Book of Steps Preface - ܡܰܡܠ̱ܠܳܐ

ܡܶܛܽܠ ܕܛܽܘܒܳܢܳܐ ܗܳܢܳܐ ܠܳܐ ܨܒܳܐ ܕܢܰܟܬܶܒ ܫܡܶܗ: ܘܬܰܫܥܺܝܬܳܐ ܕܰܥܠܰܘܗ̱ܝ ܠܚܰܕ ܡܶܢ ܡܰܟ̈ܬܒܳܢܶܐ ܠܳܐ ܐܰܡܺܝܪܳܐ: ܘܙܰܒܢܶܗ ܚܰܬܺܝܬܳܐܺܝܬ ܠܳܐ ܐܶܬܺܝܕܰܥ ܠܰܢ: ܐܶܠܴܐ ܐܶܢ ܕܰܒܡܰܫܠܡܳܢܽܘܬܳܐ ܩܰܒܶܠܢܰܢ ܕܚܰܕ ܡܶܢ ܬܰܠܡܺܝܕܰܝ̈ܗܽܘܢ ܐ̱ܚܪ̈ܳܝܶܐ ܕܰܫܠ̈ܺܝܚܶܐ ܐܺܝܬܰܘܗ̱ܝ: ܐܰܕܪܶܟܢܰܢ ܕܶܝܢ ܐܳܦ ܡܶܢ ܡܶܠܰܘ̈ܗ̱ܝ: ܕܡܶܢ ܡܰܠ̈ܦܳܢܶܐ ܩܰܕ̈ܡܳܝܶܐ ܕܰܒܠܶܫܳܢܳܐ ܣܽܘܪܝܳܝܳܐ ܐܶܬܚܙܺܝܘ ܐܺܝܬܰܘܗ̱ܝ. ܘܰܕܠܰܘ ܫܚܺܝܡܰܐ ܗ̱ܘ: ܡܶܢܶܗ ܡܶܢ ܝܽܘܠܦܳܢܶܗ ܐܰܣܬܰܟܰܠܢ.

ܘܰܕܢܶܗܘܶܐ ܓܠܶܐ ܘܰܕܢܺܝܚ ܩܕܳܡ ܥܰܝܢܰܘ̈ܗ̱ܝ ܕܗܰܘ ܕܩܳܪܶܐ܇ ܪܰܒܽܘܬܳܐ ܘܥܽܘܫܢܳܐ ܕܣܽܘܟܳܠܰܘ̈ܗ̱ܝ ܪ̈ܽܘܚܳܢܶܐ ܕܒܰܪ ܐ̱ܢܳܫܳܐ ܗܳܢܳܐ ܕܰܐܠܳܗܳܐ: ܗܘܳܬ ܠܰܢ ܒܛܺܝܠܽܘܬܳܐ ܕܠܽܘܩܕܰܡ ܦܳܣܽܘܩܳܐ ܐ̱ܚܪܳܝܳܐ ܕܫܽܘܠܳܡ ܦܶܢܩܺܝܬܳܐ ܕܝܽܘܠܦܳܢܶܗ ܢܰܕܢܰܚ ܘܰܢܣܺܝܡ ܩܰܕܡܳܐܺܝܬ ܘܟܶܢ ܡܰܩܦܺܝܢܰܢ ܒܪܺܝܫ ܦܶܢܩܺܝܬܳܐ ܕܡܺܐܡܪ̈ܰܘܗ̱ܝ. ܗܳܕܶܐ ܕܶܝܢ ܥܒܰܕܢܰܢ: ܕܢܶܣܬܰܟܰܠ ܗܰܰܘ ܕܩܳܪܶܐ ܒܶܗ ܒܦܳܣܽܘܩܳܐ ܗܳܢܳܐ: ܘܢܺܐܠܰܦ ܡܶܢܶܗ ܓܰܠܝܳܐܺܝܬ ܕܰܢܒܺܝܰܐ ܗ̱ܘ: ܘܰܕܪܽܘܚܳܐ ܦܰܪܰܩܠܺܝܛܳܐ ܩܰܒܶܠ: ܘܒܰܢܛܽܘܪܽܘܬ ܦܽܘܩܕ̈ܳܢܶܐ ܐܶܫܬܰܡܠܺܝ: ܘܕܰܢܡܰܠܶܠ ܥܰܠ ܐܰܠܳܗܳܐ ܐܶܫܬܘܺܝ: ܘܕܰܒܝܰܕ ܪܽܘܚܳܐ ܕܩܽܘܕܫܳܐ ܓܠܳܐ ܘܦܰܫܶܩ ܐܶܢܽܘܢ ܠܗܳܠܶܝܢ ܪ̈ܳܐܙܶܐ ܟܽܠܗܽܘܢ: ܘܰܕܕܰܡܫܽܘܚܬܳܐ ܐܺܝܬܰܘܗ̱ܝ ܪܰܒܬܳܐ ܘܰܡܫܰܡܠܰܝܬܳܐ ܘܰܕܒܰܪ ܬܶܓܡܰܐ ܗ̱ܘ ܕܰܫܠ̈ܺܝܚܶܐ ܘܚܰܒܪܳܐ ܗ̱ܘܳܐ ܕܰܢܒܺܝ̈ܶܐ ܐܰܝܟ ܗܳܠܶܝܢ ܕܒܰܦܪܰܟܣܺܝܣ ܡܶܫܬܰܡܗܺܝܢ: ܐܰܓܰܒܳܘܣ ܘܚܰܒܪ̈ܰܘܗ̱ܝ.

ܠܳܐ ܗ̱ܘܳܐ ܒܚܽܘܫܳܒ̈ܶܐ ܐ̱ܢܳܫܳܝ̈ܶܐ ܐܳܦܠܳܐ ܒܝܽܘܠܦܳܢܳܐ ܕܡܶܢ ܚܰܟ̈ܺܝܡܶܐ ܩܰܒܶܠ ܗܳܢܳܐ ܝܽܘܠܦܳܢܳܐ ܚܰܝܠܬܳܢܳܐ ܘܪܽܘܚܳܢܳܐ ܕܰܐܫܠܶܡ ܠܰܢ: ܟܰܕ ܗܺܝ ܦܫܺܝܛܽܘܬ ܡܶܠܬܶܗ ܕܠܰܘ ܪܰܕܝܳܐܺܝܬ ܐܰܟܬܶܒ ܡܰܘܕܥܳܐ.

ܘܰܕܡܶܠܬܶܗ ܥܰܬܺܝܩܬܳܐ ܗ̱ܝ ܒܠܶܫܳܢܳܐ ܣܽܘܪܝܳܝܳܐ: ܡܶܢ ܦܫܺܝܛܽܘܬ ܡܶܠܬܶܗ ܗܳܟܺܝܠ ܘܡܶܢ ܚܰܝܠܶܗ ܕܗܳܢܳܐ ܦܳܣܽܘܩܳܐ ܝܺܕܰܥܢܰܢ ܘܰܐܕܪܶܟܢܰܢ ܘܗܰܝܡܶܢܢ ܕܒܰܠܚܽܘܕ ܡܶܢ ܚܰܝܠܳܐ ܕܪܽܘܚܳܐ ܕܩܽܘܕܫܳܐ ܐܶܬܦܰܪ̈ܢܰܣ ܗܳܠܶܝܢ ܒܺܐܝܕܶܗ. ܐܶܡܰܪ ܓܶܝܪ ܥܰܠ ܢܰܦܫܶܗ ܕܰܢܒܺܝܰܐ ܗ̱ܘ ܗܳܟܰܢܳܐ: ܐܶܢ ܐ̱ܢܳܫ ܠܰܡ ܐܳܡܰܪ ܕܗܳܠܶܝܢ ܡܶܢ ܐܰܝܡܶܟܳܐ ܠܶܗ ܠܗܳܢܳܐ: ܢܶܕܰܥ ܠܰܡ ܕܰܟܬܺܝܒ: ܕܪܽܘܚܳܐ ܕܰܢܒܺܝ̈ܶܐ ܠܰܢ̈ܒܺܝܶܐ ܡܶܫܬܰܥܒܕܳܐ. ܘܶܐܫܽܘܕ ܪܽܘܚܝ ܥܰܠ ܟܽܠܒܣܰܪ: ܗܳܢܰܘ ܕܶܝܢ ܠܰܡ ܥܰܠ ܐܰܝܠܶܝܢ ܕܢܳܛܪܺܝܢ ܦܽܘܩܕ̈ܳܢܰܘܗ̱ܝ ܕܡܳܪܰܢ ܘܡܶܬܕܰܡܶܝܢ ܒܡܰܟܺܝܟܽܘܬܶܗ.

ܕܒܳܗ ܒܗܳܕܶܐ ܐܰܘܕܰܥ ܕܦܽܘܩܕ̈ܳܢܰܘܗ̱ܝ ܕܡܳܪܰܢ ܢܛܰܪ ܘܰܒܡܰܟܺܝܟܽܘܬܶܗ ܐܶܬܕܰܡܺܝ. ܘܬܽܘܒ ܕܡܰܘܕܰܥ ܥܰܠ ܢܰܦܫܶܗ ܦܫܺܝܛܳܐܺܝܬ: ܕܠܳܐ ܬܶܣܒܪܽܘܢ ܕܠܰܝܬ ܝܰܘܡܳܢܳܐ ܒܢܰܝ̈ ܐ̱ܢܳܫܳܐ ܕܡܶܬܢܰܒܶܝܢ ܘܡܶܫܬܰܥܶܝܢ ܥܰܠ ܐܰܠܳܗܳܐ: ܥܰܡ ܫܰܪܟܳܐ ܕܰܐܝܟ ܗܳܠܶܝܢ ܕܰܒܡܺܐܡܪܳܐ ܩܰܕܡܳܝܳܐ ܘܰܒܦܳܣܽܘܩܳܐ ܗܳܢܳܐ ܓܰܠܝܳܐܺܝܬ ܕܳܢܚܺܝܢ.

ܗܳܢܳܐ ܗܳܟܺܝܠ ܡܶܕܶܡ ܕܰܥܒܰܕܢܰܢ: ܢܶܗܘܶܐ ܐܺܝܬܰܘܗ̱ܝ ܠܰܕܩܳܪܶܐ ܒܶܗ: ܒܰܕܡܽܘܬ ܬܰܫܥܺܝܬܳܐ ܕܢܶܨܚܳܢܰܘ̈ܗ̱ܝ ܐܰܟܙܢܳܐ ܕܰܚܕܳܐ ܡܶܢ ܬܰܫܥ̈ܝܳܬܳܐ ܕܗܳܠܶܝܢ ܐܰܒܳܗ̈ܳܬܳܐ: ܓܪܺܝܓܽܘܪܺܝܳܣ ܪܰܒܳܐ ܘܛܽܘܒܳܢܳܐ ܒܰܣܺܝܠܺܝܳܘܣ ܪܰܒܳܐ ܘܰܕܛܽܘܒܳܢܳܐ ܐܶܘܰܓܪܺܝܣ: ܕܺܐܝܬܰܘܗ̱ܝ ܒܰܪ ܦܶܚܡܗܽܘܢ ܒܰܐܠܳܗ̈ܳܝܳܬܳܐ܀

ܗܳܢܳܐ ܗܳܟܺܝܠ ܐܺܝܬܰܘܗ̱ܝ ܦܳܣܽܘܩܳܐ ܐ̱ܚܪܳܝܳܐ ܕܡܺܐܡܪܳܐ ܐ̱ܚܪܳܝܳܐ ܕܝܽܘܠܦܳܢܶܗ:

ܐܶܢ ܐ̱ܢܳܫ ܕܶܝܢ ܡܰܣܠܶܐ ܣܳܗ̈ܕܘܳܬܳܐ ܕܰܟܬܳܒ̈ܶܐ: ܕܰܢܒܺܝ̈ܶܐ ܘܰܕܡܳܪܰܢ ܘܕܰܫܠ̈ܺܝܚܶܐ ܘܳܐܡܰܪ܇ ܕܡܰܢܽܘ ܗܳܢܳܐ ܕܝܳܕܰܥ ܕܗܳܠܶܝܢ ܗܳܟܰܢܳܐ ܐܺܝܬܰܝ̈ܗܶܝܢ؟ ܐܰܘ ܕܢܺܐܡܰܪ܇ ܕܰܢܒܺܝ̈ܶܐ ܘܰܫܠ̈ܺܝܚܶܐ ܝܺܕܰܥܘ: ܝܰܘܡܳܢ ܕܶܝܢ ܡܰܢܽܘ ܢܶܕܰܥ ܕܗܳܠܶܝܢ ܗܳܟܰܢܳܐ ܐܶܢܶܝܢ؟ ܢܶܬܕܟܰܪ ܕܰܟܬܺܝܒ: ܕܪܽܘܚܳܐ ܕܰܢܒܺܝ̈ܶܐ ܠܰܢ̈ܒܺܝܶܐ ܡܶܫܬܰܥܒܕܳܐ ܘܢܶܬܕܟܰܪ ܬܽܘܒ ܠܰܢܒܺܝܳܐ ܕܡܰܠܶܠ ܒܶܗ ܡܳܪܝܳܐ: ܕܰܒܝܰܘ̈ܡܳܬܳܐ ܐ̱ܚܪ̈ܳܝܶܐ ܐܶܫܽܘܕ ܪܽܘܚܝ ܥܰܠ ܟܽܠܒܣܰܪ: ܘܢܶܬܢܰܒܽܘܢ ܒܢܰܝ̈ܟܽܘܢ ܘܰܒܢ̈ܳܬܟܽܘܢ. ܘܢܶܬܕܟܰܪ ܬܽܘܒ ܠܰܢܒܺܝܳܐ ܐ̱ܚܪܺܢܳܐ ܕܶܐܡܰܪ: ܐܰܒܰܥ ܠܶܒܝ ܦܶܬܓܳܡ̈ܶܐ ܛܳܒ̈ܶܐ: ܐܺܡܰܪ ܥܒ̈ܳܕܰܝ ܡܰܠܟܳܐ: ܠܶܫܳܢܝ ܩܰܢܝܶܗ ܕܣܳܦܪܳܐ ܡܗܺܝܪܳܐ: ܕܫܰܦܺܝܪ ܒܚܶܙܘܶܗ ܡܶܢ ܒܢܰܝ̈ܢܳܫܳܐ.

ܚܳܙܶܐ ܐܰܢ̱ܬ ܐܰܝܟܰܢ ܐܳܫܶܕ ܗܽܘܼ ܡܳܪܝܳܐ ܪܽܘܚܶܗ ܒܝܰܘ̈ܡܳܬܳܐ: ܘܡܶܬܢܰܒܶܝܢ ܒܢܰܝ̈ܳܐ ܘܰܒ̈ܢܳܬܳܐ: ܐܰܝܠܶܝܢ ܕܢܳܛܪܺܝܢ ܦܽܘܩܕܳܢܰܘ̈ܗ̱ܝ ܕܡܳܪܰܢ ܘܡܶܬܕܰܡܶܝܢ ܒܡܰܟܺܝܟܽܘܬܶܗ. ܘܰܚܙܺܝ ܐܰܝܟܰܢ ܗܿܳܘܶܐ ܠܶܫܳܢܗܽܘܢ ܩܰܢܝܳܐ ܕܣܳܦܪܳܐ ܡܗܺܝܪܳܐ: ܕܺܐܝܬܰܘܗ̱ܝ ܡܳܪܰܢ ܕܫܰܦܺܝܪ ܒܚܶܙܘܶܗ ܘܰܦܐܶܐ ܡܶܕܶܡ ܕܠܳܐ ܡܶܣܬܰܝܰܟ: ܘܗܳܘܶܐ ܠܶܗ ܠܶܫܳܢܗܽܘܢ ܩܰܢܝܳܐ: ܘܟܳܬܶܒ ܥܠܰܘܗ̱ܝ ܕܽܘܒܳܪ̈ܶܐ ܬܡܺܝ̈ܗܶܐ: ܘܡܶܫܬܰܥܶܝܢ ܠܰܒܢܰܝ̈ܢܳܫܳܐ ܕܢܶܕܥܽܘܢܳܝܗ̱ܝ ܘܢܶܛܪܽܘܢ ܟܽܠܗܽܘܢ ܦܽܘܩܕܳܢܰܘ̈ܗ̱ܝ: ܠܳܐ ܗܳܟܺܝܠ ܬܶܬܦܰܠܰܓ ܘܬܺܐܡܰܪ: ܕܠܰܝܬ ܝܰܘܡܳܢܳܐ ܒܢܰܝ̈ܢܳܫܳܐ ܕܡܶܬܢܰܒܶܝܢ ܘܡܶܫܬܰܥܶܝܢ ܥܰܠ ܐܰܠܳܗܳܐ. ܘܶܐܢ ܐܳܡܰܪ ܐܰܢ̱ܬ ܕܠܰܢ̈ܒܺܝܶܐ ܩܰܕ̈ܡܳܝܶܐ ܘܠܰܫ̈ܠܺܝܚܶܐ ܡܩܰܒܶܠ ܐ̱ܢܳܐ: ܕܫܰܪܺܝܪܺܝܢ ܠܺܝ ܡܶܢ ܐܳܬܘ̈ܳܬܳܐ ܕܥܳܒܶܕ ܗ̱ܘܳܐ ܐܰܠܳܗܳܐ ܒܺܐܝܕ̈ܰܝܗܽܘܢ: ܕܗܽܘ ܡܰܠܶܠ ܒܗܽܘܢ: ܐܳܦܶܢ ܠܳܐ ܥܳܒܕܺܝܢ ܢܒܺܝ̈ܶܐ ܕܝܰܘܡܳܢ ܐܳܬܘ̈ܳܬܳܐ: ܡܶܛܽܠ ܕܠܳܐ ܨܳܒܶܐ ܡܳܪܰܢ ܕܢܶܥܒܶܕ ܒܺܐܝܕܰܝ̈ܗܽܘܢ: ܡܶܛܽܠ ܕܡܶܬܗܰܝܡܰܢ ܗ̱ܽܘ ܝܰܘܡܳܢ: ܡܰܢ ܓܶܝܪ ܕܠܳܐܬܘ̈ܳܬܳܐ ܩܰܕ̈ܡܳܝܳܬܳܐ ܠܳܐ ܡܗܰܝܡܶܢ: ܐܳܦܠܳܐ ܠܰܐܚܪ̈ܳܝܳܬܳܐ ܡܗܰܝܡܶܢ. ܠܰܢ ܕܶܝܢ ܕܺܝܠܰܢ ܕܠܳܐ ܗܳܘ̈ܝܳܢ ܐܳܬܘ̈ܳܬܳܐ ܒܺܐܝܕ̈ܰܝܢ ܡܶܢ ܣܳܗܕܽܘܬܳܐ ܕܰܟܬܳܒܰܝ̈ܗܽܘܢ ܕܩܰܕ̈ܺܝܫܶܐ ܕܰܥܒܰܕܘ ܐܳܬܘ̈ܳܬܳܐ ܚܰܣ̈ܺܝܢܳܬܳܐ ܢܶܬܩܰܒܰܠ ܡܺܐܡܪܰܢ. ܐܶܢ ܫܰܪܺܝܪܺܝܢ ܠܟܽܘܢ ܢܒܺܝ̈ܶܐ ܘܰܫܠ̈ܺܝܚܶܐ ܘܡܳܪܰܢ: ܣܳܓܕܺܝܢܰܢ ܠܶܗ: ܗܶܢܽܘܢ ܣܳܗܕܺܝܢ ܠܡܶܠܰܝ̈ܢ ܒܡܶܠܰܝ̈ܗܽܘܢ: ܕܫܰܪܺܝܪ̈ܳܢ ܐܶܢܶܝܢ ܘܫܳܠ̈ܡܳܢ ܠܡܶܠܰܝܗ̈ܽܘܢ܀

ܫܠܶܡ ܦܳܣܽܘܩܳܐ ܐ̱ܚܪܳܝܳܐ ܕܡܰܠܦܳܢܽܘܬܶܗ ܕܗܳܢܳܐ ܩܰܕܺܝܫܳܐ.