Nisibis 21

https://syriaccorpus.org/278

TEI/XML Text

Show

section : section

line : line

Table of Contents

1 2 3 4 5 6 7 8 9 10 11 12 13 14 15 16 17 18 19 20 21 22 23

21 Nisibis XXI

ܡܶܢܶܗ ܒܰܪ ܩܳܠܶܗ

1 ܝܽܘܚܰܢܳܢ ܕܰܫܪܳܓܳܐ ܗ̱ܘܳܐ ܦܰܪܣܺܝ ܘܰܐܟܶܣ ܙ̈ܰܠܺܝܠܶܐ ܣܰܪܗܶܒܘ̱ ܕܰܥܟܽܘܗ̱ܝ ܠܰܫܪܳܓܳܐ ܕܢܶܫܕܽܘܢ ܨܳܒܶܝܢ ܪܶܓܬܗܽܘܢ ܗܘܺܝ ܠܰܡܦܺܐܕܳܐ ܒܙܰܗܝܽܘܬܳܐ ܘܫ̇ܰܠܳܐ ܥ̇ܰܒ̈ܕܰܝ ܚܶܫܽܘܟܳܐ ܕܰܟܡܳܐ ܕܰܢܗܰܪ ܝܽܘܠܦܳܢܳܟ ܠܳܐ ܐ̱ܢܳܫ ܡܰܡܪܰܚ ܕܰܒܕܶܢܚܶܗ ܢܫܰܡܶܫ ܪܶܓܰܬ ܚܶܫܽܘܟܳܐ ܒܪܺܝܟ ܗ̱ܽܘ ܕܥܰܒܼܕܳܟ ܠܰܡܦܺܐܕܰܢ

2 ܛܽܘܒܳܐ ܪܰܒܳܐ ܟܣܼܶܐ ܗ̱ܘܳܐ ܒܳܗ̇ ܒܡܰܟܣܳܢܽܘܬܶܗ ܕܶܐܠܺܝܳܐ ܫܰܡܫܶܗ ܐܶܠܺܝܫܰܥ ܘܰܬܒܼܰܥ ܚܰܕ ܬܪܶܝܢ ܐܰܓܪܳܐ ܕܬܶܫܡܶܫܬܶܗ ܫܽܘܦܪܳܐ ܚܰܕ ܬܪܶܝܢ ܝܶܗܒܰܬ ܠܶܗ ܕܒܰܐܥܦܳܐ ܠܳܒܶܫ ܢܶܨ̈ܚܳܢܶܝܗ̇ ܕܰܐܚܶܒܬܶܗ ܠܡܶܣܟܺܢܽܘܬܶܗ ܕܽܘܠܓܰܫ ܪܰܒܳܟ ܥܰܬܺܝܪܳܐ ܬܺܐܪܰܬ ܓܰܙܳܐ ܕܚ̈ܶܟܡܳܬܶܗ ܒܪܺܝܟ ܗ̱ܽܘ ܕܰܡܥܰܬܰܪ ܝܽܘܠܦܳܢܳܟ

3 ܬܶܚܽܘܒ ܝܰܥܢܽܘܬܳܐ ܡܶܢ ܨܰܘܡܳܟ ܐܰܝܟ ܕܰܒܨܰܘܡܶܗ ܕܕܳܢܺܝܐܶܝܠ ܬܶܒܗܼܰܬ ܪܶܓܬܳܐ ܨܶܝܕ ܦܰܓܪܳܟ ܐܰܝܟ ܡܳܐ ܕܰܒܶܗܬܰܬ ܨܶܝܕ ܝܰܘܣܶܦ ܬܶܚܽܘܒ ܡܶܢܳܟ ܪܶܓܰܬ ܟܶܣܦܳܐ ܐܰܝܟ ܡܳܐ ܕܚܳܒܰܬ ܨܶܝܕ ܫܶܡܥܽܘܢ ܬܶܐܣܽܘܪ ܒܰܐܪܥܳܐ ܐܰܟܘܳܬܶܗ ܘܬܶܫܼܪܶܐ ܒܪܰܘܡܳܐ ܒܰܕܡܼܽܘܬܶܗ ܕܗܰܝܡܳܢܽܘܬܳܟ ܐܰܝܟ ܕܺܝܠܶܗ ܒܪܺܝܟ ܕܰܐܫܼܠܶܡ ܠܳܟ ܬܶܫܡܶܫܬܶܗ

4 ܢܰܟܦܽܘܬܳܟ ܐܰܝܟ ܕܶܐܠܺܝܫܰܥ ܘܰܒܬܽܘܠܽܘܬܳܟ ܕܶܐܺܠܝܳܐ ܩܳܝܡܼܳܐ ܠܥܰܝ̈ܢܰܝܟ ܐܰܝܟ ܕܺܐܝܽܘܒ ܡܪܰܚܡܳܢܽܘܬܳܟ ܐܰܝܟ ܕܰܘܺܝܕ ܘܰܕܠܳܐ ܚܣܰܡ ܐܰܝܟ ܢܰܘܢܳܬܰܢ ܥܰܙܽܝܙܽܘܬܳܟ ܕܶܐܪܰܡܝܳܐ ܒܰܣܺܝܡܽܘܬܳܟ ܕܰܫܠܺܝ̈ܚܶܐ ܠܳܟ ܥܰܬܺܝܩܳܐ ܕܰܢܒ̈ܺܝܶܐ ܠܳܟ ܚ̈ܰܕܬܳܬܳܐ ܕܰܫܠܺܝ̈ܚܶܐ ܒܪܺܝܟ ܕܰܡܠܰܟ ܡܶܢ ܓܰܙܰܝ̈ܗܽܘܢ

5 ܬܶܗܘܶܐ ܟܠܺܝܠܳܐ ܠܟܽܘܡܪܽܘܬܳܐ ܘܒܳܟ ܬܶܙܕܰܗܶܐ ܬܶܫܡܶܫܬܳܐ ܬܶܗܘܶܐ ܐܰܚܳܐ ܠܩܰܫ̈ܺܝܫܶܐ ܐܳܦ ܦܳܩܽܘܕܳܐ ܠܫ̈ܰܡܳܫܶܐ ܬܶܗܘܶܐ ܪܰܒܳܐ ܠܫܰܒܪܽܘܬܳܐ ܚܽܘܛܪܳܐ ܘܺܐܝܕܳܐ ܠܣܰܝܒܽܘܬܳܐ ܬܶܗܘܶܐ ܫܽܘܪܳܐ ܠܢ̈ܰܟܦܳܬܳܐ ܩܳܝܡܼܳܐ ܒܩܰܘܡܳܟ ܢܶܬܢܰܨܰܚ ܘܥܺܕ̱ܬܳܐ ܒܫܽܘܦܪܳܟ ܬܶܨܛܰܒܰܬ ܒܪܺܝܟ ܗ̱ܽܘ ܕܰܓܒܳܟ ܕܰܬܟܰܗܶܢ

6 ܒܡܶܣܟܺܢܽܘܬܳܟ ܢܶܬܒܰܛܰܠ ܥܺܝܕܳܐ ܣܰܢܝܳܐ ܕܒܶܝܬ ܓܰܚܙܰܝ ܒܩܺܝܫܽܘܬܳܟ ܢܶܬܛܰܠܰܩ ܥܺܝܕܳܐ ܛܰܡܐܳܐ ܕܒܶܝܬ ܥܰܠܺܝ ܒܰܐܘܝܽܘܬܳܟ ܬܽܘܒ ܢܶܬܦܰܟܰܗ ܫܠܳܡܳܐ ܢܟܺܝܠܼܳܐ ܕܣ̈ܶܦܘܳܬܰܢ ܕܶܐܣܟܰܪܝܽܘܛܳܐ ܢܳܟܽܘܠܳܐ ܣܰܘܟܶܝܗ̇ ܠܟܽܠܳܗ̇ ܡܰܚܫܰܒܬܰܢ ܘܨܽܘܪܶܝܗ̇ ܡܶܕܪܺܝܫ ܚܰܕܬܳܐܺܝܬ ܒܪܺܝܟ ܕܰܒܟܽܘܪܳܟ ܨܳܪܶܦ ܠܰܢ

7 ܒܩܰܘܡܳܟ ܢܶܒܗܰܬ ܡܳܡܽܘܢܳܐ ܕܰܗܘܳܐ ܡܳܪܳܐ ܠܚܺܐܪܽܘܬܰܢ ܢܶܬܒܰܛܰܠ ܡܶܢܰܢ ܟܺܐܒܳܐ ܕܰܐܥܺܝܕ ܥܰܡܰܢ ܘܰܒܣܶܡ ܠܰܢ ܒܰܛܶܠ ܥ̈ܰܠܠܳܬܳܐ ܕܶܐܚܰܕ ܥܝ̈ܳܕܶܐ ܕܰܡܠܼܶܝܢ ܚܽܘܣܪ̈ܳܢܶܐ ܩܶܢܬܰܢ ܒܺܝܫܼܬܳܐ ܒܰܥܝܳܕܳܐ ܬܼܰܩܢܰܢ ܛܳܒܬܳܐ ܒܰܥܝܳܕܳܐ ܗܘܺܝ ܡܳܪܝ̱ ܥܠܼܰܬ ܥܽܘܕܪܳܢܰܢ ܒܪܺܝܟ ܕܰܓܒܳܟ ܡܶܛܽܠ ܚܰܝܰܝܢ

8 ܥܝܳܕ̈ܶܐ ܒܺܝ̈ܫܶܐ ܢܶܬܦܰܣܩܽܘܢ ܥܺܕ̱ܬܳܐ ܢܶܟܣ̈ܶܐ ܠܳܐ ܬܶܩܼܢܶܐ ܘܰܕܬܶܣܦܰܩ ܬܶܩܢܶܐ ܪ̈ܽܘܚܳܬܳܐ ܘܶܐܢ ܗܽܘ ܕܬܶܣܼܦܰܩ ܕܽܘܡܳܪܰܐ ܗ̱ܘ ܘܥܰܙܺܝܕ̈ܶܐ ܠܳܐ ܢܶܬܩ̇ܰܒܪܽܘܢ ܒܰܦܣܳܩ ܣܰܒܪܳܐ ܚܰܢܦܳܐܺܝܬ ܒܢܰܚ̈ܬܶܐ ܘܶܐܠܝܳܐ ܘܡܰܪܩܽܘܕܬܳܐ ܕܚܰܝܳܐ ܠܳܒܶܫ ܟܽܘܬܺܝܢܳܐ ܘܥܰܢܺܝܕܳܐ ܟܽܠܶܗ ܥܰܝܒܳܐ ܒܪܺܝܟ ܕܰܠܥܰܦܪܰܢ ܡܰܗܼܦܶܟ ܠܰܢ

9 ܪܶܓܬܳܐ ܥܼܶܠܰܬ ܒܺܝܼܫܬܳܐ ܐܳܦ ܝܰܥܢܽܘܬܳܐ ܕܒܶܝܬ ܥܰܠܝ ܘܓܰܢܳܒܽܘܬܳܐ ܕܒܶܝܬ ܓܰܚܙܝ ܡܨܰܥܪܳܢܽܘܬܳܐ ܕܒܶܝܬ ܢܳܒܳܠ ܡܥܺܝ̈ܢܶܐ ܣܰܢܝ̈ܳܬܳܐ ܛܰܡܶܡ ܕܠܳܐ ܢܶܗܘܶܐ ܢܶܒܥܳܐ ܪܰܒܳܐ ܘܢܶܗܘܶܐ ܡܶܢܶܗ ܦܽܘܠܦܳܠܳܐ ܕܳܐܦ ܠܳܟ ܢܶܡܼܛܶܐ ܡܶܢ ܪܶܙܦܶܗ ܡܳܪܰܢ ܢܶܣܟܽܘܪ ܢܶܒ̈ܥܰܝܗܶܝܢ ܒܪܺܝܟ ܕܰܐܘܒܶܫ ܡܰܒܽܘ̈ܥܰܝܗܶܝܢ

10 ܠܣܳܒܳܐ ܡܶܠܬܳܐ ܐܰܓܥܶܠ ܠܶܗ ܠܛܰܠܝܳܐ ܫܶܬܩܳܐ ܐܰܫܠܶܡ ܠܶܗ ܕܢܽܘܟܪܳܝܳܐ ܕܥܳܐܶܠ ܨܶܐܕܰܝܟ ܡܶܢ ܛܽܘܟܳܣܳܟ ܝܺܠܶܦ ܠܳܟ ܕܡܰܢܽܘ ܡܡܰܠܶܠ ܩܰܕܡܳܝܳܐ ܘܡܼܰܢܽܘ ܕܰܬܪܶܝܢ ܘܰܬܠܳܬܳܐ ܘܶܐܢ ܟܽܠܢܳܫ ܢܳܛܰܪ ܦܽܘܡܶܗ ܘܶܐܢ ܟܽܠܢܳܫ ܝܳܕܰܥ ܕܰܪܓܶܗ ܛܽܘܒܳܢܳܐ ܗܘܰܘ ܩܳܪܶܝܢ ܠܳܟ ܢܶܓܡܽܘܪ ܡܳܪܰܢ ܨܶܒܝܳܢܳܟ

11 ܩܳܠ ܫܪܳܪܳܟ ܚܰܕ ܢܶܗܘܶܐ ܘܩ̈ܳܠܶܐ ܫܐܺܝ̈ܠܶܐ ܕܠܳܐ ܡܶܢܝܳܢ ܨܰܠܡܳܐ ܕܩܽܘܫܬܳܐ ܥܰܠ ܠܶܒܳܟ ܘܥܰܠ ܦܰܪܨܽܘܦܳܟ ܟܽܠ ܕܶܡ̈ܘܳܢ ܟܡܺܝܪܳܐ ܚܘܺܝܚܳܐ ܘܢܰܫܺܝܫܳܐ ܠܕܰܐܣܟܶܠ ܚܰܘܳܐ ܕܰܪܓܺܝܙ ܐܰܢ̱ܬ ܠܕܰܢܟܶܦܼ ܚܰܘܳܐ ܕܰܦܨܺܝܚ ܐܰܢ̱ܬ ܚܰܕ ܗܘܺܝ ܠܰܐܠܳܗܽܘܬܳܐ ܘܰܠܐ̱ܢܳܫܽܘܬܳܐ ܣܰܓܺܝ̈ܐܶܐ ܒܪܺܝܟ ܗ̱ܽܘ ܕܥܰܡ ܟܽܠ ܟܽܠ ܗܘܳܐ

12 ܐܶܢ ܬܶܫܡܼܰܥ ܛܶܒܼܳܐ ܒܼܺܝܫܳܐ ܡܶܢ ܫܰܪ̈ܺܝܪܶܐ ܕܠܶܐ ܡܰܛܥܶܝܢ ܐܰܫܦܰܥ ܕܶܡ̈ܥܶܐ ܕܰܥܶܟܶܝܗ̇ ܠܢܽܘܪܳܐ ܕܣܳܦܼܰܬ ܒܰܐ̱ܚܪ̈ܳܢܶܐ ܢܶܒܥܽܘܢ ܥܰܡܳܟ ܦܳܪ̈ܽܘܫܶܐ ܘܰܓܙܽܘܪ ܨܰܘܡܳܐ ܠܝܳܕܽܘ̈ܥܶܐ ܘܰܒܚܰܫܳܐ ܬܶܗܘܶܐ ܕܰܝܪܳܟ ܥܰܠ ܗܰܘ ܕܶܐܒܼܰܕ ܒܰܚܼܛܺܝܬܳܐ ܕܢܶܬܦܢܶܐ ܒܰܬܝܳܒܽܘܬܳܐ ܒܪܺܝܟ ܕܶܐܫܟܼܰܚ ܥܶܪܒܳܐ ܕܶܐܒܼܰܕ

13 ܠܟܽܠܢܳܫ ܐܶܕܢܳܟ ܠܳܐ ܬܶܬܶܠ ܕܠܳܐ ܢܛܺܝܦܽܘܢܳܟ ܕܰܓ̈ܳܠܶܐ ܠܟܽܠܢܳܫ ܪܶܓܠܳܟ ܠܳܐ ܬܶܫܰܐܠ ܕܠܳܐ ܢܰܦܗܽܘܢܳܟ ܙܰܠܺܝ̈ܠܶܐ ܠܟܽܠܢܳܫ ܢܰܦܫܳܟ ܠܳܐ ܬܶܬܶܠ ܕܠܳܐ ܢܕܽܘܫܽܘܢܳܟ ܡܰܪ̈ܳܚܶܐ ܛܰܪ ܐܺܝܕܳܟ ܡܶܢ ܙܺܐܦܳܢܳܐ ܕܠܳܐ ܢܶܠܩܽܘܛ ܟܽܘܒ̈ܶܐ ܒܺܐܝܕܳܟ ܗܘܺܝ ܪܰܚܺܝܩܳܐ ܘܩܰܪܺܝܒܳܐ ܒܪܺܝܟ ܗ̱ܽܘ ܕܩܰܪܺܝܒ ܟܰܕ ܪܰܚܺܝܩ

14 ܗܳܐ ܛܶܒܼܶܗ ܕܡܰܠܟܳܐ ܚܰܕܬܳܐ ܪܳܥܶܡ ܘܳܐܬܶܐ ܒܰܒܪܺܝܬܳܐ ܠܰܒ̈ܙܺܝܙܶܐ ܗܘܼܳܐ ܠܽܘܒܳܒܳܐ ܘܰܠܒ̈ܳܙܽܘܙܶܐ ܣܽܘܪܳܕܳܐ ܓܽܘܥܳܡܳܐ ܕܝ̈ܰܥܢܶܐ ܡ̇ܰܛܺܝ ܕܰܢܬܺܝܒܽܘܢ ܟܽܠ ܡܳܐ ܕܰܒܠܼܰܥܘ̱ ܢܶܬܪܰܗܒܽܘܢ ܐܳܦ ܡܶܢ ܨܶܐܕܰܝܟ ܕܒܶܝܬ ܟܳܗܢܳܐ ܠܡܰܠܟܳܐ ܟܺܐܢܳܐ ܥܗܺܝܕܳܐ ܩ̈ܰܕܡܶܐ ܢܶܬܚܰܢܩܽܘܢ ܒܪܺܝܟ ܕܰܪܓܼܶܙ ܘܰܦܢܳܐ ܪܰܚܶܡ

15 ܐܺܝܬ ܕܶܐܫܼܟܰܚ ܐܰܬܪܳܐ ܘܰܐܫܺܝܚ ܘܺܐܝܬ ܕܰܥܼܨܳܐ ܘܰܐܠܶܨ ܝܰܨܪܶܗ ܚܰܕ ܪܳܢܶܐ ܕܰܢܛܺܝܼܪ ܕܺܝܢܼܳܐ ܘܰܐ̱ܚܪܺܢܳܐ ܕܳܐܦ ܠܳܐ ܗܳܘܶܐ ܐܺܝܬ ܕܰܓܼܢܰܒ ܘܰܐܦܺܝܓ ܨܶܗܝܶܗ ܘܺܐܝܬ ܕܰܓܢܼܰܒ ܘܰܨܗܶܐ ܠܡܶܓܢܰܒ ܓܢܰܒܘ̱ ܥܰܬܺܝܪ̈ܶܐ ܘܡܶܣܟܺܢ̈ܶܐ ܓܢܼܰܒܘ̱ ܕܶܝܢ ܟ̈ܰܦܢܶܐ ܒܰܡܫܽܘܚܬܳܐ ܘܰܓܢܰܒܘ̱ ܣܰܒ̈ܥܶܐ ܕܠܳܐ ܡܽܘܫܳܚܳܐ ܒܪܺܝܟ ܕܰܒܚܰܪ ܟܽܠ ܨܶܒܝܳܢܺܝ̈ܢ

16 ܗܳܫܳܐ ܕܶܝܢ ܝܰܗ̱ܒ ܐܰܬܪܳܐ ܘܚܰܘܺܝ ܟܽܠܢܳܫ ܨܒܶܝܳܢܶܗ ܕܰܐܝܟܰܢܳܐ ܘܰܠܡܼܰܢ ܕܳܡܶܐ ܘܡܳܢܳܐ ܓܒܼܳܐ ܠܶܗ ܡܶܢ ܡܳܢܳܐ ܫܩܼܰܠ ܢܶܣܝܳܢܳܐ ܡܶܢ ܟܽܠܢܳܫ ܕܰܡ ܢܶܟܦܽܘܪ ܕܳܐܦ ܠܳܐ ܣܢܳܐ ܗ̱ܘܳܐ ܝܰܗ̱ܒ ܠܰܢ ܐܰܬܪܳܐ ܕܢܶܬܒܰܝܰܢ ܕܛܳܒ ܡܶܢ ܗܳܢܳܐ ܫܽܘܠܛܳܢܳܐ ܩܽܘܦܳܚܳܐ ܡܥܰܕܰܪ ܣܰܓܺܝ ܒܪܺܝܟ ܕܰܠܥܽܘܕܪܳܢ ܟܳܐܶܐ ܒܰܢ

17 ܠܳܐ ܓܶܝܪ ܨܳܒܶܐ ܕܒܰܩܛܺܝܪܳܐ ܢܺܝܪܶܗ ܢܰܪܡܶܐ ܥܰܠ ܨܰܘܪܰܢ ܝܰܗ̱ܒ ܠܰܢ ܐܰܬܪܳܐ ܘܶܐܫܬܰܥܠܶܝܢ ܕܳܡܐ ܕܰܡܪܰܕܢܰܢ ܘܶܐܣܬܰܓܰܦܢ ܢܪܰܚܶܡ ܢܺܝܪܶܗ ܩܰܠܺܝܠܳܐ ܢܶܓܼܒܶܐ ܫܰܒܛܶܗ ܒܰܣܺܝܡܳܐ ܢܝ̇ܳܚܰܢ ܣܰܓܺܝ ܡܠܳܐܳܐ ܠܰܢ ܕܒܰܩܛܺܝܪܶܗ ܗܳܝ ܢܺܝܚܽܘܬܳܐ ܘܰܒܢܺܝܪܶܗ ܩܰܠܺܝܠܽܘܬܳܐ ܒܪܺܝܟ ܗ̱ܽܘ ܕܥܰܡܠܶܗ ܒܽܘܣܳܡܰܐ ܗ̱ܘ

18 ܥܳܠܡܳܐ ܟܽܠܶܗ ܐܰܝܟ ܓܽܘܫܡܳܐ ܒܟܽܘܪܗܳܢܳܐ ܪܰܒܳܐ ܢܦܼܰܠ ܗ̱ܘܳܐ ܕܒܶܐܫܳܬܳܗ̇ ܕܚܰܢܦܽܘܬܳܐ ܐܶܫܬܰܚܰܢ ܘܰܡܼܪܰܥ ܘܰܢܦܼܰܠ ܝܰܡܺܝܢܳܐ ܕܪ̈ܰܚܼܡܶܐ ܓܶܫܬܶܗ ܘܥܶܣܼܶܬ ܢܰܦܫܶܗ ܒܰܚܢܼܳܢܳܐ ܦܶܣܩܼܰܬ ܒܰܥܓܰܠ ܚܰܢܦܽܘܬܳܐ ܕܗܼܺܝ ܗܺܝ ܥܶܠܼܰܬ ܟܽܘܪܗܳܢܶܗ ܘܶܐܬܢܰܦܰܨ ܘܰܕܥܼܶܬ ܘܰܦܢܼܳܐ ܫܽܘܒܚܳܐ ܠܺܐܝܼܕܳܐ ܕܰܣܥܰܪܬܶܗ

19 ܬܶܫܬܰܝܰܢ ܐܰܪܥܳܐ ܒܝܰܘ̈ܡܰܝܟ ܕܰܚܙܳܬܳܟ ܕܰܡܠܼܶܐ ܫܰܝܢܐ ܐܰܢ̱ܬ ܒܳܟ ܢܶܬܒ̈ܰܢܝܳܢ ܥܺܕ̈ܳܬܳܐ ܘܢ̈ܶܬܥܰܛܦܳܢ ܬܰܨܒܺܝ̈ܳܬܰܝܗܶܝܢ ܘܢܶܬܦܰܬܚܽܘܢ ܒܗܶܝܢ ܣܳܦܼܪ̈ܰܝܗܶܝܢ ܘܢܶܣܬܰܕܪܽܘܢ ܦܳܬܽܘܪ̈ܰܝܗܶܝܢ ܘܢܶܙܕܰܗܽܘܢ ܫܰܡܳܫܰܝ̈ܗܶܝܢ ܬܰܣܼܰܩ ܠܡܶܢܗܶܝܢ ܬܰܘܕܺܝܬܳܐ ܪܺܝܫܺܝܬܳܐ ܠܡܳܪܶܐ ܫܰܝܢܳܐ ܒܪܺܝܟ ܕܰܡܢܰܚܶܡ ܥܶܗܰܕܬܰܢ

20 ܨܠܽܘܬܳܟ ܬܶܣܼܰܩ ܠܰܫܡܰܝܳܐ ܬܶܣܰܩ ܥܰܡܳܗ̇ ܬܰܪܥܽܘܬܳܐ ܢܰܡܛܰܪ ܡܳܪܳܗ̇ ܕܰܫܡܰܝܳܐ ܛܳܒ̈ܳܬܶܗ ܥܰܠ ܒܺܝܼܫܽܘܬܰܢ ܘܒܽܘ̈ܝܳܐܰܘܗ̱ܝ ܥܰܠ ܥܳܩ̈ܳܬܰܢ ܘܟܽܘܢܳܫܶܗ ܥܰܠ ܒܽܘܕܳܪܰܢ ܢܥܺܝܪ ܛܢܳܢܼܶܗ ܥܰܡ ܚܽܘܒܶܗ ܚܶܣܕܰܢ ܬܶܬܒܰܥ ܟܺܐܢܽܘܬܶܗ ܥܰܘܠܰܢ ܬܶܥܼܛܶܐ ܛܰܝܒܽܘܬܶܗ ܒܪܺܝܟ ܕܰܡܒܰܪܶܟ ܡܰܪܥܺܝܬܶܗ

21 ܕܟܳܗܢܳܐ ܘܡܰܠܟܳܐ ܩܰܕܡܳܝܳܐ ܐܰܝܟ ܒܰܚܕ̈ܳܕܶܐ ܨܺܝܪܺܝܢ ܗ̱ܘܰܘ ܘܰܐܝܟ ܕܰܒ̈ܟܰܦܶܐ ܬܩܺܝܠܺܝܢ ܗ̱ܘܰܘ ܐܳܦ ܘܰܠܓܳܫ ܐܳܦ ܒܰܪ ܡܰܠܟܳܐ ܕܡܰܟܺܝܟܺܝܢ ܗ̱ܘܰܘ ܘܰܒܗܰܝܠܶܝܢ ܢܕܰܡܽܘܢ ܐ̱ܚܪ̈ܳܝܳܐ ܠܰܚܕ̈ܳܕܶܐ ܟܳܗ̈ܢܶܐ ܢܶܗܘܽܘܢ ܢܰܗܺܝܪ̈ܶܐ ܘܰܡܗܰܠܟܳܐ ܢܶܗܘܽܘܢ ܙܰܠܺܝ̈ܩܶܐ ܐܳܦ ܕ̈ܰܝܳܢܶܐ ܙܰܗܪ̈ܺܝܪܶܐ ܒܪܺܝܟ ܗ̱ܽܘ ܕܰܐܢܗܰܪ ܢܰܦܫ̈ܳܬܰܢ

22 ܡܶܢ ܡܰܠܟܽܘܬܳܐ ܢܳܡܽܘ̈ܣܶܐ ܘܡܶܢ ܟܳܗܢܽܘܬܳܐ ܚܽܘ̈ܣܳܝܶܐ ܕܢܰܪܟܶܢ ܬܰܪ̈ܬܰܝܗܶܝܢ ܣܰܢܝܳܐ ܗ̱ܝ ܕܢܰܥܙܶܢ ܬܰܪ̈ܬܰܝܗܶܝܢ ܩܰܫܝܳܐ ܗ̱ܝ ܚܕܳܐ ܬܶܥܰܙ ܘܰܚܕܳܐ ܬܶܒܼܣܰܡ ܒܒܽܘܝܳܢܳܐ ܘܰܒܦܽܘܪܫܳܢܳܐ ܕܶܚܠܳܐ ܒܪ̈ܰܚܡܶܐ ܬܶܬܡܰܙܰܓ ܬܗܶܐ ܟܳܗܢܽܘܬܰܢ ܒܰܣܺܝܡܳܐ ܐܳܦ ܡܰܠܟܽܘܬܰܢ ܥܰܙܺܝܙܳܐ ܒܪܺܝܟ ܕܡܰܙܶܓ ܥܽܘܕܪ̈ܳܢܺܝܢ

23 ܢܨܰܠܽܘܢ ܟܳܗ̈ܢܶܐ ܥܰܠ ܡܰܠܟ̈ܶܐ ܕܢܶܗܘܽܘܢ ܫܽܘܪܳܐ ܠܐ̱ܢܳܫܽܘܬܳܐ ܡܶܢ ܨܶܝܕ ܡܰܠܟ̈ܶܐ ܙܳܟܽܘܬܳܐ ܘܡܶܢ ܟܳܗ̈ܢܶܐ ܗܰܝܡܳܢܽܘܬܳܐ ܙܳܟܽܘܬܳܐ ܢܶܬܢܰܛܰܪ ܦܰܓܪ̈ܶܐ ܘܗܰܝܡܳܢܽܘܬܳܐ ܢܰܦܫ̈ܳܬܳܐ ܡ̈ܰܠܟܶܐ ܢܶܫܠܽܘܢ ܬܰܟܬܽܘܫܳܐ ܟܳܗ̈ܢܶܐ ܢܶܫܠܽܘܢ ܥܽܘܩܳܒܳܐ ܕܪܺܝܫܳܐ ܘܩܺܐܪܣܳܐ ܢܶܬܒܰܛܰܠ ܒܪܺܝܟ ܝܰܠܕܶܗ ܕܰܡܫܶܝܢ ܟܽܠ ܫܽܘܒܚܳܐ ܠܳܟ ܥܰܠ ܡܰܘܗܰܒܬܳܟ

SEDRA IV

Syriac Lexeme

About This Digital Text

Corpus Text ID:

https://syriaccorpus.org/278

NHSL Work ID(s):

http://syriaca.org/work/8757
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1961).