Nisibis 30

https://syriaccorpus.org/284

TEI/XML Text

Show

section : section

line : line

Table of Contents

1 2 3 4 5 6 7 8 9 10 11 12 13 14 15 16 17 18 19 20 21 22

30 Nisibis XXX

ܘ ܒܰܪ ܩܳܠܶܗ

1 ܘܰܐܝܟܰܢ ܕܰܚ̈ܛܶܐ ܒܶܪܝ̱ ܡܰܐܕܰܬܓܡܰܪ ܫܰܠܚܳܝܗ̱ܝ ܠܥܽܘܪܳܐ ܕܠܳܐ ܙܳܕܶܩ ܕܰܗܘܼܳܐ ܚܠܺܝܛ ܒܗܶܝܢ ܗܳܟܰܢ ܫܠܼܰܚܘ̱ ܟܺܐܢ̈ܶܐ ܡܶܕܶܡ ܕܠܳܐ ܥܰܕܰܪ ܥܽܘܢܺܝܬܳܐ: ܫܽܘܒܚܳܐ ܠܡܳܪܽܘܬܳܟ

2 ܡܽܘܫܶܐ ܘܕܳܢܺܝܐܶܝܠ ܡܗܺܝܪ̈ܶܐ ܘܚ̈ܰܟܺܝܡܶܐ ܝܰܘ̈ܢܶܐ ܕܶܐܬܥܪܰܡ ܒܰܝܢܳܬ ܚܘ̈ܰܘܳܬܳܐ ܚܰܕ ܐܶܬܪܕܺܝ ܒܡܶܨܪܶܝܢ ܐ̱ܚܪܺܢܳܐ ܒܓܰܘ ܒܳܒܶܠ

3 ܫܒܼܰܩ ܚܰܕ ܕܚ̈ܰܠܳܫܶܐ ܐ̱ܚܪܺܢܳܐ ܕܟܰܠܕ̈ܳܝܶܐ ܚܶܟܡܬܳܐ ܕܒܰܟܝܳܢܳܐ ܫܰܘܬܶܦܘ̱ ܠܫܰܒܪܽܘܬܳܐ ܒܰܕܡܽܘܬ ܢܰܗܺܝܪܳܐ ܐ̱ܚܝܳܢܳܐ ܕܒ̈ܳܒܳܬܳܐ

4 ܨܢܺܝܥܺܝܢ ܒܪܺܝܪܺܝܢ ܗ̱ܘܰܘ ܥܪܺܝܡܺܝܢ ܦܫܺܝܛܺܝܢ ܗ̱ܘܰܘ ܫܦܶܝܢ ܗ̱ܘܰܘ ܘܦܳܪܽܘܫܺܝܢ ܡܗܺܝܪܺܝܢ ܘܬܰܡܺܝܡܺܝܢ ܚܙܰܘ ܛܳܒܬܳܐ ܠܰܒܫܽܘܗ̇ ܚܙܰܘ ܒܺܝܫܬܳܐ ܫܰܠܚܽܘܗ̇

5 ܘܰܐܝܟ ܐ̱ܢܳܫܳܐ ܕܠܳܐ ܪܕܳܐ ܒܽܐܘܪܚܳܐ ܕܠܳܐ ܝܳܕܰܥ ܠܳܐ ܝܳܕܥܺܝܢ ܗ̱ܘܰܘ ܠܳܗ̇ ܠܽܐܘܪܚܶܗ ܕܚܶܫܽܘܟܳܐ ܒܰܚܕܰܐ ܗ̱ܘ ܡܦܣܺܝܢ ܗ̱ܘܰܘ ܐܽܘܪܚܶܗ ܕܢܰܗܺܝܪܳܐ

6 ܠܘܳܬ ܒܺܝܫܬܳܐ ܫܰܒܪ̈ܶܐ ܠܘܳܬ ܪܶܓܬܳܐ ܚܣ̈ܺܝܠܶܐ ܛ̈ܠܳܝܶܐ ܠܪܳܡܽܘܬܳܐ ܓܡܺܝܪ̈ܶܐ ܠܘܳܠܺܝܬܳܐ ܛܰܪ̈ܩܶܐ ܠܙܰܗܝܽܘܬܳܐ ܘܢܰܟ̈ܦܶܐ ܠܕܰܟܝܽܘܬܳܐ

7 ܡܰܢܽܘ ܚܙܳܐ ܡܶܢ ܡܬܽܘܡ ܕܺܐܒ̈ܶܐ ܕܪ̈ܰܒܳܢܶܐ ܗܘܰܘ ܠܶܐܡܪ̈ܶܐ ܢܰܟ̈ܦܶܐ ܠܝܰܘ̈ܢܶܐ ܚ̈ܘܰܘܳܬܳܐ ܘܰܠܨܰܦܪܳܐ ܢ̈ܶܨܶܐ ܕܢܺܐܠܦܽܘܢ ܥܝ̈ܳܕܰܝܗܽܘܢ

8 ܒܺܝܫܰܐ ܗ̱ܘ ܚܼܠܰܛ ܐܰܚܰܝ̈ ܡܶܐܪܬܶܗ ܒܚܰܠܝܽܘܬܳܐ ܘܚܶܫܟܶܗ ܒܢܰܗܺܝܪܳܐ ܘܙܺܐܦܶܗ ܒܓܰܘ ܩܽܘܫܬܳܐ ܘܒܶܝܫܬܶܗ ܒܛܰܝܒܽܘܬܳܐ ܘܥܰܘܠܶܗ ܒܟܺܐܢܽܘܬܳܐ

9 ܡܳܐܢ̈ܶܐ ܓܒܳܐ ܗܘܳܐ ܠܶܗ ܕܟܰܝ̈ܳܐ ܘܩܰܕܺܝ̈ܫܶܐ ܘܰܢܣܼܰܟ ܒܗܽܘܢ ܬܶܛܪܶܗ ܣܝܳܢܶܗ ܡܠܳܐ ܐܶܢܽܘܢ ܝܽܘܠܦܳܢ ܚܰܪ̈ܳܫܶܐ ܘܡܺܐܡܪܳܐ ܕܟܰܠܕ̈ܳܝܶܐ

10 ܘܰܐܓܰܪ ܘܰܐܘܚܰܪ ܗ̱ܘܳܐ ܬܰܛܪܶܗ ܒܕܰܟܝܽܘܬܳܐ ܕܰܐܟܒܰܪ ܢܥܺܝܕ ܩܽܘܫܬܳܐ ܥܰܡܶܗ ܕܚܶܫܽܘܟܳܐ ܘܢܶܛܥܶܐ ܘܢܳܕܶܫ ܗ̱ܘܳܐ ܫܪܳܪܳܐ ܒܓܰܘ ܫܽܘܩܪܳܐ

11 ܘܰܪܢܳܐ ܕܶܐܢ ܬܶܗܘܶܐ ܟܽܠܳܗ̇ ܕܝܽܘܬܪܳܢܳܐ ܗ̱ܝ ܟܰܕ ܗܼܺܝ ܕܚܽܘܣܪܳܢܳܐ ܗ̱ܝ ܕܰܗܘܼܳܐ ܡܕܺܝܠ ܬܶܛܪܶܐ ܣܝܳܢܳܐ ܕܝܽܘܠܦܳܢܶܗ ܒܦܽܘܡ̈ܶܐ ܒ̈ܢܰܝ ܩܽܘܫܬܳܐ

12 ܘܰܪܢܳܐ ܕܶܐܢ ܗܼܽܘ ܕܡܰܪܕܽܘ ܫ̈ܦܰܝܳܐ ܘܰܫܕܰܘ ܬܶܛܪܶܐ ܕܰܢܣܰܟ ܒܗܽܘܢ ܚܰܪܡܳܐ ܠܳܐ ܡܶܫܟܚܳܐ ܕܠܰܓܡܳܪ ܠܳܐ ܢܦܽܘܫ ܒܗܽܘܢ ܛܰܥܡܳܐ ܘܗܰܘܦܳܐ ܕܝܽܘܠܦܳܢܶܗ

13 ܗܳܟܰܢ ܢܟܶܠ ܛܰܘܶܫ ܡܳܐܢ̈ܶܐ ܕܬܶܫܡܶܫܬܳܐ ܕܡܶܟܽܝܠ ܕܶܐܬܛܰܘܰܫܘ̱ ܠܳܐ ܡܨܶܝܢ ܕܢܶܬܕܰܟܽܘܢ ܕܢܶܦܣܽܘܩ ܣܒܰܪ ܥܰܡܳܐ ܕܠܳܐ ܢܚܽܘܪ ܠܦܽܘܢܳܝܳܐ

14 ܘܰܒܗܼܶܬ ܒܬܰܪ̈ܬܰܝܗܶܝܢ ܡܳܐܢ̈ܶܐ ܕܒܰܟܝܳܢܳܐ ܠܳܐ ܐܶܬܡܨܺܝ ܛܰܘܶܫ ܕܡܳܪܗܽܘܢ ܬܒܰܥ ܐܶܢܽܘܢ ܕܗܳܝ ܦܶܣܬܳܐ ܕܺܐܝܕܳܐ ܐ̱ܬܳܬ ܕܰܟܝܰܬ ܐܶܢܽܘܢ

15 ܟܬܳܒܳܗ̇ ܗ̱ܘܳܐ ܫܶܦܥܳܐ ܘܰܗܘܼܳܐ ܐܳܦ ܦܽܘܫܳܩܳܗ̇ ܨܰܪܦܳܐ ܒܓܰܘ ܟܽܘܪܳܐ ܘܒܺܐܕܳܐ ܕܕܳܢܺܝܐܶܝܠ ܐܶܬܡܪܰܩܘ̱ ܘܶܐܬܕܰܟܺܝܘ ܘܰܫܦܼܰܪܘ̱ ܘܶܐܬܚܰܠܰܠܘ̱

16 ܘܕܰܢܦܼܰܩܘ̱ ܒܫܺܝܛܽܘܬܳܐ ܦܢܰܘ ܥܰܠܘ̱ ܒܙܰܗܝܽܘܬܳܐ ܕܰܢܦܼܰܩܘ̱ ܒܓܽܘܕܳܦܳܐ ܐܶܬܚܡܶܠܘ̱ ܒܩܽܘܠܳܣܳܐ ܕܶܐܬܗܰܦܰܟܘ̱ ܒ̈ܢܰܝ ܛܽܘܥܝܰܝ ܘܫܰܒܚܽܘܗ̱ܝ ܠܡܳܪܶܐ ܟܽܠ

17 ܡܳܐܢ̈ܶܐ ܕܒܰܟܝܳܢܳܐ ܐܰܟܣܽܘܗ̱ܝ ܕܠܳܐ ܟܝܳܢܳܐ ܡܳܐܢ̈ܶܐ ܕܚܺܐܪܽܘܬܳܐ ܐܰܟܣܽܘܗ̱ܝ ܒܨܶܒܝܳܢܳܐ ܡܳܐܢ̈ܶܐ ܡܠܰܘ ܩܽܘܫܬܳܐ ܘܰܐܣܪܰܚܘ̱ ܫܪܳܪܰܝܗܽܘܢ

18 ܡܳܐܢ̈ܶܐ ܕܰܡܠܶܝܢ ܗ̱ܘܰܘ ܬܽܘܒ ܒܨܶܒܝܳܢܗܽܘܢ ܫܽܘܩܪܳܐ ܐܶܬܟܦܺܝܘ ܘܶܐܣܬܰܦܰܩܘ̱ ܘܶܐܬܶܐܫܶܕܘ̱ ܘܶܐܣܬܰܪܰܩܘ̱ ܒܺܝܫܳܐ ܠܐܺܝ ܕܢܰܬܼܩܶܢ ܘܡܶܕܪܺܝܫ ܕܢܰܡܠܶܐ ܐܶܢܽܘܢ

20 ܡܳܐܢ̈ܶܐ ܒ̈ܢܰܝ ܩܽܘܫܬܳܐ ܩܛܺܝܪܳܐ ܡܠܳܐ ܐܶܢܽܘܢ ܘܗܼܶܢܽܘܢ ܠܗܽܘܢ ܣܰܦܶܩܘ̱ ܘܰܚܠܳܦ ܡܶܪܬܳܐ ܕܶܐܫܰܕ ܚܽܘܒܳܐ ܚܰܠܝܳܐ ܘܩܽܘܫܬܳܐ ܗܼܶܢܽܘܢ ܒܗܽܘܢ ܢܣܼܰܟܘ ܬܽܘܒ

21 ܚܢܰܢ ܕܶܝܢ ܕܦܳܪܽܘܩܰܢ ܫܪܳܪܶܗ ܢܣܼܰܟ ܘܰܡܠܳܢ ܡܳܐܢܳܐ ܟܦܳܐ ܢܰܦܫܶܗ ܘܶܐܬܶܐܫܰܕ ܒܨܶܒܝܳܢܶܗ ܘܰܗܼܦܰܟ ܡܠܳܐ ܥܽܘܒܶܗ ܬܶܛܪܳܐ ܘܚܶܪܝܳܢܳܐ

22 ܒܪܺܝܟ ܐܰܢ̱ܬ ܥܳܒܽܘܕܰܢ ܕܰܗܘܰܝܬ ܓܳܒܽܘܠܰܢ ܡܳܐܢ̈ܶܐ ܕܬܰܪܥܺܝܬܳܐ ܥܒܰܕܬܳܢܝ̱ ܡܶܢ ܥܰܦܪܳܐ ܠܳܐ ܢܶܬܡܠܶܐ ܥܰܦܪܳܐ ܚܠܳܦ ܣܺܝܡܬܳܐ ܕܩܽܘܫܬܳܐ

SEDRA IV

Syriac Lexeme

About This Digital Text

Corpus Text ID:

https://syriaccorpus.org/284

NHSL Work ID(s):

http://syriaca.org/work/8763
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1961).