Ephrem the Syrian: Nisibis 62

Corrections?  Copy   TEI   Text  
Show  
section :
line :
Table of Contents  
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32
62 Nisibis LXII
ܝܐ ܒܰܪ ܩܳܠܶܗ
1 ܗܳܐ ܡܰܘܬܳܐ ܡܰܠܟܳܐ ܕܫܶܬܩܳܐ ܩܰܒܶܠ ܐܰܚ̈ܰܝ ܕܡܰܠܺܝܢܳܝܗ̱ܝ ܐܰܬܪܶܗ ܐܺܝܠܳܠܬܳܐ ܕܰܦܣܰܩ ܣܰܒܪܳܐ ܥܽܘܢܺܝܬܳܐ: ܠܳܟ ܫܽܘܒܚܳܐ ܪܰܒܳܐ ܕܰܢܚܶܬ ܨܶܝܕ ܬܰܚ̈ܬܳܝܶܐ ܘܚܰܫ ܘܶܐܬܢܰܚܰܡ ܘܰܒܦܰܓܪܶܗ ܢܰܚܶܡ ܦܰܓܪ̈ܰܝܢ
2 ܕܒܳܟܶܝܢ ܚܢܰܢ ܐܰܝܟ ܫ̈ܢܰܝܳܐ ܒܬܰܪ̈ܥܶܝܗ̇ ܕܰܫܝܽܘܠ ܫܡܰܥ ܐܰܝܠܶܝܢ ܐܶܡܰܪ ܡܰܘܬܳܐ ܟܰܕ ܟܐܳܐ ܒܰܢ
3 ܢܶܟܦܰܬ ܠܺܝ ܐܶܡܰܪ ܡܰܘܬܳܐ ܕܟܺܝܬܽܘܢܳܢܝ̱ ܦܰܠܓܳܗ̇ ܕܰܫܝܽܘܠ ܠܳܐ ܡܠܶܐ ܠܰܩ̈ܛܺܝܠܰܝܟܽܘܢ
4 ܫ̈ܠܰܕܶܐ ܓܶܝܪ ܢܽܘܟܪ̈ܳܝܳܬܳܐ ܟܫܶܝܢ ܒܰܫܝܽܘܠ ܬܰܪ̈ܬܶܝܢ ܡ̈ܢܰܘܳܢ ܐܺܝܬ ܬܰܡܳܢ ܡܺܝ̈ܬܶܐ ܩ̈ܛܺܝܠܶܐ
5 ܚܠܳܦ ܕܶܐܩܒܽܘܠ ܕܥܶܠܒܬܽܘܢܳܢܝ̱ ܗܳܐ ܒܳܟܶܝܢ ܐܰܢ̱ܬܽܘܢ ܫܚܰܩܬܽܘܢܳܝܗ̱ܝ ܬܰܪܥܳܗ̇ ܕܰܫܝܽܘܠ ܘܰܐܠܙܳܬܽܘܢܳܢܝ̱ ܀܀܀
6 ܠܝܰܠܽܘܕܳܐ ܓܶܝܪ ܕܳܡܶܝܢ ܐܰܢ̱ܬܽܘܢ ܗܰܘ ܕܥܰܕ ܒܳܟܶܐ ܓܚܶܟ ܠܶܗ ܬܽܘܒ ܐܰܝܟ ܕܳܐܦ ܐܰܢ̱ܬܽܘܢ ܥܰܠ ܡܺܝ̈ܬܰܝܟܽܘܢ
7 ܠܳܐ ܛܰܥܡܳܐ ܓܶܝܪ ܠܰܐܒ̈ܺܠܰܝܟܽܘܢ ܘܠܳܐ ܪܶܥܝܳܢܳܐ ܠܓܽܘܚ̈ܟܰܝܟܽܘܢ ܠܚܰܣܺܝܠܰܐ ܗ̱ܘ ܓܶܝܪ ܕܳܡܶܝܢ ܐܰܢ̱ܬܽܘܢ ܠܺܝ
8 ܚܕܳܐ ܫܥܳܐ ܒܶܟܝܳܐ ܘܶܐܠܺܝܳܐ ܘܒܳܬܰܪ ܩܰܠܺܝܠ ܐܳܦ ܫܳܥܝܳܐ ܘܙܰܠܺܝܠܽܘܬܳܐ ܐܰܝܟ ܕܰܛ̈ܠܳܝܶܐ
9 ܠܳܐ ܡܨܶܝܢ ܐܰܢ̱ܬܽܘܢ ܓܶܝܪ ܠܡܶܗܘܶܐ ܐ̱ܢܳܫܳܐ ܫܰܠܡ̈ܶܐ ܕܠܳܐ ܒܳܟܝܳܐ ܐܳܦ ܠܳܐ ܓܽܘܚܟܳܐ ܐܰܝܟ ܛܥܡ̈ܢܐ
10 ܥܰܠ ܣܳܦܪ̈ܰܝܟܽܘܢ ܟܰܪܝܳܐ ܠܰܢ ܕܰܫܚܶܩܘ̱ ܐܶܢܽܘܢ ܠܟܰܬܳܒ̈ܶܝܗ̇ ܕܰܐܠܳܗܽܘܬܳܐ ܕܰܠܟܽܘܢ ܢܶܩܪܽܘܢ
11 ܩܳܪ̈ܽܘܝܶܐ ܡܰܩܥܳܐ ܩܳܥܶܝܢ ܕܽܘ̈ܓܶܐ ܐܰܢ̱ܬܽܘܢ ܓܶܝܪ ܗܺܝ ܩܥܳܬܳܐ ܡܦܺܝܣܳܐ ܥܠܰܝܟܽܘܢ ܕܥܶܪ̈ܕܶܐ ܐܰܢ̱ܬܽܘܢ
12 ܕܩܳܪܶܐ ܓܶܝܪ ܐܳܦ ܕܡܶܬܰܪܓܶܡ ܡܩܳܥܰܐ ܗ̱ܘ ܩܳܥܶܝܢ ܐܶܕ̈ܢܰܝܟܽܘܢ ܟܰܝ ܝܰܩܺܝܪ̈ܳܢ ܐܰܘ ܠܶܒ̈ܰܝܟܽܘܢ
13 ܐܶܠܽܘ ܓܶܝܪ ܐܺܝܬ ܗ̱ܘܳܐ ܐܶܕܢܳܐ ܗ̱ܝ ܕܦܺܝܣܳܐ ܠܡܶܫܡܰܥ ܩܰܠܺܝܠ ܙܳܕܶܩ ܗ̱ܘܳܐ ܘܣܰܓܺܝ ܠܡܶܥܒܰܕ
14 ܕܰܣܟܺܝܪܳܐ ܗ̱ܝ ܕܶܝܢ ܡܶܫܡܰܥܬܳܐ ܡܳܐ ܕܢܳܩܶܫ ܒܳܗ̇ ܗܰܘ ܩܳܠܳܐ ܥܛܰܦ ܠܶܗ ܨܶܝܕ ܗܰܘ ܕܰܡܫܰܕܰܪ ܠܶܗ
15 ܀܀܀ ܠܳܐ ܐܺܝܬ ܩܥܳܬܳܐ ܨܶܐܕܰܝ ܕܺܝܠܝ̱ ܠܰܘ ܕܽܘܓܳܐ ܐ̱ܢܳܐ ܠܳܐ ܕܩܳܪܶܐ ܘܠܳܐ ܕܡܶܬܰܪܓܶܡ ܠܰܘ ܥܳܛܠܳܐ ܐ̱ܢܳܐ
16 ܗܰܘܦܳܐ ܕܡܶܢܶܗ ܦܩܰܕ ܠܺܝ ܕܰܐܳܠܗ ܩܽܘܫܬܳܐ ܘܥܰܡ ܦܽܘܩܕܳܢܳܐ ܗܰܠܶܟ ܠܶܗ ܘܳܐܦ ܣܽܘܥܪܳܢܳܐ
17 ܠܰܝܬ ܠܘܳܬܝ̱ ܡܰܐܝܳܢܽܘܬܳܐ ܘܠܳܐ ܟܽܘܪ̈ܟܶܐ ܣܳܒܰܪ ܐ̱ܢܳܐ ܕܳܐܦ ܠܳܐ ܓܶܐܪܳܐ ܡܨܶܐ ܩܳܕܶܡ ܠܺܝ
18 ܒܣܺܝܪܺܝܢ ܠܺܝ ܕܶܝܢ ܩ̈ܳܠܰܝܟܽܘܢ ܡܳܐ ܕܒܳܟܶܝܢ ܐܰܢ̱ܬܽܘܢ ܥܰܠ ܩܰܒܪ̈ܶܐ ܕܥܰܢܺܝ̈ܕܰܝܟܽܘܢ ܒܰܦܣܳܩ ܣܰܒܪܳܐ
19 ܐܶܠܽܘ ܫܰܠܺܝܛ ܐܰܘ ܡܰܦܰܣ ܟܰܕ ܒܳܟܶܝܢ ܐܰܢ̱ܬܽܘܢ ܢܳܦܶܩ ܗܘܺܝܬ ܕܰܠܟܽܘܢ ܐܶܬܶܠ ܥܰܠ ܐܰܦܰܝ̈ܟܽܘܢ
20 ܕܶܐܢܳܐ ܥܳܡܶܠ ܐ̱ܢܳܐ ܕܶܐܬܶܠ ܚܽܘܫܒܳܢ ܡܺܝ̈ܬܶܐ ܘܰܡܕܰܘܕܶܝܢ ܠܺܝ ܩ̈ܳܠܰܝܟܽܘܢ ܕܰܐܛܥܶܐ ܚܽܘܫܒܳܢܝ̱
21 ܐܰܢ̱ܬܽܘܢ ܥܰܡ̈ܡܶܐ ܠܳܐ ܢܶܗܘܶܐ ܛܰܠܳܐ ܡܰܕܥܟܽܘܢ ܐܰܝܟ ܗܰܘ ܥܰܡܳܐ ܕܠܳܐ ܪܰܒܳܐ ܗ̱ܘܳܐ ܡܬܽܘܡ ܣܽܘܟܳܠܶܗ
22 ܕܠܳܐ ܢܰܒܶܗ ܒܶܗ ܒܽܘܝܳܢܳܐ ܐܰܝܟ ܕܰܒܣܰܟܠܳܐ ܚܶܫܽܘܟܳܐ ܗ̱ܝ ܓܶܝܪ ܡܰܚܫܰܒܬܶܗ ܡܶܢ ܦܽܘܪܫܳܢܳܐ
23 ܥܰܘ̈ܠܰܝܟܽܘܢ ܓܶܝܪ ܘܰܒ̈ܢܰܝܟܽܘܢ ܒܢܽܘܚܳܡܳܐ ܗܶܢܽܘܢ ܢܳܦܩܺܝܢ ܩܰܕܡܳܝܰܬ ܐܰܝܟ ܪܺܝܫܺܝܬܳܐ
24 ܒܳܬܪܗܽܘܢ ܕܶܝܢ ܙܰܕܺܝ̈ܩܶܐ ܐܰܝܟ ܙܰܟ̈ܳܝܶܐ ܀܀܀ ܐ̱ܚܪ̈ܳܝܶܐ ܢܳܦܩܺܝܢ ܚܰܛ̈ܳܝܶܐ ܐܰܝܟ ܒܶܗܝ̈ܳܬܳܐ
25 ܐܳܦܶܢ ܓܶܝܪ ܒܰܪܦܳܦ ܥܰܝܢܳܐ ܚܰܝܶܝܢ ܐܶܠܳܐ ܒܛܶܟܣܰܐ ܗ̱ܘ ܢܳܦܩܺܝܢ ܣܶܕܪ̈ܰܝܗܽܘܢ ܡܶܢܳܗ̇ ܕܰܫܝܽܘܠ
26 ܢܳܦܩܺܝܢ ܢܒܺܝ̈ܶܐ ܘܰܫ̈ܠܺܝܚܶܐ ܘܰܐܒܳܗ̈ܳܬܳܐ ܒܳܬܪܗܽܘܢ ܒܶܐܣܟܺܝܡ ܐܶܣܟܺܝܡ ܐܰܝܟ ܦܽܘܩܕܳܢܳܐ
27 ܗܳܢܳܐ ܕܗܳܫܳܐ ܒܠܺܝܠܳܐܺܝܬ ܗܳܐ ܡܶܙܕܰܪܥܶܝܢ ܒܛܶܟܣܳܐ ܪܰܒܳܐ ܡܶܬܦܢܶܝܢ ܐܰܝܟ ܙܳܪ̈ܥܽܘܢܶܐ
28 ܟܰܕ ܓܶܝܪ ܐ̱ܢܳܫ ܢܶܚܠܽܘܛ ܢܶܙܪܽܘܥ ܟܽܠ ܙܳܪ̈ܥܽܘܢܺܝܢ ܐܰܝܢܳܐ ܕܒܳܟܰܪ ܡܶܢ ܚܰܒܪܶܗ ܠܚܰܒܪܶܗ ܩܕܳܡ
29 ܘܠܳܐ ܐܰܝܟ ܕܰܒܠܺܝܠ ܡܚܰܬܗܽܘܢ ܗܳܟܰܢ ܫܓܺܝܫ ܡܰܣܩܗܽܘܢ ܡܶܢܳܗ̇ ܕܰܐܪܥܳܐ ܕܶܐܬܰܛܟܰܣ ܠܶܗ
30 ܗܳܐ ܗܘܺܝܬ ܐܶܢܳܐ ܠܽܘܩܒܰܠ ܢܰܦܫܝ̱ ܒܰܐܝܠܶܝܢ ܕܶܐܡܪܰܬ ܕܟܰܣ̈ܝܳܬܳܐ ܕܠܳܐ ܐܰܕܪܶܟܬܽܘܢ ܡܶܢܝ̱ ܐܺܝܠܶܦܬܽܘܢ
31 ܚܠܳܦ ܕܶܡ̈ܥܶܐ ܕܠܳܐ ܝܽܘܬܪܳܢܳܐ ܕܰܠܘܳܬ ܩܰܒܪܳܐ ܐܰܫܦܰܥܘ̱ ܐܶܢܶܝܢ ܒܰܨ̈ܠܰܘܳܬܳܐ ܒܓܰܘ ܥܺܕ̈ܳܬܳܐ
32 ܕܰܠܡܺܝ̈ܬܶܐ ܒܗܶܝܢ ܝܽܘܬܪܳܢܳܐ ܐܳܦ ܠܚ̈ܰܝܶܐ ܠܳܐ ܬܶܒܟܽܘܢ ܒܶܟܝܳܐ ܕܰܡܥܺܝܩ ܡܺܝ̈ܬܶܐ ܘܚ̈ܰܝܶܐ
SEDRA IV

Syriac Lexeme

About This Digital Text
Corpus Text ID:
https://syriaccorpus.org/316
Source:
Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963). Link to Syriaca.org Bibliographic Record
Type of Text: Digital Edition  
Status: Edited  
Publication Date: June 12, 2019
Preparation of Electronic Edition:
TEI XML encoding by James E. Walters.
Syriac text transcribed by Michael Oez.
Open Access and Copyright:

Creative Commons License

 See details...
How to Cite this Electronic Edition
Note:
Ephrem the Syrian, “Nisibis 62” , Digital Syriac Corpus, last modified June 12, 2019, https://syriaccorpus.org/316.
Bibliography:
“Nisibis 62.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/316.

Show Citation Styles
Linked Data