ܒ ܒܰܪ ܩܳܠܶܗ

1 ܠܰܬܠܳܬܳܐ ܪ̈ܳܥܰܘܳܬܳܐ ܥ̈ܶܠܳܢܶܐ ܗ̱ܘܰܘ ܣܰܓ̈ܺܝܐܶܐ ܠܰܚܕܳܐ ܐܶܡܳܐ ܕܰܒܟܳܪܟܳܐ ܒ̈ܢܳܬܳܐ ܗ̈ܘܰܝ ܠܳܗ̇ ܒܟܽܠ ܦܶܢ̈ܝܳܢ ܕܰܐܚܪܶܒ ܪܽܘܓܙܳܐ ܕܰܝܪ̈ܳܬܳܗ̇ ܢܶܒܢܼܶܐ ܫܰܝܢܳܐ ܥܺܕ̱̈ܳܬܳܗ̇

ܥܽܘܢܺܝܬܳܐ: ܒܪܺܝܟ ܕܰܓܒܳܐ ܠܰܬܠܳܬܰܝܗܽܘܢ

2 ܥܰܡܠܶܗ ܛܳܒܳܐ ܕܩܰܕܡܳܝܳܐ ܨܶܡܕܳܗ̇ ܠܰܐܪܥܳܐ ܒܽܐܘܠܨܳܢܳܗ̇ ܠܰܚܡܶܗ ܘܚܰܡܪܶܗ ܕܡܶܨܥܳܝܳܐ ܠܟܳܪܟܳܐ ܥܰܨܒܶܗ ܒܰܬܒܳܪܶܗ ܚܰܠܺܝ ܡܶܪܬܰܢ ܒܽܐܘܠܨܳܢܳܐ ܡܡܰܠܠܶܗ ܚܰܠܝܳܐ ܕܰܐ̱ܚܪܳܝܳܐ

3 ܩܰܕܡܳܐ ܦܠܼܰܚ ܐܰܪܥܳܐ ܒܥܰܡܠܳܐ ܥܩܰܪ ܡܶܢܳܗ̇ ܝܰܥܪܳܐ ܘܟܽܘܒ̈ܶܐ ܡܶܨܥܳܝܳܐ ܐܰܟܪܶܟ ܣܓܳܗ̇ ܒܰܦܪ̈ܺܝܩܶܐ ܣܝܳܓܳܐ ܥܒܼܰܕ ܠܳܗ̇ ܐ̱ܚܪܳܝܳܐ ܦܬܼܰܚ ܐܰܘܨܰܪ ܡܳܪܶܗ ܘܰܙܪܰܥܼ ܒܳܗ̇ ܡ̈ܶܠܰܝ ܡܳܪܳܗ̇

4 ܟܳܗܢܳܐ ܩܰܕܡܳܐ ܒܝܰܕ ܨܰܘܡܳܐ ܬܰܪ̈ܥܶܐ ܕܦܽܘܡ̈ܶܐ ܐܶܚܰܕ ܗ̱ܘܳܐ ܟܳܗܢܳܐ ܕܰܬܪ̈ܶܝܢ ܒܰܫܒܰܝ̈ܳܐ ܦܽܘܡ̈ܶܐ ܕܟܺܝܣܳܐ ܦܳܬܰܚ ܗ̱ܘܳܐ ܐ̱ܚܪܳܝܳܐ ܕܶܝܢ ܢܳܩܶܒ ܐܶܕ̈ܢܶܐ ܘܰܐܪܡܺܝ ܒܗܶܝܢ ܚܶܫܠܰܬ ܚ̈ܰܝܶܐ

5 ܐܰܗܪܽܘܢ ܫܰܠܰܚ ܗ̱ܘܳܐ ܐܶܕ̈ܢܶܐ ܡܶܢ ܩܰܕܫ̈ܶܐ ܘܥܰܒܼܰܕ ܥܶܓܠܳܐ ܥܶܓܠܳܐ ܡܺܝܬܳܐ ܟܰܣܝܳܐܺܝܬ ܕܰܩܰܪ ܩܶܛܠܳܗ̇ ܠܡܰܫܪܺܝܬܳܐ ܠܗܳܢܽܘܢ ܕܰܚܫܰܠܘ̱ ܩܰܪ̈ܢܳܬܶܗ ܦܰܪܶܬ ܐܶܢܽܘܢ ܒܩܰܪ̈ܢܳܬܶܗ

6 ܟܳܗܢܰܢ ܕܶܝܢ ܬܠܺܝܬܳܝܳܐ ܐܶܕ̈ܢܰܝ ܠܶܒܳܐ ܢܳܩܶܒ ܗ̱ܘܳܐ ܘܰܐܪܡܺܝ ܗ̱ܘܳܐ ܩܕ̈ܳܫܶܐ ܕܰܚܼܫܰܠ ܡܶܢ ܨ̈ܶܨܶܐ ܕܶܐܬܩܒܰܥܘ̱ ܗ̱ܘܰܘ ܒܰܙܩܺܝܦܳܐ ܕܰܙܩܼܰܦ ܡܳܪܶܗ ܘܰܐܚܺܝ ܗ̱ܘܳܐ ܠܰܟܢܰܘ̈ܳܬܶܗ

7 ܒܪܳܐ ܠܡܰܘܬܳܐ ܝܳܠܕܳܐ ܢܽܘܪܳܐ ܡܰܘܬܳܐ ܪܳܥܶܐ ܟܽܠ ܦܰܓܪ̈ܺܝܢ ܒܰܪ ܡܰܘܬܳܐ ܕܰܙܟܼܳܐ ܠܡܰܘܬܳܐ ܢܰܦܫ̈ܳܬܳܐ ܕܐ̱ܢܳܫܳܐ ܪܥܼܳܐ ܗ̱ܘܳܐ ܥܶܓܠܳܐ ܓ̈ܶܠܶܐ ܐܰܪܦܺܝ ܗ̱ܘܳܐ ܕܪ̈ܶܥܝܳܢܶܐ ܪܳܥܝܳܐ ܗܘܰܘ ܠܶܗ

8 ܠܩܰܝܣܳܐ ܩܰܕܡܳܐ ܘܩܳܛܽܘܠܳܐ ܒܼܪܳܐ ܝܶܠܕܰܬ ܠܶܗ ܛܰܝܒܽܘܬܳܐ ܐܰܘ ܨܰܠܝܳܐ ܝܰܠܕܳܐ ܕܩܰܝܣܳܐ ܕܰܐܩܪܶܒ ܠܽܘܩܒܰܠ ܝܳܠܽܘܕܶܗ ܩܰܝܣܳܐ ܗܘܳܐ ܢܶܒܥܳܐ ܕܡܰܘܬܳܐ ܙܩܺܝܦܳܐ ܗܘܳܐ ܢܶܒܥܳܐ ܕܚ̈ܰܝܶܐ

9 ܒܼܪܳܐ ܕܰܗܘܳܐ ܗ̱ܘܳܐ ܠܶܗ ܠܡܰܘܬܳܐ ܟܽܠ ܦܽܘܡܺܝ̈ܢ ܦܬܺܝܚܺܝܢ ܠܳܛܽܘܗ̱ܝ ܒܠܼܰܥ ܗ̱ܘܳܐ ܦܰܓܪ̈ܶܐ ܘܢܰܦܫ̈ܳܬܳܐ ܘܰܐܣܓܺܝ ܠܰܐܒܽܘܗ̱ܝ ܟܽܘܐܳܪܳܐ ܙܩܺܝܦܳܐ ܕܶܝܢ ܐܰܥܒܰܪ ܚܶܣܕܶܗ ܕܰܐܒܽܘܗ̱ܝ ܩܰܝܣܳܐ ܩܰܕܡܳܝܳܐ

10 ܒ̈ܢܰܝܳܐ ܬܪ̈ܰܝܗܽܘܢ ܐܶܬܕܰܡܺܝܘ ܠܶܐܡ̈ܗܳܬܳܐ ܕܺܝܠܶܕ ܐܶܢܽܘܢ ܥܶܓܠܳܐ ܕܺܝܠܶܕܬܶܗ ܢܽܘܪܳܐ ܢܽܘܪܳܐ ܒܥܰܡܳܐ ܐܰܣܶܦ ܗ̱ܘܳܐ ܙܩܺܝܦܳܐ ܝܰܠܕܳܐ ܕܛܰܝܒܽܘܬܳܐ ܛܽܘ̈ܒܶܐ ܦܰܠܶܓ ܠܰܒܪܺܝܬܳܐ

11 ܐܳܘ ܠܶܫܳܢܝ̱ ܫܳܠܶܐ ܘܫܰܬܶܩ ܫܰܪ̈ܒܶܐ ܬܟܺܝ̈ܒܶܐ ܕܰܙܩܺܝܦܳܐ ܕܒܶܛܢܰܬ ܡܶܢ ܫܶܠܝ ܬܰܪܥܺܝܬܳܐ ܘܗܳܐ ܡܳܚܶܝܢ ܠܳܗ̇ ܚܒܳܠܰܝ̈ܗܽܘܢ ܒܶܛܢܰܬ ܐܶܢܽܘܢ ܒܰܐ̱ܚܪ̈ܳܝܶܐ ܘܰܕܢܶܗܘܽܘܢ ܒܽܘܟܪ̈ܶܐ ܨܳܒܶܝܢ

12 ܐܰܩܪܶܒܘ̱ ܥܽܘ̈ܠܶܐ ܒܓܰܘ ܟܰܪܣܳܐ ܪܗܰܛ ܗ̱ܘܳܐ ܕܢܶܦܽܘܩ ܩܰܫܺܝܫܳܐ ܘܰܐܪܡܺܝ ܐܺܝܕܶܗ ܥܰܠ ܥܶܩܒܶܗ ܙܥܽܘܪܳܐ ܪܳܚܶܡ ܒܽܘܟܪܽܘܬܳܐ ܕܠܳܐ ܫܰܩܠܳܗ̇ ܡܶܢ ܡܰܘܠܳܕܳܐ ܫܰܩܠܳܗ̇ ܗ̱ܘܳܐ ܡܶܢ ܒܽܘܫܳܠܳܐ

13 ܒܶܗ ܒܰܙܢܳܐ ܫܰܪ̈ܒܶܐ ܐ̱ܚܪ̈ܳܝܶܐ ܗܳܐ ܡܰܩܠܶܝܢ ܥܰܠ ܩܰܕܡ̈ܳܝܶܐ ܕܢܶܦܩܽܘܢ ܢܶܣܒܽܘܢ ܒܽܘܟܪܽܘܬܳܐ ܢܰܘܠܶܕ ܫܰܪܒܳܐ ܕܰܐܒܳܗ̈ܰܝܢ ܗܳܐ ܓܶܝܪ ܫܰܪ̈ܒܰܘܗ̱ܝ ܕܰܙܩܺܝܦܳܐ ܒܽܘܟܪ̈ܶܝܗ̇ ܐܶܢܽܘܢ ܕܰܒܪܺܝܬܳܐ

14 ܐܶܢ ܓܶܝܪ ܗܰܘ ܕܰܕܠܳܐ ܫܽܘܪܳܝ ܗܽܘܝܽܘ ܒܽܘܟܪܳܐ ܕܟܽܠ ܒܶܪ̈ܝܳܢ ܒܽܘܟܪ̈ܶܐ ܐܶܢܽܘܢ ܐܳܦ ܫܰܪ̈ܒܰܘܗ̱ܝ ܕܩܰܫܺܝܫܺܝܢ ܡܶܢ ܒܶܪ̈ܝܳܬܳܐ ܢܶܬܠܽܘܢ ܡܳܪܝ̱ ܐܰܬܪܳܐ ܫܰܪ̈ܒܰܝܟ ܕܢܶܫܬܰܥܶܐ ܥܰܠ ܫܰܡ̈ܳܫܰܝܟ

15 ܩܰܕܡܳܐ ܒܰܕܪܰܓ ܬܽܘܠܡܳܕܳܐ ܡܰܡܠܠܶܗ ܠܕܰܪܓܶܗ ܐܶܬܕܰܡܺܝ ܡܶܨܥܳܝܳܐ ܒܕܰܪܓܳܐ ܕܰܬܪ̈ܶܝܢ ܣܠܼܶܩ ܬܽܘܪܓܳܡܶܗ ܥܰܠ ܕܰܪܓܶܗ ܐ̱ܚܪܳܝܳܐ ܒܕܳܪܳܐ ܕܰܬܠܳܬܳܐ ܐܺܝܪܶܒ ܡܰܡܠܠܶܗ ܐܰܟܘܳܬܶܗ

16 ܩܰܕܡܳܝܳܐ ܒܰܦܫ̈ܺܝܛܳܬܳܐ ܝܰܗ̱ܒ ܚܰܠܒܳܐ ܠܺܝܠܽܘܕܽܘܬܶܗ ܡܶܨܥܳܝܳܐ ܒܕ̈ܰܠܺܝܠܳܬܳܐ ܝܰܗ̱ܒ ܗ̱ܘܳܐ ܛܥܽܘܡܳܐ ܠܫܰܒܪܽܘܬܶܗ ܬܠܺܝܬܳܝܳܐ ܒܰܓܡܺܝܪ̈ܳܬܳܐ ܝܰܗ̱ܒ ܐܽܘܟܠܳܐ ܠܰܓܡܺܝܪܽܘܬܶܗ

17 ܐܳܦ ܗܺܝ ܒܰܪܬܳܐ ܕܬܰܪܒܺܝܬܳܐ ܒܕܰܪ̈ܓܺܝܢ ܕܰܪ̈ܓܺܝܢ ܣܶܠܩܰܬ ܗܘܳܬ ܥܰܡ ܪ̈ܰܒܳܢܝܶܗ̇ ܘܰܐܒܳܗ̈ܶܝܗ̇ ܫܰܒܪܳܐ ܗܘܳܬ ܥܰܡ ܩܰܕܡܳܝܳܐ ܦܫܺܝܛܳܐ ܗܘܳܬ ܥܰܡ ܡܶܨܥܳܝܳܐ ܐܶܬܓܰܡܪܰܬ ܒܰܬܠܺܝܬܳܝܳܐ

18 ܩܰܕܡܳܝܳܐ ܐܰܝܟ ܠܰܫܒܰܪܬܳܐ ܡܚܰܒܶܒ ܗ̱ܘܳܐ ܘܰܡܕܰܚܶܠ ܗ̱ܘܳܐ ܡܶܨܥܳܝܳܐ ܐܰܝܟ ܠܰܛܠܺܝܬܳܐ ܟܳܐܶܐ ܗ̱ܘܳܐ ܘܰܡܚܰܕܶܐ ܗ̱ܘܳܐ ܐ̱ܚܪܳܝܳܐ ܐܰܝܟ ܕܰܠܡܰܠܳܦܬܳܐ ܗ̱ܘܳܐ ܠܳܗ̇ ܢܺܝܚܳܐ ܘܒܰܣܺܝܡܳܐ

19 ܐܳܦ ܪܳܡܳܐ ܨܶܝܕ ܒܰܪ̱ܬ ܝܰܥܩܽܘܒ ܫܕܳܠܳܐ ܘܫܰܒܛܳܐ ܠܛܰܠܝܽܘܬܳܗ̇ ܘܰܠܚܽܘܨܦܳܗ̇ ܘܰܥܠܰܝܡܽܘܬܳܗ̇ ܫܰܘܬܶܦ ܣܰܝܦܳܐ ܘܢܳܡܽܘܣܳܐ ܘܰܐܝܟ ܠܪܳܕܺܝܬܳܐ ܘܰܠܦܶܬܳܐ ܐܶܬܳܐ ܠܳܗ̇ ܢܺܝܚܳܐ ܘܒܰܣܺܝܡܳܐ

20 ܩܰܕܡܳܐ ܕܺܝܠܶܕ ܡܰܪܥܺܝܬܳܐ ܛܥܶܢ ܥܽܘܒܶܗ ܝܺܠܽܘܕܽܘܬܳܗ̇ ܡܶܨܥܳܝܳܐ ܦܨܺܝܚ ܦܰܪܨܽܘܦܳܐ ܢܰܨܰܪ ܘܰܐܦܨܰܚ ܛܰܠܝܽܘܬܳܗ̇ ܐ̱ܚܪܳܝܳܐ ܝܰܩܺܝܪ ܦܰܪܨܽܘܦܳܐ ܗܳܐ ܡܢܰܟܶܦ ܠܰܥܠܰܝܡܽܘܬܳܗ̇

21 ܟܳܗܢܳܐ ܩܰܕܡܳܝܳܐ ܕܺܝܠܶܕ ܝܰܗ̱ܒ ܚܰܠܒܳܐ ܠܺܝܠܽܘܕܽܘܬܳܗ̇ ܟܳܗܢܳܐ ܡܶܨܥܳܝܳܐ ܬܰܪܓܶܡ ܘܝܳܗܶܒ ܛܥܽܘܡܳܐ ܠܫܰܒܪܽܘܬܳܗ̇ ܟܳܗܢܳܐ ܕܰܬܠܳܬܳܐ ܬܰܪܣܺܝ ܘܝܳܗܶܒ ܐܽܘܟܠܳܐ ܠܰܚܠܺܝܡܽܘܬܳܗ̇

22 ܐܰܒܳܐ ܟܰܫܺܝܪܳܐ ܘܩܰܕܡܳܝܳܐ ܣܳܡ ܣܺܝܡ̈ܳܬܳܐ ܠܫܰܒܪܽܘܬܳܗ̇ ܡܶܨܥܳܝܳܐ ܠܰܓܡܺܝܪܽܘܬܳܗ̇ ܐܰܣܓܺܝ ܙܘ̈ܳܕܶܐ ܠܡܰܪܕܺܝܬܳܗ̇ ܬܠܺܝܬܳܝܳܐ ܙܰܝܬܳܐ ܗܕܺܝܪܳܐ ܐܰܣܓܺܝ ܡܶܫܚܳܐ ܒܡܺܐܢܶܝ̈ܗ̇

23 ܡܳܐ ܕܰܡܛܳܬ ܨܶܝܕ ܥܰܬܺܝܪܳܐ ܡܚܰܘܝܳܐ ܓܰܙܶܗ ܕܩܰܕܡܳܝܳܐ ܡܳܐܕܰܡܛܳܬ ܨܶܝܕ ܦܳܪܽܘܩܳܐ ܡܚܰܘܝܳܐ ܦܪ̈ܺܝܩܶܐ ܕܡܶܨܥܳܝܳܐ ܡܳܐ ܕܢܶܦܩܰܬ ܠܽܐܘܪܰܥ ܚܰܬܢܳܐ ܡܚܰܘܝܳܐ ܡܶܫܚܳܐ ܕܢܰܗܺܝܪ̈ܶܝܗ̇

24 ܩܕܳܡ ܗܰܘ ܦܳܪܰܥ ܠܰܠܐܰܝ̈ܳܐ ܡܩܰܪܒܳܐ ܥܰܡܠܶܗ ܕܩܰܕܡܳܝܳܐ ܩܕܳܡ ܗܰܘ ܪܳܚܶܡ ܝܳܗ̈ܽܘܒܶܐ ܡܩܰܪܒܳܐ ܙܶܕܩܶܗ ܕܡܶܨܥܳܝܳܐ ܩܕܳܡ ܗܰܘ ܕܳܐܶܢ ܝܽܘ̈ܠܦܳܢܶܐ ܡܩܰܪܒܳܐ ܕܪܺܝܫܶܗ ܕܰܐ̱ܚܪܳܝܳܐ

25 ܘܚܰܛܳܝܳܐ ܕܰܥܡܰܠ ܕܺܐܝܬܰܘܗ̱ܝ ܬܰܪܒܺܝܬܳܐ ܕܰܬܠܳܬܰܝܗܽܘܢ ܟܰܕ ܢܶܚܙܽܘܢ ܠܰܬܠܺܝܬܳܝܳܐ ܕܰܐܚܕܶܗ ܬܰܪܥܳܐ ܕܰܓܢܽܘܢܶܗ ܬܠܳܬܰܝܗܽܘܢ ܢܶܒܥܽܘܢ ܥܠܰܝ ܕܬܰܪܥܶܗ ܩܰܠܺܝܠ ܢܨܰܠܶܦ ܠܺܝ

26 ܢܶܚܒܽܘܨ ܢܶܥܽܘܠ ܚܰܛܳܝܳܐ ܟܰܕ ܚܰܕܺܝ ܘܕܳܚܶܠ ܠܰܡܚܳܪ ܢܶܩܪܽܘܢ ܬܠܳܬܳܐ ܪ̈ܰܒܳܢܰܝܢ ܠܚܰܕ ܬܰܠܡܺܝܕܳܐ ܒܛܰܝܒܽܘܬܳܐ ܢܶܠܩܰܛ ܬܚܶܬܝ̱ ܦܳܬܽܘܪ̈ܶܐ ܦܰܪ̈ܬܽܘܬܳܐ ܕܰܡܠܶܝܢ ܚܰܝ̈ܶܐ

Nisibis 14