Odes of Solomon: Ode 26

1 ܐܰܒܿܥܶܬ ܬܶܫܒܽܘܚܬܳܐ ܠܡܳܪܝܳܐ܆ ܡܶܛܽܠ ܕܕܺܝܠܶܗ ܐܶܢܳܐ. 2 ܘܐܷܡܰܠܶܠ ܙܡܺܝܪܬܳܐ ܩܰܕܺܝܫܬܳܐ ܕܺܝܠܶܗ܆ ܡܶܛܽܠ ܕܠܶܒܝ ܠܘܳܬܶܗ ܗ̱ܽܘܼ܆ 3 ܩܺܝܬܳܪܶܗ ܓܶܝܪ ܒܐܺܝ̈ܕܰܝ܆ ܘܠܴܐ ܢܶܫ̈ܠܝܳܢ ܙܡܺܝܪ̈ܳܬܳܐ ܕܰܢܝܳܚܶܗ. 4 ܐܶܓܥܶܐ ܠܘܳܬܶܗ ܡܼܳܢ ܟܽܠܶܗ ܠܶܒܝ܆ ܐܶ݀ܫܰܒܰܚ ܘܶܐܪܰܡܪܡܺܝܘܗ̱ܝ ܡܼܶܢ ܟܽܠܗܽܘܢܿ ܗܰܕܳܡܱ̈ܝ. 5 ܡܼܶܢ ܡܰܕܢܚܳܐ ܓܶܝܪ ܘܰܥܕܰܡܳܐ ܠܡܰܥܪܒܳܐ܆ ܬܶܫܒܽܘܚܬܳܐ ܕܺܝܠܶܗ ܗ̱ܺܝܼ. 6 ܘܡܼܶܢ ܬܰܝܡܢܳܐ ܘܰܥܕܰܡܳܐ ܠܓܰܪܒܝܳܐ܆ ܕܺܝܠܶܗ ܗ̱ܺܝܼ ܬܰܘܕܺܝܬܳܐ. 7 ܘܡܼܶܢ ܪܺܝܫܳܐ ܕܪ̈ܰܘܡܶܐ ܘܰܥܕܰܡܳܐ ܠܚܰܪܬܗܽܘܢܿ܆ ܫܽܘܡܠܳܝܶܗ ܕܺܝܠܶܗ ܗ̱ܽܘܼ. 8 ܡܰܢܽܘ ܕܟܴܿܬܶܒ ܙܡܺܝܪ̈ܳܬܶܗ ܕܡܳܪܝܳܐ܆ ܐܰܘ ܡܰܢܽܘ ܕܩܴܿܪܶܐ ܠܗܶܝܢ. 9 ܐܰܘ ܡܰܢܽܘ ܕܪܳܕܶܐ ܢܰܦܫܶܗ ܠܚܰܝܷ̈ܐ܆ ܕܬܶܬܼܦܪܶܩܝ ܢܰܦܫܶܗ. 10 ܐܰܘ ܡܰܢܽܘ ܕܡܶܬܬܢܺܝܚ ܥܰܠ ܡܪܰܝܡܳܐ܆ ܕܰܢܡܰܠܶܠ ܡܼܶܢ ܦܽܘܡܶܗ. 11 ܡܰܢܽܘ ܡܶܫܟܰܚ ܕܰܢܬܰܪܓܶܡ ܬܶܕܡܪ̈ܳܬܶܗ ܕܡܳܪܝܳܐ܆ ܡܶܛܽܠ ܓܶܝܪ ܕܗܰܘܿ ܕܰܡܬܰܪܓܶܡ ܢܶܫܼܬܪܶܐ܆ ܘܰܢܩܰܘܶܐ ܗܰܘܿ ܕܡܶܬܬܰܪܓܰܡ. 12 ܣܳܦܶܩ ܓܶܝܪ ܠܡܶܕܰܥ ܘܰܠܡܶܬܬܢܳܚܽܘ܆ ܡܙܰܡܪ̈ܳܢܶܐ ܓܶܝܪ ܩܳܝܿܡܺܝܢ ܒܢܺܝܚܽܘܬܳܐ. 13 ܐܰܝܟ ܢܰܗܪܳܐ ܕܐܺܝܬ ܠܶܗ ܡܰܒܽܘܥܳܐ ܥܰܬܺܝܪܳܐ܆ ܘܪܳܕܶܐ ܠܥܽܘܕܪܳܢܳܐ ܕܐܰܝܠܶܝܢ ܕܒܳܥܶܝܢ ܠܶܗ. ܗܰܠܶܠܘܽܝܰܐ.