On the Power of Repentance - ܥܲܠ ܬܼܝܵܒܼܘܼܬܼܵܐ

ܒܵܟܼ ܡܵܪܝ ܐܹܚܘܼܪ ܕܲܡܠܹܝܬܿ ܫܘܼܦܖܹ̈ܐ ܠܲܕܼܚܵܐܲܪ ܒܵܟܼ܀ ܚܸܫܘܿܟܼ ܥܵܠܡܵܐ ܘܲܒܼܬܼܘܼ̈ܩܠܵܬܼܵܐ ܣܪܝܼܓܼܵܐ ܐܘܼܪܚܹܗ: ܒܢܘܼܗܪܵܟܼ ܡܵܪܲܢ ܐܸܪܕܸܐ ܥܲܡܵܟܼ ܠܐܲܬܼܪܹܗ ܕܐܲܒܼܘܼܟܼ܀ ܚܸܠܡܵܐ ܗ̣̄ܘ ܥܵܠܡܵܐ ܘܲܕܿܛܵܥܹ̇ܐ ܒܹܗ ܬܘܵܬܼܵܐ ܡܸܫܟܲܚ: ܐܲܥܝܼܪ ܠܲܢ ܡܵܪܝ ܕܐܲܢ̄ܬܿ ܗ̣̄ܘ ܨܲܦܪܵܐ ܡܥܝܼܪ ܛܲܒܿܝܼ̈ܥܹܐ܀ ܐܘܼܪܚܹܗ ܕܥܵܠܡܵܐ ܦܲܚ̈ܬܹܐ ܘܦܲܚܹ̈ܐ ܡܲܠܝܵܐ ܟ̱ܠܵܗ̇: ܗ̤ܘܝܼ ܠܲܢ ܐܘܼܪܚܵܐ ܒܪܵܐ ܢܲܗܝܼܪܵܐ ܘܲܢܗܲܠܸܟܼ ܒܵܟܼ܀ ܒܥܸܒܼܖܹ̈ܐ ܕܥܵܠܡܵܐ ܕܲܓܵܠܘܼܬܼܵܐ ܘܡܲܣܲܒܼ ܒܐܲܦܹ̈ܐ: ܚܛܝܼܬܼܵܐ ܠܡܹܐܢܹܗ ܬܹܐܓܼܘܼܪܬܹܗ ܕܹܝܢ ܟܠ ܚܘܼܣܖ̈ܵܢܹܐ܀ ܒܖܹ̈ܫܵܘܗܝ ܫܘܼܚܕܵܐ ܘܲܒܼܕܲܝܵܢܵܘ̈ܗܝ ܓܲܢܵܒܼܘܼܬܼܵܐ: pb. 647 ܒܫܘܼܩܵܘ̈ܗܝ ܥܵܘ̣ܠܵܐ ܘܒܲܟܼܢܘܼ̈ܫܵܬܹܗ ܡܲܣܲܒܼ ܒܐܲܦܹ̈ܐ܀ ܫܠܵܡܹܗ ܢܵܟܹ̇ܠ ܚܘܼܒܹܗ ܚܵܢܹ̇ܩ ܫܘܼܦܪܹܗ ܡܲܛܥܸܐ: ܟ̱ܠܹܗ ܡܲܪܝܼܪ ܘܲܡܠܸܐ ܘܵܝܹ̈ܐ ܠܲܕܼܪܵܚܹ̇ܡ ܠܹܗ܀ ܥܲܠ ܡܲܛ̈ܪܵܬܹܗ ܫܹܐܕܹ̈ܐ ܩܵܝ̇ܡܝܼܢ ܒܢܲܝ̈ ܚܸܫܘܿܟܼܵܐ: ܘܨܵܠܹ̇ܝܢ ܦܲܚܹ̈ܐ ܘܛܵܡ̇ܪܝܼܢ ܢܸܫ̈ܒܹܐ ܠܲܕܼܪܵܕܹܐ ܒܹܗ܀ ܠܐܘܼܪܚܵܐ ܕܩܘܼܫܬܵܐ ܚܲܦܝܘܼܗ̇ ܫܹܐܕܹ̈ܐ ܒܠܘܼܬܵܟܲܝ̈ܗܘܿܢ: ܕܠܵܐ ܢܸܚܙܸܐ ܐ̄ܢܵܫ ܦܲܚܵܐ ܘܢܸܣܛܸܐ ܕܠܵܐ ܢܸܦܸܠ ܒܹܗ܀ ܚܹܐܪܘܼܬܼܵܐ ܕܹܝܢ ܒܸܛܠܲܬ̤ ܕܸܡܟܲܬ̤ ܡ̣ܢ ܛܲܒܼ̈ܵܬܼܵܐ: ܘܗܵܐ ܥܝܼܪ ܥܵܘ̣ܠܵܐ ܘܲܚܢܝܼܩܵܐ ܒܹܗ ܒܪܝܼܬܼܵܐ ܟ̱ܠܵܗ̇܀ ܟܠܢܵܫ ܡܵܘܫܸܛ ܪܸܓܼܠܹܗ ܒܦܲܚܵܐ ܕܗ̤ܘ ܢܸܦܸܠ ܒܹܗ: ܠܵܘ ܓܹܝܪ ܦܲܚܵܐ ܪܵܗܹ̇ܛ ܨܵܐܹ̇ܕܼ ܠܲܕܼܢܵܦܹ̇ܠ ܒܹܗ܀ ܡܸܫܕܲܠ ܫܵܕܹܠ ܘܲܡܫܲܓܵܫܘܼ ܡܫܲܓܸܫ ܒܝܼܫܵܐ: ܠܵܐ ܓܹܝܪ ܡܸܫܟܲܚ ܕܲܠܚܹܐܪܘܼܬܼܵܐ ܒܥܘܼܫܢܵܐ ܢܸܙܟܸܿܐ܀ ܡܟܲܣܸܐ ܦܲܚܵܘ̈ܗܝ ܘܐܲܝܢܵܐ ܕܨܵܒܹ̇ܐ ܢܸܚܙܸܐ ܐܸܢܘܿܢ: ܡܲܣܛܸܐ ܘܥܵܒ݁ܲܪ ܘܲܡܒܲܙܲܚ ܒܹܗ ܒܦܲܚܵܐ ܕܲܛܡܝܼܪ܀ ܠܵܘ ܓܹܝܪ ܟܠܢܵܫ ܝܵܨܹ̇ܦ ܚܵܐܲܪ ܢܸܚܙܸܐ ܦܲܚܵܐ: ܘܐܸܠܘܼ ܒܵܥܹ̇ܐ ܥܵܒ݁ܲܪ ܗ̄ܘ̣ܵܐ ܠܹܗ ܘܠܵܐ ܡܲܟܸܿܐ ܠܹܗ܀ ܛܘܼܥܝܲܝ ܪܲܒܿܬܼܵܐ ܦܵܪܣܝܼܢ ܫܹܐܕܹ̈ܐ ܥܲܠ ܐܘܼܖ̈ܚܵܬܼܵܐ: ܘܲܕܿܛܘܼܥܝܲܝ ܗ̣̄ܝ ܟܠܢܵܫ ܝܵܕܲܥ̇ ܐܸܢ ܗ̤ܘ ܕܨܵܒܹ̇ܐ܀ ܡܲܢ ܠܵܐ ܝܵܕܲܥ̇ ܕܲܒܼܫܘܼܠܵܡܵܐ ܕܚܲܝܹ̈ܐ ܡܵܘܬܵܐ ܗ̄ܘ̣: ܘܐܲܝܟܼ ܨܵܦܲܚܬܵܐ ܗ̄ܘ̣ ܝܵܘܡܵܐ ܕܩܸܨܵܐ ܠܥܸܠ ܡ̣ܢ ܪܹܫܹܗ܀ ܡܲܢ ܠܵܐ ܝܵܕܲܥ̇ ܕܥܵܠܡܵܐ ܚܸܠܡܵܐ ܗ̄ܘ̣ ܐܵܦ ܛܸܠܵܠܵܐ: pb. 648 ܘܲܡܫܲܢܸܐ ܠܹܗ ܘܠܵܐ ܡܸܬܼܩܲܕܸܐ ܨܹܝܕܼ ܚܲܒܿܝܼܒܼܵܘ̈ܗܝ܀ ܡܲܢ ܠܵܐ ܝܵܕܲܥ̇ ܕܐܘܼܪܚܹܗ ܕܥܵܠܡܵܐ ܠܩܲܒܼܪܵܐ ܣܝܼܡܵܐ: ܡܵܘܚܲܪ ܩܲܠܝܼܠ ܩܲܕܸܡ ܩܲܠܝܼܠ ܗܵܐ ܬܲܡܵܢ ܗ̄ܘ̣܀ ܡܲܢ ܠܵܐ ܝܵܕܲܥ̇ ܕܐܸܢ ܖܸ̈ܒܿܘܵܬܼܵܐ ܕܟܲܟܿܖܹ̈ܐ ܢܸܩܢܸܐ: ܠܩܲܒܼܪܵܐ ܕܢܸܥܘܿܠ ܥܲܡܹܗ ܡܸܕܸܡ ܠܵܐ ܝܵܗ̇ܒܿܝܼܢ ܠܹܗ܀ ܡܲܢ ܠܵܐ ܝܵܕܲܥ̇ ܕܐܵܦܸܢ ܢܸܥܬܲܪ ܐܲܝܟܼ ܐܝܼܡܵܡܵܐ: ܥܘܼܬܼܪܹܗ ܡܸܢܹܗ ܒܥܸܕܵܢ ܡܵܘܬܹܗ ܗܵܪܟܵܐ ܦܵܐܹ̇ܫ܀ ܡܲܢ ܠܵܐ ܝܵܕܲܥ̇ ܕܐܸܠ̣ܘ ܝܵܗܹ̇ܒܼ ܟ̱ܠܹܗ ܕܲܗܒܹܗ: ܒܥܸܕܵܢ ܩܸܨܹܗ ܠܵܐ ܡܸܬܼܩܲܒܲܠ ܫܘܼܚܕܵܐ ܡܸܢܹܗ܀ ܡܲܢ ܠܵܐ ܝܵܕܲܥ̇ ܕܛܵܒܼܵܐ ܒܬܼܘܼܠܬܵܐ ܡ̣ܢ ܙܵܢܝܼܬܼܵܐ: ܘܩܲܕܝܼܫܘܼܬܼܵܐ ܛܵܒܼ ܡ̣ܢ ܫܸܕܼ̈ܠܹܐ ܕܓܲܝܵܪܘܼܬܼܵܐ܀ ܡܲܢ ܠܵܐ ܣܵܢܹ̇ܐ ܠܐܲܝܢܵܐ ܕܪܵܘܹܐ ܡܵܐ ܕܚܵܙܹ̇ܐ ܠܹܗ: ܘܥܵܪܹܩ ܡܲܣܓܸܐ ܡ̣ܢ ܥܸܢܝܵܢܹܗ ܟܲܕܼ ܡܲܗܸܠ ܒܹܗ܀ ܡܲܢ̣ܘܼ ܕܪܵܚܹ̇ܡ ܠܐܲܝܢܵܐ ܕܗܲܪܵܪ ܢܵܨܹ̇ܐ ܘܲܕܼܠܝܼܚ: ܘܫܵܐܹ̇ܛ ܣܵܒܹ̈ܐ ܘܠܵܐ ܡܸܬܼܟܲܚܲܕܼ ܡ̣ܢ ܝܲܩܝܼܖܹ̈ܐ܀ ܡܲܢ ܠܵܐ ܣܵܢܹ̇ܐ ܠܕܲܓܵܠܘܼܬܼܵܐ ܘܓܲܢܵܒܼܘܼܬܼܵܐ: ܕܠܵܐ ܫܲܦܝܼܖ̈ܵܢ ܐܵܦ ܠܵܐ ܡܸܡܬܼܘܿܡ ܠܥܵܒܼܘܿܕܲܝ̈ܗܹܝܢ܀ ܡܵܕܹܝܢ ܦܲܚܵܘ̈ܗܝ ܕܐܵܟܹܠܩܲܪܨܵܐ ܗܵܐ ܓܠܹܝܢ ܐܸܢܘܿܢ: ܘܟܲܕܼ ܚܵܐܲܪ ܐ̄ܢܵܫ ܡܵܘܫܸܛ ܪܸܓܼܠܹܗ ܕܲܒܼܗܘܿܢ ܢܸܦܸܠ܀ ܘܚܲܒܿܝܼܒܼ ܕܲܗܒܼܵܐ ܟܲܕܼ ܝܵܕܲܥ̇ ܠܹܗ ܕܠܵܐ ܡܸܬܼܩܲܕܸܐ: ܐܵܦ ܩܸܢܝܵܢܵܐ ܟܲܕܼ ܚܵܐܲܪ ܒܹܗ ܕܲܡܫܲܢܸܐ ܠܹܗ܀ ܘܲܠܙܵܢܝܘܼܬܼܵܐ ܟܲܕܼ ܣܵܢܹ̇ܐ ܠܵܗ̇ ܠܵܐ ܡܲܪܦܸܐ ܠܵܗ̇: pb. 649 ܘܪܵܐܹ̇ܓܼ ܚܲܡܪܵܐ ܟܲܕܼ ܓܵܥܲܪ ܒܹܗ ܒܐܲܝܢܵܐ ܕܪܵܘܹܐ܀ ܟܹܐܝܢ ܗ̣̄ܘ ܟܝܵܢܵܐ ܐܵܦ ܫܲܦܝܼܪܵܐ ܒܪܝܼܬܼܵܐ ܣܲܓܿܝܼ: ܘܫܲܦܝܼܖ̈ܵܢ ܠܹܗ ܫܲܦܝܼܖ̈ܵܬܼܵܐ ܕܢܸܣܥܘܿܪ ܐܸܢܹܝܢ܀ ܘܲܠܒܼܝܼ̈ܫܵܬܼܵܐ ܣܵܢܹ̇ܐ ܟܝܵܢܵܐ ܡܵܐ ܕܡܸܣܬܲܥܖ̈ܵܢ: ܘܟܲܕܼ ܣܵܢܹ̇ܐ ܠܗܹܝܢ ܦܵܠܲܚ ܠܗܹܝܢ ܚܲܒܿܝܼܒܼܵܐܝܼܬܼ܀ ܘܡܲܢ ܠܵܐ ܢܸܒܼܟܸܐ ܥܲܠ ܚܹܐܪܘܼܬܼܵܐ ܕܲܟܼܡܵܐ ܚܵܒܲܬ̤: ܕܪܵܚ̇ܡܵܐ ܛܵܒܼܬܼܵܐ ܘܣܵܥ̇ܪܵܐ ܟܠܝܘܿܡ ܟܠ ܒܝܼ̈ܫܵܬܼܵܐ܀ ܘܟܲܕܼ ܐܲܠܵܗܵܐ ܨܵܒܹ̇ܐ ܒܛܵܒܼܬܼܵܐ ܘܝܵܗܹ̇ܒܼ ܐܲܓܼܪܵܐ: ܘܲܡܥܲܕܲܪ ܠܹܗ ܐܵܦ ܗ̤ܘ ܟܝܵܢܵܐ ܕܲܡܟܼܵܢܵܐ ܒܹܗ܀ ܘܗ̤ܝ ܫܲܦܝܼܪܵܐ ܘܗ̤ܝ ܡܸܫܬܲܒܿܚܵܐ ܡ̣ܢ ܚܲܙܵܝܹ̈ܐ: ܠܵܐ ܐ̄ܢܵܫ ܨܵܒܹ̇ܐ ܕܢܸܥܒܸܕܼ ܛܵܒܼܬܼܵܐ ܟܲܕܼ ܪܵܚܹܡ ܠܵܗ̇܀ ܘܟܲܕܼ ܣܵܢܹ̇ܐ ܠܵܗ̇ ܠܒܼܝܼܫܬܵܐ ܟܠܢܵܫ ܘܲܡܩܲܦܲܚ ܠܵܗ̇: ܣܵܢܹ̇ܐ ܠܵܗ̇ ܕܹܝܢ ܐܵܦ ܐܲܠܵܗܵܐ ܘܠܵܐ ܨܵܒܹ̇ܐ ܒܵܗ̇܀ ܣܵܢܹ̇ܐ ܠܵܗ̇ ܬܘܼܒܼ ܐܵܦ ܗ̤ܘ ܟܝܵܢܵܐ ܕܠܵܐ ܒܲܪܝܵܐ ܒܹܗ: ܘܟܲܕܼ ܛܵܒܼ ܗܵܟܲܢ ܗ̤ܝ ܡܸܬܼܦܲܠܚܵܐ ܟܲܫܝܼܪܵܐܝܼܬܼ܀ ܟܲܕܼ ܐܲܠܵܗܵܐ ܒܪܵܝܗܝ ܠܲܟܼܝܵܢܵܐ ܫܲܦܝܼܪܵܐ ܗ̄ܘ̣ܵܐ: ܘܡܸܕܸܡ ܕܐܝܼܬܼ ܒܹܗ ܗܵܫܵܐ ܕܲܣܢܸܐ ܠܵܘ ܡܸܢܹܗ ܗ̣̄ܘ܀ ܟܲܕܼ ܥܲܒܼܕܹܗ ܗ̄ܘ̣ܵܐ ܚ̣ܙܵܝܗܝ ܐܲܠܵܗܵܐ ܘܗܵܐ ܛܵܒܼ ܫܲܦܝܼܪ: ܘܗܵܠܹܝܢ ܡܘܼ̈ܡܹܐ ܚܸܘܝܵܐ ܐܲܥܸܠ̣ ܥܲܠ ܚܹܐܪܘܼܬܼܵܐ܀ ܘܥܲܠ ܕܲܚܛܝܼܬܼܵܐ ܠܵܘ ܒܲܟܼܝܵܢܵܐ ܣܵܡ̣ ܒܵܪܘܿܝܵܐ: ܒܣܝܼܪ ܗ̣̄ܘ ܘܡܸܬܿܬܿܘܸܐ ܐܲܝܟܵܐ ܕܚܵܛܹ̇ܐ ܟܝܵܢܵܐ ܟܠ ܝܘܿܡ܀ ܘܪܸܓܿܬܼܵܐ ܣܢܝܼܬܼܵܐ ܡ̣ܢ ܠܒܲܪ ܥܸܠܲܬ̤ ܥܲܠ ܫܲܦܝܼܪܵܐ: pb. 650 ܗ̤ܝ (ܡܕܲܠܚܵܐ ܠܹܗ ܕܢܵܘܒܸܿܕܼ( 1 ) ܫܘܼܦܪܹܗ ܗܵܘ̇ ܩܲܕܼܡܵܝܵܐ܀ ܘܡܸܛܠܗܵܢܵܐ ܡܵܐ ܕܲܚܛܵܗܵܐ ܠܢܲܦ̮ܫܵܐ ܣܵܪܲܚ: ܚܵܫ݁ܵܐ ܘܒܼܵܗ̇ܬܵܐ ܘܠܵܐ ܫܲܦܝܼܪ ܠܵܗ̇ ܚܛܵܗܵܐ ܕܲܚܛܵܬ̤܀ ܘܟܲܕܼ ܒܲܩܛܝܼܪܵܐ ܠܵܐ ܡܸܬܿܕܲܒܼܪܵܐ ܕܬܸܚܛܸܐ ܢܲܦ̮ܫܵܐ: ܐܲܟܼܡܵܐ ܕܕܲܒܼܪܵܗ̇ ܩܛܝܼܪܵܐ ܡܥܵܩܵܐ ܥܲܠ ܒܝܼ̈ܫܵܬܼܵܗ̇܀ ܘܟܲܕܼ ܐܸܠܘܼ ܨܒܼܵܬ̤ ܠܵܐ ܚܵܛ̇ܝܵܐ ܗ̄ܘ̣ܵܬܼ ܡܲܪܝܼܪܵܐ ܠܵܗ̇: ܘܲܠܡܲܢ ܬܸܥܕܘܿܠ ܐܸܠܵܐ ܗ̤ܝ ܠܵܗ̇ ܒܟܼܠ ܣܘܼܪܚܵܢܵܗ̇܀ ܛܪܘܼܢܵܐ ܦܸܪܥܘܿܢ ܕܒܲܪ ܗ̄ܘ̣ܵܐ ܠܣܲܪܵܐ ܡ̣ܢ ܐܲܒܼܪܵܗܵܡ: ܡܲܠܟܵܐ ܓܲܐܝܵܐ ܡ̣ܢ ܓܵܠܘܵܝܵܐ( 2 ) ܕܦܵܗܹ̇ܐ ܒܐܲܬܼܪܵܐ܀ ܘܠܵܐ ܒܲܣܝܼܡ ܗ̄ܘ̣ܵܐ ܦܵܬܼܘܿܪ ܡܲܠܟܵܐ ܠܗܵܝ̇ ܒܲܪ̄ܬܼ ܚܹܐܖܹ̈ܐ: ܐܲܝܟܼ ܗܵܘ̇ ܠܲܚܡܵܐ ܙܥܘܿܪܵܐ ܕܫܸܒܼܩܲܬ̤ ܒܹܝܬܼ ܐܲܒܼܪܵܗܵܡ܀ ܒܥܲܪܣܹܗ ܪܵܡܬܼܵܐ ܕܡܲܠܟܵܐ ܫܸܟܼܒܲܬ̤ ܛܲܥܡܵܢܝܼܬܼܵܐ: ܘܠܵܐ ܒܸܣܡܲܬ̤ ܠܵܗ̇ ܫܸܢܬܼܵܐ ܬܲܡܵܢ ܡܸܛܠ ܓܲܒܼܪܵܗ̇܀ ܒܗܵܘ̇ ܓܵܠܘܵܝܵܐ(⁶¹⁷) ܐܸܣܪܲܬ̤ ܚܘܼܒܵܗ̇ ܘܠܵܐ ܛܥܵܬܹܗ ܗ̄ܘ̣ܵܬܼ: ܟܲܕܼ ܦܲܛ̈ܒܼܵܓܹܐ ܕܡܲܠܟܵܐ ܣܕܼܝܼܪܝܼܢ ܥܲܠ ܦܵܬܼܘܿܪܵܗ̇܀ ܘܥܘܼܬܼܪܹܗ ܕܦܸܪܥܘܿܢ ܫܝܼܛ ܗ̄ܘ̣ܵܐ ܒܥܲܝܢܹ̈ܝܗ̇ ܘܲܡܥܵܩܵܐ ܒܹܗ: ܘܐܲܠܝܼܨܵܐ ܗ̄ܘ̣ܵܬܼ ܕܲܬܼܫܲܢܸܐ ܠܵܗ̇ ܨܹܝܕܼ ܐܲܒܼܪܵܗܵܡ܀ ܐܘܿ ܠܹܟܼܝ ܢܲܦ̮ܫܵܐ ܕܕܲܒܼܪܵܗ̇ ܒܝܼܫܵܐ ܡ̣ܢ ܐܲܠܵܗܵܐ: ܠܵܐ ܢܸܒܼܣܲܡ ܠܹܟܼܝ ܠܲܚܡܵܐ ܥܲܡܹܗ ܕܩܵܛܹ̇ܠ ܐ̄ܢܵܫܵܐ ܗ̣̄ܘ܀ ܦܢܵܝ ܠܐܲܠܵܗܵܐ ܐܲܝܟܼ ܕܲܦܢܵܬ̤ ܗ̄ܘ̣ܵܬܼ ܣܲܪܵܐ ܠܐܲܒܼܪܵܡ: ܗ̤ܘܝܘܼ ܡܢܵܬܹܟܼܝ ܠܵܐ ܬܸܬܲܟܼܠܝܼܢ ܥܲܠ ܕܲܓܵܠܵܐ܀ pb. 651 ܟܲܕܼ ܠܵܐ ܨܵܒܼ̇ܝܵܐ ܐܸܙܲܠ̄ܬ̤ ܣܲܪܵܐ ܠܒܹܝܬܼ ܗܵܘ̇ ܦܸܪܥܘܿܢ: ܪܲܒܿ ܗ̄ܘ̣ ܚܸܣܕܹܟܼܝ ܕܐܲܢ̄ܬܝ ܟܲܕܼ ܨܵܒܼܝܵܐ ܐܢ̄ܬܝ ܗܵܐ ܐܸܫܬܲܥܒܲܕܬܿܝ܀ ܥܗܲܕܝܼܘܗܝ ܢܲܦ̮ܫܵܐ ܠܨܲܠܡܹܗ ܪܲܒܵܐ ܕܨܝܼܪ ܥܲܠ ܝܵܬܹܟܼܝ: ܘܲܠܦܘܼܪܩܵܢܵܐ ܗܵܘ̇ ܕܲܥܒܲܕܼ ܠܹܟܼܝ ܒܝܼܚܝܼܕܼܵܝܹܗ܀ ܚܲܠܛܹܟܼܝ ܥܲܡܹܗ (ܘܟܲܬܼܒܹܟܼܝ ܒܲܫܡܹܗ( 3 ) ܘܗܵܐ ܕܝܼܠܹܗ ܐܲܢ̄ܬܿܝ: ܘܡܲܢ̣ܘܼ ܗܵܢܵܐ ܕܝܼܬܸܒܼ ܠܐܸܕܼܢܹܟܼܝ ܘܲܫܒܼܵܟܼܝ ܡܸܢܹܗ܀ ܥܵܠܡܵܐ ܒܫܸܕܼܠܵܘ̈ܗܝ ܫܲܓܸܫ̣ ܕܲܒܼܪܹܟܼܝ ܠܲܖ̈ܓܼܝܼܓܼܵܬܹܗ: ܘܗܵܐ ܒܲܢܝܵܚܵܘ̈ܗܝ ܐܲܝܟܼ ܕܲܒܼܣܘܼܛ̈ܡܹܐ ܩܫܲܝ̈ܵܐ ܐܲܣܪܹܟܼܝ܀ ܐܲܝܟܼ ܦܵܬܼܘܿܪܹܗ ܕܡܲܠܟܵܐ ܕܡܸܨܪܹܝܢ ܗܵܐ ܣܕܼܝܼܪ ܘܲܡܠܸܐ: ܥܵܠܡܵܐ ܒܝܼܫܵܐ ܛܘܼ̈ܒܹܐ ܕܙܲܒܼܢܵܐ ܕܠܵܐ ܡܸܬܼܩܲܕܹܝܢ܀ ܠܣܲܪܵܐ ܚܹܐܪܬܼܵܐ ܠܵܐ ܒܣܸܡ̣ ܗ̄ܘ̣ܵܐ ܠܵܗ̇ ܗܵܘ̇ ܦܵܬܼܘܿܪܵܐ: ܚܘܼܪܝ ܒܵܗ̇ ܢܲܦ̮ܫܵܐ ܘܠܵܐ ܢܸܒܼܣܲܡ ܠܹܟܼܝ ܥܵܠܡܵܐ ܒܝܼܫܵܐ܀ ܥܗܲܕܼܝ ܠܐܲܠܵܗܵܐ ܐܲܝܟܼ ܕܥܵܗ̇ܕܵܐ ܗ̄ܘ̣ܵܬܼ ܣܲܪܵܐ ܠܐܲܒܼܪܵܡ: ܘܲܦܢܵܝ ܨܹܐܕܼܵܘܗܝ ܐܲܝܟܼ ܕܲܦܢܵܬ̤ ܗ̤ܝ ܨܹܝܕܼ ܫܵܘܬܵܦܵܗ̇܀ ܗܵܐ ܡܸܨܖ̈ܵܝܹܐ ܢܵܛ̇ܪܝܼܢ ܬܲܖ̈ܥܹܐ ܕܠܵܐ ܢܲܪܦܘܿܢܹܟܼܝ: (ܬܸܬܼܦܲܢܹܝܢ ܠܹܗ ܠܟܹܐܢܵܐ ܕܚܵܐܲܪ( 4 ) ܘܲܡܣܲܟܸܐ ܠܹܟܼܝ܀ ܡܥܵܩܝܼܢ ܫܹܐܕܹ̈ܐ ܐܸܢ ܡܸܬܼܦܲܢܝܲܬܿܝ ܨܹܝܕܼ ܐܲܠܵܗܵܐ: ܐܲܥܝܼܩ ܐܸܢܘܿܢ ܒܲܬܼܝܵܒܼܘܼܬܹܟܼܝ ܡܲܠܝܲܬܼ ܫܘܼܦܖܹ̈ܐ܀ ܫܲܦܝܼܪ ܗ̄ܘ̣ ܠܹܟܼܝ ܕܬܸܚܹܝܢ ܢܲܦ̮ܫܵܐ ܥܲܡ ܐܲܠܵܗܵܐ: ܘܠܵܐ ܥܲܡ ܥܵܠܡܵܐ ܕܲܡܠܸܐ ܡܵܘܬܵܐ ܠܲܕܼܚܵܐܲܪ ܒܹܗ܀ pb. 652 ܒܝܼܫܵܐ ܦܸܪܥܘܿܢ ܢܸܣܒܹܟܼܝ ܒܵܥܹ̇ܐ ܡ̣ܢ ܐܲܠܵܗܵܐ: ܚܙܵܝ ܠܵܐ ܬܚܲܒܿܠܝܼܢ ܫܵܘܬܵܦܘܼܬܹܟܼܝ ܡܲܠܝܲܬܼ ܫܘܼܦܖܹ̈ܐ܀ ܐܘܿ ܒܲܪ̄ܬܼ ܣܲܪܵܐ ܦܢܵܝ ܐܲܝܟܼ ܣܲܪܵܐ ܨܹܝܕܼ ܙܲܕܝܼܩܵܐ: ܠܵܐ ܬܸܣܬܲܪܚܝܼܢ ܥܲܡ ܥܵܘ̇ܵܠܵܐ ܕܫܵܐܹ̇ܠ ܢܲܦ̮ܫܹܟܼܝ܀ ܒܝܵܘܡܵܐ ܕܬܸܦܩܝܼܢ ܡ̣ܢ ܒܹܝܬܼ ܦܸܪܥܘܿܢ ܥܝܼܖܹ̈ܐ ܚܵܕܹܝܢ: ܡܸܨܖ̈ܵܝܹܐ ܕܹܝܢ ܝܵܬܼ̇ܒܿܝܼܢ ܒܐܸܒܼܠܵܐ ܥܲܠ ܦܘܼܪܩܵܢܹܟܼܝ܀ ܠܒܹܝܬܼ ܚܵܡ ܕܲܒܼܪܘܼܟܼܝ ܘܲܠܡܸܨܖ̈ܵܝܹܐ ܒܥܵܘ̣ܠܵܐ ܝܲܗܒܘܼܟܼܝ܀ ܘܲܗ̤ܘܲܝܬܿܝ ܫܲܦܠܵܐ ܒܡܲܫܟܿܢܵܐ ܕܥܲܒܼ̈ܕܹܐ ܕܫܲܕܹܠܘ ܕܲܒܼܪܘܼܟܼܝ܀ ܥܪܘܿܩܝ ܡ̣ܢ ܥܵܠܡܵܐ ܢܲܦ̮ܫܵܐ ܪܵܚܡܲܬܼ ܫܲܦܝܼܖ̈ܵܬܼܵܐ: ܥܪܘܿܩܝ ܡ̣ܢ ܦܸܪܥܘܿܢ ܚܹܐܪܬܼܵܐ ܕܕܲܒܼܪܘܼܗ̇ ܡ̣ܢ ܫܵܘܬܵܦܵܗ̇܀ ܠܵܐ ܬܸܬܲܟܼܠܝܼܢ ܥܲܠ ܡܸܨܪܵܝܵܐ ܕܲܡܫܲܓܸܫ ܠܹܟܼܝ: ܒܢܲܚ̈ܬܹܐ ܓܐܲܝ̈ܵܐ ܘܲܒܼܡܹܐܟܼ̈ܠܵܬܼܵܐ ܖܹ̈ܫܵܝܵܬܼܵܐ܀ ܠܵܐ ܢܲܛܥܸܐ ܒܹܟܼܝ ܥܵܠܡܵܐ ܕܚܵܡܹ̇ܐ ܐܲܝܟܼ ܗܲܒܵܒܼܵܐ: ܚܸܠܡܵܐ ܗ̄ܘ̣ ܫܘܼܦܪܹܗ ܚܘܼܪܝ ܒܐܲܠܵܗܵܐ ܕܠܵܐ ܡܸܫܬܲܚܠܲܦ܀ ܦܣܘܿܩܝ ܥܸܢܝܵܢܹܟܼܝ ܡ̣ܢ ܡܸܨܖ̈ܵܝܹܐ ܕܕܲܓܵܠܹ̈ܐ ܐܸܢܘܿܢ: ܠܵܐ ܢܲܛܥܘܿܢܹܟܼܝ ܒܲܖ̈ܓܼܝܼܓܼܵܬܼܵܐ ܫܹܐܕܹ̈ܐ ܛܲܢ̈ܦܹܐ܀ ܟܡܵܐ ܒܲܣܝܼܡ ܠܹܟܼܝ ܠܲܚܡܹܗ ܕܦܸܪܥܘܿܢ ܕܬܹܐܟܼܠܝܼܢ ܡܸܢܹܗ: ܥܗܲܕܼܝ ܠܐܲܠܵܗܵܐ ܘܬܼܵܝ ܐܲܝܟܼ ܣܲܪܵܐ ܨܹܝܕܼ ܐܵܒܼܪܵܗܵܡ܀ ܢܲܦ̮ܫܵܐ ܚܹܐܪܬܼܵܐ ܘܡܲܠܝܲܬܼ ܫܘܼܦܖܹ̈ܐ ܘܲܕܼܠܵܐ ܡܘܼܡܵܐ: ܟܲܠܲܬܼ ܡܲܠܟܵܐ ܘܨܲܠܡܵܗ̇ ܪܲܒܵܐ ܕܐܲܠܵܗܘܼܬܼܵܐ܀ ܒܪܝܼܬܼܵܐ ܕܪܵܡܵܐ ܡ̣ܢ ܒܸܖ̈ܝܵܬܼܵܐ ܒܫܘܼܦܪܵܐ ܕܲܥܠܹܝܗ̇: ܒܲܪ̄ܬܼ ܢܲܗܝܼܖܹ̈ܐ ܕܲܓܼܒܼܵܗ̇ ܪܲܒܵܐ ܘܨܵܪ̣ ܒܵܗ̇ ܨܲܠܡܹܗ܀ pb. 653 ܨܘܼܪܬܵܐ ܪܚܝܼܡܬܵܐ ܕܪܲܒܵܐ ܘܪܵܡܵܐ ܡ̣ܢ ܨܘܼܖ̈ܵܬܼܵܐ: ܡܲܢ̣ܘܼ ܚܲܒܸܿܠ̣ ܗܵܠܹܝܢ ܫܘܼܦܖܹ̈ܐ ܕܲܡܟܼܵܢܝܼܢ ܒܹܟܼܝ܀ ܚܛܵܗܵܐ ܦܓܲܥ̣ ܒܝܼ ܘܲܣ̣ܒܲܟܼ ܢܲܟܼܬܲܢܝ ܘܲܢܬܲܪ ܨܘܼܖ̈ܵܬܼܝ: ܘܲܡܠܵܢܝ ܡܘܼ̈ܡܹܐ ܘܲܕܼܥܸܟܼܘ( 5 ) ܫܘܼܦܖ̈ܲܝ ܕܲܪܚܝܼܡܝܼܢ ܗ̄ܘ̣ܵܘ܀ ܦܸܪܥܘܿܢ ܕܲܒܼܪܲܢܝ ܡ̣ܢ ܐܲܠܵܗܵܐ ܕܪܵܚ̇ܡܵܐ ܐ̄ܢܵܐ ܠܹܗ: ܘܫܲܕܸܠ̣ ܚܲܒܼܫܲܢܝ ܒܲܛܪܘܼܢܘܼܬܹܗ ܘܗܵܐ ܡܒܲܙܲܚ ܒܝܼ܀ ܚܛܝܼܬܼܵܐ ܢܸܦܚܲܬ̤ ܐܲܝܟܼ ܐܲܟܸܕܼܢܵܐ ܒܙܝܼܘܵܐ ܕܐܲܦܲܝ̈: ܘܗܵܐ ܣܲܢܝܵܐ ܐ̄ܢܵܐ ܘܚܸܫܘܿܟܼܵܐ ܐ̄ܢܵܐ ܕܥܵܘ̣ܠܵܐ ܥܸܒܼ̇ܕܹܬܼ܀ ܥܠܲܝ ܒܲܪ̄ܬܼ ܚܹܐܖܹ̈ܐ ܣܢ̣ܵܐ ܣܵܛܵܢܵܐ ܐܲܝܟܼ ܡܸܨܪܵܝܵܐ: ܘܲܦܪܲܫ̣ ܕܲܒܼܪܲܢܝ ܡ̣ܢ ܐܲܠܵܗܵܐ ܕܲܢܒܲܙܲܚ ܒܝܼ܀ ܘܗܵܐ ܢܵܛ̇ܪܝܼܢ ܠܝܼ ܫܹܐܕܹ̈ܐ ܠܙܝܼ̈ܙܹܐ ܒܢܲܝ̈ ܚܸܫܘܿܟܼܵܐ: ܐܲܝܟܼ ܡܸܨܖ̈ܵܝܹܐ ܕܠܵܐ ܬܘܼܒܼ ܐܸܦܢܸܐ ܨܹܝܕܼ ܐܲܠܵܗܵܐ܀ ܥܵܠܡܵܐ ܦܲܟܼܪܲܢܝ ܘܲܒܼܥܸܠ̈ܠܵܬܼܵܐ ܕܥܵܘ̣ܠܵܐ ܚܲܒܼܫܲܢܝ: ܘܡ̇ܢ ܡܲܦܸܩ ܠܝܼ ܡ̣ܢ ܚܸܫܘܿܟܼܵܐ ܕܥܵܡܪܵܐ ܐ̄ܢܵܐ ܒܹܗ܀ ܚܛܹ̇ܝܬܼ ܘܐܸܬܿܬܲܒܼܪܹܬܼ ܥܸܒܼ̇ܕܹܬܼ ܥܵܘ̣ܠܵܐ ܘܒܸܗ̇ܬܹܬܼ ܩܵܡܹ̇ܬܼ: ܡ̇ܢ ܥܵܨܹ̇ܒܼ ܠܝܼ ܘܡ̇ܢ ܐܵܡܲܪ ܠܝܼ ܕܡܸܬܼܚܲܠܡܵܐ ܐ̄ܢܵܐ܀ ܫܘܼܦܪܵܐ ܕܲܒܼܪܝܼܬܼܝ ܐܸܬܼܚܲܒܲܠ ܠܹܗ ܒܥܵܘ̣ܠܵܐ ܕܐܝܼܕܲܝ̈: ܘܐܸܢ ܦܵܢ̇ܝܵܐ ܐ̄ܢܵܐ ܟܲܕܼ ܣܲܢܝܵܐ ܐ̄ܢܵܐ ܡ̇ܢ ܦܵܬܲܚ̇ ܠܝܼ܀ ܠܵܐ ܝܵܗ̇ܒܿܝܼܢ ܠܝܼ ܐܸܥܘܿܠ ܠܐܵܬܼܪܵܐ ܕܢܸܦܩܹ̇ܬܼ ܡܸܢܹܗ: ܘܐܸܚܙܸܐ ܠܚܲܬܼܢܵܐ ܕܣܲܓܝܼ ܪܵܚܹ̇ܡ ܫܲܦܝܼܖ̈ܵܬܼܵܐ܀ ܬܵܝ ܠܹܟܼܝ ܢܲܦ̮ܫܵܐ ܕܦܸܠܚܲܬ̤ ܥܵܘ̣ܠܵܐ ܒܥܵܠܡܵܐ ܒܝܼܫܵܐ: pb. 654 ܦܢܵܝ ܠܐܲܠܵܗܵܐ ܘܗ̤ܘ ܡܦܲܢܸܐ ܠܹܟܼܝ ܥܘܼܬܼܪܵܐ ܕܐܵܘܒܸܿܕܬܿܝ܀ ܐܵܦ ܐܲܒܼܪܵܗܵܡ ܩܲܒܿܠ̣ܵܗ̇ ܠܣܲܪܵܐ ܟܲܕܼ ܛܲܡܐܵܐ ܗ̄ܘ̣ܵܬܼ: ܘܐܸܬܼܩܲܕܫܲܬ̤ ܒܹܗ ܘܲܒܼܕܲܟܼܝܘܼܬܼܵܐ ܥܲܡܹܗ ܚܲܠܛ̣ܵܗ̇܀ ܐܲܦܩ̣ܵܗ̇ ܦܸܪܥܘܿܢ ܟܲܕܼ ܛܲܡܐܘܼܬܼܵܐ ܥܲܠ ܗܲܕܵܡܹ̈ܝܗ̇: ܘܡܸܚܕܼܵܐ ܕܥܸܠܲܬ̤ ܨܹܝܕܼ ܐܲܒܼܪܵܗܵܡ ܕܟܼܝܼܬܼܵܐ ܥܲܒܼܕܵܗ̇܀ ܐܵܦܠܵܐ ܚܲܣ̣ܕܵܗ̇ ܐܵܦܠܵܐ ܥܲܕܼܠܵܗ̇ ܠܗܵܝ̇ ܒܲܪ̄ܬܼ ܚܹܐܖܹ̈ܐ: ܐܸܠܵܐ ܚܕܼܝܼ ܒܵܗ̇ ܘܲܗܘ̤ܵܬܼ ܥܲܡܹܗ ܒܢܸܩܦܵܐ ܕܲܟܼܝܵܐ܀ ܐܵܦ ܒܹܟܼܝ ܚܵܕܹܐ ܡܵܪܝܵܐ ܕܨܵܒܹ̇ܐ ܕܬܸܬܼܦܲܢܹܝܢ ܠܹܗ: ܘܲܡܩܲܒܸܿܠ ܠܹܟܼܝ ܘܲܡܩܲܕܸܫ ܠܹܟܼܝ ܘܲܡܕܲܟܸܐ ܠܹܟܼܝ܀ ܡܸܦܲܩ ܬܵܝ ܦܘܿܩܝ ܡ̣ܢ ܛܲܡܐܘܼܬܼܵܐ ܕܲܣܚܝܼܦܲܬܿܝ ܒܵܗ̇: ܘܲܠܩܲܕܝܼܫܵܐ ܠܵܐ ܢܵܕܵܐ ܠܹܗ ܕܲܢܕܲܟܹܝܟܼܝ ܒܹܗ܀ ܐܲܝܟܼ ܕܐܸܬܼܩܲܕܫܲܬ̤ ܣܲܪܵܐ ܕܥܸܒܼܪܲܬ̤ ܥܲܠ ܛܲܡܐܘܼܬܼܵܐ: ܡܩܲܕܸܫ ܗ̄ܘ̣ ܠܹܟܼܝ ܡܵܪܹܗ ܕܐܲܒܼܪܵܡ ܡ̣ܢ ܚܘܼܠܛܵܢܹܗ܀ ܐܘܿ ܬܲܝܵܒܼܬܵܐ ܢܲܦ̮ܫܵܐ ܬܵܝ ܥܘܿܠܝ ܨܹܝܕܼ ܐܲܠܵܗܵܐ: ܒܲܬܼܝܵܒܼܘܼܬܼܵܐ ܕܦܵܬܼ̇ܚܵܐ ܬܲܪܥܵܐ ܘܫܵܪܝܵܐ ܩܸܛܖܹ̈ܐ܀ ܡܸܦܲܩ ܬܵܝ ܦܘܿܩܝ ܡ̣ܢ ܐܲܦܲܕܼܢܹܗ ܕܗܵܘ̇ ܥܵܘ̇ܵܠܵܐ: ܘܡܸܚܕܼܵܐ ܦܵܬܲܚ̇ ܬܲܪܥܵܐ ܠܩܘܼܒܼܠܹܟܼܝ ܡܵܪܝܵܐ ܡܵܪܹܟܼܝ܀ ܕܖ̈ܵܥܵܘܗܝ ܦܵܪܹܣ ܘܲܡܩܲܒܸܿܠ ܠܹܟܼܝ ܘܲܡܚܲܒܸܒܼ ܠܹܟܼܝ: ܐܵܦ ܚܵܕܹܐ ܒܹܟܼܝ ܐܲܟܼܡܵܐ ܕܠܵܐ ܥܒܲܕܬܿܝ ܥܵܘ̣ܠܵܐ ܡܸܡܬܼܘܿܡ܀ ܠܵܐ ܡܚܲܣܸܕܼ ܠܹܟܼܝ ܡܸܛܠ ܕܲܚܛܲܝܬܿܝ ܐܵܘ ܪܵܫܹ̇ܐ ܠܹܟܼܝ: ܐܸܠܵܐ ܚܵܕܹܐ ܡܸܛܠ ܕܲܦܢܲܝܬܿܝ ܐܵܦ ܪܵܚܹ̇ܡ ܠܹܟܼܝ܀ ܕܬܸܦܩܝܼܢ ܟܵܠ̇ܝܵܐ ܠܵܐ ܕܹܝܢ ܟܵܠܹ̇ܐ ܗ̤ܘ ܕܲܢܩܲܒܸܠ: pb. 655 ܕܲܡܛܲܝܲܒܼ ܗ̄ܘ̣ܵܐ ܕܢܸܦܘܿܩ ܠܐܘܼܪܥܹܟܼܝ ܡܵܐ ܕܡܸܬܼܦܲܢܝܲܬܿܝ܀ (ܐܵܦܠܵܐ ܕܬܸܦܢܹܝܢ ܠܲܬܼܝܵܒܼܘܼܬܼܵܐ ܟܵܠ̇ܝܵܐ ܡܵܕܹܝܢ: ܕܲܬܼܟܼܝܼܠܵܐ ܐܲܢ̄ܬܝ ܕܬܲܪܥܵܐ ܦܬܼܝܼܚ ܗ̄ܘ̣ ܠܗܵܘ̇ ܕܲܡܩܲܒܸܠ( 6 )܀ ܐܵܦܠܵܐ ܠܦܸܪܥܘܿܢ ܐܝܼܬܼ ܠܹܗ ܩܛܝܼܪܵܐ ܕܢܸܟܼܠܹܝܟܼܝ ܨܹܐܕܼܵܘܗܝ: ܕܡܸܚܕܼܵܐ ܕܬܸܨܒܹܿܝܢ ܬܸܦܩܝܼܢ ܡܸܢܹܗ ܠܵܐ ܠܵܒܹ̇ܟܼ ܠܹܟܼܝ܀ ܠܡܘܿܢ ܒܵܣܲܪ ܠܹܟܼܝ ܕܟܲܕܼ ܠܵܐ ܠܒܼܝܼܟܼ ܠܹܟܼܝ ܗܵܐ ܥܲܡܹܗ ܐܲܢܬܿܝ: ܘܐܸܢܗ̤ܘ ܕܬܸܨܒܹܿܝܢ ܠܲܡܫܲܢܵܝܘܼ ܠܵܐ ܥܵܨܹ̇ܐ ܠܹܟܼܝ܀ ܗܵܐ ܡܩܲܕܫܵܢܵܐ ܕܛܲܡ̈ܐܹܐ ܩܵܐܹ̇ܡ ܘܲܡܣܲܟܹܿܐ ܠܹܟܼܝ: ܘܲܛܥܝܼܢ ܙܘܿܦܵܐ ܪܣܵܣܵܐ ܕܲܕܼܡܹܗ ܕܲܢܕܲܟܹܝܟܼܝ ܒܹܗ܀ ܐܸܢܗ̤ܘ ܕܬܸܦܢܹܝܢ ܡܸܦܢܵܐ ܨܹܐܕܼܵܘܗܝ ܒܹܗ ܚܵܠܹ̇ܛ ܠܹܟܼܝ: ܘܡܵܐ ܕܚܲܠ̣ܛܹܟܼܝ ܒܹܗ ܡܸܛܠܵܬܹܗ( 7 ) ܒܹܗ ܩܲܕܝܼܫܲܬܿܝ܀ ܡܸܬܼܩܲܕܫܵܐ ܗ̣̄ܝ ܓܹܝܪ ܠܵܐ ܡܗܲܝܡܲܢܬܵܐ ܒܡ̇ܢ ܕܲܡܗܲܝܡܸܢ: ܟܡܵܐ ܝܲܬܿܝܼܪܵܐ ܒܡܵܪܵܐ ܕܩܘܼ̈ܕܼܫܹܐ ܐܸܢ ܠܹܗ ܬܸܩܲܦ܀ ܒܲܬܼܝܵܒܼܘܼܬܼܵܐ ܥܵܐ̇ܠܵܐ ܢܲܦ̮ܫܵܐ ܨܹܝܕܼ ܐܲܠܵܗܵܐ: ܘܡܸܬܼܢܲܩܦܵܐ ܠܹܗ ܘܗܵܘ̇ܝܵܐ ܥܲܡܹܗ ܚܕܼܵܐ ܒܲܚܕܼܵܐ ܪܘܼܚ܀ ܘܐܲܝܟܼ ܕܐܸܬܼܩܲܒܿܠܲܬ̤ ܣܲܪܵܐ ܕܐܸܬܲܬ̤ ܡ̣ܢ ܒܹܝܬܼ ܦܸܪܥܘܿܢ: ܡܸܬܼܩܲܒܠܵܐ ܗ̤ܝ ܡ̣ܢ ܐܲܠܵܗܵܐ ܡܵܪܹܗ ܕܐܲܒܼܪܵܡ܀ ܡܹܐܬܼܵܐ ܬܹܐܬܹܝܢ ܘܗܵܘ̇ ܕܲܡܩܲܒܸܿܠ ܗܵܐ ܩܵܐܹ̇ܡ ܗ̄ܘ̣: ܘܲܡܠܸܐ ܚܢܵܢܵܐ ܘܲܦܬܼܝܼܚ ܬܲܪܥܹܗ ܠܐܲܝܢܵܐ ܕܐܵܬܹ̇ܐ܀ ܐܘܿ ܠܹܟܼܝ ܢܲܦ̮ܫܵܐ ܕܲܫܒܼܵܗ̇ ܥܵܠܡܵܐ ܒܲܖ̈ܓܼܝܼܓܼܵܬܹܗ: ܥܪܘܿܩܝ ܡ̣ܢ ܥܵܠܡܵܐ ܒܲܝܬܹܗ ܕܦܸܪܥܘܿܢ ܕܲܡܠܸܐ ܥܵܘ̣ܠܵܐ܀ pb. 656 ܠܵܐ ܢܸܒܼܣܲܡ ܠܹܟܼܝ ܗܵܘ̇ ܥܸܢܝܵܢܵܐ ܕܡܸܨܖ̈ܵܝܵܬܼܵܐ: ܐܲܪܦܵܝ ܐܸܢܹܝܢ ܠܲܖ̈ܓܼܝܼܓܼܵܬܼܵܐ ܢܘܼܟܼܖ̈ܵܝܵܬܼܵܐ܀ ܠܵܐ ܢܲܛܥܸܐ ܒܹܟܼܝ ܒܲܝܬܹܗ ܕܦܸܪܥܘܿܢ ܕܲܡܠܸܐ ܛܘܼ̈ܒܹܐ: ܥܵܠܡܵܐ ܕܐܝܼܬܼ ܒܹܗ ܢܝܵܚܹ̈ܐ ܒܝܼ̈ܫܹܐ ܕܠܵܐ ܫܲܪܝܼܪܝܼܢ܀ ܥܲܡ ܐܲܠܵܗܵܐ ܢܘܼܪܵܐ ܘܣܲܝܦܵܐ ܐܸܢ ܦܵܓܲܥ̇ ܒܹܟܼܝ: ܘܠܵܐ ܒܘܼ̈ܣܵܡܹܐ ܘܕܲܫ̈ܢܹܐ ܦܖ̈ܝܼܫܹܐ ܥܲܡ ܣܵܛܵܢܵܐ܀ ܐܵܡ̇ܪܵܐ ܒܟܹܐܒܹ̈ܝܗ̇ ܢܲܦ̮ܫܵܐ ܟܪܝܼܗܬܵܐ ܡܲܢ ܕܹܝܢ ܝܲܗ̣̄ܒܼ ܠܝܼ: ܗܵܠܹܝܢ ܫܘܼܦܖܹ̈ܐ ܕܲܠܒܼܝܼܫܵܐ ܗ̄ܘܹ̇ܝܬܼ ܥܲܕܼܠܵܐ ܐܸܚܛܸܐ܀ ܐܸܢ ܐܲܠܵܗܵܐ ܕܐܝܼܬܼ ܠܹܗ ܖ̈ܲܚܡܹܐ ܡܩܲܒܸܿܠ ܗ̄ܘ̣ ܠܝܼ: ܫܘܼܦܖ̈ܲܝ ܕܐܸܒܲܕܼܘ ܡܲܢ̣ܘܼ ܡܸܫܟܲܚ ܕܲܢܦܲܢܸܐ ܠܝܼ܀ ܟܝܵܢܝ ܫܲܦܝܼܪܵܐ ܗܵܘ̇ ܕܲܦܐܸܐ ܗ̄ܘ̣ܵܐ ܐܲܝܟܼ ܐܝܼܡܵܡܵܐ: ܕܲܚܫܸܟܼ ܘܲܕܼܥܸܟܼ ܡܲܢ ܡܲܢܗܲܪ ܠܹܗ ܕܢܸܗܘܸܐ ܫܲܦܝܼܪ܀ ܐܸܢ ܒܲܚܢܵܢܵܐ ܡܸܬܼܚܲܣܝܵܐ ܐ̄ܢܵܐ ܡ̣ܢ ܚܵܘ̈ܒܵܬܼܵܐ: ܥܲܠ ܗܵܘ̇ ܕܲܪܓܼܵܐ ܕܢܸܦ̇ܠܹܬܼ ܡܸܢܹܗ ܡܲܢ̣ܘܼ ܢܩܝܼܡ ܠܝܼ܀ ܡܸܫܒܲܩ ܒܲܠܚܘܿܕܼ ܐܸܢ ܫܵܒܹ̇ܩ ܠܝܼ ܟܠܡܵܐ ܕܲܚܛܹ̇ܝܬܼ: ܣܲܓܿܝܼ ܪܲܒܵܐ ܠܡܘܿܢ ܬܘܼܒܼ ܐܸܣܒܲܪ ܥܲܠ ܝܲܬܿܝܼܪܵܐ܀ ܗܵܘ̇ ܕܹܝܢ ܫܘܼܦܪܵܐ ܕܐܝܼܬܼ ܗ̄ܘ̣ܵܐ ܠܲܒܼܪܝܼܬܼܝ ܥܲܕܼܠܵܐ ܐܸܚܛܸܐ: ܐܲܝܟܵܐ ܡܸܟܹܝܠ ܚܵܙ̇ܝܵܐ ܐ̄ܢܵܐ ܠܹܗ ܡ̣ܢ ܕܐܵܘܒܸܿܕܬܹܗ܀ ܬܵܝ ܠܹܟܼܝ ܢܲܦ̮ܫܵܐ ܨܘܼܪܲܬܼ ܡܲܠܟܵܐ ܕܐܸܒܲܕܼ ܫܘܼܦܪܵܗ̇: ܗܵܐ ܒܐܝܼܕܼܵܘ̈ܗܝ ܗ̄ܘ̣ ܕܡܵܪܹܟܼܝ ܫܘܼܦܪܹܟܼܝ ܘܲܢܛܝܼܪ ܗ̄ܘ̣ ܠܹܟܼܝ܀ ܡܸܚܕܼܵܐ ܕܬܹܐܬܹܝܢ ܝܵܗܹ̇ܒܼ ܗ̄ܘ̣ ܠܹܟܼܝ ܐܲܝܟܼ ܕܐܲܪܦܝܼܬܹܝܘܗܝ: ܘܗ̤ܘ ܙܗܝܼܪ ܗ̄ܘ̣ܵܐ ܒܹܗ ܘܠܹܟܼܝ ܗ̄ܘ̣ ܢܛܝܼܪ ܠܹܗ ܕܢܸܬܼܦܲܢܸܐ ܠܹܟܼܝ܀ pb. 657 ܠܵܘ ܐܲܝܟܼ ܐܵܣܝܵܐ ܥܵܨܹ̇ܒܼ ܫܘܼܚܢܵܐ ܡܵܪܝܵܐ ܡܵܪܹܟܼܝ: ܕܐܵܣܝܵܐ ܡܲܪܦܸܐ ܫܘܼܡܬܼܵܐ ܒܓܼܘܼܫܡܵܐ ܡܵܐ ܕܡܲܚܠܸܡ ܠܹܗ܀ ܘܟܲܕܼ ܒܲܥܨܵܒܹ̈ܐ ܘܲܒܼܥܸܩܵܖܹ̈ܐ ܘܲܒܼܡܘܼ̈ܙܵܓܹܐ: ܠܓܼܘܼܫܡܵܐ ܡܫܲܓܸܫ ܕܠܵܐ ܬܸܗܘܸܐ ܒܹܗ ܫܘܼܡܬܼܵܐ ܠܲܓܼܡܵܪ܀ ܦܵܝ̇ܫܵܐ ܫܘܼܡܬܼܵܐ ܐܵܘ ܐܸܢ ܩܲܠܝܼܠ ܐܵܘ ܐܸܢ ܣܲܓܿܝܼ: ܕܠܵܐ ܡܨܸܐ ܐܵܣܝܵܐ ܕܢܸܥܒܸܿܕܼ ܓܘܼܫܡܵܐ ܐܲܝܟܼ ܩܲܕܼܡܵܝܵܐ܀ ܢܲܦ̮ܫܵܐ ܟܪܝܼܗܬܵܐ ܐܸܢ ܠܐܲܠܵܗܵܐ ܬܚܵܘܹܝܢ ܫܘܼܚܢܹܟܼܝ: ܡܵܐ ܕܥܵܨܹ̇ܒܼ ܠܹܗ ܫܘܼܡܬܼܵܐ ܒܓܼܘܼܫܡܹܟܼܝ ܠܵܐ ܡܲܪܦܸܐ ܠܵܗ̇܀ ܠܵܘ ܐܲܝܟܼ ܐܵܣܝܵܐ ܦܵܣܹ̇ܩ ܒܸܣܪܵܐ ܡ̣ܢ ܗܲܕܵܡܹ̈ܐ: ܕܬܸܗܘܸܐ ܫܘܼܡܬܼܵܐ ܒܕܼܘܼܟܿܬܼܵܐ ܕܲܫܩܝܼܠ ܒܸܣܪܵܐ ܡܸܢܵܗ̇܀ ܗ̤ܘ ܡ̣ܢ ܦܲܓܼܪܹܗ ܕܝܼܠܹܗ ܣܵܐܹ̇ܡ ܠܲܚܒܼܵܖ̈ܵܬܼܵܐ: ܘܥܲܡܹܗ ܕܓܼܘܼܫܡܵܐ ܡܲܫܘܸܐ ܠܫܘܼܚܢܵܐ ܡܵܐ ܕܡܲܚܠܸܡ ܠܹܗ܀ ܡܵܐ ܕܲܚܒܲܪܬܼܵܐ ܥܵܡ̇ܩܵܐ ܕܬܸܗܘܸܐ ܚܲܠܵܕܝܼܬܼܵܐ: ܣܪܲܓܼ ܒܵܗ̇ ܦܲܓܼܪܹܗ ܬܸܩܢܲܬ̤ ܩܵܡܲܬ̤ ܓܘܼܫܡܵܐ ܓܲܐܝܵܐ܀ ܠܵܘ ܥܸܩܵܖܹ̈ܐ ܐܵܘ ܚܲܡܝܼ̈ܡܹܐ ܐܵܘ ܩܲܪܝܼܖܹ̈ܐ: ܡܡܲܙܸܓܼ ܥܵܒܹ̇ܕܼ ܣܲܡܵܐ ܠܫܘܼ̈ܚܢܹܐ ܕܢܸܥܨܘܿܒܼ ܐܸܢܘܿܢ܀ ܓܘܼܫܡܹܗ ܡܢܲܬܸܫ ܒܚܘܼܒܹܗ ܘܣܵܐܹ̇ܡ ܥܲܠ ܡܲܚ̈ܘܵܬܼܵܐ: ܥܒܼܵܕܼܵܐ ܚܲܕܼܬܼܵܐ ܕܠܵܐ ܐ̄ܢܵܫ ܥܲܒܼܕܹܗ ܐܸܠܵܐ (ܐܸܢ ܗ̤ܘ( 8 )܀ ܐܲܝܟܵܐ ܚܙܸܐ ܠܟܼܘܿܢ ܐܵܣܝܵܐ ܕܦܲܓܼܪܹܗ ܠܫܘܼܚ̈ܢܹܐ ܣܵܐܹ̇ܡ: ܐܸܠܵܐ ܡܵܪܲܢ ܕܝܵܨܹ̇ܦ ܘܥܵܨܹ̇ܒܼ ܠܲܡ̈ܡܲܚܲܝܵܐ܀ pb. 658 ܕܡܵܐ ܡ̣ܢ ܦܲܓܼܪܵܐ ܫܵܩ̇ܠܝܼܢ ܟܠܗܘܿܢ ܐܵܣܵܘ̈ܵܬܼܵܐ: ܘܗܵܢܵܐ ܐܵܣܝܵܐ ܗ̤ܘ ܪܵܡܹ̇ܐ ܕܡܹܗ ܠܲܚܒܼܵܖ̈ܵܬܼܵܐ܀ ܡܲܢ̣ܘܼ ܐܵܣܝܵܐ ܕܲܕܼܡܹܗ ܒܫܘܼ̈ܚܢܹܐ ܦܫܝܼܩ ܠܹܗ ܢܲܪܡܸܐ: ܐܸܠܵܐ ܡܫܝܼܚܵܐ ܕܲܬܼܪܲܥ̣ ܣܸܛܪܹܗ ܘܒܲܕܼܡܹܗ ܥܲܨܒܲܢ܀ ܐ̄ܚܖ̈ܵܢܹܐ ܫܵܩ̇ܠܝܼܢ ܗ̤ܘ ܕܹܝܢ ܝܵܗܹ̇ܒܼ ܕܲܦܫܝܼܩ ܗ̄ܘ̣ ܠܹܗ: ܕܲܕܼܡܹܗ ܢܸܬܸܿܠ ܕܬܸܬܼܐܲܣܸܐ ܒܹܗ ܒܪܝܼܬܼܵܐ ܟ̱ܠܵܗ̇܀ ܦܲܓܼܪܹܗ ܠܫܘܼ̈ܚܢܹܐ ܘܲܕܼܡܹܗ ܪܵܡܹ̇ܐ ܠܲܚܒܼܵܖ̈ܵܬܼܵܐ: ܘܠܵܐ ܡܸܬܼܝܲܕܼܥܵܐ ܫܘܼܡܬܼܵܐ ܕܥܵܘ̣ܠܵܐ ܒܢܲܦ̮ܫܵܐ ܡܸܡܬܼܘܿܡ܀ ܒܪܝܼܬܼܵܐ ܚܕܲܬܵܐ ܡܩܝܼܡ ܫܘܼܒܼܩܵܢܵܐ ܕܡ̣ܢ ܐܲܠܵܗܵܐ: ܘܐܲܝܟܼ ܕܲܡܟܼܵܢܵܐ ܢܲܦ̮ܫܵܐ ܒܫܘܼܦܖܹ̈ܝܗ̇ ܚܵܙ̇ܝܵܐ ܐܲܦܵܘ̈ܗܝ܀ ܒܫܘܼܚܢܵܐ ܕܥܵܨܹ̇ܒܼ ܠܵܐ ܡܲܪܦܸܐ ܒܹܗ ܫܘܼܡܬܼܵܐ ܠܲܓܼܡܵܪ: ܕܠܵܐ ܡܸܬܼܝܲܕܼܥܵܐ ܕܘܼܟܿܬܹܗ ܕܫܘܼܚܢܵܐ ܡܵܐ ܕܡܲܚܠܸܡ ܠܹܗ܀ ܟ̱ܠܹܗ ܫܘܼܦܪܵܐ ܕܐܝܼܬܼ ܠܲܟܼܝܵܢܵܐ ܡܸܬܼܦܲܢܸܐ ܠܹܗ: ܕܢܹܐܡܲܪ ܡܵܪܝܵܐ ܗܵܐ ܛܵܒܼ ܫܲܦܝܼܪ ܐܲܝܟܼ ܕܐܸܡ̣ܲܪ ܗ̄ܘ̣ܵܐ܀ ܒܲܬܼܝܵܒܼܘܼܬܼܵܐ ܒܪܝܼܬܹܗ ܡܚܲܕܸܬܼ ܡ̣ܢ ܫܘܼܒܼܩܵܢܵܐ: ܘܠܵܐ ܡܲܪܦܸܐ ܒܵܗ̇ ܫܘܼܡܬܼܵܐ ܕܥܵܘ̣ܠܵܐ ܕܬܸܗܘܸܐ ܣܲܢܝܵܐ܀ ܐܲܝܟܼ ܐܲܠܵܗܵܐ ܠܵܘ ܐܲܝܟܼ ܐܵܣܝܵܐ ܥܵܨܹ̇ܒܼ ܫܘܼܚܢܵܐ: ܐܲܠܵܗܵܐ ܓܹܝܪ ܡܸܒܼܪܵܐ ܒܵܪܹܐ ܘܲܦܫܝܼܩ ܗ̄ܘ̣ ܠܹܗ܀ ܗ̤ܘ ܗܵܘ̇ ܫܘܼܦܪܵܐ ܕܝܲܗ̣̄ܒܼ ܠܲܟܼܝܵܢܵܐ ܟܲܕܼ ܒܵܪܹܐ ܠܹܗ: ܗ̤ܘ ܡܲܩܢܸܐ ܠܹܗ ܒܲܬܼܝܵܒܼܘܼܬܼܵܐ ܡܵܐ ܕܫܵܒܼܹ̇ܩ ܠܹܗ܀ ܘܐܸܠܘܼ ܐܲܪܦܝܼ ܫܘܼܡܬܼܵܐ ܚܸܣܕܵܐ ܗ̄ܘ̣ ܠܲܕܼܩܵܢܹ̇ܐ ܠܵܗ̇܀ pb. 659 ܐܸܢܗ̤ܘ ܕܡܲܪܦܸܐ ܫܘܼܡܬܼܵܐ ܒܢܲܦ̮ܫܵܐ ܡܵܐ ܕܥܵܨܹ̇ܒܼ ܠܵܗ̇: ܗ̤ܘ ܡܸܬܼܚܲܣܲܕܼ ܕܐܲܣ̣ܝܼ ܫܘܼܚܢܵܐ ܘܡܘܼܡܹܗ( 9 ) ܩܲܝܵܡ܀ ܘܡܸܬܼܡܲܠܲܠ ܗ̄ܘ̣ܵܐ ܕܐܵܘ ܡܸܫܟܵܚܘܼ ܠܵܐ ܡܸܫܟܲܚ ܗ̄ܘ̣ܵܐ: ܐܵܘ ܒܝܼܫܘܼܬܼܵܐ ܗ̣̄ܝ ܕܐܲܣ̣ܝܼ ܫܘܼܚܢܵܐ ܘܐܲܪܦܝܼ ܡܘܼܡܵܐ܀ ܠܫܘܼܒܼܚܵܐ ܫܵܘܹ̇ܐ ܘܟܸܫ̈ܠܹܐ ܘܡܲܡ̈ܠܠܹܐ ܫܩܝܼܠܝܼܢ ܐܸܢܘܿܢ: ܡ̣ܢ ܝܑܼܕܲܥܬܹܗ ܡܲܠܝܲܬܼ ܖ̈ܲܚܡܹܐ ܕܠܵܐ ܡܸܬܼܥܲܕܼܠܵܐ܀ ܗܘ̤ܵܐ( 10 ) ܗ̄ܘ̣ܵܐ ܫܘܼܚܢܵܐ ܒܢܲܦ̮ܫܹܗ ܕܫܸܡܥܘܿܢ ܪܹܫ ܬܲܠܡܝܼ̈ܕܹܐ: ܕܥܵܘ̣ܠܵܐ ܟܡܸܢ ܠܹܗ ܘܐܲܪܡܝܼ ܬܲܒܪܹܗ ܒܟܼܵܦܘܿܪܘܼܬܼܵܐ܀ ܘܟܲܕܼ ܐܸܬܼܓܵܘܲܣ ܒܲܬܼܝܵܒܼܘܼܬܼܵܐ ܘܐܲܝܬܝܼ ܕܸܡ̈ܥܹܐ: ܥܲܨܒܹܿܗ ܡܫܝܼܚܵܐ ܘܫܘܼܦܪܹܗ ܝܲܗ̣̄ܒܼ ܠܹܗ ܗܵܘ̇ ܩܲܕܼܡܵܝܵܐ܀ ܥܲܕܼܠܵܐ ܢܸܚܛܸܐ ܥܒܼܝܼܕܼ ܗ̄ܘ̣ܵܐ ܪܹܫܵܐ ܠܬܲܠܡܝܼܕܼܘܼܬܼܵܐ: ܘܒܼܵܬܲܪ ܕܲܟܼܦܲܪ ܒܲܬܼܝܵܒܼܘܼܬܼܵܐ ܕܘܼܟܿܬܹܗ ܝܲܗ̣̄ܒܼ ܠܹܗ܀ ܠܵܐ ܐܲܚܬܹܗ ܗ̄ܘ̣ܵܐ ܕܢܸܗܘܸܐ ܕܚܲܡܫܵܐ ܐܵܘ ܕܲܬܼܠܵܬܼܵܐ: ܐܸܠܵܐ ܒܕܲܪܓܹܗ ܗܵܘ̇ ܩܲܕܼܡܵܝܵܐ ܣܠܸܩ̣ ܐܲܩܝܼܡܹܗ܀ ܥܲܕܼܠܵܐ ܢܸܟܼܦܘܿܪ ܪܲܒ ܒܲܝܬܵܐ ܗ̄ܘ̣ܵܐ ܘܲܟܼܦܲܪ ܘܲܢܦܲܩ̣: ܘܲܕܿܬܵܒܼ ܐܲܥ̣ܠܹܗ ܘܐܵܘܣܸܦ̣ ܝܲܗ̣̄ܒܼ ܠܹܗ ܥܵܢܹ̈ܗ ܕܢܸܪܥܹܝܗ̇܀ ܝܲܗ̣̄ܒܼ ܠܹܗ ܩܠܝܼܕܼܵܘ̈ܗܝ ܗܵܠܹܝܢ ܕܐܵܘܒܸܿܕܼ ܟܲܕܼ ܟܵܦܲܪ ܗ̄ܘ̣ܵܐ: ܘܐܵܘܣܸܦ̣ ܠܹܗ ܬܘܼܒܼ ܐܸܡܖܹ̈ܐ ܘܥܸܖ̈ܒܹܐ ܘܲܢ̈ܩܵܘܵܬܼܵܐ܀ ܐܲܟܼܡܵܐ ܕܫܘܼܦܪܵܐ ܐܸܬܿܬܵܘܣܲܦ ܠܹܗ ܒܲܬܼܝܵܒܼܘܼܬܼܵܐ: ܐܵܘܣܸܦ̣ ܗ̄ܘ̣ܵܐ ܠܹܗ ܐܵܦ ܫܘܼܠܛܵܢܵܐ ܒܥܵܢ̈ܵܐ ܕܐܸܫܟܲܚ܀ pb. 660 ܪܲܚܡ̣ܵܗ̇ ܠܥܵܢܹ̈ܗ ܘܡܝܼܬܼ ܥܲܠ ܐܲܦܹ̈ܝܗ̇ ܒܲܪ ܐܲܠܵܗܵܐ: ܘܝܲܗ̣ܒܵܗ̇ ܠܫܸܡܥܘܿܢ ܕܲܬܼܟܼܝܼܠ ܗ̄ܘ̣ܵܐ ܥܠܵܘܗܝ ܕܲܡܢܲܛܲܪ ܠܵܗ̇܀ ܘܗܵܢܵܐ ܓܲܒܼܪܵܐ ܬܲܠܡܝܼܕܼܵܗ̇ ܗ̄ܘ̣ ܕܲܬܼܝܵܒܼܘܼܬܼܵܐ: ܘܗ̤ܝ ܐܲܥܸܠܬܹܗ ܕܲܢܦܲܩ̣ ܗ̄ܘ̣ܵܐ ܠܹܗ ܐܸܠܘܼ ܠܵܐ ܗ̤ܝ܀ ܟܦܲܪ ܗ̄ܘ̣ܵܐ ܒܡܵܪܹܗ ܘܝܼܡ̣ܵܐ ܘܐܲܚܪܸܡ̣ ܕܠܵܐ ܝܵܕܲܥ̇ ܠܹܗ: ܘܲܪܓܸܙ ܘܲܢܦܲܩ̣ ܡܸܢܹܗ ܕܒܲܝܬܵܐ (ܘܗܵܐ ܐܸܙܲܠ̣( 11 ) ܠܹܗ܀ ܘܲܬܼܝܵܒܼܘܼܬܼܵܐ ܪܸܗܛܲܬ̤ ܒܵܬܼܪܹܗ ܟܲܕܼ ܥܵܪܹܩ ܗ̄ܘ̣ܵܐ: ܘܐܲܥܛܸܦܬܹܗ ܗ̄ܘ̣ܵܬܼ ܘܥܲܠ ܐܸܣܟܿܘܼܦܬܹܗ ܕܡܵܪܹܗ ܢܸܒܼܪܘܿܟܼ܀ ܘܐܲܠܸܦܬܹܗ ܗ̄ܘ̣ܵܬܼ ܕܢܲܝܬܸܐ ܕܸܡ̈ܥܹܐ ܚܠܵܦ ܩܘܼܖ̈ܒܵܢܹܐ: ܘܲܫܩܲܠ̣ ܘܐܲܝܬܝܼ ܐܲܝܟܼ ܕܐܸܬܼܚܲܟܲܡ ܒܲܬܼܝܵܒܼܘܼܬܼܵܐ܀ ܘܡܸܚܕܼܵܐ ܕܐܸܬܼܵܐ ܚ̣ܵܪ ܒܹܗ ܡܫܝܼܚܵܐ( 12 ) ܘܲܗܘ̤ܵܐ ܫܲܦܝܼܪ: ܘܐܲܟܼܡܵܐ ܕܠܲܓܼܡܵܪ ܠܵܐ ܟܦܝܼܪ ܗ̄ܘ̣ܵܐ ܠܹܗ ܚܲܠ̣ܛܹܗ ܥܲܡܹܗ܀ ܘܒܼܵܬܲܪ ܗܵܟܲܢ ܟ̱ܠܵܗ̇ ܥܵܢ̈ܵܐ ܕܡܝܼܬܼ ܥܲܠ ܐܲܦܹ̈ܝܗ̇: ܠܹܗ ܝܲܗ̣ܒܵܗ̇ ܗ̄ܘ̣ܵܐ ܐܲܝܟܼ ܕܲܠܪܵܚ̇ܡܵܐ ܕܠܵܐ ܚܛܵܐ ܡܸܡܬܼܘܿܡ܀ ܘܲܠܬܲܝܵܒܹ̈ܐ ܥܲܒܼܕܹܗ ܨܘܼܪܬܵܐ ܐܵܦ ܡܲܚܙܝܼܬܼܵܐ: ܕܲܗܘ̤ܵܘ ܝܵܕܼܥ̇ܝܼܢ ܡܵܢܵܐ ܗ̄ܘ̣ ܚܲܝܠܵܗ̇ ܕܲܬܼܝܵܒܼܘܼܬܼܵܐ܀ ܘܲܒܼܗܵܘ̇ ܫܘܼܦܪܵܐ ܕܐܝܼܬܼ ܠܲܟܼܝܵܢܵܐ ܥܲܕܼܠܵܐ ܢܸܚܛܸܐ: ܡܸܚܕܼܵܐ ܕܬܼܵܐܹ̇ܒܼ ܥܵܐܹ̇ܠ ܩܵܐܹ̇ܡ ܒܹܝܬܼ ܐܲܠܵܗܵܐ܀ ܘܲܒܼܚܲܛܵܝܵܐ ܕܬܼܵܐܹ̇ܒܼ ܚܵܕܼܝܢ ܐܵܦ ܡܲܠܲܐܟܹ̈ܐ: pb. 661 ܥܲܠ ܕܐܸܫܬܲܟܚܲܬ̤ ܨܘܼܪܬܹܗ ܕܡܲܠܟܵܐ ܕܐܲܒܿܝܼܕܼܵܐ ܗ̄ܘ̣ܵܬܼ܀ ܡܸܟܹܝܠ ܢܲܦ̮ܫܵܐ ܗܵܐ ܬܟܼܝܼܠܵܐ ܐܲܢ̄ܬܿܝ ܘܫܲܪܝܼܪܵܐ ܠܹܟܼܝ: ܕܡܸܬܼܦܲܢܸܐ ܗ̄ܘ̣ ܠܹܟܼܝ ܫܘܼܦܪܹܟܼܝ ܬܵܝ ܠܹܟܼܝ ܨܹܝܕܼ ܐܲܠܵܗܵܐ܀ ܐܲܝܟܼ ܕܐܸܬܼܦܲܢܝܼ ܠܫܸܡܥܘܿܢ ܪܹܫܵܐ( 13 ) ܕܲܫܠܝܼܚܘܼܬܼܵܐ: ܡܸܬܼܦܲܢܸܐ ܠܹܟܼܝ ܟ̱ܠܹܗ ܫܘܼܦܪܵܐ ܗܵܘ̇ ܕܲܟܼܝܵܢܹܟܼܝ܀ ܘܐܲܝܟܼ ܕܐܸܬܼܩܲܕܫܲܬ̤ ܣܲܪܵܐ ܒܓܲܒܼܪܵܗ̇ ܡ̣ܢ ܛܲܡܐܘܼܬܼܵܐ: ܡܩܲܕܸܫ ܐܵܦ ܠܹܟܼܝ ܡܵܪܹܗ ܕܐܲܒܼܪܵܡ ܡ̣ܢ ܒܝܼ̈ܫܵܬܹܟܼܝ܀ ܣܕܲܩ̣ ܗ̄ܘ̣ܵܐ ܦܸܪܥܘܿܢ ܫܵܘܬܵܦܘܼܬܼܵܐ ܕܒܹܝܬܼ ܐܲܒܼܪܵܗܵܡ: ܘܒܲܛܪܘܼܢܘܼܬܹܗ ܦܫܲܚ̣ ܗܲܕܵܡܵܐ ܕܦܲܓܼܪܵܐ ܢܲܟܼܦܵܐ܀ ܐܵܦ ܠܹܟܼܝ ܫܲܩ̣ܠܹܟܼܝ ܒܝܼܫܵܐ ܘܣܲܕܩܹܟܼܝ ܡ̣ܢ ܐܲܠܵܗܵܐ: ܘܢܲܟܼܪܝܼ ܦܲܪܫܹܟܼܝ ܡ̣ܢ ܚܘܼܠܛܵܢܵܐ ܕܗܵܝ̇ ܪܲܒܿܘܼܬܼܵܐ܀ ܦܢܵܬ̤ ܕܹܝܢ ܣܲܪܵܐ ܘܐܸܬܼܵܐ ܠܕܘܼܟܿܬܹܗ ܐܵܦ ܗܲܕܵܡܵܐ: ܘܲܬܼܩܸܢ( 14 ) ܓܘܼܫܡܵܐ ܕܲܡܕܼܵܘܲܕܼ ܗ̄ܘ̣ܵܐ ܠܗܵܘ̇ ܡܸܨܪܵܝܵܐ܀ ܗܵܟܲܢ ܐܵܦ ܐܲܢ̄ܬܿܝ ܐܸܢ ܡܸܬܼܦܲܢܝܲܬܿܝ ܨܹܝܕܼ ܐܲܠܵܗܵܐ: ܡܲܬܼܩܸܢ ܠܹܟܼܝ ܒܹܗ ܘܲܡܚܲܠܸܛ ܠܹܟܼܝ ܥܲܡ ܪܲܒܿܘܼܬܹܗ܀ ܘܣܸܕܼܩܵܐ ܕܲܥ̣ܒܲܕܼ ܒܝܼܫܵܐ ܒܹܝܬܼ ܠܹܟܼܝ ܘܲܠܐܲܠܵܗܵܐ: ܐܲܝܟܼ ܡܵܐ ܕܠܵܐ ܗܘ̤ܵܐ ܐܵܦܠܵܐ ܡܸܗܘܵܐ ܗܵܘܹ̇ܐ ܠܲܝܬܵܘܗܝ܀ ܠܵܘ ܓܲܝܵܪܬܵܐ ܚܫܝܼܒܼܵܐ ܣܲܪܵܐ ܒܹܝܬܼ ܐܲܒܼܪܵܗܵܡ: ܕܐܸܙܲܠ̄ܬ̤ ܘܐܸܬܲܬ̤ ܘܲܗܘ̤ܵܬܼ ܚܹܐܪܬܼܵܐ ܐܲܝܟܼ ܠܵܐ ܐܸܙܲܠ̄ܬ̤܀ ܡܸܚܕܼܵܐ ܕܐܸܬܲܬ̤ ܠܵܐ ܐܸܬܼܚܲܫܒܲܬ̤ ܐܵܦܠܵܐ ܕܐܸܙܲܠ̄ܬ̤: 662 ܕܫܵܘܬܵܦܘܼܬܼܵܐ ܕܓܲܒܼܪܵܐ ܟܹܐܢܵܐ ܕܟܼܝܼܬܼܵܐ ܥܒܲܕܬܼܵܗ̇܀ ܐܵܦ ܗܘ݀ ܫܸܡܥܘܿܢ ܡܼܢ ܕܲܟܼܦܲܪ ܗ̄ܘܼܵܐ ܡܸܚܕܼܵܐ ܕܐܸܬ݀ܵܐ: ܘܐܲܪܡܝܼ ܕܸܡ̈ܥܹܐ ܐܲܝܟܼ ܠܵܐ ܟܦܝܼܪ ܠܹܗ ܐܸܬܼܩܲܒܲܠ ܗ̄ܘܼܵܐ܀ ܐܵܦ ܐܲܢ̄ܬܿܝ ܢܲܦ̮ܫܵܐ ܐܸܢܗ݀ܘ ܕܬܸܦܢܹܝܢ ܨܹܝܕܼ ܐܲܠܵܗܵܐ: ܐܲܝܟܼ ܠܵܐ ܚܛܸܐ ܠܹܟܼܝ ܡܸܚܛܵܐ ܠܲܓܼܡܵܪ ܗܵܘܹ̇ܐ ܥܲܡܹܟܼܝ܀ ܒܵܬܲܪ ܕܲܗܘ݀ܵܬܼ ܣܲܪܵܐ ܕܟܼܝܼܬܼܵܐ ܒܹܝܬܼ ܥܵܘܵܠܵܐ: ܘܲܗܘ݀ܵܐ ܥܲܡܵܗ̇ ܒܢܸܩܦܵܐ ܕܪܲܚܝܼܩ ܡܼܢ ܐܲܠܵܗܵܐ܀ ܘܝܸܬܼܒܲܬܸ ܒܲܫܡܹܗ ܥܲܠ ܛܲܡܐܘܼܬܼܵܐ ܒܨܲܥܪܵܐ ܪܲܒܵܐ: ܘܐܸܬܸܦܲܪܫܬܸ ܗ̄ܘܼܵܬܼ ܡܼܢ ܐܲܒܼܪܵܗܵܡ ܓܲܒܼܪܵܐ ܟܹܐܢܵܐ܀ ܘܥܲܒܼ̈ܕܲܝ ܦܸܪܥܘܿܢ ܬܲܒܼܥܘܼܗ̇ ܥܝܲܕܹ̈ܐ ܕܡܸܨܪ̈ܵܝܵܬܼܵܐ: ܘܗܘ݀ ܡܸܨܪܵܝܵܐ ܐܲܝܟܲܢ ܕܲܨܒܼܵܐ ܡܕܲܒܲܪ ܗ̄ܘܼܵܐ ܠܵܗ̇܀ ܘܟܹܐܡܲܬܼ ܥܲܡܹܗ ܐܲܝܟܼ ܡܸܨܪܵܝܬܵܐ ܠܥܲܪܣܹܗ ܣܸܠܩܲܬ݀: ܘܗܵܐ ܬܹܐܒܲܕܼ ܠܵܗ̇ ܡܼܢ ܐܲܠܵܗܵܐ ܘܡܼܢ ܐܲܒܼܪܵܗܵܡ܀ ܦܢܵܬܸ ܠܐܲܒܼܪܵܗܵܡ ܘܲܬܼܩܸܢ ܡܸܕܸܡ ܕܲܡܚܲܒܲܠ ܗ̄ܘܼܵܐ: ܘܐܲܝܟܼ ܡܵܐ ܕܠܵܐ ܗ݀ܘܲܝ̈ ܗܵܠܹܝܢ ܕܲܗ݀ܘܲܝ̈ ܒܹܝܬܼ ܡܸܨܪ̈ܵܝܹܐ܀ ܘܲܠܒܲܪܬܼ ܙܵܘܓܹܗ ܩܲܒܸܿܠ̣ ܟܹܐܢܵܐ ܕܠܵܐ ܪܘܼܥܵܡܵܐ: ܘܲܚܕܼܝܼ ܕܐܸܬܲܬܸ ܘܲܒܼܛܸܠ̣ ܗܵܠܹܝܢ ܕܐܸܫܬܲܡܲܥ ܗ̄ܘܲܝ̈܀ ܐܵܦ ܐܲܠܵܗܵܐ ܒܵܬܲܪ ܕܲܦܢܵܬܸ ܡܼܢ ܒܹܝܬܼ ܦܸܪܥܘܿܢ: ܝܲܗ̄ܒܼ ܠܵܗ̇ ܠܐܝܼܣܚܵܩ ܡܼܢ ܐܲܒܼܪܵܗܵܡ ܓܲܒܪܵܐ ܟܹܐܢܵܐ܀ ܚܵܘܝܼ ܡܵܪܝܵܐ ܕܕܲܟܼܝܵܐ ܣܲܪܵܐ ܡܼܢ ܛܲܡܐܘܼܬܼܵܐ: ܒܲܒܼܪܵܐ ܕܝܲܗ̄ܒܼ ܠܵܗ̇ ܕܐܝܼܬܼܵܘܗܝ ܝܵܪܬܵܐ ܘܒܲܪ ܡܘܼܠܟܵܢܵܐ܀ ܘܲܟܼܒܲܪ ܣܲܪܵܐ ܕܡܘܼܬܼܵܐ ܘܨܘܼܪܬܵܐ ܕܢܲܦ̮ܫܵܐ ܐܝܼܬܹܝܗ̇: pb. 663 ܘܥܲܠܗܵܝ̇ ܐܸܙܲܠܬ݀ ܘܥܲܠܗܵܝ̇ ܐܸܬܲܬ݀ ܨܹܝܕܼ ܐܲܒܼܪܵܗܵܡ܀ ܕܬܸܗܘܸܐ ܡܲܬܼܠܵܐ ܠܢܲܦ̮ܫܵܐ ܕܗܵܦ̇ܟܵܐ 15 : ܡܼܢ ܒܝܼ̈ܫܵܬܼܵܐ: ܕܡܸܚܕܼܵܐ ܕܦܵܢ̇ܝܵܐ ܨܹܝܕܼ ܐܲܠܵܗܵܐ ܡܩܲܒܸܠ ܗ̄ܘܼ ܠܵܗ̇܀ ܘ:ܡܚܲܣܸܐ ܠܵܗ̇ ܘܲܡܕܲܟܸܿܐ ܠܵܗ̇ ܘܲܡܩܲܕܸܫ ܠܵܗ̇: ܘܠܵܒܼ݁ܫܵܐ ܘܩܵܝ̇ܡܵܐ ܒܟܼܠܗܘܿܢ ܫܘܼܦܪܹ̈ܐ ܕܲܡܟܼܵܢܝܼܢ ܒܵܗ̇܀ ܐܵܦ ܫܘܼܘ̈ܕܵܝܹܐ ܐܵܦ ܡܘܼܠܟܵܢܹ̈ܐ ܕܐܝܼܬܼ ܠܐܲܠܵܗܵܐ: ܠܲܓܼܡܝܼܪܘܼܬܼܵܐ ܝܵܗܹ̇ܒܼ ܗ̄ܘܼܵܐ ܠܗܘܿܢ ܠܲܬܼܝܵܒܼܘܼܬܼܵܐ܀ ܐܵܦܠܵܐ ܡܸܕܸܡ ܡܼܢ ܡܘܼܠܟܵܢܹ̈ܐ ܟܵܠܹ̇ܐ ܡܸܢܵܗ̇: ܐܲܟܡܵܐ ܕܠܵܐ ܟܠ̣ܵܐ ܠܣܲܪܵܐ 16 : ܕܢܸܦܩܲܬܸ ܡܼܢ ܛܲܡܐܘܼܬܼܵܐ܀ ܠܲܒܸܒܼܝ ܝܵܬܹܟܼܝ ܢܲܦ̮ܫܵܐ ܕܢܸܦܠܲܬ݀ ܡܼܢ ܐܲܠܵܗܵܐ: ܘܩܘܼܡܝ ܬܵܝ ܨܹܐܕܼܵܘܗܝ ܕܲܨܠܝܼܒܼ ܘܩܵܐܹ̇ܡ ܘܲܡܣܲܟܸܿܐ ܠܹܟܼܝ܀ ܟ̱ܠܹܗ ܝܵܘܡܵܐ ܦܫܝܼ̈ܛܵܢ ܐܝܼܕܼܵܘ̈ܗܝ ܒܲܨܠܝܼܒܼܘܼܬܼܵܐ: ܘܗܵܐ ܠܹܟܼܝ ܚܵܐܲܪ ܕܬܹܐܙܠ̄ܝܼܢ ܥܲܡܹܗ ܠܐܲܬܼܪܹܗ 17 : ܕܐܲܒܼܘܼܗܝ܀ ܡܼܢ ܒܹܝܬܼ ܚܲܫܹ̈ܐ ܩܥ̣ܵܐ ܒܲܙܩܝܼܦܵܐ ܒܩܵܠܵܐ ܪܵܡܵܐ: ܕܬܹܐܬܹܝܢ ܬܸܦܩܝܼܢ ܡܼܢ ܒܹܝܬܼ ܦܸܪܥܘܿܢ ܛܲܡܐܵܐ ܕܲܫܒܼܵܟܼܝ܀ ܥܢܵܐܝܼܘܗܝ ܢܲܦ̮ܫܵܐ ܕܗܵܐ ܛܥܝܼܢ ܝܘܼܩܪܵܐ ܡܸܛܠܵܬܹܟܼܝ: ܘܐܸܡܲܪܝ ܐܹܝܢ ܡܵܪܝ ܥܲܡܵܟܼ ܐܹܙܲܠ ܠܟܲܪ ܕܐܵܙܹ̇ܠ ܐܲܢ̄ܬܿ܀ ܟܦܝܼܪ ܒܹܗ ܒܦܸܪܥܘܿܢ ܘܲܒܼܦܲܛܒܼܵܓܼܵܘ̈ܗܝ ܘܲܒܼܦܵܬܼܘܿܪܹܗ: ܘܲܒܼܡܹܐ̈ܟܼܠܵܬܹܗ ܪܹ̈ܫܵܝܵܬܼܵܐ ܕܡܵܘܬܵܐ ܡܲܠ̈ܝܵܢ܀ pb. 664 ܟܦܝܼܪ ܒܹܗ ܒܥܵܠܡܵܐ ܘܲܒܼܣܝܼܪ ܥܘܼܬܼܪܹܗ ܘܲܪ̈ܓܼܝܼܓܼܵܬܹܗ: ܘܐܵܦ ܒܩܸܢܝܵܢܹܗ ܘܲܫܡܹܗ ܘܫܘܼܒܼܚܹܗ ܘܪܹܫܵܢܘܼܬܹܗ܀ ܟܦܝܼܪ ܒܐܵܦܲܕܼ̈ܢܹܐ ܐܸܢ ܪܲܚܝܼܩܝܼܢ ܡܼܢ ܥܸܢܝܵܢܵܟܼ: ܘܲܒܼܒܼܝܼܪ̈ܵܬܼܵܐ ܐܸܢ ܒܲܨܠܝܼܒܼܵܟܼ ܠܵܐ ܥܲܬܿܝܼܪ̈ܵܢ܀ ܩܢܝܼܢܝ ܕܲܦܪܲܩܬܵܢܝ ܘܲܫܒܼܵܢܝ ܫܲܒܵܝ ܡܼܢ ܕܐܲܪܦܝܼܬܵܢܝ: ܥܘܿܠ ܐܲܦܸܩܲܝܢܝ ܡܼܢ ܒܹܝܬܼ ܦܸܪܥܘܿܢ ܘܐܸܗܘܸܐ ܥܲܡܵܟܼ܀ ܠܝܼ ܠܵܐ ܬܚܘܼܬ ܐܹܬܸܐ ܠܘܵܬܼܵܟܼ ܕܲܡܚܝܼܠܐ ܐ̄ܢܵܐ: ܐܲܢ̄ܬܿ ܬܵܐ ܨܹܐܕܲܝ ܘܲܫܒܼܝܼܢܝ ܡܸܢܹܗ ܕܛܲܡܐܵܐ ܕܲܫܒܼܵܢܝ܀ ܢܲܦ̮ܫܵܐ ܕܚܲܒܿܠ̣ܵܗ̇ ܥܵܠܡܵܐ ܒܲܪ̈ܓܼܝܼܓܼܵܬܼܵܐ: ܦܢܵܝ ܘܐܸܡܲܪܝ ܠܹܗ ܠܡܵܪܝܵܐ ܡܵܪܹܟܼܝ ܚܲܨܝܼܦܵܐܝܼܬܼ܀ ܫܒܼܵܢܝ ܡܸܨܪܵܝܵܐ ܘܚܲܒܸܿܠ̣ ܚܹܐܪܘܼܬܼܝ ܘܐܵܘܒܸܿܕܼ ܕܲܟܼܝܼܘܼܬܼܝ: ܘܲܒܼܛܲܡܐܘܼܬܼܵܐ ܕܥܵܘܼܠܵܐ ܝܸܬܿܒܲܬܼ ܥܲܡ ܥܲܘ̈ܵܠܵܐ܀ ܠܝܼ ܥܸܕܼܠܵܝܵܐ ܕܐܸܠܘܼ ܠܵܐ ܨܒܹ̇ܝܬܼ ܠܵܐ ܐܸܬܿܕܲܒܼܪܹܬܼ: ܘܠܹܗ ܟܘܼܐܵܪܵܐ ܕܐܲܡܪܲܚ̣ ܘܲܫ̣ܒܼܵܐ ܚܹܐܪܘܼܬܼܝ ܡܸܢܵܟܼ܀ ܠܝܼ ܒܣܘܿܪ ܘܐܲܦܸܩ ܡܼܢ ܛܲܡܐܘܼܬܼܵܐ ܕܝܵܬܼ݁ܒܵܐ ܐ̄ܢܵܐ ܒܵܗ̇: ܠܹܗ ܡܣܘܿܪ ܘܲܦܟܼܘܿܪ ܡܸܛܠ ܕܐܲܡܪܲܚ̣ ܥܲܠ ܩܸܢܝܵܢܵܟܼ܀ ܠܝܼ ܐܲܫܵܐ ܠܝܼ ܟܠ ܠܝܼ ܡܘܿܢ ܕܲܚ̇ܙܹܝܬܼ ܒܹܝܬܼ ܥܵܘ̈ܵܠܵܐ: ܘܠܹܗ ܐܲܒܼܗܸܬܲܝܗܝ ܟܲܕܼ ܡܸܬ݁ܕܲܒܼܪܵܐ ܕܒܪܵܪܬܹܗ ܡܸܢܹܗ܀ ܠܝܼ ܚܠܘܿܛ ܥܲܡܵܟܼ ܘܐܸܒܼܩܲܕܲܫ ܒܵܟܼ ܘܐܸܗܘܸܐ ܕܝܼܠܵܟܼ: ܘܠܹܗ ܫܕܼܝܼ ܠܐܲܒܼܕܵܢ ܢܸܗܘܸܐ ܠܲܚܡܵܐ ܠܫܲܠܗܹܒܼܝܼܬܼܵܐ܀ ܢܝܵܚܹ̈ܐ ܛܲܒܿܥܘܼܢܝ ܥܲܠ ܬܸܫܘܝܼܬܹܗ ܒܫܸܢܲܬܼ ܥܵܘܼܠܵܐ: ܐܲܢ̄ܬܿ ܐܲܥܝܼܪܲܢܝ ܘܲܕܼܒܲܪܲܢܝ ܠܵܟܼ ܘܐܸܗܘܸܐ ܥܲܡܵܟܼ܀ pb. 665 ܚܛܵܗܵܐ ܫܲܗܝܲܢܝ ܘܐܹܬܸܐ ܠܘܵܬܼܵܟܼ ܠܵܐ ܡܲܨܝܵܐ ܐ̄ܢܵܐ: ܬܵܐ ܣܲܒܼ ܕܝܼܠܵܟܼ ܠܵܐ ܐܹܒܲܕܼ ܠܝܼ ܡ̣ܢ ܕܐܸܫܟܲܚܬܵܢܝ܀ ܨܒܼܝܼ ܒܝܼ ܐܸܨܒܸܿܐ ܘܲܚܠܘܿܛ ܨܒܼܝܵܢܝ ܥܲܡ 18 : ܨܒܼܝܵܢܵܟܼ: ܘܲܠܨܒܼܝܵܢܹܗ ܒܣܘܿܪ ܕܲܛܪܘܼܢܵܐ ܕܠܵܐ ܢܸܚܕܸܐ ܠܝܼ܀ ܚܵܒܹ̇ܬܼ ܕܲܚܛܹ̇ܝܬܼ ܒܸܗ̇ܬܹܬܼ ܕܲܛܥܹ̇ܝܬܼ ܡ̇ܝܼܬܹܬܼ ܕܲܨܒܹ̇ܬܼ: ܒܵܟܼ ܐܸܬܼܚܲܟܲܡ ܬܸܬܼ̱ܢܫܸܐ ܒܵܟܼ ܒܸܗܬܲܬܼ ܐܲܦܲܝ̈: ܪܹܝܚܵܐ ܕܚܲܝܹ̈ܐ ܡܵܚܹ̇ܐ ܡܸܢܵܟܼ ܡܲܠܟܵܐ ܦܵܪܘܿܩܝ: ܬܵܐ ܐܲܦܸܩܲܝܢܝ ܡ̣ܢ ܣܲܪܝܘܼܬܼܵܐ ܕܝܵܬܼ̇ܒܵܐ ܐ̄ܢܵܐ ܒܵܗ̇܀ ܪܹܝܚܵܐ ܕܡܵܘܬܵܐ ܟܲܪ ܠܝܼ ܒܐܲܦܲܝ̈ ܡ̣ܢ ܡܸܨܪܵܝܵܐ: ܡܸܫܚܵܐ ܕܡܘܼܪܵܐ ܫܡܵܟܼ ܢܸܗܘܸܐ ܠܝܼ ܘܐܸܬܼܒܲܣܲܡ ܒܵܟܼ܀ ܠܸܠܝܹܗ ܕܥܵܠܡܵܐ ܐܲܚܫܸܟܼ ܐܘܼܪ̈ܚܵܬܼܝ ܘܐܲܣܓܿܝܼ ܬܘܼܩ̈ܠܵܬܼܝ: ܬܵܐ ܐܝܼܡܵܡܵܐ ܡܫܝܼܚܵܐ ܕܒܲܪܲܝܢܝ ܘܐܸܗܘܸܐ ܥܲܡܵܟܼ܀ ܦܲܚܵܐ ܦܓܲܥ̣ ܒܝܼ ܘܢܸܦ̇ܠܹܬܼ ܠܝܼ ܒܹܗ ܕܲܨܒܹ̇ܝܬܼ ܐܸܦܸܠ 19 : ܬܵܐ ܬܒܼܘܿܪ ܦܲܚܵܐ ܘܦܲܨܵܐ ܠܢܲܦ̮ܫܵܐ ܕܲܚܢܝܼܩܵܐ ܒܹܗ܀ ܒܝܼܫܵܐ ܒܢܸܫܒܵܘ̈ܗܝ ܥܲܪܩܸܠ ܐܘܼܪ̈ܚܵܬܼܝ ܫܲܦܝܼܪ̈ܵܬܼܵܐ: ܘܗܵܐ ܪܵܕܼܝܵܐ ܐ̄ܢܵܐ ܒܐܘܼܪܚܵܐ ܕܥܵܘ̣ܠܵܐ ܠܘܵܬܼܵܟܼ ܐܲܝܬܵܢܝ܀ ܦܲܢܵܢܝ ܠܵܟܼ ܡܵܪܝ ܐܲܝܟܼ ܕܐܸܬܼܦܲܢܝܲܬ݀ ܣܲܪܵܐ ܠܐܲܒܼܪܵܡ: ܘܐܸܬܼܩܲܕܲܫ ܒܵܟܼ (ܘܐܸܗܘܸ ܕܝܼܠܵܟܼ ܗܵܪܟܵܐ ܘܲܠܗܲܠ܀ ܫܘܼܒܼܚܵܐ ܠܵܟܼ ܡܵܪܝ ܕܲܟܼܡܵܐ ܪܚܸܡܬܲܢܝ ܡܪܲܚܡܵܢܘܼܬܼܵܟܼ: ܕܬܸܒܼܪܹܝܢܝ ܒܪ̈ܲܚܡܹܐ ܘܬܸܪܕܼܹܝܢܝ ܒܪ̈ܲܚܡܹܐ ܘܬܸܩܢܹܝܢܝ ܒܪ̈ܲܚܡܹܐ܀ pb. 666 ܒܗܵܢܘܿܢ ܪ̈ܲܚܡܹܐ ܕܲܒܼܗܘܿܢ ܩܪܲܝܬܵܢܝ ܡ̣ܢ ܫܘܼܪܵܝܵܐ: ܒܪ̈ܵܚܡܹܐ ܗܵܢܘܿܢ ܚܲܣܵܐ ܚܛܵܗܲܝ̈ ܘܪܲܚܸܡ ܥܠܲܝ 20 :܀