Nisibis 72

https://syriaccorpus.org/326

TEI/XML Text

Show

section : section

line : line

Table of Contents

1 2 3 4 5 6 7 8 9 10 11 12 13 14 15 16 17 18 19

72 Nisibis LXXII

ܒ ܡܶܢܶܗ ܒܰܪ ܩܳܠܶܗ

1 ܫܡܰܥܘ̱ ܘܶܐܬܒܰܝܰܐܘ̱ ܡܳܝ̈ܽܘܬܳܐ ܕܰܗܘܳܐ ܢܽܘܢܳܐ ܪܰܒ ܒܰܝܬܳܐ ܢܣܰܒ ܘܰܢܛܰܪ ܘܰܦܢܺܝ ܘܝܰܗ̱ܒ ܗܳܟܰܢ ܝܳܗܶܒ ܚܽܘܫܒܳܢܳܐ ܡܰܘܬܳܐ ܪܰܒ ܒܰܝܬܳܐ ܕܰܫܝܽܘܠ ܕܟܰܕ ܐܰܚܺܝ ܡܳܪܰܢ ܡܺܝ̈ܬܶܐ ܐܳܦ ܬܶܡܪ̈ܶܐ ܕܥ̈ܰܝܢܶܐ ܬܰܒܥܶܗ ܥܺܘܢܺܝܬܳܐ: ܠܳܟ ܬܶܫܒܽܘܚܬܳܐ ܡܰܠܟܳܐ ܡܫܺܝܚܳܐ ܡܢܳܕ ܕܰܡ̈ܟܶܐ ܒܩܳܠ ܫܽܝܦܽܘܪܶܗ

2 ܐܶܢܗܽܘ ܕܨܳܦܽܘܪܳܐ ܓܶܙܪܰܬ ܒܰܓܙܽܘܪܬܳܐ ܕܙܰܒܢܳܐ ܠܰܒܪܳܗ̇ ܘܰܒܛܶܠ ܡܰܘܬܳܐ ܒܰܓܙܽܘܪܬܳܐ ܟܡܳܐ ܝܰܬܺܝܪ ܒܛܶܠ ܡܰܘܬܳܐ ܒܡܰܥܡܽܘܕܺܝܬܳܐ ܕܰܫܪܳܪܳܐ ܕܰܐܝܢܳܐ ܕܰܥܡܰܕ ܒܰܡܫܺܝܚܳܐ ܠܰܒܫܶܗ ܠܚܰܝܳܐ ܡܰܚܶܐ ܟܽܠ

3 ܀܀܀ ܐܰܝܟܰܢ ܛܳܠܶܡ ܐܰܠܳܗܳܐ ܠܰܐܒܪܳܗܳܡ ܒܳܬܰܪ ܡܰܘܬܶܗ ܐܰܘ ܚܽܘܒܶܗ ܐܰܘ ܙܶܕܩ̈ܳܬܶܗ ܘܰܐܝܟܰܢ ܛܳܠܶܡ ܠܶܗ ܠܺܐܝܣܚܳܩ ܦܰܟܪ̈ܶܐ ܕܺܐܝܕ̈ܰܘܗ̱ܝ ܘܰܕܪ̈ܶܓܠܰܘܗ̱ܝ ܘܣܰܟܺܝܢܳܐ ܕܰܚܙܳܬ ܥܰܝܢܶܗ ܕܰܥܠܰܘܗ̱ܝ ܡܶܢ ܫܶܠܝ̱ ܐܶܫܬܰܡܛܰܬ

4 ܐܰܝܟܰܢ ܛܳܠܶܡ ܠܰܢܒ̈ܺܝܶܐ ܕܰܐܝܟ ܐܶܡܪ̈ܶܐ ܓܙܳܪ̈ܺܝܢ ܓܙܳܪ̈ܺܝܢ ܐܶܬܚܰܪܰܫܘ̱ ܒܰܛܝܳܪ̈ܰܝܗܽܘܢ ܕܺܐܝܙܒܶܠ ܕܐܒܬܐ ܕܰܢܒ̈ܺܝܶܐ ܚܶܪܫܰܬ ܐܶܢܽܘܢ ܠܰܢܒ̈ܺܝܶܐ ܘܡܳܐܐ ܢܒܺܝܺܝ̈ܢ ܕܶܐܬܦܰܠܰܛܘ̱ ܒܟܰܦܢܳܐ ܘܨܰܗܝܳܐ ܐܶܫܬܰܢܰܩܘ̱

5 ܐܳܦ ܠܠܽܘܛ ܐܰܝܟܰܢ ܛܳܠܶܡ ܕܬܰܪ̈ܬܰܝܗܶܝܢ ܒ̈ܢܳܬܶܗ ܝܰܗ̱ܒ ܗ̱ܘܳܐ ܚܠܳܦ ܩܰܕܺܝ̈ܫܶܐ ܕܥܰܠܘ̱ ܨܶܐܕܰܘܗ̱ܝ ܡܶܢ ܦܽܘܡܳܐ ܕܢܽܘܪܳܐ ܦܰܪܩܶܗ ܘܰܒܦܽܘܡܳܐ ܕܰܫܝܽܘܠ ܫܕܳܝܗ̱ܝ ܘܡܳܢܳܐ ܡܰܘܬܰܪ ܦܽܘܨܳܝܳܐ ܐܶܢ ܢܽܘܚܳܡܳܐ ܠܳܐ ܗܳܘܶܐ

6 ܗܳܐ ܚܙܺܝ ܥܰܘ̈ܳܠܶܐ ܕܰܚܢܺܝܩܺܝܢ ܘܰܢܒܺܝ̈ܶܐ ܬܽܘܒ ܕܰܢܟܺܝܣܺܝܢ ܘܰܒ̈ܢܰܝ ܐܺܝܽܘܒ ܕܰܛܡܺܝܪ̈ܺܝܢ ܘܰܐܚ̈ܶܐ ܫܰܒܥܳܐ ܕܰܢܫܺܝܛܺܝܢ ܥܰܡ ܣܰܓܺܝ̈ܐܶܐ ܕܰܪܓܺܝܡܺܝܢ ܐܰܝܟܰܢ ܛܠܶܡ ܐܰܠܳܗܳܐ ܗܳܠܶܝܢ ܟܽܠܗܽܘܢ ܢܶܨ̈ܚܳܢܶܐ

7 ܘܰܐܢ̱ܬ ܕܽܘܢ ܒܢܰܦܫܳܟ ܕܰܐܝܟܰܢܳܐ ܡܨܰܠܶܐ ܦܽܘܡܳܟ ܠܰܐܠܳܗܳܐ ܕܦܳܪܽܘܥܰܐ ܗ̱ܘ ܐܰܘ ܛܳܠܽܘܡܰܐ ܗ̱ܘ ܐܶܢ ܛܳܠܽܘܡܰܐ ܗ̱ܘ ܠܳܐ ܬܳܠܐܶܐ ܘܶܐܢ ܦܳܪܽܘܥܰܐ ܗ̱ܘ ܠܳܐ ܬܶܫܠܶܐ ܐܰܓܪܳܐ ܬܳܒܰܥ ܕܰܐܓܺܝܪܳܐ ܘܛܳܠܶܡ ܐܰܓܪܳܐ ܕܰܨܠܽܘܬܳܐ

8 ܘܶܐܢ ܗܳܪܟܳܐ ܠܚܽܘܕ ܦܳܪܰܥ ܠܳܟ ܚܰܪܬܳܐ ܒܺܝܫܬܳܐ ܛܰܝܶܒ ܠܳܟ ܕܢܽܘܚܳܡܳܐ ܠܳܐ ܥܳܒܶܕ ܠܳܟ ܐܳܦ ܠܳܐ ܗܳܪܟܳܐ ܦܳܪܰܥ ܠܳܟ ܕܟܽܠܶܗ ܥܽܘܡܪܳܟ ܬܽܘܢܳܢܰܐ ܗ̱ܘ ܘܠܳܐ ܗܳܘܶܐ ܡܶܕܶܡ ܝܰܬܺܝܪ ܐܰܢ̱ܬ ܠܰܐܠܳܗܳܐ ܡܶܢ ܚ̈ܰܛܳܝܶܐ

9 ܚܠܺܝܨ ܗ̱ܽܘ ܡܶܢܳܟ ܓܰܝܳܣܳܐ ܘܛܽܘܠܺܝܩ ܡܶܢܳܟ ܓܰܢܳܒܳܐ ܘܰܡܢܳܚ ܡܶܢܳܟ ܙܰܢܳܝܳܐ ܘܰܚܠܺܝܡ ܡܶܢܳܟ ܚܰܛܳܝܳܐ ܘܟܳܗܶܝܢ ܡܶܢܳܟ ܪܰܫܺܝܥܳܐ ܘܶܐܢ ܢܽܘܚܳܡܳܐ ܠܳܐ ܗܳܘܶܐ ܣܪܺܝܩ ܗ̱ܽܘ ܪܶܗܛܳܟ ܚܰܠܳܫܳܐ

10 ܘܶܐܢ ܒܗܳܠܶܝܢ ܚ̈ܰܝܶܐ ܚܬܺܝܪܰܬ ܚܶܘܝܳܐ ܚܰܝܳܐ ܛܳܒ ܡܶܢܳܟ ܘܝܰܬܺܝܪ ܡܶܢܳܟ ܬܰܢܺܝܢܳܐ ܚ̈ܳܠܡܺܝܢ ܡܶܢܳܟ ܚܰܝ̈ܘܳܬܳܐ ܘܢܶܫܪ̈ܶܐ ܡܶܢܳܟ ܩܰܠܺܝܠܺܝܢ ܘܰܐܪ̈ܝܰܘܳܬܳܐ ܥܰܙܺܝܙܺܝܢ ܘܡܳܢܳܐ ܚܬܺܝܪ ܐܰܢ̱ܬ ܐܰܘ ܣܰܟܠܳܐ

11 ܐܶܫܬܰܥܳܐ ܠܰܢ ܚܰܠܳܫ ܡܳܢܰܘ ܐܰܓܪܳܐ ܕܰܨܠܽܘܬܳܟ ܘܦܽܘܪܥܳܢܶܗ ܕܨܰܘܡܳܟ ܡܰܢܽܘ ܢܶܕܪܰܟ ܬܽܘܟܰܐ ܗ̱ܘ ܝܰܬܺܝܪܳܐ ܐܳܦ ܩܽܘܪܒܳܢܳܟ ܚܽܘܣܪܳܢܰܐ ܗ̱ܘ ܘܶܐܢ ܢܽܘܚܳܡܳܐ ܠܳܐ ܗܳܘܶܐ ܫܰܘܝܰܬ ܗܽܘ ܒܰܫܝܽܘܠ ܥܰܡ ܟܽܠܢܳܫ

12 ܘܶܐܢ ܡܶܢ ܣܰܝܦܳܐ ܕܳܚܶܠ ܐܰܢ̱ܬ ܕܠܳܐ ܬܶܩܛܽܘܠ ܕܰܠܡܳܐ ܬܺܐܒܰܕ ܘܠܳܐ ܬܶܓܢܽܘܒ ܕܰܠܡܳܐ ܬܺܐܩܰܕ ܘܗܳܐ ܕܰܝܳܢܳܟ ܒܰܪ ܐ̱ܢܳܫܰܐ ܗ̱ܘ ܘܰܡܨܶܐ ܒܫܽܘܚܕܳܐ ܩܳܛܶܠ ܠܳܟ ܐܰܝܟ ܡܳܐ ܕܰܩܛܰܠ ܙܰܟ̈ܳܝܶܐ ܘܰܗܦܰܟ ܙܰܟܺܝ ܠܚ̈ܰܝܳܒܶܐ

13 ܟܰܕ ܬܽܘܒ ܩܰܝܳܡ ܫܽܘܐܳܠܳܐ ܕܶܐܢ ܡܶܢ ܐܰܠܳܗܳܐ ܐܺܝܬܰܘܗ̱ܝ ܢܳܡܽܘܣܳܐ ܘܕܺܝܢܳܐ ܟܺܐܢܳܐ ܐܰܝܟܰܢ ܫܶܦܪܰܬ ܠܰܐܠܳܗܳܐ ܟܺܐܢܽܘܬܳܐ ܕܰܡܠܶܐ ܙܰܒܢܳܐ ܡܶܢ ܟܺܐܢܽܘܬܳܐ ܕܰܠܥܳܠܰܡ ܐܶܢ ܗܽܘ ܕܛܳܠܶܡ ܢܽܘܚܳܡܰܢ

14 ܐܶܢ ܓܶܝܪ ܟܺܐܢܰܐ ܗ̱ܘ ܐܰܝܟܰܢܳܐ ܛܠܶܡ ܠܰܢ ܒܳܬܰܪ ܡܰܘܬܰܢ ܙܶܕܩ̈ܳܬܰܢ ܘܰܨ̈ܠܰܘܳܬܰܢ ܘܶܐܢ ܟܺܐܢܽܘܬܳܐ ܠܳܐ ܪܳܚܶܡ ܗܳܕܶܐ ܕܚܳܣ ܠܰܢ ܕܰܢܗܰܝܡܶܢ ܐܰܝܟܰܢܳܐ ܘܡܶܢ ܡܰܢ ܫܰܪܺܝܘ ܢܳܡ̈ܽܘܣܶܐ ܟܺܐܢ̈ܶܐ ܒܰܐܪܥܳܐ

15 ܐܶܢ ܢܺܐܡܰܪ ܡܶܢ ܒܰܪ ܐ̱ܢܳܫܳܐ ܘܟܐܺܝܢ ܗܽܘ ܟܰܝ ܡܶܢ ܒܳܪܽܘܝܶܗ ܗܳܕܶܐ ܕܰܚܪܶܡ ܕܰܢܡܰܠܶܠ ܕܗܳܐ ܒܰܪܢܳܫܳܐ ܥܰܘܳܠܳܐ ܒܫܽܘܚܕܳܐ ܫܳܪܶܐ ܢܳܡܽܘ̈ܣܶܐ ܘܶܐܢ ܡܶܢ ܚܰܠܩܰܐ ܗ̱ܘ ܢܳܡܽܘܣܳܐ ܬܪ̈ܰܝܗܽܘܢ ܫܳܪܶܝܢ ܠܰܚ̈ܕܳܕܶܐ ܀܀܀

16 ܟܰܕ ܐܶܢ ܐܰܠܳܗܳܐ ܟܺܐܢܰܐ ܗ̱ܘ ܠܳܐ ܡܨܶܐ ܕܰܢܩܺܝܡ ܒܶܝܬ ܝܰܠܕܳܐ ܕܡܶܢܶܗ ܗܘܳܝܶܢ ܥܰܘ̈ܳܠܶܐ ܘܡܶܛܽܠ ܕܰܐܠܳܗܳܐ ܛܳܒܰܐ ܗ̱ܘ ܠܳܐ ܡܨܶܐ ܣܳܢܶܐ ܢܽܘܚܳܡܳܐ ܕܒܺܝܫܳܐ ܗ̱ܝ ܣܰܓܺܝ ܕܢܶܬܛܰܠܡܽܘܢ ܙܰܕܺܝܩ̈ܶܐ ܕܡܺܝܬ ܥܰܠ ܐܰܦܰܘ̈ܗ̱ܝ

17 ܡܶܢ ܟܽܠ ܓܰܒܺܝ̈ܢ ܐܶܬܚܰܒܫܰܬ ܘܳܐܦ ܐܶܬܕܰܪܫܰܬ ܘܶܐܬܚܰܙܝܰܬ ܕܢܽܘܚܳܡܳܐ ܠܡܺܝ̈ܬܶܐ ܗܳܘܶܐ ܘܡܳܢܳܐ ܬܶܚܣܰܪ ܐܰܘ ܣܰܟܠܳܐ ܐܶܢ ܗܽܘ ܕܗܳܘܶܐ ܢܽܘܚܳܡܳܐ ܕܗܳܠܶܝܢ ܕܺܐܝܩܺܐ ܢܳܛܰܪ ܐܰܢ̱ܬ ܗܰܝܡܶܢ ܕܰܒܗܶܝܢ ܡܰܡܠܳܟ ܐܰܢ̱ܬ

18 ܕܰܐܝܠܶܝܢ ܕܡܰܓܳܢ ܢܳܛܰܪ ܐܰܢ̱ܬ ܡܶܛܽܠ ܣܰܝܦܳܐ ܘܰܣܪ̈ܳܩܶܐ ܛܰܪ ܐܶܢܶܝܢ ܡܶܛܽܠ ܣܰܒܪܳܐ ܘܰܐܝܕܳܐ ܕܡܶܛܽܠ ܩܽܘܠܳܣܳܐ ܬܶܗܘܶܐ ܡܶܛܽܠ ܢܽܘܚܳܡܳܐ ܚܠܳܦ ܡܰܘܬܳܐ ܕܰܦܣܳܩ ܣܰܒܪܳܐ ܡܽܘܬ ܡܰܘܬܳܐ ܕܰܡܠܶܐ ܣܰܒܪܳܐ

19 ܒܢܽܘܪܳܐ ܐܰܘܩܶܕܘ̱ ܢܰܨ̈ܺܝܚܶܐ ܒܡܰܝ̈ܳܐ ܚܢܰܩܘ̱ ܠܰܬܪ̈ܺܝܨܶܐ ܒܣܰܝ̈ܦܶܐ ܢܰܟܶܣܘ̱ ܠܰܐܒ̈ܺܝܠܶܐ ܘܰܒܟܺܐܦ̈ܶܐ ܪܓܰܡܘ̱ ܠܰܢܒ̈ܺܝܶܐ ܘܒܰܙܩ̈ܺܝܦܶܐ ܬܠܰܘ ܠܰܫ̈ܠܺܝܚܶܐ ܘܰܐܝܟܰܢ ܟܰܝ ܛܳܠܶܡ ܟܺܐܢܳܐ ܪܶܒܽܘ ܪ̈ܶܒܘܳܢ ܓܽܘ̈ܥܠܳܢܺܝܢ ܀܀܀

SEDRA IV

Syriac Lexeme

About This Digital Text

Corpus Text ID:

https://syriaccorpus.org/326

NHSL Work ID(s):

http://syriaca.org/work/8805
http://syriaca.org/work/8737

Source:

Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963).