Nisibis 34

https://syriaccorpus.org/288

TEI/XML Text

Show

section : section

line : line

Table of Contents

1 2 3 4 5 6 7 8 9 10 11 12 13

34 Nisibis XXXIV

ܬܽܘܒ ܥܰܠ ܚܳܪܳܢ ܥܰܠ ܩܳܠܳܐ ܕܟܰܠܰܬ ܡܰܠܟܳܐ

1 ܐܳܣܝܳܐ ܐܰܒܪܳܡ ܡܫܰܒܚܳܐ ܠܚܳܪܳܢ ܐܶܬܳܐ ܕܰܟܪܺܝܗܳܐ ܗܘܳܬ ܓܳܫܳܗ̇ ܘܰܬܡܰܗ ܘܶܐܬܦܼܢܺܝ ܠܰܐܪܥܳܐ ܕܰܟܢܰܥܢ ܡܰܛܺܝ ܠܡܶܨܪܶܝܢ ܠܟܽܠܶܗ ܓܽܘܫܡܳܐ ܣܰܥܪܶܗ ܘܰܢܚܼܶܬ ܘܰܥܼܨܰܒ ܘܰܐܣܺܝ ܒܡܶܠܬܳܐ ܕܩܽܘܫܬܳܐ ܕܰܐܒܪܳܡ ܠܳܐ ܣܦܼܰܩ ܠܶܟܝ̱ ܡܰܢܽܘ ܕܣܳܦܶܩ ܠܶܟܝ̱ ܚܳܪܳܢ ܕܟܽܘܪܗܳܢܳܗ̇ ܒܰܣܼܶܡ ܠܳܗ̇

ܥܽܘܢܺܝܬܳܐ: ܒܪܺܝܟ ܗ̱ܽܘ ܕܠܳܐ ܡܶܢ ܡܬܽܘܡ ܫܰܒܩܳܗ̇ ܠܐ̱ܢܳܫܽܘܬܳܐ ܕܰܐܣܓܺܝ ܒܟܽܠ ܕܳܪ̈ܺܝܢ ܣܳܥܽܘܪ̈ܶܝܗ̇

2 ܐܳܣܝܳܐ ܝܰܥܩܽܘܒ ܡܫܰܡܗܳܐ ܠܚܳܪܳܢ ܐܶܬܳܐ ܕܰܢܕܺܝܩ ܥܠܶܝܗ̇ ܓܳܫܳܗ̇ ܘܰܫܕܳܗ̇ ܘܰܐܪܦܺܝܗ̇ ܕܠܳܐ ܢܶܒܼܛܰܠ ܒܳܗ̇ ܫܢ̈ܰܝܳܐ ܥܶܣܪܺܝܢ ܡܟܰܢܶܟ ܗ̱ܘܳܐ ܠܳܗ̇ ܘܕܰܚܼܙܳܐ ܕܰܫܢܳܬ ܐܳܦ ܗܶܡܣܰܬ ܒܶܗ ܐܰܪܦܺܝܗ̇ ܘܫܰܢܺܝ ܗܳܐ ܡܺܝ̈ܟܰܝ ܡܪ̈ܺܝܪܺܝܢ ܘܝ̈ܰܠܕܰܝܟܝ̱ ܓܕܺܝ̈ܕܺܝܢ ܚܳܪܳܢ ܐܶܬܚ̇ܰܠܺܝ ܒܰܨܠܺܝܒܳܐ

3 ܒܳܒܶܠ ܐܺܝܬܶܝܗ̇ ܫܒܳܒܳܬܳܐ ܕܗܰܘ ܒܶܢܝܳܢܳܐ ܕܦܳܫܘ̱ ܒܰܢ̈ܳܝܰܘܘ̱ܝ؟ ܡܶܨܪܶܝܢ ܐܺܝܬܶܝܗ̇ ܫܒܳܒܳܬܳܐ ܕܰܣܕܽܘܡ̈ܳܝܶܐ ܐܰܢ̱ܬ ܕܶܝܢ ܚܳܪܳܢ ܗܳܐ ܣܺܝܡܬܝ̱ ܗܽܘ ܒܰܫܒܳܒܽܘܬܳܐ ܕܰܡܫܰܒܰܚܬܳܐ ܐܽܘܪܗܳܝ ܦܺܐܝܬܳܐ ܒܰܪܬܳܐ ܕܶܡܝ̱ ܠܶܐܡܶܟܝ̱ ܕܡܶܠܚܳܐ ܗ̱ܝ ܒܓܰܘ ܬܺܒܶܝܠ ܘܡܰܕܶܟܝ̱ ܒܝܽܘܠܦܳܢܳܗ̇ ܪܶܥܝܳܢܶܟܝ̱

4 ܐܰܝܢܳܐ ܕܚܳܐܰܪ ܕܫܳܥܬܳܐ ܒܓܰܘ ܡܰܚܙܺܝܬܳܐ ܡܶܨܛܰܒܰܬ ܒܳܗ̇ ܐܰܢ̱ܬܝ ܕܶܝܢ ܚܳܪܳܢ ܨܳܐܬܳܐ ܗܳܐ ܡܰܚܙܺܝܬܶܟܝ̱ ܫܒܺܝܚܳܐ ܘܕܰܟܝܳܐ ܐܶܨܛܰܒܰܬܝ̱ ܒܳܗ̇ ܒܰܡܒܰܪܟܳܬܳܐ ܕܣܺܝܡܳܐ ܩܕܳܡܰܝܟܝ̱ ܕܬܶܫܦܪܺܝܢ ܠܝܶܫܽܘܥ ܚܽܘܪܝ̱ ܒܳܗ̇ ܘܰܫܦܰܪܝ̱ ܒܳܗ̇ ܕܬܶܗܘܶܐ ܠܥܽܘܕܪܳܢܶܟܝ̱ ܕܰܠܡܳܐ ܠܟܽܘܐܳܪܳܐ ܬܶܗܘܶܐ ܠܶܟܝ̱

5 ܚܙܰܘ ܠܡܶܨܪܶܝܢ ܟܪܺܝܗܳܬܳܐ ܕܳܐܦ ܐܶܬܚܰܠܡܰܬ ܒܡܰܐܣܶܐ ܟܽܠ ܘܚܳܠܕܳܝܬܐ ܕܰܦܬܰܟܪܽܘܬܳܐ ܒܚܳܪܳܢ ܚܶܠܕܰܬ ܘܡܳܐ ܕܶܐܬܚܰܠܡܰܬ ܠܰܝܬ ܬܽܘܟܠܳܢܳܐ ܥܰܠ ܚܽܘܠܡܳܢܳܗ̇ ܕܰܒܟܽܠ ܥ̈ܶܠܠܳܢ ܣܶܬܳܪܳܐ ܗ̱ܝ ܡܚܽܘܬܳܗ̇ ܒܳܒܶܠ ܘܳܐܦ ܚܳܪܳܢ ܘܡܶܨܪܶܝܢ ܬܠܳܬܰܝܗܶܝܢ ܫܡ̈ܳܗܶܐ ܬܠܺܝ̈ܬܳܝܶܐ ܥܡܼܰܕ ܘܰܠܒܼܶܫ

6 ܡܳܐ ܕܳܡܶܐ ܕܶܝܢ ܥܳܠܡܳܐ ܠܨܰܠܡܳܐ ܪܰܒܳܐ ܕܰܚܼܙܳܐ ܛܪܽܘܢܳܐ ܪܺܝܫܶܗ ܒܳܒܶܠ ܡܨܰܥܬܶܗ ܐܰܪܥܳܐ ܕܺܝܗܽܘܕ ܒܛܽܘܦܣܳܐ ܕܪ̈ܶܓܠܶܐ ܣܺܝܡܳܐ ܡܶܨܪܶܝܢ ܓܽܘܫܡܰܐ ܗ̱ܘ ܪܰܒܳܐ ܕܳܐܣܰܘ̈ܳܬܳܐ ܪܰܘܪ̈ܒܶܐ ܥܡܰܠܘ̱ ܒܶܗ ܛܳܒܳܐ ܒܝܰܕ ܥܰܒ̈ܕܰܘܗ̱ܝ ܡܰܬܚܶܗ ܠܣܽܘܥܪܳܢܳܐ ܐܰܝܟ ܐܳܣܝܳܐ ܪܰܒܳܐ ܠܟܽܠ ܦܶܢܝ̈ܳܢ

7 ܘܰܐܝܟ ܕܰܐܒܪܳܗܳܡ ܐܳܣܝܳܐ ܡܶܢ ܨܶܝܕ ܪܺܝܫܳܐ ܐܰܣܺܝ ܘܰܢܚܼܶܬ ܐܳܦ ܗ̱ܽܘ ܡܽܘܫܶܐ ܐܰܣܝܶܗ ܡܶܢ ܨܶܝܕ ܪ̈ܶܓܠܶܐ ܐܳܘ ܠܰܟܪܺܝܗܳܐ ܕܳܐܣܰܘ̈ܳܬܶܗ ܡܶܢ ܟܽܠ ܓܰܒ̈ܰܘܗ̱ܝ ܘܡܶܢ ܚܽܘܠܡܳܢܳܐ ܡܦܰܠܶܐ ܗ̱ܘ ܒܰܣܶܡ ܠܶܗ ܒܪܺܝܟ ܗ̱ܽܘ ܕܠܳܐ ܡܶܢ ܡܬܽܘܡ ܫܰܒܩܳܗ̇ ܠܐ̱ܢܳܫܽܘܬܳܐ ܕܰܐܣܓܺܝ ܒܟܽܠ ܕܳܪ̈ܺܝܢ ܥܽܘܪ̈ܢܶܝܗ̇

8 ܘܰܐܝܟ ܕܰܠܥܶܩܒܳܐ ܟܪܺܝܗܬܳܐ ܐܰܣܺܝ ܝܰܘܣܶܦ ܠܰܐܪܥܳܐ ܕܡܶܨܪܶܝܢ ܢܒܺܝ̈ܶܐ ܠܨܶܗܝܽܘܢ ܐܰܣܝܽܘܗ̇ ܐܰܝܟ ܕܰܠܠܶܒܳܐ ܐܳܦ ܕܳܢܺܝܐܶܝܠ ܠܒܳܒܶܠ ܟܰܢܶܟ ܐܰܝܟ ܕܰܠܪܺܝܫܳܐ ܕܰܫܼܢܳܐ ܒܕܰܒܪܳܐ ܘܶܐܬܚܠܶܡ ܘܰܐܘܕܺܝ ܡܶܨܪܶܝܢ ܐܳܣܺܝܬܳܐ ܡܗܺܝܪܰܬ ܒܣܰܡܳܡ̈ܢܶܝܗ̇ ܟܺܐ̈ܒܶܝܗ̇ ܒܨܶܒܝܳܢܳܗ̇ ܐܶܬܩܰܫܺܝܘ

9 ܟܝܳܢܳܐ ܟܽܠܶܗ ܐܶܬܟܪܶܗ ܒܰܕܡܽܘܬ ܓܽܘܫܡܳܐ ܒܟܽܘܪܗܳܢ ܛܽܘܥܝܰܝ ܬܟܶܒܘ ܗ̱ܘܰܘ ܣܳܥܽܘܪ̈ܰܘܗ̱ܝ ܡܫܰܡ̈ܗܶܐ ܐܳܣܰܘ̈ܳܬܳܐ ܕܢܶܬܰܐܣܶܐ ܗ̱ܘܳܐ ܡܶܢ ܟܽܘܪܗܳܢܳܐ ܟܰܣܝܳܐ ܕܢܰܦܫܳܐ ܘܰܢܩܽܘܡ ܢܰܘܕܶܐ ܠܳܐܣܝܳܐ ܕܚܰܢܶܗ ܫܽܘܒܚܳܐ ܠܗܰܘ ܕܰܐܟܪܶܟ ܠܟܺܐܢ̈ܶܐ ܒܟܽܠ ܦܶܢܝ̈ܳܢ ܕܠܰܟܪܺܝܗܬܳܐ ܬܺܒܶܝܠ ܢܶܣܥܽܘܪ ܗ̱ܘܳܐ

10 ܠܳܐ ܣܦܼܶܩܘ̱ ܠܶܗ ܕܶܝܢ ܠܥܳܠܡܳܐ ܐܳܣܰܘ̈ܳܬܳܐ ܒܣܰܡ̈ܳܡܢܰܝܗܽܘܢ ܚܙܳܝܗ̱ܝ ܘܶܐܬܪܩܶܡ ܐܳܣܝܳܐ ܕܰܠܟܽܠ ܣܳܦܶܩ ܓܙܰܪ ܡܶܢ ܦܰܓܪܶܗ ܣܳܡ ܥܰܠ ܟܺܐܒܶܗ ܘܰܐܣܺܝ ܚܫܰܢ ܒܦܰܓܪܶܗ ܘܰܕܡܶܗ ܐܰܚܠܡܳܗ̇ ܡܚܽܘܬܰܢ ܫܽܘܒܚܳܐ ܠܣܰܡ ܚ̈ܰܝܶܐ ܕܗܽܘܝܽܘ ܣܦܼܰܩ ܘܰܐܣܺܝ ܟܺܐܒܳܐ ܕܢܰܦܫ̈ܳܬܳܐ ܒܝܽܘܠܦܳܢܶܗ

11 ܝܶܫܽܘܥ ܐܺܝܬܰܘܗ̱ܝ ܐܳܣܝܰܢ ܘܰܐܝܟ ܡܳܐ ܕܡܶܡܬܽܘܡ ܒܶܗ ܗ̱ܽܘ ܗܘܰܝܢܰܢ ܗܳܟܰܢ ܒܺܐܝܕܶܗ ܐܶܬܰܐܣܶܝܢ ܘܰܐܝܟ ܐܰܠܳܗܳܐ ܟܝܳܢܳܐ ܘܟܺܐܒܳܐ ܕܢܰܦܫܳܐ ܝܳܕܰܥ ܕܳܐܦ ܥܳܒܽܘܕܰܐ ܗ̱ܘ ܐܳܦ ܥܳܨܽܘܒܰܐ ܗ̱ܘ ܘܳܐܣܝܳܐ ܘܣܰܡܳܐ ܫܽܘܒܚܳܐ ܠܡܰܢ ܕܰܒܼܪܳܐ ܡܶܕܶܡ ܕܠܰܝܬܰܘܗ̱ܝ ܗ̱ܘܳܐ ܘܟܰܕ ܬܽܘܒ ܚܛܳܐ ܘܰܢܦܼܰܠ ܐܰܩܺܝܡܶܗ

12 ܐܳܣܰܘ̈ܳܬܳܐ ܕܥܳܠܡܳܐ ܒܚܰܫܰܐ ܗ̱ܘ ܡܨܶܝܢ ܠܡܰܐܣܳܝܽܘ ܣܰܓܺܝ ܕܚܺܝܠܳܐ ܐܺܝܕܗܽܘܢ ܠܰܡܡܰܚܰܝ̈ܳܐ ܠܰܡܚܽܘܬܰܢ ܡܳܪܝ̱ ܣܰܓܺܝ ܚܰܒܺܝܒ ܢܰܩܦܳܗ̇ ܕܺܐܝܕܳܟ ܕܳܐܦ ܗܺܝ ܨܶܒܥܳܟ ܓܶܫܬܳܐ ܗ̱ܝ ܕܪ̈ܰܚܡܶܐ ܒܪܺܝܟ ܗ̱ܽܘ ܕܡܶܢ ܢܰܚ̈ܬܰܘܗ̱ܝ ܒܪ̈ܶܝܟܶܐ ܘܪ̈ܰܟܺܝܟܶܐ ܚܰܝܠܳܐ ܢܦܼܰܩ ܘܰܐܣܺܝ ܢܺܝܚܳܐܺܝܬ

13 ܛܳܒܳܐ ܕܰܠܐܺܝ ܒܥܳܠܡܳܐ ܕܢܶܗܘܶܐ ܟܽܠܶܗ ܓܽܘܫܡܳܐ ܚܠܺܝܡܳܐ ܠܳܐ ܬܶܒܣܼܶܐ ܡܳܪܝ̱ ܒܪܶܚܡܬܳܟ ܥܰܠ ܗܰܕܳܡܳܐ ܚܰܕ ܚܰܠܳܫܳܐ ܒܰܓܫܽܘܡ ܟܺܐܢ̈ܶܐ ܢܶܬܪܟܶܒ ܡܳܪܝ̱ ܘܢܶܗܘܶܐ ܩܰܒܥܶܗ ܥܰܡܗܽܘܢ ܠܥܳܠܰܡ ܛܳܒܳܐ ܕܰܩܒܰܥ ܗ̱ܘܳܐ ܠܶܐܕܢܳܐ ܕܶܐܬܦܰܣܩܰܬ ܠܳܐ ܬܦܰܣܩܳܢܝ̱ ܡܶܢܳܟ ܕܰܐܪܓܶܙܬܳܟ

SEDRA IV

Syriac Lexeme

About This Digital Text

Corpus Text ID:

https://syriaccorpus.org/288

NHSL Work ID(s):

http://syriaca.org/work/8767
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1961).