Narsai: On Supplication - ܕܒܼܵܥܘܼܬܼܵܐ ܘܲܕܼܨܵܘܡܵܐ

1 :ܐܵܣܝܵܐ ܕܐܲܣܝܼ ܟܹܐܒܹܗ ܕܓܸܢܣܲܢ ܒܣܲܡܵܐ ܕܪ̈ܲܚܡܵܘܗܝ 2 ܚܘܼܢ ܚܵܘ̈ܒܵܬܲܢ ܐܲܝܟ ܕܲܡܥ̇ܕܬܿ ܠܡܸܣܥܲܪ ܨܹܐܕܲܝܢ ܀ 3 :ܛܵܒܼܵܐ ܕܚܵܢ̣ܵܗ̇ ܠܒܼܝܼܫܘܼܬܼ ܝܲܨܪܲܢ ܟܲܕܼ ܠܵܐ ܫܸܐܢ̣ܵܝܗܝ 4 ܓܡܘܿܪ ܨܸܒܼܝܵܢܵܐ ܕܒܲܣܝܼܡܘܼܬܼܵܟ ܒܦܘܼܢܵܝ ܚܲܝܲܝ̈ܢ ܀ 5 :ܡܲܠܟܵܐ ܕܦܲܪܩܲܢ ܡ̣ܢ ܥܲܒܼܕܿܘܼܬܼܵܐ ܕܒܼܝܼܫܵܐ ܘܡ̇ܘܬܵܐ 6 ܦܪܘܿܩ ܠܲܟܼܝܵܢܲܢ ܡ̣ܢ ܢܸܟܼܝܵܢܹ̈ܐ ܕܚܵܘܒܲܬܼ ܚܵܘܒܵܘ̈ܗܝ ܀ pb. 118 7 :ܒܪܵܐ ܕܐܲܠܵܗܵܐ ܕܐܲܦܢܝܼ ܫܒܼܝܼܬܲܢ ܡ̣ܢ ܫܲܒܵܝܵܐ 8 ܚܵܪܵܪ ܚܲܝܲܝ̈ܢ ܕܠܵܐ ܬܘܼܒܼ ܢܸܦܸܢܹܐ ܠܥܲܒܼܕܿܘܼܬܼ ܒܝܫܵܐ ܀ 9 :ܒܢܝܼܪܵܐ ܕܡ̇ܘܬܵܐ ܟܕܝܼܢ ܗ̄ܘ̣ܵܐ ܓܸܢܣܲܢ ܡ̣ܢ ܫܘܼܪܵܝܵܐ 10 ܘܡ̣ܝܼܬܼ ܚܲܕܼ ܡܸܢܲܢ ܘܬܲܒܿܪܹܗ ܡܸܢܲܢ ܠܢܝܼܪܹܗ ܕܡ̇ܘܬܵܐ ܀ 11 :ܚܲܝܠܵܐ ܕܚܲܣܢܹܗ ܠܒܼܝܼܫܵܐ ܘܡ̇ܘܬܿܐ ܒܝܲܕܼ ܒܲܪ ܓܸܢܣܲܢ 12 ܗܲܒܼ ܒܲܢ ܚܲܝܠܵܐ ܠܡܸܬܼܚܲܝܵܠܘܼ ܒܐܵܓܼܘܿܢ ܥܲܡܠܹ݁̈ܐ ܀ 13 :ܒܐܵܓܼܘܿܢ ܥܲܡܠܹ̈ܐ ܕܚܲܫܲܝ̈ ܦܲܓܼܪܵܐ ܪܡ݂ܝܢܲܢ ܟܠܫܲܥ 14 ܘܠܲܝܬܿ ܥ̣ܕܵܢܵܐ ܕܫܵܠܹ̇ܐ ܩܹܐܪܣܵܐ ܕܪ̈ܓܼܝܼܓܼܵܬܲܢ ܀ 15 :ܢܸܒܥܵܐ ܕܚܲܫܹ̈ܐ ܒܲܥܪܝܼܪ̈ܝܹܐ ܪܵܕܹܐ ܡܸܢܲܢ 16 ܘܲܡܕܼܵܘܕܼ ܠܵܗ̇ ܠܡܲܪܕܿܝܼܬܼ ܚܲܝܲܝ̈ܢ ܒܲܫܓܼܝܼܫܘܼܬܹܗ ܀ 17 :ܐܲܝܟ ܥܲܠܥܵܠܵܐ ܫܓܼܝܼܫ ܚܘܼܬܼܚܵܬܼܵܐ ܕܲܡܕܲܝܲܪ ܒܲܢ 18 ܘܕܲܠܲܚ ܢܲܦܫܲܢ ܐܲܟܼܡܵܐ ܕܕܼܵܠܲܚ ܡܲܫܒܼܵܐ ܠܝܲܡܵܐ ܀ 19 :ܠܝܲܡܵܐ ܕܵܡܹ̇ܐ ܟܲܕܼ ܡܸܬܼܒܲܥܪܲܪ ܒܲܢܦܝܼܚܘܼܬܹܗ 20 ܘܝܵܗܹ̇ܒܼ ܩܵܠܵܐ ܕܲܪ݁ܓܼܝܼܓܼܵܬܹܗ ܐܲܝܟ ܥܲܠܥܵܠܵܐ ܀ 21 :ܒܲܕܼܡܘܼܬܼ ܓܲܠܠܹ̈ܐ ܪܵܗ̇ܛܝܼܢ ܚܹܐܦܵܘ̈ܗܝ ܒܡܸܨܥܲܬܼ ܐ̄ܢܵܫܵܐ 22 ܘܙܵ̇ܥܝܼܢ ܡܸܢܹܗ ܦܲܓܼܪܵܐ ܘܢܲܦܫܵܐ ܕܠܵܐ ܢܸܬܿܛܲܒܿܥܘܼܢ ܀ 23 :ܝܲܡܵܐ ܕܲܬܼܪܹܝܢ ܚܘܼܬܼܚܵܬܼ ܦܲܓܼܪܵܐ ܕܲܫܪܹܐ ܒܦܲܓܼܪܲܢ 24 ܘܐܲܝܟ ܥܲܠܥܵܠܵܐ ܡܙܝܼܥ ܠܵܗ̇ ܠܐܸܠܦܵܐ ܕܦܲܓܼܾܪܵܢܘܼܬܲܢ ܀ 25 :ܒܝܲܡܹܗ ܫܓܼܝܼܫܵܐ ܪܵܕܼܝܵܐ ܐܸܠܦܵܐ ܕܡܵܝܘܿܬܼܘܼܬܲܢ 26 ܘܲܡܙܲܥܙܲܥ ܠܵܗ̇ ܩܸܢܛܵܐ ܕܪ̈ܘܼܚܵܘܗܝ ܥܲܙܝܼ̈ܙܵܬܼܵܐ ܀ 27 :ܡ̣ܢ ܢܸܟܼܝܵܢܵܘ̈ܗܝ ܩܵܢܹ̇ܛ ܓܸܢܣܲܢ ܡܠܸܐ ܢܸܟܼܝܢܹ̈ܐ 28 ܘܐܲܡܝܼܢ ܒܵܥܹ̇ܐ ܥܒܵܬܼܵܐ ܕܡܲܠܝܵܐ ܚܢܵܢܵܐ ܘܪ̈ܲܚܡܹܐ ܀ 29 :ܚܢܵܢܵܐ ܘܪ̈ܲܚܡܹܐ ܫܵܐܹ̇ܠ ܟܠܢܵܫ ܟܝܵܢ ܡ̇ܝܘܿܬܹ̈ܐ 30 ܕܕܲܡ ܢܸܬܼܦܲܨܸܐ ܡ̣ܢ ܢܸܟܼܝܵܢܹ̈ܐ ܕܐܲܡܝܼܢܝܢ ܠܹܗ ܀ 31 :ܙܢܲܝ̈ ܢܸܟܼܝܵܢܵܘ̈ܗܝ ܚܙܹ̇ܝܬܼ ܕܲܣܒܼܝܼܣܝܼܢ ܣܲܓܿܝܼܵܐܝܼܬܼ 32 ܘܪܲܟܿܒܹܬܼ ܡܸܠܹ̈ܐ ܕܐܸܪܕܹܐ ܥܲܡܹܗ ܠܲܠܡܹܐܝܢ ܫܲܝܢܵܐ ܀ 33 :ܠܲܠܡܹܐܝܢ ܫܲܝܢܵܐ ܕܚܘܼܣܵܝ ܚܵܘ̈ܒܹܿܐ ܪܓܼܝܼܓܼ ܕܲܢܡܲܢܲܥ 34 ܚܢܲܢܵܟ ܢܸܗܘܸܐ ܩܹܘܒܲܪܢܹܝܛܵܐ ܠܡܲܪܕܿܝܼܬܼ ܚܲܝܵܘ̈ܗܝ ܀ 35 :ܠܹܩܹ̈ܐ ܕܪ̈ܲܚܡܲܝܟ ܢܸܗܘܘܿܢ ܠܹܩܹ̈ܐ ܠܝܲܩܝܼܪܘܼܬܹܗ 36 ܘܲܢܕܲܠܘܿܢܵܝܗܝ ܕܠܵܐ ܢܸܬܿܛܲܒܲܥ ܒܚܲܫܲܝ̈ ܢܲܦܫܹܗ ܀ pb. 119 37 :ܒܲܫܡܵܟ ܪܲܒܵܐ ܢܹܐܣܘܿܪ ܚܲܝܵܘ̈ܗܝ ܐܲܝܟ ܕܒܹܐܘܩܝܼܢܵܐ 38 ܘܒܵܟ ܢܸܣܬܲܬܲܪ ܡ̣ܢ ܡܲܚܫܘܼܠܹ̈ܐ ܕܚܲܫܹ̈ܐ ܫܓܼܝܼܫܹ̈ܐ ܀ 39 :ܚܲܫܹ̈ܐ ܫܓܼܝܼܫܹ̈ܐ ܫܵܓ̇ܿܫܝܼܢ ܟܠܫܵܥ ܠܡܵܝܘܿܬܼܘܼܬܹܗ 40 ܘܲܡܥܵܘܟܼܝܼܢ ܠܹܗ ܡ̣ܢ ܡܲܪܕܿܝܼܬܼܵܐ ܕܘܲܥܕܵܐ ܕܲܫܡܵܟ ܀ 41 :ܒܲܫܡܵܟ ܒܵܥܹ̇ܐ ܠܡܸܬܼܓܵܘܵܣܘܼ ܡܚܝܼܠ ܡ̣ܢ ܚܲܝܠܵܐ 42 ܗܲܒ ܠܹܗ ܐܝܪܕܼܵܐ ܕܢܸܬܿܕܲܠܸܐ ܒܵܟ ܡ̣ܢ ܝܵܘ̈ܒܵܬܹܗ ܀ 43 :ܒܚܵܘܒܲܬܼ ܚܵܘܒܵܘ̈ܗܝ ܡܛܲܒܲܥ ܘܲܫܕܹܐ ܐܲܝܟ ܕܲܒܼܝܲܡܵܐ 44 ܗܵܐ ܡܸܬܼܝܲܐܲܒܼ ܕܲܢܕܲܠܘܿܢܵܝܗܝ ܪ̈ܲܚܡܹܐ ܠܪܵܘܡ̇ܐ ܀ 45 :ܠܪ̈ܲܚܡܹܐ ܚܵܐ̇݁ܪ ܕܲܢܣܲܝܥܘܼܢܵܝܗܝ ܒܐܵܓܼܘܿܢ ܥܲܡܠܵܘ̈ܗܝ 46 ܕܝܵ̇ܕܲܥ ܕܲܡܚܝܼܠ ܟܝܵܢ ܫܝܼܛܘܼܬܹܗ ܩܕܼܵܡ ܚܘܼܬܼܚܵܬܹ̈ܐ ܀ 47 :ܒܲܡܚܝܼܠܘܼܬܹܗ ܚܵܪܹܬܼ ܐܵܦ ܐ̄ܢܵܐ ܡܚܝܼܠ ܚܘܼܫܵܒܹ̈ܐ 48 ܘܝܸܗ̄ܒܹ̇ܬܼ ܪܸܥܝܵܢܝ ܕܐܸܪܕܹܿܐ ܥܲܡܹܗ ܠܘܲܥܕܵܐ ܕܪ̈ܲܚܡܹܐ ܀ 49 :ܪ̈ܲܚܡܹܐ ܢܸܗܘܘܿܢ ܐܲܝܟ ܗܲܕܿܝܼܐܵܐ ܩܕܼܵܡ ܗܲܠܟܵܬܹ̈ܗ 50 ܘܲܢܚܵܘܘܿܢܵܝܗܝ ܫܒܼܝܼܠ ܫܘܼܒܼܩܵܢܵܐ ܕܲܡܣܲܟܹܿܐ ܠܹܗ ܀ 51 :ܠܫܘܼܒܼܩܵܢ ܚܵܘ̈ܒܹܿܐ ܡܣܲܟܸܿܐ ܘܲܪܗܝܼܒܼ ܪܵܕܹܐ ܒܩܸܢܛܵܐ 52 ܫܒܼܘܿܩ ܠܹܗ ܚܵܘܒܵܘ̈ܗܝ ܕܢܗܘܸܐ ܠܒܼܝܼܒܼܵܐ ܒܡܲܪܕܿܝܼܬܼ ܚܲܝܵܘ̈ܗܝ ܀ 53 :ܚܲܝܹ̈ܐ ܟܪ̈ܲܝܵܐ ܚܲܝ̈ ܚܲܝܒܼܵܐ ܡܠܸܐ ܚܵܘ̈ܒܵܬܵܐ 54 ܚܘܼܢ ܠܚܵܘܒܵܬܹ̈ܗ ܥܲܕܼܠܵܐ ܢܸܕܥܲܟ ܫܪܵܓܼܵܐ ܕܚܲܝܵܘ̈ܗܝ ܀ 55 :ܫܪܵܓܼܵܐ ܗ̄ܘ̣ ܪܲܗܛܵܐ ܕܚܲܝܘܼܬܼ ܚܲܝܵܘ̈ܗܝ ܕܲܟܼܪܸܐ ܚܲܝܹ̈ܐ 56 ܘܩܲܠܝܼܠ ܕܵܠܹ̇ܩ ܘܡ̇ܘܦܸܐ ܡܸܢܹܗ ܡܸܫܚܵܐ ܕܪ̈ܲܚܡܹܐ ܀ 57 :ܢܘܼܪ ܚܘܼ̈ܬܼܚܵܬܹܐ ܡܵܬܼ̇ܩܵܐ ܚܲܝܵܘ̈ܗܝ ܐܲܝܟ ܕܲܠܡܸܫܚܵܐ 58 ܘܕܼܵܥܹ̇ܟ ܡܸܢܫܹܠܝ ܘܛܵܠܹ̇ܩ ܢܘܼܗܪܵܐ ܕܲܡܠܝܼܠܘܼܬܹܗ ܀ 59 :ܡܥܲܪܬܼܵܐ ܕܦܲܓܼܪܹܗ ܗܵܚܹ̇ܦ ܡ̇ܘܬܵܐ ܒܲܥܪܝܼܪܵܝܵܐ 60 ܘܗܵܘܹ̇ܐ ܚܒܼܵܠܵܐ ܡܸܬܼܚܲܒܵܠܵܢܵܐ ܕܠܵܐ ܚܲܝܘܼܬܼܵܐ ܀ 61 :ܕܠܵܐ ܚܲܝܘܼܬܼܵܐ ܡܩܵܘܸܐ ܒܲܫܝܘܿܠ ܡܸܬܼܚܲܒܿܠܵܢܵܐ 62 ܥܕܲܡܵܐ ܕܫܵܡܲ݁ܪ ܗܵܝ̇ ܒܲܪ̄ܬܼ ܩܵܠܵܐ ܕܚܝܵܬܼ ܡܝܼܬܹ̈ܐ ܀ 63 :ܒܗܵܢ ܚܘܼܒܵܠܵܐ ܡܥܵܕܼ ܡܸܬܼܒܲܩܸܐ ܒܟܼܠ ܥܸܕܸܵܢܝܼ̈ܢ 64 ܘܲܡܥ̇ܩ ܕܕܲܠܡܵܐ ܢܹܐܙܲܠ ܒܚܵܒܲܬܼ ܚܵܘܒܵܘ̈ܗܝ ܀ 65 :ܪܵܢܹ̇ܐ ܒܚܵܘܒܵܘ̈ܗܝ ܥܲܠ ܗܵܝ̇ ܫܵܐܹ̇ܠ ܚܢܵܢܵܐ ܘܪ̈ܲܚܡܹܐ 66 ܚܘܼܢ ܚܵܘ̈ܒܵܬܹܗ ܥܲܕܼܠܵܐ ܢܸܚܙܘܿܩ ܠܒܹܝܬܼ ܐܲܒܼܵܗܵܘ̈ܗܝ ܀ 67 :ܠܒܲܝܬܵܐ ܕܡ̇ܘܬܵܐ ܚ̣ܙܲܩܘ ܐܲܒܼܵܗܵܘ̈ܗܝ ܕܒܲܪ ܡ̇ܝܘܿܬܹ̈ܐ 68 ܘܒܼܵܗ̇ ܒܲܕܼܡܘܼܬܼܵܐ ܡܛܲܝܸܒܼ ܐܵܦ ܗܘ̤ ܙܘܵܕܹ̈ܐ ܠܐܘܼܪܚܹܗ ܀ 69 ܐܘܼܪܚܵܐ ܗ̄ܝ݂ ܪܲܒܿܬܼܵܐ ܐܘܼܪܚܹܗ ܕܡ̇ܘܬܵܐ ܠܲܒܼܢܵܘ̈ܗܝ ܕܐܵܕܡ: pb. 120 70 ܘܪܵܕܹܝܢ ܟܠܝܘܿܡ ܘܠܵܐ ܡܸܬܼܦܲܣܩܵܐ ܡ̣ܢ ܚܵܙܘܿܩܹ̈ܐ ܀ 71 :ܒܗܵܢܵܐ ܚܙܘܼܩܝܵܐ ܕܐܲܡܝܼܢܘܼܬܼܵܐ ܫܚܝܼܩܝܼܢ ܟܠܝܘܿܡ 72 ܘܪܵܢܹ̇ܝܢ ܕܕܲܠܡܵܐ ܢܹܐܙܠ̄ܘܼܢ ܠܲܫܝܘܿܠ ܟܲܕܼ ܚܲܝܵܒܼܝܼܢ ܀ 73 :ܚܵܐܹ̇ܝܢ ܚܵܘ̈ܒܹܿܐ ܚܘܼܢ ܚܵܘ̈ܒܵܬܼܵܐ ܕܚܲܝܵܒܼܘܼܬܲܢ 74 ܕܗܵܐ ܥܸܫܢܲܬ̤ ܠܵܗ̇ ܚܵܘܒܲܬܼ ܚܵܘ̈ܒܲܝܢ ܡ̣ܢ ܟܠ ܕܵܪ̈ܝܼܢ ܀ 75 :ܚܵܒܼ݂ܢܲܢ ܣܲܓܼܝܼ ܘܠܲܝܬܿ ܡܸܢܝܵܢܵܐ ܠܚܲܝܵܒܼܘܼܬܲܢ 76 ܘܥܸ̇ܦ ܪܼ̈ܒܿܝܵܬܼܵܐ ܕܲܫܛܵܪ ܚܵܘܒܲܝ̈ܢ ܠܡܸܕܹܿܡ ܕܝܼܙܸܦ̄ܢ ܀ 77 :ܝ̄ܙܦܲܬܼܵܐ ܒܝܼܫܬܵܐ ܕܥܵܘ̣ܠܵܐ ܒܝܼܫܵܐ ܝ̄ܙܸܦ̄ܝܼܢ ܡ̣ܢ ܒܝܼܫܵܐ 78 ܘܗܵܐ ܡܪ̈ܲܒܹܿܐ ܠܲܢ ܒܝܲܕܼ ܪܼ̈ܒܿܝܵܬܵܪܐ ܕܲܫܟܼܝܼܪ̈ܵܬܵܪܐ ܀ 79 :ܒܲܫܟܼܝܼܪ̈ܵܬܼܵܐ ܫܲܪܝܼ ܓܸܢܣܲܢ ܡ̣ܢ ܫܘܼܪܵܝܵܐ 80 ܘܒܹܗ ܒܲܥܝܵܕܵܐ ܪܓܼܝܼܓܼ ܕܲܢܫܲܠܸܡ ܝܵܘܡܲܝ̈ ܚܲܝܵܘ̈ܗܝ ܀ 81 :ܥܝܵܕܼܵܐ ܚ݂ܲܣܢܹܗ ܐܵܦ ܚܵܣܹ̇ܢ ܠܹܗ ܒܟܼܠܗܘܿܢ ܚܲܝܵܘ̈ܗܝ 82 ܘܣܲܢܝܵܐ ܒܥܲܝܵܢ̈ܘ̈ܗܝ ܕܢܸܣܢܹܐ ܥܝܵܕܼܵܐ ܕܲܫܟܼܝܼܪ̈ܵܢܹܗ ܀ 83 :ܪܵܚܹ̇ܡ ܐ̄ܢܵܫܵܐ ܚܘܼܣ ܥܲܠ ܐ̄ܢܵܫܵܐ ܣܵܢܹ̇ܐ ܚܲܝܵܘ̈ܗܝ 84 ܘܗܲܒܼ ܒܹܗ ܚܲܝܠܵܐ ܠܡܸܚܣܲܢ ܩܹܐܪܣܵܐ ܕܲܪ̈ܓܼܝܼܓܼܵܬܹܗ ܀ 85 :ܐܲܢ̄ܬܿ ܗܲܒܼ ܚܲܝܠܵܐ ܒܣܲܚܝܼܠܘܼܬܹܗ ܕܲܡܚܝܼܠ ܚܲܝܠܵܐ 86 ܕܠܵܐ ܢܸܬܼܪܲܦܸܐ ܩܕܼܵܡ ܚܘܼ̈ܬܼܚܵܬܹܐ ܘܕܲܝܘܸ̈ܐ ܛܪ̈ܘܼܢܹܐ ܀ 87 :ܒܲܬܼܪܹܝܢ ܩܹܐܪ̈ܣܹܐ ܪܡܸܐ ܝܲܠܵܫܵܐ ܕܲܕܘܸܐ ܡ̣ܢ ܟܠ 88 ܒܚܲܫܲܝ̈ ܢܲܦܫܹܗ ܘܫܹܐܕܹ̈ܐ ܕܡܲܦܗܹܝܢ ܠܲܡܚܝܼܠܘܼܬܹܗ ܀ 89 :ܚܲܝܸܠ ܙܵܘܥܵܘ̈ܗܝ ܕܲܡܚܝܼܠ ܚܲܝܠܵܐ ܕܒܼܵܥܹ̇ܐ ܘܲܡܦܝܼܣ 90 ܘܪܕܘܿܦ ܡܸܢܹܗ ܫܹܐܕܹ̈ܐ ܒܝܼܫܹ̈ܐ ܕܲܨܗܹܝܢ ܠܲܕܼܡܹܗ ܀ 91 :ܠܵܐ ܡ̇ܪܝ ܬܸܬܸܠ ܠܪܸܓܲܬܼ ܒܝܼܫܹ̈ܐ ܠܡܸܫܬܲܡܠܵܝܘܼ 92 ܕܠܵܐ ܢܸܬܿܬܿܪܝܼܡܘܼܢ ܘܲܢܒܲܙܚܘܼܢ ܒܹܗ ܒܲܫܡܵܟ ܪܲܒܵܐ ܀ 93 :ܒܲܫܡܵܟ ܪܲܒܵܐ ܩ̣ܪܲܝܬܵܢ ܛܵܒܼܵܐ ܡ̣ܢ ܫܘܼܪܵܝܵܐ 94 ܓܡܘܿܪ ܒܲܥܒܼܵܕܼܵܐ ܩܪܵܝܬܵܐ ܕܲܫܡܵܟ ܒܫܝܼܛܘܼܬܼ ܓܸܢܣܲܢ ܀ 95 :ܫܡܵܗܹ̈ܐ ܕܲܫܡܵܟ ܣܵܡ̣ܬܿ ܥܲܠ ܪܹܫܲܢ ܟܲܕܼ ܬܲܩܸܢܬܵܢ 96 ܫܲܪܲܪ ܐܸܢܘܿܢ ܒܝܲܕܼ ܣܘܼܥܪ̈ܵܢܹܐ ܕܲܦܐܹܝܢ ܠܲܫܡܵܟ ܀ 97 :ܫܡܵܟ ܝܲܩܝܼܪܵܐ ܗ̄ܘ̣ ܘܠܵܐ ܡܸܬܼܡܲܠܲܠ ܡ̣ܢ ܡܲܠܵܠܹ̈ܐ 98 ܠܵܐ ܢܸܨܛܲܚܸܐ ܫܡܵܟ ܒܲܫܡܵܗܹ̈ܐ ܕܙܲܠܝܼܠܘܿܬܲܢ ܀ 99 :ܐܸܢ ܐܲܥܘܸܠܢܲܢ ܒܲܢ ܐܲܥܘܸܠܢܲܢ ܘܠܵܐ ܐܲܚܣܲܪܢܵܟ 100 ܠܵܟ ܠܵܐ ܩܵܪܹ̇ܒܼ ܠܵܐ ܚܘܼܣܪܵܢܵܐ ܘܠܵܐ ܝܘܼܬܼܪܵܢܵܐ ܀ 101 :ܐܲܢ̄ܬܿ ܐܲܝܟ ܕܐܝܼܬܲܝܟ ܐܝܼܬܲܝܟ ܘܐܝܼܬܲܝܟ ܕܠܵܐ ܫܘܼܚܠܵܦܵܐ 102 ܘܥܲܡ ܟܠ ܒܸܪ̈ܝܵܢ ܡܗܲܠܸܟ ܪܸܡܙܵܟ ܟܲܕܼ ܠܵܐ ܠܵܐܹ̇ܐ ܀ 103 :ܠܵܐ ܡܲܠܐܸܐ ܠܵܟ ܥܵܘܼܠܵܐ ܕܒܼܝܼܫܹ̈ܐ ܘܲܕܿܛܵܠܘܼܡܹ̈ܐ 104 ܘܠܵܐ ܡܩܲܠܸܣ ܠܵܟ ܫܘܼܒܼܚܵܐ ܕܟܹܐܢܹ̈ܐ ܘܲܕܼܙܲܕܿܝܼܩܹ̈ܐ ܀ 105 :ܠܵܐ ܓܘܼܢܵܝܹ̈ܐ ܡܓܼܿܢܹܝܢ ܠܲܫܡܵܐ ܕܙܲܕܼܝܼܩܘܼܬܼܵܟ 106 ܘܠܵܐ ܪܘܼܡܪ̈ܵܡܹܐ ܡܪܝܼܡܝܼܢ ܕܲܪܓܼܵܐ ܕܓܼܡܝܼܪܘܼܬܼܵܟ ܀ pb. 121 107 :ܚܲܕܼ ܐܸܢܘܿܢ ܠܵܟ ܫܘܼܒܼܚܵܐ ܘܨܲܥܪܵܐ ܠܦܘܼܬܼ ܪܲܒܿܘܼܬܵܟ 108 ܒܲܕܼ ܠܵܐ ܡܩܲܒܸܿܠ ܟܝܵܢ ܐܝܼܬܼܘܼܬܼܵܟ ܚܕܼܵܐ ܡ̣ܢ ܗܵܠܹܝܢ ܀ 109 :ܠܲܝܬܿ ܠܲܟܼܝܵܢܵܟ ܐܵܦܠܵܐ ܗܵܕܹܐ ܫܡܵܐ ܕܲܟܼܝܵܢܵܟ 110 ܘܡ̣ܢ ܠܵܐ ܫܡܵܗܹ̈ܐ ܡܟܲܢܹܝܢܲܢ ܠܹܗ ܫܡܵܐ ܕܲܟܼܝܵܢܵܐ ܀ 111 :ܠܵܟ ܠܵܐ ܟܲܝܸܢ ܟܝܵܢܵܐ ܐ̄ܚܪܹܢܵܐ ܡܟܼܝܼܢ ܒܸܪ̈ܝܵܬܼܵܐ 112 ܘܠܵܐ ܠܵܚܹ̇ܡ ܠܵܟ ܫܸܡ ܟܘܼܢܵܝܵܐ ܕܡܸܬܼܟܲܝܢܵܢܹܐ ܀ 113 :ܡܕܝܼܢ ܒܸܪ̈ܝܵܬܼܵܐ ܢܸܩܪܹܝܟ ܒܲܠܚܘܿܕܼ ܐܲܝܟ ܕܲܦܠܸܐ ܠܵܟ 114 ܘܠܵܐ ܢܛܘܼܫ ܒܲܫܡܵܟ ܫܡܵܗܹ̈ܐ ܫܐܝܼܠܹ̈ܐ ܕܡܵܟܿܝܼܢ ܡܸܢܵܟ ܀ 115 :ܠܲܝܬܿ ܫܘܼܡ̇ܗܵܐ ܕܲܦܠܸܐ ܠܲܫܡܵܐ ܕܐܲܡܝܼܢܘܼܬܵܪܟ 116 ܐܸܠܵܐ ܐܸܢ ܚܲܕܼ ܐܝܼܬܼܝܵܐ ܕܐܝܼܬܼܵܘܗܝ ܕܠܵܐ ܫܘܼܪܵܝܵܐ ܀ 117 :ܒܗܵܢ ܟܘܼܢܵܝܵܐ ܦܠܸܐ ܕܲܢܟܲܢܹܝܟ ܟܠ ܕܲܥܒܼܝܼܕܵܪܐ ܗ̄ܘ̣ 118 ܗܵܢ ܕܐܲܢ̄ܬܿ ܐܲܠܸܦܬܿ ܠܲܥܒܼܵܕܼ ܐܝܼܕܲܝ̈ܟ ܕܒܹܗ ܢܸܩܪܘܿܢܵܟ ܀ 119 :ܠܡܘܼܫܹܐ ܥܲܒܼܕܵܟ ܓܠ݂ܲܝܬܵܝܗܝ ܠܲܫܡܵܐ ܕܐܲܡܝܼܢܘܼܬܼܵܟ 120 ܡ̇ܕܹܝܢ ܓܲܠܝܵܐ ܗ̄ܝ݂ ܕܠܲܝܬܿ ܫܘܼܡ̇ܗܵܐ ܐ̄ܚܪܹܢܵܐ ܠܲܫܡܵܟ ܀ 121 :ܫܒܼܝܼܚ ܨܸܒܼܝܵܢܵܟ ܕܲܟܼܡܵܐ ܪܵܚܹ̇ܡ ܠܲܥܒܼܵܕܼ ܐܝܼܕܼܵܘ̈ܗܝ 122 ܘܒܹܗ ܒܲܥܒܼܵܕܹܗ ܡܚܵܘܹܐ ܚܲܝܠܵܐ ܕܐܲܡܝܼܢܘܼܬܹܗ ܀ 123 :ܒܗܵܢ ܨܸܒܼܝܵܢܵܐ ܚܵܪܵܬ̤ ܡܸܠܲܬܼܝ ܪܵܚ̇ܡܲܬܼ ܡܸܠܹ̈ܐ 124 ܘܫܲܪܝܲܬ̤ ܕܬܼܵܘܠܸܕܼ ܡܸܠܹ̈ܐ ܕܚܲܫܵܐ ܕܥܲܠ ܚܲܛܵܝܹ̈ܐ ܀ 125 :ܕܸܒܼܚܵܐ ܕܡܸܠܹ̈ܐ ܡܩܲܪܒܼܵܐ ܡܸܠܲܬܼܝ ܚܠܵܦ ܡܲܠܵܠܹ̈ܐ 126 ܩܲܒܸܿܠ ܕܸܒܼܚܵܗ̇ ܡܩܲܒܸܿܠ ܕܸܒܼܚܹ̈ܐ ܘܲܨܠܵܘܵܬܼܵܐ ܀ 127 :ܕܸܒܼܚܵܗ̇ ܦܝܵܣܵܐ ܗ̄ܘ̣ ܕܡܠܸܐ ܪ̈ܥܘܿܡ̇ܬܼܵܐ 128 ܚܘܼܣ ܥܲܠ ܡܸܠܹ̈ܝ̈ܗ̇ ܐܵܦܸܢ ܫܝܼ̈ܛܵܢ ܡ̣ܢ ܩܘܼܒܵܠܵܐ ܀ 129 :ܪܵܥܘܿܡ̇ܐܝܼܬܼ ܡܸܬܼܟܲܫܦܵܐ ܠܵܟ ܒܨܝܼܪܲܬܼ ܚܲܝܠܵܐ 130 ܐܲܝܟ ܐܲܪܡܲܠܬܵܐ ܠܗܵܘ̇ ܕܲܝܵܢܵܐ ܚܲܪܡ̇ܢܵܝܵܐ ܀ 131 :ܐܲܢ̄ܬܿ ܪܲܟܸܿܒܼܬܵܝܗܝ ܠܡܲܬܼܠܵܐ ܕܡ̇ܘܕܲܥ ܡܚܝܼܠܘܼܬܼ ܓܸܢܣܲܢ 132 ܘܨܵܪܬܿ ܬܲܚܘܝܼܬܵܐ ܒܲܡܓܲܙܲܝܬܵܐ ܕܨܵܬܼܵܗ̇ ܛܪܘܼܢܵܐ ܀ 133 :ܘܐܸܢ ܗܵܘ̇ ܚܲܪܡ̇ܐ ܚܲܣܢ̣ܵܗ̇ ܦܝܵܣܵܐ ܠܚܲܪܡ̇ܢܘܼܬܹܗ 134 ܟܡܵܐ ܢܸܬܼܪܲܟܼܢܘܼܢ ܪ̈ܲܚܡܲܝܟ ܕܝܼܠܵܟ ܨܹܝܕܼ ܚܲܛܵܝܹ̈ܐ ܀ 135 :ܐܸܢ ܚܲܪܡ̇ܢܵܐ ܗܘ̤ܵܐ ܪܲܚܡܵܢܵܐ ܐܲܝܟ ܕܐܲܢ̄ܬܿ ܚܵܘܝܼܬܿ 136 ܚܵܘܵܐ ܒܓܸܠܝܵܐ ܚܹܝܠ ܦܸܠܐܬܼܵܐ ܨܹܝܕܼ ܒܝܼܫܘܼܬܲܢ ܀ 137 :ܐܸܢ ܠܵܐ ܟܹܐܢܵܐ ܬܒܲܥ̣ ܟܹܐܢܘܼܬܼܵܐ ܕܲܛܠܝܼܡܵܐ ܗ̄ܘ̣ܵܬܼ 138 ܟܡܵܐ ܐܲܢ̄ܬܿ ܟܹܐܢܵܐ ܬܕܘܼܢ ܟܹܐܢܵܐܝܼܬܼ ܠܲܛܠܝܼܡܘܼܬܲܢ ܀ 139 :ܛܠܝܼܡܝܼܢܲܢ ܡ̇ܪܝ ܡ̣ܢ ܚܘܼ̈ܬܼܚܵܬܹܐ ܘܡ̣ܢ ܣܵܛܵܢܵܐ 140 ܬܒܲܥ ܒܲܝܢܵܬܲܢ ܬܒܲܥܬܵܐ ܕܦܲܐܝܵܐ ܠܕܲܝܵܢܘܼܬܼܵܟ ܀ 141 :ܬܪܹܝܢ ܣܲܩܘܼܒܼܠܹ̈ܐ ܗܘ̤ܵܘ ܠܲܢ ܥܼܠܬܼܵܐ ܕܟܼܠ ܒܝܼ̈ܫܵܬܼܵܐ 142 ܝܲܨܪܲܢ ܒܝܫܵܐ ܘܒܼܝܼܫܵܐ ܕܲܣܢ̣ܵܢ ܡ̣ܢ ܫܘܼܪܵܝܵܐ ܀ pb. 122 143 :ܒܝܼܫܵܐ ܗܘ̤ܵܐ ܠܲܢ ܡ̇ܠܹ̇ܝܟ ܡܸܠܟܵܐ ܕܲܫܟܼܝܼܪ̈ܵܬܼܵܐ 144 ܘܢܦܲܩ̣ܘ ܐ̄ܢܵܫܵܐ ܠܡܸܒܼܥܵܐ ܒܥܵܬܼܵܐ ܕܲܫܟܼܝܼܪ̈ܵܬܹܗ ܀ 145 :ܒܲܫܟܼܝܼܪ̈ܵܬܹܗ ܫܲܟܿܪܹܗ ܠܫܘܼܦܪܵܐ ܕܦܲܐܝܘܼܬܼ ܨܲܠܡܲܢ 146 ܘܢܸܕܲܬ̤ ܡܸܢܲܢ ܠܲܫܡܲܝܵܢܹ̈ܐ ܘܠܲܐܪ̈ܥܵܢܵܝܹܐ ܀ 147 :ܒܦܲܐܝܘܼܬܼ ܨܲܠܡܲܢ ܬܲܗܝܪܝܼܢ ܗ̄ܘ̣ܵܘ ܩܕܼܵܡ ܣܲܟ̣ܠܘܼܬܲܢ 148 ܘܡ̣ܢ ܕܐܲܣܟܸܿܠܢܲܢ ܗܦܲܟܼܘ ܘܐܸܬܿܕܲܡܲܪܘ ܥܲܠ ܫܘܼܟܪܵܢ ܀ 149 :ܡܲܬܼܩܸܢ ܨܲܠܡܲܢ ܒܲܨܠܸܡ ܨܲܠܡܹܗ ܕܠܵܐ ܪܘܼܟܵܒܼܵܐ 150 ܚܘܼܣ ܥܲܠ ܨܲܠܡܲܢ ܡܸܛܠ ܨܲܠܡܵܟ ܕܠܵܐ ܪܘܼܟܵܒܼܵܐ ܀ 151 :ܠܲܝܬܿ ܠܵܟ ܨܲܠܡܵܐ ܩܢܸܐ ܪܘܼܟܵܒܼܵܐ ܐܲܝܟ ܡ̇ܝܘܿܬܹ̈ܐ 152 ܘܗܵܢ݁ܵܘ ܬܸܡܗܵܐ ܕܠܲܢ ܟܲܢܝܼܬܵܢ ܒܲܕܼܠܵܐ ܡܟܼܵܢܵܢ ܀ 153 :ܒܫܸܡ ܪܲܒܿܘܼܬܼܵܟ ܩ̣ܪܵܝܬܵܢ ܛܵܒܼܵܐ ܕܟܼܠܹܗ ܛܵܒܼܵܐ ܗ̄ܘ̣ 154 ܠܵܐ ܢܸܫܬܲܚܠܵܦ ܫܸܡ ܛܵܒܼܘܼܬܼܵܟ ܒܒܼܝܼܫܘܼܬܼ ܥܵܘ̣ܠܲܢ ܀ 155 :ܚܵܣ ܠܵܐ ܗܵܘ̇ܝܵܐ ܐܵܦ ܠܵܐ ܡܲܨܝܵܐ ܕܬܸܗܘܸܐ ܗܵܕܹܐ 156 ܕܥܵܘ̣ܠܲܢ ܒܵܩܵܐ ܢܸܙܟܹܿܐ ܠܚܲܝܠܵܐ ܕܐܲܚܝܼܕܼ ܟܠܵܐ ܀ 157 :ܡ̇ܢܵܐ ܗ̄ܘ̣ ܥܵܘ̣ܠܵܐ ܕܫܹܐܕܹ̈ܐ ܘܐ̄ܢܵܫܵܐ ܒܦܸܚܡܵܐ ܕܪ̈ܲܚܡܲܝܟ 158 ܐܵܘ ܗ̤ܝ ܒܝܼܫܬܵܐ ܕܟܼܠܵܗ̇ ܒܪܝܼܬܼܵܐ ܩܕܼܵܡ ܚܵܘܣܵܢܵܟ ܀ 159 :ܪܲܒܿܘܼ ܚܢܵܢܵܟ ܡ̣ܢ ܒܸܪ̈ܝܵܬܵܪܐ ܕܗ̤ܘܲܝ̈ ܡܸܢܵܟ 160 ܘܠܵܐ ܡܸܬܼܦܲܚܡܵܐ ܡܪܲܚܡܵܢܘܼܬܼܵܟ ܒܲܥܒܼܵܕܼ ܐܝܼܕܲܝ̈ܟ ܀ 161 :ܒܢܝܼܫܵܐ ܕܪ̈ܲܚܡܲܝܟ ܚܵܪ̣ܘ ܚܘܼܫܵܒܲܝ̈ ܪ̈ܵܚܡܲܝ ܦܸܗܝܵܐ 162 ܘܫܲܪܝܼܘ ܚܵܢܹ̇ܝܢ ܠܘܼܩܒܲܠ ܢܝܼܫܵܐ ܕܪܲܒܿܘܬܼ ܪ̈ܲܚܡܲܝܟ ܀ 163 :ܢܝܼܫܵܐ ܕܪ̈ܲܚܡܲܝܟ ܩܒܲܥ̣ܬܿ ܒܹܝܬܼ ܚܘܼܩܹ̈ܐ ܕܲܟܼܬܼܝܼ̈ܒܼܵܬܼܵܐ 164 ܘܗܵܐ ܒܨܝܼܪ ܩܲܠܝܼܠ ܐܲܠܦܹ̈ܐ ܐܸܫܬܵܐ ܘܠܵܐ ܡܸܫܬܿܚܠܲܦ ܀ 165 :ܪܲܚܡܵܢܵܐܝܼܬܼ ܕܕܼܵܐ ܨܸܒܼܝܵܢܵܟ ܥܲܡ ܟܠ ܕܵܪ̈ܝܼܢ 166 ܘܠܵܐ ܐܸܬܼܒܲܨܲܪ ܡ̣ܢ ܡܵܐ ܕܐܝܼܬܼܵܘܗܝ ܥܕܲܡܵܐ ܠܚܲܪܬܼܵܐ ܀ 167 :ܓ̣ܙܲܪܬܿ ܥܲܠ ܐܵܕܡ ܕܝܼܢܵܐ ܕܡܵܘܬܵܐ ܕܲܚܛ̣ܵܐ 168 ܘܲܚ̣ܝܵܐ ܐܵܕܼܵܡ ܒܵܬܲܪ ܕܲܚܛ̣ܵܐ ܬܫܲܥܡܵܐܐ ܘܝܲܬܼܿܝܼܪ ܀ 169 :ܦܣܲܩ̣ܬܿ ܥܲܠ ܩܵܐܹܝܢ ܫܒܲܥ ܬܲܒܼܥܵܬܵܐ ܕܫܲܒܼܥܵܐ ܢܸܓܼܕܲܝܼ̈ܢ 170 ܘܠܵܐ ܓ̣ܡܲܪܬܿ ܐܸܢܹܝܢ ܚܲܬܿܝܼܬܼܵܐܝܼܬܼ ܐܲܟܼܡܵܐ ܕܲܦܣܲܩ̣ܬܿ ܀ 171 :ܐܼܡ݂ܲܪܬܿ ܕܐܸܥܛܹܐ ܟܠܡܵܐ ܕܥܸܒܲܕܹܿܬܼ ܕܠܵܐ ܚܵܘܣܵܐ 172 ܘܗܵܐ ܩܲܝܵܡܵܐ ܒܪܝܼܬܼܵܐ ܟܠܵܗ̇ ܥܲܡ ܟܠ ܕܲܗܘ̤ܵܘ ܀ 173 :ܠܵܛ̣ܬܵܝܗܝ ܠܲܟܼܢܲܥ̄ܢ ܕܢܸܗܘܸܐ ܥܲܒܼܕܵܐ ܘܲܥܒܸܕܼ ܥܲܒܼܕܲܝ̈ܢ 174 ܘܐܲܡܠܸܟܼܘ ܡܸܢܹܗ ܡܲܠ̈ܟܹܿܐ ܩ̈ܫܲܝܵܐ ܘܫܲܥܒܸܿܕܼܘ ܥܲܡܡܹ̈ܐ ܀ 175 :ܢܚ̣ܸܬܿܬܿ ܟܲܕܼ ܠܵܐ ܢܚ̣ܸܬܿܬܿ ܠܒܹܝܬܼ ܒܵܒܼܠܵܝܹ̈ܐ ܠܡܸܥܒܲܕܼ ܩܹܐܪܣܵܐ 176 ܘܫܲܚܠܸܦܬܿ ܐܸܢܘܿܢ ܠܡܵܐܢܲܝ̈ ܙܲܝܢܵܟ ܠܲܡܫܲܝܢܘܼܬܼܵܐ ܀ 177 ܓܙܲܡ̣ܬܿ ܥܲܠ ܐܲܪܥܵܐ ܕܦܵܠܹܣܛܝܼܢܹܐ ܕܠܵܐ ܢܦܘܼܫ ܒܵܗ̇ ܐ̄ܢܵܫ: pb. 123 178 ܘܦܵܫ̣ܘ ܪܸ̈ܒܿܘܵܬܼܵܐ ܡ̣ܢ ܝܲܬܵܒܹ̈ܝܗ̇ ܕܠܵܐ ܡܲܪܕܿܘܼܬܵܐ ܀ 179 :ܐܲܪܝܼܡܬܿ ܐܝܼܕܼܵܟ ܥܲܠ ܡܸܨܪ̈ܝܹܐ ܘܢܲܓܸܿܕܲܬܿ ܐܸܢܘܿܢ 180 ܘܠܲܝܬܿ ܡܲܪܕܕܿܘܼܬܼܵܐ ܕܠܵܐ ܚܠܝܼܛ ܗ̄ܘ̣ܵܐ ܒܵܗ̇ ܚܢܵܢܵܐ ܩܲܠܝܼܠ ܀ 181 :ܝܲܡܲܝܼܬܼ݂ ܕܬܼܵܘܒܸܿܕܼ ܠܝܼܣܪ̈ܠܵܝܹܐ ܒܚܘܼܪܒܵܐ ܕܚܝܼܠܵܐ 182 ܘܒܼܵܬܲܪ ܕܝܼܡ݂ܲܝܬܿ ܦܲܪܢܸܣܬܿ ܐܸܢܘܿܢ ܚܘܼܒܵܢܵܐܝܼܬܼ ܀ 183 :ܚܘܼܒܵܢܵܐܝܼܬܼ ܚ̣ܙܲܝܢܲܢ ܕܲܪܕܲܝܬܿ ܟܠ ܟܲܪ ܕܲܪܕܲܝܬܿ 184 ܘܠܲܝܬܿ ܡܲܪܕܿܘܼܬܼܵܐ ܕܠܵܐ ܡܵܙ̇ܓܲܬܿ ܒܵܗ̇ ܒܲܣܝܼܡܘܼܬܼܵܐ ܀ 185 :ܒܒܲܣܝܼܡܘܼܬܵܟ ܐܸܬܼܒܲܩܝܼܢܲܢ ܘܡܸܬܼܒܲܩܹܝܢܲܢ 186 ܘܠܵܐ ܫܵܠܹ̇ܝܢܲܢ ܡ̣ܢ ܬܲܟܼܫܲܦܬܵܐ ܕܥܲܠ ܚܵܘ̈ܒܵܬܲܢ ܀ 187 :ܒܪܲܒܿܘܼܬܼ ܚܘܼܒܵܟ ܡܸܬܼܓܵܘܣܝܼܢܲܢ ܒܟܼܠ ܥܸܕܵܢܝܼ̈ܢ 188 ܒܲܕܼܡܘܼܬܼ ܝܲܠ̈ܕܹܿܐ ܕܛܵܦ̇ܣܝܼܢ ܟܠܫܵܥ ܒܐܲܒܼܵܗܲܝ̈ܗܘܿܢ ܀ 189 :ܠܐܲܒܼܵܗܘܼܬܼܵܟ ܡܸܣܬܲܟܿܠܝܼܢܲܢ ܐܲܒܼܵܐ ܒܲܠܚܘܿܕܼ 190 ܘܠܵܐ ܩܵܪܹܝܢܲܢ ܐܲܒܼܵܐ ܕܝܲܠܕܲܝܢ ܚܘܼܒܵܢܵܐܝܼܬܼ ܀ 191 :ܠܵܐ ܝܵ̇ܕܸܥܝܼܢܲܢ ܠܐܲܒܼܵܐ ܐ̄ܚܪܹܢܵܐ ܐܸܠܵܐ ܐܸܢ ܠܵܟ 192 ܕܠܲܝܬܿ ܐܲܒܼܵܗܹ̈ܐ ܕܕܼܵܡܹ̇ܐ ܚܘܼܒܗܘܿܢ ܠܐܲܒܼܵܗܘܼܬܵܟ ܀ 193 :ܐܲܢ̄ܬܿ ܐܲܢ̄ܬܿ ܒܲܠܚܘܿܕܼ ܐܲܒܼܵܐ ܘܡ̇ܪܵܐ ܐܵܦ ܕܲܝܵܢܵܐ 194 ܕܐܝܼܬܼ ܠܵܟ ܟܠܗܹܝܢ ܥܲܡ ܐܝܼܬܼܘܼܬܼܵܟ ܕܠܵܐ ܫܘܼܪܵܝܵܐ ܀ 195 :ܕܠܵܐ ܫܘܼܪܵܝܵܐ ܩܢܹܝܬܿ ܟܠ ܕܲܩܢܹܝܬܿ ܐܵܠܵܗܵܐܝܼܬܼ 196 ܘܠܲܝܬܿ ܠܵܟ ܡܸܕܹܿܡ ܕܠܵܐ ܐܝܼܬܼܵܘܗܝ ܗ̄ܘ̣ܵܐ ܐܲܡܝܼܢܵܐܝܼܬܼ ܀ 197 :ܠܘܵܬܼܵܟ ܡ̇ܪܹܝܢ ܦܠܹܐ ܠܲܡܪܵܡܘܼ ܥܲܝܢܹ̈ܐ ܕܟܼܠܢܵܫ 198 ܘܡܸܢܵܟ ܢܸܫܐܲܠ ܡ̇ܙܘܿܢ ܙܲܒܼܢܵܐ ܘܫܘܼܒܼܩܵܢ ܥܵܘ̣ܠܵܐ ܀ 199 :ܚܘܼܣ ܥܲܠ ܚܲܝܲܝ̈ܢ ܢܸܒܼܥܵܐ ܕܚܲܝܹ̈ܐ ܠܵܐ ܡ̇ܝܘܿܬܹ̈ܐ 200 ܘܗܲܒܼܠܲܢ ܙܲܒܼܢܵܐ ܕܲܡܠܹܐ ܫܲܝܢܵܐ ܘܬܘܼܪܣܵܝ ܚܲܝܹ̈ܐ ܀ 201 :ܚ̣ܛܲܝܢܲܢ ܣܲܓܿܝܼ ܘܲܥܒ݂ܲܪ ܥܵܘ̣ܠܲܢ ܠܥܸܠ ܡ̣ܢ ܪܹܫܲܢ 202 ܘܩܲܪܝܼܒܼܝܼܢܲܢ ܠܡܸܬܿܛܲܒܵܥܘܼ ܒܗܵܘܬܼܵܐ ܕܚܵܘܒܲܝ̈ܢ ܀ 203 :ܥ̣ܫܸܢ ܡܸܢܝܵܢܵܐ ܕܲܫܟܼܝܼܪ݁ܵܬܲܢ ܡ̣ܢ ܡܸܢܝܵܢܵܐ 204 ܘܠܵܐ ܡܸܬܿܬܿܟܼܝܼܠܵܐ ܚܲܝܵܒܼܘܼܬܲܢ ܒܟܲܝܠܵܐ ܝ̄ܕܼܝܼܥܵܐ ܀ 205 :ܒܠܲܥ̣ܢܲܢ ܣܲܓܿܝܼ ܐܵܦ ܡܲܚ̈ܘܵܬܼܵܐ ܥܲܙܝܼ̈ܙܵܬܵܐ 206 ܘܠܵܐ ܦܵܫ̣ ܝܲܨܪܲܢ ܡ̣ܢ ܥܸܢܝܵܢܵܐ ܕܨܼܝܕܼ ܒܝܼ̈ܫܵܬܼܵܐ ܀ 207 :ܢܬܲܥ ܡܲܬܼܩܵܠܵܐ ܕܪܲܒܿܘܼܬܼ ܢܸܓܼܕܲܢ ܡ̣ܢ ܣܲܢ̈ܝܵܬܲܢ 208 ܘܠܵܐ ܢܲܣܝܼܢܲܢ ܠܡܸܣܢܵܐ ܥܵܘ̣ܠܲܢ ܘܠܵܐ ܟܠ ܟܠܹܗ ܀ 209 :ܐܸܢܗܘ̤ ܕܥܵܘ̣ܠܲܢ ܣܗܸ݂ܕܼ ܒܲܢ ܡ̇ܪܝܵܐ ܐܲܟܼܡܵܐ ܕܲܟܼܬܼܝܼܒܼ 210 ܐܲ̄ܢ̄ܬܿ ܚܘܼܢ ܘܲܫܒܼܘܿܩ ܡܸܛܠ ܪ̈ܲܚܡܲܝܟ ܕܠܵܐ ܡܸܬܼܡܲܫܚܝܼܢ ܀ 211 :ܠܵܐ ܡܸܬܼܡܲܫܚܵܐ ܡܪܲܚܡܵܢܘܼܬܼܵܟ ܡ̣ܢ ܡ̇ܫܘܿܚܹ̈ܐ 212 ܘܐܸܢ ܗܵܟܲܢܵܐ ܗ̄ܝܼ ܡ̇ܢܵܘ ܥܵܘ̣ܠܲܢ ܒܵܩܵܐ ܫܝܼܛܵܐ ܀ pb. 124 213 :ܒܵܩܵܐ ܗ̄ܝ̣ ܫܝܼܛܵܐ ܥܵܘܵܠܘܼܬܲܢ ܟܡܵܐ ܐܸܢ ܪܲܒܵܐ 214 ܫܕܼܝܼܗ̇ ܐܲܝܟ ܒܸܙܩܵܐ ܒܝܲܡܵܐ ܪܲܒܵܐ ܕܒܲܣܝܼܡܘܼܬܼܵܟ ܀ 215 :ܠܵܐ ܬܲܩܸܨ ܠܲܢ ܥܲܠ ܕܲܚܛ݂ܲܝܢܲܢ ܐܲܝܟ ܚܲܛܵܝܹ̈ܐ 216 ܕܐܲܢܬܿ ܛܵܒܼ ܡ̣ܢ ܟܠ ܡܦܵܣ ܐܲܢ̄ܬܿ ܒܲܙܢܵܐ ܕܚܲܛܵܝܘܼܬܲܢ ܀ 217 :ܐܲܢ̄ܬܿ ܝܵ̇ܕܲܥܲܬܿ ܠܲܢ ܩܕܼܵܡ ܬܘܼܩܵܢܲܢ ܘܒܼܵܬܲܪ ܕܲܗ̣ܘܲܝܢ 218 ܘܲܡܦܵܣ ܐܲܢ̄ܬܿ ܒܹܗ ܒܝܲܨܪܲܢ ܒܝܼܫܵܐ ܕܡܸܨܛܲܠܝܵܢܵܐ ܗ̄ܘ̣ ܀ 219 :ܕܐܲܢ̄ܬܿ ܬܲܩܸܢܬܵܝܗܝ ܘܐܲܢ̄ܬܿ ܐܲܥܢܝܼܬܵܝܗܝ ܠܡܸܬܼܗܲܓܵܝܘܼ 220 ܡ̇ܕܹܝܢ ܡܸܢܵܟ ܝ̄ܠܸܦ ܗܸܓܼܝܵܢܵܐ ܕܒܹܝܬܼ ܛܵܒܼ ܠܲܕܼܒܝܼܫ ܀ 221 :ܘܐܸܢ ܐܲܢ̄ܬܿ ܪܲܒܵܐ ܘܗܘ̤ ܬܲܠܡܝܼܕܼܵܐ ܕܪܲܒܵܢܘܼܬܼܵܟ 222 ܓܡܘܿܪ ܬܲܠܡܝܼܕܼܵܟ ܐܲܝܟ ܨܸܒܼܝܵܢܵܐ ܕܪܲܒܵܘܼܬܼܵܟ ܀ 223 :ܣܲܒ̣ ܠܵܟ ܛܲܢܬܵܐ ܠܛܲܠܝܵܐ ܫܲܒܼܪܵܐ ܕܐܸܬܿܬܿܠܡܲܕܼ ܠܵܟ 224 ܘܲܗܓܼܝܼ ܩܕܼܵܡ̇ܘܗܝ ܗܸܓܼܝܵܢ ܡܸܠܹ̈ܐ ܕܲܡܚܲܝ̈ܡܵܢ ܠܹܗ ܀ 225 :ܟܬܼܘܿܒܼ ܐܵܬܼ̈ܘܵܬܼܵܐ ܕܫܸܡ ܐܝܼܬܼܘܼܬܼܵܟ ܥܲܠ ܪܸܥܝܵܢܹܗ 226 ܘܢܸܩܪܹ̈ܐ ܒܗܵܘܢܵܐ ܘܢܸܛܲܪ ܛܲܟܼܣܵܐ ܕܕܘܼܒܵܪ ܚܲܝܵܘ̈ܗܝ ܀ 227 :ܬܢܝܼ ܘܲܪܫܘܿܡ ܠܹܗ ܚܘܼܩܵܐ ܐ̄ܚܪܹܢܵܐ ܕܪܸܚܡܲܬܼ ܐ̄ܢܵܫܵܐ 228 ܕܢܹܐܣܘܿܪ ܚܘܼܒܹܿܗ ܒܐܵܠܲܦ ܐܝܼܬܼܝܵܐ ܘܬܼܵܘ ܐ̄ܢܵܫܘܼܬܼܵܐ ܀ 229 :ܘܐ̄ܢܵܫܵܐ ܡ̇ܐ ܕܐܸܬܼܝܲܠܲܦ ܠܡܸܩܪܵܐ ܫܲܦܝܼܪ 230 ܦܫܝܼܡ ܠܹܗ ܕܢܸܟܼܬܿܘܿܒܼ ܘܢܸܬܼܗܲܓܹܿܐ ܒܵܗ̇ ܒܚܹܐܪܘܼܬܼ ܢܲܦܫܹܗ ܀ 231 :ܚܹܐܪܘܼܬܼ ܢܲܦܫܵܬܐ ܡܠܲܝ̣ܬܵܗ̇ ܠܢܲܦܫܵܐ ܟܕܼ ܬܲܩܸܢܬܵܗ̇ 232 ܘܛܵܒܼ ܫܲܠܝܼܛܵܐ ܠܡܸܦܪܲܫ ܬܲܪܬܹܿܝܢ ܦܵܪܘܿܫܵܐܝܼܬܼ ܀ 233 :ܦܪܘܿܫ ܦܵܪܘܿܫܬܵܐ ܗܵܢ ܦܘܼܪܫܵܢܵܐ ܕܣܝܼܡ ܒܲܟܼܝܵܢܹܟܼܝ 234 ܘܕܲܥܝ ܠܲܟܼܝܵܢܹܟܼܝ ܘܠܲܡܬܲܩܢܵܢܹܟܼܝ ܕܣܵܡ̣ ܒܹܟܼܝ ܬܲܪܬܹܿܝܢ ܀ 235 :ܬܲܪܬܹܿܝܢ ܐܝܼܬܼ ܠܹܟܼܝ ܢܦܫܵܐ ܡ̇ܪܬܵܐ ܕܛܵܒܼܬܼܵܐ ܘܒܼܝܼܫܬܵܐ 236 ܕܘܼܢܝ ܟܹܐܢܵܐܝܼܬܼ ܕܐܲܝܕܵܐ ܟܹܐܢܵܐ ܡ̣ܢ ܬܲܪ̈ܬܲܝܗܹܝܢ ܀ 237 :ܒܚܸܟܵܐ ܕܒܸܣܪܵܐ ܦܵܪܫܲܬܿܝ ܚܲܠܝܵܐ ܡ̣ܢ ܡܪܝܼܪܵܐ 238 ܦܪܘܿܫܝ ܠܲܟܼܝܵܢܹܟܼܝ ܐܲܟܼܡܵܐ ܕܲܦܪܲܫ̣ܬܿܝ ܠܲܕܼܠܵܐ ܕܝܼܠܹܟܼܝ ܀ 239 :ܕܝܼܠܹܟܼܝ ܫܲܦܝܼܪ ܠܡܸܚܙܵܐ ܫܲܦܝܼܪ ܐܸܢ ܫܲܦܝܼܪܲܬܿܝ 240 ܘܡ̇ܐ ܕܲܫܦ݂ܲܪ ܠܹܟܼܝ ܫܘܼܦܪܵܐ ܕܢܲܦܫܹܟܼܝܒ ܟܹܐܝܢ ܒܘܼܚܪܵܢܹܟܼܝ ܀ 241 :ܟܹܐܝܢ ܒܘܼܚܪܵܢܵܐ ܗ̄ܘ̣ ܟܠ ܒܲܪܢܵܫܵܐ ܕܲܩܢܸܐ ܢܲܦܫܵܐ 242 ܘܲܕܠܝܼܠܵܐ ܠܹܗ ܠܡܸܦܪܲܫ ܣܲܢܝܵܐ ܡ̣ܢ ܫܲܦܝܼܪܵܐ ܀ 243 :ܫܲܦܝܼܪ ܡ̇ܕܹܝܢ ܕܵܝ̇ܢܝܼܢ ܥܲܡܲܢ ܟܝܵܢܹ̈ܐ ܚܲܪ̈ܫܹܐ 244 ܘܲܡܚܲܝܒܼܝܼܢ ܠܲܢ ܕܠܵܐ ܚܲܝܵܒܼܝܼܢ ܠܚܲܝܵܒܼܘܼܬܲܢ ܀ 245 ܐܸܢ ܟܹܐܢܵܐܝܼܬܼ ܪܕܲܢ ܦܘܼܩܕܵܢܵܐ ܐܲܠܵܗܵܝ̇ܐ: pb. 125 246 ܘܫܲܚܠܸܦ ܙܲܒܼܢܹ̈ܐ ܠܒܲܪ ܡ̣ܢ ܛܲܟܼܣܵܐ ܕܫܘܼܚܠܵܦܲܝ̈ܗܘܿܢ ܀ 247 :ܟܹܐܢܵܐ ܡܚܘܿܬܲܢ ܘܲܬܼܪܝܼܨ ܢܸܓܼܕܼܵܐ ܕܡܲܪܵܚܘܼܬܲܢ 248 ܘܬܼܘܼܒܼ ܫܵܘܹ̇ܝܢܲܢ ܠܡܸܬܼܢܲܓܼܵܕܼܘܼ ܢܸܓܼ̈ܕܹܿܐ ܥܦܝܼܦܹ̈ܐ ܀ 249 :ܢܸܓܼ̈ܕܹܿܐ ܥܦܝܼܦܹ̈ܐ ܚܲܝܵܒܼ ܝܲܨܪܲܢ ܠܡܸܬܼܢܲܓܼܵܕܼܘܼ 250 ܕܝܵ̇ܕܲܥ ܕܲܚܛ̣ܵܐ ܘܠܵܐ ܡܸܬܼܥܲܗܲܕܼ ܬܒܲܥܬܼܵܐ ܕܕܼܝܼܢܵܐ ܀ 251 :ܫܡܝܼܥ ܠܹܗ ܕܝܼܢܵܐ ܕܗܵܘܹ̇ܐ ܒܚܲܪܬܼܵܐ ܕܫܘܼܠܵܡ 252 ܘܠܵܐ ܡܸܣܬܲܪܲܕܼ ܡ̣ܢ ܫܘܼܢܵܩܵܐ ܕܫܸܡ ܓܹܗܲܢܵܐ ܀ 253 :ܘܵܝܠܲܢ ܕܲܟܼܡܵܐ ܛܪܘܼܢ ܪܸܥܝܵܢܲܢ ܡ̣ܢ ܛܲܪܵܢܵܐ 254 ܕܫܲܪܝܼܪܵܐ ܠܲܢ ܘܠܵܐ ܫܲܪܝܼܪܵܐ ܬܒܲܥܬܼܵܐ ܕܕܼܝܼܢܵܐ ܀ 255 :ܫܲܪܝܼܪ ܠܲܢ ܠܡܵܢ ܠܵܐ ܒܵܗܹ̇ܒܼ ܝܲܨܪܵܐ ܒܝܼܫܵܐ 256 ܘܥܲܠ ܡ̇ܢ ܡܲܩܠܸܐ ܠܘܼܩܒܲܠ ܡܸܕܲܡ ܕܫܲܪܝܼܪ ܘܲܒܼܚܝܼܪ ܀ 257 :ܫܲܪܝܼܪ ܕܝܼܢܵܟ ܪܲܒܿ ܕܲܝܵܢܹ̈ܐ ܕܕܼܵܐܲܝܟ ܟܠܵܐ 258 ܘܡ̇ܐܢܵܐ ܢܸܥܒܸܿܕ ܕܕܲܓܸܿܠ̄ܢ ܐܸܢܘܿܢ ܐܲܓܼܙܵܪ ܕܝܼܢܲܝ̈ܟ ܀ 259 :ܕܲܓܵܠܵܐܝܼܬܼ ܫܡ݂ܲܥܢܵܝܗܝ ܠܲܫܡܵܐ ܕܕܼܝܼܢܵܟ ܟܹܐܢܵܐ 260 ܘܐܸܠܘܼ ܫ̣ܡܲܥܬܵܝܗܝ ܫܲܪܝܼܪܵܐܝܼܬܼ ܠܵܐ ܚܵܛܹ̇ܝܢ ܗ̣̄ܘܲܝܢ ܀ 261 :ܚ̣ܛܲܝܢ ܐܲܝܟ ܕܲܚܛ̣ܲܝܢ ܠܦܘܼܬܼ ܕܲܟܼܝܵܢܲܢ ܢܩܸܐ ܠܲܚܛܝܼܬܼܵܐ ܗ̄ܘ̣ 262 ܡܵܪܹܐ ܟܝܵܢܹ̈ܐ ܚܘܼܢ ܠܲܟܼܝܵܢܲܢ ܕܠܵܐ ܢܸܬܼܚܲܝܲܒܼ ܀ 263 :ܥܲܠ ܚܵܘ̈ܒܵܬܲܢ ܩܲܢܝܼܛܝܼܢܲܢ ܒܟܼܠܗܘܿܢ ܚܲܝܲܝ̈ܢ 264 ܘܗܵܐ ܡܪܲܟܿܒܼܝܼܢܲܢ ܦܘܼܪ̈ܣܹܐ ܕܒܼܵܥܹ̇ܝܢ ܫܪܵܝ ܚܵܘ̈ܒܵܬܼܵܐ ܀ 265 :ܫܪܝ ܚܵܘ̈ܒܵܬܲܢ ܡ̇ܪܵܐ ܕܫܲܠܝܼܛ ܥܲܠ ܚܵܘ̈ܒܵܬܲܢ 266 ܘܲܠܚܝܼ ܐܸܢܹܝܢ ܡ̣ܢ ܥܘܼܗܕܵܢܵܐ ܕܲܣܦܲܪ ܕܝܼܢܲܝ̈ܟ ܀ 267 :ܐܦܸܩ ܐܸܢܹܝܢ ܡ̣ܢ ܒܹܝܬܼ ܐܲܪ̈ܟܹܿܐ ܕܕܲܝܵܢܘܼܬܼܵܟ 268 ܘܬܲܠܲܚ ܐܸܢܹܝܢ ܠܥܹܝܢ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ ܀ 269 :ܠܵܐ ܢܦܘܼܫ ܨܹܐܕܷܲܟ ܫܛܵܪܵܐ ܕܲܟܼܬܼܝܼܒܼ ܐܵܕܼܵܡ̇ܐܝܼܬܼ 270 ܕܠܵܐ ܢܸܬܼܚܲܬܿܪܘܼܢ ܣܵܢ̇ܐܵܘ̈ܗܝ ܕܐܵܕܼܵܡ ܒܚܵܘܒܵܘ̈ܗܝ ܕܐܕܼܵܡ ܀ 271 :ܐ̄ܫܛܵܪܵܐ ܕܚܵܘ̈ܒܹܿܐ ܟܬ݂ܲܒܼ ܗ̄ܘ̣ܵܐ ܒܲܥܕܹܢ ܒܐܘܼܟܼܠܵܐ ܕܦܹܐܪܵܐ 272 ܘܲܕܼܠܵܐ ܦܲܪܥܹܗ ܚܕܼܝܼ ܣܵܛܵܢܵܐ ܒܚܵܘܒܲܬܼ ܚܵܘܒܵܘ̈ܗܝ ܀ 273 :ܗܵܝ̇ ܪܸܒܿܘܼܬܼܵܐ ܕܗܵܘ̇ ܦܘܼܩܕܵܢܵܐ ܪܒܼܵܬ̤ ܥܲܠ ܝܲܠܕܵܘ̈ܗܝ 274 ܘܝܲܗ̄ܒܼ݂ܘ ܦܲܓܼܪܲܝܗܘܿܢ ܡܫܲܟܿܢܵܢܘܼܬܼܵܐ ܠܡܵܘܬܵܐ ܝܲܥܢܵܐ ܀ 275 :ܐܲܝܟ ܡܸܫܟܢܹ̈ܐ ܠ݂ܒܲܟ ܦܲܓܼܪ̈ܲܝܗܘܿܢ ܡ̇ܘܬܵܐ ܨܹܐܕܼܵܘܗܝ 276 ܘܗܵܐ ܡܒܲܠܸܐ ܠܗܘܿܢ ܚܲܪܡ̇ܢܵܐܝܼܬܼ ܒܢܸܩܥܹ̈ܐ ܕܲܫܝܘܿܠ ܀ 277 :ܫܝܘܿܠ ܒܵܠܲܥܬܼܵܐ ܒܸܠܥܲܬ̤ ܐܸܢܘܿܢ ܠܲܒܼܢܲܝ̈ ܥܲܦܪܵܐ 278 ܘܠܲܝܬܿ ܥܲܦܪܵܢܵܐ ܕܪܵܢܹ̇ܐ ܒܥܲܦܪܵܐ ܕܲܟܼܢܵܘܵܬܹ̈ܗ ܀ 279 :ܓܵܒܹ̇ܠ ܥܦܲܪܲܢ ܚܘܼܣ ܥܲܠ ܥܲܦܪܲܢ ܕܲܗܘ̤ܵܐ ܥܲܦܪܵܐ 280 ܘܢܲܚܸܡ ܥܲܦܪܲܢ ܡ̣ܢ ܡܝܬܼܘܼܬܼܵܐ ܘܡ̣ܢ ܚܵܘ̈ܒܵܬܼܵܐ ܀ 281 :ܒܲܬܼܪܹܝܢ ܡ̇ܘ̈ܬܿܝܼܢ ܕܒܼܝܼܫ ܚܲܕܼ ܡ̣ܢ ܡܲܝܬܼܝܼܢܲܢ 282 ܒܚܘܼܒܵܠ ܡ̇ܘܬܵܐ ܘܒܲܫܟܼܝܼܪ݁ܵܬܼܵܐ ܕܒܼܝܼܫܘܼܬܼ ܝܲܨܪܲܢ ܀ pb. 126 283 :ܢܲܚܸܡ ܚܲܝܲܝ̈ܢ ܪܵܚܹ̇ܡ ܚܲܝܲܝ̈ܢ ܡ̣ܢ ܬܲܪ̈ܬܷܲܗܹܝܢ 284 ܘܲܦܬܲܚ ܒܐܲܦܲܝ̈ܢ ܬܪܲܥ ܡܝܼܬܼܘܼܬܼܵܐ ܘܫܘܼܒܼܩܵܢ ܥܵܘ̣ܠܵܐ ܀ 285 :ܡ̇ܘܬܵܐ ܘܥܵܘ̣ܠܵܐ ܐܸܚܲܕܼܘ ܒܐܲܦܲܝ̈ܢ ܬܪܲܥ ܢܸܟܼܠܲܝ̈ܗܘܿܢ 286 ܘܗܵܐ ܡܸܨܛܲܢܥܝܼܢ ܕܲܢܛܲܒܥܘܼܢܵܢ ܒܠܵܐ ܢܘܼܚܵܡܵܐ ܀ 287 :ܐܲܢ̄ܬܿ ܫܒܼܝܼܠ ܢܘܼܚܵܡܵܐ ܘܚܘܼܣܵܝ ܚܵܘ̈ܒܹܿܐ 288 ܘܐܲܢ̄ܬܿ ܐܲܠܸܦܬܵܢ ܕܒܼܵܛܹ̇ܠ ܡ̇ܘܬܵܐ ܘܫܵܬܹ̇ܩ ܥܵܘ̣ܠܵܐ ܀ 289 :ܒܚܲܕܼ ܡ̣ܢ ܓܸܢܣܲܢ ܕܪܲܫܬ̣ܵܗ̇ ܠܐܘܼܪܚܵܐ ܕܚܘܼܕܵܬܼ ܓܸܢܣܲܢ 290 ܗܲܒܼܠܲܢ ܕܢܸܪܕܹܿܐ ܠܘܼܥܕܵܐ ܦܲܐܝܵܐ ܕܚܘܼܕܵܬܼ ܚܲܝܲܝ̈ܢ ܀ 291 :ܒܚܲܝܘܼܬܼ ܚܲܝܵܘ̈ܗܝ ܚܲܬܸܿܡ ܐܸܢܘܿܢ ܠܕܲܫܢܹ̈ܐ ܕܚܲܝܲܝ̈ܢ 292 ܘܲܬܼܟܼܝܼܠܝܼܢܲܢ ܕܠܵܐ ܡܕܲܓܸܿܠ ܐܲܢ̄ܬܿ ܒܫܘܼܘܕܵܝ ܡܸܠܲܝ̈ܟ ܀ 293 :ܗܡܲܝܪܵܐ ܕܫܲܝܢܵܐ ܕܒܲܪ̣ܬܿ ܡ̣ܢ ܓܸܢܣܲܢ ܡܠܸܐ ܚܵܘ̈ܒܵܬܼܵܐ 294 ܘܗܵܐ ܡܸܙܕܲܝܲܚ ܒܲܫܒܼܝܼ̈ܚܵܬܵܐ ܕܐܲܠܵܗܘܼܬܼܵܟ ܀ 295 :ܫܒܼܝܼܚ ܡ̣ܢ ܟܠܵܐ ܥ̣ܒܲܕܿܬܵܝܗܝ ܥܲܡܵܟ ܠܪܹܫܝܼܬܼ ܚܲܝܲܝ̈ܢ 296 ܝܲܩܲܪ ܚܲܝܲܝ̈ܢ ܡܸܛܠ ܚܲܝܵܘ̈ܗܝ ܕܗܵܘ̇ ܕܲܓܼܒ݂ܲܝܬܵܝܗܝ ܀ 297 :ܚܘܼܒܵܐ ܪܲܒܵܐ ܕܠܵܐ ܡܸܬܼܡܲܠܲܠ ܚܵܘܝܼܬܿ ܨܹܐܕܵܪܘܗܝ 298 ܒܗܵܝ̇ ܕܐܲܣܸܩܬܵܝܗܝ ܠܪܵܘܡ̇ܐ ܪܲܒܵܐ ܕܲܫܡܵܟ ܀ 299 :ܢܦܝܼܣܵܟ ܡ̇ܕܹܝܢ ܒܲܪ ܝܲܡܝܼܢܵܐ ܕܐܲܠܵܗܘܼܬܼܵܟ 300 ܕܬܬܼܪܲܥܸܐ ܠܲܢ ܥܲܠ ܕܐܲܪܓܸܿܙܢܵܟ ܥܵܘ̇ܠܵܐܝܼܬܼ ܀ 301 :ܨܠܘܿܬܼܵܐ ܐܲܡܝܼܪ ܕܲܡܩܲܪܸܒܼ ܠܵܟ ܚܠܵܦ ܚܲܛܵܝܹ̈ܐ 302 ܗܵܐ ܥܸܕܵܢܵܐ ܕܬܼܵܒܲܥ ܛܲܟܼܣܵܐ ܕܨ̈ܠܵܘܵܬܼܵܐ ܀ 303 :ܚܘܼܒܵܢܵܐܝܼܬܼ ܡܥ̈ܕܼ ܕܲܢܨܲܠܸܐ ܚܠܵܦ ܚܲܒܿܝܼܒܼܵܘ̈ܗܝ 304 ܩܲܒܸܿܠ ܡܸܠܵܘ̈ܗܝ ܒܚܘܼܒܵܐ ܕܲܦܠܸܐ ܠܒܲܣܝܼܡܘܼܬܼܵܟ ܀ 305 :ܚܘܒܵܢܵܐܝܼܬܼ ܡܚܲܒܸܿܒܼ ܐܲܢ̄ܬܿ ܠܹܗ ܒܪܲܪܓܼܵܐ ܕܲܫܡܵܟ 306 ܓܡܘܿܪ ܒܲܥܒܼܵܕܼܵܐ ܦܝܵܣܵܐ ܕܡܸܠܵܘ̈ܗܝ ܕܡܸܛܠܵܬܲܢ ܀ 307 :ܡܸܛܠܵܬܲܢ ܡܨܲܠܸܐ ܥܲܡܲܢ ܪܹܫܹܗ ܕܓܸܢܣܲܢ 308 ܪܵܚܹ̇ܡ ܓܸܢܣܲܢ ܫܡܲܥ ܒܲܪ ܓܸܢܣܲܢ ܘܚܘܼܣ ܥܲܠ ܓܸܢܣܲܢ ܀ 309 :ܨܘܼܬܼ ܒܵܥܘܼܬܲܢܡ ܕܲܡܩܲܪܸܒܼ ܠܵܟ ܒܪܵܐ ܒܲܪ ܓܸܢܣܲܢ 310 ܘܗܲܒܼܠܲܢ ܐܝܼܕܼܵܐ ܕܚܘܼܣܵܝ ܚܵܘ̈ܒܹܿܐ ܕܒܼܵܥܹ̇ܝܢܲܢ ܠܵܟ ܀ 311 :ܫܡܲܥܲܝܢ ܛܵܒܼܵܐ ܕܲܫܡܝܼܥܵܐ ܠܵܟ ܝܵܥܘܼܬܼ ܡܸܠܲܝ̈ܢ 312 ܘܐܲܦܝܼܣ ܐܲܢ̄ܬܿ ܠܵܟ ܐܸܢܗܘ̤ ܕܲܙܥܘܿܪ ܦܝܵܣܲܢ ܨܹܐܕܲܝܟ ܀ 313 :ܙܥܘܿܪ ܗ̄ܘ̣ ܦܝܵܣܲܢ ܠܦܘܼܬܼ ܪܲܒܿܘܼܬܼܵܐ ܕܚܲܝܵܒܼܘܼܬܲܢ 314 ܘܲܕܼܠܵܐ ܢܦܝܼܣ ܠܵܟ ܐܵܦ ܗܝ̤ ܗܵܕܹܐ ܕܚܲܝܵܒܼܘܼܬܼܵܐ ܗ̄ܝܼ ܀ 315 :ܒܐܵܓܼܘܿܢ ܚܲܫܹ̈ܐ ܕܥܲܠ ܚܵܘ̈ܒܲܬܿܢ ܪܡܹܝܢܲܢ ܟܠܢܵܫ 316 ܘܕܲܢܦܝܼܣ ܩܸܢܛܵܐ ܗ̄ܘ̣ ܘܲܕܼܠܵܐ ܢܦܝܼܣ ܬܘܼܒܼ ܩܸܢܛܵܐ ܥܦܝܼܦܵܐ ܀ 317 :ܩܸܢܛܵܐ ܗ̄ܘ̣ ܕܲܢܦܝܼܣ ܒܲܕܼܠܵܐ ܣܢܝܼܩ ܐܲܢ̄ܬܿ ܕܲܢܦܝܼܣܘܼܢܵܟ 318 ܘܲܩܢܸܛ ܩܸܢܛܝܼܢ ܐܸܢܗܘ̤ ܕܠܵܐ ܢܦܝܼܣ ܥܲܠ ܣܲܟܼܠܘܼܬܲܢ ܀ pb. 127 319 :ܠܵܐ ܚܵܫܲܚ ܠܵܟ ܦܝܵܣܵܐ ܕܡܸܠܹ̈ܐ ܕܲܡܦܝܼܣܵܢܹ̈ܐ 320 ܒܗܵܝ̇ ܕܲܫܡܝܼܥ ܠܵܟ ܦܝܵܣܵܐ ܕܟܼܠܢܵܫ ܩܕܼܵܡ ܕܲܢܦܝܼܣܵܟ ܀ 321 :ܚܙܸܐ ܠܵܟ ܥܵܘ̣ܠܵܐ ܕܟܼܠܗܘܿܢ ܕܵܪܹ̈ܐ ܩܕܼܵܡ ܟܠ ܒܸܪ̈ܝܵܢ 322 ܘܡ̇ܢ ܐܸܡܲ݁ܪ ܐ̄ܢܵܐ ܕܵܪܹ̈ܐ ܘܙܲܒܼܢܹ̈ܐ ܥܲܡ ܐܝܼܬܼܘܼܬܼܵܟ ܀ 323 :ܥܲܡ ܐܝܼܬܼܘܼܬܵܟ ܠܒܼܝܼܟ ܐܲܢ̄ܬܿ ܣܵܟܼܵܐ ܕܡܸܣܬܲܝܟܼܵܢܹ̈ܐ 324 ܘܠܲܝܬܿ ܒܲܒܼܪܝܼܬܼܵܐ ܡܸܕܹܿܡ ܕܐܝܼܬܼܵܘܗܝ ܕܠܵܐ ܒܵܟ ܐܝܼܬܼܵܘܗܝ ܀ 325 :ܥܲܡܵܟ ܐܝܼܬܼܵܘܗܝ ܥܘܼܗܕܵܢ ܣܸܦܪܹ̈ܐ ܕܲܗܘ̤ܵܘ ܘܗܵܘܹ̇ܝܢ 326 ܘܠܲܝܬܿ ܒܲܥܒܼܝܼ̈ܕܹܐ ܡܸܕܹܿܡ ܕܿܟܼܣܸܐ ܡ̣ܢ ܝܼܕܲܥܬܼܵܟ ܀ 327 :ܓܠܸܐ ܠܵܟ ܥܵܘ̣ܠܲܢ ܘܙܲܕܿܝܼܩܘܼܬܼܵܐ ܕܥܝܼܪܹ̈ܐ ܘܐ̄ܢܵܫܵܐ 328 ܘܲܬܼܩܝܼܠ ܗ̄ܘ̣ ܠܵܟ ܦܘܼܪܥܵܢ ܐܲܓܼܪܵܐ ܕܛܵܒܹ̈ܐ ܘܒܼܝܼܫܹ̈ܐ ܀ 329 :ܘܟܲܕܼ ܛܵܒܼ ܒܵܟ ܗ̄ܘ̣ ܟܠܡܵܐ ܕܐܝܼܬܼܵܘܗܝ ܘܲܥܬܼܝܼܕ ܕܢܸܗܘܸܐ 330 ܚܢܲܢ ܠܵܐ ܡܲܨܝܵܐ ܕܠܵܐ ܢܸܬܼܟܲܫܲܦ ܥܲܠ ܚܵܘ̈ܒܵܬܲܢ ܀ 331 :ܥܲܠ ܝܵܘ̈ܒܵܬܲܢ ܡܸܬܼܫܦܝܼܢܲܢ ܩܕܼܵܡ ܪܲܒܿܘܼܬܼܵܟ 332 ܫܒܼܘܿܩ ܚܵܘ̈ܒܵܬܲܢ ܘܲܥܛܝܼ ܐ̄ܫܛܵܪܵܐ ܕܪܲܒܿܘܼܬܼ ܥܵܘ̣ܠܲܢ ܀ 333 :ܚܘܼܣ ܚܲܢܵܢܵܐ ܥܲܠ ܒܝܼܫܘܼܬܿܢ ܕܥܸܫܢܲܬ̤ ܣܲܓܿܝܼ 334 ܘܩܲܪܝܼܒܼܝܼܢ ܚ̄ܢܲܢ ܕܢܸܗܘܸܐ ܚܲܒܼܪܹ̈ܐ ܠܲܣܕܼܘܿܡ̇ܝܹ̈ܐ ܀ 335 :ܠܵܐ ܢܬܸܬܸܿܠ ܠܹܗ ܐܲܬܼܪܵܐ ܠܥܵܘ̣ܠܵܐ ܕܲܢܕܿܝܲܪ ܒܲܢ 336 ܕܐܸܢ ܥܵܡܲ݁ܪ ܒܲܢ ܙܥܘܿܪܝܵܐ ܠܕܝܼܢܲܢ ܬܒܲܥܬܼܵܐ ܕܲܣܕܼܘܿܡ ܀ 337 :ܠܵܐ ܡ̇ܪܝ ܢܸܗܘܸܐ ܚܲܒܼܪܹ̈ܐ ܒܕܼܝܼܢܵܐ ܠܲܣܕܼܘܿܡ̇ܝܹ̈ܐ 338 ܕܕܲܠܡܵܐ ܢܵܪܦܸܐ ܫܸܡ ܒܝܼܫܘܼܬܲܢ ܒܲܕܼܡܘܼܬܼ ܗܵܢ̇ܘܿܢ ܀ 339 :ܟܠܝܼ ܡ̣ܢ ܥܲܡܲܢ ܢܸܓܼܕܵܐ ܕܕܼܵܡܹ̇ܐ ܠܲܣܕܼܘܿܡ̇ܝܹ̈ܐ 340 ܘܠܵܐ ܬܨܘܼܪ ܒܐܲܪܥܲܢ ܕܡܘܼܬܼܵܐ ܣܢܝܼܬܼܵܐ ܕܐܲܪܥܵܐ ܕܲܣܕܼܘܿܡ ܀ 341 :ܬܘܿܗ ܘܒܼܘܿܗ ܐܝܼܬܹܝܗ̇ ܐܲܪܥܵܐ ܕܲܣܕܼܘܿܡ ܡ̣ܢ ܟܲܕܼ ܝܸܩܕܲܬ̤ 342 ܘܨܲܕܝܵܐ ܘܫܲܗܝܵܐ ܡ̣ܢ ܥܲܠ̈ܠܵܬܵܐ ܕܙܲܪܥܹ̈ܐ ܘܦܹܐܪܹ̈ܐ ܀ 343 :ܠܵܐ ܟܹܝܬܼ ܢܸܚܙܹܝܗ̇ ܠܗܵܝ̇ ܡܲܪܕܿܘܼܬܵܐ ܘܠܵܐ ܟܠ ܟܠܹܗ 344 ܘܠܵܐ ܢܸܬܼܥܲܗܲܕܼ ܫܸܡ ܣܘܼܥܪ̈ܵܢܹܝܗ̇ ܒܕܼܘܼܒܵܪ ܚܲܝܲܝ̈ܢ ܀ 345 :ܚܲܝܹ̈ܐ ܟܪ̈ܲܝܵܐ ܘܡܲܠܝܲܝ̈ ܚܵܘ̈ܒܹܿܐ ܚܲܝ̈ ܒܲܪܢܵܫܲܢ 346 ܪܵܚܹ̇ܡ ܐ̄ܢܵܫܵܐ ܚܘܼܣ ܥܲܠ ܚܲܝܲܝ̈ܢ ܡܲܠܝܲܝ̈ ܚܵܘ̈ܒܹܿܐ ܀ 347 :ܠܵܐ ܬܚܲܝܸܒܼ ܠܲܢ ܒܚܲܝܵܒܼܘܼܬܼܵܐ ܕܚܵܘܒܲܬܼ ܚܵܘܒܲܝ̈ܢ 348 ܕܗܵܐ ܚܵܒܼ݂ܢܲܢ ܠܲܢ ܠܩܲܠܝܼܠ ܢܸܓܼ̈ܕܹܿܐ ܕܥܲܠ ܚܵܘ̈ܒܵܬܲܢ ܀ 349 :ܟܲܕܼܘ ܪܕܿܝܬܵܗ̇ ܠܛܵܠܘܿܡܘܼܬܲܢ ܒܲܕܼܡܸܬܼܚܲܙ̈ܝܵܢ 350 ܠܵܐ ܬܵܘܣܸܦ ܠܲܢ ܢܸܓܼ̈ܿܕܹܿܐ ܥܦܝܼܦܹ̈ܐ ܕܠܵܐ ܢܹܐܒܲܕܼ ܠܲܢ ܀ 351 :ܐܲܪܝܼܡ ܫܲܒܼܛܵܟ ܡ̣ܢ ܡܲܚ̈ܘܵܬܼܵܐ ܕܦܲܓܼܪܲܢ ܘܐܲܪܥܲܢ 352 ܘܲܟܼܐܝܼ ܒܟܸܢܫܹ̈ܐ ܕܲܫܡܲܝܵܢܹ̈ܐ ܕܠܵܐ ܢܲܟܿܘܿܢܵܢ ܀ pb. 128 353 :ܫܲܝܸܢ ܐܸܢܘܿܢ ܕܠܵܐ ܢܚܵܘܘܿܢ ܠܲܢ ܐܲܦܹ̈ܐ ܕܚܸܡܬܼܵܐ 354 ܘܲܢܫܲܝܢܘܼܢܵܝܗܝ ܠܐܵܐܲܪ ܕܲܕܼܠܝܼܚ ܡܸܛܠ ܥܵܘ̣ܠܲܢ ܀ 355 :ܪܡܘܿܙ ܠܹܗ ܠܐܲܪܟܿܘܿܢ ܕܐܲܚܝܼܕܼ ܪܲܗܛܵܐ ܕܝܲܪ̈ܚܲܝ ܫܲܢ̄ܬܵܐ 356 ܕܢܲܪܡܸܐ ܦܓܼܘܼܕܹ̈ܐ ܕܲܡܫܲܝܢܘܼܬܼܵܐ ܒܙܲܒܼܢܹ̈ܐ ܫܓܼܝܼܫܹ̈ܐ ܀ 357 :ܩܪܝܼ ܘܙܲܗܲܪܲܝܗܝ ܠܪܘܼܚܵܐ ܕܐܲܚܝܼܕܼ ܫܘܼܠܛܵܢ ܪܘܼܚܵܐ 358 ܕܢܸܬܼܟܿܘܿܣ ܚܹܐܦܵܐ ܕܙܵܘܥܵܘ̈ܗܝ ܕܐܵܐܲܪ ܡ̣ܢ ܩܲܫܝܘܼܬܼܵܐ ܀ 359 :ܣܝܼܡ ܠܹܗ ܛܲܟܼܣܵܐ ܠܡܛܲܟܿܣܵܢܵܐ ܕܙܲܒܼܢܹ̈ܐ ܚܲܪ̈ܫܹܐ 360 ܕܢܲܠܸܦ ܐܸܢܘܿܢ ܠܡܸܛܲܪ ܛܲܟܼܣܵܐ ܕܫܘܼܚܠܵܦܲܝ̈ܗܘܿܢ ܀ 361 :ܒܫܘܼܚܠܵܦܲܝ̈ܗܘܿܢ ܕܕܲܠܵܐ ܛܲܟܼܣܵܐ ܙܥܲܪ݂ ܟܠ ܡܸܕܹܿܡ 362 ܘܠܵܐ ܡ̣ܢ ܦܵܫ̣ ܡܸܕܹܿܡ ܕܠܵܐ ܐܸܬܼܡܲܣܟܲܢ ܡ̣ܢ ܡ̇ܐ ܕܐܝܼܬܼܵܘܗܝ ܀ 363 :ܡܸܣܟܹܿܝܢ ܘܲܨܪܝܼܟ ܥܘܼܡܪܵܐ ܕܐ̄ܢܵܫܵܐ ܡ̣ܢ ܟܠ ܛܵܒܼ̈ܢ 364 ܘܲܡܙܲܠܗܲܙ ܗ̄ܘ̣ ܡ̇ܙܘܿܢ ܦܲܓܼܪܵܐ ܘܥܸܢܝܵܢ ܢܦܫܵܐ ܀ 365 :ܥܪܲܩ ܠܹܗ ܡܸܢܲܢ ܢܝܵܚܵܐ ܕܦܲܓܼܪܵܐ ܘܲܕܪܲܥܝܵܢܵܐ 366 ܘܩܵܡ̣ ܒܲܪܢܵܫܲܢ ܐܲܝܟ ܐܝܼܠܵܢܵܐ ܒܝܵܘܡܲܝ̈ ܣܲܬܼܘܵܐ ܀ 367 :ܠܣܲܬܼܘܵܐ ܟܡܝܼܪܵܐ ܕܵܡܹ̇ܐ ܪܲܗܛܵܐ ܕܝܲܪ̈ܚܲܝ ܫܲܢ̄ܬܵܐ 368 ܘܠܲܝܬܿ ܒܘܼܝܵܐܐ ܕܡܲܩܢܹܐ ܣܲܒܼܪܵܐ ܒܐܲܝܕܼܵܐ ܕܦܲܐܝܵܐ ܀ 369 :ܠܲܝܬܿ ܟܠ ܟܠܹܗ ܥܘܼܗܕܵܢ ܡܸܕܹܿܡ ܕܢܝܼܚ ܘܲܡܫܲܝܲܢ 370 ܐܸܠܵܐ ܩܵܠܵܐ ܕܲܫܟܼܝܼܪ̈ܵܬܼܵܐ ܕܪܵܥܹ̇ܡ ܒܐܲܪܥܵܐ ܀ 371 :ܩܵܠܵܐ ܕܥܵܘ̣ܠܵܐ ܪܵܥܹ̇ܡ ܒܲܠܚܘܿܕܼ ܒܹܝܬܼ ܐܲܪ̈ܥܵܢܹܐ 372 ܘܩܵܠ ܛܵܒܼܵܬܼ̈ܐ ܫܠܹܐ ܐܲܝܟ ܡܝܼܬܼܵܐ ܕܠܵܐ ܚܝܘܼܬܼܵܐ ܀ 373 :ܙܢܲܝ̈ ܛܵܒܼܵܬܼ̈ܐ ܡ̣ܝܬܼܘܼ ܐܲܝܟ ܡܝܼܬܼܵܐ ܕܠܵܐ ܥܘܼܦܵܝܵܐ 374 ܘܲܛܥ̣ܵܘ ܐܸܢܘܿܢ ܣܵܥܘܿܪ݁ܲܝܗܘܿܢ ܐܲܝܟ ܕܲܠܡܝܼܬܵܐ ܀ 375 :ܡ̣ܝܼܬܼ ܛܵܒܼܵܬܼ̈ܐ ܘܲܚ̣ܝܵܘ ܐܵܕܫܹ̈ܐ ܕܫܟܼܝܼܪ̈ܵܬܼܵܐ 376 ܘܵܝ ܠܲܢ ܕܲܗ̤ܘܲܝܢ ܡܝܼ̈ܬܹܐ ܠܩܘܼܫܬܵܐ ܘܚܲܝܹ̈ܐ ܠܥܵܘ̣ܠܵܐ ܀ 377 :ܚܢܲܢ ܢܲܚܸܡܢܵܝܗܝ ܠܥܵܘ̣ܠܵܐ ܡܝܼܬܼܵܐ ܒܥܵܘ̇ܠܵܘܼܬܲܢ 378 ܘܲܒܼܚܲܪܡܘܼܬܲܢ ܩܛ̣ܲܠܢܲܢ ܥܘܸܠܹ̈ܐ ܕܙܲܕܿܝܼܩܘܼܬܼܵܐ ܀ 379 :ܚܢܲܢ ܓܲܙܝܼܢܵܗ̇ ܠܙܲܕܿܝܼܩܘܼܬܲܢ ܡ̣ܢ ܝܲܠ̈ܕܵܬܼܵܐ 380 ܘܠܵܐ ܝܲܗ̣̄ܒܼܢܲܢ ܠܵܗ̇ ܠܲܡܪܒܵܝܘܼ ܦܹܐܪܹ̈ܐ ܕܚܘܼܒܵܐ ܀ 381 :ܠܦܸܪܥܘܿܢ ܕܵܡ̇ܝܵܐ ܚܲܪܡ̇ܢܘܼܬܲܢ ܕܠܘܼܩܒܲܠ ܩܘܼܫܬܵܐ 382 ܘܛܵܟ ܚܲܪܡ̇ܢܵܐ ܗ̄ܝ̣ ܠܵܐ ܡܫܲܝܢܘܼܬܲܢ ܡ̣ܢ ܕܡܸܨܪ̈ܵܝܹܐ ܀ 383 :ܦܸܪܥܘܿܢ ܦܲܓܼܪܹ̈ܐ ܕܥܘܸܠܹ̈ܐ ܚܲܢܸܩ ܒܡܲܝܵ̈ܐ ܕܢܲܗܪܵܐ 384 ܚܢܲܢ ܚܲܝܘܼܬܼܵܐ ܕܢܲܦܫܵܐ ܛܲܒܵܥ̄ܢ ܒܡܵܡܘܿܠ ܥܵܘ̣ܠܵܐ ܀ 385 :ܚܲܝܹ̈ܐ ܕܢܲܦܫܵܐ ܠܵܐ ܡ̇ܝܘܿܬܿܬܼܵܐ ܡܡܝܼܬܼܝܼܢ ܐ̄ܢܵܫܵܐ 386 ܠܵܐ ܗ̄ܘ̣ܵܐ ܕܡ̇ܝ̇ܬܵܐ ܐܸܠܵܐ ܕܗܵܘ̇ܝܵܐ ܡܝܼܬܿܬܵܐ ܕܥܵܘ̣ܠܵܐ ܀ 387 :ܒܝܼܫ ܗ̄ܘ̣ ܡ̇ܘܬܵܐ ܕܡܝܼܬܼܘܼܬܼ ܥܵܘ̣ܠܵܐ ܡ̣ܢ ܟܠ ܡܵܘܬܿܝܼ̈ܢ 388 ܘܣܵܗܹ̇ܕ ܩܵܠܵܐ ܕܡܲܚܹܐ ܡܝܼ̈ܬܹܐ ܕܬܲܪܓܸܿܡ ܗܵܠܹܝܢ ܀ pb. 129 389 :ܠܵܘ ܠܲܡ ܡ̇ܘܬܵܐ ܗ̄ܘ̣ ܐܲܝܢܵܐ ܕܩܵܛܹ̇ܠ ܦܲܓܼܪܵܐ ܒܲܠܚܘܿܕ 390 ܐܸܠܵܐ ܕܐܲܝܢܵܐ ܕܡ̇ܘܒܸܿܕܼ ܐܲܟܲܚ̄ܕܼ ܦܲܓܼܪܵܐ ܘܢܲܦܫܵܐ ܀ 391 :ܦܲܓܼܪܵܐ ܘܢܲܦܫܵܐ ܡ̇ܘܒܸܿܕ ܐܲܟܼܚ̄ܕܼ ܒܝܵܘܡ̇ܐ ܕܕܼܝܼܢܵܐ 392 ܘܵܝ ܠܲܢ ܕܲܩܪܸ݂ܒܼ ܝܵܘܡ̇ܐ ܕܕܼܝܼܢܠܐ ܕܣܵܥܲ݁ܪ ܗܵܠܹܝܢ ܀ 393 :ܘܵܝ ܠܲܢ ܕܐܸܒܼ݂ܕܼ ܦܲܓܼܪܵܢ ܗܵܪܟܵܐ ܒܟܲܦܢܵܐ ܘܟܹܐܒܹ̈ܐ 394 ܘܲܥܬܼܝܼܕܝܼܢܲܢ ܠܡܸܫܬܲܢܵܩܘܼ ܒܦܲܓܼܪܵܐ ܘܢܲܦܫܵܐ ܀ 395 :ܘܵܝ ܠܲܢ ܕܲܒܼܠ̣ܝܼܢ ܒܡܸܣܟܹܿܢܘܼܬܵܐ ܒܥܘܼܡܪܵܐ ܕܙܲܒܼܢܵܐ 396 ܘܲܒܼܗܵܘ̇ ܕܲܥܬܼܝܼܕܼ ܡܸܬܓܲܠܙܝܼܢܲܢ ܡ̣ܢ ܟܠ ܛܵܒܼ̈ܢ ܀ 397 :ܘܵܝ ܠܲܢ ܕܿܗ̤ܘܲܝܢ ܘܠܵܐ ܗ̤ܘܲܝܢ ܫܲܦܝܼܪ ܒܕܼܘܼܒܵܪ ܚܲܝܲܝ̈ܢ 398 ܘܡܸܬܼܢܲܚܡܝܼܢܲܢ ܘܠܵܐ ܗܵܘܹ̇ܝܢܲܢ ܠܦܘܼܬܼ ܢܘܼܚܵܡܲܢ ܀ 399 :ܥܡ݂ܲܪܢܲܢ ܒܐܲܪܥܵܐ ܘܠܵܐ ܐܲܟܲܫܲܪܢܲܢ ܒܬܼܵܘܬܵܒܼܘܼܬܵܗ̇ 400 ܘܐܲܝܟܲܢ ܒܗܵܘ̇ ܕܘܼܒܵܪܵܐ ܕܲܫܡܲܝܵܢܹ̈ܐ ܀ 401 :ܠܲܝܬܿ ܠܲܢ ܡ̇ܕܹܝܢ ܐܲܬܼܪܵܐ ܕܐܝܼܬܼܵܘܗܝ ܒܹܝܬܼ ܦܘܼܠܚܵܢܵܐ 402 ܐܸܠܵܐ ܒܲܠܚܘܿܕܼ ܗܵܝ̇ ܓܹܗܲܢܵܐ ܕܠܵܐ ܡܸܬܼܦܲܠܚܵܐ ܀ 403 :ܘܵܝ ܠܲܢ ܕܲܠܡܵܐ ܬܲܡ̇ܢ ܗܵܘܹ̇ܐ ܥܘܼܡܪܵܐ ܕܚܲܝܲܝ̈ܢ 404 ܒܗܵܘ̇ ܦܘܼܠܚܵܢܵܐ ܕܲܡܠܸܐ ܒܸܟܼܝܵܐ ܘܚܘܼܪܵܩ ܫܸܢܹ̈ܐ ܀ 405 :ܠܵܐ ܠܲܡ ܬܸܗܘܸܐ ܗܵܕܹܐ ܕܐܸܡ̇ܪܹܬܼ ܠܦܘܼܬܼ ܚܵܘ̈ܒܵܬܲܢ 406 ܘܠܵܐ ܢܸܬܼܓܲܙܹܐ ܡ̣ܢ ܛܵܒܼܵܬܼ̈ܐ ܕܲܬܼܢܵܢ ܘܕܲܠܗܲܠ ܀ 407 :ܠܵܐ ܠܲܡ ܢܸܦܘܿܩ ܡ̣ܢ ܗܵܢ ܥܵܠܡܵܐ ܥܲܪܛܸܠܵܐܝܼܬܼ 408 ܘܢܹܐܙܲܠ ܢܸܗܘܸܐ ܨܪ̈ܝܼܟܲܝ ܫܘܼܒܼܚܵܐ ܒܗܵܘ̇ ܬܘܼܩܵܢܵܐ ܀ 409 :ܠܵܐ ܢܸܬܼܢܲܟܼܪܸܐ ܡ̣ܢ ܗܵܘ̇ ܫܘܼܒܼܚܵܐ ܡܫܲܒܲܚ ܛܵܒܹ̈ܐ 410 ܘܠܵܐ ܢܲܦܩܘܼܢܵܢ ܐܲܝܟ ܗܵܘ̇ ܕܲܢܦܲܩ̣ ܡ̣ܢ ܡܸܫܬܿܘܼܬܼܵܐ ܀ 411 :ܛܘܼܒܹ̈ܐ ܛܵܒܹ̈ܐ ܡ̣ܠܲܟܼܬܿ ܠܹܗ ܠܓܸܢܣܲܢ ܒܚܕܼ ܒܲܪ ܓܸܢܣܲܢ 412 ܘܠܵܐ ܢܸܬܿܕܓܲܠ ܫܘܼܘܕܵܝ ܡܸܠܲܝ̈ܟ ܒܝܲܕܼ ܪܲܦܝܘܼܬܿܢ ܀ 413 :ܪܦܹܝܢܲܢ ܣܲܓܿܝܼ ܘܲܒܼܗܝܼܠܝܼܢܲܢ ܒܦܘܼܠܚܵܢ ܩܘܼܫܬܵܐ 414 ܘܡܲܐܝܼܢܵܐ ܠܲܢ ܠܡܸܥܡܲܠ ܩܲܠܝܼܠ ܒܲܕܼܫܲܦܝܼܪ̈ܢ ܀ 415 :ܣܲܓܿܝܼ ܘܲܣܒܲܝܼܣ ܝܘܼܬܼܪܵܢ ܚܲܝܹ̈ܐ ܠܵܐ ܡ̇ܝ̈ܘܿܬܹܐ 416 ܘܠܵܐ ܪܵܓܵܐ ܠܲܢ ܕܢܸܣܲܒ݂ ܡܸܢܹܗ ܚܲܕܼ ܫܵܡܘܿܢܵܐ ܀ 417 :ܕܚܝܼܠ ܕܝܼܢܵܐ ܕܗܵܘܹ̇ܐ ܬܲܡܵܢ ܒܗܵܘ̇ ܕܘܼܒܵܪܵܐ 418 ܘܠܵܐ ܡܲܪܦܸܐ ܠܲܢ ܘܠܵܐ ܫܵܡܘܿܢܵܐ ܡ̣ܢ ܚܵܘ̈ܒܵܬܲܢ ܀ 419 :ܥܕܲܡ̇ܐ ܠܡܸܠܬܼܵܐ ܕܒܲܛܝܼܠ ܫܸܡܥܵܗ̇ ܬܵܒܲܥ̇ ܒܐܝܼܕܲܝ̈ܢ 420 ܘܠܵܐ ܪܢܲܝܼܢ ܡܸܡܬܼܘܿܡ ܘܠܵܐ ܪܵܢܹ̇ܝܢܲܢ ܒܗܵܘ̇ ܒܘܼܚܪܵܢܵܐ ܀ 421 :ܗܵܘ̇ ܒܘܼܚܪܵܢܵܐ ܣܠܸܩ ܥܲܠ ܪܸܥܝܵܢܝ ܪܵܥܹ̇ܐ ܒܡܸܠܹ̈ܐ 422 ܘܙܵܥ ܘܐܸܬܼܒܲܠܗܝ̣ ܘܫܲܪܝܼ ܡܪܲܟܸܿܒܼ ܦܝܵܣܵܐ ܕܡܸܠܹ̈ܐ ܀ 423 :ܦܝܵܣܵܐ ܪܲܓܿܬܹܗ ܠܪܸܥܝܵܢܝ ܣܲܟܼܠܵܐ ܠܲܡܪܲܟܵܒܼܘܼ 424 ܕܝܵ̇ܕܲܥ ܡܚܝܼܠ ܗ̄ܘ̣ ܠܲܡܪܲܟܵܒܼܘܼ ܙܢܲܝ̈ ܕܘܼܒܵܪܹ̈ܐ ܀ pb. 130 425 :ܦܫܝܼܩ ܗ̄ܘ̣ ܦܝܵܣܵܐ ܠܲܡܦܝܼܣܵܢܹ̈ܐ ܛܵܒܼ ܡ̣ܢ ܥܲܡܠܹ̈ܐ 426 ܘܡܸܛܠ ܗܵܕܹܐ ܓ̣ܒܼܵܐ ܠܹܗ ܪܸܥܝܵܢܝ ܗܵܘ̇ ܕܲܦܫܝܼܩܵܐ ܀ 427 :ܠܲܚܒܸܢܵܢܵܐ ܠܵܐ ܪܵܓܵܐ ܠܹܗ ܠܡܸܪܕܵܐ ܒܥܲܡܠܹ̈ܐ 428 ܕܝܵ̇ܕܲܥ ܕܵܫܚܝܼܩ ܕܘܼܒܵܪ ܚܲܝܹ̈ܐ ܪ̈ܘܼܚܵܢܵܝܹܐ ܀ 429 :ܡ̣ܢ ܨܹܝܕܼ ܥܲܡܠܹ̈ܐ ܪ̈ܘܼܚܵܢܵܝܹܐ ܥܪܲܩ ܐܵܦ ܪܸܥܝܵܢܝ 430 ܘܗܵܐ ܡܚܲܝܸܛ ܠܹܗ ܢܲܚܬܵܐ ܕܡܸܠܹ̈ܐ ܕܢܸܬܼܟܲܣܸܐ ܒܹܗ ܀ 431 :ܥܲܪܛܸܠܵܐܝܼܬܼ ܚ̣ܙܵܐ ܠܲܩܢܘܿܡܹܗ ܥܲܪܛܸܠܵܝܵܐ 432 ܘܲܫܩ݂ܲܠ ܡܸܠܹ̈ܐ ܦܪ݂ܲܣ ܥܲܠ ܐܲܦܵܘ̈ܗܝ ܡ̣ܢ ܟܘܼܚܵܕܼܵܐ ܀ 433 :ܒܡܸܠܹ̈ܐ ܓ̣ܒܼܵܐ ܠܹܗ ܠܲܡܟܲܣܵܝܘܼ ܠܲܫܠܝܼܚܘܼܬܹܗ 434 ܒܗܵܝ̇ ܕܲܫܡܝܼܥ ܠܹܗ ܕܟܲܣܝܼ ܗܵܠܹܝܢ ܠܲܕܼܕܼܵܡܹ̇ܝܢ ܠܹܗ ܀ 435 :ܩܵܠ ܚܲܟܿܝܼܡܵܐ ܫܡ݂ܲܥ ܕܲܡܟܲܐܲܪ ܠܲܚܒܸܢܵܢܵܐ 436 ܘܐܲܝܟ ܕܡ̣ܢ ܫܸܢܬܼܵܐ ܡܥܝܼܪ ܠܲܪ̈ܦܲܝܵܐ ܠܘܵܬܼ ܦܘܼܠܚܵܢܵܐ ܀ 437 :ܥܕܲܡ̇ܐ ܠܐܸܡܲܬܼܝ ܩܥ̣ܵܐ ܚܲܟܿܝܼܡܵܐ ܠܲܚܒܸܢܵܢܵܐ 438 ܕܵܡ̇ܟܲܬܿ ܘܫܵܠܹ̇ܝܬܿ ܡ̣ܢ ܦܘܼܠܚܵܢܵܐ ܕܙܲܕܿܝܼܩܘܼܬܵܐ ܀ 439 :ܨܠܸܡ ܫܵܘܫܡܵܢܵܐ ܨܵܪ ܠܹܗ ܠܫܲܠܦܵܐ ܡܲܐܝܼܢ ܥܲܡܠܹ̈ܐ 440 ܕܢܸܬܼܒܲܩܸܐ ܒܹܗ ܘܲܢܥܝܼܪ ܗܵܘܢܹܗ ܠܘܵܬܼ ܦܘܼܠܚܵܢܵܐ ܀ 441 :ܚܙܝܼ ܠܫܵܘܫܡܵܢܵܐ ܡܲܠܸܠ ܥܲܡܹܗ ܕܝܼܩܝܼܪ ܠܹܒܸܿܗ 442 ܘܝܼܠܲܦ ܡܸܢܹܗ ܙܢܲܝ̈ ܟܵܫܪܘܼܬܼܵܐ ܘܥܝܼܪܘܼܬܼ ܢܲܦܫܵܐ ܀ 443 :ܚܙܝܼ ܟܡܵܐ ܥܝܼܪܵܐ ܢܲܦܫܹܗ ܕܫܝܼܛܵܐ ܠܘܵܬܼ ܦܘܼܠܚܵܢܹܗ 444 ܘܐܲܥܝܼܪ ܙܵܘܥܲܝ̈ܟ ܠܘܵܬܼ ܦܘܼܠܚܵܢܵܐ ܕܫܲܦܝܼܪ̈ܵܬܼܵܐ ܀ 445 :ܚܙܝܼ ܕܲܡܛܲܝܸܒܼ ܡ̇ܙܘܿܢ ܚܲܝܵܘ̈ܗܝ ܩܕܼܵܡ ܥܸܕܵܢܵܐ 446 ܘܛܲܝܸܒܼ ܐܵܦ ܐܲܢ̄ܬܿ ܙܘܵܕܹ̈ܐ ܕܲܡܛܲܝܲܒܼ ܠܵܟ ܀ 447 :ܚܙܝܼ ܕܠܵܐ ܕܦܵܩܕܿܝܼܢ ܘܠܵܐ ܕܡܸܬܼܦܲܩܕܿܝܼܢ ܐܝܼܬܼ ܒܲܝܢܲܝܗܘܿܢ 448 ܘܐܲܦܝܼܣ ܐܵܢ̄ܬܿ ܠܵܟ ܩܕܼܵܡ ܕܲܢܦܝܼܣܵܟ ܐ̄ܚܪܹܝܢ ܥܲܠ ܥܲܡܠܹ̈ܐ ܀ 449 :ܗܵܠܹܝܢ ܡܸܠܹ̈ܐ ܫܡ݂ܲܥܘ ܚܘܼܫܵܒܲܝ̈ ܣܵܢ̇ܝܲܝ̈ ܥܲܡܠܹܐ 450 ܘܐܲܪܡܝܼܘ ܐܝܼܕܼܵܐ ܒܥܲܡܠܵܐ ܕܡܸܠܹ̈ܐ ܡܦܝܼܣܵܢ̈ܝܵܬܼܵܐ ܀ 451 :ܦܝܵܣܵܐ ܕܡܸܠܹ̈ܐ ܣܵܡ̣ ܫܲܬܸܐܣܬܼܵܐ ܠܲܒܼܢܲܝ̈ ܥܲܡܠܹ̈ܐ 452 ܕܕܲܡ ܡ̣ܢ ܡܸܠܹ̈ܐ ܢܸܗܘܘܿܢ ܒܵܢܹ̇ܝܢ ܒܸܢܝܵܢ ܥܲܡܠܹ̈ܐ ܀ 453 :ܒܸܢܝܵܢ ܥܲܡܠܹ̈ܐ ܒܥܹ̇ܝܬܼ ܕܐܹܚܵܘܸܐ ܠܒܼܵܢܲܝ̈ ܥܲܡܠܹ̈ܐ 454 ܕܢܸܗܘܘܿܢ ܒܵܢܹ̇ܝܢ ܕܘܼܒܵܪ̈ܲܝܗܘܿܢ ܠܥܸܠ ܡ̣ܢ ܡܸܠܲܝ̈ ܀ 455 :ܐܘܿ ܒܲܬܵܝܹ̈ܐ ܕܒܸܢܝܵܢ ܥܲܡܠܹ̈ܐ ܪܼ̈ܘܚܵܢܵܝܹܐ 456 ܒܢܵܘ ܥܲܠ ܡܸܠܲܝ̈ ܥܲܡܠܹ̈ܐ ܕܕܼܘܼܒܵܪ̈ܲܝܟܿܘܿܢ ܀ 457 :ܬܵܘ ܕܲܡܦܝܼܣܝܼܢ ܥܲܠ ܫܘܼܒܼܩܵܢܵܐ ܕܲܙܢܲܝ̈ ܥܵܘ̣ܠܵܐ 458 ܡܲܕܼܟܼܘ ܡܸܠܲܬܼܝ ܥܲܡ ܡܸܠܲܝ̈ܟܿܘܿܢ ܒܚܲܫܵܐ ܘܕܸܡܥܹ̈ܐ ܀ pb. 131 459 :ܬܵܘ ܕܲܓܼܡܝܼܪܝܼܢ ܒܕܸܘܒܵܪ̈ܲܝܗܘܿܢ ܐܲܟܼܡܵܐ ܕܡܲܨܝܵܐ 460 ܪܘܿܣܘ ܥܲܡܠܲܝ̈ܟܿܘܿܢ ܐܲܝܟ ܚܵܘܣܵܢܵܐ ܥܲܠ ܚܲܛܝܹ̈ܐ ܀ 461 :ܬܵܘ ܚܲܛܵܝܹ̈ܐ ܕܲܚܛܵܘ̣ ܘܐܲܣܟܸܿܠܘ ܐܲܝܟ ܚܲܛܵܝܹ̈ܐ 462 ܪܕܼܵܘ ܥܲܡ ܡܸܠܹ̈ܐ ܕܡܲܠ̈ܝܵܢ ܗܸܪܓܵܐ ܕܥܲܠ ܚܲܛܵܝܹ̈ܐ ܀ 463 :ܒܗܸܪܓܵܐ ܕܡܸܠܹ̈ܐ ܕܥܲܠ ܚܲܛܝܹ̈ܐ ܗܸܪܓܸܿܬ̤ ܡܸܠܲܬܼܝ 464 ܕܐܲܠܸܦ ܐܸܢܘܿܢ ܐܘܼܪܚܵܐ ܕܡܲܠܝܵܐ ܚܢܵܢܵܐ ܘܪ̈ܲܚܡܹܐ ܀ 465 :ܚܢܵܢܵܐ ܘܪ̈ܲܚܡܹܐ ܡܲܕܸܟ ܪܸܥܝܵܢܝ ܒܣܲܡܵܐ ܕܡܸܠܹ̈ܐ 466 ܕܲܒܼܝܲܕܼ ܡܸܠܹ̈ܐ ܢܸܫܬܿܘܿܢ ܐ̄ܢܵܫܵܐ ܚܢܵܢܵܐ ܘܪ̈ܲܚܡܹܐ ܀ 467 :ܒܫܸܩܝܵܐ ܕܡܸܠܹ̈ܐ ܡܲܕܿܟܹܬܼ ܣܲܡܵܐ ܕܚܘܼܣܵܝ ܚܵܘ̈ܒܹܿܐ 468 ܘܡܸܬܼܝܲܐܲܒܼ ܐ̄ܢܵܐ ܕܢܸܫܬܹܿܝܘܗܝ ܟܠܢܵܫ ܘܢܸܥܛܹܐ ܥܵܘ̣ܠܹܗ ܀ 469 :ܒܗܵܢܵܐ ܢܝܼܫܵܐ ܣܵܡܹ̇ܬܼ ܢܝܼܫܵܐ ܕܫܸܡ ܒܵܥܘܼܬܼܵܐ 470 ܕܐܸܒܼܥܹܐ ܘܐܲܦܝܼܣ ܥܲܠ ܚܵܘ̈ܒܵܬܼܵܐ ܕܝܼܠܝܼ ܘܲܕܚܲܒܼܪ̈ܲܝ ܀ 471 :ܬܵܘ ܟܹܝܬܼ ܚܲܒܼܪ̈ܲܝ ܗܘ̤ܵܘ ܠܝܼ ܚܲܒܼܪܹ̈ܐ ܒܲܦܝܵܣ ܡܸܠܹ̈ܐ 472 ܘܲܢܦܝܼܣ ܐܲܟܼܚ̄ܕ ܠܗܵܘ̇ ܠܵܐ ܣܢܝܼܩܵܐ ܕܒܼܵܥܹ̇ܐ ܦܝܵܣܵܐ ܀ 473 :ܒܵܥܹ̇ܐ ܦܝܵܣܵܝܐ ܠܵܐ ܗ̄ܘ̣ܵܐ ܕܒܼܵܥܹ̇ܐ ܐܲܝܟ ܡ̇ܐ ܕܐܸܡ̇ܪܹܬܼ 474 ܐܸܠܵܐ ܕܢܲܠܸܦ ܠܲܡܦܝܼܣܵܢܹ̈ܐ ܕܲܢܦܝܼܣܘܼܢܵܝܗܝ ܀ 475 :ܒܲܕܡܘܼܬܼ ܪܲܒܵܐ ܩܵܐܹ̇ܡ ܪܸܡܙܹܗ ܠܥܸܠ ܡ̣ܢ ܪܹܫܲܢ 476 ܘܵܡܚܲܟܸܿܡ ܠܲܢ ܘܠܵܐ ܡܸܬܼܚܲܟܿܡܵܐ ܫܲܒܼܪܘܼܬܼ ܢܲܦܫܲܢ ܀ 477 :ܡܚܲܟܸܿܡ ܐ̄ܢܵܫܵܐ ܚܘܼܣ ܥܲܠ ܐ̄ܢܵܫܵܐ ܥܲܛܠܲܝ̈ ܠܸܒܵܐ 478 ܕܫܵܝ̇ܛܝܼܢ ܣܸܦܪܹ̈ܐ ܕܪܲܒܵܘܼܬܼܵܟ ܡܲܠܝܲܬܼ ܚܲܝܹ̈ܐ ܀ 479 :ܚܙܝܼ ܕܲܡܚܝܼܠܵܐ ܗ̄ܘ̣ ܟܝܵܢܵܐ ܕܡܸܢܲܢ ܒܲܡܚܝܼ̈ܠܵܬܼܵܐ 480 ܘܠܵܐ ܬܲܩܸܨ ܠܹܗ ܚܵܐܹ̇̄ܒܼ ܟܠܫܵܥ ܡ̣ܢ ܚܘܼܬܼܚܵܬܼܵܘ̈ܗܝ ܀ 481 :ܐܲܢ̄ܬܿܘܼ ܓ̣ܒܲܠܬܵܝܗܝ ܡ̣ܢ ܕܲܚܝܼܚܵܐ ܐܲܝܟ ܕܲܫܦ݂ܲܪ ܠܵܟ 482 ܘܥܲܡܹܗ ܕܡܸܕܪܹܗ ܚܠܲܛܬ݂ܿ ܚܘܼ̈ܬܼܚܵܬܹܐ ܕܝܲܨܪܵܐ ܪܲܦܝܵܐ ܀ 483 :ܝܲܨܪܵܐ ܪܲܦܝܵܐ ܡܲܕܼܟ ܪܸܡܙܵܟ ܥܲܡ ܕܲܚܝܼܚܹܗ 484 ܘܠܵܐ ܡܨܸܐ ܡܚܲܝܸܨ ܠܪܲܦܝܘܼܬܼ ܡܸܕܼܪܹܗ ܡ̣ܢ ܒܸܠܥܵܕܲܝܟ ܀ 485 :ܚܲܫܹ̈ܐ ܠܙܝܼܙܹ̈ܐ ܡܲܠܙܝܼܢ ܚܲܝܵܘ̈ܗܝ ܒܟܼܠܗܘܿܢ ܚܲܝܵܘ̈ܗܝ 486 ܘܠܵܐ ܡܲܪܦܹܝܢ ܠܹܗ ܕܢܸܗܘܸܐ ܚܝܼܨܵܐ ܒܦܘܼܠܚܵܢ ܚܲܝܵܘ̈ܗܝ ܀ 487 :ܒܲܕܡܘܼܬܼ ܒܵܩܹ̈ܿܐ ܡܥܵܕܹܝܼܢ ܩܵܝ̇ܡܝܼܢ ܠܥܸܠ ܡ̣ܢ ܚܲܨܹܗ 488 ܘܲܡܕܼܵܘܕܝܼܢ ܠܹܗ ܡ̣ܢ ܥܸܢܝܵܢܵܐ ܕܫܲܦܝܼܪ̈ܵܬܼܵܐ ܀ 489 :ܠܹܠܲܝ ܐܝܼܡܵܡ ܫܚܝܼܩ ܡ̣ܢ ܠܸܙܬܵܐ ܕܲܫܚܝܼܩ̈ܬܼܵܐ 490 ܘܠܲܝܬܿ ܥܸܕܵܢܵܐ ܕܲܟܼܢܝܼܫ ܟܠܹܗ ܨܹܝܕ ܪܸܥܝܵܢܹܗ ܀ 491 :ܩܲܝܛܵܐ ܘܣܲܬܼܘܵܐ ܥܡܝܼܠ ܘܲܡܛܲܪܦ ܒܚܲܣܝܼܪܘܼܬܼܵܐ 492 ܘܐܲܡܝܼܢ ܦܠܲܚ ܘܠܵܐ ܡܸܬܼܡܠܝܵܐ ܚܲܣܝܼܪܘܼܬܹܗ ܀ 493 :ܐܲܝܟ ܚܵܕܼܘܿܪܵܐ ܚܵܕܲܪ ܐܵܦ ܗܘ̤ ܙܸܕܩܵܐ ܠܚܲܝܵܘ̈ܗܝ 494 ܘܢܲܩܹ̇ܫ ܟܠܫܵܥ ܒܲܬܼܪܲܥ ܥܡܠܹ̈ܿܐ ܕܟܼܠ ܐܘܼܡ̇ܢܘܼ ܀ 495 :ܫܟܼܵܚܬܵܐ ܚܕܲܬܵܐ ܕܥܲܡܠܹ̈ܐ ܚܲܪ̈ܬܹܐ ܡܲܒܲܥ ܟܠܝܘܿܡ 496 ܕܕܲܡ ܢܸܫܟܲܚ ܠܹܗ ܡ̇ܙܘܿܢ ܙܲܒܼܢܵܐ ܠܲܙܒܼܝܼܢܵܐ ܕܚܲܝܵܘ̈ܗܝ ܀ pb. 132 497 :ܠܐ̣ܝܼ ܠܹܗ ܠܲܐܝܵܐ ܡ̣ܢ ܕܲܢܚܲܕܹܿܬܼ ܥܲܡܠܹ̈ܐ ܚܲܕ̈ܿܬܹܐ 498 ܘܲܟܼܡܵܐ ܕܠܵܠܹ̇ܐ ܡܸܥܫܲܢ ܥܵܫ̇ܢܵܐ ܡܸܣܟܹܿܢܘܼܬܹܗ ܀ 499 :ܐܘܿ ܠܡܸܣܟܹܿܢܵܐ ܒܲܪ ܡܸܣܟܹܿܢܹ̈ܐ ܕܡܸܣܟܹܿܝܢ ܘܲܣܟܲܠ 500 ܘܠܵܐ ܡܸܬܼܒܲܝܲܢ ܠܡܸܛܲܪ ܛܲܟܼܣܵܐ ܕܡܸܣܟܹܿܢܘܼܬܹܗ ܀ 501 :ܐܘܿ ܠܚܵܕܘܿܪܵܐ ܕܐܲܡܝܼܢ ܚܵ̇ܕܲܪ ܩܲܝܛܵܐ ܘܣܲܬܼܘܵܐ 502 ܘܠܵܐ ܡܸܬܼܡܲܠܸܐ ܣܘܼܢܩܵܢ ܢܲܦܫܹܗ ܡ̣ܢ ܙܸܕܩܵܬܼܵܐ ܀ 503 :ܐܘܿ ܠܐܲܓܼܝܼܪܵܐ ܕܡ̇ܘܓܲܪ ܚܲܝܵܘ̈ܗܝ ܒܲܥܡܝܼ̈ܠܬܼܵܐ 504 ܘܦܵܠܲܚ ܟܠܝܘܿܡ ܘܛܠܝܼܡ ܐܲܓܼܪܹܗ ܒܠܵܐ ܝܼܕܲܥܬܼܵܐ ܀ 505 :ܠܵܐ ܝܼܕܲܥܬܼܵܐ ܥܒܲܕܬܹܗ ܛܠܝܼܡܵܐ ܐܵܦ ܚܵܕܼܘܿܪܵܐ 506 ܘܐܲܟܼܡܵܐ ܕܚܵ̇ܕܲܪ ܥܲܡܠܹܗ ܣܵܓܹܿܐ ܘܐܲܪܹܗ ܙܵܥܲܪ ܀ 507 :ܙܥܲܪ݂ ܠܹܗ ܘܐܘܦܝܼ ܥܲܦܪܹܗ ܕܐܵܕܼܵܡ ܒܲܫܚܝܼ̈ܩܵܬܼܵܐ 508 ܓܵܒܹ̇ܠ ܥܲܦܪܹܗ ܚܘܼܣ ܥܲܠ ܥܲܦܪܹܗ ܥܲܕܼܠܵܐ ܢܹܐܒܲܕܼ ܀ 509 :ܦܸܪ̈ܕܹܿܐ ܩܲܠܝܼܠ ܩܲܝ̈ܡܵܢ ܒܵܗ̇ ܒܲܟܼܢܝܼܫܘܼܬܹܗ 510 ܘܗܵܐ ܡܫܲܢ̈ܝܵܢ ܠܗܹܝܢ ܪ̈ܘܼܚܹܐ ܕܚܲܫܹ̈ܐ ܡ̣ܢ ܕܘܼܟ ܠܲܐ̄ܚܪܹܝܢ ܀ 511 :ܥܲܠܥܵܠ ܚܲܫܹ̈ܐ ܡܸܬܼܟܲܪܟܵܐ ܒܹܗ ܐܲܝܟ ܕܲܒܼܚܲܝܠܵܐ 512 ܘܲܡܩܝܼܡܵܐ ܠܹܗ ܐܲܝܟ ܥܵܪ̈ܡ̇ܬܼܵܐ ܒܲܣܦܵܪ ܝܲܡܵܐ ܀ 513 :ܠܡܲܝܵ̈ܐ ܘܪܘܼܚܵܐ ܕܵܡܹ̇ܝܢ ܚܲܫܵܘ̈ܗܝ ܕܲܡܠܸܐ ܚܲܫܹ̈ܐ 514 ܘܡ̇ܐ ܕܲܥܒ݂ܲܪܘ ܒܹܗ ܗܘ̤ܵܐ ܐܲܝܟ ܡܸܕܼܪܵܐ ܩܕܼܵܡ ܪ̈ܓܼܠܵܬܼܵܐ ܀ 515 :ܪܓܸܠܬܵܐ ܕܚܲܫܹ̈ܐ ܥܵܒܲ݁ܪܵܐ ܒܚܵܝܠܵܐ ܕܡ̇ܝܘܿܬܼܘܼܬܹܗ 516 ܘܠܵܐ ܫܒܲܩܵܐ ܠܹܗ ܠܡܸܕܪܹܗ ܕܲܢܢܘܼܚ ܒܲܚܕܼܵܐ ܕܘܼܟܵܐ ܀ 517 :ܗܵܐ ܓܪܝܼܦ ܘܲܕܼܪܸܐ ܡܸܕܪܹܗ ܕܡܸܕܪܲܝܢ ܒܟܼܠ ܐܲܬܼܪ̈ܘܵܢ 518 ܘܠܲܝܬܿ ܒܲܒܼܪܝܼܬܼܵܐ ܕܘܼܟܿܬܼܵܐ ܕܠܵܐ ܙܪܝܼܥ ܡ̣ܢ ܕܲܚܝܼܚܲܢ ܀ 519 :ܗܵܐ ܡܒܲܕܿܪܝܼܢܲܢ ܒܲܕܼܡܘܼܬܼ ܙܲܪܥܵܐ ܒܥܘܼܒܵܐ ܕܐܲܪܥܵܐ 520 ܘܲܥܒܼܝܼܕܼܝܼܢܲܢ ܐܘܼܟܼܠܵܐ ܠܪ̈ܲܚܫܵܐ ܘܲܠܦܵܪ̈ܲܚܬܼܵܐ ܀ 521 :ܚܕܼܵܐ ܚܲܣܝܼܪܵܐ ܠܒܝܼܫܘܼܬܼ ܝܲܨܪܲܢ ܡܲܪܝܼܪ ܝܲܨܪܵܐ 522 ܕܲܢܦܘܼܫ ܒܐܲܪܥܵܐ ܘܢܸܗܘܸܐ ܡܸܕܪܲܢ ܡܢܵܬܼܵܐ ܠܡܸܕܼܪܵܐ ܀ 523 :ܠܵܐ ܚܲܢܵܢܵܐ ܠܵܐ ܬܸܗܘܸܐ ܠܲܢ ܗܵܕܹܐܜ ܕܐܸܡ̇ܪܹܬܼ 524 ܘܠܵܐ ܬܸܬܼܩܲܝܲܡ ܡܸܠܬܼܵܐ ܕܝܸܠܕܲܬ̤ ܣܸܒܼܪܵܐ ܣܪܝܼܩܵܐ ܀ 525 :ܠܵܐ ܢܸܣܬܲܪܲܩ ܣܲܒܼܪܵܢ ܪܲܒܵܐ ܕܥܲܠ ܪܲܒܿܘܼܬܼܵܟ 526 ܘܠܵܐ ܢܸܬܿܕܲܓܲܠ ܫܪܵܪܵܐ ܕܲܫܡܵܟ ܒܪܓܵܠܘܼܬܲܢ ܀ 527 :ܐܲܢ̄ܬܿ ܫܲܪܝܼܪ ܐܲܢ̄ܬܿ ܘܒܼܵܟ ܡܸܬܼܩܲܝܲܡ ܫܪܵܪܵܐ ܕܲܫܡܵܟ 528 ܘܠܵܐ ܡܲܟܝܵܐ ܠܵܟ ܕܲܓܵܠܘܼܬܿܢ ܘܠܵܐ ܟܠ ܟܠܹܗ ܀ 529 :ܩܵܘܵܐ ܡ̇ܕܹܝܢ ܒܫܘܼܘܕܵܝ ܡܸܠܲܝ̈ܟ ܕܲܠܘܵܬܼ ܓܸܢܣܲܢ 530 ܘܗܲܒܼܠܲܢ ܐܝܼܕܼܵܐ ܕܲܢܩܘܼܡ ܩܲܠܝܼܠ ܡ̣ܢ ܡܲܦܘܼܠܬܲܢ ܀ 531 :ܣܲܓܿܝܼ ܢܦܲܠ̣ܢܲܢ ܒܲܫܟܼܝܼܪ̈ܵܬܐ ܕܠܵܐ ܡܸܬܼܡܲܢ̈ܝܵܢ 532 ܘܐܸܢ ܥܘܼܕܼܪܵܢܵܟ ܠܵܐ ܡܲܕܼܪܸܟ ܠܲܢ ܢܦܲܠ̄ܢ ܘܲܠܥܵܠܲܡ ܀ 533 ܠܥܵܠܲܡ ܐܝܼܬܲܝܟ ܡ̇ܪܝܵܐ ܡ̇ܪܵܐ ܕܝܼܠܲܢ ܘܲܕܼܟܼܠ: pb. 133 534 ܘܒܼܵܟ ܡܸܬܼܩܲܝܡܝܼܢ ܫܡܲܝܵܐ ܘܐܲܪܥܵܐ ܘܟܼܠܡܵܐ ܕܲܒܼܗܘܿܢ ܀ 535 :ܠܵܐ ܠܲܢ ܡ̇ܪܝܵܐ ܠܵܐ ܠܲܢ ܬܲܩܸܨ ܪܲܒܿܘܼܬܼ ܥܵܘ̣ܠܲܢ 536 ܐܸܠܵܐ ܠܲܫܡܵܟ ܗܲܒܼ ܐܝܼܩܵܪܵܐ ܕܲܦܠܹܐ ܠܲܫܡܵܟ ܀ 537 :ܠܲܫܡܵܟ ܝܲܩܲܪ ܒܝܲܕܼ ܦܘܼܪܩܵܢܵܐ ܕܥܵܒܹ̇ܕ ܐܲܢ̄ܬܿ ܠܲܢ 538 ܕܠܵܐ ܢܲܗܠܘܼܢ ܒܹܗ ܫܹܐܕܹ̈ܐ ܒܲܫܡܵܟ ܡܸܛܠ ܥܵܘ̣ܠܲܢ ܀ 539 :ܡܸܛܠ ܥܵܘ̣ܠܲܢ ܐܲܗܸܠܘ ܫܹܐܕ̈ܐ ܒܲܫܡܵܟ ܪܵܒܵܐ 540 ܦܣܘܿܩ ܥܸܠܲܬܼܗܘܿܢ ܕܒܼܵܥܝܲܝ̈ ܥܸܠ̈ܠܹܐ ܒܫܘܼܒܼܩܵܢ ܥܵܘ̣ܠܵܐ ܀ 541 :ܫܒܼܘܿܩܲܝܗܝ ܠܥܵܘ̣ܠܲܢ ܘܠܵܐ ܢܸܬܼܥܲܗܲܕܼ ܫܡܹܗ ܟܠ ܟܠܹܗ 542 ܘܗܵܐ ܡܸܬܼܦܲܣܩܵܐ ܥܸܠܬܼܐ ܕܐܲܝܠܹܝܢ ܕܒܼܵܥܹ̇̄ܝܢ ܥܸܠܬܼܵܐ ܀ 543 :ܦܣܘܿܩ ܐܵܦ ܗܵܕܹܐ ܕܲܢܩܲܪܸܒܼ ܠܵܟ ܦܝܵܣܵܐ ܟܠܫܵܥ 544 ܕܗܵܐ ܐܲܠܐܲܝܼܢܵܟ ܒܠܹܐܘܬܼܵܐ ܕܡܸܠܲܝ̈ܢ ܟܲܕܼ ܠܵܐ ܠܵܐܹܝܬܿ ܀ 545 :ܗܵܐ ܐܵܦ ܡܸܠܲܝ̈ܢ ܬܚܸܒܼ݂ ܘܐܸܬܼܒܲܨܲܪ ܡ̣ܢ ܪܘܼܟܵܒܼܵܐ 546 ܘܠܵܐ ܬܘܼܒܼ ܡܲܨ̈ܝܵܢ ܠܲܡܪܲܟܿܒܼܘܼ ܙܢܲܝ̈ ܒܵܥܘܼܬܼܵܐ ܀ 547 :ܗܵܐ ܡܸܐܢܲܬ̤ ܠܵܗ̇ ܠܡܸܠܬܼܵܐ ܡܠܝܼܠܬܵܐ ܕܬܼܵܘܠܸܕܼ ܡܸܠܹ̈ܐ 548 ܘܠܵܐ ܪܵܓܵܐ ܠܵܗ̇ ܠܡܸܫܬܵܘܬܵܦܘܼ ܥܲܡ ܪܸܥܝܵܢܵܐ ܀ 549 :ܗܵܐ ܩܵܘܝܼ ܠܹܗ ܐܵܦ ܪܸܥܝܵܢܵܐ ܠܘܵܬܼ ܪܸܥܝܵܢܹܗ 550 ܘܠܵܐ ܬܘܼܒܼ ܨܵܒܹ̇ܐ ܠܡܸܬܼܗܲܓܵܝܘܼ ܒܥܸܢܝܵܢ ܡܠܹ̈ܐ ܀ 551 :ܗܵܐ ܠܲܝܬܿ ܡܸܠܹ̈ܐ ܕܠܵܐ ܐܲܡܝܼܪ̈ܵܢ ܥܲܠ ܫܘܼܒܼܩܵܢܵܐ 552 ܘܲܟܼܡܵܐ ܕܢܹܐܡܲܪ ܐܲܝܢܵܐ ܕܐܵܡܲܪ ܗܸܢܹܝܢ ܐܵܡܲ݁ܪ ܀ 553 :ܗܵܐ ܐܲܡܝܼܪ̈ܵܢ ܘܗܵܐ ܡܸܬܿܬܲܢ̈ܝܵܢ ܡ̣ܢ ܟܠ ܦܘܼܡܝܼ̈ܢ 554 ܘܡ̇ܢ ܝܘܼܬܼܪܵܢܵܐ ܕܠܲܝܬܿ ܝܘܼܬܼܪܵܢܵܐ ܡ̣ܢ ܠܹܐܘܲܬܼܗܹܝܢ ܀ 555 :ܗܵܐ ܙܩܲܦ̣ ܨܸܒܼܥܵܐ ܟܠܹܗ ܟܝܵܢܲܢ ܡ̣ܢ ܟܠ ܡܸܕܹܿܡ 556 ܡ̇ܪܹܐ ܟܝܵܢܹ̈ܐ ܚܘܼܢ ܠܲܟܼܝܵܢܲܢ ܡܠܸܐ ܚܵܘ̈ܒܵܬܵܐ ܀