Digital Syriac Corpus

Nisibis 75

   https://syriaccorpus.org/329
  TEI/XML   Text  
Show  
section :
line :
Table of Contents  
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25
75 Nisibis LXXV
ܒ ܒܰܪ ܩܳܠܶܗ
1 ܝܰܘܡܳܐ ܕܥܽܘܢܕܳܢܳܐ ܝܰܘܡܰܐ ܗ̱ܘ ܡܰܪܺܝܪܳܐ ܝܰܘܡܰܐ ܗ̱ܘ ܕܰܚܢܰܓܬܳܐ ܝܰܘܡܰܐ ܗ̱ܘ ܕܰܒܟܳܬܳܐ ܀܀܀ ܗܘܺܝ ܡܳܪܰܢ ܒܽܘܝܳܐܰܢ ܥܽܘܢܺܝܬܳܐ: ܗܘܺܝ ܡܳܪܝ̱ ܒܽܘܝܳܐܰܢ
2 ܝܰܘܡܰܐ ܗ̱ܘ ܕܰܓܙܳܪ ܫܩܰܠ ܗܰܕܳܡܶܐ ܡܶܢ ܓܽܘܫܡܳܐ ܐܽܘܝܳܐ ܕܰܐܚ̈ܰܘܗ̱ܝ ܘܰܐܚ̈ܝܳܢܰܘܗ̱ܝ ܒܳܟ ܡܳܪܝ̱ ܢܶܬܪܰܟܰܒ
3 ܝܰܘܡܰܐ ܗ̱ܘ ܕܡܰܟܪܶܐ ܠܣܳܒ̈ܶܐ ܒܰܒܢܰܝ̈ܗܽܘܢ ܕܬܳܒܰܪ ܠܶܗ ܡܰܘܬܳܐ ܠܚܽܘܛܪܳܐ ܕܣܰܝܒܽܘܬܳܐ ܒܳܟ ܡܳܪܝ̱ ܢܶܣܬܰܡܟܽܘܢ
4 ܝܰܘܡܰܐ ܗ̱ܘ ܕܕܰܒܰܪ ܬܽܘܒ ܐܺܝܚܺܝܕܳܐ ܡܶܢ ܐܶܡܶܗ ܘܦܰܣܩܳܗ̇ ܠܕܰܪܥܳܐ ܕܡܰܣܡܶܟ ܗ̱ܘܳܐ ܠܳܗ̇ ܐܰܢ̱ܬ ܡܳܪܝ̱ ܣܰܡܟܺܝܗ̇
5 ܝܰܘܡܰܐ ܗ̱ܘ ܕܰܐܒܳܗ̈ܶܐ ܥܢܰܕܘ̱ ܒܶܗ ܘܰܦܼܪܰܫܘ̱ ܒܶܗ ܘܰܫܒܼܰܩܘ̱ ܝ̈ܰܠܕܰܝܗܽܘܢ ܝܰܬܡ̈ܶܐ ܘܚܰܣ̈ܺܝܠܶܐ ܐܰܢ̱ܬ ܡܳܪܝ̱ ܪܰܒܳܐ ܐܶܢܽܘܢ
6 ܝܰܘܡܰܐ ܗ̱ܘ ܬܽܘܒ ܕܰܐܚܳܐ ܦܳܪܶܫ ܡܶܢ ܐܰܚܽܘܗ̱ܝ ܘܚܳܣܰܪ ܡܶܢܝܳܢܳܐ ܘܰܙܥܰܪ ܨܶܒ̈ܥܳܬܳܐ ܒܳܟ ܡܳܪܝ̱ ܢܶܬܡܰܠܽܘܢ
7 ܝܰܘܡܰܐ ܗ̱ܘ ܕܒܰܪܬܶܗ ܀܀܀ ܕܣܳܒܳܐ ܦܪܰܫ ܡܶܢܶܗ ܘܶܐܬܥܰܘܪܰܬ ܥܰܝܢܶܗ ܕܒܳܗ̇ ܗܽܘ ܚܳܙܶܐ ܗ̱ܘܳܐ ܢܒܰܝܐܶܗ ܢܰܗܺܝܪܳܟ
8 ܝܰܘܡܰܐ ܗ̱ܘ ܕܰܦܪܰܫ ܒܶܗ ܓܰܒܪܳܐ ܡܶܢ ܐܶܠܥܶܗ ܘܶܐܬܓܰܙܝܰܬ ܐܰܪܥܳܐ ܕܠܰܝܬܰܘܗ̱ܝ ܪܺܝܫ ܓܽܘܫܡܳܐ ܒܰܥܕܶܢ ܬܽܘܒ ܬܶܚܙܶܝܘܗ̱ܝ
9 ܝܰܘܡܰܐ ܗ̱ܘ ܬܽܘܒ ܕܰܦܪܰܫ ܐܰܢ̱ܬܬܳܐ ܡܶܢ ܒܰܝܬܳܗ̇ ܘܟܰܦܳܐ ܘܳܐܦ ܐܰܫܺܝܕ ܕܶܐܒܰܕ ܛܽܘܟܳܣܶܗ ܬܒܰܝܰܐܗ̇ ܡܰܠܟܽܘܬܳܟ
10 ܝܰܘܡܰܐ ܗ̱ܘ ܕܡܺܝܬܳܐ ܫܳܡܽܘܥܬܳܐ ܡܶܢ ܫܶܠܝܳܐ ܘܥܳܐܶܠ ܕܳܠܰܚ ܠܳܗ̇ ܛܳܒܳܐ ܠܡܰܫܡܰܥܬܳܐ ܒܩܳܠܳܟ ܬܶܫܬܰܝܰܢ
11 ܝܰܘܡܰܐ ܗ̱ܘ ܕܓܰܪܶܓ ܥܰܝ̈ܢܶܐ ܠܰܒܟܳܬܳܐ ܘܺܐܝ̈ܕܶܐ ܠܡܰܪܩܽܘܕܬܳܐ ܘܦܽܘܡܳܐ ܠܽܐܘܠܺܝܬܳܐ ܒܳܟ ܡܳܪܝ̱ ܢܶܬܟܺܝܫ
12 ܝܰܘܡܰܐ ܗ̱ܘ ܕܩܳܪܶܐ ܠܒܶܟܝܳܐ ܣܰܓܺܝܐܳܐ ܕܥܳܐܶܠ ܘܰܕܢܳܦܶܩ ܘܳܝܳܐ ܡܠܶܐ ܦܽܘܡܶܗ ܒܛܽܘܒܳܟ ܢܶܬܒܰܝܰܐ
13 ܝܰܘܡܰܐ ܗ̱ܘ ܕܦܳܪܶܫ ܒܶܗ ܪܳܚܡܳܐ ܡܶܢ ܚܰܒܪܶܗ ܬܰܘܪ̈ܶܐ ܬܪ̈ܶܝܢ ܕܰܦܼܪܰܫܘ̱ ܡܶܢ ܢܺܝܪ ܐܽܘܝܽܘܬܳܐ ܒܚܽܘܒܳܟ ܢܶܬܡܰܙܓܽܘܢ
14 ܝܰܘܡܰܐ ܗ̱ܘ ܕܰܦܪܰܫܘ̱ ܒܶܗ ܚ̈ܰܬܢܶܐ ܘܟ̈ܰܠܠܳܬܳܐ ܘܰܚܠܳܦ ܗܰܘ ܪܶܩܕܳܐ ܗܘܳܬ ܠܳܗ̇ ܡܰܪܩܽܘܕܬܳܐ ܢܡܰܢܥܽܘܢ ܠܰܚܠܽܘܠܳܟ
15 ܝܰܘܡܰܐ ܗ̱ܘ ܕܰܡܒܰܛܶܠ ܫܪܳܪܳܐ ܕܡܳܟܽܘܪ̈ܶܐ ܘܰܚܠܳܦ ܓܢܽܘܢܳܐ ܩܰܒܪܳܐ ܛܰܝܶܒ ܠܳܗ̇ ܐܰܫܘܳܗ̇ ܠܰܓܢܽܘܢܳܟ
16 ܝܰܘܡܰܐ ܗ̱ܘ ܕܰܦܪܰܫ ܬܽܘܒ ܠܒܰܪܬܳܐ ܘܰܠܚܳܬܳܐ ܘܰܐܫܩܰܠ ܐܰܝܟ ܝܰܘ̈ܢܶܐ ܡܶܢ ܒܶܝܬ ܡܰܥܡܪܰܗܶܝܢ ܢܫܰܟܢܰܢ ܒܦܰܪܕܰܝܣܳܟ
17 ܝܰܘܡܰܐ ܗ̱ܘ ܕܰܦܪܰܫ ܬܽܘܒ ܫܒܰܪܬܳܐ ܡܶܢ ܐܶܡܳܗ̇ ܘܶܐܬܟܰܡܪܰܬ ܣܰܬܳܐ ܕܠܰܝܬܶܝܗ̇ ܛܽܘܛܺܝܬܳܐ ܒܰܥܕܶܢ ܬܶܬܪܰܒܶܐ ܀܀܀
18 ܝܰܘܡܰܐ ܗ̱ܘ ܕܰܦܪܰܫ ܥܰܘ̈ܳܠܶܐ ܣ̈ܰܓܺܝܐܶܐ ܘܶܐܬܰܐܒܠܰܬ ܘܨܳܕܰܬ ܓܦܶܬܳܐ ܕܶܐܬܩܰܛܦܰܬ ܒܽܐܘܨܪܳܟ ܢܶܬܢܰܛܪܽܘܢ
19 ܐܺܝܚܺܝܕܳܐ ܡܳܐ ܕܰܥܢܰܕ ܣܰܘ̈ܟܶܐ ܡܶܬܪܰܟܢܰܢ ܕܰܢܢܽܘܕܳܢ ܥܠܰܘܗ̱ܝ ܕܦܺܐܪܳܐ ܕܢܶܬܰܪ ܠܶܗ ܠܳܟ ܡܳܪܝ̱ ܢܶܬܩܰܪܰܒ
20 ܫܽܘܒܚܳܐ ܠܰܕܚܰܢܩܶܗ ܠܡܰܘܬܳܐ ܒܰܡܨܰܥܬܳܐ ܒܶܝܬ ܚ̈ܰܝܶܐ ܠܚ̈ܰܝܶܐ ܣܳܡܶܗ ܕܢܰܠܦܟܽܘܢ ܕܡܰܘܬܟܽܘܢ ܛܰܠܶܩ ܠܶܗ
21 ܫܩܽܘܠܘ̱ ܠܟܽܘܢ ܕܶܡ̈ܘܳܬܳܐ ܡܶܢܶܗ ܘܒܶܗ ܕܦܰܓܪܳܐ ܕܰܒܛܶܟܣܳܐ ܐܳܬܶܝܢ ܕܰܪ̈ܓܰܘܗ̱ܝ ܘܝܽܘ̈ܒܳܠܰܘܗ̱ܝ ܢܫܰܟܠܠܶܗ ܓܳܡܰܪ ܟܽܘܠ
22 ܒܰܪܢܳܫܳܐ ܒܚܰܫܶܗ ܘܒܶܐܒܠܶܗ ܡܶܬܪܰܥܰܡ ܗܰܒ ܠܶܗ ܡܳܪܝ̱ ܐܰܬܪܳܐ ܕܰܢܦܰܝܶܓ ܟܰܪܝܽܘܬܶܗ ܕܰܒܟܽܠ ܬܶܫܬܰܒܰܚ
23 ܫܓܺܝܫܰܐ ܗ̱ܘ ܡܶܙܕܰܠܰܠ ܕܒܰܥܓܰܠ ܢܶܬܢܰܚܰܡ ܠܰܘ ܗܳܟܰܢ ܫܓܺܝܫ ܛܳܒܳܐ ܘܰܡܣܰܪܗܰܒ ܒܪܺܝܟ ܗ̱ܽܘ ܡܣܰܝܒܰܪ ܟܽܠ
24 ܫܓܽܘܫܘ̱ ܡܳܕܶܝܢ ܘܣܺܝܡܘ̱ ܦܺܐܪ̈ܶܐ ܩܕܳܡ ܦܶܪ̈ܥܶܐ ܘܝ̈ܰܠܕܶܐ ܩܕܳܡ ܒ̈ܰܛܢܶܐ ܘܫܰܦܺܝܪ ܒܳܟܶܝܢ ܐܰܢ̱ܬܽܘܢ ܕܰܐܘܚܰܪ ܡܰܚܶܐ ܟܽܘܠ
25 ܬܗܰܝܡܶܢ ܟܰܪܝܽܘܬܰܢ ܕܢܶܚܙܶܐ ܠܥܰܢܺܝ̈ܕܰܝܢ ܘܥܰܡ ܟܽܠ ܚܰܒ̈ܺܝܒܰܝܢ ܢܰܘܕܶܐ ܠܰܓܡܰܪ ܟܽܠ ܕܢܰܚܶܡ ܘܰܐܚܺܝ ܟܽܘܠ
SEDRA IV

Syriac Lexeme

About This Digital Text
Corpus Text ID:
https://syriaccorpus.org/329
Source:
Edmund Beck (ed.), "Des Heiligen Ephraem der Syrers Carmina Nisibena." in Corpus Scriptorum Christianorum Orientalium (Louvain: Secrétariat du CorpusSCO, 1963). Link to Syriaca.org Bibliographic Record
Type of Text: Digital Edition  
Status: Edited  
Publication Date: June 12, 2019
Preparation of Electronic Edition:
TEI XML encoding by James E. Walters.
Syriac text transcribed by Michael Oez.
Open Access and Copyright:

Creative Commons License

 See details...
How to Cite this Electronic Edition
Note:
Ephrem the Syrian, “Nisibis 75” , Digital Syriac Corpus, last modified June 12, 2019, https://syriaccorpus.org/329.
Bibliography:
“Nisibis 75.” In Corpus Scriptorum Christianorum Orientalium, edited by . Syriaca.org, 2016-. Entry published . https://syriaccorpus.org/329.

Show Citation Styles
Linked Data