Nisibis 42

1 ܐܰܝܠܶܠ ܒܺܝܫܳܐ ܕܠܰܐܝܟܳܐ ܡܶܟܺܝܠ ܐܺܝܬ ܠܺܝ ܕܶܐܥܪܽܘܩ ܡܶܢ ܙܰܕܺܝ̈ܩܶܐ ܠܡܰܘܬܳܐ ܓܶܪܝܶܬ ܕܶܐܩܛܽܘܠ ܠܰܫܠܺܝ̈ܚܶܐ ܐܰܝܟ ܕܰܐܓܗܶܐ ܡܶܢ ܢܶܓܕܰܝ̈ܗܽܘܢ ܒܡ̈ܰܘܬܰܝܗܽܘܢ ܝܰܬܺܝܪ ܗܳܫܳܐ ܡܶܬܢܰܓܰܕ ܐ̱ܢܳܐ ܩܰܫܝܳܐܺܝܬ ܫܶܠܚܳܐ ܕܩܰܛܠܶܗ ܒܗܶܢܕܽܘ ܠܽܐܘܪܗܳܝ ܩܰܕܡܰܢܝ̱ ܗܳܪܟܰܐ ܗ̱ܘ ܟܽܠܶܗ ܐܳܦ ܬܰܡܳܢ ܐܶܙܰܠ̱ܬ ܠܬܰܡܳܢ ܬܰܡܳܢ ܗ̱ܽܘ ܗܳܪܟܳܐ ܘܬܰܡܳܢ ܐܶܫܟܰܚܬܶܗ ܘܶܐܬܟܰܡܪܶܬ ܥܽܘܢܺܝܬܳܐ: ܒܪܺܝܟ ܚܰܝܠܳܐ ܕܰܫܪܶܐ ܒܓܰܪ̈ܡܶܐ ܢܰܨ̈ܺܝܚܶܐ

2 ܓܰܪ̈ܡܶܐ ܛܥܶܢ ܗ̱ܘܳܐ ܗܰܘ ܬܰܓܳܪܳܐ ܀܀܀ ܐܰܘ ܕܰܠܡܳܐ ܟܰܝ ܗܳܢܽܘܢ ܛܰܥܢܰܘܗ̱ܝ ܗܳܐ ܓܶܝܪ ܠܰܚ̈ܕܳܕܶܐ ܐܶܬܬܰܓܰܪܘ̱ ܗ̱ܘܰܘ ܘܠܺܝ ܡܳܐ ܠܺܝ ܕܥܰܕܰܪܘ̱ ܗܳܢܽܘܢ ܐܳܦ ܐܶܬܥܰܕܰܪܘ̱ ܚܰܕ ܡܶܢ ܚܰܕ ܕܠܺܝ ܒܬܰܪ̈ܬܰܝܗܶܝܢ ܚܽܘܣܪܳܢܰܐ ܗ̱ܘ ܗܰܘ ܓܠܽܘܣܩܳܡܶܗ ܕܰܣܟܰܪܝܽܘܛܳܐ ܡܰܢܽܘ ܢܚܰܘܶܝܢܝ̱ ܕܡܶܢܶܗ ܚܰܝܠܳܐ ܩܳܢܶܐ ܗܘܺܝܬ ܓܠܽܘܣܩܳܡܶܗ ܕܬܽܐܘܡܰܐ ܩܰܛܠܰܢܝ̱ ܕܚܰܝܠܳܐ ܟܰܣܝܳܐ ܕܰܫܪܶܐ ܒܶܗ ܡܫܰܢܶܩ ܠܺܝ

3 ܓܰܒܝܳܐ ܡܽܘܫܶܐ ܛܥܼܶܢ ܗ̱ܘܳܐ ܓܰܪ̈ܡܶܐ ܒܗܰܝܡܳܢܽܘܬܳܐ ܐܰܝܟ ܝܽܘܬܪܳܢܳܐ ܘܶܐܢ ܗܽܘ ܕܰܢܒܺܝܳܐ ܪܰܒܳܐ ܗܰܝܡܶܢ ܕܺܐܝܬ ܗ̱ܽܘ ܒܓܰܪ̈ܡܶܐ ܥܽܘܕܪܳܢܳܐ ܫܰܦܺܝܪ ܗܰܝܡܶܢ ܬܰܓܳܪܳܐ ܘܫܰܦܺܝܪ ܫܡܶܗ ܬܰܓܳܪܳܐ ܗܳܢ ܬܰܓܳܪܳܐ ܐܶܬܬܰܓܰܪ ܘܺܝܪܶܒ ܘܰܐܡܠܶܟ ܣܺܝܡܬܶܗ ܣܰܓܺܝ ܡܶܣܟܺܢܬܳܢܝ̱ ܣܺܝܡܬܶܗ ܒܽܐܘܪܳܗܝ ܐܶܬܦܰܬܚܰܬ ܘܰܐܥܬܰܪܬܶܗ ܠܟܶܪܟܳܐ ܪܰܒܳܐ ܒܥܽܘܕܪ̈ܳܢܶܐ

4 ܒܗܳܕܶܐ ܣܺܝܡܰܬ ܓ̈ܰܙܶܐ ܬܶܗܪܰܬ ܙܥܽܘܪܳܐ ܗ̱ܘܳܐ ܓܶܝܪ ܓܰܙܳܗ̇ ܠܽܘܩܕܰܡ ܘܰܟܡܳܐ ܕܠܳܐ ܐ̱ܢܳܫ ܫܩܰܠ ܗ̱ܘܳܐ ܡܶܢܳܗ̇ ܡܶܣܟܺܝܢ ܗ̱ܘܳܐ ܕܢܶܒܥܶܐ ܕܥܽܘܬܪܳܗ̇ ܟܰܕ ܕܶܝܢ ܟܰܪܟܽܘܗ̇ ܣܰܓ̈ܺܝܐܶܐ ܘܰܒܙܽܘܗ̇ ܘܰܚܛܰܦܘ̱ ܝܽܘܬܪ̈ܳܢܶܝܗ̇ ܟܡܳܐ ܕܡܶܬܒܰܙܙܳܐ ܟܶܢ ܝܰܬܺܝܪ ܣܳܓܶܐ ܥܽܘܬܪܳܗ̇ ܕܡܰܒܽܘܥܳܐ ܚܒܺܝܫܳܐ ܐܶܢ ܗܽܘ ܕܗܶܡܰܣ ܒܶܗ ܟܶܢ ܗܽܘ ܝܰܬܺܝܪ ܡܶܬܬܪܰܥ ܪܰܒܳܐ ܐܳܦ ܪܳܕܶܐ ܘܡܶܫ̇ܰܬܦܰܥ

5 ܀܀܀ ܓܰܠܝܳܐ ܗ̱ܝ ܗܳܕܶܐ ܕܳܐܦ ܐܶܠܺܝܫܰܥ ܡܰܒܽܘܥܳܐ ܗ̱ܘܳܐ ܒܥܰܡܳܐ ܨܰܗܝܳܐ ܘܡܶܛܽܠ ܕܰܨܗ̈ܰܝܳܐ ܠܳܐ ܗܰܡܶܣܘ̱ ܗ̱ܘܰܘ ܒܶܗ ܠܳܐ ܣܶܓܝܰܬ ܗܘܳܬ ܡܰܪܕܺܝܬܶܗ ܟܰܕ ܕܶܝܢ ܗܳܡܶܣ ܒܶܗ ܢܶܥܡܳܢ ܐܰܫܦܰܥ ܘܶܐܫܰܕ ܚܽܘܠܡܳܢܳܐ ܡܰܒܽܘܥܳܐ ܠܓܰܘ ܡܰܒܽܘܥܳܐ ܫܰܩܠܶܗ ܘܰܫܕܳܝܗ̱ܝ ܕܰܒܢܰܗܪܳܐ ܠܓܰܪܒܶܐ ܕܰܟܺܝ ܝܶܫܽܘܥ ܝܰܡܳܐ ܕܥܽܘܕܪ̈ܳܢܶܐ ܠܫܺܝܠܽܘܚܳܐ ܫܰܠܚܶܗ ܠܣܰܡܝܳܐ ܕܶܐܬܦܰܬܰܚ

6 ܓܶܚܙܺܝ ܒܚܽܘܛܪܳܐ ܡܰܚܶܐ ܡܺܝ̈ܬܶܐ ܠܳܐ ܐܶܫܟܰܚ ܗ̱ܘܳܐ ܛܰܠܝܳܐ ܕܰܢܩܺܝܡ ܘܰܐܝܟܰܢ ܒܙܳܟܽܘܪܳܐ ܣܠܶܩ ܢܰܨܺܝܚܳܐ ܚܢܰܢ ܗܽܘ ܒܫܳܐܽܘܠ ܒܰܙܰܚܢܰܢ ܕܰܚܠܳܦ ܚܰܕ ܫܺܐܕܳܐ ܕܫܰܐܶܠ ܬܪ̈ܶܝܢ ܫܺܐܕ̈ܺܝܢ ܣܠܶܩܘ̱ ܒܰܙܰܚܘ̱ ܒܶܗ ܒܓܰܪ̈ܡܰܘܗ̱ܝ ܕܶܐܠܺܝܫܰܥ ܐܺܝܠܰܦ ܐܳܦ ܕܰܫܡܳܘܐܶܝܠ ܕܶܐܢ ܓܰܪ̈ܡܶܐ ܠܡܺܝܬܳܐ ܐܰܚܝܰܘ ܠܳܐ ܡܨܶܐ ܙܟܽܘܪܳܐ ܡܺܝܬܳܐ ܠܓܰܪ̈ܡܶܐ ܚܰܝ̈ܶܐ ܘܩܰܕܺܝ̈ܫܶܐ ܠܡܰܣܰܩܘ̱

7 ܘܰܟܡܳܐ ܒܥܺܝܬܳܗ̇ ܠܗܳܕܶܐ ܒܥܳܬܳܐ ܘܠܳܐ ܝܰܗܒܳܗ̇ ܠܺܝ ܗܰܘ ܝܰܗ̱ܒ ܟܽܘܠ ܕܶܐܠܽܘ ܡܶܬܬܙܺܝܥܺܝܢ ܗ̱ܘܰܘ ܫܺܐܕ̈ܶܐ ܡܶܢ ܓܰܪ̈ܡܶܐ ܕܓܰܒܪܳܐ ܟܽܘܡܪܳܐ ܐܰܘ ܕܰܡܓܽܘܫܶܐ ܘܚܰܪܫܳܐ ܕܟܰܠܕܳܝܳܐ ܘܰܕܩܳܨܽܘܡܳܐ ܐܳܦ ܐܶܢܳܐ ܝܳܕܰܥ ܗܘܺܝܬ ܕܰܕܒܶܙܚܳܐ ܗܘܳܬ ܒܰܬܪ̈ܶܝܢ ܓܰܒܺܝ̈ܢ ܡܰܛܥܳܐ ܗܘܺܝܬ ܕܰܐܘ ܠܰܫܠܺܝܚ̈ܶܐ ܡܕܰܓܶܠ ܗܘܺܝܬ ܐܰܘ ܠܰܫܠܺܝ̈ܚܰܝ ܒܰܫܠܺܝ̈ܚܶܐ ܡܕܰܡܶܐ ܗܘܺܝܬ ܀܀܀

8 ܓܰܒ̈ܶܐ ܕܫܺܐܕ̈ܶܐ ܗܳܐ ܡܶܣܬܰܪܩܺܝܢ ܓܰܒ̈ܶܐ ܕܕܰܝ̈ܘܶܐ ܢܶܓܕ̈ܶܐ ܛܥܺܝܢܺܝܢ ܟܰܕ ܠܰܝܬ ܕܰܡܪܰܝܰܡ ܫܰܒܛܳܐ ܓܰܠܝܳܐܺܝܬ ܫܺܐܕ̈ܶܐ ܓܳܥܶܝܢ ܡܶܢ ܟܺܐܒ̈ܶܐ ܟܰܕ ܠܰܝܬ ܕܶܐܣܰܪ ܘܕܰܦܟܰܪ ܪ̈ܽܘܚܶܐ ܬܰܠܝܳܢ ܘܰܦܟܺܝܪ̈ܳܢ ܗܳܢܰܘ ܕܺܝܢܳܐ ܒܗܺܝܠܳܐ ܕܰܡܢܳܚ ܘܫܳܠܳܐ ܕܳܐܦܠܳܐ ܒܫܽܘܐܳܠܳܐ ܥܡܰܠ ܚܰܕ ܚܰܝܠܳܐ ܕܰܠܟܳܐ ܣܳܦܶܩ ܗܳܐ ܫܪܳܐ ܒܓܰܪ̈ܡܰܘܗ̱ܝ ܕܰܐܠܺܝܫܰܥ ܬܰܢܺܝܢܳܐ

9 ܕܺܝܢܳܐ ܝܰܗ̱ܒ ܠܰܬܪܥܶܣܰܪܬܶܗ ܐܰܝܟ ܕܰܢܕܽܘܢܽܘܢ ܬܪ̈ܶܥܣܰܪ ܫܰܒ̈ܛܺܝܢ ܘܶܐܢܗܼܽܘ ܕܠܰܒ̈ܢܰܝ ܐܰܒܪܳܗܳܡ ܪܰܒܳܐ ܥܬܺܝܕܺܝܢ ܫܠܺܝ̈ܚܶܐ ܕܰܢܕܽܘܢܽܘܢ ܠܳܐ ܗ̱ܘܳܐ ܟܺܝܬ ܪܰܒܳܐ ܗܳܕܶܐ ܕܰܠܫܺܐܕ̈ܶܐ ܢܕܽܘܢܽܘܢ ܗܳܫܳܐ ܘܶܐܠܳܐ ܡܰܫܪܶܝܢ ܙܳܩ̈ܽܘܦܶܐ ܠܕܰܝܢܼܳܐ ܕܰܥܬܺܝܕ ܒܕܺܝܢܰܢ ܕܺܝܠܰܢ ܢܶܬܒܰܩܽܘܢ ܕܒܺܝܫ ܡܶܢܰܢ ܗܳܘܶܝܢ ܩܳܥܶܝܢ ܩܕܳܡ ܫܠܺܝܚ̈ܶܐ ܕܰܝܳܢ̈ܶܐ ܕܫܰܪ̈ܒܳܬܳܐ

10 ܕܰܐܒܳܐ ܗ̱ܘܳܐ ܓܶܝܪ ܫܠܺܝܚܳܐ ܫܳܐܽܘܠ ܘܒܰܕܡܳܐ ܕܥܶܪ̈ܒܶܐ ܐܶܢܳܐ ܪܰܒܺܝܬܶܗ ܘܰܥܫܶܢ ܘܰܗܘܳܐ ܕܰܐܒܳܐ ܝܺܚܺܝܕܳܐ ܨܶܝܕ ܕܪܰܡܣܽܘܩ ܕܶܝܢ ܡܶܢ ܫܶܠܝܳܐ ܕܰܐܒܳܐ ܠܥܶܪܒܳܐ ܐܶܫܬܰܚܠܰܦ ܗܽܘ ܐܶܡܼܰܪ ܗ̱ܘܳܐ ܕܰܠܡܰܠܰܐܟ̈ܶܐ ܥܬܺܝܕܺܝܢ ܫܠܺܝܚ̈ܶܐ ܕܰܢܕܽܘܢܽܘܢ ܒܡܰܠܰܐܟ̈ܶܐ ܓܶܝܪ ܟܰܢܺܝ ܠܟܳܗ̈ܢܶܐ ܐܰܝܟ ܕܰܟܬܺܝܒ ܘܶܐܢ ܗܽܘ ܕܗܳܟܰܢ ܫܰܠܺܝܛܺܝܢ ܘܳܝ ܠܫܺܐܕ̈ܶܐ ܡܶܢ ܢܶܓܕ̈ܶܐ ܕܓܰܪ̈ܡܰܝܗܽܘܢ