Nisibis 70

https://syriaccorpus.org/324

section : section

line : line

70 Nisibis LXX

ܒ ܒܰܪ ܩܳܠܶܗ

1 ܐܳܘ ܡܳܐ ܡܰܪܺܝܪ ܐܰܚ̈ܰܝ ܟܣܶܐ ܗܳܢܳܐ ܕܡܰܘܬܳܐ ܕܡܰܪܘܶܐ ܐܳܦ ܠܢܰܟ̈ܦܶܐ ܕܢܶܫܬܰܢܽܘܢ ܒܕܶܡ̈ܥܶܐ ܥܽܘܢܺܝܬܳܐ: ܒܪܺܝܟ ܗ̱ܽܘ ܕܡܰܚܶܐ ܠܡܺܝ̈ܬܶܐ

2 ܒܥܽܘܢܕܳܢܶܗ ܕܡܺܝܬܳܐ ܐܳܦ ܝܰܩܺܝܪܳܐ ܡܙܰܕܟܳܐ ܕܢܶܙܕܰܠܰܠ ܘܢܰܝܠܶܠ ܥܰܠ ܚܰܒܺܝܒܶܗ ܕܰܦܪܰܫ

3 ܓܳܥܶܐ ܗܽܘ ܓܶܝܪ ܒܚܽܘܒܶܗ ܗܰܕܳܡܳܐ ܕܦܳܐܶܫ ܥܰܠ ܒܰܪ ܙܰܘܓܶܗ ܕܶܐܬܦܣܶܩ ܘܰܐܘܦܺܝ ܥܝܳܕܶܗ ܘܨܽܘܬܶܗ

4 ܕܠܺܝ̈ܠܰܐ ܗ̱ܘ ܕܕܳܡܶܝܢ ܠܰܐܒܪܳܗܳܡ ܕܥܳܙܺܝ ܕܢܶܬܶܠ ܦܺܐܪܳܐ ܕܪ̈ܰܚܡܰܘܗ̱ܝ ܡܶܛܽܠ ܡܳܪܶܗ ܠܡܰܘܬܳܐ

5 ܗܳܢܰܘ ܥܳܡܽܘܕܝ̱ ܫܪܳܪܳܐ ܕܰܛܥܶܢ ܝܽܘܩܪܳܐ ܒܥܰܡܳܐ ܕܓܰܠܳـ̈ܠܶܐ ܕܚܰܫ̈ܶܐ ܛܰܪܘ̱ ܒܶܗ ܘܠܳܐ ܐܶܙܕܰܥܙܰܥ ܫܪܳܪܶܗ

6 ܗܳܐ ܦܳܠܚܳܐ ܕܟܰܕ ܚܙܳܐ ܦܺܐܪܳܐ ܒܣܰܬܶܗ ܥܩܰܪܬܳܐ ܣܓܽܘܠܳܐ ܕܰܗܘܳܐ ܠܢܽܘܓܪܳܐ ܐܰܝܟ ܪܺܝܫܺܝܬܳܐ ܩܰܪܒܶܗ

7 ܘܰܕܢܶܦܬܰܚ ܬܽܘܒ ܬܡܺܝܗܳܐ ܗ̱ܝ ܦܳܠܚܳܐ ܕܩܰܛܦܳܗ̇ ܠܛܽܘܛܺܝܬܳܐ ܕܰܒܥܶܠܰܬ ܠܡܳܪܶܐ ܟܰܪܡܳܐ ܩܰܪܒܳܗ̇ ܀܀܀

8 ܙܟܳܐ ܩܰܪܒܶܗ ܠܪ̈ܳܚܡܰܘܗ̱ܝ ܘܰܥܼܨܳܐ ܚܽܘܒܶܗ ܘܰܐܣܩܳܗ̇ ܘܠܳܐ ܐܶܫܬܰܢܺܝ ܒܚܰܫܶܗ ܕܗܰܝܡܳܢܽܘܬܶܗ ܣܡܰܟܬܶܗ

9 ܚܰܡܪܶܗ ܓܶܝܪ ܕܡܰܘܬܳܐ ܬܶܛܪܶܐ ܗ̱ܘ ܕܰܕܠܺܝܚ ܒܚܰܫܳܐ ܒܕܶܡ̈ܥܶܐ ܡܰܪܘܶܐ ܚܰܪ̈ܺܝܦܰܘܗ̱ܝ ܘܠܰܙܡ̈ܺܝܢܰܘܗ̱ܝ ܒܒܶܟܝܳܐ

10 ܛܳܒ ܗܳܟܺܝܠ ܡܒܰܝܰܐ ܛܽܘܦܣܶܗ ܪܰܒܳܐ ܕܢܶܦܬܰܚ ܕܰܒܣܰܝܦܳܐ ܩܰܪܒܳܗ̇ ܣܺܝܡܰܬ ܚܰܝ̈ܶܐ ܠܡܳܪܳܗ̇

11 ܝܰܡܺܝܢܶܗ ܦܫܰܛ ܗ̱ܘܳܐ ܢܶܦܬܰܚ ܘܰܐܣܶܩ ܕܶܒܚܬܳܐ ܝܰܘܢܳܐ ܚܙܳܬܶܗ ܕܰܐܟܪܺܝ ܘܰܠܒܳܒܬܶܗ ܒܩܳܠܳܗ̇

12 ܝܳܐܶܐ ܗ̱ܘܳܐ ܟܳܗܢܳܐ ܕܟܳܗܶܢ ܒܰܕܡܳܐ ܕܡܶܢܶܗ ܕܢܶܗܘܶܐ ܛܽܘܦܣܳܐ ܠܡܳܪܶܗ ܕܟܳܗܶܢ ܒܰܕܡܳܐ ܕܢܰܦܫܶܗ

13 ܟܽܠ ܡܰܢ ܕܰܪܘܳܐ ܒܚܽܘܒܳܐ ܘܰܙܟܳܐ ܒܪܶܚܡܰܬ ܫܪܳܪܳܐ ܐܰܝܟ ܕܰܒܚܶܠܡܰܐ ܗ̱ܘ ܚܳܙܶܐ ܠܚܰܒܺܝܒܶܗ ܕܰܥܢܰܕ

14 ܀܀܀ ܠܚܰܒܪܶܗ ܓܶܝܪ ܒܚܶܠܡܶܗ ܓܕܰܫ ܚܳܙܶܐ ܕܡܳܐܶܬ ܘܐܶܬܳܐ ܨܰܦܪܳܐ ܘܒܰܝܐܶܗ ܡܶܢ ܟܰܪܝܽܘܬܶܗ ܕܚܶܠܡܳܐ

15 ܡܳܐ ܕܳܡܶܐ ܠܶܗ ܥܰܢܺܝܕܳܐ ܠܗܰܘ ܕܰܡܟܳܐ ܫܟܺܝܒܳܐ ܘܕܳܡܶܐ ܡܰܘܬܳܐ ܠܚܶܠܡܳܐ ܐܳܦ ܢܽܘܚܳܡܳܐ ܠܨܰܦܪܳܐ

16 ܢܶܕܢܰܚ ܒܰܢ ܫܪܳܪܳܐ ܒܰܕܡܽܘܬ ܢܽܘܗܪܳܐ ܒܥܰܝܢܳܐ ܘܗܳܐ ܚܙܰܝܢܳܝܗ̱ܝ ܠܡܰܘܬܳܐ ܕܰܐܝܟ ܣܽܘܪܳܕܰܐ ܗ̱ܘ ܕܚܶܠܡܳܐ

17 ܣܟܼܰܠ ܓܶܝܪ ܐܰܝܢܳܐ ܕܚܳܙܶܐ ܫܶܢܬܳܐ ܕܠܰܝܬܶܝܗ̇ ܠܨܰܦܪܳܐ ܘܰܢܣܰܒܰܪ ܥܠܰܘܗ̱ܝ ܕܡܰܘܬܳܐ ܕܫܶܢܬܳܐ ܠܥܳܠܰܡ ܬܩܰܘܶܐ

18 ܥܰܝܢܳܐ ܕܣܰܒܪܳܐ ܐܶܢ ܩܳܢܶܐ ܡܨܶܐ ܚܙܳܐ ܠܳܗ̇ ܒܟܰܣܝܳܐ ܠܗܳܝ ܫܶܢܬܶܗ ܕܡܰܘܬܳܐ ܕܰܒܗܰܘ ܨܰܦܪܳܐ ܒܶܛܠܳܐ

19 ܦܪܰܚ ܪܺܝܚܶܗ ܬܡܺܝܗܳܐ ܕܗܰܘ ܓܰܙܳܐ ܕܚܰܝ̈ܶܐ ܒܦܰܓܪܳܐ ܒܰܝܬܳܗ̇ ܕܢܰܦܫܳܐ ܕܢܶܦܩܰܬ ܡܶܢܶܗ ܘܶܐܬܢܕܶܕ

20 ܨܶܒ̈ܬܰܘܗ̱ܝ ܣܰܓܺܝ̈ܐܺܝܢ ܘܫܽܘܦܪ̈ܰܘܗ̱ܝ ܀܀܀ ܕܗܰܝܟܰܠ ܚܽܘܒܰܐ ܗ̱ܘ ܕܪܽܘܚܳܐ ܡܶܫܬܰܝܰܢ ܕܰܨܕܳܐ ܘܰܗܘܳܐ ܡܰܫܟܶܢ ܫܠܳܡܳܐ

21 ܩܳܠ ܫܺܝܦܽܘܪܳܐ ܡܰܝܒܶܒ ܠܟܶܢ̈ܫܶܐ ܫ̈ܠܰܝܳܐ ܕܩܽܘܡܘ̱ ܙܰܡܰܪܘ̱ ܘܫܰܒܰܚܘ̱ ܩܕܳܡ ܚܰܬܢܳܐ ܒܩܳܠܳܐ

22 ܪܰܘܒܳܐ ܗ̱ܘܳܐ ܒܦܽܘܡ̈ܶܐ ܕܡܶܬܦܰܬܚܺܝܢ ܩܰܒܪ̈ܶܐ ܚܰܕ ܠܚܰܕ ܠܥܶܙ ܒܡ̈ܰܢܰܘܗ̱ܝ ܫܽܘܒܚܳܐ ܝܰܗ̱ܒ ܒܩ̈ܳܠܰܘܗ̱ܝ

23 ܫܽܘܒܚܳܐ ܠܳܟ ܕܰܐܘܪܶܒܬ ܠܳܐܕܳܡ ܟܰܕ ܕܟܶܐ ܗ̱ܘܳܐ ܠܳܟ ܫܽܘܒܚܳܐ ܕܒܰܫܝܽܘܠ ܡܰܟܶܟܬܳܝܗ̱ܝ ܕܶܐܬܬܪܺܝܡ

24 ܬܰܘܕܺܝ ܠܡܰܢ ܕܡܰܟܶܟ ܘܬܰܘܕܺܝ ܠܡܰܢ ܕܢܰܚܶܡ ܘܳܐܦ ܟܶܢܳܪܝ̱ ܢܫܰܒܰܚ ܒܢܽܘܚܳܡܶܗ ܠܡܳܪܶܗ

How to Cite this Electronic Edition

Note:

Ephrem the Syrian, “Nisibis 70” , Digital Syriac Corpus, last modified June 12, 2019, https://syriaccorpus.org/324.

TEST2

Bibliography:

“Nisibis 70.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/324.

Show Citation Styles

SEDRA IV

Syriac Lexeme

About This Digital Text

Corpus Text ID:

https://syriaccorpus.org/324

NHSL Work ID(s):

http://syriaca.org/work/8803
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).

Link to Syriaca.org Bibliographic Record

Type of Text: Digital Edition

Status: Edited

Publication Date: June 12, 2019

Preparation of Electronic Edition:

TEI XML encoding by James E. Walters.
Syriac text transcribed by Michael Oez.

Open Access and Copyright:

See details...