Digital Syriac Corpus

Nisibis 32

   https://syriaccorpus.org/286
  TEI/XML   Text  
Show  
section :
line :
Table of Contents  
1 2 3 4 5 6 7 8 9 10 11 12 13 14 15 16
32 Nisibis XXXII
ܒܰܪ ܩܳܠܶܗ
1 ܪܳܦܩܳܐ ܚܳܬܶܗ ܕܠܳܒܳܢ ܠܳܐ ܕܳܡܝܳܐ ܗܘܳܬ ܠܶܗ ܠܗܳܝ ܚܶܟܡܬܳܐ ܫܦܺܝܬܳܐ ܠܗܰܘ ܨܶܢܥܬܳܐ ܣܢܺܝܬܳܐ ܒܕܺܝܠܶܗ ܚܝܳܬ ܪܳܦܩܳܐ ܒܕܺܝܠܳܗ̇ ܐܶܒܰܕ ܠܳܒܳܢ
ܥܽܘܢܺܝܬܳܐ: ܬܶܫܒ̈ܚܳܢ ܠܝܳܕܰܥ ܟܽܠ
2 ܫܦܺܝܬܳܐ ܕܢܶܩܦܰܬ ܠܶܗ ܠܣܳܒܳܐ ܕܕܰܒܪܳܗ̇ ܗ̱ܘܳܐ ܪܳܡܳܐ ܚܼܙܳܐ ܕܠܰܐܒܪܳܡ ܣܰܓܺܝ ܥܗܺܝܕܬܳܐ ܗܘܳܬ ܫܰܕܰܪ ܡܼܟܰܪ ܕܰܒܪܳܗ̇ ܘܰܐܥܠܳܗ̇ ܠܝܽܘܪܬܳܢܶܗ
3 ܚܶܛܬܳܐ ܡܶܢ ܒܶܝܬ ܟܽܘ̈ܒܶܐ ܢܶܦܩܰܬ ܘܙܺܝ̈ܙܳܢܶܐ ܘܡܶܢ ܐܰܘܨܪܳܐ ܕܚ̈ܰܢܦܶܐ ܠܗܰܘ ܡܰܥܡܪܳܐ ܕܟܺܐܢ̈ܶܐ ܐܰܘ ---- ----- ܀܀܀
4 ܪܰܒܗܽܘܢ ܟܣܶܐ ܘܰܨܢܺܝܥ ܘܺܝܠܶܦܘ̱ ܐܘܡܳܢܘܬܶܗ ܘܕܰܡܺܝܘ̱ ܒܨ̈ܶܢܥܳܬܶܗ ܕܰܠܐܺܝ ܒܗܽܘܢ ܣܰܓܺܝ ܕܢܶܗܘܽܘܢ ܒ̈ܢܰܝ ܓܰܒܶܗ ܡܳܐܢܰܘ̈ܗ̱ܝ ܘܬܰܠܡ̈ܺܝܕܰܘܗ̱ܝ
5 ܡܶܢ ܕܺܝܠܗܽܘܢ ܡܨܶܝܢ ܗ̱ܘܰܘ ܠܰܡܚܳܪ ܒܗܳܝ ܕܺܝܠܶܗ ܕܰܐܝܟܰܢ ܕܳܐܦ ܠܶܝܳܐ ܠܳܐ ܕܳܡܝܳܐ ܠܪܳܚܶܝܠ ܗܳܟܰܢ ܐܳܦ ܠܳܐ ܦܬܰܟܪܳܐ ܕܳܡܶܐ ܠܰܐܠܳܗܳܐ
6 ܘܶܐܢܗܽܘ ܕܳܐܦ ܚܳܬܳܐ ܠܳܐ ܕܳܡܝܳܐ ܠܚܳܬܳܗ̇ ܟܰܕ ܒܰܪ̱ܬ ܟܝܳܢܳܗ̇ ܗܺܝ ܟܡܳܐ ܟܺܝܬ ܢܽܘܟܪܳܝܳܐ ܛܽܘܥܝܰܝ ܠܰܐܠܳܗܳܐ ܕܶܐܬܟܰܢܝܰܬ ܒܰܫܡܶܗ
7 ܘܝܰܥܩܽܘܒ ܐܳܦܶܢ ܢܰܟܠܽܘܗ̱ܝ ܐܶܬܪܡܺܝ ܩܢܳܗ̇ ܟܺܐܢܳܐ ܠܰܐܪܥܳܐ ܕܰܐܓܥܶܠܘ̱ ܠܶܗ ܙܰܪܥܶܗ ܫܕܳܐ ܒܓܰܘܳܗ̇ ܕܠܳܐ ܢܦܽܘܫ ܗ̱ܘܳܐ ܙܰܪܥܶܗ ܒܰܐܬܪܳܐ ܕܙܺܝ̈ܙܳܢܶܐ
8 ܩܽܘܫܬܰܐ ܗ̱ܘ ܕܠܳܐ ܡܶܡܬܽܘܡ ܐܶܬܪܡܺܝ ܕܢܶܩܰܦ ܗ̱ܘܳܐ ܫܪܳܪܶܗ ܠܚܰܢܦܽܘܬܳܐ ܘܩܽܘܕܫܶܗ ܠܛܰܡܐܽܘܬܳܐ ܘܢܰܚܬܶܗ ܠܨܳܐܽܘܬܳܐ ܘܶܐܣܛܶܗ ܠܦܽܘܠܦܳܠܳܐ
9 ܪܳܦܩܳܐ ܠܽܐܘܡܢܽܘܬܶܗ ܠܩܽܘܒܠܶܗ ܠܒܶܫܬܳܗ̇ ܗܘܳܬ ܘܰܒܨܶܢܥܬܶܗ ܥܰܡܶܗ ܢܶܦܠܰܬ ܒܰܐܓܽܘܢܳܐ ܒܙܰܝܢܳܐ ܕܰܚܫܼܰܠ ܗܶܦܟܰܬ ܠܶܒܫܰܬ ܘܚܰܝܶܒܬܶܗ
10 ܘܟܰܕ ܛܳܒ ܗ̱ܽܘ ܥܺܣܽܘ ܐܺܝܬܰܘܗ̱ܝ ܒܪܳܗ̇ ܒܽܘܟܪܳܗ̇ ܝܶܕܥܰܬ ܕܢܽܘܟܪܳܝ ܗ̱ܽܘ ܠܙܰܪܥܳܐ ܕܫܰܪ̈ܺܝܪܶܐ ܘܟܶܐܡܰܬ ܠܚܳܪܳܢ ܗ̱ܽܘ ܡܰܚܝܳܢ ܒܕܽܘܒܳܪ̈ܰܘܗ̱ܝ
11 ܪܰܒܗܽܘܢ ܕܚܶܪ̈ܢܳܝܶܐ ܫܪܳܐ ܗ̱ܘܳܐ ܒܓܰܘ ܥܺܣܽܘ ܐܶܨܛܰܢܥܰܬ ܪܳܦܩܳܐ ܙܟܳܬܶܗ ܠܗܰܘ ܕܰܐܠܶܦ ܕܡܶܕܶܡ ܚܠܳܦ ܡܶܕܶܡ ܢܶܥܒܕܽܘܢ ܒ̈ܢܰܝ ܐ̱ܢܳܫܳܐ
12 ܘܰܩܪܳܬ ܠܬܰܡܺܝܡܳܐ ܘܢܶܟܠܰܬ ܘܶܐܠܒܶܫܬܶܗ ܡܰܫ̈ܟܶܐ ܒ̈ܢܰܝ ܪܳܙܶܗ ܕܺܝܠܶܗ ܕܣܳܛܳܢܳܐ ܕܰܒܟܽܠܗܶܝܢ ܕܺܝܠܶܗ ܢܶܙܕܟܶܐ ܓܡܺܝܪܳܐܺܝܬ
13 ܘܢܶܟܠܰܬ ܘܚܰܠܶܨܬܶܗ ܓܰܙܳܐ ܕܒܽܘܪ̈ܟܳܬܳܐ ܘܒܶܥܪܰܬ ܘܣܰܦܶܩܬܶܗ ܕܠܳܐ ܢܶܫܬܼܒܶܩ ܗܰܘܦܳܐ ܠܰܒܪܳܗ̇ ܕܣܶܡܳܠܳܐ ܕܰܬܣܰܪܩܺܝܘܗ̱ܝ ܓܰܒܶܗ
14 ܘܰܐܝܟܰܢ ܕܣܰܪܶܩܬܶܗ ܡܶܢܗܶܝܢ ܕܒܽܘܪ̈ܟܳܬܳܐ ܫܰܕܪܰܬ ܠܬܰܡܺܝܡܳܐ ܡܳܐܢܳܐ ܕܫܰܦܝܽܘܬܳܐ ܘܰܢܚܼܶܬ ܚ̇ܳܠܶܨ ܬܽܘܒ ܕܰܢܡܰܣܟܢܶܝܗ̇ ܠܚܳܪܳܢ
15 ܙܟܳܬܶܗ ܠܥܶܠ ܘܰܠܬܰܚܬ ܪܳܦܩܳܐ ܠܢܳܟܽܘܠܳܐ ܒܢܶܟܠܶܗ ܢܟܰܠܬܶܗ ܗܘܳܬ ܙܟܳܬܶܗ ܒܒܽܘܪ̈ܟܳܬܳܐ ܙܟܳܬܶܗ ܒܰܫܒܳܬܳܐ ܕܰܐܝܬܺܝ ܠܬܽܘܠܡܳܕܶܗ
16 ܘܫܰܕܪܰܬ ܠܨܰܝܕܳܐ ܘܰܐܓܰܪ ܘܕܳܨ ܐܶܢܶܝܢ ܠܬܰܪ̈ܬܶܝܢ ܛܰܠܝ̈ܳܬܳܐ ܛܽܘܦܣܳܐ ܕܰܟܢܽܘܫ̈ܳܬܳܐ ܕܚܳܫܚܳܐ ܗ̱ܝ ܠܬܰܪ̈ܬܰܝܗܶܝܢ ܗܳܝ ܡܰܓܪܰܬ ܪܽܘܚܳܐ
SEDRA IV

Syriac Lexeme

About This Digital Text
Corpus Text ID:
https://syriaccorpus.org/286
Source:
Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1961). Link to Syriaca.org Bibliographic Record
Type of Text: Digital Edition  
Status: Edited  
Publication Date: June 12, 2019
Preparation of Electronic Edition:
TEI XML encoding by James E. Walters.
Syriac text transcribed by Michael Oez.
Open Access and Copyright:

Creative Commons License

 See details...
How to Cite this Electronic Edition
Note:
Ephrem the Syrian, “Nisibis 32” , Digital Syriac Corpus, last modified June 12, 2019, https://syriaccorpus.org/286.
Bibliography:
“Nisibis 32.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/286.

Show Citation Styles
Linked Data