Demonstration 23: On the Grapecluster - ܬܚܘܝܬܐ ܕܛܘܛܝܬܐ

ܐܟܬܘܒ ܘܐܚܘܝܟ ܚܒܝܒܝ ܪܚܝܡܐ ܥܠ ܗܠܝܢ ܪ̈ܫܐ ܕܬܒܥܬܢܝ܂ ܥܠ ܗܝ ܒܘܪܟܬܐ ܕܛܡܝܪܐ ܒܣܓܘܠܐ܂ ܕܡܛܠ ܛܘܛܝܬܐ ܕܒܘܪܟܬܐ܂ ܠܐ ܐܬܝܗܒ ܣܓܘܠܐ ܠܚܒܠܐ܂ ܡܛܠ ܕܒܝܘܡ̈ܝ ܐܫܥܝܐ ܨܒܐ ܗܘܐ ܡܪܗ ܕܣܓܘܠܐ ܕܢܚܒܠܝܘܗܝ܂ ܘܐܬܐܡܪ ܠܗ ܒܦܬܓܡܐ ܕܠܐ ܢܬܚܒܠ ܣܓܘܠܐ ܡܛܠ ܕܒܘܪܟܬܐ ܐܝܬ ܒܗ܂ ܘܕܫܐܠܬܢܝ ܬܘܒ܂ ܕܐܢ ܒܟܠܙܒܢ ܫܟܝܚܝܢ ܙܕܝܩ̈ܐ ܘܟܐ̈ܢܐ ܥܠ ܐܪܥܐ܂ ܘܐܦܝܣܟ ܥܠ ܒܘܪܟܬܐ ܗܝ ܕܪܕܬ ܒܟܠܗܘܢ ܕܪ̈ܐ ܥܕܡܐ ܠܙܒܢܗ܂ ܘܐܚܘܝܟ ܐܦ ܥܠ ܡܠܬܐ ܕܬܒܥܬܢܝ܂ ܕܠܡܢܐ ܒܙܒܢ ܐܫܬܡܥܘ ܙܕܝ̈ܩܐ ܟܕ ܡܨܠܝܢ ܗܘܘ܂ ܘܒܙܒܢܐ ܐܚܪܢܐ ܠܐ ܫܡܥ ܐܢܘܢ ܐܠܗܐ܂ ܘܐܟܬܘܒ ܠܟ ܐܦ ܥܠ ܫ̈ܢܝ ܕܪ̈ܐ ܩܕܡ̈ܝܐ܂ ܕܕܪ ܕܪ ܚܘܫܒܢܗ܂ ܥܕܡܐ ܠܙܒܢܐ ܕܚܪܒܬ ܐܘܪܫܠܡ܂ ܘܐܫܬܩܠܬ ܡܢܗ ܛܝܒܘܬܐ܂ ܘܕܐܝܟܢܐ ܙܗܝܪܝܢ ܗܘܘ ܙܕܝܩ̈ܐ ܒܒܘܪܟܬܐ ܕܪܕܬ ܡܢܗܘܢ܂ ܥܕܡܐ ܠܙܒܢܐ ܕܡܛܐ ܝܘܒܠܗ ܒܝܕ ܝܫܘܥ ܠܒܝܬ ܥܡܡ̈ܐ܂ ܒܪܡ ܕܝܢ ܥܘܩܒܐ ܕܡ̈ܠܐ ܫܦܝܪ ܠܡܐܠܦ ܘܠܡܣܬܟܠܘ܂ ܐܠܐ ܝܬܝܪܐܝܬ ܒܠܒܐ ܕܟܝܐ ܠܡܕܚܠ \ܡܢ/ܡܢ ܐܠܗܐ/ ܝܗܘܒܐ ܕܦܬܓܡ̈ܐ ܙܕܩ ܠܢ܂ ܕܟܬܒ ܘܣܡ ܩܕܡܝܢ܂ ܕܒܥܡܠܐ ܪܒܐ ܘܒܕܚܠܬܐ ܣܓܝܐܬܐ ܘܒܬܪܥܐ ܐܠܝܨܐ ܘܒܐܘܪܚܐ ܕܩܛܝܢܐ ܪܕܝܢ ܕܚܠܘܗ̈ܝ ܕܐܠܗܐ܀

ܠܘܩܕܡ ܗܟܢܐ ܚܒܝܒܝ ܘܠܐ ܠܢ ܕܢܕܚܠ ܡܢ ܕܝܢܐ ܕܐܠܗܐ܂ ܘܡܢ ܡܠܘܗ̈ܝ ܘܦܘܩ̈ܕܢܘܗܝ ܕܡܚܝܢܐ ܕܐܡܪ܂ ܕܟܠ ܡܠܐ ܒܛܠܐ ܕܢܐܡܪܘܢ ܒ̈ܢܝܢܫܐ ܢܬܠܘܢ ܦܬܓܡܐ ܒܝܘܡܐ ܕܕܝܢܐ܂ ܘܬܘܒ ܟܬܝܒ܂ ܕܡܢ ܡ̈ܠܝܟ ܬܙܕܕܩ܂ ܘܡܢ ܡ̈ܠܝܟ ܬܬܚܝܒ܂ ܘܬܘܒ ܟܬܝܒ܂ ܕܦܘܡܗܘܢ ܕܒ̈ܢܝܢܫܐ ܪܡܐ ܠܗܘܢ ܘܒܕܘܟܬܐ ܐܚܪܬܐ ܟܬܝܒ܂ ܕܦܘܡܗ ܕܣܟܠܐ ܥܒܕ ܠܗ ܬܘܩܠܬܐ܂ ܘܐܬܟܕܪ ܠܡ̈ܠܘܗܝ ܕܡܠܦܢܐ ܕܥܡ̈ܡܐ܂ ܕܐܡܪ܂ ܕܠܟܠܢ ܠܡܩܡ ܠܢ ܩܕܡ ܒܝܡ ܕܡܫܝܚܐ܂ ܕܢܬܦܪܥ ܐܢܫ ܐܢܫ ܒܦܓܪܗ ܡܕܡ ܕܡܢ ܩܕܝܡ ܥܒܝܕ ܗܘܐ ܠܗ܂ ܐܢ ܕܛܒ ܘܐܢ ܕܒܝܫ܂ ܘܬܘܒ ܐܡܪ܂ ܕܒܕܚܠܬܐ ܘܒܪܬܝܬܐ ܚܝܝ̈ܟܘܢ ܫܘܙܒܘ܂ ܘܬܘܒ ܐܘܣܦ ܘܙܗܪܢ܂ ܕܕܚܠܬܐ ܗܝ ܪܒܬܐ ܠܡܦܠ ܒܐܝܕܘ̈ܗܝ ܕܐܠܗܐ ܚܝܐ܂ ܘܐܦ ܫܠܝܚ̈ܐ ܛܘܒ̈ܢܐ ܐܟܪܙܘ܂ ܕܒܐܘܠܨܢܐ ܪܒܐ ܘܠܐ ܠܡܥܠ ܠܡܠܟܘܬܗ ܕܐܠܗܐ܂ ܘܬܘܒ ܐܡܪ܂ ܕܕܚܝܠ ܗܘ ܝܘܡܗ ܕܡܪܝܐ܂ ܘܡܢܘ ܡܫܟܚ ܡܣܝܒܪ ܠܗ܂ ܐܟܬܢ ܘܚܡܝܡ ܪܘܓܙܗ܂ ܘܢܥܒܕܝܗ ܠܐܪܥܐ ܠܚܘܪܒܐ܂ ܘܚ̈ܛܝܝܗ ܢܘܒܕ ܡܢܗ܀

ܡܛܠ ܓܝܪ ܕܐܩܝܡ ܒܪܢܫܐ ܩܕܡܝܐ ܡܫܡܥܬܗ ܠܚܘܝܐ܂ ܩܒܠ ܡܣܡܒܪܫܐ ܠܘܛܬܐ܂ ܕܢܗܘܐ ܡܟܘܠܬܐ ܠܚܘܝܐ܂ ܘܪܕܬ ܠܘܛܬܐ ܥܠ ܟܠܗܘܢ ܝܠܕܘ̈ܗܝ܂ ܥܠ ܕܐܟܠ ܓܝܪ ܡܢ ܐܝܠܢܐ ܕܝܕܥܬܐ܂ ܐܬܟܠܝ ܡܢ ܦܐܪ̈ܝ ܐܝܠܢܐ ܕܚ̈ܝܐ܂ ܕܠܐ ܢܐܟܘܠ ܡܢܗ ܘܢܚܐ ܠܥܠܡ܂ ܘܒܗܕܐ ܝܕܥܝܢܢ ܕܡܛܠ ܕܦܣܥ ܒܪܢܫܐ ܥܠ ܦܘܩܕܢܐ ܒܡܛܥܝܢܘܬܗ ܕܒܝܫܐ܂ ܘܩܕܡ ܢܣܒ ܠܗ ܪܡܘܬܐ܂ ܕܢܗܘܐ ܦܚܡܐ ܕܥܒܘܕܗ܂ ܘܒܦܘܪܫܢܐ ܕܝܕܥܬܐ ܕܩܒܠ܂ ܗܘܐ ܣܝܓܐ ܒܝܢܘܗܝ ܠܐܝܠܢܐ ܕܚ̈ܝܐ܂ ܕܒܥܠܬ ܢܟܝܠܘܬܗ ܕܒܝܫܐ ܐܬܟܠܝ ܡܢ ܦܐܪ̈ܘܗܝ܂ ܘܐܬܣܝܓ ܐܝܠܢܐ ܡܢ ܦܘܩܕܢܐ ܕܪܒܐ ܒܪܘܡܚܐ ܕܚܝܠܬܐ܂ ܘܒܫܠܗܒܝܬܐ ܕܡܬܟܪܟܐ܂ ܘܐܦ ܗܘ ܒܪܢܫܐ ܡܛܠ ܕܐܪܓܫ ܘܝܕܥ ܡܫܟܚ ܗܘܐ ܠܡܐܙܠ ܠܘܬ ܗܘ ܐܝܠܢܐ܂ ܐܠܐ ܡܚܝܠܘܬܗ ܠܡܥܒܪ ܣܝܓܐ ܠܐ ܡܫܟܚܐ ܗܘܬ܂ ܡܛܠ ܗܢܐ ܗܘ ܗܢܐ ܐܝܠܢܐ ܕܚܝ̈ܐ܂ ܒܒܣܝܡܘܬܗ ܠܐ ܐܬܟܠܝ ܡܢ ܣܢܝܩ̈ܐ܂ ܕܢܐܟܠܘܢ ܡܢܗ ܘܢܚܘܢ܂ ܗܝܕܝܢ ܐܘܪܟ ܣܘܟܘܗ̈ܝ ܘܣܪ̈ܥܦܝܬܗ ܫܕܐ܂ ܘܐܘܫܛ ܫܒܘܩܘ̈ܗܝ ܠܥܠ ܡܢ ܣܝܓܐ܂ ܘܫܕܐ ܦܐܪܗ ܒܛܝܒܘ ܠܒܪ ܡܢ ܬܚܘܡܐ܂ ܕܟܪܝܟ ܗܘܐ ܠܡܛܪܗ܂ ܘܒ̈ܢܝ ܡܛܠ ܝܕܥܬܐ ܡܕܘܕܬܐ ܘܡܣܓܦܢܝܬܐ ܕܩܕܡܘ ܐܚܕܘ ܗܘܘ ܒܢ̈ܓܕܐ ܣܓܝܐ̈ܐ܂ ܒܗܢܐ ܦܘܪܣܐ ܕܐܣܝܘܬܐ܂ ܐܬܦܫܚ ܡܢܗܘܢ ܡܘܠܟܢܐ ܕܠܘܛܬܐ܂ ܘܟܕ ܐܪܓܫ ܒܥܠܕܒܒܐ܂ ܒܗܬ ܩܠܝܠ ܒܬܪܥܝܬܗ܂ ܘܒܛܠ/ܘܒ̈ܛܠܝ/ ܨܢܥ̈ܬܗ܂ ܘܪܓܙ ܥܠ ܦܐܪܐ ܘܐܟܘܠܘܗ̈ܝ܂ ܘܩܒܠܘ ܒܦܓܪ̈ܝܗܘܢ ܠܒܘܛܠܗ ܕܠܘܛܬܐ܂ ܘܙܟܬ ܚܟܡܬܐ ܕܫܪܪܐ ܠܢܟܝܠܘܬܗ ܕܒܝܫܐ܂ ܘܐܬܢܛܪܘ ܐܟܘ̈ܠܘܗܝ ܕܦܐܪܐ ܐܝܟ ܛܘܛܝܬܐ ܒܣܓܘܠܐ܂ \ܘܥܠ ܕܒܥܠܬ /ܒܥܠܬ/ ܐܬܢܛܪ ܟܠܗ ܣܓܘܠܐ܂ ܥܕ ܢܫܠܡ ܙܒܢܐ ܕܣܝܡ ܠܥܠܝܐ܂ ܘܕܢܓܪ ܥܠܝܗܘܢ ܦܘܣܩܢܐ ܥܠ ܫܪܟܗ ܕܣܓܘܠܐ܂ ܘܠܐ ܨܒܘ ܕܢܬܘܒܘܢ ܒܚܝܠܗ ܕܒܘܪܟܬܐ܂ ܕܢܒܫܠܘܢ ܘܢܚܠܘܢ ܡܢ ܡܪܝܪܘܬܐ ܕܩܒܠܘ܂ ܘܢܗܘܘܢ ܫܘ̈ܬܦܐ ܠܚܠܝܘܬܗ ܕܦܐܪܐ܂ ܕܡܬܦܠܚܐ ܢܨܒܬܐ ܒܚܟܡܬ ܦܠܚܐ܂ ܕܙܒܢܐ ܣܓܝܐܐ ܐܬܓܠܙܬ ܡܢ ܥܘܕܪܢܐ܂ ܘܡܢ ܡܫܬܘܕܥܘܬܐ ܕܡܘܗܒܬܐ ܕܐܣܝܘܬܐ܂ ܘܒܡܦܬܚ ܬܪܥܐ ܕܫܐܠܬ ܫܠܡܐ܂ ܥܪܩ ܥܡܛܢܐ ܕܪܥܝܢܐ ܕܣܓܝܐ̈ܐ܂ ܘܒܕܢܚܐ ܕܢܘܗܪܐ ܕܬܪܥܝܬܐ܂ ܘܒܛܥܝܢܘܬ ܦܐܪ̈ܘܗܝ ܕܙܝܬܐ ܡܢܗܪܢܐ܂ ܕܒܗ ܪܘܫܡܐ ܕܐܪܙܐ ܕܚ̈ܝܐ܂ ܕܒܗ ܡܬܓܡܪ̈ܝܢ ܡܫܝ̈ܚܝܐ ܘܟܗ̈ܢܐ ܘܡܠܟ̈ܐ ܘܢܒ̈ܝܐ܂ ܡܢܗܪ ܚܫܘ̈ܟܐ ܘܡܕܗܢ ܬܚܘܒ̈ܐ܂ ܘܡܩܪܒ ܠܬܝ̈ܒܐ ܒܐܪܙܗ ܛܡܝܪܐ܂ ܘܐܝܠܝܢ ܕܚܒܨܝܢ ܘܩܪܒܝܢ ܠܘܬܗ܂ ܢܛܦ ܛܥܡܗ ܒܐ̈ܕܢܝܗܘܢ ܟܣܝ̈ܬܐ܂ ܘܚܙܝܢ ܒܥܝܢܝܗ̈ܘܢ ܘܫܡܥܝܢ ܒܐܕܢܝ̈ܗܘܢ܂ ܘܨܝܪܝܢ ܕܡܘ̈ܬܗ ܒܪ̈ܓܫܝ ܗܡ̈ܣܝܗܘܢ܂ ܘܡܬܚܦܛܝܢ ܕܠܐ ܒܗܠܐ ܠܡܪܕܐ ܠܩܕܡܝܗܘܢ܂ ܘܡܫܬܘܫܛܝܢ ܠܡܐܙܠ ܘܛܥܝܢ ܕܒܣܬܪܗܘܢ܂ ܘܡܫܟܚܝܢ ܡܡܢܥܝܢ ܠܗܝ ܚܙܬܐ ܛܡܝܪܬܐ ܕܩܒܠܘ ܟܕ ܛܥܡܘܗܝ ܕܨܪ ܠܗܘܢ ܢܥܡ̈ܬܐ ܕܢܥܪܩܘܢ ܡܢ ܒܝܫܐ܂ ܘܗܝܕܝܢ ܗܘܝܢ ܚܡܝܪܐ ܕܙܕܝ̈ܩܐ ܒܥܠܡܐ ܗܢܐ܂ ܕܢܬܝܗܒ ܒܗܘܢ ܐܬܪܐ ܠܬܝܒܘܬܐ܂ ܐܦ ܡܛܠܬܗܘܢ ܡܫܬܒܩܝܢ ܚ̈ܛܝܐ ܥܠ ܐܪܥܐ ܕܢܩܒܠܘܢ ܡܘܠܟܢܐ܂ ܕܬܕܢܚ ܫܡܫܐ ܕܛܝܒܘܬܐ ܥܠܝܗܘܢ܂ ܘܡܛܠ ܢܓܝܪܘܬ ܪܘܚܗ ܕܛܒܐ܂ ܡܬܢܛܪܝܢ ܙܝܙ̈ܢܐ ܥܡ ܚܛܐ̈܂ ܕܠܐ ܐܢ ܢܨܒܐ ܡܪܐ ܙܪܥܐ܂ ܕܟܕ ܙܝܙ̈ܢܐ ܠܐ ܫܠܡܘ ܡܪܒܝܬܗܘܢ܂ ܢܦܩܘܕ ܕܢܬܥܩܪܘܢ܂ ܘܢܡܛܐ ܢܟܝܢܐ ܐܦ ܠܚ̈ܛܐ܂ ܟܕ ܡܬܕܟܝܢ ܙܝܙ̈ܢܐ ܡܢܗܝܢ܂ ܐܠܐ ܡܛܪܐ ܕܡܪܒܐ ܠܙܪܥܐ ܛܒܐ܂ ܗܘ ܡܫܘܚ ܠܙܝܙ̈ܢܐ ܙܪܥܗ ܕܒܝܫܐ܂ ܘܗܕܐ ܕܥܒܕ ܛܒܐ ܒܚܟܡܬܗ܂ ܡܛܠ ܕܬܒܛܠ ܐܘܡܢܘܬܐ ܕܒܢܘܗ̈ܝ ܕܒܝܫܐ܂ ܕܣܝܡܝܢ ܬܪ̈ܝܢ ܥܩܪ̈ܝܢ ܕܛܒܬܐ ܘܕܒܝܫܬܐ܂ ܐܠܘ ܓܝܪ ܡܛܪܐ ܕܡܪܒܐ ܠܚ̈ܛܐ܂ ܡܬܚܒ ܗܘܐ ܠܙܝܙ̈ܢܐ ܙܪܥܗ ܕܒܝܫܐ܂ ܝܕܝܥܐ ܗܘܬ ܕܬܪ̈ܝܢ ܟܝ̈ܢܐ ܡܫܬܡܫܝܢ ܒܒܪܝܬܐ܂ ܐܠܐ ܡܪܒܝܬܐ ܕܗܠܝܢ ܘܕܗܠܝܢ܂ ܒܡܛܪܐ ܘܒܪܘܚܐ ܘܒܫܡܫܐ ܡܬܓܐܝܐ܂ ܘܡܣ̈ܗܕܢ ܒ̈ܪܝܬܐ ܥܠ ܚܕ ܒܪܘܝܐ܂ ܕܒܦܘܩܕܢܗ ܒܪ̈ܝܬܗ ܡܬܕܒܪܢ܂ ܣܓܝ̈ܐܐ ܓܝܪ ܐܝܬܝܗܘܢ ܛܒ̈ܐ ܒܥܠܡܐ ܥܠ ܒܝܫ̈ܐ܂ ܕܡܛܠܬܗܘܢ ܡܢܗܘܢ ܪܘܓܙܐ ܐܫܝܕܐ ܡܬܟܠܐ܂ ܘܒܙܒܢ ܕܡܬܬܪܥ ܣܝܓܐ ܕܥܠ ܒܝ̈ܫܐ܂ ܘܠܝܬ ܡܢ ܛܒ̈ܐ ܕܩܐܡ ܒܗ܂ ܫܦܥܐ ܟܝܠܬ ܚ̈ܛܝܐ܂ ܘܡܥܝܪܐ ܪܘܓܙܗ ܕܥܠܝܐ܂ ܘܒܥܠܬ ܪܘܓܙܐ ܕܥܠ ܒܝܫ̈ܐ܂ ܡܬܥܪܩܠܝܢ ܓܒ̈ܝܐ ܒܬܢܢܐ܂ ܘܟܕ ܣܦܣܪܐ ܠܡܚܪܒ ܡܬܦܩܕܐ ܡܘܒܕܐ ܚ̈ܛܝܐ ܘܙܕܝܩ̈ܐ܂ ܥܠ ܕܠܐ ܐܣܬܪܗܒܘ ܙܕܝܩ̈ܐ ܠܡܩܡ ܒܬܘܪܥܬܗ ܕܣܝܓܐ܂ ܐܝܟ ܕܐܡܪ ܢܒܝܐ ܟܕ ܡܟܪܙ܂ ܕܒܥܝܬ ܒܥܡܝ ܓܒܪܐ ܕܣܐܓ ܣܝܓܐ ܘܩܐܡ ܒܬܘܪܥܬܐ ܥܠ ܐ̈ܦܝܗ ܕܐܪܥܐ ܕܠܐ ܐܚܒܠܝܗ ܘܠܐ ܐܫܟܚܬ܀

ܘܐܝܟ ܕܩܕܡ ܘܚܘܝ ܐܬܐ ܗܕܐ ܒܙܕ̈ܝܩܐ ܕܕܪ̈ܐ ܩܕܡ̈ܝܐ܂ ܢܛܝܪܝܢ ܗܘܘ ܓܝܪ ܥܣܪܐ ܕܪ̈ܝܢ ܕܒܝܬ ܐܕܡ ܒܚܝ̈ܘܗܝ ܕܡܬܘܫܠܚ܂ ܘܒܗ ܒܙܒܢܐ ܕܡܝܬ܂ ܗܘܐ ܛܘܦܢܐ ܘܣܦ ܥܠܡܐ܂ ܘܐܬܚܒܠ ܡܢ ܪܘܓܙܐ܂ ܘܢܘܚ ܐܣܬܬܪ ܡܢ ܡ̈ܝܐ ܕܡܡܘܠܐ܂ ܕܡܢܗ ܢܚܠܦ ܥܠܡܐ ܬܢܝܢܐ܂ ܘܒܚܝܘ̈ܗܝ ܕܢܘܚ ܓܒܪܐ ܕܢܝܚܐ܂ ܐܬܢܛܪܘ ܥܣܪܐ ܕܪ̈ܝܢ ܡܢ ܛܘܦܢܐ ܘܠܬܚܬ܂ ܘܟܕ ܫܠܡ ܙܢܒܐ ܘܡܝܬ܂ ܫܢܝ ܐܒܪܗܡ ܡܢ ܐܘܪ ܕܟܠܕ̈ܝܐ܂ ܘܒܡܓܪܬ ܪܘܚܗ ܥܠܝܐ ܚܘܝ ܚܢܢܗ ܥܠ ܟܢܥ̈ܢܝܐ܂ ܕܟܕ ܟܝܠܬ ܚܘܒܝ̈ܗܘܢ ܠܐ ܫܠܡܬ܂ ܠܐ ܨܒܐ ܠܡܘܒܕܘ ܐܢܘܢ܂ ܐܥܠ ܙܪܥܗ ܕܐܒܪܗܡ ܠܡܨܪܝܢ܂ ܘܡܠܟ ܫܘܥܒܕܐ ܥܠ ܝܠܕܐ ܕܪ̈ܚܡܘܗܝ܂ ܕܢܫܠܡܘܢ ܚܘܒܝܗ̈ܘܢ ܕܐܡܘܪ̈ܝܐ܂ ܘܕܢܬܚܙܝܢ ܬܕܡܪ̈ܬܗ ܒܡܫܥܒ̈ܕܢܝܗܘܢ܂ ܘܟܕ ܐܦܩ ܐܢܘܢ ܒܚܝܠܗ ܪܒܐ܂ ܚܘܝ ܐܢܘܢ ܬܕܡܪ̈ܬܗ܂ ܒܡܕܒܪܐ ܬܪܣܝ ܐܢܘܢ ܒܡܐܟܘܠܬܐ ܕܩܕܝ̈ܫܘܗܝ܂ ܘܣܒܥ ܐܢܘܢ ܠܚܡܐ ܕܡܠܐܟ̈ܐ܂ ܘܐܪܕܝ ܠܗܘܢ ܡܒܘܥܐ ܒܐܬܪܐ ܕܠܐ ܡ̈ܝܐ܂ ܘܟܕ ܡܪܡܪܘ ܪܘܚܗ ܘܐܪܓܙܘܗܝ܃ ܩܡ ܡܘܫܐ ܒܬܘܪܥܬܐ ܕܥܡܗ܂ ܘܐܦ ܒܚܝܘܗ̈ܝ ܕܐܗܪܘܢ ܟܗܢܐ ܪܒܐ ܡܚܣܝܢܐ ܘܣܐܡ ܥܛܪܐ ܒܪܘܓܙܐ܂ ܠܐ ܫܠܛܘ ܗܘܘ ܒܗܘܢ ܒܥܠܕܒ̈ܒܝܗܘܢ܂ ܘܒܡܘܬܗ ܕܒܗܘܪ ܛܘܪܐ܂ ܐܬܓܪܝ ܒܗܘܢ ܟܢܥܢܝܐ ܡܠܟܐ ܕܓܕܪ܂ ܕܥܡܪ ܒܬܝܡܢܐ܂ ܘܒܚ̈ܝܘܗܝ ܕܡܘܫܐ ܠܐ ܚܣܪ ܠܗܘܢ ܠܡܬܦܪܢܣܘ܂ ܘܒܡܘܬܗ ܕܒܛܘܪܐ ܕܢܒܘ܂ ܐܬܟܠܝ ܡܢܢܐ ܡܢܗܘܢ܂ ܘܟܕ ܢܦܩ ܥܡܗ ܡܢ ܡܨܪܝܢ܂ ܐܥܒܪ ܐܢܘܢ ܐܠܗܐ ܒܝܡܐ ܕܚܝܠܐ܂ ܘܟܕ ܛܒܥ ܦܪܥܘܢ ܐܠܘܨܐ܂ ܢܣܒܬ ܡܪܝܡ ܦܠܓܐ ܒܐܝܕܗ܂ ܘܫܒܚܬ ܠܓܐܝܐ ܡܛܒܥܢܗܘܢ܂ ܘܒܙܒܢܐ ܕܡܝܬܬ ܡܪܝܡ܂ ܠܝܬ ܗܘܐ ܡ̈ܝܐ ܕܢܫܬܐ ܥܡܐ܂ ܘܒܝܘܡ̈ܝ ܚܙܩܝܐ ܡܠܟܐ܂ ܐܬܦܨܝܘ ܡܢ ܬܪ̈ܝܢ ܡ̈ܠܟܐ ܐܬܘܪ̈ܝܐ܂ ܘܒܬܪ ܡܘܬܗ ܕܓܒܪܐ ܙܕܝܩܐ ܐܬܕܒܪܘ ܒܢܘܗ̈ܝ ܒܗܡܝܪ̈ܐ ܠܘܬ ܡܠܟܐ ܕܒܒܠ܂ ܘܝܘܫܝܐ ܡܠܟܐ ܙܕܝܩܐ܂ ܕܟܝ ܐܪܥܐ ܕܐܝܣܪܝܠ ܡܢ ܛܡܐܘܬܐ܂ ܘܗܘ ܐܬܟܢܫ ܡܢ ܩܕܡ ܒܝܫܬܐ܂ ܘܒܬܪ ܡܘܬܗ ܣܓܝܘ ܐܠܘܨܘ̈ܗܝ ܕܐܝܣܪܝܠ܂ ܘܥܩܪܘ ܐܢܘܢ ܡܢ ܐܪܥܗܘܢ ܡ̈ܠܟܐ ܒܥܠܕܒܒ̈ܝܗܘܢ܀

ܘܒܙܒܢܐ ܕܫܦܥܬ ܟܝܠܬ ܚ̈ܛܝܐ܂ ܬܘܒ ܠܐ ܐܫܬܡܥܬ ܨܠܘܬܐ ܕܙܕܝܩ̈ܐ܂ ܐܡܪ ܓܝܪ ܩܕܝܫܐ ܠܐܪܡܝܐ ܕܒܗܢܐ ܙܒܢܐ܂ ܐܢ ܢܩܘܡ ܡܘܫܐ ܘܫܡܘܐܝܠ ܩܕܡܝ܂ ܠܐ ܨܒܝܐ ܢܦܫܝ ܒܥܡܐ ܗܢܐ܂ ܐܠܐ ܐܦܩ ܐܢܘܢ ܡܢ ܩܕܡ ܐ̈ܦܝ ܘܢܦܩܘܢ܂ ܘܐܢ ܢܐܡܪܘܢ ܠܟ ܠܐܝܟܐ ܢܦܘܩ܂ ܐܡܪ ܠܗܘܢ܂ ܠܚܪܒܐ ܘܠܫܒܝܐ ܘܠܟܦܢܐ ܘܠܡܘܬܢܐ܂ ܐܪ̈ܒܥ ܡܚ̈ܘܢ ܐܫܕܪ ܥܠܝܗܘܢ܂ ܘܐܦ ܠܚܙܩܝܐܝܠ ܐܡܪ ܠܗ ܐܠܗܐ܂ ܕܐܢ ܐܫܕܪ ܚܪܒܐ ܥܠ ܐܪܥܐ܂ ܘܐܡܪ ܬܥܒܪ ܚܪܒܐ ܒܐܪܥܐ܂ ܐܘ ܚܝܘܬܐ ܒܝܫܬܐ܂ ܘܢܘܚ ܘܐܝܘܒ ܘܕܢܝܐܝܠ ܐܝܬ ܒܗ ܒܐܪܥܐ ܗܝ܂ ܚܝ ܐܢܐ ܐܡܪ ܡܪܐ ܡܪ̈ܘܬܐ܂ ܕܠܐ ܠܒܪܐ ܘܠܐ ܠܒܪܬܐ ܢܦܨܘܢ܂ ܐܠܐ ܗܢܘܢ ܒܙܕܝܩܘܬܗܘܢ ܢܦܨܘܢ ܢܦܫܗܘܢ܂ ܘܐܪܥܐ ܬܗܘܐ ܠܚܒܠܐ܂ ܘܡܣܟܠܐ ܗܘܬ ܠܢ ܡܠܬܐ܂ ܕܡܟܪܐ ܗܘ \ܟܪܝܬ/ܟܪܝܬ ܠܗ/ ܠܢܒܝܐ ܟܕ ܡܨܠܐ ܘܠܐ ܡܫܬܡܥ܂ ܡܛܠ ܟܢ ܢܦܩ ܠܗ ܡܪܗ ܪܘܚܐ ܒܬܚܘܝܬܐ ܕܗܠܝܢ ܬܠܬܐ ܙܕܝܩ̈ܝܢ܂ ܥܠ ܕܣܠܩܬ ܗܘܬ ܡܚܫܒܬܐ ܥܠ ܠܒܗ܂ ܕܠܡܢܐ ܢܘܚ ܘܐܝܘܒ ܘܕܢܝܐܝܠ ܐܫܬܡܥܘ ܚܕ ܚܕ ܡܢܗܘܢ ܒܕܪܗ܂ ܘܨܠܘܬܝ ܕܝܠܝ ܠܐ ܫܡܥ܂ ܢܘܚ ܐܫܬܡܥ ܘܐܫܬܘܙܒܘ ܒ̈ܢܝ ܒܝܬܗ ܥܡܗ ܡܢ ܪܘܓܙܐ ܕܡܡܘܠܐ܂ ܘܐܝܘܒ ܨܠܝ ܥܠ ܪ̈ܚܡܘܗܝ܂ ܘܥܒܕ ܡܪܝܐ ܒܐܦܘܗ̈ܝ ܘܠܐ ܗܘܘ ܒܩܠܠܐ܂ ܘܠܕܢܝܐܝܠ ܐܬܓܠܝ ܐܪܙܐ ܒܨܠܘܬܗ܂ ܘܚܒܪ̈ܘܗܝ ܐܬܦܨܝܘ ܡܢ ܪܘܓܙܗ ܕܡܠܟܐ܂ ܘܐܦ ܚܟܝܡ̈ܐ ܕܒܒܠ ܕܒܝܫܝܢ ܗܘܘ ܐܫܬܘܙܒܘ ܘܚܝܘ ܒܨܠܘܬܗ ܕܕܢܝܐܝܠ܂ ܟܕ ܗܠܝܢ ܐܬܪܥܝ ܢܒܝܐ ܢܦܩ ܠܗ ܛܒܐ ܪܘܚܐ ܒܒܣܝܡܘܬܗ ܐܝܟ ܕܡܥܕ܂ ܕܗܠܝܢ ܬܠܬܐ ܓܒܪ̈ܝܢ ܙܕܝܩ̈ܝܢ܂ ܕܠܚܕ ܚܕ ܡܢܗܘܢ ܒܕܪܗ ܫܡܥܬ ܐܢܘܢ܂ ܐܢ ܢܩܘܡܘܢ ܩܕܡܝ ܒܗܢܐ ܙܒܢܐ܂ ܠܐ ܒܠܚܘܕ ܥܠ ܒܝ̈ܫܐ ܠܐ ܐܫܡܥ ܐܢܘܢ܂ ܐܠܐ ܐܦܠܐ ܒܪܐ ܘܒܪܬܐ ܢܦܨܘܢ܂ ܐܠܐ ܗܢܘܢ ܒܙܕܝܩܘܬܗܘܢ ܢܦܨܘܢ ܢܦܫܗܘܢ܂ ܘܐܪܥܐ ܬܗܘܐ ܠܚܒܠܐ܂܂܂܀܂܂܂ ܗܝܕܝܢ ܐܬܛܦܝܣ ܢܒܝܐ ܒܡܦܩ ܒܪܘܚܐ ܕܡܪܗ܀

ܘܐܟܘܬܗ ܕܗܕܐ ܡܚܫܒܬܐ܂ ܐܬܪܥܝ ܐܦ ܐܪܡܝܐ ܢܒܝܐ ܘܐܡܪ܂ ܕܡܛܠ ܡܢܐ ܡܘܫܐ ܘܫܡܘܐܝܠ ܐܫܬܡܥܘ ܚܕ ܚܕ ܡܢܗܘܢ ܒܕܪܗ܂ ܘܒܐ̈ܦܝ ܨܠܘܬܝ ܕܝܠܝ ܛܠܠ ܡܪܝܐ ܘܠܐ ܫܡܥ܂ ܡܛܠ ܕܡܘܫܐ ܩܡ ܒܬܘܪܥܬܐ ܕܥܡܗ ܙܒ̈ܢܝܢ ܣܓ̈ܝܐܢ܂ ܘܠܐ ܐܬܥܛܝܘ ܡܛܠ ܚܛܗܝ̈ܗܘܢ܂ ܘܐܦ ܫܡܘܐܝܠ ܚܣܝ ܥܠ ܟܠܗ ܐܝܣܪܝܠ܂ ܥܠ ܕܫܐܠܘ ܡܠܟܐ ܘܐܣܠܝܘ ܡܠܟܘܬܗ܂ ܘܬܘܒ ܛܒܐ ܒܢܓܝܪܘܬ ܪܘܚܗ܂ ܐܦܝܣ ܠܐܪܡܝܐ ܢܒܝܐ܂ ܕܐܢ ܢܩܘܡ ܡܘܫܐ ܘܫܡܘܐܝܠ ܩܕܡܝ ܒܗܢܐ ܙܒܢܐ ܠܐ ܐܫܡܥ ܐܢܘܢ܀

ܘܐܦ ܒܙܒܢܗܘܢ ܗܠܝܢ ܙܕܝܩ̈ܐ܂ ܓܢܒܪ̈ܝ ܚܝܠܐ ܒܙܒܢ ܙܒܢ ܐܫܬܡܥܘ܂ ܟܕ ܡܨܠܝܢ܂ ܘܒܙܒܢ ܨܠܝܘ ܘܠܐ ܐܬܥܢܝܘ܂ ܡܘܫܐ ܢܒܝܐ ܪܒܐ ܕܟܘܠܗ ܐܝܣܪܝܠ܂ ܕܒܨܠܘܬܗ ܡܩܒܠܬܐ ܐܬܦܨܝܘ ܥܡܗ ܡܢ ܪܘܓܙܐ ܙܒ̈ܢܝܢ ܣܓܝܐ̈ܢ܂ ܘܣܦܩܬ ܨܠܘܬܗ ܠܟܠܗ ܐܝܣܪܐܝܠ܂ ܘܒܙܒܢܐ ܐܚܪܢܐ ܟܕ ܨܠܝ ܠܐ ܣܦܩܬ ܨܠܘܬܗ ܠܩܢܘܡܐ ܕܢܦܫܗ܂ ܨܠܝ ܓܝܪ ܒܚܢܓܬܐ ܘܐܬܚܢܢ ܕܢܥܒܪ ܢܚܙܐ ܐܪܥܐ ܕܡܘܠܟܢܐ܂ ܘܐܡܪ ܠܗ ܡܪܗ܂ ܣܦܩ ܠܟ ܠܐ ܬܘܣܦ ܬܘܒ ܠܡܡܠܠܘ ܩܕܡܝ ܦܬܓܡܐ ܗܢܐ܂ ܡܛܠ ܕܠܐ ܫܡܥܢܐ ܠܟ܂ ܥܠ ܕܡܪܡܪܬܘܢ ܡܠܬ ܦܘܡܝ܂ ܘܠܐ ܩܕܫܬܘܢܢܝ ܒܡ̈ܝܐ ܕܡܨܘܬܐ܂ ܐܘ ܪ̈ܙܐ/ܐܪ̈ܙܐ/ ܬܡܝܗ̈ܐ ܕܠܐ ܡܫܬܡܥܝܢ ܙܕܝܩ̈ܐ܂ ܡܛܠ ܕܒܕܠܐ ܡܫܬܡܥܝܢ܂ ܢܬܪܕܘܢ ܡܢ ܩܕܡ ܕܝܢܐ܂ ܕܠܐ ܢܬܪܫܘܢ ܒܝܘܡܐ ܕܦܘܪܥܢܐ܂ ܒܗܕܐ ܐܬܪܕܝ ܡܘܫܐ ܥܠ ܕܡܪܡܪ܂ ܘܠܐ ܐܫܬܡܥܬ ܨܠܘܬܗ܂ ܘܠܐ ܥܠ ܠܐܪܥܐ ܕܡܘܠܟܢܐ܀

ܐܡܪܢܐ ܐܚ̈ܝ ܒܬܘܟܠܢܐ ܫܪܝܪܐ܂ ܕܒܟܠܙܒܢ ܡܢ ܒܪܫܝܬ ܘܠܥܠܡ܂ ܫܟܝܚܝܢ ܐܢܘܢ ܙܕܝܩ̈ܐ ܘܟܐ̈ܢܐ ܥܠ ܐܪܥܐ܂ ܐܝܟ ܕܟܬܝܒ܂ ܕܠܐ ܥܢܕ ܙܕܝܩܐ ܡܢ ܩܕܡ ܥܝܢܘܗ̈ܝ ܕܡܪܝܐ܂ ܘܠܐ ܒܛܠ ܥܠܡܐ ܡܢ ܟܐܢ̈ܐ܂ ܥܠ ܗܕܐ ܣܗܕ ܦܪܘܩܢ܂ ܕܠܐ ܐܬܝܬ ܕܐܩܪܐ ܠܙܕܝܩ̈ܐ ܐܠܐ ܠܚܛܝ̈ܐ ܠܬܝܒܘܬܐ܂ ܡܛܠ ܕܨܒܐ ܕܢܙܕܕܩܘܢ ܚ̈ܛܝܐ ܐܬܐ ܡܫܝܚܐ܂ ܡܛܠ ܕܠܝܬ ܗܘܐ ܠܗܘܢ ܡܕܡ ܣܘܢܩܢܐ ܠܚܠܝܡ̈ܐ ܥܠ ܐܣܝܐ܂ ܡܛܠ ܕܠܝܬ ܗܘܐ ܠܗܘܢ ܟܪܝܗܘܬܐ܂ ܘܐܦܠܐ ܣܒ̈ܥܐ ܟܦܢܝܢ ܗܘܘ ܠܗ܂ ܐܘ ܕܨܗܝܢ ܕܢܫܬܘܢ ܘܢܬܢܝܚܘܢ܂ ܗܘ ܓܝܪ ܗܟܢܐ ܩܪܐ܂ ܕܟܠ ܕܨܗܐ ܢܐܬܐ ܘܢܫܬܐ܂ ܘܢܒܝܐ ܩܪܐ܂ ܕܐܘܝ ܕܨܗܝܢ ܙܠܘ ܠܡ̈ܝܐ܂ ܘܣܒܘ ܠܟܘܢ ܕܠܐ ܟܣܦܐ܂ ܘܕܠܐ ܕܡ̈ܝܢ ܚܠܒܐ ܘܚܡܪܐ܂ ܚܡܪܐ ܡܚܕܝܢܐ ܘܚܠܒܐ ܡܪܒܝܢܐ܂ ܘܫܠܝܚܐ ܐܡܪ ܥܠ ܗܕܐ܂ ܕܐܝܟ ܕܠܝܠܘܕ̈ܐ ܒܡܫܝܚܐ ܚܠܒܐ ܐܫܩܝܬܟܘܢ܀

ܗܢܐ ܐܪܙܐ ܪܒܐ ܕܩܕܡ ܐܟܪܙ ܢܒܝܐ܂ ܐܡܪ ܓܝܪ ܕܟܠ ܕܨܗܐ ܢܐܙܠ ܠܡ̈ܝܐ܂ ܘܡܡܠܝܢܐ ܕܢܒ̈ܝܐ ܐܡܪ܂ ܕܟܠ ܕܨܗܐ ܢܐܬܐ ܘܢܫܬܐ܂ ܢܒܝܐ ܫܕܪ ܠܡܒܘܥܐ܂ ܘܗܘ ܡܫܩܝܢܐ ܩܪܐ ܠܡܫܬܐ܂ ܘܐܟܪܙ ܢܒܝܐ܂ ܕܩܪܘܒܘ ܘܐܫܬܘ ܕܠܐ ܕܡ̈ܝܢ ܚܡܪܐ ܘܚܠܒܐ܂ ܡܢ ܗܘ ܕܙܪܓܢ ܥܝܢܘܗ̈ܝ ܡܢ ܚܡܪܐ܂ ܘܚܘܪ̈ܢ ܫܢܘܗ̈ܝ ܡܢ ܚܠܒܐ܂ ܘܠܐ ܐܝܟ ܢܒ̈ܝܐ ܕܓܠܐ̈ ܕܢܟܬܝܢ ܒܫܢܝܗ̈ܘܢ ܘܡܟܪܙܝܢ ܫܠܡܐ܂ ܘܡܢ ܕܠܐ ܪܡܐ ܠܗܘܢ ܒܦܘܡܗܘܢ ܡܟܪܙܝܢ ܥܠܘܗܝ ܩܪܒܐ܂ ܘܠܐ ܬܘܒ ܡܬܕܡܝܢ ܒܟܗܢ̈ܐ ܥܘ̈ܠܐ܂ ܘܢܒܝ̈ܐ ܕܫܘܩܪܐ ܕܡܠܦܝܢ ܒܐܓܪܐ ܘܩܨܡܝܢ ܒܟܣܦܐ܂ ܘܐܟܠܘ ܚܛܝܬܗ ܕܥܡܐ܂ ܘܠܥܘܠܗܘܢ ܐܪܡܝܘ ܢܦܫܗܘܢ܂ ܘܗܘܐ ܠܗ ܟܗܢܐ ܐܝܟ ܥܡܐ ܒܗܝ ܕܠܐ ܪܫܐ ܠܥܡܐ ܒܚܛܝܬܗ܂ ܘܣܥܪ ܟܗܢܐ ܐܝܟ ܚܛܝܬܗ ܕܥܡܐ܂ ܘܟܕ ܡܛܬ ܡܠܬܐ ܠܘܬ ܡܡܠܝܢܗ܂ ܐܟܪܙ ܠܫܠܝܚܘܗ̈ܝ܂ ܕܡܓܢ ܢܣܒܬܘܢ ܡܓܢ ܗܒܘ܂ ܘܒܢܐ ܒܬܪܗ ܡܠܦܢܐ ܕܥܡܡ̈ܐ܂ ܕܡܓܢ ܐܟܪܙܬ ܠܟܘܢ ܣܒܪܬܗ ܕܡܫܝܚܐ܂ ܘܬܘܒ ܐܡܪ ܕܨܒܐ ܐܢܐ ܕܕܠܐ ܢܦܩܬܐ ܐܬܠܝܗ ܠܣܒܪܬܐ܀

ܘܒܗܕܐ ܕܟܬܒܬ܂ ܕܒܟܠܙܒܢ ܫܟܝ̈ܚܝܢ ܐܢܘܢ ܙܕܝ̈ܩܐ ܘܟܐܢ̈ܐ ܥܠ ܐܪܥܐ܂ ܗܟܢܐ ܐܝܬܝܗ ܕܠܐ ܦܘܠܓ܂ ܡܛܠ ܙܕܝܩ̈ܐ ܓܝܪ ܡܕܢܚ ܛܒܐ ܫܡܫܗ ܥܠ ܒܝ̈ܫܐ ܘܥܠ ܛܒ̈ܐ܂ ܘܡܚܬ ܐܢܬ ܡܛܪܟ ܕܢܬܦܪܢܣܘܢ ܥܘ̈ܠܐ܂ ܡܠܚܗ ܐܢܘܢ ܓܝܪ ܕܐܪܥܐ ܙܕܝܩ̈ܐ ܘܟܐ̈ܢܐ܂ ܐܝܟ ܕܐܡܪ ܦܪܘܩܢ ܠܫܠܝܚܘܗ̈ܝ ܛܘܒܢ̈ܐ܂ ܕܐܢܬܘܢ ܐܢܘܢ ܡܠܚܗ ܕܐܪܥܐ܂ ܕܐܢ ܡܠܚܐ ܬܦܟܗ܂ ܥܠܡܐ ܒܥܓܠ ܡܬܡܣܐ ܘܡܬܚܒܠ܂ ܒܕܡܘܬ ܢܦܫܐ ܠܦܓܪܐ ܫܩܝܠܝܢ ܠܗ ܙܕܝܩ̈ܐ ܠܐܪܥܐ܂ ܕܟܕ ܬܫܢܐ ܢܦܫܐ܂ ܢܦܠ ܦܓܪܐ ܘܡܬܚܒܠ ܡܢ ܩܝܡܗ܂ ܒܕܡܘܬ ܥܝ̈ܢܐ ܠܦܓܪܐ ܐܝܬܝܗܘܢ ܙܕܝܩ̈ܐ ܒܐܪܥܐ܂ ܕܐܢ ܬܣܬܡܐ ܒܛܠ ܦܓܪܐ܂ ܘܐܫܬܓܢܝ ܡܢ ܫܘܦܪܗ܂ ܘܫܪܝ ܡܬܬܩܠ ܒܛܗܪܐ ܐܝܟ ܕܒܠܠܝܐ܂ ܘܠܐ ܬܪܨ ܠܡܪܕܐ ܒܗ̈ܠܟܬܗ܂ ܣܡܐ ܐܢܘܢ ܕܚ̈ܝܐ ܙܕܝܩ̈ܐ ܒܥܠܡܐ ܗܢܐ܂ ܕܐܠܘ ܠܐ ܐܝܬܝܗܘܢ ܒܗ ܒܥܠܡܐ܂ ܡܫܬܪܐ ܗܘܐ ܥܠܡܐ ܘܡܬܚܒܠ ܡܢ ܪܘܓܙܐ܂ ܪܘܙ ܥܠܡܐ ܟܕ ܙܕܝܩ̈ܐ ܒܓܘܗ ܒܕܡܘܬ ܦܪܕܝܣܐ ܒܡܒܘܥܐ ܕܡ̈ܝܐ܂ ܐܢ ܓܙ ܡܒܘܥܐ ܝܒܫܝܢ ܦܐܪ̈ܐ ܕܦܪܕܝܣܐ܂ ܘܠܝܬ ܒܗܘܢ ܠܚܘܫܚܐ ܘܠܢܝܚܐ ܕܢܦܫܐ܂ ܘܡܬܥܩܪ̈ܢ ܐܦ ܓܘܦܢܘܗ̈ܝ ܘܝܩܕܢ ܒܢܘܪܐ܂ ܘܟܕ ܡܫܬܟܚܢ ܓܘ̈ܦܢܐ ܕܡܚܕܝܢ ܠܦܠܚܐ܂ ܡܘܣܦܢ ܡܬܦܠܚܢ ܘܡܚܘܝܢ ܥ̈ܠܠܬܐ܂ ܐܚܝܕ ܫܒܝܩ ܥܠܡܐ ܒܨܠܘܬܗܘܢ ܕܙܕܝܩ̈ܐ܂ ܒܕܡܘܬ ܓܒܝܠܬܐ ܒܚܝܠܐ ܕܚܡܝܪܐ܂܂ ܡܕܒܪ̈ܢܘܗܝ ܐܢܘܢ ܙܕܝܩ̈ܐ ܕܥܠܡܐ ܗܢܐ܂ ܐܝܟ ܕܡܬܕܒܪܐ ܐܠܦܐ ܒܚܟܡܬ ܡ̈ܠܚܝܗ܂ ܢܦܠܐ ܐܠܦܐ ܒܓ̈ܠܠܐ ܬܟܝܒ̈ܐ܂ ܘܡܝܛܐ ܠܟܐ ܘܠܟܐ ܒܙܘ̈ܥܐ ܬܩܝܦ̈ܐ܂ ܘܩܝܡܝܢ ܒܥܝܪܘܬܐ ܡܕܒܪ̈ܢܐ ܚܟܝܡ̈ܐ܂ ܘܡܡܢܥܝܢ ܠܗ ܠܐܠܦܐ ܠܐܬܪܐ ܕܢܝܚܐ܂ ܐܢ ܠܝܬ ܠܐܠܦܐ ܡܕܒܪ̈ܢܐ ܚܟܝܡ̈ܐ܂ ܠܐ ܡܫܟܚܐ ܪܕܝܐ ܠܠܡܐܢܐ܂ ܘܛܒܥܐ ܐܠܦܐ ܘܐܒܕܐ ܬܐܓܘܪܬܗ܂ ܐܢ ܠܝܬ ܟܐ̈ܢܐ ܐܒܕܝܢ ܥܘ̈ܠܐ܂ ܘܐܢ ܠܝܬ ܙܕܝ̈ܩܐ ܠܐ ܡܬܙܝܢܝܢ ܟܦܘܪ̈ܐ܀

ܘܐܢ ܬܒܥܢܝ ܫܡܘܥܐ܂ ܕܟܕ ܐܝܬ ܙܕܝܩ̈ܐ ܘܟܐ̈ܢܐ ܥܠ ܐܪܥܐ܂ ܠܡܢܐ ܒܙܒܢܐ ܒܝܫܐ ܘܐܠܝܨܐ ܠܝܬ ܨܠܘܬܐ ܕܡܫܬܡܥܐ܂ ܢܣܬܟܠ ܕܠܐ ܚܪܝܢ܂ ܫܡܘܥܐ܂ ܡܕܡ ܕܡܢ ܠܥܠ ܪܫܡܬ ܠܗ܂ ܕܡܘܫܐ ܓܒܪܐ ܢܒܝܐ ܪܒܐ ܡܕܒܪܢܗ ܕܟܘܠܗ ܐܝܣܪܝܠ܂ ܒܙܒܢ ܙܒܢ ܨܠܘܬܗ ܚܣܝܬ ܥܠ ܟܘܠܗ ܥܡܗ܂ ܘܒܙܒܢܐ ܐܚܪܢܐ ܐܦ ܠܐ ܥܠ ܐ̈ܦܝ ܢܦܫܗ ܐܫܬܡܥ܂ ܘܐܣܬܟܠ ܕܪܒܐ ܡܢܗ ܥܠ ܝܫܘܥ ܦܪܘܩܐ ܪܒܐ܂ ܘܒܪܗ ܕܐܠܗܐ܂ ܕܡܛܠ ܫܡܝܥܘܬ ܨܠܘܬܗ ܡܩܒܠܬܐ܂ ܐܬܪܥܝ ܐܠܗܐ ܠܒܪܝܬܗ܂ ܐܝܟ ܕܐܡܪ ܫܠܝܚܐ܂ ܕܗܘ ܪܥܝܢ ܥܡ ܐܒܘܗܝ܂ ܘܒܙܒܢܐ ܕܐܬܬ ܫܥܬܗ܂ ܨܠܝ ܘܒܥܐ ܘܐܬܚܢܢ ܟܕ ܠܐ ܣܢܝܩ܂ ܘܐܡܪ܂ ܐܒܝ ܐܢ ܡܫܟܚܐ ܢܥܒܪܢܝ ܟܣܐ ܗܢܐ܂ ܘܥܠ ܐ̈ܦܝ ܢܦܫܗ ܨܠܘܬܗ ܠܐ ܐܫܬܡܥܬ܂ ܠܥܘܕܪܢܐ ܕܝܠܢ ܠܐ ܐܫܬܡܥ ܦܪܘܩܢ܂ ܕܘܠܐ ܗܘܐ ܠܗ ܕܢܡܘܬ܂ ܕܢܬܠ ܠܢ ܪܗܒܘܢܐ ܕܡܝܬ ܐܟܘܬܢ ܘܩܛܠܗ ܠܡܘܬܐ ܘܩܡ ܘܐܩܝܡܢ܂ ܘܡܠܟ ܠܢ ܕܢܚܐ܂ ܐܠܘ ܓܝܪ ܐܫܬܡܥ ܟܕ ܐܫܬܐܠ ܡܢ ܡܘܬܐ܂ ܟܕ ܦܓܪܐ ܠܒܝܫ ܗܘܐ܂ ܠܢ ܠܩܝܡܬܐ ܡܢܘ ܡܫܪ ܗܘܐ ܠܢ܂ ܠܒܒܢ ܒܡܘܬܗ܂ ܘܚܕܝܢ ܒܩܝܡܬܗ܂ ܘܒܗܕܐ ܕܕܚܠ ܡܢ ܡܘܬܐ܂ ܒܚܟܡܬܗ ܥܒܕ ܠܘܬܢ ܕܢܬܥܕܪ܂ ܕܢܚܘܐ ܦܫܝܩܐܝܬ ܠܟܠܗܘܢ ܒܢ̈ܝܢܫܐ܂ ܟܪܝܗܘܬܗ ܕܦܓܪܐ ܕܠܒܫ ܐܟܘܬܢ܂ ܐܠܘ ܓܝܪ ܠܐ ܝܠܝܕ ܗܘܐ ܐܟܘܬܢ ܠܝܬ ܗܘܐ ܥܠܘܗܝ ܐܘܪܚܐ ܠܡܘܬܐ܂ ܘܐܠܘ ܠܝܬ ܗܘܐ ܒܢ ܡܢ ܪܘܚܗ ܕܚ̈ܝܐ܂ ܐܦܠܐ ܝܗܒ ܗܘܐ ܠܢ ܪܗܒܘܢܐ ܕܚ̈ܝܐ ܕܢܩܘܡ ܐܟܘܬܗ܂ ܠܘܩܕܡ ܡܝܬ ܒܡܘܬܢ܂ ܕܢܬܠܒܒ ܒܡܘܬܗ܂ ܘܩܡ ܒܚܝܠܐ ܪܒܐ ܕܠܐ ܟܪܝܗܘܬܐ܂ ܟܕ ܙܟܝܗܝ ܠܡܘܬܐ ܘܣܠܩ ܡܢ ܐܬܪܗ܂ ܘܚܕܝܢܢ ܕܡܬܒܠܥ ܡܘܬܢ ܒܚܝܘ̈ܗܝ܂ ܘܩܒܠܢ ܪܗܒܘܢܐ ܕܚ̈ܝܐ ܒܡܘܬܗ܂ ܐܠܘ ܠܐ ܡܫܝܚܐ ܡܝܬ ܒܦܓܪܐ ܕܡܢܢ܂ ܠܝܬ ܗܘܐ ܠܗ ܪܗܒܘܢܐ ܠܡܬܠ ܠܢ܂ ܕܢܩܒܠ ܬܟܝܠܐܝܬ ܕܚܝܢܢ/ܕܚܝܝܢ ܚܢܢ/ ܡܢ ܡܘܬܐ܂ ܐܠܐ ܟܘܠܗܘܢ ܪ̈ܗܒܘܢܐ ܒܢܦܫܗ ܓܡܪ ܐܢܘܢ܂ ܘܢܣܒܢ ܡܢܗ ܪܗܒܘܢܐ ܬܟܝܠܐܝܬ܂ ܕܚܝܢܢ/ܕܚܝܝܢ ܚܢܢ/ ܡܢ ܡܘܬܐ܂ ܠܐ ܟܪܝܐ ܠܢ ܒܝܠܕܐ܂ ܡܛܠ ܕܐܬܝܠܕ ܐܟܘܬܢ ܘܠܐ ܩܛܥܐ ܠܢ ܒܟܘܪ̈ܗܢܝܢ܂ ܕܐܦ ܗܘ ܐܬܟܪܗ ܐܟܘܬܢ܂ ܘܠܐܝ ܘܐܦ ܟܦܢ܂ ܡܛܘܠ ܕܢܠܦܢ ܕܢܨܘܡ܂ ܘܐܙܕܟܝ ܡܢ ܫܢܬܐ܂ ܘܚܫ ܘܐܬܢܣܝ ܒܦܓܪܐ ܡܚܝܠܐ܂ ܕܡܫܟܚ ܕܢܥܕܪ ܠܐܝܠܝܢ ܕܡܬܢܣܝܢ܀

ܐܝܠܦ ܘܐܣܬܟܠ ܘܐܦܝܣ ܪܥܝܢܟ܂ ܕܒܘܠܝܬܐ ܠܐ ܐܫܬܡܥܬ ܨܠܘܬܗܘܢ܂ ܕܗܠܝܢ ܬܪ̈ܝܢ ܢܒ̈ܝܐ ܪܘܪ̈ܒܐ܂ ܘܪ̈ܥܘܬܐ ܫܒܝ̈ܚܐ܂ ܕܥܠ ܐ̈ܦܝ ܢܦܫܗܘܢ ܨܠܝܘ܂ ܠܐ ܓܝܪ ܫܪܐ ܕܝܬܩܐ܂ ܐܠܐ ܐܢ ܢܡܘܬ ܡܢ ܕܟܬܒܗ܂ ܒܝܕ ܡܘܫܐ ܓܝܪ ܐܬܡܠܟܬ ܕܝܬܩܐ ܠܥܡܐ ܕܐܝܣܪܝܠ܂ ܕܢܬܠ ܠܗܘܢ ܐܪܥܐ ܕܟܢ̈ܥܢܝܐ ܠܝܘܪܬܢܐ܂ ܘܒܝܕ ܝܫܘܥ ܐܬܡܠܟܬ ܕܝܬܩܐ܂ ܕܢܬܠ ܠܥܡܡ̈ܐ ܐܪܥܐ ܕܚܝ̈ܐ܂ ܡܝܬ ܡܘܫܐ ܒܥܒܪ ܝܘܪܕܢܢ܂ ܘܫܪܬ ܕܝܬܩܐ ܕܡܠܟ ܠܥܡܗ܂ ܘܡܝܬ ܝܫܘܥ ܒܐܪܥܐ ܕܡܘܬܢ ܘܫܪܬ ܕܝܬܩܐ ܕܡܠܟ ܠܥܡܡ̈ܐ܂ ܕܐܫܬܘܕܝ ܕܢܬܠ ܠܗܘܢ ܐܪܥܐ ܕܚܝ̈ܐ܂ ܠܡܘܫܐ ܚܘܝܗ ܡܪܗ ܐܪܥܐ ܕܡܘܠܟܢܐ܂ ܟܕ ܥܕܟܝܠ ܠܐ ܝܪܬܗ ܐܝܣܪܝܠ܂ ܘܝܫܘܥ ܦܪܘܩܢ ܩܡ ܡܢ ܒܝܬ ܡܝ̈ܬܐ܂ ܘܐܙܠ ܕܢܥܬܕ ܠܢ ܐܪܥܐ ܕܐܫܬܘܕܝ܂ ܐܝܟ ܕܐܡܪ ܠܗܘܢ ܠܫܠܝܚ̈ܘܗܝ ܕܐܬܪܐ ܐܙܠ ܐܢܐ ܕܐܛܝܒ ܠܟܘܢ܂ ܘܗܝܕܝܢ ܐܬܐ ܘܐܕܒܪܟܘܢ܂ ܕܐܬܪ ܕܐܢܐ ܐܦ ܐܢܬܘܢ ܬܗܘܘܢ ܘܐܫܪ ܠܢ ܡܘܠܟܢܐ ܕܥܡܗ ܢܗܘܐ܂ ܘܚܘܝ ܐܢܘܢ ܐܦ ܠܫܠܝܚܘ̈ܗܝ ܡܢ ܩܕܡ ܙܒܢܐ܂ ܟܕ ܫܐܠܘܗܝ ܐܬܐ ܕܡܐܬܝܬܗ܂ ܟܕ ܕܒܪ ܠܬܠܬܐ ܬܠܡܝܕܘ̈ܗܝ܂ ܠܫܡܘܥܢ ܘܠܝܥܩܘܒ ܘܠܝܘܚܢܢ܂ ܠܫܡܥܘܢ ܟܐܦܐ ܫܬܐܣܬܐ ܕܥܕܬܐ܂ ܘܠܝܥܩܘܒ ܘܠܝܘܚܢܢ ܥܡܘ̈ܕܐ ܬܩ̈ܢܐ ܕܥܕܬܐ܂ ܘܚܘܝ ܐܢܘܢ ܠܗܠܝܢ ܬܠܬܐ ܣܗ̈ܕܝܢ ܫܪܝܪ̈ܐ܂ ܐܬܐ ܕܡܐܬܝܬܗ ܟܕ ܐܫܬܚܠܦ ܒܚܙܘܗ܂ ܒܕܡܘܬ ܡܐܬܝܬܗ܂ ܟܕ ܡܘܫܐ ܘܐܠܝܐ ܠܘܬܗ܂ ܘܠܒܒ ܠܡܝ̈ܬܐ ܕܥܬܝܕ ܠܡܚܐ܂ ܐܝܟ ܡܘܫܐ ܕܐܬܚܙܝ܂ ܘܡܬܬܟܠܝܢ ܚ̈ܝܐ ܕܡܫܬܚܪܝܢ ܠܡܐܬܝܬܗ ܕܡܬܚܛܦܝܢ ܠܐܘܪܥܗ܂ ܒܕܡܘܬ ܐܠܝܐ܂ ܕܠܐ ܛܥܡ ܡܘܬܐ܂ ܘܐܬܚܙܝ ܠܘܬܗ܂ ܐܘܕܥܢ ܓܝܪ ܕܡܘܫܐ ܢܒܝܐ ܪܒܐ܂ ܘܝܫܘܥ \ܒܪܐ/ܒܪܐ ܒܘܟܪܐ/ ܚܒܝܒܐ ܒܙܒܢ ܕܘܠܐ ܗܘܐ ܐܫܬܡܥ/ܐܫܬܡܥܘ܂/ ܘܚܣܝܘ ܒܨܠܘܬܗܘܢ ܥܠ ܥܡܐ ܣܓܝܐܐ܂ ܘܒܙܒܢ ܐܚܪܝܢ ܐܬܟܠܝܘ ܡܢ ܫܐܠܬܗ̈ܘܢ܂ ܕܒܗܕܐ ܬܚܘܝܬܐ ܢܬܠܒܒܘܢ ܣܓܝܐ̈ܐ܂ ܐܝܠܝܢ ܕܡܨܠܝܢ ܘܠܐ ܡܫܬܡܥܝܢ܂ ܟܕ ܪܓܝܫܝܢ ܒܬܚܘܝܬܐ ܕܗܠܝܢ ܓܢܒܪ̈ܝ ܚܝܠܐ܂ ܕܟܕ ܡܨܠܝܢ ܘܠܐ ܡܫܬܡܥܝܢ ܠܐ ܟܪܝܐ ܠܗܘܢ܂ ܕܡܩܒܠܝܢ ܒܪܥܝܢܗܘܢ ܘܡܬܛܦܝܣܝܢ܂ ܡܢ ܕܡܘܬܐ ܕܡܘܫܐ ܘܕܦܪܘܩܢ܂ ܘܕܢܒ̈ܝܐ ܘܙܕܝܩ̈ܐ ܩܕܡ̈ܝܐ܀

ܡܟܝܠ ܐܬܛܦܝܣ ܘܐܬܒܝܢ܂ ܕܐܝܬ ܙܕܝܩ̈ܐ ܒܐܪܥܐ܂ ܘܥܠܡܐ ܡܛܠ ܟܐ̈ܢܐ ܡܬܩܝܡ܂ ܥܠܡܐ ܓܝܪ ܒܛܝܒܘܬܐ ܩܐܡ܂ ܐܝܟ ܕܐܡܪ ܢܒܝܐ܂ ܕܥܠܡܐ ܒܛܝܒܘܬܐ ܢܬܒܢܐ܂ ܘܗܕܐ ܗܝ ܛܝܒܘܬܐ ܡܝܬܪܬܐ܂ ܕܥܕܡܐ ܠܥܠܡ ܙܕܝܩ̈ܐ ܠܐ ܥܢܕܝܢ ܡܢ ܥܠܡܐ܂ ܘܠܐ ܡܓܪܕܝܢ܂ ܕܠܐ ܓܪܕܝܘ ܙܕܝܩ̈ܐ ܡܢ ܥܠܡܐ܂ ܒܫܘܦܥ ܟܝܠܬ ܚܘܒ̈ܐ ܕܥܘ̈ܠܐ ܣܐܦ ܗܘܐ ܥܠܡܐ ܒܪܘܓܙܐ܂ ܘܡܙܕܟܝܐ ܗܘܬ ܠܗ ܛܝܒܘܬܐ܂ ܡܢ ܟܐܢܘܬܐ ܬܒܥܬ ܕܝܢܐ܂ ܘܡܛܠ ܗܢܐ ܟܐ̈ܢܐ ܫܒܝܩܝܢ ܒܐܪܥܐ ܒܥܠܡ ܫܘܩܪܐ܂ ܕܡܛܠܬܗܘܢ ܠܐ ܬܙܟܐ ܟܐܢܘܬܐ܂ ܘܬܥܘܠ ܒܥܠܡܐ ܕܩܐܡ ܒܛܝܒܘܬܐ܂ ܠܡܬܒܥ ܕܝܢܐ ܒܐܬܪ ܕܠܐ ܕܝܢܐ܂ ܘܛܡܝܪܝܢ ܟܐܢ̈ܐ ܒܥܠܡܐ ܗܢܐ܂ ܕܡܛܠܬܗܘܢ ܠܐ ܡܬܚܒܠ ܡܢ ܪܘܓܙܐ܂ ܒܕܡܘܬ ܛܘܛܝܬܐ ܕܛܡܝܪܐ ܗܘܬ ܒܣܓܘܠܐ܂ ܘܡܛܠ ܛܘܛܝܬܐ ܐܬܢܛܪ ܣܓܘܠܐ ܙܒܢܐ ܣܓܝܐܐ܂ ܡܛܠ ܕܗܟܢܐ ܫܡܥܢܢ ܦܬܓܡܐ܂ ܕܩܪܐ ܢܒܝܐ ܘܐܡܪ ܠܥܡܐ܂ ܕܐܝܟ ܕܡܫܬܟܚܐ ܛܘܛܝܬܐ ܒܣܓܘܠܐ܂ ܘܐܡܪ ܓܒܪܐ ܠܚܒܪܗ܂ ܠܐ ܬܚܒܠܝܘܗܝ ܠܣܓܘܠܐ ܡܛܠ ܕܒܘܪܟܬܐ ܐܝܬ ܒܗ܂ ܘܐܡܪ ܗܟܢܐ ܐܥܒܕ ܡܛܠ ܓܒ̈ܝܝ܂ ܘܠܐ ܐܚܒܠ ܠܟܠܗܘܢ܂ ܘܐܦܩ ܙܪܥܐ ܡܢ ܝܥܩܘܒ܂ ܘܡܢ ܝܗܘܕܐ ܝܪܬܐ ܕܛܘܪܝ ܩܕܝܫܐ܂ ܣܓܘܠܐ ܥܡܐ ܕܐܝܣܪܝܠ܂ ܘܒܘܪܟܬܐ ܕܗܘܬ ܒܓܘܗ ܡܠܟܐ ܡܫܝܚܐ܀

ܡܢ ܪܫܝܬܐ ܗܕܐ ܛܘܛܝܬܐ ܢܛܝܪܐ ܗܘܬ ܒܐܕܡ ܒܘܟܪܐ ܩܕܡܝܐ܂ ܘܐܦܢ ܚܛܐ ܐܬܢܛܪ ܡܢܗ ܙܪܥܐ ܕܙܕܝ̈ܩܐ܂ ܘܐܬܢܛܪܬ ܒܘܪܟܬܐ ܒܫܝܬ ܘܒܟܠܗܘܢ ܕܪ̈ܘܗܝ܂ ܘܟܕ ܚܒܠ ܟܠ ܒܣܪ ܐܘܪܚܗ ܥܠ ܐܪܥܐ܂ ܐܬܢܛܪܬ ܒܘܪܟܬܐ ܒܓܒܪܐ ܕܢܝܚܐ ܒܢܘܚ܂ ܕܐܫܬܟܚ ܙܕܝܩ ܘܬܡܝܡ ܒܕܪܐ ܡܚܒܠܢܐ܂ ܘܐܬܢܛܪܬ ܒܘܪܟܬܐ ܒܩܒܘܬܐ ܕܩܝܣܐ܂ ܘܣܦܘ ܟܠܗܘܢ ܪ̈ܫܝܥܐ ܒܪܘܓܙܐ ܐܫܝܕܐ܂ ܟܕ ܫܡܝܛܐ ܘܫܩܝܠܐ ܡܢܗܘܢ ܛܘܛܝܬܐ܂܂܂܂܂ ܘܢܦܩ ܢܘܚ ܘܒܢܘܗ̈ܝ ܡܢ ܩܒܘܬܐ܂ ܘܢܛܝܪܐ ܗܘܬ ܒܘܪܟܬܐ ܒܫܝܡ ܐܒܐ ܕܙܕܝ̈ܩܐ܂ ܦܪܫܬ ܓܝܪ ܪܘܚܐ ܒܦܘܡ ܓܒܪܐ ܕܢܝܚܐ܂ ܟܕ ܡܒܪܟ ܠܒܢܘ̈ܗܝ ܒܬܪ ܡܡܘܠܐ܂ ܐܡܪ ܓܝܪ ܕܢܦܬܐ ܐܠܗܐ ܠܝܦܬ܂ ܘܢܫܪܐ ܒܡܫܟܢܗ ܕܫܝܡ܂ ܘܠܛ ܟܢܥܢ ܙܪܥܐ ܕܚܡ ܕܒܙܚ ܒܐܒܘܗܝ܂ ܘܐܬܓܠܙ ܡܢ ܒܘܪܟܬܐ܂ ܘܪܕܬ ܗܕܐ ܒܘܪܟܬܐ ܒܥܣܪܐ ܕܪ̈ܝܢ܂ ܡܢ ܢܘܚ ܥܕܡܐ ܠܐܒܪܗܡ܂ ܚܝܐ ܓܝܪ ܒܬܪ ܛܘܦܢܐ܂ ܬܠܬܡܐܐ ܘܚܡܫܝܢ ܫ̈ܢܝܢ܂ ܘܐܘܠܕܘ ܘܣܓܝܘ ܒܢܘܗ̈ܝ ܘܒܢ̈ܬܗ ܒܝ̈ܘܡܬܗ܂ ܘܟܕ ܡܛܘ ܠܒܒܠ ܠܐܪܥ ܟܠܕ̈ܝܐ ܒܠܒܠ ܬܡܢ ܐܠܗܐ ܠܫܢ̈ܐ ܕܟܠܗ ܐܪܥܐ܂ ܘܢܘܚ ܩܘܝ ܒܐܘܪ ܕܟܠܕܝ̈ܐ܂ ܟܕ ܝܬܒ ܘܢܛܪ ܒܘܪܟܬܐ ܕܙܕܝܩ̈ܐ ܡܢ ܒܬܪ ܛܘܦܢܐ܂ ܡܐ̈ܬܝܢ ܘܬܫܥܝܢ ܘܬܪ̈ܬܝܢ ܫ̈ܢܝܢ܀

ܘܐܬܝܠܕ ܐܒܪܗܡ ܒܐܘܪ ܕܟܠܕ̈ܝܐ܂ ܒܫܢܬ ܬܡܢܡܐܐ ܘܬܫܥܝܢ ܘܬܪ̈ܬܝܢ ܫ̈ܢܝܢ ܠܚܝܘ̈ܗܝ ܕܢܘܚ܂ ܒܬܪ ܙܒܢܐ ܣܓܝܐܐ ܕܐܬܒܠܒܠܘ ܠܫ̈ܢܐ܂ ܘܟܕ ܗܘܐ ܢܘܚ ܒܪ ܬܫܥܡܐܐ ܘܚܡܫܝܢ ܫ̈ܢܝܢ܂ ܫܠܡ ܙܒܢܗ ܘܡܝܬ ܒܣܝܒܘܬܐ ܛܒܬܐ܂ ܒܫܢܬ ܚܡܫܝܢ ܘܬܡܢܐ ܫ̈ܢܝܢ ܠܚܝܘ̈ܗܝ ܕܐܒܪܗܡ܂ ܡܝܬ ܢܘܚ ܒܐܘܪ ܕܟܠܕ̈ܝܐ܂ ܗܝܕܝܢ ܢܦܩ ܐܒܪܗܡ ܡܢ ܐܘܪ ܕܟܠܕܝ̈ܐ܂ ܘܐܙܠ ܥܡܪ ܒܚܪܢ ܙܒܢܐ ܙܥܘܪܐ܂ ܘܡܢ ܚܪܢ ܫܢܝܗ ܐܠܗܐ ܠܐܪܥܐ ܕܟܢܥܢ܂ ܝܠܕܗ ܕܚܝܡ/ܕܚܡ/ ܙܪܥܐ ܠܝܛܐ ܕܡܠܝܟܐ ܥܠܝܗܘܢ ܥܒܕܘܬܐ܂ ܘܟܕ ܗܘܐ ܐܒܪܗܡ ܒܪ ܡܐܐ ܫ̈ܢܝܢ܂ ܒܫܢܬ ܐܪ̈ܒܡܐܐ/ܐܪܒܥܡܐܐ/ ܘܬܫܥܝܢ ܘܬܪܬܝܢ ܫ̈ܢܝܢ ܠܚܝܘܗ̈ܝ ܕܫܝܡ ܐܒܐ ܕܙܕܝܩ̈ܐ܂ ܗܝܕܝܢ ܐܬܝܠܕ ܐܝܣܚܩ܂ ܘܚܝܐ ܫܝܡ ܡܢ ܒܬܪ ܕܐܬܝܠܕ ܐܝܣܚܩ܂ ܡܐܐ ܘܬܪܬܥܣܪ̈ܐ ܫ̈ܢܝܢ܂ ܘܐܝܣܚܩ ܐܘܠܕ ܠܝܥܩܘܒ ܘܠܥܣܘ ܒܪ ܫܬܝܢ ܫ̈ܢܝܢ܂ ܘܚܝܐ ܫܝܡ ܡܢ ܒܬܪ ܕܐܬܝܠܕܘ ܝܥܩܘܒ ܘܥܣܘ ܫܬܝܢ ܘܬܪ̈ܬܝܢ ܫ̈ܢܝܢ܂ ܘܡܝܬ ܐܒܪܗܡ ܒܪ ܡܐܐ ܘܫܒܥܝܢ ܘܚܡܫ ܫ̈ܢܝܢ܂ ܘܚܝܐ ܫܝܡ ܡܢ ܒܬܪ ܡܘܬܗ ܕܐܒܪܗܡ ܬܠܬܝܢ ܘܫܒܥ ܫ̈ܢܝܢ܂ ܘܗܘܐ ܐܝܣܚܩ ܒܪ ܡܐܐ ܘܬܠܬܝܢ ܘܫܒܥ ܫ̈ܢܝܢ܂ ܟܕ ܒܪܟ ܠܝܥܩܘܒ ܒܪܗ܂ ܕܒܗ ܛܡܝܪܐ ܗܘܬ ܒܘܪܟܬܐ ܕܙܕܝܩ̈ܐ܂ ܘܝܥܩܘܒ ܒܪ ܫܒܥܝܢ ܘܫܒܥ ܫ̈ܢܝܢ ܟܕ ܥܪܩ ܠܚܪܢ܂ ܘܒܪ ܬܡܢܝܢ ܘܐܪ̈ܒܥ ܫ̈ܢܝܢ ܢܣܒ ܠܠܝܐ ܘܠܪܚܝܠ܂ ܘܡܢ ܒܬܪ ܡܐܐ ܘܬܪ̈ܬܥܣܪܐ ܫ̈ܢܝܢ ܠܚܝܘ̈ܗܝ ܕܐܝܣܚܩ܂ ܡܝܬ ܫܝܡ ܒܫܢܬ ܚܡܫܝܢ ܘܬܪ̈ܬܝܢ ܫ̈ܢܝܢ ܠܚܝܘܗ̈ܝ ܕܝܥܩܘܒ܂ ܘܟܕ ܗܘܐ ܝܥܩܘܒ ܒܪ ܬܫܥܝܢ ܘܫܒܥ ܫ̈ܢܝܢ܂ ܐܡܪ ܠܗ ܐܠܗܐ܂ ܕܗܦܘܟ ܠܐܪܥܐ ܕܐܒ̈ܗܝܟ ܘܐܛܐܒ ܠܟ܂ ܘܐܗܘܐ ܥܡܟ܂ ܘܝܥܩܘܒ ܒܪ ܬܫܥܝܢ ܗܘܐ ܘܫܒܥ ܫ̈ܢܝܢ ܟܕ ܗܦܟ ܡܢ ܚܪܢ܂ ܘܐܝܣܚܩ ܐܒܘܗܝ ܒܪ ܡܐܐ ܘܚܡܫܝܢ ܘܫܒܥ ܫ̈ܢܝܢ܂ ܘܚܝܐ ܐܝܣܚܩ ܡܢ ܒܬܪ ܕܗܦܟ ܝܥܩܘܒ ܡܢ ܚܪܢ܂ ܥܣܪܝܢ ܘܬܠܬ ܫ̈ܢܝܢ܂ ܘܒܫܢܬ ܐܪ̈ܒܥܝܢ ܘܬܠܬ ܕܒܪܟܗ܂ ܘܥܣܪܝܢ ܘܬܠܬ ܕܗܦܟ ܡܢ ܚܪܢ܂ ܡܝܬ ܒܪ ܡܐܐ ܘܬܡܢܐܝܢ ܫ̈ܢܝܢ܂ ܘܢܚܬ ܝܥܩܘܒ ܠܡܨܪܝܢ ܒܬܪ ܥܣܪܝܢ ܫ̈ܢܝܢ ܕܡܝܬ ܐܝܣܚܩ ܐܒܘܗܝ܂ ܒܬܪ ܥܣܪܝܢ ܘܬܪ̈ܬܝܢ ܫܢ̈ܝܢ܂ ܕܐܙܕܒܢ ܝܘܣܦ ܒܪܗ ܠܡܨܪܝܢ܂ ܒܬܪ ܫܬܝܢ ܘܬܡܢܐ ܫܢ̈ܝܢ ܠܡܘܬܗ ܕܫܝܡ܂ ܘܗܘܐ ܝܥܩܘܒ ܒܡܨܪܝܢ ܫܒܥܣܪ̈ܐ ܫ̈ܢܝܢ܂ ܘܡܝܬ ܒܪ ܡܐܐ ܘܐܪ̈ܒܥܝܢ ܘܫܒܥ ܫ̈ܢܝܢ܂ ܘܒܬܪ ܚܡܫܝܢ ܫ̈ܢܝܢ ܕܐܬܐ ܡܢ ܚܪܢ܂ ܒܬܪ ܥܣܪܝܢ ܘܫܒܥ ܫ̈ܢܝܢ ܕܡܝܬ ܐܝܣܚܩ ܐܒܘܗܝ܂ ܘܟܕ ܡܝܬ ܝܥܩܘܒ܂ ܝܘܣܦ ܒܪ ܚܡܫܝܢ ܘܫܬ ܫ̈ܢܝܢ ܐܝܬܘܗܝ ܗܘܐ܂ ܘܐܬܢܛܪܬ ܒܘܪܟܬܐ ܒܝܗܘܕܐ ܝܠܕܗ ܕܝܥܩܘܒ܂ ܥܕܠܐ ܢܥܘܠ ܠܡܨܪܝܢ܂ ܘܐܘܠܕ ܝܗܘܕܐ ܠܦܪܨ܂ ܘܗܝ ܗܕܐ ܒܘܪܟܬܐ܂ ܟܕ ܢܚܬ ܝܥܩܘܒ ܘܝܗܘܕܐ ܠܡܨܪܝܢ܂ ܒܚܨܗ ܕܦܪܨ ܛܡܝܪܐ ܗܘܬ܂ ܘܦܪܨ ܐܘܠܕ ܠܚܨܪܘܢ܂ ܘܚܨܪܘܢ ܐܘܠܕ ܠܐܪܡ܂ ܘܐܪܡ ܐܘܠܕ ܠܥܡܝܢܕܒ܂ ܘܥܡܝܢܕܒ ܐܘܠܕ ܠܢܚܫܘܢ ܪܒܐ ܕܒ̈ܢܝ ܝܗܘܕܐ܀

ܘܒܬܪܗ ܕܥܡܝܢܕܒ ܝܬܒܬ ܠܐܠܝܥܙܪ ܒܪ ܐܗܪܘܢ ܟܗܢܐ ܕܐܬܝܠܕ ܡܢܗ ܦܝܢܚܣ܂ ܘܡܢ ܥܡܝܢܕܒ ܢܦܩܬ ܒܘܪܟܬܐ ܕܡܠܟܘܬܐ ܘܟܗܢܘܬܐ ܡܕܒܪܢܘܬܐ ܘܡܠܟܘܬܐ ܡܢ ܢܚܫܘܢ܂ ܘܟܗܢܘܬܐ ܡܢ ܝܠܕܐ ܕܚܬܗ ܕܢܚܫܘܢ܂ ܕܐܘܠܕܬ ܠܦܝܢܚܣ܂ ܕܐܢܝܚ ܪܘܓܙܗ ܕܐܠܗܐ ܒܛܢܢܗ܂ ܘܡܢ ܢܚܫܘܢ ܐܬܝܠܕ ܫܠܐ܂ ܘܫܠܐ ܐܘܠܕ ܠܒܥܙ܂ ܘܡܢ ܒܥܙ ܢܦܩܬ ܡܕܒܪܢܘܬܐ ܕܡܠܟ̈ܐ܂ ܒܝܕ ܒܥܙ ܘܪܥܘܬ ܡܘܐܒܝܬܐ܂ ܘܡܛܠ ܗܢܐ ܢܣܒ ܒܥܙ ܠܪܥܘܬ ܡܘܐܒܝܬܐ܂ ܕܢܗܘܐ ܠܘܛ ܫܘܬܦܐ ܒܒܘܪܟܬܐ ܕܙܕܝܩ̈ܐ܂ ܘܡܢ ܝܠܕܗ ܕܪܥܘܬ܂ ܐܬܝܠܕܬ ܫܪܒܬܐ ܕܒܝܬ ܕܘܝܕ܂ ܘܡܢ ܙܪܥܗܘܢ ܐܬܝܠܕ ܡܠܟܐ ܡܫܝܚܐ܂ ܘܠܐ ܛܠܡ ܐܠܗܐ ܠܐܟܣܢܝܘܬܗ ܕܠܘܛ܂ ܒܪ ܐܚܘܗܝ ܕܐܒܪܗܡ ܕܢܦܩ ܥܡܗ ܡܢ ܚܪܢ܂ ܘܒܕܩܒܠ ܐܟܣܢ̈ܝܐ ܐܝܟ ܐܒܪܗܡ ܕܕܗ܂ ܫܘܬܦܗ ܐܠܗܐ ܒܒܘܪܟܬܐ ܕܙܕܝܩ̈ܐ܂ ܒܝܕ ܪܥܘܬ ܡܘܐܒܝܬܐ ܕܢܣܒܗ ܒܥܙ ܐܢܬܬܐ܂ ܘܬܘܒ ܐܬܕܟܪܗ ܐܠܗܐ ܠܠܘܛ ܒܝܕ ܢܥܡܐ ܥܡܘܢܝܬܐ ܕܢܣܒ ܫܠܝܡܘܢ܂ ܘܝܠܕܬ ܠܪܚܒܥܡ ܡܠܟܐ܂ ܢܫ̈ܐ ܓܝܪ ܣܓܝܐ̈ܬܐ ܢܣܒ ܫܠܝܡܘܢ܂ ܫܒܥܡܐܐ ܚܐܪ̈ܬܐ܂ ܘܬܠܬܡܐܐ ܕܪ̈ܘܟܬܐ܂ ܘܠܐ ܟܬܝܒ ܕܡܢ ܐܠܦ ܢܫܘܗ̈ܝ ܗܘܐ ܠܗ ܙܪܥܐ ܡܢܗܝܢ܂ ܐܠܐ ܪܚܒܥܡ ܡܢ ܢܥܡܐ ܥܡܘܢܝܬܐ܂ ܕܡܢ ܚܝ̈ܝ ܕܘܝܕ ܐܒܘܗܝ ܗܘܬ ܠܗ ܐܢܬܬܐ܂ ܡܛܠ ܕܟܕ ܩܡ ܫܠܝܡܘܢ ܒܡܠܟܘܬܐ܂ ܪܚܒܥܡ ܒܪ ܫܢܬܐ ܚܕܐ ܐܝܬܘܗܝ ܗܘܐ܂ ܐܡܠܟ ܫܠܝܡܘܢ ܐܪ̈ܒܥܝܢ ܫ̈ܢܝܢ܂ ܘܟܕ ܡܝܬ ܫܠܝܡܘܢ ܐܡܠܟ ܪܚܒܥܡ܂ ܒܪ ܫ̈ܢܝܢ ܐܪ̈ܒܥܝܢ ܘܚܕܐ܀

ܘܐܫܬܘܬܦ ܠܘܛ ܒܒܘܪܟܬܐ ܕܙܕܝܩ̈ܐ܂ ܒܝܕ ܪܥܘܬ ܡܘܐܒܝܬܐ܂ ܘܢܥܡܐ ܥܡܘܢܝܬܐ܂ ܡܢ ܬܪ̈ܝܢ ܫܒ̈ܛܐ ܕܗܘܘ ܡܢܗ܂ ܘܒܥܙ ܐܘܠܕ ܠܥܘܒܝܕ܂ ܘܥܘܒܝܕ ܐܘܠܕ ܠܐܝܫܝ܂ ܘܐܝܫܝ ܐܘܠܕ ܠܕܘܝܕ܂ ܘܐܬܢܛܪܬ ܗܕܐ ܒܘܪܟܬܐ ܒܟܠܗܘܢ ܡ̈ܠܟܐ ܕܒܝܬ ܝܗܘܕܐ܂ ܡܢ ܕܘܝܕ ܥܕܡܐ ܠܝܘܟܢܝܐ܂ ܒܡ̈ܠܟܐ ܬܡܢܬܥܣܪ܂ ܚܛܐ ܕܘܝܕ܂ ܘܒܒܘܪܟܬܐ ܕܛܡܝܪܐ ܗܘܬ ܒܗ ܐܬܚܣܝ ܡܢ ܥܘܠܗ܂ ܘܥܒܪ ܫܠܝܡܘܢ ܢܡܘܣܐ ܘܫܒܩ ܠܐܠܗܗ܂ ܘܡܛܠ ܒܘܪܟܬܐ ܕܛܡܝܪܐ ܗܘܬ ܒܗ ܘܒܙܪܥܗ ܐܡܪ ܐܠܗܐ܂ ܕܪܒܐ ܐܥܒܕܝܘܗܝ ܟܠܗܘܢ ܝܘܡ̈ܬܗ܂ ܘܐܣܗܝ ܣܟܠܘܬܐ ܪܚܒܥܡ܂ ܘܡܛܠ ܒܘܪܟܬܐ܂ ܕܒܗ ܐܡܪ ܐܠܗܐ܂ ܕܠܐ ܐܨܪܐ ܟܠܗ ܡܠܟܘܬܐ ܡܢܗ܂ ܐܠܐ ܐܬܠ ܠܗ ܫܪܓܐ ܒܐܘܪܫܠܡ܂ ܡܛܠ ܕܘܝܕ ܥܒܕܝ܂ ܘܚܛܐ ܐܒܝܐ ܒܪܗ ܕܪܚܒܥܡ܂ ܘܡܛܠ ܒܘܪܟܬܐ ܕܒܗ ܐܫܬܠܡ ܒܐܝܕܗ ܝܘܪܒܥܡ ܘܚܝܠܗ܂ ܘܒܐܣܐ ܪܬܚܬ ܒܘܪܟܬܐ ܕܙܕܝ̈ܩܐ܂ ܘܦܠܚ ܙܕܝܩܘܬܐ ܘܫܡܥ ܐܠܗܐ ܨܠܘܬܗ܂ ܘܐܫܬܠܡܘ ܒܐܝܕܘ̈ܗܝ ܒܥܠܕܒܒ̈ܘܗܝ܂ ܘܐܬܢܛܪܬ ܒܘܪܟܬܐ ܒܝܘܫܦܛ܂ ܘܥܒܕ ܕܫܦܝܪ ܩܕܡ ܡܪܝܐ܂ ܘܐܣܓܝ ܠܡܚܛܐ ܝܗܘܪܡ܂ ܘܡܛܠ ܒܘܪܟܬܐ ܐܬܢܛܪ܂ ܘܚܛܐ ܘܠܐ ܐܬܥܛܝ ܐܝܟ ܒܝܬܗ ܕܐܚܒ܂ ܡܛܠ ܕܚܬܢܐ ܗܘܐ ܕܒܝܬ ܐܚܒ܂ ܘܐܛܥܝܬܗ ܥܬܠܝܐ ܒܪܬ ܥܡܪܝ ܡܠܟܐ ܕܐܝܣܪܝܠ܂ ܘܐܬܢܛܪܬ ܛܘܛܝܬܐ ܒܝܘܐܫ ܒܪ ܐܚܙܝܐ܂ ܘܠܐ ܐܬܩܛܠ ܥܡ ܐܚܘܗ̈ܝ܂ ܟܕ ܐܘܒܕܬ ܥܬܠܝܐ ܙܪܥܐ ܕܡܠܟܘܬܐ ܟܕ ܚܙܬ ܕܐܬܩܛܠ ܐܚܙܝܐ ܒܪܗ ܡܢ ܐܝ̈ܕܝ ܝܗܘ ܒܪ ܝܡܫܝ܂ ܘܚܛܐ ܝܘܐܫ ܘܐܫܕ ܕܡܐ ܙܟܝܐ܂ ܘܛܠܡ ܛܝܒܘܬܐ ܕܝܘܝܕܥ ܟܗܢܐ܂ ܘܐܘܒܕ ܠܙܪܥܗ ܡܢ ܒܬܪܗ܂ ܘܡܛܠ ܒܘܪܟܬܐ ܐܬܢܛܪ ܙܪܥܗ܂ ܘܩܡ ܐܡܘܨܝܐ ܘܕܒܪ ܡܠܟܘܬܐ܂ ܘܚܛܐ ܒܦܬܟܪ̈ܐ ܘܣܓܕ ܠܐܠܗ̈ܐ ܐܚܪ̈ܢܐ ܢܘܟܪ̈ܝܐ܂ ܘܡܛܠ ܒܘܪܟܬܐ ܐܬܢܛܪ ܙܪܥܗ܂ ܘܩܡ ܥܘܙܝܐ ܒܬܪܗ܂ ܘܐܡܪܚ ܥܠ ܟܗܢܘܬܐ ܘܠܐ ܫܡܥܗ܂ ܘܡܚܝܗܝ ܩܕܝܫܐ ܒܡܚܘܬܐ ܕܓܪܒܐ ܟܠܗܘܢ ܝܘܡ̈ܬܗ܂ ܘܩܡ ܝܘܬܡ ܒܡܠܟܘܬܐ ܘܐܣܓܝ ܠܡܚܛܐ܂ ܘܡܛܠ ܒܘܪܟܬܐ ܙܪܥܗ ܐܫܬܘܙܒ܂ ܘܩܡ ܐܚܙ ܒܡܠܟܘܬܐ܂ ܘܐܣܓܝ ܠܡܚܛܐ܂ ܘܣܓܕ ܠܐܠܗ̈ܐ ܡܝ̈ܬܐ܂ ܘܐܡܪ܂ ܐܢܬܘܢ ܐܠܗ̈ܝ ܘܡܪ̈ܝ܂ ܘܠܟܘܢ ܣܓܕ ܐܢܐ܂ ܘܡܛܠ ܒܘܪܟܬܐ ܐܬܢܛܪ ܙܪܥܗ܂ ܘܩܡ ܚܙܩܝܐ ܡܠܟܐ ܙܕܝܩܐ ܥܠ ܟܠܗ ܝܗܘܕܐ ܒܐܘܪܫܠܡ܂ ܘܨܠܝ ܘܐܬܚܢܢ ܩܕܡ ܐܠܗܗ܂ ܘܐܫܬܡܥܬ ܨܠܘܬܗ܂ ܘܚܪܒܬ ܒܥܠܕܒܒܘ̈ܗܝ܂ ܘܫܡܫ ܙܗܝܐܝܬ ܒܘܪܟܬܐ ܕܙܕܝܩ̈ܐ ܕܒܓܘܗ܂ ܘܐܬܟܪܗ ܘܨܠܝ ܘܐܬܚܠܡ ܡܢ ܟܘܪܗܢܗ܀

ܘܡܛܠ ܕܐܝܬ ܐܢ̈ܫܝܢ ܚܒܝܒܝ܂ ܕܡܝܬܝܢ ܥܕܠܝܐ ܥܠ ܚܙܩܝܐ܂ ܕܠܡܢܐ ܟܪܝܬ ܠܗ ܒܟܘܪܗܢܗ ܕܡܐܬ ܗܘܐ܂ ܕܗܐ ܙܕܝܩܘܬܐ ܪܒܬܐ ܦܠܚ ܩܕܡ ܐܠܗܗ܂ ܘܡܢܐ ܠܡ ܗܢܝܢܐ ܡܛܝܗܝ ܒܗܝ ܬܘܣܦܬܗ ܕܐܬܣܝܡ ܒܗ ܡܘܡܐ ܒܗܝ ܬܘܣܦܬܗ܂ ܥܠ ܕܐܫܬܒܗܪ ܗܘܐ ܒܥܘܬܪܗ ܩܕܡ ܐܝܙ̈ܓܕܐ ܕܡܠܟ ܒܒܠ܂ ܘܠܐ ܫܒܚ ܫܡܐ ܕܐܠܗܗ܂ ܕܐܚܠܡܗ ܡܢ ܟܘܪܗܢܗ܂ ܥܠ ܗܕܐ ܓܝܪ ܟܪܝܬ ܗܘܬ ܠܗ ܠܚܙܩܝܐ ܡܠܟܐ ܙܕܝܩܐ܂ ܡܛܠ ܕܥܕܟܝܠ ܒܪܐ ܠܝܬ ܗܘܐ ܠܗ܂ ܘܒܚܨܗ ܛܡܝܪܐ ܗܘܬ ܒܘܪܟܬܐ ܕܙܕܝܩ̈ܐ܂ ܘܗܟܢܐ ܐܡܪ ܒܚܢܓܬܗ܂ ܕܒܘܪܟܬܐ ܕܪܕܬ ܒܟܠܗܘܢ ܕܪ̈ܐ ܩܕܡ̈ܝܐ܂ ܡܢ ܐܕܡ ܘܥܕܡܐ ܠܘܬܝ܂ ܒܐܪ̈ܒܥܝܢ ܘܫܬ ܫܪ̈ܒܢ܂ ܡܢܝ ܠܡܢܐ ܠܐ ܢܦܩܬ܂ ܘܡܢܝ ܕܥܟܬ ܛܘܛܝܬܐ܂ ܗܐ ܡܟܝܠ ܡܬܝܗܒ ܠܗ ܣܓܘܠܐ ܠܚܒܠܐ܂ ܟܕ ܗܠܝܢ ܐܬܪܥܝ ܘܨܠܝ ܚܢܝܓܐܝܬ܂ ܐܬܐ ܠܘܬܗ ܐܫܥܝܐ ܢܒܝܐ ܘܐܡܪ ܠܗ܂ ܗܟܢܐ ܐܡܪ ܡܪܝܐ܂ ܗܐ ܡܘܣܦ ܐܢܐ ܥܠ ܫܢ̈ܝܟ܂ ܚܡܫܥܣܪ̈ܐ ܫ̈ܢܝܢ ܚܝܐ ܐܢܬ܂ ܘܐܘܣܦ ܠܗ ܚܡܫܥܣܪ̈ܐ ܫ̈ܢܝܢ܂ ܗܝܕܝܢ ܒܫܢܬ ܬܡܢܥܣܪܐ ܕܡܠܟܘܬܗ܂ ܘܒܫܢܬ ܬܠܬ ܕܬܘܣܦܬܗ܂ ܐܘܠܕ ܠܡܢܫܐ܂ ܥܣܪܝܢ ܓܝܪ ܘܬܫܥ ܫ̈ܢܝܢ ܐܡܠܟ܂ ܩܕܡ̈ܝܬܐ ܐܪܒܥܣܪ̈ܐ܂ ܘܐܚܪ̈ܝܬܐ ܚܡܫܥܣܪ̈ܐ܂ ܘܫܠܡܬ ܡܠܬܐ ܕܟܬܝܒܐ܂ ܕܙܕܝܩ̈ܐ ܢܓܪܘܢ ܝܘܡ̈ܬܗܘܢ܂ ܘܫܢܝܗ̈ܘܢ ܕܥܘ̈ܠܐ ܢܬܒܨܪ̈ܢ ܐܬܒܨܪ ܫܢ̈ܝܐ ܕܕܪܐ ܡܚܒܠܢܐ ܕܒܝܘܡ̈ܝ ܢܘܚ܂ ܘܕܡܠܟܘܬܐ ܚܛܝܬܐ ܕܒܝܬ ܐܦܪܝܡ܂ ܘܐܘܣܦ ܠܚܙܩܝܐ ܘܐܦ ܠܐܝܘܒ܂ ܠܚܙܩܝܐ ܐܘܣܦ ܚܡܫܥܣܪ̈ܐ ܫ̈ܢܝܢ܂ ܘܠܐܝܘܒ ܐܥܦܐ ܒܫܢܘܗ̈ܝ ܘܒܩܢܝܢܗ ܘܒܒܢܘ̈ܗܝ܂ ܘܐܢ ܐܢܫ ܢܬܚܪܐ ܕܠܐ ܩܒܠ ܐܝܘܒ ܐܥܦܐ ܒܟܠ ܡܕܡ܂ ܢܬܛܦܝܣ ܕܠܐ ܚܪܝܢܐ܂ ܗܟܢܐ ܓܝܪ ܟܬܝܒ܂ ܕܐܣܓܝ ܐܠܗܐ ܚܪܝܬܗ/ܐܚܪܝܬܗ/ ܕܐܝܘܒ ܡܢ ܩܕܡܝܬܗ܂ ܘܐܬܝܠܕܘ ܠܗ ܫܒܥܐ ܒ̈ܢܝܢ ܘܬܠܬ ܒ̈ܢܢ܂ ܘܫܒܥܐ ܒܢܘܗ̈ܝ ܘܬܠܬ ܒܢ̈ܬܗ܂ ܩܕܡܝ̈ܐ ܘܐܚܪ̈ܝܐ܂ ܟܕ ܗܘܐ ܙܒܢܐ ܕܩܝܡܬܐ ܒܥܠܡܐ ܕܙܕܝܩ̈ܐ܂ ܡܩܒܠ ܒܢܘܗ̈ܝ ܒܐܥܦܐ܂ ܘܟܕ ܗܘܐ ܒܗܢܐ ܥܠܡܐ܂ ܩܒܠ ܩܢܝܢܗ ܒܟܠ`ܡܕܡ ܐܥܦܐ܂ ܘܡܣܟܠܐ ܠܢ ܡܠܬܐ ܕܐܦ ܫܢܘܗ̈ܝ ܐܥܦܐ ܝܗܒ ܠܗ ܐܠܗܐ܂ ܐܝܟ ܕܟܬܝܒ ܕܣܐܒ ܐܝܘܒ ܘܣܒܥ ܝܘܡ̈ܬܗ ܘܡܝܬ܂ ܒܬܪ ܢܣܝܘܢܗ ܡܐܐ ܘܐܪ̈ܒܥܝܢ ܫ̈ܢܝܢ ܚܝܐ܂ ܘܕܡܢ ܩܕܡ ܢܣܝܘܢܗ ܫܒܥܝܢ ܫ̈ܢܝܢ܂ ܘܫܠܡܬ ܥܠܘܗܝ ܡܠܬܐ ܕܟܬܝܒܐ ܕܩܒܠ ܐܝܘܒ ܐܥܦܐ ܒܟܠ ܡܕܡ܂ ܫܢܘܗ̈ܝ ܘܩܢܝܢܗ ܒܗܢܐ ܥܠܡܐ܂ ܘܒܢܘܗ̈ܝ ܘܒܢ̈ܬܗ ܒܥܠܡܐ ܕܙܕܝܩ̈ܐ܂ ܫܠܝܛ ܗܘ ܓܝܪ ܐܘܡܢܐ ܥܠ ܓܒܝܠܬܗ ܠܡܘܣܦܘ ܘܠܡܒܨܪ܀

ܘܐܬܝܠܕ ܡܢܫܐ ܝܠܕܐ ܪܫܝܥܐ ܡܢ ܓܒܪܐ ܙܕܝܩܐ܂ ܘܐܣܓܝ ܠܡܚܛܐ ܡܢ ܟܠܗܘܢ ܕܩܕܡܘܗܝ܂ ܒܪ ܬܪܬܥܣܪ̈ܐ ܫ̈ܢܝܢ ܩܡ ܒܡܠܟܘܬܐ܂ ܘܚܡܫܝܢ ܘܚܡܫ ܫ̈ܢܝܢ ܐܡܠܟ܂ ܘܐܦܢ ܐܣܓܝ ܚܛܗܘܗ̈ܝ ܘܣܓܕ ܠܦܬܟܪ̈ܐ܂ ܡܛܠ ܒܘܪܟܬܐ ܐܬܢܛܪ ܙܪܥܗ܂ ܘܐܘܠܕ ܠܐܡܘܢ܂ ܘܐܡܠܟ ܐܡܘܢ܂ ܘܗܠܟ ܒܐܘܪ̈ܚܬܗ ܕܡܢܫܐ܂ ܘܡܛܠ ܒܘܪܟܬܐ ܕܒܗ ܕܒܪ ܡܠܟܘܬܐ܂ ܘܐܬܝܠܕ ܡܢܗ ܓܒܪܐ ܙܕܝܩܐ ܝܘܫܝܐ ܕܘܟܪܢܗ ܠܒܘܪܟܬܐ܂ ܕܐܥܒܪ ܛܡܐܘܬܐ ܡܢ ܐܪܥܐ ܕܐܝܣܪܝܠ ܒܝܘܡ̈ܝ ܡܠܟܘܬܗ܂ ܘܡܛܠ ܕܣܪܗܒܘ ܠܗܘܢ ܚܛܗܘ̈ܗܝ ܕܥܡܐ܂ ܐܬܟܢܫ ܡܢ ܩܕܡ ܒܝܫܬܐ܂ ܩܠܐ ܐܬܬ ܒܝܘܡܘܗ̈ܝ ܥܠ ܥܡܐ܂ ܐܝܟ ܕܐܬܢܒܝܬ ܚܘܠܕܝ ܢܒܝܬܐ܂ ܟܕ ܫܕܪ ܠܘܬܗ ܠܡܫܐܠ ܦܬܓܡܐ܂ ܘܫܠܚܬ ܠܗ܂ ܕܗܟܢܐ ܐܡܪ ܡܪܝܐ ܐܠܗܐ ܕܐܝܣܪܝܠ܂ ܚܠܦ ܕܐܬܬܒܪ ܠܒܟ ܘܟܪܝܬ ܠܟ ܥܠ ܚܛܗܘ̈ܗܝ ܕܥܡܐ܂ ܟܕ ܫܡܥܬ ܦܬܓܡ̈ܐ ܕܢܡܘܣܐ܂ ܗܐ ܟܢܫ ܐܢܐ ܠܟ ܥܡ ܐܒܗ̈ܝܟ܂ ܘܠܐ ܬܚܙܐ ܒܒܝܫܬܐ ܕܐܬܝܐ ܥܠ ܥܡܐ ܗܢܐ܂ ܘܐܬܟܢܫ ܡܢ ܩܕܡ ܒܝܫܬܐ܂ ܟܕ ܩܛܠܗ ܦܪܥܘܢ ܚܓܝܪܐ ܡܠܟܐ ܕܡܨܪܝܢ܂ ܘܩܡ ܒܡܠܟܘܬܐ ܝܗܘܐܚܙ ܒܪܗ܂ ܘܡܛܠ ܕܠܐ ܗܘܬ ܒܗ ܒܘܪܟܬܐ ܠܐ ܐܟܫܪ ܒܡܠܟܘܬܐ ܕܒܝܬ ܕܘܝܕ܂ ܐܡܠܟ ܬܠܬܐ ܝܪ̈ܚܝܢ܂ ܘܡܢ ܒܬܪܟܢ ܕܒܪܗ ܦܪܥܘܢ ܚܓܝܪܐ ܡܠܟܐ ܕܡܨܪܝܢ܂ ܘܡܝܬ ܒܡܨܪܝܢ܂ ܘܐܬܥܛܝ ܕܘܟܪܢܗ܂ ܘܐܡܠܟ ܝܘܝܩܝܡ ܒܡܠܟܘܬܐ܂ ܕܒܗ ܛܡܝܪܐ ܗܘܬ ܒܘܪܟܬܐ ܕܙܕܝܩ̈ܐ܂ ܘܒܫܢܬ ܬܠܬ ܕܡܠܟܘܬܗ ܟܒܫܗ ܢܒܘܟܕܢܨܪ ܒܡܕܐܬܐ܂ ܘܕܒܪ ܠܕܢܝܐܝܠ ܘܠܐܚܘܗ̈ܝ ܒܗܡܝܪ̈ܐ܂ ܘܦܠܚ ܠܢܒܘܟܕܢܨܪ ܬܡܢܐ ܫ̈ܢܝܢ܂ ܘܟܕ ܐܣܓܝ ܚܛܗܘܗ̈ܝ ܘܡܪܕ܂ ܩܛܠܗ ܢܒܘܟܕܢܨܪ܂ ܘܓܪܘ ܘܫܕܐܘܗܝ ܠܒܪ ܡܢ ܬܪ̈ܥܐ ܕܐܘܪܫܠܡ܂ ܘܩܒܘܪܬ ܚܡܪ ܐܬܩܒܪ܂ ܘܐܡܠܟ ܝܘܝܟܝܢ ܒܪܗ ܒܬܪܗ܂ ܘܥܠ ܕܒܗ ܛܡܝܪܐ ܗܘܬ ܒܘܪܟܬܐ ܕܙܕܝܩ̈ܐ܂ ܐܡܠܟ ܬܠܬܐ ܝܪ̈ܚܝܢ܂ ܘܟܕ ܡܪܕ ܥܠ ܡܠܟܐ ܕܒܒܠ܂ ܐܬܘ ܥܠܘܗܝ ܚܝܠܐ ܕܟܠܕܝ̈ܐ܂ ܘܕܒܪ̈ܘܗܝ ܘܐܙܠܘ ܠܒܒܠ܂ ܘܐܬܐܣܪ ܬܠܬܝܢ ܘܫܒܥ ܫ̈ܢܝܢ ܒܒܒܠ܂ ܟܕ ܛܡܝܪܐ ܗܘܬ ܒܗ ܒܘܪܟܬܐ ܕܙܕܝ̈ܩܐ܂ ܘܐܫܬܒܩ ܥܡܐ ܒܐܘܪܫܠܡ ܡܢ ܛܡܐܘܬܐ܂ ܘܩܡ ܥܠܝܗܘܢ ܨܕܩܝܐ܂ ܥܠ ܫܪܟܐ /ܕܥܡܐ/ ܒܡܠܟܘܬܐ܂ ܘܐܘܠܕ ܝܘܝܟܝܢ ܠܫܠܬܐܝܠ ܒܒܒܠ܂ ܘܟܡܐ ܕܒܘܪܟܬܐ ܒܒܒܠ ܗܘܬ܂ ܕܒܪܘ ܒܒ̈ܠܝܐ ܡܠܟܘܬܐ ܒܫܝܢܐ ܘܒܫܠܡܐ܂ ܘܟܕ ܐܬܝܠܕ ܫܠܬܐܝܠ ܒܐܪܥܐ ܕܒܒܠ܂ ܒܗ ܛܡܝܪܐ ܗܘܬ ܒܘܪܟܬܐ ܕܙܕܝܩ̈ܐ܂ ܘܫܠܬܐܝܠ ܐܘܠܕ ܠܙܘܪܒܒܠ܂ ܘܗܝܕܝܢ ܒܝܘܡ̈ܝ ܙܘܪܒܒܠ܂ ܗܦܟܬ ܠܗ ܫܒܝܬܐ ܡܢ ܒܒܠ ܒܝܕ ܥܙܪܐ ܣܦܪܐ܂ ܒܡܠܟܘܬ ܟܘܪܫ ܦܪܣܝܐ܂ ܘܙܘܪܒܒܠ ܥܡܗ ܕܫܒܝܬܐ܂ ܘܗܘܐ ܪܒܐ ܥܠܝܗܘܢ ܐܝܟ ܕܐܡܪ ܢܒܝܐ܂ ܕܙܘܪܒܒܠ܂ ܒܪ ܫܠܬܐܝܠ ܪܒܐ ܕܝܗܘܕܐ܂ ܘܝܫܘܥ ܒܪ ܝܘܙܕܩ ܟܗܢܐ ܪܒܐ܂ ܗܠܝܢ ܐܢܘܢ ܬܪ̈ܝܢ ܒܢ̈ܝ ܕܘܗܢܐ܂ ܕܩܝܡܝܢ ܗܘܘ ܩܕܡ ܡܪܐ ܕܟܠܗ ܐܪܥܐ܀

ܘܟܕ ܦܢܬ ܒܘܪܟܬܐ ܡܢ ܒܒܠ ܠܐܘܪܫܠܡ܂ ܒܛܠܬ ܡܠܟܘܬܐ ܕܒܒ̈ܠܝܐ܂ ܘܐܡܠܟ ܟܘܪܫ ܦܪܣܝܐ܂ ܡܢ ܒܬܪ ܫܬܝܢ ܘܬܠܬ ܫ̈ܢܝܢ܂ ܦܢܬ ܒܘܪܟܬܐ ܡܢ ܒܒܠ ܠܐܘܪܫܠܡ܂ ܡܢ ܙܒܢܐ ܕܐܫܬܒܝ ܝܘܝܟܝܢ ܥܕܡܐ ܕܗܦܟܬ ܫܒܝܬܐ ܒܝܕ ܥܙܪܐ܂ ܘܙܘܪܒܒܠ܂ ܐܘܠܕ ܠܐܒܝܘܕ܂ ܘܐܒܝܘܕ ܐܘܠܕ ܠܐܠܝܩܝܡ܂ ܘܐܠܝܩܝܡ ܐܘܠܕ ܠܥܙܘܪ܂ ܘܥܙܘܪ ܐܘܠܕ ܠܙܕܘܩ܂ ܘܙܕܘܩ ܐܘܠܕ ܠܐܟܝܢ܂ ܘܐܟܝܢ ܐܘܠܕ ܠܐܠܝܘܕ܂ ܘܐܠܝܘܕ ܐܘܠܕ ܠܐܠܝܥܙܪ܂ ܘܐܠܝܥܙܪ ܐܘܠܕ ܠܡܬܢ܂ ܘܡܬܢ ܐܘܠܕ ܠܝܥܩܘܒ܂ ܘܝܥܩܘܒ ܐܘܠܕ ܠܝܘܣܦ܂ ܘܝܘܣܦ ܐܬܩܪܝ ܐܒܐ ܠܝܫܘܥ ܡܫܝܚܐ܂ ܘܝܫܘܥ ܐܬܝܠܕ ܡܢ ܡܪܝܡ ܒܬܘܠܬܐ܂ ܡܢ ܙܪܥܐ ܕܒܝܬ ܕܘܝܕ܂ ܡܢ ܪܘܚܐ ܕܩܘܕܫܐ ܐܝܟ ܕܟܬܝܒ܂ ܕܝܘܣܦ ܘܡܪܝܡ ܡܟܝܪܬܗ܂ ܬܪ̈ܝܗܘܢ ܡܢ ܒܝܬܗ ܕܕܘܝܕ܂ ܘܫܠܝܚܐ ܣܗܕ܂ ܕܝܫܘܥ ܡܫܝܚܐ ܡܢ ܡܪܝܡ ܗܘܐ܂ ܡܢ ܙܪܥܐ ܕܒܝܬ ܕܘܝܕ ܒܪܘܚܐ ܕܩܘܕܫܐ܂ ܝܘܣܦ ܐܬܩܪܝ ܐܒܐ ܠܝܫܘܥ܂ ܟܕ ܠܐ ܗܘܐ ܡܢ ܙܪܥܗ ܐܬܝܠܕ܂ ܐܠܐ ܫܡܐ ܕܐܒܗܘܬܐ ܐܬܝܒܠ ܡܢ ܐܕܡ ܥܕܡܐ ܠܝܘܣܦ܂ ܠܫܬܝܢ ܘܬܠܬ ܫܪ̈ܒܢ܂ ܘܐܫܬܩܠ ܫܡܐ ܕܐܒܗܘܬܐ ܡܢ ܝܘܣܦ܂ ܘܐܬܣܝܡ ܥܠ ܡܫܝܚܐ܂ ܡܢ ܝܘܣܦ ܩܒܠ ܫܡܐ ܕܐܒܗܘܬܐ܂ ܘܡܢ ܝܘܚܢܢ ܫܡܐ ܕܟܗܢܘܬܐ܂ ܘܡܢ ܡܪܝܡ ܠܒܫ ܦܓܪܐ ܘܩܒܠ ܫܡܐ܂ ܕܡܘܠܕܐ܂ ܡܢ ܒܬܪ ܫ̈ܬܝܢ ܘܬܪܝܢ ܫܒܘ̈ܥܝܢ܂ ܐܬܝܠܕ ܡܫܝܚܐ ܘܐܬܩܛܠ܂ ܘܐܫܬܩܠܬ ܛܘܛܝܬܐ ܕܒܘܪܟܬܐ ܡܢ ܣܓܘܠܐ܂ ܘܐܬܝܗܒ ܟܠܗ ܣܓܘܠܐ ܠܚܒܠܐ܂ ܘܚܪܒ ܟܪܡܐ ܡܢ ܒܠܝ ܦܘܠܚܢܐ ܘܐܘܥܝ ܚܪ̈ܘܒܐ ܘܦܐܪ̈ܝ ܡܪ̈ܪܐ܂ ܘܚܪܒܬ ܓܦܬܐ܂ ܘܐܬܥܩܪܬ ܣܬܐ܀

ܡܟܝܠ ܩܒܠ ܚܘܫܒܢܐ ܕܗܠܝܢ ܫܬܝܢ ܘܬܠܬ ܫܪ̈ܒܢ܂ ܡܢ ܐܕܡ ܥܕܡܐ ܕܐܬܝܠܕ ܡܫܝܚܐ܂ ܐܕܡ܂ ܫܝܬ܂ ܐܢܘܫ܂ ܩܝܢܢ܂ ܡܗܠܠܐܝܠ܂ ܝܪܕ܂ ܚܢܘܟ܂ ܡܬܘܫܠܚ܂ ܠܡܟ܂ ܢܘܚ܂ ܫܝܡ܂ ܐܪܦܟܫܪ܂ ܫܠܚ܂ ܥܒܪ܂ ܦܠܓ܂ ܐܪܥܘ܂ ܣܪܘܓ܂ ܢܚܘܪ܂ ܬܪܚ܂ ܐܒܪܗܡ܂ ܐܝܣܚܩ܂ ܝܥܩܘܒ܂ ܝܗܘܕܐ܂ ܦܪܨ܂ ܚܨܪܘܢ܂ ܐܪܡ܂ ܥܡܝܢܕܒ܂ ܢܚܫܘܢ܂ ܫܠܐ܂ ܒܥܙ܂ ܥܘܒܝܕ܂ ܐܝܫܝ܂ ܕܘܝܕ܂ ܫܠܝܡܘܢ܂ ܪܚܒܥܡ܂ ܐܒܝܐ܂ ܐܣܐ܂ ܝܘܫܦܛ܂ ܝܗܘܪܡ: ܐܚܙܝܐ: ܝܗܘܐܫ܂ ܐܡܘܨܝܐ܂ ܥܘܙܝܐ܂ ܝܘܬܡ܂ ܐܚܙ܂ ܚܙܩܝܐ܂ ܡܢܫܐ܂ ܐܡܘܢ܂ ܝܘܫܝܐ܂ ܝܘܝܩܡ܂ ܝܘܝܟܝܢ܂ ܫܠܬܐܝܠ܂ ܙܘܪܒܒܠ܂ ܐܒܝܘܕ܂ ܐܠܝܩܝܡ܂ ܥܙܘܪ܂ ܙܕܘܩ܂ ܐܟܝܢ܂ ܐܠܝܘܕ܂ ܐܠܝܥܙܪ܂ ܡܬܢ܂ ܝܥܩܘܒ܂ ܝܘܣܦ܂ ܘܝܫܘܥ ܒܪܗ ܕܐܠܗܐ܂ ܕܐܬܝܠܕ ܡܢ ܡܪܝܡ ܒܬܘܠܬܐ܂ ܘܐܬܩܪܝ ܝܘܣܦ ܐܒܘܗܝ܀

ܡܟܝܠ ܐܫܪܐ ܠܡܚܘܝܘܬܟ ܥܠ ܚܘܫܒܢܐ ܕܫ̈ܢܝܐ܂ ܡܢ ܐܕܡ ܥܕܡܐ ܠܗ ܠܗܢܐ ܚܘܫܒܢܐ ܕܪܫܡܬ ܘܚܘܝܬܟ܂ ܐܠܗܐ ܒܪܐ ܘܐܘܠܕ ܠܐܕܡ܂ ܘܟܕ ܗܘܐ ܐܕܡ ܒܪ ܡܐܐ ܘܬܠܬܝܢ ܫ̈ܢܝܢ܂ ܐܘܠܕ ܠܫܝܬ܂ ܘܚܝܐ ܐܕܡ ܡܢ ܒܬܪ ܕܐܘܠܕ ܠܫܝܬ܂ ܬܡܢܡܐܐ ܫ̈ܢܝܢ܂ ܣܟܐ ܕܫܢ̈ܘܗܝ ܬܫܥܡܐܐ ܘܬܠܬܝܢ ܫ̈ܢܝܢ܂ ܥܕܡܐ ܠܫܢܬ ܬܠܬܝܢ ܘܚܕܐ ܠܚ̈ܝܝ ܠܡܟ ܕܐܘܠܕ ܠܢܘܚ܂ ܚܝܐ ܐܕܡ܂ ܘܡܝܬ ܒܕܪܐ ܬܫܝܥܝܐ܀

ܘܚܝܐ ܫܝܬ ܡܐܐ ܘܚܡܫ ܫܢ̈ܝܢ܂ ܘܐܘܠܕ ܠܐܢܘܫ܂ ܘܚܝܐ ܫܝܬ ܡܢ ܒܬܪ ܕܐܘܠܕ ܠܐܢܘܫ܂ ܬܡܢܡܐܐ ܘܫܒܥ ܫܢ̈ܝܢ܂ ܣܟܐ ܕܫܢܘܗ̈ܝ ܬܫܥܡܐܐ ܘܬܪܬܥܣܪ̈ܐ ܫܢ̈ܝܢ܂ ܥܕܡܐ ܠܡܐܐ ܘܬܡܢܐܝܢ ܠܚ̈ܝܝ ܠܡܟ܂ ܚܝܐ ܬܪ̈ܬܝܢ ܫ̈ܢܝܢ ܡܢ ܩܕܡ ܡܘܠܕܗ ܕܢܘܚ܂ ܘܡܝܬ ܒܕܪܐ ܬܡܝܢܝܐ܀

ܘܚܝܐ ܐܢܘܫ ܬܫܥܝܢ ܫ̈ܢܝܢ ܘܐܘܠܕ ܠܩܝܢܢ܂ ܘܚܝܐ ܐܢܘܫ ܡܢ ܒܬܪ ܕܐܘܠܕ ܠܩܝܢܢ܂ ܬܡܢܡܐܐ ܘܚܡܫܥܣܪ̈ܐ ܫ̈ܢܝܢ܂ ܣܟܐ ܕܫܢܘܗ̈ܝ ܬܫܥܡܐܐ ܘܚܡܫ ܫ̈ܢܝܢ܂ ܘܚܝܐ ܐܢܘܫ ܥܕܡܐ ܠܫܢܬ ܫܒ̈ܥܝܢ ܘܬܫܥ ܫܢ̈ܝܢ ܠܚܝ̈ܝ ܢܘܚ܂ ܥܕܡܐ ܠܫܢܬ ܚܡܫܡܐܐ ܘܥܣܪܝܢ ܘܚܕܐ܂ ܡܢ ܩܕܡ ܡܡܘܠܐ܂ ܘܡܝܬ ܒܕܪܐ ܬܡܝܢܝܐ܀

ܘܚܝܐ ܩܝܢܢ ܫܒܥܝܢ ܫ̈ܢܝܢ܂ ܘܐܘܠܕ ܠܡܗܠܠܐܝܠ܂ ܘܚܝܐ ܩܝܢܢ ܡܢ ܒܬܪ ܕܐܘܠܕ ܠܡܗܠܠܐܝܠ܂ ܬܡܢܡܐܐ ܘܐܪ̈ܒܥܝܢ ܫ̈ܢܝܢ܂ ܣܟܐ ܕܫܢܘܗ̈ܝ ܬܫܥܡܐܐ ܘܥܣܪ ܫ̈ܢܝܢ܂ ܘܚܝܐ ܩܝܢܢ ܥܕܡܐ ܠܫܢܬ ܡܐܐ ܘܫܒܥܝܢ ܘܬܫܥ ܠܚ̈ܝܝ ܢܘܚ܂ ܥܕܡܐ ܠܫܢܬ ܐܪ̈ܒܥܡܐܐ ܘܥܣܪܝܢ ܘܚܕܐ ܡܢ ܩܕܡ ܡܡܘܠܐ܂ ܘܡܝܬ ܒܕܪܐ ܫܒܝܥܝܐ܀

ܘܚܝܐ ܡܗܠܠܐܝܠ ܫܬܝܢ ܘܚܡܫ ܫ̈ܢܝܢ܂ ܘܐܘܠܕ ܠܝܪܕ܂ ܘܚܝܐ ܡܗܠܠܐܝܠ ܡܢ ܒܬܪ ܕܐܘܠܕ ܠܝܪܕ ܬܡܢܡܐܐ ܘܬܠܬܝܢ ܫܢ̈ܝܢ܂ ܣܟܐ ܕܫ̈ܢܘܗܝ ܬܡܢܡܐܐ ܘܬܫܥܝܢ ܘܚܡܫ ܫܢ̈ܝܢ܂ ܘܚܝܐ ܡܗܠܠܐܝܠ ܥܕܡܐ ܠܫܢܬ ܡܐ̈ܬܝܢ ܘܐܪܒܥܣܪ̈ܐ ܫ̈ܢܝܢ ܠܚܝ̈ܝ ܢܘܚ܂ ܥܕܡܐ ܠܫܢܬ ܬܠܬܡܐܐ ܘܬܡܢܐܝܢ ܘܫܬ ܡܢ ܩܕܡ ܡܡܘܠܐ܂ ܘܡܝܬ ܒܕܪܐ ܫܬܝܬܝܐ܀

ܘܚܝܐ ܝܪܕ ܡܐܐ ܘܫܬܝܢ ܘܬܪ̈ܬܝܢ ܫ̈ܢܝܢ܂ ܘܐܘܠܕ ܠܚܢܘܟ܂ ܘܚܝܐ ܝܪܕ ܡܢ ܒܬܪ ܕܐܘܠܕ ܠܚܢܘܟ܂ ܬܡܢܡܐܐ ܫ̈ܢܝܢ܂ ܣܟܐ ܕܫܢܘ̈ܗܝ ܬܫܥܡܐܐ ܘܫܬܝܢ ܘܬܪ̈ܬܝܢ ܫ̈ܢܝܢ܂ ܘܚܝܐ ܝܪܕ ܥܕܡܐ ܠܫܢܬ ܬܠܬܡܐܐ ܘܫܒܥܝܢ ܘܬܡܢܐ ܠܚܝ̈ܝ ܢܘܚ܂ ܥܕܡܐ ܠܫܢܬ ܡܐ̈ܬܝܢ ܘܥܣܪܝܢ ܘܬܪ̈ܬܝܢ ܫ̈ܢܝܢ ܡܢ ܩܕܡ ܡܡܘܠܐ܂ ܘܡܝܬ ܒܕܪܐ ܚܡܝܫܝܐ܀

ܘܚܝܐ ܚܢܘܟ ܫܬܝܢ ܘܚܡܫ ܫܢ̈ܝܢ܂ ܘܐܘܠܕ ܠܡܬܘܫܠܚ܂ ܘܫܦܪ ܚܢܘܟ ܠܐܠܗܐ ܡܢ ܒܬܪ ܕܐܘܠܕ ܠܡܬܘܫܠܚ܂ ܬܠܬܡܐܐ ܫܢ̈ܝܢ܂ ܣܟܐ ܕܫܢܘܗ̈ܝ ܬܠܬܡܐܐ ܘܫܬܝܢ ܘܚܡܫ ܫ̈ܢܝܢ܂ ܘܒܫܢܬ ܬܠܬܡܐܐ ܕܡܬܘܫܠܚ ܒܪܗ܂ ܘܒܫܢܬ ܡܐܐ ܘܬܠܬܥܣܪܐ ܠܚܝ̈ܝ ܠܡܟ܂ ܫܬܝܢ ܘܬܫܥ ܫ̈ܢܝܢ ܡܢ ܩܕܡ ܡܘܠܕܗ ܕܢܘܚ܂ ܫܬܡܐܐ ܘܫܬܝܢ ܘܬܫܥ ܫ̈ܢܝܢ ܡܢ ܩܕܡ ܡܡܘܠܐ܂ ܫܢܝܗ ܐܠܗܐ ܠܐܬܪܐ ܕܚ̈ܝܐ ܒܕܪܐ ܬܠܝܬܝܐ܀

ܘܚܝܐ ܡܬܘܫܠܚ ܡܐܐ ܘܬܡܢܐܝܢ ܘܫܒܥ ܫ̈ܢܝܢ܂ ܘܐܘܠܕ ܠܠܡܟ܂ ܘܚܝܐ ܡܬܘܫܠܚ ܡܢ ܒܬܪ ܕܐܘܠܕ ܠܠܡܟ܂ ܫܒܥܡܐܐ ܘܬܡܢܐܝܢ ܘܬܪ̈ܬܝܢ ܫ̈ܢܝܢ܂ ܣܟܐ ܕܫܢܘ̈ܗܝ ܬܫܥܡܐܐ ܘܫܬܝܢ ܘܬܫܥ ܫ̈ܢܝܢ܂ ܘܚܝܐ ܡܬܘܫܠܚ ܥܕܡܐ ܠܫܢܬ ܫܬܡܐܐ ܫ̈ܢܝܢ ܠܚ̈ܝܝ ܢܘܚ܂ ܘܡܢ ܒܬܪ ܡܘܬܗ ܥܠ ܢܘܚ ܠܩܒܘܬܐ܂ ܘܗܘܐ ܡܡܘܠܐ ܒܗ ܒܙܒܢܐ ܕܡܝܬ ܓܒܪܐ ܙܕܝܩܐ܂ ܚܙܐ ܠܐܕܡ ܡܐܐ ܘܚܡܫܝܢ ܘܚܕܐ ܫ̈ܢܝܢ܂ ܘܠܫܝܡ ܬܫܥܝܢ ܘܫܒܥ ܫܢ̈ܝܢ܂ ܘܡܝܬ ܒܕܪܐ ܬܠܝܬܝܐ܂ ܘܣܦ ܥܠܡܐ ܒܪܘܓܙܐ܀

ܘܚܝܐ ܠܡܟ ܡܐܐ ܘܬܡܢܐܝܢ ܘܬܪ̈ܬܝܢ ܫܢ̈ܝܢ܂ ܘܐܘܠܕ ܠܢܘܚ܂ ܘܚܝܐ ܠܡܟ ܡܢ ܒܬܪ ܕܐܘܠܕ ܠܢܘܚ܂ ܚܡܫܡܐܐ ܘܬܫܥܝܢ ܘܚܡܫ ܫ̈ܢܝܢ܂ ܣܟܐ ܕܫܢܘܗ̈ܝ ܫܒܥܡܐܐ ܘܫܒܥܝܢ ܘܫܒܥ ܫ̈ܢܝܢ܂ ܘܚܝܐ ܠܡܟ ܥܕܡܐ ܠܫܢܬ ܚܡܫܡܐܐ ܘܬܫܥܝܢ ܘܫܬ ܫ̈ܢܝܢ ܠܚܝ̈ܝ ܢܘܚ ܒܪܗ܂ ܐܪ̈ܒܥ ܫ̈ܢܝܢ ܡܢ ܩܕܡ ܡܡܘܠܐ܂ ܘܚܝܐ ܡܬܘܫܠܚ ܐܒܘܗܝ ܒܬܪܗ ܐܪ̈ܒܥ ܫ̈ܢܝܢ ܘܗܝܕܝܢ ܗܘܐ ܡܡܘܠܐ܂ ܘܚܙܐ ܠܡܟ ܠܐܕܡ ܫܬܝܢ ܘܬܡܢܐ ܫ̈ܢܝܢ܂ ܘܡܝܬ ܡܢ ܒܬܪ ܐܪ̈ܒܥ ܫܢ̈ܝܢ ܡܢ ܩܕܡ ܡܡܘܠܐ܂ ܒܕܪܐ ܕܬܪ̈ܝܢ

ܘܐܬܝܠܕ ܢܘܚ ܒܫܢܬ ܬܡܢܐܝܢ ܘܫܬ ܫ̈ܢܝܢ ܒܬܪ ܡܘܬܗ ܕܐܕܡ܂ ܒܘܟܪܐ ܩܕܡܝܐ ܕܐܘܠܕ ܠܫܝܬ܂ ܐܬܝܠܕ ܒܫܢܬ ܬܫܥ ܫ̈ܢܝܢ ܡܢ ܩܕܡ ܡܘܬܗ ܕܫܝܬ ܕܐܘܠܕ ܠܐܢܘܫ܂ ܒܫܢܬ ܫܒܥܝܢ ܘܬܫܥ ܠܚܝ̈ܝ ܢܘܚ܂ ܡܝܬ ܐܢܘܫ ܕܐܘܠܕ ܠܩܝܢܢ܂ ܒܫܢܬ ܡܐܐ ܘܫܒܥܝܢ ܘܬܫܥ ܠܚ̈ܝܝ ܢܘܚ܂ ܡܝܬ ܩܝܢܢ ܕܐܘܠܕ ܠܡܗܠܠܐܝܠ܂ ܒܫܢܬ ܡܐܬܝܢ ܘܐܪܒܥܣܪ̈ܐ ܫ̈ܢܝܢ ܠܚܝ̈ܝ ܢܘܚ܂ ܡܝܬ ܡܗܠܠܐܝܠ ܕܐܘܠܕ ܠܝܪܕ܂ ܒܫܢܬ ܬܠܬܡܐܐ ܘܫܒܥܝܢ ܘܬܡܢܐ ܠܚܝ̈ܝ ܢܘܚ܂ ܡܝܬ ܝܪܕ ܕܐܘܠܕ ܠܚܢܘܟ܂ ܒܫܢܬ ܫܬܝܢ ܘܬܫܥ ܫ̈ܢܝܢ ܡܢ ܩܕܡ ܕܢܬܝܠܕ ܢܘܚ܂ ܐܫܬܢܝ ܚܢܘܟ ܘܠܐ ܐܫܬܟܚ ܡܘܬܗ܂ ܫܬܡܐܐ ܘܫܬܝܢ ܘܬܫܥ ܫ̈ܢܝܢ ܡܢ ܩܕܡ ܡܡܘܠܐ܂ ܒܫܢܬ ܫܬܡܐܐ ܠܚܝ̈ܝ ܢܘܚ ܡܝܬ ܡܬܘܫܠܚ܂ ܘܡܢ ܒܬܪܟܢ ܗܘܐ ܡܡܘܠܐ܂ ܒܫܢܬ ܚܡܫܡܐܐ ܘܬܫܥܝܢ ܘܫܬ ܫ̈ܢܝܢ ܠܚܝ̈ܝ ܢܘܚ܂ ܡܝܬ ܠܡܟ ܐܒܘܗܝ ܕܢܘܚ܂ ܐܪܒܥ ܫ̈ܢܝܢ ܡܢ ܩܕܡ ܡܬܘܫܠܚ ܐܒܘܗܝ܂܂܂܂܂ ܘܗܘܐ ܢܘܚ ܒܪ ܫܬܡܐܐ ܫ̈ܢܝܢ܂ ܟܕ ܥܠ ܠܩܒܘܬܐ܂ ܒܗ ܒܫܢܬܐ ܕܡܝܬ ܡܬܘܫܠܚ܂ ܘܗܘܐ ܢܘܚ ܒܓܘ ܩܒܘܬܐ܂ ܗܘ ܘܒ̈ܢܝ ܒܝܬܗ ܡܢ ܫܒܥܣܪ̈ܐ ܒܝܪܚܐ ܬܢܝܢܐ܂ ܥܕܡܐ ܠܫܒܥܐ ܘܥܣܪܝܢ ܠܝܪܚܐ ܬܢܝܢܐ ܠܫܢܬܐ ܐܚܪܬܐ܂ ܬܪ̈ܥܣܪ ܝܪ̈ܚܝܢ ܘܥܣܪܐ ܝܘܡ̈ܝܢ܂ ܗܝܕܝܢ ܢܦܩ ܢܘܚ ܘܒܢܘܗ̈ܝ ܡܢ ܩܒܘܬܐ܂ ܘܚܝܐ ܢܘܚ ܡܢ ܒܬܪ ܛܘܦܢܐ܂ ܬܠܬܡܐܐ ܘܚܡܫܝܢ ܫ̈ܢܝܢ܂ ܘܡܝܬ܂ ܒܫܢܬ ܚܡܫܝܢ ܘܬܡܢܐ ܠܚܝ̈ܝ ܐܒܪܗܡ܂ ܐܬܝܠܕ ܡܢ ܫܢܬ ܫܒܥܝܢ ܘܬܫܥ ܫܢ̈ܝܢ ܠܚܝ̈ܝ ܐܢܘܫ܂ ܘܡܝܬ ܒܫܢܬ ܚܡܫܝܢ ܘܬܡܢܐ ܠܚ̈ܝܝ ܐܒܪܗܡ܂ ܚܙܐ ܬܡܢܬܥܣܪ ܕܪ̈ܝܢ܂ ܕܡܢ ܩܕܡܘܗܝ ܘܕܡܢ ܒܬܪܗ܀

ܫܝܡ ܒܪ ܡܐܐ ܫ̈ܢܝܢ ܐܘܠܕ ܠܐܪܦܟܫܪ܂ ܬܪ̈ܬܝܢ ܫ̈ܢܝܢ ܡܢ ܒܬܪ ܛܘܦܢܐ܂ ܘܚܝܐ ܫܝܡ ܡܢ ܒܬܪ ܕܐܘܠܕ ܠܐܪܦܟܫܪ ܚܡܫܡܐܐ ܫ̈ܢܝܢ܂ ܣܟܐ ܕܫܢܘܗ̈ܝ ܫܬܡܐܐ ܫ̈ܢܝܢ܂ ܘܡܝܬ ܒܫܢܬ ܡܐܐ ܘܬܪ̈ܬܥܣܪܐ ܠܚ̈ܝܝ ܐܝܣܚܩ܂ ܘܒܫܢܬ ܫܒܥܝܢ ܘܬܪ̈ܬܝܢ ܠܚ̈ܝܝ ܝܥܩܘܒ܂ ܐܬܝܠܕ ܫܝܡ܂ ܬܫܥܝܢ ܘܬܡܢܐ ܫ̈ܢܝܢ ܡܢ ܩܕܡ ܡܡܘܠܐ܂ ܐܬܝܠܕ ܒܫ̈ܢܝ ܡܬܘܫܠܚ܂ ܘܡܝܬ ܒܫ̈ܢܝ ܝܥܩܘܒ܂ ܚܙܐ ܫܬܬܥܣܪ ܕܪ̈ܝܢ܂ ܕܡܢ ܩܕܡܘܗܝ ܘܕܡܢ ܒܬܪܗ܀

ܘܐܪܦܟܫܪ ܚܝܐ ܬܠܬܝܢ ܘܚܡܫ ܫܢ̈ܝܢ ܘܐܘܠܕ ܠܫܠܚ܂ ܘܚܝܐ ܐܪܦܟܫܪ ܡܢ ܒܬܪ ܕܐܘܠܕ ܠܫܠܚ܂ ܐܪ̈ܒܥܡܐܐ ܘܬܠܬ ܫ̈ܢܝܢ܂ ܣܟܐ ܕܫܢܘ̈ܗܝ ܐܪ̈ܒܥܡܐܐ ܘܬܠܬܝܢ ܘܬܡܢܐ ܫ̈ܢܝܢ܂ ܘܡܝܬ ܒܫܢܬ ܡܐܐ ܘܐܪ̈ܒܥܝܢ ܘܫܒܥ ܫ̈ܢܝܢ ܠܚܝ̈ܝ ܐܒܪܗܡ܂ ܘܒܫܢܬ ܐܪ̈ܒܥܝܢ ܘܫܒܥ ܫ̈ܢܝܢ ܠܚ̈ܝܝ ܐܝܣܚܩ ܒܕܪܐ ܕܥܣܪܐ܀

ܘܚܝܐ ܫܠܚ ܬܠܬܝܢ ܫ̈ܢܝܢ ܘܐܘܠܕ ܠܥܒܪ܂ ܘܚܝܐ ܫܠܚ ܡܢ ܒܬܪ ܕܐܘܠܕ ܠܥܒܪ܂ ܐܪ̈ܒܥܡܐܐ ܘܬܠܬ ܫܢ̈ܝܢ܂ ܣܟܐ ܕܫܢܘܗ̈ܝ ܐܪ̈ܒܥܡܐܐ ܘܬܠܬܝܢ ܘܬܠܬ ܫ̈ܢܝܢ܂ ܘܡܝܬ ܒܫܢܬ ܫܬܝܢ ܘܬܪ̈ܬܝܢ ܠܚܝ̈ܝ ܝܥܩܘܒ܂ ܘܒܫܢܬ ܡܐܐ ܘܥܣܪܝܢ ܘܬܪ̈ܬܝܢ ܠܚܝ̈ܝ ܐܝܣܚܩ ܒܕܪܐ ܕܥܣܪܐ܀

ܘܥܒܪ ܚܝܐ ܬܠܬܝܢ ܘܐܪ̈ܒܥ ܫ̈ܢܝܢ܂ ܘܐܘܠܕ ܠܦܠܓ܂ ܘܚܝܐ ܥܒܪ ܡܢ ܒܬܪ ܕܐܘܠܕ ܠܦܠܓ܂ ܐܪ̈ܒܥܡܐܐ ܘܬܠܬܝܢ ܫ̈ܢܝܢ܂ ܣܟܐ ܕܫܢܘܗ̈ܝ ܐܪܒܥܡܐܐ ܘܫܬܝܢ ܘܐܪ̈ܒܥ ܫ̈ܢܝܢ܂ ܘܡܝܬ ܒܫܢܬ ܡܐܐ ܘܥܣܪܝܢ ܘܚܡܫ ܠܚܝ̈ܝ ܝܥܩܘܒ܂ ܒܬܪ ܚܡܫ ܫ̈ܢܝܢ ܕܡܝܬ ܐܝܣܚܩ ܒܕܪܐ ܕܥܣܪܐ܀

ܘܦܠܓ ܚܝܐ ܬܠܬܝܢ ܫ̈ܢܝܢ ܘܐܘܠܕ ܠܐܪܥܘ܂ ܘܚܝܐ ܦܠܓ ܡܢ ܒܬܪ ܕܐܘܠܕ ܠܐܪܥܘ܂ ܡܐ̈ܬܝܢ ܘܬܫܥ ܫ̈ܢܝܢ܂ ܣܟܐ ܕܫܢܘ̈ܗܝ ܡܐ̈ܬܝܢ ܘܬܠܬܝܢ ܘܬܫܥ ܫ̈ܢܝܢ܂ ܘܡܝܬ ܒܫܢܬ ܐܪ̈ܒܥܝܢ ܘܬܡܢܐ ܫ̈ܢܝܢ ܠܚ̈ܝܝ ܐܒܪܗܡ ܒܕܪܐ ܕܫܬܐ܀

ܘܐܪܥܘ ܚܝܐ ܬܠܬܝܢ ܘܬܪ̈ܬܝܢ ܫ̈ܢܝܢ܂ ܘܐܘܠܕ ܠܣܪܘܓ܂ ܘܚܝܐ ܐܪܥܘ ܡܢ ܒܬܪ ܕܐܘܠܕ ܠܣܪܘܓ ܡܐ̈ܬܝܢ ܘܫܒܥ ܫ̈ܢܝܢ܂ ܣܟܐ ܕܫܢܘܗ̈ܝ ܡܐ̈ܬܝܢ ܘܬܠܬܝܢ ܘܬܫܥ ܫ̈ܢܝܢ܂ ܘܒܫܢܬ ܫܒܥܝܢ ܘܬܡܢܐ ܫ̈ܢܝܢ ܡܝܬ ܠܚ̈ܝܝ ܐܒܪܗܡ܂ ܒܬܪ ܬܠܬ ܫ̈ܢܝܢ ܕܢܦܩ ܡܢ ܚܪܢ ܒܕܪܐ ܕܚܡܫܐ܀

ܘܣܪܘܓ ܚܝܐ ܬܠܬܝܢ ܫ̈ܢܝܢ ܘܐܘܠܕ ܠܢܚܘܪ܂ ܘܚܝܐ ܣܪܘܓ ܡܢ ܒܬܪ ܕܐܘܠܕ ܠܢܚܘܪ܂ ܡܐ̈ܬܝܢ ܫܢ̈ܝܢ܂ ܣܟܐ ܕܫܢܘ̈ܗܝ ܡܐܬܝܢ ܘܬܠܬܝܢ ܫ̈ܢܝܢ܂ ܘܡܝܬ ܒܫܢܬ ܡܐܐ ܘܚܕܐ ܠܚ̈ܝܝ ܐܒܪܗܡ܂ ܒܫܢܬ ܚܕܐ ܕܐܬܝܠܕ ܐܝܣܚܩ ܒܕܪܐ ܚܡܝܫܝܐ܀

ܘܢܚܘܪ ܚܝܐ ܥܣܪܝܢ ܘܬܫܥ ܫ̈ܢܝܢ܂ ܘܐܘܠܕ ܠܬܪܚ܂ ܘܚܝܐ ܢܚܘܪ ܡܢ ܒܬܪ ܕܐܘܠܕ ܠܬܪܚ܂ ܡܐܐ ܘܬܫܥܣܪ̈ܐ ܫ̈ܢܝܢ܂ ܣܟܐ ܕܫܢ̈ܘܗܝ ܡܐܐ ܘܐܪܒܥܝܢ ܘܬܡܢܐ ܫ̈ܢܝܢ܂ ܘܡܝܬ ܒܫܢܬ ܐܪ̈ܒܥܝܢ ܘܬܫܥ ܠܚܝ̈ܝ ܐܒܪܗܡ܂ ܒܫܢܬ ܬܫܥܡܐܐ ܘܬܠܬܝܢ ܘܬܫܥ ܠܚܝܘܗ̈ܝ ܕܢܘܚ܂ ܒܫܢܬ ܬܠܬܡܐܐ ܘܬܠܬܝܢ ܘܬܫܥ ܒܬܪ ܛܘܦܢܐ܂ ܘܚܝܐ ܢܘܚ ܡܢ ܒܬܪ ܕܡܝܬ ܢܚܘܪ܂ ܚܕܥܣܪܐ ܫ̈ܢܝܢ ܘܡܝܬ ܒܕܪܐ ܬܠܝܬܝܐ܀

ܘܚܝܐ ܬܪܚ ܫܒܥܝܢ ܫ̈ܢܝܢ܂ ܘܐܘܠܕ ܠܐܒܪܗܡ܂ ܘܚܝܐ ܬܪܚ ܡܢ ܒܬܪ ܕܐܘܠܕ ܠܐܒܪܗܡ܂ ܡܐܐ ܘܬܠܬܝܢ ܘܚܡܫ ܫ̈ܢܝܢ܂ ܣܟܐ ܕܫܢ̈ܘܗܝ ܡܐ̈ܬܝܢ ܘܚܡܫ ܫ̈ܢܝܢ܂ ܘܡܝܬ ܒܫܢܬ ܡܐܐ ܘܬܠܬܝܢ ܘܚܡܫ ܠܚ̈ܝܝ ܐܒܪܗܡ܂ ܒܫܢܬ ܬܠܬܝܢ ܘܚܡܫ ܠܚ̈ܝܝ ܐܝܣܚܩ܂ ܩܕܡ ܚܡܫ ܫ̈ܢܝܢ ܕܢܣܒ ܐܝܣܚܩ ܠܪܦܩܐ ܒܪܬ ܒܬܘܐܝܠ܂ ܒܕܪܐ ܬܠܝܬܝܐ ܡܝܬ܀

ܘܚܝܐ ܐܒܪܗܡ ܡܐܐ ܫ̈ܢܝܢ ܘܐܘܠܕ ܠܐܝܣܚܩ܂ ܘܚܝܐ ܐܒܪܗܡ ܡܢ ܒܬܪ ܕܐܘܠܕ ܠܐܝܣܚܩ܂ ܫܒܥܝܢ ܘܚܡܫ ܫ̈ܢܝܢ܂ ܣܟܐ ܕܫܢ̈ܘܗܝ ܡܐܐ ܘܫܒܥܝܢ ܘܚܡܫ ܫ̈ܢܝܢ܂ ܘܡܝܬ ܒܫܢܬ ܚܡܫܥܣܪ̈ܐ ܫܢ̈ܝܢ ܠܚ̈ܝܝ ܝܥܩܘܒ܂ ܒܕܪܐ ܬܠܝܬܝܐ ܡܝܬ܀

ܘܚܝܐ ܐܝܣܚܩ ܫܬܝܢ ܫ̈ܢܝܢ܂ ܘܐܘܠܕ ܠܝܥܩܘܒ܂ ܘܚܝܐ ܐܝܣܚܩ ܡܢ ܒܬܪ ܕܐܘܠܕ ܠܝܥܩܘܒ܂ ܡܐܐ ܘܥܣܪܝܢ ܫ̈ܢܝܢ܂ ܣܟܐ ܕܫܢ̈ܘܗܝ ܡܐܐ ܘܬܡܢܐܝܢ ܫ̈ܢܝܢ ܘܡܝܬ܂ ܒܫܢܬ ܡܐܐ ܘܥܣܪܝܢ ܠܚܝ̈ܝ ܝܥܩܘܒ܂ ܒܬܪ ܥܣܪܝܢ ܘܬܠܬ ܫ̈ܢܝܢ ܕܗܦܟ ܝܥܩܘܒ ܡܢ ܚܪܢ܂ ܒܬܪ ܚܕܥܣܪ̈ܐ ܫ̈ܢܝܢ ܕܐܙܕܒܢ ܝܘܣܦ ܠܡܨܪܝܢ܂ ܩܕܡ ܥܣܪ ܫ̈ܢܝܢ ܕܢܚܬ ܝܥܩܘܒ ܠܡܨܪܝܢ܂ ܒܕܪܐ ܪܒܝܥܝܐ ܡܝܬ܀

ܘܗܘܐ ܝܥܩܘܒ ܒܪ ܫܒܥܝܢ ܘܫܒܥ ܫ̈ܢܝܢ ܟܕ ܒܪܟܗ ܐܝܣܚܩ ܐܒܘܗܝ܂ ܘܒܪ ܬܡܢܐܝܢ ܘܐܪ̈ܒܥ ܫ̈ܢܝܢ ܢܣܒ ܠܠܝܐ ܘܠܪܚܝܠ ܒܢ̈ܬܗ ܕܠܒܢ܂ ܘܐܬܝܠܕܘ ܠܗ ܡܢ ܠܝܐ ܪܘܒܝܠ ܘܫܡܥܘܢ ܘܠܘܝ ܘܝܗܘܕܐ܂ ܘܐܝܣܟܪ ܘܙܒܘܠܘܢ܂ ܘܡܢ ܪܚܝܠ ܝܘܣܦ ܘܒܢܝܡܝܢ܂ ܘܡܢ ܒܠܗܐ ܐܡܬܗ ܕܪܚܝܠ܂ ܓܕ ܘܐܫܝܪ܂ ܘܡܢ ܙܠܦܐ ܐܡܬܗ ܕܠܝܐ܂ ܕܢ ܘܢܦܬܠܝ܂ ܗܠܝܢ ܒܢܘܗ̈ܝ ܕܝܥܩܘܒ ܬܪ̈ܥܣܪ܂ ܘܡܝܬ ܝܥܩܘܒ ܒܪ ܡܐܐ ܘܐܪ̈ܒܥܝܢ ܘܫܒܥ ܫ̈ܢܝܢ܂ ܒܬܪ ܫܒܥܣܪ̈ܐ ܫ̈ܢܝܢ ܕܢܚܬ ܠܡܨܪܝܢ܂ ܒܕܪܐ ܪܒܝܥܝܐ ܡܝܬ܀

ܡܢ ܐܕܡ ܥܕܡܐ ܕܥܠ ܢܘܚ ܠܩܒܘܬܐ܂ ܗܘܝܢ ܫ̈ܢܝܐ ܐܠܦ ܘܫܬܡܐܐ ܘܚܡܫܝܢ ܘܚܕܐ܂ ܐܝܟ ܡܕܡ ܕܒܣܦܪ ܬܘܠܕ̈ܬܐ ܟܬܝܒ܂ ܘܡܢ ܟܕ ܢܦܩ ܢܘܚ ܡܢ ܩܒܘܬܐ܂ ܥܕܡܐ ܠܙܒܢܐ ܕܐܩܝܡ ܐܠܗܐ ܩܝܡܐ ܥܡ ܐܒܪܗܡ܂ ܗܘܝܢ ܫ̈ܢܝܐ ܬܠܬܡܐܐ ܘܬܡܢܐܝܢ ܘܫܒܥ ܫ̈ܢܝܢ܂ ܐܝܟ ܡܕܡ ܕܒܣܦܪ ܬܘܠܕ̈ܬܐ ܟܬܝܒ܂ ܘܡܢ ܡܘܠܟܢܐ ܕܐܒܪܗܡ ܥܕܡܐ ܕܥܠ ܝܥܩܘܒ ܠܡܨܪܝܢ܂ ܗܘܝܢ ܡܐܬܝܢ ܘܚܡܫ ܫ̈ܢܝܢ܂ ܘܗܘܘ ܒ̈ܢܝ ܐܝܣܪܝܠ ܒܡܨܪܝܢ܂ ܡܐ̈ܬܝܢ ܘܥܣܪܝܢ ܘܚܡܫ ܫ̈ܢܝܢ܂ ܡܢ ܡܘܠܟܢܐ ܕܐܒܪܗܡ ܥܕܡܐ ܕܢܦܩ ܥܡܐ ܡܢ ܡܨܪܝܢ܂ ܐܪܒܥܡܐܐ ܘܬܠܬܝܢ ܫ̈ܢܝܢ܂ ܐܝܟ ܡܕܡ ܕܣܗܕ ܦܘܠܘܣ ܫܠܝܚܐ ܘܐܡܪ܂ ܕܕܝܬܩܐ ܕܡܫܪܐ/ܕܡܫܪܪܐ/ ܗܘܬ ܡܢ ܩܕܡ ܙܒܢܐ ܠܐܠܗܐ܂ ܢܡܘܣܐ ܗܘ ܕܗܘܐ ܡܢ ܒܬܪ ܐܪܒܥܡܐܐ ܘܬܠܬܝܢ ܫ̈ܢܝܢ܂ ܠܐ ܡܫܟܚ ܕܢܣܠܝܗ ܘܢܒܛܠ ܡܘܠܟܢܐ܂܂܂ ܡܢ ܐܕܡ ܥܕܡܐ ܠܡܡܘܠܐ ܗܘܝܢ ܫ̈ܢܝܢ ܐܠܦ ܘܫܬܡܐܐ ܘܚܡܫܝܢ ܘܚܕܐ܂ ܘܡܢ ܛܘܦܢܐ ܥܕܡܐ ܕܢܦܩ ܥܡܐ ܡܢ ܡܨܪܝܢ܂ ܗܘܝܢ ܫܢ̈ܝܐ ܬܡܢܡܐܐ ܘܫܒܥܣܪ̈ܐ܀

ܡܘܫܐ ܗܘܐ ܠܥܡܐ ܡܕܒܪܢܐ ܒܡܕܒܪܐ ܫ̈ܢܝܢ ܐܪ̈ܒܥܝܢ܂ ܘܝܫܘܥ ܒܪܢܘܢ ܗܘܐ ܡܕܒܪܢܐ ܠܥܡܐ ܫ̈ܢܝܢ ܥܣܪܝܢ ܘܚܡܫ܂ ܝܗܘܕܐ ܘܥܬܢܐܝܠ ܒܪ ܩܢܙ܂ ܗܘܘ ܡܕܒܪ̈ܢܐ ܠܥܡܐ ܫ̈ܢܝܢ ܐܪ̈ܒܥܝܢ ܘܬܡܢܐ܂ ܘܥܓܠܘܢ ܡܠܟܐ ܕܡܘܐܒ ܫܥܒܕ ܠܥܡܐ ܫ̈ܢܝܢ ܬܡܢܥܣܪ̈ܐ܂ ܐܗܘܪ ܗܘܐ ܡܕܒܪܢܐ ܠܥܡܐ ܫ̈ܢܝܢ ܬܡܢܐܝܢ܂ ܢܒܝܢ ܫܥܒܕ ܠܐܝܣܪܝܠ ܫ̈ܢܝܢ ܥܣܪܝܢ܂ ܕܒܘܪܐ ܘܒܪܩ ܗܘܘ ܡܕܒܪ̈ܢܐ ܠܥܡܐ ܫ̈ܢܝܢ ܐܪ̈ܒܥܝܢ܂ ܡܕܝ̈ܢܝܐ ܫܥܒܕܘ ܠܐܝܣܪܝܠ ܫ̈ܢܝܢ ܫܒܥ܂ ܓܕܥܘܢ ܗܘܐ ܡܕܒܪܢܐ ܠܥܡܐ ܫ̈ܢܝܢ ܐܪ̈ܒܥܝܢ܂ ܐܒܝܡܠܟ ܒܪ ܓܕܥܘܢ ܗܘܐ ܡܕܒܪܢܐ ܠܥܡܐ ܫ̈ܢܝܢ ܫܬܝܢ܂ ܬܘܠܥ ܒܪ ܦܘܐܐ ܗܘܐ ܡܕܒܪܢܐ ܠܥܡܐ ܫ̈ܢܝܢ ܥܣܪܝܢ ܘܬܠܬ܂ ܝܐܝܪ ܗܘܐ ܡܕܒܪܢܐ ܠܥܡܐ ܫ̈ܢܝܢ ܥܣܪܝܢ ܘܬܪ̈ܬܝܢ܂ ܦܠܫܬ̈ܝܐ ܘܥܡܘ̈ܢܝܐ ܫܥܒܕܘ ܠܐܝܣܪܝܠ ܫ̈ܢܝܢ ܬܡܢܥܣܪ̈ܐ܂ ܢܦܬܚ ܗܘܐ ܡܕܒܪܢܐ ܠܥܡܐ ܫ̈ܢܝܢ ܫܬ܂ ܐܒܨܢ ܗܘܐ ܡܕܒܪܢܐ ܠܥܡܐ ܫ̈ܢܝܢ ܫܒ̈ܥ܂ ܐܠܘܢ ܗܘܐ ܡܕܒܪܢܐ ܠܥܡܐ ܥܣܪ ܫ̈ܢܝܢ܂ ܥܟܪܢ ܗܘܐ ܡܕܒܪܢܐ ܠܥܡܐ ܫ̈ܢܝܢ ܬܡܢܐ܂ ܦܠܫ̈ܬܝܐ ܫܥܒܕܘ ܠܐܝܣܪܝܠ ܫ̈ܢܝܢ ܐܪ̈ܒܥܝܢ܂ ܫܡܫܘܢ ܗܘܐ ܡܕܒܪܢܐ ܠܥܡܐ ܫ̈ܢܝܢ ܥܣܪܝܢ܂ ܥܠܝ ܗܘܐ ܡܕܒܪܢܐ ܠܥܡܐ ܫ̈ܢܝܢ ܐܪ̈ܒܥܝܢ܂ ܡܢ ܒܬܪ ܥܠܝ ܗܘܬ ܩܒܘܬܐ ܒܝܬ ܐܒܝܢܕܒ܂ ܕܒܓܒܥܘܬ ܫ̈ܢܝܢ ܥܣܪܝܢ܂ ܫܡܘܐܝܠ ܗܘܐ ܡܕܒܪܢܐ ܠܥܡܐ ܫ̈ܢܝܢ ܬܠܬܝܢ܂ ܫܐܘܠ ܗܘܐ ܡܕܒܪܢܐ ܠܥܡܐ ܫ̈ܢܝܢ ܐܪ̈ܒܥܝܢ ܗܘܝܢ ܗܠܝܢ ܫ̈ܢܝܐ ܕܡܕܒܪ̈ܢܐ ܫܬܡܐܐ ܘܚܡܫܝܢ ܘܚܡܫ܂ ܒܪܡ ܕܝܢ ܒܣܦܪܐ ܕܡ̈ܠܟܐ ܗܟܢܐ ܟܬܝܒ܂ ܕܒܫܢܬ ܐܪ̈ܒܥܡܐܐ ܘܬܡܢܐܝܢ ܠܡܦܩܬܐ ܕܒ̈ܢܝ ܐܝܣܪܝܠ ܡܢ ܐܪܥܐ ܕܡܨܪܝܢ܂ ܥܕܡܐ ܠܫܢܬ ܐܪ̈ܒܥ ܕܡܠܟܘܬܗ ܕܫܠܝܡܘܢ܂ ܕܫܪܝ ܠܡܒܢܐ ܒܝܬܗ ܕܐܠܗܐ܂ ܗܟܢܐ ܐܬܚܫܒ ܫ̈ܢܝܐ܂ ܘܚܘܫܒܢܐ ܩܕܡܝܐ ܠܐܚܪܝܐ ܠܐ ܫܠܡ܀

ܐܡܠܟ ܕܘܝܕ ܫ̈ܢܝܢ ܐܪ̈ܒܥܝܢ܂ ܐܡܠܟ ܫܠܝܡܘܢ ܫ̈ܢܝܢ ܐܪ̈ܒܥܝܢ܂ ܐܡܠܟ ܪܚܒܥܡ ܫ̈ܢܝܢ ܫܒܥܣܪ̈ܐ܂ ܐܡܠܟ ܐܒܝܐ ܫܢ̈ܝܢ ܬܠܬ܂ ܐܡܠܟ ܐܣܐ ܫ̈ܢܝܢ ܐܪ̈ܒܥܝܢ ܘܚܕܐ܂ ܐܡܠܟ ܝܗܘܫܦܛ ܫ̈ܢܝܢ ܥܣܪܝܢ ܘܚܡܫ܂ ܐܡܠܟ ܝܗܘܪܡ ܫ̈ܢܝܢ ܬܡܢܐ܂ ܐܡܠܟ ܐܚܙܝܐ ܫܢܬܐ ܚܕܐ܂ ܐܡܠܟܬ ܥܬܠܝܐ ܫ̈ܢܝܢ ܫܬ܂ ܐܡܠܟ ܝܘܐܫ ܫܢ̈ܝܢ ܐܪ̈ܒܥܝܢ܂ ܐܡܠܟ ܐܡܘܨܝܐ ܫ̈ܢܝܢ ܥܣܪܝܢ ܘܬܠܬ܂ ܐܡܠܟ ܥܘܙܝܐ ܫ̈ܢܝܢ ܚܡܫܝܢ ܘܬܪ̈ܬܝܢ܂ ܐܡܠܟ ܝܘܬܡ ܫ̈ܢܝܢ ܫܬܥܣܪ̈ܐ܂ ܐܡܠܟ ܐܚܙ ܫܢ̈ܝܢ ܫܬܬܥܣܪܐ܂ ܐܡܠܟ ܚܙܩܝܐ ܫ̈ܢܝܢ ܥܣܪܝܢ ܘܬܫܥ܂ ܐܡܠܟ ܡܢܫܐ ܫ̈ܢܝܢ ܚܡܫܝܢ ܘܚܡܫ܂ ܐܡܠܟ ܐܡܘܢ ܫܢ̈ܝܢ ܬܪ̈ܬܝܢ܂ ܐܡܠܟ ܝܘܫܝܐ ܫ̈ܢܝܢ ܬܠܬܝܢ ܘܚܕܐ܂ ܐܡܠܟ ܝܗܘܐܚܙ ܝܪ̈ܚܐ ܬܠܬܐ܂ ܐܡܠܟ ܝܘܝܩܡ ܫ̈ܢܝܢ ܚܕܥܣܪ̈ܐ܂ ܐܡܠܟ ܝܘܝܟܝܢ ܝܘܡ̈ܝܢ ܡܐܐ܂ ܐܡܠܟ ܨܕܩܝܐ ܫ̈ܢܝܢ ܚܕܥܣܪ̈ܐ܂ ܗܠܝܢ ܗܘܝܢ ܫ̈ܢܝ ܡ̈ܠܟܐ ܐܪ̈ܒܥܡܐܐ ܘܚܡܫܝܢ ܘܚܡܫ ܫ̈ܢܝܢ܂ ܘܫܬܐ ܝܪ̈ܚܝܢ ܘܥܣܪܐ ܝܘܡܝܢ܂ ܒܫܢܬ ܬܠܬ ܕܡܠܟܘܬܗ ܕܝܘܝܩܝܡ܂ ܣܠܩ ܢܒܘܟܕܢܨܪ ܠܐܘܪܫܠܡ ܘܟܒܫ ܠܐܡܐ ܒܡܕܐܬܐ܂ ܘܝܬܒ ܐܝܣܪܝܠ ܒܐܘܪܫܠܡ ܟܕ ܟܒܝܫ ܒܡܕܐܬܐ܂ ܫ̈ܢܝܢ ܥܣܪܝܢ ܘܬܫܥ ܕܝܘܝܩܝܡ܂ ܘܚܕܥܣܪ̈ܐ ܕܨܕܩܝܐ܂ ܘܝܬܒܬ ܐܘܪܫܠܡ ܒܨܕܝܘܬܗ ܚܡܫܝܢ ܫ̈ܢܝܢ܂ ܫܒܥ ܫܒ̈ܐ ܕܫܢ̈ܝܐ ܘܐܬܢܝܚܬ ܐܪܥܐ ܒܫܒ̈ܝܗ܂ ܟܕ ܗܢܘܢ ܒܐܪܥܐ ܕܒܥܠܕܒܒ̈ܐ܂ ܥܠ ܕܠܐ ܐܫܒܬܬ ܒܫܒܝܗ̈ܘܢ ܟܕ ܗܢܘܢ ܒܓܘܗ܂ ܘܠܫܘܠܡ ܫܒܥܝܢ ܫ̈ܢܝܢ܂ ܐܥܒܪ ܟܘܪܫ ܦܪܣܝܐ ܩܠܐ ܒܡܠܟܘܬܗ܂ ܘܩܪܐ ܠܗܘܢ ܦܘܢܝܐ܂ ܘܡܢ ܒܬܪ ܦܘܢܝܐ܂ ܝܬܒ ܐܝܣܪܝܠ ܒܐܘܪܫܠܡ ܫܒܥܝܢ ܫܒܘ̈ܥܝܢ܂ ܐܝܟ ܕܐܬܢܒܝ ܕܢܝܐܝܠ܂ ܕܗܘܝܢ ܗܠܝܢ ܫܒܘ̈ܥܐ ܐܪ̈ܒܥܡܐܐ ܘܬܫܥܝܢ ܫ̈ܢܝܢ܂ ܘܡܢ ܒܬܪ ܩܛܠܗ ܕܡܠܟܐ ܡܫܝܚܐ ܚܪܒܬ ܐܘܪܫܠܡ܂ ܕܬܘܒ ܠܐ ܝܬܒܐ ܠܥܠܡ܂ ܘܥܕܡܐ ܠܓܡܘܪܝܐ ܕܦܣܝ̈ܩܬܐ܂ ܝܬܒܬ ܥܠ ܚܒܠܐ܂ ܘܐܫܬܩܠܬ ܛܘܛܝܬܐ ܡܢ ܣܓܘܠܐ܂ ܘܐܬܝܗܒ ܠܗ ܣܓܘܠܐ ܠܚܒܠܐ܂ ܘܐܣܬܪܩ ܥܡܐ ܡܢ ܛܝܒܘܬܐ܀

ܘܡܢ ܝܫܘܥ ܪܕܬ ܒܘܪܟܬܐ ܠܒܝܬ ܥܡ̈ܡܐ܂ ܐܡܪ ܠܗܘܢ ܓܝܪ ܠܝܗܘܕ̈ܝܐ܂ ܕܬܫܬܩܠ ܡܢܟܘܢ ܡܠܟܘܬܐ ܕܐܠܗܐ܂ ܘܬܬܝܗܒ ܠܥܡܐ ܕܝܗܒ ܦܐܪ̈ܐ܂ ܘܠܢ ܐܡܪ ܕܥܡܟܘܢ ܐܢܐ ܥܕܡܐ ܠܫܘܠܡܗ ܕܥܠܡܐ܂ ܘܬܘܒ ܐܡܪ܂ ܕܐܢܬܘܢ ܒܝ ܐܢܬܘܢ܂ ܘܐܢܐ ܒܟܘܢ ܐܢܐ܂ ܘܫܠܝܚܐ ܣܗܕ܂ ܕܐܢ ܐܢܫ ܡܢܟܘܢ ܠܝܬ ܒܗ ܪܘܚܐ ܕܐܠܗܐ܂ ܗܢܐ ܠܐ ܗܘܐ ܕܝܠܗ܂ ܘܬܘܒ ܐܡܪ ܕܗܝܟܠܗ ܐܢܬܘܢ ܕܐܠܗܐ܂ ܘܪܘܚܗ ܕܡܫܝܚܐ ܥܡܪܐ ܒܟܘܢ܂ ܘܢܒܝܐ ܐܡܪ ܕܐܥܡܪ ܒܗܘܢ ܘܐܗܠܟ ܒܗܘܢ܂ ܘܠܒܒܢ ܒܢܦܫܗ܂ ܕܠܐ ܢܕܚܠ ܡܢ ܢܣܝܘ̈ܢܐ ܕܐܬܝܢ ܥܠܝܢ܂ ܘܐܡܪ ܠܢ܂ ܕܐܢ ܡܠܬܝ ܫܡܥܘ ܘܢܛܪܘ ܘܐܦ ܕܝܠܟܘܢ ܢܛܪܝܢ܂ ܘܐܢ ܠܝ ܪܕܦܘ ܘܐܦ ܠܟܘܢ ܢܪܕܦܘܢ܂ ܘܬܘܒ ܐܡܪ ܠܢ܂ ܕܠܐ ܗܘܝܬܘܢ ܡܢ ܥܠܡܐ܂ ܐܝܟ ܕܐܢܐ ܠܐ ܗܘܝܬ ܡܢܗ܂ ܘܐܡܪ ܕܐܠܘ ܡܢ ܥܠܡܐ ܗܘܝܬܘܢ ܥܠܡܐ ܠܕܝܠܗ ܪܚܡ ܗܘܐ܂ ܡܟܝܠ ܕܗܠܝܢ ܦܘܩ̈ܕܢܐ ܩܒܠܢ ܡܢ ܝܫܘܥ ܡܚܝܢܢ܂ ܠܐ ܡܫܟܚܝܢܢ ܕܠܒܪ ܡܢ ܗ̈ܠܟܬܗ ܕܗܠܟ ܒܗܝܢ ܢܗܠܟ܂ ܐܢ ܠܡܫܝܚܐ ܪܕܦܘ ܐܦ ܠܢ܂ ܐܢ ܠܡܫܝܚܐ ܣܢܘ ܐܦ ܠܢ܂ ܐܢ ܠܡܫܝܚܐ ܐܣܪܘ ܐܦ ܠܢ܂ ܐܢ ܠܡܫܝܚܐ ܡܚܘ ܥܠ ܦܟܘܗ̈ܝ ܐܦ ܠܢ܂ ܐܢ ܡܫܝܚܐ ܚܫ ܐܦ ܚܢܢ܀

ܪܒܐ ܗܝ ܓܝܪ ܡܘܗܒܬܗ ܕܛܒܐ ܕܠܘܬܢ܂ ܟܕ ܠܐ ܐܠܝܨ ܒܚܛܗ̈ܝܢ ܨܒܐ ܕܢܙܕܕܩ܂ ܘܟܕ ܠܐ ܡܬܥܕܪ ܒܥ̈ܒܕܝܢ ܫܦܝܪ̈ܐ܂ ܡܙܗܪ ܠܢ ܕܢܫܦܪ ܩܕܡܘܗܝ܂ ܟܕ ܠܐ ܨܒܝܢܢ ܕܢܫܐܠ ܡܢܗ ܪܓܙ ܥܠܝܢ܂ ܩܪܐ ܠܢ ܒܟܠ ܥܕܢ ܕܫܐܠܘ ܘܣܒܘ܂ ܘܟܕ ܬܒܥܘܢ ܬܫܟܚܘܢ܂ ܥܘܬܪܗ ܓܝܪ ܡܣܒܥ ܟܕ ܡܣܬܢܩ܂ ܠܝܬ ܓܝܪ ܐܢܫ ܕܐܡܪ ܟܕܘ ܫܩܠܬ܂ ܟܕ ܢܣܒ ܡܢ ܓܙܗ ܫܒܝܚܐ܂ ܨܒܐ ܒܐܝܠܝܢ ܕܫܐܠܝܢ ܠܗ܂ ܩܪܐ ܠܢ ܒܟܠܥܕܢ ܕܫܐܠܘ ܘܣܒܘ܂ ܘܟܕ ܬܒܥܘܢ ܬܫܟܚܘܢ܂ ܘܒܐܝܠܝܢ ܕܡܚܒܨܝܢ ܠܡܣܒ ܡܢܗ܂ ܕܛܥܡ ܠܗ ܠܥܘܬܪܗ ܬܘܒ ܣܢܝܩ ܠܡܣܒ ܡܢܗ܂ ܡܢܘ ܓܝܪ ܐܟܘܬܗ ܕܐܡܪ ܕܫܐܠܘ ܘܣܒܘ܂ ܘܪܓܙ ܥܠܝܢ ܟܕ ܠܐ ܢܫܐܠ ܡܢܗ܀

ܘܐܦ ܟܕ ܠܐ ܫܐܠܢܝܗܝ ܫܕܪ ܠܢ ܡܘܗܒܬܗ ܕܠܘܬܢ ܡܢ ܡܬܘܡ ܠܐ ܫܟܝܚܐ ܗܘܬ܂ ܫܕܪ ܠܡܫܝܚܐ ܐܝܟ ܒܪ ܐܢܫܐ ܕܢܓܚܟ ܥܠ ܒܝܫܐ ܘܚ̈ܝܠܘܗܝ܂ ܘܠܡܪܕܦ ܡܢ ܠܘܬܢ ܚܝܠܐ ܚܝܒܐ܂ ܫܕܪ ܙܟܝܐ ܠܘܬܢ ܕܢܬܕܝܢ ܘܢܬܚܝܒ܂ ܕܢܙܟܘܢ ܚܝܒ̈ܐ ܒܕܝܢܗ ܙܟܝܐ܂ ܫܕܪ ܠܚܝܠܬܢܐ ܒܕܡܘܬ ܟܪܝܗܘܬܢ ܕܢܚܝܠ ܡܚܝܠܘܬܢ ܥܠ ܚܝܠܗ ܕܒܝܫܐ܂ ܠܒܫ ܦܓܪܐ ܕܡܢ ܥܦܪܐ ܘܢܓܕܗ ܠܟܝܢܗ܂ ܘܛܡܪ ܒܢ ܡܠܚܐ ܡܕܝܒܬ ܬܡܣܘܬܐ܂ ܕܟܕ ܢܨܒܐ ܚܘܝܐ ܠܡܩܪܒ ܠܡܐܟܠܗ܂ ܢܓܥܨ ܠܗ ܡܢ ܡܠܚܐ ܕܠܐ ܡܫܟܚ ܠܡܐܟܠܗ܂ ܫܕܪ ܙܟܝܐ ܠܒܪܗ ܠܘܬܢ ܕܢܡܘܬ ܐܝܟ ܡܘܬܢ܂ ܕܢܒܗܬ ܒܗ ܡܘܬܐ܂ ܪܒܐ ܗܝ ܡܘܗܒܬܗ ܕܛܒܐ ܕܝܗܒ ܠܙܥܘܪ̈ܐ܂ ܕܡܝܬܪ ܡܢ ܒܪܗ܂ ܡܢܐ ܘܠܐ ܗܘܐ ܠܡܬܠ ܠܢ܂ ܟܕ ܕܝܬܝܪ ܡܢ ܕܗܫܐ ܚ̈ܛܝܝܢ ܗܘܝܢ܂ ܗܕܐ ܡܘܗܒܬܐ ܫܕܪ ܠܘܬܢ܂ ܟܕ ܢܙܕܕܩ܂ ܡܢܐ ܢܬܠ ܠܢ ܐܠܐ ܚܝ̈ܐ ܥܡ ܕܐܬܐ ܠܘܬܢ܂ ܡܢ ܕܥܠ ܒܪܗ ܠܐ ܚܣ ܕܢܫܕܪ ܠܨܥܪܐ܀

ܬܡܝܗܐ ܗܝ ܘܪܒܐ ܡܘܗܒܬܗ ܕܠܘܬܢ܂ ܢܦܩ ܓܝܪ ܡܠܟܐ ܡܢ ܐܬܪܗ ܠܦܘܪܣܐ ܕܐܣܝܘܬܢ ܘܐܬܕܒܪ ܒܗ̈ܠܟܬܐ ܕܦܓܪܐ ܡܚܝܠܐ ܒܝܠܕܐ ܐܟܘܬܢ܂ ܘܒܨܥܪܐ ܝܬܝܪ ܡܢܢ܂ ܗܠܝܢ ܟܠܗܝܢ ܣܝܒܪ ܚܠܦܝܢ ܘܪܗܒܘܢܐ ܕܚ̈ܝܝܢ ܩܒܠܢ ܡܘܗܒܬܗ܂ ܐܢܐ ܗܕܐ ܐܝܬ ܠܝ ܠܡܐܡܪ܂ ܕܠܝܬ ܗܘܐ ܠܐܠܗܐ ܡܘܗܒܬܐ ܕܢܫܕܪ ܠܘܬܢ ܕܪܒܐ ܗܝ ܡܢ ܗܕܐ܂ ܘܟܕ ܐܬܐ ܢܣܒ ܡܢܢ ܪܗܒܘܢܐ ܘܐܙܠ ܠܐܬܪܗ܂ ܘܐܡܪ ܠܢ ܕܐܢܬܘܢ ܒܝ ܐܢܬܘܢ܂ ܘܐܢܐ ܒܟܘܢ ܐܢܐ܂ ܘܫܠܝܚܐ ܐܡܪ܂ ܕܐܣܩܢ ܘܐܘܬܒܢ ܥܡܗ ܒܫܡܝܐ܂ ܪܫܐ ܕܩܝܡܬܢ ܦܓܪܐ ܕܠܒܫ ܡܢܢ܂ ܚܪܪܗ ܡܢ ܫܘܥܒܕܐ ܘܥܠܝܗ ܠܘܬܗ܂ ܘܐܫܪ ܠܢ ܡܘܠܟܢܘ̈ܗܝ ܕܥܡܗ ܢܗܘܐ܂ ܦܫܝܩܐܝܬ ܐܡܪ ܕܐܬܪ ܕܐܢܐ ܐܦ ܐܢܬܘܢ ܬܗܘܘܢ܂ ܡܟܝܠ ܢܚܕܐ ܒܗܡܝܪܐ ܕܕܒܝܪ ܡܢܢ܂ ܘܝܬܒ ܒܫܘܒܚܐ ܥܡ ܡܠܟܐ ܫܒܝܚܐ܀

ܪܒܐ ܗܝ ܡܘܗܒܬܗ ܕܛܒܐ ܕܠܘܬܢ܂ ܕܕܒܝܪ ܡܢܢ ܗܡܝܪܐ ܡܢ ܡܠܟܐ ܕܐܟܘܬܗ ܘܥܒܕܗ ܠܗ ܪܚܡܐ ܘܢܛܪ ܬܚܘܡܐ܂ ܗܢܘ ܒܪ ܐܕܡ ܦܓܪܐ ܕܡܢ ܡܪܝܡ ܕܕܒܝܪ ܡܢ ܠܘܬܢ ܠܐܬܪܐ ܕܚ̈ܝܐ܂ ܘܗܘܐ ܚܝܠܬܢܐ ܦܓܪܐ ܡܚܝܠܐ ܘܩܒܠ ܬܫܒܘܚܬܐ ܕܪܒܐ ܘܬܡܝܗܐ ܡܢ ܗܝ ܕܫܠܚ ܐܕܡ ܒܫܦܠܘܬܗ܀

ܚܕܝܢܢ ܒܟ ܝܠܕܐ ܪܚܝܡܐ ܕܕܪܫܬ ܠܢ ܐܘܪܚܐ ܠܐܬܪ ܨܒܝܢܢ܂ ܡܘܕܝܢܢ ܠܟ ܐܣܝܐ ܕܟܐ̈ܒܝܢ܂ ܕܛܡܪܬ ܒܢ ܪܘܚܟ ܣܡܐ ܠܦܓܪ̈ܝܢ܂ ܣܓܕܝܢܢ ܠܟ ܠܐܒܘܟ ܪܡܐ ܕܐܪܝܡܢ ܒܟ ܘܩܪܢ ܠܘܬܗ܂ ܡܘܕܝܢܢ ܒܟ ܠܪ̈ܚܡܐ ܕܫܠܚܘܟ܂ ܕܨܒܐ ܒܢ ܕܢܚܐ ܒܡܘܬܗ ܕܝܚܝܕܝܗ܂ ܡܫܒܚܝܢܢ ܒܟ ܠܐܝܬܝܐ ܕܢܦܫܗ܂ ܕܦܪܫܟ ܡܢ ܐܝܬܘܬܗ ܘܫܕܪܟ ܠܘܬܢ܂ ܡܪܡܪܡܝܢܢ ܠܟ ܝܬܒ ܒܩܘܕܫܗ ܠܗ ܦܓܪ̈ܝܢ ܒܪܗܒܘܢܐ ܕܩܒܠܢ܂ ܢܘܕܐ ܒܦܘܡܢ ܐܝܟ ܡܐ ܕܣܦܩ ܠܚܝܠܐ ܕܐܬܐ ܕܢܚܐ ܡܚܝ̈ܠܐ܂ ܢܬܥܝܪ ܟܠ`ܝܘܡ ܠܡܐܡܪ ܕܫܒܘܚܬܐ ܒܝܕ ܒܪܐ ܚܒܝܒܝ ܠܐܒܐ ܕܫܠܚܗ܂ ܢܚܕܐ ܒܡܘܗܒܬܗ ܕܐܦ ܗܘ ܢܚܕܐ ܒܢ܂ ܢܘܕܐ ܒܗ ܠܐܒܘܗܝ ܕܐܦ ܗܘ ܢܘܕܐ ܒܢ܂ ܢܫܐܠ ܡܘܗܒܬܐ ܡܢ ܓܙܐ ܣܢܝܩܐ܂ ܕܗܕܐ ܗܝ ܣܢܝܩܘܬܗ ܕܢܬܠ ܚܝ̈ܐ ܠܣܢܝܩ̈ܐ܂ ܪܒܐ ܗܝ ܓܝܪ ܘܫܒܝܚܐ ܡܘܗܒܬܗ ܕܠܘܬܢ܂ ܕܡܢ ܒܨܝܪ̈ܐ ܫܐܠ ܬܫܒܘܚܬܐ܂ ܕܐܦ ܟܕ ܠܐ ܢܫܒܚܝܘܗܝ ܗܘ ܡܫܒܚ ܗܘ܂ ܘܟܕ ܠܐ ܢܪܡܪܡܝܘܗܝ ܗܘ ܡܪܡܪܡ ܗܘ܂ ܣܢܝܩ ܓܝܪ ܠܡܬܠ ܘܨܒܐ ܕܢܫܐܠ܂ ܕܒܝܕ ܫܐ̈ܠܬܢ ܢܬܠ ܕܐܫܬܘܕܝ ܚܝ̈ܐ܂ ܘܢܚܐ ܥܡ ܒܪܗ ܝܚܝܕܝܗ܂ ܠܗ ܐܝܬ ܠܡܬܠ܂ ܘܠܢ ܐܝܬ ܠܡܫܐܠ܂ ܠܗ ܐܝܬ ܚܝ̈ܐ ܘܠܢ ܕܢܥܪܘܩ ܡܢ ܡܘܬܐ܂ ܠܗ ܐܝܬ ܚܝ̈ܐ܂ ܘܠܢ ܩܪܐ ܕܢܣܒ܂ ܠܗ ܐܝܬ ܛܝܒܘܬܐ ܘܒܐܝܕ̈ܝܢ ܣܝܡܐ ܕܢܥܪܘܩ ܡܢ ܒܝܫܐ܂ ܠܗ ܐܝܬ ܚܝ̈ܐ ܘܢܘܗܪܐ ܠܘܬܗ܂ ܘܠܢ ܙܗܪ ܠܡܥܪܩ ܡܢ ܚܫܟܗ ܕܡܘܬܐ܂ ܠܝܬ ܓܝܪ ܕܩܐܡ ܥܠ ܣܟܐ ܕܓܙܘܗ̈ܝ܂ ܘܠܝܬ ܕܡܣܬܟܠ ܥܡܝܩܘܬ ܚܟܡܬܗ܀

ܐܘܢ ܛܒܐ ܘܒܣܝܡܐ܂ ܦܬܚ ܬܪܥܐ ܠܫܐ̈ܠܬܢ ܘܨܘܬ ܨܠܘܬܢ܂ ܘܫܡܥ ܒܥܘܬܢ܂ ܐܝܟ ܕܐܠܦܢ ܚܒܝܒܟ ܕܗܘܝܬܘܢ ܡܨܠܝܢ ܘܠܐ ܬܡܐܢ ܠܟܘܢ܂ ܘܬܘܒ ܬܢܐ ܘܙܗܪܢ ܕܨܠܘ ܕܠܐ ܬܥܠܘܢ ܠܢܣܝܘܢܐ܂ ܘܬܘܒ ܟܬܒ ܠܢ ܕܢܕܥ ܒܣܝܡܘܬܟ܂ ܘܐܡܪ ܕܠܝܬ ܡܕܡ ܕܬܫܐܠܘܢ ܠܐܠܗܐ ܒܨܠܘܬܟܘܢ ܕܠܐ ܢܬܠ ܠܟܘܢ܂ ܘܐܦ ܗܫܐ ܠܐ ܗܘܐ ܡܛܠ ܥܒ̈ܕܝܢ ܫܦܝܪ̈ܐ ܐܘ ܥܠ ܙܕܝܩܘܬܢ ܬܟܝܠܝܢܢ ܘܡܨܠܝܢܢ ܩܕܡܝܟ܂ ܐܠܐ ܡܛܠ ܡܪܚܡܢܘܬܟ ܕܛܒܐ ܐܝܬܝܟ ܘܒܣܝܡܐ܂ ܚܢܢ ܓܝܪ ܐܝܟ ܚܝܒ̈ܐ ܡܨܠܝܢܢ ܩܕܡܝܟ܂ ܘܐܢܬ ܐܝܟ ܛܒܐ ܘܒܣܝܡܐ ܫܡܥ ܨܠܘܬܢ܂ ܚܢܢ ܐܝܟ ܡܚ̈ܝܠܐ ܡܨܠܝܢܢ ܩܕܡܝܟ܂ ܘܐܢܬ ܚܝܠܬܢܐ ܠܐ ܬܟܠܐ ܫܐ̈ܠܬܢ܂ ܐܝ̈ܕܝܢ ܦܫܝ̈ܛܢ ܘܠܒܢ ܓܝܪ ܠܘܬܟ ܠܡܫܐܠ ܘܠܡܒܥܐ ܡܢܟ ܛܝܒܘܬܐ܂ ܪܘܙ ܪܥܝܢܢ ܟܕ ܬܫܡܥ ܒܥܘܬܢ܃ ܢܬܥܝܪܘܢ ܪ̈ܓܫܝܢ ܠܡܫܐܠ ܬܟܝܠܐܝܬ܂ ܐܕ̈ܢܝܢ ܦܬܚ ܠܨܠܘܬܐ ܕܦܬܓܡ̈ܝܟ ܘܥܝ̈ܢܝ ܠܒܢ ܢܬܡܬܚܢ ܠܘܬܟ ܠܡܪܘܡܐ܂ ܫܡܥ ܨܠܘܬܢ܂ ܘܩܒܠ ܒܥܘܬܢ܂ ܥܒܕ ܨܒܝܢܢ܂ ܨܘܬ ܘܫܡܥ ܒܩܠܢ܂ ܚܙܝ ܫܘܥܒܕܢ܂ ܘܚܘܣ ܥܠ ܥܡܟ ܒܙܒܢܐ ܕܐܘܠܨܢܗ܂ ܘܣܪܗܒ ܚܢܢܟ܃ ܘܚܘܐ ܓܢܒܪܘܬܟ܂ ܠܐ ܬܪܕܝܢ ܒܪܘܓܙܟ܂ ܘܠܐ ܬܟܣܢ ܒܚܡܬܟ܂ ܥܡܟ ܚܢܢ ܓܒܝܠܬܐ ܕܐܝ̈ܕܝܟ܂ ܥܒܕܐ ܕܨܒ̈ܥܬܟ܂ ܒܨܠܡܟ ܒܪܝܬܢ܂ ܒܨܘܪܬܟ ܥܒܕܬܢ܂ ܒܐܝ̈ܕܝܟ ܓܒܠܬܢ܂ ܡܢ ܪܘܚܟ ܒܢ܂ ܠܐ ܬܪܓܙ ܠܥܠܡ܂ ܘܠܐ ܬܩܘܡ ܒܪܘܚܩܐ܂ ܟܕ ܛܥܝܢ ܗܘܝܢ ܦܪܩܬܢ܂ ܟܕ ܡܒܕܪܝܢ ܗܘܝܢ ܟܢܫܬܢ܂ ܟܕ ܚܫܘܟܝܢ ܗܘܝܢ ܐܢܗܪܬܢ܂ ܟܕ ܚܒܝܫܝܢ ܗܘܝܢ ܐܦܩܬܢ܂ ܟܕ ܫܒܝܢ ܗܘܝܢ ܐܥܕܝܬܢ܂ ܟܕ ܐܣܝܪܝܢ ܗܘܝܢ ܫܪܝܬܢ܂ ܡܢ ܓܘܒܐ ܚܒܝܫܐ܂ ܟܕ ܠܐ ܗܘܐ ܠܢ ܣܒܪܐ܂ ܩܪܝܬܢ ܠܣܒܪܟ܂ ܟܕ ܚܛܝܝܢ ܗܘܝܢ ܨܒܝܬ ܒܢ ܕܢܙܕܕܩ܂ ܟܕ ܠܐ ܫܐܠܢܟ ܫܕܪܬ ܠܢ ܝܚܝܕܝܟ܂ ܒܕܡܗ ܦܪܩܬܢ܂ ܒܐܝܕܗ ܝܕܥܢܟ܂ ܫܕܪܬܝܗܝ ܠܘܬܢ ܟܕ ܠܐ ܩܪܝܢܟ܂ ܐܦܓܥܬܝܗܝ ܒܥܘܠܢ ܟܕ ܠܐ ܫܐܠܢܟ܂ ܐܚܬܬܝܗܝ ܠܫܝܘܠ ܟܕ ܠܐ ܐܠܨܢܟ܂ ܡܟܟܬܝܗܝ ܚܠܦܝܢ ܟܕ ܚܢܢ ܡܪ̈ܓܙܢܝܟ܂ ܦܪܩܬܢ ܒܚܫܗ܂ ܟܕ ܪܒ ܥܘܠܢ ܩܕܡܝܟ܂ ܘܐܦ ܗܫܐ ܟܕ ܒܥܝܢܢ܂ ܘܟܕ ܣܓܕܝܢܢ܂ ܘܟܕ ܡܘܕܝܢܢ܂ ܘܟܕ ܡܫܒܚܝܢܢ ܠܪ̈ܚܡܝܟ ܒܐܝܕܗ܂ ܫܡܥ ܨܠܘܬܢ܂ ܩܒܠ ܒܥܘܬܢ܂ ܚܙܝ ܚܣܕܢ܂ ܘܨܘܬ ܡܘܟܟܢ܂ ܬܪܥܡ ܢܦܫܟ ܥܠ ܥܡܟ ܒܙܝܙܐ܂ ܥܠ ܒܝܬܟ ܕܚܪܒ܂ ܥܠ ܡܕܒ̈ܚܝܟ ܕܣܚܝ̈ܦܝܢ܂ ܥܠ ܟܗ̈ܢܝܟ ܕܚܪ̈ܝܒܝܢ܂ ܥܠ ܩܝܡܟ ܕܪܕܝܦ܂ ܥܠ ܟܬܒ̈ܝܟ ܕܚܬ̈ܝܡܝܢ܂ ܥܠ ܡܒܕܪܘܬܢ܂ ܘܥܠ ܒܙܝܙܘܬܢ܂ ܣܓܝܬ ܒܗܬܬܢ܂ ܐܬܒܕܪ ܥܡܢ܂ ܐܬܐܫܕ ܕܡܢ܂ ܡܦܪܣܝ ܩܝܡܢ܂ ܚܘܣ ܥܠ ܡܘܟܟܢ ܘܚܣܕܢ ܘܒܗܬܬܢ܀

ܡܢ ܡܢ ܢܒܥܐ ܕܢܫܡܥ ܨܠܘܬܢ܂ ܠܘܬ ܡܢ ܢܐܙܠ܂ ܕܗܐ ܕܝܠܟ ܚܢܢ܂ ܪܕܝܬܢ ܒܪܘܓܙܟ܂ ܩܢܝܢ ܒܪ̈ܚܡܝܟ܂ ܥܩܬ ܠܢ܂ ܠܐ ܬܗܡܐ܂ ܟܕ ܬܩܛܥ ܠܢ܂ ܠܐ ܬܓܪ ܪܘܚܟ ܥܠ ܡܘܟܟܢ ܘܚܣܕܢ܂ ܐܝܟ ܕܫܐܠ ܢܒܝܟ ܟܕ ܐܠܝܨ ܐܟܘܬܢ ܘܐܡܪ܂ ܕܠܐ ܒܢܓܝܪܘܬ ܪܘܚܟ ܬܕܒܪܢܝ܂ ܫܡܥ ܨܠܘܬܢ ܐܝܟ ܕܡܘܫܐ ܪܚܡܟ܂ ܘܢܬܦܪܥܘܢ ܒܥܠܕܒܒ̈ܐ ܐܝܟ ܦܪܥܘܢ ܐܠܘܨܐ܂ ܨܘܬ ܒܥܘܬܢ܂ ܐܝܟ ܕܫܡܥܬ ܠܝܫܘܥ܂ ܘܐܬܚܪܒ ܥܡܠܝܩ܂ ܘܐܬܥܛܝ ܕܘܟܪܢܗ܂ ܐܢܬ ܗܘ ܐܠܗܐ ܕܩܕܡ̈ܝܐ ܘܕܐܚܪ̈ܝܐ܂ ܫܡܥܬ ܠܡܘܫܐ ܘܛܒܥܬ ܠܦܪܥܘܢ܂ ܘܥܢܝܬ ܠܐܗܪܘܢ ܘܐܬܟܠܝ ܡܘܬܢܐ܂ ܐܗܦܟܬ ܪܘܓܙܟ ܒܛܢܢܗ ܕܦܝܢܚܣ܂ ܘܥܕܪܬ ܠܝܫܘܥ ܒܪܢܘܢ ܘܒܗܬܘ ܒܥܠܕܒܒ̈ܘܗܝ܂ ܘܥܢܝܬ ܠܫܡܫܘܢ ܒܙܒܢ ܡܘܟܟܗ܂ ܘܐܬܢܩܡܬ ܠܗ ܒܦܠܫܬܝ̈ܐ ܡܪ̈ܓܙܢܐ܂ ܬܒܥܬܝܗܝ ܠܕܘܝܕ ܡܢ ܫܐܘܠ ܪܕܘܦܗ܂ ܘܥܒܕܬ ܠܗ ܕܝܢܐ ܒܐܒܫܠܘܡ ܕܠܘܚܗ܂ ܚܣܝ ܩܕܡܝܟ ܫܡܘܐܝܠ ܥܠ ܥܡܗ܂ ܘܚܘܝܬ ܪܒܘܬܟ ܥܠ ܕܐܣܠܝܘ ܡܠܟܘܬܟ܂ ܥܒܕܬ ܕܝܢܐ ܠܐܠܝܐ ܪܕܝܦܐ܂ ܘܐܬܚܪܒܘ ܒܨܠܘܬܗ ܢܒܝܘܗ̈ܝ ܕܒܥܠܐ܂ ܐܬܢܛܪ ܡܝܟܐ ܒܪ̈ܚܡܝܟ ܣܓܝܐܐ̈܂ ܘܢܦܠ ܪܕܘܦܗ ܘܡܝܬ ܒܩܪܒܐ܂ ܘܚܘܝܬ ܬܕܡܪ̈ܬܟ ܒܐܠܘܨܘ̈ܗܝ ܕܐܠܝܫܥ܂ ܟܕ ܥܠܘ ܠܫܡܪܝܢ܂ ܘܝܕܥܘ ܪܒܘܬܟ܂ ܥܢܝܬ ܠܚܙܩܝܐ ܟܕ ܚܒܝܫ ܒܐܘܠܨܢܐ܂ ܘܚܘܝܬ ܓܢܒܪܘܬܟ ܒܣܢܚܝܪܝܒ ܘܚܝܠܗ܂ ܫܡܥܬ ܠܐܣܐ ܘܥܕܪܬ ܠܝܘܫܦܛ܂ ܘܒܥܓܠ ܐܬܢܩܡܬ ܒܟܘܠܗܘܢ ܐܠܘܨܘܗ̈ܝ܂ ܫܡܥܬܝܗܝ ܠܝܘܢܢ ܡܢ ܥܘܡ̈ܩܘܗܝ ܕܝܡܐ܂ ܘܡܢ ܡܥܘܗ̈ܝ ܕܢܘܢܐ܂ ܘܡܢ ܓܠܠܐ̈ ܕܚܕܪ̈ܘܗܝ܂ ܥܢܝܬ ܠܕܢܝܐܝܠ ܟܕ ܫܕܐ ܒܓܘܒܐ܂ ܘܦܨܝܬܝܗܝ ܡܢ ܦܘܡܐ ܕܐܪ̈ܝܘܬܐ܂ ܥܕܪܬ ܠܚܢܢܝܐ ܘܠܐܚܘܗ̈ܝ ܒܓܘ ܐܬܘܢܐ ܕܢܘܪܐ܂ ܘܐܘܩܕܬ ܫܠܗܒܝܬܐ ܠܐܟ̈ܠܝ ܩܪ̈ܨܐ܂ ܥܢܝܬ ܠܡܘܪܕܟܝ ܘܠܐܣܬܝܪ ܒܐܘܠܨܢܗܘܢ܂ ܘܦܪܩܬܝܗܝ ܠܥܡܟ܂ ܘܒܗܬ ܗܡܢ ܪܕܘܦܐ܂ ܐܣܩܬ ܠܐܪܡܝܐ ܡܢ ܓܘܒܐ ܕܣܝܢܐ܂ ܘܝܗܒܬܝܗܝ ܒܪ̈ܚܡܝܢ ܩܕܡ ܡܠܟܐ ܕܒܒܠ܀

ܚܘܣ ܡܪܝܐ ܥܠ ܫܘܥܒܕܗ ܕܥܡܟ܂ ܚܘܣ ܡܪܝܐ ܥܠ ܒܥܘܬܢ ܘܫܡܥ ܨܠܘܬܢ܂ ܚܪܒ ܒܝܬ ܡܩܕܫܢ܂ ܘܒܝܬ ܣܓܕܬܢ ܨܕܐ܂ ܚܪ̈ܝܒܝܢ ܟܗ̈ܢܝܢ܂ ܘܪܫܢ ܡܚܦܝ܂ ܒ̈ܬܘܠܬܢ ܡܡܟܟܢ܂ ܘܩܝܡܢ ܡܒܕܪ܂ ܚܘܣ ܡܪܝܐ ܚܘܣ ܥܠ ܡܣܟ̈ܢܐ ܘܐܟܣܢ̈ܝܐ ܘܡܛܪ̈ܦܐ ܕܠܝܬ ܠܗܘܢ ܢܝܚܐ ܘܒܝܬ ܡܣܡܟ ܡܣܡܟ ܪܫܐ܂ ܨܕܝ ܐܘܪ̈ܚܬܐ܂ ܘܒܛܠܘ ܫܒ̈ܝܠܐ܂ ܚܫܟ ܥܝ̈ܢܝܢ ܘܠܒܢ ܗܐ ܕܘܐ܂ ܫܡܥ ܨܠܘܬܢ ܘܩܒܠ ܒܥܘܬܢ܂ ܐܢ ܚܢܢ ܐܥܠܝܢ ܘܡܪܡܪܢܟ܂ ܐܢܬ ܚܘܣ ܡܛܠ ܫܡܟ ܪܒܐ܂ ܠܝܬ ܠܢ ܬܘܟܠܢܐ ܐܚܪܢܐ܂ ܘܠܐ ܣܒܪܐ ܘܠܐ ܢܝܚܐ ܠܒܪ ܡܢܟ܂ ܕܝܠܟ ܐܢܘܢ ܓܝܪ ܫܡܝܐ ܘܕܝܠܟ ܗܝ ܐܪܥܐ܂ ܕܝܠܟ ܗܘ ܐܝܡܡܐ ܘܕܝܠܟ ܗܘ ܠܠܝܐ܂ ܫܡܫܐ ܘܣܗܪܐ ܐܢܬ ܒܪܝܬ ܐܢܘܢ܂ ܠܟ ܗܘ ܡܫܒܚܝܢ ܝܡܡ̈ܐ ܒܓܠܠܝܗ̈ܘܢ܂ ܕܩܒܥܬ ܐܢܘܢ ܒܬܚܘ̈ܡܐ܂ ܘܦܘܩܕܢܟ ܥܒܕܝܢ܂ ܐܣܝܪ ܝܡܐ ܒܚܠܐ ܘܓܡܪ ܨܒܝܢܟ܂ ܠܟ ܚܝܪܝܢ ܘܡܣܟܝܢ ܟܠܗܘܢ ܟܝ̈ܢܐ܂ ܝܡܝܢܟ ܣܦܩܐ ܠܟܠܗܝܢ ܒܪ̈ܝܬܟ܂ ܘܠܝܬ ܡܕܡ ܕܡܫܟܚ ܥܨܐ ܨܒܝܢܟ܂ ܕܝܠܟ ܐܢܘܢ ܢܗܝܪ̈ܝ ܪܩܝܥܐ܂ ܪ̈ܘܚܐ ܘܥ̈ܠܥܠܐ ܡܫܒܚܝܢ ܠܫܡܟ܂ ܠܘܬܟ ܚܝܪܐ ܚܝܘܬܐ ܕܕܒܪܐ܂ ܘܦܪܚܬܐ ܕܫܡܝܐ܂ ܘܢܘܢ̈ܐ ܕܝܡܐ܂ ܩܘܡ ܒܥܘܕܪܢܢ ܒܚܝܠܟ ܪܒܐ܂ ܕܢܕܥܘܢ ܟܠ ܥܡܡ̈ܝܢ ܕܥܠ ܐ̈ܦܝ ܐܪܥܐ܂ ܕܠܝܬ ܐܟܘܬܟ ܘܠܐ ܠܒܪ ܡܢܟ܂ ܐܡܪ ܥܠܝܟ ܦܪܥܘܢ ܡܢܘ ܐܠܗܐ܂ ܘܛܒܥܬܝܗܝ ܐܝܟ ܩܪܒܬܢܐ ܒܝܡܐ ܕܚܝܠܐ܂ ܘܚܫܒܟ ܣܢܚܝܪܝܒ ܐܝܟ ܐܠܗ̈ܐ ܕܥܡܡ̈ܐ܂ ܘܥܒܕܬܝܗܝ ܠܬܡܗܐ ܘܚܘܝܬ ܪܒܘܬܟ܂ ܥܕܪܬ ܠܡܬܝܬܐ ܟܕ ܛܢ ܛܢܢܟ܂ ܘܥܢܝܬ ܠܝܗܘܕܐ ܘܠܫܡܥܘܢ ܘܠܐܚܘ̈ܗܝ܂ ܘܥܕܪܬ ܐܢܘܢ ܒܩܪ̈ܒܐ ܬܡܝܗ̈ܐ ܕܥܒܕܬ ܒܐܝܕܝ̈ܗܘܢ܀

ܢܬܥܝܪܘܢ ܪ̈ܚܡܝܟ܂ ܘܢܬܓܠܐ ܚܢܢܟ܂ ܫܒܘܩ ܫܪܟܢܐ ܠܥܡܟ ܒܙܝܙܐ܂ ܥܒܕ ܚܘܕܬܐ ܠܒܝܬܟ ܒܝܘܡ̈ܝܢ܂ ܐܪܝܡ ܪܫܢ ܕܡܪܟܢ ܒܥܘܠܢ܂ ܩܒܠ ܩܘܪܒܢܐ ܕܥܡܢ܂ ܘܬܒܣܡ ܠܟ ܨܠܘܬܢ ܢܬܦܬܚܘܢ ܬܪ̈ܥܐ ܐܚܝ̈ܕܐ܂ ܘܢܬܬܪܨܘܢ ܡܕܒܚ̈ܐ ܣܚܝ̈ܦܐ܂ ܢܬܟܢܫ ܥܡܢ ܒܙܝܙܐ܂ ܘܢܚܕܐ ܒܚܘܕܬܗ ܕܒܝܬܟ܂ ܢܓܥܐ ܠܘܬܟ ܕܡܐ ܕܙܕܝ̈ܩܐ܂ ܘܢܗܘܐ ܒܗܘܢ ܢܝܚܟ܂ ܐܝܟ ܥܛܪܐ ܕܒܣܡ̈ܐ܂ ܚܘܣ ܡܪܝܐ܂ ܚܘܣ ܥܠ ܢܟܦܘܬܗ ܕܩܝܡܟ܂ ܕܢܦܠ ܒܐܝ̈ܕܝ ܒ̈ܝܫܐ܂ ܘܚܕܝܢ ܥܠ ܬܒܪܢ܂ ܡܥܕ ܐܢܬ ܡܠܟܢ ܠܡܚܘܝܘ ܚܢܢܟ܂ ܘܡܥܕܝܢ ܚܢܢ ܒܟܠܙܒܢ ܠܡܫܐܠ ܡܢ ܪ̈ܚܡܝܟ܂ ܒܥܝܢܢ ܡܢܟ ܥܠ ܬܘܟܠܢܐ ܕܒܣܝܡܘܬܟ܂ ܛܝܒܘܬܟ ܐܦ ܡܢ ܒܝ̈ܫܐ ܠܐ ܟܠܝܐ܂ ܫܡܫܟ ܡܕܢܚ ܐܢܬ ܥܠ ܛܒ̈ܐ ܘܥܠ ܒ̈ܝܫܐ܂ ܘܡܚܬ ܐܢܬ ܡܛܪܟ ܥܠ ܟܐ̈ܢܐ ܘܥܠ ܥܘ̈ܠܐ܂ ܡܛܠ ܕܝܕܥܝܢܢ ܕܒܟܠ ܙܒܢ ܡܥܕ ܐܢܬ ܠܡܫܡܥ ܠܐܠܝ̈ܨܐ܂ ܒܙܒܢ ܙܒܢ ܓܝܪ ܥܢܝܬ ܠܚܒܝ̈ܫܐ܂ ܘܥܕܪܬ ܠܪ̈ܕܝܦܐ܂ ܘܚܝܠܬ ܠܡܚܝ̈ܠܐ܂ ܘܐܪܝܡܬ ܠܡܟܝ̈ܟܐ܂ ܘܫܘܙܒܬ ܠܡܛܪ̈ܦܐ܂ ܘܦܪܩܬ ܠܒܙܝ̈ܙܐ܂ ܘܫܪܝܬ ܠܐܣܝܪ̈ܐ܂ ܘܐܢܗܪܬ ܠܚܫܘܟ̈ܐ܂ ܘܣܒܥܬ ܠܟܦܢ̈ܐ܂ ܘܐܥܬܪܬ ܠܡܣܟ̈ܢܐ܂ ܒܟܠ ܕܪ ܘܕܪ܂ ܗܠܝܢ ܝܕܥܢ ܕܥܒܕܬ ܠܥܒܕ̈ܝܟ܂ ܐܢܬ ܗܘ ܕܐܘܕܥܬܢ܂ ܕܐܢܐ ܐܢܐ ܩܕܡܝܐ ܘܐܢܐ ܐܢܐ ܐܚܪܝܐ܂ ܐܢܬ ܗܘ ܐܠܗܐ ܕܩܕܡ̈ܝܐ ܘܕܐܚܪ̈ܝܐ܂ ܕܝܠܟ ܐܢܘܢ ܓܝܪ ܬܪ̈ܝܗܘܢ ܥܠܡ̈ܐ܂ ܘܟܠ ܕܗܘܘ ܘܕܥܬܝܕܝܢ܀

ܠܘܬ ܡܢ ܢܐܙܠ ܕܢܫܡܥܢ܂ ܠܡܢ ܢܚܘܪ ܕܢܥܕܪܢ܂ ܠܡܢ ܢܣܟܐ ܕܢܦܪܩܢ܂ ܠܡܢ ܢܨܠܐ ܕܢܩܒܠ ܒܥܘܬܢ܂ ܕܝܠܟ ܚܢܢ ܘܐܢܬ ܗܘ ܐܠܗܢ܂ ܚܣ ܠܟ ܕܢܬܟܣܐ ܕܡܐ ܕܙܕܝܩ̈ܐ ܕܐܬܐܫܕ ܒܥܘܠܐ܂ ܐܠܐ ܢܬܣܝܡ ܥܠ ܟܐܦܐ ܫܥܝܥܬܐ܂ ܕܬܣܩ ܒܗ ܚܡܬܐ ܠܦܘܪܥܢܘܬܐ܂ ܚܣ ܠܟ ܕܬܚܡܘܠ ܪ̈ܚܡܝܟ ܒܪܘܓܙܟ܂ ܠܐ ܓܝܪ ܡܡܬܘܡ ܡܙܕܟܝܐ ܛܝܒܘܬܟ ܡܢ ܒܝܫܘܬܢ܂ ܘܠܐ ܚܢܢܟ ܡܬܟܠܐ ܡܛܠ ܥܘܠܢ܂ ܠܐ ܡܬܚܒܠ ܟܝܢܟ ܡܛܠܬܢ܂ ܛܒܐ ܫܡܟ܂ ܚܘܐ ܛܝܒܘܬܟ܂ ܛܝܒܘܬܟ ܒܢ ܘܟܐܢܘܬܟ ܒܕܠܩܘܒܠܢ܂ ܕܠܘܬܟ ܬܪ̈ܬܝܗܝܢ ܫܟܝܚܢ܂ ܘܒܐܝ̈ܕܝܟ ܐܢܝܢ܀

ܣܓܕܝܢܢ ܠܟ ܐܝܬܝܐ ܕܢܦܫܗ܂ ܕܒܪܝܬܢ ܡܢ ܠܐ ܡܕܡ܂ ܘܓܒܠܬܢ ܒܨܘܪܬܐ ܕܕܡܘܬܟ܂ ܘܢܦܚܬ ܡܢ ܪܘܚܟ ܕܚܝ̈ܐ܂ ܘܫܒܩܬܢ ܒܓܘ ܥܠܡܐ ܥܡܘܪ̈ܐ ܩܕܡܝܟ܂ ܒܐܝ̈ܕܝܟ ܗܘ ܡܘܬܢ܂ ܘܚܝ̈ܝܢ܂ ܡܢܐ ܐܢܘܢ ܒܢ̈ܝ ܐܢܫܐ ܩܕܡܝܟ܂ ܐܝܟ ܠܗܓܐ ܕܣܠܩ ܡܢ ܩܕܪܐ܂ ܘܐܝܟ ܥܘܪܐ ܕܫܩܠܐ ܥܠܥܠܐ܂ ܘܐܝܟ ܛܠܠܐ ܕܦܢܝܐ܂ ܘܐܝܟ ܥܢܢܐ ܕܨܦܪܐ܂ ܘܐܝܟ ܥܘܪܐ ܕܥܒܪ܂ ܘܐܝܟ ܗܒܒܐ ܕܚܡܐ܂ ܐܢ ܨܒܝܬ ܐܝܬܝܢ܂ ܘܐܠܐ ܨܒܝܬ ܠܐ ܐܝܬܝܢ܂ ܐܢ ܬܚܘܪ ܒܐܪܥܐ ܙܝܥܐ܂ ܘܐܢ ܬܗܦܟ ܐ̈ܦܝܟ ܣܝܦܝܢ ܥܡܘܪ̈ܝܗ܂ ܨܒܝܢܟ ܫܩܝܠ ܠܟܠ ܒܪ̈ܝܬܟ܂ ܘܦܘܩܕܢܟ ܡܫܡܫ ܠܟܠܗܘܢ ܟܝ̈ܢܐ܂ ܕܢܚ ܫܡܫܐ ܒܡܠܬܟ܂ ܘܡܬܟܪܟ ܒܨܒܝܢܟ ܒܟܠܗ ܒܪܝܬܟ܂ ܡܫܬܚܠܦ ܣܗܪܐ ܒܬܕܡܘܪܬܐ܂ ܘܣܡܬܝܗܝ ܠܦܘܪܫܢܐ ܕܙܒ̈ܢܐ܂ ܣܕܪܬ ܢܗܝܪ̈ܐ ܒܪܩܝܥܐ ܘܡܨܒܬܝܢ ܠܟܠܗܝܢ ܒܪ̈ܝܬܐ܂ ܢܫܒܢ ܪ̈ܘܚܐ ܒܨܒܝܢܟ܂ ܘܒܙܒܢ ܙܒܢ ܚܝܠܗܝܢ ܡܚܘܝܢ܂ ܫ̈ܓܫܢ ܝܡܐ ܘܡܙܝܥܢ ܛܘܪ̈ܐ܂ ܘܬܘܒ ܒܦܘܩܕܢܟ ܡܪ̈ܘܚܢ ܠܒܪܝܬܟ܂ ܣܚܝܐ ܦܪܚܬܐ ܒܐܐܝܪ/ܒܐܐܪ܂/ ܘܪܕܝܐ ܒܫܒ̈ܝܠܝܗ ܐܝܟ ܐܘܪܚܐ ܕܕܪܝܫܐ܂ ܘܐܦ ܒܕܡܘܬܗ ܢܘ̈ܢܐ ܕܝܡܐ܂ ܢܘ̈ܢܐ ܟܕ ܢܣܩܘܢ ܠܐܐܪ ܡܝܬܝܢ܂ ܘܦܪܚܬܐ ܟܕ ܬܦܠ ܒܝܡܐ ܡܬܚܢܩܐ܂ ܕܝܠܟ ܗܘ ܕܗܘܐ ܘܗܘܐ܂ ܘܡܢܟ ܐܬܦܪܫܘ ܟܠܗܘܢ ܟܝܢ̈ܐ܀

ܡܫܒܚܝܢܢ ܠܟ ܟܕ ܫܘܒܚܐ ܥܛܝܦܬ܂ ܡܘܕܝܢܢ ܠܟ ܟܕ`ܠܐ ܣܢܝܩ ܐܢܬ܂ ܡܪܡܪܡܝܢܢ ܠܟ ܡܢ ܥܘܡ̈ܩܐ ܬܚܬ̈ܝܐ܂ ܘܕܝܠܟ ܡܥܡܪܟ ܒܫܡ̈ܝ ܫܡܝܐ܂ ܨܒܝܢܟ ܠܥܠ ܡܢ ܫܡܝܐ܂ ܘܦܘܩܕܢܟ ܠܬܚܬ ܡܢ ܐܪܥܐ܂ ܠܐ ܥܒܕܟ ܐܝ̈ܕܝܢ܂ ܘܠܐ ܠܐܝ ܒܟ ܨܒ̈ܥܬܢ܂ ܨܪܢܟ ܒܠܒܢ ܘܕܡܝܢܟ ܒܬܪܥܝܬܢ܂ ܚܙܬܟ ܡܚܫܒܬܢ܂ ܘܩܪܝܢܟ ܐܠܗܐ܂ ܫܡܗܢܟ ܐܒܐ܂ ܡܛܠ ܕܐܘܠܕܬܢ܂ ܘܡܠܟܐ ܘܐܠܗܐ ܡܛܠ ܕܐܢܬ ܩܪܝܬܢ܂ ܣܝܟܢܟ ܘܠܐ ܐܘܦܝܢ܂ ܦܚܡܢܟ ܘܠܝܬ ܠܟ ܕܡܘܬܐ܂ ܚܙܬܟ ܟܣܝܐ ܘܣܓܝ ܚܝܠܟ܂ ܘܪܒܘܬܟ ܓܢܝܙܐ ܘܒܟ ܬܠܝܐ ܒܪܝܬܐ܂ ܡ̈ܝܐ ܣܓܝܐ̈ܐ ܡܟܠܝܢ/ܐܟܝܠܬ/ ܒܫܘܥܠܟ܂ ܛܘܪ̈ܐ ܪ̈ܡܐ ܬܩܠܬ ܒܡܬܩܠܐ܂ ܘܪ̈ܡܬܐ ܒܡܣܐܬܐ܂ ܐܪܥܐ ܐܪܝܟܐ ܘܦܬܝܐ ܘܪܘܝܚܐ܂ ܘܡܫܘܚܬܗ ܡܣܬ ܟܘܒܫܐ ܕܪ̈ܓܠܝܟ܂ ܐܟܝܠܬ ܒܙܘܪܟ ܥܦܪܐ ܕܐܪܥܐ܂ ܘܫܡܝܐ ܟܘܪܣܝܟ܂ ܘܠܐ ܡܣܝܒܪܝܢ ܠܟ܂ ܘܟܕ ܪܒ ܫܡܟ ܘܪܘܪ̈ܒܝܢ ܥܒܕ̈ܝܟ܂ ܐܙܥܪܬ ܪܒܘܬܟ ܡܣܬ ܠܫܢܢ܂ ܣܦܩ ܠܟ ܦܘܡܢ܂ ܘܥܡܪܬ ܒܓܘܢ܂ ܫܪܐ ܐܢܬ ܒܙܕܝܩ̈ܐ ܘܪܘܝܚ ܠܟ ܐܬܪܐ܂ ܘܚܠܕܬ ܪܒܘܬܟ ܒܠܒܐ ܙܥܘܪܐ܂ ܗܝܟ̈ܠܐ ܥܒܕܬܢ ܡܥܡܪܐ ܠܐܝܩܪܟ܂ ܘܢܘܣܟ ܩܪܝܬܢ܂ ܘܗܠܟܬ ܒܢ ܪܒܘܬܟ܂ ܐܝܟ ܕܩܕܡܬ ܐܘܕܥܬ ܒܦܘܡܐ ܕܢܒ̈ܝܝܟ܂ ܕܐܥܡܪ ܒܗܘܢ ܘܐܗܠܟ ܒܗܘܢ܂ ܥܡܪ ܐܢܬ ܒܢ̈ܝܚܐ܂ ܫܪܐ ܐܢܬ ܒܡܟܝ̈ܟܐ܂ ܢܝܚ ܐܢܬ ܒܢܝ̈ܚܐ ܘܛܒ̈ܐ܂ ܨܒܝܬ ܒܬܝܒ̈ܐ܂ ܚܐܪ ܐܢܬ ܒܟܐܢ̈ܐ܂ ܘܪܘܙܬ ܒܡܣܟ̈ܢܐ܂ ܝܙܦ ܐܢܬ ܡܢ ܣܢܝܩ̈ܐ ܐܝܟ ܓܒܪܐ ܒܨܝܪܐ܂ ܠܝܬ ܣܟܐ ܠܪ̈ܚܡܝܟ܂ ܠܝܬ ܡܘܫܚܐ ܠܛܝܒܘܬܟ܂ ܠܐ ܡܘܦܝܢ ܠܟ ܟܘܠ ܦܘܡ̈ܝܢ܂ ܠܐ ܣܦܩܝܢ ܠܟ ܟܠ ܠܫܢ̈ܝܢ܂ ܟܕ ܡܣܝܟ ܒܪܢܫܐ ܟܬܪ ܠܗ܂ ܘܡܐ ܕܡܬܚ ܪܥܝܢܗ ܠܐ ܣܦܩ܂ ܐܢ ܢܪܝܡ ܬܪܥܝܬܗ ܠܥܠ ܡܢ ܫܡܝܐ܂ ܐܫܬܟܚ ܠܗ ܡܗܠܟ ܥܠ ܐܪܥܐ܂ ܘܐܢ ܬܚܘܬ ܠܥܘܡܩܐ ܡܚܫܒܬܗ܂ ܒܙܒܢܐ ܙܥܘܪܐ ܗܦܟ ܠܐܪܥܗ܂ ܘܒܛܠܬ ܡܪܢܝܬܗ܂ ܠܥܠ ܡܢ ܫܡܝܐ ܡܢܐ ܐܝܬ܂ ܡܢ ܡܘܦܐ܂ ܠܬܚܬ ܡܢ ܐܪܥܐ ܡܢܐ ܣܝܡ܂ ܠܝܬ ܠܡܐܡܪ܂ ܪܩܝܥܐ ܒܡܢܐ ܡܬܝܚ ܐܘ ܫܡܝܐ ܒܡܢܐ ܬܠܝܢ܂ ܐܪܥܐ ܥܠ ܡܢܐ ܟܒܝܫܐ܂ ܐܘ ܬܗܘܡܐ ܒܡܢܐ ܩܒܝܥ܀