Memra 6: On Those Who Are Made Perfect and Continue to Grow - ܡܺܐܡܪܳܐ ܕܶܫܬܳܐ ܕܥܰܠ ܐ̱ܢܳܫ ܕܡܶܬܓܡܰܪ ܘܝܳܪܶܒ

ܢܚܰܘܶܐ ܕܶܝܢ ܐܰܝܟܰܢ ܐ̱ܢܳܫ ܡܶܬܓܡܰܪ: ܘܰܐܝܟܰܢ ܝܳܪܶܒ ܒܳܬܰܪ ܓܡܺܝܪܽܘܬܶܗ. ܐܰܝܟ ܐܰܪ̈ܕܺܝܟܠܶܐ ܘܰܐܝܟ ܐܽܘ̈ܡܳܢܶܐ: ܐܶܡܰܬܝ ܕܨܳܒܶܝܢ ܕܢܶܒܢܽܘܢ ܒܰܝܬܳܐ: ܐܰܘ ܕܢܶܚܫܠܽܘܢ ܡܳܐܢܳܐ ܪܰܒܳܐ ܕܢܶܬܬܣܺܝܡܽܘܢ ܒܶܗ ܡܳܐܢܰܘ̈ܗ̱ܝ ܡܝܰܩܪ̈ܶܐ ܕܡܰܠܟܳܐ: ܘܡܳܐ ܕܰܒܢܰܐܽܘܗ̱ܝ ܠܒܰܝܬܳܐ ܒܰܦܣ̈ܺܝܠܳܬܳܐ: ܘܶܐܬܬܨܺܝܪ ܘܰܣܠܶܩ ܟܽܠܶܗ ܒܨܽܘܪ̈ܳܬܳܐ: ܘܶܐܨܛܰܒܰܬܘ ܟܰܘܰܘ̈ܗ̱ܝ ܘܬܰܪ̈ܥܰܘܗ̱ܝ: ܐܳܡܪܺܝܢ ܠܶܗ ܠܡܰܠܟܳܐ: ܗܳܐ ܓܡܺܝܪ ܒܰܝܬܳܐ: ܚܙܺܝ ܡܳܢܳܐ ܡܳܠܶܐ ܐܰܢ̱ܬ ܠܶܗ. ܗܳܝܕܶܝܢ ܡܫܰܪܶܐ ܡܰܠܟܳܐ ܕܢܶܡܠܶܝܘܗ̱ܝ ܟܽܠ ܛܳܒ̈ܳܬܳܐ ܟܽܠܝܽܘܡ ܒܝܽܘܡ܀

ܘܳܐܦ ܚܳܫ̈ܽܘܠܶܐ ܡܳܐ ܕܰܚܫܰܠܘ ܡܳܐܢܳܐ ܕܕܰܗܒܳܐ ܐܰܘ ܕܣܺܐܡܳܐ: ܘܰܥܒܰܕܘ ܠܶܗ ܬܰܪܥܳܐ ܘܰܟܣܳܝܳܐ: ܘܰܩܒܰܥܘ ܒܶܗ ܪ̈ܺܝܙܰܣ ܘܰܐܪܡܺܝܘ ܩܽܘܦܠܳܐ ܕܠܳܐ ܢܶܬܛܪܶܐ ܠܶܗ ܢܽܘܟܪܳܝܳܐ ܒܶܠܥܳܕ ܡܳܪܶܗ: ܗܳܝܕܶܝܢ ܐܳܡܪܺܝܢ ܠܶܗ ܠܡܰܠܟܳܐ: ܕܗܳܐ ܡܳܐܢܳܟ ܓܡܺܝܪ: ܚܡܽܘܠ ܒܶܗ ܟܽܠܗܶܝܢ ܣܺܝܡ̈ܳܬܳܟ ܘܶܐܬܬܟܶܠ ܥܠܰܘܗ̱ܝ. ܗܳܝܕܶܝܢ ܡܫܰܪܶܐ ܡܰܠܟܳܐ ܠܰܡܣܳܡ ܒܶܗ ܟܽܠܝܽܘܡ ܒܝܽܘܡ ܟܽܠ ܡܶܕܶܡ ܕܡܶܬܬܰܓܰܪ.

ܗܳܟܰܢܳܐ ܐܳܦ ܒܰܪܢܳܫܳܐ ܡܳܐ ܕܰܐܡܶܟ ܢܰܦܫܶܗ ܡܶܢ ܟܽܠ ܕܺܐܝܬ ܒܰܐܪܥܳܐ: ܘܰܫܚܰܩ ܪܶܥܝܳܢܶܗ ܒܠܺܠܝܳܐ ܘܒܺܐܝܡܳܡܳܐ: ܘܣܳܡ ܠܟܽܠܢܳܫ ܐܰܝܟ ܕܰܡܝܰܬܰܪ ܡܶܢܶܗ: ܘܣܰܪܶܩ ܢܰܦܫܶܗ ܡܶܢ ܟܽܠ ܕܰܩܢܶܐ ܘܢܰܫܶܩ ܪ̈ܶܓܠܶܐ ܕܰܒܥܶܠܕܒܳܒܰܘ̈ܗ̱ܝ: ܗܳܝܕܶܝܢ ܚܳܙܶܐ ܡܳܪܰܢ ܡܽܘܟܳܟܶܗ: ܘܰܡܫܰܕܰܪ ܠܶܗ ܪܽܘܚܳܐ ܦܰܪܰܩܠܺܝܛܳܐ: ܘܝܳܕܰܥ ܟܽܠܶܗ ܫܪܳܪܳܐ. ܘܡܳܐ ܕܺܝܕܰܥ ܫܪܳܪܳܐ: ܗܳܝܕܶܝܢ ܦܳܪܶܫ ܫܪܳܪܳܐ ܡܶܢ ܕܰܓܳܠܽܘܬܳܐ: ܘܡܶܬܟܰܬܰܫ ܥܰܡ ܤܳܛܳܢܳܐ: ܘܣܳܚܶܦ ܠܶܗ: ܐܰܝܟ ܕܣܰܚܦܶܗ ܡܳܪܰܢ: ܘܰܡܚܰܪܰܪ ܠܶܗ ܡܶܢ ܡܰܚܫ̈ܒܳܬܳܐ ܒܺܝܫ̈ܳܬܳܐ. ܘܗܳܝܕܶܝܢ ܡܳܐ ܕܰܙܟܳܝܗ̱ܝ ܠܰܒܥܶܠܕܒܳܒܶܗ: ܘܢܳܚ ܡܶܢ ܓܶܐܪ̈ܰܘܗ̱ܝ ܝܰܩ̈ܕܶܐ: ܘܰܚܬܰܡܝ̈ ܫܽܘ̈ܡܳܬܳܐ ܕܟܺܐܒܰܘ̈ܗ̱ܝ: ܘܶܐܬܚܠܶܡ ܬܒܳܪܳܐ ܕܡܰܚ̈ܘܳܬܶܗ: ܘܩܳܡ ܢܳܛܽܘܪܳܐ ܥܰܠ ܟܽܠܗܽܘܢ ܗܰܕܳܡܰܘ̈ܗ̱ܝ: ܗܳܝܕܶܝܢ ܐܳܡܰܪ ܡܰܠܟܳܐ ܡܫܺܝܚܳܐ: ܕܗܳܐ ܡܶܟܺܝܠ ܓܡܺܝܪ ܩܢܽܘܡܳܐ ܗܳܢܳܐ: ܐܰܝܟ ܕܰܒܝܰܘܡܳܐ ܕܰܓܒܰܠܬܶܗ. ܗܳܝܕܶܝܢ ܦܳܬܰܚ ܠܶܗ ܡܳܪܰܢ ܬܰܪ̈ܥܶܐ ܫܡܰܝ̈ܳܢܶܐ: ܘܥܳܐܶܠ ܘܡܶܬܓܰܐܶܐ ܒܥܽܘܬܪܗܽܘܢ ܕܪ̈ܳܐܙܶܐ.

ܘܰܐܝܟܰܢ ܕܗܳܢܳܐ ܡܰܠܟܳܐ ܟܽܠܝܽܘܡ ܛܳܒ̈ܳܬܳܐ ܣܳܐܶܡ ܒܗܰܘ ܒܶܝܬ ܓܰܙܳܐ ܕܰܒܢܳܐ ܠܶܗ ܐܰܪܕܺܝܟܠܳܐ ܘܰܚܫܰܠ ܠܶܗ ܐܽܘܡܳܢܳܐ: ܗܳܟܰܢܳܐ ܗܳܢܳܐ ܒܰܪܢܳܫܳܐ ܟܰܕ ܩܳܐܶܡ ܒܰܐܪܥܳܐ ܒܰܦܓܰܪ: ܪܶܥܝܳܢܶܗ ܒܪܽܘܚ ܟܽܠܝܽܘܡ ܒܰܥܕܶܢ ܗ̱ܽܘ: ܗܳܢܰܘ ܕܶܝܢ ܒܽܐܘܪܺܫܠܶܡ ܕܰܠܥܶܠ: ܘܗܳܟܰܢ ܝܳܪܶܒ ܘܫܳܡܶܢ ܟܽܠ ܝܽܘܡ: ܘܡܶܬܦܰܢܰܩ ܘܡܶܬܒܰܣܰܡ ܒܪܽܘܚܳܐ: ܥܕܰܡܳܐ ܕܳܐܬܶܐ ܠܰܡܫܽܘܚܬܳܐ ܕܥܺܝܪ̈ܶܐ ܪ̈ܽܘܚܳܢܶܐ: ܘܗܳܝܕܶܝܢ ܐܳܬܶܐ ܡܳܪܰܢ ܘܕܳܒܰܪ ܠܶܗ ܠܟܽܠܶܗ ܡܶܢ ܗܳܢܳܐ ܥܳܠܡܳܐ: ܐܰܝܟ ܕܰܕܒܪܶܗ ܠܪܶܥܝܳܢܶܗ ܘܰܐܥܠܶܗ ܠܦܰܪܕܰܝܣܳܐ: ܘܬܰܡܳܢ ܗܳܘܶܐ ܥܽܘܡܪܶܗ ܒܽܐܘܪܺܫܠܶܡ ܥܶܠܳܝܬܳܐ.

ܩܰܕܡܳܐܰܬ ܕܶܝܢ: ܗܳܠܶܝܢ ܦܽܘܩ̈ܕܳܢܶܐ ܪܰܘܪ̈ܒܶܐ ܟܽܠܗܽܘܢ ܕܟܶܬܒܶܬ ܡܶܢ ܠܥܶܠ ܢܳܛܰܪ ܐ̱ܢܳܫ ܘܟܶܢ ܡܶܬܓܡܰܪ: ܘܡܳܐ ܕܶܐܬܓܰܡܰܪ ܘܶܐܬܡܰܟܰܟ ܝܰܬܺܝܪ ܡܶܢܗܽܘܢ: ܟܶܢ ܣܳܠܶܩ ܠܘܳܬ ܗܳܝ ܪܰܒܽܘܬܳܐ ܡܫܰܒܰܚܬܳܐ: ܘܗܳܘܶܐ ܥܽܘܡܪܶܗ ܬܰܡܳܢ. ܗܳܟܰܢ ܗ̱ܽܘ ܥܽܘܡܪܳܐ ܕܥܰܡ ܡܳܪܰܢ: ܕܰܐܝܠܶܝܢ ܕܰܗܘܰܘ ܡܰܟ̈ܺܝܟܶܐ ܘܒܰܣ̈ܺܝܡܶܐ ܘܩܰܕ̈ܺܝܫܶܐ: ܘܰܒܢܰܝ̈ ܡܕܺܝܢ̱ܬܳܐ ܕܚܰܝ̈ܶܐ: ܘܥܳܒ̈ܕܰܝ ܨܶܒܝܳܢܶܗ ܕܡܳܪܰܢ ܗܰܘ ܛܳܒܳܐ ܘܰܡܩܰܒܠܳܐ ܘܰܓܡܺܝܪܳܐ: ܟܰܕ ܡܨܰܠܶܝܢ ܕܢܶܗܘܶܐ ܨܶܒܝܳܢܶܗ ܕܰܐܠܳܗܳܐ ܒܰܐܪ̈ܥܳܢܳܝܶܐ ܐܰܝܟ ܕܰܗܘܳܐ ܒܰܫ̈ܡܰܝܳܢܶܐ܀

ܫܠܶܡ ܡܺܐܡܪܳܐ ܕܶܫܬܳܐ ܕܥܰܠ ܐ̱ܢܳܫ ܕܡܶܬܓܡܰܪ ܘܝܳܪܶܒ܀