Nisibis 47

https://syriaccorpus.org/301

TEI/XML Text

Show

section : section

line : line

Table of Contents

1 2 3 4 5 6 7 8 9 10 11 12 13 14

47 Nisibis XLVII

ܗ ܒܰܪ ܩܳܠܶܗ

1 ܢܽܘܪܳܐ ܒܓܰܘ ܩܰܝܣܳܐ ܛܡܺܝܪܳܐ ܘܛܰܪܢܳܐ ܡܚܶܐ ܘܡܰܕܢܰܚ ܠܳܗ̇ ܡܰܕܥܰܢ ܒܨ̈ܶܢܥܳܬܶܗ ܘܶܐܢܗܽܘ ܕܨܶܒܝܳܢܰܢ ܡܢܰܚܶܡ ܠܒܶܪ̈ܝܳܬܳܐ ܟܡܳܐ ܟܺܝܬ ܨܶܒܝܳܢܳܐ ܕܟܽܠ ܡܨܶܐ ܦܩܰܕ ܘܡܰܕܢܰܚ ܠܳܗ̇ ܠܢܰܦܫܳܐ ܒܓܰܘ ܦܰܓܪܳܐ ܕܢܶܦܩܰܬ ܘܰܫܒܰܩܬܶܗ ܬܽܘܒ ܡܰܢܗܪܳܐ ܒܓܰܘܶܗ ܥܽܘܢܺܝܬܳܐ: ܦܰܓܪܳܐ ܘܢܰܦܫܳܐ ܡܳܪܝ̱ ܢܙܰܡܪܽܘܢ ܒܦܰܪܕܰܝܣܳܟ

2 ܬܳܒܰܥ ܡܳܪܝ̱ ܛܠܺܝܡܽܘܬܶܗ ܕܒܰܝܬܳܐ ܕܥܶܡܪܶܬ ܒܶܗ ܬܰܘܬܳܒܬܳܐ ܢܰܦܫܳܐ ܕܗܳܢܰܘ ܐܰܓܰܪ ܒܰܝܬܳܐ ܝܶܗܒܰܬ ܒܡܰܦܩܳܬܳܗ̇ ܣܶܚܦܰܬ ܘܰܐܚܪܶܒܬܶܗ ܬܶܥܽܘܠ ܘܬܶܥܡܰܪ ܒܶܗ ܀܀܀ ܡܶܕܪܺܝܫ ܬܗܰܝܠܶܠ ܒܓܰܘ ܕܰܝܪܶܗ ܘܬܶܙܡܰܪ ܒܡܶܕܝܳܪ̈ܰܘܗ̱ܝ ܘܬܽܘܒ ܢܶܫܬܡܰܥ ܨܰܘܬܳܗ̇ ܡܶܢ ܡܰܫܟܢܳܐ ܕܰܨܕܳܐ

3 ܡܢܳܬܳܐ ܕܚܰܝܽܘܬܳܐ ܕܝܳܠܳܐ ܒܗܰܕܳܡ̈ܰܘܗ̱ܝ ܙܰܘ̈ܥܶܐ ܕܚܽܘܫ̈ܳܒܶܝܗ̇ ܕܰܝܠܶܝܢ ܒܓܰܘ ܪ̈ܶܓܫܰܘܗ̱ܝ ܓ̈ܰܙܶܐ ܕܒܣܰܡ̈ܳܢܶܝܗ̇ ܦܳܝܚܺܝܢ ܒܫܶܪ̈ܝܳܢܰܘܗ̱ܝ ܘܰܗܦܰܟ ܡܳܐ ܕܺܝܙܶܦ ܕܢܶܦܪܥܳܗ̇ ܕܒܶܗ ܩܳܢܝܳܐ ܥܽܘܬܪܳܗ̇ ܒܶܗ ܠܳܥܙܳܐ ܫܽܘܒܚܳܗ̇ ܟܰܕ ܬܳܒܥܺܝܢ ܬܰܡܳܢ ܪܶܗܛܗܽܘܢ ܘܥܰܡ̈ܠܰܝܗܽܘܢ

4 ܨܠܽܘܬܳܐ ܒܓܰܘ ܦܽܘܡܶܗ ܩܶܪܒܰܬ ܠܫܳܡܰܥ ܟܽܠ ܒܺܐܝ̈ܕܰܘܗ̱ܝ ܠܙܶܕܩ̈ܳܬܳܐ ܐܰܘܙܦܰܬ ܠܦܳܪܰܥ ܟܽܠ ܒܥܰܝ̈ܢܰܘܗ̱ܝ ܩܪܳܬ ܣܶܦܪܳܐ ܒܶܐܕ̈ܢܰܘܗ̱ܝ ܠܡܽܘܠܟܳܢܳܐ ܒܪ̈ܶܓܠܰܘܗ̱ܝ ܬܪܰܥ ܒܰܝܬܶܗ ܫܰܡܫܶܬ ܘܰܚܙܰܘ ܒܢܶܣܝܳܢܳܐ ܕܒܶܗ ܩܳܝܡܳܐ ܟܽܠܳܗ̇ ܒܪܺܝܟ ܕܰܐܣܢܩܳܗ̇ ܠܢܰܦܫܳܐ ܕܢܰܘܪܶܒ ܠܫܰܘܬܦܳܗ̇

5 ܨܶܒܝܳܢ ܒܳܪܽܘܝܶܗ ܡܟܰܢܶܫ ܠܕܰܚܺܝܚܶܗ ܡܚܰܕܶܬ ܘܰܥܒܰܕ ܠܶܗ ܗܰܝܟܠܳܐ ܕܬܶܫܒܽܘܚܬܳܐ ܡܰܥܶܠ ܘܒܰܓܢܽܘܢܶܗ ܡܒܰܝܰܐ ܠܒܰܪ̱ܬ ܙܰܘܓܶܗ ܘܕܶܐܬܟܡܰܪ ܒܰܫܝܽܘܠ ܡܶܬܦܨܰܚ ܘܕܶܐܬܦܣܶܩ ܣܰܒܪܶܗ ܡܝܰܒܶܒ ܒܡܽܘܠܟܳܢܶܗ ܘܕܰܐܘܚܶܠܘ̱ ܥܠܰܘܗ̱ܝ ܣܰܟ̈ܠܶܐ ܥܠܰܘܗ̱ܝ ܥܳܫܢܺܝܢ ܪ̈ܰܚܡܶܐ

6 ܪ̈ܶܓܠܰܘܗ̱ܝ ܐܰܣܺܝܪ̈ܳܬܳܐ ܕܳܝܨܳܢ ܒܦܰܪܕܰܝܣܳܐ ܘܺܐܝ̈ܕܰܘܗ̱ܝ ܕܶܐܫܬܪܺܝ ܩ̈ܳܛܦܳܢ ܠܟܽܠ ܛܽܘ̈ܒܺܝܢ ܥܰܝ̈ܢܰܘܗ̱ܝ ܕܶܐܬܥܡܶܨ ܚܳܙܶܝܢ ܠܡܰܢܗܰܪ ܟܽܠ ܦܽܘܡܶܗ ܕܶܐܫܬܬܰܩ ܡܶܬܦܬܰܚ ܘܶܐܕ̈ܢܰܘܗ̱ܝ ܣܟܺܝܪ̈ܳܬܳܐ ܫܶܡܥܰܢ ܠܫܺܝܦܽܘܪܳܐ ܘܓܽܘܫܡܶܗ ܕܶܐܬܚܰܒܰܠ ܡܦܰܪܶܓ ܒܬܶܫܒܽܘܚܬܳܐ

7 ܘܶܐܢ ܗܽܘ ܕܟܰܕ ܚܶܡܬܳܐ ܪܶܓܬܳܐ ܘܝܰܥܢܽܘܬܳܐ ܘܫܰܪܟܳܐ ܕܣܰܢܝ̈ܳܬܳܐ ܗܳܐ ܢܳܒܗܳܢ ܡܶܢܶܗ ܡܶܛܽܠ ܕܚܰܦܺܝ ܐܶܢܶܝܢ ܒܥܳܠܡܳܐ ܕܨܶܒܝܳܢܶܗ ܡܰܘܕܶܝܢ ܟܳܦܽܘܪ̈ܶܐ ܕܗܰܝܟܠܰܐ ܗ̱ܘ ܘܠܳܐ ܟܳܘܙܳܐ ܪܽܘܚܳܐ ܕܫܳܪܝܳܐ ܒܨܰܐܘܬܶܗ ܘܠܳܐ ܗ̱ܘܳܐ ܐܰܝܟ ܐܶܪܰܡܝܳܐ ܒܓܽܘܒܳܐ ܡܥܳܩܳܐ ܒܶܗ

8 ܀܀܀ ܢܟܰܣ ܠܟܳܦܽܘܪ̈ܶܐ ܕܶܐܬܚܰܒܰܫܘ̱ ܒܡ̈ܶܠܰܝܗܽܘܢ ܕܗܶܢܽܘܢ ܠܗܽܘܢ ܚܰܝܶܒܘ ܕܡܰܘܕܶܝܢ ܕܪܽܘܚ ܩܽܘܕܫܳܐ ܒܓܰܘ ܦܰܓܪܗܽܘܢ ܫܳܪܝܳܐ ܢܕܺܝܕܳܐ ܘܳܐܟܽܘܠܳܐ ܘܟܰܕ ܣܳܒܪܺܝܢ ܕܰܙܟܰܘ ܐܶܙܕܟܺܝܘ ܕܶܐܢܗܽܘ ܕܟܰܕ ܨܳܐܶܐ ܗܽܘ ܒܶܝܬ ܡܰܫܪܝܰܐ ܗ̱ܘ ܦܰܐܝܳܐ ܟܡܳܐ ܟܰܝ ܒܨܽܘܠܳܠܶܗ ܢܶܬܪܰܚܰܡ ܒܢܽܘܚܳܡܶܗ

9 ܫܺܐܕܳܐ ܫܪܳܐ ܒܓܽܘܫܡܳܐ ܘܟܰܕ ܥܰܪܨܰܐ ܗ̱ܘ ܣܰܢܝܳܐ ܪܳܚܶܡ ܕܢܶܥܡܰܪ ܒܶܗ ܟܰܕ ܐܳܪܚܰܐ ܗ̱ܘ ܠܺܝܛܳܐ ܨܰܘܡܰܐ ܗ̱ܘ ܥܳܩܰܪ ܠܶܗ ܠܝܰܥܢܳܐ ܕܠܳܐ ܢܳܦܶܩ ܢܰܦܫܳܐ ܟܡܳܐ ܬܶܪܚܰܡ ܠܡܰܥܡܪܳܗ̇ ܕܶܐܢ ܐܶܫܬܘܺܝܘ ܐܰܟܚܰܕ ܐܰܦܩܽܘܗ̱ܝ ܠܬܰܘܬܒܳܐ ܘܰܩܪܰܘ ܠܪܽܘܚ ܩܽܘܕܫܳܐ ܕܒܰܝܢܳܬܗܽܘܢ ܬܰܫܪܶܐ

10 ܘܶܐܢܗܽܘ ܕܳܐܦ ܪܽܘܚܳܐ ܛܡܐܬܐ ܒܢܽܘܩܝܳܐ ܫܳܪܝܳܐ ܘܥܰܠ ܡܺܝܬܳܐ ܫܰܟܢܳܐ ܘܡܶܬܰܐܣܳܪܳܐ ܘܡܶܫܬܰܘܬܳܦܳܐ ܠܩܰܝܣܳܐ ܓܠܺܝܦܳܐ ܕܠܳܐ ܫܳܡܰܥ ܟܡܳܐ ܟܺܝܬ ܪܽܘܚ ܩܽܘܕܫܳܐ ܬܚܰܒܒܺܝܘܗ̱ܝ ܠܦܰܓܪܳܐ ܕܥܰܠ ܣܰܒܪܳܐ ܀܀܀ ܐܶܬܕܒܰܚ ܘܠܳܐ ܕܒܰܚ ܓܰܠܝܳܐ ܗ̱ܝ ܕܳܐܦ ܩܶܛܠܶܗ ܣܳܗܕܰܐ ܗ̱ܘ ܕܢܽܘܚܳܡܶܗ

11 ܕܠܰܘ ܓܶܝܪ ܐܰܠܳܗܰܐ ܗ̱ܘ ܕܡܺܝ̈ܬܶܐ ܐܶܡܰܪ ܡܳܪܰܢ ܡܺܝ̈ܬܶܐ ܕܡܺܝ̈ܬܰܝܗܽܘܢ ܩܳܒܪܺܝܢ ܕܠܳܐ ܣܰܒܪܳܐ ܟܢܰܫܘ̱ ܗ̱ܘܰܘ ܕܪܰܫܘ̱ ܥܰܡܶܗ ܕܰܡܚܳܐ ܒ̈ܢܰܝ ܐ̱ܢܳܫܳܐ ܒܗܳܝ ܥܶܠܬܳܐ ܕܰܪܟܶܒܘ̱ ܐܶܙܕܰܟܺܝܘ ܕܰܬܢܳܐ ܠܗܽܘܢ ܣܳܦܪܳܐ ܘܰܐܚܺܝ ܠܗܽܘܢ ܡ̈ܺܝܬܶܐ ܒܡ̈ܶܠܶܐ ܘܒܰܥܒܳܕ̈ܶܐ ܫܪܳܪܶܗ ܠܢܽܘܚܳܡܳܐ

12 ܩܪܳܝܗ̱ܝ ܗ̱ܘܳܐ ܠܳܠܥܳܙܳܪ ܘܰܢܦܰܩ ܒܣܰܪ ܐܶܢܽܘܢ ܕܶܐܠܽܘ ܠܡܳܪܶܗ ܡܺܝܬ ܠܳܐ ܐܶܬܡܨܺܝ ܘܰܥܢܳܝܗ̱ܝ ܚܰܝ ܗ̱ܘܳܐ ܒܡܺܝܬܽܘܬܶܗ ܠܩܳܠܳܐ ܕܰܐܩܺܝܡܶܗ ܡܺܝܬܳܐ ܚܰܝܳܐ ܘܗܶܢܽܘܢ ܚܣܰܡܘ̱ ܘܡܺܝܬܘ̱ ܡܳܪܰܢ ܒܟܼܶܐ ܥܠܰܝܗܽܘܢ ܕܚ̈ܰܝܶܐ ܕܡܺܝܬܺܝܢ ܗ̱ܘܰܘ ܕܶܐܬܟܰܡܰܪܘ̱ ܒܢܽܘܚܳܡܳܐ ܕܰܐܦܨܚܶܗ ܠܳܠܥܳܙܳܪ

13 ܡܺܝܬܳܐ ܕܚܰܝܽܘܬܳܐ ܟܣܺܝܬܳܐ ܛܡܺܝܪܳܐ ܒܶܗ ܚܰܝ ܗܽܘ ܠܰܐܠܳܗܳܐ ܡܶܢ ܩܕܳܡ ܕܢܶܬܢܰܚܰܡ ܗܳܟܰܢ ܐܳܦ ܚܰܛܳܝܳܐ ܀܀܀ ܡܺܝܬܰܐ ܗ̱ܘ ܩܕܳܡ ܕܰܢܡܽܘܬ ܡܺܝܬܳܐ ܠܟܳܦܽܘܪ̈ܶܐ ܡܦܺܝܣ ܗ̱ܘܳܐ ܕܗܳܢܽܘܢ ܐܶܢܽܘܢ ܡܺܝ̈ܬܶܐ ܩܒܺܝܪ̈ܰܝ ܒܚܰܝ̈ܰܝܗܽܘܢ ܢܦܺܝܚܝ̱ ܒܢܶܚ̈ܬܰܝܗܽܘܢ ܡܰܣ̈ܝܰܝ ܒܚܰܘܒܰܝ̈ܗܽܘܢ

14 ܠܳܐ ܡܳܪܝ̱ ܢܶܚܙܽܘܢܳܢܝ̱ ܥܰܡܗܽܘܢ ܒܓܺܗܰܢܳܐ ܘܢܰܗܠܽܘܢ ܕܠܰܘ ܡܶܕܶܡ ܡܶܢܗܽܘܢ ܡܝܰܬܰܪ ܐ̱ܢܳܐ ܠܳܐ ܐܶܬܛܠܶܡ ܕܰܕܪܺܝܫ ܠܶܫܳܢܝ̱ ܚܠܳܦ ܩܽܘܫܬܳܐ ܠܳܐ ܡܳܪܝ̱ ܢܶܚܙܽܘܢܳܢܝ̱ ܠܘܳܬܗܽܘܢ ܢܶܕܥܽܘܢ ܕܥܰܠ ܗܳܕܶܐ ܗ̱ܽܘ ܚܰܢܬܳܢܝ̱ ܒܢܽܘܚܳܡܳܐ ܕܰܥܠܰܘܗ̱ܝ ܕܢܽܘܚܳܡܳܐ ܡܰܠܶܠܬ ܟܡܳܐ ܕܰܐܘܦܺܝܬ

SEDRA IV

Syriac Lexeme

About This Digital Text

Corpus Text ID:

https://syriaccorpus.org/301

NHSL Work ID(s):

http://syriaca.org/work/8780
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).