On the Revelations to Abraham - ܥܠ ܓܠܝܢ̈ܐ ܕܠܘܬ ܐܒܪܗܡ

1 :ܡܵܪܹܐ ܒܪܝܼܬܼܵܐ ܓ̣ܒܼܵܐ ܚܲܕܼ ܥܲܡܵܐ ܕܢܸܗܘܹܐ ܕܝܼܠܹܗ 2 ܘܒܼܐܝܼܕܹܗ ܐܲܠܸܦ ܚܹܝܠ ܪܲܒܿܘܼܬܼܵܐ ܠܟܼܠܗܘܿܢ ܥܲܡܡܹ̈ܐ ܀ 3 :ܫ̣ܒܲܩ ܟܠ ܥܲܡܡܝܼ̈ܢ ܒܝܲܕܼ ܚܹܐܪܘܼܬܼܵܐ ܕܣ̣ܵܡ ܒܲܟܝܵܢܵܐ 4 ܘܐܵܩܸܦ ܨܹܐܕܼܵܘܗܝ ܚܕܼܵܐ ܝܵܪܬܿܘܼܬܼܵܐ ܒܝܲܕܼ ܓܸܠܝܵܢܵܘ̈ܗܝ ܀ 5 :ܐܲܪܡܝܼ ܥܠܲܝܗܘܿܢ ܛܲܒܼܥܵܐ ܕܲܫܡܹܗ ܘܲܪܫܲܡ ܐܸܢܘܿܢ 6 ܕܠܵܐ ܢܸܬܼܚܲܠܛܘܼܢ ܥܲܡ ܫܲܪ̈ܒܼܵܬܼܵܐ ܘܢܸܛܥܘܿܢ ܠܲܫܡܹܗ ܀ 7 :ܣܵܓܼ ܒܐܲܦܲܝ̈ܗܘܿܢ ܢܵܡܘܿܣ ܡܸܠܵܘ̈ܗܝ ܒܲܕܼܡܘܼܬܼ ܫܘܼܪܵܐ 8 ܘܐܸܣܲܪ̣ ܐܸܢܘܿܢ ܒܲܢܛܘܼܪ̈ܬܼܵܐ ܐܲܝܟ ܕܲܒܼܚܲܒܼܠܵܐ ܀ 9 :ܓ̣ܒܼܵܐ ܠܹܗ ܥܘܼܡܪܵܐ ܒܥܲܡܵܐ ܕܲܓܼܒܼ݂ܵܐ ܕܢܸܗܘܹܐ ܕܝܼܠܹܗ 10 ܕܢܲܠܸܦ ܐܸܢܘܿܢ ܕܲܟܼܡܵܐ ܪܵܚܹ̇ܡ ܠܲܒܼܢܲܝ̈ ܒܲܝܬܹܿܗ ܀ 11 :ܚܲܦܸܛ ܐܸܢܘܿܢ ܒܥܸܠܲܬܼ ܕܸܒܼܚܹ̈ܐ ܕܒܸܣܪܵܐ ܘܲܕܼܡܵܐ 12 ܕܢܩܲܪܒܼܘܼܢ ܠܹܗ ܕܸܒܼܚܹ̈ܐ ܕܚܘܼܒܵܐ ܐܲܝܟ ܕܲܠܟܲܣܝܵܐ ܀ 13 :ܝܲܩܲܪ ܐܸܢܘܿܢ ܠܥܹܝܢ ܫܲܪ̈ܒܼܵܬܼܵܐ ܒܚܹܝܠ ܥܘܼܕܪ̈ܵܢܵܘܗܝ 14 ܘܪܲܡܪܸܡ ܐܸܢܘܿܢ ܠܥܸܠ ܡ̣ܢ ܥܲܡܡܹ̈ܐ ܒܙܵܟܼܘܼܬܼ ܚܲܝܠܹܗ ܀ 15 :ܚܵܘܝܼ ܕܟܹܐܢܵܐ ܗ̄ܘ̣ ܕܲܪܕܵܐ ܐܸܢܘܿܢ ܟܲܕܼ ܚܵ̇ܛܝܹܢ ܗ̄ܘ̣ܵܘ 16 ܘܐܲܟܼܪܸܙ ܚܲܝܠܹܗ ܒܝܲܕܼ ܙܵܟܼܘܼܬܼܵܐ ܕܝܲܗ̄ܒܼ݂ ܒܲܩܪ̈ܵܒܹܐ ܀ 17 :ܠܟܼܠܗܘܿܢ ܥܲܡܡܹ̈ܐ ܛܲܟܸܿܣ ܘܐܲܩܝܼܡ ܫܲܠܝܼܛܵܢܹ̈ܐ 18 ܘܥܲܡܵܐ ܕܲܓ̣ܒܼܵܐ ܕܲܒܲܪ ܐܸܢܘܿܢ ܒܲܫܡܵܐ ܕܝܼܠܹܗ ܀ 19 :ܠܵܐ ܡ̣ܢ ܒܝܼܫܘܼ ܐܲܣܠܝܼ ܠܥܲܡܡܹ̈ܐ ܘܲܓܼܒܼ݂ܵܐ ܠܥܲܡܵܐ 20 ܠܗܵܝ̇ ܕܲܥܬܼܝܼܕܼܵܐ ܩܲܕܹܿܡ ܒܲܕ݂ܿܩ ܒܥܲܡܵܐ ܕܲܓܼܒܼ݂ܵܐ ܀ 21 :ܒܝܲܕܼ ܚܲܕܼ ܥܲܡܵܐ ܨܒܼ݂ܵܐ ܕܲܢܚܲܟܸܿܡ ܠܟܼܠܗܘܿܢ ܥܲܡܡܹ̈ܐ 22 ܕܪܸܡܙܵܐ ܕܝܼܠܹܗ ܥܒ݂ܲܕܼ ܟܠ ܡܸܕܹܿܡ ܘܒܹܗ ܩܵܐܹ̇ܡ ܟܠ ܀ 23 ܐܲܝܟ ܫܲܬܼܐܸܣܬܼܵܐ ܕܫܘܼܪܵܝ ܒܲܝܬܵܐ ܣܵܡ̣ܹܗ ܠܥܲܡܵܐ: pb. 58 24 ܘܲܥܠܵܘܗܝ ܫܲܟܼܠܸܠ ܒܸܢܝܵܢ ܥܲܡܡܹ̈ܐ ܐܲܝܟ ܕܲܫܦ݂ܲܪ ܠܹܗ ܀ 25 :ܢܨ̣ܵܒܼ ܠܐܲܒܼܪܵܗܵܡ ܒܲܝܢܬܼ ܥܲܡܡܹ̈ܐ ܐܲܝܟ ܥܸܩܵܪܵܐ 26 ܘܪܲܒܿܝܼ ܢܲܦܫܹܗ ܒܝܲܕܼ ܓܸܠܝܵܢܹ̈ܐ ܐܲܠܵܗܵܝܹ̈ܐ ܀ 27 :ܦܣ݂ܲܩ ܫܲܒܿܘܼܩܵܐ ܡ̣ܢ ܐܝܼܠܵܢܵܐ ܡܲܪܝܼܪ ܢܲܦܸܫܵܐ 28 ܘܲܗܦܲܟ ܢܲܨܲܒܹܿܗ ܘܲܛܥ݂ܲܢ ܣܵܘܟܵܘ̈ܗܝ ܦܹܐܪܹ̈ܐ ܕܫܘܼܒܼܚܵܐ ܀ 29 :ܡ̣ܢ ܚܲܢܦܘܼܬܼܵܐ ܓܠܝܼܙܲܬܼ ܦܹܐܪܹ̈ܐ ܪ̈ܘܼܚܵܢܵܝܹܐ 30 ܗܲܒܸܿܒ݂ ܦܹܐܪܵܐ ܡܠܸܐ ܒܘܼܣܵܡܹ̈ܐ ܚܘܼܒܹܿܗ ܕܐܲܒܼܪܵܡ ܀ 31 :ܗܘ̤ ܡ̣ܢ ܢܲܦܫܹܗ ܒܲܟܲܪ ܘܝܲܗ̄ܒܼ݂ ܠܹܗ ܩܵܠ ܬܵܘܕܿܝܼܬܼܵܐ 32 ܘܐܲܝܟ ܪܹܫܝܼܬܼܵܐ ܩܲܪܝܼܒܼ ܐܵܪܵܐ ܕܗܲܝܡܵܢܘܼܬܹܗ ܀ 33 :ܢܲܓܼܕܹܿܗ ܪܸܡܙܵܐ ܕܚܹܝܠ ܒܵܪܘܿܝܵܐ ܡ̣ܢ ܓܵܘ ܒܵܒܹܠ 34 ܕܢܸܫܒܿܘܿܩ ܐܲܬܼܪܹܗ ܘܢܹܐܙܲܠ ܢܸܥܡܲܪ ܒܐܲܬܼܪܵܐ ܕܢܘܼܟܼܪܵܝ ܀ 35 :ܗܵܕܹܐ ܓܠ̣ܵܐ ܠܹܗ ܐ̄ܪܵܙܵܢܵܐܝܼܬܼ ܗܵܘ̇ ܝܵ̇ܕܲܥ ܟܠ 36 ܕܲܫܒܼܘܿܩ ܛܘܼܥܝܲܝ ܘܬܼܵܐ ܐܸܬܼܢܲܗܲܪ ܒܢܘܼܗܪܵܐ ܕܝܼܕܲܥܬܼܝ ܀ 37 :ܫܪܝܼ ܨܸܒܼܝܵܢܵܟ ܡ̣ܢ ܫܸܫ̈ܠܵܬܼܵܐ ܕܚܲܪ̈ܫܹܐ ܓܠܝܼܦܹ̈ܐ 38 ܘܝܵܗܹ̇ܒܼ ܐ̄ܢܵܐ ܠܵܟ ܚܹܐܪܘܼܬܼ ܢܲܦܫܵܐ ܕܲܠܡܲܢ ܬܸܣܓܿܘܿܕܼ ܀ 39 :ܫܒܼܘܿܩ ܝܵܪܬܿܘܼܬܼܵܐ ܕܒܹܝܬܼ ܐܲܒܼܵܗܲܝ̈ܟ ܡܲܠܝܲܬܼ ܟܘܼ̈ܒܹܿܐ 40 ܘܡܲܩܢܹܐ ܐ̄ܢܵܐ ܠܵܟ ܝܵܪܬܿܘܼܬܼ ܚܘܼܒܵܐ ܕܲܠܘܵܬܼ ܡܵܪܘܼܬܼܝ ܀ 41 :ܠܵܐ ܐܲܟܼܪܝܼ ܗ̄ܘ̣ܵܐ ܕܲܫܒ݂ܲܩ ܐܲܬܼܪܹܗ ܘܐܲܪܦܝܼ ܥܲܡܹܗ 42 ܘܠܵܐ ܐܸܬܼܥܲܣܲܩ ܕܡܸܛܠ ܡܵܢܵܐ ܠܐܲܬܼܪܵܐ ܐ̄ܚܪܹܢܵܐ ܀ 43 :ܠܵܐ ܐܲܥܝܼܩܹܗ ܫܡܵܐ ܕܐܲܟܼܣܸܢܝܵܐ ܡܠܹܐ ܛܘܼܪ̈ܦܹܐ 44 ܘܠܵܐ ܐܲܟܼܪܝܵܬܹܗ ܓܠܝܼܙܘܼܬܼ ܚܘܼܒܵܐ ܕܒܹܝܬܼ ܢܘܼܟܼܪ̈ܵܝܹܐ ܀ 45 :ܚ̣ܙܲܩ ܡ̣ܢ ܐܲܬܼܪܹܗ ܒܐܘܼܪܚܵܐ ܕܡܲܠܝܵܐ ܚܲܫܹ̈ܐ ܘܟܹܐܒܹ̈ܐ 46 ܘܥܲܡ ܗܲܕܿܡܵܘ̈ܗܝ ܚ̣ܙܲܩܘ ܚܘܼܫܵܒܼܵܘ̈ܗܝ ܒܵܬܲܪ ܡܵܪܹܗ ܀ 47 :ܗܘ̤ܵܐ ܢܘܼܟܪܵܝܵܐ ܠܐ̄ܚܝܵܢܘܼܬܼܵܐ ܕܲܒܼܢܲܝ̈ ܥܲܡܹܗ 48 ܘܲܪܚܸ̣ܡ ܘܐܲܚܸܒܼ ܒܲܝܬܵܝܘܼܬܼܵܐ ܕܲܠܘܵܬܼ ܡܵܪܹܗ ܀ 49 :ܢܦܲܩ̣ ܡ̣ܢ ܒܵܒܹܠ ܢܸܒܼܥܵܐ ܕܐܲܪܕܿܝܼ ܟܲܠܕܼܵܝܘܼܬܼܵܐ 50 ܘܐܸܬܵܪ݂ܐ ܠܚܲܪܵܢ ܐܸܡܵܐ ܕܝܸܠܕܲܬ̤ ܚܲܪܵܫܘܼܬܼܵܐ ܀ 51 :ܠܵܐ ܐܸܬܿܕܲܠܚܲܬ̤ ܫܲܦܝܼܘܼܬܼ ܢܲܦܫܹܗ ܒܢܸܚܫܲܝ̈ ܒܵܒܹܠ 52 ܘܠܵܐ ܐܸܬܿܬܿܘܝܼܥܲܬ̤ ܗܲܝܡܵܢܘܼܬܹܗ ܒܚܲܪ̈ܫܲܝ ܚܲܪܵܢ ܀ 53 :ܠܵܐ ܐܸܫܬܲܚܠܲܦ ܨܸܒܼܝܵܢ ܚܘܼܒܹܿܗ ܒܚܘܼܠܵܦ ܐܲܬܼܪܵܐ 54 ܘܠܵܐ ܐܸܬܼܪܲܦܝܼ ܒܝܲܕܼ ܥܸܠ̈ܠܵܬܼܵܐ ܠܣܸܓܼܕܲܬܼ ܨܲܠܡܹ̈ܐ ܀ 55 :ܠܵܐ ܗ̄ܘ̣ܵܐ ܐܲܬܼܪܵܐ ܡܲܪܦܸܐ ܗ̄ܘ̣ܵܐ ܠܵܗ̇ ܠܙܲܕܿܝܼܩܘܼܬܹܗ 56 ܒܨܸܒܼܝܵܢ ܚܘܼܒܹܿܗ ܡܚܲܝܸܨ ܗܘ̣ܵܐ ܠܵܗ̇ ܠܗܲܝܡܵܢܘܼܬܹܗ ܀ 57 :ܓܠܝܼܙ ܗ̄ܘ̣ܵܐ ܦܲܓܼܪܹܗ ܡ̣ܢ ܡܵܘܠܵܕܹܵܐ ܒܸܣܪܵܢܵܝܵܐ 58 ܘܡܵܘܠܸܕܼ ܟܠܫܵܥ ܦܹܐܪܹ̈ܐ ܕܫܘܼܒܼܚܵܐ ܒܓܼܵܘ ܪܸܥܝܵܢܹܗ ܀ pb. 59 59 :ܠܵܘ̇ܝܵܐ ܗ̄ܘ̣ܵܬܼ ܠܹܗ ܥܲܩܪܘܼܬܼ ܒܸܣܪܵܐ ܠܹܗ ܘܲܠܣܲܣܵܐ 60 ܘܡܲܦܪܹܝܢ ܟܠܫܵܥ ܚܘܼܫܵܒܲܝ̈ܗܘܿܢ ܩܵܠ ܬܵܘܕܿܝܼܬܼܵܐ ܀ 61 :ܒܲܚ̣ܪܹܗ ܡܵܪܹܗ ܒܝܲܕܼ ܥܲܩܪܘܼܬܼܵܐ ܐܲܝܟ ܕܲܒܼܢܘܼܪܵܐ 62 ܘܚܵܘܝܼ ܫܘܼܦܪܹܗ ܒܝܲܕܼ ܬܵܘܕܿܝܼܬܼܵܐ ܕܠܵܐ ܦܘܼܠܵܓܼܵܐ ܀ 63 :ܠܵܘ ܗܘ̤ ܝܲܠܦ݂ܹܗ ܕܝܵ̇ܕܲܥ ܗ̄ܘ̣ܵܐ ܠܹܗ ܩܕܼܵܡ ܬܘܼܩܵܢܹܗ 64 ܠܕܼܵܪܹ̈ܐ ܕܐܵܬܹܿܝܢ ܓܠ̣ܵܐ ܚܘܼܡܣܵܢܵܐ ܕܗܲܝܡܵܢܘܼܬܼܗܘܿܢ ܀ 65 :ܡܫܲܢܹܐ ܗ̄ܘ̣ܵܐ ܠܹܗ ܠܬܼܵܘܬܵܒܼܘܼܬܼܵܐ ܕܒܹܝܬܼ ܢܘܼܟܼܪ̈ܵܝܹܐ 66 ܕܢܸܙܪܘܿܥ ܚܘܼܒܵܐ ܘܗܲܝܡܵܢܘܼܬܼܵܐ ܒܐܲܪܥܵܐ ܥܩܲܪܝܵܬܐ ܀ 67 :ܫܒܼܩ݂ܵܗ̇ ܠܚܲܪܵܢ ܕܢܹܐܙܲܠ ܠܐܲܪܥܵܐ ܕܐܸܬܼܡܲܠܟܲܬ̤ ܠܹܗ 68 ܘܢܲܪܡܹܐ ܬܲܡ̇ܢ ܢܘܼܪܵܐ ܕܚܘܼܒܹܿܗ ܘܢܵܘܩܸܕܼ ܝܲܥܪܵܐ ܀ 69 :ܢܦܲܩ̣ ܟܲܕܼ ܚܵܝ̇ܕܹܐ ܒܫܘܼܘܕܵܝ ܡܵܪܹܗ ܕܠܵܐ ܡܸܬܿܕܲܓܲܠ 70 ܘܲܕܼܠܵܐ ܣܲܒܼܪܵܐ ܠܣܲܒܼܪܵܐ ܗܲܝܡܸܢ ܕܝܵ̇ܪܹܬܼ ܐܲܪܥܵܐ ܀ 71 :ܢܦ݂ܲܩ ܙܲܕܼܝܼܩܵܐ ܒܬܸܢܘܝ ܕܐܲܪܥܵܐ ܕܐܸܬܼܡܲܠܟܲܬ̤ ܠܹܗ 72 ܘܗܲܝܡܸܢ ܘܐܲܫܲܪ ܕܗܵܘܹ̇ܐ ܙܲܪܥܹܗ ܡܠܹܐ ܐܸܡ̈ܘܵܬܼܵܐ ܀ 73 :ܗܘ̤ܵܐ ܬܵܘܬܵܒܼܵܐ ܒܐܲܪܥܵܐ ܕܩܲܒܸܿܠ ܒܚܲܕܼ ܡܘܼܠܟܵܢܵܐ 74 ܘܐܲܝܟ ܢܘܼܟܼܪܵܝܵܐ ܥ݂ܡܲܪ ܒܹܗ ܒܐܲܬܪܵܐ ܕܐܸܫܬܵܘܕܿܝܼ ܠܹܗ ܀ 75 :ܐܲܣܓܿܝܼ ܦܲܠ̣ܚܹܗ ܒܐܲܪܥܵܐ ܕܲܟܼܢܲܥ̄ܝܢ ܒܝܲܕܼ ܓܸܠܝܵܢܹ̈ܐ 76 ܘܦܲܢܝܼ ܦܹܐܪܹ̈ܐ ܣܲܒܪܵܐ ܘܚܘܼܒܵܐ ܘܗܲܝܡܵܢܘܼܬܼܵܐ ܀ 77 :ܟܠܝܘܿܡ ܫܵܡܲ݁ܥ ܩܵܠܵܐ ܕܙܲܪܥܵܟ ܝܵ̇ܪܹܬܼ ܐܲܪܥܵܐ 78 ܘܠܲܝܬܿ ܝܵܪܘܿܬܵܪܐ ܘܡܲܫܲܪ ܩܵܠܵܐ ܕܠܵܐ ܣܘܼܥܪ݁ܵܢܹܐ ܀ 79 :ܬܠܝܼ ܠܲܡ ܥܲܝܢܲܝ̈ܟ ܘܚܘܼܪ ܒܲܫܡܲܝܵܐ ܒܕܸܠܩܲܝ̈ ܢܘܼܗܪܵܐ 80 ܘܐܲܟܼܝܼܠ ܚܵܠܵܐ ܕܒܲܣܦܵܪ ܝܲܡܵܐ ܐܸܢ ܡܸܫܟܲܚ ܐܲܢ̄ܬܿ ܀ 81 :ܗܵܟܲܢ ܣܵܓܹ̇ܐ ܝܲܠܕܼܵܐ ܕܲܡܥܲܝ̈ܟ ܩ̣ܪܵܐ ܠܹܗ ܩܵܠܵܐ 82 ܘܲܕܼܠܵܐ ܡܸܢܝܵܢ ܗܵܘܹ̇ܐ ܙܲܪܥܵܟ ܐܲܟܼܡܵܐ ܕܐܸܡ̇ܪܹܬܼ ܀ 83 :ܡܬܼܘܿܚ ܚܘܼܫܵܒܲܝ̈ܟ ܠܐܲܪܒܲܥ ܦܸܢ̈ܝܵܢ ܘܚܘܼܪ ܒܐܲܪ̈ܥܵܬܼܵܐ 84 ܕܲܥܬܼܝܼܕܼ ܙܲܪܥܵܟ ܕܢܸܟܼܒܿܘܿܫ ܐܸܢܹܝܢ ܒܚܲܕܼ ܡܲܕܲܐܬܼܵܐ ܀ 85 :ܒܝܼ ܠܲܡ ܝܼܡܝܼܬܼ ܘܠܵܐ ܡܕܲܓܸܿܠ ܐ̄ܢܵܐ ܒܲܟܼܝܵܢܝ ܟܲܣܝܵܐ 86 ܕܒܼܵܟ ܢܸܬܼܒܲܪܟܼܘܼܢ ܥܲܡܡܹ̈ܐ ܕܐܲܪܥܵܐ ܒܗܲܝܡܵܢܘܼܬܼܵܐ ܀ 87 :ܚܠܵܦ ܕܲܫܠ݂ܲܚܬܵܝܗܝ ܠܢܲܚܬܵܐ ܣܲܢܝܵܐ ܕܫܸܡ ܚܲܢܦܘܼܬܼܵܐ 88 ܡܟܲܣܸܐ ܐ̄ܢܵܐ ܒܵܗ̇ ܒܗܲܝܡܵܢܘܼܬܼܵܟ ܨܲܥܪܵܐ ܕܥܲܡܡܹ̈ܐ ܀ 89 :ܕܲܕܪܲܫ̣ܬܿ ܐܘܼܪܚܵܐ ܒܝܲܕܼ ܬܵܘܕܿܝܼܬܼܵܐ ܕܚܲܕܼ ܒܵܪܘܿܝܵܐ 90 ܒܲܫܒܼܝܼܠ ܚܘܼܒܵܟ ܢܵܓܹ̇ܕܼ ܐ̄ܢܵܐ ܟܠ ܠܘܵܬܼ ܗܲܝܡܵܢܘܼܬܼܝ ܀ pb. 60 91 :ܕܲܦܬܲܚ̣ܬܿ ܬܲܪܥܵܐ ܠܟܲܣܝܘܼܬܼ ܡ̇ܪܘܼܬܼܝ ܒܝܲܕܼ ܨܸܒܼܝܵܢܵܟ 92 ܒܵܟ ܦܵܬܲ݁ܚ ܐ̄ܢܵܐ ܬܲܪܥܵܐ ܕܚܲܝܹ̈ܐ ܠܡܝܼ̈ܬܹܐ ܕܥܵܘ̣ܠܵܐ ܀ 93 :ܕܠܵܐ ܐܸܬܼܦܲܠܲܓܼܬܿ ܥܲܠ ܡܘܼܠܟܵܢܲܝ̈ ܟܲܕܼ ܪܲܚܝܼܩܝܼܢ 94 ܪܹܫܵܐ ܕܚܲܝܹ̈ܐ ܥܵܒܼ̇ܕܼ ܐ̄ܢܵܐ ܠܵܟ ܒܡܲܠܟܿܘܼܬܼ ܪܵܘܡܵܐ ܀ 95 :ܕܕܸܢܝ̣ܚܲܬ̤ ܡ̇ܪܘܼܬܼܝ ܒܓܼܵܘ ܪܸܥܝܵܢܵܟ ܕܟܲܣܝܵܐ ܐܝܼܬܲܝ 96 ܡܸܢܵܟ ܢܸܕܢܲܚ ܗܵܘ̇ ܕܲܡܟܲܢܸܫ ܥܲܡܡܹ̈ܐ ܠܲܚܕܼܵܐ ܀ 97 :ܚܠܵܦ ܐܲܟܼܣܸܢܝܵܐ ܕܒܲܐܬܼܪ̈ܘܵܬܼܵܐ ܡܠܹܝܢ ܛܘܼܪ̈ܵܦܹܐ 98 ܠܡܹܐܢܵܐ ܕܫܲܝܢܵܐ ܥܵܒܹ̇ܕܼ ܐ̄ܢܵܐ ܠܵܟ ܠܟܼܠ ܕܲܡܥܵܩܝܼܢ ܀ 99 :ܥܠܲܝܟ ܒܵܢܹ̇ܐ ܐ̄ܢܵܐ ܒܸܢܝܵܢ ܚܘܼܒܵܐ ܘܗܲܝܡܵܢܘܼܬܼܵܐ 100 ܘܒܼܵܟ ܡܚܲܙܸܩ ܐ̄ܢܵܐ ܒܣܲܒܼܪܵܐ ܕܚܲܝܹ̈ܐ ܠܟܼܠܗܘܿܢ ܥܲܡܡܹ̈ܐ ܀ 101 :ܒܝܲܕܼ ܡܘܼܠܟܵܢܹ̈ܐ ܒ̣ܩܵܝܗܝ ܠܲܬܼܪܝܼܨܵܐ ܗܵܘ̇ ܝܵ̇ܕܲܥ ܟܠ 102 ܠܲܕܼܪܲܚܝܼܩܝܼܢ ܗܲܝܡܸܢ ܗܲܝܡܸܢ ܐܵܢܘܿܢ ܐܲܝܟ ܩܲܪ̈ܝܼܒܹܐ ܀ 103 :ܘܟܲܕܼ ܝܵ̇ܕܲܥ ܗ̄ܘ̣ܵܐ ܕܠܵܐ ܡܸܬܼܦܲܠܲܓܼ ܥܲܠ ܡܘܼܠܟܵܢܵܘ̈ܗܝ 104 ܒܝܲܕܼ ܢܸܣܝܵܢܵܐ ܓ̣ܠܵܝܗܝ ܠܲܫܪܵܪܵܐ ܕܗܲܝܡܵܢܘܼܬܹܗ ܀ 105 :ܝܵ̇ܕܲܥ ܗ̄ܘ̣ܵܐ ܠܹܗ ܩܕܼܵܡ ܕܲܢܢܲܣܹܝܗܝ ܕܫܲܪܝܼܪ ܚܘܼܒܹܿܗ 106 ܘܲܒܼܩܸܐ ܗ̄ܘ̣ܵܐ ܠܹܗ ܥܲܕܼܠܵܐ ܢܸܩܪܹܝܗܝ ܕܠܵܐ ܡܸܬܼܦܲܠܲܓܼ ܀ 107 :ܠܲܒܼܢܲܝ̈ ܓܸܢܣܹܗ ܨܒܼܵܐ ܕܲܢܚܲܦܸܛ ܒܝܲܕܼ ܕܘܼܒܵܪ̈ܘܗܝ 108 ܘܲܟܼܬܸܒܼ ܐܸܢܘܿܢ ܒܲܣܦܲܪ ܡܸܠܵܘ̈ܗܝ ܕܒܹܗ ܢܸܬܿܕܲܡܘܿܢ ܀ 109 :ܒܲܕܼܡܘܼܬܼ ܨܲܠܡܵܐ ܨܵܪܹܗ ܠܫܘܼܦܪܵܐ ܕܗܲܝܡܵܢܘܼܬܹܗ 110 ܕܢܸܩܒܿܘܿܥ ܟܠܢܵܫ ܚܘܼܡܣܵܢ ܢܲܦܫܹܗ ܒܓܼܵܘ ܪܸܥܝܵܢܹܗ ܀ 111 :ܝ̄ܒܸܫ̣ ܗ̄ܘ̣ܵܐ ܦܲܓܼܪܹܗ ܒܝܲܕܼ ܥܲܩܪܘܼܬܼܵܐ ܐܲܝܟ ܕܲܒܼܨܲܗܝܵܐ 112 ܘܪܲܓܿܝܼ ܢܲܦܫܹܗ ܒܫܸܩܝܵܐ ܕܪܘܼܚܵܐ ܘܲܛܥ݂ܲܢ ܦܹܐܪܹ̈ܐ ܀ 113 :ܠܙܲܪܥܹܗ ܐܸܡ݂ܲܪ ܕܝܵܗܹ̇ܒܼ ܐ̄ܢܵܐ ܠܵܗ̇ ܠܐܲܪܥܵܐ ܕܲܟܼܢܲܥ̄ܢ 114 ܘܛܲܪ̣ܕܹܿܗ ܡܸܢܵܗ̇ ܐܲܝܟ ܓܲܠܘܵܝܵܐ ܠܐܲܪܥܵܐ ܕܡܸܨܪܹܝܢ ܀ 115 :ܐܲܪܝܼܡ ܫܲܒܼܛܵܐ ܘܲܡ̣ܚܵܗ̇ ܠܐܲܪܥܵܐ ܒܟܲܦܢܵܐ ܩܲܫܝܵܐ 116 ܕܢܸܥܪܘܿܩ ܡܸܢܵܗ̇ ܒܥܸܠܲܬܼ ܟܲܦܢܵܐ ܠܐܲܬܼܪܵܐ ܐ̄ܚܪܹܢܵܐ ܀ 117 :ܐܣܓܿܝܼ ܒܲܚ̣ܪܹܗ ܒܝܲܕܼ ܫܘܼܚܠܵܦܵܐ ܕܐܲܬܼܪ̈ܵܘܵܬܼܵܐ 118 ܕܢܸܫܡܲܥ ܟܠܢܵܫ ܕܠܵܐ ܐܸܬܼܪܲܦܝܼ ܩܕܼܵܡ ܛܘܼܪ̈ܦܹܐ ܀ 119 :ܥܪܲܩ ܡ̣ܢ ܟܲܦܢܵܐ ܕܢܲܚܐ ܢܲܦܫܹܗ ܒܐܲܪܥܵܐ ܕܡܸܨܪܹܝܢ 120 ܘܦܲܣܩܘܼܗܝ ܠܦܸܠܓܹܿܗ ܘܚܲܛܦ̣ܘܼܗ̇ ܡܸܢܹܗ ܠܐܸܠܥܵܐ ܕܢܸܩܦܹܗ ܀ 121 :ܠܵܐ ܪܲܛܸܢ ܗ̄ܘ̣ܵܐ ܕܲܫܩܲܠ̣ܘ ܒܝܼܫܹ̈ܐ ܐܲܪܥܵܐ ܕܙܲܪܥܹܗ 122 ܘܠܵܐ ܐܸܬܼܦܲܠܲܓܼ ܕܫܲܩܠ̣ܘܼܗ̇ ܡܸܢܹܗ ܠܣܲܬܵܐ ܕܦܹܐܪ̈ܵܘܗܝ ܀ pb. 61 123 :ܫܲܪܝܼܪ ܗ̄ܘ̣ܵܐ ܠܹܗ ܕܠܵܐ ܡܸܬܿܕܲܓܲܠ ܩܵܠܵܐ ܕܲܩܪ̣ܵܝܗܝ 124 ܕܠܵܐ ܡ̇ܛܹ̇ܐ ܠܵܗ̇ ܠܐܲܪܥܵܐ ܕܢܸܩܦܹܗ ܢܸܩܦܵܐ ܐ̄ܚܪܹܢܵܐ ܀ 125 :ܥܬ݂ܲܪ ܒܵܗ̇ ܒܐܲܪܥܵܐ ܘܚܹܪܸܒܼ ܣܲܓܿܝܼ ܒܟܲܗܝܼܢܘܼܬܹܗ 126 ܘܲܥܠ݂ܲܒܼ ܥܘܼܬܼܪܵܐ ܕܗܲܝܡܵܢܘܼܬܹܗ ܠܐܲܪ̈ܥܵܢܵܝܵܬܼܵܐ ܀ 127 :ܥܡ݂ܲܪ ܒܲܦܢܝܼܬܵܐ ܕܦܲܠ̣ܚܘܼܗ̇ ܫܹܐܕܹ̈ܐ ܒܚܲܪܵܫܘܼܬܼܵܐ 128 ܘܫܲܘܲܚܘ ܦܹܐܪܹ̈ܐ ܕܗܲܝܡܵܢܘܼܬܹܗ ܒܓܼܵܘ ܙܝܼܙܵܢܹ̈ܐ ܀ 129 :ܐܘܿ ܐܝܼܠܵܢܵܐ ܕܪܲܒܿܝܼ ܢܲܦܸܫܹܗ ܒܡܸܨܥܲܬܼ ܟܘܼ̈ܒܹܿܐ 130 ܘܩܲܦܲܚ ܐܸܢܘܿܢ ܒܣܵܘܟܲܝ̈ ܚܘܼܒܹܿܗ ܠܦܹܐܪ̈ܲܝ ܒܝܼܫܹ̈ܐ ܀ 131 :ܐܘܿ ܬܵܘܬܵܒܼܵܐ ܕܥܲܠ̣ ܒܐܲܟܼܣܸܢܝܵܐ ܒܠܹܝܬܼ ܢܘܼܟܼܪ̈ܵܝܹܐ 132 ܘܲܣܓܸܕܼܘ ܩܘܼܕܼܡ̇ܘܗܝ ܡܲܠ̈ܟܹܿܐ ܘܚܹܐܪܹ̈ܐ ܟܲܕܼ ܠܵܐ ܨܵܒܹ̇ܝܢ ܀ 133 :ܐܘܿ ܢܘܼܟܼܪܵܝܵܐ ܕܐܸܬܼ݂ܵܐ ܢܡܲܠܹܐ ܣܘܼܢܩܵܢ ܚܲܝܘ̈ܗܝ 134 ܘܐܲܪܝܼܡ ܫܲܒܼܛܵܐ ܘܲܡ̣ܚܵܐ ܐܸܢܘܿܢ ܠܐ̄ܢܵܫܲܝ̈ ܐܲܬܼܪܵܐ ܀ 135 :ܡ̣ܚܵܐ ܠܲܡ ܡ̇ܪܝܵܐ ܠܦܸܪܥܘܿܢ ܡܲܠܟܵܐ ܘܠܲܒܼܢܲܝ̈ ܒܲܝܬܹܿܗ 136 ܡܸܛܠ ܣܲܪܵܐ ܐܲܢ̄ܬܲܬܼ ܐܲܒܼܪܵܡ ܕܚܲܛܦܵܗ̇ ܡܸܢܹܗ ܀ 137 :ܘܟܲܕܼ ܥܲܡ ܥܵܠܡܵܐ ܡܸܬܼܢܲܓܲܕܼ ܗ̄ܘ̣ܵܐ ܒܚܘܼܡܣܵܢ ܢܸܟܼܣܵܘ̈ܗܝ 138 ܥܠܝܼܒܼܵܐ ܥܘܼܬܼܪܹܗ ܡܸܬܼܪܲܒܸܿܐ ܗ̄ܘ̣ܵܐ ܒܦܘܼܩܕܵܢ ܡܵܪܹܗ ܀ 139 :ܣܓ̣ܝܼ ܐܝܼܩܵܪܹܗ ܒܥܸܠܲܬܼ ܣܲܪܵܐ ܕܕܲܒܼܪ̣ܵܗ̇ ܡܲܠܟܵܐ 140 ܘܐܵܘܕܿܝܼ ܠܡܵܪܹܗ ܕܝܲܗ̄ܒܼ݂ ܠܹܗ ܥܘܼܬܼܪܵܐ ܒܝܲܕܼ ܥܸܠ̈ܠܵܬܼܵܐ ܀ 141 :ܥܬ݂ܲܪ ܚܲܟܿܝܼܡܵܐ ܒܐܲܬܼܪܵܐ ܕܡܸܣܟܹܿܝܢ ܡ̣ܢ ܝܼܕܲܥܬܼܵܐ 142 ܘܲܛܥ̣݂ܲܢ ܥܘܼܬܼܪܹܗ ܕܢܹܐܙܲܠ ܠܐܲܪܥܵܐ ܕܐܸܬܼܡܲܠܟܲܬ̤ ܠܹܗ ܀ 143 :ܦ̣ܢܵܐ ܘܝܼܬܸܒܼ ܒܵܗ̇ ܒܐܲܪܥܵܐ ܕܲܟܼܢܲܥ̄ܢ ܐܲܝܟ ܕܲܒܼܕܼܝܼܠܹܗ 144 ܟܲܕܼ ܚܵܝ̈ܐܲܪ ܗ̄ܘ̣ܵܐ ܒܫܘܼܘܕܵܝ ܡ̇ܪܹܗ ܕܝܵܗܹ̇ܒܼ ܠܵܗ̇ ܠܹܗ ܀ 145 :ܫ̣ܠܸܡ ܡܸܢܝܵܢܵܐ ܕܲܫܢܲܝ̈ ܚܲܝܵܘ̈ܗܝ ܬܸܫܥܝܼܢ ܘܲܬܼܫܲܥ 146 ܘܡܲܠܸܠ ܥܲܡܹܗ ܒܝܲܕܼ ܓܸܠܝܵܢܵܐ ܕܢܸܓܼܘܙܿܪ ܒܸܣܪܹܗ ܀ 147 :ܢܦ݂ܲܠ ܥܲܠ ܐܲܦܘ̈ܗܝ ܥܲܒܼܕܵܐ ܘܲܣܓܸܕܼ ܩܕܼܵܡ ܥܵܒܼܘܿܕܹܗ 148 ܘܐܲܩܝܼܡ ܥܲܡܹܗ ܩܝܵܡܵܐ ܕܢܸܪܫܘܿܡ ܙܲܪܥܹܗ ܒܲܫܡܹܗ ܀ 149 :ܫܲܚܠܸܦ ܠܲܫܡܹܗ ܕܡܸܬܼܟܲܢܹܐ ܗ̄ܘ̣ܵܐ ܒܫܸܡ ܚܲܕܼ ܥܲܡܵܐ 150 ܘܲܩܪ̣ܵܝܗܝ ܒܲܫܡܵܐ ܕܡܸܬܼܦܲܫܲܩ ܗ̄ܘ̣ܵܐ ܐܲܒܼܵܐ ܕܥܲܡܡܹ̈ܐ ܀ 151 :ܥܲܡ ܫܘܼܚܠܵܦܵܐ ܕܫܲܚܠܸܦ ܘܲܩܪ̣ܵܝܗܝ ܐܲܒܼܵܐ ܕܥܲܡܡܹ̈ܐ 152 ܩܪ̣ܵܐ ܠܹܗ ܩܵܠܵܐ ܕܡܸܟܹܿܝܠ ܩܲܒܸܿܠ ܝܲܠܕܵܐ ܕܡܸܠ̇ܟܹܿܬ ܀ 153 :ܗܵܐ ܡܸܫܬܲܠܲܡ ܫܘܼܘܕܵܝ ܨܹܐܕܲܝܟ ܒܝܲܕܼ ܣܘܼܥܪ̈ܵܢܹܐ 154 ܘܝܵ̇ܗܒ ܐ̄ܢܵܐ ܠܵܟ ܒܪܵܐ ܡ̣ܢ ܛܲܝܒܿܘܼ ܠܒܲܪ ܡ̣ܢ ܛܲܟܼܣܵܐ ܀ 155 :ܗܵܐ ܡܪܵܓܸܿܐ ܐ̄ܢܵܐ ܦܲܓܼܪܵܟ ܡܝܼܬܼܵܐ ܘܝ̇ܵܗܒ ܙܲܪܥܵܐ 156 ܘܡܲܦܪܲܥ ܢܘܼܪܒܵܐ ܡ̣ܢ ܥܸܩܵܪܵܐ ܕܲܣܐܸ̣ܒܼ ܘܲܒܼܠ̣ܝܼ ܀ pb. 62 157 :ܡܒܲܝܲܐ ܐ̄ܢܵܐ ܠܵܗ̇ ܠܣܲܪܵܐ ܥܩܲܪܬܼܵܐ ܡ̣ܢ ܥܲܩܪܘܼܬܼܵܐ 158 ܘܡܲܩܨܲܚ ܐ̄ܢܵܐ ܠܵܗ̇ ܠܲܡܓܲܙܲܝܬܵܐ ܒܦܸܐܪܵܐ ܕܡܸܢܵܗ̇ ܀ 159 :ܡܲܥܒܲܪ ܐ̄ܢܵܐ ܠܹܗ ܠܚܸܣܕܵܐ ܕܦܲܓܼܪܵܗ̇ ܕܫܸܡ ܥܲܩܪܘܼܬܼܵܐ 160 ܘܝܵ̇ܗܹܒܼ ܐ̄ܢܵܐ ܠܵܗ̇ ܐܲܓܼܪܵܐ ܝܲܠܕܵܐ ܒܝܲܕܼ ܚܘܼܡܣܵܢܵܗ̇ ܀ 161 :ܫܠܸܡ̣ܘ ܫܘܼܘܕܝܹ̈ܐ ܘܫܲܪ̣ܘ ܡܘܼܠܟܵܢܹ̈ܐ ܕܲܠܘܵܬܼ ܥܲܩܪܹ̈ܐ 162 ܕܐܸܬܼ݂ܵܐ ܕܢܸܬܸܿܠ ܟܲܣܝܵܐ ܒܓܸܒܝܵܐ ܐܲܓܼܪܐ ܠܟܹܐܢܹ̈ܐ ܀ 163 :ܓܠ̣ܵܐ ܠܲܡ ܡ̇ܪܝܵܐ ܢܲܦܫܹܗ ܠܐܲܒܼܪܵܡ ܒܐܲܪܥܵܐ ܕܡܲܡܪܹ̈ܐ 164 ܘܗܘ̤ ܝܵ̇ܬܹܒܼ ܗ̄ܘ̣ܵܐ ܒܲܬܼܪܲܥ ܒܲܝܬܹܿܗ ܟܲܕܼ ܚ݂ܲܡ ܝܵܘܡ̇ܐ ܀ 165 :ܐܘܿ ܚܲܡܝܼܡܵܐ ܕܠܵܐ ܐܲܩܲܪܬܹܗ ܩܲܫܝܘܼܬܼ ܚܘܼܡܵܐ 166 ܘܫܵܛ̣ ܠܲܢܝܵܚܹ̈ܐ ܕܠܵܐ ܢܸܬܼܒܲܨܲܪ ܡ̣ܢ ܩܘܼܒܵܠܹܗ ܀ 167 :ܐܲܪܝܼܡ ܥܲܝܢܵܘ̈ܗܝ ܟܲܕܼ ܚܵܐܲܪ ܗ̄ܘ̣ܵܐ ܒܹܝܬܼ ܐܘܼܪ̈ܚܵܬܼܵܐ 168 ܕܢܸܓܼܡܘܼܪ ܚܘܼܒܹܿܗ ܒܝܲܕܼ ܡ̇ܙܘܿܢܵܐ ܠܘܵܬܼ ܕܲܣܢܝܼܩܝܼܢ ܀ 169 :ܚܙܵܬܼܵܐ ܚܕܲܬܵܐ ܚܙ̣ܵܐ ܐܲܒܼܪܵܗܵܡ ܕܡܲܠܝܵܐ ܬܲܗܪܵܐ 170 ܥܝܼܪܹ݁ܐ ܬܠܵܬܼܵܐ ܕܥܛܝܼܦܝܢ ܗ̄ܘ̣ܵܘ ܐܸܣܟܹܿܝܡ ܐ̄ܢܵܫܵܐ ܀ 171 :ܪܗܸܛ̣ ܟܲܕܼ ܚܕܹܐ ܘܲܢܦܲܠ̣ ܘܲܣܓܸܕܼ ܩܕܼܵܡ ܪ̈ܘܼܚܵܢܹܐ 172 ܘܐܲܦܝܼܣ ܐܸܢܘܿܢ ܕܢܸܓܼܡܘܿܪ ܚܘܼܒܹܿܗ ܒܲܢܝܵܚܲܝ̈ܗܘܿܢ ܀ 173 :ܫܸܡ ܒܪܘܿܝܵܐ ܩܪ̣ܵܐ ܨܹܐܕܲܝܗܘܿܢ ܒܝܲܕܼ ܓܸܠܝܵܢܹ̈ܐ 174 ܕܠܵܐ ܡ̇ܪܝ ܬܸܥܒܲܪ ܡ̣ܢ ܒܹܝܬܼ ܥܲܒܼܕܵܟ ܕܲܡܣܲܟܸܿܐ ܠܵܟ ܀ 175 :ܐܘܿ ܐܝܼܬܼܘܼܬܵܐ ܕܟܲܣܝܵܐ ܡ̣ܢ ܟܠ ܘܠܵܐ ܡܸܬܼܚܲܙܝܵܐ 176 ܕܲܓܼܠ̣ܵܬ̤ ܢܲܦܫܵܗ̇ ܠܘܵܬܼ ܐܲܒܼܪܵܗܵܡ ܒܐܸܣܟܹܿܝܡ ܐ̄ܢܵܫܵܐ ܀ 177 ܐܘܿ ܙܲܕܿܝܼܩܵܐ ܕܲܫܘ̣ܵܐ ܕܢܸܚܙܹܐ ܐ̄ܪܵܙܵܢܵܐܝܼܬܼ ܀ 178 ܠܡܸܠܬܹܗ ܕܐܲܒܼܵܐ ܕܲܥܬܼܝܼܕܼ ܕܢܸܠܒܲܫ ܦܲܓܼܪܵܐ ܕܐ̄ܢܵܫܵܐ ܀ 179 :ܬܵܬܼܵܐ ܥܲܠ̣ܘ ܗ̄ܘ̣ܵܘ ܠܒܹܝܬܼ ܐܲܒܼܪܵܗܵܡ ܒܝܲܕܼ ܐܸܣܟܹܿܡܵܐ 180 ܘܐܲܒܼܪܵܐ ܡܲܠܸܠ ܥܲܡ ܚܲܕܼ ܒܲܠܚܘܿܕܼ ܐܲܝܟ ܐܲܠܵܗܵܐ ܀ 181 :ܡܸܠܬܹܗ ܕܐܲܒܼܵܐ ܠܒܸܫ̣ ܐܸܣܕܹܿܡܵܐ ܐ̄ܪܵܙܵܢܵܐܝܼܬܼ 182 ܘܲܚܝ̣ܕܼܝܼ ܐܲܒܼܪܵܡ ܕܲܚ̣ܙܵܐ ܠܟܲܣܝܵܐ ܒܦܲܓܼܪܵܐ ܓܲܒܝܵܐ ܀ 183 ܥܒ݂ܲܕܼ ܩܘܼܒܵܠܵܐ ܠܡܵܪܵܐ ܘܥܲܒܼ̈ܕܹܿܐ ܠܦܘܼܬܼ ܗܵܝ̇ ܕܲܚ̣ܙܵܐ: pb. 63 184 ܘܐܲܢܝܼܚ ܐܸܢܘܿܢ ܒܠܲܚܡܵܐ ܘܡܲܝܵ̈ܐ ܐܲܝܟ ܡ̇ܐ ܕܲܣܒ݂ܲܪ ܀ 185 :ܘܐܵܦ ܪ̈ܘܼܚܵܢܹܐ ܚܵܘܝܼܘ ܨܹܐܕܼܵܘܗܝ ܐܲܝܟ ܛܘܼܝܵܒܹܗ 186 ܕܚܵܘܝܼܘ ܕܐܸܟܲܠ̣ܘ ܟܲܕܼ ܠܵܐ ܐܸܟܼܠ̣ܘ ܡܸܛܠ ܚܘܼܒܹܿܗ ܀ 187 :ܠܲܝܬܿ ܠܲܟܼܝܵܢܵܐ ܕܪ̈ܘܼܚܵܢܵܝܹܐ ܢܩܲܒܸܿܠ ܐܘܼܟܼܠܵܐ 188 ܘܠܵܐ ܡܸܬܿܬܿܪܣܹܝܢ ܫܡܲܝܵܢܵܝܹ̈ܐ ܒܐܲܪ̈ܥܵܢܵܝܵܬܼܵܐ ܀ 189 :ܠܚܘܼܒܹܿܗ ܕܐܲܒܼܪܵܡ ܐܲܢܝܼܘ ܒܐܘܼܟܼܠܵܐ ܕܚܵܘܝܼܘ ܕܐܸܟܲܠ̣ܘ 190 ܘܗܸܢ̣ܘܿܢ ܩܵܘܝܼܘ ܕܠܵܐ ܬܘܼܪܣܵܝܵܐ ܐܲܝܟ ܕܿܡܥ̇ܕܹܝܢ ܀ 191 :ܩܲܒܸܿܠ ܚܘܼܒܹܿܗ ܡ̇ܪܵܐ ܘܥܲܒܼ̈ܕܹܿܐ ܕܥܲܒܼܕܵܐ ܛܵܒܼܵܐ 192 ܘܦܲܪ̣ܥܘܼܗܝ ܐܲܓܼܪܵܐ ܒܲܛܢܵܐ ܘܚܲܠܕܵܐ ܕܠܵܐ ܒܲܟܼܝܵܢܵܐ ܀ 193 :ܠܙܲܒܼܢܵܐ ܗܵܢܵܐ ܬܸܗܦܘܼܟ ܨܹܐܕܲܝܟ ܡܲܠܸܠ ܥܲܡܹܗ 194 ܘܢܸܗܘܹܐ ܦܹܐܪܵܐ ܠܣܲܪܵܐ ܥܩܲܪܬܼܵܐ ܟܲܕܼ ܗܝ̤ ܚܲܝܵܐ ܀ 195 :ܩܲܒܸܿܠ ܚܘܼܒܹܿܗ ܘܝܲܗ̄ܒܼ݂ ܦܘܼܪܥܵܢܵܐ ܒܣܘܼܒܵܪ ܒܲܛܢܵܐ 196 ܘܲܓܼܠ̣ܵܐ ܘܒܲܕ݂ܿܩ ܬܒܲܥܬܼܵܐ ܕܒܼܝܼܫܹ̈ܐ ܕܕܼܵܫ̣ܘ ܛܘܼܟܵܣܵܘ̈ܗܝ ܀ 197 :ܓܥܵܬܼܵܐ ܕܲܣܕܼܘܿܡ ܘܲܕܼܥܵܡܘܿܪܵܐ ܥܸܠܲܬ̤ ܨܹܐܕܲܝ 198 ܐܸܚܘܿܬܼ ܐܸܚܙܸܐ ܐܸܢ ܐܲܝܟ ܫܸܡܥܵܐ ܗܘ̤ܵܐ ܣܘܼܥܪܵܢܵܐ ܀ 199 :ܐܘܿ ܝܵ̇ܕܲܥ ܟܠ ܕܲܛܥܝܼܢ ܚܘܼܒܹܿܗ ܠܥܲܣܩܘܼܬܼ ܓܸܢܣܲܢ 200 ܕܟܲܕܼ ܝܵ̇ܕܲܥ ܠܵܗ̇ ܠܒܼܝܼܫܘܼܬܼ ܝܲܨܪܲܢ ܡܬܿܗܸܐ ܠܪܘܼܓܼܙܹܗ ܀ 201 :ܓܠ̣ܵܐ ܠܹܗ ܠܐܲܒܼܪܵܡ ܕܢܘܼܪܵܐ ܡܲܡܛܲܪ ܥܲܠ ܡܲܪ̈ܚܹܐ 202 ܘܚܵܘܝܼ ܕܲܡܢܵܚ ܐܸܢ ܐܝܼܬܼ ܟܹܐܢܹ̈ܐ ܢܫܲܠܸܐ ܪܘܼܓܼܙܹܗ ܀ 203 :ܚ̣ܙܵܐ ܐܲܒܼܪܵܗܵܡ ܨܸܒܼܝܵܢ ܡ̇ܪܹܗ ܕܲܪܓܼܝܼܓܼ ܕܢܸܫܒܿܘܿܩ 204 ܘܲܒܼܥܵܐ ܘܐܲܦܝܼܣ ܕܐܸܢܗܘ̤ ܢܦܘܼܫ ܡ̣ܢ ܚܸܡܬܹܗ ܀ 205 :ܡܲܟܸܿܢ ܢܲܦܫܹܗ ܩܕܼܵܡ ܥܵܒܼܘܿܕܼܐ ܒܝܲܕܼ ܒܵܥܘܼܬܹܗ 206 ܕܲܚܙ̣ܵܐ ܟܝܵܢܹܗ ܕܲܙܥܘܿܪ ܕܲܢܦܝܼܣ ܥܲܠ ܫܘܼܒܼܩܵܢܵܐ ܀ 207 :ܩܲܒܸܿܠ ܡܸܢܹܗ ܒܵܥܘܼܬܼ ܚܘܼܒܹܿܗ ܐܲܟܼܡܵܐ ܕܐܲܦܝܼܣ 208 ܕܐܸܢ ܐܝܼܬܼ ܟܹܐܢܹ̈ܐ ܠܵܐ ܡܚܲܒܸܿܠ ܐ̄ܢܵܐ ܒܪܘܼܓܼܙܵܐ ܠܐܲܬܼܪܵܐ ܀ 209 :ܫܲܐܸܠ ܐܲܒܼܪܵܡ ܕܐܸܢ ܐܝܼܬܼ ܚܲܡܫܝܼܢ ܚܵ̇ܢܲܬܿ ܠܐܲܬܼܪܵܐ 210 ܘܲܢܚܸܬܼ ܥܲܡܹܗ ܗܵܘ̇ ܒܲܣܝܼܡܵܐ ܥܕܲܡ̇ܐ ܠܥܸܣܪܵܐ ܀ 211 :ܐܸܢ ܐܝܼܬܼ ܟܹܐܢܹ̈ܐ ܥܸܣܪܵܐ ܒܲܣܕܼܘܿܡ ܫܵܒܹ̇ܩ ܐ̄ܢܵܐ ܠܵܗ̇ 212 ܘܟܲܕܼ ܝܵ̇ܕܲܥ ܗ̄ܘ̣ܵܐ ܕܠܲܝܬܿ ܐܸܠܵܐ ܚܲܕܼ ܐܸܡ݂ܲܪ ܕܐܸܢ ܐܝܼܬܼ ܀ 213 :ܚ̣ܙܲܩܘ ܪ̈ܘܼܚܵܢܹܐ ܡ̣ܢ ܨܹܝܕܼ ܐܲܒܼܪܵܡ ܘܐܸܬܼ݂ܵܘ ܠܲܣܕܼܘܿܡ 214 ܘܩܲܒܸܿܠ ܐܸܢܘܿܢ ܐ̄ܚܝܵܢܹܗ ܕܐܲܒܼܪܵܡ ܒܲܕܼܡܘܼܬܼ ܐܲܒܼܪܵܡ ܀ 215 :ܦܩ݂ܲܪܘ ܦܲܓܼܪ̈ܵܢܹܐ ܒܪܸܓܲܬܼ ܒܸܣܪܵܐ ܥܲܠ ܪ̈ܘܼܚܵܢܹܐ 216 ܕܲܚ̣ܙܵܘ ܐܸܢܘܿܢ ܕܲܥܛܝܼܦܝܼܢ ܗ̄ܘ̣ܵܘ ܫܲܠܗܹܒܼܝܼܬܼܵܐ ܀ 217 :ܒܗܵܕܹܐ ܬܢܘܲܝ ܫܲܕܲܪ ܐܸܢܘܿܢ ܗܵܘ̇ ܝܵ̇ܕܲܥ ܟܠ 218 ܕܢܸܗܘܘܿܢ ܣܵܗ̈ܕܹܿܐ ܒܒܼܝܼܫܘܼܬܼ ܐ̄ܢܵܫܵܐ ܕܚܲܒܸܿܠܘ ܛܲܟܼܣܵܐ ܀ 219 :ܘܕܲܣܥ̣ܵܐ ܣܲܓܿܝܼ ܟܝܵܢܵܐ ܫܝܼܛܵܐ ܘܚܲܒܸܿܠ ܐܘܼܪܚܹܗ 220 ܠܵܐ ܚܠܲܛ̣ ܛܵܒܼܵܐ ܪ̈ܲܚܡܹܐ ܒܪܘܼܓܼܙܹܐ ܟܲܕܼ ܕܵܢ ܐܸܢܘܿܢ ܀ pb. 64 221 :ܒܢܘܼܪܵܐ ܩܲܦܲܚ ܬܲܙܝܼܙܘܼܬܼܵܐ ܕܪܸܓܲܬܼ ܦܲܩܪܹ̈ܐ 222 ܘܥܲܒܼ݂ܕܹܿܗ ܠܐܲܬܼܪܵܐ ܬܲܚܘܝܼܬܼ ܪܘܼܫܥܵܐ ܕܐ̄ܢܵܫܵܐ ܕܐܲܡܪܲܚܘ ܀ 223 :ܦܲܨܲܚ̣ ܠܟܹܐܢܵܐ ܡ̣ܢ ܐܲܒܼܕܼܵܢܵܐ ܕܥܲܡ ܥܵܘܵܠܹ̈ܐ 224 ܘܚܵܘܝܼ ܪ̈ܲܚܡܵܘܗܝ ܒܚܲܕܼ ܕܐܸܬܼܦܲܠܲܛ ܕܪܵܚܹ̇ܡ ܐ̄ܢܵܫܵܐ ܗ̄ܘ̣ ܀ 225 :ܚܕܝܼ ܐܲܒܼܪܵܗܵܡ ܕܲܚܙ̣ܵܐ ܠܟܲܣܝܵܐ ܒܝܲܕܼ ܓܸܠܝܵܢܵܘ̈ܗܝ 226 ܘܟܲܕܼ ܥܲܦܪܵܢܵܐ ܗ̄ܘ̣ ܫ̣ܘܵܐ ܕܲܢܡܲܠܸܠ ܥܲܡ ܐܝܼܬܼܘܼܬܼܵܐ ܀ 227 :ܩܲܒܸܿܠ ܡ̇ܪܹܗ ܒܵܥܘܼܬܼ ܚܘܼܒܹܿܗ ܒܠܘܿܛ ܕܐܸܬܼܦܲܨܝܼ 228 ܘܒܲܝܲܐ ܢܲܦܫܹܗ ܘܝܲܗ̄ܒܼ ܠܹܗ ܐܲܓܼܪܵܐ ܒܲܛܢܵܐ ܘܝܲܠܕܵܐ ܀ 229 :ܫܠ̣ܡܘ ܫܘܼܘܕܵܝܹ̈ܐ ܘܫܲܪ̣ܘ ܡܘܼܠܟܵܢܹ̈ܐ ܘܒܸܛ̣ܢܲܬ̤ ܣܲܪܵܐ 230 ܘܝܸܠ̣ܕܲܬ̤ ܝܲܠܕܵܐ ܠܒܲܪ ܡ̣ܢ ܛܲܟܼܣܵܐ ܕܣܝܼܡ ܒܲܟܼܝܵܢܵܐ ܀ 231 :ܩܲܒܸܿܠܘ ܐܲܓܼܪܵܐ ܟܹܐܢܹ̈ܐ ܕܣܲܟܿܝܼܘ ܠܦܘܼܪܥܵܢ ܐܲܓܼܪܵܐ 232 ܘܝܲܗ̄ܒܼ݂ܘ ܬܵܘܕܿܝܼܬܵܐ ܠܩܵܠܵܐ ܕܪܲܓܿܝܼ ܗܲܕܵܡܲܝ̈ܗܘܿܢ ܀ 233 :ܒܐܝܼܣܚܵܩ ܩܲܒܸܿܠܘ ܡܘܼܠܟܵܢܲܝ̈ܗܘܿܢ ܟܹܐܢܹ̈ܐ ܥܲܩܪܹ̈ܐ 234 ܘܲܚ̣ܕܼܝܼܘ ܕܲܚ̣ܙܵܘ ܒܗܵܘ̇ ܩܲܪܝܼܒܼܵܐ ܠܗܵܘ̇ ܪܲܚܝܼܩܵܐ ܀ 235 :ܒܚܲܕܼ ܦܸܠܐܬܼܵܐ ܒܲܝܲܐ ܐܸܢܘܿܢ ܗܵܘ̇ ܝܵ̇ܕܲܥ ܟܠ 236 ܘܚܵܘܝܼ ܐܸܢܘܿܢ ܐܲܝܟ ܕܲܒܼܐ̄ܪܵܙܵܐ ܠܗܵܝ̇ ܕܲܥܬܼܝܼܕܵܐ ܀ 237 :ܚܠܵܦ ܨܸܒܼܝܵܢܵܐ ܕܲܦܪ̣ܫܘ ܚܲܕܼܥܘܼܗܝ ܐܲܝܟ ܕܠܡܵܪܵܐ 238 ܐܲܫܘܝܼ ܐܸܢܘܿܢ ܕܢܸܚܙܘܿܢ ܐ̄ܪܵܙܵܐ ܕܣܘܼܟܵܝ ܥܲܡܡܹ̈ܐ ܀ 239 :ܝܲܗ̄ܒܼ݂ ܦܘܼܪܥܵܢܵܐ ܠܨܸܒܼܝܵܢܲܝ̈ܗܘܿܢ ܕܲܡܓܲܝܼ̈ܙܲܝܵܐ 240 ܕܡܸܢܗܘܿܢ ܢܸܕܼܢܲܚ ܡܲܣܓܹܿܐ ܣܲܒܼܪܵܐ ܠܲܕܼܠܵܐ ܣܲܒܼܪܵܐ ܀ 241 :ܚ̣ܕܼܝܼܘ ܘܐܸܬܼܒܲܝܲܐ. ܕܲܚ̣ܙܵܘ ܣܲܒܼܪܵܐ ܕܠܵܐ ܡܸܬܿܕܲܓܲܠ 242 ܕܲܒܼܡܵܘ̈ܡ̇ܬܵܐ ܚܬܲܡ ܝܲܗ̄ܒܹ݂ܿܗ ܗܵܘ̇ ܕܐܸܫܬܵܘܕܲܝܼ ܀ 243 :ܐܵܦ ܪܹܫܝܼܬܼܵܐ ܕܫܘܼܡܠܲܝ ܐ̄ܪ̈ܵܙܹܐ ܕܲܠܘܵܬܼ ܟܹܐܢܹ̈ܐ 244 ܚܲܬܸܿܡ ܘܐܸܡ݂ܲܪ ܕܲܚܙ̣ܵܢܝ ܐܲܒܼܪܵܡ ܘܲܚܕܲܝܼ ܒܣܘܼܟܵܝ ܀ 245 :ܒܝܲܠܕܹܿܗ ܕܐܝܼܣܚܵܩ ܒܲܝܲܐ ܐܸܢܘܿܢ ܡ̣ܢ ܥܲܩܪܘܼܬܵܐ 246 ܘܐܲܥܸܠ ܐܸܢܘܿܢ ܐܲܝܟ ܕܲܒܼܟܼܘܼܪܵܐ ܒܐ̄ܪܵܙܵܐ ܕܕܸܒܼܚܹܗ ܀ 247 :ܩܪ̣ܵܐ ܠܲܡ ܡܵܪܝܵܐ ܐܲܒܼܪܵܡ ܐܲܒܼܪܵܐ ܒܝܲܕܼ ܓܸܠܝܢܵܐ 248 ܕܒܲܪ ܠܝܼܚܝܼܕܵܟ ܘܐܲܣܸܩܲܝܗܝ ܠܝܼ ܥܠܵܬܼܵܐ ܒܛܘܼܪܵܐ ܀ 249 :ܕܸܒܼܚܵܐ ܚܲܕܼܬܼܵܐ ܫܵܐܹ̇ܠ ܐ̄ܢܵܐ ܠܵܟ ܕܲܬܼܩܲܪܸܒܼ ܠܝܼ 250 ܕܝܵ̇ܕܲܥ ܐ̄ܢܵܐ ܠܹܗ ܠܚܘܼܒܵܟ ܕܲܠܘܵܬܼܝ ܕܠܵܐ ܡܸܬܿܕܿܓܲܠ ܀ 251 :ܠܵܐ ܐܸܫܬܵܘܚܲܪ ܥܲܒܼܕܵܐ ܛܵܒܼܵܐ ܒܦܘܼܩܕܵܢ ܡ̇ܪܹܗ 252 ܘܠܵܐ ܪܲܛ̣ܢ ܗ̄ܘ̣ܵܐ ܕܲܗ̣ܦܲܝܟ ܢܲܣܒܹܿܗ ܠܫܘܼܘܕܲܝ ܡܸܠܵܘ̈ܗܝ ܀ 253 :ܩܲܕܹܿܡ ܐܲܒܼܵܐ ܒܵܬܼܪ ܝܵܘܡ̇ܐ ܐܲܝܟ ܕܐܸܬܼܦܲܩܲܕܼ 254 ܘܛܲܝܸܒܼ ܩܲܝܣܹ̈ܐ ܠܝܲܩܕܵܐ ܕܲܒܼܪܹܗ ܒܫܲܦܝܘܼܬܼ ܠܸܒܵܐ ܀ 255 :ܬܠܵܬܵܐ ܝܵܘܡܝܼ̈ܢ ܢܲܓܼܕܹܿܗ ܩܵܠܵܐ ܕܢܸܪܕܹܿܐ ܒܐܘܼܪܚܵܐ 256 ܘܠܵܐ ܐܸܬܼܦܲܠܲܓܼ ܚܘܼܒܹܿܗ ܕܟܹܐܢܵܐ ܡ̣ܢ ܛܘܼܝܵܒܹܗ ܀ pb. 65 257 :ܓܠ̣ܵܐ ܘܚܵܘܝܼ ܠܹܗ ܕܘܼܟܲܬܼ ܕܸܒܼܚܵܐ ܗܵܘ̇ ܕܲܩܪ̣ܵܐ ܠܹܗ 258 ܘܲܫܒ݂ܲܩ ܒܥܲܒܼܕܵܘ̈ܗܝ ܘܲܕܼܒܲܪ ܠܲܒܼܪܹܗ ܐܲܝܟ ܨܸܒܼܝܵܢܹܗ ܀ 259 :ܢܣܲܒܼ ܣܲܟܝܼܢܵܐ ܘܢܘܼܪܵܐ ܘܩܲܝܣܹ̈ܐ ܠܛܘܼܝܵܒܼ ܕܸܒܼܚܵܐ 260 ܘܠܵܐ ܓܠ̣ܵܐ ܐ̄ܪܵܙܵܐ ܕܩܸܛܠܹܗ ܕܐܝܼܣܚܵܩ ܠܲܒܼܢܲܝ̈ ܒܲܝܬܹܿܗ ܀ 261 :ܩܵܘܝܼܘ ܥܲܒܼ̈ܕܹܿܐ ܒܗܵܕܹܐ ܬܸܢܘܲܝ ܒܲܫܦܘܿܠ ܛܘܼܪܵܐ 262 ܕܢܸܣܲܩ ܢܸܣܓܿܘܿܕܼ ܗܘ̤ ܥܲܡ ܛܲܠܝܵܐ ܘܢܸܦܢܹܐ ܢܹܐܬܹܐ ܀ 263 :ܡܲܠܸܠ ܕܸܒܼܚܵܐ ܥܲܡ ܕܵܒܼܘܿܚܹܗ ܝܲܠܕܵܐ ܠܐܲܒܼܘܼܗܝ 264 ܕܗܵܐ ܠܲܡ ܢܘܼܪܵܐ ܘܩܲܝܣܹܐ ܠܕܸܒܼܚܵܐ ܐܲܝܟܵܘ ܐܸܡܪܵܐ ܀ 265 :ܦܲܢܝܼ ܐܲܒܼܵܐ ܠܘܵܬܼ ܝܼܠܝܼܕܹܗ ܩܵܠܵܐ ܕܣܲܒܼܪܵܐ 266 ܕܐܲܠܵܗܵܝ ܢܸܚܙܹܐ ܘܲܢܛܲܝܸܒܼ ܠܹܗ ܐܸܡܪܵܐ ܠܕܸܒܼܚܵܐ ܀ 267 :ܒܲܝܲܐ ܠܲܒܼܪܹܗ ܒܣܘܼܟܵܝ ܡܪܹܗ ܕܠܵܐ ܬܸܟܼܪܸܐ ܠܹܗ 268 ܘܐܵܦ ܗܘ̤ ܩܲܒܸܿܠ ܕܠܵܐ ܡܸܬܿܕܲܓܲܠ ܦܸܬܓܼܵܡ ܐܲܒܼܘܼܗܝ ܀ 269 :ܒܢ̣ܵܐ ܠܲܥܠܵܬܵܐ ܘܲܣܕܲܪ ܩܲܝܣܹ̈ܐ ܘܦܲܟܼܪܹܗ ܠܕܸܒܼܚܵܐ 270 ܥܲܡ ܨܸܒܼܝܵܢܹܗ ܫܡܲܛ̣ ܣܲܟܿܝܼܢܵܐ ܠܡܸܟܿܣܹܗ ܠܲܒܼܪܹܗ ܀ 271 :ܐܘܿ ܪܸܥܝܵܢܵܐ ܕܐܲܝܼܪ ܚܘܼܒܹܿܗ ܥܲܡ ܗܲܕܵܡܹ̈ܐ 272 ܕܲܫܪ̣ܵܐ ܚܘܼܒܵܐ ܕܐܲܣܝܼܪܘܼܬܹܗ ܒܪܸܚܡܲܬܼ ܡܵܪܹܗ ܀ 273 :ܐܘܿ ܡ̇ܝܘܿܬܼܵܐ ܠܒܼܝܼܫ ܟܲܪܝܘܼܬܼܵܐ ܕܚܲܫܲܝ̈ ܒܸܣܪܵܐ 274 ܕܟܲܕܼ ܡܵܚܹ̇ܝܢ ܠܹܗ ܚܸܒܼܠܹ̈ܐ ܕܪ̈ܲܚܡܹܐ ܥܨܲܝ ܠܲܟܼܝܵܢܹܗ ܀ 275 :ܐܘܿ ܐܲܬܼܠܹܝܛܵܐ ܕܐܸܚܲܕܼ ܕܪܵܐ ܗܘ̤ ܥܲܡ ܢܲܦܫܹܗ 276 ܘܲܙܟܼܵܐ ܐܸܢܘܿܢ ܠܚܲܫܲܝ̈ ܦܲܓܼܪܵܐ ܒܚܹܝܠ ܪܸܥܝܵܢܹܗ ܀ 277 :ܬܗ݂ܲܪܘ ܥܸܠܵܝܹ̈ܐ ܒܚܘܼܡܣܵܢ ܢܲܦܫܹܗ ܕܟܼܵܗܵܢܵܐ ܚܲܕܼܬܵܐ 278 ܕܐܸܚܲܕܼ ܪ̈ܲܚܡܵܘܗܝ ܕܢܹܐܣܘܿܪ ܚܘܼܒܹܿܗ ܒܪܸܚܡܲܬܼ ܡ̇ܪܹܗ ܀ 279 :ܬܠ̣ܵܐ ܣܲܟܿܝܼܢܵܐ ܕܢܸܟܿܘܿܣ ܠܲܒܼܪܹܗ ܕܠܵܐ ܦܘܼܠܵܓܼܵܘ 280 ܘܲܟܼܠ̣ܵܝܗܝ ܩܵܠܵܐ ܕܠܵܐ ܒܵܥܹ̇ܐ ܐ̄ܢܵܐ ܕܸܒܼܚܵܐ ܕܐ̄ܢܵܫܵܐ ܀ 281 :ܩ̣ܪܵܐ ܠܹܗ ܡܵܪܝܵܐ ܐܲܒܼܪܵܡ ܐܲܒܼܪܵܡ ܡܲܠܸܠ ܥܲܡܹܗ 282 ܕܲܟܼܠܝܼ ܐܝܼܕܼܵܟ ܡ̣ܢ ܝܵܪܬܿܘܼܬܼܵܟ ܘܠܵܐ ܬܚܲܒܸܿܠܲܝܗܝ ܀ 283 :ܡܩܲܒܲܠ ܕܸܒܼܚܵܟ ܥܲܡ ܨܸܒܼܝܵܢܵܟ ܐܲܝܟ ܗܵܘ̇ ܕܲܕܼܒܼܝܼܚ 284 ܕܗܵܐ ܐܵܘܕܲܥܬܵܝܗܝ ܠܚܘܼܒܵܟ ܕܲܠܘܵܬܼܝ ܠܥܹܝܢ ܪ̈ܘܼܚܵܢܹܐ ܀ 285 :ܚܠܵܦ ܕܲܫܡ݂ܲܥܬܵܝܗܝ ܘܠܵܐ ܐܸܫܬܵܘܚܲܪ ܦܘܼܩܕܵܢܝ ܨܹܐܕܲܝܟ 286 ܢܸܗܘܸܐ ܙܲܪܥܵܟ ܒܲܕܼܡܘܼܬܼ ܚܵܠܵܐ ܕܒܲܣܦܵܪ ܝܲܡܵܐ ܀ 287 :ܕܠܵܐ ܟ̣ܠܲܬܿ ܠܲܒܼܪܵܟ ܡ̣ܢ ܣܲܟܿܝܼܢܵܐ ܕܢܸܗܘܹܐ ܕܸܒܼܚܵܐ 288 ܒܲܟܼܝܵܢܝ ܝܼܡܝܼܬܼ ܕܐܲܫܦܲܥ ܒܘܼܪ̈ܟܵܬܼܝ ܥܲܠܐ ܝܲܠ̈ܕܵܬܼܵܟ ܀ 289 :ܚܠܵܦ ܩܘܼܪܒܵܢܵܐ ܕܩܲܪܸܒܼ ܐܝܼܕܵܝ̈ܟ ܒܠܸܒܵܐ ܫܲܠܡܵܐ 290 ܒܵܟ ܐܵܣܲܪ ܐ̄ܢܵܐ ܫܲܝܢܵܐ ܕܲܣܕ݂ܲܩ ܥܒܼܵܪ ܦܘܼܩܕܵܢܵܐ ܀ 291 ܠܵܐ ܗ̄ܘ̣ܵܐ ܕܸܒܼܚܵܐ ܕܐ̄ܢܵܫܵܐ ܪܵܓܼܢ̣ܝ ܕܲܬܼܩܲܪܸܒܼ ܠܝܼ: pb. 66 292 ܗܵܝ̇ ܕܲܥܬܼܝܼܕܼܵܐ ܒܥܹ̇ܝܬܼ ܕܐܸܓܼܠܹܐ ܒܵܟ ܒܗܵܕܹܐ ܕܲܣܥ݂ܲܪܬܿ ܀ 293 :ܒܕܸܒܼܚܵܐ ܕܐ̄ܢܵܫܵܐ ܥܬܼܝܼܕܼ ܐ̄ܢܵܐ ܕܐܹܣܘܿܪ ܫܲܝܢܵܐ ܕܟܼܠܵܐ 294 ܘܩܲܕܿܡܹ̇ܬܼ ܨܵܪܹܬܼ ܒܕܸܒܼܚܵܐ ܕܲܒܼܪܵܟ ܡ̇ܘܬܹܿܗ ܕܚܲܒܿܝܼܒܼܝ ܀ 295 :ܒܪܵܟ ܐܸܢ ܡ̇ܐܹ̇ܬܼ ܠܵܐ ܦܵܪܲܥ ܠܵܗ̇ ܠܚܵܘܒܵܬܼ ܓܸܢܣܹܗ 296 ܒܹܪܝ ܕܡ̣ܢ ܙܲܪܥܵܟ ܫܸܪܹܐ ܒܡܵܘܬܹܿܗ ܫܘܼܠܛܵܢ ܡ̇ܘܬܵܐ ܀ 297 :ܚܲܕܼ ܢܵܣܹ̇ܒܼ ܐ̄ܢܵܐ ܡܸܢܹܗ ܕܙܲܪܥܵܟ ܒܫܘܼܠܵܡ ܙܲܒܼܢܹ̈ܐ 298 ܘܥܵܒܹ̇ܕܼ ܐ̄ܢܵܐ ܠܹܗ ܕܸܒܼܚܵܐ ܫܲܠܡܵܐ ܕܲܡܚܲܣܸܐ ܟܠ ܀ 299 :ܒܡܵܘܬܹܿܗ ܕܐܝܼܣܚܵܩ ܪܸܫܡܹ̇ܬܼ ܡ̇ܘܬܹܿܗ ܕܡܝܼܬܼ ܟܲܕܼ ܡܝܼܬܼ 300 ܕܡ̇ܐܹ̇ܬܼ ܐܵܦ ܗܘ̤ ܘܠܵܐ ܡܸܬܼܚܲܒܲܠ ܦܲܓܼܪܹܗ ܒܲܫܝܘܿܠ ܀ 301 :ܒܲܦܟܼܵܪ ܐܝܼܕܼܵܘ̈ܗܝ ܕܐܝܼܣܚܵܩ ܨܵܪܹܬܼ ܨܸܨܹ̈ܐ ܒܐܝܼܕܼܵܘ̈ܗܝ 302 ܗܵܪܟܵܐ ܒܐ̄ܪܵܙܵܐ ܘܬܲܡ̇ܢ ܒܩܘܼܫܬܵܐ ܒܗܘܿܢ ܒܲܥܒܼܵܕܹ̈ܐ ܀ 303 :ܠܐܝܼܣܚܵܩ ܦܲܟܼܪܹܗ ܚܘܼܒܵܐ ܘܪ̈ܲܚܡܹܐ ܕܡܸܛܠ ܡ̇ܪܹܗ 304 ܘܠܹܗ ܦܵܟܲܪ ܠܹܗ ܚܘܼܒܵܐ ܘܪ̈ܲܚܡܹܐ ܕܡܸܛܠ ܓܸܢܣܹܗ ܀ 305 :ܒܐܝܼܣܚܵܩ ܫܲܡ̣ܠܝܼܬܿ ܚܘܼܒܵܐ ܘܪ̈ܲܚܡܹܐ ܕܲܠܘܵܬܼ ܡ̇ܪܘܼܬܼܝ 306 ܘܒܹܗ ܡܚܵܘܹܐ ܐ̄ܢܵܐ ܥܘܼܬܼܪܵܐ ܘܚܘܼܒܵܐ ܕܲܠܘܵܬܼ ܟܠܵܐ ܀ 307 :ܒܐܝܼܣܚܵܩ ܨܵ̇ܟܹ̇ܬܼ ܬܲܚܘܝܼܬܼ ܡ̇ܘܬܹܿܗ ܘܢܘܼܚܵܡ ܚܲܝܵܘ̈ܗܝ 308 ܕܲܡܩܝܼܡ ܐ̄ܢܵܐ ܠܹܗ ܒܵܬܲܪ ܡ̇ܘܬܹܿܗ ܘܠܵܐ ܡܸܬܼܚܲܒܲܠ ܀ 309 :ܠܐܝܼܣܚܵܩ ܦܲܨܲܝܼ ܕܸܟܼܪܵܐ ܚܲܪܫܵܐ ܒܝܲܕܼ ܦܘܼܩܕܵܢܵܐ 310 ܘܗܘ̤ ܡܸܬܦܲܨܸܐ ܒܚܲܝܠܵܐ ܟܲܣܝܵܐ ܗܵܘ̇ ܕܥܵܡܲ݁ܪ ܒܹܗ ܀ 311 :ܪܹܫܵܐ ܕܚܲܝܹ̈ܐ ܥܒܲ̇ܕܿܬܵܟ ܐܲܒܼܪܵܡ ܗܵܪܟܵܐ ܘܬܲܡ̇ܢ 312 ܒܐ̄ܪܵܙܵܐ ܕܩܘܼܫܬܵܐ ܓܵܡܲ݁ܪ ܐ̄̇ܢܵܐ ܠܹܗ ܠܫܘܼܘܕܵܝ ܨܹܐܕܲܝܟ ܀ 313 :ܗܵܐ ܚܵܘܝܼܬܵܟ ܐ̄ܪܵܙ ܦܘܼܪܩܵܢܵܐ ܒܕܸܒܼܚܹܗ ܕܲܒܼܪܵܟ 314 ܕܚܲܕܼ ܕܵܒܲܚ ܐ̄ܢܵܐ ܒܫܘܼܠܵܡ ܙܲܒܼܢܹ̈ܐ ܠܦܘܼܪܩܵܢ ܟܠܵܐ ܀ 315 :ܗܵܐ ܝܸܗ̄ܒܹܿܬܼ ܠܵܟ ܕܸܒܼܚܵܐ ܚܲܪܫܵܐ ܓܡܘܿܪ ܨܸܒܼܝܵܢܵܟ 316 ܫܪܝܼ ܠܲܡܠܝܼܠܵܐ ܘܟܼܘܿܣ ܫܲܬܿܝܼܩܵܐ ܘܫܲܡܠܸܵܐ ܕܸܒܼܚܵܟ ܀ 317 :ܚܙ̣ܝܼ ܐܲܒܼܪܵܗܵܡ ܕܝܸܗ̄ܒܹܿܬܼ ܐܲܓܼܪܵܐ ܠܚܘܼܒܵܟ ܕܲܠܘܵܬܼܝ 318 ܕܐ̄ܪܵܙܵܐ ܕܟܲܣܝܼܬܼ ܡ̣ܢ ܥܸܠܵܝܹ̈ܐ ܓܠܹ̇ܝܬܼ ܚܵܘܝܼܬܵܟ ܀ 319 :ܕܙܲܪܥܵܟ ܐܲܒܼܪܵܡ ܥܬܼܝܼܕ ܐ̄ܢܵܐ ܕܐܸܠܒܲܫ ܒܲܕܼܡܘܼܬܼ ܢܲܚܬܵܐ 320 ܕܲܒܼܓܲܠܝܘܼܬܹܗ ܢܲܟܼܪܸܙ ܚܲܝܠܵܐ ܕܒܹܪܝ ܝܼܚܝܼܕܼܵܐ ܀ pb. 67 321 :ܒܝܲܕܼ ܨܸܒܼܝܵܢܵܐ ܥܵܡܲ݁ܪ ܐ̄ܢܵܐ ܒܹܗ ܒܪܹܫܝܼܬܼ ܙܲܪܥܵܟ 322 ܘܒܲܐܦܲܝ̈ ܬܲܪܥܵܐ ܕܦܲܓܼܪܹܗ ܣܵܓܹ̇ܕܼ ܟܠܢܵܫ ܠܲܟܼܝܵܢܝ ܀ 323 :ܗܵܐ ܩܲܒܸܿܠܬܹܿܗ ܠܕܸܒܼܚܵܐ ܕܐܝܼܕܲܝ̈ܟ ܥܲܡ ܨܸܒܼܝܵܢܵܟ 324 ܚܘܿܬܼ ܟܲܕܼ ܚܵܪܹܝܬܿ ܒܫܘܼܡܠܵܝ ܕܸܒܼܚܵܟ ܕܦܘܼܪܩܵܢ ܥܲܡܡܹ̈ܐ ܗ̄ܘ̣ ܀ 325 :ܐܲܪܝܼܡ ܐܲܒܼܪܵܡ ܥܲܝܢܵܘ̈ܗܝ ܘܲܚ̣ܙܵܐ ܕܸܟܼܪܵܐ ܒܛܘܼܪܵܐ 326 ܕܐܲܣܪܹܗ ܪܹܡܙܵܐ ܒܪܹܫ ܐܝܼܠܵܢܵܐ ܕܦܘܼܨܵܝ ܝܲܠܕܹܿܗ ܀ 327 :ܓ̣ܡܲܪ ܨܸܒܼܝܵܢܹܗ ܘܫܲܡܠܝܼ ܕܸܒܼܚܹܗ ܒܕܼܟܼܪܵܐ ܚܲܪܫܵܐ 328 ܘܲܚܕܼܝܼ ܕܲܚܙ̣ܵܐ ܩܘܼܫܬܼܵܐ ܒܐ̄ܪܵܙܵܐ ܕܫܲܡܸܫ ܐܝܼܕܼܵܘ̈ܗܝ ܀ 329 :ܒܗܵܢ ܣܘܼܟܵܝܵܐ ܚܲܕܼܝܼ ܐܸܢܘܿܢ ܛܵܒܼܵܐ ܠܟܹܐܢܹ̈ܐ 330 ܘܥܲܒ݂ܲܪ ܐܸܢܘܿܢ ܪܹܫ ܬܘܼܩܵܢܵܐ ܕܡܲܠܟܿܘܼܬܼ ܪܵܘܡ̇ܐ ܀ 331 :ܒܗܘܿܢ ܐܸܫܬܵܘܕܿܝܼ ܠܟܼܠ ܕܐܸܙܕܲܡܲܢܘ ܒܕܼܘܼܒܵܪ̈ܲܝܗܘܿܢ 332 ܕܒܲܐܝܟ ܕܒܲܠܡܹܐܢܵܐ ܡܢܝܼܚ ܨܹܐܕܲܝܗܘܿܢ ܠܐܲܝܠܹܝܢ ܕܲܠܐ̣ܝܼܘ ܀ 333 :ܝܲܩܲܪ ܐܢܘܿܢ ܒܝܲܕܼ ܡܘܼܠܟܵܢܹ̈ܐ ܕܲܥܬܼܝܼ̈ܕܼܵܬܼܵܐ 334 ܘܲܪܫܲܡ ܨܲܠܡܵܐ ܕܕܸܘܼܒܵܪ̈ܲܝܗܘܿܢ ܠܕܼܵܪܹ̈ܐ ܕܐܵܬܹ̇ܝܢ ܀ 335 :ܙܲܡܸܢ ܥܲܡܡܹ̈ܐ ܠܐܲܪܒܲܥ ܦܸܢ̈ܝܵܢ ܠܲܓܼܢܘܿܢܲܝ̈ܗܘܿܢ 336 ܕܢܹܐܬܼܘܿܢ ܢܸܚܕܿܘܿܢ ܪܘܼܚܵܢܵܐܝܼܬܼ ܒܲܣܡܵܟܲܝ̈ܗܘܿܢ ܀ 337 :ܫ̣ܘܵܐ ܐܲܒܼܪܵܗܵܡ ܕܢܸܗܘܹܐ ܪܹܫܵܐ ܒܡܲܠܟܿܘܼܬܼ ܪܵܘܡ̇ܐ 338 ܕܲܕܼܪܲܫ ܐܘܼܪܚܵܐ ܠܦܘܼܢܝܵ ܥܲܡܡܹ̈ܐ ܒܗܲܝܡܵܢܘܼܬܹܗ ܀ 339 :ܗܘ̤ܵܬܼ ܬܵܘܕܿܝܼܬܹܗ ܐܲܝܟ ܫܲܬܸܐ ܣܬܼܵܐ ܕܫܘܼܪܵܝ ܒܲܝܬܵܐ 340 ܘܒܹܗ ܐܸܫܬܲܟܼܠܲܠܘ ܚܘܼܒܵܐ ܘܣܲܒܼܪܵܐ ܘܗܲܝܡܵܢܘܼܬܼܵܐ ܀ 341 :ܕܣܲܝܒܲܪ ܟܹܐܢܵܐ ܥܲܩܪܘܼܬܼ ܦܲܓܼܪܹܗ ܘܠܵܐ ܐܸܬܼܦܲܠܲܓܼ 342 ܣܵܡ̣ܹܗ ܐܲܒܼܵܐ ܠܥܲܡܡܹ̈ܐ ܕܕܲܡܝܼܘ ܒܗܲܝܡܵܢܘܼܬܹܗ ܀ 343 :ܢܸܗܘܹܐ ܐܲܒܼܪܵܡ ܒܝܲܕܼ ܕܘܼܒܵܪ̈ܵܘܗܝ ܐܲܝܟ ܡܲܚܙܝܼܬܼܵܐ 344 ܘܢܸܚܙܹܐ ܢܲܦܫܲܢ ܕܕܲܠܡܵܐ ܣܲܢܝܵܐ ܒܥܵܘ̣ܠܵܐ ܟܲܣܝܵܐ ܀ 345 :ܢܸܙܪܘܿܥ ܒܐܲܪܥܵܐ ܕܗܲܝܡܵܢܘܼܬܹܗ ܣܲܒܼܪܵܐ ܘܚܘܼܒܵܐ 346 ܘܢܸܚܨܘܿܕܼ ܦܹܐܪܹ̈ܐ ܪ̈ܘܼܚܵܢܵܝܹܐ ܕܠܵܐ ܫܘܼܠܵܡܵܐ ܀ 347 :ܒܹܗ ܢܸܬܼܒܲܩܘܿܢ ܥܲܩܪܹ̈ܐ ܓܠܝܼܙܲܝ̈ ܡ̣ܢ ܡܘܼܠܟܵܢܵܐ 348 ܘܢܸܩܢܘܿܢ ܝܲܠܕܵܐ ܕܠܵܐ ܣܘܼܟܵܝܵܐ ܒܕܼܘܼܡܝܵܐ ܕܝܼܠܹܗ ܀ 349 :ܒܲܠܘܝܼܬܼ ܚܘܼܒܹܗ ܢܸܪܕܿܘܿܢ ܒܐܘܼܚܵܐ ܫܚܝܼܩܲܝ̈ ܥܘܼܡܪܵܐ 350 ܕܢܸܗܘܹܐ ܥܲܡܗܘܿܢ ܠܡܹܐܢܵܐ ܢܝܼܚܵܐ ܠܛܘܼܪ̈ܵܦܲܝܗܘܿܢ ܀ 351 :ܒܛܘܼܦܣܵܐ ܕܥܘܼܬܼܪܹܗ ܢܸܩܢܘܿܢ ܥܘܼܬܼܪܵܐ ܐܵܦ ܥܲܬܼܝܼܪܹ̈ܐ 352 ܘܢܸܗܘܘܿܢ ܥܲܡܹܗ ܒܢܲܝ̈ ܝܵܪܬܿܘܼܬܼܵܐ ܒܥܘܼܬܼܪܵܐ ܕܪܵܘܡ̇ܐ ܀ 353 :ܠܹܗ ܢܸܬܿܕܡܘܿܢ ܩܢܹܝܢ ܣܝܼ̈ܡܵܬܼܵܐ ܐܲܪ̈ܥܵܢܵܝܵܬܼܵܐ 354 :ܘܢܸܩܢܘܿܢ ܥܲܡܹܗ ܫܡܲܝܵܢ̈ܝܵܬܼܵܐ ܕܠܵܐ ܡܸܫܬܲܪ̈ܝܵܢ 355 :ܢܸܗܘܹܐ ܫܘܼܦܪܹܗ ܐܲܝܟ ܡܲܚܙܝܼܬܼܵܐ ܠܟܼܠ ܚܲܙܵܝܝܼ̈ܢ 356 ܘܢܸܩܢܘܿܢ ܚܘܼܒܵܐ ܠܘܵܬܼ ܡܸܣܟܹܿܢܹ̈ܐ ܒܡܵܙܘܿܢ ܙܲܒܼܢܵܐ ܀ pb. 68 357 :ܒܣܲܪܵܐ ܢܚܘܼܪ̈ܢ ܥܲܬܿܝܼܪ̈ܬܵܪܐ ܕܩܲܢ̈ܝܵܢ ܣܲܓܿܝܼ 358 ܕܟܲܕܼ ܩܲܢܝܵܐ ܗ̄ܘ̣ܵܬܼ ܒܐܝܼܕܹ̈ܝܗ̇ ܫܲܡܫܲܬ̤ ܠܪ̈ܘܼܚܵܢܵܝܹܐ ܀ 359 :ܡܘܼܟܵܟ ܢܲܦܸܫܵܗ̇ ܢܩܲܦܲܚ ܐܸܢܹܝܢ ܠܥܲܬܼܝܼܪ̈ܵܬܼܵܐ 360 ܕܠܵܐ ܚܲܠܸܦܬܹܗ ܠܚܝܘܼܒܹܿܗ ܕܠܲܒܼܪܵܡ ܒܥܘܼܬܼܪܵܗ̇ ܕܡܸܨܪܹܝܢ ܀ 361 :ܢܩܲܛܪܸܓܼ ܐܸܢܹܝܢ ܒܠܲܕܼ ܚܘܼܡܣܵܢܵܐ ܕܗܲܝܡܵܢܘܼܬܼܵܗ̇ 362 ܠܦܲܟܿܝܼ̈ܗܵܬܼܵܐ ܕܫܵܐ̈ܠܵܢ ܝܲܠܕܵܐ ܠܫܹܐܕܹ̈ܐ ܛܲܡ̈ܐܹܐ ܀ 363 :ܡܸܬܼܚܵܐ ܕܲܫܢܹܝ̈ܗ̇ ܢܲܟܸܿܣ ܐܸܢܹܝܢ ܠܙܲܢܵܝܵ̈ܬܼܵܐ 364 ܕܲܠܡܵܐ ܫܢܲܝ̈ܢܵܐ ܢܸܣܒܲܬ̤ ܝܲܠܕܵܐ ܕܠܵܐ ܣܘܼܟܵܝܵܐ ܀ 365 :ܬܸܗܘܹܐ ܣܲܪܵܐ ܐܲܝܟ ܡܲܚܙܝܼܬܼܵܐ ܡܲܚܙܲܝܼܬܼܵܐ ܠܲܒܼ̈ܢܵܬܼ ܚܵܘܵܐ 366 ܘܲܢܚܘܼܪ̈ܵܢ ܒܵܗ̇ ܘܠܵܐ ܡܸܬܼܦܲܠ̈ܓܵܝܼܢ ܥܲܠ ܒܵܪܘܿܝܵܐ ܀ 367 :ܒܐܲܒܼܪܵܡ ܢܸܚܙܘܼܢ ܠܲܩܢܘܿܡܲܝ̈ܗܘܿܢ ܪ̈ܚܡܲܝ ܥܘܼܬܼܪܵܐ 368 ܕܦܲܪܢܸܣ ܥܘܼܬܼܪܹܗ ܘܡܲܟܸܟ ܢܲܦܫܹܗ ܐܲܝܟ ܡܸܣܟܹܿܢܵܐ ܀ 369 :ܢܸܗܘܘܿܢ ܟܹܐܢܹ̈ܐ ܒܕܼܘܼܒܵܪܲܝܗܘܿܢ ܨܲܠܡܹ̈ܐ ܓܠܲܝܵܐ 370 ܘܲܢܨܘܼܪ ܟܠܢܵܫ ܨܠܸܡ ܫܘܼܦܪܲܝܗܘܿܢ ܒܓܼܵܘ ܪܸܥܝܵܢܹܗ ܀ 371 :ܒܪܸܚܡܲܬܼ ܢܲܦܫܲܢ ܢܹܐܣܘܿܪ ܚܘܼܒܲܢ ܠܘܵܬܼ ܒܵܪܘܿܝܵܐ 372 ܕܢܸܬܸܿܠ ܐܲܓܼܪܵܐ ܠܗܲܝܡܵܢܘܼܬܲܢ ܥܲܡ ܫܲܪܝܼܪ̈ܵܘܗܝ ܀