Nisibis 51

https://syriaccorpus.org/305

TEI/XML Text

Show

section : section

line : line

Table of Contents

1 2 3 4 5 6 7 8 9 10 11 12 13 14 15 16 17

51 Nisibis LI

ܥܰܠ ܩܳܠܳܐ ܐܳܘ ܝܳܗܽܘܒܳܐ ܕܦܽܘܪ̈ܫܳܢܶܐ

1 ܒܙܺܝܙܳܢܳܐ ܦܶܓܥܶܬ ܐܰܚܰܝ̈ ܕܰܠܒܺܝܫ ܗ̱ܘܳܐ ܓܰܘܢܳܐ ܕܚ̈ܶܛܶܐ ܕܰܢܕܰܘܶܕ ܙܰܪܥܳܐ ܛܳܒܳܐ ܘܕܶܐܬܦܰܩܰܕܘ̱ ܐܰܟܳܪ̈ܶܐ ܠܳܐ ܫܰܩܠܽܘܗ̱ܝ ܐܳܦ ܠܳܐ ܥܰܩܪܽܘܗ̱ܝ ܘܳܐܦܶܢ ܐܰܗܡܺܝܘ ܐܰܟܳܪ̈ܶܐ ܥܫܶܢ ܙܰܪܥܳܐ ܡܶܢ ܙܺܝ̈ܙܳܢܶܐ ܪܰܒܺܝ ܘܰܣܓܺܝ ܘܚܰܦܺܝ ܚܰܢܩܶܗ ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ ܡܰܚܶܐ ܟܽܠ

2 ܦܓܰܥ ܒܺܝ ܟܬܳܒܶܗ ܕܒܰܪ ܕܰܝܨܳܢ ܘܶܐܬܐܰܠܨܶܬ ܕܰܡܠܶܐ ܫܳܥܳܐ ܐܰܣܪܰܚ ܐܶܕ̈ܢܰܝ ܕ̈ܰܟܝܳܬܳܐ ܘܶܐܥܒܶܕ ܐܶܢܶܝܢ ܡܰܥܒܰܪܬܳܐ ܠܡܰܡܠ̱ܠܳܐ ܕܰܡܠܶܐ ܓܽܘܕܳܦܳܐ ܀܀܀ ܪܶܗܛܶܬ ܬܽܘܒ ܐܰܣܚܺܝܬ ܐܶܢܶܝܢ ܒܩܶܪܝܳܢܳܐ ܫܰܦܝܳܐ ܘܕܰܟܝܳܐ ܕܰܟܬܳܒܶܝ̈ܗ̇ ܕܰܐܠܳܗܽܘܬܳܐ

3 ܫܶܡܥܶܬ ܡܶܢ ܗܰܘ ܩܶܪܝܳܢܳܐ ܟܰܕ ܓܰܕܶܦ ܥܰܠ ܟܺܐܢܽܘܬܳܐ ܘܥܰܠ ܒܰܪ̱ܬ ܙܰܘܓܳܗ̇ ܛܰܝܒܽܘܬܳܐ ܐܶܢ ܓܶܝܪ ܦܰܓܪܳܐ ܠܳܐ ܩܳܐܶܡ ܚܶܣܕܰܐ ܗ̱ܘ ܒܺܝܫܳܐ ܠܛܰܝܒܽܘܬܳܐ ܕܰܒܪܳܬܶܗ ܐܰܝܟ ܕܰܠܣܽܘܪܳܚܰܢ ܘܓܽܘܕܳܦܰܐ ܗ̱ܘ ܕܥܰܠ ܟܺܐܢܽܘܬܳܐ ܕܰܫܕܳܬܶܗ ܐܰܝܟ ܕܠܰܐܒܕܳܢ

4 ܡܥܺܝܩ ܗ̱ܘܐ ܕܶܝܢ ܗܽܘ ܩܶܪܝܳܢܳܐ ܠܢܰܦܫܳܐ ܘܦܰܓܪܳܐ ܫܰܘܝܳܐܺܝܬ ܕܰܐܪܡܺܝ ܒܰܝܢܳܬ ܚܰܒܺܝ̈ܒܶܐ ܦܽܘܪܫܳܢܳܐ ܕܰܦܣܳܩ ܣܰܒܪܳܐ ܠܦܰܓܪܳܐ ܓܠܰܙ ܡܶܢ ܢܽܘܚܳܡܶܗ ܘܰܠܢܰܦܫܳܐ ܡܶܢ ܫܰܘܬܳܦܳܗ̇ ܘܰܠܬܽܘܟܳܐ ܕܰܐܪܡܺܝ ܚܶܘܝܳܐ ܝܽܘܬܪܳܢܳܐ ܩܪܳܝܗ̱ܝ ܒܰܪ ܕܰܝܨܳܢ

5 ܘܶܐܢ ܐܰܝܢܳܐ ܕܡܰܡܪܰܚ ܩܳܛܶܠ ܚܰܕ ܦܰܓܪܳܐ ܚܰܝܳܒ ܡܰܘܬܰܐ ܗ̱ܘ ܐܰܝܢܳܐ ܕܩܳܛܶܠ ܠܶܫܳܢܶܗ ܟܽܠ ܦܰܓܪ̈ܺܝܢ ܕܰܒܢܰܝ̈ ܐ̱ܢܳܫ̈ܳܐ ܠܝܰܡܳܐ ܪܰܒܳܐ ܐܶܢ ܢܳܚܶܬ ܠܳܐ ܡܨܶܐ ܝܰܡܳܐ ܥܳܪܶܒ ܒܶܗ ܕܰܒܟܰܝܠܳܐ ܕܡܰܝ̈ܳܐ ܢܶܦܪܽܘܥ ܩܶܛܠܳܐ ܕܰܩܛܰܠ ܠܶܫܳܢܶܗ

6 ܟܡܳܐ ܩܳܛܽܘܠܺܝ̈ܢ ܡܰܪܺܝܪܺܝܢ ܗܘܰܘ ܠܶܗ ܠܦܰܓܪܳܐ ܚܰܠܳܫܳܐ ܀܀܀ ܩܰܛܠܶܗ ܩܳܐܺܝܢ ܡܶܢ ܠܽܘܩܕܰܡ ܘܰܐܫܠܶܡ ܚܰܪܒܶܗ ܩܳܛܽܘܠܳܐ ܠܰܐ̱ܚܪ̈ܳܢܶܐ ܕܰܢܡܰܪܽܘܢ ܒܶܗ ܘܗܳܐ ܠܐܶܝܢ ܒܽܐܘܡܳܢܽܘܬܶܗ ܟܽܠ ܬܰܠܡܺܝܕ̈ܰܘܗ̱ܝ ܕܰܢܕܰܡܽܘܢ ܠܶܗ ܠܪܰܒܳܐ ܕܰܐܠܶܦ ܡܶܢ ܢܰܦܫܶܗ

7 ܩܰܛܠܽܘܗ̱ܝ ܣܰܝ̈ܦܶܐ ܓܰܠܝܳܐܺܝܬ ܘܳܐܦ ܠܶܫܳܢ̈ܶܐ ܟܰܣܝܳܐܺܝܬ ܥܪܺܝܡܳܐ ܩܰܛܠܶܗ ܡܶܢ ܠܽܘܩܕܰܡ ܘܰܨܢܺܝܥܳܐ ܡܶܢ ܒܳܬܰܪܟܶܢ ܚܶܘܝܳܐ ܡܰܪܺܝܪܳܐ ܚܰܠܺܝ ܠܶܫܳܢܶܗ ܟܰܕ ܩܳܛܶܠ ܠܶܗ ܘܳܐܦ ܬܰܠܡܺܝ̈ܕܰܘܗ̱ܝ ܡܰܪܺܝܪ̈ܶܐ ܒܠܶܫܳܢܳܐ ܚܰܠܝܳܐ ܩܰܛܠܽܘܗ̱ܝ

8 ܚܢܳܢܶܗ ܛܳܒܳܐ ܕܓܳܒܽܘܠܳܟ ܢܩܽܘܡ ܦܰܓܪܳܐ ܠܰܛܠܺܝܡܽܘܬܳܟ ܫܕܳܟ ܚܶܘܝܳܐ ܡܶܢ ܦܰܪܕܰܝܣܳܐ ܘܳܐܦ ܝܰܠܕ̈ܰܘܗ̱ܝ ܡܶܢ ܡܰܠܟܽܘܬܳܐ ܗܰܘ ܓܰܠܙܳܟ ܡܶܢ ܚܰܝܽܘܬܳܐ ܘܳܐܦ ܗܳܠܶܝܢ ܡܶܢ ܢܽܘܚܳܡܳܐ ܪܗܶܛ ܚܶܘܝܳܐ ܨܶܝܕ ܫܽܘܪܳܝܳܐ ܘܬܰܠܡܺܝܕ̈ܰܘܗ̱ܝ ܨܶܝܕ ܫܽܘܠܳܡܳܐ

9 ܢܰܦܫܳܐ ܕܶܝܢ ܕܰܠܒܺܝܫܳܐ ܠܶܗ ܠܦܰܓܪܳܐ ܣܰܓܺܝ ܙܗܺܝܪܳܐ ܒܶܗ ܕܰܠܡܳܐ ܦܳܪܫܺܝܢ ܚܰܕ ܡܶܢ ܚܰܕ ܒܗܳܠܶܝܢ ܚܰܝ̈ܶܐ ܥܳܒܽܘܪ̈ܶܐ ܘܰܐܝܟܰܢ ܡܰܨܝܳܐ ܕܰܬܣܰܝܒܰܪ ܒܚܰܪܬܳܐ ܠܡܶܚܳܐ ܒܶܠܥܳܕܰܘܗ̱ܝ ܠܳܐ ܓܶܝܪ ܫܳܒܶܩ ܠܳܗ̇ ܚܽܘܒܶܗ ܕܰܬܚܰܡܣܶܢ ܡܶܢ ܢܽܘܚܳܡܶܗ

10 ܚܽܘܪ ܐܰܝܟܰܢܳܐ ܡܶܠܰܬܗܽܘܢ ܡܶܬܟܰܣܣܳܐ ܘܳܐܦ ܡܶܫܬܰܪܝܳܐ ܟܰܕ ܡܶܬܪܰܗܒܺܝܢ ܡܶܢ ܣܰܝܦܳܐ ܘܳܐܦ ܡܶܢ ܪܰܚܫܳܐ ܢܳܟܽܘܝܳܐ ܒܢܰܝ̈ ܚܶܘܝܳܐ ܕܚܶܠܘ̱ ܡܶܢ ܚܶܘܝܳܐ ܡܶܛܽܠ ܦܰܓܪܳܐ ܩܳܛܽܘܠܳܐ ܕܙܳܕܶܩ ܗ̱ܘܐ ܕܢܶܣܢܽܘܢ ܚܰܝܰܘ̈ܗ̱ܝ ܐܰܝܟ ܕܰܣܢܰܘ ܐܳܦ ܢܽܘܚܳܡܶܗ

11 ܪ̈ܓܺܝܓܳܬܳܐ ܓܶܝܪ ܣܰܢܝ̈ܳܬܳܐ ܣܰܢ̈ܝܳܢ ܐܶܢܶܝܢ ܟܰܕ ܡܶܣܬܰܥܪ̈ܳܢ ܠܗܶܝܢ ܗ̱ܽܘ ܡܰܟܶܣ ܢܳܡܽܘܣܳܐ ܠܗܶܝܢ ܗ̱ܽܘ ܪܳܕܶܦ ܕܰܝܳܢܳܐ ܥܠܰܝܗܶܝܢ ܡܶܬܬܘܶܐ ܬܰܝܳܒܳܐ ܦܰܓܪܳܐ ܡܝܰܩܰܪ ܒܰܟܬܳܒܳܐ ܗܽܘܝܽܘ ܪܚܺܝܡ ܐܳܦ ܒܰܟܝܳܢܳܐ ܒܶܗ ܗ̱ܽܘ ܙܗܺܝܪ ܐܳܦ ܒܰܪܢܳܫܳܐ

12 ܬܳܒܰܥ ܠܶܗ ܐܳܦ ܒܳܪܽܘܝܳܐ ܠܩܳܛܽܘܠܳܐ ܕܚܰܒܶܠ ܦܰܓܪܳܐ ܟܺܐܢܳܐ ܫܳܪܶܐ ܪܽܘܟܳܒܶܗ ܕܢܺܐܠܰܦ ܡܳܐ ܒܺܝܫ ܚܽܘܒܳܠܶܗ ܕܨܰܠܡܳܐ ܕܨܳܪܰܬ ܛܰܝܒܽܘܬܳܐ ܒܓܽܘܫܡܳܐ ܕܰܐܚܶܫ ܡܰܚܶܫ ܠܶܗ ܒܦܰܓܪܶܗ ܝܺܠܶܦ ܩܳܛܽܘܠܳܐ ܕܚܰܒܶܠ ܗܰܝܟܰܠ ܥܳܒܽܘܕܳܐ

13 ܘܶܐܢ ܕܶܝܢ ܡܶܬܬܒܰܥ ܩܳܛܽܘܠܳܐ ܠܰܘ ܕܰܠܡܰܢ ܩܰܛܶܠ ܢܰܦܫܳܐ ܡܶܫܪܳܐ ܫܪܳܗ̇ ܐܰܝܟ ܡܶܠܰܬܗܽܘܢ ܘܶܐܢ ܫܳܪܽܘܝܳܐ ܩܳܛܽܘܠܰܐ ܗ̱ܘ ܠܰܐܝܟܳܐ ܢܶܥܪܽܘܩ ܒܰܪ ܕܰܝܨܳܢ ܕܒܰܕܪܳܫܳܐ ܠܳܛܶܫ ܠܶܫܳܢܶܗ ܘܩܰܛܠܶܗ ܠܦܰܓܪܳܐ ܡܶܢ ܚܰܝ̈ܶܐ ܕܰܒܢܽܘܚܳܡܳܐ ܡܶܬܝܰܗܒܺܝܢ ܀܀܀

14 ܒܡܶܠܟܶܗ ܩܰܛܠܶܗ ܩܰܕܡܳܝܳܐ ܘܳܐܦ ܬܰܢܺܝܢܳܐ ܒܝܽܘܠܦܳܢܶܗ ܗܰܘ ܩܰܛܠܶܗ ܐܰܝܟ ܝܳܨܽܘܦܳܐ ܘܳܐܦ ܗܳܠܶܝܢ ܐܰܝܟ ܥܳܕܽܘܪ̈ܶܐ ܕܳܪ̈ܽܘܫܶܐ ܒܰܥܪܺܝܡܽܘܬܳܐ ܠܚܶܘܝܳܐ ܥܒܺܝܕܺܝܢ ܫܰܘܬܳܦ̈ܶܐ ܥܬܺܝܕܺܝܢ ܠܡܶܒܗܰܬ ܒܢܰܝ̈ ܚܶܘܝܳܐ ܐܰܝܟ ܐܰܒܽܘܗܽܘܢ ܩܰܕܡܳܝܳܐ

15 ܒܗܰܕ̈ܳܡܶܐ ܘܪ̈ܶܓܫܰܝ ܦܰܓܪܳܐ ܝܳܠܦܳܐ ܢܰܦܫܳܐ ܟܽܠ ܛܳܒ̈ܳܢ ܘܶܐܢ ܦܰܓܪܰܐ ܗ̱ܘ ܣܰܢܝܳܐ ܐܰܝܟܰܢ ܬܶܦܠܽܘܚ ܒܺܐܝܕܶܗ ܛܳܒ̈ܳܬܳܐ ܘܶܐܢ ܒܰܟܝܳܢܶܗ ܕܰܓܳܠܰܐ ܗ̱ܘ ܐܰܝܟܰܢ ܩܽܘܫܬܳܐ ܬܺܐܠܰܦ ܒܶܗ ܕܠܳܐ ܝܳܗܒܺܝܢ ܠܶܗ ܠܽܐܘܡܳܢܳܐ ܡܳܐܢܳܐ ܕܢܽܘܟܪܳܝ ܠܰܥܒܳܕܶܗ

16 ܠܳܐ ܓܶܝܪ ܟܳܬܶܒ ܟܳܬܽܘܒܳܐ ܣܶܦܪܳܐ ܒܣܰܝܦܶܗ ܕܰܐܟܳܪܳܐ ܘܳܐܦܠܳܐ ܨܳܝܰܪ ܨܰܝܳܪܳܐ ܒܝܰܕ ܡܰܣܳܪܶܗ ܕܢܰܓܳܪܳܐ ܘܠܳܐ ܐܳܣܝܳܐ ܡܰܐܣܶܐ ܥܰܝܢܳܐ ܒܥܽܘܩܣܳܐ ܣܰܢܝܳܐ ܕܥܶܩܰܪܒܳܐ ܘܠܳܐ ܡܶܡܬܽܘܡ ܓܳܙܰܪ ܫܽܘܚܢܳܐ ܒܓܰܪܡܳܐ ܕܚܶܘܝܳܐ ܘܚܰܪܡܳܢܳܐ

17 ܟܽܠ ܡܶܕܶܡ ܓܶܝܪ ܬܰܩܢܳܐܺܝܬ ܒܡܳܐܢܳܐ ܕܰܡܚܰܝܶܢ ܠܶܗ ܘܰܒܪܶܓܫܳܐ ܕܰܡܫܰܘܬܶܦ ܠܶܗ ܡܶܬܬܰܩܰܢ ܦܳܪܽܘܫܳܐܺܝܬ ܐܳܦ ܦܰܓܪܳܐ ܐܶܢ ܕܰܚܛܺܝܬܰܐ ܗ̱ܘ ܠܰܝܬ ܕܰܡܨܶܐ ܡܶܙܕܰܕܰܩ ܒܶܗ ܙܰܕ̈ܺܝܩܶܐ ܕܶܐܬܢܰܨܰܚܘ̱ ܒܶܗ ܀܀܀ ܠܚܺܝܡܺܝܢ ܠܰܐܝܢܳܐ ܕܥܳܫܶܩ ܠܶܗ

SEDRA IV

Syriac Lexeme

About This Digital Text

Corpus Text ID:

https://syriaccorpus.org/305

NHSL Work ID(s):

http://syriaca.org/work/8784
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).