Nisibis 40

https://syriaccorpus.org/294

TEI/XML Text

Show

section : section

line : line

Table of Contents

1 2 3 4 5 6 7 8

40 Nisibis XL

ܘ ܒܰܪ ܩܳܠܶܗ

1 ܐܶܪܓܶܫ ܒܺܝܫܳܐ ܒܫܰܦܠܶܗ ܪܰܒܳܐ ܘܫܳܒܗܳܪ ܢܰܦܫܶܗ ܩܕܳܡ ܦܰܠܳܚ̈ܰܘܗ̱ܝ ܡ̈ܶܠܰܘܗ̱ܝ ܪܰܘܪܶܒ ܟܰܕ ܐܰܦܺܝܣ ܘܶܐܡܰܪ ܕܺܝܕܰܥܬܳܐ ܠܰܡ ܕܩܳܢܶܐ ܐ̱ܢܳܐ ܩܰܠܺܝܠ ܡܶܢܶܗ ܕܰܟܝܳܢܳܐ ܘܣܽܘܓܳܐܗ̇ ܘܟܽܠܳܗ̇ ܕܝܽܘܠܦܳܢܳܐ ܐܶܢܳܐ ܠܰܩܢܽܘܡܝ̱ ܗܘܺܝܬ ܪܰܒܳܐ ܘܫܶܚܩܶܬ ܡܰܕܰܥܝ̱ ܕܠܳܐ ܡܰܠܦܳܢܳܐ ܝܶܠܦܶܬ ܟܽܠ ܙܶܝܢܶܬ ܢܰܦܫܝ̱ ܒܟܽܠ ܡܶܕܶܡ ܘܕܰܒܪ̱ܬ ܒܳܗ̇ ܟܠܺܝܠܳܐ ܕܰܨܒܺܝܬ ܒܐ̱ܢܳܫܽܘܬܳܐ ܥܽܘܢܺܝܬܳܐ: ܒܪܺܝܟ ܕܶܐܬܼܳܐ ܘܒܳܛܶܠ ܢ̈ܶܟܠܶܐ ܕܰܚܛܺܝܬܳܐ

2 ܒܰܦܪܺܝܫܳܝܰܐ ܗ̱ܘ ܠܶܒܫܰܬ ܣ̈ܶܢܝܳܬܝ̱ ܕܰܐܩܪܶܒ ܥܰܡܶܗ ܕܗܰܘ ܒܰܪ ܡܰܪܝܰܡ ܚܶܡܬܳܐ ܐܰܝܟ ܩܶܫܬܳܐ ܓܺܐܪ̈ܶܐ ܡܶܛܪܰܬ ܡܰܪܚܽܘܬܳܐ ܨܳܥܰܪܬܶܗ ܀܀܀ ܘܰܣܥܳܬ ܥܠܰܘܗ̱ܝ ܦܰܩܪܽܘܬܳܐ ܘܰܥܫܰܩܬܶܗ ܛܳܠܽܘܡܽܘܬܳܐ ܚܣܳܡܳܐ ܘܛܰܢܳܢܳܐ ܒܪܽܘܓܙܳܐ ܢܳܨܘ̱ ܗ̱ܘܰܘ ܥܰܡܶܗ ܘܓܽܘܕܳܦܳܐ ܟܺܐܦ̈ܶܐ ܫܩܰܠ ܗ̱ܘܳܐ ܐܳܣܝܳܐ ܥܰܠ ܩܳܡ ܒܶܝܬ ܡܰܪ̈ܥܶܐ ܘܓܶܪܝܰܬ ܐܶܢܽܘܢ ܠܰܟܪ̈ܺܝܗܶܐ ܒܬܰܟܬܽܘܫܶܗ

3 ܕܠܳܐ ܢܳܦܶܠ ܗ̱ܘܳܐ ܬܚܶܝܬ ܡܰܪܫܽܘܬܳܐ ܒܫ̈ܺܐܝܠܳܬܰܐ ܗ̱ܘ ܡܶܬܓܰܘܰܣ ܗܘܺܝܬ ܐܰܣܓܺܝܬ ܓܰܪܺܝܬ ܥ̈ܶܠܠܳܬܳܐ ܘܰܚܙܺܝܬ ܕܶܐܬܟܰܣܶܣܬ ܠܳܗ̇ ܕܰܓܳܠܽܘܬܝ̱ ܘܶܐܬܝܰܕܥܰܬ ܠܳܗ̇ ܚܨܺܝܦܽܘܬܝ̱ ܘܶܐܬܒܰܣܪܰܬ ܠܳܗ̇ ܣܪܽܘܒܽܘܬܝ̱ ܒܗ̈ܶܦܟܳܬܳܐ ܕܚܶܪܝܳܢܳܐ ܡܶܣܬܰܬܰܪ ܗܘܺܝܬ ܟܽܠ ܐܰܝܟܳܐ ܕܕܰܪܫܰܬ ܥܰܡܶܗ ܗܳܘܶܐ ܠܶܗ ܟܽܠܶܗ ܥܡܰܠܝ̱ ܐܰܝܟ ܥܽܘܪܳܐ ܘܕܳܪܬܶܗ ܡܶܠܰܬ ܩܽܘܫܬܳܐ ܠܟܽܠ ܓܰܒܺܝ̈ܢ

4 ܚܶܙܝܰܬ ܕܰܐܬܠܺܝܛܰܐ ܗ̱ܘ ܘܡܳܪܳܐ ܚܰܝܠܰܐ ܗ̱ܘ ܒܽܐܘܡܳܢܽܘܬܰܐ ܗ̱ܘ ܒܓܰܘ ܒܰܪܢܳܫܳܐ [ܘܡܰܕܚܶܠ ܠܳܗ̇ ܪܰܚܫܳܐ ܕܰܠܒܰܪ] ܝܳܨܪܶܗ ܒܓܰܘ ܡܶܬܥܰܘܩܰܕ ܟܽܠܫܳܥ ܛܰܢܳܢܶܗ ܢܨܰܦ ܐܰܝܟ ܚܶܘܝܳܐ ܐܰܪ̈ܓܺܝܓܳܬܳܐ ܕܡܰܘܬܳܐ ܡܰܘܠܶܕ ܘܡܶܢ ܐܶܫܬܳܐ ܡܶܬܩܰܢܰܛ ܦܽܘܩܕܳܢܳܐ ܚܠܳܦ ܥܶܩܪܳܐ ܡܨܶܐ ܕܢܰܫܗܶܝܘܗ̱ܝ [ܠܡܽܘܝܳܩܳܐ ܕܰܡܚܶܐ ܠܰܐܒܕܳܢ] ܚܽܘܒܰܐ ܗ̱ܘ ܡܶܫܟܰܚ ܬܳܒܰܪ ܠܶܗ ܠܥܽܘܩܣܶܗ ܟܰܣܝܳܐ ܘܡܰܪܺܝܪܳܐ ܕܠܶܫܳܢܳܐ

5 ܡܰܢܽܘ ܕܰܣܟܶܠ ܡܶܢ ܒܰܪܢܳܫܳܐ ܕܛܳܒ ܡܶܢ ܢܰܦܫܶܗ ܕܥܽܘܡܪܶܗ ܝܺܨܶܦ ܡܺܐܢ̈ܶܐ ܕܒܰܥܝܳܒܶܗ ܣܳܥܰܪ ܟܽܠܝܽܘܡ ܘܰܟܣܳܐ ܣܳܣܳܐ ܒܗܰܕܳܡ̈ܰܘܗ̱ܝ ܣ̈ܶܕܩܶܐ ܕܰܒܢܶܚ̈ܬܰܘܗ̱ܝ ܚܳܐܶܛ ܘܰܥܒܺܝܕ ܣܶܕܩܳܐ ܒܪܶܥܝܳܢܶܗ ܒܰܝܬܶܗ ܡܶܢܶܗ ܢܰܗܺܝܪ ܗ̱ܽܘ ܘܚܶܫܽܘܟ ܠܶܒܶܗ ܫܳܥ ܪ̈ܶܓܫܰܘܗ̱ܝ ܘܫܳܛܶܦ ܟܰܘ̈ܰܘܗ̱ܝ ܐܰܚܺܝܕ ܬܰܪܥܶܗ ܘܰܢܛܺܝܪ ܟܶܣܦܶܗ ܬܪܺܝܥ ܦܽܘܡܶܗ ܘܰܓܢܺܝܒ ܓܰܙܳܐ ܕܡܰܚܫܰܒܬܶܗ

6 ܒܥܺܝܪܶܗ ܡܶܢܶܗ ܡܰܘܪܶܒ ܣܰܟܠܳܐ ܕܝܳܨܶܦ ܕܺܝܠܶܗ ܛܳܒ ܡܶܢ ܢܰܦܫܶܗ ܙܰܪ̈ܥܶܐ ܛܳܒ̈ܶܐ ܙܪܰܥ ܒܳܗ̇ ܒܰܐܪܥܶܗ ܒܠܶܒܶܗ ܙܪܰܥ ܙܺܝ̈ܙܳܢܶܐ ܬܪܺܝܥܳܐ ܘܫܳܕܝܳܐ ܬܰܪܥܺܝܬܶܗ ܘܒܰܣ̈ܝܳܓܶܐ ܕܟܰܪ̈ܡܶܐ ܠܳܐܶܐ ܡܰܓܒܳܐ ܘܢܳܨܶܒ ܢܶܨ̈ܒܳܬܳܐ ܟܰܕ ܬܰܪܥܺܝܬܶܗ ܓܦܶܬܳܐ ܗ̱ܝ ܡܶܢ ܓܽܘ̈ܦܢܶܝܗ̇ ܕܣܳܕܽܘܡ ܥܶܪܕܳܐ ܟܽܠܳܐ ܡܶܢ ܙܰܪܥܶܗ ܘܰܪܥܳܐ ܠܶܗ ܚܙܺܝܪܳܐ ܕܥܶܒܳܐ ܠܡܰܚܫܰܒܬܶܗ

7 ܟܽܘܪܳܐ ܐܰܝܬܺܝ ܠܰܒ̈ܢܰܝ ܐ̱ܢܳܫܳܐ ܘܒܺܝ ܡܶܬܒܰܚܪܺܝܢ ܪ̈ܶܥܝܳܢܰܝܗܽܘܢ ܒܰܕܓܽܘܢ ܫܰܠܺܝܛ ܠܺܝ ܕܶܐܓܕܽܘܠ ܙܺܐܦܳܐ ܟܽܠܕܝܽܘܬܳܐ ܡܰܠܶܦ ܐ̱ܢܳܐ ܒܫܰܪ̈ܺܝܪܳܬܳܐ ܕܶܐܣܬܰܩܒܰܠ ܐܶܬܗܰܝܡܶܢ ܕܰܓ̈ܳܠܳܬܳܐ ܒܓܰܘ ܡܶܨܪܶܝܢ ܐܶܚܕܶܬ ܥܰܝ̈ܢܶܐ ܩܰܠܡܳܐ ܚܰܘܺܝܬ ܣܰܒܰܪܘ̱ ܕܺܐܝܬܶܝܗ̇ ܟܰܕ ܠܳܐ ܐܺܝܬܶܝܗ̇ ܒܶܐܚܰܕ ܥܰܝ̈ܢܶܐ ܡܰܠܶܦ ܐ̱ܢܳܐ ܡܳܠܽܘ̈ܫܶܐ ܕܠܳܐ ܐܺܝܬܰܝܗܽܘܢ ܒܰܫܡܰܝܳܐ ܀܀܀

8 ܒܝܰܕ ܩܰܠܺܝܠܽܘܬܝ̱ ܛܳܣܶܬ ܘܰܚܙܺܝܬ ܘܩܰܕܡܰܬ ܚܘܺܝܬܳܐ ܠܰܐܝܢܳܐ ܕܰܩܨܶܡ ܐܰܝܠܶܝܢ ܕܰܛܥܰܘ ܒܺܝ ܢܒܺܝܳܐ ܚܰܫܒܽܘܢܝ̱ ܐܺܝܬ ܕܶܝܢ ܐܰܝܟܳܐ ܕܡܰܚܨܶܦ ܐ̱ܢܳܐ ܘܫܳܐܶܠ ܐ̱ܢܳܐ ܕܰܠܡܶܠܶܐ ܫܳܥܳܐ ܢܶܬܓܰܠܝܳܢ ܠܺܝ ܟܰܣ̈ܝܳܬܳܐ ܕܢܶܬܒܰܚܪܽܘܢ ܒܺܝ ܫܰܪ̈ܺܝܪܶܐ ܒܰܕܡܽܘܬ ܐܺܝܽܘܒ ܐܳܦ ܙܺܐܦܳܢ̈ܶܐ ܐܰܝܟ ܫܳܐܽܘܠ ܐܺܝܬ ܕܓܰܠܝܳܬܶܗ ܠܢܰܚܫܶܗ ܘܺܐܝܬ ܕܡܰܪܩܬܶܗ ܠܰܫܪܳܪܶܗ ܘܶܐܬܩܰܠܰܣ

SEDRA IV

Syriac Lexeme

About This Digital Text

Corpus Text ID:

https://syriaccorpus.org/294

NHSL Work ID(s):

http://syriaca.org/work/8773
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).