On Repentance and an Admonition - ܥܲܠ ܬܝܵܒܼܘܼܬܼܵܐ ܘܡܲܪܬܿܝܵܢܘܼܬܼܵܐ

ܣܲܓܝܼ ܦܫܝܼܩܵܐ ܐܘܼܪܚܵܐ ܪܲܒܿܬܼܵܐ ܕܲܬܼܝܵܒܼܘܼܬܼܵܐ: ܘܲܣܕܼܝܼܪܝܼܢ ܒܵܗ̇ ܡܝܼ̈ܠܹܐ ܕܫܲܝܢܵܐ ܠܲܕܼܪܵܕܹܝܢ ܒܵܗ̇܀ ܡܲܢ ܠܵܐ ܙܲܕܝܼܩ ܐܲܝܟܼ ܙܵܢܝܼܬܼܵܐ ܕܲܢܗܲܠܸܟܼ ܒܵܗ̇: ܕܪܸܗܛܲܬ݀ ܥܸܠܲܬ݀ ܨܹܝܕܼ ܫܵܒܼܘܿܩܵܐ ܘܠܵܐ ܐܸܬܼܟܲܠܝܲܬ݀܀ ܡܲܢ̣ܘܼ ܕܲܚܛܲܦ̣ ܘܐܲܥܘܸܠ̣ ܘܐܲܥ̣ܘܝܼ ܐܲܝܟܼ ܓܲܝܵܣܵܐ: ܘܟܲܕܼ ܣܵܡ̣ ܐܲܦܵܘ̈ܗܝ ܪܲܗܛܵܐ ܠܒܲܟܼ ܗ̄ܘ̣ܵܐ ܟܲܫܝܼܪܵܐܝܼܬܼ܀ ܦܟܼܝܼܪ ܒܲܙܩܝܼܦܵܐ ܘܫܲܪܝܵܐ ܐܘܼܪܚܹܗ ܠܒܹܝܬܼ ܡܲܠܟܿܘܼܬܼܵܐ: ܕܠܲܬܼܝܵܒܼܘܼܬܼܵܐ ܟܠ ܥܲܣ̈ܩܵܬܼܵܐ ܦܫܝܼ̈ܩܵܢ ܐܸܢܹܝܢ܀ ܒܨܸܨܸ̈ܐ ܥܪܸܐ ܗ̄ܘ̣ܵܐ ܘܐܘܼܪܚܵܐ ܕܐܲܪܡ̣ܝܼ ܠܵܐ ܒܸܛܠܲܬ݀ ܗ̄ܘ̣ܵܬܼ: pb. 667 ܕܲܬܼܝܵܒܼܘܼܬܼܵܐ ܠܵܐ ܡܸܬܼܚܲܓܪܵܐ ܘܠܵܐ ܒܵܦܟܼܵܪܹ̈ܐ܀ ܐܲܝܟܼ ܡܲܚܙܝܼܬܼܵܐ ܣܝܼ̈ܡܵܢ ܗܵܠܹܝܢ ܠܐܲܝܢܵܐ ܕܢܵܦܹ̇ܠ: ܕܟܲܕܼ ܚܵܙܹ̇ܐ ܠܗܹܝܢ ܢܸܬܿܬܿܥܝܼܪ ܢܩܘܼܡ ܡ̣ܢ ܡܲܦܘܼܠܬܵܐ܀ ܢܠܲܒܸܿܒܼ ܢܲܦ̮ܫܹܗ ܕܐܸܢ ܚܝܵܬ݀ ܒܲܡܫܝܼܚܵܐ: (ܠܡ̇ܢ ܚܲܛܵܝܵܐ ܠܵܐ ܦܵܬܲܚ̇2: ܠܹܗ ܐܸܢ ܡܸܬܼܟܲܫܲܦ܀ ܡܵܟܼܣܵܐ ܩܲܪܝܼܒܼ ܡܲܢ̣ܘܼ ܪܲܚܝܼܩ ܡ̣ܢ ܐܲܠܵܗܵܐ: ܐܸܠܵܐ ܐܲܝܢܵܐ ܕܒܲܦܣܵܩ ܣܲܒܼܪܵܐ ܒܛܸܠ̣ ܡ̣ܢ ܐܘܼܪܚܹܗ܀ ܕܪܲܫ̣ ܢܵܡܘܿܣܵܐ ܐܘܼܪܚܵܐ ܠܟܹܐܢܹ̈ܐ ܘܣܲܓܿܝܼ ܩܲܫܝܵܐ: ܕܲܡܗܲܠܟܼܝܼܢ ܒܵܗ̇ ܘܠܵܐ ܡܸܙܕܲܕܩܝܼܢ ܡ̣ܢ ܢܵܡܘܿܣܵܐ܀ ܗܘ݀ܵܐ ܕܹܝܢ ܡܵܪܲܢ ܐܘܼܪܚܵܐ ܠܥܵܠܡܵܐ ܡ̣ܢ ܛܲܝܒܿܘܼܬܼܵܐ: ܕܐܵܦ ܚܲܛܵܝܹ̈ܐ ܡܸܙܕܲܕܩܝܼܢ ܒܹܗ ܕܠܵܐ ܢܵܡܘܿܣܵܐ܀ ܦܫܲܛ̣ ܗ̄ܘ̣ܵܐ ܢܲܦ̮ܫܹܗ ܠܡܵܟܼܣܹ̈ܐ ܕܢܹܐܬܼܘܿܢ ܠܲܬܼܝܵܒܼܘܼܬܼܵܐ: ܘܲܠܙܵܢ̈ܝܵܬܼܵܐ ܕܢܸܬܼܩܲܪ̈ܒܪܵܢ ܠܹܗ ܘܠܵܐ ܢܸܬܼܟܲܠ̈ܝܵܢ܀ ܠܗܵܠܹܝܢ ܕܲܗܘ݀ܵܘ ܒܝܼܫ ܒܝܼܫ ܛܲܦ̣ܝܼ ܚܢܵܢܵܐ ܡܵܪܲܢ: ܕܐܵܦ3: ܚܘܼܠܡܵܢܵܐ ܠܗܘܿܢ ܚܵܫܲܚ ܗ̄ܘ̣ܵܐ ܕܲܡܚܝܼ̈ܠܹܐ ܗ̄ܘ̣ܵܬܼ܀ ܥܵܘ̣ܠܵܐ ܢܦܲܩ̣ ܗ̄ܘ̣ܵܐ ܐܲܝܟܼ ܟܘܼܪܗܵܢܵܐ ܒܥܵܠܡܵܐ ܟ̱ܠܹܗ: ܘܐܲܝܟܼ ܣܵܥܘܿܪܵܐ ܢܚܸܬܼ ܗ̄ܘ̣ܵܐ ܡܵܪܲܢ ܕܢܲܚܠܸܡ ܐܸܢܘܿܢ܀ ܕܠܵܐ ܡܸܫܟܲܚ ܗ̄ܘ̣ܵܐ ܥܵܠܡܵܐ ܕܢܹܐܬܸܐ ܨܹܝܕܼ ܐܲܠܵܗܵܐ: ܒܲܪ ܐܲܠܵܗܵܐ ܛܲܥ̣ܢܹܗ ܕܢܸܩܪܘܿܒܼ ܨܹܝܕܼ ܝܵܠܘܿܕܹܗ܀ ܗܘ݀ܵܐ ܐܘܼܪܚܵܐ ܠܐܲܝܠܹܝܢ ܕܲܠܐܹܝܢ ܘܲܫܩܲܠ ܐܸܢܘܿܢ: ܘܒܹܗ ܐܵܬܹ̇ܝܢ ܗ̄ܘ̣ܵܘ ܕܲܡܚܝܼܠܝܼܢ ܗ̄ܘ̣ܵܘ ܠܲܡܗܲܠܵܟܼܘܼ܀ pb. 668 ܗܵܕܲܐ ܗ̄ܝܼ ܐܘܼܪܚܵܐ ܕܲܡܗܲܠܟܼܵܐ ܗ̄ܘ̣ܵܬܼ ܗܝ݀ ܡ̣ܢ ܢܲܦ̮ܫܹܗ: ܘܣܵܒܼ̇ܠܵܐ ܡܝܼ̈ܬܹܐ ܕܠܲܐܬܼܪܵܐ ܕܚܲܝܹ̈ܐ ܬܲܥܒܲܪ ܐܸܢܘܿܢ܀ ܠܲܕܼܠܵܐ ܪܸ̈ܓܼܠܹܐ ܫܸܩܠܲܬ݀ ܐܘܼܪܚܵܐ ܕܬܲܪܗܸܛ ܐܸܢܘܿܢ: ܕܠܵܐ ܪܵܕܹܝܢ ܗ̄ܘ̣ܵܘ ܐܸܠܘܼ ܠܵܐ ܗܝ݀ ܕܩܲܪܒܲܬ݀ ܐܸܢܘܿܢ܀ ܐܸܠܘܼ ܠܵܐ ܓܹܝܪ ܗܘ݀ ܗܘ݀ܵܐ ܐܘܼܪܚܵܐ ܕܡܲܠܝܵܐ ܬܲܗܪܵܐ: ܠܵܘ ܙܵܢ̈ܝܵܬܼܵܐ ܪܵܗܛܵܢ ܗ̄ܘܲܝ̈ ܒܵܗ̇ ܨܹܝܕܼ ܩܲܕܝܼܫܵܐ܀ ܐܸܠܘܼ ܡܵܪܲܢ ܠܵܐ ܗܲܠܸܟܼ ܗ̄ܘ̣ܵܐ ܡܵܟܼܣܵܐ ܕܢܹܐܬܸܐ: ܚܓܼܝܼܪ ܗ̄ܘ̣ܵܐ ܠܥܵܘ̣ܠܵܐ ܘܨܹܝܕܼ ܟܹܐܢܘܼܬܼܵܐ ܠܵܐ ܩܵܪܹܒܼ ܗ̄ܘ̣ܵܐ܀ ܠܵܐ ܟܹܝܬܼ ܢܲܡܐܸܢ ܢܸܪܕܸܐ ܒܐܘܼܪܚܵܐ ܕܲܬܼܝܵܒܼܘܼܬܼܵܐ: ܕܗ݀ܘܝܘܼ ܡܵܪܲܢ ܛܵܥܹ̇ܢ ܠܐܲܝܢܵܐ ܕܐܵܬܹ̇ܐ ܨܹܐܕܼܵܘܗܝ܀ ܡܲܢ ܠܵܐ ܢܹܐܬܸܐ ܠܗܵܢܵܐ ܫܒܼܝܼܠܵܐ ܡܠܸܐ ܛܵܒܼ̈ܵܬܼܵܐ: ܕܗ݀ܘ ܡܩܲܪܸܒܼ ܠܵܟܼ ܕܬܸܣܥܘܿܪ ܐܘܼܪܚܵܟܼ ܟܲܕܼ ܠܵܐ ܠܵܐܹ̇ܝܬܿ܀ ܒܸܛܠܵܬ݀ ܗ̄ܘ̣ܵܬܼ ܠܵܗ̇ ܐܘܼܪܚܹܗ ܕܥܵܠܡܵܐ ܡ̣ܢ ܡܲܪܕܝܼܬܼܵܐ: ܘܨܹܝܕܼ ܐܲܠܵܗܵܐ ܠܡܲܚܣܸܢ ܟܹܐܢܹ̈ܐ ܒܵܗ̇ ܪܵܕܹܝܢ ܗ̄ܘ̣ܵܘ܀ ܚܲܛܵܝܹ̈ܐ ܕܹܝܢ ܐܵܦܠܵܐ ܒܥܲܠܡܵܐ ܒܵܗ̇ ܐܵܬܹ̇ܝܢ ܗ̄ܘ̣ܵܘ: ܕܲܒܼܢܵܡܘܿܣܵܐ ܠܡܲܚܣܸܢ ܚܵܝܹ̇ܐ ܐܵܦ ܙܲܕܝܼܩܵܐ܀ ܐ̄ܬ݀ܵܐ ܕܹܝܢ ܡܵܪܲܢ ܘܲܦܫܲܛ̣ ܢܲܦ̮ܫܹܗ ܩܕܼܵܡ ܚܲܛܵܝܹ̈ܐ: ܘܲܗܘ݀ܵܐ ܐܘܼܪܚܵܐ ܕܲܢܗܲܠܟܼܘܼܢ ܒܵܗ̇4: ܕܠܵܐ ܢܵܡܘܿܣܵܐ܀ ܘܡܸܟܹܝܠ ܟܠܝܘܿܡ ܗܵܕܹܐ ܐܘܼܪܚܵܐ ܠܵܐ ܡܸܬܼܟܲܠܝܵܐ: ܡܲܢ ܓܹܝܪ ܦܵܣܹ̇ܩ ܠܐܘܼܪܚܵܐ ܕܪܵܕܼܝܵܐ ܥܲܡ ܗܲܠܵܟܹ̈ܐ܀ ܒܗܵܕܹܐ ܡܵܕܹܝܢ ܬܵܘ ܚܲܛܵܝܹ̈ܐ ܠܲܡܗܲܠܵܟܼܘܼ: pb. 669 ܠܵܘ ܓܹܝܪ ܡܘܼܫܹܐ ܕܲܪܫ̣ܵܗ̇ ܐܸܠܵܐ ܒܪܵܐ ܕܐܲܠܵܗܵܐ܀ ܠܐܝܼܬܿ ܒܲܚܛܵܗܹ̈ܐ ܪܕܼܝܼ ܥܲܡ ܡܵܟܼܣܵܐ ܕܲܡܗܲܠܸܟܼ ܒܵܗ̇: ܒܥܵܘ̣ܠܵܐ ܫܚܝܼܩ ܐܲܢ̄ܬܿ ܗܵܐ ܙܵܢܝܼܬܼܵܐ ܢܲܩܝܼܦܵܐ ܠܵܟܼ܀ ܪܘܼܫܥܵܐ ܦܲܟܼܪܵܟܼ ܫܲܪܝܵܐ5: ܐܘܼܪܚܼܵ ܥܲܡ ܓܲܝܵܣܵܐ: ܫܩܝܼܠܵܐ ܗ̄ܝܼ ܥܸܠܬܼܵܐ ܠܵܐ ܬܸܬܲܗܸܐ ܡ̣ܢ ܡܲܪܕܝܼܬܼܵܐ܀ ܠܵܘ ܥܲܡ ܛܵܒܹ̈ܐ ܥܵܨܹ̇ܐ ܠܵܟܼ ܐ̄ܢܵܫ ܕܪܲܗܛܵܐ6: ܬܸܠܒܿܘܿܟܼ: ܒܒܼܝܼ̈ܫܹܐ ܡܲܪܵܐ ܕܲܡܗܲܠܟܼܝܼܢ ܒܵܗ̇ ܘܠܵܐ ܡܸܬܿܬܲܟܣܝܼܢ܀ ܠܵܐ ܬܸܒܼܛܲܠ ܠܵܟܼ ܐܲܢ̄ܬܿ ܟܠ ܟ̱ܠܹܗ ܡ̣ܢ ܛܵܒܼ̈ܵܬܼܵܐ: ܕܠܵܐ ܬܸܗܘܸܐ ܒܝܼܫ ܐܵܦ ܡ̣ܢ ܒܝܼ̈ܫܹܐ ܕܲܣܥܲܪ ܐܸܢܘܿܢ܀ ܒܙܵܢܝܼܬܼܵܐ ܚܘܼܪ ܘܲܒܼܟܼܝܼ ܥܲܡܵܗ̇ ܥܲܠ ܣܘܼܪ̈ܚܵܢܲܝܟ: ܐܸܢ ܕܹܝܢ ܬܲܕܹܫ ܒܡܘܿܢ7: ܐܹܨܘܼܪܵܟܼ ܠܵܐ ܝܵܕܲܥ̇ ܐ̄ܢܵܐ܀ ܐܲܝܟܼ ܓܲܝܵܣܵܐ ܫܐܲܠ ܡܲܠܟܿܘܼܬܼܵܐ ܘܡܸܬܼܝܲܗܒܵܐ ܠܵܟܼ: ܘܐܸܢܗܘ݀ ܕܬܲܗܡܸܐ ܠܵܘ ܓܲܝܵܣܵܐ ܐܢ̄ܬܿ ܐܸܠܵܐ ܕܹܐܒܪܵܐ܀ ܒܡܵܟܼܣܵܐ ܕܲܡܵܐ ܘܒܲܕܲܪ ܩܠܝܼܠ ܡ̣ܢ ܩܵܢܝܵܢܵܟܼ: ܘܐܸܢ ܥܲܡ ܗܵܠܹܝܢ ܠܵܐ ܬܵܐܹ̇ܒܼ ܐܲܢ̄ܬܿ ܡ̇ܢ ܕܵܡܹ̇ܐ ܠܼܵ܀ ܣܪܝܼܚ ܐܲܢ̄ܬܿ ܗ̄ܘ̣ ܟܲܝ ܡ̣ܢ ܙܵܢܝܼܬܼܵܐ ܕܐܸܬܿܬܵܘܝܲܬ݀ ܗ̄ܘ̣ܵܬܼ: ܐܵܘ ܚܵܛܘܿܦ ܐܲܢ̄ܬܿ ܛܵܒܼ ܡ̣ܢ ܡܵܟܼܣܵܐ ܕܐܸܙܕܲܕܲܩ ܗ̄ܘ̣ܵܐ܀ ܕܲܡ ܒܝܼܫ ܐܲܢ̄ܬܿ ܗ̄ܘ̣ ܡ̣ܢ ܓܲܝܵܣܵܐ ܒܲܥ̇ܒܼܵܕܼ ܐܝܼܕܲܝ̈ܟ: ܘܠܲܐܝܟܵܐ ܡܵܛ̇ܝܵܐ ܡܫܘܼܚܬܼܵܟܼ ܡܵܕܹܝܢ ܐܸܢ ܗܵܟܲܢ ܐܲܢ̄ܬܿ܀ ܐܸܢ ܡ̣ܢ ܡܵܟܼܣܵܐ ܘܡ̣ܢ ܙܵܢܝܼܬܼܵܐ ܘܡ̣ܢ ܓܲܝܵܣܵܐ: ܒܝܼܫ ܐܲܢ̄ܬܿ ܓܲܒܼܪܵܐ ܟܦܘܼܪܝܵܐ ܗ̄ܘ̣ ܟܵܠܹ̇ܐ ܕܢܸܫܬܲܡܲܫ ܒܵܟܼ܀ pb. 670 ܪܵܡܵܐ ܡܫܘܼܚܬܵܐ ܕܥܲܠܝܼܢܵܟܼ ܠܵܗ̇ ܐܸܢ ܟܵܦܘܿܪܵܐ ܐܢ̄ܬܿ: ܠܫܸܡܥܘܿܢ ܕܵܡܹ̇ܝܬܿ ܬܘܼܒܼ ܐܲܟܼܘܵܬܹܗ ܘܡܸܬܼܩܲܒܲܠ ܐܲܢ̄ܬܿ܀ ܟܦܘܼܪܝܹܗ ܕܫܸܡܥܘܿܢ ܡܲܚܙܝܼܬܼܵܐ ܗ̄ܝܼ ܠܵܟܼ ܐܸܢ ܨܵܒܹ̇ܐ ܐܲܢ̄ܬܿ: ܕܥܲܠ ܗܵܝ̇ ܟܹܐܦܵܐ ܬܸܒܼܢܸܐ ܢܲܦ̮ܫܵܟܼ ܒܲܬܼܝܵܒܼܘܼܬܼܵܐ܀ ܥܲܠ ܫܲܬܼܐ̱ܣܬܼܵܐ ܣܝܼܡ ܒܸܢܝܵܢܵܟܼ ܐܸܢ ܦܵܪܘܿܫܵܐ ܐܢ̄ܬܿ: ܡ̇ܢ ܓܹܝܪ ܛܵܥܹ̇ܢ ܝܘܼܩܪܹܗ ܕܒܲܝܬܵܐ ܐܸܠܵܐ ܫܸܡܥܘܿܢ܀ ܥܲܠ ܗܵܝ̇ ܟܹܐܦܵܐ ܐܸܠܵܐ ܣܵܕܼܪܲܬܿ ܕܘܼ̈ܡܣܹܐ ܕܡܲܛܠܠܵܟܼ8: ܠܒܲܪ ܡ̣ܢ ܒܲܝܬܵܐ ܐܢ̄ܬܿ ܘܐܲܝܟܵܐ ܢܸܒܼܥܹܝܟܼ ܡܵܪܹܐ ܒܲܝܬܵܐ܀ ܐܵܦ ܥܲܠ ܗܵܕܹܐ ܒܟܼܵܐ ܗ̄ܘ̣ܵܐ ܫܸܡܥܘܿܢ ܡܲܪܝܼܪܵܐܝܼܬܼ: ܕܐܲܝܢܵܐ ܕܚܵܛܹ̇ܐ ܠܹܗ ܢܸܬܿܕܲܡܸܐ ܒܲܬܼܝܵܒܼܘܼܬܼܵܐ܀ ܕܠܵܐ ܬܝܵܒܼܘܼܬܼܵܐ ܥܹܕܬܵܐ ܠܵܝܬܹܝܗ̇ ܨܹܝܕܼ ܐܲܠܵܗܵܐ: ܥܠܹܝܗ̇ ܓܹܝܪ ܒܲܢܝܵܐ ܘܒܼܵܗ̇ ܗ̄ܘ̣9: ܩܵܡܲܬ݀ ܡ̣ܢ ܫܘܼܪܵܝܵܐ܀ ܒܲܬܼܝܵܒܼܘܼܬܼܵܐ ܚܬܼܝܼܪܵܐ ܥܹܕܬܵܐ ܕܗܝ݀ ܗ̄ܝܼ ܣܲܒܼܪܵܗ̇: ܒܵܗ̇ ܓܹܝܪ ܨܵܝ̇ܕܵܐ ܠܲܒܼܢܲܝ̈ܢܵܫܵܐ ܨܹܝܕܼ ܐܲܠܵܗܵܐ܀ ܡܨܝܼܕܬܵܐ ܪܲܒ݁ܬܼܵܐ ܕܐܲܪܡ̣ܝܼ ܒܥܵܠܡܵܐ ܒܪܵܐ ܕܐܲܠܵܗܵܐ: ܕܐܵܦܸܢ ܡܝܼ̈ܬܹܐ ܚܵܒܼ̇ܫܵܐ ܒܓܸܠܝܵܐ10: ܚܲܝܹ̈ܐ ܗܵܘܹ̇ܝܢ܀ ܗܵܢܵܐ ܬܲܗܪܵܐ ܚܙܸܐ ܒܲܣܒܲܪܬܼܵܐ11: ܒܲܬܼܝܵܒܼܘܼܬܼܵܐ: ܕܐܵܦ ܙܵܢܝܼܬܼܵܐ ܡܡܲܠܝܵܐ ܕܘܼܟܿܬܼܵܐ ܕܲܒܼܬܼܘܼ̈ܠܵܬܼܵܐ܀ ܫܸܡܥܘܿܢ ܕܣܝܼܡ ܒܵܗ̇ ܐܲܝܟܼ ܫܵܬܼܐ̱ܣܬܼܵܐ ܘܟܼܵܦܘܿܪܵܐ ܗ̄ܘ̣ܵܐ: ܕܐܲܝܢܵܐ ܕܒܼܵܥܹ̇ܐ ܕܢܸܒܼܢܸܐ ܢܲܦ̮ܫܹܗ ܥܠܵܘܗܝ ܠܵܐ ܢܸܕܼܚܲܠ܀ ܗܵܐ ܝܑܼܕܲܥܬ܀ܗ ܕܒܲܪ ܐܲܠܵܗܵܐ ܡܵܢܵܐ ܥܸܒܼܕܲܬ݀: pb. 671 ܕܡܲܢ ܡܸܨܥܵܝܵܐ ܒܹܝܬܼ ܠܹܗ ܠܥܹܕܬܵܐ ܣܵܡ̣ ܩܲܕܼܡܵܝܑܼܬܼ܀ ܗܵܘ̇ ܕܐܸܬܿܬܲܚܬܝܼ ܠܟܼܵܦܘܿܪܘܼܬܼܵܐ ܨܹܝܕܼ ܚܲܛܵܝܹ̈ܐ: ܩܵܡ̣ ܐܲܝܟܼ ܚܵܒܼܪܵܐ ܕܢܸܕܼܒܲܪ ܐܸܢܘܿܢ ܨܹܝܕܼ ܫܲܪܝܼܪܵܐ܀ ܢܚܸܬܼ ܒܲܟܼܦܘܼܪܝܵܐ ܘܩܵܡ̣ ܠܹܗ ܒܓܲܒܵܐ ܕܒܹܬܼ ܣܸܡܵܠܵܐ: ܘܒܲܚ̣ܫܹܗ ܠܟܼܠܹܗ ܕܢܹܐܬܸܐ ܢܸܥܒܲܪ ܨܹܝܕܼ ܝܲܡܝܼܢܵܐ܀ ܒܗܵܝ̇ ܕܲܟܼܦܲܪ ܗ̄ܘ̣ܵܐ ܥܲܡ ܚܲܛܵܝܹ̈ܐ ܚܠܝܼܛ ܡܸܢܝܵܢܹܗ: ܕ:ܢܚܵܘܸܐ ܠܗܘܿܢ ܕܐܲܝܟܲܢ ܦܵܢܹ̇ܝܢ ܨܹܝܕܼ ܐܲܠܵܗܵܐ܀ ܘܟܲܕܼ ܐܸܫܬܲܪܪܲܬ݀ ܟܵܦܘܿܪܘܼܬܼܵܐ ܘܗܵܐ ܢܹܐܒܲܕܼ ܠܹܗ: ܒܟܼܵܐ ܚܲܟܿܝܼܡܵܐ ܘܐܲܪܥܹܗ ܠܣܸܕܼܪܵܐ ܕܒܹܝܬܼ ܣܸܡܵܠܵܐ܀ ܟܦܲܪ ܘܐܸܫܬܲܪܲܪ ܐܲܟܼܡܵܐ ܕܡܸܢܹܗ ܕܓܲܒܵܐ ܐܝܼܬܼܵܘܗܝ: ܘܟܲܕܼ ܕܲܒܼܪܘܼܗܝ ܗ̄ܘ̣ܵܘ ܐܲܗ̣ܦܸܟܼ ܐܝܼܕܹܗ ܘܲܕܼܒܲܪ ܐܸܢܘܿܢ܀ ܚܲܒܼܪܵܐ ܠܒܼܝܼ̈ܫܹܐ ܗܘ݀ܵܐ ܟܲܕܼ ܟܵܦܲܪ ܘܐܲܠܸܦ̣ ܐܸܢܘܿܢ: ܕܲܡܨܹܝܢ ܐܸܢܘܿܢ ܛܵܒܹ̈ܐ ܠܡܸܗܘܵܐ ܒܲܬܼܝܵܒܼܘܼܬܼܵܐ܀ ܡܲܥܡܘܿܕܼܝܼܬܪܵܐ ܚ̣ܦܲܪ ܗ̄ܘ̣ܵܐ ܬܲܡܵܢ ܨܹܝܕܼ ܪ̈ܲܫܝܼܥܹܐ: ܘܲܡ̣ܠܵܗ̇ ܕܸܡ̈ܥܹܐ ܕܲܢܚܘܼܪܘܼܢ ܒܹܗ ܟܲܕܼ ܡܸܬܼܚܲܣܸܐ܀ ܗ݀ܘ ܒܲܩܢܘܿܡܹܗ ܚܵܘܝܼ ܥ̇ܒܪܵܕܼܵܗ̇ ܕܲܬܼܝܵܒܼܘܼܬܼܵܐ: ܕܲܒܼܟܼܠ ܦܘܼܪ̈ܣܝܼܢ ܐܲܝܢܵܐ ܕܚܵܛܹ̇ܐ12: ܠܹܗ ܢܸܬܿܕܲܡܸܐ܀ ܡܸܒܼܟܵܐ ܒܟܼܵܐ ܗ̄ܘ̣ܵܐ ܡܲܪܝܼܪܵܐܝܼܬܼ ܥܲܠ ܣܘܼܪܚܵܢܹܗ13: ܘܲܣܦܲܩ̣ ܒܸܟܼܝܹܗ ܢܩܝܼܡܹܗ ܒܕܲܪܓܼܵܐ ܕܲܫܠܝܼܚܘܼܬܼܵܐ܀ ܚܛܵܗܵܐ ܪܡܸܐ ܗ̄ܘܟܵܐ ܥܠܵܘܗܝ ܐܲܝܟܼ ܐܲܪܝܵܐ ܘܲܡܢܲܟܸܬܼ ܠܹܗ: ܘܛܘܼ̈ܦܹܐ ܕܕܸܡ̈ܥܹܐ ܫ̣ܕܼܵܐ ܒܹܗ ܘܛܲܪܕܹܗ ܕܠܵܐ ܢܸܣܪܘܿܚ ܒܹܗ܀ pb. 672 ܚܛܝܼܬܼܵܐ ܩܸܕܼܚܲܬ݀ ܫܲܠܗܹܒܼܝܼܬܼܵܐ ܘܲܫܓܲܪܬܼܵܗ̇ ܒܹܗ: ܘܫܲܡܲܪ ܡܲܝ̈ܵܐ ܥܵܠ ܓܵܘܙܲܠܬܵܐ ܘܕܼܵܫ̣ܵܗ̇ ܘܲܥ̣ܒܲܪ܀ ܫܘܼܚܢܵܐ ܥ̣ܒܲܪ ܠܹܗ ܘܝܼܬܸܒܼ ܥܲܨܒܹܗ ܩܕܼܵܡ ܚܲܛܵܝܹ̈ܐ: ܕܲܢܚܘܼܪܘܼܢ ܒܹܗ ܘܲܗܘ݀ܵܐ ܥܵܨ̇ܒ̇ܝܼܢ ܣܘܼܪ̈ܚܵܢܲܝܗܘܿܢ܀ ܒܠܲܥ̣ ܗ̄ܘ̣ܵܐ ܠܒܼܝܼܒܼܵܐ ܒܓܹܐܪܵܐ ܕܪܘܼܫܥܵܐ ܘܥܵܦ̣ ܡ̣ܢ ܚܲܫܵܐ: ܘܟܲܕܼ ܡܲܝܠܸܠ ܗ̄ܘܟܵܐ ܫܡܲܛ̣ ܠܘܿܠܝܼܬܼܵܐ ܡ̣ܢ ܫܸܪܝܵܢܸܵܗ̇܀ ܩܪܲܒܼܬܼܵܢܵܐ ܗ̄ܘ̣ܵܐ ܕܲܗܘ݀ܵܐ ܕܡܘܼܬܼܵܐ ܠܲܡ̈ܡܲܚܲܝܵܐ: ܕܐܲܝܢܵܐ ܕܒܵܠܲܥ̇ ܒܲܝܢܵܬܼ ܣܵܕܼܪܹ̈ܐ ܡܵܢܵܐ ܢܸܥܒܸܿܕܼ܀ ܒܒܸܟܼܝܵܐ14: ܫܲܡ̣ܛܹܗ ܠܓܹܐܪܵܐ ܕܲܡܚ̣ܵܝܘܗܝ ܟܲܕܼ ܡܸܬܼܟܲܬܲܫ: ܘܠܵܗ̇ ܠܲܡܚܘܿܬܼܵܐ ܒܕܸܡ̈ܥܹܐ15: ܥܲܨ̣ܒܵܗ̇ ܘܫܲܢܝܼ ܟܹܐܒܼܵܗ̇16: ܀ ܗܘ݀ܵܐ ܡܲܚܙܝܼܬܼܵܐ ܕܲܢܚܘܼܪܘܼܢ ܒܹܗ ܟܠ ܚܲܛܵܝܹ̈ܐ ܘܲܢܨܲܒܿܬܼܘܼܢ ܒܹܗ ܠܲܩܢܘܿܡܲܝ̈ܗܘܿܢ ܫܲܦܝܼܪܵܐܝܼܬܼ܀ ܗܵܐ ܥܲܠ ܗܵܢܵܐ ܒܲܢܝܵܐ ܚܲܟܿܝܼܡܵܐܝܼܬܼ: ܕܒܲܬܼܝܵܒܼܘܼܬܼܵܐ ܬܸܫܦܲܪ ܟܠܝܘܿܡ ܐܸܢ ܡܸܨܛܲܠܝܵܐ܀ ܕܲܪ̈ܓܹܐ ܕܚܘܼܒܵܐ ܣܵܡ̣ ܐܲܠܵܗܵܐ ܚܲܕܼ ܥܲܠ ܚܲܒܼܪܹܗ: ܕܲܒܼܗܘܿܢ ܢܸܣܲܩ ܥܵܠܡܵܐ ܨܹܐܕܼܵܘܗܝ ܢܸܬܼܡܲܛܸܐ ܠܹܗ܀ ܗ݀ܘ ܒܪܵܘܡܵܐ ܗ̄ܘ̣ܵܐ ܘܥܲܦܪܲܢ ܕܝܼܠܲܢ ܥܲܠ ܕܲܚܝܼܚܹܗ: ܘܲܒܼܥܸܠ̈ܠܵܬܼܵܐ ܕܪܲܟܸܒܼ ܐܲܣܩܲܢ ܕܢܸܗܘܸܐ ܥܲܡܹܗ܀ ܒܝܲܠܕܹܗ ܕܲܒܼܪܵܐ ܟܲܒܼܫ̣ܵܗ̇ ܠܐܲܪܥܵܐ ܟܲܕܼ ܢܵܚܹ̇ܬܼ ܗ̄ܘ̣ܵܐ: ܕܬܸܗܘܸܐ ܦܫܝܼܩܵܐ ܟܲܕܼ ܣܵܠܩ̇ܝܼܢ ܒܵܗ̇ ܠܘܵܬܼ ܫܵܠܘܿܚܹܗ܀ ܒܲܝܢܵܬܼ ܥܵܠܡܵܐ ܠܐܲܒܼܵܐ ܩܵܡ̣ ܗ̄ܘ̣ܵܐ ܒܪܵܐ ܡܸܨܥܵܝܵܐ: pb. 673 ܘܣ̣ܵܡܹܗ ܠܫܸܡܥܘܿܢ ܒܹܝܬܼ ܠܹܗ ܠܥܹܕܬܵܐ ܬܘܼܒܼ ܡܸܨܥܵܝܵܐ܀ ܟܒܲܫ̣ ܡܲܣܩܵܢܵܐ ܕܠܵܐ ܢܸܬܿܬܿܩܸܠ ܐ̄ܢܵܫ ܡܵܐ ܕܪܵܕܹܐ ܒܹܗ: ܒܕܲܪ̈ܓܼܝܼܢ ܕܲܣܕܲܪ ܘܲܢܚܸܬܼ ܨܹܝܕܼ ܐ̄ܢܵܫܘܼܬܼܵܐ܀ ܒܪܹܫܵܗ̇ ܕܐܘܼܪܚܵܐ ܩܵܡ̣ ܟܵܦܘܿܪܵܐ ܘܗܵܐ ܩܵܪܹܐ ܠܵܟܼ: ܕܬܼܵܐ ܠܵܟܼ ܢܸܪܕܸܐ ܒܲܬܼܝܵܒܼܘܼܬܼܵܐ ܨܹܝܕܼ ܐܲܠܵܗܵܐ܀ ܘܡܵܐ ܕܲܢܩܸܦܬܵܝܗܝ ܡܸܫܟܲܚ ܐܲܢ̄ܬܿ ܠܹܗ ܕܒܼܵܟܹܿܐ ܤܲܒܲܬܼ: ܘܟܲܕܼ ܩܵܪܹܒܼ ܐܲܢ̄ܬܿ ܡܸܫܟܲܚ ܐܲܢ̄ܬܿ ܠܹܗ ܫܠܝܼܚܵܐ ܪܲܒܵܐ܀ ܒܵܗ̇ ܒܡܲܪܕܝܼܬܼܵܐ ܡܩܲܪܸܒܼ ܠܵܟܼ ܬܘܼܒܼ ܕܬܸܚܙܸܐ ܠܲܒܼܪܵܐ: ܘܡܸܬܼܚܵܘܸܐ ܠܵܟܼ ܐܲܝܟܼ ܒܲܪܢܵܫܵܐ ܕܲܡܠܸܐ ܚܲܫܹ̈ܐ܀ ܘܡܵܐ ܕܲܢܩܸܦܬܵܝܗܝ ܐܲܝܟܼ ܕܲܠܚܲܒܼܪܵܐ ܕܬܸܪܕܸܐ ܥܲܡܹܗ: ܡܸܫܟܲܚ ܐܲܢ̄ܬܿ ܠܹܗ ܕܐܵܦ ܐܲܠܵܗܵܐ ܗ̄ܘ̣ ܐܲܝܟܼ ܝܵܠܘܿܕܹܗ܀ ܒܩܲܠܝܼܠ ܩܲܠܝܼܠ ܣܸܠܩܲܬ݀ ܐܘܿ ܚܲܛܵܝܵܐ: ܡ̣ܢ ܓܵܘ ܥܘܼܡܩܵܐ ܕܥܲܡ ܐܲܠܵܗܵܐ ܒܪܵܘܡܵܐ ܬܸܗܘܸܐ܀ ܒܕܲܟܼܦܲܪ ܫܸܡܥܘܿܢ ܐܲܦܹ̈ܐ ܐܝܼܬܼ ܠܹܗ ܨܹܝܕܼ ܚܲܛܵܝܹ̈ܐ: ܢܠܲܒܸܒܼ ܐܸܢܘܿܢ ܥܲܠ ܫܘܼܒܼܩܵܢܵܐ ܕܡ̣ܢ ܐܲܠܵܗܵܐ܀ ܐܵܦ ܡܵܪܲܢ ܬܘܼܒܼ ܒܗܵܝ̇ ܕܐܸܬܼܢܲܣܝܼ ܟܬܼܝܼܒܼ ܕܲܡܥܲܕܲܪ: ܠܡܸܬܼܢܲܣ̈ܝܵܢܹܐ ܡܵܐ ܕܩܵܪܹܝܢ ܠܹܗ ܒܐܘܼܠܨܵܢܲܝ̈ܗܘܿܢ܀ ܠܒܼܝܼܒܼ ܚܲܛܵܝܵܐ ܡܵܐ ܕܲܡܗܲܠܸܟܼ ܥܲܡ ܟܵܦܘܿܪܵܐ: ܘܝܵܠܹ̇ܦ ܡܸܢܹܗ ܥܲܠ ܣܘܥܪܵܢܵܐ17: ܕܲܬܼܝܵܒܼܘܼܬܼܵܐ܀ ܡܸܬܼܚܲܝܲܠ ܬܘܼܒܼ ܡܵܐ ܕܠܲܡܫܝܼܚܵܐ ܚܵܙܹ̇ܐ ܕܲܙܩܝܼܦ: ܘܲܛܥܝܼܢ ܥܵܘ̣ܠܵܐ ܘܣܵܒܹ̇ܠ ܚܲܫܹ̈ܐ ܚܠܵܦ ܪ̈ܲܫܝܼܥܹܐ܀ pb. 674 ܠܐ̄ܢܵܫܵܐ ܡܚܝܼ̈ܠܹܐ ܕܲܪ̈ܓܹܐ ܦܫܝܼ̈ܛܹܐ ܣ̣ܕܲܪ ܚܲܢܵܢܵܐ: ܕܠܵܐ ܢܸܬܿܬܲܩܠܘܼܢ ܡܵܐ ܕܡܸܬܼܥܲܠܹܝܢ ܠܲܬܼܝܵܒܼܘܼܬܼܵܐ܀ ܠܚܲܕܼ ܪܵܕܼܘܿܦܵܐ ܫܠܝܼܚܵܐ ܥܲܒܼܕܹܗ ܨܹܝܕܼ ܚܲܛܵܝܹ̈ܐ: ܕܗܘ݀ ܒܲܩܢܘܿܡܹܗ ܢܚܵܘܸܐ ܥ̇ܒܼܵܕܼܵܗ̇ ܕܲܬܼܝܵܒܼܘܼܬܼܵܐ܀ ܠܗܵܘ̇ ܬܘܼܒܼ ܕܲܟܼܦܲܪ ܐܲܝܟܼ ܫܲܬܼܐ̱ܣܬܼܵܐ ܕܒܲܝܬܵܐ ܣܵܡܹܗ: ܕܲܥܠܵܘܗܝ ܢܸܒܼܢܘܿܢ ܟܠ ܬܲܝܵܒܹ̈ܐ ܒܸܢܝܵܢܲܝ̈ܗܘܿܢ܀ ܫܸܡܥܘܿܢ ܟܵܦܲܪ ܫܵܐܘܿܠ ܪܵܕܹܦ ܡܵܪܲܢ ܘܲܙܩܝܼܦ18: (ܗܵܠܹܝܢ ܟܠܗܹܝܢ ܕܢܹܐܬܼܘܿܢ ܒܝܼ̈ܫܹܐ ܠܲܬܼܝܵܒܼܘܼܬܼܵܐ19:܀ ܗܵܐ ܡܣܲܒܿܪ̈ܵܢܹܐ ܚܲܕܼ ܟܵܦܘܿܪܵܐ ܘܚܲܕܼ ܪܵܕܼܘܿܦܵܐ: ܘܡܲܢ ܥܲܡ ܗܵܠܹܝܢ ܕܵܚܹ̇ܠ ܢܸܪܕܸܐ ܨܹܝܕܼ ܐܲܠܵܗܵܐ܀ ܒܪܵܐ ܡܸܨܥܵܝܵܐ ܣܒܲܠ̣ ܬܘܼܒܼ ܚܲܫܹ̈ܐ ܡܸܛܠܵܬܼܵܟܼ: ܘܥܵܘ̣ܠܵܟܼ ܪܲܒܵܐ ܫܩܲܠ̣ ܒܲܩܢܘܿܡܹܗ ܕܐܲܢ̄ܬܿ ܬܸܬܼܚܲܣܸܐ܀ ܚܲܟܿܝܼܡܵܐܝܼܬܼ ܨܵܕܸܗ ܠܥܵܠܡܵܐ ܡܲܠܸܦ ܚܲܝܹ̈ܐ: ܘܦܘܼܪ̈ܣܹܐ ܕܚܵܫ̇ܚܝܼܢ ܠܲܬܼܒܵܝܼܘܼܬܼܵܐ ܣܵܡ̣ ܒܲܣܒܲܪܬܪܵܐ܀ ܒܬܸܓ̣ܡܵܐ ܕܒܼܝܼ̈ܫܹܐ ܚܠܲܛ̣ ܟܵܦܘܿܪܵܐ ܕܢܸܕܼܒܲܪ ܐܸܢܘܿܢ: ܐܲܝܟܼ ܕܲܠܚܲܒܼܪܹ̈ܐ20: ܘܢܹܐܬܸܐ ܢܸܒܼܟܸܐ ܩܕܼܵܡ ܪܲܒܿܘܼܬܼܵܐ܀ ܒܸܟܼܝܹܗ ܕܫܸܡܥܘܿܢ ܡܠܘܿܐܵܐ ܗ̄ܘ̣ ܪܲܒܵܐ ܒܹܝܬܼ ܬܲܝܵܒܹ̈ܐ: ܕܩܵܠ ܚܸܢ̈ܓܼܵܬܹܗ ܢܥܝܼܪ ܐܸܢܘܿܢ ܠܲܬܼܝܵܒܼܘܼܬܼܵܐ܀ ܘܐܲܟܼܡܵܐ ܕܗܵܠܹܝܢ ܐܵܡܲܪ ܫܸܡܥܘܿܢ ܨܹܝܕܼ ܚܲܛܵܝܹ̈ܐ: ܕܐܝܼܬܼ ܗ̄ܘ̣ ܣܲܒܼܪܵܐ ܠܒܼܝܼܫܵܐ21: ܕܗܵܦܹ̇ܟܼ ܡ̣ܢ ܣܲܢ̈ܝܵܬܹܗ܀ pb. 675 ܐܵܦ ܠܝܼ ܒܲܙܒܲܢ ܢܲܟܼܬܲܢܝ ܥܵܘ̣ܠܵܐ ܘܐܲܪܡܝܼ ܬܲܒܼܪܲܢܝ: ܘܕܸܡ̈ܥܹܐ ܗ̄ܘ̣ ܝܸܗ̇ܒܹܬܼ ܐܲܓܼܪܵܐ ܠܐܵܣܝܵܐ (ܘܐܸܬ݀ܵܐ ܥܲܨܒܲܢ̣ܝܼ22:܀ ܗܘܚܹܝܬܼ ܟܵܦܘܿܪܵܐ ܘܫܵܛܹ̇ܬܼ ܠܲܒܼܪܵܐ ܩܕܼܵܡ ܨܵܠܘܿܒܼܵܘ̈ܗܝ: ܘܐܲܝܢܵܐ ܚܛܵܗܵܐ ܕܪܲܒ ܡ̣ܢ ܗܵܢܵܐ ܒܥܵܠܡܵܐ ܟ̱ܠܹܗ܀ ܟܢܵܬܼܟܼܘܿܢ ܐܝܼܬܲܝ ܬܵܘ ܐܸܬܼܟܲܫܲܦܘ ܥܲܠ ܫܘܼܒܼܩܵܢܵܐ: ܐܸܬܿܕܲܡܵܘ ܒܝܼ ܕܚܲܢܘܼܢܝ ܪ̈ܲܚܡܹܐ ܒܚܲܫܵܐ ܕܲܩܢܘܿܡܝ܀ ܒܟܼܵܘ ܐܲܝܟܼ ܕܲܒܼܟܹ̇ܝܬܼ ܘܡܸܬܼܚܲܣܹܝܢ ܐܢ̄ܬܿܘܿܢ ܐܲܝܟܼ ܕܐܸܬܼܚܲܣ̇ܝܼܬܼ: ܓܥܵܘ ܒܲܚܢܲܓܼܬܼܵܐ ܘܒܲܥܓܲܠ ܡܵܘ̇ܦܹܝܢ ܣܘܼܪ̈ܚܵܢܲܝܟܿܘܿܢ܀ ܐܵܦ ܠܝܼ ܐܲܚܕܲܢܝ ܦܲܚܵܐ ܕܪܘܼܫܥܵܐ ܒܚܲܕܼ ܡ̣ܢ ܙܲܒܼ̈ܢܝܼܢ: ܘܒܲܬܼܝܵܒܼܘܼܬܼܵܐ ܬܲܒܼܪܹܗ ܚܢܵܢܵܐ ܘܐܸܢܵܐ ܦܸܠܛܹ̇ܬܼ܀ ܦܓܲܥ ܗ̄ܘ̣23: ܠܹܗ ܒܝܼ ܚܛܵܗܵܐ ܘܥܲܩ̣ܪܲܢܝ ܡ̣ܢ ܫܲܬܼܐ̣ܣܲܝ̈: ܘܐܲܪܡ̇ܝܼܬܼ ܕܸܡ̈ܥܹܐ ܘܲܒܼܟܹܿܝܬܼ ܠܲܩܢܘܿܡܝ ܕܐܸܬܼܦܲܠܦܲܠ24: ܗ̄ܘ̣ܵܐ܀ ܐܵܦ ܠܝܼ ܗܘ݀ܵܐ ܠܝܼ ܗܵܢܵܐ ܟܹܐܒܪܵܐ ܕܲܠܟܼܘܿܢ ܡܲܚܸܫ: ܘܡܸܚܕܼܵܐ ܕܲܒܼܟܹܝ̇ܬܼ ܐܸܬܼܪܵܘܚܹܬܼ ܠܝܼ25: ܡ̣ܢ ܐܘܼܠܨܵܢܵܐ܀ ܢܦܝܼܠ ܗ̄ܘ̣ ܠܝܼ ܒܹܗ ܒܗܵܢ ܟܘܼܪܗܵܢܵܐ ܕܚܲܫܹ̈ܐ ܒܝܼ̈ܫܹܐ: ܘܐܸܠܘܼ ܒܸܟܼܝܵܐ ܠܵܐ ܣܲܥ̣ܪܲܢܝ ܗ̄ܘ̣ܵܐ ܠܵܐ ܩܵܐܹ̇ܡ ܗ̄ܘܹ̇ܝܬܼ܀ ܫܘܼܡܥܘܼܢܝ ܚܲܒܼܪ̈ܲܝ ܐܹܚܵܘܸܐ ܠܟܼܘܿܢ ܡܵܢܵܐ ܥܵܒܼ̇ܕܹܬܼ: ܘܡܸܒܼܟܵܐ ܒܟܹܿܝܬܼ ܗ̄ܘܹ̇ܝܬܼ ܘܐܸܬܼܚܲܠܡܹܬܼ ܗ̄ܘܹ̇ܝܬܼ ܩܲܠܝܼܠܵܐܝܼܬܼ܀ ܥܲܡܹܗ ܕܒܸܟܼܝܵܐ ܥܪܲܩ̣ ܗ̄ܘ̣ܵܐ ܚܛܵܗܵܐ26: ܕܩܵܛܹ̇ܠ ܗ̄ܘ̣ܵܐ ܠܝܼ: ܝܸܗ̇ܒܹܿܬܼ ܕܸܡ̈ܥܹܐ ܘܫܸܩ̇ܠܹܬܼ ܪ̈ܲܚܡܹܐ ܡ̣ܢ ܚܲܢܵܢܵܐ܀ pb. 676 ܥܒܸܕܼܘ ܗܵܟܲܢܵܐ ܘܡܸܬܼܚܲܠܡܝܼܢ ܐܢ̄ܬܿܘܿܢ ܐܲܝܟܼ ܕܐܸܬܼܚܲܠܡܹܬܼ: ܒܲܩܢܘܿܡܝ ܢܲܣ̇ܝܼܬܼ ܠܵܐ ܬܸܬܼܦܲܠܓܼܘܼܢ ܥܲܠ ܚܘܼܣܵܝܵܐ܀ ܗܵܠܹܝܢ ܐܵܡܲܪ ܒܸܟܼܝܹܗ ܕܫܸܡܥܘܿܢ ܨܹܝܕܼ ܚܲܛܵܝܹ̈ܐ: ܕܲܒܼܓܼܘܼܪܵܓܼܵܐ ܢܲܪܬܲܚ ܐܸܢܘܿܢ ܠܲܡܕܲܡܵܥܘܼ܀ ܕܲܒܼܗܝܼܠܝܼܢ ܗ̄ܘ̣ܵܘ ܒܝܼ̈ܫܹܐ ܘܲܥܢܹܝܢ ܒܲܚܛܵܗܲܝ̈ܗܘܿܢ: ܐܲܝܠܸܠ̣ ܟܹܐܦܵܐ ܘܚܲܦܸܛ̣ ܐܸܢܘܿܢ ܒܲܬܼܝܵܒܼܘܼܬܼܵܐ܀ ܒܲܦܣܵܩ ܣܲܒܼܪܵܐ ܐܵܝܟܼ ܕܲܒܼܫܸܢܬܼܵܐ ܛܲܒܿܝܼܥܝܼܢ ܗ̄ܘ̣ܵܘ: ܘܩܵܠܵܐ ܕܒܸܟܼܝܵܐ ܫ̣ܕܼܵܐ ܗ̄ܘ̣ܵܐ ܥܠܲܝܗܘܿܢ ܕܲܢܥܝܼܪ ܐܸܢܘܿܢ܀ ܐܲܪܡܝܼ ܩܢܝܼܬܵܐ ܕܢܸܥܢܘܿܢ ܒܵܬܼܪܹܗ ܟܠ ܚܲܛܵܝܹ̈ܐ: ܕܲܒܼܫܘܼܠܵܡܵܐ27: ܣܲܒܼܪܵܐ ܗ̄ܘ̣ ܪܲܒܵܐ ܠܲܕܼܙܵܡܲܪ ܒܵܗ̇28:܀ ܣܸܦܪܵܐ ܚܲܕܼܬܼܵܐ ܟܬܲܒܼ ܗ̄ܘ̣ܵܐ ܒܕܸܡܥܵܘ̈ܗܝ ܪܹܫ ܬܲܠܡܝܼ̈ܕܹܐ: ܘܲܠܚܲܛܵܝܹ̈ܐ ܒܚܘܼܒܵܐ ܝܵܗ̣ܒܹܿܗ ܕܢܸܬܼܗܲܓܘܿܢ ܒܹܗ܀ ܩܪܵܘ ܠܲܡ ܗܵܪܟܵܐ ܥܕܲܡܵܐ ܕܬܹܐܠܦܘܼܢ ܙܲܕܝܼܩܘܼܬܼܵܐ: ܒܪܲܡܫܵܐ ܘܨܲܦܪܵܐ ܒܕܸܡ̈ܥܹܐ29: ܦܲܪܓܸܠܘ ܒܲܬܼܝܵܒܼܘܼܬܼܵܐ܀ ܡܵܐ ܕܕܼܵܒܹ̇ܨ ܠܵܗ̇ ܚܛܵܗܵܐ ܠܢܲܦ̮ܫܵܐ ܒܒܸܟܼܝܵܐ ܫܘܼܡܛܘܼܗܝ30: ܠܵܐ ܓܹܝܪ ܢܵܦܹ̇ܩ ܐܸܠܵܐ ܒܕܼܡ̈ܥܹܐ ܚܲܪ̈ܝܼܦܵܬܼܵܐ܀ ܗܵܐ ܫܲܬܼܐ̱ܣܬܼܵܐ ܕܲܠܬܲܝܵܒܹ̈ܐ ܣܵܡ̣ ܫܲܪܝܼܪܵܐ: ܘܐܲܠܸܦ ܐܸܢܘܿܢ ܕܐܲܝܟܲܢ ܢܸܒܼܢܘܿܢ ܠܲܩܢܘܿܡܲܝ̈ܗܘܿܢ܀ ܥܒܼܵܕܼܵܐ ܪܲܒܵܐ ܥ̣ܒܲܕܼ ܒܵܗ̇ ܒܥܹܕܬܵܐ ܒܸܟܼܝܹܗ ܕܫܸܡܥܘܿܢ: ܕܗܵܐ ܡ̣ܢ ܥܵܠܲܡ ܠܵܐ ܗܘ݀ܵܐ ܐ̄ܚܪܹܢܵܐ ܕܪܲܒܿ ܐܲܟܼܘܵܬܹܗ܀ pb. 677 ܒܗܵܠܹܝܢ ܕܸܡ̈ܥܹܐ ܕܐܸܫܲܕܼ ܟܹܐܦܵܐ ܒܲܬܼܝܵܒܼܘܼܬܹܗ: ܚܵܘܪܵܐ ܪܲܒܵܐ ܫܒܲܩ̣ ܗ̄ܘ̣ܵܐ ܠܥܹܕܬܵܐ ܕܬܸܬܿܕܲܡܸܐ ܒܹܗ܀ ܡܲܢ ܝܵܕܲܥ̇ ܗ̄ܘ̣ܵܐ ܕܡܵܐ ܕܚܵܛܹ̇ܐ ܗ̄ܘܟܵܐ ܡܵܢܵܐ ܢܸܥܒܸܿܕܼ: ܘܡܲܢ ܡܲܫܲܪ ܗ̄ܘ̣ܵܐ ܕܡܵܐ ܕܒܼܵܟܹܿܐ ܗ̄ܘ̣ܵܐ ܡܸܬܼܥܲܕܲܪ ܗ̄ܘ̣ܵܐ܀ ܡܲܢܘܼ ܨܵܐܲܪ ܨܲܠܡܵܐ ܕܡܲܠܟܵܐ ܕܠܵܐ ܕܸܡ̈ܘܵܬܼܵܐ: ܐܵܘ ܪܲܒܿܘܼܬܼܵܗ̇ ܕܢܲܦ̮ܫܵܐ ܟܣܝܼܬܼܵܐ ܕܠܵܐ ܬܲܚܘܝܼܬܼܵܐ܀ ܣܲܪܚܵܗ̇ ܚܛܵܗܵܐ ܘܡܲܢ ܝܵܕܲܥ̇ ܗ̄ܘ̣ܵܐ ܒܡܘܿܢ31: ܡܸܬܼܒܲܕܼܩܵܐ: ܘܐܸܠܘܼ ܠܵܐ ܒܟܼܵܐ ܫܸܡܥܘܿܢ ܘܐܲܠܸܦ̣ ܥܲܠ ܬܘܼܩܵܢܵܗ̇܀ ܠܵܐ ܫܚܝܼܡ ܓܲܒܼܪܵܐ ܠܵܐ ܐ̄ܢܵܫ ܢܲܒܼܣܸܐ ܥܲܠ ܝܘܼܠܦܵܢܹܗ: ܒܹܗ ܡܲܠܸܦ ܠܵܟܼ ܠܵܘ ܒܲܐ̄ܚܪܹܢܵܐ ܡܵܢܵܐ ܬܸܥܒܸܿܕܼ܀ ܡܵܐ ܕܐܸܬܼܡܲܪܩܲܬ݀ ܢܲܦ̮ܫܵܐ ܒܡܲܝ̈ܵܐ ܕܡܲܥܡܘܿܕܼܝܼܬܼܵܐ: ܕܸܒܼܚܵܐ ܐ̄ܚܪܹܢܵܐ ܢܚܲܣܹܝܗ̇ ܠܵܐ ܐܝܼܬܼ ܐܸܠܵܐ ܕܸܡ̈ܥܹܐ܀ ܚܕܼܵܐ ܙܒܲܢ ܒܲܠܚܘܿܕܼ ܡܝܬܼ ܠܲܚܛܝܼܬܼܵܐ ܒܲܪ ܐܲܠܵܗܵܐ: ܘܬܼܘܼܒܼ ܠܵܐ ܡܵܐܹ̇ܬܼ ܕܒܼܘܿܚ ܐܲܢ̄ܬܿ ܡܸܕܸܡ ܐܸܢ ܚܵܛܹ̇ܐ ܐܲܢ̄ܬܿ܀ ܕܸܒܼܚܬܼܵܐ ܐ̄ܚܪܹܬܼܵܐ ܠܵܐ ܡܸܬܼܝܲܗܒܼܵܐ ܚܠܵܦ ܦܘܼܪܩܵܢܵܟܼ: ܡ̣ܢ ܕܝܼܠܵܟܼ ܗܲܒܼ ܡܸܕܸܡ ܕܲܡܨܸܐ ܢܚܲܣܸܐ ܥܵܘ̣ܠܵܟܼ܀ ܗܘ݀ܝܼ ܠܲܩܢܘܿܡܵܟܼ ܟܵܗܢܵܐ ܠܒܼܝܼܒܼܵܐ ܐܲܝܟܼ ܐܲܒܼܪܵܗܵܡ: ܘܲܕܼܒܼܘܿܚ ܩܵܠܵܟܼ32: ܐܲܝܟܼ ܝܑܼܚܝܼܕܹܗ33: ܒܹܝܬܼ ܚܘܼܣܵܝܵܐ܀ ܦܲܠܦܸܠ ܢܲܦ̮ܫܵܟܼ ܒܲܕܼܡܵܐ34: ܓܲܐܝܵܐ ܣܲܓܝܼܵܐܝܼܬܼ܀ ܒܕܸܡ̈ܥܹܐ ܕܗܸܢܹܝܢ ܗܵܘ̈ܝܵܢ ܕܸܒܼܚܵܐ ܕܠܵܐ ܙܲܗܡܘܼܬܼܵܐ܀ pb. 678 ܐܲܢ̄ܬܿ ܠܼܵ ܚܲܣܵܐ ܒܚܲܫܵܐ35: ܕܢܲܦ̮ܫܵܟܼ ܟܲܕܼ ܒܵܟܹ̇ܐ ܐܲܢ̄ܬܿ: ܠܵܐ ܬܘܼܒܼ ܬܸܩܪܸܐ ܠܨܲܥܪܵܐ ܡܵܪܵܟܼ ܘܲܠܩܘܼܦܵܚܵܐ܀ ܝܵܘܡܵܢ ܢܸܒܼܟܸܐ ܥܲܠ ܒܝܼ̈ܫܵܬܲܢ ܡܲܪܝܼܪܵܐܝܼܬܼ: ܟܲܕܘܼ ܕܚܲܩ̣ܢܵܗ̇ ܠܛܵܒܼܬܼܵܐ ܡܸܢܲܢ ܒܲܛܪ̈ܵܝܵܬܼܵܐ36:܀ ܠܲܬܼܝܵܒܼܘܼܬܼܵܐ ܝܵܘܡܵܢ ܢܲܚܸܒܼ ܕܐܝܼܬܼ ܠܵܗ̇ ܐܲܓܼܪܵܐ: ܟܲܕܘܼ ܦܠܲܚܢܲܢ ܥܵܘ̣ܠܵܐ ܒܬܸܢܘܲܝ ܢܲܓܝܼܪܵܐܝܼܬܼ܀ ܙܲܕܝܼܩܘܼܬܼܵܐ ܢܛܲܪܢܵܗ̇ ܠܲܡܚܵܪ ܒܲܕܼܠܵܐ ܩܲܪܝܼܒܼ: ܘܝܵܘܡܵܢ ܟ̱ܠܹܗ ܠܥܵܘ̣ܠܵܐ ܝܲܗ̄ܒܼܢܵܝܗܝ ܢܸܫܬܲܡܲܫ ܒܹܗ܀ ܚܛܝܼܬܼܵܐ ܒܩܘܼܪܒܵܐ ܘܙܲܕܝܼܩܘܼܬܼܵܐ ܠܒܲܪ ܡ̣ܢ ܬܲܪܥܵܐ: ܗܵܪܟܵܐ ܐܸܚܛܸܐ ܘܗܵܪ ܬܲܡܵܢ ܠܲܡ ܡܸܙܕܲܕܲܩ ܐ̄ܢܵܐ܀ ܗܵܐ ܟܡܵܐ ܠܲܡܚܵܪ ܘܲܒܼܫܘܼܘܕܵܝܲܢ ܠܵܐ ܟܲܬܲܪܢܲܢ: ܟܠܝܘܿܡ ܬܸܘܢܲܝ ܠܲܬܼܝܵܒܼܘܼܬܼܵܐ ܘܬܘܼܒܼ ܪܲܚܝܼܩܵ ܗ̄ܝܼ܀ ܟܠ ܢܸܫܬܵܘܕܸܐ ܦܫܝܼܩ ܠܲܢ ܒܲܠܚܘܿܕܼ ܥܲܠ ܛܵܒܼ̈ܵܬܼܵܐ: ܡܸܣܬܲܥܪܵܐ ܕܹܝܢ ܒܝܼܫܬܵܐ ܟܠܝܘܿܡ ܓܲܢ̄ܒܵܪܵܐܝܼܬܼ܀ ܕܝܵܘܡܵܐ ܒܝܵܘܡܹܗ ܣܵܡ̣ܢܲܢ ܬܸܢܘܵܝ ܠܲܬܼܝܵܒܼܘܼܬܼܵܐ: ܘܠܲܝܬܵܘܗܝ ܕܐܵܬܹ̇ܐ ܠܲܡܚܵܪ ܕܝܼܠܲܢ ܢܸܬܼܝܲܬܲܪ ܒܹܗ܀ ܛܪܲܝܢܲܢ ܡܸܢܲܢ ܫܲܦܝܼܪ̈ܵܬܼܵܐ ܥܲܡ ܝܵܘ̈ܡܵܬܼܵܐ: ܕܟܼܠܹܗ ܙܲܒܼܢܵܐ ܕܚܲܝܹ̈ܐ ܢܵܘܦܸܐ ܕܠܵܐ ܬܝܵܒܼܘܼܬܼܵܐ܀ ܐܲܝܟܵܘ ܝܵܘܡܵܢ ܗܵܘ̇ ܫܘܼܘܕܵܝܵܐ ܕܲܗܘ݀ܵܐ ܐܸܬܼܡܵܠܝ: ܕܐܵܘܚܲܪ ܠܲܡܚܵܪ ܕܲܡܫܲܢܸܐ ܐ̄ܢܵܐ ܡ̣ܢ ܒܝܼܫܵܬܼܵܐ܀ ܩܘܼܡ ܠܲܥ̇ܒܼܵܕܵܟܼ ܟܲܕܘܼ ܬܸܢܘܲܝ ܕܲܓܵܠܵܐܝܼܬܼ: pb. 679 ܚܛܵܗܵܐ ܠܩܘܼܒܼܠܵܟܼ ܩܘܼܡ ܐܸܬܼܟܲܬܲܫ ܥܲܡ ܩܵܛܘܿܠܵܟܼ܀ ܠܵܐ ܢܸܬܼܝܲܗܒܿܘܼܢ ܟܠܗܘܿܢ ܝܵܘܡܹ̈ܐ ܠܥܵܘ̣ܠܵܐ ܡܸܢܵܟܼ: ܣܲܒܼ ܠܵܟܼ ܙܲܒܼܢܵܐ ܠܙܲܕܝܼܩܘܼܬܼܵܐ ܥܲܕܼ ܫܲܠܝܼܛ ܐܲܢ̄ܬܿ܀ ܚܛܲܝܢܲܢ ܐܸܬܼܡܵܠܝ ܢܸܒܼܟܸܐ ܝܵܘܡܵܢ ܥܲܠ ܣܘܼܪ̈ܚܵܢܲܝܢ: ܠܵܐ ܢܸܠܒܿܘܿܟܼ ܠܹܗ ܚܛܵܗܵܐ ܢܘܿܡܝܼ ܘܲܢܦܲܫܲܚ ܠܲܢ܀ ܒܥܵܘ̣ܠܵܐ ܣܐܸܒܼܢܲܢ ܢܸܗܘܸܐ ܛܠܵܝܹ̈ܐ ܒܲܬܼܝܵܒܼܘܼܬܼܵܐ: ܕܲܒܼܡܲܠܟܿܘܼܬܼܵܐ ܡܲܢ ܕܐܲܝܟܼ ܛܲܠܝܵܐ ܗ̄ܘ̣ ܘܟܸܢ37: ܥܵܐܹ̇ܠ ܠܵܗ̇܀ ܫܩܲܠ̣ ܥܲܠ ܐܝܼܕܼܵܘ̈ܗܝ ܛܲܠܝܵܐ ܡܵܪܲܢ ܕܲܢܚܵܘܸܐ ܗ̄ܘ̣ܵܐ: ܟܡܵܐ ܫܲܦܝܼܪܵܐ ܒܪܝܼܬܼܵܐ ܒܛܲܟܼܣܵܗ̇ ܠܲܕܼܢܵܛܲܪ ܠܵܗ̇܀ ܚܘܼܪ ܒܲܫܠܝܼܚܹ̈ܐ ܕܲܠܗܘܿܢ ܚܵܘܝܹܗ ܟܲܕܼ ܐܵܡܲܪ ܗ̄ܘ̣ܵܐ: ܗܘ݀ܵܐ ܐܲܝܟܼ ܗܵܢܵܐ (ܕܗ݀ܘܝܘܼ ܣܵܟܼܵܐ38: ܕܲܓܼܡܝܼܪܘܼܬܼܵܐ܀ ܡܵܪܝ ܐܲܝܟܲܢܵܐ ܡܸܫܟܲܚ ܣܵܒܼܵܐ ܕܢܸܗܘܸܐ ܛܲܠܝܵܐ: ܕܣܘܿܓ̣ܐܵܐ ܕܝܵܘܡܵܘ̈ܗܝ ܐܲܦܸܩ̣ ܐܸܢܘܿܢ ܒܲܣܪܝܼܩܘܼܬܼܵܐ܀ ܬܵܘܣܲܦܬܵܐ ܠܲܡ ܐܝܼܬܼ ܒܲܒܼܪܝܼܬܹܗ39: ܕܐܲܝܢܵܐ ܕܲܚܛ̣ܵܐ40: ܘܗ݀ܘ ܡ̣ܢ ܕܝܼܠܹܗ ܐܵܘܣܸܦ ܡܸܕܸܡ ܥܲܠ ܬܘܼܩܵܢܹܗ܀ ܟܡܵܐ ܕܲܟܼܝܵܢܵܐ ܢܛܝܼܪ ܒܲܒܼܪܝܼܬܹܗ ܛܲܠܝܵܐ ܗ̄ܘ̣ ܟܠܝܘܿܡ: ܐܸܢܕܹܝܢ ܚܵܛܹ̇ܐ ܣܐܸܒܼ ܠܹܗ ܒܥܵܘ̣ܠܵܐ ܠܡܸܬܼܚܲܒܵܠܘܼ܀ ܗܵܠܹܝܢ ܕܘܼܡ̈ܣܹܐ ܕܲܒܼܢܵܬ݀ ܢܲܦ̮ܫܵܐ ܟܲܕܼ ܐܸܨܛܲܠܝܲܬ݀: ܬܸܗܦܘܿܟܼ ܬܸܣܬܿܘܿܪ ܡ̣ܢ ܬܘܼܩܵܢܵܗ̇ ܒܲܬܼܝܵܒܼܘܼܬܼܵܐ܀ ܣܒܼܘܿܠ ܐܲܢ̄ܬܿ41: ܘܐܲܦܸܩ ܝܲܬܿܝܼܪ̈ܵܬܼܵܐ ܕܥܲܠ̣ ܠܲܩܢܘܿܡܵܟܼ: pb. 680 ܘܗܲܒܼ ܠܝܼ ܟܝܵܢܵܐ ܫܲܦܝܵܐ ܒܲܠܚܘܿܕܼ ܐܲܝܟܼ ܕܲܒܼ̇ܪܹܝܬܼܵܟܼ܀ ܠܵܐ ܬܸܙܕܲܕܲܩ ܐܲܢ̄ܬܿ ܡ̣ܢ ܕܝܼܠܵܟܼ ܐܵܦܠܵܐ ܩܲܠܝܼܠ: ܟܝܵܢܵܐ ܛܲܪ42: ܠܝܼ ܕܠܵܐ ܟܘܼ̈ܬܼܡܵܬܼܵܐ ܘܣܲܓܝܼ ܫܲܦܝܼܪ܀ ܐܸܢ ܕܹܝܢ ܡܸܕܸܡ ܥܲܠ̣ ܝܲܬܿܝܼܪܵܐ ܥܲܠ ܬܘܼܩܵܢܵܐ: ܠܵܐ ܚܵܫܲܚ̇ ܠܝܼ ܢܸܬܿܛܲܠܲܩ ܠܹܗ ܒܲܬܼܝܵܒܼܘܼܬܼܵܐ܀ ܗܦܘܿܟܼ ܠܲܡ ܢܲܦ̮ܫܵܟܼ ܘܲܗ݀ܘܝܼ ܛܲܠܝܵܐ ܐܲܝܟܼ ܕܲܒܼ̇ܪܹܝܬܼܵܟܼ: ܕܲܒܼܡܲܠܟܿܘܼܬܼܵܐ ܬܸܗܘܸܐ ܝܵܪܬܵܐ ܐܲܝܟܼ ܕܲܩ̇ܪܹܝܬܼܵܟܼ܀ ܡܘܿܢ ܡ̣ܢ ܕܝܼܠܼܵ ܐܝܼܬܼ ܒܵܟܼ ܒܲܨܵܐ43: ܘܲܫܕܝܼ ܡܸܢܵܟܼ: ܘܗܵܘ̇ ܕܝܼܠܝ ܐܲܪܦܵܐ ܕܠܵܐ ܫܘܼܚܠܵܦܵܐ ܘܒܲܪ ܡܲܠܟܿܘܼܬܼܝ ܐܲܢ̄ܬܿ܀ ܗܵܘ̇ ܡܵܐ ܕܲܒܼܢ̣ܵܐ ܚܛܵܗܵܐ ܒܢܲܦ̮ܫܵܟܼ ܥܩܘܿܪ ܡ̣ܢ ܬܲܡܵܢ: ܒܪܝܼܬܼܝ ܫܲܦܝܼܪܵܐ ܗ̄ܝܼ ܠܵܐ ܬܒܲܠܒܸܠܹܝܗ̇44: ܒܲܪ̈ܓܼܝܼܓܼܵܬܼܵܐ܀ ܡܸܛܠܗܵܢܵܐ ܗܦܘܿܟܼ ܠܲܡ ܢܲܦ̮ܫܵܟܼ ܘܲܗܘ݀ܝܼ ܛܲܠܝܵܐ: ܕܗ݀ܘܝܘܼ ܣܵܟܼܵܗ̇ ܕܲܓܼܡܝܼܪܘܼܬܼܵܐ ܘܙܲܕܝܼܩܘܼܬܼܵܐ܀ ܗܵܐ ܬܲܝܵܒܼܵܐ ܡܵܢܵܐ ܥܵܒܹ̇ܕܼ ܐܸܢ ܡܸܬܼܟܲܫܲܪ: ܕܐܵܦܸܢ ܣܵܒܼܵܐ ܗ̄ܘ̣ ܡܸܫܟܲܚ ܢܸܒܼܪܸܐ ܢܲܦ̮ܫܹܗ ܛܲܠܝܵܐ܀ ܥܲܠ̣ ܗ̄ܘ̣ܵܐ ܟܦܘܼܪܝܵܐ ܘܥܲܒܼܕܹܗ ܣܵܒܼܵܐ ܠܪܹܫ ܬܲܠܡܝܼ̈ܕܹܐ: ܕܒܲܬܼܝܵܒܼܘܼܬܼܵܐ ܗܦܲܟܼ ܗ̄ܘ̣ܵܐ ܢܲܦ̮ܫܹܗ ܕܢܸܗܘܸܐ ܛܲܠܝܵܐ܀ ܚ̣ܙܵܐ ܠܲܚܛܝܼܬܼܵܐ ܕܝܸܩܪܲܬ݀ ܥܠܵܘܗܝ ܐܲܝܟܼ ܣܲܝܒܿܘܼܬܼܵܐ: ܘܟܲܕܼ ܡܲܝܠܸܠ ܗ̄ܘ̣ܵܐ ܢܲܦܨܵܗ̇ ܡܸܢܹܗ ܕܠܵܐ ܒܸܣܡܲܬ݀ ܠܹܗ܀ ܡܗܝܼܪܵܐ ܗ̄ܝܼ ܢܲܦ̮ܫܵܐ ܘܪܵܡ ܣܘܼܟܵܠܵܗ̇ ܡ̣ܢ ܒܸܪ̈ܝܵܬܼܵܐ: ܘܐܝܼܬܼ ܒܵܗ̇ ܚܲܝܠܵܐ ܕܐܲܝܟܵܐ ܕܨܵܠ̇ܝܵܐ ܥܒܼܵܕܼܵܐ ܬܸܥܒܸܿܕܼ܀ pb. 681 ܘܡܵܐ ܕܡܸܬܼܦܲܢܝܵܐ ܥܲܠ ܒܸܢܝܵܢܵܐ ܕܫܲܦܝܼܪ̈ܵܬܼܵܐ: ܕܘܼܡ̈ܣܹܐ ܕܥܵܘ̣ܠܵܐ ܥܵܩ̇ܪܵܐ ܕܬܲܦܸܩ ܡ̣ܢ ܡܸܕܼܝܵܪܹ̈ܝܗ̇܀ ܐܲܝܟܼ ܕܲܠܒܲܝܬܵܐ ܪܲܒܵܐ ܥܵܐܠܵܐ ܗܝ݀ ܠܲܩܢܘܿܡܵܗ̇: ܘܚܵܙ̇ܝܵܐ ܕܲܒܼܠܝܼܠ45: ܘܲܡܠܸܐ ܢܦܵܬܼܵܐ ܕܲܪ̈ܓܼܝܼܓܼܵܬܼܵܐ܀ ܣܝܼܡ ܒܹܗ ܥܵܘ̣ܠܵܐ ܒܓܼܘܼܫܡܵܐ ܪܲܒܵܐ ܕܥܲܠ̣ ܡ̣ܢ ܒܝܼܫܵܐ: ܘܲܣܕܼܝܼܪܝܼܢ ܒܹܗ ܚܛܵܗܹ̈ܐ ܐ̄ܚܪ̈ܵܢܹܐ ܐܲܝܟܼ ܬܘܼܩ̈ܠܵܬܼܵܐ܀ ܡܠܸܐ ܒܝܼ̈ܫܵܬܼܵܐ ܘܲܣܟܼܝܼܪ ܬܲܪܥܹܗ ܡ̣ܢ ܣܲܢ̈ܝܵܬܼܵܐ: ܘܠܵܐ ܝܼܬܼ ܐܲܬܼܪܵܐ ܕܬܸܥܘܿܠ ܛܵܒܼܬܼܵܐ ܒܚܲܕܼ ܡ̣ܢ ܓܲܒܿܝܼ̈ܢ܀ ܒܲܬܼܝܵܒܼܘܼܬܼܵܐ ܢܵܗ̇ܪܵܐ ܢܲܦ̮ܫܵܐ ܕܬܸܚܙܸܐ ܗܵܠܹܝܢ: ܘܢܵܦ̇ܠܵܐ ܒܥܲܡܠܵܐ ܕܬܸܣܒܿܘܿܠ ܬܲܩܸܦ ܟܠ ܒܝܼ̈ܫܵܬܼܵܐ܀ ܡܵܐ ܕܹܝܢ ܕܲܚܙܵܬ݀ ܕܲܩܫܸܐ ܗ̄ܘ̣ ܡܸܢܵܗ̇ ܥ̇ܒܼܵܕܼܵܐ ܗܵܢܵܐ: ܠܪ̈ܲܚܡܹ ܩܵܪܝܵܐ ܕܲܢܥܲܕܪܘܼܢܵܗ̇ ܒܲܥܒܼܝܼ̈ܕܼܵܬܼܵܗ̇܀ ܡܫܲܪܝܵܐ ܕܬܸܓܘܿܪ ܥܵܘ̣ܠܵܐ ܢܸܦܘܿܩ ܡ̣ܢ ܓܵܘ ܒܲܝܬܵܗ̇: ܘܐܵܓܼ̇ܪܵܐ ܒܕܸܡ̈ܥܹܐ ܚܢܵܢܵܐ ܕܢܸܗܘܸ ܦܵܥܠܵܐ ܥܲܡܵܗ̇܀ ܫܵܩ̇ܠܵܐ ܕܬܸܟܼܢܘܿܫ ܚܵܘ̈ܒܹܐ ܕܥܲܠ̣ܘ ܠܵܗ̇ ܡ̣ܢ ܛܲܠܝܘܼܬܼܵܗ̇: ܘܙܵܠ̇ܚܵܐ ܩܢܘܿܡܵܗ̇ ܒܡܲܝ̈ܵܐ ܕܥܲܝܢܗܹܝܗ̇ ܦܵܪܘܿܫܵܐܝܼܬܼ܀ ܟܵܢ̇ܫܵܐ ܚܛܵܗܹ̈ܐ ܐܲܝܟܼ ܕܲܠܟܼܘܼ̈ܒܹܐ ܡ̣ܢ ܩܲܝܛܘܿܢܵܗ̇: ܘܪܵܬܼܚܵܐ ܒܒܸܟܼܝܵܐ ܕܬܼܵܘܩܸܕܼ ܐܸܢܘܿܢ ܚܲܡܝܼܡܵܐܝܼܬܼ܀ ܢܘܼܪܵܐ ܕܡܲܝ̈ܵܐ ܫܵܕܼܝܵܐ ܥܠܲܝܗܘܿܢ ܚܲܟܿܝܼܡܵܐܝܼܬܼ: ܕܲܒܼܝܲܩܕܵܢܵܐ ܕܠܵܐ ܬܸܢܵܢܵܐ ܬܲܕܼܠܸܩ46: ܐܸܢܘܿܢ܀ ܫܸܡܥܘܿܢ ܒܵܟܹ̇ܐ ܡܲܢ ܠܵܐ ܢܲܝܠܸܠ ܐܸܢ ܚܲܛܵܝܵܐ ܗ̄ܘ̣: pb. 682 ܥܲܠ̣ ܓܲܝܵܣܵܐ ܘܡܲܢ ܠܵܐ ܢܸܬܿܬܿܟܸܠ ܐܸܢ ܬܲܝܵܒܼܵܐ ܗ̄ܘ̣܀ ܐܵܦ ܓܲܝܵܣܵܐ ܛܲܠܝܵܐ ܗܘ݀ܵܐ ܒܵܗ̇47: ܒܗܵܝ̇ ܬܵܘܕܝܼܬܼܵܐ: ܘܟܸܢ ܐܸܬܼܡܲܛܝܼ48: ܕܢܸܗܘܸܐ ܝܵܪܬܵܐ ܒܗܵܝ̇ ܡܲܠܟܿܘܼܬܼܵܐ܀ ܒܲܚܕܼܵܐ ܡܸܠܬܼܵܐ ܟܠܗܘܿܢ ܛܘܼܪܹ̈ܐ ܕܥܵܘ̣ܠܵܐ ܕܲܒܼܢ̣ܵܐ: ܫܲܢܝܼ ܐܸܢܘܿܢ ܕܗܲܝܡܵܢܘܼܬܹܗ ܚܲܣܝܼܢܵܐ ܗ̄ܘ̣ܵܬܼ܀ ܪ̈ܲܚܡܹܐ ܥܲܕܪܘܼܗܝ ܕܢܹܐܬܸܐ ܠܗܵܢܵܐ ܥ̇ܒܼܵܕܼܵܐ ܪܲܒܵܐ: ܘܠܵܟܼ ܐܸܢ ܬܸܒܼܥܸܐ ܐܵܬܹ̇ܝܢ ܐܸܢܘܿܢ ܠܲܡܥܲܕܵܪܘܼ܀ ܒܲܠܚܘܿܕܼ ܫܲܪܵܐ ܘܡܸܚܕܼܵܐ ܚܢܵܢܵܐ ܪܵܕܹܐ ܥܲܡܵܟܼ: ܥܸܠܬܼܵܐ ܐܲܥܝܼܪ ܘܲܡܥܲܕܪܵܢܵܟܼ ܠܵܐ ܡܸܫܬܵܘܚܲܪ܀ ܐܲܢ̄ܬܿ ܗ̄ܘ̣ ܟܵܠܹ̇ܐ ܕܬܸܩܪܸܐ49: ܒܬܲܪܥܵܗ̇ ܕܲܬܼܝܵܒܼܘܼܬܼܵܐ: ܫܘܼܒܼܚܵܐ ܠܪ̈ܲܚܡܹܐ ܕܲܟܼܡܵܐ ܦܨܝܼܚܝܼܢ ܨܝܼܕܼ ܬܲܝܵܒܹ̈ܐ܀