On the Divine Revelations to Abraham - ܥܠ ܓܠܝܢ̈ܐ ܐܠܗܝ̈ܐ ܕܗܘܘ ܠܘܬ ܐܒܪܗܡ

1 :ܬܘܵܬܼ ܪ̣ܥܝܵܢܵܐ ܬܘ̣ܵܬܲܢܝ ܕܐܸܦܢܹܐ ܠܘܵܬܼ ܝܘܼܠܦܵܢܵܐ 2 ܘܐܸܪܕܹܿܐ ܒܐܘܼܪܚܵܐ ܕܝܥ̣ܢܝܵܢ ܣܸܦܪܹ̈ܐ ܕܦܵܫܹ̇ܬܼ ܡܸܢܵܗ̇ ܀ 3 :ܒܥܸܢܝܵܢ ܣܸܦܪܹ̈ܐ ܐܲܠܵܗܵܝܹ̈ܐ ܥܢܹܐ ܗ̄ܘ̣ܵܐ ܪܸܥܝܵܢܝ 4 ܘܲܪܚܝܼܡ ܗ̄ܘ̣ܵܐ ܠܝܼ ܡܹܐܡܪܵܐ ܕܲܟܼܝܵܐ ܕܣܘܼܟܵܠܲܝ̈ܗܘܿܢ ܀ 5 :ܒܣܘܼܟܵܠܲܝ̈ܗܘܿܢ ܡܸܬܼܒܲܩܸܐ ܗ̄ܘܹ̇ܝܬܼ ܕܲܟܼܡܵܐ ܪܓܼܝܼܓܼܝܼܢ 6 ܘܠܵܐ ܫܵܠܹ̇ܐ ܗ̄ܘܹ̇ܝܬܼ ܠܡܸܒܼܥܵܐ ܒܥܵܬܼܵܐ ܕܐ̄ܪ̈ܵܙܹܐ ܕܲܒܼܗܘܿܢ ܀ 7 :ܒܐ̄ܪܵܙ ܡܸܠܲܝ̈ܗܘܿܢ ܫܚܝܼܩ ܗ̄ܘ̣ܵܐ ܪܸܥܝܵܢܝ ܠܹܠܲܝ ܐܝܼܡܵܡ 8 ܘܡܸܬܼܝܲܐܲܒܼ ܗ̄ܘܹ̇ܝܬܼ ܠܡܸܕܲܥ ܚܲܝܠܵܐ ܕܩܵܢܘܿܢܲܝ̈ܗܘܿܢ ܀ 9 :ܒܗܵܢ ܥܸܢܝܵܢܵܐ ܥܢܹܐ ܗ̄ܘ̣ܵܐ ܪܸܥܝܵܢܝ ܪܵܥܹ̇̄ܐ ܒܡܸܠܹ̈ܐ 10 ܘܲܫܒܼ݂ܵܢܝ ܒܝܼܫܵܐ ܘܥܵܘܟܲܢܝ ܡܸܢܹܗ ܟܲܕܼ ܠܵܐ ܪܥܹܐ ܐ̄ܢܵܐ ܀ 11 :ܒܡܲܐܝܼܢܘܼܬܼܵܐ ܐܲܝܟ ܕܲܒܼܫܸܢܬܼܵܐ ܛܒ݂ܲܥܘ ܚܘܼܫܵܒܲܝ̈ 12 ܘܥܲܠܘ̣ ܚܘܼܬܼܚܵܬܹ̈ܐ ܐܲܝܟ ܓܲܝܵܣܹ̈ܐ ܘܚܲܠܸܨܘ ܥܸܢܝܵܢܝ ܀ 13 :ܦܲܚܹ̈ܐ ܕܫܹܬܿܩܵܐ ܨܠܵܘ̣ ܠܝܼ ܚܲܫܹ̈ܐ ܕܲܒܼܗܲܕܵܡܲܝ̈ 14 ܘܲܫܬܹ݂ܩܘ ܙܵܘܥܹ̈ܐ ܡ̣ܢ ܥܸܢܝܵܢܵܐ ܕܲܥܢܹܝܢ ܗ̄ܘ̣ܵܘ ܒܹܗ ܀ pb. 2 15 :ܬܘܵܬܼܵܐ ܕܗܵܠܹܝܢ ܫܚܲܩ̣ܬܲܢܝ ܣܲܓܿܝ̣ ܠܒܲܪ ܡ̣ܢ ܛܲܟܼܣܵܐ 16 ܘܐܲܝܟ ܕܡ̣ܢ ܫܸܢܬܼܵܐ ܢܵܕܹܬܼ ܩܵܡܹ̇ܬܼ ܠܩܵܠ ܝܘܼܠܦܵܢܵܐ ܀ 17 :ܗܘ̤ ܝܘܼܠܦܵܢܵܐ ܩ̣ܪܵܢܝ ܘܐܲܥܝܼܪܲܢܝ ܡ̣ܢ ܡܲܐܝܼܢܘܼܬܼܝ 18 :ܘܐܲܝܟ ܕܲܠܫܲܒܼܪܵܐ ܓܲܪܸܓܼ ܢܲܓܼܕܲܢܝ ܠܘܵܬܼ ܥܸܢܝܵܢܹܗ 19 :ܥܕܲܡ̇ܐ ܠܐܸܡܲܬܼܝ ܕܲܡܟܲܬܿ ܫܲܠܦܵܐ ܪܵܚܹ̇ܡ ܫܸܢܬܼܵܐ 20 ܩܘܼܡ ܨܘܼܬܼ ܩܵܠܹ̈ܐ ܕܣܸܦܪ̈ܲܝ ܪܘܼܚܵܐ ܕܿܡܠܹܝܢ ܬܲܗܪܵܐ ܀ 21 :ܬܲܗܪܵܐ ܪܲܒܵܐ ܡܠܹܝܢ ܓܸܠܝܵܢܹ̈ܐ ܕܣܸܦܪ̈ܲܝ ܪܘܼܚܵܐ 22 ܘܣܵܗܹ̇ܕ ܡܘܼܫܹܐ ܕܿܗܘ̤ܵܐ ܒܘܼܟܼܪܵܐ ܕܪܹܫ ܓܸܠܝܵܢܹ̈ܐ ܀ 23 :ܗܘ̤ ܐܸܫܬܲܥܝܼ ܕܐܲܝܟܲܢ ܬܸܩܢܲܬ̤ ܒܪܝܼܬܼܵܐ ܒܪܵܫܝܼܬܼ 24 ܘܗܘ̤ ܒܲܕܹܿܩ ܠܲܢ ܥܲܠ ܫܘܼܪܵܝܵܐ ܘܝܘܼܒܵܠ ܓܸܢܣܲܢ ܀ 25 :ܒܣܸܦܪܹܗ ܚܙܲܝܢܵܗ̇ ܠܐܘܼܪܚܵܐ ܕܡܲܠܝܵܐ ܡܲܪܕܿܝܼܬܼ ܐ̄ܢܵܫܵܐ 26 ܘܒܲܕܼܡܘܼܬܼ ܡܝܼܠܹ̈ܐ ܣܕܼܝܼܪܝܼܢ ܗ̄ܘ̣ܵܘ ܒܵܗ̇ ܙܢܲܝ̈ ܥܘܼܗܕܵܢܹ̈ܐ ܀ 27 :ܐܲܝܟ ܫܲܬܼܐܸܣܬܼܵܐ ܣ̣ܵܡܹܗ ܠܐܵܕܼܵܡ ܪܹܫ ܐ̄ܢܵܫܘܼܬܼܵܐ 28 ܘܐܝܼܕܵܐ ܒܐܝܼܕܼܵܐ ܥܕܲܡ̇ܐ ܕܿܡ̣ܛܵܐ ܠܘܵܬܼ ܐܲܒܼܪܵܗܵܡ ܀ 29 :ܥܸܣܪܝܼܢ ܫܲܪ̈ܒܼܵܢ ܡ̣ܢܵܐ ܡ̣ܢ ܐܵܕܼܵܡ ܥܕܲܡܵܐ ܠܐܲܒܼܪܵܡ 30 ܘܨܹܝܕܼ ܐܲܒܼܪܵܗܵܡ ܫܲܚܠܸܦ ܛܲܟܼܣܵܐ ܕܡܲܪܕܿܝܼܬܼ ܡܸܠܬܹܗ ܀ 31 :ܒܐܲܒܼܪܵܡ ܣܲܝܸܟ ܪܲܗܛܵܐ ܕܡܸܠܵܘ̈ܗܝ ܟܲܕ ܠܵܐ ܣܲܝܸܟ 32 ܘܫܲܪܝܼ ܡܝܵܘܹܐ ܙܢܲܝ̈ ܓܸܠܝܵܢܹ̈ܐ ܕܲܗܘ̤ܵܘ ܨܹܐܕܼܵܘܗܝ ܀ 33 :ܪܘܼܚ ܓܸܠܝܵܢܹ̈ܐ ܓܠ̣ܵܐ ܠܹܗ ܒܪܘܼܚܵܐ ܪܘܼܚܵܢܵܐܝܼܬܼ 34 ܘܲܓܼܠ̣ܵܐ ܘܒܲܕܿܩ ܥܲܠ ܒܵܪܘܿܚܵܐ ܘܲܡܫܲܡܫܵܢܵܘ̈ܗܝ ܀ 35 :ܒܝܲܕ ܐܲܒܼܪܵܗܵܡ ܓ̣ܡܲܪ ܨܸܒܼܝܵܢܹܗ ܪܵܚܹ̇ܡ ܐ̄ܢܵܫܵܐ 36 ܘܐܸܫܬܵܘܕܿܝܼ ܠܹܗ ܕܒܹܗ ܡܸܬܼܒܲܪܟܼܝܼܢ ܥܲܡܡܹ̈ܐ ܕܐܲܪܥܵܐ ܀ 37 :ܐܲܒܼܵܐ ܕܥܲܡܡܹ̈ܐ ܩ̣ܪܵܝܗܝ ܒܵܪܘܿܝܵܐ ܠܪܵܚܡܵܐ ܕܚܘܼܒܹܿܗ 38 ܘܣ̣ܵܡ ܬܵܘܕܿܝܼܬܼܵܐ ܕܗܲܝܡܵܢܘܼܬܹܗ ܩܕܼܵܡ ܚ̣ܿܙܵܝܹ̈ܐ ܀ 39 :ܠܗܲܝܡܵܢܘܼܬܹܗ ܝܲܗ̄ܒܹܿܗ ܠܓܲܙܵܐ ܕܫܘܼܘܕܵܝ ܡܸܠܵܘ̈ܗܝ 40 ܕܢܸܕܼܪܘܿܫ ܐܘܼܪܚܵܐ ܠܘܵܬܼ ܐܝܼܬܼܘܼܬܹܗ ܠܟܼܠ ܕܲܡܗܲܝܡܸܢ ܀ 41 :ܒܗܲܝܡܵܢܘܼܬܹܗ ܐܸܡ̣ܲܪ ܕܝܵ̇ܕܲܥ ܠܐܲܠܵܗ ܟܠܵܐ 42 ܘܐܸܬܼܚܲܫܒܲܬ̤ ܠܹܗ ܙܲܕܿܝܼܩܘܼܬܼܵܐ ܕܡ̣ܢ ܨܸܒܼܝܵܢܵܐ ܀ 43 ܨܸܒܼܝܵܢ ܢܲܦܫܹܗ ܗܘ̤ܵܐ ܗܲܕܿܝܼܐܵܐ ܠܡܲܪܕܿܝܼܬܼ ܥܲܡܠܵܘ̈ܗܝ: pb. 3 44 ܘܡܲܙܲܥ ܘܲܡ̣ܛܵܐ ܠܘܵܬܼ ܡܘܼܠܟܵܢܹ̈ܐ ܕܪܵܡܝܼܢ ܡܸܢܹܗ ܀ 45 :ܒܝܲܕ ܡܘܼܠܟܵܢܹ̈ܐ ܐܲܣܪܹܗ ܠܪܵܚܡܹܗ ܪܵܚܹ̇ܡ ܟܹܐܢܹ̈ܐ 46 ܘܫܲܐ̣ ܠܹܗ ܪܵܚܡܹܗ ܕܐܲܝܟܲܢ ܘܐܸܡܲܬܼܝ ܗܵܘܹ̇ܝܢ ܨܹܐܕܼܵܘ̈ܗܝ ܀ 47 :ܐܲܝܟܲܢ ܐܸܕܲܥ ܕܫܵܠ̈ܡܵܢ ܨܹܐܕܲܝ ܡܸܠܲܝ̈ ܚܘܼܒܵܟ 48 ܘܲܡܩܝܼܢܲܬܼ ܠܝܼ ܒܝܵܪܬܿܘܼܬܿ ܐܲܪܥܵܐ ܐܲܝܟ ܕܐܸܫܬܵܘܕܿܝܼܬܿ ܀ 49 :ܒܕܸܒܼܚܵܐ ܚܵܘܝܹܗ ܡ̇ܪܵܐ ܠܥܲܒܼܕܹܿܗ ܢܝܼܫܵܐ ܕܚܘܼܒܹܿܗ 50 ܘܲܒܼܚܲܝ̈ܘܵܬܼܵܐ ܓܠ̣ܵܐ ܘܒܲܕܹܿܩ ܠܹܗ ܥܲܠ ܕܲܥܬܼܝܼ̈ܕܼܵܝܼܢ ܀ 51 :ܬܠܵܬܼ ܚܲܝ̈ܘܵܬܼܵܐ ܣܲܒ̣ ܠܵܟ ܐܲܒܼܪܵܡ ܠܫܘܼܘܕܵܝ ܡܸܠܲܝ̈ 52 ܥܸܓ̣ܠܵܐ ܬܘܼܠܬܵܐ ܘܕܸܟܼܪܵܐ ܬܘܼܠܬܵܐ ܘܥܸܙܵܐ ܬܘܼܠܬܵܐ ܀ 53 :ܡ̣ܢ ܦܵܪܲܚܬܼܵܐ ܣܲܒ̣ ܠܵܟ ܬܲܪܬܹܿܝܢ ܠܦܘܼܬܼ ܡܘܼܠܟܵܢܵܐ 54 ܘܲܒܼܫܘܼܦܢܝܼܢܵܐ ܘܲܒܼܒܲܪ ܝܵܘܢܵܐ ܐܲܢܝܼܚ ܢܲܦܫܵܟ ܀ 55 :ܦܲܠܸܓܼ ܦܲܓܼܪܹ̈ܐ ܘܣܝܼܡ ܗܲܕܵܡܹ̈ܐ ܚܲܕ ܠܘܼܩܒܲܠ ܚܲܕ 56 ܘܲܒܼܦܘܼܠܵܓܼܗܘܿܢ ܨܘܼܪ ܬܲܚܘܝܼܬܼܵܐ ܕܗܵܝ̇ ܕܵܥܬܼܝܼܕܼܵܐ ܀ 57 :ܣܝܼܡ ܦܲܪܲܚܬܼܵܐ ܟܲܕܼ ܠܵܐ ܦܠܝܼܓܼܵܐ ܠܲܡ̈ܢܵܘܵܬܼܵܐ 58 ܘܲܒܫܲܠܡܘܼܬܼܗܘܿܢ ܡܬܼܘܿܚ ܪܸܥܝܵܢܵܟ ܠܘܵܬܼ ܫܘܼܠܵܡܵܐ ܀ 59 :ܒܗܵܠܹܝܢ ܐܲܠܦܹܗ ܡܵܪܵܐ ܛܵܒܼܵܐ ܙܢܲܝ̈ ܨܸܒܼܝܵܢܹܗ 60 ܕܢܸܗܘܹܐ ܡ̇ܬܲܚ ܚܚܪܵܐ ܕܗܵܘܢܹܗ ܠܘܵܬܼ ܕܲܥܬܼܝܼ̈ܕܵܢ ܀ 61 :ܓ̣ܡܲܕ ܙܲܕܝܼܩܵܐ ܝܸܨܝܵܢ ܡܲܪܹܗ ܘܛܲܝܸܒܼ ܕܵܒܼܚܹ̈ܐ 62 ܘܦܲܠܸܓܼ ܐܸܢܹܝܢ ܠܲܡ̈ܢܵܘܵܬܼܐ ܬܲܪܬܲܥܸܣܪܹ̈ܐ ܀ 63 :ܣܵܝ̣ܡ ܫܘܼܦܢܝܼܢܵܐ ܐܵܦ ܒܲܪ ܝܵܘܢܵܐ ܕܠܵܐ ܦܘܼܠܵܓܼܵܐ 64 ܘܲܡܣܲܟܹܿܐ ܗ̄ܘ̣ܵܐ ܕܬܸܚܘܿܬܼ ܢܘܼܪܵܐ ܘܬܹܐܟܼܘܿܠ ܕܒܸܚܵܘ̈ܗܝ ܀ 65 :ܒܲܙܗܝܼܪܘܼܬܼܵܐ ܢ̇ܵܛܲܪ ܗ̄ܘ̣ܵܐ ܠܹܗ ܠܕܸܒܼܚܵܐ ܕܡܵܪܹܗ 66 ܘܠܵܐ ܫܵܒܹ̇ܩ ܗ̄ܘ̣ܵܐ ܠܛܲܝܪܵܐ ܠܡܹܐܟܲܠ ܡ̣ܢ ܕܸܒܼܚܵܬܹ̈ܗ ܀ 67 :ܟܠܹܗ ܝܵܘܡܵܐ ܢ̣ܛܲܪ ܕܸܒܼܚܬܹܗ ܡ̣ܢ ܢܸܟܼܝܵܢܹ̈ܐ 68 ܘܡܲܥܪܲܒܼ ܫܸܡܫܵܐ ܫܘ̣ܵܐ ܠܓܸܠܝܵܢܵܐ ܐܲܠܵܗܵܝܵܐ ܀ 69 :ܚܝ̣ܙܵܐ ܬܲܢܘܼܪܵܐ ܕܣܵܠ̇ܩܵܐ ܡܸܢܹܗ ܫܲܠܗܹ ܒܼܝܼܬܼܵܐ 70 ܘܠܲܡܦܹܝܕ ܢܘܼܪܵܐ ܕܥܵܒܲ̇ܕ ܘܐܵܟܹ̇ܠ ܦܘܼܠܵܓܼ ܕܸܒܼܚܵܘ̈ܗܝ ܀ 71 :ܬܲܗܪܵܐ ܪܲܒܵܐ ܢ̣ܦܲܥ ܗ̄ܘ̣ܵܐ ܡ̣ܢ ܫܹܠܝ ܥܲܠ ܪܸܥܝܵܢܹܗ 72 ܘܡܸܬܿܕܲܡܲܪ ܗ̄ܘ̣ܵܐ ܕܲܟܼܡܵܐ ܡܛܲܟܲܣ ܒܝܘܼܒܵܠ ܕܸܒܼܚܹܗ ܀ 73 :ܚܹܝܠ ܒܵܪܘܿܝܵܐ ܚܲܟܿܡܹܗ ܠܡܸܕܲܥ ܐ̄ܪܵܙ ܓܸܠܝܵܢܹ̈ܐ 74 ܕܢܸܗܘܹܐ ܝܵ̇ܕܲܥ ܕܪܲܚܝܼܩ ܙܲܒܼܢܵܐ ܕܗܵܠܹܝܢ ܕܲܚܝ̣ܙܵܐ ܀ 75 :ܗܵܫܵܐ ܕܲܫܠܹܡ ܣܸܕܪܵܐ ܕܡܸܠܹ̈݁ܐ ܕܲܟܼܬܼܝܼ̈ܒܼܵܬܼܵܐ 76 ܢܸܦܢܹܐ ܢܸܬܼܢܹܐ ܚܹܝܠ ܣܘܼܟܵܠܵܐ ܕܲܟܼܣܸܐ ܒܡܠܹ̈ܐ ܀ pb. 4 77 :ܡܸܠܹ̈ܐ ܫܸܡܥܹ̇ܬܼ ܕܲܪܫܲܝ̣ܡ ܡܘܼܫܹܐ ܒܣܸܦܪܵܐ ܕܲܟܼܬ݂ܲܒܼ 78 ܘܲܡܕܲܣܝ̈ܵܢ ܗ̣̄ܘܲܝ̈ ܡܸܠܹ̈ܐ ܒܡܸܠܹ̈ܐ ܐܲܝܟ ܕܲܒܼܢܲܚܬܵܐ ܀ 79 :ܢܲܚܬܵܐ ܕܡܸܠܹ̈ܐ ܦܪܝܼܣ ܗ̄ܘ̣ܵܐ ܥܠܲܝܗܹܝܢ ܕܡܸܠܲܝ̈ ܪܘܼܚܵܐ 80 ܘܲܒܼܥܹ̇ܝܬܼ ܕܐܸܕܲܥ ܡ̇ܢܲܐ ܗ̄ܝܼ ܥܸܠܬܼܵܐ ܕܲܡܟܲܣ̈ܝܵܢ ܗ̣̄ܘܲܝ̈ ܀ 81 :ܠܵܐ ܓܲܠܝܘܼܬܼܗܹܝܢ ܥܒ݂ܲܕܼܬܲܢܝ ܕܐܸܒܼܥܹܐ ܒܥܵܬܼܵܐ ܕܼܒܼܗܹܝܢ 82 ܕܐܸܕܲܥ ܘܐܵܘܕܲܥ ܠܪ̈ܚܡܲܝ ܗܸܪ̈ܓܹܿܐ ܕܪ̈ܘܼܚܵܢܝܵܬܼܵܐ ܀ 83 :ܬܵܐ ܫܵܡܘܿܥܵܐ ܫܡܲܥ ܣܘܼܟܵܠܵܐ ܕܕܸܒܼܚܹܗ ܕܐܲܒܼܪܵܡ 84 ܘܚܘܼܪ ܘܐܸܬܼܒܲܝܲܢ ܕܲܟܼܡܵܐ ܪܓܼܝܼܓܼܝܼܢ ܙܢܲܝ̈ ܕܸܒܼܚܵܬܹ̈ܐ ܀ 85 :ܒܲܬܼܠܵܬܼ ܚܲܝ̈ܘܵܢ ܐܲܠܦܹܗ ܠܡܸܕܲܥ ܫܘܼܥܒܵܕ ܙܲܪܥܹܗ 86 ܘܲܒܼܫܘܼܥܒܵܕܼܗܘܿܢ ܚܵܘܝܹܗ ܛܲܟܼܣܵܐ ܕܡܸܢܝܵܢ ܫܲܒܼܛܹ̈ܐ ܀ 87 :ܠܫܲܒܼܛܹ̈ܐ ܬܪܸܥܣܲܪ ܡܸܬܼܦܲܠܲܓܼ ܗ̄ܕܵܐ ܙܲܪܥܹܗ ܕܟܹܐܢܵܐ 88 ܘܩܲܕܹܿܗ ܦܲܠܓܹܗ ܒܝܲܕܼ ܦܘܼܠܵܓܼܵܐ ܕܲܬܼܠܵܬܼ ܚܝ̈ܘܵܢ ܀ 89 :ܬܠܵܬܼܵܐ ܕܵܪܹ̈ܐ ܡܸܫܬܲܝܥܒܲܕܼ ܗ̄ܘ̣ܵܐ ܒܝܲܕܼ ܢܘܼܟܼܪ̈ܵܝܹܐ 90 ܘܨܵܪ݂ܹܗ ܠܥܲܡܠܵܐ ܕܲܬܼܥܝܼܫܘܼܬܹܗ ܒܫܲܬܿܝܼ̈ܩܵܬܼܵܐ ܀ 91 :ܒܲܥܠܲܝܡܘܼܬܹܗ ܟܵܕܹܢ ܗ̄ܘ̣ܵܐ ܠܹܗ ܒܢܝܼܪܵܐ ܕܥܲܒܼ̈ܕܹܿܐ 92 ܘܡܸܛܠ ܗܵܕܹܐ ܦܲܩܕܹܗ ܬܘܼܠܬܵܐ ܠܲܡܕܿܒܵܚܘܼ ܀ 93 :ܒܕܸܒܼܚܹ̈ܐ ܥܬܼܝܼܕ ܗ̄ܘ̣ܵܐ ܠܲܡܝܲܩܵܪܘܼ ܫܸܡ ܒܵܪܘܿܝܵܐ 94 ܘܥܲܒܼ݂ܕܹܿܗ ܠܕܸܒܼܚܹܗ ܐܲܝܟ ܗܲܕܿܝܼܠܵܐ ܩܕܼܵܡ ܝܲܠܕܵܬܹ̈ܐ ܀ 95 :ܒܫܸܡ ܚܲܝ̈ܘܬܼܵܐ ܡܲܠܸܜ ܗ̄ܘ̣ܵܐ ܠܹܗ ܙܢܲܝ̈ ܚܵܘܣܵܢܵܐ 96 ܘܨ̣ܵܪ ܠܹܗ ܛܘܼܦܣܵܐ ܕܢܸܚܙܹܐ ܫܲܦܝܼܪ ܠܢܝܼܫܵܐ ܕܡܵܪܹܗ ܀ 97 :ܟܠܹܗ ܛܲܟܼܣܵܐ ܢܵܡܘܿܣܵܝܵܐ ܨܵܪ ܠܹܗ ܒܕܸܒܼܚܵܘ̈ܗܝ 98 ܒܥܸܪܒܵܐ ܘܬܼܵܘܪܵܐ ܘܲܒܼܫܘܿܦܢܝܼܢܵܐ ܘܲܒܼܪܲܪ ܝܵܘܢܵܐ ܀ 99 :ܡ̣ܢ ܚܲܝ̈ܘܵܬܼܵܐ ܐܲܠܦܹܗ ܕܢܸܣܹ̈ܐ ܬܠܵܬܼܵܐ 100 ܘܡ̣ܢ ܦܵܪ̈ܚܵܬܼܵܐ ܬܪܹܝܢ ܟܲܕ ܫܵܠ̇ܡܝܼܢ ܒܲܫܡܵܗܲܝ̈ܗܘܿܢ ܀ 101 :ܒܪ̈ܵܚܫܲܝ ܒܐܲܪܥܵܐ ܚܵܘܝܹܗ ܥܲܡܠܹܗ ܒܹܝܬܼ ܢܘܼܟܼܪ̈ܵܝܹܐ 102 ܘܲܒܼܦܵܪ̈ܘܿܚܹܐ ܓܼܠܵܐ ܠܹܗ ܕܡܲܫܩܸܠ ܡ̣ܢ ܫܘܼܥܒܵܕܼܵܐ ܀ 103 :ܒܝܲܕ ܫܘܿܦܢܝܼܢܵܐ ܥܘܼܡܪܵܐ ܕܒܲܪܵܐ ܨܵܐܼ̈̄ܪ ܗ̄ܘ̣ܵܐ ܠܹܗ 104 ܘܲܒܼܒܲܪ ܝܵܘܢܵܐ ܢܝܵܚܬܵܐ ܕܒܲܐܪܥܵܐ ܕܲܟܼܢܲܥܢܵܝܹ̈ܐ ܀ 105 ܒܪܵܚܹ̇ܡ ܚܘܼܪܒܵܐ ܒܚܘܼܪܒܵܐ ܕܲܠܒܲܪ ܡܕܹܿܪܸܫ ܗ̄ܘ̣ܵܐ ܠܹܗ ܀ 106 ܘܲܒܼܒܲܪ ܫܲܝܢܵܐ ܒܕܼܘܼܒܵܪ ܥܲܡܡܹ̈ܐ ܘܲܡܕܹܝܼ̈ܢܵܬܼܵܐ ܀ 107 :ܒܗܵܕܹܐ ܬܸܢܘܲܝ ܠܵܐ ܦ̣ܪܲܫ ܐܸܢܘܿܢ ܟܲܕܼ ܡܸܬܿܕܲܒܼܚܝܼܢ 108 ܒܲܕܼܠܵܐ ܓܠܝ̣ܛ ܗ̄ܘ̣ܵܐ ܥܲܡܵܐ ܒܥܲܡܡܹ̈ܐ ܒܚܘܼܪܒܵܐ ܘܫܲܝܢܵܐ ܀ 109 :ܒܲܕܼ ܢܵ̇ܛܲܪ ܗ̄ܘ̣ܵܐ ܐܲܒܼܪܵܡ ܦܲܓܼܪܹ̈ܐ ܡ̣ܢ ܢܸܟܼܝܵܢܹ̈ܐ 110 ܒܥܘܼܕܼܪܵܢ ܡܵܪܹܗ ܕܥܲܠ ܝܲܠܕܼܵܬܹ̈ܗ ܡܸܬܼܒܲܩܸܐ ܗ̄ܘ̣ܵܐ ܀ 111 ܒܛܲܝܪܵܐ ܟܲܢܝܵܗ̇ ܠܡܲܟܼܝܵܢܘܼܬܼܵܐ ܕܐܵܓܸܒܼܛܵܝܹ̈ܐ: pb. 5 112 ܘܚܵܘܝܼ ܕܚܲܣܝܼܢ ܚܹܝܠ ܥܘܼܕܼܪܵܢܹܗ ܡ̣ܢ ܡܸܨܪ̈ܵܝܹܐ ܀ 113 :ܗܵܝ ܥܲܒܼܕܿܘܼܬܼܵܐ ܕܒܹܝܬܼ ܡܸܨܪ̈ܵܝܹܐ ܨܵܪܼ ܚܵܘܝܼ ܠܹܗ 114 ܘܡܸܛܠܗܵܕܹܐ ܣ̣ܵܡ ܗܲܕܵܡܵܐ ܠܘܼܩܒܲܠ ܚܲܒܼܪܹܿܗ ܀ 115 :ܘܠܵܐ ܣܦ̇ܩܝܼܢ ܗ̄ܘ̣ܵܘ ܠܲܡܥܲܕܵܪܘܼ ܠܲܐ̄ܚܪܹܢܵܐ 116 ܒܗܵܢ ܫܘܼܥܒܵܕܵܐ ܡܸܬܼܒܲܩܸܐ ܗ̄ܘ̣ܵܐ ܝܵܕܲܥ ܟܠܵܐ ܀ 117 :ܘܩܲܕܲܡ ܡܲܬ̣ܼܠܹܗ ܒܲܬܼܠܵܬܼ ܚܲܝ̈ܘܵܢ ܬܠܵܬܼܵܐ ܕܵܪ̈ܝܼܢ 118 :ܒܫܘܼܠܵܡ ܝܵܘܡ̇ܐ ܚܵܘܝܹܗ ܙܲܒܼܢܵܐ ܕܡܸܬܼܦܲܪܩܝܼܢ ܒܹܗ 119 ܕܡ̇ܐ ܕܡܸܫܬܲܚܩܝܼܢ ܟܸܢ ܡܸܬܼܚܲܪܪܝܼܢ ܡ̣ܢ ܥܲܒܼܕܿܘܼܬܼܵܐ ܀ 120 :ܒܩܘܼܒܵܠ ܕܸܒܼܚܹܗ ܦܘܼܪܩܵܢ ܙܲܪܥܹܗ ܡܸܬܼܒܲܕܲܩ ܗ̄ܘ̣ܵܐ 121 ܒܗܵܝ ܕܐܵܟܼ̇ܠܵܐ ܗ̄ܘ̣ܵܬܼ ܢܘܼܪܵܐ ܠܕܸܒܼܚܵܘ̈ܗܝ ܗܲܢܝܼܵܐܝܼܬܼ ܀ 122 :ܒܢܘܼܪܵܐ ܚܵܘܝܹܗ ܦܘܼܪܩܵܢ ܙܲܪܥܹܗ ܕܲܟܼܡܵܐ ܢܲܗܝܼܪ 123 ܕܲܠܥܹܝܢ ܟܠܢܵܫ ܡܸܬܼܚܲܪܲܪ ܗ̄ܘ̣ܵܐ ܡ̣ܢ ܥܲܒܼܕܿܘܼܬܼܵܐ ܀ 124 :ܬܪܹܝܢ ܣܘܼܥܪ̈ܵܢܹܐ ܨܵܪ̣ ܠܹܗ ܒܚܸܙܘܵܐ ܕܫܲܠܗܹܒܼܝܼܬܼܵܐ 125 ܚܪܘܼܪܹ̈ܐ ܕܥܲܡܹܗ ܘܢܸܓ̣̈ܕܹܿܐ ܩ̈ܫܲܝܵܐ ܕܐܵܓܹܝܼܛܵܝܹ̈ܐ ܀ 126 :ܒܙܲܗܪܵܐ ܕܢܘܼܪܵܐ ܒܩܘܼܒܵܠ ܕܵܒܼܚܵܘ̈ܗܝ ܡܵܬܼܒܲܩܸܐ ܗ̄ܘ̣ܵܐ 127 ܘܲܒܼܬܼܢܵܢܵܐ ܒܥܲܙܝܼܙܘܼܬܼܵܐ ܕܡܸܬܼܢܲܓܿܕܼܵܢܹ̈ܐ ܀ 128 :ܦܵܪܘܿܫܵܐܝܼܬܼ ܡܸܬܼܒܲܩܸܐ ܗ̄ܘ̣ܵܐ ܒܠܵܐ ܦܵܪܘܿܫܬܵܐ 129 ܕܲܡܚܲܕܿܝܵܐ ܗ̄ܘ̣ܵܬܼ ܘܲܡܥܝܼܩܵܐ ܗ̄ܘ̣ܵܬܼ ܠܲܬܼܪܹܝܢ ܓܲܒܿܝܼ̈ܢ ܀ 130 :ܗܲܢܝܼܵܐܝܼܬܼ ܐܵܟܼ̇ܠܵܐ ܗ̄ܘ̣ܵܬܼ ܠܹܗ ܠܕܸܒܼܚܹܗ ܕܐܲܒܼܪܵܡ 131 ܒܵܟܼ ܥܵܒܼ̇ܪܵܐ ܗ̄ܘ̣ܵܬܼ ܡ̣ܢ ܚܲܕܼ ܠܲܐ̄ܚܪܹܝܢ ܐܲܝܟ ܦܵܪܘܿܫܬܵܐ ܀ 132 :ܐܵܦ ܗܘ̤ ܟܹܐܢܵܐ ܒܗܵܢ ܦܘܼܪܫܵܢܵܐ ܬ̣ܗܲܪ ܘܐܸܬܿܕܲܡܲܪ 133 ܕܲܟܼܡܵܐ ܦ̇ܪ̇ܫܵܐ ܘܲܟܼܡܵܐ ܢܵܛ̇ܪܵܐ ܛܲܟܼܣܵܐ ܕܐܘܼܟܼܠܵܗ̇ ܀ 134 :ܡܘܼܫܹܐ ܐܸܡ݂ܲܪ ܕܢܦ݂ܲܠ ܬܸܡܗܵܐ ܥܲܠ ܐܲܒܼܪܵܗܵܡ 135 ܒܗܵܝ̇ ܕܐܸܬܿܕܲܒܼܪ ܗ̄ܘ̣ܵܐ ܗܵܘܢܹܗ ܠܲܡܚܵܪ ܒܲܕܪ̈ܲܚܝܼܩܵܢ ܀ 136 :ܪ̈ܲܚܝܼܩܵܢ ܗ̣̄ܘܲܝ̈ ܗܵܠܹܝܢ ܕܲܚܙ̣ܵܐ ܒܝܲܕܼ ܓܸܠܝܵܢܵܐ 137 ܘܡܸܛܠ ܗܵܕܹܐ ܡܸܬܿܬܿܡܲܗ ܗ̄ܘ̣ܵܐ ܘܡܸܬܼܕܲܡܲܪ ܗ̄ܘ̣ܵܐ ܀ 138 :ܩܵܠ ܓܸܠܝܵܢܵܐ ܡܚܲܟܸܿܡ ܗ̄ܘ̣ܵܐ ܠܹܗ ܠܡܸܙܵܐ ܕܟܲܣ̈ܝܵܢ 139 ܕܢܸܗܘܹܐ ܝܵ̇ܕܲܥ ܕܫܲܪܝܼܪ ܚܸܙܘܵܐ ܘܪܲܚܝܼܩ ܙܲܒܼܢܹܗ ܀ 140 :ܡܸܕܲܥ ܬܸܕܲܥ ܐܵܡܲ݁ܪ ܗ̄ܘ̣ܵܐ ܠܹܗ ܡ̇ܪܵܐ ܠܥܲܒܼܕܹܿܗ 141 ܕܥܵܡܘܿܪܵܐ ܠܲܡ ܢܸܗܘܹܐ ܙܲܪܥܵܝܟ ܒܹܝܬܼ ܢܘܼܟܼܪ̈ܵܝܹܐ ܀ pb. 6 142 :ܐܲܪܒܲܥܡܐܵܐ ܠܲܡ ܫ̈ܢܲܝܵܐ ܢܸܗܘܹܐ ܥܲܒܼܕܵܐ ܠܥܲܒܼ̈ܕܹܿܐ 143 ܘܡ̣ܢ ܫܘܼܥܒܵܕܼܵܐ ܕܲܟܼܢ̇ܘܵܬܹ̈ܐ ܢܹܐܠܲܦ ܡܵܪܘܼܬܼܝ ܀ 144 :ܐ̄ܢܵܐ ܐ̄ܢܵܐ ܪܸܫܡܹ̇ܬܼ ܫܸܡ ܥܲܒܼܕܿܘܼܬܼܵܐ ܒܹܝܬܼ ܐܲܪ̈ܥܵܢܹܐ 145 :ܘܣܵܡ̇ܬܹܿܗ ܠܢܝܼܪܵܐ ܕܫ̣ܡ ܒܲܪ ܚܹܐܪܹ̈ܐ ܥܲܠ ܚܵܡ ܥܲܒܼܕܵܐ 146 :ܒܗܵܝ̇ ܥܲܒܼܕܿܘܼܬܼܵܐ ܕܲܟܼܕܲܝܢ ܟܹܐܢܵܐ ܠܚܵܡ ܙܲܠܝܼܠܵܐ 147 ܒܵܗ̇ ܟܵܕܹܿܢ ܐ̄ܢܵܐ ܠܙܲܪܥܵܟ ܕܝܼܠܵܝܟ ܐܲܝܟ ܕܠܵܐ ܦܘܼܠܚܵܢܝ ܀ 148 :ܒܗܵܕܹܐ ܬ̣ܢܘܲܝ ܣܵܡܹ̇ܬܼ ܒܐܲܪܥܵܐ ܫܸܡ ܥܲܒܼܕܿܘܼܬܼܵܐ 149 ܕܐܵܘܕܲܥ ܡ̇ܪܘܼܬܼܝ ܕܡ̇ܪܵܐ ܐܝܼܬܲܝ ܕܥܲܒܼ̈ܕܹܿܐ ܘܚܹܐܪܹ̈ܐ ܀ 150 :ܥܲܠ ܫܹܝܡ ܣܵܡ̇ܬܹ̇ܐ ܠܫܸܡ ܝܲܩܝܼܪܵܐ ܒܦܘܼܡ ܙܲܕܼܝܼܩܵܐ 151 ܘܲܒܼܚܵܡ ܟܸܕܼܢܹ̇ܬܼ ܒܢܝܼܪܵܐ ܕܡ̇ܪܘܼܬܼܝ ܠܟܼܠ ܕܲܥܒܼܝܼܕܼܵ ܗ̄ܘ̣ ܀ 152 :ܗܵܐ ܪܹܫܡܹ̇ܬܼ ܠܵܟ ܐܲܒܼܪܵܡ ܪܵܚܹܡܝ ܐܘܼܪܚܵܐ ܫܦܝܼܬܼܵܐ 153 ܪܕܼܝܼ ܬܲܩܢܵܐܝܼܬܼ ܒܝܲܕܼ ܓܲܠ̈ܝܵܬܼܵܐ ܠܘܵܬܼ ܟܲܣ̈ܝܵܬܼܵܐ ܀ 154 :ܗܵܐ ܚܸܘܝܼܬܵܟ ܥܲܒܼܕܿܘܼܬܼ ܙܲܪܥܵܟ ܘܚܹܐܪܘܼܬܼ ܙܲܪܥܵܟ 155 ܕܲܒܼܬܲܪ̈ܬܲܝܗܹܝܢ ܢܹܐܠܲܦ ܛܲܟܼܣܵܐ ܕܥܲܒܼ̈ܕܹܿܐ ܘܚܹܐܪܹ̈ܐ ܀ 156 :ܒܝܲܕ ܢܸܣܝܵܢܵܐ ܡܲܠܸܦ ܐ̄ܢܵܐ ܠܹܗ ܙܢܲܝ̈ ܦܘܼܩܕܵܢܲܝ̈ 157 ܕܢܸܗܘܹܐ ܝܵ̇ܕܲܥ ܠܡܸܛܲܪ ܛܲܟܼܣܵܐ ܒܹܝܬܼ ܠܝܼ ܠܐ̄ܢܵܫܵܐ ܀ 158 :ܒܟܼܘܼܪ ܥܲܒܼܕܿܘܼܬܼܵܐ ܒܵܚܲ݁ܪ ܐ̄ܢܵܐ ܠܹܗ ܠܝܲܨܪܵܐ ܕܢܲܦܫܹܗ 159 ܕܒܲܥܡܝܼܠܵܬܼܵܐ ܢܸܒܼܥܹܐ ܦܘܼܪ̈ܣܹܐ ܕܲܡܢܝܼܚܝܼܢ ܠܹܗ ܀ 160 :ܬܠܵܬܼܵܐ ܕܵܪ̈ܝܼܢ ܢܸܗܘܹܐ ܥܲܒܼܕܵܐ ܠܥܲܒܼܕܵܐ ܕܥܲܒܼ̈ܕܹܿܐ 161 ܘܲܪܒܼܝܼܥ̈ܝܵܐ ܢܸܫܪܹܐ ܡܸܢܹܗ ܢܝܼܪܵܐ ܕܥܲܡܠܹܗ ܀ 162 :ܒܗܵܠܹܝܢ ܡܸܠܹ̈ܐ ܫܲܪܲܪ ܡ̇ܪܝܵܐ ܠܐܲܒܼܪܵܡ ܥܲܒܼܕܹܿܗ 163 ܘܲܦܥ̣ܵܐ ܘܚܵܝܹܗ ܙܢܲܝ̈ ܓܸܠܝܵܢܹ̈ܐ ܕܪܲܒܿ ܡ̣ܢ ܗܵܢܵܐ ܀ 164 :ܪܲܒܵܐ ܙܚܵܬܼܵܐ ܕܲܒܼܚܲܕܼ ܥܲܝܢܹ̈ܐ ܛܵܒܼ ܡ̣ܢ ܡܸܠܹ̈ܐ 165 ܐܲܟܼܡܵܐ ܕܢܲܗܝܼܪ ܢܘܼܗܪܹܗ ܕܫܸܡܫܵܐ ܡ̣ܢ ܚܸܫܘܿܟܼܵܐ ܀ 166 :ܡܸܠܹ̈ܐ ܗ̤ܘܲܝ̈ ܓܹܝܪ ܕܡܸܬܼܡܲܠ̈ܠܵܢ ܗ̄ܘܲܝ̈ ܒܥܸܕܵܢ ܕܸܒܼܚܹ̈ܐ 167 ܘܪ̈ܲܚܝܼܩܵܢ ܗ̣̄ܘܲܝ̈ ܡ̣ܢ ܣܘܼܥܪ̈ܵܢܹܐ ܛܵܘܪܵܐ ܪܲܒܵܐ ܀ 168 :ܒܗܵܢ ܓܸܠܝܵܢܐ ܚܙܵܬܼܵܐ ܓܠܝܼܬܼܵܐ ܡܸܬܼܒܲܕܿܩܵܐ ܗ̄ܘ̣ܵܬܼ 169 ܘܲܛܥܝܼܢܵܐ ܗ̄ܘ̣ܵܬܼ ܣܒܲܪܬܼܵܐ ܚܕܲܬܵܐ ܕܒܲܛܢܵܐ ܘܝܲܠܕܵܐ ܀ 170 :ܒܥܸܕܵܢ ܛܲܗܪܵܐ ܡܸܬܼܒܲܕܲܩ ܗ̄ܘ̣ܵܐ ܗܵܢ ܓܸܠܝܵܢܵܐ 171 ܒܗܵܘ̇ ܥ̣ܕܵܢܵܐ ܕܥܲܙܝܼܙ ܣܲܓܿܝܼ ܢܘܼܗܪܹܗ ܕܫܸܡܫܵܐ ܀ 172 :ܒܥܲܝܢܹ̈ܐ ܕܦܲܓܼܪܵܐ ܚܵܙܹ̇ܐ ܗ̄ܘ̣ܵܐ ܠܹܗ ܟܹܐܢܵܐ ܠܚܸܘܙܵܐ 173 ܟܲܕܼ ܡܸܬܼܒܲܩܸܐ ܒܝܲܕܼ ܢܲܗܝܼܪܵܐ ܒܡܵܪܹܗ ܕܢܘܼܗܪܵܐ ܀ 174 :ܬܠܵܬܼ ܕܸܡ̈ܘܵܬܼܵܐ ܕܓܲܒܼܪܹ̈ܐ ܬܠܵܬܼܵܐ ܚ̣ܙܵܐ ܙܲܕܿܝܼܩܵܐ 175 ܘܲܡܗܲܠܟܼܝܼܢ ܗ̄ܘ̣ܵܘ ܠܘܵܬܼ ܕܸܡ̈ܘܵܬܼܵܐ ܕܲܥܛܝܼܦܝܼܢ ܗ̄ܘ̣ܵܘ ܀ pb. 7 176 :ܐܲܝܟ ܕܒܼܓܲܒܼܪܹ̈ܐ ܚܵܐ݁ܲܪ ܗ̄ܘ̣ܵܐ ܒܗܘܿܢ ܐܵܦ ܐܲܒܼܪܵܗܵܡ 177 ܘܠܵܐ ܝܵ̇ܕܲܥ ܗ̄ܘ̣ܵܐ ܕܲܚܙܵܬܼܵܐ ܗ̄ܘ̣ܵܬܼ ܕܠܵܐ ܪܘܼܟܵܒܼܵܐ ܀ 178 :ܕܠܵܐ ܪܘܼܟܵܒܼܵܐ ܗ̄ܘ̣ ܟܝܵܢ ܪ̈ܘܼܚܵܢܹܐ ܘܲܕܼܠܵܐ ܓܘܼܫܡܵܐ 179 ܘܡ̇ܐ ܕܡܸܫܬܿܕܲܪܝܼܢ ܨܹܝܕܼ ܐܲܪ̈ܥܵܢܹܐ ܡܚܵܘܹܝܢ ܓܘܼܫܡܵܐ ܀ 180 :ܠܵܘ ܒܲܫܪܵܪܵܐ ܓܘܼܫܡܵܐ ܩܢܹܝܢ ܗ̄ܘ̣ܵܘ ܠܘܵܬܼ ܫܘܼܚܠܵܦܵܐ 181 ܐܸܠܵܐ ܕܡܘܼܬܼܵܐ ܠܵܐ ܡܪܲܟܲܒܼܬܵܐ ܡܚܵܘܹܝܢ ܒܐܵܐܲܪ ܀ 182 :ܚܲܝܠܵܐ ܪܲܒܵܐ ܩܢܹܝܢ ܒܲܒܼܪܝܼܬܼܗܘܿܢ ܡ̣ܢ ܚܹܝܠ ܟܲܣܝܵܐ 183 ܘܒܹܗ ܒܗܵܘ̇ ܚܲܝܠܵܐ ܡܚܵܘܹܝܢ ܚܲܝܠܵܐ ܕܐܲܠܵܗܘܼܬܹܐ ܀ 184 :ܚܲܝܠܹܗ ܡܗܲܠܸܟ ܥܲܡ ܬܘܼܩܵܢܵܘ̈ܗܝ ܐܲܟܼܡܵܐ ܕܨܵܒܹ̇ܐ 185 ܘܝܲܬܿܝܼܪ ܡ̣ܢ ܟܠ ܒܚܲܝܠܲܝ̈ ܪܵܘܡܵܐ ܣܵܥܲ݁ܪ ܗܵܕܹܐ ܀ 186 :ܪܘܼܚܵܐ ܪܲܟܹܿܒܼ ܟܲܕܼ ܠܵܐ ܪܲܟܲܒܼ ܒܪܘܼܚ ܓܸܠܝܵܢܵܐ 187 ܘܥܲܠ̣ ܨܹܝܕܼ ܐܲܒܼܪܵܡ ܒܲܬܼܠܵܬܼ ܕܸܡ̈ܘܵܢ ܓܘܼܫܡܵܢ̈ܝܵܬܼܵܐ ܀ 188 :ܬܠܵܬܼܵܐ ܓܲܒܼܪ̈ܝܼܢ ܚܙ̣ܵܐ ܡ̣ܢ ܫܸܠܝܵܐ ܕܐܵܬܹ̇ܝܢ ܠܐܘܼܪܥܹܗ 189 ܘܲܣܘ݂ܲܚ ܣܲܓܿܝܼ ܘܩܲܒܸܿܠ ܐܸܢܘܿܢ ܐܲܝܟ ܕܲܠܓܲܒܼܪܹ̈ܐ ܀ 190 :ܒܚܘܼܒܵܐ ܪܲܒܵܐ ܢܦܲܩ݂ ܠܘܼܩܒܲܠܗܘܿܢ ܠܦܘܼܬܼ ܪܲܒܿܘܼܬܼܗܘܿܢ 191 ܒܗܵܘ̇ ܐܸܣܟܹܿܡܵܐ ܕܲܡܩܲܒܸܿܠ ܗ̄ܘ̣ܵܐ ܒܥܘܼܡܪܹܗ ܠܐ̄ܢܵܫܵܐ ܀ 192 :ܐܲܝܟ ܕܲܠܐ̄ܢܵܫܵܐ ܩܲܒܸܿܠ ܐܸܢܘܿܢ ܐܲܒܼܪܵܡ ܟܹܐܢܵܐ 193 ܘܟܸܢ ܐܸܬܼܚܲܟܲܡ ܕܠܵܘ ܐ̄ܢܵܫܵܐ ܗܘ̤ܵܘ ܐܸܠܵܐ ܪܘܼܚܵܐ ܀ 194 :ܪ̈ܘܼܚܵܢܵܝܹܐ ܠܒܸ݂ܫܘ ܐܸܣܟܹܿܡܵܐ ܦܲܓܼܪܵܢܵܝܵܐ 195 ܘܥܲܠ̣ܘ ܨܹܝܕܼ ܥܲܒܼܕܵܐ ܕܲܢܣܲܒܿܪܘܼܢܵܝܗܝ ܣܒܲܪܬܼܵܐ ܚܕܼܿܬܵܐ ܀ 196 :ܡ̇ܪܵܐ ܘܥܲܒܼܕܵܘ̈ܗܝ ܥܲܠ̣ܘ ܨܹܝܕ ܥܲܒܼܕܵܐ ܪܵܚܹ̇ܡ ܡ̇ܪܹܗ 197 ܘܲܥܛܝܼܦܝܼܢ ܗ̄ܘ̣ܵܘ ܕܡܘܼܬܼܵܐ ܕܥܲܒܼ̈ܕܹܿܐ ܘܲܕܼܥܵܒܼܘܿܕܼܵܐ ܀ 198 :ܕܡܘܼܬܼܵܐ ܕܥܲܒܼܕܵܐ ܥܬܝܼܕܸ ܗ̄ܘ̣ܵܐ ܕܢܸܣܲܒܼ ܐܲܠܵܗ ܟܠܵܐ 199 ܘܩܲܕܹܿܡ ܨܵܪܵܗ̇ ܠܗܵܝ ܕܥܬܼܝܼܕܼܵܐ ܒܝܲܕܼ ܐܲܒܼܪܵܗܵܡ ܀ 200 :ܡ̣ܢ ܐܲܒܼܪܵܗܵܡ ܥܬܼܝܼܕܼ ܗ̄ܘ̣ܵܐ ܕܢܸܗܘܹܐ ܡܚܲܪܿܪ ܐ̄ܢܵܫܵܐ 201 ܘܲܕܪܲܫ ܐܘܼܪܚܵܐ ܠܗܵܝ̇ ܕܲܥܬܼܝܼܕܼܵܐ ܒܗܵܕܹܐ ܕܲܣܥ݂ܲܪ ܀ 202 :ܥܬܝܼܕܼ ܗ̄ܘ̣ܵܐ ܡܸܠܬܼܵܐ ܝܲܠܕܹܿܗ ܕܐܲܒܼܵܐ ܕܢܸܣܲܒܼ ܐ̄ܢܵܫܵܐ 203 ܘܢܸܩܪܹܿܝܘܗܝ ܒܲܫܡܹܗ ܥܪܵܐ ܕܐܲܠܵܗܵܐ ܡܲܠܟܿܐ ܘܡܵܪܵܐ ܀ 204 :ܦܲܓܼܪܵܐ ܓܲܠܝܵܐ ܥܬܼܝܼܕܼ ܗ̄ܘ̣ܵܐ ܕܢܸܥܒܸܿܕܸ ܢܵܘܣܵܐ ܠܚܘܼܒܹܿܗ 205 ܘܥܲܠ̣ ܨܹܝܕܼ ܐܲܒܼܪܵܡ ܒܵܗ̇ ܒܲܕܼܡܘܼܬܼܵܐ ܦܲܚܼܪܵܢܵܝܬܵܐ ܀ 206 :ܝܕܲܥ ܗ̄ܘ̣ܵܐ ܠܹܗ ܠܙܲܪܥܹܗ ܕܐܲܒܼܪܵܡ ܕܡܸܬܼܥܲܕܿܠܵܢܵܐ ܗ̄ܘ̣ 207 ܕܩܲܕܹܿܡ ܦܲܣܩ̣ܵܗ̇ ܠܥܸܠܬܼܵܐ ܕܝܲܨܪܹܗ ܒܝܲܕܼ ܡܲܥܲܠܬܹܿܗ ܀ 208 ܡܦܵܣ ܗ̄ܘ̣ܵܐ ܕܐܵܡ̇ܪܝܼܢ ܕܐܲܝܟܲܢ ܗܵܘܹ̈ܐ ܐ̄ܢܵܫܵܐ ܐܲܠܵܗ: pb. 8 209 ܘܚܵܘܝܵܗ̇ ܠܗܵܕܹܐ ܒܐܸܣܟܹܿܝܡ ܦܲܓܼܪܵܐ ܦܲܓܼܪܵܐ ܕܚܵܕܝܼ ܠܐܲܒܼܪܵܡ ܀ 210 :ܒܦܲܓܼܪܵܐ ܕܐ̄ܢܵܫܵܐ ܚܙ̣ܵܐ ܐܲܒܼܪܵܗܵܡ ܠܐܲܠܵܗ 211 ܠܵܐ ܗ̄ܘ̣ܵܐ ܦܲܓܼܪܵܐ ܐܸܠܵܐ ܒܲܙܢܵܐ ܕܕܼܵܡܹ̇ܐ ܠܦܲܓܼܪܵܐ ܀ 212 :ܠܵܘ ܦܲܓܼܪܵܐ ܗ̄ܘ̣ܵܐ ܕܲܚܙ̣ܵܐ ܟܹܐܢܵܐ ܐܲܝܟ ܡܵܐ ܕܲܚܙ̣ܵܐ 213 ܐܸܠܵܐ ܦܲܓܼܪܵܐ ܕܕܼܵܡܹ̇ܐ ܠܦܲܓܼܪܵܐ ܟܲܕܼ ܠܲܝܬܿ ܦܲܓܼܪܵܐ ܀ 214 :ܐܵܦ ܐܲܒܼܪܵܗܵܡ ܒܗܵܕܹܐ ܬܸܢܘܲܝ ܡܸܬܼܦܲܠܲܓܼ ܗ̄ܘ̣ܵܐ 215 ܕܐܵܪܵܐ ܗ̄ܘ̣ ܦܲܓܼܪܵܐ ܕܲܡܚܵܘܹܐ ܠܹܗ ܐܵܘ ܠܵܘ ܦܲܓܼܪܵܐ ܗ̄ܘ̣ ܀ 216 :ܗܲܝܡܵܢܘܼܬܹܗ ܥܒܲܕܼܬܹܗ ܠܟܹܐܢܐ ܕܢܸܗܘܹܐ ܟܹܐܢܵܐ 217 ܘܲܚܙ̣ܵܐ ܠܟܲܣܝܵܐ ܒܦܲܓܼܪܵܐ ܓܲܠܝܵܐ ܘܗܲܝܡܸܢ ܕܐܝܼܬܼܵܘܗܝ ܀ 218 :ܚܙ̣ܵܐ ܠܲܬܼܠܵܬܼܵܐ ܕܲܥܛܝܼܦܝܼܢ ܗ̄ܘ̣ܵܘ ܚܲܕ ܐܸܣܟܹܿܡܵܐ 219 ܘܫܲܒ݂ܲܩ ܠܲܬܼܪܹܝܢ ܘܡܲܠܸܠ ܥܲܡ ܚܲܕܼ ܐܲܝܟ ܕܲܠܡܵܪܵܐ ܀ 220 :ܡ̇ܪܝܵܐ ܟܲܢܝܹܗ ܐܲܒܼܪܵܐ ܟܹܐܢܵܐ ܠܡܵܪܵܐ ܟܹܐܢܵܐ 221 ܘܲܒܼܥ̣ܵܐ ܡܸܢܹܗ ܕܢܸܥܘܿܠ ܨܹܐܕܼܵܘܗܝ ܐܲܝܟ ܥܲܒܼܕܹܿܗ ܀ 222 :ܐܵܦ ܒܵܪܘܿܝܵܐ ܫ̣ܡܲܥ ܒܵܥܘܼܬܹܗ ܐܲܟܼܡܵܐ ܕܐܲܦܝܼܣ 223 ܘܥܲܠ̣ ܥܲܡ ܥܲܒܼܕܵܘ̈ܗܝ ܕܲܢܨܘܼܪ ܛܘܼܦܸܣܵܐ ܦܲܓܼܪܵܢܵܝܵܐ ܀ 224 :ܒܦܲܓܼܪܵܐ ܕܐ̄ܢܵܫܵܐ ܡܪܲܥ̣ܐ ܗ̄ܘ̣ܵܐ ܟܠ ܥܲܡ ܪܲܒܿܘܼܬܹܗ 225 ܘܲܕܼܒܲܪ ܥܲܡܹܗ ܬܪܹܝܢ ܪ̈ܘܼܚܵܢܹܐ ܘܥܲܠ̣ ܨܹܝܕܼ ܥܲܒܼܕܹܗ ܀ 226 :ܠܗܵܘ̇ ܠܘܼܚܵܡܵܐ ܕܲܒܼܦܲܪܕܲܝܣܵܐ ܒܲܛܸܠ ܗܵܫܵܐ 227 ܘܪܲܥܝܼ ܗ̄ܘ̣ܵܐ ܠܹܗ ܠܲܫܡܲܝܵܢܹ̈ܐ ܘܠܲܐܪ̈ܥܵܢܵܝܹܐ ܀ 228 :ܟܠ ܥܲܡ ܟܠܵܐ ܐܲܝܬܿܝܼ ܥܲܡܹܗ ܠܒܹܝܬܼ ܐܲܒܼܪܵܗܵܡ 229 ܘܐܲܣܡܸܟ ܐܸܢܘܿܢ ܒܲܚܫܵܡܝܼܬܼܵܐ ܥܲܡ ܪܲܒܿܘܼܬܹܗ ܀ 230 :ܫܡܲܝܵܐ ܘܐܲܪܥܵܐ ܙܲܡܸܢ ܘܲܩܪܵܐ ܠܒܹܝܬܼ ܐܲܒܼܪܵܗܵܡ 231 ܕܲܢܚܵܘܹܐ ܠܗܘܿܢ ܪܲܒܿܘܼܬܼ ܚܘܼܒܹܿܗ ܕܲܠܘܵܬܼ ܐ̄ܢܵܫܵܐ ܀ 232 :ܪܲܒܿܘܼܬܼ ܚܘܼܒܹܿܗ ܓܠ̣ܵܐ ܠܪ̈ܘܼܚܵܢܹܐ ܘܦܲܓܼܪ̈ܵܢܵܝܹܐ 233 ܒܗܵܝ̇ ܡܲܥܲܠܬܵܐ ܕܥܲܠ̣ ܥܲܡ ܥܲܒܼܕܵܘܗܝ ܠܘܵܬܼ ܒܲܪ ܒܲܝܬܹܿܗ ܀ 234 :ܣܝܵܓܼܵܐ ܕܚܸܡܬܼܵܐ ܕܒܹܝܬܼ ܠܹܗ ܠܐ̄ܢܵܫܵܐ ܫ̣ܪܵܐ ܒܹܝܬܼ ܐ̄ܢܵܫܵܐ 235 ܘܲܩܪ̣ܵܐ ܣܵܗ̈ܕܹܿܐ ܠܲܫܡܲܝܵܢܹ̈ܐ ܒܬܲܪܥܘܼܬܼ ܐ̄ܢܵܫܵܐ ܀ 236 :ܒܬܲܪܥܘܼܬܼ ܐ̄ܢܵܫܵܐ ܗܘ̤ܵܘ ܐܵܦ ܗܸܢܘܲܢ ܪ̈ܵܚܡܹܐ ܠܐ̄ܢܵܫܵܐ 237 ܘܲܚܕܼܝܼܘ ܕܲܗܘ̤ܵܬܼ ܚܕܼܵܐ ܫܲܘܝܘܼܬܼܵܐ ܠܗܘܿܢ ܘܲܠܐ̄ܢܵܫܵܐ ܀ 238 ܚܕܼܵܐ ܫܲܘܝܘܼܬܼܵܐ ܥܒ݂ܲܪ ܒܵܪܘܿܝܵܐ ܠܟܼܠ ܥܲܡ ܟܠܵܐ: pb. 9 239 ܘܐܲܢܝܼܚ ܐܸܢܘܿܢ ܒܲܚܫܵܡܝܼܬܵܐ ܕܲܥܒ݂ܲܪܸ ܐܲܒܼܪܵܡ ܀ 240 :ܗܘ̤ ܥܲܡ ܕܝܼܠܹܗ ܥܲܠ̣ ܨܹܝܕ ܕܝܼܠܹܗ ܟܣܹܐ ܡ̣ܢ ܟܠܵܐ 241 ܘܬܲܡܝܼܗܝܼܢ ܗ̄ܘ̣ܵܘ ܫܡܲܝܵܐ ܘܐܲܪܥܵܐ ܒܬܸܡܗܵܐ ܕܲܥܠܵܘܗܝ ܀ 242 :ܡܠܝܼܠܹ̈ܐ ܘܚܲܪ̈ܫܹܐ ܡܸܬܿܕܲܡܪܝܼܢ ܗ̄ܘܵܘ ܒܩܵܠܵܐ ܘܫܸܬܼܩܵܐ 243 ܟܲܕܼ ܚܵܙܹܿܝܢ ܗ̄ܘ̣ܵܘ ܕܠܵܐ ܩܢܹܐ ܣܵܟܼܵܐ ܕܲܣܡܝܼܟ ܒܐܲܪܥܵܐ ܀ 244 :ܐܘܿ ܠܲܣܡܵܟܼܵܐ ܪܘܼܚܵܢܵܝܵܐ ܘܦܲܓܼܪܵܢܵܝܵܐ 245 ܕܲܣܡܝܼܟ ܗ̄ܘ̣ܵܐ ܒܹܗ ܡ̇ܪܵܐ ܘܥܲܒܼܕܼܵܘ̈ܗܝ ܒܲܚܕܼܵܐ ܫܲܘܝܘܼ ܀ 246 :ܐܘܿ ܠܫܵܪܘܼܬܼܐ ܕܲܡܬܲܩܢܵܐ ܗ̄ܘ̣ܵܬܼ ܒܹܝܬܼ ܐܲܒܼܪܵܗܵܡ 247 ܘܡܸܬܼܐܲܟܼܠܵܐ ܗ̄ܘ̣ܵܬܼ ܘܠܵܐ ܡܸܬܼܐܲܟܼܠܵܐ ܡ̣ܢ ܐܵܟܼܘܿܠܹ̈ܝܗ̇ ܀ 248 :ܐܘܿ ܟܡܵܐ ܪܲܒܿ ܗ̄ܘ̣ܵܐ ܗܵܘ̇ ܬܘܼܩܵܢܵܐ ܕܲܥܝܼܒ݂ܲܕܼ ܟܹܐܢܵܐ 249 ܕܲܣܦ̣ܲܩ ܐܘܼܟܼܠܹܗ ܠܲܫܡܲܝܵܢܹ̈ܐ ܘܠܲܐܪ̈ܥܵܢܵܝܹܐ ܀ 250 :ܫܡܲܝܵܐ ܘܐܲܪܥܵܐ ܣܡܝܼܟܼܝܼܢ ܗ̄ܘ̣ܵܘ ܒܹܗ ܒܒܲܝܬܹܿܗ ܕܟܹܐܢܵܐ 251 ܐܲܠܵܗ ܟܠܵܐ ܕܠܵܐ ܣܘܼܝܵܟܼܵܐ ܘܕܝܼܠܹܗ ܒܣܵܟܼܵܐ ܀ 252 :ܗܵܘ̇ ܬܘܼܩܵܢܵܐ ܕܗܵܘܹ̇ܐ ܒܪܵܘܡ̇ܐ ܓܠ̣ܵܐ ܠܹܗ ܠܐܲܒܼܪܵܡ 253 ܒܗ̈ܝ̇ ܫܵܪܘܼܬܼܵܐ ܕܲܣܡܝܼܟ ܗ̄ܘ̣ܵܐ ܒܵܗ̇ ܥܲܡ ܪ̈ܘܼܚܵܢܹܐ ܀ 254 :ܒܲܒܼܪܹܗ ܕܐܲܒܼܪܵܡ ܡܣܲܝܸܟ ܗ̄ܘ̣ܵܐ ܠܹܗ ܠܨܸܒܼܝܵܢ ܚܘܼܒܹܿܗ 255 ܘܲܓܼܠ̣ܵܗ̇ ܠܗܵܕܹܐ ܒܚܘܼܒܵܐ ܪܲܒܵܐ ܕܚܵܘܝܼ ܠܐܲܒܼܪܵܡ ܀ 256 :ܚܘܼܒܹܿܗ ܪܲܒܵܐ ܚܵܘܝܹܗ ܠܟܹܐܢܐ ܒܲܕܼ ܥܲܠ̣ ܨܹܐܕܼܵܘܗܝ 257 ܘܨܵܪ ܠܹܗ ܛܘܼܦܣܵܐ ܕܪܲܚܝܼܩܵܬܼܵܐ ܒܲܕܸܩܲܪ̈ܝܼܒܼܵܢ ܀ 258 :ܒܫܘܼܠܵܡ ܙܲܒܼܢܹ̈ܐ ܗܵܘܹ̇ܐ ܒܚܘܼܒܵܐ ܟܠ ܥܲܡ ܟܠܵܐ 259 ܘܚܵܘܝܵܗ̇ ܠܗܵܕܹܐ ܒܚܘܼܒܹܿܗ ܕܐܲܒܼܪܵܡ ܪܵܚܡܵܐ ܕܚܘܼܒܵܐ ܀ 260 :ܫܡܲܝܵܐ ܕܲܬܼܪܹܝܢ ܥܒܼܝܼܕܼ ܗ̄ܘ̣ܵܐ ܒܲܝܬܹܿܗ ܕܐܲܒܼܵܐ ܕܥܲܡܡܹ̈ܐ 261 ܘܲܫܪܹܝܢ ܗ̄ܘ̣ܵܘ ܒܹܗ ܐܲܪ̈ܥܵܢܵܝܹܐ ܘܲܫܡܲܝܵܢܹ̈ܐ ܀ 262 :ܚܕܲܬܵܐ ܕܠܵܐ ܗ̄ܘ̣ܵܬܼ ܗܘ̤ܵܬܼ ܡ̣ܢ ܫܸܠܝܵܐ ܒܹܝܬܼ ܐܲܒܼܪܵܗܵܡ 263 ܘܬܼܵܗ̇ܪܝܼܢ ܗ̄ܘ̣ܵܘ ܒܵܗ̇ ܪ̈ܘܼܚܵܢܵܝܹܐ ܒܪܲܒܿܘܼܬܼ ܬܲܗܪܵܗ̇ ܀ pb. 10 264 :ܒܪܲܒܿܘܼܬܼ ܬܲܗܪܵܗ̇ ܡܸܬܿܕܲܡܪܝܼܢ ܗ̄ܘ̣ܵܘ ܚܲܝ̈ܠܲܝ ܪܵܘܡܵܐ 265 ܕܡ̇ܢܲܐ ܗ̄ܝܼ ܗܵܕܹܐ ܕܲܣܥ݂ܲܪ ܟܲܣܝܵܐ ܒܹܝܬܼ ܐܲܪ̈ܥܵܢܹܐ ܀ 266 :ܘܠܵܐ ܚܲܙܝܵܐ ܠܲܢ ܗܵܕܹܐ ܕܲܗܘ̤ܵܬܼ ܡ̣ܢ ܝܘܿܡ ܕܲܗ̤ܘܲܝܢ 267 ܘܠܵܐ ܫܡܝܼܥܵܐ ܠܲܢ ܕܐܝܼܬܼܝܵܐ ܚܵܘܝܼ ܝܵܬܹܗ ܠܥܲܒܼܕܵܘ̈ܗܝ ܀ 268 :ܗܵܐ ܒܨܝܼܪ ܩܲܠܝܼܠ ܐܲܠܦܹ̈ܐ ܥܕܲܡ̇ܐ ܠܗܵܫܵܐ 269 ܘܠܵܐ ܒܲܕܲܩ ܠܲܢ ܥܲܠ ܟܲܣܝܼܘܼܬܼܵܐ ܕܪܲܒܿܘܼܬܼ ܚܘܼܒܹܿܗ ܀ 270 :ܒܥܸܠܲܬܼ ܐ̄ܢܵܫܵܐ ܓܠ̣ܵܐ ܠܲܢ ܚܘܼܒܹܿܗ ܪܵܚܹ̇ܡ ܐ̄ܢܵܫܵܐ 271 ܘܛܵܒܼ ܡ̣ܢ ܟܠ ܐ̄ܢܵܫ ܚܵܘܝܵܗ̇ ܠܗܵܕܹܐ ܠܘܵܬܼ ܐܲܒܼܪܵܗܵܡ ܀ 272 :ܬܪܹܝܢ ܪ̈ܘܼܚܵܢܹܐ ܓܒܼ݂ܵܐ ܡ̣ܢ ܟܠܵܐ ܠܣܵܥܘܿܪܘܼܬܹܗ 273 ܘܥܲܠ̣ܘ ܨܹܝܕܼ ܐܲܒܼܪܵܡ ܒܲܕܼܡܘܼܬܼ ܓܲܒܼܪܹ̈ܐ ܡܸܬܼܚܲܙܝܵܢܹ̈ܐ ܀ 274 :ܐܲܝܟ ܕܲܠܓܲܒܼܪܹ̈ܐ ܩܲܒܸܿܠ ܐܸܢܘܿܢ ܐܵܦ ܐܲܒܼܪܵܗܵܡ 275 ܘܠܹܗ ܠܐܸܣܟܹܿܡܵܐ ܡܸܬܼܚܲܙܝܵܢܵܐ ܦܠܲܓܼ ܐܝܼܩܵܪܵܐ ܀ 276 :ܣܡܝܼܕܵܐ ܘܥܸܓܼܠܵܐ ܘܚܲܠܒܼܵܐ ܘܚܹܐܘܬܼܵܐ ܛܲܝܸܒܼ ܘܐܲܬܼܩܸܢ 277 ܒܲܕܼܣܵܒܲܪ ܗ̄ܘ̣ܵܐ ܕܗܵܠܹܝܢ ܦܲܐ̈̄ܝܵܢ ܠܲܙܢܲܝ̈ ܚܘܼܒܵܐ ܀ 278 :ܐܵܦ ܒܵܪܘܿܝܵܐ ܒܚܘܼܒܵܐ ܩܲܒܿܠܹܗ ܠܨܸܒܼܝܵܢ ܚܘܼܒܹܿܗ 279 ܒܲܕ ܝܵܕܲܥ ܗ̄ܘ̣ܵܐ ܕܗܵܕܹܐ ܥܵܕܼ̇ܪܵܐ ܠܐܲܪ̈ܥܵܢܵܝܹܐ ܀ 280 :ܐܘܿ ܠܗܵܘ̇ ܚܲܝܠܵܐ ܕܠܵܐ ܣܵܦܩܝܼܢ ܠܹܗ ܫܡܲܝܵܐ ܘܐܲܪܥܵܐ 281 ܕܣܲܝܸܟ ܗܘ̤ ܠܹܗ ܟܲܕܼ ܠܵܐ ܣܲܝܸܟ ܒܥܸܠܲܬܼ ܐ̄ܢܵܫܵܐ ܀ 282 :ܡܸܛܠ ܐ̄ܢܵܫܵܐ ܥܲܠ̣ ܨܹܝܕܼ ܐ̄ܢܵܫܵܐ ܕܲܫܡܹܗ ܐܲܒܼܪܵܐ 283 ܘܐܸ̣ܟܲܠ ܘܐܸܫܬܿܝܼ ܗܵܘ̇ ܕܲܡܢܲܟܼܪܲܝ ܠܐܘܼܟܼܠܵܐ ܘܫܸܩܝܵܐ ܀ 284 :ܡܸܠܬܼܵܐ ܕܡܸܢܹܗ ܥܬܼܝܼܕܼ ܗ̄ܘ̣ܵܐ ܕܢܸܣܲܒ̣ ܚܲܕܼ ܡ̣ܢ ܐ̄ܢܵܫܵܐ 285 ܘܢܸܣܥܘܿܪ ܒܐܝܼܕܼܵܘ̈ܗܝ ܗܵܝ̇ ܕܲܥܬܼܝܼܕܼܵܐ ܒܫܘܼܠܵܡ ܙܲܒܼܢܹ̈ܐ ܀ 286 :ܚܲܕܸ ܥܡ ܚܘܼܒܹܿܗ ܥܵܒܹ̇ܕܼ ܗ̄ܘ̣ܵܐ ܠܹܗ ܠܗܵܘ̇ ܒܲܪܢܵܫܵܐ 287 ܘܲܪܫܲܡ̣ ܐܸܢܹܝܢ ܠܐ̄ܢܵܫܵܝܵܬܹ̈ܐ ܒܐܲܠܵܗܘܼܬܹܗ ܀ 288 :ܒܐܘܼܟܼܠܵܐ ܘܫ̣ܩܝܵܐ ܡܸܬܼܚܲܫܲܚ ܗ̄ܘ̣ܵܐ ܗܵܘ̇ ܒܲܪܢܵܫܵܐ 289 ܘܩܲܕܹܿܡ ܐܸܟܲܠ̣ ܕܒܼܐܘܼܟܼܠܹܗ ܢܫܲܪܲܪ ܦܲܓܼܪܵܢܘܼܬܹܗ ܀ 290 :ܒܦܲܓܼܪܵܐ ܘܢܲܦܫܵܐ ܡܸܬܿܬܲܩܲܢ ܗ̄ܘ̣ܵܐ ܒܪܹܗ ܕܐܲܒܼܪܵܗܵܡ 291 ܘܥܲܡ ܨܹܝܕܸ ܐܒܼܘܼܗܝ ܟܲܕܼ ܡܸܬܼܥܲܛܲܦ ܙܢܲܝ̈ ܗܲܕܵܡܹ̈ܐ ܀ 292 :ܐܵܦ ܐܒܼܪܵܗܵܡ ܒܦܲܓܼܪܵܢܘܼܬܹܗ ܡܸܬܼܒܲܩܸܐ ܗ̄ܘ̣ܵܐ 293 ܕܐܵܪܵܐ ܦܲܓܼܪܵܐ ܗ̄ܘ̣ ܐܵܘ ܠܵܘ ܦܲܓܼܪܵܐ ܗ̄ܘ̣ ܗܵܘ̇ ܡܵܐ ܕܚܵܙܹ̇ܐ ܀ 294 :ܘܛܵܟ ܪܵܢܹ̇ܐ ܗ̄ܘ̣ܵܐ ܠܦܘܼܬܼ ܫܲܒܼܪܘܼܬܼܵܐ ܕܲܒܼܗܵܘ̇ ܙܲܒܼܢܵܐ 295 ܕܐܵܦ ܪ̈ܘܼܚܵܢܹܐ ܒܐܘܼܟܼܠܵܐ ܕܐ̄ܢܵܫܵܐ ܡܥܵܕܼܝܼܢ ܚܵܐܹ̇ܝܢ ܀ 296 :ܟܒܲܪ ܐܵܦ ܗܵܕܹܐ ܡܸܬܼܚܲܫܲܒܼ ܗ̄ܘ̣ܵܐ ܐܲܝܟ ܒܲܪܢܵܫܵܐ 297 ܘܡܸܛܠ ܚܘܼܒܹܿܗ ܣܲܥ̣ܪܵܗ̇ ܠܗܵܕܹܐ ܟܲܕܼ ܠܵܐ ܣܲܥ̣ܪܵܗ̇ ܀ 298 ܠܵܐ ܓܹܝܪ ܣܲܥ̣ܪܵܗ̇ ܘܠܵܐ ܡܸܣܬܲܥܪܵܐ ܘܠܵܐ ܟܠ ܟܠܹܗ: pb. 11 299 ܒܲܕܼܪܵܡ ܐܝܼܬܼܝܵܐ ܡ̣ܢ ܕܸܡ̈ܘܵܬܼܵܐ ܦܲܓܼܪ̈ܵܢܝܵܬܼܐ ܀ 300 :ܠܲܝܬܿ ܠܲܕܝܵܢܹܗ ܟܝܵܢܵܝ̈ܬܼܵܐ ܕܐܲܪ̈ܥܵܢܵܝܹܐ 301 ܘܠܵܐ ܐܸܣܬܲܝܲܟ ܘܠܵܐ ܡܸܣܬܲܝܲܟ ܒܲܥܒܼܵܕܼ ܐܝܼܕܹ̈ܘ̈ܗܝ ܀ 302 :ܠܲܝܬܿ ܠܹܗ ܣܵܟܼܵܐ ܕܲܡܣܲܝܸܟ ܠܹܗ ܠܓܼܵܘ ܡ̣ܢ ܣܵܟܹܗ 303 ܕܗܘ̤ ܠܒܲܪ ܡ̣ܢ ܟܠ ܘܲܠܗܵܠ ܡ̣ܢ ܟܠ ܘܟܼܠ ܠܟܼܵܐ ܡܸܢܹܗ ܀ 304 :ܒܚܘܼܒܵܐ ܡܚܵܘܹܐ ܟܲܣܝܘܼܬܼ ܚܘܼܒܹܿܗ ܠܪܵܚܹ̇ܡ ܚܘܼܒܹܿܗ 305 ܕܢܲܪܡܹܐ ܛܢܵܢܵܐ ܠܪ̈ܚܡܲܝ ܚܘܼܒܹܿܗ ܕܲܢܚܘܼܪܘܼܢ ܒܹܗ ܀ 306 :ܒܐܲܒܼܪܵܡ ܩܲܒ̣ܥܹܗ ܠܢܝܼܫܵܐ ܕܚܘܼܒܹܿܗ ܩܕܼܵܡ ܚܲܙܹ̈ܝܹܐ 307 ܕܢܸܗܘܘܿܢ ܚܵܙܹ̇ܝܢ ܟܲܣܝܵܐ ܒܓܲܠܝܵܐ ܟܲܕܼ ܠܵܐ ܚܵܙܹ̇ܝܢ ܀ 308 :ܒܚܘܼܒܵܐ ܚܙ̣ܵܝܗܝ ܗ̄ܘ̣ܵܐ ܐܵܦ ܐܲܒܼܪܵܗܵܡ ܟܲܕܼ ܠܵܐ ܚܙ̣ܵܝܗܝ ܗ̄ܘ̣ܵܐ 309 ܘܣܵܗܹ̇ܕ ܩܵܠܹܗ ܕܠܵܐ ܚܵܙܹ̇ܐ ܠܹܗ ܐ̄ܢܵܫܵܐ ܘܚܵܝܹ̇ܐ ܀ 310 :ܠܵܐ ܚ̣ܙܵܝܗܝ ܐܲܒܼܪܵܡ ܠܲܟܼܣܹܐ ܡ̣ܢ ܟܠ ܒܢܲܝ̈ ܐܲܒܼܪܵܗܵܡ 311 ܚ̣ܙܵܘ ܠܵܐ ܬܸܛܥܘܿܢ ܘܬܲܛܥܘܿܢ ܠܐ̄ܢܵܫܵܐ ܒܥܸܠܲܬܼ ܐܲܒܼܪܵܡ ܀ 312 :ܐܲܒܼܪܵܡ ܟܹܐܢܵܐ ܗ̄ܘ̣ ܘܫܲܪܝܼܪܵܐܝܼܬܼ ܫܲܪܝܼܪ ܚܘܼܒܹܿܗ 313 ܘܐܹܝܢ ܒܲܫܪܵܪܵܐ ܚܙ̣ܵܐ ܕܸܡ̈ܘܘܵܬܼܵܐ ܕܠܵܐ ܪܘܼܟܵܒܼܵܐ ܀ 314 :ܕܠܵܐ ܪܘܼܟܵܒܼܵܐ ܚܙ̣ܵܐ ܠܲܚܙܵܬܼܵܐ ܕܠܵܐ ܡܸܬܿܕܲܪܟܵܐ 315 ܘܲܕܼܠܵܐ ܣܵܟܼܵܐ ܚܵܪ̣ ܒܲܕܼܡܘܼܬܼܐ ܕܠܵܐ ܡܸܬܿܕܲܡܝܵܐ ܀ 316 :ܥܝܵܕܼܵܐ ܗ̄ܘ̣ ܗܵܢܵܐ ܕܐܠܵܗ ܟܠܵܐ ܕܗܵܟܲܢ ܢܸܣܥܘܿܪ 317 ܒܲܕܼܠܵܐ ܣܵܦ̇ܩܝܼܢ ܥܒܼܝܼܪܹ̈ܐ ܠܡܸܚܙܵܐ ܠܐܲܠܵܗܘܼܬܹܗ ܀ 318 :ܒܗܵܕܹܐ ܕܡܘܼܬܼܵܐ ܡܸܬܼܚܵܘܹܐ ܗ̄ܘ̣ܵܐ ܠܥܸܣܪܝܼܢ ܕܵܪ̈ܝܼܢ 319 ܘܒܲܥܣܝܼܪܵܝܵܐ ܓܙ݂ܲܪ ܠܘܼܚܵܡܵܐ ܘܚܲܒܸܿܠ ܟܠܵܐ ܀ 320 :ܡ̣ܢ ܢܘܿܚ ܫܲܪܝܼ ܒܲܡܫܲܝܢܘܼܬܼܵܐ ܕܲܠܘܵܬܼ ܐ̄ܢܵܫܵܐ 321 ܘܲܦܢ̣ܵܐ ܘܲܡ̣ܢܵܐ ܥܸܣܪܵܐ ܕܵܪ̈ܝܼܢ ܥܕܲܡܵܐ ܠܐܲܒܼܪܵܐ ܀ 322 :ܒܐܲܒܼܪܵܡ ܣܲܝܸܟ ܥܸܣܪܝܼܢ ܫܲܪ̈ܒܼܵܢ ܕܲܟܼܝܵܢ ܐ̄ܢܵܫܵܐ 323 ܘܫܲܪܝܼ ܡܚܵܘܹܐ ܙܢܲܝ̈ ܢܝܼܚܘܼܬܼܐ ܘܒܲܣܝܼܡܘܼܬܼܵܐ ܀ 324 :ܒܚܸܙܘܵܐ ܢܝܼܚܐ ܓܠ̣ܵܐ ܨܸܒܼܝܵܢܹܗ ܠܪܵܚ̇ܡܵܐ ܕܚܘܼܒܹܿܗ 325 ܘܒܲܣܝܼܡܑܵܝܼܬܼ ܡܲܠܸܠ ܥܲܡܹܗ ܠܦܘܼܬܼ ܪܸܥܝܵܢܹܗ ܀ 326 :ܒܡܲܡܠܠܵܐ ܕܥܲܡܹܗ ܒܛ̣ܠܸܘ ܠܘܼܚܵܡܹ̈ܐ ܕܲܓܼܙܵܪ ܕܝܼܢܵܐ 327 ܥܒܼܵܪ ܦܘܼܩܕܵܢܵܐ ܘܚܘܼܒܵܠ ܡܲܝ̈ܵܐ ܘܦܘܼܠܵܓܼ ܡܲܡܠܠܵܐ ܀ 328 :ܠܹܗ ܒܲܠܚܘܿܕܼܵܘ̈ܗܝ ܡ̣ܠܲܟ ܡܘܼܠܟܵܢܵܐ ܕܠܵܐ ܡܸܬܿܕܲܓܲܠ 329 ܕܲܒܼܝܲܕ ܙܲܪܥܹܗ ܢܸܦܢܘܿܢ ܥܲܡܡܹ̈ܐ ܠܕܹܚܠܲܬܼ ܩܘܼܫܬܵܐ ܀ 330 :ܒܗܵܢ ܚܘܼܫܵܒܼܵܐ ܬܲܚܬܿܝܼܝܵܬܹܗ ܠܡܸܥܲܠ ܨܹܐܕܼܵܘ̈ܗܝ 331 ܘܥܲܠ̣ ܟܲܕܼ ܠܵܐ ܥܲܠ̣ ܒܲܕܼܠܵܐ ܥܵܐܲܠ ܟܝܵܢܹܗ ܒܡܸܕܹܿܡ ܀ 332 :ܠܵܐ ܡܸܣܬܲܝܲܟ ܟܝܵܢ ܐܝܼܬܼܘܼܬܹܗ ܒܡܸܕܹܿܡ ܕܲܡܟܼܵܢ 333 ܟܲܕܼ ܠܲܝܬܿ ܣܵܟܼܵܐ ܠܐܲܡܝܼܢܘܼܬܹܗ ܕܲܕܼܠܵܐ ܫܘܼܪܵܝ ܀ 334 :ܕܠܵܐ ܫܘܼܪܵܝܵܐ ܘܙܲܓܼܠܵܐ ܫܘܼܠܵܡ ܐܝܼܬܼܵܘܗܝ ܘܐܝܼܬܼܵܘܗܝ 335 ܘܲܟܼܡܵܐ ܕܢܹܐܡܲܪ ܐܲܝܢܵܐ ܕܐܵܡܲ̇ܪ ܟܲܪܝܵܐ ܗ̄ܝܼ ܡܸܠܬܹܗ ܀ pb. 12 336 :ܒܡܸܠܬܹܗ ܐܸܡ̇ܪܹܬܼ ܐܵܦ ܐ̄ܢܵܐ ܕܐܸܡ̇ܪܹܬܼ ܐܲܝܠܹܝܢ ܕܐܵܡ̇ܪܹܬܼ 337 ܘܠܵܐ ܣܦ݂ܲܩ ܪܸܥܝܵܢܝ ܠܡܹܐܚܲܕܼ ܣܵܟܼܵܐ ܕܐܲܝܠܹܝܢ ܕܐܸܡ̇ܪܹܬܼ ܀ 338 :ܐܸܡ̇ܪܹܬܼ ܕܲܟܼܬܼܝܼܒܼ ܕܥܲܠ̣ ܒܵܪܘܝܵܐ ܠܒܹܝܬܼ ܐܲܒܼܪܵܗܵܡ 339 ܠܵܐ ܗ̄ܘ̣ܵܐ ܒܣܵܟܼܵܐ ܡܸܣܬܲܝܟܼܵܢܵܐ ܐܸܠܵܐ ܒܚܸܙܘܵܐ ܀ 340 :ܒܚܸܙܘܵܐ ܕܓܲܒܼܪܵܐ ܚܙ̣ܵܐ ܠܐܲܠܵܗܵܐ ܐܲܒܼܪܵܡ ܓܲܒܼܪܵܐ 341 ܘܩܲܒܿܠܹܗ ܒܒܲܝܬܹܿܗ ܐܲܝܟ ܕܲܠܓܲܒܼܪܵܐ ܡܸܬܼܚܲܙܝܵܢܵܐ ܀ 342 :ܐܲܝܟ ܕܲܠܓܲܒܼܪܵܐ ܐܸܡ̇ܪܹܬܼ ܕܩܲܒܿܠܹܗ ܠܵܘ ܒܲܟܼܝܵܢܵܐ 343 ܒܲܟܼܠܵܐ ܡܟܼܵܢܵܐ ܐܲܠܵܗܘܼܬܼܵܐ ܕܬܸܚܙܹܝܗ̇ ܥܲܝܢܵܐ ܀ 344 :ܠܵܘ ܠܲܟܼܝܵܢܹܗ ܚܙ̣ܵܐ ܐܲܒܼܪܵܗܵܡ ܒܚܸܙܘܵܐ ܕܲܚܙ̣ܵܐ 345 ܐܸܠܵܐ ܒܐ̄ܪܵܙܵܐ ܕܡܸܬܼܡܲܠܲܠ ܗ̄ܘ̣ܵܐ ܒܦܲܓܼܪܵܐ ܕܡܸܢܹܗ ܀ 346 :ܒܦܲܓܼܪܵܐ ܕܡܸܢܹܗ ܡܲܦܢܹܐ ܗ̄ܘ̣ܵܐ ܟܠ ܠܘܵܬܼ ܝܼܕܲܥܬܹܗ 347 ܘܩܲܕܹܿܡ ܣܲܒܿܪܹܗ ܣܒܲܪܬܼܵܐ ܕܡܲܠܝܵܐ ܚܲܝܹ̈ܐ ܠܐ̄ܢܵܫܵܐ ܀ 348 :ܚܲܝܹ̈ܐ ܕܐ̄ܢܵܫܵܐ ܟܣܹܝܢ ܗ̄ܘ̣ܵܘ ܡ̣ܢ ܟܠ ܒܐܲܠܵܗ ܟܠܵܐ 349 ܘܲܓܼܠ̣ܵܐ ܐܸܢܘܿܢ ܠܥܹܝܢ ܟܠ ܒܸܪ̈ܝܵܢ ܒܝܲܕܼ ܐܲܒܼܪܵܗܵܡ ܀ 350 :ܟܠܵܗ̇ ܒܪܝܼܬܼܵܐ ܡܸܬܼܒܲܩܝܵܐ ܗ̄ܘ̣ܵܬܼ ܒܚܸܙܘܹܐ ܕܐܲܒܼܪܵܐ 351 ܘܠܵܐ ܣܵܒܼ̇ܥܵܐ ܗ̄ܘ̣ܵܬܼ ܠܡܸܚܙܵܐ ܚܙܵܬܼܵܐ ܕܠܵܐ ܡܸܬܼܚܲܙܝܵܐ ܀ 352 :ܡܠܝܼܠܹ̈ܐ ܘܚܲܪ̈ܫܹܐ ܡܬܿܕܲܡܪܝܼܢ ܗ̄ܘ̣ܵܘ ܒܩܵܠܵܐ ܘܫܸܬܼܩܵܐ 353 ܕܡ̇ܢܲܐ ܗ̄ܝܼ ܗܵܕܹܐ ܕܲܟܼܢܝܼܫ ܥܵܠܡܵܐ ܠܒܲܝܬܹܿܗ ܕܐܲܒܼܪܵܡ ܀ 354 :ܡܠܝܼ̈ܠܹܐ ܝܲܬܿܝܼܪ ܡܸܬܿܕܲܡܪܝܼܢ ܗ̄ܘ̣ܵܘ ܒܗܵܢܵܐ ܬܲܗܪܵܐ 355 :ܒܕܲܩܢܹܝܢ ܗܵܘܢܵܐ ܠܲܡܚܵܪ ܫܲܦܝܼܪ ܒܲܕܼܠܵܐ ܓܲܠ̈ܝܵܢ 356 :ܠܗܘܿܢ ܗ̄ܘ̣ ܫܵܘܬܸܿܦ ܡܲܬܼܩܸܢ ܟܠܵܐ ܒܐ̄ܪܵܙ ܓܸܠܝܵܢܹܗ 357 ܒܲܕܼܫܲܪܝܼܪܝܼܢ ܠܡܸܛܲܪ ܐ̄ܪܵܙܵܐ ܕܒܹܝܬܼ ܠܹܗ ܘܲܠܗܘܿܢ ܀ 358 :ܐ̄̈ܪܵܙܵܐ ܗ̄ܘ̣ܵܐ ܓܹܝܪ ܕܲܡܟܲܣܲܝ ܗ̄ܘ̣ܵܐ ܡ̣ܢ ܟܠ ܒܸܪ̈ܝܵܢ 359 ܘܲܓܼܠ̣ܵܝܗܝ ܠܲܬܼܪܹܝܢ ܟܝܵܢܹ̈ܐ ܡܠܝܼܠܹ̈ܐ ܥܝܼܪܹ̈ܐ ܘܐ̄ܢܵܫܵܐ ܀ 360 :ܠܲܬܼܪܹܝܢ ܥܝܼܪܹ̈ܐ ܘܚܲܕ ܒܲܪܢܵܫܵܐ ܓܠ̣ܵܐ ܨܸܒܼܝܵܢܹܗ 361 :ܘܚܵܘܝܼ ܐܸܢܘܿܢ ܐ̄ܪܵܙܵܢܵܐܝܼܬܼ ܐ̄ܪܵܙ ܟܲܣܝܬܹܗ 362 :ܐ̄ܪܵܙܵܐ ܕܚܘܼܒܹܿܗ ܥܬܼܝܼܕܼ ܗ̄ܘ̣ܵܐ ܕܢܸܓܼܠܹܐ ܒܝܲܕܼ ܒܲܪܢܵܫܵܐ 363 ܘܸܡܛܠ ܗܵܕܹܐ ܕܒܲܪ̣ ܪ̈ܘܼܚܵܢܹܐ ܘܥܲܠ ܨܹܝܕܼ ܐܲܒܼܪܵܡ ܀ 364 :ܬܲܗܪܵܐ ܗ̄ܘ̣ܵܬܼ ܓܹܝܪ ܗܵܝ̇ ܡܲܥܲܠܬܵܐ ܘܛܵܒ̣ ܬܲܗܝܼܪܵܐ 365 ܘܟܲܓܼ ܓܲܠܝܵܐ ܗ̄ܘ̣ܵܬܼ ܠܵܐ ܓܲܠܝܵܐ ܗ̄ܘ̣ܵܬܼ ܠܲܕܚܵܙܹ̇ܝܢ ܠܵܗ̇ ܀ 366 :ܠܵܐ ܪ̈ܘܼܚܵܢܹܐ ܡܸܣܬܲܟܼܠܝܼܢ ܗ̄ܘ̣ܵܘ ܒܚܹܝܠ ܣܘܼܟܵܠܵܗ̇ 367 ܘܠܵܐ ܐܲܒܼܪܵܗܵܡ ܝܵ̇ܕܲܥ ܗ̄ܘ̣ܵܐ ܐܵܗ̇ ܕܡܵܢܲܐ ܗ̄ܝܼ ܘܥܲܠ ܡ̇ܢ ܀ 368 :ܒܚܸܙܘܵܗ̇ ܒܲܠܚܘܿܕܼ ܡܸܬܼܒܲܩܹܝܢ ܗ̄ܘ̣ܵܘ ܒܲܪܵܢܵܫܐܝܼܬܼ 369 ܘܲܠܣܘܼܟܵܠܵܗ̇ ܠܵܐ ܣܵܦ̇ܩܝܼܢ ܗ̄ܘ̣ܵܘ ܠܡܸܬܼܩܲܪܵܒܼܘܼ ܀ 370 :ܨܸܒܼܝܵܢ ܟܲܣܝܵܐ ܡܚܲܟܹܿܡ ܗ̄ܘ̣ܵܐ ܠܗܘܿܢ ܠܥܲܒܼܕܲܝ̈ ܟܲܣܝܵܐ 371 ܕܠܵܐ ܢܸܫܬܲܚܩܘܼܢ ܒܲܒܼܥܵܬܼ ܟܲܣܝܵܐ ܕܠܵܐ ܡܸܬܿܕܲܪܟܵܐ ܀ pb. 13 372 :ܒܚܹܝܠ ܨܸܒܼܝܵܢܹܗ ܡܸܬܼܒܲܩܹܝܢ ܗ̄ܘ̣ܵܘ ܕܠܵܐ ܣܲܒܼܥܘܼܬܼܵܐ 373 ܘܠܵܐ ܫܵܠܹ̇ܝܢ ܗ̄ܘ̣ܵܘ ܡ̣ܢ ܕܲܠܡܸܒܼܥܵܐ ܒܥܵܬܼܵܐ ܕܲܥܠܵܘܗܝ ܀ 374 :ܚܸܒܼܠܹ̈ܐ ܕܚܘܼܒܵܐ ܥܵܨܹ̇ܝܢ ܗ̄ܘ̣ܵܘ ܠܹܗ ܠܗܵܘܢܵܐ ܕܵܒܼܗܘܿܢ 375 ܕܐܸܡܲܬܼܝ ܢܵܘܠܸܕܼ ܪܸܡܙܵܐ ܟܲܣܝܵܐ ܚܹܝܠ ܟܲܣܝܘܼܬܹܗ ܀ 376 :ܠܣܘܼܟܵܠ ܡܸܠܹ̈ܐ ܡܸܬܼܝܲܐܒܼܝܼܢ ܗ̄ܘ̣ܵܘ ܥܝܼܪܹ̈ܐ ܘܐܲܒܼܪܵܡ 377 ܘܲܡܣܲܟܹܿܝܢ ܗ̄ܘ̣ܵܘ ܕܢܸܚܙܘܿܢ ܡܸܕܹܿܡ ܐܲܝܟ ܪܸܓܼܬܼܗܘܿܢ ܀ 378 :ܒܗܵܕܹܐ ܪܸܓܿܬܼܵܐ ܡܸܫܬܲܚܩܝܼܢ ܗ̄ܘ̣ܵܘ ܓܲܒܹ̈ܐ ܬܪ̈ܲܝܗܘܿܢ 379 :ܕܡܵܢܲܐ ܗ̄ܝܼ ܗܵܕܹܐ ܕܲܣܝܸܟ ܗܘ̤ ܠܹܗ ܟܲܕܼ ܠܵܐ ܣܲܝܸܟ 380 ܘܲܥܲܠ̣ ܒܲܚܙܵܬܼܵܐ ܕܠܵܐ ܡܸܬܚܲܙܝܵܐ ܠܘܵܬܼ ܒܲܝܬܹܿܗ ܀ 381 :ܡܵܢܵܐ ܩܲܒܸܿܠ ܕܢܲܬܼܩܸܢ ܠܹܗ ܟܠ ܙܢܲܝ̈ ܫܵܪܵܘܼܬܼܵܐ 382 ܕܗܵܐ ܠܵܐ ܡܩܲܒܸܿܠ ܟܝܵܢ ܐܝܼܬܼܘܼܬܹܗ ܦܲܓܼܪ̈ܵܢܝܵܬܼܵܐ ܀ 383 :ܗܵܐ ܕܠܵܐ ܐܘܼܟܼܠܵܐ ܡܲܚܸܐ ܒܚܲܝܠܹܗ ܐܵܦ ܠܲܟܼܝܵܢܲܢ 384 ܘܐܲܝܟܢ ܣܲܥ̣ܪܵܗ̇ ܠܗܵܕܹܐ ܕܲܣܥ݂ܲܪ ܬܲܗܪܵܐ ܗ̄ܝܼ ܟܠܵܗ̇ ܀ 385 :ܬܲܗܪܵܐ ܪܲܒܵܐ ܡܲܠܝܵܐ ܗ̄ܝܼ ܡܸܠܬܼܵܐ ܕܐܸܡ݂ܲܪ ܡܘܼܫܹܐ 386 ܕܡܵܪܐ ܒܪܝܼܬܼܵܐ ܡܸܣܬܲܝܒܲܪ ܗ̄ܘ̣ܵܐ ܡ̣ܢ ܒܸܪ̈ܝܵܬܹܗ ܀ 387 :ܠܵܐ ܡܸܬܼܡܲܠܠܵܐ ܡܸܠܬܼܵܐ ܡܸܠܬܼܵܐ ܕܐܸܡܲܪ ܒܲܪ ܥܸܒܼܪ̈ܵܝܹܐ 388 ܕܐܝܼܬܼܝܵܐ ܕܥܲܠ ܟܠ ܣܡܝܼܟ ܗ̄ܘ̣ܵܐ ܒܐܲܪܥܵܐ ܥܲܡ ܬܘܼܩܵܢܹܗ ܀ 389 :ܐܵܕܫܹ̈ܐ ܓܠܲܝܵ̈ܐ ܣܕ̣ܪ ܐܲܒܼܪܵܗܵܡ ܠܵܐ ܓܲܠܝܵܐ 390 ܘܡܲܢ ܠܵܐ ܢܸܬܼܡܲܗ ܕܥܵܐܹ̇ܠ ܐܘܼܟܼܠܵܐ ܒܠܵܐ ܪܘܼܟܵܒܼܵܐ ܀ 391 :ܒܪ̈ܓܼܫܹܐ ܘܙܵܘܥܹ̈ܐ ܡܸܬܼܒܲܩܹܝܢ ܗ̄ܘ̣ܵܘ ܐܵܦ ܚܲܙܵܝܹ̈ܐ 392 ܘܟܲܓܼ ܚܵܙܹܿܝܢ ܗ̄ܘ̣ܵܘ ܠܵܐ ܚܵܙܹ̇ܝܢ ܗ̄ܘ̣ܵܘ ܫܲܪܝܼܪܵܐܝܼܬܼ ܀ 393 :ܠܵܘ ܒܲܫܪܵܪܵܐ ܗܘ̤ܵܬܼ ܗܵܝ̇ ܕܲܗܘ̤ܵܬܼ ܒܒܲܝܬܹܿܗ ܕܐܲܒܼܪܵܐ 394 ܐܵܠܵܐ ܒܐ̄ܪܵܙܵܐ ܕܠܵܐ ܡܸܬܼܡܲܠܲܠ ܡ̣ܢ ܡܲܠܵܠܹ̈ܐ ܀ 395 :ܠܵܐ ܡܸܬܼܡܲܠܲܠ ܟܝܵܢ ܐܝܼܬܼܘܼܬܼܵܐ ܡ̣ܢ ܡܲܠܵܠܹ̈ܝܢ 396 ܡܵܕܹܝܢ ܠܵܐ ܗܘ̤ܵܬܼ ܗܵܝ̇ ܕܐܸܬܼܡܲܠܠܲܬ̤ ܐܲܝܟ ܕܐܸܬܼܡܲܠܠܲܬ̤ ܀ 397 :ܡܸܠܹ̈ܐ ܗ̤ܘܲܝ̈ ܓܹܝܪ ܕܠܵܐ ܪܘܼܟܵܒܼܵܐ ܕܲܟܼܬܲܒܼ ܡܘܼܫܹܐ 398 ܘܲܡܪ̈ܲܟܼܒܼܵܐ ܗ̣̄ܘܲܝ̈ ܘܠܵܐ ܡܪ̈ܲܟܼܒܼܵܢ ܗ̣̄ܘܲܝ̈ ܓܘܼܫܡܵܢܵܐܝܿܬܼ ܀ 399 :ܠܵܘ ܓܘܼܫܡܵܐ ܗ̄ܘ̣ܵܐ ܕܐܲܢܝܼܚ ܐܲܒܼܪܵܡ ܒܐܘܼܟܼܠܵܐ ܘܫܸܩܝܵܐ 400 ܐܸܠܵܐ ܚܙܵܬܼܵܐ ܕܡܸܬܿܬܿܨܝܼܪܵܐ ܗ̄ܘ̣ܵܬܼ ܒܸܠܥܵܕܼ ܓܘܼܫܡܵܐ ܀ 401 :ܠܵܘ ܦܲܓܼܪܵܐ ܗ̄ܘ̣ܵܐ ܕܐܸܚܲܝܼܕܼ ܐܝܼ̈ܕܹܐ ܦܲܓܼܪ̈ܵܢܝܵܬܼܵܐ 402 ܐܸܠܵܐ ܪܘܼܚܵܐ ܕܩܲܛܝܼܢ ܚܲܝܠܹܗ ܡ̣ܢ ܪ̈ܘܼܚܵܢܹܐ ܀ 403 ܠܵܐ ܗ̄ܘ̣ܵܬ ܒܪܸ̈ܓܼܫܹܐ ܡܸܬܼܒܲܠܥܝܼܢ ܗ̄ܘ̣ܵܘ ܙܢܲܝ̈ ܡܹܐܟܼܘܼܠܬܵܐ ܀ pb. 14 404 ܐܸܠܵܐ ܒܐܵܐܲܪ ܡܸܬܿܛܲܠܲܩ ܗ̄ܘ̣ܵܐ ܐܘܼܟܼܠܵܐ ܓܫܝܼܡܵܐ ܀ 405 :ܚܲܝܠܵܐ ܗ̄ܘ̣ܵܐ ܓܹܝܪ ܐܲܠܵܗܵܝܵܐ ܕܲܣܥ݂ܲܪ ܗܵܠܹܝܢ 406 ܗܵܘ ܕܲܦܫܝܼܩ ܠܹܗ ܕܡ̣ܢ ܠܵܐ ܡܸܕܹܿܩ ܢܨܘܼܪ ܟܠܡܸܕܹܿܡ ܀ 407 :ܠܐܲܒܼܪܵܡ ܐܲܢܝܼܚ ܒܐܲܝܠܹܝܢ ܕܲܣܥ݂ܲܪ ܒܒܲܝܬܹܿܗ ܕܐܲܒܼܪܵܡ 408 ܕܢܸܓܼܡܘܿܪ ܨܹܐܕܼܵܘܗܝ ܫܘܼܘܕܵܝ ܡܸܠܵܘ̈ܗܝ ܒܝܲܕܼ ܣܘܼܥܪ̈ܵܢܹܐ ܀ 409 :ܦܘܼܢܵܝ ܥܲܡܡܹ̈ܐ ܕܲܒܼܝܲܕܼ ܪܲܪܥܹܗ ܐܸܫܬܵܘܕܲܝܼ ܠܹܗ 410 ܘܚܵܘܝܹܗ ܝܵܬܹܗ ܐܲܟܼܡܵܐ ܐܲܟܼܡܵܐ ܕܣܵܦܹ̇ܩ ܐ̄ܢܵܫܵܐ ܠܡܸܚܙܵܐ ܀ 411 :ܠܵܐ ܣܵܦܹ̇ܩ ܗ̄ܘ̣ܵܐ ܥܒܼܝܼܕܼܵܐ ܠܡܸܚܙܵܐ ܠܲܡܬܵܩܢܵܢܹܗ 412 ܘܡܸܛܠ ܗܵܕܹܐ ܨܵܪ̣ ܕܸܡ̈ܘܵܬܼܵܐ ܩܕܼܵܡ ܒܵܒܼܵܬܹ̈ܗ ܀ 413 :ܕܸܡ̈ܘܵܬܼܵܐ ܗ̣̄ܘܲܝ̈ ܕܲܚܙܵܐ ܐܲܒܼܪܵܡ ܒܥܲܝܢܹ̈ܐ ܕܦܲܓܼܪܵܐ 414 ܠܵܘ ܕܸܡ̈ܘܵܬܼܵܐ ܚܲܬܿܝܼ̈ܬܼܵܬܼܵܐ ܐܸܠܵܐ ܕܘܼܡܝܵܐ ܀ 415 :ܕܘܼܡܝܵܐ ܗ̄ܘ̣ܵܐ ܓܹܝܪ ܟܠܡܵܐ ܕܲܗܘ̤ܵܐ ܒܗܵܘ̇ ܓܸܠܝܵܢܵܐ 416 ܚܸܙܘܵܐ ܕܐ̄ܢܵܫܵܐ ܘܡܲܡܠܠܵܐ ܕܐ̄ܢܵܫܵܐ ܘܐܘܼܟܼܠܵܐ ܕܐ̄ܢܵܫܵܐ ܀ 417 :ܐܲܠܵܗ ܟܠܵܐ ܗ̄ܘ̣ ܕܲܣܥ݂ܲܪ ܗܵܕܹܐ ܚܲܟܿܝܼܡܵܐܝܼܬܼ 418 ܐܲܟܼܡܵܐ ܕܲܡܥܵܕܼ ܚܲܝܠܹܗ ܠܡܸܣܥܲܪ ܒܟܼܠܗܘܿܢ ܕܵܪܹ̈ܐ ܀ 419 :ܒܪܝܼܬܼܵܐ ܕܲܒܼܪ̣ܵܐ ܐܸܬܼ݂ܵܐ ܠܡܸܣܥܲܪ ܒܝܲܕܼ ܐܲܒܼܪܵܗܵܡ 420 ܘܚܵܘܝܹܗ ܚܘܼܒܹܿܗ ܒܗܵܘ̇ ܐܸܣܟܹܿܡܵܐ ܕܚܵܘܝܼ ܠܐܕܼܵܡ ܀ 421 :ܚܘܼܒܵܐ ܪܲܒܵܐ ܚܵܘܝܹܗ ܠܐܵܕܼܵܡ ܒܓܼܵܘ ܦܲܪܕܲܝܣܵܐ 422 ܘܕܲܛܥ̣ܵܐ ܚܘܼܒܹܿܗ ܡ̣ܝܼܬܼ ܒܲܚܛܝܼܬܼܵܐ ܘܚܵܝܸܒܼ ܗܘ̤ ܘܝܲܠܕܵܘ̈ܗܝ ܀ 423 :ܚܵܘܒܲܬܼ ܐܵܕܼܵܡ ܐܸܬܼ݂ܵܐ ܕܢܸܦܪܘܿܥ ܒܒܹܝܬܼ ܐܲܒܼܪܵܗܵܡ 424 ܘܲܠܒܸ݂ܫ ܕܘܼܡܝܵܐ ܕܗܵܘ̇ ܐܸܣܟܹܿܡܵܐ ܕܐܲܬܼܪܵܐ ܕܲܥܕܹܢ ܀ 425 :ܥܒܼܵܪ ܦܘܼܩܕܵܢܵܐ ܕܡܸܬܼܒܲܛܲܠ ܗ̄ܘ̣ܵܐ ܒܗܵܝ̇ ܡܹܐܟܼܘܼܠܬܵܐ 426 ܘܲܫܪܵܝ ܡܵܘܬܵܐ ܡܸܬܼܒܲܕܹܿܩ ܗ̄ܘ̣ܵܐ ܒܒܲܛܢܹܗ ܕܐܝܼܣܚܵܩ ܀ 427 :ܬܪܹܝܢ ܡ̣ܝܼܬܼܘ ܒܲܥܕܹܢ ܒܐܘܼܟܼܠܵܐ ܕܦܹܐܪܵܐ ܚܵܘܵܐ ܘܐܵܕܼܵܡ 428 ܘܲܬܼܪܹܝܢ ܢܲܚܸܩ ܝܘܿܡ ܓܸܠܝܵܢܵܐ ܠܣܲܪܵܐ ܘܐܲܒܼܪܵܡ ܀ 429 :ܡܝܼ̈ܬܹܐ ܗ̄ܘ̣ܵܘ ܓܹܝܪ ܣܲܪܵܐ ܘܐܲܒܼܪܵܐ ܒܥܲܩܪܘܼܬܼ ܦܲܓܼܪܵܐ 430 ܐܲܝܟ ܗܵܘ̇ ܡܵܘܬܵܐ ܕܚܵܘܵܐ ܘܐܵܕܼܵܡ ܒܐܘܼܟܼܠܵܐ ܕܦܹܐܪܵܐ ܀ 431 :ܣܒܲܪܬܼܵܐ ܛܵܒܼܬܼܵܐ ܕܢܘܼܚܵܡ ܟܠܵܐ ܫܡ݂ܲܥ ܐܲܒܼܪܵܗܵܡ 432 ܒܗܵܝ̇ ܒܲܪܬܼ ܩܵܠܵܐ ܕܢܸܗܘܹܐ ܝܲܠܕܵܐ ܠܣܲܪܵܐ ܐܲܢ̄ܬܿܬܼܵܟ ܀ 433 :ܗܵܝ̇ ܒܲܪܬܼ ܩܵܠܵܐ ܕܲܩܥ̣ܵܬ̤ ܠܐܵܕܼܵܡ ܕܥܲܦܪܵܐ ܬܸܗܘܹܐ 434 ܗܝܸ ܩܪܵܬ̤ ܠܐܲܒܼܪܵܡ ܕܗܵܐ ܡܢܲܚܸܡ ܐ̄ܢܵܐ ܡܝܼܬܼܘܼܬܼ ܦܲܓܼܪܵܟ ܀ 435 ܟܠܹܗ ܓܸܢܣܵܐ ܐܵܕܼܵܡܵܝܵܐ ܚܝ̣ܵܐ ܒܐܲܒܼܪܵܗܵܡ: pb. 15 436 ܒܗܵܝ̇ ܕܲܒܼܙܲܪܥܹܗ ܦܵܢܹ̇ܝܢ ܥܲܡܡܹ̈ܐ ܠܘܵܬܼ ܒܵܪܘܵܝܵܐ ܀ 437 :ܦܘܼܢܵܝ ܥܲܡܡܹ̈ܐ ܡܸܬܼܒܲܕܿܩ ܗ̄ܘ̣ܵܐ ܒܚܸܙܘܹܐ ܕܐܲܒܼܪܵܡ 438 ܘܫܲܝܢܵܐ ܪܲܒܵܐ ܕܒܹܝܬܼ ܒܵܪܘܿܝܵܐ ܘܲܕܼܒܼܪ̈ܝܵܬܹܗ ܀ 439 :ܫܲܝܢܵܐ ܪܲܒܵܐ ܡܠܹܐ ܗ̄ܘ̣ܵܐ ܒܲܝܬܹܿܗ ܕܐܲܒܼܵܐ ܕܟܼܠܵܐ 440 ܘܲܡܕܲܝܠܝܼܢ ܗ̄ܘ̣ܵܘ ܫܡܲܝܵܐ ܘܐܲܪܥܵܐ ܒܝܘܿܡ ܫܵܪܘܼܬܹܗ ܀ 441 :ܡܵܪܹܐ ܒܪܝܼܬܼܵܐ ܣܡܝܼܟ ܗ̄ܘ̣ܵܐ ܒܪܹܫܵܐ ܕܚܲܝ̈ܠܘܵܬܹܗ 442 ܘܲܡܫܲܝܢܝܼܢ ܗ̄ܘ̣ܵܘ ܟܸܢ̈ܫܲܝ ܪܵܘܡܵܐ ܥܲܡ ܐܲܪ̈ܥܵܢܹܐ ܀ 443 :ܟܠ ܥܲܡ ܟܠܵܐ ܡܸܬܼܒܲܣܲܡ ܗ̄ܘ̣ܵܐ ܒܲܚܠܘܿܠ ܚܘܼܒܵܐ 444 ܘܲܡܗܲܠܠܝܼܢ ܗ̄ܘ̣ܵܘ ܟܝܵܢܹ̈ܐ ܥܒܼܝܼ̈ܕܹܐ ܠܫܸܡ ܥܵܒܼܘܿܕܼܵܐ ܀ 445 :ܫܒܼܝܼܚ ܒܵܪܘܿܝܵܐ ܩܥ̣ܵܘ ܪ̈ܘܼܚܵܢܹܐ ܒܒܹܝܬܼ ܐܲܒܼܪܵܗܵܡ 446 ܕܚܵܘܝܼ ܚܘܼܒܹܿܗ ܘܫܲܝܢܲܢ ܥܲܡܹܗ ܘܠܲܢ ܥܲܡ ܟܠܵܐ ܀ 447 :ܫܵܘܹ̇ܐ ܠܫܘܼܒܼܚܵܐ ܗܵܘ̇ ܕܲܡܣܲܝܟܼܝܼܢ ܥܵܠܡܹ̈ܐ ܒܣܵܟܹܗ 448 ܕܬܲܝܬܿܝܼ ܢܲܦܫܹܗ ܘܐܲܓܸܿܣ ܥܲܡܲܢ ܥܲܠ ܦܵܬܼܘܿܪܵܐ ܀ 449 :ܠܹܗ ܚܲܝܵܒܼܝܼܢ ܫܡܲܝܵܐ ܘܐܲܪܥܵܐ ܚܕܼܵܐ ܬܵܘܕܿܝܼܬܼܵܐ 450 ܕܬܲܪܓܸܿܡ ܥܲܡܲܢ ܩܵܠܹ̈ܐ ܕܫܲܝܢܵܐ ܟܕܼ ܠܵܐ ܒܥ݂ܲܝܢܵܝܗܝ ܀ 451 :ܐܘܿ ܟܡܵܐ ܪܲܒܵܐ ܚܕܲܬܵܐ ܕܲܣܥ݂ܲܪ ܡ̇ܪܹܐ ܒܪܝܼܬܼܵܐ 452 ܕܟܲܕܼ ܗܘ̤ ܒܟܼܠܵܐ ܣܲܝܸܟ ܝܵܬܹܗ ܒܲܚܕܼܵܐ ܕܘܼܟܵܐ ܀ 453 :ܐܘ̇ ܠܗܵܘ̇ ܚܲܝܠܵܐ ܕܐܲܚܝܼܕܼ ܟܠܵܐ ܒܪܸܡܙܵܐ ܕܚܲܝܠܹܗ 454 ܕܚܵܘܝܼ ܝܵܬܹܗ ܐܲܝܟ ܡܸܣܟܹܿܢܵܐ ܩܕܼܵܡ ܬܘܼܩܵܢܹܗ ܀ 455 :ܠܗܵܘ̇ ܓܼܙܵܐ ܕܙܵܐܹ̇ܝܢ ܥܵܠܡܹ̈ܐ ܡ̣ܢ ܡܵܘܗܲܒܼܬܹܗ 456 ܕܿܫܐ̣ܸܠ ܙܸܕܸܩܵܐ ܡ݂ܢ ܒܲܪ ܒܲܝܬܹܿܗ ܐܲܝܟ ܚܵܕܼܘܿܪܵܐ ܀ 457 :ܙܸܕܸܩܵܐ ܕܚܘܼܒܵܐ ܩܲܪܸܒܼ ܐܲܒܼܪܵܡ ܠܡܲܬܸܩܸܢ ܟܠܵܐ 458 ܘܦܲܪܥܹܗ ܐܲܓܼܪܵܐ ܝܲܠܕܵܐ ܕܝܵܗܹ̇ܒܼ ܚܲܝܹ̈ܐ ܠܐ̄ܢܵܫܵܐ ܀ 459 :ܚܲܝܹ̈ܐ ܕܐ̄ܢܵܫܵܐ ܟܣܹܝܢ ܗ̄ܘ̣ܵܘ ܒܐܝܼܣܚܵܩ ܝܲܠܕܹܿܗ ܕܐܲܒܼܪܵܡ 460 ܘܡܸܬܼܝܲܒܿܠܝܼܢ ܗ̄ܘ̣ܵܘ ܡ̣ܢ ܚܲܕܼ ܠܲܐ̄ܚܪܹܝܢ ܐܲܝܟ ܪܲܗܒܼܘܿܢܵܐ ܀ 461 :ܕܵܪܵܐ ܠܕܼܵܪܵܐ ܡܲܫܠܸܡ ܗ̄ܘ̣ܵܐ ܠܹܗ ܠܪܲܗܒܼܘܿܢ ܐܲܒܼܪܵܡ 462 ܥܕܲܡ̇ܐ ܕܡܲܢܲܥ ܠܕܼܵܪܵܐ ܕܝܼܠܹܗ ܕܪܹܫܝܼܬܼ ܚܲܝܲܝ̈ܢ ܀ 463 :ܪܹܫܝܼܬܼ ܚܲܝܹ̈ܐ ܡܸܬܼܚܵܘܝܵܐ ܗ̄ܘ̣ܵܬܼ ܡ̣ܢ ܐ̄ܢܵܫܘܼܬܲܢ 464 ܘܩܲܕܹܿܡ ܒܲܕܿܩܹܗ ܒܝܲܕܼ ܓܸܠܝܵܢܵܐ ܕܚܵܘܝܼ ܠܐܲܒܼܪܵܡ ܀ 465 :ܗܵܕܹܿܐ ܗ̄ܝܼ ܥܸܠܬܼܵܐ ܕܟܼܠܹܗ ܫܲܪܒܵܐ ܕܐܸܫܬܲܥܝܼܢܲܢ 466 ܘܒܼܵܗ̇ ܐܲܣܝܼܪ̈ܵܢ ܩܲܪܸ̈ܡܵܝܵܬܼܵܐ ܘܲܐ̄ܚܪ̈ܵܝܵܬܼܵܐ ܀ 467 :ܗܵܢܵܘ̇ ܣܵܟܼܵܐ ܕܲܡܣܲܝܟܼܝܼܢ ܒܹܗ ܥܵܠܡܹ̈ܐ ܘܕܼܵܪܹ̈ܐ 468 ܘܲܠܓܼܵܘ ܡܸܢܹܗ ܚܒܼܝܼܫ ܪܘܼܟܵܒܼܵܐ ܕܪܵܘܡ̇ܐ ܘܥܘܼܡܩܵܐ ܀ pb. 16 469 :ܦܵܘܠܘܿܣ ܣܵܗܹ̇ܕܼ ܕܲܒܼܢܵܡܘܿܣܵܐ ܚܒܼܝܼܫ ܟܠܡܸܕܹܿܡ 470 ܘܗܘ̤ ܢܵܡܘܿܣܵܐ ܣܵܟܹܗ ܡܫܝܼܚܵܐ ܗ̄ܘ̣ ܕܲܡܣܲܝܸܟ ܟܠ ܀ 471 :ܗܘ̤ܝܘܼ ܡܫܝܼܚܵܐ ܕܡܸܬܼܡܲܠܲܠ ܗ̄ܘ̣ܵܐ ܒܒܹܝܬܼ ܐܲܒܼܪܵܗܵܡ 472 ܘܲܒܼܐ̄ܪܵܙ ܫܲܝܢܹܗ ܡܣܝܼܟ ܗ̄ܘ̣ܵܐ ܡ̇ܪܵܐ ܥܲܡ ܒܸܪ̈ܝܵܬܹܗ ܀ 473 :ܠܹܗ ܠܗܵܢ ܫܲܝܢܵܐ ܕܲܗܘ̤ܵܐ ܒܚܲܪܬܼܵܐ ܒܚܲܕܼ ܡ̣ܢ ܐ̄ܢܵܫܵܐ 474 ܠܹܗ ܩܲܕܹܿܡ ܨܵܪ ܒܗܵܝ̇ ܚܫܵܡܝܼܬܼܵܐ ܕܒܹܝܬܼ ܐܲܒܼܪܵܗܵܡ ܀ 475 :ܗܵܘ̇ ܒܘܼܣܵܡܵܐ ܠܵܐ ܡ̇ܝܘܿܬܼܵܐ ܕܗܵܘܹ̇ܐ ܒܪܵܘܡܵܐ 476 ܗܘ̤ܝܘܼ ܕܲܥܒ݂ܲܕܼܘ ܡܵܪܵܐ ܘܥܲܒܼܕܵܘ̈ܗܝ ܒܹܝܬܼ ܐܲܪ̈ܥܵܢܹܐ ܀ 477 ܒܲܠܡܹܐܝܢ ܫܲܝܢܵܐ ܡܲܫܪܸܐ ܟܲܣܝܵܐ ܟܠ ܥܲܡ ܟܠܵܐ ܀ 478 ܘܝܲܗ̣̄ܒܼ ܪܲܗܒܼܘܿܢܵܐ ܕܗܵܝ̇ ܕܲܥܬܼܝܼܕܼܵܐ ܒܗܵܕܹܐ ܕܲܗܘ̤ܵܬܼ ܀ 479 :ܗܵܐ ܗ̤ܘܲܝ̈ ܟܠܗܹܝܢ ܡ̣ܢ ܡ̇ܪܹ ܟܠ ܒܝܲܕܼ ܐܲܒܼܪܵܗܵܡ 480 ܬܵܘ ܢܸܬܼܒܲܩܸܐ ܚܲܬܿܝܼܬܵܐܝܼܬܼ ܒܥܸܠܬܼܵܐ ܕܲܒܼܗܹܝܢ ܀ 481 :ܗܵܐ ܕܪܲܫ̣ ܐܘܼܪܚܵܐ ܐܝܼܬܼܝܵܐ ܟܲܣܝܵܐ ܠܡܸܪܕܼܵܐ ܠܘܲܥܕܹܿܗ 482 ܬܵܘ ܢܸܬܼܚܲܟܲܡ ܠܡܸܛܲܪ ܛܲܟܼܣܵܐ ܕܲܣܬܼܝܼܪ̈ܵܬܼܵܐ ܀ 483 :ܗܵܐ ܓܠ̣ܵܐ ܘܚܵܘܝܲܢ ܪܲܒܿܘܼܬܼ ܚܘܼܒܹܿܗ ܒܝܲܕܼ ܐ̄ܢܵܫܵܐ 484 ܬܵܘ ܢܸܬܼܚܲܦܲܛ ܠܡܹܐܣܲܪ ܚܘܼܒܿܢ ܠܘܵܬܼ ܨܸܒܼܝܵܢܹܗ ܀ 485 :ܗܵܐ ܨܒ̣ܵܐ ܘܲܩܪ̣ܵܢ ܠܡܸܬܼܒܲܣܵܡܘܼ ܒܲܫܒܼܝܼ̈ܚܵܬܹܗ 486 ܘܝܲܗ̣̄ܒܼܠܲܢ ܛܘܼܦܸܣܵܐ ܒܐܘܼܟܼܠܵܐ ܕܐܸܟܲܠ̣ ܒܹܝܬܼ ܐܲܒܼܪܵܗܵܡ ܀ 487 :ܐܘܼܟܼܠܵܐ ܓܫܝܼܡܵܐ ܬܲܩܸܢ ܐܲܒܼܪܵܡ ܠܠܵܐ ܓܘܼܫܡܵܢܵܐ 488 ܘܐܸܡ݂ܲܪ ܕܐܸܟܲܠ̣ ܟܲܓܼ ܠܵܐ ܐܸܟܼܠ̣ ܡܸܛܠ ܚܘܼܒܹܿܗ ܀ 489 :ܕܠܵܐ ܕܹܝܢ ܐܸܟܲܠ̣ ܛܵܟ ܣܵܗ̇ܕܿܝܼܢ ܠܲܢ ܡܠܝܼܠܹ̈ܐ ܘܚܲܪ̈ܫܹܐ 490 ܒܗܵܝ̇ ܕܲܡܦܵܣܝܼܢ ܕܲܟܼܝܵܢ ܟܲܣܝܵܐ ܕܠܵܐ ܪܘܼܟܵܒܼܵܐ ܗ̄ܘ̣ ܀ 491 :ܠܵܘ ܠܲܟܼܝܵܢܹܗ ܓܠ̣ܵܐ ܒܓܸܠܝܵܢܵܐ ܕܲܠܘܵܬܼ ܥܲܒܼܕܹܿܗ 492 ܠܥܲܒܼܕܹܿܗ ܚܲܟܸܿܡ ܕܢܸܗܘܹܐ ܚܵܢܹ̇ܐ ܠܢܝܼܫܵܐ ܕܚܘܼܒܹܿܗ ܀ 493 :ܪܵܚ̇ܡܵܐ ܛܵܒܼܵܐ ܩܪ̣ܵܝܗܝ ܠܐܲܒܼܪܵܗܵܡ ܡܸܛܠ ܚܘܼܒܹܿܗ 494 ܘܐܲܠ̣ܦܹܗ ܠܡܸܛܲܪ ܛܲܟܼܣܵܐ ܕܚܘܼܒܵܐ ܠܘܵܬܼ ܒܵܪܘܝܹܗ ܀ 495 :ܒܣܲܓܵܝܼ̈ܐܵܬܼܵܐ ܒܩܵܝ̣ܗܝ ܠܲܬܼܪܝܼܨܵܐ ܟܲܕܼ ܝܵ̇ܕܲܥ ܠܹܗ 496 ܕܢܸܗܘܘܿܢ ܝܵܕܼܥܝܼܢ ܕܵܪܹ̈ܐ ܕܐܵܬܹܿܝܢ ܙܢܲܝ̈ ܒܘܼܩܝܵܢܹܗ ܀ 497 :ܡ̣ܠܲܟ ܠܹܗ ܝܲܠܕܵܐ ܘܝܲܗ̣̄ܒܼ ܠܹܗ ܝܲܠܕܵܐ ܘܫܲܪܲܪ ܡܸܠܵܘ̈ܗܝ 498 ܘܲܦܢ̣ܵܐ ܘܲܒܼܥ̣ܵܝܗܝ ܕܢܸܗܘܹܐ ܕܸܒܼܚܵܐ ܠܪܹܝܚ ܨܸܒܼܝܵܢܹܗ ܀ 499 :ܕܸܒܼܚܵܐ ܪܵܓܲܢܝ ܕܲܬܼܩܲܪܸܒܼ ܠܝܼ ܐܲܒܼܪܵܡ ܪܵܚܹܡܝ 500 ܐܲܢܝܼܚ ܨܸܒܼܝܵܢܝ ܒܕܸܒܼܚܵܐ ܕܲܒܼܪܵܟ ܕܪܵܚܹܝ̇ܡ ܐܲܢ̄ܬܿ ܠܝܼ ܀ 501 :ܒܝܲܕܼ ܢܸܣܝܵܢܵܐ ܝܸܠܦܹ̇ܬܼ ܚܘܼܒܵܟ ܕܪܵܚ̇ܡܵܐ ܐܢ̄ܬܿ ܛܵܒܼܵܐ 502 ܘܗܲܢܝܼܐܐ ܠܵܟ ܢܝܵܚܬܵܐ ܕܪ̈ܵܚܡܲܝܟ ܛܵܒܼ ܡ̣ܢ ܢܲܦܸܫܵܟ ܀ 503 :ܣܲܓܿܝ̣ ܒ̣ܣܸܡ ܠܝܼ ܐܘܼܟܼܠܵܐ ܕܚܘܼܒܵܟ ܛܵܒܼ ܡ̣ܢ ܟܠܢܵܫ 504 ܡ̣ܢ ܢܸܣܝܵܢܵܐ ܕܗܵܝ̇ ܫ̇ܪܘܼܬܼܵܐ ܕܲܒܼܓܼܵܘ ܒܲܝܬܵܟ ܀ pb. 17 505 :ܒܗܵܝ̇ ܓܲܠܝܵܐܝܼܬܼ ܓܠܹ̇ܝܬܼ ܒܲܣܝܼܡܘܼܬܼܝ ܠܥܹܝܢ ܪ̈ܘܼܚܵܢܹܐ 506 ܘܗܵܫܵܐ ܒܲܝܢܲܝ ܘܠܵܟ ܨܵܒܹ̇ܐ ܐ̄ܢܵܐ ܕܲܬܼܢܝܼܚ ܨܸܒܼܝܵܢܝ ܀ 507 :ܐ̄̈ܪܵܙܵܐ ܪܲܒܵܐ ܟܣܸܐ ܒܝܼ ܡܸܡܬܼܘܿܡ ܥܲܡ ܐܲܠܵܗܘܼܬܼܝ 508 ܘܲܡܛܲܝܲܒܼ ܐ̄ܢܵܐ ܕܐܸܓܼܠܹܐ ܗܵܫܵܐ ܒܹܝܬܼ ܠܝܼ ܠܚܘܼܒܵܟ ܀ 509 :ܡܸܕܹܿܡ ܣܝܼܡ ܠܝܼ ܡ̣ܢ ܫܘܼܪܵܝܵܐ ܕܠܵܐ ܫܘܼܪܵܝܵܐ 510 ܘܲܡܣܲܪܗܲܒܼ ܐ̄ܢܵܐ ܕܐܹܚܵܘܹܝܘܗܝ ܠܵܟ ܐܲܝܟ ܕܸܠܪܵܚܡܵܐ ܀ 511 :ܒܪܝܼܬܼܵܐ ܚܕܲܬܵܐ ܡܛܲܝܲܒܼ ܪܸܥܝܵܢܝ ܕܐܸܒܼܪܸܐ ܒܬܸܢܝܵܐ 512 ܘܠܵܟ ܩܵܪܹܐ ܐ̄ܢܵܐ ܒܫܵܘܬܵܦܘܼܬܼܵܐ ܕܥܲܡ ܬܘܼܩܵܢܵܗ̇ ܀ 513 :ܒܝܲܕܼ ܒܲܪܢܵܫܵܐ ܣܵܥ݁ܲܪ ܐ̄ܢܵܐ ܠܵܗ̇ ܠܟܲܣܝܼܘܼܬܼ ܨܸܒܼܝܵܢܝ 514 ܘܠܹܗ ܥܵܒܹ̇ܕܼ ܐ̄ܢܵܐ ܚܲܕܼ ܡܸܨܥܵܝܵܐ ܒܹܝܬܼ ܠܝܼ ܠܐ̄ܢܵܫܵܐ ܀ 515 :ܒܡܸܨܥܵܝܘܼܬܹܗ ܡܚܵܘܹܐ ܐ̄ܢܵܐ ܚܘܼܒܿܝ ܠܥܹܝܢ ܟܠܒܸܪ̈ܝܵܢ 516 ܐܲܟܼܡܵܐ ܕܚܵܝܼܬܼ ܒܗܵܘ̇ ܬܘܼܩܵܢܵܐ ܕܫܘܼܪܵܝ ܘܲܒܼܢܹ̈ܐ ܀ 517 :ܒܲܨܠܸܡ ܐ̄ܢܵܫܵܐ ܓܠܹ̇̄ܝܬܼ ܥܲܠ ܟܲܣܝܘܼܬܼܝ ܒܪܵܫܝܼܬܼ ܕܲܒܼܪܹܝ̇ܬܼ 518 ܕܐܝܼܬܿܝܼ ܘܐܝܼܬܲܝ ܩܢܘܿܡܹ̈ܐ ܬܠܵܬܼܵܐ ܒܲܟܼܝܵܢܵܐ ܚܲܕܼ ܀ 519 :ܒܗܵܢܵܐ ܟܝܵܢܵܐ ܕܠܵܐ ܐܸܬܼܟܲܝܲܢ ܡ̣ܢ ܐܘܼܡ̇ܢܵܐ 520 ܒܹܗ ܟܲܢܝܼܬܹܿܗ ܠܲܨܠܸܡ ܐ̄ܢܵܫܵܐ ܟܲܕܼ ܬܲܩܸܢ̇ܬܹܿܗ ܀ 521 :ܡܸܛܠܵܬܹܗ ܒܪܹܝܬܼ ܟܠܡܸܕܹܿܡ ܕܲܟܼܣܸܐ ܘܲܓܼܠܸܐ 522 ܘܠܹܗ ܐܲܩܝܼܡܹܬܼ ܐܲܦܸܛܪܘܿܦܵܐ ܥܲܠ ܬܘܼܩܵܢܲܝ̈ ܀ 523 :ܒܹܗ ܐܵܦ ܗܵܫܵܐ ܓܵܡܲ݁ܪ ܐ̄ܢܵܐ ܠܹܗ ܠܚܘܼܒܿܝ ܒܲܥܒܼܵܕܹܵܐ 524 ܘܲܡܚܲܕܹܿܬܼ ܐ̄ܢܵܐ ܒܪܝܼܬܼܵܐ ܕܥܸܬܼܩܲܬ̤ ܒܡܵܝܘܿܬܼܘܼܬܼܵܐ ܀ 525 :ܡ̇ܘܬܼܵܐ ܚܲܒ̣ܿܠܹܗ ܠܦܲܐܝܘܼܬܼ ܬܘܼܩܵܢܝ ܒܥܸܠܲܬܼ ܐ̄ܢܵܫܵܐ 526 ܘܒܹܗ ܒܒܲܪܢܵܫܵܐ ܡܚܲܕܹܿܬܼ ܐ̄ܢܵܐ ܟܠ ܥܲܡ ܒܲܪܢܵܫܵܐ ܀ 527 :ܠܒܸܢܬܲܬܼ ܫܹܐܪ̣̈ܐ ܣܵܥܲ݁ܪ ܐ̄ܢܵܐ ܠܵܗ̇ ܠܗܵܕܹܐ ܕܐܸܡ̇ܪܹܬܼ 528 ܕܠܵܐ ܢܸܬܼܚܲܬܿܪܘܼܢ ܕܡܸܚܣܲܢ ܚ݂ܲܣܢܘܼܢܝ ܒܛܘܼܥܝܲܝ ܕܐܵܕܼܵܡ ܀ 529 :ܒܹܗ ܟܹܝܬܼ ܒܐܵܕܼܵܡ ܡܚܵܘܹܐ ܐ̄ܢܵܐ ܠܗܘܿܢ ܫܘܼܠܛܵܢ ܡ̇ܪܘܼܬܼܝ 530 ܘܲܒܼܚܲܝܵܒܼܵܐ ܡܲܪܸܣ ܐ̄ܢܵܐ ܠܗܘܿܢ ܕܲܟܼܡܵܐ ܫܲܦܠܝܼܢ ܀ 531 :ܒܡܵܘܬܵܐ ܚܲܝܒܼܘܼܗܝ ܠܐܵܕܼܵܡ ܨܲܠܡܵܐ ܕܲܨܠܸܡ ܟܲܣܝܘܼܬܼܝ 532 ܘܲܒܼܝܲܕܼ ܡ̇ܘܬܵܐ ܫܵܪܹ̇ܐ ܐ̄ܢܵܐ ܠܹܗ ܠܢܝܼܪܹܗ ܕܡ̇ܘܬܵܐ ܀ 533 :ܚܛܝܼܬܼܵܐ ܥܒ݂ܲܕܬܹܗ ܠܡܵܘܬܵܐ ܡ̇ܘܬܵܐ ܥܲܠ ܡ̇ܝ̈ܘܿܬܹܐ 534 ܘܲܒܼܡܵܝܘܿܬܼܵܐ ܥܵܛܹ̇ܐ ܐ̄ܢܵܐ ܠܵܗ̇ ܡ̣ܢ ܡ̇ܝ̈ܘܿܬܹܐ ܀ 535 :ܒܡܸܠܟܹܿܗ ܕܒܼܝܼܫܵܐ ܩܢܲܬ̤ ܫܘܼܠܛܵܢܵܐ ܚܛܝܼܬܼܵܐ ܘܡ̇ܘܬܵܐ 536 ܘܠܵܐ ܪܵܓܵܐ ܠܝܼ ܕܢܸܗܘܘܿܢ ܥܲܒܼܕܲܝ̈ ܥܲܒܼ̈ܕܹܿܐ ܕܲܐ̄ܚܪܹܝܢ ܀ 537 ܕܝܼܠܝ ܐܝܼܬܿܝܗܘܿܢ ܟܠ ܕܐܝܼܬܲܝܗܘܿܢ ܡܠܝܼܠܹ̈̄ܐ ܘܚܲܪ̈ܫܹܐ: pb. 18 538 ܘܠܵܐ ܡܲܗܡܹܐ ܐ̄ܢܵܐ ܡ̣ܢ ܬܘܼܩܵܢܵܐ ܕܲܥܒ݂ܲܕܼ ܐܝܼܕܲܝ̈ ܀ 539 :ܡ̣ܢ ܠܵܐ ܡܸܕܹܿܡ ܒܪܹܝܬܼ ܟܠܡܸܕܹܿܡ ܐܲܝܟ ܠܝܼ 540 ܘܗܵܫܵܐ ܒܡܸܕܹܿܡ ܡܚܲܕܹܿܬܼ ܐ̄ܢܵܐ ܠܹܗ ܕܬܼܘܼܒܼ ܠܵܐ ܢܹܐܒܲܕܼ ܀ 541 :ܒܐ̄ܢܵܫܵܐ ܚܲܬܿܡܹܬܼ ܗܵܘ̇ ܬܘܼܩܵܢܵܐ ܕܿܗܘ̤ܵܐ ܒܪܵܫܝܼܬܼ 542 ܘܲܒܼܒܲܪܢܵܫܵܐ ܡܚܲܕܲܬܼ ܐ̄ܢܵܐ ܟܠ ܥܲܡ ܒܲܪܢܵܫܵܐ ܀ 543 :ܡܸܢܵܟ ܐܲܒܼܪܵܡ ܓܵܒܹܿܐ ܐ̄ܢܵܐ ܠܹܗ ܠܗܵܢ ܒܲܪܢܵܫܵܐ 544 ܡܸܛܠ ܚܘܼܒܵܐ ܕܚܵܘܝܼܬܿ ܨܹܐܕܲܝ ܡ̣ܢ ܟܠ ܕܲܗܘ̤ܵܘ ܀ 545 :ܠܵܟ ܩܵܪܹܢܵܐ ܐܲܒܼܵܐ ܕܐ̄ܢܵܫܵܐ ܕܲܗܘ̤ܵܘ ܘܗܵܘܹ̇ܝܢ 546 ܚܠܵܦ ܕܲܪܚܸܡ̣ܬܵܢܝ ܘܲܣܢܲܝܬܿ ܛܘܼܥܝܲܝ ܕܟܼܠܕܼܵܝܘܼܬܼܵܐ ܀ 547 :ܒܪܵܟ ܥܵܒܹ̇ܕܼ ܐ̄ܢܵܐ ܡ̇ܪܵܐ ܘܡܲܠܟܵܐ ܥܲܠ ܬܘܼܩܵܢܲܝ̈ 548 ܕܢܸܕܲܥ ܟܠܢܵܫ ܕܫܲܪܝܼܪ ܘܲܒܼܚܝܼܪ ܫܡܵܐ ܕܣܵܡܹ̇ܬܼ ܠܵܟ ܀ 549 :ܐܲܒܼܵܐ ܕܥܲܡܡܹ̈ܐ ܩܪܹܝ̇ܬܹܵܟ ܐܲܒܼܪܵܡ ܒܹܝܬܼ ܐܲܪ̈ܥܵܢܹܐ 550 ܘܲܡܚܲܬܸܿܡ ܐ̄ܢܵܐ ܫܡܵܟ ܒܲܥܒܼܵܕܼܵ̈ܐ ܒܝܲܠܕܵܐ ܕܡܸܢܵܟ ܀ 551 :ܒܝܲܠܕܼܵܐ ܕܡܸܢܵܟ ܡܣܲܝܸܟ ܐ̄ܢܵܐ ܠܹܗ ܠܟܼܠܹܗ ܨܸܒܼܝܵܢܝ 552 ܘܐܲܝܟ ܕܲܒܼܢܵܘܣܵܐ ܡܲܥܡܲܪ ܐ̄ܢܵܐ ܒܹܗ ܡܠܝܼ̈ܠܹܐ ܘܚܲܪ̈ܫܹܐ ܀ 553 :ܗܲܝܟܲܠ ܡܲܠܟܿܘܼܬܼܝ ܥܵܒܹ̇ܕܼ ܐ̄ܢܵܐ ܠܹܗ ܠܝܲܠܕܵܟ ܐܲܒܼܪܵܡ 554 ܘܒܹܗ ܡܩܲܒܸܿܠ ܐ̄ܢܵܐ ܣܸܓܼܕܲܬܼ ܚܘܼܒܵܐ ܚܘܼܒܵܐ ܡ̣ܢ ܟܠ ܒܸܪ݁ܝܵܢ ܀ 555 :ܒܹܗ ܣܵܓܼ̇ܕܵܐ ܠܝܼ ܒܪܝܼܬܼܵܐ ܕܲܒܼܪܹܝ̇ܬܼ ܡ̣ܢ ܠܵܐ ܡܸܕܲܡ 556 ܘܝܵܗܹ̇ܒܼ ܐ̄ܢܵܐ ܠܹܗ ܫܡܵܐ ܝܲܩܝܼܪܵܐ ܕܫܸܡ ܐܲܠܵܗܘܼܬܼܝ ܀ 557 :ܗܵܠܹܝܢ ܡܲܠܸܠ̣ ܩܢܹܐ ܩܵܠܵܐ ܥܲܡ ܐܲܒܼܪܵܗܵܡ 558 ܠܵܐ ܗ̄ܘ̣ܵܐ ܒܓܸܠܝܵܐ ܐܸܠܵܐ ܒܐ̄ܪܵܙܵܐ ܕܠܵܐ ܡܸܬܼܡܲܠܲܠ ܀ 559 :ܠܵܐ ܡܸܬܼܡܲܠܲܠ ܐ̄ܪܵܙ ܟܲܣܝܘܼܬܼܵܐ ܒܦܘܼܡ ܡܲܠܠܹ̈ܐ 560 ܘܟܲܕܼ ܛܵܒܼ ܥܲܣ̈ܩܵܢ ܡܲܠܸܠ̣ ܐܸܢܹܝܢ ܥܲܡ ܐܲܒܼܪܵܗܵܡ ܀ 561 :ܥܲܡ ܐܲܒܼܪܵܗܵܡ ܡܲܠܸܠ ܟܲܣܝܵܐ ܕܠܵܐ ܡܸܬܼܡܲܠܲܠ 562 ܘܐܲܠܦܹܗ ܛܲܟܼܣܵܐ ܕܲܢܩܲܪܸܒܼ ܠܹܗ ܕܸܒܼܚܵܐ ܕܲܒܼܪܹܗ ܀ 563 :ܕܸܒܼܚܵܐ ܕܚܘܼܒܵܐ ܒܵܥܹ̇ܐ ܐ̄ܢܵܐ ܠܵܟ ܪܵܚܹܡܝ 564 ܩܲܪܸܒܲܝܗܝ ܠܝܼ ܐܲܟܼܡܵܐ ܕܬܼܵܒܲܥ̇ ܛܲܟܼܣܵܐ ܕܚܘܼܒܵܐ ܀ 565 :ܗܡܲܝܪܵܐ ܕܫܲܝܢܵܐ ܥܬܼܝܼܕܼ ܐ̄ܢܵܐ ܕܐܸܣܲܒܼ ܡ̣ܢ ܝܲܠܕܵܬܹ̈ܗ 566 ܕܪܘܿܫ ܠܹܗ ܐܘܼܪܚܵܐ ܒܕܸܒܼܚܵܐ ܕܐ̄ܪܵܙܵܐ ܠܗܵܘ̇ ܕܲܫܪܵܪܵܐ ܀ 567 :ܝܵ̇ܕܲܥܢܵܐ ܠܹܗ ܠܙܲܪܥܵܐ ܕܡܸܢܵܟ ܕܡܸܬ ܥܲܕܿܠܵܢܵܐ ܗ̄ܘ̣ 568 ܘܡܸܬܼܥܲܕܿܠܝܼܢ ܒܝܼ ܟܲܓܼ ܓܵܡܲ݁ܪ ܐ̄ܢܵܐ ܨܸܒܼܝܵܢܝ ܒܲܒܼܪܵܟ ܀ 569 ܒܕܸܒܼܚܵܐ ܕܠܵܐ ܕܡ̇ܐ ܡܲܟܸܿܣ ܐ̄ܢܵܐ ܠܵܗ̇ ܠܚܸܪܚܵܘܼܬܼܗܘܿܢ: pb. 19 570 ܕܠܵܐ ܢܸܬܼܥܲܕܿܠܘܼܢ ܡܵܐ ܕܡܸܫܬܲܡܲܫ ܕܸܒܼܚܵܐ ܕܩܘܼܫܬܵܐ ܀ 571 :ܕܒܲܪ ܟܹܝܬܼ ܠܲܒܼܪܵܟ ܠܐܝܼܣܚܵܩ ܝܲܠܕܵܟ ܕܪܵܚܹ̇ܡ ܐܲܢ̄ܬܿ ܠܹܗ 572 ܘܲܥܒܸܕܲܝܗܝ ܠܝܼ ܥܠܵܬܼܵܐ ܒܛܘܼܪܵܐ ܕܐ݁ܵܡܲܪ ܐ̄ܢܵܐ ܠܵܟ ܀ 573 :ܐܘܿ ܩܵܠܵܐ ܕܲܟܼܡܵܐ ܪܚܝܼܡ ܗ̄ܘ̣ܵܐ ܘܲܟܼܡܵܐ ܥܣܸܩ ܗ̄ܘ̣ܵܐ 574 ܘܡܸܬܼܡܲܠܲܠ ܗ̄ܘ̣ܵܐ ܘܠܵܐ ܡܸܬܼܡܲܠܲܠ ܐܲܟܼܡܵܐ ܕܐܝܼܬܼܵܘܗܝ ܀ 575 :ܪܚܝܼܡ ܗ̄ܘ̣ܵܐ ܒܚܘܼܒܵܐ ܠܦܘܼܬܼ ܦܘܼܩܕܵܢܵܐ ܐܲܠܵܗܵܝܵܐ 576 ܘܲܥܣܸܩ ܗ̄ܘ̱ܵܐ ܛܵܒܼ ܠܲܡܚܝܼܠܘܼܬܼܵܐ ܕܲܟܼܝܵܢ ܐ̄ܢܵܫܵܐ ܀ 577 :ܠܹܗ ܠܲܟܼܝܵܢܵܐܝܼܬ ܡܚܝܼܠܵܐ ܚܲܝܸܠ ܡ̇ܪܹܐ ܟܝܵܢܵܐ 578 ܕܢܵܘܕܲܥ ܕܲܡܨܸܐ ܠܡܸܥܨܵܐ ܟܝܵܢܹܗ ܒܪܸܡܚܲܬܼ ܡܵܪܹܗ ܀ 579 :ܟܘܼܪ ܒܘܼܚܪܵܢܵܐ ܥܲܒܼ݂ܕܹܿܗ ܠܐܲܒܼܪܵܡ ܡ̇ܪܹܗ ܕܐܲܒܼܪܵܗ 580 ܘܐܸܬܼܒܲܚܪܲܬ̤ ܒܹܗ ܡܚܝܼܠܘܼܬܼ ܐ̄ܢܵܫܵܐ ܘܲܩܢ̣ܵܬ̤ ܚܲܝܠܵܐ ܀ 581 :ܚܲܝܠܵܐ ܪܲܒܵܐ ܩܢ̣ܵܐ ܪܸܥܝܵܢܹܗ ܕܒܲܪ ܡ̇ܝܘܿܬܹ̈ܐ 582 ܘܟܲܕܼ ܡ̇ܚܘܿܬܼܵܐ ܗ̄ܘ̣ ܗܘ̤ܵܐ ܒܪܸܥܝܵܢܹܗ ܠܵܐ ܡ̇ܝܘܿܬܼܵܐ ܀ 583 :ܐܘܿ ܠܡܵܝܘܿܬܼܵܐ ܕܲܛܥ̣ܵܐ ܟܝܵܢܵܐ ܕܡ̇ܝܘܿܬܼܘܼܬܹܗ 584 ܘܕܼܵܫ ܨܸܒܼܝܵܢܹܗ ܠܥܘܼܩܣܹ̈ܐ ܩ̈ܫܲܝܵܐ ܕܡ̇ܝܘܿܬܼܘܼܬܼܵܐ ܀ 585 :ܐܘܿ ܠܚܵܫܘܿܫܵܐ ܕܲܟܼܕܲܝܼܢ ܚܲܫܘ̈ܗܝ ܬܚܹܝܬܼ ܪܸܥܝܵܢܹܗ 586 ܘܐܲܪܗܸܛ ܐܸܢܘܿܢ ܒܐܸܣܛܵܕܼܝܼܘܿܢ ܕܚܵܫܘܿܫܘܼܬܹܗ ܀ 587 :ܐܘܿ ܠܡܲܬܿܝܼܢܵܐ ܕܲܪܟܸܒܼ ܗܘ̤ ܠܹܗ ܐܲܝܟ ܗܸܢܘܿܟܼܵܐ 588 ܘܟܲܒܸܿܫ ܐܸܢܘܿܢ ܠܚܲܫܲܝ̈ ܦܲܓܼܪܹܗ ܘܙܵܘܥܲܝ̈ ܢܲܦܫܹܗ ܀ 589 :ܐܘܿ ܪܸܥܝܵܢܵܐ ܕܲܟܼܕܼܝܼܢ ܟܠܹܗ ܒܲܥܡܝܼ̈ܠܵܬܼܵܐ 590 ܕܲܫܕܵܐ ܡܸܢܹܗ ܝܘܼܩܪܵܐ ܕܚܲܫܘ̈ܗܝ ܐܲܝܟ ܠܵܐ ܟܕܼܝܼܢܵܐ ܀ 591 :ܐܘܿ ܟܡܵܐ ܦܲܓܸܿܕܼ ܝܲܨܪܵܐ ܗܘ̤ ܠܹܗ ܒܩܹܐܡ̇ܐ ܕܫܸܬܼܩܵܐ 592 ܘܫܲܠ̣ܝܼ ܘܲܫܬܸ݂ܩ ܡ̣ܢ ܡܲܪܕܿܝܼܬܼܵܐ ܕܪܲܗܛܵܐ ܫܓܼܝܼܫܵܐ ܀ 593 :ܐܵܪܵܐ ܠܵܐ ܟܲܝ ܗܪܲܓܼ ܪܸܥܝܵܢܹܗ ܒܐܲܝܠܹܝܢ ܕܲܡܥܵܕܼ 594 ܕܡܵܢܲܐ ܗ̄ܝܼ ܗܵܕܹܐ ܚܕܲܬܵܐ ܕܲܒܼܥܵܢ̣ܝ ܐܲܠܵܗ ܟܠܵܐ ܀ 595 :ܠܵܐ ܟܲܝ ܐܵܘܠܸܕܼܘ ܙܵܘܥܲܝ̈ ܢܲܦܸܫܹܗ ܙܢܲܝ̈ ܚܘܼܫܒܹ̈ܐ 596 ܕܐܸܡܲܬܼܝ ܩܲܪܸܒܼ ܐ̄ܢܵܫܵܐ ܠܐ̄ܢܵܫܵܐ ܕܸܒܼܚܵܐ ܠܟܲܣܝܵܐ ܀ 597 :ܚܲܝܠܵܐ ܟܲܣܝܵܐ ܚܲܝܸܠ ܗܵܘܢܹܗ ܕܲܩܢܹܐ ܗܵܘܢܵܐ 598 ܘܠܵܐ ܐܸܬܼܪܲܦܝܼ ܒܐܵܓܼܘܿܢ ܚܲܫܹ̈ܐ ܕܦܲܓܼܪܵܐ ܘܢܲܦܫܵܐ ܀ 599 :ܚܲܠܝܘܼܬܼ ܚܘܼܒܵܐ ܕܪܸܚܡܲܬܼ ܡ̇ܪܹܗ ܥܨ̣ܵܬܹܗ ܠܟܹܐܢܵܐ 600 ܘܦܲܟܲܗ ܠܡܸܪܬܼܵܐ ܠܡܸܪܬܼܵܐ ܕܲܡܙܝܼ̈ܓܼܵܢ ܒܵܗ̇ ܟܝܵܢ̈ܝܵܬܼܵܐ ܀ 601 ܐܘܿ ܠܵܟ ܐܲܒܼܪܵܡ ܪܵܚ̇ܡܵܐ ܛܵܒܼܵܐ ܕܗܲܝܡܵܢܘܼܬܼܵܐ: pb. 20 602 ܕܲܛܥ݂ܲܝܬܿ ܐܸܢܹܝܢ ܠܲܪ̈ܚܝܼܡܵܬܼܵܐ ܕܲܩܢܹܐ ܟܝܵܢܵܐ ܀ 603 :ܫܲܦܝܼܪ ܗܵܟܹܝܠ ܓܒܼ݂ܵܟ ܗܵܘ̇ ܕܲܓܼܒܼ݂ܵܟ ܡ̣ܢ ܟܠ ܥܲܡܡ̈ܝܼܢ 604 ܘܥܲܒܼ݂ܕܵܟ ܪܹܫܵܐ ܠܟܼܠ ܕܲܡܕܲܡܹܐ ܒܪܸܚܡܲܬܼ ܚܘܼܒܵܟ ܀ 605 :ܒܪܸܚܡܲܬܼ ܡ̇ܪܹܗ ܓܡܲ݁ܪ ܚܲܡܝܼܡܵܐ ܨܸܒܼܝܵܢ ܡ̇ܪܹܗ 606 ܘܲܕܼܒܲܪ ܠܲܒܼܪܹܗ ܕܢܹܐܙܲܠ ܠܐܲܬܼܪܵܐ ܕܐܸܬܼܚܵܘܝܼ ܠܹܗ ܀ 607 :ܒܐܲܬܼܪܵܐ ܕܪܲܚܝܼܩ ܦܲܩ̣ܕܹܿܗ ܩܵܠܵܐ ܕܢܸܒܸܿܕܼ ܕܸܒܼܚܹܗ 608 ܕܢܸܗܘܹܐ ܒܚܝܼܪܵܐ ܠܥܹܝܢ ܐܲܪ̈ܥܵܢܹܐ ܘܲܫܡܲܝܵܢܹ̈ܐ ܀ 609 :ܠܥܹܝܢ ܟܠܒܸܪ̈ܝܵܢ ܡܚܵܘܹܐ ܗ̄ܘ̣ܵܐ ܠܹܗ ܠܚܘܼܡܣܵܢ ܢܲܦܫܹܗ 610 ܕܲܟܼܡܵܐ ܡܥܲܙܹܐ ܘܠܵܐ ܡܸܬܼܪܲܦܹܐ ܒܥܲܡܠܵܐ ܕܐܘܼܪܚܹܗ ܀ 611 :ܬܠܬܼܵܐ ܝܵܘܡܝܼ̈ܢ ܪܕܼܵܐ ܟܲܕܼ ܫܲܬܿܝ̇ܩ ܡ̣ܢ ܦܘܼܠܵܓܼܵܐ 612 ܘܠܵܐ ܓܠ̣ܵܐ ܐ̄ܪܵܙܵܐ ܕܨܸܒܼܝܵܢ ܡܵܪܹܗ ܠܲܒܼܢܲܝ̈ ܒܲܝܬܹܿܗ ܀ 613 :ܡ̣ܢ ܟܠ ܒܲܪܢܵܫ ܟܲܣܝܹܗ ܠܐ̄ܪܵܙܵܐ ܕܒܹܝܬܼ ܠܹܗ ܠܡܵܪܹܗ 614 ܘܐܵܦܠܵܐ ܠܣܲܪܵܐ ܓܠ̣ܵܐ ܛܘܼܝܵܒܼܵܐ ܕܲܒܼܪܸܥܝܵܬܹܗ ܀ 615 :ܒܹܝܬܼ ܠܹܗ ܠܡܵܪܹܗ ܡܟܲܣܹܐ ܗ̄ܘ̣ܵܐ ܠܹܗ ܠܐ̄̈ܪܵܙܵܐ ܕܡ̇ܪܹܗ 616 ܕܢܸܗܘܹܐ ܫܲܪܝܼܪ ܫܲܪܝܼܪ ܫܪܵܪܵܐ ܕܚܘܼܒܹܿܗ ܠܡܵܪܵܐ ܕܓܲܒܼ݂ܵܝܗܝ ܀ 617 :ܦܘܼܩܕܵܢ ܡ̇ܢܹܗ ܝܲܩܝܼܪ ܗ̄ܘ̣ܵܐ ܠܹܗ ܡ̣ܢ ܟܠ ܡܸܕܹܿܡ 618 ܘܐܲܝܟ ܨܸܒܼܝܵܢܹܗ ܡܛܲܝܸܒܼ ܗ̄ܘ̣ܵܐ ܠܹܗ ܠܨܸܒܼܝܵܢ ܢܲܦܫܹܗ ܀ 619 :ܒܗܵܢ ܨܸܒܼܝܵܢܵܐ ܐܲܣܝܼܪܝܼܢ ܗ̄ܘ̣ܵܘ ܙܵܘܥܲܝ̈ ܢܲܦܫܹܗ 620 ܘܲܡܣܲܟܹܿܐ ܗ̄ܘ̣ܵܐ ܕܡ̇ܢܵܐ ܢܸܗܘܹܐ ܒܫܘܼܠܵܡ ܐܘܼܪܚܹܗ ܀ 621 :ܫܠܸ݂ܡ ܡܸܢܝܵܢܵܐ ܕܡܲܪܕܿܝܼܬܼ ܐܘܼܪܚܹܗ ܬܠܵܬܼܵܐ ܝܵܘܡܝܼ̈ܢ 622 ܘܐܲܚܹܡ ܥܲܝܢܵܘ̈ܗܝ ܘܲܚܙ̣ܵܝܗܝ ܠܐܲܬܼܪܵܐ ܘܲܚܕܲܝܼ ܠܩܘܼܒܼܠܹܗ ܀ 623 :ܒܥܲܝܢܹ̈ܐ ܕܦܲܓܼܪܵܐ ܚܵܘܝܹܗ ܕܘܼܟܿܬܼܵܐ ܕܕܸܒܼܚܵܐ ܕܲܒܼܪܹܗ 624 ܘܲܒܼܪܸܥܝܵܢܵܐ ܓܠ̣ܵܐ ܠܹܗ ܛܘܼܦܣܵܐ ܕܗܵܝ̇ ܕܲܥܬܼܝܼܕܼܵܐ ܀ 625 :ܕܸܒܼܚܵܐ ܕܩܘܼܫܬܵܐ ܥܬܼܝܼܕܼ ܗ̄ܘ̣ܵܐ ܕܢܸܗܘܹܐ ܒܕܼܘܼܟܲܬܼ ܐ̄ܪܵܙܵܐ 626 ܘܚܵܘܝܹܗ ܕܘܼܟܿܬܼܵܐ ܕܢܸܗܘܹܐ ܫܵܠܹ̇ܡ ܐ̄ܪܵܙܵܐ ܠܩܘܼܫܬܵܐ ܀ 627 :ܒܗܵܕܹܐ ܕܘܼܟܿܬܼܵܐ ܥܬܼܝܼܕܼ ܗ̄ܘ̣ܵܐ ܕܢܸܗܘܹܐ ܕܸܒܼܚܵܐ ܡܫܝܼܚܵܐ 628 ܘܩܲܕܹܿܡ ܒܲܕܿܩܹܗ ܒܕܸܒܼܚܵܐ ܕܐ̄ܪܵܙܵܐ ܩܕܼܵܡ ܣܘܼܥܪ̈ܵܢܹܐ ܀ 629 :ܐ̄ܪܵܙܵܐ ܗ̄ܘ̣ܵܐ ܓܹܝܪ ܕܸܒܼܚܹܗ ܕܐܝܼܣܚܵܩ ܕܗܵܘ̇ ܕܲܡܫܝܼܚܵܐ 630 ܘܛܵܒܼ ܙܵܕܹ̇ܩ ܗ̄ܘ̣ܵܐ ܕܢܸܗܘܹܐ ܕܵܡܹ̇ܐ ܕܸܒܼܚܵܐ ܠܕܸܒܼܚܵܐ ܀ 631 :ܚܹܝܠ ܒܵܪܘܝܵܐ ܡܕܲܡܹܐ ܗ̄ܘ̣ܵܐ ܠܹܗ ܠܨܸܒܼܝܵܢ ܚܘܼܒܹܿܗ 632 ܕܠܵܐ ܢܸܬܼܦܲܠܓܼܘܼܢ ܨܵܝ̈ܬܲܝ ܡܸܠܹ̈ܐ ܥܲܠ ܣܘܼܥܪ̈ܵܢܹܐ ܀ 633 :ܒܗܵܢ ܪܸܥܝܵܢܵܐ ܗܘ̤ܵܬܼ ܡܲܪܕܿܝܼܬܼܵܐ ܕܝܵܘܡܹ̈ܐ ܬܠܵܬܼܵܐ 634 ܕܢܸܗܘ̤ܐ ܣܵܗܹ̇ܕܼ ܕܸܒܼܚܵܐ ܠܕܸܒܼܚܵܐ ܘܛܘܼܦܣܵܐ ܠܩܘܼܫܬܵܐ ܀ pb. 21 635 :ܐܵܦ ܐܲܒܼܪܵܗܵܡ ܠܗܵܢܵܐ ܢܝܼܫܵܐ ܚ̣ܢܵܐ ܪܸܥܝܵܢܹܗ 636 ܘܢܵܚܲܬ̤ ܢܲܦܫܹܗ ܒܕܼܘܲܟܲܬܼ ܕܸܒܼܚܵܐ ܕܚܵܘܝܹܗ ܡ̇ܪܹܗ ܀ 637 :ܒܕܼܘܼܟܲܬܼ ܕܸܒܼܚܵܐ ܓ̣ܡܲܪ ܨܸܒܼܝܵܢܹܗ ܘܨܸܒܼܝܵܢ ܡ̇ܪܹܗ 638 ܘܲܒܼܢ̣ܵܐ ܡܲܕܼܒܿܚܵܐ ܘܲܣܕ݂ܲܪ ܩܲܝܣܹ̈ܐ ܘܦܲܟܼ݂ܪܹܗ ܠܲܒܼܪܹܗ ܀ 639 :ܫܡܲܛ݂ ܣܲܟܿܝܼܢܵܐ ܘܥܲܡ ܣܲܟܿܝܼܢܵܐ ܫܡ݂ܲܛ ܨܸܒܼܝܵܢܹܗ 640 ܘܲܟܼܠ̣ܵܝܗܝ ܩܵܠܵܐ ܕܢܸܟܼܠܹܐ ܐܝܼܕܹܗ ܡ̣ܢ ܚܲܒܿܝܼܒܹܗ ܀ 641 :ܐܲܒܼܪܵܡ ܐܲܒܼܪܵܡ ܩܪ̣ܵܐ ܪܘܼܚܵܢܵܐ ܠܦܲܓܼܪܵܢܵܝܵܐ 642 ܕܲܟܼܠܝܼ ܐܝܼܕܼܵܟ ܘܦܘܼܫ ܡ̣ܢ ܩܸܛܠ̇ܐ ܕܕܸܒܼܝܠܐ ܕܲܒܼܪܵܟ ܀ 643 :ܦܘܼܫ ܡ̣ܢ ܕܸܒܼܚܵܐ ܕܕܸܡ ܒܲܪܢܵܫܵܐ ܕܲܒܼܥܹ̇ܝܬܼ ܡܸܢܵܟ 644 ܘܣܲܒ̣ ܩܲܪܸܒܼ ܠܝܼ ܕܡ̇ܐ ܫܲܬܿܝܼܩܵܐ ܚܠܵܦ ܡܲܠܵܠܵܐ ܀ 645 :ܠܵܐ ܒܵܥܹ̇ܐ ܐ̄ܢܵܐ ܕܹܡ ܒܲܪܢܵܫܵܐ ܒܗܵܢܵܐ ܙܲܒܼܢܵܐ 646 ܒܲܕܸܠܵܐ ܣܵܦܹ̇ܩ ܕܢܸܥܛܹܐ ܒܲܕܸܡܹܗ ܫܛܵܪ ܚܲܝܵܒܹ̈ܐ ܀ 647 :ܠܵܐ ܡܸܬܼܦܲܪܥܵܐ ܚܵܘܼܒܲܬܼ ܐ̄ܢܵܫܵܐ ܒܕܸܡ ܒܲܪܢܵܫܵܐ 648 ܥܕܲܡ̇ܐ ܕܗܵܘܹ̇ܐ ܡ̣ܢ ܐ̄ܢܵܫܘܼܬܼܵܐ ܐ̄ܢܵܫ̇ܐ ܓܡܝܼܪܵܐ ܀ 649 :ܝܵ̇ܕܲܥ ܐ̇̄ܢܵܐ ܠܹܗ ܠܙܲܒܼܢܵܐ ܕܥܵܗܹ̇ܝܢ ܠܲܓܼܡܝܼܪܘܼܬܼܵܐ 650 ܘܠܵܐ ܛܲܥܝܵܐ ܠܝܼ ܕܐܸܡܲܬܼܝ ܦܵܪܹܩ ܐ̄ܢܵܫܵܐ ܐ̄ܢܵܫܵܐ ܀ 651 :ܦܘܼܪܩܵܢ ܐ̄ܢܵܫܵܐ ܓܠ݂̇ܝܬܼ ܠܵܟ ܐܲܒܼܪܵܡ ܒܥܸܠܲܬܼ ܕܸܒܼܚܵܐ 652 ܠܡܸܕܲܥ ܟܠܢܵܫ ܠܡܸܛܲܪ ܙܲܒܼܢܵܐ ܕܦܘܼܪܩܵܢ ܐ̄ܢܵܫܵܐ ܀ 653 :ܐܘܼܪܚܵܐ ܕܼܪܫܹ̇ܬܼ ܒܗܵܕܹܐ ܕܨܐܕܲܝܟ ܠܗܵܝ̇ ܕܲܥܬܼܝܼܪܼܵܐ 654 ܕܢܸܪܕܿܘܿܢ ܐ̄ܢܵܫܵܐ ܠܘܲܥܕܵܐ ܕܣܲܒܼܪܵܐ ܕܒܼܘܼܛܵܠ ܡ̇ܘܬܵܐ ܀ 655 :ܒܗܵܕܹܐ ܥ̣ܠܬܼܵܐ ܪܲܟܿܒܹ̇ܬܼ ܥ̣ܠܠܹ̈ܐ ܘܲܒܼܥܹ̇ܝܬܼ ܕܸܒܼܚܵܐ 656 ܕܐܸܓܼܠܸܐ ܠܐ̄ܢܵܫܵܐ ܟܲܣܝܘܼܬܼ ܨܸܒܼܝܵܢܝ ܕܲܠܘܵܬܼ ܐ̄ܢܵܫܐ ܀ 657 :ܒܵܟ ܐܲܒܼܪܵܗܵܡ ܓܠܹ̇ܝܬܼ ܠܲܥܒܼܝܼ̈ܕܹܐ ܨܸܒܝܼܝܵܢܝ ܕܥܲܠ ܟܠ 658 ܫܡܲܥ ܘܐܸܬܼܚܲܟܲܡ ܘܚܲܟܸܿܡ ܐ̄ܢܵܫܵܐ ܡ̣ܢ ܚܸܟܼ̈ܡܵܬܼܟ ܀ 659 :ܠܵܐ ܕܹܝܢ ܬܸܣܒܲܪ ܕܕܸܒܼܚܵܟ ܐܲܣܠܝܼܬܼ ܐܲܝܟ ܠܵܐ ܓܡܝܼܪܵܐ 660 ܗܵܐ ܝܸܗ̄ܒܹ̇ܬܼ ܠܵܟ ܕܬܸܣܥܘܿܪ ܨܸܒܼܝܵܢܝ ܒܕܸܒܼܚܵܐ ܕܐܸܡܪܵܐ ܀ 661 :ܐܸܡܪܵܐ ܚܲܪܫܵܐ ܝܵܗܹ̇ܒܼ ܐ̄ܢܵܐ ܠܵܟ ܚܠܵܦ ܡܲܠܵܠܵܐ 662 ܘܲܒܼܫܲܬܿܝ̣ܩܵܐ ܡܲܠܸܦ ܐ̄ܢܵܐ ܠܵܟ ܙܢܲܝ̈ ܕܸܒܼܚܵܬܼܵܐ ܀ 663 :ܬܠܵܬܼܵܐ ܕܸܒܼܚܹ̈ܐ ܒܵܥܹ̇ܐ ܐ̄ܢܵܐ ܠܵܟ ܕܲܬܼܩܲܪܸܒܼ ܠܝܼ 664 ܬܪܹܝܢ ܡܲܠܠܹ̈ܐ ܘܚܿܕܼ ܒܲܬܿܝܼܩܵܐ ܛܘܼܦܸܣܵܐ ܘܩܘܼܫܬܵܐ ܀ 665 :ܒܛܘܼܦܣܵܐ ܩܲܒܿܠܹ̇ܬܼ ܡ̇ܘܬܹ̇ܐ ܕܐܝܼܣܚܵܩ ܒܕܸܘܼܟܲܬܼ ܩܘܼܫܬܵܐ 666 ܘܲܚܠܵܦ ܐܝܼܣܚܵܩ ܕܡܵܐ ܫܲܬܿܝܼܩܵܐ ܕܐܸܡܪܵܐ ܫܲܠܝܵܐ ܀ 667 :ܗܵܐ ܚܲܪܸܡܬܿܟ ܠܡܸܛܲܪ ܛܲܟܼܣܵܐ ܕܫܘܼܠܵܡ ܙܲܒܼܢܹ̈ܐ 668 ܫܲܡܠܵܐ ܪܸܓܿܬܼܟ ܒܕܸܒܼܚܵܐ ܕܙܲܒܼܢܵܐ ܘܣܲܟܵܐ ܠܙܲܒܼܢܵܐ ܀ 669 ܒܓܸܠܝܵܢ ܪܘܼܚܵܐ ܪܡܲܙ̣ ܠܹܗ ܕܲܢܚܘܼܪ ܒܪܹܫ ܐܝܼܠܵܢܵܐ: pb. 22 670 ܘܲܚܙ̣ܵܘ ܡ̣ܢ ܫܹܠܝ ܐܸܡܪܵܐ ܕܲܬܼܠܸܐ ܒܐ̄ܪܵܙܵܐ ܙܩܝܼܦܵܐ ܀ 671 :ܘܲܒܼܬܸܕܼܡܘܼܪܬܿܐ ܕܲܠܘܵܬܼ ܐܲܒܼܪܵܡ ܡܸܣܬܲܥܪܵܐ ܗ̄ܘ̣ܵܬܼ 672 ܢܘܼܟܼܪ̈ܵܝܵܢ ܗ̣̄ܘܲܝ̈ ܙܢܲܝ̈ ܕܸܡ̈ܘܵܬܹܗ ܠܲܕܼܟܼܠ ܕܸܡ̈ܘܵܢ ܀ 673 :ܟܠܗܘܿܢ ܥܸܪ̈ܒܹܿܐ ܒܐܲܪܥܵܐ ܪܵܥܹ̇ܝܢ ܐܲܪ̈ܥܵܢܹܐ 674 ܘܥܸܪܒܹܿܗ ܕܐܲܒܼܪܵܡ ܒܪܹܫ ܐܝܼܠܢܵܐ ܡܸܬܿܬܲܪܣܸܐ ܗ̄ܘ̣ܵܐ ܀ 675 :ܒܪܹܫ ܐܝܼܠܵܢܵܐ ܬܠܸܐ ܗ̄ܘ̣ܵܐ ܐܸܡܪܵܐ ܕܐܸܬܼܚܵܘܝܼ ܠܹܗ 676 ܘܲܚܠܵܦ ܨܹܨܹ̈ܐ ܩܒ݂ܲܥ ܗ̄ܘ̣ܵܐ ܒܓܼܘܼܫܡܹܗ ܣܵܘܟܲܝ̈ ܩܲܝܣܵܐ ܀ 677 :ܙܩܝܼܦܵܐ ܪܟܸܒܼ݂ ܗ̄ܘ̣ܵܐ ܛܘܼܦܣܹܗ ܕܩܘܼܫܬܵܐ ܒܕܼܘܼܡܝܵܐ ܕܩܘܼܫܬܵܐ 678 ܘܲܡܚܲܙܲܩ ܗ̄ܘ̣ܵܐ ܟܠܹܗ ܒܟܼܠܹܗ ܐܲܝܟ ܕܲܠܡܵܘܬܵܐ ܀ 679 :ܡܵܘܬܵܐ ܕܩܲܝܣܵܐ ܥܬܼܝܼܕܼ ܗ̄ܘ̣ܵܐ ܕܲܡܗܘܼܬܼ ܫܵܪܹ̇ܐ ܡ̇ܘܬܵܐ 680 ܘܲܬܼܠ̣ܵܐ ܐܸܡܪܲܐ ܒܪܹܫ ܐܝܼܠܵܢܵܐ ܕܢܲܟܼܪܸܙ ܡ̇ܘܬܹܿܗ ܀ 681 :ܘܐܸܠܵܐ ܢܸܒܼܥܹܐ ܕܡ̇ܢܲܐ ܗ̄ܝܼ ܥܸܠܬܼܵܐ ܕܐܸܡܪܵܐ ܒܩܲܝܣܵܐ 682 ܘܡܲܢ̣ܘܼ ܕܲܬܼܠܵܝܼܗܝ ܠܒܲܪ ܡ̣ܢ ܛܲܟܼܣܵܐ ܕܓܸܢܣܹ̈ܐ ܚܲܪ̈ܫܹܐ ܀ 683 :ܚܲܪ̈ܫܹܐ ܕܠܵܐ ܢܦܸܫ ܒܐܲܪܥܵܐ ܡܥܵܕܝܼܢ ܠܡܸܬܼܗܲܦܵܟܼܘܼ 684 ܘܡ̇ܢܲܐ ܗ̄ܝܼ ܗܵܕܹܐ ܕܗܘ̤ ܒܲܠܚܘܿܪܼܵܘܗܝ ܬܠܹܐ ܗ̄ܘ̣ܵܐ ܒܩܲܝܣܵܐ ܀ 685 :ܕܠܵܐ ܗܘ̤ ܐܸܣܲܪ ܢܲܦܸܫܹܗ ܒܩܲܝܣܵܐ ܗܵܕܹܐ ܓܲܠܝܵܐ ܗ̄ܝܼ 686 ܘܲܐ̄ܚܪܹܝܢ ܦܲܟܼܪܹܗ ܘܲܬܼܠܵܝܼܗܝ ܬܲܡ̇ܢ ܠܵܐ ܫܲܪܝܼܪܵܐ ܀ 687 :ܫܪܵܪܵܐ ܣܵܗܹ̇ܕܼ ܘܠܵܐ ܡܸܬܿܕܲܓܿܠܵܐ ܫܲܪܝܼܪܘܼܬܹܗ 688 ܕܪܸܡܙܵܐ ܟܲܣܝܵܐ ܬܠܵܝܼܗܝ ܒܐܝܼܠܵܢܵܐ ܒܐ̄ܪܵܙܵܐ ܕܩܘܼܫܬܵܐ ܀ 689 :ܐ̄ܪܵܙ ܦܵܪܘܿܩܲܢ ܩܲܕܸܡ ܚܵܘܝܲܢ ܚܵܘܝܲܢ ܪܵܚܹ̇ܡ ܓܸܢܣܲܢ 690 ܕܡܵܐ ܕܦܵܪܹܩ ܠܲܢ ܠܵܐ ܢܸܬܿܕܲܡܲܪ ܕܐܲܝܼܟܲܢ ܦܲܪ̣̱ܩܲܢ ܀ 691 :ܒܡܵܘܬܵܐ ܕܐ̄̇ܢܵܫܵܐ ܡܸܬܼܦܲܪܩܝܼܢ ܗ̄ܘ̣ܵܘ ܐܵܕܼܵܡ̇ܝܼ̈ܐ 692 ܘܩܲܕܹܿܡ ܨܵܪܹܗ ܠܐ̄ܪܵܙ ܦܘܼܪܩܵܢܲܢ ܒܡܵܘܬܵܐ ܕܐܸܡܪܵܐ ܀ 693 :ܐܸܡܪܵܐ ܩܪ̣ܵܝܗܝ ܗ̄ܘ̣ܵܐ ܐܵܦ ܝܘܿܚܲܢܵܢ ܠܦܵܪܹܩ ܓܸܢܣܲܢ 694 ܒܗܵܝ̇ ܕܵܥܬܼܝܼܕܼ ܗ̄ܘ̣ܵܐ ܕܢܸܦܪܘܿܩ ܚܲܝܲܝ̈ܢ ܒܕܸܒܼܚܵܐ ܕܡܵܘܬܹܿܗ ܀ 695 :ܡ̣ܢ ܥܸܪ̈ܒܹܿܐ ܗ̄ܘ̣ܵܐ ܥܸܪܒܵܐ ܕܲܦܪ݂ܲܩ ܚܲܝܵܘ̈ܗܝ ܕܠܝܼܣܚܲܩ 696 ܘܡ̣ܢ ܐ̄ܢܵܫܵܐ ܗ̄ܘ̣ܵܐ ܕܲܦܪ̣ܵܩ ܐ̄ܢܵܫܵܐ ܒܡܵܘܬܹܿܗ ܠܐ̄ܢܵܫܵܐ ܀ 697 :ܐܘܼܪܚܵܐ ܕܡ̇ܘܬܹܿܗ ܕܪܲܫ ܫܲܬܿܝܼܩܵܐ ܕܦܲܨܝܼ ܠܐܝܼܣܚܵܩ 698 ܘܗܵܕܲܐ ܗ̄ܝܼ ܕܐܸܡܲܪ ܕܲܚܙܵܢܝ ܐܲܒܼܪܵܡ ܘܲܚܕܼܝܼ ܒܝܘܿܡ ܡܵܘܬܿܝ ܀ 699 :ܝܵܘܡ̇ܐ ܕܡ̇ܘܬܹܿܗ ܚܙ̣ܸܵܐ ܐܲܒܼܪܵܗܵܡ ܠܵܐ ܗ̄ܘ̣ܵܐ ܕܿܚܙ̣ܵܐ 700 ܐܸܠܵܐ ܕܲܚܙ̣ܵܐ ܒܝܲܕܼ ܓܸܠܵܝܵܢܵܐ ܝܵܘܡ̇ܐ ܕܡ̇ܘܬܹܿܗ ܀ 701 :ܡ̇ܘܬܹܿܗ ܟܣܹܐ ܗ̄ܘ̣ܵܐ ܒܡܵܘܬܹܿܗ ܕܐܸܡܼܪܵܐ ܕܲܕܼܒܲܝܼܚ ܐܲܒܼܪܵܡ 702 ܘܲܒܼܦܘܼܪܩܵܢܵܐ ܕܲܕܼܒܼܝܼܚܘܼܬܹܗ ܚܲܝܹ̈ܐ ܕܟܼܠ ܐ̄ܢܵܫ ܀ 703 :ܘܐܸܢ ܐܵܡܲ݁ܪ ܐ̄ܢܵܫ ܕܪܘܼܟܵܒܼ ܡܸܠܹ̈ܐ ܗ̄ܘ̣ ܡܹܐܡܪܵܐ ܕܐܸܡ̇ܪܹܬܼ 704 ܢܹܐܡܲܪ ܡ̇ܕܹܝܢ ܗܘ̤ ܡ̣ܢ ܕܝܼܠܹܗ ܘܐ̄ܢܵܐ ܡܩܲܒܸܿܠ ܀ 705 ܢܚܵܘܹܝܢܝ ܚܲܝܠܵܐ ܕܣܘܼܟܵܠ ܡܸܠܵܘ̈ܗܝ ܡ̣ܢ ܕܲܟܼܬܼܝܼ̈ܒܼܵܢ: pb. 23 706 ܘܫܵܠܹ̇ܡ ܐ̄ܢܵܐ ܠܹܗ ܕܫܲܦܝܼܪ ܥܲܕܼܠܲܢܝ ܐܲܝܟ ܕܲܠܣܲܟܼܠܵܐ ܀ 707 :ܠܵܐ ܒܲܪܢܵܫܵܐ ܠܵܘ ܣܲܟܼܠܵܐܝܼܬܼ ܕܲܟܼܬܼܝܼ̈ܒܼܵܢ 708 ܘܠܵܘ ܡ̣ܢ ܪܸܥܝܵܢܝ ܒܕܹܝ̇ܬܼ ܣܘܼܟܵܠܵܐ ܘܚܲܝܠܵܐ ܕܲܒܼܗܹܝܢ ܀ 709 :ܠܹܗ ܗ̄ܘ̣ ܠܢܝܼܫܵܐ ܕܲܟܼܬܼܝܼ̈ܒܼܵܬܵܐ ܚ̣ܢܵܘ ܚܘܼܫܵܒܼܵܝ̈ 710 ܘܡ̣ܢ ܩܸܪܝܵܢܗܹܝܢ ܝܸܠܦܹ̇ܬܼ ܕܐܹܡܲܪ ܥܲܠ ܣܘܼܟܵܠܗܹܝܢ ܀ 711 :ܠܵܐ ܗ̄ܘ̣ܵܐ ܒܛܘܼܦܣܵܐ ܕܠܵܐ ܫܲܪܝܼܪ̈ܵܢ ܫܲܪܪܹܬܼ ܡܸܠܲܝ̈ 712 ܐܸܠܵܐ ܒܐ̄ܪ̈ܵܙܹܐ ܕܚܵܢܹ̇ܝܢ ܣܲܓܿܝܼ ܠܩܘܼܫܬܵܐ ܓܲܠܝܵܐ ܀ 713 :ܩܘܼܫܬܵܐ ܣܵܗܹ̇ܕܼ ܕܠܵܐ ܣܛܵܬ̤ ܡܸܠܲܬܼܝ ܡ̣ܢ ܨܹܝܕܼ ܩܘܼܫܬܵܐ 714 ܘܠܵܐ ܚܲܠܸܦܬܹܿܗ ܠܲܫܪܵܪ ܡܸܠܵܘ̈ܗܝ ܒܡܸܠܹ̈ܐ ܕܙܹܐܦܵܐ ܀ 715 :ܡܸܢ̣ܘ ܕܩܘܼܫܬܵܐ ܝܸܠܦܹ̇ܬܼ ܕܐܹܡܲܪ ܡܹܐܡܪܵܐ ܕܿܥܠܵܘܗܝ 716 ܘܐܲܝܟ ܕܸܠܪܲܒܵܐ ܝܸܗ̄ܒܹ̇ܬܼ ܪܸܥܝܵܢܝ ܠܬܲܠܡܝܼܕܼܘܼܬܹܗ ܀ 717 :ܬܲܠܡܝܼܕܼܵ ܐ̄ܢܵܐ ܕܣܸܦܪ̈ܲܝ ܪܘܼܚܵܐ ܕܲܟܼܬ݂ܲܒܼ ܪܘܼܚܵܐ 718 ܘܫܲܪܝܼܪܵܐ ܠܝܼ ܕܠܵܐ ܣܛ̣ܵܐ ܪܸܥܝܵܢܝ ܡ̣ܢ ܕܲܟܼܬܼܝܼ݁ܒܼܵܢ ܀ 719 :ܥܲܠ ܬܘܼܟܼܠܵܢܵܐ ܕܚܲܝܠܵܐ ܕܲܒܼܗܘܿܢ ܪܕܹܝ̇ܬܼ ܒܵܬܲܪܗܘܿܢ 720 ܘܲܒܼܥܘܼܕܼܪܵܢܗܘܿܢ ܩܢܹ̇ܝܬܼ ܥܘܼܕܼܪܵܢܵܐ ܠܡܹܐܡܲܪ ܡܸܠܹ̈ܐ ܀ 721 :ܡܸܠܹ̈ܐ ܕܲܒܼܗܘܿܢ ܗܘ̤ܿܝ̈ ܠܝܼ ܗܸܪܓܵܐ ܒܟܼܠܗܘܿܢ ܚܲܝܲܝ̈ 722 :ܘܠܵܐ ܪܵܓܵܐ ܠܝܼ ܕܐܹܦܘܼܫ ܘܐܲܗܡܹܐ ܡ̣ܢ ܥܸܢܝܵܢܗܘܿܢ 723 :ܒܝܲܕ ܢܸܣܝܵܢܵܐ ܩܢܹ̇ܝܬܼ ܢܸܣܵܝܵܢܵܐ ܕܗܸܪܓܵܐ ܕܲܒܼܗܘܿܢ 724 ܕܲܟܼܡܵܐ ܡ̇ܘܬܲܪ ܥܸܢܝܵܢ ܡܸܠܹ̈ܐ ܕܬܼܘܼܪ̈ܓܵܡܲܝܗܘܿܢ ܀ 725 :ܡܠܘܿܐܵܐ ܛܵܒܼܵܐ ܢܸܣ̇ܒܹܿܬܼ ܡܸܢܗܘܿܢ ܕܐܸܬܿܬܲܓܲܪ ܒܹܗ 726 ܘܠܵܐ ܫܵܠܹ̇ܐ ܐ̄ܢܵܐ ܕܐܸܦܪܘܿܥ ܛܲܝܒܿܘܼ ܐܵܦܸܢ ܡܸܠܹ̈ܐ ܀ 727 :ܒܡܸܠܹ̈ܐ ܚܦܝܼܛ ܐ̄ܢܵܐ ܕܐܸܦܪܘܿܥ ܛܲܝܒܿܘܼ ܠܲܡܚܲܟܿܡܵܢܲܝ̈ 728 ܕܲܠܡܵܐ ܐܹܚܘܼܒܼ ܐܲܝܟ ܚܲܝܵܒܼܵܐ ܕܝܼ݂ܙܸܦ ܘܲܛܠܲܡ ܀ 729 :ܚܲܝܵܒܼܵܐ ܐ̄ܢܵܐ ܘܠܵܐ ܟܵܦ̇ܪ ܐ̄ܢܵܐ ܒܚܵܘܒܲܬܼ ܚܵܘ̈ܒܲܝ 730 ܘܡܸܬܼܟܲܬܲܫ ܐ̄ܢܵܐ ܠܡܸܦܪܲܥ ܡܸܠܹ̈ܐ ܚܠܵܦ ܣܘܼܥܪ̈ܵܢܹܐ ܀ 731 :ܡܸܠܹ̈ܐ ܕܣܸܦܪܹ̈ܐ ܚܙܹ̇ܝܬܼ ܕܲܥܡܝܼܠܝܼܢ ܒܩܸܪ̈ܝܵܢܲܝܗܘܿܢ 732 ܘܲܒܼܥܹ̇ܝܬܼ ܕܐܸܕܲܥ ܡ̇ܢܲܐ ܗ̄ܝܼ ܥܸܠܬܹܗ ܕܗܵܢܵܐ ܥܲܡܠܵܐ ܀ pb. 24 733 :ܪܓܼܬܼܵܐ ܪܲܓܿܬܿܢܝ ܕܐܸܠܐܹܐ ܥܲܡܗܹܝܢ ܒܥܲܡܠܵܐ ܕܵܒܼܗܹܝܢ 734 ܘܐܹܠܲܦ ܫܲܦܝܼܪ ܚܹܝܠ ܣܘܼܟܵܠܵܐ ܕܲܠܓܼܵܘ ܡܸܢܗܹܝܢ ܀ 735 :ܚܹܝܠ ܣܘܼܟܵܠܗܹܝܢ ܓܲܪܓܲܢܝ ܕܐܸܗܘܹܐ ܒܲܪ ܥܸܢܝܵܢܗܘܿܢ 736 ܘܐܲܥܢܹܐ ܚܲܝܲܝ̈ ܒܗܸܪܓܵܐ ܛܵܒܼܵܐ ܕܡܲܩܢܹܐ ܚܲܝܹ̈ܐ ܀ 737 :ܚܲܝܠܵܐ ܕܪܘܼܚܵܐ ܬܲܪܓܸܿܡ ܐܸܢܹܝܢ ܒܦܘܼܡ̇ܐ ܕܒܸܣܪܵܐ 738 ܕܢܼܗܘܘܿܢ ܗܵܪܓܿܝܼܢ ܒܸܣܪ̈ܵܢܵܝܹܐ ܒܪ̈ܘܼܚܵܢܝܵܬܼܵܐ ܀ 739 :ܗܵܢܵܐ ܗܸܪܓܵܐ ܓܲܪܓܲܢܝ ܐܵܦܠܝܼ ܡܚܝܼܠ ܚܘܼܫܵܒܹ̈ܐ 740 ܕܐܲܥܬܢܝܼܬܼ ܪܸܥܝܵܢܝ ܒܡܸܠܹ̈ܐ ܕܡܲܠ̈ܝܵܢ ܗܸܪܓܵܐ ܕܡܸܠܹ̈ܐ ܀ 741 :ܒܣܸܦܪܹܗ ܕܡܘܼܫܹܐ ܚܙܹܝ̇ܬܹܗ ܕܲܣܒܼܝܼܣ ܗܵܢ ܥ̣ܢܝܵܢܵܐ 742 ܘܲܡܚܲܬܼܝܸܬܼ ܗ̄ܘ̣ܵܐ ܠܲܕܼܗܵܪܹܓܼ ܒܹܗ ܕܬܼܘܼܒܼ ܢܸܗܪܘܿܓܼ ܒܹܗ ܀ 743 :ܫܲܪܒܵܐ ܕܟܹܐܢܹ̈ܐ ܣܝܼܡ ܗ̄ܘ̣ܵܐ ܒܓܼܵܘܹܗ ܐܲܝܟ ܕܲܒܼܓܲܙܵܐ 744 ܘܛܵܒܼ ܡ̣ܢ ܟܠܗܘܿܢ ܣܒܼܝܼܣ ܗ̄ܘ̣ܵܐ ܫܲܪܒܵܐ ܕܫܲܪܒܹܿܗ ܕܐܲܒܼܪܵܐ ܀ 745 :ܫܲܪܒܹܿܗ ܕܐܲܒܼܪܵܡ ܗܘ̤ܵܐ ܠܝܼ ܪܸܓܿܬܼܵܐ ܕܫܲܪܒܵܐ ܗܵܢܵܐ 746 ܘܡ̣ܢ ܬܲܫܥܝܼܬܹܗ ܩܥܹ̇ܝܬܼ ܒܘܼܝܵܢܐ ܠܡܸܒܼܥܵܐ ܕܟܲܣ̈ܝܵܢ ܀ 747 :ܥܲܠ ܟܲܣ̈ܝܵܬܼܵܐ ܗܘ̤ܵܐ ܠܝܼ ܪܸܢܝܵܐ ܠܲܡܥܲܩܵܒܼܘܼ 748 ܕܡ̇ܢܲܐ ܗ̄ܝܼ ܥܸܠܬܼܵܐ ܕܟܲܣ̈ܝܵܢ ܡܸܠܹ̈ܐ ܡ̣ܢ ܡܲܠܵܠܹ̈ܐ ܀ 749 :ܠܡܵܢ ܠܵܐ ܓܲܠ̈ܝܵܢ ܐܲܝܟ ܓܲܠܝܘܼܬܼܵܐ ܕܚܲܝܠܵܐ ܕܲܒܼܗܹܝܢ 750 ܕܛܵܟ ܪܵܗܹ̇ܛ ܗ̄ܘ̣ܵܐ ܗܵܘܢܵܐ ܠܡܸܓܼܠܵܐ ܠܲܕܼ ܠܵܐ ܓܲܠ̈ܝܵܢ ܀ 751 :ܐܸܠܘܼ ܕܠܝܼܠ ܗ̄ܘ̣ܵܐ ܚܹܝܠ ܣܘܼܟܵܠܗܹܝܢ ܐܲܝܟ ܩܸܪܝܵܢܗܹܝܢ 752 ܦܫܝܼܩ ܗ̄ܘ̣ܵܐ ܐܟܼܠܢܵܫ ܠܡܸܪܚܲܡ ܗܸܪܓܵܐ ܕܲܡܝܲܬܿܪ̈ܵܬܼܵܐ ܀ 753 :ܠܝܘܼܬܼܪܵܢ ܥܲܒܼܕܵܗ̇ ܝܵ̇ܕܲܥ ܟܠܵܐ ܠܗܵܕܹܐ ܕܲܥܒ݂ܲܕܼ 754 ܕܟܲܣܝܹܗ ܠܚܲܝܠܵܐ ܕܡܸܠܲܝ̈ ܪܘܼܚܵܐ ܒܠܵܐ ܣܘܼܟܵܠܵܐ ܀ 755 :ܠܹܗ ܠܝܘܼܦܠܵܢܵܐ ܝܲܩܲܪ ܘܐܵܘܪܸܒܼ ܩܕܼܵܡ ܝܵܠܘܦܹ̈ܐ 756 ܕܠܵܐ ܢܫܘܼܛܵܢܵܝ̈ܗܝ ܥܲܝܢܲܝ̈ ܒܸܣܪܵܐ ܒܝܲܕܼ ܓܲܠܝܘܼܬܹܗ ܀ 757 :ܟܣܸܐ ܠܲܚܙܵܬܼܵܐ ܒܸܣܪ̈ܵܢܵܝܬܵܐ ܟܠܡܵܐ ܕܲܓܼܠܹܐ 758 ܘܝܲܩܝܼܪ ܘܲܪܚܝܼܡ ܟܠ ܡܵܐ ܕܲܟܼܣܸܐ ܡ̣ܢ ܚܲܙܵܝܹ̈ܐ ܀ 759 :ܗܵܕܿܐ ܗ̄ܝ̣ ܥ̣ܠܬܼܵܐ ܕܟܲܣܝܘܼܬܼ ܡܸܠܹ̈ܐ ܪ̈ܘܼܚܵܢܝܵܬܼܵܐ 760 ܘܲܒܼܟܲܣܝܘܼܬܼܗܹܝܢ ܢܹܐܪܲܒܼ ܚܲܝܠܵܐ ܕܬܲܪܓܸܿܡ ܐܸܢܹܝܢ ܀ 761 :ܚܲܝܠܵܐ ܕܪܘܼܚܵܐ ܬܲܪܓܸܿܡ ܐܸܢܹܝܢ ܒܦܘܼܡ ܦܲܓܼܪ̈ܵܢܹܐ 762 ܘܡܸܛܠܗܵܕܹܐ ܠܵܐ ܕܠܝܼܠ ܠܫܸܡܥܵܐ ܕܣܘܼܟܵܠܲܝܗܹ̈ܝܢ ܀ 763 :ܥܲܣܩܵܐ ܗ̄ܝ̣ ܣܲܓܵܝܼ ܠܠܸܫܵܢ ܒܸܣܪܵܐ ܡܠܸܗ ܓܵܐ ܒܪܘܼܚܵܐ 764 ܐܲܟܼܡܵܐ ܕܢܘܼܟܼܪܵܝ ܟܝܵܢ ܡ̇ܝܘܿܬܹ̈ܐ ܠܠܵܐ ܡ̇ܝܘܿܬܹ̈ܐ ܀ 765 :ܠܵܐ ܡ̇ܝܘܿܬܼܵܐ ܥܬܼܝܼܕܼ ܗ̄ܘ̣ܵܐ ܕܢܼܗܘܹܐ ܟܝܵܢ ܡ̇ܝܘܿܬܹ̈ܐ 766 ܘܲܓܼܒܼ݂ܵܐ ܠܐܲܒܼܪܵܐ ܠܐܲܒܼܪܵܡ ܘܥܲܒܼ݂ܕܹܿܗ ܪܹܫܵܐ ܕܚܲܝܹ̈ܐ ܚܲܕܹ̈ܬܹܐ ܀ 767 :ܒܒܲܪ ܐܲܒܼܪܵܗܵܡ ܡܸܬܼܚܲܕܲܬܼ ܗ̄ܘ̣ܵܐ ܟܠ ܥܲܡܟ ܟܠܵܐ 768 ܘܒܹܗ ܒܐܲܒܼܪܵܗܵܡ ܨܵܪ ܬܲܚܘܝܼܬܼܵܐ ܕܗܵܘ̇ܝܵܐ ܒܲܒܼܪܹܗ ܀ 769 ܒܗܵܕܹܐ ܬܼܢܘܲܝ ܡܸܬܼܝܲܐܒܼ ܗ̄ܘ̣ܵܐ ܐܵܦ ܐܲܒܼܪܵܗܵܡ: pb. 25 770 ܕܢܚܙܹܐ ܒܲܒܼܪܹܗ ܚܙܵܬܵܐ ܕܚܘܼܕܲܬܼ ܐ̄ܢܵܫܵܐ ܀ 771 :ܚܘܼܕܲܬܼ ܐ̄ܢܵܫܵܐ ܚܙ̣ܵܐ ܐܲܒܼܪܵܗܵܡ ܒܕܸܒܼܚܵܐ ܕܲܒܼܪܹܗ 772 ܕܡ̣ܝܼܬܼ ܟܲܕܼ ܠܵܐ ܡ̣ܝܼܬܼ ܘܨܵܪ ܬܲܚܘܝܼܬܼܵܐ ܕܡ̇ܘܬܵܐ ܘܚܲܝܹ̈ܐ ܀ 773 :ܡܝܼܬܼܵܐ ܚܫܝܼܒܼ ܗ̄ܘ̣ܵܐ ܡ̣ܢ ܥܸܕܵܢܵܐ ܕܦܲܟܼܪܹܗ ܐܲܒܼܘܼܗܝ 774 ܘܲܚ̣ܝܵܐ ܒܐ̄ܪܵܙܵܐ ܡ̣ܢ ܨܹܒܼܝܵܢܵܐ ܕܐܲܠܵܗ ܟܠܵܐ ܀ 775 :ܠܐܲܠܵܗ ܟܠܵܐ ܫܦ݂ܲܪ ܠܹܗ ܘܲܒܼܥ̣ܵܝܗܝ ܕܢܸܗܘܹܐ ܕܸܒܼܚܵܐ 776 ܡ̇ܕܹܝܢ ܩܲܒܿܠܵܗ̇ ܠܲܕܼܒܼܝܼܚܘܼܬܹܗ ܐܲܝܟ ܗܵܝ̇ ܕܲܗܘ̤ܵܬܼ ܀ 777 :ܠܵܘ ܒܲܬܼܘܵܬܼܵܐ ܥܲܒܼ݂ܕܵܗ̇ ܠܗܵܕܹܐ ܗܵܘ̇ ܝܵܕܲܥ ܟܠ 778 ܕܲܒܼܥ̣ܵܐ ܕܸܒܼܚܵܐ ܘܲܦ̣ܢܵܐ ܘܐܸܡ݂ܲܪ ܕܠܵܐ ܒܵܥܹ̇̄ܐ ܐ̄ܢܵܐ ܀ 779 :ܠܵܘ ܢܸܣܝܵܢܐ ܕܚܘܼܒܹܿܗ ܕܐܲܒܼܪܵܡ ܝ̄ܠܸܦ ܐܲܝܟ ܕܲܟܼܬܼܝܼܒܼ 780 ܘܠܵܐ ܣܘܼܩܵܢܹܗ ܒܥܼ̇ܐ ܕܲܢܡܲܠܹܐ ܕܫܲܐ̣ܠܹܗ ܕܸܒܼܚܵܐ ܀ 781 :ܝܵܕܲܥ ܗ̄ܘ̣ܵܐ ܠܐܲܒܼܪܵܐ ܘܲܠܟܼܠ ܩܕܼܵܡ ܟܠ ܡܸܕܹܿܡ 782 ܘܲܠܝܬܿ ܒܲܥܒܼܝܼ̈ܕܹܐ ܕܲܗܘ̤ܵܐ ܘܗܵܘܹ̇ܐ ܕܠܵܐ ܝܵ̇ܕܲܥ ܠܹܥ ܀ 783 :ܡܣܲܝܕܝܼܢ ܗ̄ܘ̣ܵܘ ܠܹܗ ܒܥܒܼܝܼ̈ܕܹܐ ܕܲܥܒܲܕܼ ܠܓܼܵܘ ܡ̣ܢ ܣܵܟܹܗ 784 ܘܗܘ̤ ܠܓܼܵܘ ܡ̣ܢ ܟܠ ܘܲܠܒܲܪ ܡ̣ܢ ܟܠ ܕܠܵܐ ܣܘܼܝܵܟܼܵܐ ܀ 785 :ܠܵܐ ܟܹܝܬܼ ܢܸܪܢܹܐ ܐܲܚܵܐ ܕܪܵܢܹܐ ܗܸܕܝܘܿܛܵܐܝܼܬܼ 786 ܕܟܲܕܼ ܠܵܐ ܝܵ̇ܕܲܥ ܒܥܵܝܗܝ ܠܐܲܒܼܪܵܗܵܡ ܕܸܒܼܚܵܐ ܕܲܒܼܪܹܗ ܀ 787 :ܠܵܐ ܗܘ̤ ܝܲܠܦܹܗ ܠܚܘܼܒܹܿܗ ܕܟܹܐܢܵܐ ܠܦܘܼܬܼ ܕܲܣܒܼܝܼܪܵܐ 788 ܠܐ̄ܢܵܫܵܐ ܐܲܠܸܦ ܕܢܸܩܢܘܿܢ ܚܘܼܒܵܐ ܕܕܼܵܡܹ̇ܐ ܠܐܲܒܼܪܵܐ ܀ 789 :ܠܐ̄ܢܵܫܵܐ ܚܲܕܲܡ ܟܠܗܹܝܢ ܕܲܣܥ݂ܲܪ ܨܹܝܕܼ ܐܲܒܼܪܵܗܵܡ 790 ܘܡܸܛܠ ܐ̄ܢܵܫܵܐ ܓܒܼ݂ܵܝܗܝ ܡ̣ܢ ܐ̄ܢܵܫܵܐ ܘܲܩܪ̣ܵܝܗܝ ܪܵܚ̇ܡܹܗ ܀ 791 :ܠܐ̄ܢܵܫܵܐ ܚܵܘܝܼ ܐ̄ܪܵܙ ܚܘܼܕܵܬܼܵܐ ܕܗܵܘܹ̇ܐ ܒܚܲܪܬܼܵܐ 792 ܕܢܸܗܘܘܿܢ ܪܵܢܹ̇ܝܢ ܒܗܵܝ̇ ܕܲܥܬܼܝܼܕܼܵܐ ܕܠܹܐܡܲܬܼܝ ܬܸܗܘܹܐ ܀ 793 :ܗܵܝ̇ ܕܲܥܬܼܝܼܕܼܵܐ ܚܵܘܝܼ ܒܡܵܘܬܹܿܗ ܕܒܲܪ ܐܲܒܼܪܵܗܵܡ 794 ܕܲܒܼܝܲܕ ܡ̇ܘܬܵܐ ܕܚܲܕܼ ܒܲܪܢܵܫܵܐ ܚܵܐܹ̇ܝܢ ܐ̄ܢܵܫܵܐ ܀ 795 :ܒܲܬܼܪܹܝܬ ܡ̇ܘ̈ܬܲܝܢ ܡ̇ܝܲܬܿܝܼܢ ܐ̄ܢܵܫܵܐ ܘܒܲܬܼܪܹܝܢ ܚܵܐܹ̇ܝܢ 796 ܚܲܕܼ ܒܲܥܡܵܕܼܵܐ ܐ̄ܪܵܙܵܢܵܝܵܐ ܘܚܲܕܼ ܒܲܫܪܵܪܵܐ ܀ 797 :ܐ̄ܪܵܙܵܢܵܐܝܼܬܼ ܡ̣ܝܼܬܼ ܗ̄ܘ̣ܵܐ ܐܝܼܣܚܵܩ ܘܲܚ̣ܝܵܐ ܒܐ̄ܪܵܙܵܐ 798 ܘܨܵܪ ܠܲܢ ܡ̇ܘܬܵܐ ܕܡܲܥܡܘܿܕܲܝܼܬܼܵܐ ܘܚܲܝܹ̈ܐ ܕܡܵܢܵܗ̇ ܀ 799 :ܡ̇ܘܬܵܐ ܕܩܘܼܫܬܵܐ ܡ̣ܝܼܬܼ ܦܵܪܘܿܩܲܢ ܒܪܹܫ ܓܵܓܼܘܿܠܬܵܐ 800 ܘܚܲܝܹ̈ܐ ܕܩܘܼܫܬܵܐ ܚ̣ܝܵܐ ܒܲܫܪܵܪܵܐ ܘܐܲܚܝܼ ܠܟܼܠܵܐ ܀ 801 :ܡ̣ܝܼܬܿܢܲܢ ܗܵܟܹܝܠ ܐ̄ܪܵܙܵܢܵܐܝܼܬܼ ܘܩܘܼܫܬܵܢܵܐܝܼܬܼ 802 ܘܲܥܬܼܝܼܕܼܝܼܢܲܢ ܕܢܸܚܹܐ ܕܠܵܐ ܚܒܼܵܠ ܚܲܝܹ̈ܐ ܕܩܘܼܫܬܵܐ ܀ 803 ܡܫܝܼܚܵܐ ܠܲܡ ܩ̣ܵܡ ܡ̣ܢ ܒܹܝܬܼ ܡܝܼ̈ܬܹܐ ܘܬܼܘܼܒܼ ܠܵܐ ܡ̇ܐܹ̇ܬܼ: pb. 26 804 ܡ̇ܕܹܝܢ ܩ̣ܵܡ ܠܹܗ ܟܠܹܗ ܟܝܵܢܵܐ ܥܲܡ ܒܲܪ ܓܸܢܣܹܗ ܀ 805 :ܚܲܕܼܘܼ ܟܝܵܢܵܐ ܐܵܕܼܵܡܵܝܵܐ ܒܟܼܠ ܕܐܝܼܬܼ ܠܐܵܕܼܵܡ 806 ܘܐܸܢܗܘ̤ ܕܩܵܡ݂ܲܬ̤ ܡܢܵܬܼܵܐ ܡܸܢܹܗ ܩ̣ܵܡ ܠܹܗ ܟܠܹܗ ܀ 807 :ܐܲܣܩܲܢ ܥܲܡܹܗ ܠܐܲܝܟܵܐ ܕܲܣܠ̣ܸܩ ܐܸܡ݂ܲܪ ܦܵܘܠܵܘܿܣ 808 ܘܐܸܢ ܫܲܪܝܪܵܐ ܠܬܲܡ̇ܢ ܣܵܠܹ̇ܩ ܟܠܹܗ ܟܝܵܢܲܢ ܀ 809 :ܒܲܪܢܵܫܲܢ ܠܲܡ ܗܵܘ̇ ܥܲܬܿܝܼܩܵܐ ܐܸܙܕܿܩܸܦ ܥܲܡܹܗ 810 ܗܵܐ ܡܝܼܬܿܢ ܥܲܡܹܗ ܘܲܚܝܼܢܲܢ ܥܲܡܹܗ ܘܐܲܡܠܸܟ ܥܲܡܹܗ ܀ 811 :ܥܲܡܹܗ ܒܡܵܘܬܵܐ ܘܥܲܡܹܗ ܒܚܲܝܹ̈ܐ ܘܥܲܡܹܗ ܒܫܘܼܒܼܚܵܐ 812 ܘܡܲܢ̣ܘܼ ܡܸܟܹܝܠ ܡܨܸܐ ܦܵܪܹܫ ܠܲܢ ܡ̣ܢ ܥܸܢܝܵܢܹܗ ܀ 813 :ܐܸܢ ܐܲܠܵܗܵܐ ܚܠܵܦܲܝܢ ܐܝܼܬܼܵܘܗܝ ܐܲܟܼܡܵܐ ܕܲܟܼܬܼܝܼܒܼ 814 ܡܲܢ̣ܘܼ ܣܵܦܹ̇ܩ ܠܲܡܥܵܘܵܟܼܘܼ ܦܘܼܪܩܵܢ ܚܲܝܲܝ̈ܢ ܀ 815 :ܗܘ̤ ܒܵܪܘܿܝܵܐ ܚ̣̄ܡܵܐ ܒܲܩܢܘܿܡܹܗ ܠܪܵܚܡܹܗ ܐܲܒܼܪܵܡ 816 ܕܒܼܵܟ ܢܸܬܼܒܲܪܟܼܘܼܢ ܥܲܡܡܹ̈ܐ ܟܠܗܘܿܢ ܒܫܹܡܝ ܕܲܥܠܲܝܗܘܿܢ ܀ 817 :ܗܵܐ ܓܡ݂ܲܪ ܡܸܠܵܘ̈ܗܝ ܕܲܠܘܵܬܼ ܐܲܒܼܪܵܡ ܒܗܘܿܢ ܒܲܥܒܼܵܕܹ̈ܐ 818 ܘܲܗܘ̤ܵܘ ܐ̄ܢܵܫܵܐ ܒܢܲܝ̈ ܐܲܒܼܪܵܗܵܡ ܐܲܝܟ ܕܐܸܫܬܵܘܕܿܝܼ ܀ 819 :ܒܗܵܢܵܐ ܣܲܒܼܪܵܐ ܐܲܣܝܼܪܝܼܢ ܗ̄ܘ̣ܵܘ ܟܠܗܘܿܢ ܥܲܡܡܹ̈ܐ 820 ܘܲܡܣܼ̇ܟܹܿܝܢ ܕܐܸܡܲܬܼܝ ܢܸܗܘܘܿܢ ܒܢܲܝ̈ ܐܲܒܼܪܵܗܵܡ ܀ 821 :ܒܢܲܝ̈ ܡܸܬܿܬܿܩܠܝܼܢ ܗ̄ܘ̣ܵܘ ܒܫܲܪܒܹܿܗ ܕܐܲܒܼܪܵܐ 822 ܘܠܵܐ ܨܸܒܹ̇ܝܢ ܗ̄ܘ̣ܵܘ ܕܢܸܗܘܘܿܢ ܥܲܡܡܹ̈ܐ ܐ̄ܚܝܵܢܹ̈ܐ ܠܙܲܪܥܹܗ ܀ 823 :ܠܚܵܣܘܿܡܘܼܬܼܵܐ ܕܗܵܢ ܪܸܥܝܵܢܵܐ ܚܙ̣ܵܐ ܚܵܙܹ̇ܐ ܟܠ 824 ܘܐܲܟܸܿܣ ܐܸܢܘܿܢ ܒܝܲܕܼ ܫܘܼܓܼܠܵܦܵܐ ܕܲܫܡܹܗ ܕܐܲܒܼܪܵܐ ܀ 825 :ܐܲܒܼܪܵܐ ܐܲܒܼܵܐ ܕܥܲܡܵܐ ܒܲܠܚܘܿܕܼ ܡܸܬܼܟܲܢܹܐ ܗ̄ܘ̣ܵܐ 826 ܘܒܼܵܬܲܪ ܙܲܒܼܢܵܐ ܩ̣ܪܵܝܗܝ ܐܲܒܼܪܵܗܵܡ ܐܲܒܼܵܐ ܕܥܲܡܡܹ̈ܐ ܀ 827 :ܫܝܼܛ ܗ̄ܘ̣ܵܐ ܘܲܙܥܘܿܪ ܫܡܵܐ ܩܲܕܼܡ̇ܝܵܐ ܠܹܗ ܐܲܒܼܘܼܗܝ 828 ܘܡܸܛܠ ܗܵܕܹܐ ܫܲܚܠܸܦ ܠܲܫܡܹܗ ܕܪܵܥܹܗ ܀ 829 :ܒܫܸܡ ܒܵܪܘܿܝܵܐ ܩ̣ܪܵܝܗܝ ܒܵܪܘܿܝܵܐ ܠܒܲܪ ܟܲܠܕܵܝܹ̈ܐ 830 ܒܗܵܝ̇ ܕܲܥܬܼܝܼܕܼ ܗ̄ܘ̣ܵܐ ܕܲܢܪܝܼܡ ܙܲܪܥܹܗ ܠܪܵܘܡ̇ܐ ܕܲܫܡܹܗ ܀ 831 :ܫܡܵܐ ܝܲܩܝܼܪܵܐ ܝܵܗܹ̇ܒܼ ܗ̄ܘ̣ܵܐ ܠܹܗ ܠܒܲܪ ܐܲܒܼܪܵܗܵܡ 832 ܘܩܲܕܹܿܡ ܝܲܩܲܪ ܫܡܹܗ ܕܐܲܒܼܪܵܗܵܡ ܒܫܸܡ ܗܵܘ̇ ܕܲܥܬܼܝܼܕܼ ܀ 833 :ܡܸܛܠ ܝܲܠܕܹܿܗ ܝܲܩܲܪ ܠܐܲܒܼܪܵܡ ܡ̇ܪܹܗ ܕܐܲܒܼܪܵܡ 834 ܕܢܸܗܘܹܐ ܝܵ̇ܕܲܥ ܕܠܵܐ ܕܝܼܠܹܗ ܗ̄ܝܼ ܒܘܼܪܟܵܬܼ ܀ 835 :ܠܵܐ ܐܸܬܼܒܲܪܲܟܼܘ ܥܼ̇ܡܡܹ̈ܐ ܕܐܲܪܥܵܐ ܒܹܗ ܘܲܒܼܝܲܠܕܵܘ̈ܗܝ 836 ܥܕܲܡ̇ܐ ܚܲܕܼ ܡ̣ܢ ܙܲܪܥܹܗ ܘܒܲܪܸܟ ܐ̄ܢܵܫܵܐ ܀ pb. 27 837 :ܚܲܕܼ ܡ̣ܢ ܙܲܪܥܹܗ ܗܘ̤ܸܵܐ ܪܹܫܝܼܬܼܵܐ ܕܓܲܒܼܵܐ ܡ̣ܢ ܟܠ 838 ܘܩܲܪܒܼ ܢܲܦܫܹܗ ܕܸܒܼܚܵܐ ܕܲܟܼܝܵܐ ܘܪܲܥܝܼ ܠܟܼܠܵܐ ܀ 839 :ܠܟܼܠ ܥܲܡ ܟܠܵܐ ܪܲܥܝܼ ܒܡܵܘܬܹܿܗ ܒܪܹܗ ܕܐܲܒܼܪܵܗܵܡ 840 ܘܲܩܢ̣ܵܐ ܕܪܵܥܵܐ ܕܠܵܐ ܡܸܬܼܦܲܚܲܡ ܥܲܡ ܕܥܒܼܝܼܪܹ̈ܐ ܀ 841 :ܒܡܵܘܬܹܿܗ ܓܲܡ̣ܪܵܗ̇ ܠܚܲܣܝܼܪܘܼܬܼܵܐ ܕܲܒܼܢܲܝ̈ ܓܸܢܣܹܗ 842 ܘܡܸܛܠ ܗܵܕܹܐ ܝ̄ܪܸܒܼ ܡ̣ܢ ܟܠܵܐ ܘܲܣܓܸܕܼ ܠܹܗ ܟܠ ܀ 843 :ܣܸܓܼܕܲܬܼ ܟܠܵܐ ܡܩܲܒܸܿܠ ܡ̣ܢ ܟܠ ܥܲܡ ܒܵܪܘܿܝܵܐ 844 ܘܗܵܢ̇ܘ ܬܲܗܪܵܐ ܕܲܣܓܸܕܼ ܠܹܗ ܟܠ ܥܲܡ ܐܝܼܬܼܘܼܬܼܵܐ ܀ 845 :ܬܲܗܪܵܐ ܡܲܠܝܵܐ ܚܕܲܬܵܐ ܕܲܗܘ̤ܵܬ ܒܹܝܬܼ ܐܲܪ̈ܥܵܢܹܐ 846 ܕܲܗܘ̤ܵܐ ܟܝܵܢܗܘܿܢ ܡܸܡܬܲܓܼܕܵܢܵܐ ܥܲܡ ܐܝܼܬܼܘܼܬܼܵܐ ܀ 847 :ܗܵܐ ܩܢܹܐ ܟܝܵܢܲܢ ܕܲܪܓܼܵܐ ܪܵܡܵܐ ܥܲܡ ܡܟܲܝܢܵܢܹܗ 848 ܬܵܘ ܢܸܬܼܚܲܦܲܛ ܠܡܸܦܪܲܥ ܛܲܝܒܲܘܼ ܠܗܵܘ̇ ܕܐܲܪܝܼܡܲܢ ܀ 849 :ܗܵܐ ܗܘ̤ܵܐ ܡܸܢܲܢ ܚܲܕܼ ܙܲܟܵܝܵܐ ܕܲܙܟܼܵܐ ܘܙܲܟܿܝܼ 850 ܢܸܒܼܥܹܐ ܡܸܢܹܗ ܕܲܢܥܲܕܲܪ ܠܲܢ ܒܐܵܓܼܘܿܢ ܚܲܫܹ̈ܐ ܀ 851 :ܗܵܐ ܦܪܝܼܩܝܼܢܲܢ ܒܡܵܘܬܵܐ ܕܩܘܼܫܬܵܐ ܕܚܲܕܼ ܡ̣ܢ ܓܸܢܣܲܢ 852 ܠܵܐ ܬܘܼܒܼ ܢܸܦܢܹܐ ܢܡܘܼܬܼ ܒܲܚܛܝܼܬܼܵܐ ܒܵܬܲܪ ܕܲܚܢܲܢ ܀ 853 :ܗܵܐ ܙܒܼܝܼܢܝܼܢܲܢ ܒܲܕܼܡ̇ܐ ܕܲܟܼܝܵܐ ܕܡ̣ܢ ܐ̄ܢܵܫܘܼܬܲܢ 854 ܠܵܐ ܢܸܙܕܲܒܲܢ ܠܥܲܒܼܕܿܘܼܬܼ ܒܝܼܫܵܐ ܕܿܓܼܗܲܝܢ ܡܸܢܵܗ̇ ܀ 855 :ܗܵܐ ܨܒܼܵܬܐ ܘܩܲܒܸܿܠ ܐܲܠܵܗ ܟܠܵܐ ܚܲܕܼ ܡ̣ܢ ܟܠܲܢ 856 ܠܵܐ ܬܘܼܒܼ ܢܸܦܗܹܐ ܒܲܪ̈ܓܼܝܼܓܼܵܬܼܵܐ ܒܸܣܪ̈ܵܢܝܵܬܼܵܐ ܀ 857 :ܗܵܐ ܩܲܒܸܿܠܢܲܢ ܣܒܲܪܬܼܵܐ ܚܕܲܬܵܐ ܕܚܵܝܵܬܼ ܡܝܼ̈ܬܹܐ 858 ܢܸܚܢܹܐ ܒܗܵܘܢܲܢ ܠܗܵܘ̇ ܬܘܼܩܵܢܵܐ ܕܠܵܐ ܡܸܬܼܚܲܒܲܠ ܀ 859 :ܗܵܐ ܐܸܬܿܕܲܪܫܲܬ̤ ܐܘܼܪܚܵܐ ܫܦܝܼܬܼܵܐ ܠܪܵܘܡܵܐ ܕܲܠܥܸܠ 860 ܢܵܘܥ̣ܐ ܓܸܦܹ̈ܐ ܕܦܵܪܘܿܚܘܼܬܼܵܐ ܒܝܲܕܼ ܕܘܼܒܵܪ̈ܲܝܢ ܀ 861 :ܗܵܐ ܡܙܲܡܢܝܼܢܲܢ ܠܲܚܠܘܿܠ ܡܲܠܟܵܐ ܐܲܠܵܗܵܝܵܐ 862 ܢܛܲܝܸܒܼ ܢܲܚ̈ܬܹܿܐ ܕܲܦܐܹܝܢ ܠܲܫܡܵܐ ܕܗܵܝ̇ ܡܸܫܬܿܘܼܬܼܵܐ ܀ 863 :ܗܵܐ ܡܟܲܢܝܝܼܢܲܢ ܒܢܲܝ̈ ܝܵܪܬܿܘܼܬܼܵܐ ܕܝܵܪ̈ܬܹܿܐ ܕܟܼܠܵܐ 864 ܢܹܐܣܘܿܪ ܚܘܼܒܲܢ ܒܚܘܼܒܵܐ ܕܲܫܡܹܗ ܕܪܹܫ ܝܵܪܬܿܘܼܬܼܢ ܀ 865 :ܗܵܐ ܣܠ̣ܩ ܘܐܲܡܠܸܟ ܠܥܸܠ ܡ̣ܢ ܐܲܪ̈ܟܿܘܿܣ ܘܫܲܠܝܼܛܵܢܹ̈ܐ 866 ܢܸܚܕܹܿܐ ܘܲܢܕܼܘܼܨ ܕܝܼܪܸܒܼ ܓܸܢܣܲܢ ܠܥܸܠ ܡ̣ܢ ܟܠܵܐ ܀ 867 :ܗܵܐ ܡܸܫܬܲܒܲܚ ܟܝܵܢܲܢ ܫܝܼܛܵܐ ܥܲܡ ܓܵܒܼܘܿ ܠܹܗ 868 ܢܲܪܡܹܐ ܐܝܼܕܼܵܐ ܒܬܼܵܘܕܿܝܼܬܼ ܢܲܦܫܲܢ ܐܸܢ ܡܸܫܬܲܒܲܚ ܀ 869 :ܗܵܐ ܐܸܫܬܲܡܠܝܼܘ ܩܵܠܹ̈ܐ ܕܲܗܘ̤ܵܘ ܨܹܝܕܼ ܬܘܼܩܵܢܲܢ 870 ܕܲܗܘܲܝܢ ܨܲܠܡܵܐ ܡܸܣܬܲܓܼܕܵܢܵܐ ܥܲܡ ܒܵܪܘܿܝܲܢ ܀ 871 :ܗܵܐ ܣܵܓܼ̇ܕܲܝܼܢ ܠܲܢ ܫܡܲܝܵܐ ܘܐܲܪܥܵܐ ܒܗܵܘ̇ ܒܲܪܢܵܫܵܐ 872 ܢܸܦܪܘܿܥ ܛܲܝܒܿܘܼ ܠܗܵܘ̇ ܕܐܲܪܝܼܡܲܢ ܠܥܸܠ ܡ̣ܢ ܟܠܵܐ ܀ 873 :ܢܗܲܝܡܸܢ ܠܸܒܲܢ ܘܢܵܘܕܹܿܐ ܦܘܼܡܲܢ ܕܠܵܐ ܦܘܼܠܵܓܼܵܐ 874 ܕܨܸܒܼܝܵܢ ܟܲܣܝܵܐ ܠܒܸ݂ܫ ܠܲܟܼܝܵܢܲܢ ܘܚܲܕܹܿܬܼ ܠܲܢ ܒܲܢ ܀ pb. 28 875 :ܒܢܲܦܸܫܵܐ ܘܦܲܓܼܪܵܐ ܢܸܙܡܲܪ ܫܘܼܒܼܚܵܐ ܒܟܼܠܹܗ ܐ̄ܢܵܫܲܢ 876 ܠܗܵܘ̇ ܕܐܲܫܘܝܲܢ ܠܲܡܗܲܠܵܠܘܼ ܠܫܸܡ ܪܲܒܿܘܼܬܹܗ ܀ 877 :ܒܗܵܠܹܝܢ ܢܲܥܢܹܐ ܥ̣ܢܝܵܢ ܢܲܦܫܲܢ ܕܠܵܐ ܣܲܒܼܥܘܼܬܼܵܐ 878 ܘܠܵܐ ܢܸܬܸܠ ܠܹܗ ܐܲܬܼܪܵܐ ܠܝܲܨܪܲܝܢ ܠܡܸܦܗܵܐ ܒܬܼܵܘܫܵܐ ܀ 879 :ܬܵܘܫܵܐ ܗ̄ܘ̣ ܦܸܗܝܵܐ ܕܲܪ̈ܓܼܝܼܓܼܵܬܼܵܐ ܐܲܪ̈ܥܵܢܝܵܬܼܵܐ 880 ܠܵܐ ܢܸܬܼܪܲܓܼܪܲܓܼ ܕܠܵܐ ܢܸܬܼܚܲܝܲܒܼ ܥܲܡ ܚܲܝܵܒܹ̈ܐ ܀ 881 :ܥܒ݂ܲܪ ܠܹܗ ܠܸܠܝܵܐ ܕܲܪ̈ܓܼܝܼܓܼܵܬܼܵܐ ܦܲܓܼܪ̈ܵܢܝܵܬܼܵܐ 882 ܘܲܕܲܢܲܚ̣ ܢܘܼܗܪܵܐ ܕܕܼܘܼܒܵܪ ܚܲܝܲ̈ܐ ܠܵܐ ܡ̇ܝܘܿܬܹ̈ܐ ܀ 883 :ܐܲܝܟ ܕܲܒܼܢܘܼܗܪܵܐ ܢܚܵܘܹܐ ܢܲܦܫܲܢ ܠܥܹܝܢ ܚܲܙܝܹ̈ܐ 884 ܘܢܵܘܕܿܘܿܢ ܥܲܡܲܢ ܠܗܵܘ̇ ܕܲܒܼܢܘܼܗܪܹܗ ܚܙ݂ܲܝܢܲܢ ܢܘܼܗܪܵܐ ܀ 885 :ܢܘܼܗܪܵܐ ܗ̄ܘ̣ ܪܲܒܵܐ ܕܸܢܚܹܗ ܕܡ̇ܪܲܢ ܕܲܕܼܢܲܚ̣ ܒܐܲܪܥܵܐ 886 ܘܪܲܕܦܵܗ̇ ܠܛܘܼܥܝܲܝ ܕܲܦܬܲܟܼܪܘܼܬܼܵܐ ܡ̣ܢ ܐܲܪ̈ܥܵܢܹܐ ܀ 887 :ܬܵܘ ܐܲܪ̈ܥܵܢܹܐ ܚܘܼܪܘ ܘܐܸܬܼܒܲܩܵܘ ܒܕܸܚܠܲܬܼ ܩܘܼܫܬܵܐ 888 ܕܢܲܗܝܼܪ ܢܘܼܗܪܹܗ ܡ̣ܢ ܢܲܗܝܼܪܵܐ ܕܡܲܢܗܲܪ ܒܐܲܪܥܵܐ ܀ 889 :ܢܘܼܗܪܵܐ ܘܢܘܼܪܵܐ ܩܪܵܗ ܐܵܦ ܡ̇ܪܲܢ ܠܟܼܵܪܘܿܙܘܼܬܹܗ 890 ܘܒܼܵܗ̇ ܐܸܬܼܢܲܗܲܪܘ ܐܲܪ̈ܥܵܢܵܝܹܐ ܘܲܫܡܲܝܵܢܹ̈ܐ ܀ 891 :ܗܵܐ ܢܗ݂ܲܪ ܥܵܠܡܵܐ ܒܢܘܼܗܪܵܐ ܪܲܒܵܐ ܕܫܸܡ ܒܵܪܘܿܝܵܐ 892 ܢܩܵܘܹܐ ܒܢܘܼܗܪܹܗ ܕܠܵܐ ܢܸܫܬܲܢܲܩ ܒܚܸܫܟܵܐ ܕܲܠܒܲܪ ܀