On the Consecration of the Church and on Moses the Prophet - ܥܲܠ ܩܘܼܕܵܫ ܥܹܕܬܵܐ ܘܥܲܠ ܡܘܼܫܹܐ ܢܒ̣ܝܼܵܐ

ܐܲܢ̄ܬ݁ ܥܲܬ݁ܝܼܪܵܐ ܗܲܒ̣ ܠܲܣܢܝܼܩܵܐ ܕܒ̣ܵܥܹ̇ܐ ܡܸܢܵܟ̣: ܕܲܟ̣ܡܵܐ ܕܢܵܣܹ̇ܒ̣ ܠܵܐ ܡܸܬܼܟܲܚܲܕܼ ܕܢܸܗܦܘܿܟ̣ ܢܸܒ̣ܥܹܐ܀ ܫܕܼܝܼ ܡܵܘܗܲܒ̣ܬܼܵܟ̣ ܥܲܠ ܚܵܕܼܘܼܪܵܐ ܟܲܕܼ ܠܵܐ ܫܵܘܹ̇ܐ: ܒܬܲܪܥܵܟ̣ ܢܵܩܹ̇ܫ ܠܵܐ ܡܵܪܝ ܬܸܫܪܹܝܘܗܝ ܡܸܣܟܹ݁ܢܵܐܝܼܬܼ܀ ܟܡܵܐ ܕܬܸܬܸܠ ܠܝܼ ܬܘܼܒ̣ ܫܵܐܹ̇ܠ ܐ̄ܢܵܐ ܕܬܼܘܼܒ̣ ܬܲܣܓܹܐ ܠܝܼ: ܠܵܐ ܓܹܝܪ ܣܸܒ̣ܥܹ̇ܬܼ ܡ̣ܢ ܡܵܘܗܲܒ̣ܬܼܵܟ̣ ܐܲܝܟ̣ ܕܐܲܟ̣ܦܸܢܬܵܢܝ܀ ܒܫܸܩܝܵܐ ܕܡܹܐܡܪܵܟ̣ ܕܪܵܕܹܐ ܨܹܐܕܲܝ ܥܲܬ݁ܝܼܪܵܐܝܼܬܼ: ܣܲܓ݁ܝܼ ܨܲܗܝܵܐܠ ܐܼܬ݁ܬܵܘܣܲܦ ܠܝܼ ܡ̣ܢ ܫܵܩܘܼܬܹܗ܀ pb. 39 ܒܗܵܠܹܝܢ ܬܲܦܹ̈ܐ ܕܲܠܗܝܼܩ ܠܸܫܵܢܝ ܡ̣ܢ ܬܲܫܥܝܼܬܹܗ: ܨܲܗܝܵܐ ܕܬܲܪܥܝܼܬܼܝ ܠܵܐ ܐܸܬܼܦܲܝܲܓ̣ ܐܲܝܟ̣ ܕܐܸܫܬܲܪܲܚ܀ ܡܥܝܼܢܵܐ ܗ̄ܘ̣ ܡܘܼܫܹܐ ܘܲܟ̣ܡܵܐ ܕܐܸܕܼܠܹܝܘܗܝ ܡܸܣܓܵܐ ܣܵܓܹܐ: ܗܲܒ̣ ܠܝܼ ܐܲܪܥܵܐ ܬܩܲܒܸ݁ܠ ܫܸܩܝܵܐ ܘܬܸܬܸܠ ܦܹܐܪܹ̈ܐ܀ ܢܸܬܸ݁ܠ ܫܲܪܒܵܟ̣ ܥܠܲܠܬܹܗ ܕܫܘܼܒ̣ܚܵܐ ܡ̣ܢ ܫܵܡ̈ܘܿܥܹܐ: ܕܠܵܟ̣ ܩܘܼܠܵܣܵܐ ܠܗܘܿܢ ܥܘܼܕܼܪ̈ܵܢܹܐ ܘܠܝܼ ܚܘܼܣܵܝܵܐ܀ ܠܚܲܩܠܹܗ ܕܡܘܼܫܹܐ ܥܸܠܹ̇ܬܼ ܐܸܚܨܘܿܕܼ ܟܲܦܵܐ ܕܐ̄ܪ̈݁ܵܙܲܝܟ: ܐܲܢ̄ܬ݁ ܙܲܡܸܢ ܠܝܼ ܦܵܥ̈ܠܹܐ ܕܫܘܼܒ̣ܚܵܐ ܥܲܠ ܐܸܫܟܵܪܵܟ̣܀ ܓܕܼܝܼܫܵܐ ܕܥܸܣܪܵܐ ܫܲܪܝܼܬ݁ ܐܹܣܝܼܡ ܒܢܵܘ̈ܝܼܵܬܼܵܟ̣: ܗܲܒ̣ ܠܝܼ ܐܸܡܛܹܐ ܠܟܲܪܝܵܐ ܒܪܝܼܟ̣ܵܐ ܕܐܵܬܹ̇ܐ ܒܲܡܵܐܐ܀ ܓܘܼܫܡܵܟ̣ ܪܲܒ݁ ܗ̄ܘ̣ ܡ̣ܢ ܐܵܡܘܿܪܹ̈ܐ ܘܡ̣ܢ ܫܵܡ̈ܘܿܥܹܐ: ܒܲܕܼܓ̣ܘܿܢ ܚܸܒ̣ܨܹ̇ܬܼ ܐܸܬܼܢܹܐ ܫܘܼܦܪܵܐ ܕܛܸܠܵܢܝܼܬܼܵܟ̣܀ ܒܚܲܬ݁ܝܼܬܼܘܼܬܼܵܟ̣ ܠܵܐ ܡܨܹܐ ܗܵܘܢܵܐ ܕܢܸܬܼܒܲܩܹܐ ܒܵܗ̇: ܘܥܲܠܗܵܝ̇ ܨܘܼܪܬܵܟ̣ ܡܸܬܼܚܲܙܝܵܐ ܒܝܼ ܒܟ̣ܠܗܘܿܢ ܫܲܪ̈ܒܹܐ܀ ܡܘܼܫܹܐ ܕܡܘܼܬܼܵܟ̣ ܗܵܐ ܡܸܬܼܢܲܨܲܪ ܒܲܝܢܵܬܼ ܣܸܦܘܵܬܼ̈ܝ: ܘܥܲܠ ܕܲܩ̣ܪܵܟ̣ ܗ̄ܘ̣ܵܐ ܢܒ̣ܝܼܵܐ ܐܲܟ̣ܘܵܬܼܝ ܨܵܪܬܹܗ ܒܟ̣ܠܵܟ̣܀ ܠܲܟܟܪ̈ܝܼܗܹܐ ܕܹܝܢ ܛܸܠܵܢܝܼܬܹܗ ܕܫܸܡܥܘܿܢ ܣܸܡܟܲܬ݀: ܠܪܸܥܝܵܢܝ ܕܲܡܚܝܼܠ ܒܡܘܼܫܹܐ ܣܡܘܿܟܲܝܗܝ ܒܛܸܠܵܢܝܼܬܼܵܟ̣܀ ܟܡܵܐ ܕܠܵܟ̣ ܕܵܡܹ̇ܐ ܡ̣ܢ ܬܲܫܥܝܼܬܹܗ ܠܵܐ ܫܵܠܹ̇ܐ ܐ̄ܢܵܐ: ܘܕܲܚܙܹ̇ܝܬܼܵܟ̣ ܒܹܗ ܐܲܝܟܲܢ ܐܸܫܬ݁ܘܿܩ ܡ̣ܢ ܥܸܢܝܵܢܹܗ܀ ܠܝܼ ܗܘ݀ ܡܓܲܪܸܓ̣ ܕܐܸܦܘܿܩ ܒܵܬܼܪܹܗ ܩܲܠܝܼܠܵܐܝܼܬܼ: ܟܲܕܼ ܡܲܣܒܲܪ ܠܝܼ ܕܗܵܐ ܣܵܡܹ̇ܟ̣ ܠܝܼ ܨܹܝܕܼ ܫܘܼܠܵܡܵܐ܀ pb. 40 ܘܡܵܐ ܕܣܲܝܸܟ̣ܬܹܗ ܠܫܲܪܒܵܐ ܪܲܒܵܐ ܗܵܐ ܠܲܡ ܐܹܢܘܼܚ: ܨܹܝܕܼ ܫܘܼܠܵܡܹܗ ܬܘܼܒ̣ ܫܘܼܪܵܝܵܐ ܡܸܬܼܚܵܘܹܐ ܠܝܼ܀ ܐܸܥܪܘܿܩ ܡܸܟܹܝܠ ܕܲܠܐܵܘܵܢܵܐ ܕܫܸܬܼܩܵܐ ܐܸܥܘܿܠ: ܕܠܵܐ ܐܸܒ̣ܩܹܐ ܠܝܼ ܡܸܨܥܲܬܼ ܐܘܼܪܚܵܐ ܡܬܼܝܼܚܵܐ ܕܐ̄ܪ̈ܵܙܵܘܗܝ܀ ܐܸܫܬ݁ܘܿܩ ܣܲܓ݁ܝܼ ܘܐܹܡܲܪ ܩܲܠܝܼܠ ܡ̣ܢ ܦܸܠܵܐ̈ܬܹܗ: ܕܲܒ̣ܟܲܪ̈ܝܵܬܼܵܐ ܛܥܵܡܬܵܐ ܢܸܣܲܒ̣ ܕܲܬܼܡܝܼ̈ܗܵܬܼܵܐ܀ ܒܐܝܼܕܹܗ ܕܡܘܼܫܹܐ ܐܸܬܼܪܲܫܡܲܬ݀ ܗ̄ܘ̣ܵܬܼ ܥܹܕܬܵܐ ܒܐ̄ܪܵܙܵܐ: ܘܲܕ݁ܛܘܼܦ̮ܣܵܐ ܗ̄ܘ̣ܵܐ ܡܲܫܟܲܢܙܲܒ̣ܢܵܐ ܡܸܬܼܟܲܢܹܐ ܗ̄ܘ̣ܵܐ܀ ܠܵܘ ܗܘ݀ ܒܢ̣ܵܗ̇ ܗ̄ܘ̣ܵܐ ܫܲܪܝܼܪܵܐܝܼܬܼ ܕܠܵܘ ܡܵܪܵܗ̇ ܗ̄ܘ̣ܵܐ: ܡܸܪܫܲܡ ܪܲܫ̣ܡܵܗ̇ ܐ̄ܪܵܙܵܢܵܐܝܼܬܼ ܘܐܲܪܦ̣ܝܼ ܘܲܥ̣ܒܲܪ܀ ܒܲܢܝܵܐ ܗ̄ܘ̣ܵܬܼ ܓܹܝܪ ܥܹܕܬܵܐ ܓܒ̣ܝܼܬܼܵܐ ܗܵܐ ܥܵܠܲܡ: ܘܣܵܗܹ̇ܕܼ ܡܘܸܫܹܐ ܕܲܚ̣ܙܵܐ ܕܡܘܼܬܼܵܗ̇ ܒܛܘܼܪܵܐ ܕܣܝܼܢܲܝ܀ ܗܵܕܹܐ ܗܦܵܟ̣ܬܵܐ ܠܵܘ ܚܘܼܫܵܒܲܝ̈ ܥܲܓܸܠ̣ܘ ܣܵܡ̣ܡܘܼܗ̇: ܫܪܵܪܵܐ ܪܡܲܙ ܠܝܼ ܕܗܵܢܵܘ ܩܘܼܫܬܵܐ ܒܵܟ̣ ܢܸܬܼܡܲܠܲܠ܀ ܠܩܲܕܝܼܡܘܼܬܼܵܐ ܕܥܹܕܬܵܐ ܚ̣ܙܵܐ ܗ̄ܘ̣ܵܐ ܡܘܼܫܹܐ ܒܛܘܼܪܵܐ: ܘܲܢܚܸܬܼ ܪܲܫܡ̣ܵܗ̇ ܒܓܟܵܘ ܡܲܫܪܝܼܬܼܵܐ ܕܬܸܫܬܲܪܲܪ ܒܵܗ̇܀ ܟܲܕܼ ܐܸܬܼܦܲܩܲܕܼ ܥܲܠ ܬܘܼܩܵܢܹܗ ܕܡܲܫܟܲܢ ܙܲܒ̣ܢܵܐ: ܠܵܗ̇ ܠܲܕܼܡܘܼܬܼܵܐ ܕܥܹܕܬܵܐ ܚ̣ܙܵܐ ܗ̄ܘ̣ܵܐ ܫܲܪܝܼܪܵܐܝܼܬܼ܀ ܫܡܲܥܘ ܦܵܪ̈ܘܿܫܹܐ ܕܠܵܐ ܥܸܨܝܵܢܵܐ ܠܩܘܼܫܬܵܐ ܓܲܠܝܵܐ: ܕܗܘ݀ܝܘܼ ܫܪܵܪܵܐ ܟܲܕܼ ܠܵܐ ܡܨܹܐ ܐ̄ܢܵܐ ܡܸܬܼܡܲܠܲܠ ܒܝܼ܀ ܟܲܕܼ ܓܹܝܪ ܦܲܩ̣ܕܹܗ ܡܵܪܹܗ ܠܡܘܼܫܹܐ ܢܚܵܘܹܐ ܢܸܥܒܸ݁ܕܼ: ܡܲܫܟܲܢ ܙܲܒ̣ܢܵܐ ܕܫܲܡܸܫ ܙܲܒ̣ܢܵܐ ܒܐ̄ܪ̈ܵܙܹܐ ܕܥܹܕܬܵܐ܀ pb. 41 ܡ̣ܢ ܕܲܚ̣ܫܲܒ̣ ܠܹܗ ܟܠܗܘܿܢ ܓܵܘܢܵܘ̈̈ܝ ܣܲܝܸܟ̣ ܗܵܪܟܵܐ: ܕܒܲܕܼܡܘܼܬܼܵܐ ܠܲܡ ܕܲܒ̣ܪܹܫ ܛܘܼܪܵܐ ܡܚܵܘܹܐ ܐ̄ܢܵܐ ܠܵܟ̣܀ ܥܹܕܬܵܐ ܕܒܲܢܝܵܐ ܣܠܸܩ ܚܵܘܝܼ ܠܹܗ ܒܓ̣ܵܘ ܥܲܪܦܸܠܵܐ: ܐܘܿܪܸܫܠܸܡ ܗ̄ܘ̣ܵܬܼ ܚܹܐܪܬܼܵܐ ܕܲܠܥܸܠ ܕܲܚ̣ܙܵܐ ܬܲܡܵܢ܀ ܬܲܠܡܝܼܕܼܵܐ ܓܹܝܪ ܕܐܘܼܡܵܢܘܼܬܼܵܐ ܕܝܵܠܹ̇ܦ ܡܸܕܹܡ: ܠܹܗ ܠܲܥ̇ܒ̣ܵܕܼܵܐ ܕܲܓ̣ܡܝܼܪ ܚܵܙܹ̇ܐ ܘܟܸܢ ܩܵܪܹܒ̣ ܠܹܗ܀ ܠܵܘ ܡ̣ܢ ܡܸܠܹ̈ܐ ܡܲܣܪܲܚ ܪܲܒܵܐ ܡܲܠܦܵܘܼܬܼܵܐ: ܠܹܗ ܠܲܥ̇ܒ̣ܕܵܐ ܡܚܵܘܹܐ ܕܲܓ̣ܡܝܼܪ ܠܐܲܝܢܵܐ ܕܝܵܠܹ̇ܦ܀ ܠܵܐ ܓܹܝܪ ܡܸܫܟܲܚ ܢܸܥܒܸ݁ܕܼ ܡܸܕܹܡ ܟܲܕܼ ܠܵܐ ܚܙܹܐ ܠܹܗ: ܕܐܘܼܡܵܢܘܼܬܼܵܐ ܕܠܵܐ ܬܲܚܘܝܼܬܼܵܐ ܠܵܐ ܡܸܬܼܝܲܠܦܵܐ܀ ܘܡܵܐ ܕܡܸܬܼܦܲܪܲܣ ܪܲܒܵܐ ܕܢܲܠܸܦ ܟܲܕܼ ܠܵܐ ܠܵܐܹ̇ܐ: ܨܒ̣ܘܼܬܼܵܐ ܓܡܝܼܪܬܵܐ ܡܩܲܪܸܒ̣ ܣܵܐܹ̇ܡ ܨܹܝܕܼ ܬܲܠܡܝܼܕܹܗ܀ ܕܐܲܝܟ̣ ܗܵܟܲܢܵܐ ܥܒܲܕܼ ܒܵܪܘܿܝܵܐ ܠܡܘܼܫܹܐ ܥܲܒ̣ܕܹܗ: ܕܥܹܕܬܵܐ ܓܡܝܼܪܬܵܐ ܚܵܘܝܼ ܗ̄ܘܟܵܐ ܠܹܗ ܕܢܸܪܫܘܿܡ ܕܘܼܡܝܵܗ̇܀ ܕܠܵܐ ܬܸܦܸܕܼ ܠܵܗ̇ ܨܘܼܪܬܵܐ ܡܸܢܹܗ ܟܲܕܼ ܢܵܚܹ̇ܬܼ ܗ̄ܘ̣ܵܐ: ܚ̣ܙܵܗ̇ ܒܲܫܪܵܪܵܐ ܕܠܵܐ ܬܘܼܒ̣ ܢܸܛܥܹܝܗ̇ ܡܵܐ ܕܡܸܬܼܪܲܫܡܵܐ܀ ܒܡܲܫܡܲܥ ܐܸܕܼܢܵܐ ܕܡܘܼܬܼܵܐ ܕܡܸܕܹܡ ܠܵܐ ܡܸܬܼܚܲܫܒ̣ܵܐ: ܚܙܵܬܼܵܐ ܗ̄ܝܼ ܡܲܨܝܵܐ ܬܸܟ̣ܢܘܿܫ ܬܹܐܚܘܿܕܼ ܟܠ ܨܘܼܪ̈ܵܬܼܵܐ܀ ܐܸܠܘܼܠܵܐ ܚ̣ܙܵܐ ܡܘܼܫܹܐ ܒܥܲܝܢܵܘ̈ܗܝ ܥܹܕܬܵܐ ܕܒܲܢܝܵܐ: ܠܵܐ ܣܵܦܹ̇ܩ ܗ̄ܘ̣ܵܐ ܟ̱ܠܹܗ 1 : ܨܸܒ̣ܬܵܗ̇ ܢܚܵܘܹܐ ܢܸܥܒܸ݁ܕܼ܀ ܒܲܕܼܡܘܼܬܼܵܐ ܓܹܝܪ ܕܐܸܬܼܚܲܙܝܲܬ݀ ܠܹܗ ܥܲܠ ܛܘܼܪ ܣܝܼܢܲܝ: pb. 42 ܢܚܸܬܼ ܗ̄ܘ̣ܵܐ ܘܓܲܡܪܹܗ ܠܗܵܘ̇ ܬܼܘܩܵܢܵܐ ܕܠܵܐ ܕܘܼܘܵܕܼܵܐ܀ ܚ̣ܙܵܐ ܠܒܸܢܝܵܢܵܗ̇ ܕܲܡܟܲܠܲܠܬܵܐ ܒܫܲܠܗܹܒ̣ܝܼܬܼܵܐ: ܘܠܲܪܘܝܼܚܘܼܬܼܵܗ̇ ܕܲܡܥܲܕܲܢܬܵܐ ܒܪܵܘܡܵܐ ܪܲܒܵܐ܀ ܚ̣ܙܵܐ ܗ̄ܘ̣ܵܐ ܠܥܘܼܡܪܵܗ̇ ܕܲܡܫܲܠܲܠ ܗ̄ܘ̣ܵܐ ܒܟܲܝܼܢܘܼܬܼܵܐ: ܘܕܲܝܪܵܗ̇ ܪܲܒ݁ܬܪܵܐ ܕܬܲܩܝܼܦܵܐ ܗ̄ܘ̣ܵܬܼ ܒܹܝܬܼ ܡܲܠܲܐܟܹ̈ܐ܀ ܚ̣ܙܵܐ ܕܐܲܚܝܼܕܼܵܐ ܣܵܘ̈ܦܲܝ ܪܵܘܡܵܐ ܘܲܙܥܘܿܪܝܼܢ ܠܵܗ̇: ܘܲܫܕܹܝܢ ܛܘܼܢܒܹ̈ܝܗ̇ ܥܲܠ ܦܸܢ̈ܝܵܬܼܵܐ ܘܬܼܘܼܒ̣ ܐܲܪܝܼܟ̣ܝܼܢ܀ ܚ̣ܙܵܐ ܗ̄ܘ̣ܵܐ ܠܥܘܼܒܵܗ̇ ܕܲܚܡܝܼܠܝܼܢ ܒܹܗ ܚܲܝ̈ܠܲܝ ܪܵܘܡܵܐ: ܘܲܡܕܲܝܪܝܼܢ ܒܹܗ ܟܲܕܼ ܠܵܐ ܙܪܝܼܒ̣ܝܼܢ ܟܲܕܼ ܣܲܓ݁ܝܼܐܝܼܢ܀ ܚ̣ܙܵܐ ܠܲܫܟ̣ܝܼܢܬܵܐ ܕܲܫܪܝܵܐ ܒܓ̣ܵܘܵܗ̇ ܒܲܩܕܼܘܿܫ ܩܘܼ̈ܕܼܫܝܼܢ: ܘܲܡܝܲܒ݁ܝ̣ܝܼܢ ܒܵܗ̇ ܬܸܓ̣ܡܲܝ̈ ܢܘܼܪܵܐ ܒܩܵܠܲܝ̈ ܫܘܼܒ̣ܚܵܐ܀ ܚ̣ܙܵܐ ܗ̄ܘ̣ܵܐ ܠܓ̣ܘܼ̈ܕܹܐ ܟܲܕܼ ܩܵܝ̇ܡܝܼܢ ܒܵܗ̇ ܪܘܼܚܵܢܵܐܝܼܬܼ: ܘܣܸܕܼܪܹ̈ܐ ܡܬܼܝܼܚܹ̈ܐ ܕܲܦܫܝܼܛܝܼܢ ܒܵܗ̇ ܢܘܼܪܵܢܵܐܝܼܬܼ܀ ܚ̣ܙܵܐ ܗ̄ܘ̣ܵܐ ܛܲܟ̣ܣܹ̈ܐ ܕܲܫܡܲܝܵܢܹ̈ܐ ܕܲܫܪܹܝܢ ܬܲܡܵܢ: ܘܥܝܼܪܹ̈ܐ ܒܫܘܼܒ̣ܚܵܐ ܕܙܵܥ̇ܩܝܼܢ ܩܵܠܹܐ ܕܩܲܕܝܼܫܘܼܬܼܵܐ܀ ܚ̣ܙܵܗ̇ ܟܲܕܼ ܡܲܠܝܵܐ ܘܲܟ̣ܡܵܐ ܕܢܸܥܠܘܼܢ ܐܵܚܹ̇ܕܼ ܥܘܼܒܵܗ̇: ܘܲܠܦܲܓ̣ܪ̈ܵܢܹܐ ܡܣܲܟ݁ܝܵܐ ܕܬܸܚܡܘܿܠ ܐܲܝܟ̣ ܕܲܠܥܝܼܪܹ̈ܐ܀ ܚ̣ܙܵܗ̇ ܗ̄ܘ̣ܵܐ ܡܘܼܫܹܐ ܕܲܓ̣ܡܝܼܪ ܨܸܒ̣ܬܵܗ̇ ܡ̣ܢ ܓܵܘܙܲܠܬܵܐ: ܘܒܲܝܬܵܗ̇ ܪܲܒܵܐ ܕܟ̣ܠܹܗ ܢܘܼܪܵܐ ܗ̄ܘ̣ ܡ̣ܢ ܟܠ ܓܲܒ݁ܝܼ̈ܢ܀ ܚ̣ܙܵܐ ܗ̄ܘ̣ܵܐ ܠܟܸܢܫܹ̈ܐ ܕܲܡܫܲܒ݁ܚܵܢܹ̈ܐ ܕܲܦܨܝܼܚܝܼܢ ܒܵܗ̇: ܟܲܕܼ ܙܵܠܚ̇ܝܼܢ ܒܵܗ̇ ܩܘܼ̈ܕܼܫܹܐ ܓܐܲܝ̈ܵܐ ܡ̣ܢ ܦܘܼܡܲܝ̈ܗܘܿܢ܀ ܚ̣ܙܵܗ̇ ܠܲܒ̣ܪܝܼܬܼܵܐ ܕܲܥܒ̣ܝܼܕܵܐ ܠܵܗ̇ ܟܘܼܒ̣ܫܵܐ ܠܪܸ̈ܓ̣ܠܹܝܗ̇: pb. 43 ܘܗܝ݀ ܐܲܝܟ̣ ܚܹܐܪܘܼܬܼܵܐ ܒܪܵܘܡܵܐ ܕܲܠܥܸܠ ܡܸܬܼܓܲܝܐܵܐ ܗ̄ܘ̣ܵܬܼ܀ ܚ̣ܙܵܗ̇ ܟܲܕܼ ܠܥܸܠ ܡ̣ܢ ܣܵܘ̈ܦܹܗ ܕܟ̣ܠܗܘܿܢ ܪ̈ܵܘܡܹܐ: ܘܲܠܥܸܠ ܡܸܢܵܗ̇ ܡܵܪܵܗ̇ ܒܲܠܚܘܿܕܼ ܐܝܼܬܼ ܐܲܝܟ̣ ܪܹܫܵܐ܀ ܚ̣ܙܵܐ ܠܙܲܗܝܘܼܬܼܵܐ ܕܲܡܩܲܕܫܵܢܹ̈ܐ ܟܡܵܐ ܪܲܬ݁ܝܼܬܼܝܼܢ: ܘܗܵܠܹܝܢ ܩܵܠܹ̈ܐ ܕܲܡܒܲܪ̈ܟ̣ܵܢܹܐ ܟܡܵܐ ܥܲܙܝܼܙܝܼܢ܀ ܚ̣ܙܵܐ ܒܵܗ̇ ܐܲܬܼܪܵܐ ܕܲܫܒ̣ܝܼܚ ܘܲܓ̣ܐܹܐ ܘܠܵܐ ܡܸܬ݁ܬܲܪܓܲܡ: ܀ܘܲܠܓܟܵܘ ܡܸܢܹܗ ܕܲܓ̣ܢܝܼܙ ܘܲܦܐܹܐ ܘܠܵܐ ܡܸܬܼܥܲܩܲܒ̣܀ ܚ̣ܙܵܐ ܒܵܗ̇ ܢܘܼܗܪܵܐ ܐ̄ܫܝܼܕܼܵܐ ܬܪܝܼܥܵܐ ܕܠܵܐ ܡܸܣܬܲܝܲܟ̣: ܙܲܗܪܵܐ ܕܚܝܼܠܵܐ ܕܫܲܠܗܹܒ̣ܝܼܬܼܵܐ ܕܠܵܐ ܡܸܬܼܡܲܠܲܠ܀ ܚ̣ܙܵܐ ܐܸܣܟܹܡܵܐ ܕܬܲܪ̈ܥܹܐ ܦܬܼܝܼܚܹ̈ܐ ܕܐܲܦܲܝ̈ ܬܲܪ̈ܥܹܐ: ܕܲܩܪܝܼܡ ܙܝܼܘܵܐ ܘܫܲܪܝܵܐ ܫܟ̣ܝܼܢܬܵܐ ܠܓ̣ܵܘ ܡ̣ܢ ܢܘܼܗܪܵܐ܀ ܚ̣ܙܵܐ ܒܲܕܼܡܘܼܬܼܵܐ ܒܲܝܬܵܐ ܕܲܠܓ̣ܵܘ ܐܲܝܟ̣ ܗܵܘ̇ ܕܲܥ̣ܒܲܕܼ: ܘܲܚܕܝܼܪܵܐ ܠܹܗ ܕܵܪܬܵܐ ܕܲܠܒܲܪ ܐܲܝܟ̣ ܗܵܝ̇ ܕܐܲܬܼܩܸܢ܀ ܚ̣ܙܵܐ ܗ̄ܘ̣ܵܐ ܣܸܕܼܪܹ̈ܐ ܐܵܦ ܥܲܡܘܼ̈ܕܹܐ ܕܲܟ̣ܪܝܼܟ̣ܝܼܢ ܠܵܗ̇: ܥܒ̣ܵܕܼܵܐ ܕܢܘܼܗܪܵܐ ܘܲܦܣܝܼܩ ܘܲܓ̣ܠܝܼܦ ܡ̣ܢ ܓܵܘܙܲܠܬܵܐ܀ ܚ̣ܙܵܐ ܠܲܥܢܵܢܹ̈ܐ ܕܲܚܕܼܵܐ ܐܲܣܝܼܪ̈ܵܢ ܒܵܗ̇: ܘܲܚܠܵܦܲܝܗܹܝܢ ܝܵܪ̈ܝܼܥܵܬܼܵܐ ܥ̣ܒܲܕܼ ܗ̄ܘ̣ܵܐ ܠܕܼܝܼܠܹܗ܀ ܚ̣ܙܵܐ ܕܲܩܪܝܼܡܵܐ ܒܓ̣ܵܘܢܵܐ ܕܢܘܼܪܵܐ ܕ̣ܟ̣ܠ ܐܸܣܟܹܡ̈ܝܼܢ: ܘܲܨܒܲܥ̣ ܡܸܫ̈ܟܹ݁ܐ ܕܲܢܕܲܢܹܐ ܗ̄ܘ̣ܵܐ ܒܗܵܠܹܝܢ ܓܵܘ̈ܢܹܐ܀ ܚ̣ܙܵܐ ܗ̄ܘ̣ܵܐ ܠܣܲܗܪܵܐ ܒܲܕܼܡܘܼܬܼ ܩܸܫܬܵܐ ܗܵܝ̇ ܕܲܥܢܵܢܹ̈ܐ: ܘܠܐܸܣܦܲܝܢܝܼܩܵܐ ܥܲܡ ܣܵܣܓܵܘܢܵܐ ܨܒܲܥ̣ ܐܲܟ̣ܘܵܬܼܵܗ̇܀ ܚ̣ܙܵܗ̇ ܒܲܟ̣ܪ̈ܘܼܒܹܐ ܟܲܕܼ ܡܸܫܬܲܩܠܵܐ ܒܟܲܬܼܦܵܐ ܕܢܘܼܪܵܐ: pb. 44 ܘܲܥ̣ܒܲܕܼ ܩܘܿܦܹ̈ܐ ܕܲܒ̣ܠܹܘܵܝܹ̈ܐ ܢܙܲܝܲܚ ܕܝܼܠܹܗ܀ ܐܲܝܟܲܢ ܕܲܚ̣ܙܵܗ̇ ܗܵܟܲܢ ܪܲܫܡܵܗ̇ ܚܲܬ݁ܝܼܬܼܵܐܝܼܬܼ: ܐܸܠܘܼܠܵܐ ܚ̣ܙܵܗ̇ ܡܣܲܝܸܟ̣ ܗ̄ܘ̣ܵܐ ܠܟ̣ܠܗܘܿܢ ܨܸܒ̣ܬܹ̈ܝܗ̇܀ ܗܵܪܟܵܐ ܐ̄ܪܵܙܵܐ ܓܠܹܐ ܗ̄ܘ̣ܵܐ ܐܲܝܟ̣ ܫܸܡܫܵܐ ܒܚܲܬ݁ܝܼܬܼܘܼܬܹܗ: ܘܗܘ݀ ܢܵܬܹ̇ܦ ܠܝܼ ܢܸܬܼܡܲܠܲܠ ܒܝܼ ܣܘܼܥܪܵܢܵܐܝܼܬܼ܀ ܕܵܡܹ̇ܐ ܗ̄ܘ̣ܵܐ ܠܹܗ ܡܘܼܫܹܐ ܠܡܵܪܲܢ ܒܐܲܝܠܹܝܢ ܕܲܣ̣ܥܲܪ: ܕܗ݀ܘܝܘܼ ܕܡܘܼܬܹܗ ܘܛܸܠܵܢܝܼܬܹܗ ܘܨܘܼܪܬܵܐ ܕܓ̣ܘܼܫܡܹܗ܀ ܒܗܵܘ̇ ܬܘܼܩܵܢܵܐ ܕܲܚ̣ܙܵܐ ܒܛܘܼܪܵܐ ܗܵܘ̇ ܠܹܘܵܝܵܐ: ܠܵܗ̇ ܗ̄ܘ̣ ܠܥܹܕܬܵܐ ܨܵܪ ܒܲܕܼܡܘܼܬܼܵܐ ܗܵܝ̇ ܕܲܡܫܝܼܚܵܐ܀ ܘܲܕܼܒܲܢܝܵܐ ܗ̄ܘ̣ܵܬܼ ܥܹܕܬܵܐ ܒܐ̄ܪܵܙܵܐ ܗܵܐ ܡ̣ܢ ܗܵܝܕܹܝܢ: ܣܵܗܹܕܼ ܕܵܘܝܼܕܼ ܕܲܚ̣ܙܵܗ̇ ܗ̄ܘܟܵܐ ܬܘܼܒ̣ ܐܲܝܟ̣ ܕܐܵܦ ܡܘܼܫܹܐ܀ ܐܸܬ݁ܕܲܟ̣ܪ ܠܥܹܕܬܵܗ ܕܲܩ̣ܢܲܝܬ݁ ܡ̣ܢ ܩܕܝܼܡ ܗܵܐ ܓܲܠܝܵܐܝܼܬܼ: ܐܲܟ̣ܪܸܙ ܕܵܘܝܼܕܼ ܥܲܠ ܬܘܼܩܵܢܵܗ̇ ܕܲܡܫܲܟ̣ܠܲܠܬܵܐ܀ ܠܲܓ̣ܡܝܼܪܘܼܬܼܵܗ̇ ܚ̣ܙܵܐ ܗ̄ܘ̣ܵܐ ܡܘܼܫܹܐ ܘܲܢܚܸܬܼ ܪܲܫ̣ܡܵܗ̇: ܘܝܲܒ݁ܠܹܗ ܠܐ̄ܪܵܙܵܐ ܕܥܹܕܬܵܐ ܘܡܵܪܲܢ ܥܲܠ ܬܘܼܩܵܢܵܗ̇܀ ܠܵܐ ܥܲܡܘܼ̈ܛܵܢ ܗܵܠܹܝܢ ܕܐܸܡ̇ܪܹܬܼ ܐܘܿ ܫܵܡ̈ܘܿܥܹܐ: ܒܘܼܝܵܢܵܐ ܓܹܝܪ ܒܵܥ̈ܝܵܢ ܐܸܢܹܝܢ ܘܟܸܢ ܡܸܬܼܝܲܕܼ̈ܥܵܢ܀ ܗܵܫܵܐ ܫܸܩ̇ܠܹܬܼ ܕܐܹܚܹܘܹܐ ܠܵܟ̣ ܫܲܪܝܼܪܵܐܝܼܬܼ: ܕܐܲܝܟܲܢ ܪܲܫܡܵܗ̇ ܡܘܼܫܹܐ ܠܥܹܕܬܵܐ ܒܟ̣ܠ ܐܸܣܟܹܡ̈ܝܼܢ܀ ܒܡܲܫܟܲܢܙܲܒ̣ܢܵܐ ܨܵܪ ܗ̄ܘ̣ܵܐ ܠܝܲܬܼܒܵܗ̇ ܕܲܡܟܲܠܲܠܬܵܐ: ܘܒܲܩܕܼܘܿܫܩܘܼ̈ܕܼܫܹܐ ܡܲܕܼܒ݁ܚܵܐ ܙܲܗܝܵܐ ܕܡܵܪܲܬܼ ܐ̄ܪ̈ܵܙܹܐ܀ ܠܲܡܕܲܒ݁ܪ̈ܵܢܹܐ ܕܥܲܡܵܐ ܫܲܒ̣ܥܝܼܢ ܨܵܪ ܒܲܫܠܝܼܚܹ̈ܐ: pb. 45 ܘܒܲܬܼܪܸܥܣܲܪܬܵܐ ܠܪܹ̈ܫܲܝ ܫܲܒ̣̈ܛܹܐ ܗܵܠܹܝܢ ܕܲܓ̣ܒ̣ܵܐ܀ ܡ̣ܢ ܗܵܝ̇ ܪܘܼܚܵܐ ܕܐܝܼܬܼ ܗ̄ܘ̣ܵܐ ܒܡܘܼܫܹܐ ܢܣܲܟ̣ ܗ̄ܘ̣ܵܐ ܒܗܵܠܹܝܢ: ܐܲܝܟ̣ ܕܲܡܫܝܼܚܵܐ ܡ̣ܢ ܪܘܼܚ ܦܘܼܡܹܗ ܢܣ̣ܲܟ̣ ܒܲܫܠܝܼܚܵܘ̈ܗܝ܀ ܗܘ݀ܵܘ ܡܲܠܦܵܢܹ̈ܿܐ ܠܟ̣ܠܹܗ ܥܲܡܵܐ ܒܐܝܼ̈ܕܲܝ ܡܘܼܫܹܐ: ܘܐܸܬܼܝܲܩܲܪ ܗܘ݀ ܐܲܝܟ̣ ܐܵܠܵܗܵܐ ܡ̣ܢ ܡܲܫܪܝܼܬܼܵܐ܀ ܫܩܲܠ̣ܘ ܡ̣ܢ ܪܘܼܚܹܗ ܫܲܒ̣ܥܝܼܢ ܘܲܢܦܲܩ̣ܘ ܒܲܝܢܵܬܼ ܫܲܒ̣ܛܹ̈ܐ: ܐܲܝܟ̣ ܕܲܡܫܝܼܚܵܐ ܒܓ̣ܘܼܕܵܐ ܕܫܲܒ̣ܥܝܼܢ ܡܸܣܬܲܒܲܪ ܗ̄ܘ̣ܵܐ܀ ܗܵܢܵܐ ܐ̄ܪܵܙܵܐ ܢܲܩܝܼܦ ܗ̄ܘ̣ܵܐ ܠܹܗ ܠܦܹܐܩܵܐ ܕܝܼܪܸܒ̣: ܘܡܸܛܠ ܗܵܢܵܐ ܫܩܲܠ̣ ܫܘܼܠܛܵܢܵܐ ܕܢܸܗܘܹܐ ܐܲܠܵܗ܀ ܗܵܢܵܐ ܛܲܟ̣ܣܵܐ ܕܐܸܬ݀ܵܐ ܠܥܵܠܡܵܐ ܒܐܝܼ̈ܕܲܝ ܡܵܪܲܢ: ܗܵܐ ܡ̣ܢ ܡܘܼܫܹܐ ܡܸܬܼܝܲܒܲܠ ܗ̄ܘ̣ܵܐ ܐ̄ܪܵܘܵܢܵܐܝܼܬܼ܀ ܐܸܠܘܼܠܵܐ ܓܹܝܪ ܨܵܪܹܗ ܡܘܼܫܹܐ ܟ̱ܠܹܗ ܒܟ̣ܠܗܹܝܢ: ܠܵܘ ܒܲܫܪܵܪܵܐ ܢܒ̣ܝܼܵܐ ܐܲܟ̣ܘܵܬܼܝ ܩܵܪܹܐ ܗ̄ܘ̣ܵܐ ܠܹܗ܀ ܣܲܦ̣ܘ ܒܹܗ ܐ̄ܪ̈ܵܙܹܐ 2 : ܥܕܲܡܵܐ ܕܝܼܩܸܕܼ 3 : ܘܐܵܘܦܝܼ ܦܲܓ̣ܪܹܗ: ܘܫܸܪܟܲܬ݀ ܨܘܼܪܬܹܗ ܠܙܝܼܘܵܐ ܪܲܒܵܐ ܕܐܲܠܵܗܘܼܬܼܵܐ܀ ܐܸܬܼܢܲܒ̣ܪܲܫ ܗ̄ܘ̣ܵܐ ܒܛܘܼܦ̮ܣܵܐ ܕܫܸܓ̣ܪ̈ܵܘܗܝ ܚܲܡܝܼܡܵܐܝܼܬܼ: ܥܕܲܡܵܐ ܕܐܲܙܗܲܪ ܐܲܝܟ̣ ܢܘܼܪܵܢܵܐ ܒܫܘܼܒ̣ܚܵܐ ܕܲܠܒܸܫ̣܀ ܥܲܠ̣ ܠܲܕܼܡܘܼܬܼܵܐ ܘܲܪܬܲܚ̣ ܗ̄ܘ̣ܵܐ ܒܵܗ̇ ܐܲܝܟ̣ ܕܲܒ̣ܢܘܼܪܵܐ: ܘܲܢܦܲܩ̣ ܡܸܢܵܗ̇ ܟܲܕܼ ܡܸܬܼܓܵܘܙܲܠ ܝܵܩܘܿܕܵܐܝܼܬܼ܀ ܩܢܵܬ݀ ܗ̄ܘ̣ܵܬܼ ܨܘܼܪܬܹܗ ܝܵܩܘܿܕܼܘܼܬܼܵܐ ܡ̣ܢ ܕܲܡܫܝܼܚܵܐ: ܘܐܲܚܕܹܗ ܥܲܡܵܐ ܐܲܝܟ̣ ܠܐܲܠܵܗܵܐ ܒܕܸܚܠܵܐ ܪܲܒܵܐ܀ pb. 46 ܓܕܲܠ̣ ܠܹܗ ܐ̄ܪܵܙܵܐ ܩܸܢܵܐ ܕܢܘܼܪܵܐ ܒܓ̣ܵܘ ܦܲܪܨܘܿܦܹܗ: ܘܲܪܒܲܥ̣ ܗ̄ܘ̣ܵܐ ܒܹܗ ܘܗܘ݀ ܡܲܪܗܸܒ̣ ܗ̄ܘ̣ܵܐ ܠܲܕܼܚܵܙܹ̇ܝܢ ܠܹܗ܀ ܐܸܬ݁ـ݁ܨܝܼܪ ܗ̄ܘ̣ܵܐ ܠܹܗ ܒܗܵܘ̇ ܦܵܪܘܿܩܵܐ ܟ̱ܠܹܗ ܨܲܠܡܹܗ: ܘܡܸܛܠ ܫܘܼܦܪܹܗ ܐܲܪܦܝܼ ܪܗܵܒ̣ܬܵܐ ܒܟ̣ܠ ܚܲܙܵܝܵܘ̈ܗܝ܀ ܕܠܲܩ̣ ܗ̄ܘ̣ܵܐ ܒܓ̣ܵܘ̈ܢܹܐ ܘܐܸܬܼܡܲܙܲܓ̣ܘ ܒܹܗ ܡ̣ܢ ܕܲܡܫܝܼܚܵܐ: ܘܗܵܐ ܩܲܪܝܼܒ̣ ܗ̄ܘ̣ܵܐ ܕܢܲܣܒܲܪ ܥܲܡܵܐ ܕܐܲܠܵܗܵܐ ܗ̄ܘ̣ܵܐ܀ ܐܸܬ݁ܕܲܪܲܓ̣ ܗ̄ܘ̣ܵܐ ܠܪܵܘܡܵܐ ܕܐ̄ܪ̈ܵܙܹܐ ܘܲܣܠܸܩ ܫܲܢܝܼ: ܘܗܵܐ ܕܢܸܫܪܲܟ̣ ܠܹܗ ܠܲܫܡܵܐ ܣܓ̣ܝܼܕܼܵܐ ܕܐܲܠܵܗܘܼܬܼܵܐ܀ ܬܸܡܗܲܬ݀ ܗ̄ܘ̣ܵܬܼ ܠܵܗ̇ ܐܲܪܥܵܐ ܟ̱ܠܹܗ̇ ܒܓ̣ܵܘܢܹ̈ܐ ܕܲܣ̣ܥܲܪ: ܘܩܲܪܝܼܒ̣ܵܐ ܗ̄ܘ̣ܵܬܼ ܠܲܡܗܲܝܡܵܢܘܼ ܕܗܘ݀ܝܘܼ ܡܵܪܵܗ̇ 4 :܀ ܢܩܸܦ̣ ܗ̄ܘ̣ܵܐ ܠܹܗ ܫܡܵܐ ܕܓܲܢ̄ܒܵܪܘܼܬܼܵܐ ܒܲܝܢܵܬܼ ܥܲܡܡܹ̈ܐ: ܘܲܪܢܵܘ ܕܲܟ̣ܒܲܪ ܗܘ݀ܝܘܼ ܫܲܠܝܼܛ ܥܲܠ ܒܸܪ̈ܝܵܬܼܵܐ܀ ܚܙܵܬ݀ ܡܲܫܪܝܼܬܼܵܐ ܟܲܕܼ ܦܵܩܹ̇ܕܼ ܗ̄ܘ̣ܵܐ ܠܪܵܘܡܵܐ ܘܥܘܼܡܩܵܐ: ܘܫܸܩܠܲܬ݀ ܥܲܝܢܵܗ̇ ܕܬܸܚܙܹܝܘܗܝ ܒܲܫܡܵܐ ܕܒ̣ܵܪܘܿܝܘܼܬܼܵܐ܀ ܛ̇ܥܵܝܗܝ ܗ̄ܘ̣ܵܐ ܥܲܡܵܐ ܐܵܦ ܠܐܲܠܵܗܵܐ ܒܗܵܝ̇ ܕܲܓ̣ܢܝܼܙ ܗ̄ܘ̣ܵܐ: ܘܡܘܼܫܹܐ ܕܩܲܪܝܼܒ̣ ܗܘ݀ ܡܲܠܝܼ ܗ̄ܘ̣ܵܐ ܕܘܼܟܲܬܼ ܡܵܪܹܗ܀ ܥܕܲܡܵܐ ܠܗܵܪܟܵܐ ܢܲܓ̣ܕܲܢܝ ܡܘܼܫܹܐ ܒܲܬܼܡܝܼ̈ܗܵܬܹܗ: ܘܬܼܘܼܒ̣ ܠܵܐ ܡܨܹܐ ܐ̄ܢܵܐ ܕܐܸܩܪܘܿܒ̣ ܥܲܡܹܗ ܕܲܡܦܲܫܲܚ ܠܝܼ܀ ܚܵܒܹ̇ܬܼ ܠܝܼ ܓܹܝܪ ܡ̣ܢ ܬܲܫܥܝܼܬܹܗ ܕܒܲܪ ܠܹܘܵܝܹ̈ܐ: ܕܲܟ̣ܡܵܐ ܕܐܹܡܲܪ ܬܘܼܒ̣ ܡܸܬܼܝܲܬ݁ܪܵܐ ܘܣܵܟ̣ܵܐ ܠܲܝܬܵܘܗܝ܀ ܐܸܠܘܼ ܪܸܥܝܵܢܝ ܠܵܐ ܐܲܡܚܸܠ̣ ܠܹܗ ܡܸܢܹܗ ܕܫܲܪܒܵܐ: pb. 47 ܗܵܫܵܐ ܗ̄ܘ̣ ܫܲܪܝܼܬܼ ܐܹܡܲܠܸܠ ܗ̄ܘܹ̇ܝܬܼ ܚܲܬ̈ܝܼܬܼܵܐܝܼܬܼ܀ ܐܸܠܘܼ ܗܵܘܢܵܐ ܠܵܐ ܛܵܐܹ̇ܦ ܗ̄ܘ̣ܵܐ ܒܣܲܓ̣ܝܼ̈ܐܵܬܼܵܐ: ܗܵܢܵܐ ܪܹܫܵܐ ܗ̄ܘ̣ ܠܵܘ ܫܘܼܠܵܡܵܐ ܕܡܹܐܡܪܹܗ ܕܡܘܼܫܹܐ܀ ܗܵܪܟܵܐ ܐܹܣܝܼܡ ܡܝܼܠܵܐ ܕܫܸܬܼܩܵܐ ܐܲܝܟ̣ ܐܵܘܵܢܵܐ: ܘܐܸܢ ܐܝܼܬܼ ܙܲܒ̣ܢܵܐ ܬܘܼܒ̣ ܪܵܕܹܐ ܐ̄ܢܵܐ ܒܐܘܼܪܚܹܗ ܕܘܼܫܹܐ܀ ܬܡܝܼܗ ܗ̄ܘ̣ ܐ̄ܪܵܙܵܐ ܕܫܲܡܸܫ ܬܲܡܵܢ ܘܠܵܐ ܡܸܬܼܡܲܠܲܠ: ܘܫܵܬܹ̇ܩ ܐ̄ܢܵܐ ܠܝܼ ܕܠܵܐ ܢܸܙܥܲܪ ܒܝܼ ܛܘܼܦ̮ܣܵܐ ܪܲܒܵܐ܀ ܠܗܵܝ̇ ܡܲܚܲܬܬܵܐ ܕܡ̣ܢ ܪܹܫ ܛܘܼܪܵܐ ܕܲܠܘܵܬܼ ܥܲܡܵܐ: ܡ̇ܢ ܟܲܝ ܣܵܦܹ̇ܩ ܠܲܡܡܲܠܵܘܼ ܐܲܝܟܲܢ ܕܐܝܼܬܹܝܗ̇܀ ܥܕܲܡܵܐ ܠܗܵܪܟܵܐ ܒܐ̄ܪ̈ܵܙܹܐ ܫܒ̣ܝܼܚܹ̈ܐ ܡܸܫܬܲܡܲܫ ܗ̄ܘ̣ܵܐ: ܘܗܵܪܟܵܐ ܨܲܠܡܵܐ ܪܲܒܵܐ ܕܲܡܠܟܵܐ ܫܩܲܠ̣ ܗ̄ܘ̣ܵܐ ܘܲܢܚܸܬܼ܀ ܕܢܲܚ̣ ܐܲܝܟ̣ ܫܸܡܫܵܐ ܥܲܠ ܥܸܒ̣ܪ̈ܵܝܹܐ ܘܐܲܓ̣ܗܲܪ ܐܸܢܘܿܢ: ܢܦܲܩ̣ܘ ܙܲܠܝܼܩܹ̈ܐ ܡ̣ܢ ܦܲܪܨܘܿܦܹܗ ܥܲܠ ܡܲܫܪܝܼܬܼܵܐ܀ ܐܲܒ̣ܪܸܩ ܢܘܼܗܪܹܗ ܘܲܬܼܗܲܪ ܥܲܡܵܐ ܒܥܲܙܝܼܙܘܼܬܹܗ: ܢܚܸܬܼܘ ܙܲܗܪܝܼܪ̈ܵܘܗܝ ܘܲܪܥܸܠ̣ܘ ܫܲܒ̣̈ܛܹܐ ܒܬܲܗܪܵܐ ܕܲܚ̣ܙܵܘ܀ ܫܸܡܫܵܐ ܕܒܸܣܪܵܐ ܥܛܝܼܦ ܙܲܠܝܼܩܹ̈ܐ ܢܚܸܬܼ ܡ̣ܢ ܛܘܼܪܵܐ: ܘܲܒ̣ܫܘܿܫܸܦܵܐ ܚܡܲܠ̣ ܓܲܐܝܘܼܬܹܗ ܡ̣ܢ ܚܲܙܵܝܹ̈ܐ܀ ܐܘܿ ܫܘܿܫܸܦܵܐ ܥܛܝܼܦܲܬܼ ܐ̄ܪ̈ܵܙܹܐ ܬܵܡ̇ܗܵܐ ܠܝܼ ܒܹܟ̣ܝ: ܕܲܒ̣ܐ̄ܢܵܫܘܼܬܹܗ ܕܒܲܪ ܐܲܠܵܗܵܐ ܨܝܼܪ ܦܘܼܚܵܡܹܟ̣ܝ܀ ܒܗܵܝ̇ ܫܘܿܫܸܦܵܐ ܕܐܲܪܡ̣ܝܼ ܡܘܼܫܹܗ ܥܲܠ ܦܲܪܨܘܿܦܹܗ: ܦܲܓ̣ܪܵܢܘܼܬܹܗ ܕܒܲܪ ܐܲܠܵܗܵܐ ܡܸܬܼܚܲܙܝܵܐ ܗ̄ܘ̣ܵܬܼ܀ ܡܸܛܠ ܗܵܠܹܝܢ ܐ̄ܪ̈ܵܙܹܐ ܕܩܘܼܫܬܵܐ ܕܲܠܒܸܫ̣ ܡܘܼܫܹܐ: pb. 48 ܠܡܵܪܹܗ ܡܒ̣ܝܹ̈ܐ ܢܒ̣ܝܵܐ ܐܲܟ̣ܘܵܬܼܝ ܩܵܪܹܐ ܗ̄ܘ̣ܵܐ ܠܹܗ܀ ܒܓ̣ܵܘ ܫܘܿܫܸܦܵܐ ܟܢܘܼܫܬܵܐ ܠܡܘܼܫܹܐ ܝܲܩܲܪܬܹܗ ܗ̄ܘ̣ܵܬܼ: ܘܲܒ̣ܐ̄ܢܵܫܘܼܬܹܗ ܥܹܕܬܵܐ ܠܡܵܪܲܢ ܩܲܒܸ݁ܠܬܹܗ ܗ̄ܘ̣ܵܬܼ܀ ܘܹܐܠܵܐ ܘܢܸܦܠܲܬ݀ ܒܐܲܦܲܝ̈ ܡܘܼܫܹܐ ܨܹܝܕܼ ܡܲܫܪܝܼܬܼܵܐ: ܗܵܢܵܘ ܛܘܼܦ̮ܣܵܐ ܕܥܹܕܬܵܐ ܠܡܵܪܲܢ ܒܦܲܓ̣ܪܹܗ ܐܸܚܕܲܬ݀܀ ܗܵܠܹܝܢ ܐ̄ܪ̈ܵܙܹܐ ܒܐܲܝܢܵܐ ܕܲܣܦܝܼܪ ܡܸܙܕܲܡܪܝܼܢ ܗ̄ܘ̣ܵܘ: ܘܲܒ̣ܛܘܼܠܝܵܩܵܐ ܘܚܲܪܝܼܦ ܗܵܘܢܵܐ ܬܘܼܒ̣ ܥܵܬܼܪܝܼܢ ܗ̄ܘ̣ܵܘ܀ ܘܕܲܒ̣ܨܝܼܪܵܐܝܼܬܼ ܐܸܬܼܡܲܠܲܠ ܒܝܼ ܫܲܪܒܹܗ ܕܡܘܼܫܹܐ: ܠܵܐ ܡܵܪܝ ܬܸܛܠܘܿܡ ܥܲܡܠܹܗ ܙܥܘܿܪܵܐ ܕܲܚܒܸܢܵܢܵܐ܀ ܠܲܡܚܝܼܠܘܼܬܹܗ ܕܡܹܐܡܪܵܐ ܩܲܒܸ݁ܠ ܚܲܒ݁ܝܼܒ̣ܵܐܝܼܬܼ: ܘܢܸܦܸܠ ܫܵܡܘܿܢܝ ܥܲܠ ܦܵܬܼܘܿܪܵܟ̣ ܦܵܪܘܿܫܵܐܝܼܬܼ܀ ܕܠܵܐ ܣܲܝܸܟ̣ܬܵܟ̣ ܠܵܐ ܥܕܼܝܼܠ ܐ̄ܢܵܐ ܡܵܪܝ ܡ̣ܢ ܟܹܐܢܘܼܬܼܵܐ: ܡ̇ܢ ܓܹܝܪ ܡܵܘܦܹܐ ܕܲܡܣܲܝܟ̣ܵܐܝܼܬܼ ܢܹܐܡܲܪ ܫܲܪܒܵܟ̣܀ ܩܲܒܥܸܠ ܕܲܫܢܵܐ ܕܩܵܠܹ̈ܐ ܙܥܘܼܪܹ̈ܐ ܕܫܲܕܲܪ ܠܸܫܵܢܝ: ܘܛܘܿܪ ܠܝܼ ܠܘܵܬܼܵܟ̣ ܣܝܼܡܬܼܵܐ ܕܪ̈ܲܚܡܹܐ ܥܲܕܼ ܐܵܬܹ̇ܐ ܐ̄ܢܵܐ܀ ܚܠܵܦ ܟܲܪ̈ܝܵܬܼܵܐ ܕܙܸܡ̇ܪܹܬܼ ܗܵܪܟܵܐ ܢܲܫܝܼܫܵܐܝܼܬܼ: ܢܹܐܪܟܘܼܢ ܪ̈ܲܚܡܲܝܟ ܪ̈ܲܚܡܲܝܟ ܘܲܒ̣ܗܘܿܢ ܐܸܚܹܐ ܢܲܓܝܼܪܵܐܝܼܬܼ܀ ܒܲܪ ܐܲܠܵܗܵܐ ܕܲܥܠܵܘܗܝ ܐܲܟ̣ܬܸܒ̣ ܡܘܼܫܹܐ ܥܲܒ̣ܕܹܗ: ܠܵܟ̣ ܬܸܫܒ݁ܘܿܚܬܵܐ ܠܥܹܕܬܵܟ ܣܲܒ̣ܪܵܐ ܘܠܝܼ ܫܘܼܒ̣ܩܵܢܵܐ܀