Nisibis 39

https://syriaccorpus.org/293

TEI/XML Text

Show

section : section

line : line

Table of Contents

1 2 3 4 5 6 7 8 9 10 11 12 13 14 15 16 17 18 19 20 21

39 Nisibis XXXIX

ܗ ܡܶܢܶܗ ܒܰܪ ܩܳܠܶܗ

1 ܡܛܰܐܘܢܝ̱ ܙܰܒ̈ܢܶܐ ܡܶܢ ܙܰܕܺܝ̈ܩܶܐ ܘܠܳܐ ܐ̱ܢܳܫ ܬܰܒܪܰܢܝ̱ ܐܰܝܟ ܒܰܪ ܡܰܪܝܰܡ ܗܳܐ ܓܶܝܪ ܐܶܠܺܝܳܐ ܡܺܝܬܳܐ ܐܰܚܺܝ ܘܳܐܦܶܢ ܗܽܘ ܦܠܰܛ ܡܶܢ ܐܺܝ̈ܕܰܝ ܗܘܳܐ ܠܺܝ ܒܳܬܪܶܗ ܒܽܘܝܳܐܳܐ ܕܡܺܝܬܳܐ ܕܰܐܚܺܝ ܐܰܥܕܺܝܬܶܗ ܡܶܢ ܐܶܠܺܝܫܰܥ ܒܰܪ ܫܳܦܰܛ ܫ̈ܰܒܛܶܐ ܒܶܠܥܶܬ ܬܪ̈ܶܝܢ ܓܶܝܪ ܡܺܝ̈ܬܺܝܢ ܐܰܚܺܝ ܗ̱ܘܳܐ ܒܚܰܕ ܫܰܒܛܳܐ ܗܶܦܟܰܬ ܕܒܰܪ̱ܬ ܠܰܢܒܺܝܳܐ ܐܳܦ ܠܡܺܝ̈ܬܶܐ ܕܰܐܚܺܝ ܗ̱ܘܳܐ ܥܽܘܢܺܝܬܳܐ: ܒܪܺܝܟ ܕܰܨܪܳܐ ܩܰܒܪ̈ܶܝܗ̇ ܕܰܫܝܽܘܠ ܒܝܰܕ ܩܳܠܶܗ

2 ܩܶܢܛܶܬ ܡܶܢܶܗ ܕܓܰܚܙܰܝ ܕܰܚܙܺܝܬ ܟܰܕ ܣܳܡ ܚܽܘܛܪܳܐ ܠܥܶܠ ܡܶܢ ܛܰܠܝܳܐ ܫܰܩܠܶܗ ܓܰܢܒܳܐ ܠܚܽܘܛܪܳܐ ܘܰܥܛܰܦ ܐܶܬܳܐ ܐܠܺܝܫܰܥ ܐܶܬܟܰܦܰܦ ܀܀܀ ܘܰܙܥܰܪ ܥܰܡ ܛܰܠܝܳܐ ܘܺܝܪܶܒ ܘܰܠܟܳܐ ܘܰܠܟܳܐ ܗܰܠܶܟ ܬܽܘܒ ܬܰܘܪܰܬ ܠܺܝ ܒܐ̱ܪ̈ܳܙܶܐ ܚ̈ܰܕܬܶܐ ܕܰܚܙܺܝܬ ܬܰܡܳܢ ܕܚܰܕ ܛܰܠܝܳܐ ܒܰܠܚܽܘܕ ܐܰܚܺܝܘ ܛܽܘܒܰܝ ܗ̱ܘܳܐ ܟܰܕ ܐ̱ܪ̈ܳܙܶܐ ܗ̱ܘܰܘ ܘܠܳܐ ܗܳܫܳܐ ܕܰܡܪܰܕܘ̱ ܡܺܝ̈ܬܶܐ ܘܰܙܟܰܐܽܘܢܝ̱

3 ܡܽܘܫܶܐ ܕܰܚ̇ܙܺܝܬ ܙܺܝܘܳܐ ܪܰܒܳܐ ܥܰܠ ܦܰܪܨܽܘܦܶܗ ܩܶܢܛܶܬ ܡܶܢܶܗ ܠܰܘ ܕܶܝܢ ܐܰܝܟ ܡܳܐ ܕܩܳܢܶܛ ܗܘܺܝܬ ܓܶܕܫܰܢܝ̱ ܢܺܝܣܳܢ ܒܰܫܝܽܘܠ ܐܰܘܥܺܝ ܠܺܝ ܪܥܺܝܬ ܓܶܝܪ ܪܳܥܼܝܳܐ ܕܰܫ̈ܠܰܕܶܐ ܕܶܐܠܦ̈ܶܐ ܫܶܬܡܳܐܐ ܕܰܢܦܼܰܠܘ̱ ܗ̱ܘܰܘ ܗܳܢܳܐ ܫܺܝܛܳܐ ܘܡܰܟܺܝܟܳܐ ܕܰܒܣܺܝܬ ܥܠܰܘܗ̱ܝ ܠܡܰܪ̈ܥܶܐ ܘܠܰܟܪ̈ܺܝܗܶܐ ܐܰܚܠܶܡ ܠܰܐܚܪ̈ܺܢܶܐ ܠܰܚܡܳܐ ܐܰܣܓܺܝ ܘܠܰܚܡܰܢ ܕܺܝܠܰܢ ܡܶܢ ܦܽܘܡܰܢ ܚܳܛܶܦ ܠܶܗ

4 ܚܠܽܘܠܳܐ ܪܰܒܳܐ ܗܳܘܶܐ ܗ̱ܘܳܐ ܒܰܫܝܽܘܠ ܟܰܕ ܒܳܠܥܰܬ ܗܘܳܬ ܠܰܕܒܶܝܬ ܩܽܘܪܳܚ ܒܶܣܡܳܐ ܪܰܒܳܐ ܥܒܰܕ ܠܺܝ ܣܳܛܳܢܳܐ ܕܰܥܒܰܕ ܣܶܕܩܳܐ ܒܰܠܘ̈ܳܝܶܐ ܡܰܒܽܘܥܳܐ ܕܚܰܠܒܳܐ ܘܕܶܒܫܳܐ ܐܰܪܕܺܝ ܠܺܝ ܒܰܐܬܪܳܐ ܨܰܗܝܳܐ ܕܰܟܢܽܘܫ̈ܳܬܳܐ ܕܥܰܘ̈ܳܠܶܐ ܢܚܼܶܬ ܠܳܗ̇ ܠܰܫܝܽܘܠ ܗܳܐ ܚܰܝܰܘ ܙܰܕܺܝ̈ܩܶܐ ܘܰܢܦܼܰܩܘ̱ ܡܽܘܫܶܐ ܚ̈ܰܝܶܐ ܐܰܚܶܬ ܠܳܗ̇ ܝܶܫܽܘܥ ܕܶܝܢ ܢܰܚܶܡ ܘܰܐܣܶܩ ܠܰܕܡܺܝ̈ܬܺܝܢ

5 ܛܽܘܒܰܝ ܗܘܳܐ ܕܶܝܢ ܒܝܰܘܡ̈ܰܝ ܛܰܢܳܢ̈ܶܐ ܕܰܒܣܰܝ̈ܦܰܝܗܽܘܢ ܡܶܬܒܰܣܰܡ ܗܘܺܝܬ ܦܺܝܢܚܶܣ ܛܰܢܳܢܳܐ ܕܥܼܰܨ ܗ̱ܘܳܐ ܝܰܗ̱ܒ ܠܺܝ ܒܪܺܝܫܳܐ ܕܢܶܝܙܟܶܗ ܒܽܘܣܳܡܳܐ ܠܰܙܡܪܝ̱ ܘܠܟܽܘܣܳܒܝ̱ ܐܰܟܚܰܕ ܒܪܺܝܫܳܐ ܕܪܽܘܡܚܶܗ ܐܰܘܫܶܛ ܠܺܝ ܠܡܰܢܽܘ ܟܰܝ ܬܪ̈ܶܝܢ ܬܰܘܪ̈ܺܝܢ ܕܦܰܛܡܳܐ ܡܶܢ ܡܬܽܘܡ ܒܪܺܝܫܳܐ ܕܢܺܝܙܟܳܐ ܐܶܬܩܰܪܰܒܘ̱ ܚܠܳܦ ܕܶܝܢ ܟܽܘܣܳܒܝ̱ ܒܰܪ̱ܬ ܪ̈ܺܝܫܳܢܶܐ ܠܒܰܪ̱ܬ ܝܽܘܳܐܪܳܫ ܚܼܛܰܦ ܝܶܫܽܘܥ ܡܶܢ ܐܺܝܕ̈ܰܝ

6 ܦܺܝܪܡܶܗ ܕܰܐܗܪܽܘܢ ܡܰܕܚܶܠ ܗ̱ܘܳܐ ܠܺܝ ܕܩܳܡ ܒܶܝܬ ܡܺܝ̈ܬܶܐ ܠܚܰܝ̈ܶܐ ܘܰܙܟܼܳܢܝ̱ ܨܠܺܝܒܳܐ ܝܰܬܺܝܪ ܡܶܢܶܗ ܡܶܕܚܰܠ ܠܺܝ ܕܨܳܪܝ ܐܶܢܽܘܢ ܩܰܒܪ̈ܶܐ ܕܰܫܝܽܘܠ ܙܩܺܝܦܳܐ ܕܒܶܗ ܗܽܘ ܩܳܛܶܠ ܗܘܺܝܬ ܗܳܫܳܐ ܒܶܗ ܗܽܘ ܐܶܬܩܰܛܠܶܬ ܠܰܘ ܣܰܓܽܝ ܪܰܒ ܟܽܘܐܳܪܶܗ ܕܰܐܝܢܳܐ ܕܚܳܐܶܒ ܡܶܢ ܓܰܢ̱ܒܳܪܳܐ ܕܰܡܙܰܝܶܢ ܒܺܝܫ ܠܺܝ ܟܽܘܳܐܪܰܝ ܡܶܢ ܫܽܘܢܳܩܝ̱ ܕܰܒܓܰܒܪܳܐ ܙܩܺܝܦܳܐ ܚܳܒܶܬ ܥܰܙܺܝܙܽܘܬܝ̱

7 ܪܽܘܡܚܶܗ ܕܦܺܝܢܚܶܣ ܬܽܘܒ ܐܰܕܚܶܠܬܳܢܝ̱ ܕܒܳܗ̇ ܗܽܘ ܒܚܰܪܒܶܗ ܟܠܳܐ ܡܰܘܬܳܢܳܐ ܪܽܘܡܚܳܐ ܢܛܰܪܬܶܗ ܠܺܐܝܠܳܢܳܐ ܕܚܰܝ̈ܶܐ ܐܰܦܨܰܚܬܳܢܝ̱ ܐܳܦ ܐܰܟܡܰܪܬܳܢܝ̱ ܕܰܟܠܳܬ ܠܳܐܕܳܡ ܡܶܢ ܚܰܝ̈ܶܐ ܘܰܟܠܳܬ ܡܰܘܬܳܐ ܡܶܢ ܥܰܡܳܐ ܪܽܘܡܚܳܐ ܕܶܝܢ ܕܰܒܠܰܥ ܝܶܫܽܘܥ ܐܶܢܳܐ ܚܫܶܬ ܒܳܗ̇ ܗܼܽܘ ܒܳܠܼܰܥ ܘܶܐܢܳܐ ܡܰܝܠܶܠ ܀܀܀ ܢܦܰܩܘ̱ ܡܶܢܶܗ ܡܰܝ̈ܳܐ ܘܰܕܡܳܐ ܣܚܼܳܐ ܐܳܕܳܡ ܘܰܚܝܳܐ ܘܰܦܢܳܐ ܠܦܰܪܕܰܝܣܳܐ

8 ܗ̱ܘܰܘ ܠܺܝ ܦܽܘ̈ܡܶܐ ܙܳܕܽܘ̈ܩܳܝܶܐ ܘܕܰܪܫܰܘ ܥܰܡܶܗ ܐܰܝܟ ܡܶܢ ܪܶܥܝܳܢܝ̱ ܕܠܳܐ ܠܰܡ ܐܺܝܬ ܚܰܝܰܬ ܡܺܝ̈ܬܶܐ ܠܰܓܡܰܪ ܬܼܳܢܶܐ ܠܗܽܘܢ ܝܶܫܽܘܥ ܦܶܬܓܳܡܳܐ ܕܶܐܢܳܐ ܒܰܠܚܽܘܕ ܪܶܓܫܶܬ ܒܶܗ ܡܶܢ ܣܰܢܝܳܐ ܩܼܥܳܐ ܘܰܐܥܺܝܩܰܢܝ̱ ܕܶܐܢܳܐ ܐ̱ܢܳܐ ܠܰܡ ܐܰܠܳܗܶܗ ܕܗܰܘ ܐܰܒܪܳܗܳܡ ܘܰܐܠܳܗܳܐ ܠܳܐ ܗ̱ܘܳܐ ܕܡܺܝ̈ܬܶܐ ܛܽܘܒܰܝ ܗ̱ܘܳܐ ܟܰܕ ܡ̈ܶܠܶܐ ܗܘ̈ܰܝ ܘܠܳܐ ܕܚܰܘܶܝܢܝ̱ ܚܰܝܰܬ ܡܺܝ̈ܬܶܐ ܒܰܥܒܳܕܳܐ

9 ܝܶܫܽܘܥ ܒܰܪܢܽܘܢ ܡܰܠܟ̈ܶܐ ܬܠܳܬܺܝܢ ܩܰܒܪ̈ܶܐ ܘܢܶܩ̈ܥܶܐ ܚܼܪܰܒ ܘܰܡܠܳܐ ܠܺܝ ܐܰܚܪܶܒ ܠܺܐܝܪܺܝܚܽܘ ܘܰܡܠܳܐ ܠܰܫܝܽܘܠ ܗܳܢܳܐ ܕܶܝܢ ܝܶܫܽܘܥ ܕܶܐܬܳܐ ܐܰܚܪܶܒ ܩܰܒܪ̈ܶܐ ܡܶܢ ܡܺܝ̈ܬܶܐ ܘܰܡܠܳܐ ܟܰܪ̈ܟܶܐ ܥܶܠܳܝ̈ܶܐ ܠܡܳܢܳܐ ܟܰܝ ܟܰܕ ܗܳܐ ܕܳܡܶܝܢ ܒܰܫܡ̈ܳܗܰܝܗܽܘܢ ܠܳܐ ܕܳܡܶܝܢ ܒܣܽܘܥܪ̈ܳܢܰܝܗܽܘܢ ܗܰܘ ܝܰܗ̱ܒ ܠܺܝ ܦܰܓܪܶܗ ܕܰܥܟܰܪ ܗܳܢܳܐ ܕܶܝܢ ܐܰܥܕܺܝ ܦܰܓܪܶܗ ܕܠܳܥܳܙܳܪ

10 ܡܽܘܫܶܐ ܒܥܰܛܶܗ ܠܗܰܘ ܡܶܨܪܳܝܳܐ ܒܡܰܟܽܝܟܽܘܬܶܗ ܚܠܰܛ ܟܽܐܢܽܘܬܶܗ ܡܶܢ ܐܰܝܟܳܐ ܟܰܝ ܢܳܡܽܘܣܳܐ ܚܰܕܬܳܐ ܢܒܼܰܥ ܠܺܝ ܕܰܡܚܳܐ ܠܳܟ ܠܰܡ ܥܰܠ ܦܰܟܳܟ ܀܀܀ ܐ̱ܚܪܺܢܳܐ ܦܰܟܳܟ ܐܰܬܩܶܢ ܠܶܗ ܘܰܚܙܺܝ ܠܰܡ ܕܰܠܡܳܐ ܬܶܣܢܶܝܘܗ̱ܝ ܚܠܳܦ ܛܰܢܳܢܳܐ ܥܰܙܺܝܙܳܐ ܕܰܒܥܰܛ ܘܰܩܛܰܠ ܚܰܢܳܢܳܐ ܚܰܕܬܳܐ ܕܢܰܚ ܠܰܢ ܫܡܽܘܐܶܝܠ ܠܰܐܓܳܓ ܕܦܳܫܰܚ ܗ̱ܘܳܐ ܝܶܫܽܘܥ ܕܶܝܢ ܠܗܰܘ ܕܰܡܫܰܪܺܝ ܐܰܣܺܝ ܗ̱ܘܳܐ

11 ܡܪܰܚܡܳܢܽܘܬܳܐ ܕܰܐܝܟ ܙܶܥܪܰܬ ܗܘܳܬ ܒܗܰܘ ܙܰܒܢܳܐ ܗܳܐ ܣܶܓܝܰܬ ܠܳܗ̇ ܘܺܐܝܬ ܬܽܘܒ ܐܰܝܟܳܐ ܕܡܶܣܢܳܐ ܣܳܢܝܳܐ ܗܘܳܬ ܕܢܶܥܒܰܪ ܐ̱ܢܳܫ ܥܰܠ ܦܽܘܩܕܳܢܳܐ ܕܠܳܐ ܪ̈ܳܚܡܺܝܢ ܓܶܝܪ ܐܶܬܩܰܛܰܠܘ̱ ܫܳܐܽܘܠ ܘܳܐܚܳܒ ܥܰܠ ܕܰܨܒܰܘ ܠܰܡܪܰܚܡܽܘ ܥܰܠ ܒܺܝ̈ܫܶܐ ܘܠܳܐ ܐܶܬܩܰܛܰܠܘ̱ ܕܚܰܝܳܒܺܝܢ ܗ̱ܘܰܘ ܦܽܘܪܥܳܢܳܐ ܠܰܙܒܰܢܝ̱ ܕܺܝܠܝ̱ ܗܰܦܟܶܗ ܝܶܫܽܘܥ ܕܟܽܠ ܐ̱ܢܳܫ ܠܰܡ ܢܺܚܶܐ ܘܢܺܚܽܘܢ ܩܳܛܽܘܠܶܗ

12 ܕܟܺܝܪ ܗܽܘ ܫܶܡܫܽܘܢ ܓܽܘܪܝܳܐ ܕܰܐܪܝܳܐ ܕܰܬܒܰܪ ܝܰܗܒ ܠܺܝ ܥܪ̈ܳܕܶܐ ܕܦܶܠܫܰܬ ܐܳܦ ܗܰܘ ܪܰܒܳܐ ܚܰܝܠܳܐ ܐܰܒܢܺܝܪ ܒܰܪ ܢܺܝܪ ܛܰܒܝܳܐ ܨܳܕ ܠܺܝ ܩܰܠܺܝܠܳܐ ܠܰܥܫܳܐܶܝܠ ܒܰܪ ܨܽܘܪܳܝܳܐ ܕܰܡܚܳܝܗ̱ܝ ܘܰܫܕܳܝܗ̱ܝ ܥܰܠ ܐܰܪܥܳܐ ܐܳܦ ܒܰܢܝܳܐ ܒܗܰܝܟܰܠ ܩܽܘܕܫܳܐ ܩܰܛܠܶܗ ܠܝܽܘܐܳܒ ܟܺܐܢܳܐܺܝܬ ܐܰܝܟ ܡܳܐ ܕܰܟܬܺܝܒ ܕܚܶܡܠܰܬ ܣܰܝܦܳܗ̇ ܟܺܐܢܽܘܬܳܐ ܢܕܽܘܨܽܘܢ ܡܶܟܺܝܠ ܬܰܝܳܒ̈ܶܐ ܒܛܰܝܒܽܘܬܳܐ

13 ܡܫܼܰܚ ܗ̱ܘܳܐ ܕܰܘܺܝܕ ܀܀܀ ܠܰܐܕܽܘ̈ܡܳܝܶܐ ܚܶܒܠܺܝ̈ܢ ܚܶܒܠܺܝ̈ܢ ܘܰܚܪܰܒ ܐܶܢܽܘܢ ܟܡܳܐ ܟܰܝ ܪܰܚܡܰܢ ܐܰܢ̱ܬ ܐܰܘ ܒܰܪ ܕܰܘܺܝܕ ܕܟܺܐܢܽܘܬܶܗ ܕܕܰܘܺܝܕ ܥܶܦܰܬ ܕܰܬܪ̈ܶܝܢ ܚܶܒܠܺܝ̈ܢ ܩܛܰܠ ܗ̱ܘܳܐ ܘܰܡܠܳܐ ܚܒܳܠܳܐ ܡܰܚܶܐ ܗ̱ܘܳܐ ܒܰܪ ܕܰܘܺܝܕ ܗܳܐ ܡܰܠܶܦ ܠܰܢ ܕܰܫܒܽܘܩ ܠܰܐܚܽܘܟ ܫܒܰܥ ܫܒܰܥ ܠܰܡ ܥܰܠ ܫܰܒܥܺܝܢ ܠܗܰܠ ܟܺܐܢܽܘܬܳܐ ܕܶܐܬܡܰܫܚܰܬ ܗܳܪܟܳܐ ܕܶܝܢ ܒܰܣܺܝܡܽܘܬܳܐ ܕܠܳܐ ܡܽܘܫܳܚܳܐ

14 ܛܢܳܢܳܐ ܘܚܰܝܠܳܐ ܩܢܳܐ ܗ̱ܘܳܐ ܕܰܘܺܝܕ ܠܰܐܪܝܳܐ ܘܕܺܐܒܳܐ ܩܛܰܠ ܗ̱ܘܳܐ ܐܰܟܚܰܕ ܫܰܒܩܶܗ ܠܰܐܪܝܳܐ ܚܰܣܺܝܢܳܐ ܘܰܪܗܶܛ ܠܶܗ ܥܰܠ ܓܰܢ̱ܒܳܪܳܐ ܥܰܙܺܝܙܳܐ ܒܟܺܐܦܳܐ ܒܰܕܰܪ ܢܰܗܺܝܪܶܗ ܘܰܫܒܰܩܬܶܗ ܢܰܦܫܶܗ ܘܰܐܘܦܺܝ ܝܶܫܽܘܥ ܕܶܝܢ ܩܪܳܐ ܠܡܺܝܬܳܐ ܥܠܺܝܡܳܐ ܥܠܺܝܡܳܐ ܐܳܦ ܡܺܝ̈ܬܶܐ ܠܶܗ ܕܰܡܟ̈ܶܐ ܐܶܢܽܘܢ ܥܠܺܝܡܳܐ ܐܰܚܺܝ ܘܰܚܛܰܦ ܡܶܢܝ̱ ܚܙܺܝܪ̈ܶܐ ܫܺܝ̈ܛܶܐ ܚܢܰܩ ܗ̱ܘܳܐ ܠܺܝ ܒܓܰܘ ܝܰܡܳܐ

15 ܩܛܰܠܘ̱ ܠܶܘ̈ܳܝܶܐ ܡܶܛܽܠ ܥܶܓܠܳܐ ܠܰܐܒܳܗܰܝ̈ܗܽܘܢ ܘܠܰܐܚܰܝ̈ܗܽܘܢ ܢܶܦܬܰܚ ܒܺܐܝ̈ܕܰܘܗ̱ܝ ܒܰܪܬܶܗ ܢܟܰܣ ܗ̱ܘܳܐ ܡܰܠܟܳܐ ܕܡܽܘܐܳܒ ܥܰܠ ܫܽܘܪܳܐ ܠܰܒܪܶܗ ܒܽܘܟܪܶܗ ܕܒܰܚ ܗ̱ܘܳܐ ܠܽܘܩܒܰܠ ܚܰܪܒܶܗ ܐܶܬܦܰܨܚܰܬ ܒܝܶܫܽܘܥ ܗܽܘ ܩܗܺܝܬ ܚܰܪܒܳܐ ܐܳܦ ܐܶܙܕܰܓܪܰܬ ܐܶܫܬܳܐ ܚܳܬܳܗ̇ ܕܰܫܝܽܘܠ ܚܶܡܬܶܗ ܕܫܶܡܥܽܘܢ ܐܶܬܚܰܠܡܰܬ ܀܀܀ ܠܰܫܝܽܘܠ ܕܶܝܢ ܐܰܟܪܶܗ ܛܳܒܳܐ ܕܚܽܘܠܡܳܢܳܗ̇

16 ܗܳܢܳܐ ܝܶܫܽܘܥ ܟܰܕ ܒܰܪ ܟܺܐܢܰܐ ܗ̱ܘ ܟܽܠ ܛܰܝܒܽܘܬܳܐ ܡܶܬܟܰܪܙܳܐ ܒܶܗ ܠܺܝ ܕܶܝܢ ܗܼܺܝ ܛܰܝܒܽܘܬܶܗ ܫܽܘܢܳܩܳܐ ܒܶܗ ܚܣܳܡܰܐ ܗ̱ܘ ܥܶܠܰܬ ܒܽܘܣܳܡܳܢ ܕܰܚܣܳܡܳܐ ܓܶܝܪ ܡܶܢ ܠܽܘܩܕܰܡ ܡܼܰܙܶܓ ܗ̱ܘܳܐ ܠܺܝ ܕܡܳܐ ܫܳܪܽܘܝܳܐ ܡܰܢ ܚܳܒܶܬ ܠܶܗ ܠܒܰܪ ܡܰܪܝܰܡ ܕܶܐܬܳܐ ܦܰܩܶܕ ܕܠܳܐ ܠܰܡ ܬܶܪܓܰܙ ܥܰܠ ܐܰܚܽܘܟ ܫܩܼܰܠ ܚܰܪܒܳܐ ܡܶܢ ܒܶܝܬ ܐܰܚ̈ܶܐ ܕܰܒܚܰܪܒܶܗ ܕܩܳܐܶܝܢ ܒܶܣܡܰܬ ܕܫܳܪܽܘܬܺܝܢ

17 ܟܰܟܳܪܺܝܬܳܐ ܒܓܰܘ ܬܶܓܪܽܘܡܬܳܐ ܐܶܫܟܰܚ ܫܶܡܫܽܘܢ ܠܡܳܐ ܟܰܝ ܐ̱ܪܳܙܰܐ ܗ̱ܘ ܗܳܢܳܐ ܝܶܫܽܘܥ ܐܰܣܺܝܓ ܠܰܢ ܐ̱ܪ̈ܳܙܶܐ ܒܶܝܬ ܓ̈ܰܠܠܶܐ ܕܐܪ̈ܳܙܰܘܗ̱ܝ ܢܶܦܠܰܬ ܕܰܐܡܬܶܠ ܠܰܢ ܚܰܝܰܬ ܡܺܝ̈ܬܶܐ ܒܟܽܠ ܐ̱ܪ̈ܳܙܰܝܢ ܘܰܒܟܽܠ ܛܽܘ̈ܦܣܺܝܢ ܡܶܢ ܐܳܟܠܳܐ ܐܽܘܟܠܳܐ ܢܦܼܰܩ ܗ̱ܘܳܐ ܐܰܡܬܶܠ ܫܶܡܫܽܘܢ ܠܺܝ ܕܶܝܢ ܗܶܦܟܳܐܺܝܬ ܓܶܕܫܰܬ ܕܳܐܟܠܳܐ ܢܦܼܰܩ ܠܺܝ ܡܶܢ ܐܽܘܟܠܳܐ ܕܡܶܢ ܐܳܕܳܡ ܗܳܐ ܒܰܪ ܐܳܕܳܡ ܕܰܐܣܺܝܦܳܢܝ̱

18 ܘܳܐܦ ܙܰܕܺܝ̈ܩܶܐ ܐܰܣܓܺܝܘ ܬܶܒܪܽܘܢܝ̱ ܕܚܰܝܰܬ ܡܺܝ̈ܬܶܐ ܒܗܽܘܢ ܐܶܬܟܰܪܙܶܬ ܡܰܙܰܓܘ̱ ܕܶܝܢ ܒܶܐܒܠܰܝ̈ ܒܽܘܝܳܐܳܐ ܪܰܒܳܐ ܒܰܨܠܽܘܬ ܐܰܣܳܐ ܘܚܶܙܰܩܝܳܐ ܒܰܩܛܺܝ̈ܠܶܐ ܡܶܫܬܪܶܐ ܗܘܺܝܬ ܀܀܀ ܘܳܐܦ ܒܰܫܠܰܕ̈ܶܐ ܡܚܰܫܶܡ ܗܘܺܝܬ ܐܶܠܺܝܳܐ ܢܶܒܢ̈ܰܝ ܒܰܥܠܳܐ ܢܰܟܶܣ ܝܰܗ̱ܒ ܠܺܝ ܒܠܰܚܡܳܐ ܕܺܐܝܙܒܶܠ ܐܶܬܦܰܛܰܡܘ̱ ܟܺܐܢ̈ܶܐ ܐܳܠܨܽܘܢܝ̱ ܕܐܬܝܥܢ ܝܶܫܽܘܥ ܕܶܝܢ ܐܰܠܨܰܢܝ̱ ܕܶܐܬܺܝܒ ܠܳܟ ܕܶܐܟܠܶܬ

19 ܩܶܢܛܰܬ ܡܶܢܶܗ ܕܰܕܡܳܐ ܪܣܺܝܣܳܐ ܕܪܰܣ ܗ̱ܘܳܐ ܡܽܘܫܶܐ ܥܰܠ ܟܽܠ ܬܰܪ̈ܥܺܝܢ ܕܟܰܕ ܗܽܘ ܩܛܺܝܠܰܐ ܗ̱ܘ ܠܚܰܝ̈ܶܐ ܢܳܛܰܪ ܡܶܢ ܕܡܳܐ ܡܶܢ ܡܬܽܘܡ ܠܳܐ ܕܶܚܠܰܬ ܐܶܠܳܐ ܡܶܢ ܕܡܳܐ ܕܥܰܠ ܬܰܪ̈ܥܶܐ ܘܡܶܢ ܗܳܢܳܐ ܬܽܘܒ ܕܥܰܠ ܩܰܝܣܳܐ ܕܡܳܐ ܕܰܩܛܺܝ̈ܠܶܐ ܒܽܘܣܳܡܰܐ ܗ̱ܘ ܘܰܐܝܟ ܪܺܝܚ ܒܰܣܺܝܡܰܐ ܗ̱ܘ ܕܡܶܗ ܕܝܶܫܽܘܥ ܠܺܝ ܣܽܘܪܳܕܰܐ ܗ̱ܘ ܕܡܳܐ ܕܶܐܙܠܶܬ ܕܺܐܪܺܝܚ ܒܰܕܡܶܗ ܡܣܰܪܶܕ ܠܺܝ ܪܺܝܚܳܐ ܕܚܰܝ̈ܶܐ ܕܰܟܣܶܐ ܒܶܗ

20 ܟܳܗ̈ܢܶܐ ܘܟܽܘܡܪ̈ܶܐ ܡܫܺܝܚ̈ܶܐ ܘܡܰܠܟ̈ܶܐ ܕܚܰܘܺܝܘ ܛܽܘ̈ܦܣܶܐ ܕܚܰܝܰܬ ܡܺܝ̈ܬܶܐ ܠܳܐ ܗܘܳܐ ܒܰܨܠܺܝܒܰܝ̈ܗܽܘܢ ܐܶܬܢܰܨܰܚܘ̱ ܟܠܺܝ̈ܠܶܐ ܘܬܳܓ̈ܶܐ ܣܺܝܡܺܝܢ ܗ̱ܘܰܘ ܘܟܰܕ ܢܶܦܠܶܬ ܒܺܐܝܓܽܘ̈ܢܰܝܗܽܘܢ ܒܳܠܰܥ ܗܘܺܝܬ ܐܳܦ ܡܰܚܶܐ ܗܘܺܝܬ ܗܳܢܳܐ ܕܶܝܢ ܒܰܪ ܢܰܓܳܪܳܐ ܒܰܟܠܺܝܠ ܟܽܘܒܰܘ̈ܗ̱ܝ ܫܳܦܶܠ ܘܰܫܕܳܗ̇ ܠܰܚܬܺܝܪܽܘܬܝ̱ ܒܫܺܝܛܽܘܬܳܐ ܘܰܒܡܺܝܬܽܘܬܳܐ ܚܙܳܬܶܗ ܫܝܽܘܠ ܐܳܦ ܐܶܬܪܰܗܒܰܬ ܡܶܢ ܩܽܘܕܡܰܘܗ̱ܝ

21 ܠܡܽܘܫܶܐ ܚܙܳܝܗ̱ܝ ܝܰܡܳܐ ܘܰܥܪܰܩ ܕܚܶܠ ܡܶܢ ܚܽܘܛܪܶܗ ܐܳܦ ܡܶܢ ܫܽܘܒܚܶܗ ܙܺܝܘܶܗ ܘܚܽܘܛܪܶܗ ܘܫܽܘܠܛܳܢܶܗ ܚܙܺܝܬ ܀܀܀ ܐܳܦ ܗܳܝ ܟܺܐܦܳܐ ܕܶܐܬܬܰܪܥܰܬ ܫܝܽܘܠ ܕܶܝܢ ܕܶܐܨܛ̇ܪܺܝܘ ܩܰܒܪ̈ܶܝܗ̇ ܡܳܢܳܐ ܚܙܳܬ ܒܶܗ ܒܝܶܫܽܘܥ ܚܠܳܦ ܙܺܝܘܶܐ ܓܰܘܢܳܐ ܕܡܺܝ̈ܬܶܐ ܠܒܶܫ ܘܰܐܙܺܝܥܳܗ̇ ܘܶܐܢ ܓܰܘܢܳܐ ܕܩܳܛܠܶܗ ܩܰܛܠܳܗ̇ ܐܰܝܟܰܢ ܡܰܨܝܳܐ ܕܰܬܣܰܝܒܰܪ ܡܳܐ ܕܳܐܬܶܐ ܕܰܢܩܺܝܡ ܡܺܝ̈ܬܶܐ ܒܬܶܫܒܽܘܚܬܶܗ [ܫܠܶܡ]

SEDRA IV

Syriac Lexeme

About This Digital Text

Corpus Text ID:

https://syriaccorpus.org/293

NHSL Work ID(s):

http://syriaca.org/work/8772
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).