Exhortation of the Apostle Peter - ܡܡܠܠܐ ܕܛܘܒܢܐ ܦܬܪܘܣ ܫܠܝܚܐ ܕܥܠ ܡܪܬܝܢܘܬܐ
Preface
This text is a born-digital edition of the Exhortation of the Apostle Peter. This edition is based on the only known extant copy of this work, which is found in MS Sachau 165 (Berlin 201; fol. 9v-12v) in the Staatsbibliothek zu Berlin, which Sachau dated to the 14th century. 1 The manuscript has been digitized, and it can be viewed here. This text has never been edited in any prior edition.
There is a forthcoming English translation of this text, along with a detailed introduction in New Testament Apocrypha: More Noncanonical Scriptures, Vol. 2, ed. by Tony Burke and Brent Landau (Grand Rapids, MI: Eerdmans, forthcoming).
ܟܕ ܟܢܼܫܐ ܣܓܝܐܐ ܐܝܼܬ ܗܼܘܐ ܠܘܬ ܦܬܪܘܣ ܫܠܝܼܚܐ: ܘܨܿܒܝܢ ܗܼܘܘ ܠܡܼܫܡܥ ܡܢܗ ܡܠܼܬܐ ܕܝܘܠܦܢܐ. ܥܢܼܐ ܘܐܡܼܪ ܠܗܘܢ. ܓܒܪ̈ܐ ܐܚ̈ܝ܆ ܠܐ ܬܬܬܚܕܘܢ ܒܡܕܡ ܒܥܠܡܐ ܗܢܐ. ܐܠܐ ܢܬܒܛܠ ܠܟܘܢ ܥܠ ܚܝ̈ܝܟܘܢ ܕܡܐ. ܕܡܫܬܕܪ ܒܬܪܟܘܢ ܕܬܫܿܢܘܢ ܡܸܢ ܗܪܟܐ ܬܫܬܟܚܘܢ ܟܕ ܡܛܝܒܝܢ ܐܢܬܘܢ. ܘܚܼܙܘ ܕܠܝܬ ܡܕܡ ܕܡܝܼܿܬܪ ܡܢ ܫܡܐ ܛܒܐ. ܘܠܝܬ ܢܝܪܐ ܕܝܩܝܪ ܘܩܫܐ ܡܢ ܨܦܬܗ ܕܥܠܡܐ. ܘܥܠ ܗܠܝܢ ܐܢܿܐ ܐܚܘܟܘܢ ܕܕܐܝܟ ܐܝܿܟܢܐ ܐܢ̈ܝܢ: pb. f.10r
ܐܝܼܬ ܗܼܘܐ ܒܡܕܝܢܬܐ ܚܕܐ ܓܒܪܐ ܚܕ ܪܒܼܐ. ܘܥܲܬܝܪ ܗܼܘܐ ܣܓܝ. ܘܐܝܼܬ ܗܼܘܐ ܠܗ ܥܒܼ̈ܕܐ ܛܒ̈ܐ ܣܓ̈ܝܐܐ. ܐܣܟܼܠܘ ܕܝܢ ܬܪܝܢ ܡܢ ܒܢ̈ܝ ܒܝܬܗ. ܘܒܣܼܘ ܥܠ ܦܘܩܕܢܗ. ܘܪܓܼܙ ܥܠܝܗܘܢ ܡܪܗܘܢ. ܘܫܼܕܐ ܐܢܘܢ ܡܸܢ ܩܕܡ ܐܦ̈ܘܗܝ ܠܐܪܥܐ ܪܚܝܩܬܐ. ܚܕ ܕܝܢ ܡܢܗܘܢ ܡܸܢ ܥܒ̈ܕܐ ܕܐܫܬܕܝܘ ܡܢܗ܆ ܐܙܼܠ ܘܩܢܼܐ ܒܢ̈ܝܐ ܒܐܬܪܐ ܗܘܿ ܕܐܙܼܠ ܠܗ. ܘܢܼܨܒ ܟܪ̈ܡܐ ܘܦܪܕܝܣܐ ܘܐܬܩܼܢ ܠܗ ܒܝܬ ܢܚ̈ܬܘܡܐ. ܘܒܢܼܐ ܒܢܝ̈ܢܐ ܣܓܝ̈ܐܐ. ܗܘܿ ܕܝܢ ܥܒܕܐ ܐܚܪܢܐ. ܟܠܗܿ ܬܐܓܘܪܬܗ ܟܢܼܫܗܿ ܘܥܒܕܗܿ ܕܗܒܐ. ܘܝܗܒܗܿ ܠܐܘܡܢܐ ܕܥܿܒܕ ܕܗܒܐ. ܘܨܒܬܗ ܘܥܲܒܕܗ ܠܕܗܒܐ ܗܿܘ ܟܠܝܠܐ. ܘܐܡܼܪ ܠܗ ܠܐܘܡܢܐ ܗܘܿ. ܐܢܿܐ ܥܒܼܕܐ ܐܝܿܬܝ. ܘܐܝܼܬ ܠܝ ܡܪܐ ܘܒܪܗ. ܠܗܘܢ ܠܗܠܝܢ ܡܪ̈ܝ ܨܘܪ ܥܠ ܟܠܝܠܐ. ܘܗܘܼ ܥܒܼܕ ܗܟܢܐ ܘܐܡܼܪ ܠܗ ܠܥܒܼܕܐ ܗܘܿ ܗܐ ܟܠܝܠܐ ܥܗܝܼܕ ܣܝܡܝܗܝ ܒܪܝܫܟ. ܘܥܢܼܐ ܥܒܕܐ ܗܘܿ ܘܐܡܼܪ ܠܗ. ܣܼܒ ܐܓܪܐ ܕܟܠܝܠܟ. ܐܢܐ ܓܸܝܪ ܙܒܢܐ ܐܝܼܬ ܠܝ ܕܐܣܝܡܝܘܗܝ.
ܘܡܢ ܒܬܪ ܙܲܒܢܐ ܣܓܝܐܐ ܗܘܼܐ ܝܘܡܐ ܕܢܬܦܩܕܘܢ ܥܒܼ̈ܕܐ ܗܠܝܢ. ܘܫܲܕܪ ܡܪܗܘܢ ܒܬܪܗܘܢ ܥܒܼܕܐ ܩܲܫܝܐ ܘܕܠܐ ܪ̈ܚܡܼܐ. ܘܐܡܼܪ ܠܗ ܡܪܗ. ܥܕ ܫܲܒܥܐ ܝܘܡ̈ܝܢ ܐܢܐ ܡܲܝܬܝܬ ܠܗܘܢ ܩܝܢܕܘܢܣ ܪܒܐ ܣܒܼܠܬ. ܗܝܕܝܢ ܢܦܼܩ ܥܲܒܼܕܐ ܗܘܿ ܕܐܫܬܲܕܪ ܒܚܦܝܛܘܬܐ ܣܓܝܐܐ. ܘܐܙܼܠ ܠܐܬܪܐ ܗܘܿ ܘܡܲܢܥ ܠܘܬ ܗܿܢܘܢ ܥܒܼ̈ܕܐ. ܘܐܚܼܕ ܐܢܘܢ. ܘܐܡܼܪ ܠܗܘܢ. ܡܪܟܘܢ ܫܲܕܪܢܝ ܒܬܪܟܘܢ. ܐܚܼܕ ܕܝܢ ܩܕܡܐܝܬ ܠܗܘܿ ܕܒܢܼܐ ܒܢܝ̈ܢܐ ܘܢܼܨܒ ܟܪ̈ܡܐ ܘܩܢܼܐ ܩܢܝ̈ܢܐ. ܘܐܡܪ ܠܗ ܩܘܼܡ ܢܐܙܼܠܐ ܡܸܛܠ ܕܫܲܕܪܢܝ ܒܬܪܟܘܢ. ܗܘܼ ܕܝܢ ܥܢܼܐ ܘܐܡܼܪ ܠܗ ܟܕ ܟܪܝܐ ܠܗ. ܐܝܢ ܐܙܿܠ ܐܢܼܐ. ܠܚܪܬܐ ܕܝܢ ܐܡܿܪ ܠܗ. ܐܓܪ ܥܠܝ ܪܘܚܐ ܩܠܝܠ܆ ܥܕ ܐܙܿܒܢ. ܟܠܡܕܡ ܕܩܢܿܝܬ ܘܒܿܢܝܬ ܗܪܟܐ܆ ܘܢܐܙܠ ܥܡܝ ܠܘܬ pb. f.10v ܡܪܝ ܗܿܘ ܡܕܡ ܕܡܫܬܟܚ ܠܝ. ܘܐܡܼܪ ܠܗ ܥܒܼܕܐ ܗܘܿ ܕܐܫܬܕܪ ܒܬܪܗ. ܠܐ ܡܫܟܼܚ ܐܢܼܐ ܕܐܓܪ ܠܟ ܪܘܚܐ ܐܦܠܐ ܩܠܝܠ. ܡܛܠ ܕܫܒܥܐ ܐܢܘܢ ܝܘܡ̈ܐ ܒܠܚܘܕ. ܕܐܬܝܗܒܬ ܠܝ ܦܪܬܣܡܝܐ ܕܐܘܒܠܟܘܢ. ܘܐܢܗܘܼ ܕܡܓܪ ܐܢܐ ܠܟ ܩܝܢܕܘܢܣ ܪܒܐ ܣܿܒܠ ܐܢܼܐ. ܘܡܛܠ ܕܕܚܿܠ ܐܢܼܐ ܡܢ ܠܘܚܡܗ ܕܡܪܝ ܠܐ ܡܫܟܼܚ ܐܢܼܐ ܐܩܿܘܐ ܠܟ.
ܗܝܕܝܢ ܥܢܼܐ ܥܒܼܕܐ ܗܘܿ ܘܐܡܼܪ. ܘܿܝ ܠܝ ܕܠܐ ܐܫܬܟܚܬ ܟܕ ܡܛܝܒ ܐܢܼܐ ܠܗܕܐ ܐܘܪܚܐ. ܘܥܢܼܐ ܗܘܿ ܕܐܫܬܕܪ ܒܬܪܗ.+ ܠܐ ܡܫܼܟܚ ܐܢܼܐ ܕܐܓܪ ܠܟ ܪܘܚܐ ܐܦܠܐ ܩܠܝܠ. ܡܸܛܠ ܕܫܒܥܐ ܐܢܘܢ ܝܘܡ̈ܐ+ ܘܐܡܼܪ ܠܗ. ܐܘّ ܥܒܕܐ ܒܝܫܐ. ܠܐ ܝܕܿܥ ܗܘܝܬ ܕܡܪܐ ܐܝܬ ܠܟ܆ ܘܡܫܬܕܝܘ ܐܫܼܬܕܝܬ ܡܢܗ. ܘܐܡܼܬܝ ܕܗܘܼ ܡܬܕܟܪ ܠܟ. ܘܡܫܕܪ ܒܬܪܟ. ܡܛܠܡܢܐ ܢܼܨܒܬ ܠܟ ܟܪ̈ܡܐ ܘܒܢܝܬ ܒܢܝ̈ܢܐ. ܘܩܢܼܝܬ ܩܢܝ̈ܢܐ ܒܐܬܪܐ ܗܢܐ ܕܐܬܝܼܬ ܠܗ. ܘܗܫܐ ܐܫܬܟܚܬ ܟܕ ܠܐ ܡܛܝܒܬ. ܘܢܦܼܩܬ ܣܪܝܩܐܝܬ ܡܢ ܟܠܡܕܡ ܕܠܐܝܬ ܘܐܬܛܪܦܬ ܒܗ. ܗܝܕܝܢ ܒܟܼܐ ܥܒܼܕܐ ܗܘܿ ܘܐܡܼܪ ܘܝܿ ܠܝ ܘܝܿ ܠܝ ܡܼܢ ܓܕܫܢܝ. ܕܐܢܿܐ ܗܟܘܬ ܣܿܥܪ ܗܘܝܬ: ܕܟܿܠܗܘܢ ܝܘܡ̈ܬܝ ܒܐܬܪܐ ܗܢܐ ܕܐܫܿܬܕܝܬ ܠܗ ܗܿܘܐ ܗܿܘܝܬ. ܘܠܐ ܝܿܕܥ ܗܘܝܬ ܕܥܬܝܕ ܗܘ ܡܪܝ ܠܡܒܥܝܢܝ. ܡܛܠܗܢܐ ܩܢܿܝܬ ܗܢܐ ܟܠܿܗ ܩܢܝܢܐ. ܘܡܕܡ ܡܢܗ ܠܐ ܡܛܢܝ. ܘܡܪܝ ܬܒܿܥ ܒܐܝܲܕܝ ܦܘܠܚܢܝ. ܗܝܕܝܢ ܐܦܩܼܗ ܗܘܿ ܕܐܫܬܕܪ ܥܠܘܗܝ ܡܣܪܗܒܐܝܬ. ܟܕ ܡܕܡ ܥܡܗ ܠܐ ܫܩܼܠ ܠܘܬ ܡܪܗ.
ܗܘܿ ܕܝܢ ܥܒܼܕܐ ܐ̱ܚܪܢܐ ܟܕ ܫܡܼܥ ܕܐܫܬܕܪ ܒܬܪܗ܆ ܩܡܼ ܡܚܼܕܐ ܥܬܝܕܐܝܬ ܟܕ ܡܛܝܼܒ ܘܫܩܼܠ ܟܠܝܠܐ ܗܘܿ ܕܕܗܒܐ ܕܥܒܼܕ. ܘܩܕܡ ܐܸܙܲܠ ܠܗ ܠܐܘܪܚܐ ܗܝܿ ܕܐܙܿܠ ܒܗܿ ܗܘܿ ܕܐܫܬܕܪ ܒܬܪܗܘܢ. ܘܝܿܬܒ ܗܼܘܐ ܘܡܣܲܟܐ ܠܗ ܥܕ ܐܬܐ ܒܬܪܗ. ܘܟܕ ܐܬܼܐ ܠܘܬܗ ܥܢܼܐ ܘܐܡܼܪ ܠܗ. ܡܪܟ ܫܕܪܢܝ ܒܬܪܟ. ܗܘܼ ܕܝܢ ܐܡܼܪ ܠܗ. ܐܢܿܐ ܡܛܝܒ ܐܢܼܐ ܗܘܿ ܕܐܙܿܠ ܒܚܕܘܬܐ. ܠܝܬ ܠܝ ܓܝܪ ܗܪܟܐ ܡܕܡ ܕܡܿܥܘܟ ܠܝ. ܒܪܡ ܕܝܢ ܗܘܿ ܡܕܡ ܕܐܝܼܬ ܠܝ ܩܠܝܠ ܗܼܘ ܘܙܥܘܪ. pb. f.11r ܠܝܬ ܠܝ ܓܝܪ ܡܕܡ ܐܠܐ ܐܢ ܗܢܐ ܟܠܝܠܐ ܕܕܗܒܐ. ܗܘܼ ܓܝܪ ܥܿܬܕܬ ܠܝ. ܟܕ ܡܣܲܟܐ ܗܿܘܝܬ ܒܟܠܥܕܢ܆ ܘܡܼܨܿܠܐ ܐܢܼܐ ܕܢܗܘܼܐ ܠܝ ܚܘܼܣܝܐ܆ ܘܢܚܘܣ ܥܠܝ ܡܪܝ ܘܢܫܕܪ ܢܕܒܪܢܝ ܡܢ ܗܢܐ ܐܬܪܐ ܢܘܟܪܝܐ. ܕܕܠܡܐ ܢܚܣܡܘܢ ܒܝ ܐ̱ܢܫ̈ܝܢ ܡܢ ܒܢ̈ܝ ܐܬܪܐ ܗܢܼܐ. ܘܢܣܒܘܢܝܗܝ ܡܢܝ ܠܟܠܝܠܐ ܗܢܐ. ܗܐ ܗܟܝܠ ܐܬܘܒܠܼܬ݀ ܨܠܘܬܝ ܘܒܥܘܬܝ. ܩܘܼܡ ܗܟܝܠ ܢܐܙܼܠ ܕܠܐ ܬܘܗܝܐ.
ܗܝܿܕܝܢ ܐܬܼܘ ܥܒܼ̈ܕܐ ܗܿܢܘܢ ܬܪܝܗܘܢ. ܥܡ ܗܘܿ ܕܐܫܬܕܪ ܒܬܪܗܘܢ. ܘܟܕ ܚܼܙܐ ܐܢܘܢ ܡܪܗܘܢ܆ ܐܡܼܪ ܠܗܿܘ ܕܠܐ ܐܝܬܝ ܥܡܗ ܡܕܡ. ܐܝܟܘ ܟܠܗ ܦܘܼܠܚܢܟ: ܕܗܢܐ ܟܠܗ ܙܒܢܐ ܕܐܪܚܼܘܬ ܡܢܝ. ܥܢܼܐ ܥܒܼܕܐ ܗܿܘ ܘܐܡܼܪ ܠܗ ܠܡܪܗ. ܡܪܝ ܫܕܪܬ ܒܬܪܝ ܥܒܼܕܐ ܩܲܫܝܐ. ܘܒܿܥܝܬ ܡܢܗ ܕܢܿܓܪ ܠܝ ܪܘܚܐ. ܕܐܙܿܒܢ ܡܕܡ ܕܩܢܼܐ ܐܢܼܐ: ܘܐܣܿܒ ܒܐܝܲܕ̈ܝ ܘܐܬܿܐ ܠܘܬܟ. ܘܠܐ ܫܒܩܼܢܝ. ܗܝܕܝܢ ܥܢܼܐ ܡܪܗ ܘܐܡܼܪ ܐܘّ ܥܒܼܕܐ ܒܝܼܫܐ ܗܫܐ ܐܕܟܰܪܬ ܠܡܙܿܒܢܘ ܩܸܢܝܿܢܟ܆ ܡܢ ܒܬܪ ܕܫܕܪܬ ܒܬܪܟ܆ ܥܠ ܡܢܐ ܠܐ ܐܬܚܫܼܒܬ ܕܡܸܫܕܐ ܫܼܕܐ ܗܘܼܝܬ ܡܢܝ ܠܐܬܪܐ ܗܿܘ ܪܢܝܼܬ ܕܝܢ ܘܚܙܼܝܬ ܕܟܠܗ ܡܕܡ ܕܩܢܼܝܬ ܬܡܢ ܡܕܡ ܠܐ ܡܲܘܬܪ ܠܟ. ܗܝܿܕܝܢ ܐܬܚܲܡܬ ܥܠܘܗܝ ܡܪܗ. ܘܦܩܼܕ ܕܢܬܐܣܪ ܒܐܝܼ̈ܕܘܗܝ ܘܒܪ̈ܓܠܘ̄. ܘܢܫܬܕܪ ܠܐܬܪ̈ܘܬܐ ܕܚܫܘܟܐ.
ܘܩܪܝܗܝ ܡܪܗ ܠܗܘܿ ܥܒܼܕܐ ܐ̱ܚܪܢܐ. ܕܥܒܼܕ ܟܠܝܠܐ ܗܘܿ ܕܕܗܒܐ ܘܐܡܼܪ ܠܗ. ܐܝܟܘ ܦܘܼܠܚܢܟ ܕܗܢܐ ܟܠܗ ܙܒܢܐ. ܘܥܼܢܐ ܘܐܡܼܪ ܠܡܪܗ. ܐܢܿܐ ܡܪܝ ܒܟܠܥܕܢ܆ ܚܿܐܪ ܗܿܘܝܬ ܘܡܣܲܟܐ ܐܢܼܐ ܕܐܡܼܬܝ ܬܕܟܪܝܢܝ ܘܬܫܲܕܪ ܒܬܪܝ. ܘܥܠܗܕܐ ܟܿܢܫܬ ܟܠܗ ܥܒܿܕܝ܆ ܘܥܒܿܕܐ ܠܝ ܟܠܝܠܐ ܗܢܐ ܕܐܩܿܪܒ ܠܟ ܩܘܪܒܢܐ. ܘܥܢܼܐ ܡܪܗ ܘܐܡܼܪ ܠܗ. ܥܒܼܕܐ ܛܒܿܐ ܘܡܗܝܡܢܐ. ܝܿܕܥ ܐܢܬ ܗܘ ܕܚܐܪܘܬܐ ܪܚܼܡܬ ܡܸܢ ܟܠܝܠܐ ܗܘܿ ܕܥܒܿܕ ܠܟ. ܡܸܛܿܠ ܕܟܠܝܠܐ ܕܒ̈ܢܝ ܚܐܪ̈ܐ ܗܘ. ܘܠܐ ܐܡܼܪܚܬ ܕܬܣܝܡܗ ܒܪܝܫܟ: ܒܠܥܕ ܡܢ ܦܘܩܕܢܐ ܕܡܪܟ. ܡܛܠ ܗܟܝܠ ܕܚܹܐܪܘܬܐ ܪܓܬ܆ pb. f.11v ܗܘܿ ܡܕܡ ܕܪܓܼܬ ܢܗܘܼܐ ܠܟ. ܗܝܿܕܝܢ ܐܩܝܼܡܗ ܡܪܗ ܥܠ ܥܒܼ̈ܕܐ ܣܿܓܝ̈ܐܐ.
ܗܟܢܐ ܗܟܝܠ ܐܝܬܝܗܘܢ܆ ܐܦ ܗܠܝܢ ܕܡܫܲܡܗܝܢ ܥܒܼ̈ܕܐ ܕܚܬܢܐ ܫܡܝܢܐ. ܡܪܗ ܕܒܝܬܐ ܐܝܬ̄ܘ ܡܪܢ ܝܫܘܥ ܡܫܝܚܐ. ܡܪܐ ܕܟܠܗܝܢ ܒܪ̈ܝܬܐ: ܕܫܕܢ ܡܸܛܠ ܚ̈ܛܗܝܢ ܠܐܬܪܐ ܗܢܐ. ܘܐܝܟ ܕܒܐܟܣܘܪܝܐ ܥܿܡܪܝܢܢ ܒܗ. ܠܐ ܓܝܪ ܡܫܬܲܒܩܝܢܢ ܒܗ ܥܕܡܐ ܠܫܘܠܡܐ. ܐܬܿܐ ܓܝܪ ܩܸܨܐ ܕܟܠܒܪܢܫ ܡܢܢ܆ ܘܡܬܕܒܪܝܢܢ ܠܢ ܡܢܗ. ܡܫܬܕܪ ܓܝܪ ܡܠܐܟܐ ܩܫܝܐ ܘܕܠܐ ܪ̈ܚܼܡܐ ܕܐܝܬ̄ܘ ܡܲܘܬܐ. ܘܡܐ ܕܐܬܼܐ ܕܢܕܒܪܗܿ ܠܢܦܫܗ ܕܚܛܝܼܐ. ܗܘܿ ܕܟܲܢܫ ܠܗ ܥܘܬܪܐ ܕܚ̈ܛܗܐ ܣܿܓ̈ܝܼܐܐ. ܐܿܠܨ ܠܗܿ ܩܲܫܝܐܝܬ. ܘܢܿܦܠܐ ܥܠܘܗܝ ܘܪܗܒܬܐ. ܘܡܿܫܪܐ ܠܡܸܒܥܐ ܘܠܡܐܡܪ܆ ܐܓܪ ܥܠܝ ܡܪܝ ܩܠܝܠ ܙܒܢܐ. ܐܬܘܒ ܘܚܲܣܐ ܚ̈ܛܗܐ ܕܚܿܛܝܬ ܒܦܓܪܝ. ܡܲܘܬܐ ܕܝܢ ܠܐ ܡܬܛܦܝܣ ܠܗ. ܡܛܠ ܕܫܠܼܡ ܠܗ ܩܸܨܐ: ܘܠܐ ܡܨܐ ܕܢܫܒܼܩܗ. ܐܢ ܗܟܝܠ ܢܐܹܙܠ ܒܚ̈ܛܗܘܗܝ܆ ܟܕ ܥܒܼ̈ܕܐ ܕܙܕܝܩܘܬܐ ܠܝܬ ܥܡܗ܆ ܡܫܬܕܪ ܡܢ ܐܠܗܼܐ ܠܐܬܪܐ ܕܬܫܢܝܩܐ. ܢܦܫܐ ܕܝܢ ܐܝܿܕܐ ܕܐܝܼܬ ܠܗܿ ܥܒܿܕ̈ܐ ܛܒ̈ܐ܆ ܠܐ ܕܚܿܠܐ ܡܢ ܡܿܘܬܐ. ܐܠܐ ܒܚܕܘܬܐ ܐܙܿܠܐ ܥܡܗ. ܟܕ ܚܙܼܝܐ ܘܐܡܿܪܐ. ܕܠܝܬ ܡܕܡ ܕܡܥܲܘܟ ܠܝ ܒܥܠܡܐ ܗܢܐ. ܡܛܠ ܕܟܠܗ ܩܢܝܢܝ ܥܡܝ ܐܝܬ̄ܘ ܫܡܐ ܛܒܿܐ ܘܪܒܐ ܕܩܿܢܝܬ ܕܐܝܬܝܗܿ. ܒܬܘܠܘܬܐ ܘܥܒ̈ܕܐ ܕܙܕܝܩܘܬܐ ܕܠܒܝܼܫܐ ܐܢܼܐ. ܘܒܿܥܝܐ ܐܢܼܐ ܡܢ ܗܘܿ ܕܐܫܬܕܪ ܒܬܪܗܿ ܕܠܐ ܢܫܒܩܝܗܿ ܒܐܬܪܐ ܗܢܐ. ܕܠܡܐ ܢܩܘܡܘܢ. ܘܢܫܒܘܢܗܿ ܒܢ̈ܝ ܐܬܪܐ ܕܐܝܬܝܗܘܢ ܫ̈ܐܕܐ: ܘܢܫܩܠܘܢ ܡܢܗܿ ܟܠܝܠܐ ܡܥܠܝܐ ܕܒܬܘܠܘܬܗܿ. ܕܒܥܡܠܐ ܘܐܘܠܨܢܐ ܩܢܬܗ. ܘܡܐ ܕܢܦܩܼܬ܁ ܢܦܫܐ ܗܿܝ ܡܢ ܦܓܪܗܿ. ܡܬܕܒܪܐ ܘܐܙܿܠܐ ܠܘܬ ܚܬܢܐ ܒܬܫܒ̈ܚܬܐ ܥܕܡܐ ܕܡܛܝܐ ܠܐܬܪ̈ܘܬܐ ܕܒܸܝܬ ܐܒܐ: ܘܚܿܙܐ ܠܗܿ. ܘܚܿܕܐ ܒܗܿ. ܘܡܩܝܼܡ ܠܗܿ ܒܚ̈ܝܐ ܥܡ ܦܓܪܐ ܕܥܡܼܠܬ܁ ܒܗ. ܥܠ ܐܬܪ̈ܘܬܐ ܣܿܓܝ̈ܐܐ.܀
ܐܝܼܬ ܗܼܘܐ ܬܘܒ pb. f.12r ܝܚܝܕܝܐ ܚܕ ܒܡܕܒܪܐ ܒܪܝܐ. ܕܒܡܥܪܬܐ ܥܿܡܪ ܗܘܐ. ܘܒܟܠܗ ܦܘܠܚܢܐ ܕܝܚܝܕܝܘܬܐ ܚܠܝܨܐܝܬ ܡܬܕܒܪ ܗܼܘܐ. ܘܡܢ ܥܡܠܐ ܕܐܝ̈ܕܘ̱ ܡܣܬܲܝܒܪ ܗܼܘܐ ܒܠܚܡܐ. ܟܕ ܕܝܢ ܒܒܘܬܐ ܣܿܓܝ ܥܬܝܪ ܗܼܘܐ܆ ܘܒܢܨܚ̈ܢܐ ܐܬܝܬܪ ܗܼܘܐ: ܚܼܙܿ ܒܥܒ̈ܕܘܗܝ ܫܦܝܼܪ̈ܐ ܘܐܬܬܟܠ ܛܒܿ ܥܠ ܢܦܫܗ. ܘܒܢܣܸܝܢܐ ܕܝܢ ܐܝܟ ܕܠܐܝܘܒ ܡܢ ܐܠܗܐ ܫܸܐܠܗ ܗܘܐ.
ܘܫܪܝ ܗܼܘܐ ܡܢܲܣܐ ܠܗ. ܘܐܬܚܙܝ ܠܗ ܒܥܕܢ ܪܡܫܐ ܒܕܡܘܬ ܐܢܬܬܐ ܫܦܝܪܬܐ ܕܛܥܼܝܐ ܒܡܕܒܪܐ. ܐܝܿܕܐ ܕܐܫܟܼܚܬ܁ ܬܪܥܐ ܕܦܬܝܚ ܘܫܼܘܪܬ܁ ܥܠܼܬ܁ ܠܡܥܪܬܐ. ܘܥܠ ܪ̈ܓܠܘܗܝ ܕܝܚܝܕܝܐ ܢܦܼܠܬ܁. ܘܚܢܢܐ ܕܒܘܬܐ ܡܢܗ ܒܿܥܝܐ ܗܘܐ. ܐܝܟ ܗܿܘ ܠܡ ܕܪܡܫܐ ܐܕܪܟܗܿ܆ ܘܠܐ ܚܿܟܡܐ ܗܘܐ ܕܠܐܝܟܐ ܬܐܙܠ. ܗܼܘ ܕܝܢ ܚܿܢ ܘܐܬܪܚܡ ܥܠܝܗܿ. ܡܕܡ ܕܠܐ ܘܿܠܐ ܠܗ ܠܡܥܼܒܕ. ܘܩܒܠܗܿ ܒܡܥܪܬܗ. ܘܫܲܪܝ ܡܫܲܐܠ ܠܗܿ ܥܠ ܛܥܝܗܿ. ܗܝܼ ܕܝܢ ܟܕ ܡܬܢܿܝܐ ܠܗ ܦܗܝܗܿ܆ ܡ̈ܠܐ ܕܫܘܕܠܐ ܘܕܚܘܒܿܠ ܪܥܝܢܐ ܒܗ ܡܫܕܝܐ ܗܘܬ. ܘܡܬܚܬ܁ ܣܿܓܝ ܣܘܕܗܿ + ܠܘܬܗ ܚܠܝܐܝܬ. ܘܫܲܠܝܙܝܬ ܪܓܬܐ ܒܝܫܬܐ ܥܠܘܗܝ ܡܥܝܼܪܐ ܗܘܬ. ܘܡܡܠܠܐ ܣܓܝܐܐ ܠ̈ܚܕܕܐ ܡܲܫܡܥܝܢ ܗܘܘ. ܘܓܘܚܟܐ ܣܢܝܐ ܒܝܢܬܗܘܢ ܡܸܣܬܥܪ ܗܼܘܐ. ܘܐܛܥܝܬܗ ܒܣܘܓܐܐ ܕܡ̈ܠܝܗܿ. ܘܡܟܝܠ ܐܝܕܗ ܪܟܝܟܐܝܬ ܠܓܫܬܐ ܕܐܝܕܗ ܘܕܕܩܢܗ ܘܕܩܕܠܗ ܡܿܬܚܐ ܗܘܬ. ܘܣܟܐ ܠܚܪܬܐ ܫܒܼܬܗ ܠܝܚܝܕܝܐ ܡܠܝܐܝܬ.
ܗܘܼ ܓܝܪ ܟܕ ܒܣܘܓܐܐ ܕܚܘܫ̈ܒܐ ܡܢ ܠܓܘ ܡܬܗܦܟ ܗܼܘܐ ܘܡܬܪܥܐ ܗܼܘܐ ܐܝܟ ܗܘܿ ܕܗܐ ܒܐܝܼܕ̈ܘܗܝ ܐܚܝܕ ܠܗܿ ܠܨܒܘܬܐ: ܟܕ ܡܬܚܫܒ ܕܥܕܢܐ ܕܫܠܝܘܬܐ ܐܝܬ̄ܘ܆ ܘܕܠܐ ܥܡ ܩܼܢܛܐ ܡܫܼܟܚ ܣܿܥܪ ܪܓܬܗ: ܫܠ݂ܡ ܗܼܘܐ ܡܟܝܠ ܠܬܪܥܝܬܗ܆ ܘܠܥܒܿܕܐ ܕܠܚܫܐ ܒܝܼܫܐ ܗܿܘܐ ܗܘܼܐ. ܘܟܕ ܒܣܐ ܒܚ̈ܝܘܗܝ ܟܠ ܟܠܗ. ܡܟܝܠ ܕܢܫܬܘܬܦ ܥܡܗܿ. ܐܡܪܚ ܗܼܘܐ. ܗܝܼ ܕܝܢ ܡܢ ܫܠ ܒܩܠܐ ܪܡܐ ܩܥܬ. ܘܡܢ ܐܝܼܕ̈ܘܗܝ ܦܠܛܬ: ܘܐܝܟ ܬܢܢܐ ܦܪܚܬ܇ ܓܘܚܟܐ ܪܒܐ pb. f.12v ܕܕܝ̈ܘܐ ܣܿܓܝ̈ܐܐ ܡܢ ܐܐܪ ܡܫܬܡܥ ܗܼܘܐ. ܕܡܒܓܢܝܢ ܘܡܟܲܣܢ ܗܼܘܘ ܘܡܚܣܕܝܢ ܠܗ ܥܠ ܕܛܥܼܐ. ܘܒܩܠܐ ܪܡܐ ܫܿܥܝܢ ܗܘܘ ܠܗ. ܥܠ ܠܡ ܕܢܬܬܪܝܡ ܢܬܡܟܟ. ܘܐܢܬ ܕܐܬܬܪܝܡܬ ܥܕܡܐ ܠܬܗܘܡܐ. ܩܲܘܝ ܕܝܢ ܥܕܡܐ ܠܫܦܪܐ. ܒܓܘܢܚܐ ܪܒܐ ܘܒܐܒܠܐ ܡܪܝܪܐ. ܘܡܢ ܒܬܪ ܕܢܗܓܬ. ܩܼܡ ܟܕ ܛܥܝܢ ܝܘܩܪܐ ܕܠܠܝܐ. ܒܐܒܠܐ ܕܠܐ ܡܬܒܿܝܐ. ܘܣܿܟܝ ܟܠܗ ܝܘܡܐ ܒܒܟܝܐ ܚܢܝܓܐ ܘܐܠܝܐ ܬܟܝܼܒܐ.
ܟܕ ܐܚܝܕܝܢ ܠܗ ܨܘܪ̈ܢܐ. ܘܦܿܣܩ ܗܘܐ ܣܒܪܗ. ܡܕܡ ܕܠܐ ܙܿܕܩ ܗܘܐ ܠܡܥܒܕ. ܘܠܥܠܡܐ ܬܘܒ ܗܼܦܝܟ. ܗܕܐ ܗܿܝ ܓܝܪ ܨܢܥܬܗ ܕܢܟܝܼܠܐ܁ ܕܐܡܼܬܝ ܕܡܬܟܬܫ ܘܙܿܟܐ ܠܒܥܠܕܪܗ. ܗܝܕܝܢ ܠܫܿܢܝܘܬܐ ܢܓܿܕ ܠܗ. ܘܚܲܝܠܗܿ. ܕܢܦܫܗ ܦܿܣܩ ܕܡܟܝܠ ܠܐ ܢܫܟܼܚܝܘ ܢܬܚܝܠ ܘܢܩܘܡ. ܘܡܛܠ ܗܢܐ ܐܘّ ܒܢ̈ܝ. ܠܐ ܦܿܩܚ ܠܟܘܢ ܡܥܡܪܐ ܕܩܲܪܝܒ ܠܝܬܒܐ. ܘܠܐ ܚܙܬܐ ܕܢܫ̈ܐ ܘܠܐ ܣܘܕܐ ܕܥܡܗܝܢ. ܥܘܗܕܢܗܝܢ. ܓܝܪ ܠܐ ܡܬܛܥܐ. ܐܝܢܐ ܕܡܢ ܚܙܬܐ ܘܡܡܠܠܐ ܒܪܥܝܢܢ ܒܥܝܢܢ. 2 ܘܠܐ ܬܘܒ ܥܿܗܢ ܠܢ ܕܢܦܣܘܩ ܣܒܪܢ ܘܒܠܐ ܗܝܡܢܘܬܐ ܢܬܚܬܐ ܢܦܫܢ. ܗܐ ܣܿܓ̈ܝܐܐ ܕܐܗܡܝܘ ܒܦܘܪܩܢܗܘܢ ܘܒܣܝܢܐ ܕܚܛܝܼܬܐ ܐܬܛܒܥܘ. ܘܒܝܕ ܬܝܒܘܬܗܘܢ ܠܡܪܚܡܢܘܬܐ ܕܐܠܗܐ ܐܫܬܘܝܘ.
Footnotes
1 Eduard Sachau, Verzeichniss der syrischen Handschriften der Königlichen Bibliothek zu Berlin (Berlin, Asher & Co., 1899), 667.
2 It appears as though the scribe crossed out a letter on the beginning of this word.
Corpus Text ID:
NHSL Work ID(s):
http://syriaca.org/work/8853Source:
Berlin Staatsbibliothek zu Berlin 201 Sachau 165 http://syriaca.org/manuscript/2297Preparation of Electronic Edition:
TEI XML encoding by James E. Walters.Syriac text transcribed by James E. Walters.
Open Access and Copyright:
Note:
“Exhortation of the Apostle Peter - ܡܡܠܠܐ ܕܛܘܒܢܐ ܦܬܪܘܣ ܫܠܝܚܐ ܕܥܠ ܡܪܬܝܢܘܬܐ” edited by James E. Walters, Digital Syriac Corpus, last modified April 25, 2018, https://syriaccorpus.org/372.Show Citation Styles