Ephrem the Syrian: Nisibis 69

Corrections?  Copy   TEI   Text  
Show  
section :
line :
Table of Contents  
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28
69 Nisibis LXIX
ܥܰܠ ܩܳܠܳܐ ܕܺܐܝܙܓܰܕܳܐ ܗܶܕܝܳܐܳܐ
1 ܐܰܢ̱ܬ ܗ̱ܽܘ ܓܒܰܠܬܳܝܗ̱ܝ ܠܥܰܦܪܳܐ ܡܶܢ ܫܽܘܪܳܝܳܐ ܒܪ̈ܰܚܡܶܐ ܘܰܐܢ̱ܬ ܗܽܘ ܡܫܰܠܶܡ ܠܘܳܬܶܗ ܡܰܘܗܰܒܬܳܟ ܒܚܽܘܒܳܐ ܥܽܘܢܺܝܬܳܐ: ܬܶܫ̈ܒܚܳܢ ܠܡܳܪܽܘܬܳܟ
2 ܐܰܢ̱ܬ ܗܽܘ ܛܳܒܳܐ ܒܪܰܝܬܳܝܗ̱ܝ ܠܳܐܕܳܡ ܟܰܕ ܓܠܶܐ ܠܳܟ ܕܰܛܠܰܡ ܠܳܟ ܘܰܛܥܳܐ ܓܒܰܠܬܳܝܗ̱ܝ ܐܰܝܟ ܕܬܶܙܟܶܝܘܗ̱ܝ
3 ܒܦܰܓܪܳܐ ܚܳܪܶܬ ܟܰܕ ܐܰܒܺܝܠ ܒܢܰܦܫܳܐ ܟܰܕ ܟܡܺܝܪܳܐ ܕܡܶܙܓܰܬ ܐܶܢܽܘܢ ܒܚܽܘܒܳܐ ܘܰܥܢܰܕܘ̱ ܘܰܦܪܰܫܘ̱ ܒܚܰܫܳܐ
4 ܓܒܺܝܠ ܦܰܓܪܳܐ ܒܚܶܟܡܳܐ ܢܦܺܝܚܳܐ ܢܰܦܫܳܐ ܒܛܰܝܒܽܘ ܡܙܺܝܓ ܚܽܘܒܳܐ ܒܰܫܠܶܡܘ̱ ܦܰܪܫܶܗ ܚܶܘܝܳܐ ܒܒܺܝܫܽܘ
5 ܕܶܐܢ ܦܰܓܪܳܐ ܘܢܰܦܫܳܐ ܕܰܐܝܢܳܐ ܐܰܚܛܺܝ ܠܚܰܒܪܶܗ ܣܰܟܠܽܘܬܳܐ ܕܓܰܘܳܐ ܗ̱ܝ ܕܚܺܐܪܽܘܬܳܐ ܕܓܰܘܳܐ ܗ̱ܝ ܀܀܀
6 ܕܺܝܠܳܟ ܗ̱ܝ ܒܪܺܝܟܳܐ ܕܬܽܘܒ ܬܶܬܢܳܐ ܬܪܰܚܰܡ ܐܺܝܕܳܟ ܬܶܓܒܽܘܠ ܡܶܕܪܺܝܫ ܨܶܒܥܳܟ ܠܳܐܕܳܡ ܬܨܽܘܪܺܝܘܗ̱ܝ
7 ܗܳܐ ܓܶܝܪ ܡܳܪܝ̱ ܡܶܢ ܡܬܽܘܡ ܠܳܐ ܓܳܙ ܡܶܢܶܗ ܚܢܳܢܳܟ ܫܶܪܝܰܬ ܥܰܡܶܗ ܒܚܽܘܒܳܐ ܫܠܶܡ ܥܰܡܶܗ ܒܪ̈ܰܚܡܶܐ
8 ܘܶܐܢ ܓܶܝܪ ܟܰܕ ܠܰܝܬ ܗ̱ܘܳܐ ܕܢܶܗܘܶܐ ܐܺܝܬܰܘܗ̱ܝ ܒܪܰܝܬܳܝܗ̱ܝ ܗܳܫܳܐ ܕܺܐܝܬܰܘܗ̱ܝ ܠܥܰܦܪܶܗ ܒܳܟ ܢܶܬܚܰܕܰܬ ܗܰܝܟܠܶܗ
9 ܙܳܕܶܩ ܗܽܘ ܠܡܰܠܟܳܐ ܕܰܚܙܳܐ ܨܰܠܡܶܗ ܕܰܐܥܬܶܩ ܕܰܒܣܰܡ̈ܳܡܢܶܐ ܓܒܰܝ̈ܳܐ ܢܶܦܨܰܚ ܨܰܠܡܳܐ ܟܡܺܝܪܳܐ
10 ܚܙܳܬܳܐ ܗܘܳܬ ܕܬܶܗܪܳܐ ܕܰܪܟܶܢ ܪܽܘܡܳܟ ܫܒܺܝܚܳܐ ܠܘܳܬ ܥܰܦܪܳܐ ܫܚܺܝܡܳܐ ܕܰܢܨܽܘܪ ܨܰܠܡܳܐ ܗܕܺܝܪܳܐ
11 ܛܳܒܳܐ ܗ̱ܝ ܗܳܕܶܐ ܐ̱ܚܪܺܝܬܳܐ ܡܶܢ ܗܳܝ ܕܰܗܘܳܬ ܒܪܺܝܫܺܝܬ ܕܠܰܘ ܡܒܪܐ ܒܪܰܝܬܳܝܗ̱ܝ ܐܶܠܳܐ ܡܰܠܒܶܫ ܠܒܶܫܬܳܝܗ̱ܝ
12 ܀܀܀ ܝܳܕܰܥ ܪܳܡܳܐ ܕܳܐܕܳܡ ܐܰܠܳܗܳܐ ܨܒܳܐ ܕܢܶܗܘܶܐ ܫܰܕܰܪ ܠܰܒܪܶܗ ܘܠܰܒܫܶܗ ܕܢܶܬܶܠ ܠܶܗ ܪܶܓܬܶܗ
13 ܟܡܺܝܪ ܒܺܝܫܳܐ ܕܰܚܼܙܳܐ ܕܰܟܡܳܐ ܕܣܰܚܦܶܗ ܠܳܐܕܳܡ ܝܰܬܺܝܪ ܕܰܪܓܳܐ ܣܠܶܩ ܗ̱ܘܳܐ ܕܢܶܒܗܰܬ ܡܶܢ ܕܣܰܚܦܶܗ
14 ܠܦܰܓܪܳܐ ܚܕܳܝܗ̱ܝ ܒܢܰܦܫܳܐ ܠܢܰܦܫܳܐ ܦܰܢܳܗ̇ ܠܦܰܓܪܳܐ ܠܰܚܕ̈ܳܕܶܐ ܢܣܽܘܚܽܘܢ ܕܰܦܪܰܫܘ̱ ܘܰܦܢܰܘ ܘܶܐܬܡܰܙܰܓܘ̱
15 ܡܰܢܥܶܝܗ̇ ܠܢܰܦܫܳܐ ܘܬܶܥܽܘܠ ܠܳܗ̇ ܠܒܰܝܬܳܗ̇ ܢܶܫܬܶܝܢ ܡܰܫܟܢܳܗ̇ ܘܢܰܢܗܰܪ ܒܳܗ̇ ܫܪܳܓܶܗ
16 ܢܶܫܪܳܐ ܢܽܘܗܪܳܐ ܒܥܰܝ̈ܢܰܘܗ̱ܝ ܢܶܥܒܰܪ ܩܳܠܳܐ ܒܶܐܕ̈ܢܰܘܗ̱ܝ ܪ̈ܶܓܫܰܘܗ̱ܝ ܕܰܚܪܶܒܘ̱ ܐܳܦ ܨܳܕܘ̱ ܨܽܘܬܳܐ ܘܫܰܝܢܳܐ ܢܶܬܡܰܠܽܘܢ
17 ܣܰܝܒܽܘܬܳܐ ܣܢܺܝܬܳܐ ܥܠܰܝܗܽܘܢ ܠܳܐ ܡܕܺܝܩܳܐ ܐܳܦ ܠܳܐ ܟܺܐܒ̈ܶܐ ܘܚ̈ܰܫܶܐ ܕܰܫܠܰܚܘ̱ ܐܶܢܽܘܢ ܒܡܰܘܬܳܐ
18 ܥܶܠܬܳܐ ܗܽܘ ܓܶܝܪ ܚܕܰܬܳܐ ܗ̱ܘܳܐ ܡܰܘܬܳܐ ܠܡܺܝ̈ܬܶܐ ܕܰܚܫܳܐ ܒܶܗ ܫܠܚܝܢ ܘܒܶܗ ܫܽܘܒܚܳܐ ܠܳܒܫܺܝܢ
19 ܦܽܘܡܶܗ ܕܡܺܝܬܳܐ ܒܓܰܘ ܥܶܕܶܢ ܗܽܘ ܥܰܡ ܢܰܦܫܳܐ ܡܰܡܠܶܠ ܕܡܶܢ ܐܰܝܟܳܐ ܘܠܰܐܝܟܳܐ ܘܰܐܝܟܰܢ ܐܶܬܺܝܬ ܠܗܳܪܟܳܐ
20 ܨܳܒܰܥ ܠܶܗ ܠܦܰܓܪܳܐ ܢܽܘܗܪܳܐ ܕܬܰܡܳܢ ܒܓܰܘ̈ܢܰܘܗ̱ܝ ܗܳܘܶܐ ܚܳܙܶܐ ܩܢܽܘܡܶܗ ܕܰܐܝܟ ܙܰܠܺܝ̈ܩܶܐ ܡܥܰܛܰܦ
21 ܨܠܺܝܒ ܢܽܘܗܪܳܐ ܕܬܰܡܳܢ ܙܺܝܘܶܗ ܡܒܰܪܶܩ ܥܠܰܝܗܽܘܢ ܕܡܶܢ ܗܳܪܟܳܐ ܪܫܶܡܘ̱ ܗ̱ܘܰܘ ܐ̱ܪܳܙܶܗ ܪܰܒܳܐ ܥܠܰܝܗܽܘܢ
22 ܩܳܪܒܺܝܢ ܥܺܝܪ̈ܶܐ ܕܢܽܘܪܳܐ ܠܘܳܬ ܐ̱ܢܳܫܳܐ ܕܒܶܣܪܳܐ ܒܚܽܘܒܳܐ ܠܗܽܘܢ ܣܰܘܚܺܝܢ ܕܰܥܡܰܠܘ̱ ܘܰܐܢܺܝܚܘ̱ ܢܰܦܫܗܽܘܢ
23 ܩܳܪܒܺܝܢ ܥܺܝܪ̈ܶܐ ܠܡܰܬܢܳܐ ܠܙܰܕܺܝ̈ܩܶܐ ܪܳܗܛܗܽܘܢ ܢܶܨܚ̈ܳܢܰܝܗܽܘܢ ܡܕܰܟܪܺܝܢ ܒܕܺܝܠܗܽܘܢ ܠܗܽܘܢ ܡܰܘܪܒܺܝܢ
24 ܪܺܝܫܺܝܬܳܐ ܕܫܽܘܒܚܳܐ ܕܫܳܪܽܘܬܶܝܢ ܣܶܠܩܳܐ ܡܶܢ ܦܽܘܡ̈ܶܐ ܣܟܺܝܪ̈ܶܐ ܕܒܰܫܝܽܘܠ ܗܳܐ ܚܒܺܝܫܺܝܢ
25 ܫܡܰܥ ܡܰܘܬܳܐ ܨܰܠܰܠܬܳܐ ܨܰܠܳܐ ܐܶܕܢܶܗ ܒܕܶܚܠܳܐ ܢܦܰܠ ܒܶܗ ܪܬܺܝܬܳܐ ܕܰܫܪܶܝܘ ܡܺܝ̈ܬܶܐ ܠܡܳܪܬܳܡ
26 ܫܳܒܩܺܝܢ ܠܶܗ ܚܒܺܝܫ̈ܰܘܗ̱ܝ ܕܡܰܪܕܽܘ ܥܠܰܘܗ̱ܝ ܐܰܣܺܝܪ̈ܰܘܗ̱ܝ ܚܒܽܘܫܳܐ ܚܒܺܝܫܳܐ ܕܚܰܒܫܽܘܗ̱ܝ ܒܰܚܒܽܘܫܬܶܗ
27 ܬܰܘܕܺܝܬܳܐ ܥܰܡܟܽܘܢ ܢܰܫܘܶܝܢ ܡܳܪܰܢ ܕܢܰܣܶܩ ܐܰܘ ܟܺܐܢ̈ܶܐ ܒܪ̈ܺܝܟܶܐ ܕܠܳܐ ܓܳܐܶܙ ܩܳܠܗܽܘܢ
28 ܬܰܘܕܺܝ ܠܡܰܢ ܕܡܰܪܕܶܐ ܢܶܒܥܶܐ ܒܦܽܘܡܳܐ ܣܟܺܝܪܳܐ ܕܢܶܬܶܠ ܫܽܘܒܚܳܐ ܐܰܡܺܝܢܳܐ ܒܰܒܪܳܐ ܠܰܐܒܳܐ ܣܓܺܝܕܳܐ
SEDRA IV

Syriac Lexeme

About This Digital Text
Corpus Text ID:
https://syriaccorpus.org/323
Source:
Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963). Link to Syriaca.org Bibliographic Record
Type of Text: Digital Edition  
Status: Edited  
Publication Date: June 12, 2019
Preparation of Electronic Edition:
TEI XML encoding by James E. Walters.
Syriac text transcribed by Michael Oez.
Open Access and Copyright:

Creative Commons License

 See details...
How to Cite this Electronic Edition
Note:
Ephrem the Syrian, “Nisibis 69” , Digital Syriac Corpus, last modified June 12, 2019, https://syriaccorpus.org/323.
Bibliography:
“Nisibis 69.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/323.

Show Citation Styles
Linked Data