On the Three Doctors - ܥܲܠ ܐܲܒܼܗ̈ܬܼܵܐ ܘܡܲܠܦܵܢܹ̈ܐ ܝܵܘܢܝܹ̈ܐ

1 :ܛܢܵܢܵܐ ܟܹܐܢܵܐ ܕܲܚܠܵܦ ܟܹܐܢܹܐ ܫܚܩܢܝ ܣܲܓܿܝܼ 2 ܕܡܸܛܠ ܡܵܢܵܐ ܛܠܝܼܡ ܝܘܼܬܼܪܵܢܵܐ ܕܡ̣ܢ ܥܲܡܠܲܝܗ̈ܘܿܢ. 3 :ܝܘܼܬܼܪ̈ܵܢܲܝܗܘܿܢ ܚܙܹ̇ܝܬܼ ܕܲܣܒܼܝܼܣܝܼܢ ܒܹܝܬܼ ܐܲܪ̈ܥܵܢܵܐ 4 ܘܚܸܫܹ̇ܬܼ ܣܲܓܿܝܼ ܕܐܲܝܟܲܢ ܘܲܟ̣ܡܵܐ ܛܠܝܼܡܝܼܢ ܟܹܐܢܹ̈ܐ܀ 5 :ܛܠܘܼܡܝܵܐ ܪܲܒܿܐ ܛܠܲܡ̣ܘ ܡܲܪ̈ܚܹܐ ܠܝܵܕܼܥܲܝ̈ ܩܘܼܫܬܵܐ 6 ܘܚܲܪ ܡܵܢܵܐܝܼܬܼ ܒܲܙܲܚ̣ܘ ܘܐܲܗܸܠ̣ܘ ܒܦܸܬܼܓܼܵܡܲܝ̈ܗܘܿܢ. 7 :ܒܦܸܬܼܓܼܵܡܲܝ̈ܗܘܿܢ ܚܙܵܬ̤ ܐ̄ܢܵܫܘܬܼܵܐ ܫܪܵܪܵܐ ܓܲܠܝܵܐ 8 ܘܠܵܐ ܫܲܪܝܼܪܹ̈ܐ ܚܫܸܟܼܘ ܡ̣ܢ ܢܘܼܗܪܵܐ ܕܗܲܝܡܵܢܘܼܬܼܵܐ܀ 9 :ܐܲܝܟ ܕܲܒܼܡܠܚܐ ܡܲܕܼܟܼܘܼܗܝ ܠܥܵܠܡܵܐ ܒܣܘܼ̈ܟܵܠܲܝܗܘܿܢ 10 ܘܥܛ̈ܠܝ ܠܸܒܵܐ ܦܟܼܗܘ ܡ̣ܢ ܛܲܡܵܐ ܕܡܠܲܬܼ ܚܲܝ̈ܐ. 11 :ܐܘܪܚܵܐ ܕܚܲܝܹ̈ܐ ܕܪܫ̣ܘ ܒܒܪܝܼܬܐ ܠܡܝܼܬܼܘܼܬܼ ܐܢܵܫܵܐ 12 ܘܡܝ̈ܬܹܐ ܕܥܵܘܠܵܐ ܠܵܐ ܐܸܬܼܢܲܚܲܡܘ ܡ̣ܢ ܚܵܘܒ̈ܝܗܘܿܢ܀ 13 :ܣܢܝ̈ܝ ܚ̈ܝܐ ܗܘ̤ܵܘ ܚܸܪ̈ܝܵܝܹܐ ܒܚܸܪܚܵܘܼܬܼܗܘܿܢ 14 ܒܗܵܝ̇ ܕܲܣܢܵܐܘܗ̇ ܠܡܸܠܲܬܼ ܩܘܼܫܬܵܐ ܕܲܒܼܝܵܕܘܥܹ̈ܐ. 15 :ܠܡܸܠܲܬܼ ܩܘܼܫܬܵܐ ܪܚܸܡܘ ܫܲܪܝܼܪܹ̈ܐ ܡ̣ܢ ܟܠܡܸܕܹܡ 16 ܘܲܒܼܢܲܝ̈ ܛܘܼܥܝܲܝ ܟܢܝܼܘ ܐܸܢܘܿܢ ܣܵܢܐܹ̈ܐ ܕܩܘܼܫܬܐ܀ 17 ܫܪܪܐ ܓܠܝܵܐ ܡܲܟܼܪܸܙ ܚܲܝܠܵܐ ܕܦܸܬܼܓܼܵܡܲܝ̈ܗܘܿܢ: pb. f.60v 18 ܘܣܲܟܼ̈ܠܹܐ ܩܥܝ̇ܢ ܕܕܲܓܲܠ ܡܸܐܡܪܵܐ ܕܪܸ̈ܥܝܵܢܲܝܗܘܿܢ. 19 :ܐܲܝܟ ܫܝܼܦܘܿܪܵܐ ܩܥ̇ܐ ܩܘܼܫܬܐ ܒܓܼܵܘ ܣܸܦܪ̈ܝܗܘܿܢ 20 ܘܐܸܕܼܢܵܐ ܕܣܲܟܼ̈ܠܹܐ ܗܘ̤ܵܬܼ ܐܲܝܟ ܫܘܥܐ ܕܠܵܐ ܡܸܬܼܪܲܟܲܟ܀ 21 ܠܢܝܼܫܵܐ ܕܣܦܪ̈ܐ ܐܲܠܗܝ̈ܐ ܚܢ̣ܵܘ ܫܲܪܝܼܪܹ̈ܐ. 22 ܘܚܲܬܿܝܼܬܼܵܐܝܼܬܼ ܦܲܫܩܘܼܗܝ ܠܚܲܝܠܵܐ ܕܣܘܼܟܠܲܝܗ̈ܘܢ. 23 :ܠܩܘܼܫܬܐ ܕܲܒܼܗܘܿܢ ܚ̣ܙܵܐ ܡܵܪܘܿܕܼܵܐ ܣܵܢܵܐܐ ܕܐܢܵܫܵܐ 24 ܘܐܲܛܸܢ ܐܢܫ̈ܐ ܕܢܣܢܘܢ ܐܢܘܢ ܐܝܟ ܕܲܠܒܿܝܼܫ̈ܐ܀ 25 :ܛܢܢܐ ܒܝܼܫܵܐ ܐܪܡܝܼ ܢܟܼܠܵܐ ܒܪܸܥܝܵܢ ܣܲܟܼܠܹ̈ܐ 26 ܕܲܢܨܲܚܘܢܗ̇ ܠܡܠܬܼ ܩܘܫܬܐ ܕܒܼܝܵܕܘܥܹ̈ܐ. 27 :ܙܪܥܵܐ ܗ̄ܘ̣ ܕܝܠܹܗ ܗܵܢ ܝܘܠܦܵܢܵܐ ܕܲܫܘܲܚ ܒܐܲܪܥܵܐ 28 ܕܡܣܢܐ ܠܐܢ̈ܫܐ ܝܲܕܘܥܬܢ̈ܐ ܒܥܝܢܝ̈ ܣܟ̈ܠܐ܀ 29 :ܒܦܘܼܡ ܗܕܝܘ̈ܛܹܐ ܓܣ̇ܐ ܡܸܪܬܹܗ ܥܲܠ ܝܵܕܘܥܹ̈ܐ 30 ܕܝܵܕܥ̇ ܕܪܓܼܝܼܓܼ ܗܸܪܓܐ ܕܠܸܒܿܗܘܿܢ ܠܲܡܨܵܬܼ ܡܸܠܵܘ̈ܗܝ. 31 :ܒܢܟܘܠܬܢ̈ܐ ܡܥܕܼ ܡܸܬܼܢܲܨܲܚ ܢܟܘܠܬܢܐ 32 ܘܒܗܘܢ ܫܵܕܹ̇ܐ ܓܹܐܪܹ̈ܐ ܕܢܸܟܼܠܵܘ̈ܗܝ ܒܓܲܒܵܐ ܕܟܹܐܢ̈ܐ܀ 33 :ܒܦܘܡܗܘܿܢ ܡܲܩܪܸܒܼ ܥܲܡ ܫܲܪܝܼܪܹ̈ܐ ܒܟܼܠܗܘܿܢ ܕܵܪܹ̈ܐ 34 ܘܲܒܠܸܫܵܢܗܘܿܢ ܚܵ̇ܪܸܒܼ ܣܸܕܼܪܹ̈ܐ ܕܗܲܝܡܵܢܘܼܬܼܵܐ. 35 :ܗܵܢ̇ܘ ܢܝܼܫܹܗ ܡ̣ܢ ܫܘܼܪܵܝܵܐ ܕܬܼܘܼܩܵܢ ܐܵܢܵܫܐ 36 ܕܲܒܼܝܲܕܼ ܐܢܵܫܵܐ ܢܸܣܕܘܿܪ ܩܸܬܪܣܵܐ ܠܘܼܩܒܲܠ ܐܵܢܵܫ̈ܐ܀ 37 :ܓܘܼܫܡܵܢܵܐܝܼܬܼ ܡܥ̇ܕܼ ܡܸܬܼܟܲܬܲܫ ܥܲܡ ܓܘܼܫܡܵܢܹ̈ܐ 38 ܒܗܵܝ̇ ܕܲܟܼܝܵܢܹܗ ܕܠܵܐ ܪܘܼܟܵܒܼܵܐ ܗ̄ܘ̣ ܘܲܕܼܠܵܐ ܚܙܵܬܼܵܐ. 39 ܒܚܸܘܝܵܐ ܓܫܝܼܡܵܐ ܐܲܩܪܸܒܼ ܠܘܩܕܼܵܡ ܥܲܡ ܒܲܪܬܼ ܩܵܠܹ̇ܐ. 40 ܘܲܒܼܠܸܫܵܢܹܗ ܙܲܪܥܵܗ̇ ܠܛܘܼܥܝܲܝ ܒܐܸܕܼܢܲܝ̈ ܚܵܘܵܐ܀ 41 :ܒܐܝܼܕܼܵܐ ܕܒܸܣܪܵܐ ܩܲܛܠܹܗ ܠܗܵܒܹܝܠ ܒܘܼܟܼܪܵܐ ܕܟܹܐܢܹ̈ܐ 42 ܘܲܒܚܲܣܵܡܵܐ ܓܡܲܪ ܨܒܼܝܵܢܵܐ ܕܚܵܣܘܿܡܘܼܬܹܗ. 43 :ܒܦܘܼܡ ܡܲܪܵܚܵܐ ܨܲܚܝܹܗ ܠܟܹܐܢܵܐ ܕܟܹܐ ܡ̣ܢ ܥܵܘܠܵܐ 44 ܘܐܲܗܸܠ ܘܲܓܼܚܸܟ ܒܪܵܐ ܙܲܠܝܼܠܵܐ ܥܲܠ ܝܵܠܘܿܕܹܗ܀ 45 :ܕܐܚܲܝܝ̈ ܒܲܚܣܵܘܲܡܘܼܬܼܵܐ ܝܵܘܣܸܦ ܙܲܒܼܢܹܗ ܠܝܵܘܣܸܦ 46 ܘܥܲܒܼܕܹܗ ܥܲܒܼܕܵܐ ܠܙܲܪܥܹܗ ܕܲܟܼܢܲܥܢ ܥܲܒܼܕܵܐ ܕܥܲܒܼ̈ܕܹܐ. 47 :ܒܝܼܣܲܪܠܵܝܵܐ ܛܲܪܕܹܗ ܠܡܘܼܫܹܵܐ ܘܡ̣ܢ ܒܹܝܬܼ ܦܹܪܥܘܿܢ 48 ܘܐܘܓܪ ܢܲܦ̣ܫܹܗ ܥܲܡ ܩܵܨܵܘܿܡܵܐ ܟܘܼܡܪܵܐ ܕܫܹܐܕ̈ܐ܀ 49 :ܒܫܵܐܘܿܠ ܫܹܐܕ̇ܐ ܥܘܼܡܪܵܐ ܕܫ̈ܐܕܹܐ ܪܕܼܦܹܗ ܠܕܵܘܝܼܕ 50 ܘܚܲܫ̣ ܘܐܸܬܿܬܲܢܲܚ ܟܲܕܼ ܡܸܬܬܵܘܬܲܒ ܒܹܝܬܼ ܢܘܼܟܼܪ̈ܝܐ. 51 :ܠܟܼܠܗܘܿܢ ܟܐܹܢܹ̈ܐ ܐܲܟܝܼ ܢܟܼܝܼܠܵܐ ܒܲܢܟܼܝܼܠܘܼܬܹܗ 52 ܘܠܵܐ ܗ̄ܘ̣ܵܐ ܢܲܟܼܦܵܐ ܕܠܑܵܐ ܒܲܙܲܚ ܒܹܗ ܒܦܘܼܡ ܡܪ̈ܚܹܐ܀ 53 :ܒܦܘܼܡ ܡܪ̈ܚܐ ܕܡܝܼܪ ܨܒܝܼܢܗ ܒܟܼܠܗܘܢ ܕܵܪܹ̈ܐ 54 ܘܠܵܐ ܦܫ̣ ܘܐܲܗܡܝܼ ܡ̣ܢ ܬܲܟܼܬܘܼܫܵܐ ܕܥܲܡ ܫܲܪܝܼܪܹ̈ܐ. 55 :ܚܲܕ ܡ̣ܢ ܐܢܫܐ ܫܠܝܼܗ̇ ܒܠܚܘܕܼ ܠܲܟܼܬܝܼܫܘܬܹܗ ܬܲܟܼܬܘܼܫܗ 56 ܘܒܼܵܬܲܪܙܲܒܼܢܵܐ ܗܦ̣ܟ ܠܩܪܵܒܼܵܐ ܕܐܘܼܡܵܢܘܼܬܹܗ܀ 57 :ܩܪܵܒܼܵܐ ܕܥܵܘܠܵܐ ܪܚܝܼܡ ܠܹܗ ܕܢܸܥܒܸܿܕ ܥܲܡ ܐܲܪ݁ܥܵܢܹܐ 58 ܘܗܵܐ ܡܸܬܼܦܲܪܲܣ ܦܘܼܪ̈ܣܹܐ ܨܢܝܼ̈ܥܹܐ ܕܢܸܓܼܡܘܿܪ ܝܲܨܪܹܗ܀ 59 :ܥܲܡ ܫܲܪܝܼܪܹ݁ܐ ܡܥܵܕ ܡܸܬܼܟܲܬܲܫ ܕܲܓܿܥ ܟܠܹܗ 60 ܘܲܒܼܕܓ̈ܠܹܐ ܡܚܵܘܹܐ ܚܲܝܠܵܐ ܕܐܘܼܡܵܢܘܼܬܹܗ. 61 :ܒܦܘܼܡ ܙܹܐܦ̈ܢܹܐ ܡܬܲܪܓܸܿܡ ܙܹܐܦܹܗ ܙܹܐܦܵܢܵܝܵܐ 62 ܘܲܒܼܠܸܫܵܢܗܘܿܢ ܫܵܪܹ̇ܐ ܒܸܙܚܵܐ ܒܢܲܟܼܦܑ̈ ܘܟܹܐܢܹ̈ܐ܀ 63 :ܠܘܼܩܒܲܠ ܟܹܐܢܹ̈ܐ ܬܪܝܼܨ ܠܹܗ ܢܝܼܫܵܐ ܠܡܸܬܼܟܲܬܿܫܘܼ 64 ܕܝܵܕܥ̇ ܕܡܨܝܢ ܠܡܸܣܬܲܪ ܪܵܘܡܵܐ ܕܒܸܢܝܵܢ ܙܹܐܦܹܗ. 65 :ܠܙܹܐܦܵܢܘܼܬܹܗ ܣܬܲܪܘ ܫܲܪܝܼܪܹ̈ܐ ܒܚܹܝܠ ܡܸܠܲܝܗ̈ܘܿܢ 66 ܘܡܸܛܠ ܗܵܕܹܐ (ܢܵܒܲܚ̇) ܟܠܫܵܥ ܒܲܦܛܸܓܼܡܲܝ̈ܗܘܿܢ܀ 67 ܒܲܕܼܡܘܼܬܼ ܟܲܠܒܐ ܢܵܒܚ̇ ܝܲܨܪܹܗ ܒܦܘܼܡ ܡܪܸ̈ܚܐ: pb. f.61r 68 ܘܡܲܠܸܙ ܫܸܡܥܵܐ ܕܣܲܟܿܘܼܠܬܹܵܢܹ̈ܐ ܒܠܲܙܝܼܙܘܼܬܹܗ. 69 :ܥܝܼܕܼܵܐ ܕܟܲܠܒܹ̈ܐ ܩܢܹܐ ܟܲܠܒܵܢܵܐ ܟܠܒܿܐ ܡܠܝܼܠܵܐ 70 ܘܡܵܐ ܕܚܵܙܹ̇ܐ ܐ̄ܢܵܫ ܕܠܵܐ ܫܡ̇ܥ ܠܹܗ ܦܩ݂ܲܪ ܘܐܸܫܬܚܝܢ܀ 71 :ܬܠܵܬܼܵܐ ܐܢܵܫ̈ܐ ܚܙ̣ܵܐ ܐܵܦ ܗܵܫܵܐ ܕܫܲܦܝܼܪ ܪܵܕܼܝܼ̇ܢ 72 ܘܫܲܪܝܼ ܡܲܝܠܸܠ ܐܲܝܟ ܗܵܘ̇ ܙܲܒܼܢܵܐ ܕܲܩܕܼܵܡ ܡܵܪܵܢ. 73 :ܒܙܸܩܬܼܵܐ ܕܕܼܵܡ̇ܐ ܠܗܵܘ̇ ܕܕܲܫܠܝܼܚܹ̈ܐ ܙܲܩܬܲܘܼܗܝ ܟܹܐܢܹܐ 74 ܘܙܵܥ ܘܐܸܬܼܒܲܠܗܝܼ ܡ̣ܢ ܩܲܫܝܘܼܬܼܵܐ ܕܦܸܬܼܓܼܵܡܲܝ̈ܗܘܿܢ܀ 75 :ܬܠܵܬܼܵܐ ܓܼܐܪܹ̈ܐ ܫܕܼܵܘ ܒܹܗ ܦܵܠܚܹ̈ܐ ܕܗܝܡܢܘܬܼܵܐ 76 ܘܐܲܠܦܘܼܗܝ ܚܲܝܠܵܐ ܕܐܲܠܗܘܼܬܼܵܐ ܕܲܟܼܣܹܐ ܒܐܢܵܫܵܐ. 77 :ܒܗܲܝܡܵܢܘܼܬܼܵܐ ܒܲܕܼܩܘܼܗܝ ܠܐܪܵܙܵܐ ܕܗܲܝܡܵܢܘܼܬܼܵܐ 78 ܘܲܓܼܠ̣ܵܘ ܘܚܵܘܝܘܼܗܝ ܠܫܡܝܢ̈ܐ ܘܲܠܐܲܪ̈ܥܵܢܵܝܹܐ܀ 79 :ܐܝܼܬܼܝܵܐ ܕܐܵܢܵܫܵܐ ܣܵܡ̣ ܐܢܵܫܵܐ ܩܕܼܵܡ ܐ̄ܢܵܫܘܼܬܼܵܐ 80 ܕܢܸܗܘܘܿܢ ܚܵ̇ܢܹܝܢ ܐܢܵܫܵܐ ܠܡܸܩܪܵܐ ܡܸܠܬܼܵܐ ܘܦܲܓܼܪܵܐ. 81 :ܡܸܠܬܐ ܘܦܲܓܼܪܵܐ ܐܲܟܼܪܸܙܘ ܐܢܵܫ̈ܐ ܡܗܝܼܪ̈ܲܝ ܗܵܘܢܵܐ 82 ܘܗܵܐ ܚܲܡܝܼܬܼܝܼܢ ܫܹܐܕܹ̈ܐ ܩܝܼܫܹ̈ܐ ܘܐ̄ܢܵܫ̈ܐ ܣܲܟܼ̈ܠܹܐ܀ 83 :ܚܕܵܐ ܐܝܼܬܼܘܼܬܼܵܐ ܕܐܝܼܬܹܝܗ̇ ܬܠܵܬܼܵܐ ܬܲܪܓܸܡܘ ܟܹܐܢ̈ܐ 84 ܘܐܲܩܸܦܘ ܥܲܡܵܗ̇ ܚܲܕܼܒܲܪܢܵܫܵܐ ܒܲܚܕܼܵܝܘܼܬܼܵܐ. 85 :ܒܚܲܕܼ ܫܘܼܡܵܗܵܐ ܩܪ̣ܵܘ ܫܲܪܝܼܪܹ̈ܐ ܠܡܸܠܬܼܵܐ ܘܦܲܓܼܪܵܐ 86 ܒܲܪ ܐܝܼܬܼܘܼܬܼܵܐ ܘܒܲܪܐܢܵܫܘܼܬܼܵܐ ܚܲܕܼ ܦܲܪܨܘ̄:܀ 87 :ܚܲܕܼ ܗ̄ܘ̣ ܡܸܠܬܼܵܐ ܝܲܠܕܹܗ ܕܐܲܒܼܵܐ ܕܠܵܐ ܫܘܼܪܵܝܵܐ 88 ܘܚܲܕܼ ܒܲܪ ܐܢܵܫܵܐ ܡ̣ܢ ܐܵܢܫܘܼܬܼܵܐ ܐܕܼܵܡܵܝܬܿܐ. 89 :ܬܪܹܝܢ ܒܲܟܼܝܵܢܵܐ ܟܠ ܕܐܝܼܬܼ ܠܐܝܼܬܼܝܵܐ ܘܠܲܒܲܪܢܵܫܵܐ 90 ܚܲܕܼ ܒܐܝܼܩܵܪܵܐ ܘܲܒܼܫܘܼܠܛܵܢܵܐ ܒܪܵܐ ܕܐܲܠܵܗܵܐ܀ 91 :ܒܪܵܐ ܕܐܲܠܵܗܵܐ ܚܲܕܼ ܦܲܪܨܘܿܦܵܐ ܠܵܘ ܒܲܟܼܝܵܢܵܐ 92 ܕܐܝܼܬܼܝܵܐ ܐܝܼܬܼܝܵܐ ܗ̄ܘ̣ ܘܐܢܵܫܵܐ ܐ̄ܢܵܫܵܐ ܗ̄ܘ̣ ܬܪܹܝܢ ܕܲܗܘ̤ܵܘ ܚܲܕܼ. 93 :ܗܵܕܐ ܗ̄ܝ̣ ܡ̣ܠܬܼܵܐ ܕܐܲܟܼܪܸܙܘ ܟܐܢܹ̈ܐ ܒܐܸܕܼܢܲܝ̈ ܐܵܢܵܫܹ̈ܐ 94 ܘܐܵܢܵܫ̈ܐ ܣܲܟܼܠܑܹ̈ܐ ܫܲܡܥܘܼܗ̇ ܘܲܓܼܥܨܘ ܡ̣ܢ ܒܘܼܝܵܢܵܗ̇܀ 95 :ܠܗܵܢܵܐ ܢܝܼܫܵܐ ܚܢ̣ܵܘ ܫܲܪܝܼܪܹ̈ܐ ܬܠܵܬܼܵܐ ܕܐܸܡ̇ܪܹܬܼ 96 ܘܠܵܐ ܐܸܬܼܪܲܦܝܼܘ ܡ̣ܢ ܩܵܠ ܒܸܙܚܵܐ ܕܫܹܐܕ̈ܐ ܘܐ̄ܢܵܫ̈ܐ. 97 :ܫܹܐܕܹ̈ܐ ܘܐ̄ܢܵܫܹ̈ܐ ܨܲܝܼܚܘܼ ܐܸܢܘܿܢ ܐܲܝܟ ܕܲܠܒܼܝܼܫܐ 98 ܡܸܛܠ ܡܸܠܬܼܵܐ ܕܗܲܝܡܵܢܘܼܬܼܵܐ ܕܐܲܟܼܪܸܙ ܒܐܲܪܥܵܐ܀ 99 :ܗܲܝܡܵܢܘܼܬܼܵܐ ܠܒܸܫܘ ܐܲܝܟ ܣܲܟܿܪܵܐ ܩܕܼܵܡ ܟܠ ܩܵܠܝܼ̈ܢ 100 ܘܠܵܐ ܒܪܲܨܘ ܓܹܐܪ̈ܐ ܕܲܨܥܝܼܪ̈ܬܼܵܐ ܒܗܲܕܼܵܡܲܝ̈ܗܘܿܢ. 101 :ܪܘܼܚܵܢܵܐܝܼܬܼ ܡܸܙܕܲܝܼܢܝܼܢ ܗ̄ܘ̣ܵܘ ܟܲܕܼ ܦܲܓܼܪ̈ܢܝܼܢ 102 ܘܲܒܲܦܓܼܪ̈ܲܝܗܘܵܢ ܚܵܣ̇ܢܝܼܢ ܗ̄ܘ̣ܵܘ ܠܹܗ ܠܩܹܐܪܣܵܐ ܕܚܲܫܹ̈ܐ܀ 103 ܬܲܗܪܵܐ ܪܲܒܿܐ ܡܠܹܐ ܬܲܟܼܬܘܼܫܵܐ ܕܢܸܨܚܵܢܲܝܗܘܿܢ 104 :ܕܟܲܕܼ ܡܵܝܘܿܬܼܝܼܢ ܣܥܲܪ̣ܘ ܣܘܼܥܪ̈ܵܢܹܐ ܘܠܵܐ ܡܵܝܘܿܬܹ̈ܐ 105 :ܡܵܝܘܿܬܹ̈ܐ ܗ̄ܘ̣ܵܘ ܡܸܢܹܗ ܕܛܘܼܗܡܵܐ ܓܒܝܼܠ ܡ̣ܢ ܥܲܦܪܵܐ 106 ܘܗܼܵܢ̣ܵܘ ܬܲܗܪܵܐ ܕܒܹܗ ܒܲܟܼܝܵܢܗܘܿܢ ܙܟܼܵܘ ܠܲܟܼܝܵܢܗܘܿܢ܀ 107 :ܡܥܝܼܢܵܐ ܕܚܲܫܹ̈ܐ ܒܠܵܘ ܡ̣ܢ ܪܸܕܝܵܐ ܕܗܲܕܵܡܲܝ̈ܗܘܿܢ 108 ܘܐܲܒܲܥ ܠܸܒܗܘܿܢ ܡܸܐܡܪܵܐ ܕܲܟܼܝܵܐ ܕܩܘܼܫܬܵܐ ܕܲܟܼܝܵܐ. 109 :ܡܹܐܡܪܵܐ ܕܲܟܼܝܵܐ ܢܒ݂ܲܥ ܡ̣ܢ ܐܢ̈ܫܐ ܕܲܟܼܝܲܝ ܢܲܦ̣ܫܵܐ 110 ܘܲܕܠܚܘܼܗܝ ܠܫܸܩܝܹܗ ܫܹܐܕܹ̈ܐ ܒܝܼܫܹ̈ܐ ܘܐܵܢܵܫ̈ܐ ܣܲܟܼ̈ܠܐ܀ 111 :ܡܸܪܬܼܵܐ ܒܝܼܫܬܵܐ ܫܸܚܩܲܬ̤ ܐܸܢܘܿܢ ܠܣܵܢ̈ܝܲܝ ܢܲܦ̣ܫܵܐ 112 :ܘܠܵܐ ܨܒܼܵܘ ܩܲܒܸܿܠ ܫܸܩܝܵܐ ܚܠܲܝܵܐ ܕܗܲܝܡܵܢܘܼܬܼܵܐ 113 :ܒܗܲܝܼܡܵܢܘܼܬܼܵܐ ܚܵܙܝܵܐ ܢܲܦ̣ܫܵܐ ܠܗܲܝܡܵܢܘܼܬܼܵܐ 114 ܘܲܡܚܲܟܿܡܐ ܠܵܗ̇ ܠܡܸܚܙܵܐ ܚܙܵܬܼܵܐ ܕܠܵܐ ܡܸܬܼܚܲܙܝܵܐ܀ 115 :ܠܵܐ ܓܲܠܝܬ̈ܐ ܓܥ̣ܘ ܫܲܪܝܼܪܹ̈ܐ ܒܓܸܠܢ̈ܝܗܘܿܢ 116 ܘܐܲܝܟ ܕܲܒܢܘܼܗܪܵܐ ܚܵܘܝܼܘ ܐܸܢܹܝܢ ܠܥܹܝܢ ܚܲܙ̈ܝܹܐ. 117 :ܟܣܹܐ ܗ̄ܘ̣ܵܐ ܐ̄ܪܵܙܵܐ ܕܚܲܕܼ ܦܲܪܨܘܿܦܵܐ ܕܐܝܼܬܼܝܵܐ ܘܐܵܢܵܫܵܐ 118 ܘܲܡܣܲܬܲܪ ܗ̄ܘ̣ܵܐ ܡ̣ܢ ܪܸ̈ܥܝܵܢܹܐ ܕܠܵܐ ܝܵܕܘܿܥܹ̈ܐ܀ 119 :ܠܠܵܐ ܝܵܕܘܼܥܹ̈ܐ ܟܣܐ ܗ̄ܘ̣ܵܐ ܐܪܵܙܵܐ ܕܐܸܡ̇ܪܹܬܼ ܕܲܟܼܣܹܐ 120 ܒܲܕܼܠܵܐ ܝܵܕܼܥܝܼܢ ܠܲܡܚܵܪ ܫܲܦܝܼܪ ܒܲܕܼܠܵܐ ܓܲܠܝ̈ܢ. 121 ܠܝܲܕܘܥܬܼܵܢܹ̈ܐ ܓܠܹܐ ܟܠܡܸܕܹܡ ܕܲܟܼܣܹܐ ܘܲܓܼܠܹܐ: pb. f.61v 122 ܘܢܲܗܝܼܪܵܐܝܼܬܼ ܒܲܕܼܩܝܲܢ ܐ̄ܪܵܙܵܐ ܕܲܣܬܝܪ̈ܵܬܼܵܐ܀ 123 :ܢܲܗܝܼܪܵܐܝܼܬܼ ܚܵܘܝܘܼܗܝ ܠܐܪܵܙܵܐ ܕܗܲܝܡܵܢܘܼܬܼܵܐ 124 ܘܐܲܝܟ ܕܲܠܝܘܿܩܢܵܐ ܩܲܒܼܥܘܲܗܝ ܒܐܲܪܥܵܐ ܩܕܼܵܡ ܚܲܙܵܝܹ̈ܐ. 125 :ܚܙܵܬܼܵܐ ܕܬܲܗܪܵܐ ܚܵܘܝܼܘ ܐܢܵܫ̈ܐ ܠܲܒܼܢ̈ܝܵܢܵܫܵܐ 126 ܘܠܵܐ ܒܢܲܝ̈ܢܵܫܵܐ ܠܵܐ ܐܸܬܼܒܲܩܝܼܘ ܒܲܫܒܼܝܼܚܘܼܬܹܗ܀ 127 :ܫܒܼܝܼܚܵܐ ܗ̄ܘ̣ܵܬܼ ܛܵܒܼ ܡܸܠܬܼܵܐ ܕܐܲܟܼܪܸܙ ܒܹܝܬܼ ܐܲܪ̈ܥܵܢܹܐ 128 ܘܲܫܒܼܝܼܚܵܐܝܼܬܼ ܨܵܬܼܘܼܗ̇ ܐܢܵܫ̈ܐ ܪܲܚ̈ܡܲܝ ܩܘܼܫܬܼܵܐ. 129 :ܣܲܟܼܠܹܐ ܒܲܠܚܘܕܼ ܠܵܐ ܨܒ̣ܵܘ ܩܲܒܸܠܘ ܦܝܵܣܵܐ ܕܲܥܠܹܝܗ̇ 130 ܘܠܵܐ ܚܵܪ̣ܘ ܫܲܦܝܼܪ ܒܲܫܒܼܝܼܚܘܼܬܹܗ ܕܦܸܐܝܘܼܬܼ ܫܘܼܦܪܗ̇܀ 131 :ܚܣܵܡܵܐ ܣܲܡܝܵܐ ܣܲܡܝܼ ܐܸܢܘܿܢ ܠܣܵܡܝܲܝ ܢܲܦܫܵܐ 132 ܘܠܵܐ ܚ̣ܙܵܘ ܢܘܼܗܪܵܐ ܕܢܲܗܝܼܪ ܡ̣ܢ ܟܠ ܢܘܼܗܪ̈ܝܼܢ. 133 :ܠܑܵܐ ܡܸܕܹܡ ܗ̄ܘ̣ ܢܘܼܗܪܵܐ ܕܫܸܡܫܵܐ ܟܡܵܐ ܐܸܢ ܢܲܗܝܼܪ 134 ܟܲܕܼ ܡܸܬܼܦܲܚܲܡ ܥܲܡ ܢܲܗܝܼܪܵܐ ܕܡ̣ܠܲܬܼ ܩܘܼܫܬܼܵܐ܀ 135 :ܡܸܠܲܬܼ ܩܘܼܫܬܼܵܐ ܪܲܕܦܵܗ̇ ܠܛܘܼܥܝܲܝ ܚܸܫܟܵܐ ܕܲܬܼܪܹܝܢ 136 ܘܗܵܐ ܡܣܲܝܥܝܼܢ ܠܹܗ ܐܢܵܫ̈ܐ ܒܝܼܫܹ̈ܐ ܕܬܲܦܢܹܐ ܠܫܲܝܢܵܐ. 137 :ܠܚܘܼܪܒܵܐ ܕܲܠܒܲܪ ܛܲܪܕܘܼܗ̇ ܟܹܐܢܹ̈ܐ ܠܕܸܚܠܲܬܼ ܫܹܐܕܹ̈ܐ 138 ܕܠܵܐ ܢܸܬܿܕܵܘܲܕܼ ܥܘܡܼܪܵܐ ܕܐ̄ܢܵܫ̈ܐ ܒܲܟܼܬܝܼܫܘܼܬܼܵܗ̇܀ 139 :ܟܬܼܝܼܫ ܗ̄ܘ̣ܵܐ ܥܘܼܡܪܲܢ ܘܲܡܕܵܘܲܕܼ ܗ̄ܘ̣ܵܐ ܕܘܼܒܵܪ ܚܲܝܲܝ̈ܢ 140 ܥܕܲܡܵܐ ܕܫܲܝܸܢ ܡܲܬܼܩܸܢ ܟܠܵܐ ܒܚܲܕܼ ܒܲܪܢܵܫܵܐ. 141 :ܚܲܕ ܡ̣ܢ ܐܢܵܫܵܐ ܓܒ̣ܵܐ ܗܵܘ̇ ܚܲܝܠܵܐ ܕܬܩܸܢ ܐܢܵܫܵܐ 142 :ܘܝܲܗ̣ܒܼ ܒܹܗ ܚܲܝܠܵܐ ܕܢܸܗܘܸܐ ܡܫܲܝܸܢ ܟܠ ܥܲܡ ܟܠܵܐ 143 :ܠܫܲܝܢܵܐ ܕܐܢܵܫ̈ܐ ܓܒ̣ܵܝܗܝ ܡ̣ܢ ܟܠܵܐ ܡܲܬ̣ܩܸܢ ܟܠܵܐ 144 ܘܠܵܐ ܦܵܫ̣ ܡܸܕܹܡ ܕܠܵܐ ܒܹܗ ܫܲܝܸܢ ܥܲܡ ܪܲܒܿܘܼܬܹܗ. 145 :ܚܹܝܠ ܪܲܒܿܘܼܬܹܗ ܓܠ̣ܵܐ ܒܲܟܼܝܵܢܲܢ ܡܟܼܝܼܢ ܒܹܪ̈ܝܵܬܼܵܐ 146 ܘܒܲܫܒܼܝܼܚܘܼܬܹܗ ܝܲܩܪܹܗ ܠܓܸܢܣܲܢ ܓܒܼܝܼܠ ܡ̣ܢ ܥܲܦܪܵܐ܀ 147 :ܥܲܦܪܵܐ ܫܝܼܛܵܐ ܛܥ̣ܵܐ ܠܲܟܼܝܵܢܹܗ ܘܠܲܡܟܲܝܢܵܢܹܗ 148 ܘܫܲܪܝܼ ܢܵܒܲܚ̇ ܒܲܕܼܡܘܼܬܼ ܟܲܠܒܵܐ ܒܡܵܪܵܐ ܕܓܲܒܼܠܹܗ. 149 :ܒܡܵܪܵܐ ܕܓܲܒܼܠܲܢ ܢܵܒܼܚ̇ܝܼܢ ܥܲܛ̈ܠܹܐ ܕܲܒܼܝܵܘ̈ܡܵܬܲܢ 150 ܒܝܲܕܼ ܨܘܼܚ̈ܝܵܬܼܵܐ ܕܓܼܵܣܹ̇ܐ ܦܘܼܡܗܘܿܢ ܥܲܠ ܫܲܪܝܼܪܹ̈ܐ܀ 151 :ܒܝܲܕܼ ܫܲܪܝܼܪܹ̈ܐ ܓܠ̣ܵܐ ܨܒܼܝܵܢܹܗ ܨܵܒܹ̇ܐ ܒܚܲܝܲܝ̈ܢ 152 ܘܲܒܗܘܿܢ ܚܵܟܼܡܝܼܢ ܠܡܸܕܲܥ ܐܪܵܙܵܐ ܕܲܣܬܝܼܪ̈ܵܬܹܗ. 153 :ܓܲܙܵܐ ܕܚܘܼܒܹܗ ܣܵܡ̣ ܒܐܝܲܕܼܝ̈ܗܘܿܢ ܕܵܪ݁ܚܡܲܝ ܚܘܼܒܵܗ 154 ܕܲܢܵܦܲܠܓܼܘܼܢܝܗܝ ܚܘܼܒܵܢܵܐܝܼܬܼ ܠܲܨܪܝܼܟܼܘܬܲܢ܀ 155 :ܨܪܝܼܟ ܗ̄ܘ̣ܵܐ ܓܸܢܣܲܢ ܘܲܡܓܲܙܲܝ ܗ̄ܘ̣ܵܐ ܡ̣ܢ ܟܠ ܛܵܒܼ̈ܢ 156 ܘܣܵܡ̣ ܨܒܼܝܵܢܹܗ ܒܲܟܼܢܵܘ̈ܬܲܢ ܕܲܢܬܲܪܣܘܼܢܲܢ. 157 ܐܲܝܟ ܨܒܼܝܵܢܹܗ ܙܵܢܘܼܗ̇ ܟܹܐܢܹ̈ܐ ܠܡܸܣܟܢܘܲܬܼܢ 158 ܘܲܕܼܠܵܐ ܚܣܵܡܵܐ ܦܲܪܢܸܣܵܘ ܚܲܝܲܝ̈ܢ ܒܪ̈ܘܼܚܵܢܝܵܬܼܵܐ܀ 159 :ܪܘܼܚܵܢܵܐܝܼܬܼ ܚܵܘܝܼܘ ܚܲܝܠܵܐ ܕܪ̈ܘܼܚܵܢܝܵܬܼܵܐ 160 ܘܲܒܼܓܼܵܠܝܵܬܼܵܐ ܨܵܪܘ ܠܲܢ ܕܘܼܡܝܵܐ ܕܲܣܬܝܼܪܵܬܵܐ. 161 :ܟܣܹܐ ܗ̄ܘ̣ܵܐ ܡܸܢܲܢ ܐ̄ܪܵܙ ܒܘܼܕܵܩܵܐ ܕܲܒܼܪܵܐ ܘܪܘܼܚܵܐ 162 ܘܠܵܐ ܝܵܕܼܥܝܼ̈ܢ ܗܘܲܝ̣ܢ ܕܐܝܼܬܼܝܹ̈ܐ ܐܸܢܘܿܢ ܕܠܵܐ ܫܘܼܪܵܝܵܐ܀ 163 :ܟܹܐܢܹܐ ܚܲܟܼܡܘܼܗ̇ ܠܠܵܐ ܝܼܕܲܥܬܲܢ ܘܲܕܠܵܐ ܓܼܠܝ̈ܢ 164 ܘܗ̣ܢܘܢ ܐܲܠܦܘܢ ܠܡܩܪܐ ܒܛܲܟܼܣܵܐ ܫܡܵܗܹ̈ܐ ܬܠܵܬܼܵܐ. 165 :ܠܗܵܢܵܐ ܛܲܟܼܣܵܐ ܕܲܘܸܕܘ ܥܲܛ̈ܠܹܐ ܕܲܒܼܝܵܘ̈ܡܵܬܲܢ 166 ܘܲܛܠ̣ܡܘ ܥܲܡ̈ܠܹܐ ܕܐܢܵܫ̈ܐ ܕܛܲܟܿܣܘܼܗܝ ܒܝܲܕܼ ܥܲܡܠܲܝܗ̈ܘܿܢ܀ 167 :ܥܲܡ̈ܠܹܐ ܫܚܝܼ̈ܩܹܐ ܥ̣ܡܲܠܘ ܟܲܫܝܪܹ̈ܐ ܒܗܵܢܵܐ ܛܲܟܼܣܵܐ 168 ܘܲܚܒܸܢܵܢܹ̈ܐ ܟܲܢܝܼܘ ܐܸܢܘܿܢ ܦܵܥܠܹ̈ܐ ܢܟܼܝ̈ܠܹܐ. 169 :ܦܥ̈ܠܐ ܢܟܼܝܼ̈ܠܹܐ ܩܪ̣ܵܘ ܟܕܒ̈ܐ ܠܦܠܚܝ̈ ܫܦܝܼܪ 170 ܘܡ̇ܢ ܠܵܐ ܢܲܟܼܪܹܐ ܥܲܠ ܗܵܢ ܓܘܼܢܚܵܐ ܕܲܕܚܝܼܠ ܫܸܡܥܹܗ܀ 171 :ܒܗܵܢܵܐ ܓܘܼܢܚܵܐ ܬܸܡܗܹ̇ܬܼ ܣܲܓܿܝܼ ܐܵܦ ܬܵܡܲ̇ܗ ܐ̄ܢܵܐ 172 ܘܡܸܛܠܵܬܹܗ ܚܸܙܩܹ̇ܬܼ ܣܲܓܿܝܼ ܒܐܘܼܪܚܵܐ ܕܡܸ̈ܠܹܐ. 173 :ܡܸܠܬܼܵܐ ܕܟܹܐܢܹ̈ܐ ܚܙܹܝܬܼ ܕܲܛܠܝܼܡܵܐ ܡ̣ܢ ܛܵܠܘܿܡܹ̈ܐ 174 ܘܲܒܼܥܹܝܬܼ ܕܐܸܕܲܥ ܕܡܵܢܲܐ ܗ̄ܝ̣ ܥܸܠܬܼܵܐ ܕܗܵܢܵܐ ܛܠܘܿܡܝܵܐ܀ pb. f.62r 175 :ܬܠܵܬܵܐ ܐ̄ܢܵܫ̈ܐ ܓܒܹܝܬܼ ܡ̣ܢ ܟܠܹܗ ܓܲܒܵܐ ܕܟܸܐܢܸ̈ܐ 176 ܕܲܒܼܥܸܠܲܬܼܗܘܿܢ ܐܸܓܼܠܹܐ ܥܸܠܬܼܵܐ ܕܟܼܠܗܘܿܢ. 177 :ܟܸܐܢ̈ܐ ܛܠܲܡܘ ܛܵܠܘܿܡܹ̈ܐ ܒܕܵܕ̈ܝܼܢ ܕܵܪ̈ܝܼܢ 178 ܘܝܲܬܼܝܼܪ ܡ݂ܢ ܟܠ ܠܗܵܠܝܼܢ ܕܐܸܡܪܸܬܼ ܐܣܓܼܝܼܘ ܘܲܛܠܡܘ܀ 179 :ܕܠܵܐ ܡܘܼܫ̈ܚܵܬܐ ܨܲܚܝܼܘܼ ܐܸܢܘܿܢ ܒܢܲܝ̈ ܚܸܪ̈ܝܵܝܹܐ 180 ܘ̣ܛܵܟ ܡ̣ܢ ܫܸܐܕܹ̈ܐ ܝܲܠܦܘܼܗܝ ܠܗܵܢܵܐ ܙܢܵܐ ܕܨܘܼܚ̈ܝ̇ܬܼܵܐ 181 :ܫܹܐܕ̈ܐ ܐܪܡܝܼܘ ܒܐ̄ܢܵܫ̈ܐ ܣܲܟܼ̈ܠܹܐ ܛܢܵܢܵܐ ܣܲܟܼܠܵܐ 182 ܕܲܢܨܲܚ̣ܘܼܢܵܗ̇ ܠܡܸܠܬܼ ܩܘܼܫܬܐ ܒܠܸܫ̣ܵܢ ܒܸܣܪܵܐ܀ 183 :ܒܠܸܫܵܢ ܒܸܣܪܵܐ ܡܥܵܕܝܼܢ ܫܸܐܕܹ̈ܐ ܠܲܡܓܼܕܵܦܘܼ 184 ܘܲܒܼܒܸܣܪ̈ܵܢܹܐ ܡܟܲܣܹܝܢ ܙܹܐܦܵܐ ܕܓܼܘܼܕܵܦܲܝ̈ܗܘܿܢ. 185 :ܓܼܘܼܕܵܦܲܝ̈ܗܘܿܢ ܚܙܝܬ ܕܲܢܕܼܝܕܼܝܼܢ ܘܡܲܣܠܹܝܢ ܣܲܓܝܼ 186 ܘܛܸܢܸܬܼ ܣܲܓܼܝ ܕܐܸܬܒܲܥ̣ ܡܸܢܗܘܿܢ ܨܲܥܪܵܐ ܕܟܸܐܢܹ̈ܐ܀ 187 :ܚܠܵܽܦ ܝܵܕܘܿܥ̈ܐ ܡܸܬܼܟܲܬܲܫ ܐ̄ܢܵܐ ܥܲܡ ܠܵܐ ܪ̈ܕܲܝܵܐ 188 ܕܲܗܘ̤ܵܘ ܚܲܒܼܪ̈ܐ ܠܐܵܟܼܠܩܲܪܨܐ ܒܩܸܐܪܣܵܐ ܕܥܲܡܗܘܿܢ. 189 :ܩܸܐܪܣܵܐ ܗ̄ܘ̣ ܪܲܒܵܐ ܕܣܵܕܪܲܝܢ ܐ̄ܢܫ̈ܐ ܠܘܼܩܒܼܵܠ ܐ̄ܢܵܫ̈ܐ 190 ܘܠܲܝܬܼ ܕܲܡܫܲܐܸܠ ܕܡܵܢܲܐ ܗܝ̣ ܥܸܠܬܹܗ ܕܗܵܢ ܬܲܟܼܬܘܼܫܵܐ܀ 191 :ܐܲܝܟ ܕܲܒܼܫܢܬܼܵܐ ܛܒܲܥܘ ܟܠ ܬ̣ܓܼܡܝܼ̈ܢ ܡ̣ܢ ܗܵܢ ܫܲܪܒܵܐ 192 ܘܗܵܐ ܒܵܥܹ̇ܐ ܐ̄ܢܵܐ ܕܐܲܥܝܼܪ ܐܸܢܘܿܢ ܕܢܸܬܼܒܿܩܘܿܢ ܒܹܗ. 193 :ܒܓܸܠܝܐ ܡܸܟܸܝܠ ܡܚܵܘܹܐ ܠܹܗ ܠܫܲܪܒܵܐ ܕܡ̣ܠܝܼ̈ 194 ܕܢܸܗܘܘܿܢ ܝܵܕܥܝܼܢ ܨܵܝܿܬܼܝ̈ ܡܸܠܸܐ ܣܘܼܟܵܠ ܡܸ̈ܠܸܐ܀ 195 :ܐ̄ܢܵܫ̈ܐ ܣܲܟܼ̈ܠܹܐ ܐܸܡܕܲܬܼ ܕܲܛܠܲܡ̣ܘ ܠܐ̄ܢܫ̈ܐ ܟܸܐܢ̈ܐ 196 :ܙܵܕܹܩ ܕܐܸܓܼܠܹܐ ܕܡܲܢܘܼ ܛܠܝܼܡܵܐ ܘܡ̇ܢ ܛܵܠܵܘܿܡܵܐ 197 :ܛܠܝܼܡܲܝ̈ ܡܲܓܿܢ ܐܸܢܘܿܢ ܕܟܲܗܸܢܘ ܫܲܦܝܼܪ 198 ܚܲܕ ܕܝܼܘܿܕܘܿܪܘܿܣ ܘܚܲܕ ܬܹܐܕܘܿܪܘܿܣ ܘܚܲܕ ܢܸܣܛܘܿܪܝܼܣ܀ 199 :ܗܵܠܹܝܢ ܐܸܢܘܿܢ ܛܠܝܼܡܹ̈ܐ ܕܐܸܡܪܸܬܼ ܡ̣ܢ ܫܘܿܪܝܵܐ 200 ܘܛܵܠܘܿܡܲܝ̈ܗܘܿܢ ܫܸܐܕܹ̈ܐ ܘܐ̄ܢܵܫ̈ܐ ܗܲܪ̈ܵܛܝܼܩܹܐ. 201 :ܗܲܪ̈ܵܛܝܼܩܹܐ ܚ̣ܙܵܘ ܕܐܸܬܼܦܲܪܣܝܼܘ ܙܸܐܦܹ̈ܐ ܕܲܒܼܗܘܿܢ 202 ܘܠܒܫ ܙܲܝܢܵܐ ܐ̄ܢܫ̈ܐ ܠܒܝܼܫܲܝ̈ ܩܘܼܫܬܐ܀ 203 :ܠܒܼܝܼܫܲܝ̈ ܩܘܼܫܬܐ ܣܲܬܼܪܘܼܗ̇ ܠܛܘܼܥܝܲܝ ܕܲܒܛܵܥܲܝܵ̈ܐ 204 ܘܛܵܒܼ ܡ̣ܢ ܟܠܢܵܫ ܙܪܝܼܙ ܒܲܩܪܵܒܼܵܐ ܕܝܼܘܿܕܿܘܿܪܘܿܣ. 205 :ܗܘ̤ ܐܸܬܼܟܲܬܲܫ ܥܲܡ ܣܝܼ̈ܥܵܬܼܵܐ ܕܗܲܪ̈ܵܛܝܼܩܹܐ 206 ܘܦܲܪܣܝܼ ܘܲܓܼܠܵܗ̇ ܠܙܹܐܵܦܢܘܼܬܼܗܘܿܢ ܩܕܼܵܡ ܟܠ ܒܲܪܢܵܫ܀ 207 :ܒܣܲܝܦܵܐ ܕܡܸܠܬܹܗ ܚܪܲܒܼ ܡܸܠܲܝ̈ܗܘ̤ܿܢ ܕܢܲܟܼܘܠܬܵܢܹ̈ܐ 208 ܘܠܵܐ ܣܦܲܩܘ ܥܲܙܝܼܘ ܩܕܼܵܡ ܩܲܫܝܘܼܬܼܵܐ ܕܡܸܠܲܬܼ ܦܘܼܡܹܗ. 209 :ܐܝܼܬ ܕܲܠܕܼܐܒܹ̈ܐ ܒܲܕܿܪܼ ܐܸܢܘܿܢ ܒܩܵܠ ܦܸܬܼܓܵܡܵܘ̈ܗܝ 210 :ܘܟܲܢܫܵܗ̇ ܠܥܵܢ̈ܐ ܕܿܡܒܲܕܪܵܐ ܗ̄ܘ̣ܵܬܼ ܒܚܸܪ̈ܝܵܢܲܝܗܘܿܢ 211 ܒܲܐܢܛܝܘܿܟܝܼ ܟܲܪܟܼܵܐ ܫܲܪܝܼ ܒܩܸܐܪܣܵܐ ܕܥܲܡ ܛܵܥܲܝܵܐ. 212 ܘܒܼܵܬܿܪܼ ܙܲܒܼܢܵܐ ܓܡܲܪ ܙܵܟܼܘܿܬܹܗ ܒܐܲܬܼܪܵܐ ܕܛܲܪܣܘܿܣ. 213 :ܒܛܲܪܣܘܿܣ ܟܲܪܟܼܵܐ ܡܛܵܬܹܗ ܦܸܨܬܼܵܐ ܠܲܡܟܹܿܗܵܢܘܼ 214 ܐܲܝܟܵܐ ܕܝܼܠܝܼܕ ܗ̇ܘ ܟܵܪܘܿܙܵܐ ܕܟܼܠܗܘܿܢ ܥܲܡܡܹ̈ܐ܀ 215 :ܒܗܵܢܵܐ ܟܲܪܟܵܐ ܢܨܲܚ̣ ܝܘܼܠܦܵܢܹܗ ܕܟܼܵܗܢܵܐ ܙܲܗܝܵܐ 216 ܘܒܹܗ ܐܸܬܼܟܲܠܲܠ ܐܲܝܟ ܙܲܟܲܝܵܐ ܕܠܵܐ ܚܵܒܼܘ ܘܐܲܫܦܸܠܘ. 217 :ܪܲܒ ܙܲܟܵܝܹ̈ܐ ܚܲܝܸܠ ܐܸܢܘܿܢ ܠܦܵܠܚܹ̈ܐ ܚܝܼ̈ܨܐ 218 ܘܗܘ̇ ܣܵܡ̣ ܐܸܢܘܿܢ ܢܘܼܗܪܵܐ ܘܡܸܠܚܵܐ ܠܝܘܼܬܼܪܵܢ ܐ̄ܢܵܫܵܐ܀ 219 :ܠܬܹܐܕܘܿܪܘܿܣ ܫܲܕܪܹܗ ܠܟܲܪܟܼܵܐ ܟܪܝܼܗ ܒܲܚܛܝܼܬܼܵܐ 220 ܕܡܸܬܟܲܢܹܐ ܗ̄ܘ̣ܵܐ ܒܫܹܡ ܒܲܛܝܼܠܵܐ ܡܲܦܣܘܿܣ ܕܿܝܼܘܵܐ. 221 :ܕܲܝܼܘܵܐ ܐܲܩܝܼܡ ܦܬܲܟܼܪܵܐ ܠܲܫܡܹܗ ܘܲܩܪܵܝܗܝ ܡܲܦܲܣܘܿܣ 222 ܘܡܸܬܼܟܲܢܝܵܐ ܗ̄ܘ̣ܵܬ ܐܵܦ ܗ̇ܝ ܡܕܝܼܢܬܐ ܡܲܦܣܘܿܣܛܝܼܐ܀ 223 :ܡ̣ܢ ܚܲܕ ܟܲܪܟܼܵܐ ܢܦܲܩܘ ܠܲܡܦܹܝ̈ܕܹܐ ܬܠܵܬܐ ܕܢܘܼܗܪܵܐ 224 ܘܲܕܢܲܚ ܢܘܼܗܪܵܐ ܕܕܘܼܒܵܪ̈ܲܝܗܘܿܢ ܒܟܲܪ̈ܟܹܐ ܬܠܵܬܼܵܐ. pb. f.62v 225 :ܒܲܚܕܵܐ ܡܕܝܼܢ̄ܬܵܐ ܗܘ̤ܵܐ ܡܵܘܠܵܕܵܐ ܕܲܬܼܠܵܬܼܝ̈ܗܘܿܢ 226 :ܘܡ̣ܢ ܕܐܸܬܼܪܲܒܝܼܘ ܫܲܪܝܼܘܼ ܒܩܸܐܪܣܵܐ ܕܚܠܵܦ ܩܘܼܫܬܵܐ 227 :ܐܲܝܟ ܕܠܦܵܠܚܹܐ ܙܲܝܸܢ ܐܸܢܘܿܢ ܩܘܼܫܬܵܐ ܒܚܲܝܠܹܗ 228 ܘܫܲܕܿܪܼ ܐܸܢܘܿܢ ܠܡܸܥܒܿܕ ܩܸܐܪܣܵܐ ܕܥܲܡ ܣܵܛܵܢܵܐ. 229 :ܦܸܨ̈ܐ ܕܚܘܼܒܵܐ ܐܲܪܡܝܼ ܚܘܼܒܵܐ ܠܲܬܼܠܵܬܲܝ̈ܗܘܿܢ 230 ܘܟܼܠܚܲܕ ܡܸܢܗܘܿܢ ܠܦܲܩ ܠܲܦܢܝܼܬܼܵܐ ܕܦܲܩܕܹܗ ܪܸܡܙܵܐ܀ 231 :ܪܸܡܙܵܐ ܟܲܣܝܵܐ ܟܣܐ ܗ̄ܘ̣ܵܐ ܒܡܸܠܵܘ̈ܗܝ ܕܬܹܐܕܘܿܪܘܿܣ 232 ܘܲܡܬܲܪܓܸܡ ܗ̄ܘ̣ܵܐ ܐ̄ܪ̈ܵܙܹܐ ܟܣܲܝܵ̈ܐ ܠܲܡܦܣܘܿܣܛܵܝܹ̈ܐ. 233 :ܡܲܦܣܘܿܣܛܵܝܹ̈ܐ ܡܸܬܼܟܿܢܝܼܢ ܗ̄ܘ̣ܵܘ ܒܢܲܝ̈ ܡܲܦܣܘܼܣܛܐ 234 ܒܫܸܡ ܗ̇ܘ ܫܸܐܕܵܐ ܕܣܝܼܡ ܗ̄ܘ̣ܵܐ ܒܲܫܡܹܗ ܦܬܲܟܼܪܵܐ ܚܲܪܫܵܐ܀ 235 :ܫܡܵܗܹ̈ܐ ܣܢܲܝ̈ܵܐ ܟܲܦܲܪ ܡܸܢܗܘܿܢ ܡܗܝܼܪ ܪܸܥܝܵܢܵܐ 236 ܘܲܥܒܲܕ ܐܸܢܘܿܢ ܡܵܐܢܹ̈ܐ ܕܟܲܝܵ̈ܐ ܠܫܸܡ ܒܵܪܵܘܿܝܵܐ. 237 :ܒܫܸܡ ܒܵܪܘܿܝܵܐ ܟܲܕܢܹܗ ܟܸܐܢܵܐ ܠܫܹܐܕܵܐ ܕܟܲܪܟܼܵܐ 238 ܘܐܲܠܦܹܗ ܕܢܸܬܼܢܸܐ ܫܡܵܗܹ̈ܐ ܬܠܵܬܼܵܐ ܚܕܵܐ ܐܝܼܬܼܘܼܬܼܵܐ܀ 239 :ܫܡܵܗܹ̈ܐ ܬܿܠܵܬܼܵܐ ܠܒܝܼܟ ܗ̄ܘ̣ܵܐ ܦܵܠܚܵܐ ܕܙܲܕܼܝܼܩܘܼܬܼܵܐ 240 ܘܫܵܕܐ ܗ̄ܘ̣ܵܐ ܠܗܘܿܢ ܒܲܕܡܘܼܬ ܓܸܐܪܹ̈ܐ ܒܗܲܪ̈ܵܛܝܼܩܹܐ. 241 :ܕܚܝܼܠ ܗ̄ܘ̣ܵܐ ܩܵܠܹܗ ܟܲܕ ܩܵܥܹܐ ܗ̄ܘ̣ܵܐ ܒܦܘܼܠܵܓܿܝܼ̈ܗܘܿܢ 242 ܘܠܵܐ ܡܨܝܢ ܡܥܲܙܝܼܢ ܠܲܡܨܵܬܼ ܫܸܡܥܵܐ ܕܣܘܼܟܵܠ ܡܸܠܵܘ̈ܗܝ܀ 243 :ܒܣܘܼܟܵܠ ܡܸܠܵܘ̈ܗܝ ܡܸܬܬܲܡܗܝܼܢ ܗ̄ܘ̣ܵܘ ܫܸܐܕܹ̈ܐ ܟܬܝܼ̈ܫܹܐ 244 ܕܡܵܢܵܐ ܗ̄ܝ̣ ܗܵܕܹܐ ܕܟܲܕ ܒܲܪܢܵܫܵܐ ܡܙܝܼܥ ܠܲܢ ܩܵܠܹܗ. 245 :ܬܗܪܵܐ ܪܲܒܵܐ ܣܥܲܪ ܒܵܪܘܿܝܵܐ ܒܲܒܼܢܲܝ̈ ܒܲܝܬܹܗ 246 ܘܚܵܒܼܘ ܡ̣ܢ ܩܵܠܵܐ ܕܦܸܬܼܓܵܡܲܝ̈ܗܘܿܢ ܫܸܐܕܸ̈ܐ ܘܐ̄ܢܵܫ̈ܐ܀ 247 :ܫܸܐܕܹ̈ܐ ܘܐ̄ܢܵܫ̈ܐ ܫܡ̣ܲܥܘ ܒܲܪܬ ܩܵܠܵܐ ܕܫܝܼܦܘܿܪ ܩܵܠܵܐ 248 ܘܲܟܼܢܲܫܘ ܘܐ̣ܬܼܵܘ ܘܲܣܕܿܪܼܘ ܩܸܐܪܣܵܐ ܠܘܼܩܒܼܵܠ ܡܸܠܵܘ̈ܗܝ. 249 :ܢܸܒܼܥܵܐ ܕܡܸ̈ܠܹܐ ܪ̈ܘܼܚܵܢܝܵܬܼܵܐ ܓܲܚ ܡ̣ܢ ܦܘܼܡܹܗ 250 ܘܐܲܝܟ ܡܵܡܘܠܵܐ ܓܲܪܦܹܗ ܠܚܲܝܠܵܐ ܕܗܲܪ̈ܛܝܼܩܹܐ܀ 251 :ܒܲܕܡܘܼܬ ܓܸܦܹ̈ܐ ܛܵܦܘ ܐܪ̈ܝܵܢܹܐ ܘܐܸܘܢܡܝܵܢܹ̈ܐ 252 ܘܐܸܒܼܕܘ ܥܲܡܗܘܿܢ ܕܘܼܡܵܪ̈ܲܝܼܛܹܐ ܘܦܸܘܠܘ̈ܢܝܵܢܹ̈ܐ. 253 :ܐܲܝܟ ܕܲܠܥܘܼܪܵܐ ܒܲܕܪ ܐܸܢܘܿܢ ܠܣܸܕܩܸ̈ܐ ܦܠܝܼܓܹ̈ܐ 254 ܘܲܥܪܲܩܘ ܘܲܛܫܵܘ ܒܹܝܬܼ ܚܘܼܠܵܢܹ̈ܐ ܕܲܟܼܡܹܐܢܲܝܼ̈ܗܘܿܢ܀ 255 :ܥܪܘܼܩܝܵܐ ܪܗܝܼܒܼܵܐ ܥܪܲܩܝ ܣܝܼܵܥܬܗ̈ܘܿܢ ܕܲܒܼܢܿܝܼ ܛܘܼܥܝܲܝ 256 ܡ̣ܢ ܩܕܼܵܡ ܓܲܒܼܪܵܐ ܕܿܡܼܬܲܪܓܡ ܗ̄ܘ̣ܵܐ ܫܪܵܪܵܐ ܕܲܟܼܝܵܐ. 257 :ܫܪܵܪܵܐ ܕܲܟܼܝܵܐ ܫܡܲܥܘ ܕܲܓܵܠܹ̈ܐ ܡ̣ܢ ܫܲܪܝܼܪܹ݁ܐ 258 ܘܙܵܥܘ ܘܐܸܬܼܒܲܠܗܘܿܢ ܐܲܝܟ ܝܵܠܸܕܬܼܵܐ ܕܚܲܣܢܗ̇ ܟܸܐܒܵܐ܀ 259 :ܚܸܝܠ ܐܵܬܼܘܵܬܼܵܐ ܚܵܘܝܼ ܐܸܢܘܿܢ ܠܦܵܠܚܸ̈ܐ ܫܵܦ̈ܠܹܐ 260 ܘܲܫܕܵܘ ܙܲܝܢܵܐ ܕܝܘܼܠܦܵܢܲܝ̈ܗܘܿܢ ܘܲܥܪܲܩܘ ܥܲܪܛܸܠ. 261 :ܐܘ ܟܡܵܐ ܕܚܝܼܠܵܐ ܚܲܝܠܵܐ ܕܚܲܝܠܹܗ ܠܦܵܠܚܵܐ ܕܪܘܼܚܵܐ 262 ܕܚܵܒܼܘ ܡ̣ܢ ܩܵܠܹܗ ܟܸܢ̈ܫܹܐ ܟܬܝܼܫܹ̈ܐ ܕܟܲܢܸܫܘ ܕܲܝܼܘܹ̈ܐ܀ 263 :ܐܘ ܟܡܵܐ ܕܚܝܼܠ ܗ̄ܘ̣ܵܐ ܣܘܼܟܵܠ ܡܸ̈ܠܹܐ ܕܲܗܦܵܟܼܵܬܹ̈ܗ 264 ܕܲܡܦܲܪܣܹܐ ܗ̄ܘ̣ܵܐ ܙܢܲܝ̈ ܨܢܥܵܬܹ̈ܗ ܕܟܼܠ ܝܘܼܠܦܵܢܝܼ̈ܢ. 265 :ܐܘܿ ܟܡܵܐ ܡܗܝܼܪ ܗ̄ܘ̣ܵܐ ܗܵܘܢܵܐ ܕܬܲܩܢܵܐ ܡ̣ܢ ܟܠ ܕܲܡ̣ܗܝܼܪ 266 ܕܵܠܵܐ ܫܒܲܩ ܡܸܕܡ ܕܲܡܚܲܦܲܝ ܗ̄ܘ̣ܵܐ ܕܠܵܐ ܓܠܵܐ ܘܚܵܘܝܹܗ܀ 267 :ܐܘܿ ܟܡܵܐ ܥܪܝܼܡ ܗ̄ܘ̣ܵܐ ܠܡܸܒܨܵܐ ܣܸܦܪܸ̈ܐ ܐܲܠܵܗܵܝܹ̈ܐ 268 ܕܦܫܸܩ ܩܵܠܹ̈ܐ ܕܢܲܒܝܼܘܼܬܼܵܐ ܘܕܲܫܠܝܼܚܘܼܬܼܵܐ. 269 :ܐܘ ܟܡܵܐ ܪܗܸܛܘ ܗ̄ܘ̣ܵܘ ܙܵܘܥܲܝ̈ ܢܲܦܫܹܗ ܥܲܡ ܗܲܕܵܡܵܘ̈ܗܝ 270 ܘܣܲܝܟܹܗ ܠܪܲܗܛܵܐ ܕܟܼܠܗܘܿܢ ܣܸܦܪܹ̈ܐ ܠܓܵܘܼ ܡ̣ܢ ܡܸܠܵܘ̈ܗܝ܀ 271 :ܐܘܿ ܠܗܝ̇ ܢܲܦܫܵܐ ܡܗܝܼܪܲܬܼ ܗܵܘܢܵܐ ܘܩܫܝܲܬܼ ܚܲܝܠܵܐ 272 ܕܚܸܣܢܲܬ̤ ܘܲܙܟܲܬ̤ ܠܲܬܼܪܹܝܢ ܩܸܐܪ̈ܣܹܐ ܕܫܸܐܕܹ̈ܐ ܘܐ̄ܢܵܫ̈ܐ. pb. f.63r 273 :ܠܫܸܐܕܹ̈ܐ ܘܐ̄ܢܵܫ̈ܐ ܙܟܼܵܐ ܐܲܬܠܹܝܼܛܵܐ ܕܙܲܕܝܼܩܘܼܬܼܵܐ 274 ܘܠܵܐ ܐܸܬܪܦܝܼ ܡ̣ܢ ܟܠ ܬܲܟܼܬܘܼܫܵܐ ܕܥܲܡ ܟܠ ܚܲܫܝܼܢ܀ 275 :ܢܝܼܫܵܐ ܬܪܲܝܼܨܵܐ ܩܒܲܥ ܒܲܒܼܪܝܼܬܼܵܐ ܠܲܩܪ̈ܲܒܼܬܵܢܹܐ 276 :ܕܢܸܗܘܘܿܢ ܚܵܢܹܝܢ ܠܕܸܚܠܲܬܼ ܩܘܼܫܬܼܵܐ ܒܕܘܼܡܝܵܐ ܕܝܼܠܹܗ 277 :ܡܸܠܚܵܐ ܘܢܘܼܗܪܵܐ ܗܘ̤ܵܘ ܦܸܬܼܓܼܵܡܵܘ̈ܗܝ ܒܹܝܬܼ ܐܲܪ̈ܥܵܢܐ 278 ܘܝܼܠܲܦܘ ܐ̄ܢܵܫ̈ܐ ܠܲܡܲܕܵܟܼܘܼ ܠܲܒܫܲܝ̈ ܐ̄ܢܵܫܵܐ܀ 279 :ܛܲܥܡܵܐ ܛܵܒܼܵܐ ܩܢܵܬ̤ ܐ̄ܢܵܫܘܼܬܼܵܐ ܒܝܲܕܼ ܣܘܼܟܵܠܵܘ̈ܗܝ 280 ܘܫܵܛܲܬ̤ ܘܲܫܕܲܬ̤ ܠܲܗܦܝܼܟܼܘܼܬܼܵܐ ܕܕܚܸܠܲܬ̤ ܫܹܐܕܹ̈ܐ. 281 ܠܗܵܢܵܐ ܓܲܒܼܪܵܐ ܓܢܒܵܪ ܚܲܝܠܵܐ ܘܲܡܗܝܼܪ ܗܵܘܢܵܐ. 282 ܣܢܵܐܘܼܗܝ ܐ̄ܢܵܫ̈ܐ ܣܲܢܝܲܝ ܢܲܦܫܵܐ ܘܡܲܠܝܲܝ ܚܘܼܬܼܪܵܐ܀ 283 :ܡܸܠܲܬܼ ܩܘܼܫܬܵܐ ܣܵܡܬܹܗ ܕܢܸܗܘܹܐ ܟܵܪܘܿܙ ܩܘܼܫܬܼܵܐ 284 ܘܣܲܟܼ̈ܠܹܐ ܩܪܵܐܘܼܗܝ ܦܠܝܼܓܼ ܪܸܥܝܵܢܵܐ ܘܡܲܠܸܦ ܙܐܦܵܐ. 285 :ܐܘܿ ܠܗܲܦܟܼܵܝܹ̈ܐ ܟܡܵܐ ܗܲܦܟܼܵܝܵܐ ܗܲܦܟܼܵܝܵܐ ܗܲܦܟܼܵܝܘܼܬܼܗܘܿܢ 286 ܕܲܠܢܲܗܝܼܪܵܐ ܩܪܵܐܘܼܗܝ ܚܸܫܟܵܐ ܘܚܸܫܟܵܐ ܢܘܼܗܪܵܐ܀ 287 :ܠܘܵܝܵܐ ܕܡܸܠܬܼܵܐ ܕܲܢܒܝܼܘܼܬܼܵܐ ܫܵܘܹܝܢ ܥܲܛ̈ܠܹܐ 288 ܕܲܗܦܲܟܼܘ ܛܲܟܼܣܵܐ ܕܬܩܝܼ̈ܢܬܼܵܐ ܠܗܲܦܟܼܵܝܵܬܼܵܐ. 289 :ܠܗܲܦܟܼܵܝܵܬܼܵܐ ܪܚܸܡܘ ܗܲܦܟܼܵܝܹ̈ܐ ܣܲܢܝܲܝ̈ ܢܲܦܫܵܐ 290 ܘܲܣܩܲܪܘ ܘܲܣܢܵܘ ܠܐ̄ܢܵܫ̈ܐ ܪ̈ܵܚܸܡܸܐ ܕܗܲܝܡܵܢܘܼܬܼܵܐ܀ 291 :ܗܲܝܡܵܢܘܼܬܼܵܐ ܕܠܵܐ ܡܸܙܕܲܟܼܝܵܐ ܐܲܟܼܪܸܙܘ ܟܸܐܢܸ̈ܐ 292 ܕܝܼܘܿܕܘܿܘܿܣ ܘܬܐܕܘܿܪܘܿܣ ܘܥܲܡ ܢܸܣܛܘܿܪܝܼܣ. 293 :ܒܲܬܸܠܵܬܲܝ̈ܗܘܿܢ ܚܵܘܝܲܬ ܚܲܝܠܵܗ̇ ܬܠܝܼܬܵܘܬܼܵܐ 294 ܘܐܲܠܦܲܬ̤ ܐܸܢܘܿܢ ܠܡܸܣܬܲܪ ܒܸܕܝܐ ܕܝܘܼܠܦܢ ܛܘܼܥܝܲܝ܀ 295 :ܟܵܗܢܸ̈ܬ ܒܚܝܼܪܹ̈ܐ ܣܵܡܲܬ̤ ܐܸܢܘܿܢ ܒܟܲܪ̈ܟܹܐ ܬܠܵܬܼܵܐ 296 ܕܢܸܗܘܘܿܢ ܡܲܐܣܝܼܢ ܟܸܐܒܸ̈ܐ ܩܫܲܝ̈ܐ ܒܦܸܬܓܼܵܡܲܝ̈ܗܘܿܢ. 297 :ܡܲܐܣܝܲܝ̈ ܐ̄ܢܵܫܵܐ ܗܘ̣ܵܘ ܫܲܪܝܼܪܹ̈ܐ ܒܟܼܠ ܟܲܪ ܕܲܗܘ̤ܵܘ 298 ܘܲܙܗܝܼܪܵܐܝܼܬܼ ܪܵܥ̣ܘ ܡܲܪܥܝܼܬܼܵܐ ܕܥܲܪ̈ܒܹܐ ܡܠܝܼܠܹ̈ܐ܀ 299 :ܠܗܝ̇ ܒܲܪܬ ܩܵܠܵܐ ܕܲܠܘܵܬ ܫܸܡܥܘܿܢ ܫܡܲܥܘ ܟܲܫܝܼܪܹ̈ܐ 300 ܘܬܲܠܡܸܕܘ ܘܐܲܠܸܦܘ ܠܓܼܒܼܪܹ̈ܐ ܘܢܫܹ̈ܐ ܘܲܠܝܲܠܘܼ̈ܕܹܐ. 301 :ܒܝܲܕ ܣܘܼܥܪ̈ܵܢܹܐ ܓܲܡܪܘܼܗܝ ܠܲܫܡܵܐ ܕܫܸܡ ܪܵܥܝܼܘܼܬܼܵܐ 302 ܘܟܼܠܚܲܕ ܡܸܢܗܘܿܢ ܣܥܲܪ ܡܲܪܥܝܼܬܹܗ ܕܠܵܐ ܒܘܼܣܪܵܢܵܐ܀ 303 :ܠܛܲܪܣܘܿܣܵܝܹܐ ܪܥ̣ܵܐ ܕܝܘܿܕܿܪܘܿܣ ܡܗܝܼܪ ܒܲܕܪܵܫܵܐ 304 ܚܲܟܹܡ ܐܸܢܘܿܢ ܠܡܸܫܪܵܐ ܩܸܛܪܹ̈ܐ ܕܗܲܪ̈ܵܛܝܼܩܹܐ. 305 :ܠܡܲܦܣܘܿܣܛܵܝܹ̈ܐ ܪܥ̣ܵܐ ܬܹܐܵܕܘܿܪܘܿܣ ܒܲܕܹܩ ܐ̄ܪ̈ܵܙܹܐ 306 ܘܐܲܠܸܦ ܐܸܢܘܿܢ ܠܲܡܚܵܪ ܫܲܦܝܼܪ ܒܲܕܠܵܐ ܓܿܠܝܵܢ܀ 307 :ܠܒܘܿܙܵܢܛܵܝܹ̈ܐ ܪܥ̣ܵܐ ܢܸܣܛܘܿܪܝܼܣ ܚܲܪܝܼܦ ܙܵܘܥܹܗ 308 ܘܚܲܟܸܡ ܐܸܢܘܿܢ ܠܡܹܐܪܲܥ ܩܸܐܪܣܵܐ ܕܥܲܡ ܗܹܪܹ̈ܣܝܼܣ. 309 :ܡܕܝܼܢܲܬ ܡܲܠܟܹ̈ܐ ܡܛܵܬܹܗ ܠܬܲܩܢܵܐ ܠܲܡܕܲܒܵܪܘ 310 ܠܲܦܘܼܬ ܕܲܪܓܹܗ ܚܵܘܝܼ ܦܸܐܪܹ̈ܐ ܕܡܲܠܦܵܢܘܼܬܹܗ܀ 311 :ܚܲܟܝܼܡܵܐܝܼܬܼ ܒܢܵܝܗܝ ܠܲܫܪܵܪܵܐ ܕܡܸܠܲܬܼ ܩܘܼܫܬܵܐ 312 ܕܠܵܐ ܢܙܝܼܥܘܼܢܵܝܗܝ ܡܲܫܒܹ̈ܐ ܫܓܼܝܼ̈ܫܹܐ ܕܗܲܪ̈ܵܛܝܼܩܹܐ. 313 :ܗܲܪ̈ܛܝܼܩܹܐ ܣܢܵܐܘܼܗܝ ܡܲܓܢ ܠܪܵܚܸܡ ܩܘܼܫܬܼܵܐ 314 ܘܪܲܟܸܒܼܘ ܦܘܼܪ̈ܣܹܐ ܕܟܲܕܵܒܼܘܼܬܵܐ ܠܘܼܩܒܼܵܠ ܡܸܠܵܘ̈ܗܝ܀ 315 :ܦܘܼܪ̈ܣܹܐ ܨܢܝܼ̈ܥܹܐ ܚܫܲܠܘ ܩܲܝܢܵܝܹ̈ܐ ܙܹܐܦܵܢܵܝܹ̈ܐ 316 ܕܢܹܐܣܪܘܿܢ ܡܸ̈ܠܹܐ ܕܠܵܐ ܡܸܬܠܲܒܼ̈ܟܵܢ ܒܐܝܼܕܵܐ ܕܙܹܐܦܵܐ. 317 :ܙܹܐܦܵܢܵܐܝܼܬ ܣܵܥ̣ܘ ܡܲܪ̈ܵܚܹܐ ܥܲܠ ܫܲܪ̈ܝܼܪܹ̈ܐ 318 ܘܲܕܠܵܐ ܥܸܠܬܼܵܐ ܩܛܲܪܘ ܥܸܠܬܼܵܐ ܕܲܓܵܠܵܬܵܐ܀ 319 :ܣܵܗ̈ܕܹܐ ܕܫܘܼܩܪܵܐ ܓܒܼܵܘ ܫܲܩܵܪܹ̈ܐ ܒܕܝܼܢܹܗ ܕܟܹܐܢܵܐ 320 ܒܗ̇ܘ ܐܸܣܟܹܝܡܵܐ ܕܥܸܒܕܲܬ̤ ܐܝܼܙܒܹܝܠ ܒܕܝܼܢܹܗ ܕܢܵܒܼܘܼܬܼ. 321 :ܐܲܢ̄ܬܬܵܐ ܩܛܵܠܬܹܗ ܠܢܵܒܼܘܼܬ ܟܹܐܢܵܐ ܡܛܠ ܟܲܪܡܹܗ 322 ܘܲܠܫܲܪܝܼܪܵܐ ܢܸܫܹ̈ܐ ܪܲܕܦܵܝܗܝ ܡ̣ܢ ܟܵܗܢܘܼܬܹܗ܀ 323 ܢܸܫܹ̈ܐ ܐܲܓܼܪܘ ܟܵܗܢܹ̈ܐ ܕܙܹܐܦܵܐ ܒܕܝܼܢܵܐ ܕܙܹܐܦܵܐ: pb. f.63v 324 ܘܲܥܒܲܕܘ ܐܸܢܘܿܢ ܐܣܟܘܵܠܲܣܛܝܼ̈ܩܹܐ ܕܕܲܓܵܠܘܼܬܼܵܐ. 325 :ܒܕܲܗܒܼܵܐ ܙܲܒܼܢܘܗܝ ܠܩܘܼܫܬܐ ܕܲܟܼܝܵܐ ܕܠܵܐ ܡܸܙܕܲܒܲܢ 326 ܘܒܹܝܬܼ ܙܵܒܼܢܵܐ ܠܲܡܙܲܒܢܵܢܵܐ ܛܠܡܘ ܠܟܸܐܢܹ̈ܐ܀ 327 :ܟܸܣܦܵܐ ܚܲܪܫܵܐ ܕܲܚܩܹܗ ܠܟܹܐܢܵܐ ܠܒܲܪ ܡ̣ܢ ܫܲܝܢܵܐ 328 ܘܟܲܕ ܛܵܒܼ ܚܲܪܫܵܐ ܗ̄ܘ̣ ܐܲܪܝܼܡ ܩܵܠܹܗ̇ ܥܲܠ ܟܹܐܢܘܼܬܵܐ. 329 :ܐܘ ܠܟܹܐܢܘܼܬܐ ܟܡܵܐ ܐܸܫܬܲܬܼܩܲܬ̤ ܡ̣ܢ ܬܲܒܼܥܵܬ̈ܗ̇ 330 ܘܠܵܐ ܐܲܟܸܣܬܹܗ ܠܙܹܐܦܵܐ ܓܲܠܝܵܐ ܐܲܝܟ ܕܵܡܲܥܕܵܐ܀ 331 :ܐܘܿ ܟܡܵܐ ܪܲܒ ܗ̄ܘ̣ܵܐ ܥܵܘܠܵܐ ܕܐܥܘܸܠ ܟܵܗ̈ܢܹܐ ܒܟܵܗܢ̈ܐ 332 ܘܠܵܐ ܙܵܥܘ ܘܲܕܚܸܠܘ ܡ̣ܢ ܡܵܗܢܘܼܬܐ ܕܿܡܟܲܗܢܝܼܢ ܗ̄ܘ̣ܵܘ. 333 :ܬܵܘ ܟܹܝܬ ܟܵܗܢܹ̈ܐ ܚܙ̣ܵܘ ܡ̇ܢ ܥܸܒܼܕܲܬ̤ ܡܸܥܲܬ̤ ܟܵܗܢܹ̈ܐ 334 ܕܕܚܸܩܲܬ̤ ܟܵܗܢܵܐ ܡ̣ܢ ܟܵܗܢܘܼܬܐ ܥܵܘܠܵܐܝܼܬܼ܀ 335 :ܡܲܪܵܚܐܝܼܬܼ ܠܟܹܐܢܵܐ ܕܲܚܩܘܼܗܝ ܡ̣ܢ ܟܵܗܢܘܼܬܗ 336 :ܘܠܵܐ ܟܹܐܢܵܐܝܬ ܓܙܲܪܘ ܘܲܫܕܵܐܘܼܗܝ ܠܐܸܟܣܘܿܪܝܵܐ 337 :ܘܐܸܢ ܐܝܼܬܼ ܕܵܐܡ̇ܪ ܕܠܵܘ ܟܸܐܢܵܐܝܼܬܼ ܐܸܡܪܸܬ ܗܵܠܹܝܢ 338 ܢܚܵܘܹܐ ܒܓܼܠܝܵܐ ܘܐܵܢܵܐ ܦܵܪܲܥܢܵܐ ܚܵܘܒܲܬ ܡܸܠܲܝ̈܀ 339 :ܬܵܐ ܚܵܘܵܐ ܠܝܼ ܓܲܒܼܪܵܐ ܕܕܵܐܸܢ ܠܘܼܩܒܼܵܠ ܡܸܠܲܝ̈ 340 ܕܡܵܢܲܐ ܗ̣ܝ ܥܸܠܬܐ ܕܚܲܝܵܒܼܘܼܬܹܗ ܕܗܵܢܵܐ ܓܼܒܼܪܵܐ. 341 :ܓܠܝ ܘܒܲܕܸܩ ܠܝܼ ܙܢܵܐ ܕܣܲܟܼܠܘܼܬܹܗ ܢܗܲܝܼܪܵܐܝܼܬܼ 342 ܘܫܲܠܸܡ ܐ̄ܢܵܐ ܠܵܟ ܕܫܲܦܝܼܪ ܚܝܒܿܬ ܠܐܲܝܢܵܐ ܕܐܲܣܟܸܠ܀ 343 :ܠܲܡܨܲܚܝܵܢܵܘ̈ܗܝ ܐܸܡܪܸܬ ܗܵܠܹܝܢ ܘܬܘܼܒܼ ܐܵܡܲ݁ܪ ܐ̄ܢܵܐ 344 ܕܿܢܚܵܘܘܿܢ ܠܲܢ ܙܢܵܐ ܕܣܲܟܼܠܘܼܬܼܵܐ ܕܐܸܬܼܚܲܝܲܒܼ ܒܵܗ̇. 345 :ܠܲܝܬ ܟܝܼܬܼ ܕܲܡܨܐ ܕܢܹܐܡܲܪ ܡܸ̈ܠܹܐ ܠܘܼܩܒܼܵܠ ܡܸܠܲܝ̈ 346 ܒܲܕܠܵܐ ܝܵܕܲܥ ܠܡܸܪܕܵܐ ܒܐܘܼܪܚܵܐ ܕܦܘܼܢܵܝ ܡܸ̈ܠܵܐ܀ 347 :ܠܵܐ ܝܵܕܥܝܼܢ ܐܢܬܘܿܢ ܠܲܡܪܲܟܵܒܼܘܼ ܦܝܵܣܵܐ ܕܡܸ̈ܠܸܐ 348 ܐܸܢ ܨܵܒܹܝܢ ܐ̄ܢܬܘܿܢ ܫܡ݂ܲܥܘ ܡܸܢܝ ܘܐܹܡܲܪ ܕܠܵܐ ܝܵܕܥܝܼܢ ܐ̄ܢܬܘܿܢ. 349 :ܘܐ̄ܢܵܐ ܐܵܡ̇ܪ ܐ̄ܢܵܐ ܕܡܵܢܵܐ ܗܝ̣ ܥܸܠܬܹܗ ܕܗܵܢ ܬܲܟܼܬܼܘܼܫܵܐ 350 ܘܡ̣ܢ ܐܲܝܟܵܢ ܢܒܲܥ ܡܹܐܟܲܠܩܲܪܨܵܐ ܕܥܲܠ ܗܵܢ ܓܲܒܼܪܵܐ܀ 351 :ܚܣܵܡܵܐ ܒܝܼܫܵܐ ܕܐ̄ܢܵܫ̈ܐ ܒܝܼܫܹ̈ܐ ܣܢܵܝܗܝ ܠܲܬ̣ܪܝܼܨܵܐ 352 ܡܛܠ ܥܸܠܬܵܐ ܕܗܲܝܡܵܢܘܬܵܐ ܕܬܲܪܓܸܡ ܫܲܦܝܼܪ. 353 :ܪܹܫܵܐ ܕܡܸܨܪܝܼܢ ܟܪܝܼܗ ܗ̄ܘ̣ܵܐ ܘܲܢܣܝܼܣ ܒܗܵܢܵܐ ܫܲܪܒܵܐ 354 ܘܕܲܫܡܲܥ ܩܵܠܵܐ ܕܓܵܙܲܪ ܟܸܐܒܹܗ ܛܲܢ ܘܐܸܬܼܥܲܙܲܙ܀ 355 :ܓܙܵܪܵܐ ܕܡܸܠܬܹܗ ܕܡܲܐܣܹܐ ܫܲܦܝܼܪ ܚܙܵܐ ܡܸܨܵܪܵܝܵܐ 356 ܘܠܵܐ ܫܸܦܪܲܬ̤ ܠܹܗ ܡܸܠܬܐ ܕܡܵܠܝܵܐ ܙܢܲܝ̈ ܚܘܼܠܹܡܵܢܵܐ. 357 :ܠܡ̇ܢ ܠܲܡ ܡܲܟܼܪܸܙ ܬܪܹܝܢ ܫܘܼܡܵܗܹ̈ܐ ܡܸܠܬܐ ܘܦܲܓܪܵܐ 358 ܘܥܲܠ ܡ̇ܢ ܩܵܪܹܐ ܡܸܠܬܐ ܕܡܘܼܬܐ ܕܥܲܒܼܕܵܐ ܘܕܥܵܒܘܿܕܼܵܐ܀ 359 :ܠܡ̇ܢ ܠܵܐ ܐܡ̇ܪ ܕܐܸܡܵܐ ܗ̄ܝ̣ ܡܲܪܝܼܡ [...] ܕܐܲܠܵܗܘܼܵܬܐ 360 ܕܝܼܠܕܲܬ̤ ܠܐܝܼܬܝܵܐ ܒܸܣܪ̈ܢܵܐܝܼܬܼ ܒܲܕ ܗܘ̤ܵܐ ܒܸܣܪܵܐ. 361 :ܗܵܕܲܐ ܗܝ̣ ܥܸܠܬܐ ܕܚܲܣܵܡܘܼܬܹܗ ܕܐܵܓܸܒܼܛܵܝܵܐ 362 ܘܡܸܛܠ ܗܵܕܹܐ ܣܢܵܝܗܝ ܠܲܬܿܪܝܼܨܵܐ ܐܲܝܟ ܕܠ̣ܒܼܝܵܫܐ܀ 363 :ܚܣܵܡܵܐ ܫܓܼܪܹܗ ܠܚܲܣܘܡܼܬܵܢܵܐ ܠܘܼܩܒܼܵܠ ܟܹܐܢܵܐ 364 ܕܡܛܠ ܡܛܵܝܗܝ ܕܿܢܕܲܒܲܪ ܡܕܝܼܢܲܬ ܡܲܠܟܹ̈ܐ. 365 :ܡܘܼ̈ܟܼܠܸܐ ܕܢܸܟܼܠܵܐ ܚܫܲܠ ܚܲܣܵܡܵܐ ܒܲܢܟܼܝܼܠܘܼܬܹܗ 366 ܘܐܵܘܚܸܕ ܐܸܢܘܿܢ ܒܐܝܼܕܵܐ ܕܐ̄ܢܵܫ̈ܐ ܠܡܸܣܚܲܦ ܩܘܼܫܬܼܵܐ܀ 367 ܟܢܘܼܫܝܵܐ ܕܙܹ̈ܐܦܵܐ ܟܲܢܸܫ ܘܐܝܼܬܝܼ ܥܲܠ ܫܲܪܝܼܪܵܐ. 368 ܘܫܲܡܲܗ ܐܸܢܘܿܢ ܒܫܸܡ ܣܘܿܢܗܵܕܘܿܣ ܒܚܝܼܪܵܐ ܘܕܼܵܟܼܝܵܐ. 369 :ܗܵܢܵܐ ܟܫܘܼܫܝܵܐ ܕܵܚܩܹܗ ܠܟܵܗܢܵܐ ܡ̣ܢ ܟܵܗܢܘܼܬܹܗ 370 ܒܫܵܘܬܵܦܘܼܬܵܐ ܕܢܸܫܹ̈ܐ ܕܥܲܕܲܪ ܠܫܸܟܼܠܵܐ ܕܟܼܵܗܢܹ̈ܐ܀ 371 :ܗܵܕܹܐ ܗ̄ܝ̣ ܥܸܠܬܼܵܐ ܕܐܸܬܼܚܲܝܲܒܼ ܒܵܗ̇ ܠܵܐ ܚܲܝܵܒܼܵܐ 372 ܘܲܢܦ̣ܩ ܛܸܒܵܐ ܕܚܲܝ̇ܒܼܘܼܬܹܗ ܕܲܓܵܠܵܐܝܼܬܼ. pb. f.64r 373 :ܦܲܚܹ̈ܐ ܢܟܼܝ̈ܠܐ ܛ̣ܡܲܪܠܗ ܢܟܼܝܼ̈ܠܹܐ ܠܕܼܟܹܐ ܢܲܦ̣ܫܵܐ 374 ܡܲܓܿܢ ܨܲܚܘܼܗܝ ܐܲܝܟ ܕܲܠܣܵܢܠ̇ܐ ܕܗܝܡܵܢܘܼܬܼܵܐ܀ 375 ܗܵܐ ܚܵܘܝܬܼܵܐ ܠܥܸܠܬܼܵܐ ܕܕܼܝܼܢܹܗ ܕܓܲܒܼܪܵܐ ܛܠܝܡܼܵܐ. 376 ܕܠܵܐ ܟܹܐܢܵܐܝܼܬܼ ܚܲܝܒܼܘܼܗܝ ܐܢܫ̈ܐ ܢܟܼܘܠܬ̈ܢܐ. 377 :ܗܵܐ ܒܲܕܩܬܿܗ ܐܵܦ ܠܚܣܵܡܹܗ ܕܚܲܣܘܼܡܬܼܵܢܵܐ 378 ܕܡܲܓܿܢ ܛܲܠܡܹܗ ܠܟܼܵܗܢܵܐ ܦܐܲܝܵܐ ܒܲܕܼܠܵܐ ܦܲܐܝ̈ܢ܀ 379 ܠܵܐ ܟܹܐܢܵܐ ܗܘ̣ܵܬܼ ܕܟܼܵܗܢܵܐ ܢܸܦܘܿܩ ܡ̣ܢ ܟܵܗܢܘܼܬܹܗ 380 ܘܠܵܐ ܙܵܕܸܩ̇ ܗ̄ܘ̣ܵܐ ܕܢܲܟܿܘܼܠܬܵܢܹ̈ܐ ܢܸܩܢܘܢ ܕܪܓܹܗ. 381 :ܗܵܐ ܚ̣ܙܵܘ ܐܢܵܫ̈ܐ ܟܡܵܐ ܬܲܩܢ̈ܬܼܵܐ ܗܦܲܟ̣ܘ ܚܣܡ̈ܐ 382 ܘܚܘܪܘ ܘܐܸܬܼܒܲܩܘ ܕܟܼܡܵܐ ܒܝܼܫܵܐ ܚܵܣܘܿܡܘܼܬܼܵܐ܀ 383 :ܗܵܐ ܐܸܬܼܓܲܠܝܬ̤ ܬܲܚܦܝܼܬܼ ܙܹܐܦܵܐ ܕܲܒܼܙܹܐܦܵܢܹ̈ܐ 384 ܕܠܵܐ ܟܹܐܢܵܐܝܼܬܼ ܬܒܲܥ̣ܘ ܟܹܐܢܘܼܬܼܵܐ ܒܕܼܝܼܢܵܐ ܕܦܣܩ̣ܘ. 385 :ܘܐܸܢ ܐܝܼܬܼ ܕܐܡ̇ܪ ܕܠܵܘ ܟܹܐܢܵܐܝܼܬܼ ܬܢܹܝ̇ܬܹܗ ܠܫܲܪܒܵܐ 386 ܢܹܐܡܲܪ ܠܝܼ ܗܘ̤ ܕܲ[ܒܼ] ܡ̇ܢ ܐܣܛܹܝ̇ܬܼ ܡ̣ܢ ܘܵܠܝܼܬܼܵܐ܀ 387 :ܡܵܢܵܘ ܕܐܸܡ̇ܪܹܬ ܕܠܵܐ ܐܲܝܟ ܕܐܝܼܬܼܵܘܼܗܝ ܗܵܟܲܢ ܐܸܡ̇ܪܹܬܼ 388 ܢܚܵܘܹܐ ܒܓܸܠܝܵܐ ܟܠܡ̇ܢ ܕܐܝܼܬܼ ܠܹܗ ܡܸܠܬܐ ܓܠܝܼܬܼܵܐ. 389 :ܠܲܝܬܿ ܠܵܟ ܓܲܒܼܪܵܐ ܕܗܦܸܟ ܡܸ̈ܠܹܐ ܠܘܼܩܒܲܠ ܡܸ̈ܠܲܝ 390 ܘܠܵܐ ܘܲܬܼܚܵܘܸܐ ܕܟܹܐܝܢ ܗ̄ܘ̣ ܕܝܼܢܵܐ ܕܚܲܝܒܹܗ ܠܟܹܐܢܵܐ܀ 391 :ܘܢܸܗܘܸܐ ܕܐܵܡܲ̇ܪ [ܕ]ܗܵܐ ܐ̄ܢܵܐ ܟܵܗܢܵܐ ܓܲܙܪܘܼܗܝ ܠܕܼܝܼܢܵܐ 392 ܠܲܕܼܠܵܐ ܡܚܲܝܒܼܝܼܢ ܠܡܵܢܵܐ ܡܚܲܝܒܼܝܼܢ ܐܲܝܟ ܚܲܝܵܒܹ̈ܐ. 393 :ܗܵܐ ܕܝܘܿܕܘܿܪܘܿܣ ܘܬܹܐܕܘܿܪܘܿܣ ܟܹܐܢܹ̈ܐ ܐܸܢܘܿܢ 394 ܠܲܝܬܿ ܐ̄ܢܵܫ ܕܐܵܡܲܪ̈ ܕܩܲܛܪܸܓܼ ܐܸܢܘܿܢ ܕܝܼܢܵܐ ܕܐܢܵܫ̈ܐ܀ 395 :ܠܡܵܢܵܐ ܡܨܲܚܝܼܢ ܥܲܛ̈ܠܲܝ ܠܸܒܵܐ ܠܝܼܕܿܘܼܥܬܼܵܢܹ̈ܐ 396 ܘܥܲܠ ܡ̇ܢ ܥܵܪܩܝܼ̇ܡ ܡ̣ܢ ܚܸܟܼܡ̈ܬܼܵܐ ܕܬܼܘܼܪܓܼܵܡܲܝܗܘܿܢ. 397 :ܗܵܐ ܠܵܐ ܢܸܒܼ̇ܥܹܬܼ ܒܥܵܬܼܵܐ ܕܡܼ̈ܠܹܐ ܥܲܠ ܡܸܠܲܝܗ̈ܘܿܢ 398 ܥܕܲܡܵܐ ܕܵܢܒ̣ܥ ܚܣܵܡܵܐ ܒܝܼܫܵܐ ܒܐ̄ܢܵܫ̈ܐ ܒܝܼܫܹ̈ܐ܀ 399 :ܗܵܐ ܒܝܵܘܡܲܝ̈ܗܘܿܢ ܠܵܐ ܗ̄ܘ̣ܵܐ ܟܢܘܼܫܝܵܐ ܕܣܘܿܢܗܘܿܕܝܼܩܘܿܣ 400 ܘܠܵܐ ܦܘܼܩܕܵܢܵܐ ܕܟܲܢܸܫ ܟܵܗܢܹ̈ܐ ܠܘܵܬܼ ܬܲܒܼ̈ܥܵܬܼܵܐ. 401 :ܬܠܵܬܼܵܐ ܟܢܘܼܫ̈ܝܹܐ ܗܘ̤ܵܘ ܒܵܗ̇ ܒܐܲܪܥܵܐ ܕܪܗܘܿܡܵܢܝܼܵܐ 402 ܘܟܼܠܚܲܕܼ ܡܸܢܗܘܿܢ ܝܼܕܲܥ̣ ܙܲܒܼܢܹܗ ܘܓܲܠܝܵܐ ܥܸܠܬܹܗ܀ 403 :ܚܲܕܼ ܐܸܬܼܟܲܢܲܫ ܒܝܵܘܡܲܝ̈ ܡܲܠܟܐ ܩܘܼܣܛܲܢܛܝܼܢܘܿܣ 404 ܡܸܛܠ ܪܘܼܫܥܵܐ ܕܲܢܒ݂ܲܥ ܡ̣ܢ ܫܸܠܝ ܒܦܘܼܡ ܐܵܪܝܼܘܿܣ. 405 :ܗܵܘ̇ ܬܘܼܒܼ ܕܲܬܪܹܝܢ ܗܘ̤ܵܐ ܒܝܵܘܡ̈ܬܹܗ ܕܬܹܐܕܵܣܝܼܣ 406 ܒܥܸܠܲܬܼ ܒܸܕܼܝܵܐ ܫܟܼܝܼܪܵܐ ܕܐܵܘܠܸܕ ܡܵܩܕܘܿܢܝܼܣ܀ 407 :ܬܠܝܼܬܼܵܝܵܐ ܗܘ̤ܵܐ ܒܪܹܫܵܢܘܼܬܼܵܐ ܕܲܬܼܪܹܝܢ ܡܲܠܟܹ̈ܐ 408 ܘܥܸܠܬܹܗ ܐܝܼܬܹܝܗ̇ ܚܵܣܘܿܡܘܼܬܹܗ ܕܐܲܓܒܼܛܵܝܵܐ. 409 :ܗܵܐ ܣܘܿܢܗܵܕ̈ܘܿܣ ܬܠܵܬܼܵܐ ܕܲܗܘ̤ܵܘ ܒܙܲܒܼܢܹ̈ܐ ܬܠܵܬܼܵܐ 410 ܘܠܵܐ ܒܚܲܕܼ ܡܸܢܗܘܿܢ ܠܵܐ ܗܘ̤ܵܘ ܐܵܢܵܫ̈ܐ ܬܠܵܬܼܵܐ ܕܐܸܡ̇ܪܹܬܼ܀ 411 :ܒܗܵܘ̇ ܩܲܕܡܵܝܵܐ ܠܵܐ ܝܠܝܼܕܼܝܼܢ ܗ̄ܘ̣ܵܘ ܕܒܹܝܬܼ ܕܝܘܿܕܘܿܪܘܿܣ 412 ܘܡܲܢ̣ܘܼ ܕܡܨܐ ܕܢܹܐܡܲܪ ܕܝܼܢܵܐ ܥܲܡ ܠܵܐܝܠܝܼܕ̈ܐ. 413 :ܒܗܵܘ̇ ܬܘܼܒܼ ܕܲܬܼܪܹܝܢ ܠܵܐ ܡܲܢܲܥ̣ܘ ܗ̄ܘ̣ܵܘ ܠܪܹܫܵܢܘܼܬܼܵܐ 414 ܡܕܝܼܢ ܓܼܠܝܵܐ ܗ̄ܝ̣ ܕܠܵܐ ܩܪ̣ܵܐ ܐܸܢܘܿܢ ܟܢܘܼܫܹ̈ܐ ܠܕܝܼܢܵܐ܀ 415 :ܒܲܬܼܠܬܼܵܚܵܐ ܥܲܢܝܼܕܝܼܢ ܗ̄ܘ̣ܵܘ ܡ̣ܢ ܒܹܝܬܼ ܚܲܝܹ̈ܐ 416 ܘܡܲܢ̣ܘܼ ܕܫܲܢܲܝ̈ ܕܿܠܥܲܢܝܼ̈ܕܹܐ ܢܩܲܛܪܸܓܼ ܡܲܓܿܢ. 417 :ܗܵܐ ܐܸܬܼܓܲܠܝܲܬ̤ ܥܸܠܬܼܵܐ ܕܬܵܒܼܥܵܐ ܙܢܲܝ̈ ܨܘܼܚ̈ܬܼܵܐ 418 ܢܸܒܼܥܹܐ ܗܵܟܹܝܠ ܕܡܸܛܠ ܡܵܢܵܐ ܡܨܲܚܝܢ ܟܹܐܢܹ̈ܐ܀ 419 :ܠܡܵܢܵܐ ܟܬܼܝܼܫܝܼܢ ܐܢܵܫ̈ܐ ܟܬܼܝܼܫܹ̈ܐ ܠܘܼܩܒܲܠ ܬܲܩܢܹ̈ܐ 420 ܘܬܼܵܢܹ̇ܝܢ ܒܸܙܚܵܐ ܣܵܢܝܲܝ̈ ܢܲܦܫܵܐ ܥܲܠ ܫܲܦܝܼܪܹ̈ܐ. 421 :ܠܡܵܢܵܐ ܩܪ̈ܝܼܢ ܕܠܵܐ ܫܲܪܝܼܪ̈ܝܼܢ ܣܸܦܪܹ̈ܐ ܕܐܲܟܼܬܸܒܼܘ 422 ܕܗܵܐ ܠܵܐ ܢܲܗܝܼܪ ܕܸܢܚܹܗ ܕܫܸܡܫܵܐ ܐܲܝܟ ܡܸܠܲܝ̈ܗܘܿܢ܀ 423 ܠܡܵܢܵܐ ܡܟܲܕܼܒܼܝܼܢ ܡܸ̈ܠܹܐ ܕܚܸܪܡܵܐ ܕܣܘܿܢܗܘܿܕܝܼܩܘܿܣ: pb. f.64v 424 ܕܗܵܐ ܠܲܝܬܿ ܟܸܢܫܵܐ ܕܩܲܛܪܸܓܼ ܐܸܢܘܿܢ ܒܡܸܕܹܡ ܕܲܫܟܼܝܼܪ. 425 :ܘܐܸܢܗܘ̤ ܕܬܼܢܹܝ̇ܢ ܠܗܵܝ̇ ܣܘܿܢܗܵܕܘܿܣ ܬܹܒܼܝܼܠܵܝܬܵܐ 426 ܡ̇ܢ ܩܲܪܝܼܒܼܵܐ ܗܵܕܹܐ ܠܐܢܵܫ̈ܐ ܕܡܲܝܼܝܼܬܼܝܼܢ ܗ̄ܘ̣ܵܘ܀ 427 :ܘܐܸܢܗ̤ܘ ܕܬܼܵܒܼܥܝܼܢ ܫܲܪܒܹܿܗ ܕܢܸܣܛܘܿܪ ܕܲܒܼܗܵܘ̇ ܙܲܒܼܢܵܐ 428 ܗܵܐ ܐܵܦ ܠܵܐ ܗܘ̤ ܫܲܡܥܹܗ ܠܫܲܪܒܵܐ ܕܲܓܼܙܲܪ ܕܝܼܢܹܗ. 429 :ܠܵܐ ܩܲܪܝܼܒܼ ܗ̄ܘ̣ܵܐ ܠܘܵܬܼ ܕܝ̈̇ܢܐ ܕܚܲܝܒܼܘܼܗܝ ܡܲܓܿܢ 430 ܒܗܵܝ̇ ܕܥܲܢܝܼܕܼ ܗ̄ܘ̣ܵܐ ܥܲܕܼܠܵܐ ܢܸܡܛܹܐ ܨܝܕܼ ܕܲܝ̈̇ܢܵܘܗܝ܀ 431 :ܡܲܢ̣ܘܼ ܡ̣ܢ ܡܬܼܘܿܡ ܫܡܲܥ̣ ܐܲܝܟ ܗܵܕܹܐ ܕܲܣܥܪܘ ܟܵܗܢܹ̈ܐ 432 ܕܲܦܲܣܲܩ̣. ܕܝܢܵܐ ܟܲܕ ܠܵܐ ܩܲܪܝܹܒܼ ܡܸܬܿܕܝܼܢܵܐ. 433 :ܚܲܣܲܒܼ ܒܐܲܦܹ̈ܐ ܣܥ̣ܪܘ ܕܝ̈̇ܢܐ ܕܗܢܐ ܕܝܼܢܵܐ 434 ܘܡ̣ܢ ܦܲܪܨܘܿܦܵܐ ܒܗܸܬܼܘ ܕܲܢܚܵܘܘܢ ܫܪܵܪܵܐ ܓܲܠܝܐ܀ 435 :ܡ̣ܢ ܡܸܨܪܵܝܵܐ ܒܗܸܬܼܘ ܚܲܟܝ̈ܡܹܐ ܩܵܢܝܲܝ̈ ܗܵܘܢܵܐ 436 ܘܩܸܢܛܵܐ ܕܢܸ̈ܢܹܐ ܣܲܪܸܕܼ ܐܸܢܘܿܢ ܠܡܹܐܡܲܪ ܩܘܼܫܬܐ 437 :ܘܗܵܐ ܡܦܣܵܝܼܢ ܗ̄ܘ̣ܵܘ ܒܢܝܼܫܵܐ ܕܡܸܠܵܘ̈ܗܝ ܕܐܵܓܸܒܼܛܵܝܵܐ 438 ܘܠܵܐ ܫܵܠܡܝܼܢ ܗ̄ܘ̣ܵܘ ܠܚܸܪ̈ܡܹܐ ܕܲܟܼܬܲܒܼܘ ܚܲܪܡܵܢܵܐܝܼܬܼ܀ 439 :ܚܲܪܡܵܢܵܐܝܼܬܼ ܐܲܚܪܸܡܘ ܚܪ̈ܡܹܐ ܠܝܵܕܼ̈ܥܲܝ ܩܘܼܫܬܵܐ 440 ܘܠܵܐ ܟܲܣܝܵܐ ܗ̄ܘ̣ܵܬܼ ܚܲܪܡܵܢܘܼܬܼܗܘܿܢ ܡ̣ܢ ܥܲܝܢܲܝ̈ܗܘܿܢ. 441 :ܗܵܐ ܐܵܦ ܗܸܢܘܿܢ ܐܲܚܪܸܡܘ ܐܸܢܘܿܢ ܠܚܪܡܹܐ ܕܒܸܕܹܝܹܗ 442 ܘܠܵܐ ܗ̄ܘ̣ܵܐ ܠܚܲܪ̈ܡܵܘܗܝ ܐܸܠܵܐ ܐܵܦ ܠܹܗ ܒܚܸܪܡܵܐ ܚܲܒܼܫܘܼܗܝ܀ 443 :ܗܵܐܗܵܟܲܢܵܐ ܟܬܼܝܼܒܼ ܒܲܟܼܬܼܵܒܼܵܐ ܕܗܲܝܡܵܢܘܼܢܗܘܿܢ 444 ܕܡܲܚܝܪܼܡ ܗ̄ܘ̣ ܠܲܡ ܟܠܡ̇ܢ ܕܐܡ̇ܪ ܫܡܵܐ ܕܡܘܼܙܵܓܼܵܐ. 445 :ܘܗܵܐ ܡܸܨܪܵܝܵܐ ܣܝܼܡ ܠܹܗ ܚܸܪܡܵܐ ܠܘܼܩܒܲܠ ܗܵܕܹܐ 446 ܕܠܵܐ ܐ̄ܢܵܫ ܫܲܠܝܼܛ ܕܢܹܐܡܲܪ ܦܲܓܼܪܵܐ ܘܐܲܠܵܗܘܼܬܼܵܐ܀ 447 :ܘܡܵܢܵܐ ܗܵܟܹܝܠ ܢܸܥܒܸܿܕ ܐܲܝܢܵܐ ܕܫܵܡܲܥ̇ ܗܵܠܹܝܢ 448 ܕܡܲܚܪܲܡ ܐܲܝܢܵܐ ܕܡܵܘܕܹܐ ܫܲܦܝܼܪ ܘܲܕܼܠܵܐ ܡܵܘܕܹܐ܀ 449 :ܗܵܐ ܡܵܢܵܐ ܣܥ݂ܲܪ ܡܲܣܲܒܼ ܒܲܐܦܹ̈ܐ ܒܣܲܟܿܘܼܠܬܼܵܢܹ̈ܐ 450 ܕܼܕܼܵܢܘ̣ ܟܹܐܢܵܐܝܼܬܼ ܘܲܗܦ݂ܲܟܼܘ ܚܲܝܵܒ̣ܘ ܥܵܘܵܠܵܐܝܼܬܼ܀ 451 :ܟܹܐܝܢ ܗ̄ܘ̣ܵܐ ܚܸܪܡܵܐ ܕܲܫܪ̈ܝ ܡܸܠܘ̈ܗܝ ܕܐܓܼܒܼܛܝܐ 452 ܘܠܑܵ ܟܹܐܢܵܐ ܗ̄ܘ̣ܵܬܼ ܕܢܸܚܪܘܿܒܼ ܓܲܒܼܪܵܐ ܕܲܩ̣ܛܲܠ̣ ܐܸܢܘܿܢ. 453 :ܩܹܐܪܣܵܐ ܪܲܒܵܐ ܥܒ̣ܕ ܚܵܣܡܐ ܠܘܼܩܒܲܠ ܚܪ̈ܡܘܗܝ 454 ܘܚܲܠܛ̣ܘܗܝ ܐܲܟܼܚܲܕ ܠܫ̇ܪܐ ܚܪ̈ܡܐ ܘܩܛ̇ܪ ܚܪ̈ܡܐ܀ 455 :ܚܪܡܵܐ ܒܚܪܡܵܐ ܚ̣ܠܲܛ ܗ̄ܘ̣ܵܐ ܟܸܢܫܵܐ ܬܹܒܹܝܠܵܝܵܐ 456 ܘܐܲܪܡܝܼܘ ܗܸܪܬܼܵܐ ܒܹܝܬܼ ܝܵܕܼܘܿܥܹ̈ܐ ܘܠܵܐ ܝܵܕܘܿܥܹ̈ܐ. 457 :ܠܵܐ ܐܢܵܫ ܡܸܫܟܲܚ ܕܢܸܫܪܹܐ ܚܸܪܡܵܐ ܡ̣ܢ ܕܲܠܩܘܼܒܼܠܹܗ 458 ܒܗܵܝ̇ ܕܲܚܒܼܝܼܫܝܼܢ ܬܪܲܝܗܘܿܢ ܚܸܪ݁ܡܹܐ ܬܚܝܹܬܼ ܚܲܕܼ ܚܸܪܡܵܐ܀ 459 :ܗܵܢ ܒܘܼܠܒܵܠܵܐ ܕܲܠܚܹܗ ܠܥܵܠܡܵܐ ܒܲܒܿܠܝܼܠܘܼܬܹܗ 460 ܘܗܵܐ ܦܠܝܼܓ ܚܘܼܒܵܐ ܘܠܲܝܬܿ ܫܘܝܘܼܬܼܵܐ ܒܹܝܬܼ ܚܲܕ ܠܲܐܚܪܹܝܢ. 461 :ܠܲܝܬܿ ܫܵܘܝܘܼܬܼܵܐ ܠܵܐ ܟܠ ܟܠܹܗ ܒܹܝܬܼ ܐܲܪ̈ܥܵܢܹܐ 462 ܘܝܲܬܿܝܼܪܵܐܝܼܬܼ ܒܥܲܡܵܐ ܕܲܓܼܒ̣ܵܐ ܡܫܝܼܚܵܐ ܠܲܫܡܹܗ܀ 463 :ܒܲܡܫܝܼܚܵܝܹ̈ܐ ܣܓܼܝܼܘ ܦܘܼ̈ܠܵܓܹܐ ܕܠܵܐ ܡܸܢܝܵܢܵܐ 464 ܘܠܵܐ ܐ̄ܢܵܫ ܝܵܕܥ̇ ܠܡܸܪܕܵܐ ܫܲܦܝܼܪ ܒܐܘܼܪܚܵܐ ܕܩܘܼܫܬܵܐ. 465 :ܒܐܘܼܪܚܵܐ ܕܩܘܼܫܬܵܐ ܚܙܹ̇ܝܬܼ ܒܲܛܝܼܠܐ ܡ̣ܢ ܡܲܪܕܝܼܬܼܵܐ 466 ܘܬܸܗ̇ܪܹܬܼ ܣܲܓܿܝܼ ܕܡܵܢܵܐ ܥܸܒܼܕܲܬ̤ ܒܝܼܫܘܼܬܼ ܢܫܹ̈ܐ܀ 467 :ܒܝܼܫܘܼܬܼ ܢܸܫܹ̈ܐ ܚܙܝܹ̇ܬܼ ܕܫܲܓܸܫܬܹܗ ܠܥܘܼܡܪܵܐ ܕܐܵܢܵܫ̈ܐ 468 ܘܐܸܡ̇ܪܹܬܼ ܐ̄ܢܵܐ ܠܝܼ ܕܠܵܘ ܟܹܐܢܵܐܝܼܬܼ ܚܵܪܹ̈ܐܬܼ ܘܲܫܠܹ̇ܝܬܼ. 469 :ܐ̄ܢܵܐ ܠܝܼ ܕܵܢܹ̇ܬܼ ܒܐܲܝܠܹܝܢ ܕܲܡܨܐ ܡܠܝܼܠܵܐ ܕܲܢܕܘܢ 470 ܕܥܲܠ ܡ̇ܢ ܡܲܗܡܬ ܡ̣ܢ ܬܲܒܼܥܵܬ̈ܐ ܕܲܒܼܝܲܕ ܡܸ̈ܠܹܐ܀ 471 :ܣܲܓܿܝܼ ܦܫܝܼܩ ܠܹܗ ܠܲܩܢܹܐ ܡܸܠܬܼܵܐ ܠܡܸܟܼܠܵܐ ܒܥܵܘܠܵܐ 472 ܘܕܲܠܝܼܠܵܐ ܝܠܹܗ ܠܲܡܫܲܬܵܩܘܼ ܙܢܲܝ̈ ܒܝܼܫ̈ܬܼܵܐ. pb. f.65r 473 :ܙܢܲܝ̈ ܒܝܼܫ̈ܬܼܵܐ. ܚܙܹ̇ܝܬܼ ܕܲܣܒܼܝܼܣܝܼܢ ܒܹܝܬܼ ܐܲܪ̈ܥܵܢܹܐ 474 ܘܡܲܠܟܿܢܝ ܪܸܥܝܵܢܝ ܕܐܹܡܲܪ ܕܝܼܢܵܐ ܒܡܸ̈ܠܹܐ ܕܟܹܐܢ̈ܢ܀ 475 :ܕܝܼܢܵܐ ܕܡܸ̈ܠܹܐ ܐܝܼܬܼ ܠܝܼ ܕܐܹܡܲܪ ܥܲܡ ܡܲܠܵܠܹܐ 476 ܕܡܸܛܠ ܡܵܢܵܐ ܫܠܹܝܢ ܡ̣ܢ ܡܸ̈ܠܹܐ ܕܵܝܢ̈ܢ ܡܸ̈ܠܹܐ. 477 :ܡܲܡܠܠܵܐ ܕܠܵܐܟܹܐܝܢ ܫܸܡ̇ܥܹܬܼ ܕܡܲܠܸܠܘ ܐܢܫ̈ܐ ܣܲܟܼ̈ܠܹܐ 478 ܘܪܲܟܿܒܹ̇ܬܼ ܡܸ̈ܠܹܐ ܠܘܼܩܒܲܠ ܡܸ̈ܠܹܐ ܕܠܵܐ ܫܲܦܝܪ̈ܢ܀ 479 :ܐܢܫ̈ܐ ܟܐܹܢܹ̈ܐ ܚܙܹ̇ܝܬܼ ܕܲܛܠܝܼܡܝܼܢ ܡ̣ܢ ܗܸܕܿܝܘܿܛ̈ܐ 480 ܘܠܵܐ ܒܸܣܡܲܬ̤ ܠܝܼ ܕܐܸܫܡܲܥ ܒܸܙܡܲܥ ܕܣܲܟܿܘܼ̈ܠܬܼܵܢܹܐ. 481 ܒܸܣܦܪܹ̈ܐ ܕܲܟܼܬܒ̣ܘ ܩ̇ܪܹܝܬܼ ܘܐܸܬܼܗܲܓܼܝܼܬܼ ܕܲܟܼܡܵܐ ܒܚܝܼܪܹܝܢ܀ 482 ܘܬܸܗ̇ܪܹܬܼ ܣܲܓܿܝܼ ܕܲܟܼܡܵܐ ܛܠܝܼܡܝܼܢ ܡ̣ܢ ܛܵܠܘܿܡܹ̈ܐ܀ 483 :ܠܛܵܠܘܡܲܝ̈ܗܘܿܢ ܒܥܹܝܗ̇ ܕܐܹܩܲܛܪܸܓܼ ܒܩܵܠܵܐ ܕܡܸ̈ܠܲܝ 484 ܕܥܲܠ ܡ̇ܢ ܛܵܠܡܝܼ̇ܢ ܠܲܕܼܠܵܐ ܒܣܝܼܪܝܼܢ ܡ̣ܢ ܟܹܐܢܘܼܬܼܵܐ. 485 :ܠܡ̇ܢ ܛܵܠܘܿܡܹ̈ܐ ܛܠ݂ܲܡܬܘܢ ܣܲܓܿܝܼ ܠܕܲܟܼܝܲܝ̈ ܢܲܦܫ̣ܵܐ 486 ܘܐܲܣܠܝܼܬܘܢܝܗܝ ܠܗܸܪܓܵܐ ܛܵܒܼܵܐ ܕܡ̣ܢ ܡܠܝ̈ܗܘܿܢ܀ 487 :ܐܲܝܢܵܘ ܥܵܘܠܵܐ ܕܐܲܥܘܸܠܘ ܟܹܐܢܹ̈ܐ ܟܲܕܼ ܠܵܐ ܐܲܥܘܸܠ 488 ܕܗܵܐ ܡܸܬܼܪܲܕܦܝܼܢ ܡ̣ܢ ܡܸܠܲܝ̈ܗܘܿܢ ܐܲܝܟ ܥܵܘܠܹ̈ܐ. 489 :ܐܸܢ ܗܘ̤ ܕܥܵܘܠܵܐ ܗ̄ܘ̣ ܕܐ̄ܢܵܫ ܢܸܬܼܗܲܓܹܗ ܒܗܲܝܡܵܢܘܼܬܼܵܐ 490 ܗܵܐ ܟܠ ܟܹܐܢܝܼ̈ܢ ܒܗܵܢܵܐ ܗܸܪܓܵܐ ܫܠܸܡܘ ܚܲܝ̈ܗܘܿܢ܀ 491 :ܘܐܸܢ ܗܘ̤ ܕܓܼܘܢܚܵܐ ܗ̄ܘ̣ ܕܢܹܐܡܲܪ ܩܘܼܫܬܵܐ ܕܹܝܢ ܬܲܚܦܝܼܬܼܵܐ 492 ܗܵܐ ܟܵܪ̈ܘܿܙܹܐ ܫܠܝܼܚܹ̈ܐ ܕܲܪܫ̣ܘܼܗ̇ ܠܗܵܕܹܐ ܐܘܼܪܚܵܐ. 493 :ܗܵܐ ܗܘ̤ ܪܹܫܵܐ ܕܲܬܼܪܹܥܣܪ̈ܝܬܐ ܩܥ̣ܵܐ ܠܝܗܘܵܕܼ̈ܝܐ 494 ܕܓܲܒܼܪܵܐ ܗ̄ܘ̣ ܝܼܫܘܿܥ ܐܵܦ ܒܲܪܢܵܫܵܐ ܕܡ̣ܢ ܐܲܠܵܗܵܐ܀ 495 :ܗܵܐ ܐܵܦ ܦܵܘܠܘܿܣ ܒܚܝܼܪ ܒܲܫܠܝܼܚܹ̈ܐ ܠܗܵܕܹܐ ܫܵܠ̇ܡܸܐ 496 ܘܲܡܟܲܢܹܐ ܠܹܗ ܚܲܕܼ ܡܸܨܥܵܝܵܐ ܕܐܝܼܬܼܝܵܐ ܘܕܼܝܼܠܲܢ. 497 :ܠܘܼܩܵܐ ܘܡܲܬܲܝ ܕܠܵܐ ܬܲܚܦܝܼܬܼܵܐ ܟܲܬܼܒܼܘܼܗܝ ܠܫܲܪܒܹܿܗ 498 ܘܲܣܕܪܘ ܐܸܢܘܿܢ ܠܲܡܝܿܒܲܠܵܢܵܘ̈ܗܝ ܚܲܕܼ ܒܵܬܲܪ ܚܲܕܼ܀ 499 :ܐܵܦ ܒܲܪ ܪܲܥܡܵܐ ܒܩܵܠܵܐ ܓܼܠܝܵܐ ܓܠܵܗ̇ ܠܐ̄ܢܵܫܘܼܬܹܗ 500 ܕܡܵܐ ܕܡܸܫܬܲܪܝܵܐ ܡܩܝܼܡ ܠܵܗ̇ ܚܲܝܠܵܐ ܐܲܠܵܗܵܝܵܐ. 501 :ܠܗܘܿܢ ܠܟܼܵܪ̈ܘܿܙܹܐ ܢܸܥܕܘܿܠ ܡܵܕܹܝܢ ܐܲܝܢܵܐ ܕܥܵܕܹ̇ܠ 502 ܕܗܵܐ ܒܣܸܦܪ̈ܲܝܗܘܿܢ ܟܬܼܝܼܒܼ ܦܘܼܪܫܵܢܵܐ ܕܡܸܠܬܐ ܘܦܲܓܼܪܵܐ܀ 503 :ܐܵܦ ܗܘ̤ ܡܵܪܢ ܬܚܹܝܬܼ ܡܲܪܫܘܼܬܼܵܐ ܘܵܠܹ̇ܐ ܕܢܸܗܘܹܐ 504 ܕܚܵܘܝܼ ܒܲܦܓܼܪܹܗ ܕܘܼܟܲܬܼ ܨ̈ܨܹܐ ܘܪܘܼܡܚܵܐ ܕܲܒܼܠܲܥ. 505 :ܗܘ̤ ܘܬܲܠܡܝܼܕܼܵܘ̈ܗܝ ܕܲܪܫ̣ܘܼܗ̇ ܠܐܘܼܪܚܵܐ ܕܗܵܢ ܦܘܼܪܫܵܢܵܐ 506 ܘܲܓܼܠ̣ܘ ܘܒܲܕܼܩܘ ܟܝܵܢ ܐܝܼܬܼܘܼܬܼܵܐ ܘܲܟܼܝܵܢ ܐ̄ܢܵܫ̈ܐ܀ 507 :ܟܝܵܢܹ̈ܐ ܦܲܪܸܫܘ ܕܠܵܐ ܢܸܬܼܒܲܠܒܲܥ ܛܲܟܼܣܵܐ ܕܲܒܼܗܘܿܢ 508 ܘܟܲܢܸܫܘ ܐܸܢܘܿܢ ܠܲܚܕܼܵܝܘܼܬܼܵܐ ܕܚܲܕ ܼܦܲܪܨܘܿܦܵܐ. 509 :ܚܲܕܼ ܦܲܪܨܘܿܦܵܐ ܩܪ̣ܵܘ ܟܵܪ̈ܘܿܙܹܐ ܠܡܸܠܬܼܵܐ ܘܦܲܓܼܪܵܐ 510 ܘܠܹܗ ܠܗܵܢ ܢܝܼܫܵܐ ܚܢ̣ܵܘ ܡܲܠܦܵܢܹ̈ܐ ܕܕܚܠܲܬܼ ܩܘܼܫܬܐ܀ 511 :ܠܢܝܼܫܵܐ ܕܚܲܒܼܪܵܘܗܝ ܚ̣ܢܵܐ ܕܝܘܿܕܘܿܪܘܿܣ ܘܬܼܵܐܕܘܿܪܘܿܣ 512 ܘܡܵܢܲܐ ܗ̄ܝ̣ ܗ̇ܕܹܐ ܕܲܠܗܘܿܢ ܒܲܠܚܘܕܲ ܥܵܕܼܠܝܼܢ ܣܲܟܼ̈ܠܹܐ. 513 :ܐܝܼܬܼ ܚܲܟܿܝܼܡܹ̈ܐ ܐܚܪ̈ܢܐ ܕܗܪܓܼܘ ܒܗܵܢܵܐ ܫܲܪܒܵܐ 514 ܘܠܵܐ ܐ̄ܢܵܫ ܥܵܕܠ̇ ܠܬܼܘܼܪ̈ܓܵܡܲܝ ܐܸܠܵܐ ܠܗܵܢܘܿܢ܀ 515 :ܗܲܪ݁ܵܛܝܼܩܹܐ ܗ̄ܘ̣ ܒܲܠܚܘܿܕܲ ܣܵܢܐܘܼܗܝ ܠܗܵܢ ܥܸܢܝܵܢܵܐ 516 ܘܠܵܐ ܨܒ̣ܵܘ ܩܲܒܸܿܠܘ ܚܕܼܵܐ ܬܵܘܕܝܬܼܵܐ ܕܡܸܠܬܼܵܐ ܘܦܲܓܼܪܵܐ. 517 :ܠܗܘܿܢ ܠܛܵܥܲܝ̈ܐ ܫܠܡ̇ܝܼܢ ܡܵܕܝܢ ܐܵܦ ܗܸܕܝܘܿܛܹ̈ܐ 518 ܘܐܲܝܟ ܪܸܥܝܵܢܗܘܿܢ ܪܵܕܹܝܢ ܒܐܘܼܪܚܵܐ ܕܠܵܐ ܫܲܪܝܼܪܵܐ܀ 519 :ܠܵܐ ܫܲܪܝܼܪܵܐ ܐܘܼܪܚܵܐ ܕܲܕܼܪܼܫ̣ܘ ܗܲܪ̈ܣܝܘܿܛܹܐ 520 ܘܲܡܚܵܘܼܐ ܐ̄ܢܵܐ ܡ̣ܢ ܣܸܦܪ̈ܲܝܗܘܿܢ ܕܠܵܐ ܫܲܪܝܼܪܵܐ. 521 :ܣܝܼܡܘܿܢܝܵܢܹ̈ܐ ܚܸܠܡܵܐ ܚܲܫܒܿܘܼܗ̇ ܠܦܲܓܼܪܢܘܼܬܼܵܐ 522 ܘܐܲܝܟ ܗܲܓܵܓܼܵܐ ܦܲܫܸܩܘ ܐܸܢܝܢ ܠܐܵܢܵܫܝ̈ܵܬܼܵܐ܀ pb. f.65v 523 ܒܲܪ ܒܘܼܪ̈ܝܵܢܹܐ ܛܠܲܡ̣ܘ ܟܠ ܟܠܹܗ ܡܸܠܬܐ ܘܦܲܓܼܪܐ. 524 ܘܪܸܟܸܿܒܼ̇ܘ ܒܸܕܼܝܵܐ ܕܲܫܟܼܝܼܪ̈ܵܬܼܵܐ ܕܠܵܐ ܡܸܬܼܡܲܠܲܠ. 525 :ܡܢܢܕܪ̈ܝܐ ܛܥ̣ܘ ܟܠ ܟܠܹܗ ܕܠܲܝܬܿ ܐܝܼܬܼܘܼܬܼܵܐ 526 ܘܣܵܡܘܼܗܝܼ ܠܲܫܡܵܐ ܕܲܒܵܪܘܿܝܘܼܬܼܵܐ ܥܲܠ ܡܲܠܲܐܟܹ̈ܐ܀ 527 :ܦܘܼܛܝܢ̈ܝܢܐ ܚܲܕܼ ܦܲܪܨܘܿܦܵܐ ܩܪ̣ܵܘ ܠܲܬܼܠܵܬܼܵܐ 528 ܘܕܼܵܘܕܼܘܗܝ ܠܛܲܟܼܣܵܐ ܕܐܲܒܼܵܗܘܬܼܵܐ ܘܕܼܝܼܠܝܼܕܼܘܼܬܼܵܐ. 529 :ܦܵܘܠܘܢܝܢ̈ܐ ܬܚܹܝܬܼ ܫܘܼܪܵܝܵܐ ܚܲܒܼܫܘܼܗܝ ܠܲܒܼܪܵܐ 530 ܘܡ̣ܢ ܒܲܪܬܼ ܐ̄ܢܵܫܐ ܥܒ̣ܕܘ ܫܘܼܪܝܵܐ ܠܲܐܠܵܗܘܼܬܹܗ܀ 531 :ܡܲܪ̈ܩܝܘܿܢܸܣ ܛܹܐ ܥܪܲܩ̣ܘ ܡ̣ܢ ܗ̇ܠܹܝܢ ܐܵܦ ܡ̣ܢ ܗܵܠܹܝܢ 532 :ܘܐܲܥܸܠܘ ܐܝܼܬܼܝܵܐ ܕܢܘܼܟܪܵܝ ܒܲܫܡܹܗ ܠܫܸܡ ܐܝܼܬܼܘܼܬܼܵܐ 533 :ܘܠܢܝܼܢܝܐ ܐܵܦܠܵܐ ܒܡܸܠܬܐ ܩܪܸܒܼܘ ܠܲܦܝܵܣܵܐ 534 ܒܗܝ̇ ܕܐܲܪܝܼܡܘܼܗܝ ܠܫܸܡ ܐܝܼܬܼܘܵܬܼܵܐ ܡ̣ܢ ܣܸܦܪ̈ܲܝܗܘܿܢ܀ 535 :ܕܒܹܝܬܼ ܒܲܪܕܲܝܨܵܝܢ ܚܫܲܒ̣ܘ ܟܠ ܡ̣ܕܲܡ ܐܲܝܟ ܠܵܐ ܡܸܕܼܡ 536 ܘܲܣܬܲܪܘ ܘܲܒܼܢ̣ܵܘ ܒܸܢܝܵܢ ܙܹܐܦܵܐ ܘܠܵܐ ܡܸܬܼܩܲܝܲܡ. 537 :ܘܠܢܛܝܢܘܣ ܥܒ݂ܲܪܓܘܼܕܵܦܹܗ ܠܟܼܠ ܓܘܼܕܵܦܝܼ̈ܢ 538 ܘܲܐܪܫܲܥ ܘܐܸܡܲܪ ܕܠܵܐ ܦܲܓܼܪܵܐ ܗ̄ܘ̣ܵܐ ܕܝܸܠܕܲܬ̤ ܡܲܪܝܼܡ܀ 539 :ܣܹܒܼܵܠܝܼܘܿܣ ܛܠܲܡ̣ ܐܢܵܫܘܼܬܼܵܐ ܘܐܲܠܵܗܘܼܬܼܵܐ 540 ܡܲܥܛ̣ܵܐ ܩܢܘܡܹ̈ܐ ܘܚܲܒܸܿܠ ܛܲܟܼܣܵܐ ܕܿܐܝܼܬܼ ܒܐܝܼܬܼܘܬܼܵܐ. 541 :ܕܒܹܝܬܼ ܐܪܝܼܘܿܣ ܦܲܪܫܘܼܗܝ ܠܲܒܼܪܵܐ ܡ̣ܢ ܝܵܠܘܿܕܹܗ 542 ܘܟܲܢܝܘܼܗܝ ܥܲܒܼܕܵܐ ܘܲܡܫܲܡܫܵܢܵܐ ܐܲܝܟ ܟܠ ܒܸܪ̈ܝܵܢ܀ 543 :ܐܸܘܢܘܡܝܢ̈ܐ ܒܲܫܡܵܐ ܒܲܠܚܘܕ ܩܪ̣ܵܐܘܼܗܝ ܝܲܠܕܵܐ 544 ܘܒܲܛܠܘܼܗܝ ܠܲܫܡܵܐ ܕܐܲܒܼܵܗܘܬܼܵܐ ܘܕܼܝܼܠܝܼܕܼܘܼܬܼܵܐ. 545 :ܕܘܡܪ݁ܝܛܐ ܦܸܠܓܘܲܬܼ ܐܢܵܫܵܐ ܚܲܒܼܫܘܼܗܝ ܠܡܵܪܢ 546 ܘܠܵܐ ܐܲܦܸܣܘܼܠܹܗ ܕܢܸܗܘܸܐ ܓܡܝܼܪܵܐ ܐܵܦ ܠܵܐ ܒܢܲܦܫܵܐ܀ 547 :ܡܩܕܘܢܝܣ ܠܚܵܝܗܝ ܠܲܩܢܘܿܡܐ ܕܪܘܼܚܵܐ ܕܩܘܼܕܼܫܵܐ 548 ܘܢܲܟܼܪܝܼ ܘܲܫܕܵܝܗܝ ܠܗܵܠ ܡ̣ܢ ܢܘܡ̈ܐ ܕܐܲܒܼܵܐ ܘܲܒܼܪܵܐ. 549 :ܕܒܹܝܬܼ ܣܹܘܵܪܹ̈ܐ ܛܲܠܡܘܼܗܝ ܠܦܲܓܼܪܵܐ ܕܲܫܩ̣ܲܠ ܡܸܢܲܢ 550 ܒܗܵܝ̇ ܕܐܵܡ̇ܪܝܼܢ ܗ̄ܘ̣ܵܘ ܕܠܵܘ ܒܲܪܢܵܫܵܐ ܗ̄ܘ̣ ܕܚܫ̣ ܘܐܸܬܼܢܲܣܝܼ܀ 551 :ܗܵܐ ܬܵܘܕܝܼܬܼܵܐ ܕܗܲܪ̈ܛܝܼܩܹܗ ܣܵܢܝܝ ܢܲܦܫܵܐ 552 ܚ̣ܙܵܘ ܗܸܕܼܝ̈ܘܛܹܐ ܟܡ̇ܐ ܓܘܼܕܵܦܹ̈ܐ ܡܠܹܝܢ ܫܲܪ̈ܒܲܝܗܘܿܢ. 553 :ܚܘܼܪܘ ܬܼܵܩܢܵܐܝܼܬܼ ܟܡܵܐ ܢܘܼܟܼܪܵܝܼܢ ܠܗܲܝܡܵܢܘܼܬܼܵܐ 554 ܘܲܟܼܡܵܐ ܟܬܼܵܝܼܫܝܼܢ ܠܲܡܕܲܘܵܕܼܘ ܠܬܩܝܼܢܵܬܼܵܐ܀ 555 :ܦܪܘܿܫ ܟܹܐܢܵܐܝܼܬܼ ܐܲܝܟ ܦܵܪܘܿܫܵܐ ܩܵܢܝܲܝ̈ ܡܸܠܬܹܐ 556 ܟܡܵܐ ܦܘܼܪ̈ܫܢܹܐ ܐܝܼܬܼ ܒܹܝܬܼ ܟܹܐܢܹ̈ܐ ܘܲܠܥܵܘ̈ܠܹܐ. 557 :ܟܹܐܢܝܼ̈ܢ ܣܲܓܿܝܼ ܐ̄ܢܵܫ̈ܐ ܕܕܼܵܢܹ̇ܬܼ ܚܠܵܦ ܡܸܠܲܝ̈ܗܘܿܢ 558 ܘܫܲܪܝܼܪ ܘܲܕܼܟܹܐ ܫܪܵܪܵܐ ܕܐܲܟܼܪܸܙܘ ܒܲܝܢܵܬܼ ܐ̄ܢܵܫ̈ܐ܀ 559 :ܡܸܛܠܵܬܼܗܘܿܢ ܬܢܹܝ̇ܬܼ ܥܘܼܗܕܵܢܵܐ ܕܗ̇ܪ̈ܲܛܝܩܹܐ 560 ܕܐܸܓܼܠܹܐ ܠܐ̄ܢܵܫ̈ܐ ܟܡܵܐ ܪ̈ܚܝܼܩܝܼܢ ܡ̣ܢ ܟܹܐܢܘܼܬܼܵܐ. 561 :ܠܛܵܠܘܿܡܘܼܬܼܗܘܿܢ ܒܥܹ̇ܝܬܼ ܕܐܹܚܵܘܹܐ ܩܕܼܵܡ ܛܵܠܘܿܡܹ̈ܐ 562 ܕܐܵܘܕܲܥ ܐܸܢܘܿܢ ܕܠܵܐ ܟܹܐܢܵܐܝܼܬܼ ܛܠܲܡ̣ܘ ܠܲܬܼܪ̈ܝܼܨܐ܀ 563 :ܗܲܪ̈ܛܝܼܩܹܐ ܟܲܢܝܼܘ ܐܸܢܘܿܢ ܠܝܵܕܼܥܲܝ̈ ܩܘܼܫܬܵܐ 564 ܘܡܸܛܠ ܗܵܕܹܐ ܬܢܹ̇ܝܬܼ ܩܘܼܛܪܵܓܼܵܐ ܕܛܵܠܘܿܡܘܼܬܼܗܘܿܢ. 565 :ܫܪܵܪܵܐ ܕܲܒܼܗܘܿܢ ܦܸܚܡܲܬ̤ ܡܸܠܲܬܼܝ ܥܲܡ ܙܹܐܦܵܢܹ̈ܐ 566 ܕܐܸܓܼܠܹܐ ܠܐܢܵܫ̈ܐ ܕܲܟܼܡܵܐ ܢܘܼܟܼܪܵܝ ܫܪܵܪܵܐ ܠܙܹܐܦܵܐ܀ 567 :ܫܪܵܪܵܐ ܗ̄ܘ̣ ܓܲܠܝܵܐ ܕܐܲܟܼܪܸܙ ܒܐܲܪܥܵܐ ܣܲܟܿܘܼܠܬܲܢܹ̈ܐ 568 ܘܣܲܟܼܠܹ̈ܐ ܚܲܫܒܿܘܼܗܝ ܐܲܝܟ ܛܵܥܝܘܼܬܼܵܐ ܕܗܲܪ̈ܛܝܼܩܹܐ. 569 :ܩܪܵܒܼܵܐ ܪܲܒܵܐ ܥܒ̣ܕܘ ܫܲܪ̈ܝܼܪܹܐ ܥܲܡ ܕܲܓܼܠܹ̈ܐ 570 ܘܗܵܢ̇ܵܘ ܬܲܗܪܵܐ ܕܟܲܢܝܼܘ ܐܸܢܘܿܢ ܒܫܸܡ ܕܲܓ̈ܠܹܐ܀ 571 :ܫܢܲܝ̈ܐ ܬܸܫܥܝܼ̈ܢ ܘܝܼܬܿܝܼܪ ܩܲܠܝܼܠ ܚܲܝܵܐ ܬܸܐܵܕܘܲܪܘܿܣ 572 ܘܠܵܐ ܫܠܝܼ ܘܲܫܬܸܩ ܡ̣ܢ ܬܲܟܼܬܘܼܫܵܐ ܕܥܲܡ ܛܵܥܲܝ̈ܵܐ. pb. f.66r 573 :ܙܲܝܢܵܐ ܕܪܘܝܼܢܵܐ ܠܒܝܼܫ ܗ̄ܘ̣ܵܐ ܟܸܐܢܵܐ ܒܼܟܼܠܗܘܿܢ ܚܲܝܵܘ̈ܗܝ 574 ܘܡܸܬܼܟܲܬܲܫ ܗ̄ܘ̣ܵܐ ܥܲܡ ܣܝܼ̈ܥܵܬܼܵܐ ܕܗܲܪ̈ܵܛܝܼܩܹܐ. 575 :ܒܣܲܝܦܵܐ ܕܪܘܼܚܵܐ ܚܪܸܒܼ ܗ̄ܘ̣ܵܐ ܠܗܘܿܢ ܠܲܒܼܢܲܝ̈ ܛܘܥܝܝ 576 ܘܲܡܦܲܪܣܹܐ ܗ̄ܘ̣ܵܐ ܙܢܲܝ̈ ܨܢܥ̈ܬܼܵܐ ܕܝܼܘܼܠܦܵܢܵܝܼ̈ܗܘܿܢ. 577 :ܐܘܼܡܵܢܵܐܝܼܬܼ ܡܸܬܼܟ̣ܿܬܲܫ ܗ̄ܘ̣ܵܐ ܥܲܡ ܗܹܪܹ̈ܣܝܼܣ 578 ܘܲܨܢܝܼܥܵܐܝܼܬܼ ܫܵܪܹܐ ܗ̄ܘ̣ܵܐ ܠܗܘܿܢ ܠܩܸܛܪܹ̈ܐ ܕܛܘܼܥܝܲܝ܀ 579 :ܐܲܬܠܝܼܛܵܐܝܼܬ ܐܲܚܝܼܕ ܗ̄ܘ̣ܵܐ ܠܹܗ ܠܕܼܵܕܵܐ ܕܥܲܡܗܘܿܢ 580 ܘܐܲܝܟ ܕܲܒܼܨܒܼܥܵܐ ܡܚܵܘܹܐ ܗ̄ܘ̣ܵܐ ܠܵܗ̇ ܠܚܲܝܵܒܘܼܬܼܗܘܿܢ. 581 :ܐܲܝܟ ܕܿܪܼܵܪܵܐ ܡܸܬܚܵܘܹܐ ܗ̄ܘ̣ܵܐ ܒܲܗܦܵܟܼܬܹ̈ܗ 582 ܘܚܵܒܲܛ ܗ̄ܘ̣ܵܐ ܠܹܗ ܠܙܹܐܦܵܐ ܒܲܐܪܥܵܐ ܠܥܹܝܢ ܚܲܙܵܝܹ̈ܐ܀ 583 :ܐܲܝܟ ܬܼܐܲܛܪܘܿܢ ܚܫܝܼܒܼܝܼܢ ܗ̄ܘ̣ܵܘ ܠܹܗ ܙܢܲܝ̈ ܬܲܟܼܬܘܼܫܵܐ 584 ܘܠܵܐ ܡܚܵܦܲܪ ܗ̄ܘ̣ܵܐ ܡ̣ܢ ܙܵܟܼܘܼܬܼܵܐ ܒܟܼܠܗܘܿܢ ܚܲܝܵܘ̈ܗܝ. 585 :ܡ̣ܢ ܛܲܠܝܘܼܬܹܗ ܫܲܪܝܼ ܒܗܸܪܓܵܐ ܕܐ̄ܬܠܹܝܛܘܼܬܼܵܐ 586 ܘܠܵܐ ܢܵܚ ܘܲܫܠܝܼ ܥܕܲܡܵܐ ܕܫܲܠܹܝܗ ܡܵܘܬܵܐ ܠܪܲܗܛܹܗ܀ 587 :ܐܲܝܟ ܚܲܕ ܝܘܡܵܐ ܚܲܫܒܹܗ ܠܪܲܗܛܵܐ ܕܲܫܢܲܝ̈ ܚܲܝܵܘ̈ܗܝ 588 ܘܠܵܐ ܦܪܫ̤ ܗ̄ܘ̣ܵܐ ܠܹܗ ܝܘܿܡ ܛܲܠܝܘܼܬܼܵܐ ܡ̣ܢ ܣܲܝܒܘܼܬܵܐ. 589 :ܩܸܐܪܣܵܐ ܫܚܝܼܩܵܐ ܫܠܸܡܘ ܝܘܿܡܵܬܹ̈ܗ ܕܦܵܠܚܵܐ ܚܝܼܨܵܐ 590 ܘܲܚܠܝܼܨܵܐܝܼܬ ܫܲܪܝܼ ܘܫܲܠܸܡ ܒܦܲܠܚܘܼܬ ܡܵܪܹܗ܀ 591 :ܚܘܼܒܵܐ ܕܡܵܪܹܗ ܥܨܵܝܗܝ ܠܲܬܪܝܼܨܵܐ ܠܡܸܬܼܟܿܬܲܫܘܼ 592 ܘܠܵܐ ܢܵܡ ܘܲܕܡܸܟ ܥܕܲܡܵܐ ܕܡܲܫܥܼ ܠܘܵܬܼ ܙܵܟܼܘܼܬܼܵܐ. 593 :ܠܗܝ̇ ܙܵܟܼܘܼܬܵܐ ܕܡܸܠܲܬܼ ܦܵܘܠܘܿܣ ܡܸܬܝܿܐܸܒܼ ܗ̄ܘ̣ܵܐ 594 ܕܪܵܗܸ̇ܛ ܐ̄ܢܵܐ ܠܲܡ ܠܘܼܩܒܼܵܠ ܢܝܼܫܵܐ ܕܙܵܟܼܘܼܬܼ ܪܵܘܡܵܐ܀ 595 :ܐܘܿ ܠܙܲܟܵܝܵܐ ܕܲܚܫ̣ܵܐ ܠܫܝܼܫܵܐ ܕܪ̈ܲܗܛܝܼ ܫܲܦܝܼܪ 596 ܘܠܵܐ ܥܵܘܸܟܬܹܗ ܡܚܸܝܼܠܘܼܬܼ ܦܲܓܼܪܵܐ ܘܚܲܫܝ̈ ܢܲܦܫܵܐ. 597 :ܐܘ ܟܲܫܝܼܪܵܐ ܟܡܵܐ ܐܸܬܼܪܼܫܲܪ ܠܩܸܢܝ̈ܢ ܚܲܝܹ̈ܐ 598 ܘܠܐ ܝܲܗܒܼ ܐܲܬܼܪܐ ܠܣܵܢܵܐ ܕܢܸܒܼܘܿܙ ܡ̣ܢ ܩܸܢܝܵܢܵܘ̈ܗܝ܀ 599 :ܐܘ ܚܲܟܝܼܡܵܐ ܟܡܵܐ ܐܸܬܼܚܲܟܼܡ ܠܡܸ̇ܚܙܵܐ ܕܟܲܣ̈ܝܵܢ 600 ܘܠܵܐ ܐܸܬܼܟܲܣܝܲܬ̤ ܚܕܵܐ ܕܲܣܬܝܼܪܵܐ ܡ̣ܢ ܪܸܥ̇ܝܵܢܹܗ. 601 :ܐܘ ܠܬܲܓܵܪܵܐ ܕܡܸܬܬܲܓܼܪ ܗ̄ܘ̣ܵܐ ܒܟܲܟܪܹܐ ܕܪܘܼܚܵܐ 602 ܕܥܵܦܘ ܝܘܼܬܼܪ̈ܵܢܵܘܗܝ ܟܠ ܟܵܪ ܪ̈ܲܡܛܬ̤ ܟܵܪܘܿܙܘܼܬܹܗ܀ 603 :ܟܲܟܪܹ̈ܐ ܕܪܘܼܚܵܐ ܫܩܲܠ ܡ̣ܢ ܡܵܪܹܗ ܥܲܒܼܕܵܐ ܛܵܒܼܵܐ 604 ܘܚܦܝܼܛܵܐܝܼܬ ܙܪܲܥ ܝܘܼܬܼܪܵܢܗܹܝܢ ܒܐܸܕܿܢܲܝ̈ ܟܠܢܵܫ. 605 :ܒܟܼܠ ܐܲܬܼܪ̈ܘ̈ܢ ܫܘܿܚܘ ܝܘܼܬܼܪ̈ܢܹܐ ܕܥܲܡܠܲܝ̈ ܢܲܦܫܹܗ 606 ܘܠܵܐ ܦܵܫ ܥܲܡܵܐ ܕܠܵܐ ܐܸܬܼܡܲܪܲ[ܟܼ] ܒܛܼ̇ܥܡܵܐ ܕܡܸܠܘ̈ܗܝ. 607 :ܒܲܕܡܘܼܬ ܢܘܼܗܪܵܐ ܕܢܲܚ̣ܘ ܣܘܼܟܠܵܘ̈ܗܝ ܒܹܝܬܼ ܐܲܪ̈ܥܵܢܹܐ 608 ܘܪܲܕܦܵܗ̇ ܠܛܘܼܥܝܲܝ ܕܡܣܲܬܪ̈ܐ ܗ̄ܘ̣ܵܬ ܒܪܥܝܵܢ ܐ̄ܢܫܐ. 609 :ܢܘܼܗܪܵܐ ܕܚܲܝܹܐ ܚܙܬ̤ ܐ̄ܢܵܫܘܼܬܼܵܐ ܒܝܲܕ ܦܸܬܼܓܵܡܵܘ̈ܗܝ 610 ܘܝܸܠܦܲܬ̤ ܕܲܬܼܚܘܿܪ ܒܝܲܕ ܓܲܠܝܬܼܵܐ ܠܲܕܠܵܐ ܓܲܠܝܵܢ܀ 611 :ܐܲܝܟ ܕܲܒܼܫܸܢܬܐ ܫܠܹܝܢ ܗ̄ܘ̣ܵܘ ܐ̄ܢܵܫ̈ܐ ܡ̣ܢ ܕܘܼܪܫܵܐ 612 ܥܕܲܡܵܐ ܕܲܕܢܲܚ ܨܲܦܪܵܐ ܕܡܸܠܵܘ̈ܗܝ ܘܐܲܥܝܼܪ ܐܸܢܘܿܢ. 613 :ܢܲܚܬܵܐ ܕܫܸܢܬܐ ܦܪܝܼܣ ܗ̄ܘ̣ܵܐ ܥܠܲܝܗܘܿܢ ܕܣܸܦܪ̈ܲܝ ܪܘܼܚܵܐ 614 ܘܐܲܪܝܼܡܹܗ ܗܘ̤ ܒܗܸܪܓܵܐ ܛܵܒܼܵܐ ܕܙܘܸܥܲܝ̈ ܢܲܦܫܗ܀ 615 :ܒܠܵܐ ܝܼܕܲܥܬܼܵܐ ܡܸܬܗܓܝܼܢ ܗ̄ܘ̣ܵܘ ܩܲܪ̈ܝܲܝ ܣܸܦܪܹ̈ܐ 616 ܥܕܲܡ̤ܵܐ ܕܲܩܪܵܘ ܒܲܟܼܬܼܝܼ̈ܒܼܵܬܹܗ ܘܟܸܢ ܐܸܬܚܲܟܲܡܘ. 617 :ܣܵܦܪܵܐ ܕܣܵܦܪܸ̈ܐ ܙܵܕܸܩ ܕܢܸܩܪܝܼܘܗܝ ܠܲܡܗ̤ܝܼܪ ܗܵܘܢܵܐ 618 ܘܐܸܠܘܼ ܠܐ ܗܘ̤ ܠܲܝܬܼ ܗ̄ܘ̣ܵܐ ܣܵܦܪܵܐ ܕܡܲܠܸܦ ܫܲܦܝܼܪ܀ 619 :ܡ̣ܢ ܒܹܝܬܼ ܓܲܙܵܐ ܕܲܟܼܬܝܼܒܼܵܬܹܗ ܥܬܲܪ ܟܠ ܕܲܥܬܲܪ 620 ܘܡ̣ܢ ܦܘܼܫܵܩܵܘ̈ܗܝ ܩܢܵܘ ܒܘܼܝܵܢܵܐ ܠܲܡܦܲܫܵܩܘ. 621 :ܡܸܢܹܗ ܝܸܠܦܸܬ ܐܵܦ ܐ̄ܢܵܐ ܕܝܸܠܦܸܬ ܠܲܡܠܓܼܠܵܓܘܼ 622 ܘܲܒܼܥܸܢܝܵܢܹܗ ܩܢܹܝܬܼ ܥܸܢܝܵܢܵܐ ܕܗܸܪܓܵܐ ܕܡܸ̈ܠܐ܀ pb. f.66v 623 :ܗܸܪܓܹܗ ܗܘ̤ܵܐ ܠܝܼ ܐܲܝܟ ܗܲܕܝܼܐܵܐ ܠܘܵܬܼ ܕܲܟܼܬܝܼ̈ܒܵܢ 624 ܘܗܘ̤ ܐܲܪܝܼܡܲܢܝ ܠܘܵܬܼ ܣܘܼܟܵܠ̇ܐ ܕܣܸܦܪܵܝ ܪܘܼܚܵܐ. 625 :ܚܠܵܦ ܝܘܼܬܪ̈ܵܢܵܘܗܝ ܡܸܬܟܲܬܲܫ ܐ̄ܢܵܐ ܥܲܡ ܣܵܩܘܿܪܵܘܗܝ 626 ܘܲܡܚܵܘܸܐ ܐ̄ܢܵܐ ܕܠܵܘ ܟܐܹܢܵܐܝܼܬܼ ܛܠܲܡܘ ܝܘܼܬܼܪ̈ܵܢܵܘܗܝ܀ 627 :ܛܠܘܼܡܝܵܐ ܪܲܒܵܐ ܛܲܠܡܘܼܗܝ ܐ̄ܢܵܫ̈ܐ ܠܒܝܼܫܲܝ̈ ܚܘܼܬܼܪܵܐ 628 ܘܛܸܢܸܬ ܣܲܓܼܝܼ ܕܐܸܬܒܲܥ ܡܸܢܗܘܿܢ ܥܝܲܪܬܵܐ ܕܨܲܥܪܹܗ. 629 :ܥܝܼܪܵܬܼܵܐ ܕܨܲܥܪܹܗ ܥܒܲܕܬܲܢܝ ܕܐܸܬܒܲܥ ܡܸܐܡܪܐ ܕܡܸܠܹ̈ܐ 630 ܘܡܸܛܠܵܬܹܗ ܪܕܝܹܬ ܒܲܫܒܝܼܠܵܐ ܕܲܗܦܵܟܼܵ̈ܬܐ܀ 631 :ܠܹܗ ܘܠܲܚܲܒܼܪ̈ܵܘܗܝ ܚܙܹܝ̇ܬ ܕܡܲܨܚܝܢ ܗܲܪ̈ܲܛܝܼܩܹܐ 632 :ܘܐܸܡܕܲܬܼ ܕܐܹܡܲܪ ܕܝܼܢܵܐ ܟܹܐܢܵܐ ܥܲܡ ܡܸܠܲܝ̈ܗܘܿܢ 633 :ܠܘܵܬܼ ܡܸܠܲܝ̈ܗܘܿܢ ܚܵܪܲܬܼ ܡܸܠܲܬܝ ܡ̣ܢ ܫܘܼܪܵܝܐ 634 ܘܬܘܼܒܼ ܨܐܕܿܝܼܗܘܿܢ ܡܬܲܚܸܡ ܐ̄ܢܵܐ ܠܹܗ ܠܫܲܪܒܵܐ ܕܡܸܠܲܬܝ܀ 635 :ܠܗܘܿܢ ܪܵܫܵܐܢܵܐ ܠܪ̈ܫܝܲܝ ܡܸ̈ܠܹܐ ܕܝܲܕܘܼܥܬ̈ܢܹܐ 636 ܕܟܲܕ ܗܸܕܝܘܿܛܝܼ̈ܢ ܓܪܹܝܢ ܘܲܡܨܲܝܚܝܼܢ ܠܣܲܟܼܘܼܠܵܬܵܢܹ̈ܐ. 637 :ܪܲܒ ܣܘܼܟܵܠܵܐ ܕܚܵܘܝܼܘ ܒܲܐܪܥܵܐ ܡܗܝܼܪ̈ܲܝ ܗܵܘܿܢܵܐ 638 ܘܠܵܐ ܐ̄ܢܵܫ ܝܵܕܲܥ ܠܡܸܣܬܲܟܵܠܘܼ ܒܣܘܼܟܵܠܲܝܗ̈ܘܿܢ܀ 639 :ܚܲܟܼܝܡܵܐܝܬ ܟܬܼܒܼܘ ܟܠ ܕܿܟܼܬܿܒܼܘ ܒܣܸܦܪܹ̈ܐ ܕܲܟܼܬܲܒܼܘ 640 ܘܠܲܝܬܿ ܚܲܟܼܝܡܵܐ ܕܲܢܣܝܼܡ ܡܘܼܡܵܐ ܒܦܵܘܼܫܵܩܲܝ̈ܗܘܿܢ. 641 :ܣܲܟܼܠܹ̈ܐ ܒܲܠܚܘܿܕܿ ܨܲܚܝܼܘ ܐܸܢܘܿܢ ܐܲܝܟ ܕܲܠܒܼܝܼ̈ܫܹܐ 642 ܒܗܝ̇ ܕܟܼܪܝܼܗܝܼܢ ܠܡܸܣܬܲܟܵܠܘܼ ܒܚܹܝܠ ܡܸܠܲܝ̈ܗܘܿܢ܀ 643 :ܒܟܸܐܒܹ̈ܐ ܩܫܲܝ̈ܵܐ ܕܠܵܐ ܝܼܕܲܥܬܼܵܐ ܟܪܝܼܗܝܼܢ ܥܲܛܠܹ̈ܐ 644 ܘܠܵܐ ܪܵܓܵܐ ܠܗܘܿܢ ܠܡܸܫܡܲܥ ܛܸܒܵܐ ܕܚܘܼܠܡܵܢ ܢܲܦܫܵܐ܀ 645 :ܒܢܦܫܵܐ ܟܪܝܼܗܝܼܢ ܟܪ̈ܝܼܗܲܝ ܢܲܦܫܵܐ ܕܠܑܵ ܒܘܼܝܵܢܹ̈ܐ 646 ܥܲܠ ܗ̇ܝ ܣܵܢܹܝܢ ܠܓܼܙܪ̈ܝ ܟܸܐܒܹ̈ܐ ܩܫܝ̈ܐ ܕܢܲܦܫܵܐ. 647 :ܡܸܕܲܥ ܝܵܕܥܝܼܢ ܕܠܵܐ ܡܸܬܐܲܣܝܵܐ ܚܸܪܚܵܘܼܬܼܗܘܿܢ 648 ܡܸܛܠ ܗܵܕܹܐ ܠܒܼܝܼܫܝܼܢ ܪܘܼܓܼܙܵܐ ܕܠܵܐ ܬܲܪܥܘܼܬܼܵܐ. 649 :ܪܘܓܼܙܵܐ ܩܲܫܝܵܐ ܩܢܵܘ ܗܸܕܝܘܿܛܹ̈ܐ ܠܘܵܬܼ ܝܵܕܘܿܥܹ̈ܐ 650 ܥܲܠ ܕܲܡܦܲܪܫܝܼܢ ܟܝܵܢܝܵܬܹ̈ܐ ܕܡܸܠܬܐ ܘܦܲܓܼܪܵܐ܀ 651 :ܦܲܓܼܪܵܐ ܕܡܸܢ̇ܢ ܫܩܲܠ ܒܵܪܘܿܝܵܐ ܡܸܠܬܹܗ ܕܐܲܒܼܵܐ 652 ܘܟܲܢܝܹܗ ܒܚܘܼܒܵܐ ܒܪܵܐ ܕܐܲܠܵܗܵܐ ܒܲܛܟܼܣܵܐ ܕܝܼܠܹܗ. 653 :ܕܝܼܠܹܗ ܝܲܗ̣ܒ ܠܹܗ ܟܲܕ ܗܘ̤ ܠܵܐ ܙܥܲܪ ܡ̣ܢ ܡܵܐ ܕܐܝܼܬܼܵܘܗܝ 654 ܕܠܲܝܬܼ ܠܲܟܼܝܵܢܹܗ ܕܠܑܵܐ ܢܸܬܼܒܲܝܨܲܪ ܘܠܑܵ ܢܸܬܼܝܲܬܿܪ܀ 655 :ܪܵܡ ܗܘ̣ ܟܝܵܢܹܗ ܡ̣ܢ ܢܸܟܼܝܵܢܹ̈ܐ ܘܡ̣ܢ ܫܘܼܚ̈ܠܵܦܹܐ 656 :ܘܠܵܐ ܩܲܪ̈ܒܵܢ ܠܹܗ ܟܝܵܢ̈ܝܵܬܐ ܕܲܟܼܝܵܢ ܐ̄ܢܵܫܵܐ 657 :ܠܲܟܼܝܵܢ ܐ̄ܢܵܫܵܐ ܩܪܸܒܼܘ ܡܲܟܼܵܬܼܵܐ ܕܿܟܹܝܵܢ ܐ̄ܢܵܫܵܐ 658 ܠܵܘ ܠܲܟܼܝܵܢܵܐ ܕܪܵܡ ܘܲܡܥܲܠܲܝ ܡ̣ܢ ܢܸܟܼܝܵܢܹ̈ܐ܀ 659 :ܕܐ̄ܢܵܫܵܐ ܐܸܢܹܝܢ ܟܠ ܕܲܟܼܬܼܝܼ̈ܒܵܢ ܥܲܠ ܒܲܪܢܵܫܵܐ 660 ܒܲܛܢܵܐ ܘܝܲܠܕܵܐ ܐܵܦ ܬܲܪܒܝܼܬܵܐ ܘܚܲܫܵܐ ܘܡܵܘܬܵܐ܀ 661 :ܠܗܵܢ ܦܘܼܪܫܵܢܵܐ ܕܡܸܠܬܼܵܐ ܘܦܲܓܼܪܵܐ ܓܠܵܘ ܫܲܪܝܼܪܹ̈ܐ 662 ܘܣܲܟܼ̈ܠܹܐ ܟܬܝܼܫܝܼܢ ܕܥܲܠ ܡ̇ܢ ܚܵܘܝܼܘ ܠܲܕܠܵܐ ܓܲܠܝܵܢ܀ 663 :ܗܵܕܹܐ ܗ̣ܝ ܥܸܠܬܐ ܕܥܸܒܕܲܬ̤ ܐܸܢܘܿܢ ܣܵܢܐܹ̈ܐ ܠܟܸܐܢܹ̈ܐ 664 :ܘܡܸܛܠܵܬܵܗ̇ ܣܩܝܼܪܝܼܢ ܘܲܣܢܹܝܢ ܒܹܝܬܼ ܐܲܪ̈ܥܵܢܹܐ 665 :ܘܗܵܐ ܙܵܕܸܩ ܗ̄ܘ̣ܵܐ ܕܡܛܠ ܗܵܕܹܐ ܪ̈ܚܝܼܡܹܐ ܢܸܗܘܘܿܢ 666 ܠܦܘܼܬܼ ܒܘܼܕܵܩܵܐ ܕܲܣܬܝܼܪ̈ܵܬܐ ܕܚܵܘܝܼܘ ܒܐܲܪܥܵܐ܀ 667 :ܠܫܘܼܒܼܚܵܐ ܫܵܘܹܐ ܐܲܝܢܵܐ ܕܓܵܠܹܐ ܠܲܕܠܵܐ ܓܲܠܝܵܢ 668 ܘܕܵܪܸܫ ܐܘܼܪܚܵܐ ܠܫܲܒܼܪܘܼܬ ܐ̄ܢܵܫܵܐ ܠܡ̣ܒܼܥܵܐ ܕܟܲܣ̈ܝܵܢ. 669 :ܠܫܲܒܼܪܘܼܬܼ ܐ̄ܢܵܫ̈ܐ ܚܸܟܼܡܲܬ ܡܸܠܬܼܵܐ ܕܲܒܼܝܵܕܘ̈ܥܹܐ 670 ܘܡ̣ܢ ܠܵܐ ܢܲܟܼܪܹܐ ܕܛܲܠܡܘܼܗܝ ܣܲܟܼ̈ܠܹܐ ܠܗܵܢ ܝܘܼܬܼܪܵܢܵܐ܀ 671 :ܬܪܹܝܢ ܝܘܼܬܼܪ̈ܵܢܹܐ ܥܦܝܼ̈ܦܹܐ ܝܥܵܘܝܼܘ ܪ̈ܚܡܲܝ ܩܘܼܫܬܐ 672 ܡܸܠܲܬܼ ܩܘܼܫܬܵܐ ܘܲܫܒܼܚܝܘܼܬܵܐ ܕܕܘܒܼܵܪ̈ܲܝܗܘܿܢ. 673 ܫܒܝܼܚ ܗ̄ܘ̣ܵܐ ܥܲܡܠܵܐ ܕܕܘܼܒܵܪ̈ܲܝܗܘܿܢ ܕܣܲܟܘܼܠܬܵܢܹ̈ܐ: pb. f.67r 674 ܘܠܵܐ ܐ̄ܢܵܫ ܝܵܕܲܥ ܕܢܸܬܼܢܸܐ ܫܲܦܝܼܪ ܙܢܲܝ̈ ܥܲܡܠܲܝ̈ܗܘܿܢ܀ 675 :ܒܥܲܡܠܹܐ ܠܐܝܼ ܕܝܘܿܕܘܿܪܘܿܣ ܓܲܢܒܲܪ ܚܲܝܠܵܐ 676 ܥܕܲܡܵܐ ܕܬܲܚܸܒܼܘ ܪܸ̈ܓܼܫܲܝ ܦܲܓܼܪܹܗ ܒܥܲܢܘܵܝܘܼܬܼܵܐ. 677 :ܕܬܹܐܕܘܿܪܘܿܣ ܪܲܒܵܐ ܗ̣ܝ ܣܲܓܝܼ ܡ̣ܢ ܬܲܫܥܝܼܬܼܵܐ 678 ܕܥܸܡܛܲܬ̤ ܥܲܝܢܹܗ ܒܗܸܪܓܵܐ ܕܣܸܦܪܹ̈ܐ ܘܠܵܐ ܦܵܫ ܘܐܲܗܡܝܼ܀ 679 :ܐܵܦ ܢܸܣܛܘܿܪܝܼܣ ܥܡܝܼܠ ܗ̄ܘ̣ܵܐ ܥܲܡܠܹܗ ܡ̣ܢ ܟܠ ܥܲܡܠܝܼ̈ܢ 680 ܒܲܕܠܵܐ ܝܲܗ̄ܒܠܹܗ ܐܲܬܼܪܵܐ ܠܚܲܨܪܹܗ ܠܡܸܪܕܵܐ ܒܬܵܘܫܵܐ. 681 :ܗܵܐ ܥܲܡܠܲܝ̈ܗܘܿܢ ܕܐ̄ܢܵܫ̈ܐ ܟܸܐܢܹ̈ܐ ܟܡܵܐ ܐܸܬܼܟܲܫܲܪܘ 682 ܘܗܵܐ ܒܝܼܫܘܼܬܵܐ ܕܛܵܠܘܿܡܲܝ̈ܗܘܿܢ ܟܡܵܐ ܐܸܬܥܲܠܝܲܬ̤܀ 683 :ܗܵܐ ܚܙ̣ܵܘ ܐ̄ܢܵܫ̈ܐ ܟܡܵܐ ܣܥ̣ܵܘ ܐ̄ܢܵܫ̈ܐ ܠܘܼܩܒܼܵܠ ܐ̄ܢܵܫ̈ܐ 684 ܗܸܕܝܘܿܛܘܼܬܼܵܐ ܥܲܠ ܡܲܒܘ̈ܥܹܐ ܡܠܹܝܢ ܚܸܟܼ̈ܡܵܬܐ. 685 :ܢܸܒܼ̈ܥܹܐ ܚܠܲܝ̈ܐ ܗܘ̤ܵܘ ܫܲܪܝܼܪܹ̈ܐ ܠܨܲܗܝܘܼܬ ܐ̄ܢܵܫ̈ܐ 686 ܘܟܠ ܡ̇ܢ ܕܐܸܫܬܼܝ ܡ̣ܢ ܢܸܒܼܥܲܝܗ̈ܘܿܢ ܛܥ̣ܵܐ ܥܵܩܵܬܹ̈ܗ. 687 :ܣܲܟܼܠܹ̈ܐ ܠܵܐ ܨܒܼܵܘ ܩܲܒܸܠܘ ܫܸܩܝܵܐ ܕܡܸܢܗܘܿܢ 688 ܘܗܵܐ ܡܸܫܬܿܢܩܝܼܢ ܒܲܟܼܬܝܼܫܘܼܬܼܵܐ ܕܪܸ̈ܥܝܵܢܲܝܗܘܿܢ. 689 :ܐܘ ܠܲܣ̈ܡܲܝܵܐ ܕܚܵܙܹܝܢ ܘܲܣܡܹܝܢ ܡ̣ܢ ܒܘܼܝܵܢܵܐ 690 ܘܗܲܢܝܼܐܵܐ ܠܗܘܿܢ ܣܲܡܝܘܼܬܼ ܢܲܦܫܵܐ ܕܲܟܼܪܝܼܗܝܼܢ ܒܵܗ̇܀ 691 :ܠܲܦܪ̈ܲܚܕܘܼܕܹܐ ܟܵܡܹܝܢ ܥܲܛܠܹܐ ܒܥܝܪ̈ܲܝܗܘܿܢ 692 ܕܪܵܚܡܝܼܢ ܚܸܫܟܵܐ ܕܠܲܝܠܵܘܵܬ̈ܐ ܛܵܒܼ ܡ̣ܢ ܢܘܼܗܪܵܐ. 693 :ܐܘܿ ܠܲܟܼܝܵܢܵܐ ܝܲܕܘܼܥܵܬܢܵܐ ܕܐܲܚܪܸܫ ܢܲܦܫܹܗ 694 ܘܫܲܠܸܡ ܠܪܲܗܛܵܐ ܕܦܵܪܘܿܫܘܼܬܼܵܐ ܕܣܝܼܡܵܐ ܗ̄ܘ̣ܵܬ ܒܹܗ܀ 695 :ܠܲܝܬ ܟܹܝܬܼ ܦܘܼܪܣܵܐ ܠܠܵܐ ܝܼܕܵܥܬܼܵܐ ܝܵܕܘܿܥܹܐ 696 ܐܵܦ ܠܵܐ ܦܣܵܩܵܐ ܕܲܓܼܙܲܪ ܕܝܼܢܹܗ ܕܡܸܠܬܹܗ ܕܡܵܪܲܢ. 697 :ܡܸܠܬܹܗ ܕܡܵܪܲܢ ܦܸܣܩܲܬ̤ ܐܸܢܘܿܢ ܡ̣ܢ ܓܵܘ ܥܕܹܬܵܐ 698 ܘܲܫܕܬ̤ ܐܸܢܘܿܢ ܠܹܐܟܣܘܿܪܝܵܐ ܕܥܲܡ ܒܲܪ̈ܵܝܹܐ܀ 699 :ܒܲܕܡܘܼܬܼ ܡܲܟܼ̈ܣܹܐ ܘܚܲܢ̈ܦܹܐ ܦܲܩܪܲܢ ܕܢܸܚܫܘܿܒܼ ܐܸܢܘܿܢ 700 ܘܠܵܐ ܢܸܬܼܚܲܠܛ ܒܲܫܟܼܝܼܪ̈ܵܬܼܵܐ ܕܪܸ̈ܥܝܵܢܲܝܗܘܿܢ. 701 :ܠܲܥܝܵܕܲܝܼ̈ܗܘܿܢ ܦܣܲܩ ܐܵܦ ܦܵܘܠܘܿܣ ܒܣܲܝܦܵܐ ܕܡܸܠܵܘ̈ܗܝ 702 ܘܐܲܫܠܸܡ ܐܸܢܘܿܢ ܕܢܸܗܘܘܿܢ ܚܲܒܼܪܹ̈ܐ ܠܐܵܟܸܠܩܲܪܨܵܐ܀ 703 :ܠܐܵܟܸܠܩܪܨܵܐ ܕܵܡܹܝܢ ܐ̄ܢܵܫ̈ܐ ܣܲܢܝܲܝ ܩܘܼܫܬܵܐ 704 ܕܐܵܟܼܠܝܼܢ ܩܲܪܨܵܐ ܕܪ̈ܚܡܲܝ ܩܘܼܫܬܵܐ ܐܲܝܟ ܣܵܛܵܢܵܐ. 705 :ܘܛܵܟ ܣܵܛܵܢܵܐ ܐܲܥܢܝܼ ܐܸܢܘܿܢ ܒܗܵܢ ܥܸܢܝܵܢܵܐ 706 ܕܢܸܗܘܘܼܢ ܓܵܡܪܝܼܢ ܪܸܓܲܬ ܝܲܨܪܹܗ ܒܨܲܥܪܵܐ ܕܟܸܐܢܹ̈ܐ܀ 707 :ܠܟܸܐܢܸ̈ܐ ܣܵܢܹܐ ܘܲܒܼܫܲܪܝܼܪܹ̈ܐ ܡܥܵܕ ܡܸܬܛܲܓܲܪ 708 ܘܠܵܐ ܪܵܓܵܐ ܠܹܗ ܕܢܸܚܙܹܐ ܟܹܐܢܵܐ ܘܠܵܐ ܟܠ ܟܠܹܐ. 709 :ܙܢܲܝ̈ ܟܹܐܢܘܼܬܼܵܐ ܚܙܵܐ ܐܵܦ ܗܵܫܵܐ ܒܐܵܢ̈ܫܐ ܟܸܐܢܹ̈ܐ 710 ܘܥܲܬܼܕܼ ܢܦܲܫܹܗ ܒܚܵܣܘܿܡܘܼܬܼܵܐ ܕܩܸܐܪܣܵܐ ܕܥܲܡܗܘܿܢ܀ 711 :ܩܸܐܪܣܵܐ ܗ̄ܘ̣ ܕܝܼܠܹܗ ܕܥܵܒܼܕܝܼܢ ܣܲܟܼܠܹܐ ܥܲܡ ܚܲܟܝܼ̈ܡܐ 712 ܘܓܸܐܪܹ̈ܐ ܕܪܘܼܓܼܙܹܗ ܡܫܕܐ ܒܦܘܼܡܗܘܿܢ ܒܣܸܕܪ̈ܲܝ ܩܘܼܫܬܐ. 713 :ܠܣܸܕܪ̈ܲܝ ܩܘܼܫܬܐ ܒܵܥܹܐ ܕܢܸܚܪܘܿܒܼ ܒܦܘܿܡ ܚܸܪ̈ܚܹܵܐ 714 ܘܠܵܐ ܝܵܗܸܒܼ ܠܹܗ ܚܲܝܠܹܗ ܕܩܘܼܫܬܵܐ ܕܢܸܓܼܡܘܿܪ ܝܲܨܪܹܗ܀ 715 :ܒܝܼܫܘܼܬ ܚܲܨܪܹܗ ܡܚܵܘܹܐ ܒܲܠܚܘܿܕ ܡܲܪܝܼܪ ܚܲܨܪܵܐ 716 ܘܠܵܐ ܡܸܬܼܥܲܠܝܵܐ ܪܸܓܲܬܼ ܢܲܦܫܹܗ ܠܘܵܬܼ ܫܘܼܠܵܡܵܐ. 717 :ܘܐܸܠܘܼ ܡܨܸܐ ܗ̄ܘ̣ܵܐ ܕܢܓܼܡܘܿܪ ܚܲܨܪܹܗ ܐܲܝܟ ܛܘܼܝܵܒܹܗ 718 ܠܲܝܬܼ ܗ̄ܘ̣ܵܐ ܒܐܲܪܥܵܐ ܫܸܡ ܟܹܐܢܘܼܬܼܵܐ ܘܠܵܐ ܟܠ ܟܠܹܗ܀ 719 :ܘܐܸܠܘܼ ܐܝܼܬ ܗ̄ܘ̣ܵܐ ܦܘܼܪܣܵܐ ܠܦܘܼܪ̈ܣܵܘܐ ܨܹܝܕ ܫܲܪܝܼܪܹ̈ܐ 720 ܕܒܹܝܬܼ ܕܝܘܕܘܿܪܘܿܣ ܠܚ̣ܵܐ ܗ̄ܘ̣ܵܐ ܫܡܸܗܘܿܢ ܡ̣ܢ ܒܹܝܬܼ ܚܲܝܹ̈ܐ. 721 :ܠܗܵܕܹܐ ܣܝܼܥܬܵܐ ܣܢܵܐ ܐܵܦ ܣܵܢܹܐ ܛܵܒܼ ܡ̣ܢ ܟܠ ܐ̄ܢܵܫ 722 ܕܝܵܕܼܥ ܕܡܨܝܢ ܠܡܸܫܪܵܐ ܩܸܛܪܵܐ ܕܲܢܟܝܼܠܘܼܬܹܗ: pb. f.67v 723 :ܟܠܗܘܿܢ ܢܸܟܼܠܵܘ̈ܗܝ ܕܢܟܲܘܼܠܬܵܢܵܐ ܚܲܟܝܼ̈ܡܹܐ 724 ܘܚܵܘܝܼܘܼܗܝ ܠܙܹܐܦܹܗ ܠܥܹܝܢ ܐܲܪ̈ܥܵܢܹܐ ܘܲܫܡܲܝܵܢܹ̈ܐ. 725 :ܒܗܲܪ̈ܵܛܝܼܩܹܐ ܡܛܲܫܝܼܢ ܗ̄ܘ̣ܵܘ ܠܹܗ ܙܢܲܝ̈ ܛܲܥܝܘܼܬܹܗ 726 ܦܲܪܣܝܼܘ ܐܸܢܘܿܢ ܥܪ̈ܝܼܡܲܝ ܢܲܦܫܵܐ ܠܥܹܝܢ ܟܠ ܒܸܪ̈ܝܵܢ ܀ 727 :ܦܲܥ̈ܠܹܐ ܫܲܦܠܹ̈ܐ ܓܒܼܵܐ ܠܹܗ ܫܲܦܠܵܐ ܠܘܼܩܒܲܠ ܟܸܐܢܸ̈ܐ 728 ܘܠܵܐ ܣܦܲܩ̣ܘ ܥܲܙܝܘܼ ܠܡܹܐܪܲܥ ܩܸܐܪܣܵܐ ܕܥܲܡ ܫܲܪܝܼܪܹ̈ܐ. 729 :ܐܲܝܟ ܕܲܒܼܣܲܝܦܵܐ ܚܲܪܒܘܼܗ̇ ܟܸܐܢܸ̈ܐ ܠܡܲܫܪܝܼܬ ܙܹܐܦܹܗ 730 ܘܦܵܫܘ ܕܲܠܝܼ̈ܠܹܐ ܕܢܸܗܘܘܿܢ ܣܵܗ̈ܕܹܐ ܕܚܲܝܵܒܼܘܼܬܹܗ ܀ 731 :ܠܚܲܝܵܒܼܘܼܬܹܗ ܚܙܵܐ ܚܲܝܵܒܼܵܐ ܡܠܸܐ ܚܵܘ̈ܒܵܬܼܵܐ 732 ܘܗܵܐ ܡܸܬܡܲܪܡܲܪ ܘܓܵܣ̇ܐ ܡܸܪܬܹܗ ܥܲܠ ܗܸܕܝ̈ܘܿܛܹܐ. 733 :ܥܝܲܪܬܵܐ ܕܫܦ̈ܥܐ ܒܵܥܹܐ ܕܢܸܬܒܲܥ ܡ̣ܢ ܙܲܟܵܝܹ̈ܐ 734 ܡ̣ܢ ܕܝܘܿܕܘܿܪܘܿܣ ܘܬܹܐܘܿܪܘܿܣ ܘܡܵܪܝ ܢܸܣܛܘܿܪܝܣ ܀ 735 :ܠܵܐ ܚܲܝܵܒܼܵܐ ܠܲܝܬ ܒܵܟ ܚܲܝܠܵܐ ܠܡܸܬܼܟܲܬܵܫܘܼ 736 ܕܗܵܐ ܒܢܸܣܝܵܢܵܐ ܝܠܦܬܝܗܝ ܠܙܲܝܢܵܐ ܕܦܵܠܚܹ̈ܐ ܚܝܼܨܹ̈ܐ. 737 :ܗܵܐ ܒܡܘܼܬܼ ܐܸܢܘܿܢ ܒܩܸܐܪܣܵܐ ܕܲܥܒܲܕ ܥܲܡ ܣܝܼ̈ܥܵܬܵܟ 738 ܕܲܗܪܲܩܝ ܘܛܲܫܲܝ̈ ܘܠܵܐ ܣܦ݂ܲܩ ܥܲܙܝܼ ܒܝܘܿܡ ܬܲܟܼܬܘܼܫܵܐ ܀ 739 :ܘܐܸܠܵܐ ܚܵܘܝܼ ܡ̇ܢ ܡ̣ܢ ܦܠܵܚܲܝ̈ܟ ܙܟܼܵܐ ܠܫܲܪܝܼܪܹ̈ܐ 740 ܘܐܸܡܲܬܝ ܘܐܲܝܟܵܐ ܘܲܒܼܝܘܡܲܝ̈ ܡ̇ܢ ܗܘ̤ܵܬ ܙܵܟܼܘܿܬܵܟ. 741 :ܐܲܝܟܵܘ ܣܝܼܡܘܿܢ ܒܘܼܟܼܪܵܐ ܕܒܲܟܲܪ ܒܲܫܟܼܝܼܪܵܬܵܟ 742 ܘܒܐܝܼܕܵܐ ܒܐܝܼܕܵܐ ܟܠ ܕܐܸܬܬܲܠܡܲܕ ܠܙܹܐܦܢܘܼܬܹܗ ܀ 743 :ܗܵܐ ܛܠܹܩܘ ܘܐܵܦܝܼܘ ܟܠܗܘܿܢ ܣܸܕܩܹ̈ܐ ܕܐܵܘܠܸܕ ܒܐܲܪܥܵܐ 744 ܘܠܵܐ ܦܵܫ̣ܘܡܸܢܗܘܿܢ ܐܸܠܵܐ ܣܪܝܼܕܵܐ ܠܚܸܣܕܵܐ ܕܝܼܠܵܟ. 745 :ܠܚܸܣܕܵܟ ܩܲܝܵܡ ܣܪܝܼܕܵܐ ܩܲܠܝܼܠ ܡ̣ܢ ܗܹܪ̈ܣܝܼܣ 746 ܟܲܕ ܟܡܝܼܢܝܼܢ ܒܸܕܡܘܼܬ ܕܐܒܹ̈ܐ ܠܘܲܥܕܵܐ ܕܥܵܢ̈ܐ ܀ 747 :ܠܘܲܥܕܵܐ ܕܥܵܢ̈ܐ ܟܢܝܼܫܝܼܢ ܟܠܫܵܥ ܗܲܪ̈ܛܝܼܩܸܐ 748 ܘܠܵܐ ܡܸܬܟܚܲܕܝܼܢ ܕܡܲܣܠܝܢ ܘܲܫܕܹܝܢ ܣܪ̈ܘܚܹܐ. 749 :ܡܸܠܲܬܼ ܟܸܐܢܹ̈ܐ ܕܚܸܩܲܬ̤ ܐܸܢܘܿܢ ܠܒܲܪ ܡ̣ܢ ܥܵܢ̈ܐ 750 ܘܝܲܬܝܼܪܵܐܝܼܬ ܛܢܵܢܵܐ ܟܹܐܢܵܐ ܕܒܹܝܬܼ ܕܝܘܿܕܘܿܪܣ ܀ 751 :ܕܒܹܝܬܼ ܕܝܘܿܕܘܿܪ̈ܘܣ ܡܟܸܟ ܪܵܘܡܵܐ ܕܟܠ ܗܹܪ̈ܣܝܼܣ 752 ܘܣܵܗܕܝܼܢ ܣܸܦܪܹ̈ܐ ܕܲܟܼܬܵܒܲܝܼ̈ܗܘܿܢ ܥܲܠ ܥܲܡܠܲܝ̈ܗܘܿܢ. 753 :ܒܲܟܼܬܵܒܿܝܼ̈ܗܘܿܢ ܪܫܝܼܡ ܥܘܼܗܕܵܢܵܐ ܕܢܸܨܚܢܲܝ̈ܗܘܿܢ 754 ܕܐܸܡܲܬܝ ܫܲܪܝܼܘ ܘܐܸܡܲܬܝ ܫܲܠܸܡܘ ܒܩܸܐܪܣܵܐ ܕܥܲܡܗܘܿܢ ܀ 755 ܒܝܘܡܲܝ̈ ܘܵܠܝܼܣ ܗ̄ܘ̤ܵܐ ܫܘܼܪܵܝܵܐ ܠܬܲܟܼܬܘܿܫܵܝ̈ܗܘܿܢ: ܒܝܵܘܡܲܝ̈ ܓܲܒܼܪܵܐ ܡܣܲܝܥ ܙܹܐܦܵܐ ܕܒܹܝܬܼ ܐܵܪܝܼܘܿܣ. 756 :ܗܘ̤ ܐܪܝܼܡܹܗ ܠܪܹܫܵܐ ܟܦܝܼܦܵܐ ܕܒܹܝܬ ܐܪܝܼܘܿܣ 757 ܘܲܪܕܲܦ ܐܸܢܘܿܢ ܠܟܵܗܢܹ̈ܐ ܟܸܐܢܹ̈ܐ ܠܒܲܪ ܡ̣ܢ ܥܵܢ̈ܐ ܀ 758 :ܒܗܵܢܵܐ ܙܲܒܼܢܵܐ ܘܲܩܫܹܐ ܙܲܒܼܢܹܗ ܗܘ̤ܵܘ ܫܲܪܝܼܪܹ̈ܐ 759 ܘܫܲܪܝܼܪܵܐܝܬܼ ܡܲܟܟܼܘܼܗܝ ܠܙܲܒܼܢܵܐ ܘܲܠܩܲܫܝܘܼܬܹܗ. 760 :ܡܵܪܹ̈ܐ ܙܲܒܼܢ̈ܐ ܫܲܕܲܪ ܐܸܢܘܿܢ ܠܘܼܩܒܼܵܠ ܙܒܼܢܹ̈ܐ 761 ܒܲܕܡܘܼܬ ܡܲܠܟܵܐ ܕܓܼܒܵܐ ܦܵܠܚܹ̈ܐ ܠܩܸܐܪ̈ܣܹܐ ܩܫܲܝܵܐ ܀ 762 :ܩܫܹܐ ܗ̄ܘ̣ܵܐ ܙܲܒܼܢܵܐ ܕܲܬܼܠܵܬܲܝ̈ܗܘܿܢ ܦܵܠܵܚܹ̈ܐ ܚܝܼܨܹ̈ܐ 763 ܘܫܘܼܪܵܝܵܐ ܗ̄ܘ̣ܵܐ ܕܲܟܼܬܝܼܫܘܼܬܼܵܐ ܕܗܲܪܵܛܝܼܩܹܐ. 764 :ܠܒܲܪ ܡ̣ܢ ܛܲܟܼܣܵܐ ܟܬܝܼܫ ܗ̄ܘ̣ܵܐ ܓܲܒܵܐ ܕܒܹܝܬܼ ܐܵܪܝܼܘܿܣ 765 ܘܲܡܣܲܝܲܥ ܗ̄ܘ̣ܵܐ ܠܲܟܼܬܝܼܫܘܼܬܗܘܿܢ ܡܲܠܟܵܐ ܟܬܝܼܫܵܐ ܀ 766 :ܡܲܠܟܵܐ ܘܥܲܡܵܐ ܙܩܝܼܦ ܗ̄ܘ̣ܵܐ ܐܲܟܚܕ ܠܘܼܩܒܼܵܠ ܟܸܐܢܹ̈ܐ 767 ܘܠܵܐ ܣܵܦܩܝܼܢ ܗ̄ܘ̣ܵܘ ܠܲܡܥܲܙܵܝܼܘ ܠܘܼܩܒܼܵܠ ܟܸܐܢܹ̈ܐ. 768 :ܐܘܿ ܠܙܵܟܘܼܬܼܵܐ ܕܚܵܘܝܼܘ ܒܐܲܪܥܵܐ ܐܲܪ̈ܥܵܢܵܝܹܐ 769 ܕܚܲܣܢܘܼܗܝ ܠܥܵܠܡܵܐ ܘܕܵܫܘܼܗ̇ ܒܐܲܪܥܵܐ ܠܡܵܝܘܿܬܼܘܼܬܼܵܐ ܀ 770 ܐܘ ܠܡܝܘ̈ܬܐ ܕܚܵܘܝܼܘ ܟܘܼܫܪܐ ܕܠܵܐ ܡܵܝܘܿܬܹ̈ܐ: pb. f.68r 771 ܘܲܫܒܲܩ̇ܘ ܒܐܲܪܥܵܐ ܫܸܡ ܙܵܟܼܘܼܬܼܗܘܿܢ ܠܕܪ̈ܐ ܕܐܬ̇ܝܢ. 772 :ܐܘ ܠܗܲܕ̈ܝܼܐܹܐ ܕܲܕܼܪܲܫ̣ܘ ܐܘܼܪܚܵܐ ܕܲܫܚܝܼܩ ܥܲܡܠܵܗ̇ 773 ܕܐܲܠܸܦܘ ܐ̄ܢܵܫ̈ܐ ܕܢܸܪܕܘܢ ܫܦܝܼܪ ܠܘܲܥܕܵܐ ܕܪܘܡܵܐ ܀ 774 :ܠܘܲܥܕܐ ܕܪܵܘܡܵܐ ܪܕܵܘ̣ ܚܲܟܿܝܼܡܹ̈ܐ ܡܚܲܟܿܡܲܝ̈ ܐ̄ܢܵܫ̈ܐ 775 ܘܗܵܢ̇ܘ ܬܲܗܪܵܐ ܕܟܲܕܼ ܒܐܲܪܥܵܐ ܗ̄ܘ̤ܵܘ ܣܥ݂ܲܪܘ ܕܲܫܡܲܝܵܐ. 776 :ܬܲܗܪܵܐ ܪܲܒܵܐ ܡܠܹܐ ܕܘܼܒܵܪܗܘܿܢ ܕܐܲܪܥܵܢܵܝܹܐ 777 ܘܐܲܪ̈ܥܵܢܵܝܹܐ ܠܵܐ ܚܵܪ̣ܘ ܫܲܦܝܼܪ ܒܕܼܘܼܒܵܪ̈ܲܝܗܘܿܢ ܀ 778 :ܒܕܘܼܒܵܪ̈ܲܝܗܘܿܢ ܥܨܵܐܘܢܝ ܕܐܸܬܼܢܸܐ ܬܲܟܼܬܘܼܫܲܝ̈ܗܘܿܢ 779 ܘܲܛܠܝܼܡܘܼܬܼܗܘܿܢ ܥܒܕܬܼܢܝ ܕܐܲܟܸܿܣ ܠܛܵܠܘܿܡ̈ܲܝܗܘܿܢ. 780 :ܛܵܠܘܿܡܲܝ̈ܗܘܿܢ ܢܸܬܠܘܢ ܕܝܢܐ ܕܲܛܠܝܡܼܘܼܬܼܗܘܿܢ 781 ܕܟܲܕܼ ܙܲܟܵܝܼܝܼ̈ܢ ܚܲܝ̇ܒܼܘ ܐܸܢܘܿܢ ܟܲܕܵܒܼܵܐܝܼܬܼ ܀ 782 :ܠܗܵܢܵܐ ܛܠܘܼܡܝܵܐ ܒܥ̇ܝܬܼ ܕܐܸܬܼܢܲܩܲܡ ܡ̣ܢ ܛܵܠܘܿܡܹ̈ܐ 783 ܘܲܥܨܵܢܝ ܪܸܥܝܵܢܝ ܕܐܵܘܠܸܕܼ ܡܸ̈ܠܹܐ ܕܡܲܟܿܣܵܢܘܼܬܼܵܐ. 784 :ܡܸ̈ܠܹܐ ܕܣܲܟܼ̈ܠܹܐ ܥܲܒܼܪܢܝ ܕܐܸܗܘܹܐ ܡܗܦܟ ܡܸܠܹ̈ܐ 785 ܘܟܲܕܼ ܠܵܐ ܪܥܐ ܐ̄ܢܵܐ ܬܢܹ̇ܝܬܼ ܬܲܫܥܝܼܬܼܵܐ ܕܕܘܼܒܵܪ ܟܹܐܢܹ̈ܐ ܀ 786 :ܥܹܢܝܵܢ ܟܹܐܢܹ̈ܐ ܢܸܪܚܲܡ ܟܠܢܫ ܕܟܹܐܝܢ ܥܸܢܝܵܢܹܗ 787 ܘܲܒܼܥܸܢܝܵܢܗܘܿܢ ܢܕܲܪܸܫ ܢܲܦܫܹܗ ܒܟܼܠܗܘܿܢ ܚܲܝ̈ܘܗܝ. 788 :ܚܲܝܹ̈ܐ ܕܠܵܐ ܚܒܸܿܠ ܡܲܩܢܹܐ ܗܪܸܓܿܐ ܕܥܲܡ ܫܲܪܝܼܪܹ̈ܐ 789 ܬܵܘ ܢܸܬܼܗܲܓܹܿܐ ܒܗܸܓܼܝܵܢ ܚܲܝܹ̈ܐ ܕܡ̣ܢ ܡܸܠܲܝ̈ܗܘܿܢ ܀ 790 :ܠܚܲܝܹ̈ܐ ܕܐ̄ܢܵܫ̈ܐ ܪܚܸܡܘ ܫܲܪ̈ܝܼܪܹܐ ܡ̣ܢ ܟܠܡܸܕܡ 791 ܘܡܸܛܠ ܐܢܵܫ̈ܐ ܩܲܒܸܿܠܘ ܒܸܙܚܵܐ ܡ̣ܢ ܡܲܪ̈̇ܚܹܐ. 792 :ܠܪܵܚܸ̇ܡ ܐ̄ܢܵܫܵܐ ܚܙ̣ܵܘ ܕܲܒܛܝܼܠ ܠܹܗ ܥܲܠ ܒܲܪܢܵܫܵܐ 793 ܘܲܬܼܪܲܨܘ ܢܝܼܫܵܐ ܠܲܡܕܲܡܵܝܘܼ ܠܢܝܼܫܵܐ ܕܪ̈ܵܚܡܵܘܗܝ ܀ 794 :ܠܢܝܼܫܵܐ ܕܪ̈ܵܚܡܵܘܗܝ ܚܙ̣ܵܘ ܐܲܬܼܠܹܝܛܹ̈ܐ ܕܙܲܕܝܼܩܘܼܬܼܵܐ 795 ܬܵܘ ܢܸܬܪܲܪܲܫ ܠܡܸܚܢܵܐ ܠܢܝܼܫܵܐ ܕܕܼܘܼܒܵܪ̈ܲܝܗܘܿܢ. 796 :ܕܘܼܒܵܪ̈ܲܝܗܘܿܢ ܢܣܝܼܡ ܐܲܝܟ ܨܲܠܡܵܐ ܩܕܼܵܡ ܪܸܥܝܵܢܲܢ 797 ܘܢܸܚܙܸܐ ܢܲܦ̣ܫܲܢ ܕܲܠܡܵܐ ܣܵܢܝܵܐ ܒܥܵܘܠܵܐ ܣܲܢܝܵܐ ܀ 798 :ܨܵܐܬܼܵܐ ܕܥܵܘܠܵܐ ܢܸܡܪܘܿܩ ܟܠܫܵܥ ܡ̣ܢ ܪܸܥܝܵܢܲܢ 799 ܕܠܵܐ ܢܸܬܼܦܲܪܣܐ ܒܗܵܘ̇ ܒܘܼܚܪܵܢܵܐ ܕܟܹܐܝܢ ܒܘܼܚܪܵܢܹܗ ܀