ܕܥܰܠ ܒܺܝܛܽܘܣ ܐܶܦܺܝܣܩܽܘܦܳܐ ܕܚܳܪܳܢ ܥܰܠ ܩܳܠܳܐ ܕܩܰܕܳܡܰܘܗ̱ܝ

1 ܥܗܼܰܕ ܡܳܪܝ̱ ܨ̈ܠܰܘܳܬܶܗ ܕܰܐܒܪܳܗܳܡ ܒܓܰܘ ܚܳܪܳܢ ܕܝܰܥܩܽܘܒ ܒܦܰܕܳܢܳܐ ܘܒܰܝܰܐ ܠܣܳܓܽܘܕܳܟ ܕܰܫܩܼܰܠ ܠܒܼܶܫ ܐܶܢܽܘܢ ܒܚܽܘܒܶܗ ܠܚܰܒܺܝ̈ܒܰܝܟ

ܥܽܘܢܺܝܬܳܐ: ܬܶܫ̈ܒܚܳܢ ܠܡܰܢ ܕܰܓܒܳܝܘܗ̱ܝ

2 ܘܰܫܼܦܰܪ ܒܨܶܒ̈ܬܰܝܗܽܘܢ ܘܰܢܨܰܚ ܒܨܰܘܡ̈ܰܝܗܽܘܢ ܘܰܕܚܳܪ ܒܡܰܚܙܺܝܬܳܟ ܐܰܘܣܶܦ ܫܼܦܰܪ ܣܰܓܺܝ ܢܰܟܦܳܐ ܕܡܶܢ ܟܽܠܳܗ̇ ܓܦܶܬܳܐ ܚܣܼܰܠ ܦܽܘܡܶܗ

3 ܡܥܳܕܳܐ ܗ̱ܝ ܡܳܪܝ̱ ܚܳܪܳܢ ܕܰܬܥܺܝܩ ܠܒܶܝܬ ܝܰܥܩܽܘܒ ܛܳܠܽܘܡܬܳܐ ܕܥܰܡ̈ܠܰܘܗ̱ܝ ܐܰܣܟܶܠ ܘܩܳܡ ܕܳܐܶܢ ܕܰܨܒܳܬ ܢܟܰܠ ܘܰܐܥܶܠ ܚܳܬܳܐ ܚܠܳܦ ܚܳܬܳܗ̇

4 ܠܳܐ ܡܶܬܥܒܶܕ ܗܳܟܰܢ ܒܰܐܬܪܰܢ ܐܡܰܪ ܠܳܒܳܢ ܥܺܝܕܳܟ ܢܦܺܝܣ ܥܠܰܝܟ ܕܰܐܘ ܐܰܢ̱ܬ ܠܚܽܘܕ ܕܰܓܶܠ ܘܰܐܬܪܳܟ ܫܦܶܐ ܘܫܰܪܺܝܪ ܐܰܘ ܒܳܟ ܛܒܺܝܥ ܐܰܬܪܳܟ

5 ܗܳܝ ܓܶܝܪ ܕܚܰܠܶܦܬܳܝܗ̱ܝ ܠܰܐܓܪܶܗ ܥܣܰܪ ܙܰܒ̈ܢܺܝܢ ܘܡܶܟܳܐ ܘܰܠܟܳܐ ܫܕܰܝܬܳܝܗ̱ܝ ܠܡܳܐ ܬܽܘܒ ܕܰܐܬܪܳܟ ܗ̱ܺܝ ܕܠܳܐ ܢܶܬܠܽܘܢ ܐܰܓܪܳܐ ܕܡܳܐ ܕܩܰܨܘ̱ ܛܠܰܡܘ̱ ܕܰܓܶܠܘ̱

6 ܐܰܪܫܶܠ ܫܒܼܰܩ ܓܰܙܶܗ ܘܰܣܠܼܶܩ ܕܢܶܬܟܰܬܰܫ ܥܰܡ ܗܰܘ ܕܣܰܝܒܰܪ ܗ̱ܘܳܐ ܟܡܺܐ̈ܢܰܘܗ̱ܝ ܘܥܽܘܩ̈ܣܰܘܗ̱ܝ ܕܰܢܟܼܶܠ ܠܫܰܪܺܝܪܳܐ ܘܚܰܣܶܕ ܠܫܰܦܺܝܪܳܐ

7 ܕܥܺܝܪܳܐ ܠܫܰܗܪܳܐ ܩܳܡ ܒܽܐܘܪܚܳܐ ܘܰܒܓܰܘ ܚܳܪܳܢ ܚܳܒ ܒܫܶܢܬܶܗ ܠܳܒܳܢ ܕܚܶܠܡܳܐ ܙܟܳܝܗ̱ܝ ܘܰܐܝܬܺܝ ܟܠܺܝܠܳܐ ܠܗܰܘ ܫܰܗܪܳܐ ܐܰܓܪܳܐ ܕܥܺܝܪܽܘܬܶܗ

8 ܓܒܳܐ ܠܶܗ ܩܰܪ̈ܚܶܐ ܚܳܒ ܘܶܐܙܕܰܟܺܝ ܒܚܶܘܳܪ̈ܶܐ ܩܪܰܚ ܦܝܳܣܶܟܝ̱ ܗ̱ܘܳܐ ܠܳܒܳܢ ܒܫܽܘܚ̈ܠܳܦܰܘܗ̱ܝ ܥܢܳܢܰܐ ܗ̱ܘ ܕܚ̈ܽܘܠܳܦܶܐ ܘܓܺܝܓܠܳܐ ܕܫܽܘܚ̈ܠܳܦܶܐ

9 ܡܳܪܶܗ ܚܼܙܳܐ ܥܰܡܠܶܗ ܘܰܕܟܰܕ ܛܠܺܝܡ ܫܰܬܺܝܩ ܘܰܕܟܰܕ ܥܠܺܝܒ ܡܰܗܡܶܐ ܘܕܰܐܣܓܺܝ ܨܠܰܘ̈ܳܬܶܗ ܟܰܠܠܶܗ ܒܢܶܨ̈ܚܳܢܶܐ ܫܳܡܰܥ ܨܠܰܘ̈ܳܬܳܐ

10 ܣܳܒܳܐ ܐܶܠܺܝܥܳܙܳܪ ܕܰܢܚܼܶܬ ܡܟܰܪ ܚܳܬܶܗ ܕܰܚܼܙܳܐ ܨܢܺܝܥܽܘܬܶܗ ܒܟܽܠ ܡܰܘܗ̈ܒܳܢ ܛܰܡܪܶܗ ܕܠܳܒܳܢ ܠܒܺܝܫ ܗ̱ܘܳܐ ܠܶܗ ܠܒܰܝܬܳܐ ܘܰܠܥܳܡܽܘܪ̈ܰܘܗ̱ܝ

11 ܓܰܡ̈ܠܶܐ ܥܣܰܪ ܛܥܼܶܢ ܗ̱ܘܳܐ ܘܰܐܝܬܺܝ ܠܟܽܠ ܛܽܘ̈ܒܺܝܢ ܕܰܢܦܺܝܣ ܠܟܽܠ ܦܽܘܡܺܝ̈ܢ ܙܰܒܢܳܗ̇ ܠܚܺܐܪܽܘܬܳܐ ܘܰܫܚܕܳܗ̇ ܠܟܰܦܢܽܘܬܳܐ ܕܚܳܪܳܢ ܒܩܽܘܪ̈ܒܳܢܰܘܗ̱ܝ

12 ܐܳܦ ܗܰܘ ܗܕܺܝܪ ܐܰܦ̈ܶܐ ܒܚܶܟܡܳܐ ܓܢܼܰܒ ܐܶܢܽܘܢ ܟܬܺܝܒ ܓܶܝܪ ܕܝܰܗ̱ܒ ܠܰܐܒܽܘܗ̇ ܘܰܟܬܺܝܒ ܕܰܝܗ̱ܒ ܠܶܐܡܳܗ̇ ܒܠܳܒܳܢ ܣܦܳܐ ܘܰܐܣܼܓܺܝ ܕܠܶܫܳܢܗܽܘܢ ܗܼܽܘ ܗ̱ܘܳܐ

13 ܥܺܝܕܶܗ ܐܶܬܳܐ ܕܢܶܒܥܶܐ ܨܶܝܕ ܗܰܘ ܚܒܰܪ ܥܽܘܦܳܐ ܕܰܫܠܺܝܚ ܫܩܺܝܠ ܚܽܘܛܪܳܐ ܢܺܝܫܳܐ ܕܰܙܩܺܝܦܽܘܬܳܐ ܕܡܶܣܟܺܝܢ ܗ̱ܘܳܐ ܘܰܫܦܶܐ ܛܰܡܪܶܗ ܒܟܽܠ ܨ̈ܶܢܥܳܢ

14 ܢܰܟܠܽܘܗ̱ܝ ܒܓܰܘ ܥܳܢܳܐ ܟܡܺܐܢ̈ܰܘܗ̱ܝ ܒܡܶܫܬܽܘܬܳܐ ܓܰܒܪܳܐ ܕܠܳܐ ܐܰܠܳܗ ܘܰܐܝܟܰܢ ܡܨܶܐ ܕܰܢܫܰܪ ܒ̈ܢܳܬܶܗ ܣܢܳܐ ܘܥܰܠ ܡܰܢ ܡܨܶܐ ܗ̱ܘܳܐ ܕܢܶܬܪܰܚܰܡ

15 ܫܰܦܝܳܐ ܠܢܳܟܽܘܠܳܐ ܗܰܝܡܶܢܘ̱ ܒܫܽܘܘܕ̈ܳܝܰܘܗ̱ܝ ܡܶܛܽܘܠ ܕܶܐܣܬܰܬܰܪ ܒܰܫܡܶܗ ܕܰܐܒܪܳܗܳܡ ܒܥܶܕܳܢ ܒܡܶܫܬܽܘܬܳܐ ܢܟܼܶܠ ܡܰܨܥܶܗ ܠܚܰܬܢܳܐ

16 ܘܡܶܛܽܠ ܕܡܰܛܥܶܐ ܗ̱ܘܳܐ ܒܓܶܢܣܶܗ ܕܰܐܒܪܳܗܳܡ ܝܰܥܩܽܘܒ ܗ̱ܘܳܐ ܟܽܘܪܳܐ ܕܒܶܗ ܐܶܬܓܠܺܝ ܢܚܳܫܶܗ ܘܶܐܬܺܝܕܰܥ ܒܫܽܘܚ̈ܠܳܦܰܘܗ̱ܝ ܕܰܣܢܐܶܐ ܗ̱ܘ ܕܒܶܝܬ ܐܺܝܣܚܳܩ

17 ܪܬܰܚ ܠܶܗ ܘܠܳܐ ܛܰܫܺܝ ܒܺܝܫܬܶܗ ܕܰܢܨܰܛܒܶܬ ܩܛܺܝܪܳܐ ܐܶܡܼܰܪ ܕܰܟܠܳܢܝ̱ ܕܢܶܗܘܶܐ ܕܠܳܐ ܛܰܝܒܽܘ ܚܰܘܺܝ ܕܨܶܒܝܳܢܶܗ ܣܰܩܽܘܒܠܰܐ ܗ̱ܘ ܕܬܰܪܥܽܘܬܳܐ

18 ܝܰܥܩܽܘܒ ܕܒܰܪ ܫܰܝܢܰܐ ܗ̱ܘ ܚܼܕܺܝ ܒܶܗ ܒܗܰܘ ܫܰܝܢܳܐ ܘܙܰܒܢܶܗ ܒܫܳܪܽܘܬܳܐ ܠܝܰܥܢܳܐ ܕܚܳܕܶܐ ܒܳܗ̇ ܟܺܐܢܳܐ ܠܟܺܐܢܳܐ ܩܳܡ ܣܓܺܝܕܳܐ ܠܣܳܓܽܘܕܶܗ

19 ܕܶܐܬܚܣܶܡ ܣܰܢܝܳܐܺܝܬ ܘܶܐܣܬܩܰܪ ܥܪܺܝܨܳܐܺܝܬ ܐܶܬܪܕܶܦ ܪܗܺܝܒܳܐܺܝܬ ܘܨܰܠܺܝ ܬܟܺܝܒܳܐܺܝܬ ܘܶܐܬܦܪܶܩ ܬܡܺܝܗܳܐܺܝܬ ܘܶܐܬܦܨܰܚ ܫܦܺܝܥܳܐܺܝܬ

20 ܠܳܒܳܢ ܚܼܙܳܐ ܕܠܳܟ ܡܳܐ ܕܰܥܒܼܰܕ ܐܰܝܟ ܕܰܠܩܽܘܒܠܰܐ ܗ̱ܘ ܗܘܼܳܐ ܠܶܗ ܚܠܳܦ ܝܰܥܩܽܘܒ ܗܼܦܰܟ ܠܶܗ ܕܢܶܫܬܰܝܰܢ ܩܝܳܡܳܐ ܐܰܩܺܝܡ ܥܰܡܶܗ ܘܰܢܫܼܰܩ ܫܪܳܝܗ̱ܝ ܘܰܐܫܩܶܠ

21 ܘܰܐܓܗܺܝ ܫܦܳܐ ܟܽܠܶܗ ܡܶܢ ܗܰܘ ܕܠܺܝܚ ܟܽܠܶܗ ܟܺܐܢܳܐ ܦܣܼܰܩ ܐܶܢܽܘܢ ܠܥܳܠܰܡ ܦܼܪܰܫ ܐܶܢܽܘܢ ܠܥܽܘܡܩܶܗ ܢܚܼܶܬ ܬܶܛܪܳܐ ܠܪܰܘܡܶܗ ܦܢܳܐ ܫܰܦܝܳܐ

22 ܨܠܽܘܬܝ̱ ܡܳܪܝ̱ ܕܠܰܘ ܗܳܟܰܢ ܬܶܥܒܶܕ ܒܝܰܘܡ̈ܳܬܰܢ ܕܶܐܢܗܼܽܘ ܕܥܶܩܳܪܶܗ ܡܩܰܒܶܠ ܕܡܰܪܺܝܪܳܐ ܠܚܰܠܝܳܐ ܕܢܶܛܥܰܡ ܒܶܗ ܘܟܰܕ ܠܳܐ ܫܘܶܝܢ ܐܳܘܳܝܢ

23 ܟܡܳܐ ܟܺܝܬ ܦܫܺܝܩܳܐ ܡܳܪܝ̱ ܠܰܡܫ̈ܰܠܛܶܐ ܕܠܳܐ ܗܘܳܐ ܟܝ̈ܳܢܶܐ ܐܰܣܺܝܪ̈ܶܐ ܐܶܢܽܘܢ ܕܢܶܦܢܽܘܢ ܘܚܰܕ ܢܶܗܘܽܘܢ ܘܰܐܝܢܳܐ ܕܰܢܦܼܰܠ ܢܶܒܥܶܐ ܘܰܐܝܢܳܐ ܕܩܳܡ ܢܶܣܡܽܘܟ

24 ܐܶܢ ܓܶܝܪ ܚܰܝ̈ܘܳܬܳܐ ܝ̈ܰܠܕܶܐ ܕܢܽܘܟܪ̈ܳܝܺܝܢ ܠܰܟܝܳܢܰܗܶܝܢ ܣܰܓܺܝ ܩܰܒܶܠ ܪܚܶܡ ܘܺܐܝܢܶܩ ܘܶܐܢ ܦܼܪܰܫܘ̱ ܒܩ̈ܳܠܝܰܗܶܝܢ ܡܰܟܪ̈ܙܳܢ ܥܰܠ ܚܰܫ̈ܰܝܗܶܝܢ

25 ܠܥܺܝܪ̈ܶܐ ܢܕܰܡܶܐ ܡܳܪܝ̱ ܚ̈ܳܕܝܰܝ ܒܬܰܝ̈ܳܒܶܐ ܕܶܐܠܳܐ ܐܰܒܺܝܠܳܐ ܐ̱ܢܳܐ ܣܰܓܺܝ ܥܕܺܝܠܳܐ ܐ̱ܢܳܐ ܕܶܐܡܳܐ ܕܠܳܐ ܪ̈ܰܚܡܶܐ ܠܥܺܝܪ̈ܶܐ ܚܫܺܝܒܳܐ ܐ̱ܢܳܐ

26 ܟܡܳܐ ܡܚܰܝܢܺܝܢ ܥܽܘ̈ܒܰܝ ܠܝ̈ܰܠܕܰܝ ܕܡܶܢܝ̱ ܐܶܢܽܘܢ ܘܰܒ̈ܢܰܝ ܟܝܳܢܝ̱ ܐܶܢܽܘܢ ܘܰܒ̈ܢܰܝ ܫܪܳܪܝ̱ ܒܰܙܒܰܢ ܢܶܪܥܽܘܢ ܒܦܺܐܪ̈ܰܝܗܽܘܢ ܕܰܐܪܓܙܽܘܗ̱ܝ ܠܦܰܠܳܚܳܐ

27 ܒܰܝܰܐ ܠܦܰܠܳܚܳܐ ܕܥܰܡ ܢܶܨܒܬܶܗ ܒܰܪܕܳܐ ܘܓܰܪܦܳܐ ܘܡܳܡܽܘܠܳܐ ܟܠܰܘ ܢܶܨܒܬܳܐ ܚܕܰܬܳܐ ܥܰܬܺܝܩܬܳܐ ܣܰܓܶܦܘ̱ ܒܥܰܒ̈ܕܶܐ ܥܒܰܕ ܓܽܘܢܚܳܐ

28 ܒܰܝܰܐ ܠܰܐܟܳܪܳܐ ܕܰܪܦܶܬܬ ܒܫܽܘܪܶܝܗ ܬܽܘܠܥܳܐ ܒܓܰܘ ܐܰܪܥܳܐ ܘܒܰܐܘܨܳܪܳܐ ܩܳܠܡܳܐ ܒܪܶܡܬܶܗ ܠܗܰܘ ܕܰܠܓܰܘ ܐܟܰܠܬܶܗ ܠܗܰܘ ܕܰܠܒܰܪ

29 ܕܶܐܬܛܠܰܡ ܒܬܰܪ̈ܬܰܝܗܶܝܢ ܢܶܥܼܬܰܪ ܒܬܰܪ̈ܬܰܝܗܶܝܢ ܙܰܪܥܳܐ ܠܒܰܪ ܒ̇ܰܪܳܟ ܡܼܠܺܝ ܐܰܘܨܪ̈ܶܐ ܕܰܠܓܰܘ ܚܰܕܬܳܐ ܘܥܰܬܺܝܩܳܐ ܢܶܣܼܪܰܚ ܒܝܽܘܠܦܳܢܶܗ

30 ܢܦܼܰܩ ܪܳܥܝܳܐ ܚܰܕܬܳܐ ܘܰܐܪܥܽܘܗ̱ܝ ܕܫܘܬܝܢ ܙܪܺܝܦܬܳܐ ܘܥܺܝܡܳܐ ܘܕܰܘܶܕܘ ܠܥ̈ܶܠܳܢܶܐ ܠܕܺܐܒ̈ܶܐ ܪܚܶܡܘ̱ ܘܰܣܒܰܪܘ̱ ܕܗܰܘ ܪܳܥܝܳܐ ܕܰܐܒܰܐ ܗ̱ܘ

31 ܕܫܶܟܪܰܬ ܒܚܶܫܽܘܟܳܐ ܥܰܝܢܳܐ ܕܥܰܗܠܳܢܳܐ ܚܙܳܝܗܽܘܢ ܘܡܰܕܥܗܽܘܢ ܢܶܬܩܰܢ ܒܝܰܕ ܢܽܘܗܪܳܟ ܘܥܰܠ ܪܳܥܝܳܐ ܢܶܦܼܢܽܘܢ ܘܠܶܐܡܪ̈ܰܘܗ̱ܝ ܢܶܪܥܽܘܢ

32 ܘܰܕܐܶܡܪ̈ܶܐ ܘܕܺܐܒ̈ܶܐ ܐ̱ܘܶܝܢ ܐܶܢܽܘܢ ܒܟܽܘܝܳܠܳܐ ܥܶܪܒܳܐ ܕܩܼܰܪ ܚܰܒܪܶܗ ܓܥܽܘܪ ܡܳܪܝ̱ ܒܣܳܛܳܢܳܐ ܕܡܶܢ ܐܶܡܪ̈ܶܐ ܒܪ̈ܺܝܪܶܐ ܥܰܒܼܕܳܐ ܢܶܡܪ̈ܶܐ ܕܚܺܝ̈ܠܶܐ

33 ܡܰܢܽܘ ܕܢܶܬܶܠ ܠܶܗ ܠܗܰܘ ܪܳܥܝܳܐ ܕܥܶܪ̈ܒܶܐ ܕܕܺܐܒ̈ܶܐ ܢܫܰܚܠܶܦ ܗ̱ܘܳܐ ܡܰܢܽܘ ܕܠܰܐܟܳܪܳܐ ܢܶܬܶܠ ܕܙܺܝ̈ܙܳܢܶܐ ܠܚܶܛ̈ܶܐ ܢܫܰܚܠܶܦ ܗ̱ܘܳܐ

34 ܗܳܐ ܠܟܳܗ̈ܢܶܐ ܦܽܘܪܣܳܐ ܕܰܢܫܰܚܠܦܽܘܢ ܕܺܐܒ̈ܶܐ ܘܥܰܡܗܽܘܢ ܠܙܺܝ̈ܙܳܢܶܐ ܡܶܠܐܰܐ ܗ̱ܘ ܗܳܐ ܠܳܐܶܝܢ ܒܕܺܐܒ̈ܶܐ ܕܢܶܗܘܽܘܢ ܥܶܪ̈ܒܶܐ ܘܟܽܘ̈ܒܶܐ ܕܢܶܗܘܽܘܢ ܙܰܪ̈ܥܶܐ

35 ܥܰܕܰܪ ܠܦܰܠܳܚܳܐ ܕܰܢܨܰܒܬܳܗ̇ ܠܰܐܪܥܳܐ ܨܗܺܝܬܳܐ ܒܡܰܒ̈ܽܘܥܶܐ ܒܐܶܣܳܐ ܘܒܰܫܪܽܘܝܳܢܳܐ ܘܒܐܫܟܪܥܐ ܡ̈ܠܺܝܠܳܝܶܐ ܘܰܒܐ̱ܪ̈ܳܙܶܐ ܡܫ̈ܺܝܚܳܝܶܐ

36 ܢܶܗܘܽܘܢ ܒܣܰܘ̈ܟܰܝܗܽܘܢ ܠܡܳܐܢܳܐ ܠܦܳܪܰܚܬܳܐ ܠܰܐܝܬܳܐ ܕܡܶܢ ܪܽܘܚܩܳܐ ܕܳܐܬܶܝܢ ܠܡܶܙܡܰܪ ܠܳܟ ܕܰܘܺܝܕ ܒܩ̈ܺܝܢܳܬܳܐ ܘܫܽܘܒܚܳܐ ܒܢܶܥܡ̈ܳܬܳܐ

37 ܘܫܶܦܠܳܐ ܕܝܰܩܰܪ ܓܶܦܶܗ ܘܶܐܡܐܰܢ ܩܰܦܶܣ ܦܽܘܡܶܗ ܠܫܰܗܪܳܐ ܘܗܽܘܠܳܠܳܐ ܒܩܺܝܬܳܪܗܽܘܢ ܫܰܗܪ̈ܶܐ ܒܟܶܢܳܪܗܽܘܢ ܢܰܟ̈ܦܶܐ ܢܶܒܥܽܘܢ ܥܠܰܝ ܡܳܪܰܢ

Nisibis 31

Syriac Lexeme

Corpus Text ID:

NHSL Work ID(s):

Source:

Preparation of Electronic Edition:

Open Access and Copyright:

Note:

Bibliography: