Nisibis 4

https://syriaccorpus.org/262

Show

section : section

line : line

4 Nisibis IV

ܒܰܪ ܩܳܠܶܗ ܕܟܶܢܫܳܐ ܕܽܐܘ̈ܠܨܳܢܝ̱

1 ܐܰܠܳܗܝ̱ ܕܠܳܐ ܡܰܡܐܶܢ ܐܶܕܪܽܘܫ ܬܪܰܥ ܒܰܝܬܳܟ ܕܛܶܠܡܶܬ ܠܟܽܠ ܛܰܝܒܽܘ ܐܶܫܰܐܠ ܒܡܰܪܳܚܽܘ ܕܶܐܣܰܒ ܒܰܚܨܺܝܦܽܘ

ܥܽܘܢܺܝܬܳܐ: ܣܰܒܪܰܢ ܗܼܘܺܝ ܫܽܘܪܰܢ

2 ܐܶܢ ܓܶܝܪ ܡܳܪܝ̱ ܐܰܪܥܳܐ ܠܚܶܛܬܳܐ ܡܫܰܘܚܰܕܬܳܐ ܡܥܰܬܪܳܐ ܒܣܰܓܺܝ̈ܐܶܐ ܟܡܳܐ ܢܶܥܬܪ̈ܳܢ ܗܳܟܺܝܠ ܨܠܰܘ̈ܳܬܝ̱ ܒܛܰܝܒܽܘܬܳܟ

3 ܒܩ̈ܳܠܶܐ ܕܝܰܠܽܘ̈ܕܰܝ̱ ܚܢܺܝ̈ܓܶܐ ܘܪ̈ܰܥܽܘܡܶܐ ܦܬܼܰܚ ܠܺܝ ܬܼܪܰܥ ܪ̈ܰܚܡܰܝܟ ܐܶܦܨܰܚ ܒܩܳܠܰܝ̈ܗܽܘܢ ܐܶܒܠܳܐ ܕܣܳܩ̈ܰܝܗܽܘܢ

4 ܒܽܘܟܪܳܐ ܕܰܗܘܳܐ ܚܣܺܝܠܳܐ ܘܰܢܩܶܦ ܠܝܰܠܽܘ̈ܕܶܐ ܒܢ̈ܰܝ ܢܳܨܪܰܬ ܠܺܝ̈ܛܶܐ ܥܢܺܝ ܠܶܐܡܪ̈ܰܝ ܕܰܚܙܰܘ ܕܺܐܒ̈ܶܐ ܘܗܳܐ ܓܳܥܶܝܢ

5 ܘܰܥܢܳܐ ܒܕܰܒܪܳܐ ܡܳܪܝ̱ ܐܶܢܗܽܘ ܕܰܚܙܳܬ ܕܺܐܒ̈ܶܐ ܛܳܦܣܳܐ ܒܥܰܠܳܢܳܐ ܡܶܬܓܰܘܣܳܐ ܒܚܽܘܛܪܳܐ ܕܰܪܕܰܦ ܠܳܐܟܽܘ̈ܠܶܝܗ̇

6 ܥܳܢܳܟ ܚܙܳܬ ܕܺܐܒ̈ܶܐ ܘܗܳܐ ܓܳܥܝܳܐ ܪܳܒܰܬ ܐܰܕܪܶܟ ܕܶܐܬܪܰܗܒܰܬ ܨܠܺܝܒܳܟ ܢܶܗܘܶܐ ܚܽܘܛܪܳܐ ܕܰܪܕܰܦ ܠܒܳܠܽܘ̈ܥܶܝܗ̇

7 ܩܰܒܶܠ ܓܥܳܬܝ̱ ܫܰܒܪ̈ܰܝ ܕܰܕܟܶܝܢ ܒܟܽܠܡܶܕܶܡ ܗܰܘ ܗܽܘ ܛܠܶܐ ܝܰܘܡ̈ܶܐ ܡܶܫܟܰܚ ܡܪܰܥܶܐ ܡܳܪܝ̱ ܠܥܰܬܺܝܩ ܝܰܘܡ̈ܳܬܳܐ

8 ܝܰܘܡܳܐ ܕܰܢܦܰܠ ܥܽܘܠܳܐ ܒܓܰܘ ܐܽܘܪܝܳܐ ܒܶܗ ܗܽܘ ܥܺܝܪ̈ܶܐ ܢܚܶܬܘ̱ ܣܰܒܰܪܘ̱ ܫܠܳܡܳܐ ܕܗܽܘ ܢܶܗܘܶܐ ܒܫܽܘ̈ܩܰܝ ܠܟܽܠ ܫܰܒܪ̈ܰܝ

9 ܫܰܒܥܺܝܢ ܘܰܬܪ̈ܶܝܢ ܣܳܒܺܝ̈ܢ ܣ̈ܳܒܰܘܗ̱ܝ ܕܗܰܘ ܥܰܡܳܐ ܠܳܐ ܣܦܼܰܩܘ̱ ܠܬܽܘܪ̈ܥܳܬܳܐ ܥܽܘܠܰܐ ܗ̱ܘ ܒܰܪ ܡܰܪܝܰܡ ܫܰܝܶܢ ܠܟܽܠ ܦܶܢܝܳܢ

10 ܚܽܘܢ ܡܳܪܝ̱ ܠܝܰܠܽܘܕ̈ܰܝ ܒܝ̈ܰܠܕܰܝ ܥܗܰܕ ܝܰܠܕܳܟ ܕܰܗܘܰܝܬ ܝܰܠܽܘܕܳܐ ܕܕܳܡܶܝܢ ܠܛܰܠܝܽܘܬܳܟ ܢܺܚܽܘܢ ܒܛܰܝܒܽܘܬܳܟ

11 ܒܠܺܝ̈ܠܝܳܢ ܒܓܰܘ ܥܳܢܳܟ ܦܳܥܝܳܐ ܕܬܰܡܺܝ̈ܡܶܐ ܘܩܳܠܳܐ ܕܰܢܩ̈ܰܘܳܬܳܐ ܕܩܳܪܶܝܢ ܠܪܳܥܶܐ ܟܽܠ ܕܡܶܢ ܟܽܠ ܢܦܰܨܶܐ ܐܶܢܽܘܢ

12 ܐܶܓܕܽܘܠ ܠܟܽܠ ܩ̈ܳܠܶܝܢ ܘܶܐܥܒܶܕ ܟܠܺܝܠ ܩ̈ܳܠܶܐ ܐܶܩܰܪܒܺܝܘܗ̱ܝ ܠܰܐܒܽܘܟ ܐܶܙܒܶܢ --- ----- a ܘܳܝ ܠܺܝ ܕܡܰܢܽܘ ܠܺܝ ܫܒܳܒܳܐ ܘܩܰܪܺܝܒܳܐ ܕܠܳܐ ܟܳܝ̈ܫܳܢ ܪ̈ܶܓܠܰܘܝ ܒܰܐܬܪܶܗ ܕܟܽܠܥܶܕܳܢ ܥܰܠ ܪܺܝܫܝ̱ ܐܰܡܺܝܢ ܘܩܳܐܶܡ b ܘܳܝ ܠܺܝ ܕܡܰܢܽܘ ܠܺܝ ܐܳܪܚܳܐ ܕܠܺܝ ܘܰܠܠܰܚܡܝ̱ ܒܳܥܶܐ ܕܢܶܐܟܽܘܠ ܡܳܪܝ̱ ܬܰܨܪܺܝܘܗ̱ܝ ܟܺܐܢܽܘܬܳܐ ܕܰܟܦܶܢ ܠܝܰܥܢܽܘܬܳܐ c ܘܳܝ ܠܺܝ ܕܡܰܢܽܘ ܠܺܝ ܣܳܐܢܳܐ ܘܩܰܪܺܝܒܳܐ ܛܽܘܒܰܝ ܕܡܰܢܽܘ ܠܺܝ ܡܳܪܳܐ ܘܦܳܪܽܘܩܳܐ ܕܙܰܓܪܶܗ ܘܰܙܓܰܪ ܠܶܗ

13 ܚܰܕܽܘܬܳܐ ܕܣܽܘܓܦܳܢܳܐ ܥܳܩܬܳܐ ܛܡܺܝܪܳܐ ܒܳܗ̇ ܥܳܩܬܳܐ ܕܥܽܘܕܪܳܢܳܐ ܡܥܺܝܢܳܐ ܗ̱ܝ ܕܚ̈ܰܕܘܳܬܳܐ ܒܗܰܘ ܥܳܠܡܳܐ ܚܰܕܬܳܐ

14 ܛܽܘܒܳܐ ܕܰܩܢܳܐ ܪܳܕܽܘܦܝ̱ ܘ̈ܳܝܶܐ ܛܡܺܝܪ̈ܺܝܢ ܒܶܗ ܒܰܕܓܽܘܢ ܦܨܺܝܚܳܐ ܐ̱ܢܳܐ ܕܘܳܝܳܐ ܕܰܩܢܺܝܬ ܡܶܢܶܗ ܛܽܘܒܳܐ ܟܣܶܐ ܠܺܝ ܒܶܗ

15 ܡܰܢܽܘ ܕܠܳܐ ܢܰܘܕܶܐ ܠܗܰܘ ܡܰܢ ܕܰܐܘܠܶܕ ܠܰܢ ܘܰܡܨܶܐ ܕܢܰܘܠܶܕ ܬܽܘܒ ܡܶܢ ܓܰܘ ܫܡܽܘ̈ܥܳܬܳܐ ܩ̈ܳܠܶܐ ܕܣܰܒܪ̈ܳܬܳܐ

16 ܐܰܢ̱ܬ ܗܽܘ ܡܰܐܣܶܐ ܟܽܠ ܣܥܰܪܬܳܢܝ̱ ܒܟܽܘܪ̈ܗܳܢܰܝ ܐܰܓܪܳܐ ܕܣܰܡ̈ܡܳܢܰܝܟ ܠܳܐ ܐܶܬܡܨܺܝܬ ܕܶܐܬܶܠ ܕܕܳܡܶܝܢ ܠܰܝܬ ܠܗܽܘܢ

17 ܙܳܟܶܝܢ ܠܣܰܡ̈ܳܡܢܰܝܟ ܪ̈ܰܚܡܰܝܟ ܥܰܬܺܝܪ̈ܶܐ ܠܳܐ ܡܨܶܝܢ ܡܶܙܕܰܒܢܺܝܢ ܡܰܓܳܢ ܡܶܬܝܰܗܒܺܝܢ ܒܕܶܡ̈ܥܶܐ ܗ̱ܘ ܡܶܬܢܰܣܒܺܝܢ

18 ܟܡܳܐ ܡܶܫܟܚܳܐ ܪܰܒܽܘܢܝ̱ ܡܕܺܝܢ̱ܬܳܐ ܡܓܰܙܰܝܬܳܐ ܕܪܰܚܺܝܩ ܒܰܪ ܡܰܠܟܳܗ̇ ܘܩܰܪܺܝܒ ܒܥܶܠܕܰܪܳܗ̇ ܕܰܬܩܽܘܡ ܕܠܳܐ ܪ̈ܰܚܡܶܐ

19 ܠܡܺܐܢܳܐ ܘܒܶܝܬ ܓܰܘܣܳܐ ܐܰܢ̱ܬ ܗܽܘ ܒܟܽܠ ܥܶܕܳܢ ܟܰܕ ܚܰܦܝܽܘܢܝ̱ ܝܰܡ̈ܡܶܐ ܢܚܼܶܬܘ̱ ܕܰܠܝܽܘܢܝ̱ ܪ̈ܰܚܡܰܝܟ ܬܽܘܒ ܢܶܕܪܟܰܢܝ̱ ܥܶܕܪܳܟ

20 ܐܰܣܪܰܚ ܠܒܽܘ̈ܣܒܳܣܰܝ ܣܰܡܳܐ ܕܦܽܘܪܩܳܢܳܟ ܘܚܰܫܳܐ ܕܥܽܘܕܪܳܢܳܟ ܢܺܝܫܳܟ ܡܨܶܐ ܕܢܶܗܘܶܐ ܣܰܡܳܐ ܡܰܐܣܶܐ ܟܽܠ

21 ܣܰܓܺܝ ܐܰܠܺܝܨܳܐ ܐ̱ܢܳܐ ܘܕܶܐܩܒܽܘܠ ܐܰܟܺܝܦܳܐ ܐ̱ܢܳܐ ܥܰܠ ܡܰܢ ܕܫܰܓܶܫ ܠܺܝ ܚܢܳܢܳܟ ܢܦܰܟܶܗ ܡܳܪܝ̱ ܟܳܣܳܐ ܕܰܡܼܙܰܓܘ ܚܰܘ̈ܒܰܝ

22 ܚܳܪܶܬ ܠܟܽܠ ܓܰܒܺܝ̈ܢ ܘܰܒ̇ܟܺܝܬ ܕܶܐܬܓܰܙܺܝܬ ܟܰܕ ܛܳܒ ܣܰܓܺܝ̈ܐܺܝܢ ܪ̈ܺܝܫܰܝ ܘܦܳܪ̈ܽܘܩܰܝ ܚܰܕ ܗܽܘ ܕܰܦܪܰܩ ܠܺܝ

23 ܦܰܪܘ̱ ܡܳܪܝ̱ ܢܦܰܩܘ̱ ܝܰܠܕ̈ܰܝ ܘܕܳܡܽܘ ܠܦܰܪ̈ܽܘܓܶܐ ܕܢܶܫܪܳܐ ܪܕܰܦ ܐܶܢܽܘܢ ܗܳܐ ܛܫܶܝܢ ܒܣܶܬܪܳܐ ܫܰܝܢܳܟ ܢܰܦܢܶܐ ܐܶܢܽܘܢ

24 ܨܰܘܬܳܐ ܕܟܰܪ̈ܡܰܝ ܗܳܐ ܦܳܩܕܳܢ ܐܶܕ̈ܢܰܝ ܕܓܰܪܕܺܝܘ ܩܳܠܰܝ̈ܗܽܘܢ ܢܶܪܥܰܡ ܒܣܰܒܪ̈ܳܬܳܐ ܛܶܒܳܐ ܕܦܽܘܪܩܳܢܳܟ

25 ܩܳܠܳܐ ܕܣܽܘܪܳܕܳܐ ܥܰܠ ܡ̈ܰܓܕܠܰܝ ܫܶܡ̇ܥܶܬ ܕܩܳܥܶܝܢ ܦܪ̈ܽܘܩܰܝ ܟܰܕ ܢܳܛܪܺܝܢ ܫܽܘܪ̈ܰܝ ܫܰܠܳܝܗ̱ܝ ܒܩܳܠ ܫܰܝܢܳܟ

26 ܪܒܳܒܬܳܐ ܕܦܰܠܳܚ̈ܰܝ ܬܫܰܝܶܢ ܠܒܰܪ ܡܶܢ ܫܽܘܪܝ̱ ܪܰܥܡܳܐ ܕܥܳܡܽܘܪ̈ܰܝ ܢܫܰܝܶܢ ܠܓܰܘ ܡܶܢ ܫܽܘܪܝ̱ ܕܰܐܘܕܶܐ ܠܒܰܪ ܘܰܠܓܰܘ

27 ܫܪܺܝ ܡܳܪܝ̱ ܐܰܒܺܝܠܽܘܬܶܗ ܕܗܰܘ ܡܰܕܒܚܳܟ ܕܰܟܝܳܐ ܘܰܕܟܳܗܢܳܟ ܢܰܟܦܳܐ ܕܩܳܐܶܡ ܠܒܺܝܫ ܐܶܒܠܳܐ ܡܶܢ ܠܥܶܠ ܟܒܺܝܢ ܣܰܩܳܐ

28 ܬܰܘܕܶܐ ܒܦܽܘܪܩܳܢܳܟ ܥܺܕ̱ܬܳܐ ܘܫܰܡܳܫܶܝ̈ܗ̇ ܡܕܺܝܢ̱ܬܳܐ ܘܥܳܡܪ̈ܶܝܗ̇ ܢܗܶܐ ܡܳܪܝ̱ ܩܳܠ ܫܰܝܢܳܐ ܐܰܓܪܳܐ ܕܩܳܠܰܝ̈ܗܽܘܢ

How to Cite this Electronic Edition

Note:

Ephrem the Syrian, “Nisibis 4” , Digital Syriac Corpus, last modified June 12, 2019, https://syriaccorpus.org/262.

TEST2

Bibliography:

“Nisibis 4.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/262.

Show Citation Styles

SEDRA IV

Syriac Lexeme

About This Digital Text

Corpus Text ID:

https://syriaccorpus.org/262

NHSL Work ID(s):

http://syriaca.org/work/8741
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1961).