Memra 26: On the Second Law That the Lord Established From Adam - ܡܺܐܡܪܳܐ ܕܥܶܣܪܺܝܢ ܘܶܫܬܳܐ ܥܰܠ ܢܳܡܺܘܣܳܐ ܕܰܬܪܶܝܢ ܕܣܳܡ ܡܳܪܝܳܐ ܠܳܐܕܳܡ

ܥܰܠ ܢܳܡܽܘܣܳܐ ܕܣܳܡ ܡܳܪܝܳܐ ܠܳܐܕܳܡ ܡܶܢ ܒܳܬܰܪ ܕܶܐܟܰܠ ܡܶܢ ܐܺܝܠܳܢܳܐ. ܡܶܟܺܝܠ ܗܳܐ ܣܳܐܶܡ ܐ̱ܢܳܐ ܠܳܟ ܢܳܡܽܘܣܳܐ ܒܗܳܢܳܐ ܡܶܕܶܡ ܕܰܪܚܶܡܬ ܕܗܳܢܳܐ ܢܳܡܽܘܣܳܐ ܕܣܳܐܶܡ ܐ̱ܢܳܐ ܠܳܟ: ܐܶܠܳܐ ܬܶܥܒܪܺܝܘܗ̱ܝ ܢܶܟܠܶܝܟ ܡܶܢ ܫܝܽܘܠ ܘܢܶܬܶܠ ܠܳܟ ܚܰܝ̈ܶܐ ܕܰܠܥܳܠܰܡ ܘܝܽܘܪܬܳܢܳܐ ܘܢܶܚܡܬܳܐ. ܘܶܐܢ ܬܰܡܪܰܚ ܥܠܰܘܗ̱ܝ ܐܰܝܟ ܕܥܰܠ ܩܰܕܡܳܝܳܐ ܬܶܚܙܶܝܗ ܠܰܫܝܽܘܠ ܘܬܶܫܬܰܢܰܩ.

ܐܶܢ ܬܶܛܰܪ ܗܳܟܺܝܠ ܗܳܢܳܐ ܢܳܡܽܘܣܳܐ ܕܟܺܐܢܽܘܬܳܐ: ܘܬܶܪܗܰܛ ܒܳܬܰܪ ܚܽܘܒܳܐ ܘܒܳܬܰܪ ܓܡܺܝܪܽܘܬܳܐ: ܠܚܰܪܬܳܐ ܕܰܫܢܰܝ̈ܳܐ ܕܗܳܢܳܐ ܥܳܠܡܳܐ ܡܶܬܓܠܶܐ ܐ̱ܢܳܐ ܘܓܳܡܰܪ ܐ̱ܢܳܐ ܠܳܟ ܘܰܠܟܽܠܗܽܘܢ ܕܪܳܗܛܺܝܢ ܒܳܬܰܪ ܚܽܘܒܳܐ ܘܒܳܬܰܪ ܓܡܺܝܪܽܘܬܳܐ. ܘܥܳܐܠܺܝܢ ܐܰܢ̱ܬܽܘܢ ܠܦܰܪܕܰܝܣܳܐ ܪܽܘܚܳܢܳܐ ܕܰܢܦܰܩܬ ܡܶܢܶܗ. ܘܰܡܚܰܘܶܐ ܐ̱ܢܳܐ ܠܟܽܠ ܐܰܝܠܶܝܢ ܕܚܳܐܶܝܢ ܒܡܶܐܬܺܝܬܝ ܘܒܳܬܰܪ ܡܶܐܬܺܝܬܝ: ܐܰܝܟܰܢ ܒܪܶܐ ܗ̱ܘܰܝܬ ܐܰܝܟ ܥܺܝܪ̈ܶܐ: ܘܰܐܝܟܰܢ ܢܺܐܬܽܘܢ ܠܗܳܝ ܒܪܺܝܬܳܐ ܩܰܕܺܝܫܬܳܐ ܕܰܒܪܶܐ ܗ̱ܘܰܝܬ. ܘܶܐܢܳܐ ܐܶܠܒܰܫ ܕܡܽܘܬܳܟ ܘܶܐܚܰܘܶܐ ܐܶܢܽܘܢ ܟܽܠ ܡܶܕܶܡ.

ܡܶܢ ܒܳܬܰܪ ܓܶܝܪ ܕܥܳܢܶܕ ܐܰܢ̱ܬ ܡܶܢ ܗܳܢܳܐ ܥܳܠܡܳܐ: ܛܳܥܶܝܢ ܠܳܗ ܝܰܠ̈ܕܰܝܟ ܠܰܒܪܺܝܬܳܟ ܐܰܝܟܰܢܳܐ ܗܘܳܬ ܘܡܰܢܽܘ ܐܺܝܠܳܢܳܐ ܕܶܐܟܰܠܬ ܡܶܢܶܗ: ܘܰܠܟܽܠ ܨܒܽܘ ܢܕܰܡܽܘܢܳܗ ܠܰܒܪܺܝܬܳܟ ܐܰܝܟܰܢܳܐ ܗ̱ܘܳܐ ܘܰܠܐܺܝܠܳܢܳܐ ܕܶܐܟܰܠܬ ܡܶܢܶܗ: ܘܠܳܐ ܢܶܕܥܽܘܢ ܐܶܠܳܐ ܚܰܕܚܕ̈ܳܢܺܝܢ: ܥܕܰܡܳܐ ܕܺܐܬܶܐ ܘܶܐܚܰܘܶܐ ܠܗܽܘܢ ܓܰܠܝܳܐܺܝܬ ܐܰܝܟܰܢ ܐܺܝܬܰܘܗ̱ܝ ܗ̱ܘܳܐ ܨܶܒܝܳܢܝ ܡܶܢ ܒܪܺܝܫܺܝܬ. ܢܶܛܥܽܘܢ ܠܗܽܘܢ ܓܶܝܪ ܝܰܠ̈ܕܰܝܟ ܘܢܶܦܠܽܘܢ ܐܳܦ ܡܶܢ ܟܺܐܢܽܘܬܳܐ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ܀

ܘܶܐܡܰܪ ܠܶܗ ܐܰܠܳܗܳܐ ܠܳܐܕܳܡ: ܟܰܕ ܣܳܡ ܠܶܗ ܢܳܡܽܘܣܳܐ ܐ̱ܚܪܳܝܳܐ: ܒܗܰܘ ܝܰܘܡܳܐ ܕܰܥܒܰܪ ܥܰܠ ܩܰܕܡܳܝܳܐ. ܗܳܐ ܩܶܢܝܳܢܳܐ ܕܰܪܚܶܡܬ ܘܠܳܐ ܐܶܬܒܰܝܰܢܬ ܒܺܐܝܩܳܪܳܟ. ܩܢܺܝ ܟܡܳܐ ܕܰܨܒܰܝܬ: ܒܰܠܚܽܘܕ ܟܺܐܢܳܐܺܝܬ ܗܰܠܶܟ. ܘܗܳܐ ܐܰܪܥܳܐ ܕܰܪܚܶܡܬ ܝܺܗܺܝܒܳܐ ܠܳܟ: ܒܰܠܚܽܘܕ ܠܳܐ ܬܶܣܰܒ ܕܚܰܒܪܳܟ. ܗܳܐ ܥܰܡܠܳܐ ܕܰܒܥܰܝܬ ܝܺܗܺܝܒ ܠܳܟ ܒܰܠܚܽܘܕ ܥܰܠ ܥܰܡܠܳܐ ܕܚܰܒܪܳܟ ܠܳܐ ܬܶܬܝܰܥܰܢ. ܗܳܐ ܙܽܘܘܳܓܳܐ ܕܰܒܥܰܝܬ ܒܡܶܠܟܶܗ ܕܒܺܝܫܳܐ ܝܺܗܺܝܒ ܠܳܟ: ܒܰܠܚܽܘܕ ܠܰܐܢ̱ܬܰܬ ܚܰܒܪܳܟ ܠܳܐ ܬܶܪܰܓ ܘܠܳܐ ܬܶܣܰܒ ܬܰܪ̈ܬܶܝܢ ܢܶܫܺܝ̈ܢ: ܘܠܳܐ ܢܶܙܢܽܘܢ ܒܢܰܝ̈ܟ ܘܠܳܐ ܒܢ̈ܳܬܳܟ ܢܶܗܘ̈ܝܳܢ ܙܳܢܝ̈ܳܬܳܐ. ܘܦܰܩܶܕ ܠܰܒܢܰܝ̈ܟ ܡܶܢ ܒܳܬܪܳܟ: ܘܰܒܢܰܝ̈ܟ ܢܶܦܩܕܽܘܢ ܠܰܒܢܰܝ̈ܗܽܘܢ ܥܰܕ ܐܳܬܶܐ ܐ̱ܢܳܐ ܘܗܳܘܶܐ ܐ̱ܢܳܐ ܠܟܽܘܢ ܚܰܘܪܳܐ ܕܰܓܡܺܝܪܽܘܬܳܐ܀

ܘܶܐܡܰܪ ܠܗܽܘܢ ܡܳܐ ܕܩܳܢܶܝܢ ܐܰܢ̱ܬܽܘܢ: ܠܳܐ ܐܰܝܟ ܕܰܠܥܳܠܰܡ ܬܶܩܢܽܘܢ ܘܬܶܛܥܽܘܢܳܢܝ. ܘܡܳܐ ܕܒܳܢܶܝܢ ܐܰܢ̱ܬܽܘܢ ܐܰܝܟ ܐ̱ܢܳܫܳܐ ܕܝܳܕܥܺܝܢ ܐܰܢ̱ܬܽܘܢ ܕܠܰܘ ܠܥܳܠܰܡ ܗܳܪܟܳܐ ܐܰܢ̱ܬܽܘܢ. ܐܶܠܳܐ ܗܘܰܝܬܽܘܢ ܝܳܕܥܺܝܢ ܕܡܰܥܒܰܪ ܐ̱ܢܳܐ ܠܳܗ ܠܰܐܪܥܳܐ ܘܰܠܟܽܠ ܕܺܐܝܬ ܒܳܗ ܘܕܺܝܢܳܐ ܗܳܘܶܐ ܘܰܢܝܳܚܬܳܐ ܗܳܘܝܳܐ. ܘܟܽܠܢܳܫ ܐܰܝܟ ܥܒܳܕ̈ܰܘܗ̱ܝ ܡܶܬܦܪܰܥ. ܟܰܕܽܘ ܠܟܽܘܢ ܐܳܕܳܡ ܘܚܰܘܳܐ ܕܰܢܦܰܠܬܽܘܢ ܡܶܢ ܒܬܽܘܠܽܘܬܳܐ ܘܡܶܢ ܓܡܺܝܪܽܘܬܳܐ. ܠܳܐ ܬܺܘܒ ܬܶܦܠܽܘܢ ܠܟܽܘܢ ܡܶܢ ܬܪܺܝܨܽܘܬܳܐ ܘܡܶܢ ܟܺܐܢܽܘܬܳܐ. ܐܰܝܟܰܢܳܐ ܓܶܝܪ ܕܺܐܝܬ ܣܰܩܽܘܒܠܳܐ ܠܰܓܡܺܝܪܽܘܬܳܐ: ܟܽܠܶܗ ܫܽܘܦܪܳܐ ܕܰܐܪܥܳܐ ܕܡܶܬܚܙܶܐ ܠܥܰܝ̈ܢܶܐ ܕܒܶܣܪܳܐ: ܗܳܟܰܢܳܐ ܐܺܝܬ ܣܰܩܽܘܒܠܳܐ ܠܟܺܐܢܽܘܬܳܐ: ܟܽܠ ܡܶܕܶܡ ܕܒܺܝܫ ܘܢܳܟܶܐ ܠܒܰܪܢܳܫܳܐ ܐܰܘ ܡܥܺܝܩ ܠܟܽܠ ܕܺܐܝܬ ܒܶܗ ܢܰܦܫܳܐ܀

ܡܶܢ ܒܳܬܰܪ ܗܳܟܺܝܠ ܦܽܘܩܕܳܢܳܐ ܩܰܕܡܳܝܳܐ ܐܳܕܳܡ ܘܟܽܠܗܽܘܢ ܟ̈ܺܐܢܶܐ ܩܰܕ̈ܡܳܝܶܐ ܐܰܩܺܝܡܘ ܥܰܠ ܗܳܝ ܟܺܐܢܽܘܬܳܐ ܕܦܰܩܶܕ ܐܰܠܳܗܳܐ ܠܳܐܕܳܡ: ܡܶܢ ܒܳܬܰܪ ܕܰܥܒܰܪ ܥܰܠ ܡܶܠܬܳܐ ܩܰܕܡܳܝܬܳܐ ܘܰܗܘܳܐ ܐܰܪܥܳܢܳܐ. ܫܰܪܟܳܐ ܕܶܝܢ ܕܰܒܢܰܝ̈ܢܳܫܳܐ: ܐܶܠܽܘ ܩܰܘܺܝܘ ܒܗܳܕܶܐ ܟܺܐܢܽܘܬܳܐ ܕܰܟܬܺܝܒܳܐ ܕܳܐܕܳܡ ܘܟܺܐܢ̈ܶܐ ܪܕܰܘ ܒܳܗ: ܠܳܐ ܡܶܬܺܝܗܶܒ ܗ̱ܘܳܐ ܢܳܡܽܘܣܳܐ ܐ̱ܚܪܺܢܳܐ: ܥܕܰܡܳܐ ܕܳܐܬܶܐ ܗ̱ܘܳܐ ܡܳܪܝܳܐ ܘܝܳܗܶܒ ܗ̱ܘܳܐ ܗܳܕܶܐ ܣܒܰܪܬܳܐ ܕܝܰܗ̱ܒ ܗܳܫܳܐ. ܐܶܡܰܪ ܓܶܝܪ ܫܠܺܝܚܳܐ: ܕܢܳܡܽܘܣܳܐ ܡܶܛܽܠ ܡܰܣܛܝܳܢܽܘܬܳܐ ܐܶܬܬܰܘܣܰܦ: ܗܳܢܳܐ ܕܰܒܝܰܕ ܡܽܘܫܶܐ ܐܶܬܺܝܗܶܒ.

ܣܰܟܺܝܘ ܠܶܗ ܗܳܟܺܝܠ ܠܗܳܢܳܐ ܫܰܝܢܳܐ ܕܰܒܝܰܕ ܡܳܪܰܢ: ܐܳܕܳܡ ܘܟܽܠܗܽܘܢ ܟܺܐܢ̈ܶܐ ܘܰܢܒܺܝ̈ܶܐ ܘܙܰܕ̈ܺܝܩܶܐ: ܘܰܫܟܶܒܘ ܥܰܠ ܗܳܢܳܐ ܣܰܒܪܳܐ: ܕܳܐܬܶܐ ܡܳܪܰܢ ܘܥܳܒܶܕ ܫܰܝܢܳܐ ܒܰܐܪܥܳܐ. ܘܟܰܕ ܩܪܶܒ ܙܰܒܢܳܐ ܗܰܘ ܕܰܨܒܳܐ ܐܰܠܳܗܳܐ ܕܒܶܗ ܢܶܬܓܠܶܐ ܘܢܶܥܒܶܕ ܬܰܪܥܽܘܬܳܐ ܘܫܰܝܢܳܐ ܒܰܐܪܥܳܐ: ܒܥܳܬ ܪܽܘܚܳܐ ܚܠܳܦ ܟܽܠܗܽܘܢ ܒܢܰܝ̈ ܐ̱ܢܳܫܳܐ ܛܳܒ̈ܶܐ ܘܒܺܝܫ̈ܶܐ ܘܶܐܡܪܰܬ ܗܳܟܰܢܳܐ: ܥܶܗܰܕ ܡܶܠܬܳܟ ܠܥܰܒܕܳܟ ܗܳܝ ܕܰܐܬܟܠܰܬ ܠܳܐܕܳܡ ܘܰܠܟܽܠܗܽܘܢ ܟܺܐܢ̈ܶܐ: ܘܒܳܗ ܐܶܬܒܰܐܝܰܘ ܒܡܽܘܟܳܟܗܽܘܢ: ܡܶܛܽܠ ܕܡܺܐܡܪܳܟ ܐܰܚܺܝ ܐܶܢܽܘܢ.

ܘܶܐܬܳܐ ܗܰܘ ܕܫܰܪܺܝܪ ܫܽܘܘܕܳܝܶܗ ܘܡܽܘܠܟܳܢܶܗ ܡܗܰܝܡܶܢ ܘܓܰܡܰܪ ܐܶܢܽܘܢ ܠܰܐܝܠܶܝܢ ܕܰܫܒܰܩܘ ܟܽܠܡܶܕܶܡ ܘܰܥܒܰܕܘ ܨܶܒܝܳܢܶܗ ܘܰܪܗܶܛܘ ܒܳܬܰܪ ܚܽܘܒܳܐ ܘܒܳܬܰܪ ܓܡܺܝܪܽܘܬܳܐ. ܘܰܫܟܶܒܘ ܩܕܳܡ ܡܶܐܬܺܝܬܶܗ: ܘܰܐܥܶܠ ܐܶܢܽܘܢ ܠܦܰܪܕܰܝܣܳܐ ܪܽܘܚܳܢܳܐ ܐܰܝܟ ܕܶܐܫܬܰܘܕܺܝ: ܘܚܰܘܺܝ ܠܰܐܚܪ̈ܳܝܶܐ ܓܰܠܝܳܐܺܝܬ: ܐܰܝܟܰܢ ܗܘܳܐ ܐܳܕܳܡ ܡܶܢ ܩܕܺܝܡ. ܘܰܡܠܰܟ ܠܗܽܘܢ ܦܰܪܕܰܝܣܳܐ ܘܶܐܬܥܰܠܺܝ ܡܶܢ ܠܘܳܬܗܽܘܢ: ܕܗܶܢܽܘܢ ܢܶܫܒܩܽܘܢ ܐܰܪܥܳܐ ܘܢܺܐܙܽܠ̱ܘܢ ܒܳܬܪܶܗ܀

ܗܳܕܶܐ ܕܶܝܢ ܣܒܰܪܬܳܐ ܕܝܰܗ̱ܒ ܝܶܫܽܘܥ: ܗܺܝ ܗ̱ܺܝ ܕܰܥܠܶܝܗ ܥܒܰܪ ܐܳܕܳܡ ܘܰܢܦܰܠ. ܘܗܳܝ ܟܺܐܢܽܘܬܳܐ ܕܝܰܗ̱ܒ ܡܽܘܫܶܐ ܘܰܢܒܺܝ̈ܶܐ ܗܺܝ ܗ̱ܺܝ ܕܶܐܬܬܣܺܝܡܰܬ ܠܳܐܕܳܡ ܡܶܢ ܒܳܬܰܪ ܕܰܥܒܰܪ ܥܰܠ ܦܽܘܩܕܳܢܳܐ ܩܰܕܡܳܝܳܐ. ܘܰܗܘܳܐ ܢܳܡܽܘܣܳܐ ܩܰܕܡܳܝܳܐ ܐ̱ܚܪܳܝܳܐ ܘܰܐܚܪܳܝܳܐ ܩܰܕܡܳܝܳܐ: ܐܰܝܟ ܕܰܗܘܰܘ ܐ̱ܚܪ̈ܳܝܶܐ ܩܰܕ̈ܡܳܝܶܐ ܘܩܰܕ̈ܡܳܝܶܐ ܐ̱ܚܪ̈ܳܝܶܐ. ܡܰܢ ܕܰܓܡܺܝܪܽܘܬܳܐ ܕܶܝܢ ܒܳܥܶܐ ܘܩܰܕܺܝܫܽܘܬܳܐ ܪܳܚܶܡ: ܒܗܳܠܶܝܢ ܗܳܘܝܳܐ ܩܰܕܺܝܫܽܘܬܳܐ ܕܠܶܒܳܐ: ܝܳܗܶܒ ܠܶܗ ܟܽܠ ܕܺܐܝܬ ܠܶܗ ܠܰܣܢ̈ܺܝܩܶܐ ܘܡܶܬܥܰܠܶܐ ܠܶܗ ܡܶܢ ܡܶܕܶܡ ܕܡܶܬܚܙܶܐ: ܘܗܳܘܶܐ ܥܠܰܘܗ̱ܝ ܚܶܪܝܳܢܳܐ ܘܠܳܐ ܕܳܐܶܢ ܠܐ̱ܢܳܫ ܘܠܳܐ ܬܳܒܰܥ ܠܐ̱ܢܳܫ. ܐܶܠܳܐ ܡܰܚܶܒ ܠܟܽܠܢܳܫ ܐܰܝܟ ܩܰܕܺܝܫܳܐ ܕܡܳܪܰܢ: ܡܶܛܽܠ ܕܡܰܕܢܰܚ ܚܽܘܒܶܗ ܠܘܳܬ ܟܽܠܢܳܫ ܐܰܝܟ ܫܶܡܫܶܗ ܕܰܐܒܳܐ ܥܰܠ ܟܽܠ ܕܺܐܝܬ ܒܰܐܪܥܳܐ ܥܰܠ ܛܳܒ̈ܶܐ ܘܥܰܠ ܒܺܝܫ̈ܶܐ ܘܥܰܠ ܟܺܐܢ̈ܶܐ ܘܥܰܠ ܥܰܘ̈ܳܠܶܐ܀

ܫܠܶܡ ܡܺܐܡܪܳܐ ܕܟܘ܀