On Peter and Paul - ܕܕܼܘܼܟܼܪܵܢܵܐ ܕܦܲܛܪܘܿܣ ܘܦܵܘܠܘܿܣ

1 :ܛܵܒܼܵܐ ܕܦܲܠܸܓܼ ܥܘܼܬܼܪܵܐ ܕܚܘܼܒܹܿܗ ܠܲܒܼܢܲܝ̈ ܒܲܝܬܹܿܗ 2 ܗܲܒܼܠܝܼ ܕܐܸܫܘܹܐ ܠܢܸܬܼܪܵܐ ܙܥܘܿܪܵܐ ܕܡ̣ܢ ܡ̇ܘܗܲܒܼܬܼܵܟ ܀ 3 :ܡܲܠܟܿܐ ܕܐܲܠܒܸܿܫ ܙܲܝܢܵܐ ܕܪܘܼܚܵܐ ܠܚܲܝܠܵܘܵܬܹ̈ܐ 4 ܬܪܘܿܨ ܚܘܼܫܵܒܲܝܿ ܠܘܼܩܒܲܠ ܢܝܼܫܵܐ ܕܟܼܵܪܘܿܙܘܼܬܼܵܟ ܀ pb. 69 5 :ܪܲܒܵܐ ܡܗܝܼܪܵܐ ܕܐܲܩܢܝܼ ܗܵܘܢܵܐ ܠܫܲܒܼܪܘܼܬܼ ܐ̄ܢܵܫܵܐ 6 ܚܲܟܸܿܡ ܪܸܥܝܵܢܝ ܕܢܸܗܘܹܐ ܪܵܕܹܐ ܠܘܼܩܒܲܠ ܡܸܠܲܝ̈ܟ ܀ 7 :ܝܵܗܹ̇ܒܼ ܚܲܝܹ̈ܐ ܠܡܵܝܘܿܬܼܘܼܬܹܵܐ ܒܝܲܕܼ ܡ̇ܝ̈ܘܿܬܹܐ 8 ܢܲܚܸܡ ܪܸ̈ܓܼܫܲܝ ܠܡܸܫܡܲܥ ܩܵܠܹ̇ܐ ܕܡܸܠܲܬܼ ܚܲܝܹ̈ܐ ܀ 9 :ܣܵܦܪܵܐ ܕܲܪܫ̣ܩ ܣܸܦܪܵܐ ܕܪܘܼܚܵܐ ܠܦܲܓܼܪ̈ܵܢܵܝܹܐ 10 ܒܚܘܼܩܵܐ ܕܡܸܠܬܼܵܟ ܢܸܪܗܲܛ ܠܸܫܵܢܝ ܥܲܡ ܚܘܼܫܵܒܲܝ̈ ܀ 11 :ܒܵܟ ܢܸܬܼܗܲܓܿܘܿܢ ܪܸܓܼܫܹܐ ܘܙܵܘܥܹ̈ܐ ܥܲܝܢܹ̈ܐ ܘܗܵܘܢܵܐ 12 ܕܕܲܡ ܢܸܬܼܚܲܣܟܿܘܼܢ ܡ̣ܢ ܥܸܢܝܵܢܵܐ ܕܣܪ̈ܝܼܩܵܬܼܵܐ ܀ 13 :ܠܵܟ ܫܵܐܹ̇ܠ ܐ̄ܢܵܐ ܥܘܼܕܪܵܢ ܪܘܼܚܵܐ ܡܲܬܬܲܪ ܟܠܵܐ 14 ܗܲܒܼܠܝܼ ܕܝܼܠܵܟ ܕܐܸܬܼܢܹܐ ܒܕܸܝܼܠܵܟ ܥܲܠ ܚܵܟܼ̈ܡܵܬܼܵܟ ܀ 15 :ܐܲܢ̄ܬܿ ܐܲܥܬܲܪܹܝܗ̇ ܠܡܸܣܟܹܿܢܘܼܬܹܗ ܕܓܸܢܣܲܢ ܫܝܼܛܵܐ 16 ܘܒܼܵܟ ܐܸܬܼܚܲܟܲܡ ܥܵܠܡܵܐ ܒܪܝܼܪܵܐ ܘܲܩ̣ܢܵܐ ܗܵܘܢܵܐ ܀ 17 :ܩܵܠܵܟ ܕܲܪܫܵܗ݂̇ ܠܐܘܼܪܚܵܐ ܕܚܲܝܹ̈ܐ ܒܹܝܬܼ ܡ̇ܝ̈ܘܿܬܹܐ 18 ܘܐܲܝܟ ܗܲܕܿܝܼܐܵܐ ܗܘ̤ܵܐ ܦܘܼܩܕܼܵܢܵܟ ܠܠܵܐ ܝܼܕܲܥܬܲܢ ܀ 19 :ܒܐܝܼܙܓܲܕܿܘܼܬܼܵܐ ܕܲܒܼܢܲܝ̈ ܓܸܢܣܵܟ ܨܒܲܬ݂ܿ ܕܲܬܼܫܲܝܸܢ 20 ܫܡܲܝܵܐ ܘܐܲܪܥܵܐ ܕܲܦܠܝܼܓܼܝܼܢ ܗ̄ܘ̣ܵܘ ܡܸܛܠ ܥܵܘ̣ܠܲܢ ܀ 21 :ܬܪܸܥܣܲܪ ܐ̄ܢܵܫܵܐ ܓ̣ܒܲܝܬܿ ܡ̣ܢ ܛܘܿܗܡܵܐ ܥܲܦܪܵܢܵܝܵܐ 22 ܘܐܲܩܢܝܼܬܿ ܐܸܢܘܿܢ ܚܲܝܠܵܐ ܕܪܘܼܚܵܐ ܠܡܸܚܣܲܢ ܟܠܵܐ ܀ 23 :ܒܗܘܿܢ ܡܲܟܸܿܟܼܬܵܗ̇ ܠܲܛܪܘܼܢܘܼܬܹܗ ܕܡ̇ܘܬܵܐ ܘܒܼܝܼܫܵܐ 24 ܘܲܒܼܗܘܿܢ ܟܲܒܸܿܫܬܿ ܪܵܘܡ̇ܐ ܘܥܘܼܡܩܵܐ ܬܹܚܝܬܼ ܫܘܼܠܛܵܢܵܟ ܀ 25 :ܬܪܸܥܣܲܪ ܟܹܐܦܹ̈ܐ ܦ̣ܣܲܠ ܨܸܒܼܝܵܢܵܟ ܡ̣ܢ ܛܘܼܪ ܐ̄ܢܵܫܵܐ 26 ܘܲܥܒ݂ܲܕܿܬܿ ܐܸܢܘܿܢ ܐܲܝܟ ܫܲܬܸܐܣܹ̈ܐ ܠܒܸܢܝܵܢ ܚܘܼܒܵܟ ܀ 27 :ܒܲܬܼܪܸܥܣܲܪܬܵܐ ܐܲܝܟ ܕܲܒܼܝܲܪ̈ܚܹܐ ܡܫܲܡܫܲܝ̈ ܫܲܢ̄ܬܵܐ 28 ܫܲܡܠܝܼܬܿ ܘܲܓ̣ܡܲܪܬܿ ܩܘܼܝܵܡ ܚܲܝܹ̈ܐ ܠܵܐ ܡܵܝ̈ܘܿܬܹܐ ܀ 29 :ܠܐܲܪܒܲܥܦܸܢ̈ܝܵܢ ܫܲܕܲܪܬܿ ܐܸܢܘܿܢ ܙܵܘܓܿܝܼ̈ܢ ܙܵܘܓܿܝܼ̈ܢ 30 ܘܦܲܠܚ̣ܘܼܗ̇ ܠܐܲܪܥܵܐ ܘܲܥܩ݂ܲܪܘ ܡܸܢܵܗ̇ ܝܲܥܪܵܐ ܕܥܵܘ̣ܠܵܐ ܀ 31 :ܓ̣ܒܲܝܬܿ ܬܘܼܒܼ ܫܲܒܼܥܝܼܢ ܘܲܡ̣ܠܲܝܬܿ ܐܸܢܘܿܢ ܪܘܼܚܵܐ ܕܚܲܝܹ̈ܐ 32 ܘܢܸܦܚܘܼܢ ܒܐܲܦܵܘ̈ܗܝ ܕܥܵܠܡܵܐ ܢܫܲܡܬܼܵܐ ܕܪܘܼܚ ܚܲܝܘܼܬܼܵܐ ܀ 33 :ܘܡ̣ܢ ܕܐܸܬܼܢܲܚܲܡܘ ܪܵܘܡܵܐ ܘܥܘܼܡܩܵܐ ܒܩܵܠ ܦܘܼܩܕܵܢܵܟ 34 ܗܲܒܸܿܒܼܘ ܘܲܛܥܲܢܘ ܦܹܐܪܹ̈ܐ ܕܫܘܼܒܼܚܵܐ ܠܫ̣ܡ ܪܲܒܿܘܼܬܵܪܟ ܀ 35 ܣܓܼܝܼ ܠܹܗ ܚܨܵܕܼܵܐ ܕܦܹܐܪ̈ܲܝ ܙܲܪܥܵܟ ܕܐܲܪܡܝܼܬܿ ܒܐܲܪܥܲܢ: pb. 70 36 ܘܲܙܥܘܼܪܝܼܢ ܗ̄ܘ̣ܵܘ ܦܵܥܠܹ̈ܐ ܕܪܘܼܚܵܐ ܕܲܢܟܲܢܫܘܼܢܵܝܗܝ ܀ 37 :ܪܡܲܙ̣ ܨܸܒܼܝܵܢܵܟ ܠܘܵܬܼ ܡܫܲܡܫܵܢܹ̈ܐ ܕܟܼܵܪܘܿܙܘܼܬܼܵܟ 38 ܕܲܢܦܝܼܣܘܼܢܵܟ ܕܬܲܦܸܩ ܦܵܥܠܹ̈ܐ ܠܕܘܼܢܵܫ ܙܲܪܥܵܟ ܀ 39 :ܦܪܲܣܬ̣ܵܝܗܝ ܠܥܘܼܬܼܪܵܐ ܕܚܹܝܠ ܡ̇ܘܗܲܒܼܬܼܵܟ ܥܲܠ ܟܠ ܬܸܓܼܡܝܼ̈ܢ 40 ܘܲܩܪ݂ܲܬܿ ܐܲܟܲܚ̄ܕܼ ܠܛܵܒܹ̈ܐ ܘܒܼܝܼܫܹ̈ܐ ܠܡܸܫܬܿܘܼܬܼ ܚܘܼܒܵܟ ܀ 41 :ܓ̣ܒܲܬܿ ܡ̣ܢ ܛܵܒܹ̈ܐ ܕܬܲܛܸܢ ܛܵܒܹ̈ܐ ܠܦܘܼܠܚܵܢ ܩܘܼܫܬܵܐ 42 ܘܲܩܪ̣̰ܵܝܬܿ ܟܸܢܫܹ̈ܐ ܕܢܲܩܢܘܿܢ ܣܲܒܼܪܵܐ ܠܲܕܼܠܵܐ ܣܲܒܼܪܵܐ ܀ 43 :ܒܝܕܼ ܙܲܕܿܝܼܩܹ̈ܐ ܓܠ݂ܲܝܬܿ ܟܹܐܢܘܼܬܼܵܟ ܕܪܵܚܹ̇ܡ ܩܘܼܫܬܵܐ ܐܢ̄ܬܿ 44 ܘܲܒܼܚܲܛܵܝܹ̈ܐ ܚܵܘܝܼܬܿ ܥܘܼܬܼܪܵܐ ܕܒܲܣܝܼܡܘܼܬܼܵܟ ܀ 45 :ܒܐܲܝܠܹܝܢ ܕܲܦܢ̣ܵܘ ܒܝܲܕܼ ܨܸܒܼܝܵܢܵܐ ܓܠ݂ܲܝܬܿ ܚܹܐܪܘܼܬܲܢ 46 ܘܒܲܐܝܠܹܝܢ ܕܥܲܨܝܼܘ ܚܵܘܝܼܬܿ ܘܲܡܫܹܝܬܿ ܚܹܝܠ ܟܠܡܸܕܲܡ ܀ 47 :ܬܪܸܥܣܲܪ ܢܩܲܦ̣ܘܼܟ ܒܝܲܕܼ ܨܼܒܼܝܵܢܵܐ ܘܚܹܝܠ ܐܵܬܼ̈ܘܵܬܼܵܐ 48 ܘܲܠܪܵܕܼܘܿܦܵܟ ܥܨ̣ܵܝܗܝ ܦܘܼܩܕܵܢܵܟ ܟܲܕܼ ܠܵܐ ܨܵܒܹ̇ܐ ܀ 49 :ܫܵܐܘܿܠ ܥܲܨܝܼ ܠܘܼܩܒܲܠ ܡܸܠܹ̈ܐ ܕܟܼܵܘܿܪܙܘܼܬܼܵܟ 50 ܘܟܲܕܼ ܠܵܐ ܨܵܒܹ̇ܐ ܟܲܕܼܢܹܗ ܪܸܡܙܵܟ ܒܢܝܼܪܵܐ ܕܚܘܼܒܵܟ ܀ 51 :ܛܲܢܵܢܵܐ ܗ̄ܘ̣ܵܐ ܕܛܵܐܹܿܝܢ ܟܠܢܵܫ ܚܠܵܦ ܢܵܡܘܿܣܵܐ 52 ܘܲܡܣܲܟܹܿܐ ܗ̄ܘ̣ܵܐ ܠܦܘܼܪܥܵܢ ܐܲܓܼܪܵܐ ܢܵܡܘܿܣܵܝܵܐ ܀ 53 :ܐܲܬܼܠܹܝܛܵܐ ܗ̄ܘ̣ܵܐ ܕܐܲܡܝܼܢ ܛܵܐܹ̇ܢ ܢܵܡܘܿܣܵܐܝܼܬܼ 54 ܟܲܕܼ ܣܵܒ̇ܲܪ ܗ̄ܘ̣ܵܐ ܠܡܸܙܟܵܐ ܒܪܲܗܛܵܐ ܐܲܪܥܵܢܵܝܵܐ ܀ 55 :ܐܲܪܥܵܢܵܐܝܼܬܼ ܡܸܬܼܟܲܬܲܫ ܗ̄ܘ̣ܵܐ ܒܐܵܓܼܘܿܢ ܥܲܡܠܹ̈ܐ 56 ܘܠܵܐ ܝܵ̇ܕܲܥ ܗ̄ܘ̣ܵܐ ܕܠܵܐ ܡܸܬܼܟܲܠܲܠ ܒܸܠܥܵܕܼ ܪܘܼܚܵܐ ܀ 57 :ܒܲܢܛܘܼܪ̈ܵܬܼܵܐ ܒܸܣܪ̈ܵܢܝܵܬܼܵܐ ܡܸܬܼܚܲܙܲܩ ܗ̄ܘ̣ܵܐ 58 ܟܲܕܼ ܢܵܚܹ̇ܬܼ ܗ̄ܘ̣ܵܐ ܠܕܲܪܵܐ ܟܠܝܘܿܡ ܒܪܸ̈ܓܼܫܲܝ ܦܲܓܼܪܵܐ ܀ 59 :ܙܲܝܢܵܐ ܡܚܝܼܒܵܐ ܠܒܼܝܼܫ ܗ̄ܘ̣ܵܐ ܟܠܢܵܫ ܥܲܡ ܗܲܕܿܡܵܘ̈ܗܝ 60 ܘܡܸܬܼܥܵܘܲܟ ܗ̄ܘ̣ܵܐ ܨܸܒܼܝܵܢ ܢܲܦܫܹܗ ܡ̣ܢ ܕܲܠܡܸܙܟܵܐ ܀ 61 :ܢܝܼܫܵܐ ܪܲܒܵܐ ܕܫܸܡ ܒܵܪܘܿܝܵܐ ܛܥܝܼܢ ܗ̄ܘ̣ܵܐ ܒܢܲܦܫܹܗ 62 ܘܲܡܙܲܝܲܚ ܗ̄ܘ̣ܵܐ ܚܕܵܐ ܬܵܘܕܲܝܼܬܼܵܐ ܒܓܼܵܘ ܪܸܥܝܵܢܹܗ ܀ 63 :ܝܲܬܿܝܼܪ̈ܵܬܼܵܐ ܚܫܝܼ̈ܒܼܵܢ ܗ̣̄ܘܲܝ̈ ܠܹܗ ܟܠ ܣܸܓܼ̈ܕܵܬܼܵܐ 64 ܕܠܵܐ ܡܩܲܒܸܿܠ ܗ̄ܘ̣ܵܐ ܐܲܠܵܗ ܢܘܼܟܼܪܵܝ ܐܵܠܲܐ ܐܸܢ ܚܲܕܼ ܀ 65 :ܒܗܵܢܵܐ ܢܝܼܫܵܐ ܪܵܕܹܦ ܗ̄ܘ̣ܵܐ ܠܵܗ̇ ܠܟܼܵܪܘܿܙܘܼܬܼܵܐ 66 ܒܝܲܕܼ ܣܵܒܲ̇ܪ ܗ̄ܘ̣ܵܐ ܕܢܘܼܟܼܪܵܝܘܼܬܼܵܐ ܗ̄ܝܼ ܠܐܲܠܵܗ ܟܠܵܐ ܀ 67 :ܫ̣ܡܲܥ ܛܲܢܵܢܵܐ ܛܸܒܵܐ ܚܲܕܼܬܼܵܐ ܕܒܼܘܼܕܵܩ ܩܢܘܿܡܹ̈ܐ 68 ܘܛܲܢ݂ ܘܐܸܬܼܥܲܙܲܙ ܕܢܸܬܼܒܲܥ ܨܲܥܪܵܐ ܕܫܸܡ ܒܵܪܘܿܝܵܐ ܀ pb. 71 69 :ܚܙ̣ܵܐ ܕܲܡܣܲܝܒܼܝܼܢ ܚܕܲܬܵܐ ܒܐܲܪܥܵܐ ܐ̄ܢܵܫܵܐ ܒܨܝܼܪܹ̈ܐ 70 ܘܲܠܒܸܫ̣ ܙܲܝܢܵܐ ܕܢܸܚܪܘܿܒܼ ܐܸܢܘܿܢ ܐܲܝܟ ܕܲܠܒܼܝܼܫܹ̈ܐ ܀ 71 :ܠܵܐ ܣܲܝܒܲܪ ܗ̄ܘ̣ܵܐ ܕܲܚ̣ܙܵܐ ܕܢܵܨܲ̇ܚ ܫܸܡ ܒܲܪܢܵܫܵܐ 72 ܘܡܸܬܼܩܲܠܲܣ ܗ̄ܘ̣ܵܐ ܡ̣ܢ ܟܠ ܦܘܼܡܝܼ̈ܢ ܫܸܡ ܥܵܒܼܘܿܕܼܵܐ ܀ 73 :ܛܢܵܢܵܐ ܫܲܓܼܪܹܗ ܥܲܙܝܼܙܵܐܝܼܬܼ ܒܲܕܼܡܘܼܬܼ ܢܘܼܪܵܐ 74 ܘܲܒܼܥܵܐ ܕܢܵܘܩܸܕܼ ܕܲܟܼܝܘܼܬܼ ܚܵܛܹ̈ܐ ܐܲܝܟ ܕܲܠܝܲܥܪܵܐ ܀ 75 :ܠܡܵܢ ܠܲܡ ܡܲܫܘܹܝܢ ܟܝܵܢܵܐ ܥܒܼܷܝܼܕܼܵܐ ܥܲܡ ܥܵܒܼܘܿܕܼܵܐ 76 ܘܲܠܡܵܢ ܡܲܥܠܝܼܢ ܥܲܡ ܐܝܼܬܼܘܼܬܼܵܐ ܚܲܝܠܵܐ ܐ̄ܚܪܹܢܵܐ ܀ 77 :ܠܡܵܢܵܐ ܡܩܲܪܒܼܝܼܢ ܣܸܓܼܕܲܬܼ ܟܲܣܝܵܐ ܠܦܲܓܼܪܵܢܵܝܵܐ 78 ܘܡ̇ܢ ܡܸܬܼܝܲܩܲܪ ܓܲܒܼܪܵܐ ܨܠܝܼܒܼܵܐ ܒܫܸܡ ܐܲܠܵܗܵܐ ܀ 79 :ܠܵܐ ܡܣܲܝܒܲܪ ܐ̄ܢܵܐ ܨܲܥܪܵܐ ܪܲܒܵܐ ܕܲܫܡܹܗ ܕܐܲܠܵܗܝ 80 ܕܝܵܗ̄ܒܿܝܼܢ ܐ̄ܢܵܫܵܐ ܫܸܡ ܪܲܒܿܘܼܬܹܗ ܠܲܥܒܼܵܕܼ ܐܝܼܕܼܵܘ̈ܗܝ ܀ 81 :ܠܵܐ ܙܵܕܹܿܩ ܠܝܼ ܕܐܲܗܡܹܐ ܘܐܸܫܬܿܘܿܩ ܡ̣ܢ ܘܵܠܝܼܬܼܵܐ 82 ܕܠܵܐ ܐܸܬܼܩܲܛܪܲܓܼ ܡ̣ܢ ܢܵܡܘܿܣܵܐ ܕܙܲܗܲܪ ܗܵܕܹܐ ܀ 83 :ܡܘܼܫܹܐ ܓܠ̣ܵܐ ܠܝܼ ܕܠܵܐ ܢܸܗܘܹܐ ܠܵܟ ܐܲܠܵܟ ܢܘܼܟܼܪܵܝ 84 ܘܗܘ̤ ܒܲܕܲܩ ܠܝܼ ܕܠܵܐ ܫܲܪܝܼܪܝܼܢ ܚܓܲܪܼ̈ܬܹܗ ܕܗܵܘܹ̇ܝܢ ܀ 85 :ܟܠ ܐܲܠܵܗܹ̈ܐ ܕܠܵܐ ܥܒ݂ܲܕܼܘ ܘܐܲܬܼܩܸܢܘ ܫܡܲܝܵܐ ܘܐܲܪܥܵܐ 86 ܢܹܐܒܼܕܿܘܼܢ ܠܲܓܼܡܵܪ ܘܠܵܐ ܢܸܬܿܕܲܟܼܪܘܼܢ ܥܘܼܗܕܵܢܲܝ̈ܗܘܿܢ ܀ 87 :ܒܗܵܕܹܐ ܬ̣ܢܘܲܝ ܠ̣ܒܸܫ ܚܲܡܝܼܡܵܐ ܛܢܵܢܵܐ ܩܲܫܝܵܐ 88 ܘܪܵܕܹܦ ܗ̄ܘ̣ܵܐ ܠܹܗ ܠܲܫܡܵܐ ܕܝܼܫܘܿܥ ܐܲܝܟ ܢܘܼܟܼܪܵܝܵܐ ܀ 89 :ܪܲܕܼܦܹܗ ܠܲܫܡܹܗ ܕܠܵܐ ܢܸܣܬܲܪܲܪ ܒܹܝܬܼ ܥܸܒܼܪ̈ܵܝܹܐ 90 ܘܲܛܪܕܼ ܐܸܢܘܿܢ ܠܲܡܣܲܒܪ̈ܵܢܵܘܗܝ ܠܒܲܪ ܡ̣ܢ ܥܲܡܵܐ ܀ 91 :ܘܕܲܚܙ̣ܵܐ ܕܢܸܦܩܲܬ̤ ܟܵܪܘܿܙܘܼܬܼܵܐ ܠܒܹܝܬܼ ܢܘܼܟܼܪ̈ܵܝܹܐ 92 ܫܲܓܼܪܹܗ ܛܢܵܢܵܐ ܕܢܹܐܚܘܿܕܼ ܒܐܲܦܹܝܗ̇ ܐܵܦ ܒܹܝܬܼ ܥܲܡܡܹ̈ܐ ܀ 93 :ܫܩܲܠ̣ ܫܘܼܠܛܵܢܵܐ ܡ̣ܢ ܪܹ̈ܫܢܹܐ ܣ̈ܡܲܝܵܐ ܕܥܵܘ̣ܠܵܐ 94 ܘܲܢܦ݂ܲܩ ܢܸܪܕܿܘܿܦ ܢܘܼܗܪܵܐ ܕܲܪܕܲܦ ܠܚܸܫܟܵܐ ܕܛܘܼܥܝܲܝ ܀ 95 :ܚ̣ܙܲܩ ܛܲܢܵܢܵܐ ܒܐܘܼܪܚܵܐ ܕܥܲܡܡܹ̈ܐ ܠܡܸܪܕܲܦ ܢܘܼܗܪܵܐ 96 ܘܐܲܙܠܸܓܼ ܡܸܢܫܹܠܝ ܚܲܕܼ ܙܲܠܝܼܩܵܐ ܘܲܡ̣ܚܵܝܗܝ ܘܐܲܪܡ̇ܝܗܝ ܀ 97 :ܒܫܲܒܼܛܵܐ ܕܢܘܼܗܪܵܐ ܡ̣ܚܵܝܗܝ ܒܲܣܝܼܡܵܐ ܠܗܵܘ̇ ܛܲܢܵܢܵܐ 98 ܕܲܡܚܵܘܹܐ ܠܹܗ ܕܗܵܘ̇ ܡܵܐ ܕܣܵܢܹ̇ܐ ܒܹܗ ܡܸܬܼܢܲܓܲܕ ܀ 99 :ܓܹܐܪܵܐ ܕܢܘܼܗܪܵܐ ܫ̣ܕܼܵܐ ܒܹܗ ܘܲܡ̣ܚܵܝܗܝ ܥܲܠ ܒܵܒܼܵܬܹ̈ܗ 100 ܘܫܲܩ̣ܠܹܗ ܠܢܘܼܗܪܹܗ ܕܿܨܒܼܵܐ ܕܢܸܪܕܿܘܿܦ ܢܘܼܗܪܵܐ ܕܟܼܠܵܐ ܀ 101 ܒܢܘܼܗܪܵܐ ܢܲܓܼܕܹܿܗ ܥܲܠ ܢܲܗܝܼܪܹܗ ܠܪܵܕܹܦ ܢܘܼܗܪܵܐ: pb. 72 102 ܘܥܲܠ ܦܲܪܨܘܿܦܹܗ ܡ̣ܚܵܝܗܝ ܘܐܲܙܝܼܥܹܗ ܠܪܵܕܹܦ ܠܲܫܡܹܗ ܀ 103 :ܒܠܲܥ̣ ܘܐܸܣܬܲܡܝܼ ܢܘܼܗܪܵܐ ܕܥܲܝܢܵܘ̈ܗܝ ܒܲܪ̈ܵܝܵܬܼܵܐ 104 ܘܲܕܿܢܲܚ̣ ܡܸܢܫܹܠܝ ܢܘܼܗܪܵܐ ܟܲܣܝܵܐ ܒܓܼܵܘ ܪܸܥܝܵܢܹܗ ܀ 105 :ܚ̣ܙܵܐ ܢܲܗܝܼܪܵܐ ܕܥܵܠܹ̇ܒܼ ܢܘܼܗܪܹܗ ܠܐܸܣܦܹܝܪ ܫܸܡܫܵܐ 106 ܘܲܫܡ݂ܲܥ ܩܵܠܵܐ ܕܗܲܢܝܼ ܘܲܪܚܝܼܡ ܡ̣ܢ ܟܠ ܩܵܠܝܼ̈ܢ ܀ 107 :ܫܵܐܘܿܠ ܫܵܐܘܿܠ ܩܪ̣ܵܝܗܝ ܢܝܼܚܵܐܝܼܬܼ ܐܲܝܟ ܝܵ̇ܕܲܥ ܠܹܗ 108 ܘܚܵܘܝܼ ܕܲܡܦܵܣ ܒܹܗ ܒܲܛܢܵܢܹܗ ܠܘܼܩܒܲܠ ܡܸܠܘ̈ܗܝ ܀ 109 :ܡ̇ܢ ܪܵܕܦܲܬܼ ܠܝܼ ܓܙܝܼܪܵܐ ܕܦܲܓܼܪܵܐ ܘܥܘܼܪܠܵܐ ܕܠܸܒܵܐ 110 ܘܡ̇ܢ ܛܵܪܕܲܬܿ ܠܹܗ ܠܲܫܡܵܐ ܕܡ̇ܪܘܼܬܼܝ ܐܲܝܟ ܢܘܼܟܼܪܵܝܵܐ ܀ 111 :ܠܡܵܢܵܐ ܠܚܝܼܡܲܬܿ ܥܲܠ ܟܵܪ̈ܘܿܙܲܝ ܥܲܙܝܼܙܵܐܝܼܬܼ 112 ܘܲܨܗܹܝܬܿ ܠܲܕܼܡ̇ܐ ܕܲܡܣܲܒܿܪ̈ܵܢܲܝ ܟܲܕܼ ܠܵܐ ܚ̣ܛܵܘ ܠܵܟ ܀ 113 :ܠܡܵܢܵܐ ܒܵܥܹ̇ܝܬܿ ܕܬܸܣܬܿܘܿܪ ܪܵܘܡܵܐ ܕܒܸܢܝܵܢ ܚܘܼܒܵܐ 114 ܘܬܸܕܼܠܘܿܚ ܫܲܝܢܵܐ ܕܐܸܬܼ݂ܵܐ ܢܫܲܝܸܢ ܥܵܠܡܵܐ ܦܠܝܼܓܼܵܐ ܀ 115 :ܠܡܵܢ ܡܸܬܼܟܲܬܿܫܲܬܿ ܥܲܡ ܚܲܣܝܼܢܵܐ ܕܚܲܣܢܹܗ ܠܡܵܘܬܵܐ 116 ܘܲܠܡܵܢ ܫܵܕܹ̇ܝܬܿ ܓܹܐܪ̈ܲܝ ܚܸܡܬܼܵܟ ܒܙܵܟܹ̇ܐ ܠܟܼܠܵܐ ܀ 117 :ܩܫܹܐ ܗ̄ܘ̣ ܠܵܟ ܓܲܒܼܪܵܐ ܠܲܡܒܲܥܵܛܘܼ ܠܥܸܠ ܡ̣ܢ ܥܘܼܩܣܹ̈ܐ 118 ܘܠܵܐ ܡܨܹܝܬܿ ܕܬܹܐܚܘܿܕܼ ܕܲܪܵܐ ܒܪܸ̈ܓܿܫܹܐ ܥܲܡ ܪ̈ܘܼܚܵܢܹܐ ܀ 119 :ܡܚܝܼܠܘܼ ܟܝܵܢܵܟ ܠܡܸܣܥܵܐ ܠܪܵܘܡ̇ܐ ܠܐܲܝܟܵܐ ܕܐܝܼܬܲܝ 120 ܘܠܵܐ ܡܲܦܲܣ ܠܵܟ ܠܡܸܣܲܩ ܨܹܐܕܲܝ ܟܲܕܼ ܒܸܣܪܵܢܵܐ ܐܢ̄ܬܿ ܀ 121 :ܠܡܵܢ ܪܲܕܼܦܲܬܿ ܠܝܼ ܐܲܝܟ ܕܲܠܡܝܼܬܵܪܐ ܫܓܼܝܼܪ ܒܲܛܢܵܢܵܐ 122 ܘܡܵܢܵܐ ܡܨܲܚܹܝܬܿ ܫܹܡܝ ܝܲܩܝܼܪܵܐ ܠܥܹܝܢ ܚܲܙܵܝܹ̈ܐ ܀ 123 :ܠܡܵܢ ܛܲܢܝܼܢܲܬܿ ܚܠܵܦ ܢܵܡܘܿܣܵܐ ܣܵܦܪܵܐ ܫܲܒܼܪܵܐ 124 ܫܒܼܘܿܩ ܫܲܒܼܪܘܼܬܼܵܐ ܘܬܼܵܐ ܐܸܬܼܩܲܪܲܒܼ ܠܲܓܼܡܝܼܪܘܼܬܼܵܐ ܀ 125 :ܠܵܘ ܡܝܼܬܼܵܐ ܐ̄ܢܵܐ ܐܲܟܼܡܵܐ ܕܪܵܢܹ̇ܝܬܿ ܐܸܠܵܐ ܚܲܝܵܐ 126 ܘܒܼܝܼ ܡܸܬܼܩܲܝܡܝܼܢ ܚܲܝܹ̈ܐ ܡܠܝܼܟܹ̈ܐ ܘܫܲܝܢܵܐ ܕܟܼܠܵܐ ܀ 127 :ܐܵܦܸܢ ܡܝܼܬܹܿܬܼ ܥܵܘ̇ܠܵܐܝܼܬܼ ܡ̣ܢ ܡܲܪ̈ܵܚܹܐ 128 ܐܸܠܵܐ ܚܲܝ ܐ̄ܢܵܐ ܒܚܲܝܹ̈ܐ ܚܲܕܬܹ̈ܐ ܕܠܵܐ ܫܘܼܠܵܡܵܐ ܀ 129 :ܗܵܠܹܝܢ ܡܲܠܸܠ ܩܵܠܵܐ ܚܲܝܵܐ ܥܲܡ ܡ̇ܝܘܿܬܼܵܐ 130 ܘܐܲܚܝ̣ܕܹܿܗ ܓܘܼܢܚܵܐ ܘܙܵܥ ܘܐܼܬܼܒܲܠܗܝܼ ܒܩܵܠܵܐ ܘܢܘܼܗܪܵܐ ܀ 131 :ܒܲܬܼܪܹܝܢ ܣܵܗ̈ܕܹܿܐ ܚܵܘܝܼ ܫܪܵܪܹܗ ܚܲܝܵܐ ܠܡܝܼܬܼܵܐ 132 ܒܩܵܠܵܐ ܘܢܘܼܗܪܵܐ ܓܠ̣ܵܐ ܥܲܠ ܚܲܝܵܘ̈ܗܝ ܘܥܲܠ ܫܘܼܠܛܵܢܹܗ ܀ 133 :ܒܩܵܠܵܐ ܐܲܠܦܹܗ ܕܠܵܐ ܗ̄ܘ̣ܵܐ ܡܝܼܬܼܵܐ ܐܲܟܼܡܵܐ ܕܲܣܒ݂ܲܪ 134 ܘܲܒܼܝܲܕܼ ܢܘܼܗܪܵܐ ܚܵܕܝܼ ܫܪܵܪܵܐ ܕܟܼܵܪܘܼܙܘܼܬܹܗ ܀ 135 :ܣܒ݂ܲܪ ܛܲܢܵܢܵܐ ܕܠܲܒܲܪܢܵܫܵܐ ܩܛܝܼܠܵܐ ܪܵܕܹܦ 136 ܘܲܚܙ̣ܵܝܗܝ ܕܲܢܛܝܼܪ ܬܵܓܼܵܐ ܒܪܵܘܡ̇ܐ ܘܡܲܡܠܸܟ ܥܲܠܐ ܟܠ ܀ 137 :ܒܫܘܼܒܼܚܵܐ ܪܲܒܵܐ ܚܵܘܼܝ ܢܲܦܫܹܗ ܠܥܹܝܢ ܪܵܕܼܘܿܦܹܗ 138 ܐܲܝܟ ܕܲܒܼܐ̄ܪܵܙܵܐ ܕܲܒܼܓܸܠܝܵܢܵܐ ܕܲܒܼܫܘܼܠܵܡܵܐ ܀ pb. 73 139 :ܐ̄ܪܵܙ ܗܵܘ̇ ܫܘܼܒܼܚܵܐ ܚܵܘܝܼ ܒܗܵܘܢܵܐ ܠܵܘ ܒܲܚܙܵܬܼܵܐ 140 ܕܠܵܐ ܡܨܸܐ ܦܲܓܼܪܵܐ ܕܢܸܚܙܹܐ ܒܪܸ̈ܓܼܫܹܐ ܠܗܵܝ̇ ܬܸܫܿܒܘܿܚܬܐ ܀ 141 :ܠܵܐ ܗ̄ܘ̣ܵܐ ܩܢܘܿܡ̇ܐ ܚܙܲܝ̈ ܒܵܒܼܵܬܹ̈ܐ ܒܸܣܪ̈ܵܢܝܵܬܼܵܐ 142 ܐܸܠܵܐ ܐ̄ܪܵܙܵܐ ܕܨܲܠܡܵܐ ܓܲܠܝܵܐ ܕܲܟܼܣܸܐ ܒܪܵܘܡ̇ܐ ܀ 143 :ܒܢܘܼܗܪܵܐ ܕܡ̣ܢ ܫܹܠܝ ܫ̣ܘܵܐ ܕܢܸܬܼܒܲܩܸܐ ܗܘ̤ ܘܲܕܼܥܲܡܹܗ 144 ܘܣܘܼܟܵܠ ܡܸܠܹ̈ܐ ܠܹܗ ܒܲܠܚܘܿܕܼܵܘܗܝ ܡܸܬܼܦܲܫܲܩ ܗ̄ܘ̣ܵܐ ܀ 145 :ܚܙ̣ܵܘ ܢܲܗܝܼܪܵܐ ܘܲܫ̣ܡܲܥܘ ܩܵܠܵܐ ܗܘ̤ ܘܐܵܦ ܗܸܢ̣ܘܲܢ 146 ܠܗܘܿܢ ܒܲܪܬܼ ܩܵܠܵܐ ܠܹܗ ܦܘܼܫܵܩܵܐ ܕܲܟܼܣܸܐ ܒܩܵܠܵܐ ܀ 147 :ܐܘܿ ܬܸܕܼܡܘܼܪܬܵܐ ܕܲܠܘܵܬܼ ܫܵܐܘܿܠ ܡܸܣܬܲܥܪܵܐ ܗ̄ܘ̣ܵܬܼ 148 ܕܲܫܡܲܥ ܩܵܠܵܐ ܕܲܟܼܣܸܐ ܘܲܓܲܠܸܐ ܗܘ̤ ܘܲܕܿܥܲܡܹܗ ܀ 149 :ܐܘܿ ܡܲܫܡܲܥܬܼܵܐ ܕܟܲܕܼ ܫܲܘܝܵܐ ܗ̄ܘ̣ܵܬܼ ܠܵܐ ܫܲܘܝܵܐ ܗ̄ܘ̣ܵܬܼ 150 ܘܚܲܕܼ ܡܣܸܬܲܟܲܠ ܘܲܐ̄ܚܪܹܝܢ ܩܵܐܹ̇ܡ ܒܲܕܼܡܘܼܬܼ ܚܲܪܫܵܐ ܀ 151 :ܫܵܡ̇ܥܝܼܢ ܩܵܠܵܐ ܕܲܡܬܲܪܓܸܿܡ ܗ̄ܘ̣ܵܐ ܐܲܝܟ ܡܲܡܲܠܠܗܘܿܢ 152 ܘܲܟܼܣܸܐ ܚܲܝܠܹܗ ܡ̣ܢ ܡܲܫܡܲܥܬܼܵܐ ܘܡ̣ܢ ܪܸܥܝܵܢܵܐ ܀ 153 :ܚܲܕܼ ܫܵܡܲ݁ܥ ܗ̄ܘ̣ܵܐ ܘܥܲܡܹܗ ܕܫܸܡܥܵܐ ܐܵܦ ܣܘܼܟܵܠܹܗ 154 ܘܲܐ̄ܚܪܹܝܢ ܫܵܡܲ݁ܥ ܫܸܡܥܵܐ ܕܿܓܼܢܝܼܙ ܡ̣ܢ ܒܘܼܝܵܢܵܐ ܀ 155 :ܫܵܐܘܿܠ ܫܵܡܲ݁ܥ ܘܝܵ̇ܠܹܦ ܚܲܝܠܵܐ ܕܗܵܘ̇ ܡܵܐ ܕܫܵܡܲ݁ܥ 156 ܘܠܲܟܼܢܵܘܵܬܹ̈ܗ ܐܲܝܟ ܬܸܡܗܵܐ ܒܫܘܼܚܠܵܦ ܩܵܠܵܐ ܀ 157 :ܥܲܡܹܗ ܒܲܠܚܘܿܕܼ ܡܸܣܬܵܘܲܕ ܗ̄ܘ̣ܵܐ ܐ̄ܪܵܙܵܢܵܐܝܼܬܼ 158 ܐܲܝܟ ܒܲܪ ܟܝܵܢܵܐ ܕܝܵ̇ܕܲܥ ܕܢܵܛܲ̇ܪ ܐ̄ܪܵܙܵܐ ܕܡܵܪܹܗ ܀ 159 :ܐܲܠܦܹܗ ܩܵܠܵܐ ܕܲܣܪܝܼܩܵܐܝܼܬܼ ܡܲܩܪܸܒܼ ܥܲܡܹܗ 160 ܘܚܵܘܝܹܗ ܒܓܸܠܝܵܐ ܕܠܵܐ ܙܵܕܹܿܩ ܠܹܗ ܠܡܸܬܼܟܲܬܵܫܘܼ ܀ 161 :ܐܵܦ ܗܘ̤ ܩܲܒܸܿܠ ܘܲܫܡ݂ܲܥ ܘܲܫܠܸܡ ܠܐܲܝܕܼܵܐ ܕܲܫܡ݂ܲܥ 162 ܘܦܲܢܝܹܗ ܠܗܵܘ̇ ܕܲܩܪ̣ܵܐ ܠܹܗ ܒܲܣܝܼܡܵܐܝܼܬܼ ܀ 163 :ܡܲܢ ܐܲܢ̄ܬܿ ܠܲܡ ܡܵܪܝ ܫܵܐܘܿܠ ܦܲܢܝܼ ܠܘܵܬܼ ܗܵܘ̇ ܕܲܩܪܲܝܗܝ 164 ܡܲܢ ܐܲܢ̄ܬܿ ܕܲܟܼܣܹܝܬܿ ܘܲܓܼܠܸܐ ܩܵܠܵܟ ܒܝܲܕܼ ܣܘܼܥܪ̈ܵܢܹܐ ܀ 165 :ܐ̄ܢܵܐ ܐ̄ܢܵܐ ܝܼܫܘܿܥ ܕܐܲܢ̄ܬܿ ܪܵܕܹܦ ܐܲܢ̄ܬܿ ܥ̣ܢܵܝܗܝ ܒܲܣܝܼܡܵܐ 166 ܐ̄ܢܵܐ ܐ̄ܢܵܐ ܕܡܝܼܬܹܿܬܼ ܘܐܲܚܝܲܢܝ ܚܲܝܠܵܐ ܕܠܲܒܼܫܲܢܝ ܚܘܼܒܹܿܗ ܀ 167 :ܐ̄ܢܵܐ ܐ̄ܢܵܐ ܕܨܲܠܒܼܘܼܢܝ ܙܲܪܥܹܗ ܕܐܲܒܼܪܵܡ ܥܲܠ ܪܹܫ ܩܲܝܣܵܐ 168 ܘܲܙܩܲܦ̣ܬܵܗ̇ ܥܲܡܝ ܡܝܼܘܿܬܼܘܼܬܼܵܐ ܕܐܲܚܹܝܗ̇ ܒܚܲܝܲܝ̈ ܀ 169 :ܐ̄ܢܵܐ ܐ̄ܢܵܐ ܕܢܸܚܬܹܿܬܼ ܒܲܕܼܡܵܐ ܕܲܩܢܘܿܡܝ ܠܥܘܼܡܩܵܐ ܕܲܫܝܘܿܠ 170 ܘܲܫܪܹ̇ܝܬܼ ܡܸܢܵܗ̇ ܚܒܼܝܼܫܹ̈ܐ ܕܢܘܼܓܼܪܵܐ ܕܲܚܒ݂ܲܫ ܡܵܘܬܵܐ ܀ 171 :ܠܝܼ ܗ̄ܘ̣ ܨܲܚܝܼܬܿ ܐܲܝܟ ܕܲܠܡܝܼܬܼܵܐ ܕܡܝܼܬܼ ܘܐܸܬܼܚܲܒܿܠ 172 ܚܙܝܼ ܘܐܸܣܬܲܟܲܠ ܕܚܲܝ ܐ̄ܢܵܐ ܒܚܲܝܹ̈ܐ ܕܠܵܐ ܫܘܼܠܵܡܵܐ ܀ 173 :ܗܵܐ ܚܵܘܝܼܬܵܟ ܚܲܝܠܵܐ ܕܙܵܟܼܘܼܬܼܝ ܒܚܲܕܼ ܣܘܼܥܪ̈ܵܢܹܐ 174 ܦܘܼܫ ܠܵܐ ܬܸܪܕܿܘܿܦ ܒܵܬܲܪ ܚܲܝܠܵܐ ܕܲܩܫܹܐ ܡܸܢܵܟ ܀ 175 ܚܙܝܼ ܡ̣ܢ ܐܲܝܟܵܐ ܡܲܠܠܹܬܼ ܥܲܡܵܟ ܒܲܣܝܼܡܵܐܝܼܬܼ: pb. 74 176 ܘܠܵܐ ܢܸܛ̇ܪܹܬܼ ܠܵܟ ܥܝܵܪܬܵܐ ܕܨܲܥܪܵܐ ܕܨܲܚܝܼܬܿ ܠܲܩܢܘܿܡܝ ܀ 177 :ܟܲܕܼܘ ܪܕܿܦܬܵܢܝ ܕܠܵܐ ܚܵܘܣܵܢܵܐ ܒܝܲܕܼ ܟܵܪ̈ܘܿܙܲܝ 178 ܟܠܝܼ ܣܲܦܸܣܸܪܵܟ ܘܦܘܼܫ ܡܢ݂ ܚܲܪܒܵܐ ܕܲܡܫܲܡܫܵܢܲܝ̈ ܀ 179 :ܚܙ̣ܵܐ ܚܲܡܝܼܡܵܐ ܠܫܲܠܗܹܒܼܝܼܬܼܵܐ ܕܟܲܣܝܵܐ ܒܡܸܠܹ̈ܐ 180 ܘܩܸܪܲܬ̤ ܚܸܡܬܼܵܐ ܕܛܲܢܵܢܘܼܬܹܗ ܘܢܵܚ̣ ܘܐܸܫܬܲܝܲܢ ܀ 181 :ܢܚܸܬܼ ܡ̣ܢ ܪܵܘܡ̇ܐ ܕܚܘܼܬܼܪܵܐ ܣܲܟܼܠܵܐ ܕܩܵܐܹ̇ܡ ܗ̄ܘ̣ܵܐ ܒܹܗ 182 ܘܲܠܒܸ݂ܫ ܢܲܚܬܵܐ ܕܡܲܟܿܝܼܟܼܘܼܬܼܵܐ ܘܢܲܟܸܿܦ ܢܲܦܫܹܗ ܀ 183 :ܫܲܚܠܸܦ ܩܵܠܹܗ ܡ̣ܢ ܨܘܿܚ̈ܝܵܬܼܵܐ ܠܘܵܬܼ ܬܵܘܕܿܝܼܬܼܵܐ 184 ܘܫܲܪܝܼ ܡܵܪܲܟܸܿܒܼ ܩܵܠܹ̈ܐ ܚܢܝܼܓܹ̈ܐ ܕܲܬܼܘܵܬܼ ܢܲܦܸܫܵܐ ܀ 185 :ܡܲܢ ܐܲܢ̄ܬܿ ܠܲܡ ܡܪܝ ܘܩܲܪ̣ܵܝܗܝ ܡ̇ܪܵܐ ܟܲܕܼ ܠܵܐ ܫܵܒܹ̇ܐ 186 ܘܲܥ̣ܢܵܝܗܝ ܩܵܠܵܐ ܕܢܚ̣ ܡ̣ܢ ܕܝܼܠܹܗ ܕܐ̄ܢܵܐ ܐ̄ܢܵܐ ܝܼܫܘܿܥ ܀ 187 :ܡܲܢ ܐܲܢ̄ܬܿ ܕܲܕܚܝܼܠ ܩܵܠ ܦܸܬܼܓܼܵܡܲܝ̈ܟ ܘܡܲܪܗܸܒܼ ܢܲܦܫܵܐ 188 ܘܩܲܠܝܼܠ ܪܸܡܙܵܟ ܛܵܒܼ ܡ̣ܢ ܒܲܪܩܵܐ ܠܘܵܬܼ ܣܘܼܥܪ̈ܵܢܹܐ ܀ 189 :ܡܲܢ ܐܲܢ̄ܬܿ ܓܲܒܼܪܵܐ ܕܢܘܼܗܪܵܐ ܪܵܗܹ̇ܛ ܩܕܼܵܡ ܦܘܼܩܕܵܢܵܟ 190 ܘܲܡܢܲܓܸܿܕܼ ܐܲܢ̄ܬܿ ܒܥܲܪ̈ܩܲܝ ܢܘܼܪܵܐ ܠܲܕܼܣܵܢܹ̇ܐ ܠܵܟ ܀ 191 :ܡܲܢ ܐܲܢ̄ܬܿ ܕܲܫܪܹܝܬܿ ܒܐܲܬܼܪܵܐ ܕܲܠܥܸܠ ܘܡܸܠܬܼܵܟ ܒܐܲܪܥܵܐ 192 ܘܦܵܩܹ̇ܕܼ ܪܡܙܵܟ ܠܲܫܡܲܝܵܢܹ̈ܐ ܘܠܲܐܪ̈ܥܵܢܵܝܹܐ ܀ 193 :ܠܵܐ ܝܵ̇ܕܲܥ ܗ̄ܘܹ̇ܝܬܼ ܕܒܲܫܡܲܝܵܐ ܐܲܢ̄ܬܿ ܐܸܠܵܐ ܒܐܲܪܥܵܐ 194 ܘܠܵܐ ܪܵܢܹ̇ܐ ܗ̄ܘܹ̇ܝܬܼ ܕܒܹܝܬܼ ܚܲܝܹ̈ܐ ܐܲܢ̄ܬܿ ܐܸܠܵܐ ܒܡܵܘܬܿܐ ܀ 195 :ܫܒܼܘܿܩ ܠܝܼ ܕܲܚܛܹ̇ܝܬܼ ܕܪܸܕܼܦܹ̇ܬܼ ܠܲܫܡܵܟ ܘܲܠܟܼܵܪ̈ܘܿܙܲܝܟ 196 ܘܠܵܐ ܬܲܩܸܛܟ ܠܝܼ ܕܛܸܠܡܹ̇ܬܼ ܫܘܼܒܚܵܐ ܕܙܵܕܹܿܩ ܗ̄ܘ̣ܵܐ ܠܵܟ ܀ 197 :ܠܵܐ ܝܼܕܲܥܬܼܵܐ ܥܒ݂ܲܕܼܬܿܢܝ ܣܲܡܝܵܐ ܡ̣ܢ ܒܘܼܝܵܢܵܐ 198 ܘܲܚܫ݂ܸܟܼܘ ܙܵܘܥܲܝ̈ ܘܠܵܐ ܐܸܬܼܒܲܩܝܼܬܼ ܒܦܲܐܝܘܼܬܼ ܢܘܼܗܪܵܟ ܀ 199 :ܘܡܸܟܹܿܝܠ ܕܲܨܒܲܝܬܿ ܘܲܩܪ̣ܵܢܝ ܚܘܼܒܵܟ ܠܘܵܬܼ ܝܼܕܲܥܬܼܵܟ 200 ܠܵܐ ܦܵܠܲܚ ܐ̄ܢܵܐ ܢܵܡܘܿܣܵܐܝܼܬܼ ܐܸܠܵܐ ܒܚܘܼܒܵܟ ܀ 201 :ܫܒܼܝܼܩ ܢܵܡܘܿܣܵܐ ܘܲܢܛܘܼܪ̈ܬܹܗ ܕܥܲܒܼ݂ܕܲܢܝ ܣܲܡܝܵܐ 202 ܘܠܵܐ ܝܲܗ̄ܒܼ ܐܲܓܼܪܵܐ ܠܨܼܒܼܝܵܢܝ ܕܲܛܥ݂ܲܝܢ ܝܘܼܩܪܹܗ ܘܚܘܼܡܹܗ ܀ 203 :ܬܚܹܝܬܼ ܡܵܪܘܼܬܼܵܟ ܡܲܦܠܲܚ ܪܸܥܝܵܢܝ ܪܘܼܚܵܢܵܐܝܼܬܼ 204 ܘܠܘܼܩܒܲܠ ܢܝܼܫܵܐ ܕܟܼܵܪܘܿܙܘܼܬܼܵܟ ܚܵܢܲܝܢ ܙܵܘܥܲܝ̈ ܀ 205 :ܚܙ̣ܵܝܗܝ ܒܲܣܝܼܡܵܐ ܗܵܘ̇ ܕܲܚܙ̣ܵܐ ܠܹܗ ܥܲܕܼܠܵܐ ܢܸܗܘܹܐ 206 ܕܢܲܓܸܿܕܼ ܢܲܦܫܹܗ ܛܵܒܼ ܡ̣ܢ ܢܸܓܼܕܵܐ ܕܥܲܠ ܒܵܒܼܵܬܹ̈ܗ ܀ 207 :ܚܙ̣ܵܝܗܝ ܕܲܡܛܲܝܲܒܼ ܕܢܸܦܠܲܚ ܥܲܡܹܗ ܒܪܸ̈ܓܼܫܹܐ ܘܙܵܘܥܹ̈ܐ 208 ܘܛܲܒܼ݂ܥܹܗ ܒܲܫܡܹܗ ܘܲܩܪ̣ܵܝܗܝ ܕܝܼܠܹܗ ܦܵܠܚܵܐ ܕܪܘܼܚܵܐ ܀ pb. 75 209 :ܚܙ̣ܵܝܗܝ ܕܲܡܢܲܓܸܿܕܼ ܗܘ̤ ܠܲܩܢܘܡܹܗ ܒܐܲܝܠܹܝܢ ܕܲܚ̣ܛܵܐ 210 ܘܚ̣ܵܢܹܗ ܒܪ̈ܲܚܡܹܐ ܘܐܲܚܝܹܗ ܒܣܲܒܼܪܵܐ ܕܲܬܼܝܼܒܼܘܼܬܼܵܐ ܀ 211 :ܠܲܒܿܒܹܗ ܒܬܸܢܘܲܝ ܕܫܘܿܒܼܩܵܢ ܥܵܘ̣ܠܵܐ ܕܡܲܣܪܲܚ ܨܹܐܕܼܵܘܗܝ 212 ܘܝܲܗ̄ܒܼ݂ܠܹܗ ܐܝܼܕܼܵܐ ܕܫܵܘܬܵܦܘܼܬܵܐ ܠܘܵܬܼ ܟܵܪ̈ܘܿܙܵܘܗܝ ܀ 213 :ܩܘܼܡ ܠܲܡ ܫܵܐܘܿܠ ܘܥܘܿܠ ܠܲܡܕܝܼܢ̄ܬܵܐ ܠܘܵܬܼ ܟܵܪ̈ܘܿܙܲܝ 214 ܕܬܲܡܵܢ ܬܹܐܠܲܦ ܐ̄ܪܵܙܹܐ ܟܣܲܝܵ̈ܐ ܕܥܲܣܩܝܼܢ ܡܸܢܵܟ ܀ 215 :ܩܘܼܡ ܥܘܿܠ ܘܲܚܙܝܼ ܪ̈ܕܝܼܦܹܐ ܕܐܲܦܸܩܬܿ ܡ̣ܢ ܓܵܘ ܥܲܡܵܐ 216 ܟܲܕܼ ܡܸܬܼܢܲܨܲܚ ܚܲܝܠܵܐ ܕܵܒܼܗܘܿܢ ܒܲܝܢܵܬܼ ܥܲܡܡܹ̈ܐ ܀ 217 :ܙܸܠ ܨܹܝܕ ܐ̄ܢܵܫܵܐ ܕܲܚܫ݂ܲܒܼܬܿ ܐܸܢܘܿܢ ܐܲܝܟ ܛܵܥܲܝܵ̈ܐ 218 ܘܝܼܠܲܦ ܡܸܢܗܘܿܢ ܫܪܵܪܵܐ ܓܲܠܝܵܐ ܕܚܿܝܠ ܒܵܪܘܿܝܵܐ ܀ 219 :ܙܸܠ ܟܲܕܼ ܩܲܝܵܡ ܫܲܒܼܛܵܐ ܕܲܡ̣ܚܵܟ ܥܲܠ ܒܵܒܼܵܬܼ̈ܟ 220 ܘܚܵܘܵܐ ܐܸܢܘܿܢ ܐܬܼܵܐ ܕܡ̇ܪܘܼܬܼܝ ܘܲܡܩܲܒܿܠܝܼܬ ܠܵܟ ܀ 221 :ܠܗܘܿܢ ܗ̄ܘ̣ ܝܸܗ̄ܒܹܿܬܼ ܩܠܝܼܕܵܐ ܕܪ̈ܚܡܹܐ ܘܕܲܓܼܙܵܪ ܕܝܼܢܵܐ 222 ܠܗܘܿܢ ܙܸܠ ܐܲܦܝܼܣ ܘܗܵܐ ܦܵܬܼ̇ܚܝܼܢ ܠܵܟ ܬܲܪܥܵܐ ܕܢܘܼܗܪܵܐ ܀ 223 :ܠܗܘܿܢ ܗ̄ܘ̣ ܥܸܒܲܕܹܿܬܼ ܐܲܦܸܛܪ̈ܘܿܦܹܐ ܕܓܲܙܵܐ ܕܪܘܼܚܵܐ 224 ܩܪܘܿܒܼ ܨܹܐܕܲܝܗܘܿܢ ܘܲܡܩܲܒܿܠܝܼܢ ܠܵܟ ܠܲܬܼܪܲܥ ܡ̇ܪܘܼܬܼܝ ܀ 225 :ܫܠܸ݂ܡ ܛܲܢܵܢܵܐ ܠܐܲܝܠܹܝܢ ܕܲܫܡ݂ܲܥ ܡ̣ܢ ܒܲܣܝܼܡܵܐ 226 ܘܥܲܠ̣ ܟܲܕܼ ܡܣܲܡܸܐ ܠܘܵܬܼ ܬܲܠܡܝܼܕܹ̈ܐ ܐܲܝܟ ܕܐܸܬܼܦܲܩܲܕܼ ܀ 227 :ܬܠܵܬܼܵܐ ܝܵܘܡܝܼ̈ܢ ܨ̣ܵܡ ܟܲܕܼ ܒܵܪܹܐ ܘܐܵܠܹ̇ܐ ܠܢܲܦܫܹܗ 228 ܘܡܸܬܼܟܲܫܲܦ ܗ̄ܘ̣ܵܐ ܕܢܸܬܼܦܲܥܹܐ ܠܹܗ ܢܘܼܗܪܵܐ ܕܥܲܝܼܢܵܘ̈ܗܝ ܀ 229 :ܒܫܘܼܠܵܡ ܨܵܘܡܹܗ ܫ̣ܘܵܐ ܠܲܚܙܵܬܵܐ ܕܓܸܠܝܵܢ ܪܘܼܚܵܐ 230 ܘܐܸܫܬܲܪܲܪ ܠܹܗ ܒܚܲܕ ܟܵܪܘܿܙܵܐ ܕܢܲܐܣܸܐ ܟܹܐܒܹܗ ܀ 231 :ܚܵܘܝܹܗ ܓܲܒܼܪܵܐ ܕܲܫܡܹܗ ܡܲܟܼܪܸܙ ܥܲܠ ܚܘܼܠܡܵܢܹܗ 232 ܘܒܲܣܝܵܡ ܐܝܼܕܹܗ ܥܵܪܹܩ ܚܸܫܵܐ ܡ̣ܢ ܒܒܼܵܬܹ̈ܗ ܀ 233 :ܒܚܸܙܘܵܐ ܓܠ̣ܵܐ ܠܹܗ ܐܵܦ ܠܹܗ ܠܐܵܣܝܵܐ ܕܫܲܕܲܪ ܨܹܐܕܼܵܘܗܝ 234 ܕܙܸܠ ܠܲܡ ܢܲܚܸܡ ܠܫܵܐܘܿܠ ܡܝܼܬܼܵܐ ܕܲܪܕܦ ܚܲܝܹ̈ܐ ܀ 235 :ܙܸܠ ܦܲܬܲܚ ܠܹܗ ܥܲܡ ܒܵܒܼܵܬܹ̈ܐ ܐܵܦ ܚܘܼܫܵܒܼܵܘ̈ܗܝ 236 ܕܢܸܚܙܹܐ ܒܥܲܝܢܵܘ̈ܗܝ ܘܲܒܼܪܸܥܝܵܢܹܗ ܢܘܼܗܪܵܐ ܕܝܘܼܠܦܵܢܝ ܀ 237 :ܙܸܠ ܐܲܫܡܲܥܲܝܗܝ ܩܵܠ ܚܘܼܕܵܬܼܵܐ ܘܢܲܦܫܵܐ 238 ܘܗܵܐ ܡܸܬܿܬܿܥܝܼܪܝܼܢ ܪ̈ܓܼܫܲܝ ܦܲܓܼܪܹܗ ܘܙܵܘܥܲܝ̈ ܢܵܦܫܹܗ ܀ pb. 76 239 :ܙܸܠ ܚܲܟܲܡܲܝܗܝ ܠܣܵܦܪܵܐ ܡܗܝܼܪܵܐ ܕܲܕܼܝܵܬܹܩܹܐ 240 ܘܲܟܼܬܼܘܲܒܼ ܐܲܗܓܵܝܗܝ ܪܘܼܚܢܵܐܝܼܬܼ ܒܚܲܕܼܬܼܘܼܬܼܝ ܡܸܠܲܝ̈ ܀ 241 :ܙܸܠ ܐܸܡܲܪ ܠܹܗ ܠܪܵܗܹ̇ܛ ܪܲܗܛܵܬܐ ܢܵܡܘܿܣܵܝܵܐ 242 ܕܠܲܝܬܿ ܦܘܼܪܥܵܢܵܐ ܒܐܸܣܛܵܕܼܝܼܘܿܢ ܕܲܢܛܘܼܪ̈ܵܬܼܵܐ ܀ 243 :ܓܠܝܼ ܘܒܲܕܸܿܩ ܠܹܗ ܓܸܘܿܢܸܣܛܵܐ ܚܬܝܼܪ ܒܲܓܼܙܘܼܪܬܵܐ 244 ܕܠܵܐ ܝܵܗܹ̇ܒܼ ܠܵܟ ܟܠܝܼܠ ܙܵܟܼܵܘܼܬܼܵܐ ܛܲܒܼܥܵܐ ܕܦܲܓܼܪܵܐ ܀ 245 :ܫܡ݂ܲܥ ܚܲܢܲܢܝܵܐ ܕܲܡܫܲܕܲܪ ܠܹܗ ܠܘܵܬܼ ܪܵܕܼܘܿܦܹܗ 246 ܘܲܬܼܡܲܗ̣ ܘܐܵܘܚܸܠ ܕܐܸܢ ܡܸܫܬܲܚܠܲܦ ܕܐܸܒܼܵܐ ܠܐܸܡܪܵܐ ܀ 247 :ܡ̇ܪܝ ܠܲܡ ܫܸܡ̇ܥܹܬܼ ܡ̣ܢ ܣܲܓܲܝܼ̈ܐܐ ܥܲܠ ܗܵܢ ܓܲܒܼܪܵܐ 248 ܕܲܟܼܡܵܐ ܒܝܼ̈ܫܵܢ ܐܲܣܒܸܿܠ ܐܸܢܘܿܢ ܠܲܡܣܲܒܿܪ̈ܵܢܲܝܟ ܀ 249 :ܐܲܝܟܲܢ ܐܹܙܲܠ ܠܘܵܬܼ ܪܵܕܼܘܿܦܵܐ ܕܪܵܕܹܦ ܠܲܫܡܵܟ 250 ܘܐܲܝܟܲܢ ܐܸܓܼܠܹܐ ܐ̄ܪܵܙܐ ܕܚܘܼܒܵܟ ܠܲܡܨܲܥܪܵܢܵܟ ܀ 251 :ܐܲܝܟܲܢ ܐܲܫܡܲܥ ܩܵܠ ܢܘܼܚܵܡܵܐ ܠܲܨܗܸܐ ܠܲܕܼܡܢ 252 ܘܐܲܝܟܲܢ ܐܸܙܪܘܿܥ ܣܲܒܼܪܵܐ ܘܚܘܼܒܵܐ ܒܕܼܵܠܲܚ ܫܲܝܢܲܢ ܀ 253 :ܩܘܼܡ ܠܲܡ ܙܸܠ ܠܵܟ ܐܸܡ݂ܲܪ ܡܵܪܝܵܐ ܠܘܵܬܼ ܚܲܢܲܢܝܵܐ 254 ܕܠܵܐ ܗ̄ܘ̣ܵܐ ܕܐܸܒܼܵܐ ܗ̄ܘ̣ ܐܲܟܼܡܵܐ ܕܲܪܢܲܚ̣ܬܿ ܐܸܠܵܐ ܐܸܡܪܵܐ ܗ̄ܘ̣ ܀ 255 :ܚܙܵܬܼܵܐ ܕܕܹܐܒܼܵܐ ܥܛܝܼܦ ܒܐܸܣܟܹܿܡܵܐ ܘܠܵܘ ܒܲܫܪܵܪܐ 256 ܐܵܦܸܢ ܪܵܪܹܦ ܠܵܘ ܪܵܕܼܘܿܦܵܐ ܗ̄ܘ̣ ܐܸܠܵܐ ܪܕܝܼܦܵܐ ܀ 257 :ܡܸܛܲܢ ܛܵܐܹ̇ܢ ܟܲܕܼ ܡܸܬܪܲܥܹܐ ܕܲܚܠܵܦ ܩܘܼܫܬܵܐ ܗ̄ܘ̣ 258 ܘܪܸܡܙܵܐ ܗ̄ܘ̣ ܒܵܥܹ̇ܐ ܘܗܵܐ ܡܸܬܼܩܲܪܲܒ ܠܲܓܼܡܝܼܪܘܼܬܼܵܐ ܀ 259 :ܡ̇ܐܢܵܐ ܗ̄ܘ̣ ܓܲܒܼܝܵܐ ܕܲܓܼܒܸܐ ܘܲܒܼܚܝܼܪ ܠܨܸܒܼܝܵܢ ܟܲܣܝܵܐ 260 ܘܠܲܝܬܿ ܒܹܗ ܡܘܼܡܵܐ ܒܕܲܗܒܼܵܐ ܕܲܟܼܝܵܐ ܕܫܲܦܝܘܼܬܼ ܢܲܦܫܹܗ ܀ 261 :ܒܫܝܼܦܘܼܪ ܩܵܠܹܗ ܡܲܟܸܪܸܙ ܙܵܟܼܘܼܬܼܝ ܒܐܲܪܒܲܥ ܦܸܢ̈ܝܵܢ 262 ܘܲܡܚܵܘܹܐ ܠܹܗ ܠܚܲܝܠܝ ܒܲܥܒܼܵܕܼܵܐ ܠܥܹܝܢ ܚܲܙܝܹ̈ܐ ܀ 263 :ܒܡܸܠܵܘ̈ܗܝ ܫܵܪܹ̇ܐ ܣܝܵܓܼ ܢܵܡܘܿܣܵܐ ܕܲܢܛܘܼܪ̈ܵܬܼܵܐ 264 ܘܡܲܥܸܠ ܥܲܡܡܹ̈ܐ ܠܲܐ̄ܚܝܵܢܘܼܬܼܵܐ ܕܒ݂ܹܝܬܼ ܐܲܒܼܪܵܗܵܡ ܀ 265 :ܒܪܲܥܡܵܐ ܕܩܵܠܹܗ ܡܪܲܓܹܿܐ ܠܐܲܪܥܵܐ ܕܬܸܬܸܿܠ ܦܹܐܪܹ̈ܐ 266 ܘܲܒܼܦܸܬܼܓܼܵܡܵܘ̈ܗܝ ܡܢܲܚܸܡ ܡܚܲܝܼܬܹ̈ܗ ܕܡܝܼܬܼܘ ܒܲܚܛܝܼܬܼܵܐ ܀ 267 :ܝܵ̇ܕܲܥ ܐ̄ܢܵܐ ܠܹܗ ܕܲܟܼܡܵܐ ܡܛܲܝܸܒܼ ܠܡܸܣܒܲܠ ܚܲܫܹ̈ܐ 268 ܘܠܵܐ ܛܲܥܝܵܐ ܠܝܼ ܕܡ̇ܐܹܬܼ ܟܠܝܘܿܡ ܚܠܵܦ ܟܵܪܘܿܘܙܼܬܼܝ ܀ 269 :ܒܩܵܐ ܠܝܼ ܚܘܼܒܹܿܗ ܥܲܕܼܠܵܐ ܢܗܘܹܐ ܕܲܟܼܡܵܐ ܫܲܪܝܼܪ 270 ܘܝܵ̇ܕܲܥ ܐ̄ܢܵܐ ܠܹܗ ܕܠܵܐ ܡܸܬܼܪܲܦܵܐ ܩܕܼܵܡ ܚܘܼܬܼܚܵܬܹ̈ܐ ܀ 271 :ܪܵܚ̇ܡܵܐ ܗ̄ܘ̣ ܛܵܒܼܵܐ ܕܐܲܣܝܼܪ ܚܘܼܒܹܿܗ ܥܲܡ ܚܲܒܿܝܼܒܹܗ 272 ܘܠܵܐ ܡܸܬܼܦܲܟܿܗܵܐ ܚܲܡܝܼܡܘܼܬܹܗ ܒܲܨܥܝܼܪ̈ܵܬܼܵܐ ܀ 273 :ܐܵܓܼܘܿܢܸܣܛܵܐ ܗ̄ܘ̣ ܕܝܵ̇ܕܲܥ ܕܢܸܙܟܹܿܐ ܪܘܼܚܢܵܐܝܼܬܼ 274 ܘܠܵܐ ܡܸܬܼܦܲܟܲܪ ܨܸܒܼܝܵܢ ܢܲܦܫܹܗ ܒܐܲܪ̈ܥܵܢܝܵܬܵܐ ܀ pb. 77 275 :ܦܵܠܵܚܵܐ ܗ̄ܘ̣ ܚܝܼܨܵܐ ܕܐܲܡܝܼܢ ܡܩܪܸܒܼ ܥܲܡ ܕܲܠܩܘܼܒܼܠܵܐ 276 ܘܠܵܐ ܫܵܠܲܚ ܠܹܗ ܠܙܲܝܢܵܐ ܟܲܣܝܵܐ ܡ̣ܢ ܪܸܥܝܵܢܹܗ ܀ 277 :ܘܡܸܛܠ ܕܲܚܙܹܝܬܼ ܚܘܼܡܣܵܢ ܢܲܦܫܹܗ ܕܲܟܼܡܵܐ ܫܲܪܝܼܪ 278 ܓܒܹ̇ܝܬܼ ܘܲܛܒܲܥܬܹܿܗ ܒܛܲܒܼܥܵܐ ܕܪܘܼܚܵܐ ܐܲܝܟ ܡܵܐ ܕܫܵܘܹ̇ܐ ܀ 279 :ܫܡܲܥ ܬܲܠܡܝܼܕܼܵܐ ܣܵܗܕܿܘܼܬܼ ܡܸܠܹ̈ܐ ܕܪܲܒܵܐ ܡܗܝܼܪܵܐ 280 ܘܩܲܒܸܿܠ ܘܲܫ̣ܠܸܡ ܕܐܹܝܢ ܫܲܪܝܼܪ̈ܵܢ ܐܲܝܟ ܕܐܸܬܼܡܲܠܲܠ ܀ 281 :ܩܢ̣ܵܐ ܠܘܼܒܵܒܼܵܐ ܒܐܲܝܠܹܝܢ ܕܲܫܡ݂ܲܥ ܥܲܠ ܪܵܕܼܘܿܦܵܐ 282 ܘܐܸܙܲܠ ܨܹܐܕܵܘܗܝ ܕܬܼܘܼܒܼ ܢܸܫܬܪܲܪ ܒܝܲܕܼ ܣܘܼܥܪ̈ܵܢܹܐ ܀ 283 :ܥܲܠ̣ ܘܐܸܡ݂ܲܪ ܠܹܗ ܒܩܵܠܵܐ ܢܝܼܚܵܐ ܐܲܝܟ ܕܐܸܬܼܦܲܩܲܕܼ 284 ܕܫܵܐܘܿܠ ܠܲܡ ܐܲܚ ܡ̇ܪܲܢ ܫܲܠܚ݂ܲܢܝ ܕܐܹܬܸܐ ܨܹܐܕܲܝܟ ܀ 285 :ܗܘ̤ ܠܲܡ ܫܲܕܲܪܲܢܝ ܗܵܘ̇ ܡܲܢ ܕܲܩܪ̣ܵܟ ܫܵܐܘܿܠ ܫܵܐܘܿܠ 286 ܕܲܒܼܩܲܪܝܼܒܼܘܼܬܼܝ ܢܸܬܼܦܲܢܹܐ ܠܵܟ ܢܘܼܗܪܵܐ ܕܥܲܝܢܲܝ̈ܟ ܀ 287 :ܟܪܝܼܗܵܐ ܐܲܪܓܸܿܫ ܒܐܵܪܝܵܐ ܕܪܘܼܚܵܐ ܕܐܸܫܬܲܕܲܪ ܠܹܗ 288 ܘܲܣܘ݂ܲܚ ܠܐܘܼܪܥܹܗ ܕܲܫ̣ܡܲܥ ܩܵܠܵܐ ܕܕܼܵܡܹ̇ܐ ܠܕܲܩܪ̣ܵܝܗܝ ܀ 289 :ܐܵܦ ܗܘ̤ ܐܵܣܝܵܐ ܚܙ̣ܵܝܗܝ ܠܲܟܼܪܝܼܗܵܐ ܕܲܚܕܝܼ ܠܩܘܼܒܼܠܹܗ 290 ܘܠܵܐ ܐܸܬܼܥܲܣܲܩ ܕܢܲܣܪܲܚ ܣܲܡܵܐ ܕܢܘܼܗܪܵܐ ܠܥܲܝܢܵܘ̈ܗܝ ܀ 291 :ܣ̣ܵܡ ܠܹܗ ܐܝܼܕܵܐ ܥܲܠ ܒܵܒܼܵܬܹ̈ܗ ܕܲܟܼܪ̈ܝܼܿܗܵܢ ܗ̣̄ܘܝ̈ 292 ܘܩܦ̣ܲܠ ܡܸܢܗܹܝܢ ܢܲܚܬܵܐ ܕܚܸܫܟܵܐ ܕܲܦܪ̣ܲܣ ܢܘܼܗܪܵܐ ܀ 293 :ܒܢܘܼܗܪܵܐ ܒܠ̣ܲܥ ܗ̄ܘ̣ܵܐ ܥܲܠ ܢܲܗܝܼܪܹܗ ܘܲܚܫܵܟ ܢܘܼܗܪܹܗ 294 ܘܲܗܦ݂ܲܟ ܢܘܼܗܪܵܐ ܕܥܲܒܼܕܹܿܗ ܣܲܡܝܵܐ ܘܝܲܗ̄ܒ݂ܼܠܹܗ ܢܘܗܪܵܐ ܀ 295 :ܐܘܿ ܢܲܗܝܼܪܵܐ ܕܡܲܢܗܲܪ ܟܠܵܐ ܐܲܝܟܵܐ ܕܨܵܒܹ̇ܐ 296 ܘܠܲܕܼܣܵܢܹ̇ܐ ܠܹܗ ܡܲܚܫܵܟ ܢܘܼܗܪܹܗ ܒܝܲܕܼ ܙܠܝܼܩܵܘ̈ܗܝ ܀ 297 :ܐܘܿ ܬܼܕܡܘܼܪܬܵܐ ܟܕܲ ܢܗܝܼܪܵܐ ܡܲܢܗܲܪ ܥܲܝܢܹ̈ܐ ܗ̄ܘ̣ 298 ܠܥܲܝܢܲܝ̈ ܫܵܐܘܼܠ ܣܲܡܝܼ ܐܸܢܹܝܢ ܨܸܡܚܵܐ ܕܡܢܗܪܹܗ ܀ 299 :ܢܘܼܗܪܵܐ ܓܲܠ̣ܙܹܗ ܡ̣ܢ ܢܲܗܝܼܪܵܐ ܠܪܵܕܹܦ ܢܘܼܗܪܵܐ 300 ܘܲܦܢ̣ܵܐ ܘܝܲܗ̄ܒܼ݂ ܠܹܗ ܢܘܼܗܪܵܐ ܥܦܝܼܦܵܐ ܒܥܲܝܼܢܹ̈ܐ ܘܗܵܘܢܵܐ ܀ 301 :ܒܲܣܝܵܡ ܐܝܼܕܹܗ ܕܐܵܣܝܵܐ ܕܪܘܼܚܵܐ ܥܪܲܩ ܚܸܫܘܿܟܼܵܐ 302 ܘܲܦܢܵܐ ܢܘܼܗܪܵܐ ܘܚܲܕܿܝܼ ܠܥܲܝܢܹ̈ܐ ܘܲܠܪܸܥܝܵܢܵܐ ܀ 303 :ܚܙ̣ܵܐ ܘܐܸܣܬܲܟܲܠ ܒܐܲܝܠܹܝܢ ܕܫܡ݂ܲܥ ܕܲܟܼܡܵܐ ܒܚܝܼܪ̈ܲܢ 304 ܘܲܕܬܼ݂ܿܒܼ ܐܸܢܹܝܢ ܒܩܲܢܝܵܐ ܕܪܘܼܚܵܐ ܥܲܠ ܚܘܼܫܒܼܵܘ̈ܗܝ ܀ 305 :ܥܡ݂ܲܕ ܘܐܸܬܿܕܲܟܿܝܼ ܘܫܲܠܚܹܗ ܠܝܘܼܩܪܵܐ ܕܲܢܛܘܼܪ̈ܵܬܼܵܐ 306 ܘܠܲܒܸܫ̣ ܢܲܚܬܵܐ ܕܒܲܣܝܼܡܘܼܬܼܵܐ ܕܙܲܩܪܹܗ ܪܘܼܚܵܐ ܀ 307 ܬܲܒܿܪܹܗ ܠܛܲܒܼܥܵܐ ܕܲܛܒܼܝܼܥ ܗ̄ܘ̣ܵܐ ܒܹܗ ܢܵܡܘܿܣܵܐܝܼܬܼ: pb. 78 308 ܘܛܲܒ݂ܲܥ ܢܲܦܫܹܗ ܒܛܲܒܼܥܵܐ ܚܲܕܼܬܼܵܐ ܕܫܸܡ ܛܲܝܒܿܘܼܬܼܵܐ ܀ 309 :ܗ̣ܦܲܟ ܪܵܕܼܘܿܦܵܐ ܘܫܲܪܝܼ ܣܵܬܲܪ ܠܐܲܝܠܹܝܢ ܕܲܒܼܢ̣ܵܐ 310 ܟܲܕܼ ܕܵܪܹܫ ܗ̄ܘ̣ܵܐ ܒܲܗ̈ܦܵܟܼܬܼܵܐ ܠܘܼܩܒܲܠ ܡܸܠܵܘ̈ܗܝ ܀ 311 :ܡ̣ܢ ܢܵܡܘܿܣܵܐ ܡܩܲܛܪܸܓܼ ܗ̄ܘ̣ܵܐ ܠܵܗ̇ ܠܝܗ̄ܘܼܕܼܵܝܘܼܬܼܵܐ 312 ܘܲܡܚܵܘܹܐ ܗ̄ܘ̣ܵܐ ܕܲܟܼܡܵܐ ܒܨܝܼܪܵܐ ܡ̣ܢ ܛܲܝܒܿܘܼܬܼܵܐ ܀ 313 :ܒܝܲܕܼ ܣܘܼܥܪ̈ܵܢܹܐ ܡܲܟܼܪܸܙ ܗ̄ܘ̣ܵܐ ܠܹܗ ܠܥܘܼܕܼܪܵܢ ܪܘܼܚܵܐ 314 ܘܡܦܲܫܸܩ ܗ̄ܘ̣ܵܐ ܚܲܝܠܵܐ ܕܲܟܼܣܸܐ ܒܟܼܵܪܘܿܙܘܼܬܼܵܐ ܀ 315 :ܥܲܡܵܐ ܓܙܝܼܪܵܐ ܚܙ̣ܵܝܗܝ ܠܲܓܼܙܝܼܪܵܐ ܕܪܵܕܹܦ ܠܲܫܡܹܗ 316 ܘܙܵܥ ܘܐܸܬܼܒܲܠܗܝܼ ܕܕܲܠܡܵܐ ܙܲܒܼܢܵܐ ܗ̄ܘ̣ ܕܢܸܒܼܛܲܠ ܥܲܡܵܐ ܀ 317 :ܒܢܲܝ̈ ܐܲܒܼܪܵܗܵܡ ܚܙ̣ܵܘ ܒܲܪ ܐܲܒܼܪܵܡ ܕܲܫܒ݂ܲܩ ܥܲܡܹܗ 318 ܘܫܲܪܝܼ ܡܚܲܝܸܢ ܥܲܡܡܹ̈ܐ ܦܠܝܼ̈ܓܼܐ ܠܚܘܼܒܹܿܗ ܕܐܲܒܼܪܵܡ ܀ 319 :ܒܬܲܗܪܵܐ ܩܵܡ̣ܘ ܗ̄ܘ̣ܵܘ ܓܙܝܼܪܹ̈ܐ ܘܥܘܼܪ̈ܠܹܐ ܥܲܠ ܫܘܼܚܠܵܦܹܗ 320 ܘܩܸܢܛܵܐ ܪܲܒܵܐ ܡܠܹܝܢ ܗ̄ܘ̣ܵܘ ܡܸܢܹܗ ܬܪ̈ܲܝܗܘܿܢ ܓܲܒܹ̈ܐ ܀ 321 :ܬܗܲܪ ܒܹܗ ܥܲܡܵܐ ܕܐܲܝܟܲܢ ܕܵܪܹܫ ܠܘܼܩܒܲܠ ܥܲܡܹܗ 322 ܘܩܲܢ݂ܲܛܘ ܡܸܢܹܗ ܐܵܦ ܬܲܠܡܝܼܪܹ̈ܐ ܕܕܲܠܡܵܐ ܢܸܟܼܠܵܐ ܗ̄ܘ̣ܵ ܀ 323 :ܒܝܲܕܼ ܣܘܼܥܪ̈ܵܢܹܐ ܚܵܘܝܼ ܫܪܵܪܐ ܕܟܼܵܪܘܿܙܘܼܬܹܗ 324 ܕܠܵܘ ܒܐܸܣܟܹܿܡܵܐ ܩܢܹܐ ܫܘܼܚܠܵܦܵܐ ܐܸܠܵܐ ܒܩܘܼܫܬܵܐ ܀ 325 :ܒܩܘܼܫܬܵܐ ܠܲܒܼܫܹܗ ܠܢܲܚܬܵܐ ܦܲܐܝܵܐ ܕܗܲܝܡܵܢܘܼܬܼܵܐ 326 ܘܪܘܼܚܵܢܵܐܝܼܬܼ ܐܸܨܛܲܒܲܬܼ ܒܹܗ ܒܟܸܣܝܵܐ ܘܓܸܠܝܵܐ ܀ 327 :ܒܚܘܼܒܵܐ ܘܪ̈ܲܚܡܹܐ ܐܲܫܠܸܡ ܢܲܦܫܹܗ ܠܦܵܠܚܘܼܬܼ ܩܘܼܫܬܵܐ 328 ܘܲܠܒܸܫ ܙܷܲܝܢܵܐ ܘܩ̣ܵܡ ܒܲܩܪܵܒܼܵܐ ܠܘܼܩܒܲܠ ܛܘܼܥܝܲܝ ܀ 329 :ܚܙ̣ܵܐ ܬܲܟܼܬܿܘܼܫܹܗ ܕܠܵܘ ܥܲܡ ܒܸܣܪܵܐ ܗ̄ܘ̣ ܡܸܬܼܚܲܙܝܵܢܵܐ 330 ܘܙܲܝܸܢ ܢܲܦܫܹܗ ܪܘܼܚܵܢܵܐܝܼܬܼ ܠܘܼܩܒܲܠ ܪܘܼܚܵܐ ܀ 331 :ܙܲܝܢܵܐ ܕܪܘܼܚܵܐ ܝܲܗ̄ܒܼ݂ ܠܹܗ ܡܲܠܟܵܐ ܕܢܸܬܼܟܲܬܲܫ ܒܹܗ 332 ܕܝܲܕܼܥܹܗ ܠܚܘܼܒܹܿܗ ܕܪܘܼܚܵܢܵܐܝܼܬܼ ܨܵܒܹ̇ܐ ܕܢܲܩܪܸܒܼ ܀ 333 :ܐܲܝܟ ܪܲܒܿܚܝܠܵܐ ܡܗܝܼܪܵܐ ܣ̣ܵܡܹܗ ܠܚܲܝ̈ܠܵܘܬܹܗ 334 ܕܲܚ̣ܙܵܝܗܝ ܕܲܠܒܼܝܼܫ ܠܘܼܩܒܲܠ ܚܲܫܹ̈ܐ ܕܦܲܓܼܪܵܐ ܘܢܲܦܸܫܵܐ ܀ 335 :ܒܲܚܦܝܼܛܘܼܬܹܗ ܨܒ̣ܵܐ ܕܲܢܚܵܘܹܐ ܪܲܒܿܘܼܬܼ ܚܝܠܹܗ 336 ܕܐܸܢ ܒܲܪ ܒܲܝܬܹܿܗ ܒܕܼܝܼܠܹܗ ܙܵܟܹ̇ܐ ܟܡܵܐ ܗܘ̤ ܒܕܸܝܼܠܹܗ ܀ 337 :ܥܲܡ ܟܠܡܸܕܲܡ ܥܲܒܼܕܹܿܗ ܕܢܲܩܪܸܒܼ ܪܘܼܚܵܢܵܐܝܼܬܼ 338 ܘܲܙܟܼܵܐ ܗܘ̤ ܒܹܗ ܘܝܲܗ̄ܒܼ ܠܹܗ ܐܲܓܼܪܵܐ ܐܲܝܟ ܙܲܟܵܝܵܐ ܀ 339 :ܣܵܡ݂ܹܗ ܠܥܵܠܡܵܐ ܡ̣ܢ ܚܲܕܼ ܓܲܒܵܐ ܘܗܘ̤ ܒܲܠܚܘܿܕܼܵܘܗܝ 340 ܘܚܵܝ̣ܒܼܘ ܟܠ ܬܸܓܼܡܝܼ̈ܢ ܕܠܘܩܒܲܠ ܩܘܼܫܬܵܐ ܘܲܙܟܼܵܐ ܫܠܝܼܚܵܐ ܀ 341 :ܐܸܚܲܕܼ ܕܲܪܵܐ ܥܲܡ ܪ̈ܘܼܚܵܢܹܐ ܘܦܲܓܼܪ̈ܵܢܵܝܹܐ 342 ܘܐܲܫܩܸܠ ܘܲܕܚܝܠ ܟܠ ܕܸܚ̈ܠܵܬܼܵܐ ܘܗܘ̤ ܪܵܡ ܩܵܠܹܗ ܀ 343 ܟܢܸܫܘ ܐܲܪ̈ܥܵܢܹܐ ܘܲܫܡܲܝܵܢܹ̈ܐ ܕܢܸܬܼܒܲܩܘܿܢ ܒܹܗ: pb. 79 344 ܟܲܕܼ ܡܸܬܼܟܲܬܲܫ ܥܲܡ ܟܠ ܚܲܫܝܼ̈ܢ ܕܲܟܼܣܹܝܢ ܘܲܓܼܠܹܝܢ ܀ 345 :ܠܵܐ ܨܒܼܵܐ ܕܢܸܣܲܩ ܡ̣ܢ ܬܲܟܼܬܿܘܼܫܵܐ ܠܹܠܲܝ ܐܝܼܡܵܡ 346 ܥܕܲܡ̇ܐ ܕܐܸܬܼ݂ܵܐ ܪܲܡܫܹܗ ܕܡ̇ܘܬܿܐ ܘܐܲܢܝܼܚ ܥܲܡܠܹܗ ܀ 347 :ܠܵܐ ܫܠ̣ܲܚ ܙܲܝܢܵܐ ܕܝܲܗ̣̄ܒܼ ܠܹܗ ܡܲܠܟܿܐ ܕܢܸܬܼܟܲܬܲܫ ܒܹܗ 348 ܥܕܲܡ̇ܐ ܕܲܚܪܲܒܼ ܘܓܲܡܲܪ ܐܸܢܘܿܢ ܠܣܸܕܼܪ̈ܲܝ ܒܝܼܫܵܐ ܀ 349 :ܠܵܐ ܢ̣ܵܡ ܘܲܕܼܡܸܟ ܟܲܕܼ ܪܵܕܹܐ ܗ̄ܘ̣ܵܐ ܒܝܲܡܵܐ ܫܓܼܝܼܫܵܐ 350 ܕܠܵܐ ܢܸܬܼܛܲܒܲܥ ܥܘܼܬܼܪܵܐ ܕܟܲܢܸܫ ܒܲܝܢܵܬܼ ܓܲܠܠܹ̈ܐ ܀ 351 :ܥܝܼܪ ܗ̄ܘ̣ܵܐ ܟܠܫܵܥ ܘܢܵܛܲ݁ܪ ܓܲܙܹܗ ܡ̣ܢ ܢܸܟܼܝܵܢܹ̈ܐ 352 ܘܡܲܠܲܒܸܿܒܼ ܗ̄ܘ̣ܵܐ ܒܩܵܠ ܦܸܬܼܓܼܵܡܵܘ̈ܗܝ ܠܲܟܼܢܵܘܵܬܹ̈ܐ ܀ 353 :ܚܠܝܼܡ ܗ̄ܘ̣ܵܐ ܦܲܓܼܪܹܗ ܥܲܡ ܪܸܥܝܵܢܹܗ ܒܗܲܝܡܵܢܘܼܬܼܵܐ 354 ܘܡܲܐܣܸܐ ܒܡܸܠܵܘܗܝ ܟܹܐܒܹ̈ܐ ܕܦܲܓܼܪܵܐ ܘܡܘܼܡܹ̈ܐ ܕܢܲܦܫܵܐ ܀ 355 :ܒܢܲܚܬܲܝ̈ ܦܲܓܼܪܹܗ ܡܲܐܣܸܐ ܠܦܲܓܼܪܹ̈ܐ ܕܲܟܼܪܝܼܗܝܼܢ ܗ̄ܘ̣ܵܘ 356 ܘܲܒܼܪܘܼܚ ܦܘܼܡܹܗ ܛܵܪܹܕܼ ܥܵܘ̣ܠܵܐ ܡ̣ܢ ܢܲܦܸܫܵܬܹ̈ܐ ܀ 357 :ܡܩܝܼܡ ܠܲܪ̈ܡܲܝܵܐ ܘܝܵܗܹ̇ܒܼ ܐܝܼܕܼܵܐ ܠܐܲܝܠܹܝܢ ܕܲܢܦܲܠ̣ܘ 358 ܘܣܵܐܹ̇ܡ ܣܲܡܵܐ ܕܲܬܼܘܵܬܼ ܢܲܦܸܫܵܐ ܠܲܡ̈ܡܲܚܲܝܵܐ ܀ 359 :ܩܵܪܹܐ ܘܲܡܩܝܼܡ ܠܲܚܒܸܢܵܢܹ̈ܐ ܕܩܘܼܡܘ ܘܐܸܬܼܟܲܫܲܪܘ 360 ܘܣܵܪܹܟ ܘܲܡܩܝܼܡ ܠܐܲܝܠܹܝܢ ܕܐܲܫܦܸܠܘ ܒܲܬܼܝܵܒܼܘܼܬܼܵܐ ܀ 361 :ܥܲܡ ܟܠ ܘܲܒܼܟܼܠ ܡܸܬܿܕܲܡܹܐ ܗ̄ܘ̣ܵܐ ܕܢܲܚܹܐ ܠܟܼܠܵܐ 362 ܘܲܠܟܼܠ ܬܼܓܼܡܝܼ̈ܢ ܡܸܫܬܵܘܬܲܦ ܗ̄ܘ̣ܵܐ ܒܝܲܕܼ ܥܘܼܕܪ̈ܢܵܘܗܝ ܀ 363 :ܫܦܝܼܥ ܗ̄ܘ̣ܵܐ ܚܘܼܒܹܿܗ ܘܡܲܣܪܲܚ ܝܵܗܸ̇ܒܼ ܥܘܼܬܼܪܵܐ ܕܡܸܠܵܘ̈ܗܝ 364 ܘܲܡܓܲܪܸܓܼ ܗ̄ܘ̣ܵܐ ܠܟܼܠ ܡܘܼܫܚܵܬܹ̈ܐ ܠܡܸܥܬܲܪ ܡܸܢܹܗ ܀ 365 :ܠܵܐ ܫ̣ܒܲܩ ܥܲܡܵܐ ܕܠܵܐ ܦܲܓܸܠܼ ܒܹܗ ܡ̣ܢ ܣܝܼܡܵܬܹ̈ܗ 366 ܘܠܵܐ ܡܲܠܟܿܘܼܬܼܵܐ ܕܠܵܐ ܐܲܣܸܢ ܒܵܗ̇ ܚܹܝܠ ܚܸܟܼܡܵܬܹ̈ܗ ܀ 367 :ܒܟܼܠ ܐܲܬܼܪ̈ܘܵܢ ܐܲܫܡܲܥ ܩܵܠܹܗ ܒܲܕܼܡܘܼܬܼ ܪܲܥܡܵܐ 368 ܘܲܟܼܢܲܫ̣ܘ ܨܹܐܕܼܵܘܗܝ ܡ̣ܢ ܟܠܦܸܢ̈ܝܵܢ ܕܲܢܨܘܼܬܼܘܼܢܵܝܗܝ ܀ 369 :ܗܲܢܝܼ ܗ̄ܘ̣ܵܐ ܛܵܒܼ ܩܵܠ ܢܸܥܡܵܬܹ̇ܗ ܡ̣ܢ ܟܠ ܩܵܠܝܼ̈ܢ 370 ܟܲܕܼ ܙܵܡܲ݁ܪ ܗ̄ܘ̣ܵܐ ܬܠܝܼܬܼܵܝܘܼܬܼܵܐ ܒܐܸܕܼܢܲܝ̈ ܟܠܢܵܫ ܀ 371 :ܐܘܿ ܕܸܢܪܵܐ ܕܢܵܩܹ̇ܫ ܗ̄ܘ̣ܵܐ ܒܹܗ ܙܡ̇ܪܵܐ ܕܪܘܼܚܵܐ 372 ܘܲܡܚܲܕܹܿܐ ܗ̄ܘ̣ܵܐ ܠܪ̈ܘܼܚܵܢܵܝܹܐ ܘܦܲܓܼܪ̈ܵܢܵܝܹܐ ܀ 373 :ܐܘܿ ܐܲܒܿܘܼܒܼܵܐ ܕܙܵܡܲܪ ܟܠܝܘܿܡ ܘܠܵܐ ܡܸܬܼܪܲܦܸܐ 374 ܘܟܲܕܼ ܗܘ̤ ܪܵܦܝܵܐ ܗ̄ܘ̣ ܡܸܬܼܚܲܨܲ ܗ̄ܘ̣ܵܐ ܟܲܕܼ ܙܵܡܲ݁ܪ ܒܹܗ ܀ 375 ܐܘܿ ܫܝܼܦܘܿܪܵܐ ܕܲܡܣܲܝܲܟ ܗ̄ܘ̣ܵܐ ܒܲܚܕܼܵܐ ܕܘܼܟܵܐܲ 376 ܘܡܲܫܡܲܥ ܩܵܠܹܗ ܒܟܼܠ ܐܲܬܼܪ̈ܵܘܵܢ ܐܲܝܟ ܩܲܪܝܼܒܼܵܐ ܀ 377 :ܚܙܲܩ̣ܘ ܗܲܕܿܡ̇ܘ̈ܗܝ ܥܲܡ ܪܸܥܝܢܹܗ ܠܐܲܪܒܲܥܦܸܢ̈ܝܵܢ 378 ܘܟܲܢܸܫ ܐܸܢܹܝܢ ܠܡܸܫܡܲܥ ܬܲܗܪܵܐ ܕܕܼܵܪܘܿܙܘܼܬܹܗ ܀ 379 ܒܝܲܕܼ ܣܘܼܥܪ̈ܵܢܹܐ ܫܸܠܡ݂ܲܬ̤ ܨܹܐܕܼܵܘܗܝ ܣܵܗܕܿܘܼܬܼ ܡܵܪܹܗ: pb. 80 380 ܕܡܵܐܢܵܐ ܗ̄ܘ̣ ܓܲܒܼܝܵܐ ܕܲܓܼܒܸܐ ܘܲܒܼܚܝܼܪ ܒܟܼܘܼܪܵܐ ܕܪܘܼܚܵܐ ܀ 381 :ܓܒܼ݂ܵܝܗܝ ܨܸܒܼܝܵܢܵܐ ܕܲܓܼܠܹܐ ܠܹܗ ܟܠ ܥܲܕܼܠܵܐ ܢܸܗܘܹܐ 382 ܘܐܲܓܼܥܸܠ ܒܐܝܼܕܼܵܘ̈ܗܝ ܓܲܙܵܐ ܕܪܘܼܚܵܐ ܕܟܼܵܪܘܿܙܘܼܬܹܗ ܀ 383 :ܠܚ̣ܵܐ ܠܲܓܼܙܘܼܪܬܵܐ ܛܲܒܼܥܵܐ ܕܒܸܣܪܵܐ ܡܸܬܼܚܲܒܿܠܵܐ 384 ܘܛܲܒܼ݂ܥܹܗ ܒܪܘܼܚܵܐ ܕܢܸܗܘܹܐ ܡܲܦܠܲܚ ܪܘܼܚܵܢܵܐܝܼܬܼ ܀ 385 :ܫܲܚܠܸܦ ܠܲܫܡܹܗ ܕܡܸܬܼܟܲܢܸܐ ܗ̄ܘ̣ܵܐ ܒܲܫܡܵܐ ܫܐܝܼܠܵܐ 386 ܘܲܩܪ݂ܵܝܗܝ ܦܘܿܠܘܿܣ ܡܸܬܿܛܦܝܼܣܵܢܵܐ ܕܐܸܬܿܛܦܝܼܣ ܘܐܲܦܝܼܣ ܀ 387 :ܒܲܫܡܹܗ ܦܲܫܸܩ ܥܲܠ ܪܸܥܝܵܢܹܗ ܕܫܵܠܹ̇ܡ ܠܲܫܡܹܗ 388 ܘܲܒܼܣܘܼܥܪ݁ܵܢܹܐ ܓܲܡ̣ܪܹܗ ܠܲܫܡܹܗ ܘܲܠܓܲܒܼܝܘܼܬܹܗ ܀ 389 :ܒܟܼܠ ܐܸܣܟܹܿܡܝܼ̈ܢ ܫܲܠܚܹܗ ܠܲܫܡܵܐ ܕܝܗ̄ܘܼܕܼܵܝܘܼܬܼܵܐ 390 ܘܲܒܼܟܼܠ ܡܸܕܹܿܡ ܠܒܸܫ ܠܲܡܫܝܼܚܵܐ ܫܡܵܐ ܝܲܩܝܼܪܵܐ ܀ 391 :ܡ̣ܢ ܟܠ ܡܸܕܹܿܡ ܪܲܚܡܹܗ ܠܲܫܡܵܐ ܕܫܲܚܠܸܦ ܠܲܫܡܹܗ 392 ܘܠܵܐ ܣ̣ܵܡ ܡܸܕܹܿܡ ܥܲܡ ܗܵܘ̇ ܕܲܓܼܒܼ݂ܵܝܗܝ ܐܸܠܵܐ ܐܸܢ ܗܘ̤ ܀ 393 :ܒܲܫܡܵܐ ܡܫܝܼܚܵܐ ܡܸܫܬܲܒܼܗܲܪ ܗ̄ܘ̣ܵܐ ܒܟܼܠ ܐܘܼܠܨܵܢܝܼ̈ܢ 394 ܘܒܹܗ ܡܲܩܪܸܒܼ ܗ̄ܘ̣ܵܐ ܘܙܵܟܹ̇ܐ ܠܛܘܼܥܝܲܝ ܘܲܠܦܲܠܵܚܹ̈ܝܗ̇ ܀ 395 :ܠܹܗ ܗ̄ܘ̣ ܠܲܫܡܵܐ ܣ݂ܵܡ ܫܲܬܐܸܣܬܵܐ ܕܟܼܵܪܘܼܙܘܼܬܹܗ 396 ܘܲܥܠܵܘܗܝ ܫܲܟܼܠܸܠ ܒܸܢܝܵܢ ܐ̄ܢܵܫܵܐ ܕܗܲܝܡܼܢܘ ܒܲܫܡܹܗ ܀ 397 :ܫܒܼܝܼܚ ܒܸܢܝܵܢܹܗ ܘܲܦܠܸܐ ܘܲܪܓܼܝܼܓܼ ܪܵܘܡ̇ܐ ܕܡܸܠܵܘ̈ܗܝ 398 ܘܠܵܐ ܐ̄ܢܵܫ ܒܵܢܹܐ ܝܲܬܿܝܼܪ ܡܵܢܹܗ ܒܸܢܝܵܢ ܩܘܼܫܬܵܐ ܀ 399 :ܐ̄ܢܵܐ ܠܲܡ ܣܵܡܹ̇ܬܼ ܐܲܝܟ ܚܲܟܿܝܼܡܵܐ ܐܸܣܬܼܵܐ ܕܩܘܼܫܬܵܐ 400 ܢܸܚܙܹܐ ܟܠܢܵܫ ܐܲܝܟܲܢ ܒܵܢܹ̇ܐ ܠܘܵܬܼ ܫܘܼܠܵܡܵܐ ܀ 401 :ܐܘܿ ܒܲܢܵܝܵܐ ܕܣ̣ܵܡ ܫܲܬܸܐܣܬܼܵܐ ܕܗܲܝܡܵܢܘܼܬܼܵܐ 402 ܐܲܝܟ ܕܲܒܼܥܲܪ̈ܩܹܐ ܫܲܟܼܠܸܠ ܘܲܒܼܢ̣ܵܐ ܣܲܒܪܵܐ ܘܚܘܼܒܵܐ ܀ 403 :ܐܘܿ ܐܲܬܼܠܹܝܛܵܐ ܕܐܸܚܲܕܼ ܕܲܪܵܐ ܥܲܡ ܟܠ ܡܸܕܸܡ 404 ܘܚ̣ܵܒܼ ܟܠܡܸܕܸܿܡ ܡ̣ܢ ܚܘܼܡܣܵܢܵܐ ܕܗܲܝܡܵܢܘܼܬܹܗ ܀ 405 :ܐܘܿ ܩܪܲܒܼܬܼܵܢܵܐ ܕܲܡܙܲܝܲܢ ܗ̄ܘ̣ܵܐ ܪܘܼܚܵܢܵܐܝܼܬܼ 406 ܘܡܸܬܼܟܲܬܲܫ ܗ̄ܘ̣ܵܐ ܘܚܵܢܹ̇ܐ ܒܙܵܘܥܹ̈ܐ ܠܢܝܼܫܵܐ ܡܫܝܼܚܵܐ ܀ 407 :ܡܲܢ̣ܘܼ ܣܵܦܹ̇ܩ ܕܢܸܬܼܢܹܐ ܒܡܸܠܹ̈ܐ ܙܵܟܼܘܼܬܼ ܥܲܡܠܲܝ̈ܟ 408 ܘܡܲܢ̣ܘ ܡܸܫܟܲܚ ܕܲܢܨܘܼܪ ܫܘܼܦܪܲܝܟ ܒܲܟܼܬܼܝܼ̈ܒܼܵܬܼܵܐ ܀ 409 :ܠܲܝܬܿ ܪܸܥܝܵܢܵܐ ܕܲܡܨܹܐ ܕܢܸܡܛܹܐ ܠܪܵܘܡ̇ܐ ܕܥܲܡܠܲܝܟ 410 ܐܸܠܵܐ ܐܲܝܢܵܐ ܕܲܡܕܲܡܹܐ ܒܵܟ ܒܪ̈ܓܼܫܹܐ ܘܙܵܘܥܹ̈ܐ ܀ 411 :ܠܵܐ ܐ̄ܢܵܫ ܣܵܠܹ̇ܩ ܠܐܲܝܟܵܐ ܕܲܣܠܸ̣ܩܬܿ ܐܲܝܟ ܕܐܲܢ̄ܬܿ ܐܸܡ̣ܪܬܿ 412 ܐܸܠܵܐ ܫܵܠܲܚ ܡ̇ܝܘܿܬܼܘܼܬܼܵܐ ܒܐ̄ܪܵܙ ܕܘܼܒܵܪ̈ܲܝܟ ܀ pb. 81 413 :ܠܬܼܘܼܠܬܵܐ ܕܪܵܘܡ̇ܐ ܢܲܓܼܕܵܟ ܪܸܡܙܵܐ ܘܡܲܠܸܠ ܥܲܡܵܟ 414 ܡܸܠܹ̈ܐ ܕܟܲܣ̈ܝܵܢ ܘܠܵܐ ܡܸܬܼܡܲܠ̈ܠܵܢ ܒܸܠܫܵܢ ܒܸܣܪܵܐ ܀ 415 :ܐܘܿ ܒܸܣܪܵܢܵܐ ܕܟܲܕܼ ܒܸܣܪܵܢܵܐ ܗ̄ܘ̣ ܦܪ݂ܲܚ ܥܲܠ ܐܵܐܲܪ 416 ܐܘܿ ܠܡܵܝܘܿܬܼܵܐ ܕܲܫܘ̣ܵܐ ܠܩܵܠܵܐ ܕܠܵܐ ܡ̇ܝܘܿܬܹ̈ܐ ܀ 417 :ܐܘܿ ܕܐܸܬܼܝܲܩܲܪ ܒܲܫܒܼܝܼ̈ܚܵܬܼܵܐ ܕܪ̈ܵܡ̇ܢ ܡܸܢܹܗ 418 ܘܡܲܟܸܿܢ ܢܲܦܫܹܗ ܐܲܝܟ ܠܵܐ ܝܵ̇ܕܲܥ ܕܲܫ̣ܘܵܐ ܠܡܸܕܲܡ ܀ 419 :ܐܘܿ ܚܵܙܘܿܩܵܐ ܕܲܡ̣ܛܵܐ ܠܲܥܕܹܢ ܟܲܕܼ ܠܵܐ ܗܲܠܸܟ 420 ܘܲܫܡܲ݁ܥ ܩܵܠܵܐ ܕܟܲܕܼ ܡܸܬܼܡܲܠܲܠ ܠܵܐ ܡܸܬܡܲܠܲܠ ܀ 421 :ܡ̇ܢܵܘ ܕܐܸܡܲܪܬܿ ܦܵܘܠܘܿܣ ܓܲܒܼܝܵܐ ܥܲܣܩܵܐ ܒܥܵܬܹܗ 422 ܐܲܝܟܲܢ ܫܵܡܲ݁ܥ ܐܲܝܢܵܐ ܕܫܵܡܲ̇ܥ ܟܕܼ ܠܵܐ ܫܲܠܝܼܟ ܀ 423 :ܓܠܝܼ ܠܲܢ ܠܲܒܼܪܵܐ ܡ̇ܢܵܘ ܕܐܸܡܲܪܬܿ ܕܲܥܛܸܠ ܫܸܡܥܹܗ 424 ܒܐܲܝܠܹܝܢ ܪ̈ܓܼܫܹܐ ܫܘ݂ܲܝܬܿ ܕܬܼܨܘܼܬܼܝܼܘܗܝ ܐܲܢ̄ܬܿ ܒܲܠܚܘܿܕܲܝܟ ܀ 425 :ܐܸܢ ܠܵܐ ܫܲܠܝܼܛ ܠܡܸܬܼܡܲܠܵܠܘܼ ܠܡܵܢ ܐܸܬܼܡܲܠܲܠ 426 ܘܐܸܢ ܐܸܬܼܡܲܠܲܠ ܡ̇ܕܹܝܢ ܫܲܠܝܼܛ ܠܲܡܨܵܬܼ ܫܸܡܥܹܗ ܀ 427 :ܐܸܢܗܘ̤ ܕܲܫܘ݂ܲܬܿ ܕܬܸܫܡܲܥ ܡܸܕܹܿܡ ܕܠܵܐ ܡܸܬܼܡܲܠܲܠ 428 ܡ̇ܕܹܝܢ ܩܲܒܸܿܠܬܿ ܐܵܦ ܣܘܼܟܿܠܹܗ ܕܗܵܘ̇ ܡ̇ܐ ܕܲܫ̣ܡܲܥܬܿ ܀ 429 :ܐܸܝܢ ܠܲܡ ܫܸܡܥܹ̇ܬܼ ܘܝܹܠܦܹ̇ܬܼ ܚܲܝܠܵܐ ܕܗܵܘ̇ ܡ̇ܐ ܕܫܸܡܥܹ̇ܬܼ 430 ܐܸܠܵܐ ܥܲܣܩܵܐ ܠܒܸܣܪ̈ܵܢܵܝܹܐ ܠܒܸܣܪ̈ܵܢܵܝܹܐ ܠܡܸܫܡܲܥ ܗܵܟܲܢ ܀ 431 :ܐܵܦ ܐ̄ܢܵܐ ܕܫܸܡܥܹ̇ܬܼ ܠܵܐ ܗ̄ܘ̣ܵܐ ܒܪ̈ܓܼܫܹܐ ܕܒܸܣܪܵܐ ܫ̣ܡܥܹ̇ܬܼ 432 ܐܸܠܵܐ ܒܐ̄ܪܵܙܵܐ ܕܠܸܥܙܵܐ ܕܩܢܹܝܢ ܠܵܐ ܡ̇ܝܘܿܬܹ̈ܐ ܀ 433 :ܒܐ̄ܪܵܙ ܗܵܘ̇ ܩܵܠܵܐ ܕܲܡܗܲܠܠܝܼܢ ܒܹܗ ܒܗܵܘ̇ ܬܘܼܩܵܢܵܐ 434 ܒܹܗܘ̣ ܫܸܡܥܹ̇ܬܼ ܗܵܘ̇ ܡ̇ܐ ܕܫܸܡܥܹ̈ܬܼ ܠܵܐ ܗ̄ܘ̣ܵܐ ܒܲܦܓܲܪ ܀ 435 :ܒܪܘܼܚܵܐ ܫܸܡܥܹ̇ܬܼ ܠܟܸܢ̈ܫܲܝ ܪܵܘܡ̇ܐ ܐ̄ܪܵܙܵܢܵܐܝܼܬܼ 436 ܕܲܡܗܠܠܝܼܢ ܗ̄ܘ̣ܵܘ ܪܘܼܚܵܢܵܐܝܼܬܼ ܠܚܹܝܠ ܐܝܼܬܼܘܼܬܼܵܐ ܀ 437 :ܫܒܼܝܼܚ ܗ̄ܘ̣ܵܐ ܘܲܬܼܡܝܼܗ ܩܵܠ ܢܸܥ̈ܡܵܬܼܵܐ ܕܗܘܼ̈ܠܵܠܲܝܗܘܿܢ 438 ܘܠܵܐ ܣܵܒܲܥ ܗ̄ܘ̣ܵܐ ܗܵܘܢܵܐ ܠܡܸܫܡܲܥ ܠܗܵܝ̇ ܚܲܠܝܘܼܬܵܐ ܀ 439 :ܠܵܐ ܣܵܦ̇ܩܵܐ ܗ̄ܘ̣ܵܬܼ ܐܼܕܼܢܵܐ ܕܒܸܣܪܵܐ ܠܗܵܝ̇ ܡܲܫܡܲܥܬܼܵܐ 440 ܘܠܵܐ ܠܸܫܢܵܐ ܡܨܸܐ ܗ̄ܘ̣ܵܐ ܕܢܹܐܡܲܪ ܐܲܝܟ ܠܸܥܙܲܝ̈ܗܘܿܢ ܀ 441 :ܚܕܲܬܵܐ ܗ̄ܝܼ ܕܲܗܘ̤ܵܬܼ ܨܹܐܕܲܝ ܒܲܠܚܘܿܕܼ ܠܵܘ ܡܸܛܠܵܬܼܝ 442 ܕܲܫܘܹ̇ܝܬܼ ܕܐܸܚܙܹܝܘܗܝ ܠܗܵܘ̇ ܬܘܼܩܵܢܵܐ ܐ̄ܪܵܙܵܢܵܐܝܼܬܼ ܀ 443 :ܒܝܼ ܩܲܕܼܡ̇ܝܵܐ ܨܒܼܵܐ ܕܲܢܚܵܘܹܐ ܥܘܼܬܼܪܵܐ ܕܪ̈ܲܚܡܵܘܗܝ 444 ܕܢܸܬܸܿܠ ܒܐܝܼܕܲܝ̈ ܣܲܒܼܪܵܐ ܛܵܒܼܵܐ ܠܡܵܝܘܿܬܼܘܼܬܼܵܐ ܀ pb. 82 445 :ܒܗܵܕܹܐ ܬܸܢܘܲܝ ܫܘܹ̇ܝܬܼ ܠܲܕܼܪ̈ܡ̇ܢ ܡ̣ܢ ܡ̇ܝܘܿܬܹ̈ܐ 446 ܕܒܼܝܼ ܢܸܬܼܠܲܒܿܒܼܘܼܢ ܓܸܢܣܵܐ ܕܐ̄ܢܵܫܵܐ ܒܣܲܒܼܪܵܐ ܕܚܲܝܹ̈ܐ ܀ 447 :ܘܡܸܛܠ ܗܵܕܹܐ ܢܲܓܼܕܲܢܝ ܪܸܡܙܵܐ ܥܕܲܡ̇ܐ ܠܲܥܕܹܢ 448 ܕܐܹܙܲܠ ܐܸܚܙܹܐ ܘܐܲܝܬܹܿܗ ܣܒܲܪܬܼܵܐ ܕܗܵܘ̇ ܬܘܼܩܵܢܵܐ ܀ 449 :ܕܐܸܙܹ̇ܠ̄ܬܼ ܝܸܕܥܹ̇ܬܼ ܘܕܲܐܝܟܲܢ ܐܸܙܹ̇ܠ̄̇ܬܼ ܠܵܐ ܝܵܕܲܥ ܐ̄ܢܵܐ 450 ܕܠܵܐ ܨܒܼܵܐ ܪܸܡܙܵܐ ܕܲܢܒܲܕܹܿܩ ܠܝܼ ܕܐܲܝܟܲܢ ܐܸܙܹ̇ܠ̄ܬܼ ܀ 451 :ܠܵܐ ܨܒܼܵܐ ܓܠ̣ܵܐ ܠܝܼ ܕܐܸܢ ܥܲܡ ܢܲܦܫܵܐ ܚ̣ܙܲܩܘ ܗܲܕܵܡܹ̈ܐ 452 ܕܐܵܦ ܗܝ̤ ܗܵܕܹܐ ܒܚܸܟܼܡܵܐ ܥܲܒܼ݂ܕܵܗ̇ ܕܐܸܕܲܥ ܠܲܟܼܝܵܢܝ ܀ 453 :ܠܒܲܪ ܡ̣ܢ ܛܲܟܼܣܵܐ ܨܒܼܵܐ ܕܲܢܚܵܘܹܝܢܝ ܐܲܝܟ ܕܲܠܝܲܚܛܵܐ 454 ܘܲܕܼܠܵܐ ܐܸܛܥܸܐ ܠܲܟܼܝܵܢܝ ܫܝܼܛܵܐ ܟܠ̣ܵܢܝ ܡ̣ܢ ܗܵܕܹܐ ܀ 455 :ܕܫܸܡܥܹ̇ܬܼ ܩܵܠܵܐ ܐܵܦ ܣܘܼܟܵܠܵܐ ܫܲܪܝܼܪܵܐ ܠܝܼ 456 ܘܕܸܐܢ ܬܲܡܵܢ ܗ̄ܘܹ̇ܝܬܼ ܒܲܦܓܲܪ ܘܒܼܪܘܼܚ ܠܵܐ ܝܵ̇ܕܲܥ ܐ̄ܢܵܐ ܀ 457 :ܘܐܸܢܗܘ̤ ܕܐܸܢܵܐ ܕܫܸܡܥܹ̇ܬܼ ܐܸܢܹܝܢ ܛܥ̣ܵܬܲܢܝ ܗܵܕܹܐ 458 ܡ̇ܢ ܡܸܬܼܦܲܫܲܟ ܐܲܝܢܵܐ ܕܒܼܵܥܹܐ ܕܐܲܝܟܲܢ ܐܸܙܹ̇ܠ̄ܬܼ ܀ 459 :ܐܸܙܹ̇ܠ̄ܬܼ ܘܲܡ̇ܛܹܝܬܼ ܠܐܲܝܟܵܐ ܕܐܸܡܹ̇ܬܼ ܗܲܝܡܸܢ ܘܐܲܫܲܪ 460 ܘܲܕܼܫܸܡܥܹ̇ܬܼ ܐܲܝܠܹܝܢ ܕܲܬܼܢܹ̇ܝܬܼ ܠܵܐ ܬܸܬܼܦܲܠܲܓܼ ܀ 461 :ܠܵܘ ܫܘܼܒܼܗܵܪܵܐ ܚܲܦܛܲܢ̣ܝ ܕܐܸܬܼܢܹܐ ܩܘܼܠܵܣ ܥܲܡܠܲܝ̈ 462 ܛܢܵܢܵܐ ܕܣܲܛܼܠܹ̈ܐ ܥܨ̣ܵܢܝ ܕܐܸܫܬܲܒܼܗܲܪ ܒܲܕܼܪ̈ܵܡܵܢ ܡܹܢܝ ܀ 463 :ܒܗܵܕܹܐ ܥ̣ܠܬܼܵܐ ܨܒܹ̇ܝܬܼ ܕܐܹܒܲܕܹܿܩ ܐܲܝܠܹܝܢ ܕܲܚܙܹ̇ܝܬܼ 464 ܕܐܲܩܢܹܐ ܣܲܒܼܪܵܐ ܠܲܕܼܠܵܐ ܣܲܒܼܪܵܐ ܒܛܘܼܒܹ̈ܐ ܕܲܠܗܲܠ ܀ 465 :ܡܲܢ ܠܵܐ ܢܸܪܚܲܡ ܡܸܠܲܬܼ ܦܵܘܠܘܿܣ ܕܲܫ̣ܡܲܥ ܘܐܲܦܝܼܣ 466 ܘܠܵܐ ܟܵܝ̣ܡ ܘܲܛܠܲܡ ܠܲܟܼܢܵܘܵܬܹ̈ܗ ܡ̣ܢ ܡ̇ܐ ܕܲܫܡ݂ܲܥ ܀ 467 :ܡܲܢ ܠܵܐ ܢܸܗܪܘܿܓܼ ܒܣܸܦܪܲܝ ܡܸܠܵܘ̈ܗܝ ܕܣܵܦܪܵܐ ܕܪܘܼܚܵܐ 468 ܘܦܲܫܸܩ ܘܐܲܕܼܢܲܚ ܐ̄ܪ̈ܵܙܹܐ ܟܣܲܝܵ̈ܐ ܩܕܼܵܡ ܬܲܠܡܝܼܕܼܵܘ̈ܗܝ ܀ 469 :ܡܵܢ ܠܵܐ ܢܸܩܒܿܘܿܥ ܠܢܝܼܫܵܐ ܕܡܸܠܬܹܗ ܩܕܸܵܡ ܬܲܪܥܝܼܬܹܗ 470 ܕܲܚ̣ܢܵܐ ܒܙܵܘܥܹ̈ܐ ܘܲܒܼܗܲܕܵܡܹ̈ܐ ܠܘܵܬܼ ܙܵܟܼܘܼܬܼܵܐ ܀ 471 :ܡܲܢ ܠܵܐ ܢܸܡܪܘܿܩ ܣܲܢܝܘܼܬܼ ܢܲܦܫܹܗ ܒܫܘܼܦܪܵܐ ܕܡܸܠܵܘ̈ܗܝ 472 ܘܢܸܚܙܹܐ ܡܘܼܡ̇ܘ̈ܗܝ ܒܝܲܕܼ ܡܲܚܙܝܼܬܼܵܐ ܕܫܲܦܝܼܪ̈ܵܬܹܗ ܀ 473 :ܡܲܢ ܠܵܐ ܢܸܒܼܢܹܐ ܥܲܠ ܬܵܘܕܿܝܼܬܼܵܐ ܕܗܲܝܡܵܢܘܿܬܹܗ 474 ܕܲܢ̣ܫܲܒܼ ܪ̈ܘܼܚܹܐ ܕܚܲܫܹ̈ܐ ܩܫ̈ܲܝܵܐ ܘܠܵܐ ܐܲܙܝܥܘܼܗ̇ ܀ 475 :ܡ̣ܢ ܠܵܐ ܢܸܠܒܲܫ ܙܲܝܢܵܐ ܕܪܘܼܚܵܐ ܒܛܲܟܼܣܵܐ ܕܝܼܠܹܗ 476 ܕܠܵܐ ܐܸܬܼܪܲܦܝܼ ܡ̣ܢ ܬܿܟܼܬܿܘܼܫܵܐ ܥܕܲܡܵܐ ܠܡܵܘܬܵܐ ܀ 477 :ܡܲܢ ܠܵܐ ܢܸܪܕܹܿܐ ܒܐܘܼܪܚܵܐ ܕܲܕܼܪܲܐ ܒܐܘܼܪܚܵܐ ܠܐܲܦܲܝ̈ ܪܵܘܡ̇ܐ 478 ܕܡܲܢܲܥ ܘܡ̣ܛܵܐ ܠܐܲܦܲܝ̈ ܪܵܘܡ̇ܐ ܕܠܵܐ ܟܲܪܝܘܼܬܼܵܐ ܀ 479 ܡܲܢ ܠܵܐ ܢܹܐܣܘܿܪ ܙܵܘܥܲܝ̈ ܢܲܦܫܹܗ ܒܗܲܝܡܵܢܘܼܬܹܗ: pb. 83 480 ܘܐܲܟܼܬܸܿܒܼ ܣܲܒܼܪܵܐ ܘܐܲܗܓܿܝܼ ܚܘܼܒܵܐ ܕܠܵܐ ܡܸܬܼܚܲܒܲܠ ܀ 481 :ܐܲܝܟܲܢ ܢܸܛܠܘܿܩ ܐܲܝܢܵܐ ܕܩܵܪܹܐ ܒܲܟܼܬܼܝܼ̈̄ܒܼܵܬܹܗ 482 ܕܠܵܐ ܢܸܦܪܘܼܥ ܠܹܗ ܐܵܦܸܢ ܡܸܠܹ̈ܐ ܚܠܵܦ ܣܘܼܥܪ̈ܵܢܹܐ ܀ 483 :ܐܲܝܟܲܢ ܢܲܗܘܸܐ ܐܲܝܢܵܐ ܕܪܵܗܹ̇ܛ ܠܘܼܩܒܲܠ ܢܝܼܫܹܗ 484 ܕܠܵܐ ܢܦܲܢܹܐ ܠܹܗ ܟܠܝܼܠ ܙܵܟܼܘܼܬܵܐ ܐܲܟܼܡܵܐ ܕܫܵܘܹ̇ܐ ܀ 485 :ܡܲܢ ܐܸܬܼܟܲܬܲܫ ܒܐܵܓܼܘܿܢ ܩܘܼܫܬܵܐ ܒܲܕܼܡܘܼܬܼ ܦܵܘܠܘܿܣ 486 ܘܡܲܢ̣ܘܼ ܕܲܫܘ̣ܵܐ ܠܲܟܼܠܝܼܠ ܫܘܼܒܼܚܵܐ ܝܲܬܼܝܼܪ ܡܸܢܹܗ ܀ 487 :ܡܲܢ ܐܼܬܸܚܲܟܲܡ ܒܪ̈݁ܘܼܚܵܢܝܵܬܼܵܐ ܐܲܝܟ ܪܸܥܝܵܢܹܗ 488 ܘܡܲܢ̣ܘܼ ܕܲܬܼܢ̣ܵܐ ܥܲܠ ܕܲܥܬܼܝܼ̈ܕܼܵܢ ܐܲܝܟ ܡܵܐ ܕܐܲܟܼܬܸܿܒܼ ܀ 489 :ܡܲܢ̣ܘ ܕܕܲܡܝܼ ܠܘܼܩܒܲܠ ܢܝܼܫܵܐ ܕܲܩܒ݂ܲܥ ܡܲܠܟܵܐ 490 ܘܐܲܝܢܵܘ ܕܲܚܢ̣ܵܐ ܠܘܵܬܼ ܙܵܟܼܘܼܬܼܵܐ ܒܕܼܘܼܡܝܵܐ ܕܝܼܠܹܗ ܀ 491 :ܕܲܦܠ݂ܲܚ ܕܠܵܐ ܢܲܦ̈ܩܵܬܼܵܐ ܐܲܝܟ ܦܘܼܠܚܵܢܹܗ 492 ܘܠܵܐ ܢܣ݂ܲܒܼ ܐܲܓܼܪܵܐ ܐܲܦܣܘܿܢ̈ܝܵܬܼܵܐ ܐ̄ܢܵܫܵܝܼ̈ܬܼܵܐ ܀ 493 :ܡܲܢ̣ܘܼ ܕܲܪܗܲܛ ܒܸܐܣܛܵܕܝܼܘܿܢ ܪܘܼܚܵܢܵܝܬܵܐ 494 ܘܠܵܐ ܐܸܬܼܥܲܪܩܲܠ ܨܸܒܼܝܵܢ ܢܵܦܫܹܗ ܒܐܲܪ̈ܥܵܢܵܝܵܬܼܵܐ ܀ 495 :ܐܵܘ ܓܲܪ ܢܲܦܫܹܗ ܒܦܘܼܠܚܵܢ ܪܘܼܚܵܐ ܒܥܸܕܵܢ ܨܲܦܪܵܐ 496 ܘܣܵܡ̣ܹܗ ܠܥܲܡܠܹܗ ܐܲܝܟ ܚܲܕܼ ܝܵܘܡܵܐ ܒܫܘܼܠܵܡ ܚܲܝ̈ܘ̈ܗܝ ܀ 497 :ܫܲܪܝܼ ܒܪܲܗܛܵܐ ܕܟܼܵܘܿܙܘܼܬܼܵܐ ܒܥܠܲܝܡܘܼܬܹܗ 498 ܘܫܲܠܡܵܗ̇ ܠܐܘܼܪܚܹܗ ܒܝܲܕܼ ܫܸܫ̈ܠܵܬܼܵܐ ܘܲܒܼܣܲܝܒܿܘܿܬܹܗ ܀ 499 :ܦܵܘܠܘܿܣ ܣܵܒ̣ܵܐ ܐܵܦ ܐܲܣܝܼܪܵܐ ܕܲܚܠܵܦ ܩܘܼܫܬܵܐ 500 ܐܲܝܢܵܘ ܦܘܼܡܵܐ ܕܲܡܨܸܐ ܕܢܸܬܼܢܹܝܟ ܐܲܟܼܡܵܐ ܕܐܝܼܬܲܝܟ ܀ 501 :ܒܨܝܼܪ ܪܸܥܝܵܢܵܐ ܕܢܸܪܗܲܛ ܥܲܡܵܟ ܩܲܠܝܼܠܵܐܝܼܬܼ 502 ܘܲܡܚܝܼܠ ܓܸܦܹܗ ܕܢܸܦܪܲܚ ܨܹܐܕܲܝܟ ܠܐܲܝܟܵܐ ܕܐܝܼܬܲܝܟ ܀ 503 :ܚܲܕܼ ܗ̄ܘ̣ ܝܵ̇ܕܲܥ ܕܲܢܦܲܢܹܐ ܠܵܟ ܟܠܝܼܠ ܙܵܟܼܘܼܬܼܵܐ 504 ܗܵܘ̇ ܕܲܪܚܸܡ̣ܬܵܝܗܝ ܡ̣ܢ ܟܠ ܡܸܕܹܿܡ ܐܲܝܟ ܕܲܦܸܠܹܐ ܠܹܗ ܀ 505 :ܪܸܡܙܵܐ ܕܲܓܼܒܼ݂ܵܟ ܡܨܸܐ ܦܵܪܲܥ ܠܵܟ ܐܲܓܼܪܵܐ ܠܚܘܼܒܵܟ 506 ܗܵܘ̇ ܕܲܚܙܹܝܢ ܠܹܗ ܥܲܡܠܹ̈ܐ ܕܟܼܠܵܐ ܩܕܼܵܡ ܟܠ ܕܲܗܘ̤ܵܐ ܀ 507 :ܪܸܚܡܲܬܼ ܚܘܼܒܹܿܗ ܪܲܚ̣ܡܵܟ ܘܐܲܚܒܼܵܟ ܘܲܩܪ̣ܵܟ ܕܝܼܠܹܗ 508 ܘܝܲܗ̣̄ܒܼ ܒܵܟ ܚܲܝܠܵܐ ܠܡܸܙܟܵܐ ܒܕܝܼܠܹܗ ܐܲܝܟ ܕܲܒܼܕܝܼܠܵܟ ܀ 509 :ܠܵܘ ܕܝܼܠܵܟ ܗ̄ܘ̣ܵܐ ܠܡܸܙܟܵܐ ܠܚܲܫܹ̈ܐ ܒܸܠܥܵܕܼ ܚܲܝܠܹܗ 510 ܕܲܡܚܝܼܠ ܣܲܓܝܼ ܟܝܵܢ ܡ̇ܝܘܿܬܹ̈ܐ ܠܡܸܙܟܵܐ ܒܕܼܝܼܠܹܗ ܀ pb. 84 511 :ܠܵܘ ܕܝܼܠܵܟ ܗ̄ܘ̣ܵܬ ܠܡܹܐܠܲܦ ܐ̄ܪܵ̈ܙܹܐ ܕܲܣܬܼܝܼܪ̈ܵܬܼܵܐ 512 ܕܠܲܝܬܿ ܒܲܥܒܼܝܼܕܹ̈ܐ ܠܡܸܣܬܲܟܵܠܘܼ ܒܡܸܕܹܿܡ ܕܲܟܼܣܸܐ ܀ 513 :ܚܘܼܒܹܿܗ ܓܠ̣ܵܐ ܠܵܟ ܐܲܝܟ ܕܲܠܪܵܚܡܵܐ ܕܫܲܪܝܼܪ ܚܘܼܒܹܿܗ 514 ܘܗܘ̤ ܒܲܕܹܿܩ ܠܵܟ ܚܹܝܠ ܟܲܣ̈ܝܵܬܼܵܐ ܕܪ̈ܡ̇ܢ ܡܸܢܵܟ ܀ 515 :ܫܪܵܪܵܟ ܚܵܘܝܼܢܿ ܒܟܸܣܦܵܐ ܕܝܲܗ̄ܒܼ݂ ܠܵܟ ܕܬܸܬܲܓܲܪ ܒܹܗ 516 ܘܐܲܓܼܥܸܠ ܒܐܝܼܕܲܝ̈ܟ ܐܲܝܟ ܫܲܪܝܼܪܵܐ ܓܲܙܵܐ ܕܪ̈ܲܚܡܵܘܗܝ ܀ 517 :ܫܲܪܝܼܪ ܚܘܼܒܵܟ ܘܲܦܸܠܹܐ ܓܲܙܵܐ ܕܡܲܓܼܥܲܠ ܒܐܝܼܕܲܝ̈ܟ 518 ܘܠܵܠ ܐ̄ܢܵܫ ܝܵ̇ܕܲܥ ܠܲܡܦܲܪܢܵܣܘܼ ܝܲܬܿܝܼܪ ܡܸܢܵܟ ܀ 519 :ܐܲܢ̄ܬܿ ܐܲܟܼܪܸܙܬܵܝܗܝ ܠܫܸܡ ܐܝܼܬܼܘܼܬܼܵܐ ܒܐܸܕܼܢܲܝ̈ ܟܠܢܵܫ 520 ܘܐܲܢ̄ܬܿ ܚܵܘܝܼܬܵܗ̇ ܠܫܲܘܝܘܼܬܼ ܐܲܒܼܵܐ ܘܪܘܼܚܵܐ ܀ 521 :ܐܲܢ̄ܬܿܘܼ ܒܲܕܸܿܩܬܿ ܕܠܵܐ ܛܠܹܐ ܝܲܠܕܵܐ ܡ̣ܢ ܝܵܠܘܿܕܹܗ 522 ܘܐܵܦܠܵܐ ܪܘܼܚܵܐ ܒܨܝܼܪ ܡ̣ܢ ܐܲܒܼܵܐ ܘܝܲܠܕܵܐ ܕܡܸܢܹܗ ܀ 523 :ܐܲܢ̄ܬܿ ܐܲܠܸܦܬܵܢ ܕܠܵܐ ܡܸܣܬܲܝܲܟ ܐܝܼܬܼܝܵܐ ܒܕܸܝܼܠܹܗ 524 ܘܐܲܢ̄ܬܿ ܚܵܘܝܼܬܵܢ ܕܠܵܐ ܡܸܬܼܢܲܣܸܐ ܒܚܵܫܘܿܫܘܼܬܼܵܐ ܀ 525 :ܒܪܘܼܚ ܓܸܠܝܵܢܵܐ ܓܼܠܲܝܬܵܝܗܝ ܠܐ̄ܪܵܙܵܐ ܕܦܘܼܪܩܵܢ ܚܲܝܲܝ̈ܢ 526 ܕܫܲܡܠܝܼ ܘܲܓܼܡ݂ܲܪ ܨܸܒܼܝܵܢ ܟܲܣܝܵܐ ܒܓܲܠܝܘܼܬܼ ܦܲܓܼܪܲܢ ܀ 527 :ܒܟܸܢܲܪ ܢܲܦܸܫܵܟ ܙܡ݂ܲܪ ܦܘܼܪܫܵܢܵܐ ܕܬܲܪܬܹܿܝܢ ܕܸܡ̈ܘܵܢ 528 ܕܡܘܼܬܼܵܐ ܕܥܲܒܼܕܵܐ ܘܲܕܼܥܵܒܼܘܿܕܼܵܐ ܟܲܣܝܵܐ ܘܓܼܠܝܵܐ ܀ 529 :ܗܘ̤ܵܐ ܠܸܫܵܢܵܟ ܒܲܕܼܡܘܼܬܼ ܩܲܢܝܵܐ ܒܐܝܼܕܼܵܐ ܕܪܘܼܚܵܐ 530 ܘܨܵܪ ܐܵܬܼ̈ܘܵܬܼܵܐ ܒܪܸܥܝܵܢ ܐ̄ܢܵܫܵܐ ܡܸܠܬܼܵܐ ܘܦܲܓܼܪܵܐ ܀ 531 :ܡܸܠܬܼܵܐ ܘܦܲܓܼܪܵܐ ܐܲܟܼܪܸܙ ܩܵܠܵܟ ܒܹܝܬܼ ܡ̇ܝܘܿܬܹ̈ܐ 532 ܬܪܹܝܢ ܕܲܦܪܝܼܫܝܼܢ ܒܲܟܼܝܵܢܲܝ̈ܗܘܿܢ ܘܲܫܘܹܝܢ ܐܲܟܲܚ̄ܕܼ ܀ 533 :ܦܪܝܼܫܝܼܢ ܘܲܫܘܹܝܢ ܘܲܟܣܹܝܢ ܘܲܓܼܠܹܝܢ ܘܚܲܕܼ ܡܸܬܼܟܲܢܹܝܢ 534 ܒܪܵܐ ܕܐܲܠܵܗܵܐ ܕܫܵܘܬܸܿܦ ܥܲܡܹܗ ܠ̄ܐܢܵܫܵܐ ܕܲܢ̣ܣܲܒܼ ܀ 535 :ܠܵܘ ܦܘܼܪܫܵܢܵܐ ܕܲܒܼܪܵܐ ܘܲܒܼܪܵܐ ܐܲܥܸܠ ܦܵܘܠܘܿܣ 536 ܕܠܵܐ ܬܸܬܲܩܲܠ ܗܲܪܵܛܝܼܩܵܐ ܒܦܘܼܪܫܵܢ ܡܸܠܵܘ̈ܗܝ ܀ 537 :ܟܝܵܢܹ̈ܐ ܦܲܪܸܫ ܒܗܵܝ̇ ܕܲܦܪܝܼܫܝܼܢ ܚܲܕܼ ܡ̣ܢ ܚܲܒܼܪܹܗ 538 ܘܟܲܢܸܫ ܐܸܢܘܿܢ ܒܲܚܕܼܵܝܘܼܬܼܵܐ ܠܚܲܕܼ ܦܲܪܨܘܿܦܵܐ ܀ 539 :ܦܲܪܸܫ ܐܸܢܘܿܢ ܡܸܛܠ ܚܲܫܹ̈ܐ ܘܲܫܒܼܝܼ̈ܚܵܬܼܵܐ 540 ܘܐܲܫܘܝܼ ܐܸܢܘܿܢ ܡܸܛܠ ܚܘܼܒܵܐ ܕܠܵܐ ܦܘܼܠܵܓܼܵܐ ܀ 541 :ܦܲܠܸܓܼ ܐܸܢܘܿܢ ܘܠܵܐ ܣܕܲܩ ܐܸܢܘܿܢ ܚܕܼ ܡ̣ܢ ܨܿܝܕܼ ܚܲܕܼ 542 ܘܐܲܫܘܝܼ ܐܸܢܘܿܢ ܒܝܲܕܼ ܨܸܒܼܝܵܢܵܐ ܕܲܨܒܼܵܐ ܒܗܵܕܹܐ ܀ pb. 85 543 :ܝܲܗ݂̄ܒܼ ܠܹܗ ܕܝܼܠܹܗ ܠܟܼܠܚܲܕܼ ܡܸܢܗܘܿܢ ܠܦܘܼܬܼ ܗܵܝ̇ ܕܐܝܼܬܼܵܘܗܝ 544 ܕܠܵܐ ܢܸܬܿܬܲܚܬܸܐ ܐܝܼܬܼܝܵܐ ܠܚܼܫܹ̈ܐ ܒܕܲܢܣܲܒܼ ܕܝܼܠܲܢ ܀ 545 :ܫܵܘܬܸܦ ܪܵܡ̇ܐ ܒܲܡܚܝܼ̈ܠܵܬܼܵܐ ܒܲܫܡܵܐ ܫܐܝܼܠܵܐ 546 ܘܲܠܡܲܟܿܝܼܟܼܵܐ ܒܲܫܒܼܝܼ̈ܚܵܬܼܵܐ ܒܗܘܿܢ ܒܲܥܒܼܵܕܹ̈ܐ ܀ 547 :ܘܐܸܢܗܘ̤ ܕܦܵܘܠܘܿܣ ܕܲܓܼܒܼ݂ܵܝܗܝ ܪܘܼܚܵܐ ܦܲܪܸܫ ܘܐܲܫܘܝܼ 548 ܡ̇ܢ ܡܸܬܼܥܲܕZܠ ܗܲܪܵܣܝܘܿܛܵܐ ܒܡܵܐܢܵܐ ܓܲܒܼܝܵܐ ܀ 549 :ܦܵܘܠܘܿܣ ܡܲܠܸܠ ܡܲܢ̣ܘܼ ܫܲܠܝܼܛ ܠܡܸܥܕܲܠ ܦܵܘܠܘܿܣ 550 ܘܐܲܝܢܵܐ ܕܥܵܕܹܠ ܪܘܼܚܵܐ ܕܓܲܝܼܒܼܵܝܗܝ ܗܘ̤ ܡܚܲܝܲܒܼ ܠܹܗ ܀ 551 :ܫܬܼܘܿܩ ܠܵܟ ܡ̇ܕܹܝܢ ܗܲܪܵܣܝܘܿܛܵܐ ܠܵܐ ܬܸܬܼܥܲܕܲܠ 552 ܕܠܵܐ ܬܸܬܼܚܲܝܲܒܼ ܒܲܓܼܙܵܪ ܕܝܼܢܵܐ ܩܲܫܝܵܐ ܕܪܘܼܚܵܐ ܀ 553 :ܫܬܼܘܿܩܘ ܠܵܐ ܬܸܩܥܘܿܢ ܥܲܡ ܫܲܪܝܼܪܹ̈ܐ ܦܵܥܠܹ̈ܐ ܕܙܹܐܦܵܐ 554 ܟܲܕܼܘܼ ܕܠܲܚ̣ܬܿܘܿܢ ܫܲܝܢܵܐ ܕܐ̄ܢܵܫܵܐ ܒܚܸܪ݁ܝܢܲܝܟܿܘܿܢ ܀ 555 :ܡܦܵܣ ܐ̄ܢܵܐ ܕܣܲܓܿܝܼ ܣܵܢܹ̇ܝܬܿܘܿܢ ܠܹܗ ܠܲܫܡܹܗ ܕܦܵܘܠܘܿܣ 556 ܘܠܵܐ ܛܲܥܝܵܐ ܠܝܼ ܕܠܵܐ ܡܢܵܚܝܼܬܿܘܿܢ ܒܦܘܼܪܫܵܢ ܡܸܠܵܘ̈ܗܝ ܀ 557 :ܣܲܓܿܝܼ ܡܲܨܪܸܦ ܣܲܡܐ ܕܡܸܠܵܘܗܝ ܠܟܹܐܒܼܵܐ ܕܲܒܼܟܼܘܼܢ 558 ܘܡܸܛܠ ܗܵܕܹܐ ܣܵܢܹ̇ܝܬܿܘܿܢ ܠܹܗ ܐܲܝܟ ܢܘܼܟܼܪܵܝܵܐ ܀ 559 :ܣܵܢܐܵܐ ܕܐ̄ܢܵܫܵܐ ܣܲܡܝܵܗ̇ ܠܥܲܝܢܵܐ ܕܪ̈ܥܝܵܢܲܝܟܿܘܿܢ 560 ܕܠܵܐ ܬܸܬܼܒܲܩܘܿܢ ܒܢܘܼܗܪܵܐ ܕܲܟܼܣܸܐ ܠܓܼܵܘ ܡ̣ܢ ܡܸܠܵܘ̈ܗܝ ܀ 561 :ܗܘ̤ ܐܲܫܩܝܼܟܼܘܿܢ ܟܵܣܵܐ ܕܲܠܚܵܗܿ ܕܡܸܪܲܬܼ ܪܘܼܓܼܙܹܗ 562 :ܘܲܒܼܟܼܘܿܢ ܕܲܠܚܵܗ̇ ܠܫܲܦܝܘܼܬܼ ܫܲܝܢܵܐ ܕܫܲܝܸܢ ܟܠܵܐ 563 :ܗܘ̤ ܐܲܠܸܦܟܼܘܿܢ ܠܡܸܣܥܵܐ ܠܪܵܘܡ̇ܐ ܠܘܵܬܼ ܐܝܼܬܼܘܼܬܼܵܐ 564 ܘܗܘ̤ ܚܵܘܝܼܟܼܘܿܢ ܫܒܼܝܼܠܵܐ ܣܲܢܝܵܐ ܕܚܵܫܘܿܫܘܼܬܼܵܐ ܀ 565 :ܗܘ̤ ܢܲܟܼܪܝܼܟܼܘܿܢ ܡ̣ܢ ܥܸܢܝܵܢܵܐ ܕܡܸܠܲܬܼ ܦܵܘܠܘܿܣ 566 ܕܲܚܙ̣ܵܐ ܕܡܲܟܼܪܸܙ ܕܲܟܼܝܵܢ ܟܲܣܝܵܐ ܠܵܐ ܡܸܣܬܲܝܲܟ ܀ 567 :ܦܘܼܪܣܵܐ ܗ̄ܘ̣ ܕܝܼܠܹܗ ܕܐܸܫܟܲܚ ܘܐܲܠܸܦ ܠܲܕܲܕܼܵܡܹ̇ܝܢ ܠܹܗ 568 ܕܲܢܸܚܲܫ ܟܲܣܝܵܐ ܘܢܸܛܠܘܿܡ ܦܲܓܼܪܵܢ ܡ̣ܢ ܪܘܼܡܪܵܡ̇ܐ ܀ 569 :ܒܗܵܕܹܐ ܬܸܢܘܲܝ ܓ̣ܡܲܪ ܨܸܒܼܝܵܢܹܗ ܒܝܲܕܼ ܡܸܠܲܝ̈ܟܘܿܢ 570 ܘܕܼܵܘܸܕܼ ܕܛܲܟܼܣܹ̈ܐ ܕܛܲܟܸܿܣ ܪܘܼܚܵܐ ܒܝܲܕܼ ܟܵܪ̈ܘܿܙܹܐ ܀ 571 :ܒܟܼܘܿܢ ܗ̄ܘ̣ ܟܲܣܝܵܗ̇ ܠܙܹܐܦܵܢܘܼܬܹܗ ܐܲܝܟ ܕܲܒܼܢܲܚܬܵܐ 572 ܘܥܲܠ̣ ܘܐܸܣܬܲܬܲܪ ܒܓܼܵܘ ܡܲܪܥܝܼܬܼܵܐ ܐܲܝܟ ܫܲܪܝܼܪܵܐ ܀ 573 :ܠܟܼܘܿܢ ܗ̄ܘ̣ ܫܲܕܲܪ ܐܲܝܟ ܓܵܫܘܿܫܹ̈ܐ ܠܘܵܬܼ ܒܲܝܬܿܝܹ̈ܐ 574 ܘܲܒܼܡܼܘܿܢ ܨܲܚܝܵܗ̇ ܠܟܼܵܪܘܿܙܘܼܬܼܵܐ ܐܲܝܟ ܫܲܒܵܝܹ̈ܐ ܀ 575 :ܒܟܼܘܿܢ ܐܸܬܼܢܲܩܲܡ ܥܝܵܪܬܵܐ ܕܒܸܙܚܹܗ ܡ̣ܢ ܫܲܪܝܼܪܹ̈ܐ 576 ܕܒܲܣܒܸܿܣܬܿܘܿܢܵܝܗܝ ܠܓܼܘܼܫܡܵܐ ܚܠܝ̣ܡܵܐ ܕܗܲܝܡܵܢܼܬܼܵܐ ܀ 577 :ܡ̣ܢ ܣܸܢܐܲܬܼܟܼܘܿܢ ܕܲܠܘܵܬܼ ܦܵܘܠܘܿܣ ܢܹܐܠܲܦ ܗܵܕܹܐ 578 ܕܐܸܙܕܲܝܲܢܬܿܘܿܢ ܒܝܲܕܼ ܨܸܢ̈ܥܵܬܼܵܐ ܠܘܼܩܒܲܠ ܡܸܠܵܘ̈ܗܝ ܀ pb. 86 579 :ܐܘܿ ܡ̣ܢ ܚܘܼܨܦܵܐ ܕܗܲܪ̈ܵܛܝܼܩܹܐ ܘܕܵܐܟܹ̇ܠ ܩܲܪܨܵܐ 580 ܕܣܵܥܹ̇ܿܝܢ ܟܠܢܵܫ ܠܲܡܕܼܵܘܵܕܼܘܼ ܠܛܲܟܼܣܹ̈ܐ ܕܪܘܼܚܵܐ ܀ 581 :ܓܘܼܢܚܵܐ ܪܲܒܵܐ ܣܥ݂ܲܪܘ ܡܲܪ̈ܚܹܐ ܥܲܡ ܡ̇ܪܘܿܕܼܵܐ 582 ܕܕܼܵܫ̣ܘ ܘܐܲܫܝ̣ܛܘܼܗܝ ܠܩܘܼܕܫܵܐ ܕܿܟܼܝܵܐ ܒܓܼܘܼܕܵܦܲܝ̈ܗܘܿܢ ܀ 583 :ܒܓܼܵܢܲܝܟ ܡܲܠܟܵܐ ܕܦܲܪܩܹܗ ܠܓܸܢܣܲܢ ܚܘܼܣ ܥܲܠ ܓܸܢܣܲܢ 584 ܕܡ̣ܢ ܕܐܸܬܼܚܲܪܲܪ ܦ̣ܢܵܐ ܘܐܸܫܬܲܥܒܲܕܼ ܠܥܲܒܼܕܿܘܼܬܼ ܡ̇ܘܬܵܐ ܀ 585 :ܫܲܒܼܩ̣ܘܼܗ̇ ܐ̄̇ܢܵܫܵܐ ܠܐܘܼܪܚܵܐ ܕܚܘܼܒܵܟ ܡܲܠܝܲܬܼ ܫܲܝܢܵܐ 586 ܘܲܚܙܲܩ̣ܘ ܒܐܘܼܪܚܵܐ ܕܡܲܠܝܵܐ ܩܸܢܛܵܐ ܕܠܵܐ ܫܲܘܝܘܼܬܼܵܐ ܀ 587 :ܣܢܵܘ ܟܵܪ̈ܘܿܙܹܐ ܕܐܲܟܼܪܸܙܘ ܩܘܼܫܬܵܐ ܘܗܲܝܡܵܢܘܼܬܼܵܐ 588 ܘܲܪܚܸܡ̣ܘ ܙܹܐܦܵܐ ܕܕܲܓܵܠܘܼܬܼܐ ܕܐܵܘܠܸܕܼ ܒܝܼܫܵܐ ܀ 589 :ܫܒܼܝܼܩ ܫܸܡ ܦܵܘܠܘܿܣ ܘܲܟܼ̈ܢܵܘܵܬܹܗ ܦܵܠܚܹ̈ܐ ܕܪܘܼܚܵܐ 590 ܘܓܼܵܘܕܹܠ ܟܠܢܵܫ ܟܠܝܼܠ ܢܸܨܚܵܢܹ̈ܐ ܠܦܵܥ̈ܠܹܐ ܕܙܹܐܦܵܐ ܀ 591 :ܠܵܐ ܐ̄ܢܵܫ ܡܲܝܬܸܿܐ ܣܵܗܕܿܘܼܬܼ ܡܸܠܹ̈ܐ ܡ̣ܢ ܫܲܪܝܼܪܹ̈ܐ 592 ܕܐܸܣܬܲܬܲܬܼ ܠܹܗ ܒܸܕܼܝܵܐ ܕܛܘܼܥܝܲܝ ܒܪܸܥܝܵܢ ܣܲܟܼܠܹ̈ܐ ܀ 593 :ܐܸܢ ܐ̄ܢܵܫ ܬܵܢܹ̇ܐ ܡܸܠܲܬܼ ܦܵܘܠܘܿܣ ܐܵܘ ܕܲܡܫܝܼܚܵܐ 594 ܢܘܼܟܼܪܵܝ ܫܸܡܥܹܗ ܘܠܵܐ ܡ̣ܬܼܩܲܒܲܠ ܒܐܸܕܼܢܲܝ̈ ܥܲܛܠܹ̈ܐ ܀ 595 ܣܢܵܐܘܼܗܝ ܣܲܓܿܝܼ ܠܗܸܪܓܵܐ ܕܡܸܠܹ̈ܐ ܕܒܲܟܼܬܼܝܼ̈ܒܼܵܬܼܵܐ: 596 ܘܐܲܝܟ ܝܲܬܿܝܼܪܵܐ ܚܫܝܼܒܼ ܥܸܢܝܵܢܹܗ ܠܘܵܬܼ ܡܲܪ̈ܵܚܹܐ ܀ 597 :ܠܵܐ ܠܲܡ ܫܲܦܝܼܪ ܠܡܸܗܪܲܓܼ ܣܲܓܿܝܼ ܒܲܫܒܼܝܼ̈ܚܵܬܼܵܐ 598 ܕܕܲܠܡܵܐ ܢܸܛܥܹܐ ܠܸܒܵܐ ܒܗܸܪܓܵܐ ܕܡܸܠܲܝ̈ ܪܘܼܚܵܐ ܀ 599 :ܒܨܵܬܼܵܐ ܡܲܠܸܦ ܥܸܢܝܵܢ ܡܼܠܹ̈ܐ ܘܡܲܦܗܹܐ ܠܢܲܦܫܵܐ 600 ܘܪܵܘܹܐ ܗܵܘܢܵܐ ܒܲܗ̈ܦܵܟܼܵܬܼܵܐ ܐܲܝܟ ܕܲܒܼܚܲܡܪܵܐ ܀ 601 :ܠܵܐ ܬܘܼܒܼ ܬܹܐܟܼܘܿܠ ܕܸܒܼܫܵܐ ܣܲܓܿܝܼ ܩܥ̣ܵܐ ܚܲܟܿܝܼܡܵܐ 602 ܗܵܐ ܠܲܡ ܚܵܘܝܼ ܕܠܵܐ ܬܸܬܼܝܼܥܲܢ ܥܲܠ ܕܲܟܼܬܼܝܼ̈ܒܼܵܢ ܀ 603 :ܘܥܲܒܼܕܵܐ ܕܝܵ̇ܕܲܥ ܨܸܒܼܝܵܢ ܡ̇ܪܹܗ ܘܠܵܐ ܬܲܩܸܢ ܠܹܗ 604 ܢܸܓܼ̈ܕܹܿܐ ܩܫܲܝ̈ܵܐ ܒܵܠܲܥ ܡܸܢܹܗ ܕܝܼܕܲܥ ܘܲܛܠܲܡ ܀ 605 :ܗܵܐ ܝܘܼܠܦܵܢܹܗ ܕܪܲܒܵܐ ܣܲܟܼܠܵܐ ܠܘܵܬܼ ܬܲܠܡܝܼܕܵܘ̈ܗܝ 606 ܕܨܵܪ ܐܵܬ̈ܘܵܬܼܵܐ ܘܐܲܗܓܝܼ ܐܸܢܘܿܢ ܡ̣ܢ ܬܵܘ ܠܐܲܠܲܦ ܀ 607 :ܗܵܐ ܬܘܼܪܓܵܡܹܗ ܕܣܵܦܪܵܐ ܢܟܼܝܼܠܵܐ ܠܘܵܬܼ ܫܵܡܘܿܥܵܘ̈ܗܝ 608 ܕܐܲܚܫܸܟ ܐܸܢܘܿܢ ܡ̣ܢ ܝܼܕܲܥܬܼܵܐ ܕܡܸܠܲܬܼ ܚܝܹ̈ܐ ܀ 609 :ܗܵܐ ܣܲܡ ܡܸܪܬܹܗ ܕܩܵܛܹ̇ܠ ܐ̄ܢܵܫܵܐ ܕܐܲܪܡܝܼ ܒܐ̄ܢܵܫܵܐ 610 ܘܐܲܛܥܝܼ ܐܸܢܘܿܢ ܠܒܲܪ ܡ̣ܢ ܐܘܼܪܚܵܐ ܕܡܸܠܲܝ̈ ܪܘܼܚܵܐ ܀ 611 :ܪܘܼܚܵܐ ܕܲܪܫܵܗ̣̇ ܠܐܘܼܪܚܵܐ ܕܚܲܝܹ̈ܐ ܒܦܘܼܡ ܟܵܪ̈ܘܿܙܹܐ 612 ܘܣܵܢܐܵܐ ܒܢܸܟܼܠܹܗ ܡ̣ܠܵܗ̇ ܩܲܬܼܵܪܹ̈ܐ ܩܕܼܵܡ ܚܵܙܘܼܩܹ̈ܐ ܀ 613 :ܐܲܪܡܝܼ ܩܸܢܛܵܐ ܘܕܲܚܸܠ ܐܸܢܘܿܢ ܡ̣ܢ ܝܘܼܠܦܵܢܵܐ 614 ܕܠܵܐ ܠܲܡ ܬܸܚܙܘܿܩ ܒܐܘܼܪܚܵܐ ܕܣܸܦܪܹ̈ܐ ܕܲܠܡܵܐ ܬܸܛܥܹܐ ܀ 615 :ܬܵܐ ܟܵܪܘܿܙܵܐ ܡ̇ܐܢܵܐ ܓܲܒ̣ܝܵܐ ܕܐܲܟܼܪܸܙ ܩܘܼܫܬܵܐ 616 ܚܙܝܼ ܨܹܢ̈ܥܵܬܼܵܐ ܕܪܲܟܸܿܒܼ ܒܝܼܫܵܐ ܠܘܼܩܒܲܠ ܡܸܠܲܝ̈ܟ ܀ pb. 87 617 :ܬܵܐ ܐܲܠܸܦ ܠܲܢ ܡ̣ܢ ܚܸܟܼ̈ܡܵܬܼܵܐ ܕܣ̣ܵܡ ܒܵܟ ܪܘܼܚܵܐ 618 ܕܲܒܼܗܘܿܢ ܢܸܣܬܿܘܿܪ ܒܸܢܝܵܢ ܙܹܐܦܵܐ ܕܲܒܼܢܵܐ ܢܟܼܝܼܠܵܐ ܀ 619 :ܐܲܢ̄ܬܿ ܡܲܠܸܠ ܒܲܢ ܕܢܸܬܼܢܹܐ ܕܝܼܠܵܟ ܠܘܵܬܼ ܛܵܠܘܿܡܹ̈ܐ 620 ܕܛܲܠܡ̣ܘܼܟ ܣܲܓܿܝܼ ܒܡܹܐܟܲܠ ܩܲܪܨܵܐ ܕܓܼܘܼܕܵܦܲܝ̈ܗܘܿܢ ܀ 621 :ܡ̣ܢ ܒܹܝܬܼ ܐܲܪ̈ܟܹܿܐ ܕܲܟܼܬܼܝܼ̈ܒܼܵܬܼܵܟ ܢܲܟܸܿܣ ܐܸܢܘܿܢ 622 ܘܲܒܼܦܸܬܼܓܼܵܡܲܝ̈ܟ ܢܸܓܼܠܹܐ ܙܹܐܦܵܐ ܕܕ̈ܥܝܵܢܲܝܗܘܿܢ ܀ 623 :ܟܠ ܠܲܡ ܣܸܦܪܵܐ ܕܟܲܬܼܒܹܿܗ ܪܘܼܚܵܐ ܕܝܼܠܵܟ ܢܸܬܼܢܹܐ 624 ܝܘܼܬܼܪܵܢ ܚܲܝܹ̈ܐ ܡܲܩܢܹܐ ܥܲܡܠܹܗ ܠܲܕܼܗܵܪܹܿܓܼ ܒܹܗ ܀ 625 :ܓܡܝܼܪܵܐ ܥܵܒܹ̇ܕܼ ܘܲܡܫܲܠܡܵܢܵܐ ܠܲܕܼܝܵܠܹ̇ܠ ܠܹܗ 626 ܘܗܵܘܹ̇ܐ ܚܵܫܲ݁ܚ ܠܲܡܫܲܡܵܫܘܼ ܪܘܼܚܵܢܵܐܝܼܬܼ ܀ 627 :ܬܵܘ ܙܹܐܦܵܢܹ̈ܐ ܚܙܵܘ ܝܘܼܬܼܪܵܢܵܐ ܕܡܸܠܲܝ̈ ܪܘܼܚܵܐ 628 ܕܓܼܵܡܲ݁ܪ ܐ̄ܢܵܫܵܐ ܒܪ̈ܘܼܚܵܢܝܵܬܼܵܐ ܘܝܵܗܹ̇ܒܼ ܚܲܝܹ̈ܐ ܀ 629 :ܢܸܬܼܢܹܐ ܐܵܦ ܗܵܝ̇ ܕܲܠܬܲܠܡܝܼܕܼܵܟ ܒܵܗ̇ ܡܲܛܸܢ ܗ̣̄ܘܲܝܬܿ 630 ܕܡ̣ܢ ܛܲܠܝܘܼܬܼܵܟ ܣܸܦܪܹ̈ܐ ܐܲܠܦܘܼܟ ܐܘܼܪܚܵܐ ܕܚܲܝܹ̈ܐ ܀ 631 :ܒܗܸ̣ܬܼܘ ܘܐܸܬܼܟܲܚܲܕܼܘ ܣܵܢܝܲ̈ܝ ܗܸܪܓܲܝ̈ ܪܘܼܚܵܐ 632 ܡ̣ܢ ܒܲܪܬܼ ܩܵܠܹܗ ܕܪܲܒܵܐ ܡܗܝܼܪܵܐ ܠܘܵܬܼ ܬܲܠܡܝܼܕܹܗ ܀ 633 :ܠܵܐ ܬܸܬܼܥܲܕܼܠܘܼܢ ܟܲܕܼܵܒܼܵܐܝܼܬܼ ܒܒܸܢܝܵܢ ܡܸܠܵܘ̈ܗܝ 634 ܕܲܒܼܚܹܝܠ ܪܘܼܚܵܐ ܡܚܲܙܲܩ ܘܲܒܼܢܸܐ ܚܲܟܿܝܼܡܵܐܝܼܬܼ ܀ 635 :ܪܘܼܚܵܐ ܣܵܗܹ̇ܕ ܥܲܠ ܒܸܢܝܵܢܹܗ ܕܫܲܦܝܼܪ ܡܲܬܼܩܲܢ 636 ܘܗܘ̤ ܡܲܟܸܿܣ ܠܹܗ ܠܒܸܢܝܵܢ ܙܹܐܦܵܐ ܕܪ̈ܥܝܵܢܲܝܟܿܘܿܢ ܀ 637 :ܪܘܼܚܵܐ ܢܸܗܘܹܐ ܣܢܹܐܓܼܪܵܐ ܒܕܼܝܼܢܵܐ ܒܹܝܬܼ ܠܝܼ ܘܲܠܟܼܘܿܢ 638 ܘܪܸܡܙܹܗ ܡܦܲܪܣܸܐ ܢܸܟܼܠܵܐ ܟܲܣܝܵܐ ܕܚܘܼܫܵܒܲܝ̈ܗܘܿܢ ܀ 639 :ܗܘ̤ ܢܲܟܸܿܣܟܼܘܿܢ ܕܲܛܠܲܡ̣ܬܿܘܿܢܵܝܗܝ ܠܥܲܡܠܵܐ ܕܚܘܼܒܹܿܗ 640 ܕܩ̣ܵܡ ܒܐܵܓ̣ܘܿܢܵܐ ܘܲܙܟܼܵܐ ܘܲܙܟܿܝܼ ܠܲܟܼܢܵܘܵܬܹ̈ܐ ܀ 641 :ܐܵܪܵܐ ܥܲܛܠܹ̈ܐ ܕܥܲܛܠܝܼܢ ܣܲܓܼܝܼ ܠܘܵܬܼ ܕܲܦܫܝܼ̈ܩܵܢ 642 ܐܲܝܢܵܘ ܢܘܼܗܪܵܐ ܕܲܦܠܹܐ ܒܕܸܢܚܹܗ ܐܲܝܟ ܫܸܡ ܦܵܘܠܘܿܣ ܀ 643 :ܐܲܝܕܼܵܐ ܗ̄ܝܼ ܐܘܼܪܚܵܐ ܕܲܦܫܝ̣ܩ ܪܲܗܛܵܗ̇ ܐܲܝܟ ܦܸܬܼܓܼܵܡܵܘ̈ܗܝ 644 ܘܡܲܢܘܼ ܕܠܵܠܹ̇ܐ ܒܲܫܒܼܝܼܠ ܡܸܠܵܘ̈ܗܝ ܒܲܣܝܼ̈ܡܵܬܼܵܐ ܀ 645 :ܐܲܝܠܹܝܢ ܛܘܼܒܹ̈ܐ ܕܠܵܐ ܐܲܣܝܼܢܝܼܢ ܘܲܟܼܣܹܝܢ ܒܲܫܡܹܗ 646 ܘܡ̇ܐ ܕܲܦܬ݂ܲܚ ܐ̄̇ܢܵܫ ܘܲܩܪ̣ܵܐ ܦܵܘܠܘܿܣ ܥܬ݂ܲܪ ܘܐܸܬܼܢܲܨܲܚ ܀ 647 :ܐܲܝܢܵܘ ܣܲܡܵܐ ܕܠܵܘ ܒܐܸܓܪ̈ܵܬܹܗ ܡܡܲܕܲܟ ܘܲܚܠܝܼܛ 648 ܘܲܠܟܼܠ ܟܹܐܒܼܝܼ̈ܢ ܫܟܼܝܼܚ ܥܘܼܕܼܪܵܢܵܐ ܕܡ̣ܢ ܙܘܼܗܵܪ̈ܘܗܝ ܀ 649 :ܐܲܝܢܵܘ ܛܲܟܼܣܵܐ ܕܡܲܩܢܹܐ ܚܲܝܹ̈ܐ ܕܠܵܘ ܗܘ̤ ܣܵܡܹܗ 650 ܘܐܲܝܢܵܘ ܬܸܓܼܡܵܐ ܕܠܵܐ ܐܸܬܼܥܲܕܲܪ ܡ̣ܢ ܩܵܢܘܿܢܵܘ̈ܗܝ ܀ 651 :ܣ̣ܵܡ ܢܵܡܘܿܣܹ̈ܐ ܠܲܥܠܲܝܡܘܼܬܼܵܐ ܘܲܠܣܲܝܒܿܘܼܬܼܵܐ 652 ܠܥܲܒܼ̈ܕܹܿܐ ܘܚܹܐܪܹ̈ܐ ܠܡܸܫܬܲܥܒܵܕܼܘܼ ܬܚܹܝܬܼ ܚܲܕܼ ܡܵܪܵܐ ܀ pb. 88 653 ܚܒܲܫ̣ ܟܠ ܡܘܼ̈ܫܚܵܢ ܬܚܹܝܬܼ ܩܵܢܘܿܢܵܐ ܕܟܼܵܪܘܿܙܘܼܬܹܗ ܀ 654 ܘܲܟܼܕܲܝܢ ܓܲܒܼܪܹ̈ܐ ܥܲܡ ܢܸܫܲܝ̈ܗܘܿܢ ܒܢܝܼܪܵܐ ܕܚܘܼܒܵܐ ܀ 655 :ܝܲܗ̣̄ܒܼ ܙܵܟܼܘܼܬܼܵܐ ܠܐܲܬܼܠܹܝܛܘܼܬܼܵܐ ܕܨܸܒܼܝܵܢ ܟܹܐܢܹ̈ܐ 656 ܘܚܲܝܸܠ ܘܣܲܡܸܟ ܠܲܡܚܝܼܠܘܼܬܵܐ ܠܐܲܝܠܹܝܢ ܕܐܲܫܦܸܠܘ ܀ 657 :ܛܲܟܸܿܣ ܕܲܪ̈ܓܹܐ ܕܪܹܫܵܢܘܼܬܼܵܐ ܕܲܠܓܼܵܘ ܘܕܲܠܒܲܪ 658 ܘܚܵܘܝܼ ܠܟܼܠܢܵܫ ܕܐܲܝܟܲܢ ܢܸܦܪܘܿܥ ܐܲܝܕܼܵܐ ܕܘܵܠܝܵܐ ܀ 659 :ܟܲܕܼܢܹܗ ܠܥܵܠܡܵܐ ܒܢܝܼܪܵܐ ܢܝܼܚܐ ܕܚܘܼܒܵܐ ܕܡ̇ܪܹܗ 660 ܕܢܸܦܠܘܿܚ ܟܠܢܵܫ ܒܐܸܫܟܵܪ ܚܲܝܹ̈ܐ ܪ̈ܘܼܚܵܢܵܝܹܐ ܀ 661 :ܪܲܕܦܹܗ ܠܚܸܫܟܵܐ ܕܚܹܝܠ ܒܝܼ̈ܫܬܵܐ ܡ̣ܢ ܐ̄ܢܵܫܘܼܬܼܵܐ 662 ܘܲܪܕܲܦ ܐ̄ܢܵܫܵܐ ܠܘܼܩܒܲܠ ܢܘܼܗܪܵܐ ܕܟܼܵܪܘܿܙܘܼܬܹܗ ܀ 663 :ܒܣܲܝܦܵܐ ܕܡܸܠܬܹܗ ܦܲܣܩܵܗ̇ ܘܲܫܕܼܵܗ̇ ܠܪܸܚܡܲܬܼ ܡܸܣܦܵܐ 664 ܘܚܵܘܝܼ ܠܟܼܠܢܵܫ ܡܲܪܝܼܪܘܼܬܼܵܐ ܕܟܲܣܝܵܐ ܒܦܹܐܪܹ̈ܝܗ̇ ܀ 665 :ܒܢܲܝܙܟܼܵܐ ܕܚܘܼܒܹܿܗ ܣܲܬ̣ܪܹܗ ܠܪܵܘܡ̇ܐ ܕܪܸܚܡܲܬܼ ܫܘܼܒܼܚܵܐ 666 ܘܡܲܟܸܿܟ ܚܘܼܬܼܪܵܐ ܘܪܵܡܘܼܬܼ ܢܲܦܸܫܵܐ ܕܠܵܘܝܵܐ ܠܐ̄ܢܵܫܵܐ ܀ 667 :ܚܣܵܡܵܐ ܚܸܘܝܵܐ ܕܓܼܵܪܣܹ̇ܐ ܡܸܪܬܹܗ ܘܩܵܛܹ̇ܠ ܐ̄ܢܵܫܵܐ 668 ܫ̣ܕܵܐ ܒܹܗ ܓܹܐܪܵܐ ܕܡܸܠܲܬܼ ܫܲܝܢܵܐ ܘܦܸܟܼ݂ܗܲܬ̤ ܡܸܪܬܹܗ ܀ 669 :ܩܪ̣ܵܐ ܠܪ̈ܓܿܝܼܙܹܐ ܕܬܼܵܘ ܐܸܫܬܲܚܲܢܘ ܘܦܘܼܫܘ ܡ̣ܢ ܪܘܼܓܼܙܵܐ 670 ܥܲܕܼ ܠܵܐ ܢܸܥܪܲܒܼ ܫܸܡܫܵܐ ܕܚܲܝܹ̈ܐ ܕܲܡܠܹܐ ܙܲܒܼܢܵܐ ܀ 671 :ܐܲܪܡܝܼ ܩܸܢܛܵܐ ܘܲܓܼܙܵܪ ܕܝܼܢܵܐ ܩܕܼܵܡ ܚܲܛܝܹ̈ܐ 672 ܘܲܦܢ̣ܵܐ ܘܠܲܒܸܿܒܼ ܕܐܸܢ ܡܸܙܕܲܕܲܩܝܼܢ ܠܵܐ ܡܸܬܼܚܲܝܒܼܝܼܢ ܀ 673 :ܓܠ̣ܵܐ ܥܲܠ ܥܘܼܬܼܪܵܐ ܕܒܲܣܝܼܡܘܼܬܹܗ ܕܐܲܠܵܗ ܟܠܵܐ 674 ܕܲܡܚܵܘܹܐ ܠܵܗ̇ ܒܫܘܼܠܵܡ ܙܲܒܼܢܹ̈ܐ ܠܘܵܬܼ ܟܠ ܘܲܒܼܟܼܠ ܀ 675 :ܐܘܿ ܠܲܡ ܥܘܼܡܩܵܐ ܕܥܘܼܬܼܪܵܐ ܪܲܒܵܐ ܕܠܵܐ ܡܸܣܬܲܝܲܟ 676 ܕܙܵܐܹ̇ܢ ܥܵܠܡܵܐ ܥܲܡ ܥܵܡܘܿܪ̈ܘܗܝ ܘܠܵܐ ܡܸܬܼܒܲܨܲܪ ܀ 677 :ܐܘܿ ܒܘܼܚܪܵܢܵܐ ܕܥܵܐܠܵܐ ܒܨܵܬܹܗ ܠܪ̈ܓܼܫܹܐ ܘܙܵܘܥܹ̈ܐ 678 ܘܠܵܐ ܛܵܥܹ̇ܐ ܠܹܗ ܐܵܦܠܵܐ ܚܝܵܪܵܐ ܘܪܸܙܵܐ ܙܥܘܿܪܵܐ ܀ 679 :ܐܘܿ ܝܼܕܲܥܬܼܵܐ ܕܚܸܒܼ݂ܫܲܬ̤ ܟܠܵܐ ܒܠܵܐ ܝܼܕܲܥܬܼܵܐ 680 ܕܬܸܬܸܿܠ ܚܲܝܹ̈ܐ ܘܬܲܚܸܐ ܒܛܲܝܒܿܘܼ ܠܲܥܒܼܵܕܼ ܐܝܼܕ̈ܝܗ̇ ܀ 681 :ܐܘܿ ܓܲܢ̄ܒܵܪܵܐ ܕܚܲܗ̣̄ܒܼܠܹܗ ܪܸܡܙܵܐ ܩܠܝܼܕܹ̈ܐ ܕܪܘܼܚܵܐ 682 ܘܲܦܬ̣ܲܝ ܓܲܙܵܐ ܕܲܣܬܼܝܼܪ̈ܵܬܵܪܐ ܕܟܲܣ̈ܝܵܢ ܡ̣ܢ ܟܠ ܀ 683 :ܐܘܿ ܬܲܠܡܝܼܕܵܐ ܕܲܡ̣ܛܵܝܗܝ ܕܲܪܓܼܵܐ ܕܪܲܒܵܢܘܼܬܼܵܐ 684 ܘܝܼܠܸܦ ܘܐܲܠܸܦ ܒܝܲܕܼ ܗܸܓܿܝܵܢܵܐ ܩܢܘܿܡܹ̈ܐ ܬܠܵܬܼܵܐ ܀ 685 :ܐܘܿ ܕܐܸܬܿܬܲܠܡܲܕܼ ܡ̣ܢ ܢܵܡܘܿܣܵܐ ܠܡܲܠܟܿܘܼܬܼ ܪܵܘܡ̇ܐ 686 ܘܲܥ̣ܬܲܪ ܘܐܲܥܬܲܪ ܡ̣ܢ ܣܝܼ̈ܡܵܬܹܗ ܠܥܲܡܵܐ ܘܥܲܡܡܹ̈ܐ ܀ pb. 89 687 :ܒܵܟ ܐܸܫܬܲܠܲܡ ܒܝܲܕܼ ܣܘܼܥܪ̈ܵܢܹܐ ܚܹܝܠ ܦܸܠ̈ܐܵܬܵܐ 688 ܕܲܚܒ݂ܲܫܬܿ ܥܘܼܬܼܪܵܐ ܢܵܡܘܿܣܵܝܵܐ ܘܪܘܼܚܵܢܵܝܵܐ ܀ 689 :ܠܛܘܼܒܼܵܐ ܫܵܘܹ̇ܝܬܿ ܡ̣ܢ ܟܠ ܦܘܼܡܝܼ̈ܢ ܐܘܿ ܟܵܪܘܿܙܵܐ 690 ܕܐܲܟܼܪܸܙܬܿ ܩܘܼܫܬܵܐ ܘܐܲܦܢܝܼܬܿ ܟܠܵܐ ܠܕܸܚܠܲܬܼ ܩܘܼܫܬܵܐ ܀ 691 :ܟܠܝܼܠ ܙܵܟܼܘܬܼܵܐ ܢܸܬܼܦܲܢܹܐ ܠܵܟ ܡ̣ܢ ܟܠ ܠܸܫܵܢ 692 ܕܐܲܠܸܦܬܿ ܐ̄ܢܵܫܵܐ ܠܡܸܙܡܲܪ ܫܘܼܒܼܚܵܐ ܠܫܸܡ ܐܝܼܬܼܘܼܬܼܵܐ ܀ 693 :ܒܲܫܒܼܝܼܠ ܡܸܠܲܝ̈ܟ ܘܵܠܹ̇ܐ ܕܢܸܪܕܿܘܢ ܟܠܗܘܿܢ ܬܸܓܼܡܹ̈ܐ 694 ܕܲܕܼܪܲܫ̣ܬܿ ܐܘܼܪܚܵܐ ܕܢܘܼܚܵܡ ܦܲܓܼܪܵܐ ܘܚܘܼܪܵܪ ܢܲܦܫܵܐ ܀ 695 :ܥܲܠ ܒܸܢܝܵܢܵܐ ܕܡܸܠܬܼܵܟ ܢܸܒܼܢܘܿܢ ܪ̈ܵܚܡܲܝ ܩܘܼܫܬܵܐ 696 ܕܫܲܟܼܠܸܠܬܿ ܘܲܒܼܢܲܝܬܿ ܚܕܼܵܐ ܬܵܘܕܿܝܼܬܼܵܐ ܕܠܵܐ ܡܸܬܿܬܿܙܝܼܥܵܐ ܀ 697 :ܠܢܝܼܫܵܐ ܕܝܼܠܵܟ ܢܸܚܢܹܐ ܟܠܢܵܫ ܒܦܲܓܼܪܵܐ ܘܢܲܦܫܵܐ 698 ܕܡܝܼܬܿܬܿ ܠܲܒܼܪܝܼܬܼܵܐ ܐܵܦ ܗܝ̤ ܒܪܝܼܬܼܵܐ ܡܝܼܬܼܵܐ ܗ̄ܘ̣ܵܬܼ ܠܵܟ ܀ 699 :ܨܠܝܼܒܼ ܗ̄ܘ̣ܵܬܿ ܟܠܝܘܿܡ ܠܲܪ̈ܓܼܝܼܓܼܵܬܼܵܐ ܐܲܝܟ ܠܵܐ ܚܲܝܵܐ 700 ܘܲܚܫܝܼܒܼ ܗ̄ܘ̣ܵܐ ܠܵܟ ܥܵܠܡܵܐ ܚܲܝܵܐ ܒܲܕܼܡܘܼܬܼ ܡܝܼܬܼܵܐ ܀ 701 :ܛܘܼܒܲܝܟ ܦܵܘܠܘܿܣ ܡܸܬܿܛܦܝܼܣܵܢܵܐ ܕܐܸܬܿܛܦܝܼܣ ܘܐܲܦܝܼܣ 702 ܕܲܢܛܝܼܪ ܗ̄ܘ̣ ܠܵܟ ܟܠܝܼܠ ܙܵܟܼܘܼܬܼܵܐ ܠܐܵܓܼܘܿܢ ܥܲܡܠܲܝ̈ܟ ܀ 703 :ܐܲܦܝܼܣ ܥܲܡܲܢ ܡܸܬܼܛܦܝܼܣܵܢܵܐ ܐܲܝܟ ܕܲܡܥܵܕܲܬܿ 704 ܕܢܸܫܘܸܐ ܠܪ̈ܲܚܡܹܐ ܡ̇ܐ ܕܡܲܫܘܸܐ ܠܵܟ ܪܸܡܙܵܐ ܠܛܘܼܒܹ̈ܐ ܀ ܥܘܼܢܵܝܵܐ: ܬܵܘܕܲܝܼ ܠܚܲܢܵܢܵܐ ܕܡܲܠܸܦ ܙܢܲܝ̈ ܚܵܘܣܵܢܵܐ: ܠܪ̈ܵܚܡܹܐ ܕܟܹܐܢܘܼܬܹܗ ܀