Digital Syriac Corpus

Nisibis 11

   https://syriaccorpus.org/268
  TEI/XML   Text  
Show  
section :
line :
#11 Nisibis XI
ܕ ܒܰܪ ܩܳܠܶܗ
1 ܡܰܪܕܽܘܬܳܟ ܐܺܝܬܶܝܗ̇ ܐܶܡܳܐ ܕܫܰܒܪܽܘܬܰܢ ܟܐܳܬܳܗ̇ ܕܚܰܢܳܢܳܐ ܗ̱ܝ ܕܙܶܓܪܰܬ ܡܶܢ ܫܶܥܝܳܐ ܠܫܰܒܪ̈ܶܐ ܘܶܐܬܚܰܟܰܡܘ̱
ܥܽܘܢܺܝܬܳܐ: ܫܽܘܒܚܳܐ ܠܟܺܐܢܽܘܬܳܟ
2 ܢܶܒܼܨܶܐ ܟܺܐܢܽܘܬܳܟ ܟܰܕ ܡܰܢ ܣܳܦܶܩ ܠܳܗ̇ ܕܰܢܟܺܝܠ ܥܽܘܕܪ̈ܳܢܶܝܗ̇ ܕܒܳܗ̇ܽ ܗ̱ܘ ܙ̈ܰܠܺܝܠܶܐ ܐܰܣܓܺܝܘ ܐܶܬ̇ܢܰܟܰܦܘ̱
3 ܣܰܓܺܝ ܗ̱ܘ ܣܶܥܪܰܬ ܡܳܪܝ̱ ܐܺܝܕܳܗ̇ ܠܰܟܪ̈ܺܝܗܶܐ ܕܗܺܝܺܝ ܐܳܣܺܝܬܳܐ ܟܣܺܝܬܳܐ ܕܟܺܐܒ̈ܰܝܗܽܘܢ ܘܰܡܥܺܝܢ ܚܰܝ̈ܰܝܗܽܘܢ
4 ܣܰܓܺܝ ܪܰܟܺܝܟܳܐ ܨܶܒܥܳܗ̇ ܕܟܺܐܢܽܘܬܳܟ ܒܚܽܘܒܳܐ ܘܚܰܘܣܳܢܳܐ ܓܳܫܳܐ ܢܶܟܝ̈ܳܢܰܘܗ̱ܝ ܕܰܐܝܢܳܐ ܕܡܶܬܰܐܣܶܐ
5 ܣܰܓܺܝ ܢܺܝܚ ܘܰܪܚܺܝܡ ܓܙܳܪܳܗ̇ ܠܰܕܚܰܟܺܝܡ ܣܳܡܳܗ̇ ܚܰܪܺܝܦܳܐ ܒܚܽܘܒܶܗ ܥܰܙܺܝܙܳܐ ܐܶܟܰܠ ܬܰܡܣܽܘܬܳܐ
6 ܣܰܓܺܝ ܦܐܶܐ ܪܽܘܓܙܶܗ ܠܰܐܝܢܳܐ ܕܦܳܪܽܘܫܰܐ ܗ̱ܘ ܣܢܺܝܐ̈ܺܝܢ ܣܰܡ̈ܡܳܢܶܝܗ̇ ܠܣܰܟܠܳܐ ܕܒܳܣܶܡ ܠܶܗ ܒܽܘܣܒܳܣ ܗܰܕܳܡ̈ܰܘܗ̱ܝ
7 ܣܰܓܺܝ ܬܳܟܶܒ ܠܶܗ ܥܨܳܒܳܗ̇ ܠܰܓܙܳܪܳܗ̇ ܡܳܐ ܕܡܰܚܶܬ ܚܳܢܰܬ ܕܡܶܢ ܒܶܝܬ ܬܰܪ̈ܬܰܝܗܶܝܢ ܬܰܘܠܶܕ ܚܽܘܠܡܳܢܳܐ
8 ܣܰܓܺܝ ܦܐܶܐ ܪܽܘܓܙܶܗ ܘܚܶܡܬܳܗ̇ ܒܰܣܺܝܡܳܐ ܘܰܚܠܶܐ ܡܽܘܪܡܳܪܳܗ̇ ܡܚܰܠܐ ܠܡܰܪ̈ܺܝܪܶܐ ܕܢܶܗܘܽܘܢ ܒܰܣܺܝܡ̈ܶܐ
9 ܥܶܠܰܬ ܒܶܛܠܳܢܰܐ ܗ̱ܘ ܢܰܘܚܳܟ ܠܰܪ̈ܦܰܝܳܐ ܥܶܠܰܬ ܝܽܘܬܪܳܢܰܐ ܗ̱ܘ ܫܰܒܛܳܟ ܨܶܝܕ ܫ̈ܶܦܠܶܐ ܕܢܶܗܘܽܘܢ ܬܰܓܳܪ̈ܶܐ
10 ܥܶܠܰܬ ܚܺܝܨܽܘܬܰܢ ܐܺܝܬܶܝܗ̇ ܟܺܐܢܽܘܬܳܟ ܥܶܠܰܬ ܪܰܦܝܽܘܬܰܢ ܐܺܝܬܶܝܗ̇ ܛܰܝܒܽܘܬܳܟ ܕܰܣܟܶܠ ܒܽܘܝܳܢܰܢ
11 ܦܶܪܥܽܘܢ ܕܶܐܬܩܰܫܺܝ ܡܶܛܽܠ ܛܰܝܒܽܘܬܳܟ ܕܡܳܐ ܕܪܰܟܘ̱ ܗ̱ܘܰܘ ܢܶܓܕ̈ܰܘܗ̱ܝ ܥܰܙܘ̱ ܗ̱ܘܰܘ ܣܽܘܪ̈ܚܳܢܰܘܗ̱ܝ ܘܕܰܓܶܠ ܫܽܘܘ̈ܕܳܝܰܘܗ̱ܝ
12 ܦܪܰܥܬܶܗ ܟܺܐܢܽܘܬܳܐ ܕܰܐܣܓܺܝ ܕܰܓܶܠ ܒܳܗ̇ ܒܚܳܬܳܗ̇ ܒܰܪ̱ܬ ܚܺܐܪ̈ܶܐ ܐܳܦ ܠܶܗ ܚܣܰܟܬܶܗ ܬܽܘܒ ܕܠܳܐ ܬܽܘܒ ܢܶܪܓܰܙ ܗ̱ܘܳܐ
13 ܨ̈ܶܢܥܳܬܝ̱ ܡܳܪܝ̱ ܐܰܟܶܣ ܕܟܰܕܳܒ ܐܰܝܟ ܡܶܨܪܶܝܢ ܨܠܰܘ̈ܳܬܝ̱ ܡܦܺܝܣܳܢ ܕܠܳܐ ܗܘܺܝܬ ܐܰܟܘܳܬܳܗ̇ ܕܬܰܪܥܳܟ ܠܳܐ ܫܶܒܩܶܬ
14 ܨܠܺܝܒܳܟ ܡܳܪܝ̱ ܕܩܳܡ ܒܬܽܘܪ̈ܥܳܬܝ̱ ܓ̈ܰܠܝܳܬܳܐ ܢܣܽܘܓ ܬܽܘܒ ܟܰܣ̈ܝܳܬܳܐ ܕܰܚܠܳܦ ܒܰܪ̈ܳܝܶܐ ܬܰܪܥܽܘܢܝ̱ ܓܰܘ̈ܳܝܶܐ
15 ܨܪܳܐ ܝܰܡܳܐ ܘܰܐܪܡܺܝ ܡܰܓܕܠܳܐ ܕܢܶܨܚܶܬ ܒܶܗ ܣܥܼܳܐ ܥܰܘܠܳܐ ܘܰܐܩܺܝܡ ܢܰܘܣܳܐ ܕܒܶܗܬܶܬ ܒܶܗ ܚܰܢܩܰܢܝ̱ ܢܽܘܩܳܝܶܗ
16 ܨܠܰܘ̈ܳܬܝ̱ ܥܰܠ ܫܽܘܪ̈ܰܝ ܫܡܼܰܥܘ̱ ܗ̱ܘܰܘ ܪ̈ܳܕܽܘܦܰܝ ܒܗܼܶܬܝ̱ ܗ̱ܘܳܐ ܒܰܡܓܽܘܫ̈ܰܘܗ̱ܝ ܫܶܡܫܳܐ ܘܣܳܓ̈ܽܘܕܰܘܗ̱ܝ ܕܢܶܨܚܶܬ ܒܰܨܠܺܝܒܳܟ
17 ܩܥ̈ܰܝ ܗܘܰܝ ܒܶܪ̈ܝܳܬܳܐ ܕܰܚ̈ܙܰܝ ܐܺܝܓܽܘܢܳܐ ܫܪܳܪܳܐ ܕܥܰܡ ܛܽܘܥܝܰܝ ܒܫܽܘܪ̈ܶܐ ܪ̈ܰܥܺܝܠܶܐ ܐܰܩܪܶܒ ܘܶܐܬܟܰܠܰܠ
18 ܩܛܺܝܪܶܗ ܕܰܫܪܳܪܳܐ ܠܛܽܘܥܝܰܝ ܢܰܓܶܕ ܗ̱ܘܳܐ ܒܢܶܓܕ̈ܶܝܗ̇ ܪܶܓܫܶܬ ܒܶܗ ܘܰܒܝܰܕ ܚܰܘܒ̈ܳܬܳܗ̇ ܝܶܠܦܶܬ ܙܳܟܽܘܬܳܗ̇
19 ܩܶܢܛܰܐ ܗ̱ܘ ܠܺܝ ܪܰܒܳܐ ܕܒܳܬܰܪ ܦܽܘܪܩܳܢܳܐ ܫܒܺܝ̈ܚܶܐ ܘܥܰܙܺܝ̈ܙܶܐ ܕܪܰܚܶܦܘ̱ ܥܰܠ ܡܰܕܒܰܚܝ̱ ܒܢܼܰܘ ܒܺܝ ܥܠܰܘ̈ܳܬܳܐ
20 ܪ̈ܶܓܫܰܝ ܡܳܪܝ̱ ܫܰܒܥܳܐ ܐܶܠܽܘ ܡܰܒ̈ܽܘܥܶܐ ܗܘܰܘ ܗ̱ܘܰܘ ܕܰܒܟܳܬܳܐ ܙܥܽܘܪ̈ܳܢ ܐܶܢܶܝܢ ܕܶܡ̈ܥܰܝ ܠܰܒܟܳܝܶܗ ܕܬܰܒܪܰܢ
21 ܫܽܘܩ̈ܶܐ ܕܰܒܣܰܩ̈ܶܐ ܘܩܶܛܡܳܐ ܓ̇ܳܥܶܝܢ ܗ̱ܘܰܘ ܫܰܓܺܝܫܺܝܢ ܒܫܶܥܝܳܐ ܚܰܒܪܶܗ ܕܗܰܘ ܕܰܗܘܼܳܐ ܒܕܰܒܪܳܐ ܩܕܳܡ ܥܶܓܠܳܐ
22 ܫܽܘܦܪܳܐ ܕܫ̈ܽܘܫܰܢܶܐ ܡܪܳܪܳܐ ܫܐܶܠ ܘܰܠܒܼܶܫ ܘܰܟܡܳܐ ܕܟܰܣܝܳܢ ܗܘ̈ܰܝ ܡܰܛܥܝܳܢ ܦܳܪ̈ܥܰܝܗܶܝܢ ܐܰܦܪܰܥ ܓܰܕܕܰܝ̈ܗܶܝܢ
SEDRA IV

Syriac Lexeme

About This Digital Text
Corpus Text ID:
https://syriaccorpus.org/268
Source:
Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1961). Link to Syriaca.org Bibliographic Record
Type of Text: Digital Edition  
Status: Edited  
Publication Date: June 12, 2019
Preparation of Electronic Edition:
TEI XML encoding by James E. Walters.
Syriac text transcribed by Michael Oez.
Open Access and Copyright:

Creative Commons License

 See details...
How to Cite this Electronic Edition
Note:
Ephrem the Syrian, “Nisibis 11” , Digital Syriac Corpus, last modified June 12, 2019, https://syriaccorpus.org/268.
Bibliography:
“Nisibis 11.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/268.

Show Citation Styles
Linked Data