On the Iniquity of the World - ܥܲܠ ܒܝܼܫܘܼܬܼ ܙܲܒܼܢܵܐ ܘܠܵܚܹܡ ܠܒܼܵܥܘܼܬܼܵܐ

1 :ܒܝܼܫܘܼܬܼ ܢܸܓܼ̈ܕܹܿܐ ܕܒܸܠܥܲܬ̤ ܐܲܪܥܲܢ ܡܸܫܬܲܥܹܐ ܐ̄ܢܵܐ 2 ܬܵܘ ܐܲܪ̈ܥܵܢܹܐ ܫܡܲܥܘ ܘܐܸܬܿܬܲܢܲܚܘ ܕܲܟܼܡܵܐ ܒܠܲܥܢܲܢ ܀ 3 :ܒܠܲܥ̣ܢܲܢ ܣܲܓܿܝ̣ ܠܦܘܼܬܼ ܒܝܼܫܘܼܬܲܢ ܕܥܸܫܢܲܬ̤ ܣܲܓܿܝܼ 4 ܘܛܵܟ ܠܲܝܬܿ ܕܵܪܵܐ ܕܲܣܓܼܝܼܘ ܢܸܓܼܕܵܘ̈ܗܝ ܐܲܝܟ ܕܲܒܼܕܼܵܪ̈ܢ ܀ 5 :ܒܕܼܵܪܢ ܫܸܠܡܲܬ̤ ܗܵܝ̇ ܕܲܟܼܬܼܝܼܒܼܵܐ ܥܲܠ ܥܸܒܼܪ̈ܵܝܹܐ 6 ܕܲܡܚܹ̇ܝܬܼ ܐܸܢܘܿܢ ܘܠܵܐ ܨܒܼܵܘ̣ ܩܲܒܸܿܠܘ ܙܢܲܝ̈ ܡܲܪܕܿܘܼܬܼܵܐ ܀ 7 :ܚܲܛܿܝܼܡܵܐܝܼܬܼ ܪܕܼܵܢ ܒܵܪܘܿܝܵܐ ܒܟܼܠܡܵܐ ܕܲܪܕܼܵܢ 8 ܘܲܕܼܠܵܐ ܒܘܼܝܵܢ ܚܲܪ̣ܵ ܪܸܥܝܵܢܲܢ ܒܩܲܫܝܼܘܼܬܼ ܢܸܓܼܕܲܘ̈ܗܝ ܀ 9 :ܗܘ̤ ܡ̣ܢ ܚܘܼܒܵܐ ܪܕܼܵܢ ܐܲܝܟ ܐܲܒܼܵܐ ܕܪܵܕܹܐ ܠܲܒܼܢܵܘ̈ܗܝ 10 ܘܒܼܝܼܫܘܼܬܼ ܝܲܨܪܵܢ ܠܵܐ ܒܸܣܡܲܬ̤ ܠܵܗ̇ ܡܲܪܕܿܘܼܬܼ ܚܘܼܒܹܿܗ ܀ 11 :ܒܲܥܪܝܼܪܵܐܝܼܬܼ ܪܕܼܵܐ ܗ̄ܘ̣ܵܐ ܟܝܵܢܲܢ ܒܲܫܟܼܝܼܪ̈ܵܬܼܵܐ 12 ܘܠܵܐ ܨܒܼ݂ܵܐ ܩܲܒܸܿܠ ܢܝܼܪܵܐ ܢܝܼܚܵܐ ܕܦܘܼܠܚܵܢ ܡ̇ܪܹܗ ܀ 13 ܐܲܝܟ ܕܲܒܼܢܝܼܪܵܐ ܟܲܕܼ ܢܵܗ̇ ܠܢܲܦܫܲܢ ܒܵܪܹܐ ܢܲܦܫܹܗ: ܘܢܸܘܪܲܬ̤ ܒܸܥܛܲܬ̤ ܘܬܲܒܪܵܬ̤ ܢܝܼܪܵܐ ܕܦܘܼܩܕܵܢ ܡܸܠܵܘ̈ܗܝ ܀ 14 :ܚܲܝܘ̄ܬܼܵܢܵܐܝܼܬܼ ܪܕܲܬ̤ ܚܲܝܘܼܬܼܵܐ ܕܦܵܪܘܿܫܘܼܬܲܢ 15 ܘܛܼܵܒܼ ܡ̣ܢ ܚܲܝܘ̄ܬܼܵܐ ܢܸܟܼܬܲܬ̤ ܡܸܠܹ̈ܐ ܕܲܡܚܲܟܿܡܵܢܹ̈ܝܗ̇ ܀ 16 :ܒܲܕܼܡܘܼܬܼ ܟܲܠ̈ܒܹܿܐ ܢܒܲܚ̣ܘ ܚܘܼܫܵܒܲܝ̈ܢ ܒܪ̈ܵܥܵܘܵܬܲܢ 17 ܘܠܵܐ ܦܪ݂ܲܫ ܗܵܘܢܲܢ ܡ̇ܪܹܐ ܒܲܝܬܵܐ ܡ̣ܢ ܢܘܼܟܼܪܵܝܐ ܀ 18 :ܟܲܠܒܵܐ ܦܵܪܹ̇ܫ ܚܙܵܬܼܵܐ ܕܡ̇ܪܹܗ ܘܲܡܚܲܪܟܸܿܫ ܠܹܗ 19 ܘܠܸܒܲܢ ܠܵܐ ܦܪ݂ܲܫ ܐܵܦܠܵܐ ܦܵܪܹܫ ܐܲܝܠܹܝܢ ܕܟܹܐ̈ܢܵܢ ܀ 20 :ܘܲܕܸܠܵܐ ܦܪܲܫܢ̣ܲܢ ܐܲܝܟ ܦܵܪ̈ܘܿܫܹܐ ܘܩܲܢܝܲܝ̈ ܡܸܠܬܼܵܐ 21 ܐܲܪܝܼܡ ܐܝܼܕܹܗ ܝܵܗܹ̇ܒܼ ܡܸܠܬܼܵܐ ܘܲܡ̣ܚܵܢ ܪܲܒܿܬܼ ܀ 22 :ܪܲܒܲܬܼ ܢܲܓܼܕܲܢ ܗܵܘ̇ ܦܘܼܩܕܵܢܵܐ ܕܟܹܐܝܢ ܦܘܼܩܕܵܢܹܗ 23 ܘܚܲܬܝܼܬܼܵܐܝܼܬܼ ܦܲܪܣܝܼ ܐܸܢܹܝܢ ܠܲܫܟܼܝܼܪ̈ܵܬܲܢ ܀ pb. 101 24 :ܒܢܸܓܼܕܲܝ̈ܢ ܨܵܪܵܗ̇ ܠܒܼܝܫܘܼܬܼ ܝܲܨܪܵܐ ܕܲܒܼܓܼܵܘ ܢܲܦܫܲܢ 25 ܘܲܓܼܠܵܗ̇ ܘܚܵܘܝܵܗ̇ ܠܥܹܝܢ ܐܲܪ̈ܥܵܢܹܐ ܘܲܫܡܲܝܵܢܹ̈ܐ ܀ 26 :ܫܡܲܝܵܐ ܘܐܲܪܥܵܐ ܗܘ̤ܵܘ ܚܲܙܝܹ̈ܐ ܠܲܒܼܟܼܝܼܪ̈ܵܬܲܢ 27 ܘܲܒܼܡܲܪܕܿܘܼܬܲܢ ܝܲܠܝ̣ܦܘܼܗܝ ܠܥܵܘ̣ܠܲܢ ܕܲܡܣܲܬܲܪ ܗ̄ܘ̣ܵܐ ܀ 28 :ܒܩܲܫܝܘܼܬܼ ܢܸܓܼܕܲܝ̈ܢ ܚܵܪ̣ܘ ܓܲܠܝܵܐܝܼܬܼ ܡܠܝܼ̈ܠܹܐ ܘܚܲܪ̈ܫܹܐ 29 ܘܐܲܝܟ ܕܲܒܼܟܲܦܹ̈ܐ ܬܲܩ݂ܠܘܼܗܝ ܠܥܵܘ̣ܠܲܢ ܕܲܟܼܡܵܐ ܥܵܘܵܠ ܀ 30 :ܐܲܝܟ ܡܲܚܙܝܼܬܼܵܐ ܗܘ̤ܵܬܼ ܡܲܪܕܿܘܼܬܼܵܐ ܕܲܒܼܝܵܘ̈ܡ̇ܬܲܢ 31 ܘܢܸܬܼܥܲܬ̤ ܒܝܼܫܬܵܐ ܕܲܫܟܼܝܼܪ̈ܵܬܲܢ ܛܵܒܼ ܡ̣ܢ ܢܸܓܼܕܲܝ̈ܢ ܀ 32 :ܥܫܸ̣ܢ ܒܝܼ̈ܫܵܬܲܢ ܡ̣ܢ ܡܲܚ̈ܘܵܬܲܢ ܕܠܵܐ ܡܸܢܝܵܢܵܐ 33 ܘܠܵܐ ܪܢܵܐ ܠܸܒܲܢ ܝܲܩܝܼܪ ܠܸܒܵܐ ܒܝܘܼܩܪܵܐ ܕܥܵܘ̣ܠܹܗ ܀ 34 :ܘܲܕܼܠܵܐ ܪܢܲܝܢܲܢ ܐܲܝܟ ܕܲܦܠܸܐ ܗ̄ܘ̣ܵܐ ܠܝܲܕܲܘܼܥܬܼܵܢܹ̈ܐ 35 ܙܲܩܬܿܘܼܢ ܢܸܓܼ̈ܕܹܿܐ ܐܲܝܟ ܕܲܠܚܲܝܘ̄ܬܼܵܐ ܕܠܵܐ ܒܘܼܝܵܢܵܐ ܀ 36 :ܐܲܝܟ ܕܲܠܚܲܝܘ̄ܬܼܵܐ ܙܲܩܬ݂ܲܢ ܪܸܡܙܵܐ ܐܲܠܵܗܵܝܵܐ 37 ܘܫܸܠܡܲܬ̤ ܨܹܐܕܲܝܢ ܗܵܝ̇ ܕܐܸܬܼܡܲܠܠܲܬ̤ ܡ̣ܢ ܚܲܟܿܝܼܡܵܐ ܀ 38 :ܒܫܲܒܼܛܵܐ ܘܙܸܩܬܵܐ ܪܕܼܵܐ ܚܲܟܿܝܼܡܵܐ ܠܚܘܼܬܼܪܵܐ ܣܲܟܼܠܵܐ 39 ܘܚܲܕܼ ܠܘܼܚܵܡܵܐ ܓܼܘܲܪ ܥܲܠ ܚܲܪ݁ܫܹܐ ܘܥܲܠ ܡܲܠܵܠܹ̈ܐ ܀ 40 :ܐܲܝܟ ܕܲܠܚܲܝܘ̄ܬܼܵܐ ܙܲܩ̣ܬܿܘܼܗ̇ ܠܢܲܦܫܲܢ ܙܢܲܝ̈ ܡܲܚ̈ܘܵܬܵܐ 41 ܘܠܵܐ ܐܸܬܼܟܲܒܼܫܲܬ̤ ܡ̣ܢ ܒܝܼܫܘܼܬܼܵܐ ܕܲܫܟܼܝܼܪ̈ܵܬܵܗ̇ ܀ 42 :ܟܲܦ݂ܲܢ ܟܲܦܢܵܐ ܘܠܵܐ ܐܸܬܼܪܲܟܼܢܲܬ̤ ܪܵܡܘܼܬܼ ܪܘܼܚܲܢ 43 ܡ̣ܚܵܢ ܟܘܼܪܗܵܢܵܐ ܘܠܵܐ ܐܸܬܼܡܲܚܠܲܬ̤ ܬܲܙܝܼܙܘܼܬܿܢ ܀ 44 :ܒܲܠܥ݂ܲܢ ܡ̇ܘܬܵܐ ܘܐܲܥܸܠ ܚܲܝ̣ܒܼܫܲܢ ܒܗܵܘܬܼܵܐ ܕܲܫܝܘܿܠ 45 ܘܠܵܐ ܙܵܥ ܠܸܒܲܢ ܡ̣ܢ ܣܘܼܪܵܕܼܵܐ ܡܠܹܐ ܣܘܼܪ̈ܕܹܐ ܀ 46 :ܢܦܲܠ̣ ܐܲܝܟ ܕܲܟܼܬܼܝܼܒܼ ܫ̈ܠܲܕܹܐ ܕܐ̄ܢܵܫܵܐ ܒܲܕܼܡܘܼܬܼ ܙܸܒܼܠܵܐ 47 ܘܠܵܐ ܢܦܲܠ̣ ܪܵܘܡ̇ܐ ܕܲܚܬܼܝܼܪܘܼܬܲܢ ܡ̣ܢ ܫܘܼܥܠܵܝܹܗ ܀ 48 :ܚܸܒܼܫܲܬ̤ ܐܲܪܥܵܐ ܘܠܵܐ ܝܸܗ̄ܒܲܬ̤ ܠܲܢ ܦܹܐܪܹ̈ܐ ܘܙܲܪ̈ܥܹܐ 49 ܘܠܵܐ ܓܵܙ̣ ܢܸܒܼܥܵܐ ܕܙܲܠܝܼܠܘܼܬܿܢ ܡ̣ܢ ܡܲܪܕܿܝܼܬܹܗ ܀ 50 :ܫܲܚܠܸܦ ܐܵܐܲܪ ܙܢܲܝ̈ ܫܘܚܠܵܦܹ̈ܐ ܕܲܡܟܼܢܝܼܢ ܒܹܗ 51 ܘܚܹܐܦܹܗ ܕܪܘܼܓܼܙܲܢ ܠܵܐ ܐܸܫܬܲܚܠܲܦ ܡ݂ܢ ܡܵܐ ܕܐܝܼܬܼܘܗܝ ܀ 52 ܐܲܙܝ̣ܥܘ ܠܐܲܪܥܵܐ ܪ̈ܲܥܡܹܐ ܘܒܲܪ̈ܩܹܐ ܕܠܵܐ ܒܲܥܝܵܕܼܵܐ: pb. 102 53 ܘܠܵܐ ܙܵܥ ܝܲܨܪܲܢ ܝܲܨܪܵܐ ܡ̣ܢ ܩܲܫܝܘܼܬܹܗ ܀ 54 :ܬܲܒܲܪ ܒܲܪܕܼܵܐ ܓܘܼܫܢܹ̈ܐ ܘܬܹܐܢܹ̈ܐ ܥܲܡ ܟܠ ܦܹܐܪ̈ܝܼܢ 55 ܘܠܵܐ ܣܲܪܸܕܼܬܲܢ ܚܙܵܬܼܵܐ ܕܐܝܼܬܹܝܗ̇ ܕܪܘܼܓ̣ܙܵܐ ܀ 56 :ܗ̤ܘܲܝ̈ ܐܵܬܼ̈ܘܵܬܼܵܐ ܕܼܲܕܼܚܝܼ̈ܠܝܢ ܗ̣̄ܘܲܝ̈ ܡ̣ܢ ܐܵܬܼ̈ܘܵܬܼܵܐ 57 ܘܠܵܐ ܒܥ݂ܵܘ ܗܵܘܢܲܢ ܕܡ̇ܢܲܐ ܗ̄ܝܼ ܥܸܠܬܼܵܐ ܕܒܼܘܼܕܵܩܲܝ̈ܗܹܝܢ ܀ 58 :ܗܘ̤ܿܘ ܢܸܟܼܝܵܢܹ̈ܐ ܕܩܲܡܨܵܐ ܘܙܵܚܠܵܐ ܕܠܵܐ ܚܙܹܝܢ ܗ̄ܘ̣ܵܘ ܠܲܢ 59 ܘܠܵܐ ܫܲܐܸܠܢܲܢ ܕܡܸܛܠ ܡ̇ܢܵܐ ܣܒܼܝܼܣܝܼܢ ܢܸܓܼܕܿܝܼ̈ܢ ܀ 60 :ܐܲܟܼܠܝ̣ܘܼܗܝ ܠܐܘܼܟܼܠܲܢ ܟܝܵܢܹ̈ܐ ܫܝܼܛܹ̈ܐ ܘܠܵܐ ܦܵܪ̈ܘܿܫܹܐ 61 ܘܠܵܐ ܥܲܩܸܒܼܢܲܢ ܕܡܲܢ̣ܘܼ ܝܲܗ̄ܒܲܢ ܐܘܼܟܼܠܵܐ ܀ 62 :ܓ̣ܡܲܪ ܡܵܙܘܿܢܲܢ ܘܲܒܼܛܸܠ ܥܲܡܠܲܢ ܘܲܛܠܸܩܘ ܚܲܝܲܝ̈ܢ 63 ܘܠܲܝܬܿ ܒܲܢ ܕܸܡܨܸܐ ܕܢܩܘܿܡ ܒܐܲܦܲܝ̈ܢ ܘܲܢܣܲܝܲܥ ܠܲܢ ܀ 64 :ܘܵܝ ܠܲܢ ܕܲܠܡܵܐ ܓܵܡܲ݁ܪ ܓܸܢܣܲܢ ܒܩܲܫܝܘܼܬܼ ܢܸܓܼ̈ܕܹܿܐ 65 ܘܠܵܐ ܦܵܐܹ̇ܫ ܠܲܢ ܣܪܝܼܕܼܵܐ ܕܚܲܝܹ̈ܐ ܒܹܝܬܼ ܐܲܪ̈ܥܵܢܹܐ ܀ 66 :ܘܵܝܠܲܢ ܕܲܠܡܵܐ ܗܵܘܹ̇ܝܢ ܨܹܐܕܷܲܢ ܗܵܠܹܝܢ ܕܲܗ̤ܘܲܝ̈ 67 ܢܘܼܪܵܐ ܕܿܣܕܘܿܡ ܘܗܵܘܬܼܵܐ ܕܒܸܠܥܲܬ̤ ܠܲܕܼܒܹܝܬܼ ܕܵܬܼܵܢ ܀ 68 :ܐܝܼܬܲܝܗܘܿܢ ܒܲܢ ܙܢܲܝ̈ ܒܝܼܫܵܬܼܵܐ ܗܵܠܹܝܢ ܕܲܬܼܢܹܝܬܼ 69 ܘܣܵܗ̇ܕܿܝܼܢ ܟܹܐܒܹ̈ܐ ܕܒܸܠܥܲܬ̤ ܐܲܪܥܲܢ ܕܐܝܼܬܲܝܗܘܿܢ ܒܲܢ ܀ 70 :ܒܟܹܐܒܹ̈ܐ ܕܐܲܪܥܲܢ ܡܸܬܼܒܲܩܸܐ ܐ̄ܢܵܐ ܕܲܣܒܼܝܼܣܝܼܢ ܒܲܢ 71 ܘܗܵܐ ܡܛܲܝܲܒܼ ܐ̄ܢܵܐ ܕܐܸܣܕܿܘܿܪ ܐܸܢܘܿܢ ܩܕܼܵܡ ܫܵܡܘܿܥܹ̈ܐ ܀ 72 :ܬܵܘ ܫܵܡܘܼܥܹ̈ܐ ܫܡܲܥܘ ܬܲܫܥܝܼܬܵܐ ܕܲܙܢܲܝ̈ ܟܹܐܒܲܝ̈ܢ 73 ܘܙܘܥܘܼ ܘܐܸܬܿܬܲܢܲܚܘ ܥܲܠ ܡܲܚ̈ܘܵܬܼܵܐ ܕܕܼܵܪܲܢ ܒܝܼܫܵܐ ܀ 74 :ܕܵܪܲܢ ܒܝܼܫܵܐ ܐܲܒܼܐܸܫ ܣܲܓܿܝܼ ܡ̣ܢ ܟܠ ܕܵܪ̈ܝܼܢ 75 ܘܡܸܛܠ ܗܵܢܵܐ ܣܒܼܝܼܣܝܼܢ ܢܸܓܼܕܵܘ̈ܗܝ ܡ̣ܢ ܟܠ ܕܵܪ̈ܝܼܢ ܀ 76 :ܣܲܢܝܘܼܬܼ ܥܵܘ̣ܠܲܢ ܚܙ̣ܵܐ ܗܵܘ̇ ܪܸܡܙܵܐ ܕܲܚܙܹܐ ܠܹܗ ܟܠ 77 ܘܐܲܗܦܸܟ ܐܲܦܹ̈ܐ ܕܒܲܣܝܼܡܘܼܬܹܗ ܡ̣ܢ ܣܲܢ̈ܝܵܬܼܵܢ ܀ 78 :ܐܲܦܹ̈ܐ ܕܚܸܡܬܼܵܐ ܚܵܘܝܼ ܨܹܐܕܲܝܢ ܠܵܐ ܚܸܡܬܼܵܢܵܐ 79 ܘܙܵܥܲܬ̤ ܐܲܪܥܵܐ ܘܩܲܪܝܼܒܼܵܐ ܗ̄ܘ̣ܵܬܼ ܕܬܘܸܐ ܗܵܘܬܼܵܐ ܀ 80 :ܠܟܼܠܵܗ̇ ܒܪܝܼܬܵܐ ܐܲܙܝܼܥ ܥܵܘ̣ܠܲܢ ܒܥܵܘܵ݁ܠܘܼܬܹܗ 81 ܘܠܵܐ ܦ̣ܵܫ ܡܸܕܹܿܡ ܕܠܵܐ ܐܸܙܕܲܥܙܲܥ ܒܲܫܟܼܝܼܪ̈ܬܲܢ ܀ 82 :ܠܟܼܠܹܗ ܥܵܠܡܵܐ ܫܲܟܲܪ ܚܸܙܘܵܐ ܕܲܫܟܼܝܼܪ̈ܵܬܿܢ 83 ܘܢܸܕܲܬ̤ ܡܸܢܲܢ ܠܲܫܡܲܝܵܢܹ̈ܐ ܘܠܲܐܪ̈ܥܵܢܵܝܹܐ ܀ 84 :ܚܙܵܬܼܵܐ ܫܟܼܝܼܪܬܵܐ ܕܣܲܢܝܘܼܬܼ ܥܵܘ̣ܠܲܢ ܚ̣ܙܵܘ ܪ̈ܘܼܚܵܢܹܐ 85 ܘܛܲܢ̣ܘ ܘܐܸܬܼܥܲܙܙܲܘ ܕܲܢܢܲܓܿܕܘܼܢܵܝܗܝ ܒܙܵܘܥ̈ܘ̈ܗܝ ܕܐܵܐܲܪ ܀ 86 :ܒܡܲܪܵܚܘܼܬܲܢ ܚܵܝ̣ܪܘ ܘܐܸܬܒܲܩܝܼܘ ܚܵܙܝܲܝ̈ ܫܦܝܼܪ 87 ܘܲܠܒܸܫܘ ܙܲܝܢܵܐ ܕܲܢܡܲܟܿܟܼܘܼܢܵܗ̇ ܠܲܛܪܘܼܢܘܼܬܲܢ ܀ pb. 103 88 :ܗܵܘ̇ ܦܘܼܩܕܵܢܵܐ ܕܐܲܩܝܼܡ ܐܸܢܘܿܢ ܥܲܠ ܬܸܫܡܸܫܬܲܢ 89 ܗܘ̤ ܦܩ݂ܲܕܼ ܐܸܢܘܿܢ ܕܢܲܪܡܘܿܢ ܐܝܼܕܼܵܐ ܒܲܫܛܵܪ ܢܸܓܼܕܲܝ̈ܢ ܀ 90 :ܣܲܩܪܵܐ ܕܢܸܓܼܕܹ̈ܐ ܟ̣ܬܲܒܼ ܗܵܘ̇ ܡܲܠܟܵܐ ܕܲܠܥܸܠ ܡ̣ܢ ܟܠ 91 ܘܝܲܗ̣̄ܒܹܿܗ ܠܟܸܢܫܹ̈ܐ ܕܲܫܡܲܝܵܢܹ̈ܐ ܕܢܲܝܬܿܘܿܢ ܨܹܐܕܲܢ ܀ 92 :ܐܲܝܟ ܦܵܪܲܚܬܼܵܐ ܦܪܲܚܝ̣ܘ ܦܵܪ̈ܘܿܚܹܗ ܩܕܼܵܡ ܦܘܼܩܕܼܵܢܵܐ 93 ܘܩܲܠܝܼܠܵܐܝܼܬܼ ܓ̣ܡܲܪܘ ܒܲܥ̣ܒܼܵܕܼܵܐ ܙܢܲܝ̈ ܡܲܚ̈ܘܵܬܲܢ ܀ 94 :ܐܵܦܵܦܵܣܝܼܣ ܕܥܲܠ ܡܲܚ̈ܘܵܬܲܢ ܚܙ̣ܵܘ ܕܿܪܗܝܼܒܼܵܐ 95 ܘܲܪܗܝܼܒܼܵܐܝܼܬܼ ܣܥ݂ܲܪܘ ܨܸܒܼܝܵܢܵܐ ܕܲܡܫܲܕܪܵܢܗܘܿܢ ܀ 96 :ܒܥܲܪܩܹܐ ܕܪܘܼܚܵܐ ܡܲܬܼܚܘܼܗܝ ܠܓܸܢܣܲܢ ܐ̄ܚܝܵܢܹ̈ܐ ܕܓܸܢܣܲܢ 97 ܘܲܒܼܫܲܒܿܘܼܩܹ̈ܐ ܕܟܼܦܢܵܐ ܘܨܲܗܝܵܐ ܒܲܣܒܸܿܣܘ ܦܲܓܼܪܲܢ ܀ 98 ܣܪ̈ܵܩܹܐ ܕܟܹܐܒܹ̈ܐ ܠ̣ܒܲܟܼܘ ܒܐܝܼܕܲܝ̈ܗܘܿܢ ܠܵܐ ܓܘܼܫܡܵܢܹ̈ܐ:܆ 99 ܘܣܲܪܩܘܼܗܝ ܠܓܼܘܼܫܡܲܢ ܒܚܲܪܝܼܦܘܼܬܼܵܐ ܕܲܣܪ̈ܵܩܲܝܗܘܿܢ ܀ 100 :ܐܲܝܟ ܠܸܣܛܵܝܵܐ ܩܕܼܵܡ ܕܲܝܵ̇ܢܵܐ ܬܠܵܐ̣ܘܼܗܝ ܠܥܲܡܲܢ 101 ܘܫܲܪܝܼ ܡܲܝܠܸܠ ܡ̣ܢ ܩܲܫܝܘܼܬܼܵܐ ܕܢܓܼ̈ܕܹܿܐ ܕܲܥܠܵܘܗܝ ܀ 102 :ܒܠܲܥ̣ ܘܐܸܬܼܒܲܣܒܲܣ ܟܠܹܗ ܒܟܼܠܹܗ ܐܲܝܟ ܣܵܪܘܿܚܵܐ 103 ܘܲܒܼܟܼܵܐ ܘܐܲܝܠܸܠ ܘܠܵܐ ܨܒܼ̣݂ܵܘ ܨܵܬܼܘܼܗܝ ܥܲܒܼܕܲܝ̈ ܡܲܠܟܵܐ ܀ 104 :ܡܲܠܟܵܐ ܕܥܲܠ ܟܠ ܦ̣ܩܲܕ ܥܲܡܲܢ ܕܪܵܚܹ̇ܡ ܥܵܘ̣ܠܵܐ 105 ܕܲܢܢܲܓܿܕܼܘܼܢܵܗ̇ ܠܡܲܪܵܚܘܼܬܲܢ ܕܠܵܐ ܚܵܘܣܵܢܵܐ ܀ 106 :ܕܠܵܐ ܚܵܘܣܵܢܵܐ ܢܲܓܿܕܼܘܼܢ ܟܸܢܫܹ̈ܐ ܕܲܫܡܲܝܵܢܹ̈ܐ 107 ܘܛܵܟ ܠܵܐ ܫܵܠܹ̇ܝܢ ܡ̣ܢ ܡܲܪܕܿܘܼܬܲܢ ܥܕܲܡ̇ܐ ܠܚܲܪܬܼܵܐ ܀ 108 :ܒܪܲܒܿܘܼܬܼ ܥܵܘ̣ܠܵܢ ܚܵܪܘܼ ܐܵܦ ܚܵܝ̇ܪܝܼܢ ܐܲܡܝܼܢܵܐܝܼܬܼ 109 ܥܲܠܗܵܝ̇ ܬܲܠܝܵܐ ܐܝܼܕܼܵܐ ܕܲܒܼܗܘܿܢ ܠܥܸܠ ܡ̣ܢ ܚܲܨܲܝܢ ܀ 110 :ܡܸܕܲܥ ܝܵܕܼܥ̇ܝܼܢ ܕܠܵܐ ܗܵܦܟܿܝܼܢܲܢ ܡ̣ܢ ܣܲܢ̈ܝܵܬܲܢ 111 ܘܡܸܛܠ ܗܵܕܹܐ ܠܒܼܝܼܫܝܼܢ ܪܘܼܓܼܙܵܐ ܥܲܠ ܬܲܒܼ̈ܥܵܬܲܢ ܀ 112 :ܚܵܘܒܲܬܼ ܚܵܘܒܲܝ̈ܢ ܥܸܫܢܲܬ̤ ܣܲܓܿܝܼ ܠܒܲܪ ܡ̣ܢ ܛܲܟܼܣܵܐ 113 ܘܗܵܐ ܬܵܒܼܥ̇ܝܼܢ ܠܲܢ ܙܢܲܝ̈ ܪܸܒܿܝܼܬܼܵܐ ܕܐܸܓܲܪ ܨܹܐܕܲܝܢ ܀ 114 :ܐ̄ܫܛܵܪܵܐ ܕܚܵܘ̈ܒܹܿܐ ܚܵܝ̣ܒܼ ܒܲܪܢܵܫܲܢ ܠܒܲܪ ܡ̣ܢ ܐ̄ܢܵܫܵܐ 115 ܘܲܕܼܠܵܐ ܦܪܲܥܢ̣ܵܝܗܝ ܗܵܐ ܦܵܪܥ̇ܝܼܢܲܢ ܕܠܵܐ ܡ̣ܢ ܛܲܝܒܿܘܼ ܀ 116 ܛܵܠܘܿܡ̇ܐܝܼܬܼ ܣܥ݂ܲܪ ܨܸܒܼܝܵܢܲܢ ܒܚܵܘܒܲܬܼ ܚܵܘܒܲܝ̈ܢ ܀ 117 ܥܲܠ ܗܵܝ̇ ܩܲܫ̈ܝܵܢ ܐܵܦ ܡܲܚ̈ܘܵܬܲܢ ܡ̣ܢ ܟܠ ܕܵܪ̈ܝܼܢ ܀ 118 :ܕܠܵܐ ܐܸܬܼܚܲܦܲܛܢ ܐܲܝܟ ܚܲܝܵܒܹ̈ܐ ܠܡܸܦܪܲܥ ܪܹܫܵܐ 119 ܗܵܐ ܦܵܪܥ̇ܝܼܢܲܢ ܐܵܦ ܪ̈ܲܒܿܝܵܬܼܵܐ ܕܥܲܦ̣ ܪܸ̈ܒܿܝܵܬܼܵܐ ܀ pb. 104 120 :ܪܸ̈ܒܿܝܵܬܼ ܡܸܬܿܬܲܒܼܥܝܼܢܲܢ ܠܦܘܼܬܼ ܒܝܼܫܘܼܬܲܢ 121 ܘܬܼܘܼܒܼ ܫܵܘܹ̇ܝܢܲܢ ܐܲܝܟ ܛܵܠܘܿܡܹ̈ܐ ܕܲܛܠ݂ܲܡܘ ܣܲܓܿܝܼ ܀ 122 :ܣܲܓܿܝܼ ܛܠ݂ܲܡܢܲܢ ܘܣܵܗܹ̇ܕܼ ܝܲܨܪܲܢ ܕܣܲܓܿܝܼ ܛܠܲܡ̣ܢܲܢ 123 ܘܛܵܟ ܠܵܐ ܛܵܠ̇ܡܝܼܢ ܫܹܐܕܹ̈ܐ ܛܠܘܼܡܝܵܐ ܕܕܼܵܡܹ̇ܐ ܠܕܝܼܠܲܢ ܀ 124 :ܛܵܠ̇ܡܝܼܢ ܫܹܐܕܹ̈ܐ ܘܪܵܢܹܝܢ ܕܲܛܠ݂ܲܡܘ ܘܝܵܕܼܥ̇ܝܼܢ ܕܐܲܣܟܸܿܠܘ 125 ܚܢܲܢ ܠܵܐ ܪܢܲܝ̣ܢܲܢ ܘܠܵܐ ܩܲܛܪܸܓܼܢܲܢ ܠܲܫܟܼܝܼܪ̈ܵܬܲܢ ܀ 126 :ܘܲܕܼܠܵܐ ܪܢܲܝ̣ܢܲܢ ܐܲܝܟ ܕܲܦܐܹܐ ܗ̄ܘ̣ܵܐ ܠܝܲܕܿܘܼܥܬܵܢܹ̈ܐ 127 ܗܵܐ ܪܵܕܹܝܢ ܠܲܢ ܟܝܵܢܹ̈ܐ ܚܲܪ̈ܫܹܐ ܒܲܟܼܝܵܢܲܝ̈ܗܘܿܢ ܀ 128 :ܘܲܕܼܠܵܐ ܨܒܲܝ݂ܢܲܢ ܠܲܡܕܲܢ ܢܲܦܫܲܢ ܒܕܝܼܢܵܐ ܕܢܲܦܫܲܢ 129 ܗܵܐ ܕܵܐܹ̇ܢ ܠܲܢ ܪܸܡܙܵܐ ܟܹܐܢܵܐ ܕܟܹܐܝܢ ܒܘܼܚܪܵܢܹܗ ܀ 130 :ܠܟܹܐܢܘܼܬܼ ܪܸܡܙܹܗ ܝܲܗ̣̄ܒܹܿܗ ܠܕܝܼܢܲܢ ܪܲܒܿ ܕܲܝܵܢܹ̈ܐ 131 ܕܢܸܕܲܥ ܕܐܝܼܬܼ ܠܹܗ ܐܵܦ ܟܹܐܢܘܼܬܼܵܐ ܕܠܵܐ ܡܸܙܕܲܟܼܝܵܐ ܀ 132 :ܛܵܒܼ ܟܹܐܢܵܐܝܼܬܼ ܒܲܚ̣ܪܹܗ ܠܕܝܼܢܵܐ ܕܛܵܠܘܼܡܘܼܬܿܢ 133 ܘܲܓܼܙ݂ܲܪ ܕܝܼܢܵܐ ܠܦܘܼܬܼ ܒܝܼ̈ܫܵܬܼܵܐ ܕܡܸܬܼܢܲܓܿܕܼܵܢܹ̈ܐ ܀ 134 :ܒܓܼܵܘ ܡܲܣܐܬܼܵܐ ܕܒܼܵܚܘܿܪܘܼܬܹܗ ܣܵܡ̣ܹܗ ܠܥܵܘ̣ܠܲܢ 135 ܘܕܲܢ̣ܬܲܥ ܣܲܓܿܝܼ ܣ̣ܵܡ ܠܹܗ ܢܸܓܼ̈ܕܹܿܐ ܠܘܼܩܒܲܠ ܝܘܼܩܪܹܗ ܀ 136 :ܠܲܙܢܲܝ̈ ܥܵܘ̣ܠܵܐ ܦܲܠܸܓܼ ܢܸܓܼ̈ܕܹܿܐ ܕܥܲܠ ܥܵܘܵܠܹ̈ܐ 137 ܘܟܼܠܚܲܕܼ ܡܸܢܗܘܿܢ ܬܲܒܼܥܹ݂ܗ ܒܢܸܓܼܕܵܐ ܕܥܵܗܹ̇ܝܢ ܗ̄ܘ̣ܵܐ ܠܹܗ ܀ 138 :ܠܪܸܚܡܲܬܼ ܟܸܣܦܵܐ ܥܲܩ̣ܪܵܗ̇ ܒܡܲܪܵܐ ܕܡܸܣܟܹܿܢܘܼܬܼܵܐ 139 ܕܠܵܐ ܬܘܼܒܼ ܬܲܚܸܠܦ ܘܬܸܛܥܲܢ ܦܹܐܪܹ̈ܐ ܕܟܸܣܦܵܐ ܪܓܼܝܼܓܼܵܐ ܀ 140 :ܠܪܸܚܡܲܬܼ ܫܘܼܒܼܚܵܐ ܦܲܣܩܵܗ̇ ܒܢܵܪܓܵܐ ܕܡܲܟܿܝܼܘܼܬܼܵܐ 141 ܕܠܵܐ ܬܸܨܛܲܢܲܥ ܠܡܸܕܒܲܨ ܐ̄ܢܵܫܵܐ ܒܥܘܼܩܣܵܐ ܕܫܘܼܒܼܚܵܐ ܀ 142 :ܠܥܵܠܘܿܒܼܘܼܬܼܵܐ ܓܲܙܪܵܗ̇ ܒܦܲܪܙܠܵܐ ܕܲܨܪܝܼܟܼܘܼܬܼܵܐ 143 ܕܕܲܠܡܵܐ ܢܸܪܗܲܛ ܥܸܒܼܝܵܐ ܕܡܸܢܵܗ̇ ܒܟܼܠܹܗ ܓܘܼܫܡܵܐ ܀ 144 :ܠܲܚܬܼܝܼܪܘܼܬܼܵܐ ܣ̣ܵܡ ܠܵܗ̇ ܟܘܝܵܐ ܕܲܡܫܲܝܢܘܼܬܼܵܐ 145 ܕܠܵܐ ܬܸܫܬܲܩܲܠ ܘܬܸܩܢܹܐ ܥܝܵܕܼܵܐ ܕܚܲܝܘܲܬܼ ܫܸܢܵܐ ܀ 146 :ܠܕܿܓܵܠܘܼܬܼܵܐ ܐܲܣܪܵܗ̇ ܒܙܲܝܢܵܐ ܕܲܚܕܵܐ ܡܸܠܬܼܵܐ 147 ܕܠܵܐ ܬܸܬܼܥܲܝܲܕܼ ܠܲܡܡܲܠܵܠܘܼ ܝܲܬܿܝܼܪ̈ܵܬܼܵܐ ܀ 148 :ܒܚܵܣܘܿܡܘܼܬܼܵܐ ܐܲܪܡܝܼ ܒܦܘܼܡ̇ܗ̇ ܩܹܐܡ̇ܐ ܕܫܸܬܼܩܵܐ 149 ܕܲܠܡܵܐ ܬܼܟܿܘܿܬܼ ܐ̄ܢܵܫܵܐ ܒܢܝܼܒܹ̈ܐ ܕܲܟܼܬܼܝܼܫܘܼܬܼܵܗ̇ ܀ 150 :ܠܓܲܢܵܒܼܘܼܬܼܵܐ ܚܲܝ̣ܣܢܵܗ̇ ܒܚܸܣܢܹ̈ܐ ܕܠܵܐ ܡܸܬܼܚܲܣܢܹܝܢ 151 ܕܠܵܐ ܬܘܼܒܼ ܬܸܓܼܠܘܿܙ ܚܲܝܹ̈ܐ ܕܐ̄ܢܵܫܵܐ ܡ̣ܢ ܢܸܟܼܣܲܝ̈ܗܘܿܢ ܀ 152 :ܠܓܲܝܵܪܘܼܬܼܵܐ ܡ̣ܚܵܗ̇ ܒܲܡܚܘܿܬܼܵܐ ܕܟܲܡܗܘܼܬܼ ܥܲܝܢܹ̈ܐ 153 ܕܠܵܐ ܬܸܬܼܒܲܩܸܐ ܙܲܠܝܼܠܵܐܝܼܬܼ ܒܲܕܼܠܵܐ ܕܝܼܠܵܗ̇ ܀ 154 :ܠܚܸܡܬܼܵܐ ܫܲܬܿܩܵܗ̇ ܒܩܵܠܹ̈ܐ ܕܚܝܼ̈ܠܹܐ ܕܓܼܙܵܪ ܕܝܼܢܵܐ 155 ܕܠܵܐ ܢܸܗܘܸܐ ܠܵܗ̇ ܐܲܬܼܪܵܐ ܠܡܸܪܗܲܛ ܒܲܥܪܝܼܪܵܐܝܼܬܼ ܀ 156 :ܠܟܼܠܗܘܿܢ ܚܲܫܹ̈ܐ ܪܕܼܵܐ ܟܹܐܢܵܐܝܼܬܼ ܒܟܹܐܢܘܼܬܼ ܢܸܓܼܕܵܘ̈ܗܝ 157 ܘܚܲܟܿܝܼܡܐܝܼܬܼ ܚܵܘܝܼ ܚܲܝܠܹܗ ܒܡܸܬܼܢܲܓܿܕܵܢܹ̈ܐ ܀ pb. 105 158 :ܡ̣ܢ ܡܲܚܘܵܬܹ̈ܗ ܕܚܸܝ̣ܠ ܟܠܡܸܕܹܿܡ ܘܚ݂ܵܒܼ ܟܠܡܸܕ݂ܿܡ 159 ܘܐܲܡܠܸܟ ܩܸܢܛܵܐ ܥܲܠ ܟܠܡܸܕܹܿܡ ܕܐܝܼܬܼܵܘܗܝ ܡܸܕܹܿܡ ܀ 160 :ܙܵܥ ܟܠܡܸܕ݂ܿܡ ܡܢ ܡ̇ܐ ܕܲܗܘ̤ܵܐ ܨܹܝܕܼ ܟܠ ܡܸܕܹܿܡ 161 ܘܠܵܐ ܦܵܝ̣ܫ ܡܸܕܹܿܡ ܕܠܵܐ ܐܸܬܼܢܲܣܝܼ ܒܚܲܫܲܝ̈ ܐ̄ܢܵܫܵܐ ܀ 162 :ܡܸܛܠ ܐ̄ܢܵܫܵܐ ܗ̤ܘܲܝ̈ ܒܥܘܼܡܪܵܐ ܕܐ̄ܢܵܫܵܐ 163 ܘܲܒܼܒܼܝܼܫܘܼܬܹܗ ܣܒܲܠ ܒܝܼ̈ܫܵܬܼܵܐ ܡܠܝܼ̈ܠܹܐ ܘܚܲܪ̈ܫܹܐ ܀ 164 :ܡܸܛܠܵܬܹܗ ܒܸܠܥܲܬ̤ ܐܲܪܥܵܐ ܢܸܓܼ̈ܕܹܿܐ ܩ̈ܫܲܝܵܐ 165 ܘܝܼܒܸܫ ܥܘܼܒܵܗ̇ ܡ̣ܢ ܡ̇ܘ̈ܥܝܵܬܼܵܐ ܕܙܲܪ̈ܥܹܐ ܘܦܹܐܪܹ̈ܐ ܀ 166 :ܡܸܛܠ ܥܸܘ̣ܠܹܗ ܠܵܐ ܨܒܵܬ̤ ܝܸܠܕܵܬ̤ ܥܘܸܠܹ̈ܐ ܕܙܲܪܥܵܐ 167 ܘܟܲܕܼ ܝܵܠܹܕܿܬܵܐ ܗ̄ܝܼ ܗܘ̤ܵܬܼ ܠܵܗ̇ ܥܩܲܪܬܵܐ ܘܲܡܓܲܙܲܝܬܼܵܐ ܀ 168 :ܒܥܲܩܪܘܼܬܼ ܐ̄ܢܵܫܵܐ ܚܵܪܲܬ̤ ܐܲܪܥܵܐ ܠܵܐ ܦܵܪܘܿܫܬܵܐ 169 ܘܲܟܼܠ̣ܵܬ̤ ܥܘܼܒܵܗ̇ ܡ̣ܢ ܡܲܪܕܿܝܼܬܼܵܐ ܕܣܝܼܡܵܐ ܗ̄ܘ̣ܵܬܼ ܒܵܗ̇ ܀ 170 :ܒܵܗ̇ ܐܸܬܿܕܲܡܝܼܘ ܟܝܵܢܹ̈ܐ ܫܒܼܵܒܹ̈ܿܝܗ̇ ܡܲܝܵ̈ܐ ܘܐܲܐܲܪ 171 ܘܠܵܐ ܪܕܼܵܘ ܫܲܦܝܼܪ ܒܐܘܼܪܚܵܐ ܫܦܝܼܬܼܵܐ ܕܫܘܼܚܠܵܦܲܝ̈ܗܘܿܢ ܀ 172 :ܕܠܵܐ ܛܘܼܟܵܣܵܐ ܪܕܼܵܘ ܫܲܬܼܝܼܩܹ̈ܐ ܕܲܡܛܲܟܿܣܝܼܢ ܗ̄ܘ̣ܵܘ 173 ܘܕܵܪܘܕܘܼܗܝ ܠܥܵܠܡܵܐ ܕܲܡܛܲܟܲܣ ܗ̄ܘ̣ܵܐ ܡ̣ܢ ܫܘܼܪܵܝܵܐ ܀ 174 :ܥܵܘ̣ܠܵܐ ܕܐ̄ܢܵܫܵܐ ܐܲܠܸܦ ܐܸܢܘܿܢ ܠܠܵܐ ܪ̈ܵܓܼܘܿܫܹܐ 175 ܕܢܸܪܕܿܘܿܢ ܒܐܘܼܪܚܵܐ ܕܡܲܠܝܵܐ ܩܸܢܛܵܐ ܕܠܵܐ ܫܲܘܝܘܼܬܼܵܐ ܀ 176 :ܗܘ̤ ܒܲܪܢܵܫܵܐ ܕܵܘܕܹܗ ܠܛܲܟܼܣܵܐ ܕܟܼܠܵܗ̇ ܒܪܝܼܬܼܵܐ 177 ܘܲܒܼܦܝܘܼܬܹܗ ܪܲܦܝܼ ܚܙܵܩܵܐ ܕܪܵܘܡ̇ܐ ܘܥܘܼܡܩܵܐ ܀ 178 :ܒܹܗ ܐܲܣܝܼܪ ܗ̄ܘ̣ܵܐ ܪܵܘܡ̇ܐ ܘܥܘܼܡܩܵܐ ܒܲܚܕܼܵܐ ܫܲܘܝܘܼ 179 ܘܡܸܛܠܵܬܹܗ ܦܟ݂ܲܗ ܟܠ ܡܸܕܼܵܡ ܡ̣ܢ ܡ̇ܐ ܕܐܝܼܬܼܵܘܗܝ ܀ 180 :ܪܘܼܓܼܙܹܗ ܐܲܪܓܸܿܙ ܠܚܲܝܠܵܐ ܕܠܲܝܬܼ ܠܹܗ ܕܢܸܪܓܲܙ ܡܸܡܬܼܘܿܡ 181 ܘܲܪܕܼܵܝܗܝ ܠܥܵܠܡܵܐ ܒܪܘܼܓܼܙܵܐ ܩܲܫܝܵܐ ܕܠܵܐ ܚܵܘܣܵܢܵܐ ܀ 182 :ܕܠܵܐ ܚܵܘܣܵܢܵܐ ܗܘ̤ܵܬܼ ܡܲܪܕܿܘܼܬܵܐ ܕܲܒܼܝܵܘ̈ܡ̇ܬܿܢ 183 ܘܛܵܟ ܠܵܐ ܒܸܠܥܲܬ̤ ܒܝܼܫܘܼܬܼ ܐ̄ܢܵܫܵܐ ܐܷܲܟ ܒܝܼܫܘܼܬܲܢ ܀ 184 :ܘܐܸܠܵܐ ܢܸܒܼܥܹܐ ܡ̣ܢ ܕܲܟܼܝܵܢܵܐ ܘܡ̣ܢ ܕܲܟܼܬܼܵܒܼܵܐ 185 ܘܐܸܢ ܐܝܼܬܼ ܕܵܪܵܐ ܕܲܪܕܼܵܝܗܝ ܟܹܐܢܵܐ ܐܲܝܟ ܕܲܠܕܼܵܪܲܢ ܀ 186 :ܒܠܲܥ̣ܘ ܩܲܕܡܵܝܹ̈ܐ ܒܢܸܓܼ̈ܕܹܿܐ ܩ̈ܫܲܝܵܐ ܐܲܟܼܡܵܐ ܕܲܟܼܬܼܝܼܒܼ 187 ܘܐܵܘܕܲܥ ܐܸܢܘܿܢ ܕܡ̇ܢܲܐ ܗ̄ܝܼ ܥܸܠܬܼܵܐ ܕܢܸܓܼ̈ܕܹܿܐ ܕܲܒܼܠܲܥ̣ܘ ܀ 188 :ܠܲܢ ܢܲܓܲܕܼ ܠܲܢ ܒܟܼܠ ܐܸܣܟܹܿܡܝܼ̈ܢ ܕܲܙܢܲܝ̈ ܢܸܓܼܕܹܿܐ 189 ܘܠܵܐ ܒܲܕܸܿܩ ܠܲܢ ܕܡ̇ܢܲܐ ܗ̄ܝܼ ܥܸܠܬܼܵܐ ܕܩܲܫܝܘܼܬܼ ܢܸܓܼܕܲܝ̈ܢ ܀ 190 :ܗܵܕܹܿܐ ܗ̄ܝܼ ܕܩܲܫܝܵܐ ܡ̣ܢ ܟܠܡܸܕܹܿܡ ܠܡܸܬܼܢܲܓܿܕܵܢܹ̈ܐ 191 ܕܟܲܕܼ ܡܸܬܼܢܲܓܿܕܝܼܢ ܠܵܐ ܝܵ̇ܕܼܥܝܼܢ ܠܵܗ̇ ܠܥܸܠܬܹܗ ܕܢܸܓܼܕܵܐ ܀ pb. 106 192 :ܥܵܘ̣ܠܲܢ ܚܲܦܝܵܗ̇ ܠܥܸܠܬܹܗ ܕܢܸܓܼܕܵܐ ܡ̣ܢ ܪܸܥܝܵܢܲܢ 193 :ܗܘ̤ܝܘܼ ܥܵܘ̣ܠܲܢ ܥܵܘܪܵܗ̇ ܠܢܲܦܫܲܢ ܡ̣ܢ ܒܘܼܝܵܢܵܐ 194 ܘܠܵܐ ܡܸܬܼܒܲܝܢܵܐ ܟܲܕܼ ܡܸܬܿܬܿܫܝܼܛܵܐ ܒܲܫܟܼܝܼܪ̈ܵܬܼܵܐ ܀ 195 :ܗܘ̤ ܐܲܪܡܝܼ ܒܵܗ̇ ܒܲܡܠܝܼܠܘܼܬܼܵܗ̇ ܩܹܐܡܵܐ ܕܫܸܬܼܩܵܐ 196 ܘܒܲܛܸܠ ܗܵܘܢܵܗ̇ ܡ̣ܢ ܥ̣ܢܝܵܢܵܐ ܕܫܲܦܝܼܪ̈ܵܬܸܿܐ ܀ 197 :ܗܘ̤ ܠܵܐ ܝܲܗ̣̄ܒܼ ܠܵܗ̇ ܠܦܵܪܘܿܫܘܼܬܼܵܗ̇ ܠܡܸܦܪܲܫ ܫܲܦܝܼܪ 198 ܘܟܲܕܼ ܦܵܪܘܿܫܬܵܐ ܗ̄ܝܼ ܩ̣ܢܵܬ̤ ܠܵܗ̇ ܥܝܵܕܼܵܐ ܕܠܵܐ ܦܵܪ̈ܘܿܫܹܐ ܀ 199 :ܗܵܢܵܐ ܥܝܵܕܼܵܐ ܥܲܒܼ݂ܕܵܗ̇ ܣܡܝܼܬܼܵܐ ܕܠܵܐ ܒܘܼܝܵܢܵܐ 200 ܘܒܸܠܥܲܬ̤ ܢܸܓܼ̈ܕܹܿܐ ܘܠܵܐ ܨܒܼܵܬ̤ ܕܬܸܕܼܥ ܥ̣ܠܲܬܼ ܢܸܓܼܕܹܿܝ̈ܗ̇ ܀ 201 :ܢܸܓܼ̈ܕܹܿܐ ܩܫܲܝܵ̈ܐ ܒܸܠܥܲܬ̤ ܢܲܦܫܲܢ ܡܗܝܼܪܲܬܼ ܗܵܘܢܵܐ 202 ܘܲܟܼܡܵܐ ܕܒܸܠܥܲܬ̤ ܗܘ̤ܵܘ ܠܵܗ̇ ܢܸܓܼ̈ܕܹܿܐ ܐܲܝܟ ܠܵܐ ܢܼܓܼ̈ܕܹܿܐ ܀ 203 :ܟܡܵܐ ܣܓܼܝܼܘܼ ܢܸܓܼ̈ܕܹܐ ܘܡܸܬܼܢܲܓܿܕܼܵܢܹ̈ܐ ܠܵܐ ܚܲܫ̣ܘ ܘܐܲܪܓܸܫܘ 204 ܥܲܦ̣ ܡܲܚ̈ܘܬܼܵܐ ܘܲܡܡܲܚ̈ܝܵܐ ܩ̣ܢܵܘ ܠܘܼܒܵܒܼܵܐ ܀ 205 :ܟܡܵܐ ܗܘ̤ܵܘ ܙܵܘܥܹ̈ܐ ܘܪܸܥܠܲܬ̤ ܐܲܪܥܵܐ ܘܢܦܲܠܘ̣ ܛܘܼܪܹ̈ܐ 206 ܘܠܵܐ ܙܵܥ ܠܸܒܿܢ ܒܩܵܠ ܝܲܠܕܵܬܵܐ ܕܐܲܪܥܵܐ ܫܠܝܼܬܼܵܐ ܀ 207 :ܢܦܲܠ̣ܘ ܡܸܕܝܵܪܹ̈ܐ ܘܲܗܘ̤ܵܘ ܩܲܒܼܪܹ̈ܐ ܠܥܵܡܘܿܪ̈ܲܝܗܘܿܢ 208 ܘܪܵܡܘܼܬܼ ܪܘܼܚܲܢ ܠܵܐ ܐܸܬܼܡܲܟܿܟܲܬ̤ ܡ̣ܢ ܫܘܼܡܠܵܝܵܐ ܀ 209 :ܓܲܙܝܲܬ̤ ܐܲܪܥܵܐ ܡ̣ܢ ܥܲܠ̈ܠܵܬܵܐ ܕܟܼܠ ܐܸܣܟܹܿܡܝܼ̈ܢ 210 ܘܒܼܝܼܫܘܼܬܼ ܝܲܨܪܲܢ ܠܵܐ ܦܵܫ̣ ܝܲܨܪܵܗ̇ ܡ̣ܢ ܣܲܢ̈ܝܵܬܼܵܐ ܀ 211 :ܝ̄ܒܸܫܘ̣ ܐܝܼܠܵܢܹ̈ܐ ܘܲܢ̣ܬܲܪܘ ܛܲܪ̈ܦܹܐ ܘܲܚܡܵܘ̣ ܙܲܪ̈ܥܹܐ 212 ܘܠܵܐ ܐܸܬܼܝܲܒܲܫ ܢܸܒܼܥܵܐ ܣܲܢܝܵܐ ܕܲܫܟܼܝܼܪ̈ܬܲܢ ܀ 213 :ܐܲܟܼܠ݂ܲܢ ܩܲܡܨܵܐ ܡ̣ܫܵܢ ܡ̇ܫܘܿܛܵܐ ܡܲܚܵܢ ܨܲܪܨܘܼܪܵܐ 214 ܘܡܸܪܲܬܼ ܢܲܦܫܲܢ ܠܵܐ ܐܸܬܼܦܲܪܗܲܬ̤ ܡ̣ܢ ܡ̇ܐ ܕܐܝܼܬܹܝܗ̇ ܀ 215 :ܢ̣ܫܲܒܼ ܥܲܠܥܵܠܹ̈ܐ ܥܲܙܝܼ̈ܙܵܬܵܐ ܒܩܲܝܛܵܐ ܘܣܲܬܼܘܵܐ 216 ܘܲܙܟܼܵܐ ܐܸܢܹܝܢ ܡܲܫܒܼܵܐ ܩܲܫܝܵܐ ܕܲܫܟܼܝܼܪ̈ܵܬܲܢ ܀ 217 :ܝܲܠܸܦ ܐܵܐܲܪ ܘܢܲܛܸܦ ܡܸܛܪܵܐ ܒܟܹܐܦܲܝ̈ ܒܲܪܕܼܵܐ 218 ܘܥܵܘ݁ܵܠܘܼܬܲܢ ܠܵܐ ܚܲܠܸܦܬܹܗ ܠܪܲܗܛܵܐ ܕܥܵܘ̣ܠܵܗ̇ ܀ 219 :ܙܵܥܘ̣ ܫܲܬܿܝܼܩܹ̈ܐ ܒܩܵܠܹ̈ܐ ܕܪ̈ܲܥܡܹܐ ܘܚܸܙܘܵܐ ܕܒܲܪ̈ܩܹܐ 220 ܘܡܲܐܝܼܢܘܼܬܲܢ ܠܵܐ ܐܸܬܿܬܿܥܝܼܪܲܬ̤ ܡ̣ܢ ܕܲܡܟܿܘܼܬܸܲܗ̇ ܀ 221 :ܨܵܪܘ ܪ̈ܘܼܚܵܢܹܐ ܙܢܲܝ̈ ܐܵܬܼ̈ܘܵܬܼܵܐ ܒܐܲܦܲܝ̈ ܪܵܘܡ̇ܐ 222 ܘܲܚ̣ܙܲܝܢ ܐܸܢܹܝܢ ܘܲܛܥܲܝܢ ܐܸܢܹܝܢ ܐܲܝܟ ܕܲܠܚܸܠܡܵܐ ܀ 223 :ܫܲܪܝܼܪ̈ ܗ̣̄ܘܲܝ̈ ܘܚܲܬܿܝܼ̈ܬܲܢ ܗ̣̄ܘܲܝ̈ ܘܲܕܢܝܼ̈ܚܵܢ ܗ̣̄ܘܲܝ̈ 224 ܘܐܵܦ ܣܲܢ̈ܝܵܬܲܢ ܠܛܵܠܘܿܡܘܼܬܲܢ ܠܵܐ ܓܲܠ̈ܝܵܢ ܗ̣̄ܘܲܝ̈ ܀ pb. 107 225 :ܠܛܵܠܘܿܡܘܼܬܲܢ ܚܵܘܝܼܘ ܐܸܢܹܝܢ ܚܲܝܠܲܝ̈ ܪܵܘܡ̇ܐ 226 ܘܲܚ̣ܙܲܝܢ ܐܸܢܹܝܢ ܘܠܵܐ ܚ̣ܙܲܝܢ ܐܸܢܹܝܢ ܒܗܵܘܢܵܐ ܬܲܩܢܵܐ ܀ 227 :ܡܸܛܠܵܬܲܢ ܗ̤ܘܲܝ̈ ܟܠ ܕܲܗ̤ܘܲܝ̈ ܒܪܵܘܡ̇ܐ ܘܥܘܼܡܩܵܐ 228 ܘܠܵܐ ܫܲܐܸܠܢܲܢ ܕܡ̇ܢܲܐ ܗ̄ܝܼ ܥ̣ܠܬܵܐ ܕܫܘܼܚܠܵܦܲܝ̈ܗܹܝܢ ܀ 229 :ܘܲܕܠܵܐ ܨܒܿܝ̣ܢܲܢ ܠܡܸܒܼܥܵܐ ܒܥܵܬܼܵܐ ܕܙܢܲܝ̈ ܢܸܓܼܕܿܝ̈ܢ 230 ܪܡ݂ܲܙ ܒܵܪܘܿܝܵܐ ܠܲܡܫܲܡܫܵܢܵܘ̈ܗܝ ܕܲܢܓܿܕܼܘܼܬܵܢ ܀ 231 ܫܩܲܠ̣ܘ ܦܘܼܩܕܵܢܵܐ ܥܝܼܪܹ̈ܐ ܐ̄ܚܝܵܢܲܝ̈ܢ ܥܲܠ ܒܝܼܫܘܼܬܲܢ ܀ 232 ܘܡܲܬܼܚ̣ܘܗܝ ܠܠܸܒܲܢ ܠܢܸܓܼܕܵܐ ܩܲܫܝܵܐ ܕܕܼܵܡܹ̇ܐ ܠܠܸܒܲܢ ܀ 233 :ܕܠܵܐ ܚ݂ܲܫ ܠܸܒܲܢ ܒܢܸܓܼܕܵܐ ܕܒܸܠܥܲܬ̤ ܚܠܵܦܲܝܢ 234 ܡ̣ܚܵܐܘܼܢ ܟܹܐܢܹ̈ܐ ܥܲܠ ܗܲܕܵܡܲܝ̈ܢ ܘܥܲܠ ܚܘܼܫܵܒܲܝ̈ܢ ܀ 235 :ܘܛܵܟ ܗܵܕܹܐ ܪܢ̣ܵܘ ܠܡܲܪܵܚܘܼܬܲܢ ܪ̈ܵܢܝܲܝ ܫܲܦܝܼܪ 236 ܕܠܵܐ ܘܝܼܠܗܘܿܢ ܗ̄ܘ̣ ܡܸܫܟܵܐ ܕܲܒܼܠܲܥ̣ ܐܲܝܢܵܐ ܕܲܒܼܠܲܠ̣ ܀ 237 :ܡܥܵܕܼ ܗ̄ܘ̣ ܐ̄ܢܵܫܵܐ ܕܟܼܠ ܕܐܝܼܬܼ ܝܵܗܹ̇ܒܼ ܘܗܘ̤ ܠܵܐ ܢܸܒܼܠܲܠ 238 ܡ̇ܕܹܝܢ ܢܸܒܼܠܲܥ ܐܲܝܢܵܐ ܕܕܼܵܚܹ̇ܠ ܘܗܵܐ ܡܸܬܼܚܟܲܡ ܀ 239 :ܗܘ̤ ܒܲܩܢܘܿܡܹܗ ܢܸܛܥܲܡ ܛܲܥܡܵܐ ܕܩܲܫܝܘܼܬܼ ܢܸܓܼ̈ܕܹܿܐ 240 ܘܢܸܗܘܸܐ ܝܵ̇ܕܲܥ ܠܡܸܛܲܪ ܛܲܟܼܣܵܐ ܕܲܡܠܝܼܠܘܼܬܹܗ ܀ 241 :ܒܗܵܕܹܐ ܬܼܢܘܲܝ ܒܠܲܥܘ̣ ܗܲܕܵܡܲܝ̈ܢ ܒܟܹܐܒܹ̈ܐ ܩܫܲܝܵ̈ܐ 242 ܘܗܵܐ ܡܸܬܼܒܲܣܒܲܣ ܦܲܓܼܪܲܢ ܫܝܼܛܵܐ ܒܲܚܒܼܵܪ̈ܵܬܼܵܐ ܀ 243 :ܒܗܵܢܵܐ ܦܘܼܪܣܵܐ ܪܗܝܼܒܼܝܼܢ ܟܹܐܢܹ̈ܐ ܘܲܡܢܲܓܿܕܝܼܢ ܠܲܢ 244 ܘܠܵܐ ܫ̣ܠܝܘܼ ܘܫܵܠܹ̇ܝܢ ܡ̣ܢ ܡܲܚ̈ܘܵܬܲܢ ܩܷܲܛܵܐ ܘܣܲܬܼܘܵܐ ܀ 245 :ܒܟܼܠ ܐܸܣܟܹܿܡܝܼ̈ܢ ܪܵܕܹܝܢ ܟܹܐܢܹ̈ܐ ܠܥܲܛܠܘܼܬܼ ܠܸܒܵܢ 246 ܘܡ̇ܐ ܕܠܵܐ ܬܵܒܼܢ݂ܲܢ ܐܸܬܼ݂ܵܐ ܡ̇ܘܬܵܐ ܘܒܲܠܥ݂ܲܢ ܡܸܢܫܹܠܝ ܀ 247 :ܠܒܲܪ ܡ̣ܢ ܛܲܟܼܣܵܐ ܚܵ̇ܪܹܒܼ ܡܸܢܲܢ ܡ̇ܘܬܵܐ ܝܲܥܢܵܐ 248 ܘܲܕܼܠܵܐ ܚܵܘܣܵܢ ܡܒܲܣܒܸܿܣ ܦܲܓܼܪܵܢ ܚܲܪܡ̇ܢܵܐܝܼܬܼ ܀ 249 :ܐܲܝܟ ܫܲܒܵܝܵܐ ܪܵܕܹܦ ܟܠܢܵܫ ܒܵܬܲܪ ܓܸܢܣܲܢ 250 ܘܥܵܠܹ̇ܒܼ ܫܸܒܼܝܹܗ ܠܫܸܒܼܝܵܐ ܕܫܵܒܹ̇ܝܢ ܐ̄ܢܵܫܵܐ ܠܐ̄ܢܵܫܵܐ ܀ 251 :ܫܒܼ݂ܵܐܘܿܢ ܐ̄ܢܵܫܵܐ ܘܲܫܒܼ݂ܵܢ ܡ̇ܘܬܵܐ ܫܸܒܼܝܵܐ ܥܦܝܼܦܵܐ 252 ܘܥܵܠܹ̇ܒܼ ܫܸܒܼܝܵܐ ܕܲܫܟܼܝܼܪ̈ܵܬܲܢ ܠܫܸܒܼܝܵܐ ܘܫܸܒܼܝܵܐ ܀ 253 :ܫܸܒܼܝܵܐ ܕܥܵܘ̣ܠܲܢ ܥܠܲܒܼ ܠܲܫܒܼܝܼܬܼܵܐ ܕܐ̄ܢܵܫܵܐ ܘܡ̇ܘܬܵܐ 254 ܘܛܵܟ ܗܘ̤ ܕܲܪܫܗ݂̇ ܠܐܘܼܪܚܵܐ ܕܫܸܒܼܝܵܐ ܕܲܬܼܪܹܝܢ ܫܸܒܼܝܼ̈ܐ ܀ 255 :ܘܵܝ ܠܹܗ ܠܥܲܡܲܢ ܡ̣ܢ ܫܲܒܵܝܹ̈ܐ ܕܐܲܡܝܼܢܝܼܢ ܠܹܗ 256 ܘܲܡܓܼܡܪܝܼܬ ܠܹܗ ܘܠܵܐ ܡܸܬܼܟܲܚܲܕܼ ܡ̣ܢ ܣܲܢܝܵܬܹ̈ܗ ܀ 257 :ܘܵܝܠܲܢ ܕܲܗ̤ܘܲܝܢ ܒܸܙܚܵܐ ܘܨܲܥܪܵܐ ܩܕܼܵܡ ܟܠ ܒܸܪ̈ܝܵܢ 258 ܘܲܡܓܲܢܹܝܢ ܠܵܗ̇ ܠܪܲܒܿܘܼܬܼ ܒܸܙܚܲܢ ܡܠܝܼܠܹ̈ܐ ܘܚܲܪ̈ܫܹܐ ܀ 259 :ܘܵܝܠܲܢ ܕܲܢܦܲܩ̣ ܛܸܒܵܐ ܒܝܼܫܵܐ ܒܐܲܪܒܲܥ ܦܸܢ̈ܝܵܢ 260 ܘܠܲܝܬܿ ܒܲܒܼܪܝܼܬܼܵܐ ܕܠܵܐ ܬܲܫܥܝܼܬܵܐ ܕܥܵܘܼܠܲܢ ܬܢܹ̇ܐ ܀ 261 ܫܸܡ ܒܝܼܫܘܼܬܲܢ ܬܵܢܹ̇ܝܢ ܫܹܐܕܹ̈ܐ ܕܒܼܝܼܫܝܼܢ ܡܸܢܲܢ: pb. 108 262 ܘܟܲܕܼ ܛܵܒܼ ܒܝܼܫܝܼܢ ܛܵܒܼ ܬܲܡܝܼܗܝܼܢ ܒܝܼ̈ܫܵܬܲܢ ܀ 263 :ܘܐܸܢܗܘ̤ ܕܒܼܝܼܫܹ̈ܐ ܬܲܡܝܼܗܝܼܢ ܒܲܢ ܥܲܠ ܕܐܲܒܼܐܸܫܢܲܢ 264 ܫܲܦܝܼܪ ܡ̇ܕܹܝܢ ܥܫ݂ܸܢ ܒܝܼ̈ܫܵܬܲܢ ܘܲܣܓܼܝܼܘܼ ܟܹܐܒܲܝܹ̈ܢ ܀ 265 :ܫܲܦܝܼܪ ܪܵܕܹܦܝܼܢ ܒܵܬܼܪ ܚܲܝܲ̈ܢ ܟܲܦܢܵܐ ܘܟܹܐܒܹ̈ܐ 266 ܘܛܵܟ ܡ̣ܢ ܥܵܘ̣ܠܵܐ ܥܦܝܼܦܵܐ ܚܵܣ̇ܟܿܝܼܢ ܠܥܵܘ̇ܠܘܼܬܢ ܀ 267 :ܠܥܵܘܵ݁ܠܘܼܬܲܢ ܪܵܕܹܐ ܟܹܐܢܵܐ ܒܟܲܦܢܵܐ ܘܟܹܐܒܹ̈ܐ 268 ܘܲܡܛܲܟܸܿܣ ܠܲܢ ܕܠܵܐ ܢܸܬܼܒܲܥܪܲܪ ܒܵܬܲܪ ܥܵܘ̣ܠܵܐ ܀ 269 :ܘܐܸܠܵܐ ܢܸܒܼܥܹܐ ܕܡ̇ܢܲܐ ܗ̄ܝܼ ܥܸܠܬܵܐ ܕܩܲܫܝܘܼܬܼ ܢܸܓܼܕܲܝ̈ܢ 270 ܘܡܸܛܠ ܡ̇ܢܵܐ ܒܨܝܼܪ ܘܲܡܙܲܠܗܲܙ ܡ̇ܙܘܿܢ ܚܲܝܲܝ̈ܢ ܀ 271 :ܡܸܛܠ ܡܕܼܵܘܲܕܼ ܙܲܒܼܢܲܢ ܡ̣ܢ ܟܠ ܙܲܒܼܢܝܼ̈ܢ 272 ܘܠܲܝܬܿ ܥܸܕܵܢܵܐ ܕܲܫܦܸܐ ܘܫܲܦܝܼܪ ܕܘܼܒܵܪ ܥܘܼܡܪܲܢ ܀ 273 :ܠܡܵܢܵܐ ܟܡܝܼܪܝܼܢ ܙܲܒܼܢܲܝ̈ ܫܲܢ̄ܬܵܐ ܒܦܘܼܚܠܵܢܝ̈ܗܘܿܢ 274 ܘܠܲܝܬܿ ܫܘܼܚܠܵܦܵܐ ܕܕܼܵܡܹ̇ܐ ܛܲܟܼܣܹܗ ܠܛܲܟܼܣܵܐ ܬܲܩܢܵܐ ܀ 275 :ܒܓܼܝܼܫ ܟܠܡܸܕܲܡ ܒܠܝܼܠ ܟܠܡܸܕܹܿܡ ܟܡܝܼܪ ܟܠܡܸܕܲܡ 276 ܘܲܥܒܼܝܼܕܼ ܥܵܠܡܵܐ ܐܲܝܟ ܒܹܝܬܼ ܒܵܪܹ̈ܐ ܥܲܠ ܥܵܡܘܿܪ̈ܘܗܝ ܀ 277 :ܐܸܒܼܠܵܐ ܪܲܒܿܐ ܠܒܼܝܼܫܵܐ ܒܪܝܼܬܼܵܐ ܥܲܠ ܒܝܼ̈ܫܵܬܲܢ 278 ܘܲܡܒܲܟܿܝܵܐ ܠܲܢ ܐܲܝܟ ܕܥܲܠ ܡܝܼܬܼܵܐ ܕܡܲܪܝܼܪ ܐܸܒܼܠܹܗ ܀ 279 :ܡܲܪܝܼܪܵܐܝܼܬܼ ܡܲܪܝܼܪܵܐ ܠܵܗ̇ ܠܐܲܪܥܵܐ ܚܠܵܦܲܝܢ 280 ܘܐܸܠܘ̣ ܡܲܨܝܵܐ ܩܥ̣ܵܬ̤ ܐܲܝܟ ܐܸܡ̇ܐ ܥܲܠ ܚܲܒܿܝܼܒܼܵܗ̇ ܀ 281 :ܘܐܸܠܘܼ ܩܲܢܝܵܐ ܦܘܼܡ̇ܐ ܡܠܝܼܠܵܐ ܐܲܝܟ ܡܲܠܵܠܹ̈ܐ 282 ܒܩܵܠ ܐܘܿܠ̈ܝܵܬܼܵܐ ܡܒܲܟܿܝܵܐ ܗ̄ܘ̣ܵܬܼ ܠܹܗ ܠܙܲܒܼܢܲܢ ܒܝܼܫܵܐ ܀ 283 :ܘܐܸܠܘܼ ܪܓܼܝܼܫܝܼܢ ܟܝܵܢܹ̈ܐ ܚܲܪ̈ܫܹܐ ܒܚܲܫܲܝ̈ ܢܲܦܸܫܲܢ 284 ܠܵܐ ܫܵܠܹ̇ܝܢ ܗ̄ܘ̣ܵܘ ܡ̣ܢ ܚܸܢ̈ܓܼܵܬܼܵܐ ܕܥܲܠ ܡܘܼܟܵܟܲܢ ܀ 285 :ܛܵܒܼ ܐܸܬܼܡܲܟܿܟܼܢ ܥܕܲܡ̇ܐ ܠܐܲܪܥܵܐ ܐܲܟܼܡܵܐ ܕܲܟܼܬܼܝܼܒܼ 286 ܘܲܚܠْܦ ܐܪܥܵܐ ܕܸܒܼܩܲܬ̤ ܢܲܦܸܫܲܢ ܠܒܸܙܚܵܐ ܘܨܲܥܪܵܐ ܀ 287 :ܐܲܝܟ ܥܲܠܥܵܠܵܡ ܢ̣ܫܲܒܼ ܒܝܼܫ̈ܬܲܢ ܒܙܲܒܼܢܲܢ ܒܝܼܫܵܐ 288 ܘܲܫ݂ܠܲܚ ܫܲܒܼ̈ܝ̣ܩܵܢ ܐܲܝܟ ܐܝܼܠܵܢܹ̈ܐ ܒܲܙܒܲܢ ܣܲܬܼܘܵܐ ܀ 289 :ܒܲܕܼܡܘܼܬܼ ܛܲܪ̈ܦܹܐ ܢܬܲܪ ܛܵܒܼܵܬܼܵܐ ܡ̣ܢ ܦܘܼܡ ܐ̄ܢܵܫܵܐ 290 ܘܲܗܘ̤ܵܘ ܐ̄ܢܵܫܵܐ ܐܲܝܟ ܠܵܐ ܐ̄ܢܵܫܵܐ ܒܣܘܼܥܪ̈ܵܢܲܝܗܘܿܢ ܀ 291 :ܒܚܫܹ̈ܐ ܩܫܲܝܵܐ ܒܠܲܥ̣ܘ ܡ̇ܝܘܿܬܹ̈ܐ ܥܕܲܡ̇ܐ ܠܡܵܘܬܵܐ 292 ܘܲܚܡ̣ܵܘ ܘܝܼܒܸܫ̣ܘ ܡ̣ܢ ܥܵܩܵܬܼ̈ܐ ܕܟܹܐܒܹ̈ܐ ܕܟܼܦܢܵܐ ܀ 293 :ܣܲܝܦܵܐ ܕܟܲܦܢܵܐ ܢܦܲܩ̣ ܥܲܠ ܥܲܡܲܢ ܥܢܹܐ ܒܲܚܛܝܼܬܼܵܐ 294 ܘܲܚܝܼܪܵܒܼ ܘܲܫܕܵܢ ܐܲܝܟ ܚܲܝ̈ܘܵܬܼܵܐ ܕܠܵܐ ܥܘܼܦܵܝܵܐ ܀ 295 :ܨܹܐܕܲܝܢ ܫܸܠ̣ܡܲܬ̤ ܗܵܝ̇ ܕܲܟܼܬܼܝܼܒܼܵܐ ܨܹܝܕܼ ܩܲܕܡ̇ܝܹ̈ܐ 296 ܕܒܲܕܼܡܘܼܬܼ ܙܸܒܼܠܵܐ ܢܵܦ̈ܠܵܢ ܫܠܲܕܹ̈ܐ ܕܲܒܼܢܲܝ̈ܢܵܫܵܐ ܀ 297 :ܗܵܐ ܢܦܲܠ̣ܘ ܦܲܓܼܪܹ̈ܐ ܕܲܒܼܢܲܝ̈ܢܵܫܵܐ ܕܠܵܐ ܥܘܼܦܵܝܵܐ 298 ܘܗܲܠܸܟܼܘ ܐ̄ܢܵܫܵܐ ܠܥܸܠ ܡ̣ܢ ܐ̄ܢܵܫܵܐ ܕܠܵܐ ܟܘܼܚܵܕܵܐ ܀ 299 ܟܲܦܢܵܐ ܐܲܚܕܹܿܗ ܠܲܬܼܪܵܥ ܪ̈ܲܚܡܹܐ ܒܐܲܦܲܝ̈ ܪ̈ܲܚܡܹܐ: pb. 109 300 ܘܕܲܫ̣ ܒܲܪܢܵܫܵܐ ܥܲܠ ܒܲܪܢܵܫܵܐ ܐܲܝܟ ܠܵܐ ܐ̄ܢܵܫܵܐ ܀ 301 :ܥܨ̣ܵܝܗܝ ܠܲܟܼܝܵܢܵܐ ܟܲܦܢܵܐ ܒܚܲܝܠܵܐ ܕܚܲܣܝܼܢܘܼܬܹܗ 302 ܘܫܲܪܝܼ ܣܵܥܹܐ ܥܲܠ ܕܲܟܼܝܵܢܵܐ ܘܥܲܠ ܕܲܟܼܬܼܵܒܼܵܐ ܀ 303 :ܒܥܸܠܲܬܼ ܟܲܦܢܵܐ ܛܥ̣ܵܝܗܝ ܠܲܟܼܝܵܢܹܗ ܟܝܵܢܵܐ ܫܝܼܛܵܐ 304 ܘܫܲܥܒܸܿܕܼ ܢܲܦܫܹܗ ܠܡܹܐܟܲܠ ܐܘܼܟܼܠܵܐ ܕܠܵܐ ܒܲܥܝܵܕܼܵܐ ܀ 305 :ܕܠܵܐ ܒܲܥܝܕܵܐ ܐܸܟܼܠ̣ܘ ܐ̄ܢܵܫܵܐ ܒܣܲܪ ܒܲܪܢܵܫܵܐ 306 ܘܵܝܠܲܢ ܡ̇ܢܵܐ ܓ̣ܕܲܫ ܠܲܟܼܝܵܢܲܢ ܡܠܸܐ ܢܸܟܼܝܵܢܹ̈ܐ ܀ 307 :ܘܵܝܠܲܢ ܕܲܠܡܵܐ ܒܙܲܒܼܢܲܢ ܫܵܠ̇ܡܵܐ ܚܲܪܬܹܗ ܕܥܵܠܡܵܐ 308 ܘܒܲܢ ܡܸܫ̈ܬܲܠܡܵܢ ܟܠ ܕܲܟܼܬܼܝܼ̈ܒܼܵܢ ܥܲܠ ܫܘܼܠܵܡܵܐ ܀ 309 :ܟܬܼܝܼܒܼ ܗ̄ܘ̣ ܕܐܸܟܲܠ̣ ܢܸܫܹ̈ܐ ܒܢܲܝܗܹܝ̈ܢ ܒܲܙܒܲܢ ܟܲܦܢܵܐ 310 ܘܲܗܘ̤ܵܘ ܥܘܸܠܹ̈ܐ ܪ̈ܚܘܼܡܹܐ ܕܟܲܪܣܵܐ ܐܘܼܟܼܠܵܐ ܠܟܲܪܣܵܐ ܀ 311 :ܗܵܐ ܗܘ̤ܵܬܼ ܗܵܕܹܐ ܒܲܙܒܲܢ ܒܙܲܒܼܢܲܢ ܒܝܼܫܵܐ 312 ܘܐܸܟܲܠ̣ ܢܸܫܹ̈ܐ ܝܲܠܘܼܕܲܝ̈ܗܹܝܢ ܘܐܵܦ ܛܝܼܡܲܝ̈ܗܘܿܢ ܀ 313 :ܒܛܝܼܡܹ̈ܐ ܫܝܼܛܹ̈ܐ ܝܲܗ݂̇̄ܒܼܘ ܐܲܒܼܵܗܹ̈ܐ ܒܢܲܝ̈ܵܐ ܪ̈ܚܝ̣ܡܹܐ 314 ܘܐܸܟܲܠ̣ܘ ܐܘܼܟܼܠܵܐ ܡܠܸܐ ܥܵܩܵܬܹ̈ܐ ܘܡ̣ܝܼܬܼܘ ܒܚܸܢ̈ܓܼܵܬܼܵܐ ܀ 315 :ܒܩܲܨܝܵܐ ܕܠܲܚܡܵܐ ܫܸܩܠܲܬ̤ ܐܸܡ̇ܐ ܕܡܲܝ̈ ܚܲܒܿܝܼܒܼܵܗ̇ 316 ܘܫܸܚܠܲܬ̤ ܥܲܝܢܵܗ̇ ܘܕܼܵܒܲܬ̤ ܢܲܦܸܫܵܗ̇ ܡ̣ܢ ܟܲܪܝܘܼܬܼܵܐ ܀ 317 :ܐܘܿܗ ܠܗܵܘ̇ ܐܘܼܟܼܠܵܐ ܕܙܲܒܼܢ̣ܹܗ ܟܝܵܢܵܐ ܕܠܵܐ ܒܲܥܝܵܕܵܐ 318 ܘܲܛܥ̣ܵܐ ܟܝܵܢܵܐ ܟܝܵܢ̈ܝܵܬܼܵܐ ܕܣܝܼ̈ܡܵܢ ܗ̣̄ܘܲܝ̈ ܒܹܗ ܀ 319 :ܐܘܿ ܠܲܟܼܝܵܢܵܐ ܕܐܲܣܝܼܪ ܟܠܹܗ ܒܪܸܚܡܲܬܼ ܕܝܼܠܹܗ 320 ܕܙܲܒܸܿܢ ܕܝܼܠܹܗ ܒܪܸܚܡܲܬܼ ܐܘܼܟܼܠܵܐ ܕܲܚܕܼܵܐ ܫܵܥܵܐ ܀ 321 :ܐܘܿܗ ܡ̇ܢ ܓܲܕܫܹܗ ܠܓܸܢܣܲܢ ܪܹܫܵܐ ܕܟܼܠܗܘܿܢ ܓܸܢܣܹ̈ܐ 322 ܘܐܲܫܝܼܛ ܗܘ̤ ܠܹܗ ܒܲܨܥܝܼܪ̈ܵܬܼܵܐ ܕܫܝܼ̈ܛܢ ܡ̣ܢ ܟܠ ܀ 323 :ܐܘܿ ܠܲܟܼܝܵܢܲܢ ܡܟܲܢܹܐ ܒܲܫܡܵܐ ܕܲܡܟܼܝܼܢܵܢܹܗ 324 ܕܲܗܘ̤ܵܐ ܫܲܦܠܵܐ ܘܐܲܗܸܠܘ ܫܲܦܠܹ̈ܐ ܥܲܠ ܫܲܦܠܘܼܬܹܗ ܀ 325 :ܐܘܿ ܠܪܵܡ ܡ̣ܢ ܟܠ ܘܲܫܒܼܝܼܚ ܡ̣ܢ ܟܠ ܒܲܫܡܹܗ ܘܕܲܪܓܹܗ 326 ܕܕܼܵܫܘܼ݂ܗܝ ܚܲܫܹ̈ܐ ܘܡܲܟܿܟܼܘܼܗܝ ܟܹܐܒܹ̈ܐ ܘܒܲܠܥܹܗ ܡ̇ܘܬܵܐ ܀ 327 :ܐܘܼ ܠܕܲܐܚܝܼܕܼ ܗ̄ܘ̣ܵܐ ܥܵܠܡܵܐ ܟܠܹܗ ܒܦܲܓܼܪܹܗ ܘܢܲܦܫܹܗ 328 ܕܲܗܘ̤ܵܐ ܣܢܝܼܐܵܐ ܡ̣ܢ ܟܠ ܡܸܕܸܿܡ ܡܸܛܠ ܥܵܘ̣ܠܹܗ ܀ 329 :ܡܸܛܠ ܥܵܘ̣ܠܹܗ ܣܢ̣ܵܐܘܼܗܝ ܐܲܟܲܚ̄ܕܼ ܡܐܝܼܠܹ̈ܐ ܘܚܲܪ̈ܫܹܐ 330 ܘܗܵܐ ܡܩܲܦܚܝܼܢ ܠܹܗ ܒܢܲܓܼ̈ܕܹܿܐ ܩܫܲܝܵ̈ܐ ܕܟܼܠ ܫܘܼܚܠܵܦܝܼܢ ܀ 331 :ܟܲܦܢܵܐ ܩܲܫܝܵܐ ܘܟܹܐܒܹ̈ܐ ܣܒܼܝܼܣܹ̈ܐ ܘܡ̇ܘܬܵܐ ܪܗܝܼܒܼܵܐ 332 ܘܠܲܝܬܿ ܒܘܼܝܵܐܐ ܒܹܝܬܼ ܡܲܪܕܿܘܼܬܼܵܐ ܘܲܠܡܲܪܕܿܘܼܬܼܵܐ ܀ pb. 110 333 :ܒܲܕܡܘܼܬܼ ܓܲܠܠܹ̈ܐ ܪܗܝܼܒܼܝܼܢ ܢܸܓܼ̈ܕܹܿܐ ܚܲܕܼ ܒܵܬܲܪ ܚܲܕ 334 ܘܠܵܐ ܝܵܗ̇ܒܿܝܼܢ ܠܲܢ ܐܵܦܸܢ ܩܲܠܝܼܠ ܫܸܠܝܵܐ ܘܢܵܘܚܵܐ ܀ 335 :ܩܵܠ ܝܼܠܲܠܬܲܐ ܪܵܥܹ̇ܡ ܒܐܲܪܥܲܢ ܒܟܼܠ ܥܸܕܵܢܝܼܢ 336 ܘܐܲܝܟ ܒܹܝܬܼ ܒܵܪܹ̈ܐ ܥܒܼܝܼܕܼ ܕܘܼܒܵܪܲܢ ܠܹܠܲܝ ܐܝܼܡܵܡ ܀ 337 :ܒܸܟܼܝܵܐ ܒܫܘܼܩܹ̈ܐ ܝ̄ܠܲܠܬܵܐ ܒܒܼܵܬܹ̈ܐ ܚܢܲܓܼܬܼܵܐ ܒܟܼܠܕܿܘܼܟ 338 ܘܡܲܝܠܸܠ ܦܘܼܡ̇ܐ ܘܕܼܵܡ̈ܥܵܢ ܥܲܝܢܹ̈ܐ ܘܨܵܠܝ̈ܢ ܐܸܕܢܹ̈ܐ ܀ 339 :ܒܸܟܼܝܵܐ ܘܐܸܠܝܵܐ ܫ̇ܡܲܥ ܟܠܢܵܫ ܡ̣ܢ ܟܠ ܦܘܼܡܝܼ̈ܢ 340 ܘܠܲܝܬܿ ܒܲܪܢܵܫܵܐ ܕܠܵܐ ܒܲܪ̄ܬܼ ܩܵܠܵܐ ܕܘܵܝܵܐ ܬܵܢܹ̇ܐ ܀ 341 :ܘܝܵ ܘܝܵ ܐܵܡܲܪ ܐ̄ܢܵܫܵܐ ܠܐ̄ܢܵܫܵܐ ܥܲܠ ܒܲܪܢܵܫܵܐ 342 ܕܓܲܙ ܛܵܒܼܵܬܹ̈ܗ ܘܲܣܓܼܝܼܘ ܐܸܒܼܠܵܘ̈ܗܝ ܘܥܲܦ̣ ܬܸܢܚܵܬܹ̈ܐ ܀ 343 :ܩܵܠ ܬܸܢ̈ܚܵܬܼܵܐ ܫܵܡ̇ܥܲ ܟܠܫܵܥ ܡ̣ܢ ܒܲܪ ܙܵܘܓܹܿܗ 344 ܘܠܲܝܬܿ ܒܲܪ̄ܬܼ ܩܵܠܵܐ ܕܠܵܐ ܚܠܝܼܛܵܐ ܒܵܗ̇ ܟܲܪܝܘܼܬܼ ܐ̄ܢܵܫܵܐ ܀ 345 :ܟܲܪܝܵܐ ܠܟܼܠܢܵܫ ܘܲܡܥܵܩ ܟܠܢܵܫ ܘܒܼܵܟܹ̇ܐ ܟܠܢܵܫ 346 ܘܠܲܝܬܿ ܦܲܪܨܘܼܦܵܐ ܕܢܲܗܝܼܪ ܘܲܦܨܝܼܚ ܠܘܼܩܒܲܠ ܚܲܒܼܪܹܗ ܀ 347 :ܡܢܝܼܪ ܟܠ ܒܲܪܢܵܫ ܠܘܼܩܒܲܠ ܚܙܵܝܵܐ ܟܡܝܼܪܵܐ ܕܟܼܠܢܵܫ 348 ܘܲܬܼܡܝܼܗ ܟܠܢܵܫ ܥܲܠ ܥܵܩܵܬܼ̈ܐ ܕܐܲܡܠܸܟ ܒܐܲܪܥܵܐ ܀ 349 :ܥܲܠ ܥܵܩܵܬܼ̈ܐ ܡܫܲܐܸܠ ܟܠܢܵܫ ܠܲܕܼܦܵܓܲܥ ܒܹܗ 350 ܕܐܵܪܵܐ ܐܝܼܬܼ ܟܲܝ ܕܘܼܟܿܬܼܵܐ ܕܫܲܠܝܵܐ ܡ̣ܢ ܥܵܩܵܬܼ̈ܐ ܀ 351 :ܟܠ ܥܲܡ ܟܠܵܐ ܡܠܹܝܢ ܥܵܩܵܬܼ̈ܐ ܕܥܲܠ ܥܵܩܵܬܼܵܐ 352 ܘܡܲܪܟܹܿܢ ܪܹܫܵܐ ܕܡܲܠ̈ܟܹܿܐ ܘܡ̇ܟܹ̈ܐ ܩܕܼܵܡ ܥܵܩܵܬܼ̈ܐ ܀ 353 :ܡܥܵܩ ܥܲܬܿܝܼܪܵܐ ܡܥܵܩ ܡܸܣܟܹܿܢܵܐ ܥܲܒܼܕܐ ܘܡܪܹܗ 354 ܘܲܢܦܲܩ̣ ܠܟܢܵܫ ܒܵܬܲܪ ܚܸܕܪܵܐ ܕܣܘܼܢܩܵܢ ܚܲܝܵܘ̈ܗܝ ܀ 355 :ܒܵܬܲܪ ܚܸܕܪܵܐ ܢܦܲܩ̣ܘ ܚܵܕܼܘܿܪܹ̈ܐ ܘܠܵܐ ܚܵܕܼܘܿܪܹ̈ܐ 356 ܘܕܼܵܘܕܹܗ ܟܲܦܢܵܐ ܠܛܲܟܼܣܵܐ ܪܲܒܵܐ ܕܒܹܝܬܼ ܚܲܕܼ ܠܲܐ̄ܚܪܹܝܢ ܀ 357 :ܟܲܦܢܵܐ ܐܲܠܸܦ ܠܲܒܼܢܲܝ̈ ܚܹܐܪܹ̈ܐ ܚܵܕܼܘܿܪܘܼܬܼܵܐ 358 ܘܗܵܐ ܡܸܬܼܟܲܪܟܿܝܼܢ ܘܫܵܐܠ̇ܝܼܢ ܙܸܕܼܩܵܐ ܐܲܝܟ ܚܵܕܼܘܿܪܹ̈ܐ ܀ 359 :ܐܘܼܡ̇ܢܘܼܬܼܵܐ ܕܚܵܕܼܘܿܪܘܼܬܼܵܐ ܣܸܓܼܝܲܬ̤ ܒܐܲܪܥܵܐ 360 ܘܠܲܝܬܿ ܥܸܕܵܢܵܐ ܕܠܵܐ ܒܲܪ̄ܬܼ ܩܵܠܵܐ ܕܚܸܕܼܪܵܐ ܙܵܡ̇ܐ ܀ 361 :ܩܵܠܹ̈ܐ ܚܢܝܼܓܼ̈ܐ ܡܪܲܟܿܒܼܝܼܢ ܐ̄ܢܵܫܵܐ ܩܕܼܵܡ ܚܲܒܼܪ̈ܲܗܘܿܢ 362 ܕܒܼܵܟܹ̇ܝܢ ܘܐܵܠܹ̇ܝܢ ܡܒܲܟܹܿܝܢ ܥܲܡܗܘܿܢ ܠܫܵܡܘܿܥܲܝ̈ܗܘܿܢ ܀ 363 :ܐܲܝܟ ܚܲܝ̈ܘܬܼܵܐ ܥܵܘܹ̇ܝܢ ܟܠܢܵܫ ܥܲܡ ܚܲܒܼܪ̈ܲܝܗܘܿܢ 364 ܘܢܵܗ̇ܡܝܼܢ ܘܢܵܨ̇ܪܝܼܢ ܒܲܕܼܡܘܼܬܼ ܝܵܘܢܹ̈ܐ ܘܣܢܘܿܢ̈ܝܵܬܼܵܐ ܀ 365 :ܐܵܦ ܠܵܐ ܠܐ̄ܢܵܫܵܐ ܕܵܡܹ̇ܐ ܩܵܠܵܐ ܩܵܠ ܚܸܢ̈ܓܼܵܬܼܗܘܿܢ 366 ܕܫܲܚܠܸܦ ܐܸܢܹܝܢ ܟܲܦܢܵܐ ܠܡܸܠܹ̈ܐ ܘܲܠܢܸܥ̈ܡܵܬܼܵܐ ܀ 367 ܩܵܠܹ̈ܐ ܚܢܝܼܓܹ̈ܐ ܡܫܲܚܠܸܦ ܒܵܝ̇ܫܵܐ ܥܲܠ ܣܘܼܢܩܵܢܹܗ: pb. 111 368 ܕܛܵܟ ܬܸܟܼܪܸܐ ܠܹܗ ܠܐܲܝܢܵܐ ܕܫܵܡܲ݁ܥ ܙܢܲܝ̈ ܢܸܥ̈ܡܵܬܹܗ ܀ 369 :ܕܠܵܐ ܟܘܼܚܵܕܼܵܐ ܡܲܩܠܸܐ ܘܫܵܐܹ̇ܠ ܒܓܼܡܕܵܐ ܘܚܘܼܨܦܵܐ 370 ܘܝܵܡܹ̇ܐ ܘܡ̇ܘܡܸܐ ܕܐܸܠܵܐ ܫܸܩܠܹ̇ܬܼ ܠܵܐ ܡܫܲܢܹܐ ܐ̄ܢܵܐ ܀ 371 :ܡ̇ܢܐ ܥܸܒܼܕܲܬ̤ ܒܝܼܫܘܼܬܼ ܝܲܨܪܲܢ ܡܲܪܝܼܪ ܝܲܨܪܵܐ 372 ܕܥܸܩܪܲܬ̤ ܡܸܢܲܢ ܚܹܐܪܘܼܬܼ ܢܲܩܸܫܵܐ ܘܙܸܪܥܲܬ̤ ܚܘܼܨܦܵܐ ܀ 373 :ܚܹܐܪܘܼܬܼ ܢܲܦܸܫܵܐ ܩܲܢܝܵܐ ܢܲܦܸܫܵܐ ܥܲܡ ܬܘܼܩܵܢܵܗ̇ 374 ܘܗܵܢܵܘ̇ ܬ̣ܡܗܵܐ ܕܚܲܣܢ̣ܵܗ̇ ܟܲܦܢܵܐ ܠܲܕܼܠܵܐ ܟܵܦ̇ܢܵܐ ܀ 375 :ܟܲܦܢܵܐ ܥܲܒܼ݂ܕܵܗ̇ ܠܵܐ ܒܲܪ̄ܬܼ ܓܹܐܪܹ̈ܐ ܠܢܲܦܸܫܵܐ ܚܹܐܪܬܲܐ 376 ܘܲܗܘ̤ܵܬܼ ܐܲܡܬܼܵܐ ܠܲܡܫܲܡܵܫܘܼ ܠܣܘܼܢܩܵܢ ܦܲܓܼܪܵܐ ܀ 377 :ܣܘܼܢܩܵܢ ܦܲܓܼܪܵܐ ܟܲܕܼܢܵܗ̇ ܒܢܝܼܪܵܐ ܕܣܘܼܢܩܵܢ ܦܲܓܼܪܵܐ 378 ܘܫܲܪܝܲܬ̤ ܡܪܲܟܿܒܼܵܐ ܩܵܠܹ̈ܐ ܚܢܝܼܓܼ̈ܐ ܠܡܸܫܐܲܠ ܙܸܕܼܩܵܐ ܀ 379 :ܓܘܼܢܚܵܐ ܪܲܒܵܐ ܣܥ݂ܲܪ ܒܹܗ ܥܵܘ̣ܠܵܐ ܒܕܼܵܪܲܢ ܒܝܼܫܵܐ 380 ܕܕܸܲܟܿܒܼܵܐ ܩܵܠܹ̈ܐ ܚܢܝܼܓܼ̈ܐ ܠܡܸܫܐܲܠ ܙܸܕܼܩܵܐ ܀ 381 :ܓܘܼܢܚܵܐ ܪܲܒܵܐ ܣܥ݂ܲܪ ܒܹܗ ܥܵܘ̣ܠܵܐ ܒܕܵܪܪܲܢ ܒܝܼܫܵܐ 382 ܕܕܼܵܘܸܕܸ ܐܲܢܹܝܢ ܠܫܲܦܝܼܪܵܬܼܵܐ ܕܦܲܓܼܪܵܐ ܘܢܲܦܸܫܵܐ ܀ 383 :ܫܲܦܝܪ̈ܵܢ ܗ̣̄ܘܲܝ̈ ܟܝܵܢܵܝܵܬܹ̈ܐ ܕܣܝܼܡܵܢ ܗ̣̄ܘܲܝ̈ ܒܵܗ̇ 384 ܘܚܲܒܸܿܠ ܐܼܢܹܝܢ ܥܵܘ̣ܠܵܐ ܛܪܘܼܢܵܐ ܕܲܒܼܥܵܘܵܠܹ̈ܐ ܀ 385 :ܥܵܘ̣ܠܵܐ ܗ̄ܘ̣ ܥܸܠܬܼܵܐ ܕܗܵܠܹܝܢ ܕܲܬܼܢܹ̇ܝܬܼ ܘܲܕܿܬܼܵܢܹܐ ܐ̄ܢܵܐ 386 ܘܗܘ̤ܝܘܼ ܕܲܪܕܵܢ ܒܟܲܦܢܵܐ ܘܟܹܐܢܹ̈ܐ ܘܲܒܼܡܵܘܬܵܢܵܐ ܀ 387 :ܗܘ̤ܝܘܼ ܕܓܿܙܝܼ ܠܐܲܪܥܵܐ ܦܐܝܼܬܼܵܐ ܡ̣ܢ ܛܵܒܼܵܬܼ̈ܐ 388 ܘܠܵܐ ܝܸܗ̄ܒܼܬ̤ ܠܲܢ ܦܹܐܪܹ̈ܐ ܘܙܲܪ̈ܥܹܐ ܐܲܝܟ ܕܲܡܥܵܕܼܵܐ ܀ 389 :ܗܘ̤ܝܘܼ ܕܐܵܘܠܸܕܼ ܩܲܡܨܵܐ ܘܙܵܚܠܵܐ ܘܐܵܦ ܨܲܪܨܘܼܪܵܐ 390 ܘܫܲܚܠܸܦ ܠܐܵܐܲܪ ܘܐܲܚܸܬܼ ܢܘܼܪܵܐ ܚܠܵܦ ܢܘܼܛ̈ܦܵܬܼܵܐ ܀ 391 :ܠܲܝܬܿ ܢܸܟܼܝܵܢܵܐ ܕܐܲܟܼܝܲܢ ܡ̣ܢ ܡܬܼܘܿܡ ܕܠܵܐ ܗܘ̤ ܥܲܒܼ݂ܕܹܿܗ 392 ܘܠܲܝܬܼ ܚܘܼܣܪܵܢܵܐ ܕܚܝ̣ܣܲܪ ܓܸܢܣܲܢ ܕܠܵܐ ܗܘ̤ ܣܲܥ̣ܪܹܗ ܀ 393 :ܒܥܵܘܼܠܲܢ ܡ̇ܕܹܝܢ ܙܵܕܹܩ ܗ̄ܘ̣ܵܐ ܠܲܢ ܠܡܸܬܼܥܲܕܵܠܘܼ 394 ܘܠܵܘ ܒܐܲܠܵܗܲܢ ܥܲܒܼ݂ܕܲܢ ܟܹܐܢܹ̈ܐ ܘܲܒܼܢܲܝ̈ ܚܹܐܪܹ̈ܐ ܀ 395 :ܠܵܗ̇ ܠܚܹܐܪܘܼܬܲܢ ܦܐܸܐ ܗ̄ܘ̣ܵܐ ܕܬܸܪܫܸܐ ܠܠܵܐ ܚܹܐܪܘܼܬܼܵܗ̇ 396 ܕܡܸܛܠ ܡ̇ܢܵܐ ܗܘ̤ܵܬܼ ܒܲܪ̄ܬܼ ܚܹܐܪܹ̈ܐ ܠܵܐ ܒܲܪ̄ܬܼ ܚܹܐܪܹ̈ܐ ܀ 397 :ܘܲܕܼܠܵܐ ܦܸܪܫܲܬ̤ ܐܲܝܟ ܦܵܪܘܿܫܬܵܐ ܕܬܸܪܫܹܐ ܗܝ̤ ܠܵܗ̇ 398 ܬܲܒܼܥ̣ܘܼܗ̇ ܚܲܫܹ̈ܐ ܬܒܲܥܬܼܵܐ ܩܫܝܼܬܼܵܐ ܚܘܼܣܪ̈ܵܢܝܼܢ ܀ 399 :ܩܫܹܝܢ ܚܘܼܣܪ̈ܵܢܹܐ ܕܚܸܣܪܲܬ̤ ܢܲܦܸܫܲܢ ܒܗܵܢܵܐ ܙܲܒܼܢܵܐ 400 ܘܠܲܝܬܿ ܡܲܬܼܩܵܠܵܬܐ ܕܣܵܠܹ̇ܩ ܝܘܼܩܪܹܗ ܐܲܝܟ ܚܘܼܣܪܵܢܲܢ ܀ 401 :ܙܥܘܿܪ ܚܘܼܣܪܵܢܵܐ ܕܲܒܼܟܼܠ ܕܵܪ̈ܝܼܢ ܡ̣ܢ ܚܘܼܣܪܵܢܲܢ 402 ܘܣܵܗ̇ܕܿܝܼܢ ܢܸܓܼ̈ܕܹܿܐ ܕܒܸܠܥܲܬ̤ ܢܲܦܸܫܲܢ ܕܲܟܼܡܵܐ ܚ̣ܣܲܪܢܲܢ ܀ 403 :ܠܵܐ ܡܸܬܼܡܲܠ̈ܠܵܢ ܙܢܲܝ̈ ܡܲܚ̈ܘܵܬܲܢ ܒܠܸܫܵܢ ܐ̄ܢܵܫܵܐ 404 ܘܲܙܥܘܿܪ ܦܘܼܡ̇ܐ ܕܢܸܬܼܢܹܐ ܐܸܢܹܝܢ ܐܲܝܟ ܕܐܝܼܬܲܝܗܹܝܢ ܀ 405 :ܕܲܗ̤ܘܲܝ̈ ܒܲܠܚܘܼܕܼ ܡܨܸܐ ܐܵܡܘܿܪܵܐ ܕܢܹܐܡܲܪ ܐܸܢܹܝܢ 406 ܘܕܿܐܝܼܟܲܢ ܘܲܟܼܡܵܐ ܡܨܸܐ ܠܸܫܢܵܐ ܕܢܸܣܕܿܘܿܪ ܐܸܢܹܝܢ ܀ pb. 112 407 :ܕܲܗܘܲܝ̈ ܐܸܡ̇ܪܹܬܼ ܐܵܦ ܐ̄ܢܵܐ ܕܲܒܼܥܹ̇ܝܬܼ ܕܐܹܡܲܪ ܐܸܢܹܝܢ 408 ܘܣܵܟ̣ܵܐ ܕܲܒܼܗܹܝܢ ܠܵܐ ܣܦ݂ܲܩ ܪܸܥܝܵܢܝ ܠܲܡܣܲܝܵܟܼܘܼ ܀ 409 :ܣܲܓܿܝܼܐܘܼܬܗܹܝܢ ܥܒ݂ܲܕܼܬܲܢܝ ܕܐܸܒܼܥܹܐ ܒܥܵܬܼܵܐ ܕܲܒܼܗܹܝܢ 410 ܘܬܸܡ̇ܗܹܬܼ ܣܲܓܿܝܼ ܘܦܵܫܹ̇ܬܼ ܣܲܓܿܝܼ ܡ̣ܢ ܗܵܝ̇ ܕܲܒܼܥܹ̇ܝܬܼ ܀ 411 :ܪܟܼܘܼܒܼܵܐ ܕܡܸܠܹ̈ܐ ܪܟܼܒܼ݂ܘ ܚܘܼܫܵܒܲܝ̈ ܒܐܘܼܪܚܵܐ ܕܡܸܠܹ̈ܐ 412 ܘܲܨܒܹ̇ܝܬܼ ܕܐܸܪܕܼܵܐ ܒܲܠܘܝܼܬܼ ܡܸܠܹ̈ܐ ܠܘܵܬܼ ܣܘܼܥܪ̈ܵܢܹܐ ܀ 413 :ܙܢܲܝ̈ ܣܘܼܥܪ̈ܵܢܹܐ ܕܲܗܘ̤ܵܘ ܒܐܲܪܥܲܢ ܒܥܹ̇ܝܬܼ ܕܐܹܬܲܢܹܐ 414 ܘܕܲܚܙܹ̇ܝܬܼ ܐܸܢܘܿܢ ܕܲܟܼܡܵܐ ܣܒܼܝܼܣܝܼܢ ܚܸܓܼܪܬ̤ ܡܸܠܲܬܼܝ ܀ 415 :ܒܩܵܢܛܵܐ ܩܖܵܡܲܬ̤ ܐܵܦ ܗܝ̤ ܡܸܠܲܬܼܝ ܒܫܘܼܪܵܝ ܡܸܠܹܝ̈ܗ̇ 416 ܕܕܲܠܡܵܐ ܬܲܫܲܪ ܘܠܵܐ ܬܸܬܼܡܲܢܲܥ ܠܘܵܬܼ ܫܘܼܠܵܡܵܐ ܀ 417 :ܡܸܬܼܚܵܐ ܕܡܸܠܹ̈ܐ ܚܙܹ̇ܝܬܼ ܕܲܥܬܼܝܼܕܼܵܐ ܠܲܡܪܲܟܵܒܼܘܼ 418 ܘܩܸܢܛܹ̇ܬܼ ܣܲܓܼܝܼ ܡ̣ܢ ܪܘܼܟܵܒܼܵܐ ܕܲܙܢܲܝ̈ ܡܸܠܹ̈ܐ ܀ 419 :ܕܚܲܝ̈ܠܵܢ ܡܸܠܹ̈ܐ ܕܥܲܠ ܡܲܚ̈ܘܵܬܼܵܐ ܡ̇ܐ ܕܡܸܬܼܡܲܠ̈ܠܵܢ 420 ܘܠܵܐ ܦܫܝܼܩ ܫܲܪܒܵܐ ܕܩܲܫܝܘܼܬܼ ܢܸܓܼ̈ܕܲܐ ܠܲܡܬܲܢܵܝܘܼ ܀ 421 :ܩܛܝܼܪܵܐ ܕܢܸܓܼ̈ܕܹܿܐ ܣܲܪܕܲܢܝ ܕܐܹܡܲܪ ܡܹܐܡܪܵܐ ܕܢܸܓܼ̈ܕܹܿܐ 422 ܘܲܥܨ̣ܵܢܝ ܪܸܥܝܵܢܝ ܠܡܸܙܩܲܪ ܢܲܚܬܵܐ ܕܲܡܠܸܐ ܢܸܓܼ̈ܕܹܐ ܀ 423 :ܒܥܸܠܬܼܵܐ ܕܡܸܠܹ̈ܐ ܒܥܹ̇ܝܬܼ ܕܐܹܢܲܣܸܐ ܠܡܸܬܼܢܲܓܿܕܵܢܹ̈ܐ 424 ܕܠܵܐ ܢܸܬܼܦܲܪܣܘܼܢ ܠܥܹܝܢ ܚܲܙܵܝܹ̈ܐ ܕܚܵܙܹ̇ܿܝܢ ܫܲܦܝܼܪ ܀ 425 :ܚܵܙܝܲܝ̈ ܫܲܦܝܼܪ ܚܙܹ̇ܝܬܼ ܕܲܪܓܼܝܼܓܼܝܼܢ ܠܲܡܚܵܪ ܣܲܓܿܝܼ 426 ܘܨܵܪܹܬܼ ܨܲܠܡܵܐ ܕܲܙܢܲܝ̈ ܢܓܼ̈ܕܹܿܐ ܕܲܢܚܘܼܪܘܼܢ ܒܹܗ ܀ 427 :ܬܵܘ ܚܲܙܵܝܹ̈ܐ ܚܵܙܝܲܝ̈ ܫܲܦܝܼܪ ܚܙܵܘ ܡܲܚ̈ܘܵܬܲܢ 428 ܕܲܟܼܡܵܐ ܒܠܲܥܢܲܢ ܘܟܼܡܵܐ ܐܲܩܠܝܼܢ ܠܘܼܩܒܲܠ ܢܸܓܼܕܲܝ̈ܢ ܀ 429 :ܠܚܲܝܘܲܬܼ ܒܲܪܵܐ ܕܡ̇ܐ ܪܸܥܝܵܢܲܢ ܩܕܼܵܡ ܡܲܚ̈ܘܵܬܲܢ 430 ܕܲܡܟܲܒܿܫܝܼܢ ܠܵܗ̇ ܘܠܵܐ ܡܸܬܼܟܲܒܿܫܵܐ ܥܕܲܡ̇ܐ ܠܚܲܪܬܵܐ ܀ 431 :ܐܲܝܟ ܕܲܠܚܲܝܘ̄ܬܼܵܐ ܙܲܩܬ̣ܿܘܼܗ̇ ܢܸܓܼ̈ܕܹܿܐ ܠܡܲܪܵܚܘܼܬܿܢ 432 ܘܲܟܼܡܵܐ ܕܒܸܠܥܲܬ̤ ܬܘܼܒܼ ܐܸܬܼܚܲܝܠܲܬ̤ ܠܡܸܬܼܒܲܪܵܪܘ ܀ 433 :ܩܹܐܡ̇ܐ ܕܟܼܦܢܵܐ ܐܲܪܡܝܼ ܟܹܐܢܵܐ ܒܦܘܼܡ ܒܝܼܫܘܼܬܿܢ 434 ܘܗܝ̤ ܒܝܼܫܘܼܬܲܢ ܠܵܐ ܦܵܫ̣ ܪܲܗܛܵܗ̇ ܡ̣ܢ ܒܝܼ̈ܫܿܬܲܗ̇ ܀ 435 :ܒܥܲܪ̈ܩܹܐ ܕܟܹܐܦܹ̈ܐ ܡܲܬ̣ܚܹܗ ܠܦܲܓܼܪܲܢ ܩܕܼܵܡ ܡܲܚ̈ܝܵܘܵܬܼܵܐ 436 ܘܲܒܼܠܲܥ̣ ܣܲܓܿܝܼ ܘܐܲܩܠܝܼ ܣܲܓܿܝܼ ܐܲܝܟ ܠܵܐ ܚܵܐܹ̇ܫ ܀ 437 :ܠܵܐ ܚܵܫܘܿܫܵܐ ܗܘ̤ܵܐ ܚܵܫܘܿܫܵܐ ܒܥܸܕܲܢ ܚܲܫܹ̈ܐ 438 ܘܲܛ̣ܥܵܐ ܟܝܵܢܹܗ ܟܝܵܢܵܐ ܕܲܓܼܒܼܝܼܠ ܒܡܵܝܘܿܬܼܘܼܬܼܵܐ ܀ 439 :ܥܕܲܡ̇ܐ ܠܡܵܘܬܵܐ ܩܲܪܒܼܘܼܗܝ ܟܹܐܒܹ̈ܐ ܠܡܸܬܼܢܲܓܿܕܼܵܢܵܐ 440 ܘܙܵܥܲܬ̤ ܢܲܦܸܫܵܐ ܕܥܸܪܩܲܬ̤ ܢܸܦܩܲܬ̤ ܡ̣ܢ ܓܵܘ ܥܘܼܡܪܵܗ̇ ܀ 441 :ܒܗܲܝܟܲܠ ܦܲܓܼܪܵܐ ܝܲܬܿܝܼܒܼܵܐ ܗ̄ܘ̣ܵܬܼ ܡ̇ܪܬܵܐ ܢܲܦܸܫܵܐ 442 ܘܣܲܬܼ݂ܪܘܼܗܝ ܟܹܐܒܹ̈ܐ ܠܗܲܝܟܲܠ ܚܘܼܒܵܗ̇ ܘܥܸܪܩܲܬ̤ ܡܸܢܹܗ ܀ pb. 113 443 :ܘܐܸܢܗܘ̤ ܕܢܲܦܸܫܵܐ ܥܸܪܩܲܬ̤ ܡܸܢܲܢ ܒܥܸܕܵܢ ܢܸܓܼܕܲܝ̈ܢ 444 ܢܸܕܲܥ ܟܠܢܫ ܐܵܦ ܡܲܚ̈ܘܵܬܵܐ ܣܓܼܝܼ ܕܲܒܼܠܲܥ̄ܢ ܀ 445 :ܫܘܼܠܵܡ ܚܲܝܹ̈ܐ ܐܝܼܬܼܵܘܗܝ ܡ̇ܘܬܵܐ ܠܡܸܬܼܢܲܓܿܕܵܢܹ̈ܐ 446 ܡ̇ܕܹܝܢ ܓܲܠܝܵܐ ܗ̄ܝܼ ܕܩܲܫܝܵܐ ܡܚܘܿܬܲܢ ܡ̣ܢ ܡܲܚ̈ܘܵܬܼܵܐ ܀ 447 :ܘܲܟܼܒܲܪ ܐܵܡܲ݁ܪ ܐܲܝܢܵܐ ܕܫܵܡܲ݁ܥ ܡ̇ܘܬܵܐ ܗ̄ܝܼ 448 ܐܸܠܵܐ ܢܸܫܡܲܥ ܕܐܼܝܼܬܼ ܗ̄ܘ̣ ܡ̇ܘܬܵܐ ܕܒܼܝܼܫ ܡ̣ܢ ܡ̇ܘܬܵܐ ܀ 449 :ܒܝܼܫ ܗ̄ܘ̣ ܡ̇ܘܬܲܢ ܡ̣ܢ ܟܠ ܡ̇ܘܬܿܝܼ̈ܢ ܕܲܗܘ̤ܵܘ ܘܗܵܘܹ̇ܝܢ 450 ܕܲܚܙܲܝܢ ܡ̇ܘܬܲܢ ܘܐܲܟܸܿܢ ܡ̣ܝܼܬܼܢܲܢ ܡ̇ܘܬܵܐ ܥܦܝܼܦܵܐ ܀ 451 :ܚܙܵܬܼܵܐ ܕܡ̇ܘܬܵܐ ܚ̣ܙܲܝܢ ܒܲܬܼܒܲܥܬܼܵܐ ܕܥܲܠ ܪܘܼܪ̈ܚܵܢܲܢ 452 ܘܩܲܕܼܵܡ ܕܲܢܡܘܼܬܼ ܡ̣ܝܼܬܹܝܢ ܒܲܚܙܵܬܼܵܐ ܕܩܲܫܝܼܘܼܬܼ ܢܸܓܼܕܲܝ̈ܢ ܀ 453 :ܟܲܦܢܵܐ ܘܟܹܐܒܹ̈ܐ ܗܘ̤ܵܘ ܗܲܕܿܝܼ̈ܐܹܐ ܠܡܵܘܬܵܐ ܪܗܝܼܒܼܵܐ 454 ܘܲܪܗܸܛ ܒܲܠ̣ܥܲܢ ܐܲܝܟ ܬܲܢܝܼܢܵܐ ܠܚܲܝܘܲܬܼ ܫܸܢܵܐ ܀ 455 :ܒܟܼܠ ܐܸܣܟܹܿܡܝܼ̈ܢ ܒܲܠܥ̣ܵܗ̇ ܡ̇ܘܬܵܐ ܠܡܵܝܘܿܬܼܘܼܬܲܢ 456 ܘܛܵܟ ܠܵܐ ܦܵܐܹ̇ܫ ܣܪܝܼܕܼܵܐ ܕܚܲܝܹ̈ܐ ܡ̣ܢ ܐ̄ܢܵܫܘܼܬܿܢ ܀ 457 :ܟܠ ܢܸܣܝܘܿܢܝܼ̈ܢ ܥܒ݂ܲܪܘ ܥܲܠ ܢܲܦܸܫܲܢ ܩܲܢܝܲܬܼ ܚܲܝܹ̈ܐ 458 ܘܲܟܼܒܲܪ ܡ̇ܘܦܸܐ ܢܸܒܼܥ̇ܐ ܕܚܲܝܹ̈ܐ ܘܛܵܠܹ̇ܩ ܦܲܓܼܪܵܢ ܀ 459 :ܚܲܝܹ̈ܐ ܕܠܵܐ ܚܒܼܵܠ ܩܲܢܝܵܐ ܒܝܵܬܵܗ̇ ܡ̣ܢ ܒܵܪܘܿܝܵܐ 460 ܘܲܒܼܚ̣ܿܝܘܼܬܼܵܐ ܚܲܝ ܘܲܡܗܲܠܸܟ ܦܲܓܼܪܲܢ ܡܝܲܬܪܵܐ ܀ 461 :ܘܐܸܠܘܼܠܵܐ ܗܝ̤ ܢܵܛܪܵܐ ܗ̄ܘ̣ܵܬܼ ܠܲܢ ܒܚܹܝܠ ܚܲܝܘܼܬܼܵܗ̇ 462 ܗܵܘܹ̇ܐ ܗ̄ܘ̣ܵܐ ܠܹܗ ܓܸܢܣܵܐ ܕܐ̄ܢܵܫܵܐ ܐܲܝܟ ܠܵܐ ܐ̄ܢܵܫܵܐ ܀ 463 :ܐܲܝܟ ܠܵܐ ܐ̄ܢܵܫܵܐ ܗ̤ܘܲܝܢ ܒܲܬܼܒܲܥܬܼܵܐ ܕܟܼܠ ܣܘܼܪ̈ܚܵܢܝܼܢ 464 ܘܲܬܼܡܲܗ̣ܘ ܘܲܬܼܘܲܪܘ ܡܠܝܼܠܹ̈ܐ ܘܚܲܪ̈ܫܹܐ ܥܲܠ ܚܘܼܒܵܠܲܢ ܀ 465 :ܥܲܠ ܚܘܼܒܵܠܲܢ ܒܵܟܹ̇ܝܢ ܘܐܵܠܹ̇ܝܢ ܫܡܲܝܵܐ ܘܐܲܪܥܵܐ 466 ܘܲܚܢܲܢ ܒܲܠܚܘܼܕ ܠܵܐ ܪܓܼܝܼܫܝܼܢ ܚ̄ܢܲܢ ܒܚܘܼܒܵܠ ܓܸܢܲܣܲܢ ܀ 467 :ܥܲܠ ܣܲܢ̈ܝܵܬܲܢ ܟܡܝܼܪ ܕܘܼܒܪܵܐ ܕܩܲܝܛܵܐ ܘܣܲܬܼܘܐ 468 ܘܲܒܼܠܝܼܠ ܘܲܫܓܼܝܼܫ ܛܲܟܼܣܵܐ ܪܲܒܵܐ ܕܝܲܪ̈ܚܲܝ ܫܲܢ̄ܬܵܐ ܀ 469 :ܡܸܛܠܵܬܲܢ ܠܒܼܝܼܫܵܐ ܒܪܝܼܬܵܐ ܢܲܚ̈ܬܹܿܐ ܕܐܸܒܼܠܵܐ 470 ܘܲܡܒܲܟܿܝܵܐ ܠܲܢ ܐܲܝܟ ܕܲܠܡܝܼܬܼܵܐ ܕܡܲܪܝܼܪ ܐܸܒܼܠܹܗ ܀ 471 :ܡܲܪܝܼܪ ܐܸܒܼܠܵܐ ܕܝܘ̇ܡ ܥܵܩܵܬܼ̈ܢ ܡ̣ܢ ܟܠ ܐܸܒܼܠܝܼ̈ܢ 472 ܘܢܝܼܚ ܝܘܿܡ ܡ̇ܘܬܲܢ ܡ̣ܢ ܝܵܘ̈ܡ̇ܬܵܐ ܕܩܲܫܝܘܼܬܼ ܢܸܓܼܕܝ̈ܢ ܀ 473 :ܒܢܸܓܼ̈ܕܹܿܐ ܘܟܹܐܒܹ̈ܐ ܛܠܸ݂ܩܘ ܝܵܘ̈ܡ̇ܬܵܐ ܕܝܵܘ̈ܡܲܝ ܚܲܝܲܝ̈ܢ 474 ܘܠܲܝܬܿ ܒܹܗ ܒܥܘܼܡܪܲܢ ܝܵܘܡ̇ܐ ܕܲܫܠܸܐ ܡ̣ܢ ܥܵܩܵܬܼ̈ܐ ܀ 475 :ܡ̣ܢ ܛܲܠܝܘܬܲܢ ܪܲܒܿܝܘܼܢ ܟܹܐܒܹ̈ܐ ܐܲܟܼܡܵܐ ܕܲܟܼܬܼܝܼܒܼ 476 ܘܥܲܡ ܬܲܪܒܿܝܼܬܲܢ ܫ̣ܘܲܚ ܡܲܚ̈ܘܵܬܼܵܐ ܕܥܲܠ ܗܲܕܵܡܲܝ̈ܢ ܀ 477 :ܡ̣ܢ ܫܘܼܪܵܝܵܐ ܕܫܘܼܪܵܝ ܓܸܢܣܲܢ ܩܲܦܚܘܼܢ ܟܹܐܒܹ̈ܐ 478 ܘܐܲܝܟ ܗܲܕܿܝܼܐܵܐ ܗ̤ܘܲܝ̈ ܥܵܩܵܬܼ̈ܐ ܠܡܲܪܕܿܝܼܬܼ ܚܲܝܲܝ̈ܢ ܀ pb. 114 479 :ܚܲܝܹ̈ܐ ܣܡܝܼܡܹ̈ܐ ܚ̣ܝܲܝܢܲܢ ܒܐܲܪܥܵܐ ܡ̣ܢ ܝܘܿܡ ܕܲܗ̤ܘܲܝܢ 480 ܘܠܵܐ ܫܠܹܝܢ ܡܸܢܲܢ ܩܹܐܪ̈ܣܹܐ ܩ̈ܫܲܝܵܐ ܕܚܵܣܘܿܡܘܼܬܼܵܐ ܀ 481 :ܫܒܼܵܒܹ̈ܐ ܒܝܼܫܹ̈ܐ ܗܘ̤ܵܘ ܠܲܢ ܒܐܲܪܥܵܐ ܕܬܼܵܘܬܵܒܼܘܼܬܲܢ 482 ܘܒܲܙ̣ܘ ܡܲܪ̈ܗܵܛܲܢ ܘܫܲܥܒܸܿܕܼܘ ܚܲܝܲܝ̈ܢ ܒܥܲܡܠܵܐ ܩܲܫܝܵܐ ܀ 483 :ܒܫ̣ܒܼܝܵܐ ܕܥܵܘ̣ܠܵܐ ܕܲܒܼܪܘܼܗܝ ܠܓܸܢܣܲܢ ܣܵܢ̈ܐܹܐ ܕܓܸܢܣܲܢ 484 ܘܥܲܒܼ݂ܕܿܘܼܢ ܥܲܒܼ̈ܕܼܿܐ ܠܲܪ̈ܓܼܝܼܓܵܬܼܵܐ ܕܣܘܼܥܪ̈ܵܢܲܝܗܘܿܢ ܀ 485 :ܐܲܝܟ ܓܲܠܘܵܝܹ̈ܐ ܢܦܲܩܘ ܐܲܒܼܵܗܝ̈ܢ ܡ̣ܢ ܦܲܪܕܲܝܣܵܐ 486 ܘܲܥܡ݂ܲܪ ܒܐܲܪܥܵܐ ܕܡܲܠܝܵܐ ܟܘܼ̈ܒܹܿܐ ܘܟܹܐܒܹ̈ܐ ܘܡ̇ܘܬܵܐ ܀ 487 :ܫܸܒܼܝܵܐ ܕܡܲܝܵ̈ܐ ܐܲܩܸܦ ܐܸܢܘܿܢ ܐܵܦ ܡ̣ܢ ܗܵܕܹܐ 488 ܘܲܠܘܲܝ ܫܸܒܼܝܵܐ ܘܠܵܘ ܚܘܼܒܵܠܵܐ ܕܠܵܐ ܚܵܘܣܵܢܵܐ ܀ 489 :ܕܠܵܐ ܚܵܘܣܵܢܵܐ ܚܲܒܿܠܲܢ ܫܸܒܼܝܵܐ ܕܡ̇ܡܘܿܠ ܡܲܝܵ̈ܐ 490 ܘܓܲܪܦܹܗ ܠܥܲܦܪܵܐ ܕܪܘܼܟܵܒܼ ܦܲܓܼܪܲܝܢ ܘܛܲܡ̣ܪܹܗ ܒܐܲܪܥܵܐ ܀ 491 :ܫܸܒܼܝܵܐ ܠܫܸܒܼܝܵܐ ܝܲܒܸܿܠ ܝܲܗ̄ܒܲܢ ܡ̣ܢ ܚܲܕܼ ܠܲܐ̄ܚܪܹܝܢ 492 ܘܠܵܐ ܐܲܓܲܪ ܠܲܢ ܕܢܲܓܲܪ ܒܐܲܬܼܪܵܐ ܕܬܼܵܘܬܵܒܼܘܼܬܲܢ ܀ 493 :ܫܸܒܼܝܵܐ ܩܲܕܼܡ̇ܐ ܫܒܼ݂ܵܢ ܡ̣ܢ ܐܲܬܼܪܵܐ ܦܲܐܝܵܐ ܕܲܥܕܹܝܢ 494 ܘܲܬܼܪܲܝܵܢܵܐ ܡ̣ܢ ܝܵܪܬܿܘܼܬܵܐ ܕܡܲܠܝܵܐ ܟܘܼ̈ܒܹܿܐ ܀ 495 :ܫܸܒܼܝܵܐ ܐ̄ܚܪܹܢܵܐ ܫ̣ܒܼܵܢ ܡ̣ܢ ܒܵܒܹܠ ܒܝܲܕܼ ܦܘܼܠܵܓܼܵܐ 496 ܘܙܲܪܩܹܗ ܠܡܸܕܪܲܢ ܒܐܲܪܒܲܥܦܸܢ̈ܝܵܢ ܒܝܲܡܵܐ ܘܝܲܒܼܫܵܐ ܀ 497 :ܬܠܵܬܵܐ ܫܸܒܼܝܝܼ̈ܢ ܕܒܼܝܼܫ ܚܲܕܼ ܡ̣ܢ ܚܲܕܼ ܫ̣ܒܼܵܐܘܼܗܝ ܠܓܸܢܣܲܢ 498 ܘܚܲܕܼ ܡ̣ܢ ܓܸܢܣܲܢ ܚܪܵܪ ܓܸܢܣܲܢ ܡ̣ܢ ܥܲܒܼܕܿܘܼܬܼܵܐ ܀ 499 :ܥܝܵܕܼܵܐ ܒܝܼܫܵܐ ܥܬܸܩ ܒܹܗ ܒܓܸܢܣܲܢ ܡ̣ܢ ܫܘܼܪܵܝܵܐ 500 ܘܗܲܢܝܼܐܵܐ ܠܹܗ ܥܲܒܼܕܿܘܼܬܼ ܥܲܒܼ̈ܕܹܿܐ ܡ̣ܢ ܚܹܐܪܘܼܬܼܵܐ ܀ 501 :ܠܵܘ ܚܹܐܪܘܼܬܼܵܐ ܕܦܘܼܠܚܵܢ ܥܲܒܼ̈ܕܹܿܐ ܪܚܸܡ̣ ܒܲܪ ܚܹܐܪܹ̈ܐ 502 ܘܠܵܐ ܪܵܓܵܐ ܠܹܗ ܕܲܢܪܝܼܡ ܪܹܫܹܗ ܡ̣ܢ ܥܲܒܼܕܿܘܼܬܼܵܐ ܀ 503 :ܗܵܢܵܐ ܥܝܵܕܼܵܐ ܥܲܒܼ݂ܕܹܿܗ ܕܢܸܒܼܠܲܥ ܢܸܓܼ̈ܕܹܿܐ ܩ̈ܫܲܝܵܐ 504 ܘܗܵܐ ܡܸܬܼܒܲܣܒܲܣ ܒܲܚܒܼܵܪ̈ܵܬܼܵܐ ܕܦܲܓܼܪܵܐ ܘܢܲܦܫܵܐ ܀ 505 :ܒܦܲܓܼܪܹܗ ܘܢܲܦܫܹܗ ܡܲܣܓܹܿܐ ܚܵܛܹ̇ܐ ܘܡܲܣܓܸܿܐ ܒܵܠܲܥ 506 ܘܲܡܬܼܝܼܚ ܟܠܢܵܫ ܠܢܸܓܼ̈ܕܹܿܐ ܩ̈ܫܲܝܵܐ ܘܠܵܐ ܡܸܬܼܟܲܚܲܕܼ ܀ 507 :ܥܲܡܹܗ ܗܲܠܟܲܬ̤ ܩܲܫܝܘܼܬܼ ܢܸܓܼܕܿܘ̈ܗܝ ܒܟܼܠܗܘܿܢ ܕܵܪܹ̈ܐ 508 ܘܝܲܬܿܝܼܪܵܐܝܼܬܼ ܒܕܵܪܪ̈ܲܢ ܕܝܼܠܲܢ ܥܲܦ݂ ܡܲܚ̈ܘܵܬܼܵܐ ܀ 509 :ܢܸܓܼ̈ܕܹܿܐ ܩ̈ܫܲܝܵܐ ܡ̣ܢ ܟܠ ܓܲܒܿܝܼ̈ܢ ܗܵܐ ܟܪܝܼܟܼܝܼܢ ܠܲܢ 510 ܘܗܵܐ ܒܵܠ̇ܥܝܼܢܲܢ ܘܠܵܐ ܡܸܣܬܲܝܟܼܝܼܢ ܙܢܲܝ̈ ܒܝܼ̈ܫܵܬܲܢ ܀ 511 :ܕܠܵܐ ܡܸܢܝܵܢܵܐ ܣܓܼܝܼ ܒܝܼ̈ܫܵܬܲܢ ܘܲܫܟܼܝܼܪ̈ܵܬܲܢ 512 ܘܲܕܠܵܐ ܣܵܟܼܵܐ ܪܲܒܲܬܼ ܢܲܓܿܕܼܘܼܗ̇ ܠܡܲܪܲܚܘܼܬܲܢ ܀ 513 :ܩܫܹܝܢ ܗ̄ܘ̣ܵܘ ܢܸܓܼܕܲܝ̈ܢ ܡ̣ܢ ܟܠ ܢܸܓܼ̈ܕܹܿܐ ܕܲܒܼܟܼܠ ܕܵܪ̈ܝܼܢ 514 ܘܠܲܝܬܿ ܗ̄ܘ̣ܵܐ ܐܲܦܬܼܵܐ ܒܹܝܬܼ ܚܲܕܼ ܠܲܐ̄ܚܪܹܝܢ ܒܪܸܡܙܵܐ ܀ 515 :ܪܸܡܙܵܐ ܟܲܣܝܵܐ ܟܲܢܸܫ ܐܸܢܘܿܢ ܠܘܲܥܕܑܵܐ ܕܚܲܝܲܝ̈ܢ 516 ܘܐܲܠܸܦ ܐܸܢܘܿܢ ܠܡܸܥܒܲܕܼ ܩܹܐܪܣܵܐ ܥܲܡ ܒܝܼܫܘܼܬܲܢ ܀ pb. 115 517 :ܩܹܐܪܣܵܐ ܪܲܒܵܐ ܥܒ݂ܲܕܼܘ ܘܣܵܡ̣ܘ ܥܲܡܲܢ ܢܸܓܼ̈ܕܹܿܐ ܕܥܲܡܲܢ 518 ܘܒܲܙܥܘܼܗܝ ܠܥܲܡܲܢ ܒܓܹܐܪܹ̈ܐ ܫܢܝܼܢܹ̈ܐ ܕܟܲܦܢܵܐ ܘܨܲܗܝܵܐ ܀ 519 :ܐܲܝܟ ܡܲܫܪܝܼܬܼܵܐ ܚܲܕܼܪܘܼܢ ܟܹܐܒܹ̈ܐ ܡ̣ܢ ܟܠ ܓܲܒܿܝܼ̈ܢ 520 ܘܠܵܐ ܦܠ݂ܲܛ ܓܘܼܫܡܵܐ ܕܠܵܐ ܐܸܬܼܡܚܝܼ ܒܲܚܒܼܵܪ̈ܬܼܵܐ ܀ 521 :ܟܠܹܗ ܓܘܼܫܡܲܢ ܗܘ̤ܵܐ ܚܲܕܼ ܫܘܼܚܢܵܐ ܕܠܵܐ ܚܘܼܠܡܵܢܵܐ 522 ܘܢܸܕܲܬ̤ ܡܸܢܹܗ ܠܐܵܣܵܘ̈ܬܼܵܐ ܘܠܵܐ ܬܘܼܒܼ ܥܲܨܒܿܘܼܗܝ ܀ 523 :ܟܲܦܢܵܐ ܘܟܹܐܒܹ̈ܐ ܒܲܣܒܸܿܣܘ ܦܲܓܼܪܹܗ ܘܕܼܵܘܸܕܼܘ ܢܲܦܫܹܗ 524 ܘܐܵܘܦܝܼܘ ܚܲܝܵܘ̈ܗܝ ܡ̣ܢ ܡ̇ܙܘܿܢܵܐ ܘܡ̣ܢ ܚܲܝܘܼܬܵܐ ܀ 525 :ܠܲܝܬܿ ܚܲܝܘܼܬܼܵܐ ܒܚܲܝܹ̈ܐ ܕܐ̄ܢܵܫܵܐ ܘܠܵܐ ܟܠ ܟܠܹܗ 526 ܘܐܸܢ ܐܝܼܬܼ ܠܵܐ ܐܝܼܬܼ ܕܗܵܐ ܠܲܝܬܿ ܡܸܕܹܿܡ ܕܲܡܩܝܼܡ ܚܲܝܗܹܐ ܀ 527 :ܓܡ݂ܲܪ ܡ̇ܙܘܿܢܵܐ ܕܲܡܩܝܼܡ ܚܲܝܹ̈ܐ ܡ̣ܢ ܦܘܼܡ ܚܲܝܹ̈ܐ 528 ܘܲܬܼܠܹܝܢ ܚܲܝܘ̈ܗܝ ܕܲܟܼܪܸܐ ܚܲܝܹ̈ܐ ܩܕܼܵܡ ܒܵܒܼܵܬܹ̈ܗ ܀ 529 :ܠܫܘܼܠܵܡ ܚܲܝܘ̈ܗܝ ܚܵܐܲ݁ܪ ܟܠܢܵܫ ܡܙܲܠܗܲܙ ܚܲܝܹ̈ܐ 530 ܘܪܵܢܹ̇ܐ ܘܕܵܚܹ̇ܠ ܕܕܲܠܡܵܐ ܩܸܪܒܲܬ̤ ܦܪܵܬܼܘܿܙܡܝܹܗ ܀ 531 :ܒܪܲܡܫܵܐ ܐܵܡܲ݁ܪ ܕܐܵܪܵܐ ܐܝܼܬܿܝܼ ܥܕܲܡ̇ܐ ܠܨܲܦܪܵܐ 532 ܘܥܸܕܼܵܢ ܨܲܦܪܵܐ ܡܫܲܐܸܠ ܠܚܲܒܼܪ݁ܵܘܗܝ ܕܲܥܪܵܒܼ ܫ̣ܡܫܵܐ ܀ 533 :ܥܲܡܹܗ ܕܝܵܘܡ̇ܐ ܪܵܕܹܐ ܒܪܸܢܝܵܐ ܕܥܲܠ ܥܵܩܵܬܹ̈̄ܐ 534 ܕܡܸܢܵܝܵܢ ܫܵܥܑܹ̈ܐ ܕܠ݂ܠܲܝ ܐܝܼܡܵܡ ܥܦܝܼܦ ܫܘܼܢܵܩܹܗ ܀ 535 :ܘܵܝܠܹܗ ܠܕܵܘܝܵܐ ܟܝܵܢ ܒܲܪܢܵܫܵܐ ܕܲܟܼܡܵܐ ܡܕܵܘܲܕܼ 536 ܘܲܟܼܡܵܐ ܣܒܼܝܼܣܝܼܢ ܚܲܫܲܝ̈ ܢܲܦܸܫܹܗ ܘܟܹܐܒܲܝ̈ ܦܲܓܼܪܹܗ ܀ 537 :ܘܵܝܵܐ ܠܘܹܐ ܠܹܗ ܠܲܕܼܘܸܐ ܡ̣ܢ ܟܠ ܒܟܼܠܗܘܿܢ ܕܵܪܹ̈ܐ 538 ܘܝܲܬܿܝܼܪ ܕܵܘܹܐ ܒܕܼܵܪܲܢ ܕܝܼܠܲܢ ܡ̣ܢ ܟܠ ܕܵܪ̈ܝܼܢ ܀ 539 :ܒܕܵܪܲܢ ܕܝܼܠܲܢ ܕܵܘܹܐ ܘܲܡܥ̇ܩ ܟܠ ܒܲܪܢܵܫܵܐ 540 ܘܲܥܦܝܼܦ ܘܵܝܵܐ ܘܣܲܓܿܝܼ ܢܸܓܼܕܵܐ ܘܪܲܒ ܫܘܼܢܵܩܵܐ ܀ 541 :ܪܲܒܿ ܫܘܼܢܵܩܵܐ ܕܲܚܙ݂ܲܝ̈ ܥܲܝܢܲܝ̈ܢ ܘܲܫ̣ܡܲܥ ܐܸܕܢܲܝ̈ܢ 542 ܪܲܕܼܦܘ̣ܢ ܟܹܐܒܹ̈ܐ ܘܪܲܕܼܦܘܼܢ ܐ̄ܢܵܫܵܐ ܬܿܪܬܹܿܝܢ ܒܲܚܕܵܐ ܀ 543 :ܣܒ݂ܲܠ ܒܲܪܢܵܫܲܢ ܡܲܪܝܼܪ ܝܲܨܪܵܐ ܫܸܒܼܝܵܐ ܕܟܼܦܢܵܐ 544 ܘܫܸܒܼܝܵܐ ܕܐ̄ܢܵܫܵܐ ܕܒܼܝܼܫ ܡ̣ܢ ܟܲܦܢܵܐ ܘܡ̣ܢ ܟܠ ܒܝܼ̈ܫܵܢ ܀ 545 :ܩܫܹܐ ܫܸܒܼܝܵܐ ܕܲܒܼܢܲܝ̈ ܗܵܓܼܵܪ ܐܵܦ ܡ̣ܢ ܟܲܦܢܵܐ 546 ܘܡܲܪܝܼܪܵܐ ܗ̄ܘ̣ܵܬܼ ܡܚܘܿܬܼܵܐ ܕܲܒܼܗܘܿܢ ܡ̣ܢ ܟܘܼܪ̈ܗܵܢܹܐ ܀ 547 :ܠܡܸܪܲܬܼ ܚܸܘܝܵܐ ܕܵܡ̇ܝܵܐ ܡܚܘܿܬܼܵܐ ܕܲܒܼܢܵܘ̈ܗܝ ܕܐܲܒܼܪܵܡ 548 ܘܛܵܟ ܐܝܼܬܼ ܦܘܼܪܣܵܐ ܠܡܸܪܲܬܼ ܪ̈ܲܚܫܵܐ ܘܲܠܗܘܿܢ ܠܵܐ ܐܝܼܬܼ ܀ 549 :ܠܘܲܝ ܕܹܝܢ ܠܵܐ ܩܪܹܝܢ ܒܫܸܡ ܐܲܒܼܪܵܗܵܡ ܒܢܲܝ̈ ܡܸܨܪܵܝܬܵܐ 550 ܕܗܵܐ ܡܸܬܼܥܲܕܠܝܼܢ ܠܵܐ ܝܵܕܼܘܿܥ̈ܿ ܒܗܵܢ ܟܘܼܢܵܝܵܐ ܀ 551 :ܠܘܲܝ ܠܵܐ ܩ̣ܪܸܒܼ ܗ̄ܘ̣ܵܐ ܗܵܘ̇ ܙܲܕܿܝܼܩܵܐ ܠܗܵܝ̇ ܫܵܛܝܼܬܼܵܐ 552 ܟܒܲܪ ܫܵܠܹ̇ܝܢ ܗ̄ܘ̣ܵܘ ܡܸܬܼܟܲܫܠܵܢܹ̈ܐ ܡ̣ܢ ܟܸܫܠܲܝ̈ܗܘܿܢ ܀ pb. 116 553 :ܠܘܲܝ ܐܝܼܬܼ ܗ̄ܘ̣ܵܐ ܠܗܘܿܢ ܫܡܵܐ ܢܘܼܟܼܪܵܝܵܐ ܕܢܘܼܟܼܪܵܝ ܠܐܒܼܪܵܡ 554 ܡܸܬܼܟܲܢܹܝܢ ܗ̄ܘ̣ܵܘ ܒܲܥܪܝܼܪ̈ܵܝܹܐ ܐܲܝܟ ܐܲܒܼܘܼܗܘܿܢ ܀ 555 :ܥܪܵܕܼܵܐ ܕܒܲܪܵܐ ܩܪ̣ܵܝܗܝ ܒܵܪܘܿܝܵܐ ܠܪܹܫ ܫܲܪ̈ܵܒܼܵܬܼܗܘܿܢ 556 ܕܝܵ̇ܕܲܥ ܗ̄ܘ̣ܵܐ ܠܹܗ ܕܠܵܐ ܡܨܸܐ ܢܵܛ̇ܲܪ ܛܲܟܼܣܵܐ ܕܐ̄ܢܵܫܵܐ ܀ 557 :ܚܲܝܘܲܬܼ ܒܲܪܢܵܫ ܦܐܹܐ ܕܢܸܬܼܟܲܢܹܐ ܒܲܪ ܡܸܨܪܵܬܵܐ 558 ܘܲܢܪܝܼܡ ܡܸܢܹܗ ܫܡܵܐ ܕܐܲܒܼܪܵܗܵܡ ܪܵܚܹ̇ܡ ܐ̄ܢܵܫܵܐ ܀ 559 :ܪܵܚܹ̇ܡ ܐ̄ܢܵܫܵܐ ܘܪܵܚܹ̇ܡ ܡ̇ܪܹܗ ܐܝܼܬܼܵܘܗܝ ܐܲܒܼܪܵܡ 560 ܡ̇ܕܹܝܢ ܙܵܕܹܩ ܕܟܹܐܢܹ̈ܐ ܢܸܗܘܘܿܢ ܒܢܲܝ̈ܵܐ ܠܟܹܐܢܵܐ ܀ 561 :ܠܵܐ ܥܕܝܼܠ ܐܲܒܼܪܵܡ ܕܐܵܘܠܸܕܼ ܒܝܼܫܹ̈ܐ ܘܒܲܥܪܝܼܪ̈ܵܝܹܐ 562 ܒܝܼܫܹ̈ܐ ܥܕܝܼܠܝܼܢ ܕܠܵܐ ܪܕܼܵܘ ܒܐܘܼܪܚܵܐ ܕܚܘܼܒܹܿܗ ܕܐܲܒܼܪܵܡ ܀ 563 :ܐܵܦ ܐ̄ܢܵܐ ܕܥܸܕܠܹ̇ܬܼ ܠܟܼܠ ܥܸܕܠܵܝܝܼ̈ܢ ܫܵܘ̇ܝܵܐ ܡܸܠܲܬܼܝ 564 ܕܐܸܡ̇ܪܹܬܼ ܕܲܠܘܲܝ ܠܵܐ ܩ̣ܪܸܒܼ ܐܲܒܼܪܵܡ ܠܗܵܓܼܵܪ ܐܲܡܬܵܐ ܀ 565 :ܠܵܘ ܐܲܒܼܵܗܹ̈ܐ ܡܨܸܝܢ ܕܲܢܨܘܼܪܘܼܢ ܚܹܐܪܘܼܬܼ ܢܲܦܸܫܵܐ 566 ܚܸܐܪܘܼܬܼ ܢܦܸܫܵܐ ܗ̄ܝ̣ ܕܥܵܒܼ݁ܕܵܐ ܟܹܐܢܹ̈ܐ ܐܵܦ ܥܵܘܵܠܹ̈ܐ ܀ 567 :ܠܥܵܕܼܠܲܝ̈ ܐܵܒܼܪܵܡ ܐܸܡ̇ܪܹܬܼ ܗܵܠܹܝܢ ܐܵܦ ܐܵܡܲ݁ܪ ܐ̄ܢܵܐ 568 ܕܐܸܢ ܗܵܓܼܪ̈ܵܝܹܐ ܫܒ̣ܵܐܘܼܢ ܡܲܓܵܢ ܐ̄ܚܪܸ̈ܢܹܐ ܠܡܵܢܵܐ ܀ 569 :ܠܡܵܐ ܩܕܹܫܵܝܹ̈ܐ ܐ̄ܚܝܵܢܹ̈ܐ ܐܸܢܘܿܢ ܕܲܒܼܢܲܝ̈ ܗܵܓܵܪ 570 ܕܒܲܙ̣ܘܼܗܝ ܠܥܵܠܡܵܐ ܒܸܙܬܼܵܐ ܕܥܵܠ̈ܒܵܐ ܠܕܹܐܫܡܲܥܠܵܝܹ̈ܐ ܀ 571 :ܠܡܵܐ ܡ̣ܢ ܐܲܒܼܪܵܡ ܪܕܼܵܐ ܚܘܼܒܵܠܵܐ ܕܲܛܡܘܼܪ̈ܝܹܐ 572 ܕܥܲܒܼ݂ܕܿܘܼܗ̇ ܠܐܵܬܼܘܪ ܐܵܡ̇ܐ ܕܡܲܠ̈ܟܹܿܐ ܐܲܝܟ ܨܵܕܼܝܼܬܼܵܐ ܀ 573 :ܠܵܐ ܟܹܝܬܼ ܢܸܥܕܿܘܿܠ ܠܵܐ ܠܐܲܒܼܵܗܹ̈ܐ ܠܲܒܼܢܲܝܵ̈ܐ 574 ܐܸܠܵܐ ܠܝܲܨܪܵܐ ܕܦܵܪܹܫ ܬܲܪܬܹܿܝܢ ܛܵܒܼܝܼܫܵܬܵܐ ܀ 575 :ܠܝܲܨܪܵܐ ܒܝܼܫܵܐ ܕܒܼܢܲܝ̈ ܗܵܓܼܵܪ ܢܸܥܝܕܿܘܿܠ ܟܠܫܵܥ 576 ܘܝܲܬܿܝܼܪܵܐܝܼܬܼ ܠܥܲܡܵܐ ܕܲܩܕܸܫ ܚܲܝܘ̄ܬܼܵܢܵܝܹ̈ܐ ܀ 577 :ܠܵܐ ܒܲܥܪܝܼܪܵܝ ܟܝܵܢ ܚܲܝ̈ܘܵܬܼܵܐ ܐܲܝܟ ܩܕܹܫܵܝܵܐ 578 ܘܗܵܐ ܬܲܚܘܝܼܬܵܐ ܕܠܵܐ ܡܫܲܝܢܘܼܬܼܗܘܿܢ ܒܡܸܕܹܿܡ ܕܲܣܥ݂ܲܪܘ ܀ 579 :ܠܵܐ ܣܥ݂ܲܪܘ ܚܲܗܠܹ̈ܐ ܕܲܒܼܢܲܝ̈ ܗܵܓܼܵܪ ܐܲܟܼܡܵܐ ܕܲܣܥ݂ܲܪܘ 580 ܘܠܵܐ ܛܡܘܼܪ̈ܝܹ̈ܐ ܥܒܲܕܼܘ ܚܘܼܒܵܠܵܐ ܕܚܲܒܸܿܠܘ ܗܵܢ̇ܘܿܢ ܀ 581 :ܥܲܒ݂ܲܪ ܚܘܼܒܵܠܗܘܿܢ ܠܲܕܿܬܲܚܝܡܢܵܝܹ̈ܐ ܘܠܲܕܼܓܼܪ̈ܒܿܝܹ̈ܐ 582 ܘܛܵܟ ܠܲܝܬܼܿ ܒܝܼܫܬܿܐ ܕܦܵܚ̇ܡܵܐ ܠܒܼܝܼܫܬܵܐ ܕܲܣܥ݂ܲܪܘ ܒܐܲܪܥܲܢ ܀ pb. 117 583 :ܒܗܵܠܹܝܢ ܢܸܓ̈ܿܕܹܿܐ ܒܸܠܥܲܬ̤ ܐܲܪܥܲܢ ܡܲܠܝܲܬܼ ܥܵܘ̣ܠܵܐ 584 ܘܲܒܼܥܵܘܵܠܹ̈ܐ ܕܒܼܝܼܫܝܼܢ ܡܸܢܲܢ ܗܘ̤ܵܬܼ ܡܲܪܕܿܘܼܬܲܢ ܀ 585 :ܒܐܝܼܕܵܐ ܕܒܼܝܼܫܹ̈ܐ ܕܒܼܝܼܫܝܼܢ ܡ̣ܢܲܢ ܪܕܼܵܢ ܒܵܪܘܿܝܵܐ 586 ܕܡ̇ܐ ܕܡܸܬܼܢܲܓܲܕܼ ܥܵܘ̣ܠܵܐ ܒܥܵܘ̣ܠܵܐ ܢܸܒܼܣܘܿܪ ܗܘ̤ ܠܹܗ ܀ 587 :ܬܠܵܬܼܵܐ ܫܲܒܼܛܝܼ̈ܢ ܐܲܪܝܼܡ ܥܵܘ̣ܠܵܐ ܥܲܠ ܒܝܼܫܘܼܬܲܢ 588 ܐܝܼܫܡܲܥܠܵܝܹ̈ܐ ܘܲܛܡܘܼܪ̈ܝܹܐ ܘܲܩܕܹܫܵܝܹ̈ܐ ܀ 589 :ܬܠܵܬܼ ܐܸܣܩܹܛܝܼ̈ܢ ܒܸܠܥܲܬ̤ ܢܲܦܸܫܲܢ ܡܲܠܝܲܬܼ ܚܘܼܬܼܪܵܐ 590 ܡ̣ܢ ܫܲܪ̈ܒܼܵܬܼܵܐ ܬܠܵܬܼ ܕܲܚܬܝܼܪ̈ܵܢ ܝܲܬܿܝܼܪ ܡܸܢܲܢ ܀ 591 :ܟܹܐܝܢ ܒܵܪܘܿܝܵܐ ܕܢܲܓܿܕܹܗ ܠܥܵܘ̣ܠܲܢ ܒܝܲܕܼ ܥܵܘ̈ܠܹܐ 592 ܘܟܹܐܢܵܐ ܕܢܵܘܕܹܿܐ ܕܐܹܝܢ ܟܹܐܢܵܐܝܼܬܼܿ ܗܘ̤̇ܬܼ ܡܲܪܘܼܬܲܢ ܀ 593 :ܠܝܘܼܬܼܪܵܢ ܢܲܓܿܕܿܢ ܗܵܘ̇ ܦܘܼܩܕܵܢܵܐ ܕܫܲܠܝܼܛ ܥܲܠ ܟܠ 594 ܘܚܲܟܿܝܼܡܵܐܝܼܬܼ ܓܲܙܪܹܗ ܠܟܹܐܒܼܵܐ ܕܲܫܟܼܝܼܪ̈ܵܬܲܢ ܀ 595 :ܬܵܘ ܟܹܝܬܼ ܢܵܘܕܹܿܐ ܠܗܵܝ̇ ܝܼܕܲܥܬܼܵܐ ܕܥܸܨܒܲܬ̤ ܟܹܐܒܲܝ̈ܢ 596 ܘܲܢܩܲܪܸܒܼ ܠܵܗ̇ ܕܵܫܢܹ̈ܐ ܕܫܘܼܒܼܚܵܐ ܕܲܪܕܼܵܬ̤ ܘܲܩܢܵܬ̤ ܀