Nisibis 41

https://syriaccorpus.org/295

TEI/XML Text

Show

section : section

line : line

Table of Contents

1 2 3 4 5 6 7 8 9 10 11 12 13 14 15 16

41 Nisibis XLI

ܙ ܒܰܪ ܩܳܠܶܗ

1 ܐܶܡܰܪ ܒܺܝܫܳܐ ܕܩܶܢܛܶܬ ܡܶܢܶܗ ܕܝܶܫܽܘܥ ܕܰܠܡܳܐ ܢܰܘܒܶܕ ܪ̈ܶܗܛܰܝ ܗܳܐ ܓܶܝܪ ܒܰܪ ܐܰܠܦ̈ܶܐ ܐ̱ܢܳܐ ܕܰܫܢܰܝ̈ܳܐ ܘܠܳܐ ܡܬܽܘܡ ܗ̱ܘܳܐ ܠܺܝ ܒܶܛܠܳܢܳܐ ܠܳܐ ܚܙܺܝܬ ܡܶܕܶܡ ܟܰܕ ܡܰܬܩܶܢ ܘܰܐܗܡܺܝܬ ܡܶܢܶܗ ܘܰܐܪܦܺܝܬܶܗ ܐܶܬܳܐ ܠܶܗ ܡܢܰܟܶܦ ܙܠܺܝ̈ܠܶܐ ܐܶܒܠܰܐ ܗ̱ܘ ܡܶܟܺܝܠ ܕܣܰܬܰܪ ܠܶܗ ܠܟܽܠ ܡܳܐ ܕܰܒܢܺܝܬ ܣܓܺܝܘ ܥܰܡ̈ܠܰܝ ܥܰܡ ܬܽܘܠܡ̈ܳܕܰܝ ܕܥܰܦܺܝܬܳܗ̇ ܠܟܽܠܳܗ̇ ܒܪܺܝܬܳܐ ܒܟܽܠ ܒܺܝܫ̈ܳܢ ܥܽܘܢܺܝܬܳܐ: ܒܪܺܝܟ ܕܶܐܬܳܐ ܘܦܰܪܣܺܝ ܢܶܟ̈ܠܰܘܗ̱ܝ ܕܰܨܢܺܝܥܳܐ

2 ܦܶܚܡܶܬ ܪ̈ܶܗܛܰܝ ܥܰܡ ܩ̈ܰܠܺܝܠܶܐ ܘܥܶܒܪܶܬ ܐܶܢܽܘܢ ܡܶܬܟܰܬܰܫ ܗܘܺܝܬ ܪܰܘܒܳܐ ܕܣ̈ܰܓܺܝܐܶܐ ܙܰܝܢܳܐ ܗ̱ܘܳܐ ܠܺܝ ܒܪܰܘܒܳܐ ܕܥܰܡܳܐ ܚܳܕܶܐ ܗܘܺܝܬ ܕܝܰܗ̱ܒ ܗ̱ܘܳܐ ܐܰܬܪܳܐ ܩܰܠܺܝܠ ܕܰܩܫܰܐ ܗ̱ܘ ܚܺܐܦܳܐ ܕܣ̈ܰܓܺܝܐܶܐ ܒܚܰܝܠܳܐ ܕܣܰܓܺܝܐܳܐ ܛܽܘܪܳܐ ܪܰܒܳܐ ܙܶܩܦܰܬ ܡܰܓܕܠܳܐ ܠܰܫܡܰܝܳܐ ܡܶܬܚܰܬ ܐܶܢ ܥܰܡ ܪܰܘܡܳܐ ܐܶܬܟܰܬܰܫܘ̱ ܟܡܳܐ ܢܶܙܟܽܘܢ ܠܰܐܝܢܳܐ ܕܒܰܐܪܥܰܐ ܗ̱ܘ ܬܰܟܬܽܘܫܶܗ

3 ܥܰܡܶܗ ܕܙܰܒܢܳܐ ܘܥܰܡ ܥܽܘܕܪܳܢܶܗ ܡܶܬܟܰܬܰܫ ܐ̱ܢܳܐ ܦܳܪܽܘܫܳܐܺܝܬ ܫܡܼܰܥ ܗ̱ܘܳܐ ܥܰܡܳܐ ܕܰܐܠܳܗܳܐ ܚܰܕ ܗ̱ܽܘ ܥܒܰܕ ܠܶܗ ܣܽܘܓܐܳܐ ܕܰܐܠܳܗ̈ܶܐ ܘܕܰܚܼܙܳܐ ܠܰܒܪܶܗ ܕܰܐܠܳܗܳܐ ܪܗܶܛ ܠܶܗ ܨܶܝܕ ܚܰܕ ܐܰܠܳܗܳܐ ܕܰܐܝܟ ܡܰܘܕܶܐ ܒܶܗ ܒܰܐܠܳܗܳܐ ܗܳܘܶܐ ܟܳܦܰܪ ܒܶܗ ܘܰܐܝܟ ܛܐܶܢ ܢܶܥܪܽܘܩ ܡܶܢܶܗ ܕܰܒܟܽܠ ܙܰܒ̈ܢܺܝܢ ܗ̈ܶܦܟܳܝܶܐ ܢܶܫܬܰܟܚܽܘܢ ܕܰܕܠܳܐ ܐܰܠܳܗ ܐܺܝܬܰܝܗܽܘܢ

4 ܗܳܐ ܒܰܪ ܢܽܘܓܪܳܐ ܐܶܢܳܐ ܕܰܫ̈ܢܰܝܳܐ ܘܥܰܠ ܝܰܠܽܘܕܳܐ ܠܳܐ ܒܣܺܝܬ ܡܶܢ ܡܬܽܘܡ ܛܰܥܢܰܐ ܗ̱ܘ ܕܫܰܒܪ̈ܶܐ ܫܶܩܠܶܬ ܣ̇ܰܓܺܝ ܕܥܺܝ̈ܕܶܐ ܕܠܳܐ ܫܰܦܺܝܪ̈ܺܝܢ ܐܶܩܢܶܐ ܐܶܢܽܘܢ ܡܶܢ ܫܽܘܪܳܝܳܐ ܕܢܰܪܒܽܘܢ ܥܰܡܗܽܘܢ ܡܽܘ̈ܡܰܝܗܽܘܢ ܐܺܝܬ ܕܶܝܢ ܐܰܒܳܗ̈ܶܐ ܣ̈ܰܟܠܶܐ ܕܠܳܐ ܡܟܶܝܢ ܠܙܰܪܥܳܐ ܕܙܶܪܥܶܬ ܒܰܒ̈ܢܰܝܗܽܘܢ ܘܺܐܝܬ ܕܰܐܝܟ ܐܰܟܳܪ̈ܶܐ ܛܳܒ̈ܶܐ ܥܩܰܪܘ̱ ܡܽܘ̈ܡܶܐ ܡܶܢ ܬܰܪܥܺܝܬܳܐ ܕܝܰܠܕܰܝ̈ܗܽܘܢ ܀܀܀

5 ܚܠܳܦ ܫܺܫܠܳܬܳܐ ܒܡܰܐܝܳܢܽܘܬܳܐ ܦܶܟܪܶܬ ܐ̱ܢܳܫܳܐ ܘܒܰܛܶܠܘ̱ ܘܺܝܬܶܒܘ̱ ܓܶܠܙܶܬ ܪ̈ܶܓܫܰܝܗܽܘܢ ܡܶܢ ܛܳܒ̈ܳܢ ܥܰܝ̈ܢܰܝܗܽܘܢ ܡܶܢ ܩܶܪܝܳܢܳܐ ܦܽܘܡ̈ܰܝܗܽܘܢ ܡܶܢ ܗܽܘܠܳܠܳܐ ܡܰܕܥܗܽܘܢ ܡܶܢ ܝܽܘܠܦܳܢܳܐ ܠܡ̈ܰܬܠܶܐ ܚܰܪ̈ܒܶܐ ܘܒܰܛܺܝ̈ܠܶܐ ܡܳܐ ܟܰܫܺܝܪ̈ܺܝܢ ܠܰܡܡܰܠܳܠܳܐ ܣܦܺܝܩܳܐ ܛܽܘܠܺܝܩܺܝܢ ܐܶܢ ܢܶܦܠܰܬ ܡܶܠܰܬ ܚ̈ܰܝܶܐ ܐܰܘ ܕܰܚܩܽܘܗ̇ ܐܰܘ ܩܳܡܘ̱ ܫܰܢܺܝܘ ܡܶܢ ܨܶܐܕܶܝܗ̇

6 ܟܡܳܐ ܣ̈ܳܛܳܢܺܝܢ ܒܓܰܘ ܒܰܪܢܳܫܳܐ ܘܠܺܝ ܕܺܝܠܝ̱ ܒܰܠܚܽܘܕ ܠܳܐܶܛ ܟܽܠ ܐ̱ܢܳܫ ܗܳܐ ܓܶܝܪ ܚܶܡܬܶܗ ܕܒܰܪܢܳܫܳܐ ܐܺܝܬܶܝܗ̇ ܫܺܐܕܳܐ ܕܟܽܠܝܽܘܡ ܫܳܚܶܩ ܠܶܗ ܕܰܝ̈ܘܶܐ ܠܳܐܪ̈ܚܶܐ ܡܶܬܕܰܡܶܝܢ ܕܰܡܫܰܢܶܝܢ ܐܶܢ ܡܶܬܰܐܠܨܺܝܢ ܥܰܠ ܚܶܡܬܳܐ ܕܶܝܢ ܐܶܢ ܢܽܘܡܽܘܢ ܟܽܠ ܙܰܕܺܝ̈ܩܶܐ ܠܳܐ ܡܶܬܥܰܩܪܳܐ ܡܶܢ ܐܰܬܪܳܗ̇ ܚܠܳܦ ܚܣܳܡܳܐ ܣܪܽܘܚܳܐ ܠܫܺܐܕܳܐ ܫܺܝܛܳܐ ܘܚܰܠܳܫܳܐ ܣܳܢܶܐ ܟܽܠ ܐ̱ܢܳܫ

7 ܒܗܶܬ ܐܳܫܽܘܦܳܐ ܥܰܡ ܒܰܪܩܳܐ ܕܠܰܚܘ̈ܰܘܳܬܳܐ ܡܟܰܒܶܫ ܟܽܠܝܽܘܡ ܐܰܟܕܳܢܳܐ ܕܰܒܓܰܘܶܗ ܡܶܢܶܗ ܡܶܪܕܰܬ ܕܪܶܓܬܶܗ ܒܓܰܘܶܗ ܠܳܐ ܟܳܒܶܫ ܚܛܺܝܬܳܐ ܟܣܺܝܬܳܐ ܐܰܝܟ ܐܶܣܦܶܣ ܡܳܐ ܕܢܶܦܚܰܬ ܒܶܗ ܐܶܣܬܺܝܛ ܡܳܐ ܕܛܳܒ ܨܶܕܳܗ̇ ܠܰܐܟܕܳܢܳܐ ܀܀܀ ܒܽܐܘܡܳܢܽܘܬܶܗ ܡܰܚܬܶܗ ܛܽܘܥܝܰܝ ܟܰܣܝܳܐܺܝܬ ܡܫܰܗܶܐ ܪܰܚܫܳܐ ܒܠܽܘܚܫ̈ܳܬܶܗ ܡܥܺܝܪ ܥܠܰܘܗ̱ܝ ܪܽܘܓܙܳܐ ܪܰܒܳܐ ܒܠܽܘ̈ܚܫܳܬܶܗ

8 ܣܺܝܡܰܬ ܥܽܘܩ̈ܣܶܐ ܘܝܶܬܒܰܬ ܩܰܘܝܰܬ ܡܰܢܽܘ ܕܽܐܘܪܳܟ ܪܶܥܝܳܢܶܗ ܥܰܡ ܟܽܠ --------- ܨܶܝܕ ܢܰܓܺܝܪ ܪܽܘܚܳܐ ܝܶܬܒܰܬ ܘܰܕܪܰܓ ܡܶܢ ܕܪܰܓ ܐܰܫܦܳܬܶܗ ܕܢܺܐܬܶܐ ܠܩܽܘܛܳܥ ܪܶܥܝܳܢܳܐ ܠܰܐܝܢܳܐ ܕܟܳܘܶܙ ܡܶܢ ܚܰܘ̈ܒܶܐ ܥܺܝܕ̈ܶܐ ܟܶܒܫܰܘܗ̱ܝ ܒܩܰܠܺܝܠ ܩܰܠܺܝܠ ܕܪܶܫܬܶܗ ܥܕܰܡܳܐ ܕܰܗܘܳܐ ܬܚܶܝܬ ܢܺܝܪܳܐ ܕܥܰܠ ܘܰܐܥܺܝܕ ܘܳܐܦ ܠܳܐ ܕܢܶܦܽܘܩ ܨܳܒܶܐ ܗ̱ܘܳܐ

9 ܪܶܓܫܶܬ ܘܰܚܙܺܝܬ ܕܢܰܓܺܝܪ ܪܽܘܚܳܐ ܗܽܘܝܽܘ ܡܶܫܟܰܚ ܕܢܶܟܒܰܫ ܟܽܠ ܒܙܰܒܢܳܐ ܕܰܙܟܰܝܬܶܗ ܠܳܐܕܳܡ ܚܰܕ ܗ̱ܘܳܐ ܐܰܪܦܺܝܬܶܗ ܥܰܕ ܗܳܐ ܡܰܘܠܶܕ ܘܰܒܥܺܝܬ ܠܺܝ ܥܒܳܕܳܐ ܐ̱ܚܪܺܢܳܐ ܕܠܳܐ ܢܶܛܥܰܡ ܒܺܝ ܒܶܛܠܳܢܳܐ ܚܶܠܳܐ ܕܝܰܡܳܐ ܡܳܢܳܐ ܗܘܺܝܬ ܕܪܽܘܚܝ̱ ܐܰܓܰܪ ܒܶܗ ܘܕܰܐܒܩܶܐ ܥܽܘܗܕܳܢܝ̱ ܐܶܢ ܣܳܦܶܩ ܠܰܒ̈ܢܰܝ ܐ̱ܢܳܫܳܐ ܡܳܐ ܕܰܣܓܺܝܘ ܥܰܕ ܠܳܐ ܢܶܣܓܽܘܢ ܒܣ̈ܰܓܺܝܐܶܐ ܒܩܺܝܬ ܐܶܢܽܘܢ

10 ܕܪܰܫܘ̱ ܦܰܠܳܚ̈ܰܘܗ̱ܝ ܕܒܺܝܫܳܐ ܥܰܡܶܗ ܘܰܫܪܰܘ ܡ̈ܶܠܰܘܗ̱ܝ ܒܗ̈ܶܦܟܳܬܳܐ ܕܗܳܐ ܠܰܡ ܐܶܠܺܝܫܰܥ ܐܰܚܺܝ ܡܺܝܬܶܐ ܘܕܰܙܟܳܐ ܠܡܰܘܬܳܐ ܒܥܶܠܺܝܬܳܐ ܘܰܐܚܺܝ ܠܰܒܪܳܗ̇ ܕܰܐܪܡܰܠܬܳܐ ܗܳܐ ܡܫܰܥܒܶܕ ܗܳܫܳܐ ܒܰܫܝܽܘܠ ܕܪܰܒܳܐ ܗܘܳܬ ܕܶܝܢ ܡܰܚܫܰܒܬܶܗ ܕܒܺܝܫܳܐ ܣܰܓܺܝ ܒܡܶܠܰܝ̈ܗܽܘܢ ܫܪܶܐ ܡܶܠܰܝ̈ܗܽܘܢ ܕܰܐܝܟܰܢܳܐ ܚܳܒ ܐܶܠܺܝܫܰܥ ܕܗܳܐ ܒܰܫܝܽܘܠ ܐܰܚܺܝ ܡܺܝܬܶܐ ܒܝܰܕ ܓܰܪ̈ܡܰܘܗ̱ܝ

11 ܐܶܢ ܐܶܠܺܝܫܰܥ ܕܰܙܥܽܘܪܳܐ ܗ̱ܘܳܐ ܪܰܒ ܗ̱ܘܳܐ ܚܰܝܠܶܗ ܒܓܰܘܳܗ̇ ܕܰܫܝܽܘܠ ܕܶܐܢ ܗܽܘ ܕܚܰܕ ܡܺܝܬܳܐ ܐܰܚܺܝ ܗܘܳܐ ܒܳܗ̇ ܟܡܳܐ ܟܰܝ ܡܳܝ̈ܬܺܝܢ ܡܰܚܶܐ ܒܳܗ̇ ܡܰܘܬܶܗ ܕܝܶܫܽܘܥ ܥܰܙܺܝܙܳܐ ܡܶܢܳܗ̇ ܕܗܳܕܶܐ ܐܶܬܒܰܝܰܢܘ̱ ܕܰܟܡܰܐ ܗ̱ܘ ܟܰܝ ܪܰܒ ܗ̱ܘܳܐ ܝܶܫܽܘܥ ܡܶܢ ܚܰܒܪ̈ܰܝ ܕܗܳܐ ܒܨ̈ܶܢܥܳܬܶܗ ܐܰܛܥܺܝܟܽܘܢ ܘܠܳܐ ܣܦܰܩܬܽܘܢ ܠܰܡܣܰܝܟܽܘ ܪܰܒܽܘܬܶܗ ܕܦܶܚܡܬܽܘܢܳܝܗ̱ܝ ܠܰܢܒ̈ܺܝܶܐ

12 ܙܥܽܘܪ̈ܺܝܢ ܐܶܢܽܘܢ ܒܽܘܝܳܐܝܰܟܽܘ̈ܢ ܐܳܡܰܪ ܒܺܝܫܳܐ ܠܰܒ̈ܢܰܝ ܬܶܓܡܶܗ ܗܰܘ ܓܶܝܪ ܕܰܐܚܺܝ ܠܳܠܥܳܙܳܪ ܟܰܕ ܡܺܝܬ ܐܰܝܟܰܢ ܣܳܦܶܩ ܠܶܗ ܡܰܘܬܳܐ ܘܶܐܢ ܕܶܝܢ ܙܳܟܶܐ ܠܶܗ ܡܰܘܬܳܐ ܗܽܘܝܽܘ ܨܒܼܳܐ ܕܢܶܫܬܰܥܒܰܕ ܠܶܗ ܘܶܐܢ ܗܽܘ ܨܳܒܶܐ ܕܢܶܫܬܰܥܒܰܕ ܐܰܣܶܓܘ̱ ܕܚܶܠܘ̱ ܕܠܳܐ ܡܳܐܶܬ ܒܛܶܠܳܐܺܝܬ ܓܽܘܢܚܰܐ ܗ̱ܘ ܪܰܒܳܐ ܥܒܰܕ ܒܰܢ ܕܟܰܕ ܡܳܐܶܬ ܠܳܐܕܳܡ ܥܳܐܶܠ ܠܰܡܰܚܳܝܽܘ

13 ܐܰܕܺܝܩ ܡܰܘܬܳܐ ܡܶܢ ܓܰܘ ܢܶܩܥܶܗ ܘܬܽܘܒ ܕܰܚܼܙܳܐ ܠܡܳܪܰܢ ܕܰܙܩܺܝܦ ܘܶܐܡܰܪ ܐܰܘ ܡܰܚܶܐ ܡܺܝ̈ܬܶܐ ܐܰܝܟܳܐ ܐܰܢ̱ܬ ܐܰܢ̱ܬ ܬܶܗܘܶܐ ܠܺܝ ܡܶܐܟܽܘܠܬܳܐ ܚܠܳܦ ܒܰܣܺܝܡܳܐ ܠܳܥܳܙܳܪ ܕܗܳܐ ܛܰܥܡܶܗ ܥܕܰܟܺܝܠ ܒܦܽܘܡܝ̱ ܒܰܪ̱ܬ ܝܽܘܐܳܪܳܫ ܬܺܐܬܶܐ ܬܶܚܙܶܐ ܗܳܢܳܐ ܙܩܺܝܦܳܟ ܒܪܳܗ̇ ܕܰܐܪܡܰܠܬܳܐ ܚܳܐܰܪ ܒܳܟ ܩܰܝܣܳܐ ܨܶܕܶܗ ܠܺܝ ܠܳܐܕܳܡ ܒܪܺܝܟ ܗ̱ܽܘ ܨܠܺܝܒܳܐ ܕܨܳܕܶܗ ܠܺܝ ܠܒܰܪ ܕܰܘܺܝܕ

14 ܦܽܘܡܶܗ ܦܬܰܚ ܗ̱ܘܳܐ ܡܰܘܬܳܐ ܘܶܐܡܰܪ ܠܳܐ ܫܡܺܝܥ ܗ̱ܘܳܐ ܠܳܟ ܐܰܘ ܒܰܪ ܡܰܪܝܰܡ ܕܡܽܘܫܶܐ ܕܺܝܪܶܒ ܘܶܐܬܝܰܬܰܪ ܡܶܢ ܟܽܠ ܗ̱ܘܳܐ ܐܰܠܳܗ ܘܰܥܒܰܕ ܕܰܐܠܳܗ ܐܰܡܺܝܬ ܒܽܘܟܪ̈ܶܐ ܘܦܰܨܺܝ ܒܽܘܟܪ̈ܶܐ ܟܽܠܳܐ ܡܰܘܬܳܢܳܐ ܡܶܢ ܚܰܝ̈ܶܐ ܠܛܽܘܪܳܐ ܣܶܠܩܶܬ ܥܰܡ ܡܽܘܫܶܐ ܘܡܶܢ ܐܺܝܕ ܠܺܐܝܕ ܝܰܗܒܶܗ ܠܺܝ ܒܪܺܝܟ ܐܺܝܩܳܪܶܗ ܕܰܟܡܳܐ ܕܢܺܐܪܰܒ ܒܰܪ ܐܳܕܳܡ ܗܽܘ ܥܰܦܪܳܐ ܠܥܰܦܪܶܗ ܗܦܰܟ ܕܡܶܢ ܐܰܪܥܰܐ ܗ̱ܘ

15 ܐܶܬܳܐ ܣܳܛܳܢܳܐ ܥܰܡ ܦܰܠܳܚ̈ܰܘܗ̱ܝ ܕܢܶܚܙܶܐ ܠܡܳܪܰܢ ܕܰܐܪܡܳܐ ܒܰܫܝܽܘܠ ܘܢܶܚܕܶܐ ܥܰܡܶܗ ܕܡܰܘܬܳܐ ܒܰܪ ܡܰܠܟܶܗ ܘܰܚܙܳܝܗ̱ܝ ܗ̱ܘܳܐ ܕܰܟܡܺܝܪ ܘܰܐܒܺܝܠ ܥܰܠ ܡܺܝ̈ܬܶܐ ܕܰܒܩܳܠ ܒܽܘܟܪܳܐ ܚܰܝܰܘ ܘܰܢܦܰܩܘ̱ ܡܶܢܳܗ̇ ܕܰܫܝܽܘܠ ܩܳܡ ܒܺܝܫܳܐ ܕܰܢܒܺܝܳܐ ܗ̱ܘܳܐ ܠܡܰܘܬܳܐ ܐܳܚܝܳܢܶܗ ܕܠܳܐ ܐܰܘܒܕܶܬ ܐܰܝܟ ܡܳܐ ܕܶܐܫܟܚܰܬ ܟܡܳܐ ܕܝܶܫܽܘܥ ܠܓܰܘ ܡܶܢܳܟ ܠܺܐܝܕܳܟ ܐܳܬܝܳܢ ܐܳܦ ܕܚܰܝܰܘ ܘܰܕܚܰܝܰܝܢ ܀܀܀

16 ܦܬܰܚ ܠܰܢ ܢܶܚܙܶܝܘܗ̱ܝ ܐܳܦ ܢܰܗܶܠ ܒܶܗ ܢܶܥܢܶܐ ܘܢܺܐܡܰܪ ܕܰܐܝܟܰܘ ܚܰܝܠܳܟ ܗܳܐ ܓܶܝܪ ܝܰܘܡ̈ܳܬܳܐ ܬܠܳܬܳܐ ܗ̱ܘܰܘ ܠܶܗ ܘܢܺܐܡܰܪ ܠܶܗ ܐܳܘ ܬܠܺܝܬܳܝܳܐ ܕܰܠܪܒܺܝܥܳܝܳܐ ܠܳܠܥܳܙܳܪ ܐܰܚܶܝܬ ܐܰܚܳܐ ܠܰܩܢܽܘܡܳܟ ܦܬܰܚ ܡܰܘܬܳܐ ܬܰܪ̈ܥܶܝܗ̇ ܕܰܫܝܽܘܠ ܘܰܐܙܠܶܓ ܡܶܢܳܗ̇ ܙܺܝܘܳܐ ܕܦܰܪܨܽܘܦܶܗ ܕܡܳܪܰܢ ܘܰܐܝܟ ܣܳܕܽܘܡܳܝ̈ܶܐ ܒܠܰܥܘ̱ ܗ̱ܘܰܘ ܡܳܫܘ̱ ܘܰܒܥܰܘ ܬܰܪܥܳܗ̇ ܕܰܫܝܽܘܠ ܕܶܐܒܰܕ ܠܳܗ̇

SEDRA IV

Syriac Lexeme

About This Digital Text

Corpus Text ID:

https://syriaccorpus.org/295

NHSL Work ID(s):

http://syriaca.org/work/8774
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).