Nisibis 37

https://syriaccorpus.org/291

section : section

line : line

37 Nisibis XXXVII

ܓ ܡܶܢܶܗ ܒܰܪ ܩܳܠܶܗ

1 ܡܶܒܟܳܐ ܗ̱ܘܳܐ ܠܳܗ̇ ܡܰܘܬܳܐ ܠܰܫܝܽܘܠ ܕܰܚܼܙܳܐ ܓܰܙܶܝ̈ܗ̇ ܕܶܐܣܬܰܪܰܩܘ̱ ܗ̱ܘܰܘ ܘܶܐܡܰܪ ܡܰܢܽܘ ܟܰܝ ܚܳܠܶܨ ܥܽܘܬܪܶܟܝ̱ ܓܢܼܰܒ ܗ̱ܘܳܐ ܓܶܚܙܺܝ ܘܶܐܬܦܰܪܣܺܝ ܐܶܢܳܐ ܕܟܽܠܝܽܘܢ ܓܳܢܶܒ ܐ̱ܢܳܐ ܓܢܽܘܒܬܳܐ ܥܰܠܝ̱ ܠܳܐ ܐܶܬܬܚܰܕܰܬ ܡܶܫܬܰܕܰܪ ܐ̱ܢܳܐ ܥܰܠ ܡ̈ܰܠܟܶܐ ܒܟܽܘܪ̈ܗܳܢܰܝܗܽܘܢ ܟܪ̈ܺܝܟܺܝܢ ܠܗܽܘܢ ܢܳܛܽܘܪ̈ܰܝܗܽܘܢ ܟܰܕ ܢܳܛܽܘܪ̈ܶܐ ܥܰܠ ܬܰܪܥܳܐ ܢܰܦܫܳܐ ܕܡ̈ܰܠܟܶܐ ܡܥܰܕܶܐ ܐ̱ܢܳܐ ܘܢܳܦܶܩ ܐ̱ܢܳܐ ܥܽܘܢܺܝܬܳܐ: ܒܪܺܝܟ ܕܬܰܒܰܪ ܥܽܘܩܣܳܗ̇ ܕܰܫܝܽܘܠ ܒܰܨܠܺܝܒܶܗ

2 ܡ̈ܥܳܩܳܢ ܐܶܢܶܝܢ ܟܽܠ ܥܰܩܪ̈ܳܬܳܐ ܫܝܽܘܠ ܚܰܕܽܘܬܳܗ̇ ܥܰܠ ܥܰܩܪܽܘܬܳܗ̇ ܗܘܼܳܬ ܠܳܗ̇ ܨܕܺܝܬܳܐ ܐܶܢ ܗܽܘ ܕܝܶܠܕܰܬ ܚܰܝܠܳܐ ܥܳܨܶܐ ܟܽܠ ܐܰܠܨܶܗ ܠܥܽܘܒܳܐ ܥܶܩܳܪܳܐ ܘܩܰܪܺܝܪܳܐ ܘܰܦܢܺܝ ܝܰܗ̱ܒ ܟܰܕ ܛܠܽܘܡܰܐ ܗ̱ܘ ܪܳܦܩܳܐ ܕܳܐܠܨܽܘܗ̇ ܬܪ̈ܶܝܢ ܥܽܘ̈ܠܺܝܢ ܡܰܘܬܳܐ ܫܶܐܠܰܬ ܟܡܳܐ ܟܰܝ ܪܰܒ ܟܺܐܒܳܗ̇ ܕܰܫܝܽܘܠ ܕܡܰܚܐܽܘܗ̇ ܚܒ̈ܳܠܶܐ ܚ̈ܰܕܬܶܐ ܕܠܰܘ ܡܺܝ̈ܬܶܐ ܘܨܳܪܘ̱ ܘܰܢܦܼܰܩܘ̱ ܡܶܢ ܓܰܘܳܗ̇

3 ܕܳܡ ܟܰܝ ܗܳܢܰܘ ܗܰܘ ܦܶܬܓܳܡܳܐ ܕܰܫܡܺܝܥ ܗ̱ܘܳܐ ܠܺܝ ܡܶܢ ܐܶܫܰܥܝܳܐ ܘܰܒܣܺܝܬ ܥܠܰܘܗ̱ܝ ܟܰܕ ܩܳܐܶܡ ܘܶܐܡܰܪ ܀܀܀ ܕܡܼܰܢܽܘ ܠܰܡ ܫܡܼܰܥ ܐܰܝܟ ܗܳܕܶܐ ܕܰܡܚܰܒܠܳܐ ܐܰܪܥܳܐ ܒܚܰܕ ܝܽܘܡ ܘܝܰܠܕܳܐ ܥܰܡܳܐ ܚܕܳܐ ܫܳܥܶܐ ܗܳܕܳܐ ܗ̱ܝ ܕܰܗܘܳܬ ܐܰܘ ܕܰܠܡܳܐ ܢܛܺܝܪܳܐ ܗ̱ܝ ܠܰܢ ܬܽܘܒ ܘܶܐܢ ܗܳܕܶܐ ܛܰܠܳܢܺܝܬܳܐ ܗ̱ܝ ܕܡܰܠܟܳܐ ܐܰܝܬܰܝ ܣܰܒܰܪ ܗܘܺܝܬ ܠܳܐ ܝܶܕܥܶܬ ܕܓܽܘܥܠܳܢܰܐ ܗ̱ܘ ܢܳܛܰܪ ܐ̱ܢܳܐ

4 ܬܪ̈ܶܝܢ ܕܶܝܢ ܩ̈ܳܠܶܝܢ ܕܡܰܫܓܢܺܝܢ ܗ̱ܘܰܘ ܫܶܡ̇ܥܶܬ ܡܶܢܶܗ ܕܗܰܘ ܐܶܫܰܥܝܳܐ ܐܶܡܼܰܪ ܓܶܝܪ ܕܰܒܬܽܘܠܬܳܐ ܬܶܒܛܰܢ ܬܺܐܠܰܕ ܘܶܐܡܼܰܪ ܬܽܘܒ ܕܰܐܪܥܳܐ ܬܺܐܠܰܕ ܗܳܐ ܕܶܝܢ ܝܺܠܶܕܬܶܗ ܒܬܽܘܠܬܳܐ ܘܺܐܝܠܶܕܬܶܗ ܫܝܽܘܠ ܥܩܰܪܬܳܐ ܬܪ̈ܶܝܢ ܥܽܘܒ̈ܺܝܢ ܕܠܳܐ ܒܶܟܝܳܢܳܐ ܐܶܫ̇ܬܰܚܠܰܦܘ̱ ܒܶܗ ܒܬܽܘܠܬܳܐ ܘܰܫܝܽܘܠ ܬܰܪ̈ܬܰܝܗܶܝܢ ܠܰܒܬܽܘܠܬܳܐ ܒܝܰܠܕܳܗ̇ ܚܰܕܺܝ ܠܰܫܝܽܘܠ ܕܶܝܢ ܐܰܟܡܰܪ ܘܰܐܥܺܝܩ ܒܢܽܘܚܳܡܶܗ

5 ܚܙܺܝܬ ܒܰܦܩܰܥܬܳܐ ܠܗܰܘ ܚܰܙܩܺܝܐܶܝܠ ܕܰܐܚܺܝ ܡܺܝ̈ܬܶܐ ܟܰܕ ܡܶܫܬܐܶܠ ܘܰܚܙܺܝܬ ܓܰܪ̈ܡܶܐ ܕܶܐܬܒܰܠܒܰܠܘ̱ ܘܰܪܚܼܶܫܘ̱ ܗܳܘܼܶܐ ܪܰܘܒܳܐ ܕܓܰܪ̈ܡܶܐ ܒܰܫܝܽܘܠ ܕܓܰܪܡܳܐ ܡܥܰܩܶܒ ܥܰܠ ܚܰܒܪܶܗ ܘܰܫܪܺܝܬܳܐ ܥܰܠ ܒܰܪ̱ܬ ܙܰܘܓܳܗ̇ ܠܰܝܬ ܬܰܡܳܢ ܕܰܡܫܰܐܶܠ ܘܰܕܡܶܫܬܐܶܠ ܕܶܐܢ ܚܰܝ̈ܰܝܢ ܓܰܪ̈ܡܶܐ ܗܳܠܶܝܢ ܕܠܳܐ ܫܽܘܐܳܠ ܐܰܚܺܝ ܐܶܢܽܘܢ ܩܳܠܶܗ ܕܝܶܫܽܘܥ ܦܳܩܽܘܕܳܐ ܕܒܶܪ̈ܝܳܬܳܐ ܀܀܀

6 ܫܝܽܘܠ ܐܶܬܟܰܡܪܰܬ ܕܰܚܙܳܬ ܐܶܢܽܘܢ ܠܡܺܝ̈ܬܶܐ ܟܡܺܝܪ̈ܶܐ ܕܰܦܨܺܝܚܺܝܢ ܗ̱ܘܰܘ ܒܟܳܬܶܗ ܠܳܠܥܳܙܳܪ ܟܰܕ ܢܳܦܶܩ ܗ̱ܘܳܐ ܙܶܠ ܒܰܫܠܳܡ ܡܺܝܬܳܐ ܚܼܰܝܳܐ ܚܢܺܝܓܳܐ ܕܰܬܪ̈ܶܝܢ ܒܶܝܬ ܒܟ̈ܰܘܗ̱ܝ ܕܰܠܒܰܪ ܘܰܠܓܰܘ ܝ̈ܺܠܠܳܬܶܗ ܕܰܐܚ̈ܘܳܬܶܗ ܒ̈ܟܶܝ ܟܰܕ ܥܳܐܶܠ ܠܩܰܒܪܶܐ ܨܶܐܕܝ̱ ܘܶܐܢܳܐ ܒܟܺܝܬܶܗ ܟܰܕ ܢܳܦܶܩ ܒܡܰܘܬܶܗ ܒܶܟܝܳܐ ܒܶܝܬ ܚ̈ܰܝܶܐ ܐܳܦ ܒܰܫܝܽܘܠ ܐܶܒܠܳܐ ܪܰܒܳܐ ܒܢܽܘܚܳܡܶܗ

7 ܗܳܫܳܐ ܗܰܘ ܛܶܥܡܰܬ ܛܰܥܡܳܐ ܕܶܐܒܠܶܗ ܕܰܐܝܢܳܐ ܕܰܒܟܳܐ ܥܰܠ ܚܰܒܺܝܒܶܗ ܡܺܝ̈ܬܶܐ ܕܗܳܟܰܢ ܚܰܒܺܝ̈ܒܺܝܢ ܠܰܫܝܽܘܠ ܟܡܳܐ ܪܚܺܝܡܺܝܢ ܠܳܐܒܳܗ̈ܰܝܗܽܘܢ ܗܰܕܳܡ̈ܶܐ ܕܓܶܙܪܰܬ ܫܶܩܠܰܬ ܗܳܐ ܓܙܺܝܪ̈ܺܝܢ ܡܶܢܝ̱ ܘܰܫܩܺܝܠܺܝܢ ܐܶܢ ܐܶܢܳܐ ܗܳܟܰܢ ܚܳܫܶܬ ܥܰܠ ܦܽܘܪܫܳܢܶܗ ܕܗܰܘ ܥܠܰܝܡܳܐ [ܕܶܐܬܢܰܚܰܡ] ܒܪܺܝܟ ܗ̱ܽܘ ܕܰܚܢܳܗ̇ ܠܰܐܪܡܰܠܬܳܐ ܒܺܝܚܺܝܕܶܗ̇ ܫܰܝܶܢ ܥܽܘܡܪܳܗ̇ ܕܶܐܬܓܰܙܺܝ

8 ܗܳܢܳܐ ܚܰܫܳܐ ܕܗܳܐ ܡܰܚܶܫ ܐ̱ܢܳܐ ܠܰܒ̈ܢܰܝ ܐ̱ܢܳܫܳܐ ܒܚܰܒܺܝ̈ܒܰܝܗܽܘܢ ܠܚܰܪܬܳܐ ܥܰܠܝ̱ ܗܽܘ ܟܰܢܶܫ ܠܶܗ ܠܟܽܠܳܗ̇ ܕܡܳܐ ܕܫܰܒܩܽܘܗ̇ ܡܺܝ̈ܬܶܐ ܠܰܫܝܽܘܠ ܠܟܽܠ ܐ̱ܢܳܫ ܗܳܘܶܐ ܢܽܘܚܳܡܳܐ ܘܠܺܝ ܒܰܠܚܽܘܕܝ̱ ܫܽܘܢܳܩܳܐ ܘܡܰܢܽܘ ܟܰܝ ܕܰܢܣܰܝܒܰܪ ܠܺܝ ܀܀܀ ܗܳܕܶܐ ܟܽܠܳܗ̇ ܕܰܐܚܙܶܝܗ̇ ܠܰܫܝܽܘܠ ܒܰܠܚܽܘܕܶܝܗ̇ ܕܗܰܘ ܩܳܠܳܐ ܕܨܳܪܝ̱ ܩܰܒܪ̈ܶܐ ܡܰܚܪܶܒ ܠܳܗ̇ ܘܡܰܦܶܩ ܡܺܝ̈ܬܶܐ ܕܰܒܓܰܘܳܗ̇

9 ܐܶܢ ܐ̱ܢܳܫ ܩܼܪܳܐ ܒܗܽܘܢ ܒܰܢܒ̈ܺܝܶܐ ܩܪ̈ܳܒܶܐ ܟܺܐܢ̈ܶܐ ܫܡܼܰܥ ܬܰܡܳܢ ܒܫܰܪܒܶܗ ܕܝܶܫܽܘܥ ܐܶܢ ܐ̱ܢܳܫ ܡܶܬܗܰܓܶܐ ܚܢܳܢܳܐ ܘܪ̈ܰܚܡܶܐ ܡܶܬܝܰܠܶܦ ܘܶܐܢ ܐ̱ܢܳܫ ܣܰܒܰܪ ܥܰܠ ܝܶܫܽܘܥ ܕܢܽܘܟܪܳܝܳܐ ܗ̱ܺܝ ܠܺܝ ܓܽܘܕܳܦܰܐ ܗ̱ܘ ܩܠܺܝܕܳܐ ܐ̱ܚܪܺܢܳܐ ܢܽܘܟܪܳܝܳܐ ܠܬܰܪܥܳܐ ܕܰܫܝܽܘܠ ܠܳܐ ܡܼܨܶܐ ܡܶܡܬܽܘܡ ܢܦܰܠ ܠܶܗ ܚܰܕ ܗ̱ܽܘ ܩܠܺܝܕܳܐ ܕܒܳܪܽܘܝܳܐ ܕܗܰܘ ܦܰܬܚܳܗ̇ ܐܳܦ ܦܳܬܰܚ ܠܳܗ̇ ܒܡܶܐܬܺܝܬܶܗ

10 ܓܰܪ̈ܡܶܐ ܡܰܢܽܘ ܡܨܶܐ ܕܰܢܪܰܟܶܒ ܐܶܠܳܐ ܚܰܝܠܰܐ ܗ̱ܘ ܕܰܒܼܪܳܐ ܐܶܢܽܘܢ ܚܰܨ̈ܦܶܐ ܕܦܰܓܪܳܐ ܡܰܢܽܘ ܕܢܶܕܒܰܩ ܐܶܠܳܐ ܐܰܝܕܳܐ ܕܥܳܒܽܘܕܳܐ ܡܰܢܽܘ ܕܢܰܬܼܩܶܢ ܨܽܘܪ̈ܳܬܳܐ ܐܶܠܳܐ ܨܶܒܥܳܐ ܕܒܳܪܽܘܝܳܐ ܗܰܘ ܕܰܒܪܳܐ ܘܰܗܼܦܰܟ ܚܒܳܠ ܗܽܘܝܽܘ ܡܶܫܟܰܚ ܐܳܦ ܕܰܢܚܰܕܶܬ ܘܰܢܢܰܚܶܡ ܠܳܐ ܡܼܨܶܐ ܐܰܠܳܗܳܐ ܐ̱ܚܪܺܢܳܐ ܕܢܶܥܽܘܠ ܢܰܬܩܶܢ ܒܶܪ̈ܝܳܬܳܐ ܕܠܳܐ ܕܺܝܠܶܗ

11 ܐܶܠܽܘ ܐܺܝܬ ܗ̱ܘܳܐ ܚܰܝܠܳܐ ܐ̱ܚܪܺܢܳܐ ܣܰܓܺܝ ܐܰܪܥܳܐ ܗ̇ܘܺܝܬ ܕܢܺܐܬܶܐ ܨܶܐܕܝ̱ ܒܥܽܘܒܶܝ̈ܗ̇ ܕܰܫܝܽܘܠ ܢܚܶܬ ܝܺܠܰܦ ܗ̱ܘܳܐ ܕܚܰܕ ܗ̱ܽܘ ܒܰܠܚܽܘܕ ܐܰܠܳܗܳܐ ܡܳܝ̈ܽܘܬܳܐ ܕܰܛܥܰܘ ܘܰܐܟܪܶܙܘ̱ ܕܺܐܝܬ ܐܰܠܳܗ̈ܶܐ ܣ̈ܰܓܺܝܐܶܐ ܗܳܐ ܒܰܫܝܽܘܠ ܚܒܺܝܫܺܝܢ ܠܺܝ ܘܰܐܠܳܗܰܝ̈ܗܽܘܢ ܥܠܰܝܗܽܘܢ ܡܶܡܬܽܘܡ ܠܳܐ ܐܰܟܪܺܝܘ ܠܚܰܕ ܐܰܠܳܗܳܐ ܝܳܕܰܥ ܐ̱ܢܳܐ ܠܰܢܒܺܝ̈ܰܘܗ̱ܝ ܐܳܦ ܠܰܫܠܺܝܚ̈ܰܘܗ̱ܝ ܚܳܟܶܡ ܐ̱ܢܳܐ ܀܀܀

How to Cite this Electronic Edition

Note:

Ephrem the Syrian, “Nisibis 37” , Digital Syriac Corpus, last modified June 12, 2019, https://syriaccorpus.org/291.

TEST2

Bibliography:

“Nisibis 37.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/291.

Show Citation Styles

SEDRA IV

Syriac Lexeme

About This Digital Text

Corpus Text ID:

https://syriaccorpus.org/291

NHSL Work ID(s):

http://syriaca.org/work/8770
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).