Nisibis 16

https://syriaccorpus.org/273

section : section

line : line

16 Nisibis XVI

ܒ ܒܰܪ ܩܳܠܶܗ

1 ܒܗܳܕܶܐ ܥܕܺܝܠܳܐ ܡܰܚܙܺܝܬܳܐ ܐܶܢ ܥܰܡܽܘܛܳܐ ܫܰܦܝܽܘܬܳܗ̇ ܕܺܐܝܬ ܟܽܘܬܡ̈ܳܬܳܐ ܒܰܩܢܽܘܡܳܗ̇ ܕܗܳܘܝܳܐ ܠܳܗ̇ ܨܳܐܬܳܐ ܕܰܥܠܶܝܗ̇ ܬܰܚܦܺܝܬܳܐ ܩܕܳܡ ܚ̈ܰܙܳܝܶܐ

ܥܽܘܢܺܝܬܳܐ: ܒܪܺܝܟ ܕܡܰܪܩܳܗ̇ ܠܡܰܚܙܺܝܬܰܢ

2 ܕܠܳܐ ܫܽܘܦܪܳܐ ܡܶܨܛܰܒܰܬ ܒܳܗ̇ ܘܠܳܐ ܡܽܘܡܳܐ ܡܶܬܟܰܐܰܪ ܒܳܗ̇ ܬܽܘܟܳܐ [ܗ̱ܝ ܟܽܠܳܗ̇ ܠܫܰܦܺܝܪ̈ܶܐ ܕܠܳܐ ܡܶܬܬܰܓܪܺܝܢ ܫܽܘܦܪ̈ܰܝܗܽܘܢ ܬܰܨ̈ܒܝܳܬܳܐ ܐܰܝܟ ܝܽܘܬܪ̈ܳܢܶܐ

4 ܡܰܚܙܺܝܬܰܢ ܐܶܢ ܚܶܫܽܘܟܳܐ ܚܰܕܽܘܬܳܐ ܗ̱ܝ ܟܽܠܳܗ̇ ܕܰܣܢ̈ܰܝܳܐ ܕܠܳܐ ܡܶܬܟܰܣܣܺܝܢ ܡܽܘܡܰܝ̈ܗܽܘܢ ܐܶܢ ܕܶܝܢ ܡܪܺܝܩܳܐ ܘܢܰܗܺܝܪܳܐ ܕܚܺܐܪܽܘܬܰܢ ܗܳܝ ܕܬܶܨܰܛܒܰܬ݀

5 ܥܰܦ ܠܶܗ ܬܽܘܟܳܐ ܒܚܽܘܣܪܳܢܳܐ ܠܰܣ̈ܢܰܝܳܐ ܘܰܠܫܰܦܺܝܪ̈ܶܐ ܕܠܳܐ ܫܰܦܺܝܪ̈ܶܐ ܐܶܬܟ̇ܰܠܠܰܘ ܘܳܐܦ ܠܳܐ ܣ̈ܢܰܝܳܐ ܐܶܨܛܰܒܰܬܘ̱ ܬܽܘܟܳܐ ܦܶܠܓܰܬ ܡܰܚܙܺܝܬܳܐ

6 ܠܳܐ ܡܬܽܘܡ ܕܰܒܪ̱ܰܬ ܡܰܚܙܺܝܬܳܐ ܒܰܩܛܺܝܪܳܐ ܠܰܕܚܳܐܰܪ ܒܳܗ̇ ܐܳܦ ܠܳܐ ܛܰܝܒܽܘܬܳܐ ܕܶܐܬܳܬ݀ ܥܰܠ ܟܺܐܢܽܘܬܶܗ ܕܢܳܡܽܘܣܳܐ ܩܳܢܼܝܳܐ ܩܛܺܝܪܶܗ ܕܢܳܡܽܘܣܳܐ

7 ܗܼܘܳܬ ܟܺܐܢܽܘܬܳܐ ܠܛܰܠܝܽܘܬܳܐ ܡܨܰܒܬܳܢܺܝܬܳܐ ܕܰܩܛܺܝܪܳܐ ܕܛܰܠܝܳܐ ܗܘܳܬ ܓܶܝܪ ܐ̱ܢܳܫܽܘܬܳܐ ܨܰܒܶܬܬܳܗ̇ ܗܘܳܬ ܒܰܩܛܺܝܪܳܐ ܟܰܕ ܠܳܐ ܓܶܠܙܰܬ ܚܺܐܪܽܘܬܳܗ̇

8 ܫܕܳܠܳܐ ܘܫܰܒܛܳܐ ܐܶܚܕܰܬ ܗܘܳܬ ܟܺܐܢܽܘܬܳܐ ܨܶܝܕ ܛܰܠܝܽܘܬܳܐ ܡܳܐ ܕܰܡܚܳܬܳܗ̇ ܫܰܓܶܫܬܳܗ̇ ܫܰܒܛܳܗ̇ ܚܽܘܨܦܳܐ ܙܰܓܰܪ ܗ̱ܘܳܐ ܫܕܳܠܳܗ̇ ܪܰܓܺܝ ܪ̈ܶܥܝܳܢܶܐ]

9 ------ ܕܢܶܨܛܰܒܰܬ ܝܰܘܡܳܢ ܐܰܚ̈ܰܝ ܠܣܰܒܪܽܘܬܳܐ ܐ̱ܚܰܪܬܳܐ ܫܰܒܪܰܐ ܗ̱ܘ ܒܙܰܒܢܳܐ ܕܪܰܒܽܘܬ ܪܶܥܝܳܢܳܐ ܗܳܘܶܐ ܠܶܗ ܗܽܘ ܕܠܳܐ ܪܶܥܝܳܢܳܐ

10 ܒܕܰܪܓܳܐ ܓܶܝܪ ܕܰܓܡܺܝܪܽܘܬܳܐ ܢܚܼܶܬ ܠܶܗ ܗ̱ܽܘ ܠܺܝܠܽܘܕܽܘܬܳܐ ܠܗܰܘ ܢܳܡܽܘܣ ܥܰܒ̈ܕܶܐ ܪܳܚܶܡ ܕܰܐܝܟܳܐ ܕܡܰܡܪܰܚ ܡܳܚܶܐ ܠܶܗ ܘܰܐܝܟܳܐ ܕܡܰܦܨ̇ܰܚ ܩܳܦܰܚ ܠܶܗ

11 ܟܽܠܶܗ ܨܶܒܬܶܗ ܕܰܩܛܺܝܪܳܐ ܠܳܐ ܗ̱ܘܳܐ ܫܰܪܺܝܪܳܐ ܕܰܫܐܺܝܠܰܐ ܗ̱ܘ ܗܳܕܶܐ ܪܰܒܳܐ ܠܰܐܠܳܗܳܐ ܕܡܶܢ ܢܰܦܫܶܗ ܐ̱ܢܳܫ ܢܶܨܛܰܒܰܬ݀ ܒܰܕܓܽܘܢ ܫܰܩܠܶܗ ܠܰܩܛܺܝܪܳܐ

12 ܕܰܐܝܟܰܢܳܐ ܕܦܳܪܽܘܫܳܐܺܝܬ ܒܙܰܒܢܶܗ ܝܰܗܒܶܗ ܠܰܩܛܺܝܪܳܐ ܗܳܟܰܢܳܐ ܦܳܪܽܘܫܳܐܺܝܬ ܫܰܩܠܶܗ ܒܙܰܒܢܳܐ ܕܰܚܠܳܦܰܘܗ̱ܝ ܡܰܟܺܝܟܽܘܬܳܐ ܡܶܬܒܰܥܝܳܐ

13 ܕܰܟܡܳܐ ܕܝܳܐܶܐ ܠܛܰܠܝܽܘܬܳܐ ܕܰܗܘܳܬ ܪܶܗܛܳܐ ܬܚܶܝܬ ܫܰܒܛܳܐ ܣܢܳܐ ܣܰܓܺܝ ܕܰܬܚܶܝܬ ܫܰܒܛܳܐ ܬܶܫܬܰܥܒܰܕ ܚܰܟܺܝܡܽܘܬܳܐ ܕܰܩܛܺܝܪܳܐ ܡܳܪܳܐ ܢܗܶܐ ܠܳܗ̇

14 ܚܽܘܪ ܗܳܟܺܝܠ ܐܰܝܟ ܛܰܟܶܣ ܐܳܦ ܐܰܠܳܗܳܐ ܝܽܘܒ̈ܳܠܰܝ ܒܪ̈ܳܥܰܘܳܬܳܐ ܕܰܗܘܰܘ ܠܺܝ ܘܰܒܡ̈ܰܠܦܳܢܶܐ ܕܝܰܗ̱ܒ ܠܺܝ ܘܒܰܐܒ̈ܳܗܶܐ ܕܡܰܢܺܝ ܠܺܝ

15 ܕܰܬܩܺܝܠܺܝܢ ܥܰܡ ܙܰܒ̈ܢܰܝܗܽܘܢ ܥܽܘܕܪ̈ܳܢܶܐ ܕܶܐܣܟܺܡ̈ܰܝܗܽܘܢ ܕܒܰܐܝܢܳܐ ܕܙܳܕܶܩ ܕܽܘܚܳܠܳܐ ܘܒܰܐܝܢܳܐ ܕܚܳܫܰܚ ܠܽܘܒܳܒܳܐ ܘܒܰܐܝܢܳܐ ܕܘܳܠܶܐ ܡܽܘܟܳܟܳܐ

16 ܒܡܰܬܩܳܠܳܐ ܗܰܠܶܟ ܡܽܘܫ̈ܚܳܬܝ̱ ܠܛܰܠܝܽܘܬܝ̱ ܐܰܣܪܰܚ ܣܽܘܪܳܕܳܐ ܐܳܦ ܠܰܥܠܰܝܡܽܘܬܝ̱ ܕܽܘܚܳܠܳܐ ܠܚܰܟܺܝܡܽܘܬܝ̱ ܘܰܠܦܳܪܽܘܫܽܘܬܝ̱ ܐܰܣܪܰܚ ܝܰܗ̱ܒ ܠܳܗ̇ ܡܽܘܟܳܟܳܐ

17 ܒܚܽܘܨܦܳܐ ܘܕܰܪܓܳܐ ܕܛܰܠܝܽܘܬܳܐ ܡܪܰܒܝܳܢܳܐ ܕܚܺܝܠܳܐ ܗ̱ܘܳܐ ܠܺܝ ܫܰܒܛܶܗ ܙܰܓܪܰܢܝ̱ ܡܶܢ ܫܶܒܝܳܐ ܘܡܶܢ ܣܽܘܪܚܳܢܳܐ ܣܽܘܪܳܕܶܗ ܘܡܶܢ ܦܽܘܢܳܩܳܐ ܕܽܘܚܳܠܶܗ

19 ܟܰܕ ܐܶܬܥܰܠܺܝܬ ܡܶܢ ܕܰܪ̈ܓܶܐ ܕܛܰܠܝܽܘܬܳܐ ܘܰܥܠܺܝܡܽܘܬܳܐ ܥܒܼܰܪ ܣܽܘܪܳܕܳܐ ܩܰܕܡܳܝܳܐ ܥܒܼܰܪ ܕܽܘܚܳܠܳܐ ܬܶܢܝܳܢܳܐ ܝܰܗ̱ܒ ܠܺܝ ܪܳܥܝܳܐ ܒܰܣܺܝܡܳܐ

20 ܗܳܐ ܠܰܓܡܺܝܪܽܘܬܝ̱ ܡܶܐܟܽܘܠܬܶܗ ܘܰܠܚܰܟܺܝܡܽܘܬܝ̱ ܬܽܘܪ̈ܓܳܡܰܘܗ̱ܝ ܘܰܠܫܰܠܝܽܘܬܝ̱ ܡܰܟܺܝܟܽܘܬܶܗ ܘܰܠܢܺܝܚܽܘܬܝ̱ ܒܰܣܺܝܡܽܘܬܶܗ ܘܰܠܢܰܟܦܽܘܬܝ̱ ܝܰܩܺܝܪܽܘܬܶܗ

21 ܒܪܺܝܟ ܗ̱ܽܘ ܕܰܐܝܟ ܕܒܰܡܣܰܐܬܳܐ ܬܰܩܶܠ ܘܝܰܗ̱ܒ ܠܺܝ ܐܰܒ̈ܳܗܶܐ ܕܠܽܘܩܒܰܠ ܙܰܒ̈ܢܰܝ ܥܽܘܕܪ̈ܳܢܰܝ ܘܠܽܘܩܒܰܠ ܟܺܐܒ̈ܰܝ ܣܰܡ̈ܳܡܢܰܝ [ܘܠܽܘܩܒܰܠ ܫܽܘܦܪ̈ܰܝ ܬܰܨ̈ܒܺܝܬܰܝ

22 ܚܢܰܢ ܗܽܘ ܗܳܟܺܝܠ ܕܰܘܶܕܢܳܝܗ̱ܝ ܠܝܽܘܒܳܠܳܐ ܘܛܶܟܼܣܳܐ ܦܰܐܝܳܐ ܕܰܒܙܰܒܢܳܐ ܕܰܪܡܺܝܣܽܘܬܳܐ ܗܳܐ ܒܳܥܶܝܢܰܢ ܩܰܫܝܽܘܬܳܐ ܕܬܶܟܼܐܶܐ ܒܰܢ ܐܰܝܟ ܒܰܛܠܳܝ̈ܶܐ]

How to Cite this Electronic Edition

Note:

Ephrem the Syrian, “Nisibis 16” , Digital Syriac Corpus, last modified June 12, 2019, https://syriaccorpus.org/273.

TEST2

Bibliography:

“Nisibis 16.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/273.

Show Citation Styles

SEDRA IV

Syriac Lexeme

About This Digital Text

Corpus Text ID:

https://syriaccorpus.org/273

NHSL Work ID(s):

http://syriaca.org/work/8752
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1961).

Link to Syriaca.org Bibliographic Record

Type of Text: Digital Edition

Status: Edited

Publication Date: June 12, 2019

Preparation of Electronic Edition:

TEI XML encoding by James E. Walters.
Syriac text transcribed by Michael Oez.

Open Access and Copyright:

See details...