Nisibis 44

https://syriaccorpus.org/298

section : section

line : line

44 Nisibis XLIV

ܒ ܒܰܪ ܩܳܠܶܗ

1 ܛܳܒܳܐ ܓܒܼܰܠ ܦܰܓܪܳܐ ܕܢܰܠܶܦ ܠܛܳܥܰܝ̈ܳܐ ܟܡܳܐ ܪܰܒ ܥܒܳܕ ܐܺܝ̈ܕܰܘܗ̱ܝ ܘܰܠܥܳܠܡܺܝܢ ܩܰܝܳܡ ܟܺܐܢܳܐ ܢܦܼܰܚ ܢܰܦܫܳܐ ܕܢܰܠܶܦ ܟܡܳܐ ܪܰܒܳܐ ܡܶܢ ܗܳܝ ܕܚܰܝ̈ܘܳܬܳܐ ܕܠܳܐ ܢܦܼܰܚ ܗܳܝ ܓܶܝܪ ܕܠܳܐ ܢܦܺܝܚܳܐ ܦܽܘܡܳܗ̇ ܫܠܶܐ ܘܰܚܼܪܰܫ ܘܗܳܕܶܐ ܕܰܢܦܰܚ ܦܽܘܡܶܗ ܦܽܘܡܳܗ̇ ܐܳܦ ܡܰܠܳܠܰܐ ܗ̱ܘ ܥܽܘܢܺܝܬܳܐ: ܢܰܦܫܳܐ ܘܦܰܓܪܳܐ ܡܳܪܝ̱ ܢܶܚܕܽܘܢ ܒܢܽܘܚܳܡܳܟ

2 ܬܩܽܘܠܳܝܗ̱ܝ ܠܒܰܪܢܳܫܳܐ ܥܰܡܗܶܝܢ ܕܚܰܝ̈ܘܳܬܳܐ ܒܟ̈ܰܦܶܐ ܕܒܽܘܝܳܢܳܐ ܘܰܚܙܳܝܘܗ̱ܝ ܒܪܶܥܝܳܢܳܐ ܕܰܐܝܟܰܢ ܕܗܼܺܝ ܒܥܺܝܪܳܐ ܡܢܳܬܳܐ ܗ̱ܝ ܕܚܽܘܒܳܠܳܐ ܘܥܳܒܽܘܪܬܳܐ ܗ̱ܝ ܟܽܠܳܗ̇ ܒܟܽܠ ܐܶܣܟܺܝܡ ܗܳܟܰܢ ܐܳܦ ܐ̱ܢܳܫܽܘܬܳܐ ܣܺܝܡܬܳܐ ܗ̱ܝ ܕܢܽܘܛܪܳܐ ܟܽܠܳܗ̇ ܒܢܽܘܚܳܡܳܐ ܡܢܳܬܳܐ ܗ̱ܝ ܕܚܰܝܽܘܬܳܐ ܀܀܀

3 ܚܽܘܪ ܬܽܘܒ ܒܪܽܘܟܳܒܳܐ ܕܺܝܠܗܶܝܢ ܕܚܰܝ̈ܘܳܬܳܐ ܘܰܚܙܳܝ ܕܫܰܠܶܡ ܗ̱ܽܘ ܠܝܳܬܶܗ ܒܟܽܠܡܶܕܶܡ ܟܽܠܶܗ ܫܘܶܐ ܒܗܳܕܶܐ ܕܟܽܠܶܗ ܕܠܳܐ ܣܰܒܪܰܐ ܗ̱ܘ ܕܢܰܟܶܣ ܠܛܳܥܰܝ̈ܳܐ ܕܦܰܠܓܽܘܗ̱ܝ ܟܝܳܢܶܗ ܕܒܰܪܢܳܫܳܐ ܕܟܰܕ ܗ̱ܽܘ ܫܘܶܐ ܣܳܡܽܘܗ̱ܝ ܦܰܠܓܶܗ ܬܚܶܝܬ ܣܰܒܪܳܐ ܘܦܰܠܓܶܗ ܕܠܳܐ ܣܰܒܪܳܐ

4 ܣܳܗܕܳܐ ܠܦܽܘܪܥܳܢܰܢ ܒܥܺܝܪܳܐ ܕܡܶܬܛܰܠܡܳܐ ܕܥܰܡܠܳܗ̇ ܕܠܳܐ ܣܰܒܪܰܐ ܗ̱ܘ ܘܪܶܗܛܳܗ̇ ܕܠܳܐ ܐܰܓܪܳܐ ܘܚܰܫܶܗ ܕܠܳܐ ܡܽܘܠܟܳܢ ܘܟܽܠܳܗ̇ ܕܠܳܐ ܢܽܘܚܳܡ ܕܢܰܠܶܦ ܠܒܰܪܢܳܫܳܐ ܕܬܶܛܦܺܝܣ ܕܰܬܪ̈ܶܝܢ ܒܚܰܕ ܢܺܝܪܳܐ ܪܶܗܛܗܽܘܢ ܕܟܽܘܠܳܠܰܐ ܗ̱ܘ ܥܰܡܠܗܽܘܢ ܕܡܽܘܠܟܳܢܰܐ ܗ̱ܘ ܘܚܰܫܗܽܘܢ ܕܢܰܨܺܝܚܰܐ ܗ̱ܘ

5 ܗܳܐ ܕܶܝܢ ܬܪ̈ܶܝܢ ܫܰܪ̈ܒܺܝܢ ܡܶܬܬܰܠܝܳܢ ܒܚܰܠܳܫܳܐ ܕܰܢܦܺܝܣ ܥܰܠ ܪܶܗܛܳܐ ܛܠܺܝܡܳܐ ܕܚ̈ܰܝܘܳܬܳܐ ܘܕܰܢܦܺܝܣ ܥܰܠ ܐܰܓܪܳܐ ܡܠܺܝܟܳܐ ܕܒܰܪܢܳܫܳܐ ܘܕܰܢܦܺܝܣ ܕܠܳܐ ܥܽܘܠ ܒܶܪܝܳܢ ܕܰܡܠܶܟ ܠܒܰܪܢܳܫܳܐ ܀܀܀ ܓܰܢܬܳܐ ܘܓܺܗܰܢܳܐ ܘܰܐܣܓܺܝ ܠܚܰܝ̈ܘܳܬܳܐ ܢܝ̈ܳܚܶܐ ܕܠܳܐ ܚܰܘ̈ܒܶܐ

6 ܚܽܘܪ ܬܽܘܒ ܒܚܰܝ̈ܘܳܬܳܐ ܕܠܳܐ ܐܶܬܐܶܠܶܨ ܘܰܐܘܙܶܦ ܡܶܕܶܡ ܠܰܐܠܳܗܳܐ ܕܢܺܐܡܰܪ ܕܡܶܬܛܰܠܡܳܢ ܦܰܓܪܳܐ ܐܰܠܺܝܨ ܕܰܐܘܙܶܦ ܨܰܘܡܶܗ ܠܟܺܐܢܽܘܬܳܐ ܘܶܐܢ ܠܰܝܬ ܠܶܗ ܢܽܘܚܳܡ ܐܶܬܛܠܶܡ ܘܛܳܒ ܡܶܢ ܕܡܶܗ ܕܗܳܒܶܝܠ ܫܶܬܩܶܗ ܒܓܰܘ ܐܰܪܥܳܐ ܓܳܥܶܐ ܥܰܠ ܓܽܘܥܠܳܢܶܗ ܩܕܳܡܰܘܗ̱ܝ ܕܰܦܪܰܥ ܟܽܠ

7 ܩܳܛܽܘܠ ܚܰܝܽܘܬܳܐ ܘܺܝܠܶܦ ܕܠܳܐ ܐܺܝܬ ܕܩܳܛܶܠ ܠܳܟ ܕܥܳܒܽܘܪܬܳܐ ܗ̱ܝ ܢܰܦܫܳܗ̇ ܥܰܡܶܗ ܕܗܰܘ ܦܰܓܪܳܐ ܘܠܳܐ ܐܺܝܬ ܒܳܗ̇ ܡܶܕܶܡ ܕܐܶܬܳܐ ܠܢܽܘܚܳܡܳܐ ܡܶܠܬܳܐ ܗ̱ܝ ܕܟܽܠ ܚܶܪܝܳܢ ܫܪܳܝܳܐ ܕܰܐܝܟܰܢ ܕܚܰܝ̈ܘܳܬܳܐ ܕܢܰܦܫܗܶܝܢ ܐܰܝܟ ܦܰܓܪ̈ܰܝܗܶܝܢ ܗܳܟܰܢ ܥܬܺܝܕ ܦܰܓܪܰܢ ܕܢܺܚܳܐ ܒܪܳܙ ܢܰܦܫܰܢ

8 ܟܬܳܒ̈ܶܐ ܠܦܳܪ̈ܽܘܫܶܐ ܟܝܳܢܳܐ ܠܟܳܦܽܘܪ̈ܶܐ ܡܰܠܶܦ ܕܥܳܒܽܘܪܳܐ ܡܶܬܢܰܛܰܪ ܡܠܶܐ ܙܰܒܢܳܐ ܘܰܐܝܢܳܐ ܕܠܳܐ ܥܳܒܰܪ ܠܥܳܠܰܡ ܕܢܽܘܛܳܪܰܐ ܗ̱ܘ ܘܰܐܝܢܳܐ ܕܩܳܛܶܠ ܠܶܗ ܡܶܬܩܛܶܠ ܫܪܳܝܶܗ ܡܦܺܝܣ ܕܳܐܦ ܗ̱ܽܘ ܩܰܒܥܶܗ ܠܥܳܠܰܡ ܗܳܘܶܐ ܐܰܬܠܺܝܛ ܒܟܽܠ ܡܶܢ ܟܽܠ ܚܶܘܝܳܐ ܕܰܢܟܶܠ ܘܰܫܪܳܝܗ̱ܝ

9 ܗܳܐ ܓܶܝܪ ܦܳܪܰܚܬܳܐ ܘܢܽܘ̈ܢܶܐ ܘܚܰܝ̈ܘܳܬܳܐ ܒܒܽܘܪܟܬܰܐ ܗ̱ܘ ܡܶܬܢܰܟܣܶܝܢ ܘܒܳܗ̇ ܬܽܘܒ ܡܶܬܐܰܟܠܶܝܢ ܒܳܗ̇ ܡܶܬܚܨܶܕ ܙܰܪܥܳܐ ܒܳܗ̇ ܡܶܬܩܛܶܦ ܦܺܐܪܳܐ ܘܠܳܐ ܡܶܬܠܺܝܛ ܕܢܰܟܼܶܣ ܐܰܘ ܩܼܛܰܦ ܘܶܐܢ ܗܽܘ ܕܚܽܘܒܳܠܰܐ ܗ̱ܘ ܦܰܓܪܶܗ ܕܒܰܪ ܐ̱ܢܳܫܳܐ ܠܡܰܢ ܡܶܬܠܺܝܛ ܐܰܘ ܠܺܝܛ ܚܶܘܝܳܐ ܘܩܳܛܽܘܠܳܐ

10 ܙܰܪܥܳܐ ܕܥܳܦ ܘܰܢܬܰܪ ܦܺܐܪܳܐ ܕܦܰܓ ܘܦܰܟܶܗ ܪܺܝܫܺܝܢ ܠܦܰܠܳܚܳܐ ܕܰܐܘܚܰܪ ܘܠܳܐ ܩܰܛܦܶܗ ܘܠܳܐ ܐܰܫܠܚܶܗ ܘܦܰܪܫܶܗ ܠܙܰܪܥܳܐ ܡܶܢ ܓܰܘ ܬܶܒܢܳܐ ܙܳܕܶܩ ܐܰܝܟ ܡܶܠܰܬܗܽܘܢ ܕܢܶܬܪܫܶܐ ܐܰܝܢܳܐ ܕܠܳܐ ܩܳܛܶܠ ܠܣܳܒܳܐ ܕܦܰܟܶܗ ܛܰܥܡܶܗ ܕܢܶܫܪܳܐ ܡܶܢ ܗܳܝ ܢܰܦܫܳܐ ܐܰܣܽܘܪܶܗ ܕܝܰܩܺܝܪܳܐ

11 ܘܟܽܠܶܗ ܕܡܶܫܬܰܒܩܺܝܢ ܣ̈ܳܒܶܐ ܕܠܳܐ ܚܫܰܚܘ̱ ܀܀܀ ܕܢܺܠܰܦ ܒܗܽܘܢ ܛܳܒܳܐ ܫܪܳܪܳܐ ܠܟܰܕܳܒ̈ܶܐ ܕܟܰܕ ܛܳܒ ܗ̱ܽܘ ܣܰܝܦܳܐ ܠܣܳܒܳܐ ܡܢܺܝܚܳܢܰܐ ܗ̱ܘ ܥܠܰܝܡܳܐ ܕܢܰܥܶܓ ܠܶܗ ܡܶܬܢܰܥܰܓ ܡܚܰܒܶܠ ܠܛܰܠܝܽܘܬܳܐ ܕܚܰܒܠܰܬ ܠܣܰܝܒܽܘܬܳܐ ܕܢܺܠܰܦ ܟܡܳܐ ܚܰܒܺܝܒ ܦܰܓܪܳܐ ܠܓܳܒܽܘܠܶܗ

12 ܣܳܒܳܐ ܕܟܽܠ ܡܽܘ̈ܡܺܝܢ ܡܰܘܒܠܰܐ ܗ̱ܘ ܕܥܳܩ̈ܳܬܳܐ ܠܡܰܘܬܶܗ ܡܣܰܟܶܐ ܟܽܠ ܘܠܳܐ ܐܺܝܬ ܕܩܳܛܶܠ ܠܶܗ ܕܟܰܕ ܛܳܒ ܪܚܺܝܡ ܡܰܘܬܶܗ ܣܰܓܺܝ ܕܚܰܝܶܠ ܩܰܛܠܶܗ ܕܢܺܠܰܦ ܒܫܺܝܛܽܘܬܶܗ ܟܡܳܐ ܫܒܺܝܚ ܘܕܰܟܡܳܐ ܡܝܰܩܰܪ ܗ̱ܘܳܐ ܟܰܕ ܗ̱ܽܘ ܒܦܰܪܕܰܝܣܳܐ ܘܕܰܟܡܳܐ ܗ̱ܝ ܬܶܫܒܽܘܚܬܶܗ ܡܳܐ ܕܩܳܡ ܘܶܐܬܢܰܚܰܡ

How to Cite this Electronic Edition

Note:

Ephrem the Syrian, “Nisibis 44” , Digital Syriac Corpus, last modified June 12, 2019, https://syriaccorpus.org/298.

TEST2

Bibliography:

“Nisibis 44.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/298.

Show Citation Styles

SEDRA IV

Syriac Lexeme

About This Digital Text

Corpus Text ID:

https://syriaccorpus.org/298

NHSL Work ID(s):

http://syriaca.org/work/8777
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).