Nisibis 71

https://syriaccorpus.org/325

section : section

line : line

71 Nisibis LXXI

ܕܢܽܘܚܳܡܳܐ ܥܰܠ ܩܳܠܳܐ ܕܰܚܺܝ ܗܳܒܶܝܠ ܘܰܩܛܺܝܠ ܩܳܐܶܝܢ

1 ܪܽܘܚܳܐ ܒܕܰܘܺܝܕ ܐܶܡܪܰܬ ܗ̱ܘܳܬ ܕܶܐܦܪܽܘܥ ܐܶܢܽܘܢ ܥܰܒܕ̈ܰܝܗܽܘܢ ܠܡܽܘܫܶܐ ܘܠܰܐܗܪܽܘܢ ܘܠܰܫܡܽܘܐܶܝܠ ܠܶܐ ܐܶܡܪܰܬ ܕܦܶܪܥܰܬ ܐܶܢܽܘܢ ܀܀܀ ܐܶܠܳܐ ܗܳܝ ܕܶܐܦܪܽܘܥ ܐܶܢܽܘܢ ܒܪܺܝܟ ܗ̱ܽܘ ܕܰܒܩܰܠܺܝܠ ܐܶܕܢܰܚ ܬܶܫܒܽܘܚܬܳܐ ܕܢܽܘܚܳܡܰܝ̈ܗܽܘܢ ܥܽܘܢܺܝܬܳܐ: ܒܪܺܝܟ ܕܰܒܟܺܐܢ̈ܶܐ ܐܳܦ ܒܰܢܒܺܝ̈ܶܐ ܨܳܪ ܗ̱ܘܳܐ ܐ̱ܪܳܙܳܐ ܕܚܰܝܰܬ ܡܺܝ̈ܬܶܐ

2 ܢܽܘܚ ܘܺܐܝܽܘܒ ܘܕܳܢܺܝܐܶܝܠ ܚܰܘܺܝ ܢܒܺܝܳܐ ܕܚܰܝ̈ܺܝܢ ܐܶܢܽܘܢ ܐܶܢ ܡܶܣܬܰܟܰܠ ܫܳܡܽܘܥܳܐ ܐܶܢ ܙܰܕܺܝ̈ܩܶܐ ܐܺܝܬܰܝܗܽܘܢ ܘܢܰܦܫ̈ܳܬܗܽܘܢ ܡܨܶܝܢ ܕܰܢܦܰܨܽܘܢ ܐܳܦ ܡܶܢ ܡܰܘܬܳܐ ܡܶܬܦܰܪܩܺܝܢ ܘܡܶܢܳܗ̇ ܕܰܫܝܽܘܠ ܡܶܬܦܰܨܶܝܢ

3 ܡܳܢܳܐ ܓܶܝܪ ܬܰܘܬܰܪ ܐܶܢܽܘܢ ܙܰܕܺܝܩܽܘܬܗܽܘܢ ܠܰܪ̈ܕܺܝܦܶܐ ܐܶܢܗܽܘ ܕܡܺܝ̈ܬܶܐ ܠܳܐ ܚܳܐܶܝܢ ܕܣܰܟܠܳܐ ܗ̱ܝ ܗܳܕܶܐ ܕܢܶܬܩܰܛܠܽܘܢ ܚܠܳܦ ܐܰܠܳܗܳܐ ܕܠܳܐ ܡܰܚܶܐ ܘܰܕܛܳܠܶܡ ܟܺܐܢܳܐ ܚܽܘܒ̈ܠܰܝܗܽܘܢ ܘܰܗܘܰܘ ܒܰܫܝܽܘܠ ܐܰܝܟ ܟܽܠ ܐ̱ܢܳܫ

4 ܐܶܢ ܢܩܽܘܡ ܡܽܘܫܶܐ ܘܰܫܡܽܘܐܶܝܠ ܒܗܳܕܶܐ ܚܰܘܺܝ ܕܚܰܝ̈ܺܝܢ ܐܶܢܽܘܢ ܐܰܝܟ ܣܽܘܟܳܠܶܗ ܕܩܶܪܝܳܢܳܐ ܘܡܳܢܳܐ ܠܳܐܶܐ ܒܚ̈ܰܛܳܝܶܐ ܐܶܢ ܙܰܕܺܝ̈ܩܶܐ ܠܳܐ ܚܰܝܺܝܢ ܘܡܳܢܳܐ ܠܳܐܶܐ ܒܰܣܪ̈ܺܝܚܶܐ ܐܶܢ ܢܰܟܦܳܐ ܠܳܐ ܡܶܬܢܰܚܰܡ

5 ܚܢܽܘܟ ܚܝܳܐ ܡܶܛܽܠ ܐܳܕܳܡ ܕܠܳܐ ܢܶܦܣܽܘܩ ܣܰܒܪܶܗ ܕܫܰܡܰܥ ܕܡܶܢ ܥܰܦܪܳܐ ܐܰܢ̱ܬ ܘܠܶܗ ܬܶܗܦܽܘܟ ܘܕܰܢܚܰܘܶܐ ܕܰܡܨܶܐ ܗܽܘ ܦܰܓܪܳܐ ܕܢܺܚܶܐ ܠܥܳܠܰܡ ܥܰܡ ܢܰܦܫܳܐ ܒܪܺܝܟ ܗ̱ܽܘ ܕܒܰܚܢܽܘܟ ܐܰܣܓܺܝ ܠܶܗ ܒܽܘܝܳܐܳܐ ܠܰܐܒܽܘܢ ܐܳܕܳܡ

6 ܠܶܐܠܺܝܳܐ ܦܪܰܥ ܒܰܫܡܰܝܳܐ ܕܠܳܐ ܢܣܰܒܰܪ ܥܰܡܳܐ ܝܰܥܢܳܐ ܕܒܰܐܪܥܰܐ ܗ̱ܘ ܒܰܠܚܽܘܕ ܦܽܘܪܥܳܢܳܐ ܠܶܐܪܰܡܝܳܐ ܒܓܽܘܒܳܐ ܛܰܠܡܶܗ ܕܢܶܪܢܽܘܢ ܕܰܐܝܟܳܐ ܦܳܪܰܥ ܠܶܗ ܕܰܘܶܕ ܐܶܢܽܘܢ ܕܰܢܩܽܘܡܽܘܢ ܥܰܠ ܦܽܘܪܥܳܢܳܐ ܫܰܪܺܝܪܳܐ

7 ܐܶܢ ܢܽܘܚܳܡܳܐ ܠܳܐ ܗܳܘܶܐ ܕܡܶܗ ܕܗܳܒܶܝܠ ܡܳܢܳܐ ܐܰܘܬܰܪ ܕܥܰܠ ܩܳܛܽܘܠܶܗ ܓܳܥܶܐ ܗ̱ܘܳܐ ܩܽܘܪܒܳܢܳܐ ܕܩܰܪܶܒ ܩܰܛܠܶܗ ܕܰܬܫܰܥܡܳܐܐ ܫܢܺܝ̈ܢ ܚܳܝܶܐ ܗ̱ܘܳܐ ܐܶܢ ܚ̈ܰܝܶܐ ܚ̈ܕܰܬܳܐ ܠܳܐ ܐܺܝܬ ܠܡܳܢܳܐ ܐܰܘܒܶܕ ܩܰܪ̈ܺܝܒܶܐ

8 ܠܡܰܘܬܳܐ ܝܰܥܢܳܐ ܠܳܐ ܝܰܗ̱ܒ ܠܶܗ ܡܺܝܬܳܐ ܚܰܛܳܝܳܐ ܠܽܘܩܕܰܡ ܕܠܳܐ ܢܟܽܘܡ ܥܠܰܘܗ̱ܝ ܟܺܐܢܳܐܺܝܬ ܒܰܠܥܶܗ ܠܟܺܐܢܳܐ ܫܳܪܽܘܝܳܐ ܕܢܶܓܥܰܡ ܒܶܗ ܢܽܘܚܳܡܳܐ ܕܡܳܐ ܕܕܳܐܶܠ ܟܺܐܢܳܐ ܩܰܕܡܳܐ ܡܰܘܬܳܐ ܡܶܢ ܟܽܠ ܢܶܣܬܰܦܰܩ

9 ܒܪܺܝܟ ܗ̱ܽܘ ܕܝܰܗ̱ܒ ܠܳܗ̇ ܠܰܐܬܳܢܳܐ ܡܶܠܬܳܐ ܓܠܺܝܬܳܐ ܐܰܝܟ ܙܶܩܬܳܐ ܕܬܶܡܚܶܐ ܠܡܳܪܳܗ̇ ܥܰܠ ܕܰܡܚܳܗ̇ ܀܀܀ ܟܽܘܕܰܢܝܳܐ ܣܰܟܠܳܐ ܕܰܚܙܳܐ ܟܰܪܝܳܐ ܕܟܶܣܦܳܐ ܘܶܐܫܬܺܝܚܳܢ ܠܳܐ ܢܶܬܕܰܡܶܐ ܠܰܒܥܺܝܪܳܐ ܘܢܶܦܣܽܘܩ ܣܰܒܪܳܐ ܕܢܽܘܚܳܡܰܢ

10 ܐܰܚ̈ܶܐ ܫܰܒܥܳܐ ܕܶܐܬܢܰܟܰܣܘ̱ ܐܰܝܟ ܐܶܡܪ̈ܶܐ ܒܶܝܬ ܛܰܒ̈ܳܚܶܐ ܐܰܝܟܳܐ ܢܶܒܥܽܘܢ ܚܰܝ̈ܰܝܗܽܘܢ ܥܰܠ ܐܰܝܕܳܐ ܬܰܢܘܰܝ ܐܰܣܠܺܝܘ ܐܳܦ ܕܳܫ̈ܢܶܐ ܐܳܦ ܫܽܘ̈ܘܕܳܝܶܐ ܒܪܺܝܟ ܕܒܰܪܬܳܐ ܝܳܗܶܒ ܠܳܗ̇ ܠܰܫܡܽܘܢܺܝ ܟܠܺܝܠܳܐ ܕܰܒܢܶܝ̈ܗ̇

11 ܐܶܢ ܢܒܰܝܰܐ ܣܳܒܳܐ ܗܰܝܡܶܢ ܕܒܶܝܬ ܓܰܪ̈ܡܶܐ ܠܓܰܪ̈ܡܶܐ ܦܳܪܶܫ ܝܽܘܫܺܝܳܐ ܐܰܝܟ ܕܰܝܳܢܳܐ ܗܳܐ ܐ̱ܪܙܳܐ ܪܰܒܳܐ ܐܰܚ̈ܰܝ ܕܳܐܬܶܐ ܡܳܪܰܢ ܘܰܡܢܰܚܶܡ ܘܰܡܦܰܪܶܫ ܣܽܘܥܪ̈ܳܢܰܝܗܽܘܢ ܕܥܰܢܺܝ̈ܕܶܐ ܥܰܡ ܓܰܪ̈ܡܰܝܗܽܘܢ

12 ܐܶܢ ܢܽܘܚܳܡܳܐ ܠܳܐ ܗܳܘܶܐ ܡܳܢܳܐ ܐܰܘܬܰܪ ܝܽܘܫܺܝܳܐ ܕܝܰܩܰܪ ܓܰܪ̈ܡܰܘܗ̱ܝ ܕܰܢܒܺܝܳܐ ܬܰܒܪܶܗ ܐܰܪܝܳܐ ܟܰܕ ܡܰܪܓܶܫ ܘܶܐܬܝܰܩܰܪ ܟܰܕ ܠܳܐ ܡܰܪܓܶܫ ܓܰܪ̈ܡܶܐ ܢܛܺܝܪ̈ܶܐ ܕܰܢܒܺܝܳܐ ܒܐ̱ܪܳܙ ܐܰܟܪܶܙܘ̱ ܥܰܠ ܢܽܘܚܳܡܳܐ

13 ܐܰܪܝܳܐ ܕܩܰܛܠܶܗ ܗ̱ܘܳܐ ܠܰܢܒܺܝܳܐ ܠܳܐ ܩܰܛܠܳܗ̇ ܗ̱ܘܳܐ ܠܰܐܬܳܢܳܐ ܕܠܰܘ ܦܽܘܩܕܳܢܳܐ ܫܛܳܬ ܗ̱ܘܳܬ ܒܗܳܝ ܐܰܬܳܢܳܐ ܕܶܐܬܢܰܛܪܰܬ ܀܀܀ ܬܺܐܠܰܦ ܚܰܘܳܐ ܕܶܐܬܩܰܛܠܰܬ ܕܦܽܘܩܕܳܢܳܐ ܕܫܳܛܰܬ ܩܰܛܠܳܗ̇ ܠܳܐ ܓܶܝܪ ܥܽܘܠ ܕܰܝܳܢܳܐ

14 ܗܰܘ ܕܰܐܦܶܣ ܠܰܐܪܝܳܐ ܝܰܥܢܳܐ ܘܬܰܒܪܶܗ ܠܰܢܒܺܝܳܐ ܟܰܦܢܳܐ ܕܒܡܟܽܘܠܬܳܐ ܐܶܫܬܕܶܠ ܦܩܰܕ ܠܶܗ ܠܡܰܘܬܳܐ ܕܶܐܬܟܦܶܢ ܘܒܰܠܥܶܗ ܠܳܐܕܳܡ ܕܐܶܬܝܰܥܰܢ ܡܰܘܬܳܐ ܘܰܐܪܝܳܐ ܡܶܬܒܰܛܰܠ ܢܒܺܝܳܐ ܘܳܐܕܳܡ ܡܶܬܢܰܚܰܡ

15 ܘܶܐܢ ܗܰܘ ܚܰܪܫܳܐ ܕܠܳܐ ܐܶܕ̈ܢܶܐ ܡܰܕܒܚܳܐ ܕܰܥܒܰܕ ܝܽܘܪܒܳܥܳܡ ܫܡܰܥ ܗ̱ܘܳܐ ܩܳܠܶܗ ܕܰܢܒܺܝܳܐ ܨܪܳܐ ܥܽܘܒܶܗ ܘܶܐܫܰܕ ܩܰܛܡܳܐ ܒܐ̱ܪܳܙܶܗ ܩܰܒܪ̈ܶܐ ܡܶܨܛܰܪ̈ܝܳܢ ܕܶܐܢ ܟܺܐܦ̈ܶܐ ܫܡܰܥ ܠܰܢܒܺܝܳܐ ܫܳܡܥܺܝܢ ܠܶܗ ܓܰܪ̈ܡܶܐ ܠܰܒܪܳܐ

16 ܗܳܐ ܐ̱ܪܳܙܳܐ ܒܢܽܘܢܳܐ ܐܰܚ̈ܰܝ ܕܚܰܝ ܗ̱ܘܳܐ ܝܰܘܢܳܢ ܠܰܐܠܳܗܳܐ ܟܰܕ ܡܺܝܬ ܗ̱ܘܳܐ ܠܰܒ̈ܢܰܝ ܐ̱ܢܳܫܳܐ ܐܳܦ ܡ̈ܺܝܬܶܐ ܠܰܢ ܡܳܝܬܺܝܢ ܐܶܢܽܘܢ ܟܰܕ ܚܰܝܺܝܢ ܠܰܐܠܳܗܽܘܬܳܐ ܘܚܰܒܺܝܒܰܢ ܕܰܥܡܰܕ ܒܰܫܝܽܘܠ ܐܰܝܟ ܝܰܘܢܳܢ ܢܒܰܓ ܡܶܢܳܗ̇

17 ܢܦܰܠ ܚܰܝܳܐ ܒܝܰܡܳܐ ܡܺܝܬܳܐ ܘܡܰܠܳܠܳܐ ܒܓܽܘܒܳܐ ܚܬܺܝܡܳܐ ܘܰܦܟܺܝܪ̈ܶܐ ܒܢܽܘܪܳܐ ܫܪܺܝܬܳܐ ܝܰܡܳܐ ܘܓܽܘܒܳܐ ܘܰܐܬܽܘܢܳܐ ܥܶܪ̈ܒܶܐ ܠܡ̈ܺܝܬܶܐ ܗܳܘܶܝܢ ܕܗܳܟܰܢ ܥܳܢܶܝܢ ܡܶܢ ܟܽܠ ܕܽܘܟ ܡܳܐ ܕܩܳܪܶܐ ܠܰܢ ܢܽܘܚܳܡܳܐ

How to Cite this Electronic Edition

Note:

Ephrem the Syrian, “Nisibis 71” , Digital Syriac Corpus, last modified June 12, 2019, https://syriaccorpus.org/325.

TEST2

Bibliography:

“Nisibis 71.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/325.

Show Citation Styles

SEDRA IV

Syriac Lexeme

About This Digital Text

Corpus Text ID:

https://syriaccorpus.org/325

NHSL Work ID(s):

http://syriaca.org/work/8804
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).