On Stephen - ܕܕܼܘܼܟܼܪܵܢܵܐ ܕܡܵܪܝ ܐܸܣܛܲܦܵܢܘܿܣ

1 :ܡܲܠܟܵܐ ܕܪܵܘܡ̇ܐ ܕܲܙܟ̣̇ܐ ܒܩܲܝܣܵܐ ܠܒܼܝܼܫܵܐ ܘܡ̇ܘܬܵܐ 2 ܓܼܒܼܵܐ ܠܹܗ ܦܵܠܚܵܐ ܘܫܲܕܲܪ ܒܩܲܕܼܡ̇ܐ ܩܕܼܵܡ ܡܲܫܪܝܼܬܹܗ ܀ 3 :ܩܕܼܵܡ ܡܫܲܪܝܼܬܼܵܐ ܢܦ݂ܲܩ ܕܵܪܵܐ ܕܐܲܬܼܠܹܝܛܘܼܬܼܵܐ 4 ܘܩܵܡ̣ ܒܹܝܬܼ ܓܘܼ̈ܕܹܿܐ ܕܡܲܠܟܵܐ ܕܪܵܘܡ̇ܐ ܠܲܒܼܥܸܠܕܲܪܵܐ ܀ 5 :ܠܐܸܣܛܲܦܵܢܘܿܣ ܫܲܕܲܪ ܡܲܠܟܿܐ ܩܕܼܵܡ ܡܲܫܪܝܼܬܹܗ 6 ܕܗܘ̤ ܩܲܕܼܡ̇ܝܵܬܼ ܢܹܐܚܘܿܕ ܕܲܪܵܐ ܥܲܡ ܡ̇ܪܘܿܕܲܐ ܀ 7 :ܒܛܲܟܼܣܵܐ ܬܡܝܼܗܵܐ ܕܲܡܛܼܪ̈ܝܵܢܹܐ ܫܲܕܿܪܹܗ ܡܲܠܟܿܐ 8 ܕܡ̇ܐ ܕܚܵܙܹ̇ܝܢ ܠܹܗ ܚܲܝܠ̈ܲܝ ܪܵܘܡ̇ܐ ܢܸܬܼܪܲܗܒܿܘܼܢ ܒܹܗ ܀ 9 :ܡܲܫܚܹܗ ܒܪܘܼܚܵܐ ܘܚܲܙܩܹܗ ܒܙܲܝܢܵܐ ܕܠܵܐ ܢܸܬܼܚܲܝܲܒܼ 10 ܘܲܩܕܼܵܡ ܓܘܼܕܼܵܐ ܕܲܫܠܝܼܚܘܼܬܼܵܐ ܢ̣ܨܲܚ ܒܐܓܼܘܿܢܵܐ ܀ 11 :ܟܠܹܗ ܙܲܝܢܵܐ ܕܲܩܪܲܒܼܬܼܵܢܹܐ ܝܲܗ̄ܒܼ ܠܹܗ ܡܲܠܟܿܐ 12 ܕܲܕܸܠܵܐ ܕܸܚܠܵܐ ܢܸܥܒܸܿܕ ܩܹܐܪܣܵܐ ܥܲܡ ܡܵܪܘܿܕܹܐ ܀ 13 :ܣܲܝܦܵܐ ܕܪܘܼܚܵܐ ܐܵܘܚܸܕܼ ܒܐܝܼܕܹܗ ܪܸܡܙܵܐ ܕܫܲܕܼܪܹܗ 14 ܕܢܸܚܪܘܿܒܼ ܘܢܲܪܡܹܐ ܠܒܼܝܼܫܹ̈ܐ ܕܲܡ̣ܪܲܕܼܘ ܥܲܠ ܟܹܐܢܘܼܬܼܵܐ ܀ 15 :ܗܲܝܡܵܢܘܼܬܼܵܐ ܣܲܛܿܪܵܐ ܕܩܘܼܫܬܵܐ ܐܸܚܲܕܼ ܒܐܝܼܕܼܵܘ̈ܗܝ 16 ܘܒܼܵܗ̇ ܩܲܒܸܿܠ ܗ̄ܘ̣ܵܐ ܓܹܐܪܹ̈ܐ ܫܢܝܼܢܹ̈ܐ ܕܲܒܼܥܸܠܕܲܪ̈ܘܗܝ ܀ 17 ܡ̇ܐ ܕܫܵܕܹܝܢ ܗ̄ܘ̣ܵܘ ܓܹܐܪܹ̈ܐ ܕܥܵܘ̣ܠܵܐ ܕܵܢܒܲܙܚܘܼܢܵܝܗܝ: pb. 91 18 ܩܲܒܸܿܠ ܐܸܢܘܿܢ ܒܣܲܟܿܪܵܐ ܕܣܲܒܼܪܵܐ ܘܠܵܐ ܐܸܬܼܢܟܼܝܼ ܀ 19 :ܥܛ݂ܲܦ ܫܸܪܝܵܢܵܐ ܕܙܲܕܿܝܼܩܘܼܬܼܵܐ ܥܲܠ ܗܲܕܿܡ̇ܘ̈ܗܝ 20 ܕܠܵܐ ܢܸܡܚܘܿܢܵܝܗܝ ܘܢܸܗܘܹܐ ܓܘܼܚܟܵܐ ܠܚܲܝ̈ܠܵܘܵܬܼܗܘܿܢ ܀ 21 :ܣ̣ܵܡ ܣܲܢܘܲܪܬܵܐ ܕܦܘܼܪܩܵܢ ܚܲܝܹ̈ܐ ܕܝܲܗ̣̄ܒܼ ܠܹܗ ܡܲܠܟܵܐ 22 ܕܲܢܣܲܬܲܪ ܒܵܗ̇ ܗܲܝܡܵܢܘܼܬܼܵܐ ܪܹܫܵܐ ܕܚܲܝܵܘ̈ܗܝ ܀ 23 :ܟܠܹܗ ܒܟܼܠܹܗ ܡܚܲܙܲܩ ܗ̄ܘ̣ܵܐ ܒܵܗ̇ ܒܗܲܝܡܵܢܘܼܬܼܵܐ 24 ܘܠܲܝܬܼ ܒܵܗ̇ ܕܘܼܟܿܬܵܐ ܕܡܲܫܠܚܵܐ ܗ̄ܘ̣ܵܐ ܡ̣ܢ ܟܹܐܢܘܼܬܼܵܐ ܀ 25 :ܪܹܫܵܐ ܕܚܲܝܵܘ̈ܗܝ ܚܫܝܼܒܼܵܐ ܗ̄ܘ̣ܵܬ ܠܹܗ ܗܲܝܡܵܢܘܼܬܵܐ 26 ܘܲܒܼܣܲܢܘܲܪܬܵܐ ܡܛܲܫܹܐ ܗ̄ܘ̣ܵܐ ܠܵܗ̇ ܕܠܵܐ ܢܸܡܚܘܿܢܵܗ̇ ܀ 27 :ܠܹܗ ܘܲܠܚܲܒܼܪ̈ܵܘܗܝ ܡܲܠܟܵܐ ܙܲܗܲܪ ܘܦܲܩܸܕܼ ܐܢܘܿܢ 28 ܕܐܸܬܿܕܿܡ̇ܘ ܠܲܡ ܠܲܚ̈ܘܵܘܵܬܼܵܐ ܒܲܥܪܝܼܡܘܼܬܼܟܼܘܿܢ ܀ 29 :ܚܲܟܿܝܼܡ ܚܸܘܝܵܐ ܕܢܵܛܲ̇ܪ ܢܲܦܫܹܗ ܕܠܵܐ ܢܸܡܚܘܿܢܵܝܗܝ 30 ܕܟܲܕܼ ܪܹܫܹܗ ܚܲܝ ܠܵܐ ܡܸܬܼܚܲܒܲܠ ܡ̣ܢ ܡܲܚ̈ܘܵܬܼܵܐ ܀ 31 :ܒܗܵܕܹܐ ܕܡܘܼܬܼܵܐ ܙܵܕܹܩ ܕܬܸܛܪܘܼܢ ܗܲܝܡܵܢܘܼܬܼܵܐ 32 ܕܟܲܕܼ ܗ̤ܝ ܢܛܝܼܪܵܐ ܠܵܐ ܕܵܚ̇ܠܝܼܢ ܐ̄ܢܬܿܘܢ ܡ̣ܢ ܢܸܟܼܝܵܢܹ̈ܐ ܀ 33 :ܠܗܵܢ ܦܘܼܩܕܵܢܵܐ ܐܲܚܝܼܕܼ ܗ̄ܘ̣ܵܐ ܠܹܗ ܦܵܠܚܵܐ ܚܝܼܨܵܐ 34 ܘܒܲܕܼܡܘܼܬܼ ܪܹܫܵܐ ܢܵܛܲ݁ܪ ܗ̄ܘ̣ܵܐ ܠܹܗ ܕܕܲܡ ܢܸܬܼܢܟܹܐ ܀ 35 :ܒܲܕܼܡܘܼܬܼ ܣܲܟܿܪܵܐ ܐܸܚܲܕ ܒܐܝܼܕܹܗ ܠܗܲܝܡܵܢܘܼܬܼܵܐ 36 ܘܲܠܛܘܼܝܵܒܹܗ ܕܐܹܘܢܓܲܠܝܼܘܼܢ ܣܲܐܢܹܗ ܒܪܸ̈ܓܼܠܵܘ̈ܗܝ ܀ 37 :ܪܕܲܒܼ ܥܲܠ ܡܸܠܬܼܵܐ ܕܩܲܕܿܝܼܫܘܼܬܼܵܐ ܐܲܝܟ ܕܥܲܠ ܣܘܼܣܝܵܐ 38 ܘܥܲܠ ܡܘܼܟܵܟܼܵܐ ܕܙܲܕܝܩܘܼܬܼܵܐ ܩܲܠܝܼܠ ܓܸܦܹ̈ܐ ܀ 39 :ܪܟܸܒܼ ܥܲܠ ܡܸܠܬܼܵܐ ܘܐܸܚܲܕܼ ܣܲܝܦܵܐ ܘܲܠܒܸܫ̣ ܩܘܼܫܬܵܐ 40 ܘܣ̣ܵܡ ܣܲܢܘܼܪܬܵܐ ܘܲܣܐܸܢ ܒܪ̈ܓܼܠ̇ܘܗܝ ܛܘܼܝܵܒܼ ܡ̇ܪܹܗ ܀ 41 :ܩܥ̣ܵܐ ܒܡܲܫܪܝܼܬܹܗ ܕܲܒܼܥܸܠܕܪܵܐ ܐܲܝܟ ܪܲܒܿܚܲܝܠܵܐ 42 ܘܫܲܪܝܼܘ ܪܵܥ̇ܠܝܼܢ ܡ̣ܢ ܒܲܪܬܼ ܩܵܠܹܗ ܕܕܵܡ̇ܝܵܐ ܠܪܲܥܡܵܐ ܀ 43 :ܩܕܼܵܡ ܓܘܼܕܲܝ̈ܗܘܿܢ ܕܚܲܝ̈ܠܲܝ ܪܵܘܡ̇ܐ ܫܲܕܿܪܹܗ ܡܲܠܟܵܐ 44 ܕܢܸܕܪܘܿܫ ܐܘܼܪܚܵܐ ܠܲܟܼܢܵܘܵܬܹܗ ܕܢܸܬܿܕܲܡܘܿܢ ܒܹܗ ܀ 45 :ܗܘܸ ܩܲܕܡ̇ܝܵܬܼ ܕܲܪܫܵܗ̇ ܠܐܘܼܪܚܵܐ ܕܣܵܗܕܿܘܼܬܼ ܡ̇ܪܹܗ 46 ܘܲܗܘ̤ܵܐ ܒܘܼܟܼܪܵܐ ܕܣܵܗܕܘ̈ܗܝ ܕܝܼܫܘܿܥ ܡܲܠܟܵܐ ܕܪܵܘܡ̇ܐ ܀ 47 :ܚܲܝܠܵܘܵܬܹܗ ܕܪܹܫܵܐ ܕܐܵܐܲܪ ܡܸܫܬܲܢܩܝܼܢ ܗ̄ܘ̣ܵܘ 48 ܕܚܵܙܹ̇ܝܢ ܗ̄ܘ̣ܵܘ ܠܹܗ ܠܲܩܪܲܒܼܬܼܵܢܵܐ ܕܡܲܗܸܠ ܗ̄ܘ̣ܵܐ ܒܗܘܿܢ ܀ 49 :ܚܙ̣ܵܘ ܕܲܡܚܝܼܠܝܼܢ ܡ̣ܢ ܬܲܟܼܬܿܘܼܫܵܐ ܕܠܘܼܩܒܲܠ ܚܲܝܠܹܗ 50 ܘܐܸܓܲܪܘ ܘܐܲܝܬܿܝܼܘ ܠܲܒܼܢܲܝ̈ ܐܲܒܼܪܵܡ ܕܢܸܗܘܘܿܢ ܥܲܡܗܘܿܢ ܀ pb. 92 51 :ܒܢܲܝ̈ ܐܲܒܼܪܵܗܗܵܡ ܘܚܲܝܠܲܝ̈ ܒܝܼܫܵܐ ܗܘ̤ܵܘ ܚܕܵܐ ܓܘܼܕܵܐ 52 ܕܲܢܚܲܝܒܼܘܼܢܵܝܗܝ ܠܐܸܣܛܲܦܵܢܘܿܣ ܦܵܠܚܵܐ ܕܩܘܼܫܬܵܐ ܀ 53 :ܐܵܘܓܲܪܘ ܢܲܦܫܗܘܿܢ ܠܲܒܼܥܸܠܕܲܪܵܐ ܒܢܵܘ̈ܗܝ ܕܐܲܒܼܪܵܗܵܡ 54 ܘܲܢܣ݂ܲܒܼܘ ܐܲܓܼܪܵܐ ܕܐܲܓܼܝܼܪܘܼܬܼܗܘܿܢ ܕܝܼܢܵܐ ܕܲܥܬܼܝܼܕܼ ܀ 55 :ܒܝܲܕܼ ܥܸܒܼܪ̈ܵܝܹܐ ܐܲܩܪܸܒܼ ܒܝܼܫܵܐ ܠܘܼܩܒܲܠ ܦܵܠܚܵܐ 56 ܐܲܝܟ ܡ̇ܐ ܕܐܲܩܪܸܒ ܒܪܹ̈ܫܵܢܲܝܗܘܿܢ ܠܘܼܩܒܲܠ ܡܲܠܟܿܐ ܀ 57 :ܐܸܣܛܲܦܵܢܘܿܣ ܡܠܹܐ ܗ̄ܘ̣ܵܐ ܚܲܝܠܵܐ ܐܵܦ ܛܲܝܒܿܘܼܬܵܐ 58 ܘܥܵܒܹ̇ܕܼ ܗ̄ܘ̣ܵܐ ܠܲܡ ܐܵܦ ܐܵܬܼܘܵܬܼܵܐ ܒܐܲܪܥܵܐ ܕܲܝܗܘܼܕܼ ܀ 59 :ܩܵܡ̣ܘ ܗ̄ܘ̣ܵܘ ܐ̄ܢܵܫܵܐ ܟܢܘܼܫܬܵܐ ܒܝܼܫܵܐ ܕܠܹܘܒܲܪ̈ܛܝܼܢܘܿ 60 ܘܩܹܘܪ̈ܝܼܢܵܝܹܐ ܥܲܡ ܚܲܒܼܪ̈ܲܝܗܘܿܢ ܕܢܸܒܼܥܘܿܢ ܥܲܡܹܗ ܀ 61 :ܠܵܐ ܡܸܫܟܿܚܝܼܢ ܗ̄ܘ̣ܵܘ ܣܵܢ̈ܐܹܐ ܕܩܘܼܫܬܵܐ ܐܵܦܠܵܐ ܩܲܠܝܼܠ 62 ܠܲܡܩܵܡ ܒܓܲܒܵܐ ܠܘܼܩܒܲܠ ܪܘܼܚܵܐ ܕܡܠܸܠ ܗ̄ܘ̣ܵܐ ܒܹܗ ܀ 63 :ܚܵܒܼ݂ܘܼ ܡ̣ܢ ܡܸܠܵܘ̈ܗܝ ܕܦܵܠܚܵܐ ܛܵܒܼܵܐ ܟܲܕܼ ܒܲܗܝܼܬܼܝܼܢ 64 ܘܗܵܐ ܡܸܬܼܟܲܪܙܵܐ ܚܲܝܵܒܼܘܼܬܼܗܘܿܢ ܒܟܼܠܗܘܿܢ ܕܼܵܪܹ̈ܐ ܀ 65 :ܒܓܼܘܼܡܕܼܵܢܘܼܬܼܗܘܿܢ ܫܲܕܲܪܘ ܓܼܒܼܪܹ̈ܐ ܘܐܲܠܸܦܘ ܕܢܹܐܡܪܘܼܢ 66 ܕܲܫܡܲܥ̣ܢܵܝܗܝ ܠܲܡ ܕܓܲܕܸܿܦ ܒܡܸܠܵܘ̈ܗܝ ܥܲܠ ܐܵܠܵܗܵܐ ܐܵܦ ܥܲܠ ܡܲܠܟܵܐ ܀ 67 :ܚܛܲܦܘ ܗ̄ܘ̣ܵܘ ܘܐܲܝܬܿܝܘܼܗܝ ܠܡܸܨܥܲܬܼ ܟܸܢܫܵܐ ܕܥܵܒܼܕܼܵܝ̈ ܥܵܘ̣ܠܵܐ 68 ܕܲܢܡܝܼܬܼܘܼܢܵܝܗܝ ܐܲܝܟ ܡ̇ܢ ܕܓܲܕܲܦ ܥܲܠ ܐܲܠܵܗܵܐ ܀ 69 :ܒܓܹܐܪܹ̈ܐ ܕܡܸܠܵܘ̈ܗܝ ܡܢܲܓܸܿܕܼ ܗ̄ܘ̣ܵܐ ܠܗܘܿܢ ܣܵܗܕܹܿܗ ܕܝܼܫܘܿܥ 70 ܠܲܒܼܢܲܝ̈ ܐܲܒܼܪܵܐ ܕܠܵܐ ܗܘ̤ܵܘ ܝܵܪ̈ܬܹܿܐ ܕܣܲܒܼܪܹܗ ܕܐܲܒܼܪܵܡ ܀ 71 :ܓܒܝܼܬܹܗ ܕܐܲܒܼܪܵܡ ܕܓܼܒܼ݂ܵܝܗܝ ܪܸܡܙܵܐ ܒܹܝܬܼ ܒܵܒܼܠܵܝܹ̈ܐ 72 ܐܲܡ̣ܪܵܗ̇ ܟܹܐܢܵܐ ܠܲܒܼܢܲܝ̈ ܐܲܒܼܪܵܡ ܕܢܲܒܼܗܸܬܼ ܐܸܢܘܿܢ ܀ 73 :ܓܒܼ݂ܵܐ ܠܲܡ ܪܸܡܙܵܐ ܠܲܒܼܢܵܘ̈ܗܝ ܕܐܲܒܼܪܵܡ ܡ̣ܢ ܟܠ ܥܲܡܡܹ̈ܐ 74 ܘܝܲܩܲܪ ܐܸܢܘܿܢ ܒܒܲܝܬܵܝܘܼܬܹܗ ܛ̇ܒܼ ܡ̣ܢ ܟܠܢܵܫ ܀ 75 :ܠܵܐ ܫ̣ܒܲܩ ܐ̄ܢܵܫܵܐ ܕܢܸܛܠܘܿܡ ܐܸܢܘܿܢ ܘܢܲܟܹܿܐ ܐܸܢܘܿܢ 76 ܘܲܦܪ݂ܲܩ ܐܸܢܘܿܢ ܡ̣ܢ ܡܸܨܪ̈ܵܝܹܐ ܘܡ̣ܢ ܒܵܒܼܵܠܵܝܹ̈ܐ ܀ 77 :ܩܲܫ̈ܝܲܝ ܩܕܼܵܠܵܐ ܘܲܕܼܠܵܐ ܓܙܝܼܪܝܼܢ ܒܠܸܒܵܘܵܬܼ̈ܗܘܿܢ 78 ܗ̤ܘܲܝܬܿܘܿܢ ܠܩܘܼܒܼܠܹܗ ܘܠܘܼܩܒܲܠ ܪܘܼܚܵܐ ܕܩܘܼܕܸܫܵܐ ܕܡܸܢܹܗ ܀ 79 :ܠܐܲܒܼܵܗܲܝ̈ܟܿܘܿܢ ܕܵܡܹ̇ܐ ܛܢܵܢܵܐ ܕܪܥܝܵܢܲܝܟܿܘܿܢ 80 ܕܲܪܕܲܦܘ̣ ܟܹܐܢܹ̈ܐ ܩ̣ܛܠܘ ܙܲܕܿܝܼܩܹ̈ܐ ܕܫܲܕܲܪ ܪܸܡܙܵܐ ܀ pb. 93 81 :ܒܩܵܠܹܝܢ ܡܸܠܹ̈ܐ ܡ̇ܚܹ̇ܐ ܗ̄ܘ̣ܵܐ ܠܗܘܿܢ ܐܲܝܟ ܕܲܒܼܫܲܒܼܛܵܐ 82 ܘܲܡܩܝܼܡ ܗ̄ܘ̣ܵܐ ܠܗܘܿܢ ܒܡܲܪܝܼܪܘܼܬܼܵܐ ܕܠܵܐ ܬܲܪܥܘܼܬܼܵܐ ܀ 83 :ܦܸܪܚܲܬ̤ ܡܸܪܬܼܵܐ ܕܚܸܡܬܼܵܢܘܼܬܼܵܐ ܒܠܸܒܵܘ̈ܬܼܗܘܿܢ 84 ܘܠܵܐ ܣܦܲܩܘ ܥܲܙܝܼܘ ܠܘܼܩܒܲܠ ܓܹܐܪܹ̈ܐ ܫܢܝܼܢܹ̈ܐ ܕܡܸܠܵܘ̈ܗܝ ܀ 85 :ܚܲܝܸܒܼ ܐܸܢܘܿܢ ܠܦܵܠܚܹ̈ܐ ܠܦܵܚܹ̈ܐ ܕܒܼܝܼܫܵܐ ܦܵܠܚܵܐ ܛܵܒܼܵܐ 86 ܘܐܸܬܼܡܲܪܡܲܪܘ ܗ̄ܘ̣ܵܘ ܕܲܩܢ̣ܵܘ ܓܲܒܵܐ ܕܚܲܝܵܒܼܘܼܬܼܵܐ ܀ 87 :ܒܪܘܼܓܼܙܵܐ ܐܲܚܝܼܪܘ ܟܲܕܼ ܚܵܝܒܿܝܼܢ ܗ̄ܘ̣ܵܘ ܡ̣ܢ ܟܹܐܢܘܼܬܼܵܐ 88 ܘܐܸܚܲܝܕܼܘ ܐܲܦܩܘܼܗܝ ܠܒܲܪ ܡ̣ܢ ܡܕܝܼܢ̄ܬܵܐ ܘܪܵܓܼܡ̇ܝܼܢ ܗ̄ܘ̣ܵܘ ܠܹܗ ܀ 89 :ܠܵܘ ܣܦܲܩ̣ܘ ܥܲܙܝܼܘ ܚܘܼܒܵܐ ܕܡܸܠܬܹܗ ܕܐܲܬܼܠܹܝܛ ܩܘܼܫܬܵܐ 90 ܘܲܚܙ̣ܵܘ ܦܘܼܪܣܵܐ ܕܲܢܡܝܼܬܼܘܼܢܵܝܗܝ ܡ̇ܘܬܵܐ ܕܙܲܒܼܢܵܐ ܀ 91 :ܡ̇ܘܬܵܐ ܕܙܲܒܼܢܵܐ ܡ̣ܝܼܬܼ ܢܲܨܝܼܚܵܐ ܠܵܘ ܕܲܠܥܵܠܲܡ 92 ܘܡܸܛܠ ܗܵܕܹܐ ܟܲܕܼ ܚܵ̇ܕܹܐ ܗ̄ܘ̣ܵܐ ܩܲܒܿܠܹܗ ܠܡܵܘܬܵܐ ܀ 93 :ܝ̄ܠܹܦ ܡ̣ܢ ܡ̇ܪܹܗ ܕܲܙܟܼܵܝ̣ܗܝ ܠܡܵܘܬܵܐ ܘܬܲܒܿܪܹܗ ܠܥܘܼܩܣܹܗ 94 ܘܡܸܛܠ ܗܵܕܹܐ ܡܲܗܸܠ ܗ̄ܘ̣ܵܐ ܒܹܗ ܘܠܵܐ ܕܵܚܹ̇ܠ ܗ̄ܘ̣ܵܐ ܀ 95 :ܥܲܠ ܪܓܼܘܿܡ̇ܘܗܝ ܡܸܬܼܟܲܫܲܦ ܗ̄ܘ̣ܵܐ ܠܡܵܪܵܐ ܕܲܓܼܒܼ݂ܵܝܗܝ 96 ܕܠܑܵܐ ܢܩܝܼܡ ܠܗܘܿܢ ܗܵܕܹܐ ܚܛܝܼܬܼܵܐ ܕܣܵܥ̇ܪܝܼܢ ܨܹܐܕܼܵܘܗܝ ܀ 97 :ܒܡܵܪܵܐ ܕܟܼܠܵܐ ܡܸܬܿܕܿܡܹܐ ܗ̄ܘ̣ܵܐ ܦܵܠܚܵܐ ܕܩܘܼܫܬܵܐ 98 ܕܐܲܦܝܼܣ ܠܐܲܒܼܘܼܗܝ ܥܲܠ ܙܵܩܘܿܦܵܘ̈ܗܝ ܕܢܸܫܒܿܘܿܩ ܠܗܘܿܢ ܀ 99 :ܣܕ݂ܲܪܘ ܓܘܼܕܲܝ̈ܗܘܿܢ ܦܵܠܚܹ̈ܐ ܕܥܵܘ̣ܠܵܐ ܐܲܝܟ ܕܒܲܩܪܵܒܼܵܐ 100 ܘܲܚܠܵܦ ܙܲܝܢܵܐ ܘܲܝܸܢܘ ܢܲܦܸܫܗܘܿܢ ܒܟܹܐܦܹ̈ܐ ܘܫܘܿܥܹ̈ܐ ܀ 101 :ܠܵܐ ܐܸܬܼܪܲܦܝܼ ܥܲܒܼܕܵܐ ܚܝܼܨܵܐ ܡ̣ܢ ܒܝܼܫܘܼܬܼܗܘܿܢ 102 ܘܠܵܐ ܐܲܫܦܸܠ ܗ̄ܘ̣ܵܐ ܡ̣ܢ ܬܲܟܼܬܿܘܼܫܵܐ ܕܠܘܼܩܒܲܠ ܥܵܘܼܠܵܐ ܀ 103 :ܡܲܠܟܵܐ ܕܲܓܼܒܼܵܝܗܝ ܡܠܲܒܸܿܒܼ ܗ̄ܘ̣ܵܐ ܠܹܗ ܕܠܵܐ ܢܸܬܼܪܲܦܸܐ 104 ܘܲܦܬ݂ܲܚ ܩܘܼܕܼܡ̇ܘܗܝ ܘܹܐܠܵܐ ܕܪܵܘܡ̇ܐ ܕܬܘܼܒܼ ܢܸܬܼܠܲܒܲܒܼ ܀ 105 :ܒܝܲܕܼ ܓܸܠܝܵܢܵܐ ܚܙ̣ܵܐ ܠܲܫܡܲܝܵܐ ܕܲܦܬܼܝܼܚܝܼܢ ܗ̄ܘ̣ܵܘ 106 ܘܲܚܙ̣ܵܐ ܠܝܼܫܘܼܥ ܩܵܐܹ̇ܡ ܗ̄ܘ̣ܵܐ ܡ̣ܢ ܝܲܡܝܼܢܵܐ ܀ 107 :ܟܲܕܼ ܩܵܐܹ̇ܡ ܗ̄ܘ̣ܵܐ ܚܙ̣ܵܝܗܝ ܠܲܡܫܝܼܚܵܐ ܣܵܗܕܵܐ ܒܚܝܼܪܵܐ 108 ܟܲܕܼ ܩܵܐܹ̇ܡ ܗ̄ܘ̣ܵܘ ܐܲܝܟ ܡ̇ܢ ܕܒܼܵܥܹ̇ܐ ܕܢܸܚܘܿܬܼ ܨܹܐܕܼܵܘܗܝ ܀ 109 :ܒܗܵܕܹܐ ܕܡܘܼܬܼܵܐ ܡܚܵܘܹܐ ܗ̄ܘ̣ܵܐ ܠܹܗ ܡܫܝܼܚܵܐ ܢܲܦܫܹܗ 110 ܐܲܝܟ ܡ̇ܢ ܕܒܼܥܹ̇ܐ ܕܢܹܐܬܸܐ ܢܦܲܨܹܝܘܗܝ ܡ̣ܢ ܐܝܼܕܼܵܝ̈ܗܘܿܢ ܀ 111 :ܚܘܼܒܹܿܗ ܕܝܼܫܘܿܥ ܕܠܵܐ ܡܸܬܼܡܲܠܲܠ ܚܙ̣ܵܐ ܐܲܬܼܠܹܝܛܵܐ 112 ܕܠܵܘ ܟܲܕܼ ܝܵܬܹܿܒܼ ܚܵܘܝܼ ܢܲܦܫܹܗ ܐܸܠܵܐ ܕܩܵܐܹ̇ܡ ܀ 113 :ܗܵܢܵܘ̇ ܛܲܟܼܣܵܐ ܕܐܲܝܠܹܝܢ ܕܨܵ̇ܦܝܼܢ ܕܚܲܒܿܝܼܒܲܝ̈ܗܘܿܢ 114 ܕܠܵܐ ܡܸܬܿܛܦܝܼܣܝܼܢ ܕܢܲܗܡܘܿܢ ܡܸܢܗܘܿܢ ܟܲܕܼ ܡܸܬܿܛܲܠܡܝܼܢ ܀ 115 :ܪܵܚܡܹܗ ܕܡܲܠܟܵܐ ܡܸܬܼܢܲܓܲܕ ܗ̄ܘ̣ܵܐ ܡ̣ܢ ܡܲܪ̈ܲܚܹܐ 116 ܘܲܚܙ̣ܵܐ ܡܲܠܟܵܐ ܪܵܚܡܹܗ ܕܲܒܼܠܲܥ̣ ܘܚܵܘܝܼ ܢܲܦܫܹܗ ܀ pb. 94 117 :ܢܲܦܫܹܗ ܚܵܘܝܼ ܒܝܲܕܼ ܓܸܠܝܵܢܵܐ ܠܪܵܚܡܵܐ ܕܚܘܼܒܹܿܗ 118 ܘܲܢܗܲܪ ܐܲܦܵܘ̈ܗܝ ܐܲܝܟ ܦܲܪܨܘܿܦܵܐ ܡܲܠܲܐܟ ܢܘܼܗܪܵܐ ܀ 119 :ܢܘܼܗܪܵܐ ܕܫܘܼܒܼܚܹܗ ܚܙ̣ܵܐ ܐܲܬܼܠܹܝܛܵܐ ܒܓܼܵܘ ܐܲܓܼܘܿܢܵܐ 120 ܘܲܢ̣ܗܲܪ ܥܲܝܢܵܘ̈ܗܝ ܠܡܸܬܼܒܲܩܵܝܘܼ ܒܡܲܠܟܿܘܼܬܼ ܪܵܘܡ̇ܐ ܀ 121 :ܒܡܲܠܟܿܘܼܬܼ ܪܵܘܡ̇ܐ ܡܸܬܼܒܲܩܸܐ ܗ̄ܘ̣ܵܐ ܪܵܚܡܹܗ ܕܝܼܫܘܿܥ 122 ܘܡܸܛܠ ܗܵܕܹܐ ܫܵܛ̣ ܗ̄ܘ̣ܵܐ ܘܒܲܣܲܪ ܥܲܠ ܟܠ ܚܲܫܝܼ̈ܢ ܀ 123 :ܐܸܙܕܼܠܲܚ ܢܘܼܗܪܵܐ ܕܙܝܼܘܹܗ ܕܝܼܫܘܿܥ ܥܲܠ ܦܲܪܨܘܿܦܹܗ 124 ܘܐܸܬܼܚܲܠܲܛ ܗ̄ܘ̣ܵܐ ܢܘܗܪܵܐ ܕܢܲܦܫܹܗ ܒܙܝܼܘܵܐ ܕܐܲܦܘ̈ܗܝ ܀ 125 :ܢܘܼܗܪܵܐ ܕܐܲܦܵܘ̈ܗܝ ܚܠܝܼܛ ܗ̄ܘ̣ܵܐ ܒܙܝܼܘܵܐ ܕܢܘܼܗܪܹܗ ܕܝܼܫܘܿܥ 126 ܘܚܲܕܼ ܗ̄ܘ̣ܵܐ ܢܘܼܗܪܵܐ ܕܫܘܼܒܹܚܗ ܕܡ̇ܪܲܢ ܘܲܕܗܵܘ̇ ܕܝܼܠܹܗ ܀ 127 :ܡܫܝܼܚܵܐ ܒܪܵܘܡ̇ܐ ܘܐܸܣܛܲܦܵܢܘܿܣ ܒܹܝܬܼ ܐܲܪ̈ܥܵܢܹܐ 128 ܘܚܲܕܼ ܗ̄ܘ̣ܵܐ ܫܘܼܒܼܚܵܐ ܕܡ̇ܪܹܗ ܒܪܵܘܡ̇ܐ ܘܕܝܼܠܹܗ ܕܲܠܬܿܚܬܿ ܀ 129 :ܠܵܘ ܐܲܝܟ ܡܵܪܹܗ ܗܘ̤ܵܐ ܒܬܸܫܒܿܘܿܚܬܵܐ ܕܠܵܐ ܡܸܬܼܡܲܠܠܵܐ 130 ܡܢܵܬܼܵܐ ܝܲܗ̣̄ܒܼ ܠܹܗ ܡܸܢܹܗ ܕܫܘܼܒܚܹܗ ܘܲܗܘ̤ܵܐ ܒܫܘܼܒܼܚܵܐ ܀ 131 :ܫܘܼܒܼܚܵܐ ܡܲܠܒܸܿܫ ܡܲܠܟܵܐ ܕܪܵܘܡ̇ܐ ܒܪܵܘܡ̇ܐ ܠܥܲܒܼܕܵܘ̈ܗܝ 132 ܘܠܸܐܣܛܲܦܵܢܘܿܣ ܐܲܠܒܿܫܹܗ ܫܘܼܒܼܚܵܐ ܟܲܕܼ ܥܲܠ ܐܲܪܥܵܐ ܗ̄ܘ̣ ܀ 133 :ܟܲܕܼ ܥܲܠ ܐܲܪܥܵܐ ܗ̄ܘ̣ ܝܲܗ̣̄ܒܼ ܠܹܗ ܫܘܼܒܼܚܵܐ ܕܠܵܐ ܡ̇ܝܘܿܬܹ̈ܐ 134 ܕܢܫܲܪܲܪ ܗܵܝ̇ ܕܲܥܬܼܝܼܕܼܵܐ ܠܲܡ ܕܬܸܗܘܸܐ ܠܚܲܪܬܼܵܐ ܀ 135 :ܡܵܐ ܕܡܸܬܼܚܲܠܲܦ ܦܲܓܼܪܵܢ ܫܝܼܛܵܐ ܐܵܡܲ݁ܪ ܦܵܘܠܘܿܣ 136 ܥܬܼܝܼܕܼ ܗ̄ܘ̣ܵܐ ܕܢܸܥܒܿܕܼܝܼܘܗܝ ܐܲܝܟ ܬܸܫܒܿܘܿܚܬܐ ܕܦܲܓܼܪܵܐ ܕܫܘܼܒܼܚܹܗ ܀ 137 :ܒܗܵܢܵܐ ܛܲܟܼܣܵܐ ܥܒ݂ܲܕܼ ܐܵܦ ܗܵܫܵܐ ܠܐܸܣܛܲܦܵܢܘܿܣ 138 ܟܲܕܼ ܥܲܠ ܐܲܪܥܵܐ ܗ̄ܘ̣ ܝܲܩܲܪ ܐܲܦܵܘ̈ܗܝ ܒܙܝܼܘܵܐ ܕܝܼܠܹܗ ܀ 139 :ܐܹܝܘ ܬܸܕܡܘܼܪܬܵܐ ܒܐܸܣܛܲܦܵܢܘܿܣ ܡܸܬܼܚܵܘܝܵܐ ܗ̄ܘ̣ܵܬܼ 140 ܕܡ̇ܘܬܵܐ ܢܵܗܹ̇ܡ ܘܗ̤ܘ ܡܲܗܸܠ ܗ̄ܘ̣ܵܐ ܒܲܒܼ̈ܢܵܬܼ ܩܵܠܵܘ̈ܗܝ ܀ 141 :ܡܲܢ̣ܘܼ ܡܸܡܬܼܘܿܡ ܚܙ̣ܵܐ ܡ̇ܝܘܿܬܼܵܐ ܕܪ̈ܵܘܙܵܢ ܐܲܦܵܘ̈ܗܝ 142 ܐܲܝܟ ܡ̇ܐ ܕܲܪܘܲܙ ܐܸܣܛܲܦܢܘܿܣ ܟܲܕܼ ܡܵܐܹ̇ܬܼ ܗ̄ܘ̣ܵܐ ܀ 143 :ܡܲܢ̣ܘܿ ܦܵܠܚܵܐ ܕܢܗ݂ܲܪ ܬܲܦܵܘ̈ܗܝ ܒܥܸܕܵܢ ܩܹܐܪܣܵܐ 144 ܐܸܠܵܐ ܐܸܢ ܗܵܢ ܦܵܠܵܚܵܐ ܕܩܘܼܫܬܵܐ ܕܲܫ̣ܘܵܐ ܠܗܵܕܹܐ ܀ 145 :ܡܵܢ̣ܘܼ ܕܲܚܙ̣ܵܐ ܕܪ̈ܥܹܐ ܕܲܬܠܹܝܢ ܘܟܹܐܦܹ̈ܐ ܥܲܡܗܘܿܢ 146 ܘܲܢܗ̣ܲܪ ܐܲܦܵܘ̈ܗܝ ܘܐܲܬܼܗܲܪ ܐܸܢܘܿܢ ܠܲܡܡܝܼܬܼܵܢܵܘ̈ܗܝ ܀ 147 :ܟܠܗܘܿܢ ܚܵܪ̣ܘ ܒܹܗ ܐܲܝܟ ܡ̇ܐ ܕܲܟܼܬܼܝܼܒܼ ܟܢܘܼܫܬܵܐ ܟܠܵܗ̇ 148 ܘܡܸܬܿܕܲܡܪܝܼܢ ܗ̄ܘ̣ܵܘ ܒܚܸܙܘܵܐ ܕܐܲܦܵܘ̈ܗܝ ܕܡܵܢܲܐ ܗ̄ܝܼ ܗܵܕܹܐ ܀ pb. 95 149 :ܠܘܼܩܒܲܠ ܐܲܦܵܘ̈ܗܝ ܐܸܬܼܡܲܪܡܲܪܘ ܗ̄ܘ̣ܵܘ ܦܵܠܚܹ̈ܐ ܕܥܵܘ̣ܠܵܐ 150 ܘܐܲܚܸܬܼܘ ܥܠܵܘܗܝ ܡܸܛܪܵܐ ܕܟܹܐܦܹ̈ܐ ܐܲܝܟ ܕܥܲܠ ܗܵܒܹܝܠ ܀ 151 :ܚܣܵܡܵܐ ܪܲܓܼܡܹܗ ܒܟܹܐܦܹ̈ܐ ܕܚܸܡܬܼܵܐ ܐܲܝܟ ܕܲܠܗܵܒܹܝܠ 152 ܘܛܵܒܼ ܡ̣ܢ ܕܗܵܒܹܝܠ ܓܥ̣ܵܐ ܗ̄ܘ̣ܵܐ ܒܩܘܼܫܬܵܐ ܕܡܹܗ ܕܐܲܬܼܠܹܝܛܵܐ ܀ 153 :ܚܣܵܡܵܐ ܕܐܲܚܘܼܗܝ ܪܲܓܼܡܹܗ ܠܗܵܒܹܝܠ ܥܵܘ̇ܠܵܐܝܼܬܼ 154 ܘܠܸܐܣܛܲܦܵܢܘܿܣ ܐܲܚܵܘ̈ܗܝ ܪܲܓܼܡܘܼܗܝ ܥܵܘ̇ܠܵܐܝܼܬܼ ܀ 155 :ܩ̣ܛܲܪܘ ܥܲܪܦܸܠܵܐ ܕܟܹܐܦܹ̈ܐ ܕܪܘܼܓܼܙܵܐ ܥܲܠ ܢܲܨܝܼܚܵܐ 156 ܘܛܲܡ̣ܪܘܼܗܝ ܒܓܼܵܘܗܹܝܢ ܐܲܝܟ ܕܲܠܗܵܒܹܝܠ ܕܩܲܛ̣ܠܹܗ ܩܵܐܹܝܢ ܀ 157 :ܩܲܛܠܹ݂ܗ ܩܵܐܹܝܢ ܠܗܵܒܹܝܠ ܐܲܚܘܼܗܝ ܘܛܲܡ̣ܪܹܗ ܒܟܹܐܦܹ̈ܐ 158 ܘܐܲܩܝܼܡ ܥܠܵܘܗܝ ܝܲܓܼܪܵܐ ܕܟܹܐܦܹ̈ܐ ܕܠܵܐ ܢܸܬܼܝܼܕܲܥ ܀ 159 ܒܗܵܕܹܐ ܕܡܘܼܬܼܵܐ ܣܥ̣ܲܪܘ ܐܵܦ ܗܸܢ̣ܘܿܢ ܥܲܠ ܬܲܡܝܼܡܵܐ ܀ 160 ܘܒܲܕܼܡܘܼܬܼ ܩܵܐܹܝܢ ܡܣܲܟܹܿܝܢ ܡܸܟܹܿܠ ܠܦܘܼܪܥܵܢ ܐܲܓܼܪܵܐ ܀ 161 :ܐܹܝܘ ܠܟܲܫܝܼܪܵܐ ܕܠܵܐ ܐܸܬܼܥܲܦܚܼ ܝܲܩܝܼܪܵܐܝܼܬܼ 162 ܕܐܸܬܼܒܲܣܒܲܣ ܗ̄ܘ̣ܵܐ ܓܘܼܫܡܹܗ ܙܲܗܝܵܐ ܒܝܲܓܼܪܵܐ ܕܟܹܐܦܹ̈ܐ ܀ 163 :ܐܹܝܘ ܠܵܟ ܪܹܫܵܐ ܕܐܸܬܼܩܲܕܲܫ ܗ̄ܘ̣ܵܐ ܒܲܣܝܵܡ ܐܝܼܕܵܐ 164 ܕܲܟܼܠܝܼܠ ܟܹܐܦܹ̈ܐ ܛܥܝܼܢ ܗ̄ܘ̣ܵܐ ܒܥܵܘܼܠܵܐ ܥܵܘ̇ܠܵܐܝܼܬܼ ܀ 165 :ܒܲܣܝܵܡ ܐܝܼܕܼܵܐ ܕܲܫܠܝܼܚܘܼܬܼܵܐ ܐܸܬܼܩܲܕܲܫ ܗ̄ܘ̣ܵܐ 166 ܘܲܒܼܢܲܝ̈ ܥܵܘ̣ܠܵܐ ܡ̣ܠܐܘܼܗܝ ܟܹܐܦܹ̈ܐ ܒܡܲܪܵܚܘܼܬܼܗܘܿܢ ܀ 167 :ܪܲܚܸܦ ܪܘܼܚܵܐ ܘܩܲܕܿܫܹܗ ܒܚܲܝܠܵܐ ܕܡܓܿܢܵܢܘܼܬܹܗ 168 ܘܲܒܼܢܲܝ̈ ܥܵܘܼܠܵܐ ܙܠܲܚ̣ܗ ܠܲܩܢܘܿܡܹܗ ܒܲܕܼܡ̇ܐ ܕܢܲܦܫܹܗ ܀ 169 :ܓܘܼܕܵܐ ܒܪܝܼܟܼܬܵܐ ܕܲܫܠܝܼܚܘܼܬܼܵܐ ܣܵܡ݂ܲܬ̤ ܐܝܼ̈ܕܹܝܗ̇ 170 ܘܦܸܝ̣ܪܲܫܲܬ̤ ܕܢܸܗܘܸܠܐ ܡܩܲܕܲܫ ܐ̄ܪ̈ܵܙܹܐ ܕܩܲܕܿܝܼܫܘܼܬܵܐ ܀ 171 :ܡܫܲܡܫܵܢܵܐ ܗ̄ܘ̣ܵܐ ܕܐ̄ܪܵܙܹܐ ܕܚܝܼܠܹ̈ܐ ܘܐܲܠܵܗܵܝܹ̈ܐ 172 ܘܲܒܼܬܸܫܡܸܫܬܹܿܗ ܨܵܪ ܗ̄ܘ̣ܵܐ ܛܘܼܦܸܣܵܐ ܕܡܲܠܲܐܟܼܘܼܬܼܵܐ ܀ 173 :ܗܵܢܵܐ ܛܘܼܦܣܵܐ ܩܢܹܝܢ ܫܲܡܵܫܹ̈ܐ ܒܥܹܕܲܬܼ ܩܘܼܕܼܫܵܐ 174 ܟܲܕ ܡܸܬܿܕܲܡܹܝܢ ܒܝܲܕܼ ܬܸܫܡܸܫܬܿܗܘܿܢ ܠܚܲܝܠܲܝ̈ ܪܵܘܡ̇ܐ ܀ 175 :ܠܗܵܢܵܐ ܕܲܪܓܼܵܘ ܩܢܹܐ ܐܲܬܼܠܹܝܛܵܐ ܒܚܲܝܹ̈ܐ ܕܲܬܼܢܵܢ 176 ܕܲܪܓܼܵܐ ܘܚܸܙܘܵܐ ܕܢܸܗܘܸܐ ܒܩܘܼܫܬܵܐ ܥܝܼܪܵܐ ܕܒܸܣܪܵܐ ܀ 177 :ܟܝܵܢܵܐ ܕܒܸܣܪܵܐ ܘܐܲܦܹ̈ܐ ܕܢܘܼܪܵܐ ܡܸܬܼܚܲܙ̈ܝܵܢ ܗ̣̄ܘܲܝ̈ 178 ܚܙܵܬܼܵܐ ܕܬܲܗܪܵܐ ܒܲܟܼܝܵܢ ܐ̄ܢܵܫܵܐ ܕܕܼܵܡ̇ܝܵܐ ܠܥܝܼܪܹ̈ܐ ܀ 179 :ܡܸܛܠ ܗܵܕܹܐ ܝܲܩܪܹܗ ܡ̇ܪܹܗ ܒܙܝܼܘܵܐ ܕܥܝܼܪܹ̈ܐ 180 ܕܡ̇ܐ ܕܡܸܬܼܢܲܚܲܡ ܢܸܗܘܸܐ ܒܫܘܼܒܼܚܵܐ ܕܕܼܵܡܹ̇ܐ ܠܕܼܝܼܠܗܘܿܢ ܀ 181 :ܠܦܲܓܼܪܹܗ ܕܡ̇ܪܲܢ ܕܵܡܹ̇ܐ ܦܲܓܼܪܵܐ ܕܲܒܼܢܲܝ̈ ܢܘܼܗܪܵܐ 182 ܒܗܵܘ̇ ܕܘܼܒܪܵܐ ܕܡܸܬܼܥܲܠܝܵܐ ܒܹܗ ܡ̇ܝܘܿܬܼܘܼܬܼܵܐ ܀ pb. 96 183 :ܠܵܘ ܐܸܣܬܲܪܲܕܼܘ ܦܵܠ̇ܚܲܝ̈ ܥܵܘܼܠܵܐ ܒܢܘܼܗܪܵܐ ܕܐܲܦܵܘ̈ܗܝ 184 ܘܡܲܪܵܚܵܐܝܼܬܼ ܒܓܼܘܼܡܕܲܢܘܼܬܼܗܘܿܢ ܪܲܓܼܡ̣ܘܼܗܝ ܠܟܹܐܢܵܐ ܀ 185 :ܥܲܒܼܕܹ̈ܿܐ ܒܝܼܫܹ̈ܐ ܕܲܗܘ̤ܵܘ ܒܟܲܪܡܵܐ ܕܲܗܘ̤ܵܐ ܒܚܲܒܿܝܼܒܼܝ 186 ܚܙ̣ܵܘ ܠܲܫܒܸܫܬܵܐ ܕܝܹܥܵܬ̤ ܒܣܲܬܵܐ ܘܟܲܣܚ̣ܘܼܗ̇ ܒܪܘܼܓܼܙܵܐ ܀ 187 ܚ݂ܙܵܘ ܡܲܪ̈ܲܚܹܐ ܫܒܸܫܬܵܐ ܕܝܵܗ̇ܒܵܐ ܦܹܐܪܹ̈ܐ ܛܵܒܹ̈ܐ ܀ 188 ܘܟܲܣܚ̣ܘܼܗ̇ ܡܸܚܕܼܵܐ ܐܲܝܟ ܕܠܵܐ ܬܸܛܥܲܢ ܦܹܐܪܹ̈ܐ ܚܠܲܝܵ̈ܐ ܀ 189 :ܟܲܪܡ̇ܐ ܕܚܲܒܿܝܼܒܼܝ ܥܲܡܵܐ ܐܝܼܬܼܵܘܗܝ ܕܒܹܝܬܼ ܝܼܣܪܵܝܹܠ 190 ܘܥܲܒܼ̈ܕܹܿܐ ܒܝܼܫܹ̈ܐ ܝܵܪ̈ܬܹܿܐ ܕܒܲܙܲܚܘ ܒܡܵܪܹܐ ܡܲܪܡ̇ܐ ܀ 191 :ܡ̇ܪܹܐ ܟܲܪܡ̇ܐ ܫܲܕܲܪ ܠܒܼܪܹܗ ܕܢܲܝܬܸܿܐ ܦܹܐܪܹ̈ܐ 192 ܘܐܸܚܲܕܼܘ ܐܦܩܘܼܗܝ ܠܒܲܪ ܡ̣ܢ ܟܲܪܡ̇ܐ ܘܩܲܛܠ̣ܘܗܝ ܒܥܵܘ̣ܠܵܐ ܀ 193 :ܕܝܼܢܵܐ ܕܩܘܼܫܬܵܐ ܦܣܲܩ̣ܘ ܥܵܘܵܠܹ̈ܐ ܟܲܕܼ ܐܸܫܬܲܐܲܠܘ 194 ܕܡܵܢܵܐ ܢܸܥܒܸܿܕ ܡ̇ܪܹܐ ܟܲܪܡ̇ܐ ܠܥܲܒܼ̈ܕܹܿܐ ܗܵܢܵܘܿܢ ܀ 195 :ܒܝܼܫ ܒܝܼܫ ܐܸܡ݂ܲܪܘ ܕܢܵܘܒܸܿܕܼ ܐܸܢܘܿܢ ܠܥܒܼ̈ܕܹܿܐ ܗܵܢ̇ܘܿܢ 196 ܕܲܡ̣ܚܵܘ ܠܥܲܒܼܕܵܘ̈ܗܝ ܘܨܲܥܲܪܘ ܠܦܵܠܚܵܘ̈ܗܝ ܘܩܲܛܸܠܘ ܠܲܒܼܪܹܗ ܀ 197 :ܘܐܵܦ ܒܵܪܘܿܝܵܐ ܕܲܚܙ̣ܵܝܗܝ ܠܟܲܪܡ̇ܐ ܕܠܵܐ ܝܲܗ̣̄ܒܼ ܦܹܐܪܹ̈ܐ 198 ܬܪܲܥ ܠܲܣܝܵܓܹܗ ܘܲܥܩ݂ܲܪ ܡܲܓܼܕܿܠܹܗ ܘܲܟܼܠܵܐ ܫܩܝܹܗ ܀ 199 :ܟܠ̣ܵܐ ܢܒܼܝܼܘܼܬܵܐ ܕܐܸܫܬܼܝ̣ܘ ܡܸܢܹܗ ܫܸܩܝܵܐ ܕܪܘܼܚܵܐ 200 ܘܠܲܙܗܝܼܪܘܼܬܵܐ ܕܲܒܼܛܝܼܠܘܼܬܹܗ ܕܚ̇ܵܕܼܪܵܐ ܗ̄ܘ̣ܵܬܼ ܠܹܗ ܀ 201 :ܥܲܩ̣ܪܹܗ ܠܡܲܓܼܕܿܠܵܐ ܗܲܝܟܲܠ ܩܘܼܕܫܵܐ ܕܲܒܼܢ̣ܵܐ ܒܓܼܵܘܹܗ 202 ܕܒܹܗ ܥܵܨ̇ܪܝܼܢ ܗ̄ܘ̣ܵܘ ܕܸܒܼܚܹ̈ܐ ܚܲܪ̈ܫܹܐ ܕܲܒܼܢܵܡܘܿܣܵܐ ܀ 203 :ܠܲܚܕܼܵܐ ܓܦܸܬܵܐ ܢ̣ܣܲܒܼ ܡ̣ܢ ܓܸܢܣܹܗ ܕܗܵܢܵܐ ܟܲܪܡܵܐ 204 ܘܫܲܒܼܩܹ݂ܗ ܠܟܼܠܹܗ ܕܢܼܗܘܸܐ ܛܵܥܹܿܢ ܝܲܥܪܵܐ ܘܟܼܘܼ̈ܒܹܿܐ ܀ 205 :ܓܦܸܬܵܐ ܕܚܲܝܹ̈ܐ ܢܣ݂ܲܒܼ ܒܵܪܘܿܝܵܐ ܡ̣ܢ ܗܵܢ ܟܲܪܡ̇ܐ 206 ܕܟܼܠ ܡܲܢ ܕܨܵܒܹ̇ܐ ܕܢܲܛܥܸܡ ܢܦܸܫܹܗ ܒܚܲܝܹ̈ܐ ܕܡܸܢܵܗ̇ ܀ 207 :ܓܦܸܬܵܐ ܕܚܲܝܹ̈ܐ ܗܘ̤ܵܐ ܒܲܒܼܪܝܼܬܼܵܐ ܪܹܫܝܼܬܼ ܓܸܢܣܲܢ 208 ܕܲܒܼܚܲܠܝܘܼܬܸܿܐ ܕܚܲܡܪܵܐ ܕܚܘܼܒܹܿܗ ܢܲܪܘܸܐ ܒܥܲܒܼܕܵܘ̈ܗܝ ܀ 209 ܐ̄ܢܵܐ ܐ̄ܢܵܐ ܓܦܸܬܵܐ ܕܩܘܼܫܬܵܐ ܐܸܡ݂ܲܪ ܘܐܲܢ̄ܬܿܘܿܢ ܫܒܸܫ̈ܬܹܿܐ: pb. 97 210 ܘܣܵܡ̣ܬܿܟܼܘܿܢ ܒܥܵܠܡܵܐ ܕܬܹܐܙܠ̄ܘܼܢ ܬܲܝܬܿܘܿܢ ܦܹܐܪܹ̈ܐ ܕܫܘܼܒܼܚܵܐ ܀ 211 :ܐܲܒܼܵܐ ܐܝܼܬܼܵܘܗܝ ܠܲܡ ܦܲܠܵܚܹܗ ܕܗܵܢܵܐ ܟܲܪܡ̇ܐ 212 ܘܟܼܠ ܠܲܡ ܫܒܸܫܬܵܐ ܕܠܵܐ ܫܟܼܝܼܚܝܼܢ ܒܵܗ̇ ܦܹܐܪܹ̈ܐ ܢܣܒ݂ܵܗ̇ ܀ 213 :ܚܙ̣ܵܘ ܠܵܐ ܬܲܗܡܘܿܢ ܡ̣ܢ ܕܲܠܡܸܥܒܲܕܼ ܦܹܐܪܹ̈ܐ ܛܵܒܹ̈ܐ 214 ܕܲܠܡܵܐ ܬܹܐܩܕܿܘܼܢ ܒܲܕܼܡܘܼܬܼ ܫܒܸܫ̈ܬܹܿܐ ܕܝܵܩ̈ܕܵܢ ܒܢܘܼܪܵܐ ܀ 215 :ܫܒܸܫܬܵܐ ܕܝܵܒܼ̇ܫܵܐ ܡܸܚܕܼܵܐ ܠܵܩ̇ܛܝܼܢ ܡܪܡܹܝܢ ܒܢܘܼܪܵܐ 216 ܗܵܟܲܢ ܘܲܠܟܼܘܿܢ ܐܸܢ ܠܵܐ ܬܩܵܘܘܿܢ ܒܚܘܼܒܵܐ ܕܲܠܘܵܬܼܝ ܀ 217 :ܐ̄ܢܵܐ ܐ̄ܢܵܐ ܓܦܸܬܵܐ ܘܐܲܢ̄ܬܿܘܿܢ ܫܒܸܫ̈ܬܹܿܐ ܘܐܵܒܼܝ ܦܲܠܵܚܵܐ 218 ܐܲܝܬܵܘ ܦܹܐܪܹ̈ܐ ܘܗܲܒܼܘ ܬܸܘܕܿܝܼܬܼܵܐ ܕܠܵܐ ܬܸܬܼܦܣܩܘܼܢ ܀ 219 :ܗܸܠܹܝܢ ܐܸܡ݂ܲܪ ܡܵܪܵܐ ܛܵܒܼܵܐ ܠܥܲܒܼ̈ܕܹܿܐ ܕܼܓܼܒܼ݂ܵܐ 220 ܘܙܲܗܼܪ ܐܸܢܘܿܢ ܕܠܵܐ ܢܸܬܼܪܲܚܩܘܼܢ ܡ̣ܢܨܹܝܕ ܚܘܼܒܹܿܗ ܀ 221 :ܒܹܗ ܐܵܦ ܗܸܢ̣ܘܿܢ ܢܲܨܲܒܿܘܼܗܝ ܠܚܝܼܒܿܗܘܿܢ ܫܲܪܝܼܪܵܐܝܼܬܼ 222 ܒܲܕܼܡܘܼܬܼ ܫܒܸܫܬܵܐ ܕܒܼܵܗ̇ ܒܲܓܼܦܸܬܵܐ ܣܝ̣ܡ ܥܸܩܵܪܵܗ̇ ܀ 223 :ܡ̣ܢ ܚܲܝܘܼܬܼܵܗ̇ ܪܕܲܬ̤ ܚܲܝܘܼܬܼܵܐ ܠܲܢܨܝܼܒܼܘܼܬܼܗܘܿܢ 224 ܘܡܸܢܗܘܿܢ ܕܡܲܝܵ̈ܐ ܕܩܲܕܿܝܼܫܘܼܬܼܵܗ̇ ܐܸܫܬܼܝܼܘ ܗܸܢ̣ܘܿܢ ܀ 225 :ܣܠܸܩ̣ ܩܵܘ̈ܡܵܬܼܗܘܿܢ ܠܥܸܠ ܡ̣ܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ 226 ܘܣܲܬܿܪܘ ܐܸܢܘܿܢ ܡ̣ܢ ܟܘܼܪܗܵܢܵܐ ܕܡ̇ܝܘܿܬܼܘܼܬܼܵܐ ܀ 227 :ܢܩܲܫܘ̣ ܛܸܠܵܠܹ̈ܐ ܒܟܼܠ ܦܸܢ̈ܝܵܬܼܵܐ ܕܥܸܒܼܪܹ̈ܝܗ̇ ܕܐܲܪܥܵܐ 228 ܘܲܚܣܲܟܼܘ ܐܸܢܘܿܢ ܡ̣ܢ ܫܘܼܠܗܵܒܼܵܐ ܕܚܲܛܵܝܘܼܬܼܵܐ ܀ 229 :ܒܲܥܲܪܘ ܟܠܗܘܿܢ ܣܓܼܘܼܠܹ̈ܐ ܚܠܲܝ̈ܵܐ ܕܕܼܘܼܒܵܪܲܝܗܘܿܢ 230 ܘܐܸܟܲܠ̣ ܟܠܢܵܫ ܘܚܸܠܝܲܬ̤ ܚܸܟܹܿܗ ܕܡܲܪܝܼܪܵܐ ܗ̄ܘ̣ܵܬܼ ܀ 231 :ܡܲܪܝܼܪܵܐ ܗ̄ܘ̣ܵܬܼ ܚܸܟܵܐ ܕܟܼܠܢܵܫ ܡ̣ܢ ܣܲܡ ܡ̇ܘܬܵܐ 232 ܘܚܲܠܝܘܼܗ̇ ܗܸܢܘܿܢ ܒܣܲܒܼܪܵܐ ܛܵܒܼܵܐ ܕܚܵܝܵܬܼ ܡܝܼ̈ܬܹܐ ܀ 233 :ܚܵܝܵܬܼ ܡܝܼ̈ܬܹܐ ܐܲܦܸܠ ܐܸܢܘܿܢ ܕܢܹܐܡܪܘܼܢ ܒܐܲܪܥܵܐ 234 ܕܩܵܐܹ̇ܡ ܟܠܢܵܫ ܡ̣ܢ ܒܹܝܬܼ ܡܝܼܬܹ̈ܐ ܐܲܟܼܡܵܐ ܕܗܘ̤ ܩ̣ܵܡ ܀ 235 :ܒܗܵܕܹܐ ܓܦܸܬܵܐ ܒܲܕܼܡܘܼܬܼ ܚܲܒܼܪ̈ܵܘܗܝ ܢܨܝܼܒܼ ܗ̄ܘ̣ܵܐ ܓܲܒܼܝܵܐ 236 ܘܦܵܠܚܲܝ̈ ܥܵܘ̣ܠܵܐ ܦܲܣܩ̣ܘܼܗܝ ܒܡܲܓܿܠܵܐ ܕܡܲܪܵܚܘܼܬܼܗܘܿܢ ܀ 237 :ܒܗܵܕܹܐ ܓܦܸܬܵܐ ܐܲܛܥܸܡ ܐܲܛܥܹܡ ܢܲܦܫܹܗ ܒܚܘܼܒܵܐ ܪܲܒܵܐ 238 ܘܒܲܟܲܪ ܦܹܐܪܹ̈ܐ ܘܲܛܥ݂ܲܢ ܛܲܪ̈ܦܹܐ ܠܚܘܼܠܡܵܢ ܐ̄ܢܵܫܵܐ ܀ 239 :ܒܲܕܼܡܘܼܬܼ ܐܘܼܟܼܠܵܐ ܐܵܘܟܸܿܠ ܐܸܢܘܿܢ ܡܲܠܦܵܢ̈ܘܵܬܼܵܐ 240 ܘܐܲܚܠܸܡ ܐܸܢܘܿܢ ܒܚܲܝܠܵܐ ܕܪܘܼܚܵܐ ܡ̣ܢ ܟܹܐܒܲܝ̈ܗܘܿܢ ܀ 241 :ܪܕܼܵܐ ܠܹܗ ܦܹܐܪܹ̈ܐ ܒܲܕܼܡܘܼܬܼ ܚܲܒܼܪ̈ܘܗܝ ܫܸܩܝܵܐ ܕܚܲܝܹ̈ܐ 242 ܘܲܪܘܲܙܘ ܛܲܪ̈ܦܵܘܗܝ ܒܬܲܗܪܵܐ ܪܒܵܐ ܕܠܵܐ ܡܸܬܼܡܲܠܲܠ ܀ pb. 98 243 :ܣܓܼܘܼܠܵܐ ܕܢܲܦܫܹܗ ܡܠܹܐ ܗ̄ܘ̣ܵܐ ܚܲܡܪܵܐ ܕܚܘܼܒܹܿܗ ܕܝܼܫܘܿܥ 244 ܘܣܵܢ̈ܐܹܐ ܕܡܲܓܵܢ ܚܙ̣ܵܐܘܼܗܝ ܠܫܘܼܦܪܹܗ ܘܐܸܬܼܡܲܪܡܲܪܘ ܗ̄ܘ̣ܵܘ ܀ 245 :ܗܘ̤ܵܘ ܡܲܠܲܐܟܹ̈ܐ ܠܐܵܟܹ̇ܠܩܲܪܨܵܐ ܣܵܢܵܐܐ ܕܐ̄ܢܵܫܵܐ 246 ܘܲܩܛܲܪܘ ܥܵܠܘܗܝ ܥܢܵܢܵܐ ܕܪܘܼܓܼܙܵܐ ܘܒܲܪܕܼܵܐ ܕܟܹܐܦܹ̈ܐ ܀ 247 :ܒܒܲܪܕܼܵܐ ܕܟܹܐܦܹ̈ܐ ܚܵܒܼ̇ܛܼܝܼܢ ܗ̄ܘ̣ܵܐ ܠܹܗ ܠܦܹܐܪܵܐ ܚܲܠܝܵܐ 248 ܕܠܵܐ ܢܸܬܼܒܲܣܒܲܣ ܡ̣ܢ ܚܲܠܝܘܼܬܹܗ ܣܢܝܼܩܲܝ̈ ܠܫܸܩܝܵܐ ܀ 249 :ܒܓܼܵܘ ܡܲܥܨܲܪܬܵܐ ܕܚܵܣܘܿܡܘܼܬܼܵܐ ܣܵܡ̣ܘܗܝ ܠܟܹܐܢܵܐ 250 ܘܲܒܼܝܲܕܼ ܥܸܩܒܹ̈ܐ ܕܚܸܪܚܵܘܼܬܼܵܐ ܕܵܝ̇ܫܝܼܢ ܗ̄ܘ̣ܵܘ ܠܹܗ ܀ 251 :ܙܲܠܚܘܼܗܝ ܠܲܕܼܡܹܗ ܒܲܕܼܡܘܼܬܼ ܚܲܡܪܵܐ ܒܓܼܵܘ ܡܲܥܨܲܪܬܵܐ 252 ܘܟܲܒܿܫܘܼܗܝ ܠܦܲܓܼܪܹܗ ܠܬܲܚܬܿ ܡ̣ܢ ܟܹܐܦܹ̈ܐ ܐܲܝܟ ܣܲܡܝܼܢܹ̈ܐ ܀ 253 :ܟܲܕܼ ܛܥܝܼܢܝܼܢ ܗ̄ܘ̣ܵܘ ܟܹܐܦܹ̈ܐ ܕܪܘܼܓܼܙܵܐ ܕܫܵܕܹܝܢ ܗ̄ܘ̣ܵܘ ܒܹܗ 254 ܕܡܹܗ ܕܲܡܫܝܼܚܐ ܠܵܐ ܐܸܬܿܬܿܫܝܼܓܼ ܗ̄ܘ̣ܵܘ ܡ̣ܢ ܐܝܼܕܲܝ̈ܗܘܿܢ ܀ 255 :ܒܪܹܫ ܨܸܒܼܥܵܬܼ̈ܗܘܿܢ ܡܸܬܿܛܲܢܲܦ ܗ̄ܘ̣ܵܐ ܕܸܡ ܦܵܪܘܿܩܵܐ 256 ܟܲܕ ܒܐܝܼܕܲܝ̈ܗܘܿܢ ܟܹܐܦܹ̈ܐ ܕܥܵܘ̣ܠܵܐ ܫܵܟܹܝܢ ܗ̄ܘ̣ܵܐ ܒܹܗ ܀ 257 :ܒܲܕܼܡܘܼܬܼ ܕܐܹܒܹ̈ܐ ܣܥ̣ܵܘ ܥܲܠ ܪܵܥܝܵܐ ܘܣܲܕܹܿܩܘ ܓܘܼܫܡܹܗ 258 ܘܐܲܚܝܼܪܘ ܚܹܐܦܗܘܿܢ ܥܲܠ ܥܵܠܵܝܵܐ ܕܲܢܚܲܝܒܼܘܼܢܵܝܗܝ ܀ 259 :ܠܵܐ ܣܒ݂ܲܥܘ ܛܲܡ̈ܐܹܐ ܡ̣ܢ ܗܵܝ̇ ܕܐܸܫܲܕܼܘ ܠܲܕܼܡܹܗ ܕܡ̇ܪܵܐ 260 ܘܬܼܘܼܒܼ ܐܸܬܼܝܲܥܲܢܘ ܕܢܹܐܫܕܿܘܼܢ ܠܲܕܼܡ̇ܐ ܕܪܵܚܡܵܐ ܕܚܘܼܒܹܿܗ ܀ 261 :ܡܸܬܼܕܲܡܕܲܡܝܼܢ ܡ̣ܢ ܢܘܼܛ̈ܦܬܼܵܐ ܕܲܕܡܹܗ ܕܡ̇ܪܵܐ 262 ܟܲܕܼ ܐܵܬܹ̇ܝܢ ܗ̄ܘ̣ܵܘ ܕܲܢܚܲܝܒܘܼܢܲܝܗܝ ܠܐܸܡܪܵܐ ܪܚܝܼܡܵܐ ܀ 263 :ܒܲܕܼܡ̇ܐ ܪܘܹܝܢ ܗ̄ܘ̣ܵܘ ܕܐܹܒܹ̈ܐ ܕܪܲܡܫܵܐ ܠܒܲܪ ܡ̣ܢ ܛܲܟܼܣܵܐ 264 ܘܡܲܪܝܼܪܵܐ ܗ̄ܘ̣ܵܬܼ ܚܸܡܬܼܵܢܘܼܬܼܗܘܿܢ ܛܵܒܼ ܡ̣ܢ ܕܐܸܒܹ̈ܐ ܀ 265 :ܥܠܲܝܗܘܿܢ ܩܲܒܿܠܘܼܗܝ ܠܲܕܼܡܹܗ ܕܡ̇ܪܵܐ ܘܥܲܠ ܝܲܠܕܲܝ̈ܗܘܿܢ 266 ܘܡܲܟܲܬܿܡܝܼܢ ܒܹܗ ܥܕܲܡ̇ܐ ܠܥܵܠܲܡ ܕܠܵܐ ܫܘܼܠܵܡܵܐ ܀ 267 :ܚܲܠܛ̣ܘܼܗܝ ܒܝܼܫܹ̈ܐ ܠܲܕܼܡܹܗ ܕܥܲܒܼܕܵܐ ܒܲܕܼܡܹܗ ܕܡ̇ܪܵܐ 268 ܘܛܲܥ̣ܢܘܼܗܝ ܥܠܲܝܗܘܿܢ ܠܡܲܟܿܣܵܢܘܼܬܼܵܐ ܕܚܲܝܵܒܼܘܼܬܼܗܘܿܢ ܀ 269 :ܕܡܹܗ ܕܩܲܕܿܝܼܫܵܐ ܐܸܫܬܲܩܲܥ ܗ̄ܘ̣ܵܐ ܒܲܕܼܡܘܼܬܼ ܡ̇ܪܹܗ 270 ܕܥܲܡܹܗ ܕܡ̇ܪܹܗ ܢܸܗܘܸܐ ܒܫܘܼܒܼܚܵܐ ܒܡܲܠܟܿܘܼܬܼ ܪܵܘܡ̇ܐ ܀ pb. 99 271 :ܡ̇ܐ ܕܦܵܓܼܪ ܒܲܢ ܥ̣ܵܘܠܵܐ ܒܝܼܫܵܐ ܕܲܒܼܢܲܝ̈ ܥܵܘ̣ܠܵܐ 272 ܠܗܵܢܵܐ ܢܸܩܪܸܐ ܕܲܢܦܲܨܸܐ ܠܲܢ ܡ̣ܢ ܥܵܘܵܠܹ̈ܐ ܀ 273 :ܐܲܝܢܵܐ ܕܲܥܠܝܼܒܼ ܘܡܸܬܓܼܵܘܲܣ ܒܹܗ ܒܚܘܼܒܵܐ ܘܣܲܒܼܪܵܐ 274 ܠܵܐ ܬܘܼܒܼ ܚܵܐܹ̇ܒܼ ܡ̣ܢ ܥܵܘܵܠܹ̈ܐ ܕܡܲܥܘܠܝܼܢ ܒܹܗ ܀ 275 :ܐܲܝܢܵܐ ܕܲܪܕܼܝܼܦ ܠܐܵܟܹ̇ܠܩܲܪܨܵܐ ܣܵܢܐܵܐ ܕܐ̄ܢܵܫܵܐ 276 ܢܸܬܼܓܵܘܲܣ ܒܹܗ ܘܥܵܪܹܩ ܡܸܢܹܗ ܐܲܝܟ ܬܸܢܵܢܵܐ ܀ 277 :ܒܚܲܝܹ̈ܐ ܕܙܲܒܼܢܵܐ ܪܵܕܹܦ ܗ̄ܘ̣ܵܐ ܠܗܘܿܢ ܠܫܹܐܕܹ̈ܐ ܛܪ̈ܘܼܢܹܐ 278 ܘܗܵܫܵܐ ܒܡܵܘܬܹ̇ܗ ܝܲܬܝܼܪ ܪܵܥܠ̇ܝܼܢ ܡ̣ܢ ܚܹܝܠ ܚܲܝܠܹܿܗ ܀ 279 :ܒܚܲܝܹ̈ܐ ܕܙܲܒܼܢܵܐ ܠܵܐ ܡܸܫܟܿܚܝܼܢ ܗ̄ܘ̣ܵܘ ܕܲܢܚܘܼܪܘܼܢ ܒܹܗ 280 ܘܗܵܫܵܐ ܒܡܵܘܬܹ̇ܗ ܠܵܐ ܡܨܹܝܢ ܥܵܐ̇ܠܝܼܢ ܐܵܦܠܵܐ ܠܥܘܼܡܪܹܗ ܀ 281 :ܘܐܢܗܘ̤ ܕܥܵܐ̇ܠܝܼܢ ܒܕܸܚܠ̇ܐ ܥܵܐ̇ܠܝܼܢ ܡܲܪܵܚܵܐܝܼܬܼ 282 ܟܲܕܼ ܡܲܟܼܪܙܝܼܢ ܒܚܲܕܼ ܕܸܚܠܲܬܼܗܘܿܢ ܚܲܝܵܒܼܘܼܗܘܿܢ ܀ 283 :ܙܵܘܥܵܐ ܘܕܸܚܠܵܐ ܡܠܹܝܢ ܡ̇ܪ̈ܘܿܕܹܐ ܫܲܪܝܼܪܵܐܝܼܬܼ 284 ܡ̇ܐ ܕܚܵܙܹ̇ܝܢ ܠܹܗ ܠܥܘܿܡܪܹܗ ܕܟܹܐܢܵܐ ܐܵܦ ܡ̣ܢ ܪܘܼܚܩܵܐ ܀ 285 :ܡܕܝܼܢ̄ܬܵܐ ܩܫܝܼܬܼܵܐ ܕܠܵܐ ܡܸܬܼܚܲܣܢܵܐ ܡ̣ܢ ܕܲܠܩܘܼܒܼܠܵܐ 286 ܣܝܼܡܵܐ ܒܠܸܒܿܗܘܿܢ ܕܲܝܪܹܿܗ ܕܟܹܐܢܵܐ ܡ̇ܐ ܕܚܵܙܹ̇ܝܢ ܠܵܗ̇ ܀ 287 :ܒܪܘܼܚܩܵܐ ܩܵܝ̇ܡܝܼܢ ܥܲܠ ܪܹܫ ܛܘܼܪܹ̈ܐ ܘܡܸܬܼܒܲܩܹܝܢ ܒܵܗ̇ 288 ܡܸܛܠ ܕܠܵ ܡܨܸܝܢ ܠܡܸܬܼܩܲܪܵܒܼܘܼ ܠܐܲܦܲܝ̈ ܫܘܼܪܵܗ̇ ܀ 289 :ܚܝܠܵܐ ܢܵܦܹ̇ܩ ܡ̣ܢ ܣܝܼ̈ܡܵܬܼܵܐ ܕܓܲܪ̈ܡ̇ܘܗܝ ܕܟܹܐܢܵܐ 290 ܘܠܹܗܘ̣ ܚܵܙܹ̇ܝܢ ܐܲܝܟ ܪܲܒܿܚܲܝܠܵܐ ܘܥܵܪܩ̇ܝܼܢ ܡܸܢܹܗ ܀ 291 :ܬܵܘ ܢܸܬܼܚܲܦܛ ܒܝܘܿܡ ܕܘܼܟܼܪܵܢܹܗ ܕܣܵܗܕܵܐ ܙܲܗܝܵܐ 292 ܕܲܢܥܲܕܲܪ ܠܲܢ ܕܠܵܐ ܢܸܬܼܢܟܸܐ ܡ̣ܢ ܡ̇ܪܘܿܕܹܵܐ ܀ 293 :ܬܵܘ ܢܸܬܼܚܲܦܲܛ ܒܲܨ̈ܠܵܘܵܬܼܵܐ ܒܝܘܿܡ ܥܲܕܥܹܕܹܗ 294 ܕܢܸܗܘܸܐ ܥܲܡܹܗ ܒܡܲܠܟܿܘܼܬܼ ܪܵܡ̇ܐ ܒܛܘܼܒܹ̈ܐ ܡܠܝܼܟܹ̈ܐ ܀