Nisibis 36

https://syriaccorpus.org/290

TEI/XML Text

Show

section : section

line : line

Table of Contents

1 2 3 4 5 6 7 8 9 10 11 12 13 14 15 16 17 18

36 Nisibis XXXVI

ܡܶܢܶܗ ܒܰܪ ܩܳܠܶܗ

1 ܡܳܪܰܢ ܫܰܥܒܶܕ ܚܰܝܠܶܗ ܘܰܐܚܕܽܘܗ̱ܝ ܕܡܰܘܬܶܗ ܚܰܝܳܐ ܢܺܚܶܐ ܠܳܐܕܳܡ ܐܺܝ̈ܕܰܘܗ̱ܝ ܠܩܽܘܒܥܳܐ ܕܨܶܨ̈ܶܐ ܝܰܗ̱ܒ ܗ̱ܘܳܐ ܚܠܳܦ ܐܺܝܕܳܐ ܕܩܶܛܦܰܬ ܦܺܐܪܳܐ ܒܠܼܰܥ ܥܰܠ ܦܰܟܶܗ ܒܶܝܬ ܕܺܝܢܼܳܐ ܚܠܳܦ ܦܽܘܡܳܐ ܕܶܐܟܼܰܠ ܒܥܶܕܳܢ ܘܕܶܫܕܶܐ ܗ̱ܘܳܐ ܐܳܕܳܡ ܪܶܓܠܶܗ ܪ̈ܶܓܠܰܘܗ̱ܝ ܩܒܰܥܘ̱ ܫܠܼܰܚ ܗ̱ܘܳܐ ܡܳܪܰܢ ܕܢܰܢܟܶܦ ܒܰܡܪܳܪܳܐ ܘܚܶܠܳܐ ܚ̇ܳܠܝ ܡܳܪܬ ܚܶܘܝܳܐ ܕܰܢܼܣܰܟ ܗ̱ܘܳܐ ܒܐ̱ܢܳܫܽܘܬܳܐ ܥܽܘܢܺܝܬܳܐ: ܒܪܺܝܟ ܕܰܙܟܳܢܝ̱ ܘܰܐܚܺܝ ܡܺܝ̈ܬܶܐ ܠܬܶܫܒܽܘܚܬܶܗ

2 ܐܶܢ ܐܰܠܳܗܳܐ ܐܰܢ̱ܬ ܚܰܘܳܐ ܚܰܝܠܳܟ ܘܶܐܢ ܒܰܪܢܳܫܳܐ ܐܰܢ̱ܬ ܢܰܣܳܐ ܚܰܝܠܰܢ ܘܶܐܢ ܗܼܽܘ ܕܠܳܐܕܳܡ ܒܥܺܝܬ ܙܶܠ ܠܳܟ ܥܰܠ ܚܰܘ̈ܒܳܬܶܗ ܚܒܺܝܫ ܗܳܪܟܳܐ ܠܳܐ ܡܨܶܝܢ ܟܪ̈ܽܘܒܶܐ ܘܰܣܪ̈ܳܦܶܐ ܕܢܶܗܘܽܘܢ ܚܠܳܦܰܘܗ̱ܝ ܦܳܪ̈ܽܘܥܶܐ ܠܰܝܬ ܒܗܽܘܢ ܡܳܝܽܘܬܳܐ ܕܢܶܬܶܠ ܢܰܦܫܶܗ ܚܠܳܦܰܘܗ̱ܝ ܡܰܢ ܦܳܬܰܚ ܦܽܘܡܳܗ̇ ܕܰܫܝܽܘܠ ܘܥܳܡܶܕ ܡܰܣܶܩ ܠܶܗ ܡܶܢܳܗ̇ ܕܰܒܠܰܥܬܶܗ ܘܰܟܡܳܬ ܥܠܰܘܗ̱ܝ ܘܰܠܥܳܠܰܡ

3 ܐܶܢܳܐ ܐ̱ܢܳܐ ܕܰܙܟܺܝܬ ܟܽܠ ܚܰܟܺܝ̈ܡܶܐ ܘܗܳܐ ܒܙܳܘܝ̈ܳܬܳܐ ܟܳܫܶܝܢ ܠܺܝ ܒܰܫܝܽܘܠ ܬܳܐ ܥܽܘܠ ܒܰܪ ܝܰܘܣܶܦ ܘܰܚܙܺܝ ܓܽܘܢ̈ܚܶܐ ܩܽܘܠܘ̈ܳܬܳܐ ܕܓܰܢ̱ܒܳܪ̈ܶܐ ܫܰܪܕܽܘܕܶܗ ܪܰܒܳܐ ܕܫܶܡܫܽܘܢ ܘܬܶܓܪܽܘܡܬܶܗ ܕܓܽܘܠܝܰܕ ܩܰܫܝܳܐ ܥܽܘܓ ܒܰܪ ܓܰܢ̱ܒܳܪ̈ܶܐ ܬܽܘܒܰܢ ܗܰܘ ܕܰܥܒܰܕ ܠܶܗ ܥܰܪܣܳܐ ܕܦܰܪܙܠܳܐ ܘܰܓܢܶܐ ܒܳܗ̇ ܡܶܢܳܗ̇ ܣܚܰܦܬܶܗ ܘܰܐܪܡܺܝܬܶܗ ܠܗܰܘ ܐ̱ܪܳܙܳܐ ܒܬܰܪܥܳܐ ܕܰܫܝܽܘܠ ܫܰܦܠܬܶܗ

4 ܐܶܢܳܐ ܒܰܠܚܽܘܕܝ̱ ܙܟܺܝܬ ܠܣ̈ܰܓܺܝܐܶܐ ܘܺܝܚܺܝܕܳܝܳܐ ܒܳܥܶܐ ܕܢܶܙܟܶܝܢܝ̱ ܢܒܺܝ̈ܶܐ ܘܟܳܗ̈ܢܶܐ ܘܢܰܨ̇ܺܝܚܳܐ ܕܒܰܪ̱ܬ ܙܟܺܝܬ ܠܡ̈ܰܠܟܶܐ ܒܣܶܕܪ̈ܰܝܗܽܘܢ ܘܓܰܢ̱ܒܳܪ̈ܶܐ ܒܢܰܚܫܺܝܪ̈ܰܝܗܽܘܢ ܘܙܰܕܺܝܩ̈ܶܐ ܒܢܶܨܚ̈ܳܢܰܝܗܽܘܢ ܢܰܗܪ̈ܰܘܳܬܳܐ ܕܰܫ̈ܠܰܕܶܐ ܪܳܡܶܝܢ ܒܰܫܝܽܘܠ ܘܰܟܡܳܐ ܕܢܳܣܟܺܝܢ ܒܳܗ̇ ܨܰܗܝܳܐ ܗ̱ܝ ܐܶܢ ܩܰܪܺܝܒ ܐ̱ܢܳܫ ܘܶܐܢ ܪܰܚܺܝܩ ܗܼܽܘ ܩܨܳܐ ܠܬܰܪܥܳܐ ܕܰܫܝܽܘܠ ܡܰܝܬܶܐ ܠܶܗ

5 ܠܟܶܣܦܳܐ ܒܶܣܪܰܬ ܨܶܝܕ ܥܰܬܺܝܪ̈ܶܐ ܘܠܳܐ ܫܰܚܕܽܘܢܝ̱ ܗ̱ܘܰܘ ܩܽܘܪ̈ܒܳܢܰܝܗܽܘܢ ܡܳܪ̈ܰܝ ܥܼܰܒ̈ܕܶܐ ܠܳܐ ܫܕܰܠܽܘܢܝ̱ ܗ̱ܘܰܘ ܡܶܡܬܽܘܡ ܕܶܐܕܒܰܪ ܥܼܰܒܕܳܐ ܚܠܳܦ ܡܳܪܶܗ ܘܡܶܣܟܺܢܳܐ ܚܠܳܦ ܥܰܬܺܝܪܳܐ ܐܳܘ ܣܳܒܳܐ ܚܠܳܦ ܝܰܠܽܘܕܳܐ ܚܰܟܺܝ̈ܡܶܐ ܕܰܠܚܰܝ̈ܘܳܬܳܐ ܡܨܶܝܢ ܕܰܢܦܺܝܣܽܘܢ ܦܝܳܣܗܽܘܢ ܒܶܐܕܢ̈ܰܝ ܠܳܐ ܥܳܐܶܠ ܣܳܢܶܐ ܦܺܝܣ ܢܶܩܪܶܝܢܝ̱ ܟܽܠ ܐ̱ܢܳܫ ܘܶܐܢܳܐ ܡܶܕܶܡ ܕܶܐܬܦܰܩܕܰܬ ܥܰܒܕܳܢܳܐ

6 ܡܰܢܽܘ ܗܳܢܳܐ ܐܰܘ ܒܰܪ ܡܰܢܽܘ ܘܰܐܝܢܰܘ ܛܽܘܗܡܶܗ ܕܗܰܘ ܡܰܢ ܕܰܙܟܼܳܢܝ̱ ܣܳܦܪܳܐ ܕܫܰܪ̈ܒܳܬܳܐ ܨܶܐܕܝ̱ ܐܺܝܬܰܘܗ̱ܝ ܗܳܐ ܥܶܠܶܬ ܥܶܡܠܶܬ ܘܰܩܪܺܝܬ ܫܡ̈ܳܗܶܐ ܕܡܶܢ ܐܳܕܳܡ ܘܰܠܟܳܐ ܘܐ̱ܢܳܫ ܡܶܢ ܡܺܝ̈ܬܶܐ ܠܳܐ ܛܳܥܶܐ ܫܰܪ̈ܒܳܢ ܫܰܪ̈ܒܳܢ ܗܳܐ ܟܬܺܝܒܺܝܢ ܥܰܠ ܗܰܕ̈ܰܡܰܝ ܡܶܛܽܠܳܬܳܟ ܗܳܐ ܝܶܫܽܘܥ ܥܶܠܶܬ ܥܶܒܕܶܬ ܚܽܘܫܒܳܢܳܐ ܕܰܐܚܰܘܝܶܟ ܕܠܰܝܬ ܕܦܳܠܶܛ ܡܶܢ ܐܺܝܕ̈ܰܝ

7 ܬܪܶܝܢ ܓܶܝܪ ܓܰܒܪ̈ܺܝܢ ܕܠܳܐ ܐܶܕܓܰܠ ܕܰܫܡ̈ܳܗܰܝܗܽܘܢ ܛܥܺܝܢ ܒܰܫܝܽܘܠ ܚܳܢܽܘܟ ܓܶܝܪ ܘܶܐܠܺܝܳܐ ܠܳܐ ܐܶܬܰܘ ܨܶܐܕܰܝ ܒܟܽܠܳܗ̇ ܒܪܺܝܬܳܐ ܒܥܺܝܬ ܐܶܢܽܘܢ ܐܳܦ ܠܰܐܝܟܳܐ ܕܰܢܚܼܶܬ ܝܰܘܢܳܢ ܢܶܚܬܶܬ ܡܳܫܶܬ ܘܠܰܝܬ ܐܶܢܽܘܢ ܘܕܰܐܣܒܰܪ ܕܰܠܦܰܪܕܰܝܣܳܐ ܥܰܠܘ̱ ܘܶܐܬܦܰܠܰܛܘ̱ ܟܪܽܘܒܳܐ ܕܚܺܝܠܳܐ ܢܳܛܰܪ ܠܶܗ ܣܶܒܶܠܬܳܐ ܚܙܳܐ ܗ̱ܘܳܐ ܝܰܥܩܽܘܒ ܕܰܠܡܳܐ ܟܰܝ ܒܳܗ̇ ܐܶܬܥܰܠܺܝܘ ܠܰܫܡܰܝܳܐ

8 ܡܰܢܽܘ ܕܰܐܟܺܝܠ ܚܰܠܳܐ ܕܝܰܡܳܐ ܘܬܰܪ̈ܬܶܝܢ ܦܶܪ̈ܕܺܝܢ ܒܰܠܚܽܘܕ ܒܰܕܰܪ ܗܳܢܳܐ ܚܶܨܕܳܐ ܕܰܐܪܡܰܝܢ ܒܶܗ ܟܽܠܝܽܘܡ ܟܽܘܪ̈ܗܳܢܶܐ ܐܰܝܟ ܚܰܨ̈ܽܘܕܶܐ ܐܶܢܳܐ ܒܰܠܚܽܘܕ ܣܳܒܶܠ ܐ̱ܢܳܐ ܟܦܰܝ̈ܗܽܘܢ ܘܰܡܩܰܒܶܪ ܐ̱ܢܳܐ ܡܩܰܪ̈ܒܳܢܶܐ ܟܰܕ ܡܶܬܪܰܗܒܺܝܢ ܟ̈ܰܦܶܐ ܡܰܪܦܶܝܢ ܩܳܛܽܘ̈ܦܶܐ ܣܓܽܘ̈ܠܶܐ ܛܥܺܝܢ ܬܰܪ̈ܬܶܝܢ ܛܽܘ̈ܛܝܳܢ ܦ̈ܳܠܛܳܢ ܡܶܢܝ̱ ܒܩܶܛܦܳܐ ܪܰܒܳܐ ܕܩܶܛܦܰܬ ܒܰܠܚܽܘܕܝ̱

9 ܐܶܢܳܐ ܐ̱ܢܳܐ ܕܥܶܒܕܶܬ ܐܳܡܰܪ ܡܰܘܬܳܐ ܒܝܰܡܳܐ ܘܝܰܒܫܳܐ ܟܽܠ ܢܰܚܫܺܝܪ̈ܺܝܢ ܢܶܫܪ̈ܶܐ ܕܒܳܐܐܰܪ ܨܶܐܕܝ̱ ܐܶܬܝܳܢ ܐܳܦ ܬܰܢܺܝ̈ܢܶܐ ܕܰܬܗܽܘܡܳܐ ܪܰܚܫܳܐ ܘܛܰܝܪܳܐ ܘܰܒܥܺܝܪܳܐ ܣ̈ܳܒܶܐ ܥܠܰܝܡ̈ܶܐ ܘ̈ܰܛܠܳܝܶܐ ܗܳܠܶܝܢ ܟܽܠܗܽܘܢ ܢܦܺܝܣܽܘܢܳܟ ܐܰܘ ܒܰܪ ܡܰܪܝܰܡ ܕܡܰܡܠܶܟ ܗܽܘ ܫܽܘܠܛܳܢܝ̱ ܥܰܠ ܟܽܠ ܙܩܺܝܦܳܟ ܐܰܝܟܰܢ ܙܟܳܐ ܠܺܝ ܕܗܳܐ ܒܩܰܝܣܳܐ ܢܶܨܚܶܬ ܘܰܙܟܺܝܬ ܡܶܢ ܠܽܘܩܕܰܡ

10 ܨܳܒܶܐ ܗܘܺܝܬ ܕܶܝܢ ܕܺܐܡܰܪ ܘܰܐܣܓܶܐ ܠܳܐ ܓܶܝܪ ܐܺܝܬܰܝ ܚܣܺܝܪ ܡ̈ܶܠܶܐ ܐܳܦ ܠܳܐ ܡܶܬܒܥܶܝܢ ܡ̈ܶܠܶܐ ܗܳܐ ܓܶܝܪ ܥܰܒ̈ܕܶܐ ܩܳܥܶܝܢ ܩܰܪ̈ܺܝܒܶܐ ܠܰܘ ܐܰܟܘܳܬܟܽܘܢ ܡܶܬܟܶܠ ܐ̱ܢܳܐ ܠܰܦܫ̈ܺܝܛܶܐ ܥܰܠ ܟܰܣܝ̈ܳܬܳܐ ܕܰܗܘܳܐ ܗܽܘ ܠܰܡ ܢܽܘܚܳܡܳܐ ܐܶܡܰܬܝ̱ ܐܶܡܰܬܝ̱ ܐܶܢ ܕܶܝܢ ܣܰܓܺܝ ܚܣܺܝܢ ܐܰܢ̱ܬ ܗܰܒ ܪܰܗܒܽܘܢܳܐ ܩܰܪܺܝܒܳܐ ܕܢܶܬܗܰܝܡܶܢ ܐܳܦ ܡܽܘܟܠܳܢܳܟ ܪܰܚܺܝܩܳܐ

11 ܡܰܘܬܳܐ ܫܳܠܶܡ ܡܺܐܡܰܪ ܒܶܙܚܶܗ ܘܩܳܠܶܗ ܕܡܳܪܰܢ ܪܳܥܶܡ ܒܳܗ̇ ܒܰܫܝܽܘܠ ܘܰܩܥܼܳܐ ܘܰܨܪܺܝ ܐܶܢܽܘܢ ܩܰܒܪ̈ܶܐ ܚܰܕ ܚܰܕ ܨܽܘܪ̈ܳܢܶܐ ܠܡܰܘܬܳܐ ܐܰܚܕܽܘܗ̱ܝ ܫܝܽܘܠ ܕܡܶܢ ܡܬܽܘܡ ܠܳܐ ܢܶܗܪܰܬ ܐܰܒܪܶܩܘ̱ ܗ̱ܘܰܘ ܒܳܗ̇ ܙܰܠܺܝ̈ܩܶܐ ܡܶܢ ܥܺܝܪ̈ܶܐ ܕܥܰܠܘ̱ ܗ̱ܘܰܘ ܘܰܐܦܶܩܘ̱ ܡܺܝ̈ܬܶܐ ܠܽܐܘܪܥܶܗ ܕܗܰܘ ܡܺܝܬܳܐ ܕܰܠܟܽܠ ܐܰܚܺܝ ܢܦܼܰܩܘ̱ ܡܺܝ̈ܬܶܐ ܘܰܒܗܶܬܘ̱ ܚ̈ܰܝܶܐ ܗܳܢܽܘܢ ܕܰܣܒܰܪܘ̱ ܕܙܰܟܽܐܘܗ̱ܝ ܠܡܰܚܶܐ ܟܽܠ

12 ܡܰܢ ܕܶܝܢ ܝܰܗ̱ܒ ܠܺܝ ܝܰܘܡܶܗ ܕܡܽܘܫܶܐ ܐܶܡܰܪ ܡܰܘܬܳܐ ܥܺܐܕܳܐ ܥܒܼܰܕ ܠܺܝ ܗܽܘܓܶܝܪ ܐܶܡܪܳܐ ܕܒܶܡܨܪܶܝܢ ܝܰܗ̱ܒ ܠܺܝ ܡܶܢ ܟܽܠ ܒ̈ܳܬܶܝܢ ܪܫܺܝܬܳܐ ܟܪ̈ܰܘܳܢ ܟܪ̈ܰܘܳܢ ܡܶܢ ܒܽܘܟܪ̈ܶܐ ܥܰܠ ܬܰܪܥܳܐ ܟܫܼܶܐ ܠܺܝ ܕܰܫܝܽܘܠ ܗܳܢܳܐ ܐܶܡܰܪ ܥܰܕܥܺܐܕܳܐ ܒܰܙܳܗ̇ ܠܰܫܝܽܘܠ ܡܺܝ̈ܬܶܐ ܥܣܰܪ ܘܕܰܒܰܪ ܡܶܢܝ̱ ܗܰܘ ܐܶܡܪܳܐ ܩܰܒܪ̈ܶܐ ܡܶܠܳܐ ܠܺܝ ܗܳܢܳܐ ܕܶܝܢ ܣܳܦܶܩ ܩܰܒܪ̈ܶܐ ܕܰܡܠܶܝܢ ܗ̱ܘܰܘ

13 ܡܰܘܬܶܗ ܕܝܶܫܽܘܥ ܠܺܝ ܫܽܘܢܳܩܰܐ ܗ̱ܘ ܓܒܺܝܬ ܠܺܝ ܚܰܝ̈ܰܘܗ̱ܝ ܛܳܒ ܡܶܢ ܡܰܘܬܶܗ ܗܳܢܰܘ ܡܺܝܬܳܐ ܕܗܳܐ ܡܰܘܬܶܗ ܣܢܳܐ ܠܺܝ ܒܡܰܘܬܳܐ ܕܟܽܠܢܳܫ ܚܳܕܶܐ ܐ̱ܢܳܐ ܒܡܰܘܬܶܗ ܕܺܝܠܶܗ ܩܳܨܶܦ ܐ̱ܢܳܐ ܕܢܶܗܦܽܘܟ ܢܺܚܶܐ ܡܣܰܟܶܐ ܐ̱ܢܳܐ ܟܰܕ ܚܰܝ ܗ̱ܘܳܐ ܬܠܳܬܳܐ ܡܳܝ̈ܬܺܝܢ ܐܰܚܺܝ ܘܢܰܚܶܡ ܗܳܫܳܐ ܕܶܝܢ ܒܝܰܕ ܡܰܘܬܶܗ ܥܰܠ ܬܰܪܥܳܐ ܕܰܫܝܽܘܠ ܕܫܽܘܢܳܝ ܡܺܝ̈ܬܶܐ ܕܚܰܝܰܘ ܕܶܐܙܶܠ̱ܬ ܗܘܺܝܬ ܕܶܐܟܠܶܐ ܐܶܢܽܘܢ

14 ܐܶܪܗܶܛ ܐܶܚܽܘܕ ܬܰܪ̈ܥܶܝܗ̇ ܕܰܫܝܽܘܠ ܩܕܳܡ ܗܰܘ ܡܺܝܬܳܐ ܕܒܰܙܢܝ ܡܰܘܬܶܗ ܐܰܝܢܳܐ ܕܫܳܡܰܥ ܢܶܬܕܰܡܰܪ ܥܰܠ ܫܰܦܶܠܝ̱ ܕܡܶܢ ܡܺܝܬܳܐ ܕܰܠܒܰܪ ܚܳܒܶܬ ܟܽܠ ܡܳܝ̈ܬܺܝܢ ܠܡܶܦܰܩ ܒܳܥܶܝܢ ܗܳܢܳܐ ܕܶܝܢ ܠܡܶܥܰܠ ܚܳܒܶܨ ܣܳܡ ܚ̈ܰܝܶܐ ܥܰܠ ܠܳܗ̇ ܠܰܫܝܽܘܠ ܘܰܐܚܺܝ ܡܺܝ̈ܬܶܝܗ̇ ܡܰܢ ܐܰܥܶܠ ܘܰܛܡܼܰܪ ܠܺܝ ܟܰܝ ܢܽܘܪܳܐ ܚܰܝܬܳܐ ܕܰܫܪܰܘ ܒܳܗ̇ ܥܽܘ̈ܒܶܐ ܕܰܫܝܽܘܠ ܩܰܪ̈ܺܝܪܶܐ ܘܚ̈ܶܫܽܘܟܶܐ

15 ܡܰܘܬܳܐ ܚܼܙܳܐ ܗ̱ܘܳܐ ܥܺܝܪ̈ܶܐ ܒܰܫܝܽܘܠ ܠܳܐ ܡܳܝ̈ܽܘܬܳܐ ܚܠܳܦ ܡܳܝ̈ܽܘܬܳܐ ܘܶܐܡܼܰܪ ܕܕܽܘܳܘܕܳܐ ܠܥܽܘܡܪܰܢ ܥܰܠ ܠܶܗ ܒܬܰܪ̈ܬܰܝܗܶܝܢ ܓܶܝܪ ܫܽܘܢܳܩܰܐ ܗ̱ܘ ܕܡܺܝ̈ܬܶܐ ܢܦܰܩܘ̱ ܡܶܢܳܗ̇ ܕܰܫܝܽܘܠ ܥܺܝܪ̈ܶܐ ܕܠܳܐ ܡܳܝܬܺܝܢ ܥܰܠܘ̱ ܠܳܗ̇ ܗܳܐ ܚܰܕ ܠܶܐܣ̈ܕܰܝ ܩܰܒܪܶܗ ܥܰܠ ܝܺܬܶܒ ܠܶܗ ܘܚܰܒܪܶܗ ܐ̱ܚܪܺܢܳܐ ܠܪ̈ܶܓܠܰܘܗ̱ܝ ܐܶܒܥܶܐ ܡܶܢܶܗ ܘܰܐܦܺܝܣܶܗ ܕܒܶܗܡܺܝܪܶܗ ܢܰܣܶܩ ܢܺܐܙܰܠ ܠܡܰܠܟܽܘܬܶܗ

16 ܠܳܐ ܬܶܩܰܨ ܠܺܝ ܝܶܫܽܘܥ ܛܳܒܳܐ ܡ̈ܶܠܶܐ ܕܡܰܠܶܠ ܫܽܘܒܗܳܪܝ ܩܽܘܕܡܰܝܟ ܡܰܢܽܘ ܕܟܰܕ ܚܙܳܐ ܙܩܺܝܦܳܟ ܠܳܐ ܟܰܝ ܢܶܬܦܰܠܰܓ ܗ̱ܘܳܐ ܕܒܰܪܢܳܫܳܐ ܐܰܢ̱ܬ ܡܰܢܽܘ ܕܢܶܚܙܶܐ ܗ̱ܘܳܐ ܚܰܝܠܳܟ ܘܠܳܐ ܢܗܰܝܡܶܢ ܕܳܐܦ ܐܰܠܳܗܳܐ ܐܰܢ̱ܬ ܗܳܐ ܗܳܟܺܝܠ ܒܬܰܪ̈ܬܰܝܗܶܝܢ ܕܰܐܘܕܶܐ ܝܶܠܦܰܬ ܕܒܰܪܢܳܫܳܐ ܐܰܢ̱ܬ ܐܳܦ ܐܰܠܳܗܳܐ ܐܰܢ̱ܬ ܕܠܳܐ ܬܳܝܒܺܝܢ ܡܺܝ̈ܬܶܐ ܒܰܫܝܽܘܠ ܒܶܝܬ ܚܰܝ̈ܶܐ ܣܰܩ ܡܳܪܝ̱ ܐܰܣܶܩ ܬܝܳܒܽܘܬܳܐ

17 ܝܶܫܽܘܥ ܡܰܠܟܳܐ ܩܰܒܶܠ ܒܳܥܽܘܬܝ̱ ܘܥܰܡܳܗ̇ ܕܒܳܥܽܘܬܝ̱ ܗܡܺܝܪܳܐ ܣܰܒ ܠܳܟ ܠܳܐܕܳܡ ܗܡܺܝܪܳܐ ܪܰܒܳܐ ܕܒܼܰܪ ܠܳܟ ܕܒܶܗ ܗܽܘ ܛܡܺܝܪ̈ܺܝܢ ܟܽܠ ܡ̈ܺܝܬܺܝܢ ܐܰܝܟܰܢܳܐ ܕܟܰܕ ܩܰܒܶܠܬܶܗ ܒܶܗ ܟܣܶܝܢ ܗ̱ܘܰܘ ܟܽܠܗܽܘܢ ܚ̈ܰܝܶܐ ܗܡܺܝܪܳܐ ܩܰܕܡܳܐ ܝܶܗܒܰܬ ܠܳܟ ܦܰܓܪܶܗ ܕܳܐܕܳܡ ܣܰܩ ܡܶܟܺܝܠ ܐܰܡܠܶܟ ܥܰܠ ܟܽܠ ܘܶܐܡܰܬܝ̱ ܕܶܐܫܡܰܥ ܫܺܝܦܽܘܪܳܟ ܐܶܢܳܐ ܒܺܐܝ̈ܕܰܝ ܐܰܦܶܩ ܡܺܝ̈ܬܶܐ ܒܡܶܐܬܺܝܬܳܟ

18 ܡܰܠܟܰܢ ܚܰܝܳܐ ܙܳܚܼ ܘܶܐܬܥܰܠܺܝ ܡܶܢܳܗ̇ ܕܰܫܝܽܘܠ ܐܰܝܟ ܙܰܟܳܝܳܐ ܘܳܝܳܐ ܠܓܰܒܳܐ ܕܣܶܡܳܠܳܐ ܥܳܦ ܗ̱ܘܳܐ ܠܪ̈ܽܘܚܶܐ ܘܕܰܝ̈ܘܶܐ ܕܽܘܘܳܢܳܐ ܠܣܳܛܳܢܳܐ ܘܡܰܘܬܳܐ ܚܰܫܳܐ ܠܰܚܛܺܝܬܳܐ ܘܰܫܝܽܘܠ ܐܶܒܠܳܐ ܚܰܕܽܘܬܳܐ ܠܓܰܒܳܐ ܕܝܰܡܺܝܢܳܐ ܝܰܘܡܳܢܳܐ ܗܘܳܬ ܒܗܳܢܳܐ ܝܰܘܡܳܐ ܕܪܰܒ ܗܳܟܺܝܠ ܫܽܘܒܚܳܐ ܪܰܒܳܐ ܢܶܬܶܠ ܠܶܗ ܠܰܕܡܺܝܬ ܘܚܰܝܳܐ ܕܰܠܟܽܠ ܢܰܚܶܐ ܘܢܢܰܚܶܡ

SEDRA IV

Syriac Lexeme

About This Digital Text

Corpus Text ID:

https://syriaccorpus.org/290

NHSL Work ID(s):

http://syriaca.org/work/8769
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).