Nisibis 29

https://syriaccorpus.org/283

section : section

line : line

29 Nisibis XXIX

ܗ ܒܰܪ ܩܳܠܶܗ

2 ܘܗܶܢܽܘܢ ܕܚܰܕ ܥܰܠ ܚܰܕ ܕܢܶܬܦܰܠܓܽܘܢ ܥܰܕܰܪ ܐܳܘܝܳܢ ܗ̱ܘܰܘ ܒܚܰܕ ܪܶܥܝܳܢ ܘܰܒ̈ܢܰܝ ܕܘ̇ܳܠܶܐ ܗܘܳܐ ܕܢܶܫܠܡܽܘܢ ܠܚܰܕ ܚܽܘܒܳܐ ܦܰܠܓܽܘܗ̱ܝ ܠܚܰܕ ܩܽܘܫܬܳܐ

3 ܐܶܬܰܐܘܺܝܘ ܚ̈ܘܰܘܳܬܳܐ ܒܳܠܥܰܝ̈ ܠܰܐܚ̈ܰܝܗܽܘܢ ܘܰܪܚܶܡܘ̱ ܠܚܰܒܪ̈ܰܝܗܽܘܢ ܘܶܐܡܪ̈ܰܝ ܠܰܐܚ̈ܰܝܗܽܘܢ ܕܺܐܒ̈ܶܐ ܗ̱ܘܰܘ ܘܰܣܥܰܘ ܥܰܠ ܪܳܥܝܳܐ ܕܓܰܘ

4 ܠܽܐܘܪܶܫܠܶܡ ܐܶܡܰܪܬ ܕܰܬܟܰܢܫܺܝܗ̇ ܒܪܳܙܳܐ ܕܶܐܡܳܐ ܕܦܰܪ̈ܽܘܓܶܝܗ̇ ܟܶܢܫܰܬ ܬܚܶܝܬ ܟ̈ܶܢܦܶܝܗ̇ ܫܪܳܪܳܟ ܢܟܰܢܶܫ ܡܳܪܝ̱ ܝ̈ܰܠܕܰܝ ܬܚܶܝܬ ܟ̈ܶܢܦܰܝ

5 ܒܰܝܰܐܬ ܠܰܫܡܽܘܐܶܝܠ ܟܰܕ ܐܰܣܠܝܽܘܗ̱ܝ ܣܰܟ̈ܠܶܐ ܕܠܳܟ ܒܶܗ ܐܰܣܠܺܝ ܥܰܡܳܐ ܘܥܺܕܬܳܟ ܒܐ̱ܪܳܙܳܟ ܡܳܪܝ̱ ܕܰܠܟܳܗܢܳܟ ܐܰܣܠܺܝܘ ܠܺܝ ܒܶܗ ܣܢܰܘ ܝ̈ܰܠܕܰܝ

6 ܘܡܶܛܽܠ ܕܝܳܕܰܥ ܗܘܰܝܬ ܕܙܰܒܢܰܐ ܗ̱ܘ ܕܨܽܘܚܺܝܬܳܐ ܠܳܐ ܝܰܗܒܬ ܠܺܝ ܛܶܠܰܝ ܪܳܥܝܳܐ ܕܰܙܩܺܝܠ ܘܰܦܐܶܐ ܕܰܢܩܶܦ ܗܳܝ ܨܽܘܚܺܝܬܳܐ ܒܰܥܓܰܠ ܠܛܰܠܝܽܘܬܳܐ

7 ܒܣܳܒܳܐ ܡܨܰܚܶܝܢ ܠܺܝ ܒܢܰܟܦܳܐ ܡܦܰܪܣܺܝܢ ܠܺܝ ܕܳܐܦ ܠܳܐ ܟܝܳܢܳܐ ܡܳܪܝ̱ ܝܰܗ̱ܒ ܕܬܶܬܩܰܪܰܒ ܡܶܠܬܳܐ ܕܨܽܘܚܺܝܬܳܐ ܒܰܥܓܰܠ ܠܣܰܝܒܽܘܬܳܐ

8 ܠܳܐ ܨܺܝܡ ܠܗܽܘܢ ܥܰܡܶܗ ܠܳܐ ܫܗܺܝܪ ܠܗܽܘܢ ܥܰܡܶܗ ܕܣܳܒܳܐ ܕܠܰܥܼܠܰܝܡ̈ܶܐ ܡܳܠܐܳܐ ܒܥܺܝܪܽܘܬܶܗ ܒܳܥܽܘܬܝ̱ ܕܢܺܐܬܽܘܢ ܡܳܪܝ̱ ܥܰܡܶܗ ܠܦܽܘܚܳܡܳܐ

9 ܡܶܣܟܺܝܢ ܘܥܰܬܺܝܪܺܝܢ ܡܫܰܝܰܢ ܘܚܳܪ̈ܝܳܝܺܢ ܒܰܣܺܝܡ ܘܥܰܙܺܝܙܺܝܢ ܡܰܟܺܝܟ ܘܛܳܠܽܘܡܺܝܢ ܕܰܐܟܒܰܪ ܒܡܽܘܟܳܟܶܗ ܐܶܣܬܪܰܚܘ̱ ܘܶܐܫܬܰܥܠܺܝܘ

10 ܒܓܰܒܪܳܐ ܕܰܡܠܶܐ ܪ̈ܰܚܡܶܐ ܗܘܰܘ ܡܳܪܝ̱ ܕܠܳܐ ܪ̈ܰܚܡܶܐ ܕܰܨܥܰܪܘ̱ ܠܰܐܒܽܘܗܽܘܢ ܘܰܠܐܶܡܗܽܘܢ ܦܰܪܣܺܝܘ ܥܰܒܕܽܘܢܝ̱ ܒܗܰܘ ܣܳܒܳܐ ܣܳܒܬܳܐ ܡܰܨܚܰܝܬܳܐ

11 ܘܡܰܢܽܘ ܕܠܳܐ ܢܶܒܟܳܐ ܕܰܠܐܰܝܟܳܐ ܡܛܳܬ ܚܰܪܬܝ̱ ܕܶܐܬܝܰܩܪܰܬ ܛܰܠܝܽܘܬܝ̱ ܘܶܐܨܛܰܥܪܰܬ ܣܰܝܒܺܘܬܝ̱ ܒ̈ܢܰܝ ܐܶܙܠ̱ܽܘܢܝ̱ ܘܰܗ̇ܘܺܝܬ ܚܶܣܕܳܐ ܠܙܳܩ̈ܽܘܦܶܐ

12 ܬܰܩ̈ܢܰܝ ܥܢܰܕܘ̱ ܘܰܦܪܰܫܘ̱ ܘܫܰܒܩܽܘܢܝ̱ ܠܡܽܘܝܳܩܳܐ ܕܚ̈ܰܢܦܶܐ ܒܥܶܠܰܬܗܽܘܢ ܚܳܓܘ̱ ܡܶܢ ܩܕܳܡ ܐܰܦܰܝ̈ ܟܽܠ ܐ̱ܢܳܫ ܒܨܶܒܥܶܗ ܗܽܘ ܝܰܘܡܳܢ ܡܚܰܘܶܐ ܠܺܝ

13 ܗܳܐ ܐܶܬܕܒܰܪܘ̱ ܛܰܪ̈ܩܰܝ ܓܡܺܝܪ̈ܰܝ ܘܢܰܨ̈ܺܝܚܝ̱ ܕܥܰܒܕܽܘܢܝ̱ ܡܟܰܠܰܠܬܳܐ ܚܣܺܝܡܰܬ ܒܓܰܘ ܬܺܒܶܝܠ ܘܕܰܗܘܺܝܬ ܡܫܰܡܰܗܬܳܐ ܗܘܺܝܬ ܠܺܝ ܡܚܰܣܰܕܬܳܐ

14 ܕܚܰܕ ܚܰܕ ܒܕܽܘܒܳܪ̈ܰܘܗ̱ܝ ܝܰܩܪܽܘܢܝ̱ ܒܢܰܨ̈ܺܚܢܶܐ ܚ̈ܰܢܦܶܐ ܘܢܽܘܟܪ̈ܳܝܶܐ ܝܰܩܪܽܘܢܝ̱ ܒܥܶܠܰܬܗܽܘܢ ܝܰܘܡܳܢ ܐܳܦ ܡܶܢ ܕܺܝܠܝ̱ ܗܳܐ ܡܳܪܝ̱ ܒܣܺܝܪܳܐ ܐ̱ܢܳܐ

15 ܐܰܝܟܳܐ ܡܛܰܘ ܢܰܟ̈ܦܰܝ ܢܰܨ̈ܚܰܝ ܒܨܰܘܡܰܝ̈ܗܽܘܢ ܐܰܡܺܝ̈ܢܶܐ ܠܛܳܒ̈ܳܬܳܐ ܚ̈ܦܺܝܛܰܝ ܒܣܽܘܥܪ̈ܳܢܶܐ ܠܰܝܬܰܘܗ̱ܝ ܠܗܰܘ ܛܰܥܡܳܐ ܕܠܰܝܬܶܝܗ̇ ܠܗܳܝ ܡܶܠܚܳܐ

16 ܒܚܰܕ ܡܶܢܗܽܘܢ ܡܰܠܟܳܐ ܡܨܶܐ ܗܘܳܐ ܕܢܶܬܪܰܥܶܐ ܘܒܰܬܪ̈ܶܝܢ ܕܢܶܬܒܰܝܰܐ ܘܢܶܚܕܶܐ ܡܠܶܟ ܡ̈ܰܠܟܶܐ ܓܒܰܝܬ ܕܰܒܰܪܬ ܐܶܢܽܘܢ ܚܰܕ ܚܰܕ ܠܩܽܘܪܒܳܢܳܟ

17 ܦܳܠܚ̈ܰܝ ܟܢܰܫܘ̱ ܦܺܐܪ̈ܰܝ ܓܡܺܝܪ̈ܶܐ ܘܒܰܣܺܝ̈ܡܶܐ ܗܘܳܐ ܛܰܥܡܗܽܘܢ ܩܽܘܫܬܳܐ ܘܚܰܠܝܽܘܬܗܽܘܢ ܚܽܘܒܳܐ ܝܰܘܡܳܢ ܦܟܼܰܗܘ̱ ܦܺܐܪ̈ܰܝ ܕܰܢܓܰܪ ܥܠܰܝ ܣܰܬܘܳܐ

18 ܣܰܬܘܳܐ ܟܰܣܝܳܐ ܘܣܰܢܝܳܐ ܒܬܰܠܓ̈ܰܘܗ̱ܝ ܘܒܰܓܠܺܝܕ̈ܰܘܗ̱ܝ ܠܰܣܡܳܕܪܐ ܥܰܘܪܶܗ ܕܡܶܢܶܗ ܕܡܽܘܥܺܝܬܶܗ ܟܪܺܝܗ ܗܽܘ ܒܬܽܘܠܡܳܕܶܗ ܘܰܡܪܰܥ ܒܫܽܘܪܳܝܶܗ

19 ܫܽܘܦܪܳܐ ܥܼܠܰܒ ܘܰܙܟܼܳܐ ܕܛܰܪ̈ܦܶܐ ܕܰܒܗܰܘ ܙܰܒܢܳܐ ܠܦܺܐܪ̈ܶܐ ܕܝܰܘܡܳܢܳܐ ܒܰܘܥܳܪܗܽܘܢ ܣܰܓܺܝ ܚܰܒܺܝܒ ܕܩܰܕܡܳܝ̈ܶܐ ܡܶܢ ܛܥܶܢܬܳܐ ܕܝܰܘܡܳܢ

20 ܩܰܝ̈ܛܶܐ ܗ̱ܘܰܘ ܣܰܬ̈ܘܶܐ ܘܶܐܒܰܕܘ̱ ܠܛܽܘ̈ܟܣܶܐ ܘܰܬܡܰܗܘ̱ ܘܩܳܡܘ̱ ܦܺܐܪ̈ܶܐ ܘܡܶܕܪܽܘ ܠܛܰܥܡ̈ܰܝܗܽܘܢ ܕܰܫܡܶܢ ܒܫܶܠ ܡܰܓܺܝܓ ܕܰܒܟܰܪ ܒܟܽܘܠ ܦܰܟܺܝܗ

21 ܦܺܐܪܳܐ ܠܩܺܝܫܳܝܳܐ ܐ̱ܚܪܳܝܳܐ ܐ̱ܚܝܳܢ ܣܰܬܘܳܐ ܪܺܝܚܶܗ ܘܛܰܥܡܶܗ ܒܶܗ ܥܳܠܶܒ ܘܙܳܟܶܐ ܠܶܗ ܠܗܳܢܳܐ ܦܺܐܪܳܐ ܕܝܰܘܡܳܢ ܕܰܒܫܼܶܠ ܒܓܰܘ ܩܰܝܛܳܐ

22 ܡܠܺܝ ܡܰܥܨܪ̈ܳܬܝ̱ ܘܰܫܦܰܥ ܚܰܡܪܳܐ ܕܠܳܐ ܪܳܬܰܚ ܘܰܐܝܟ ܗܰܘ ܕܠܰܘ ܚܰܕܬܰܐ ܗ̱ܘ ܕܚܽܘܒܶܗ ܫܠܳܐ ܘܢܰܫܺܝܫ ܡܶܢܶܗ ܕܚܕܰܬܳܐ ܡܳܪܝ̱ ܡܰܫܓܳܢܝ̱ ܘܥܰܬܺܝܩܳܐ

23 ܚܰܡܪܳܐ ܕܚܰܕܬ ܪܳܬܰܚ ܘܰܐܝܢܳܐ ܕܰܥܬܶܩ ܡܰܬܺܝܢ ܚܰܡܪܶܗ ܕܗܳܢ ܕܳܪܳܐ ܡܰܫܓܳܢܝ̱ ܒܬܰܪ̈ܬܰܝܗܶܝܢ ܚܽܘܒܶܗ ܘܠܳܐ ܪܳܬܰܚ ܛܰܥܡܶܗ ܘܠܳܐ ܡܰܬܺܝܢ

24 ܘܰܚܠܳܦ ܕܘܳܠܶܐ ܗ̱ܘܳܐ ܕܢܶܪܬܰܚ ܒܚܰܠܝܽܘܬܶܗ ܒܚܶܡܬܳܐ ܠܚܽܘܕ ܪܳܬܰܚ ܕܪܽܘܓܙܳܐ ܡܰܗܦܶܟ ܠܶܗ ܠܳܟ ܗ̱ܽܘ ܡܶܟܺܝܠ ܓܰܠܝܳܐ ܚܰܪܬܳܐ ܕܳܡܢܳܐ ܗܺܝ

26 ܘܰܐܝܟܰܢ ܕܬܰܠܡ̈ܺܝܕܶܐ ܐܰܥܺܝܪܽܘܟ ܒܓܰܘ ܝܰܡܳܐ ܘܩܳܡܬ ܗܘܰܝܬ ܘܰܒܩܳܠܳܟ ܦܣܰܩܬܶܗ ܠܥܰܠܥܳܠܳܐ ܫܡܼܰܥ ܡܳܪܝ̱ ܒܩܳܠ ܕܶܡ̈ܥܶܐ ܕܟܽܠܝܽܘܡ ܡܥܺܝܪ̈ܳܢ ܠܳܟ

27 ܡܶܢ ܬܰܝܡܢܳܐ ܟܬܺܝܒ ܡܳܪܝ̱ ܕܶܐܬܰܝܬ ܘܰܫܪܰܝܬܳܝܗ̱ܝ ܐ̱ܓܠܺܝܕܳܐ ܕܡܶܨܪ̈ܳܝܶܐ ܘܰܐܦܪܰܥ ܢܦܰܦ ܥܰܡܳܐ ܣܰܪܗܶܒ ܥܒܶܕ ܩܰܝܛܳܐ ܦܨܺܝܚܳܐ ܕܡܰܦܨܰܚ ܠܰܢ

28 ܒܶܗ ܢܶܒܫܠܽܘܢ ܦܺܐܪ̈ܰܝ ܒܶܗ ܢܶܫܡܢܽܘܢ ܙܰܪ̈ܥܰܝ ܒܶܗ ܢܶܫܦܪܽܘܢ ܙܰܒ̈ܢܰܝ ܒܶܗ ܢܶܥܒܪܽܘܢ ܚ̈ܰܫܰܝ ܒܶܗ ܢܶܫܠܡܽܘܢ ܐܶܒ̈ܺܠܰܝ ܘܒܶܗ ܢܶܪܥܡܽܘܢ ܥܺܐܕ̈ܰܝ

29 ܢܶܣܓܽܘܢ ܚܰܕ ܒܰܡܳܐܐ ܦܺܐܪ̈ܰܝ ܒܛܰܝܒܽܘܬܳܟ ܕܗܽܘ ܗܰܘ ܝܽܘܬܪܳܢܳܐ ܢܺܐܬܶܐ ܐܰܝܟ ܪܰܒܰܝܬܳܐ ܠܰܐܪܥܳܐ ܕܒܰܛܶܠܬܶܗ ܚܶܨܕܳܐ ܒܓܰܘ ܣܰܬܘܳܐ

30 ܟܰܦܢܳܐ ܟܰܣܝܳܐ ܗܘܳܐ ܗ̱ܘܳܐ ܘܰܙܥܼܰܪ ܥܒܽܘܪ ܩܽܘܫܬܳܐ ܘܓܰܪܕܺܝ ܠܚܶܡ ܚܽܘܒܳܐ ܘܡܶܢ ܟܰܦܢܗܽܘܢ ܐ̱ܢܳܫܳܐ ܐܶܙܕܪܰܩܘ̱ ܠܟܽܠ ܦܶܢ̈ܝܳܢ ܘܶܐܫܬܕܺܝܘ ܠܟܽܠ ܓܰܒ̈ܺܝܢ

31 ܠܰܐܝܢܳܐ ܕܨܳܒܶܐ ܡܳܪܝ̱ ܐܰܘܨܪܳܟ ܡܠܶܐ ܣܶܒܥܳܐ ܕܶܐܢ ܐܰܘܨܪܶܗ ܕܝܰܘܣܶܦ ܦܰܪܢܶܣ ܠܟܰܦܢܽܘܬܳܐ ܡܬܰܪܣܰܐ ܗ̱ܘ ܚܰܕ ܒܰܡܳܐܐ ܐܰܘܨܪܳܟ ܠܗܰܝܡܳܢܽܘܬܝ̱

32 ܗܰܒ ܠܰܢ ܘܰܐܣܓܳܐ ܠܰܢ ܣܰܒܥܶܗ ܕܝܽܘܠܦܳܢܳܟ ܨܰܘܡܳܐ ܚܰܕ ܒܰܬܠܳܬܺܝܢ ܢܺܐܬܶܐ ܚܽܘܒܳܐ ܒܶܫܬܺܝܢ ܫܪܳܪܳܟ ܠܚܽܘܕ ܒܰܡܳܐܐ ܢܺܐܬܶܐ ܒܟܽܠ ܛܳܒ̈ܳܢ

33 ܐܰܢ̱ܬ ܗ̱ܽܘ ܐܶܡܰܪܬ ܕܶܐܦܪܽܘܥ ܫ̈ܢܰܝܳܐ ܕܶܐܟܰܠ ܩܰܡܨܳܐ ܙܳܚܠܳܐ ܘܨܰܪܨܽܘܪܳܐ ܠܺܝ ܡܳܪܝ̱ ܦܪܽܘܥ ܝܰܬܺܝܪ ܕܩܶܡܨܳܐ ܟܰܣܝܳܐ ܐܳܟܠܳܗ̇ ܘܙܰܪܥܳܗ̇ ܠܗܰܝܡܳܢܽܘܬܝ̱

34 ܐܰܪܥܳܐ ܕܕܳܪ̈ܽܘܫܶܐ ܚܰܩܠܳܐ ܕܰܡܗܰܠܰܝܗܽܘܢ ܫܒܳܬ ܒܪܽܘܚ ܛܽܘܥܝܰܝ ܘܰܗܘܼܳܐ ܟܰܦܢܳܐ ܠܢܰܦܫܳܐ ܐܰܝܕܳܐ ܕܠܳܐ ܐܰܣܢܶܬ ܩܽܘܫܬܳܐ ܒܰܪ ܥܰܝܢܳܗ̇

35 ܐܟܪܝ ܟܪܽܘܒ ܠܰܐܪ̈ܥܳܬܝ̱ ܘܬܼܢܝ ܘܰܬܠܳܬ ܡܳܪܝ̱ ܐܳܦ ܓܶܝܪ ܬܠܺܝܬܳܝܳܐܺܝܬ ܐܰܥܡܕܰܬ ܘܰܐܚܺܝܬܳܗ̇ ܠܰܐܪܥܳܐ ܕܢܰܦܫ̈ܳܬܰܢ ܘܥܺܕ̱ܬܳܐ ܕܪ̈ܽܘܚܳܬܰܢ

36 ܘܰܬܢܰܘ ܘܳܐܦ ܬܠܳܬܰܘ ܫ̈ܠܺܝܚܶܐ ܘܰܙܪܰܥܼܘ̱ ܘܰܚܨܰܕܘ̱ ܘܡܶܢܳܗ̇ ܕܗܳܝ ܟܬܳܐ ܐܶܬܝܰܒܠܰܬ ܘܶܐܬܳܬ ܘܥܶܬܪܰܬ ܡܶܠܰܬ ܐܰܪܥܳܐ ܒܽܐܘܨܳܪܳܐ ܕܝܽܘܠܦܳܢܳܐ

37 ܘܰܐܝܟܰܢ ܕܳܐܦ ܫܶܪܫܳܗ̇ ܝܳܒܶܠ ܡܼܛܳܐ ܨܶܐܕܰܝܢ ܗܳܟܰܢ ܡܝܰܒܶܠ ܬܽܘܒ ܥܕܰܡܳܐ ܠܡܶܐܬܺܝܬܳܟ ܕܡ̈ܰܠܟܶܐ ܒܣܰܝ̈ܦܰܝܗܽܘܢ ܠܳܐ ܐܶܬܡܨܺܝܘ ܦܰܣܩܽܘܗ̇

38 ܟܡܳܐ ܡܳܪܝ̱ ܕܶܐܬܶܠ ܠܳܟ ܣܰܓܺܝ ܙܥܽܘܪ̈ܳܢ ܠܳܟ ܘܰܟܡܳܐ ܕܬܶܬܶܠ ܠܺܝ ܬܽܘܒ ܫܳܐܠܳܐ ܝܰܥܢܽܘܬܝ̱ ܠܕܺܝܠܰܢ ܟܦܼܶܢ ܚܽܘܒܳܟ ܠܕܺܝܠܳܟ ܨܗܶܐ ܣܽܘܢܩܳܢܝ̱

39 ܬܰܪܥܺܝܬܝ̱ ܬܗܶܐ ܐܰܪܥܳܟ ܟܪܽܘܒܶܝܗ̇ ܒܫܶܡ ܐܰܒܽܘܟ ܘܬܶܢܝܳܗ̇ ܒܫܶܡ ܝܰܠܕܳܟ ܬܠܳܬ ܒܪܽܘܚ ܩܽܘܕܫܳܟ ܘܰܟܦܳܐ ܕܬܶܫܒܽܘܚܬܳܐ ܬܶܣܰܩ ܠܫܳܠܽܘܚܳܟ

40 ܕܰܦܢܺܝܬܳܐ ܠܺܝ ܝ̈ܰܠܕܰܝ ܘܰܐܩܦܰܬ ܠܺܝ ܪ̈ܚܽܘܡܰܝ ܕܶܐܢ ܡܳܪܝ̱ ܦܳܪܰܚܬܳܐ ܚܳܕܝܳܐ ܒܦܰܪ̈ܽܘܓܶܝܗ̇ ܡܶܢ ܕܠܳܐ ܬܶܚܕܶܐ ܒܨܰܘܬܳܐ ܕܚܰܒܺܝ̈ܒܶܝܗ̇

41 ܢܶܫܬܰܘܕܥܽܘܢ ܩܳܠܳܐ ܕܶܐܡܗܽܘܢ ܒܛܰܝܒܽܘܬܳܟ ܘܢܶܣܬܰܪܗܒܽܘܢ ܨܶܐܕܰܝ ܢܬܽܘܒܽܘܢ ܘܢܶܦܢܽܘܢ ܠܺܝ ܘܶܐ̱ܢܳܐ ܘܗܳܢܽܘܢ ܡܳܪܝ̱ ܢܰܘܕܶܐ ܒܚܰܕ ܩܽܘܫܬܳܐ

How to Cite this Electronic Edition

Note:

Ephrem the Syrian, “Nisibis 29” , Digital Syriac Corpus, last modified June 12, 2019, https://syriaccorpus.org/283.

TEST2

Bibliography:

“Nisibis 29.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/283.

Show Citation Styles

SEDRA IV

Syriac Lexeme

About This Digital Text

Corpus Text ID:

https://syriaccorpus.org/283

NHSL Work ID(s):

http://syriaca.org/work/8762
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1961).

Link to Syriaca.org Bibliographic Record

Type of Text: Digital Edition

Status: Edited

Publication Date: June 12, 2019

Preparation of Electronic Edition:

TEI XML encoding by James E. Walters.
Syriac text transcribed by Michael Oez.

Open Access and Copyright:

See details...