Nisibis 46

https://syriaccorpus.org/300

TEI/XML Text

Show

section : section

line : line

Table of Contents

1 2 3 4 5 6 7 8 9 10 11 12 13 14 15 16 17

46 Nisibis XLVI

ܕ ܒܰܪ ܩܳܠܶܗ

1 ܢܦܺܝܣܽܘܢ ܒ̈ܢܰܝ ܛܽܘܥܝܰܝ ܕܰܐܝܟܰܢ ܛܰܡܳܐ ܗ̱ܽܘ ܠܶܗ ܦܰܓܪܳܐ ܠܦܳܪܽܘܩܰܢ ܕܰܢܚܶܬ ܫܼܪܳܐ ܒܡܰܪܝܰܡ ܘܝܰܘܡܳܢ ܫܪܶܐ ܒܦܰܓܪܳܐ ܕܢܰܟ̈ܦܶܐ ܘܢܰܟ̈ܦܳܬܳܐ ܡܰܠܟܳܐ ܐܶܢܗܽܘ ܕܰܫܪܳܐ ܒܕܽܘܟܬܳܐ ܡܚܰܪܰܪ ܘܡܰܘܪܶܒ ܠܳܗ̇ ܘܛܳܒܳܐ ܕܰܫܪܳܐ ܒܦܰܓܪܳܐ ܗܳܕܶܐ ܡܠܶܟ ܠܶܗ ܟܰܝ ܕܢܶܗܘܶܐ ܕܠܳܐ ܢܽܘܚܳܡ ܥܽܘܢܺܝܬܳܐ: ܠܳܐ ܢܶܬܛܠܰܡ ܦܰܓܪܳܐ ܩܒܺܝܪܳܐ ܕܗܰܝܡܶܢ ܒܳܟ

2 ܪܳܡܳܐ ܕܶܐܬܰܬܚܬܺܝ ܥܕܰܡܳܐ ܠܘܳܬ ܦܰܓܪܳܐ ܘܰܐܫܺܝܓ ܠܶܗ ܪ̈ܶܓܠܰܘܗ̱ܝ ܘܥܰܩ̈ܒܶܐ ܕܶܐܬܝܰܩܰܪ ܡܰܠܦܳܢ ܟܡܳܐ ܡܰܘܪܶܒ ܠܪܺܝܫܳܐ ܒܢܽܘܚܳܡܳܐ ܛܰܥܢܶܗ ܒܝܰܕ ܫܰܒܪ̈ܶܐ ܘܙܰܝܚܶܗ ܫܰܩܠܶܗ ܘܥܰܠ ܚܰܕܝܶܗ ܚܒܳܒܶܗ ܒܝܽܘܚܰܢܳܢ ܗܳܠܶܝܢ ܠܟܽܘܐܳܪܶܗ ܣܳܦܩ̈ܳܢ ܕܒܰܪ ܕܰܝܨܳܢ

3 ܙܽܘܙܳܐ ܕܰܐܝܟ ܡܺܝܬܳܐ ܕܡܳܐ ܒܨܰܘܪ̈ܳܬܶܗ ܘܡܶܢܳܗ̇ ܚܫܺܝܠ ܕܰܐܪܥܳܐ ܘܒܳܗ̇ ܬܽܘܒ ܢܦܰܠ ܘܶܐܒܰܕ ܛܰܒܥܰܐ ܗ̱ܘ ܕܗܳܐ ܕܡܳܐ ܠܦܰܓܪܳܐ ܕܡܶܢ ܐܰܪܥܳܐ ܘܙܳܕܶܩ ܕܰܐܝܟ ܐ̱ܪܳܙܳܗ̇ ܕܦܶܠܳܐܬܳܐ ܕܰܒܫܶܟܚܳܬܶܗ ܕܦܰܓܪܳܐ ܢܶܚܕܶܐ ܠܛܰܝܒܽܘܬܳܐ ܕܥܶܡܠܰܬ ܘܶܐܫܟܰܚܬܶܗ ܀܀܀ ܒܐ̱ܪܳܙ ܐܰܢ̱ܬܬܳܐ ܠܙܽܘܙܳܐ

4 ܠܡܶܢܝܳܗ̇ ܘܫܳܡܽܘܢܳܗ̇ ܐܰܘܪܒܶܗ ܕܰܐܪܡܰܠܬܳܐ ܗ̱ܘܳܐ ܠܳܗ̇ ܐܳܦ ܚܰܙܳܝܳܐ ܣܳܗܕܳܐ ܘܥܶܪܒܳܐ ܘܚܰܘܺܝ ܕܒܶܝܬ ܓܰܙܳܐ ܩܰܒܠܶܗ ܠܪܽܘܡܝܳܢܳܗ̇ ܝܺܠܰܦ ܒܫܳܡܽܘܢܳܐ ܕܠܳܐ ܛܠܶܡ ܕܰܐܝܟܰܢ ܡܨܶܐ ܛܳܠܶܡ ܠܦܰܓܪܳܐ ܕܶܐܬܬܰܓܰܪ ܟܰܟܪ̈ܶܐ ܕܝܽܘܬܪܳܢܳܐ ܒܣܰܝܦܳܐ ܕܪ̈ܳܕܽܘܦܶܐ

5 ܨܰܠܡܳܐ ܕܠܳܐ ܪ̈ܶܓܫܶܐ ܘܛܰܒܥܳܐ ܕܠܳܐ ܙܰܘ̈ܥܶܐ ܐܶܣܬܪܳܐ ܠܬܶܫܒܽܘܚܬܶܗ ܐܰܣܩܳܗ̇ ܒܦܽܘܡ ܢܽܘܢܳܐ ܟܡܳܐ ܟܺܝܬ ܡܶܫܬܰܒܰܚ ܒܨܰܠܡܶܗ ܕܡܰܠܳܠܐܰ ܗ̱ܘ ܦܩܰܕ ܠܒܳܠܽܘܥܶܗ ܒܚܰܪܬܳܐ ܘܒܰܕܡܽܘܬ ܐܶܣܬܪܳܐ ܡܰܦܢܶܐ ܘܝܳܗܶܒ ܠܶܗ ܠܨܽܘܪܬܳܐ ܕܶܐܬܛܰܒܥܰܬ ܒܕܽܘܡܝܶܗ ܕܨܰܝܳܪܳܗ̇

6 ܛܳܒܳܐ ܕܡܰܘܡܳܬܶܗ ܐܰܦܺܝܣܬ ܕܠܳܐ ܛܳܠܶܡ ܟܣܶܐ ܕܩܰܪ̈ܺܝܪܶܐ ܕܡܶܛܽܠ ܫܡܶܗ ܝܰܗܒܽܘܗ̱ܝ ܐܰܝܟܰܢ ܡܨܶܐ ܛܳܠܶܡ ܠܦܰܓܪܳܐ ܒܬܽܘܠܽܘܬܶܗ ܀܀܀ ܕܢܰܦܶܠ ܒܺܐܝܓܽܘܢܳܐ ܡܳܐܐ ܫ̈ܢܺܝܢ ܕܳܐܦ ܠܳܐ ܒܓܰܘ ܚܶܠܡܳܐ ܐܰܪܦܝܶܗ ܒܥܶܠܕܰܪܶܗ ܡܰܢܽܘ ܕܠܳܐ ܢܰܒܓܰܢ ܐܶܢ ܡܶܬܛܰܠܰܡ ܗܳܢܳܐ

7 ܬܠܳܬܳܐ ܠܗܳܝ ܢܽܘܪܳܐ ܙܟܰܐܽܘܗ̇ ܒܚܰܕ ܝܰܘܡܳܐ ܘܗܳܢܳܐ ܙܟܼܳܐ ܟܽܠܝܽܘܡ ܢܽܘܪܳܐ ܕܫܳܪܝܳܐ ܒܶܗ ܕܥܰܕ ܕܳܥܟܳܐ ܕܶܠܩܰܬ ܘܥܰܕ ܫܰܗܝܳܐ ܣܶܦܰܬ ܛܽܘܒܰܘܗ̱ܝ ܠܡܰܢ ܕܰܨܗܺܝ ܘܕܰܥܟܳܗ̇ ܢܽܘܪܳܐ ܐܶܢ ܗܽܘ ܕܣܶܦܰܬ ܡܶܬܕܰܥܟܳܐ ܒܡܰܝ̈ܳܐ ܘܗܳܕܶܐ ܐܶܢ ܗܽܘ ܕܕܶܥܟܰܬ ܡܶܬܓܰܘܙܠܳܐ ܒܚܰܡܪܳܐ

8 ܐܶܢ ܕܶܝܢ ܒܛܺܝܠܽܘܬܶܗ ܕܡܳܪܰܢ ܡܦܺܝܣܳܐ ܠܰܢ ܕܰܐܣܝܶܗ ܠܒܰܪܢܳܫܳܐ ܠܟܽܠܶܗ ܒܟܽܠ ܡܶܕܶܡ ܐܰܥܡܕܶܗ ܒܪܽܘܚ ܩܽܘܕܫܳܐ ܬܰܪܣܝܶܗ ܒܣܰܡ ܚ̈ܰܝܶܐ ܟܡܳܐ ܟܰܝ ܣܢܳܐ ܡܰܐܢܺܝ ܘܡܰܪܩܝܽܘܢ ܘܰܥܘܺܝܪ ܒܰܪ ܕܰܝܨܳܢ ܕܩܳܪܶܝܢ ܘܠܳܐ ܚܳܙܶܝܢ ܕܟܽܠܶܗ ܨܠܰܡ ܐ̱ܢܳܫܳܐ ܡܶܬܩܰܒܰܥ ܒܢܽܘܚܳܡܳܐ

9 ܐܶܢ ܓܶܝܪ ܐܳܦ ܐܶܕܢܳܐ ܕܫܶܡܥܽܘܢ ܦܣܰܩ ܘܰܫܕܳܐ ܪܳܡܳܐ ܪܟܶܢ ܫܰܩܠܳܗ̇ ܘܩܰܒܥܳܗ̇ ܕܠܳܐ ܬܺܐܒܰܕ ܟܡܳܐ ܟܺܝܬ ܥܰܠ ܟܽܠܶܗ ܡܥܰܩܶܒ ܒܢܽܘܚܳܡܳܐ ܕܡܶܕܶܡ ܡܶܢ ܥܰܦܪܶܗ ܠܳܐ ܢܦܽܘܫ ܐܳܦ ܠܳܐ ܒܰܐܬܽܘܢܳܐ ܛܥܳܬ ܡܢܳܬܳܐ ܕܪܺܝܫܳܐ ܕܢܰܘܕܰܥ ܒܛܺܝܠܽܘܬܳܐ ܕܥܳܒܶܕ ܒܢܽܘܚܳܡܳܐ

10 ܐܶܢ ܕܶܝܢ ܥܰܠ ܠܰܚܡܳܐ ܦܩܰܕ ܗ̱ܘܳܐ ܘܶܐܬܠܰܩܰܛ ܩܨܶܝ̈ܘܗ̱ܝ ܘܫܰܪ̈ܟܳܢܰܘܗ̱ܝ ܚܰܦܶܛ ܘܶܐܬܟܰܢܰܫܘ̱ ܘܙܰܗܰܪ ܕܠܳܐ ܢܺܐܒܰܕ ܡܶܢ ܒܽܘܪܟܬܶܗ ܡܶܕܶܡ ܟܡܳܐ ܟܺܝܬ ܥܰܠ ܦܰܓܪܳܐ ܦܩܺܝܕ ܠܶܗ ܕܢܶܬܟܰܢܫܽܘܢ ܓܰܪ̈ܡܰܘܗ̱ܝ ܘܢܶܬܠܰܚܡܽܘܢ ܕܶܒ̈ܩܰܘܗ̱ܝ ܘܰܢܡܰܠܠܽܘܢ ܩ̈ܳܠܰܘܗ̱ܝ ܫܽܘܒܚܳܐ ܕܰܡܩܺܝܡܳܢܶܗ

11 ܠܰܚܡܶܗ ܕܠܳܐ ܚܪܺܝܢ ܣܳܗܶܕ ܠܢܽܘܚܳܡܰܢ ܕܒܰܪܳܟ ܠܡܶܐܟܽܘܠܬܳܐ ܟܡܳܐ ܟܺܝܬ ܠܐܳܟܽܘ̈ܠܶܐ ܒܰܬܪ̈ܶܥܣܰܪ ܠܰܚܡܺܝ̈ܢ ܕܰܒܪܺܝܟ ܘܰܐܣܓܺܝ ܗ̱ܘܳܐ ܒܰܪܶܟ ܬܪ̈ܰܥܣܰܪܬܶܗ ܘܰܐܣܓܝܳܗ̇ ܘܰܫܩܰܠ ܩܨܳܐ ܠܰܚܡܳܐ ܐ̱ܚܪܺܢܳܐ ܐܺܝܚܺܝܕܳܝܳܐ ܐ̱ܪܳܙܳܐ ܕܗܰܘ ܦܰܓܪܳܐ ܝܺܚܺܝܕܳܐ ܕܡܶܢ ܡܰܪܝܰܡ ܀܀܀

12 ܚܕܺܝ ܠܰܐܪܡܰܠܬܳܐ ܕܰܐܚܺܝ ܠܚܰܒܺܝܒܶܗ̇ ܘܰܐܝܟ ܕܳܐܡܪܺܝܢ ܣ̈ܰܟܠܶܐ ܕܦܰܓܪܰܐ ܗ̱ܘ ܕܡܶܢ ܒܺܝܫܳܐ ܠܒܺܝܫܰܐ ܗ̱ܘ ܟܺܝܬ ܐܰܚܺܝ ܘܚܰܕܺܝ ܠܣܳܛܳܢܳܐ ܠܒܰܪܬܶܗ ܕܝܽܘܳܐܪܳܫ ܬܽܘܒ ܕܰܐܚܝܶܗ̇ ܚܛܺܝܬܳܐ ܗܽܘ ܢܰܚܶܡ ܒܳܗ̇ ܘܕܶܐܡܰܪ ܕܕܰܡܟܳܐ ܗ̱ܘܳܬ ܐܰܟܶܣ ܠܟܳܦܽܘܪ̈ܶܐ ܕܬܽܘܒ ܡܶܬܬܥܺܝܪ ܦܰܓܪܰܢ

13 ܟܰܕ ܓܶܝܪ ܢܦܰܠ ܝܰܘܢܳܢ ܘܰܛܒܰܥ ܒܓܰܘ ܝܰܡܳܐ ܣܦܺܝ̈ܢܶܐ ܘܣ̈ܳܦܢܶܐ ܟܽܠܗܽܘܢ ܦܣܰܩܘ̱ ܣܰܒܪܳܐ ܕܰܐܝܢܰܘ ܚܰܣܺܝܢܳܐ ܕܢܺܐܡܰܪ ܕܰܣܠܶܩ ܗ̱ܘܳܐ ܘܰܐܝܢܰܘ ܚܰܟܺܝܡܳܐ ܕܢܶܬܚܪܶܐ ܥ̈ܳܛܠܳܢ ܘܥܳܣ̈ܩܳܢ ܗܘܰܝ ܘܰܠܚܰܕ ܕܰܠܝ̈ܠܳܢ ܗܘܰܝ ܠܝܰܡܳܐ ܪܡܶܙ ܘܰܫܠܺܝ ܠܢܽܘܢܳܐ ܦܩܰܕ ܘܰܓܣܳܐ

14 ܙܰܪܥܳܐ ܒܓܰܘ ܥܰܦܪܶܗ ܣܳܗܕܰܐ ܗ̱ܘ ܕܢܽܘܚܳܡܶܗ ܕܳܐܦ ܒܳܗ̇ ܒܡܺܝܬܽܘܬܶܗ ܢܽܘܚܳܡܬܶܗ ܡܰܟܪܶܙ ܘܰܩܝܳܡܬܶܗ ܟܰܣܝܳܐ ܒܓܰܘܳܗ̇ ܕܡܰܦܽܘܠܬܶܗ ܒܡܶܛܪܰܐ ܗ̱ܘ ܡܶܬܢܰܚܰܡ ܘܡܶܬܥܺܝܪ ܟܡܳܐ ܟܺܝܬ ܒܢܽܘܚܳܡܳܐ ܀܀܀ ܢܶܬܪܣܶܣ ܒܕܰܚܺܝܚܳܢ ܛܰܠܳܐ ܕܒܶܗ ܐܳܕܳܡ ܐܶܬܓܒܰܠ ܘܶܐܬܢܰܚܰܡ

15 ܐܶܢ ܕܶܝܢ ܐܳܦ ܩܰܡܨܳܐ ܕܶܐܬܢܰܨܰܒ ܒܓܰܘ ܐܰܪܥܳܐ ܘܰܐܝܟ ܕܥܰܠ ܦܣܳܩ ܣܰܒܪܳܐ ܐܶܬܛܡܰܪ ܒܓܰܘ ܥܰܦܪܳܐ ܥܽܘ̈ܒܶܐ ܒܐ̱ܪܳܙ ܩܰܒܪ̈ܶܐ ܡܠܳܐ ܗ̱ܘܳܐ ܘܰܐܪܦܺܝ ܗ̱ܘܳܐ ܒܗܼܶܬܘ̱ ܕܶܝܢ ܟܳܦܽܘܪ̈ܶܐ ܕܠܳܐ ܕܡܘ ܐܳܦ ܠܳܐ ܠܗܰܘ ܩܰܡܨܳܐ ܕܚܰܦܺܝ ܛܡܰܪ ܝܰܠܕܶܗ ܘܶܐܬܩܒܰܪ ܘܶܐܬܢܰܚܰܡ ܠܙܰܒܢܶܗ ܒܦܽܘܩܕܳܢܳܐ

16 ܘܶܐܢ ܨܰܦܪܳܐ ܒ̈ܢܳܬܳܗ̇ ܫ̈ܠܰܕܶܐ ܕܠܳܐ ܙܰܘܥܳܐ ܡܟܰܢܶܫ ܠܗܶܝܢ ܚܰܘܒܶܗ̇ ܡܚܰܒܶܒ ܠܗܶܝܢ ܓܶܦܳܗ̇ ܘܩܳܠܳܐ ܘܚܰܝܽܘܬܳܐ ܛܰܒܥܳܐ ܒܡܺܝܬܽܘܬܳܗ̇ ܘܡܶܨܛܰܒܬܶܝܢ ܡܰܝ̈ܳܐ ܒܟܽܠ ܕܶܡܘ̱ ܘܰܡܢܰܚܡܳܐ ܩܒܺܝܪ̈ܶܐ ܡܶܢ ܓܰܘ ܫܰܪ̈ܩܳܬܳܐ ܟܡܳܐ ܢܶܨܛܰܪܽܘܢ ܩܰܒܪ̈ܶܐ ܒܩܳܠܳܐ ܡܢܰܚܶܡ ܟܽܠ

17 ܡܶܢܶܗ ܘܒܶܗ ܗܳܟܺܝܠ ܕܙܰܪܥܳܐ ܕܐ̱ܢܳܫܽܘܬܳܐ ܡܨܶܐ ܐ̱ܢܳܫ ܕܢܶܣܰܒ ܠܶܗ ܕܡܰܘܬܳܐ ܕܢܽܘܚܳܡܶܗ ܕܳܐܦ ܗܽܘ ܒܐ̱ܪܳܙ ܡܺܝ̈ܬܶܐ ܡܶܬܢܰܛܰܪ ܒܓܰܘ ܟܰܪܣܳܐ ܒܰܚ̈ܒܳܠܰܐ ܗ̱ܘ ܡܶܬܢܰܚܰܡ ܘܡܶܬܥܺܝܪ ܘܰܢܦܰܩ ܠܢܰܗܺܝܪܳܐ ܠܓܰܘ ܥܳܠܡܳܐ ܐ̱ܚܪܺܢܳܐ ܒܰܛܢܶܗ ܘܡܰܘܠܳܕܶܗ ܥܳܪܒܺܝܢ ܒܢܽܘܚܳܡܶܗ

SEDRA IV

Syriac Lexeme

About This Digital Text

Corpus Text ID:

https://syriaccorpus.org/300

NHSL Work ID(s):

http://syriaca.org/work/8779
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).