The Book of Heraclides
Book 1.1
pb. 10
ܫܘܼܪܵܝܹܗ ܕܲܟܼܬܼܵܒܼܵܐ: ܗܵܢܵܐ ܕܹܝܢ: ܫܘܼܪܵܝ ܡܲܡܠܠܵܐ ܕܝܼܠܹܗ
ܕܩܲܕܝܼܫܵܐ ܡ̣ܢ ܗܵܪܟܵܐ ܐܝܼܬܼܵܘܗܝ.
ܟܬܼܵܒܼܵܐ ܕܩܲܕܝܼܫܵܐ ܡܵܪܝ ܢܸܤܛܘܿܪܝܼܣ ܦܵܛܪܝܼܪܵܟܵܐ
ܕܩܘܼܤܛܲܢܛܝܼܢܵܦܘܿܠܝܼܣ: ܘܩܵܢܘܿܢܵܗ̇ ܕܐܵܪܬܵܕܘܿܟܿܤܝܼܵܐ.
ܥܘܼܬܵܕܵܐ. ܙܵܕܹܿܩ ܗܵܟܹܝܠ: ܐܲܝܟܼ ܕܤܵܒܲܪ̇ ܐ̄ܢܵܐ: ܠܐܲܝܢܵܐ ܕܲܥܬܼܝܼܕܼ
ܕܲܒܼܟܼܠܵܗ̇ ܚܦܝܼܛܘܼܬܼܵܐ ܢܥܲܩܸܒܼ ܥܲܠ ܫܪܵܪܵܐ: ܘܠܵܘ ܒܲܡܩܲܕܡܘܼܬܼ
ܪܸܥܝܵܢܵܐ ܢܸܥܒܿܕܼܝܼܗ̇ ܠܡܸܠܬܹܗ: ܐܸܠܵܐ ܕܢܲܝܬܸܿܐ ܠܲܡܨܲܥܬܼܵܐ ܟܠܗܹܝܢ
ܐܲܝܠܹܝܢ ܕܠܘܼܩܒܲܠ ܫܪܵܪܵܐ ܐܝܼܬܲܝܗܹܝܢ ܘܲܢܒܲܚܸܢ ܐܸܢܹܝܢ. ܐܲܟܼܙܢܵܐ ܕܝ̇ܕܼܥܲܝ̈
ܕܲܗܒܼܵܐ: ܠܕܲܗܒܼܵܐ ܛܵܒܼܵܐ ܡ̣ܢ ܐܲܝܢܵܐ ܕܲܒܼܨܝܼܪ: ܒܦܘܼܚܵܡܵܐ ܕܥܲܡ
ܚܕܼܵܕܹ̈ܐ ܡܚܵܘܹ̇ܝܢ ܦܘܼܪܫܵܢܹܗ: ܠܲܚܙܵܬܼܵܐ ܕܐܲܝܠܹܝܢ ܕܨܵܒܹ̇ܝܢ ܕܠܲܡܚܲܠܛܵܐ
ܐܲܝܟܼ ܚܲܬܿܝܼܬܼܵܐ ܘܲܩܕܼܵܡ ܚܲܬܝܼܬܼܵܐ ܒܩܲܒܿܠܘܼܢ. ܤܼܲܓܿܝܼ̈ܐܹܐ ܓܹܝܪ ܓܵܒܹ̇ܝܢ
ܒܝܼ̈ܫܬܼܵܐ ܚܠܵܦ ܛܵܒܼ̈ܬܼܵܐ: ܘܕܲܓܵܠܘܼܬܼܵܐ ܩܕܼܵܡ ܫܪܵܪܵܐ: ܒܲܕܼܫܲܘ̈ܝܵܢ
ܥܠܲܝܗܘܿܢ ܬܲܪ̈ܬܲܝܗܹܝܢ. ܘܲܡܩܲܕܡܵܐ ܡܝܲܩܪܵܐ ܥܠܲܝܗܘܿܢ ܠܡܸܬܼܚܪܵܝܘܼ
ܘܲܠܡܸܙܟܵܐ ܚܲܕܼ ܠܚܲܕܼ: ܝܲܬܿܝܼܪ ܡ̣ܢ ܕܠܲܡܩܲܝ̇ܡܘܼ ܫܪܵܪܵܐ. ܡܸܛܠ
ܗܵܟܹܝܠ ܕܲܐ̄ܚܪ̈ܵܢܹܐ ܐ̄ܚܪܵܢܝܵܐܝܼܬܼ ܡܵܘܕܝܼܢ ܒܲܡܫܝܼܚܵܐ: ܘܒܲܠܚܘܿܕܼ ܒܲܫܡܵܐ
pb. 11
ܢܲܩܝܼܦܝܼܢ: ܐ̄ܚܪܵܢܹܐ ܕܹܝܢ ܐܵܦ ܥܠܵܘܗܝ ܕܲܫܡܵܐ ܢܵܨ̇ܝܢ: ܙܵܕܹ̇ܩ ܠܲܢ
ܕܲܢܤܝܼܡ ܠܡܲܤܒܿܪܵܢܘܼܬܼܵܐ ܕܲܚܕܼܵܐ ܚܕܸܵܐ ܡ̣ܢ ܗܹܪܹ̈ܤܝܼܵܣ ܕܲܥܠܵܘܗܝ
ܕܲܡܫܝܼܚܵܐ. ܐܲܝܟܲܢܵܐ ܕܡ̣ܢ ܦܸܚܡܵܐ ܕܗܹܪܹ̈ܤܝܼܵܣ ܬܸܬܼܝܼܕܲܥ ܗܲܝܡܵܢܘܼܬܼܵ
ܫܲܪܝܼܪܬܵܐ: ܘܠܵܐ ܢܸܙܕܲܥܙܲܥ ܟܲܕܼ ܒܗܵܠܹܝܢ ܘܲܒܼܗܵܠܹܝܢ ܢܵܦ̇ܠܝܼܢ ܚ̄ܢܲܢ
ܐܲܝܟܼ ܐܲܝܠܹܝܢ ܕܠܵܐ ܚܵܙܹ̇ܝܢ.
ܐ. ܕܡܸܛܠ ܡܵܢܵܐ ܚܲܢܹ̈ܦܹܐ ܠܵܐ ܐܵܡ̇ܪܝܼܢ ܠܹܗ ܠܲܡܫܝܼܚܵܐ ܐܲܠܵܗܵܐ.
ܚܲܢ̈ܦܹܐ ܡ̇ܢ ܠܵܐ ܡܩܲܒܿܠܝܼܢ ܕܢܵܩܪܘܿܢܵܝܗܝ ܠܲܡܫܝܼܚܵܐ ܐܲܠܵܗܵܐ:
ܡܸܛܠ ܚܲܫܵܐ ܕܦܲܓܼܪܵܐ ܘܲܙܝܼܦܵܐ ܘܡܵܘܬܵܐ: ܘܕܼܒܲܛܘܿܥܝܲܝ ܗ̤ܘܲܝ̈
ܗܵܠܹܝܢ ܬܸܕܼܡܪ̈ܵܬܼܵܐ ܡܲܤܒܿܪܝܼܢ. ܘܲܒܲܫܡܵܐ ܠܵܐ ܡܫܲܚ̱ܠܦܝܼܢ: ܡܸܛܠ
ܕܐܵܦ ܠܵܐ ܚܲܕܼ ܦܘܼܪܫܵܢܵܐ ܐܝܼܬܼ ܒܗܘܿܢ: ܒܗܵܝ̇ ܕܟܼܠܗܘܿܢ ܚܲܢ̈ܦܹܐ
ܐܝܼܬܲܝܗܘܿܢ.
ܒ. ܕܡܸܛܠ ܡܵܢܵܐ ܝܗ̄ܘܼ̈ܕܵܝܹܐ ܠܵܐ ܡܩܲܒܿܠܝܼܢ ܠܹܗ ܕܗ̤ܘ
ܐܝܼܬܼܵܘܗܝ ܡܫܝܼܚܵܐ.
ܝܗ̄ܘܼ̈ܕܵܝܹܐ ܕܹܝܢ ܠܵܐ ܡܵܘܕܹܝܢ ܠܹܗ ܕܐܝܼܬܼܵܘܗܝ ܡܫܝܼܚܵܐ: ܡܸܛܠ
ܙܩܝܼܦܵܐ ܘܡܵܘܬܵܐ: ܒܗܵܝ̇ ܕܗܸܢܘܿܢ ܒܟܼܠܵܗ̇ ܬܸܫܒܿܘܿܚܬܼܵܐ ܪܲܒܿܬܼܵܐ
ܘܡܸܬܼܡܲܨܝܢܘܼܬܼܵܐ ܡܤܲܟܹܿܝܢ ܕܲܢܩܲܒܿܠܘܼܢ ܠܲܡܫܝܼܚܵܐ.
ܓ. ܕܡܸܛܠ ܡܵܢܵܐ ܡܵܢܝܼ̈ܢܵܝܹܐ ܠܵܐ ܡܩܲܒܿܠܝܼܢ ܠܹܗ: ܕܐܵܦ ܒܲܪܢܵܫܵܐ
ܐܝܼܬܼܵܘܗܝ ܒܲܟܼܝܵܢܵܐ ܡܫܝܼܚܵܐ: ܐܸܠܵܐ ܐܲܠܵܗܵܐ ܒܲܚܠܘܿܕܼ.
ܡܵܢܝܼ̈ܢܵܝܹܐ ܬܘܼܒܼ ܘܐܲܝܠܹܝܢ ܕܡܸܢܗܘܿܢ ܘܥܲܡܗܘܿܢ ܫܘܲܚ̣ܘ:
ܐܵܡ̇ܪܝܼܢ ܕܠܵܐ ܐܝܼܬܼܵܘܗܝ ܒܲܪܢܵܫܵܐ: ܐܸܠܵܐ ܐܲܠܵܗܵܐ ܒܲܠܚܘܿܕܼ:
pb. 12
ܡܸܛܠ ܬܸܕܼܡܪ̈ܵܬܼܵܐ. ܠܐ̄ܢܵܫܵܝ̈ܬܹܗ ܕܹܝܢ: ܒܐܸܤܟܹܿܡܵܐ ܘܲܒܼܗܲܓܵܓܼܵܐ:
ܘܠܵܘ ܒܲܟܼܝܵܢܵܐ ܤܵܝ̇ܡܝܼܢ ܠܗܹܝܢ.
ܕ. ܕܡܸܛܠ ܡܵܢܵܐ ܦܵܘܠܘܿܢ̈ܝܵܢܹܐ ܘܦܘܿܛܝܼ̈ܢܝܵܢܹܐ: ܕܒܲܪܢܵܫܵܐ ܗ̣̄ܘ
ܒܲܠܚܘܿܕܼ ܡܵܘܕܹܝܢ ܠܹܗ ܡܫܝܼܚܵܐ: ܘܠܵܘ ܕܐܵܦ ܐܲܠܵܗܵܐ
ܐܝܼܬܼܵܘܗܝ.
ܦܵܘܠܘܿܢܝܵܢܹ̈ܐ ܕܹܝܢ ܐܵܡ̇ܪܝܼܢ: ܕܠܵܐ ܐܝܼܬܼܵܘܗܝ ܐܲܠܵܗܵܐ: ܐܸܠܵܐ
ܒܲܪܢܵܫܵܐ ܒܲܠܚܘܿܕܼ: ܡܸܛܠ ܝܲܠܕܼܵܐ ܘܡܵܘܬܼܵܐ. ܘܬܸܕܼܡܪ̈ܵܬܼܵܐ ܕܹܝܢ:
ܐܲܝܟܸ ܕܲܠܐ̄ܢܵܫ ܡ̣ܢ ܩܲܕܝܼ̈ܫܹܐ ܝܵܗ̇ܒܿܝܼܢ.
ܗ. ܕܡܸܛܠ ܡܵܢܵܐ ܐܵܪ̈ܝܵܢܹܐ: ܠܵܐ ܐܲܠܵܗܵܐ ܡܫܲܠܡܵܢܵܐ ܘܠܵܐ
ܤܢܝܼܩܵܐ: ܘܠܵܐ ܬܘܼܒܼ ܒܲܪܢܵܫܵܐ ܡܩܲܒܿܠܝܼܢ ܠܲܡܫܝܼܚܵܐ: ܐܸܠܵܐ ܦܸܠܓܼܘܼܬܼ
ܐܲܠܵܗܵܐ ܘܦܸܠܓܘܼܬܼ ܒܲܪܢܵܫܵܐ.
ܐܵܪ̈ܝܵܢܘܿ ܡܲܘܕܹܝܢ ܠܹܗ ܦܸܠܓܿܘܼܬܼ ܐܵܠܵܗܵܐ ܘܦܸܠܓܘܼܬܼ ܒܲܪܢܵܫܵܐ:
ܡܼܢ ܦܲܓܼܪܵܐ ܠܵܐ ܡܢܲܦܫܵܐ ܘܡ̣ܢ ܐܲܠܵܗܘܼܬܼܵܐ ܥܒܼܝܼܕܼܬܵܐ. ܡܒܲܨܪܝܼܢ
ܠܹܗ ܕܹܝܢ ܡ̣ܢ ܒܢܲܝ̈ܢܵܫܵܐ: ܒܗܵܝ̇ ܕܐܸܡ̇ܪܝܼܢ ܕܢܲܦܫܵܐ ܠܲܝܬܿ ܒܹܗ.
ܘܲܡܒܲܨܪܝܼܢ ܠܹܗ ܬܘܼܒܼ ܡ̣ܢ ܐܲܠܵܗܵܐ: ܒܗܵܝ̇ ܕܠܵܐ ܐܵܡ̇ܪܝܼܢ ܠܹܗ ܠܵܐ
ܥܒܼܝܼܕܼܵܐ ܘܠܵܐ ܤܢܝܼܩܵܐ. ܡܸܛܠܵܬܼܵܗ̇ ܕܹܝܢ ܕܡܸܬܼܒܲܪܢܫܵܢܘܼܬܼܵܐ ܘܝܲܠܕܵܐ
ܕܡ̣ܢ ܐܲܢ̄ܬܿܬܼܵܐ ܘܡܵܘܬܼܵܐ: ܒܐ̄ܢܵܫܵܝ̈ܬܐ ܚܵܫ̇ܒܿܝܼܢ ܕܲܗܘ̤ܵܐ ܐܲܠܵܗܵܐ.
ܠܐܲܠܵܗܵܝ̈ܬܹܗ ܕܹܝܢ ܒܐ̄ܢܵܫܵܝ̈ܬܐ ܡܚܲܠܛܝܼܢ: ܟܲܕܼ ܠܵܘ ܒܫܘܼܠܛܵܢܵܐ:
ܐܸܠܵܐ ܒܦܘܘܼܩܕܵܢܵܐ ܩܛܝܼܪܵܝܵܐ ܝܵܗ̇ܒܿܝܼܢ ܠܵܗ̇ ܠܡܸܬܼܒܲܪܢܵܫܢܘܼܬܹܗ: ܟܲܕܼ
ܐܵܡ̇ܪܝܼܢ ܕܲܚܕܼܵܝܘܼܬܼܵܐ ܕܲܠܘܵܬܼ ܒܸܤܪܵܐ ܠܚܲܕܼ ܟܝܵܢܵܐ ܗܘ̤ܵܬܿ. ܘܠܵܘ ܐܲܝܟܼ
pb. 13
ܕܠܲܚܫܲܚܬܼܵܐ ܕܦܲܪܨܘܿܦܵܐ ܕܲܡܕܲܒܿܪܵܢܘܼܬܼܵܐ ܕܲܚܠܵܦܲܝܢ: ܐܸܠܵܐ ܐܲܟܼܙܢܵܐ
ܕܢܲܦܫܵܐ ܘܦܲܓܼܪܵܐ ܕܠܲܚܲܕܼ ܟܝܵܢܵܐ ܐܲܤܝܼܪܝܼܢ: ܘܲܠܚܲܫܹ̈ܐ ܕܦܲܓܼܪܵܐ
ܪܲܓܿܘܼܫܬܼܵܢܵܐܝܼܬܼ ܚ̇ܵܫܵܐ: ܟܲܕܼ ܨܵܒܲܝܵܐ ܘܟܲܕܼ ܠܵܐ ܨܵܒܲܝܵܐ. ܐܵܦܸܢ ܡܸܢܵܗ̇
ܘܠܵܗ̇ ܠܲܝܬܿ ܠܵܗ̇ ܕܲܬܼܩܲܒܸܿܠ ܗܵܠܹܝܢ: ܒܗܵܝ̇ ܕܲܠܝܬܿ ܠܵܗ̇ ܦܲܓܼܪܵܐ
ܕܒܼܐܝܼܕܹܗ ܬܸܚܲܫ. ܗܵܟܲܢܵܐ ܐܵܦ ܠܐܲܠܵܗܵܐ ܒܦܲܓܼܪܵܐ ܐܵܡ̇ܪܝܼܢ ܠܚܲܕܼ
ܟܝܵܢܵܐ: ܟܲܕܼ ܚܲܫܵܐ ܕܲܟܼܝܵܢܵܐ ܗܵܘ̇ ܕܲܗܘ̤ܵܐ ܡ̣ܢ ܐܵܢܲܢܩܹܐ ܚܵܐܹ̇ܫ ܗ̄ܘ̣ܵܐ:
ܟܲܕܼ ܨܵܒܹ̇ܐ ܘܟܲܕܼ ܠܵܐ ܨܵܒܹ̇ܐ: ܐܲܝܟܼ ܡ̇ܢ ܕܠܵܐ ܐܝܼܬܼܵܘܗܝ ܡ̣ܢ ܟܝܵܢܵܐ
ܠܵܐ ܚܵܫܘܿܫܵܐ ܘܠܵܐ ܤܢܝܼܩܵܐ ܕܐܲܒܼܵܐ. ܘܗܵܕܹܐ ܐܵܡ̇ܪܝܼܢ: ܕܒܲܠܚܘܿܕܼ
ܡܫܲܠܛܵܐ ܘܦܵܩ̇ܘܿܕܼܵܐ ܠܵܐ ܢܚܵܘܘܿܢܵܝܗܝ. ܐܲܝܟܼ ܕܐܵܦ ܦܘܼܩܕܵܢܵܐ
ܕܩܲܒܸܿܠ̣ ܕܲܡܤܵܡ ܒܪܹܫܵܐ ܗ̄ܘ̣: ܘܲܡܤܵܡ ܒܪܹܫܵܐ ܕܒܲܟܼܝܵܢܵܐ ܕܠܵܐ
ܥܪܘܼܩܝܵܐ ܐܝܼܬܼܵܘܗܝ: ܟܲܕܼ ܒܲܕܼܠܵܐ ܨܸܒܼܝܵܢܹܗ ܚܵܐܹ̇ܫ ܗ̄ܘ̣ܵܐ ܚܲܫܹ̈ܐ
ܕܦܲܓܼܪܵܐ ܒܡܲܪܓܫܵܢܘܼܬܼܵܐ ܟܝܵܢܵܝܵܬܐ: ܘܲܟܼܦܸܢ ܘܲܨܗܝ̣ ܘܲܠܐܝܼ ܘܲܕܼܚܸܠ̣
ܘܲܥܪܲܩ̣. ܘܡܝܼܬܼ ܘܩܵܡ̣ ܠܵܘ ܒܲܟܼܝܵܢܹܗ: ܐܸܠܵܐ ܒܫܘܼܠܛܵܢܵܐ ܘܲܒܼܚܝܠܵܐ
ܕܐܲܒܼܵܐ. ܘܡ̣ܢ ܚܕܼܵܐ ܙܒܲܢ ܠܐܲܝܠܹܝܢ ܕܕܼܟܼܝܵܢܵܐ ܚܵܫܘܿܫܵܐ ܕܲܥ̣ܒܲܕܼ ܠܹܗ:
ܠܗܵܠܹܝܢ ܕܲܟܼܝܵܢܵܐܝܼܬܼ ܤܲܝܒܲܪ ܐܵܡ̇ܪܝܼܢ.
ܘ. ܕܐܲܝܠܹܝܢ ܕܼܚ̈ܠܵܬܼܵܐ ܕܫܵܠ̄ܡܵܢ ܠܡܵܢܝܼ̈ܢܵܝܹܐ.
. . ܡܸܨܥܲܬܼ ܗܵܠܹܝܢ ܫܘܲܚ̣ ܗܹܪܹ̈ܤܝܼܵܝ: ܡܸܢܗܹܝܢ ܡ̣ܢ
ܡܵܢܝܼ̈ܢܵܝܹܐ: ܘܡܸܢܗܹܝܢ ܡ̣ܢ ܦܲܘܠܘܿܢܝܵܢܹ̈ܐ.
ܙ. ܘܐܲܝܠܹܝܢ ܐܸܢܹܝܢ ܕܫܵܠ̈̄ܡܵܢ ܠܐܵܪ̈ܵܝܢܹܐ .
pb. 14
ܚ. ܘܲܒܼܡܵܢ ܪ̈ܲܚܝܼܩܵܢ ܠܗܘܿܢ. ܘܲܒܼܡܵܢ ܬܘܼܒܼ ܢܲܩܝܼ̈ܦܵܢ ܠܗܘܿܢ.
ܪ̈ܲܚܝܼܩܵܢ ܠܗܘܿܢ .
ܛ. ܕܡܸܛܠ ܡܵܢܵܐ ܠܲܡܕܲܒܿܪ̈ܵܢܹܐ ܕܗܵܠܹܝܢ ܕܸܚ̈ܠܵܬܼܵܐ ܠܵܐ ܐܲܟܼܬܸܒܼ:
ܐܸܠܵܐ ܒܲܠܚܘܿܕܼ ܠܕܼܘܿܓܡܹ̈ܐ ܕܝܼܠܗܘܿܢ.
ܡ̣ܢ ܫܡܵܗܹ̈ܐ ܕܹܝܢ ܕܲܡܕܲܒܿܪ̈ܵܢܲܝܗܘܿܢ ܨܒܲܝܢ ܕܢܸܫܬܸܿܠ: ܐܲܝܟ
ܕܠܵܐ: ܟܲܕܸ ܡܩܲܕܼܡܝܼܢ ܚ̄ܢܲܢ ܡܸܬܼܠܲܒܼܪܝܼܢ ܚ̄ܢܲܢ ܒܲܫܡܵܗܹ̈ܐ: ܢܵܘܪܸܟܼ
ܡܲܡܠܠܲܢ:. ܐܵܘ ܢܸܫܬܿܟܲܚ ܟܲܕܼ ܠܵܐ ܤܵܝ̇ܝܼܢ ܚ̄ܢܲܢ ܡܸܠܬܼܵܐ ܡܸܕܸܡ
ܕܒܼܘܼܚܵܢܵܐ.
ܝ. ܕܐܲܝܠܹܝܢ ܐܸܢܹܝܢ ܡܸܠܹ̈ܐ ܕܗܵܢ̇ܘܿܢ ܕܐܵܡ̇ܪܝܼܢ: ܕܒܲܟܼܝܵܢܵܐ ܗܘ̤ܵܐ
ܐܲܠܵܗܵܐ ܡܸܠܬܼܵܐ ܒܸܤܪܵܐ: ܟܲܕܼ ܦܲܓܼܪܵܐ ܠܵܐ ܢܤܲܒ̣.
ܡܩܲܛܪ̱ܓܼܝܼܢ ܓܹܝܪ ܠܡܵܢܝܼܢܵܝܹ̈ܐ ܕܐܵܡ̇ܪܝܼܢ: ܕܠܵܐ ܟܝܵܢܵܐ ܫܲܪܝܼܪܵܐܝܼܬܼ
ܐܝܼܬܼܵܘܗܝ ܦܲܓܼܪܹܗ ܕܡܵܪܲܢ ܡܫܝܼܚܵܐ: ܐܸܠܵܐ ܡܲܤܒܿܪܵܢܘܼܬܼܵܐ ܘܗܲܓܵܓܼܵܐ.
ܘܲܠܬܸܕܼܡܪܵܬܼܵܐ ܐܲܝܟ ܕܲܒܼܤܘܿܓܼܵܐܐ: ܐܵܘ ܐܲܝܟ ܡ̇ܢ ܕܠܵܐ ܡܲܨܝܵܐ ܗ̄ܘܼܵܬܼ:
ܘܬܘܼܒܼ ܕܠܵܐ ܫܵܘ̇ܝܵܐ ܗ̄ܘ̣ܵܬܼ ܕܢܸܗܘ̈ܝܵܢ ܒܝܲܕܼ ܦܲܓܼܪܵܐ: ܥܲܠ ܐܲܠܵܗܵܐ
ܒܲܠܚܘܿܕܼ ܫܵܩ̇ܠܝܼܢ ܠܗܹܝܢ.
ܤܘܿܦܿܪܘܿܢܝܘܿܣ. ܕܕܲܟܼܝܵܢܵܐ ܠܲܡ ܗܵܘ̇ ܕܟܼܠ ܡܸܫܟܲܚ ܘܠܵܐ
ܡܸܤܬܼ̈ܝܼܟܼ ܐܝܬܹܝܗ̇ ܗܵܝ̇ ܕܟܼܠ ܡܸܫܟܲܚ ܕܢܸܥܒܸܿܕܼ: ܟܠܗܹܝܢ ܗܵܟܹܝܠ
ܐ̄ܚܪܵܢܝܵܬܼܵܐ ܒܨܸܒܼܝܵܢܵܐ ܕܗܵܢܵܐ ܡܸܬܿܬܲܚ̈ܡܵܢ: ܗܘ̤ ܕܹܝܢ ܡ̣ܢ ܡܸܕܸܡ ܠܵܐ
ܡܸܬܿܬܲܚܲܡ. ܘܗܵܘ̇ ܡܵܐ ܕܠܵܐ ܡܲܨܝܵܐ ܕܢܸܗܘܸܐ ܡ̣ܢ ܐ̄ܚܪܹܢܵܐ: ܗܘ̤
ܐܲܝܟ ܐܲܠܵܗܵܐ ܡܸܫܟܲܚ ܠܡܸܥܒܲܕܼ. ܠܵܘ ܓܹܝܪ ܡ̣ܢ ܟܝܵܢܵܐ ܐܵܘ ܥܸܠܬܼܵܐ
ܡܸܕܼܡ ܕܪܲܒܵܐ ܡܸܢܹܗ ܐܝܼܬܼ ܠܹܗ ܕܢܸܗܘܸܐ: ܕܲܒܼܗܵܕܹܐ ܢܸܩܢܸܐ ܗܵܝ̇
pb. 15
ܕܢܸܗܘܸܐ ܐܲܠܵܗܵܐ: ܘܗܵܝ̇ ܕܠܵܐ ܢܸܗܘܸܐ. ܘܡܸܛܠ ܗܵܢܵܐ ܕܲܚ̇ܠܝܼܢ ܡ̣ܢ
ܗܵܟܲܢܵܐ: ܕܢܵܘܕܘܿܢ ܕܒܸܤܪܵܐ ܫܲܪܝܼܪܵܐܝܼܬܼ ܗܘ̤ܵܐ: ܕܠܵܐ ܟܲܕܼ ܗܵܕܹܐ
ܢܹܐܡܪܘܼܢ: ܢܸܤܒܼܘܼܢ ܗܵܝ̇ ܕܐܼܝܼܬܼܵܘܗܝ ܐܲܠܵܗܵܐ ܒܪܵܐ ܐܵܡ̇ܪܝܼܢ: ܕܐܲܝܟܲܢܵܐ
ܬܸܗܘܸܐ ܗܵܕܹܐ: ܐܲܝܟܵܐ ܕܐܵܦ ܠܦܲܓܼܪܵܐ ܐܲܠܵܗܵܐ ܡܵܘܕܹܝܢ ܚ̄ܢܲܢ
ܕܐܝܼܬܼܵܘܗܝ. ܟܝܢܵܐ ܓܹܝܪ ܕܐܲܠܵܗܵܐ ܐܝܼܬܼܵܘܗܝ ܐܵܦ ܗܵܘ̇ ܕܡܸܤܬܿܒܲܪ
ܕܒܸܤܪܵܐ ܗ̄ܘ̣: ܘܗ̤ܘܝܘܼ ܟܲܕܼ ܗ̤ܘ ܘܠܵܘ ܐ̄ܚܪܹܢܵܐ.
ܝܐ. ܕܐܲܟܼܙܢܵܐ ܠܲܡ ܕܡܲܝ̈ܵܐ ܕܡܲܓܼܠܕܹܝܢ: ܒܹܗ ܒܲܟܼܝܵܢܗܘܿܢ
ܡܲܓܼܠ̱ܕܹܝܢ: ܟܲܕܼ ܗܵܘܹ̇ܝܢ ܗܵܘ̇ ܡܸܕܸܡ ܕܠܵܐ ܐܝܼܬܲܝܗܘܿܢ ܗ̄ܘ̣ܵܘ:
ܘܠܵܘ ܡ̣ܢ ܠܒܲܪ ܢܵܤ̇ܒܿܝܼܢ ܠܵܗ̇ ܠܗܵܕܹܐ: ܗܵܟܲܢܵܐ: ܐܵܡ̇ܪܝܼܢ ܗܵܢ̇ܘܿܢ:
ܕܐܵܦ ܐܲܠܵܗܵܐ ܡܸܠܬܼܵܐ ܗܘ̤ܵܐ ܦܲܓܼܪܵܐ: ܟܲܕܼ ܠܵܘ ܡ̣ܢ ܠܒܲܪ ܢܤܲܒܼ ܦܲܓܼܪܵܐ.
ܐܲܝܟܲܢܵܐ ܠܲܡ ܕܡܲܝ̈ܵܐ ܐܲܫܝܼ̇ܕܹܐ ܘܲܫܪ̈ܲܝܵܐ: ܡܵܐ ܕܲܓܼܠܲܕܼܘ ܘܲܩ̣ܛܲܪܘ:
ܠܵܐ ܡܸܕܸܡ ܐܵܡ̇ܪܝܼܢܲܢ ܗܘ̤ܵܘ: ܐܸܠܵܐ ܗܸܢ̣ܘܿܢ ܐܸܢܘܿܢ ܡܲܝ̈ܵܐ ܕܲܩ̣ܛܲܪܘ:
ܗܵܟܲܢܵܐ ܐܵܦ ܐܲܠܵܗܵܐ: ܫܲܪܝܼܪܵܐܝܼܬܼ ܗܘ̤ܵܐ ܒܸܤܪܵܐ: ܟܲܕܼ ܐܝܼܬܼܵܘܗܝ
ܐܲܠܵܗܵܐ ܒܲܟܼܝܵܢܹܗ. ܘܲܒܼܟܼܠ ܐܝܼܬܼܵܘܗܝ ܗ̄ܘ̣ܵܐ: ܘܥܵܒܼ̇ܕܼ ܗ̄ܘ̣ܵܐ ܐܲܝܟܼ
ܐܲܠܵܗܵܐ. ܘܲܒܼܗܵܝ̇ ܕܒܸܤܪܵܐ: ܒܲܫܪܵܪܵܐ ܐܵܦ ܥܵܒܹ̇ܕܼ ܗ̄ܘ̣ܵܐ ܐܵܦ ܚܲܐܹ̇ܫ
ܗ̄ܘ̣ܵܐ ܐܲܝܟܼ ܒܸܤܪܵܐ. ܘܲܗܘ̤ܵܐ ܒܡܲܪܒܿܥܵܐ ܒܸܤܪܵܐ: ܘܲܒܼܗܵܝ̇ ܕܲܗܘ̤ܵܐ
ܐܵܦ ܐܸܬܼܝܼܠܸܕܼ ܐܵܦ ܐܸܬܼܪܲܒܿܝܼ ܐܲܝܟܼ ܒܸܤܪܵܐ ܫܲܪܝܼܪܵܐܝܼܬܼ. ܘܟܲܕܼ ܗܵܕܹܐ
ܓܒܼܵܐ ܠܹܗ ܕܢܸܗܘܸܐ: ܐܵܦ ܟܦܸܢ ܐܵܦ ܨܗܝܼ: ܐܵܦ ܠܐܝܼ: ܐܵܦ ܚܲܫ̣
ܐܵܦ ܐܸܨܛܠܸܒܼ ܫܲܪܝܼܪܵܐܝܼܬܼ: ܐܸܢ ܗܘ̤ܵܐ ܫܲܪܝܼܪܵܐܝܼܬܼ ܒܸܤܪܵܐ. ܐܲܟܼܙܢܵܐ
ܓܹܝܪ ܕܡܲܝ̈ܵܐ ܠܵܐ ܡܸܬܿܬܲܒܿܪ̈ܵܢܹܐ: ܡܵܐ ܕܡܲܓܼܠ̱ܕܹܝܢ: ܒܲܫܪܵܪܵܐ ܡܸܬܿܬܲܒܿܪܝܼܢ:
pb. 16
ܘܚܲܫܵܐ ܕܲܟܼܝܵܢܵܐ ܕܲܗܘ̤ܵܘ ܡܩܲܒܿܠܝܼܢ ܫܲܪܝܼܪܵܐܝܼܬܼ: ܗܵܟܲܢܵܐ ܐܵܦ ܐܲܠܵܗܵܐ
ܕܲܗܘ̤ܵܐ ܒܲܫܪܵܪܵܐ: ܟܠܗܹܝܢ ܐܲܝܠܹܝܢ ܕܕܲܟܼܝܵܢܵܐ ܕܲܗܘ̤ܵܐ ܡܩܲܒܸܿܠ
ܗ̄ܘ̣ܵܐ ܫܲܪܝܼܪܵܐܝܼܬܼ: ܟܲܕܼ ܡ̣ܢ ܟܝܵܢܹܗ ܠܵܐ ܡܸܬܿܕܚܸܩ ܗ̄ܘ̣ܵܐ.
ܝܒ. ܕܐܲܟܼܙܢܵܐ ܠܲܡ ܕܥܲܠ ܐܲܒܼܪܵܗܵܡ ܘܝܥܩܘܿܒܼ ܐ̄ܢܵܫܵܐܝܼܬܼ
ܐܸܬܼܓܿܠܝܼ: ܟܲܕܼ ܓܘܼܫܡܵܐ ܡ̣ܢ ܠܒܲܪ ܠܵܐ ܢܤܲܒ̣: ܗܵܟܲܢܵܐ ܐܵܦ
ܐܸܬܼܒܲܪܢܲܫ.
ܐܲܝܟܲܢܵܐ ܕܐܵܦ ܠܐܲܒܼܵܗܲܝ̈ܢ ܐܲܒܼܪܵܗܵܡ ܘܐܝܼܤܚܵܩ ܘܝܲܥܘܿܒܼ ܘܲܫܪܟܵܐ
ܕܩܲܕܝ̈ܫܹܐ ܐܸܬܼܚܙܝܼ ܗ̄ܘ̣ܵܐ ܒܲܫܪܵܪܵܐ ܒܲܟܼܝܵܢܵܐ ܡܸܬܼܚܲܙܝܵܢܵܐ: ܟܲܕܼ ܡܗܲܠܸܟܼ
ܗ̄ܘ̣ܵܐ ܒܗܵܘ̇ ܕܡܗܲܠܸܟܼ: ܘܲܡܡܲܠܸܠ ܗ̄ܘ̣ܵܐ ܒܗܵܘ̇ ܕܲܡܡܲܠܸܠ:
ܘܐܵܟܹ̇ܠ ܗ̄ܘ̣ܵܐ ܘܫܵܬܹ̇ܐ ܒܗܵܘ̇ ܕܐܵܟܹ̇ܠ: ܠܵܐ ܓܹܝܪ ܗܘ̤ܵܐ ܡܸܕܸܡ
ܒܡܲܛܥܝܵܢܘܼܬܼܵܐ ܡ̣ܢ ܐܲܠܵܗܵܐ: ܐܸܠܵܐ ܟܠ ܡܸܕܸܡ ܒܲܫܪܵܪܵܐ ܘܒܲܟܼܝܵܢܵܐ.
ܒܵܪܘܿܝܵܐ ܗ̄ܘ̣ ܓܹܝܪ: ܘܒܼܵܪܘܿܝܵܐ ܡܸܕܸܡ ܒܐܸܤܟܹܿܡܵܐ ܘܲܒܼܗܲܓܵܓܼܵܐ ܠܵܐ
ܥܵܒܹ̇ܕܼ: ܐܸܠܵܐ ܒܲܟܼܝܵܢܵܐ ܘܒܲܫܪܵܪܵܐ. ܥܲܠ ܐܲܝܠܹܝܢ ܕܹܝܢ ܕܠܵܐ ܐܝܼܬܲܝܗܘܿܢ
ܕܲܟܼܝܵܢܵܐ ܒܪܘܿܝܵܐ: ܗܸܠܹܝܢ ܙܵܕܼܩܵܐܝܼܬܼ ܡܸܬܼܐܲܡܪܵܢ: ܗܵܢܵܘ ܕܹܝܢ
ܡܲܤܒܿܪܵܢܘܼܬܼܵܐ ܘܗܲܓܵܓܼܵܐ: ܒܲܕܼܠܵܐ ܡܸܫܟܿܚܝܼܢ ܕܢܸܬܼܙܘܿܢ ܒܲܟܼܝܵܢܗܘܿܢ.
ܝܓ. ܕܐܲܝܟܲܢܵܐ ܢܵܤ̇ܒܿܝܼܢ ܠܗܵܝ̇ ܕܫܲܪܝܼܪܵܐܝܼܬܼ ܘܠܵܘ ܒܲܕܝܵܢܵܐ:
ܘܒܲܟܼܡܵܐ ܙܢܲܝ̈ܵܐ ܡܸܬܼܐܲܡܪܵܐ ܗܵܝ̇ ܕܫܲܪܝܼܪܵܐܝܼܬܼ.
ܢܸܤܛܘܿܪܝܼܣ. ܫܲܪܝܼܪܵܐܝܼܬܼ ܡܵܕܹܝܢ ܐܵܡ̇ܪܝܼܢ: ܕܗ̤ܘ ܐܲܠܵܗܵܐ
ܗܘ̤ܵܐ ܒܸܤܪܵܐ:
ܤܘܿܦܪܘܿܢܝܘܿܣ ܐܲܡܲ݁ܪ: ܫܲܪܝܼܪܵܐܝܼܬܼ ܠܲܡ ܠܹܗ ܡܵܘܕܹܝܢ
pb. 17
ܚ̄ܢܲܢ ܕܲܗܘ̤ܵܐ ܒܸܤܪܵܐ: ܘܠܵܘ ܒܲܟܼܝܵܢܹܗ. ܒܗܵܝ̈: ܕܗܵܘ̇ ܕܗܘ̤ܵܐ:
ܒܲܫܪܵܪܵܐ ܗܘ̤ܵܐ. ܘܐܝܼܬܼܵܘܗܝ ܟܵܝܵܢܵܐ: ܘܠܵܘ ܕܹܝܢ ܒܲܟܼܝܵܢܵܐ: ܘܠܵܘ ܓܹܝܪ
ܡܬܼܘܿܡܵܐܝܼܬܼ ܐܝܼܬܼܵܘܗܝ ܗ̄ܘ̣ܵܐ ܒܸܤܪܑܵܐ: ܐܸܠܵܐ ܐܲܟܼܙܢܵܐ ܕܡܲܝ̈ܵܐ ܫܪܲ̈ܝܵܐ
ܟܲܕܸ ܡܲܓܼܠ̱ܕܹܝܢ: ܟܝܵܢܵܐ ܕܓܼܠܝܼܕܼܵܐ ܐܝܼܬܼ ܠܗܘܿܢ. ܘܠܵܘ ܗܵܕܹܐ ܗ̄ܘ̣ܵܘ
ܒܲܟܼܝܵܗܘܿܢ: ܐܸܠܵܐ ܗܘ̤ܵܘ. ܗܵܟܲܢܵܐ ܐܵܦ ܐܲܠܵܗܵܐ: ܫܲܪܝܼܪܵܐܝܼܬܼ ܗܘ̤ܵܐ
ܒܸܤܪܵܐ: ܘܐܝܼܬܼܵܘܗܝ ܟܝܵܢܵܐ ܕܒܸܤܪܵܐ: ܘܠܵܘ ܒܲܟܼܝܵܢܹܗ. ܒܗܵܝ̇: ܕܗܵܢܵܐ
ܠܵܐ ܐܝܼܬܼܵܘܗܝ ܡܬܼܘܿܡܵܐܝܼܬܼ: ܐܸܠܵܐ ܡ̣ܢ ܒܵܬܲܪܟܸܢ ܗܘ̤ܵܐ. ܗܵܕܹܿܐ ܗ̣̄ܝ
ܓܹܝܪ ܫܲܪܝܼܪܵܐܝܼܬܼ ܡܸܬܼܒܲܪܢܫܵܢܘܼܬܼܵܐ: ܕܒܲܟܼܝܵܢܹܗ ܕܝܼܠܹܗ ܢܸܗܘܸܐ ܒܸܤܪܵܐ
ܘܒܲܪܢܵܫܵܐ: ܘܠܵܘ ܒܗܲܓܵܓܼܵܐ: ܘܠܵܘ ܒܐܸܤܟܹܡܵܐ ܘܲܒܼܡܲܒܿܪܵܢܘܼܬܼܵܐ
ܕܠܵܐ ܩܢܘܿܡܵܐ: ܗܵܝ̇ ܕܐܝܼܬܹܝܗ̇ ܫܲܪܝܼܪܵܐܝܼܬܼ ܠܵܐ ܡܸܬܼܒܲܪܢܫܵܢܘܼܬܼܵܐ.
ܗܵܘ̇ ܗܵܟܹܝܠ ܕܒܼܵܥܹ̇ܐ ܕܲܒܼܡܲܤܒܿܪܵܢܘܼܬܼܵܐ ܢܸܤܒܲܪ ܕܲܗܘ̤ܵܐ: ܡܼܢ
ܫܪܵܪܵܐ ܥܵܪܹܩ.
ܝܕ. ܕܲܒܼܡܵܢܵܐ ܫܵܠܡ̇ܝܼܢ ܗܵܢ̇ܘܿܢ ܕܗܵܠܹܝܢ ܐܵܡ̇ܪܝܼܢ ܠܡܵܢܝܼܢܵܝܹ̈ܐ:
ܘܲܒܼܡܵܢܵܐ ܡܸܤܬܲܒܼܪܝܼܢ ܕܲܦܪܝܼܫܝܼܢ ܡܸܢܗܘܿܢ.
ܐܵܪܵܐ ܟܲܝ ܐܸܬܼܓܲܠܝܲܬ̤ ܠܵܟܼ ܕܲܒܼܡܵܢ ܗ̤ܝ ܟܲܕܼ ܗ̤ܝ ܡܸܬܼܪܲܥܹܝܢ: ܘܲܒܼܡܵܢ
ܡܸܤܬܲܒܼܪܝܼܢ ܕܐܝܼܬܼ ܠܗܘܿܢ ܫܘܼܚ̈ܠܦܹܐ: ܘܒܼܵܗ̇ ܟܲܕܼ ܒܵܗ̇ ܩܵܝ̇ܡܝܼܢ.
ܘܙܵܕܹܩ ܠܲܢ ܕܢܲܪܦܸܐ ܠܐܲܝܠܹܝܢ ܕܒܼܵܬܲܪ ܗܵܠܹܝܢ: ܕܠܵܐ ܒܐܲܝܠܹܝܢ
ܕܡܸܬܿܬܵܘ̈ܕܝܵܢ ܤܪܝܼܩܵܐܝܼܬܼ ܢܒܲܛܸܠ ܠܲܫܪܵܪܵܐ.
ܢܸܤܛܘܿܪܝܼܣ ܐܵܡܲ݁ܪ: ܐܸܢܵܐ ܐܵܡܲ݁ܪ ܐ̄ܢܵܐ: ܕܠܵܐ ܠܲܓܼܡܵܪ ܢܲܗܡܸܐ
ܒܡܸܠܬܼܵܐ ܗܵܕܹܐ. ܐܵܦܸܢ ܐܲܢ̄ܬܿ ܨܵܒܹ̇ܐ ܐܲܢ̄ܬܿ ܠܡܸܪܗܲܛ ܥܠܹܝܗ̇ ܐܲܝܟܼ
ܐܲܝܕܵܐ ܕܡܸܬܿܬܵܘܕܝܵܐ: ܟܲܕܼ ܗܵܟܲܢܵܐ ܡܕܲܪܡܵܐܝܼܬܼ ܐܸܬܼܐܲܡܪܲܬ̤: ܐܲܝܟܼ
pb. 18
ܕܐܵܦ ܐܸܬܼܚܲܫܒܲܬ̤ ܠܫܵܡ̈ܘܿܥܹܐ ܫܟܼܝܼܪܬܵܐ: ܤܵܒܲܪ ܐ̄ܢܵܐ ܕܹܝܢ ܕܐܵܦ ܠܵܟܼ.
ܗܵܫܵܐ ܐܸܓܼܠܹܝܗ̇ ܠܲܒܼܥܵܬܼܵܐ ܗܵܕܹܐ ܠܐܲܝܢܵܐ ܕܨܵܒܹ̇ܐ: ܕܗܵܝ̇ ܕܡܸܤܬܿܒܼܵܪܘܼ
ܡܸܤܬܲܒܼܪܵܐ ܬܹܐܬܸܐ ܠܓܸܠܝܵܐ. ܠܵܐ ܓܹܝܪ ܚܵܙܹ̇ܐ ܐ̄ܢܵܐ ܒܗܹܝܢ ܡܸܕܸܡ
ܕܟܼܵܡܹ̇ܐ ܠܡܸܕܸܡ: ܐܵܦ ܠܵܐ ܕܢܲܩܝܼܦ. ܤܲܓܿܝܼ ܓܹܝܪ ܪ̈ܲܚܝܼܩܵܢ ܡ̣ܢ
ܚܕܼܵܕܹ̈ܐ: ܐܲܝܟܼ ܟܡܵܐ ܕܪܲܚܝܼܩܵܐ ܡܲܤܒܿܪܵܢܘܼܬܼܵܐ ܡ̣ܢ ܫܪܵܪܵܐ: ܘܦܲܓܼܪܵܐ
ܡ̣ܢ ܡܲܤܒܿܪܵܢܘܼܬܼܵܐ ܕܦܲܓܼܪܵܐ. ܘܲܒܼܗܵܠܹܝܢ ܚܵܙܹ̇ܐ ܐ̄ܢܵܐ ܠܤܲܓܿܝܼ̈ܐܹܐ ܕܛܵܒܼ
ܡܸܬܼܥܲܫܢܝܼܢ: ܐܲܝܟܼ ܡܸܕܸܡ ܕܒܲܫܪܵܪܵܐ ܘܪܸܥܝܵܢܵܐ ܥܲܬܿܝܼܩܵܐ. ܘܡܸܛܠ
ܗܵܕܹܐ ܨܵܒܹ̇ܐ ܐ̄ܢܵܐ: ܕܠܵܘ ܥܵܒܼܘܿܪܵܐܝܼܬܼ ܬܒܲܚܸܢ ܐܸܢܹܝܢ: ܐܸܠܵܐ ܒܟܼܠܵܗ̇
ܒܛܝܼܠܘܼܬܼܵܐ. ܐܲܝܟܼ ܕܠܵܐ ܢܸܗܘ̈ܝܵܢ ܡܸܠܹ̈ܐ ܕܗܲܝܡܵܢܘܼܬܼܵܐ ܕܠܵܐ ܥܘܼܩܵܒܼܵܐ
ܘܡܸܬܼܩܲܩ̈ܠܵܬܼܵܐ: ܐܸܠܵܐ ܓܲܠ̈ܝܵܬܼܵܐ ܘܝܼܕܼܝ̈ܥܵܬܼܵܐ ܠܟܼܠܢܵܫ. ܐܲܝܟܼ ܐܲܠܹܝܢ
ܕܒܲܬܼܚܘܼ̈ܡܹܐ ܡܸܕܸܡ ܘܲܒܼܕܼܡ̈ܘܵܬܼܵܐ ܟܝܵܡ̈ܘܵܬܼܵܐ ܟܝܵܢܵܝ̈ܬܼܵܐ ܡܸܬܿܬܲܚ̈ܡܵܢ: ܘܠܵܘ
ܐܲܝܟܼ
ܐܲܝܠܹܝܢ ܕܟܲܕܼ ܛܸܠܵܢ̈ܝܵܬܼܗܹܝܢ ܡܸܬܿܬܿܨܝܼܪ̈ܵܢ ܚܵܢ̈ܝܵܢ ܠܗܵܢܹܝܢ ܘܲܠܗܵܢܹܝܢ:
ܥܕܲܡܵܐ ܕܒܼܵܗ̇ ܒܲܕܼܡܘܼܬܼܵܐ ܡܸܬܼܪ̈ܲܫܡܵܢ. ܒܐܲܝܕܵܐ ܗܵܟܹܝܠ ܐܸܡܲ݁ܪ ܐܲܢ̄ܬܿ:
ܕܗ̤ܝ ܟܲܕܼ ܗ̤ܝ ܐܵܡ̇ܪܝܼܢ: ܒܗܵܝ̇ ܕܕܼܵܡܹ̇ܝܢ ܢܸܗܘܿܢ ܠܡܵܢܝܼܢܵܝܹ̈ܐ:
ܒܐܲܝܠܹܝܢ ܕܢܸܗܢܘܿܢ ܡܲܟܿܤܝܼܢ ܠܗܘܿܢ.
ܤܘܿܦܪܘܿܢܝܘܼܣ. ܗܵܢܘܿܢ ܕܗܵܠܹܝܢ ܐܵܡ̇ܪܝܼܢ: ܠܵܘ ܐܲܝܟܸ ܡ̇ܢ
ܕܫܵܝ̇ܛܝܼܢ ܠܦܲܓܼܪܵܐ ܕܝܼܠܲܢ: ܡܵܬܿܬܲܤܠܹܝܢ ܡܸܢܗܘܿܢ. ܬܪ̈ܲܝܗܘܿܢ ܓܹܝܪ
ܟܵܦܪܝܼܢ ܒܗܵܝ̇ ܕܐܸܬܼܢܤܸܒܼ ܦܲܓܼܪܐ. ܐܸܠܵܐ ܡܸܛܠ ܕܠܵܐ ܐܵܡ̇ܪܝܼܢ ܠܗܵܝ̇
ܐ̄ܚܪܹܬܼܵܐ ܕܒܲܫܪܵܪܵܐ: ܐܸܠܵܐ ܕܗܲܓܵܓܼܵܐ ܗ̄ܘ̣ܵܐ ܟܝܵܢܵܐ ܕܒܸܤܪܵܐ. ܢܸܚܙܸܐ
ܡܵܕܹܝܢ ܐܵܦ ܠܛܘܼܝܵܒܼܗܘܿܢ ܕܥܲܠ ܗܵܠܹܝܢ: ܕܐܲܝܕܵܐ ܡܸܠܬܼܵܐ ܟܹܐܢܵܐܝܼܬܼ
ܐܝܼܬܼ ܠܗܘܿܢ: ܘܠܵܐ ܠܐܲܝܟܵܐ ܕܠܵܐ ܙܵܕܹܩ ܢܲܡܕܘܼܢ ܓܘܼܕܵܦܲܝ̈ܗܘܿܢ.
pb. 19
ܝܗ. ܫܪܵܝܵܐ ܕܠܘܼܩܒܲܠ ܐܲܝܠܹܝܢ ܕܐܵܡ̇ܪܝܼܢ: ܕܐܘܼܤܝܼܵܐ ܕܒܸܤܪܵܐ
ܗܘ̤ܵܐ ܐܲܠܵܗܵܐ ܡܸܠܬܼܵܐ: ܟܲܕܼ ܦܲܓܼܪܵܐ ܠܵܐ ܢܤܲܒܼ.
ܢܸܤܛܘܿܪܝܼܣ ܐܵܡܲ݁ܪ. ܐܹܡܲܪ ܡܸܟܹܝܠ ܓܸܢܤܵܢܵܐܝܼܬܼ ܠܗܵܠܹܝܢ ܕܗܸܢܘܿܢ
ܐܵܡ̇ܪܝܼܢ: ܝܲܬܿܝܼܪ ܡ̣ܢ ܡܵܐ ܕܐܵܡ̇ܪܝܼܢ ܕܤܲܪܝܼܟܼܝܼܢ ܥܲܠ ܐܲܦܲܝ̈
ܢܲܦܫܗܘܿܢ. ܕܠܵܐ ܢܸܤܬܲܒܼܪܘܼܢ: ܕܡܸܛܠ ܕܠܲܝܬܿ ܠܗܘܿܢ ܤܢܹܐܓܼܪܵܐ
ܐܵܘ ܡܥܲܕܪܵܢܵܐ: ܐܸܬܼܚܲܝܲܒܼܘ. ܕܵܡܹ̇ܝܢ ܐ̄ܢܬܿܘܿܢ ܠܝܼ ܓܹܝܪ: ܕܤܲܓܿܝܼ
ܡܦܵܤܝܼܢ ܐܢ̄ܬܿܘܿܢ ܒܐܲܝܠܹܝܢ ܕܗܸܢܘܿܢ ܐܵܡ̇ܪܝܼܢ. ܘܲܒܼܡܸܠܹ̈ܐ ܤܲܓܿܝܼ̈ܐܵܬܼܵܐ
ܤܵܦ̇ܩܝܼܢ ܐܢ̄ܬܿܘܿܢ ܕܲܬܼܚܲܝܠܘܼܢ ܠܡܸܠܲܝ̈ܗܘܿܢ: ܐܝܟܲܢܵܐ ܕܡܸܫܟܿܝܼܚܢ
ܐܢ̄ܬܿܘܿܢ ܠܡܸܥܒܲܕܼ ܐܵܦ ܠܫܵܡ̈ܘܿܥܹܐ ܕܢܲܗܝܡܢܘܼܢ ܕܗܵܟܲܢܵܐ ܐܝܼܬܲܗܘܿܢ.
ܐܲܠܘܿܨ ܗܵܟܹܝܠ ܐܵܦ ܠܝܼ: ܕܐܹܡܲܪ ܠܘܵܬܼ ܗܸܠܹܝܢ. ܤܲܒܼ ܠܟܼܠ ܚܕܼܵܐ
ܚܕܼܵܐ ܡ̣ܢ ܡܸܠܹ̈ܐ ܐܲܝܠܹܝܢ ܕܡܹܢܝ ܐܸܬ̱ܐܡܲܪܹ̈ܝܢ: ܘܲܠܗܵܠܹܝܬ ܬܘܼܒܼ
ܕܡܸܢܵܟܼ: ܘܐܸܡܲܪ ܠܘܵܬܼܝ. ܕܠܘܵܬܼ ܟܠ ܚܕܼܵܐ ܡܸܢܗܹܝܢ ܐܹܦܲܢܸܐ
ܦܸܬܼܓܼܵܡܵܐ: ܐܸܢ ܐܸܬܼܡ̱ܨܐ. ܡܸܬܼܡܨܐ ܐ̄ܢܵܐ ܕܹܝܢ: ܐܸܢ ܐܲܠܵܗܵܐ ܢܸܨܒܸܿܐ
ܘܢܸܬܸܿܠ ܠܝܼ ܗܵܘ̇ ܡܵܐ ܕܙܵܕܹ̇ܩ ܠܡܹܐܡܲܪ: ܠܡܲܠܵܦܘܼ ܠܲܡܫܘܼܚܬܼܵܐ
ܕܝܼܠܝ. ܠܡܸܕܸܡ ܓܹܝܪ ܐܸܢܵܐ ܠܵܐ ܫܵܘܹ̇ܐ ܐ̄ܢܵܐ: ܐܸܠܵܐ ܠܦܘܼܬܼ ܐܲܝܠܹܝܢ
ܕܢܵܩ̇ܫܝܼܢ ܘܒܼܵܥܹ̇ܝܢ ܡ̣ܢ ܬܲܪܥܵܐ ܕܲܫܪܵܪܵܐ: ܟܲܕܼ ܐܝܼܬܼܵܘܗܝ ܫܪܵܪܵܐ.
ܤܘܿܦܪܘܿܢܝܘܿܣ. ܐܲܝܠܹܝܢ ܕܐܸܢܵܐ ܐܸܡ̇ܪܹܬܼ ܐܸܡܲ݁ܪ ܐ̄ܢܵܐ ܕܬܲܚܘܝܼܬܼܵܐ
ܐܝܼܬܲܝܗܹܝܢ ܕܚܲܝܠܵܐ ܐܲܠܵܗܵܝܵܐ: ܕܢܸܫܟܲܚ ܢܸܗܘܸܐ ܒܸܤܪܵܐ ܫܲܪܝܼܪܵܐܝܼܬܼ ܟܲܕܼ
ܐܝܼܬܼܵܘܗܝ ܐܲܠܵܗܵܐ. ܗܵܘ̇ ܓܹܝܪ ܒܲܫܪܵܪܵܐ ܐܲܠܵܗܵܐ: ܝܵܗܹ̇ܒܼ ܠܹܗ
ܕܟܼܠ ܡܸܕܸܡ ܡܸܫܟܲܚ. ܟܠ ܡܸܕܸܡ ܓܹܝܪ ܕܨܵܒܹ̇ܐ: ܥܵܒܹ̇ܕܼ. ܨܒ̤̈ܐ ܕܹܝܢ
ܕܢܸܗܘܸܐ ܒܸܤܪܵܐ: ܘܲܗܘ̤ܵܐ ܒܸܤܪܵܐ. ܠܵܐ ܗܘ̤ܵܐ ܐܸܤܟܹܿܡܵܐ ܕܒܸܤܪܵܐ:
pb. 20
ܐܸܠܵܐ ܟܝܵܢܵܐ ܕܒܸܤܪܵܐ: ܗܵܢܵܘ ܕܹܝܢ ܫܲܪܝܼܪܵܐܝܼܬܼ ܒܸܤܪܵܐ. ܘܲܒܼܗܵܕܹܐ
ܫܲܪܝܼܪܵܐܝܼܬܼ ܐܸܬܼܒܲܪܢܲܫ: ܕܒܲܟܼܝܵܢܹܗ ܗܘ̤ܵܐ ܒܲܪܢܵܫܵܐ ܘܠܵܘ ܒܲܐ̄ܚܪܹܢܵܐ.
ܘܲܬܼܠܝܼܬܼܵܝܘܼܬܼܵܐ: ܬܠܝܼܬܼܵܝܘܼܬܼܵܐ ܐܝܼܬܹܝܗ̇: ܟܲܕܼ ܬܵܘܤܲܦܬܼܵܐ ܕܐܘܼܤܝܼܵܐ
ܐ̄ܚܪܹܬܼܵܐ ܠܵܐ ܩܲܒܿܠܲܬ̤. ܐܸܡܲܪ ܗܵܟܹܝܠ ܠܘܵܬܼ ܗܠܹܝܢ: ܒܡܸܠܹ̈ܐ ܓܹܝܪ
ܘܲܒܼܡܲܚ̈ܫܒܼܵܬܼܵܐ ܕܓܼܵܘܵܐ ܡܸܬܼܚܲܙ̈ܝܵܢ ܕܡܸܬܼܚܲܫܚܝܼܢ: ܕܲܠܡܸܬܼܚܪܵܝܘܼ
ܠܘܼܩܒܲܠܗܹܢܝ: ܕܡܲܪܵܚܘܼܬܼܵܐ ܐܝܼܬܹܝܗ̇ ܤܲܓܝܼܐܬܼܵܐ.
ܝܘ. ܥܲܠ ܗܵܝ̇: ܕܗܵܘ̇ ܕܒܼܐܘܼܤܝܼܵܐ ܗܘ̤ܵܐ ܦܲܓܼܪܵܐ: ܦܵܐܹ̇ܫ ܠܹܗ
ܡ̣ܢ ܗܵܝ̇ ܕܢܸܗܘܸܐ ܐܲܠܵܗܵܐ: ܘܲܕܢܸܫܟܲܚ ܟܠ: ܘܲܕܢܸܗܘܸܐ
ܐܲܝܟܼ ܐܲܠܵܗܵܐ.
ܢܸܤܛܘܿܪܝܼܣ. ܒܲܫܪܵܪܵܐ ܐܸܡ݂ܲܪܬܿ: ܘܠܘܼܩܒܲܠ ܐܲܝܠܹܝܢ ܕܒܲܫܪܵܪܵܐ
ܡܸܬܼܐܲܡܪ̈ܵܢ ܠܵܐ ܙܵܕܹܩ ܠܡܸܬܼܚܪܵܝܘܼ. ܘܐܵܦ ܕܲܒܼܟܼܠܡܸܕܸܡ ܡܸܬܼܡܲܨܝܵܢܐ
ܗ̄ܘ̣ ܐܲܠܵܗܵܐ: ܘܟܼܠ ܡܸܕܸܡ ܕܨܵܒܹ̇ܐ ܥ̈ܒܹܕܼ. ܘܡܸܛܠ ܗܵܢܵܐ: ܠܵܐ
ܗܘ̤ܵܬܼ ܐܘܼܤܝܼܵܐ ܕܝܠܹܗ ܒܸܤܪܵܐ. ܗܵܘ̇ ܓܹܝܪ ܕܒܲܟܼܝܵܢܹܗ ܗܵܘܹ̇ܐ ܒܸܤܪܵܐ:
ܦܵܐܹ̇ܫ ܠܹܗ ܡ̣ܢ ܗܵܝ̇ ܕܢܸܬܼܡܨܐ ܕܢܸܥܒܸܿܕܼ ܟܠ ܡܸܕܸܡ. ܒܗܵܝ̇ ܕܒܸܤܪܵܐ
ܐܝܼܬܼܵܘܗܝ: ܘܠܵܘ ܐܲܠܵܗܵܐ. ܕܐܲܠܵܗܵܐ ܓܹܝܪ ܐܝܼܬܹܝܗ̇: ܗܵܝ̇ ܕܟܼܠ
ܡܸܕܸܡ ܡܨܐ ܠܡܸܤܥܲܪ. ܘܠܵܘ ܕܒܸܤܪܵܐ: ܘܠܵܘ ܟܠ ܕܨܵܒܹ̇ܐ
ܡܸܫܟܲܚ ܠܡܸܥܒܲܕܼ. ܟܲܕܼ ܡܩܵܘܸܐ ܕܹܝܢ ܐܲܠܵܗܵܐ: ܠܵܘ ܟܠ ܡܸܕܸܡ
ܨܸܵܒܹ̇ܐ. ܘܠܵܐ ܬܘܼܒܼ ܕܠܵܐ ܢܸܗܘܸܐ ܐܲܠܵܗܵܐ ܨܵܒܹ̇ܐ: ܐܲܝܟܼ ܕܢܸܥܒܸܕܼ
ܢܲܦܫܹܗ ܕܠܵܐ ܐܝܼܬܼܵܘܗܝ ܐܲܠܵܗܵܐ. ܒܗܵܝ̇ ܓܹܝܪ ܕܲܒܼܟܼܠܙܒܲܢ ܐܝܼܬܼܵܘܗܝ:
ܘܡܸܫܟܲܚ ܕܟܼܠ ܕܨܵܒܹ̇ܐ: ܐܝܼܬܼܵܘܗܝ ܐܲܠܵܗܵܐ. ܘܠܵܘ ܒܗܵܝ̇
pb. 21
ܕܢܸܬܼܡܨܐ ܠܡܸܥܒܲܕܼ ܢܲܦܫܹܗ: ܕܠܵܐ ܐܝܼܬܼܵܘܗܝ ܐܲܠܵܗܵܐ: ܗܵܘ̇ ܓܹܝܪ
ܕܥܲܠ̣ ܠܐܘܼܤܝܼܵܐ ܕܝܼܠܹܗ ܟܝܵܢܵܐ ܕܒܸܤܪܵܐ: ܗܢܵܐ ܥ̣ܒܲܕܼ ܢܲܦܫܹܗ
ܕܠܵܐ ܐܝܼܬܼܵܘܗܝ ܐܲܠܵܗܵܐ: ܘܲܕܼܠܵܐ ܬܘܼܒܼ ܡܸܫܟܲܚ ܠܡܸܥܒܲܕܼ ܟܠ
ܡܵܐ ܕܨܵܒܹܿܐ.
ܤܘܿܦܪܘܿܢܝܘܿܣ
. ܠܵܐ ܗ̄ܘ̣ܵܐ ܕܠܵܐ ܢܸܗܘܸܐ ܗܵܘ̇ ܡܵܐ ܕܐܝܼܬܼܵܘܗܝ
ܨܒܼܵܐ ܕܢܸܗܘܸܐ: ܐܸܠܵܐ ܕܢܸܗܘܸܐ ܗܵܘ̇ ܕܠܵܐ ܐܝܼܬܼܵܘܗܝ ܗ̄ܘ̣ܵܐ.
ܘܡܸܛܠ ܗܵܢܵܐ: ܗܘ̤ ܒܲܪܢܵܫܵܐ ܒܲܫܪܵܪܵܐ ܗܘ̤ܵܐ ܗܵܘ̇ ܡܵܐ ܕܠܵܐ
ܐܝܼܬܼܵܘܗܝ ܗ̄ܘ̣ܵܐ. ܗܵܢܵܘ ܕܹܝܢ: ܗܘ̤ܵܐ ܫܲܪܝܼܪܵܐܝܼܬܼ ܒܸܤܪܵܐ ܐܵܦ ܒܲܪܢܵܫܵܐ:
ܠܵܘ ܕܹܝܢ ܒܲܟܼܝܵܢܵܐ. ܗܵܘ̇ ܡܵܐ ܓܹܝܪ ܕܐܝܼܬܼܵܘܗܝ: ܒܲܟܼܝܵܢܵܐ ܐܝܼܬܼܵܘܗܝ.
ܗܵܘ̇ ܕܹܝܢ ܕܲܗܘ̤ܵܐ: ܒܲܟܼܝܵܢܵܐ ܡ̇ܢ ܟܠ ܐܝܼܬܼܵܘܗܝ: ܫܲܪܝܼܪܵܐܝܼܬܼ ܕܹܝܢ
ܐܝܼܬܼܵܘܗܝ ܗܵܘ̇ ܡܵܐ ܕܲܗܘ̤ܵܐ:
ܝܙ. ܕܗܵܝ̇ ܕܫܲܪܝܼܪܵܐܝܼܬܼ ܗܘ̤ܵܐ ܦܲܓܼܪܵܐ ܐܲܠܵܗܵܐ ܡܸܠܬܼܵܐ: ܐܵܘ ܐܲܝܟܼ
ܕܒܼܐܘܼܤܝܼܵܐ: ܐܵܘ ܐܲܝܟܼ ܕܲܒܼܗܓܵܓܼܵܐ: ܡܸܢܗܘܿܢ ܡܸܬܼܢܲܤܒܵܐ.
ܢܸܤܛܘܿܪܝܼܣ. ܐܲܝܟܼ ܕܒܼܐܘܼܤܝܼܵܐ ܝܵܗܹ̇ܒܼ ܐܲܢ̄ܬܿ ܠܗܵܝ̇ ܕܫܲܪܝܼܪܵܐܝܼܬܼ
ܐܵܘ ܕܲܒܼܗܲܓܵܓܼܵܐ ܘܲܒܼܡܲܤܒܿܪܵܢܘܼܬܼܵܐ.
ܤܘܿܦܪܘܿܢܝܘܿܣ. ܬܲܪ̈ܬܲܝܗܹܝܢ ܓܹܝܪ ܫܲܪܝܼܪܵܐܝܼܬܼ ܡܸܬܼܢܲܤ̈ܒܵܡܢ.
ܚ. ܥܲܠ ܗܵܝ̇: ܘܐܸܢ ܒܲܟܼܝܝܵܢܵܐ ܗܘ̤ܵܐ ܐܲܠܵܗܵܐ ܡܸܠܬܼܵܐ ܒܸܤܪܵܐ:
ܘܩ̣ܵܘܝܼ ܟܲܕܼ ܐܝܼܬܼܵܘܗܝ ܐܲܠܵܗܵܐ: ܬܲܪܬܹܝܢ ܐܘܼ̈ܤܝܼܵܣ ܡܵܕܹܝܢ ܐܝܼܬܼܵܘܗܝ
ܐܲܠܵܗܵܐ ܡܸܠܬܼܵܐ ܟܝܵܢܵܐܝܼܬܼ.
ܢܸܤܛܘܿܪܝܼܣ. ܐܸܢ ܗܵܘ̇ ܡܵܐ ܕܡܸܤܬܿܒܲܪ ܐܲܝܟܼ ܕܒܼܐܘܼܤܝܼܵܐ
ܐܝܼܬܼܵܘܗܝ: ܡܵܕܹܝܢ ܕܐܵܦ ܫܲܪܝܼܪܵܐܝܼܬܼ ܐܝܼܬܼܵܘܗܝ ܐܲܠܵܗܵܐ ܒܐܘܼܤܝܼܵܐ
pb. 22
ܐܵܡܲܪ ܐܲܢ̄ܬܿ. ܘܐܝܼܬܼܵܘܗܝ ܠܒܸܤܪܵܐ: ܡ̣ܢ ܒܵܬܲܪ ܕܲܗܘ̤ܵܐ ܗ̤ܘ
ܒܸܤܪܵܐ. ܘܲܕܿܬܲܪܬܹܝܢ ܐܸܢܹܝܢ ܐܘܼ̈ܤܝܼܵܣ: ܗܵܝ̇ ܕܒܲܟܼܝܵܢܹܗ ܐܝܼܬܼܵܘܗܝ
ܒܵܗ̇: ܘܗܵܝ̇ ܕܲܗܘ̤ܵܐ ܒܵܗ̇. ܗܵܝ̇ ܕܐܲܠܵܗܵܐ: ܘܗܵܕܹܐ ܕܒܸܤܪܵܐ.
ܤܘܿܦܪܘܿܢܢܝܘܿܣ. ܠܵܘ ܐܘܼܤܝܼܵܐ ܐ̄ܚܪܹܬܼܵܐ ܘܲܐ̄ܚܪܹܬܼܵܐ: ܐܸܠܵܐ ܗ̤ܝ
ܟܲܕܼ ܗ̤ܝ ܐܘܼܤܝܼܵܐ ܕܐܲܠܵܗܵܐ: ܕܐܵܦ ܐܘܼܤܝܼܵܐ ܕܒܸܤܪܵܐ ܗܘ̤ܵܬܼ. ܘܡܸܛܠ
ܗܵܢܵܐ: ܚܕܼܵܐ ܐܘܼܤܝܼܵܐ. ܐܲܟܼܙܢܵܐ ܕܡܲܝ̈ܵܐ: ܕܐܵܦ ܟܲܕܼ ܘܲܫܪܹܝܢ ܐܵܦ
ܟܲܕܼ ܩܛܝܼܪܝܼܢ: ܠܵܘ ܬܲܪܬܹܝܢ ܐܸܢܹܝܢ ܢܘܼ̈ܤܝܼܣ ܕܡܲܝ̈ܐ: ܐܸܠܵܐ ܚܕܼܵܐ:
ܕܐܝܼܬܹܝܗ̇ ܐܵܦ ܒܪܲܛܝܼܒܼܘܼܬܼܵܐ ܐܵܦ ܒܲܩܛܝܼܪܘܼܬܼܵܐ: ܘܡܸܤܬܲܒܼܪܵܐ
ܕܕܲܠܩܘܼܒܼܠܵܐ ܗ̣̄ܝ ܩܛܝܼܪܘܼܬܼܵܐ ܠܫܲܪܝܘܼܬܼܵܐ: ܗܵܟܲܢܵܐ ܐܵܦ ܐܲܠܵܗܵܐ:
ܗ̤ܘܝܘܼ ܟܲܕܼ ܗܘ̤ ܦܲܓܼܪܵܐ ܘܲܕܼܠܵܐ ܦܲܓܼܪܵܐ. ܐܵܦܸܢ ܒܗܵܝ̇ ܕܐܝܼܬܼܵܘܗܝ
ܦܲܓܼܪܵܐ: ܦܪܝܼܫ ܡ̣ܢ ܗܵܝ̇ ܕܲܕܼܠܵܐ ܦܲܓܼܪܵܐ.
ܝܛ. ܥܲܠ ܗܵܝ̇: ܕܐܲܝܠܹܝܢ ܕܒܲܟܼܝܵܢܵܐ ܠܲܝܬܿ ܠܗܹܝܢ ܦܘܼܪܫܵܢܵܐ
ܘܲܦܪ̈ܝܼܫܵܢ: ܒܐܸܤܟܹܿܡܵܐ ܡܸܬܼܐܲܡܪܲܢ ܕܲܦܪ̈ܝܼܫܵܢ.
ܢܸܤܛܘܿܪܝܼܣ. ܡܵܕܹܝܢ ܐܸܡܲܪ: ܕܠܵܘ ܒܲܟܼܝܵܢܵܐ ܐܝܼܬܼ ܠܗܘܿܢ
ܦܘܼܪܫܵܢܵܐ. ܘܐܲܝܠܹܝܢ ܕܒܲܟܼܝܵܢܵܐ ܠܲܝܬܿ ܠܗܘܿܢ ܦܘܼܪܫܵܢܵܐ ܘܲܦܪܝܼܫܝܼܢ:
ܒܦܲܪܨܘܿܦܵܐ ܗ̄ܘ̣ ܦܪܝܼܫܝܼܢ. ܒܦܲܪܨܘܿܦܵܐ ܕܹܝܢ ܟܝܵܢܵܐ: ܐܸܤܟܹܡܵܐ
ܗ̄ܘ̣ ܕܠܵܐ ܩܢܘܿܡܵܐ: ܒܐܸܤܟܹܡܵܐ ܐ̄ܚܪܹܢܵܐ. ܐܘܵ ܐܲܝܟܼ ܡܵܢܝܼܢܵܝܹ̈ܐ:
ܒܡܲܤܒܿܪܵܢܘܼܬܼܵܐ ܘܲܒܼܗܲܓܵܓܼܵܐ ܐܸܡܲ݁ܪ ܐܲܢ̄ܬܿ ܥܲܠ ܒܸܤܪܵܐ ܘܥܲܠ ܗܵܠܹܝܢ
ܕܒܸܤܪܵܐ. ܟܲܕܼ ܝܵܗܹ̇ܒܼ ܐܲܢ̄ܬܿ ܕܲܒܼܛܵܥܝܘܼܬܼܵܐ ܗܘ̤ܵܬܼ ܡܸܬܼܒܲܪܢܫܵܢܘܼܬܼܵܐ.
ܠܐܲܝܕܵܐ ܗܵܟܹܝܠ ܡܲܤܒܲܪ ܐܲܢ̄ܬܿ ܕܫܲܪܝܼܪܵܐ: ܠܗܵܝ̇ ܟܕܲܕܼ ܢܸܬܸܿܠ
pb. 23
ܕܲܟܼܝܵܢܵܐܝܼܬܼ ܡ̣ܢ ܐܘܼܤܝܼܵܐ ܕܐܲܠܵܗܵܐ ܐܝܼܬܼܵܘܗܝ ܒܸܤܪܵܐ: ܘܢܸܗܘ̈ܝܵܢ
ܬܲܪ̈ܬܲܝܗܹܝܢ ܐܘܼ̈ܤܝܼܣ ܚܕܼܵܐ: ܘܢܸܤܘ̈ܝܵܢ ܗܵܘ̇ ܡܵܐ ܕܠܵܐ ܡܲܨܝܵܐ
ܕܢܸܗܘ̈ܝܵܢ. ܗܵܢܵܐ ܕܹܝܢ: ܕܠܵܐ ܐܝܼܬܼܵܘܗܝ ܐܲܠܵܗܵܐ: ܐܸܠܵܐ ܒܸܤܪܵܐ: ܐܵܘ
ܕܲܒܼܗܲܓܵܓܼܵܐ ܗܘ̤ܵܐ ܒܸܤܪܵܐ.
ܤܘܿܦܪܘܿܢܝܘܿܣ. ܠܐܲܝܠܹܝܢ ܕܲܒܼܤܲܝܡܵܢܘܼܬܼܵܐ ܘܵܠ̈ܝܵܢ ܕܢܸܬܼܢܲܤܪ̈ܒܵܢ:
ܐܲܢ̄ܬܿܘܿܢ ܒܗܵܝ̇ ܕܲܒܼܡܸܠܬܼܵܐ ܟܝܵܢܵܝܵܬܼܵܐ ܡܩܲܒܿܠܝܼܬܿܘܿܢ ܠܗܹܝܢ: ܠܠܵܐ
ܡܸܬܼܡܲܨܝܵܢ̈ܝܵܬܼܵܐ ܡܲܦܩܝܼܬܿܘܿܢ ܠܗܹܝܢ. ܘܡ̣ܢ ܗܲܝܡܢܘܼܬܼܵܐ ܕܲܟܼܪܸܤܛܝܵܢܘܼܬܼܵܐ
ܫܵܪܹܝܢ ܐܢ̄ܬܿܘܿܢ ܠܲܢ ܒܲܫܪܵܪܵܐ: ܐܲܝܟܼ ܚܲܢ̈ܦܹܐ ܘܐܲܝܟܼ ܡܲܢܝܼܢܵܝܹ̈ܐ:
ܕܒܲܨܠܝܼܒܹܗ ܕܲܡܫܝܼܚܵܐ ܡܸܬܼܟܲܫܠܝܼܢ.
ܢܸܤܛܘܿܪܝܼܣ. ܘܐܲܝܠܹܝܢ ܐܸܢܘܿܢ ܕܒܲܕܼܡܘܼܬܼ ܚܲܢ̈ܦܹܐ ܘܡܵܢܝܼܢܵܝܹ̈ܐ
ܕܒܲܨܠܝܼܒܹܗ ܕܲܡܫܝܼܚܵܐ ܡܸܬܼܟܲܫܠܝܼܢ: ܠܵܘ ܐܲܝܠܹܝܢ ܕܲܒܼܫܘܼܚܠܵܦܵܐ ܕܐܘܼܤܝܼܵܐ
ܡܩܲܒܿܠܝܼܢ ܠܐ̄ܢܵܫܘܼܬܹܗ. ܕܚܲܢ̈ܦܹܐ ܗ̣̄ܝ ܓܹܝܪ: ܕܲܒܼܫܘܼܚܠܵܦܵܐ ܕܕܼܡ̈ܘܵܬܼܵܐ
ܕܐܲܠܵܗܵܐ: ܕܠܐܘܼܤܝܼܵܐ ܕܲܒܼܡܵܢܵܐ ܐܵܘ ܕܲܠܩܘܼܢܸܩܘܿ ܕܒܲܟܼܝܵܢܵܐ ܗܵܘ̇
ܕܒܹܗ ܐܸܫܬܲܚܠܲܦ ܐܵܡ̇ܪܝܼܢ ܕܡܲܥܒܸܕܼ. ܘܬܼܘܼܒܼ ܫܵܪܹܝܢ ܠܹܗ ܠܲܟܼܝܵܢܵܐ: ܠܗܵܘ̇
ܡ̇ܐ ܕܲܒܼܫܘܼܪܵܝܵܐ ܐܝܼܬܼܵܘܗܝ ܗ̄ܘ̣ܵܐ. ܕܡܸܢܗܘܿܢ ܐܵܦ ܡܵܢܝܼܢܵܝܹ̈ܐ ܢܤܲܒܼܘ
ܘܐܼܡܲܪܘ: ܕܠܸܐܤܟܹܿܡܵܐ ܕܠܵܐ ܩܢܘܿܡܵܐ ܗܘ̤ܵܐ ܫܘܚܠܵܦܵܐ ܕܲܕܼܡܘܼܬܼܵܐ.
ܘܐܲܢ̄ܬܿܘܿܢ: ܟܲܕܸ ܐܵܡ̇ܪܝܼܢ ܐܢܬܿܘܿܢ ܗܵܠܹܝܢ: ܠܗܵܠܹܝܢ ܢܵܩ̇ܦܝܼܢ ܐܢ̄ܬܿܘܿܢ:
ܘܐܲܝܟܼ ܐܲܝܠܹܝܢ ܕܡܸܬܼܟܲܫܠܝܼܢ ܒܲܨܠܝܼܒܼܵܐ ܗܵܠܹܝܢ ܐܵܡ̇ܪܝܼܢ ܐ̄ܢܬܿܘܿܢ.
ܟܟ. ܥܲܠ ܗܵܝ̇: ܕܐܲܝܠܹܝܢ ܕܲܒܼܫܘܚܵܠܵܦܵܐ ܕܲܕܼܡܘܼܬܼܵܐ ܐܵܡ̇ܪܝܼܢ
ܠܡܸܬܼܒܲܪܢܫܵܢܘܼܬܼܵܐ: ܠܵܐ ܐܲܠܵܗܵܐ ܘܠܵܐ ܒܲܪܢܵܫܵܐ ܡܵܘܕܹܝܢ ܠܹܗ
ܠܲܡܫܝܼܚܵܐ.
pb. 24
ܟܲܕܼ ܠܵܐ ܐܲܠܵܗܵܐ ܡܵܘܕܹܝܢ ܐܢ̄ܬܿܘܿܢ ܠܹܗ ܒܐܘܼܤܝܼܵܐ: ܒܗܵܝ̇
ܕܠܐܘܼܤܝܼܵܐ ܕܒܸܤܪܵܐ ܫܲܚܠܸܦܬܿܘܿܢܵܝܗܝ. ܘܐܵܦܠܵܐ ܒܲܪܢܵܫܵܐ ܟܝܵܢܵܐܝܼܬܼ:
ܒܗܵܝ̇ ܕܠܐܘܼܤܝܼܵܐ ܕܐܲܠܵܗܵܐ ܥܵܒܼ̈ܕܝܼܬܿܘܿܢ ܠܹܗ. ܘܠܵܘ ܐܲܠܵܗܵܐ
ܫܲܪܝܼܪܵܐܝܼܬܼ ܘܒܲܟܼܝܵܢܵܐ ܐܲܠܵܗܵܐ: ܘܐܵܦܠܵܐ ܒܲܪܢܵܫܵܐ ܫܲܪܝܼܪܵܐܝܼܬܼ
ܘܒܲܟܼܝܵܢܵܐ ܒܲܪܢܵܫܵܐ:
ܟܐ. ܥܲܠ ܗܵܝ̇: ܕܗܵܘ̇ ܕܒܼܐܘܼܤܝܼܵܐ ܗܵܘܹ̇ܐ ܡ̣ܢ ܗܘܼܠܹܐ
ܩܲܕܼܡܵܝܵܬܼܵܐ: ܗܵܘ̇ ܡܵܐ ܕܲܗܘ̤ܵܐ ܐܝܼܬܼܵܘܗܝ: ܘܠܵܐ ܗ̄ܘ̣ܵܐ ܗܵܘ̇ ܡܵܐ
ܕܐܝܼܬܼܵܘܗܝ ܗ̄ܘ̣ܵܐ ܡ̣ܢ ܩܕܼܵܡ ܕܢܸܗܘܸܐ. ܐܲܟܼܙܢܵܐ ܕܡ̣ܢ ܐܲܢ̄ܬܿܬܼܵܐ:
ܩܵܢܝܑܸܬܼܵܐ ܕܡܸܠܚܵܐ ܗܘ̤ܵܬܼ.
ܘܠܲܝܬܿ ܡܸܕܸܡ ܐ̄̇ܚܪܹܝܢ ܤܛܲܪ ܡ̣ܢ ܗܵܢܵܐ: ܕܐܲܟܼܙܢܵܐ ܕܐܵܦܠܵܐ
ܒܲܪܢܵܫܵܐ ܕܡ̣ܢ ܩܲܝܤܵܐ ܘܟܹܐܦܵܐ ܒܲܪܢܵܫܵܐ ܡܸܬܼܐ̱ܡܲܪ ܫܲܪܝܼܪܵܐܝܼܬܼ: ܟܲܕܼ
ܐܝܼܬܼܵܘܗܝ ܟܝܵܢܵܐ ܕܩܲܝܤܵܐ ܘܲܕܼܟܹܐܦܵܐ: ܗܵܟܲܢܵܐ ܐܵܦܠܵܐ ܗܵܘ̇ ܕܡ̣ܢ
ܐܘܼܤܝܼܵܐ ܕܐܲܠܵܗܵܐ ܗܘ̤ܵܐ ܒܪܢܵܫܵܐ: ܡܸܬܼܐ̱ܡܲܪ ܒܲܟܼܝܵܢܵܐ ܒܲܪܢܵܫܵܐ: ܟܲܕܼ
ܩܲܝܵܡ ܟܝܵܢܵܐ ܐܲܠܵܗܵܝܵܐ.
ܤܘܿܦܪܘܿܢܝܘܼܣ. ܐܝܼܛܵܐ ܐܘܿ ܬܡܝܼܗܵܐ: ܡ̣ܢ ܟܹܐܦܹ̈ܐ ܡܸܫܟܲܚ
ܐܲܠܵܗܵܐ ܠܲܡܩܵܡܘܼ ܒܢܲܝ̈ܐ ܠܐܲܒܼܪܵܗܵܡ. ܘܡ̣ܢ ܓܘܼܫܡܵܐ ܐ̄ܢܵܫܵܝܵܐ:
ܩܵܝܑܸܡܬܼܵܐ ܕܡܸܠܚܵܐ. ܘܡ̣ܢ ܐܲܪܥܵܐ: ܒܲܪܢܵܫܵܐ. ܘܠܵܐ ܡܸܚܸܡ ܥܲܟܿܪܹܗ:
ܘܠܵܐ ܬܘܼܒܼ ܡܥܲܟܲܪ ܠܹܗ ܡܸܕܸܡ ܠܐܲܠܵܗܵܐ ܡ̣ܢ ܕܢܸܥܒܸܿܕ ܗܵܘ̇ ܡܵܐ
ܕܨܵܒܹ̇ܐ: ܕܢܸܗܘܸܐ ܗ̄ܘ̣ ܒܸܤܪܵܐ ܡܥܲܟܲܪ ܠܹܗ؟
ܢܸܤܛܘܿܪܝܼܘܿܣ. ܩܲܕܼܡܵܐܝܼܬܼ ܗܵܟܹܝܠ ܥܲܩܸܒܼ ܗܵܘ̇ ܡܵܐ ܕܐܸܡ݂ܲܪܬܿ:
pb. 25
ܕܗܵܟܲܢܵܐ ܨܒܼܵܐ ܐܲܠܵܗܵܐ: ܚܵܘܵܐ ܠܲܢ ܗܵܕܹܐ. ܠܗܵܝ̇ ܓܹܝܪ ܕܟܼܠܡܸܕܼܡ
ܕܨܵܒܹ̇ܐ ܐܲܠܵܗܵܐ ܡܸܫܟܲܚ ܠܡܸܥܒܲܕܼ: ܟ̱ܠܹܗ ܪܸܥܝܵܢܵܐ ܕܓܼܵܘܵܐ ܫܵܠܹ̇ܡ.
ܬܘܼܒܼ ܕܹܝܢ ܒܬܲܚܘ̈ܝܵܬܼܵܐ ܕܕܲܠܩܘܼܒܼܠܵܐ ܡܸܬܼܚܲܫܲܚ ܐܲܢ̄ܬܿ. ܗܵܘ̇ ܓܹܝܪ
ܕܡ̣ܢ ܟܹܐܦܵܐ ܐܵܘ ܡ̣ܢ ܐܲܪܥܵܐ ܗܵܘܹ̇ܐ ܒܲܪܢܵܫܵܐ: ܟܝܵܢܵܐ ܕܒܲܪܢܵܫܵܐ
ܐܝܼܬܼܵܘܗܝ. ܒܕܲܗܘ̤ܵܐ ܫܲܪܝܼܪܵܐܝܼܬܼ ܒܲܪܢܵܫܵܐ: ܘܠܵܘ ܟܝܵܢܵܐ ܕܟܹܐܦܵܐ ܐܵܘ
ܕܐܲܪܥܵܐ. ܘܗܵܝ̇ ܕܡ̣ܢ ܦܲܓܼܪܵܐ ܐ̄ܢܵܫܵܝܵܐ ܗܘ̤ܵܬܼ ܩܵܝܑܸܡܬܼܵܐ ܕܡܸܠܚܵܐ:
ܟܝܵܢܵܐ ܕܗܵܘ̇ ܡܸܕܸܡ ܗܘ̤ܵܬܼ ܒܲܠܚܘܿܕܼ. ܐܲܝܠܹܝܢ ܓܹܝܪ ܕܡ̣ܢ ܐܘܼܤܝܼܵܐ
ܩܲܕܼܡܵܝܵܬܼܵܐ ܡܸܫܬܲܚ̱ܠܦܝܼܢ: ܠܗܵܘ̇ ܟܝܵܢܵܐ ܒܲܠܚܘܿܕܼ ܩܢܹܝܢ: ܕܲܠܗܵܘ̇
ܕܠܹܗ ܐܸܫܬܲܚܠܲܦܘ. ܡܵܕܹܝܢ: ܐܸܢܗܘ̤ ܕܡ̣ܢ ܗܘܼܠܹܐ ܩܲܕܼܡܝܵܬܼܵܐ ܕܲܟܼܝܵܢܵܐ
ܕܐܲܠܵܗܵܐ ܐܵܡܲ݁ܪ ܐܲܢ̄ܬܿ ܕܲܗܘ̤ܵܐ ܟܝܵܢܵܐ ܕܒܸܤܪܵܐ: ܗܵܝ̇ ܐܘܼܤܝܼܵܐ ܩܢܸܐ:
ܕܲܗܘ̤ܵܐ ܟܲܕܼ ܠܵܐ ܐܝܼܬܼܵܘܗܝ ܗ̄ܘ̣ܵܐ. ܘܲܒܼܡܸܕܸܡ ܠܵܐ ܡܲܥܒܿܕܼܵܐ ܐܲܝܟܼ
ܕܐܸܡ̇ܪܹܬܼ: ܕܡ̣ܢ ܟܹܐܦܵܐ ܐܵܘ ܡ̣ܢ ܐܲܪܥܵܐ ܐܵܘ ܡ̣ܢ ܙܲܪܥܵܐ ܕܒܲܪܢܵܫܵܐ
ܗܵܘ̇ܝܵܐ ܐܘܼܤܝܼܵܐ ܕܲܒܼܢܲܝ̈ܢܵܫܵܐ. ܗܵܘ̇ ܓܹܝܪ ܕܡ̣ܢ ܐܘܼܤܝܼܵܐ ܩܲܕܼܡܵܝܵܬܼܵܐ
ܐܝܼܬܼܵܘܗܝ: ܡܸܫܬܲܚܠܲܦ ܠܲܟܼܝܵܢܵܐ ܗܵܘ̇ ܕܲܗܘ̤ܵܐ. ܘܐܸܢܗ̤ܘ ܕܠܵܐ
ܡܸܫܬܲܚܠܲܦ: ܐܵܦܠܵܐ ܒܲܟܼܝܵܢܵܐ ܗܵܘܹ̇ܐ ܒܸܤܪܵܐ.
ܤܘܿܦܪܘܿܢܝܘܿܣ. ܗܵܕܹܐ ܡܸܠܬܼܵܐ ܟܬܼܵܒܼܵܐ ܐܲܠܵܗܵܝܵܐ ܫܵܪܹܐ ܠܵܗ̇ ܠܵܟܼ:
ܘܠܵܐ ܫܵܒܹ̇ܩ ܠܡܸܬܼܥܲܫܵܢܘܼ ܘܲܠܡܹܐܡܲܪ ܦܵܤܘܿܩܵܐܝܼܬܼ. ܚܘܼܛܪܵܐ ܓܹܝܪ
ܕܡܘܼܫܹܐ: ܟܲܕܼ ܗܘ̤ܵܐ ܫܲܪܝܼܪܵܐܝܼܬܼ ܚܸܘܝܵܐ: ܚܸܘܝܵܐ ܐܝܼܬܼܵܘܗܝ ܐܵܦ
ܚܘܼܪܵܐ. ܘܡܲܝ̈ܵܐ ܕܢܝܼܠܘܿܣ ܕܲܗܘ̤ܵܘ ܕܡܵܐ: ܟܝܵܢܵܐ ܗܘ̤ܵܘ ܕܲܕܼܡܵܐ
ܐܵܦ ܕܡܲܝ̈ܵܐ. ܐܘܼܤܝܼܵܐ ܗ̤ܝ: ܐܵܦܸܢ ܐܸܫܬܲܚ̱ܠܦܲܬ̤. ܘܡܸܛܠ
pb. 26
ܗܵܢܵܐ: ܡܸܬܼܚܲܫܚܝܼܢ ܗ̄ܘ̣ܵܘ ܒܢܲܝ̈ ܝܑܼܤܪܵܝܹܠ ܒܡܲܝ̈ܐ ܕܲܗܘ̤ܵܘ ܕܡܵܐ ܐܲܝܟܼ
ܟܝܵܢܵܐ ܕܡܲܝ̈ܐ: ܘܡܘܼܫܹܐ ܒܚܸܘܝܵܐ ܐܲܝܟܼ ܚܘܼܛܪܐ: ܒܲܕܼܫܲܪܝܼܪܵܐܝܼܬܼ:
ܬܲܪ̈ܬܲܝܗܹܝܢ ܐܝܼܬܼܵܘܗܝ ܗ̄ܘ̣ܵܐ. ܐܲܝܟܲܢܵܐ ܓܹܝܪ ܕܨܵܒܹ̇ܐ ܐܲܠܵܗܵܐ:
ܡܩܝܼܡ ܠܲܟܼܝܵܢܹ̈ܐ.
ܟܒ. ܥܲܠ ܗܵܝ̇: ܕܡܲܝ̈ܵܐ ܕܢܝܼܠܘܣ ܟܲܕܼ ܐܸܫܬܲܓܼܬܝܼܘ
ܠܐܘܼܤܝܼܵܐ ܕܲܕܼܡܵܐ: ܗܵܝ̇ ܐܘܼܤܝܼܵܐ ܒܠܲܚܘܿܕܼ ܐܝܼܬܼ ܗ̄ܘ̣ܵܐ ܠܗܘܿܢ ܗܵܝ̇
ܕܠܵܗ̇ ܐܸܫܬܲܚܠܲܦܘ.
ܢܸܤܛܘܿܪܝܼܘܿܣ. ܬܘܼܒܼ ܒܬܲܚ̈ܘܝܵܬܼܵܐ ܕܕܼܵܡ̈ܝܵܢ ܠܗܵܠܹܝܢ ܡܸܬܼܚܲܫܲܚ
ܐܲܢ̄ܬܿ: ܒܲܕܼܤܵܒܲܪ ܐ̄ܢܵܐ ܕܲܡܙܲܠܗܲܙ ܐܲܢ̄ܬܿ. ܗܵܝܕܹܝܢ ܓܹܝܪ ܗܵܘ̈ܝܵܢ ܗ̣̄ܘܲܝ̈
ܬܲܪ̈ܬܲܝܗܹܝܢ ܐܘܼܤ̈ܝܼܣ: ܟܲܕܼ ܡܲܝ̈ܵܐ ܗܵܢ̇ܘܿܢ ܕܡܸܬܼܢܲܤܒܿܝܼܢ ܗ̄ܘ̣ܵܘ ܡ̣ܢ
ܥܸܒܼܪ̈ܵܝܹܐ: ܕܡܵܐ ܐܵܦ ܡܲܝ̈ܵܐ ܐܝܼܬܲܝܗܘܿܢ ܗ̄ܘ̣ܵܘ. ܐܵܘ ܗܵܢ̇ܘܿܢ
ܕܡܸܬܼܢܲܤܒܿܝܼܢ ܗ̄ܘ̣ܵܘ ܡ̣ܢ ܡܸܨܪ̈ܵܝܹܐ: ܒܵܗ̇ ܟܲܕܼ ܒܵܗ̇ ܐܝܼܬܲܗܘܿܢ
ܗ̄ܘ̣ܵܘ ܬܲܪ̈ܬܲܝܗܹܝܢ. ܐܸܢ ܕܹܝܢ: ܗܵܢ̇ܘܿܢ ܡܲܝ̈ܵܐ ܒܲܠܚܘܿܕܼ ܐܝܼܬܲܝܗܘܿܢ
ܗ̄ܘ̣ܵܘ: ܘܗܵܠܹܝܢ ܒܲܠܚܘܿܕܼ ܕܡܵܐ: ܘܡ̣ܢ ܒܵܬܲܪܟܸܢ ܡܸܫܬܲܚ̱ܠܦܝܼܢ
ܗ̄ܘ̣ܵܘ. ܟܲܕܼ ܓܹܝܪ ܡܸܬܼܢܲܤܒܿܝܼܢ ܗ̄ܘ̣ܵܘ: ܡܸܫܬܲܚ̱ܠܦܝܼܢ ܗ̄ܘ̣ܵܘ ܗܵܠܹܝܢ
ܕܡܸܬܼܢܲܤܒܿܝܼܢ ܗ̄ܘ̣ܵܘ: ܘܬܼܘܼܒ ܡܸܕܸܡ ܐ̄ܚܪܹܝܢ ܐܝܼܬܲܘܿܢ ܗ̄ܘ̣ܵܘ:
ܐܸܠܵܐ ܐܸܢ ܗܵܘ̇ ܡܸܕܸܡ ܕܗܵܘܹ̇ܝܢ ܗ̄ܘ̣ܵܘ. ܐܲܝܟܲܢܵܐ ܗܵܟܹܝܠ ܠܵܘ ܒܗܵܠܹܝܢ
ܗܸܢܹܝܢ ܟܲܕܼ ܗܸܢܹܝܢ ܡܸܬܼܚܲܙ̈ܝܵܢ: ܕܗܵܘ̇ ܕܗܵܘܹ̇ܐ ܒܲܟܼܝܵܢܵܐ: ܡ̣ܢ ܟܠ
ܦܪܘܿܣ. ܗ̤ܘ ܐܝܼܬܼܵܘܗܝ ܗܵܘ̇ ܡܵܐ ܕܵܗܘ̤ܵܐ ܒܲܟܼܝܵܢܵܐ: ܘܠܵܘ
ܡܸܕܸܡ ܐ̄ܚܪܹܝܢ.
ܤܘܿܦܪܘܿܢܝܘܿܣ. ܘܗܵܐ ܬܲܪ̈ܬܲܝܗܹܝܢ ܚܵܙܹ̇ܝܢ ܚ̄ܢܲܢ ܕܐܸܡ݂ܲܪ ܟܬܼܵܒܼܵܐ
pb. 27
ܐܲܠܵܗܵܝܵܐ: ܕܡܸܢܵܗ̇ ܟܲܕܼ ܡܸܢܵܗ̇ ܕܐܘܼܤܝܼܵܐ ܗܵܘ̈ܝܵܢ ܬܲܪ̈ܬܲܝܗܹܝܢ ܒܲܟܼܝܵܢܵܐ:
ܟܲܕܼ ܐܵܡܲ݁ܪ ܗܵܘ̇ ܕܡ̣ܢ ܥܲܦܪܵܐ ܘܐܲܪܥܵܐ ܗܘ̤ܵܐ ܒܲܪܢܵܫܵܐ: ܘܐܝܼܬܼܵܘܗܝ
ܒܲܟܼܝܵܢܵܐ ܒܲܪܢܵܫܵܐ: ܐܸܢܵܐ ܥܲܦܪܵܐ ܐ̄ܢܵܐ ܘܩܸܛܡܵܐ. ܐܸܢܗ̤ܘ ܕܠܵܘ
ܒܲܟܼܬܼܵܒܼܵܐ ܟܵܐܹ̇ܐ ܐܲܢ̄ܬܿ: ܐܲܝܟܼ ܡ̇ܢ ܕܠܵܐ ܡܸܬܼܡܲܨ̈ܝܵܢܝܵܬܼܵܐ ܐܵܡܲ݁ܪ:
ܕܲܠܗܵܘ̇ ܕܐܝܼܬܼܵܘܗܝ ܗ̄ܘ̣ܵܐ ܒܲܪܢܵܫܵܐ: ܒܲܟܼܝܵܢܹܗ ܒܲܪܢܵܫܵܐ: ܐܵܡܲ݁ܪ:
ܥܲܦܪܵܐ ܐ̄ܢܵܐ ܘܩܸܛܡܵܐ.
ܟܓ. ܥܲܠ ܗܵܝ̇: ܕܲܚܕܼܵܐ ܐܘܼܤܝܼܵܐ ܐܲܝܕܵܐ ܕܲܒܼܬܲܪܬܹܿܝܢ ܐܘܼܤ̈ܝܼܣ
ܡܸܬܼܚܲܙܝܵܐ: ܒܲܚܕܼܵܐ ܐܘܼܤܝܼܵܐ ܐܝܬܹܝܗ̇ ܒܲܟܼܝܵܢܵܐ: ܒܗܵܝ̇ ܕܹܝܢ ܐ̄ܚܪܹܬܼܵܐ
ܒܐܸܤܟܹܿܡܵܐ ܒܲܠܚܘܿܕܼ.
ܢܸܤܛܘܿܪܝܼܘܿܣ. ܐܸܢܗ̤ܘ ܕܟܲܕܼ ܥܲܠ ܟܝܵܢܹܗ ܕܒܲܪܢܵܫܵܐ ܡܬܲܢܸܐ
ܗܵܠܹܝܢ ܟܬܼܵܒܼܵܐ ܐܲܠܵܗܵܝܵܐ ܐܵܡܲ݁ܪ: ܘܟܼܠ ܐ̄ܢܵܫ ܟܝܵܢܵܐ ܕܒܲܪܢܵܫܵܐ
ܐܝܼܬܼܵܘܗܝ ܘܠܵܐ ܡܕܸܡ ܐ̄ܚܪܹܝܢ. ܡܵܕܹܝܢ ܐܵܦ ܐܲܠܵܗܵܐ ܡܸܠܬܼܵܐ ܕܲܗܘ̤ܵܐ
ܫܲܪܝܼܪܵܐܝܼܬܼ ܒܲܟܼܝܵܢܵܐ ܒܲܪܢܵܫܵܐ: ܥܲܦܪܵܐ ܐܝܼܬܼܵܘܗܝ ܐܵܦ ܩܸܛܡܵܐ
ܒܲܟܼܝܵܢܵܐ. ܘܠܵܘ ܡ̣ܢ ܐܘܼܤܝܼܵܐ ܕܐܲܠܵܗܵܐ ܗ̄ܘ̣: ܐܸܠܵܐ ܡ̣ܢ ܥܲܦܪܵܐ
ܘܩܸܛܡܵܐ. ܐܸܢܗ̤ܘ ܕܗܵܝ̇ ܕܡܸܢܵܗ̇ ܗܘ̤ܵܐ: ܗܵܕܹܐ ܡܵܘܕܥܵܐ. ܐܸܢܕܹܝܢ
ܟܠܢܵܫ ܒܲܟܼܝܵܢܵܐ ܗܵܕܹܐ ܐܝܼܬܼܵܘܗܝ: ܗ̤ܘ ܕܹܝܢ ܠܵܐ ܐܝܼܬܼܵܘܗܝ ܐܘܼܤܝܼܵܐ
ܗܵܕܹܐ: ܐܸܠܵܐ ܐܘܼܤܝܼܵܐ ܕܐܲܠܵܗܵܐ: ܒܲܪܢܵܫܵܐ ܠܵܐ ܗ̄ܘ̣ܵܐ: ܐܸܠܵܐ ܒܐܸܤܟܹܿܡܵܐ:
ܐܲܝܟܼ ܕܐܵܡ̇ܪܝܼܢ ܡܵܢܝܼܢܵܝܹ̈ܐ: ܘܐܵܦ ܡܸܠܹ̈ܐ ܕܲܥܠܵܘܗܝ ܒܐܸܤܟܹܡܵܐ ܐܸܢܹܝܢ:
ܕܠܵܐ ܢܸܬܼܓܿܠܹܐ ܗܵܘ̇ ܡܵܐ ܕܐܝܼܬܼܵܘܗܝ ܠܟܼܠܢܵܫ. ܡܸܛܠ ܕܲܚܕܼܵܐ
ܐܘܼܤܝܼܵܐ: ܐܸܢ ܒܬܲܪܬܹܝܢ ܐܘܼܤ̈ܝܼܵܣ ܡܸܬܼܝܲܕܼܥܵܐ: ܒܗܵܝ̇ ܚܕܼܵܐ
pb. 28
ܐܝܼܬܹܝܗ̇ ܐܘܼܤܝܼܵܐ: ܒܗܵܝ̇ ܕܹܝܢ ܐ̄ܚܪܹܬܵܐ ܒܐܸܤܟܹ̇ܡܵܐ ܐܵܘ ܒܪܲܓܵܠܘܼܬܼܵܐ
ܘܲܒܼܗܲܓܵܓܼܵܐ.
ܤܘܿܦܪܘܿܢܝܘܿܣ. ܘܠܵܐ ܡܸܕܸܡ ܝܲܬܿܝܼܪ ܡ̣ܢ ܗܵܘ̇ ܠܵܐ ܝ̈ܗܹܒܼ
ܐܲܢ̄ܬܿ ܠܐܲܠܵܗܵܐ: ܐܸܠܵܐ ܕܢܸܗܘܸܐ ܐܲܠܵܗܵܐ ܫܲܪܝܼܪܵܐܝܼܬܼ ܒܲܟܼܝܵܢܵܐ ܐܵܦ
ܒܲܪܢܵܫܵܐ ܢܸܗܘܸܐ ܒܲܟܼܝܵܢܵܐ. ܗܘ̤ ܟܲܕܼ ܗܘ̤ ܟܝܵܢܵܐ ܒܬܲܪ̈ܬܲܝܗܹܝܢ: ܐܸܠܵܐ
ܐܸܢ ܕܐܲܠܵܗܵܐ ܒܒܲܪܢܵܫܵܐ. ܘܐܲܝܕܵܐ ܡܸܬܼܒܲܪܢܫܵܢܘܼܬܼܵܐ: ܐܸܠܵܐ ܐܸܢ ܗܵܝ̇
ܕܒܲܟܼܝܵܢܵܐ ܗܘ̤ܵܐ ܒܲܪܢܵܫܵܐ ܒܲܟܼܝܵܢܵܐ ܕܒܲܟܼܝܼܢܲܢ ܡܲܠܸܠ̣ ܠܲܢ:
ܟܲܕܼ ܟܠܗܹܝܢ ܐܲܝܠܹܝܢ ܕܕܝܼܠܲܢ ܟܝܵܢܵܐܝܼܬܼ ܤܲܝܒܲܪ. ܕܡܸܛܠ ܨܒܼܘܼܬܼܵܐ
ܗܵܕܹܐ ܐܵܦ ܐܸܬܼܒܲܪܢܲܫ. ܐܸܠܵܐ ܬܘܼܒܼ ܒܝܲܕܼ ܡܸܨܥ̈ܝܐ ܘܲܠܒܼܘܼܫܵܐ
ܕܐܸܤܟܹܿܡܵܐ. ܘܕܲܐܲܝܟܼ ܗܵܕܹܐ ܫܟܼܝܼܪܘܼܬܼܵܐ ܤܵܝ̇ܡܝܼܢ ܐܢ̄ܬܿܘܿܢ ܕܲܥܒܲܕܼ
ܐܲܠܵܗܵܐ: ܟܲܕܼ ܡܸܬܿܕܲܡܸܐ ܒܲܛܪ̈ܓܼܘܿܕܹܐ ܘܲܒܼܙܲܡܵܪܹ̈ܐ ܕܲܒܼܦܘܼܪܤܵܐ
ܡܚܲܦܹܝܢ.
ܟܕ. ܥܲܠ ܗܵܝ̇: ܕܗܵܘ̇ ܕܒܲܟܼܝܵܢܹܗ ܡܸܫܪܚܵܐ ܕܢܸܬܼܚܙܸܐ: ܕܢܸܗܘܸܐ
ܡܸܕܸܡ ܐ̄ܚܪܹܝܢ ܕܒܹܗ ܢܸܬܼܚܙܸܐ ܠܵܐ ܤܢܝܼܩ.
ܢܸܤܛܘܿܪܝܼܘܿܣ. ܐܸܠܵܐ ܐܘܿ ܬܡܝܼܗܵܐ: ܩܵܘ̇ܐ ܠܲܡܦܲܚܵܡܘܼ ܐܲܝܠܹܝܢ
ܕܐܸܬܼܐ̱ܡܲܪ ܡܸܢܵܟܼ: ܕܲܕܠܵܐ ܡܸܨܥܵܝܵܐ ܐܼܬܼܚܙܝܼ ܠܲܢ ܒܲܟܼܝܵܢܵܐ ܕܝܼܠܹܗ:
ܡܸܛܠ ܐܲܝܕܵܐ ܗܵܟܹܝܠ ܐܸܡ݂ܲܪܬܿ: ܕܗܘ̤ ܗܘ̤ܵܐ ܟܝܵܢܵܐ ܕܒܲܪܢܵܫܵܐ ܟܲܕܼ
ܩܵܘ̣ܝܼ ܐܲܠܵܗܵܐ؟ ܗܵܘ̇ ܓܹܝܪ ܕܒܲܟܼܝܵܢܹܗ ܡܸܬܼܚܙܸܐ: ܠܵܐ ܤܢܝܼܩ
ܕܐܘܼܤܝܼܵܐ ܐ̄ܚܪܹܬܵܐ ܢܸܗܘܸܐ ܕܒܼܵܗ̇ ܢܸܬܼܚܙܸܐ. ܐܸܢ ܒܕܼܝܼܠܹܗ ܡܸܬܼܚܙܸܐ
ܗ̄ܘ̣ܵܐ: ܘܗܵܝ̇ ܕܠܵܐ ܡܸܫܟܿܚܵܐ ܐܵܡܲ݁ܪ ܐܲܢ̄ܬܿ: ܕܗ̤ܘ ܠܹܗ ܗܘ̤ܵܐ ܡܸܨܥܝ̈ܐ.
pb. 29
ܡܸܨܥܝܐ ܓܹܝܪ ܠܵܐ ܗ̄ܘ̣ܵܐ ܕܚܲܕܼ: ܐܲܠܵܗܵܐ ܕܹܝܢ ܚܲܕܼ ܗ̄ܘ̣. ܘܡܸܛܠ
ܗܵܢܵܐ ܠܵܐ ܐܝܼܬܼܵܘܗܝ ܐܲܠܵܗܵܐ: ܐܸܠܐ ܡܸܨܥܝܐ ܕܐܲܠܵܗܵܐ.
ܟܗ. ܥܲܠ ܗܵܝ̇: ܕܐܸܢ ܒܗܵܘ̇ ܡܵܐ ܕܐܸܬܼܚܙܝܼ ܐܲܠܵܗܵܐ ܠܩܲܕܝܼ̈ܫܹܐ:
ܒܫܘܼܚܠܵܦ ܐܘܼܤܝܼܵܐ ܐܸܬܼܚܙܝܼ: ܡܵܕܹܝܢ ܒܐܘܼܤ̈ܝܼܵܣ ܤܲܓܿܝܼܵܐܬܼܵܐ ܘܠܵܘ
ܒܲܚܕܼܵܐ ܐܸܬܼܒܲܪܢܲܫ.
ܬܘܼܒܼ ܕܹܝܢ ܒܗܵܝ̇ ܐܸܬܿܛܦܝܼܣ ܠܲܡܚܵܪ: ܚܕܼܵܐ ܡܸܬܼܒܲܪܢܵܫܢܘܼܬܼܵܐ
ܐܵܡܲ݁ܪ ܐܲܢ̄ܬܿ ܥܲܠ ܐܲܠܵܗܵܐ: ܐܵܘ ܤܲܓܿܝܼ̈ܐܵܬܼܵܐ؟ ܐܲܝܟܲܢܵܐ ܐܸܵܡܲ݁ܪ ܐܲܢ̄ܬܿ
ܠܗܵܕܹܐ؟ ܡܸܛܠ ܗܵܟܹܝܠ ܕܐܵܡ̇ܪܝܼܢ ܐܢ̄ܬܿܘܿܢ: ܕܥܲܠ ܐܲܒܼܪܵܡܵܡ
ܘܝܲܥܩܘܿܒܼ ܟܝܢܵܐ ܕܒܲܪܢܵܫܵܐ ܗܘ̤ܵܐ ܘܐܸܬܼܚܙܝܼ: ܘܥܲܠ ܟܠ ܚܲܕܼ ܚܲܕܼ
ܡ̣ܢ ܩܲܕܼܝܼ̈ܫܹܐ ܒܐܲܝܢܵܐ ܕܲܗܘ̤ܵܐ ܐܸܤܟܹܿܡܵܐ ܕܐܸܬܼܚܙܝܼ: ܟܝܵܢܵܐܝܼܬܼ ܐܸܫܬܲܚܠܲܦ
ܠܲܟܼܝܵܢܵܐ ܕܐܸܬܼܚܙܝܼ: ܘܲܒܼܚܲܪܬܼܵܐ ܕܝܵܘ̈ܡܵܬܼܵܐ ܐܸܫܬܲܚܠܲܦ ܠܲܟܼܝܵܢܵܐ
ܕܒܲܪܢܵܫܵܐ ܠܡܸܬܼܒܲܪܢܸܵܫܘܼ: ܡܸܬܼܒܲܪ̈ܢܫܵܢܘܵܬܼܵܐ ܤܲܓܿܝܼ̈ܐܵܬܼܵܐ ܐܵܡ̇ܪܝܼܢ
ܐܢ̄ܬܿܘܿܢ: ܐܸܢ ܠܗܵܝ̇ ܓܹܝܪ ܕܒܲܕܝܵܢܹܗ ܐܸܬܼܒܲܪܢܲܫ ܫܵܠܡ̇ܝܼܢ ܐܢ̄ܬܿܘܿܢ:
ܕܐܝܼܬܹܝܗ̇ ܡܸܬܼܒܲܪܢܵܫܢܘܼܬܼܵܐ. ܤܲܓܿܝܼܐܝܼܢ ܐܸܢܘܿܢ ܫܘܼ̈ܚܠܵܦܹܐ: ܕܲܒܼܗܘܿܢ
ܐܸܬܼܚܙܝܼ ܒܐܸܤܟܹܿܡܵܐ.
ܤܘܿܦܪܘܿܢܝܘܿܣ. ܚܕܼܵܐ ܡܸܬܼܒܲܪܢܵܫܢܘܼܬܼܵܐ ܐܵܡ̇ܪܝܼܢ ܚ̄ܢܲܢ ܕܗܵܝܕܹܝܟ
ܫܲܪܝܼܪܵܐܝܼܬܼ ܐܸܬܼܒܲܪܢܲܫ ܒܲܟܼܝܵܢܹܗ: ܘܠܵܘ ܟܲܕܼ ܠܐ̄ܢܵܫ̈ܝܼܢ ܐܸܬܼܚܙܝܼ: ܐܲܟܼܙܢܵܐ
ܕܠܲܐܒܼܪܵܗܵܡ ܘܲܠܝܲܥܩܘܿܒܼ: ܐܸܠܵܐ ܕܲܠܟܼܠ ܐ̄ܢܵܫ.
ܟܘ. ܥܲܠ ܗܵܝ̇: ܕܐܸܢ ܥܲܠ ܕܲܠܟܼܠ ܐ̄ܢܵܫ ܐܸܬܼܚܙܝܼ ܘܠܵܐ
ܠܚܲܕܼܚܕܼܵܢܹ̈ܐ: ܐܲܟܼܙܢܵܐ ܕܲܠܩܲܕܝܼ̈ܫܹܐ: ܡܸܬܼܐܲܡܪܵܐ ܡܸܠܬܼܵܐ ܗܵܝ̇
pb. 30
ܕܐܸܬܼܒܼܲܢܲܫ: ܒܗܵܝ ܕܠܵܐ ܠܟܼܠܗܘܿܢ ܒܢܲܝ̈ܢܵܫܵܐ ܐܸܬܼܚܙܝܼ: ܐܵܠܦܵܐ
ܡܵܕܹܝܢ ܐܸܬܼܒܲܪܢܲܫ.
ܢܸܤܛܘܿܪܝܼܣ. ܒܗܵܕܹܐ ܡܸܠܬܼܵܐ: ܕܐܵܦܠܵܐ ܐܸܬܼܒܲܪܢܲܫ: ܒܗܵܝ̇
ܕܠܵܘ ܠܟܼܠܢܵܫ ܐܸܬܼܚܙܝܼ: ܐܸܠܵܐ ܠܗܵܢ̇ܘܿܢ ܕܲܒܼܦܵܠܸܤܛܝܼܢܹܐ: ܠܡܵܢ
ܗܵܟܹܝܠ ܡܢܵܬܼܵܢܵܐܝܼܬܼ ܗܘ̤ܵܬܼ ܡܬܼܒܲܪܢܵܫܢܘܼܬܹܗ: ܘܠܵܘ ܕܲܠܟܼܠܢܵܫ؟
ܐܵܘ ܒܗܵܝ̇ ܕܲܗܘ̤ܵܐ ܒܲܟܼܝܵܐ ܒܲܪܢܵܫܵܐ: ܟܲܕܼ ܒܟܼܠܙܒܲܢ ܐܸܬܼܒܲܪܢܲܫ
ܘܲܠܟܼܠ ܐ̄ܢܵܫ ܐܸܬܼܚܙܝܼ: ܠܗܵܕܹܐ ܐܵܡܲ݁ܪ ܐܲܢ̄ܬܿ ܡܸܬܼܒܲܪܢܵܫܢܘܼܬܼܵܐ؟
ܟܙ. ܕܥܲܠ ܗܵܝ̇ ܡܸܬܲܐܡܪܵܐ ܥܠܵܘܗܝ ܡܸܬܼܒܲܪܢܵܫܢܘܼܬܼܵܐ: ܒܗܵܝ̇
ܕܒܲܟܼܝܵܢܵܐ ܐ̄ܢܵܫܵܝܵܐ ܐܸܬܼܚܙܝܼ.
ܐܸܢ ܕܹܝܢ ܚܕܼܵܐ ܗܘ̤ܵܬܼ ܫܲܪܝܼܪܵܐܝܼܬܼ ܡܸܬܼܒܲܢܵܫܢܘܼܬܼܵܐ. ܘܲܕܼܟܼܠܢܵܫ:
ܘܠܵܘ ܕܐ̄ܢܵܫ̈ܝܼܢ. ܘܲܕܼܗܵܢܘܿܢ ܕܲܚܙܵܐܘܼܗܝ: ܘܗܵܢ̇ܘܿܢ ܕܠܵܐ ܚܙܵܐܘܼܗܝ.
ܘܕܲܐܝܠܹܝܢ ܕܗܵܘܹ̇ܝܢ: ܘܕܲܐܝܠܹܝܢ ܕܡ̣ܢ ܩܕܼܝܼܡ ܗܘ̤ܵܘ. ܘܕܼܠܟܼܠܹܗ
ܟܝܵܢܵܐ ܐܲܟܲܚ̄ܕܼ ܗܘ̤ܵܬܼ ܡܸܬܼܒܲܪܢܵܫܢܘܼܬܼܵܐ: ܘܠܵܝܵܐܝܼܬܼ ܡܵܘܕܹܝܢ ܚ̄ܢܲܢ:
ܕܠܵܘ ܟܝܵܢܵܐ ܕܒܲܪܢܵܫܵܐ ܗܘ̤ܵܐ ܐܲܠܵܗܵܐ ܡܸܠܬܼܵܐ. ܠܵܐ ܓܹܝܪ ܐܝܼܬܼܵܘܗܝ
ܟܝܵܢܵܐ ܕܒܲܪܢܵܫܵܐ: ܗܵܘ̇ ܕܠܵܐ ܐܝܼܬܼܵܘܗܝ ܟܝܵܢܵܐ ܕܒܲܪܢܵܫܵܐ ܐܸܠܵܐ ܕܐܲܠܵܗܵܐ.
ܐܸܠܵܐ ܒܐܘܼܤܝܼܵܐ ܕܒܲܪܢܵܫܵܐ ܫܲܪܝܼܪܵܐܝܼܬܼ ܒܲܪܢܵܫܵܐ: ܡ̣ܢ ܟܝܵܢܵܐ ܫܲܪܝܼܪܵܐ
ܕܒܲܪܢܵܫܵܐ ܫܲܪܝܼܪܵܐ: ܕܒܹܗ ܐܲܝܟܼ ܕܒܲܟܼܝܵܢܵܐ ܟ̱ܠܹܗ ܠܟܼܠ ܐܸܬܼܒܲܪܢܲܫ.
ܘܥܲܒܼܕܹܗ ܦܲܪܨܘܿܦܵܐ ܕܝܼܠܹܗ: ܘܐܸܬܼܓܠܝܼ ܒܐܲܝܠܹܝܢ ܕܲܒܼܢܲܝ̈ܢܵܫܵܐ: ܟܲܕܼ
ܡܸܬܿܕܲܒܲܪ ܒܲܟܼܝܵܢܵܐ ܕܒܲܪܢܵܫܵܐ: ܟܲܕܼ ܐܝܼܬܼܵܘܗܝ ܐܲܠܵܗܵܐ ܒܲܟܼܝܵܢܵܐ ܐ̄ܢܵܫܵܝܵܐ.
ܐܲܟܼܙܢܵܐ ܕܡܲܠܟܵܐ ܒܐܸܤܟ݂ܡܵܐ ܕܦܵܠܚܵܐ: ܦܵܠܚܵܐܝܼܬܼ ܘܠܵܘ ܡܲܠܟܵܝܼܬܼ:
pb. 31
ܚܵܙܹ̇ܩ ܒܦܵܠܚܘܼܬܼܵܐ ܒܐܲܝܠܹܝܢ ܕܲܤܢܝܼ̈ܩܵܢ ܥܲܠ ܬܘܼܪܵܨܵܐ. ܘܲܒܼܟܼܠ
ܡܸܬܸܐ̱ܡܲܪ ܕܚܵܙܹ̇ܩ: ܒܗܵܝ̇ ܕܲܗܘ̤ܵܐ ܐܸܤܟܹܿܡܵܐ ܕܚܲܕܸ ܠܵܦܚܵܐ: ܗܵܘ̇
ܕܲܠܟܼܠܗܘܿܢ ܦܵܠܚܹ̈ܐ ܡܲܠܒܸܿܫ. ܗܵܟܲܢܵܐ: ܒܚܲܕܼ ܒܲܪܢܵܫܵܐ: ܠܟܼܠܗܘܿܢ
ܒܢܲܝ̈ܢܵܫܵܐ ܕܡܸܢܹܗ ܕܲܟܼܝܵܢܵܐ ܗ̄ܘ̣ܵܘ ܐܸܬܼܒܲܪܢܲܫ: ܘܲܕܼ ܒܲܟܼܝܵܢܵܐ ܕܝܼܠܗܘܿܢ
ܗ̄ܘ̣ܵܐ. ܘܒܹܗ ܠܟܼܠܢܵܫ ܡܲܠܸܠ̣: ܐܲܝܟܼ ܕܒܲܟܼܝܵܢܹܗ ܡܲܠܸܠ̣.
ܤܘܿܦܪܘܿܢܝܘܼܣ. ܐܝܼܛܵܐ: ܟܲܕܼ ܗܘ̤ܵܐ ܒܲܟܼܝܵܢܵܐ ܕܒܲܪܢܵܫܵܐ: ܡܸܬܼܐ̱ܡܲܪ
ܕܐܸܬܼܒܲܪܢܲܫ. ܘܒܼܐܝܼܕܹܗ ܘܒܹܗ ܠܟܼܠܢܵܫ: ܘܠܵܘ ܝܲܬܿܝܼܪܵܐܝܼܬܼ ܡܸܛܠܵܬܹܗ.
ܒܕܲܗܘ̤ܵܐ ܗܘ̤ ܒܲܪܢܵܫܵܐ ܒܲܫܪܵܪܵܐ: ܘܲܒܼܗܵܕܹܐ ܢܸܫܬܵܘܬܲܦ ܠܒܲܪܢܵܫܵܐ
ܕܡܸܢܹܗ ܕܲܟܼܝܵܢܗܘܿܢ ܐܝܬܼܵܘܗܝ. ܘܲܗܘ̤ܵܬܼ ܒܲܫܪܵܪܵܐ ܡܸܬܼܒܲܪܢܵܫܢܘܼܬܼܵܐ:
ܒܗܵܝ̇ ܕܒܲܟܼܝܵܢܵܐ ܕܝܼܠܹܗ ܗܘ̤ܵܐ ܒܲܪܢܵܫܵܐ: ܘܠܵܐ ܐܸܤܬܿܢܸܩ ܥܲܠ
ܟܝܵܢܵܐ ܐ̄ܚܪܹܢܵܐ.
ܢܸܤܛܘܼܪܝܼܣ. ܠܵܐ ܓܹܝܪ ܐܝܼܬܹܝܗ̇ ܗܵܕܹܐ ܡܸܬܼܒܲܪܢܫܵܢܘܼܬܼܵܐ: ܐܲܝܟܼ
ܕܐܵܦܠܵܐ ܡܲܠܟܵܐ ܗܵܝ̇ ܕܡܲܠܟܵܐܝܼܬܼ ܒܐܸܤܟܹܡܵܐ ܕܦܲܠܚܘܼܬܼܵܐ ܡܸܬܼܚܲܫܲܚ:
ܘܠܵܘ ܦܵܠܚܵܐܝܼܬܼ ܗܵܘܹ̇ܐ ܠܵܦܚܵܐ. ܐܵܘ ܕܲܠܡܵܐ ܐܲܝܟܼ ܐ̄ܢܵܫ ܢܹܐܡܲܪ:
ܕܒܲܫܡܵܐ ܒܲܠܚܘܿܕܼ ܗܵܘܹ̇ܐ ܠܵܦܚܵܐ. ܗܵܟܲܢܵܐ ܐܵܦܠܵܐ ܐܸܬܼܒܲܪܢܲܫ ܐܲܠܵܗܵܐ:
ܟܲܕܼ ܠܵܘ ܒܲܟܼܝܵܢܵܐ: ܐܸܠܵܐ . . .
ܤܘܿܦܪܘܿܢܝܘܼܣ. ܐܲܝܟܲܢܵܐ ܐܵܡܲ݁ܪ ܐܲܢ̄ܬܿ ܠܗܵܝ̇ ܕܡܲܠܟܵܐܝܼܬܼ
ܘܠܵܦܚܵܐܝܼܬܼ؟
ܢܸܤܛܘܿܪܝܼܣ. ܐܲܟܼܙܟܵܐ ܕܐܲܪ̈ܓܘܿܢܹܐ ܠܒܼܘܼܫܵܐ ܕܡܲܠܟܿܘܼܬܼܵܐ
ܐܝܼܬܲܝܗܘܿܢ ܘܠܵܘ ܕܦܵܠܚܘܼܬܼܵܐ: ܘܠܲܒܼܘܼܫܵܐ ܕܦܵܐܚܹ̈ܐ ܡܵܙܘܿܢܵܐ
ܐܝܼܬܼܵܘܗܝ ܗܵܘ̇ ܕܐܝܼܬܼܵܘܗܝ ܕܦܵܠܚܹ̈ܐ ܘܠܵܘ ܕܡܲܠܟܹ̈ܐ. ܐܸܡܲܬܼܝ
pb. 32
ܗܵܟܹܝܠ ܕܲܠܒܼܘܼܫܵܐ ܕܦܵܠܚܹ̈ܐ: ܗܵܢܵܘ ܕܹܝܢ ܡܵܙܘܿܢܵܐ: ܢܸܨܒܼܵܐ ܡܲܠܟܵܐ
ܠܡܸܠܒܲܫ: ܘܢܸܫܒܿܘܿܩ ܐܲܪ̈ܓܿܘܵܢܹ݂ܐ ܕܡܲܠܟܿܘܼܬܼܵܐ: ܗܵܘ̇ ܕܐܝܼܬܼܵܘܗܝ
ܗ̄ܘ̣ܵܐ ܒܹܗ ܒܐܸܤܟܹܿܡܵܐ ܕܦܵܠܚܵܐ ܕܲܗܘ̤ܵܐ ܒܹܗ ܡܸܬܼܚܲܫܲܚ: ܟܲܕܼ ܠܵܐ
ܢܵܚܹ̈ܬܼ ܡ̣ܢ ܥܘܼܫܢܵܐ ܕܡܲܠܟܿܘܼܬܼܵܐ: ܘܲܒܼܪܵܒܿܘܼܬܼܵܐ ܘܲܒܼܫܘܼܠܛܵܢܵܐ ܕܥܲܠ
ܟܠ ܐܝܼܬܼܵܘܝ ܐܵܦ ܒܐܸܤܟܹܡܵܐ ܗܵܢܵܐ. ܟܲܕܼ ܕܹܝܢ ܢܸܨܒܸܿܐ
ܠܡܸܬܼܢܲܚܵܬܼܘܼ ܘܲܠܡܸܗܘܵܐ ܚܲܕܼ ܡ̣ܢ ܦܵܠܚܹ̈ܐ: ܠܒܼܘܼܫܵܐ ܢܵܤܹ̇ܒܼ ܡ̣ܢ
ܗܵܠܹܝܢ ܕܦܵܠܚܹ̈ܐ: ܐܲܝܟܼ ܕܲܗܘ̤ܵܐ ܠܵܦܵܚܵܐ: ܘܠܵܘ ܕܡܲܠܟܿܘܼܬܼܵܐ: ܘܲܡܟܲܤܸܐ
ܒܹܗ ܢܲܦܫܹܗ. ܘܡ̣ܢ ܫܲܘܝܘܼܬܼܵܐ ܡܡܲܠܸܠ ܥܲܡܥܗܘܿܢ. ܘܲܡܦܝܼܣ
ܠܗܘܿܢ: ܟܲܕܼ ܠܵܐ ܐܵܠܹ̇ܨ ܠܗܘܿܢ. ܘܥܵܒܹ̇ܕܼ ܥܒܼܵܕܹ̈̇ܐ ܕܡܲܠܟܿܘܼܬܼܵܐ:
ܒܐܸܤܟܹܿܡܵܐ ܕܦܵܠܵܚܵܐ. ܗܵܟܼܵܢܵܐ ܐܵܦ ܐܲܠܵܗܵܐ: ܟܲܕܼ ܨܒܼܵܐ ܠܡܸܬܼܒܲܪܢܵܫܘܼ:
ܐܸܠܘܼ ܠܵܐ ܐܸܬܼ݂ܵܐ ܒܲܟܼܝܵܢܵܐ ܐ̄ܢܵܫܵܝܵܐ: ܐܸܠܵܐ ܒܵܗ̇ ܒܐܘܼܤܝܼܵܐ ܕܝܼܠܹܗ ܗܘ̤ܵܐ
ܒܸܤܪܵܐ: ܐܵܦܠܵܐ ܐܸܬܼܒܲܪܢܲܫ. ܒܗܵܝ̇ ܕܒܼܐܘܼܤܝܼܵܐ ܕܝܼܠܹܗ: ܘܠܵܘ
ܒܲܟܼܝܵܢܵܐ ܕܲܒܼܢܲܝ̈ܢܵܫܵܐ ܐܸܬܼܒܲܪܢܲܫ ܠܗܘܿܢ.
ܟܚ. ܥܲܠ ܗܵܝ̇: ܕܗܵܘ̇ ܕܲܒܼܫܘܼܚܠܵܦܵܐ ܕܐܘܼܤܝܼܵܐ ܗܵܘܹ̇ܐ ܒܲܪܢܵܫܵܐ:
ܡ̣ܢ ܟܝܵܢܵܐ ܗ̄ܘ̣ ܐ̄ܚܪܹܢܵܐ: ܘܠܵܘ ܡ̣ܢ ܟܝܵܢܵܐ ܕܲܒܼܢܲܝ̈ܫܵܐ.
ܗܵܘ̇ ܓܹܝܪ ܕܲܒܼܫܘܼܚܠܵܦ ܐܘܼܤܝܼܵܐ ܗܵܘܹ̇ܐ ܒܲܪܢܵܫܵܐ: ܡ̣ܢ ܟܝܢܵܐ ܗ̄ܘ̣
ܐ̄ܚܪܹܢܵܐ: ܘܠܵܘ ܡ̣ܢ ܟܝܵܢܵܐ ܕܲܒܼܢܲܝ̈ܢܵܫܵܐ. ܒܗܵܝ̇ ܕܡܸܠܬܼܵܐ ܐ̄ܚܪܹܬܼܵܐ ܕܲܟܼܝܵܢܵܐ
ܐܝܼܬܼ ܠܹܗ: ܘܠܵܘ ܠܗܵܝ̇ ܕܲܒܼܢܲܝ̈ܢܵܫܵܐ. ܡܸܛܠ ܗܵܝ̇ ܕܒܲܟܼܝܵܢܵܐ ܐܝܼܬܼܵܘܗܝ
ܐܲܠܵܗܑܵܐ: ܘܡܸܕܸܡ ܐ̄ܚܪܹܝܢ ܤܛܲܪ ܡ̣ܢ ܟܝܵܢܵܐ ܐܲܠܵܗܵܝܵܐ ܗܘ̤ܵܐ ܐܘܼܤܝܼܵܐ
ܕܒܲܪܢܵܫܵܐ: ܐܲܝܟܲܢܵܐ ܕܢܸܗܘ̈ܝܵܢ ܒܲܟܼܝܵܢܵܐ ܬܲܪ̈ܬܲܝܗܹܝܢ. ܠܵܘ ܕܲܗܘ̤ܵܐ ܡ̣ܢ
ܟܝܵܢܵܐ ܐܲܠܵܗܵܝܵܐ ܠܲܟܼܝܵܢܵܐ ܐ̄ܢܵܫܵܝܵܐ: ܘܠܵܘ ܡܸܕܸܡ ܐ̄ܚܪܹܝܢ ܡ̣ܢ ܗܵܠܹܝܢ:
pb. 33
ܐܝܼܬܼܵܘܗܝ ܒܲܟܼܝܵܢܵܐ ܒܬܲܪ̈ܬܲܝܗܹܝܢ. ܐܸܠܵܐ ܗܵܘ̇ ܡ̇ܢ ܒܲܪܢܵܫܵܐ: ܒܲܪܢܵܫܵܐ
ܒܲܠܚܘܿܕܼ. ܘܐܲܠܵܗܵܐ: ܐܲܠܵܗܵܐ ܒܲܠܚܘܿܕܼ.
ܤܘܿܦܪܘܿܢܝܼܘܿܣ. ܘܐܸܢ ܠܵܘ ܗܵܟܲܢܵܐ ܢܤܲܒ̣ ܠܡܸܬܼܒܲܪܢܵܫܢܘܼܬܼܵܐ:
ܐܸܠܵܐ ܘܒܲܟܼܝܵܢܵܐ ܐ̄ܚܪܹܢܵܐ ܗܘ̤ܵܬܼ: ܘܠܵܘ ܡ̣ܢ ܐܘܼܤܝܼܵܐ ܕܐܲܠܵܗܵܐ:
ܐܲܝܟܲܢܵܐ ܬܠܝܼܬܼܵܘܼܬܼܵܐ ܠܵܐ ܡܩܲܒܿܠܵܐ ܬܵܘܤܲܦܬܼܵܐ ܒܲܟܼܝܵܢܵܐ: ܕܐܘܼܤܝܼܵܐ
ܕܲܐ̄ܚܪܹܢܵܐ ܩܲܒܿܠܲܬ̤؟ ܐܵܘ ܐܲܝܟܲܢܵܐ ܗܵܢܵܐ ܐܲܠܵܗܵܐ ܡ̣ܢ ܟܝܵܢܵܐ ܕܲܒܼܢܲܝ̈ܢܵܫܵܐ
ܐܝܼܬܼܵܘܗܝ: ܘܠܵܘ ܡ̣ܢ ܐܘܼܤܝܼܵܐ ܕܐܲܠܵܗܵܐ؟
ܟܛ. ܥܲܠ ܗܵܝ̇: ܕܲܒܼܗܵܘ̇ ܕܒܼܐܘܼܤܝܼܵܐ ܕܒܲܪܢܵܫܵܐ ܗܵܘܹ̇ܐ ܒܲܪܢܵܫܵܐ:
ܘܠܵܐ ܗ̄ܘ̣ܵܐ ܒܐܘܼܤܝܼܵܐ ܗܵܘܹ̇ܐ ܒܲܪܢܵܫܵܐ: ܠܵܐ ܒܲܟܼܝܵܢܵܐ ܘܠܵܐ ܒܦܲܪܨܘܿܦܵܐ
ܡܩܲܒܸܠ ܬܵܘܤܲܦܬܼܵܐ.
ܢܸܤܛܘܿܪܝܼܣ. ܐܲܝܟܲܢܵܐ ܕܡܲܠܟܵܐ: ܟܲܕܼ ܢܵܤܹ̇ܒܼ ܠܐܒܼܘܼ̈ܫܹܐ
ܕܦܵܠܚܘܼܬܼܵܐ ܘܐܝܼܬܼܵܘܗܝ: ܠܵܐ ܗ̄ܘ̣ܵܐ ܡܲܠܟܵܐ ܥܦܝܼܦܵܐ ܗܵܘܹ̇ܐ: ܘܐܵܦܠܵܐ
ܒܸܠܥܵܕܼܵܘܗܝ ܐܝܼܬܼܵܘܗܝ ܡܲܠܟܵܐ: ܒܗܵܝ̇ ܕܐܝܼܬܼܵܘܗܝ ܒܹܗ. ܘܠܵܐ
ܬܘܼܒܼ ܒܸܠܥܵܕܵܘܗܝ ܡܸܤܬܿܓܸܕܼ: ܒܗܵܘ̇ ܕܒܹܗ ܐܸܬܼܝܼܕܵܥ: ܒܗܵܘ̇
ܕܐܵܦ ܝܲܕܼܥܘܼܗܝ ܘܐܸܫܬܵܘܙܲܒܼܘ. ܗܵܟܲܢܵܐ ܐܵܦ ܐܲܠܵܗܵܐ ܐܸܬܼܚܲܫܲܚ
ܒܦܲܪܨܘܿܦܵܐ ܕܝܼܠܹܗ ܠܡܸܬܼܬܲܚܬܼܵܢܘܼܬܼܵܐ ܕܡܸܤܟܹܿܢܘܼܬܼܵܐ ܘܲܕܼܒܸܗܬܿܬܼܵܐ
ܥܕܲܡܵܐ ܠܡܵܘܬܵܐ ܕܲܙܩܝܼܦܵܐ ܥܲܠ ܐܲܦܲܝ̈ ܦܘܼܪܩܵܢܲܢ: ܘܲܒܼܗܵܢܵܐ ܐܸܬܼܥܲܠܝܼ
ܐܵܦ ܠܐܝܼܩܵܪܵܐ ܘܲܠܫܘܼܒܼܚܵܐ ܘܲܠܤܸܓܼܕܬܼܵܐ. ܒܗܵܘ̇ ܕܒܹܗ ܐܸܨܛܲܥܲܪ:
ܒܗܵܢܵܐ ܐܵܦ ܐܸܫܬܲܒܲܚ. ܕܐܝܼܩܵܪܵܐ ܓܹܝܪ: ܘܠܵܘ ܕܨܲܥܪܵܐ: ܐܝܼܬܹܝܗ̇
ܐܵܬ̤ܵܐ ܕܦܘܼܪܩܵܢܵܐ ܘܲܕܼܙܵܟܼܘܼܬܼܵܐ. ܘܠܵܘ ܬܵܘܤܲܦܬܼܵܐ ܕܐܘܼܤܝܼܵܐ ܩܲܒܸܿܠ̣:
ܒܕܲܡܩܵܘ̈ܝܵܢ ܐܘܼܤܝܼ̈ܣ ܕܠܵܐ ܫܘܼܚܠܵܦܵܐ. ܗܵܝܕܹܝܟ ܓܹܝܪ ܗܵܘ̇ܝܵܐ
pb. 34
ܬܵܘܤܲܦܬܼܵܐ ܒܐܘܼܤܝܼܵܐ: ܕܲܐ̄ܚܪܵܢܵܝܘܼܬܼ ܐܘܼܤܝܼܵܐ ܫܲܘܝܘܼܬܼ ܐܘܼܤܝܼܵܐ ܡܩܲܒܿܠܵܐ.
ܘܐܵܦܠܵܐ ܬܵܘܤܲܦܬܼܵܐ ܠܦܲܪܨܘܿܦܵܐ ܩܲܒܸܿܠ̣: ܒܥܗܵܝ̇ ܕܲܠܦܲܪܨܘܿܦܵܐ
ܕܝܼܠܹܗ ܢܲܤܒܹܗ ܘܠܵܘ ܕܲܐ̄ܚܪܹܢܵܐ. ܠܵܘ ܒܦܘܼܪܢܵܫܵܐ: ܐܸܠܵܐ ܒܲܚܕܲܝܘܼܬܼܵܐ
ܠܦܲܪܨܘܿܦܵܐ ܕܝܼܠܹܗ ܐܵܦ ܕܗܵܘ̇ ܕܒܹܗ ܐܸܬܼܒܲܪܢܲܫ. ܘܲܒܼܗܵܕܹܐ: ܐܵܦ
ܦܲܪܨܘܿܦܹܗ ܐܝܼܬܼܵܘܗܝ ܒܹܗ: ܘܠܵܘ ܒܲܐ̄ܚܪܹܢܵܐ. ܠܒܸܫ̣ ܓܹܝܪ ܕܡܘܼܬܼܵܐ
ܕܥܲܒܼܕܵܐ: ܘܒܼܵܗ̇ ܤܲܪܸܩ̣ ܢܲܦܫܹܗ: ܘܐܲܒܿܫܵܗ̇ ܦܲܪܨܘܿܦܹܗ:
ܘܐܲܪܝܼܡܹܗ ܠܲܫܡܹܗ ܠܥܸܠ ܡ̣ܢ ܟܠ ܫܡܵܗ̈ܝܼܢ. ܒܦܲܪܨܘܿܦܵܐ ܗܵܟܹܝܠ
ܕܐܲܠܵܗܘܼܬܼܵܐ ܡܸܤܬܲܓܼܕܵܐ: ܘܠܵܘ ܒܕܲܐ̄ܚܪܹܢܵܐ. ܘܡܸܛܠ ܗܵܢܵܐ: ܚܲܕܼ
ܐܝܼܬܼܵܘܗܝ ܦܲܪܨܘܦܵܐ ܘܲܫܡܵܐ ܕܲܒܼܪܵܐ.
ܠ. ܠܘܼܩܒܲܠ ܐܲܝܠܹܝܢ ܕܐܵܡ̇ܪܝܼܢ: ܕܠܵܘ ܐܲܠܵܗܵܐ ܐܸܫܐܲܚܠܲܦ
ܠܲܟܼܝܵܢܵܐ ܕܒܲܪܢܵܫܵܐ: ܐܸܠܵܐ ܕܠܵܗ̇ ܠܐܘܼܤܝܼܵܐ ܕܒܲܪܢܵܫܵܐ ܫܲܚܠܸܦ̣
ܠܐܘܼܤܝܼܵܐ ܕܐܲܠܵܗܵܐ.
ܠܐܲܝܠܹܝܢ ܓܹܝܪ ܕܲܒܼܫܘܼܚܠܵܦ ܐܵܡ̇ܪܝܼܢ ܚܕܼܵܝܘܼܬܼܵܐ: ܢܵܩ̇ܦܵܐ ܗ̣̄ܝ
ܬܵܘܤܲܦܬܼܵܐ ܕܐܘܼܤܝܼܵܐ ܘܐܵܦ ܕܦܲܪܨܘܿܦܵܐ ܒܟܼܠ ܙܢܵܐ ܕܐܝܼܬܼ. ܐܘܤܝܼܵܐ
ܓܹܝܪ ܕܲܥܗܘ̤ܵܬܼ ܒܸܤܪܵܐ ܡ̣ܢ ܐܲܠܵܗܵܐ ܡܸܠܬܼܵܐ: ܐܸܬܿܬܵܘܤܦܲܬ̤
ܠܲܬܼܠܝܼܬܼܵܝܘܼܬܼܵܐ. ܘܦܲܪܨܘܿܦܵܐ ܗܵܢܵܐ ܓܲܠܝܵܐ ܕܦܸܠܓܵܐ ܗ̄ܘ̣:
ܘܒܲܦܠܝܼܓܼܘܼܬܼܵܐ ܡܸܬܼܪܢܸܐ: ܕܲܗܘ̤ܵܐ ܟܝܵܢܵܐ ܕܒܸܤܪܵܐ ܡ̣ܢ ܐܘܼܤܝܼܵܐ
ܕܠܲܠܵܗܵܐ ܡܸܠܬܼܵܐ ܒܲܦܠܝܼܓܼܘܼܬܼܵܐ ܬܵܘܤܲܦܬܼܵܐ ܗܵܘ̇ܝܵܐ . . . .
ܡ̣ܢ ܐܲܝܟܵܐ ܗܵܟܹܝܠ ܐܝܼܬܼ ܠܗܘܿܢ ܠܗܵܠܹܝܢ ܫܘܼܪܵܝܵܐ: ܘܒܲܐܝܕܵܐ ܦܪܝܼܫܝܼܢ:
ܘܬܼܘܼܒܼ ܠܗܹܝܢ ܟܲܕܼ ܠܗܹܝܢ ܡ̣ܢ ܟܲܕܘܼ ܐܸܡܲܪܢܲܢ. ܢܸܦܢܸܐ
pb. 35
ܗܵܟܹܝܠ ܐܵܦ ܥܲܠ ܓܘܼܕܵܐ ܐ̄ܚܪܹܬܼܵܐ ܕܡ̣ܢ ܗܵܠܹܝܢ ܫܸܘܚܲܬ̤: ܘܲܦܪܝܼܫܵܐ
ܡܸܢܗܘܿܢ: ܘܬܼܘܼܒܼ ܒܗܘܿܢ ܡܚܲܠܛܵܐ.
ܤܘܿܦܪܘܿܢܝܼܘܿܣ. ܦܲܓܼܪܹܗ ܗܵܟܹܝܠ ܕܡܵܪ̈ܲܢ ܡܵܘܕܹܝܢ ܕܡ̣ܢ ܒܸܤܪܵܐ
ܕܝܼܠܹܗ ܐܝܼܬܼܵܘܗܝ: ܘܲܒܼܗܵܕܹܐ ܡܒܲܙܚܝܼܢ ܐܵܦ ܒܐܲܝܠܹܝܢ ܕܐܵܡ̇ܪܝܼܢ
ܕܲܒܼܡܲܤܒܿܪܵܢܘܼܬܼܵܐ ܘܲܒܼܗܲܓܵܓܼܵܐ ܐܝܼܬܼܵܘܗܝ ܗ̄ܘ̣ܵܐ ܒܸܤܪܵܐ: ܐܵܦ
ܒܐܲܝܠܹܝܢ ܕܐܵܡ̇ܪܝܼܢ ܕܡ̣ܢ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ ܐܝܼܬܼܵܘܗܝ ܟܲܕܼ
ܐܵܡ̇ܪܝܼܢ . . . .
ܠܐ. ܕܒܼܐܝܠܹܝܢ ܡܸܠܹ̈ܐ ܡܸܬܼܚܲܫܚܝܼܢ ܗܵܡ̇ܘܿܢ ܕܐܵܡ̇ܪܝܼܢ: ܕܲܟܼܝܵܢܵܐ
ܕܦܲܓܼܪܵܐ ܐܸܫܬܲܚܠܲܦ ܠܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ.
ܠܵܐ ܠܲܡ ܓܹܝܪ ܐܸܬܼ݂ܵܐ ܕܲܢܫܲܚܠܸܦ ܠܐܘܼܤܝܼܵܐ ܠܵܐ ܡܸܫܬܲܚ̱ܠܦܵܢܝܼܬܼܵܐ
ܕܝܼܠܹܗ: ܘܢܸܥ̱ܒܿܕܝܼܗ̇ ܐܘܼܤܝܼܵܐ. ܐܸܠܵܐ ܕܲܠܗܵܕܹܐ ܕܝܼܠܲܢ
ܡܸܤܟܹܿܢܬܼܵܐ ܘܡܸܫܬܲܚܠܦܵܢܝܼܬܼܵܐ ܢܲܤܸܩ: ܠܗܵܝ̇ ܕܲܕܼܠܵܐ ܫܘܼܚܠܵܦ
ܕܝܼܠܹܗ: ܘܢܸܥܒܿܕܼܝܼܗ̇ ܐܲܠܵܗܵܝܵܐ ܘܲܤܓܼܝܼܕܬܵܐ. ܠܵܘ ܡܸܢܵܗ̇ ܘܠܵܗ̇:
ܐܸܠܵܐ ܒܲܚܕܼܵܝܘܼܬܼܵܐ. ܠܲܚܕܼܵܝܘܼܬܼܵܐ ܕܹܝܢ ܕܥܲܡ ܐܘܼܤܝܼܵܐ ܕܝܼܠܹܗ ܢܲܫܘܹܝܗ̇:
ܐܲܝܟܼ ܕܬܸܗܘܸܐ ܚܕܼܵܐ ܐܘܼܤܝܼܵܐ: ܘܚܲܕܼ ܦܲܪܨܘܿܦܵܐ ܕܲܚܕܼܵܐ ܐܘܼܤܝܼܵܐ:
ܕܐܸܬܼܡܲܙܓܲܬ̤ ܘܐܸܫܬܵܘܝܲܬ̤ ܗܵܝ̇ ܕܲܒܼܨܝܼܪܵܐ ܥܲܡ ܗܵܝ̇ ܕܐܲܠܵܗܘܼܬܼܵܐ
ܪܲܒܿܬܼܵܐ ܘܲܕܼܠܵܐ ܫܘܼܚܠܵܦ. ܐܲܟܼܙܢܵܐ ܕܐܲܝܠܹܝܢ ܕܲܒܼܢܘܼܪܵܐ ܡܸܬܼܪܡܹܝܢ:
ܡܸܫܬܿܘܹܝܢ ܥܲܡ ܐܘܼܤܝܼܵܐ ܕܢܘܼܪܵܐ: ܘܗܵܘܹ̇ܝܢ ܟܝܵܢܵܐ ܕܢܘܼܪܵܐ: ܕܲܥܒܲܕܼ
ܐܸܢܹܝܢ ܗܵܘ̇ ܡܵܐ ܕܲܗ̤ܘܲܝ̈: ܗܵܟܲܢܵܐ ܐܵܦ ܟܝܵܢܵܐ ܐܲܠܵܗܵܝܵܐ ܩܲܒܸܿܠ̣ ܠܲܟܼܝܵܢܵܐ
ܐ̄ܢܵܫܵܝܵܐ ܘܒܲܟܼܝܵܢܵܐ ܕܝܼܠܹܗ ܚܲܒܼܟܹܗ: ܘܫܲܚ̱ܠܦܹܗ ܘܥܲܒܕܹܗ ܡܸܟܹܝܠ
ܚܲܕܼ ܕܠܵܐ ܦܘܼܪܵܫ: ܒܐܘܼܤܝܼܵܐ ܐܵܦ ܒܦܲܪܨܘܼܿܦܵܐ. ܘܠܵܐ ܥܲܠ
pb. 36
ܟܝܵܢܵܐ: ܘܠܵܐ ܥܲܠ ܦܲܪܨܘܿܦܵܐ: ܫܲܪܝܼܪܵܐܝܼܬܼ ܗܘ̤ܵܬܼ ܬܵܘܤܲܦܬܼܵܐ
ܕܲܬܼܠܝܼܬܼܵܝܘܼܬܼܵܐ. ܘܗܵܟܲܢܵܐ ܡܸܬܼܒܲܪܢܫܵܢܘܼܬܹܗ ܐܵܦ ܗܘ̤ܵܬܼ: ܐܵܦ
ܡܸܬܼܪܲܢܝܵܐ.
ܠܒ. ܕܒܲܐܝܠܹܝܢ ܦܪܝܼܫܝܼܢ ܡ̣ܢ ܡܵܢܝܼܢܵܝܹ̈ܐ: ܘܒܲܐܝܠܹܝܢ ܐܲܟܼܘܵܬܼܗܘܿܢ
ܡܵܘܕܹܝܢ.
ܦܫܝܼܪܝܼܢ ܡ̇ܢ ܗܵܠܹܝܢ ܡ̣ܢ ܡܵܢܝܼܝܹ̈ܐ: ܒܲܕܼܡܵܘܕܹܝܢ ܫܲܪܝܼܪܵܐܝܼܬܼ
ܕܒܸܤܪܵܐ ܐܝܼܬܼܵܘܗܝ ܡ̣ܢ ܟܝܵܢܵܐ ܕܝܼܠܲܢ. ܘܠܵܘ ܐܸܤܟܹܡܵܐ ܕܒܸܤܪܵܐ:
ܐܸܠܵܐ ܟܝܵܢܵܐ ܕܒܸܪܵܐ. ܘܡ̣ܢ ܐ̄ܚܪ̈ܵܢܹܐ ܕܹܝܢ ܕܥܲܡܗܘܿܢ: ܒܲܕܼܡܘܕܹܝܢ
ܗܸܢ̣ܘܿܢ ܕܒܸܤܪܵܐ ܫܲܪܝܼܪܵܐ: ܠܵܘ ܕܹܝܢ ܡ̣ܢ ܟܝܵܢܵܐ ܐ̄ܢܵܫܵܝܵܐ: ܐܸܠܵܐ ܐܲܠܵܗܵܝܵܐ
ܘܡ̣ܢ ܟܝܵܢܵܐ ܕܐܲܠܵܗܘܼܬܼܵܐ. ܒܗܵܠܹܝܢ ܦܪܝܼܫܝܼܢ: ܘܲܒܼܟܼܠܹܗ ܚܲܝܠܗܘܿܢ
ܡܸܬܼܟܲܬܿܫܝܼܢ. ܘܐܲܝܠܹܝܢ ܕܲܒܼܥܹܕܬܼܵܐ ܡܸܤܬܲܒܼܪܝܼܢ ܕܲܡܫܲܡܫܝܼܢ: ܡܵܘܕܹܝܢ
ܕܡ̣ܢ ܟܝܵܢܵܐ ܘܡ̣ܢ ܐܘܼܤܝܼܵܐ ܕܝܼܠܲܢ ܐܝܼܬܼܵܘܗܝ ܒܸܤܪܵܐ. ܘܗܵܕܹܐ: ܝܑܼܕܝܼܥ
ܦܘܼܪܫܵܢܹܗ ܠܟܼܠܢܵܫ. ܓܵܘܵܢܵܐܝܼܬܼ ܓܹܝܪ ܠܘܵܬܼ ܟܠܗܘܿܢ ܡܸܬܼܚܪܹܝܢ
ܠܘܼܩܒܲܠ ܡܵܢܝܼܢܵܝܹ̈ܐ: ܥܲܠ ܗܵܝ̇ ܕܐܝܼܬܼܵܘܗܝ ܐܘܤܝܼܵܐ ܘܒܲܫܪܵܪܵܐ
ܐܘܼܤܝܼܵܐ. ܠܘܵܬܼ ܗܵܢܘܿܢ ܕܹܝܢ: ܕܠܵܘ ܡ̣ܢ ܟܝܵܢܵܐ ܕܐܲܠܵܗܵܐ: ܐܸܠܵܐ ܕܡ̣ܢ
ܐܲܒܼܵܗܲܝ̈ܢ. ܠܘܵܬܼ ܥܹܕܬܵܐ ܕܹܝܢ: ܒܗܵܝ̇ ܕܲܡܫܲܚ̱ܠܦܝܼܢ ܠܒܸܤܪܵܐ
ܠܐܘܼܤܝܼܵܐ ܕܐܲܠܵܗܵܐ. ܒܗܵܝ̇ ܗܵܟܹܝܠ ܕܠܵܐ ܫܵܒܼܩ̇ܝܼܢ ܠܹܗ ܠܒܸܤܪܵܐ
ܕܲܢܩܵܘܸܐ ܒܐܘܼܤܝܼܵܐ ܕܝܼܠܹܗ: ܫܘܹܝܢ ܥܲܡ ܡܵܢܝܼܢܵܝܹ̈ܐ: ܒܲܕܼܡܵܘܒܿܕܝܼܢ
ܠܐܘܼܤܝܼܵܐ ܕܒܸܤܪܵܐ. ܒܗܵܝ̇ ܕܹܝܢ ܕܟܼܠ ܟ̱ܠܹܗ ܐܵܡ̇ܪܝܼܢ ܕܲܒܼܗܘܼܠܹܐ
ܕܒܸܤܪܵܐ ܗܘ̤ܵܐ ܐܲܠܵܗܑܵܐ: ܥܵܪܩܝܼܢ ܡ̣ܢ ܡܵܢܝܼܢܵܝܹ̈ܐ. ܐܵܦ ܗܵܠܹܝܢ ܕܹܝܢ:
ܒܗܵܝ̇ ܕܒܲܪ ܫܵܥܬܹܗ ܡܫܲܚ̱ܠܦܝܼܢ ܠܹܗ ܠܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ:
pb. 37
ܘܲܕܼܥܲܡ ܦܲܓܼܪܵܐ ܐ̄ܢܵܫܵܝܵܐ ܐܝܼܬܼܵܘܗܝ ܐܲܠܵܗܵܐ ܠܵܐ ܨܵܒܹ̇ܝܢ ܠܡܵܘܕܼܵܝܘܼ:
ܠܹܗ ܟܲܕܼ ܠܹܗ ܠܪܸܥܝܵܢܵܐ ܘܠܹܗ ܠܚܲܫܵܐ ܫܵܠܡ̇ܝܼܢ: ܟܲܕܼ ܡܲܦܩܝܼܢ
ܠܵܗ̇ ܠܐܘܼܤܝܼܵܐ ܕܒܸܤܪܵܐ ܕܠܵܐ ܐܝܼܬܹܝܗ̇: ܟܲܕܼ ܡܸܬܼܥܲܫܢܝܼܢ: ܕܐܵܘ
ܢܐܲܠܗܘܼܢܵܗ̇ ܠܐܘܼܤܝܼܵܐ ܕܒܸܤܪܵܐ: ܐܵܘ ܐܲܝܟܼ ܕܲܠܡܹܐܡܲܪ ܠܐܘܼܤܝܼܵܐ
ܕܐܲܠܵܗܵܐ ܢܒܲܤܪܘܼܢܵܗ̇ ܒܐܘܼܤܝܼܵܐ ܕܒܸܤܪܵܐ ܕܐܲܠܵܗܘܼܬܼܵܐ.
ܠܓ. ܕܗܵܠܹܝܢ ܕܲܡܫܲܚ̱ܠܦܝܼܢ ܠܲܟܼܝܵܢܵܐ ܕܒܲܪܢܵܫܵܐ ܠܲܟܼܝܵܐ
ܐܲܠܵܗܵܝܵܐ: ܠܵܐ ܐܵܡ̇ܪܝܼܢ ܕܐܲܠܵܗܵܐ ܐܸܬܼܒܲܪܢܲܫ: ܐܸܠܵܐ ܕܒܲܪܢܵܫܵܐ ܐܸܬܼܐܲܠܲܗ.
ܗܵܘ̇ ܗܵܟܹܝܠ ܕܠܵܐ ܐܝܼܬܼܵܘܗܝ ܐܘܼܤܝܼܵܐ ܐ̄ܢܵܫܵܝܵܬܼܵܐ ܕܒܸܤܪܵܐ:
ܘܡܸܬܼܐ̱ܡܲܪ ܒܸܤܪܵܐ: ܗܵܢܵܐ ܒܫܲܘܝܘܼܬܼ ܫܡܵܐ ܡܸܬܼܐ̱ܡ݂ܲܪ. ܐܲܟܼܙܢܵܐ
ܕܓܲܒܼܪܵܐ ܡ̣ܢ ܕܲܗܒܼܵܐ ܘܡ̣ܢ ܤܹܐܡܵܐ: ܘܡ̣ܢ ܐܘܼܤܝܼܵܐ ܐ̄ܚܪܹܬܼܵܐ
ܕܐܲܝܕܵܐ ܕܗ̤ܝ ܗܘ̣ܠܹܐ. ܠܵܐ ܕܹܝܢ ܐܝܼܬܼܵܘܗܝ ܒܲܟܼܝܵܢܵܐ ܒܲܪܢܵܫܵܐ: ܗܵܘ̇
ܕܲܟܼܝܵܐ ܕܒܲܪܢܵܫܵܐ ܠܵܐ ܐܝܼܬܼ ܠܹܗ. ܘܗܵܕܹܐ ܠܵܐ ܐܝܼܬܹܝܗ̇ ܡܸܬܼܒܲܪܢܫܵܢܘܼܬܼܵܐ
ܕܐܲܠܵܗܵܐ: ܐܸܠܵܐ ܡܸܬܼܐܲܠܗܵܢܘܼܬܼܵܐ ܕܒܲܪܢܵܫܵܐ.
ܠܕ. ܥܲܠ ܗܵܝ̇: ܕܐܲܝܠܹܝܢ ܕܡܲܫܚ̱ܠܦܝܼܢ! ܠܲܟܼܝܵܢܵܐ ܕܒܲܪܢܵܫܵܐ
ܠܐܘܼܤܝܼܵܐ ܐܲܠܵܗܵܝܼܵܐ: ܬܵܘܤܲܦܬܼܵܐ ܥܵܒܼ̇ܕܝܼܢ ܕܲܬܼܠܝܼܬܼܵܝܘܼܬܼܵܐ ܘܐܵܦ
ܒܲܟܼܝܼܵܢܵܐ ܘܐܵܦ ܒܦܲܪܨܘܿܦܵܐ.
ܐܸܢܗ̤ܘ ܗܵܟܹܝܠ ܕܲܡܩܵܘܸܐ ܟܝܵܢܵܐ ܕܒܸܤܪܵܐ ܗܵܘ̇ ܕܐܸܬܼܐܲܠܲܗ:
ܒܗܵܝ̇ ܐܘܼܤܝܼܵܐ ܕܐܸܬܼܐܲܠܲܗ ܒܵܗ̇: ܐܲܝܟܲܢܵܐ ܠܵ. ܬܵܘܤܲܦܬܼܵܐ ܒܐܘܼܤܝܼܵܐ
ܩܲܒܿܠܲܬ̤ ܬܠܝܼܬܼܵܝܘܼܬܼܵܐ ܘܲܒܼܦܲܨܘܿܦܵܐ؟ ܠܲܝܬܿ ܓܹܝܪ ܡܸܕܸܡ
pb. 38
ܒܲܬܼܠܝܼܬܼܵܝܘܼܬܼܵܐ ܡ̣ܢ ܟܝܵܢܵܐ ܐ̄ܢܵܫܵܝܵܐ: ܠܵܐ ܐܲܒܼܵܐ ܘܠܵܐ ܒܪܵܐ ܘܠܵܐ ܪܘܼܚܵܐ
ܕܩܘܼܕܼܫܵܐ: ܐܸܠܵܐ ܗ̤ܝ ܠܚܘܿܕܹܝܗ̇ ܐܝܼܬܹܝܗ̇ ܗܵܘ̇ ܕܹܝܢ ܕܠܵܐ ܗ̄ܘ̣ܵܐ
ܥܲܡܵܗ̇ ܡܬܼܘܿܡܵܐܝܼܬܼ: ܐܸܠܵܐ ܗܘ̤ܵܐ ܠܵܗ̇: ܒܗܵܢܵܐ ܬܵܘܤܲܦܬܼܵܐ ܢܸܤܒܲܬ̤.
ܬܵܘܤܲܦܬܼܵܐ ܕܹܝܢ ܕܗܵܘ̇ܝܵܐ: ܐܲܝܟܲܢܵܐ ܠܵܐ ܐܝܬܹܝܗ̇ ܬܵܘܤܲܦܬܼܵܐ؟ ܘܐܵܦ
ܗܵܕܹܐ ܫܘܼܥܝܼܬܼܵܐ ܗ̣̄ܝ ܐ̄ܚܪܹܬܼܵܐ: ܘܡܲܬܼܠܵܐ ܡܵܢܝܼܢܵܝܵܐ. ܐܸܢ ܕܹܝܢ ܗܵܘ̇
ܡܵܐ ܕܲܗܘ̤ܵܐ ܠܵܐ ܦܵܫ̣ ܐܲܝܟܼ ܕܐܝܼܬܼܵܘܗܝ ܗ̄ܘ̣ܵܐ: ܐܸܠܵܐ ܐܲܟܼܙܢܵܐ ܕܡ̣ܢ
ܢܘܼܪܵܐ ܡ̣ܢ ܟܝܵܢܵܐ ܕܐܲܠܵܗܘܼܬܼܵܐ ܐܸܬܿܛܠܸܡ ܟܝܵܢܵܐ ܕܲܒܼܢܲܝ̈ܢܵܫܵܐ: ܘܲܒܼܗܵܕܹܐ
ܠܵܐ ܩܲܒܿܠܲܬ̤ ܬܵܘܤܲܦܬܼܵܐ ܬܠܝܼܬܵܝܘܼܬܼܵܐ: ܗܵܕܹܐ ܐܵܦܠܵܐ ܡܸܬܼܒܲܪܢܵܫܢܘܼܬܼܵܐ
ܐܝܼܬܹܝܗ̇: ܐܸܠܵܐ ܛܘܼܠܵܩܵܗ̇ ܕܡܸܬܼܒܲܪܢܫܵܢܘܼܬܼܵܐ. ܗܵܘ̇ ܓܹܝܪ ܡܸܕܸܡ
ܕܲܠܛܘܼܠܵܩܵܐ ܕܲܟܼܝܵܢܵܐ ܐ̄ܢܵܫܵܝܵܐ ܗܵܘܹ̇ܐ: ܘܠܵܘ ܠܡܸܬܼܢܲܛܪܵܢܘܼܬܹܗ:
ܗܵܢܵܐ ܠܵܐ ܡܸܫܬܲܡܲܗ ܡܸܬܼܒܲܪܢܫܵܢܘܼܬܼܵܐ. ܐܸܠܵܐ ܐܲܟܼܙܢܵܐ ܕܡܸܕܸܡ
ܕܐܝܼܬܼܵܘܗܝ: ܠܗܵܘ̇ ܡܵܐ ܕܠܵܐ ܐܝܼܬܼܵܘܗܝ.
ܠܗ. ܕܒܲܐܝܠܹܝܢ ܫܲܠܡ̇ܝܼܢ ܗܵܠܹܝܢ ܕܡܫܲܚ̱ܠܦܝܼܢ ܠܲܟܼܝܵܢܵܐ ܕܦܲܓܼܪܵܐ
ܠܐܘܼܤܝܼܵܐ ܕܐܲܠܵܗܵܐ: ܠܗܵܢ̇ܘܿܢ ܕܠܐܘܼܤܝܼܵܐ ܕܐܲܠܵܗܵܐ ܡܫܲܚ̱ܠܦܝܼܢ
ܠܲܟܼܝܵܢܵܐ ܕܦܲܓܼܪܵܐ:
ܘܲܒܼܗܵܕܹܐ ܫܵܠܡ̇ܝܼܢ ܠܐܲܝܠܹܝܢ ܕܠܐܘܼܤܝܼܵܐ ܐܲܠܵܗܵܝܵܬܼܵܐ: ܠܲܟܼܝܵܢܵܐ ܐ̄ܢܵܫܵܝܵܐ
ܡܫܲܚ̱ܠܦܝܼܢ. ܗ̤ܝ ܓܹܝܪ ܟܲܕܼ ܗ̣ܝ ܡܸܠܬܼܵܐ ܐܝܼܬܹܝܗ̇: ܕܢܸܗܘܸܐ ܐܲܠܵܗܵܐ
ܐܘܼܤܝܼܵܐ ܕܒܲܟܼܝܵܢܵܐ: ܐܵܘ ܠܐܘܼܤܝܼܵܐ ܕܒܲܪܢܵܫܵܐ ܢܫܲܚܠܸܦ ܠܲܟܼܝܵܢܵܐ ܕܐܲܠܵܗܵܐ.
ܠܘ. ܥܲܠ ܗܵܝ̇: ܕܠܵܐ ܡܸܫܟܿܚܵܬ ܕܐܵܘ ܒܡܘܼܙܵܓܼܵܐ ܐܵܘ ܒܫܘܼܠܵܦܵܐ
ܕܐܘܼܤܝܼܵܐ: ܟܝܵܢܵܐ ܕܐܲܠܵܗܵܐ ܬܸܫܬܲܚܠܲܦ ܠܓܼܘܼܫܡܵܐ: ܐܵܦܠܵܐ ܕܦܲܓܼܪܵܐ
ܢܸܫܬܲܚܠܲܦ ܠܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ.
pb. 39
ܒܘܼܛܵܠܵܐ ܓܹܝܪ ܕܲܟܼܝܵܢܵܐ ܐܲܠܵܗܵܝܵܐ ܥܵܒܹ̇ܕܼ: ܐܲܝܢܵܐ ܕܠܲܟܼܝܵܢܵܐ ܐ̄ܢܵܫܵܝܵܐ
ܡܫܲܚܠܸܦ ܠܹܗ. ܘܗܘܼܠܵܠܵܬ ܕܼܟܼܝܵܢܵܐ ܐ̄ܢܵܫܵܝܵܐ ܤܵܥܲܪ̇: ܗܵܘ̇ ܕܠܲܟܼܝܵܢܵܐ
ܐܲܠܵܗܵܝܵܐ ܡܫܲܚܠܸܦ ܠܹܗ. ܘܠܲܟܼܝܵܢܵܐ ܠܵܐ ܥܒܼܝܼܕܼܵܐ ܥܵܒܹ̇ܕܼ: ܕܠܲܟܼܝܵܢܵܐ
ܥܒܼܝܼܕܼܵܐ ܠܵܐ ܥܒܼܝܼܕܼܵܐ ܐܸܡܲ݁ܪ: ܗܵܘ̇ ܕܠܵܐ ܡܸܫܟܿܚܵܐ ܕܢܸܗܘܸܐ. ܕܡ̣ܢ
ܠܵܐ ܡܸܕܸܡ ܓܹܝܪ ܢܟܲܢܸܫ ܥܵܒܼ̇ܘܿܕܼܵܐ ܐܘܼܤܝܼܵܐ ܡܫܵܟܼܵܐܝܼܬܼ: ܢܫܲܚ̱ܠܦܝܼܗ̇
ܠܐܘܼܤܝܼܵܐ ܥܒܼܝܼܕܬܵܐ ܡ̣ܢ ܥܒܼܝܼܕܬܵܐ. ܕܡ̣ܢ ܥܒܼܝܼܕܼܵܐ ܕܹܝܢ ܠܵܐ
ܥܒܼܝܼܕܬܵܐ: ܘܲܕܠܵܐ ܗܵܘ̇ܝܵܐ ܡ̣ܢ ܗܵܝ̇ ܕܗܵܘ̇ܝܵܐ: ܐܲܝܟܼ ܕܐܵܡܲ݁ܪ ܐܲܢ̄ܬܿ:
ܠܵܐ ܡܸܫܟܿܚܵܐ: ܐܵܘ ܡܒܲܛܵܠܘ̣ ܡܒܲܛܸܠ ܐܲܢ̄ܬܿ ܠܵܗ̇ ܡ̣ܢ ܗܵܝ̇
ܕܬܸܗܘܸܐ ܐܘܼܤܝܼܵܐ. ܐܘܼܤܝܼܵܐ ܕܹܝܢ ܗܵܝ̇ ܕܗܵܘ̇ܝܵܐ ܕܬܸܗܘܸܐ ܠܵܐ ܗܘܝܼܬܼܵܐ:
ܘܲܥܒܼܝܼܕܼܬܵܐ ܕܬܸܗܘܸܐ ܠܵܐ ܥܒܼܝܼܕܼܬܵܐ: ܠܲܝܬܿ ܦܘܼܪܤܵܐ ܕܬܸܗܘܸܐ.
ܘܠܵܐ ܬܘܼܒܼ ܗܵܘ̇ ܕܠܵܐ ܐܝܼܬܼܵܘܗܝ: ܘܲܗܘ̤ܵܐ ܟܝܵܢܵܐ ܡܬܼܘܿܡܵܝ̇ܐ:
ܘܥܲܡ ܡܬܼܘܿܡܵܝܵܐ ܗܵܘܹ̇ܐ. ܘܠܵܐ ܬܘܼܒܼ ܐܲܝܟܼ ܕܲܒܼܫܘܼܚܠܵܦ ܟܝܵܢܵܐ:
ܘܠܵܐ ܐܲܝܟܼ ܕܲܒܼܒܼܘܼܠܒܵܠܵܐ ܐܵܘ ܐܲܝܟܼ ܕܲܒܼܡܘܼܙܵܓܼܵܐ: ܗܵܘܹ̇ܐ ܟܝܵܢܵܐ ܠܵܐ
ܗܲܘܝܵܐ ܗܲܘܝܵܐ. ܘܲܡܬܼܘܿܡܵܝܵܐ: ܗܵܘ̇ ܕܠܵܘ ܡܬܼܘܿܡܵܐܝܼܬܼ ܐܝܼܬܼܵܘܗܝ.
ܐܵܘ ܡ̣ܢ ܐܘܼܤܝܼܵܐ ܕܲܡܬܼܘܿܡܵܝܵܐ: ܗܵܝ̇ ܕܠܵܐ ܡܬܼܘܿܡܵܐܝܼܬܼ ܐܝܼܬܹܝܗ̇.
ܐܵܘ ܓܹܝܪ ܡ̣ܢ ܬܿܪ̈ܬܲܝܗܹܝܢ ܐܘܼܤ̈ܝܼܣ: ܒܡܘܼܙܵܓܼܵܐ ܐܵܘ ܒܒܼܘܼܠܒܵܠܵܐ
ܗܵܘܹ̇ܐ ܫܘܼܚܠܵܦ ܐܘܼܤܝܼܵܐ: ܠܚܲܕܼ ܟܝܵܢܵܐ ܕܡ̣ܢ ܬܲܪ̈ܬܲܗܹܝܢ ܗܵܢܹܝܢ
ܐܸܬܼܡܲܙܲܓܼ. ܐܵܘ ܚܕܼܵܐ ܐܘܼܤܝܼܵܐ ܡ̣ܢ ܗܵܠܹܝܢ ܠܲܐ̄ܚܪܹܬܼܵܐ ܐܸܫܬܲܚ̱ܠܦܲܬ̤:
ܗܵܝ̇ ܕܠܵܐ ܡܸܫܟܿܚܵܐ ܕܠܵܐ ܥܒܼܝܼܕܼܵܐ ܕܠܵܐ ܥܒܼܝܼܕܼܵܐ: ܘܲܡܬܼܘܿܡܵܝܵܐ ܙܲܒܼܢܵܢܵܝܵܐ:
ܘܙܲܒܼܢܵܢܵܝܵܐ ܡܬܼܘܿܡܵܝܵܐ. ܘܲܕܼܒܲܪܝܵܐ ܠܵܐ ܒܲܪܝܵܐ ܒܲܟܼܝܵܢܵܐ: ܗܵܘ̇ ܡܵܐ
ܕܐܝܼܬܼܵܘܗܝ ܠܵܐ ܒܲܪܝܵܐ ܘܠܵܐ ܗܵܘܝܵܐ ܘܲܡܬܼܘܿܡܵܝܵܐ: ܒܗܵܕܹܐ ܕܢܸܗܘܸܐ
pb. 40
ܥܒܼܝܼܕܼܵܐ ܘܙܵܒܼܢܵܢܵܝܵܐ: ܐܲܝܟܼ ܕܡ̣ܢ ܟܝܵܢܵܐ ܥܒܼܝܼܕܼܵܐ ܘܙܲܒܼܢܵܢܵܝܵܐ ܗܘ̤ܵܐ. ܐܵܘ
ܡ̣ܢ ܟܝܵܢܵܐ ܥܒܼܝܼܕܼܵܐ ܘܙܲܒܼܢܵܢܵܝܵܐ ܕܢܸܗܘܸܐ ܟܝܵܢܵܐ ܠܵܐ ܥܒܼܝܼܕܼܵܐ ܘܲܡܬܼܘܿܡܵܝܵܐ:
ܘܲܠܡܸܗܘܵܐ ܐܘܼܤܝܼܵܐ ܠܵܐ ܥܒܼܝܼܕܬܵܐ ܘܲܡܬܼܘܿܡܵܝܵܬܼܵܐ: ܠܵܐ ܡܸܫܟܚܵܢܝܼܬܼܵܐ
ܓܹܝܪ ܘܠܵܐ ܡܸܬܼܪܲܢܝܵܢܝܼܬܼܵܐ ܐܝܼܬܲܝܗܹܝܢ. ܐܲܝܟܲܢܵܐ ܓܹܝܪ ܢܸܪܢܸܐ ܐ̄ܢܵܫ: ܕܟܲܕܼ
ܐ̄ܚܪܹܢܝܵܐ ܐܝܼܬܼܵܘܗܝ ܡ̣ܢ ܟܠ ܦܪܘܿܣ ܥܵܒܼ̇ܘܿܕܼܵܐ ܡ̣ܢ ܥܒܼܝܼܕܼܵܐ:
ܘܐ̄ܚܪܹܢܵܐ ܗܵܘ̇ ܕܡܸܬܼܥ̱ܒܸܕܼ: ܗ̤ܘ ܟܲܕܼ ܗ̤ܘ ܡܫܲܚܠܸܦ ܠܝܵܬܹܗ؟
ܟܵܡܵܐ ܓܹܝܪ ܕܐܝܼܬܼܵܘܗܝ ܥܵܒܼ݁ܘܿܕܼܵܐ: ܠܵܐ ܡܸܫܬܲܚܠܵܦ: ܒܲܟܼܝܵܢܵܐ ܓܹܝܪ
ܠܵܐ ܡܸܫܬܲܚܠܦܵܢܵܐ ܥܵܒܹ̇ܕܼ. ܟܲܕܼ ܕܹܝܢ ܠܵܐ ܐܝܼܬܼܵܘܗܝ ܗܵܘ̇
ܕܐܝܼܬܼܵܘܗܝ: ܠܵܐ ܥܵܒܹ̇ܕܼ. ܐܵܘ ܓܹܝܪ ܐܝܼܬܼܵܘܗܝ ܗܵܘ̇ ܕܐܝܼܬܼܵܘܗܝ
ܒܲܟܼܝܵܢܵܐ ܡܬܼܘܿܡܵܐܝܼܬܼ ܐܲܠܵܗܵܐ: ܘܠܵܐ ܗ̄ܘ̣ܵܐ ܟܝܵܢܵܐ ܐ̄ܚܪܹܢܵܐ: ܟܲܕܼ ܡܩܵܘܸܐ
ܒܐܘܼܤܝܼܵܐ ܕܐܲܠܵܗܵܐ. ܐܵܘ ܟܲܕܼ ܠܵܐ ܐܝܼܬܼܵܘܗܝ ܟܝܵܢܵܐ ܕܐܲܠܵܗܵܐ:
ܡܸܬܼܥܒܸܕܼ ܘܠܵܐ ܥܵܒܹ̇ܕܼ. ܗ̤ܝ ܟܲܕܼ ܫܟܼܝܼܪܬܵܐ ܘܠܵܐ
ܡܸܫܟܿܚܵܢܝܼܬܼܵܐ ܗܵܘ̇ܝܵܐ.
ܠܙ. ܥܲܠ ܗܵܝ̇: ܕܐܵܦ ܐܲܝܠܹܝܢ ܕܒܲܡܢܵܬܼܵܐ ܐܵܡ̇ܪܝܼܢ ܕܐܸܫܬܲܚܠܲܦ
ܟܢܵܝܵܐ ܘܠܵܘ ܟ̱ܠܹܗ: ܠܵܐ ܡܸܬܼܡܲܨܝܵܢܝܼܬܼܵܐ ܐܵܡ̇ܪܝܼܢ:
ܐܵܦܸܢ ܓܹܝܪ ܢܸܬܸܿܠ ܐ̄ܢܵܫ ܕܒܲܡܢܵܬܼܵܐ ܫܲܚܠܸܦ ܟܝܵܢܹܗ: ܘܒܲܡܢܵܬܼܵܐ ܠܵܐ
ܐܸܫܬܲܚܠܲܦ: ܗܵܘ̇ ܕܥܵܒܹ̇ܕܼ ܝܲܬܿܝܼܪ ܡܵܪܵܢܵܝܵܐ ܐܝܼܬܼܵܘܗܝ ܡ̣ܢ ܗܵܘ̇
ܕܡܸܬܼܥܒܸܕܼ: ܘܡ̣ܢ ܗܵܘ̇ ܕܡܸܫܬܿܚܠܲܦ ܡ̣ܢ ܟܠܦܪܘܿܣ. ܠܲܝܬܿ
ܓܹܝܪ ܡܸܕܸܡ: ܕܝܲܬܿܝܼܪ ܡ̣ܢ ܡܢܵܬܹܗ ܐܝܼܬܼܵܘܗܝ ܡܵܪܵܢܵܝܵܐ ܒܲܟܼܝܵܢܹܗ.
ܐܸܠܵܐ ܗܵܘ̇ ܡܵܐ ܕܐܝܼܬܼܵܘܗܝ ܟ̱ܠܹܗ: ܗܘ̤ ܗܵܢܵܐ ܐܝܼܬܼܵܘܗܝ ܐܵܦ
pb. 41
ܒܲܡܢܵܬܹܗ. ܐܸܢ ܗܵܟܹܝܠ ܐܵܦ ܫܟܼܝܼܪ̈ܵܬܼܵܐ ܐܲܝܟܼ ܕܲܒܼܫܘܼܦܪܵܐ ܡܩܲܒܿܠܝܼܢ
ܚ̄ܢܲܢ: ܥܲܠ ܟܝܵܢܵܐ ܦܫܝܼܛܵܐ ܘܠܵܐ ܡܸܬܼܦܲܠܓܼܵܢܵܐ ܐܡܝܼܪ ܡܢܵܬܼܵܐ: ܐܵܦܠܵܐ
ܗܵܟܲܢܵܐ ܡ̣ܢ ܗܵܝ̇ ܕܲܫܟܼܝܼܪܵܐ ܘܠܵܐ ܡܬܼܘܿܡܵܝܵܐ ܡܲܡܸܕܼ ܐ̄ܢܵܫ. ܒܡ̇ܢ
ܓܹܝܪ ܗܵܘܹ̇ܐ ܒܐܘܼܤܝܼܵܐ: ܗܵܘ̇ ܡܵܠ ܕܠܵܐ ܐܝܼܬܼܵܘܗܝ ܐܘܼܤܝܼܵܐ. ܟܡܵܐ
ܓܹܝܪ ܕܐܝܼܬܼܵܘܗܝ ܐܲܠܵܗܑܵܐ: ܠܵܐ ܡܼܫܬܲܚ̱ܠܦܵܢܵܐ ܗ̄ܘ̣. ܟܲܕܼ ܠܵܐ ܕܹܝܢ
ܐܝܼܬܼܵܘܗܝ ܐܲܠܵܗܵܐ: ܠܵܐ ܥܵܒܹ̇ܕܼ ܡܸܕܸܡ. ܐܲܝܟܲܢܵܐ ܗܵܟܹܝܠ ܡܸܬܼܐܲܡܪܵܐ
ܗܵܕܹܐ: ܗܵܝ̇ ܕܐܵܦ ܠܵܐ ܠܡܸܬܼܪ̱ܢܵܝܘܼ ܡܸܫܟܹܚܵܐ: ܠܵܐ ܕܐܲܠܵܗܵܐ
ܢܸܫܬܲܚܠܲܦ ܠܐܘܼܤܝܼܵܐ ܐ̄ܚܪܹܬܼܵܐ: ܘܠܵܐ ܬܘܼܒܼ ܕܐܘܼܤܝܼܵܐ ܐ̄ܚܪܹܬܼܵܐ
ܬܸܫܬܲܚܠܲܦ ܠܐܘܼܤܝܼܵܐ ܕܐܲܠܵܗܵܐ: ܘܬܸܗܘܸܐ ܗܵܘ̇ ܡܵܐ ܕܐܝܼܬܼܵܘܗܝ
ܥܵܒܲܘܿܕܼܵܐ. ܗܵܢܵܘ ܕܹܝܢ: ܠܵܐ ܥܒܼܝܼܕܼܵܐ ܘܠܵܐ ܗܲܘܝܵܐ: ܗܵܘ̇ ܕܐܸܬܼܥ̱ܒܸܕܼ
ܘܲܗܘ̤ܵܐ. ܕܲܠܩܘܼܒܼܠܵܐ ܓܹܝܪ ܐܝܼܬܲܝܗܹܝܢ. ܐܲܝܟܲܢܵܐ ܓܹܝܪ ܡܸܬܼܚܲܙ̈ܝܵܢ ܠܵܟܼ
ܗܵܠܹܝܢ ܕܐܸܬܼܐ̱ܡܲܪ؟ ܐܵܢܵܐ ܤܵܦܩܵܐܝܼܬܼ ܐܸܬܼܐ̱ܡܲܪ ܒܲܬܼܪ̈ܲܝܗܘܿܢ ܓܲܒܹ̈ܐ:
ܐܲܝܠܹܝܢ ܕܲܡܩܲܝܼ̈ܡܵܢ ܐܝܼܕܼܵܐ ܠܡܸܠܲܝ̈ܗܘܿܢ ܕܗܵܢ̇ܘܿܢ ܐܵܦ ܕܕܼܝܼܠܲܢ؟ ܐܵܘ
ܥܕܲܟܹܿܝܠ ܚܲܤܝܼܪ ܡܸܕܸܡ ܕܙܵܕܹܩ ܠܲܩܢܘܿܡܲܝ̈ܗܘܿܢ: ܘܙܵܕܹܩ ܠܵܟܼ
ܠܲܡܫܲܡܠܵܝܘܼܬܹܗ: ܐܲܝܟܼ ܡ̇ܢ ܕܦܲܪܨܘܿܦܗܘܿܢ ܡܡܲܠܸܐ ܐܲܢ̄ܬܿ. ܐܸܢ
ܓܹܝܪ ܐܸܫܬܿܒܸܩ ܡܸܕܸܡ ܡܲܗܡܝܵܢܵܐܝܼܬܼ ܒܡܸܠܝ̈ܗܘܿܢ: ܚܲܝܠܬܼܵܢܵܐܝܼܬܼ
ܢܥܲܕܲܪ ܐܸܢܘܿܢ. ܐܲܝܟܲܢܵܐ ܕܟܲܕܼ ܢܸܤܬܲܒܼܪܘܼܢ ܠܤܲܓܿܝܼ̈ܐܹܐ ܕܐܝܼܬܲܝܗܘܿܢ
ܕܠܵܐ ܙܘܼܥܙܵܥ ܘܲܕܼܠܵܐ ܫܘܼܢܵܝ: ܟܲܕܼ ܠܵܐ ܐܝܼܬܲܝܗܘܿܢ: ܗܵܝܕܹܝܟ ܢܸܗܘܸܐ
ܪܲܒܿ ܐܵܦ ܥܪܘܼܩܝܼܗܘܿܢ.
ܤܘܿܦܪܘܿܢܝܼܘܿܣ. ܐܸܢܵܐ ܗܵܟܹܝܠ ܤܵܒܲ̇ܪ ܐ̄ܢܵܐ ܕܫܲܦܝܼܪ ܐܸܬܼܠܦܲܚ
ܡܸܠܹ̈ܐ ܕܲܬܼܪ̈ܲܝܗܘܿܢ ܓܲܒܼ̈ܐ: ܘܡܸܕܸܡ ܠܵܐ ܦܵܫ̣ ܠܲܢ. ܕܡܸܛܠ
pb. 42
ܗܵܢܵܐ ܓܹܝܪ ܐܵܦ ܚܕܼܝܼܬܼ ܠܫܵܥܲܬܼ ܫܸܬܼܩܵܐ: ܘܒܼܵܥܹ̇ܐ ܐ̄ܢܵܐ ܓܹܝܪ ܕܐܵܦ
ܐܲܢ̄ܬܿ ܬܦܘܼܫ ܠܵܟܼ. ܠܲܝܬܿ ܠܝܼ ܓܹܝܪ ܡܸܕܸܡ ܕܫܲܦܝܼܪ ܘܚܵܫܲܚ
ܕܢܸܬܼܐ̱ܡܲܪ ܠܩܘܼܒܼܠܵܟܼ: ܐܸܠܵܐ ܐܸܢ ܕܲܠܡܵܐ ܦܸܬܼܓܼܵܡܵܐ ܚܲܕܼ
ܕܲܬܼܟܼܝܼܠܵܐܝܼܬܼ ܡܸܬܼܚܲܫܚܝܼܢ ܒܹܗ ܠܘܵܬܼ ܗܵܘ̇ ܡܵܐ ܕܫܵܦܲܪ ܠܗܘܿܢ.
ܢܸܤܛܘܿܪܝܼܣ. ܐܲܝܢܵܘ؟ ܐܸܡܲܪ ܐܲܢ̄ܬܿ ܬܟܼܝܼܠܵܐܝܼܬܼ ܕܠܵܐ ܩܸܢܛܵܐ:
ܟܲܕܼ ܡܸܬܼܚܲܫܚ ܐܲܢ̄ܬܿ ܓܲܢ̄ܒܵܪܵܐܝܼܬܼ ܘܤܵܦܩܵܐܝܼܬܼ ܒܟܼܠ ܚܕܼܵܐ ܚܕܼܵܐ
ܡ̣ܢ ܡܸܠܲܝ̈ܗܘܿܢ ܒܲܕܼܡܘܼܬܼܵܐ ܕܝܼܠܗܘܿܢ. ܠܵܐ ܓܹܝܪ ܡܲܨܝܵܐ: ܕܲܒܼܚܘܼܫܵܒܼܵܐ
ܕܲܦܠܝܼܓܼ ܢܸܬܼܟܲܬܲܫ ܐ̄ܢܵܫ ܓܲܢ̄ܒܵܪܵܐܝܼܬܼ.
ܤܘܿܦܪܘܿܢܝܘܿܣ. ܗܵܟܲܢܵܐ ܘܵܠܹ̇ܐ ܠܲܚܕܼܵܝܘܼܬܼܵܐ: ܐܲܝܟܢܵܐ ܕܠܲܚܡܵܐ
ܟܲܕܼ ܗܵܘܹ̇ܐ ܦܲܓܼܪܵܐ. ܚܲܕܼ ܗ̄ܘ̣ ܦܲܓܼܪܵܐ ܘܗ̤ܘ ܟܲܕܼ ܗܘ̤: ܘܠܵܘ ܬܪܹܝܢ.
ܘܚܲܕܼ ܐܝܼܬܼܵܘܗܝ ܗܵܘ̇ ܕܡܸܬܼܪ̱ܢܸܐ ܕܟܼܝܵܢܵܐ ܕܦܲܓܼܪܵܐ: ܘܠܵܐ ܬܘܼܒܼ
ܒܲܟܼܝܵܢܹܗ ܩܲܕܼܡܵܝܵܐ ܡܸܬܼܪ̱ܢܸܐ: ܐܸܠܵܐ ܒܗܵܘ̇ ܕܠܹܗ ܗܘ̤ܵܐ ܐܲܝܟܼ ܕܠܹܗ.
ܕܡܸܟܹܝܠ ܠܵܐ ܗ̄ܘ̣ܵܐ ܗܵܘ̇ ܕܡܸܬܼܚܙܸܐ ܐܝܼܬܼܵܘܗܝ: ܐܸܠܵܐ ܗܵܘ̇ ܡܵܐ
ܕܡܸܬܼܪ̱ܢܸܐ. ܘܡܸܛܠ ܗܵܢܵܐ ܐܵܦ ܡܤܵܡ ܒܪܹܫܵܐ ܕܚܝܼܠܵܐ ܦܤܲܩ̣
ܗ̄ܘ̣ܵܐ ܫܠܝܼܚܵܐ: ܥܲܠ ܐܲܝܠܹܝܢ ܕܡܲܤܒܿܪܝܼܢ ܕܕܲܓܼܵܘܵܐ ܗ̄ܘ̣ ܦܲܓܼܪܹܗ
ܕܡܪܲܢ: ܟܲܕܼ ܐܵܡܲ݁ܪ ܗܵܟܲܢܵܐ: ܕܐܸܢ ܐܲܝܢܵܐ ܕܲܛܠܲܡ̣ ܠܢܵܡܘܿܤܵܐ
ܕܡܘܼܫܹܐ: ܥܲܠ ܦܘܼܡ ܬܪܹܝܢ ܘܲܬܼܠܵܬܼܵܐ ܕܠܵܐ ܪ̈ܲܚܡܝܼܢ ܡܵܐܹ̇ܬܼ: ܟܡܵܐ
ܝܲܬܿܝܼܪܵܐܝܼܬܼ ܡܸܤܬܿܒܲܪ ܕܠܲܡܤܵܡ ܒܪܹܫܵܐ ܩܲܫܝܵܐ ܡܸܫܬܿܘܸܐ: ܐܲܝܢܵܐ
ܕܕܵܫܹܗ ܠܲܒܼܪܹܗ ܕܐܲܠܵܗܵܐ: ܘܲܕܼܡܵܐ ܕܲܕܼܝܵܬܹܩܹܐ ܕܝܼܠܹܗ ܚܲܫܒܹܗ ܕܓܼܵܘܵܐ
ܕܒܹܗ ܐܸܬܼܩܲܕܲܫ: ܐܸܬܼܩܲܕܲܫ: ܘܲܠܪܘܼܚܵܐ ܕܛܲܝܒܿܘܼܬܼܵܐ ܨܲܥܲܪ. ܗܵܕܹܐ ܐܸܡ݂ܲܪ
pb. 43
ܠܘܼܩܒܲܠ ܐܲܝܠܹܝܢ ܕܚܵܫ̇ܒܿܝܼܢ ܗ̄ܘ̣ܵܘ ܠܹܗ ܠܲܕܼܡܹܗ ܘܲܠܦܲܓܼܪܹܗ
ܕܐܲܠܵܗܵܐ: ܕܡܵܐ ܘܦܲܓܼܪܵܐ ܕܒܲܪܢܵܫܵܐ. ܘܛܵܥܹ̇ܝܢ ܗ̄ܘ̣ܵܘ ܟܲܕܸ ܤܵܒܼ̇ܪܝܼܢ
ܕܐܲܝܟܼ ܕܲܕܓܼܵܘܵܐ ܕܟܼܠܢܵܫ ܐܝܼܬܼܵܘܗܝ: ܕܦܲܓܼܪܵܐ ܘܲܕܼܡܵܐ ܗܵܘ̇ ܕܒܹܗ
ܐܸܬܼܩܲܕܲܫܢܲܢ: ܘܲܠܪܘܼܚܵܐ ܕܛܲܝܒܿܘܼܬܼܵܐ ܨܲܥܲܪܘ. ܒܲܕܼܠܵܐ ܡܵܘܕܹܝܢ
ܕܲܒܼܪܵܐ ܗ̄ܘ̣ ܕܐܲܠܵܗܵܐ ܒܲܪ ܟܝܵܢܵܐ ܕܐܲܠܵܗܵܐ ܘܐܲܒܼܵܐ: ܐܸܠܵܐ ܦܲܓܼܪܵܐ
ܕܐ̄ܢܵܫܵܐ ܐܝܼܬܼܵܘܗܝ: ܗܵܘ̇ ܦܲܓܼܪܵܐ ܕܲܒܼܪܹܗ ܕܠܲܠܵܗܵܐ. ܗܵܢܵܐ ܕܲܠܦܲܓܼܪܹܗ
ܘܲܕܼܡܹܗ ܐܲܤܸܩ̣ ܐܸܢܘܿܢ ܠܐܘܼܤܝܼܵܐ ܕܝܼܠܹܗ: ܘܠܵܐ ܫܒܲܩ̣ ܕܢܸܬܼܪܫܘܿܢ
ܒܡܲܟܿܤܵܢܘܼܬܼܵܐ ܕܐܘܼܤܝܼܵܐ ܐ̄ܢܵܫܵܝܬܼܵܐ: ܐܸܠܵܐ ܕܒܼܐܘܼܤܝܼܵܐ ܕܝܼܠܹܗ
ܢܸܤܬܲܓܼܕܘܿܢ.
ܠܚ. ܥܲܠ ܗܵܝ̇: ܕܐܵܦ ܫܠܝܼܚܵܐ ܠܘܼܩܒܲܠ ܐܲܝܠܹܝܢ ܕܲܫܚܝܼܡܵܐ
ܘܛܲܡܐܵܐ ܚܵܫ̇ܒܿܝܼܢ ܠܲܕܡܹܗ ܘܲܠܦܲܓܼܪܹܗ ܕܲܡܫܝܼܚܵܐ ܐܵܡܲ݁ܪ: ܠܵܘ ܐܲܝܟܼ
ܡ̇ܢ ܕܡܸܫܬܲܚܠܵܦܘܼ ܐܸܫܬܲܚܠܲܦ ܠܲܟܼܝܵܢܵܐ ܕܐܲܠܵܗܵܐ ܡܸܠܬܼܵܐ: ܐܸܠܵܐ ܐܲܝܟܼ
ܡ̇ܢ ܕܡܲܤܠܹܝܢ ܗܸܢܘܿܢ ܠܲܕܼܡܵܐ ܕܢܸܩܪܘܿܢܵܝܗܝ ܕܡܵܐ: ܘܲܠܦܲܓܼܪܵܐ
ܕܢܸܩܪܘܿܢܵܝܗܝ ܦܲܓܼܪܵܐ. ܘܲܕܼܠܵܐ ܡܸܫܟܿܚܝܼܢ ܕܢܸܦܪ̱ܦܘܼܢ ܠܲܢ: ܐܲܝܟܼ
ܕܐܵܡ̇ܪܝܼܢ ܡܵܢܝܼܢܵܝܹ̈ܐ.
ܢܸܤܛܘܿܪܝܼܣ. ܐܵܪܵܐ ܙܥܘܿܪܝܵܐ ܗ̣̄ܝ ܠܵܟܼ ܬܲܚܘܝܼܬܼܵܐ ܗܵܕܹܐ ܕܲܒܼܫܸܬܼܩܵܐ
ܥܵܒܲܪ̇ ܐܲܢ̄ܬܿ ܥܠܹܝܗ̇؟ ܤܲܓܿܝܼ ܓܹܝܪ ܡܬܼܥܲܫܢܝܼܢ ܒܵܗ̇ ܗܸܢܘܿܢ:
ܘܠܵܐ ܙܵܕܹܩ ܗ̄ܘ̣ܵܐ ܠܵܟܼ ܕܡܲܗܡܝܼܵܢܵܐܝܼܬܼ ܬܩܲܪܒܼܝܼܗ̇. ܠܝܼ ܓܹܝܪ
ܦܠܲܛܬܲܢܝ ܗܵܕܹܐ ܒܲܕܼܡܘܼܬܼܵܐ ܕܐܲܝܠܹܝܢ ܕܲܠܓܸܠܵܐ ܚܵܙܹ̇ܝܢ: ܘܲܠܩܵܪܝܼܬܼܵܐ
ܠܵܐ. ܗܵܕܹܐ ܐܸܬܼܓܲܠܝܲܬ̤: ܢܒܲܚܢܝܼܗ̇ ܡ̣ܢ ܟܠ ܓܲܒܿܝܼ̈ܢ ܐܲܝܟܼ ܡܵܐ
pb. 44
ܕܐܝܼܬܹܝܗ̇: ܘܐܲܝܟܼ ܡܵܐ ܕܨܵܒܹ̇ܐ ܟܬܼܵܒܼܵܐ ܐܲܠܵܗܵܝܵܐ ܕܲܢܤܲܟܿܠܲܢ: ܐܲܝܟܼ ܕܠܵܐ
ܢܸܦܸܠ ܒܥܘܼ̈ܕܵܠܹܐ ܟܹܐܢܹ̈ܐ ܘܐܲܠܵܗܵܝܹ̈ܐ.
ܠܛ. ܕܒܲܟܼܡܵܐ ܙܢܝܼ̈ܢ ܡܸܬܼܐܡܲܪ ܫܡܵܐ ܗܵܘ̇: ܕܝܵܘܢܵܐܝܼܬܼ ܡܸܬܼܩܪܸܐ
ܩܝܼܘܿܢܘܿܢ.
ܘܢܹܐܡܲܪ ܩܲܕܼܡܵܝܑܬܼ ܐܵܦ ܥܲܠ ܚܫܲܚܬܼܵܐ ܗܵܕܹܐ: ܕܡܸܬܼܩܲܪܝܵܐ ܝܵܘܢܵܐܝܼܬܼ
ܩܝܼܘܿܢܘܿܢ. ܢܵܦܠܵܐ ܕܹܝܢ ܒܡܸܠܬܼܵܐ ܥܲܠ ܡܤܲܝܒܼܵܐ: ܘܥܲܠ ܓܵܘܵܐ:
ܘܥܲܠ ܫܵܘܬܵܦܘܼܬܼܵܐ. ܥܲܠ ܡܤܲܝܒܼܵܐ: ܐܲܝܟܼ ܗܵܝ̇ ܕܐܸܡ݂ܲܪ
ܒܲܦܪܲܟܿܤܝܼܣ: ܕܡܸܡܬܼܘܿܡ ܠܵܐ ܐܸܟܼܠܹ̇ܬܼ ܟܠ ܕܲܛܡܲܐ ܘܲܟܤܲܝܲܒܼ.
ܥܲܠ ܓܵܘܐ ܕܹܝܢ: ܐܲܝܟܼ ܗܵܝ̇ ܕܟܼܠܡܸܕܸܡ ܕܐܼܝܼܬܼ ܗ̄ܘ̣ܵܐ ܠܗܘܿܢ
ܠܲܫܠܝܼܚܹ̈ܐ ܕܓܼܵܘܵܐ ܗ̄ܘ̣ܵܐ. ܥܲܠ ܫܵܘܬܵܦܘܼܬܼܵܐ ܕܹܝܢ: ܐܲܝܟܼ ܗܵܝ̇ ܕܟܼܵܤܵܐ
ܗܵܘ̇ ܕܬܼܵܘܕܝܼܬܼܵܐ ܕܲܡܒܲܪܟܼܝܼܢ ܚ̄ܢܲܢ: ܠܵܐ ܗ̄ܘ̣ܵܐ ܫܵܘܬܵܦܘܼܬܼܵܐ ܐܝܼܬܼܵܘܗܝ
ܕܲܕܼܡܹܗ ܕܲܡܫܝܼܚܵܐ؟ ܘܠܲܚܡܵܐ ܗܵܘ̇ ܕܩܵܨܝܢ ܚ̄ܢܲܢ: ܠܵܐ ܗ̄ܘ̣ܵܐ
ܫܵܘܬܵܦܘܼܬܼܵܐ ܐܝܼܬܼܵܘܗܝ ܕܦܲܓܼܪܹܗ ܕܲܡܫܝܼܚܵܐ؟ ܘܬܼܘܼܒܼ: ܗܵܘ̇ ܕܲܡܩܲܕܸܫ
ܘܗܵܢܘܿܢ ܕܐܸܬܼܩܲܕܲܫܘ: ܡ̣ܢ ܚܲܕܼ ܐܸܢܘܿܢ ܟܠܗܘܿܢ. ܡܸܛܠ ܗܵܢܵܐ ܠܵܐ
ܒܗܸܬܼ ܕܢܸܩܪܸܐ ܐܸܢܘܿܢ ܐܲܚܵܘ̈ܗܝ ܟܲܕܼ ܐܸܡܲ݁ܪ: ܕܐܹܤܲܒܲܪ ܫܡܵܟܼ ܠܐܲܚܲܝ̈:
ܘܲܒܼܓܼܵܘ ܟܢܘܼܫܬܼܵܐ ܐܹܫܲܒܿܚܵܟܼ. ܘܬܼܘܼܒܼ: ܕܐܸܢܵܐ ܐܸܗܘܸܐ ܬܟܼܝܼܠ ܥܠܵܘܗܝ.
ܘܬܼܘܼܒܼ: ܗܵܐ ܐܸܢܵܐ ܘܲܒܼ̈ܢܲܝܵܐ ܕܝܲܗ̣̄ܒܼ ܠܝܼ ܐܲܠܵܗܵܐ. ܡܸܛܠ ܗܵܟܹܝܠ
ܕܲܒܼ̈ܢܲܝܵܐ ܐܸܫܬܵܘܬܲܦܘ ܒܒܸܤܪܵܐ ܘܲܕܼܡܵܐ: ܐܵܦ ܗ̤ܘ ܒܵܗ̇ ܒܲܕܼܡܘܼܬܼܵܐ
ܐܸܫܬܵܘܬܲܦ ܒܗܹܝܢ ܒܗܵܠܹܝܢ. ܡܸܛܠ ܗܵܟܹܝܠ ܕܲܫܡܵܐ ܗܵܢܵܐ ܡܸܬܼܩܪܸܐ
ܥܲܠ ܐ̄ܢܵܫܵܐ ܕܛܲܡܲܐ ܘܲܡܤܲܝܲܒܼ: ܘܬܼܘܼܒܼ ܥܲܠ ܓܵܘܵܐ: ܘܬܼܘܼܒܼ ܥܲܠ
ܫܵܘܬܵܦܘܼܬܼܵܐ: ܐܵܪܵܐ ܠܗܵܕܹܐ ܩܪܵܝܵܬܼܵܐ ܕܢܵܦ̇ܠܵܐ ܥܲܠ ܬܠܵܬܼ ܚܲܫ̈ܚܵܢ:
pb. 45
ܘܠܵܐ ܡܦܲܪܫܵܐ ܠܘܼܩܒܲܠ ܐܲܝܢܵܐ ܪܸܥܝܵܢܵܐ ܐܲܡ̣ܪܵܗ̇ ܫܠܝܼܚܵܐ ܘܤܵܡ̣:
ܕܡܸܛܠ ܗܵܕܹܐ ܕܵܝ̇ܫܝܼܢ ܠܲܒܼܪܹܗ ܕܠܲܠܵܗܵܐ: ܐܲܝܕܵܐ ܗ̣̄ܝ ܚܲܬܿܝܼܬܿܬܵܐ ܡ̣ܢ
ܗܵܠܹܝܢ ܬܠܵܬܼ؟
ܤܘܿܦܪܘܿܢܝܘܿܣ. ܠܘܼܩܒܲܠ ܐܲܝܠܹܝܢ ܕܚܵܫ̇ܒܿܝܼܢ ܠܹܗ: ܕܠܵܘ ܥܲܠ
ܐܲܦܲܝ̈ܢ: ܐܸܠܵܐ ܒܡܵܘܬܵܐ ܕܝܼܠܹܗ ܐܲܝܟܼ ܟܠܢܵܫ ܡܝܼܬܼ. ܘܐܲܝܟܼ ܚܲܕܼ ܡ̣ܢ
ܒܢܲܝ̈ ܐ̄ܢܵܫܵܐ ܗ̄ܘ̣ܵܐ: ܘܐܵܦ ܟܲܕܼ ܚܲܝ ܘܐܵܦ ܟܲܕܼ ܡܝܼܬܼ: ܘܡܸܕܸܡ
ܝܲܬܿܝܼܪܵܐ ܠܵܐ ܩܢܸܐ ܗ̄ܘ̣ܵܐ. ܘܠܵܐ ܝܵܕܼܥ̇ܝܼܢ ܕܲܒܼܪܹܗ ܗ̄ܘ̣ ܕܐܲܠܵܗܵܐ: ܘܲܕܼܡܹܗ
ܕܡܵܐ ܗ̄ܘ̣ ܕܐܲܠܵܗܑܵܐ: ܘܠܵܐ ܗ̄ܘ̣ܵܐ ܕܒܲܪܢܵܫܵܐ.
ܢܸܤܛܘܿܪܝܼܣ. ܐܵܪܵܐ ܗܵܕܹܐ ܐܵܡ̇ܪܝܼܢ ܐܢ̄ܬܿܘܿܢ: ܕܦܲܓܼܪܵܐ ܘܲܕܼܡܵܐ
ܐܘܼܤܝܼܵܐ ܕܲܒܼܪܵܐ ܕܐܲܠܵܗܵܐ ܐܝܼܬܲܗܘܿܢ؟ ܐܵܘ ܕܡ̣ܢ ܐܘܼܤܝܼܵܐ ܐ̄̈ܢܵܫܵܝܵܬܐ
ܐܝܼܬܼܵܘܗܝ ܦܲܓܼܪܵܐ ܘܲܕܼܡܵܐ: ܘܲܗܘ̤ܵܘ ܟܝܵܢܵܐ ܕܐܲܠܵܗܘܼܬܼܵܐ؟ ܒܸܤܪܵܐ
ܓܹܝܪ ܠܵܐ ܐܝܼܬܼܵܘܗܝ ܒܸܤܪܵܐ: ܐܲܝܟܼ ܕܐܵܡ̇ܪܝܼܢ ܐܢ̄ܬܿܘܿܢ: ܡܸܛܠ
ܕܐܸܫܬܲܚܠܲܦ ܠܹܗ ܒܝܲܕܼ ܡܘܼܙܵܓܼܵܐ ܘܲܚܕܼܵܝܘܼܬܼܵܐ ܠܐܘܼܤܝܼܵܐ ܕܐܲܠܵܗܵܐ
ܡܸܠܬܼܵܐ. ܘܛܘܼܒܼܵܢܵܐ ܫܠܝܼܚܵܐ: ܟܲܕܼ ܡܒܲܙܲܚ ܗ̄ܘ̣ܵܐ ܪܵܘܪܒܼܵܐܝܼܬܼ ܒܐܲܝܠܹܝܢ
ܕܡܵܘܕܹܝܢ ܗ̄ܘ̣ܵܘ ܦܲܓܼܪܹܗ ܘܲܕܼܡܹܗ: ܘܲܠܗܵܢܵܐ ܛܲܡܐܵܐ ܡܲܤܒܲܪܝܼܢ
ܗ̄ܘ̣ܵܘ ܕܐܝܼܬܼܵܘܗܝ: ܐܲܡ̣ܪܵܗ̇.
ܤܘܿܦܪܘܿܢܝܘܿܣ. ܠܵܘ ܠܘܼܩܒܲܠ ܐܲܝܠܹܝܢ ܕܟܼܠ ܟ̱ܠܹܗ ܠܵܐ
ܡܵܘܕܹܝܢ ܦܲܓܼܪܵܐ ܒܲܫܪܵܪܵܐ: ܘܠܵܘ ܠܘܼܩܒܲܠ ܐܲܝܠܹܝܢ ܕܲܡܫܲܚ̱ܠܦܝܼܢ
ܐܵܘ ܡܚܲܒܿܠܝܼܬ ܠܐܘܼܤܝܼܵܐ ܕܒܸܤܪܵܐ ܐܲܝܟܼ ܕܲܒܼܢܘܼܪܵܐ: ܐܵܘ ܠܐܘܼܤܝܼܵܐ
ܕܒܸܤܪܵܐ ܛܲܡ̱ܐܬܼܵܐ ܒܝܲܕܼ ܡܘܼܙܵܓܼܵܐ: ܐܸܡ݂ܲܪ ܗܵܠܹܝܢ. ܐܸܠܵܐ ܠܘܼܩܒܲܠ
ܐܝܠܹܝܢ ܕܡܵܘܕܹܝܢ ܒܸܤܪܵܐ ܘܲܕܼܡܵܐ: ܘܲܠܗܵܢܵܐ ܕܓܼܵܘܵܐ ܚܫ̇ܒܿܝܼܢ ܠܹܗ.
pb. 46
ܢܸܤܛܘܿܪܝܼܣ. ܐܲܝܟܼ ܕܡܸܬܼܚܲܙܝܐ ܠܝܼ: ܠܵܘ ܠܘܼܩܒܲܠ ܗܵܠܹܝܢ
ܠܵܚܹ̈ܡ ܝܲܬܿܝܼܪܵܐܝܼܬܼ ܪܸܥܝܵܢܵܐ ܕܲܠܒܼܝܼܟܼ ܐܲܢ̄ܬܿ: ܐܸܠܵܐ ܠܐܲܝܠܹܝܢ ܕܲܡܫܲܚ̱ܠܦܝܼܢ
ܠܐܘܼܤܝܼܵܐ ܕܐܲܠܵܗܵܐ ܠܲܟܼܝܵܢܵܐ ܕܒܸܤܪܵܐ ܘܲܕܼܡܵܐ: ܟܲܕܼ ܠܵܐ ܤܵܒܼ̇ܪܝܼܢ
ܕܐܘܼܤܝܼܵܐ ܕܒܸܤܪܹܗ ܘܲܕܼܡܹܗ ܕܡܵܪ̈ܲܢ: ܕܓܼܵܘܵܐ ܐܝܼܬܹܝܗ̇. ܐܸܠܵܐ ܕܡ̣ܢ
ܐܲܠܵܗܵܐ ܡܸܠܬܼܵܐ ܐܝܼܬܹܝܗ̇: ܘܠܵܘ ܡ̣ܢ ܒܢܲܝ̈ܬܵܫܵܐ.
ܤܘܿܦܪܘܿܢܝܘܿܣ. ܡܵܕܹܝܢ ܠܗܵܠܹܝܢ ܠܵܐ ܙܵܕܹܩ ܠܲܡܦܲܢܵܝܘܼ
ܦܸܬܼܓܼܵܡܵܐ: ܐܸܠܵܐ ܠܡܲܟܿܤܵܢܘܼܬܼܵܐ: ܥܲܠ ܕܐܸܬܼܚܲܫܲܚܘ ܒܡܸܠܹ̈ܐ
ܕܕܲܠܩܘܼܒܼܠܵܐ. ܐܸܡܲܪ ܕܹܝܢ ܡܸܟܸܿܝܠ ܥܲܠ ܐܲܝܠܹܝܢ ܕܡܲܤܒܿܪܝܼܢ ܕܡ̣ܢ
ܐܘܼܤܝܼܵܐ ܕܐܲܠܵܗܵܐ ܗܘ̤ܵܐ ܒܸܤܪܵܐ.
ܡܡ. ܕܐܲܝܟܲܢܵܐ ܙܵܕܸܩ ܠܡܸܤܬܲܟܵܠܘܼ ܠܗܵܝ̇: ܕܗܵܘ̇ ܕܲܡܩܲܕܸܫ
ܘܗܵܢܘܿܢ ܕܡܸܬܼܩܲܕܫܝܼܢ: ܡ̣ܢ ܚܲܕܼ ܐܢܘܿܢ ܟܠܗܘܿܢ.
ܢܸܤܛܘܿܪܝܼܣ. ܛܲܥܝܵܐ ܠܵܟܼ: ܕܬܲܪܬܹܝܢ ܕܕܲܠܩܘܼܒܼܠܵܐ ܠܵܐ ܐܸܡ݂ܲܪ
ܫܠܝܼܚܵܐ. ܗܵܕܹܐ ܓܹܝܪ ܒܨܸܵܐ: ܕܡ̣ܢ ܚܲܕܼ ܢܸܗܘܸܐ ܗܵܘ̇ ܕܲܡܩܲܕܼܫ
ܘܗܵܢ̇ܘܿܢ ܕܡܸܬܼܩܲܕܫܝܼܢ. ܘܐܲܚܹ̈ܐ ܕܡ̣ܢ ܚܕܼܵܐ ܐܘܼܤܝܼܵܐ: ܘܠܵܘ ܡ̣ܢ
ܐ̄ܚܪܹܬܼܵܐ ܘܲܐ̄ܚܪܹܬܼܵܐ: ܘܲܒܼܢܵܘ̈ܗܝ ܐܲܝܟܼ ܡ̇ܢ ܕܡܸܢܹܗ ܫܵܘ̇ܚܝܼܢ: ܟܲܕܼ ܐܵܡܲ݁ܪ
ܗܵܟܲܢܵܐ: ܗܵܘ̇ ܓܹܝܪ ܕܲܡܩܲܕܼܫ ܘܗܵܢ̇ܘܿܢ ܕܡܸܬܼܩܲܕܫܝܼܢ ܡ̣ܢ ܚܲܕܼ
ܐܸܢܘܿܢ ܟܠܗܘܿܢ. ܡܵܕܹܝܢ: ܐܵܦ ܕܡܵܐ ܗܵܘ̇ ܕܒܹܗ ܐܸܬܼܩܲܕܲܫܢܲܢ ܘܥܲܠ
ܐܲܦܲܝ̈ܢ ܐܸܬܼܐ̱ܫܸܕܼ: ܡ̣ܢ ܚܲܕܼ ܐܝܼܬܼܵܘܗܝ. ܘܲܒܼܗܵܕܹܐ ܐܵܦ ܐܲܚܵܘ̈ܗܝ
ܐܝܼܬܲܝܢ: ܐܲܝܟܼ ܕܡ̣ܢ ܚܲܕܼ ܐܲܒܼܵܐ. ܬܘܼܒܼ ܕܹܝܢ ܐܵܦ ܒܢܵܘ̈ܗܝ: ܐܲܝܟܼ
ܐܲܝܠܹܝܢ ܕܐܘܼܤܝܼܵܐ ܚܕܼܵܐ ܩܢܹܝܢ: ܗܵܝ̇ ܕܒܼܵܗ̇ ܐܵܦ ܒܢܲܝ̈ܵܐ ܐܝܼܬܲܝܢ. ܠܵܐ
ܓܹܝܪ ܐܝܼܬܼ ܠܹܗ ܠܐܲܠܵܗܵܐ ܡܸܠܬܼܵܐ ܗܵܝ̇ ܕܗ̤ܘ ܘܲܚܢܲܢ ܡ̣ܢ ܚܲܕܼ ܢܸܗܘܸܐ:
pb. 47
ܐܵܘ ܒܢܲܝ̈ ܕܡܘܼܬܹܗ ܢܸܬܼܩܪܸܐ: ܕܡܸܛܠ ܗܵܕܹܐ ܢܸܗܘܸܐ ܐܲܚܵܘ̈ܗܝ.
ܒܗܵܝ̇ ܕܥܸܠܬܼܵܐ ܕܲܕܼܡܘܼܬܼܵܐ ܠܲܝܬܿ ܠܲܢ: ܐܲܝܟܼ ܕܐܲܚܹ̈ܐ ܕܡ̣ܢ ܐܲܒܼܵܐ ܚܲܕܼ.
ܘܠܵܐ ܬܘܼܒܼ ܕܢܸܗܘܸܐ ܚܢܲܢ ܒܢܵܘ̈ܗܝ: ܒܲܕܼܠܵܘ ܒܵܗ̇ ܟܲܕܼ ܒܵܗ̇
ܒܐܘܼܤܝܼܵܐ ܡܸܫܬܵܘܬܿܦܝܼܢܲܢ. ܟܲܕܼ ܡܩܲܛܪܸܓܼ ܗܵܟܹܝܠ ܠܐܲܝܠܹܝܢ ܕܠܵܐ
ܡܸܬܿܛܦܝܼܤܝܼܢ ܠܲܡܩܲܒܵܠܘܼ: ܕܲܕܼܡܵܐ ܕܲܒܼܢܲܝ̈ܢܵܫܵܐ ܡܸܫܟܲܚ ܠܲܡܩܲܕܵܫܘܼ:
ܘܤܵܒܼ̇ܪܝܼܢ ܕܛܲܡܐܵܐ ܐܝܼܬܼܵܘܗܝ: ܐܲܝܟܼ ܡ̇ܢ ܕܲܕܡܵܐ ܐܝܼܬܼܵܘܗܝ ܕܒܲܪܢܵܫܵܐ:
ܘܡܸܛܠ ܗܵܢܵܐ ܛܲܡܐܵܐ ܚܵܫ̇ܒܿܝܼܢ ܠܹܗ ܠܲܕܼܡܵܐ ܕܲܕܝܵܬܹܩܹܐ ܗܵܘ̇ ܕܒܹܗ
ܐܸܬܼܩܲܕܲܫܢܲܢ: ܘܐܸܫܬܵܘܙܲܒܼ̄ܢ ܡ̣ܢ ܡܵܘܬܵܐ ܒܝܲܕܼ ܡܵܘܬܵܐ ܫܲܪܝܼܪܵܐ
ܕܒܲܪܢܵܫܵܐ: ܐܸܡ݂ܲܪ ܛܘܼܒܼܵܢܵܐ ܦܵܘܠܘܼܣ ܗܵܠܹܝܢ. ܘܲܒܼܗܵܕܹܐ ܐܵܡܲ݁ܪ
ܠܲܢ ܕܡ̣ܢ ܚܲܕܼ ܐܝܼܬܲܝܢ: ܘܲܒܼܗܵܕܹܐ ܩܵܪܹܐ ܠܲܢ ܐܲܚܵܘ̈ܗܝ: ܡܸܛܠ ܟܝܵܢܵܐ
ܗܵܘ̇ ܕܡ̣ܢ ܐܲܒܼܵܗܲܝ̈ܢ ܐܸܬܼܝܼܠܸܕܼ: ܐܵܦ ܡܝܼܬܼ ܚܠܵܦܲܝܢ. ܒܗܵܝ̇ ܓܹܝܪ
ܕܐܸܬܼܝܼܠܸܕܼ: ܡ̣ܢ ܓܸܢܤܲܢ ܐܝܼܬܼܵܘܗܝ: ܘܟܼܠܲܢ ܡ̣ܢ ܚܲܕܼ. ܒܗܵܝ̇ ܕܹܝܢ
ܕܡܝܼܬܼ ܥܲܠ ܐܲܦܲܝ̈ܢ: ܘܚܲܕܼܬܼ ܒܠܵܐ ܡܵܝܘܿܬܼܘܼܬܼܵܐ ܘܠܵܐ ܡܸܬܼܚܲܒܿܠܵܢܘܼܬܼܵܐ
ܠܬܼܘܼܩܵܢܵܐ ܕܲܥܬܼܝܼܕܼ. ܒܢܵܘ̈ܗܝ ܐܝܼܬܲܝܢ: ܒܕܐܝܼܬܼܵܘܗܝ ܐܲܒܼܵܐ ܕܥܵܠܡܵܐ
ܕܲܥܬܼܝܼܕܼ. ܘܡܸܛܠ ܗܵܢܵܐ: ܠܵܘ ܠܲܚܕܼܵܐ ܚܲܕܼ ܦܲܓܼܪܵܐ ܐܝܼܬܲܝܢ ܟ̱ܠܲܢ؟
ܟ̱ܠܲܢ ܓܹܝܪ ܡ̣ܢ ܗܵܘ̇ ܗ̄ܘ̣ ܚܲܕܼ ܠܲܚܡܵܐ ܢܵܤ̇ܒܿܝܼܢ ܚ̄ܢܲܢ: ܒܗܵܘ̇
ܕܲܡܫܵܘܬܸܦ ܠܲܢ ܒܹܗ ܟܲܕܼ ܒܹܗ ܒܲܕܼܡܵܐ ܐܵܦ ܒܒܸܤܪܵܐ: ܕܐܝܼܬܲܝܗܘܿܢ
ܡܸܢܹܗ ܟܲܕܼ ܡܸܢܹܗ ܕܲܟܼܝܵܢܵܐ: ܘܡܸܫܬܵܘܬܿܦܝܼܢܲܢ ܠܹܗ ܒܲܩܝܵܡܬܼܵܐ ܕܡ̣ܢ
ܒܹܝܬܼ ܡܝܼ̈ܬܹܐ ܘܲܒܼܠܵܐ ܡܵܝܘܿܬܼܘܼܬܼܵܐ. ܗܵܟܲܢܵܐ ܐܝܼܬܲܝܢ ܠܹܗ: ܐܲܝܟܲܢܵܐ
ܕܐܝܼܬܼܵܘܗܝ ܠܲܚܡܵܐ ܦܲܓܼܪܹܗ. ܐܲܝܟܲܢܵܐ ܠܲܡ ܕܚܲܕܼ ܗ̄ܘ̣ ܠܲܚܡܵܐ ܗܵܘ̇:
pb. 48
ܗܵܟܲܢܵܐ ܟ̱ܠܲܢ ܚܲܕܼ ܚܢܲܢ ܦܓܲܪ: ܟ̱ܠܲܢ ܓܹܝܪ ܡ̣ܢ ܗܵܘ̄ ܗ̄ܘ̣ ܚܲܕܼ
ܠܲܚܡܵܐ ܢܵܤܒܿܝܼܢܲܢ.
ܡܐ. ܥܲܠ ܗܵܝ̇: ܕܐܸܢ ܐܘܼܤܝܼܵܐ ܕܦܲܓܼܪܵܐ ܒܲܡܫܝܼܚܵܐ ܐܸܫܬܲܚ̱ܠܦܲܬ̤
ܠܐܲܠܵܗܘܼܬܼܵܐ: ܐܵܦ ܚܢܲܢ ܡܸܫܬܲܚ̱ܠܦܝܼܢܲܢ ܠܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ:
ܚܲܕܼ ܓܹܝܪ ܓܘܼܫܡܵܐ ܘܚܲܕܸ ܦܲܓܼܪܵܐ ܐܝܼܬܲܝܢ ܟ̱ܠܲܢ.
ܡܵܕܹܝܢ ܐܵܦ ܚܢܲܢ ܠܒܸܤܪܹܗ ܐܸܫܬܲܚܠܲܦܢܲܢ: ܘܐܝܼܬܲܝܢ ܦܲܓܼܪܹܗ.
ܘܠܵܐ ܡܸܟܹܝܠ ܐܝܼܬܲܢ ܦܲܓܼܪܵܐ ܘܲܕܼܡܵܐ ܕܒܲܪܢܵܫܵܐ: ܐܸܠܵܐ ܦܲܓܼܪܹܗ ܕܝܼܠܹܗ.
ܚܲܕܼ ܗ̄ܘ̣ ܓܹܝܪ ܠܲܚܡܵܐ: ܡܸܛܠ ܗܵܢܵܐ ܟ̱ܠܲܢ ܚܲܕܼ ܚܢܲܢ ܦܓܲܪ:
ܒܕܐܝܼܬܲܝܢ ܦܲܓܼܪܹܗ ܕܲܡܫܝܼܚܵܐ. ܐܲܢ̇ܬܿܘܿܢ ܠܲܡ ܕܹܝܢ ܦܲܓܼܪܹܗ ܐܲܢ̄ܬܿܘܿܢ
ܕܲܡܫܝܼܚܵܐ: ܘܗܲܕܵܡܹ̈ܐ ܒܲܡ̈ܢܵܘܵܬܼܟܼܘܼܢ. ܠܡܵܐ ܒܫܘܼܚܠܵܦ ܐܘܼܤܝܼܵܐ
ܐܝܼܬܼܵܘܗܝ ܠܲܚܡܵܐ ܦܲܓܼܪܹܗ ܕܲܡܫܝܼܚܵܐ؟ ܐܵܘ ܚܢܲܢ ܦܲܓܼܪܹܗ ܒܫܘܼܚܠܵܦܵܐ؟
ܐܵܘ ܦܲܓܼܪܹܗ ܕܲܒܼܪܹܗ ܕܐܲܠܵܗܵܐ ܚܲܕܼ ܐܝܼܬܼܵܘܗܝ ܒܐܲܠܵܗܵܐ ܡܸܠܬܼܵܐ
ܒܲܟܼܝܵܢܵܐ؟ ܐܸܠܵܐ ܐܸܢ ܚܲܕܼ ܐܸܢܘܿܢ ܒܲܟܼܝܵܢܵܐ: ܠܲܝܬܿ ܡܸܟܹܝܠ ܠܲܚܡܵܐ: ܘܠܵܐ
ܬܘܼܒܼ ܐܝܼܬܼܵܘܗܝ ܦܲܓܼܪܵܐ. ܫܠܝܼܚܵܐ ܕܹܝܢ: ܠܗܵܢ̇ܘܿܢ ܕܦܲܓܼܪܵܢ ܕܲܒܼܪܵܐ
ܕܐܲܠܵܗܵܐ ܡܤܲܝܒܼܵܐ ܚܵܫ̇ܒܿܝܼܢ ܗ̄ܘ̣ܵܘ ܐܵܡܲ݁ܪ ܕܕܵܝ̇ܫܝܼܢ ܠܲܒܼܪܹܗ ܕܐܲܠܵܗܵܐ:
ܒܗܵܝ̇ ܕܡܲܤܠܹܝܢ ܐܵܦ ܟܵܦ̇ܪܝܼܢ ܒܹܗ: ܠܵܘ ܥܲܠ ܐܲܝܠܹܝܢ ܕܡܵܘܕܹܝܢ
ܒܦܲܓܼܪܵܐ ܕܡ̣ܢ ܟܵܝܵܢܵܐ ܗ̄ܘ̣ ܕܝܼܠܲܢ: ܡܸܬܼܚܲܫܒܼܝܼܢ ܠܹܗ ܡܤܲܝܒܼܵܐ. ܐܸܠܵܐ
ܕܲܚܠܵܦ ܦܘܼܪܩܵܢܵܐ ܕܟܼܠܲܢ ܐܸܬܼܝܼܗܸܒܼ: ܒܕܐܝܼܬܼܵܘܗܝ ܕܲܟܼܝܵܐ ܘܲܕܼܠܵܐ
ܡܘܼܡ: ܘܲܕܼܦܲܪܝܼܩ ܡ̣ܢ ܚܛܵܗܹ̈ܐ: ܗܵܘ̇ ܕܥܲܠ ܐܲܦܲܝ̈ ܚܛܵܗܲܝ̈ܢ
ܟܠܗܘܿܢ ܡܵܘܬܵܐ ܩܲܒܸܿܠ̣: ܘܲܗܘ̤ܵܐ ܐܲܝܟܼ ܩܘܼܪܒܵܢܵܐ ܠܐܲܠܵܗܵܐ. ܐܸܢ
ܓܹܝܪ ܟ̱ܠܲܢ ܠܵܘ ܡ̣ܢ ܚܲܕܼ ܐܝܼܬܲܝܢ: ܠܵܐ ܐܲܚܵܘ̈ܗܝ ܘܠܵܐ ܒܢܲܝ̈ܵܐ ܕܝܼܠܹܗ
pb. 49
ܟܹܐܢܵܐܝܼܬܼ ܐܸܬܼܩܪܝܼܢ ܚ̄ܢܲܢ: ܘܠܵܐ ܬܘܼܒܼ ܠܲܚܡܹܐ ܘܠܵܐ ܓܘܼܫܡܹܗ
ܐܝܼܬܲܝܢ. ܐܸܢ ܕܹܝܢ ܟܠܗܹܝܢ ܗܵܠܹܝܢ ܐܝܼܬܲܝܗܹܝܢ ܫܲܪܝܼܪܵܐܝܬܼ ܕܲܡܫܝܼܚܵܐ:
ܚܢܲܢ ܦܲܓܼܪܹܗ ܘܲܒܼܢܲܝ̈ ܟܝܵܢܹܐ ܐܝܼܬܲܝܢ. ܒܗܵܝ̇ ܕܗܵܢܵܐ ܡܸܕܸܡ ܐܝܼܬܲܝܢ:
ܗܵܘ̇ ܡܵܐ ܕܐܵܦ ܐܘܼܤܝܼܵܐ ܕܦܲܓܼܪܹܗ ܐܝܼܬܹܝܗ̇. ܘܐܵܦ ܗܵܠܹܝܢ ܐܸܬܼܝܼܕܲܥ
ܒܝܲܕܼ ܡܸܠܹ̈ܐ ܕܕܘܿܓܡܵܐ ܕܝܼܠܗܘܿܢ: ܕܲܠܗܵܠܹܝܢ ܘܲܠܗܵܠܹܝܢ
ܡܸܫܬܲܚ̱ܠܦܝܼܢ: ܒܕܲܫܪܵܪܵܐ ܠܵܐ ܩܢܹܝܢ.
ܡܒ. ܠܘܼܩܒܲܠ ܐܲܝܠܹܝܢ ܕܐܵܡ̇ܪܝܼܢ: ܕܒܼܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ
ܗܘ̤ܵܬܼ ܚܕܲܝܘܼܬܼܵܐ. ܘܲܚܠܵܦ ܟܝܵܢܵܐ ܕܐ̄ܢܵܫܘܼܬܼܵܐ: ܟܝܵܢܵܐ ܕܐܲܠܵܗܘܼܬܼܵܐ ܡܲܠܝ.
ܡ̣ܢ ܗܵܠܹܝܢ ܬܘܼܒܼ ܓܘܼܕܵܐ ܐ̄ܚܪܹܬܼܵܐ ܩܵܡܲܬ̤: ܕܲܒܼܡܸܕܸܡ ܕܵܡܹ̇ܝܢ
ܠܗܘܿܢ: ܘܲܒܼܡܢܸܕܸܡ ܦܪܝܼܫܝܼܢ ܡܸܢܗܘܿܢ. ܫܵܠܡ̇ܝܼܢ ܕܹܝܢ ܐܵܦ
ܠܐܵܪ̈ܝܢܹܐ: ܘܬܼܘܼܒܼ ܤܵܕܩ̇ܝܼܢ ܡܸܢܗܘܿܢ. ܒܙܢܵܐ ܕܹܝܢ ܐ̄ܚܪܹܢܵܐ: ܠܵܒܼܫ̇ܝܼܢ
ܦܲܪܨܘܿܦܵܐ ܕܐܵܪ̈ܬܵܕܘܿܟܿܤܹܐ: ܟܲܕܼ ܐܵܦ ܡ̣ܢ ܗܵܢܵܐ ܡܸܢܕܪܹܫ
ܡܸܬܼܪܲܚܩܝܼܢ. ܘܲܒܒܼܗܵܕܹܐ: ܒܹܗ ܒܟܼܘܼܤܪܗܵܢܵܐ ܕܩܲܕܼܡܵܝܹ̈ܐ ܢܵܦ̇ܠܝܼܢ. ܡܵܘܕܹܝܢ
ܕܹܝܢ ܒܦܲܓܼܪܹܗ ܕܡܵܪܲܢ: ܕܡ̣ܢ ܟܝܵܢܵܐ ܕܐܲܒܼܵܗܲܝ̈ܢ ܐܝܼܬܼܵܘܗܝ. ܘܲܒܼܗܵܕܹܐ:
ܡܸܬܿܕܲܡܹܝܢ ܠܗܵܢܘܿܢ ܕܲܩܕܼܵܡ ܩܲܠܝܼܠ ܐܸܡܲܪܢܲܢ ܠܘܼܩܒܲܠܗܘܿܢ.
ܦܪܝܼܫܝܼܢ ܕܹܝܢ ܡܸܢܗܘܿܢ: ܒܲܕܼ ܟܵܦܪܝܼܢ ܒܡܸܫܬܲܚܠܦܵܢܘܼܬܼܵܐ ܕܒܸܤܪܵܐ
ܠܐܘܼܤܝܼܵܐ ܕܐܲܠܵܗܘܼܬܼܵܐ: ܘܲܡܩܲܒܿܠܝܼܢ ܚܕܼܵܝܘܼܬܼܵܐ ܕܠܵܐ ܡܘܼܙܵܓܼܵܐ
ܘܲܕܼܠܵܐ ܒܘܼܠܒܵܠܵܐ. ܫܵܪܟܿܝܼܢ ܕܹܝܢ ܠܘܵܬܼ ܐܵܪ̈ܝܵܢܹܐ: ܒܗܵܝ̇ ܕܲܠܚܲܕܼ ܟܝܵܢܵܐ
ܐܵܡ̇ܪܝܼܢ ܕܲܗܘ̤ܵܬܼ ܚܕܼܵܝܘܼܬܼܵܐ. ܠܵܘ ܒܫܘܼܚܠܵܦ ܐܘܼܤܝܼܵܐ: ܐܸܠܵܐ ܒܟܼܘܼܢܵܫܵܐ
ܘܲܒܼܪܘܼܟܵܒܼܵܐ ܟܝܵܢܵܝܵܐ. ܐܲܝܟܲܢܵܐ ܕܢܲܦܫܵܐ ܘܦܲܓܼܪܵܐ ܡܸܬܼܟܲܢܫܝܼܢ ܠܲܟܼܝܵܢܵܐ
ܚܲܕܼ: ܘܡ̣ܢ ܩܛܝܼܪܵܐ ܟܝܵܢܵܝܵܐ ܚܵܫܵܐ ܢܲܦܫܵܐ ܟܝܵܢܵܐܝܼܬܼ ܚܲܫܹ̈ܐ ܕܦܲܓܼܪܵܐ:
pb. 50
ܘܦܲܓܼܪܵܐ ܚܲܫܹ̈ܐ ܕܢܲܦܫܵܐ. ܗܵܢ̇ܘܿܢ ܕܟܼܠܚܲܕܼ ܚܲܕ ܡܸܢܗܘܿܢ ܒܲܟܼܝܵܢܹܗ ܠܵܐ
ܡܨܸܐ ܠܲܡܩܲܒܵܒܠܘܼ: ܒܲܟܼܢܘܼܫܝܵܐ ܟܝܵܢܵܝܵܐ ܩܲܒܸܿܠ̣ ܒܡܘܼܙܵܓܼܵܐ ܐܲܝܟܲܢܵܐ
ܐܵܦ ܠܚܲܫܹ̈ܐ ܐܵܦ ܠܡܲܥܒܿܕܵܢܘܼܬܼܵܐ ܒܲܚܕܼܵܐ ܪܲܓܿܘܼܫܬܼܵܢܘܼܬܼܵܐ. ܠܵܘ ܟܲܟܼ
ܒܓܸܝܵܢܵܐ ܘܒܲܚܫܲܚܬܼܵܐ ܥܲܒܼܕܘܼܗ̇ ܠܲܚܕܼܵܝܘܼܬܼܵܐ: ܐܸܠܵܐ ܒܩܲܛܝܼܪܵܐ ܟܝܵܢܵܝܵܐ
ܒܲܟܼܝܵܢܵܐ ܚܵܫܘܿܫܵܐ. ܘܲܠܗܵܕܹܐ ܐܵܡ̇ܪܝܼܢ ܕܲܗܘ̤ܵܬܼ ܚܕܼܵܝܘܼܬܼܵܐ:
ܕܲܠܡܲܥܒܿܕܼܵܢ̈ܘܵܬܼܗܘܿܢ ܘܲܠܚܲܫܲܝ̈ܗܘܿܢ ܟܝܵܢܵܐܝܼܬܼ ܢܸܫܬܵܘܬܿܦܘܼܢ. ܬܘܼܒܼ
ܕܹܝܢ ܦܪܝܼܫܝܼܢ ܡ̣ܢ ܐܵܪ̈ܝܵܢܹܐ: ܒܲܕܼ ܐܵܡ̇ܪܝܼܢ ܦܲܓܼܪܵܐ ܘܢܲܦܫܵܐ ܕܚܲܝܵܬܼܵܐ:
ܘܐܲܠܵܗܵܐ ܡܸܠܬܼܵܐ ܒܲܪ ܟܝܵܢܵܐ ܗ̄ܘ̣ ܕܐܲܒܼܵܐ. ܘܠܵܘ ܒܦܘܼܩܕܵܢܵܐ: ܐܸܠܵܐ
ܒܨܒܼܝܵܢܹܗ ܕܝܼܠܹܗ ܤܲܝܒܲܪ ܚܕܼܵܝܘܼܬܼܵܐ ܕܥܲܡ ܟܝܵܢܵܐ ܟܝܵܢܵܐܝܼܬܼ: ܐܲܝܟܼ
ܕܲܠܟܼܠܗܘܿܢ ܚܲܫܹ̈ܐ ܕܲܟܼܝܵܢܵܐ ܐ̄ܢܵܫܵܐ ܢܩܲܒܸܿܠ ܥܲܠ ܐܲܦܲܝ̈ܢ. ܠܵܘ ܒܲܟܼܝܵܢܵܐ
ܐ̄ܚܪܹܢܵܐ: ܐܸܠܵܐ ܒܕܼܝܼܠܹܗ.
ܐܵܦܘܿܠܝܼܢܵܪܸ̈ܤܛܹܐ. ܠܵܘ ܠܲܡ ܡܤܲܟܵܡܘܼ ܤܲܟܿܡܹܗ ܠܦܘܼܪܩܵܢܲܢ
ܒܐܸܤܟܹܿܡܵܐ: ܐܵܘ ܒܫܘܼܚܠܵܦ ܕܡܘܼܬܼܵܐ: ܐܵܘ ܒܫܘܼܚܠܵܦ ܐܘܼܤܝܼܵܐ:
ܐܲܝܟܼ ܕܠܵܐ ܢܸܚܲܫ ܚܲܫܲܝ̈ܢ ܒܲܟܼܝܵܢܵܐ ܕܝܼܠܹܗ. ܗܵܕܹܐ ܓܹܝܪ: ܕܗܵܘ̇ ܕܠܵܐ
ܨܒܼܵܐ ܕܢܼܬܼܒܲܪܢܲܫ ܐܝܼܬܹܝܗ̇: ܒܲܟܼܝܵܢܵܐ ܓܹܝܪ ܗܘ̤ܵܐ ܒܲܪܢܵܫܵܐ: ܐܸܠܵܐ
ܐܸܢ ܡܸܛܠ ܕܠܑܵ ܨܒ̣ܵܐ: ܐܵܘ ܡܸܛܠ ܕܠܵܐ ܡܸܫܟܿܚܵܐ ܗ̄ܘ̣ܵܬܼ ܕܢܸܥܘܿܠ
ܐܲܝܟܵܐ ܕܐܝܼܬܼ ܡܲܕܥܵܐ: ܒܲܚܕܼܵܝܘܼܬܼܵܐ ܟܝܵܢܵܝܵܬܼܵܐ ܐܸܬܼܚܲܝܲܕܼ ܠܢܲܦܫܵܐ
ܪܵܓܼܘܿܫܬܼܵܐ
ܘܚܲܝܵܬܼܵܐ ܘܲܐܦܲܓܼܪܵܐ: ܐܲܝܟܼ ܕܵܢܫܲܡܠܸܐ ܘܲܢܡܲܠܸܐ ܟܝܵܢܵܐ ܕܒܲܪ ܐ̄ܢܵܫܵܐ:
ܕܢܸܚܲܫ ܚܲܫܵܐ ܟܝܵܢܵܝܵܐ ܕܝܵܢܵܐܝܼܬܼ: ܘܲܕܼܢܸܫܬܿܠܸܡ ܠܡܵܘܬܵܐ ܟܝܵܢܵܐܝܼܬܼ ܡ̣ܢ
ܠܵܐ ܚܵܫܘܿܫܘܼܬܼܵܐ ܘܠܵܐ ܡܵܝܘܿܬܼܘܼܬܼܵܐ ܒܲܟܼܝܵܢܵܐ ܕܢܲܦܫܵܐ ܘܲܕܼܦܼܓܼܪܵܐ: ܡ̣ܢ
pb. 51
ܠܵܐ ܟܝܵܢܵܐ ܗܘ̤ܵܐ ܘܐܝܼܬܼܵܘܗܝ ܟܝܵܢܵܐ ܕܒܲܪܢܵܫܵܐ. ܠܵܐ ܗ̄ܘ̣ܵܐ ܒܒܲܪܢܵܫܵܐ
ܗܘ̤ܵܐ: ܐܸܠܵܐ ܒܲܪܢܵܫܵܐ ܗ̄ܘ̣ܵܐ ܫܲܪܝܼܪܵܐܝܼܬܼ. ܒܕܲܬܘ̤ܵܐ ܥܲܡ ܟܝܵܢܵܐ ܕܒܲܪܢܵܫܵܐ:
ܘܐܲܤܝܼܪ ܗ̄ܘ̣ܵܐ ܒܢܲܦܫܵܐ ܘܲܒܼܦܲܓܼܪܵܐ: ܐܲܝܟܼ ܕܲܠܫܘܼܡܠܵܝܵܐ ܘܠܵܘ
ܠܲܥܤܘܼܪܝܵܐ. ܥܵܪܹܩ ܓܹܝܪ ܗܵܘ̇ ܕܥܵܪܲ݁ܪ ܡ̣ܢ ܗܵܘ̇ ܕܒܹܗ ܥ̣ܡܲܪ:
ܘܠܵܐ ܟܝܵܢܵܐ ܘܠܵܐ ܫܘܼܡܵܗܵܐ ܡܩܲܒܸܿܠ ܕܗܵܘ̇ ܡܵܐ ܕܒܹܗ ܥ̣ܡܲܪ.
ܘܡܸܛܠ ܗܵܢܵܐ: ܟܲܕܼ ܒܟܼܠܗܘܿܢ ܩܲܕܝܼ̈ܫܹܐ ܥ̣ܡܲܪ: ܘܠܵܐ ܒܚܲܕܼ
ܡܸܢܗܘܿܢ ܡܸܬܼܐܲܡܪܵܐ ܕܐܸܬܼܒܲܪܢܲܫ ܘܲܗܘ̤ܵܐ ܒܲܪܢܵܫܵܐ: ܐܸܠܵܐ ܐܸܢ ܐܸܡ݂ܲܬܼܝ
ܕܲܗܘ̤ܵܐ ܫܲܪܝܼܪܵܐܝܼܬܼ ܒܲܪܢܵܫܵܐ: ܠܫܘܼܡܠܵܝܵܐ ܟܝܵܢܵܐ ܕܲܟܼܝܵܢܵܐ ܕܒܲܪܢܵܫܵܐ:
ܟܲܕܼ ܐܸܬܼܩܲܝܲܡ ܡܲܕܥܵܐ ܡܕܲܒܿܪܵܢܵܐ ܒܦܲܓܼܪܵܐ ܘܲܒܼܢܲܦܫܵܐ ܟܝܵܢܵܐܝܼܬܼ: ܘܩܲܝܸܡ
ܕܠܵܐ ܢܸܤܬܿܒܲܪ ܕܐܲܝܟܼ ܕܲܒܼܒܲܪܢܵܫܵܐ ܥ̣ܡܲܪ: ܐܸܠܵܐ ܕܲܠܫܘܼܡܠܵܝܵܐ
ܕܲܟܼܝܵܢܵܐ ܐ̄ܢܵܫܵܝܵܐ ܐܸܬܼܚܲܝܲܕܼ. ܗܵܠܹܝܢ ܗܵܟܹܝܠ ܐܝܼܬܲܝܗܹܝܢ ܕܗܵܠܹܝܢ. ܐܲܝܠܹܝܢ
ܕܹܝܢ ܕܨܵܒܹ̇ܝܢ ܕܝܲܬܿܝܼܪ ܢܸܬܼܢܲܩܦܘܼܢ ܒܐܵܪ̈ܬܵܕܘܿܟܿܤܹܐ: ܝܵܗ̇ܒܿܝܼܢ ܠܹܗ
ܦܲܓܼܪܵܐ ܐܵܦ ܢܲܦܫܵܐ ܝܲܕܘܼܥܬܼܵܢܝܼܬܼܵܐ: ܘܠܲܚܕܼܵܝܘܼܬܼܵܐ ܕܚܲܕܼ ܟܝܵܢܵܐ ܫܵܠܡ̇ܝܼܢ
ܒܫܘܼܡܠܵܝܵܐ ܕܲܟܼܝܵܢܵܐ: ܘܐܲܟܼܙܢܵܐ ܕܦܲܓܼܪܵܐ ܘܢܲܦܫܵܐ ܘܡܲܕܥܵܐ ܫܘܼܡܠܵܝܵܐ
ܐܸܢܘܿܢ ܕܲܟܼܝܵܬܢܵܐ ܕܒܲܪܢܵܫܵܐ: ܗܵܟܲܢܵܐ ܗܘ̤ܵܬܼ ܐܵܦ ܚܕܼܵܝܘܼܬܼܵܐ ܕܐܲܠܵܗܵܐ ܡܸܠܬܼܵܐ
ܒܦܲܓܼܪܵܐ ܘܲܒܼܢܲܦܫܵܐ ܝܼܕܘܼܥܬܼܵܢܝܼܬܼܵܐ ܠܲܡܫܲܡܠܵܝܘܼ ܟܝܵܢܵܐ ܗܘ̤ܵܐ ܠܲܡ
ܒܲܫܪܵܪܵܐ ܒܲܪܢܵܫܵܐ: ܟܲܕܼ ܐܝܼܬܼ ܠܹܗ ܠܲܟܼܝܵܢܵܐ ܟܠܗܹܝܢ ܕܒܲܪܢܵܫܵܐ. ܠܵܐ
ܗ̄ܘ̣ܵܐ ܟܲܕܼ ܦܸܠܓܘܼܬܼ ܫܘܼܡܠܵܝܵܐ ܗ̄ܘ̣: ܗܵܢܵܘ ܕܹܝܢ ܒܸܤܪܵܐ ܒܲܠܚܘܿܕܼ:
ܐܵܘ ܢܲܦܫܵܐ ܕܚܲܝ̈ܘܼܬܼܵܐ. ܠܵܘ ܓܹܝܪ ܗܵܕܹܿܐ ܗ̄ܝ̣ ܕܲܗܘ̤ܵܐ ܒܲܪܢܵܫܵܐ: ܟܲܕܼ
pb. 52
ܡܸܕܸܡ ܕܒܲܪܢܵܫܵܐ ܠܲܝܬܿ ܠܹܗ ܐܸܠܵܐ ܐܸܢ ܓܘܼܫܡܵܐ ܕܚܲܝ̈ܘܵܬܼܵܐ ܘܢܲܦܫܵܐ
ܕܠܵܐ ܡܸܠܬܼܵܐ. ܐܸܠܵܐ ܢܲܦܫܵܐ ܡܠܝܼܠܬܼܵܐ: ܘܦܲܓܼܪܵܐ ܡܠܝܼܠܵܐ: ܘܚܲܝܘܬܼܵܐ
ܡܠܝܼܠܬܼܵܐ: ܘܠܵܘ ܕܠܵܐ ܡܸܠܬܼܵܐ. ܟܠ ܓܹܝܪ ܐܲܝܠܹܝܢ ܕܲܠܫܘܼܡܠܵܝܵܐ
ܕܲܟܼܝܵܢܵܐ ܡܸܬܼܟܲܢ̈ܫܵܢ: ܠܗܹܝܢ ܟܲܕܼ ܠܗܹܝܢ ܘܲܠܚܲܕܼ ܟܝܵܢܵܐ ܡܸܫܬܵܘ̈ܬܿܦܵܢ.
ܡܸܫܬܵܘܬܲܦ ܓܹܝܪ: ܐܵܦ ܒܚܲܫܵܐ ܐܵܦ ܒܡܲܥܒܿܕܼܵܢܘܼܬܼܵܐ.
ܡܓ. ܠܘܼܩܒܲܠ ܐܲܝܠܹܝܢ ܕܡܵܘܕܹܝܢ ܦܲܓܼܪܵܐ ܡܢܲܦܫܵܐ: ܘܢܲܦܫܵܐ
ܝܼܕܥܬܼܵܬܝܼܬܼܵܐ: ܗܘ̤ܵܬܼ ܕܹܝܢ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܒܪܘܼܟܵܒܼܵܐ
ܚܲܕܼ ܟܝܵܢܵܐ.
ܢܸܤܛܘܿܪܝܼܣ. ܗܵܠܹܝܢ ܕܗܵܠܹܝܢ: ܠܘܵܬܼ ܗܵܢܘܿܢ ܛܵܒܼܵܐܝܼܬܼ
ܡܸܬܼܐܲܡܪܵܢ: ܕܠܵܐ ܢܲܦܫܵܐ ܕܚܲܝ̈ܘܵܬܼܵܐ: ܘܠܵܐ ܬܘܼܒܼ ܓܘܼܫܡܵܐ
ܕܢܲܦܫܵܐ ܕܠܵܐ ܡܸܠܬܼܵܐ ܐܝܼܬܼܵܘܗܝ ܦܲܓܼܪܵܐ ܕܒܲܪܢܵܫܵܐ: ܘܡܸܛܠ ܗܵܢܵܐ
ܐܵܦܠܵܐ ܒܲܪܢܵܫܵܐ ܐܝܼܬܼܵܘܗܝ: ܗܵܘ̇ ܕܠܲܝܬܿ ܠܹܗ ܡܸܕܸܡ ܕܒܲܪܢܵܫܵܐ:
ܠܵܐ ܢܲܦܫܵܐ ܘܠܵܐ ܦܲܓܼܪܵܐ ܘܠܵܐ ܐܲܠܵܗܘܼܬܼܵܐ. ܠܵܘ ܓܹܝܪ ܡ̣ܢ ܢܲܦܫܵܐ
ܕܚܲܝ̈ܘܵܬܼܵܐ ܘܐܲܠܵܗܘܼܬܼܵܐ ܘܦܲܓܼܪܵܐ: ܩܵܐܹ̇ܡ ܟܝܵܢܵܐ ܕܒܲܪܢܵܫܵܐ. ܐܲܝܟܲܢܵܐ
ܡܵܕܹܝܢ ܗܘ̤ܵܐ ܒܲܪ ܐ̄ܢܵܫܵܐ: ܒܲܟܼܢܘܼܫܝܵܐ ܕܐܲܝܠܹܝܢ ܕܠܵܐ ܥܵܒܼ̈ܕܵܢ
ܟܝܵܢܵܐ ܕܿܒܲܪܢܵܫܵܐ؟ ܐܸܠܵܐ ܬܸܢܗ̤ܘ ܕܟܼܒܲܪ ܟܝܵܢܵܐ ܐ̄ܚܪܹܢܵܐ ܗܘ̤ܵܐ
ܚܠܝܼܛܵܐܝܼܬܼ ܠܒܲܪ ܡ̣ܢ ܟܝܵܢܵܐ ܕܝܼܠܲܢ. ܘܠܵܐ ܗܘ̤ܵܐ ܡܸܕܸܡ ܕܐܲܝܟܼ
ܗܵܢܵܐ ܒܟܼܠ ܡܸܕܸܡ ܘܲܒܼܟܼܠ ܟܝܵܢܝܼ̈ܢ ܡ̣ܢ ܩܕܝܼܡ ܗܘ̤ܵܘ: ܘܲܗܘ̤ܵܐ
ܗܵܫܵܐ ܡ̣ܢ ܒܵܬܲܪ ܕܐܸܫܬܡܠܝܲܬ̤ ܟ̱ܠܵܗ̇ ܒܪܝܼܬܼܵܐ: ܟܝܵܢܵܐ ܐ̄ܚܪܹܢܵܐ ܡ̣ܢ
ܐܲܝܠܹܝܢ ܕܲܗ̤ܘܲܝ̈: ܟܲܕܼ ܠܵܐ ܐܝܼܬܼܵܘܗܝ ܗ̄ܘ̣ܵܐ.
pb. 53
ܡܕ. ܥܲܠ ܗܵܝ̇: ܕܐܸܢ ܗ̤ܝ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ
ܠܚܲܕܼ ܟܝܵܢܵܐ ܗܘ̤ܵܬܼ: ܗ̤ܘ ܗܵܘ̇ ܚܲܕܼ ܟܝܵܢܵܐ ܠܵܐ ܐܝܼܬܼܵܘܗܝ ܠܵܐ
ܕܐܲܠܵܗܵܐ ܘܠܵܐ ܕܒܲܪܢܵܫܵܐ: ܐܸܠܵܐ ܟܝܵܢܵܐ ܗ̄ܘ̣ ܐ̄ܚܪܹܢܵܐ ܕܲܡܢܲܟܼܪܲܝ ܡ̣ܢ
ܟܠܗܘܿܢ ܟܝܵܢܹ̈ܐ.
ܓܵܘܵܢܵܐܝܼܬܼ ܕܹܝܢ ܗܸܢܹܝܢ ܟܲܕܼ ܗܸܢܹܝܢ ܢܸܬܼܐܲܡܪ̈ܵܢ ܐܵܦ ܠܘܵܬܼ ܗܵܢܘܿܢ:
ܕܲܠܗܵܘ̇ ܕܡ̣ܢ ܦܲܓܼܪܵܐ ܘܢܲܦܫܵܐ ܡܠܝܼܠܵܬܼܵܐ ܘܝܼܕܼܘܼܥܬܼܵܢܝܼܬܼܵܐ ܗܘ̤ܵܐ ܟܝܵܢܵܐ
ܕܒܲܪܢܵܫܵܐ ܒܲܟܼܢܘܼܫܝܵܐ ܕܲܟܼܝܵܢܵܐ: ܠܗܵܢܵܐ ܡܸܤܬܲܟܿܠܝܼܢ ܚ̄ܢܲܢ ܘܐܵܡ̇ܪܝܼܢ
ܚ̄ܢܲܢ ܒܲܪܢܵܫܵܐ: ܘܠܵܘ ܠܗܵܘ̇ ܕܡ̣ܢ ܐܲܠܵܗܘܼܬܼܵܐ ܘܢܲܦܫܵܐ ܡܠܝܼܠܬܼܵܐ
ܘܦܲܓܼܪܵܐ ܐ̄ܢܵܫܵܝܵܐ: ܕܒܲܟܢܘܼܫܝܵܐ ܕܲܟܼܝܵܢܹ̈ܐ ܗܘ̤ܵܐ ܒܲܪܢܵܫܵܐ. ܗܵܕܹܐ ܓܹܝܪ:
ܠܵܐ ܡܲܨܝܵܐ. ܡܬܲܚܲܡ ܗ̄ܘ̣ ܓܹܝܪ ܟܝܵܢܵܐ ܐ̄ܢܵܫܵܝܵܐ: ܘܗܵܠܹܝܢ ܙ̇ܕܹܩ
ܕܢܸܗܘ̈ܝܵܢ ܠܹܗ ܠܐܲܝܢܵܐ ܕܗܵܘܹ̇ܐ ܒܲܟܼܝܵܐ ܕܒܲܪܢܵܫܵܐ: ܐܲܝܠܹܝܢ ܕܲܩܢܸܐ ܗܵܘ̇
ܕܒܼܐܘܼܤܝܼܵܐ ܘܲܟܼܝܵܢܵܐ ܐܝܼܬܼܵܘܗܝ ܒܲܪܢܵܫܵܐ: ܘܠܵܐ ܝܲܬܿܝܼܪܵܐ ܘܠܵܐ ܒܨܝܼܪܵܐ.
ܡܬܲܚ̈ܡܵܢ ܓܹܝܪ ܗܵܠܹܝܢ ܕܲܟܼܝܵܢܵܐ. ܐܵܘ ܗܵܟܹܝܠ ܒܲܪܢܵܫܵܐ: ܕܲܠܚܲܕܼ
ܟܝܵܢܵܐ ܠܵܐ ܗܘ̤ܵܬܼ ܚܕܼܵܝܘܼܬܼܵܐ ܕܐܲܠܵܗܵܐ ܡܸܠܬܼܵܐ ܠܘܵܬܼ ܦܲܓܼܪܵܐ ܘܢܲܦܫܵܐ:
ܐܸܠܵܐ ܠܲܚܫܲܚܬܼܵܐ ܕܲܡܕܲܒܪܵܢܘܼܬܼܵܐ ܕܥܲܠ ܐܲܦܲܝ̈ܢ. ܐܵܘ ܕܲܟܼܝܵܢܵܐ ܐ̄ܚܪܹܢܵܐ
ܗܘ̤ܵܘ: ܤܛܲܪ ܡ̣ܡ ܗܵܘ̇ ܕܲܒܼܢܲܝ̈ܢܵܫܵܐ ܘܕܲܐܠܵܗܵܐ: ܕܐܝܼܬܼܵܘܗܝ ܦܲܓܼܪܵܐ
ܡܢܲܦܫܵܐ ܘܐܲܠܵܗܵܐ ܡܸܠܬܼܵܐ. ܕܲܟܼܝܵܢܵܐ ܗܵܘ̇: ܠܵܐ ܐܝܼܬܼܵܘܗܝ ܕܒܲܪܢܵܫܵܐ
ܘܠܵܐ ܕܐܲܠܵܗܵܐ: ܐܸܠܵܐ ܚܲܕܼܬܼܵܐ ܗ̄ܘ̣ ܟܝܵܢܵܐ ܗܵܘ̇ ܕܐܝܼܬܼ ܠܹܗ ܡ̣ܢ
ܟܠ ܟܝܵܢܝܼ̈ܢ.
ܡܗ. ܥܲܠ ܗܵܝ̇: ܕܐܸܢ ܠܲܟܼܝܵܢܵܐ ܚܲܕܼ ܚܕܼܵܝܘܼܬܼܵܐ ܗܘ̤ܵܬܼ ܕܐܲܠܵܗܵܐ
pb. 54
ܡܸܠܬܼܵܐ ܠܘܵܬܼ ܦܲܓܼܪܵܐ: ܠܒܲܪ ܡ̣ܢ ܒܸܤܪܵܐ ܠܵܐ ܡܸܬܼܪ̱ܢܸܐ ܕܲܒܼܗܵܢܵܐ
ܐܝܼܬܼ ܠܹܗ ܕܢܸܗܘܸܐ ܒܲܟܼܝܵܢܹܗ.
ܐܵܦܠܵܐ ܓܹܝܪ ܐܲܠܵܗܵܐ ܡܸܟܹܿܝܠ ܡ̣ܢ ܟܝܵܢܵܐ ܠܵܐ ܚܵܫ̇ܘܿܫܵܐ ܐܝܼܬܼܵܘܗܝ:
ܐܸܠܵܐ ܡ̣ܢ ܚܵܫ̇ܘܿܫܵܐ. ܡ̣ܢ ܗܵܘ̇ ܕܲܗܘ̤ܵܐ ܒܲܚܕܼܵܝܘܼܬܼܵܐ ܟܝܵܢܵܝܵܬܼܵܐ ܡܸܬܼܪܢܸܐ:
ܘܲܚܕܸܬܼ ܗܵܢܵܐ ܕܐܸܬܼܒܿܪܝܼ ܚܲܕܼܬܼܵܐܝܼܬܼ. ܐܸܢ ܗܵܟܹܝܠ ܒܲܪ ܟܝܵܢܵܐ ܗ̄ܘ̣
ܕܐܲܒܼܵܐ ܘܲܕܼܪܘܼܚܵܐ ܕܩܘܼܕܫܵܐ ܐܲܠܵܗܵܐ ܡܸܠܬܼܵܐ: ܒܲܚܕܼܵܝܘܼܬܼܵܐ ܟܝܵܢܵܝܵܬܼܵܐ
ܐܸܬܼܚܲܝܲܕܼ. ܘܲܒܼܗܵܕܹܐ ܐܝܼܬܼ ܠܹܗ ܗܵܘ̇ ܕܐܝܼܬܼܵܘܗܝ: ܠܒܲܪ ܡܸܢܹܗ ܠܵܐ
ܐܝܼܬܼܵܘܗܝ: ܟܲܕܼ ܡܚܲܝܲܕܼ ܘܡܸܬܼܚܲܝܲܕܼ ܒܹܗ ܘܡܸܢܹܗ. ܐܲܟܼܙܢܵܐ ܕܦܲܓܼܪܵܐ
ܘܢܲܦܫܵܐ ܕܲܡܚܲܝܕܼܝܼܢ ܠܚܲܕܼ ܟܝܵܢܵܐ ܕܒܲܪܢܵܫܵܐ: ܘܲܠܒܲܪ ܡ̣ܢ ܟܝܵܢܗܘܿܢ
ܠܵܐ ܡܸܬܼܪ̱ܢܹܝܢ: ܐܸܠܵܐ ܦܲܓܼܪܵܐ ܒܢܲܦܫܵܐ ܘܢܲܦܫܵܐ ܒܦܲܓܼܪܵܐ: ܘܚܲܫܲܝ̈ܗܘܿܢ
ܘܤܵܥܘܿܪ̈ܘܵܬܼܗܘܿܢ. ܦܲܓܼܪܵܐ ܟܝܵܢܵܐ ܘܠܵܐ ܒܒܲܝܬܵܝܘܼܬܼܵܐ ܨܸܒܼܝܵܢܵܝܵܬܼܵܐ: ܟܲܕܼ
ܪܲܓܹܘܼܫܬܼܵܢܵܐܝܼܬܼ ܢܵܤ̇ܒܿܝܼܢ ܘܝܵܗ̇ܒܿܝܼܢ ܠܲܚܕܼܵܪܹ̈ܐ: ܒܡܘܼܙܵܓܼܵܐ ܟܝܵܢܵܝܵܐ
ܘܲܒܼܚܘܼܠܛܵܢܵܐ ܠܲܡܚܲܠܵܛܘܼ ܟܝܵܢܵܐ:
ܡܘ. ܥܲܠ ܗܵܝ̇: ܕܒܲܚܕܼܵܝܘܼܬܼܵܐ ܬܪܹܝܢ ܟܝܵܢܹ̈ܐ ܚܲܕܼ ܟܝܵܢܵܐ ܠܵܐ
ܡܸܬܼܪ̱ܢܹܝܢ.
ܐܵܪܵܐ ܒܗܵܕܹܐ ܚܕܵܝܘܼܬܼܵܐ ܟܝܵܢܵܝܬܼܵܐ ܕܐܵܡ̇ܪܝܼܢ ܐܢ̄ܬܿܘܿܢ: ܐܲܝܢܵܘ ܟܝܵܢܵܐ؟
ܗܵܘ̇ ܕܐܲܒܼܵܐ ܘܕܲܒܼܪܵܐ ܘܲܕܼܪܘܼܚܵܐ ܕܩܘܼܕܼܫܵܐ: ܟܝܵܢܵܐ ܠܵܐ ܚܵܫܘܿܫܵܐ ܘܠܵܐ
ܡܵܝܘܿܬܼܵܐ: ܘܲܡܬܼܘܿܡܝܵܐ ܘܠܵܐ ܤܢܝܼܩܵܐ؟ ܐܵܘ ܗܵܘ̇ ܡܵܝܘܿܬܼܵܐ ܘܚܵܫܘܿܫܵܐ
ܘܲܤܢܝܼܩܵܐ ܕܸܐܸܬܼܡܵܠܝ ܘܝܵܘܡܵܢܵܐ ܗܘ̤ܵܐ: ܘܠܵܐ ܐܝܼܬܼܵܘܗܝ ܠܵܐ
ܕܲܒܼܢܲܝ̈ܢܵܫܵܐ ܘܠܵܐ ܕܐܲܠܵܗܵܐ ܘܠܵܐ ܕܲܟܼܝܵܢܵܐ ܐ̄ܚܪܹܢܵܐ: ܐܸܠܵܐ ܡܡܲܙܓܼܵܐ ܕܡ̣ܢ
ܬܪܹܝܢ ܟܝܵܢܝܼ̈ܢ ܠܫܘܼܡܠܵܝܵܐ ܕܚܲܕܼ ܟܝܵܢܵܐ؟ ܐܸܢܘܗ̤ܘ ܗܵܟܹܝܠ ܕܐܵܡ̇ܪܝܼܢ:
pb. 55
ܕܐܘܼܤܝܼܵܐ ܕܐܲܒܼܵܐ ܘܕܲܒܼܪܵܐ ܘܲܕܼܪܘܼܚܵܐ ܕܩܘܼܕܼܫܵܐ: ܒܲܚܕܼܵܝܘܼܬܼܵܐ
ܟܝܵܢܵܝܵܬܼܵܐ ܡܚܲܕܼܵܐ: ܗܵܕܹܐ ܠܵܐ ܐܝܼܬܹܝܗ̇ ܚܕܼܵܝܘܼܬܼܵܐ ܟܝܵܢܵܝܵܬܼܵܐ ܕܥܲܡ
ܒܸܤܪܵܐ: ܐܸܠܵܐ ܨܸܒܼܝܵܢܵܝܬܵܐ ܕܠܲܚܫܲܚܬܼܵܐ ܕܦܲܪܨܘܿܦܵܐ: ܘܠܵܘ ܕܲܟܼܝܵܢܵܐ:
ܡܚܲܝܕܼܝܼܢ. ܡܸܛܠ ܕܐܲܝܠܹܝܢ ܕܲܠܚܲܕܼ ܟܝܵܢܵܐ ܡܚܲܝܕܼܝܼܢ: ܠܵܘ ܨܸܒܝܼܝܵܐܝܼܬܼ
ܠܚܲܘܼܠܛܵܢܵܐ. ܐܲܝܟܲܢܵܐ ܕܗܵܘ̇ ܡܵܐ ܕܲܠܟܼܠ ܚܲܕܼ ܚܲܕܼ ܡܸܢܗܘܿܢ ܡܸܢܹܗ
ܘܠܹܗ ܠܲܝܬܿ: ܢܸܩܢܹܝܘܗܝ ܡ̣ܢ ܚܕܼܵܝܘܼܬܼܵܐ ܟܝܵܢܵܝܵܬܐ ܘܠܵܐ ܨܒܼܝܢܵܐܝܬܼܵܐ:
ܕܐܸܬܼܚܲܝܲܕܼ ܠܲܟܼܝܵܢܵܐ ܚܲܕܼ. ܡ̣ܢ ܡ̇ܢ ܗܵܟܹܝܠ ܡܸܬܼܚܲܝܕܝܼܢ ܗܵܠܹܝܢ ܒܲܟܼܝܵܢܵܐ:
ܓܲܠܝܵܐ ܕܡ̣ܢ ܒܵܪܘܿܝܵܐ ܕܲܟܼܝܵܢܵܐ ܗܵܘ̇ ܕܲܗܘ̤ܵܐ. ܕܡ̣ܢ ܢܲܦܫܹܗ ܕܹܝܢ
ܡܸܬܼܚܲܝܲܕܼ ܡܼܕܸܡ ܐܸܢ ܢܹܐܡܲܪ ܐ̄ܢܵܫ: ܠܵܐ ܤܵܒܲ̇ܪ ܐ̄ܢܵܐ ܕܫܲܦܝܼܪܵܐ. ܐܵܦ
ܙܢܵܐ ܓܹܝܪ ܕܲܒܼܫܘܼܚܠܵܦ ܐܘܼܤܝܼܵܐ ܩܲܢܝܵܐ: ܗܵܝ̇ ܕܲܠܚܲܕܼ ܟܝܵܢܵܐ ܢܸܬܼܚܝܕܘܼܢ
ܟܝܵܢܹ̈ܐ ܒܐܘܼܤ̈ܝܼܵܣ. ܘܐܵܢܲܢܩܹܐ ܐܝܬܹܝܗ̇: ܕܲܟܼܝܵܢܵܐ ܗܵܘ̇ ܕܡܸܬܼܚܲܝܲܕ:
ܒܝܲܕܼ ܫܲܘܝܘܼܬܼ ܟܝܵܢܵܐ ܢܸܬܼܐ̱ܤܲܪ ܘܠܵܘ ܒܨܒܼܝܵܢܵܐ.
ܡܙ. ܥܲܠ ܗܵܝ̇: ܕܲܟܼܝܵܢܹ̈ܐ ܐܲܝܠܹܝܢ ܕܨܒܼܝܵܢܵܐܝܼܬܼ ܡܸܬܼܚܲܝܕܝܼܢ:
ܠܑܵܐ ܡܸܬܼܐܲܡܪܝܼܢ ܕܲ[ܟܝܵܢܵܐܝܼܬܼ ܡܸܬܼܚܝܕܼܝܼܢ: ܐܠܵܐ ܦܲܪܨܘܿܦܵܐܝܼܬܼ.
ܐܲܝܠܹܝܢ ܓܹܝܪ ܕܨܒܼܝܵܢܵܐܝܼܬܼ ܡܸܬܼܚܲܝܕܝܼܢ: ܠܵܐ ܗ̄ܘ̣ܵܐ ܠܚܲܕܼ ܟܝܵܢܵܐ
ܩܢܹܝܢ ܚܕܼܵܝܘܼܬܼܵܐ: ܐܸܠܵܐ ܠܲܚܕܼܵܝܘܼܬܼܵܐ ܨܸܒܼܝܵܢܵܝܵܬܐ ܕ[ܦܪܨܘܦܐ]
ܕ[ܡܕܒܪܢܘܬܼܵܐ]. ܐܸܢܗ̤ܘ ܗܵܟܹܝܠ ܕܢܹܐܡܪܘܼܢ: ܕܲܠܚܲܕܼ ܟܝܵܢܵܐ
ܗܘ̤ܵܬܼ ܚܕܼܵܝܘܼܬܼܵܐ ܕܲܟܼܝܵܢܹ̈ܐ: ܐܵܦܸܢ ܢܸܬܸܿܠ ܠܗܘܿܢ ܕܨܒܼܝܵܢܵܐܝܼܬܼ ܗܘ̤ܵܬܼ:
pb. 56
ܡ̣ܢ ܒܵܬܲܪ ܕܲܗܘ̤ܵܬܼ: ܡܸܟܹܝܠ ܠܵܘ ܨܸܒܼܝܵܢܵܐܝܼܬܼ ܐܝܼܬܹܝܗ̇ ܗ̤ܝ
ܚܕܼܵܝܘܼܬܼܵܐ: ܒܗܵܝ̇ ܕܟܼܝܵܢܹ̈ܐ ܩܢܵܐܘܼܗ̇. ܘܐܲܝܟܼ ܕܲܡܚܲܝܲܕܼ: ܐܸܦ ܟܲܕܿ ܨܵܒܹ̇ܐ
ܘܟܲܕܼ ܠܵܐ ܨܵܒܹ̇ܐ ܚܵܐܹܫ̇: ܘܲܡܩܲܒܸܠ ܚܲܫܹ̈ܐ ܕܲܟܼܝܵܢܵܐ ܗܵܘ̇ ܕܠܹܗ
ܐܸܬܼܚܲܝܲܕܼ. ܡܸܛܠ ܕܲܒܼܗܼܵܢܵܐ ܡܬܲܚܲܡ: ܘܠܵܘ ܒܠܵܐ ܚܵܫܘܿܫܘܼܬܼܵܐ ܘܲܒܼܠܵܐ
ܡܵܝܘܿܬܼܘܼܬܼܵܐ ܘܲܒܼܠܵܐ ܡܤܲܝܟܼܘܼܬܼܵܐ. ܬܚܘܼܡܵܐ ܓܹܝܪ ܘܤܘܼܝܵܟܼܵܐ ܕܟܼܠ
ܟܝܵܢ ܐܝܼܬܼܵܘܗܝ: ܗܵܘ̇ ܡܵܐ ܕܒܹܗ ܐܝܼܬܼ ܠܹܗ ܕܢܸܗܘܸܐ. ܘܐܸܢܗ̤ܘ
ܕܠܲܟܼܝܵܢܵܐ ܐܸܬܼܚܲܝܲܕܸ: ܒܗܵܢܵܐ ܐܝܼܬܼ ܠܹܗ ܕܢܸܗܘܸܐ ܐܝܼܬܼܵܘܗܝ: ܘܐܵܦ
ܕܕܲܐܝܟܼ ܐܲܝܢܵܐ ܕܐܝܼܬܼܵܘܗܝ ܒܲܟܼܝܵܢܵܐ. ܘܡ̣ܢ ܗܵܕܹܐ ܡܸܬܼܩܲܝܡܵܐ: ܕܐܵܦ
ܐܲܒܼܵܐ ܘܪܘܼܚܵܐ ܕܩܘܼܕܼܫܵܐ ܕܡܸܢܹܗ ܟܲܕܼ ܡܸܢܹܗ ܕܲܟܼܝܵܢܵܐ ܐܝܼܬܲܗܘܿܢ: ܡ̣ܢ
ܟܝܵܢܵܐ ܚܵܫܘܿܫܵܐ ܘܒܲܪܝܵܐ ܢܸܗܘܘܿܢ. ܗܵܘ̇ ܡܵܐ ܓܹܝܪ ܕܩܲܒܸܿܠ̣ ܒܪܵܐ
ܒܲܟܼܝܵܢܵܐ: ܡܸܫܟܿܚܵܐ ܕܲܢܩܲܒܸܠ ܐܵܦ ܐܲܒܼܵܐ. ܕܢܸܫܟܲܚ ܓܹܝܪ ܢܩܲܒܸܿܠ
ܒܲܟܼܝܵܢܵܐ: ܗܵܘ̇ ܕܠܵܐ ܡܟܼܵܢ ܠܲܡܩܲܒܵܠܘܼ: ܠܵܐ ܡܲܨܝܵܐ. ܐܸܢܗܘ̤
ܕܲܒܪܵܐ ܡܸܛܠ ܕܲܡܩܲܒܿܠܵܢܵܐ ܐܝܼܬܼܵܘܗܝ ܗ̄ܘ̣ܵܐ ܕܲܚܕܼܵܝܘܼܬܼܵܐ ܕܲܟܼܝܵܢܵܐ
ܗܵܢܵܐ ܩܲܒܸܿܠ̣: ܗܵܘ̇ ܕܹܝܢ ܠܵܐ ܡܩܲܒܿܠܵܢܵܐ ܐܝܼܬܼܵܘܗܝ: ܐܲܝܟܲܢܵܐ ܡ̣ܢ
ܚܲܕܼ ܐܸܢܘܿܢ ܟܝܵܢܵܐ: ܗܵܢ̇ܘܢ ܕܕܲܠܩܘܼܒܼܠܵܐ ܐܸܢܘܿܢ ܕܲܚܕܼܵܪܹ̈ܐ
ܒܲܡܩܲܒܿܠܵܢܘܼܬܼܵܐ ܘܲܒܼܠܵܐ ܡܩܲܒܿܠܵܢܘܼܬܼܵܐ؟ ܘܡ̣ܢ ܫܘܼܚܠܵܦܵܐ ܕܲܟܼܝܵܢܵܐ
ܐܵܠܨܵܐܝܼܬܼ ܢܵܤ̇ܒܵܐ ܠܟܼܘܿܢ ܡܸܠܬܼܵܐ ܕܲܚܕܼܵܝܘܼܬܼܵܐ ܠܪܸܥܝܵܢܵܐ ܕܐܵܪ̈ܝܵܢܹܐ:
ܕܐܸܬܼܚܲܝܲܕܼ ܟܝܵܢܵܐ ܕܲܒܼܪܵܐ ܡ̣ܢ ܒܵܪܘܿܝܹܗ ܕܲܟܼܝܵܢܵܐ. ܐܲܟܼܙܢܵܐ ܕܗܵܘ̇ ܕܲܒܼܪܹܗ
ܘܥܲܒܼܕܹܗ ܠܢܲܦܫܵܐ ܘܲܠܦܲܓܼܪܵܐ: ܗ̤ܘ ܐܵܦ ܚܲܝܲܕܼ ܐܸܢܘܿܢ. ܥܵܒܼܵܕܼܵܐ
ܗ̄ܘ̣ ܓܹܝܪ ܕܒܼܵܪܘܿܝܘܼܬܼܵܐ: ܐܵܦ ܒܵܥܹ̇ܐ ܕܲܠܚܲܕܼ ܟܝܵܢܵܐ ܬܚܲܝܲܕܼ ܠܢܲܦܫܵܐ
pb. 57
ܘܲܠܦܲܓܼܪܵܐ: ܒܗܵܝ̇ ܕܕܼܝܼܠܹܗ ܐܝܼܬܹܝܗ̇ ܐܵܦ ܡܩܝܼܡܘܼܬܼ ܒܵܪܘܿܝܘܼܬܼܵܐ
ܕܟܼܠ ܚܲܕܼ ܚܲܕܼ ܡܸܢܘܗܘܿܢ.
ܡܚ. ܥܲܠ ܗܵܝ̇: ܕܲܥ̇ܒܼܵܕܼܵܐ ܕܒܼܵܪܘܿܝܘܼܬܼܵܐ ܕܬܲܪܬܹܝܢ: ܐܝܼܬܹܝܗ̇
ܚܕܼܵܝܘܼܬܼܵܐ ܟܝܵܢܵܝܬܼܵܐ.
ܥ̇ܒܼܵܕܼܵܐ ܗ̄ܘ̣ ܓܹܝܪ ܕܒܼܵܪܘܿܝܘܼܬܼܵܐ ܬܪܲܝܵܢܝܼܬܼܵܐ: ܚܕܼܵܝܘܼܬܼܵܐ ܕܲܠܚܲܕܼ
ܟܝܵܢܵܐ ܕܲܟܼܝܵܢܹ̈ܐ ܕܐܸܬܼܚܲܝܲܕܼܘ. ܕܗܵܘ̇ ܡܵܐ ܕܠܲܝܬܿ ܠܟܼܠ ܚܲܕܼ ܡܸܢܗܘܿܢ
ܡܸܢܹܗ ܘܠܹܗ: ܡܚܲܝܕܼܘܼܬܼܵܐ ܕܲܗܘܵܝܹܗ: ܠܗܵܢܵܐ ܟܝܵܢܵܐܝܼܬܼ ܢܵܤܹ݁ܒܼ
ܡ̣ܢ ܗܵܘܵܝܵܐ ܕܲܬܼܪܹܝܢ. ܐܵܦܠܵܐ ܓܹܝܪ ܗܵܝ̇ ܕܢܸܟܼܦܲܢ ܘܲܕܼܢܨܗܸܐ ܘܲܕܼܢܲܪܓܸܫ
ܪܲܓܲܘܼܫܬܼܵܢܵܐܝܼܬܼ ܕܦܲܓܼܪܵܐ ܐܝܼܬܹܝܗ̇ ܡܸܢܹܗ ܘܠܹܗ: ܘܲܕܼܢܲܦܫܵܐ ܡܸܢܵܗ̇
ܘܠܵܗ̇: ܘܠܵܐ ܡ̣ܢ ܗܘܵܝܵܐ ܕܲܬܼܪܹܝܢ: ܗܘ̤ܵܬܼ ܠܗܘܿܢ. ܗܵܟܲܢܵܐ ܐܸܢ ܐܵܦ
ܚܕܼܵܝܘܼܬܼܵܐ ܕܲܟܼܝܵܢܵܐ ܗܘ̤ܵܬܼ ܠܐܲܠܵܗܵܐ ܡܸܠܬܼܵܐ ܠܘܵܬܼ ܢܲܦܫܵܐ ܘܒܸܤܪܵܐ:
ܐܲܝܟܲܢܵܐ ܕܗܵܘ̇ ܡܵܐ ܕܠܲܝܬܿ ܗ̄ܘ̣ܵܐ ܠܹܗ ܒܲܟܼܝܵܢܹܗ ܡܸܢܹܗ ܘܠܹܗ: ܡ̣ܢ
ܚܕܼܵܝܘܼܬܼܵܐ ܕܲܟܼܝܵܢܵܐ ܢܤܲܒܼ ܠܹܗ: ܨܲܗܝܵܐ ܘܟܲܦܢܵܐ ܘܠܹܐܘܬܼܵܐ ܘܬܲܟܼܬܘܼܫܵܐ
ܘܕܼܚ̱ܠܬܼܵܐ ܘܡܵܘܬܵܐ. ܒܲܚܕܼܵܐ ܡ̇ܢ ܗܘܵܝ̇ܐ ܕܲܒܼܪܝܼܬܼܵܐ ܕܬܲܪܬܹܝܢ: ܐܵܦ
ܒܵܪܘܿܝܘܼܬܼܵܐ ܩܲܕܼܡܵܝܵܬܼܵܐ ܕܐܘܼܤܝܼܵܐ ܕܝܼܠܹܗ: ܘܐܵܠܨܵܐܝܼܬܼ ܐܵܦ
ܠܒܼܵܪܘܿܝܵܐ: ܐܸܢܗ̤ܘ ܕܠܵܘ ܒܡܲܤܒܿܪܵܢܘܼܬܼܵܐ: ܐܸܠܵܐ ܟܝܵܢܵܐܝܼܬܼ ܤܲܝܒܲܪ
ܗܵܠܹܝܢ. ܘܲܤܪܝܼܩܵܐܝܼܬܼ ܝܵܗ̇ܒܿܝܼܢ ܐܲܢ̄ܬܿܘܿܢ ܫܘܼܡܵܗܵܐ ܕܒܲܪ ܟܝܵܢܵܐ: ܠܗܵܘ̇
ܕܡ̣ܢ ܐܵܢܲܢܩܹܐ ܬܘܼܒܼ ܢܵܤ̇ܒܿܝܼܢ ܐܲܢ̄ܬܿܘܿܢ ܠܹܗ ܡܸܢܹܗ. ܘܡܸܬܼܐܲܠܨܝܼܬܿܘܿܢ:
ܕܐܵܘ ܡ̣ܢ ܐܲܪ̈ܝܵܢܹܐ ܐܵܘ ܡ̣ܢ ܡܵܢܝܼܢܵܝܹ̈ܐ ܬܸܗܘܘܿܢ. ܕܐܵܘ ܬܩܲܒܿܠܘܼܢ
ܠܗܵܝ̇ ܕܠܵܐ ܚܲܫ̣ ܟܝܵܢܵܐܝܼܬܼ ܒܲܚܕܼܵܐ ܡ̣ܢ ܗܵܠܹܝܢ: ܐܵܘ ܒܗܲܓܵܓܼܵܐ
ܘܲܒܼܡܲܤܒܿܪܵܢܘܼܬܼܵܐ. ܐܵܘ ܕܟܲܕܼ ܬܸܬܿܠܘܼܢ ܕܒܲܟܼܝܵܢܵܐ ܟܝܵܢܵܐܝܼܬܼ ܒܲܪܓܸܫܬܼܵܐ
pb. 58
ܚܵܫܘܿܫܬܼܵܐ ܩܲܒܸܠ̣ ܚܲܫܹ̈ܐ: ܡ̣ܢ ܠܵܐ ܚܵܫܘܿܫܘܼܬܼܵܐ ܘܡ̣ܢ ܠܵܐ ܡܵܝܘܿܬܼܘܼܬܼܵܐ
ܘܡ̣ܢ ܗܵܝ̇ ܕܒܲܪ ܟܝܵܢܵܐ ܕܐܲܒܼܵܐ ܡܲܦܩܝܼܢ ܐܢ̄ܬܿܘܿܢ ܠܹܗ. ܘܒܲܕܼ ܩܢ̣ܵܐ
ܫܘܼܚܠܵܦܵܐ ܕܲܟܼܝܵܢܵܐ: ܕܲܡܩܲܒܸܿܠ ܘܠܵܐ ܡܩܲܒܸܿܠ. ܐܵܘ ܐܸܢ ܐܵܦܠܵܐ
ܚܲܕܼ ܫܘܼܚܠܵܦܵܐ ܕܐܘܼܤܝܼܵܐ ܐܝܼܬܼ ܠܹܗ ܒܲܟܼܝܵܢܹܗ: ܘܗܵܝ̇ ܕܐܲܒܼܵܐ ܘܲܕܼܪܘܼܚܵܐ
ܕܩܘܼܕܫܵܐ ܠܵܐ ܤܢܝܼܩܬܼܵܐ ܐܝܼܬܹܝܗ̇: ܘܠܵܐ ܡܩܲܒܿܠܵܢܝܼܬܼܵܐ ܕܚܲܫܵܐ
ܘܲܕܼܡܵܘܬܵܐ: ܬܐܸܬܼܓܿܠܸܙ ܠܹܗ ܡ̣ܢ ܗܵܝ̇ ܕܢܸܗܘܸܐ ܐܲܠܵܗܵܐ: ܒܲܕܼܠܵܐ
ܐܝܼܬܼܵܘܗܝ ܒܟܼܠ ܡܸܕܸܡ ܡ̣ܢ ܐܘܼܤܝܼܵܐ ܠܵܐ ܤܢܝܼܩܬܼܵܐ.
ܡܛ. ܥܲܠ ܗܵܝ: ܕܐܲܝܠܹܝܢ ܕܒܲܟܼܝܵܢܵܐ ܡܚܲܝܕܼܝܼܢ: ܚܲܫܹ̈ܐ ܟܝܵܢܵܝܹ̇ܐ
ܟܝܵܢܵܐܝܼܬܼ ܟܡܤܲܝܒܿܪܝܼܢ ܘܠܵܘ ܨܸܒܼܝܵܢܲܐܝܼܬܼ.
ܒܒܼܘܼܨܵܪܵܐ ܓܹܝܪ ܕܡ̣ܢ ܟܝܵܢܵܐ ܠܵܐ ܤܢܝܼܩܵܐ ܘܠܵܐ ܚܵܫ̇ܘܿܫܵܐ: ܗܘ̤ܵܐ
ܟܝܵܢܵܐ ܚܵܫ̇ܘܿܫܵܐ ܘܲܤܢܝܼܩܵܐ. ܐܲܝܟܼ ܙܢܵܐ ܕܐܵܝܢܵܐ ܕܲܒܼܨܒܼܝܵܢܹܗ ܡܪܝܼܡ
ܐܝܼܕܹܗ ܐܵܘ ܪܸܓܼܠܹܗ ܐܵܘ ܥܲܝܢܹܗ: ܘܠܵܐ ܐܝܼܬܼ ܠܹܗ ܕܝܼܠܹܗ ܡ̣ܢ ܒܵܬܲܪ
ܕܐܸܬܿܬܿܪܝܼܡܘ: ܒܗܵܝ̇ ܕܫܲܪܝܼܪܵܐܝܼܬܼ ܦܤܲܩ̣ ܐܸܢܘܿܢ: ܗܵܟܲܢܵܐ ܐܵܦ ܗܵܘ̇
ܕܲܒܼܨܝܵܢܹܗ ܡܪܝܼܡ ܡܸܢܹܗ ܠܵܐ ܡܵܝܘܿܬܼܘܼܬܼܵܐ ܘܠܵܐ ܚܵܫܘܿܫܘܼܬܼܵܐ:
ܠܫܘܼܡܠܵܝܵܐ ܕܲܟܼܝܵܢܵܐ ܚܵܫܘܿܫܵܐ ܘܲܤܢܝܼܩܵܐ: ܠܲܝܬܼ ܠܹܗ ܠܵܐ ܚܵܫܘܿܫܘܼܬܼܵܐ
ܘܠܵܐ ܤܢܝܼܩܘܼܬܼܵܐ: ܗܵܘ̇ ܡܵܐ ܕܐܝܼܬܼ ܗ̄ܘ̣ܵܐ ܠܹܗ ܡ̣ܢ ܩܵܕܼܵܡ. ܒܗܵܝ̇
ܕܥܵܡ ܟܝܵܢܵܐ ܚܵܫܘܿܫܵܐ ܐܸܫܬܿܘܝܼ: ܥܕܲܡܵܐ ܕܲܩܢ̣ܵܗ̇ ܡܸܢܕܪܹܫ ܠܠܵܐ
ܚܵܫܘܿܫܘܼܬܼܵܐ ܒܦܘܼܩܪ̣ܵܢܵܐ ܡ̣ܢ ܟܝܵܢܵܐ ܥܲܡ ܚܕܼܵܝܘܼܬܼܵܐ ܟܝܵܢܵܝܬܼܵܐ: ܟܲܕܼ
ܗܘ̤ܵܐ ܡ̣ܢ ܩܵܝܡܬܼܵܐ ܕܡ̣ܢ ܒܹܝܬܼ ܡܝܼ̈ܬܹܐ: ܒܠܲܟܼܝܵܢܵܐ ܗܵܘ̇ ܕܲܗܘ̤ܵܐ ܠܵܐ
ܡܵܝܘܿܬܼܵܐ ܘܠܵܐ ܚܵܫܘܿܫܵܐ: ܘܠܵܘ ܡ̣ܢ ܟܝܵܢܹܗ ܕܝܼܠܹܗ: ܗܵܘ̇ ܕܡ̣ܢ
ܩܕܼܵܡ ܕܢܸܗܘܸܐ ܒܲܪܢܵܫܵܐ ܡܵܝܘܿܬܼܵܐ ܒܲܚܕܼܵܝܘܼܬܼܵܐ ܟܝܵܢܵܝܬܵܐ. ܟܲܕܼ
pb. 59
ܟܠܗܹܝܢ ܐܲܝܠܹܝܢ ܕܲܟܼܝܵܢܵܐ ܕܲܗܘ̤ܵܐ ܡܩܲܒܸܿܠ ܟܝܵܢܐܝܼܬܼ: ܐܵܦ
ܠܡܸܫܬܲܡܥܵܢܘܼܬܼܵܐ ܕܥܲܕܲܡܵܐ ܠܡܵܘܬܵܐ: ܡܵܘܬܵܐ ܕܹܝܢ ܕܲܙܩܝܼܦܵܐ.
ܘܐܵܦ ܠܲܡܥܲܝܘܼܬܼ ܪܘܼܡܪܵܡܵܐ ܕܲܠܥܸܠ ܡܸܢܹܗ ܠܲܝܬܿ ܪܘܼܡܪܵܡܵܐ:
ܘܲܠܡܸܤܲܒܼ ܫܡܵܐ ܕܒܼܛܲܝܒܿܘܼ ܠܥܸܠ ܡ̣ܢ ܟܠ ܡܫܵܗ̈ܝܼܢ: ܕܠܹܗ
ܟܵܦܵܐ ܟܠ ܒܪܘܼܟ ܕܲܒܼܫܡܲܝܵܐ ܘܕܲܐܪܥܵܐ ܘܕܲܠܬܲܚܬܿ ܡ̣ܢ ܐܲܪܥܵܐ:
ܠܫܘܼܒܼܚܵܐ ܕܐܲܠܵܗܵܐ ܐܲܒܼܵܐ ܗܵܘ̇ ܕܠܹܗ ܐܸܬܫܬܲܥܒܲܕܼ: ܘܫܲܡܠܝܼ ܠܟܼܠܵܗ̇
ܡܸܫܬܲܡܥܢܘܼܬܼܵܐ. ܠܵܐ ܗ̄ܘ̣ܵܐ ܢܲܦܫܹܗ ܤܲܪܸܩ̣: ܘܠܵܐ ܬܘܼܒܼ ܦܸܝܡܵܐ
ܕܐܲܒܼܵܐ ܐܝܼܬܼܵܘܗܝ: ܐܵܘ ܢܤܲܒܼ ܡܸܢܕܪܹܫ ܦܸܚܡܵܐ ܡ̣ܢ ܐܲܒܼܵܐ. ܗ̤ܘ ܓܹܝܪ
ܡ̣ܢ ܢܲܦܫܹܗ ܐܲܪܝܼܡܹܗ. ܘܤܲܪܸܩ̣ ܢܲܦܫܹܗ ܠܲܟܼܝܵܐ ܡܵܝܘܿܬܼܵܐ: ܘܗܵܢܵܐ
ܟܝܵܢܵܐ ܗܘ̤ܵܐ. ܘܗܵܘ̇ ܡܵܐ ܕܐܝܼܬܼ ܗ̄ܘ̣ܵܐ ܠܹܗ ܒܲܟܼܝܵܢܹܗ: ܒܛܲܝܒܿܘܼ
ܢܲܤܒܹܿܗ. ܘܡ̣ܢ ܟܝܵܢܵܐ ܠܵܐ ܥܒܼܝܼܕܼܵܐ: ܗܘ̤ܵܐ ܟܝܵܢܵܐ ܥܒܼܝܼܕܼܵܐ ܘܒܲܪܝܵܐ
ܒܬܼܵܘܤܲܦܬܼܵܐ ܘܲܒܼܒܼܘܼܨܵܪܹ̈ܐ ܕܚܲܝܠܵܐ ܟܝܵܢܵܝܵܐ. ܘܐܘܼܤܝܼܵܐ ܠܵܐ
ܡܩܲܒܿܠܵܢܝܼܬܼܵܐ ܕܚܲܫܹ̈ܐ ܘܲܕܼܡܵܘܬܵܐ: ܗܘ̤ܵܬܼ ܡܵܝܘܿܬܬܵܐ ܘܚܵܫܘܿܫܬܼܵܐ.
ܘܡ̣ܢ ܡܚܝܼܠܘܼܬܼܵܐ ܡܝܼܬܼ: ܘܡ̣ܢ ܚܲܝܠܵܐ ܕܐܲܠܵܗܵܐ ܚ̣ܝܵܐ. ܒܕܲܗܘ̤ܵܐ
ܟܝܵܢܵܐ ܡܚܝܼܠܵܐ: ܘܲܠܚܲܫܵܘ̈ܗܝ ܡܲܟܼܐܒܼܵܢܹ̈ܐ ܕܗܵܢܵܐ ܤܲܝܒܲܪ: ܟܲܕܼ
ܡܲܟܼܐܸܒܼ ܘܚܵܐܹ̇ܫ ܡ̣ܢ ܫܲܘܝܘܼܬܼ ܟܝܵܢܵܐ ܡ̣ܢ ܢܲܦܫܵܐ ܘܡ̣ܢ ܦܲܓܼܪܵܐ:
ܟܲܕܼ ܡܸܬܼܢܬܸܦ ܘܡܸܬܿܕܲܠܚ ܡ̣ܢ ܟܝܵܢܹܗ: ܠܒܲܪ ܡ̣ܢ ܟܝܵܢܹܗ ܐܸܬܿܕܒܲܪ
ܟܲܕܼ ܡܸܬܼܐ̱ܠܸܨ. ܘܡܸܛܠ ܗܵܢܵܐ: ܐܵܦܠܵܐ ܡܸܬܼܚܲܒܲܠ ܒܦܘܼܪܫܵܢܵܐ
ܕܢܲܦܫܵܐ ܡ̣ܢ ܦܲܓܼܪܵܐ. ܐܲܟܼܙܢܵܐ ܕܦܲܓܼܪܵܐ ܡܤܲܝܒܲܪ ܚܲܫܵܐ ܕܡܵܘܬܵܐ:
ܘܡ̣ܢ ܚܕܼܵܐ ܫܘܝܘܼܬܼܵܐ ܡܸܬܼܢ̱ܬܸܦ ܒܲܩܛܝܼܪܵܐ: ܘܡ̣ܢ ܚܕܼܵܝܘܼܬܼܵܐ
pb. 60
ܟܝܵܢܝܵܬܐ ܒܦܘܼܪܫܵܢܵܐ. ܗܵܟܲܢܵܐ ܐܵܦ ܠܲܠܵܗܵܐ ܡܸܠܬܸܿܐ ܕܐܸܬܼܚܲܝܲܕܼ ܠܫܘܼܡܠܵܝܵܐ
ܕܲܚܕܼܵܝܘܼܬܼܵܐ ܟܝܵܢܵܝܬܼܵܐ: ܐܵܢܲܢܩܹܐ ܐܝܼܬܹܝܗ̇ ܠܹܗ: ܕܟܼܠܗܘܿܢ ܚܲܫܹ̈ܐ ܟܝܵܢܵܝܹ̈ܐ
ܕܡܵܘܬܵܐ ܟܝܵܢܵܐܝܼܬܼ ܢܤܲܝܒܲܪ. ܡܸܛܠ ܗܵܢܵܐ ܐܵܦ ܚܲܝܹ̈ܐ ܐܵܦ ܡܵܘܬܵܐ:
ܕܓܼܵܘܵܐ ܐܸܢܘܿܢ ܕܐܲܝܠܹܝܢ ܕܲܡܚܲܕܼܝܼܢ ܒܲܟܼܝܵܢܵܐ: ܗܵܘ̇ ܗܵܟܹܝܠ ܕܗܵܕܹܐ
ܝܵܗܹ̇ܒܼ: ܐܵܦ ܕܫܲܪܟܵܐ ܝܵܗܹ̇ܒܼ: ܟܲܕܼ ܨܵܒܹ̇ܐ ܘܟܲܕܼ ܠܵܐ ܨܵܒܹ̇ܐ: ܐܵܦܸܢ ܐܵܠܹܦ
ܙܲܒܼ̈ܢܝܼܢ ܐܵܡܲ݁ܪ ܕܒܲܟܼܝܵܢܹܗ ܠܵܐ ܚܵܫܘܿܫܵܐ ܗ̄ܘ̣. ܚܲܫ̣ ܕܹܝܢ ܒܟܼܝܵܢܵܐ ܗܵܘ̇
ܕܲܗܘ̤ܵܐ: ܐܸܢ ܕܒܸܤܪܵܐ ܘܐܸܢ ܕܒܲܪܢܵܫܵܐ ܘܐܸܢ ܐܲܝܢܵܐ ܕܗ̤ܘ ܕܢܹܐܡܲܪ.
ܘܗܵܕܹܐ ܠܵܐ ܢܹܐܡܲܪ: ܕܲܟܼܝܵܢܹܗ ܠܵܐ ܡܩܲܒܿܠܵܢܵܐ ܗ̄ܘ̣ ܕܚܲܫܹ̈ܐ: ܐܸܠܵܐ
ܐܸܢ ܕܲܠܡܵܐ ܐܲܟܼܙܢܵܐ ܕܐܲܝܠܹܝܢ ܕܡܲܨܝܵܐ ܕܲܢܡܘܼܬܼܘܼܢ ܘܠܵܐ ܢܡܘܼܬܼܘܼܢ:
ܘܠܵܘ ܒܲܟܼܝܵܢܗܘܿܢ ܐܝܼܬܼܵܝܗܘܿܢ ܠܵܐ ܡܵܝ̈ܘܿܬܹܐ. ܗܵܟܲܢܵܐ ܐܵܦ ܥܲܠ
ܐܲܠܵܗܵܐ ܡܸܠܬܼܵܐ ܢܹܐܡܲܪ: ܒܗܵܠܹܝܢ ܓܹܝܪ ܡܸܬܼܪ̱ܢܹܐ ܐܲܠܵܗܵܐ ܡܸܠܬܼܵܐ
ܒܟܼܝܵܢܹܗ: ܘܡܸܕܸܡ ܐ̄ܚܪܹܝܢ ܝܲܬܿܝܼܪܵܐ ܠܵܐ ܐܝܼܬܼ ܠܹܗ. ܘܐܸܢܗ̤ܘ ܕܲܟܼܝܵܢܵܐ
ܠܵܐ ܡܩܲܒܿܠܵܢܵܐ ܕܡܵܘܬܵܐ ܬܹܐܡܪܝܼܘܗܝ: ܒܟܼܠܙܢܵܐ ܕܐܝܼܬܼ ܠܵܐ
ܡܩܲܒܿܠܵܢܵܐ ܗ̄ܘ̣ ܕܡܵܘܬܵܐ ܟܝܵܢܵܝܵܐ. ܘܠܵܘ ܠܲܟܼܝܵܢܵܐ ܗܘ̤ܵܬܼ ܚܕܼܵܝܘܼܬܼܵܐ:
ܐܸܠܵܐ ܠܲܚܫܲܚܬܼܵܐ ܕܒܲܪܢܵܫܵܐ ܡܕܲܒܿܪܵܢܵܐܝܼܬܼ: ܐܲܝܟܼ ܕܲܗܘ̤ܵܬܼ ܡܸܬܼܒܲܪܢܫܵܢܘܼܬܹܗ
ܕܐܲܠܵܗܵܐ ܡܸܠܬܼܵܐ: ܕܐܝܼܬܼܵܘܗܝ ܠܵܐ ܚܵܫܘܿܫܵܐ ܘܠܵܐ ܡܵܝܘܿܬܼܵܐ ܒܲܟܼܝܵܢܹܗ.
ܡܵܢܵܐ ܗܵܟܹܝܠ ܐܵܡ̇ܪܝܼܢ: ܙܵܕܹܩ ܠܝܼ ܕܬܲܪ̈ܬܲܝܗܹܝܢ ܐܹܡܲܠܸܐ. ܕܐܹܤܝܼܡ
ܠܗܵܢܹܝܢ ܕܲܕܠܩܘܼܒܼܠܵܐ: ܐܵܦ ܐܸܫܪܸܐ ܐܸܢܹܝܢ: ܐܲܝܟܼ ܕܡܲܨܝܵܐ. ܒܗܵܝ̇
ܕܐܲܦܝܼܤܬܵܢܝ: ܕܬܲܪ̈ܬܲܝܗܹܝܢ ܐܸܥܒܸܿܕܼ.
ܤܘܿܦܵܪܘܿܢܝܘܿܣ. ܐܵܡ̇ܪܝܼܢ ܓܹܝܪ ܗܵܟܲܢܵܐ: ܐܲܝܟܲܢܵܐ ܠܲܡ ܡܸܬܼܐ̱ܡܲܪ
ܒܲܪܢܵܫܵܐ ܫܡܲܝܵܢܵܐ ܘܪܘܼܚܵܐ: ܐܸܢܗ̤ܘ ܕܠܵܐ ܪܘܼܚܵܢܵܐ ܘܲܫܡܲܝܵܢܵܐ؟
pb. 61
ܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ ܒܲܟܼܝܵܢܵܐ ܐܲܝܟܼ ܐܲܠܵܗܵܐ: ܗܵܘ̇ ܕܠܲܟܼܝܵܢܵܐ
ܐ̄ܢܵܫܵܝܵܐ ܐܸܬܼܚܲܝܲܕܼ. ܘܡܸܬܼܐ̱ܡܲܪ: ܐܲܝܟܲܢܵܐ ܕܒܲܪܢܵܫܵܐ ܩܲܕܼܡܵܝܵܐ ܥܲܦܪܵܢܵܐ
ܕܡ̣ܢ ܐܲܪܥܵܐ: ܗܵܟܲܢܵܐ ܘܐܵܦ ܡܵܪܝܵܐ ܡ̣ܢ ܫܡܲܝܵܐ. ܘܲܗܘ̤ܵܐ ܒܲܪܢܵܫܵܐ
ܩܲܕܼܡܵܝܵܐ ܠܲܢܦܸܫ ܚܲܝܵܐ: ܘܒܲܪܢܵܫܵܐ ܕܲܬܼܪܹܝܢ ܠܪܘܼܚܵܐ ܡܲܚܝܢܝܼܬܼܵܐ. ܘܠܵܐ
ܒܸܠܥܵܕܼ ܡ̣ܢ ܐܘܼܤܝܼܵܐ ܕܦܲܓܼܪܵܐ ܕܥܲܦܪܵܐ ܡܸܬܼܐ̱ܡܲܪ ܒܲܪܢܵܫܵܐ ܥܲܦܪܵܢܵܐ:
ܘܠܵܐ ܬܘܼܒܼ ܤܛܲܪ ܡ̣ܢ ܢܲܦܫܵܐ ܡܸܬܼܐ̱ܡܲܪ ܢܲܦܫܵܢܵܐ. ܐܸܠܵܐ ܡ̣ܢ
ܟܢܘܼܫܝܼܗܘܿܢ ܕܠܲܟܼܝܵܢܵܐ ܕܒܲܪܢܵܫܵܐ ܡܸܢܼܐ̱ܡܲܪ: ܤܛܲܪ ܡ̣ܢ ܐܘܼܤܝܼܵܐ
ܕܲܫܡܲܝܵܢܵܐ ܘܲܕܼܪܘܼܚܵܢܵܐ: ܕܐܸܬܼܚܲܕܲܬ̤ ܒܲܕܝܵܢܵܐ ܠܲܟܼܝܵܢܵܐ ܕܒܲܪܢܵܫܵܐ.
ܢܢ. ܥܲܠ ܗܵܝ̇: ܕܐܸܢ ܒܲܪܢܵܫܵܐ ܕܲܬܼܪܹܝܢ ܡܵܪܝܐ ܡ̣ܢ ܫܡܲܝܵܐ ܥܲܠ
ܐܲܠܵܗܵܐ ܡܸܠܬܼܵܐ ܐܸܬܼܢܤܸܒܼ: ܡܵܕܹܝܢ ܘܲܒܼܢܲܝ̈ܢܵܫܵܐ ܫܡܲܝܵܢܹ̈ܐ: ܕܝܼܠܹܗ ܕܲܟܼܝܵܢܵܐ
ܕܐܲܠܵܗܵܐ ܡܸܠܬܼܵܐ ܐܝܼܬܲܝܗܘܿܢ. ܐܲܟܼܙܢܵܐ ܓܹܝܪ ܕܗܵܘ̇ ܫܡܲܝܵܢܵܐ: ܗܵܟܲܢܵܐ
ܐܵܦ ܫܡܲܝܵܢܹ̈ܐ.
ܢܸܤܛܘܿܪܝܼܣ. ܫܡܲܥ ܡܵܕܹܝܢ ܐܵܦ ܗܵܠܹܝܢ ܟܲܕܼ ܩܵܪܹܝܢ ܐܢ̄ܬܿܘܿܢ
ܠܫܲܪܟܹܗ ܕܲܟܼܬܼܵܒܼܵܐ: ܕܐܲܝܟܲܢܵܐ ܠܲܡ ܕܐܝܼܬܼܵܘܗܝ ܗܵܘ̇ ܫܡܲܝܵܢܵܐ: ܗܵܟܲܢܵܐ
ܐܵܦ ܫܡܲܝܵܢܹ̈ܐ. ܘܐܲܝܟܲܢܵܐ ܕܲܠܒܸܫܢ ܕܡܘܼܬܹܗ ܕܗܵܘ̇ ܥܲܦܪܵܢܵܐ: ܗܵܟܲܢܵܐ
ܐܵܦ ܥܲܦܪ̈ܵܝܹܐ. ܒܲܕܼ ܟܠܗܘܿܢ ܗ̤ܘ ܟܲܕܼ ܗܘ̤ ܟܝܵܢܵܐ ܩܢܹܝܢ. ܘܐܲܝܟܲܢܵܐ
ܕܗܵܘ̇ ܫܡܲܝܵܢܵܐ: ܗܵܟܲܢܵܐ ܐܵܦ ܫܡܲܝܵܢܹ̈ܐ. ܡܸܛܠ ܕܗ̤ܘ ܟܲܕܼ ܗ̤ܘ ܟܝܵܢܵܐ
ܐܝܼܬܼ ܠܗܘܿܢ: ܕܗ̤ܘ ܫܡܲܝܵܢܵܐ: ܐܵ ܚܢܲܢ ܟ̱ܠܲܢ ܕܲܡܤܲܟܹܝܢܲܢ ܕܲܒܼܗܵܢܵܐ
ܙܢܵܐ ܢܸܗܘܸܐ. ܗ̤ܘܲܝܢܲܢ ܒܢܲܝ̈ܢܵܫܵܐ ܡ̣ܢ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ: ܟܲܕ
ܢܲܦܫܲܢ ܘܦܲܓܼܪܲܢ ܡܸܬܼܟܲܫܝܼܢ ܠܲܡܫܲܡܠܵܝܘܼ ܟܝܵܢܵܐ ܕܐܲܝܟܼ ܗܵܢܵܐ.
ܘܟܼܠܚܲܕܼ ܡܸܢܲܢ ܗܵܘܹ̇ܐ ܗܵܘ̇ ܡܵܐ ܕܐܝܼܬܼܵܘܗܝ ܒܲܟܼܝܵܢܵܐ ܐܲܠܐܵܗܵܐ ܡܸܠܬܼܵܐ.
pb. 62
ܐܲܝܟܲܢܵܐ ܠܲܡ ܓܹܝܪ ܕܗܵܘ̇ ܫܡܲܝܢܵܐ: ܗܵܟܲܢܵܐ ܐܵܦ ܫܡܲܝܵܢܹ̈ܐ. ܘܗܵܘܹ̇ܝܢ:
ܐܲܝܟܼ ܟܡܵܐ ܕܐܝܼܬܲܝܗܘܿܢ ܒܢܲܝ̈ܢܵܫܵܐ ܡܫܲܝܵܢܹ̈ܐ: ܗܵܟܲܢܵܐ ܐܵܦ ܐܝܼܬܲܝܗܘܿܢ
ܐܲܠܵܗܹ̈ܐ ܡܸܠܹ̈ܐ. ܒܗܵܝ̇ ܕܟܼܠ ܚܲܕܼ ܚܲܕܼ ܡܸܢܗܘܿܢ: ܘܡ̣ܢ ܐܲܠܵܗܵܐ
ܡܸܠܬܼܵܐ ܐܝܼܬܼܵܘܗܝ: ܘܡ̣ܢ ܢܲܦܫܵܐ ܘܡ̣ܢ ܦܲܓܼܪܵܐ ܐ̄ܢܵܫܵܝܵܐ. ܠܵܘ ܒܠܵܐ
ܡܤܲܝܟܘܼܬܼܵܐ ܕܲܟܼܝܵܢܹܗ: ܟܲܕܼ ܥܲܠ ܚܲܕܼ ܚܲܕܼ ܐܝܼܬܼܵܘܗܝ ܠܵܐ
ܡܸܤܬܲܝܟܼܵܢܵܐܝܼܬܼ. ܐܸܠܵܐ ܕܒܲܟܼܝܵܢܵܐ ܕܟܼܠ ܚܲܕܼ ܚܲܕܼ ܡܸܢܗܘܿܢ ܡܤܲܝܲܟܼ:
ܘܲܠܒܲܪ ܡܸܢܹܗ ܠܵܐ ܡܸܬܼܪ̱̣ܢܸܐ ܕܐܝܼܬܼܵܘܗܝ. ܐܸܢ ܗܵܟܲܢܵܐ ܡܸܤܬܲܟܿܠܝܼܢ
ܐܢ̄ܬܿܘܿܢ ܠܗܵܝ̇ ܕܡܵܪܝܵܐ ܡ̣ܢ ܫܡܲܝܵܐ: ܘܲܠܗܵܝ̇ ܕܒܲܪܢܵܫܵܐ ܕܲܬܼܪܹܝܢ
ܠܪܘܼܚܵܐ ܡܲܚܵܢܝܼܬܼܵܐ: ܐܲܝܟܲܢܵܐ ܡܸܬܼܪܲܥܹܝܢ ܐܢ̄ܬܿܘܿܢ ܥܲܠ ܗܵܠܹܝܢ ܕܫܲܪܟܵܐ؟
ܕܐܲܝܟܲܢܵܐ ܠܲܡ ܕܲܠܒܸܫܢ ܕܡܘܼܬܹܗ ܕܗܵܘ̇ ܥܲܦܪܵܢܵܐ: ܗܵܟܲܢܵܐ ܢܸܠܒܲܫ
ܕܗܵܘ̇ ܘܡ̣ܢ ܫܡܲܝܵܐ. ܐܲܝܟܲܢܵܐ ܗܵܟܹܝܠ ܠܒܸܫܢ ܕܡܘܼܬܹܗ ܕܗܵܘ̇ ܕܡ̣ܢ
ܥܲܦܪܵܐ؟ ܡܵܢܵܐ ܐܝܼܬܲܝܢ ܗ̣̄ܘܲܝܢ؟ ܘܡܵܢܵܐ ܠܒܸܫܢ؟ ܐܵܪܵܐ ܒܢܲܝ̈ܢܵܫܵܐ
ܫܡܲܝܵܢܹ̈ܐ ܘܪ̈ܘܼܚܵܢܵܝܹܐ ܐܝܼܬܲܝܢ ܗ̣̄ܘܲܝܢ: ܡ̣ܢ ܢܲܦܫܵܐ ܘܡ̣ܢ ܦܲܓܼܪܵܐ ܘܡ̣ܢ
ܐܲܠܵܗܵܐ ܡܸܠܬܼܵܐ؟ ܐܵܘ ܪܘܼܚܵܐ ܕܠܵܐ ܦܓܲܪ ܘܲܕܼܠܵܐ ܢܦܸܫ: ܕܲܠܒܸܫ̣
ܕܡܘܼܬܼܵܐ ܕܥܲܦܪܵܢܵܐ ܦܲܓܼܪܵܐ ܘܢܲܦܫܵܐ: ܘܡܲܪܬܸܐ ܠܲܢ ܕܢܸܗܘܸܐ
ܕܡܘܼܬܼܵܐ ܕܪ̈ܘܼܚܵܢܹܐ: ܗܵܢܵܘ ܕܹܝܢ ܪ̈ܘܼܚܹܐ ܕܠܵܐ ܢܦܸܫ ܘܲܕܼܠܵܐ ܦܓܲܪ؟
ܟܲܕܼ ܛܵܒܼ ܗܵܕܹܐ ܠܵܘ ܕܝܼܠܲܢ ܐܝܼܬܹ̇ܝܗ̇: ܐܸܠܵܐ ܕܥܵܒܼܘܿܕܼܵܐ: ܐܸܢܗ̤ܘ
ܕܒܲܫܪܵܪܵܐ ܐܝܼܬܹܝܗ̇: ܐܲܝܟܲܢܵܐ ܡܲܪܬܸܐ ܠܲܢ ܕܢܸܠܒܲܫ ܕܡܘܼܬܼܵܐ ܕܒܲܪܢܵܫܵܐ
ܪܘܼܚܵܢܵܝܵܐ: ܗܵܢܵܘ ܕܹܝܢ ܡܫܝܼܚܵܐ: ܐܲܝܟܼ ܡ̇ܢ ܕܐܝܼܬܼܵܘܗܝ ܡܫܝܼܚܵܐ ܕܠܵܐ
ܢܦܸܫ ܘܲܕܼܠܵܐ ܦܓܲܪ؟ ܘܐܲܝܟܲܢܵܐ ܡܵܕܹܝܢ ܐܝܼܬܼܵܘܗܝ ܒܲܪܢܵܫܵܐ: ܟܲܕܼ
ܡܸܕܸܡ ܕܒܲܪܢܵܫܵܐ ܠܲܝܬܿ ܠܹܗ؟ ܐܵܘ ܐܲܝܟܲܢܵܐ ܡܸܬܼܐ̱ܡܲܪ ܡܫܝܼܚܵܐ ܒܲܪܢܵܫܵܐ
pb. 63
ܪܘܼܚܵܢܵܐ: ܗܵܘ̇ ܕܡ̣ܢ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ ܐܸܬܼܩܲܝܲܡ: ܠܲܟܼܝܵܢܵܐ
ܕܒܲܪܢܵܫܵܐ ܕܢܲܦܫܵܐ ܘܲܕܼܦܲܓܼܪܵܐ؟ ܚܢܲܢ ܕܹܝܢ ܐܸܢ ܠܵܐ ܓܫܝܼ̈ܡܹܐ ܘܲܕܼܠܐ
ܢܦܸܫ ܗܵܘܹ̇ܝܢܲܢ: ܕܕܲܐܝܟܼ ܗܵܢܵܐ ܗܵܘܹ̇ܝܢܲܢ: ܐܲܝܟܼ ܡܵܐ ܕܗܵܘ̇ ܕܐܝܼܬܼܵܘܗܝ.
ܟܲܕܼ ܡܸܕܸܡ ܠܲܝܬܿ ܠܲܢ: ܐܲܟܼܡܵܐ ܕܲܠܗܵܘ̇ ܠܵܐ ܗܘ̤ܵܐ. ܗܵܕܹܐ ܕܹܝܢ: ܠܵܐ
ܡܸܫܟܿܚܵܐ ܕܬܸܗܘܸܐ ܕܐܲܝܟܼ ܗܵܢܵܐ. ܗܵܠܹܝܢ ܘܕܐܲܝܟܼ ܗܵܠܹܝܢ ܫܟܼܝܼܪ̈ܵܬܼܵܐ
ܢܵܩ̈ܦܵܢ ܕܢܹܐܡܪܘܼܢ: ܕܐܲܝܟܼ ܗܵܢܵܐ: ܗܵܠܹܝܢ ܘܕܲܐܝܟܼ ܗܵܠܹܝܢ ܫܟܼܝܼܪ̈ܵܬܼܵܐ
ܢܵܩ̈ܦܵܢ ܕܢܹܐܡܪܘܼܢ: ܐܲܝܠܹܝܢ ܕܡܵܘܕܹܝܢ ܕܲܟܼܝܵܢܵܐ ܕܐܲܠܵܗܵܐ ܠܫܘܼܡܠܵܝܵܐ
ܕܲܟܼܝܵܢܵܐ ܕܒܲܪܢܵܫܵܐ ܢܩܸܦ̣. ܕܲܟܼܝܵܢܵܐ ܓܹܝܪ ܚܵܫܘܿܫܵܐ ܘܒܲܪܝܵܐ ܐܝܼܬܹܝܗ̇
ܢܲܩܝܼܦܘܼܬܼܵܐ ܕܲܚܕܲܝܘܼܬܼܵܐ ܟܝܵܢܵܬܐ ܕܲܟܼܝܵܢܵܐ ܚܵܫܘܿܫܵܐ ܘܒܲܪ̈ܝܵܐ. ܘܡܸܛܠ
ܗܵܕܹܐ: ܐܵܘ ܒܪܸܥܝܵܢܵܐ ܕܐܵܪ̈ܝܢܹܐ ܢܵܦ̇ܠܝܼܢ: ܕܐܵܡ̇ܪܝܼܢ ܕܒܲܟܼܝܵܢܵܐ ܗܘ̤ܵܐ
ܐܲܠܵܗܵܐ ܡܸܠܬܼܵܐ ܟܝܵܢܵܐ ܕܒܲܪܢܵܫܵܐ ܚܵܫܘܿܫܵܐ ܘܡܵܝܘܿܬܼܵܐ: ܟܲܕܼ ܡܤܲܝܒܲܪ
ܚܲܫܹ̈ܐ ܪܲܓܼܘܼܫܬܼܵܢܵܐܝܼܬܼ. ܐܵܘ ܒܪܸܥܝܵܢܵܐ ܕܐܲܝܠܹܝܢ ܕܐܵܡ̇ܪܝܼܢ: ܒܡܲܤܒܿܪܵܢܘܼܬܼܵܐ
ܗܘ̤ܵܐ ܢܲܦܫܵܐ ܘܦܲܓܼܪܵܐ: ܐܵܘ ܒܲܬܼܪ̈ܲܝܗܘܿܢ. ܕܒܲܙܒܲܢ ܠܗܵܠܹܝܢ
ܘܒܲܙܒܲܢ ܠܗܵܠܹܝܢ ܢܸܥܪ̱ܩܘܼܢ: ܟܲܕܼ ܤܵܒܲܪܝܼܢ ܕܒܲܥܪܘܼܩܝܵܐ ܡܲܡܕܹܝܢ
ܡ̣ܢ ܫܟܼܝܼܪ݁ܵܬܼܵܐ ܗܵܠܹܝܢ.
ܢܐ. ܠܘܼܩܒܲܠ ܐܲܝܠܹܝܢ ܕܡܲܤܒܿܪܝܼܢ: ܕܒܲܪܢܵܫܵܐ ܗ̄ܘ̣ ܫܚܝܼܡܵܐ
ܡܫܝܼܚܵܐ.
ܥܕܲܡܵܐ ܠܗܵܘ̇ܪܟܵܐ ܐܸܬܼܐ̱ܡܲܪ ܠܘܼܩܒܲܠ ܗܵܠܹܝܢ: ܢܸܚܙܸܐ ܡܸܟܸܿܝܠ
ܐܵܦ ܠܗܹܪܹ̈ܝܤܝܼ̈ܝܣ ܗܵܠܹܝܢ ܕܲܤܕܲܩ̣: ܘܡܵܘܕܹܝܢ ܠܲܡܫܝܼܚܵܐ ܒܲܪܢܵܫܵܐ
ܒܲܠܚܘܿܕܼ: ܕܲܒܼܡܵܢܵܐ ܦܪܝܼܫܝܼܢ: ܘܒܲܐܝܠܹܝܢ ܒܗܵܡܘܿܢ ܕܡ̣ܢ ܠܥܸܠ
ܡܸܬܿܕܲܡܹܝܢ. ܐܲܝܟܲܢܵܐ ܕܐܵܦ ܠܗܹܪܹ̈ܤܝܼ̈ܣ ܕܝܼܠܗܘܿܢ ܢܦܲܪܸܫ ܘܲܢܚܵܘܸܐ:
ܐܲܝܟܼ ܕܠܵܐ ܡܸܛܠ ܐܲܝܠܹܝܢ ܕܒܼܝܼܫܵܐܝܼܬܼ ܐܲܡܝܼܪ̈ܲܢ: ܢܸܥܪܘܿܩ ܐܵܦ
pb. 64
ܡ̣ܢ ܐܲܝܠܹܝܢ ܕܫܲܦܝܪ ܐܲܡܝܼܪܵܢ. ܘܠܵܐ ܬܘܼܒܼ ܠܐܲܝܠܹܝܢ ܕܒܼܝܼܫܵܐܝܼܬܼ
ܐܲܡܝܼܪܵܢ: ܕܠܵܐ ܦܘܼܪܢܵܫܵܐ ܢܩܲܒܸܠ. ܠܡܵܘܕܵܝܘܼܬܹܗ ܓܹܝܪ ܠܲܡܫܝܼܚܵܐ
ܒܪܢܵܫܵܐ ܘܒܲܟܼܝܵܢܵܐ ܘܒܲܫܪܵܪܵܐ: ܕܲܫܪܵܪܵܐ ܐܝܼܬܹܝܗ̇: ܘܡ̣ܢ ܫܪܵܪܵܐ
ܡܸܤܬܲܗܕܵܐ. ܘܲܒܼܗܵܕܹܐ: ܠܲܝܬܿ ܐ̄̈ܢܵܫ ܕܥܵܕܹܠ ܠܗܘܿܢ. ܒܗܵܝ̇ ܕܹܝܢ
ܕܥܵܪܩܝܼܢ ܡ̣ܢ ܐܲܠܵܗܘܼܬܹܗ: ܒܗܵܝ̇ ܕܐܝܼܬܹܝܗ̇ ܒܲܫܪܵܪܵܐ ܘܒܲܟܼܝܵܢܵܐ: ܡܲܤ̈ܠܲܝܵܐ
ܐܸܢܘܿܢ: ܒܲܕܼ ܡܒܲܛܠܝܼܢ ܠܡܸܬܼܒܲܪܢܫܵܢܘܼܬܹܗ ܕܐܲܠܵܗܵܐ ܡܸܠܬܼܵܐ.
ܢܒ. ܥܲܠ ܐܲܝܠܹܝܢ: ܕܒܲܫܡܵܐ ܒܲܚܘܿܕܼ ܡܵܘܕܹܝܢ ܠܹܗ ܠܐܲܠܵܗܵܐ
ܡܸܠܬܼܵܐ.
ܤܵܒܹܿܠܝܵܢܹ̈ܐ ܡܸܢܗܘܿܢ ܓܹܝܪ: ܐܵܦ ܕܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ
ܒܐܘܼܤܝܼܵܐ ܟܵܦ̇ܪܝܼܢ. ܘܲܫܡܵܐ ܒܲܠܚܘܿܕܼ ܕܐܵܡ̇ܪܝܼܢ ܕܐܲܠܵܗܵܐ ܡܸܠܬܼܵܐ:
ܕܐܝܼܬܼܵܘܗܝ ܦܘܼܩܕܵܢܵܐܢܵܘ̇ ܕܐܸܡ݂ܲܪ ܘܲܗܘ̤ܵܐ. ܗܵܟܲܢܵܐ ܕܹܝܢ: ܐܵܦ ܠܐܲܒܼܵܐ
ܘܲܠܪܘܼܚܵܐ ܕܩܘܼܕܼܫܑܵܐ ܒܫܘܼܡܵܗܵܐ ܒܲܠܚܘܿܕܼ ܐܵܡ̇ܪܝܼܢ. ܘܲܒܼܦܵܤܝܼ̈ܩܵܬܼܵܐ:
ܠܲܝܗܘܼ̈ܕܵܝܹܐ ܫܵܠܡ̇ܝܼܢ ܝܲܬܿܝܼܪ ܡ̣ܢ ܕܠܲܟܼܪܸܤܛܝܵܢܹܐ.
ܢܓ. ܥܲܠ ܐܲܝܠܹܝܢ ܕܐܵܡ̇ܪܝܼܢ: ܕܒܲܟܼܝܵܢܵܐ ܡ̣ܢ ܐܝܼܬܼܵܘܗܝ ܐܲܠܵܗܵܐ
ܡܸܠܬܼܵܐ: ܠܵܐ ܕܹܝܢ ܐܸܬܼܚܲܝܲܕܼ ܒܲܟܼܝܵܢܵܐ ܐܸܠܵܐ ܒܐܸܤܟܹܿܡܵܐ: ܘܐܝܼܬܲܝܗܘܿܢ
ܬܪܹܝܢ ܒܢܝܼ̈ܢ.
ܦܵܘܠܘܿܢܝܵܢܹ̈ܐ. ܐ̄ܚܪܵܢܹܐ ܕܹܝܢ ܒܗܵܠܹܝܢ ܥܵܕܼܠܝܼܢ ܠܗܘܿܢ: ܒܗܵܝ̇
ܕܗܸܢܘܿܢ ܡܵܘܕܹܝܢ ܠܐܲܠܵܗܵܐ ܡܸܠܬܼܵܐ ܟܝܵܢܵܐ ܐܵܘ ܩܢܘܿܡܵܐ: ܗܵܟܼܘܵܬܼ
ܕܹܝܢ ܐܵܦ ܠܐܲܒܼܵܐ ܘܲܠܪܘܼܚܵܐ ܕܩܘܼܕܼܫܵܐ. ܥܲܠ ܡܸܬܼܒܲܪܢܵܫܢܘܼܬܹܗ
ܕܹܝܢ ܠܵܐ ܫܵܠܡ̇ܝܼܢ ܠܐܵܪ̈ܬܵܕܘܿܟܿܤܹܐ: ܐܸܠܵܐ ܡܸܬܼܩܲܪܒܼܝܼܢ ܠܐܲܝܠܹܝܢ
pb. 65
ܕܐܵܡ̇ܪܝܼܢ ܕܒܲܪܢܵܫܵܐ ܗ̄ܘ̣ ܒܲܠܚܘܿܕܼ ܡܫܝܼܚܵܐ: ܘܐܲܝܟܼ ܚܲܕܼ ܡ̣ܢ ܩܲܕܼܝܼ̈ܫܹܐ
ܬܚܹܝܬܼ ܢܵܡܘܿܤܵܐ ܐܸܬܿܕܲܒܲܪ. ܘܲܒܼܦܘܼܩܕܵܢܵܐ: ܢ̣ܛܲܪ ܠܟܼܠܗܘܿܢ
ܦܘܼ̈ܩܕܵܢܹܐ. ܘܒܲܢܛܘܼܪܬܵܐ ܪܹܫܵܝܵܬܼܵܐ: ܗܘ̤ܵܐ ܕܠܵܐ ܚܛܵܗܝܼ̈ܢ ܐܲܝܟܼ
ܒܲܪܢܵܫܵܐ. ܘܲܒܼܗܵܕܹܐ: ܐܸܬ̣ܝܲܬܲܪ ܡ̣ܢ ܟܠ ܒܢܲܝ̈ܢܵܫܵܐ. ܐܵܘ ܒܗܵܝ̇ ܕܡ̣ܢ
ܒܵܬܲܪ ܕܲܗܘ̤ܵܐ ܕܠܵܐ ܚܛܵܗܹ̈ܐ: ܐܸܬܼܚܵܘܝܼ ܕܲܡܚܲܪܪܵܐ ܗ̄ܘ̣ ܡ̣ܢ ܡܵܘܬܵܐ.
ܘܙܵܕܼܩܵܐܝܼܬܼ ܠܵܐ ܡܵܝܘܿܬܼܘܼܬܼܵܐ ܩܲܒܸܿܠ̣ ܗ̄ܘ̣ܵܐ: ܗܵܝ̇ ܕܤܝܼܡܵܐ ܠܐܝܼܩܵܪܵܐ
ܕܐܲܝܠܹܝܢ ܕܲܕܼܠܵܐ ܚܛܵܗܹ̈ܐ ܢܵܛ̇ܪܝܼܢ ܢܵܡܘܿܤܵܐ. ܐܵܘ ܡܸܛܠ ܕܟܲܕܼ
ܒܗܵܠܹܝܢ ܟܠܗܹܝܢ ܡܸܬܿܕܲܒܲܪ ܗ̄ܘ̣ܵܐ: ܡ̣ܢ ܒܵܬܲܪ ܕܲܢܛܲܪ ܟܠܗܘܿܢ
ܦܘܼ̈ܩܕܵܢܹܐ ܕܠܵܐ ܡܘܼܡ: ܩܲܒܸܿܠ̣ ܗ̄ܘ̣ܵܐ ܥܠܵܘܗܝ ܕܲܢܡܘܼܬܼ ܚܠܵܦܲܝܢ.
ܘܡ̣ܢ ܤܘܿܓܼܵܐܐ ܕܡܸܫܬܲܡܥܵܢܘܼܬܹܗ: ܩܲܒܸܿܠ̣ ܐܝܼܩܵܪܵܐ ܘܫܘܼܡܵܗܵܐ
ܕܲܒܼܪܵܐ ܒܛܲܝܒܿܘܼܬܼܵܐ. ܠܵܘ ܗ̤ܘ ܐܲܠܵܗܵܐ ܡܸܠܬܼܵܐ: ܐܸܠܵܐ ܗܵܘ̇ ܕܐܸܬܿܕܲܒܲܪ
ܘܲܢ̣ܛܲܪ ܟܠܗܘܿܢ ܦܘܼ̈ܩܕܵܢܹܐ: ܟܲܕ ܐܵܡ̇ܪܝܼܢ ܗܵܟܲܢܵܐ.
ܦܘܠܹܐ. ܠܡܵܢ ܠܲܡ ܓܹܝܪ ܚܵܫ̇ܚܵܐ ܗ̄ܘ̣ܵܬܼ: ܕܐܵܦ ܐܲܠܵܗܵܐ
ܡܸܠܬܼܵܐ ܢܸܫܬܵܘܬܲܦ ܠܹܗ ܒܤܘܼܥܪ̈ܵܢܹܐ ܘܢܸܤܥܘܿܪ ܥܲܡܹܗ: ܐܲܝܟܼ ܡܲܢ
ܕܠܵܐ ܡܸܫܟܲܚ ܗ̄ܘ̣ܵܐ ܕܡܸܢܹܗ ܘܠܹܗ ܢܸܛܲܪ ܦܘܼ̈ܩܕܵܢܹܐ؟ ܘܐܲܝܕܵܐ
ܗ̣̄ܝ ܗܵܕܹܐ ܕܐܸܬ̱ܢܛܲܪ ܕܠܵܐ ܚܛܵܗܹ̈ܐ؟ ܐܵܘ ܐܲܝܕܵܐ ܗ̣̄ܝ ܙܵܟܼܘܼܬܼܵܐ؟
ܠܵܐ ܚܵܒܿܬܼܵܐ ܥܸܠܝܵܬܼܵܐ ܐܝܼܬܹܝܗ̇: ܕܟܲܕܼ ܠܵܐ ܢܫܟܲܚ ܕܢܸܙܟܸܿܐ: ܐܸܤܬܿܢܸܩ
ܥܲܠ ܡܥܲܕܪܵܢܘܼܬܼܵܐ: ܘܡ̣ܢ ܡܥܲܕܪܵܢܘܼܬܼܵܐ ܢܸܙܟܸܿܐ: ܒܲܕܼ ܗ̤ܘ ܠܵܐ
ܡܸܫܟܲܚ. ܠܵܐ ܗ̄ܘ̣ܵܐ ܓܹܝܪ ܕܗܵܢܵܐ ܐܝܼܬܹܝܗ̇ ܙܵܟܼܘܼܬܼܵܐ: ܐܸܠܵܐ ܕܗܵܘ̇
ܕܥܲܕܪܹܗ: ܘܠܵܐ ܡܸܙܕܟܸܐ. ܐܲܝܢܵܘ ܓܹܝܪ ܬܲܟܼܬܿܘܼܫܵܐ ܕܲܠܘܵܬܼ ܐܵܠܵܗܵܐ؟
ܘܐܲܝܕܵܐ ܗ̣̄ܝ ܚܵܘܒܿܬܼܵܐ؟ ܗܵܘ̇ ܓܹܝܪ ܡ̇ܢ ܕܒܼܵܥܹ̇ܐ ܡ̣ܢ ܟܠ: ܦܵܪܘܿܩܵܐ
pb. 66
ܗܵܘܹ̇ܐ. ܐܲܝܢܵܘ ܓܹܝܪ ܕܚܵܐܲܪ ܕܐܝܼܬܼ ܒܹܝܬܼ ܠܹܗ ܘܠܲܐܪܟܿܘܿܢܵܐ ܕܐܵܬܹ̇ܐ
ܘܠܵܐ ܡܸܫܟܲܚ ܒܹܗ ܡܸܕܸܡ:: ܟܲܕܼ ܡܸܫܬܲܟܚܵܐ ܕܗ̤ܘ ܟܝܵܢܵܐ ܥܲܕܪܹܗ؟
ܘܲܠܘܵܬܼ ܡ̇ܢ ܡܸܬܿܬܿܕܝܼܢ: ܟܲܕܼ ܗܘ̤ ܐܝܼܬܼܵܘܗܝ ܕܲܝܵܢܐ ܕܕܼܵܐܹ̇ܢ ܐܵܦ
ܡܸܬܿܬܿܪܝܼܢ؟ ܡܲܢ̣ܘܼ ܗܵܘ̇ ܕܩܲܒܿܠܹܗ ܩܘܼܪܒܵܢܵܐ ܚܠܵܦ ܟܠܗܘܿܢ
ܒܢܲܝ̈ܢܵܫܵܐ: ܟܲܕܼ ܗ̤ܘ ܐܝܼܬܼܵܘܗܝ ܗܵܘ̇ ܕܲܡܩܲܒܸܿܠ ܘܗܵܘ̇ ܕܡܸܬܼܩܲܪܲܒܼ؟
ܡܲܢ̣ܘܼ ܗܵܘ̇ ܕܲܡܪܲܥܸܐ ܘܗܵܘ̇ ܕܡܸܬܼܪܲܥܸܐ: ܟܲܕܼ ܗ̤ܘ ܐܝܼܬܼܵܘܗܝ
ܒܬܲܪ̈ܬܲܝܗܹܝܢ؟ ܐܸܠܵܐ ܐܸܢ ܕܲܠܡܵܐ ܠܲܚܕܼܵܐ ܪܹܫܢܘܼܬܼܵܐ: ܠܬܲܪܬܹܝܢ ܐܲܝܠܹܝܢ
ܕܠܵܐ ܕܵܡ̈ܝܵܢ ܠܲܚܕܼܵܪܹ̈ܐ ܢܤܲܪܩܘܼܢ ܘܢܹܐܡܪܘܼܢ: ܕܐܲܒܼܵܐ ܐܸܬܼܚܲܡܲܬܼ:
ܘܲܒܼܪܵܐ ܪܲܥܢܹܗ ܪܲܓܼܝܼܙ ܗ̄ܘ̣ܵܐ: ܐܲܝܟܲܢܵܐ ܕܩܲܒܸܿܠ̣ܘ ܡ̣ܢ ܫܘܿܥ̈ܝܵܬܼܵܐ
ܕܡܵܢܝܼܢܵܝܹ̈ܐ: ܗܵܢ̇ܘܿܢ ܕܲܒܼܕܵܪܘ ܠܗܵܠܹܝܢ. ܐܵܘ ܕܲܠܡܵܐ ܒܐܸܤܟܹܡܵܐ ܚ̣ܵܘܝܼ
ܚܸܡܬܹܗ ܠܘܼܩܒܲܠ ܐܲܝܠܹܝܢ ܕܲܛܥ̣ܵܘ: ܘܲܥܒܲܕܼ ܠܲܫܪܵܝܵܗ̇ ܒܡܲܤܲܒܼ ܒܐܲܦܹ̈ܐ؟
ܒܲܕܼ ܚ̣ܵܘܝܼ ܢܲܦܫܹܗ ܚܸܡܬܼܵܢܵܐ ܘܲܡܪܲܥܝܵܢܵܐ: ܐܲܝܟܼ ܕܲܒܼܡܸܠܬܼܵܐ.
ܐ̄ܚܪܵܢܝܵܐܝܼܬܼ ܗܵܟܹܝܠ ܢܵܩ̇ܦܝܼܢ ܐܵܦ ܠܐܲܝܠܹܝܢ ܕܡܸܬܼܪܲܥܹܝܢ ܗܵܠܹܝܢ
ܕܐܵܪܝܼܘܼܤ: ܕܐܵܡ̇ܪܝܼܢ ܕܠܵܘ ܐ̄ܚܪܵܢܝܵܐܝܼܬܼ ܐܸܬܼܪܲܥܝܼ: ܐܸܠܵܐ ܒܡܵܘܬܵܐ
ܕܲܡܫܝܼܚܵܐ: ܕܡ̣ܢ ܒܪܵܫܝܼܬܼ ܐܝܼܬܼܵܘܗܝ ܗ̄ܘ̣ܵܐ ܐܲܠܵܗܑܵܐ: ܘܐܲܠܵܗܵܐ ܐܝܼܬܼܵܘܗܝ
ܗ̄ܘ̣ܵܐ. ܡܵܢ ܕܹܝܢ ܐܵܠܨܵܐ ܗ̄ܘܼܵܬܼ ܥܲܠ ܒܸܕܼܝܵܐ ܗܵܢܵܐ؟ ܗܵܘ̇ ܓܹܝܪ
ܕܐܝܼܬܼܵܘܗܝ ܗ̄ܘ̣ܵܐ ܒܹܗ: ܠܵܘ ܒܡܵܘܬܵܐ ܕܲܐ̄ܚܪܹܢܵܐ ܗܵܕܹܐ ܥܵܒܹ̇ܕܼ ܗ̄ܘ̣ܵܐ.
ܐܵܦ ܠܵܐ ܬܘܼܒܼ ܟܹܐܢܘܼܬܼܵܐ ܗ̣̄ܝ: ܕܗܵܘ̇ ܕܠܵܐ ܐܝܼܬܼܵܘܗܝ ܡܸܢܹܗ ܡ̣ܢ
ܟܝܵܢܵܐ: ܚܠܵܦ ܟܝܵܢܵܐ ܐ̄ܚܪܹܢܵܐ ܩܲܒܸܿܠ̣ ܡܵܘܬܵܐ ܥܲܠ ܐܲܦܲܝ̈ ܫܪܵܝܵܐ
ܕܚܵܘܒܿܬܼܵܐ. ܘܠܵܐ ܬܘܼܒܼ ܫܪܵܝܵܐ ܫܲܪܝܼܪܵܐ ܡܸܬܼܚܵܘܸܐ: ܐܸܠܵܐ ܐܸܤܟܹܿܡܵܐ.
pb. 67
ܘܐܵܡ̇ܪܝܼܢ ܕܢܸܬܼܦܲܠܓܼܘܼܢ ܗܵܠܹܝܢ ܠܲܬܼܪܹܝܢ ܒܢܲܝ̈ܐ. ܐܲܝܟܲܢܸܵܐ ܕܗܵܠܹܝܢ
ܡ̇ܢ ܢܸܠܚ̈ܡܵܢ ܠܗܵܢܵܐ: ܘܗܵܢܹܝܢ ܠܹܗ. ܐܲܝܟܼ ܕܠܵܐ ܢܸܗܘ̈ܝܵܢ ܒܟܼܠ
ܡܸܠܹ̈ܐ ܕܐܝܼܬܼ: ܠܵܐ ܕܲܠܩܘܼ̈ܒܼܠܵܝܵܬܼܵܐ: ܘܠܵܐ ܬܘܼܒܼ ܐܸܤܟܹܡ̈ܬܼܵܢܵܝܵܬܼܵܐ.
ܟܲܕܼ ܐܝܼܬܹܝܗ̇ ܚܕܼܵܐ ܐܲܠܵܗܘܼܬܼܵܐ: ܘܲܚܕܼܵܐ ܡܵܪܘܼܬܼܵܐ: ܘܚܲܕܼ ܫܘܼܠܛܵܢܵܐ
ܕܐܲܒܼܵܐ ܘܕܲܒܼܪܵܐ: ܕܠܵܐ ܡܩܲܒܿܠܝܼܢ ܐܸܤܟܹܡܵܐ ܕܐܲܝܟܼ ܗܵܢܵܐ. ܗܵܠܹܝܢ
ܘܲܕܲܕܼܵܡ̈ܝܵܢ ܠܗܵܠܹܝܢ ܐܵܡ̇ܪܝܼܢ: ܟܕܼ ܡܥܲܫܢܝܼܢ ܚܘܼܫܵܒܲܝ̈ܗܘܿܢ: ܕܠܲܒܼܪܵܐ
ܘܠܲܡܫܝܼܚܵܐ ܥܦܝܼܦܵܐ ܢܹܐܡܪܘܼܢܵܝܘܗܝ: ܒܦܲܪ̈ܨܘܿܦܹܐ ܐܵܦ ܒܲܩܢܘܼܿܡܹ̈ܐ.
ܒܲܕܼܡܘܼܬܼܵܐ ܕܐܲܝܟܼ ܕܩܲܒܸܿܠ̣ܘ ܩܲܕܝܼ̈ܫܹܐ ܠܲܥܡܘܼܪܝܵܐ ܕܐܲܠܵܗܵܐ: ܘܐܵܦ
ܠܨܲܠܡܹܗ ܒܹܗ ܒܲܙܢܵܐ ܐܵܡ̇ܪܝܼܢ.
ܢܸܤܛܘܿܪܝܼܣ. ܢܹܐܡܲܪ ܗܵܟܹܝܠ ܐܵܦ ܠܘܵܬܼ ܟܠ ܚܲܕܼ ܡ̣ܢ ܗܵܠܹܝܢ
ܕܛܵܥܹ̇ܝܢ ܘܲܡܛܥܹܝܢ: ܟܲܕܸ ܟܵܦ̇ܪܝܼܢ ܒܡܸܬܼܒܲܪܢܵܫܵܢܘܼܬܼܵܐ ܕܲܗܘ̤ܵܬܼ
ܠܐܲܠܵܗܵܐ ܡܸܠܬܼܵܐ. ܘܩܲܕܼܡܵܝܑܬܼ: ܒܗܘܿܢ ܒܦܸܬܼܓܼܵܡܹ̈ܐ ܕܗܵܢ̇ܘܿܢ ܢܸܬܼܚܲܫܲܚ
ܠܘܵܬܼܗܘܿܢ. ܐܲܢ̄ܬܿ ܕܹܝܢ ܤܲܒ̣ ܠܝܼ ܠܡܸܠܹ̈ܐ ܕܗܵܢ̇ܘܿܢ: ܐܲܝܠܹܝܢ
ܕܐܝܼܬܲܝܗܹܝܢ ܡܦܝܼ̈ܤܵܢܝܼܬܼܵܐ ܘܚܵܫ̈ܚܵܢ ܠܲܦܝܵܤܵܐ ܕܤܲܓܿܝܼ̈ܐܹܐ. ܘܲܓܲܢ̄ܒܵܪܵܐܝܼܬܼ
ܐܸܬܼܟܲܬܲܫ ܚܠܵܦܲܝܗܘܿܢ: ܐܲܝܟܼ ܕܐܵܦܠܵܐ ܚܕܼܵܐ ܥܸܠܬܼܵܐ ܕܡܲܦ̣ܫ ܒܪܘܼܚܵܐ
ܬܸܫܬܿܒܸܩ ܠܗܘܿܢ. ܡܸܛܠ ܐܲܝܕܵܐ ܥܸܠܬܼܵܐ: ܟܲܕܼ ܚܕܼܵܐ ܐܝܿܬܹܝܗ̇
ܐܲܠܵܗܘܼܬܼܵܐ ܘܡܵܪܘܼܬܼܵܐ: ܘܫܘܼܠܛܵܢܵܐ ܘܝܼܕܲܥܬܼܵܐ: ܘܪܸܥܝܵܢܵܐ ܘܚܲܝܠܵܐ
ܕܐܲܠܵܗܵܐ ܐܲܒܼܵܐ: ܘܕܲܒܼܪܵܐ ܕܟܼܠ ܒܐܝܼܕܹܗ ܗܘ̤ܵܐ ܡ̣ܢ ܐܵܠܵܗܵܐ:
ܘܒܸܠܥܵܕܼܵܘܗܝ ܐܵܦܠܵܐ ܚܕܼܵܐ ܗܘ̤ܵܬܼ ܡܸܕܸܡ ܕܲܗܘ̤ܵܐ. ܗܵܝ̇ ܕܹܝܢ ܕܲܗܘ̤ܵܐ
ܒܸܤܪܵܐ: ܠܐܲܠܵܗܵܐ ܡܸܠܬܼܵܐ ܒܲܠܚܘܿܕܼ ܡܲܩܸܜ: ܘܠܵܐ ܗ̄ܘ̣ܵܐ ܕܥܲܒܼܕܹܗ
ܠܒܸܤܪܵܐ: ܡܸܠܬܼܵܐ ܠܲܡ ܒܸܤܪܵܐ ܗܘ̤ܵܐ. ܗܵܘ̇ ܕܐܝܼܬܼܵܘܗܝ ܗ̄ܘ̣ܵܐ ܠܘܵܬܼ
pb. 68
ܐܲܠܵܗܵܐ: ܘܠܵܐ ܗ̄ܘ̣ܵܐ ܠܐܲܠܵܗܵܐ ܐܲܒܼܵܐ ܐܸܡ݂ܲܪ: ܗܵܘ̇ ܕܐܝܼܬܼܵܘܗܝ ܠܘܵܬܹܗ.
ܗܵܝ̇ ܓܹܝܪ ܕܲܗܘ̤ܵܐ: ܘܗܵܝ̇ ܕܲܥ̣ܒܲܕ: ܬܲܪ̈ܬܲܝܗܹܝܢ ܕܝܼܠܹܗ ܐܝܼܬܲܝܗܹܝ̇ܢ:
ܟܲܕܼ ܠܵܐ ܥܵܒܼ̈ܕܵܢ ܦܵܠܓܘܼܬܼܵܐ. ܘܠܵܐ ܗ̄ܘ̣ܵܐ ܕܗܵܢܵܐ ܐܝܼܬܼܵܘܗܝ:
ܘܲܕܼܗܵܘ̇ ܠܲܝܬܵܘܗܝ. ܐܸܠܵܐ ܐܸܢ ܕܲܠܡܵܐ ܬܲܪܬܹܝܢ ܡܠܹ̈ܐ ܡܵܘܕܹܝܢ
ܕܐܝܼܬܼ: ܐܲܝܟܼ ܬܪܹܝܢ ܒܢܲܝ̈ܵܐ. ܘܲܚܕܼܵܐ ܐܝܼܬܹܝܗ̇ ܐܲܠܵܗܘܼܬܼܵܐ: ܘܲܚܕܼܵܐ ܐܝܼܬܹܝܗ̇
ܚܵܫܘܿܫܘܼܬܼܵܐ: ܒܕܲܗܘ̤ܵܬܼ ܒܸܤܪܵܐ؟
ܤܘܿܦܵܪܘܿܢܝܼܘܿܣ. ܘܡ̇ܢ ܫܟܼܝܪܵܐ: ܘܗܵܟܲܢܵܐ ܢܵܘܕܸܐ؟ ܗܵܕܹܐ ܓܹܝܪ:
ܓܲܠܝܵܐ. ܡܸܛܠ ܗܵܢܵܐ: ܐܵܦ ܐܹܘܲܢܓܲܠܸܤܛܵܐ ܐܸܡ݂ܲܪ ܥܲܠ ܗܵܢܵܐ: ܕܲܥ̣ܡܲܪ
ܒܲܢ ܗܵܢܵܐ ܕܹܝܢ: ܥܲܠ ܡܸܠܬܼܵܐ: ܗܵܕܹܐ ܕܒܲܪܢܵܫܵܐ: ܕܲܚܙܲܝܢ ܫܘܼܒܼܚܹܗ:
ܫܘܼܒܼܚܵܐ ܐܲܝܟܼ ܕܝܼܚܝܼܕܼܵܐ: ܘܠܵܐ ܗ̄ܘ̣ܵܐ ܕܝܼܚܝܼܕܼܵܝܵܐ: ܕܲܡܠܸܐ ܛܲܝܒܿܘܼܬܼܵܐ
ܘܩܘܼܫܬܼܵܐ. ܘܠܵܐ ܬܘܼܒܼ ܒܲܟܼܝܵܢܵܐ. ܗܵܘ̇ ܓܹܝܪ ܫܘܼܒܼܚܵܐ: ܠܵܐ ܗ̄ܘ̣ܵܐ
ܡ̣ܢ ܛܲܝܒܿܘܼܬܼܵܐ: ܐܸܠܵܐ ܡ̣ܢ ܟܝܵܢܵܐ ܡܠܸܐ: ܘܠܵܐ ܤܢܝܼܩ ܥܲܠ
ܬܵܘܤܲܦܬܼܵܐ.
ܢܸܤܛܘܿܪܝܼܣ. ܡܵܐ ܗܵܟܹܝܠ ܕܐܵܡܲ݁ܪ ܐܲܒܼܵܐ ܥܲܠ ܗܵܢܵܐ: ܕܗܵܢܵܘ
ܒܹܪܝ. ܘܬܼܘܼܒܼ ܠܲܒܼܪܹܗ ܝܑܼܚܝܼܕܼܵܝܵܐ ܝܲܗ̣̄ܒܼ. ܘܝܼܚܝܼܕܼܵܝܵܐ ܗܵܘ̇
ܕܐܝܼܬܼܵܘܗܝ ܒܥܘܼܒܵܐ ܕܐܲܒܼܘܼܗܝ: ܗ̤ܘ ܐܸܫܬܲܥܝܼ ܠܲܢ. ܥܠܵܘܗܝ ܥܲܠ
ܗܵܢܵܐ ܕܐܝܼܬܼܵܘܗܝ ܒܥܘܼܒܵܐ ܕܐܲܒܼܘܼܗܝ ܐܸܡ݂ܲܪ: ܐܵܘ ܬܠܵܬܼܵܐ ܝܑܼܚܝܼ̈ܕܼܵܝܵܐ
ܐܸܡ݂ܲܪ؟ ܚܲܕܼ ܗܵܘ̇: ܕܐܝܼܬܼܵܘܗܝ ܗ̄ܘ̣ܵܐ ܡ̣ܢ ܒܪܵܫܝܼܬܼ ܐܲܠܵܗܵܐ ܡܸܠܬܼܵܐ.
ܘܲܐ̄ܚܪܹܢܵܐ: ܗܵܘ̇ ܕܐܝܼܬܼ ܗ̄ܘ̣ܵܐ ܠܹܗ ܫܘܼܒܼܚܵܐ ܐܲܝܟܼ ܕܝܼܚܝܼܬܼܵܐ: ܠܵܐ
pb. 69
ܕܹܝܢ ܐܝܼܬܼܵܘܗܝ ܗ̄ܘ̣ܵܐ ܝܑܼܚܝܼܕܼܵܝܵܐ. ܘܕܼܬܼܠܵܬܼܵܐ: ܤܛܲܪ ܡ̣ܢ ܗܵܠܹܝܢ: ܗܵܘ̇
ܕܝܲܗ̣̄ܒܼ ܥܲܠ ܐܲܦܲܝ̈ ܥܵܠܡܵܐ.
ܤܘܿܦܪܘܿܢܝܼܘܿܣ. ܡܵܢܵܐ ܗܵܟܹܝܠ؟ ܠܐܲܠܵܗܵܐ ܡܸܠܬܼܵܐ ܒܲܪ ܟܝܵܢܵܐ:
ܕܝܼܠܹܗ ܝܲܗ̣̄ܒܼ ܠܡܵܘܬܵܐ: ܗܵܘ̇ ܕܐܝܼܬܼܵܘܗܝ ܠܵܐ ܡܵܝܘܿܬܼܵܐ ܘܠܵܐ
ܚܵܫܘܿܫܵܐ؟ ܘܠܵܐ ܡܕܲܓ̈ܠܵܢ ܠܲܚܕܼܵܕܹ̈ܐ: ܗܵܘ̇ ܕܐܝܼܬܼܵܘܗܝ ܒܲܪ ܟܝܵܢܹܗ
ܠܵܐ ܚܵܫܘܿܫܵܐ ܘܠܵܐ ܡܵܘܝܿܬܼܵܐ: ܘܗܵܝ̇ ܕܵܠܡܵܘܬܵܐ ܝܲܗ̣ܒܹܿܗ. ܐܵܘ
ܕܲܠܡܵܐ: ܕܐܸܤܟܹܿܡܵܐ ܐܝܼܬܹܝܗ̇؟
ܢܸܤܛܘܿܪܝܼܣ. ܕܒܲܩܥܵܬܼܵܐ ܬܸܬܵܘܕܐ ܥܲܡܲܢ ܗܵܝ̇ ܕܠܵܐ ܐܝܼܬܲܝܗܘܿܢ
ܬܪܹܝܢ ܐܲܠܵܗܹ̈ܐ ܡܸܠܹ̈ܐ: ܐܵܘ ܬܪܹܝܢ ܢܒܲܝ̈ܐ: ܐܵܘ ܬܪܹܝܢ ܝܑܼܚܝܼ̈ܕܼܵܝܹܐ: ܐܸܠܵܐ
ܚܲܕܼ ܘܲܕܼܫܲܪܟܵܐ ܟܠ ܚܲܕܼ ܡ̣ܢ ܗܵܠܹܝܢ: ܡܸܬܼܥܲܩܒܼܵܐ ܡ̣ܢ ܬܪܹܝܢ
ܕܵܡܝܵܐܝܼܬܼ ܘܙܵܕܼܩܵܐܝܼܬܼ ܕܐܲܝܟܲܢܵܐ ܨܒܼܝܵܢܵܐܝܼܬܼ ܐܸܬܼܒܲܪܢܲܫ: ܟܲܕܼ ܐܝܼܬܼܵܘܗܝ
ܒܲܟܼܝܵܢܹܗ ܠܵܐ ܡܵܝܘܿܬܼܵܐ ܘܠܵܐ ܚܵܫܘܿܫܵܐ. ܘܒܲܐܝܕܵܐ ܡܸܬܼܐܲܡܪܵܐ ܕܡܝܼܬܼ
ܒܲܟܼܝܵܢܵܐ ܒܪܵܐ: ܘܠܵܘ ܐܲܟܼܡܵܐ ܕܐܝܼܬܼܵܘܗܝ ܒܲܟܼܝܵܐ ܠܵܐ ܡܵܝܘܿܬܼܵܐ.
ܤܘܿܦܪܘܿܢܝܼܘܿܣ. ܐܸܠܵܐ ܗܸܢܹܝܢ ܗܵܠܹܝܢ ܐܵܡ̇ܪܝܼܢܲܢ: ܕܲܢܚܵܘܸܐ
ܢܲܗܝܼܪܵܐܝܼܬܼ ܐܵܦܸܢ ܠܵܐ ܨܵܒܹ̇ܐ ܐܲܢ̄ܬܿ: ܕܲܬܼܪܹܝܢ ܒܢܝܼ̈ܢ ܐܵܡܲ݁ܪ ܐܲܢ̄ܬܿ
ܒܲܡܼܝܵܢܵܐ.
ܚܲܕܼ ܠܵܐ ܚܵܫܘܿܫܵܐ ܘܠܵܐ ܡܵܝܘܿܬܼܵܐ: ܘܲܐ̄ܚܪܹܢܵܐ ܚܵܫܘܿܫܵܐ ܘܡܵܝܘܿܬܼܵܐ.
ܢܕ. ܥܲܠ ܗܵܝ̇: ܕܗ̤ܘ ܐܲܠܵܗܵܐ ܡܸܠܬܼܵܐ ܐܸܬܼܒܲܪܢܲܫ: ܘܠܵܐ
ܐܝܼܬܼܝܗܘܿܢ ܬܼܪܹܝܢ ܒܢܲܝ̈ܵܐ: ܐܸܠܵܐ ܚܲܕܼ ܒܲܚܕܼܵܝܘܼܬܼܵܐ.
ܢܸܤܛܘܿܪܝܼܣ. ܟܠ ܟ̱ܠܹܗ ܠܵܐ ܫܲܪܝܼܪܵܐ: ܐܸܠܵܐ ܐܸܢ ܥܲܠ ܗܵܕܹܐ
ܩܲܕܼܡܵܝܑܬܼ ܙܵܕܹܩ ܠܡܹܐܡܲܪ: ܝܵܠܦ̇ܝܼܢܲܢ ܗܵܘ̇ ܡܵܐ ܕܡܵܘܕܝܼܢܲܢ ܠܘܵܬܼ
ܚܕܼܵܕܗܹܐ: ܕܡܸܢܹܗ ܕܲܟܼܬܼܵܒܼܵܐ ܐܲܠܵܗܵܝܵܐ. ܢܸܚܙܸܐ ܗܵܟܹܝܠ: ܡܵܢܵܐ ܐܵܡܲ݁ܪ
pb. 70
ܐܹܘܲܢܓܲܠܸܤܛܵܐ ܥܲܠ ܐܲܠܵܗܵܐ ܡܸܠܬܼܵܐ. ܟܲܝ ܥܲܠ ܚܲܕܼ ܐܲܠܵܗܵܐ
ܡܸܠܬܼܵܐ ܐܵܡܲ݁ܪ: ܐܵܘ ܥܲܠ ܬܪܹܝܢ ܡܸܠܹ̈ܐ؟ ܒܪܵܫܝܼܬܼ ܐܝܼܬܼܵܘܗܝ ܗ̄ܘ̣ܵܐ
ܡܸܠܬܼܵܐ: ܘܗ̤ܘ ܡܸܠܬܼܵܐ ܐܝܼܬܼܵܘܗܝ ܗ̄ܘ̣ܵܐ ܠܘܵܬܼ ܐܲܠܵܗܵܐ: ܘܐܲܠܵܗܵܐ ܐܝܼܬܼܵܘܗܝ
ܗ̄ܘ̣ܵܐ ܗ̤ܘ ܡܸܠܬܼܵܐ. ܗܵܢܵܐ ܐܝܼܬܼܵܘܗܝ ܗ̄ܘ̣ܵܐ ܒܪܵܫܝܼܬܼ ܠܘܵܬܼ ܐܲܠܵܗܵܐ:
ܟܠ ܒܐܝܼܕܹܗ ܗܘ̤ܵܐ: ܘܒܸܠܥܵܕܼܵܘܗܝ ܐܵܦܠܵܐ ܚܕܼܵܐ ܗܘ̤ܵܬܼ ܡܸܕܸܡ
ܕܲܗܘ̤ܵܐ. ܥܲܠ ܡ̇ܢ ܡܸܫ̈ܟܿܚܵܢ ܕܢܸܬܼܐܲܡܪܵܢ ܗܵܠܹܝܢ ܡ̣ܢ ܐܹܘܲܢܓܲܠܸܤܛܵܐ:
ܐܸܠܵܐ ܐܸܢ ܥܲܠ ܗܵܘ̄ ܒܲܪ ܟܝܵܢܵܐ ܘܲܕܼܠܵܐ ܓܫܘܿܡ؟ ܗܵܝ̇ ܕܹܝܢ ܕܒܹܗ
ܚܲܝܹ̈ܐ ܗܘ̤ܵܐ: ܘܚܲܝܹ̈ܐ ܐܝܼܬܲܝܗܘܿܢ ܢܘܼܗܪܵܐ ܕܲܒܼܢܲܝ̈ܢܵܫܵܐ. ܘܗ̤ܘ ܢܘܼܗܪܵܐ
ܒܚܸܫܘܿܟܼܵܐ ܡܲܢܗܲܪ: ܘܚܸܫܘܿܟܼܵܐ ܠܵܐ ܐܲܕܪܟܹܗ. ܥܲܠ ܐ̄ܚܪܹܢܵܐ ܐܸܡ݂ܲܪ:
ܐܵܘ ܥܠܵܘܗܝ ܕܝܼܠܹܗ ܟܲܕܼ ܕܝܼܠܹܗ؟ ܘܒܲܕܼܓܘܼܪܡ ܐܵܦ ܚܲܝܹ̈ܐ ܐܵܦ
ܢܘܼܗܪܵܐ ܩ̣ܪܵܝܗܝ: ܗܵܠܹܝܢ ܕܡܵܘ̈ܕܥܵܢ ܠܐܘܼܤܝܼܵܐ ܠܵܐ ܡܵܝܘܿܬܬܵܐ
ܐܲܝܟܼ ܕܥܲܠ ܐܲܝܠܹܝܢ ܕܲܒܼܡܵܘܬܵܐ ܘܲܒܼܚܸܫܘܿܟܼܵܐ ܗ̤ܘܲܝ̈: ܟܲܕܼ ܗ̤ܘ ܠܵܐ
ܡܝܲܬܼ ܚܲܝܹ̈ܐ ܓܹܝܪ ܐܝܼܬܼܵܘܗܝ ܘܢܘܼܗܪܵܐ ܕܠܵܐ ܕܵܥܹ̇ܟܼ: ܘܡܲܝܸܐ
ܠܐܲܝܠܹܝܢ ܕܲܒܼܡܵܘܬܵܐ ܐܝܼܬܲܝܗܘܿܢ. ܕܥܲܠ ܐܲܝܢܵܐ ܢܘܼܗܪܵܐ ܡܤܗܸܕܼ
ܝܘܿܚܲܢܵܢ: ܕܟܼܠܢܵܫ ܢܗܲܝܡܸܢ ܒܹܗ؟ ܐܝܼܬܼܵܘܗܝ ܓܹܝܪ ܢܘܼܗܪܵܐ ܕܲܫܪܵܪܵܐ:
ܕܡܲܢܗܲܪ ܠܟܼܠܢܵܫ ܕܐܸܬܼ݂ܵܐ ܠܥܵܠܡܵܐ. ܒܥܵܠܡܵܐ ܗ̄ܘ̣ܵܐ: ܘܥܵܠܡܵܐ
ܒܐܝܼܕܹܗ ܗܘ̤ܵܐ: ܘܥܵܠܡܵܐ ܠܵܐ ܝܲܕܼܥܹܗ. ܠܕܼܝܼܠܹܗ ܐܸܬܼ݂ܵܐ: ܘܕܼܝܼܠܹܗ
ܠܵܐ ܩܲܒܿܠܘܼܗܝ. ܘܐܲܝܠܹܝܢ ܕܹܝܢ ܕܩܲܒܿܠܘܼܗܝ: ܝܲܗ̣̄ܒܼ ܠܗܘܿܢ ܫܘܼܠܛܵܢܵܐ
ܕܲܒܼܢܲܝ̈ܐ ܕܐܲܠܵܗܵܐ ܢܸܗܘܘܢ. ܠܐܲܝܠܹܝܢ ܕܲܡܗܲܝܡܢܝܼܢ ܒܲܫܡܹܗ: ܐܲܝܠܹܝܢ
pb. 71
ܕܠܵܘ ܡ̣ܢ ܕܡܵܐ: ܘܠܵܐ ܡ̣ܢ ܨܼܒܼܝܵܢܵܐ ܕܒܸܤܪܵܐ: ܘܠܵܐ ܡ̣ܢ ܨܒܼܝܵܢܵܐ
ܕܓܲܒܼܪܑܵܐ: ܐܸܠܵܐ ܡ̣ܢ ܐܲܠܵܗܵܐ ܐܸܬܼܝܼܠܸܕܼܘ. ܕܲܠܡܵܐ ܥܲܠ ܡܸܠܬܼܵܐ
ܐ̄ܚܪܹܢܵܐ ܐܸܡ݂ܲܪ ܐܹܘܲܢܓܲܠܸܤܛܵܐ: ܐܘ ܥܲܠ ܐܲܠܵܗܵܐ ܡܸܠܬܸܿܐ: ܗܵܘ̇
ܕܒܼܐܝܼܕܹܗ ܟܠ ܗܘ̤ܵܐ: ܚܲܝܹ̈ܐ ܘܢܘܼܗܪܵܐ ܫܲܪܝܼܪܵܐ: ܗܵܘ̇ ܕܐܸܬܼ݂ܵܐ ܠܕܼܝܼܠܹܗ
ܘܕܝܼܠܹܗ ܠܵܐ ܩܲܒܿܠܘܼܗܝ. ܗܵܘ̇ ܕܝܲܗ̣̄ܒܼ ܫܘܼܠܛܵܢܵܐ ܠܐܲܝܠܹܝܢ
ܕܩܒܿܠܘܼܗܝ ܕܲܒܼܢܲܝ̈ܐ ܕܐܲܠܵܗܵܐ ܐܸܗܘܘܿܢ: ܠܵܘ ܡ̣ܢ ܕܡܵܐ: ܘܠܵܐ
ܡ̣ܢ ܨܸܒܼܝܵܢܵܐ ܕܓܲܒܼܪܑܵ: ܐܸܠܵܐ ܡ̣ܢ ܐܲܠܵܗܵܐ ܐܸܬܼܝܼܠܸܕܼܘ؟ ܘܒܲܐܝܕܵܐ ܬܘܼܒܼ
ܝܲܗ̣̄ܒܼ ܠܐܲܝܠܹܝܢ ܕܩܲܒܿܐܘܼܗܝ: ܕܢܸܗܘܘܿܢ ܒܢܲܝ̈ܵܐ ܕܐܲܠܵܗܵܐ؟ ܠܐܲܝܠܹܝܢ
ܕܐܸܬܼܝܼܠܸܕܼܘ ܡ̣ܢ ܟܝܵܢܹܗ ܕܐܲܠܵܗܵܐ؟ ܐܪܵܐ ܐܸܫܬܲܚܠܲܦܘ ܒܲܟܼܝܵܢܵܐ
ܠܲܟܼܝܵܢܹܗ ܕܐܲܠܵܗܵܐ: ܕܐܲܠܵܗܵܐ: ܘܲܗܘ̤ܵܘ ܗܵܘ̇ ܡܵܐ ܕܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ:
ܐܲܟܼܡܵܐ ܕܐܸܬܼܝܼܠܸܕܿ ܡ̣ܢ ܐܲܒܼܵܐ؟ ܐܵܘ ܒܹܗ ܒܲܟܼܝܵܢܵܐ ܩ̣ܵܘܝܼ ܒܗܵܘ̇ ܡܵܐ
ܕܐܝܼܬܲܝܗܘܿܢ ܒܹܗ: ܘܲܗܘ̤ܵܘ ܒܢܝ̈ܐ ܕܐܲܠܵܗܑܵܐ: ܘܐܸܬܼܝܼܠܸܕܼܘ ܡ̣ܢ
ܐܲܠܵܗܵܐ ܒܒܲܝܬܵܝܘܼܬܼܵܐ ܘܲܒܼܬܵܘܕܝܼܬܼܵܐ؟ ܕܐܲܝܟܲܢܵܐ ܕܩܲܒܿܠܘܼܗܝ ܠܗܵܢܵܐ ܐܲܝܟܼ
ܐܲܠܵܗܵܐ ܕܲܗܘ̤ܵܐ ܒܲܝܬܵܝܵܐ: ܘܐܵܘܕܝܼܘ ܕܗ̤ܘ ܐܝܼܬܼܵܘܗܝ ܐܲܠܵܗܗܘܿܢ:
ܗܵܘ̇ ܕܟܼܠܡܸܕܸܡ ܥ̣ܒܲܕܼ ܘܲܠܕܼܝܼܠܹܗ ܐܸܬ݂ܼܵܐ: ܗܵܟܲܢܵܐ ܐܵܦ ܗܸܢ̣ܘܿܢ ܥ̣ܒܲܕܼ
ܐܸܢܘܿܢ ܒܲܝܬܵܝܹ̈ܐ: ܘܐܵܘܕܝܼ ܒܗܘܿܢ ܕܲܒܼܢܲܝ̈ܵܐ ܐܸܢܘܿܢ ܕܐܲܠܵܗܑܵܐ: ܐܲܝܟܼ ܒܢܲܝ̈ܵܐ
ܐܲܝܠܹܝܢ ܕܗܵܘܹ̇ܝܢ ܥܵܠܘܿܠܹ̈ܐ ܒܲܒܼܪܘܼܬܼܵܐ: ܘܠܵܐ ܗ̄ܘ̣ܵܐ ܒܲܟܼܝܵܢܵܐ.
ܢܗ. ܥܲܠ ܗܵܝ̇: ܕܚܲܕܼ ܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ ܒܲܟܼܝܵܢܵܐ
ܘܡܸܫܬܲܡܲܗ: ܘܠܵܘ ܤܲܓܿܝܼܐܹ̈ܐ ܒܫܲܘܝܘܼܬܼ ܫܡܵܐ ܡܸܫܬܲܡܗܝܼܢ.
ܐܲܝܠܹܝܢ ܕܲܒܼܒܲܝܬܵܝܘܼܬܼܵܐ ܘܲܒܼܬܼܵܘܕܝܼܬܼܵܐ ܗܵܘܹ̇ܝܢ ܒܢܲܝ̈ܐ: ܕܗܵܘ̇ ܕܡܸܢܹܗ
pb. 72
ܡܸܬܼܝܲܠܕܝܼܢ: ܠܵܘ ܡ̣ܢ ܒܸܤܪܵܐ ܘܠܵܘ ܡ̣ܢ ܕܡܵܐ: ܐܸܠܵܐ ܡ̣ܢ ܨܒܼܝܵܢܵܐ
ܘܚܘܼܒܵܐ ܕܗܵܘ̇ ܕܲܕܼܠܵܐ ܓܫܘܿܡ: ܘܗ̤ܘ ܗܵܘܹ̇ܐ ܠܗܘܿܢ ܦܲܓܼܪܵܐ ܐܲܝܟܼ
ܐܲܒܼܵܐ ܒܒܲܝܬܵܝܘܼܬܵܐ ܘܲܒܼܚܘܼܒܵܐ ܘܲܒܼܬܼܵܘܕܝܼܬܼܵܐ: ܗܵܟܲܢܵܐ ܐܵܦ ܐܲܠܵܗܵܐ ܡܸܠܬܼܵܐ:
ܗܵܘ̇ ܕܲܠܕܝܼܠܹܗ ܐܸܬܼ݂ܵܐ: ܠܐܲܝܠܹܝܢ ܕܩܲܒܿܠܝܘܼܗܝ ܘܐܵܘܕܝܼܘ ܕܗܲܝܡܸܢ̣ܘ
ܒܲܫܡܹܗ: ܝܲܗ̣̄ܒܼ ܠܗܘܿܢ ܫܘܼܠܛܵܢܵܐ. ܠܵܐ ܓܹܝܪ ܐܝܼܬܼ ܗ̄ܘ̣ܵܐ ܠܗܘܿܢ
ܕܢܸܗܘܘܿܢ ܒܢܲܝ̈ܐ ܕܐܲܠܵܗܵܐ: ܠܐܲܝܠܹܝܢ ܕܠܵܘ ܡ̣ܢ ܕܡܵܐ: ܘܠܵܐ ܡ̣ܢ
ܨܒܼܝܵܢܵܐ ܕܒܸܪܵܐ: ܘܠܵܐ ܡ̣ܢ ܨܒܼܝܵܢܵܐ ܕܓܲܒܼܪܵܐ: ܗܵܕܹܐ ܓܹܝܪ ܒܲܟܼܝܵܢܘܗܘܿܢ
ܡܩܲܕܡܵܐ ܗ̄ܘ̣ܵܬܼ ܩܲܢܝܵܐ ܠܗܵܘܿܢ: ܐܸܠܵܐ ܡ̣ܢ ܐܲܠܵܗܵܐ ܐܸܬܼܝܼܠܸܕܼܘ
ܒܒܲܝܬܵܝܘܼܬܼܵܐ. ܗܵܟܲܢܵܐ ܗܵܟܹܝܠ ܗܵܘ̇ ܕܲܠܕܝܼܠܹܗ ܐܸܬ݂ܼܵܐ ܘܐܸܬܼܩܲܒܲܠ:
ܠܐܲܝܠܹܝܢ ܕܗܲܝܡܸܢܘ ܒܲܫܡܹܗ: ܝܲܗ̣̄ܒܼ ܠܗܘܿܢ ܫܘܼܠܛܵܢܵܐ ܕܢܸܗܘܘܿܢ
ܒܢܲܝ̈ܠ ܕܐܲܠܵܗܵܐ. ܘܗ̤ܘ ܢܸܗܘܸܐ ܠܗܘܿܢ ܒܸܤܪܵܐ ܒܲܢܤܝܼܒܼܘܼܬܼܵܐ
ܕܒܸܤܪܵܐ ܘܢܸܥܒܿܕܼܝܼܘܗܝ ܒܲܝܬܵܝܵܠ: ܘܢܵܘܕܹܐ ܐܲܝܟܼ ܦܲܓܼܪܹܗ
ܒܒܲܝܬܵܝܘܼܬܼܵܐ. ܡܸܛܠ ܗܵܢܵܐ ܐܸܡ݂ܲܪ: ܡܸܛܠ ܒܸܪܪܵܐ ܗܘ̤ܵܐ: ܟܲܕܼ ܦܵܪܲܥ
ܠܗܵܝ̇ ܕܲܒܼܪܵܫܝܼܬܼ ܐܝܼܬܼܵܘܗܝ ܗ̄ܘ̣ܵܐ ܡܸܠܬܼܵܐ: ܘܗ̤ܘ ܡܸܠܬܼܵܐ ܐܝܼܬܼܵܘܗܝ
ܗ̄ܘ̣ܵܐ ܠܘܵܬܼ ܐܲܠܵܗܵܐ: ܘܲܕܼܫܲܪܟܵܐ: ܐܲܝܬܲܝܼ ܐܵܦ ܗܵܝ̇: ܕܡܸܠܬܼܵܐ ܒܸܤܪܵܐ
ܗܘ̤ܵܐ ܘܐܲܓܸܢ ܒܲܢ. ܐܲܟܼܙܢܵܐ ܕܗܵܢܘܿܢ ܕܢܲܤܒܿܘܼܗܝ: ܕܒܲܢܤܝܼܒܼܘܼܬܼܵܐ
ܗܘ̤ܵܘ ܟܝܵܢܵܝܹ̈ܐ ܠܐܲܠܵܗܵܐ ܡ̣ܢ ܨܒܼܝܵܢܵܐ: ܗܵܟܲܢܵܐ ܐܵܦ ܗܵܘ̇: ܒܗܵܝ̇
ܕܲܢܤܲܒܼ ܒܸܤܪܵܐ ܘܐܲܓܸܢ ܒܹܗ: ܗܘ̤ܵܐ ܠܗܘܿܢ ܒܸܤܪܵܐ ܒܒܲܝܬܵܝܘܼܬܼܵܐ:
ܘܠܵܘ ܒܫܘܼܚܠܵܦܵܐ ܕܐܘܼܤܝܼܵܐ. ܒܲܕܼܓܲܘܿܢ ܐܵܦ ܕܝܼܠܵܝܬܹܗ ܕܐܲܠܵܗܵܐ
ܡܲܝܬܸܐ ܟܲܕܼ ܐܵܡܲ݁ܪ: ܘܲܚܙܲܝܢ ܫܘܼܒܼܚܹܗ: ܫܘܼܒܼܚܵܐ ܐܲܝܟܼ ܕܝܼܚܝܼܕܼܵܝܵܐ ܕܡ̣ܢ
pb. 73
ܐܲܒܼܵܐ. ܠܵܐ ܗ̄ܘ̣ܵܐ ܐܲܝܟܼ ܕܒܲܕܼܡܘܼܬܼܵܐ ܪܵܡܹ̇ܙ: ܐܸܠܵܐ ܐܲܝܟܼ ܕܲܠܫܘܼܪܵܪܵܐ:
ܟܲܕܼ ܐܵܡܲ݁ܪ: ܕܲܡܠܸܐ ܛܲܝܒܿܘܼܬܼܵܐ: ܠܗܵܝ̇ ܕܡܸܢܹܗ ܕܲܟܼܝܵܢܵܐ ܕܝܼܚܝܼܕܼܵܝܵܐ
ܩܵܪܹܐ ܛܲܝܒܿܘܼܬܼܵܐ: ܗܵܕܼܵܐ ܗ̄ܝ̣ ܓܹܝܪ ܡܲܠܝܘܼܬܼܵܐ. ܗܵܘ̇ ܓܹܝܪ
ܕܡܸܫܬܵܘܬܵܦܘܼ ܡܸܫܬܵܘܬܲܦ: ܠܵܐ ܡܠܸܐ. ܚܲܤܝܼܪ ܗ̣̄ܘ ܓܹܝܪ ܡ̣ܢ
ܗܘ̇: ܕܕܲܟܼܝܵܢܹܗ ܐܝܼܬܹܝܗ̇ ܟ̱ܠܵܗ̇: ܘܲܡܠܸܐ ܛܲܝܒܿܘܼܬܼܵܐ ܘܩܘܼܫܬܼܵܐ. ܠܵܘ
ܐܲܝܟܼ ܡ̇ܢ ܕܐܸܫܬܲܚܠܲܦ: ܐܸܠܵܐ ܐܲܝܟܼ ܕܐܝܼܬܼܵܘܗܝ ܗܵܘ̇ ܡܵܐ ܕܐܼܬܼܵܘܗܝ
ܗ̄ܘ̣ܵܐ ܒܪܵܐ ܚܲܒܿܝܼܒܼܵܐ: ܐܲܝܟܼ ܡܵܐ ܕܩܲܒܿܠܘܼܗܝ: ܘܐܲܝܟܼ ܡܵܐ ܕܗܲܝܡܸܢܘ
ܒܹܗ: ܗܵܟܲܢܵܐ ܐܵܦ ܚ̣ܙܵܐܘܼܗܝ ܠܗܵܘ̇ ܕܐܸܬܼܓܿܠܝܼ ܒܲܒܼܤܲܪ. ܠܹܗ: ܘܠܵܘ
ܠܐܲܠܵܗܵܐ ܐ̄ܚܪܹܢܵܐ: ܘܠܵܐ ܬܘܼܒܼ ܠܡܸܠܬܼܵܐ ܐ̄ܚܪܹܢܵܐ: ܘܐܵܦܠܵܐ ܠܚܲܝܹ̈ܐ
ܐ̄ܚܪ̈ܵܢܹܐ: ܘܠܵܐ ܠܢܘܼܗܪܵܐ ܐ̄ܚܪܹܢܵܐ: ܘܠܵܐ ܬܘܼܒܼ ܠܝܼܚܝܼܕܼܵܝ̇ܐ ܐ̄ܚܪܹܢܵܐ:
ܐܸܠܵܐ ܠܹܗ ܟܲܕܼ ܠܹܗ ܠܗܵܘ̇ ܕܒܼܒܲܤܲܪ ܐܸܬܼܚܠܝܼ. ܘܡ̣ܢ ܡܲܠܝܘܼܬܹܗ
ܕܗܵܢܵܐ: ܚܢܲܢ ܟ̱ܠܲܢ ܢܤܲܒܼܢ. ܐܲܝܟܼ ܐܲܝܠܹܝܢ ܕܠܲܝܬܿ ܗ̄ܘ̣ܵܐ ܠܘܵܬܲܢ:
ܘܡ̣ܢ ܡܲܠܝܘܼܬܹܗ ܢܤܲܒܼܢ: ܘܠܵܘ ܠܡܲܠܝܘܼܬܹܗ. ܡܲܠܝܘܼܬܼܵܐ ܓܹܝܪ
ܗܵܝ̇ ܐܝܼܬܹܝܗ̇: ܕܲܒܼܡܸܕܸܡ ܠܵܐ ܚܲܤܝܼܪܵܐ: ܐܲܝܟܼ ܐܲܠܵܗܵܐ. ܘܡܸܛܠ ܗܵܢܵܐ:
ܠܐܲܠܵܗܵܐ ܗܵܘ̇ ܕܡܸܡܬܼܘܼܡ ܐ̄ܢܵܫ ܠܵܐ ܚ̣ܙܵܝܗܝ: ܗܵܘ̇ ܝܑܼܚܝܼܕܼܵܝ̇ܐ ܗܵܘ̇
ܕܐܝܼܬܼܵܘܗܝ ܒܥܘܼܒܵܐ ܕܐܲܒܼܘܼܗܝ ܐܸܫܬܲܥܝܼ ܠܲܢ: ܘܠܵܘ ܐ̄ܚܪܹܢܵܐ. ܐܸܠܵܐ
ܗܵܘ̇ ܕܐܝܼܬܼܵܘܗܝ ܗ̄ܘ̣ܵܐ ܒܥܘܼܒܵܐ ܕܐܲܒܼܘܼܗܝ: ܘܐܸܬܼ݂ܵܐ ܘܲܗܘ̤ܵܐ ܒܸܤܪܵܐ
ܘܐܲܓܸܢ ܒܲܢ: ܘܐܝܼܬܼܵܘܗܝ ܒܥܘܼܒܵܐ ܕܐܲܒܼܘܼܗܝ ܘܲܠܘܵܬܲܢ: ܒܕܐܝܼܬܼܵܘܗܝ
ܗܵܘ̇ ܡܵܐ ܕܐܝܼܬܼܵܘܗܝ ܐܲܒܼܵܐ: ܘܐܸܫܬܲܥܝܼ ܠܲܢ. ܟܲܕܼ ܓܲܠܝܵܐ: ܕܠܵܐ ܚ̣ܵܘܝܼ
ܠܠܵܐ ܡܤܲܝܟܼܘܼܬܼܵܗ̇ ܘܲܠܠܵܐ ܡܸܬܿܕܲܪܟܵܢܘܼܬܼܵܗ̇ ܕܐܘܼܤܝܼܵܐ: ܐܲܟܼܡܵܐ
ܕܐܝܼܬܼܵܘܗܝ ܒܥܘܼܒܵܐ ܕܐܲܒܼܘܼܗܝ. ܐܲܝܟܼ ܡ̇ܢ ܕܝܵܕܲܥ̇ ܗ̄ܘ̣ܵܐ ܠܲܟܼܝܵܢܲܢ:
pb. 74
ܒܹܗ ܒܲܟܼܝܵܢܲܢ ܐܸܫܬܲܥܝܼ ܠܲܢ: ܗܵܘ̇ ܕܐ̄ܢܵܫ ܡ̣ܢ ܒܢܲܝ̈ܢܵܫܵܐ ܠܵܐ ܚ̣ܙܵܝܗܝ
ܡܸܡܬܼܘܿܡ. ܐܲܝܟܲܢܵܐ ܗܵܟܹܝܠ ܡܸܫܟܿܚܵܐ ܕܲܒܼܪܵܐ ܐ̄ܚܪܹܢܵܐ ܢܸܤܬܲܟܿܠܝܼܘܗܝ
ܠܗܵܢܵܐ: ܘܲܒܼܪܵܐ ܐ̄ܚܪܹܢܵܐ ܠܲܡܫܝܼܚܵܐ: ܘܐܲܝܟܼ ܐܲܝܢܵܐ ܕܒܲܪܢܵܫܵܐ ܗ̄ܘ̣
ܒܲܠܚܘܿܕܼ. ܘܲܒܼܫܲܘܝܘܼܬܼܵܐ ܘܒܼܐܝܼܩܵܪܵܐ ܕܲܒܼܪܘܼܬܼܵܐ ܡܩܵܘܸܐ ܒܨܲܠܡܹܗ:
ܕܗܵܘ̇ ܕܠܵܐ ܐܵܡ̇ܪܝܼܢ ܐܢ̄ܬܿܘܿܢ ܠܹܗ ܕܗ̤ܘ ܐܸܫܬܲܕܲܪ ܘܗ̤ܘ ܐܸܬܼܗܲܦܲܟܼ
ܒܲܝܢܵܬܲܢ؟ ܗܵܘ̇ ܕܐܲܝܟܼ ܥܡܘܼܪܝܵܐ ܐܲܠܵܗܵܝܵܐ: ܟܲܕܼ ܒܕܼܡܘܼܬܼܵܐ ܕܐܲܠܵܗܵܐ
ܐܝܼܬܼܵܘܗܝ ܥ̣ܡܲܪ. ܐܲܝܟܲܢܵܐ ܕܢܲܗܝܼܪܵܐܝܼܬܼ ܐܹܘܲܢܓܲܠܸܤܛܵܐ: ܡ̣ܢ ܐܲܠܵܗܵܐ
ܡܸܠܬܼܵܐ ܘܲܠܘܵܬܼ ܐܲܠܵܗܵܐ ܡܸܠܬܼܵܐ: ܡܲܤܸܩ ܠܲܢ. ܘܲܠܒܲܪ ܐܲܠܵܗܵܐ ܡܸܠܬܼܵܐ:
ܡܸܠܬܼܵܐ ܐ̄ܚܪܹܢܵܐ ܐܵܘ ܒܪܵܐ ܐ̄ܚܪܹܢܵܐ ܝܑܼܚܝܼܕܼܵܝܵܐ ܕܐܲܠܵܗܵܐ ܠܵܐ ܝܵܕܲܥ̇: ܐܸܠܵܐ
ܐܸܢ ܠܗܵܢܵܐ ܥܲܡ ܒܸܤܪܹܗ.
ܤܘܿܦܪܘܢܝܘܿܣ. ܐܸܠܵܐ ܠܲܡ ܐܸܤܬܲܟܲܠ ܡ̣ܢ ܐܲܝܠܹܝܢ
ܕܡܸܬܼܐܲܡܪ̈ܵܢ: ܡ̇ܢ ܐܵܡܲ݁ܪ ܐܹܘܲܢܓܸܿܠܸܤܛܵܐ. ܠܐܲܠܵܗܵܐ ܠܵܐ ܚ̣ܙܵܐ ܐ̄ܢܵܫ
ܡ̣ܢ ܡܬܼܘܿܡ: ܝܑܼܚܝܼܵܕܵܝܐ ܒܪܵܐ ܗܵܘ̇ ܕܐܝܼܬܼܵܘܗܝ ܗ̄ܘ̣ܵܐ ܒܥܘܼܒܵܐ
ܕܐܲܒܼܘܼܗܝ ܗ̤ܘ ܐܸܫܬܲܥܝܼ: ܟܲܕܼ ܐܸܡܲ݁ܪ ܥܲܠ ܗܵܢܵܐ ܕܐܸܬܼܢ̱ܤܸܒܼ: ܘܝܼܬܸܒܼ
ܡ̣ܢ ܝܲܡܝܼܢܵܐ ܕܐܲܒܼܵܐ. ܗܵܘ̇ ܕܲܒܼܨܲܠܡܵܐ ܘܐܝܼܩܵܪܵܐ ܕܲܒܼܪܵܐ ܐܝܼܬܼܵܘܗܝ
ܒܪܵܐ: ܗܵܘ̇ ܕܐܸܬܼܚܙܝܼ ܠܲܢ. ܗܵܘ̇ ܕܒܼܵܬܲܪܝ ܐܵܬܹ̇ܐ: ܗܵܘ̇ ܕܚܲܤܝܼܢ
ܗ̄ܘ̣ ܡܹܢܝ. ܗܵܘ̇ ܕܢܸܚܬܲܬ̤ ܪܘܼܚܵܐ ܕܩܘܼܕܼܫܵܐ ܒܲܕܼܡܘܼܬܼ ܝܵܘܢܵܐ:
ܘܩܵܘܝܲܬ̤ ܥܠܵܘܗܝ. ܗܵܘ̇ ܓܲܒܼܝܵܐ ܕܐܲܠܵܗܵܐ: ܗܵܘ̇ ܐܸܡܪܵܐ ܕܐܲܠܵܗܵܐ:
ܗܵܘ̇ ܕܡ̣ܢ ܢܵܨܪܲܬܼ: ܗܵܘ̇ ܒܪܹܗ ܕܐ̄ܢܵܫܵܐ: ܬܸܚܙܘܿܢ ܠܲܡ ܠܲܫܡܲܝܵܐ
ܕܲܦܬܼܝܼܚ̈ܝܵܢ: ܘܲܠܡܲܠܲܐܟܼܵܘ̈ܗܝ ܕܐܲܠܵܗܵܐ ܟܲܕܼ ܤܵܠܩ̇ܝܼܢ ܘܢܵܚ̇ܬܿܝܼܢ ܠܘܵܬܼ
pb. 75
ܒܪܹܗ ܕܐ̄ܢܵܫܵܐ: ܠܵܐ ܗ̄ܘ̣ܵܐ ܗܵܘ̇ ܕܒܼܐܘܼܤܝܵܬܼܐ ܐܲܠܵܗܵܐ ܡܸܠܬܼܵܐ ܒܲܪ ܟܝܵܢܵܐ
ܕܐܲܒܼܵܐ. ܠܐܲܠܵܗܵܐ ܓܹܝܼܪ ܠܵܐ ܚ̣ܙܵܐ ܐ̄ܢܵܫ ܡܸܡܬܼܘܿܡ: ܗܵܢܵܐ ܕܹܝܢ
ܐܸܬܼܚܙܝܼ. ܠܵܐ ܕܹܝܢ ܥܲܠ ܗܵܘ̇ ܐܸܡ݂ܲܪ: ܐܸܠܐ ܥܲܠ ܒܪܹܗ ܕܐ̄ܢܵܫܵܐ:
ܗܵܘ̇ ܕܲܒܼܛܲܝܒܿܘܼܬܹܗ ܒܛܲܟܼܤܵܐ ܕܨܲܠܡܵܐ ܕܲܒܼܪܵܐ ܕܐܲܠܵܗܵܐ ܐܝܼܬܼܵܘܗܝ
ܗ̄ܘ̣ܵܐ. ܘܲܒܼܗܵܕܹܐ ܐܝܼܬܼܵܘܗܝ ܒܪܵܐ ܘܝܼܚܝܼܕܼܵܝܵܐ ܒܡܸܨܛܲܒܼܝܵܢܘܼܬܼܵܐ: ܕܒܹܗ
ܥܵܡܲ݁ܪ ܟ̱ܠܹܗ ܡܘܼܠܵܝܵܐ ܕܐܲܠܵܗܘܼܬܼܵܐ ܓܘܼܫܡܵܢܵܐܝܼܬܼ. ܠܵܘ ܗ̤ܘ ܐܼܬܼܵܘܗܝ
ܡܘܼܠܝܵܐ: ܐܸܠܵܐ ܒܹܗ ܥܵܡܲ݁ܪ ܟ̱ܠܹܗ ܡܘܿܠܵܝܵܐ ܓܘܼܫܡܵܢܵܐܝܼܬܼ: ܐܲܝܟܼ
ܕܲܒܼܟܼܠ ܚܲܕܼ ܡ̣ܢ ܩܲܕܼܝܼܫܹ̈ܐ ܥ̣ܡܲܪ. ܠܵܐ ܓܹܝܪ ܡܸܢܹܗ ܘܠܹܗ
ܐܝܼܬܼܵܘܗܝ: ܗܵܘ̇ ܕܐܝܼܬܼܵܘܗܝ ܒܪܵܐ: ܘܠܵܐ ܬܘܼܒܼ ܐܲܒܼܵܐ ܡܸܢܹܗ
ܘܠܹܗ: ܒܪܵܐ ܓܹܝܪ ܒܐܲܒܼܵܐ: ܘܐܲܒܼܵܐ ܒܲܒܼܪܵܐ. ܘܡܸܛܠ ܗܵܢܵܐ: ܐܸܢܗ̤ܘ
ܕܕܲܒܼܪܵܐ ܕܐܲܠܵܗܵܐ ܐܝܼܬܹܝܗ̇ ܡܸܬܼܒܲܪܢܫܵܢܘܼܬܼܵܐ ܕܒܼܐܘܼܤܝܼܵܐ: ܬܸܗܘܸܐ
ܐܵܦ ܕܐܲܒܼܵܐ ܘܲܕܼܪܘܼܚܵܐ ܕܩܘܼܕܼܫܵܐ: ܐܸܢܗ̤ܘ ܕܒܲܟܼܝܵܢܵܐ ܠܵܘ ܒܫܲܘܝܘܼܬܼܵܐ
ܘܒܼܐܝܼܩܵܪܵܐ ܐܵܡ̇ܪܝܼܢ ܐܢ̄ܬܿܘܿܢ ܠܲܒܼܪܵܐ. ܒܦܲܪܨܘܿܦܵܐ ܓܹܝܪ ܕܲܒܼܪܵܐ
ܕܐܲܠܵܗܵܐ ܐܸܫܬܲܕܲܪ: ܘܲܠܦܲܪܨܘܿܦܵܐ ܕܝܼܠܹܗ ܠܒܫ̣: ܘܥܲܠ ܗܵܢܵܐ
ܤܵܠ̈ܩܵܢ ܟܠܗܹܝܢ ܕܗܵܘ̇: ܐܲܝܟܼ ܐܲܠܵܗܵܐ ܒܡܲܠܲܐܟܼܵܐ ܘܲܒܼܡܸܨܥܵܝܵܐ.
ܡܸܨܥܵܝܵܐ ܗ̄ܘ̣ ܓܹܝܪ ܕܐܲܠܵܗܵܐ ܘܕܲܒܼܢܲܝ̈ܢܵܫܵܐ: ܒܲܪܢܵܫܵܐ ܝܼܫܘܿܥ ܡܫܝܼܚܵܐ.
ܘܐܲܝܟܲܢܵܐ ܡܵܕܹܝܢ ܗܘ̤ܵܐ ܚܲܕܼ ܒܪܵܐ ܘܡܸܬܼܒܲܪܢܫܵܢܘܼܬܼܵܐ ܕܐܲܠܵܗܵܐ: ܐܸܠܵܐ
ܐܸܢ ܕܲܠܡܵܐ ܒܟܼܠ ܡ̇ܢ ܕܒܼܐܝܼܕܹܗ ܥ̣ܒܲܕܼ ܐܲܠܵܗܵܐ ܡܕܲܒܿܪܵܢܘܼܬܼܵܐ
ܕܲܒܼܢܲܝ̈ܢܵܫܵܐ: ܡܸܬܼܐܲܡܪܵܐ ܡܸܬܼܒܲܪܢܫܵܢܘܼܬܼܵܐ ܕܐܲܠܵܗܵܐ: ܘܲܒܼܗܵܢܹܝܢ ܕܲܒܼܝܲܕܼ
ܡܘܼܫܹܐ ܘܲܒܼܝܲܕܸ ܢܒܼܝܹ̈ܐ: ܘܗܵܢܹܝܢ ܕܲܒܼܝܲܕܼ ܡܲܠܲܐܟܹ̈ܐ ܐܸܬܼܐ̰ܡܲܪ ܐܵܘ ܐܸܬܼܥ̱ܒܸܕܼ:
ܡܸܬܼܐ̱ܡܲܪ ܕܐܲܠܵܗܵܐ ܐܸܡ݂ܲܪ: ܘܐܲܠܵܗܵܐ ܥ̣ܒܲܕܼ: ܘܐܲܠܵܗܵܐ ܐܸܬܼܚܙܝܼ.
pb. 76
ܡܸܛܠ ܓܹܝܪ ܕܐܲܠܵܗܵܐ ܒܲܟܼܝܵܢܹܗ ܠܵܐ ܡܸܬܼܚܲܙܝܵܢܵܐ ܘܠܵܐ ܡܸܬܿܕܲܪܟܵܢܵܐ
ܐܝܼܬܼܵܘܗܝ: ܙܵܕܹܩ ܠܹܗ ܡܸܨܥܵܝܵܐ ܡܸܕܸܡ: ܕܒܼܐܝܼܕܹܗ ܢܦܲܪܢܸܣ
ܗܵܠܹܝܢ. ܟܲܕܼ ܥܠܵܘܗܝ ܤܵܠ̈ܩܵܢ ܐܲܝܠܹܝܢ ܕܡ̣ܢ ܗܵܠܹܝܢ ܡܸܬܼܥܲܒܼ̈ܓܕܵܢ
ܐܵܘ ܡܸܬܼܐܲܡܪܵܢ: ܒܡܸܠܬܼܵܐ ܕܲܡܦܲܪܢܤܵܢܘܼܬܼܵܐ ܘܕܲܡܕܲܒܿܪܵܢܘܼܬܼܵܐ: ܘܠܵܐ
ܗܵܕܹܐ ܒܟܹܐܬܼܝܵܐ ܕܲܟܼܝܵܢܵܐ. ܐܲܝܟܲܢܵܐ ܐܝܼܬܼܵܘܗܝ ܐܲܠܵܗܵܐ ܒܲܟܼܝܵܢܵܐ: ܗܵܘ̇
ܕܐܝܼܬܼܵܘܗܝ ܒܲܪܢܵܫܵܐ ܒܲܟܼܝܵܢܵܐ: ܘܠܵܐ ܒܛܲܝܒܿܘܼ ܘܲܒܼܡܲܥܒܿܕܼܵܢܘܼܬܼܵܐ: ܐܲܝܟܼ
ܕܲܠܟܼܠ ܟܝܵܢ ܡܚܲܝܸܠ ܐܲܠܵܗܵܐ ܠܡܲܥܒܵܕܼܘܼ ܐܲܝܟܲܢܵܐ ܕܨܵܒܹ̇ܐ؟ ܐܸܠܵܐ
ܐܸܢ ܕܲܠܡܵܐ ܟܠܡܕܸܡ ܐܝܼܬܼ ܒܹܗ ܐܲܠܲܗܵܐ: ܢܹܐܡܲܪ ܐ̄ܢܵܫ ܕܐܲܠܵܗܵܐ
ܘܒܲܪܢܵܫܵܐ ܡܲܥܒܸܿܕܼ: ܘܲܬܼܪܹܝܢ ܛܝܵܢ̈ܝܼܢ ܐܝܼܬܼܵܘܗܝ. ܦܵܢܝ̇ܐ ܡܸܟܹܝܠ ܠܘܵܬܼ
ܗܵܠܹܝܢ: ܒܗܵܠܹܝܢ ܓܹܝܪ ܐܝܼܬܼܵܘܗܝ ܟ̱ܠܹܗ ܥܘܼܩܵܒܼܵܐ.
ܢܘ. ܥܲܠ ܗܵܝ̇: ܕܐܵܦ ܠܵܐ ܒܚܲܕܼ ܡ̣ܢ ܢܒܼ̈ܝܹܐ ܐܵܘ ܩܲܕܼܝܼܫܹ̈ܐ
ܡܸܬܼܐܲܡܪܵܐ ܕܐܸܬܼܒܲܪܢܲܫ ܐܲܠܵܗܵܐ: ܘܐܵܦܠܵܐ ܐܲܝܟܼ ܕܲܒܼܦܲܪܨܘܿܦܵܐ ܕܝܼܠܹܗ
ܐܸܬܼܚܲܫܚ ܒܐ̄ܢܵܫ ܡܸܢܘܗܘܿܢ.
ܢܸܤܛܘܿܪܝܼܣ. ܡܸܛܠ ܗܵܟܹܝܠ: ܕܐܲܝܟܼ ܕܐܵܡ̇ܪܝܼܢ: ܠܲܟܼܬܼܵܒܹ̈ܐ
ܐܲܠܵܗܵܝܹ̈ܐ ܡܸܬܼܢܲܩܦܝܼܢ: ܠܵܐ ܥܵܒܼ̇ܕܵܐ ܠܲܢ ܥܲܡܠܵܐ ܡܸܠܬܼܵܐ ܕܠܘܼܩܒܲܠܗܘܿܢ.
ܠܵܐ ܓܹܝܪ ܡܸܡܬܼܘܿܡ ܐܸܬܼܚܲܙܝܲܬ̤ ܕܲܒܦܲܪܨܘܿܦܵܐ ܕܐܲܠܵܗܵܐ: ܒܦܲܪܨܘܿܦܵܐ
ܕܝܼܠܹܗ ܐܸܬܼܚܲܫܲܚ ܐ̄ܢܵܫ: ܠܵܐ ܡ̣ܢ ܢܒܹܝܹ̈ܐ ܘܠܵܐ ܡ̣ܢ ܡܲܠܲܐܟܹ̈ܐ: ܘܐܸܠܵܐ
ܡܵܪܲܢ ܡܫܝܼܚܵܐ ܐܸܡ݂ܲܪ: ܕܐܸܢܵܐ ܘܐܲܠܵܗܵܐ ܚܲܕܼ ܚܢܲܢ. ܘܡ̇ܢ ܕܠܝܼ ܚܵܙܹ̇ܐ:
ܚܙ̣ܵܐ ܠܐܲܠܵܗܵܐ. ܘܐܲܝܠܹܝܢ ܕܐܲܠܵܗܵܐ ܥ̣ܒܲܪ: ܗܵܠܹܝܢ ܐܵܦ ܐܸܢܵܐ ܐܲܟܼܘܵܬܹܗ
ܥܵܒܹ̇ܕܼ ܐ̄ܢܵܐ. ܘܐܲܝܟܲܢܵܐ ܕܐܝܼܬܼ ܠܹܗ ܠܐܲܠܵܗܵܐ ܚܲܝܹ̈ܐ ܒܲܩܢܘܼܡܹܗ:
ܘܠܲܐܝܠܹܝܢ ܕܨܵܒܹ̇ܐ ܡܲܚܸܐ: ܐܵܦ ܐܸܢܵܐ ܠܲܡܲܢ ܕܨܵܒܹ̇ܐ ܡܲܚܸܐ ܐ̄ܢܵܐ.
pb. 77
ܘܐܸܢ ܠܝܼ ܠܵܐ ܡܗܲܝܡܢܝܼܢ ܐܢ̄ܬܿܘܿܢ: ܐܵܦܸܢ ܠܲܥܵܒܼܵܕܲܝ̈ ܗܲܝܡܸܢܘ. ܕܐܸܢܵܐ
ܘܐܲܠܵܗܵܐ ܚܲܕܼ ܚܢܲܢ. ܘܠܵܐ ܬܘܼܒܼ ܐ̄ܢܵܫ ܡ̣ܢ ܢܒܼܝܹ̈ܐ ܐܵܘ ܡ̣ܢ ܡܲܠܲܐܟܹ̈ܐ
ܐܲܡܪܲܚܘ ܗܵܠܹܝܢ ܠܡܹܐܡܲܪ: ܐܸܠܵܐ ܗܵܠܹܝܢ ܕܐܸܡ݂ܲܪܘ ܐܵܘ ܥ̣ܒܲܕܼܘ:
ܕܐܸܡ݂ܲܪ ܠܲܡ ܡܵܪܝܵܐ: ܘܠܵܐ ܗ̄ܘ̣ܵܐ ܕܐܲܠܵܗܵܐ ܐܵܘ ܗܸܢܘܿܢ. ܘܟܼܠ ܡܵܐ
ܕܲܐܸܡ݂ܲܪܘ ܐܵܘ ܥ̣ܒܲܕܼ: ܕܒܼܐܝܼܕܵܝ̈ܗܘܿܢ ܐܸܡ݂ܲܪ ܐܲܠܵܗܵܐ: ܐܵܦ ܗܸܢܘܿܢ
ܕܐܸܵܡ݂ܲܪ ܐܲܠܵܗܵܐ ܐܵܡ̇ܪܝܼܢ ܗ̄ܘ̣ܵܘ: ܐܲܝܟܼ ܢܒܼܝܹ̈ܐ ܘܐܲܝܟܼ ܡܲܠܲܐܟܹ̈ܐ. ܘܲܒܼܗܵܠܹܝܢ
ܕܲܒܼܗܹܝܢ ܐܸܤܬܲܟܲܡ ܐܲܝܟܼ ܒܲܪܢܵܫܵܐ: ܐܵܘ ܢܘܼܪܵܐ: ܕܡܸܬܼܐ̱ܡܲܪ ܕܐܸܬܼܚܙܝܼ
ܐܲܠܵܗܵܐ: ܐܵܘ ܕܲܚ̣ܙܵܐ ܠܐܲܠܵܗܵܐ. ܘܲܒܼܕܘܼܟܿܬܼܵܐ ܐ̄ܚܪܹܬܼܵܐ: ܗܵܝ̇ ܕܝܲܗ̣̄ܒܼ
ܐܲܠܵܗܵܐ ܢܵܡܘܿܤܵܐ. ܘܬܼܘܼܒܼ: ܒܝܲܕܼ ܡܲܠܲܐܟܹ̈ܐ ܐܸܬܼܝܼܗܸܒܼ ܢܵܡܘܿܤܵܐ.
ܠܵܘ ܕܲܓܵܠܵܬܼ̈ܐ ܐܝܼܬܲܝܗܹܝܢ: ܘܠܵܐ ܬܘܼܒܼ ܕܲܠܩܘܼܒܼܠܵܐ ܕܲܚܕܼܵܕܹ̈ܐ.
ܠܵܐ ܗ̄ܘ̣ܵܐ ܠܡܲܠܲܠܟܹ̈ܐ ܩܵܪܹܐ ܐܲܠܵܗܵܐ: ܘܠܵܐ ܬܘܼܒܼ ܡܲܠܐܟܼܵܐ ܩܵܪܹܐ
ܢܲܦܫܹܗ ܐܲܠܵܗܵܐ: ܐܸܠܵܐ ܡܸܛܠ ܕܲܒܼܝܲܕܼ ܡܲܠܲܐܟܹ̈ܐ ܐܸܬܼܚܙܝܼ. ܬܲܪ̈ܬܲܝܗܹܝܢ
ܫܲܪܝܼܪܵܐܝܼܬܼ ܐܸܬܼܐ̱ܡܲܪ: ܕܐܵܦ ܐܲܠܵܗܵܐ ܐܸܬܼܚܙܝܼ ܒܝܲܕܼ ܡܲܠܲܐܟܼܵܐ ܒܢܘܼܪܵܐ
ܕܤܲܢܝܵܐ: ܕܒܼܐܝܼܕܹܗ ܐܸܬܼܚܙܝܼ ܠܹܗ ܐܲܠܵܗܵܐ.
ܢܙ. ܥܲܠ ܗܵܝ̇: ܕܐܲܝܟܼ ܟܬܼܵܒܹ̈ܐ ܐܲܠܵܗܵܝܹ̈ܐ: ܐܲܠܵܗܵܐ ܒܲܟܼܝܵܢܵܐ
ܘܒܲܪܢܵܫܵܐ ܒܲܟܼܝܵܢܵܐ: ܝܑܼܠܸܦܢܲܢ ܠܡܵܘܕܵܝܘܼܬܹܗ ܠܲܡܫܝܼܚܵܐ.
ܡܸܛܠ ܗܵܟܹܝܠ ܒܬܲܪ̈ܬܝܗܹܝܢ ܩ̣ܪܵܐ ܢܲܦܫܹܗ: ܐܵܦ ܫܠܝܼܚܹ̈ܐ
ܘܲܐܹܘܲܢܓܲܠܸܤ̈ܛܹܐ ܒܬܲܪ̈ܬܲܝܗܹܝܢ ܐܵܡ̇ܪܝܼܢ ܠܹܗ ܕܐܝܼܬܼܵܘܗܝ: ܐܵܦ ܐܲܠܵܗܵܐ
ܕܟܼܠ ܒܐܝܼܕܹܗ ܗܘ̤ܵܐ: ܘܗ̤ܘ ܐܸܬܼ݂ܵܐ ܠܥܵܠܡܵܐ: ܘܗ̤ܘ ܥ̣ܒܲܕܼ
ܠܥܵܠܡܵܐ: ܘܗ̤ܘ ܠܵܐ ܐܸܬܼܩܲܒܲܠ ܡ̣ܢ ܥܲܒܼܕܵܘ̈ܗܝ. ܘܗ̣ܘ ܠܐܲܝܠܹܝܢ
pb. 78
ܕܩܲܒܿܠܘܼܗܝ ܘܗܲܝܡܸܢܘ ܒܲܫܡܹܗ: ܝܲܗ̣̄ܒܼܘ ܫܘܼܠܛܵܢܵ ܕܒܼܢܲܝ̈ܵܐ ܕܐܲܠܵܗܵܐ
ܢܸܗܘܘܿܢ. ܘܗ̤ܘ ܗܘ̤ܵܐ ܒܸܤܪܵܐ ܘܐܲܓܸܢ ܒܲܢ: ܘܠܵܘ ܐ̄ܚܪܹܢܵܐ. ܘܡ̣ܢ
ܕܲܗܘ̤ܵܐ ܘܐܲܓܸܢ ܒܲܢ: ܩܲܪܒܹܗ ܠܒܸܤܪܵܐ ܠܒܲܝܬܵܝܘܼܬܼܵܐ ܐܲܝܟܼ ܕܲܠܦܲܪܨܘܿܦܵܐ
ܕܝܼܠܹܗ ܕܐܝܼܬܼܵܘܗܝ ܒܬܲܪ̈ܬܲܝܗܹܝܢ. ܒܗܵܝ̇ ܡ̇ܢ: ܕܐܘܼܤܝܼܵܐ ܕܐܲܠܵܗܵܐ.
ܘܲܒܼܗܵܕܹܐ ܕܹܝܢ: ܕܲܚܕܲܝܘܼܬܼܵܐ ܘܲܒܼܒܲܝܬܵܝܘܼܬܼܵܐ ܒܸܤܪܵܐ. ܐܲܝܟܼ ܕܐܵܦ ܒܸܤܪܵܐ:
ܕܒܲܟܼܝܵܢܵܐ ܒܸܤܪܵܐ ܗ̄ܘ̣: ܕܲܚܕܼܵܝܘܼܬܼܵܐ ܘܲܒܼܒܲܝܬܵܝܘܼܬܼܵܐ ܕܦܲܪܨܘܿܦܵܐ ܒܪܵܐ:
ܐܵܦܸܢ ܟܲܕܼ ܒܬܲܪ̈ܬܲܝܗܹܝܢ ܐܝܼܬܼܵܘܗܝ ܘܐܵܦ ܡܸܬܼܐ̱ܡܲܪ ܚܲܕܼ ܒܪܵܐ ܘܚܲܕܼ
ܒܸܤܪܵܐ. ܘܡܸܛܠ ܗܵܢܵܐ ܝܑܼܚܝܼܕܼܵܝܐ ܒܪܵܐ ܕܐܲܠܵܗܵܐ ܘܲܒܼܪܹܗ ܕܐ̄ܢܵܫܵܐ: ܗ̤ܘ
ܟܲܕܼ ܗ̤ܘ ܡ̣ܢ ܬܲܪ̈ܬܲܝܗܹܝܢ: ܒܬܲܪ̈ܬܲܝܗܹܝܢ ܡܸܬܼܐ̱ܡܲܪ: ܟܲܕܼ ܥ̣ܒܲܕܼ ܐܸܢܹܝܢ
ܠܗܵܠܹܝܢ ܕܦܲܪ̈ܨܘܿܦܲܝܗܘܿܢ ܠܦܲܪܨܘܿܦܵܐ ܕܝܼܠܹܗ. ܘܡܸܟܹܿܝܠ ܐܲܝܟܼ ܕܡ̣ܢ
ܗܵܢܵܐ ܘܡ̣ܢ ܗܵܘ̇ ܐܲܝܟܼ ܕܡ̣ܢ ܦܲܪܨܘܿܦܵܐ ܕܝܼܠܹܗ ܡܸܬܼܚܲܕܲܥ:
ܘܲܡܡܲܠܸܠ ܥܲܡܗܘܿܢ ܒܲܙܒܲܢ ܡ̣ܢ ܐܲܠܵܗܘܼܬܼܵܐ: ܘܒܲܙܒܲܢ ܡ̣ܢ
ܐ̄ܢܵܫܘܼܬܼܵܐ: ܘܒܲܙܒܲܢ ܡ̣ܢ ܬܲܪ̈ܬܲܝܗܹܝܢ. ܐܲܝܟܼ ܕܐܵܦ ܐ̄ܢܵܫܘܼܬܼܵܐ: ܒܲܙܒܲܢ
ܡ̣ܢ ܐܘܼܤܝܼܵܐ ܕܐ̄ܢܵܫܘܼܬܼܵܐ ܡܡܲܠܠܵܐ ܗ̄ܘ̣ܵܬܼ: ܘܒܲܙܒܲܢ ܡ̣ܢ ܦܲܪܨܘܿܦܵܐ
ܕܐܲܠܵܗܘܼܬܼܵܐ. ܡܸܛܠ ܗܵܕܹܐ: ܐܵܦ ܒܪܹܗ ܕܐܲܠܵܗܵܐ ܘܲܒܼܪܹܗ ܕܐ̄ܢܵܫܵܐ
ܐܝܼܬܼܵܘܗܝ ܘܐܵܦ ܡܲܠܸܠ̣.
ܢܚ. ܕܐܲܝܟܲܢܵܐ ܕܐܵܦ ܐܲܠܵܗܵܐ ܡܸܠܬܼܵܐ ܡܸܬܼܪ̱ܢܸܐ ܕܲܗܘ̤ܵܐ ܒܸܤܪܵܐ:
ܘܚܲܕܼ ܗ̄ܘ̣ ܒܸܤܪܵܐ: ܘܠܵܐ ܐܝܼܬܲܝܗܘܿܢ ܬܪܹܝܢ ܒܸܤܪܹ̈ܐ: ܘܐܵܦ
ܒܸܤܪܵܐ ܒܪܵܐ: ܘܠܵܐ ܐܝܼܬܲܝܗܘܿܢ ܬܪܹܝܢ ܒܢܝܼ̈ܢ.
pb. 79
ܠܵܘ ܐܲܝܟܼ ܕܲܥܕܼܵܡܵܐ ܕܲܗܘ̤ܵܐ ܒܸܤܪܵܐ: ܒܪܵܐ ܡܸܠܬܼܵܐ ܒܲܠܚܘܿܕܼ.
ܐܝܼܬܼܵܘܗܝ ܗ̄ܘ̣ܵܐ؟ ܡ̣ܢ ܕܲܢܤܲܒ̣ ܗ̤ܘ ܒܸܤܪܵܐ ܠܦܲܪܨܘܿܦܵܐ ܕܝܼܠܹܗ:
ܒܸܤܪܵܐ ܗܘ̤ܵܐ. ܘܒܸܤܪܵܐ ܐܲܠܵܗܵܐ ܡܸܛܠ ܦܲܪܨܘܿܦܹܗ ܕܡܸܠܬܼܵܐ:
ܐܲܝܟܲܢܵܐ ܕܢܸܬܼܐ̱ܡܲܪ ܐܲܠܵܗܵܐ ܡܸܠܬܼܵܐ ܒܸܤܪܵܐ ܘܒܲܪܢܵܫܵܐ: ܒܸܤܪܵܐ ܕܹܝܢ
ܒܪܵܐ ܕܐܲܠܵܗܵܐ. ܥܕܲܡܵܐ ܓܹܝܪ ܕܲܢܤܲܒ̣ ܒܸܤܪܵܐ ܠܦܲܪܨܘܿܦܵܐ ܕܝܼܠܹܗ:
ܘܒܹܗ ܐܸܬܼܓܠܝܼ: ܡ̣ܢ ܐܲܠܵܗܘܼܬܼܵܐ ܡܸܬܼܐ̱ܡܲܪ ܗ̄ܘ̣ܵܐ ܒܪܵܐ. ܒܪܵܫܝܼܬܼ
ܠܲܡ ܐܝܼܬܼܵܘܗܝ ܗ̄ܘ̣ܵܐ ܡܸܠܬܼܵܐ: ܘܗ̤ܘ ܡܸܠܬܼܵܐ ܐܝܼܬܼܵܘܗܝ ܗ̄ܘ̣ܵܐ
ܠܘܵܬܼ ܐܲܠܵܗܵܐ: ܘܐܲܠܵܗܵܐ ܐܝܼܬܼܵܘܗܝ ܗ̄ܘ̣ܵܐ ܗ̤ܘ ܡܸܠܬܼܵܐ. ܟܠ ܒܐܝܼܕܹܗ
ܗܘ̤ܵܐ: ܘܒܸܠܥܵܕܼܵܘܗܝ ܐܵܦܠܵܐ ܚܕܼܵܐ ܗܘ̤ܵܬܼ ܡܸܕܸܡ ܕܲܗܘ̤ܵܐ. ܡ̣ܢ
ܕܲܗܘ̤ܵܐ ܕܹܝܢ ܒܸܤܪܵܐ: ܟܲܕܼ ܢܤܲܒ̣ ܒܸܤܪܵܐ: ܡ̣ܢ ܬܲܪ̈ܬܲܝܗܹܝܢ
ܒܬܲܪ̈ܬܲܝܗܹܝܢ ܡܸܫܬܲܡܲܗ. ܐܲܝܟܼ ܡ̇ܢ ܕܹܝܢ ܕܐܝܼܬܼܵܘܗܝ ܒܬܲܪ̈ܬܲܝܗܹܝܢ
ܚܲܕܼ: ܠܵܘ ܒܲܟܼܝܵܢܵܐ. ܐܸܠܵܐ ܒܗܵܕܹܐ ܡ̇ܢ: ܒܲܟܼܝܵܢܵܐ. ܒܗܵܝ̇ ܕܹܝܢ:
ܒܦܲܪܨܘܿܦܵܐ ܒܒܲܝܬܵܝܘܼܬܼܵܐ ܐܵܦ ܒܓܸܠܝܵܢܵܐ. ܐܸܬܼܓܿܠܝܼ ܠܲܡ ܒܲܒܼܤܲܪ
ܒܪܵܐ ܒܲܪ ܦܸܚܡܵܐ ܕܐܲܒܼܘܼܗܝ. ܐܸܢܵܐ ܠܲܡ ܘܐܵܒܼܝ ܚܲܕܼ ܚܢܲܢ. ܡܚܵܘܝܵܢܵܐܝܼܬܼ
ܡ̣ܢ ܦܲܪܨܘܿܦܵܐ ܕܝܼܠܹܗ ܐܵܡܲ݁ܪ: ܗܵܘ̇ ܕܡܸܬܼܚܙܸܐ ܗ̄ܘ̣ܵܐ ܡ̣ܢ ܗܵܘ̇
ܕܡܸܬܼܪܢܸܐ ܗ̄ܘ̣ܵܐ: ܐܵܡܲ̈ܪ ܐܲܝܟܼ ܕܡ̣ܢ ܦܲܪܨܘܿܦܵܐ ܕܝܼܠܹܗ. ܐܲܝܟܼ ܡ̇ܢ
ܕܚܲܕܼ ܗ̄ܘ̣: ܘܗ̤ܘ ܟܲܕܼ ܗ̤ܘ ܦܲܪܨܘܿܦܵܐ ܩܢܸܐ. ܡ̣ܢ ܚܲܕܼ: ܐ̄ܚܪܹܢܵܐ
ܡܸܬܼܪܢܸܐ. ܘܗܵܘ̇ ܕܡܸܬܼܪܢܸܐ: ܘܡ̣ܢ ܗܵܘ̇ ܕܡܸܬܼܚܙܸܐ: ܐܲܝܟܼ ܕܡ̣ܢ
ܦܲܪܨܘܿܦܵܐ ܕܝܼܠܹܗ ܕܗܵܘ̇ ܕܡܸܬܼܚܙܸܐ ܡܡܲܠܸܠ. ܐܵܦܸܢ ܠܝܼ ܠܵܐ
ܡܗܲܝܡܢܝܼܢ ܐܢ̄ܬܿܘܿܢ: ܠܗܘܿܢ ܠܲܥܒܼܵܕܹ̈ܐ ܗܲܝܡܸܢܘ: ܕܐܸܢܵܐ ܘܐܵܒܼܝ ܚܲܕܼ
pb. 80
ܚܢܲܢ. ܘܟܼܠܗܹܝܢ ܐܲܝܟܼ ܕܗܵܠܹܝܢ: ܐܲܝܠܹܝܢ ܕܩܲܕܼܡܵܝܑܬܼ ܒܐܘܼܤܝܼܵܐ
ܡܸܬܼܐܲܡܪ̈ܢ: ܘܢܸܩܦܵܐܝܼܬܼ ܒܦܲܪܨܘܿܦܵܐ ܐܲܝܟܼ ܕܲܒܼܒܲܝܬܵܝܘܼܬܼܵܐ ܠܡܹܐܡܲܪ
ܘܲܠܡܸܤܬܲܟܵܠܘܼ: ܘܲܠܡܸܤܥܲܪ ܒܵܗ̇ ܒܲܕܼܡܘܼܬܼܵܐ. ܠܵܐ ܓܹܝܪ ܪܲܚܝܼܩܝܼܢ:
ܠܵܐ ܒܤܘܼܥܪܵܢܵܐ: ܘܠܵܐ ܒܡܸܠܬܼܵܐ: ܘܠܵܐ ܒܐܘܼܤܝܼܵܐ: ܘܠܵܐ ܒܚܘܼܒܵܐ
ܦܪܝܼܫ. ܗܵܠܹܝܢ: ܕܐܲܝܟܼ ܕܥܲܠ ܦܲܪܨܘܿܦܵܐ ܐ̄ܚܪܹܢܵܐ ܘܲܐ̄ܚܪܹܢܵܐ
ܡܸܬܼܦܲܪ̈ܫܵܢ. ܒܚܘܼܒܵܐ ܓܹܝܪ ܘܲܒܼܨܒܼܝܵܢܵܐ ܕܐܲܠܵܗܵ ܗܵܠܹܝܢ ܡܸܬܼܪ̈ܲܢܝܵܢ
ܥܲܠ ܦܲܪܨܘܿܦܵܐ ܕܝܼܠܹܗ: ܒܕܲܢܤܲܒ̣ ܒܸܤܪܵܐ: ܘܲܒܼܗܵܢܵܐ ܐܸܬܼܓܠܝܼ:
ܘܲܒܼܗܵܢܵܐ ܐܲܠܸܦ̣: ܘܲܒܼܗܵܢܵܐ ܘܲܒܼܝܲܕܼ ܗܵܢܵܐ ܡܲܥܒܸܕܼ ܐܲܝܟܼ ܩܲܪܝܼܒܼܵܐ: ܘܠܵܘ
ܐܲܝܟܼ ܪܲܚܝܼܩܵܐ. ܒܦܲܪܨܘܿܦܵܐ ܕܝܼܠܹܗ ܡܸܬܼܚܲܫܲܚ ܒܒܸܤܪܵܐ: ܒܕܲܨܒܼܵܐ
ܕܗ̤ܘ ܢܸܗܘܸܐ ܒܸܤܪܵܐ: ܘܒܸܤܪܵܐ ܗ̤ܘ ܢܸܗܘܸܐ. ܕܐܲܝܠܹܝܢ ܕܚܵܙܹ̇ܝܢ
ܠܒܸܤܪܵܐ: ܘܐܵܦ ܠܐܲܠܵܗܵܐ. ܐܲܟܼܙܢܵܐ ܕܲܒܼܠܲܚܡܵܐ ܦܲܓܼܪܵܐ ܕܝܼܠܹܗ:
ܘܐܲܝܠܹܝܢ ܕܚܵܙܹ̇ܝܢ ܠܠܲܚܡܵܐ ܐܵܦ ܠܦܲܓܼܪܹܗ: ܡܸܛܠ ܕܲܠܦܲܪܨܘܿܦܹܗ
ܢܲܤܒܹܿܗ. ܢܤܲܒ̣ ܦܲܪܨܘܿܦܵܐ ܕܒܸܤܪܵܐ ܕܡܘܼܬܼܵܐ ܕܥܲܒܼܕܼܵܐ ܗܵܘ̇
ܕܐܝܼܬܼܵܗܝ ܦܸܚܡܵ ܕܐܲܠܵܗܵܐ: ܘܝܲܗ̣̄ܒܼ ܠܹܗ ܠܲܕܼܡܘܼܬܼܵܐ ܕܥܲܒܼܕܵܐ
ܕܡܘܿܬܹܗ. ܫܡܵܐ ܕܲܡܝܲܬܲܪ ܡ̣ܢ ܟܠ ܫܡܵܗܝܼ̈ܢ: ܗܵܢܵܐ ܕܹܝܢ ܒܪܵܐ:
ܕܒܹܗ ܟܠ ܒܪܘܿܟ ܬܸܟܿܘܿܦ ܕܲܒܲܫܡܲܝܵܐ ܘܒܲܐܪܥܵܐ: ܘܕܲܠܬܲܚܬܿ ܡ̣ܢ
ܐܲܪܥܵܐ. ܘܡܸܛܠ ܗܵܢܵܐ ܐܵܠܨܵܐ ܕܲܬܼܪܹܝܢ ܟܝܵܢܹ̈ܐ ܐܝܼܬܲܝܗܘܿܢ: ܕܐܲܠܵܗܘܼܬܼܵܐ
ܘܲܕܼܐ̄ܢܵܫܘܼܬܼܵܐ. ܗܵܘ̇ ܕܤܲܪܸܩ ܢܲܦܫܹܗ ܠܲܕܼܡܘܼܬܼܵܐ ܕܥܲܒܼܕܼܵܐ:
ܘܲܕܼܡܘܼܬܼܵܐ ܕܥܲܒܼܕܵܐ ܕܐܸܬܿܬܿܪܝܼܡܲܢ̱ ܠܲܫܡܵܐ ܕܲܠܥܸܠ ܡ̣ܢ ܟܠ
ܫܡܵܗ̈ܝܼܢ. ܗܵܘ̇ ܓܹܝܪ ܕܠܵܐ ܡܩܵܘܸܐ ܒܐܘܼܤܝܸܵ ܕܝܼܠܹܗ: ܐܵܠܦܵܐ
pb. 81
ܡܸܤܬܲܪܲܩ ܘܡܸܬܼܒܲܨܲܪ: ܘܠܵܐ ܬܘܼܒܼ ܡܸܬܿܬܿܪܝܼܡ ܠܥܸܠ ܡ̣ܢ ܟܠ
ܫܡܵܗ̈ܝܼܢ. ܡܸܛܠ ܗܵܢܵܐ ܠܲܕܼܡܘܼܬܼܵܐ ܐܸܡ݂ܲܪ ܘܠܲܫܡܵܐ ܕܢܸܤܒܲܬ̤: ܗܵܘ̇
ܕܡܵܘܕܵܥ ܥܲܠ ܦܲܪܨܘܿܦܵܐ ܐܲܝܟܼ ܕܡ̣ܢ ܚܲܕܼ: ܘܗ̤ܘ ܟܲܕܼ ܗ̤ܘ ܫܡܵܐ
ܐܵܦ ܦܲܪܨܘܿܦܵܐ ܬܲܪ̈ܬܲܝܗܹܝܢ ܡܤܲܟܸܠ. ܘܦܘܼܪܫܵܢܵܐ ܕܲܟܼܝܵܢܵܐ: ܚܲܕܼ
ܩܢܘܿܡܵܐ ܘܚܲܕܼ ܦܲܪܨܘܿܦܵܐ ܐܝܼܬܼ ܠܗܘܿܢ: ܗܵܢܵܐ ܡ̣ܢ ܗܵܘ̇: ܘܗܵܘ̇
ܡ̣ܢ ܗܵܢܵܐ ܡܸܬܼܝܲܕܲܥ. ܐܲܝܟܼ ܕܗܵܢܵܐ ܕܐܝܼܬܼܵܘܗܝ ܒܒܲܝܬܵܝܘܼܬܼܵܐ ܗܵܘ̇
ܡܵܐ ܕܐܝܼܬܼܵܘܗܝ ܗ̤ܘ ܒܲܟܼܝܵܢܵܐ: ܘܗܵܘ̇ ܐܝܼܬܼܵܘܗܝ ܥܲܡ ܗܵܢܵܐ ܒܦܲܓܼܪܵܐ.
ܐܲܝܟܼ ܡܲܠܟܵܐ ܘܡܵܪܵܐ ܕܲܢܤܲܒܼ ܦܲܪܨܘܿܦܵܐ ܕܥܲܒܼܕܵܐ ܐܲܝܟܼ ܕܲܠܦܲܪܨܘܿܦܵܐ
ܕܝܼܠܹܗ: ܘܝܵܗܹ̇ܒܼ ܦܲܪܨܘܼܦܹܗ ܠܥܲܒܼܕܼܵܐ. ܘܡܵܘܕܲܥ ܕܗ̤ܘ ܗܵܘ̇
ܐܝܼܬܼܵܘܗܝ: ܘܗܵܘ̇ ܗ̤ܘ. ܒܦܲܪܨܘܿܦܵܐ ܡܲܢ ܕܥܲܒܼܕܵܐ: ܟܲܕܼ ܡܸܨܛܥܲܪ:
ܡܩܲܒܸܿܠ. ܒܦܲܪܨܘܿܦܵܐ ܕܹܝܢ ܕܡܵܪܵܐ ܐܵܦ ܕܡܲܠܟܵܐ: ܥܲܒܼܪܵܐ ܗ̄ܘ̣
ܡܸܤܬܿܓܸܕܼ. ܘܡܸܛܗܵܢܵܐ: ܐܵܦܸܢ ܠܗܵܢܵܐ: ܠܵܐ ܡܸܛܠ ܗܵܘ̇ ܐܸܡ̇ܪܹܬܼ.
ܐܵܦܸܢ ܠܗܵܘ̇: ܗܵܢܵܐ. ܗ̤ܘ ܓܹܝܪ ܟܲܕܼ ܗ̤ܘ ܐܝܼܬܼܵܘܗܝ ܒܬܲܪ̈ܬܲܝܗܹܝܢ:
ܕܚܲܕܼ ܘܠܹܗ ܟܲܕܼ ܠܹܗ ܠܦܲܪܨܘܿܦܵܐ ܩܢܹܝܢ. ܗܵܠܹܝܢ ܐܝܼܬܲܝܗܹܝܢ ܥܲܠ
ܟܝܵܢܹ̈ܐ ܕܲܦܪܝܼܫܝܼܢ ܒܐܘܼܤܝܼܵܐ: ܘܲܒܼܚܘܼܒܵܐ ܘܠܹܗ ܟܲܕܼ ܠܹܗ
ܠܦܲܪܨܦܵܐ ܡܚܲܕܝܼܢ.
ܢܛ. ܥܲܠ ܗܵܝ̇: ܕܐܲܝܟܼ ܨܸܒܼܝܢܹܗ ܕܐܲܠܵܗܵܐ: ܠܒܲܝܬܵܝܘܼܬܼܵܐ
ܘܠܲܥܡܘܼܪܝܵܐ ܙܵܕܹܩ ܠܲܡܩܲܒܵܠܘܼ: ܘܠܵܐ ܢܸܥܪܘܿܩ ܡ̣ܢ ܫܡܵܐ ܐܲܝܟܼ
ܡܲܢ ܕܲܫܚܝܼܡܵܐ ܗ̄ܘ̣: ܡܸܛܠ ܫܲܘܝܘܼܬܼ ܫܡܵܐ ܡܸܬܼܐ̰ܡܲܪ.
ܐܵܦܸܢ ܓܹܝܪ ܐܲܝܟܼ ܡܸܨܥܵܝܵܐ ܦܲܪܨܘܿܦܵܐ ܗ̄ܘ̣ ܒܲܠܚܘܿܕܼ ܕܐܲܠܵܗܵܐ
pb. 82
ܛܥܝܼܢܵܐ ܐ̄ܢܵܫܘܼܬܼܵܐ ܕܡܸܢܲܢ ܒܒܲܝܬܵܝܘܼܬܼܵܐ: ܐܸܠܵܐ ܐܵܦ ܒܲܥܡܘܼܪܝܵܐ
ܕܐܘܼܤܝܼܵܐ. ܘܠܵܘ ܒܲܠܚܘܿܕܼ ܒܲܥܡܘܼܪܝܵܐ ܕܐܲܠܵܗܘܼܬܼܵܐ: ܐܸܠܵܐ ܕܐܲܝܟܼ
ܗܵܕܹܐ ܥܵܡܘܿܪܘܼܬܼܵܐ ܐܝܼܬܹܝܗ̇: ܐܲܝܟܼ ܕܐܵܦ ܠܚܲܕܼ ܦܲܪܨܘܿܦܵܐ ܬܸܗܘܸܐ:
ܕܗ̤ܘ ܟܲܕܼ ܗ̤ܘ ܕܗܵܘ̇ ܕܲܓܼܠܸܐ ܘܲܕܼܗܵܘ̇ ܕܡܸܬܼܓܠܸܐ. ܐܲܝܟܼ ܨܒܼܝܵܢܵܐ
ܓܹܝܪ ܕܐܲܠܵܗܵܐ ܡ̣ܢ ܐܵܢܲܢܩܹܐ ܡܸܬܿܬܵܘܕܝܵܐ ܘܡܸܬܿܬܿܕܝܼܢܵܐ ܡܸܢܲܢ: ܗܵܝ̇
ܕܐܝܼܬܼܵܘܗܝ ܘܗܵܝ̇ ܕܲܥܡܲܪ. ܐܲܠܵܗܵܐ ܐܝܼܬܼܵܘܗܝ ܡ̇ܢ ܒܟܼܠܗܘܿܢ
ܥܒܼܝܼ̈ܕܹܐ. ܒܹܗ ܓܹܝܪ ܐܝܼܬܲܝܢ. ܘܲܡܬܲܚܲܡ ܒܗܵܕܹܐ: ܕܐܵܦܸܢ ܟܲܕܼ ܛܵܒܼ
ܗܵܟܲܢܵܐ ܐܝܼܬܼܵܘܗܝ ܒܟܼܠ: ܒܐ̄ܢܵܫ̈ܝܼܢ ܐ̄ܢܵܫ̈ܝܼܢ ܡܸܬܼܐ̱ܡܲܪ ܕܲܥ̣ܡܲܪ.
ܠܐ̄ܢܵܫ̈ܝܼܢ ܕܹܝܢ: ܕܐܵܦܠܵܐ ܐܲܠܵܗܗܘܿܢ ܐܝܼܬܼܵܘܗܝ ܡܸܢܼܐ̱ܡܲܪ. ܘܠܵܘ
ܒܟܼܠܢܵܫ ܒܵܗ̇ ܒܲܕܡܘܼܬܼܵܐ ܡܸܬܼܐ̱ܡܲܪ ܕܲܥ̣ܡܲܪ: ܐܸܠܵܐ ܐܲܝܟܼ ܚܘܼܒܹܗ.
ܒܐ̄ܢܫ̈ܝܼܢ ܡܸܢܲܢ ܡܸܬܼܐ̱ܡܲܪ: ܕܒܲܠܚܘܿܕܼ ܪܘܼܟܵܒܼܵܐ ܥ̣ܡܲܪ ܐܲܝܟܼ
ܕܲܒܼܒܲܝܵܬܼܵܐ: ܐܲܟܼܙܢܵܐ ܕܒܲܡܗܲܣܝܡ̈ܢܹܐ: ܒܲܐ̄ܚܪ̈ܵܢܹܐ ܕܹܝܢ ܐܵܦܸܢ ܕܡܲܥܒܸܿܕܼ:
ܠܵܘ ܒܵܗ̇ ܒܲܕܼܡܘܼܬܼܵܐ: ܐܸܠܵܐ ܒܬܼܵܘܤܲܦܬܼܵܐ ܘܲܒܼܨܝܼܪܘܼܬܼܵܐ. ܒܲܐ̄ܚܪ̈ܵܢܹܐ
ܕܹܝܢ: ܐܲܝܟܼ ܕܒܲܫܠܝܼܚܹ̈ܐ ܒܟܼܠܗܘܿܢ. ܒܲܐ̄̈ܚܪ̈ܵܢܹܐ ܕܹܝܢ: ܐܲܝܟܼ ܕܒܲܢܒܼܝܹ̈ܐ.
ܘܒܲܐ̄ܚܪ̈ܵܢܹܐ ܕܹܝܢ: ܐܲܝܟܼ ܕܲܒܼܡܲܠܦܵܢܹ̈ܐ. ܘܒܲܐ̄ܚܪ̈ܵܢܹܐ ܕܹܝܢ: ܐܲܝܟܼ ܦܘܼ̈ܠܵܓܹܐ
ܕܡܵܘܗ̈ܒܼܵܬܼܵܐ. ܒܗܵܢܵܐ ܘܲܒܼܗܵܘ̇ ܘܒܲܐ̄ܚܪܹܢܵܐ ܥܵܡܲ݁ܪ ܘܐܵܦ ܡܲܥܒܸܿܕܼ
ܒܟܼܠ. ܘܠܵܘ ܟܠܗܘܿܢ ܐܲܝܟܼ ܟܠܗܘܿܢ ܫܘܹܝܢ ܘܕܼܵܡܹ̇ܝܢ ܠܲܚܕܼܵܕܹ̈ܐ:
ܐܸܠܵܐ ܐܲܝܟܼ ܚܘܼܒܹܗ ܕܗܵܘ̇ ܕܥܵܡܲ݁ܪ ܒܗܘܿܢ. ܡܸܢܡܗܘܿܢ ܡ̣ܢ ܗܵܠܹܝܢ
ܪܹܫܝܼܬܼܵܐ ܩܢܹܝܢ: ܘܡܸܢܗܘܿܢ ܗܵܠܹܝܢ ܕܒܼܵܬܲܪܹܝܢ. ܘܒܼܐܝܼܕܼܵܐ ܒܐܝܼܕܼܵܐ
ܒܡܲܚܲܬܬܵܐ ܟܕܝܼܢܝܼܢ ܘܢܲܩܝܦܝܼܢ ܠܲܚܕܼܵܕܹ̈ܐ: ܐܲܝܟܼ ܙܢܵܐ ܕܲܒܼܦܲܓܼܪܵܐ
pb. 83
ܐܝܼܬܲܝܗܘܿܢ ܗܲܕܵܡܹ̈ܐ. ܪܹܫܵܐ ܕܹܝܢ ܕܟܼܠܗܘܿܢ ܡܫܝܼܚܵܐ ܗܘ̣: ܘܲܒܼܗܵܢܵܐ
ܐܲܤܝܼܪܝܼܢ. ܐܵܦ ܪܹܫܹܗ ܕܹܝܢ ܕܲܡܫܝܼܚܵܐ: ܐܲܠܵܗܵܐ. ܕܐܲܝܟܲܢܵܐ ܕܐܝܼܬܼܵܘܗܝ
ܠܲܢ ܗ̤ܘ ܪܹܫܵܐ ܐܵܦ ܦܲܪܨܘܿܦܵܐ: ܗܵܟܲܢܵܐ ܐܵܦ ܐܲܠܵܗܵܐ ܐܝܼܬܼܵܘܗܝ ܪܹܫܹܗ
ܕܝܼܠܹܗ ܐܵܦ ܦܲܪܨܘܿܦܹܗ ܘܡܸܬܼܒܲܤܪܵܢܘܼܬܹܗ. ܡܸܛܠ ܗܵܢܵܐ:
ܕܢܸܗܘܸܐ ܚܢܲܢ ܒܢܲܝ̈ܐ ܕܐܲܠܵܗܵܐ ܡܸܢܹܗ ܩܲܒܸܠܢܲܢ: ܗ̤ܘ ܕܹܝܢ ܒܪܵܐ
ܝܑܼܚܝܼܕܼܵܝܵܐ. ܐܲܝܟܲܢܵܐ ܕܢܸܗܘܸܐ ܒܸܤܪܹܗ: ܗܵܘ̇ ܡܵܐ ܕܐܝܼܬܼܵܘܗܝ ܗ̤ܘ ܒܪܵܐ
ܕܐܲܠܵܗܵܐ ܘܕܲܐܒܼܵܐ. ܐܲܝܟܼ ܕܢܸܗܘܸܐ ܨܲܠܡܵܐ ܕܐܲܒܼܵܐ ܒܪܵܐ ܕܐܲܒܼܵܐ: ܗܵܘ̇
ܕܕܝܼܠܹܗ ܐܝܼܬܼܵܘܗܝ ܨܲܠܡܵܐ. ܡܸܛܠ ܕܗܸܘܝܘܼ ܟܲܕܼ ܗ̤ܘ ܦܲܪܨܘܿܦܵܐ
ܕܲܒܼܪܵܐ: ܘܗ̤ܘܝܘܼ ܘܠܵܘ ܐ̄ܚܪܹܝܢ: ܗܵܘ̇ ܕܲܒܼܬܲܪ̈ܬܲܝܗܹܝܢ ܐܘܼܤ̈ܝܼܵܣ:
ܘܠܵܐ ܡܸܬܼܦܲܪܸܫ.
ܣ. ܥܲܠ ܗܵܝ̇: ܕܠܵܘ ܐܲܝܟܼ ܕܲܒܼܨܲܠܡܹ̈ܐ: ܐܵܘ ܐܲܝܟܼ ܕܲܒܼܡܲܠܲܐܟܹ̈ܐ:
ܐܵܘ ܐܲܝܟܼ ܕܒܼܐܝܼ̈ܙܓܲܕܹܐ: ܗܵܢܘܿܢ ܕܲܡܡܲܠܹܝܢ ܦܲܪܨܘܿܦܵܐ ܕܗܵܘ̇
ܕܪܲܚܝܼܩ: ܗܵܟܲܢܵܐ ܐܵܦ ܥܲܠ ܪܹܫ ܛܘܼܦܤܵܐ ܢܸܤܒܲܪ: ܐܸܠܐ ܕܒܲܟܼܝܵܢܹܗ
ܕܝܼܠܹܗ ܘܲܒܼܦܪܨܘܿܦܹܗ ܐܸܬܼܚܲܝܲܕܼ ܠܦܲܓܼܪܵܐ ܘܐܸܬܼܒܲܪܢܲܫ: ܟܲܕܼ
ܒܦܲܪܨܘܿܦܵܐ ܕܝܼܠܹܗ ܒܦܲܓܼܪܵܐ: ܡܸܬܼܚܲܫܚܝܼܢ: ܘܦܲܓܼܪܵܐ ܒܦܲܪܨܘܿܦܵܐ
ܕܐܲܠܵܗܵܐ ܡܸܠܬܼܵܐ.
ܠܵܘ ܐܲܠܵܗܵܐ: ܘܒܲܐܝܠܹܝܢ ܕܲܒܝܘܼܩܢܵܐ ܡܸܤܬܲܥܪ̈ܵܢ: ܬܲܡܵܢ ܓܹܝܪ
ܒܲܚܙܵܬܼܵܐ ܒܲܠܚܘܿܕܼ ܡܸܬܼܐܲܡܪܝܼܢ ܕܐܝܼܬܲܝܗܘܿܢ: ܡ̣ܢ ܚܙܵܬܼܵܐ ܐܵܦ ܡ̣ܢ
ܕܡܘܼܬܼܵܐ: ܟܲܕܼ ܪܲܚܝܼܩܵܐ ܡ̣ܢ ܐܘܼܤܝܼܵܐ. ܘܐܵܦܠܵܐ ܬܘܼܒܼ ܐܲܝܟܼ ܡܲܠܲܐܟܹ̈ܐ
ܘܐܝܼ̈ܙܓܲܕܹܐ ܕܲܡܡܲܠܹܝܢ ܦܲܪܨܘܿܦܵܐ ܕܲܡܫܲܕܪ̈ܵܢܲܝܗܘܿܢ: ܘܲܒܼܗܵܕܹܐ ܐܝܼܬܲܝܗܘܿܢ
ܦܲܪ̈ܨܘܿܦܹܐ ܕܗܵܢܘܿܢ ܒܝܲܕܼ ܡܫܲܡܫܵܢܘܼܬܼܵܐ ܘܲܡܫܲܠܛܘܼܬܼܵܐ ܫܚܝܼܡܬܼܵܐ.
pb. 84
ܐܸܠܵܐ ܗ̤ܘ ܒܹܗ ܒܲܟܼܝܵܢܹܗ ܘܲܒܼܦܲܪܨܘܿܦܹܗ ܐܸܬܼܚܲܫܲܚ ܟܲܕܼ ܐܵܡܲ݁ܪ:
ܕܐܸܢܵܐ ܠܲܡ ܘܐܵܒܼܝ ܚܲܕܼ ܚܢܲܢ. ܘܐܝܼܬܼܵܘܗܝ ܗ̤ܘ: ܗܵܘ̇ ܡܵܐ ܕܐܝܼܬܼܵܘܗܝ
ܒܦܲܪܨܘܿܦܵܐ ܗܵܘ̇. ܘܗܵܘ̇ ܡܵܐ ܕܐܝܼܬܼܵܘܗܝ ܗܵܘ̇ ܒܦܲܪܨܘܿܦܵܐ:
ܐܝܼܬܼܵܘܗܝ ܗ̤ܘ. ܠܵܘ ܟܲܕܼ ܒܲܕܼܡܘܼܬܼܵܐ ܐ̄ܚܪܹܬܼܵܐ ܥܲܒܼܕܵܗ̇ ܕܡܘܼܬܹܗ.
ܐܸܠܵܐ ܒܲܕܼܡܘܼܬܼܵܐ ܕܝܼܠܹܗ: ܘܠܵܘ ܒܲܕܓܼܡܘܼܬܼܵܐ ܐ̄ܚܪܹܬܼܵܐ ܕܕܼܵܡܝܵܐ ܗ̣̄ܘܼܵܬܼ
ܠܲܕܼܡܘܼܬܼܵܐ ܕܥܲܒܼܕܵܐ: ܐܸܠܵܐ ܒܗܵܝ̇ ܕܡܘܼܬܼܵܐ ܟܝܵܢܵܝܬܼܵܐ ܕܗܵܘ̇. ܐܲܝܟܲܢܵܐ
ܕܗܵܢܵܐ ܢܸܗܘܸܐ ܗܵܘ̇ ܡܵܐ ܕܐܝܼܬܼܵܘܗܝ ܗܵܘ̇: ܘܗ̤ܘ ܗܵܘ̇ ܡܵܐ
ܕܐܝܼܬܼܵܘܗܝ ܗܵܢܵܐ: ܟܲܕܼ ܡܩܵܘܸܐ ܗܵܢܵܐ ܘܗܵܘ̇.
ܤܐ. ܥܲܠ ܗܵܝ̇: ܕܒܲܟܼܝܵܢܵܐ ܕܒܲܪܢܵܫܵܐ ܩܲܒܸܿܠ̣ ܫܡܵܐ ܕܲܡܝܲܬܲܪ ܡ̣ܢ
ܟܠ ܫܡܵܗ̈ܝܼܢ.
ܗܵܕܲܐ ܗ̣̄ܝ ܓܹܝܪ ܬܲܪܒܿܝܼܬܼܵܐ ܪܹܫܝܵܬܼܵܐ ܕܲܟܼܝܵܢܵܐ ܕܐ̄ܢܵܫܘܼܬܼܵܐ: ܕܟܲܕܼ
ܡܩܵܘܸܐ ܒܲܟܼܝܵܢܵܐ ܕܐ̄ܢܵܫܘܼܬܼܵܐ: ܡܩܲܒܸܿܠ ܫܡܵܐ ܕܲܡܝܲܬܲܪ ܡ̣ܢ ܟܠ
ܫܡܵܗܹ̈ܐ. ܠܵܘ ܒܕܼܘܼܪܵܓܼܵܐ ܕܕܼܘܼܒܵܪܹ̈ܐ: ܘܠܵܘ ܒܝܼܕܲܥܢܬܼܵܐ ܘܲܒܼܗܲܝܡܵܢܘܼܬܼܵܐ:
ܐܸܠܵܐ ܒܗܵܕܹܐ ܗܘ̤ܵܐ ܒܛܘܼܝܵܒܼܵܐ ܡܩܲܒܿܠܵܢܵܐ: ܕܢܸܗܘܸܐ ܝܘܼܩܢܹܗ
ܘܦܲܪܨܘܼܦܹܗ: ܐܲܝܟܼ ܕܐܵܦ ܦܲܪܨܘܿܦܹܗ ܐܝܼܬܼܵܘܗܝ ܦܲܪܨܘܼܦܹܗ ܕܗܵܢܵܐ.
ܘܐܝܼܬܼܵܘܗܝ: ܐܵܦ ܐܲܠܵܗܵܐ ܘܐܵܦ ܒܲܪܢܵܫܵܐ. ܘܲܕܼܡܘܼܬܼܵܐ ܕܐܲܠܵܗܵܐ
ܒܡܸܬܼܢܲܚܬܼܵܢܘܼܬܼܵܐ ܘܲܒܼܤܘܼܪܵܩܵܐ ܘܒܸܐܤܟܹܡܵܐ: ܕܡܘܼܬܼܵܐ ܕܒܸܤܪܵܐ
ܐܲܝܟܼ ܒܲܪܢܵܫܵܐ. ܘܒܲܪܢܵܫܵܐ ܐܝܼܬܼܵܘܗܝ ܒܪܘܼܡܪܵܡܵܐ: ܗܵܘ̇ ܡܵܐ
ܕܐܝܼܬܼܵܘܗܝ ܐܲܠܵܗܵܐ: ܒܲܫܡܵܐ ܕܲܠܥܸܠ ܡ̣ܢ ܟܠ ܫܡܵܗ̈ܝܼܢ. ܡܛܸܠ
ܗܵܢܵܐ: ܒܤܘܼܪܵܩܵ ܡܲܟܸܟܼ ܢܲܦܫܹܗ ܥܕܲܡܵܐ ܠܡܵܘܬܑܵܐ: ܡܵܘܬܵܐ ܕܹܝܢ
pb. 85
ܕܲܙܩܝܼܦܵܐ: ܟܲܕܼ ܦܲܪܨܘܿܦܵܐ ܕܗܵܘ̇ ܕܡܝܼܬܼ ܘܐܸܙܕܩܸܦ ܐܸܬܼܚܲܫܲܚ
ܒܦܲܪܨܘܿܦܵܐ ܕܝܼܠܹܗ. ܘܗܵܠܹܝܢ ܕܗܵܘ̇ ܕܡܝܼܬܼ ܘܐܸܙܕܩܸܦ
ܘܐܸܬܼܪܲܡܪܲܡ: ܒܦܲܪܨܘܿܦܵܐ ܕܝܼܠܹܗ ܐܸܬܼܚܲܫܲܚ. ܘܡܸܛܠ ܗܵܢܵܐ:
ܐܲܝܟܼ ܕܡ̣ܢ ܚܲܕܼ ܦܲܪܨܘܿܦܵܐ ܡܸܬܼܐ̱ܡܲܪ ܕܲܡܫܝܼܚܵܐ. ܘܟܼܠ ܚܲܕܼ: ܗܵܠܹܝܢ
ܘܗܵܢ̇ܘܿܢ: ܒܲܟܼܝܵܢܵܐ ܗܵܟܲܢ ܡܫܲܚ̱ܠܦܝܼܢ: ܐܲܝܟܼ ܡܵܐ ܕܲܡܫܲܚܠܲܦ ܟܝܵܢܵܐ
ܐܲܠܵܗܵܝܵܐ ܡ̣ܢ ܟܝܵܢܵܐ ܕܒܲܪܢܵܫܵܐ. ܐܲܝܟܲܢܵܐ ܕܲܡܫܝܼܚܵܐ ܬܪ̈ܲܝܗܘܿܬܢ ܐܝܼܬܼܵܘܗܝ:
ܕܡܘܼܬܼܵܐ ܕܐܲܠܵܗܵܐ ܘܲܕܼܡܘܼܬܼܵܐ ܕܥܲܒܼܕܼܵܐ ܕܡܸܬܼܪܲܡ̱ܪܡܵܐ: ܘܗܵܝ̇
ܕܲܡܪܲܡ̱ܪܡܵܐ. ܕܐܸܢ ܐܵܦ ܡ̣ܢ ܒܸܤܪܵܐ ܕܐܸܬܼܡܫܲܚ: ܡܸܬܼܐ̱ܡܲܪ
ܡܫܝܼܚܵܐ: ܕܲܬܼܪ̈ܲܝܗܘܿܢ ܟܝܵܢܹ̈ܐ ܚܲܕܼ ܦܲܪܨܘܿܦܵܐ ܐܝܼܬܼܵܘܗܝ. ܡܸܛܠ
ܕܐܵܦ ܚܲܕܼ ܗ̣̄ܘ ܫܡܵܐ ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ. ܬܪ̈ܲܝܗܘܿܢ: ܐܸܢ
ܐܵܦ ܡ̣ܢ ܟܝܵܢܵܐ ܐܲܠܵܗܵܝܵܐ ܡܸܬܼܐ̱ܡܲܪ: ܫܡܵܗܹ̈ܐ ܓܹܝܪ ܕܦܲܪ̈ܨܘܿܦܹܐ ܟܝܵܢܵܝܹ̈ܐ
ܕܓܼܵܘܵܐ ܐܝܼܬܲܝܗܘܿܢ ܒܡܸܬܼܢܲܚܬܼܵܢܘܼܬܼܵܐ ܘܲܒܼܡܸܬܼܪܲܡܪܡܵܢܘܼܬܼܵܐ.
ܤܒ. ܥܲܠ ܗܵܝ̇: ܕܡ̣ܢ ܬܪ̈ܲܝܗܘܿܢ ܙܵܕܹܩ ܗ̄ܘ̣ܵܐ ܕܬܸܗܘܸܐ
ܗ̄ܘܵܬܼ ܡܕܲܒܿܪܵܢܘܼܬܼܵܐ ܕܲܠܘܵܬܲܢ.
ܘܚܵܫܚܵܐ ܗ̄ܘ̣ܵܬܼ ܠܲܡܕܲܒܿܪܵܢܘܼܬܼܵܐ ܕܲܠܘܵܬܲܢ: ܕܲܬܼܪ̈ܲܝܗܘܿܢ ܠܗܵܘ̇
ܦܲܪܨܘܿܦܵܐ ܢܸܬܼܢܲܤܒܿܘܼܢ. ܡܸܛܠ ܓܹܝܪ ܕܲܐܒܲܪܢܵܫܵܐ ܩܲܕܼܡܵܝܵܐ ܒܨܲܠܡܵܐ
ܕܝܼܠܹܗ ܘܒܲܕܼܡܘܼܬܹܗ ܒܪܵܝܗܝ ܐܲܠܵܗܵܐ: ܘܦܲܪ̈ܨܘܿܦܹܐ ܘܐܲܠܵܗܵܐ
ܥܵܒܲܘܿܕܼܵܐ ܠܵܐ ܓܠܹܝܢ ܗ̄ܘ̣ܵܘ ܠܲܢ: ܕܐܲܒܼܵܐ ܘܲܒܼܪܵܐ ܘܲܕܪܘܼܚܵܐ
ܕܩܘܼܕܼܫܵܐ. ܐܲܝܟܢܵܐ ܕܐܵܦ ܠܒܼܵܪܘܿܝܵܐ ܢܸܕܲܥ: ܘܡܲܠܦܵܢܘܼܬܼܵܐ ܕܝܼܕܲܥܬܼܵܐ
ܐܲܠܵܗܵܝܵܬܼܵܐ ܡܫܲܡ̱ܠܝܵܐܝܼܬܼ ܢܸܩܢܸܐ: ܘܪܸܥܝܵܢܵܐ ܡܫܲܡܠܝܵܐ ܕܨܲܠܡܵܐ ܕܐܲܠܵܥܗܵܐ
pb. 86
ܡܫܲܡܠܝܵܐܝܼܬܼ ܢܩܲܒܸܿܠ: ܚܲܕܼܬܼ ܟ̱ܠܗ̇ ܒܪܝܼܬܼܵܐ ܒܲܡܫܝܼܚܵܐ: ܘܐܵܘܕܲܥ
ܘܚܵܘܝܼ ܠܲܢܬ ܕܡ̇ܢ ܐܝܼܬܼܵܘܗܝ ܥܵܒܲܘܿ݁ܕܼܵܐ: ܗܵܘ̇ ܕܡ̣ܢ ܒܪܵܫܝܼܬܼ
ܐܝܼܬܼܵܘܗܝ ܗ̄ܘ̣ܵܐ ܡܸܠܬܼܵܐ ܠܘܵܬܼ ܐܲܠܵܗܵܐ: ܘܐܲܠܵܗܵܐ ܗ̄ܘ̣ܵܐ ܥܵܒܼ݁ܘܿܕܼܵܐ
ܕܟܼܠ. ܟܠ ܠܲܡ ܒܐܝܼܕܹܗ ܗܘ̤ܵܐ: ܘܒܸܠܥܵܕܼܵܘܗܝ ܐܵܦܠܵܐ ܚܕܼܵܐ ܗܘ̤ܵܬܼ
ܡܸܕܼܡ ܕܲܗܘ̤ܸܵܐ.
ܤܓ. ܥܲܠ ܗܵܝ̇: ܕܡܸܛܠ ܡܵܢܵܐ ܐܲܠܵܗܵܐ ܡܸܠܬܼܵܐ ܠܝܵܬܹܗ ܗܲܝܟܿܠܵܐ
ܕܦܲܓܼܪܵܐ ܒܢ̣ܵܐ.
ܐܲܝܟܲܢܵܐ ܕܐܵܠܨܵܐܝܼܬܼ ܦܲܐܝܵܐ ܗ̄ܘ̣ܵܬܼ: ܕܡ̣ܢ ܥܵܒܼ̈ܘܿܕܼܵܐ ܕܲܟܼܝܵܢܵܐ ܢܸܗܘܸܐ
ܐܵܦ ܚܘܼܕܵܬܢ: ܡ̣ܢ ܗܵܘ̇ ܕܐܵܦ ܒܩܲܕܼܡܵܝܵܬܼܵܐ ܓܲܒܼܠܵܢ ܘܥܲܒܼܕܲܢ ܡ̣ܢ
ܐܲܪܥܵܐ. ܗܵܘ̇ ܕܲܢܤܲܒ̣ ܦܲܓܼܪܵܐ ܘܥܲܒܼܕܹܗ ܒܲܕܡܘܼܬܹܗ: ܘܐܲܩܝܼܡܹܗ
ܒܦܲܪܨܘܿܦܹܗ ܠܟܼܠ ܐܲܝܟܼ ܕܲܠܕܼܝܼܠܹܗ ܒܐܝܼܩܵܪܵܐ ܘܲܒܼܫܘܼܒܼܚܵܐ ܕܐܲܠܵܗܵܐ.
ܒܲܟܼܝܵܢܵܐ ܡܲܢ ܕܐܲܠܵܗܘܼܬܼܵܐ: ܒܦܲܪܨܘܿܦܵܐ ܕܹܝܢ ܕܲܒܼܪܵܐ ܐܸܬܼܚܲܫܲܚ: ܚܲܕܼ
ܗ̄ܘ̣ ܓܹܝܪ ܐܝܼܩܵܪܵܐ ܕܐܲܒܼܵܐ ܘܕܲܒܼܪܵܐ. ܐܲܝܟܲܢܵܐ ܠܲܡ ܕܲܡܝܼܩܪܝܼܢ ܠܐܲܒܼܵܐ:
ܢܝܲܩܪܘܼܢ ܐܵܦ ܠܲܒܼܪܵܐ. ܡܵܕܹܝܢ ܐܲܠܸܦ ܠܲܢ ܕܗܵܘ̇ ܕܲܒܼܪ̣ܵܐ ܟܠ
ܐܲܠܵܗܵܐ: ܘܕܲܒܼܪܵܐ ܥܲܡ ܐܲܒܼܵܐ ܘܪܘܼܚܵܐ: ܕܒܲܪܢܵܫܵܐ ܒܹܗ ܓܹܝܪ ܚ̣ܝܵܐ
ܗ̄ܘ̣ܵܐ: ܟܲܕܼ ܡܚܵܘܸܐ ܠܲܚܕܼܵܝܘܼܬܼܵܐ ܟܝܵܢܵܝܬܼܵܐ: ܕܐܲܒܼܵܐ ܐܝܼܬܼܵܘܗܝ ܕܲܒܼܪܵܐ:
ܘܐܲܒܼܵܐ ܒܲܒܼܪܵܐ: ܘܲܒܼܗܘܿܢ ܪܘܼܚܵܐ ܕܩܘܼܕܼܫܵܐ ܚܲܝܵܐ. ܘܲܒܼܪܵܝܗܝ
ܠܦܲܓܼܪܵܐ ܒܲܙܢܵܐ ܚܲܕܼܬܵܐ ܕܡ̣ܢ ܓܲܒܼܪܵܐ ܘܐܲܢ̄ܬܿܬܼܵܐ. ܘܡܸܛܠ ܕܲܥ̇ܒܼܵܕܼܵܐ
ܐܝܼܬܼܵܘܗܝ ܕܒܼܵܪܘܿܝܘܼܬܼܵܐ: ܡܬܲܢܸܐ ܥܲܠ ܡܸܬܼܒܲܪܝܵܢܵܐ ܘܥܲܠ ܗܵܘ̇
ܕܲܒܼܪܵܐ. ܪܘܼܚܵܐ ܠܲܡ ܕܩܘܼܕܼܫܵܐ ܬܹܐܬܸܐ: ܘܚܲܝܠܹܗ ܕܥܸܠܵܝܵܐ ܢܲܓܸܢ:
pb. 87
ܟܲܕܼ ܪܵܡܹ̇ܙ ܥܲܠ ܒܵܪܘܿܝܵܐ. ܡܸܛܠ ܗܵܢܵܐ ܗܵܘ̇ ܕܡܸܬܼܝܼܠܸܕܼ: ܗܵܢܵܘ ܕܹܝܢ
ܡܸܬܼܒܲܪܝܵܢܵܐ ܩܲܕܝܼܫܵܐ: ܢܸܬܼܩܪܸܐ ܒܪܵܐ ܕܐܲܠܵܗܵܐ. ܐܲܝܟܼ ܕܲܒܼܒܼܵܪܘܿܝܘܼܬܼܵܐ
ܐܸܡ݂ܲܪ ܩܲܕܝܼܫܵܐ ܘܲܒܼܪܵܐ: ܟܲܕܼ ܪܵܡܹ̇ܙ ܥܲܠ ܨܲܠܡܵܐ ܘܲܕܼܡܘܼܬܼܵܐ: ܕܲܢܤܲܒܼ
ܒܒܼܵܪܘܿܝܘܼܬܼܵܐ ܒܲܪܢܵܫܵܐ ܩܲܕܼܡܵܝ̇ܐ ܕܠܵܐ ܢ݂ܛܲܪ ܐܸܢܘܿܢ. ܙܵܕܹܩ ܗ̄ܘ̣ܵܐ
ܓܹܝܪ: ܕܐܲܝܟܼ ܨܲܠܡܵܐ ܕܐܲܠܵܗܑܵܐ: ܢܸܛܲܠ ܢܲܦܫܹܗ ܠܐܲܠܵܗܵܐ: ܕܠܵܐ
ܛܘܼܠܫܵܐ ܘܲܕܼܠܵܐ ܡܘܼܡ. ܗܵܝ̇ ܓܹܝܪ: ܕܗܵܘ̇ ܡܵܐ ܕܐܲܠܵܗܵܐ ܨܵܒܹ̇ܐ ܗܘ̤
ܢܸܨܒܸܿܐ: ܐܲܝܟܼ ܦܲܪܨܘܿܦܵܐ ܕܐܲܠܸܵܗܵܐ ܐܝܼܬܹܝܗ̇ ܠܹܗ. ܦܲܪܨܘܿܦܵܐ ܓܹܝܪ
ܕܐܲܠܵܗܵܐ ܗܵܢܵܘ: ܕܢܸܨܒܸܐ ܗܵܘ̇ ܡܵܐ ܕܐܲܠܵܗܵܐ ܨܵܒܹ̇ܐ: ܗܵܘ̇ ܡ̇ܢ
ܕܦܲܪܨܘܿܦܹܗ ܐܝܼܬܼ ܠܹܗ. ܡܸܛܠ ܗܵܢܵܐ ܒܲܪܢܵܫܵܐ ܕܲܬܼܪܹܝܢ ܐܸܬܼܒܿܪܝܼ
ܡ̣ܢ ܪܘܼܚܵܐ ܕܩܘܼܕܼܫܵܐ ܘܚܲܝܠܹܗ ܕܥܸܠܵܝܵܐ: ܘܲܢܤܲܒܼ ܡܸܢܹܗ ܕܢܸܗܘܸܐ
ܩܲܕܝܼܫܵܐ ܘܲܒܼܪܵܐ ܕܐܲܠܵܗܵܐ.
ܤܕ: ܥܲܠ ܗܵܝ̇: ܕܡܸܢܵܗ̇ ܕܲܓܼܒܼܝܼܠܘܼܬܹܗ ܢܤܲܒܼ ܕܢܸܗܘܸܐ
ܒܪܵܐ: ܘܠܵܐ ܒܕܼܘܼܪܵܓܼܵܐ.
ܕܠܵܘ ܐܲܝܟܼ ܐܲܝܠܹܝܢ ܕܫܲܪܟܵܐ ܢܸܗܘܸܐ: ܡ̣ܢ ܡܸܫܬܲܡܥܵܢܘܼܬܼܵܐ
ܒܗܲܝܡܵܢܘܼܬܼܵܐ ܘܲܥ̇ܒܼܵܕܹ̈ܐ. ܐܸܠܵܐ ܡ̣ܢ ܗܘܵܝܵܐ ܒܵܗ̇ ܒܲܒܼܪܬܹܗ
ܕܒܼܵܪܘܿܝܵܐ: ܦܲܪܨܘܿܦܹܗ ܢܤܲܒܼ ܡܸܬܼܒܲܪܝܵܢܵܐ: ܐܲܝܟܼ ܕܠܵܐ ܢܸܗܘܸܐ
ܩܲܕܼܡܵܝܑܬܼ ܒܲܪܢܵܫܵܐ: ܐܸܠܵܐ ܐܲܟܲܚ̄ܕܼ ܒܲܪܢܵܫܵܐ ܐܲܠܵܗܵܐ: ܒܡܸܬܼܒܲܪܢܫܵܢܘܼܬܼܵܐ
ܕܐܲܠܵܗܵ ܕܒܹܗ: ܗܵܘ̇ ܡܵܐ ܕܐܝܼܬܼܵܘܗܝ ܒܒܲܪܢܵܫܵܐ ܩܲܕܼܡܵܝܵܐ ܐܲܠܵܗܵܐ.
ܥܵܒܲ݁ܘܿܕܼܵܐ ܕܹܝܢ ܐܝܼܬܼܵܘܗܝ ܗ̄ܘ̣ܵܐ ܕܟܼܠ: ܤܵܐܹ̇ܡ ܢܵܡܘܿܤܵܐ ܒܸܠܥܵܕܼ
ܡܲܠܟܵܐ. ܫܘܼܒܼܚܵܐ. ܐܝܼܩܵܪܵܐ. ܚܲܝܠܵܐ. ܗܵܢܵܐ ܗܘ̤ܵܐ ܐܵܦ ܒܲܪܢܵܫܵܐ
pb. 88
ܕܲܬܼܪܹܝܢ: ܒܲܡܫܲܡ̈ܠܵܝܵܬܼܵܐ ܘܒܲܡܫܲܠܡܵܢ̈ܝܵܬܼܵܐ. ܕܐܲܠܵܗܵܐ ܢܸܗܘܸܐ ܠܹܗ
ܦܲܪܨܘܿܦܵܐ: ܗ̤ܘ ܕܹܝܢ ܒܐܲܠܵܗܵܐ.
ܤܗ. ܥܲܠ ܗܵܝ̇: ܕܟܲܕܼ ܠܵܐ ܐܝܼܬܼ ܠܹܗ ܦܲܪܨܘܿܦܵܐ ܕܝܵܬܹܗ:
ܐܲܝܟܲܢܵܐ ܙܵܕܹܩ ܠܡܸܤܬܲܟܵܠܘܼ ܦܲܪܨܘܿܦܵܐ ܒܲܚܕܼܵܝܘܼܬܼܵܐ.
ܐܲܝܟܼ ܕܗܵܘ̇ ܡܵܐ ܕܐܲܠܵܗܵܐ ܠܐܵܕܼܵܡ ܒܐܸܤܟܹܡܵܐ ܡܸܬܼܚܙܸܐ
ܗ̄ܘ̣ܵܐ ܘܲܡܡܲܠܸܠ ܘܠܵܘ ܐ̄ܚܪܹܝܢ ܐܝܼܬܼܵܘܗܝ ܗ̄ܘ̣ܵܐ: ܗܵܟܲܢܵܐ ܢܸܗܘܸܐ ܐܲܠܵܗܵܐ
ܠܟܼܠܗܘܿܢ ܒܢܲܝ̈ܢܵܫܵܐ: ܒܐܸܤܟܹܡܵܐ ܟܝܵܢܵܐ ܕܐܸܬܼܒܿܪܝܼ: ܗܵܢܵܘ ܕܹܝܢ
ܕܒܸܤܪܵܐ: ܟܲܕܼ ܡܸܬܼܚܙܸܐ ܘܲܡܡܲܠܸܠ ܒܨܲܠܡܵܐ ܕܝܼܠܹܗ. ܘܨܲܠܡܵܐ
ܒܪܹܫ ܛܘܼܦܤܵܐ. ܐܲܝܟܼ ܕܲܒܨܲܠܡܵܐ ܡ̇ܢ ܡܸܬܼܚܙܸܐ ܐܲܠܵܗܵܐ: ܟܲܕܼ
ܐܝܼܬܼܵܘܗܝ ܠܵܐ ܡܸܬܼܚܲܙܝܵܢܵܐ. ܨܲܠܡܵܐ ܕܹܝܢ ܒܗܵܘ̇ ܐܲܝܢܵܐ ܕܠܵܐ ܡܸܬܼܚܙܸܐ
ܡܸܬܼܪܢܸܐ. ܠܵܐ ܗ̄ܘ̣ܵܐ ܓܹܝܪ ܨܲܠܡܵܐ ܕܝܵܬܹܗ ܐܝܼܬܼܵܘܗܝ: ܐܸܠܵܐ ܕܗܵܘ̇
ܨܲܠܡܵܐ ܕܹܝܢ ܘܦܲܪܨܘܿܦܵܐ: ܐ̄ܢܵܫܘܼܬܼܵܐ ܕܐܲܠܵܗܘܼܬܼܵܐ: ܘܐܲܠܵܗܘܼܬܼܵܐ
ܕܐ̄ܢܵܫܘܼܬܼܵܐ: ܦܲܪܨܘܿܦܵܐ ܕܗܵܘ̇ ܕܡܸܬܼܪܢܸܐ. ܗܵܘ̇ ܠܲܡ ܕܒܲܕܼܡܘܼܬܼܵܐ
ܘܲܒܼܦܸܚܡܵܐ ܕܐܲܠܵܗܵܐ ܐܝܼܬܼܵܘܗܝ ܗ̄ܘ̣ܵܐ: ܕܡܘܼܬܼܵܐ ܕܥܲܒܼܕܵܐ ܢܤܲܒ̣:
ܘܒܸܐܤܟܹܿܡܵܐ ܐܸܫܬܲܟܲܚ ܐܲܝܟܼ ܒܲܪܢܵܫܵܐ: ܒܗܵܘ̇ ܕܡܸܬܼܚܙܸܐ. ܗܵܘ̇ ܕܹܝܢ
ܕܡܸܬܼܚܙܸܐ ܒܗܵܘ̇ ܕܡܸܬܼܪܢܸܐ: ܒܦܲܪܨܘܿܦܵܐ ܘܒܲܫܡܵܐ ܕܲܠܥܸܠ ܡ̣ܢ
ܟܠ ܫܡܵܗ̈ܝܼܢ: ܒܐܝܼܩܵܪܵܐ ܘܲܒܼܫܘܼܒܼܚܵܐ ܘܵܒܼܤܸܓܼܕܬܼܵܐ. ܝܗ̣̄ܒܼ ܠܹܗ ܓܹܝܪ
ܫܡܵܐ ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ: ܕܒܲܫܡܹܗ ܕܝܼܫܘܿܥ ܟܠ ܒܪܘܿܟ
ܬܸܟܿܘܿܦ ܕܒܲܫܡܲܝܵܐ ܘܒܲܐܪܥܵܐ: ܘܕܲܠܬܲܚܬܿ ܡ̣ܢ ܐܲܪܥܵܐ. ܘܟܼܠ ܠܸܫܵܢ
ܢܵܘܕܹܐ: ܕܡܵܪܝܵܐ ܗ̄ܘ̣ ܝܼܫܘܿܥ: ܡܸܫܬܲܥܸܐ.
pb. 89
ܤܘ. ܕܐܲܝܟܲܢܵܐ ܡܸܤܬܿܓܸܕܼ ܒܦܲܪܨܘܼܦܵܐ ܕܲܒܼܪܵܐ ܒܸܤܪܵܐ: ܘܟܲܕܼ
ܒܡܸܕܸܡ ܠܵܐ ܫܵܘܹ̇ܐ ܠܤܸܓܼܕܬܼܵܐ ܗܵܕܹܐ ܒܦܲܪܨܘܿܦܵܐ ܕܐܲܠܵܗܵܐ ܡܸܠܬܼܵܐ
ܡܸܤܬܿܓܸܕܼ.
ܡ̣ܢ ܦܲܪܨܘܿܦܵܐ ܓܹܝܪ ܐ̄ܢܵܫܵܝܵܐ ܡܸܬܼܝܼܕܲܥ ܒܲܪܢܵܫܵܐ: ܗܵܢܵܘ ܕܹܝܢ ܡ̣ܢ
ܐܸܤܟܹܿܡܵܐ ܕܦܲܓܼܪܵܐ ܘܡ̣ܢ ܕܡܘܼܬܼܵܐ. ܐܲܠܵܗܵܐ ܕܹܝܢ ܡ̣ܢ ܫܡܵܐ ܕܲܡܝܲܬܲܪ
ܡ̣ܢ ܟܠ ܫܡܵܗ̈ܝܼܢ: ܘܡ̣ܢ ܤܸܓܼܕܬܼܵܐ ܕܡ̣ܢ ܟ̱ܠܵܗ̇ ܒܪܝܼܬܼܵܐ: ܘܡ̣ܢ
ܬܵܘܕܝܼܬܼܵܐ ܕܐܲܝܟܼ ܐܲܠܵܗܵܐ. ܒܹܗ ܓܹܝܪ ܢܤܲܒܼ ܕܡܘܼܬܼܵܐ ܕܥܲܒܼܕܵܐ:
ܘܝܲܗ̣̄ܒܼ ܠܲܕܼܡܘܼܬܼܵܐ ܕܥܲܒܼܕܵܐ ܟܡܘܼܬܹܗ: ܕܬܸܗܘܸܐ ܫܲܘܝܵܐ ܥܲܡ
ܐܲܠܵܗܵܐ. ܕܐܲܝܟܼ ܕܗ̤ܘ ܩܲܒܿܠܵܗ̇ ܠܹܗ ܕܬܸܗܘܸܐ ܦܲܪܨܘܿܦܵܐ ܕܝܼܠܹܗ:
ܠܵܐ ܢܲܤܠܹܝܗ̇ ܐ̄ܢܵܫ ܡܸܛܠ ܟܝܵܢܵܐ ܡ̣ܢ ܤܸܓܼܕܬܵܐ ܕܐܲܠܵܗܘܼܬܼܵܐ:
ܕܒܲܫܡܲܝܵܐ ܘܒܲܠܪܥܵܐ ܘܕܲܠܬܲܚܬܿ ܡ̣ܢ ܐܲܪܥܵܐ: ܘܡ̣ܢ ܟܠ ܠܸܫܵܢ:
ܘܐܵܦܸܢ ܒܲܟܼܝܵܢܵܐ ܠܥܸܠ ܡ̣ܢ ܟܝܵܢܵܐ ܐ̄ܢܵܫܵܝܵܐ ܐܝܼܬܹܝܗ̇. ܡ̇ܢ ܓܹܝܪ ܡܲܤܠܸܐ
ܠܵܗ̇ ܡ̣ܢ ܤܸܓܼܕܬܼܵܐ: ܠܗܵܝ̇ ܕܐܝܼܬܹܝܗ̇ ܕܡܵܪܵܐ ܕܟܼܠ ܘܡ̣ܢ
ܦܲܪܨܘܿܦܵܐ ܕܝܼܠܹܗ ܘܡ̣ܢ ܫܡܹܗ؟ ܘܡܲܢ̣ܘܼ ܬܘܼܒ ܡܲܤܠܸܐ ܕܠܵܐ
ܢܸܬܼܪ̱ܟܸܢ: ܠܗܵܝ̇ ܕܩܲܕܼܡܵܝܑܬܼ ܥܵܒܲܘܿܕܼܵܐ ܕܟܼܠ ܗܘ̤ܵܐ ܐܲܤܠܝܼ ܕܢܸܬܪܟܸܢ
ܠܵܗ̇؟ ܘܲܠܗܵܕܹܐ ܟ̱ܠܵܗ̇ ܐܸܬܼܪܟܸܢ: ܗܵܘ̇ ܕܒܼܵܪܘܿܝܘܼܬܼܵܐ ܕܝܼܠܹܗ
ܒܲܟܼܝܵܢܹܗ ܠܵܘ ܒܐܝܼܩܵܪܵܐ ܘܠܵܘ ܒܫܘܼܒܚܵܐ: ܐܸܠܵܐ ܒܫܝܼܛܘܼܬܼܵܐ ܘܲܒܨܲܥܪܵܐ
ܘܲܒܼܟܼܠܵܗ̇ ܡܲܟܿܝܼܟܼܘܼܬܼܵܐ ܗܘ̤ܵܐ ܥܕܲܡܵܐ ܠܡܵܘܬܵܐ ܕܲܙܩܝܼܦܵܐ.
ܡܲܟܸܟܼ ܠܲܡ ܠܢܲܦܫܹܗ ܥܕܲܡܵܐ ܠܡܵܘܬܵܐ: ܘܡܵܘܬܵܐ ܕܹܝܢ ܕܲܙܩܝܼܦܵܐ.
ܠܲܝܬܿ ܡܸܕܸܡ ܕܲܨܥܝܼܪ ܡ̣ܢ ܡܵܘܬܵܐ. ܠܵܐ ܗ̄ܘ̣ܵܐ ܐܲܝܟܼ ܙܢܵܐ ܕܒܼܵܐܕܼܵܡ
pb. 90
ܐܸܤܬܲܥܪܲܬ̤: ܗܵܘ̇ ܕܲܒܼܟܼܠܵܗ̇ ܬܸܫܒܿܘܿܚܬܼܵܐ ܘܐܝܼܩܵܪܵܐ ܝܲܗ̣̄ܒ ܠܹܗ
ܨܲܠܡܹܗ. ܟܠ ܓܹܝܪ ܫܲܥܒܸܿܓܼ ܬܚܹܝܬܼ ܪܸ̈ܓܼܠܵܘܗܝ. ܗܵܟܲܢܵܐ
ܘܐܵܦ ܠܒܲܪܢܵܫܵܐ ܕܲܬܼܪܹܝܢ: ܝܲܗ̣̄ܒܼ ܨܲܠܡܹܗ ܕܬܸܫܒܿܘܿܚܬܼܵܐ ܘܒܼܐܝܼܩܵܪܵܐ
ܘܲܒܼܚܲܝܠܵܐ. ܐܸܠܵܐ ܕܲܠܩܘܼܒܼܠܵܐ ܟܠܗܹܝܢ ܗ̤ܘܲܝ̈ ܡ̈ܠܐ: ܡܸܗܲܕܸ ܝܲܗ̣̄ܒܼ
ܨܲܠܡܵܐ ܕܐܲܠܵܗܵܐ: (ܡܸܤܲܒܼ ܢܲܤܒܵܗ̇ ܠܲܕܼܡܘܼܬܼܵܐ ܕܥܲܒܼܕܵܐ ܒܦܲܪܨܘܿܦܵܐ
[ ] ܪܐ ܒܲܠܚܘܿܕܼ ܕܦܲܪܨܘܿܦܵܐ [ ] ܟܡܵܐ ܙܲܒܼܢܵܐ
ܕܢܲܛܪܹܗ ܡܸܛܠ [.......] ܢܗ̇: ܘܠܵܐ ܬܘܼܒܼ ܗܘ̤ܵܬܼ
ܠܹܗ [.......] ܨܠܸܡ ܒܦܲܪܨܘܿܦܵܐ ܕܝܼܠܹܗ ܘܫܲܡܠܝܹܗ.
ܕܡܘܼܬܼܵܐ ܕܐܲܠܵܗܵܐ ܒܲܕܡܘܼܬܼܵܐ [ ] ܨܲܠܡܹܗ ܠܹܗ ܒܲܕܡܘܼܬܼܵܐ
ܕܝܼܠܹܗ. ܒܲܕܼ ܥܲܒܼܕܵܗ̇ ܢܤܝܼܒܼܘܼܬܼܵܐ ܕܓܼܵܘܵܐ.
ܤܙ. ܕܡܸܛܠ ܡܵܢܵܐ: ܟܲܕܼ ܢܤܲܒܼ ܕܡܘܼܬܼܵܐ ܕܥܲܒܼܕܵܐ: ܠܵܘ
ܠܲܡܝܲܩܪܵܐ ܐܵܘ ܠܫܝܼܛܵܐ ܢܤܲܒܼ.
ܘܡܸܛܠ ܗܵܢܵܐ ܢܤܲܒܼ ܕܡܘܼܬܼܵܐ ܕܥܲܒܼܕܵܐ ܕܡܘܼܬܼܵܐ ܡܸܤܟܹܢܬܼܵܐ:
ܕܡܘܼܬܼܵܐ ܕܐܵܘܒܿܕܲܬ̤ ܠܲܕܼܡܘܼܬܼܵܐ ܕܐܲܠܵܗܵܐ. ܠܵܐ ܗ̄ܘ̣ܵܐ ܠܐܝܼܩܵܪܵܐ ܘܠܵܐ
ܗ̄ܘ̣ܵܐ ܠܫܘܼܒܼܚܵܐ: ܘܠܵܘ ܠܤܸܓܼܕܬܼܵܐ: ܘܠܵܐ ܬܘܼܒܼ ܠܲܡܫܲܠܛܘܼܬܼܵܐ:
ܟܲܕܼ ܛܒܼ ܒܪܵܐ ܐܝܼܬܼܵܘܗܝ ܗ̄ܘ̣ܵܐ: ܐܸܠܵܐ ܠܡܸܫܬܲܡܥܵܢܘܼܬܼܵܐ:
ܒܦܲܪܨܘܿܦܵܐ ܕܲܒܼܪܵܐ ܤܵܥܪܵܐ ܗ̄ܘ̣ܵܬܼ ܐܲܝܟܼ ܪܸܥܝܵܢܵܐ ܕܐܲܠܵܗܵܐ. ܟܲܕܼ ܐܝܼܬܼ
ܗ̄ܘ̣ܵܬܼ ܠܵܗ̇ ܪܸܥܝܵܢܵܐ ܕܝܼܠܹܗ: ܘܠܵܘ ܕܝܼܠܵܗ̇. ܘܠܵܘ ܡܸܕܸܡ ܕܨܵܒܲܝܵܐ:
ܐܸܠܵܐ ܗܵܘ̇ ܡܵܐ ܕܐܲܠܵܗܵܐ ܡܸܠܬܼܵܐ ܨܵܒܹ̇ܐ ܗ̄ܘ̣ܵܐ. ܗܵܕܲܐ ܗ̣̄ܝ ܓܹܝܪ
ܕܡܘܼܬܼܵܐ ܕܐܲܠܵܗܵܐ: ܕܠܵܐ ܢܸܗܘܸܐ ܠܵܗ̇ ܪܸܥܝܵܢܵܐ ܘܨܒܝܼܵܢܵܐ ܕܝܼܠܵܗ̇:
pb. 91
ܐܸܠܵܐ ܕܗܵܘ̇ ܕܕܝܼܠܹܗ ܗ̄ܘ̣ ܦܲܪܨܘܼܦܵܐ ܘܲܕܼܡܘܼܬܼܵܐ. ܘܡܸܛܠ ܗܵܕܹܐ
ܢܸܤܒܲܬ̤ ܠܲܕܼܡܘܼܬܼܵܐ ܕܥܲܒܼܕܵܐ ܕܡܘܼܬܹܗ ܕܐܲܠܵܗܵܐ: ܕܠܵܐ ܬܟܲܤܸܐ
ܡܸܕܸܡ ܡ̣ܢ ܡܘܼܟܵܟܼܵܗ̇ ܕܲܕܼܡܘܼܬܼܵܐ ܕܥܲܒܼܪܵܐ. ܐܸܠܵܐ ܟܠܗܹܝܢ ܢܸܤܒܲܬ̤:
ܕܲܒܼܟܼܠܗܹܝܢ ܬܸܗܘܸܐ ܕܡܘܼܬܼܵܐ: ܐܲܝܟܼ ܕܲܕܼܠܵܐ ܒܘܼܨܵܪܵܐ ܬܸܥܒܿܕܝܗ̇
ܒܲܕܡܘܼܬܼܵܐ ܕܝܼܠܵܗ̇.
ܤܚ. ܕܡܸܛܠ ܡܵܢܵܐ ܢܲܤܒܵܗ̇ ܠܡܸܫܬܡܥܵܢܘܼܬܼܵܐ ܨܒܼܝܵܢܵܝܬܼܵܐ
ܠܲܕܼܡܘܼܬܼܵܐ ܕܥܲܒܼܕܵܐ: ܘܠܵܘ ܠܐܘܿܪܓܵܢܵܝܬܼܵܐ ܐܵܘܕܲܥ ܕܲܕܼܠܵܐ ܨܸܒܼܝܵܢ
ܐܝܼܬܹܝܗ̇.
ܡܸܛܠ ܓܹܝܪ ܕܲܠܗܵܕܹܐ ܢܲܤܒܵܗ̇: ܐܲܝܟܼ ܕܲܢܪܝܼܡܝܼܗ̇ ܠܚܵܘܒܿܬܼܵܐ
ܕܒܲܪܢܵܫܵܐ ܩܲܕܼܡܵܝܵܐ: ܘܢܸܬܸܠ ܠܹܗ ܠܲܟܼܝܵܢܵܐ ܨܲܠܡܵܐ ܗܵܘ̇ ܩܲܕܼܡܵܝܵܐ
ܕܐܵܘܒܿܕܹܗ ܗ̄ܘ̣ܵܐ ܡܸܛܠ ܚܵܘܒܿܬܹܗ. ܘܵܠܝܵܐܝܼܬܼ ܠܵܗ̇ ܠܗܵܝ̇ ܕܐܸܬܼܚܲܝܒܲܬ̤
ܘܐܸܬܼܠܲܒܼܟܲܬ̤ ܘܐܸܫܬܲܥܒܿܕܲܬ̤ ܒܥܲܒܼܕܘܼܬܼܵܐ: ܒܗܘܿܢ ܒܐܲܤܘܼܪܹ̈ܐ ܟܠܗܘܿܢ
ܢܲܤܒܵܗ̇ ܕܨܲܥܪܵܐ ܘܫܝܼܛܘܼܬܼܵܐ: ܟܲܕܼ ܡ̣ܢ ܦܲܪܨܘܿܦܵܐ ܕܝܼܠܹܗ ܡܸܕܼܡ
ܠܵܐ ܐܲܠܵܗܵܝܵܬܐ ܘܕܐܝܼܩܵܪܵܐ ܐܵܘ ܒܲܡܫܲܠܛܘܼܬܼܵܐ. ܐܲܟܼܙܢܵܐ ܕܲܒܼܪܵܐ: ܕܟܲܕܼ
ܥܕܲܟܹܝܠ ܛܠܸܐ: ܠܵܐ ܗ̄ܘ̣ܵܐ ܒܲܡܫܲܒܠܛܘܼܬܼܵܐ ܩܢܸܐ ܕܢܸܗܘܸܐ ܝܵܪܬܵܐ
ܐܵܘ ܡܵܪܵܐ ܕܟܼܠ: ܐܸܠܵܐ ܒܡܸܫܬܲܡܥܵܢܘܼܬܼܵܐ. ܗܵܟܲܢܵ ܐܵܦ ܕܡܘܼܬܼܵܐ
ܕܥܲܒܼܕܵܐ ܕܲܢܤܲܒܼ ܠܦܲܪܨܘܿܦܵܐ ܕܝܼܠܹܗ: ܐܲܝܟܼ ܕܡܘܼܬܼܵܐ ܕܥܲܒܼܕܵܐ
ܩܲܒܿܠܵܗ̇. ܠܵܘ ܠܲܡܫܲܠܛܘܼܬܼܵܐ: ܐܸܠܵܐ ܠܡܸܫܬܲܡܥܵܢܘܼܬܼܵܐ.
ܘܡܸܫܬܲܡܥܵܘܼܬܼܵܐ ܗܵܕܹܐ ܟ̱ܠܵܗ̇: ܐܲܝܕܵܐ ܕܡܸܢܵܗ̇ ܡܸܬܼܝܲܠܕܵܐ
ܡܸܫܬܲܡܥܵܢܘܼܬܼܵܐ ܚܲܬܿܝܼܬܼܵܐܝܼܬܼ ܕܲܕܼܠܵܐ ܚܛܗܹ̈ܐ: ܘܐܸܬܼܚܙܝܼ ܫܲܪܝܪܵܐܝܼܬܼ
pb. 92
ܕܠܵܐ ܚܛܵܗ̈ܝܼܢ. ܟܲܕܼ ܗܵܟܹܝܠ ܡ̣ܢ ܟܠܗܹܝܢ ܥܸܠ̈ܠܵܬܼܵܐ ܕܡܸܢܗܹܝܢ ܗܵܘ̇ܝܵܐ
ܠܵܐ ܡܸܫܬܲܡܥܵܢܘܼܬܼܵܐ ܢܸܫܬܵܘܙܲܒܼ ܐ̄ܢܵܫ: ܗܵܝܕܹܝܟܼ ܕܲܟܼܝܵܐܝܼܬܼ ܘܲܕܼܠܵܐ
ܦܘܼܠܵܓܼ ܡܸܬܼܚܙܸܐ ܕܐܝܼܬܼܵܘܗܝ ܕܠܵܐ ܚܛܵܗܹ̈ܐ. ܡܸܛܠ ܗܵܢܵܐ: ܐܵܦ
ܡܸܢܹܗ ܕܲܟܼܝܵܢܵܐ ܕܲܚܛ̣ܵܐ ܢܤܲܒܼ. ܕܠܵܐ ܟܲܕܼ ܢܸܤܲܒ̣ ܡ̣ܢ ܟܝܵܢܵܐ ܐܲܝܢܵܐ
ܕܠܵܐ ܐܝܼܬܼܵܘܗܝ ܡܩܲܒܿܠܵܢܵܐ ܕܲܚܛܵܗܹ̈ܐ: ܡܸܤܬܿܒܲܪ ܕܡ̣ܢ ܟܝܵܢܵܐ ܐܝܼܬܼ
ܠܹܗ ܗܵܝ̇ ܕܠܵܐ ܢܸܚܛܸܐ: ܘܠܵܐ ܗ̄ܘ̣ܵܐ ܡ̣ܢ ܡܸܫܬܲܡܥܵܢܘܼܬܹܗ. ܐܸܠܵܐ
ܟܲܕܼ ܐܝܼܬܲܝܗܹܝܢ ܟܠܗܹܝܢ ܗܵܠܹܝܢ ܕܐܝܼܬܼ ܠܹܗ ܠܲܟܼܝܵܢܲܢ: ܚܸܡܬܼܵܐ:
ܘܪܸܓܿܬܼܵܐ: ܘܚܘܼ̈ܫܒܹܐ: ܘܲܒܼܕܼܘܼܪܵܓܼܵܐ ܘܲܒܼܬܲܪܒܿܝܼܬܼܵܐ ܕܟܼܠ ܩܵܘܡܬܼܵܐ:
ܐܦ ܗܵܠܹܝܢ ܡܸܬܼܪܲܒܿܝܵܢ ܗ̣̄ܘܲܝ̈: ܐܸܫܬܲܪܲܪ ܒܚܘܼ̈ܫܵܒܹܐ ܕܡܸܫܬܲܡܥܵܢܘܼܬܼܵܐ:
ܤܛ. ܕܡܸܛܠ ܡܵܢܵܐ ܠܵܘ ܒܦܘܼܩܕܵܢܹ̈ܐ ܐ̄ܚܪܵܢܹܐ ܐܲܝܟܼ ܐܵܕܼܵܡ
ܩܲܒܿܠܵܗ̇ ܠܡܸܫܬܲܡܥܵܢܘܼܬܼܵܐ: ܐܸܠܵܐ ܠܟܼܠܗܘܿܢ ܦܘܼ̈ܩܕܵܢܹܐ ܩܒܸܿܠ̣
ܘܠܵܘ ܠܚܲܕܼܚܕܼܵܢܹ̈ܐ.
ܘܲܒܼܠܗܘܿܢ ܦܘܼ̈ܩܕܵܢܹܐ ܩܲܕܼܡܵܝܹ̈ܐ: ܦܘܼܢܵܝܹܗ ܠܡܸܫܬܲܡܥܵܢܘܼܬܼܵܐ:
ܘܠܵܘ ܒܲܐ̄ܚܪ̈ܵܢܹܐ: ܕܠܵܐ ܢܸܤܬܿܒܲܪ ܕܡܸܛܠ ܦܫܝܼܩܘܼܬܼܗܘܿܢ ܐܸܫܟܲܚ
ܕܢܸܙܟܸܿܐ. ܘܠܵܐ ܬܘܼܒܼ ܒܐܲܝܠܹܝܢ ܕܐܲܟܼܡܵܐ ܒܗܘܿܢ ܓܘܼܪܵܓܼܵܐ ܕܐܝܼܩܵܪܵܐ
ܘܲܕܼܚܲܠܵܐ ܘܲܕܿܬܸܫܒܿܘܿܚܬܼܵܐ ܐܸܬܼܚܲܫܲܚ ܗ̄ܘ̣ܵܐ ܒܡܸܫܬܲܡܥܵܢܘܼܬܼܵܐ: ܐܸܠܵܐ
ܒܐܲܝܠܹܝܢ ܕܲܒܼܡܸܤܟܹܿܢܘܼܬܼܵܐ ܘܒܲܨܪܝܼܟܼܘܼܬܼܵܐ ܘܲܒܼܫܝܼܛܘܼܬܼܵܐ
ܘܒܲܡܚܝܼܠܘܼܬܼܵܐ: ܡܸܫܟܿܚܝܼܢ ܗ̄ܘ̣ܵܘ ܕܢܲܗܪܘܼܢ ܠܚܘܼ̈ܫܵܒܹܐ
ܘܡܸܫܬܲܡܥܵܢܘܼܬܼܵܐ. ܗܵܠܹܝܢ ܕܐܵܦܠܵܐ ܚܲܕܼ ܓܘܼܪܵܓܼܵܐ ܐܝܼܬܼ ܒܗܹܝܢ
ܠܡܸܫܬܲܡܥܵܢܘܼܬܼܵܐ: ܐܸܠܵܐ ܠܪܲܦܝܘܼܬܼܵܐ ܝܲܬܿܝܼܪܵܐܝܼܬܼ ܘܲܠܡܲܗܡܝܵܢܘܼܬܼܵܐ:
pb. 93
ܘܲܒܼܡܸܕܸܡ ܠܵܐ ܡܸܬܼܥܲܕܲܪ ܗ̄ܘ̣ܵܐ. ܒܲܠܚܘܿܕܼ ܕܹܝܢ ܠܗܵܕܹܐ ܝܲܐܝܼܒܼ:
ܠܡܸܫܬܿܡܵܥܘܼ ܠܐܲܠܵܗܵܐ: ܘܡܲܚܸܒ̣ ܗܵܘ̇ ܡܵܐ ܕܐܲܠܵܗܵܐ ܨܵܒܹ̇ܐ.
ܥ. ܕܡܸܛܠ ܡܵܢܵܐ ܒܕܼܘܼܒܵܪܹ̈ܐ: ܕܠܵܐ ܝܲܨܝܼܦܘܼܬܼܵܐ ܐܝܼܬܼܵܘܗܝ
ܗ̄ܘ̣ܵܐ ܒܐ̄ܢܵܫܵܝ̈ܬܼܵܐ ܡ̣ܢ ܐܲܠܵܗܘܼܬܹܗ.
ܘܡܸܛܠ ܗܵܢܵܐ: ܟܲܕܸ ܒܟܼܠ ܨܪܝܼܟܼ ܗ̄ܘ̣ܵܐ: ܘܲܒܼܕܵܠܩܘܼ̈ܒܼܠܵܝܵܬܼܵܐ
ܩܛܝܼܪܵܐܝܼܬܼ ܡܸܬܼܢܲܬܲܦ ܗ̄ܘ̣ܵܐ: ܗ̤ܘ ܒܡܸܕܸܡ ܠܵܐ ܐܸܨܛܠܝܼ ܡ̣ܢ
ܪܸܥܝܵܢܵܐ ܕܐܲܠܵܗܵܐ: ܟܲܕܼ ܛܵܒܼ ܒܟܼܠܗܹܝܢ ܗܸܠܹܝܢ ܐܸܬܼܚܲܫܲܚ ܗ̄ܘ̣ܵܐ
ܤܵܛܵܢܵܐ ܠܡܲܪܚܵܩܘܼܬܹܗ ܡ̣ܢ ܪܸܥܝܵܢܵܐ ܕܐܲܠܵܗܵܐ. ܘܝܲܬܿܝܼܪܵܐܝܼܬܼ ܒܥ̣ܵܗ̇
ܗ̄ܘ̣ܵܐ ܤܵܛܵܢܵܐ ܠܗܵܕܹܐ: ܡܸܛܠ ܕܲܚ̣ܙܵܝܗܝ ܕܠܵܐ ܐܝܼܬܼ ܠܹܗ ܝܵܨ̇ܘܿܦܵܐ.
ܐܵܦܠܵܐ ܓܹܝܪ ܡܸܬܼܚܲܙܝܵܐ: ܕܡ̣ܢ ܫܘܼܪܵܝܵܐ ܥܒܲܕܼ ܐܵܬܼ̈ܘܵܬܼܵܐ. ܘܠܵܐ
ܬܘܼܒܼ ܕܫܘܼܛܵܢܵܐ ܐܝܼܬܼ ܗ̄ܘ̣ܵܐ ܠܹܗ ܠܡܲܠܵܦܘܼ: ܐܸܠܵܐ ܠܡܸܫܬܲܥܒܵܕܼܘܼ
ܒܲܠܚܘܿܕܼ: ܘܲܠܡܸܛܲܪ ܟܠܗܘܿܢ ܦܘܼܩ̈ܕܵܢܹܐ. ܟܲܕܼ ܥܲܡ ܟܠܢܵܫ
ܡܸܬܼܗܲܦܲܟܼ ܗ̄ܘ̣ܵܐ: ܘܐܲܝܟܵܐ ܕܟܼܠܗܘܿܢ ܦܘܼܩ̈ܕܵܢܹܐ ܡ̣ܢ ܟܠ ܓܲܒܿܝܼ̈ܢ
ܟܪܝܼܟܝܼܢ ܗ̄ܘ̣ܵܘ: ܘܲܡܚܵܘܹܝܢ ܗ̄ܘ̣ܵܘ ܠܒܼܝܼܒܼܘܼܬܹܗ ܕܠܵܐ ܡܸܫܬܲܡܥܵܢܘܼܬܼܵܐ:
ܒܡܸܨܥܲܬܼ ܟܠܗܘܿܢ ܐܸܬܿܕܲܒܲܪ ܚܲܝܠܬܼܵܢܵܠܐܝܼܬܼ: ܟܲܕܼ ܠܵܐ ܡܸܕܸܡ ܝܲܬܿܝܼܪ
ܐܵܘ ܡܫܲܚܠܦܵܐ ܐܝܼܬܼ ܗ̄ܘ̣ܵܐ ܒܲܚܫܲܚܬܼܵܐ ܕܤܲܝܒܵܪܬܹܗ: ܐܸܠܵܐ ܒܗܹܝܢ
ܒܗܵܠܹܝܢ ܕܓܼܵܘܵܐ ܡܸܬܼܚܲܫܲܚ ܗ̄ܘ̣ܵܐ ܐܲܝܟܼ ܟܠܢܵܫ. ܕܠܵܐ ܢܸܤܬܿܒܲܪ:
ܕܡܸܛܠ ܡܸܬܼܢܲܛܪܵܢܘܼܬܼܵܐ ܕܲܒܼܗܵܠܹܝܢ: ܡܸܬܼܠܒܸܟܼ ܡ̣ܢ ܚܛܝܼܬܼܵܐ.
ܘܒܸܠܥܵܕܼ ܡ̣ܢ ܗܵܠܹܝܢ: ܠܵܐ ܡܸܫܟܲܚ ܗ̄ܘ̣ܵܐ ܠܡܸܬܼܠܒܼܵܟܼܘܼ. ܡܸܛܠܗܵܢܵܐ:
ܟܲܕܼ ܠܵܥܹ̇ܣ ܗ̄ܘ̣ܵܐ ܘܫܵܬܹ̇̄ܐ ܗ̄ܘ̣ܵܐ: ܢܵܛܲܪ ܟܠܗܘܿܢ ܦܘܼܩ̈ܕܵܢܹܐ.
ܘܒܲܐܝܠܹܝܢ ܕܲܫܚܵܩܵܐ ܘܲܕܕܼܘܼܥܬܼܵܐ ܐܝܼܬܲܝܗܹܝܢ ܗ̣̄ܘܲܝ̈: ܡܫܲܪܲܪ ܗ̄ܘ̣ܵܐ
pb. 94
ܒܚܘܼܫܒܹܗ: ܟܲܕܼ ܩܒܼܝܼܥ ܗ̄ܘ̣ܵܐ ܨܒܼܝܵܢܹܗ ܒܨܒܼܝܵܢܵܐ ܕܠܵܗܵܐ: ܘܠܲܝܬܿ
ܗ̄ܘ̣ܵܐ ܡܸܕܸܡ ܕܢܵܬܹ̇ܦ ܗ̄ܘ̣ܵܐ ܘܦܵܪܹܫ ܠܹܗ ܡܸܢܹܗ. ܠܵܐ ܗ̄ܘ̣ܵܐ ܓܹܝܪ
ܠܢܲܦܫܹܗ ܚܲܝ ܗ̄ܘ̣ܵܐ: ܐܸܠܵܐ ܠܗܵܘ̇ ܕܕܼܝܼܠܹܗ ܗ̄ܘ̣ܵܐ ܦܲܪܨܘܿܦܵܐ. ܘܢܲܛܪܹܗ
ܠܦܲܪܨܘܿܦܵܐ ܕܠܵܐ ܟܘܼ̈ܬܼܡܵܬܼܵܐ: ܘܲܕܼܠܵܐ ܫܘܼ̈ܡܵܬܼܵܐ: ܘܒܼܐܝܼܕܹܗ ܝܲܗ̣̄ܒܼܠܹܗ
ܠܲܟܼܝܵܢܹܗ ܙܵܟܼܘܼܬܼܵܐ.
ܥܐ. ܡܸܛܠ ܡܵܢܵܐ ܡܩܲܒܸܠ ܗ̄ܘ̣ܵܐ ܡܲܥܡܘܿܕܼܝܼܬܹܗ ܕܝܘܿܚܲܢܵܢ:
ܡ̣ܢ ܒܵܬܲܪ ܕܠܵܐ ܚܛܵܗܹ̈ܐ ܐܸܬܼܚܙܝܼ.
ܘܡܸܛܠ ܕܲܒܼܟܼܠܗܹܝܢ ܡܠܸܐ ܗ̄ܘ̣ܵܐ ܡܸܫܬܲܡܥܵܢܘܼܬܼܵܐ: ܐܲܝܟܼ
ܪܹܫܵܝܵܬܼܵܐ ܩܲܒܿܠܵܗ̇ ܗ̄ܘ̣ܵܐ ܠܡܲܥܡܘܿܕܼܝܼܬܹܗ ܕܝܘܼܚܲܢܵܢ ܒܲܕܸܡܘܼܬܼܵܐ
ܕܟܼܠܢܵܫ. ܘܟܲܕܸ ܛܵܒܼ ܠܵܐ ܤܢܝܼܩ ܗ̄ܘ̣ܵܐ: ܐܲܝܟܼ ܡܲܢ ܕܲܕܼܠܵܐ
ܚܛܗܹ̈ܐ ܐܝܼܬܼܵܘܗܝ ܗ̄ܘ̣ܵܐ: ܡܸܛܠ ܤܘܿܓܼܵܐܐ ܕܡܸܫܬܲܡܥܵܢܘܼܬܹܗ
ܐܲܝܟܼ ܤܢܝܼܩܵܐ ܩܲܒܿܠܵܗ̇: ܕܡܸܫܬܲܡܥܵܢܘܼܬܼܵܐ ܓܹܝܪ ܪܹܫܵܝܬܼܵܐ ܐܝܼܬܹܝܗ̇:
ܕܠܵܐ ܗ̄ܘ̣ܵܐ ܐܲܝܟܼ ܕܲܦܐܸܐ ܠܐܝܼܩܵܪܹܗ ܘܲܠܫܘܼܒܼܚܹܗ ܢܸܗܘܸܐ: ܐܸܠܵܐ ܬܚܹܝܬܼ
ܡܸܫܬܲܡܥܵܢܘܼܬܼܵܐ ܕܦܵܩܘܿܕܼܵܐ. ܘܲܕܼܝܲܬܿܝܼܪܵܐ ܡ̣ܢ ܗܵܕܹܐ: ܕܠܵܘ ܒܲܠܚܘܿܕܼ
ܕܠܹܗ ܢܲܪܦܸܐ ܠܡܲܥܡܵܕܼܘܼ: ܐܸܠܵܐ ܕܐܵܦ ܡܸܢܹܗ ܢܸܬܼܥ̱ܡܸܕܼ ܐܲܝܟܼ
ܚܲܝܵܒܼܵܐ ܘܡܸܙܕܲܟܼܝܵܢܵܐ ܘܲܤܢܝܝܼܩ ܥܲܠ ܫܪܵܝܵܐ. ܕܐܲܝܟܼ ܗܵܕܹܐ ܓܹܝܪ
ܐܝܼܬܹܝܗ̇ ܡܸܫܬܲܡܥܵܢܘܼܬܼܵܐ ܕܲܒܼܟܼܠ ܡܸܕܸܡ: ܕܡܸܕܸܡ ܒܦܲܪܨܘܿܦܵܐ
ܕܝܼܠܹܗ ܠܵܐ ܢܸܒܼܥܸܐ ܘܢܸܬܼܒܲܥ: ܐܸܠܵܐ ܕܗܵܘ̇ ܕܕܼܝܼܠܹܗ ܗ̄ܘ̣ ܦܲܪܨܘܿܦܵܐ:
ܘܨܒܼܝܵܢܵܐ ܕܝܼܠܹܗ ܢܸܩܢܸܐ. ܒܗܵܝ̇ ܕܕܼܝܼܠܹܗ ܗ̄ܘ̣ ܦܪܨܘܿܦܵܐ ܡܵܪܵܢܵܐܝܼܬܼ:
ܘܲܠܦܲܪܨܘܿܦܹܗ ܦܲܪܨܘܿܦܵܐ ܕܝܼܠܹܗ ܢܸܚܫܒܼܝܼܘܗܝ: ܘܚܲܕܼ ܐܝܼܬܼܵܘܗܝ
ܦܲܪܨܘܿܦܵܐ. ܡܸܛܠ ܗܵܢܵܐ: ܡ̣ܢ ܠܥܸܠ ܚܵܘܝܼܗ ܐܲܒܼܵܐ ܟܲܕܼ ܐܵܡܲ݁ܪ:
pb. 95
ܐܲܢ̄ܬܿܘܼ ܒܹܪܝ ܚܲܒܿܝܼܒܼܵܐ: ܒܵܟܼ ܐܸܨܛ̇ܒܼܝܼܬܼ. ܘܪܘܼܚܵܐ ܕܩܘܼܕܫܵܐ ܕܢܸܚܬܲܬ̤
ܒܲܕܡܘܼܬܼ ܝܵܘܢܵܐ ܘܩܵܘܝܲܬ̤ ܥܠܵܘܗܝ: ܘܠܵܘ ܒܪܵܐ ܐܵܡܲ݁ܪ ܕܲܢܚܸܬܼ.
ܡܸܛܠ ܕܗ̤ܘ ܐܝܼܬܼܵܘܗܝ ܒܪܵܐ ܗܵܘ̇ ܕܩܢ̣ܵܐ ܦܲܪܨܘܿܦܹܗ: ܘܠܲܐܝܠܹܝܢ
ܕܲܕܼܗܵܢܵܐ ܐܸܢܹܝܢ ܥ̣ܒܲܕܼ ܐܸܢܹܝܢ ܦܲܪܨܘܿܦܵܐ ܕܝܼܠܹܗ: ܠܵܘ ܟܲܕܼ ܦܪܲܫ̣
ܡܸܢܹܗ. ܡܸܛܠ ܗܵܢܵܐ ܚܲܕܼܘܼ ܐܵܦ ܒܝܼܠܝܼܕܼܘܼܬܼܵܐ ܕܒܸܤܪܵܐ. ܪܘܼܚܵܐ
ܠܲܡ ܕܩܘܼܕܼܫܵܐ ܬܹܐܬܸܐ: ܘܚܲܝܠܹܗ ܕܥܸܠܵܝܵܐ ܢܲܓܸܢ ܥܠܲܝܟܿܝ. ܡܸܛܠ
ܗܵܢܵܐ ܐܵܦ ܗܵܘ̇ ܕܡܸܬܼܝܼܠܸܕܼ ܡܸܢܹܟܼܝ ܩܲܕܝܼܫܵܐ: ܢܸܬܼܩܪܸܐ ܒܪܵܐ ܕܐܲܠܵܗܵܐ.
ܘܠܵܐ ܐܸܡ݂ܲܪ ܟܠ ܟ̱ܠܹܗ ܕܲܒܼܪܵܐ ܢܹܐܬܸܐ. ܡܸܛܠ ܕܗܵܘ̇ ܕܢܲܤܒܹܗ
ܠܦܲܪܨܘܿܦܹܗ: ܠܵܘ ܐ̄ܚܪܹܢܵܐ ܗ̄ܘ̣. ܐܸܠܵܐ ܗ̤ܘ ܟܲܕܼ ܗ̤ܘ ܗܵܘ̇
ܕܠܡܦܲܪܢܤܵܢܘܼܬܼܵܐ ܕܥܲܠ ܐܲܦܲܝ̈ܢ ܕܝܼܠܲܢ ܝܲܗ̣̄ܒܼ ܠܹܗ: ܡܸܛܠ ܥܸܠ̈ܠܵܬܐ
ܗܵܢܹܝܢ ܕܩܲܕܼܡܸܢ ܐܸܡܲܪܢ.
ܥܒ. ܕܡܸܛܠ ܡܵܢܵܐ ܗܘܼܦܵܟܼܵܘ̈ܗܝ ܥܲܡ ܟܠܢܵܫ ܥ̣ܒܲܕܼ
ܗ̄ܘ̣ܵܐ: ܘܡ̣ܢ ܒܵܬܲܪ ܗܵܠܹܝܢ ܐܸܬܿܕܒܲܪ ܠܡܲܕܼܒܿܪܵܐ.
ܘܡܸܛܠ ܕܡܸܤܬܲܒܲܪ ܗ̄ܘ̣ܵܐ ܕܝܲܬܿܝܼܪ ܡ̣ܢ ܟܠ ܐܝܼܬܼܿܘܗܝ ܢܵܛܘܿܪܵܐ
ܕܦܘܼܩ̈ܕܵܢܹܐ: ܡܸܛܠ ܗܘܼܦܵܟܲܘ̈ܗܝ ܕܲܠܘܵܬܼ ܟܠ ܐ̄ܢܵܫ: ܟܲܕܼ ܕܹܝܢ
ܒܤܲܓܝܼ̈ܐܬܼܵܐ ܢܸܫܬܵܘܚܲܪ ܗ̄ܘ̣ܵܐ: ܦܫܝܼܩ ܠܩܘܼܒܼܠܗ ܐܲܝܟܵܐ ܕܠܲܝܬܿ
ܡܸܕܸܡ ܕܡܸܢܹܗ ܢܸܬܼܥܲܕܲܪ: ܢܦܲܩ̣ ܠܹܗ ܠܡܕܼܒܿܪܵܐ ܒܲܠܚܘܿܕܼܵܘܗܝ
ܠܡܸܬܼܢܲܤܵܝܘܼ ܡ̣ܢ ܐܵܟܹ̇ܠܩܲܪܨܵܐ. ܟܲܕܸ ܨܪܝܼܟܼ ܗ̄ܘ̣ܵܐ ܡ̣ܢ ܟܠܗܹܝܢ
ܐܲܝܠܹܝܢ ܕܲܒܼܥܵܠܡܵܐ ܘܡ̣ܢ ܗܵܝ̇ ܕܡܸܤܬܲܒܼܪܵܐ ܗ̄ܘ̣ܵܬܼ ܬܥܝܼܫܘܼܬܼܵܐ
ܘܐܲܝܼܨܘܼܬܼܵܐ: ܡܸܛܠ ܡܸܬܼܪܲܚܩܵܢܘܼܬܼܵܐ ܕܡ̣ܢ ܟܠ ܡܸܕܸܡ: ܠܗܵܕܹܐ
pb. 96
ܟ̱ܠܵܗ̇ ܪܹܫܵܝܘܼܬܼܵܐ ܤܠܸܩ̣: ܐܲܝܟܼ ܟܡܵܐ ܕܡܸܫܟܲܚ ܡܸܬܼܥܲܠܸܐ ܚܲܝܠܵܐ
ܦܲܓܼܪܵܢܵܐ. ܘܲܚܠܵܦ ܚܹܐܦܹ̈ܐ ܕܲܪ̈ܓܼܝܼܓܼܵܬܼܵܐ ܕܢܲܦܫܵܐ: ܗܵܝ̇ ܕܐܲܠܵܗܵܐ ܐܲܚܝܼܕܼ
ܗ̄ܘ̣ܵܐ ܐܲܝܟܼ ܠܵܐ ܓܘܼܫܡܑܵܐ: ܟܲܕܼ ܠܵܐ ܡܸܬܼܦܢܸܐ ܗ̄ܘ̣ܵܐ ܥܲܠ ܦܲܓܼܪܹܗ:
ܐܲܝܟܼ ܡ̇ܢ ܕܕܼܝܼܠܹܗ ܐܝܼܬܼܵܘܗܝ: ܐܸܠܵܐ ܕܲܠܒܲܪ ܡܸܢܹܗ. ܗܵܕܹܐ ܓܹܝܪ
ܐܝܼܬܹܝܗ̇ ܒܲܠܚܘܿܕܼ ܕܨܲܠܡܵܐ ܕܐܲܠܵܗܵܐ: ܘܕܲܐܝܢܵܐ ܕܢܵܛܲ݁ܪ ܨܲܠܡܵܐ
ܕܐܲܠܵܗܵܐ: ܕܢܸܨܒܸܿܐ ܗܵܘ̇ ܡܵܐ ܕܐܲܠܵܗܵܐ ܐܲܒܼܵܐ. ܘܡܸܛܠ ܕܡܸܕܸܡ
ܐ̄ܚܪܹܝܢ ܠܲܝܬܿ ܗ̄ܘ̣ܵܐ: ܕܲܒܼܟܼܠ ܡܵܐ ܕܐܵܡܲ݁ܪ ܗ̄ܘ̣ܵܐ ܐܸܵܟܹ̇ܠܩܲܪܨܵܐ: ܐܲܝܟܼ
ܐܲܝܢܵܐ ܕܠܲܒܲܪ ܗ̄ܘ̣ܵܐ ܡ̣ܢ ܨܒܼܝܵܢܵܐ ܕܐܲܠܵܗܵܐ: ܐܲܒܼܗܬܹܗ. ܡܲܤܸܩ
ܠܵܗ̇ ܠܢܲܦܫܹܗ ܠܘܵܬܼ ܐܲܠܵܗܵܐ: ܟܲܕܼ ܡܠܲܚܸܡ ܠܗܹܝܢ ܕܨܒܼܝܵܢܹܗ
ܠܨܒܼܝܵܢܵܐ ܕܐܲܠܵܗܵܐ. ܐܲܝܟܼ ܕܒܲܠܚܘܿܕܼ ܨܲܠܡܵܐ ܕܪܹܫ ܛܘܼܦܤܵܐ ܢܸܗܘܸܐ:
ܘܠܵܘ ܕܝܵܬܹܗ. ܨܲܠܡܵܐ ܓܹܝܪ ܠܝܵܬܹܗ ܕܠܵܐ ܕܡܘܼܬܼܵܐ ܐܝܼܬܼܵܘܗܝ:
ܕܡܘܼܬܼܵܐ ܓܹܝܪ ܕܝܼܠܵܝܬܼܵܐ ܐܝܼܬܼ ܠܹܗ ܗܵܝ̇ ܕܪܹܫ ܛܘܼܦܤܵܐ. ܘܐܝܼܬܲܝܗܘܿܢ
ܡ̇ܢ ܬܲܪ̈ܲܝܗܘܿܢ: ܗ̤ܘ ܟܲܕܼ ܗ̤ܘ ܘܲܚܕܼܵܐ ܚܙܵܬܼܵܐ. ܡܸܛܠ ܕܒܲܥ̇ܒܼܵܕܹ̈ܐ
ܢܲܛܪܵܗ̇ ܠܲܕܼܡܘܼܬܼܵܐ ܕܐܲܠܵܗܵܐ: ܒܦܲܓܼܪ̈ܵܢܵܝܵܬܼܵܐ ܡ̣ܢ ܟܠܗܘܿܢ ܚܲܫܹ̈ܐ
ܕܦܲܓܼܪܵܐ. ܘܓܲܒܼܝܵܐ ܗ̄ܘ̣ܵܬܼ ܠܹܗ: ܕܨܒܼܝܵܢܵܐ ܕܐܲܠܵܗܵܐ ܢܸܗܘܸܐ: ܘܠܵܐ
ܕܒܸܤܪܵܐ. ܘܥܲܒܼܕܵܗ̇ ܠܹܗ ܕܡܘܼܬܼܵܐ ܒܲܥ̇ܒܼܵܪܹ̈ܐ: ܕܢܸܨܒܸܿܐ ܗܵܘ̇ ܡܵܐ
ܕܗ̤ܘ ܨܵܒܹ̇ܐ ܒܹܗ: ܕܢܸܗܘܸܐ ܚܲܕܼ: ܘܗ̤ܘ ܟܲܕܼ ܗ̤ܘ ܨܒܼܝܵܢܵܐ
ܒܲܬܼܪ̈ܲܝܗܘܿܢ: ܘܚܲܕܼ ܦܲܪܨܘܿܦܵܐ ܕܠܵܐ ܦܘܼܠܵܓܼ. ܗܵܢܵܐ ܗܵܘ̇: ܘܗܵܘ̇
ܗܵܢܵܐ. ܟܲܕܼ ܡܩܵܘܸܐ ܗܵܢܵܐ ܘܗܵܘ̇: ܟܲܕܼ ܡܫܲܪܲܪ ܗ̄ܘ̣ܵܐ ܒܟܼܠܗܹܝܢ:
pb. 97
ܒܢܸܤܝ̈ܘܿܢܹܐ ܦܲܓܼܪ̈ܵܢܹܐ ܘܢܲܦܫܵܢܹ̈ܐ: ܒܲܡܕܼܝ̈ܢܵܬܼܵܐ ܘܲܒܼܕܼܒܿܪܵܐ: ܟܲܕܼ
ܦܘܼܪܫܵܢܵܐ ܡܸܕܸܡ ܠܲܝܬܿ ܗ̄ܘ̣ܵܐ ܒܲܢܛܘܼܪܬܹܐ ܘܲܒܼܡܸܫܬܲܥܒܿܕܼܵܢܘܼܬܹܗ.
ܥܓ. ܥܲܠ ܗܵܝ̇: ܕܟܲܕܼ ܡܲܠܟܿܘܼܬܼܵܐ ܕܲܫܡܲܝܵܐ ܡܲܟܼܪܸܙ ܗ̄ܘ̣ܵܐ ܠܲܢ:
ܐܝܼܩܵܪܵܐ ܢܤܲܒܼ ܙܵܟܼܘܼܬܼܵܐ ܕܠܵܐ ܚܛܵܗ̈ܝܼܢ.
ܡܸܟܹܝܠ ܐܲܝܟܼ ܡ̇ܢ ܕܲܙܟܼܵܐ ܗ̄ܘ̣ܵܐ ܘܐܸܬܼܢܲܨܲܚ ܒܟܼܠܗܹܝܢ:
ܐܸܬܼܝܼܗܸܒܼ ܠܹܗ ܫܘܼܠܛܵܢܵܐ ܚܠܵܦ ܐܝܼܩܵܪܵܐ ܕܙܵܟܼܘܼܬܹܗ: ܠܡܲܟܼܪܵܙܘܼ
ܘܠܲܡܤܲܒܵܪܘܼ ܤܒܲܪܬܼܵܐ ܕܡܲܠܟܿܘܼܬܼܵܐ ܕܲܫܡܲܝܵܐ: ܟܲܕܼ ܐܵܡܲ݁ܪ:
ܐܸܬܼܠܲܒܲܒܼܘ: ܐܸܢܵܐ ܙܟܹܝ̇ܬܹܗ ܠܥܵܠܡܵܐ. ܗܵܫܵܐ ܕܝܼܢܹܗ ܗ̄ܘ̣ ܕܥܠܡܵܐ
ܗܵܢܵܐ: ܗܵܫܵܐ ܐܲܪܟܿܘܿܢܹܗ ܕܥܵܠܵܡܵܐ ܗܵܢܵܐ ܐܸܬܼܚܲܝܲܒܼ. ܘܐܸܢܵܐ ܡܵܐ
ܕܐܸܬܿܬܿܪܝܼܡܹ̇ܬܼ ܡ̣ܢ ܐܲܪܥܵܐ: ܐܸܓܸܕܼ ܠܟܼܠܢܵܫ ܠܘܵܬܼܝ. ܘܟܲܕܼ ܛܵܒܼ
ܒܪܵܐ ܐܝܼܬܼܵܘܗܝ: ܡ̣ܢ ܕܚܸܠ̱ܬܼܵܐ ܘܚܲܫܹ̈ܐ ܕܲܤܒܲܠ̣ ܝܲܠܦܵܗ̇
ܠܡܸܫܬܲܡܥܵܢܘܼܬܼܵܐ: ܘܐܸܬܼܓܿܡܲܪ ܘܲܗܘ̤ܵܐ ܠܟܼܠܗܘܿܢ ܐܲܝܠܹܝܢ
ܕܡܸܫܬܲܡܥܝܼܢ ܠܹܗ ܥܸܠܬܼܵܐ ܕܚܲܝܹ̈ܐ ܕܲܠܥܵܠܲܡ. ܘܐܸܫܬܲܕܲܪ ܠܡܲܠܵܦܘܼ
ܠܟܼܠܢܵܫ: ܘܲܠܡܸܥܒܲܕܼ ܐܵܬܼ̈ܘܵܬܼܵܐ ܘܬܸܕܡܪ̈ܵܬܼܵܐ ܘܐܵܤ̈ܘܵܬܼܵܐ ܥܲܡ
ܐ̄ܚܪܵܢܝܵܬܼܵܐ ܟܠܗܹܝܢ. ܠܵܘ ܡܸܛܠ ܕܢܸܬܼܪܲܓܼܪܲܓܼ ܘܢܸܬܼܚܲܦܲܛ
ܠܡܸܫܬܲܡܥܵܢܘܼܬܼܵܐ: ܐܸܠܵܐ ܠܗܲܝܡܵܢܘܼܬܼܵܐ ܕܐܲܝܠܹܝܢ ܕܝܵܠܦ̇ܝܼܢ ܗ̄ܘ̣ܵܘ:
ܐܸܬܼܚܲܫܲܚ ܗ̄ܘ̣ܵܐ ܒܗܵܠܹܝܢ ܟܠܗܹܝܢ ܠܡܸܫܬܲܡܥܵܢܘܼܬܼܵܐ ܕܝܼܠܗܘܿܢ
ܕܝܵܠܘܿܦܹ̈ܐ ܥܕܲܡܵܐ ܓܹܝܪ ܠܙܲܒܼܢܵܐ ܕܙܵܟܼܘܼܬܹܗ ܡܸܬܼܟܲܬܲܫ ܗ̄ܘ̣ܵܐ:
ܕܲܢܫܲܪܲܪ ܒܐܲܠܵܗܵܐ ܠܨܲܠܡܵܐ ܕܐܸܬܼܝܼܗܸܒܼ ܠܹܗ. ܡܸܛܠ ܕܹܝܢ ܕܩܲܝܡܹܗ
ܠܨܲܠܡܵܐ ܕܝܼܠܹܗ ܒܟܼܠ ܢܸܤܝܘܿܢܝܼ̈ܢ ܡܫܲܡܠܝܵܐܝܼܬܼ ܘܲܕܼܠܵܐ ܒܘܼܨܵܪ:
pb. 98
ܘܲܕܼܠܵܐ ܚܲܤܝܼܪ ܗ̄ܘ̣ܵܐ ܡܸܕܸܡ: ܥܲܠ ܐܲܦܲܝ̈ܢ ܡܸܟܹܿܝܠ ܡܸܬܿܕܲܒܲܪ ܗ̄ܘ̣ܵܐ:
ܟܲܕܼ ܡܸܬܼܚܲܦܲܛ ܕܠܲܢ ܫܒܲܝ̈ܐ ܢܫܵܙܸܒܼ ܡ̣ܢ ܩܛܝܼܪܹܗ ܕܲܛܪܘܼܢܵܐ:
ܘܢܸܓܿܕܲܢ ܠܘܵܬܹܗ: ܘܢܸܥܒܿܕܲܢ ܠܟܼܠܲܢ ܒܢܲܝ̈ ܡܲܠܟܿܘܼܬܼܵܐ ܕܝܼܠܹܗ:
ܫܵܘ̈ܬܵܦܹܐ ܘܝܵܪ̈ܘܿܬܹܐ ܘܲܒܼܢܲܝ̈ܐ ܕܐܲܠܵܗܵܐ. ܕܠܵܐ ܒܘܼܝܵܐܐ ܓܹܝܪ ܗܵܘ̇ܝܵܐ
ܗ̄ܘ̣ܵܬܼ ܚܵܘܒܹܿܗ ܕܲܛܪܘܼܢܵܐ: ܐܸܡܲܬܼܝ ܕܡ̣ܢ ܪܹܫܵܢܘܼܬܹܗ ܓܲܠܝܵܐܝܼܬܼ
ܢܲܪܡܹܝܘܗܝ. ܘܡ̣ܢ ܕܐܲܪܡܹܝܗ: ܐܵܦ ܥܘܼܫܢܹܗ ܢܸܠܒܿܘܿܟܼ. ܘܡܵܐ
ܕܠܲܒܼܟܹܗ: ܠܵܐ ܬܸܤܦܲܩ ܠܹܗ ܙܵܟܼܘܼܬܼܵܐ ܕܝܼܠܹܗ: ܐܸܠܵܐ ܡ̣ܢ ܟܲܕܼܘܼ
ܐܵܦ ܕܝܼܠܲܢ: ܕܥܲܠ ܐܲܦܹܝ̈ܗ̇ ܐܸܬܼܟܲܬܲܫ. ܘܠܲܐܝܠܹܝܢ ܕܡܸܫܬܲܡܥܵܢܵܘ̈ܗܝ
ܗܘ̤ܵܘ: ܒܨܒܼܝܵܢܵܐ ܘܠܵܘ ܒܲܩܛܝܼܪܵܐ: ܡܲܝܬܸܐ ܠܗܘܿܢ ܡܸܟܹܝܠ
ܠܘܵܬܹܗ. ܘܠܲܐܝܠܹܝܢ ܕܐܵܬܹ̇ܝܢ: ܡܦܝܼܣ ܠܗܘܿܢ: ܕܒܲܨܒܼܝܵܢܗܘܿܢ
ܢܸܦܪܩܘܼܢ ܡܸܢܹܗ: ܘܠܵܘ ܕܠܵܐ ܒܨܒܼܝܵܢܗܘܿܢ ܢܸܗܘܘܿܢ ܠܹܗ . . .
ܬܲܠܡܝܼ̈ܕܹܐ. ܘܡܵܢܵܐ ܐܲܡܲ݁ܪ ܐ̄ܢܵܐ ܒܠܸܠܕܒܼܵܒܼܵܐ: ܐܸܠܵܐ ܡܵܕܹܝܢ
ܕܲܒܼܥܸܠܕܒܼܵܒܼܵܐ.
ܥܕ. ܥܲܠ ܗܵܝ̇: ܕܡ̣ܢ ܒܵܬܲܪ ܙܵܟܼܘܼܬܼܵܐ: ܘܡ̣ܢ ܒܵܬܲܪ
ܕܐܸܬܲܡܪܲܬ̤ ܥܠܵܘܗܝ ܗܵܝ̇ ܕܗܵܢܵܐ ܒܹܪܝ: ܒܲܩܪܵܒܹܐ ܐ̄ܚܪ̈ܵܢܹܐ
ܩܫܲܝ̈ܐ ܕܲܚܠܵܦܲܢ ܡܫܲܪܸܐ.
ܡܸܛܠ ܗܵܢܵܐ: ܡ̣ܢ ܒܵܬܲܪ ܙܵܟܼܘܼܬܹܗ ܕܲܒܼܟܼܠܡܸܕܸܡ: ܘܡ̣ܢ ܫܡܲܝܵܐ
ܐܸܬܼܐ̱ܡܲܪ ܕܗܵܢܵܘ ܒܹܪܝ ܚܲܒܿܝܼܒܼܵܐ: ܫܲܪܝܼ ܬܘܼܒܼ ܒܲܩܪ̈ܒܹܐ ܐ̄ܚܪ̈ܵܢܹܐ . . .
ܪܹܫܢܘܼܬܼܵܐ: ܘܡܲܠܦܵܢܘܼܬܼܵܐ: ܘܤܵܥܘܿܪܘܼܬܼܵܐ ܕܬܸܕܡܪ̈ܵܬܼܵܐ ܒܫܘܼܠܛܵܢܵܐ.
ܬܘܼܒܼ ܒܡܸܫܬܿܡܲܥܵܢܘܼܬܼܵܐ ܡܥܲܠܲܝܬܼܵܐ ܐܸܬܿܕܲܒܲܪ ܒܗܵܠܹܝܢ ܕܝܼܠܲܢ:
pb. 99
ܗܵܢܵܐ ܕܹܝܢ ܒܐ̄ܢܵܫܵܝ̈ܬܼܵܐ ܘܒܲܡܚܝܼ̈ܠܼܵܐ: ܕܐܵܦܠܵܐ ܚܲܕܼ ܫܘܼܠܛܵܢܵܐ ܐܵܘ
ܝܲܬܿܝܼܪܘܼܬܼܵܐ ܩܢܸܐ ܗ̄ܘ̣ܵܐ. ܟܲܕܼ ܡܸܬܼܪ̱ܕܸܦ ܗ̄ܘ̣ܵܐ ܘܡܸܬܼܡܚܸܐ ܗ̄ܘ̣ܵܐ:
ܘܕܼܵܚܹ̇ܠ ܗ̄ܘ̣ܵܐ ܕܸܚܠܬܼܵܐ ܕܲܠܟܼܠ ܡܤܲܪܕܼܵܐ: ܗܵܘ̇ ܕܐܵܦܠܵܐ ܐܲܝܟܼ
ܦܵܪܲܚܬܼܵܐ ܘܐܵܦܠܵܐ ܐܲܝܟܼ ܚܲܝ̈ܘܵܬܼܵܐ ܐܝܼܬܼ ܗ̄ܘ̣ܵܐ ܠܹܗ ܒܹܝܬܼ ܡܲܤܡܲܟܼ
ܪܹܫܵܐ: ܟܲܕܼ ܡ̣ܢ ܕܘܼܟܵܐ ܠܕܼܘܼܟܵܐ ܡܫܲܢܸܐ ܗ̄ܘ̣ܵܐ. ܘܡ̣ܢ ܟܠܗܹܝܢ
ܡܸܫܬܩܸܦ ܗ̄ܘ̣ܵܐ ܘܡܸܬܼܐܠܸܨ: ܥܲܠ ܐܲܦܲܝ̈ ܡܸܫܬܲܡܥܵܢܘܼܬܼܵܐ ܕܝܼܠܲܢ.
ܟܲܕܼ ܡ̣ܢ ܐ̄ܢܵܫ ܠܵܐ ܡܸܬܼܐ̱ܠܸܨ ܗ̄ܘ̣ܵܐ: ܐܸܠܵܐ ܡܫܲܡܠܸܐ ܗ̄ܘ̣ܵܐ ܘܡܲܠܸܦ
ܒܟܼܠܵܗ̇ ܚܦܝܼܛܘܼܬܼܵܐ: ܘܲܠܟܼܠ ܢܸܤܝ̈ܘܿܢܝܼܢ ܡܸܛܠ ܥܸܠܬܼܵܐ
ܕܡܲܠܦܵܘܼܬܼܵܐ ܡܤܲܝܒܲܪ ܗ̄ܘ̣ܵܐ. ܘܡ̣ܢ ܟܠ ܐܲܝܟܵܐ ܕܡܸܬܼܪ̱ܕܹܦ ܗ̄ܘ̣ܵܐ:
ܠܘܵܬܼ ܐܲܝܠܹܝܢ ܕܲܥܕܲܟܹܝܠ ܠܵܐ ܐܸܤܬܲܒܲܪ ܡܸܬܼܪ̱ܕܸܦ ܗ̄ܘ̣ܵܐ. ܟܲܕܼ ܗܵܘ̇
ܡܵܐ ܕܐܵܦ ܗ̤ܘ ܥܠܵܘܗܝ ܚܦܝܼܛ ܗ̄ܘ̣ܵܐ: ܡܸܫܬܲܡܠܸܐ ܗ̄ܘ̣ܵܐ
ܡ̣ܢ ܚܦܝܼܛܘܼܬܼܗܘܿܢ ܕܲܒܼܥܸܠܕܒܼܵܒܹ̈ܐ. ܗܵܢ̇ܘܿܢ ܕܠܵܐ ܩܲܕܸܡ̣ܘ ܗ̄ܘ̣ܵܘ
ܘܚ̣ܵܪܘ ܒܡܲܦܩܵܢܹܗ ܕܤܘܼܥܪܵܢܵܐ: ܐܸܠܵܐ ܤܵܒܼ̇ܪܝܼܢ ܗ̄ܘ̣ܵܘ ܕܲܡܥܵܘܟܼܝܼܢ
ܠܹܗ ܒܕܲܠܩܘܼ̈ܒܼܠܵܝܵܬܼܵܐ: ܘܤܘܼܥܪܵܢܹܐ ܕܲܡܠܹܝܢ ܫܝܼܛܘܼܬܼܵܐ ܘܨܲܥܪܵܐ:
ܘܕܼܚ̱ܠܬܼܵܐ ܥܕܲܡܵܐ ܠܡܵܘܬܵܐ. ܘܒܼܵܬܲܪ ܙܵܟܼܘܼܬܹܗ: ܘܒܼܵܬܲܪ ܓܒܼܝܼܬܼܵܐ
ܕܡ̣ܢ ܐܲܠܵܗܵܐ ܕܗܵܢܵܘ ܒܹܪܝ ܚܲܒܿܝܼܒܼܵܐ ܕܒܹܗ ܐܸܨܛ̇ܒܼܝܼܬܼ: ܒܵܬܲܪ
ܕܩܲܒܸܠ̣ ܫܘܼܠܛܵܢܵܐ ܕܐܹܘܲܢܓܲܠܝܼܘܿܢ: ܒܵܬܲܪ ܕܐܸܬܼܓܠܝܼ ܕܲܒܼܫܘܼܠܛܵܢܹܗ
ܥܵܒܹ̇ܕܼ ܗ̄ܘ̣ܵܐ ܥ̇ܒܼܵܕܹ̈ܐ ܐܲܠܵܗܵܝܹ̈ܐ: ܒܵܬܲܪ ܕܐܸܡ݂ܲܪ ܕܐܸܢܵܐ ܘܐܵܒܼܝ ܚܲܕܼ ܚܢܲܢ:
ܒܗܵܕܹܐ ܟ̱ܠܵܗ̇ ܡܚܝܼܠܘܼܬܼܵܐ ܘܫܝܼܛܘܼܬܼܵܐ ܗܘ̤ܵܐ ܒܗܵܠܹܝܢ ܐ̄ܢܵܫ̈ܬܼܵܐ:
ܒܐܲܝܠܹܝܢ ܕܡܸܤܬܲܒܼܪܵܢ ܗ̣̄ܘܲܝ̈ ܕܠܵܐ ܡܸܫܟܲܚ ܗ̄ܘ̣ܵܐ ܕܢܲܤܝܒܲܪ
pb. 100
ܒܲܛܥܘܼܢܬܗܹܝܢ. ܐܸܠܵܐ ܕܵܠܩܘܼܒܼܠܵܐ: ܕܥܵܩܬܐܼܵ ܗܵܘ̈ܝܵܢ ܠܹܗ
ܘܕܲܟܼܦܘܼܪܝܵܐ ܕܲܒܼܛܲܝܒܿܘܼܬܼܵܐ: ܒܲܕܼܓܼܘܿܢ ܐܵܦ ܤܲܓܼܝ̈ܐܵܢ ܗ̣̄ܘܲܝ̈ ܗܵܠܹܝܢ
ܐܲܝܠܹܝܢ ܕܲܡܥܵܘܟܼܵܢ ܗ̣̄ܘܲܝ̈ ܠܹܗ ܡ̣ܢ ܕܠܲܡܤܲܒܵܪܘܼ. ܘܡ̣ܢ ܗܵܕܹܐ
ܐܵܦ ܩܛܸܓܼܪ̈ܵܢܹܐ ܥܲܠ ܐܲܦܲܝ̈ ܐܲܠܵܗܵܐ ܗܘ̤ܵܘ ܠܹܗ: ܐܲܝܟܼ ܐܲܝܢܵܐ ܕܥܸܠܬܼܵܐ
ܐܝܼܬܼܵܘܗܝ ܕܠܵܐ ܡܸܫܬܲܡܥܵܢܘܼܬܼܵܐ: ܟܲܕܼ ܒܫܝܼܛܘܼܬܼܵܐ ܘܒܲܡܚܝܼܠܘܼܬܼܵܐ
ܡܩܝܼܡܝܼܢ ܗ̄ܘ̣ܵܘ ܠܹܗ.
ܥܗ. ܥܲܠ ܗܵܝ̇: ܕܒܼܐܝܼܩܵܪܵܐ ܪܹܫܝܵܐ ܐܸܬܼܚܲܫܲܚ ܒܵܗ̇ ܒܡܸܫܬܲܡܥܵܢܘܼܬܼܵܐ
ܪܹܫܝܬܼܵܐ: ܐܲܝܟܼ ܕܐܵܦ ܒܲܪܢܵܫܵܐ ܗܘ̣ܵܐ ܫܲܪܝܼܪܵܐܝܼܬܼ ܡܫܝܼܚܵܐ: ܘܠܵܐ
ܐܲܤܠ̱ܝܵܗ̇ ܐܲܝܟܼ ܫܝܼܛܵܬܐ.
ܥܲܠ ܟܠܢܵܫ ܓܹܝܪ ܫܝܼܛܵܬܐ ܡܸܬܼܚܲܫܒܵܐ ܗ̄ܘ̣ܵܬܼ ܫܝܼܛܘܼܬܼܵܐ ܕܡ̣ܢ
ܒܵܬܲܪ ܐܝܼܩܵܪܵܐ ܗܵܘ̇ܝܵܐ: ܥܲܠ ܡܫܝܼܚܵܐ ܕܹܝܢ ܕܒܲܒܼܤܲܪ ܘܲܠܩܘܼܒܼܠܵܐ:
ܒܐܝܼܩܵܪܵܐ ܪܹܫܵܝܵܐ ܩܢ̣ܵܐ ܡܸܫܬܲܡܥܵܢܘܼܬܼܵܐ ܕܲܥܕܲܡܵܐ ܠܡܵܘܬܵܐ: ܡܵܘܬܵܐ
ܕܹܝܢ ܕܲܙܩܝܼܦܵܐ. ܘܚܵܘܝܼ ܠܤܵܛܵܢܵܐ ܘܲܠܟܼܠ ܪܹܫ ܘܲܠܟܼܠ ܫܘܼܠܛܵܢ:
ܕܥܸܠܬܼܵܐ ܕܐܝܼܩܵܪܵܐ ܝܲܬܿܝܼܪܵܐܝܼܬܼ ܐܝܼܬܹܝܗ̇ ܡܸܫܬܲܡܥܵܢܘܼܬܼܵܐ ܝܲܬܿܝܼܪܬܵܐ:
ܘܠܵܘ ܠܵܐ ܡܸܫܬܲܡܥܵܢܘܼܬܼܵܐ ܕܐܲܠܵܥܗܵܐ: ܗܵܝ̇ ܕܒܼܵܗ̇ ܚܲܫ̣ ܤܵܛܵܢܵܐ
ܟܲܕܼ ܐܸܫܬܿܘܝܼ ܠܲܟܼܝܵܢܵܐ ܘܠܐܘܼܩܵܪܵܐ. ܘܲܠܡܸܫܬܲܡܥܵܢܘܼܬܼܵܐ ܕܲܒܼܢܲܝ̈ܢܵܫܵܐ
ܠܵܐ ܤܲܝܒܲܪ: ܗܒܵܝ̇ ܕܡ̣ܢ ܦܘܼܪܫܵܢܵܐ ܕܲܟܼܝܵܢܵܐ ܕܝܼܠܹܗ ܘܕܲܒܼܢܲܝ̈̄ܢܵܫܵܐ
ܕܵܐܸ̇ܢ ܗ̄ܘ̣ܵܐ ܐܵܦ ܠܐܝܼܩܵܪܵܐ ܘܲܠܫܝܼܛܘܼܬܼܵܐ: ܘܲܚܫܲܒܼ ܕܠܵܐ ܚܲܝܒܼܵܐ
ܡܸܫܬܲܥܵܢܘܼܬܼܵܐ ܗܵܕܹܐ ܠܐܲܠܵܗܵܐ. ܥܲܠ ܐܲܦܲܝ̈ ܗܵܕܹܐ ܪܸܚܡܲܬܼ
ܬܸܫܒܿܘܿܚܬܼܵܐ: ܐܵܦ ܠܐܵܕܼܵܡ ܒܹܗ ܒܚܲܫܵܐ ܐܲܪܡܝܹܗ: ܟܲܕܼ ܐܲܦܝܼܤܹܗ ܕܠܵܐ
pb. 101
ܢܸܫܬܿܡܲܥ ܠܐܲܠܵܗܵܐ. ܘܠܵܐ ܓܒܼܵܐ ܠܹܗ ܕܲܢܩܲܒܸܿܠ ܛܲܝܒܿܘܼܬܼܵܐ:
ܘܕܲܒܼܠܵܐ ܡܸܕܸܡ ܢܸܗܘܸܐ ܡܸܫܬܲܡܥܵܢܵܐ. ܐܸܠܵܐ ܡܸܛܠ ܕܐܸܫܬܿܘܝܼ
ܠܨܲܠܡܵܐ ܕܝܼܠܹܗ: ܟܲܕܼ ܐܸܬܼܟܿܠܝܼ ܡ̣ܢ ܡܹܐܟܼܘܼܠܬܼܵܐ ܕܚܲܕܼ ܐܝܼܠܵܢܵܐ:
ܚܲܫ̣ ܒܗܵܝ̇ ܕܠܵܐ ܫܵܘܝܵܐ ܗ̄ܘ̣ܵܬܼ ܠܚܲܫܵܐ ܘܲܥܒܲܪ ܥܲܠ ܦܘܼܩܪ̣ܵܢܵܐ
ܕܐܲܠܵܗܵܐ: ܘܚܲܫܒܹܗ ܠܐܲܠܵܗܵܐ ܐܲܝܟܼ ܚܲܤܵܡܵܐ. ܡܸܛܠ ܗܵܠܹܝܢ ܟܠܗܹܝܢ
ܠܐܵܕܼܵܡ ܬܪܲܝܵܢܵܐ ܠܗܵܢܵܐ ܟ̱ܠܹܗ ܐܝܼܩܵܪܵܐ ܐܲܫ̱ܘܝܹܗ ܐܲܠܵܗܵܐ: ܥܲܠ
ܕܲܤܥܲܪ ܟ̱ܠܵܗ̇ ܡܸܫܬܲܡܥܵܢܘܼܬܼܵܐ: ܠܐܝܼܩܵܪܵܐ ܕܡܸܕܸܡ ܠܲܝܬܿ ܠܥܸܠ
ܡܸܢܹܗ: ܐܲܝܟܼ ܕܡܸܫܬܲܡܥܵܢܘܼܬܼܵܐ ܕܡܸܕܸܡ ܕܥܵܒܲ݁ܪ ܠܵܐ ܐܝܼܬܼ. ܗܵܘ̇ ܕܠܵܐ
ܚܫܲܒܼ ܢܲܦܫܹܗ ܕܡܸܕܸܡ ܐܝܼܬܼܵܘܗܝ: ܐܸܠܵܐ ܕܢܸܗܘܸܐ ܐܝܼܬܼܵܘܗܝ ܐܲܝܟܼ
ܨܒܼܝܵܢܹܗ ܕܐܲܠܵܗܵܐ: ܐܲܝܟܼ ܡܵܐ ܕܨܵܒܹ̇ܐ ܗ̄ܘ̣ܵܐ ܒܹܗ ܐܲܠܵܗܵܐ ܕܢܸܗܘܸܐ
ܐܝܼܬܼܵܘܗܝ.
ܥܘ. ܕܡܸܛܠ ܡܵܢܵܐ: ܡ̣ܢ ܦܲܪܨܘܿܦܹܗ ܥܲܒܼܕܵܗ̇
ܠܡܸܬܼܒܲܪܢܫܵܢܘܼܬܼܵܐ: ܐܲܝܟܼ ܕܐܵܦ ܐܸܬܼܒܲܪܢܲܫ.
ܡܸܛܠ ܗܵܢܵܐ ܐܵܦ ܗ̤ܘ ܐܲܠܵܗܵܐ ܐܸܬܼܒܲܪܢܲܫ ܒܒܲܪܢܵܫܵܐ ܒܦܲܪܨܘܿܦܵܐ
ܕܝܼܠܹܗ: ܘܥܲܒܼܕܹܗ ܠܦܲܪܨܘܿܦܹܗ ܦܲܪܨܘܿܦܵܐ ܕܝܼܠܹܗ. ܘܠܲܝܬܿ ܠܵܗ̇
ܦܸܚܡܵܐ ܠܗܵܕܹܐ ܡܸܬܼܢܲܚܬܼܵܢܘܼܬܼܵܐ: ܕܦܲܪܨܘܿܦܹܗ ܕܗܵܘ̇ ܢܸܗܘܸܐ ܕܝܼܠܹܗ:
ܘܢܸܬܸܠ ܠܹܗ ܦܲܪܨܘܿܦܹܗ. ܘܡܸܛܠ ܗܵܢܵܐ ܐܸܬܼܚܲܫܲܚ ܒܦܲܪܨܘܿܦܹܗ:
ܒܲܕܼ ܢܲܤܒܹܗ ܠܹܗ. ܢܲܤܒܹܗ ܕܹܝܢ: ܠܵܘ ܕܲܡܝܲܩܪܵܐ ܥܲܒܼܕܹܗ: ܐܸܠܵܐ
ܫܝܼܛܵܐ. ܐܲܝܟܼ ܕܲܢܚܵܘܸܐ ܠܟܼܠ ܡ̇ܢ ܕܗ̤ܘ ܕܫܲܡܸܫ: ܕܟܼܠ
pb. 102
ܪܲܒܿܘܼܬܼܵܐ ܕܐܝܼܬܼ ܒܡܸܬܸܢܲܚܬܼܵܢܘܼܬܼܵܐ ܡܸܬܼܪܵܘܪܒܼܵܐ: ܘܠܵܘ ܟܲܕܼ
ܡܸܬܿܬܿܪܝܼܡܵܐ. ܒܗܵܝ̇ ܕܲܢܤܲܒܼ ܕܡܘܼܬܼܵܐ ܕܥܲܒܼܕܵܐ: ܘܒܸܐܤܟܹܡܵܐ
ܐܸܫܬܿܟܲܚ ܐܲܝܟܼ ܒܲܪܢܵܫܵܐ. ܕܡܘܼܬܼܵܐ ܕܥܲܒܼܕܵܐ ܟ̱ܠܹܗ ܫܲܡܸܫܬܹܗ:
ܐܲܝܟܼ ܡܵܐ ܕܗ̤ܘ ܨܵܒܹ̇ܐ ܗ̄ܘ̣ܵܐ. ܨܵܒܹ̇ܐ ܗ̄ܘ̣ܵܐ ܕܹܝܢ ܐܲܝܟܼ ܡܵܐ ܕܐܝܼܬܼ
ܗ̄ܘ̣ܵܐ ܠܹܗ ܠܲܟܼܝܵܢܵܐ: ܕܠܵܘ ܒܲܠܚܘܿܕܼ ܕܲܚܠܵܦ ܢܲܦܫܹܗ ܡܸܫܬܿܡܲܥ
ܠܦܲܪܨܘܿܦܵܐ ܕܝܼܠܹܗ: ܐܲܝܟܼ ܕܡܸܕܸܡ ܦܘܼܠܵܓܼܵܐ ܠܵܐ ܢܸܗܘܸܐ ܥܠܵܘܗܝ
ܕܐܝܼܬܼܵܘܗܝ ܒܪܵܐ ܕܐܲܠܵܗܵܐ: ܐܸܠܵܐ ܕܐܵܦ ܥܲܠ ܐܲܦܲܝ̈ܢ ܢܸܬܿܕܒܲܪ ܘܕܲܡܘܼܬܼ
ܚܠܵܦ ܦܘܼܪܩܵܢܲܢ. ܥܲܠ ܐܲܦܲܝ̈ܢ ܕܹܝܢ: ܠܵܘ ܐܲܝܟܼ ܡ̇ܢ ܕܙܲܕܝܼ̈ܩܹܐ ܐܵܘ
ܛܵܒܹ̈ܐ ܐܝܼܬܲܝܢ ܗ̣̄ܘܲܝܢ. ܐܝܼܬܼ ܗ̄ܘ̣ ܓܹܝܪ ܓܘܼܪܵܓܼܵܐ ܒܗܵܕܹܐ: ܕܲܢܡܘܼܬܼ
ܐ̄ܢܵܫ ܚܠܵܦ ܐܲܝܠܹܝܢ ܕܐܲܝܟܼ ܗܵܠܹܝܢ ܐܸܢܘܿܢ: ܐܸܠܵܐ ܚܠܵܦ ܥܵܘܵܠܹ̈ܐ.
ܠܡܲܚܤܸܢ ܓܹܝܪ ܐ̄ܢܵܫ ܚܵܠܵܦ ܪ̈ܲܫܝܼܥܹܐ ܡܵܐܹ̇ܬܼ: ܚܠܵܦ ܛܵܒܹ̈ܐ ܓܹܝܪ
ܛܵܟܼ ܡܲܡܪܲܚ ܐ̄ܢܵܫ ܠܲܡܡܵܬܼ. ܡܸܛܠ ܗܵܟܹܝܠ ܕܐܸܬܼܢܲܚܲܬܼ ܒܟܼܠ
ܡܸܕܸܡ ܠܵܐ ܡܸܬܼܥܲܩܒܼܵܢܵܐܝܼܬܼ ܠܡܸܬܼܢܲܚܬܼܵܢܘܼܬܼܵܐ ܕܠܲܝܬܿ ܠܵܗ̇
ܦܸܚܡܵܐ: ܬܘܼܒܼ ܚܲܕܼ ܪܸܥܝܵܢܵܐ: ܚܲܕܼ ܨܒܼܝܵܢܵܐ: ܚܕܼܵܐ ܬܲܪܥܝܼܬܼܵܐ
ܐܸܬܼܚܵܘܝܲܬ̤: ܠܵܐ ܡܸܬܼܦܲܪܫܵܢܝܼܬܼܵܐ ܘܠܵܐ ܡܸܬܼܦܲܠܓܼܵܢܝܼܬܼܵܐ ܐܲܝܟܼ ܕܲܒܼܚܲܕܼ.
ܐܵܦ ܒܓܲܢ̄ܒܵܪܘܼܬܼܵܐ: ܘܒܲܡܫܲܠܛܘܼܬܼܵܐ: ܘܒܲܡܦܲܪܢܤܵܢܘܼܬܼܵܐ:
ܘܲܒܼܕܲܝܵܘܼܬܼܵܐ: ܒܟܼܠܗܹܝܢ ܐܸܫܬܵܘܬܲܦ ܠܐܲܠܵܗܵܐ ܕܠܵܐ ܦܠܝܼܓܼܘܼܬܼܵܐܐ:
ܐܲܝܟܼ ܕܡ̣ܢ ܚܲܕܼ ܒܚܲܕܼ ܒܦܘܼܪܫܵܢܵܐ ܘܒܲܓܼܒܼܝܼܬܼܵܐ ܕܲܬܼܪ̈ܝܗܘܿܢ. ܕܠܵܐ
ܢܸܩܢܸܐ ܡܸܕܸܡ ܐ̄ܢܵܫܵܝܵܐ ܕܝܼܠܹܗ ܒܗܵܠܹܝܢ ܐ̄ܢܵܫܝ̈ܬܼܵܐ: ܐܸܠܵܐ ܨܒܼܝܵܢܵܐ ܕܐܲܠܵܗܵܐ
ܨܸܒܼܝܵܢܵܐ ܕܝܼܠܹܗ ܢܸܗܘܸܐ: ܟܲܕܼ ܒܲܥܒܼܵܕܹ̈ܐ ܐܸܫܬܪܲܪ ܘܲܒܼܚܲܫܹ̈ܐ ܕܲܟܼܝܵܢܵܐ.
pb. 103
ܗܵܟܲܢܵܐ ܐܵܦ ܒܐܲܠܵܗܵܝ̈ܬܼܵܐ: ܕܡܸܕܸܡ ܕܝܼܠܹܗ ܠܵܐ ܢܸܗܘܸܐ ܠܹܗ ܡ̣ܢ
ܡܘܼܟܵܟܼܵܐ ܐ̄ܢܵܫܵܝܵܐ: ܐܸܠܵܐ ܒܟܼܠܗܹܝܢ ܒܕܲܐܠܵܗܵܐ ܢܩܵܘܸܐ: ܗܵܘ̇ ܡܵܐ
ܕܐܝܼܬܼܵܘܗܝ ܗ̄ܘ̣ܵܐ ܒܚܲܫܹ̈ܐ ܒܲܪܢܵܫܵܐ ܒܲܟܼܝܵܢܹܗ: ܐܵܦ ܒܠܵܐ ܚܵܫܘܫܘܼܬܼܵܐ.
ܕܐܲܝܟܲܢܵܐ ܕܒܲܡܤܲܪܩܘܼܬܼܵܐ ܐܸܚܲܫܲܚ ܒܲܕܼܡܘܼܬܼܵܐ ܕܥܲܒܼܕܵܐ: ܗܵܟܲܢܵܐ
ܒܪܘܼܡܪܵܡܵܐ ܕܲܕܼܡܘܼܬܼܵܐ ܕܐܲܠܵܗܵܐ ܢܸܫܬܵܘܬܲܦ: ܟܲܕܼ ܗ̤ܘ ܐܝܼܬܼܵܘܗܝ
ܒܬܲܪ̈ܬܲܝܗܹܝܢ: ܒܲܕܼܡܘܼܬܼܵܐ ܕܥܲܒܼܕܵܐ ܘܒܲܕܼܡܘܼܬܼܵܐ ܕܐܲܠܵܗܵܐ: ܘܗ̤ܘ
ܟܲܕܼ ܗ̤ܘ ܦܲܪܨܘܿܦܵܐ ܩܢܸܐ ܕܡܘܼܟܼܵܟܼܵܐ ܘܲܕܼܪܘܼܡܪܵܡܵܐ.
ܥܙ. ܥܲܠ ܗܵܝ̇: ܕܡܸܬܼܒܲܪܢܵܫܢܘܼܬܼܵܐ ܡܬܲܪܐܵܢܝܼܬܼܵܐ ܗܘ̤ܵܬܼ
ܠܟܼܠܹܗ ܟܝܵܢܵܐ ܕܲܡܠܝܼ̈ܠܹܐ.
ܡܸܛܠ ܥܸܠܬܼܵܐ ܗܵܕܹܐ: ܐܵܠܨܵܐ ܗ̄ܘ̣ܵܬܼ ܥܲܠ ܡܸܬܼܒܲܢܵܫܢܘܼܬܹܗ
ܕܐܲܠܵܗܵܐ ܡܸܠܬܼܵܐ ܠܟܼܠܹܗ ܟܝܵܢܵܐ ܕܲܡܠܝܼ̈ܠܹܐ: ܕܢܹܐܠܲܦ ܫܵܘܬܵܦܘܼܬܼܵܐ
ܕܛܵܒܼܘܼܬܹܗ. ܕܡܸܛܠܵܬܼܵܗ̇: ܟܲܕܼ ܒܡܸܕܸܡ ܠܵܐ ܤܢܝܼܩ ܗ̄ܘ̣ܵܐ:
ܟܠܡܸܕܸܡ ܤܥܲܪ: ܘܡ̣ܢ ܡܸܕܵܡ ܠܵܐ ܤܥܲܛ̣ ܡ̣ܢ ܕܢܸܥܒܸܿܕܼ ܗܵܕܹܐ:
ܥܕܲܡܵܐ ܠܫܝܼ̈ܛܵܬܼܵܐ. ܐ̄ܚܪܵܝܑܬܼ ܕܹܝܢ: ܕܐܵܦ ܢܫܵܘܬܸܦ ܒܨܲܠܡܹܗ
ܠܒܲܪܢܵܫܵܐ: ܕܐܲܝܟܼ ܕܲܒܼܕܼܵܡܝܘܼܬܼܵܐ ܟܠܢܵܫ ܕܲܠܬܲܚܬܿ ܡܸܢܹܗ ܠܵܐ
ܢܸܬܼܚܲܫܚ ܒܪܵܡܘܼܬܼܵܐ: ܐܸܠܵܐ ܒܫܵܘܬܵܦܘܼܬܼܵܐ ܕܪܲܒܿܘܼܬܼܵܐ ܘܐܲܝܟܼ
ܚܲܝܠܹܗ ܟܠܗܹܝܢ ܒܲܚܙܵܬܼܵܐ ܕܐܲܠܵܗܵܐ ܥܵܒܹ̇ܕܼ ܗ̄ܘ̣ܵܐ.
ܥܚ. ܥܲܠ ܗܵܝ̇: ܕܤܵܛܵܢܵܐ ܒܲܚܤܵܡܵܐ ܕܲܒܼܒܲܪܢܵܫܵܐ:
ܠܡܲܤܛܝܵܢܘܼܬܼܵܐ ܟܠܡܸܕܸܡ ܤܥ݂ܲܪ.
pb. 104
ܡܸܛܠ ܗܵܟܹܝܠ ܕܲܒܼܕܲܠܩܘܼܒܼܠܵܐ ܐܸܬܼܚܲܫܲܚ ܗ̄ܘ̣ܵܐ ܤܵܛܵܢܵܐ
ܒܐܲܝܠܹܝܢ ܕܡ̣ܢ ܐܲܠܵܗܵܐ ܐܸܬܼܝܼܗܸܒܼ ܠܹܗ: ܘܲܢܦܲܠ̣ ܡ̣ܢ ܪܸܥܝܵܢܹܗ ܕܐܲܠܵܗܵܐ.
ܠܵܘ ܐܲܝܟܼ ܕܘܼܡܝܵܐ ܘܬܲܚܘܝܼܬܼܵܐ ܕܦܲܐܝܵܐ ܠܐܲܠܵܗܵܐ ܒܨܲܠܡܵܐ ܕܐܲܠܵܗܵܐ
ܐܸܬܼܚܲܫܲܚ: ܐܸܠܵܐ ܒܲܚܤܵܡܵܐ ܕܠܘܼܩܒܲܠ ܒܲܪܢܵܫܵܐ: ܘܲܒܼܡܲܤܛܝܵܢܘܼܬܼܵܐ
ܕܡ̣ܢ ܐܲܠܵܗܵܐ. ܘܐܲܛܥܝܹܗ ܠܒܲܪܢܵܫܵܐ: ܘܥܲܒܼܕܹܗ ܕܲܢܦܲܠ̣ ܡ̣ܢ
ܨܲܠܡܹܗ: ܒܲܕܼ ܠܵܐ ܢܲܛܪܹܗ ܠܨܒܼܝܵܢܹܗ ܕܐܲܠܵܗܵܐ. ܘܐܲܩܝܼܡܹܗ ܒܥܸܠܕܒܼܵܒܼܵܐ
ܘܡܲܩܪܒܼܵܢܵܐ ܕܠܘܼܩܒܲܠ ܐܲܠܵܗܵܐ: ܐܲܝܟܼ ܕܲܒܼܝܲܕܼ ܗܵܕܹܐ ܢܲܪܤܝܼܘܗܝ
ܠܐܲܠܵܗܵܐ ܐܲܝܟܼ ܥܵܘ̇ܠܵܐ: ܒܲܕܼ ܚܵܘܝܼ ܪܸܥܝܵܢܵܐ ܫܲܦܝܼܪܵܐ ܕܐܲܝܟܼ ܗܵܢܵܐ ܥܲܠ
ܒܲܪܢܵܫܵܐ. ܢܲܟܿܤܹܗ ܕܹܝܢ: ܒܗܵܝ̇ ܕܡܸܬܼܢܲܩܲܡ ܨܲܥܪܹܗ ܡܸܢܹܗ ܕܒܲܪܢܵܫܵܐ.
ܘܠܲܬܼܒܲܥܬܼܵܐ ܐܲܝܟܼ ܕܫܵܘܹ̇ܐ ܬܵܒܲܥ ܡܸܢܹܗ: ܒܐܲܝܠܹܝܢ ܕܤܵܥܲܪ ܠܘܵܬܹܗ.
ܡܸܛܠ ܓܹܝܪ ܕܲܒܼܚܸܡܬܼܵܐ ܘܠܵܘ ܒܚܘܼܫܵܒܼܵܐ ܤ̣ܥܲܪ ܗ̄ܘ̣ܵܐ ܤܵܛܵܢܵܐ:
ܛܥ̣ܵܐ ܗ̄ܘ̣ܵܐ: ܕܕܲܠܩܘܼܒܼܠܵܐ ܤܵܥܲܪ ܐܲܠܵܗܵܐ ܕܗܵܠܹܝܢ ܕܗ̤ܘ ܨܵܒܹ̇ܐ.
ܥܛ. ܥܲܠ ܗܵܝ̇: ܕܐܲܠܵܗܵܐ ܚ̣ܵܘܝܼ ܠܪܹܫܵܝܘܼܬܼܵܐ ܕܛܵܒܼܘܼܬܹܗ:
ܘܲܠܪܹܫܵܝܘܼܬܼ ܒܝܼܫܘܼܬܹܗ ܕܤܵܛܵܢܵܐ ܦܲܪܤ̣ܝܼ.
ܠܵܐ ܗ̄ܘ̣ܵܐ ܓܹܝܪ ܒܡܵܘܬܵܐ ܠܐܲܒܼܕܵܢܹܗ ܕܒܲܪܢܵܫܵܐ ܤ̣ܥܲܪ ܗ̄ܘ̣ܵܐ
ܐܲܠܵܗܵܐ: ܐܸܠܵܐ ܠܡܸܬܼܒܲܝܵܐܢܘܼܬܹܗ ܘܠܲܡܥܲܕܪܵܢܘܼܬܹܗ ܕܠܵܐ ܢܸܚܛܸܐ:
ܘܠܵܐ ܬܘܼܒܼ ܢܸܬܿܛܦܝܼܣ ܠܡܸܠܟܹ̈ܐ ܕܒܼܝܼ̈ܫܐ: ܗܵܢ̇ܘܿܢ ܕܡܵܘ̈ܒܿܕܼܵܢܹܐ
ܐܝܼܬܲܝܗܘܿܢ. ܐܵܦܠܵܐ ܓܹܝܪ ܠܡܹܐܟܲܠܩܲܪܨܵܐ ܕܐܲܠܵܗܵܐ ܗܵܘ̇ܝܵܐ ܗ̄ܘ̣ܵܬܼ:
ܐܸܠܵܐ ܠܬܲܪܒܿܝܼܬܼܵܐ ܕܛܲܝܒܿܘܼܬܹܗ. ܗܵܘ̇ ܕܠܐܝܼܩܵܪܵܐ ܕܐܲܝܟܼ ܗܵܢܵ ܐܲܫ̱ܘܝܹܗ
ܠܒܲܪܢܵܫܵܐ: ܟܲܕܼ ܡܸܕܸܡ ܠܵܐ ܐܝܼܬܼܵܘܗܝ ܗ̄ܘ̣ܵܐ. ܘܲܕܼܢܟܿܤܝܼܘܗܝ
ܠܲܛܪܘܼܢܵܐ ܥܲܠ ܐܲܦܲܝ̈ ܢܸܟܼܠܹܗ: ܕܐܸܬܼܪܲܥܝܼ ܠܤܘܼܚܵܦܹܗ ܕܒܲܪܢܵܫܵܐ.
pb. 105
ܘܲܢܚܵܘܸܐ: ܕܡܸܕܸܡ ܠܵܐ ܡܸܬܼܪܲܥܸܐ ܥܲܠ ܐܲܒܼܕܵܢܹܗ: ܐܸܠܵܐ ܕܲܒܼܛܲܝܒܿܘܼܬܼܵܐ
ܢܢܲܛܪܝܼܘܗܝ. ܘܲܕܼܢܸܬܼܒܿܛܸܠ ܠܹܗ ܥܠܵܘܗܝ: ܐܲܝܟܼ ܕܢܸܥܛܘܿܦ
ܢܹܐܬܸܐ ܠܗܵܘ̇ ܡܵܐ ܕܐܝܼܬܼܵܘܗܝ ܗ̄ܘ̣ܵܐ. ܤܵܒܲܪ̇ ܗ̄ܘ̣ܵܐ ܓܹܝܪ ܤܵܛܵܢܵܐ:
ܕܡ̣ܢ ܒܵܬܲܪ ܗܵܕܹܐ ܟ̱ܠܵܗ̇ ܪܸܚܡ̱ܬܼܵܐ ܕܐܲܠܵܗܵܐ ܕܲܘܵܬܼ ܒܲܪܢܵܫܵܐ: ܐܸܢ
ܬܘܼܒܼ ܢܸܥܒܿܕܼܝܼܘܗܝ ܕܢܸܥܒܲܪ ܥܲܠ ܦܘܼܩܕܵܢܵܐ ܕܐܲܠܵܗܵܐ: ܡ̣ܢ ܟܠ
ܦܪܘܿܣ ܡܸܬܼܚܲܡܲܬܼ ܠܡܵܘܒܵܕܼܘܼܬܹܗ: ܘܠܵܐ ܗܵܘ̇ܝܵܐ ܠܹܗ ܥܸܠܬܼܵܐ
ܕܦܘܼܢܵܝܵܐ ܘܕܼܵܐܤܝܘܼܬܼܵܐ. ܐܲܝܠܹܝܢ ܕܹܝܢ ܕܲܚܛ̣ܵܘ ܘܐܸܫܬܿܘܝܼܘ ܠܦܘܼܪܩܵܢܵܐ:
ܘܬܼܘܼܒܼ ܒܗܹܝܢ ܟܲܕܼ ܒܗܹܝܢ ܩ̣ܵܘܝܘܼ: ܟܲܕܼ ܥܕܲܟܹܝܠ ܡ̣ܢ ܡܤܵܡ
ܒܪܹܫܵܐ ܩܲܕܼܡܵܝܵܐ ܠܵܐ ܦܲܠܝܼܛܝܼܢ ܗ̄ܘ̣ܵܘ: ܕܠܵܐ ܡܸܫܬܲܐܠܵܢܘܼܬܼܵܐ
ܡܸܬܿܬܿܙܝܼܥ ܥܠܲܝܗܘܿܢ ܪܘܼܓܼܙܵܐ: ܟܲܕܼ ܠܲܝܬܿ ܡܸܟܹܝܠ ܥܸܠܬܼܵܐ ܕܫܘܿܘܙܵܒܼܵܐ.
ܗ̤ܘ ܗܵܟܹܝܠ ܤܵܛܵܢܵܐ: ܠܗܵܠܹܝܢ ܕܐܸܬܼܪܲܥܝܼ ܥܲܠ ܐܲܒܼܕܵܢܹܗ ܕܒܲܪܢܵܫܵܐ:
ܡܸܢܹܗ ܘܠܹܗ ܩܲܕܸܡ ܗ̄ܘ̣ܵܐ ܐܸܬܼܚܲܫܲܒܼ: ܘܐܲܦܝܼܣ ܢܲܦܫܹܗ ܘܚܲܝܒܹܗ
ܗ̄ܘ̣ܵܐ ܠܒܲܪܢܵܫܵܐ ܠܲܬܼܒܲܥܬܼܵܐ: ܟܲܕܼ ܐܵܦܠܵܐ ܚܕܲܐ ܥܸܠܬܼܵܐ ܕܫܘܼܒܼܩܵܢܵܐ
ܐܲܪܦܝܼ ܠܹܗ. ܘܡܸܛܠ ܕܡ̣ܢ ܚܸܡܬܹܗ ܘܲܚܤܵܡܹܗ ܡܲܤܡܲܝ ܗ̄ܘ̣ܵܐ:
ܠܵܐ ܐܸܤܬܲܟܲܠ ܡ̣ܢ ܢܲܦܫܹܗ ܠܛܵܒܼܘܼܬܹܗ ܕܐܲܠܵܗܵܐ: ܕܡܸܛܠܵܬܼܵܗ̇
ܠܹܗ ܠܤܵܛܵܢܵܐ ܕܐܝܼܬܼܵܘܗܝ ܡܲܛܥܝܵܢܵܐ: ܟܲܕܼ ܗܵܟܲܢܵܐ ܐܝܼܬܼܵܘܗܝ
ܗ̄ܘ̣ܐ: ܠܵܐ ܐܵܘܒܿܕܹܗ: ܐܸܠܵܐ ܡܤܲܝܒܲܪ ܗ̄ܘ̣ܵܐ ܠܒܼܝܼܫܘܼܬܹܗ. ܕܡܸܛܠ
ܗܵܕܹܐ ܐܵܦ ܡܲܓܲܪ ܐܲܠܵܗܵܐ ܪܘܼܚܹܗ ܥܲܠ ܢܒܲܝ̈ܢܵܫܵܐ ܐܲܝܠܹܝܢ ܕܚܵܛܹ̇ܝܢ
ܘܡܲܪܫܥܝܼܢ ܒܹܗ: ܐܲܝܟܼ ܡ̇ܢ ܕܲܐ̄ܚܪܹܢܵܐ ܗ̄ܘ̣ ܕܡܲܛܥܸܐ ܠܗܘܿܢ.
ܘܡܲܓܲܪ ܪܘܼܚܹܗ ܥܲܠ ܚܲܤܝܼܪܘܼܬܼ ܪܸܥܝܵܢܗܘܿܢ ܕܲܒܼܢܲܝ̈ܢܵܫܵܐ: ܘܥܲܠ
pb. 106
ܒܝܼܫܘܼܬܹܗ ܕܲܕܼܠܵܐ ܤܵܟܼܵܐ ܕܐܲܟܹ̇ܠܩܲܪܨܵܐ ܕܲܠܘܵܬܼܗܘܿܢ. ܗܵܘ̇ ܕܗܵܢܵܐ
ܟ̱ܠܹܗ ܝܲܨܪܵܐ ܩܢܸܐ: ܐܲܝܟܼ ܕܲܠܟܼܠ ܢܲܤܛܸܐ ܘܲܠܟܼܠ ܢܸܥܒܸܿܕܼ
ܕܲܠܩܘܼܒܼܠܵܐ ܕܐܲܠܵܗܵܐ. ܘܐܲܝܟܼ ܕܡܸܢܹܗ ܢܸܬܼܥܛܸܐ ܟ̱ܠܹܗ ܓܸܢܤܲܢ:
ܡ̣ܢ ܒܠܲܝ ܕܐܲܝܬܿ ܠܹܗ ܐ̄ܢܵܫ ܕܢܸܗܘܸܐ ܒܲܥܵܝܵܐ ܚܠܵܦܵܘܗܝ. ܘܡܸܛܠ
ܕܲܠܗܵܕܹܐ ܟ̱ܠܵܗ̇ ܒܝܼܫܘܼܬܼܵܐ ܪܹܫܝܵܬܼܵܐ ܚܵܘܝܼ ܤܵܛܵܢܵܐ: ܟܲܕܼ ܐܵܦܠܵܐ ܚܕܼܵܐ
ܥܸܠܬܼܵܐ ܕܒܼܝܼܫܬܐ ܩܢܸܐ ܗ̄ܘ̣ܵܐ: ܒܗܵܕܹܐ ܟ̱ܠܵܗ̇ ܒܝܼܫܘܼܬܼܵܐ: ܐܸܬܼܚܵܘܝܲܬ̤
ܐܵܦ ܛܵܒܼܘܼܬܹܗ ܕܐܲܠܵܗܵܐ. ܘܚܵܘܝܼ ܠܛܵܒܼܘܼܬܹܗ ܠܵܐ ܡܸܬܼܡܲܠܠܵܢܝܼܬܼܵܐ:
ܟܲܕܼ ܓܵܘܢܵܐܝܼܬܼ ܥ̣ܒܲܕܼ ܛܵܒܼ̈ܬܹܗ ܠܘܵܬܼ ܟܠܗܘܿܢ ܒܢܲܝ̈ܢܵܫܵܐ: ܕܡܸܛܠ
ܪܹܫܝܘܼܬܼܵܗ̇ ܕܡܸܬܼܢܲܚܬܵܢܘܼܬܹܗ: ܕܲܠܗܵܢܵܐ ܕܗܵܢܵܐ ܟ̱ܠܹܗ ܚܛ̣ܵܐ: ܐܸܬ݂ܼܵܐ
ܗ̄ܘ̣ܵܐ ܒܫܝܼܛܘܼܬܼܵܐ ܘܲܒܲܨܥܪܵܐ ܘܲܒܼܚܲܠܵܫܘܼܬܼܵܐ: ܘܠܵܐ ܐܸܨܛܲܡܥܲܪ
ܒܨܲܥܪܵܐ ܕܥܲܠ ܐܲܦܲܝ̈ ܝܘܼܬܼܪܵܢܵܐ. ܘܲܒܼܝܲܕܼ ܦܲܪܨܘܼܦܹܗ: ܦܲܪܨܘܿܦܵܐ
ܕܝܼܠܹܗ ܕܗܵܘ̇ ܗܘ̤ܵܐ. ܘܗܵܘ̇ ܕܐܲܠܵܗܵܐ: ܟܲܕܼ ܡܡܲܠܸܐ ܗ̄ܘ̣ܵܐ ܟܠܗܹܝܢ
ܕܐܲܠܵܗܵܐ: ܗܵܢܵܘ ܕܹܝܢ ܡܲܠܦܵܢܘܼܬܼܵܐ ܡܸܬܼܢܲܚܬܼܵܢܘܼܬܼܵܐ ܡܲܠܦܵܢܝܼܬܼܵܐ.
ܠܡܲܠܦܵܢܘܼܬܼܵܐ ܓܹܝܪ ܕܡܲܟܿܝܼܟܼܘܼܬܼܵܐ: ܗܘ̤ܵܬܼ ܡܸܫܬܲܡܥܵܢܘܼܬܼܵܐ ܪܹܫܝܬܼܵܐ
ܕܐ̄ܢܵܫܘܼܬܼܵܐ: ܗܵܝ̇ ܕܠܵܐ ܗ̄ܘ̣ܵܐ ܠܗܵܠܹܝܢ ܕܝܼܠܵܗ̇ ܒܵܥ̇ܝܵܐ ܗ̄ܘ̣ܵܬܼ: ܐܸܠܵܐ
ܕܐܲܠܵܗܵܐ. ܘܲܠܚܲܕܼ ܪܸܥܝܵܢܵܐ ܐܸܬܼܚܲܝܲܕܼ: ܐܲܝܟܼ ܕܐܵܦܠܵܐ ܩܲܠܝܼܠ ܐܲܬܼܪܵܐ
ܢܸܗܘܸܐ ܠܹܗ ܠܤܵܛܵܢܵܐ ܠܲܡܥܲܠܝܘܼܬܼܵܐ ܕܠܵܐ ܡܸܫܬܲܡܥܵܢܘܼܬܼܵܐ.
ܘܡܸܛܠ ܕܦܲܚܑ̣ܫ ܗ̄ܘ̣ܵܐ ܒܲܠܚܘܿܕܼ ܡܵܘܬܵܐ: ܐܲܝܟܼ ܕܢܸܗܘܸܐ ܠܚܵܒܿܬܼܵܐ
ܘܲܠܙܵܟܼܘܼܬܼܵܐ: ܒܵܬܲܪ ܟܠ ܡܸܕܸܡ ܤܲܝܒܿܪܹܗ ܐܵܦ ܠܗܵܢܵܐ. ܐܲܝܟܼ ܕܟܲܕܼ
ܢܸܫܬܿܟܲܚ ܒܹܗ ܙܲܟܵܝܵܐ: ܓܡܝܼܪܵܐܝܼܬܼ ܢܒܲܛܠܝܼܘܗܝ. ܘܬܲܪܬܹܝܢ ܤ̣ܥܲܪ
pb. 107
ܒܹܗ: ܕܚܲܝܒܹܗ ܠܤܵܛܵܢܵܐ: ܘܲܠܟܼܠܵܗ̇ ܡܲܤܒܿܪܵܢܘܼܬܼܵܐ ܕܠܵܐ
ܡܸܫܬܲܡܥܵܢܘܼܬܼܵܐ ܐܲܪܝܼܡ ܡܸܢܹܗ.
ܦ. ܥܲܠ ܗܵܝ̇: ܕܟܲܕܼ ܙܟܼܵܐ ܡܫܝܼܚܵܐ: ܠܵܐ ܤܸܦܩܲܬ̤ ܠܹܗ
ܙܵܟܼܘܼܬܹܗ. ܐܸܠܵܐ ܐܵܦ ܕܢܸܬܿܛܠܸܡ ܚܠܵܦܲܢ ܐܸܨܛܒܼܝܼ: ܕܒܲܛܠܘܼܡܹܝܗ
ܕܲܚܠܵܦܲܝܢ ܬܒܲܥܬܼܵܐ ܢܸܤܲܒܼ.
ܘܟܲܕܼ ܤܲܓܿܝܼ̈ܐܹܐ ܐܲܫܦܸܠ̣ܘ ܡ̣ܢ ܕܸܚܸܠܬܼܵܐ ܕܡܵܘܬܵܐ: ܗ̤ܘ ܥܕܲܡܵܐ
ܠܡܵܘܬܵܐ ܤܲܝܒܲܪ. ܘܝܲܗ̣̄ܒܼ ܦܘܼܪܥܵܢܵܐ ܟܹܐܢܵܐ ܚܠܵܦܲܝܢ: ܒܗܵܝ̇
ܕܫܲܚ̱ܠܦܹܗ ܠܡܵܘܬܵܐ ܕܝܼܠܲܢ: ܒܡܵܘܬܵܐ ܗܵܘܙ̇ ܕܠܵܘ ܟܹܐܢܵܐܝܼܬܼ ܐܸܬܼ݂ܵܐ
ܥܠܵܘܗܝ. ܡܸܛܠ ܗܵܢܵܐ: ܡ̣ܢ ܒܵܬܲܪ ܕܲܢܛܲܪ ܟܠܗܘܿܢ ܦܘܼ̈ܩܕܵܢܹܐ:
ܕܢܸܗܘܸܐ ܙܲܟܵܝ ܡ̣ܢ ܡܵܘܬܵܐ: ܘܲܢܩܲܒܸܠ ܓܒܼܝܼܬܼܵܐ ܕܙܵܟܼܘܼܬܼܵܐ ܚܠܵܦܲܝܢ:
ܘܬܼܘܼܒܼ ܩܲܒܸܿܠ̣ ܥܠܵܘܗܝ ܕܘܼܒܵܪܵܐ ܗܵܢܵܐ ܠܡܲܠܦܵܢܘܼܬܼܵܐ ܕܐܲܝܠܹܝܢ
ܕܛܵܥܹ̇ܝܢ ܗ̄ܘ̣ܵܘ: ܘܡܝܼܬܼ ܥܲܠ ܐܲܦܲܝ̈ܢ ܐܲܝܟܼ ܕܥܲܠ ܐܲܦܲܝ̈ ܛܵܥܲܝ̈ܐ.
ܘܐܲܝܬܿܝܹܗ ܠܲܡܨܲܥܬܼܵܐ ܠܡܵܘܬܵܐ: ܡܸܛܠ ܕܐܵܠܨܵܐ ܗ̄ܘ̣ܵܬܼ ܕܢܸܫܬܿܪܸܐ.
ܐܵܦܠܵܐ ܓܹܝܪ ܐܲܗܡܝܼ ܗ̄ܘ̣ܵܐ ܡ̣ܢ ܗܵܝ̇ ܕܗ̤ܘ ܝܵܬܹܗ ܢܸܬܼܪ̱ܡܸܐ ܒܡܵܘܬܼܵܐ:
ܒܕܲܩܢܸܐ ܗ̄ܘ̣ܵܐ ܤܲܒܼܪܵܐ ܕܲܫܪܵܝܹܗ. ܐܵܦ ܓܹܝܪ ܡܸܛܠ ܗܵܢܵܐ ܩܲܕܸܡ
ܗ̄ܘ̣ܵܐ ܕܢܸܚܲܫ ܒܢܸܤ̈ܝܵܘܿܢܹܐ ܐ̄ܚܪ̈ܵܢܹܐ: ܘܠܵܐ ܗ̄ܘ̣ܵܐ ܕܲܢܡܘܼܬܼ ܥܵܘܠܐܝܼܬܼ:
ܟܲܕܼ ܢܒܲܥܬܼܵܐ ܠܵܐ ܬܸܗܘܸܐ. ܕܒܹܗ ܒܗܵܢܵܐ ܤܲܒܼܪܵܐ ܩܢ̣ܵܐ ܐܵܦ
ܡܸܫܬܲܡܥܵܢܘܼܬܼܵܐ ܘܚܘܼܒܵܐ ܕܠܵܐ ܡܫܘܼܚܬܼܵܐ: ܠܵܘ ܕܠܹܗ ܢܸܤܒܼܝܼܗ̇
ܠܙܵܟܼܘܼܬܼܵܐ: ܐܸܠܵܐ ܕܠܲܬܼܒܲܥܬܼܵܐ ܕܝܼܠܲܢ ܢܸܬܼܒܲܥ. ܘܠܵܘ ܥܲܠ ܐܲܦܲܝ̈
ܢܲܦܫܹܗ ܒܲܠܚܘܿܕܼ ܢܸܙܟܸܿܐ: ܐܸܠܵܐ ܥܲܠ ܐܲܦܲܝ̈ ܟܠܢܵܫ. ܕܐܝܟܲܢܵܐ ܕܚܵܘܒܿܬܹܗ
pb. 108
ܕܐܵܕܼܵܡ ܠܟܼܠ ܒܚܵܘܒܿܬܼܵܐ ܐܲܦܝܼܡܲܬ̤: ܗܵܟܲܢܵܐ ܐܵܦ ܙܵܟܼܘܼܬܹܗ ܕܗܵܢܵܐ
ܠܟܼܠ ܙܲܟܿܝܲܬ̤.
ܦܐ. ܥܲܠ ܗܵܝ̇: ܕܲܒܼܗܘܿܢ ܒܤܘܼܥܪ̈ܵܢܹܐ ܚ̣ܵܘܝܼ ܠܟܼܠ ܐܲܠܵܗܵܐ:
ܕܲܒܼܡܲܤܲܒܼ ܒܐܲܦܹ̈ܐ ܠܘܵܬܼ ܗܵܝ̇ ܐ̄ܢܵܫܘܼܬܼܵܐ ܠܵܐ ܗܘ̤ܵܐ: ܒܗܵܝ̇
ܕܲܒܼܟܼܠܗܹܝܢ ܚܸܫܲܬ̤.
ܘܡ̣ܢ ܬܪ̈ܲܝܗܘܿܢ ܝܑܼܠܸܦ̣ܘ ܟܠܗܘܿܢ ܚܲܝ̈ܠܘܵܬܼܵܐ ܕܲܡܠܝܼܠܹ̈ܐ:
ܕܠܲܝܬܿ ܡܲܤܲܒܼ ܒܐܲܦܹ̈ܐ ܠܘܵܬܼ ܐܲܠܵܗܵܐ: ܐܸܠܵܐ ܚܘܼܒܵܐ ܕܕܲܝܵܢܵܐ ܟܹܐܢܵܐ.
ܕܡܸܛܠܵܬܹܗ ܙܟܲܬ̤ ܐ̄ܢܵܫܘܼܬܼܵܐ: ܘܐܸܬܼܚܲܝܲܒܼ ܤܵܛܵܢܵܐ. ܘܐܵܘܪܒܼܵܗ̇
ܐܲܠܵܗܵܐ ܠܙܵܟܼܘܼܬܹܗ: ܘܝܲܗ̣̄ܒܼ ܠܹܗ ܐܝܼܩܵܪܵܐ ܕܲܡܝܲܬܲܪ ܡ̣ܢ ܟܠ
ܫܡܵܗ̈ܝܼܢ. ܘܐܵܦ ܟܠܗܘܿܢ ܚܲܝܵܠ̈ܘܵܬܼܵܐ ܕܡܲܠܝܼ̈ܠܹܐ ܐܲܟܲܚ̄ܕܼ ܬܗܲܪܘ
ܒܵܗ̇ ܒܙܵܟܼܘܼܬܹܗ: ܘܒܼܵܪܟܿܝܼܢ ܘܤܵܓܼܕܝܼܢ ܠܹܗ ܠܲܫܡܵܐ ܕܐܸܬܼܝܼܗܸܒܼ
ܠܹܗ: ܕܟܹܐܢܵܐܝܼܬܼ ܐܸܬܼܝܼܗܸܒܼ. ܘܡܵܘܕܹܐ ܟܠ ܠܸܫܵܢ ܠܲܡܕܲܒܿܪܵܢܘܼܬܼܵܐ
ܟܹܐܢܵܐ: ܕܥܲܠ ܐܲܦܲܝ̈ ܟܠ ܗܘ̤ܵܬܼ. ܕܒܼܵܗ̇ ܐܲܡ̣ܠܸܟܼ ܫܲܝܢܵܐ ܘܲܫܠܵܡܵܐ
ܥܲܠ ܐܲܪܥܵܐ: ܗܵܘ̇ ܕܲܒܼܟܼܠ ܤܘܼܥܪ̈ܵܢܝܼܢ: ܒܲܦܝܵܤܵܐ ܩܲܪܸܒܼ ܐܸܢܘܿܢ
ܘܠܵܘ ܒܲܩܛܝܼܪܵܐ.
ܦܒ. ܕܡܸܛܠ ܡܵܢܵܐ ܩܲܒܸܿܠ̣ ܥܠܵܘܗܝ ܕܗ̤ܘ ܢܸܬܼܒܲܪܢܲܫ.
ܘܗ̤ܘ ܐܲܠܵܗܵܐ ܓܲܡܪܵܗ̇ ܠܲܡܕܲܒܪܵܢܘܼܬܼܵܐ: ܘܠܵܐ ܗ̄ܘ̣ܵܐ ܒܝܲܕܼ
ܐ̄ܚܪܹܢܵܐ: ܕܠܵܐ ܟܲܕܼ ܒܫܝܼܛܘܼܬܼܵܐ ܘܒܲܡܚܝܼܠܘܼܬܼܵܐ ܕܐܲܝܟܼ ܗܵܕܹܐ ܢܸܗܘܸܐ:
ܨܥܝܼܪܵܐ ܢܸܬܼܚܫܸܒܼ ܦܘܼܩܕܵܢܹܗ: ܘܬܼܘܼܒܼ ܡܸܢܕܪܹܫ ܢܸܬܿܬܿܥܝܼܪ
ܥܠܵܘܗܝ ܕܒܲܪܢܵܫܵܐ ܚܤܵܡܵܐ. ܐܸܠܵܐ ܗ̤ܘ ܒܝܵܬܹܗ ܩܲܒܿܠܹܗ: ܗܵܘ̇
pb. 109
ܕܡܸܫܟܲܚ ܠܲܡܤܲܝܒܵܪܘܼ ܟܠܡܸܕܸܡ. ܘܐܲܝܼܩ̣ ܠܹܗ ܤܵܗ̈ܕܹܐ ܕܡܘܼܟܵܟܼܵܐ
ܕܐ̄̇ܢܵܫܘܼܬܹܗ: ܡܲܠܲܐܟܹ̈ܐ ܕܲܡܚܲܝܠܝܼܢ ܗ̄ܘ̣ܵܘ ܠܹܗ: ܕܠܵܐ ܐ̄ܢܵܫ ܢܹܐܡܲܪ
ܕܠܵܐ ܚܵܫܘܿܫܵܐܝܼܬܼ ܚܵܐ̇ܫܵܐ ܗ̄ܘ̣ܵܬܼ: ܡܸܛܠ ܕܗ̤ܘ ܡܚܲܝܸܠ ܗ̄ܘ̣ܵܐ ܠܵܗ̇
ܕܠܵܐ ܬܸܚܲܫ: ܘܡܸܛܠ ܗܵܕܹܐ ܠܲܝܬܿ ܠܵܗ̇ ܥܸܠܬܼܵܐ ܕܒܼܵܗ̇ ܠܵܐ ܬܸܫܬܿܡܲܥ.
ܟܠ ܐܲܝܢܵܐ ܓܹܝܪ: ܕܡܸܫܟܿܚܵܐ ܗ̄ܘ̣ܵܬܼ ܕܲܒܼܦܘܼܠܵܓܼܵܐ ܬܸܬܼܪܢܸܐ ܐܵܘ
ܬܸܬܼܐܡܲܪ ܥܠܵܘܗܝ: ܘܐܲܝܠܹܝܢ ܕܝ̇ܕܲܥ̇ ܕܐܵܡ̇ܪܝܼܢ ܥܠܵܘܗܝ: ܐܵܦܸܢ
ܗܸܢ̣ܘܿܢ ܠܵܐ ܡܸܫܟܿܚܝܼܢ ܗ̄ܘ̣ܵܘ ܕܢܹܐܡܪܘܼܢ: ܐܵܘ ܡܸܛܠ ܕܕܼܵܚ̇ܠܝܼܢ
ܗ̄ܘ̣ܵܘ: ܐܵܘ ܡܸܛܠ ܕܡܸܫܐܲܡܥܝܼܢ ܗ̄ܘ̣ܵܘ: ܠܟܼܠܗܹܝܢ ܤܵܥܲܪ
ܗ̄ܘ̣ܵܐ: ܕܐܵܦܠܵܐ ܚܕܼܵܐ ܥܸܠܬܼܵܐ ܕܦܘܼܠܵܓܼܵܐ ܢܲܪܦܸܐ. ܠܵܐ ܓܹܝܪ ܡܦܵܤܝܼܢ
ܗ̄ܘ̣ܵܘ ܒܐ̄ܪܵܙܵܐ ܗܵܢܵܐ. ܡܛܲܫܲܝ ܗ̄ܘ̣ܵܐ ܕܹܝܢ ܐܵܦ ܡ̣ܢ ܪܹ̈ܫܹܐ ܘܫܲܠܝܼܛܵܢܹ̈ܐ:
ܘܡ̣ܢ ܟܠܗܘܿܢ ܚܲܝ̈ܠܵܘܵܬܼܵܐ: ܘܐܸܬܼܓܿܠܝܼ ܠܗܘܿܢ ܐܲܝܟܼ ܕܒܼܝܼܕܲܥܬܼܵܐ.
ܘܡܵܘܕܹܝܢ ܟܠܗܘܿܢ: ܒܵܬܲܪ ܫܪܵܝܵܐ ܗܵܢܵܐ: ܠܚܘܼܫܵܒܼܵܐ ܗܵܘ̇ ܕܲܫ̣ܪܵܐ ܟܠ
ܚܘܼܫܸܒܼ̈ܝܼܢ ܘܙܲܟܿܝܼ ܐܸܢܘܿܢ. ܘܚ̣ܵܘܝܼ ܠܡܸܬܼܒܲܪܢܫܵܢܘܼܬܹܗ: ܕܲܡܒܪܵܢܘܼܬܼܵܐ
ܕܓܼܵܘܵܐ ܐܝܼܬܹܝܗ̇: ܠܟܼܠܗܘܿܢ ܐܲܝܠܹܝܢ ܕܐܸܫܬܿܘܝܼܘ ܥܲܡܹܗ ܒܚܲܕܼ ܪܸܥܝܵܢܵܐ
ܘܲܒܼܚܲܕܼ ܦܝܵܤܵܐ: ܕܢܸܵܗܘܘܿܢ ܠܘܼܩܒܲܠ ܒܥܸܠܕܒܼܵܒܼܵܐ ܕܟܼܠܗܘܿܢ: ܗܵܘ̇
ܕܕܚܩܹܗ ܘܒܲܛܸܠ̣ ܫܘܼܠܛܵܢܹܗ: ܘܠܲܝܬܿ ܠܹܗ ܡܸܟܹܿܝܠ ܐܲܬܼܪܵܐ
ܠܡܲܛܥܝܵܢܘܼܬܹܗ ܘܠܲܚܤܵܡܹܗ.
ܦܓ. ܕܡܸܛܠ ܐܲܝܕܼܵܐ ܥܸܠܬܼܵܐ: ܟܲܕܼ ܐܸܬܼܚܲܝܲܒܼ ܘܐܸܬܼܟܿܤܸܣ
ܤܵܛܵܢܵܐ ܕܐܝܼܬܼܵܘܗܝ ܒܥܸܠܕܒܼܵܒܼܵܐ ܕܟܼܠ: ܠܵܐ ܐܵܘܒܿܕܹܗ: ܐܸܠܵܐ
ܫܲܒܼܩܹܗ ܕܬܘܼܒܼ ܢܸܥܒܲܕܼ.
pb. 110
ܡܩܵܘܸܐ ܕܹܝܢ ܟܲܕܼ ܡܲܛܥܸܐ: ܐܲܝܟܼ ܕܲܠܚܘܼܝܵܒܼܵܐ ܓܲܠܝܵܐ ܕܝܼܠܹܗ:
ܘܕܲܐܝܠܹܝܢ ܕܡܸܬܿܛܦܝܼܣܝܼܢ ܠܹܗ. ܒܲܕ ܠܲܝܬܿ ܬܘܼܒܼ ܚܲܝܠܵܐ ܕܐܲܝܟܼ ܗܵܢܵܐ
ܠܡܲܛܥܝܵܢܘܼܬܹܗ: ܘܥܲܠ ܐܲܦܲܝ̈ ܙܵܟܼܘܼܬܼܵܐ ܕܐܲܝܠܹܝܢ ܕܠܵܐ ܡܸܬܿܟܦܝܼܤܝܼܢ
ܠܹܗ. ܠܵܐ ܠܲܡ ܓܹܝܪ ܐ̄ܢܵܫ ܡܸܬܼܟܲܠܲܠ: ܐܸܢ ܢܵܡܘܿܤܵܐܝܼܬܼ ܠܵܐ
ܡܸܬܼܟܲܐܲܫ. ܡܸܛܸܠ ܗܵܢܵܐ ܩ̣ܵܘܝܼ ܒܕܼܘܼܒܵܪܵܐ ܡܫܝܼܚܵܐ: ܡ̣ܢ ܒܵܬܲܪ
ܙܵܟܼܘܼܬܼܵܐ ܘܡ̣ܢ ܒܵܬܲܪ ܒܘܼܛܵܠܹܗ ܕܡܵܘܬܵܐ: ܕܘܼܒܵܪܵܐ ܗܵܘ̇
ܕܐܸܬܼܒܲܛܲܠ ܒܲܡܫܝܼܚܵܐ: ܕܐܵܦ ܐܲܝܠܹܝܢ ܕܒܲܡܫܝܼܚܵܐ ܐܸܢܘܿܢ: ܒܲܕܼܡܘܼܬܹܗ
ܕܲܡܫܝܼܚܵܐ ܢܸܬܿܕܲܒܪܘܼܢ. ܠܵܘ ܒܲܠܚܘܿܕܼ ܒܛܲܝܒܿܘܼܬܼܵܐ ܕܲܩܝܵܡܬܼܵܐ: ܐܸܠܵܐ
ܐܵܦ ܒܲܥܒܼܵܕܹ̈ܐ ܕܕܼܘܼܒܵܪܹ̈ܐ ܕܟܼܠ ܚܲܕܼ ܚܲܕܼ ܡܸܢܗܘܿܢ. ܗܵܝ̇ ܓܹܝܪ:
ܕܓܼܵܘܵܐ ܐܝܼܬܹܝܗ̇. ܗܵܕܹܐ ܕܹܝܢ: ܕܟܼܠ ܚܲܕܼ ܚܲܕܼ ܡܸܢܗܘܿܢ. ܘܐܲܝܟܼ ܕܠܵܐ
ܬܸܤܬܿܒܲܪ: ܕܬܼܘܼܩܵܢܵܐ ܗ̄ܘ̣ ܝܑܼܚܝܼܕܼܵܝ̇ܐ ܘܲܦܪܝܼܫܵܐ ܕܲܟܼܝܵܢܹܗ ܕܲܡܫܝܼܚܵܐ:
ܕܐܸܬܿܬܲܩܲܢ ܕܲܕܼܠܵܐ ܚܛܵܗ̈ܝܼܢ ܢܸܗܘܸܐ: ܘܡܸܛܠ ܗܵܕܹܐ ܙܟܼܵܐ. ܟܲܥܒܸܕܼ
ܕܡ̣ܢ ܪܸ̈ܒܿܘܲܬܼܵܐ ܕܤܲܓܿܝܼ̈ܐܹܐ ܢܸܙܕܟܸܐ ܒܕܼܘܼܒܵܪܵܐ ܕܒܡܫܝܼܚܵܐ ܒܹܗ
ܒܲܟܼܝܵܢܵܐ ܕܝܼܠܲܢ: ܡ̣ܢ ܗܵܢ̇ܘܿܢ ܕܦܘܼܩ̈ܕܵܢܹܐ ܚܲܬܿܝܼ̈ܬܹܐ ܢܵܛ̇ܪܝܼܢ. ܐܲܝܟܲܢܵܐ
ܕܲܠܦܘܼܬܼ ܢܵܡܘܿܤܵܐ ܒܨܝܼܪ ܩܲܠܝܼܠ: ܕܘܼܒܵܪܵܐ ܕܠܵܐ ܓܫܝܼ̈ܡܹܐ
ܡܸܬܿܕܲܒܿܪܝܼܢ ܒܦܲܓܼܪܵܐ. ܘܒܼܐܘܼܠܨܵܢܹ̈ܐ ܘܒܲܡܥܝܼ̈ܩܵܢܝܵܬܼܵܐ: ܘܲܒܼܠܵܗ̇
ܚܲܠܵܫܘܼܬܼܵܐ ܡܤܲܝܒܿܪܝܼܢ ܠܚܘܼܬܼܚܵܬܼܵܘ̈ܗܝ ܕܲܟܼܝܵܢܵܐ ܘܲܠܙܵܘܥܵܘ̈ܗܝ ܥܲܡ
ܚܹܐܦܹ̈ܐ ܕܡ̣ܢ ܠܒܲܪ. ܘܗܵܟܲܢܵܐ ܒܟܼܠܗܘܿܢ ܙܟܼܵܘ: ܐܲܝܟܼ ܕܬܲܪܒܿܝܼܬܼܵܐ
ܕܚܵܘܒܿܬܹܗ ܕܤܵܛܵܢܵܐ ܬܸܗܘܸܐ ܬܲܪܒܿܝܼܬܼܗܘܿܢ ܕܦܘܼܩ̈ܕܵܢܹܐ: ܗܵܘ̇
ܕܤܵܒܲܪ ܗ̄ܘ̣ܵܐ ܕܲܒܼܕܼܘܼܒܵܪܵܐ ܚܲܬܿܝܼܬܼܵܐ ܤܲܓܿܝܼ ܗܵܘ̇ܝܵܐ ܦܫܝܼܩܵܐ
ܡܲܦܘܼܠܬܿܗܘܿܢ ܕܲܒܼܢܲܝ̈ܢܵܫܵܐ.
pb. 111
ܦܕ. ܕܡܸܛܠ ܐܲܝܕܵܐ ܥܸܠܬܼܵܐ: ܠܗܵܕܹܐ ܟ̱ܠܵܗ̇ ܪܵܡܘܼܬܼܵܐ ܐܸܬܼ݂ܵܐ
ܤܵܛܵܢܵܐ: ܕܲܒܼܓܸܠܝܵܐ ܠܘܼܩܒܲܠ ܐܲܠܵܗܵܐ ܬܩܘܼܡ: ܘܢܲܫܘܸܐ ܢܲܦܫܹܗ
ܥܲܡ ܐܲܠܵܗܵܐ.
ܘܡܸܛܠ ܗܵܢܵܐ: ܕܟܲܕܼ ܡܲܪܗܸܛ ܠܟܼܵܐ ܘܲܠܟܼܵܐ: ܗܘ̤ܵܬܼ
ܚܵܘܒܿܬܹܗ ܪܲܒܿܬܼܵܐ. ܘܡܸܟܲܝܠ ܡ̣ܢ ܗܵܕܹܐ ܡܪܲܒܸܐ ܠܵܗ̇ ܠܒܼܝܼܫܘܼܬܹܗ
ܘܓܼܵܠܹ̇ܐ ܠܵܗ̇: ܘܡܲܦܸܩ ܠܵܗ̇ ܠܓܼܘܼܡܕܵܐ ܕܠܵܐ ܡܫܝܼܚܵܐ: ܕܲܢܩܘܼܡ
ܓܲܠܝܵܐܝܼܬܼ ܠܘܼܩܒܲܠ ܐܲܠܵܗܵܐ: ܘܢܸܥܒܸܿܕܼ ܢܲܦܫܹܗ ܦܸܚܡܵܐ ܕܐܲܠܵܗܵܐ:
ܘܡܸܬܿܕܲܡܸܐ ܒܡܸܬܼܪܢܫܵܢܘܼܬܹܗ. ܠܵܘ ܟܲܕܼ ܒܝܲܕܼ ܡܸܕܸܡ ܐܵܘ ܡ̣ܢ
ܡܸܕܸܡ ܡܲܛܥܸܐ: ܐܸܠܵܐ ܒܦܲܪܨܘܿܦܵܐ ܕܝܼܠܹܗ ܘܲܒܼܡܲܛܥܝܵܢܘܼܬܼܵܐ ܥܸܠܵܝܬܼܵܐ.
ܘܡܸܛܠ ܕܲܡܫܝܼܚܵܐ ܠܡܲܛܥܝܵܢܘܼܬܼܵܐ ܕܒܲܐܠܵܗܲܝ̈ܗܘܿܢ ܘܲܒܼܚܲܪ̈ܫܲܝܗܘܿܢ
ܫ̣ܪܵܐ ܗ̄ܘ̣ܵܐ: ܐܵܦ ܗܘ̤ ܠܗܵܠܹܝܢ ܕܝܼܠܹܗ ܫܵܪܹܐ: ܟܲܕܼ ܡܲܛܥܸܐ. ܕܲܠܗܵܠܹܝܢ
ܕܐܲܠܵܗܹ̈ܐ ܘܕܚ̈ܠܵܬܼܵܐ ܘܲܕܼܚܲܪ̈ܫܹܐ ܘܕܲܐ̄ܚܪ̈ܵܢܝܵܬܼܵܐ: ܐܲܝܠܹܝܢ ܕܗ̤ܘ ܐܝܼܬܼܵܘܗܝ
ܠܗܹܝܢ ܡܕܲܒܿܪܵܢܵܐ: ܡܸܛܠ ܕܢܸܥܒܸܿܕܼ ܢܲܦܫܹܗ ܪܲܒܵܐ: ܠܟܼܠܗܹܝܢ ܬܚܹܝܬܼ
ܦܲܪܨܘܿܦܵܐ ܕܝܼܠܹܗ ܥܵܒܼ̇ܕܼ: ܐܲܝܟܼ ܕܢܸܤܬܿܒܲܪ ܕܗ̤ܘ ܠܚܘܿܕ ܐܝܼܬܼܵܘܗܝ
ܐܲܠܵܗܵܐ. ܡܸܬܼܚܲܫܲܚ ܓܹܝܪ ܒܒܲܪܢܵܫܵܐ ܐܲܝܟܼ ܕܒܼܐܘܼܪܓܵܢܘܿܢ: ܗܵܘ̇ ܕܢܵܬܼܦܹܗ
ܘܢܲܓܼܕܹܗ ܠܒܼܝܼܫܵܬܐ ܕܠܵܐ ܡܸܬܼܡܲܫܚܵܐ. ܡܫܵܘܬܸܦ ܠܹܗ ܐܵܦ ܠܒܲܪܢܵܫܵܐ
ܒܲܓܼܠܝܼܙܘܼܬܼ ܝܑܼܕܲܥܬܼܵܐ ܐܲܠܵܗܥܵܝܬܼܵܐ: ܐܲܝܟܼ ܕܲܡܥܵܕܹܝܼܬ ܠܡܸܤܥܲܪ
ܒܥܸܠܕܒܼܵܒܹ̈ܐ. ܘܡ̣ܢ ܐܵܢܲܢܩܹܐ ܘܡ̣ܢ ܪܘܼܓܼܙܹܗ ܗܵܠܹܝܢ ܤܵܥܲ݁ܪ:
ܕܲܓܼܡܝܼܪܵܐܝܼܬܼ ܡܸܫܬܲܪ̈ܝܵܢ ܘܒܲܛ̈ܠܵܢ ܥܲܡ ܟ̱ܠܵܗ̇ ܪܹܫܵܢܘܼܬܹܗ. ܘܡܵܐ
ܕܲܢܤܲܒܼ ܫܘܼܠܵܡܵܐ: ܘܠܲܝܬܿ ܠܹܗ ܡܸܕܸܡ ܐ̄ܚܪܹܝܢ ܠܡܸܥܒܲܪ: ܕܲܢܩܵܘܸܐ
pb. 112
ܠܹܗ ܕܢܹܐܫܘܿܕܼ ܟ̱ܠܵܗ̇ ܒܝܼܫܘܼܬܹܗ: ܘܲܕܼܢܸܬܼܓܿܠܸܐ ܠܟܼܠ ܕܠܘܼܩܒܲܠ
ܒܵܪܘܿܝܹܗ ܐܲܩܪܸܒܼ ܚܠܵܦ ܕܥܲܒܼܕܹܗ: ܘܲܚܠܵܦ ܗܵܝ̇ ܕܚܲܝܠܵܐ ܕܐܲܝܟܼ
ܗܵܢܵܐ ܝܲܗ̣̄ܒܼ ܠܹܗ: ܘܲܚܠܵܦ ܕܐܲܪܦܝܹܗ ܕܢܸܬܼܚܲܫܲܚ ܒܚܝܠܹܗ: ܘܟܲܕܼ
ܡܲܩܪܸܒܼ ܗ̄ܘ̣ܵܐ ܒܗܵܠܹܝܢ ܟܠܗܹܝܢ ܤܲܝܒܲܪܹܗ. ܡܟܲܢܸܫ ܠܗܹܝܢ
ܠܟܼܠܗܹܝܢ ܐܲܝܠܹܝܢ ܕܥܵܩܪ̈ܢ ܘܲܡܒܲܛ̈ܠܵܢ ܠܲܛܪܘܼܢܘܼܬܹܗ. ܠܲܝܬܿ
ܠܹܗ ܓܹܝܪ ܢܸܟܼܠܵܐ ܡܸܟܹܝܠ ܕܢܸܬܼܢܟܸܠ ܥܲܠ ܓܒܲܝ̈ܐ ܕܐܲܠܵܗܵܐ:
ܒܲܕܼ ܟܠܗܹܝܢ ܒܟܼܠܗܹܝܢ ܐܸܫܬܲܡܠܝܼ: ܘܡܲܛܥܝܵܢܘܼܬܹܗ ܘܲܙܗܝܼܪܘܼܬܼ
ܦܘܼܩ̈ܕܵܢܹܐ. ܘܲܒܼܟܼܠ ܐܸܙܕܟܼܝ: ܒܛܘܼܫܝܵܐ ܘܲܒܼܛܸܠܝܵܐ: ܘܲܦܝܵܤܵܘ̈ܗܝ
ܘܲܩܛܝܼܪܹܗ ܟ̱ܠܹܗ: ܕܒܹܗ ܐܸܬܼܚܲܫܲܚ ܗ̄ܘ̣ܵܐ ܒܲܡܚܝܼܠܘܼܬܼܵܐ ܘܲܒܼܡܘܼܟܵܟܼܵܐ
ܕܦܲܚܼܪܵܐ. ܘܒܲܕܼܡܘܼܬܼ ܗܵܝ̇ ܕܲܤ̣ܥܲܪ ܨܹܝܕܼ ܡܫܝܼܚܵܐ: ܤ̣ܥܲܪ ܗ̄ܘ̣ܵܐ ܐܵܦ
ܨܹܝܕܼ ܩܲܕܝܼ̈ܫܹܐ: ܐܲܝܟܼ ܕܲܒܼܟܼܠ ܦܘܼܪ̈ܤܝܼܢ ܒܐܘܼ̈ܠܨܵܢܹܐ ܩܫܲܝ̈ܵܐ ܢܲܪܡܸܐ
ܐܸܢܘܿܢ. ܗܵܢ̇ܘܿܢ ܕܹܝܢ: ܒܗܵܠܹܝܢ ܠܵܐ ܐܸܙܕܟܼܝܼܘ. ܗ̤ܘ ܕܹܝܢ ܒܗܵܝ̇
ܕܠܵܐ: ܟܲܕܼ ܡ̣ܢ ܡܫܝܼܚܵܐ ܐܸܙܕܟܼܝܼ: ܦܵܫ̣ ܡ̣ܢ ܕܝܼܠܹܗ. ܘܠܵܐ ܬܘܼܒܼ:
ܟܲܕܼ ܡ̣ܢ ܩܲܕܝܼ̈ܫܹܐ ܐܸܬܼܚܲܝܲܒܼ: ܫܵܪܹܐ ܠܵܗ̇ ܡܫܝܼܚܵܐ ܠܪܹܫܢܘܼܬܹܗ:
ܒܡܵܘܬܵܐ ܗܵܘ̇ ܕܥܵܘܠܵܐܝܼܬܼ ܐܸܬܼ݂ܵܐ ܥܠܵܘܗܝ: ܘܲܓܼܡܝܼܪܵܐܝܼܬܼ
ܡܸܬܼܒܲܛܠܵܐ ܒܡܵܘܬܿܗܘܿܢ ܕܩܲܕܝܼ̈ܫܹܐ: ܗܵܘ̇ ܕܲܒܼܓܼܘܼܡܪܵܐ ܘܠܵܐ ܗ̄ܘ̣ܵܐ
ܒܘܵܠܝܼܬܼܵܐ ܐܲܝܬܿܝܼ ܥܠܲܝܗܘܿܢ. ܘܡܲܥܸܠ ܠܹܗ ܬܚܹܝܬܼ ܕܝܼܢܵܐ ܟܹܐܢܵܐ
ܥܲܠ ܐܲܦܲܝ̈ ܐܲܝܠܹܝܢ ܕܥܵܘܵܠܵܐܝܼܬܼ ܐܵܠܹ̇ܨ ܗ̄ܘ̣ܵܐ ܘܡܸܬܼܟܲܬܲܫ ܠܡܵܘܒܵܕܼܘܼܬܲܢ:
ܘܡܸܛܠ ܟܠܗܘܿܢ ܢܸܟܼܠܵܘ̈ܗܝ ܘܡܲܛܥܵܝܢܘܼܬܹܗ: ܘܟܼܠ ܐܵܕܼܫܵܐ
ܕܲܟܼܦܘܼܪܝܹܗ ܕܲܒܼܛܲܝܒܿܘܼܬܼܵܐ: ܘܕܲܡܫܲܥܠܝܼܘܼܬܹܗ ܘܕܲܛܪܘܼܢܘܼܬܹܗ
ܕܠܘܼܩܒܲܠ ܐܲܠܵܗܵܐ ܘܠܘܼܩܒܲܠ ܩܲܕܝܼܫܵܘ̈ܗܝ. ܙܲܒܼܢܵܐ ܓܹܝܪ ܟ̱ܠܹܗ
pb. 113
ܕܡܲܓܲܪܲܬܼ ܪܘܼܚܹܗ ܕܐܲܠܵܗܵܐ ܠܡܸܬܿܬܵܘܝܵܢܘܼܬܼܵܐ ܐܸܬܼܝܼܗܸܒܼ: ܘܲܕܼܢܹܐܢܸܐ
ܠܕܝܼܠܹܗ: ܘܢܸܕܲܥ ܤܲܟܼܠܘܼܬܹܗ ܘܡܲܪܵܚܘܼܬܹܗ ܕܥܲܠ ܠܵܐ
ܡܸܬܼܡܲܨ̈ܝܵܢܝܵܬܼܵܐ.
ܦܗ. ܕܐܲܝܠܹܝܢ ܚܘܼ̈ܫܵܒܹܐ ܐܸܬܼܚܲܫܲܒܼ ܤܵܛܵܢܵܐ ܠܘܼܩܒܲܠ ܐܲܠܵܗܵܐ.
ܘܟܲܕܼ ܡܸܫܟܲܚ ܗ̄ܘ̣ܵܐ ܕܚܵܫܘܿܫܵܐܝܼܬܼ ܢܥܝܼܩܝܼܘܗܝ ܘܲܢܫܲܢܹܝܘܗܝ
ܠܘܵܬܼ ܬܒܲܥܬܼܵܐ: ܗܵܕܹܐ ܠܵܐ ܤ̣ܥܲܪ: ܐܸܠܵܐ ܫܲܒܼܩܹܗ ܕܢܸܬܼܚܲܫܲܚ
ܒܚܸܡܬܹܗ ܐܲܝܟܲܢܵܐ ܕܨܵܒܹ̇ܐ. ܡܲܓܪ̈ܲܬܼ ܪܘܼܚܵܐ ܓܹܝܪ ܕܥܲܠ ܐܲܝܠܹܝܢ ܕܡ̣ܢ
ܒܝܼܫܘܼܬܼܵܐ ܡܸܤܬܿܡܹܝܢ: ܬܲܪܒܿܝܼܬܼܵܐ ܕܒܼܝܼܫܘܼܬܼܗܘܿܢ ܤܵܥܪܵܐ. ܕܟܲܕܼ
ܚܵܙܹ̇ܝܢ ܠܵܗ̇ ܘܚܲܬܿܝܼܬܼܵܐܝܼܬܼ ܡܦܵܤܝܼܢ ܒܵܗ̇: ܐܲܝܟܼ ܐܲܝܠܹܝܢ ܕܠܵܐ ܚܵܙܹ̇ܝܢ
ܠܵܗ̇ ܕܲܠܩܘܼܒܼܠܵܐ ܤܵܥ̇ܪܝܼܢ. ܠܲܝܬܿ ܠܵܗ̇ ܓܹܝܪ ܬܘܼܪܨܵܐ ܠܬܲܪܒܿܝܼܬܼܵܐ
ܕܒܼܝܼܫܬܼܵܐ: ܕܐܲܝܠܹܝܢ ܕܲܠܘܵܬܼ ܕܲܠܩܘܼܒܼܠܵܐ ܕܵܒܼܪܝܼܢ ܐܨܒܼ̈ܘܵܬܼܵܐ. ܐܵܘ
ܓܹܝܪ ܗܵܕܹܐ ܡܲܤܒܿܪܝܼܢ ܥܲܠ ܡܲܓܿܪܲܬܼ ܪܘܼܚܹܗ ܕܐܲܠܵܗܵܐ: ܕܡܸܛܠ
ܕܠܵܐ ܡܸܫܟܲܚ ܕܲܒܼܚܲܫܹ̈ܐ ܢܲܪܡܸܐ ܐܸܢܘܿܢ: ܒܗܵܝ̇ ܕܲܟܼܝܵܢܵܐ ܠܵܐ ܡܵܝܘܿܬܼܵܐ
ܩܢܹܝܢ. ܥܲܠ ܗܵܕܹܐ ܡܲܓܲܪ ܪܘܼܚܹܗ ܥܠܲܝܗܘܿܢ: ܘܡܸܛܠ ܗܵܕܹܐ
ܤܵܥ̇ܪܝܼܢ ܐܲܝܠܹܝܢ ܕܕܲܠܩܘܼܒܼܠܝܼܢ ܠܐܲܠܵܗܵܐ. ܐܵܘ ܗܵܝ̇: ܕܟܲܕܼ ܢܸܬܿܠܘܼܢ
ܕܟܼܠ ܡܸܕܸܡ ܡܸܫܟܲܚ ܠܡܸܥܒܲܪ: ܤܵܥ̇ܪܝܼܢ ܗܸܢܘ̣ܿܢ ܕܲܠܩܘܼܒܼܠܵܐ
ܕܨܒܼܝܵܢܹܗ: ܕܟܲܕܼ ܨܵܒܹ̇ܐ ܗ̤ܘ ܕܲܢܫܲܚܠܸܦ ܐܸܢܘܿܢ ܒܡܲܓܪܲܬܼ ܪܘܼܚܹܗ
ܡ̣ܢ ܒܝܼܫܘܼܬܼܗܘܿܢ: ܡܸܛܠ ܕܗ̤ܘ ܗܵܕܹܐ ܨܵܒܹ̇ܐ: ܢܩܘܼܡܘܼܢ ܗܸܢܘܿܢ
ܠܘܼܩܒܲܠ ܨܸܒܼܝܵܢܹܗ: ܒܗܵܝ̇ ܕܤܵܥ̇ܪܝܼܢ ܐܲܝܠܹܝܢ ܕܕܲܠܩܘܼܒܼܠܵܐ ܐܸܢܹܝܢ
pb. 114
ܕܗܵܢܹܝܢ ܕܗ̤ܘ ܨܵܒܹ̇ܐ. ܒܲܕܼ ܠܵܐ ܒܵܥܹ̇ܝܢ ܕܢܸܗܘܸܐ ܠܗܘܿܢ ܡܸܢܹܗ
ܦܘܼܪܩܵܢܵܐ: ܡܸܛܠ ܒܥܸܠܕܒܼܵܒܼܘܼܬܼܗܘܿܢ ܘܡܲܪܵܚܘܼܬܼܗܘܿܢ ܕܠܵܐ
ܡܫܘܼܚܬܼܵܐ. ܐܸܠܵܐ ܡܲܡܪܝܼܢ ܠܹܗ ܝܲܬܿܝܼܪܵܐܝܼܬܼ: ܕܢܵܘܒܸܿܕܼ ܐܸܢܘܿܢ. ܒܗܵܝ̇
ܕܐܵܦܠܵܐ ܕܢܸܗܘܘܿܢ ܬܚܹܝܬܼ ܐܲܠܵܗܵܐ ܒܵܥܹ̇ܝܢ: ܘܠܵܐ ܕܢܸܚܘܿܢ. ܘܢܸܚܙܸܐ
ܟܲܕܼ ܡܸܬܼܚܲܝܲܒܼ ܚܘܼܝܵܒܼܵܐ ܕܡ̣ܢ ܒܢܲܝ̈ܢܵܫܵܐ ܒܕܼܝܼܢܵܐ ܟܹܐܢܵܐ: ܐܸܡܲܬܼܝ ܕܐܵܦܠܵܐ
ܚܲܕܼ ܡܲܦܲܩ ܒܪܘܼܚܵܐ ܐܵܘ ܩܛܓܼܪܵܢܘܼܬܼܵܐ ܐܝܼܬܼ ܠܹܗ. ܫܲܒܼܩܹܗ ܓܹܝܪ
ܐܲܠܵܗܵܐ ܠܡܸܥܒܲܕܼ ܟܠ ܡܸܕܸܡ ܕܨܵܒܹ̇ܐ ܗ̄ܘ̣ܵܐ. ܐܲܝܟܼ ܕܠܵܐ ܬܸܗܘܸܐ
ܐܵܦܸܢ ܚܕܼܵܐ ܥܸܠܬܼܵܐ ܠܫܘܼܘܙܵܒܹܗ. ܐܵܦܠܵܐ ܓܹܝܪ ܒܲܚܕܼܵܐ ܫܵܥܵܐ ܡܵܘܒܸܿܕܼ
ܠܹܗ ܐܲܝܟܼ ܕܗ̤ܘ ܒܵܥܹ̇ܐ: ܐܵܦܠܵܐ ܬܘܼܒܼ ܕܠܵܐ ܚܘܼܝܵܒܼܵܐ ܡܲܪܦܸܐ ܠܹܗ.
ܒܗܵܝ̇ ܓܹܝܪ ܕܠܵܐ ܐܲܪܦܝܼ ܠܹܗ ܐܵܦܠܵܐ ܚܕܼܵܐ ܥܸܠܬܼܵܐ ܕܫܘܼܒܼܩܵܢܵܐ:
ܠܗܵܕܹܐ ܛܲܝܸܒܼ ܢܲܦܫܹܗ ܕܡ̣ܢ ܟܠ ܦܪܘܿܣ ܕܠܵܐ ܬܘܼܪܵܨܵܐ ܢܸܗܘܸܐ.
ܐܲܝܢܵܐ ܗܵܟܹܝܠ ܕܒܲܚܤܵܡܵܐ ܘܲܒܼܪܸܚܡܲܬܼ ܪܹܫܵܢܘܼܬܼܵܐ ܐܲܚܝܼܕܼ: ܠܵܐ ܫܵܠܹ̇ܐ
ܡ̣ܢ ܚܤܵܡܹܗ ܥܕܲܡܵܐ ܕܗܵܘܹ̇ܐ ܗܵܘ̇ ܡܸܕܸܡ ܕܡܸܬܼܚܲܤܲܡ ܐܲܝܟܼ
ܨܒܼܝܵܢܹܗ: ܘܐܝܼܬܼܵܘܗܝ ܬܲܚܘܝܼܬܼܵܐ ܠܟܼܠܗܘܿܢ ܟܵܦܪ̈ܲܝ ܒܛܲܝܒܿܘܼܬܼܵܐ.
ܠܹܗ ܓܹܝܪ ܘܲܠܟܼܠܗܘܿܢ ܐܲܝܠܹܝܢ ܕܒܲܕܼܡܘܼܬܹܗ ܢܦܲܠܘ ܒܟܼܘܼܪܗܵܢܵܐ
ܗܵܢܵܐ: ܕܵܐܹ̇ܢ ܠܗܘܿܢ ܐܲܠܵܗܵܐ ܟܹܐܢܵܐܝܼܐܼ: ܘܲܡܒܲܚܸܢ ܠܗܘܿܢ: ܘܵܠܥܹܝܢ
ܟܠ ܡܚܲܝܼܒܼ ܠܗܘܿܢ: ܘܲܒܼܫܲܠܡܘܼܬܼܵܐ ܕܓܼܵܘܵܐ ܡܸܤܬܿܢܹܝܢ. ܘܒܹܗ
ܚܵܙܹ̇ܝܢ ܠܟܼܠܹܗ ܟܦܘܼܪܝܵܐ ܕܲܒܼܛܲܝܒܿܘܼܬܼܵܐ: ܘܲܠܟܼܠܵܗ̇ ܡܲܪܲܚܘܼܬܼܵܐ
ܘܲܡܫܲܥܠܝܘܼܬܼܵܐ: ܘܲܠܟܼܠܗܘܿܢ ܦܘܼܪ̈ܤܹܐ: ܘܲܠܟܼܠܵܗ̇ ܕܲܓܵܠܘܼܬܼܵܐ:
ܘܲܠܟܼܠܹܗ ܪܘܼܫܥܵܐ ܕܲܫܘܲܚ̣ ܘܲܪܒܼܵܐ ܘܐܸܫܬܲܡܠܝܼ: ܐܲܝܟܼ ܕܠܵܐ ܬܘܼܒܼ
ܢܸܫܟܲܚ ܢܩܲܒܸܿܠ ܬܲܪܒܿܝܼܬܼܵܐ ܡܸܕܸܵܡ.
ܦܘ. ܥܲܠ ܗܵܝ̇: ܕܲܒܼܙܲܒܼܢܵܐ ܕܚܘܼܝܵܒܼܵܐ ܡ̣ܢ ܟܠ ܡܸܤܬܿܢܸܐ ܤܵܛܵܢܵܐ:
pb. 115
ܘܐܵܦ ܡ̣ܢ ܐܲܝܠܹܢ ܕܕܝܼܠܹܗ ܐܵܢܘܿܢ: ܐܲܝܟܼ ܡ̇ܢ ܕܵܗܘ̤ܵܐ ܠܗܘܿܢ ܥܸܠܐܬܼܵܐ
ܠܲܡܤܵܡ ܒܪܹܫܵܐ.
ܡܸܛܠ ܗܵܕܹܐ ܐܸܬܼܝܼܗܸܒܼ ܠܹܗ ܗܵܢܵܐ ܟ̱ܠܹܗ ܙܲܒܼܢܵܐ ܕܡܲܚܓܿܪܲܬܼ
ܪܘܼܚܵܐ: ܘܡܸܬܼܝܼܗܸܒܼ ܠܹܗ ܥܕܲܡܵܐ ܠܝܵܘܡܵܐ ܕܕܼܝܼܢܵܐ ܕܢܸܥܒܸܿܕܼ
ܟܠܡܵܐ ܕܨܵܒܹ̇ܐ: ܕܠܵܐ ܬܸܫܬܿܒܸܩ ܠܹܗ ܥܸܠܬܼܵܐ ܕܡܫܟܲܚ ܗ̄ܘ̣ܵܐ ܠܡܸܤܥܲܪ
ܒܵܗ̇ ܡܸܕܸܡ: ܐܸܠܵܐ ܐܸܬܼܝܼܗܸܒܼ ܠܹܗ ܙܲܒܼܢܵܐ ܕܡܲܓܿܪܲܬܼ ܪܘܼܚܵܐ
ܘܲܕܼܫܘܼܠܛܵܢܵܐ. ܘܒܼܵܬܲܪ ܗܵܠܹܝܢ ܡܲܠܝܵܐܝܼܬܼ ܡܸܬܿܬܿܕܝܼܢ ܘܡܸܬܼܪܸܫ
ܡ̣ܢ ܙܲܕܝܼ̈ܩܹܐ: ܥܲܡ ܟܠܗܘܿܢ ܐܲܝܠܹܝܢ ܕܥܲܡܹܗ ܐܸܫܬܵܘܬܲܦܘ
ܒܲܛܪܘܼܢܘܼܬܼܵܐ. ܟܲܕܼ ܐܵܦ ܡ̣ܢ ܗܵܠܹܝܢ ܡܸܤܬܢܸܐ ܘܡܸܬܼܩܲܛܪܲܓܼ:
ܐܲܝܟܼ ܐܲܝܢܵܐ ܕܥܸܠܵܬܼܵܐ ܕܚܘܼܝܵܒܼܵܐ ܗܘ̤ܵܐ ܠܗܘܿܢ. ܐܲܝܟܲܢܵܐ ܕܲܒܼܕܲܟܼܝܘܼܬܼܵܐ
ܕܚܘܼܒܵܐ ܒܡܸܠܬܼܵܐ ܘܲܒܼܤܘܼܥܪ̈ܵܢܹܐ: ܟܠ ܢܸܪܚܲܡ ܠܐܲܠܵܗܵܐ ܐܲܝܟܼ
ܛܵܒܼܵܐ ܘܟܹܐܢܵܐ: ܐܲܝܟܼ ܚܲܟܿܝܼܡܵܐ ܘܐܲܝܟܼ ܚܲܝܠܬܼܵܢܵܐ: ܘܐܲܝܟܼ ܥܵܒܼ̇ܘܿܕܼܵܐ
ܘܐܲܝܟܼ ܐܲܠܵܗܵܐ. ܘܟܲܕܼ ܩܢܹܝܢ ܬܲܚܘܝܼܬܼܵܐ ܠܕܝܼܢܵܐ ܟܹܐܢܵܐ ܕܠܵܐ ܡܲܤܲܒܼ
ܒܐܲܦܹ̈ܐ ܕܛܵܒܹ̈ܐ ܘܲܕܼܒܼܝܼ̈ܫܹܐ: ܘܵܠܝܵܐܝܼܬܼ ܢܹܐܠܦܘܼܢ ܟܠܗܘܿܢ ܚܲܝ̈ܠܵܘܵܬܼܵܐ
ܕܲܡܠܝܼ̈ܠܹܐ ܠܒܼܘܼܚܵܢܵܐ ܕܲܡܠܝܼܠܘܼܬܼܵܐ ܕܛܵܒܼܬܼܵܐ ܘܲܕܼܒܼܝܼܫܵܬܼܵܐ. ܘܲܕܼܡܸܛܠ
ܐܲܝܕܵܐ ܐܲܪܦܝܼ ܐܲܠܵܗܵܐ: ܕܐܲܝܟܼ ܨܒܼܝܵܢܹܗ ܟܠ ܐ̄ܢܵܫ ܢܸܓܼܒܹܿܐ ܠܹܗ: ܘܠܲܐܝܠܹܝܢ
ܕܛܵܒܼ̈ܬܼܵܐ ܓܵܒܹ̇ܝܢ ܫܵܒܹ̇ܩ ܠܗܘܿܢ ܕܢܸܤܒܿܠܘܼܢ ܒܝܼ̈ܫܬܼܵܐ: ܘܠܲܐܝܠܹܝܢ
ܕܕܲܠܩܘܼܒܼܠܵܐ ܕܗܵܠܹܝܢ ܓܒܼܵܘ ܘܡܲܩܪܒܼܝܼܢ ܠܘܼܩܒܲܠ ܨܒܼܝܵܢܹܗ.
ܡܲܓܲܪ ܪܘܼܚܹܗ ܕܟܼܠ ܡܵܐ ܕܓܼܵܒܹ̇ܝܢ ܢܸܤܥܪܘܼܢ. ܘܲܒܼܗܵܢܵܐ ܙܢܵܐ
pb. 116
ܡܸܬܼܡܬܲܚ ܕܘܼܒܵܪܵܐ ܕܥܵܠܡܵܐ ܗܵܢܵܐ: ܗܵܟܲܢܵܐ ܡܸܬܿܕܲܒܲܪ ܡ̣ܢ ܐܲܠܵܗܵܐ
ܥܕܲܡܵܐ ܠܫܘܼܠܵܡܵܐ.
ܦܙ. ܫܘܼܟܼܠܵܠܵܝܐ.
ܘܒܲܬܲܪ ܗܵܠܹܝܢ: ܐܲܟܼܡܵܐ ܕܟܼܠܡܸܕܸܡ ܫܲܦܝܼܪܵܐܝܼܬܼ ܗܘ̤ܵܐ:
ܗܵܘܹ̇ܝܢܲܢ ܒܒܼܘܼܤܵܡܵܐ ܕܲܠܥܵܠܲܡ: ܟܲܕܼ ܥܸܠܬܼܵܐ ܕܡܸܬܼܓܲܠܙܵܢܘܼܬܼܵܐ
ܕܡܸܢܹܗ ܠܲܝܬܿ ܠܲܢ: ܘܠܵܐ ܬܘܼܒܼ ܤܢܝܼܩܝܼܢܲܢ ܥܲܠ ܝܘܼܠܦܵܢܵܐ.
ܦܚ. ܥܲܠ ܗܵ̇ܝ: ܕܐܵܠ̇ܨܵܐ ܗ̄ܘ̣ܬܼ ܕܬܸܗܘܸܐ ܚܕܼܵܝܘܼܬܼܵܐ ܕܲܬܼܪܹܝܢ
ܟܝܵܢܹ̈ܐ: ܘܠܵܐ ܙܵܕܼܩܵܐ ܗ̄ܘ̣ܵܬܼ ܕܲܐ̄ܚܪܵܢܝܵܐܝܼܬܼ ܬܸܗܘܸܐ.
ܡܸܛܠ ܗܵܟܹܝܠ ܗܵܠܹܝܢ ܘܕܲܝܟܼ ܗܵܠܹܝܢ ܥܸܠ̈ܠܵܬܼܵܐ: ܟܹܐܢܵܐܝܼܬܼ
ܗܘ̤ܵܬܼ ܡܸܬܼܒܲܪܢܫܵܢܘܼܬܹܗ ܕܐܲܠܵܗܵܐ. ܐܲܠܵܗܵܐ ܫܲܪܝܼܪܵܐ ܒܲܟܼܝܵܢܵܐ: ܘܒܲܪܢܵܫܵܐ
ܫܲܪܝܼܪܵܐ ܒܲܟܼܝܵܢܵܐ. ܠܵܐ ܓܹܝܪ ܗܵܘ̇ܝܵܐ ܗ̄ܘ̣ܵܬܼ ܚܕܼܵܐ ܡ̣ܢ ܗܵܠܹܝܢ: ܐܸܢ
ܐܸܫܬܿܒܸܩ ܚܲܕܼ ܡ̣ܢ ܗܵܠܹܝܢ ܟܝܵܢܹ̈ܐ. ܐܸܠܘܼܠܵܐ ܗ̄ܘ̣ܵܐ ܐܲܠܵܗܵܐ ܐܸܬܼܒܲܪܢܲܫ:
ܘܐܸܠܘܼܠܵܐ ܒܒܲܪܢܵܫܵܐ ܕܡ̣ܢ ܟܝܵܢܵܐ ܕܲܒܼܢܲܝ̈ܢܵܫܵܐ ܗ̄ܘ̣ܵܐ: ܐܲܝܟܼ
ܕܲܒܼܡܲܛܥܝܵܢܘܼܬܼܵܐ ܓܹܝܪ ܗܵܘ̇ܝܵܐ ܗ̄ܘ̣ܵܬܼ. ܘܲܫܪܵܪܵܐ: ܕܡܸܠܵܘ̈ܗܝ
ܕܤܵܛܵܢܵܐ ܗܵܘ̈ܝܵܢ ܗ̣̄ܘܲܝ̈ ܗܵܠܹܝܢ: ܕܲܡܫܝܼܚܵܐ ܕܡܲܤܠܵܝܘܼ ܐܲܤ̱ܠܝܵܗ̇
ܠܲܓܼܒܼܝܼܠܬܹܗ ܡ̣ܢ ܨܱܲܠܡܹܗ ܐܲܝܟܼ ܫܝܼܛܬܐ. ܡܸܛܠ ܗܵܢܵܐ: ܐܵܦܠܵܐ
ܡܲܠܦܵܢܘܼܬܼܵܐ ܕܡܲܟܿܝܼܟܼܘܼܬܼܵܐ ܘܲܕܼܡܸܫܬܲܡܥܵܢܘܼܬܼܵܐ ܘܲܕܼܡܸܬܼܢܲܚܬܼܵܢܘܼܬܼܵܐ
ܗܵܘ̇ܝܵܐ ܗ̄ܘ̣ܵܬܼ. ܕܗ̤ܘ ܐܝܼܬܼܵܘܗܝ ܦܸܚܡܵܐ ܘܲܕܼܡܘܼܬܼܵܐ ܕܐܲܠܵܗܵܐ: ܟܲܕܼ
ܕܡܘܼܬܼܵܐ ܕܥܲܒܼܕܵܐ ܠܵܐ ܢܤܲܒܼ: ܕܒܲܕܼܡܘܼܬܼܵܐ ܢܸܫܬܿܟܲܚ ܐܲܝܟܼ ܒܲܪܢܵܫܵܐ:
ܐܸܠܵܐ ܝܲܬܿܪܵܐܝܼܬܼ ܟܹܐܢܘܼܬܼܵܐ ܕܡܸܠܵܘ̈ܗܝ ܕܤܵܛܵܢܵܐ: ܕܡܸܛܠ
pb. 117
ܕܲܚܙܵܝܗܝ ܗ̄ܘ̣ܵܐ ܕܲܒܼܨܝܼܪ ܒܲܟܼܝܵܢܹܗ ܡ̣ܢ ܨܲܠܡܵܐ ܘܲܕܼܡܘܼܬܼܵܐ ܕܐܝܼܩܵܪܵܐ
ܕܐܲܠܵܗܵܐ: ܫܵܛܹܗ ܗ̄ܘ̣ܵܐ. ܘܟܼܠܗܘܿܢ ܡܲܠܲܐܟܹ̈ܐ: ܐܵܦܸܢ ܐܲܝܟܼ ܕܠܲܐܠܵܗܵܐ
ܡܸܬܿܛܦܝܼܤܝܼܢ ܗ̄ܘ̣ܵܘ ܠܹܗ: ܘܠܵܐ ܡܸܫܟܿܚܝܼܢ ܗ̄ܘ̣ܵܘ ܕܢܲܡܪ̱ܚܘܼܢ
ܠܡܹܐܡܲܪ ܠܩܘܼܒܼܠܹܗ. ܗ̤ܝ ܡܸܠܬܼܵܐ ܥܵܨ̇ܝܵܐ ܗ̄ܘ̣ܵܬܼ ܕܠܵܐ ܢܸܥܕܠܘܼܢܵܝܗܝ
ܠܤܵܛܵܢܵܐ ܒܡܸܕܼܡ: ܐܲܝܟܼ ܐܲܝܢܵܐ ܕܒܼܚܲܫܵܐ ܕܠܵܐ ܙܵܕܹܩ ܐܸܬܼܪ̱ܡܝܼ
ܠܗܵܕܹܐ: ܥܲܠ ܐܝܼܩܵܪܵܐ ܕܠܵܐ ܡܫܫܘܼܚܬܼܵܐ ܕܲܟܼܝܵܢܵܐ ܕܒܲܪܢܵܫܵܐ. ܐܵܦܸܢ
ܒܗܵܕܹܐ ܐܸܬܼܥܕܲܠ: ܕܲܠܦܘܼܩܕܵܢܵܐ ܐܲܝܢܵܐ ܕܗ̤ܘ ܕܐܲܠܵܗܵܐ ܙܵܕܹܩ ܗ̄ܘ̣ܵܐ
ܠܹܗ ܕܢܸܫܬܿܡܲܥ. ܘܡܸܛܠ ܕܚܲܫܵܐ ܗܵܢܵܐ ܐܝܼܬܼ ܗ̄ܘ̣ܵܐ ܒܢܲܦܫܗܘܿܢ:
ܡܫܲܡܫܝܼܢ ܗ̄ܘ̣ܵܘ ܠܹܗ ܡܸܛܠ ܗܵܘ̇ ܕܲܦܩܲܕܼ ܐܸܢܘܿܢ: ܘܠܵܘ
ܒܨܒܼܝܵܢܵܐ ܛܵܒܼܵܐ.
ܦܛ. ܥܲܠ ܗܵܝ̇: ܕܐܵܦܠܵܐ ܐܸܢ ܒܐܸܤܟܹܡܵܐ ܕܒܲܪܢܵܫܵܐ: ܘܠܵܘ ܒܲܟܼܝܵܢܵܐ
ܕܒܲܪܢܵܫܵܐ ܗ̄ܘ̣ܵܐ: ܡܸܬܼܩܲܝܡܵܐ ܗ̄ܘ̣ܵܬܼ ܡܸܠܬܼܵܐ ܕܡܸܬܼܒܲܪܢܵܫܵܢܘܼܬܼܵܐ.
ܘܐܵܦܸܢ ܢܸܬܸܿܠ ܐ̄ܢܵܫ ܕܒܸܐܤܟܹܡܵܐ ܕܒܲܪܢܵܫܵܐ: ܠܵܐ ܕܹܝܢ ܒܲܟܼܝܵܢܵܐ
ܕܒܲܪܢܵܫܵܐ ܐܸܬܼܒܲܪܢܵܫ: ܗ̤ܝ ܟܲܕܼ ܗ̤ܝ ܡܸܤܬܲܠܝܵܢܘܼܬܼܵܐ ܕܲܟܼܝܵܢܵܐ
ܐ̄ܢܵܫܵܝܵܐ ܐܵܡܲ݁ܪ.
ܨ. ܥܲܠ ܗܵܝ̇: ܕܐܵܦܠܵܐ ܐܸܢ ܢܫܲܚܠܸܦ ܟܝܵܢܵܐ ܕܝܼܠܹܗ ܠܲܟܼܝܵܢܵܐ
ܕܒܲܢܵܫܵܐ: ܡܸܬܼܩܲܝܡܵܐ ܗ̄ܘ̣ܵܬܼ ܡܸܠܬܼܵܐ ܕܡܸܬܼܒܲܪܢܫܵܢܘܼܬܼܵܐ.
ܘܐܵܦܸܢ ܫܲܚܠܸܦ ܠܐܘܼܤܝܼܵܐ ܕܝܼܠܹܗ ܠܐܘܼܤܝܼܵܐ ܕܒܲܪܢܵܫܵܐ: ܡܸܬܼܚܲܙܝܵܐ
ܕܡܲܤܠܵܝܘܼ ܐܲܤܠ̱ܝܹܗ ܠܲܟܼܝܵܢܵܐ ܕܒܲܪܢܵܫܵܐ. ܒܗܵܝ̇ ܕܒܼܐܘܼܤܝܼܵܐ ܕܝܼܠܹܗ
ܗܘ̤ܵܐ: ܘܠܵܘ ܒܐܘܼܤܝܼܵܐ ܕܒܲܪܢܵܫܵܐ. ܠܵܘ ܓܹܝܪ ܡ̣ܢ ܐܲܪܥܵܐ: ܐܸܠܵܐ ܡ̣ܢ
ܟܝܵܢܵܐ ܕܐܲܠܵܗܵܐ ܡܸܠܬܼܵܐ ܐܝܼܬܹܝܗ̇ ܠܹܗ ܐܘܼܤܝܼܵܐ ܗܵܕܹܐ: ܘܡܸܛܠ
pb. 118
ܗܵܢܵܐ ܐܲܠܵܗܵܐ ܡܸܠܬܼܵܐ ܡܸܬܼܚܲܙܝܵܐ ܕܐܸܬܼܚܲܟܲܡ ܒܕܼܘܼܒܵܪܵܐ ܐ̄ܢܵܫܵܝܵܐ:
ܕܲܢܩܵܘܸܐ ܕܠܵܐ ܚܛܵܗܹ̈ܐ ܐܲܝܟܼ ܐܲܝܢܵܐ ܕܐܝܼܵܘܗܝ ܒܲܪܢܵܫܵܐ: ܗܵܘ̇
ܕܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ ܒܐܘܼܤܝܼܵܐ ܕܝܼܠܹܗ. ܗܵܟܲܢܵܐ ܘܐܵܦ
ܐܸܬܿܕܲܒܲܪ ܐܲܝܟܼ ܒܲܪܢܵܫܵܐ: ܟܲܕܼ ܠܵܐ ܐܝܼܬܼܵܘܗܝ ܒܲܟܼܝܵܢܵܐ ܒܲܪܢܵܫܵܐ: ܐܸܠܵܐ
ܐܲܠܵܗܵܐ ܡܸܠܬܼܵܐܘ ܐܵܦ ܟܲܕܼ ܐܸܬܼܟܲܬܲܫ ܘܲܙܟܼܵܝܗܝ ܠܲܒܼܥܸܠܕܲܪܵܐ: ܘܐܵܦ
ܟܲܕܼ ܚܵܐܹ̇ܫ ܗ̄ܘ̣ܵܐ: ܗܵܘ̇ ܕܠܵܐ ܚܵܫܘܿܫܵܐ ܐܝܼܬܼܵܘܗܝ ܗ̄ܘ̣ܵܐ ܒܲܟܼܝܵܢܹܗ ܚܵܐܹ̇ܫ
ܗ̄ܘ̣ܵܐ. ܘܗܵܟܼܘܵܬܼ ܐܵܦ ܒܗܵܠܹܝܢ ܐ̄ܚܪ̈ܵܢܝܵܬܼܵܐ: ܘܐܵܦܸܢ ܒܲܪܢܵܫܵܐ ܢܹܐܡܲܪ
ܕܲܢܤܲܒܼ: ܘܠܲܟܼܝܵܢܵܐ ܕܒܲܪܢܵܫܵܐ ܠܐܘܼܤܝܼܵܐ ܕܝܼܠܹܗ ܫܲܚܠ̱ܦܹܗ: ܠܙܵܟܼܘܼܬܼܵܐ
ܕܐܲܝܠܹܝܢ ܕܡܲܤܠܹܝܢ ܠܵܐ ܫ̣ܪܵܐ: ܕܒܲܪܢܵܫܵܐ ܡܩܝܼܡܝܼܢ. ܘܡܸܛܠܗܵܕܹܐ
ܫܲܚ̱ܠܦܹܗ ܠܲܟܼܝܵܢܹܗ ܕܒܸܤܪܵܐ: ܕܡܲܤܠ̱ܝܵܐ ܐܝܼܬܼܵܘܗܝ ܠܹܗ: ܕܠܵܐ
ܢܸܨܛܲܥܲܪ ܐܲܠܵܗܵܐ: ܟܲܕܼ ܒܲܟܼܝܵܢܵܐ ܕܒܲܪܢܵܫܵܐ ܗ̄ܘ̣ܵܐ. ܘܒܹܗ ܒܲܙܢܵܐ ܘܐܵܦ
ܕܘܼܒܵܪܹ̈ܐ ܘܚܲܫܹ̈ܐ ܘܡܵܘܬܵܐ: ܠܵܐ ܐܝܼܬܲܝܗܘܿܢ ܕܒܲܪܢܵܫܵܐ: ܘܠܵܐ ܬܘܼܒܼ
ܕܥܲܠ ܐܲܦܲܝ̈ ܒܢܲܝ̈ ܐ̄ܢܵܫܵܐ. ܘܡܵܕܹܝܢ ܘܠܵܐ ܒܡܵܘܬܵܐ ܕܐܲܠܵܗܵܐ: ܐܸܠܵܐ
ܐܸܢܗ̤ܘ ܐܲܠܵܗܵܐ ܡܸܬܼܚܲܝܲܒ ܗ̄ܘ̣ܵܐ ܡܵܘܬܵܐ. ܐܸܢ ܨܵܒܹ̇ܿܐ ܗ̄ܘ̣ܵܐ
ܕܢܸܫܒܿܩܝܼܘܗܝ: ܐܵܦ ܒܸܠܥܵܕܼ ܡ̣ܢ ܡܵܘܬܵܐ ܕܝܠܹܗ ܫܵܪܹܐ ܗ̄ܘ̣ܵܐ ܠܹܗ:
ܝܲܬܿܝܼܪ ܡ̣ܢ ܐܸܤܟܹܡܵܐ ܕܡܵܘܢܵܐ. ܐܸܠܵܐ ܡܸܛܠ ܕܐܲܠܵܗܵܐ ܐܝܼܬܼܵܘܗܝ
ܗ̄ܘ̣ܵܐ ܘܠܵܐ ܡܵܝܘܿܬܼܵܐ: ܠܦܲܪܨܘܿܦܹܗ ܗܵܘ̇ ܕܠܵܐ ܚܲܝ̇ܒܼ ܗ̄ܘ̣ܵܐ ܠܡܵܘܬܵܐ
ܢܤܲܒ̣ ܗ̄ܘ̣ܵܐ: ܗܵܢܵܘ ܕܹܝܢ ܠܡܵܝܘܿܬܼܵܐ ܘܲܠܡܸܫܬܲܚ̱ܠܦܵܢܵܐ:
ܕܲܒܼܦܘܼܩ̈ܕܵܢܹܐ ܘܒܲܛܘܼܪ̈ܵܬܼܵܐ ܡܸܫܟܲܚ ܗ̄ܘ̣ܵܐ ܠܡܲܩܪܵܒܼܘܼ ܠܘܼܩܒܲܠ
ܚܵܘܒܿܬܼܵܐ: ܕܬܸܗܘܸܐ ܙܵܟܼܘܼܬܼܵܐ ܠܨܲܠܡܹܗ ܘܠܲܕܼܡܘܼܬܹܗ: ܕܗ̤ܘ ܟܲܕܼ
pb. 119
ܗ̤ܘ ܢܸܗܘܸܐ ܗܵܘ̇ ܕܢܲܤܒܹܗ ܠܡܵܘܬܵܐ ܐܲܝܟܼ ܚܵܘܒܿܬܼܵܐ. ܘܲܠܗܵܘ̇ ܕܝܲܗ̣̄ܒܼ
ܠܵܐ ܡܵܝܘܿܬܼܘܼܬܼܵܐ ܐܲܝܟܼ ܚܪܘܼܪܹ̈ܐ ܕܡ̣ܢ ܚܵܘܒܿܬܼܵܐ: ܟܲܕܼ ܐܸܬܼܢ̱ܛܲܪ ܕܠܵܐ
ܟܘܼ̈ܬܼܡܵܬܼܵܐ ܒܨܲܠܡܵܐ ܕܝܼܠܹܗ. ܘܐܲܝܟܲܢܵܐ ܕܚܲܝܒܹܗ ܟܲܕܼ ܚܵܒܼ: ܗܵܟܲܢܵܐ
ܐܵܦ ܟܲܕܼ ܙܟܼܵܐ: ܐܲܪܝܼܡܹܗ ܠܲܫܡܵܐ ܕܲܠܥܸܠ ܡ̣ܢ ܟܠ ܡܫܵܗ̈ܝܼܢ: ܘܠܵܐ
ܬܘܼܒܼ ܒܦܘܼܩ̈ܕܵܢܹܐ ܘܒܲܢܛܘܼܪ̈ܵܬܼܵܐ ܩܢ̣ܵܗ̇ ܠܹܗ: ܐܸܠܵܐ ܒܙܵܟܼܘܼܬܼܵܐ
ܡܵܪܵܢܵܐܝܼܬܼ ܟܲܕܼ ܠܵܐ ܡܸܬ̱ܢܤܸܒܼ ܡܸܢܹܗ. ܐܲܝܟܲܢܵܐ ܕܲܒܼܪܵܐ ܟܲܕܼ ܪܵܒܹܐ
ܘܡܸܫܬܲܡܠܸܐ: ܒܲܡܫܲܠܛܘܼܬܼܵܐ ܐܝܼܬܼ ܠܹܗ ܕܢܸܗܘܸܐ ܒܪܵܐ: ܗܵܘ̇
ܕܩܲܕܼܡܵܝܑܬܼ ܬܚܹܝܬܼ ܫܘܼܠܛܵܢܵܐ ܐܝܼܬܼܵܘܗܝ ܗ̄ܘ̣ܵܐ: ܟܲܕܼ ܛܵܒܼ ܐܵܦ
ܗܵܝܕܹܝܟ ܐܲܝܟܼ ܒܪܵܐ ܐܝܼܬܼܵܘܗܝ ܗ̄ܘ̣ܵܐ.
ܨܐ. ܥܲܠ ܗܵܝ̇: ܕܐܵܦܸܢ ܢܸܬܸܠ ܐ̄ܢܵܫ ܚܕܼܵܝܘܼܬܼܵܐ ܕܲܒܼܪܘܼܟܵܒܼܵܐ
ܟܝܵܢܵܝܵܐ: ܐܵܘ ܒܒܼܘܼܠܒܵܠܵܐ: ܐܵܘ ܒܲܚܒܼܝܼܟܼܘܼܬܼ ܟܝܵܢܵܐ:
ܠܵܐ ܡܸܢܼܩܲܝܡܵܐ ܡܸܠܬܼܵܐ ܕܡܸܬܼܒܲܪܢܫܵܢܘܼܬܼܵܐ.
ܡܸܛܠܵܬܼܵܗ̇ ܕܝܼܠܵܗ̇ ܕܗܵܕܹܐ: ܐܵܦܸܢ ܢܸܬܸܠ ܐ̄ܢܵܫ ܕܲܠܐ̄ܢܵܫܘܼܬܼܵܐ
ܒܲܟܸܝܵܢܹܗ ܩܲܒܿܠܵܗ̇ ܐܲܠܵܗܵܐ ܡܸܠܬܼܵܐ: ܐܵܘ ܒܡܘܼܙܵܓܼܵܐ: ܐܵܘ ܒܒܼܘܼܠܒܵܠܵܐ:
ܐܵܘ ܒܫܵܘܬܵܦܘܼܬܼ ܐܘܼܤܝܼܵܐ: ܘܲܡܒܲܛܸܠ ܠܹܗ ܠܲܟܼܝܵܢܵܐ ܕܒܲܪܢܵܫܵܐ:
ܡܲܤ̱ܠܝܵܐ ܡܚܵܘܸܐ ܠܹܗ ܠܲܟܼܝܵܢܵܐ ܐ̄ܢܵܫܵܝܵܐ. ܘܲܕܼܠܵܐ ܡܸܫܟܲܚ ܗ̄ܘ̣ܵܐ
ܕܢܸܬܼܢ̱ܛܲܪ ܕܠܵܐ ܚܛܵܗܹ̈ܐ: ܡܸܛܠ ܕܠܵܘ ܟܝܵܢܹܗ ܙܟܼܵܐ: ܐܸܠܵܐ ܗܵܘ̇
ܕܡ̣ܢ ܬܪ̈ܲܝܗܘܿܢ ܗ̄ܘ̣ܵܐ. ܘܲܡܚܵܘܸܐ: ܕܤܵܛܵܢܵܐ: ܒܲܕܼ ܠܵܐ ܡܸܫܟܲܚ
ܗ̄ܘ̣ܵܐ: ܚܵܒܼ. ܘܟܲܕܼ ܚܲܝܸܒܼ ܗ̄ܘ̣ܵܐ ܒܫܘܼܪܵܝܵܐ ܠܒܲܪܢܵܫܵܐ ܗܵܘ̇ ܕܲܚܛ̣ܵܐ:
ܠܗܵܘ̇ ܕܠܑܵܐ ܡܸܫܟܲܚ ܗ̄ܘ̣ܵܐ ܕܢܸܗܘܸܐ ܕܠܵܐ ܚܛܵܗܹ̈ܐ ܚܲܝܸܒܼ. ܡܸܛܠ
ܕܠܵܐ ܐܝܼܬܼܵܘܗܝ ܗ̄ܘ̣ܵܐ ܡ̣ܢ ܟܝܵܢܵܐ ܕܠܵܐ ܚܛܵܗܹ̈ܐ ܕܐܲܠܵܗܵܐ ܡܸܠܬܼܵܐ:
pb. 120
ܐܸܠܵܐ ܡ̣ܢ ܟܝܵܢܵܐ ܕܒܲܪܢܵܫܵܐ ܚܲܛܵܝܵܐ. ܘܐܸܬܼܚܵܘܝܼ ܤܵܛܵܢܵܐ ܕܲܒܼܕܼܝܼܢܵܐ ܥܲܡ
ܒܲܪܢܵܫܵܐ ܡܡܲܠܸܠ ܗ̄ܘ̣ܵܐ: ܡܸܙܕܟܼܵܝܘܼ ܕܹܝܢ ܡ̣ܢ ܐܲܠܵܗܵܐ ܐܸܙܕܟܼܝܼ ܗ̄ܘ̣ܵܐ:
ܗܵܘ̇ ܕܠܲܝܬܿ ܠܹܗ ܠܲܟܼܝܵܢܹܗ ܕܡܸܙܕܟܸܐ ܡ̣ܢ ܡܸܕܸܡ. ܘܕܲܬܼܪ̈ܲܝܗܘܿܢ
ܕܲܫܥܵܬܼܵܐ ܗ̣̄ܘܲܝ̈: ܒܗܵܝ̇ ܕܲܦܩܲܕܼ ܠܤܵܛܵܢܵܐ ܘܲܠܒܲܪܢܵܫܵܐ ܠܵܐ
ܡܸܬܼܡܲܨܝܵܢܝܵܬܼܵܐ ܠܡܸܥܒܲܕܼ. ܐܸܢ ܕܹܝܢ ܐܲܝܠܹܝܢ ܕܐܸܢܼܦܲܩܲܕܼ ܡܸܬܼܡܲܨ̈ܝܵܢܝܵܬܼܵܐ
ܗ̣̄ܘܲܝ̈ ܠܡܸܤܬܿܥܵܪܘܼ ܘܠܵܐ ܐܸܬܼܢܛܲܪ: ܟܹܐܢܵܐܝܼܬܼ ܐܸܬܼܚܲܝܲܒܼ ܗ̄ܘ̣ܵܐ
ܤܵܛܵܢܵܐ. ܕܟܲܕܼ ܡܸܫܟܲܚ ܗ̄ܘ̣ܵܐ ܕܢܸܫܬܿܡܲܥ: ܠܵܐ ܐܸܫܬܿܡܲܥ. ܐܸܠܵܐ
ܩܵܡ̣ ܠܘܼܩܒܲܠ ܐܲܠܵܗܵܐ: ܒܝܲܕܼ ܐܸܤܟܹܡܵܐ ܕܒܲܪܢܵܫܵܐ. ܘܐܸܟܲܠ̣
ܩܲܪ̈ܨܵܘܗܝ ܕܐܲܠܵܗܵܐ ܩܕܼܵܡ ܒܲܪܢܵܫܵܐ: ܕܚܲܤܵܡܵܐ ܐܝܼܬܼܵܘܗܝ.
ܘܲܕܼܒܲܪܢܵܫܵܐ ܩܕܼܵܡ ܐܲܠܵܗܵܐ: ܐܲܝܟܼ ܟܵܦܲܪ ܒܛܲܝܒܿܘܼܬܼܵܐ. ܘܐܝܼܬܼܵܘܗܝ
ܒܥܸܠܕܒܼܵܒܼܵܐ ܕܟܼܠ: ܘܩܲܒܸܿܠ̣ ܕܝܼܢܵܐ ܟܹܐܢܵܐ: ܘܐܸܬܼܟܤܸܣ ܓܲܠܝܵܐܝܼܬܼ.
ܐܸܬܼܚܲܝܲܒܼ ܓܹܝܪ ܡ̣ܢ ܡܫܝܼܚܵܐ ܒܐ̄ܢܵܫܘܼܬܹܗ: ܘܡ̣ܢ ܩܲܕܝܼܫܵܘ̈ܗܝ:
ܕܓܲܠܝܵܐܝܼܬܼ ܠܘܼܩܒܲܠ ܐܲܠܵܗܵܐ ܩ̣ܵܡ ܗ̄ܘ̣ܵܐ ܘܐܵܦ ܩܵܐܹ̇ܡ. ܘܚ̣ܵܘܝܼ:
ܕܐܸܠܘܼܠܵܐ ܐܸܫܟܲܚ ܗ̄ܘ̣ܵܐ ܠܡܲܛܥܵܝܘܼܬܹܗ ܠܒܲܪܢܵܫܵܐ ܩܲܕܼܡܵܝܵܐ: ܡ̣ܢ
ܗܵܝܕܼܝܼܟ ܒܓܸܠܝܵܐ ܘܠܵܐ ܗ̄ܘ̣ܵܐ ܒܐܸܤܟܹܡܵܐ ܕܗܵܢܵܐ ܘܲܕܼܗܵܘ̇ ܡܲܩܪܸܒܼ
ܗ̄ܘ̣ܵܐ ܠܘܼܩܒܲܠ ܐܲܠܵܗܵܐ. ܘܐܵܦܸܢ ܠܵܐ ܡܸܫܟܲܚ ܗ̄ܘ̣ܵܐ ܡܸܕܸܡ
ܠܡܸܥܒܲܕܼ: ܒܪܸܥܝܵܢܹܗ ܗܵܘ̇ ܡܵܐ ܕܒܼܵܥܹ̇ܐ ܗ̄ܘ̣ܵܐ ܠܡܸܥܒܲܕܼ ܡܵܪܵܢܵܐܝܼܬܼ
ܩܢ̣ܵܐ: ܐܲܝܟܼ ܐܲܝܢܵܐ ܕܡܸܫܟܲܚ ܗ̄ܘ̣ܵܐ ܟܠ ܡܸܕܸܡ ܠܡܸܤܥܲܪ
ܘܲܠܡܲܦܤܘܼ ܘܲܠܡܲܩܪܵܒܼܘܼ. ܘܡܸܫܟܲܚ ܗ̄ܘ̣ܵܐ ܕܢܵܒܿܕܼܝܼܘܗܝ ܒܲܪ
ܫܵܥܬܹܗ: ܒܲܕܼ ܫܵܘܹ̇ܐ ܗ̄ܘ̣ܵܐ ܠܐܲܒܼܕܵܢܵܐ. ܐܸܠܵܐ ܐ̄ܚܪ̈ܵܢܹܐ ܠܵܐ ܝܵܠ̇ܦܝܼܢ ܗ̄ܘ̣ܵܘ
pb. 121
ܕܚܲܠܬܼܵܢܝܵܐ ܒܝܼܫܬܼܵܐ ܘܲܠܝܵܬܼܵܗ̇ ܡܛܲܠܩܵܐ: ܐܸܠܘܼ ܠܵܐ ܡ̣ܢ ܟܠ
ܦܘܼܪ̈ܤܝܼܢ ܝܑܼܕܲܥ̣ܘ ܕܐܲܝܟܼ ܛܲܝܒܿܘܼܬܼܵܐ ܢܤܲܒܼܘ ܠܡܸܫܬܲܥܒܿܕܵܢܘܼܬܼܵܐ:
ܘܡ̣ܢ ܡܸܫܬܲܥܒܿܕܵܢܘܼܬܼܵܐ ܠܗܵܕܹܐ ܛܲܝܒܿܘܼܬܼܵܐ ܜܢ̣ܵܘ: ܕܠܵܐ ܢܲܡ̱ܪܚܘܼܢ
ܠܘܼܩܒܲܠ ܐܲܠܵܗܵܐ: ܘܡ̣ܢ ܗܵܕܹܐ ܥܲܡ ܐ̄ܚܪ̈ܵܢܹܐ ܢܸܦ̱ܪܩܘܼܢ ܐܵܦ ܗܸܢܘܿܢ
ܡ̣ܢ ܐܲܠܵܗܵܐ. ܐܲܝܟܲܢܵܐ ܡܵܕܹܝܢ ܠܡܸܬܼܒܲܪܢܫܵܢܘܼܬܹܗ ܬܚܹܝܬܼ ܟܸܫܠܵܐ
ܥܵܒܹ̇ܕܼ ܗ̄ܘ̣ܵܐ: ܒܡܘܼܙܵܓܼܵܐ: ܐܵܘ ܒܒܼܘܼܠܒܵܠܵܐ: ܐܵܘ ܒܫܵܘܬܵܦܘܼܬܼܵܐ
ܟܝܵܢܵܝܬܼܵܐ: ܕܠܵܐ ܐܲܠܵܗܵܐ ܢܸܤܬܿܒܲܪ ܘܠܵܐ ܬܘܼܒܼ ܒܲܪܢܵܫܵܐ: ܐܸܠܵܐ ܕܡ̣ܢ
ܬܪ̈ܲܝܗܘܿܢ ܗ̄ܘ̣. ܘܠܵܐ ܐܝܼܬܼܵܘܗܝ ܕܲܟܼܝܵܐ ܘܲܕܼܠܵܐ ܦܘܼܠܵܓܼ: ܡܸܛܠ
ܗܵܢܵܐ ܡܵܕܹܝܢ ܐܝܼܬܼܵܘܗܝ ܥܲܡ ܐ̄ܢܵܫܘܼܬܼܵܐ: ܐܲܝܟܼ ܕܲܝܵܢܵܐ ܒܕܼܝܼܢܵܐ
ܘܒܼܵܐܓܼܘܿܢܵܐ ܫܲܪܝܼܪܵܐ: ܟܲܕܼ ܩܢܸܐ ܠܵܗ̇ ܒܦܲܪܨܘܼܦܹܗ ܕܝܼܠܹܗ:
ܘܡܸܫܬܲܡܥܵܐ ܠܹܗ ܒܟܼܠ ܡܸܕܸܡ. ܘܠܵܘ ܗ̤ܘ ܐܝܼܬܼܵܘܗܝ ܕܡܸܬܼܟܲܬܲܫ
ܘܡܸܬܬܕܝܼܢ: ܐܸܠܵܐ ܐܲܝܟܼ ܟܡܵܐ ܕܲܠܒܲܝܬܵܝܘܼܬܼܵܐ ܩܲܪܒܼܵܗ̇ ܠܨܲܠܡܵܐ
ܕܝܼܠܹܗ: ܘܠܵܐ ܗ̄ܘ̣ܵܐ ܠܲܟܼܝܵܢܵܐ ܕܐܘܼܤܝܼܵܐ ܠܵܐ ܡܸܙܕܲܟܼܝܵܢܝܼܬܢܼܵܐ ܘܠܵܐ
ܚܵܫܘܿܫܬܼܵܐ ܕܐܲܠܵܗܘܼܬܼܵܐ. ܠܵܐ ܓܹܝܪ ܕܝܼܢܵܐ ܐܝܼܬܼ ܗ̄ܘ̣ܵܐ ܠܤܵܛܵܢܵܐ ܠܘܵܬܼ
ܐܲܠܵܗܵܐ: ܕܢܸܥܒܿܕܼܝܼܘܗܝ ܕܠܵܐ ܢܸܫܬܿܡܲܥ ܠܹܗ. ܐܸܠܵܐ ܕܲܢܦܝܼܣ
ܠܐܲܠܵܗܵܐ: ܕܒܲܪܢܵܫܵܐ ܕܝܼܠܹܗ ܠܵܐ ܫܵܡܲܥ ܠܹܗ. ܗܵܘ̇ ܕܟܲܕܼ ܒܟܼܠ
ܡܸܕܸܡ ܩܲܒܸܿܠ̣ ܡܸܫܬܲܡܥܵܢܘܼܬܼܵܐ ܒܪܸܥܝܵܢܵܐ ܫܲܦܝܼܪܵܐ: ܥܲܠܝܼ ܝܲܩܪܹܗ
ܒܨܲܠܡܹܗ ܕܝܼܠܹܗ: ܕܲܢܚܵܘܸܐ ܕܕܲܝܵܢܵܐ ܗ̄ܘ̣ ܟܹܐܢܵܐ.
ܨܒ. ܥܲܠ ܗܵܝ̇: ܕܐܵܦܠܵܐ ܐܸܢ ܢܸܬܸܿܠ ܐ̄ܢܵܫ ܚܲܕܼ ܟܝܵܢܵܐ ܕܪܘܼܟܵܒܼܵܐ
ܟܝܵܢܵܝܵܐ: ܐܵܘ ܕܒܸܤܪܵܐ ܕܠܵܐ ܢܦܸܫ: ܐܵܘ ܒܲܡܢܲܦܫܵܐ ܕܡ̣ܢ ܢܲܦܫܵܐ
pb. 122
ܕܚܲܝ̈ܘܵܬܼܵܐ: ܐܵܘ ܒܢܲܦܫܵܐ ܡܠܝܼܠܬܼܵܐ ܠܲܚܕܼܵܝܘܼܬܼܵܐ ܟܝܵܢܵܝܬܼܵܐ: ܡܸܬܼܩܲܝܡܵܐ
ܡܸܠܬܼܵܐ ܕܡܸܬܼܒܲܪܢܫܵܢܘܼܬܼܵܐ.
ܒܹܗ ܕܹܝܢ ܒܲܙܢܵܐ: ܐܵܦܠܵܐ ܐܲܝܠܹܝܢ ܕܐܵܡ̇ܪܝܼܢ ܕܲܒܼܪܘܼܟܵܒܼܵܐ ܟܝܵܢܵܝܵܐ
ܐܸܬܼܚܲܝܲܕܼ ܒܸܤܪܵܐ ܠܐܲܠܵܗܵܐ ܡܸܠܬܼܵܐ: ܐܲܟܼܙܢܵܐ ܕܐܵܪ̈ܝܵܢܹܐ: ܘܲܒܼܚܲܫܹ̈ܐ ܟܝܵܢܵܝܹ̈ܐ
ܚܵܐܹ̇ܫ ܗ̄ܘ̣ܵܐ. ܘܠܑܵܐ ܬܘܼܒܼ ܐܲܝܠܹܝܢ ܕܲܠܒܸܤܪܵܐ ܕܚܲܝ̈ܘܵܐܬܼܵܐ: ܘܠܵܐ ܐܲܝܠܹܝܢ
ܕܲܠܢܲܦܫܵܐ ܡܠܝܼܠܬܼܵܐ ܘܲܠܒܸܤܪܵܐ ܐܵܡ̇ܪܝܼܢ ܕܲܗܘ̤ܵܬܼ ܚܕܼܵܝܘܼܬܼܵܐ.
ܕܒܲܪܓܸܫܬܼܵܐ ܟܝܵܢܵܝܵܬܐ ܚܵܐܹ̇ܫ ܗ̄ܘ̣ܵܐ ܚܲܫܹ̈ܐ ܕܦܲܓܼܪܵܐ ܘܲܕܢܲܦܫܵܐ ܕܠܵܐ ܡܸܠܬܼܵܐ
ܐܵܘ ܡܠܝܼܠܘܼܬܼܵܐ: ܒܲܫܪܵܪܵܐ ܡܩܲܝܡܝܼܢ ܠܡܸܠܬܼܵܐ ܕܡܸܬܼܒܲܪܢܫܵܢܘܼܬܼܵܐ.
ܘܠܵܘ ܗܵܕܹܐ ܐܵܡ̇ܪܝܼܢ: ܕܲܒܼܡܲܛܥܝܵܢܘܼܬܼܵܐ ܐܸܙܕܟܼܝܼ ܤܵܛܵܢܵܐ ܡ̣ܢ ܗܵܘ̇
ܕܐܸܙܕܟܼܝܼ: ܘܟܲܕܼ ܠܵܐ ܗ̄ܘ̣ܵܐ ܗ̤ܘ ܙܟܼܵܝܗܝ ܒܚܲܝܠܹܗ: ܐܸܠܵܐ ܐܸܤܬܿܢܸܩ
ܥܲܠ ܐܵܓܼܘܿܢܸܤܛܵܐ: ܗܵܢܵܘ ܕܹܝܢ ܥܲܠ ܐܲܠܵܗܵܐ ܗܵܘ̇ ܕܲܒܼܪܵܝܗܝ. ܕܐܵܘ
ܓܲܠܝܵܐܝܼܬܼ ܡܲܩܪܸܒܸ ܗ̄ܘ̣ܵܐ: ܐܵܘ ܡܲܛܫܝܼܐܝܼܬܼ. ܒܗܵܝ̇ ܓܹܝܪ ܕܟܲܕܸ ܠܵܐ
ܗ̄ܘ̣ܵܐ ܠܘܵܬܼ ܐܲܠܵܗܵܐ ܥܲܒܼܕܹܗ ܗ̄ܘ̣ܵܐ ܤܵܛܵܢܵܐ ܒܐܓܼܘܿܢܵܐ: ܐܸܙܕܟܼܝܼ
ܡ̣ܢ ܐܲܠܵܗܵܐ. ܗ̤ܘ ܙܟܼܵܐ: ܒܲܕܼ ܡܚܵܘܸܐ ܗ̄ܘ̣ܵܐ ܠܟܼܠ: ܕܥܵܘ̣ܠܵܐ ܕܚܘܼܒܹܗ
ܕܐܲܠܵܗܵܐ ܕܲܠܘܵܬܼ ܒܲܪܢܵܫܵܐ: ܘܕܐܝܟܼ ܕܲܠܨܥܪܵܐ ܕܟܼܠ ܗ̄ܘ̣ܵܐ ܪܘܼܡܪܵܡܵܗ̇
ܕܐ̄ܢܵܫܘܼܬܼܵܐ ܘܲܠܫܘܼܥܒܵܕܼܵܐ ܘܲܠܤܸܓܼܬܼܵܐ ܕܟܼܠ ܪܹܫ ܘܟܼܠ ܫܘܼܠܛܵܢ.
ܘܕܐܢ ܗܵܕܹܐ ܒܵܥܹ̇ܐ ܗ̄ܘ̣ܵܐ ܕܢܸܥܒܸܿܕܼ ܠܹܗ ܠܒܲܪܢܵܫܵܐ: ܐܵܦ ܒܸܠܥܵܕܼ
ܡ̣ܢ ܡܲܛܥܝܵܢܘܼܬܼܵܐ ܗܵܕܹܐ ܘܢܸܟܼܠܵܐ: ܡܸܫܟܲܚ ܗ̄ܘ̣ܵܐ ܠܡܸܥܒܿܕܹܗ. ܗܵܘ̇
ܡܵܐ ܕܐܵܡܲ݁ܪ: ܐܵܦ ܥܵܒܹ̇ܕܼ. ܐܵܦܠܵܐ ܓܹܝܪ ܡܸܬܼܛܲܫܸܐ ܗ̄ܘ̣ܵܐ: ܟܲܕܼ
ܒܐܸܤܟܹܿܡܵܐ ܗܵܢܵܐ ܡܸܬܼܚܲܫܲܚ. ܗܵܘ̇ ܓܹܝܪ ܕܲܠܡܸܬܿܛܲܫܵܝܘܼ ܒܵܥܹ̇ܐ: ܒܲܕܼ ܠܵܐ
ܛܲܥܝܵܐ ܠܹܗ ܕܐܸܢܗ̤ܘ ܕܡܸܬܼܓܿܠܸܐ ܡܸܬܼܟܿܤܵܤܘܼ ܡܸܬܼܟܿܤܸܣ: ܗ̤ܘ
pb. 123
ܠܢܲܦܫܹܐ ܗܵܘܹ̇ܐ ܩܛܹܓܼܪܵܢܵܐ. ܘܕܲܠܩܘܼܒܼܠܵܐ ܕܗܵܘ̇ ܡܵܐ ܕܒܼܵܥܹ̇ܝܢ
ܕܢܹܐܡܪܘܼܢ ܡܸܬܼܐܲܠܨܝܼܢ ܠܡܹܐܡܲܪ: ܕܲܢܩܲܛܪܓܼܘܼܢ ܠܐܲܠܵܗܵܐ.
ܘܲܕܼܢܸܦܩܘܼܢ ܪܘܼܚܵܐ ܥܲܠ ܐܲܦܲܝ̈ ܒܝܼܫܵܐ: ܘܲܒܼܟܼܠ ܚܹܝܠ ܕܲܓܵܠܵܐܝܼܬܼ:
ܘܥܸܠ̈ܠܵܬܼܵܐ ܕܕܲܠܩܘܼܒܼܠܵܐ ܝܵܗ̇ܒܿܝܼܢ ܕܡܸܬܼܒܲܪܢܫܵܢܘܼܬܹܗ ܕܠܲܗܵܠܵܐ.
ܨܓ. ܥܲܠ ܗܵܝ̇: ܕܐܲܝܠܹܝܢ ܕܠܲܟܼܝܵܢܵܐ ܚܲܕܼ ܡܸܬܼܪ̈ܲܟܿܒܼܵܢ: ܐܵܘ
ܕܢܸܗ̈ܝܵܢ ܪܹܫܵܐ: ܐܘ ܕܢܸܗܘ̈ܝܵܢ ܬܚܹܝܬܼ ܪܹܫܵܐ: ܘܝܲܬܿܝܼܪܵܐܝܼܬܼ ܠܢܲܦܫܵܐ
ܕܬܸܗܘܸܐ ܪܹܫܵܐ ܒܲܟܼܝܵܢܵܐ ܡܪܲܟܿܒܼܵܐ: ܐܸܢ ܐܲܠܵܗܵܐ ܡܸܠܬܼܵܐ ܟܝܵܢܵܐܝܼܬܼ
ܐܸܢܼܪܲܟܲܒܼ.
ܐܲܠܹܝܢ ܓܹܝܪ ܕܠܲܟܼܝܵܢܵܐ ܡܸܬܼܪ̈ܲܟܿܒܼܵܢ ܘܡܸܫܬܲܡ̈ܠܝܵܢ: ܐܵܘ ܕܢܸܗܘ̈ܝܵܢ
ܪܹܫܵܐ ܘܲܡܕܲܒܿܪ̈ܵܢܝܵܬܼܵܐ ܡܸܬܼܩܲܝ̈ܡܵܢ: ܐܵܘ ܕܢܸܗܘ̈ܝܵܢ ܬܚܹܝܬܼ ܪܹܫܵܐ
ܘܲܡܕܲܒܿܪܵܢܵܐ. ܐܸܢܗ̤ܘ ܗܵܟܹܝܠ ܕܡܸܛܠ ܕܠܵܐ ܤܵܦ̇ܩܵܐ ܗ̄ܘ̣ܵܬܼ ܢܲܦܫܵܐ
ܡܠܝܼܠܬܼܵܐ ܕܲܬܿܕܲܒܲܪ: ܐܸܤܬܿܢܸܩ ܥܲܠ ܫܵܘܬܵܦܘܼܬܼܵܐ ܕܐܲܠܵܗܵܐ ܡܸܠܬܼܵܐ:
ܕܗ̤ܘ ܢܸܗܘ̤ܐ ܡܕܲܒܿܪܵܢܵܐ: ܐܵܘ ܕܦܲܓܼܪܵܐ: ܐܵܘ ܕܢܲܦܫܵܐ ܡܠܝܼܠܬܼܵܐ:
ܐܵܘ ܕܚܲܝܘܼܬܼܵܐ: ܘܒܹܗ ܩܢ̣ܵܗ̇ ܠܙܵܟܼܘܼܬܹܗ. ܐܸܢ ܙܵܕܹܩ ܕܲܠܗܵܕܹܐ ܢܸܩܪܸܐ
ܙܵܟܼܘܼܬܼܵܐ: ܕܲܟܼܝܵܢܵܐ ܐ̄ܚܪܹܢܵܐ ܕܲܦܪܝܼܫ ܘܠܵܐ ܕܵܡܹ̇ܐ ܘܠܵܐ ܫܘܸܐ ܥܲܡ
ܚܲܒܼܪܵܘܗܝ ܒܢܲܝ̈ܢܵܫܵܐ: ܡܸܬܼܚܲܙܵܝܵܐ ܕܒܸܐܤܟܹܡܵܐ ܗ̄ܘ̣ ܤܵܥܲܪ ܘܲܡܫܲܥܒܸܕܼ
ܠܹܗ ܩܛܝܼܪܵܐܝܼܬܼ ܠܟܼܠ: ܘܲܬܚܹܝܬܼ ܫܘܼܠܛܵܢܹܗ ܒܲܩܛܝܼܪܵܐ ܕܵܒܲܪ
ܐܲܝܟܼ ܐܲܠܵܗܵܐ: ܕܗܵܘ̇ ܕܒܹܗ ܕܒܲܓܼܒܼܝܼܬܹܗ ܕܝܼܠܹܗ ܚܵܒܼ ܗ̄ܘ̣ܵܐ: ܡ̣ܢ
ܚܵܘܒܿܬܼܵܐ ܠܵܐ ܐܸܫܟܲܚ ܠܡܲܡܵܕܼܘܼ: ܘܠܵܐ ܠܡܸܛܲܪ ܦܘܼܩ̈ܕܵܢܹܐ ܒܲܟܼܝܵܢܹܗ
ܕܝܼܠܹܗ: ܐܸܠܵܐ ܒܐܲܠܵܗܵܐ ܡܸܠܬܼܵܐ ܗܵܘ̇ ܕܲܒܼܟܼܠܙܒܲܢ ܙܲܟܵܝܵܐ ܗ̄ܘ̣. ܠܵܘ
pb. 124
ܓܹܝܪ ܕܕܼܘܼܡܵܪܵܐ ܘܫܵܘܝܲܬܼ ܠܬܸܫܒܿܘܿܚܬܼܵܐ ܐܝܼܬܹܝܗ̇: ܕܲܗܘ̤ܵܐ ܐܲܠܵܗܵܐ
ܡܸܠܬܼܵܐ ܒܦܲܓܼܪܵܐ: ܘܲܢܛܲܪ ܟܠܗܹܝܢ ܒܛܘܼܪ̈ܵܬܼܵܐ ܕܢܲܦܫܵܐ ܘܲܕܼܦܲܓܼܪܵܐ.
ܐܸܠܘܼ ܓܹܝܪ ܠܵܐ ܩ̣ܵܘܝܼ ܒܲܟܼܝܵܢܹܗ ܠܥܸܠ ܡ̣ܢ ܟܝܵܢܵܐ ܕܦܲܓܼܪܵܐ ܐܵܘ
ܕܢܲܦܫܵܐ ܐܵܘ ܕܡܲܕܥܵܐ: ܡܸܬܼܩܥܵܝܘܼ ܡܸܬܼܒܿܥܸܐ ܗ̄ܘ̣ܵܐ: ܒܲܕܼ ܤܵܦ̇ܩܵܐ
ܗ̄ܘ̣ܵܬܼ ܐܵܦ ܢܲܦܫܵܐ ܡܠܝܼܠܬܼܵܐ ܠܡܸܛܲܪ ܦܘܼܩ̈ܕܵܢܹܐ: ܐܸܢ ܕܹܝܢ ܗܵܕܹܐ
ܠܵܐ ܤܵܦ̇ܩܵܐ: ܘܡܸܛܠ ܗܵܕܹܐ ܤܢܝܼܩܵܐ ܗ̄ܘ̣ܵܬܼ ܥܲܠ
ܡܸܬܼܒܲܪܢܫܵܢܘܼܬܹܗ ܕܐܲܠܵܗܵܐ ܡܸܠܬܼܵܐ: ܕܲܚܠܵܦ ܟܠ ܢܤܲܝܒܲܪ ܚܲܫܹ̈ܐ
ܕܦܲܓܼܪܵܐ ܘܲܕܼܢܲܦܫܵܐ ܘܲܕܼܡܲܕܿܥܵܐ. ܒܲܚܕܼܵܝܘܼܬܼܵܐ ܟܝܵܢܵܝܬܼܵܐ ܕܠܲܟܼܝܵܢܵܐ
ܡܚܲܝܕܼܵܐ: ܚܵܐܹ̇ܫ ܐܲܝܟܼ ܦܲܓܼܪܵܐ ܐܲܝܟܼ ܢܲܦܫܵܐ ܐܲܝܟܼ ܡܲܕܿܥܵܐ ܒܡܘܼܙܵܓܼܵܐ.
ܟܲܕܼ ܠܵܐ ܕܹܝܢ ܡܸܙܕܟܸܐ: ܐܲܝܟ ܚܲܕܼ ܡ̣ܢ ܗܵܠܹܝܢ: ܡܸܬܼܚܵܘܝܵܐ ܕܲܠܒܲܪ
ܡ̣ܢ ܟܝܵܢܵܐ ܕܗܵܠܹܝܢ ܗ̄ܘ̣. ܘܡܸܛܠ ܗܵܢܵܐ ܠܵܐ ܐܸܬܿܬܿܚܸܕܼ ܡ̣ܢ
ܐܲܝܠܹܝܢ: ܕܚܲܕܼ ܡ̣ܢ ܗܵܠܹܝܢ ܐܸܬܿܬܿܚܸܕܼ ܒܗܹܝܢ: ܥܲܡ ܗܵܝ̇
ܫܟܼܝܼܪܬܵܐ ܐ̄ܚܪܹܢܵܐ ܕܐܵܡ̇ܪܝܼܢ: ܕܲܡܬܲܚܬܹܝܢ ܠܹܗ ܠܐܲܠܵܗܵܐ ܠܐܵܢܲܢܩܹܐ
ܕܲܟܼܝܵܢܵܐܘ ܘܝܵܗ̇ܒܿܝܼܢ ܠܗܘܼܠܹܗ ܐܲܝܟܼ ܡܵܢܝܼܢܵܝܹ̈ܐ ܚܲܝܠܵܐ ܕܐܲܝܟܼ ܗܵܢܵܐ:
ܕܐܲܝܢܵܐ ܕܲܡܩܲܒܸܿܠ ܠܵܗ̇: ܠܫܘܼܠܛܵܢܵܐ ܘܠܲܩܛܝܼܪܵܐ ܕܝܼܠܵܗ̇ ܢܵܓܼܕܵܐ
ܠܹܗ: ܘܚܵܐܹ̇ܫ ܠܗܘܿܢ ܡ̣ܢ ܟܠ ܦܪܘܿܣ ܠܚܲܫܹ̈ܐ ܦܲܓܼܪܵܢܹܐ: ܗܵܘ̇
ܡܵܐ ܕܐܵܦ ܗ̤ܘ ܐܲܠܵܗܵܐ ܡܸܠܬܼܵܐ ܚܲܫ̣ ܕܲܢܚܸܬܼ ܠܦܲܓܸܪܵܐ: ܘܤܲܝܒܲܪ
ܐܸܢܘܿܢ ܠܚܲܫܹ̈ܐ ܦܲܓܼܪ̈ܵܢܹܐ ܒܲܟܼܝܵܢܵܐ ܕܝܼܠܹܗ: ܟܲܕܼ ܡܸܬܼܢܲܓܲܕܼ ܗ̄ܘ̣ܵܐ
ܒܟܲܦܢܐ ܘܲܒܼܨܲܗܝܵܐ: ܒܐܲܤܙܼܪܹ̈ܐ ܟܝܵܢܵܝܹ̈ܐ ܕܦܲܓܼܪܵܐ: ܟܲܕܼ ܒܲܟܼܝܵܢܹܗ ܥܲܠ
ܗܵܠܹܝܢ ܤܢܝܼܩ ܗ̄ܘ̣ܵܐ: ܡܸܬܼܪܲܓܼܪܲܓܼ ܗ̄ܘ̣ܵܐ ܘܡܸܬܼܚܲܡܲܬܼ
pb. 125
ܘܕܵܚܹ̇ܠ ܘܚܵܐܹ̇ܫ. ܘܲܠܟܼܠܗܘܿܢ ܚܲܫܹ̈ܐ ܕܦܲܓܼܪܵܐ ܘܲܕܼܢܲܦܫܵܐ ܟܝܵܢܵܐܝܼܬܼ
ܚܵܐܹ̇ܫ ܗ̄ܘ̣ܵܐ: ܡܸܛܠ ܕܠܲܟܼܝܵܢܵܐ ܡܪܲܟܲܒܼ ܗ̄ܘ̣ܵܐ. ܗܵܘ̇ ܓܹܝܪ
ܕܠܲܟܼܝܵܢܵܐ ܡܸܬܼܪܲܟܲܒܼ ܠܟܼܠܗܹܝܢ ܕܝܼܠ̈ܝܬܼܵܐ ܕܟܼܝܵܢܵܐ ܗܵܘ̇ ܡ̣ܢ ܐܵܢܲܢܩܹܐ
ܢܵܩܹ̇ܦ ܒܲܟܼܝܵܢܵܐ: ܐܸܢ ܕܒܲܪܢܵܫܵܐ: ܘܐܸܢ ܕܐܲܠܵܗܵܐ: ܘܐܸܢ ܕܲܟܼܝܵܢܵܐ ܐ̄ܚܪܹܢܵܐ:
ܕܐܸܬܼܚܲܝܲܕܼ ܠܹܗ ܟܝܵܢܵܐܝܼܬܼ ܘܐܸܬܼܪܲܟܲܒܼ. ܘܐܲܝܟܲܢ ܕܗ̤ܘ ܢܸܨܒܸܿܐ ܐ̄ܢܵܫ
ܕܢܹܐܡܲܪ: ܕܠܵܐ ܦܪܝܼܫ ܥܠܲܝ ܒܡܸܕܸܡ. ܒܪܵܡ ܐܲܝܠܹܝܢ ܕܠܲܟܼܝܵܢܵܐ
ܡܸܬܼܪ̈ܲܟܿܒܼܵܢ: ܕܝܼܠܵܝ̈ܬܼܵܐ ܕܲܟܼܝܵܢܵܐ ܗܵܘ̇ ܡ̣ܢ ܐܵܢܲܢܩܹܐ ܡܤܲܝܒܿܪ̈ܵܢ.
ܕܲܟܼܝܵܢܵܐܝܼܬܼ ܐܝܼܬܲܝܗܹܝܢ ܠܗܹܝܢ: ܘܠܵܘ ܨܒܼܝܵܢܵܐܝܬܼ. ܕܐܲܠܵܗܵܐ ܕܹܝܢ
ܡܸܠܬܼܵܐ: ܨܒܼܝܵܢܵܐܝܼܬܼ ܐܝܼܬܹܝܗ̇: ܘܠܵܘ ܩܛܝܼܪܵܐܝܼܬܼ. ܫܲܠܝܼܛ ܐ̄ܢܵܐ ܠܲܡ
ܥܲܠ ܢܲܦܫܝ ܕܐܸܤܝܼܡܝܼܗ̇: ܘܫܲܠܝܼܛ ܐ̄ܢܵܐ ܬܘܼܒܼ ܕܐܸܤܒܼܝܼܗ̇. ܡܵܕܹܝܢ
ܘܠܵܐ ܒܲܚܕܼܵܐ ܡܸܠܬܼܵܐ ܠܒܲܪ ܡ̣ܢ ܗܵܕܹܐ: ܡܸܫ̈ܟܿܚܵܢ ܕܢܸܠܚ̈ܢܵܢ ܡܸܠܹ̈ܐ
ܕܲܟܼܬܼܵܒܹ̈ܐ ܐܲܠܵܗܵܝܹ̈ܐ ܠܲܡܫܝܼܚܵܐ: ܐܸܠܵܐ ܐܲܝܟܲܢܵܐ ܕܒܲܚܸܢܢ ܘܐܸܫܟܲܚܢܲܢ:
ܕܟܼܠܗܹܝܢ: ܠܵܘ ܠܲܚܕܼܵܝܘܼܬܼܵܐ ܕܲܟܼܝܵܢܵܐ ܢܵܩ̈ܦܵܢ: ܐܸܠܵܐ ܠܦܲܪܨܘܿܦܵܐ
ܟܝܵܢܵܝܵܐ ܘܲܩܢܘܿܡܵܝܵܐ.
Book 1.2
pb. 126
ܥܠ ܗܝܡܢܘܬܐ.
ܤܘܿܦܪܘܿܢܝܘܿܣ ܐܵܡܲ݁ܪ: ܡܸܛܠ ܗܵܟܹܝܠ ܕܤܲܓܿܝܼ̈ܐܹܐ ܡܩܲܒܿܠܝܼܢ
ܠܗܲܡܵܢܘܼܬܼܵܐ ܗܵܝ̇ ܕܲܬܼܠܵܬܼܡܵܐܐ ܘܲܬܼܡܵܢܬܲܥܤܲܪ ܕܬܿܬܿܤܝܼܡܲܬ̤
ܒܢܝܼܩܝܼܵܐ: ܐܵܦ ܐ̄ܢܵܫ̈ܝܼܢ ܐܲܝܠܹܝܢ ܕܲܐ̄ܚܪܵܢܝܵܐܝܼܬܼ ܡܗܲܝܡܢܹܝܢ: ܐܵܦ
ܕܠܲܟܼܬܼܵܒܹ̈ܐ ܐܲܠܵܗܵܝܹ̈ܐ ܘܲܐ̄ܚܪ̈ܵܢܹܐ ܐ̄ܚܪܵܢܝܐܝܼܬܼ: ܘܲܒܼܪܸ̈ܥܝܵܢܹܐ ܐ̄ܚܪ̈ܵܢܹܐ
ܡܸܤܬܲܟܿܠܝܼܢ ܠܗܵܝ̇ ܕܐܸܬܼܒܲܤܲܪ ܘܐܸܬܼܒܲܪܢܲܫ: ܬܸܨܛܒܸܐ ܢܲܟܼܦܘܼܬܼܵܟܼ
ܠܡܸܥܒܲܪ ܒܪܸ̈ܥܝܵܢܲܝܗܘܿܢ ܘܲܒܼܤܲܒܿܪܵܢܘܼܬܼܗܘܿܢ: ܘܐܲܝܕܵܐ ܕܡܸܬܼܚܲܙܝܵܐ
ܠܵܟܼ ܘܲܡܒܲܚܸܢ ܐܲܢ̄ܬܿ ܕܫܲܦܝܼܪܬܵܐ ܐܝܼܬܹܗ̇: ܟܬܼܘܿܒܼ ܘܐܵܘܕܲܥ ܠܝܼ:
ܘܠܵܐ ܬܸܬܸܿܠ ܥܸܠܬܼܵܐ ܠܐܲܝܠܹܝܢ ܕܒܼܵܥܹ̇ܝܢ ܥܸܠܬܼܵܐ ܕܢܸܥܫܩܘܼܢܵܟܼ.
ܢܸܤܛܘܿܪܝܼܣ. ܐ. ܡܸܢܗܘܿܢ ܓܹܝܪ ܐܵܡ̇ܪܝܼܢ ܠܡܸܬܼܒܲܪܢܫܵܢܘܼܬܼܵܐ
ܕܡܵܪ̈ܲܢ ܡܫܝܼܚܵܐ: ܕܲܒܼܡܲܤܒܿܪܵܢܘܼܬܼܵܐ ܘܐܸܤܟܹܡܵܐ ܗܘ̤ܵܬܼ:
ܘܡܸܛܠ ܕܢܸܬܼܚܙܸܐ ܠܲܒܼܢܲܝ̈ܢܵܫܵܐ ܘܲܕܼܢܸܠܸܦ: ܘܲܕܼܢܸܬܸܠ ܛܲܝܒܿܘܼܬܼܵܐ
ܕܐܹܘܲܢܓܲܝܼܘܿܢ ܠܟܼܠ ܐ̄ܢܵܫ. ܘܐܲܟܼܙܢܵܐ ܕܡܸܬܼܚܸܙܐ ܗ̄ܘ̣ܵܐ ܠܚܲܕܸ ܚܲܕܼ
ܡ̣ܢ ܩܲܕܝܼ̈ܫܹܐ: ܗܵܟܲܢܵܐ ܒܙܲܒܼ̈ܢܹܐ ܐ̄ܚܪ̈ܵܝܹܐ ܠܼܟܼܠ ܐ̄ܢܵܫ ܐܸܬܼܚܙܝܼ.
ܒ. ܐ̄ܚܪ̈ܵܢܹܐ ܕܹܝܢ ܠܵܗ̇ ܠܐܘܼܤܝܼܵܐ ܐܲܠܵܗܵܝܬܼܵܐ ܐܵܡ̇ܪܝܼܢ ܕܲܗܘ̤ܵܬܼ
ܒܸܤܪܵܐ: ܕܒܼܵܗ̇ ܒܐܘܼܤܝܼܵܐ ܕܝܼܠܹܗ ܬܸܗܘܸܐ ܐܘܼܤܝܼܵܐ ܕܒܸܤܪܵܐ ܚܠܵܦ
ܟܝܵܢܵܐ ܕܲܒܼܢܲܝ̈ܢܫܵܐ: ܘܢܸܬܿܕܲܒܲܪ ܘܢܸܚ̣ܫ ܘܲܢܚܲܪܲܪ ܠܲܟܼܝܵܢܲܢ. ܗܵܘ̇ ܓܹܝܪ
ܕܠܵܘ ܒܐܘܼܤܝܼܵܐ ܕܝܼܠܹܗ ܗܘ̤ܵܐ ܒܲܪܢܵܫܵܐ ܐܸܠܵܐ ܒܐܸܤܟܹܡܵܐ: ܠܵܘ
ܡܚܲܪܵܪܘܼ ܚܲܪܲܪ ܠܲܢ: ܐܸܠܵܐ ܡܲܛܥܵܝܘܼ ܐܲܛܥܝܼ ܠܲܢ: ܕܐܸܬܼܚܙܝܼ
ܒܐܸܤܟܹܡܵܐ: ܘܲܕܸܢܲܚܫ ܥܲܠ ܐܲܦܵܝ̈ܢ ܟܲܕܼ ܠܵܐ ܚܲܫ̣.
pb. 127
ܓ. ܐ̄ܚܪ̈ܵܢܹܐ ܬܘܼܒܼ ܡܵܘܕܹܝܢ: ܕܲܒܼܒܸܤܪܵܐ ܐܸܬܼܒܲܤܲܪ ܐܲܠܵܗܵܐ:
ܐܲܝܟܼ ܕܲܠܫܘܼܡܠܵܝܵܐ ܕܲܟܼܝܵܢܵܐ ܚܵܠܦ ܢܲܦܫܵܐ. ܟܲܕܼ ܟܝܵܢܵܐܝܼܬܼ ܐܸܬܼܒܲܤܲܪ
ܒܒܸܤܪܵܐ ܠܡܸܥܒܲܕܼ ܘܲܠܡܸܚܲܫ: ܘܲܠܟܼܠܗܘܿܢ ܚܲܫܹ̈ܐ ܟܝܵܢܵܝܹ̈ܐ
ܕܦܲܓܼܪܵܐ ܟܝܵܢܵܐܝܼܬܼ ܡܤܲܝܒܲܪ ܗ̄ܘ̣ܵܐ. ܟܲܕܼ ܒܲܟܼܝܵܢܹܗ ܠܵܐ ܚܵܫܘܿܫܵܐ ܗ̄ܘ̣:
ܘܲܒܼܡܸܬܼܒܲܤܪܵܢܘܼܬܼܵܐ ܟܝܵܢܵܝܬܼܵܐ ܚܵܫܘܿܫܵܐ. ܐܲܟܼܙܢܵܐ ܕܢܲܦܫܵܐ:
ܕܒܲܟܼܝܵܢܵܗ̇ ܠܚܲܫܹ̈ܐ ܕܦܲܓܼܪܵܐ ܠܵܐ ܚܫܵܐ: ܘܠܵܐ ܟܵܐܹ̇ܒܼ ܠܵܗ̇: ܘܠܵܐ
ܟܵܦ̇ܢܵܬܐ. ܒܲܡܕܲܒܿܪܵܢܘܼܬܼܵܐ ܟܝܵܢܵܝܬܼܵܐ ܚܵܫܵܐ ܟܝܵܢܵܐܝܼܬܼ ܚܲܫܹ̈ܐ ܕܦܲܓܼܪܵܐ: ܟܲܕܼ
ܡܚܲܝܕܼܵܐ ܥܲܡܹܗ ܟܝܵܢܵܐܝܼܬܼ: ܕܲܟܼܝܵܢܵܐܝܼܬܼ ܢܸܬܿܕܲܒܲܪ ܘܢܸܚܲܫ ܥܲܠ ܐܲܦܲܝ̈ܢ.
ܘܠܵܘ ܒܡܲܤܒܿܪܵܢܘܼܬܼܵܐ ܘܒܸܐܤܟܹܿܡܵܐ: ܐܵܘ ܒܲܟܼܝܵܢܐ ܐ̄ܚܪܹܢܵܐ: ܐܸܠܵܐ
ܒܲܟܼܝܵܢܵܐ ܕܝܼܠܹܗ ܚܲܪܲܪ ܠܲܢ ܡ̣ܢ ܡܵܘܬܵܐ ܘܲܚܒܼܵܠܵܐ.
ܕ. ܐ̄ܚܪ̈ܵܢܹܐ ܕܹܝܢ ܡܵܘܕܹܝܢ: ܕܲܒܼܦܲܓܼܪܵܐ ܘܲܒܼܦܢܲܫܵܐ ܐܸܬܼܒܲܤܲܪ
ܠܫܘܼܡܠܵܝܵܐ ܕܲܟܼܝܵܢܵܐ. ܘܲܚܠܵܦ ܡܲܕܥܵܐ: ܗ̄ܘ̣ܵܐ ܐܲܠܵܗܵܐ ܡܸܠܬܼܵܐ. ܐܲܝܟܼ
ܕܲܚܠܵܦ ܡܲܕܼܥܵܐ ܢܸܗܘܸܐ ܠܲܟܼܝܵܢܵܐ ܒܦܲܓܼܪܵܐ ܘܲܒܼܢܲܦܫܵܐ: ܘܒܲܟܼܝܵܢܵܐ
ܕܲܒܼܢܲܝ̈ܢܵܫܵܐ ܢܸܬܿܕܲܒܲܪ ܘܢܸܚܲܫ ܥܲܠ ܐܲܦܲܝ̈ܢ. ܐܸܬܼ݂ܵܐ ܗ̄ܘ̣ܵܐ ܓܹܝܪ
ܕܲܠܡܲܕܿܥܵܐ ܗܵܘ̇ ܕܲܥ̣ܒܲܪ ܥܲܠ ܦܘܼܩܕܵܢܵܐ ܘܠܵܐ ܐܸܫܬܿܡܲܥ ܠܐܲܠܵܗܵܐ:
ܢܒܲܛܠܝܼܘܗܝ. ܘܲܚܠܵܦ ܡܲܕܿܥܵܐ ܢܸܗܘܸܐ ܒܢܲܦܫܵܐ ܘܲܒܼܦܲܓܼܪܵܐ: ܘܠܵܘ
ܒܐܸܤܟܹܢܵܐ ܕܠܵܐ ܩܢܘܿܡܵܐ: ܘܠܵܘ ܒܲܟܼܝܵܢܵܐ ܐ̄ܚܪܹܢܵܐ: ܘܠܵܘ ܬܘܼܒܼ
ܒܓܼܫܡܵܐ ܕܠܵܐ ܢܵܦܫܵܐ.
ܗ. ܐ̄ܚܪ̈ܵܢܹܐ ܕܹܝܢ ܠܒܸܤܪܵܐ ܗܵܘ̇ ܕܐܸܬܼܒܲܤܲܪ ܒܹܗ ܐܲܠܵܗܵܐ ܡܸܠܬܼܵܐ:
ܒܸܤܪܵܐ ܡܢܲܦܫܵܐ ܐܸܬܼܒܲܤܲܪ ܟܲܕܼ ܒܲܟܼܝܵܢܹܗ ܠܵܐ ܡܲܪܓܸܫ ܗ̄ܘ̣ܵܐ:
pb. 128
ܘܠܑܵܐ ܡܸܤܬܲܟܲܠ ܗ̄ܘ̣ܵܐ ܡ̣ܢ ܢܲܦܫܵܐ: ܐܸܠܵܐ ܒܡܲܥܒܿܕܵܢܘܼܬܼܵܐ ܕܐܲܠܵܗܵܐ
ܡܸܠܬܼܵܐ ܡܸܤܬܲܟܲܠ ܗ̄ܘ̣ܵܐ ܘܡܲܪܓܸܫ ܗ̄ܘ̣ܵܐ. ܒܐܲܠܵܗܵܐ ܡܸܠܬܼܵܐ:
ܘܡܲܪܓܫܵܐ ܗ̄ܘ̣ܵܬܼ ܘܐܵܦ ܡܸܤܬܲܟܿܠܵܐ ܗ̄ܘ̣ܵܬܼ ܗ̤ܝ ܢܲܦܫܵܐ. ܘܦܲܓܼܪܵܐ:
ܘܐܝܼܬܼܵܘܗܝ ܗ̄ܘ̣ܵܐ ܐܘܼܪܓܵܢܘܿܢ ܒܲܟܼܝܵܢܵܐ. ܘܠܵܐ ܡܦܲܠܓܼܝܼܢ ܠܹܗ
ܠܲܡܫܝܼܚܵܐ ܠܐܘܿܪܓܵܢܘܿܢ ܘܠܐܘܼܡܵܢܵܐ: ܟܲܕܼ ܐܘܿܪܓܵܢܘܿܢ ܘܐܘܼܡܵܢܵܐ
ܐܲܟܲܚ̄ܕܼ ܡܲܥܒܿܕܝܼܢ.
ܘ. ܐ̄ܚܪܵܢܹܐ ܕܹܝܢ ܡܵܘܕܹܝܢ ܬܪܹܝܢ ܟܝܵܢܝ̈ܢ ܒܲܡܫܝܼܚܵܐ ܩܕܼܵܡ
ܚܕܼܵܝܘܼܬܼܵܐ: ܘܲܕܼܟܼܠ ܚܲܕܼ ܡ̣ܢ ܟܝܵܢܹ̈ܐ ܒܲܟܼܝܵܢܹܗ ܕܝܼܠܹܗ ܡܸܬܼܪܢܸܐ.
ܒܐܲܒܼܵܐ ܡ̇ܢ ܘܲܒܼܪܘܼܚܵܐ ܕܩܘܼܕܼܫܵܐ: ܐܲܠܵܗܵܐ ܡܸܠܬܼܵܐ. ܘܲܒܼܢܲܝ̈ܢܵܫܵܐ:
ܒܒܸܤܪܵܐ. ܡ̣ܢ ܒܵܬܲܪ ܚܕܼܵܝܘܼܬܼܵܐ ܕܹܝܢ: ܠܵܐ ܡܸܬܼܪ̱ܢܹܝܢ ܬܪܹܝܢ ܟܝܵܢܹ̈ܐ:
ܒܕܸܐܬܼܚܲܝܲܕܼܘ ܒܐܘܼܤܝܼܵܐ: ܘܗܵܘ̇ܝܵܐ ܚܕܼܵܐ ܡ̣ܢ ܬܲܪ̈ܬܲܝܗܹܝܢ. ܗܵܢ̇ܘܿܢ
ܕܡ̣ܢ ܟܝܵܢܵܐ ܠܲܟܼܝܵܢܵܐ ܡܫܲܚܠ̱ܦܝܼܢ ܠܗܘܿܢ: ܐܲܝܟܼ ܕܡܵܪܵܢܵܐܝܼܬܼ ܒܲܪܢܵܫܵܐ
ܢܸܗܘ̤ܐ: ܗ̤ܘ ܟܲܕܼ ܗ̤ܘ ܐܵܦ ܐܲܠܵܥܗܵܐ. ܐܲܝܟܲܢܵܐ ܕܐܲܝܟܼ ܒܲܪܢܵܫܵܐ ܢܸܬܿܕܲܒܲܪ
ܐܲܠܵܗܵܐ: ܘܲܢܡܘܼܬܼ ܚܠܵܦܲܝܢ ܐܲܝܟܼ ܐܲܠܵܗܵܐ: ܘܲܢܩܘܼܡ ܒܚܲܝܠܵܐ ܕܝܼܠܹܗ.
ܙ. ܐ̄ܚܪ̈ܵܢܹܐ ܕܹܝܢ ܠܡܸܬܼܒܲܪܢܫܵܢܘܼܬܹܗ ܕܡܵܪܲܢ ܐܵܡ̇ܪܝܼܢ: ܒܸܤܪܵܐ
ܡܢܲܦܫܵܐ ܒܢܲܦܫܵܐ ܡܠܝܼܠܬܼܵܐ ܘܝܼܕܲܘܥܬܼܵܢܝܼܬܼܵܐ: ܡܫܲܡܠܲܝ ܒܲܟܼܝܵܢܹܗ
ܘܲܒܼܚܲܝܠܹܗ: ܘܲܒܼܡܲܥܒܿܕܼܵܢ̈ܘܵܬܹܗ ܟܝܵܢܵܝܵܬܼܵܐ. ܘܠܵܐ ܗ̄ܘ̣ܵܐ ܒܐܸܤܟܹܡܵܐ:
ܘܠܵܐ ܗ̄ܘ̣ܵܐ ܒܫܘܼܚܠܵܦ ܐܘܼܤܝܼܵܬܐ: ܘܠܵܐ ܬܘܼܒܼ ܠܫܘܼܡܠܵܝܵܐ ܟܝܵܢܵܝܵܐ
ܕܲܟܼܝܵܢܵܐ ܕܦܲܓܼܪܵܐ ܘܲܕܼܡܲܦܫܵܐ ܐܵܘ ܕܡܲܕܿܥܵܐ: ܐܵܘ ܡܚܲܫܒܿܟܼܵܐ ܠܚܲܕܼ ܟܝܵܢܵܐ
ܡ̣ܢ ܬܪ̈ܲܝܘܿܢ: ܐܵܘ ܕܡ̣ܢ ܐ̄ܚܪܹܢܵܐ ܠܲܐ̄ܚܪܹܢܵܐ ܐܸܫܬܲܚܠܲܦܘ: ܐܵܘ
pb. 129
ܕܲܠܫܘܼܡܠܵܝܵܐ ܕܡܲܥܒܿܕܼܵܢ̈ܘܵܬܼܵܐ ܟܝܵܢܵܝ̈ܬܼܵܐ. ܐܲܝܟܲܢܵܐ ܕܠܵܐ ܢܸܥܒܸܿܕܼ ܒܸܤܪܵܐ
ܒܲܟܼܝܵܢܵܐ ܕܝܼܠܹܗ: ܐܸܠܵܐ ܠܚܲܕܼ ܦܲܪܨܘܿܦܵܐ ܕܲܟܼܝܵܢܹ̈ܐ ܬܪ̈ܲܝܗܘܿܢ: ܟܲܕܼ
ܡܩܲܝܡܝܼܢ ܬܪ̈ܲܝܗܘܿܢ ܠܕܼܝܼܠܵܝ̈ܬܼܵܐ ܕܲܟܼܝܵܢܲܝ̈ܗܘܿܢ. ܘܲܡܩܵܘܝܵܐ ܐܘܼܤܝܼܵܐ
ܕܐܲܠܵܗܘܼܬܼܵܐ: ܘܠܵܐ ܚܵܫܵܐ: ܟܲܕܼ ܐܝܼܬܹܝܗ̇ ܒܐܘܼܤܝܼܵܐ ܕܒܸܤܪܵܐ. ܘܒܸܤܪܵܐ
ܬܘܼܒܼ ܡܩܵܘܸܐ ܒܐܘܼܤܝܼܵܐ ܕܒܸܤܪܵܐ: ܟܲܕܼ ܐܝܼܬܸܿܘܗܝ ܒܲܟܼܝܵܢܵܐ
ܘܲܒܼܦܲܪܘܿܦܵܐ ܕܐܲܠܵܗܘܼܬܼܵܐ: ܚܲܕܼܘ ܓܹܝܪ ܦܲܓܼܪܵܐ. ܘܲܬܼܪ̈ܲܝܗܘܿܢ
ܚܲܕܼ ܒܪܵܐ. ܠܵܘ ܓܹܝܪ ܐ̄ܚܵܪܹܢܵܐ ܡܸܬܼܐܡܲܪ ܐܲܠܵܗܵܐ ܡܸܠܬܼܵܐ ܒܒܸܪܤܪܵܐ:
ܠܒܲܪ ܡ̣ܢ ܗܵܘ̇ ܕܲܒܼܒܸܤܪܵܐ ܕܝܼܠܲܢ. ܘܠܵܐ ܬܘܼܒܼ ܒܸܤܪܵܐ: ܐܸܠܵܐ
ܒܲܒܼܪܵܐ ܐܝܼܬܼܵܘܗܝ: ܒܐܲܠܵܗܵܐ ܡܸܠܬܼܵܐ. ܕܢܸܬܿܕܲܒܲܪ ܡܫܲܡܠܝܵܐܝܼܬܼ
ܒܲܟܼܝܵܢܵܐ ܕܲܒܼܢܲܝ̈ܢܵܫܵܐ: ܟܲܕܼ ܐܝܼܬܼܵܘܗܝ ܒܲܪܢܵܫܵܐ. ܘܕܲܢܩܘܼܡ ܐܲܝܟܼ ܐܲܠܵܗܵܐ:
ܟܲܕܼ ܐܝܼܬܼܵܘܗܝ ܒܲܟܼܝܵܢܵܐ ܐܲܠܵܗܵܐ. ܗܵܘ̇ ܕܡ̣ܢ ܕܠܵܐ ܚܛܝܼܬܼܵܐ: ܘܡܵܐ
ܕܲܢܛܲܪ: ܢܸܫܬܿܠܸܡ ܠܡܵܘܬܵܐ ܚܠܵܦ ܦܘܼܩܩܵܢܲܢ. ܕܲܢܛܲܪ ܕܡܘܼܬܼܵܐ
ܕܨܲܠܡܵܐ ܕܝܼܠܹܗ: ܕܢܸܗܘܸܐ ܡܸܟܹܝܠ ܗܵܘ̇. ܠܵܘ ܠܲܕܼܡܘܼܬܼܵܐ ܢܤܲܒܼ
ܫܡܵܐ ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ: ܐܲܝܟܲܢܵܐ ܕܢܸܬܿܬܿܪܝܼܡ ܟܝܵܢܵܐ
ܕܲܒܼܢܲܝ̈ܢܵܫܵܐ. ܐܘܼܤܝܼܵܐ ܓܹܝܪ ܕܠܵܐ ܐܝܼܬܹܝܗ̇ ܡܸܟܹܝܠ ܕܒܲܪܢܵܫܵܐ ܐܸܠܵܐ
ܕܐܲܠܵܗܵܐ ܡܸܠܬܼܵܐ: ܠܵܐ ܡܸܬܼܝܼܗܸܒܼ ܠܵܗ̇ ܐܝܼܩܵܪܵܐ ܘܪܘܼܡܪܵܡܵܐ.
ܟܝܵܢܵܐ ܕܝܼܠܲܢ ܒܲܟܼܝܵܢܵܐ ܐ̄ܚܪܹܢܵܐ ܐܸܬܼܝܲܩܲܪ: ܘܠܵܘ ܒܲܟܼܝܵܢܵܐ ܕܝܼܠܲܢ.
ܪܘܼܡܪܵܡܵܐ ܓܹܝܪ ܕܲܟܼܝܵܢܵܐ ܕܝܼܠܲܢ: ܠܲܫܡܵܐ ܗܵܘ̇ ܕܲܡܝܲܬܲܪ ܡ̣ܢ ܟܠ
ܫܡܵܗ̈ܝܼܢ: ܗܘ̤ܵܐ ܓܵܘܢܵܐܝܼܬܼ ܕܲܟܼܝܵܢܵܐ ܕܗܵܘ̇ ܕܐܝܼܬܼܵܘܗܝ ܪܘܼܡܪܵܡܵܐ
ܕܐܲܝܢܵܐ ܕܲܡܩܵܘܸܐ ܒܐܘܼܤܝܼܵܐ ܕܝܼܠܹܗ: ܘܡܸܫܟܲܚ ܕܢܸܗܘܸܐ ܗܵܘ̇ ܡܵܐ
pb. 130
ܕܐܝܼܬܼܵܘܗܝ ܒܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ. ܗܵܕܼܵܐ ܗ̣̄ܝ ܓܹܝܪ ܡܵܪܵܢܵܐܝܼܬܼ
ܡܸܬܼܪܲܡܪ̱ܡܵܢܘܼܬܼܵܐ: ܕܐܲܟܼܘܵܬܼܵܗ̇ ܠܲܝܬܿ. ܫܘܼܚܠܵܦ ܐܘܼܤܝܼܵܐ ܓܹܝܪ
ܕܠܐܘܼܤܝܼܵܐ: ܒܘܼܛܵܠܵܐ ܐܝܼܬܼܵܘܗܝ ܕܐܘܼܤܝܼܵܐ ܗܵܝ̇ ܕܙܵܕܹܩ ܠܵܗ̇
ܕܲܬܼܪܲܡܪܸܡ: ܘܐܵܦ ܕܝܼܠܵܗ̇ ܕܪܘܼܡܡܪܵܡܵܐ. ܘܠܲܝܬܹܝܗ̇ ܐܵܦܠܵܐ
ܡܸܬܼܢܲܚܬܼܵܢܘܼܬܼܵܐ ܕܐܲܠܵܗܵܐ ܡܸܠܬܼܵܐ: ܟܲܕܼ ܠܘܼܤܝܼܵܐ ܕܒܸܤܪܵܐ
ܢܸܫܬܲܚܠܲܦ. ܡܸܛܠ ܕܠܲܝܬܹܝܗ̇ ܟܝܵܢܵܐ ܗܵܘ̇ ܕܡܸܬܼܢܲܚܲܬܼ: ܐܸܠܵܐ ܗܵܕܹܐ
ܐܝܼܬܹܝܗ̇ ܗܵܝ̇ ܕܐܸܬܼܢܲܚܲܬܼ. ܐܲܟܼܙܢܵܐ ܕܡܲܠܟܵܐ: ܐܸܢ ܢܸܗܘܸܐ ܡ̣ܢ
ܡܫܲܥ̈ܒܿܕܹܐ: ܡܸܬܼܐܡܲܪ ܕܐܸܬܼܢܲܚܲܬܼ: ܟܲܕܼ ܐܝܼܬܼܵܘܗܝ ܫܲܪܝܼܪܵܐܝܼܬܼ ܡܲܠܟܵܐ.
ܘܡܸܛܠ ܡܵܐܢܹ̈ܐ ܕܲܡܫܲܥ̈ܒܿܕܹܐ ܕܲܠܒܸܫ̣: ܡܸܬܼܐܡܲܪ ܕܡܸܬܼܢܲܚܵܬܼܘܼ
ܐܸܬܼܢܲܚܲܬܪ: ܟܲܕܼ ܠܗܵܠܹܝܢ ܕܝܼܠܹܗ ܒܗܵܠܹܝܢ ܕܗܵܘ̇ ܒܐܸܤܟܹܡܵܐ
ܡܸܬܼܚܲܚܲܫ. ܐܲܝܟܲܢܵܐ ܕܗܵܘ̇ ܡܵܐ ܕܐܝܼܬܲܝܗܘܿܢ ܗܵܡ̇ܘܢ ܬܚܹܝܬܼ ܢܵܡܘܿܤܵܐ
ܕܕܼܘܼܒܵܪܹ̈ܐ: ܗܵܟܲܢܵܐ ܢܸܗܘܸܐ ܗ̤ܘ ܒܨܒܼܝܵܢܹܗ ܬܚܹܝܬܼ ܢܵܡܘܿܤܵܐ: ܟܲܕܼ
ܐܝܼܬܼܵܘܗܝ ܡܲܠܟܵܐ ܕܝܼܠܗܘܿܢ ܕܕܼܘܼܒܵܪܹ̈ܐ ܘܡܵܪܗܘܿܢ. ܐܵܦܠܵܐ ܓܹܝܪ
ܪܘܼܡܪܵܡܵܐ ܐܝܼܬܼܵܘܗܝ: ܟܲܕܼ ܠܲܟܼܝܵܢܵܐ ܕܝܼܠܹܗ ܢܸܬܼܪܲܡܪܲܡ. ܐܸܠܵܐ
ܕܢܸܬܸܠ ܠܹܗ ܗܵܘ̇ ܡܵܐ ܕܠܲܝܬܿ ܗ̄ܘ̣ܵܐ ܠܹܗ: ܠܵܐ ܗ̄ܘ̣ܵܐ ܕܲܢܪܝܼܡܝܼܘܗܝ
ܡܸܢܹܗ ܠܗܵܘ̇ ܡܵܐ ܕܐܝܼܬܼ ܗ̄ܘ̣ܵܐ ܠܹܗ. ܐܸܢܗ̤ܘ ܓܹܝܪ ܕܲܕܼܗܵܘ̇ ܐܲܝܢܵܐ
ܕܐܝܼܬܼܵܘܗܝ ܗ̄ܘ̣ܵܐ ܘܩܲܕܼܡܵܝܑܼܬܼ ܗ̄ܘ̣ܵܐ: ܐܝܼܬܼܵܘܗܝ ܪܘܼܡܪܵܡܵܐ
ܘܡܘܼܟܵܟܼܵܐ: ܕܲܟܼܝܵܢܵܐ ܗܵܘ̇ ܕܐܝܼܬܼܵܘܗܝ ܗ̄ܘ̣ܵܐ ܘܩܲܕܼܡܵܝܑܬܼ ܐܝܼܬܼܵܘܗܝ:
ܐܝܼܬܼܵܘܗܝ ܡܘܼܟܵܟܼܵܐ: ܕܡ̇ܢ ܐܝܼܬܼܵܘܗܝ ܪܘܼܡܪܵܡܵܐ؟ ܩܲܕܼܡܵܝܑܬܼ
ܐܸܡ݂ܲܪ ܠܐܘܼܤܝܼܵܐ ܕܐܸܬܼܪܲܡܪܡܲܬ̤: ܘܗܵܝܕܹܝܢ ܠܗܵܘ̇ ܫܡܵܐ ܕܐܸܬܼܪܲܡܪ̱ܡܲܬ̤
pb. 131
ܒܹܗ: ܕܲܠܥܸܠ ܡ̣ܢ ܟܠ ܫܡܵܗ̈ܝܼܢ ܐܝܼܬܼܵܘܗܝ. ܐܸܢܗ̤ܘ ܓܹܝܪ ܕܲܬܼܥܲܠܸܐ
ܠܐܘܼܤ̈ܝܵܣ ܕܲܡܩܲܒ̈ܠܵܢ ܡܘܼܟܵܟܼܵܐ ܘܪܘܼܡܪܵܡܵܐ: ܠܲܝܬܹܝܗ̇ ܐܘܼܤܝܼܵܐ
ܕܐܸܬܼܡܲܟܲܟܲܬ̤. ܡܸܛܠ ܗܵܢܵܐ: ܕܡܲܟܸܿܟܼ ܢܲܦܫܹܗ ܐܸܡ݂ܲܪ ܠܲܚܕܵܝܘܼܬܼܵܐ
ܨܒܼܝܵܢܵܝܬܼܵܐ ܘܲܠܡܸܬܼܒܲܪܢܫܵܘܼܬܼܵܐ ܘܠܲܙܢܵܐ ܕܡܲܟܿܝܼܟܼܘܼܬܼܵܐ ܕܚ̣ܵܘܝܼ:
ܕܲܢܤܲܒܼ ܕܡܘܼܬܼܵܐ ܕܥܲܒܼܕܵܐ. ܘܬܼܘܼܒܼ ܕܲܠܨܒܼܝܵܢܵܝܬܐ: ܘܠܵܘ ܠܲܟܼܝܵܢܵܝܬܼܵܐ
ܗܘ̤ܵܐ ܗܵܘ̇ ܡܵܐ ܕܵܗܘ̤ܵܐ. ܒܐܸܤܟܹܿܡܵܐ ܐܸܫܬܟܲܚ ܐܲܝܟܼ ܒܲܪܢܵܫܵܐ: ܠܵܘ
ܒܘܼܤܝܼܵܐ. ܒܲܕܼܡܘܼܬܼܵܐ ܓܹܝܪ ܕܐܲܠܵܗܵܐ: ܕܡܘܼܬܼܵܐ ܕܥܲܒܼܕܵܐ. ܕܡܘܼܬܼܵܐ
ܕܐܲܠܵܗܵܐ ܒܐܸܤܟܹܡܵܐ ܗ̄ܘ̣ܵܐ ܐܲܝܟܼ ܒܲܪܢܵܫܵܐ: ܐܲܠܵܗܵܐ ܓܹܝܪ ܒܵܗ̇ ܒܐܘܼܤܝܼܵܐ
ܕܝܼܠܹܗ ܗܘ̤ܵܐ. ܐܲܝܟܲܢܵܐ ܕܐܵܦ ܒܡܘܼܟܵܟܼܵܐ ܢܸܬ̱ܪܢܸܐ ܒܗܵܘ̇ ܕܲܢܤܲܒܼ
ܕܡܘܼܬܼܵܐ ܕܥܲܒܼܕܵܐ: ܘܘܼܪܡܪܵܡܵܐ ܒܲܕܼܡܘܼܬܼܵܐ ܕܥܲܒܼܕܵܐ: ܒܗܵܝ̇ ܕܢܸܤܒܲܬ̤
ܫܡܵܐ ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ. ܘܠܵܐ ܗ̄ܘ̣ܵܐ ܠܫܘܼܚܠܵܦ ܐܘܼܤܝܼܵܐ:
ܐܵܘ ܠܐܘܼܤܝܼܵܐ: ܐܵܘ ܠܪܘܼܟܵܒܼܵܐ ܟܝܵܢܝܵܐ ܕܲܠܚܲܕܼ ܟܝܵܢܵܐ ܬܸܬܼܪ̱ܢܸܐ: ܐܸܠܵܐ
ܠܗܵܝ̇ ܨܸܒܼܝܵܢܵܝܬܼܵܐ: ܠܗܵܝ̇ ܕܲܒܼܗܘܼܟܵܟܼܵܐ ܘܲܒܼܪܘܼܡܪܵܡܵܐ. ܗܵܝ̇ ܓܹܝܪ
ܕܲܟܼܝܵܢܵܐ: ܚܵܫܘܿܫܬܼܵܐ ܐܝܼܬܹܝܗ̇ ܘܡܸܫܬܿܚ̱ܠܦܵܢܝܼܬܼܵܐ. ܕܐܝܼܬܼܵܘܗܝ ܟܝܵܢܵܐ ܒܲܪܝܵܐ
ܘܲܥܒܼܕܼܵܐ: ܠܵܐ ܗ̄ܘ̣ܵܐ ܠܵܐ ܒܲܪܝܵܐ: ܘܠܵܐ ܗ̄ܘ̣ܵܐ ܠܵܐ ܥܒܼܝܼܕܼܵܐ: ܘܠܵܐ
ܗ̄ܘ̣ܵܐ ܠܵܐ ܡܸܫܬܲܚ̱ܠܦܵܢܵܐ: ܘܠܵܐ ܗ̄ܘ̣ܵܐ ܠܵܐ ܡܸܫܬܲܓܼܢܝܵܢܵܐ.
ܡܸܛܠ ܗܵܕܹܐ: ܗܵܢܵܐ ܠܕܼܘܼܒܵܪܵܐ ܕܒܲܪܢܵܫܵܐ ܡܸܕܸܡ ܠܵܐ ܝܲܗ̣̄ܒܼ
ܒܡܸܬܼܒܲܪܢܫܵܢܘܼܬܼܵܐ: ܐܸܠܵܐ ܠܐܲܠܵܗܵܐ ܡܸܠܬܼܵܐ: ܐܲܝܟܲܢܵܐ ܕܒܲܟܼܝܵܢܵܐ
ܕܐ̄ܢܵܫܘܼܬܼܵܐ ܢܸܬܼܚܲܫܲܚ ܠܕܼܘܼܒܵܪܵܐ ܕܝܼܠܹܗ. ܐܲܝܟܲܢܵܐ ܕܐܵܪܪܝܼܘܿܣ
ܘܐܘܼܢܵܡܝܼܣ ܘܐܵܦܘܿܠܝܼܢܵܪܝܼܣ: ܟܹܐܡܲܬܼ ܐܲܝܟܼ ܐܲܠܵܗܵܐ ܐܵܡ̇ܪܝܼܢ ܠܹܗ
ܠܲܡܫܝܼܚܵܐ ܒܲܡܫܵܐ: ܒܲܥ̇ܒܼܵܕܼܵܐ ܕܹܝܢ ܡ̣ܢ ܗܵܝ̇ ܕܐܝܼܬܼܵܘܗܝ ܐܲܠܵܗܵܐ
pb. 132
ܡܒܲܛܠܝܼܢ ܠܹܗ. ܒܗܵܝ̇ ܕܲܠܐ̄ܢܵܫܵܝ̈ܬܹܗ ܒܲܟܼܝܵܢܵܐ ܠܐܘܼܤܝܼܵܐ ܕܝܼܠܹܗ
ܝܵܗ̇ܒܿܝܼܢ ܠܗܹܝܢ: ܘܲܡܒܲܛܠܝܼܢ ܠܝܘܼܒܵܠܵܐ ܕܫܲܪ̈ܒܼܵܬܼܵܐ ܕܲܡܫܝܼܚܵܐ
ܘܲܠܡܼ̈ܠܟܵܢܹܐ ܕܲܠܘܵܬܼ ܐܲܒܼܵܗܵܬܼܵܐ: ܕܡ̣ܢ ܙܲܪܥܗܘܿܢ ܢܩܘܼܡ ܡܫܝܼܚܵܐ
ܕܒܼܒܲܤܲܪ. ܡܸܛܠ ܗܵܢܵܐ ܡܥܲܗܕܹܝܢ ܐܹܘܲܢܓܲܠܸܤܛܹ̈ܐ ܠܟܼܠܗܹܝܢ ܐܲܝܠܹܝܢ
ܕܒܲܫܪܵܪܵܐ ܡܚܵܘ̈ܝܵܢ ܠܲܟܼܝܵܢܵܐ ܕܒܲܪܢܵܫܵܐ: ܐܲܝܟܲܢܵܐ ܕܕܲܠܡܵܐ ܡ̣ܢ ܐܲܠܵܗܘܼܬܼܵܐ
ܠܵܐ ܬܸܬܼܗܲܝܡܲܢ ܕܐܝܼܬܼܵܘܗܝ ܐܵܦ ܒܲܪܢܵܫܵܐ. ܘܠܵܐ ܬܸܬܼܗܲܝܡܲܢ ܥܲܡ
ܗܵܕܹܐ ܐܵܦܠܵܐ ܕܗܵܢܵܘ ܗܵܘ̇ ܡ̣ܢ ܟܘܼܠܟܵܢܹ̈ܐ ܐܸܫܬܲܪܲܪ. ܡܸܛܠ ܗܵܢܵܐ
ܠܛܘܼܒܼܵܢܝܼܬܼܵܐ ܡܲܪܝܲܡ ܐܸܬܼܥܗܸܕܼ ܐܲܝܟܼ ܕܠܲܐܢ̄ܬܿܬܼܵܐ ܕܲܡܟܼܝܼܪܵܐ ܗ̄ܘ̣ܵܬܼ
ܠܓܲܒܼܪܵܐ: ܗܵܘ̇ ܐܲܝܢܵܐ ܕܐܵܦ ܫܡܹܗ ܘܓܸܢܤܹܗ ܘܐܵܦ ܐܘܼܡܵܢܘܼܬܹܗ ܐܵܦ
ܕܘܿܟܹܿܬܹܗ ܟܬܲܒܼ: ܐܲܝܟܲܢܵܐ ܕܠܵܐ ܢܸܗܘܸܐ ܡܸܕܸܡ ܕܢܸܥܒܸܿܕܼ ܦܘܼܠܵܓܼܵܐ:
ܕܠܵܐ ܬܸܬܼܗܲܝܡܲܢ ܕܐܝܼܬܹܝܗ̇ ܐܲܢ̄ܬܿܬܼܵܐ. ܡܸܛܠ ܗܵܢܵܐ ܐܵܦ ܠܫܝܼܛܘܼܬܹܗ:
ܘܥܲܡ ܟܠܗܹܝܢ: ܐܵܦ ܠܤܘܼܒܵܪܵܐ ܕܒܲܛܢܹܗ ܘܲܠܝܲܠܕܹܗ
ܘܠܐܘܿܪܝܵܐ: ܠܡܵܘܕܥܵܢܘܼܬܼܵܐ ܕܗܵܘ̇ ܕܐܸܬܼܝܼܠܸܕܼ ܥܲܡ ܗܵܝ̇ ܝܼܠܸܕܬܹܗ:
ܕܢܸܫܬܲܪܲܪ ܕܫܲܪܝܼܪܵܐܝܼܬܼ ܐܝܼܬܼܵܘܗܝ ܒܲܪܢܵܫܵܐ. ܠܡܲܓܤܵܐ ܕܒܼܐܘܿܪܝܵܐ:
ܠܲܟܼܪܘܼܟܼܝܵܐ ܕܒܲܥܲܙܪܘܼܪܹ̈ܐ. ܒܐܝܠܹܝܢ ܕܕܲܟܼܝܵܢܵܐ ܐܸܢܹܝܢ ܕܥܘܸܠܹ̈ܐ:
ܠܩܘܼܪ̈ܒܵܢܹܐ ܕܲܚܠܵܦܵܘܗܝ ܐܸܬܼܩܪܲܒܼܘ. ܠܕܼܘܼܪܵܓܹܗ: ܠܬܲܪܒܿܝܼܬܹܗ
ܕܲܒܼܩܵܘܡܬܼܵܐ ܘܲܒܼܚܸܟܼܡܬܼܵܐ ܕܲܠܘܵܬܼ ܐܵܠܵܗܵܐ ܘܕܲܠܘܵܬܼ ܒܢܲܝ̈ܢܵܫܵܐ:
ܠܗܘܼܦܵܟܼܵܘ̈ܗܝ ܕܲܒܼܥܵܠܡܵܐ ܠܲܢܛܘܼܪ̈ܵܬܹܗ: ܠܡܸܫܬܲܥܒܿܕܼܵܢܘܼܬܹܗ:
ܠܲܒܼܥܵܬܼܵܐ ܕܒܵܥܹ̇ܐ ܗ̄ܘ̣ܵܐ: ܘܲܠܟܼܠܹܗ ܫܘܼܡܠܵܝܼܵܐ ܕܢܵܡܘܿܤܵܐ:
ܠܡܲܥܡܘܿܕܼܝܼܬܼܵܐ: ܘܲܠܒܲܪܬܼ ܩܵܠܵܐ ܕܐܸܬܼܐܲܡܪܲܬ̤ ܠܹܗ ܕܐܝܼܬܼܵܘܗܝ
pb. 133
ܒܪܵܐ: ܗܵܘ̇ ܕܐܝܼܬܼܵܘܗܝ ܡ̣ܢ ܡܲܪܒܿܥܵܐ ܒܲܚܕܼܵܝܘܼܬܼܵܐ ܒܪܵܐ. ܠܤܵܗܕܘܼܬܼܵܐ
ܕܲܢܛܘܼܪܬܵܐ ܕܕܼܘܼܒܵܪܹ̈ܐ: ܠܒܲܪܬܼ ܩܵܠܵܐ ܕܐܲܒܼܵܐ: ܠܲܡܚܵܘܝܵܢܘܼܬܼܵܐ
ܕܪܘܼܚܵܐ ܕܩܘܼܕܼܫܵܐ: ܠܲܡܕܲܒܿܪܵܢܘܼܬܼܵܗ ܕܥܲܠ ܐܲܦܲܝ̈ܢ ܕܲܒܼܟܼܠܵܗ̇
ܚܦܝܼܛܘܼܬܼܵܐ. ܠܵܘ ܒܗܲܓܵܓܼܵܐ ܘܠܵܘ ܒܐܸܤܟܹܡܵܐ ܕܒܲܪܢܵܫܵܐ: ܐܸܠܵܐ
ܒܲܟܼܝܵܢܵܐ ܕܒܲܪܢܵܫܵܐ: ܡ̣ܢ ܦܓܼܪܵܐ ܕܒܲܪܢܵܫܵܐ ܘܡ̣ܢ ܢܲܦܫܵܐ ܡܠܝܼܠܬܼܵܐ:
ܗܵܝ̇ ܕܡܸܬܼܚܲܫܒܼܵܐ ܘܡܸܬܼܪܲܥܝܵܐ ܒܲܟܼܝܵܢܵܐ ܕܒܲܢܲܝ̈ܢܵܫܵܐ. ܕܢܸܗܘܸܐ ܟܠܗܹܝܢ
ܗܵܘܚ ܡܵܐ ܕܐܝܼܬܼܵܘܗܝ ܒܲܟܼܝܵܢܵܐ ܕܒܲܪܢܵܫܵܐ: ܟܲܕܼ ܠܵܐ ܡܸܬܼܒܲܡܛܲܠ ܡ̣ܢ
ܚܕܼܵܝܘܼܬܼܵܐ ܕܐܲܠܵܗܵܐ ܡܸܠܬܼܵܐ.
ܠܵܘ ܓܹܝܪ ܠܲܟܼܝܵܢܵܐ ܗܘ̤ܵܬܼ ܚܕܼܵܝܘܼܬܼܵܐ ܕܲܟܼܝܵܢܹ̈ܐ: ܐܵܘ ܠܒܼܘܼܠܒܵܠܵܐ:
ܐܵܘ ܠܫܘܼܚܠܵܦܵܐ: ܐܵܘ ܠܫܘܼܚܠܵܦ ܐܘܼܤܝܼܵܐ: ܐܵܘ ܕܐܲܠܵܗܘܼܬܼܵܐ
ܠܐ̄ܢܵܫܘܼܬܼܵܐ: ܐܵܘ ܕܐ̄ܢܵܫܘܼܬܼܵܐ ܠܐܲܠܵܗܘܼܬܼܵܐ: ܐܵܘ ܠܡܘܼܙܵܓܼܵܐ ܕܲܟܼܝܢܹ̈ܐ:
ܐܵܘ ܠܪܘܼܟܵܒܼܵܐ ܕܚܲܕܸ ܟܝܵܢܵܐ: ܟܲܕܼ ܡܡܲܙܓܼܝܼܢ ܘܐܲܟܲܚ̄̇ܕܼ ܚܵܫ̇ܝܼܢ ܥܲܡ
ܚܕܼܵܕܹ̈ܐ: ܒܡܲܥ̈ܒܿܕܼܵܢܘܵܬܼܵܐ ܟܝܵܢܵܝ̈ܬܼܵܐ ܕܲܟܼܝܵܢܹ̈ܐ ܕܲܡܟܲܝܢܝܼܢ. ܠܟܼܠܗܹܝܢ
ܓܹܝܪ ܗܵܠܹܝܢ ܡܒܲܛ̇ܠܝܼܢ ܒܝܲܕܼ ܚܕܼܵܝܘܼܬܼܵܐ ܟܝܵܢܵܝܬܼܵܐ ܘܲܩܢܘܿܡܵܝܬܼܵܐ:
ܘܟܼܠܗܹܝܢ ܗܵܠܹܝܢ ܕܐܝܼܬܼ ܠܹܗ ܒܲܟܼܝܵܢܹܗ ܢܵܤ̇ܒܿܝܼܢ ܠܗܹܝܢ: ܘܠܲܐܠܵܗܵܐ
ܡܸܠܬܼܵܐ ܟܝܵܢܵܐܝܼܬܼ ܝܵܗ̇ܒܿܝܼܢ ܠܗܹܝܢ: ܠܕܼܚ̱ܠܬܼܵܐ ܐ̄ܢܵܫܵܝܬܼܵܐ: ܠܡܸܫܬܲܠܡܵܢܘܼܬܼܵܐ:
ܠܡܸܫܬܲܐܠܵܢܘܼܬܼܵܐ: ܠܦܘܼܢܵܝ ܦܸܬܼܓܼܵܡܵܐ: ܠܫܘܼܩܵܦܵܐ ܕܥܲܠ ܦܲܟܹ̈ܐ:
ܠܲܓܼܙܵܪ ܕܝܼܢܵܐ ܕܲܨܠܝܼܒܼܵܐ: ܠܡܹܐܙܲܠܬܹܗ: ܠܲܤܝܵܡܵܐ ܕܲܨܠܝܼܒܼܵܐ ܥܲܠ
ܟܲܬܼܦܹܗ: ܠܲܛܥܘܼܢܬܼܵܐ ܕܲܙܩܝܼܦܹܥܗ: ܠܡܲܤܒܼܵܐ ܕܡܸܢܹܗ ܕܥܲܠ
ܐ̄ܚܪ̈ܵܢܹܐ ܢܸܬܿܬܿܤܝܼܡ: ܠܲܟܼܠܝܼܠܵܐ ܕܟܼܘܼ̈ܒܹܿܐ: ܠܡܵܐܢܹ̈ܐ ܕܲܙܚܘܿܪܝܼܬܼܵܐ:
pb. 134
ܠܩܘܼܝܵܡܵܐ ܕܲܙܝܼܦܵܐ: ܠܲܙܩܝܼܦܘܼܬܼܵܐ: ܠܩܘܼܒܵܥܵܐ ܕܨܨܹ̈ܐ: ܠܲܡܪܵܪܬܵܐ
ܕܐܸܬܼܩܲܪܒܲܬ̤ ܠܹܗ: ܠܐܘܼ̈ܠܨܵܢܹܐ ܐ̄ܚܪ̈ܵܢܹܐ. ܠܡܲܫܡܵܢܘܼܬܼܵܐ ܕܪܘܼܚܹܗ
ܠܐܲܒܼܵܐ: ܠܡܲܪܟܿܢܵܢܘܼܬܼܵܐ ܕܪܹܫܹܗ: ܠܡܲܚܬܼܵܢܘܼܬܼܵܐ ܕܦܲܓܼܪܹܗ ܡ̣ܢ ܙܩܝܼܦܵܐ:
ܠܚܘܼܢܛܬܹܗ: ܠܲܩܒܼܘܼܪܬܹܗ: ܠܲܩܵܝܵܡܬܼܵܐ ܕܠܲܬܼܠܵܬܼܵܐ ܝܘܡ̈ܝܵܢ:
ܠܡܸܬܼܚܵܘܝܵܢܘܼܬܹܗ ܕܲܒܼܦܲܓܼܪܹܗ: ܠܡܲܡܠܠܹܗ ܘܲܠܡܲܠܦܵܢܘܼܬܹܗ:
ܕܠܵܐ ܢܸܤܒܿܪܘܼܢ ܕܗܲܓܵܓܼܵܐ ܐܝܼܬܼܵܘܗܝ ܕܦܲܓܼܪܵܐ: ܐܸܠܵܐ ܫܲܪܝܼܪܵܐܝܼܬܼ
ܦܲܓܼܪܵܐ ܗ̄ܘ̣: ܕܐܵܦ ܒܸܤܪ̈ܵܬܼܵܐ ܐܝܼܬܼ ܠܹܗ. ܡܸܛܠ ܕܠܵܐ ܗ̄ܘ̣ܵܐ ܒܗܲܓܵܓܼܵܐ
ܘܲܒܼܡܲܛܥܝܵܢܘܼܬܼܵܐ ܐܝܼܬܼܵܘܗܝ ܗ̄ܘ̣ܵܐ ܦܲܓܼܪܵܐ ܘܢܲܦܫܵܐ: ܐܸܠܵܐ ܒܲܫܪܵܪܵܐ
ܟܠܗܹܝܢ ܒܲܟܼܢܵܝܵܐ: ܡܸܕܸܡ ܠܲܝܬܿ ܕܲܛܫܸܐ.
ܟܗܠܹܝܢ ܐ̄ܢܵܫܵܝ̈ܬܼܵܐ ܐܲܝܠܹܝܢ ܕܗܵܫܵܐ ܒܵܗ̇ܬܿܝܼܢ ܠܡܹܐܡܲܪ ܥܠܵܘܗܝ:
ܐܹܘܲܢܓܲܠܸܤ̈ܛܹܐ ܠܵܐ ܒܗܸܬܼܘ ܠܡܹܐܡܲܪ ܐܸܢܹܝܢ. ܗܵܠܹܝܢ ܕܗܵܢܘܿܢ ܥ̈ܒܼܕܝܼܢ
ܠܗܹܝܢ ܟܲܕܼ ܠܵܐ ܒܵܗ̇ܬܿܝܼܢ ܕܲܟܼܝܵܢܵܐ ܐܲܠܵܗܵܝܵܐ: ܒܝܲܕܼ ܚܕܼܵܝܘܼܬܼܵܐ ܕܒܲܩܡܘܿܡܵܐ
ܟܝܵܢܵܝܵܐ: ܟܲܕܼ ܚܵܐܹ̇ܫ ܐܲܠܵܗܵܐ ܚܲܫܹ̈ܐ ܕܦܲܓܼܪܵܐ: ܕܒܲܟܼܝܵܢܵܐ ܟܝܵܢܵܐܝܼܬܼ ܡܚܲܝܲܕܼ:
ܟܲܕܼ ܨܵܗܹ̇ܐ: ܟܲܕܼ ܟܵܦܹ̇ܢ: ܟܲܕܼ ܨܪܝܼܟܼ: ܟܲܕܼ ܝܲܨܝܼܦ: ܟܲܕܼ ܡܸܬܼܚܲܫܲܒܼ:
ܟܲܕܼ ܒܵܥܹ̇ܐ. ܐܲܝܟܲܢܵܐ ܕܐܵܦ ܠܐ̄̈ܢܵܫܵܝ̈ܬܼܵܐ ܗܵܠܹܝܢ ܕܲܟܼܝܵܢܵܐܝܼܬܼ ܚܵܐܹ̇ܫ ܒܗܹܝܢ
ܢܸܙܟܸܐ: ܘܢܲܩܪܸܒܼ ܠܘܼܩܒܲܠ ܟܝܵܢܵܐ ܕܲܒܼܢܲܝ̈ܢܵܫܵܐ: ܠܒܼܘܼܛܵܠܵܐ
ܕܫܘܼܒܼܗܵܪܲܢ: ܘܲܠܒܼܘܼܛܵܠܵܐ ܕܦܘܼܪܩܵܢܲܢ. ܘܲܠܕܼܝܼ̈ܠܝܵܬܼܵܐ ܕܐܲܠܵܗܵܐ ܡܸܠܬܼܵܐ
ܢܒܲܛܠܘܼܢ ܐܵܢܹܝܢ: ܘܢܸܥܒܿܕܘܼܢ ܐܸܢܹܝܢ ܐ̄ܢܵܫܵܝ̈ܬܼܵܐ: ܕܒܲܟܼܝܵܢܵܐ ܟܝܵܢܵܐܝܼܬܼ
ܤܵܥܲ݁ܪ ܘܚܵܐܹ̇ܫ ܒܲܪܓܸܫܬܼܵܐ ܕܲܟܼܝܵܢܵܐ: ܡܩܲܒܸܿܠ ܚܲܫܹ̈ܐ ܒܐܘܼܤܝܼܵܐ ܕܝܼܠܹܗ
ܟܝܵܢܵܐܝܼܬܼ: ܐܲܝܟܲܢܵܐ ܕܦܲܓܼܪܵܐ ܡ̣ܢ ܢܲܦܫܵܐ: ܘܢܲܫܵܐ ܡ̣ܢ ܦܲܓܼܪܵܐ.
pb. 135
ܕܪܸܥܠܵܐ ܘܲܪܬܹܝܬܼܵܐ ܐܬܹܝܗ̇: ܕܡܸܪܢܵܐ ܢܸܪܢܸܐ ܠܗܵܕܹܐ ܐܵܦ
ܕܢܹܐܡܪܝܼܗ̇: ܠܲܒܼܢܲܝ̈ܢܵܫܵܐ: ܐܲܝܠܹܝܢ ܕܪܸܥܝܵܢܵܐ ܐܲܝܢܵܐ ܕܐܲܝܟܲܢ ܕܗ̤ܘ
ܐܝܼܬܼ ܠܗܘܿܢ ܥܲܠ ܒܪܵܐ: ܘܐܵܦܸܢ ܥܒܼܝܼܕܼܵܐ ܘܐܵܦܸܢ ܒܲܪܝܵܐ:
ܘܕܫܬܲܚܠܲܦ ܡ̣ܢ ܠܵܐ ܚܵܫܘܿܫܵܐ ܠܚܵܫܘܿܫܵܐ: ܘܡ̣ܢ ܠܵܐ ܡܵܝܘܿܬܼܵܐ
ܠܡܵܝܘܿܬܼܵܐ: ܘܡ̣ܢ ܠܵܐ ܡܸܫܬܲܚ̱ܠܦܵܢܵܐ ܠܡܸܫܬܲܚܠܦܵܢܵܐ. ܐܵܦܸܢ ܐܘܼܤܝܼܵܐ
ܕܡܲܠܲܐܟܹ̈ܐ ܢܸܥܒܿܕܼܝܼܘܗܝ ܐ̄ܢܵܫ ܘܲܕܼܠܵܐ ܚܵܐܹ̇ܫ: ܘܢܹܐܡܲܪ: ܕܠܵܐ ܗ̄ܘ̣ܵܐ
ܒܲܟܼܝܵܢܹܗ ܘܲܒܼܡܲܥܒܿܕܼܵܢܘܼܬܹܗ ܘܲܒܼܚܲܝܠܹܗ ܤ̣ܥܲܪ: ܐܸܠܵܐ ܒܗܵܝ̇ ܕܲܗܘ̤ܵܐ:
ܥܵܪܹܩ ܕܢܸܚܲܫ ܚܲܫܹ̈ܐ ܥܲܡ ܗܵܢܵܐ. ܠܡܸܥܪܲܩ ܕܹܝܢ: ܐܲܝܢܵܐ ܕܲܟܼܝܵܢܵܐܝܼܬܼ
ܡܚܲܝܲܕܼ: ܠܵܐ ܡܸܫܪܚܵܐ. ܐܸܢ ܓܹܝܪ ܟܝܵܢܵܐܝܼܬܼ ܠܵܐ ܚܐܹ̇ܫ ܗ̄ܘ̣ܵܐ ܚܲܫܹ̈ܐ
ܕܦܲܓܼܪܵܐ: ܢܲܦܫܵܢܵܐܝܼܬܼ ܚܠܵܦ ܢܲܦܫܵܐ ܚܵܐܹ̇ܫ ܗ̄ܘ̣ܵܐ: ܡܸܛܠ ܕܲܚܠܵܦ
ܢܲܦܫܵܐ ܐܝܼܬܼܵܘܗܝ ܗ̄ܘ̣ܵܐ: ܕܠܵܐ ܡܸܬܼܪܲܥܝܵܐ ܗ̄ܘ̣ܵܬܼ ܐܲܝܟܼ ܡܲܕܿܥܵܐ:
ܘܡܸܬܼܪܲܥܝܵܢܵܐܝܼܬܼ ܚܠܵܦ ܡܲܕܿܥܵܐ ܐܝܼܬܼܵܘܗܝ ܗ̄ܘ̣ܵܐ ܠܵܗ̇.
ܘܒܸܐܤܟܹܡܵܐ ܐܝܼܬܼܵܘܗܝ ܗ̄ܘ̣ܵܐ: ܘܡܲܛܥܸܐ ܗ̄ܘ̣ܵܐ ܒܝܲܕܼ ܐܸܤܟܹܿܡܸܐ
ܕܒܲܪܢܵܫܵܐ: ܐܲܝܟܼ ܡ̇ܢ ܕܐܝܼܬܼ ܠܹܗ ܐܲܝܠܹܝܢ ܕܲܕܼܢܲܦܫܵܐ ܘܲܕܼܦܲܓܼܪܵܐ
ܘܲܕܼܡܲܕܼܥܵܐ ܘܲܕܼܗܵܢܘܿܢ ܒܲܛܝܼܠܲܝ̈ ܡ̣ܢ ܡܲܥܒܿܕܼܵܢܘܼܬܼܵܐ ܐܝܼܬܲܝܗܘܿܢ
ܗ̄ܘ̣ܵܬ ܒܲܟܼܝܵܢܗܘܿܢ.
ܡ̣ܢ ܐܲܝܠܹܝܢ ܕܹܝܢ ܕܐܲܝܟܼ ܐܵܪ̈ܬܵܕܘܿܟܿܤܹܐ ܐܸܢܘܿܢ ܗܵܠܹܝܢ ܡܸܬܼܐܲܡܪ̈ܵܢ:
ܕܡܸܢܹܗ ܕܟܼܝܵܢܵܐ ܠܵܐ ܚܵܫܘܿܫܵܐ ܘܠܵܐ ܤܢܝܼܩܵܐ ܘܠܵܐ ܡܸܫܬܲܚܠܦܵܢܵܐ
ܘܠܵܐ ܡܸܫܬܲܓܼܢܝܵܢܵܐ ܕܐܲܒܼܵܐ ܐܝܼܬܼܵܘܗܝ. ܘܗܵܝܕܹܝܢ ܐܲܟܼܙܢܵܐ ܕܲܝܗܘܼ̈ܕܵܝܹܐ
ܡܒܲܙܚܝܼܢ ܗ̄ܘ̣ܵܘ ܟܲܕܼ ܩܵܪܹܝܢ ܠܹܗ ܡܫܝܼܚܵܐ ܘܡܸܙܩܲܦ ܙܲܩܦܘܼܗܝ
pb. 136
ܗ̄ܘ̣ܵܘ: ܗܵܟܲܢܵܐ ܐܵܦ ܗܵܠܹܝܢ: ܝܵܗ̇ܒܿܝܼܢ ܠܹܗ ܒܒܲܪܬܼ ܩܵܠܵܐ ܟܝܵܢܵܐ
ܠܵܐ ܡܸܫܬܲܚ̱ܠܦܵܢܵܐ ܠܵܐ ܚܵܫܘܿܫܵܐ ܘܠܵܐ ܤܢܝܼܩܵܐ: ܘܡܲܝܬܹܝܢ ܠܹܗ
ܠܟܼܠ ܚܲܫ̈ܝܼܢ: ܘܲܠܟܼܠ ܤܢܝܼܩܘܼܬܼܵܐ ܕܦܲܓܼܪܵܐ: ܘܥܵܒܼ̇ܕܝܼܢ ܠܟܼܠܗܹܝܢ
ܕܢܲܦܫܵܐ ܘܲܕܼܡܲܕܿܥܵܐ ܕܐܲܠܵܗܵܐ ܡܸܠܬܼܵܐ: ܒܝܲܕܼ ܚܕܼܵܝܘܼܬܼܵܐ ܩܢܘܿܡܵܝܬܼܵܐ:
ܘܐܲܝܟܼ ܐܲܝܠܹܝܢ ܕܡ̣ܢ ܟܝܵܢܹܗ ܡܫܲܚ̱ܠܦܝܼܢ ܠܹܗ. ܚܕܼܵܐ ܙܒܲܢ ܐܵܡ̇ܪܝܼܢ
ܠܹܗ ܠܵܐ ܚܵܫܘܿܫܵܐ ܘܠܵܐ ܡܵܝܘܿܬܼܵܐ ܘܠܵܐ ܡܸܫܬܲܚ̱ܠܦܵܢܵܐ: ܘܟܼܵܠܹ̇ܝܢ
ܕܠܵܐ ܢܸܬܼܐ̱ܡܲܪ ܡܸܟܹܝܠ ܠܵܐ ܡܵܝܘܿܬܼܵܐ ܘܠܵܐ ܚܵܫܘܿܫܵܐ ܘܠܵܐ ܡܸܫܬܿܚ̱ܠܦܵܢܵܐ:
ܟܲܕܼ ܡܸܬܼܚܲܡܬܼܝܼܢ ܥܲܠ ܐܲܝܢܵܐ ܕܐܵܡܲ݁ܪ ܠܹܗ ܙܲܒܼܢ̈ܝܼܢ ܤܲܓܿܝܼ̈ܐܢ ܠܵܐ
ܚܵܫܘܿܫܵܐ ܠܐܲܠܵܗܵܐ ܡܸܠܬܼܵܐ. ܚܕܼܵܐ ܙܒܲܢ ܠܲܡ ܫܡܲܥ̣ܬܿ: ܤܵܦ̇ܩܵܐ ܠܲܟܼ
ܡܸܟܹܝܠ. ܘܲܬܼܪܹܝܢ ܟܝܵܢ̈ܝܼܢ ܡܫܲܠܡܵܢܹ̈ܐ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ
ܐܵܡ̇ܪܝܼܢ: ܘܫܘܼܚܠܵܦܵܐ ܕܲܟܼܝܵܢܹ̈ܐ ܕܒܲܚܕܼܵܝܘܼܬܼܵܐ ܐܵܡ̇ܪܝܼܢ: ܟܲܕܼ ܡܸܕܸܡ ܠܵܐ
ܝܵܗ̇ܒܿܝܼܢ ܠܵܗ̇ ܠܐ̄ܢܵܫܘܼܬܼܵܐ ܘܠܵܐ ܠܐܲܠܵܗܘܼܬܼܵܐ: ܟܲܕܼ ܥܵܒܼܕܝܼܢ ܗܵܠܹܝܢ
ܕܐ̄ܢܵܫܘܼܬܼܵܐ ܒܲܟܼܝܵܢܵܐ: ܘܲܠܗܵܠܹܝܢ ܕܐܲܠܵܗܘܼܬܼܵܐ ܒܲܟܼܝܵܢܵܐ. ܘܐܵܦܠܵܐ
ܠܐܲܝܠܹܝܢ ܕܐܝܼܬܲܝܗܹܝܢ ܕܐܲܠܵܗܘܼܬܼܵܐ ܒܲܟܼܝܵܢܵܐ ܢܵܛ̇ܪܝܼܢ ܠܗܹܝܢ: ܒܲܕܼ ܥܵܒܼܕܝܼܢ
ܠܹܗ ܠܐܲܠܵܗܵܐ ܡܸܠܬܼܵܐ ܒܲܟܼܝܵܢܵܐ ܕܬܲܪ̈ܬܲܝܗܹܝܢ ܐܘܼܤ̈ܝܼܣ. ܘܲܡܛܲܫܹܝܢ
ܠܹܗ ܠܒܲܪܢܵܫܵܐ ܘܲܠܟܼܠܗܹܝܢ ܕܝܼܠܹܗ: ܕܡܸܛܠܵܬܹܗ ܗܘ̤ܵܬܼ
ܡܸܬܼܒܲܪܢܫܵܢܘܼܬܼܵܐ: ܘܒܹܗ ܗܘ̤ܵܬܼ: ܘܒܼܐܝܼܕܹܗ ܐܸܫܬܿܪܝܼܢ ܚ̄ܢܲܢ ܡ̣ܢ
ܫܒܼܝܼܬܹܗ ܕܡܵܘܬܵܐ. ܘܒܲܫܡܵܐ ܡ̇ܢ ܕܐܵܪ̈ܬܵܕܘܿܟܿܤܹܐ ܡܸܬܼܚܲܫܚܝܼܢ:
ܒܲܥܒܼܵܕܹ̈ܐ ܕܹܝܢ ܕܐܵܪ̈ܝܵܢܹܐ. ܘܡܲܛܥܹܝܢ ܒܗܵܠܹܝܢ ܠܲܡܫܲܡܠܵܝܘܼܬܹܗ
ܠܐܲܠܵܗܵܐ ܡܸܠܬܼܵܐ: ܒܟܼܠܗܹܝܢ ܐ̄ܢܵܫܵܝ̈ܬܼܵܐ ܕܲܟܼܝܵܢܵܐ ܕܐܵܡ̇ܪܝܼܢ ܥܠܵܘܗܝ:
ܡ̣ܢ ܚܕܼܵܝܘܼܬܼܵܐ ܕܲܩܢܘܿܡܵܐ ܟܝܵܢܝܵܐ ܕܢܸܬܿܕܲܒܲܪ ܘܢܸܚܲܫ ܒܟܼܠܗܹܝܢ ܐܲܢܵܫܝ̈ܬܼܵܐ
pb. 137
ܟܝܵܢܵܐܝܼܬܼ. ܘܲܒܼܐ̄ܢܵܫܘܼܬܼܵܐ ܐܸܬܼܚܲܫܲܚ: ܠܵܐ ܗ̄ܘ̣ܵܐ ܕܬܸܬܿܕܲܒܲܪ ܗ̤ܝ ܐ̄ܢܵܫܘܼܬܼܵܐ
ܘܬܸܚܲܫ ܥܲܠ ܐܲܦܲܝ̈ܢ: ܐܸܠܵܐ ܕܢܸܬܿܕܲܒܲܪ ܐܲܠܵܗܵܐ ܡܸܠܬܼܵܐ. ܠܵܐ ܗ̄ܘ̣ܐ
ܕܲܒܼܦܲܪܨܘܿܦܵܐ ܢܼܬܼܚܲܫܲܚ: ܐܸܠܵܐ ܒܲܟܼܝܵܢܵܐ. ܚܕܼܵܝܘܼܬܼܵܐ ܓܹܝܪ ܕܦܲܪܨܘܿܦܵܐ:
ܠܵܐ ܚܵܫܘܿܫܬܼܵܐ ܐܝܼܬܹܝܗ̇: ܘܕܼܵܐܪ̈ܬܵܕܘܿܟܿܤܹܐ ܗ̄ܘ̣ ܐܝܼܬܹܝܗ̇. ܗܵܝ̇ ܕܹܝܢ
ܕܚܵܫܘܿܫܬܼܵܐ ܐܝܼܬܹܝܗ̇: ܘܥܘܼܬܵܕܼܵܐ ܗ̄ܘ̣ ܕܗܲܪ̈ܛܝܼܩܹܐ ܕܠܘܼܩܒܲܠ
ܟܝܵܢܹܗ ܕܝܼܚܝܼܕܼܵܝܵܐ. ܒܐܲܝܕܵܐ ܕܨܵܒܹ̇ܐ ܐ̄ܢܵܫ ܐܵܬܹ̇ܐ: ܡ̣ܢ ܟܠ ܦܪܘܿܣ ܓܹܝܪ
ܠܫܘܼܒܚܵܐ ܕܐܵܪ̈ܬܵܕܘܿܟܿܤܹܐ ܐܵܬܹ̇ܐ ܐ̄ܢܵܫ: ܘܠܵܐ ܗ̄ܘ̣ܵܐ ܠܓܼܘܼܕܵܦܵܐ
ܕܗܲܪܲܛܝܼܩܹܐ. ܠܟܼܠܗܹܝܢ ܗܵܟܹܝܠ ܐܲܝܠܹܝܢ ܕܒܼܵܥܹ̇ܐ ܠܩܘܼܒܼܠܵܐ ܕܲܚܕܲܝܘܼܬܼܵܐ
ܩܢܘܿܡܵܝܬܼܵܐ ܒܩܹܦܵܠܹܐܹ̈ܐ ܕܝܼܠܹܗ ܟܬܲܒܼ ܕܠܵܐ ܟܘܼܚܵܕܼ: ܕܲܠܘܵܬܼܗܘܿܢ
ܤܲܓܿܝ̈ܐܬܼܵܐ ܐܸܬܼܟܿܬܸܒܼ ܡ̣ܢ ܤܲܓܿܝܼ̈ܐܹܐ: ܠܵܐ ܙܵܕܹܩ ܠܲܢ ܕܐܵܦ ܚܢܲܢ
ܢܸܥܒܿܕܹܗ ܠܲܟܼܬܼܵܒܲܢ ܕܠܵܐ ܤܵܟܼܵܐ: ܟܲܕܼ ܦܵܠܚܝܼܢܲܢ ܥܲܠ ܓܲܠܝ̈ܬܼܵܐ: ܝܲܬܿܝܼܪ
ܡ̣ܢ ܟܠ ܕܢܸܓܼܠܸܐ ܠܟܼܠܢܵܫ ܬܵܘܤܲܦܬܼܵܐ ܕܪܘܼܫܥܵܐ ܕܕܲܐܝܟܼ ܗܵܢܵܐ
ܩܲܠܝܼܠ ܒܩܲܠܝܼܠ. ܗܵܝ̇ ܕܡܸܛܠ ܕܩܲܕܡܹ̇ܬܼ ܚܙܹ̇ܝܬܼܵܗ̇: ܠܵܐ
ܐܸܫܬܲܐܠܹܬܼ ܡ̣ܢ ܟܹܐܢܘܼܬܼܵܐ ܕܐܵܪ̈ܬܵܕܘܿܟܿܤܹܐ: ܘܠܵܐ ܡܸܫܬܸܿܠ ܐ̄ܢܵܐ
ܥܕܲܡܵܐ ܠܡܵܘܬܵܐ. ܘܐܵܦܸܢ ܡ̣ܢ ܠܵܐ ܝܑܼܕܲܥܬܼܵܐ ܡܲܩܪܒܼܝܼܢ ܥܲܡܝ
ܟܠܗܘܿܢ: ܐܵܦ ܡ̣ܢ ܐܵܪ̈ܬܵܕܘܼܟܿܤܹܐ: ܘܠܵܐ ܨܵܒܹ̇ܐ ܠܡܸܫܡܲܥ
ܘܲܠܡܹܐܠܲܦ ܡܹܢܝ: ܘܢܸܗܘܘܿܢ ܠܗܘܿܢ ܙܲܒܼܢܹ̈ܐ ܕܢܹܐܠܦܘܼܢ ܡܸܢܗܘܿܢ
ܕܗܲܪ̈ܵܛܝܼܩܹܐ: ܟܲܕܼ ܡܲܩܪ̱ܒܼܝܼܢ ܠܘܼܩܒܲܠܗܘܿܢ: ܐܲܝܟܲܢܵܐ ܕܐܲܩܪܸܒܼܘ
ܠܘܼܩܒܲܠ ܗܵܘ̇ ܕܥܲܠ ܐܲܦܲܝ̈ܗܘܿܢ ܐܲܩܪܸܒܼ. . . .
ܐܸܠܵܐ ܟܒܲܪ ܐܵܡܲ݁ܪ ܐ̄ܢܵܫ: ܕܒܲܠܚܿܕܼ ܐܸܓܲܪܬܵܐ ܩܪܲܝܬܿ: ܐܸܠܵܐ ܐܵܦ
pb. 138
ܠܓܼܘܼܕܵܝ̈ܟ ܕܲܒܼܡܲܠܦܵܢ̈ܘܵܬܼܵܟܼ ܩܪܝܼ. ܐܸܓܲܪܬܵܐ ܓܹܝܪ ܟܒܲܪ
ܒܲܢܛܘܼܪܬܵܐ ܘܒܲܙܗܝܼܪܘܼܬܼܵܐ ܟܬܼܝܼܒܵܐ ܠܵܟܼ: ܐܲܝܟܼ ܡ̇ܢ ܕܲܠܘܵܬܼ ܗܵܘ̇
ܐܸܬܼܟܲܬܼܒܲܬ̤. ܡܲܠܦܵܢ̈ܘܼܬܼܵܟܼ ܕܹܝܢ ܕܲܢܫܲܠܛܵܐܝܼܬܼ ܐܸܬܼܐ̱ܡܲܪ ܡܸܢܵܟܼ:
ܢܲܗܝܼܪܵܐܝܼܬܼ ܡܦܲܫ̈ܩܵܢ ܥܲܠ ܪܸܥܝܵܢܵܟܼ. ܘܡܸܛܠ ܗܵܢܵܐ ܐܵܦܠܵܐ ܤܸܦܩܲܬ̤
ܠܲܢ ܐܸܓܲܪܬܵܐ: ܐܸܠܵܐ ܐܵܦ ܡܲܠܦܵܢ̈ܘܵܬܵܟܼ ܒܲܚܸܢܢ: ܐܲܝܟܲܢܵܐ ܕܡ̣ܢ ܟܠܗܹܝܢ
ܚܲܬܿܝܼܬܼܵܐܝܼܬܼ ܢܹܐܠܲܦ ܥܠܲܝܟ. ܘܐܵܦܠܵܐ ܗܵܟܲܢܵܐ ܐܲܫܠܸܛܬܢܲܢ ܢܲܦܫܲܢ:
ܘܐܵܦܠܵܐ ܐܲܡܪܲܚܢܲܢ: ܐܸܠܵܐ ܐܵܦ ܡܲܠܦܢ̈ܘܵܬܼܵܐ ܕܐܲܒܼ̈ܗܵܬܼܵܐ ܤܵܡܢܲܢ
ܩܕܼܵܡܲܝܢ: ܘܦܲܚܸܡܢܲܢ ܥܲܡ ܗܵܠܹܝܢ. ܘܗܵܟܲܢܵܐ ܥܲܡ ܟ̱ܠܵܗ̇ ܚܲܬܿܝܼܬܼܘܿܬܼܵܐ
ܟܲܕܼ ܥܒܲܕܼܢܲܢ ܒܘܼܚܵܢܲܢ: ܥܒܲܕܼܢܲܢ ܐܵܦ ܓܙܵܪ ܕܝܼܢܵܐ: ܟܲܕܼ ܐܸܬܼܚܲܫܲܚܢ
ܠܐܲܒܼ̈ܗܵܬܼܵܐ ܕܐܲܩܪܸܒܼܬܿ ܐܲܢ̄ܬܿ ܠܘܼܩܒܲܠܗܘܿܢ. ܒܗܵܝ̇ ܓܹܝܪ ܕܐܸܬܼܩ̣ܪܝܼܬܿ:
ܘܠܵܐ ܫܡܲܥ̣ܬܿ: ܟܠܗܹܝܢ ܗܵܠܹܝܢ ܙܲܕܼܩܵܐܝܼܬܼ ܥܒܲܕܼܢܲܢ: ܚܲܝܸܒܼܢܲܢ
ܠܐܸܓܲܪܬܵܟܼ. ܒܲܚܸܢܢ ܠܡܲܠܦܵܢ̈ܘܼܬܼܵܟܼ: ܘܲܒܼܥܲܝܢܲܢ ܐܵܦ
ܠܡܲܠܦܵܢ̈ܘܵܬܼܵܐ ܕܐܲܒܼ̈ܗܵܬܼܵܐ ܐܲܝܟܼ ܡܵܢܘܿܤܵܐ. ܡܵܢܵܐ ܗܵܟܹܝܠ ܙܵܕܹܩ
ܗ̄ܘ̣ܵܐ ܠܲܢ ܠܡܸܥܒܲܕܼ: ܘܠܵܐ ܥܒܲܕܼܢܲܢ؟ ܗܵܢܵܐ ܕܹܝܢ ܐܲܝܟܼ ܡ̇ܢ ܕܩܲܪܝܼܒܼ
ܗ̄ܘ̣ܵܐ: ܐܸܡ݂ܲܪ ܐܲܝܠܹܝܢ ܕܙܵܕܼܩ ܗ̄ܘ̣ܵܐ ܠܡܹܐܡܲܪ ܐܵܦ ܐܠܸܦ̣.
ܐܲܢ̄ܬܿ ܕܹܝܢ ܗܵܝܕܹܝܟ ܐܸܫܬܐܸܠܬܿ: ܗܵܫܵܐ ܕܹܝܢ ܥܵܕܹܠ ܐܲܢ̄ܬܿ ܠܲܢ ܟܲܕܼ
ܥܵܫܹ̇ܩ ܐܲܢ̄ܬܿ. ܠܡܵܢܵܐ ܠܵܐ ܝܲܬܿܝܼܪܵܐܝܼܬܼ ܠܵܐ ܗ̄ܘ̣ܵܐ ܠܢܲܦܫܵܟܼ ܡܩܲܛܪܸܓܼ
ܐܲܢ̄ܬܿ: ܐܸܠܵܐ ܠܲܢ؟ ܠܵܐ ܗ̄ܘ̣ܵܐ ܓܹܝܪ ܠܵܐ ܡܸܬܼܚܲܙ̈ܝܵܢܝܵܬܼܵܐ ܕܵܢܢ: ܐܸܠܵܐ
ܡܸܬܼܚܲܙ̈ܝܵܢܝܵܬܼܵܐ: ܘܐܸܢ ܒܲܨܲܪܢ: ܘܐܸܢ ܡ̣ܢ ܠܵܐ ܝܑܼܕܲܥܬܼܵܐ ܤܥܲܪܢ:
ܐܸܡܲܪ ܗܵܫܵܐ: ܐܸܢ ܗܵܟܲܢܵܐ ܐܝܼܬܲܝܗܹܝܢ ܐܲܝܟܼ ܕܐܝܼܬܲܝܗܹܝܢ. ܘܐܸܢ ܠܵܘ
pb. 139
ܟܹܐܢܵܐܝܼܬܼ ܐܸܬܿܬܿܙܝܼܥܢ ܠܩܘܼܒܼܠܵܟܼ: ܗܵܝܕܹܝܢ ܙܵܕܹܩ ܗ̄ܘ̣ܵܐ ܠܵܟܼ
ܠܡܹܐܡܲܪ: ܘܠܵܘ ܗܵܫܵܐ.
ܐܸܢܵܐ ܕܹܝܢ ܟܲܕܼ ܛܵܒܼ ܐܝܼܬܼ ܗ̄ܘ̣ܵܐ ܠܝܼ ܠܡܲܟܵܤܘܼܬܼܗܘܿܢ:
ܕܤܲܓܿܝܼ̈ܐܢ ܐܸܢܹܝܢ ܗܵܠܹܝܢ ܕܲܤܥܲܪܘ: ܘܒܲܨܲܪܘ ܐܵܦ ܤܲܓܿܝܼ̈ܐܵܬܼܵܐ: ܐܸܠܵܐ
ܥܵܒܲܪ̇ ܐ̄ܢܵܐ ܗܵܫܵܐ ܡ̣ܢ ܗܵܕܹܐ. ܕܠܵܐ ܐ̄ܢܵܫ ܢܹܐܡܲܪ: ܕܗܵܫܵܐ ܡ̣ܢ ܠܵܐ
ܤܵܦܩܘܼܬܹܗ ܐܵܡܲ݁ܪ ܠܗܹܝܢ. ܡܸܢܗܹܝܢ ܕܹܝܢ ܕܗܵܠܹܝܢ ܕܲܤܥܲܪܘ
ܠܘܼܩܒܲܠܝܼ: ܡܲܟܸܣ ܐ̄ܢܵܐܬ ܠܗܘܿܢ ܕܠܵܘ ܟܹܐܢܵܐܝܼܬܼ ܚܲܝܒܼܘܼܢܝ.
ܕܕܲܓܵܠܵܬܼ̈ܐ ܐܸܡ݂ܲܪܘ: ܘܐܲܛܥܝܼܘ ܠܤܲܓܿܝܼ̈ܐܹܐ. ܟܲܕܼ ܠܵܐ ܡܲܟܼܤܝܼܢ
ܗ̄ܘ̣ܵܘ ܠܒܼܘܼܚܢܵܐ: ܐܸܠܵܐ ܐܲܝܟܲܢܵܐ ܕܒܼܵܥܹ̇ܐ ܗ̄ܘ̣ܵܐ ܗܵܫܵܐ. ܒܵܥܹ̇ܐ ܗ̄ܘ̣ܵܐ
ܕܹܝܢ ܗܵܢܵܐ: ܕܠܵܐ ܢܸܬܼܒܲܚ̈ܢܵܢ ܘܵܠܝܵܐܝܼܬܼ: ܕܠܵܐ ܢܸܗܘܸܐ ܠܹܗ ܚܘܼܝܵܒܼܵܐ.
ܡܦܝܼܣ ܗ̄ܘ̣ܵܐ ܕܹܝܢ ܠܟܼܠܗܘܿܢ ܐܲܝܟܼ ܐܲܠܵܗܵܐ: ܐܲܝܟܼ ܐܲܝܢܵܐ ܕܝܵܕܲܥ̇
ܡܲܛܫ̈ܝܵܬܼܵܐ ܕܲܒܼܠܸܒܵܐ. ܘܐܲܝܠܹܝܢ ܕܐܸܫܬܵܘܬܲܦܘ ܠܹܗ: ܥܵܟܲܢܵܐ ܤܵܡ̣ܘ
ܠܥܹܝܢ ܤܲܓܿܝܼ̈ܐܹܐ: ܐܲܝܟܼ ܡ̇ܢ ܕܗ̤ܘ ܐܝܼܬܼܵܘܗܝ ܬܵܒܼ̇ܘܿܥܵܐ ܕܐܲܠܵܗܵܐ: ܗ̤ܘ
ܡܫܝܼܚܵܐ. ܘܠܝܼ ܠܵܐ ܫܵܒܹ̇ܩ ܠܝܼ ܠܡܹܐܡܲܪ ܐ̄ܚܪܵܢܝܵܐܝܼܬܼ. ܘܡ̣ܢ ܗܵܕܹܐ:
ܠܟܼܠܢܸܵܫ ܚܛܲܦ̣ ܥܲܡܹܗ ܠܘܼܩܒܲܠܝ: ܐܲܝܟܼ ܕܐܵܦܠܵܐ ܠܡܸܫܡܲܥ
ܒܲܪܬܼ ܩܵܠܵܐ ܕܝܼܠܝ ܢܸܨܒܿܘܿܢ. ܥܕܲܡܵܐ ܕܲܡܒܲܛܸܠ ܐ̄ܢܵܐ ܠܵܗ̇
ܓܡܝܼܪܵܐܝܼܬܼ: ܕܠܵܐ ܐܝܼܬܼܵܘܗܝ ܒܲܪܢܵܫܵܐ ܡܫܝܼܚܵܐ. ܐܲܝܟܼ ܕܠܲܐܝܢܵܐ
ܕܠܲܡܫܝܼܚܵܐ ܒܲܪܢܵܫܵܐ ܒܐܘܼܤܝܼܵܐ ܐܵܡܲ݁ܪܢܵܐ ܠܹܗ: ܐܲܠܵܗܵܐ ܕܹܝܢ ܒܫܲܘܝܘܼܬܼܵܐ
ܕܐܝܼܩܵܪܵܐ. ܘܡܸܬܼܚܲܫܲܚ ܗ̄ܘ̣ܵܐ ܒܲܡܩܲܕܿܡܘܼܬܼܵܐ ܠܘܼܩܒܲܠܝ: ܘܐܵܡܲ݁ܪ
ܗ̄ܘ̣ܵܐ ܠܘܼܩܒܲܠܝ: ܟܲܕܼ ܥܵܒܼ̇ܕܼ ܠܹܗ ܠܐܲܠܵܗܵܐ ܒܲܪܢܵܫܵܐ: ܐܲܝܟܼ ܕܠܵܐ
pb. 140
ܟܠ ܟ̱ܠܹܗ ܢܸܬܼܪܢܸܐ ܡܸܕܸܡ ܐ̄ܚܪܹܝܢ ܡܫܝܼܚܵܐ: ܠܒܲܪ ܡ̣ܢ ܐܲܠܵܗܵܐ
ܡܸܠܬܼܵܐ. ܘܲܠܘܵܬܹܗ ܐܵܠܨܵܐܝܼܬܼ ܡܵܬܲܚ ܗ̄ܘܹ̇ܬܝܬܼ ܡܸܠܲܝܬܼܝ: ܕܐܝܼܬܼܵܘܗܝ
ܐܵܦ ܒܲܪܢܵܫܵܐ: ܘܲܡܚܵܘܸܐ ܗ̄ܘܹ̇ܝܬܼ ܠܹܗ ܡ̣ܢ ܟܬܼܒܹ̈ܐ ܐܲܠܵܗܵܝܹ̈ܐ ܘܡ̣ܢ
ܡܲܠܦܵܢܵܘܵܬܼܵܐ ܕܐܲܒܼ̈ܗܵܬܼܵܐ. ܘܲܒܼܗܵܕܹܐ ܬܘܼܒܼ ܡܸܬܼܚܲܫܲܚ ܗ̄ܘ̣ܵܐ ܠܘܼܩܒܲܠܝܼ:
ܐܲܝܟܼ ܐܲܝܟܵܐ ܕܒܲܪܢܵܫܵܐ ܒܲܠܚܘܿܕܼ ܐܵܡܲ݁ܪ ܐ̄ܢܵܐ ܠܹܗ ܠܲܡܫܝܼܚܵܐ: ܥܲܠ ܗܵܘ̇
ܡܵܐ ܕܬܼܵܒܲܥ̇ ܗ̄ܘ̣ܵܐ ܠܹܗ ܕܢܵܘܕܸܐ ܘܠܵܐ ܨܸܵܒܹ̇ܐ ܗ̄ܘ̣ܵܐ ܠܗܵܘܕܼܵܝܘܼ:
ܚܲܕܼ ܡܛܲܫܸܐ ܗ̄ܘ̣ܵܐ ܠܹܗ ܡܸܕܸܡ ܕܐܵܡܲ݁ܪ ܗ̄ܘܹ̇ܝܬܼ ܐܵܦ ܡܵܘܕܹܐ ܗ̄ܘܹ̇ܝܬܼ.
ܠܵܐ ܓܹܝܪ ܫܵܫܹܐ ܗ̄ܘܹ̇ܝܬܼ ܠܹܗ ܥܲܠ ܕܠܵܐ ܡܵܘܕܹܐ ܠܹܗ ܐܲܠܵܗܵܐ
ܠܲܡܫܝܼܚܵܐ: ܐܸܠܵܐ ܒܗܵܝ̇ ܕܠܵܐ ܐܵܡܲ݁ܪ ܗ̄ܘ̣ܵܐ ܠܹܗ ܒܲܪܢܵܫܵܐ ܡܫܲܠܡܵܢܵܐ
ܠܲܡܫܝܼܚܵܐ ܒܲܟܼܝܵܢܵܐ ܘܲܒܼܕܼܘܼܒܵܪܹ̈ܐ. ܘܲܕܼܠܵܐ ܗܘ̤ܵܐ ܐܲܠܵܗܵܐ ܡܸܠܬܼܵܐ ܟܝܵܢܵܐ
ܕܒܲܪܢܵܫܵܐ: ܐܸܠܵܐ ܒܲܟܼܝܵܢܵܐ ܕܒܲܪܢܵܫܵܐ ܘܲܒܼܕܼܘܼܒܵܪܹ̈ܐ: ܐܲܝܟܲܢܵܐ ܕܬܲܪ̈ܬܲܝܗܹܝܢ
ܒܲܟܼܝܵܢܵܐ ܢܸܗܘܸܐ ܐܲܠܵܗܵܐ ܡܸܠܬܼܵܐ. ܘܲܠܗܵܠܹܝܢ ܡܚܵܘܸܐ ܐ̄ܢܵܐ ܡ̣ܢ ܐܲܝܠܹܝܢ
ܕܐܸܬܼܟܿܬܸܒܼ: ܟܲܕܼ ܢܤܲܒܼ ܡ̣ܢ ܡܲܠܦܩܵܢ̈ܘܵܬܼܝ ܕܡ̣ܢ ܡܲܠܦܵܢ̈ܘܵܬܹܗ:
ܗܵܠܹܝܢ ܕܐܸܢ ܗ̤ܘ ܫܘܼܪܵܝܵܐ ܗܵܟܲܢ ܐܝܼܬܲܝܗܹܝܢ ܗ̣̄ܘܲܝ̈: ܐܵܘ ܐܸܢܗ̤ܘ
ܕܡ̣ܢ ܒܥܸܠܕܒܼܵܒܼܘܼܬܹܗ ܕܲܠܘܵܬܼܝ ܫܲܚܠܸܦ̣ ܐܸܢܹܝܢ ܕܲܠܩܘܼܒܼܠܵܐ: ܘܡ̣ܢ
ܫܟܼܵܚ̈ܬܼܵܐ ܕܡ̣ܢ ܡܛܲܝܒܼܘܼܬܼܵܐ ܕܗܲܪ̈ܵܛܝܼܩܹܐ. ܒܲܥ̇ܒܼܵܕܼܵܐ ܕܹܝܢ ܐܲܝܟܼ
ܐܵܪܝܼܘܿܣ: ܟܲܕܼ ܕܲܠܩܘܼܒܼܠܵܐ ܕܐܘܼܤܝܼܵܐ ܕܐܲܠܵܗܵܐ ܐܵܡܲ݁ܪ ܗ̄ܘ̣ܵܐ:
ܠܟܼܠܗܹܝܢ ܐ̄ܢܵܫܝܵܬܼܵܐ ܥܲܠ ܟܝܵܢܵܐ ܕܐܲܠܵܗܵܐ ܡܸܠܬܼܵܐ ܡܲܤܸܩ ܗ̄ܘ̣ܵܐ
ܡ̣ܢ ܚܕܼܵܝܘܼܬܼܵܐ ܩܢܘܿܡܵܝܬܼܵܐ: ܕܒܲܪܓܸܫܬܼܵܐ ܟܝܵܢܝܬܼܵܐ ܚܵܐܹ̇ܫ ܟܒܗܘܿܢ
ܚܲܫܹ̈ܐ ܐ̄ܢܵܫܵܝܹ̈ܐ.
pb. 141
ܡ̣ܢ ܟܬܼܵܒܼܵܐ ܠܲܡ ܕܢܸܤܛܘܿܪܝܼܣ: ܡ̣ܢ ܟܘܼܪܵܤܵܐ ܕܲܫܒܲܥܸܤܪܹ̈ܐ
ܕܥܲܠ ܗܲܝܡܵܢܘܼܬܼܵܐ. ܡ̣ܢ ܐܲܝܢܵܐ ܟܬܼܵܒܼܵܐ ܕܝܼܠܝܼ؟ ܡ̣ܢ ܐܲܝܕܵܐ ܟܘܼܪܵܤܵܐ
ܕܲܫܒܲܥܸܤܪܹ̈ܿܐ ܡܵܢ ܕܲܒܼܥܲܝܬܿܘܿܢ ܐܲܝܬܝܼܬܘܿܢ: ܟܲܕܼ ܐ̄ܢܵܫ ܕܡܼܬܼܚܪܸܐ
ܠܘܼܩܒܲܟܼܘܿܢ ܠܲܝܬܿ ܗ̄ܘܵܐ. ܐܸܠܵܐ ܠܵܐ ܤܲܓܿܝܼ ܪܡܸܐ ܠܝܼ ܥܲܠ ܗܵܕܹܐ:
ܐܸܢ ܢܲܗܝܼܪ̈ܵܢ ܘܐܸܢ ܤܢܝܼ̈ܩܢ ܥܲܠ ܥܘܼܩܵܒܑܼܵܐ. ܥܲܠ ܗܵܠܹܝܢ ܕܹܝܢ
ܕܠܲܤܲܓܿܝܼ̈ܐܹܐ ܐܲܛܥܝܼ ܒܗܹܝܢ: ܘܲܢܓܲܕܼ ܐܸܢܘܿܢ ܡ̣ܢ ܗܲܝܡܵܢܘܼܬܼܵܐ: ܐܲܝܟܼ
ܡ̇ܢ ܕܲܒܼܗܘܼܦܵܢܹ̈ܡܵܛܵܐ ܗ̄ܘ̣ܵܐ ܒܘܼܚܵܢܵܐ: ܒܵܥܹ̇ܢܵܐ ܕܐܲܦܝܼܣ ܠܟܼܠܟܼܘܿܢ:
ܥܲܠ ܐܲܝܠܹܝܢ ܕܩܲܛܪܓܼܘܼܢܝ ܒܲܡܩܲܕܡܘܼܬܼܵܐ ܕܲܕܼܠܵܐ ܒܘܼܚܵܢܵܐ: ܕܐܲܝܠܹܝܢ
ܕܩܲܒܸܿܠ̣ܘ ܕܝܼܠܝ ܘܕܼܝܼܠܹܗ ܕܠܵܐ ܒܘܼܚܵܢܵܐ. . . . .
[ܐܸܡܬܝ ܕܟܬܒܐ ܐܲܠܵܗܝܵܐ ܥܬܼܝܼܕ ܠܡܹܐܡܲܪ ܝܲܠܕܵܐ ܕܡܫܝܼܚܐ]
ܕܡ̣ܢ ܒܬܼܘܼܠܬܼܵܐ ܡܲܪܝܲܡ: ܐܵܘ ܡܵܘܬܵܐ: ܠܵܐ ܡܸܬܼܚܵܘܝܵܐ ܒܕܘܼܟ
ܕܤܵܐܹ̇ܡ ܐܲܠܵܗܵܐ: ܐܸܠܵܐ ܐܵܘ ܡܫܝܼܚܵܐ: ܐܵܘ ܒܪܵܐ: ܐܵܘ ܡܵܪܝܵܐ. ܡܸܛܠ
ܕܲܬܼܠܵܬܲܝ̈ܗܘܿܢ ܗܵܠܹܝܢ: ܡܫܵܘܕܥܵܢܹ̈ܐ ܐܝܼܬܲܝܗܘܿܢ ܕܲܬܼܪ̈ܲܝܗܘܿܢ ܟܝܵܢܹ̈ܐ.
ܘܒܲܙܒܲܢ ܡ̇ܢ ܕܗܵܢܵܐ: ܘܒܲܙܒܲܢ ܕܹܝܢ ܕܗܵܘ̇: ܘܒܲܙܒܲܢ ܕܹܝܢ ܕܗܵܢܵܐ
ܘܲܕܼܗܵܘ̇. ܕܐܲܝܟܼ ܐܲܝܟܲܢ ܐܵܡܲ݁ܪ ܐ̄ܢܵܐ: ܐܸܡܲܬܼܝ ܕܝܲܠܕܐ ܕܡ̣ܢ ܒܬܼܘܼܠܬܼܵܐ
ܟܬܼܵܒܼܵܐ ܡܸܫܬܲܥܸܐ ܠܲܢ: ܡܵܢܵܐ ܐܵܡܲ݁ܪ؟ ܫܲܕܲܪ ܐܲܠܵܗܵܐ ܠܲܒܼܪܹܗ. ܠܵܐ ܐܵܡܲ݁ܪ
ܕܫܲܕܲܪ ܐܲܠܵܗܵܐ ܠܐܲܠܵܗܵܐ ܡܸܠܬܼܵܐ: ܐܸܠܵܐ ܢܤܲܒܼ ܫܡܵܐ ܕܲܡܫܵܘܕܲܥ
ܠܲܬܼܪ̈ܲܝܗܘܿܢ ܟܝܵܢܹ̈ܐ. ܡܸܛܠ ܕܲܒܼܪܵܐ: ܒܲܪܢܵܫܵܐ ܐܝܼܬܼܵܘܗܝ ܘܐܲܠܵܗܵܐ.
ܐܵܡܲ݁ܪ: ܕܫܲܕܲܪ ܐܲܠܵܗܵܐ ܠܲܒܼܪܹܗ: ܘܲܗܘ̤ܵܐ ܡ̣ܢ ܐܲܢ̄ܬܿܬܼܵܐ. ܘܥܲܡ ܗܵܕܹܐ
ܚܵܙܹ̇ܝܬܿ ܠܲܡܫܵܐ ܕܤܝܼܡ: ܕܡܵܘܕܲܥ ܠܲܬܼܪ̈ܲܝܗܘܿܢ ܟܝܵܢܹ̈ܐ. ܠܝܲܠܕܵܐ
ܕܡ̣ܢ ܛܘܼܒܼܵܢܝܼܬܼܵܐ ܒܬܼܘܼܠܬܼܵܐ: ܒܪܵܐ ܬܸܩܪܸܐ. ܒܪܵܐ ܓܹܝܪ ܝܸܠܓܲܬ̤
pb. 142
ܕܐܲܠܵܗܵܐ: ܒܬܼܘܼܠܬܵܐ ܝܵܠܕܲܬܼ ܡܫܝܼܚܵܐ. ܐܸܠܵܐ ܡܸܛܠ ܕܲܒܼܪܹܗ
ܕܐܲܠܵܗܵܐ ܥܦܝܼܦܵܐ ܐܝܼܬܼܵܘܗܝ ܒܲܟܼܝܵܢܹ̈ܐ: ܠܵܐ ܝܸܠܕܲܬ̤ ܠܲܒܼܪܹܗ
ܕܐܲܠܵܗܵܐ: ܐܸܠܵܐ ܝܸܠܕܲܬ̤ ܠܐ̄̈ܢܵܫܘܼܬܼܵܐ: ܗܵܝ̇ ܕܐܝܬܹܝܗ̇ ܒܪܵܐ: ܡܸܛܠ
ܒܪܵܐ ܕܐܸܬܼܚܲܝܲܕܼ ܠܵܗ̇.
ܒܵܥܹ̇ܐ ܐ̄ܢܵܐ ܗܵܟܹܝܠ ܡܸܢܟܿܘܿܢ ܠܲܡܚܵܪ ܒܗܵܠܹܝܢ ܚܲܬܿܝܼܬܼܵܐܝܼܬܼ:
ܥܵܒܲܪ ܐ̄ܢܵܐ ܓܹܝܪ ܐܲܝܠܹܝܢ ܕܒܲܨܪܘ: ܘܢܲܗܝܼܪܵܐܝܼܬܼ ܐܵܦܠܵܐ ܠܢܲܩܝܼܦܘܼܬܼܵܐ
ܢܛܲܪܘ. ܘܲܒܼܗܵܠܹܝܢ ܡܩܲܛܪܸܓܼ ܠܝܼ: ܐܲܝܟܼ ܕܠܲܐܝܢܵܐ ܕܲܡܦܲܠܸܓܼ
ܘܤܵܐܹ̇ܡ ܒܲܡ̈ܢܵܘܵܢ ܡ̈ܢܵܘܵܢ: ܠܐܲܠܵܗܵܘܼܬܼܵܐ ܡܸܢܵܗ̇ ܘܠܵܗ̇: ܘܲܠܐ̄ܢܵܫܘܼܬܼܵܐ
ܡܸܢܵܗ̇ ܘܠܵܗ̇. ܒܐܝܼܩܵܪܵܐ ܕܹܝܢ ܘܲܒܼܫܲܘܝܘܼܬܼܵܐ ܕܚܲܕܼ ܡܸܬܼܚܲܫܲܚ ܐ̄ܢܵܐ:
ܐܲܝܟܲܢܵܐ ܕܵܠܪ̈ܲܚܝܼܩܹܐ ܗܵܘ̇ܝܵܐ ܠܡܸܬܼܩܲܪܵܒܼܘܼ ܒܚܘܼܒܵܐ: ܘܠܵܐ ܗ̄ܘ̣ܵܐ
ܒܐܘܼܤ̈ܝܼܵܣ. ܗܵܟܲܢܵܐ ܡܩܲܛܪܸܓܼ ܠܝܼ: ܐܵܦ ܥܲܠ ܐܲܠܵܗܵܘܼܬܼܵܐ ܐܵܦ
ܥܲܠ ܐ̄ܢܵܫܘܼܬܼܵܐ. ܕܒܸܤܪܵܐ ܠܲܡ ܘܒܲܪܢܵܫܵܐ: ܐܲܠܵܗܵܐ ܡܸܠܬܼܵܐ. ܒܪܵܐ ܕܹܝܢ
ܘܡܵܪܝܵܐ: ܐܲܠܵܗܵܐ: ܐ̄ܢܵܫܘܼܬܼܵܐ: ܕܲܒܼܚܘܼܒܵܐ ܘܲܒܼܢܲܩܝܼܦܘܼܬܼܵܐ ܗܘ̤ܵܬܼ.
ܗܵܢܵܘ ܪܹܫܵܐ ܕܥܵܫܘܼܩܘܼܬܹܗ: ܐܲܝܟܲܢܵܐ ܕܲܒܼܟܼܠܙܒܲܢ ܙܵܕܸܩ ܠܟܼܘܿܢ
ܠܲܡܚܵܪ: ܡܸܛܠ ܕܥܲܠ ܗܵܕܹܐ ܐܝܼܬܲܝܟܿܘܿܢ ܕܲܝܵܢܹ̈ܐ. ܕܐܸܢ ܗܵܟܲܢܵܐ
ܡܸܫܟܿܚܝܼܬܿܘܿܢ ܠܝܼ ܕܡܸܬܼܪܲܥܸܐ ܐ̄ܢܵܐ: ܚܲܝܒܼܘܼܢܵܢܝ: ܘܐܵܦ ܐܸܢܵܐ ܠܢܲܦܫܝ
ܡܚܲܝܸܒܼ ܐ̄ܢܵܐ. ܘܐܵܦ ܠܟܼܘܿܢ ܡܸܬܼܟܲܫܲܦ ܐ̄ܢܵܐ: ܕܲܬܼܩܒܿܠܘܼܢ
ܒܡܲܫܠܡܵܢܘܼܬܼܵܐ ܠܚܘܼܝܵܒܼܝ: ܗܵܘ̇ ܕܐܝܼܬܼܵܘܗܝ ܟܹܐܢܵܐ: ܐܵܦܸܢ ܪܸܒܿܘ
ܙܲܒܼܢ̈ܝܼܢ ܡܸܬܼܟܲܬܲܫ ܐ̄ܢܵܐ: ܘܡܲܝܬܸܐ ܐ̄ܢܵܐ ܡܸܠܹ̈ܐ ܡܦܝܼܤܵܢ̈ܝܬܼܵܐ
ܠܩܘܼܝܵܡܵܐ: ܕܠܵܐ ܒܐܘܼܤܝܼܵܐ ܐܸܬܼܚܲܫܲܚ: ܐܸܠܵܐ ܫܚܝܼܡܵܐܝܼܬܼ ܒܚܘܼܒܵܐ:
pb. 143
ܘܲܒܼܗܵܕܹܐ ܡܸܬܼܐ̱ܡܲܪ ܡܵܪܝܵܐ ܘܲܡܫܝܼܚܵܐ ܘܲܒܼܪܵܐ. ܐܸܢ ܕܹܝܢ ܕܠܩܘܼܒܼܠܵܐ
ܐܵܡܲ݁ܪ ܐ̄ܢܵܐ: ܢܚܵܘܘܿܢ ܗܸܢ̣ܘܿܢ: ܕܡ̣ܢ ܟܝܵܢܵܐ ܗܘ̤ܵܬܼ ܚܕܼܵܝܘܼܬܼܵܐ: ܘܕܲܟܼܝܵܢܵܐ
ܗ̄ܘ̣ܵܬܼ ܚܕܼܵܝܘܼܬܼܵܐ. ܐܸܢܵܐ ܕܹܝܢ ܡܼܢ ܚܕܵܢܘܼܬܼܵܐ ܕܒܲܟܼܝܵܢܵܐ: ܚܲܕ ܦܲܪܨܘܿܦܵܐ:
ܚܕܼܵܐ ܫܲܘܝܘܼܬܼܵܐ: ܚܲܕܼ ܐܝܼܩܵܪܵܐ: ܚܕܼܵܐ ܡܫܲܠܛܘܼܬܼܵܐ: ܚܕܵܐ ܡܵܪܘܼܬܼܵܐ
ܐܵܡܲ݁ܪ ܐ̄ܢܵܐ. ܘܲܒܼܦܵܤܝܼ̈ܩܬܼܵܐ: ܒܟܼܠܗܹܝܢ ܐܲܝܠܹܝܢ ܕܐܝܼܬܼܵܘܗܝ ܒܗܹܝܢ
ܒܟܼܝܵܢܵܐ ܦܲܪܨܘܿܦܵܐ ܕܗܵܢܵܐ ܘܲܕܼܗܵܘ̇: ܐܵܦ ܗܵܠܹܝܢ ܒܲܚܕܼܵܝܘܼܬܼܵܐ ܕܚܲܕܼ
ܦܲܪܨܘܼܦܵܐ. ܦܲܪܨܘܿܦܵܐ ܓܹܝܪ ܕܲܟܼܝܵܢܹ̈ܐ: ܠܵܘ ܟܝܵܢܵܐ ܐܝܼܬܼܵܘܗܝ. ܘܒܲܟܼܝܵܢܵܐ
ܗ̄ܘ̣: ܘܠܵܘ ܟܝܵܢܵܐ ܗ̄ܘ̣: ܒܪܵܐ ܓܹܝܪ ܕܐܲܠܵܗܵܐ ܐܲܒܼܵܐ: ܒܲܟܼܝܵܢܵܐ
ܐܝܼܬܼܵܘܗܝ ܒܲܪ ܟܝܵܢܹܗ ܕܐܲܒܼܵܐ. ܘܗܵܘ ܡܵܐ ܕܐܝܼܬܼܵܘܗܝ ܒܲܟܼܝܵܢܹܗ ܐܲܒܼܵܐ:
ܗܵܢܵܐ ܐܝܼܬܼܵܘܗܝ ܐܵܦ ܒܪܵܐ. ܠܵܐ ܗ̄ܘ̣ܵܐ ܓܹܝܪ ܗܵܘ̇ ܡܵܐ ܕܐܝܼܬܼܵܘܗܝ
ܦܲܪܨܘܿܦܵܐ ܒܲܟܝܵܢܵܐ ܒܪܵܐ: ܗܵܢܵܐ ܐܝܼܬܼܵܗܝ ܐܵܦ ܐܲܒܼܵܐ. ܒܪܵܐ ܓܹܝܪ
ܕܐܝܼܬܼܵܘܗܝ ܒܲܟܼܝܵܢܵܐ: ܐܲܒܼܵܐ ܠܵܐ ܐܝܼܬܼܵܘܗܝ: ܘܐܵܦܠܵܐ ܐܲܒܼܵܐ ܒܪܵܐ.
ܕܒܲܟܼܝܵܢܵܐ ܕܐܲܒܼܵܐ ܐܝܼܬܼܵܘܝܗܝ: ܘܒܲܟܼܝܵܢܵܐ ܒܪܵܐ. ܐ̄ܚܪܹܢܵܐ ܓܹܝܪ ܘܲܐ̄ܚܪܹܢܵܐ
ܒܦܲܪܨܘܿܦܵܐ: ܠܵܘ ܕܹܝܢ ܐ̄ܚܪܹܢܸܐ ܘܲܐ̄ܚܪܹܢܵܐ ܐܸܠܵܐ ܚܲܕܘܼ ܒܐܘܼܣܝܼܵܐ
ܘܒܲܟܼܝܵܢܵܐ: ܕܠܵܐ ܦܘܼܠܵܓܼ: ܕܠܵܐ ܤܸܕܩܵܐ: ܕܠܵܐ ܦܘܼܪܫܵܢܵܐ: ܒܟܼܠܗܹܝܢ
ܐܲܝܠܹܝܢ ܕܐܝܼܬܼ ܒܲܟܼܝܵܢܵܐ ܠܦܲܪܨܘܼܿܦܵܐ: ܘܲܐ̄ܚܪܹܢܵܐ ܗ̄ܘ̣ ܒܦܲܪܨܘܿܦܵܐ. ܘܠܵܐ
ܗ̄ܘ̣ܵܐ ܗܵܟܲܢܵܐ ܕܹܝܢ: ܘܐܵܦ ܥܲܠ ܚܕܼܵܝܘܼܬܼܵܐ ܕܐܲܠܵܗܘܬܼܵܐ ܘܲܕܐ̄ܢܵܫܘܼܬܼܵܐ.
ܒܟܼܠ ܡܵܐ ܕܐܝܼܬܼܵܘܗܝ ܦܲܪܨܘܿܦܵܐ ܒܲܟܼܝܵܢܹܗ: ܒܗܹܝܢ ܒܗܵܠܹܝܢ ܐܝܼܬܼܵܘܗܝ
ܒܲܚܕܼܵܝܘܼܬܼܵܐ ܐܲܝܟܼ ܕܲܒܼܦܲܪܨܘܼܦܵܐ ܚܲܕܼ ܐܵܦܠܘܼܤܝܼܵܐ ܐ̄ܚܪܹܬܼܵܐ.
ܠܦܲܪܨܘܿܦܹܗ ܓܹܝܪ ܢܲܤܒܹܗ: ܠܵܐ ܗ̄ܘ̣ܵܐ ܠܐܘܼܤܝܼܵܐ: ܘܠܵܐ ܗ̄ܘ̣ܵܐ
pb. 144
ܠܲܟܼܝܵܢܵܐ: ܐܲܝܟܲܢܵܐ ܕܢܸܗܘܸܐ ܒܲܪ ܟܝܵܢܵܐ ܕܐܲܒܼܵܐ: ܐܵܘ ܒܪܵܐ ܐ̄ܚܪܹܢܵܐ: ܕܠܵܐ
ܗ̄ܘ̣ܵܐ ܚܲܕܼ ܘܗ̤ܘ ܟܲܕܼ ܗܘ̤ ܢܸܗܘܸܐ ܒܪܵܐ. ܦܲܪܨܘܼܦܵܐ ܓܹܝܪ
ܕܐܲܠܵܗܘܼܬܼܵܐ: ܐ̄ܢܵܫܘܼܬܼܵܐ ܐܝܼܬܹܝܗ̇. ܘܦܲܪܨܘܿܦܵܬ ܕܐ̄ܢܵܫܘܼܬܼܵܐ: ܐܲܠܵܗܘܼܬܼܵܐ.
ܐ̄ܚܪܹܢܵܐ ܗ̄ܘ̣ ܓܹܝܪ ܒܲܟܼܝܵܢܵܐ: ܘܲܐ̄ܚܪܹܢܵܐ ܒܲܚܕܼܵܝܘܼܬܼܵܐ. ܥܲܩܸܒܼܘ ܗܵܟܹܝܠ
ܘܲܚܙܵܘ ܡ̇ܢ ܘܐܲܝܠܹܝܢ ܕܟܼܬܲܒܼ ܗܵܘ̇: ܡ̇ܢ ܕܐܵܡܲ݁ܪ ܠܲܒܪܵܐ ܬܪܹܝܢ
ܟܝܵܢ̈ܝܼܢ: ܘܲܠܟܼܠ ܚܲܕܼ ܡ̣ܢ ܗܵܠܹܝܢ ܡܸܢܹܗ ܘܠܹܗ ܐܵܡܲ݁ܪ ܐܲܝܟܼ
ܕܲܒܼܪܲܚܝܼܩܘܼܬܼܵܐ ܕܦܘܼܪܫܵܢܵܐ: ܕܐܲܠܵܗܵܐ ܡܸܢܹܗ ܘܠܹܗ: ܘܒܲܪܢܵܫܵܐ ܡܸܢܹܗ
ܘܠܹܗ. ܐܸܠܘܼ ܓܹܝܪ ܐܸܡ̇ܪܹܬܼ ܫܚܝܼܡܵܐܝܼܬܼ ܐܲܠܵܗܵܐ ܘܒܲܪܢܵܫܵܐ: ܘܠܵܐ
ܗ̄ܘ̣ܵܐ ܬܪܹܝܢ ܟܝܵܢ̈ܝܼܢ ܚܲܕܼ ܡܫܝܼܚܵܐ:ܐܝܼܬܼ ܗ̄ܘ̣ܵܐ ܠܟܼܘܿܢ ܐܲܬܼܪܵܐ
ܕܬܸܥܫܩܘܼܢܵܢܝ: ܕܠܲܒܲܪ ܐ̄ܢܵܫܵܐ: ܐܲܠܵܗܵܐ ܘܒܲܪܢܵܫܵܐ ܐܵܡܲ݁ܪ ܐ̄ܢܵܐ
ܠܹܗ. ܡܛܸܠ ܗܵܝ̇ ܕܲܬܼܪܹܝܢ ܟܝܵܢ̈ܝܼܢ ܐܸܡ̇ܪܹܬܼ: ܒܲܪܢܵܫܵܐ؟
ܘܐܲܠܵܗܵܐ: ܠܵܐ ܗ̄ܘ̣ܵܐ ܠܒܲܪܢܵܫܵܐ ܬܪܹܝܬ ܟܝܵܢ̈ܝܼܢ ܐܸܡ̇ܪܹܬܼ: ܐܵܦܸܢ
ܡܸܬܼܐ̱ܡܲܪ ܐܲܠܵܗܵܐ ܡܸܛܠ ܚܕܼܵܝܘܼܬܼܵܐ. ܘܠܵܐ ܬܘܼܒܼ ܐܲܠܵܗܵܐ ܬܪܹܝܢ
ܟܝܵܢ̈ܝܼܢ: ܘܐܵܦܸܢ ܡܸܬܼܐ̱ܡܲܪ ܒܸܤܪܵܐ ܒܲܚܕܼܵܝܘܼܬܼܵܐ. ܠܲܝܬܿ ܠܵܟܼ
ܠܥܵܫܘܿܩܘܼܬܼܵܐ: ܐܵܦܠܵܐ ܚܲܕܼ. ܡܸܛܠ ܕܚܲܕܼ ܒܪܵܐ ܘܲܡܫܝܼܚܵܐ ܐܸܡ̇ܪܹܬܼ:
ܕܡܵܘܕܥܝܼܢ ܬܪܹܝܢ ܟܝܵܢ̈ܝܼܢ. ܐܸܠܵܐ ܐܸܡ̇ܪܹܬܼ: ܕܲܒܼܪܵܐ ܐܝܼܬܼܵܘܗܝ ܐܲܠܵܗܵܐ
ܘܒܲܪܢܵܫܵܐ. ܩܲܕܼܡܵܝܑܬܼ ܐܵܡ̇ܪܹܬܼ: ܕܲܬܼܪܹܝܢ ܟܝܵܢ̈ܝܼܢ ܡܵܘܕܲܥ ܫܡܵܐ
ܕܲܡܫܝܼܚܵܐ ܘܲܒܼܪܵܐ. ܘܐܸܬܹܝܬܿ ܒܲܪ ܫܵܥܬܹܗ: ܘܐܵܦ ܠܲܟܼܝܵܢܹ̈ܐ ܐܵܡ̇ܪܹܬܼ.
ܡܸܛܠ ܕܹܝܢ ܕܲܒܼܪܵܐ: ܐܲܠܵܗܵܐ ܐܝܼܬܼܵܘܗܝ ܘܒܲܪܢܵܫܵܐ: ܠܵܐ ܡܸܬܼܐ̱ܡܲܪ
pb. 145
ܠܚܘܿܕܼܵܝܼܬܼ: ܐܸܠܵܐ ܐܝܼܬܼܵܘܗܝ ܬܪܹܝܢ ܟܝܵܢ̈ܝܼܢ. ܐܸܠܵܐ ܪܵܓܹܙ ܐܲܢ̄ܬܿ
ܠܘܼܩܒܲܠܝ: ܕܠܵܐ ܐܸܡ̇ܪܹܬܼ: ܐܲܠܵܗܵܐ ܡܸܠܬܼܵܐ ܬܪܹܝܢ ܟܝܵܢ̈ܝܼܢ ܒܫܘܼܚܠܵܦ
ܐܘܼܤܝܼܵܐ. ܐ̄ܚܪܵܢܝܵܐܝܼܬܼ ܓܹܝܪ ܠܲܝܬܿ ܠܡܸܬܼܪܲܥܵܝܘܼ: ܐܸܠܵܐ ܕܒܲܟܼܝܵܢܵܐ
ܕܐ̄ܢܵܫܘܼܬܼܵܐ ܐܸܡ̇ܪܹܬܼ ܕܲܗܘ̤ܵܐ: ܘܐܝܼܬܼܵܘܗܝ ܒܪܵܐ ܒܲܪܢܵܫܵܐ ܒܲܚܕܼܵܝܘܼܬܼܵܐ:
ܘܠܵܘ ܒܲܟܼܝܵܢܵܐ. ܗܵܕܹܐ ܕܲܠܚܲܬܼܟܼܘܿܢ: ܕܐܸܢܵܐ ܐܸܡ̇ܪܹܬܼ: ܐܵܘ ܗܵܝ̇ ܕܐܵܦ
ܗ̤ܘ ܐܸܡ݂ܲܪ: ܕܟܲܕܼ ܐܸܬܼܝܼܠܸܕܼ ܒܸܤܪܵܐ: ܗ̤ܘ ܡܸܬܼܐ̱ܡܲܪ ܕܐܸܬܼܝܼܠܸܕܼ؟ ܡܸܛܠ
ܕܝܲܠܕܵܐ ܕܒܸܤܪܹܗ: ܕܝܼܠܹܗ ܚܵܫ̇ܿܒܼ ܠܹܗ ܢܲܗܝܼܪܵܐܝܼܬܼ. ܐܵܦ ܗ̤ܘ ܗܵܟܲܢܵܐ
ܐܸܡ݂ܲܪ: ܕܒܸܤܪܵܐ ܐܸܬܼܝܼܠܸܕܼ: ܥܲܒܼܕܹܿܗ ܕܹܝܢ ܕܝܼܠܹܗ. ܡܵܢܵܐ ܗܵܟܹܝܠ ܡܸܕܸܡ
ܚܲܕܼܬܼܵܐ ܬܸܡ̇ܪܹܬܼ: ܕܟܲܕܼ ܐܸܬܼܝܼܠܸܕܼ: ܒܲܪܢܵܫܵܐ ܗ̄ܘ̣ ܡܸܬܼܐ̱ܡܲܪ ܕܐܸܬܼܝܼܠܸܕܼ:
ܒܬܼܘܼܠܬܵܐ؟ ܡܸܛܠ ܕܗ̤ܝ ܐ̄ܢܵܫܘܼܬܼܵܐ: ܒܪܵܐ
ܐܝܼܬܹܝܗ̇ ܕܐܲܠܵܗܵܐ ܒܲܚܕܼܵܝܘܼܬܼܵܐ ܕܲܠܘܵܬܼ ܒܪܵܐ: ܘܠܵܐ ܗ̄ܘ̣ܵܐ ܒܲܟܼܝܵܢܵܐ.
ܒܲܚܕܼܵܝܘܼܬܼܵܐ ܓܹܝܪ ܥ̣ܒܲܕܼ ܐܸܢܹܝܢ ܐܲܠܵܗܵܐ ܡܸܠܬܼܵܐ ܕܝܼܠܹܥܗ ܠܗܵܠܹܝܢ
ܕܒܸܤܪܵܐ: ܠܵܐ ܗ̄ܘ̣ܵܐ ܕܐܲܠܵܗܘܼܬܼܵܐ ܒܝܲܠܕܸܵܐ ܕܒܸܤܪܵܐ ܐܸܬܼܝܲܠܕܲܬ̤: ܘܠܵܐ
ܬܘܼܒܼ ܒܝܲܠܕܵܐ ܕܐܲܠܵܗܘܼܬܼܵܐ ܒܸܤܪܵܐ ܟܝܵܢܵܐܝܼܬܼ ܐܸܬܼܝܼܠܸܕܼ. ܐܸܠܵܐ ܒܲܚܕܼܵܝܘܼܬܼܵܐ
ܕܲܠܘܸܬܼ ܒܸܤܪܵܐ: ܡܸܬܼܐ̱ܡܲܪ ܐܲܠܵܗܵܐ ܒܸܤܪܵܐ. ܘܒܸܤܪܵܬ ܒܲܚܕܼܵܝܘܼܬܼܵܐ
ܕܵܠܘܵܬܼ ܒܪܵܐ ܐܲܠܵܗܵܐ ܡܸܠܬܼܵܐ: ܒܪܵܐ ܡܸܬܼܐ̱ܡܲܪ. ܐܵܘ ܠܵܐ ܐܸܬܼܚܲܝܲܕܼ:
ܘܲܚܢܲܢ ܥܵܫܩܝܼܢܲܬܢ ܠܹܗ. ܡܲܢܘܼ ܐܲܛܥܝܼܟܼܘܿܢ؟ ܕܛܵܥܝ̈ܐ ܓܹܝܪ ܐܝܼܬܹܝܗ̇
ܫܲܠܡܘܼܬܼܵܐ ܗܵܕܹܐ. ܕܲܬܼܪܹܝܢ ܓܹܝܪ ܟܝܵܢܹ̈ܐ ܐܝܼܬܹܝܗ̇ ܫܲܠܡܘܼܬܼܵܐ ܗܵܕܹܐ:
ܕܲܬܼܪܹܝܢ ܓܹܝܪ ܟܝܵܢܹ̈ܐ ܐܝܼܬܼܵܘܗܝ ܡܫܵܘܕܥܵܢܵܐ ܒܪܵܐ: ܘܲܡܫܝܼܚܵܐ: ܘܡܵܪܝܐ:
ܐܵܘܕܲܥ̣ ܐܵܦ ܗ̤ܘ. ܡܲܫܚ̱ܠܦܝܼܢ ܠܲܡ ܟܝܵܢܹ̈ܐ ܕܐܸܬܼܟܲܢܲܫܘ ܠܲܚܕܼܵܝܘܼܬܼܵܐ
ܫܲܪܝܼܪܵܬܵܐ: ܚܲܕܼ ܕܹܝܢ ܡ̣ܢ ܬܪ̈ܲܝܗܘܿܢ ܒܪܵܐ: ܟܲܕܼ ܡܩܵܘܹ̇ܝܢ ܟܝܵܢܹ̈ܐ ܕܠܵܐ
pb. 146
ܒܘܼܠܒܵܠܵܐ ܒܲܚܕܼܵܝܘܼܬܼܵܐ: ܠܵܐ ܫܘܼ̈ܚܠܵܦܹܐ ܕܲܟܼܝܵܢܹ̈ܐ ܡܸܬܼܒܲܛܠܝܼܢ
ܡܸܛܠ ܚܕܼܵܝܘܼܬܼܵܐ. ܘܬܼܘܼܒܼ ܕܒܲܚܕܼܵܝܘܼܬܼܵܐ ܒܸܤܪܵܐ ܒܪܵܐ: ܘܠܵܘ
ܒܲܟܼܝܵܢܵܐ . . . ܠܵܘ ܓܹܝܪ ܢܘܼܟܼܪܵܝܵܐ ܗ̄ܘ̣ ܠܹܗ: ܕܥܲܡܹܗ ܝܑܼܬܸܒܼ
ܥܲܡ ܐܲܒܼܵܐ. ܐܵܦ ܐܲܡܒܿܪܘܿܤܝܼܘܿܣ ܐܸܡ݂ܲܪ: ܕܟܲܕܼ ܒܬܲܪ̈ܬܲܝܗܹܝܢ
ܡܡܲܠܸܠ ܒܪܵܐ ܕܐܲܠܵܗܵܐ: ܡܸܛܠ ܕܒܹܗ ܐܝܼܬܲܝܗܘܿܢ ܗ̄ܘ̣ܵܘ ܬܪ̈ܲܝܗܘܿܢ
ܟܝܵܢܹ̈ܐ: ܗ̤ܘ ܡܡܲܠܸܠ: ܘܠܵܐ ܗ̄ܘ̣ܵܐ ܒܚܲܕܼ ܙܢܵܐ ܡܡܲܠܸܠ ܐܲܡܝܼܢܵܐܝܼܬܼ.
ܚܘܼܪܘܙ ܒܹܗ: ܗܵܫܵܐ ܒܬܸܫܒܿܘܿܚܬܼܵܐ: ܘܗܵܫܵܐ ܒܚܲܫܹ̈ܐ ܕܒܲܪܢܵܫܵܐ: ܡܸܛܠ
ܕܐܲܝܟܼ ܐܲܠܵܗܵܐ ܡܲܠܸܦ ܐܲܠܵܗܵܝ̈ܬܼܵܐ: ܡܸܛܠ ܕܡܸܠܬܼܵܐ ܗ̄ܘ̣. ܐܲܝܟܼ.
ܒܲܪܢܵܫܵܐ ܕܹܝܢ ܡܡܲܠܸܠ ܐ̄ܢܵܫܵܝ̈ܬܼܵܐ: ܡܸܛܠ ܕܒܼܐܼܤܝܼܵܐ ܕܝܼܠܲܢ ܡܡܲܠܸܠ.
ܗܵܢܵܐ ܠܲܚܡܵܐ ܚܲܝܵܐ ܕܲܢܚܸܬܼ ܡ̣ܢ ܫܡܲܝܵܐ: ܗܵܢܵܐ ܠܲܚܡܵܐ ܦܲܓܼܪܵܐ.
ܐܝܼܬܼܵܘܗܝ: ܐܲܝܟܼ ܕܗ̤ܘ ܐܸܡ݂ܲܪ. ܗܵܢܵܐ ܠܲܚܡܵܐ: ܕܐܸܢܵܐ ܝܵܗܹ̇ܒܼ ܐ̄ܢܵܐ
ܠܟܼܘܿܢ: ܦܲܓܼܪܝ ܐܝܼܬܼܵܘܗܝ. ܗܵܢܵܐ ܐܝܼܬܼܵܘܗܝ ܕܲܢܚܸܬܼ: ܗܵܢܵܐ
ܐܝܼܬܼܵܘܗܝ ܕܐܲܒܼܵܐ ܩܲܕܼܫܹܗ ܘܫܲܕܪܹܗ ܠܥܵܠܡܵܐ. ܐܵܦܠܵܐ ܗ̤ܘ ܟܬܼܵܒܼܵܐ
ܡܲܠܸܦ ܠܟܼܘܿܢ: ܕܠܵܐ ܤܢܝܼܩܵܐ ܐܲܠܵܗܵܘܼܬܼܵܐ ܥܲܠ ܩܘܼܕܵܫܵܐ: ܐܸܠܵܐ
ܒܸܤܪܵܐ؟ ܐܲܝܟܲܢ ܤܵܡܬܿܘܿܢ ܗܵܠܹܝܢ: ܘܐܲܚܪܸܡܬܿܘܿܢ ܕܝܼܠܝܼ؟ ܠܵܘ ܓܹܝܪ
ܡܸܕܸܡ ܐ̄ܚܪܹܝܢ ܐܸܡܪܹܬܼ.
Book 1.3
ܒܝܼܫܵܐܝܼܬܼ ܤܲܕܼܩ̣ܬܿ ܡܢܵܬܼܵܐ: ܘܠܵܐ ܗ̄ܘ̣ܵܐ ܐ̄ܢܵܫ ܕܐܸܬܼܚܪܝܼ
pb. 147
ܠܘܼܩܒܲܠܝܼ. ܢܤܲܒܼܬܿ ܒܫܘܼܠܛܵܢܵܐ ܟܬܼܝܼ̈ܒܼܵܬܼܵܐ ܒܲܫܡܵܐ ܕܝܼܠܝܼ ܡ̣ܢ
ܡܸܢܝܵܢܵܐ ܕܐܲܦܸܤ̈ܩܘܿܦܹܐ. ܐܲܝܟܼ ܚܲܪܫܵܐ ܘܕܘܼܓܵܘ ܗܘ̤ܵܐ ܟܠܢܸܫ. ܐܲܢ̄ܬܿ
ܟܲܢܸܫ̣ܬܿ ܓܘܼܕܐ ܡ̣ܢ ܕܲܝܪ̈ܵܝܹܐ: ܘܡ̣ܢ ܐܲܝܠܹܝܢ ܕܡܸܫܬܲܡܗܝܿܢ ܗ̄ܘ̣ܵܘ
ܐܲܦܸܤܩ̈ܘܿܦܹܐ ܠܲܡܪܕܘܼܬܼܵܐ ܘܠܲܫܓܼܘܼܫܝܵܐ ܕܥܹܕܬܵܐ. ܘܠܵܐ ܗ̄ܘ̣ܵܐ ܐ̄ܢܵܫ
ܡ̣ܢ ܪܹ̈ܫܵܥܹܐ ܕܥܵܕܼܟܼ ܕܲܬܼܥܲܟܵܪ ܗܵܕܹܐ. ܐܸܬܼ݂ܵܐ ܗ̄ܘ̣ܵܐ ܟܸܢܵܫܵܐ ܕܐܲܝܟܼ ܗܵܢܵܐ
ܕܐܸܫܬܲܕܲܪ: ܘܒܲܢܛܘܼܪܬܵܐ ܡܸܬܼܚܙܹܝܢ ܗ̄ܘ̣ܵܘ ܠܘܼܩܒܲܠܝ ܒܒܲܝܬܼܵܐ
ܕܡܲܠܟܿܘܼܬܼܵܐ. ܟ̱ܠܹܗ ܥܼܫܢܵܐ ܕܡܲܠܟܿܘܼܬܼܵܐ ܐܲܢ̄ܬܿ ܩܢܸܐ ܗ̄ܘܲܝܬܿ: ܐܸܢܵܐ
ܕܹܝܢ ܫܡܵܐ ܒܲܠܚܘܿܕܼ ܕܡܲܠܟܵܐ. ܠܵܘ ܠܡܸܬܼܥܲܫܢܸܵܢܘܼܬܼܵܐ: ܘܠܵܘ
ܠܢܘܼܛܵܐ: ܘܠܵܘ ܠܥܘܼܕܼܪܵܢܵܐ ܕܝܼܠܝܼ: ܝܲܬܿܝܼܪܵܐܝܼܬܼ ܕܹܝܢ ܐܲܝܟܼ
ܕܲܠܡܸܫܬܿܡܥܵܢܘܼܬܼܵܐ ܕܝܼܠܝܼ. ܒܪܲܡ ܡܸܛܠ ܕܠܵܐ ܐܸܬܼܚܲܫ̇ܚܹܬܼ: ܠܵܐ
ܒܥܘܪܫܢܵܐ ܕܥܹܕܬܵܐ: ܘܠܵܐ ܒܥܘܼܫܢܵܐ ܕܪܹܫܵܢܹܐ: ܘܠܵܐ ܒܥܘܼܫܢܵܐ
ܕܡܲܠܟܿܘܼܬܼܵܐ: ܐܸܬܹܝ̇ܬܼ ܠܗܵܕܹܐ ܐܵܢܲܢܩܹܐ. ܐܸܢܵܐ ܕܹܝܢ: ܕܐܝܼܬܼ ܗ̄ܘ̣ܵܐ
ܠܝܼ ܪܹ̈ܫܵܢܹܐ ܘܡܲܠܟܵܐ ܘܐܵܦܸܤܩܘܿܦܘܼܬܼܵܐ ܕܩܘܼܤܛܲܢܛܲܝܢܵܦܘܿܠܝܼܣ:
ܐܸܢܵܐ ܕܲܠܗܲܪ̈ܵܛܝܼܩܹܐ ܗܘܹ̇ܝܬܼ ܢܲܓܝܼܪ ܪܘܼܚܵܐ: ܡܸܢܵܟܼ ܡܸܙܕܲܥܙܲܥ
ܗ̄ܘܹ̇ܝܬܼ ܠܡܸܬܿܛܪܵܕܼܘ. ܘܐܝܼܬܲܝܟܼ ܗ̣̄ܘܲܝܬܿ ܐܲܩܸܤܩܘܿܦܵܐ ܕܐܵܠܹܟܼܤܲܢܕܪܝܼܵܐ:
ܘܲܠܒܼܝܼܟܼ ܗ̣̄ܘܲܝܬܿ ܠܥܹܕܬܵܐ ܕܩܘܼܤܛܲܢܛܝܼܢܵܦܘܿܠܘܿܣ. ܗܵܝ̇ ܕܠܵܐ
ܚܵܐܹ̇ܫ ܗ̄ܘ̣ܵܐ ܠܵܗ̇ ܐܵܦܠܵܐ ܐܲܦܸܤܩܘܿܦܵܐ ܕܒܲܐܝܕܼܵܐ ܕܗ̤ܝ ܡܕܝܼܢ̄ܬܼܵܐ:
ܗܵܘ̇ ܕܲܒܼܕܼܝܼܢܵܐ ܨܵܒܹ̇ܐ ܐ̄ܢܵܫ ܠܲܡܕܼܵܢܵܗ̇ ܘܠܵܘ ܒܲܩܛܝܼܪܵܐ. ܐܸܠܵܐ ܤܲܝ̇ܒܿܪܹܬܼ
ܟܠܗܹܝܢ ܟܲܕܼ ܒܲܦܝܵܤܵܐ ܡܸܬܼܚܲܫܲܚ ܗ̄ܘܹ̇ܝܬܼ: ܘܠܵܘ ܒܲܩܛܝܼܪܵܐ:
pb. 148
ܠܲܡܦܵܣ ܗ̣̄ܘ ܠܠܵܐ ܝܵܕܼܘܿܥܹ̈ܐ. ܘܠܲܡܥܲܕܪ̈ܵܢܹܐ ܡܤܲܟܸܿܐ ܗ̄ܘܹ̇ܝܬܼ:
ܠܵܘ ܠܐܲܝܠܹܝܢ ܕܒܲܩܪܵܒܼܵܐ ܡܸܬܼܟܲܬܿܫܝܼܢ ܘܠܵܐ ܡܸܫܟܿܚܝܼܢ ܠܡܸܬܿܛܦܵܤܘܼ.
ܐܝܼܬܼ ܗ̄ܘ̣ܵܐ ܠܟܼܘܿܢ ܬܘܼܒܼ ܥܲܡܟܼܘܿܢ ܒܲܪܬܼ ܬܲܟܼܬܿܘܼ̈ܫܹܐ
ܠܘܼܩܒܲܠܝ: ܡܲܠܟܵܬܼܵܐ ܛܠܝܵܬܼܵܐ ܒܬܼܘܼܠܬܼܵܐ. ܗܵܝ̇: ܕܡܸܛܠ ܕܠܵܐ ܨܵܒܹ̇ܐ
ܗ̄ܘ̣ܵܝܬܼ ܠܡܸܬܿܛܦܵܤܘܼ ܠܒܼܵܥܘܼܬܼܵܗ̇: ܕܲܡܫܲܚܛܲܬܼ ܠܓܲܒܼܪܹ̈ܐ ܐܹܦܲܚܸܡ
ܠܟܲܠܬܼܵܐ ܕܲܡܫܝܼܚܵܐ: ܡܲܩܪܒܼܵܐ ܗ̄ܘ̣ܵܬܼ ܠܘܼܩܒܲܠܝܼܘ ܗܵܕܹܐ ܤܸܥ̇ܪܹܬܼ:
ܒܲܕܼ ܚܵܐܹ̇ܣ ܗ̄ܘܹ̇ܝܬܼ ܥܲܠ ܢܲܦܫܵܗ̇. ܘܲܕܼܠܵܐ ܐܸܵܗܘܸܐ ܗܲܕܲܚ̈ܐ
ܕܢܸܟܼܤܬܼܵܐ: ܒܐܲܝܠܹܝܢ ܕܗ̤ܝ ܥܵܘܠܵܐܝܼܬܼ ܓܵܒܼ̇ܝܵܐ ܗ̄ܘ̣ܵܬܼ. ܗܵܕܹܐ ܐܲܝܟܼ
ܕܲܠܫܘܼܘܕܵܥܵܐ ܐܸܡ̇ܪܹܬܼ: ܪܵܚܡܵܐ ܗ̄ܘ̣ܵܬܼ ܠܝܼ ܓܹܝܪ: ܘܡܸܛܠ ܗܵܕܹܐ
ܠܫܲܪܟܵܐ ܕܲܙܥܘܿܪܘܼܬܼ ܢܲܦܫܵܗ̇ ܐܲܝܟܼ ܛܠܝܼܬܼܵܐ ܒܫܸܬܼܩܵܐ ܢܵܛܲܪ ܐ̄ܢܵܐ
ܘܲܡܲܛܵܫܸܐ ܐ̄ܢܵܐ: ܘܡܸܛܠ ܗܵܠܹܝܢ ܐܲܩܪܒܲܬ̤ ܥܲܡܝܼ. ܘܗܪܟܵܐ
ܐܸܬܼܡܲܨܝܲܬ̤ ܚܲܝܠܝܼ: ܘܠܘܼܩܕܼܵܡ ܒܹܝܡ ܕܲܡܫܝܼܚܵܐ: ܐܲܝܟܵܐ ܕܟܼܠܡܸܕܸܡ
ܥܲܪܛܸܠ ܘܲܓܼܠܸܐ ܩܕܼܵܡ ܥܲܝܢܵܘ̈ܗܝ: ܗܵܘ̇ ܕܨܐܕܼܵܘܗܝ ܕܝܼܢܵܐ ܕܝܼܠܲܢ
ܘܕܝܼܠܗܘܿܢ ܐܲܝܟܼ ܝܵܘ̈ܡܵܬܼܵܐ ܕܤܝܼܡ ܠܹܗ ܢܹܐܬܸܿܐ.
ܐܸܠܵܐ ܠܬܲܡܵܢ ܬܘܼܒܼ ܥܵܛ݂̇ܦ ܐ̄ܢܵܐ ܠܘܵܬܼ . . . . ܐܵܪܲܥ
ܠܐܵܦܘܼܠܝܼܢܵܪܝܼܣ ܘܲܠܕܼܘܿܓܡܵܐ ܕܝܼܠܹܗ. ܐܲܝܟܲܢ ܢܛܲܪ ܠܵܐ ܝܵܕܲܥ̇ ܐܲܢ̄ܬܿ.
ܒܪܲܡ ܠܐܲܝܠܹܝܢ ܕܠܵܐ ܝܵܕܼܥ̇ܝܼܢ ܐܸܡܲ݁ܪ ܐ̄ܢܵܐ. ܗܵܢܵܐ ܡܵܘܕܹܐ ܒܒܲܪ ܟܝܵܢܵܐ
ܕܐܲܒܼܵܐ: ܘܲܒܼܗܵܕܹܐ ܩܢܸܐ ܡܲܤܒܿܪܵܢܘܼܬܼܵܐ ܕܠܲܟܼܬܼܵܒܹ̈ܐ ܐܲܠܵܗܵܝܹ̈ܐ ܫܵܠܹ̇ܡ:
ܟܲܕܼ ܠܵܐ ܡܸܫܟܿܚܝܼܢ ܗ̄ܘ̣ܵܘ ܠܡܸܚܙܵܐ ܗܵܠܹܝܢ ܕܝܼܠܹܗ ܚܲܬܿܝܼܬܼܵܐܝܼܬܼ.
ܥܲܠ ܗܵܝ̇ ܓܹܝܪ ܐܝܼܬܼܵܘܗܝ ܒܪܵܐ ܒܲܪ ܟܝܵܢܵܐ ܕܐܲܠܵܗܵܐ ܐܲܒܼܵܐ: ܡܸܬܼܚܪܸܐ
pb. 149
ܠܘܼܩܒܲܠ ܠܵܐ ܡܕܲܡ̈ܝܵܢܹܐ: ܘܠܵܐ ܝܵܕܲܥ̇ ܐܲܝܟܲܢ ܡ̣ܢ ܕܪܹܫ ܠܘܼܩܒܲܠ
ܐܸܪ̈ܬܵܕܘܿܟܿܤܹܐ ܐܸܬܼܚܪܝܼ: ܒܗܵܝ̇ ܕܠܵܐ ܐܝܼܬܼܵܘܗܝ ܒܲܪ ܟܝܵܢܵܐܘ ܐܸܠܵܐ
ܡܲܗܦܸܟܼ ܠܹܗ ܡ̣ܢ ܗܵܕܹܐ: ܡܸܛܠ ܕܠܲܟܼܝܵܢܵܐ ܕܐܲܠܵܗܵܐ ܡܸܠܬܼܵܐ
ܘܲܕܼܒܸܤܪܵܐ ܐܵܡܲ݁ܪ ܕܲܗܘ̤ܵܬܼ ܚܕܼܵܝܘܼܬܼܵܐ: ܐܲܝܟܼ ܕܩܲܒܸܠ̣ ܡ̣ܢ ܐܵܪ̈ܝܵܢܹܐ.
ܠܗܵܝ̇ ܕܐܵܡ̇ܪܝܼܢ ܐܵܪ̈ܝܵܢܹܐ: ܕܠܵܐ ܕܵܡܹ̇ܐ ܒܪܵܐ ܠܐܲܒܼܵܐ ܒܲܟܼܝܵܢܵܐ ܫܵܠܹ̇ܡ:
ܒܗܵܝ̇ ܕܡܵܘܕܹܐ ܕܒܲܪܓܸܫܼܵܐ ܟܵܝܵܢܝܬܼܵܐ: ܚܲܫܹ̈ܐ ܕܦܲܓܼܪܵܐ ܚܵܐܹ̇ܫ ܗ̄ܘ̣ܵܐ. ܠܵܐ
ܓܹܝܪ ܐܝܼܬܼܵܘܗܝ ܒܲܟܼܝܵܢܵܐ ܗ̤ܘ ܟܲܕܸ ܗ̤ܘ: ܚܲܫ̇ܘܿܫܵܐ ܘܠܵܐ ܚܵܫ̇ܘܿܫܵ:
ܘܐܵܦܸܢ ܠܢܲܦܫܵܐ ܕܠܵܐ ܡܲܕܲܥܵܐ ܢܚܝܼܕܝܼܘܗܝ ܠܦܲܓܼܪܵܐ. ܒܦܲܓܼܪܵܐ ܓܹܝܪ
ܐܵܦ ܒܢܲܦܫܵܐ ܠܲܟܼܝܵܢܵܐ ܡܚܲܝܲܕܼ: ܘܚܲܫܹ̈ܐ ܟܝܵܢܵܝܹ̈ܐ ܕܝܼܠܹܗ ܕܵܟܼܝܵܢܵܐ ܚܵܐܹ̇ܫ
ܒܹܗ ܒܲܟܼܝܵܢܵܐ. ܐܵܦܸܢ ܒܡܘܼܙܵܓܼܵܐ: ܐܵܦܸܢ ܒܫܘܼܚܠܵܦܵܐ: ܐܵܦܸܢ ܒܪܘܼܟܵܒܼܵܐ
ܘܫܘܼܡܠܵܝܵܐ ܕܲܟܼܝܵܢܵܐ ܢܹܐܡܪܘܼܢ: ܠܵܗ̇ ܠܗܵܕܹܐ ܡ̣ܢ ܟܠ ܦܪܘܿܣ
ܡܲܝܬܹܝܢ ܠܹܗ. ܗܵܘ̇ ܓܹܝܪ ܕܒܲܚܕܼܵܝܘܼܬܼܵܐ ܟܝܵܢܵܝܬܼܵܐ ܚܵܐܹ̇ܫ: ܠܵܐ
ܐܝܼܬܼܵܘܗܝ ܗ̤ܘ ܟܲܕܼ ܗ̤ܘ ܒܐܘܼܤܝܼܵܐ ܕܗܵܘ̇ ܕܠܵܐ ܡܩܸܲܠ ܚܲܫܹ̈ܐ. ܡ̣ܢ
ܚܕܼܵܝܘܬܼܵܐ ܕܹܝܢ ܟܝܵܢܝܬܼܵܐ: ܐܵܦ ܬܚܹܝܬܼ ܚܲܫܹ̈ܐ ܗܵܘܹ̇ܐ. ܗܵܢܸܵܘ ܓܹܝܪ ܟܝܵܢܸܐ:
ܕܒܹܗ ܗܘ̤ܵܐ ܒܲܚܕܼܵܝܘܼܬܼܵܐ ܟܝܵܢܵܝܬܼܵܐ. ܠܘܼܩܒܲܠ ܦܵܘܠܹܐ ܕܹܝܢ
ܘܦܘܿܛܝܼܢܘܿܣ ܡܸܬܼܚܪܸܐ: ܒܗܵܝ̇ ܕܐܝܼܬܼܵܘܗܝ ܡܸܠܬܼܵܐ ܒܲܟܼܝܵܢܵܐ
ܘܒܲܩܢܘܿܡܵܐ ܘܲܡܬܼܡܿܡܵܝܵܐ. ܛܥ̣ܵܐ ܗ̄ܘ̣ܵܐ ܕܹܝܢ: ܕܐܵܦ ܗܵܠܹܝܢ
ܕܦܲܓܼܪܵܐ ܠܐܲܠܵܗܵܐ ܡܸܠܬܼܵܐ ܒܲܟܼܝܵܢܵܐ ܡܲܩܸܦ ܒܲܚܕܼܵܝܘܼܬܼܵ ܟܝܵܢܵܝܬܼܵܐ. ܒܗܵܝ̇
ܓܹܝܪ ܕܡܸܬܼܚܪܸܐ ܗ̄ܘ̣ܵܐ ܠܘܼܩܒܲܠ ܠܵܐ ܡܕܲܡ̈ܝܵܢܹܐ: ܕܒܲܪ ܟܝܵܢܵܐ
ܐܝܼܬܼܵܘܗܝ ܒܪܵܐ ܕܐܲܠܵܗܵܐ ܐܲܒܼܵܐ. ܘܠܘܼܩܒܲܠ ܦܘܿܛܝܼܢܘܿܣ ܘܦܵܘܠܹܐ:
pb. 150
ܕܐܝܼܬܼܵܘܗܝ ܒܲܟܼܝܵܢܵܐ ܘܒܲܩܢܘܿܡܵܐ ܘܒܲܪ ܐܝܼܬܘܼܬܹܗ ܕܐܲܒܼܵܐ. ܒܲܕ ܠܵܐ
ܝܵܕܲܥ̇ ܗ̄ܘ̣ܵܐ: ܐܲܝܟܼ ܐܵܪ̈ܬܵܕܘܿܟܿܤܹܐ ܐܸܬܼܚܫܸܒܼ: ܟܵܕܼ ܛܵܒܼ ܫܵܪܹܐ ܗ̄ܘ̣ܵܐ
ܠܗܵܠܹܝܢ ܕܡܸܤܬܿܒܲܪ ܗ̄ܘ̣ܵܐ ܕܒܼܵܢܹ̇ܐ ܥܲܠ ܗܲܝܡܵܢܘܼܬܼܵܐ. ܒܲܕܼ ܠܵܐ ܐܲܩܸܦ̣
ܐܲܝܠܹܝܢ ܕܠܵܚ̈ܡܵܢ: ܐܸܠܵܐ ܐܲܝܟܼ ܒܥܸܠܕܒܼܵܒܼܵܐ ܒܲܛܸܠ̣ ܐܵܦ ܠܐܲܝܠܹܝܢ
ܕܛܵܒܼܵܐܝܼܬܼ ܐܲܡܝܼܪ݁ܵܢ.
ܘܬܼܘܼܒܼ ܠܘܵܬܼ ܐܲܝܠܹܝܢ ܕܲܬܼܪܝܼܨܵܐܝܼܬܼ ܡܵܘܕܹܝܢ: ܒܬܲܪ̈ܬܲܝܗܹܝܢ
ܡܸܬܼܚܪܸܐ ܐܲܝܟܼ ܕܵܒܲܪ ܓܘܼܕܵܐ ܗ̄ܘ̣ ܕܐܵܪ̈ܬܵܕܘܿܤܹܐ. ܘܡܼܬܥܲܫܲܢ:
ܕܲܠܛܵܥܝܘܼܬܹܗ ܢܤܝܼܡ ܒܥܹܕܬܵܐ: ܘܐܝܬܼܝ ܤܲܩܘܼܒܼܠܵܝܘܼܬܼܵܐ.
ܘܠܲܝܬܿ ܗ̄ܘ̣ܵܐ ܕܹܝܢ ܕܪܵܫܵܐ ܗܵܢܵܐ ܒܡܲܕܼܢܚܵܐ: ܘܡ̣ܢ ܟܲܕܼܘ ܐܸܬܼܦܪܸܫ
ܡ̣ܢ ܥܹܕܬܵܐ ܐܲܝܕܵܐ ܕܐܸܫܟܲܚܬܵܗ̇ ܒܩܘܼܤܛܲܢܛܝܼܢܵܦܘܼܠܝܼܣ.
ܘܠܵܐ ܗ̄ܘ̣ܵܐ ܒܝ̈ܘܡܵܬܼܝ ܫܲܪܝܼ ܗ̄ܘ̣ܵܐ: ܠܵܐ ܒܩܘܼܤܛܲܢܛܲܝܼܢܵܦܘܿܠܝܼܣ
ܘܠܵܐ ܒܡܲܕܼܢܚܵܐ. ܠܵܐ ܓܹܝܪ ܥܕܲܟܹܝܠ ܐܬܼܝܲܠܕܹܬܼ ܗܘܹ̇ܝܬܼ: ܟܲܕܼ
ܥܲܠ ܗܵܠܹܝܢ ܗܘ̤ܵܐ ܕܪܵܫܵܐ ܘܐܸܫܪܝܼ. ܘܠܵܐ ܬܘܼܒܼ
ܒܩܘܼܤܛܲܢܛܝܼܢܵܦܘܿܠܝܼܣ ܡ̣ܢ ܡܸܠܲܝ̈ ܕܝܼܠܝܼ ܩܵܒܸܠ̣ ܒܥܵܬܼܵܐ: ܐܸܠܵܐ
ܒܙܲܒܼܢܵܐ ܕܐܲܝܠܹܝܢ ܕܡ̣ܢ ܩܕܼܵܡܲܝ. ܐܲܝܟܲܢܵܐ ܗܵܟܹܝܠ ܥܵܫ݂̇ܩ ܠܲܢ̄ܬܿ ܠܝܼ
ܒܕܼܵܐܡܲܪ ܐܲܢ̄ܬܿ: ܕܗ̤ܘ ܐܲܪܡܝܵܗ̇ ܠܲܒܼܥܵܬܼܵܐ ܗܵܕܹܐ: ܘܩܵܪܹܐ ܐܲܢ̄ܬܿ ܠܝܼ
ܡܸܫܟܲܚ ܚܲܕܼ̈ܬܼܵܬܼܵܐ ܘܥܸܠܬܼܵܐ ܕܲܫܓܼܘܼܫܝܵܐ ܘܕܲܩܪܵܒܼܵܐ: ܠܲܐܝܢܵܐ ܕܠܲܓܼܡܵܪ
ܒܥܵܬܼܵܐ ܕܐܲܝܟܼ ܗܵܕܹܐ ܠܵܐ ܐܲܡܪܝܼ. ܐܸܠܵܐ ܡܸܫܟܵܚܘܼ ܐܸܫܟܚܹܗ ܒܐܲܢܛܝܟܼܝܵܐ.
ܘܬܲܡܵܢ ܐܲܠܦܹ̇ܬܼ ܐܵܦ ܐܸܡ̇ܪܹܬܼ ܥܲܠ ܗܵܠܹܝܢ: ܘܠܵܐ ܐ̄ܢܵܫ ܥܲܕܼܠܲܢܝܼ.
pb. 151
ܘܤܵܒܲܪ̇ ܗ̄ܘܹ̇ܝܬܼ: ܕܡ̣ܢ ܟܲܕܼܘ ܐܸܤܬܿܠܝܼ ܠܹܗ ܕܘܿܓܡܵܐ ܗܵܘ̇.
ܒܩܘܼܤܛܲܢܛܲܝܼܢܵܦܘܿܠܝܼܣ ܕܹܝܢ: ܟܲܕܼ ܐܸܫܟܿܚܹ̇ܬܼ ܕܒܼܵܥܹ̇ܝܢ ܘܲܤܢܝܼܩܝܼܢ
ܠܡܹܐܠܲܦ: ܐܸܬܼܪܡ̇ܝܼܬܼ ܠܲܡܦܵܤܘܼܬܼܗܘܿܢ ܐܲܝܟܼ ܡܵܐ ܕܲܫܪܵܪܵܐ ܬܵܒܲܥ̇.
ܡܢܵܘܸܬܹ̈ܐ ܓܹܝܪ ܕܥܲܡܵܐ ܕܕܵܪܫܝܼܢ ܗ̄ܘ̣ܵܘ ܥܲܠ ܗܵܕܹܐ: ܫܲܘܝܵܐܝܼܬܼ
ܐܸܬܼ݂ܵܘ ܠܒܹܝܬܼ ܐܲܦܸܤܩܘܿܦܝܘܿܢ: ܟܲܕܼ ܤܢܝܼܩܝܼܢ ܥܲܠ ܫܪܵܝܵܐ ܕܲܕܼܪܵܫܗܘܿܢ
ܘܲܕܼܢܹܐܬܼܘܿܢ ܠܐܵܘܝܘܼܬܼܵܐ. ܗܵܠܹܝܢ ܡ̇ܢ ܠܗܵܢܘܿܢ ܕܩܵܪܹܝܢ ܗ̄ܘ̣ܵܘ
ܠܵܗ̇ ܝܵܠܕܲܬܼ ܐܲܠܵܗܵܐ ܠܛܘܼܒܼܵܢܝܼܬܼܵܐ ܡܲܪܝܲܡ: ܡܵܢܝܼܢܵܝܹ̈ܐ ܩܵܪܹܝܢ ܗ̄ܘ̣ܵܘ.
ܠܐܲܝܠܹܝܢ ܕܹܝܢ ܕܝܵܠܕܲܬܼ ܒܲܪܢܵܫܵܐ ܡܫܲܡܗܝܼܢ ܗ̄ܘ̣ܵܘ ܠܵܗ̇ ܠܛܘܼܒܼܵܢܝܼܬܼܵܐ
ܡܲܪܝܲܡ: ܦܘܿܛܝܼ̈ܢܝܸܢܹܐ؟. ܟܕܼ ܕܹܝܢ ܐܸܫܬܲܐܲܠܘ ܡܹܢܝ: ܠܵܐ ܗܵܢܘܿܢ
ܟܵܦ̇ܪܝܼܢ ܗ̄ܘ̣ܵܘ ܒܐ̄ܢܵܫܘܼܬܼܵܐ: ܘܠܵܐ ܗܵܠܹܝܢ ܒܐܲܠܵܗܘܼܬܼܵܐ. ܐܸܠܵܐ
ܒܬܲܪ̈ܬܝܗܹܝܢ ܡܵܘܕܹܝܢ ܗ̄ܘ̣ܵܘ ܒܵܗ̇ ܒܲܕܼܡܘܼܬܼܵܐ. ܒܲܠܚܘܿܕܼ ܕܹܝܢ ܒܲܫܡܵܗܹ̈ܐ
ܦܪܝܼܫܝܼܢ ܗ̄ܘ̣ܵܘ: ܐܲܝܠܹܝܢ ܕܒܹܝܬܼ ܐܵܦܘܿܠܝܼܢܵܪܝܼܣ ܡܩܲܒܿܠܝܼܢ ܗ̄ܘ̣ܵܘ ܝܵܠܕܲܬܼ
ܐܲܠܵܗܵܐ: ܘܐܲܝܠܹܝܢ ܕܒܹܝܬܼ ܦܘܿܛܝܼܢܘܿܣ ܠܝܵܠܕܲܬܼ ܒܲܪܢܵܫܵܐ. ܡ̣ܢ ܕܹܝܢ
ܕܠܵܐ ܗܵܠܹܝܢ ܐܝܼܬܲܝܗܘܿܢ ܗܵܪ̈ܵܛܝܼܩܹܐ: ܘܠܵܐ ܗܵܢܘܿܢ. ܡܸܛܠ ܕܠܵܐ
ܝܵܕܼܥ̇ܝܼܢ ܠܐܵܦܘܿܠܝܼܢܵܪܝܼܣ ܘܠܵܐ ܠܕܘܿܕܡܵܐ ܕܝܼܠܹܗ: ܗܵܟܲܢܵܐ ܘܠܵܐ
ܗܠܹܝܢ ܠܕܼܘܿܡܵܐ ܕܦܘܿܛܝܼܢܘܿܣ ܘܠܵܐ ܕܦܵܘܠܹܐ. ܘܡܲܝܬܸܐ ܗ̄ܘܹ̇ܝܬܼ
ܠܗܘܼܢ ܡܸܢܵܗ̇ ܕܲܒܼܬܼܵܐ ܘܡܸܢܹܗ ܕܚܸܪܝܵܢܵܐ: ܟܲܕܼ ܐܵܡܵ݁ܪ ܗ̄ܘܹ̇ܝܬܼ:
ܕܐܸܢܗ̤ܘ ܕܠܵܐ ܡܸܬܼܦܲܪܫܵܢܵܐܝܼܬܼ ܘܲܕܼܠܵܐ ܦܤܵܩܵܐ ܐܵܘ ܟܦܘܼܪܝܵܐ
ܕܒܲܐܠܵܗܘܼܬܼܵܐ ܘܲܕܼܐ̄̈ܢܵܫܘܼܬܼܵܐ: ܢܩܲܒܸܿܠ ܐܸܢܹܝܢ ܕܡܸܬܼܐܲܡܪ̈ܵܢ ܡܸܢܗܘܿܢ
pb. 152
ܠܵܐ ܚܵܛܹ̇ܝܢ. ܐܸܢܕܹܝܢ ܠܵܐ: ܒܗܵܕܹܐ ܕܝܲܬܿܝܼܪ ܙܗܝܼܪܵܐܝܼܬܼ ܢܸܬܼܚܲܫܲܚ.
ܗܵܢܵܘ ܕܹܝܢ: ܒܒܲܪܬܼ ܩܵܠܵܐ ܕܐܹܘܢܓܲܠܝܘܿܢ: ܕܲܡܫܝܼܚܵܐ ܐܸܬܼܝܼܠܸܕܼ:
ܘܲܟܼܬܼܵܒܼܵܐ ܕܝܼܠܕܘܼܬܹܗ ܕܝܼܫܘܿܥ ܡܫܝܼܚܵܐ. ܘܡ̣ܢ ܐܲܝܠܹܝܢ ܕܐܲܝܟܼ
ܗܵܠܹܝܢ: ܡܵܘܕܼܝܼܢܲܢ ܒܲܡܫܝܼܚܵܐ ܕܐܝܼܬܼܵܘܗܝ ܐܲܠܵܗܵܐ ܘܒܲܪܢܵܫܵܐ: ܘܡܸܢܗܘܿܢ
ܓܹܝܪ ܐܸܬܼܝܼܠܸܕܼ ܡܫܝܼܚܵܐ ܒܲܒܼܤܪ: ܕܐܝܼܬܼܵܘܗܝ ܐܵܠܵܗܵܐ ܕܥܲܠ ܟܠ.
ܟܲܕܼ ܩܵܪܹܝܬܿܘܿܬܢ ܝܵܠܕܲܬܼ ܠܲܡܫܝܼܚܵܐ ܒܲܚܕܼܵܝܘܼܬܼܵܐ: ܘܠܵܐ ܤܕܼܝܼܩܵܐ
ܐܵܡܪܝܼܬܿܘܿܢ ܠܗܵܢܵܐ ܘܲܠܗܵܘ̇ ܒܲܒܼܪܘܼܬܼܵܐ: ܐܸܠܵܐ ܕܠܲܝܬܿ ܠܹܗ
ܩܛܹܐܓܕܼܪܵܢܘܼܬܼܵܐ ܕܐܹܘܲܢܓܲܠܝܼܘܿܢ ܐܸܬܼܚܲܫܲܚܘ. ܘܲܫܪܵܐܘܼܗܝ ܠܚܸܪܝܵܢܵܐ ܗܵܢܵܐ
ܡ̣ܢ ܒܲܝܢܵܬܼܟܼܘܿܢ: ܟܲܕܼ ܒܲܒܼܪܬܼ ܩܵܠܵܐ ܕܡܬܼܚܲܫܚܵܐ ܒܫܲܠܡܘܼܬܼܵܐ
ܡܸܬܼܚܲܫܚܝܼܬܿܘܿܢ. ܟܲܕܼ ܗܵܠܹܝܢ ܫܡܲܥ̣ܘ: ܐܸܡ݂ܲܪܘ: ܕܲܩܕܼܵܡ ܐܠܵܗܵܐ
ܐܸܫܬܵܪܝܲܬ̤ ܠܵܗ̇ ܒܥܵܬܲܢ. ܘܤܲܓܿܝܼ ܩܵܠܸܤ̣ܘ ܘܫܲܒܲܚܘ: ܘܲܢܚܸܬܼܘ
ܡ̣ܢ ܠܵܘܸܬܼܝ: ܘܩܵܘܝܼܘ ܒܫܲܠܡܘܼܬܼܵܐ: ܥܕܲܡܵܐ ܕܲܢܦܲܠ̣ܘ ܒܓܼܟܼܒܵܐ
ܕܐܲܝܠܹܝܢ ܕܒܼܵܥܹ̇ܝܢ ܗ̄ܘ̣ܵܘ ܐܲܦܸܤܩܘܿܦܘܼܬܼܵܐ.
ܘܠܲܩܠܹܝܪ̈ܝܼܩܵܬܹܗ ܕܡ̣ܢ ܐܵܠܹܟܼܤܲܢܕܝܼܵܐ: ܐܲܝܠܹܝܢ ܕܲܒܼܤܘܼܥܪ̈ܵܢܹܐ
ܕܝܼܠܹܗ ܐܝܼܬܲܝܗܘܿܢ: ܘܲܡܦܝܼܤܝܼܢ ܗ̄ܘ̣ܵܘ ܠܗܘܿܢ ܐܲܝܟܼ ܛܵܥܲܝ̈ܐ:
ܕܠܵܐ ܢܩܲܒܠܘܼܢ ܒܲܪܬܼ ܩܵܠܵܐ ܕܝܵܠܕܲܬܼ ܡܫܝܼܚܵܐ. ܘܲܡܙܝܼܥܝܼܢ ܗ̄ܘ̣ܵܘ
ܕܹܝܢ ܘܲܡܕܲܠܚܝܼܢ ܘܚܵܕܼܪܝܼܢ ܗ̄ܘ̣ܵܘ ܠܟܼܠ ܕܘܼܟ: ܘܲܒܼܟܼܠ ܡܸܕܸܡ
ܒܲܡܥܲܕܪܵܢܵܐ ܗܵܢܵܐ ܡܸܬܼܚܲܫܚܝܼܢ ܗ̄ܘ̣ܵܘ: ܟܲܕܼ ܡܫܲܕܪܝܼܢ ܗ̄ܘ̣ܵܘ
ܠܹܗ ܠܡܸܠܬܼܵܐ ܩܠܹܝܪ̈ܝܼܩܵܘܗܝ: ܐܲܝܟܼ ܕܐܵܦ ܗ̤ܘ ܗܵܢܵܐ ܡܥܲܕܪܵܢܵܐ
pb. 153
ܗ̄ܘ̣ܵܐ ܠܗܘܿܢ ܒܟܼܠܡܸܕܸܡ. ܡܸܛܠ ܕܡ̣ܢ ܟܲܕܼܘ ܛܪܵܐ ܗ̄ܘ̣ܵܐ ܡܹܢܝ:
ܘܲܤܢܝܼܩ ܗ̄ܘ̣ܵܐ ܥܲܠ ܥܸܠܬܼܵܐ: ܡ̣ܢ ܗܵܝ̇ ܕܠܵܐ ܐܸܬܼܥܲܕܲܪ ܡ̣ܢ ܗܵܠܹܝܢ
ܕܡܸܬܼܩܲܪ̈ܝܵܢ ܒܘܼܪ̈ܟܵܬܼܵܐ. ܘܩܲܢܝܼܛ ܗ̄ܘ̣ܵܐ ܡܹܢܝ: ܡܸܛܠ ܗܵܝ̇ ܕܠܵܐ
ܡܲܥܲܕܲܪ ܗ̄ܘܹ̇ܝܬܼ ܠܲܩܠܹܝܪ̈ܝܼܩܵܘܗܝ: ܪܗܸܛ̣ ܗ̄ܘ̣ܵܐ ܓܹܝܪ ܥܠܲܝ
ܛܸܒܵܐ ܘܐܸܬܼܥܲܫܲܢ: ܐܲܝܟܼ ܐܲܝܢܵܐ ܕܠܵܐ ܐܝܼܬܲܝ: ܕܡܲܗܡܸܐ ܐ̄ܢܵܐ ܒܐܲܝܢܵܐ
ܕܡܸܬܼܥܸܠܒܼ. ܐܸܢ ܫܲܪܝܼܪܵܐ ܘܐܸܢ ܕܲܓܵܠܵܐ ܐܝܼܬܼܵܘܗܝ ܛܸܒܵܐ: ܠܐܲܠܵܗܵܐ
ܓܲܠܝܵܬܐ. ܒܪܲܡ ܐܲܙܝܼܥ ܐܸܢܘܿܢ ܠܲܩܛܪ̈ܵܢܵܘܗܝ ܕܗܵܢܵܐ: ܘܵܥܒܲܕܼ
ܐܸܢܘܿܢ ܕܢܸܬܼܠܲܒܿܒܼܘܼܢ ܠܡܹܐܡܲܪ ܥܠܵܘܗܝ ܩܕܼܵܡ ܡܲܠܟܵܐ:
ܡܸܬܼܡܲܠܠܵܢ̈ܝܬܼܵܐ ܘܠܵܐ ܡܸܬܼܡܲܠܠܵܢ̈ܝܬܼܵܐ: ܟܲܕܼ ܐܵܡ̇ܪܝܼܢ ܗ̄ܘ̣ܵܘ ܘܫܵܐ̇ܠܹܝܢ
ܠܝܼ ܕܐܸܗܘܸܐ ܕܲܝܢܵܐ. ܡܸܛܠ ܕܹܝܢ ܕܐܸܫܬܲܕܲܪܘ ܠܘܵܬܼܝ: ܘܠܵܐ ܗܘ̤ܵܬܼ
ܠܝܼ ܥܸܠܬܼܵܐ ܕܡܸܫܬܲܐܠܵܢܘܼܬܼܵܐ: ܫܲܕܪܼܬܹ ܒܵܬܲܪ ܩܠܹܝܪ̈ܝܼܩܵܘܗܝ: ܟܲܕܼ
ܒܵܥܹ̇ܐ ܐ̄ܢܵܐ ܕܐܹܠܲܦ ܡܵܢܵܘ ܤܘܼܥܪܵܢܵܐ. ܗܸܢܘܿܢ ܕܹܝܢ ܐܸܬܼܚܲܡܲܬܼܘ ܟܲܕܼ
ܐܵܡ̇ܪܝܼܢ: ܘܟܼܠ ܟ̱ܠܹܗ ܥܲܠ ܦܵܦܵܐ ܡܩܲܒܸܠ ܐܲܢ̄ܬܿ ܩܛܹܐ ܓܼܪܵܢܘܼܬܼܵܐ:
ܘܠܵܐ ܤܐܹ̇ܡ ܐܲܢ̄ܬܿ ܒܪܹܫܵܐ ܕܲܩܛܹܐܓܼܪ̈ܢܹܐ ܒܲܪ ܫܵܥܬܹܗ ܕܠܵܐ ܒܘܼܚܵܢܵܐ
ܐܲܝܟܼ ܥܵܫܘܿܩܹ̈ܐ؟ ܐܵܦ ܕܬܸܕܲܥ ܐܸܢܘܿܢ ܡܸܕܲܥ ܠܗܵܠܹܝܢ ܟܠܗܘܿܢ:
ܕܗܵܟܲܢ ܦܫܝܼܩ ܠܗܘܿܢ ܠܲܡܩܲܛܪܵܓܼܘܼ . . . . ܕܐܵܠܿܟܼܤܲܢܕܪܝܼܵܐ
ܠܵܘ ܕܠܵܐ ܐܘܼܠܨܵܢܵܐ ܐܝܼܬܹܝܗ̇ ܟܲܕܼ ܡܫܲܠܛܘܼܬܼܵܐ ܕܐܲܝܟܼ ܗܵܕܹܐ ܢܵܤ̇ܒܿܝܼܢܲܢ
ܠܵܟܼ. ܠܵܐ ܗ̄ܘ̣ܵܐ ܓܹܝܪ ܗܵܕܹܐ ܡܸܕܸܡ ܐ̄ܚܪܹܝܢ: ܐܸܠܵܐ ܐܸܢ ܓܘܼܪܵܓܼܵܐ
ܕܡܲܪܡܪܵܢܘܼܬܼܵܐ ܕܲܢܩܲܛܪ̱ܓܼܘܼܢ. ܒܲܕܼ ܦܵܩܵܚܵܐ ܠܵܟܼ ܕܗܵܟܲܢܵܐ
ܬܸܛܪܝܼܘܗܝ ܠܵܟܼ ܐܲܝܟܼ ܡܲܚܒܼܵܢܵܐ ܠܛܵܒܼܵܐ: ܘܠܵܐ ܬܸܠܒܿܟܼܝܼܘܗܝ ܠܵܟܼ
pb. 154
ܐܲܝܟܼ ܒܥܸܠܕܒܼܵܒܼܵܐ: ܠܗܵܘ̇ ܕܲܡܫܲܒܲܚ ܒܪܲܒܿܘܼܬܼܵܐ ܘܲܒܼܪܵܘܪ̈ܒܼܵܢܹܐ
ܐܝܼܬܲܝܟ. ܗܵܝܕܹܝܢ ܠܘܵܬܼ ܗܵܠܹܝܢ ܐܸܡ̇ܪܹܬܼ: ܕܠܵܐ ܤܢܝܼܩ ܐ̄ܢܵܐ ܒܡܸܕܸܡ
ܥܲܠ ܪܵܚܡܘܼܬܼܵܐ ܗܵܝ̇ ܕܲܡܚܲܝܒܼܵܐ ܠܝܼ ܥܥܵܘܼܠܵܐ: ܐܸܠܵܐ ܠܐܲܝܢܵܐ
ܕܠܵܐ ܡܤܲܒܼ ܒܐܲܦܹ̈ܐ ܤܵܥܲ݁ܪ ܠܗܵܠܹܝܢ ܕܐܲܠܵܗܵܐ. ܗܵܠܹܝܢ ܬܸܵܡ̇ܪܹܬܼ.
ܘܗܸܢ̣ܘܿܢ ܐܸܡ݂ܲܪܘ ܠܝܼ: ܡܵܕܹܝܢ ܗܵܠܹܝܢ ܡܵܘܕܥܝܼܢܲܢ ܠܦܵܦܵܐ. ܘܡ̣ܢ
ܗܵܝܕܹܝܢ ܗܘ̤ܵܐ ܠܝܼ ܒܥܸܠܕܒܵܒܼܵܐ ܕܠܵܐ ܬܲܪܘܼܬܼܵܐ: ܘܲܠܟܼܠ ܡܥܲܬܲܪ
ܗ̄ܘ̣ܵܐ. ܘܩܲܕܼܡܵܝܑܬܼ ܥܸܵܠܬܼܵܐ ܕܲܒܼܥܸܠܕܒܼܵܒܼܬܼܵܐ ܥܲܒܼܕܵܗ̇: ܐܲܝܟܲܝܢܸܐ ܕܐܲܝܟܼ
ܕܡ̣ܢ ܒܥܸܠܕܒܼܵܒܼܵܐ ܢܸܫܬܿܐܸܠ ܡܹܢܼܝ: ܘܐܲܝܟܼ ܥܝܵܕܹܗ ܒܥܵܠܘܿܒܼܘܼܬܹܗ
ܢܸܬܼܚܲܫܲܚ ܠܘܼܩܒܲܠ ܩܛܹܐܓܼܪ̈ܵܢܵܘܗܝ: ܘܲܢܚܲܦܸܐ ܠܲܩܛܹܓܼܪ̈ܵܢܘܵܬܼܵܐ
ܕܲܥܠܵܘܗܝ. ܘܗܵܕܹܐ ܗܵܟܲܢܵܐ ܥ̣ܒܲܕܼ ܗܵܘ̇ ܕܩܲܪܸܒܼ ܗ̄ܘ̣ܵܐ ܒܵܥܘܼܬܼܵܐ:
ܕܢܸܬܼܝܸܗܸܒܼ ܕܝܼܢܵܐ ܠܲܐ̄ܚܪ̈ܵܢܹܐ. ܘܲܕܼܫܲܪܝܼܪ̈ܵܢ ܐܸܢܹܝܢ ܗܵܠܹܝܢ ܕܐܵܡܲ݁ܪ
ܐ̄ܢܵܐ: ܘܠܵܘ ܕܒܸܕܼܝܵܐ ܐܸܢܹܝܢ: ܝܵܠܦܝܼܬܿܘܿܢ ܡ̣ܢ ܗܵܠܹܝܢ: ܗܵܝ̇
ܕܫܲܕܲܪ ܩܠܹܝܪ̈ܝܼܩܵܘܗܝ: ܐܲܝܠܹܝܢ ܕܲܒܼܩܘܼܤܛܲܢܛܲܝܼܢܵܦܘܿܠܝܼܣ ܕܕܝܼܠܝ
ܤܵܥ̇ܪܝܼܢ ܗ̄ܘ̣ܵܘ: ܗܵܕܹܐ ܕܓܲܠܝܵܐ ܠܟܼܠܢܵܫ.
ܐܸܓܲܪܬܵܐ ܕܩܘܼܪܸܠܘܼܿܣ ܠܘܵܬܼ ܩܠܹܝܪ̈ܝܼܩܵܘܗܝ
ܕܲܒܼܩܘܼܤܛܲܢܛܝܼܢܵܦܘܿܠܝܼܣ.
ܠܲܨܚܵܚܵܐ ܕܒܼܵܥܘܼܬܼܵܐ ܕܐܸܫܬܲܕܲܪ ܡܸܢܟܼܘܿܢ: ܐܲܝܟܼ ܐܲܝܢܵܐ ܕܙܵܕܹܩ
ܕܢܸܬܼܝܼܗܸܒܼ ܠܡܲܠܟܵܐ: ܘܲܤܛܲܪ ܡ̣ܢ ܨܸܒܼܝܵܢܵܐ ܕܝܼܠܝܼ ܠܵܐ ܥܒܲܝܬܿܘܿܢ
pb. 155
ܕܬܸܬܿܠܘܼܢܵܝܗܝ: ܢܸܤ̇ܒܸܿܬܼ ܘܲܩ̇ܪܹܝܬܼ. ܡܸܛܠ ܕܹܝܢ ܕܤܲܓܿܝܼ ܐܝܼܬܼ ܒܹܗ
ܩܘܼܛܪܵܓܼܵܐ ܠܘܼܩܒܲܠ ܗܵܘ̇ ܕܬܲܡܵܢ: ܐܸܢ ܐܲܚܵܐ ܗ̄ܘ̣: ܘܐܸܢ ܐܲܝܟܼ
ܕܗ̤ܘ ܕܙܵܕܹܩ ܕܢܸܩܪܹܝܘܗܝ: ܒܲܡܠܸܐ ܙܲܒܼܢܵܐ ܠܵܐ ܬܸܬܿܠܘܼܢܵܝܗܝ.
ܕܠܵܐ ܢܩܘܼܡ ܥܠܲܝܟܿܘܿܢ: ܘܢܹܐܡܲܪ ܩܛܹܐ ܓܼܪܵܢܘܼܬܼܝ ܩܕܼܵܡ
ܡܲܠܟܵܐ ܐܲܝܟܼ ܗܲܪܵܛܝܼܩܵܐ. ܐܸܢ ܕܹܝܢ ܐ̄ܚܵܪܹܢܝܵܐܝܼܬܼ: ܥܲܡ ܗܵܝ̇
ܕܡܸܫܬܲܐܠܝܼܬܿܘܿܬܢ ܡ̣ܢ ܕܝܼܢܹܗ: ܬܹܐܡܪܘܼܢ ܐܵܦ ܠܲܙܢܵܐ
ܕܲܒܼܥܸܠܕܒܼܵܒܼܘܼܬܹܗ: ܘܐܸܢܗ̤ܘ ܕܟܼܠ ܟ̱ܠܹܗ ܡܸܬܿܬܿܙܝܼܥܝܼܢ ܗܵܢܘܿܢ
ܠܕܝܼܢܵܐ: ܬܸܬܿܠܘܼܢܵܝܗܝ ܠܪ݂̈ܫܵܢܹܐ ܐ̄ܚܪ̈ܵܢܹܐ.
ܢܸܤܟܛܘܹܪܝܼܣ. ܡܸܛܠ ܗܵܠܹܝܢ ܗܘ̤ܵܐ ܠܝܼ ܗܵܢܵܐ ܒܥܸܠܕܒܼܵܒܼܵܐ.
ܫܡܲܥ ܕܹܝܢ ܘܐܵܦ ܠܫܲܪܟܵܗ̇ ܕܐܸܓܲܪܬܵܐ: ܕܲܚܙܲܝܬܿܘܿܢ ܕܠܵܐ ܡܸܛܠ
ܐܲܠܵܗܵܐ: ܘܠܵܐ ܡܸܛܠ ܕܸܚܠܲܬܼ ܐܲܠܵܗܵܐ: ܘܠܵܐ ܡܸܛܠ ܗܲܝܡܵܢܘܼܬܼܵܐ
ܥܵܒܹ̇ܕܼ ܗ̄ܘ̣ܵܐ: ܐܸܠܵܐ ܕܲܠܩܘܼܒܼܠܵܐ: ܕܟܲܕܼ ܝܵܕܲܥ̇ ܠܵܗ̇ ܠܗܲܝܡܵܢܘܼܬܼܵܐ:
ܢܸܥܒܲܪ ܗܠܹܝܗ̇ ܡܸܛܠ ܥܒܸܠܕܒܼܵܒܼܘܼܬܹܗ ܕܠܲܘܵܬܼ: ܘܲܠܟܼܠ ܡܸܕܸܡ
ܫܵܓܹ̇ܫ ܗ̄ܘ̣ܵܐ ܘܵܡܕܲܠܚ: ܐܲܝܟܼ . . . ܗܵܠܹܝܢ ܕܝܼܠܹܗ ܢܸܬܿܛܲܠ̈ܩܵܢ
ܘܢܸܬܼܦܲܠܗ̈ܕܼܵܢ.
ܫܲܪܟܵܢܵܐ ܕܐܸܓܲܪܬܵܐ ܕܩܘܼܪܸܠܘܿܣ. ܩܪܵܐܘܼܢܵܝܗܝ ܗܵܟܹܝܠ
ܠܲܨܚܵܚܵܐ ܘܦܘܼܢܵܝܹܗ . . . . ܚܲܫܚܬܼܵܐ. ܘܐܸܢ ܚܙܲܝܬܿܘܿܢ ܕܲܡܩܵܘܸܐ
ܠܡܲܒܼܐܵܫܘܼ ܠܲܢ: ܫܲܪܝܼܪܵܐܝܼܬܼ ܟܠ ܙܢܵܐ ܡܙܝܼܥ ܠܩܘܼܒܼܠܲܢ: ܚܦܝܼܿܛܵܐܝܼܬܼ
ܐܵܘܕܲܥܘ ܠܲܢ: ܕܐܸܓܼܒܸܐ ܐܸܢܘܿܢ ܐ̄ܢܵܫܵܐ ܐܲܦܸܤܩ̈ܘܿܦܹܥܗ ܕܵܚܠܵܝ̈ ܐܲܠܵܗܵܐ
pb. 156
ܘܕܲܝܪܵܝܹܐ ܘܐܹܫܲܕܲܪ ܩܕܼܵܡ ܙܲܒܼܢܵܐ. ܠܵܐ ܓܹܝܪ ܐܸܬܸܠ ܫܵܢܬܼܵܐ ܠܥܲܝ̈ܢܲܝ:
ܐܲܝܟܼ ܕܲܟܼܬܼܝܼܒܼ: ܘܠܵܐ ܢܵܘܡܵܐ ܠܲܓܼܒܼܝܼܢܲܝ̈: ܘܠܵܐ ܢܚܵܚܵܐ ܠܨܪܼ̈ܥܲܝ:
ܥܕܲܡܵܐ ܕܐܼܬܼܟܲܬܲܫ ܒܐܵܓܼܘܿܢܵܐ ܕܲܚܠܵܦ ܦܘܼܪܩܵܢܵܐ ܕܟܼܠ.
ܢܸܤܟܛܘܹܪܝܼܣ. ܫܲܡܥܬܿܘܿܢ ܢܲܗܝܼܪܵܐܝܼܬܼ ܐܲܝܟܼ ܕܐܵܘܕܝܼ: ܐܵܦ ܒܸܠܥܵܕܼ
ܐܸܤܟܹܡܵܐ ܡܸܕܸܡ: ܡܲܒܼܐܫܵܢܘܼܬܼܵܐ ܓܹܝܪ ܤܵܒܲܪ̇ ܕܐܝܼܬܼܵܘܗܝ ܥܘܼܩܵܒܼܵܐ
ܕܠܩܘܼܒܼܠܹܗ. ܐܸܢ ܠܵܐ ܠܲܡ ܐܙܝܼܥ ܐܸܢܵܐ ܠܩܘܼܒܼܠܹܗ ܠܡܲܒܲܐܵܫܘܼ
ܠܹܗ: ܐܵܦܠܵܐ ܗ̤ܘ ܡܙܝܼܥ ܠܘܼܩܒܠܝܼ: ܘܡܸܬܼܟܲܬܲܫ ܒܐܵܓܼܘܿܢܵܐ ܕܥܲܠ
ܐܲܦܲܝ̈ ܦܘܼܩܵܢܵܐ ܕܟܼܠ! ܐܸܠܵܐ: ܪܵܚܡܵܐ ܘܕܵܚܹ̇ܠ ܠܐܲܠܵܗܵܐ ܘܕܼܟܼܝܵܐ
ܐܝܼܬܲܝ ܠܹܗ ܒܟܼܠܡܸܕܸܡ. ܐܸܢ ܕܹܝܢ ܠܵܐ ܐܲܗܡܸܐ ܥܲܠ ܥܸܕܼܠܵܝܲܚ̈ܟܼ:
ܡܸܛܠ ܕܝܼܢܵܐ ܟܹܐܢܵܐ ܡܸܬܼܡܲܪܡܲܪ ܐܲܢ̄ܬܿ ܥܵܝܕܼܝܼܟܼ: ܘܪܲܫܝܼܥܵܐ
ܘܗܲܪܵܛܝܼܩܵܐ ܩܵܪܹܐ ܐܲܢ̄ܬܿ ܠܝܼ. ܘܩܵܪܪܹܐ ܐܲܢ̄ܬܿ ܤܝܼ̈ܥܵܬܼܵܐ ܕܕܲܝܪ̈ܵܝܹܐ
ܘܕܲܐܦܸܤܩ̈ܘܿܦܹܐ: ܘܲܡܫܲܕܲܪ ܐܲܢ̄ܬܿ ܥܠܲܝ ܠܘܵܬܼ ܡܲܠܟܵܐ
ܘܲܡܩܲܛܪ̱ܓܼܝܼܢ ܠܝܼ. ܘܐܲܢ̄ܬܿ ܡܸܬܼܟܲܬܲܫ ܐܲܢ̄ܬܿ ܚܠܵܦ ܦܘܼܪܩܵܢܵܐ
ܕܝܼܠܵܟܼ: ܘܠܵܘ ܚܠܵܦ ܐܵܓܼܘܿܢܵܐ ܕܟܼܠ: ܐܸܠܵܐ ܝܲܬܿܝܼܪܵܐܝܼܬܼ ܒܐܵܓܼܘܿܢܵܐ
ܕܠܘܼܩܒܲܠ ܦܘܼܪܩܵܢܵܐ ܕܟܼܠ. ܘܲܠܟܼܠ ܕܠܚܬܿ ܘܒܲܠܒܸܿܠܬܿ ܘܐܲܛ̣ܥܝܼܬܿ:
ܘܗܵܟܲܢܵܐ ܐܲܦܝܼܤܬܿ ܐܸܢܘܿܢ: ܕܢܸܗܘܘܿܢ ܠܵܟܼ ܐܘܼܪܓܵܢܘܿܢ ܕܒܼܝܼܫܵܬܼܵܐ.
ܐܲܝܟܲܢܵܐ ܕܠܵܐ ܢܸܚܙܘܿܢ ܘܠܵܐ ܢܸܫܡܥܘܼܢ ܘܠܵܐ ܢܸܬܿܛܦܝܼܤܘܼܢ: ܐܵܦܸܢ
ܪܸܒܿܘܿ ܙܲܒܼ̈ܢܝܼܢ ܢܹܐܡܲܪ ܐ̄ܢܵܫ: ܕܠܵܘ ܚܠܵܦ ܦܘܼܩܵܢܵܐ ܕܟܼܠ ܥܲܠ
ܗܵܠܹܝܢ ܝܵܨ̇ܦ ܗ̣̄ܘܲܝܬܿ ܠܡܸܥܒܲܕܼ: ܐܸܠܵܐ ܕܡ̣ܢ ܩܘܼܛܪ̈ܵܓܲܝܟܼ ܬܸܥܪܘܼܩ.
ܐܲܝܕܵܐ ܓܹܝܪ ܒܥܸܠܕܒܼܵܒܼܘܼܬܼܵܐ ܐܝܼܬܼ ܗ̄ܘ̣ܵܐ ܠܝܼ ܠܘܵܬܼܬܼܵܟܼ: ܕܬܸܤܒܲܪ
pb. 157
ܕܲܠܡܲܒܼܐܫܵܢܘܼܬܼܵܟܼ ܤܵܥܲܪ̇ ܐ̄ܢܵܐ ܗܵܠܹܝܢ؟ ܠܵܐ ܓܹܝܪ ܗܘ̤ܵܬܼ ܠܝܼ
ܠܘܵܬܼܵܟܼ ܡܸܠܬܼܵܐ ܥܲܠ ܡܸܕܸܡ: ܠܵܐ ܥܲܠ ܨܒܼ̈ܘܵܬܼܵܐ: ܘܠܵܐ ܥܲܠ
ܩܸܢܝܵܢܹ̈ܐ: ܘܠܵܐ ܥܲܠ ܕܝܼܢܵܐ: ܘܠܵܐ ܥܲܠ ܦܘܼܚܵܡܵܐ: ܘܠܵܐ ܒܥܸܠܬܼܵܐ
ܐ̄ܚܪܹܬܼܵܐ. ܠܵܐ ܡ̣ܢ ܩܕܼܵܡ ܕܐܸܗܘܸܐ ܐܲܦܸܤܩܘܿܦܵܐ
ܕܩܘܼܤܛܲܢܛܝܼܢܵܦܘܼܠܝܼܣ: ܘܠܵܐ ܡ̣ܢ ܒܵܬܲܪ ܕܲܗܘܹ̇ܝܬܼ. ܐܸܠܵܐ ܒܟܼܠ
ܨܸܒܼ̈ܘܵܢ ܦܪܝܼܫܝܼܢ ܗ̣̄ܘܲܝܢ ܡ̣ܢ ܚܵܕܼܵܕܹ̈ܐ: ܐܲܝܟܼ ܕܪ̈ܲܚܝܼܩܵܐ ܐܵܠܹܟܼܤܲܢܡܕܪܝܼܵܐ
ܡ̣ܢ ܩܵܘܤܛܲܢܛܲܝܼܢܵܦܘܿܠܝܼܣ: ܘܲܦܪ̈ܝܼܫܵܢ ܙܸܕ̈ܩܵܬܼܵܐ ܕܗܵܕܹܐ ܘܲܕܼܗܵܝ̇.
ܐܸܠܵܐ ܚܕܼܵܐ ܥܸܠܬܼܵܐ ܐܝܼܬܹܝܗ̇ ܗ̄ܘ̣ܵܬܼ: ܗܵܝ̇ ܕܐܵܦ ܗ̤ܘ ܢܲܗܝܼܪܵܐܝܼܬܼ
ܩܥ̣ܵܐ ܗ̄ܘ̣ܵܐ: ܕܠܵܐ ܥܲܕܼܪܬܵܟܼ ܠܲܡܩܵܡ ܠܘܼܩܒܲܠ ܩܛܹܐܓܼܪ̈ܵܢܲܝܟܼ.
ܐܸܢ ܕܫܲܪܝܼܪܝܼܢ ܗ̄ܘ̣ܵܘ: ܘܐܸܢ ܠܵܐ. ܡܵܕܹܝܢ ܕܗܵܟܲܢܲܐ ܐܸܬܼܪܗܸܒܼܬܿ:
ܘܗܵܟܲܢܵܐ ܐܸܬܼܥܲܬܲܪܬܿ: ܐܸܬܼܝܲܕܼܥܲܬ̤ ܕܫܲܪܝܼܪܹ̈ܵܐ ܐܸܢܹܝܢ. ܗܵܕܹܐ ܓܹܝܪ
ܒܲܠܚܘܿܕܼ ܡ̣ܢ ܗܵܓܕܹܐ ܐܝܼܬܼ ܠܡܸܕܲܥ: ܕܲܒܼܥܸܠܕܒܼܵܒܼܘܬܼܵܐ ܗ̣̄ܝ ܕܝܼܠܹܗ
ܬܸܕܲܥ ܕܲܠܗܵܠܹܝܢ ܟܠܗܹܝܢ ܡܛܲܝܲܒܼ: ܐܸܠܵܐ ܐܵܦ ܡ̣ܢ ܐܸܓܲܪܬܹܗ
ܕܲܠܘܵܬܼܝ.
ܐܸܓܲܪܬܵܐ ܕܩܘܼܪܸܠܘܿܣ ܕܲܠܘܵܬܼ ܢܸܤܛܘܿܪܝܼܣ.
ܠܢܲܟܼܦܵܐ ܘܪܵܚܡܵܐ ܕܐܲܠܵܗܵܐ ܒܲܪ ܬܸܫܡܸܫܬܲܢ ܢܸܤܛܘܿܪܝܼܣ:
ܩܘܼܪܸܠܘܿܣ ܒܡܵܪܵܢ ܫܠܵܡ. ܐ̄ܢܵܫܵܐ ܚܲܒܿܝܼ̈ܒܹܐ ܘܫܵܘ̈ܚܲ ܠܡܸܬܼܗܲܝܡܵܢܘܼ:
ܐܸܬܼܵܘ ܠܐܵܠܹܟܼܤܲܢܕܪܝܼܵܐ: ܘܐܵܘܕܥܘܼܢܝ ܕܛܵܒܼ ܚܲܡܝܼܬܼܵܐ ܥܠܲܝܼܢ
ܩܲܕܝܼܫܘܼܬܼܟܼܘܿܢ: ܘܟܼܠ ܡܵܐ ܕܫܲܦܝܼܪ ܡܙܝܼܥܵܐ ܐܲܝܟܼ ܕܲܬܼܥܝܼܩ ܠܲܢ.
pb. 158
ܟܲܕܼ ܨܒܹ̇ܝܬܼ ܕܹܝܢ ܠܡܹܐܠܲܦ ܥܵܩܬܼܵܐ ܕܕܼܚܠܲܬܼ ܐܲܠܵܗܵܐ ܕܲܒܼܟܼܘܿܢ:
ܐܸܡ݂ܲܪܘ: ܕܐܸܓܲܪܬܵܐ ܐܸܬܲܬ̤ ܨܸܝܕܼ ܩܲܕܝܼ̈ܫܹܐ ܕܲܝܪ̈ܝܹܐ: ܘܡܲܟܼܪܟܼܝܼܢ ܠܵܗ̇
ܐ̄ܢܵܫ̈ܝܼܢ ܡ̣ܢ ܐܵܠܹܟܼܤܲܢܕܪܝܼܵܐ. ܘܥܸܠܬܼܵܐ ܕܤܸܢܸܐܬܼܵܐ ܘܲܕܼܥܵܩܵܬܼܵܐ ܗܵܕܹܐ
ܗܘ̤ܵܬܼ. ܐܸܬܿܓܲܡ̇ܪܹܬܼ ܗܵܟܹܝܠ: ܐܸܢ ܠܵܐ ܗ̄ܘ̣ ܝܲܬܿܝܼܪܵܐܝܼܬܼ ܐܸܬܼܚܲܫܒܲܬ̤
ܕܚܸܠܲܬܼ ܐܲܠܵܗܵܐ ܕܼܲܟܼܘܿܢ. ܠܵܐ ܗ̄ܘ̣ܵܐ ܓܹܝܪ ܩܲܕܼܡܵܝܑܝܼܬܼ ܐܸܓܲܪܬܵܐ
ܐܸܬܼܟܲܬܼܒܲܬ̤ ܡܸܢܲܢ: ܡ̣ܢ ܩܕܼܵܡ ܫܓܼܘܼܫܝܵܐ ܕܲܗܘ̤ܵܐ ܥܲܠ ܗܲܝܡܵܢܘܼܬܼܵܐ.
ܐܸܠܵܐ ܐܸܢ ܐܲܡܝܼܪܵܢ: ܘܐܸܢ ܠܵܐ ܐܲܡܝܼܪ̈ܵܢ ܡ̣ܬ ܕܸܚܸܠܲܬܼ ܐܲܠܵܗܵܐ
ܕܲܒܼܟܼܘܿܢ: ܠܵܐ ܡܦܵܤܝܼܢ ܚ̄ܢܲܢ. ܒܪܲܡ ܟܲܪ̈ܬܲܝܤܹܐ ܐܝܼܬܼ
ܕܡܲܠܦܵܢܘܼܬܼܵܐ: ܕܡܲܟܼܟܼܝܼܢ ܐ̄ܢܵܫ̈ܝܼܢ. ܘܲܚܢܲܢ ܠܵܐܹ̇ܝܢܲܢ: ܟܲܕܼ ܒܵܥܹ̇ܝܢܲܢ
ܕܲܢܬܲܪܸܨ ܠܐܲܝܠܹܝܢ ܕܲܡܥܩ̈ܡܵܢ.
ܢܸܤܛܘܿܪܝܼܣ. ܗܵܕܹܐ ܐܝܼܬܹܝܗ̇ ܐܸܓܲܪܬܵܐ ܩܲܕܼܡܵܝܬܼܵܐ ܕܪܵܚܡܘܼܬܼܵܐ
ܕܐܸܬܼܟܲܬܼܒܲܬ̤ ܠܘܵܬܼܝ: ܘܡ̣ܢ ܗܵܕܹܐ ܝܑܼܠܲܦܘ ܠܡܸܕܸܡ ܕܲܡܩܲܕܲܡ
ܤܝܼܡ ܗ̄ܘ̣ܵܐ ܠܹܗ ܠܘܼܩܒܲܠܝ. ܐܸܡܲܪ ܠܥܸܠܬܼܵܐ ܕܡܸܛܠܵܬܼܵܗ̇ ܐܸܡܲܪܬܿ:
ܕܕܲܐܝܟܼ ܗܵܢܵܐ ܫܓܼܘܼܫܝܵܐ ܗܘ̤ܵܐ ܥܲܠ ܡܲܠܦܵܢ̈ܘܵܬܼܵܐ: ܐܲܝܟܼ ܕܲܠܟܼܵܠܵܗ̇
ܐܵܠܹܟܼܤܲܢܕܪܝܼܵܐ ܢܙܝܼ̈ܥܵܢ ܟܲܕܼ ܡܸܬܼܩܲܪ̈ܝܵܢ: ܬܘܼܒܼ ܕܹܝܢ ܠܟܼܠܗܘܿܢ
ܕܲܝܪ̈ܵܝܹܐ ܕܲܒܼܡܸܨܪܹܝܢ. ܡܲܪܦܸܐ ܐ̄ܢܵܐ ܕܹܝܢ ܐܵܦ ܠܪܗܘܿܡܹܗ ܘܠܲܡܕܼܝܼ̈ܢܬܼܵܐ
ܕܲܬܼܚܹܝܬܼ ܐܝܼܕܵܗ̇: ܘܲܠܟܼܠܵܗ̇ ܡܲܕܢܚܵܐ ܐܲܟܼܚ̄ܕܼܵܐ ܐܲܙܝܼܥ. ܐܲܝܟܼ ܕܬܸܬܼܐ̱ܠܸܨ
ܠܡܸܥܒܲܕ ܐܸܓܲܪܬܵܐ ܠܘܵܬܼ ܕܲܝܪ̈ܵܝܹܐ: ܘܡ̣ܢ ܬܲܡܵܢ ܬܸܬܼܝܲܒܲܠ ܐܸܓܲܪܬܵܟܼ
ܐܵܦ ܠܘܵܬܼܝ ܐܲܝܟܼ ܕܒܼܵܗ̇ ܐܸܬܿܬܿܥܝܼܩ. ܝܑܼܕܲܥܬܿ ܕܹܝܢ ܡܸܬܿܬܿܥܝܼܩ
ܐ̄ܢܵܐ: ܡܸܛܠ ܐܲܝܕܵܐ ܠܵܐ ܩܲܕܼܡܬܿ ܟܬܲܒܼܬܿ ܠܝܼ ܐܸܓܲܪܬܵܐ ܕܪܵܚܡܘܼܬܼܵܐ:
pb. 159
ܕܡܲܠܦܵܐ ܗ̄ܘ̣ܵܬܼ ܠܝܼ ܥܲܠ ܫܓܼܘܼܫܝܵܐ ܘܥܲܠ ܥܸܠܬܼܵܐ ܕܲܫܓܼܘܼܫܝܵܐ
ܘܥܲܠ ܫܪܵܝܹܗ: ܐܲܝܟܼ ܪܵܚܡܵܐ ܠܘܵܬܼ ܪܵܚܡܵܐ: ܐܵܘ ܐܲܝܟܼ ܕܲܠܘܵܬܼ
ܐܲܦܸܤܦܘܿܦܵܐ: ܐܵܘ ܐܲܝܟܼ ܕܲܠܘܵܬܼ ܐܲܚܵܐ: ܐܵܘ ܐܲܝܟܼ ܕܡܸܛܠ ܟܸܫܠܵܐ
ܕܥܹܕܬܵܐ: ܐܵܘ ܐܲܝܟܼ ܕܲܢܦܵܣ ܗ̣̄ܘܲܝܬܿ ܕܕܝܼܠܝܼ ܐܝܼܬܝܗܹܝܢ
ܡܠܦܵܢ̈ܘܵܬܼܵܐ: ܐܵܘ ܐܲܝܟܼ ܕܠܵܐ ܝܵܕܲܥ̇ ܗ̄ܘܲܝܬܿ ܘܒܼܵܥܹ̇ܐ ܗ̣̄ܘܲܝܬܿ
ܠܡܹܐܠܲܦ: ܘܡ̣ܢ ܓܘܼܕܵܦܵܐ ܘܪܘܼܫܥܵܐ ܠܢܲܦܫܵܟܼ ܡܦܲܠܸܛ ܗ̣̄ܘܲܝܬܿ.
ܐܘ ܠܝܼ ܡܵܠܹ̇ܟܼ ܗ̣̄ܘܲܝܬܿ: ܘܐܲܝܠܹܝܢ ܕܙܵܕܼ̈ܩܵܢ ܠܡܸܥܒܲܕܼ. ܐܸܠܵܐ
ܐܸܓܼܪ̈ܵܬܼܵܟܼ ܕܲܠܩܘܼܒܼܠܲܢ ܥܲܠ̣ ܠܐܲܠܹܟܼܤܲܢܕܪܝܼܵܐ: ܘܕܲܠܚ̣ ܠܕܲܝܪ̈ܵܝܹܐ:
ܡܲܠܟܼܠܗܹܝܢ ܕܲܝܪ̈ܵܬܼܵܐ ܡܠܲܝܬܿ ܐܸܢܹܝܢ ܫܓܼܘܼܫܝܵܐ ܕܲܥܠܲܝ: ܕܐܵܦ ܠܵܐ
ܪ̈ܲܓܹܘܼܫܬܼܵܢܹܐ ܠܲܪܓܸܫܬܼܵܐ ܢܹܐܬܼܘܿܢ. ܨܵܒܹ̇ܐ ܗ̣̄ܘܲܝܬܿ ܕܹܝܢ: ܕܐܸܢܵܐ ܠܵܐ
ܐܲܙܝܼܥ: ܡܸܛܠ ܡܵܢܵܐ ܗ̤ܘܲܝ̈ ܗܵܠܹܝܢ؟ ܐܸܠܵܐ ܠܤܘܼܥܪܵܢܵܐ
ܕܲܒܼܥܸܠܕܒܼܵܒܼܘܼܬܼܵܐ ܒܟܼܠܵܗ̇ ܚܦܝܼܛܘܼܬܼܵܐ ܤܵܥܲ݁ܪ ܗ̣̄ܘܲܝܬܼ ܐܵܦ ܡܥܲܬ̤ܕܼ
ܗ̣̄ܘܲܝܬܿ: ܕܐܸܓܲܪܬܵܐ ܕܲܒܼܥܸܠܕܒܼܵܒܹ̈ܐ ܟܬܲܒܼܬܿ ܠܝܼ: ܕܡܲܤܗܕܵܐ ܗ̄ܘ̣ܵܬܼ
ܠܝܼ ܕܲܒܼܥܸܠܒܕܒܼܵܒܼܵܐ ܐܝܼܬܲܝܟ ܠܝܼ: ܘܠܵܘ ܒܲܠܚܘܿܕܼ ܠܝܼ: ܐܵܦ ܠܟܼܠܡ̇ܢ
ܕܒܲܫܓܼܘܼܫܝܵܐ ܚܵܕܼܵܐ ܟܲܕܼ ܦܵܠܹ̇ܓܼ ܗ̣̄ܘܲܝܬܿ ܠܹܗ ܡܹܢܝܼ ܘܡܲܪܚܸܩ ܠܹܗ.
ܘܐܵܦ ܠܲܐ̄ܚܪ̈ܵܢܹܐ ܡ̣ܢ ܕܗܵܠܹܝܢ ܡܲܦܪܸܩ ܗ̣̄ܘܲܝܬܿ ܡܹܢܝܼ: ܐܵܘ ܡܸܛܠ
ܠܵܐ ܪܲܓܿܘܪܫܬܼܵܢܘܼܬܼܗܘܿܢ: ܐܵܘ ܡܸܛܠ ܠܵܐ ܝܲܕܥܬܼܵܢܘܼܬܼܗܘܼܢ: ܐܵܘ
ܡܸܛܠ ܦܫܝܼܛܘܼܬܼܗܘܿܢ ܕܕܲܠܵܐ ܦܘܼܪܫܵܢ ܡܙܲܥܙܲܥ ܗ̣̄ܘܲܝܬܿ ܠܗܘܿܢ.
pb. 160
ܐܲܝܟܼ ܕܲܒܼܝܲܕܼ ܢܲܦܫܵܬܼ̈ܗܘܿܢ ܕܗܵܢܘܿܢ: ܬܸܬܼܚܲܦܲܛ ܠܲܡܬܲܪܨܘܼ ܠܗܹܝܢ:
ܕܐܲܢ̄ܬܿ ܨܵܒܹ̇ܐ ܗ̣̄ܘܲܝܬܿ ܒܗܹܝܢ. ܕܐܵܘ ܐܹܦܘܼܫ ܡ̣ܢ ܕܐܫܡܲܥ
ܠܲܩܛܹܐ ܓܼܪ̈ܲܬܲܝܟ ܘܠܲܐܝܼܠܹܝܢ ܕܵܥܬܝܼܕܝܼܢ ܠܲܡܩܲܛܪܓܼܘܼܬܼܵܟܼ: ܕܡ̣ܢ
ܟܲܕܘܼ ܡܙܲܝܢܝܼܢ ܗ̄ܘ̣ܵܘ ܥܠܲܝܟܼ. ܕܟܲܕܼ ܗܵܕܹܐ ܗܵܘ̇ܝܵܐܬ ܗ̄ܘ̣ܵܬܼ: ܡܸܟܸܿܝܠ
ܦܫܝܼܩ ܗ̄ܘ̣ܵܐ ܠܵܟܼ ܠܡܸܤܥܲܪ ܟܠܡܵܐ ܕܒܼܵܥܹ̇ܐ ܗ̣̄ܘܲܝܬܿ ܡܸܛܠ
ܩܸܢ̈ܝܵܢܹܐ. ܐܵܘ ܐܸܢ ܠܵܐ: ܕܟܲܕܼ ܛܵܠܹ̇ܐ ܐܲܢ̄ܬܿ ܠܝܼ: ܬܸܥܒܸܿܕܼ
ܡܲܤܒܼܪܵܢܘܼܬܼܵܐ ܕܡܸܛܠ ܕܚܲܠܲܬܼ ܐܲܠܵܗܵܐ ܐܝܼܬܲܝ ܠܵܟܼ ܒܥܸܠܕܒܼܵܒܼܵܐ:
ܘܡܸܛܠ ܗܵܕܹܐ ܥܸܠܵܬܼܵܐ: ܡܸܫܬܿܐܸܠ ܐ̄ܢܵܐ ܡ̣ܢ ܕܲܝܵܢܘܼܬܼܵܐ ܕܝܼܠܝ. ܘܗܵܕܹܐ
ܠܵܐ ܡܸܬܿܛܲܫܝܐ: ܐܸܠܵܐ ܡܸܬܼܓܲܠܝܵܬ ܠܟܼܠܢܵܫ: ܘܡܸܬܼܝܲܒܿܠܵܐ ܠܟܼܠ
ܕܘܼܟܼ: ܡ̣ܢ ܒܥܸܠܕܒܼܵܒܼܘܼܬܼܵܐ ܗܵܝ̇ ܕܥܲܬܼܕܬܿ: ܟܲܕܼ ܨܵܒܹ̇ܐ ܐܲܢ̄ܬܿ ܕܲܠܟܼܠ
ܬܸܩܢܸܐ ܤܵܗ̈ܕܹܐ. ܐܵܦܸܢ ܓܹܝܪ ܐܸܢܵܐ ܡܕܸܡ ܠܵܐ ܐܸܵܡܲ݁ܪ ܐ̄ܢܵܐ: ܘܐܵܦܠܵܐ
ܥܵܕܹܠ ܐ̄ܢܵܐ ܡ̣ܢ ܗܵܠܹܝܢ ܕܐܲܢ̄ܬܿ ܥܲܬܼܕܬ: ܫܲܠܝܼܛ ܠܟܼܠܢܵܫ
ܠܡܹܐܠܲܦ. ܐܵܦ ܓܹܝܪ ܡܸܬܿܬܿܪܝܼܡ ܠܘܼܩܒܲܠܝ ܐܲܝܟܼ ܕܠܘܼܩܒܲܠ
ܪܲܫܝܼܥܵܐ: ܘܥܵܒܹ̇ܕܼ ܟܠ ܫܓܼܘܼܫ̈ܚܼܢ ܘܟܼܠ ܟܸܫ̈ܠܝܼܢ. ܘܲܠܗܵܠܹܝܢ
ܟܠܗܹܝܢ ܠܵܐ ܡܸܕܸܡ ܚܵܫܹ̇ܒܼ: ܘܕܲܦܫܝܼ̈ܩܵܢ ܠܲܫܪܵܝܗܹܝܢ ܡܛܲܝܲܒܼ ܟܲܕܼ
ܐܵܡܲ݁ܪ: ܕܢܸܥܒܸܿܕܼ ܛܝܒܿܘܼܬܼܵܐ ܠܡܹܐܡܵܪ ܒܲܪܬܼ ܩܵܠܵܐ ܗܵܝ̇ ܕܥܹܕܬܵܐ
ܟܫܝܼܠܵܐ ܗ̄ܘ̣ܵܬܼ ܒܵܗ̇. ܗܵܢܵܘ ܕܹܝܢ: ܠܲܕܛܘܼܒܼܵܢܝܼܬܼܵܐ ܡܲܪܝܲܡ ܢܹܐܡܪܝܼܗ̇
ܝܵܠܕܲܬܼ ܐܵܠܵܗܵܐ. ܠܵܐ ܓܹܝܪ ܐܸܡܲ݁ܪ: ܕܚܵܝܵܒܼ ܐܲܢ̄ܬܿ: ܐܸܠܵܐ ܕܛܲܝܒܿܘܼܬܼܵܐ
ܬܸܥܒܸܿܕܼ. ܠܵܘ ܡܸܛܠܵܬܼܵܗ̇ ܕܲܨܒܼܘܼܬܼܵܐܐ: ܐܸܠܵܐ ܡܸܛܠ ܐܲܝܠܹܝܢ ܕܡܸܛܠ
ܡܚܝܼܠܘܼܬܼܗܘܿܢ ܠܵܐ ܡܫܟܿܚܝܼܢ ܠܲܡܒܲܚܵܢܘܼ ܐܲܝܠܹܝܢ ܕܡܸܢܵܟܼ ܡܸܬܼܐܲܡܪܵܢ
ܘܡܸܬܼܟܲܫܠܝܼܢ . . . . . . . . . . . . . . .
pb. 161
. . . . . . . . . . . . . . . . . . .
ܟܲܕܼ ܐܵܡܲ݁ܪ. ܤܘܼܦܪܘܿܢܝܘܿܣ: ܐܠܵܐ ܠܲܡ ܡܸܫܬܲܚܩܝܼܢ ܗ̣̄ܘܲܝܢ:
ܟܲܕܼ ܗ̄ܘ̣ܵܘ ܠܤܲܓܿܝܼ̈ܐܬܼܵܐ: ܘܗܵܟܲܢܵܐ ܐܸܬܼܐܸܠܵܨܢ ܠܡܸܬܼܟܲܢܵܫܘܼ
ܘܠܲܡܤܵܡ ܛܘܼܦܘܿܣ
ܢܸܤܛܘܿܪܝܼܣ. ܥܕܲܡܵܐ ܠܐܸܡܲܬܼܝ؟ ܐܸܡܲܪ. ܥܕܲܡܵܐ ܕܥܒܲܕܬܘܿܢ
ܗܵܠܹܝܢ ܕܲܒܼܗܹܝܢ ܫܚܝܼܩܝܵܢ ܗ̣̄ܘܲܝܬܿܘܿܬ ܘܲܥܡܝܼܠܝܼܢ ܗ̣̄ܘܲܝܬܿܘܿܢ:
ܘܕܼܵܚ̇ܠܝܼܢ ܗ̣̄ܘܲܝܬܿܘܿܢ: ܕܠܵܐ ܬܸܗܘܸܐ ܟ̱ܠܵܗ̇ ܤܘܼܢܗܵܕܘܿܣ:
ܘܢܸܬܼܚܵܘܸܐ ܕܝܢܘܿܟܼܘܿܢ؟ ܥܕܲܡܵܐ ܠܗܵܝܕܝܼܟܼ: ܡܲܟܼܪܸܗܝܼ ܗ̣̄ܘܲܝܬܿܘܿܢ:
ܘܡܵܝ̇ܬܿܝܼܢ ܗ̣̄ܘܲܝܬܿܘܿܢ: ܘܬܲܪܤܝܼܵܬܼܵܐ ܠܵܐ ܡܸܫܟܿܚܝܼܢ ܗ̣̄ܘܲܝܬܿܘܿܢ ܠܡܸܤܲܒܼ.
ܡ̣ܢ ܒܵܬܲܪ ܕܹܝܢ ܗܵܠܹܝܢ: ܐܲܝܟܲܢܵܐ ܩܵܘܝܼܬܿܘܿܢ ܙܲܒܼܢܵܐ ܤܲܓܿܝܼܐܵܐ:
ܘܡܸܕܸܡ ܡ̣ܢ ܗܵܠܹܝܢ ܠܵܐ ܤܝܒܲܪܬܿܘܿܢ؟ ܒܪܲܡ ܕܡܸܛܠ ܕܡ̣ܢ
ܡܲܪܢܝܼܬܼܵܐ ܕܗܵܠܹܝܢ ܐܲܓܼܗܝܼܬܿܘܿܢ: ܡܸܛܠ ܗܵܢܵܐ ܥܲܠ ܩܲܢܕܝܼܕܝܵܢܘܿܣ:
ܗܵܘ̇ ܕܲܡܥܵܘܸܟܼ ܗ̄ܘ̣ܵܐ ܕܠܵܐ ܬܸܗܘܸܐ ܤܘܼܢܗܵܕܘܿܣ ܒܲܡܢܵܬܼܵܐ:
ܐܲܗܡܝܼܬܿܘܿܢ ܘܒܲܤܲܬܿܘܿܢ. ܐܝܼܬܼ ܗ̄ܘ̣ܵܐ ܠܟܼܘܿܢ ܓܿܝܪ ܥܘܼܫܢܵܐ:
ܕܗܵܠܹܝܢ ܬܸܥܒܿܕܘܼܢ. ܡ̣ܢ ܐܲܝܠܹܝܢ ܕܠܵܐ ܐܲܦܝܼܤܘ ܒܐܲܝܠܹܝܢ
ܕܲܡܥܵܕܝܼܬܿܘܿܢ ܠܲܡܦܤܘܼ ܒܗܹܝܢ ܐܵܦ ܠܠܵܐ ܡܗܲܝ̈ܟܢܹܐ: ܘܲܠܤܵܗܕܘܼܬܼܵܐ
ܘܲܠܡܸܵܗ̈ܡܵܬܼܵܐ ܕܲܩܕܼܵܡ ܐܲܠܵܗܵܐ ܘܲܩܕܼܵܡ ܡܵܠܟܼܵܐ ܕܝܼܡܲܝܬܿܘܿܢ ܕܠܵܐ
ܬܸܥ̱ܒܼܕܼܘܼܢ ܡܸܕܸܡ: ܐܸܠܵܐ ܕܲܬܼܩܘܘܿܢ ܠܤܘܿܢܗܵܕܘܿܣ ܡܲܕܢܚܵܬܼܵܐ:
pb. 162
ܕܥܲܠ ܬܲܪܥܵܐ ܩܵܝ̇ܡܵܐ ܗ̄ܘ̣ܵܬܼ: ܒܡܸܕܸܡ ܠܵܐ ܚܫܲܒܼܬܿܘܿܢ. ܐܝܼܬܲܝܗܘܿܢ
ܗ̄ܘ̣ܵܘ ܓܹܝܪ ܐܲܝܠܹܝܢ ܕܲܡܦܝܼܤܝܼܢ ܗ̄ܘ̣ܵܘ ܠܡܲܠܟܵܐ: ܘܲܠܡܸܠܬܼܵܐ ܕܐܲܠܵܗܵܐ
ܠܵܐ ܥܒܲܕܼܬܿܘܿܢ. ܘܡ̣ܢ ܩܕܼܵܡ ܗܵܟܹܝܠ ܦܘܼܩܕܵܢܹܗ ܕܩܲܢܕܝܼܕܵܝܵܢܘܿܣ:
ܠܤܵܗܕܘܼܬܼܵܐ ܕܤܲܗܕܘܼܟܼܘܿܢ ܐܲܦܸܤܩ̈ܘܿܦܹܐ ܗܵܢܘܿܢ ܕܠܵܐ ܐܸܬܼܟܲܢܲܫܘ
ܠܤܵܘܼܢܗܵܕܘܿܣ ܡܢܵܬܼܵܝܬܼܵܐ ܕܝܼܠܟܼܘܿܢ ܫܡܲܥܬܿܘܿܢ: ܗܵܢܘܿܢ ܕܐܝܼܬܼܵܗܘܿܢ
ܗ̄ܘ̣ܵܘ ܫܬܝܼܢ ܘܲܢܼܡܵܢܝܵܐ ܒܡܸܢܝܵܢܵܐ. ܠܵܐ ܗ̄ܘ̣ܵܐ ܡ̣ܢ ܗܵܠܹܝܢ ܫܝܼ̈ܛܹܐ:
ܘܠܵܐ ܗ̄ܘ̣ܵܐ ܡ̣ܢ ܠܵܐ ܝܑܼܕܝܼ̈ܥܹܐ: ܐܸܠܵܐ ܡܝܼܛܪ̈ܵܦܘܼܠܹܝܛܹܐ. ܐܸܙܲܠ ܗ̄ܘ̣ܵܐ
ܕܹܝܢ ܥܲܡܗܘܿܢ ܐܵܦ ܩܢܝܼܕܵܢܘܿܣ: ܘܲܡܦܩܲܕܸܡ ܘܲܡܤܲܗܸܕܼ ܗ̄ܘ̣ܵܐ
ܠܗܘܿܢ: ܥܲܠ ܐܲܝܠܹܝܢ ܕܚܲܕܼܬܼܵܐܝܼܬܼ ܡܸܤܬܲܥܪܵܢ ܗ̣̄ܘܲܝ:
ܤܵܗܕܘܼܬܼܵܐ ܕܐܲܦܸܤܩ̈ܘܼܦܹܐ ܐܝܠܹܝܢ ܕܠܵܐ ܐܸܫܬܵܘܬܵܦܘ
ܠܩܘܼܪܸܠܘܼܣ.
ܝܑܼܕܝܼܥܵܐ ܗ̣̄ܝ ܡ̇ܢ ܗܲܝܡܵܢܘܼܬܼܵܐ ܕܕܚ̱ܠܬܼܵܐ ܕܲܫܪܵܪܵܐ: ܠܘܼܩܕܲܡ
ܡ̣ܢ ܟܵܪܘܿܙܘܼܬܼܵܐ ܕܲܟܼܬܼܵܒܹ̈ܐ ܩܲܕܝܼ̈ܫܹܐ ܘܲܤܓܼܝܼ̈ܕܹܐ: ܘܡ̣ܢ ܟܢܘܼܫܝܵܐ
ܕܲܒܼܢܝܼܩܝܼܵܐ ܕܐܲܒܼܵܗܲܝ̈ܢ ܩܲܕܝܼ̈ܫܹܐ: ܗܵܢ̇ܘܿܢ ܕܐܲܝܟܼ ܡܸܢܝܵܢܗܘܿܢ ܟܘܼ̈ܬܼܡܵܬܼܵܐ
ܕܚܲܫܹ̈ܐ ܒܗܲܕܵܡܲܝ̈ܗܘܿܢ ܐܝܼܬܼ ܗ̄ܘ̣ܵܐ: ܒܗܵܝ̇ ܕܹܝܢ ܕܡܸܛܠ ܒܥܵܬܼܵܐ ܘܚܸܪܝܵܢܵܐ
ܕܡܕܸܡ ܡܸܕܡ: ܡܗܲܝܡܢܵܐ ܘܕܵܚܹ̇ܠ ܠܲܡܫܝܼܚܵܐ ܡܲܠܟܵܐ: ܟܵܗܢܘܼܬܼܵܐ
ܕܐܵܪ̈ܬܵܕܘܿܤܹܐ ܡ̣ܢ ܟܠ ܕܘܼܟ ܒܝܲܕܼ ܟܬܼܝܼ̈ܒܼܵܬܹܗ ܠܐܲܦܸܤܘܿܣ
ܩ̣ܪܵܐ: ܟܲܕܼ ܒܲܥܝܵܕܹܗ ܐܵܦ ܒܗܵܕܹܐ ܒܲܛܢܵܢܐ ܕܥܲܠ ܐܲܦܲܝ̈ ܫܪܵܪܵܐ
ܡܸܬܼܚܲܦܲܛ: ܘܟܼܠܲܢ ܒܛܲܝܒܿܘܼܬܹܗ ܕܐܲܠܵܗܵܐ ܐܸܬܼܟܲܢܲܫܢܲ: ܚܲܤܝܼܪܬ ܕܹܝܢ
ܠܲܟܼܢܘܼܫܝܲܢ ܩܲܕܝܼܫܵܐ ܪܵܚܹܡ ܠܐܲܠܵܗܵܐ ܝܘܿܚܢܵܢ ܐܲܦܸܤܩܘܿܦܵܐ ܕܐܲܢܛܝܵܟܼܵܝܵܐ.
pb. 163
ܗܵܘ̇ ܕܐܵܦ ܕܝܼܠܹܗ ܥܲܠ ܬܲܪܥܵܐ ܗ̣̄ܝ ܡܹܐܬܼܝܼܬܹܗ: ܐܲܟܼܡܵܐ ܕܲܟܼܬܼܝܼ̈ܒܵܬܹܗ
ܐܲܝܠܹܝܢ ܕܗܵܫܵܐ ܐܸܬܼܟܹܬܸܒܼ ܠܘܵܬܲܢ: ܘܲܕܼܡܲܓܸܤܛܪܝܼܢܘܿܣ
ܘܲܕܗܘܼܦܲܪ̈ܟܝܼܩܘܿ ܐܵܝܠܹܝܢ ܕܡܸܢܲܢ ܐܸܫܬܲܕܲܪܘ ܠܘܵܬܹܗ: ܐܵܘܕܵܥ ܠܲܢ:
ܘܲܐ̄ܚܪ̈ܵܢܹܐ ܡ̣ܢ ܡܲܥ̱ܪܒܼܵܐ ܪ̈ܵܚܡܲܝ ܐܵܠܵܗܵܐ ܐܲܦܸܤܩ̈ܘܿܦܹܐ. ܐܵܘܕܥܲܬ̤ ܠܲܢ
ܕܹܝܢ ܢܲܟܼܦܘܼܬܟܼܘܿܢ ܐܲܝܟܼ ܗܵܘ̇ ܕܡܲܐܝܬܼܵܐ ܠܟܼܘܿܢ ܒܐܲܡܝܼܢܘܼܬܼܟܘܿܢ
ܕܗܵܪܟܵܐ: ܘܲܪܗܝܼܒܼܝܼܢ ܐܢ̄ܬܿܘܿܢ: ܕܗܵܘ̇ ܡܸܕܸܡ ܕܐܸܨܛܒܼܝܼ ܒܹܗ ܡܲܠܟܵܐ
ܢܸܤܲܒܼ ܒܘܼܚܵܢܵܐ: ܐܵܦ ܡ̣ܢ ܩܕܼܵܡ ܡܹܐܬܼܝܼܬܼܗܘܿܢ ܕܐܲܦܸܤܩ̈ܘܿܦܹܗ
ܪ̈ܵܚܡܲܝ ܐܲܠܵܗܵܐ ܐܲܝܠܹܝܢ ܕܐܸܡܲܪܢܲܢ. ܡܸܛܠ ܗܵܕܹܐ: ܟܬܼܒܼܵܐ ܗܵܢܵܐ
ܠܘܵܬܼ ܢܵܟܼܦܘܼܬܼܟܼܘܿܢ ܫܲܕܲܪܢܢ: ܕܲܬܼܩܵܘܘܿܢ ܠܡܹܐܬܼܝܼܵܐ ܕܝܼܠܗܘܿܢ
ܕܲܡܝܲܬܿܪܹ̈ܐ ܐܵܦܸܤܩ̈ܘܿܦܹܐ ܒܢܲܝ̈ ܬܸܫܡܸܫܬܢ. ܘܲܕܼܠܵܐ ܬܩܲܒܿܠܘܼܢ ܐܲܝܟܼ
ܕܐܵܬܵܝܵܐ ܠܐ̄ܢܵܫܵܐ ܕܲܥܒܼܝܼܕܼܵܐ ܩܵܬܼܵܪܵܤܝܼܣ ܕܝܼܠܗܘܿܢ: ܘܠܵܐ ܠܐܲܝܠܹܝܢ
ܕܐܝܼܬܲܝܗܘܿܢ ܐܵܘ ܗܵܘܹ̇ܝܢ ܒܟܸܠܝܵܢܵܐ ܡ̣ܢ ܐܲܦܸܤܩܘܼܦܲܝ̈ܢܗܘܿܢ. ܝܑܼܕܝܼܥ
ܗ̄ܘ̣ ܓܹܝܪ ܡܵܢܵܐ ܦܵܩ̇ܕܝܼܢ ܩܵܢܘܿܢܹ̈ܐ ܩܲܕܝܼܫܹܐ ܡܸܛܠ ܗܵܠܹܝܢ:
ܘܠܲܐܝܠܹܝܢ ܕܥܲܠ ܥܗܵܠܹܝܢ ܥܵܒܼܪܝܼܢ: ܠܵܘ ܬܚܹܝܬܼ ܡܤܵܡ ܒܪܹܫܵܐ
ܙܥܘܿܪܵܐ ܤܵܝ̇ܡܝܼܢ: ܐܲܝܢܵܐ ܕܠܵܐ ܡܲܨܝܵܐ ܕܢܸܬܼܥܒܲܪ ܡ̣ܢ ܤܘܼܢܗܵܕܘܿܣ
ܩܲܕܝܼܫܵܬܐ ܒܚܲܕܼ ܡ̣ܢ ܦܘܼܪ̈ܤܝܼܢ. ܬܸܕܵܥ ܕܹܝܢ ܢܲܟܼܦܘܼܬܼܟܘܿܢ ܐܵܦ
ܗܵܝ̇: ܕܟܼܠܡܸܕܸܡ ܕܲܒܼܡܲܪܚܘܼܬܼܵܐ ܡܸܤܬܿܥܲܪ ܡ̣ܢ ܡܲܪ̈ܚܹܐ:
ܠܩܘܼܒܼܠܵܗ̇ ܕܡܲܪܵܚܘܼܬܼܟܼܘܿܢ ܡܸܫܬܿܟܚܘ: ܡ̣ܢ ܡܫܝܚܵܐ ܡܵܪܵܐ ܕܟܼܠ
ܘܡ̣ܢ ܩܵܢܘܿܢܹ̈ܐ ܩܲܕܝܼ̈ܫܹܐ.
pb. 164
ܢܸܤܛܘܿܪܝܼܣ. ܩܪܵܘ ܕܹܝܢ ܐܵܦ ܠܙܘܼܗܵܪܵܐ ܕܐܸܬܿܬܿܤܝܼܡ
ܡ̣ܢ ܩܲܢܕܝܼܕܝܵܢܘܼܣ ܡܫܲܒܿܚܵܐ: ܩܘܿܡܹܣ ܕܘܿܡܲܤܛܝܼܩܵܘ: ܕܐܵܦ
ܡ̣ܢ ܗܵܢܵܐ ܬܹܐܠܦܘܼܢ ܠܲܩܛܝܼܪܵܐ ܕܲܤܥܲܪܘ ܕܠܵܐ ܟܘܼܚܵܕܼܵܐ ܘܲܕܠܵܐ
ܒܸܗܬܿܬܼܵܐ. ܘܲܕܼܡܸܟܹܝܠ ܠܵܘ ܡܵܛܥܵܝܘܼ ܡܲܛܥܸܐ: ܐܸܠܵܐ ܡ̣ܢ ܒܵܬܲܪ
ܤܵܗܕܘܼܬܼܵܐ ܕܐܲܦܸܤܩ̈ܘܼܿܦܹܗ ܕܢܲܤܒܿܘܼܗ̇ ܠܥܸܠܬܼܵܐ ܗܵܝ̇ ܕܒܲܫܚܵܩܵܐ
ܟܹܐܡܲܬܼ ܗ̄ܘ̣ܵܘ: ܒܗܵܝ̇ ܕܥܲܠ ܬܵܪܥܵܐ ܩܲܪܝܼܒܼ ܗ̄ܘ̣ܵܐ ܠܡܹܐܬܼܵܐ
ܐܲܦܸܤܘܿܦܵܐ ܕܐܲܢܛܝܵܟܼܝܵܐ ܥܲܡ ܐܲܦܸܤܩ̈ܘܿܦܹܗ ܡܲܕܼܢܚܵܝܹ̈ܐ: ܐܝܟܼ ܕܝܼܠܸܦ̣ܘ
ܡ̣ܢ ܟܬܼܝܼ̈ܒܼܵܬܼܵܐ ܕܝܼܠܹܗ ܕܝܘܿܚܲܢܵܢ ܡܲܓܸܤܛܪ̈ܝܼܢܹܐ ܐܲܝܠܹܝܢ ܕܐܸܫܬܲܕܲܪܘ
ܠܗܘܼܦܲܪ̈ܟܝܼܵܣ ܕܝܼܠܗܘܿܢ: ܕܗܵܠܹܝܢ ܐܵܡ̇ܪܝܼܢ ܗ̄ܘ̣ܵܘ. ܗܵܢܘܿܢ ܟܲܕܼ
ܫܡܲܥ̣ܘ: ܐܲܝܟܼ ܕܡ̣ܢ ܚܕܼܵܐ ܬܸܢܘܲܝ ܥ̣ܒܲܕܼܘ ܫܓܘܪܫܝܵܐ: ܟܲܕܼ ܩܵܥܹ̇ܝܢ
ܗ̄ܘ̣ܵܘ ܘܲܡܒܲܓܿܢܝܼܢ ܘܲܡܨܲܥܪܝܼܢ: ܐܲܝܟܼ ܕܢܲܦܩܼܢ ܠܐܲܦܸܤܩ̈̄ܘܿܦܹܐ
ܕܐܸܫܬܲܕܲܪܘ ܠܘܵܬܼܗܘܿܢ ܘܠܲܡܤܲܚܵܦܘܼ ܐܸܢܘܿܢ: ܐܲܝܟܼ ܕܢܸܫܬܲܡ̈ܥܵܢ
ܐܵܦ ܡܲܚ̈ܘܵܬܼܵܐ ܕܡܲܝ̇ܬܹܝܢ ܗ̄ܘ̣ܵܘ ܥܠܲܝܗܘܿܢ: ܠܩܘܿܡܹܣ
ܩܲܢܕܝܼܕܝܵܢܘܿܣ. ܡ̣ܢ ܕܹܝܢ ܕܵܠܗܵܢܘܿܢ ܗܵܟܲܢܸܐ ܢܲܟܼܦܵܐܝܼܬܼ ܐܲܦܸܩ̣ܘ
ܐܸܢܘܿܢ: ܗܦܲܟܼܘ ܠܗܘܿܢ ܥܠܵܘܗܝ ܕܲܢܨܘܼܕܼܘܢܵܝܗܝ: ܟܲܕܼ ܠܒܼܝܼܟܼܝܼܢ
ܗ̄ܘ̣ܵܘ ܒܐܝܼܕܲܝܗܘܿܢ ܠܐܲܝܠܹܝܢ ܕܡ̣ܢ ܟܲܦܢܵܐ ܘܟܼܘܼܪ̈ܗܵܢܹܐ ܠܵܐ ܡܸܫܟܿܚܝܼܢ
ܗ̄ܘ̣ܵܘ ܠܲܡܩܵܡ: ܘܠܵܐ ܫܡܲܥ̣ܘ ܠܐܲܝܠܹܝܢ ܕܗ̤ܘ ܐܵܡܵ̈݁ ܗ̄ܘ̣ܵܐ ܠܗܘܿܢ:
ܘܠܵܐ ܬܘܼܒܼ ܠܲܟܼܬܼܝܼ̈ܒܼܵܬܼܵܐ ܕܡܲܠܟܵܐ ܕܐܸܫܬܲܕܪ ܠܘܵܬܼ ܟܠܗܘܿܢ.
pb. 165
ܘܲܡܦܲܩܸܕܼ ܗ̄ܘ̣ܵܐ ܠܗܘܿܢ: ܕܠܵܐ ܬܸܗܘܸܐ ܤܘܼܢܗܵܕܘܿܣ ܡܢܵܬܼܵܢܵܐܝܼܬܼ:
ܐܸܠܵܐ ܓܵܘܵܢܵܐܝܼܬܼ ܢܸܬܿܬܿܤܝܼ̈ܡܵܢ ܒܲܓܼܒܼܝܼܬܼܵܐ ܐܲܝܠܹܝܢ ܕܡ̣ܢ ܤܘܼܢܵܗܵܕܘܿܣ
ܗܵܘ̈ܝܵܢ. ܐܸܠܵܐ ܐܲܝܟܼ ܚܲܟܿܝܼܡܵܐ ܡܸܨܥܲܬܼ ܫܲܢܲܝܵ̈ܐ: ܡܸܤܬܿܒܲܪ ܗ̄ܘ̣ܵܐ
ܕܡܸܫܢܸܐ ܫܢ̣ܵܐ ܕܗܵܠܹܝܢ ܐܸܡ݂ܲܪ: ܒܲܕܼ ܠܵܐ ܨܵܒܹ̇ܝܢ ܗ̄ܘ̣ܵܘ ܕܢܸܫܡ̱ܥܘܼܢ
ܐܸܢܹܝܢ. ܦ̣ܩܲܕܼ ܗ̄ܘ̣ܐ ܕܹܝܢ ܕܢܸܩܪܘܿܢܵܝܗܝ ܦܘܼܩܕܵܢܵܐ ܗܵܢܵܐ ܕܡܲܠܟܿܘܼܬܼܵܐ
ܩܕܼܵܡܲܝܗܘܿܢ: ܐܲܝܢܵܐ ܕܠܵܐ ܙ̇ܕܹܩ ܗ̄ܘ̣ܵܐ ܕܢܸܬܼܩܪܸܐ: ܩܕܼܵܡ ܕܟܼܠܗܘܿܢ
ܐܲܦܸܤܩ̈ܘܿܦܹܐ ܡܸܢܼܟܲܬܫܝܼܢ ܗ̄ܘ̣ܵܘ. ܟܲܕܼ ܗܵܕܹܐ ܤܵܥܲ݁ܪ ܗ̄ܘ̣ܵܐ: ܒܡܸܕܸܡ
ܠܵܐ ܚܫܝܼܒܼ ܗ̣̄ܘ̣ܵܐ.
ܡ̣ܢ ܐܲܝܠܹܝܢ ܕܒܸܐܓܲܪܬܵܐ: ܕܐܝܼܬܝܗܹܝܢ ܗ̣̄ܘܲܝ̈ ܗܵܟܲܢܵܐ.
ܦܩܲܕܼܢ ܠܩܲܢܕܝܼܕܝܵܢܘܿܣ ܩܘܿܡܹܣ ܡܫܲܒܿܚܵܐ: ܕܢܹܐܬܸܐ
ܠܘܵܬܼ ܤܘܼܢܗܵܕܘܿܣ ܩܲܕܝܼܫܵܐ ܕܝܼܠܟܼܘܿܢ: ܟܲܕܼ ܠܵܐ ܡܫܵܘܬܸܦ
ܒܡܸܕܸܡ ܥܲܠ ܗܵܠܹܝܢ ܕܲܒܼܥܵܬܼܵܐ ܥܠܝܗܹܝܢ ܗܵܘ̇ܝܵܐ ܠܟܼܘܿܢ.
ܒܕܐܬܼܚܲܒܼܢ: ܕܠܵܐ ܙܵܕܹܩ ܠܗܵܘ̇ ܕܡ̣ܢ ܟܢܘܼܫܝܵܐ ܕܐܲܦܸܤܩ̈ܘܿܦܹܐ
ܠܵܐ ܡܸܬܼܡܢܸܐ: ܕܢܸܬܼܚܲܠܲܛ ܒܲܒܼܥܵܬܼܵܐ ܕܛܲܟܼܤܹ̈ܐ ܥܹܕܬܵܢܵܝܹ̈ܐ:
ܘܒܲܒܼܨܵܬܼܵܐ ܕܗܲܝܡܵܢܘܼܬܼܵܐ. ܠܵܐ ܗ̄ܘ̣ܵܐ ܓܹܝܪ ܒܲܟܼܢܘܼܫܵܝܵܐ ܐܸܡ݂ܲܪ ܕܠܵܐ
ܡܸܫܬܵܘܬܲܦ: ܐܸܠܵܐ ܒܲܒܼܨܵܬܼܵܐ ܕܗܲܝܡܵܢܘܼܬܼܵܐ. ܕܠܐ ܗܵܟܹܝܠ ܢܲܪܦܸܐ:
ܩܕܼܵܡ ܕܢܸܗܘܸܐ ܟܢܘܼܫܝܵܐ ܕܟܼܠܗܘܿܢ ܐܦܸܤܩ̈ܘܿܦܹܗ: ܕܬܸܗܘܸܐ
ܤܘܼܢܗܵܕܘܿܣ ܡܢܵܬܼܵܢܵܐܝܼܬܼ: ܗ̤ܘ ܦܩܝܼܕܼ ܗ̄ܘ̣ܵܐ. ܡܸܛܠ ܗܵܟܹܝܠ
ܕܐܸܬܼܐܠܸܨ ܠܡܸܩܪܝܵܗ̇ ܠܗܵܕܹܐ: ܠܵܐ ܙܵܕܹܩ ܗ̄ܘ̣ܵܐ ܕܬܸܬܼܩܪܸܐ
ܩܕܸܡ ܡܹܐܬܼܝܼܬܼܵܐ ܕܠܗܘܿܢ ܐܲܦܸܤܩ̈ܘܼܦܹܐ: ܗܵܘ̇ ܕܐܸܵܬܼ݂ܵܐ ܡ̣ܢ ܓܲܒܵܐ
pb. 166
ܗܵܢܵܐ ܐܲܦܩ̣ܘܼܗܝ ܥܲܡ ܩܥܵܬܼܵܐ ܤܲܓܿܝܼܐܬܼܵܐ: ܘܡܲܫܪ̈ܘܿܩܝܵܬܼܵܐ ܘܦܘܼܪ̈ܓܵܠܹܐ:
ܕܲܠܡܵܘܬܵܐ ܡܸܫܬܿܠܸܡ: ܐܸܢܗ̤ܘ ܕܡܸܫܬܵܘܬܲܦ ܒܲܒܼܨܵܬܼܵܐ ܕܓܼܵܘܵܐ
ܕܤܘܼܢܗܵܕܿܘܿܣ. ܘܲܡܫܲܠܛܵܐܝܼܬܼ ܡܸܟܹܝܠ: ܠܢܲܦܫܗܘܿܢ ܤܘܼܢܗܵܕܘܿܣ
ܟ̱ܠܵܢܵܝܬܼܵܐ ܩܵܪܹܝܢ ܗ̄ܘ̣ܵܘ. ܕܗܵܟܲܢܵܐ ܟܹܐܡܲܬܼ ܤܲܓܿܝܼܐܝܼܢ ܗ̄ܘ̣ܵܘ ܐܲܝܠܹܝܢ
ܕܩܲܪܝܼܒܼܝܼܢ ܗ̄ܘ̣ܵܘ: ܘܲܡܤܲܗܕܹܝܢ ܗ̄ܘ̣ܵܘ ܠܗܘܿܢ ܐܲܝܠܹܝܢ ܕܠܵܐ
ܐܸܫܬܵܘܬܲܦ ܠܗܘܿܢ ܒܲܒܼܨܬܼܵܐ: ܟܲܕܼ ܐܵܡ̇ܪܝܼܢ ܗ̄ܘ̣ܵܘ ܠܗܘܿܢ: ܙܵܕܹܩ
ܕܲܢܩܵܘܸܐ ܠܐܲܝܠܹܝܢ ܕܥܲܠ ܬܲܪܥܵܐ ܩܲܪܝܼܒܼܵܐ ܗ̄ܘ̣ܵܬ ܡܹܐܬܝܼܬܼܗܘܿܢ.
ܗܵܢܵܘ ܕܹܝܢ: ܠܹܗ ܠܪܹܫܵܗ̇ ܕܤܘܼܢܗܵܕܘܿܣ. ܘܲܕܼܠܵܐ ܢܸܫܬܵܘܬܲܦ
ܠܗܘܿܢ ܩܘܼܡܹܣ: ܗܵܘ̇ ܕܲܦܩܝܼܕܼ ܗ̄ܘ̣ܵܐ ܥܲܠ ܡܛܲܟܿܤܘܼܬܼܗܘܿܢ:
ܐܵܡ̇ܪܝܼܢ ܗ̄ܘ̣ܵܘ: ܕܠܵܐ ܩܲܪܝܼܒܼ ܒܲܒܼܥܵܬܼܵܐ ܕܗܲܝܡܵܢܘܼܬܼܵܐ ܘܒܲܒܼܨܵܬܼܵܐ
ܕܨܒܼ̈ܘܵܬܼܵܐ ܥܹܕ̈ܬܵܢܵܝܵܬܼܵܐ. ܐܸܠܵܐ ܒܟܼܠܡܸܕܸܡ ܒܫܘܼܠܛܵܢܵܐ ܕܝܼܠܗܘܿܢ
ܤܵܥ̇ܪܝܼܢ ܗ̄ܘ̣ܵܘ: ܘܠܵܐ ܫܵܡ̇ܥܝܼܢ ܗ̄ܘ̣ܵܘ ܠܦܘܼܩܪܵܢܵܐ ܕܡܲܠܟܿܘܼܬܼܵܐ
ܕܢܲܗܝܼܪܵܐܝܼܬܼ ܐܵܘܕܲܥ̣ ܐܸܢܘܿܢ: ܕܡܸܛܠ ܗܵܕܹܐ ܐܸܫܬܲܕܲܪ: ܕܲܢܥܵܘܼܟܼ
ܠܲܫܓܼܘܼ̈ܫܝܹܐ ܘܲܠܤܸܕ̈ܩܹܐ ܕܗܵܘܹ̇ܝܢ ܗ̄ܘ̣ܵܘ. ܫܡܲܥ̣ܘ ܕܹܝܢ ܐܵܦ
ܠܲܟܼܬܼܝܼ̈ܒܼܵܬܼܵܐ ܕܡܲܠܟܵܐ: ܕܐܸܫܬܲܕܲܪ ܒܝܲܕܼ ܩܲܢܕܝܼܕܝܵܢܘܿܣ.
ܡ̣ܢ ܤܲܩܪܵܐ ܕܡܲܠܟܵܐ.
ܡ̣ܢ ܩܕܝܼܡ ܠܲܡ ܓܹܝܪ ܐܲܝܟܼ ܕܬܸܬܼܟܲܢܲܫ ܕܸܚܠܲܬܼ ܬܲܠܵܗܵܐ ܕܲܒܼܟܼܘܿܢ
ܠܲܡܕܼܝܼܢ̄ܬܼܵܐ ܕܐܲܦܸܤܵܝܹ̈ܐ: ܗܵܠܹܝܢ ܕܙܵܕܼ̈ܩܵܢ ܗ̣̄ܘܲܝ̈ ܟܬܲܒܼܢܲܢ. ܡܸܛܠ ܕܹܝܢ
ܕܙܵܕ݂ܹܩ ܗ̄ܘ̣ܵܐ ܠܡܹܐܨܲܦ ܐܵܦ ܕܲܡܛܲܟܿܤܘܼܵܐ ܕܚܵܘܼܫܵܒܼܵܐ ܐܲܝܢܵܐ ܕܗܵܘܹ̇ܐ
ܠܲܟܼܢܘܼܫܝܼܟܘܿܢ: ܥܲܠ ܒܥܵܬܼܵܐ ܐܲܝܕܵܐ ܕܡܸܛܠܵܬܼܵܗ̇ ܡܸܬܼܟܲܢܫܝܼܬܿܘܿܢ:
pb. 167
ܐܵܦܠܵܐ ܥܲܠ ܗܵܕܹܐ ܒܤܲܝܢܲܢ: ܕܲܒܼܟܼܠܗܹܝܢ ܙܲܗܲܪܢܵܟܼܘܿܢ ܕܬܸܗܘܘܿܢ
ܕܠܵܐ ܕܠܘܼܚܝܵܐ. ܘܲܡܦܵܤܝܼܢܲܢ ܕܠܵܐ ܤܢܝܼܩܵܐ ܕܸܚܠܲܬܼ ܐܲܠܵܗܵܐ ܕܲܒܼܟܼܘܿܢ
ܥܲܠ ܥܘܼܕܼܪ̈ܵܢܹܐ ܒܲܪ̈ܵܝܹܐ: ܕܥܲܠ ܫܲܝܢܵܐ ܬܸܬܼܚܲܦܛܘܼܢ. ܐܝܼܬܹܝܗ̇ ܗ̄ܘ̣ܵܬܼ
ܕܹܝܢ ܕܝܼܠܲܢ ܗܵܕܹܐ: ܕܠܵܐ ܢܲܗܡܸܐ ܡ̣ܢ ܐܲܟܼܝܼܦܘܼܬܼܵܐ ܕܲܒܼܥܵܬܼܵܐ ܕܲܫܪܵܪܵܐ.
ܗܵܢܵܘ ܕܹܝܢ: ܕܲܠܩܲܢܕܝܼܕܝܵܢܘܿܣ ܩܘܿܡܹܣ ܢܫܲܕܲܪ ܠܘܵܬܼ ܤܘܼܢܗܵܕܘܿܣ
ܕܝܼܠܟܼܘܿܢ: ܟܲܕܸ ܠܵܐ ܡܫܵܘܬܸܦ ܒܡܸܕܸܡ ܥܲܠ ܗܵܠܹܝܢ: ܐܲܝܠܹܝܢ
ܕܲܒܼܥܵܬܼܵܐ ܗܵܘ̇ܝܵܐ ܠܟܼܘܿܢ ܥܠܲܝܗܹܝܢ. ܒܕܸܐܬܼܚܲܫܲܒܼܢ: ܕܠܵܐ ܙܵܕܸܩ
ܕܲܠܗܵܘ̇ ܕܡ̣ܢ ܟܢܘܸܫܝܵܐ ܕܐܲܦܸܤܩ̈ܘܿܦܹܗ ܠܵܐ ܡܸܬܼܡܢܸܐ: ܕܢܸܬܼܚܲܠܲܛ
ܒܲܒܼܥܵܬܼܵܐ ܕܛܲܟܼܤܹ̈ܐ ܥܹܕ̈ܬܵܢܵܝܹܐ ܘܒܲܒܼܨܵܬܼܵܐ ܕܥܲܠ ܗܲܝܡܵܢܘܼܬܼܵܐ. ܠܲܒܼܢܲܝ̈
ܥܵܠܡܵܐ ܕܹܝܢ ܘܲܠܕܼܝܪ̈ܵܝܹܐ: ܠܗܵܢܘܿܢ ܕܡܸܛܠ ܗܵܕܹܐ ܬܲܡܵܢ ܟܢܝܼܫܝܼܢ
ܘܥܲܡܟܼܘܿܢ ܐܝܼܬܲܝܗܘܿܢ: ܢܸܛܪܘܿܕܼ ܡܸܢܵܗ̇ ܕܲܡܕܼܝܼܢ̄ܬܐ. ܡܸܛܠ ܕܠܵܐ
ܙܵܕܸܩ ܠܐ̄ܢܵܫ̈ܝܼܢ ܕܐܲܝܟܼ ܗܵܠܹܝܢ: ܕܢܸܫܬܿܟܼܚܘܼܢ ܠܲܟܼܢܘܼܫܝܼܟܼܘܿܢ:
ܕܕܲܠܡܵܐ ܫܓܼܘܼܫܝܵܐ ܢܥܝܼܪܘܼܢ: ܘܲܒܼܗܵܕܿܠ ܢܒܲܛܠܘܼܢ ܠܡܸܕܸܡ ܕܐܲܢ̄ܬܿܘܿܢ
ܒܘܵܠܝܼܬܼܵܐ ܡܒܲܚܢܝܼܢ ܐܢ̄ܬܿܘܿܢ ܘܙܵܕܼܩܵܐܝܼܬܼ ܤܵܥ̇ܪܝܼܢ ܐܢ̄ܬܿܘܿܢ. ܟܲܕܼ
ܢܹܐܨܲܦ ܕܕܲܠܡܵܐ ܦܵܠܓܘܼܬܼܵܐ ܐ̄ܢܵܫ ܢܲܪܡܸܐ ܡ̣ܢ ܥܸܠܲܬܼ ܚܸܪܝܵܢܵܐ: ܕܠܵܐ
ܡ̣ܢ ܗܵܕܹܐ ܥܸܠܬܼܵܐ ܬܸܬܲܗܸܐ ܒܥܵܬܼܟܼܘܿܢ: ܘܲܫܪܵܪܵܐ ܕܚܘܼܫܵܒܼܵܐ ܫܲܪܝܼܪܵܐ
ܕܒܲܝܢܵܬܼܟܼܘܿܢ. ܒܡܲܓܿܪܲܬܼ ܪܘܼܚܵܐ ܕܹܝܢ ܢܸܫܡܲܥ ܟܠܢܵܫ ܠܗܵܠܹܝܢ
ܕܡܸܬܼ̈ܡܲܠܠܵܢ: ܐܵܦ ܡܛܲܝܲܒܼ ܐ̄ܢܵܫ ܕܢܲܗܦܸܟܼ: ܐܵܘ ܢܲܗ̈ܦܟܼܵܢ
ܥܠܵܘܗܝ. ܘܗܵܟܲܢܵܐ ܒܫܘܼ̈ܐܵܠܹܐ ܘܒܲܗ̈ܦܵܟܼܵܬܼܵܐ ܘܒܲܫܪܵܝܵܐ: ܒܥܵܬܼܵܐ ܕܥܲܠ
ܗܲܝܡܵܢܘܼܬܼܵܐ ܕܲܫܪܵܪܵܐ ܕܠܵܐ ܚܸܪܝܵܢܵܐ ܡܸܕܸܡ ܬܸܬܿܕܝܼܢ: ܘܲܒܼܒܼܘܼܚܵܢܵܐ
ܕܓܼܵܘܵܐ ܕܚܲܤܝܘܼܬܼܟܼܘܿܢ ܫܘܼܠܵܡܵܐ ܛܵܒܼܵܐ ܕܠܵܐ ܚܸܪܝܵܢܵܐ ܬܸܤܲܒܼ.
pb. 168
ܢܸܤܛܘܿܪܝܼܣ. ܠܗܵܠܹܝܢ ܠܵܐ ܐܲܦܸܤ̣ܘ ܕܢܸܬܼܩܲܪ̈ܝܵܢ: ܘܠܵܐ
ܬܘܼܒܼ ܠܡܸܫܡܲܥ ܨܵܒܹ̇ܝܢ ܗ̄ܘ̣ܵܘ ܠܡ̇ܢ ܕܐܵܡܲ݁ܪ ܗ̄ܘ̣ܵܐ ܠܗܘܿܢ
ܕܢܹܐܨܦܘܼܢ: ܕܕܲܠܡܵܠ ܦܵܠܓܘܼܬܼܵܐ ܡܸܕܸܡ ܐ̄ܢܵܫ ܢܲܪܡܸܐ ܡ̣ܢ ܥܸܠܲܬܼ
ܚܸܪܝܵܢܵܐ. ܕܠܵܐ ܡ̣ܢ ܗܵܕܹܐ ܥܸܠܬܼܵܐ ܬܸܬܲܗܸܐ ܒܥܵܬܼܵܐ ܕܥܲܠ ܗܲܝܡܵܢܘܼܬܼܵܐ
ܕܲܫܪܵܪܵܐ: ܘܚܘܼܫܵܒܼܵܐ ܫܲܪܝܼܪܵܐ ܕܒܲܝܢܵܬܼܟܼܘܿܢ. ܒܡܲܓܿܪܲܬܼ ܪܘܼܚܵܐ ܕܹܝܢ
ܢܸܫܡܲܥ ܟܠܢܵܫ ܗܵܠܹܝܢ ܕܡܸܬܼ̈ܡܲܠܠܵܢ: ܐܵܦ ܡܛܲܝܲܒܼ ܐ̄ܢܵܫ
ܕܢܲܗܦܸܟܼ ܐܵܘ ܕܢܲܗܦܸܟܼ ܥܠܵܘܗܝ. ܘܗܵܟܲܢܵܐ ܒܫܘܼ̈ܐܵܠܹܐ ܘܒܲܗ̈ܦܵܟܼܵܐ
ܘܒܲܫܪܵܝܵܐ: ܒܥܵܬܼܵܐ ܕܥܲܠ ܗܲܝܡܵܢܘܼܬܼܵܐ ܕܲܫܪܵܪܵܐ ܕܠܵܐ ܚܸܪܝܵܢܵܐ ܡܸܕܸܡ
ܬܸܬܿܕܝܼܢ. ܘܒܼܘܼܚܪܵܢܵܐ ܕܓܼܵܘܵܐ ܕܚܲܤܝܘܼܬܼܟܼܘܿܢ: ܫܘܼܠܵܡܵܐ ܛܵܒܼܵܐ ܕܠܵܐ
ܚܸܪܝܵܢܵܐ ܢܸܤܲܒܼ. ܡܸܛܠ ܕܝܵܕܼܥ̇ܝܼܢ ܗ̄ܘ̣ܵܘ ܠܗܵܠܹܝܢ: ܠܵܐ ܡܲܪܦܹܝܢ
ܗ̄ܘ̣ܵܘ ܕܢܸܬܼܩܲܪ̈ܝܵܢ. ܡܛܲܫܹܝܢ ܗ̄ܘ̣ܵܘ ܓܹܝܪ ܠܒܲܪܬܼ ܩܵܠܵܐ ܗܵܝ̇ ܕܐܲܝܟܼ
ܕܒܲܢܒܼܝܼܘܼܬܼܵܐ ܐܲܠܵܗܵܝܬܼܵܐ: ܠܐܲܝܠܹܝܢ ܕܡܸܢܗܘܿܢ ܡܸܤܬܲܥܪ̈ܵܢ ܗ̣̄ܘܲܝ̈
ܢܲܗܝܼܪܵܐܝܼܬܼ ܡܚܵܘܝܵܐ ܗ̄ܘ̣ܵܬܼ. ܐܵܘ ܕܲܠܡܵܐ: ܡ̣ܢ ܢܝܼܫܵܐ ܕܐܲܝܠܹܝܢ
ܕܐܸܤܬܿܥܲܪ ܡܸܢܹܗ: ܚܵܢܹ̇ܐ ܗ̄ܘ̣ܵܐ ܡܲܠܟܵܐ ܕܐܲܝܠܹܝܢ ܕܲܥܬܼܝܼܕܼ ܗ̄ܘ̣ܵܐ
ܠܡܸܤܥܲܪ: ܘܩܲܕܸܡ ܘܤܵܡ̣ ܐܸܢܹܝܢ ܒܲܟܼܬܼܝܼ̈ܒܵܬܹܗ ܠܗܵܠܹܝܢ. ܤܵܦ̈ܩܵܢ
ܓܹܝܪ ܐܵܦ ܐܵܬܼ̈ܘܵܬܼܵܐ ܒܨܝܼܪ݁ܵܬܼܵܐ: ܠܡܸܥܒܲܕ ܫܘܼܘܕܵܥܵܐ ܙܥܘܿܪܵܐ ܕܲܙܢܲܝ̈ܐ
ܕܢܲܦܫܵܐ: ܐܵܦܸܢ ܠܵܐ ܥܕܲܟܹܝܠ ܩ̣ܕܲܡ ܗ̣̄ܘܲܝ̈ ܡܸܢܹܗ ܐܲܝܠܹܝܢ ܕܕܲܐܝܟܼ
ܗܵܠܹܝܢ. ܐܵܦ ܟܲܕܼ ܠܵܐ ܥܕܲܟܹܝܠ ܢܦܲܩ̣ ܗ̣̄ܘܲܝ̈ ܠܓܸܠܝܵܐ ܗܵܠܹܝܢ
ܕܡܸܢܗܹܝܢ ܡܸܫܟܿܚܵܐ ܗ̄ܘ̣ܵܬܼ ܕܢܸܬܼܝܼܕܲܥ. ܒܪܵܡ ܠܟܼܠܗܹܝܢ ܐܲܝܠܹܝܢ
ܕܕܝܼܠܹܗ ܓܠ̣ܵܐ ܐܸܢܹܝܢ ܐܲܠܵܗܵܐ: ܕܢܸܗܘ̈ܝܵܢ ܠܗܘܿܢ ܕܝܵܢܹ̈ܐ ܕܐܲܝܠܹܝܢ
pb. 169
ܕܲܥܬܼܝܼ̈ܕܼܵܢ ܗ̣̄ܘܲܝ̈ ܠܡܸܗܘܵܐ. ܕܠܵܐ ܢܸܤܬܲܒܼܪܘܼܢ: ܕܡܸܛܠ ܕܠܵܐ
ܝܵܕܼܥ̇ܝܼܢ ܗ̄ܘ̣ܵܘ ܤ̣ܥܲܪܘ ܗܵܕܹܐ: ܘܲܕܼܠܵܐ ܝܵܕܼܥ̇ܝܼܢ ܗ̄ܘ̣ܵܘ ܠܲܙܢܵܐ ܕܲܒܼܥܵܬܼܵܐ
ܘܕܼܒܼܨܵܬܼܵܐ: ܐܸܡ݂ܲܪܘ ܥܵܒܼܘܿܪܵܐܝܼܬܼ ܐܲܝܠܹܝܢ ܕܐܝܼܬܲܝܗܹܝܢ ܕܲܓܵܠܵܬܼ̈ܐ ܡ̣ܢ
ܐܲܝܠܹܝܢ ܕܐܸܬܼܐܡܲܪ. ܐܵܪܵܐ ܡ̣ܢ ܦܠܓܿܘܼܬܼܵܐ ܘܡ̣ܢ ܥܸܠܲܬܼ ܚܸܪܝܵܢܵܐ
ܡܸܫܬܲܪܝܵܐ ܒܥܵܬܼܵܐ ܫܲܪܝܼܪܵܬܵܐ ܠܐܲܝܠܹܝܢ ܕܫܲܪܝܼܪܵܐܝܼܬܼ ܒܵܥܹ̇̄ܝܢ: ܐܵܘ ܡ̣ܢ
ܫܲܘܝܘܼܬܼܵܐ ܘܡܲܓܿܪܲܬܼ ܪܘܼܚܵܐ ܕܒܲܐܝܠܹܝܢ ܕܡܸܬܼܐܲܡܪ̈ܵܢ ܠܐܝܠܹܝܢ ܕܫܵܡ̇ܥܝܼܢ؟
ܘܲܠܗܵܝ̇ ܕܲܢܤܝܼܡ ܒܲܠܚܘܿܕܼ ܟܠܗܹܝܢ ܐܲܝܠܹܝܢ ܕܐܝܼܬܼ ܥܠܲܝܗܹܝܢ ܒܥܵܬܼܵܐ: ܐܵܘ
ܡ̣ܢ ܗܵܝ̇ ܕܢܸܬܼܗܲܦ̈ܟܼܵܢ ܥܲܠ ܚܕܼܵܕܹ̈ܐ: ܘܲܒܼܫܘܼܐܵܠܼܵܐ ܘܒܲܫܪܵܝܵܐ ܢܸܬܼܒܲܚ̈ܢܵܢ:
ܥܕܲܡܵܐ ܕܬܸܗܘܸܐ ܕܠܵܐ ܚܸܪܝܵܢܵܐ ܒܥܵܬܼܵܐ ܗܵܝ̇ ܕܡܸܬܼܒܲܚܢܵܐ؟ ܒܲܪܗܝܼܒܼܘܼܬܼܵܐ
ܐܵܘ ܒܠܵܐ ܪܗܝܼܒܼܘܼܬܼܵܐ: ܕܟܲܕܼ ܢܩܲܒܸܿܠ ܫܘܼܐܵܠܵܐ: ܢܸܬܸܿܠ ܫܪܵܝܵܐ
ܘܦܘܼܢܵܝ ܦܸܬܼܓܼܵܡܵܐ ܐܲܝܢܵܐ ܕܠܵܚܹ̇ܡ ܠܹܗ: ܐܲܝܕܵܐ ܗ̣̄ܝ ܕܠܵܘ ܫܲܪܝܼܪܵܐܝܼܬܼ
ܐܸܬܼܐܲܡܪܲܬ̤ ܡ̣ܢ ܗܵܠܹܝܢ؟ ܐܸܠܵܐ ܠܵܟܼ ܡ̇ܢ ܠܵܐܠ ܫܦܲܪ ܠܵܟܼ ܦܘܼܩܕܵܢܵܐ
ܗܵܢܵܐ: ܒܲܕܼ ܨܵܒܹ̇ܐ ܗ̣̄ܘܲܝܬܿ ܠܡܸܙܟܵܐ: ܘܠܵܐ ܠܡܸܫܟܵܚܘܼ ܫܪܵܪܵܐ.
ܐܸܠܵܐ ܡ̇ܢ ܐܸܥܒܸܿܕܼ ܗܵܫܵܐ؟ ܐܹܩܲܛܪܸܓܼ ܠܩܲܢܕܝܕܝܵܢܘܿܣ: ܕܠܵܐ
ܢܛܲܪ ܟܬܼܝܼ̈ܒܼܵܬܐ ܕܡܲܠܟܿܘܼܬܼܵܐ: ܘܲܥܒܲܕܼ ܫܓܼܘܼܫܝܵܐ ܕܐܲܝܟܼ ܗܵܢܵܐ
ܠܐܲܦܸܤܩ̈ܘܿܦܹܿܐ ܠܘܼܩܒܲܠ ܐܲܦܸܤܗ̈ܘܿܦܹܐ ܚܲܒܼܪ̈ܲܝܗܘܿܢ: ܐܵܦ ܠܘܼܩܒܲܠ
ܢܲܦܫܹܗ ܕܲܦܩܝܼܕܼ ܗ̄ܘ̣ܵܐ ܥܲܠ ܢܘܼܛܵܪܗܘܿܢ ܘܥܲܠ ܡܛܲܟܿܤܘܼܬܼܗܘܿܢ.
ܐܸܠܵܐ ܒܡܸܠܹ̈ܐ ܡܸܬܼܪܡܸܐ ܗ̄ܘ̣ܵܐ ܠܲܡܦܤܘܼܬܼܗܘܿܢ ܠܐܲܝܠܹܝܢ ܕܠܵܐ
ܡܸܬܼܪܲܟܼܢܝܼܢ ܗ̄ܘ̣ܵܘ ܠܡܸܫܡܲܥ ܡܸܠܹ̈ܐ: ܗܵܢܘܿܢ ܕܲܤܢܝܼܩܝܼܢ ܗ̄ܘ̣ܵܘ
ܥܲܠ ܐܲܝܟܵܐ ܕܠܵܐ ܒܨܒܼܝܵܢܗܘܿܢ ܡܕܲܒܲܪ ܗ̄ܘ̣ܵܐ ܠܗܘܿܢ ܐܲܝܟܼ ܦܘܼܩܪܵܢܵܐ
ܕܡܲܠܟܿܘܼܬܼܵܐ: ܗܵܘ̇ ܕܡ̣ܢ ܟܠܢܵܫ ܡܸܬܿܬܵܘܕܹܐ ܗ̄ܘ̣ܵܐ ܕܟܹܐܢܵܐ
ܐܝܼܬܼܵܘܗܝ ܗ̄ܘ̣ܵܐ. ܘܲܐ̄ܚܪܵܢܝܵܐܝܼܬܼ ܠܵܐ ܦܲܐܝܵܐ ܗ̄ܘ̣ܵܬܼ ܕܬܸܗܘܸܐ ܝܲܬܿܝܼܪ ܡ̣ܢ
pb. 170
ܕܲܢܩܝܼܡ ܡܸܠܵܘ̈ܗܝ: ܟܲܕܼ ܐܵܡܲ݁ܪ ܘܡܸܬܼܦܲܢܸܐ ܠܹܗ ܒܫܘܼܐܵܠܵܐ
ܘܲܒܼܦܘܼܢܵܝ ܦܸܬܼܓܼܵܡܵܐ. ܒܪܲܡ ܐܲܝܟܼ ܫܥܵܬܼܵܐ ܚܫܘܼܒܼܵܐ ܗ̄ܘ̣ܵܬܼ ܠܗܘܿܢ ܗܵܝ̇
ܕܗܵܘ̇ܝܵܐ ܗ̄ܘ̣ܵܬܼ ܠܡܲܛܥܝܵܢܘܼܬܼܵܐ: ܐܵܦܠܵܐ ܐܝܼܬܼ ܠܝܼ ܡܸܕܸܡ ܠܡܹܐܡܲܪ.
ܤܲܗܸܕܼ ܗ̄ܘ̣ܵܐ ܐܸܢܘܿܢ ܓܹܝܪ ܒܦܘܼܩܕܵܢܵܘ̈ܗܝ: ܕܠܵܐ ܢܸܥܒܿܕܘܼܢ
ܡܸܕܸܡ ܩܕܼܵܡ ܕܢܸܬܼܟܲܢܫܘܼܢ ܟܠܗܘܿܢ ܐܲܝܟܼ ܦܘܼܩܕܵܢܵܐ ܕܡܲܠܟܿܘܼܬܼܵܐ:
ܘܐܵܦܠܵܐ ܠܹܗ ܠܦܘܼܩܕܵܢܵܐ ܕܡܲܠܟܵܐ ܨܒܼܵܘ ܠܡܸܫܡܲܥ܀ ܫܡܲܥܘ
ܗܵܟܹܝܠ ܐܵܦ ܠܙܘܼܗܵܪܵܐ ܕܝܼܠܹܗ.
ܙܘܼܗܵܪܵܐ ܕܐܸܬܿܬܿܤܝܼܡ ܡ̣ܢ ܡܫܲܒܿܚܵܐ ܩܘܿܡܹܗ ܩܲܢܕܝܼܕܝܵܢܘܿܣ:
ܕܠܵܐ ܢܸܬܼܟܲܢܫܘܼܢ ܩܕܼܵܡ ܕܟܼܠܗܘܿܢ ܐܲܦܸܤܩ̈ܘܿܦܹܐ ܢܸܬܼܟܲܢܫܘܼܢ.
ܠܩܲܕܝܼܫܵܐ ܩܘܼܪܸܠܘܿܣ ܐܲܦܸܤܩܘܿܦܵܐ ܕܐܵܠܹܟܼܤܲܢܕܪܝܼܵܐ
ܘܡܝܼܛܪܵܦܘܿܠܹܝܛܵܐ ܘܠܲܐܦܸܤܩ̈ܘܿܦܹܐ ܕܐܸܬܼܟܲܢܲܫ ܥܲܡܹܗ: ܦܵܠܵܘܝܘܿܣ
ܩܲܢܕܝܼܕܝܵܢܘܿܣ ܪܲܒܵܐ ܘܲܡܫܲܒܿܚܵܐ ܩܘܿܡܹܣ ܕܹܩܲܬܤܝܼܡܘܿܢ
ܕܘܿܡܲܤܬܝܼܩܘܿܢ. ܕܡ̣ܢ ܟܲܕܼ ܡܲܢ̇ܥܹܬܼ ܠܐܲܦܸܤܘܿܣ ܡܕܝܼܢ̄ܬܼܵܐ: ܠܵܐ
ܡܸܕܸܡ ܐ̄ܚܪܹܝܢ ܒܥܹܝ̇ܬܼ ܡ̣ܢ ܓܵܘܵܐ ܕܤܘܼܢܗܵܕܘܿܣ ܩܲܕܝܼܫܬܼܵܐ: ܐܸܠܵܐ
ܕܲܒܼܫܲܝܢܵܐ ܘܐܵܘܝܘܼܬܼܵܐ ܢܸܬܼܓܲܡܪ̈ܵܢ ܗܵܠܹܝܢ ܕܲܒܼܗܲܝܡܵܢܘܼܬܼܵܐ ܕܐܵܘܬܵܕܘܿܟܿܤܝܼܵܐ:
ܐܲܝܟܼ ܕܐܵܦ ܡܗܲܝܡܢܵܐ ܙܲܟܵܝܵܐ ܦܩܲܕܼ. ܡܦܵܤܵܐ ܗ̣̄ܝ ܕܼܚܠܲܬܼ ܐܲܠܵܗܵܐ
ܕܲܒܼܟܼܘܿܢ: ܘܤܵܦ̇ܩܵܐ ܠܝܼ ܤܵܗܕܘܼܬܹܗ ܕܲܫܪܵܪܵܐ: ܕܠܵܐ ܝܸܨ̇ܦܹܬܼ
ܕܡܸܕܸܡ ܐ̄ܚܪܹܝܢ ܝܲܬܿܝܼܪ ܡ̣ܢ ܗܵܕܹܐ. ܟܲܕܼ ܕܹܝܢ ܝܸܠ̇ܦܹܬܼ ܕܲܥܬܼܝܼܕܝܼܢ ܐܢ̄ܬܿܘܿܢ
ܕܬܸܬܼܟܲܫܘܼܢ ܒܥܹܕܬܵܐ ܩܲܕܝܼܫܬܼܵܐ ܠܒܲܪ ܨܒܼܝܵܢܵܐ ܕܐܲܦܸܤܩ̈ܘܿܦܹܐ
ܐ̄ܚܪܵܢܹܐ: ܟܲܕܼ ܥܕܼܟܹܝܠ ܠܵܐ ܐܸܬܼ݂ܵܐ ܝܘܿܚܲܢܵܢ ܐܲܦܸܤܩܘܿܦܐ ܕܐܲܢܛܝܵܟܼܝܵܐ ܘܠܵܐ
pb. 171
ܐܲܦܸܤܩ̈ܘܿܦܹܐ ܕܥܲܡܹܗ: ܠܵܐ ܫܠܝܼ̇ܬܼ ܡ̣ܢ ܩܕܼܵܡ ܚܲܕܼ ܝܵܘܡܵܠ ܗܵܘ̇
ܕܒܹܗ ܡܛܲܝܒܼܝܼܢ ܗ̣̄ܘܲܝܬܿܘܿܢ ܗܵܕܹܐ ܠܡܸܤܥܲܪ: ܡ̣ܢ ܕܲܡܦܝܼܣ ܐ̄ܢܵܐ
ܘܲܡܤܲܗܸܕܼ ܐ̄ܢܵܐ ܠܟܼܠ ܚܲܕܼ ܚܲܕܼ ܡܸܢܟܼܘܿܢ: ܕܠܵܐ ܬܸܬܼܪܲܥܘܿܢ
ܕܒܲܡܢܵܬܐ ܬܸܥܒܿܕܘܼܢ ܤܘܼܢܗܵܕܘܿܣ. ܘܬܼܘܼܒܼ ܠܒܼܵܬܼܪܹܗ ܕܝܵܘܡܵܐ:
ܡ̣ܢ ܕܐܸܬܼܟܲܢܲܫܬܿܘܿܢ ܒܵܗ̇ ܒܥܹܕܬܵܐ ܩܲܕܝܼܫܬܼܵܐ: ܠܵܐ ܐܲܗܡ̇ܝܼܬܼ ܡ̣ܢ
ܕܝܲܨܦܵܐܝܼܬܼ ܐܹܬܸܐ ܠܘܵܬܼܟܼܘܿܢ ܘܐܹܤܲܗܸܕܟܼܘܿܢ ܡܵܢܵܘ ܗܵܘ̇ ܕܐܸܨܛܒܼܝܼ
ܒܹܗ ܡܲܠܟܵܐ ܡܗܲܝܡܢܵܐ: ܐܵܦܸܢ ܗܵܕܹܐ ܝܲܬܿܝܼܪܬܵܐ ܐܝܼܬܹܝܗ̇ ܗ̄ܘ̣ܵܬܼ:
ܒܕܲܡܦܵܤܝܼܢ ܗ̣̄ܘܲܝܬܿܘܿܢ ܒܹܗ ܡ̣ܢ ܟܬܼܝܼ̈ܒܼܵܬܼܵܐ ܕܐܸܬܼܟܿܬܸܒܼ ܠܘܵܬܼܟܼܘܿܢ
ܡ̣ܢ ܐܘܼܚܕܵܢܹܗ. ܐܸܠܵܐ ܘܟܲܕܼ ܛܵܒܼ ܗܵܟܲܢܵܐ ܐܝܼܬܹܝܗ̇: ܐܲܠܸܦܬܟܼܘܿܢ
ܨܸܒܼܝܵܢܹܗ ܕܝܼܠܹܗ ܕܕܵܚܹ̇ܠ ܠܐܲܠܵܗܵܐ ܡܲܠܟܲܢ ܟܲܕܼ ܐܵܡܲ݁ܪ ܗ̄ܘܹ̇ܝܬܼ: ܕܨܒܼܝܵܢܹܗ
ܗܵܢܵܘ: ܕܗܲܝܡܵܢܘܼܬܼܘܿܢ ܤܛܲܪ ܡ̣ܢ ܦܘܫܵܟܼܵܐ ܘܒܼܘܼܠܒܵܠܵܐ ܡ̣ܢ ܟܠ
ܐ̄ܢܵܫ ܘܒܼܵܐܘܝܘܼܬܼܵܐ ܬܸܬܲܚܲܡ. ܘܲܕܼܠܵܐ ܨܵܒܹ̇ܐ: ܕܒܲܡ̈ܢܵܘܵܬܼܵܐ ܬܸܗܘܸܐ
ܤܘܼܢܗܵܕܘܿܣ. ܐܲܝܟܼ ܡ̇ܢ ܕܗܵܕܹܐ: ܠܗܸܪܬܼܵܐ ܘܲܠܤܸܕܩܵܐ
ܡܲܗܦܟܼܵܐ ܠܗܲܝܡܵܢܘܼܬܼܵܐ ܕܐܵܪܬܵܕܘܿܟܿܤܝܼܵܐ ܕܝܼܠܲܢ. ܘܬܼܘܼܒܼ ܟܲܕܼ
ܬܒܲܥܬܲܢ ܢܲܟܼܦܘܼܬܼܘܿܢ: ܕܤܲܩܪܵܐ ܕܝܼܠܹܗ ܕܲܡܗܲܝܡܢܵܐ ܘܪܵܚܹܡ
ܠܐܲܠܵܗܵܐ ܡܲܠܟܵܐ: ܗܵܝ̇ ܕܐܸܫܬܲܕܪܲܬ̤ ܠܘܵܬܼ ܤܘܼܢܗܵܕܘܿܣ ܩܲܕܝܼܫܬܼܵܐ:
ܬܸܬܼܩܪܸܐ: ܠܘܼܩܕܲܡ ܐܸܬܼܥܲܤ̇ܩܹܬܼ ܠܡܸܤܥܲܪ ܗܵܕܹܐ. ܠܵܐ ܕܹܝܢ
ܡܸܫܬܿܐܸܠ ܐ̄ܢܵܐ ܠܡܹܐܡܲܪ: ܡܸܛܠ ܕܠܵܐ ܥܕܲܟܹܝܠ ܐܲܬܿܝܼܐܝܼܢ ܗ̄ܘ̣ܵܘ
ܘܲܟܼܢܝܼܫܝܼܢ: ܗܵܠܹܝܢ ܕܐܸܬܼܦܩܸܕܼܘ ܕܢܸܗܘܘܿܢ ܒܤܘܼܢܗܵܕܘܿܣ ܩܲܕܝܼܫܬܼܵܐ.
ܡ̣ܢ ܕܹܝܢ ܕܕܼܚܠܲܬܼ ܐܲܠܵܗܵܐ ܕܲܒܼܟܼܘܿܢ ܐܸܡܪܲܬ̤: ܕܠܵܐ ܡܦܵܤܵܐ ܒܗܵܘ̇
ܡܸܕܸܡ ܕܐܸܨܛܒܼܝܼ ܒܹܗ ܡܲܠܟܵܐ ܘܲܦܩܲܕܼ ܕܢܸܗܘܸܐ: ܐܸܬܼܚܲܙܝܲܬ̤
pb. 172
ܠܝܼ ܕܡ̣ܢ ܐܵܠ̈ܨܵܬܼܵܐ ܗ̣̄ܝ: ܕܐܵܦ ܕܠܵܐ ܩܲܪܝܼܒܼܘܼܬܼܵܐ ܕܟܼܠܗܘܿܢ
ܐܲܦܸܤܩ̈ܘܿܦܹܐ: ܐܹܩܲܪܸܒܼ ܠܟܼܘܿܢ ܠܵܗ̇ ܠܲܟܼܬܼܝܼܒܼܬܹܗ ܤܓܼܝܼܕܬܵܐ
ܘܲܡܫܲܒܲܚܬܼܵܐ. ܘܬܼܘܼܒܼ ܕܹܝܢ: ܒܵܬܲܪ ܕܐܸܬܼܒܼܕܲܥ ܠܟܼܘܿܢ ܨܸܒܼܝܵܢܵܐ
ܕܡܵܪܘܼܬܹܗ: ܠܵܐ ܐܲܗܪܝܼܬܼ ܕܒܹܗ ܒܲܦܝܵܤܵܐ ܐܸܗܘܸܐ ܠܘܵܬܼܟܼܘܿܢ: ܟܲܕܼ
ܒܵܥܹ̇ܐ ܐ̄ܢܵܐ ܡ̣ܢ ܡܝܲܬܿܪܘܼܬܼܟܼܘܿܢ ܘܲܡܤܲܗܸܕܼ ܐ̄ܢܵܐ ܠܟܼܘܿܢ: ܕܠܵܐ
ܬܚܲܕܬܼܘܼܢ ܡܸܕܸܡ: ܡ̣ܢ ܩܕܼܵܡ ܕܟܼܠܗܘܿܢ ܩܲܕܝܼ̈ܫܹܐ ܐܲܦܸܤܩ̈ܘܿܦܹܐ
ܢܸܬܼܘܲܥܕܼܘܼܢ ܠܤܘܼܢܗܵܕܘܿܣ. ܐܸܠܵܐ ܕܲܬܼܩܵܘܘܿܢ ܐܲܪܒܿܥܵܐ ܝܵܘܡ̈ܝܼܢ
ܒܲܠܚܘܿܕܼ: ܠܩܲܕܝܼܫܵܐ ܝܘܿܚܲܢܵܢ ܐܲܦܸܤܩܘܿܦܵܐ ܕܐܲܢܛܝܵܟܼܝܵܐ
ܡܝܼܛܪܵܦܘܿܠܝܼܛܝܼܣ ܘܠܲܐܝܼܠܹܝܢ ܕܥܲܡܹܗ: ܘܠܲܐܝܠܹܝܢ ܬܘܼܒܼ
ܕܐܝܼܬܼ ܥܲܡ ܩܲܕܝܼܫܵܐ ܘܕܵܚܹ̇ܠ ܠܐܲܠܵܗܵܐ ܢܸܤܛܘܿܪܝܼܣ ܐܲܦܸܤܩܘܿܦܵܐ
ܕܩܘܼܤܛܲܢܛܝܼܢܵܦܘܿܠܝܼܣ. ܐܲܝܟܼ ܡ̇ܢ ܕܟܲܕܼ ܬܸܗܘܘܿܢ ܐܲܟܼܚ̄ܕܵܐ:
ܘܟܼܠܵܗ̇ ܤܘܼܢܗܵܕܘܿܣ ܩܲܕܝܼܫܵܬܐ ܬܸܬܼܟܲܢܲܫ ܠܲܚܕܼܵܐܠ: ܐܸܢ ܐܝܼܬܼ ܡܸܕܸܡ
ܕܐܝܼܬܼܵܘܗܝ ܕܲܒܼܥܵܬܼܵܐ: ܐܵܘ ܡܸܕܸܡ ܐ̄ܚܪܹܢܵܐ ܕܐܝܼܬܼܵܘܗܝ ܕܚܸܪܝܵܢܵܐ: ܐܵܘ
ܕܲܚܢܲܢ ܝܲܬܿܝܼܪܹ̈ܐ ܐܝܼܬܲܝܢ ܠܹܗ: ܟܲܕܼ ܟܢܝܼܫܝܼܬܿܘܿܢ ܐܲܟܼܚ̄ܕܼܵܐ ܢܸܬܼܒܚܲܪ.
ܘܗܵܝܕܹܝܢ ܒܫܲܠܡܘܼܬܼܵܐ ܕܟܼܠܟܼܘܿܢ ܢܸܬܼܝܼܕܲܥ ܗܵܘ̇ ܡ̇ܢ ܕܕܲܠܵܐ ܒܘܵܠܝܼܬܼܵܐ
ܘܲܠܒܲܪ ܡ̣ܢ ܩܵܢܘܼܢܹ̈ܐ ܡܸܫܬܲܟܲܚ ܕܲܡܗܲܝܡܸܢ: ܐܸܢ ܟܠܟܼܘܿܢ ܬܪܝܼܨܵܐܝܼܬܼ
ܡܵܘܕܹܝܬܿܘܿܢ: ܘܐܸܢ ܗܲܝܡܵܢܘܼܬܼܵܐ ܕܐܲܒܼܵܗܲܝ̈ܢ ܩܲܕܝܼ̈ܫܹܐ ܕܵܚ̇ܠܝܼܬܿܘܿܢ.
ܗܵܠܹܝܢ ܗܵܟܹܝܠ ܐܸܢܵܐ: ܠܵܐ ܒܲܠܚܘܿܕܼ ܡܸܡܠܲܟܼ ܡܸܠ̇ܟܹܬܼ: ܐܸܠܵܐ
ܐܵܦ ܐܲܦܝܼܤܹ̇ܬܼ. ܡܸܛܠ ܕܹܝܢ ܕܡܸܕܸܡ ܡ̣ܢ ܡܵܐ ܕܐܸܬܼܐܡܲܪ ܠܵܐ
ܠܒܲܟܼܬܿܘܿܢ: ܐܸܠܵܐ ܐܵܦ ܡܸܬܿܛܪܵܕܼܘܼ ܐܸܬܿܛܲܕܹܬܼ ܡܸܢܟܼܘܿܢ:
pb. 173
ܐܸܬܼܚܲܫ̇ܒܹܬܼ ܕܡ̣ܢ ܐܵܠܨ̈ܬܼܵܐ ܐܝܼܬܹܝܗ̇ ܕܲܒܼܝܲܕܼ ܡܤܲܗܕܼܵܢܘܼܬܼܵܐ ܗܵܕܹܐ
ܐܵܘܕܲܥܟܼܘܿܢ ܘܲܒܼܕܼܝܼܛܲܓܿܡܵܐ ܗܵܢܵܐ ܐܹܤܲܗܸܕܼܟܼܘܿܢ: ܕܠܵܐ ܬܚܲܕܬܼܘܼܢ
ܡܸܕܸܡ: ܐܸܠܵܐ ܕܲܬܼܩܵܘܘܿܢ ܠܡܹܐܬܼܝܼܬܼܵܐ ܕܟܼܠܗܘܿܢ ܩܲܕܝܼ̈ܫܹܐ ܐܲܒܼܵܗܲܝ̈ܢ
ܐܲܦܸܤܩ̈ܘܿܦܹܐ. ܘܟܲܕܼ ܒܬܲܪܥܝܼܬܼܵܐ ܕܓܼܵܘܵܐ ܗܵܘܹ̇ܝܬܿܘܿܢ: ܢܸܬܿܬܿܕܝܼܢ
ܗܵܘ̇ ܡܵܐ ܕܐܝܼܬܵܘܗܝ ܕܥܹܕܬܵܐ ܩܲܕܝܼܫܬܼܵܐ ܩܵܬܼܘܿܠܝܼܩܝܼ. ܐܸܢܗ̤ܘ
ܕܐ̄ܢܵܫ ܒܡܸܬܿܬܿܙܝܼܥܵܢܘܼܬܼܵܐ ܕܫܘܼܠܛܵܢܵܐ ܕܢܲܦܫܹܗ: ܢܸܨܒܸܿܐ
ܕܲܢܫܲܚܠܸܦ ܡܸܕܸܡ ܡ̣ܢ ܡܵܐ ܕܐܸܬܼܚܙܝܼ ܠܪܹܫܵܢܘܼܬܼܵܐ ܕܟܼܝܼܬܼܵܐ ܕܠܵܐ
ܥܵܢ̇ܕܼܵܐ: ܗܵܢܵܐ ܢܸܕܲܥ ܕܲܒܼܢܲܦܫܹܗ ܐܝܼܬܼ ܠܹܗ ܕܢܸܬܼܥܲܕܲܠ: ܘܲܠܐ̄ܢܵܫ
ܡܸܕܸܡ ܠܵܐ ܡܚܲܝܸܒܼ. ܠܵܐ ܕܹܝܢ ܡܵܐ̇ܢܵܐ ܠܝܼ: ܕܗܵܢܹ̇ܝܢ ܟܲܕܼ ܗܵܢܹ̇ܝܢ
ܐܹܡܲܪ: ܕܲܡܦܵܤܝܼܬܢܿܘܿܢ ܗ̄ܘ̣ ܘܝܵܕܲܥܵܐ ܩܲܕܝܼܫܘܼܬܼܟܼܘܿܢ: ܕܗܵܢܵܘ ܗܵܘ̇
ܡܸܕܸܡ ܕܡܸܨܛܒܸܐ ܒܹܗ ܡܠܟܲܢ ܕܵܚܹ̇ܠ ܠܐܲܠܵܗܵܐ: ܕܲܒܼܩܲܪܝܼܒܼܘܼܬܼܵܐ
ܕܟܼܠܗܘܿܢ ܩܲܕܝܼܫܹ̈ܐ ܐܲܦܸܤܩ̈ܘܿܦܹܐ ܗܵܢ̇ܘܿܢ ܕܐܸܬܼܩܪܝܼܘ ܡ̣ܢ ܫܘܼܠܛܵܢܹܗ:
ܟܠܡܸܕܸܡ ܕܐܝܼܬܼܵܘܗܝ ܚܸܪܝܵܢܵܐ ܢܸܫܬܿܪܸܐ: ܘܗܲܝܡܵܢܘܼܬܼܵܐ ܕܲܫܪܵܪܵܐ
ܬܸܬܼܓܠܸܐ. ܡܸܛܠ ܗܵܢܵܐ ܕܹܝܢ: ܐܵܦ ܤܲܩܪܵܐ ܐܲܝܕܵܐ ܕܐܸܫܬܲܕܪܲܬ̤
ܠܘܵܬܼ ܩܲܕܝܼܫܬܼܵܐ ܤܘܼܢܗܵܕܘܿܣ ܕܝܼܠܟܼܘܿܢ ܩܲܕܡܹ̇ܬܼ ܤܵܡܹ̇ܬܼ ܠܥܸܠ
ܡ̣ܢ ܕܝܼܡܲܪܛܘܿܪܝܵܐ ܗܵܕܹܐ: ܘܐܵܦ ܟܬܼܝܼ̈ܒܼܵܬܼܵܐ ܐܲܝܠܹܝܢ ܕܐܸܬܼܟܿܬܸܒܹܝ̈ܢ
ܠܘܵܬܼܝ ܡ̣ܢ ܡܵܪܘܼܬܹܗ. ܐܲܝܟܼ ܡ̇ܢ ܕܲܒܼܝܲܕܼ ܟܠܗܹܝܢ: ܟܲܕܸ ܝܵܠܦܝܼܬܿܘܿܢ
ܨܸܒܼܝܵܢܹܗ: ܬܸܫܠܘܿܢ ܡ̣ܢ ܐܲܝܠܹܝܢ ܕܡܸܬܼܚܲܦܛܝܼܬܿܘܿܢ ܠܡܸܤܥܲܪ.
pb. 174
ܬܘܼܒܼ ܕܹܝܢ ܗ̤ܘܲܝܬܿܘܿܢ ܝܵܕܼܥ̇̄ܝܼܢ: ܕܦܸܚܡܹܗ ܕܲܟܼܬܼܵܒܼܵܐ ܗܵܢܵܐ: ܐܲܝܟܼ
ܠܘܵܬܼ ܡܵܪܲܢ ܕܵܚܹ̇ܠ ܠܐܲܠܵܗܵܐ ܡܲܠܟܵܐ ܐܸܫܬܲܕܵ.
ܢܸܤܛܘܿܪܝܼܣ. ܟܲܕܸ ܗܵܠܹܝܢ ܐܸܬܿܬܿܤܝܼܡܘ ܘܐܸܬܼܩܪܝܼܘ
ܩܕܼܵܡܲܝܗܘܿܢ: ܕܲܠܡܵܐ ܐܲܢܸܫ ܗ̄ܘ̣ܵܐ ܚܹܐܦܗܘܿܢ ܗܵܘ̇ ܕܒܹܗ ܫܲܢܝܼܐܝܼܢ
ܗ̄ܘ̣ܵܘ: ܐܘܵ ܐܸܬܼܟܲܚܲܕܼܘ ܒܡܸܕܸܡ: ܐܵܘ ܕܚܸܠ̣ܘ ܗ̄ܘ̣ܵܘ ܡ̣ܢ ܥܸܕܼܠܵܝܹ̈ܐ
ܘܤܵܗ̈ܕܘܵܬܼܵܐ: ܐܵܘ ܒܡܸܕܸܡ ܚܫܲܒܼܘ ܐܸܢܘܿܢ ܠܪܹ̈ܫܵܢܹܐ ܕܲܥܠܲܝܗܘܿܢ
ܘܠܹܗ ܠܡܲܠܟܵܐ: ܘܠܲܐܝܠܹܝܢ ܕܲܥܬܼܝܼܕܝܼܢ ܗ̄ܘ̣ܵܘ ܕܲܢܕܼܢܘܼܢ ܐܸܢܘܿܢ
ܒܢܵܡܘܿܤܹ̈ܐ ܐܲܠܵܗܵܝܹ̈ܐ ܘܒܲܬܼܚܘܼ̈ܡܹܐ ܕܐܲܒܼ̈ܗܵܬܼܵܐ؟ ܐܸܠܵܐ ܥܲܠ ܟܠܗܹܝܢ
ܒܲܤܲܪܘ: ܐܝܼܬܼ ܗ̄ܘ̣ܵܘ ܠܗܘܿܢ ܓܹܝܪ ܐܲܝܠܹܝܢ ܕܡܵܘܕܥܝܼܢ ܗ̄ܘ̣ܵܘ
ܠܗܘܿܢ ܡ̣ܢ ܡܲܠܟܿܘܼܬܼܵܐ. ܘܗܵܠܹܝܢ ܟܠܗܹܝܢ ܕܠܘܼܩܒܲܠܝ: ܐܲܝܟܼ ܫܥܵܬܼܵܐ
ܡܸܕܸܡ ܡܸܤܬܲܒܼܪ̈ܵܢ ܗ̣̄ܘܲܝ̈ ܠܗܘܿܢ. ܘܐܲܝܟܼ ܕܤܵܒܲ̇ܪ ܐ̄ܢܵܐ: ܗܵܠܹܝܢ
ܝܵܕܲܥ̇ ܗ̄ܘ̣ܵܐ ܩܲܢܕܝܼܕܝܵܢܘܿܣ: ܘܡܸܬܼܩܲܢܲܛ ܗ̄ܘ̣ܵܐ ܡܸܢܗܘܿܢ. ܘܲܒܼܡܸܠܹ̈ܐ
ܒܲܠܚܘܿܕܼ ܡܥܵܘܸܟܼ ܗ̄ܘ̣ܵܐ ܠܗܘܿܢ: ܒܲܥܒܼܵܕܹ̈̇ܐ ܕܹܝܢ ܠܵܐ ܡܲܡܪܲܚ ܗ̄ܘ̣ܵܐ
ܠܡܸܤܥܲܪ ܘܠܲܡܥܵܩܘܼ ܠܐܲܝܠܹܝܢ ܕܗܵܠܹܝܢ ܤܵܥ̇ܪܝܼܢ ܗ̄ܘ̣ܵܘ. ܒܐܲܝܠܹܝܢ
ܐܸܬܿܬܿܟܸܠܬܿ ܠܡܸܤܥܲܪ: ܐܗܵܠܹܝܢ ܕܐܵܦܠܵܐ ܒܲܪܒܪ̈ܵܝܹܐ ܐܲܡܪܲܚܘ ܠܡܸܤܥܲܪ
ܡܸܡܬܼܘܿܡ؟ ܬܸܗܘܸܐ ܓܹܝܪ ܕܠܵܐ ܐܝܼܬܲܝܟ ܗ̣̄ܘܲܝܬܿ ܠܝܼ ܒܥܸܠܕܒܼܵܒܼܵܐ:
ܐܵܦܠܵܐ ܩܛܹܐ ܓܼܪܵܢܵܐ. ܐܝܼܬܿܝܟ ܗ̣̄ܘܲܝܬܿ ܕܹܝܢ ܕܲܝܵܢܵܐ: ܐܲܝܟܼ ܕܲܥ̣ܒܲܕܼܬܿ
ܢܲܦܫܵܟܼ ܐܲܝܟܼ ܫܲܪܟܵܐ ܕܲܐ̄ܚܪ̈ܵܢܹܐ: ܐܵܡܲ݁ܪ ܐ̄ܢܵܐ ܕܹܝܢ ܕܐܵܦ ܝܲܬܿܝܼܪ.
ܘܐܸܬܼܩܲܪܲܒܼ ܐܵܦ ܙܲܒܼܢܵܐ ܕܕܼܝܼܢܵܐ: ܕܒܹܗ ܙܵܕܹܩ ܗ̄ܘ̣ܵܐ ܕܢܸܬܿܬܿܕܝܼܢܘܼܢ.
ܠܵܐ ܕܹܝܢ ܐܸܬܼ݂ܵܘ ܗ̄ܘ̣ܵܘ ܗܵܡ̇ܘܿܢ ܕܕܼܵܝܢ̇ܝܼܢ ܗ̄ܘ̣ܵܘ ܥܲܡܵܟܼ: ܘܐܲܝܬܿܘܿܢ
pb. 175
ܐܸܬܼܐ̱ܠܸܨܬܿܘܿܢ ܕܬܸܩܪܘܿܢ ܠܗܘܿܢ. ܨܵܒܹ̇ܐ ܗ̣̄ܘܲܝܬܿ ܕܲܠܟܼܠܗܘܿܢ ܐܲܝܠܹܝܢ
ܕܩܲܪܝܼܒܼܝܼܢ ܗ̄ܘ̣ܵ: ܬܸܥܒܸܿܕܼ ܐܸܢܘܿܢ ܒܢܲܝ̈ ܪܸܥܝܵܢܵܟܼ. ܠܝܼ ܕܹܝܢ ܕܐܸܢܵܐ
ܒܵܥܹ̇ܐ ܗ̄ܘܹܝܬܼ ܕܢܸܗܘܸܐ ܕܝܼܢܵܐ: ܘܲܠܟܼܠܗܘܿܢ ܡܤܲܗܸܕܼ ܗ̄ܘܹ̇ܝܬܼ: ܕܠܵܐ
ܠܕܲܝ̇ܢܘܼܬܼܵܐ. ܐܝܼܬܼ ܗ̄ܘ̣ܵܐ ܠܹܗ ܟܠ ܟ̱ܠܹܗ ܩܘܼܝܵܡܵܐ ܠܕܼܝܼܢܵܟܼ: ܟܲܕܼ
ܠܵܘ ܐܲܝܟܼ ܕܐܸܬܼܩ̣ܪܝܼܬܿ ܕܵܐܹ̇ܢ ܗ̣̄ܘܲܝܬܿ. ܐܸܠܵܐ ܥܲܤܩܵܐ ܗ̄ܘ̣ܵܬܼ ܠܵܟܼ:
ܐܝܼܬܼ ܗ̄ܘ̣ܵܐ ܠܵܟܼ ܫܘܼܠܛܵܢܵܐ ܠܡܹܐܙܲܠ ܘܲܠܡܼܥܒܲܕܼ ܗܵܕܹܐ: ܕܐܲܝܟܼ
ܕܲܒܼܥܸܠܬܼܵܐ ܕܝܼܠܵܟܼ ܠܵܐ ܐܸܫܟܲܚܬܿ ܠܲܡܕܼܵܢ. ܘܠܵܘ ܕܠܵܐ ܐܸܬܹܿܝܬܼ: ܐܸܠܵܐ
ܠܵܐ ܡܸܫܟܲܚ ܗ̄ܘܹ̇ܝܬܼ ܠܡܹܐܙܲܠ. ܙܵܕܹܩ ܗ̄ܘ̣ܵܐ ܠܵܟܼ ܕܬܲܠܸܦ ܥܲܠ
ܗܵܕܹܐ ܠܐܲܝܢܵܐ ܕܐܝܼܬܼ ܠܹܗ ܫܘܼܠܛܵܢܵܐ: ܘܡ̣ܢ ܗܵܢܵܐ ܡܸܬܼܦܲܪܫܵܐ ܗ̄ܘ̣ܵܬܼ
ܕܲܝܵܢܘܼܬܼܵܐ. ܠܵܐ ܓܹܝܪ ܡܗܲܝܡܸܢ ܗ̄ܘ̣ܵܐ ܐ̄ܢܵܫ: ܕܲܠܢܲܦܫܵܟܼ ܦܵܪܹܫ ܗ̄ܘ̣ܵܝܬܿ
ܠܕܲܝܵܢܘܼܬܼܵܐ. ܘܗܵܟܲܢܵܐ ܐܸܤܬܿܥܲܪ ܗܵܠܹܝܢ. ܐܵܘ ܠܵܐ ܐܲܠܲܨܟܼܘܿܢ ܐܲܠܵܗܵܐ
ܕܲܟܼܬܲܒܼܬܘܿܢ ܐܸܢܹܝܢ: ܟܲܕܼ ܢܵܦܩܝܼܬܿܘܿܢ ܪܘܼܚܵܐ: ܘܲܡܩܲܛܪ̱ܓܼܝܼܢ ܪܘܼܚܵܐ
ܕܩܲܢܕܝܼܕܝܵܢܘܿܣ ܘܲܕܝܘܿܚܲܢܵܢ ܘܕܐܝܼܪܹܢܹܐܘܿܣ: ܓܲܒܼܪܵܐ ܕܒܲܐܠܵܗܵܐ ܚܲܝ
ܗ̄ܘ̣ܵܐ: ܟܲܕܼ ܡܫܲܡܸܫ ܗ̄ܘ̣ܵܐ ܠܹܗ ܒܩܸܢܝܵܢܵܘ̈ܗܝ ܘܲܒܼܢܲܦܫܹܗ ܘܲܒܼܦܲܓܼܪܹܗ.
ܘܡܸܛܠ ܕܠܵܐ ܫܦܲܪ ܠܹܗ ܐܲܝܠܹܝܢ ܕܲܤܥܲܪ: ܐܸܬܼܪܡܝܼܘ
ܠܲܡܩܲܛܪܵܓܼܘܼܬܹܗ: ܐܲܝܟܼ ܕܡܸܢܗܘܿܢ ܝܵܠܦܝܼܢ ܐܢ̄ܬܿܘܿܢ ܠܵܗ̇
ܠܡܲܪܵܚܘܼܬܼܗܘܿܢ ܒܲܪܒܿܪܵܝܬܼܵܐ ܘܒܲܥܪܝܼܪܵܝܬܼܵܐ ܘܥܵ̇ܘܵܠܬܐ. ܟܲܕܸ ܓܹܝܪ
ܤܠܸܩ̣ܘ ܗ̄ܘ̣ܵܘ ܠܘܵܬܼ ܡܲܠܟܵܐ: ܐܝܠܹܝܢ ܕܐܲܡܪܲܚ̣ܘ ܗ̄ܘ̣ܵܘ ܥܲܠ
ܢܵܡܘܿܤܵܐ ܕܤܵܡ̣ ܠܗܘܿܢ ܗ̤ܘ ܩܲܢܕܝܼܕܝܵܢܘܿܣ ܘܐܲܝܠܹܝܢ ܕܤܥܲܪܘ
ܠܘܵܬܼܗܘܿܢ: ܓܲܠܝܵܐܝܼܬܼ ܠܟܼܠܗܘܿܢ ܥ̣ܒܲܕܼ ܦܘܼܢܵܝ ܦܸܬܼܓܼܵܡܵܐ: ܗܵܘ̇
pb. 176
ܕܫܵܘܹ̇ܐ ܕܬܸܫܡ̱ܥܘܼܢܵܝܗܝ. ܕܡܸܢܹܗ ܬܹܐܠܦܘܼܢ ܟܠܟܼܘܿܢ ܐܲܟܼܚ̄ܕܼܵܐ:
ܐܲܝܟܲܢܵܐ ܠܟܼܠܗܘܿܢ ܚܲܝܸܒܼ ܐܸܢܘܿܢ ܠܝܼ ܐܲܠܵܗܵܐ ܡ̣ܢ ܦܘܼܡܗܘܿܢ ܒܹܗ
ܒܹܝܬܼ ܕܝܼܢܵܐ.
ܡ̣ܢ ܟܬܼܝܼ̈ܒܼܵܬܼܵܐ ܕܡܲܠܟܿܘܼܬܼܵܐ: ܕܐܸܫܬܲܕܲܪ ܒܝܲܕܼ ܦܵܠܕܝܼܘܿܣ
ܡܲܓܸܤܛܪܝܼܵܢܘܿܣ.
ܝܸܠܦܲܬ̤ ܡܲܠܟܿܘܼܬܲܢ ܡ̣ܢ ܡܸܕܸܡ ܕܲܟܼܬܲܒܼ ܠܲܢ ܡܫܲܒܿܚܵܐ ܩܘܿܡܹܣ
ܩܲܢܕܝܼܕܝܵܢܵܐ ܕܹܩܲܬܤܝܼܡܘܿܢ ܕܘܿܡܲܤܬܝܼܩܘܿܢ: ܕܒܲܫܓܼܘܼܫܝܵܐ ܘܲܕܼܠܵܐ
ܒܘܵܠܝܼܬܼܵܐ ܗܘ̤ܵܐ ܡܸܕܸܡ ܕܲܗܘ̤ܵܐ ܒܐܲܦܸܤܘܿܣ ܡܝܼܛܪܵܦܘܿܠܝܼܣ.
ܟܲܕܼ ܥܕܲܟܹܝܠ ܠܵܘ ܟܠܗܘܿܢ ܕܵܚܵܠܲܚ̈ ܐܲܠܵܗܵܐ ܐܲܦܸܤܩ̈ܘܿܦܹܐ ܗܵܢܘܿܢ
ܕܫܲܕܪܹܬܼ ܗ̄ܘܹ̇ܝܬܼ ܕܢܸܬܼܟܲܢܫܘܼܢ ܐܸܬܼܟܲܢܲܫܘ ܗ̄ܘ̣ܵܘ: ܘܟܲܕܼ ܛܵܒܼ ܩܲܪܝܼܒܼܵܐ
ܗ̄ܘ̣ܵܬܼ ܡܹܐܬܼܝܼܬܹܗ ܕܩܲܕܝܼܫܵܐ ܝܘܿܚܲܢܵܢ ܐܲܦܸܤܩܘܿܦܵܐ ܕܐܲܢܛܝܵܟܼܝܵܐ ܥܲܡ
ܡܝܼܛܪ̈ܵܦܘܿܠܹܝܛܹܐ ܐ̄ܚܪ̈ܵܢܹܐ. ܘܬܼܘܼܒܼ: ܕܐܵܦܠܵܐ ܗܸܢܘܿܢ ܗܵܠܹܝܢ ܕܩܲܪܒܼܝܼܢ
ܗ̄ܘ̣ܵܘ ܐܸܬܼܚܲܒܼܘ ܗ̄ܘ̣ܵܘ ܥܲܡܗܘܿܢ: ܐܵܘ ܫܠܸܡ̣ܘ ܗ̄ܘ̣ܵܘ ܠܲܚܕܼܵܕܹ̈ܐ:
ܘܬܼܘܼܒܼ: ܕܐܵܦܠܵܐ ܒܥܵܬܼܵܐ ܕܗܲܝܡܵܢܘܼܬܼܵܐ ܐܲܝܟܼ ܕܙܵܕܹܩ ܗ̄ܘ̣ܵܐ
ܗܘ̤ܵܬܼ: ܐܵܘ ܐܲܝܟܼ ܟܬܼܝܼ̈ܒܼܵܬܼܵܐ ܕܲܒܼܟܼܠܙܒܲܢ ܡܸܫܬܲܕܪ̈ܵܢ ܗ̣̄ܘܲܝ̈ ܡܸܢܲܢ. ܐܸܠܵܐ
ܝܑܼܕܼܝܼܥܵܐ ܗ̣̄ܝ ܒܥܸܠܕܒܼܵܒܼܘܼܬܼܵܐ ܕܐ̄ܢܵܫ̈ܝܼܢ ܨܝܕܼ ܐ̄ܢܵܫ̈ܝܼܢ: ܘܡܸܛܠ ܗܵܕܹܐ
ܐܸܬܼܚܲܦܲܛܘ ܕܐܲܝܟܼ ܡܲܤܒܿܪܵܢܘܼܬܼܗܘܿܢ ܢܸܤܥܪܘܼܢ. ܟܲܕܼ ܠܵܐ ܐܸܬܼܡܨܝܼܘ:
ܘܐܵܦܠܵܐ ܕܲܒܼܬܲܚܦܝܼܬܼܵܐ ܢܸܬܼܚܲܫܚܘܼܢ: ܐܵܘ ܕܢܸܤܬܲܒܼܪܘܼܢ ܗ̄ܘ̣ܵܘ ܠܐ̄ܢܵܫ
ܕܲܒܼܚܘܼܫܵܒܼܵܐ ܤܥܲܪܘ ܡܸܕܸܡ ܕܲܤܥܲܪܘ: ܡܸܛܠ ܗܵܕܹܐ ܐܸܬܼܚܲܙܝܲܬ̤
pb. 177
ܠܡܲܠܟܿܘܼܬܲܢ: ܕܠܵܐ ܢܸܗܘܸܐ ܐܝܼܬܼ ܠܐ̄ܢܵܫ ܐܲܬܼܪܵܐ ܠܡܲܪܵܚܘܼܬܼܵܐ: ܘܲܗܘ̤ܵܐ
ܒܲܛܝܼܠ ܟܠܡܸܕܸܡ ܕܲܗܘ̤ܵܐ ܡܸܢܗܘܿܢ ܒܠܵܐ ܘܵܠܝܼܬܼܵܐ. ܘܡܸܠܹ̈ܐ
ܕܡܸܛܠ ܗܲܝܡܵܢܘܼܬܼܵܐ ܢܸܬܼܒܲܚ̈ܢܵܢ ܠܘܼܩܕܲܡ: ܐܲܝܟܼ ܕܐܸܬܼܚܲܙܝܲܬ̤ ܠܲܢ:
ܘܐܲܝܟܼ ܕܫܸܪܲܬ̤ ܗ̄ܘ̣ܵܬܼ ܘܲܫܦܲܪ ܐܵܦ ܠܓܼܵܘܵܐ ܕܤܘܼܢܗܵܕܘܿܣ. ܘܗܵܠܹܝܢ
ܕܡܟܹܝܠ ܘܲܠܗܲܠ ܢܸܠܒ̈ܟܼܵܢ: ܟܲܕܼ ܠܵܐ ܡܩܲܒܿܠܵܐ ܥܠܹܝܗ̇ ܡܲܐܟܿܘܼܬܲܢ
ܐܲܝܠܹܝܢ ܕܒܲܡܩܲܕܡܘܼܬܼ ܫܟܼܵܚܬܼܵܐ ܡܕܲܪܡܵܐܝܼܬܼ ܗ̤ܘܲܝ̈܀ ܗܵܠܹܝܢ
ܕܡܲܠܟܵܐ ܐܸܢܹܝܢ.
ܫܡܲܥܘ ܕܹܝܢ ܐܵܦ ܠܐܲܢܵܦ̇ܘܿܪܵܐ ܕܫܲܕܲܪܘ ܗܵܠܹܝܢ ܠܡܲܠܟܵܐ: ܕܒܹܗ
ܡܩܲܛܪ̱ܓܼܝܼܢ ܗ̄ܘ̣ܵܘ ܠܩܲܢܕܝܼܕܝܵܢܘܿܣ: ܐܲܝܟܼ ܡ̇ܢ ܕܡܸܛܠ ܪܵܚܡܘܼܬܼܵܐ
ܕܝܼܠܝ ܕܲܓܸܠ̣ ܐܸܢܘܿܢ: ܘܫܲܪܝܼܪܬܵܐ ܠܵܐ ܐܵܘܕܥܹܗ ܠܡܲܠܟܵܐ:
ܘܲܡܩܝܼܡܝܼܢ ܠܐܲܝܠܹܝܢ ܕܲܤܥܲܪܘ ܠܘܼܩܒܲܠܝ. ܡ̣ܢ ܗܵܠܹܝܢ ܓܹܝܪ
ܬܸܕܲܥܘܼܢ ܝܲܬܿܝܼܪܵܐܝܼܬܼ ܠܓܼܘܼܡܕܗܘܿܢ ܐܲܟܲܚ̄ܕܼ ܘܲܠܫܲܒܼܪܘܼܬܼܗܘܿܢ: ܐܲܝܟܼ
ܕܲܠܘܵܬܼ ܛܲܠܝܵܐ ܡܸܫܬܿܥܹܝܢ ܗ̄ܘ̣ܵܘ: ܘܲܡܲܒܲܤܪܝܼܢ ܥܲܠ ܡܲܦܲܩ ܒܪܘܼܚܵܐ
ܕܲܠܘܵܬܹܗ. ܡܸܬܼܪܫܹܝܢ ܗ̄ܘ̣ܵܘ ܓܹܝܪ: ܕܡܸܛܠ ܐܲܝܕܵܐ ܩܕܼܵܡ
ܕܬܸܬܼܟܲܢܲܫ ܟ̱ܠܵܗ̇ ܤܘܼܢܗܵܕܘܿܣ: ܥܒܲܕܬܿܘܿܢ ܤܘܼܢܗܵܕܘܿܣ
ܡܢܵܬܼܢܵܐܝܼܬܼ. ܐܲܝܟܼ ܕܡ̣ܢ ܗܵܕܹܐ ܡܸܬܼܚܵܘܹܝܬܿܘܿܢ: ܕܠܵܐ ܗ̄ܘ̣ܵܐ ܒܕܼܚܠܲܬܼ
ܐܲܠܵܗܵܐ: ܐܸܠܵܐ ܒܲܒܼܥܸܠܕܒܼܵܒܼܘܼܬܼܵܐ ܐ̄ܢܵܫܵܝܬܼܵܐ ܟܠܗܹܝܢ ܤܥܲܪܬܿܘܿܢ: ܘܠܵܘ
ܒܬܹܐܪܬܵܐ ܕܟܼܝܼܬܼܵܐ ܢܛܲܪܬܿܘܿܢܬ ܕܬܸܬܼܟܲܢܲܫ ܟ̱ܠܵܗ̇ ܤܘܼܢܗܵܕܘܿܣ.
ܘܡܸܕܼܡ ܥܲܠ ܗܵܠܹܝܢ ܠܵܐ ܥܒܲܕܼܘ ܠܹܗ ܦܘܼܢܵܝ ܦܸܬܼܓܼܵܡܵܐ: ܐܸܠܐ
ܕܐܒܿܬܹܝܗ̇ ܐܲܝܟܼ ܕܐܸܬܼܩܲܛܪܲܓܼܘ.
pb. 178
ܡ̣ܢ ܐܲܢܵܦ̇ܘܿܪܵܐ ܕܩܘܼܪܸܠܘܿܣ ܕܐܸܬܲܕܲܪ ܠܡܲܠܟܵܐ: ܠܘܼܩܒܲܠ
ܐܲܢܵܦ̇ܘܿܪܵܐ ܕܫܲܕܲܪ ܩܲܢܕܝܼܕܝܵܢܘܿܣ.
ܒܗܵܠܹܝܢ ܡܸܬܼܚܵܘܹܝܢܲܢ: ܕܐܵܦܠܵܐ ܚܕܼܵܐ ܒܥܸܠܕܒܼܵܒܼܘܼܬܼܵܐ ܠܘܘܼܩܒܲܠ
ܢܸܤܛܘܿܪܝܼܣ ܐܲܙܝܼܥܢܲܢ: ܐܸܠܵܐ ܗܵܘ̇ ܝܘܼܠܦܵܢܵܐ ܕܕܼܚܸܠܲܬܼ
ܐܲܠܵܗܵܐ ܤܵܡܲܢܲܢ. ܠܗܵܘ̇ ܕܟܲܕ ܦܲܚܸܡܢ ܥܲܡ ܗܵܘ̇ ܕܢܸܤܛܘܿܪܝܼܣ:
ܐܸܬܼܚܵܘܝܼ ܗܵܘ̇ ܕܲܩܢܸܐ ܡܲܟܿܤܵܢܘܼܬܼܵܐ. ܘܡ̣ܢ ܐܸܓܿܪ̈ܵܬܼܵܐ ܐܲܝܠܹܝܢ
ܕܐܸܬܼܟܹܬܸܒܼ ܡ̣ܢ ܢܸܤܛܘܿܪܝܼܣ: ܘܡ̣ܢ ܬܘܼܪ̈ܓܵܡܹܐ ܐܲܠܝܹܝܢ
ܕܐܸܬܿܬܲܪܓܲܡܘ ܡܸܢܹܗ: ܓܲܠܝܵܐܝܼܬܼ ܓܙܵܪ ܕܝܼܢܵܐ ܐܦܸܩܢܲܢ: ܟܲܕܼ ܤܝܼܡ
ܐܹܘܲܢܓܲܠܝܼܘܿܢ ܩܲܕܝܼܫܵܐ ܒܲܡܨܲܥܬܼܵܐ: ܘܲܡܚܵܘܹܝܢܲܢ ܠܹܗ ܠܲܡܫܝܼܚܵܐ
ܡܵܪܐ ܕܟܼܠ ܕܩܲܪܝܼܒܼܘܼ.
ܢܸܤܛܘܿܪܝܼܣ. ܐܲܝܟܼ ܐܲܝܠܹܝܢ ܕܥܲܠ ܥ̇ܒܼܵܪ ܥܲܠ ܡܵܘ̈ܡܵܬܼܵܐ
ܡܸܬܼܪܫܹܝܢ ܗ̄ܘ̣ܵܘ: ܒܡܵܘ̈ܡܵܬܼܵܐ ܡܦܝܼܤܝܼܢ ܗ̄ܘ̣ܵܘ ܕܠܵܐ ܥܒܲܪܢ ܥܲܠ
ܡܵܘ̈ܡܵܬܼܵܐ: ܘܠܵܘ ܥܠܲܝܗܘܿܢ ܕܤܘܼܥܪ̈ܵܢܹܐ ܥܲܒܼܕܘܼܗܝ ܠܲܦܝܵܤܗܘܿܢ.
ܡܸܬܼܪܫܹܝܢ ܗ̄ܘ̣ܵܘ ܓܹܝܪ: ܡܸܛܠ ܐܲܝܕܵܐ ܥܒܲܪܬܿܘܿܢ ܥܲܠ ܬܚܘܼܡܵܐ ܕܓܼܵܘܵܐ:
ܘܠܵܐ ܩܵܘܝܼܬܿܘܿܢ ܠܟܼܠܵܗ̇ ܤܘܼܢܗܵܕܘܿܣ: ܐܲܝܟܼ ܕܐܵܦ ܐܸܬܼܩܪܝܼܬܿܘܿܢ
ܐܲܟܲܚ̄ܕܼ ܟܠܟܼܘܿܢ؟ ܘܠܵܐ ܡܸܕܸܡ ܠܘܵܬܼ ܗܵܕܹܐ ܦܲܢܝܼܘ ܦܸܬܼܓܼܵܡܵܐ.
ܘܲܕܡܸܛܠ ܐܲܝܕܵܐ ܥܠܹܝܗ̇ ܕܗܵܕܹܐ ܓܵܘܵܢܵܐܝܼܐܼ ܠܵܐ ܐܸܬܼܡܲܠܲܟܼܘ
ܐܲܦܸܤܩ̈ܘܿܦܹܐ: ܐܲܝܠܹܝܢ ܕܩܲܪܝܼܒܼܝܼܢ ܗ̄ܘ̣ܵܘ ܥܲܡ ܚܲܒܼܪ̈ܲܝܗܘܿܢ
pb. 179
ܕܲܠܘܵܬܼܗܘܿܢ: ܐܸܢܗ̤ܘ ܕܙܵܕܹܩ ܕܲܬܼܩܵܘܘܿܢ ܟܠܟܼܘܿܢ؟ ܐܵܦ ܠܵܐ
ܠܘܵܬܼ ܗܵܕܹܐ ܡܸܕܸܡ ܦܲܢܝܼܘ. ܡܸܛܠ ܐܲܝܕܵܐ ܠܵܘ ܒܫܲܠܡܘܼܬܼܵܐ ܕܓܼܵܘܵܐ
ܤܥܲܪܬܿܘܿܢ ܗܵܕܹܐ: ܐܸܠܵܐ ܦܪܲܫܬܿܘܿܢ ܘܲܤܕܲܩܬܿܘܿܢ ܠܲܚܕܼܵܐ
ܤܘܼܢܗܵܕܘܿܣ ܡ̣ܢ ܐܦܸܤܩ̈ܘܿܦܹܐ ܐܲܝܠܹܝܢ ܕܩܲܪܝܼܒܼܝܼܢ ܗ̄ܘ̣ܵܘ: ܘܐܲܝܠܹܝܢ
ܕܲܥܬܼܝܼܕܝܼܢ ܗ̄ܘ̣ܵܘ ܕܢܹܐܬܼܘܿܢ: ܕܒܲܝܲܕܼ ܒܘܼܚܵܢܵܐ ܕܥܲܡܗܘܿܢ ܕܝܼܢܵܐ
ܕܗܲܡܵܢܘܬܼܵܐ ܢܸܬܿܬܲܚܲܡ؟ ܘܠܵܐ ܠܘܵܬܼ ܗܵܕܹܐ ܦܲܢܝܼܘ ܦܸܬܼܓܼܵܡܵܐ:
ܐܸܠܵܐ ܒܲܡܩܲܕܡܘܼܬܼܵܐ ܕܠܵܐ ܦܘܼܪܫܵܢܵܐ: ܘܲܒܼܫܲܠܡܘܼܬܼܵܐ ܕܐܲܝܠܹܝܢ
ܕܫܵܦܪ̈ܵܢ ܠܗܘܿܢ: ܒܲܕܼ ܠܵܐ ܨܲܒܼܵܘ ܕܢܸܗܘܘܿܢ ܥܲܡܗܘܿܢ ܕܲܝܢܹ̈ܐ:
ܥܒܲܕܼܘ ܐܸܢܘܿܢ ܠܗܘܿܢ ܢܘܼܟܼܪ݁ܵܝܹܐ ܕܗܲܝܡܵܢܘܼܬܼܵܐ. ܠܵܐ ܓܹܝܪ ܦܪܲܩ̣ܬܿ
ܡ̣ܢ ܡܕܲܪܡܘܼܬܼܵܟܼ: ܗܵܝ̇ ܕܡ̣ܢ ܫܘܼܪܵܝܵܐ ܒܵܗ̇ ܗܵܪܹܓܼ ܗ̣̄ܘܲܝܬܿ:
ܘܡܸܛܠܵܬܼܵܗ̇ ܠܡܵܪܘܿܕܼܘܼܬܼܵܐ ܢܬܲܦܬܵܝܗܝ ܐܵܦ ܠܐܲܦܸܤܩܘܿܦܵܐ
ܕܪܗܘܿܡܹܐ: ܘܒܲܛܸܠܬܿ ܤܘܼܢܗܵܘܿܣ ܬܹܒܹܝܠܵܝܬܼܵܐ. ܠܘܵܬܼ ܟܠܗܹܝܢ
ܗܵܠܹܝܢ: ܚܲܪ̈ܫܹܐ ܘܲܕܼܠܵܐ ܒܲܪܬܼ ܩܵܠܵܐ ܐܝܼܬܲܗܘܿܢ ܗ̄ܘ̣ܵܘ. ܡܸܛܠ
ܐܲܝܕܵܐ ܠܵܐ ܫܡܲܥܬܿܘܿܢ ܠܗܵܝ̇: ܕܲܩܕܼܵܡ ܕܟܼܠܗܘܿܢ ܐܲܦܸܤܩ̈ܘܿܦܹܐ
ܢܸܬܼܟܲܢܫܘܼܢ: ܠܵܐ ܬܸܥ̱ܒܿܕܼܘܼܢ ܤܘܼܢܗܵܕܼܘܿܣ ܡܢܵܬܼܵܢܵܐܝܼܬܼ؟ ܡܸܛܠ
ܐܲܝܕܼܵܐ: ܩܘܿܡܹܣ ܗܵܘ̇ ܕܐܸܫܬܲܕܲܪ ܟܵܠܹ̇ܐ ܗ̄ܘ̣ܵܐ ܠܟܼܘܿܢ: ܟܲܕܸ ܡܦܝܼܣ
ܗ̄ܘ̣ܵܐ ܕܲܬܼܩܵܘܘܿܢ ܠܐܲܝܠܹܝܢ ܕܩܲܪܝܼܒܼܝܼܢ ܗ̄ܘ̣ܵܘ ܐܲܦܸܤܩ̈ܘܿܦܹܐ ܘܠܵܐ
ܪܲܚܝܼܩܝܼܢ ܗ̄ܘ̣ܵܘ: ܠܑܵܐ ܩܵܘܝܼܬܿܘܿܢ ܠܗܘܿܢ؟ ܘܲܠܘܵܬܼ ܚܕܼܵܐ ܡ̣ܢ ܗܵܠܹܝܢ
ܠܵܐ ܥ̣ܒܲܕܼܘ ܦܘܼܢܝ ܦܸܬܼܓܼܵܡܵܐ. ܐܵܪܵܐ ܐܸܢ ܝܲܬܝܼܒܼ ܗ̄ܘ̣ܵܐ ܡܫܝܼܚܵܐ:
ܘܲܡܦܵܤܝܼܢ ܗ̣̄ܘܲܝܬܿܘܿܢ ܕܥܲܡܟܼܘܿܢ ܝܲܬܿܝܼܒܼ ܗܵܠܹܝܢ ܤܵܥ̇ܪܝܼܢ ܗ̣̄ܘܲܝܬܿܘܿܢ:
ܘܲܡܫܵܘܬܿܦܝܼܢ ܗ̣̄ܘܲܝܬܿܘܿܢ ܒܪܘܼܫܥܟܼܘܿܢ ܠܲܡܫܝܼܚܵܐ: ܕܗܵܟܲܢܵܐ
pb. 180
ܕܵܫܬܿܘܿܢܵܝܗ: ܐܲܝܟܼ ܐܲܝܢܵܐ ܕܠܵܐ ܡܸܫܟܲܚ ܕܢܲܟܸܿܤܟܼܘܿܢ: ܠܗܵܘ̇ ܕܗܵܟܲܢܵܐ
ܓܲܠܝܵܐܝܼܬܼ ܦܲܪܤܝܼܟܼܘܿܢ. ܡܢ ܐܲܝܟܵܐ ܓܹܝܪ ܡܲܤܒܿܪܝܼܢ ܗ̣̄ܘܲܝܬܿܘܿܢ
ܕܪܸܥܝܵܢܟܼܘܿܢ ܥܵ̇ܘܵܠܵܐ ܘܲܡܛܲܫܝܵܐ ܡܸܬܼܓܠܵܝܘܼ ܡܬܼܓܠܸܐ: ܕܩܲܕܼܡܬܿܘܿܢ
ܘܤܲܗܸܕܬܘܿܢ ܠܐܲܦܸܤܩ̈ܘܿܦܹܐ ܥܲܠ ܪܘܼܫܥܟܼܘܿܢ: ܘܐܵܦ ܠܩܘܿܡܹܣ
ܗܵܘ̇ ܕܲܦܩܝܼܕܼ ܗ̄ܘ̣ܵܠ ܥܠܲܝܟܿܘܿܢ: ܥܲܠ ܐܲܝܠܹܝܢ ܕܒܲܫܪܵܪܵܐ ܐܲܤܸܩ̣
ܒܐܲܢܵܦܘܿܪܵܐ ܠܡܲܠܵܦܘܼܬܹܗ ܠܡܲܠܟܵܐ؟
ܠܟܼܠܗܘܿܢ ܕܹܝܢ ܐܲܝܠܹܝܢ ܕܲܠܡܹܐܠܲܦ ܛܸܒܿܟܼܘܿܢ ܒܵܥܹ̇ܝܢ: ܒܝܲܕܼ
ܟܬܼܝܼ̈ܒܼܵܬܼܵܐ ܕܡܲܠܟܿܘܼܬܼܵܠ ܐܵܘ ܒܝܲܕܼ ܐܲܢܵܦ̇ܘܿܪ̈ܵܣ ܕܝܼܠܘܿܢ: ܟܠܗܹܝܢ
ܗܵܠܹܝܢ ܢܸܫܬܪܪ̈ܵܢ ܠܗܘܿܢ ܕܫܲܪܝܼܪ̈ܵܬܼܵܐ ܐܸܢܹܝܢ ܕܠܵܐ ܦܘܼܠܵܓܼ: ܕܠܵܐ
ܐܸܫܬܵܘܬܲܦܬܿܘܿܢ ܠܪܸܥܝܵܢܵܐ ܕܐܲܝܠܹܝܢ ܕܩܲܪܝܼܒܼܝܼܢ ܗ̄ܘ̣ܵܘ: ܘܲܦܠܲܓܼܬܿܘܿܢ
ܢܲܦܫܟܼܘܿܢ ܡ̣ܢ ܐܲܦܸܤܩ̈ܘܿܦܹܐ ܐܲܝܠܹܝܢ ܕܪ̈ܲܚܝܼܩܝܼܢ ܘܡ̣ܢ ܐܲܝܠܹܝܢ
ܕܩܲܝܼܒܼܝܼܢ: ܕܠܵܐ ܬܸܨܛܒܼܘܿܢ ܠܲܡܩܵܘܵܝܘܼ ܐܲܪܒܲܬܲܥܪܲܪ ܝܵܘܡ̈ܝܼܢ
ܟܲܕܼ ܤܲܓܿܝܼ. ܘܐܸܢܵܐ ܝܲܬܼܝܼܒܼ ܗ̄ܘܹ̇ܝܬܼ: ܟܲܕܼ ܡܸܕܸܡ ܠܵܐ ܐܵܡܲ݁ܪ ܐ̄ܢܵܐ
ܐܵܘ ܤܲܥܲ̇ܪ ܐ̄ܢܵܐ. ܘܒܲܡܨܲܥܬܼܟܼܘܿܢ ܝܲܬܼܝܼܒܼ ܗ̄ܘ̣ܵܐ ܡܫܝܼܚܵܐ:
ܗܵܘ̇ ܕܲܥܨܵܟܼܘܿܢ ܠܟܼܠܟܼܘܿܢ: ܕܥܲܠ ܐܲܦܲܝ̈: ܗܵܠܹܝܢ ܬܹܐܡܪܘܼܢ
ܘܬܸܥܒܿܕܼܘܼܢ. ܐܵܦܠܵܐ ܠܲܡ ܚܕܼܵܐ ܒܥܸܠܕܒܼܵܒܼܘܼܬܼܵܐ ܠܘܼܩܒܲܠ
ܢܸܤܛܘܿܪܝܼܣ ܐܲܙܝܼܥܢܲܢ. ܟܲܕܼ ܐܸܢܵܐ ܠܵܐ ܩܲܪܝܼܒܼ ܐ̄ܢܵܐ: ܒܥܸܠܕܒܼܵܒܼܵܐ
ܕܝܼܠܝܼ ܕܵܢ ܡܸܠܲܝ̈: ܘܦܲܚܸܡ ܐܸܢܹܝܢ ܥܲܡ ܐܲܝܠܹܝܢ ܕܒܼܵܥܹ̇ܐ ܗ̄ܘ̣ܵܐ: ܘܐܲܝܟܲܢܵܐ
ܕܒܼܵܥܹ̇ܐ ܗ̄ܘ̣ܵܐ. ܘܲܡܩܲܒܸܿܠ ܗ̄ܘܹ̇ܝܬܼ ܡܸܢܗܘܿܢ: ܕܐܵܦܠܵܐ ܚܕܼܵܐ
ܒܥܸܠܕܒܼܵܒܼܘܼܬܼܵܐ ܢܛܲܪܘ ܗ̄ܘ̣ܵܘ ܠܘܼܩܒܲܠܝ. ܡܲܢܘܼ ܡܲܡܪܲܚ ܕܢܹܐܡܲܪ
pb. 181
ܗܵܠܹܝܢ: ܟܲܕܼ ܚܵܙܹ̇ܐ ܗܵܠܹܝܢ ܟܠܗܘܿܢ ܪ̈ܘܼܫܥܹܐ ܘܡܲܪ̈ܵܚܘܵܬܼܵܐ ܕܲܒܼܗܹܝܢ
ܐܸܬܿܛܲܠܡܹ̇ܿܬܼ ܡܸܢܗܘܿܢ؟ ܘܠܵܐ ܗ̄ܘ̣ܵܐ ܝܲܬܿܝܼܪܵܐܝܼܬܼ ܕܲܫܥܬܼܵܐ ܢܸܤܬܲܒܼܪ̈ܲܢ؟
ܐܵܡ̇ܪܝܼܬܿܘܿܢ ܐܸܢܹܝܢ ܓܹܝܪ ܠܗܵܘ̇ ܕܡܲܟܸܿܣ ܗ̄ܘ̣ܵܐ ܠܟܼܘܿܢ ܥܲܠ
ܗܵܠܹܝܢ: ܕܲܒܼܥܸܠܕܒܼܵܒܼܘܼܬܼܵܐ ܤܵܥܪܝܼܬܿܘܿܢ ܠܘܵܬܼܝ؟ ܐܸܠܵܐ ܒܲܕܼܡܘܼܬܼܵܐ
ܕܐܲܝܠܹܝܢ ܕܡܵܚܹ̇ܝܢ ܠܐ̄ܢܵܫ ܘܥܵ̇ܠܵܐܝܼܬܼ ܡܦܲܪܤܹܝܢ ܠܹܗ: ܘܐܵܡ̇ܪܝܼܢ
ܠܹܗ: ܕܡܸܫܬܥܵܝܘܼ ܡܸܬܿܥܹܝܢܲܢ: ܠܐܝܢܵܐ ܕܒܲܫܥܬܼܵܐ ܟܹܐܡܲܬܼ ܪܵܫܹܐ
ܠܗܘܿܢ: ܘܲܕܼܠܵܐ ܗ̄ܘ̣ܵ ܒܥܸܠܕܒܼܵܒܼܘܼܬܼܵܐ: ܐܸܠܵܐ ܒܪܵܚܡܘܼܬܼܵܐ ܗܵܕܹܐ
ܤܵܥ̇ܪܝܼܢܲܢ: ܘܲܠܗܵܘ̇ ܡܫܲܡܪܝܼܢ ܠܹܗ ܥܲܪܛܸܠܵܐܝܼܬܼ: ܟܲܕܼ ܡܨܲܠܲܦ.
ܗܵܟܲܢܵܐ ܐܵܦ ܠܝܼ ܥ̣ܒܲܕܼ: ܟܲܕܼ ܡܸܬܼܪܫܝܼܢ ܘܪܵܫܹܝܢ. ܐܸܠܵܐ ܗܵܘ̇ ܕܲܝܵܢܵܐ
ܕܟܼܠ: ܠܲܝܬܿ ܠܹܗ ܕܲܫܥܵܬܼܵܐ ܗܵܕܹܐ ܢܸܤܥܘܿܪ. ܐܵܦܸܢ ܓܹܝܪ ܠܵܐ
ܗܘ̤ܵܐ ܠܝܼ ܒܹܝܬܼ ܕܝܼܢܵܐ ܐ̄ܢܵܫܝܵܐ ܒܟܼܠܗܹܝܢ ܗܵܠܹܝܢ: ܐܝܼܬܼ ܠܝܼ ܗܵܘ̇
ܕܲܡܫܝܼܚܵܐ.
ܐܸܠܵܐ ܠܲܡ ܒܵܥܹ̇ܝܢܲܢ ܡ̣ܢ ܐܘܼܚܕܼܵܢܟܼܘܿܢ: ܕܠܵܐ ܢܸܫܬܘܸܐ ܐ̄ܢܵܫ
ܠܡܸܬܼܩܲܒܵܠܘܼ: ܡ̣ܢ ܐܲܝܠܹܝܢ ܕܲܡܝܲܩܪܝܼܢ ܠܚܘܼܒܵܐ ܕܒܲܪܢܵܫܵܐ ܡ̣ܢ
ܕܚܠܲܬܼ ܐܲܠܵܗܵܐ. ܒܕܲܐܝܟܼ ܗܵܢܵܐ ܓܹܝܪ ܨܒܼܝܵܢܵܐ ܐܲܪܓܸܫܢܲܢ: ܕܐܝܼܬܼ ܠܢܲܟܼܦܵܐ
ܝܘܿܚܲܢܵܢ ܐܲܦܸܤܩܘܿܦܵܐ ܕܐܲܢܛܝܵܟܼܝܵܐ: ܕܒܼܵܥܹ̇̄ܐ ܠܲܡܫܲܟܵܢܘܼ ܪܸܚܡܬܼܵܐ
ܝܲܬܿܝܼܪܵܐܝܼܬܼ: ܐܵܘ ܕܡܸܕܸܡ ܕܦܵܩ̇ܚ ܠܗܲܝܡܵܢܘܼܬܼܵܐ ܢܸܬܼܚܲܫܲܒܼ. ܘܥܲܠ
ܗܵܝ̇: ܠܵܐ ܡ̣ܢ ܠܘܼܚܵܡܵܐ ܕܐܘܼܚܕܵܢܟܼܘܿܢ ܕܚܸܠ̣: ܘܠܵܐ ܒܲܛܢܵܢܵܐ
ܕܗܲܝܡܵܢܘܼܬܼܵܐ ܡܸܬܿܬܿܙܝܼܥ: ܗܵܝ̇ ܕܡ̣ܢ ܠܥܸܠ ܐܸܫܬܲܠܡܲܬ̤ ܠܲܢ. ܐܸܠܵܐ
ܠܤܘܼܢܵܗܵܕܘܿܣ ܩܲܕܝܼܫܬܼܵܬ ܬܲܗܝܼ ܝܵܘ̈ܡܬܼܵܐ ܥܸܤܪܝܼ ܘܚܲܕܼ: ܡ̣ܢ ܒܵܬܲܪ
pb. 182
ܦܪܵܬܘܿܙܡܝܼܵܐ ܕܐܸܬܼܝܲܗܒܲܬ̤ ܠܲܢ ܡ̣ܢ ܐܘܼܚܕܵܢܟܼܘܿܢ. ܘܐܸܬܼܐܠܸܨܢ ܡ̣ܢ
ܐܵܪ̈ܬܵܕܘܿܟܿܤܹܐ ܕܤܘܼܢܗܵܕܘܿܣ ܩܲܕܝܼܫܬܼܵܐ: ܐܲܝܠܹܝܢ ܕܲܠܗܲܝܡܵܢܘܼܬܼܵܐ
ܒܲܠܚܘܿܕܼ ܡܲܚܒܼܝܼܢܲܢ: ܕܢܸܒܼܥܹܐ ܗܵܠܹܝܢ ܕܐܝܼܬܲܝܗܹܝܢ ܕܕܸܚܠܲܬܼ ܐܲܠܵܗܵܐ.
ܢܸܤܛܘܿܪܝܼܣ. ܐܵܪܵܐ ܠܵܘ ܓܲܠܝܵܐܝܼܬܼ ܒܸܠܥܵܕܼ ܡ̣ܢ ܬܲܚܦܝܼܬܼܵܐ
ܡܸܕܸܡ ܐܵܘܕܥܘܼܗܝ ܠܨܒܼܝܵܢܗܘܿܢ: ܕܠܵܘ ܡܸܛܠ ܕܲܫܚܝܼܩܘܼܢ ܗ̄ܘ̣ܵܘ
ܘܲܥܡܝܼܠܝܼܢ ܗ̄ܘ̣ܵܘ ܒܟܼܘܼܪܗܵܢܵܐ ܘܲܒܼܡܵܘܬܵܐ ܘܒܲܡܙܲܠܗܙܘܼܬܼܵܐ
ܕܚܲܝܹ̈ܗܘܿܢ ܠܵܐ ܐܵܬܼ݂ܵܐ ܠܕܝܼܢܵܐ: ܐܸܠܵܐ ܒܲܕܼ ܕܵܚ̇ܠܝܼܢ ܗ̄ܘ̣ܵܘ ܡ̣ܢ ܕܝܼܢܵܐ
ܕܡ̣ܢ ܟܠ ܐ̄ܢܵܫ: ܘܲܩܕܼܵܡ ܟܠܢܵܫ ܥܲܒܼܕܘܼܗܝ ܠܕܼܝܼܢܵܐ: ܩܕܼܵܡ
ܕܢܹܐܬܸܐ ܐܲܦܸܤܩܘܿܦܵܐ ܕܐܲܢܛܝܵܟܼܝܵܐ؟ ܡܵܢܵܐ ܓܹܝܪ ܡܵܘܬܿܪܵܐ ܗ̄ܘ̣ܬܼ ܠܝܼ
ܡܫܵܘܚܪܘܼܬܼܵܐ ܕܥܸܤܪܝܼܢ ܝܵܘܡ̈ܝܼܢ: ܐܵܘ ܠܟܼܘܿܢ ܡܵܢܵܐ ܡܲܗܢܝܵܐ ܗ̄ܘ̣ܵܬܼ
ܠܟܼܘܿܢ؟ ܗ̤ܘ ܓܹܝܪ ܗܵܘ̇ ܕܡܸܬܼܥܒܸܕܼ ܗ̄ܘ̣ܵܐ ܡ̣ܢ ܒܵܬܲܪ ܬܠܵܬܼܝܼܢ
ܝܵܘܡ̈ܝܼܢ: ܗ̤ܘ ܗܵܢܵܐ ܐܵܦ ܡ̣ܢ ܩܕܼܵܡ ܟܠܗܘܿܢ ܐܵܦ ܡ̣ܢ ܒܵܬܲܪ
ܟܠܗܘܿܢ ܡܸܫܟ̇ܚܵܐ ܗ̄ܘ̣ܵܬܼ ܕܢܸܬܼܥ̱ܒܸܕܼ. ܝܲܬܿܝܼܪܵܐܝܼܬܼ ܓܹܝܪ ܐܸܢ ܪܵܚܡܘܼܬܼܵܐ
ܡܫܲܟܸܢ ܗ̄ܘ̣ܵܐ ܠܘܵܬܼܝ: ܙܵܚܹܩ ܗ̄ܘ̣ܵܐ ܕܡܸܩܕܲܡ ܢܸܩܕܘܿܡ ܘܢܲܕܪܟܲܢܝ:
ܘܢܦܝܼܣ ܗ̄ܘ̣ܵܐ ܠܤܲܓܿܝܼ̈ܐܹܐ ܐܲܝܠܹܝܢ ܕܲܗܦܝܼܟܼܝܼܢ ܗ̄ܘ̣ܵܘ ܡܹܢܝ: ܘܠܵܐ
ܢܲܪܦܸܐ ܗ̄ܘ̣ܵܐ ܕܬܸܥܒܿܕܼܘܼܢ ܗܵܘ̇ ܡܵܐ ܕܲܥܒܲܕܬܿܘܿܢ: ܡܸܛܠ
ܕܡܸܬܼܟܼܠܹܝܢ ܗ̣̄ܘܲܝܬܿܘܿܢ ܡܸܢܹܗ: ܘܐܸܠܵܐ ܕܠܵܐ ܬܸܗܘܸܐ ܡܸܬܼܒܲܚܢܵܢܘܼܬܼܵܐ:
ܡܸܬܼܚܲܫܲܚ ܗ̣̄ܘܲܝܬܿ ܒܟܼܠ ܦܘܼܪ̈ܤܝܼܢ: ܐܲܝܟܼ ܕܢܸܬܼܚܲܒܲܠ ܕܝܼܢܵܐ. ܬܸܗܘܸܐ
ܗܵܕܹܐ. ܙܵܕܹܩ ܗ̄ܘ̣ܵܐ ܠܟܼܘܿܢ ܗܵܟܹܝܠ ܝܲܬܿܝܼܪܵܐܝܼܬܼ ܠܲܡܩܵܘܵܝܘܼ ܠܹܗ:
ܕܢܸܗܘܸܐ ܒܘܼܚܵܢܵܐ: ܘܠܵܐ ܬܸܬܿܠܘܼܢ ܠܝܼ ܥܸܠܬܼܵܐ ܕܲܥܪܘܼܩܝܵܐ. ܐܸܠܵܐ
ܘܠܵܐ ܚܕܼܵܐ ܡ̣ܢ ܗܵܠܹܝܢ ܫܲܪܝܼܪܵܐ. ܬܸܗܘܸܐ ܗܵܟܹܝܠ ܟܲܕܼ ܝܵܗܹ̇ܒܼ ܐ̄ܢܵܐ
pb. 183
ܠܟܼܘܿܢ ܕܩܵܘܝܼܬܿܘܿܢ ܕܢܸܗܘܸܐ ܕܝܼܢܵܐ: ܡܸܛܠ ܐܲܝܕܵܐ ܠܵܘ ܐܲܝܟܼ
ܦܘܩܕܵܢܵܐ ܕܡܲܠܟܵܐ ܤܥܲܪܬܿܘܿܢ؟ ܡܚܵܘܹ̇ܝܢ ܗ̣̄ܘܲܝܬܿܘܿܢ ܓܹܝܪ: ܕܠܵܘ
ܡܸܛܠ ܗܵܕܹܐ ܥܒܲܕܬܿܘܿܢ: ܐܸܠܵܐ ܠܵܐ ܩܵܝܘܼܬܿܘܿܢ: ܡܵܕܹܝܢ ܒܟܼܠܗܹܝܢ
ܡܸܬܼܓܿܠܸܐ ܫܚܵܩܟܼܘܿܢ ܡ̣ܢ ܫܘܼܪܵܝܵܐ: ܕܡܸܛܠ ܕܲܕܚܸܠ̣ ܕܠܵܐ
ܢܹܐܬܸܐ ܠܒܼܘܼܚܵܢܵܐ ܘܲܠܕܝܢܵܐ ܤ̣ܥܲܪ ܗ̄ܘ̣ܵܐ ܗܵܕܹܐ. ܘܕܐܝܼܬܼ ܗ̄ܘ̣ܵܐ
ܒܗܵܕܹܐ ܕܵܘ̇ܝܵܐ: ܘܡܸܬܼܦܲܪܲܣ ܗ̄ܘ̣ܵܐ ܠܲܡܥܲܬܵܕܼܘܼ ܠܗܵܠܹܝܢ ܟܠܗܹܝܢ.
ܐܸܢܘܗ̤ܘ ܗܵܟܹܝܠ ܕܲܬܼܟܼܝܼܠ ܗ̣̄ܘܲܝܬܿ ܒܐܲܝܠܹܝܢ ܕܲܟܼܬܲܒܼܬܿ: ܘܐܝܼܬܼ
ܗ̄ܘ̣ܵܘ ܠܵܟܼ ܐܲܝܠܹܝܢ ܕܤܵܗ̇ܕܝܼܢܡ ܗ̄ܘ̣ܵܘ ܠܵܟܼ: ܗܵܢܵܘ ܕܹܝܢ ܐܲܒܼ̈ܗܵܬܼܵܐ
ܘܲܟܼܬܼܵܒܹ̈ܐ ܩܲܕܝܼ̈ܫܹܐ: ܪܲܫܹ̇ܐ ܗ̣̄ܘܲܝܬܿ ܠܝܼ ܐܲܝܟܼ ܐܲܝܢܵܐ ܕܡܸܛܠ ܗܵܕܹܐ
ܥܵܒܼ̇ܕܼܬܼ ܐܲܝܠܹܝܢ ܕܥܸܒ̇ܕܼܬܼ: ܒܲܒܼܥܸܠܕܒܼܵܒܼܘܼܬܼܵܐ ܘܠܵܘ ܒܲܫܪܵܪܵܐ. ܘܥܵܕܹܠ
ܗ̣̄ܘܲܝܬܿ ܠܝܼ: ܕܥܲܠ ܠܵܐ ܡܼܕܸܡ ܫܓܲܫܬܵܗ̇ ܠܬܹܒܹܝܠ: ܟܲܕܼ ܐܲܪܡܝܼ̇ܬܼ
ܒܥܵܬܼܵܐ ܕܗܲܪ̈ܵܛܝܼܩܹܐ ܘܕܼܵܐܪ̈ܬܼܕܘܿܟܿܤܹܐ. ܘܲܠܗܵܠܹܝܢ ܙܵܕܹܩ ܗ̄ܘ̣ܵܐ ܠܵܟܼ
ܕܬܸܟܼܬܿܘܿܒܼ ܠܘܵܬܼ ܡܲܠܟܵܐ: ܘܲܠܟܼܠܗܹܝܢ ܐ̄ܚܪ̈ܵܢܝܬܼܵܐ: ܐܸܢܗ̤ܘ ܕܡܸܛܠ
ܗܵܕܹܐ ܡܲܤܒܲܪ ܐܲܢ̄ܬܿ ܕܲܗ̤ܘܲܝ̈ ܐܲܝܠܹܝܢ ܕܲܥܒܲܕܬܿ: ܐܲܝܟܼ ܗܵܘ̇ ܕܐܸܢܵܐ
ܡ̣ܢ ܕܝܼܢܵܐ ܥܵܪܹܩ ܐ̄ܢܵܐ: ܡܸܛܠ ܕܠܵܐ ܬܟܼܝܼܠ ܐ̄̈ܢܵܐ ܥܲܠ ܐܲܝܠܹܝܢ
ܕܟܸܬܼ̇ܒܹܬܼ. ܐܸܠܵܐ ܐܲܝܟܼ ܐܲܝܠܹܝܢ ܕܒܲܒܼܥܸܠܕܒܼܵܒܼܘܼܬܼܵܐ ܘܠܵܘ ܒܲܫܪܵܪܵܐ
ܥ̣ܒܲܕܼܘ ܗܵܕܹܐ: ܡ̣ܢ ܕܝܼܢܵܐ ܥܪܲܩ̣ܘ. ܘܲܓܼܒܲܠܘ ܟܲܕܼ ܐܵܡ̇ܪܝܼܢ: ܕܲܗܘ̤ܵܐ
ܕܝܼܢܵܐ ܘܒܼܘܼܚܵܢܵܐ: ܟܲܕܼ ܚܕܼܵܐ ܡ̣ܢ ܗܵܠܹܝܢ ܠܵܐ ܗ̤ܘܲܝ̈. ܢܹܐܬܸܐ ܢܸܬܿܬܿܕܝܼܢ:
ܢܸܬܸܿܠ ܡܸܠܬܼܵܐ ܥܲܠ ܐܲܦܲܝ̈ ܐܲܠܝܹܢ ܕܡܸܬܼܪ̱̣ܫܸܐ: ܘܢܸܤܲܒܼ ܡܸܠܬܼܵܐ ܥܲܠ
ܐܲܦܲܝ̈ ܐܲܝܠܹܝܢ ܕܪܵܫܹܐ: ܘܢܸܗܘܸܐ ܕܝܼܢܵܐ ܕܲܬܼܪ̈ܲܝܗܘܿܢ ܕܠܵܐ ܥܘܼܘܵܟܼܵܐ.
pb. 184
ܐܹܝܢ ܩܕܼܵܡ ܬܠܝܼܬܼܵܝܘܼܬܼܵܐ: ܕܥܲܠ ܐܲܦܹܝ̈ܗ̇ ܤܸܥ̇ܪܹܬܼ ܟ̱ܠܵܗ̇ ܚܦܝܼܛܘܼܬܼܵܐ.
ܡܛܸܠ ܐܲܝܕܵܐ ܓܹܝܪ ܒܐܲܝܠܹܝܢ ܕܐܸܢܵܐ ܬܟܼܝܼܠ ܐ̄ܢܵܐ: ܐ̄ܚܪܵܢܹܐ ܡܸܬܼܟܲܫܠܝܼܢ؟
ܗܵܠܹܝܢ ܫܲܦܠܵܝ̈ܗܝ ܠܚܲܝܠܵܟܼ. ܘܝܵܕܲܥ ܗ̣̄ܘܲܝܬܿ ܕܫܲܪܝܼܪ̈ܵܢ ܘܡܸܫ̈ܟܿܚܢ
ܠܲܡܦܵܤܘܼ: ܐܸܠܵܐ ܠܵܐ ܐܸܡ݂ܲܪܬܿ ܘܠܵܐ ܐܸܬܿܬܿܟܸܠܬܿ: ܘܠܵܐ ܟܲܕܼ ܓܵܒܹ̇ܠ
ܐܲܢ̄ܬܿ ܐܸܡ݂ܲܪ ܒܒܲܪܬܼ ܩܵܠܵܟܼ ܗܵܝ̇ ܕܚܝܼܠܬܼܵܐ ܘܙܝܼܥܬܼܵܐ: ܕܢܸܗܘܸܐ
ܕܝܼܢܵܐ: ܘܬܸܬܼܝܼܗܸܒܼ ܡܸܠܬܼܵܐ: ܘܬܸܬܼܦܲܢܸܐ ܒܫܘܼܐܵܠܵܐ ܘܲܒܼܦܘܼܢܵܝ
ܦܸܬܓܼܵܡܵܐ. ܠܒܼܝܼܟܼܵܐ ܗ̄ܘ̣ܵܬܼ ܓܹܝܪ ܒܲܪܬܼ ܩܵܠܵܟܼ ܡ̣ܢ ܬܹܐܪܬܵܟܼ.
ܐܸܵܠܵܐ ܡܵܢܵܐ ܠܲܡ؟ ܡܸܬܼܟܲܫܦܝܼܢܲܢ ܘܒܼܵܥܹ̇ܝܢܲܢ ܡ̣ܢ ܐܘܼܚܕܵܢܟܼܘܿܢ: ܡܸܛܠ
ܕܢܸܬܼܝܼܕܲܥ ܫܩܵܠ ܛܲܥܢܵܐ ܕܤܘܼܢܗܵܕܘܿܣ ܕܒܲܛܢܵܢܵܐ ܕܐܲܠܵܗܵܐ
ܐܝܼܬܼܵܘܗܝ: ܢܸܫܬܲܕܲܪ ܒܵܬܲܪ ܦܐܸܐ ܒܪܲܒܿܘܼܬܹܗ ܩܲܢܕܝܼܕܝܵܢܘܿܣ: ܘܒܼܵܬܲܪ
ܚܲܡܫܵܐ ܡ̣ܢ ܤܘܼܢܗܵܕܘܿܣ ܩܲܕܝܼܫܬܼܵܐ: ܕܲܢܩܝܼܡܘܼܢ ܐܲܝܠܹܝܢ ܕܐܸܤܬܿܥܲܪ
ܩܕܼܵܡ ܕܚܲܝܠܲܬܼ ܐܲܠܵܗܵܐ ܕܲܒܼܟܼܘܿܢ. ܨܢܝܼ̈ܥܹܐ ܓܹܝܪ ܐܝܼܬܲܝܗܘܿܢ: ܐܲܝܠܹܝܢ
ܕܲܐ̄ܚܪ̈ܢܝܵܬܼܵܐ ܠܒܲܪ ܡ̣ܢ ܗܲܝܡܵܢܘܼܬܼܵܐ ܬܪܝܼܨܬܵܐ ܡܸܬܼܪܲܥܹܝܢ: ܠܲܡܚܲܦܵܝܘܼ
ܬܲܪܥܝܼܬܼ ܛܵܥܝܘܼܬܼܗܘܿܢ. ܐܲܝܟܼ ܕܐܵܦ ܐ̄ܢܵܫ̈ܝܼܢ ܡ̣ܢ ܩܲܕܝܼ̈ܫܹܐ
ܐܲܦܸܤܩ̈ܘܿܦܹܐ: ܟܲܕܼ ܡܛܲܫܸܐ ܢܸܤܛܘܿܪܝܼܣ ܛܵܥܝܘܼܬܹܗ: ܢܸܫܬܲܕܠܘܼܢ
ܘܢܸܬܿܬܵܘܤܦܘܼܢ ܥܲܡܹܗ: ܘܢܲܪܡܘܿܢ ܐܝܼܕܼܵܐ. ܟܲܕܼ ܕܹܝܢ ܚܲܬܿܝܼܬܼܵܐܝܼܬܼ
ܫܲܐܸܠ̣ܘ: ܘܐܸܫܟܲܚܘ ܕܲܓܼܠܸܐ ܓܘܼܕܵܦܹܗ: ܐܲܪܚܸܩ̣ܘ ܡܸܢܹܗ:
ܘܲܠܤܘܼܢܗܵܕܘܿܣ ܩܲܕܝܼܫܬܼܵܐ ܩܪܸܒܼܘ.
ܢܸܤܛܘܿܪܝܼܣ. ܠܡܵܐ ܕܲܥܪܲܩ̣ ܡ̣ܢ ܤܘܼܢܗܵܕܘܿܣ: ܗܵܐ
ܓܲܠܝܵܐܝܼܬܼ ܤܢܝܼܩܝܼܬܿܘܿܢ ܥܲܠ ܡܲܠܟܵܐ ܕܲܡܫܲܕܲܪ ܒܵܬܲܪ ܚܲܡܫܵܐ ܡ̣ܢ
pb. 185
ܐܲܦܸܤܩ̈ܘܿܦܹܐ ܕܲܢܩܝܼܡܘܼܢ ܐܲܝܠܝܹܢ ܕܐܸܤܬܿܥܲܪ؟ ܐܸܠܵܐ ܥܲܡ
ܩܲܢܕܝܼܕܝܵܢܘܿܣ ܐܸܡ݂ܲܪܬܿܘܿܢ: ܘܠܵܘ ܥܲܡ ܐܲܦܸܤܩ̈ܘܿܦܹܐ ܚܲܒܼܪ̈ܲܝܗܘܿܢ:
ܕܡ̣ܢ ܫܲܘܝܘܼܬܼܵܐ ܡܲܟܿܤܝܼܢ ܗ̄ܘ̣ܵܐ ܠܟܼܘܿܢ. ܘܚܲܡܫܵܐ ܠܘܼܩܒܲܠ ܚܲܕܼ:
ܘܗܵܘ̇ ܚܲܕܼ ܥܵܠܡܵܝܵܐ ܐܝܼܬܼܵܘܗܝ: ܕܢܲܦܩܘܼܢ ܐܹܘܲܢܓܲܠܝܼܘܿܢ ܩܲܕܝܼܫܵܐ
ܘܢܹܐܡܘܿܢ ܒܹܗ. ܕܚܲܡܫܵܐ ܐܝܼܬܲܝܗܘܿܢ: ܘܐܲܦܸܤܩ̈ܘܿܦܹܐ ܐܸܢܘܿܢ: ܐܲܝܟܼ
ܕܢܸܬܼܩܲܒܿܠܘܼܢ ܕܫܲܪܝܼܪܹ̈ܐ ܐܸܢܘܿܢ: ܠܘܼܩܒܲܠ ܚܲܕܼ ܥܵܠܡܵܐ. ܤܲܓܿܝܼ
ܓܹܝܪ ܐܸܬܼܒܿܛܸܠ ܠܟܼܘܿܢ ܥܲܠ ܒܘܼܚܵܢܵܗ̇ ܕܡܸܠܬܼܵܐ ܗܵܕܹܐ. ܡ̇ܢ ܓܹܝܪ
ܝܲܬܿܝܼܪܵܐ ܐܵܘ ܒܨܝܼܪܵܐ ܐܝܼܬܼ ܗ̄ܘ̣ܵܐ ܠܹܗ ܠܡܹܐܡܲܪ ܠܩܲܢܕܝܼܕܝܵܢܘܿܣ ܟܲܕܼ
ܐܵܬܹ̇ܐ ܗ̄ܘ̣ܵܐ: ܐܸܠܵܐ ܗܵܘ̇ ܡܵܐ ܕܐܲܢ̄ܬܿܘܿܢ ܩܲܕܼܡܬܿܘܿܬ ܐܲܤܗܸܕܬܿܘܿܢ:
ܘܐܲܤܩ̣ ܗ̤ܘ ܠܡܲܠܟܵܐ؟ ܐܵܘ ܡܵܢܵܐ ܝܲܬܿܝܼܪܵܐܝܼܬܼ ܗܘ̤ܵܐ ܠܗܵܢܘܿܢ
ܚܲܡܫܵܐ: ܡ̣ܢ ܗܵܘ̇ ܡܵܐ ܕܐܲܢ̄ܬܿܘܿܢ ܟܬܲܝܼܬܿܘܿܢ ܥܠܵܘܗܝ: ܕܪܵܚܡܘܼܬܼܵܐ
ܫܲܟܸܿܢ ܗ̄ܘ̣ܵܐ ܨܐܕܼܵܘܗܝ: ܘܡܸܛܠ ܗܵܕܹܐ ܕܓܵܠܵܬܼ̈ܐ ܐܲܤܸܩ̣ ܗ̄ܘ̣ܵܐ
ܨܹܐܕܲܝܟܿܘܿܢ؟ ܡ̇ܢ ܕܹܝܢ ܐܵܠܨܵܐ ܕܬܹܐܡܘܿܢ ܥܲܠ ܚܘܼܫܒܵܢܟܼܘܿܢ؟
ܡܸܛܠ ܗܵܢܵܐ ܟܬܲܒܼܬܿܘܿܢ ܥܲܠ ܩܲܢܕܝܼܕܝܢܘܣ ܘܚܲܡܫܵܐ ܐܲܦܸܤܩ̈ܘܿܦܹܐ:
ܘܠܵܐ ܠܢܸܤܛܘܿܪܝܼܣ ܘܠܵܐ ܠܩܘܼܪܸܠܘܿܣ ܒܥܲܝܬܿܘܿܢ ܕܢܹܐܬܼܘܿܢ؟
ܗܵܠܹܝܢ ܗܘ̤ܵܘ ܥܸܠܬܼܵܐ ܕܝܼܠܹܗ ܕܲܫܓܼܘܼܫܝܵܐ: ܘܙܵܕܼܩܵܐ ܗ̄ܘ̣ܵܬܼ ܕܲܢܦܲܢܘܿܢ
ܦܸܬܼܓܼܵܡܵܐ ܚܲܕܼ ܠܚܲܕܼ. ܐܸܠܵܐ ܠܵܐ ܐܸܬܿܬܿܟܸܠܬܿ: ܕܲܒܼܡܸܠܬܼܵܟܼ ܡܠܘܿܐܵܐ
ܕܲܫܪܵܪܵܐ ܠܲܝܬܿ ܗ̄ܘ̣ܵܐ. ܠܵܘ ܓܹܝܪ ܡ̣ܢ ܡܸܕܸܡ ܐ̄ܚܪܹܝܢ ܕܚܵܠܬܿ ܡ̣ܢ
ܡܸܠܲܝ̈: ܝܲܬܿܝܼܪ ܡ̣ܢ ܫܪܵܪܵܐ. ܬܸܗܘܸܐ ܓܹܝܪ ܕܐܸܬܼ݂ܵܐ ܗ̄ܘ̣ܵܐ ܩܲܢܕܝܼܕܝܵܢܘܿܣ:
ܘܐܸܡ݂ܲܪ ܗ̄ܘ̣ܵܐ: ܕܠܵܐ ܩܵܘܝܼܬܿܘܿܢ ܠܟܼܠܵܗ̇ ܤܘܼܢܗܵܕܘܿܣ. ܟܲܕܼ ܝܵܕܼܥ̇ܝܼܢ
pb. 186
ܗ̣̄ܘܲܝܬܿܘܿܢ ܕܩܲܪܝܼܒܼܝܼܢ ܗ̄ܘ̣ܵܘ: ܘܲܕܼܩܲܕܼܡ ܤܲܗܸܕܟܼܘܿܢ: ܘܕܲܩ̣ܪܵܐ
ܩܕܼܵܡܲܝܟܿܘܿܢ ܟܬܼܝܼ̈ܒܼܵܬܐ ܘܡ̣ܢ ܡܲܠܟܵܐ. ܘܕܲܒܼܥ̣ܵܐ ܡܸܟܼܘܿܢ: ܘܠܵܐ
ܐܸܬܿܛܦܝܼܤܬܿܘܿܢ. ܠܡܵܐ ܡܸܕܸܡ ܐ̄ܚܪܹܝܢ ܐܵܡܲ݁ܪ ܗ̄ܘ̣ܵܐ؟ ܒܡܵܢܵܐ ܗܵܟܹܝܠ
ܡܲܟܿܤܝܼܢ ܗ̣̄ܘܲܝܬܿܘܿܢ ܠܹܗ؟ ܒܗܵܠܹܝܢ ܡܲܟܿܤܝܼܢ ܗ̣̄ܘܲܝܬܿܘܿܢ ܠܹܗ:
ܕܲܒܼܕܲܓܵܠܘܼܬܼܵܐ ܐܸܡ݂ܲܪ ܥܠܲܝܟܿܘܿܢ: ܡܸܛܠ ܕܲܡܫܲܟܸܢ ܗ̄ܘ̣ܵܐ ܠܘܵܬܼܝ
ܪܵܚܡܘܼܬܼܵܐ؟ ܠܵܐ ܗ̄ܘ̣ܵܬܼ ܗܵܟܲܢܵܐ: ܠܵܐ ܥܒܲܕܬܿܘܿܢ ܗܵܟܲܢܵܐ. ܐܸܠܵܐ
ܐܸܢ ܥܒܲܕܬܿܘܿܢ ܗܵܟܲܢܵܐ: ܢܹܐܬܼܘܿܢ: ܘܢܸܗܘܸܐ ܕܝܼܢܵܐ: ܐܵܦܸܢ ܩܲܢܕܝܼܕܝܵܢܘܿܣ
ܕܓܸܠ̣ ܗ̄ܘ̣ܵܐ. ܐܸܠܵܐ ܒܗܦܵܡ̈ܢܹܡܵܛܵܐ ܕܝܼܠܟܼܘܿܢ: ܥܸܠܬܼܵܐ ܕܠܵܐ
ܩܵܘܝܼܬܿܘܿܢ ܕܬܸܬܼܟܲܬܲܫ ܟ̱ܠܵܗ̇ ܤܘܼܢܗܵܕܘܿܣ ܐܸܡܲܪܬܿܘܿܢ: ܕܐܲܝܼܨܝܼܢ
ܗ̣̄ܘܲܝܢ: ܐܲܝܟܼ ܡ̇ܢ ܕܐܲܢ̄ܬܿܘܿܢ ܒܲܠܚܘܿܕܲܝܟܿܘܿܢ ܐܝܼܬܲܝܟܿܘܿܢ ܗ̣̄ܘܲܝܬܿܘܿܢ
ܬܲܡܵܢ. ܒܲܐܢܵܦ̇ܘܿܪܵܐ ܕܹܝܢ ܕܫܲܕܬܿܘܿܢ ܠܘܵܬܼ ܡܲܠܟܵܐ ܐܸܡܲܪܬܿܘܿܢ:
ܕܐܲܪܓܸܫܢܲܢ ܒܗܵܢܵܐ ܨܒܼܝܵܢܵܐ ܕܐܝܼܬܼ ܠܢܲܟܼܦܵܐ ܝܘܿܚܲܢܵܢ ܐܲܦܸܤܩܘܿܦܵܐ
ܕܐܢܛܝܵܟܼܝܵܐ: ܕܒܼܵܥܹ̇ܐ ܠܲܡܫܲܟܵܢܘܼ ܪܵܚܡܘܼܬܼܵܐ ܝܲܬܿܝܼܪܬܵܐ: ܘܡܸܛܠ ܗܵܕܹܐ
ܐܸܬܼܐ̱ܠܸܨܬܘܿܢ ܕܠܵܐ ܬܩܵܘܘܿܢ. ܐܲܝܟܼ ܕܐܸܢ ܝܵܕܼܥ̇ܝܼܢ ܗ̣̄ܘܲܝܬܿܘܿܢ ܕܫܵܠܹ̇ܡ
ܗ̄ܘ̣ܵܐ ܠܟܼܘܿܢ: ܡܩܵܘܹܝܢ ܗ̣̄ܘܲܝܬܿܘܿܢ ܠܹܗ: ܘܐܘܼܠܨܵܢܵܐ ܠܵܐ ܗܵܘܹ̇ܿܐ
ܗ̄ܘ̣ܵܐ ܠܟܼܘܿܢ ܡ̣ܢ ܕܘܼܟܿܬܼܵܐ. ܘܲܒܼܗܘܼܦܵܡ̈ܢܹܡܵܛܵܐ ܕܝܼܠܟܼܘܿܢ ܕܲܥܒܲܕܬܿܘܿܢ
ܠܘܼܩܒܲܠܝ ܐܸܡܲܪܬܿܘܿܢ: ܕܲܒܼܗܹܝܢ ܒܗܵܠܹܝܢ ܐܸܢܵܐ ܩܵܘ̇ܝܼܬܼ: ܒܐܲܝܠܹܝܢ
ܕܡ̣ܢ ܫܘܼܪܵܝܵܐ ܟܸܬܼ̇ܒܹܿܬܼ ܘܐܸܡ̇ܪܹܬܼ. ܘܟܸܵܬܹ̇ܒܹܬܼ ܐܵܦ ܠܘܵܬܼܵܟܼ ܓܲܠܝܵܐܝܼܬܼ.
ܒܗܵܝ̇ ܕܹܝܢ ܐܲܢܵܦ̇ܘܿܪܵܐ ܕܲܟܼܬܲܒܼܬܿܘܿܢ ܠܘܵܬܼ ܡܲܠܟܵܐ: ܕܲܠܩܘܼܒܼܠܵܐ
ܟܬܲܒܼܬܿܘܿܢ: ܐܲܝܟܼ ܡ̇ܢ ܕܲܡܛܲܠܵܠܘܼ ܡܛܲܠܸܠ ܠܹܗ ܠܪܘܼܫܥܵܐ ܕܲܩܢܸܐ.
ܨܢܝܼ̈ܥܹܐ ܠܲܡ ܓܹܝܪ ܐܝܼܬܲܝܗܘܿܢ: ܐܲܝܠܹܝܢ ܕܐ̄ܚܪ̈ܵܢܝܵܬܼܵܐ ܠܒܲܪ ܡ̣ܢ
pb. 187
ܗܲܝܡܵܢܘܼܬܼܵܐ ܬܪܝܼܨܬܵܐ ܡܸܬܼܪܲܥܹܝܢ: ܠܲܡܚܲܦܵܝܘܼ ܬܲܪܥܝܼܬܼܗܘܿܢ. ܐܲܝܟܼ
ܕܐܵܦ ܐ̄ܢܵܫ̈ܝܼܢ ܡ̣ܢ ܩܲܕܝܼ̈ܫܹܐ ܐܲܦܸܤܩ̈ܘܿܦܹܐ: ܟܲܕܼ ܡܛܲܫܸܐ ܢܸܤܛܘܿܪܝܼܣ
ܛܵܥܝܘܼܬܹܗ: ܢܸܫܬܲܕܠܘܼܢ ܘܢܸܬܿܬܵܘܤܦܘܼܢ ܥܲܡܹܗ: ܘܒܲܐܝܠܹܝܢ
ܕܡܸܤܬܲܥܪܵܢ ܡܸܢܹܗ ܢܲܪܡܘܿܢ ܐܝܼܕܼܵܐ. ܐܲܝܟܲܢܵܐ ܗܵܟܹܝܠ ܡܚܲܦܹܝܢ ܗܵܠܹܝܢ
ܕܝܼܠܝܼ؟ ܘܬܼܘܼܒܼ ܓܲܠܝܵܐܝܼܬܼ ܐܸܡܲܪܬܿܘܿܢ: ܕܐܸܬܼܚܪܝܼ ܢܸܤܛܘܿܪܝܼܣ. ܟܲܕܼ
ܠܲܡ ܐܸܫܟܲܚܢܲܢ ܓܲܠܝܵܐܝܼܬܼ ܕܲܐ̄ܚܪܵܢܝܵܐܝܼܬܼ ܡܸܬܼܪܲܥܸܐ: ܫܪܲܝܢܵܝܗܝ. ܐܵܦܠܵܐ
ܓܹܝܪ ܒܵܗ̇ ܒܐܲܦܸܤܘܿܣ ܡܝܼܛܪܵܦܘܿܠܝܼܣ ܛܲܫܝܼ ܪܸܥܝܵܢܹܗ: ܐܲܝܟܼ
ܕܢܸܤܬܿܢܸܩ ܥܲܠ ܩܛܹܐ ܓܼܪ̈ܵܢܹܐ ܐ̄ܚܪ̈ܵܢܹܐ. ܐܸܠܵܐ ܡܲܙܥܸܩ ܗ̄ܘ̣ܵܐ ܟܠܝܘܿܡ
ܟܲܕܼ ܡܲܟܼܪܸܙ ܩܕܼܡ ܤܲܓܿܝܼ̈ܐܹܐ ܝܘܼܠܦܵܢܹܗ: ܐܲܝܢܵܐ ܕܲܡܢܲܟܼܪܲܝ ܗ̄ܘ̣ܵܐ
ܠܗܲܝܡܵܢܘܼܬܼܵܐ. ܘܟܼܠܚܕܼܵܐ ܡܸܢܗܹܝܢ: ܒܗܘܼܦܵܡ̈ܢܹܡܵܛܵܐ ܐܲܝܠܹܝܢ
ܕܐܸܤܬܿܥܲܪ ܒܐܝܼܕܼܵܐ ܒܐܝܼܕܼܵܐ ܥܒܲܕܼܢܲܢ: ܕܢܸܬܼܝܲܕܹ̈ܥܵܢ ܠܕܲܚܠܲܬܼ
ܐܲܠܵܗܵܐ ܕܲܒܼܟܼܘܿܢ.
ܢܸܤܛܘܿܪܝܼܣ. ܒܵܗ̇ ܟܲܕܼ ܒܵܗ̇ ܕܲܠܩܘܼܒܼܠܵܐ ܐܵܡ̇ܪܝܼܢ. ܗܵܘ̇
ܗܵܟܹܝܠ ܕܩܲܒܸܿܠ̣ ܐܸܢܹܝܢ ܠܗܵܠܹܝܢ: ܗܵܢܵܘ ܕܹܝܢ ܡܲܠܟܵܐ: ܝܵܕܲܥ̇ ܗ̄ܘ̣ܵܐ
ܕܐܲܝܠܹܝܢ ܥܒܲܕܼܘ ܕܲܠܩܘܼܒܼܠܵܐ ܕܦܘܼܩܕܵܢܹܗ. ܐܸܠܵܐ ܕܐܵܦ ܐܲܝܠܹܝܢ
ܕܐܵܡ̇ܪܝܼܢ: ܕܲܠܩܘܼܒܼܠܵܐ ܐܵܡ̇ܪܝܼܢ: ܬܲܫܥܝܼܬܼܵܐ ܫܚܝܼܡܬܼܵܐ ܘܲܫܟܼܝܼܪܬܵܐ.
ܠܵܘ ܓܹܝܪ ܠܘܵܬܼ ܗܵܘ̇ ܡܵܐ ܕܒܹܗ ܥܲܕܼܠ̣ ܐܵܢܘܿܢ: ܦܲܢܝܼܘ ܠܹܗ
ܦܸܬܼܓܵܡܵܐ܀ ܡܸܛܠ ܡܵܢܵܐ ܠܲܡ ܩܕܼܵܡ ܕܢܼܬܼܟܲܢܫܘܼܢ ܐܲܦܸܤܩ̈ܘܿܦܹܐ
ܕܟܼܠܵܗ̇ ܤܘܼܢܗܵܕܘܿܣ: ܠܒܲܪ ܡ̣ܢ ܡܵܐ ܕܐܸܬܼܦܲܩܲܕܬܿܘܿܢ:
ܐܲܡܪܲܚܬܿܘܿܢ ܠܡܸܥܒܲܕܼ ܤܘܼܢܗܕܘܿܣ ܡܢܵܬܼܵܢܵܐܝܼܬܼ؟܀ ܡܸܕܸܡ ܐ̄ܚܪܹܝܢ
pb. 188
ܠܵܐ ܐܵܡ̇ܪܝܼܢ: ܐܸܠܵܐ ܕܫܸܦܪܲܬ̤ ܠܲܢ: ܐܵܦܸܢ ܕܓܲܠܝܵܐܝܼܬܼ ܠܵܐ ܐܵܡ̇ܪܝܼܢ:
ܡܸܛܠ ܙܥܝܼܦܘܼܬܼܵܗ̇ ܕܡܸܠܬܼܵܐ ܕܲܠܘܵܬܼ ܐܲܝܠܹܝܢ ܕܦܵܓܼܥ̇ܝܼܢ ܒܵܗ̇.
ܡܸܛܠ ܐܲܝܕܵܐ ܠܵܐ ܩܵܘܝܼܬܿܘܿܢ ܠܡܹܐܬܼܝܼܬܼܵܐ ܕܝܘܿܚܲܢܵܢ ܐܲܦܸܤܩܘܿܦܵܐ
ܕܐܲܢܛܝܵܟܼܝܵܐ: ܟܲܕܼ ܝܵܕܼܥ̇ܝܼܢ ܐܢ̄ܬܿܘܿܢ ܕܩܲܪܝܼܒܼܵܐ ܗ̄ܘ̣ܵܬܼ ܡܲܥܲܠܬܹܗ.
ܡܸܕܸܡ ܐ̄ܚܪܹܝܢ ܠܲܝܬܿ ܗ̄ܘ̣ܵܐ ܠܗܘܿܢ ܠܡܹܐܡܲܪ: ܐܸܠܵܐ ܕܲܚܢܲܢ ܠܵܐ
ܨܒܲܝܢ ܠܡܸܥܒܲܕܼ ܥܲܡܹܗ ܒܘܼܚܵܢܵܬܐ. ܝܲܬܿܝܼܪܵܐܝܼܬܼ ܕܹܝܢ ܒܲܕܼ ܝܵܕܼܥ̇ܝܿܢ ܗ̄ܘ̣ܵܘ:
ܕܠܵܐ ܫܵܠܹ̇ܡ ܠܗܘܿܢ. ܐܸܠܵܐ ܚܫܘܿܒܼ ܕܙܵܕܹܩ ܗ̄ܘ̣ܵܐ ܕܢܼܬܿܬܿܕܝܼܢ
ܝܘܿܚܲܢܵܢ: ܡܸܛܠ ܕܐܸܫܬܵܚܲܕܼ ܘܠܵܐ ܐܸܬܼ݂ܵܐ ܒܙܲܒܿܢܵܐ . ܠܘ ܡܸܢܵܟܼ
ܡܸܬܿܬܿܕܝܼܢ ܗ̄ܘ̣ܵܐ: ܐܸܠܵܐ ܡ̣ܢ ܡܲܠܟܵܐ: ܗܵܘ̇ ܕܐܝܼܬܼ ܗ̄ܘ̣ܵܐ ܠܹܗ ܡܸܠܬܼܵܐ
ܥܠܵܘܗܝ. ܘܩܲܕܼܡܵܝܑܬܼ ܙܵܕܹܩ ܗ̄ܘ̣ܵܐ ܕܢܸܬܿܬܿܤܝܼܡ ܒܪܹܫܵܐ
ܕܐܲܦܸܤܩ̈ܘܿܦܹܐ ܕܡ̣ܢ ܪܗܘܿܡܹܐ: ܕܠܵܐ ܐܸܬܼ݂ܵܘ ܟܲܕܼ ܐܸܬܼܩܪܝܼܘ. ܐܲܝܟܲܢܵܐ
ܗܵܟܹܝܠ ܠܒܼܝܼܟܼ ܐܲܢ̄ܬܿ ܠܗܵܢܘܿܢ؟ ܒܗܵܘ̇ ܓܹܝܪ ܓܲܒܵܐ ܕܠܲܗܵܢܘܿܢ
ܤܵܡܬܿ: ܒܹܗ ܟܲܕܼ ܒܹܗ ܤܝܼܡ ܐܵܦ ܠܝܘܿܚܲܢܵܢ: ܕܢܸܥܒܸܿܕܼ ܡܸܬܼܡܲܨܝܵܢ̈ܝܵܬܼܵܐ
ܘܠܵܐ ܡܸܬܼܡܲܨܝܵܢ̈ܝܵܬܼܵܐ. ܐܸܠܵܐ ܬܵܒܲܥ̇ ܐܲܢ̄ܬܿ ܠܹܗ ܠܝܘܿܚܲܢܵܢ: ܟܲܕܼ ܐܝܼܬܼ
ܠܹܗ ܥܸܠܬܼܵܐ ܕܡܸܛܠܵܬܼܵܗ̇ ܐܸܫܬܵܘܚܲܪ: ܘܡ̣ܢ ܟܠܢܵܫ ܡܸܬܼܩܲܒܿܠܵܐ
ܡܸܢܹܗ: ܤܛܲܪ ܡܸܢܵܟܼ ܕܝܼܠܵܟ ܕܪܲܚܝܼܩ ܐܲܢ̄ܬܿ ܡ̣ܢ ܟ̱ܠܵܗ̇ ܪܸܚܡܲܬܼ
ܒܢܲܝ̈ܢܵܫܵܐ: ܘܡ̣ܢ ܟܠܗܘܿܢ ܚܲܫܹ̈ܐ ܕܲܟܼܝܵܢܵܐ ܐ̄ܢܵܫܵܝܵܐ. ܠܵܐ ܥܵܕܹܠ ܐܲܢ̄ܬܿ
ܠܢܲܦܫܵܟܼ: ܐܵܦܠܵܐ ܟܲܕܼ ܡܸܬܼܪܫܸܐ ܐܲܢ̄ܬܿ ܡ̣ܢ ܡܲܠܟܵܐ. ܘܠܵܐ ܡܸܬܼܟܲܚܲܕܼ
ܐܲܢ̄ܬܿ: ܕܟܲܕܼ ܠܐܲܪܒܿܥܵܐ ܝܵܘܡ̈ܝܼܢ ܟܲܕܼ ܤܲܓܿܝܼ ܤܢܝܼܩ ܗ̣̄ܘܲܝܬܿ ܠܲܡܩܵܘܵܝܘܼ
ܠܗܘܿܢ: ܐܲܝܟܼ ܕܲܕܼܠܵܐ ܚܸܪܝܵܢܵܐ ܬܸܗܘܸܐ ܤܘܼܢܗܵܕܘܿܣ: ܠܵܐ ܫܡܲܥ̣ܬܿ:
ܐܸܠܵܐ ܝܲܬܿܝܼܪܐܝܼܬܼ ܓܒܲܝܬܿ ܠܵܟܼ ܠܡܸܥܒܲܕܼ ܕܠܘܼܚܝܵܐ. ܐܲܟܼܙܢܵܐ ܕܓܸܢܤܵܐ
pb. 189
ܕܢܘܼ̈ܢܹܐ ܕܡܸܬܼܩܪܸܐ ܤܦܹܐܵܐ: ܡ̣ܢ ܡܲܝ̈ܵܐ ܢܲܩ̈ܕܹܐ ܠܡܝ̈ܐ ܕܠܝܼܚܹ̈ܐ
ܥܵܐ̇ܠܝܼܢ: ܕܠܵܐ ܢܸܬܿܬܿܨܝܼܕܼܘܼܢ: ܗܵܟܲܢܵ ܐܵܦ ܐܲܢ̄ܬܿ ܤ̣ܥܲܪܬܿ. ܠܓܼܘܼܚܟܵܐ
ܫܵܘ̈ܝܵܢ ܐܲܝܠܹܝܢ ܕܟܼܠ ܟ̱ܠܹܗ ܐܝܼܬܼ ܒܗܘܿܢ ܗܵܘܢܵܐ: ܘܠܵܐ ܗ̄ܘ̣ܵܐ
ܡܸܛܥܵܐ ܛܵܥܹ̇ܝܢ ܟܲܕܼ ܬܵܒܼܥ̇ܝܼܢ ܠܵܟܼ ܒܝܲܕܼ ܗܵܠܹܝܢ. ܐܲܟܼܙܢܵܐ ܕܓܲܒܼܪܹ̈ܐ
ܟܲܕܼ ܡܸܫܬܿܥܹܝܢ ܥܲܡ ܛܠܵܝܹ̈ܐ ܕܲܩܕܩܹ̈ܐ ܕܡܸܬܼܟܲܬܿܫܝܼܢ ܥܲܡܗܘܿܢ:
ܡܸܤܬܲܒܼܪܝܼܢ ܕܗܵܐ ܡܸܬܼܟܲܬܵܫܘܼ ܡܸܬܼܟܲܬܿܫܝܼܢ: ܘܥܵܒܲܕܝܼܢ ܢܲܦܫܗܘܿܢ
ܟܹܐܡܲܬܼ ܕܚܵܝ̇ܒܿܝܼܢ ܡܸܢܗܘܿܢ. ܠܵܘ ܓܹܝܪ ܕܐܲܝܢܵܐ ܕܢܵܦܹ̇ܩ ܪܘܼܚܵܐ:
ܐܸܠܵܐ ܝܲܬܿܝܼܪܵܐܝܼܬܼ ܕܐܲܝܢܵܐ ܕܡܸܫܬܿܥܵܝܘܼ ܡܸܫܬܿܥܸܐ ܐܝܼܬܲܝܗܘܿܢ ܦܸܬܼܓܼܵܡܹ̈ܐ
ܗܵܠܹܝܢ. ܠܵܘ ܐܲܝܢܵܐ ܕܡܸܫܥܵܝܘܼ ܡܸܫܬܿܥܸܐ ܡܲܠܟܵܐ ܥܲܡܵܟܼ: ܘܠܵܘ
ܠܐܲܝܢܵܐ ܕܪܵܫܹ̇ܐ ܠܵܟܼ ܟܿܐܢܵܐܝܼܬܼ: ܘܒܲܐܝܠܹܝܢ ܕܪܵܫܹܐ ܠܵܟܼ ܠܵܐ ܡܦܝܼܣ
ܐܲܢ̄ܬܿ ܠܹܗ. ܪܦܸܐ ܗ̄ܘ̣ ܚܲܝܠܹܗ: ܒܗܵܝ̇ ܕܕܲܗܒܼܵܐ ܐܝܼܬܼܵܘܗܝ ܗ̄ܘ̣ܵܐ.
ܐܸܠܵܐ ܐܵܡ̇ܪܝܼܢ: ܐܲܝܠܹܝܢ ܠܲܡ ܕܐܸܬܼܟܲܢܲܫܘܼ: ܘܩܵܢܘܿܢܵܐܝܼܬܼ ܐܲܦܸܩ̣ܘ
ܒܫܲܠܡܘܼܬܼܵܐ ܓܙܵܪ ܕܝܼܢܵܐ ܕܩܵܬܼܵܪܤܝܼܣ ܥܲܠ ܢܸܤܛܘܿܪܝܼܣ
ܗܲܪܵܛܝܼܩܵܐ: ܐܝܼܬܲܝܢ ܝܲܬܿܝܼܪ ܡ̣ܢ ܡܲܐܬܹ̇ܝܢ ܐܲܦܸܤܩ̈ܘܿܦܹܐ: ܐܲܝܠܹܝܢ ܕܡ̣ܢ
ܟ̱ܠܵܗ̇ ܬܹܒܹܝܬܼ ܐܸܬܼܟܲܢܲܫܘ: ܟܲܕܼ ܫܵܠܡܵܐ ܠܲܢ ܟ̱ܠܵܗ̇ ܡܲܥ̱ܪܒܼܵܐ. ܘܡ̇ܢ
ܥ̇ܒܼܵܕܼܵܐ ܗܵܢܵܐ؟ ܐܝܼܬܲܝܟܿܘܿܢ ܗ̣̄ܘܲܝܬܿܘܿܢ ܓܹܝܪ ܝܲܬܼܝܼܪ ܡ̣ܢ ܡܲܐܬܹܝܢ
ܐܲܦܸܤܩ̈ܘܿܦܹܐ: ܕܫܵܠܡܝܼܢ ܗ̄ܘ̣ܵܘ ܠܵܟܼ ܒܟܼܠ ܐܲܝܠܹܝܢ ܕܐܲܢ̄ܬܿ ܒܵܥܹ̇ܐ ܐܵܢ̄ܬܿ.
ܒܵܥܹ̇ܐ ܗ̣̄ܘܲܝܬܿ ܓܹܝܪ: ܕܠܵܐ ܡܹܐܡܲܪܘܼܢ ܫܪܵܪܵܐ ܟܠ ܟ̱ܠܹܗ. ܒܐܲܢܵܦ̇ܘܿܪܵܐ
ܓܹܝܪ ܕܐܵܦܸܩ̈ܘܿܦܹܐ ܕܥܲܡܝܼ: ܐܝܼܬܼ ܪܡܵܝ ܐܝܼܕܼܵܝ̈ܐ ܕܐܦܸܤܩ̈ܘܿܦܹܐ:
ܕܝܼܕܼܝ̈ܥܵܢ ܐܵܦ ܡܕܼܝܼ̈ܢܵܬܼܗܘܿܢ ܕܠܵܐ ܦܘܼܠܵܓܼ: ܠܲܕܡܵܐ ܡ̣ܢ ܗܵܠܹܝܢ
pb. 190
ܐܲܫܲܪܬܿ؟ ܬܸܗܘܸܐ ܓܹܝܪ ܕܐܝܼܬܲܝܢ ܗ̣̄ܘܲܝܢ ܐܲܝܟܼ ܕܐܲܢ̄ܬܿ ܐܵܡܲ݁ܪ ܐܲܢ̄ܬܿ
ܐܠܵܬܼܝܼܢ ܐܲܦܸܤܩ̈ܘܿܦܹܐ: ܘܐܸܢ ܨܒܹ̇ܐ ܐܲܢ̄ܬܿ ܥܸܤܪܵܐ: ܐܵܘ ܟܡܵܐ ܕܐܲܝ̄ܬܿ
ܒܵܥܹ̇ܐ ܐܲܢ̄ܬܿ. ܠܡܵܐ ܡܸܢܝܵܢܵܐ ܡܩܝܼܡ ܠܲܫܪܵܪܵܐ ܕܐܵܪ̈ܬܵܕܘܿܪܤܘܿ
ܘܲܠܤܘܼܢܗܵܕܘܿܣ ܕܲܫܪܵܪܵܐ: ܐܵܘ ܕܢܸܥܒܸܿܕܼ ܘܢܸܛܲܪ ܐܲܝܠܹܝܢ ܕܙܵܕܼ̈ܩܵܢ؟
ܡܵܢܵܐ ܗܵܟܹܝܠ ܟܐ݂ܵܐ ܒܵܟܼ ܡܲܠܟܵܐ ܘܐܸܬܼܥܲܕܲܠ ܒܵܟܼ: ܕܟܲܢܸܫܢܲܢ
ܤܘܼܢܗܵܕܘܿܣ ܬܹܒܹܝܠܵܝܬܼܵܐ: ܐܲܝܟܼ ܕܓܼܵܘܵܢܵܐܝܼܬܼ ܘܲܒܼܫܲܠܡܘܼܬܼܵܐ ܕܓܼܵܘܵܐ
ܬܸܫܬܲܪܲܪ ܒܥܵܬܼܵܐ ܕܗܲܝܡܵܢܘܼܬܼܵܐ ܠܟܼܠܢܵܫ. ܘܝܼܕܲܥܬܵܝܗܝ ܠܢܝܼܫܲܢ:
ܘܲܨܒܿܝܼܬܿ ܠܡܸܦܠܲܓܼ ܤܘܼܢܗܵܕܘܿܣ: ܐܲܝܟܼ ܕܠܵܐ ܢܸܗܘܸܐ ܒܘܼܚܵܢܵܐ
ܕܓܼܵܘܵܐ: ܘܬܸܫܬܲܪܲܪ ܗܲܝܡܵܢܘܼܬܼܵܐ ܠܟܼܠܢܵܫ ܢܲܗܝܼܪܵܐܝܼܬܼ ܘܚܲܬܿܝܼܬܼܵܐܝܼܬܼ܆
ܒܫܲܠܡܘܼܬܼܵܐ ܕܓܼܵܘܵܐ ܕܟܼܠܢܵܫ. ܗܵܫܵܐ ܕܹܝܢ ܠܵܐ ܗ̄ܘ̣ܵܐ ܟܠܗܘܿܢ
ܕܵܚܠܲܝ̈ ܐܲܠܵܗܵܐ ܐܲܦܸܤܩ̈ܘܿܦܹܐ: ܗܵܢܘܿܢ ܕܫܲܕܹܬܼ ܗ̄ܘܹ̇ܝܬܼ
ܕܢܸܬܼܟܲܢܫܘܼܢ ܐܸܬܼܟܲܢܲܫܘ ܗ̄ܘ̣ܵܘ: ܘܟܲܕܼ ܛܵܒܼ ܩܲܪܝܼܒܼܵܐ ܗ̄ܘ̣ܵܬܼ
ܡܹܐܬܼܝܼܬܹܗ ܕܝܘܿܚܲܢܵܢ ܐܲܦܸܤܩܘܿܦܵܐ ܕܐܲܢܛܝܵܟܼܝܵܐ ܡܕܝܼܢܬܼܵܐ ܪܲܒܿܬܼܵܐ ܥܲܡ
ܡܝܼܛܪ̈ܵܦܘܿܠܹܝܛܹܐ ܐ̄ܚܪ̈ܵܢܹܐ. ܬܘܼܒܼ ܐܵܦܠܵܐ ܗܸܢܘܿܢ ܗܵܠܹܝܢ ܕܩܲܪܝܼܒܼܝܼܢ
ܗ̄ܘ̣ܵܘ ܐܸܬܼܚܲܫܲܒܼܘ ܥܲܡܗܘܿܢ: ܐܵܘ ܫܠܸܡ̣ܘ ܠܲܚܕܼܵܕܹ̈ܐ. ܘܬܼܘܼܒܼ
ܐܵܦܠܵܐ ܒܥܵܬܼܵܐ ܕܗܲܝܡܵܢܘܼܬܼܵܐ ܕܵܙܕܼܩܵܐ ܗ̄ܘ̣ܵܬܼ ܗܘ̤ܵܬܼ: ܐܵܘ ܐܲܝܟܼ
ܟܬܼܝ݁ܒܼܵܬܼܵܐ ܕܲܒܼܟܼܠܙܒܲܢ ܡܸܫܬܲܕܪ̈ܵܢ ܗ̣̄ܘܲܝ̈ ܡܸܢܲ. ܐܵܘ ܐܲܝܟܼ ܕܠܘܵܬܼ
ܐܲܝܢܵܐ ܕܡܸܛܥܵܐ ܛܥ̣ܵܐ: ܐܵܘ ܐܲܝܟܼ ܐܲܝܠܹܝܢ ܕܗܵܢ̇ܘܿܢ ܡܸܫܬܥܹܝܢ: ܐܵܘ
ܐܲܝܟܼ ܕܲܠܘܵܬܼ ܐܲܝܢܵܐ ܕܗ̤ܘ ܡܸܫܬܿܥܸܐ ܗ̄ܘ̣ܵܐ ܥܲܡܟܼܘܿܢ ܟܬܲܒܼܬܿܘܿܢ
ܠܹܗ: ܟܲܕܼ ܡܸܕܸܡ ܐ̄ܚܪܹܝܢ ܠܐ ܐܸܡܲܪܬܿܘܿܢ ܠܹܗ: ܡ̣ܢ ܗܵܘ̇ ܕܗ̤ܘ
pb. 191
ܐܸܡܲܪܬܿܘܿܢ ܠܹܗ: ܡ̣ܢ ܗܵܘ̇ ܕܗ̤ܘ ܐܸܡ݂ܲܪ ܡ̣ܢ ܪܸܥܝܵܢܹܗ: ܕܟܼܠܗܘܹܝܢ
ܤܥܲܪܬܿܘܿܢ. ܘܠܵܐ ܩܵܘܝܼܬܿܘܿܢ ܠܐܲܝܠܹܝܢ ܕܪܲܚܝܼܩܝܼܢ ܗ̄ܘ̣ܵܘ: ܘܠܵܐ
ܚܫܲܒܼܬܿܘܿܢ ܥܲܡ ܐܲܝܠܹܝܢ ܕܩܲܪܝܼܒܼܝܼܢ ܗ̄ܘ̣ܵܘ: ܐܸܠܵܐ ܤܕܲܩܬܿܘܿܢ ܡ̣ܢ
ܐܲܝܠܹܝܢ ܕܥܲܡܟܼܘܿܢ ܗ̄ܘ̣ܵܘ: ܘܡܸܢܟܼܘܿܢ ܘܲܠܟܼܘܿܢ ܒܲܚܸܢܬܿܘܿܢ:
ܐܸܤܬܿܕܩܬܿܘܿܢ ܕܹܝܢ ܡ̣ܢ ܐܲܝܠܹܝܢ ܕܲܥܬܼܝܼܕܼܝܼܢ ܗ̄ܘ̣ܵܘ ܕܢܹܐܬܼܘܿܢ
ܠܒܼܘܼܚܵܢܵܐ ܕܓܼܵܘܵܐ. ܘܒܲܙܢܵܐ ܕܙܵܕܹܩ ܠܐܲܠܹܝܢ ܕܗܲܝܡܵܢܘܼܬܼܵܐ
ܐܝܼܬܲܝܗܹܝܢ ܗ̣̄ܘܲܝ̈ ܠܵܐ ܒܲܚܵܢܬܿܘܿܢ: ܟܲܕܼ ܒܫܘܼܐܵܠܵܐ ܡܸܬܿܬܿܤܝܼ̈ܡܵܢ ܗ̣̄ܘܲܝ̈
ܐܲܠܹܝܢ ܕܐܝܼܬܼ ܥܠܲܝܗܹܝܢ ܒܥܵܬܼܵܐ: ܘܡܸܫܬܵܪ̈ܝܵܢ ܗ̣̄ܘܲܝ̈: ܘܗܵܟܲܢܵܐ
ܡܦܝܼܤܝܼܢ ܗ̣̄ܘܲܝܬܿܘܿܢ ܢܲܦܫܟܼܘܿܢ ܠܥܹܝܢ ܟܠܢܵܫ܀ ܐܸܢܗ̤ܘ ܗܵܟܹܝܠ
ܕܗܵܠܹܝܢ ܠܵܐ ܥܒܲܕܬܿܘܿܢ: ܟܹܐܢܵܐܝܼܬܼ ܥܵܒܼ̇ܕܝܼܢ ܗ̣̄ܘܲܝܬܿܘܿܢ ܡܲܦܲܩ
ܒܪܘܼܚܵܐ: ܒܝܲܕܼ ܐܲܢܵܦ̇ܘܿܪܵܐ ܕܲܠܘܵܬܼ ܡܲܠܟܵܐ. ܐܸܢܗ̤ܘ ܕܹܝܢ ܕܒܲܝܠܹܝܢ
ܕܲܠܟܼܘܿܢ ܩܲܛܪܸܓܼ ܕܲܐܠܗܵܠܹܝܢ ܥܵܘ̇ܠܵܐܝܼܬܼ ܤܥܲܪܬܿܘܿܢ: ܒܗܵܠܹܝܢ ܠܵܐ
ܟܵܦ̇ܪܝܼܢ ܐܢ̄ܬܿܘܿܢ: ܐܸܠܵܐ ܠܡܲܦܲܩ ܒܪܘܼܚܵܐ ܠܗܹܝܢ ܟܲܕܼ ܠܗܹܝܢ
ܤܵܝ̇ܡܝܼܢ ܐܢ̄ܬܿܘܿܢ: ܡܵܢܵܐ ܐ̄ܚܪܹܝܢ ܐܝܼܬܼ ܠܡܸܪܢܵܐ ܝܲܬܿܝܼܪ ܡ̣ܢ ܕܐܲܝܟܼ
ܗܵܘ̇ ܕܡܸܒܼܓܲܠ ܒܵܓܹ̇ܠ ܡܲܤܒܿܪܝܼܢ ܥܠܵܘܗܝ: ܘܐܲܝܟܼ ܕܥܲܡ ܒܢܲܝ̈
ܫܥܵܬܼܗܘܿܢ ܡܸܫܬܿܥܹܝܢ ܘܲܬܼܟܼܝܼܠܝܼܢ ܠܡܸܟܼܬܲܒܼ ܗܵܠܹܝܢ؟
ܤܘܼܢܗܵܕܘܿܣ ܬܹܒܹܝܠܵܝܬܼܵܐ ܩ̇ܪܹܝܬܿܘܿܢ ܠܵܗ̇ ܠܗܵܝ̇ ܕܤܸܕܼܩܲܬ̤ ܡ̣ܢ
ܐܲܦܸܤܩ̈ܘܿܦܹܐ: ܐܲܝܠܹܝܢ ܕܩ̣ܵܘܝܼܘ ܥܕܲܡܵܐ ܕܬܸܬܼܟܲܢܲܫ ܟ̱ܠܵܗ̇
ܤܘܼܢܗܵܕܘܿܣ: ܩܕܼܵܡ ܗܵܘ̇ ܕܡܸܛܠ ܗܵܕܹܐ ܪܫܵܟܼܘܿܢ. ܘܠܲܐܝܠܹܝܢ
ܕܲܒܼܤܲܓܿܝܼܐܘܼܬܼܗܘܿܢ ܥܒܲܪܘ ܥܲܠ ܟܹܐܢܘܼܬܼܵܠ: ܠܗܵܠܹܝܢ ܡܦܝܼܣ
ܗ̣̄ܘܲܝܬܿ ܕܢܸܬܼܝܼܗܸܒܼ ܟܠ ܫܘܼܠܛܵܢ: ܠܘܼܩܒܲܠ ܐܲܝܠܹܝܢ ܕܲܢܛܲܪܘ
pb. 192
ܠܗܵܠܹܝܢ ܕܡܲܠܟܵܐ: ܘܕܲܫܪܵܪܵܐ: ܘܲܕܼܟܼܠܵܗ̇ ܤܘܼܢܗܵܕܘܿܣ. ܠܵܘ
ܡܸܛܠ ܡܸܕܸܡ ܐ̄ܚܪܹܝܢ: ܐܸܠܵܐ ܡܸܛܠ ܕܒܼܤܲܓܝܼܐܘܼܬܼܗܘܿܢ ܥ̇ܒܼܪܝܼܢ
ܠܐܲܝܠܹܝܢ ܕܲܢܛܲܪܘ ܦܘܼܩ̈ܕܵܢܹܐ. ܐܸܠܵܐ ܠܵܐ ܡܲܡܪܚܝܼܢ ܗ̣̄ܘܲܝܬܿܘܿܢ
ܗܵܠܹܝܢ ܠܡܹܐܡܲܪ: ܐܸܠܵܐ ܠܐܲܝܠܹܝܢ ܕܲܒܼܢܲܝ̈ ܫܥܵܬܼܟܼܘܿܢ ܐܝܼܬܲܝܗܘܿܢ:
ܡܸܛܠ ܐܲܝܕܵܐ ܕܗ̤ܝ.
ܐܵܬܹ̇ܐ ܐ̄ܢܵܐ ܓܹܝܪ ܠܡܹܐܡܲܪ ܐܲܝܠܹܝܢ ܕܗܵܫܵܐ. ܐܸܠܵܐ ܟܒܲܪ ܐܵܡܲ݁ܪ
ܐ̄ܢܵܫ: ܕܠܵܐ ܤܲܓܿܝܼ ܬܹܐܨܲܦ ܕܗܵܕܹܐ: ܐܸܠܵܐ ܐܲܠܸܦ ܠܲܢ ܐܲܝܟܲܢܵܐ ܠܵܘ
ܟܹܐܢܵܐܝܼܬܼ ܫܪܵܐܘܼܟܼ: ܡ̣ܢ ܐܲܝܠܹܝܢ ܕܡܸܢܵܟܼ ܘܡ̣ܢ ܩܘܼܪܸܠܘܿܣ ܐܸܬܼܟܿܬܸܒܼ؟
ܐܸܠܘܼ ܓܹܝܪ ܟܠܗܹܝܢ ܐܲܝܠܝܹܢ ܕܙܵܕܹܩ ܗ̄ܘ̣ܵܐ ܕܢܸܬܼܒܲܚ̈ܢܵܢ ܡܸܬܼܒܲܚ̈ܢܵܢ:
ܡܵܢܵܐ ܡܸܬܼܗܢܸܐ ܐܲܢ̄ܬܿ: ܐܵܦܸܢ ܓܹܝܪ ܡ̣ܢ ܗܵܠܹܝܢ ܐܵܦܸܢ ܡ̣ܢ ܟܠܢܵܫ
ܐܸܬܼܪܫܝܼܬܿ؟ ܒܗܵܕܹܐ ܝܲܬܿܝܼܪ ܡ̣ܢ ܟܠܡܸܕܸܡ ܢܥܲܩܸܒܼ: ܕܐܲܝܠܹܝܢ ܙܵܕܹܩ
ܕܢܸܬܼܪܲܥܸܐ ܚܢܲܢ ܘܵܠܝܵܐܝܼܬܼ: ܘܠܵܐ ܢܸܤܛܸܐ ܡ̣ܢ ܐܵܪܬܵܕܘܿܟܿܤܝܼܵܐ: ܠܵܐ
ܡ̣ܢ ܡܩܲܕܡܘܼܬܼܵܐ ܕܗܵܢܵܐ: ܘܠܵܐ ܡ̣ܢ ܚܲܫܗܹܐ ܕܝܼܠܵܟܼ. ܐܸܠܵܐ ܘܠܵܐ
ܐܸܢܵܐ ܨܵܒܹ̇ܐ ܗ̄ܘܹ̇ܝܬܼ: ܐܲܝܠܹܝܢ ܕܕܝܼܠܝܼ ܠܲܡܬܲܢܵܝܘܼ ܘܲܠܡܹܐܡܲܪ: ܘܠܵܐ
ܬܘܼܒܼ ܠܲܡܩܲܛܪܵܓܼܘܼ ܠܲܐ̄ܚܪ̈ܵܢܹܐ: ܝܲܬܿܝܼܪܵܐܝܼܬܼ ܕܹܝܢ ܐܲܝܟܵܐ ܕܡܸܫܬܲܡܗܵܐ
ܤܘܼܢܗܵܕܘܿܣ: ܐܸܠܘܼܠܵܐ ܡ̣ܢ ܦܲܪܨܘܿܦܵܐ ܕܝܼܠܝܼ: ܐܵܦ ܗܲܝܡܵܢܘܼܬܼܵܐ
ܐܸܬܼܚܲܒܿܠܲܬ̤ ܘܐܸܬܼܥܲܫܩܲܬ̤. ܕܐܲܝܟܼ ܕܲܒܼܕܝܼܢܵܐ ܘܲܒܼܒܼܘܼܚܵܢܵܐ ܕܤܘܼܢܗܵܕܘܿܣ:
ܐܸܫܬܲܪܪܲܬ̤ ܗܵܝ̇ ܕܗܲܪ̈ܵܛܝܼܩܹܐ.
ܐܵܠܨܵܐ ܠܲܢ ܡܵܕܹܝܢ ܠܲܡܚܵܘܝܵܘܼ ܠܲܟܼܢܘܼܫܝܼܗܘܿܢ ܘܲܠܕܝܼܢܗܘܿܢ
ܕܐܝܼܟܲܢܵܐ ܐܸܤܬܿܥܲܪ: ܘܠܡܚܵܘܵܝܼܘ ܠܟܼܠܢܵܫ ܡ̣ܢ ܐܲܝܠܹܝܢ ܕܲܠܟܼܠܢܵܫ
ܡܸܬܿܬܵܘ̈ܕܝܵܢ ܕܐܸܬܼܟܬܸܒܼ: ܕܠܵܐ ܗܘ̤ܵܐ ܕܝܼܢܵܐ ܘܠܵܐ ܒܘܼܚܵܢܵܐ: ܕܠܵܐ
pb. 193
ܐܲܝܟܼ ܕܲܒܼܕܝܼܢܵܐ ܕܤܘܼܢܗܵܕܘܿܣ ܢܸܬܼܠܲܒܼ̈ܟܵܢ. ܐܲܝܠܹܝܢ ܕܐܲܠܵܗܵܐ ܠܵܐ
ܐܲܪܦܝܼ ܐܸܢܘܿܢ ܠܲܡܛܲܫܵܝܘܼܬܼܗܘܿܢ: ܐܸܠܵܐ ܦܲܪܤܝܼ ܐܸܢܘܿܢ ܒܐܝܼܕܼܵܐ
ܕܝܼܠܗܘܿܢ: ܒܐܲܝܠܹܝܢ ܪܥܒܲܕܼܘ ܘܲܟܼܬܿܒܼܘ ܠܐܲܝܠܹܝܢ ܕܲܗ̤ܘܲܝ̈. ܗܵܠܹܝܢ
ܕܐܵܦ ܚܢܲܢ ܟܵܬܼܒܿܝܼܢܲܢ: ܘܲܡܢܲܗܪܝܼܢܲܢ ܠܐܲܝܠܹܝܢ ܕܩܵܝ̇ܡܝܼܢ ܘܡܸܬܼܚܪܹܝܢ
ܠܩܘܼܒܼܠܲܢ: ܕܐܸܢ ܗܵܠܹܝܢ ܥܵܟܲܢܵܐ ܐܝܼܬܲܝܗܹܝܢ. ܕܟܲܕܼ ܦܲܓܼܥ̇ܝܼܢ ܒܲܟܼܬܼܝܼ̈ܒܼܵܬܼܵܐ
ܕܤܘܼܢܗܵܕܘܿܣ ܕܡܸܢܗܘܿܢ ܐܸܬܼܟܬܸܒܼ: ܢܹܐܠܦܘܼܢ ܕܗܵܟܲܢܵܐ
ܐܝܼܬܲܝܗܹܝܢ ܘܠܵܘ ܐ̄ܚܪܵܢܝܵܐܝܼܬܼ. ܘܢܸܕܿܥܘܼܢ ܥܫܘܼܩܝܵܐ ܕܲܗܘ̤ܵܐ ܡ̣ܢ
ܤܘܼܢܗܵܕܘܿܣ ܥܲܠ ܐܵܪ̈ܬܵܕܘܿܟܿܤܹܐ: ܘܐܸܫܬܪ̈ܝܼܝܼܢ ܡ̣ܢ ܐܲܝܠܹܝܢ ܕܒܲܫܪܵܪܵܐ
ܗ̄ܘ̣ܵܘ ܐܵܪ̈ܕܘܿܟܿܤܹܐ: ܐܲܟܼܙܢܵܐ ܕܐܲܝܠܹܝܢ ܕܲܗ̤ܘܲܝ̈ ܥܲܠ ܐܵܬܵܢܵܤܝܼܣ
ܘܐܘܼܤܛܵܬܝܼܣ ܘܪܸܒܿܘܿ ܐ̄ܚܪ̈ܵܢܝܼܢ. ܢܸܚܙܸܐ ܗܵܟܹܝܠ ܢܸܩܦܵܐܝܼܬܼ ܐܲܝܟܲܢܵܐ
ܐܸܤܬܿܥܲܪ ܡܸܢܗܘܿܢ ܗܘܼܦܡ̈ܢ݂ܡܵܛܵܐ ܠܘܼܩܒܲܠܝ.
ܡ̣ܢ ܗܘܼܦܵܡ̈ܢܹܡܵܛܵܐ ܕܐܲܝܠܹܝܢ ܕܐܸܤܬܿܥܲܪ ܠܘܼܩܒܲܠܝ ܒܐܲܦܸܤܘܿܣ.
ܦܲܛܪܘܿܣ: ܩܲܫܝܼܫܵܐ ܕܐܵܠܹܟܼܤܲܢܕܪܝܼܵܐ ܘܪܹܫܵܐ ܕܢܘܿܛܵܪܹ̈ܐ ܐܵܡܲ݁ܪ:
ܟܲܕܼ ܡ̣ܢ ܩܕܼܝܼܡ ܢܲܟܼܦܵܐ ܢܸܤܛܘܿܪܝܼܣ ܩܲܒܸܿܠ̣ ܤܝܵܡܝܼܕܼܵܐ ܕܢܸܗܘܸܐ
ܐܲܦܸܤܩܘܼܦܵܐ ܠܥܹܕܬܵܐ ܩܲܕܝܼܫܵܐ ܕܩܘܼܤܛܲܢܛܲܝܼܢܵܦܘܿܠܝܼܣ: ܘܲܥܒܲܪܘ
ܝܵܘ̈ܡܵܬܼܵܐ ܙܥܘܿܪܹ̈ܐ: ܐܸܬܼܝܲܒܲܠܘ ܡ̣ܢ ܐ̄ܢܵܫ̈ܝܼܢ ܡ̣ܢ ܩܘܼܤܛܲܢܛܝܼܢܵܦܘܿܠܝܼܣ.
ܬܘܼܪ̈ܓܵܢܵܘܗܝ ܕܲܡܕܲܠܚܝܼܢ ܠܐܲܝܠܹܝܢ ܕܩܵܪܹܝܢ ܠܗܘܿܢ: ܐܲܝܟܼ
pb. 194
ܕܤܲܓܿܝܼ ܡ̣ܢ ܗܵܕܹܐ ܢܸܗܘܸܐ ܫܓܼܘܼܫܝܵܐ ܠܥܹܕܬܵܐ ܩܲܕܝܼܫܬܼܵܐ. ܗܵܕܹܐ
ܗܵܟܹܝܠ ܟܲܕܼ ܝܑܼܠܸܦ̣ ܢܲܟܼܦܵܐ ܐܲܦܸܤܩܘܿܦܵܐ ܕܐܵܠܹܟܼܤܲܢܕܪܝܼܵܐ ܩܘܼܪܸܠܘܿܣ:
ܟܬܲܒܼ ܐܸܓܲܪܬܵܐ ܚܕܼܵܐ ܘܬܲܪܬܹܝܢ ܠܘܵܬܼ ܢܲܟܼܦܘܼܬܹܗ: ܟܲܕܼ ܡܲܠ̈ܝܵܢ
ܡܸܠܟܹ̈ܐ ܘܡܲܪ̈ܬܿܝܵܢܘܵܬܼܵܐ. ܘܠܘܼܩܒܲܠ ܗܵܠܹܝܢ ܟܬܲܒܼ ܕܠܵܐ ܡܸܫܬܿܡܲܥ:
ܟܲܕܼ ܡܸܬܼܥܲܫܲܢ ܘܩܵܐܹ̇ܡ ܠܘܼܩܒܲܠ ܐܲܝܠܹܝܢ ܕܐܸܬܼܟܬܸܒܼ. ܘܥܲܡ ܗܸܠܹܝܢ
ܬܘܼܒܼ: ܟܲܕܼ ܝܑܠܸܦ̣ ܢܲܟܼܦܵܐ ܐܲܦܸܤܩܘܿܦܵܐ ܩܘܼܪܸܠܘܿܣ: ܕܐܵܦ
ܠܪܗܘܿܡܹܐ ܐܸܫܬܲܕܲܪ ܡܸܢܹܗ ܟܬܼܝܼ̈ܒܼܵܬܼܵܐ ܘܲܟܼܬܼܵܒܹ̈ܐ ܕܬܼܘܼܪ̈ܓܵܡܵܘܗܝ:
ܟܬܲܒܼ ܘܐܵܦ ܗ̤ܘ ܠܘܵܬܼ ܕܵܚܹ̇ܠ ܠܐܲܠܵܗܵܐ ܐܲܦܸܤܩܘܿܦܵܐ ܕܥܹܕܬܵܐ
ܕܪܗܘܿܡܹܐ ܩܹܠܹܤܛܝܼܢܘܿܣ ܒܐܝܼܕܲܝ̈ ܦܝܤܝܼܕܝܘܿܢ ܡܫܲܡܫܵܢܵܐ.
ܘܦܲܩܕܹܗ: ܕܐܸܢ ܗ̤ܘ ܕܬܸܫܟܲܚ ܕܝܼܗܝܼܒܼܝܼܢ ܟܬܼܵܒܹ̈ܐ ܕܬܼܘܼܪ̈ܓܵܡܵܘܗܝ
ܘܐܸܓܿܪܵܬܼܵܐ: ܗܲܒܼ ܘܐܵܦ ܠܐܲܝܠܹܢܝ ܕܡܹܢܝ ܐܸܬܼܟܬܸܒܼ. ܐܸܢ ܕܹܝܢ ܠܵܐ:
ܐܲܝܬܼܵܐ ܐܸܢܹܝܢ ܠܗܵܪܟܵܐ: ܟܲܕܼ ܠܵܐ ܝܵܗܹ̇ܒܼ ܐܲܢ̄ܬܿ ܠܗܹܝܢ ܗܵܫܵܐ. ܟܲܕܼ
ܐܸܫܟܲܚ ܕܹܝܢ ܠܐܸܚܿܪ̈ܵܬܹܗ ܘܲܠܬܼܘܼܪ̈ܓܵܡܵܘܗܝ ܕܐܸܬܼܝܼܗܸܒܼܘ:
ܐܵܠܨܵܐܝܼܬܼ ܐܵܦ ܗ̤ܘ ܝܲܗ̣̄ܒܼ. ܘܐܸܬܼܟܿܬܸܒܼ ܐܲܝܠܹܝܢ ܕܘܵܠܹ̇ܐ ܡ̣ܢ ܟܵܚܹ̇ܠ
ܠܐܲܠܵܗܵܐ ܚܲܤܝܼܵܐ ܐܲܦܸܤܩܘܿܦܵܐ ܕܥܹܕܬܵܐ ܕܪܗܘܿܡܹܐ ܩܹܠܹܤܛܝܼܢܘܿܣ
ܕܐܝܼܬܼ ܒܗܹܝܢ ܛܘܼܦܘܿܣ ܝܑܼܕܼܝܼܥܵܐ. ܡܸܛܠ ܗܵܟܹܝܠ ܕܡ̣ܢ ܪܸܡܙܵܐ
ܕܪܵܚܹܡ ܐܲܠܵܗܵܐ ܡܲܠܟܵܐ: ܤܘܼܢܗܵܕܘܿܣ ܩܲܕܝܼܫܬܼܵܐ ܕܝܼܠܟܼܘܿܢ
ܐܸܬܼܘܲܥܕܲܬ̤ ܗܵܪܟܵܐ: ܡܲܠܦܝܼܢܲܢ ܐܵܠܨܵܐܝܼܬܼ ܕܲܠܟܲܪ̈ܛܲܝܤܹܐ ܕܥܲܠ
ܗܵܠܹܝܢ: ܒܐܝܼܕܵܝ̈ܢ ܫܩܝܼܠܝܼܢܲܢ: ܠܘܵܬܼ ܗܵܘ̇ ܡܵܐ ܕܫܵܦܲܪ ܠܕܼܚܠܲܬܼ
ܐܲܠܵܗܵܐ ܕܲܒܼܟܼܘܿܢ.
pb. 195
ܢܸܤܛܘܿܪܝܼܣ. ܡܵܕܹܝܢ ܪܵܕܼܘܿܦܵܐ ܘܲܡܩܲܛܪܓܼܵܢܵܐ ܩܘܼܪܸܠܘܿܣ
ܐܝܼܬܼܵܘܗܝ: ܐܸܢܵܐ ܕܹܝܢ ܡܸܬܼܪܲܕܼܦܵܢܵܐ. ܗܵܝ̇ ܕܹܝܢ ܕܫܸܡܥܲܬ̤ ܡܸܠܲܝ̈ ܘܕܼܵܢܲܬ̤
ܤܘܼܢܗܵܕܘܿܣ ܐܝܼܬܹܝܗ̇: ܘܲܡܟܲܢܫܵܢܵܐ ܡܲܠܟܵܐ. ܐܸܢ ܗܵܟܹܝܠ ܒܛܟܼܤܵܐ
ܕܕܲܝܵܢܹ̈̇ܐ: ܘܡܵܢܵܐ ܐܵܡܲ݁ܪ ܐ̄ܢܵܐ ܒܛܲܟܼܤܵܐ ܕܕܝܵܢܹ̈̇ܐ: ܗ̤ܘ ܐܝܼܬܼܵܘܗܝ ܗ̄ܘ̣ܵܐ
ܟ̱ܠܹܗ ܒܹܝܬܼ ܕܝܼܢܵܐ. ܟܠ ܡܵܐ ܓܹܝܪ ܕܐܵܡܲ݁ܪ ܗ̄ܘ̣ܵܐ ܗܵܢܵܐ: ܐܲܟܲܚ̄ܕܼ
ܟܠܗܘܿܢ ܐܵܡ̇ܪܝܼܢ ܗ̄ܘ̣ܵܘ: ܘܲܕܼܠܵܐ ܦܘܼܠܵܓܼ ܫܲܪܝܼܪ ܗ̄ܘ̣ܵܐ ܠܗܘܿܢ
ܦܲܪܨܘܿܦܹܗ ܠܒܹܝܬܼ ܕܝܼܢܵܐ. ܐܸܠܘܼ ܓܹܝܪ ܟܢܝܼܫܝܼܢ ܗ̄ܘ̣ܵܘ ܟܠܗܘܿܢ ܕܲܝܵܢܹ̈̇ܐ:
ܘܲܩܛܹܐ ܓܼܪ̈ܵܢܹܐ ܒܛܲܟܼܤܗܘܿܢ ܩܵܝ̇ܡܝܼܢ ܗ̄ܘ̣ܵܘ: ܘܡܸܬܼܩܲܛܪ̈ܓܼܵܢܹܐ
ܬܘܼܒܼ ܒܵܗ̇ ܒܲܕܼܡܘܼܬܼܵܐ. ܟܠܗܘܿܢ ܫܲܘܝܵܐܝܼܬܼ ܩܵܢܹ̇ܝܢ ܗ̄ܘ̣ܵܘ ܦܵܪܹܗ̄ܝܼܵܐ.
ܐܸܢܕܹܝܢ ܗ̤ܘ ܐܝܼܬܼܵܘܗܝ ܒܟܼܠܡܸܕܸܡ ܘܲܩܛܹܐ ܓܼܪܵܢܵܐ ܘܡܲܠܟܵܐ
ܘܕܲܝܵܢܵܐ: ܒܫܘܼܠܛܵܢܵܐ ܤܵܥܲ݁ܪ ܗ̄ܘ̣ܵܐ ܟܠܗܹܝܢ. ܟܲܕܼ ܐܲܦܸܩ̣ ܡ̣ܢ
ܫܘܼܠܛܵܢܵܐ ܗܵܢܵܐ: ܠܗܵܘ̇ ܕܲܦܩܝܼܕܼ ܗ̄ܘ̣ܵܐ ܡ̣ܢ ܡܲܠܟܵܐ ܘܐܲܩܝܼܡ
ܢܲܦܫܹܗ: ܘܟܲܢܸܫ̣ ܠܹܗ ܠܐܲܝܠܹܝܢ ܕܒܼܵܥܹ̇ܐ ܗ̄ܘ̣ܵܐ: ܠܪ̈ܲܚܝܼܩܹܐ ܘܲܠܩܲܪ̈ܝܼܒܹܐ:
ܘܲܥܒܲܕܼ ܢܲܦܫܹܗ ܒܹܝܬܼ ܕܝܼܢܵܐ. ܘܐܸܬܼܩ̇ܪܝܼܬܼ ܐܸܢܵܐ ܡ̣ܢ ܩܘܼܪܸܠܘܿܣ ܗܵܘ̇
ܕܟܲܢܫ̣ܵܗ̇ ܠܤܘܼܢܗܵܕܘܿܣ: ܘܡ̣ܢ ܩܘܼܪܸܠܘܿܣ ܕܐܝܼܬܼܵܘܗܝ ܗ̄ܘ̣ܵܐ
ܪܹܫܵܗ̇. ܡܲܢ̣ܘܼ ܕܲܝܵܢܵܐ؟ ܩܘܼܪܸܠܘܿܣ. ܘܡܲܢ̣ܘܼ ܩܛܹܐ ܓܼܪܵܢܵܐ؟
ܩܘܼܪܸܠܘܿܣ. ܡ̇ܢ ܗ̄ܘ̣ܵܐ ܐܲܦܸܤܩܘܿܦܵܐ ܕܪܗܘܿܡܹܐ؟ ܩܘܼܪܸܠܘܿܣ.
ܟܠܡܕܸܡ ܩܘܼܪܸܠܘܿܣ ܐܝܼܬܼܵܘܗܝ ܗ̄ܘ̣ܵܐ. ܩܘܼܪܸܠܘܿܣ ܠܲܟܡ ܐܝܼܬܼܵܘܗܝ
ܗ̄ܘ̣ܵܐ ܐܲܦܸܤܩܘܿܦܵܐ ܕܪܗܘܿܡܹܐ ܩܹܠܹܤܛܝܼܢܘܿܣ܀
pb. 196
ܡܲܢ̣ܘܼ ܡܗܲܝܡܸܢ ܗ̄ܘ̣ܵܐ ܕܗܵܠܹܝܢ ܗܵܟܲܢܵܐ ܗ̤ܘܲܝ̈: ܐܸܠܘܼܠܵܐ ܐܲܠܵܗܵܐ
ܚܒܲܫ̣ ܐܸܢܘܿܢ ܠܡܹܐܡܲܪ ܘܲܠܡܸܟܼܬܲܒܼ: ܘܠܲܡܫܲܕܵܪܘܼ ܠܟܼܠܵܗ̇ ܬܹܒܹܝܠ؟
ܟܠ ܐܲܝܠܹܝܢ ܓܹܝܪ ܕܐܝܼܬܲܝܗܘܿܢ ܕܝܼܠܹܗ: ܩܵܪܹܝܢ ܠܗܹܝܢ ܘܠܵܐ
ܡܗܲܝܡܢܝܼܢ ܕܗܵܠܹܝܢ ܗܵܟܲܢܵܐ ܗ̣̄ܘܲܝ̈: ܘܲܠܦܝܼܓܼܝܼܢ ܘܐܵܦ ܥܲܠ ܢܲܦܫܗܘܿܢ.
ܒܲܕܼ ܝܲܬܿܝܼܪ ܡ̣ܢ ܗܵܠܹܝܢ ܡܲܫܪܝܼܢ ܠܐܲܝܠܹܝܢ ܕܒܼܚܸܠܡܹ̈ܐ ܗܵܘ̈ܝܵܢ: ܐܸܢ
ܗܵܠܹܝܢ ܗܵܟܲܢܵܐ ܐܝܼܬܲܝܗܹܝܢ ܐܲܟܼܡܵܐ ܕܲܗ̤ܘܲܝ̈. ܡܵܢ ܐܵܠܨܵܐ ܗ̄ܘ̣ܵܬܼ ܥܲܠ
ܤܘܼܢܗܵܕܘܿܣ: ܟܲܕܼ ܗܵܢܵܐ ܐܝܼܬܼܵܘܗܝ ܗ̄ܘ̣ܵܐ ܟܠܡܸܕܸܵܡ؟ ܕܗܵܠܹܝܢ
ܗܵܟܹܝܠ ܗܵܟܲܢܵܐ ܗ̣̄ܘܲܝ̈: ܡ̣ܢ ܐܲܝܠܹܝܢ ܕܲܗ̤ܘܲܝ̈ ܒܐܲܦܸܤܘܿܣ ܝܵܠܦܝܼܬܘܿܢ.
ܡܲܡܢܘܿܢ ܓܹܝܪ ܐܵܡܲ݁ܪ ܗ̄ܘ̣ܵܐ: ܕܡ̣ܢ ܦܪܵܬܘܿܙܡܝܼܵܐ ܕܲܡܬܲܚܡܵܐ ܗ̄ܘ̣ܵܬܼ
ܒܲܟܼܬܼܝܼ̈ܒܼܵܬܼܵܐ ܕܕܵܚܹ̇ܠ ܠܐܲܠܵܗܵܐ ܘܪܵܚܹ̇ܡ ܠܲܡܫܝܼܚܵܐ ܡܲܠܟܵܐ: ܥܒܲܪܘ
ܫܸܬܿܬܲܥܤܲܪ ܝܵܘܡ̈ܝܼܢ. ܘܐܲܝܟܼ ܡܵܐ ܕܗ̤ܘ ܐܝܼܬܼܵܘܗܝ ܗ̄ܘ̣ܵܐ ܡܵܪܵܗ̇
ܕܤܘܼܢܗܵܕܘܿܣ: ܡܸܬܼܚܲܫܲܚ ܗ̄ܘ̣ܵܐ ܦܸܤܘܿܩܵܐܝܼܬܼ. ܩܘܼܪܸܠܘܼܣ
ܐܲܦܸܤܩܘܿܦܵܐ ܕܐܠܹܟܼܤܲܢܕܪܝܼܵܐ ܐܵܡܲ݁ܪ: ܤܵܦܩܵܐܝܼܬܼ ܤܘܼܢܗܵܕܘܿܣ
ܗܵܕܹܐ ܪܲܒܿܬܼܵܐ ܘܩܲܕܝܼܫܬܼܵܐ ܚܲܡܤܢܲܬ̤: ܟܲܕܼ ܡܩܵܘܝܵܐ ܠܡܹܐܬܼܝܼܬܼܵܐ ܕܐܲܝܠܹܝܢ
ܕܡܸܤܬܲܟܹܿܝܢ ܠܡܹܐܬܼܝܵܐ: ܪ̈ܵܚܡܲܝ ܐܲܠܵܗܵܐ ܐܲܦܸܤܩ̈ܘܿܦܹܐ.
ܢܸܤܛܘܿܪܝܼܣ. ܐܵܪܵܐ ܠܵܐ ܓܲܠܝܵܐ ܐܵܦ ܠܠܵܐ ܡܸܤܬܲܟܿܠܵܢܹ̈ܐ:
ܕܗ̤ܘ ܐܝܼܬܼܵܘܗܝ ܗ̄ܘ̣ܵܐ ܒܟܼܠ ܡܸܕܸܵܡ؟ ܡ̣ܢ ܗܵܢܵܐ ܗܵܟܹܝܠ: ܕܲܒܼܟܼܠ
ܡܸܕܸܡ ܐܸܬܿܬܿܤܝܼܡ ܗ̄ܘ̣ܵܐ: ܐܸܬܼܩ̇ܪܝܼܬܼ ܐܸܢܵܐ. ܘܲܠܐܝܢܵܐ ܒܹܝܬܼ ܕܝܼܢܵܐ؟
ܠܐܲܝܢܵܐ ܕܝܼܢܵܐ؟ ܠܐܲܝܕܵܐ ܒܥܵܬܼܵܐ؟ ܐܸܡܲܪ ܠܝܼ. ܤܵܦܩܵܐܝܼܬܼ ܠܲܡ
ܤܘܼܢܗܵܕܘܿܣ ܗܵܕܹܐ ܪܲܒܿܢܼܵܐ ܘܩܲܕܝܼܫܬܼܵܐ ܚܲܡܤܢܲܬ̤: ܟܲܕܼ ܡܩܵܘܝܵܐ
pb. 197
ܫܸܬܿܬܿܥܤܲܪ ܝܵܘܡ̈ܝܼܢ. ܤܵܦܩܵܐܝܼܬܼ: ܐܵܡ̇ܪܲܬܿ: ܕܚܲܡܤܢܲܬ̤: ܘܠܵܐ
ܒܥܸܬܬܘܿܢ ܕܲܟܼܬܲܒܼܬܿܘܿܢ ܗܵܕܹܐ ܐܲܝܟܼ ܥܸܠܬܼܵܐ ܡܝܲܬܲܪܬܿܐ: ܕܡܸܢܵܗ̇
ܐܸܬܼܐ̱ܠܨܬܿܘܿܢ ܕܠܵܐ ܬܩܵܘܘܿܢ ܠܐܲܦܸܤܩ̈ܘܿܦܹܐ ܐܲܝܠܹܝܢ ܕܪܲܚܝܼܩܝܼܢ:
ܐܲܝܠܹܝܢ ܕܐܵܠܨܵܐ ܗ̄ܘ̣ܵܬܼ ܠܗܘܿܢ ܠܡܹܐܬܼܵܐ؟ ܘܲܒܼܥܸܠܬܼܵܐ ܕܘܵܝܼܬܼܵܐ
ܐܸܫܬܵܘܚܲܪܘ ܠܡܹܐܬܼܵܐ: ܘܲܒܼܥ̣ܵܘ ܕܲܬܼܩܵܘܘܿܢ ܠܗܘܿܢ: ܗܵܢܘܿܢ ܕܐܵܦ
ܩܲܪܝܼܒܼܝܼܢ ܗ̄ܘ̣ܵܘ: ܘܡܸܕܸܡ ܠܵܐ ܒܨܝܼܪܵܐ ܗ̄ܘ̣ܵܬܼ ܡܹܐܬܼܝܼܬܼܗܘܿܢ. ܡ̣ܢ
ܟܠ ܦܪܘܿܣ ܡܸܫܬܵܘܚܪܝܼܢ ܗ̄ܘ̣ܵܘ ܝܵܘ̈ܡܵܬܼܵܐ ܗܵܠܹܝܢ: ܐܸܢ ܠܵܐ ܝܲܬܿܝܼܪ:
ܐܲܝܟܼ ܕܲܢܢܝܼܚܘܼܢ ܡܸܢܗܘܿܢ ܫܚܵܩܗܘܿܢ ܕܡ̣ܢ ܡܲܪܕܝܼܬܼܵܐ ܕܐܘܼܪܚܵܐ
ܘܕܼܐܠܦܵܐ. ܘܠܲܢܝܵܚܵܐ: ܘܠܲܚܫܲܚܬܼܵܐ ܕܐܵܠܨܵܝ̈ܬܼܵܐ: ܘܲܠܦܸܓܼܥܵܐ ܕܲܚܕܼܵܕܹ̈ܐ:
ܘܕܲܐܝܠܹܝܢ ܕܲܟܼܪܝܼܗܝܼܢ ܗ̄ܘ̣ܵܘ ܘܲܤܢܝܼܩܝܼܢ ܗ̄ܘ̣ܵܘ ܥܲܠ ܗܵܠܹܝܢ.
ܘܝܲܬܿܝܼܪܵܐܝܼܬܼ ܡܸܛܠ ܦܲܪ̈ܨܘܿܦܹܐ ܗܵܢܘܿܢ ܕܲܡܡܲܠܹܝܢ ܗ̄ܘ̣ܵܘ ܕܘܼܟܿܬܼܵܐ
ܕܗܵܢܘܿܢ ܕܪܲܚܝܼܩܝܼܢ ܠܤܘܼܢܗܵܕܘܿܣ: ܒܐܲܝܠܹܝܢ ܕܐܵܠܨܵܐ ܗ̄ܘ̣ܵܬܼ
ܥܠܲܝܗܘܿܢ. ܟܲܕܼ ܛܵܒܼ ܐܵܦܸܢ ܗ̤ܘ ܐܝܼܬܼܵܘܗܝ ܝܵܘܡܵܐ ܕܐܸܬܼܠܒܸܟܼ:
ܘܙܵܕܹܩ ܗ̄ܘ̣ܵܐ ܕܬܸܗܘܸܐ ܟܵܪܘܿܙܘܼܬܼܵܐ: ܓܵܕܹܫ ܗ̄ܘ̣ܵܐ ܕܹܝܢ ܡܸܕܸܡ ܐܲܝܟܼ
ܕܲܬܼܦܘܼܫ: ܘܵܠܝܵܐܝܼܬܼ ܡܸܬܼܬܵܘܤܲܦ ܗ̄ܘ̣ܵܐ ܝܵܘܡܵܐ ܐ̄ܚܪܹܢܵܐ. ܐܲܝܟܼ
ܕܲܠܘܵܬܼ ܒܢܲܝ̈ܢܵܫܵܐ: ܕܐܝܼܬܼ ܥܸܠ̈݁ܠܵܬܼܵܐ ܤܲܓܿܝܼ̈ܠܵܬܼܵܐ ܕܡ̣ܢ ܐܵܢܲܢܩܹܐ ܗܵܘ̈ܝܵܢ
ܠܗܘܿܢ: ܕܠܵܘ ܠܦܘܼܬܼ ܚܲܬܿܝܼܬܼܘܼܬܼܵܐ ܕܲܦܪܵܬܘܿܙܡܝܼܵܐ ܡܸܤܬܿܥܪ̈ܵܢ.
ܐܸܠܵܐ ܠܵܐ ܗ̄ܘ̣ܵܐ ܕܟܼܵܪܘܿܙܘܼܬܼܵܐ ܐܝܼܬܼܵܘܗܝ ܗ̄ܘ̣ܵܐ ܝܵܘܡܵܐ: ܐܸܠܵܐ
ܕܡܹܐܬܼܝܼܬܼܵܐ. ܝܵܘܡܵܐ ܓܹܝܪ ܕܟܼܵܪܘܿܙܘܼܬܼܵܐ: ܒܫܘܼܠܛܵܢܵܐ ܕܩܘܿܡܹܣ
ܡܸܬܼܦܪܸܫ ܗ̄ܘ̣ܵܐ. ܚܛܲܦܬܿ ܢܲܦܫܵܟܼ: ܒܕܸܐܬܿܬܿܟܸܠܬܿ ܥܲܠ ܐܲܝܠܹܝܢ
ܕܲܡܬܲܪܨܝܼܢ ܠܵܟܼ ܗܲܦܟܵܐܝܼܬܼ: ܒܡܲܪܵܚܘܼܬܼܵܟܼ ܕܠܵܐ ܒܘܼܝܵܢܵܐ. ܠܲܡܦܵܤܘܼ
pb. 198
ܓܹܝܪ ܡܲܚܸܒܼ ܐܲܢ̄ܬܿ: ܘܕܲܐܝܟܼ ܗܵܟܲܢܵܐ ܐܝܼܬܲܝܟܼ: ܕܒܲܐܝܠܹܝܢ ܕܩܲܪܝܼܒܼܝܼܢ
ܡܲܗܡܸܐ ܐܲܢ̄ܬ: ܘܠܲܐܝܠܹܝܢ ܕܪܲܚܝܼܩܝܼܢ ܒܵܥܹ̇̄ܐ ܐܲܢ̄ܬܿ. ܘܫܵܪܹܐ ܐܲܢ̄ܬܿ
ܠܐܲܝܠܹܝܢ ܕܩܲܪܝܼܒܼܝܼܢ ܠܤܘܼܢܵܗܵܕܘܿܣ: ܘܲܡܤܲܟܸܐ ܐܲܢ̄ܬܿ ܠܐܲܝܠܹܝܢ
ܕܪܲܚܝܼܩܝܼܢ. ܘܥܵܒܹ̇ܕܼ ܐܲܢ̄ܬܿ ܠܤܘܼܢܗܵܕܘܿܣ: ܕܠܵܐ ܢܸܬܼܡܲܛܘܿܢ ܐܲܝܠܹܝܢ
ܕܪܲܚܝܼܩܝܼܢܢ. ܘܡܸܢܹܗ ܘܠܹܗ ܥܒܲܕܼ ܤܘܼܢܗܵܕܘܿܣ: ܩܕܼܵܡ
ܤܘܼܢܗܵܕܘܣ ܕܟܼܠ ܐ̄ܢܵܫ. ܘܲܩ̣ܪܵܐ ܠܐܲܝܠܹܝܢ ܕܠܵܐ ܐܸܫܬܵܘܬܲܦܘ
ܠܹܗ: ܕܬܸܗܘܸܐ ܤܘܼܢܗܵܕܘܿܣ: ܩܕܼܵܡ ܪܘܼܢܗܵܕܘܿܣ ܕܟܼܠܗܘܿܢ
ܐܲܦܸܤܩ̈ܘܿܦܹܐ. ܘܲܡܤܲܥܕܹܝܢ ܗ̄ܘ̣ܵܘ ܠܹܗ: ܕܠܵܐ ܢܸܬܿܬܿܟܸܠ ܥܲܠ ܗܵܕܹܐ
ܤܘܼܢܗܵܕܘܿܣ: ܕܠܵܗ̇ ܐܵܦ ܠܝܼ ܩܪܵܢܝ: ܟܲܕܼ ܒܲܩܛܝܼܪܵܐ ܡܸܬܼܚܲܫܲܚ.
ܘܲܩܛܝܼܪܵܐ ܘܐܵܢܲܢܩܹܐ ܕܐܲܝܟܼ ܗܵܕܹܐ: ܐܲܝܕܵܐ ܕܟܲܕܼ ܡܬܲܢܸܐ ܐ̄ܢܵܫ ܠܵܐ
ܡܸܬܼܗܲܝܡܲܢ. ܒܪܲܡ: ܡ̣ܢ ܐܲܝܠܹܝܢ ܕܲܟܼܬܲܒܼܘ ܡܸܬܼܓܠܸܐ. ܤܛܵܤܝܼܪܹ̈ܐ
ܓܹܝܪ ܡܠܵܐܘܼܗ̇ ܠܲܡܕܼܝܼܢ̄ܬܼܵܐ ܡ̣ܢ ܤܪ̈ܝܼܩܹܐ ܘܡ̣ܢ ܩܘܼܪ̈ܚܹܐ: ܕܡ̣ܢ
ܡܲܡܢܘܿܢ ܐܲܦܸܩܘܿܦܵܐ ܕܐܲܦܸܤܘܿܣ ܐܸܬܼܟܲܢܲܫܘ. ܘܩܵܐܹ̇ܡ ܗ̄ܘ̣ܵܐ
ܒܪܹܫܗܘܿܢ: ܘܡܲܪܗܸܓ ܗ̄ܘ̣ܵܐ ܠܗܘܿܢ ܟܲܕܼ ܡܙܲܝܢܝܼܢ ܒܲܡܕܼܝܼܢ̄ܬܼܵܐ. ܐܲܝܟܼ
ܕܢܸܥܪܘܿܩ ܟܠ ܚܲܕܼ ܡܸܢܲܢ ܘܢܸܬܿܛܲܫܸܐ: ܘܢܸܬܼܚܲܫܲܚ ܒܲܙܗܝܼܪܘܼܬܼܵܐ:
ܘܲܠܡܲܚܤܸܢ ܢܸܫܬܵܘܙܲܒܼ ܒܕܸܚܸܠ̱ܬܼܵܐ ܤܲܓܝܼܐܬܼܵܐ. ܐܲܝܟܼ ܕܐܵܦ ܡ̣ܢ
ܡܲܡܠܠܵܐ ܕܐܲܝܠܹܝܢ ܕܐܸܫܬܲܕܲܪܘ ܦܫܝܼܩܵܐ ܠܡܹܐܠܲܦ: ܗܵܢ̇ܘܿܢ ܕܒܲܫܡܵܐ
ܡ̇ܢ ܐܲܝܟܼ ܕܢܸܩܪܘܿܢܵܢܝ ܠܤܘܼܢܗܵܕܘܿܣ ܐܸܬܼ݂ܵܘ: ܕܢܸܤܬܿܗܸܕܼ ܕܠܵܐ
ܢܸܗܘܸܐ ܐܲܝܟܼ ܐܲܝܠܹܝܢ ܕܠܵܐ ܝܵܕܼܥ̇ܝܼܢ ܠܵܗ̇ ܠܤܘܼܢܗܵܕܘܿܣ: ܩܕܼܵܡ
ܡܹܐܬܼܝܼܬܼܵܐ ܕܟܼܠܗܘܿܢ ܐܲܦܸܤܩ̈ܘܿܦܹܐ. ܒܲܫܪܵܪܵܐ ܓܹܝܪ ܐܸܬܼ݂ܵܘ ܕܢܸܕܼܒܿܪܘܼܢܵܢܝ
ܒܲܚܛܘܼܦܝܵܐ ܘܒܲܩܛܝܼܪܵܐ: ܘܢܲܛܒܼܘܼܢ ܥܠܲܝ ܕܡܹܐܒܲܕ ܐܸܒܲܕ:
pb. 199
ܘܐܸܤܬܿܟܲܪ ܦܘܼܡܹܗ ܥܲܠ ܓܘܼܕܵܦܵܘ̈ܗܝ: ܐܵܘ ܐܲܝܟܼ ܕܠܲܐܝܢܵܐ
ܕܐܸܫܬܲܐܲܠ ܢܸܫܪܘܿܢܵܢܝ.
ܕܗܵܠܹܝܢ ܓܹܝܪ ܐܸܬܼܐ̰ܡܲܪ: ܫܡܲܥܘ ܐܵܦ ܡ̣ܢ ܡܲܡܠܠܵܐ
ܕܝܘܼܒܹܢܵܠܝܘܿܣ.
ܝܘܼܒܹܢܵܠܝܘܿܣ ܐܲܦܸܤܩܘܼܦܵܐ ܕܐܘܼܪܸܫܠܸܡ ܐܵܡܲ݁ܪ: ܡܸܛܠ ܕܹܝܢ
ܕܲܟܼܢܘܼܫܝܵܐ ܕܪ̈ܗܘܿܡܵܝܹܐ ܐܲܚܕܲܪ ܠܒܲܝܬܹܗ: ܘܐܲܝܟܼ ܕܐܸܬܼ݂ܵܘ ܕܵܚܠܲܝ̈
ܠܐܲܠܵܗܵܐ ܐܲܦܸܤܩ̈ܘܿܦܹܐ ܘܐܸܡ݂ܲܪܘ: ܠܵܐ ܫܒܲܩ̣ܘ ܠܐ̄ܢܵܫ ܠܡܬܼܩܲܪܵܒܼܘܼ
ܠܬܲܡܵܢ: ܝܑܼܕܼܝܼܥ ܗ̄ܘ̣ ܕܠܵܘ ܒܬܹܐܪܬܵܐ ܛܵܒܼܬܼܵܐ ܡܸܫܬܿܐܸܠ ܡ̣ܢ
ܡܹܐܬܼܝܼܬܹܗ ܕܲܠܘܵܬܼ ܤܘܼܢܗܵܕܘܿܣ ܩܲܕܝܼܫܬܼܵܐ.
ܢܸܤܛܘܿܪܝܼܣ. ܚܙܲܝܬܿܘܿܢ ܕܒܲܟܼܡܵܐ ܛܪܘܼܢܘܼܬܼܵܐ ܐܸܬܼܚܲܫ̇ܚܹܬܼ ܐܸܢܵܐ:
ܘܠܲܟܼܡܵܐ ܩܛܹܐ ܓܼܪܵܢܘܼܬܼܵܐ ܚܲܝܵܒܼ ܐ̄ܢܵܐ: ܥܲܠ ܕܡܸܛܠ ܕܐܹܫܵܘܙܸܒܼ
ܢܲܦܫܵܝ ܡ̣ܢ ܒܢܲܝ̈ ܡܵܘ̈ܡܵܬܼܵܐ ܕܩܵܡ̣ܘ ܥܠܲܝ: ܐܸܤܬܲܢܩܹ̇ܬܼ ܥܲܠ
ܐܸܤܛܪܵܛܝܼܘܿܛܹܐ ܕܐܲܟܼܪܸܟܼ ܠܒܲܝܬܼܝ ܕܢܸܛܪܘܼܢܵܢܝ: ܕܠܵܐ ܢܹܐܬܼܘܿܢ
ܥܠܲܝ ܒܲܩܛܝܼܪܵܐ ܘܢܵܘܒܿܕܼܘܼܢܵܢܝ؟ ܡܩܲܛܪܸܓܼ ܐܲܢ̄ܬܿ ܠܝܼ:
ܕܐܸܤܛܪܵܛܝܼܘܿܛܹܐ ܐܲܚ̇ܕܪܹܬܼ ܠܒܲܝܬܼܝ: ܠܵܘ ܕܢܸܥܒܿܕܼܘܼܢ ܠܟܼܘܿܢ
ܡܸܕܸܡ ܕܒܼܝܼܫ: ܐܸܠܵܐ ܕܲܢܥܵܘܟܼܘܼܢܵܟܼܘܿܢ ܡ̣ܢ ܕܲܠܡܸܤܥܲܪ ܨܹܐܕܲܝ
ܒܝܼ̈ܫܬܼܵܐ. ܡ̣ܢ ܗܵܝ̇ ܕܲܥܕܲܠܬܿܘܿܢ ܠܲܢ ܥܲܠ ܕܐܲܟܼܪܸܟܼܢܲܢ ܐܸܤܛܪ̈ܵܛܝܼܘܿܛܹܐ
ܡܸܬܼܚܲܙܝܵܐ: ܕܐܸܠܘܼܠܵܐ ܗܸܢܘܿܢ ܩܲܕܸܡ̣ܘ ܐܲܕܼܟܼܘܼܢܝ: ܘܲܗܘ̤ܵܘ ܠܝܼ
ܫܘܼܪܵܐ: ܐܵܒܹ̇ܕܼ ܗ̄ܘܹ̇ܝܬܼ ܡ̣ܢ ܩܛܝܼܪ̈ܵܢܹܐ. ܡ̇ܢ ܓܹܝܪ ܩܵܪܹܝܢ ܗ̣̄ܘܲܝܬܿܘܿܢ
pb. 200
ܠܐܲܝܠܹܝܢ ܕܩܲܕܼܡ̣ܘ ܗܲܗܸܕܼܟܼܘܿܢ: ܕܠܵܐ ܬܸܗܘܸܐ ܤܘܼܢܗܵܕܘܿܣ
ܕܥܵܘ̣ܠܵܐ؟ ܠܡܵܐ: ܐܲܝܟܼ ܕܐܸܬܼܩܪܝܼܬܿܘܿܢ: ܐܸܬܼܟܲܢܲܫܬܿܘܿܢ؟ ܠܢܲܦܫܟܼܘܿܢ
ܥܒܲܕܬܿܘܿܢܵܗ̇ ܠܤܘܼܢܗܵܕܘܿܣ: ܘܠܵܘ ܠܲܢ. ܠܗܵܢܘܿܢ ܓܹܝܪ ܐܲܦܸܩܬܿܘܿܢ
ܡ̣ܢ ܤܘܼܢܗܵܕܘܿܣ: ܘܡܸܢܟܼܘܿܢ ܘܲܠܟܼܘܿܢ ܥܒܕܬܿܘܿܢ ܠܗܘܿܢ ܐܲܝܟܼ
ܕܲܨܒܲܝܬܿܘܿܢ. ܘܠܵܐ ܫܡܲܥܬܘܿܢ ܐܸܢܘܿܢ ܕܩܵܥܹ̇ܝܢ ܗ̄ܘ̣ܵܘ ܠܟܼܘܿܢ: ܕܠܵܐ
ܬܸܥܒܿܕܼܘܼܢ ܤܘܼܢܗܵܕܘܿܣ: ܐܸܠܵܐ ܕܲܬܼܩܵܘܘܿܢ ܠܐܲܦܸܤܩ̈ܘܿܦܹܐ
ܕܐܸܬܼܩܪܝܼܘ ܥܲܢܡܟܼܘܿܢ: ܕܩܲܪܝܼܒܼܝܼܢ ܗ̄ܘ̣ܵܘ ܠܡܹܐܬܼܵܐ. ܗܵܫܵܐ ܗܵܟܹܝܠ
ܐܲܝܟܼ ܕܲܐܠܡ̇ܢ ܩܪܲܝܬܿܘܿܢ ܠܲܢ: ܡ̣ܢ ܒܵܬܲܪ ܗܵܢܵܐ ܟ̱ܠܹܗ ܩܛܝܼܪܵܐ؟
ܡܲܢ̣ܘܼ ܡܤܲܝܒܲܪ ܘܠܵܐ ܢܸܒܼܟܸܿܐ: ܟܲܕܼ ܡܸܬܼܥܗܸܕܼ ܒܝܼ̈ܫܵܬܼܵܐ ܕܲܗ̤ܘܲܝ̈
ܒܐܲܦܸܤܘܿܣ؟ ܘܲܠܘܲܝ ܠܘܼܩܒܲܠܝ ܘܥܲܠ ܚܲܝܲܝ̈ ܗ̤ܘܲܝ̈: ܘܠܵܘ ܡܸܛܠ
ܪܘܼܫܥܵܐ! ܠܵܐ ܓܹܝܪ ܐܸܤܬܲܢܩܹ̇ܬܼ ܒܗܵܠܹܝܢ ܡܸܠܹ̈ܐ: ܥܲܠ ܐ̄̈ܢܵܫ ܕܤܵܦܹ̇ܩ
ܗ̄ܘ̣ܵܐ ܠܦܘܼܪܥܵܢܵܐ: ܐܸܠܵܐ ܥܲܠ ܦܵܪܘܿܩܲܢ ܝܼܫܘܿܥ ܡܫܝܼܚܵܐ: ܗܵܘ̇
ܕܐܝܼܬܼܵܘܗܝ ܕܲܝܢܵܐ ܟܹܐܢܵܐ: ܕܡܸܛܠܵܬܹܗ ܩܲܒܿܠܹ̇ܬܼ ܐܵܦ ܠܲܡܤܲܝܒܵܪܘܼ
ܡܚܲܡܤܢܵܢܵܐܝܼܬܼ: ܚܠܵܦ ܕܠܵܐ ܢܸܬܼܩܲܛܪܲܓܼ ܟ̱ܠܹܗ ܕܘܼܫܡܹܗ
ܕܲܡܫܝܼܚܵܐ. ܗܵܫܵܐ ܕܹܝܢ ܡܪܲܟܿܒܼܝܼܢ ܥܠܲܝ: ܕܡܸܛܠ ܕܠܵܐ ܐܸܫܟܿܚܹ̇ܬܼ
ܠܡܸܫܬܲܩ: ܟܲܕܼ ܡܸܬܿܛܠܸܡ ܐ̄ܢܵܐ ܥܲܠ ܐܲܦܲܝ̈ ܡܕܲܒܿܪܵܢܘܼܬܼܵܐ ܕܲܚܠܵܦܲܝܢ:
ܐܲܝܟܼ ܕܡ̣ܢ ܐܵܢܲܢܩܹܐ ܢܵܦܹ̇ܩ ܐ̄ܢܵܐ ܪܘܼܚܵܐ. ܘܲܡܦܝܼܣ ܐ̄ܢܵܐ ܠܟܼܠܗܘܿܢ
ܒܢܲܝ̈ܢܵܫܵܐ ܕܐܵܡ̇ܪܝܼܢ: ܕܗ̤ܘ ܗܘ̤ܵܐ ܥܸܠܬܼܵܐ ܕܲܫܓܼܘܼܫܝܵܐ ܘܕܲܗܦܘܼܟܼܝܵܐ
ܗܵܢܵܐ: ܘܲܚܵܘܸܐ ܐ̄ܢܵܐ ܢܲܦܫ ܕܫܲܪܝܼܪ ܐ̄ܢܵܐ. ܡܸܛܠ ܕܡ̣ܢ ܗܵܢܵܐ
ܐܸܬܼܐܲܠܨܹ̇ܬܼ: ܘܡܸܛܠ ܐܲܝܠܹܝܢ ܕܲܟܼܬܲܒܼܘ ܠܘܼܩܒܲܠܝ. ܐܸܠܵܐ ܓܹܝܪ ܐܲܢ̄ܬܿ
pb. 201
ܩܲܕܼܡܬܿ ܝܑܼܬܸܒܼܬܿ ܠܲܢ ܒܡܸܨܥܲܬܼ ܕܲܝܵܢܹ̈ܐ. ܘܡܸܛܠ ܕܠܲܝܬܿ ܗ̄ܘ̣ܵܐ
ܩܛܹܐܓܼܪ̈ܵܢܹܐ: ܒܗܵܝ̇ ܕܗܸܢܘܿܢ ܗܘ̤ܵܘ ܕܲܝܵܢܹ̈ܐ: ܐܲܩܝܼܡܘ
ܠܲܡܩܲܛܪܓܼܵܢܘܼܬܲܢܝ ܠܬܹܐܵܕܘܿܛܘܿܣ ܐܲܦܸܤܩܘܿܦܵܐ ܕܐܲܢܩܘܼܪܵܐ
ܕܓܼܵܠܵܛܝܼܵܐ: ܘܠܵܐܩܵܩܝܼܣ ܐܲܦܸܤܦܘܿܦܵܐ ܕܡܝܼܠܝܼܛܝܼܢܘܿܣ ܟܲܕܼ
ܐܝܼܬܼܵܘܗܝ ܗ̄ܘ̣ܵܐ ܗ̤ܘ ܡܫܲܐܠܵܢܵܐ.
ܬܹܐܕܘܿܛܘܿܣ. ܥܢ̣ܵܐ ܕܹܝܢ ܬܹܐܵܕܘܿܛܘܿܣ ܩܲܕܡܵܝܑܬܼ: ܐܲܝܟܼ ܡ̇ܢ
ܕܡܲܡܠܠܵܐ ܡܸܕܸܡ ܥ̣ܒܲܕܼ ܥܲܡܝܼܘ ܘܠܹܗ ܠܡܲܡܠܠܵܐ ܠܵܐ ܐܵܡܲ݁ܪ
ܠܹܗ: ܘܠܵܐ ܡܫܲܐܸܠ ܠܹܗ ܗܵܢܵܐ: ܕܲܠܘܵܬܼ ܐܲܝܕܵܐ ܐܸܬܼܐ̱ܡܲܪ ܡܸܢܹܗ:
ܕܲܢܕܼܘܼܢ ܠܬܼܪ̈ܬܲܝܗܹܝܢ ܡܸܠܹ̈ܐ ܐܲܝܟܼ ܕܲܝܵܢܵܐ. ܘܲܠܗܵܘ̇ ܢܩܲܒܸܿܠ: ܘܲܠܗܵܢܵܐ
ܢܲܤܠܸܐ: ܐܲܝܟܼ ܕܠܲܐܝܢܵܐ ܕܓܲܠܝܵܐܝܼܬܼ ܒܪܘܼܫܥܵܐ ܢܦܲܠ̣: ܐܸܠܵܐ ܒܲܠܚܘܿܕܼ
ܤܵܦܹ̇ܡ ܗ̄ܘ̣ܵܐ ܠܹܗ ܕܲܩܛܹܐ ܓܼܪܵܢܘܼܬܼܵܐ܀ ܬܹܐܵܕܘܿܛܘܿܣ
ܐܲܦܸܩܘܿܦܵܐ ܕܐܲܢܩܘܼܪܵܐ ܐܵܡܲ݁ܪ: ܟܵܐܹ̇ܒܼ ܠܝܼ ܡ̇ܢ ܥܲܠ ܪܵܡܚܵܐ: ܒܪܲܡ
ܕܹܝܢ ܡ̣ܢ ܟ̱ܠܹܗ ܚܘܼܒܵܐ ܡܝܲܩܲܪ ܐ̄ܢܵܐ ܠܕܼܚܠܲܬܼ ܐܲܠܵܗܵܐ: ܘܥܲܠ ܗܵܕܹܐ
ܐܵܢܢܲܩܹܐ ܐܝܼܬܼ ܠܝܼ: ܕܐܵܦ ܒܟܲܪܝܘܼܬܼܵܐ ܤܲܓܿܝܼܐܬܼܵܐ ܡܸܛܠ ܐܲܝܠܹܝܢ
ܕܡܸܫܬܲܐܲܠܢܵܐ: ܫܪܵܪܵܐ ܐܹܡܲܪ. ܠܵܐ ܕܹܝܢ ܤܵܒܲܪ̇ ܐ̄ܢܵܐ ܕܡܸܬܼܒܲܥܝܵܐ
ܤܵܗܕܘܼܬܼܵܐ ܕܝܼܠܲܢ: ܐܲܝܟܼ ܡ̇ܢ ܕܪܸܥܝܵܢܵܐ ܐܸܬܼܝܼܕܲܥ ܠܹܗ: ܡ̣ܢ ܟܬܼܝܼ̈ܒܼܵܬܼܵܐ
ܕܲܠܘܵܬܼ ܪܸܚܡܲܬܼ ܐܲܠܵܗܵܐ ܕܒܼܵܟܼ. ܐܲܝܠܹܝܬܢ ܓܹܝܪ ܕܬܲܡܵܢ ܐܼܡ݂ܲܪ:
ܕܠܵܐ ܢܸܬܼܐܲܡܪ̈ܵܢ ܥܲܠ ܐܲܠܵܗܵܐ: ܗܵܢܵܘ ܕܹܝܢ ܥܲܠ ܝܑܼܚܝܼܕܼܵܝܵܐ: ܟܲܕܼ
ܡܚܲܤܸܕܼ ܠܹܗ ܒܐ̄ܢܵܫܵܝ̈ܬܼܵܐ: ܗܵܠܹܝܢ ܐܵܦ ܗܵܪܟܵܐ ܟܲܕܼ ܡܡܠܸܠ ܐܸܡ݂ܲܪ:
ܕܠܵܐ ܙܵܕܹܩ ܥܲܠ ܐܲܠܵܗܵܐ ܠܡܹܐܡܲܪ: ܕܝܼܢܸܩ̣ ܚܲܠܒܼܵܐ: ܘܠܵܐ ܕܐܸܬܼܝܼܠܸܕܼ
pb. 202
ܡ̣ܢ ܒܬܼܘܼܠܬܼܵܐ. ܗܵܟܲܢܵܐ ܐܵܦ ܗܵܪܟܵܐ ܙܲܒܼ̈ܢܵܬܼܵܐ ܤܲܓܿܝܼ̈ܐܵܬܼܵܐ ܬܸܡ݂ܲܪ: ܕܒܲܪ
ܬܪܹܝܢ ܝܼܪ̈ܚܝܼܢ ܐܵܘ ܒܲܪ ܬܠܵܬܼܵܐ ܠܐܲܠܵܗܵܐ ܠܵܐ ܐܵܡܲ݁ܪ ܐ̄ܢܵܐ.
ܢܸܤܛܘܿܪܝܼܣ. ܠܵܐ ܗܵܢܘܿܢ ܐܲܝܟܼ ܕܲܝܵܢܹ̈ܐ ܒܲܚܸܢ̣ܘ ܠܗܵܠܹܝܢ:
ܘܠܵܐ ܬܘܼܒܼ ܗܵܘ̇ ܐܲܝܟܼ ܕܲܠܘܵܬܼ ܡܒܲܚܢܵܢܹ̈ܐ ܘܕܲܝܵܢܹ̈ܐ ܐܸܡ݂ܲܪ ܗ̄ܘ̣ܵܐ:
ܐܸܠܵܐ ܐܲܝܟܼ ܤܵܗܕܵܐ ܕܕܲܝܵܢܵܐ ܩܛܹܐ ܓܼܪܵܢܵܐ ܩ̣ܵܡ ܗ̄ܘ̣ܵܐ.
ܬܹܐܵܕܘܿܛܘܿܣ. ܐܲܝܠܹܝܢ ܠܲܡ ܓܹܝܪ ܕܬܲܡܵܢ ܐܲܤܠܝܼ ܕܠܵܐ
ܢܸܬܼܐܲܡܪ݁ܵܢ ܥܲܠ ܐܲܠܵܗܵܐ: ܗܵܢܵܘ ܕܹܝܢ ܥܲܠ ܝܑܼܚܝܼܕܼܵܝ̇ܐ: ܟܲܕܼ ܡܚܲܤܸܕܼ
ܠܹܗ ܒܐ̄ܢܵܫܵܝ̈ܬܼܵܐ ܗܵܠܹܝܢ ܐܵܦ ܗܵܪܟܵܐ ܟܲܕܼ ܡܡܲܠܸܠ ܐܸܡ݂ܲܪ: ܕܠܵܐ
ܙܵܕܹܩ ܥܲܠ ܐܲܠܵܗܵܐ ܕܢܹܐܡܲܪ ܕܝܼܢܸܵܩ̣ ܚܲܠܒܼܵܐ: ܘܠܵܐ ܕܐܸܬܼܝܼܠܸܕܼ ܡ̣ܢ
ܒܬܼܘܼܠܬܼܵܐ. ܗܵܟܲܢܵܐ ܐܵܦ ܗܵܪܟܵܐ ܐܵܡܲ݁ܪ: ܕܒܲܪ ܬܪܹܝܢ ܝܲܪ̈ܚܝܼܢ ܐܵܘ
ܒܲܪ ܬܠܵܬܼܵܐ ܠܵܐ ܐܵܡܲ݁ܪ ܐ̄ܢܵܐ.
ܢܸܤܛܘܿܪܝܼܣ. ܘܩܲܒܿܠܵܗ̇ ܕܠܵܐ ܒܘܼܚܵܢܵܐ ܐܲܝܟܼ ܕܲܝܵܢܵܐ ܩܛܹܐ ܓܼܪܵܢܵܐ:
ܟܲܕܼ ܡܸܕܸܡ ܠܵܐ ܫܲܐܠܹܗ ܗܵܘ̇: ܐܵܘ ܕܡ̇ܢ ܐܵܡܲ݁ܪ ܗ̄ܘ̣ܵܐ ܐܠܵܟܼ: ܟܲܕܼ
ܗܵܠܹܝܢ ܗܵܟܲܢܵܐ ܐܸܡ݂ܲܪ. ܐܵܘ ܕܐܲܢ̄ܬܿ ܠܘܵܬܼ ܗܵܠܹܝܢ ܡ̇ܢ ܐܸܡ݂ܲܪܬܿ: ܒܗܵܘ̇
ܡܵܐ ܕܐܸܬܼܚܙܝܼ ܠܩܘܼܒܼܠܵܟܼ. ܩܵܘܵܐ: ܐܸܡܲܪ ܩܕܲܡܝܢ: ܕܢܸܕܲܥ ܒܐܲܝܢܵܐ
ܪܸܥܝܵܢܵܐ ܐܲܤܠ̣ܝܼ ܐܸܢܹܝܢ ܠܗܵܠܹܝܢ. ܐܲܝܟܼ ܕܠܵܐ ܢܩܲܒܿܠܝܼܗ̇ ܕܠܵܐ ܥܸܠܬܼܵܐ
ܠܲܩܛܹܐ ܓܼܪܵܢܘܼܬܼܵܐ ܕܲܗܠܵܘܗܝ ܟܲܕܼ ܪܲܚܝܼܩ: ܘܲܕܼܠܵܐ ܒܘܼܚܵܢܵܐ ܘܲܕܼܠܵܐ
ܒܨܵܬܼܵܐ ܢܸܦܤܘܿܩ ܥܠܵܘܗܝ ܐܲܦܦܲܤܝܼܣ: ܩܕܼܵܡ ܐܲܝܠܹܝܢ ܕܲܤܢܝܼܩܝܼܢ
ܠܡܹܐܠܲܦ ܚܲܬܿܝܼܬܼܵܐܝܼܬܼ: ܕܡܸܛܠ ܐܲܝܕܼܵܐ ܐܸܐܼܚܲܝܲܒܼ. ܗܵܟܲܢܵܐ ܐܵܦܠܵܐ
ܡܸܬܼܩܲܛܪܓܼܵܢܵܐ ܡܸܫܟܲܚ ܗ̄ܘ̣ܵܐ ܠܡܸܟܼܦܲܪ: ܘܠܲܝܬܿ ܠܹܗ ܥܸܠܬܼܵܐ
pb. 203
ܕܲܒܼܡܲܤܲܒܼ ܒܐܲܦܹ̈ܐ ܢܩܲܛ̱ܪܓܲܢܝ. ܐܸܡܲܪ ܗܵܟܹܝܠ ܐܘܿ ܬܹܐܵܕܘܿܛܲܐ:
ܐܲܢ̄ܬܿ ܡܲܠܸܠܬܿ ܥܲܡܹܗ: ܐܵܢ ܠܲܡ ܡܵܕܹܝܕ ܚܲܬܿܝܼܬܼܵܐܝܼܬܼ ܡܦܵܣ
ܐܲܢ̄ܬܿ ܐܵܦ ܒܪܸܥܝܵܢܹܗ: ܟܲܕܼ ܫܲܐܸܠܬܵܝܗܝ ܘܦܲܢܝܼ ܠܵܟܼ ܦܸܬܼܓܼܵܡܵܐ: ܕܒܲܪ
[ܬܪܝܢ ܝܲܪ̈ܚܝܼܢ ܐܵܘ ܒܲܪ ܬܠܵܬܼܵܐ ܠܵܐ ܐܵܡܲ݁ܪܢܵܐ ܠܐܲܠܵܗܵܐ:] ܐܲܝܟܼ ܐܲܝܢܵܐ ܕܠܵܐ
ܐܵܡܲ݁ܪ ܠܹܗ ܠܲܡܫܝܼܚܵܐ ܐܲܠܵܗܵܐ: ܐܸܡ݂ܲܪ ܠܵܟܼ ܕܗ̤ܘ ܐܝܼܬܼܵܘܗܝ ܒܲܪ
ܬܪܹܝܢ ܝܲܪ̈ܚܝܼܢ ܘܒܲܪ ܬܠܵܬܼܵܐ. ܐܵܘ ܟܲܕܼ ܡܵܘܕܹܐ ܕܐܲܠܵܗܵܐ ܗ̄ܘ̣ ܡܫܝܼܚܵܐ:
ܘܐܲܝܟܼ ܐܲܠܵܗܵܐ ܠܵܐ ܐܸܬܼܝܼܠܸܕܼ ܘܲܗܘ̤ܵܐ ܒܲܪ ܬܪܹܝܢ ܝܲܪ̈ܚܝܼܢ ܘܒܲܪ ܬܠܵܬܼܵܐ.
ܐܲܢ̄ܬܿ ܗܵܟܹܝܠ ܕܐܸܬܼܝܼܠܸܕܼ ܐܲܠܵܗܵܐ ܡ̣ܢ ܐܲܢ̄ܬܿܬܼܵܐ: ܘܕܐܝܼܬܼܵܘܗܝ ܒܲܪ
ܬܪܹܝܢ ܝܲܪ̈ܚܝܼܢ ܘܒܲܪ ܬܠܵܬܼܵܐ: ܐܲܝܟܼ ܡ̇ܢ ܕܐܸܫܬܲܚܠܦܲܬ̤ ܐܘܼܤܝܼܵܐ ܕܝܼܠܹܗ
ܠܐܘܼܤܝܼܵܐ ܕܒܲܪܢܵܫܵܐ: ܘܐܸܬܼܝܼܠܸܕܼ ܘܲܗܘ̤ܵܐ ܒܲܪ ܬܪܹܝܢ ܝܲܪ̈ܚܝܼܢ ܘܒܲܪ
ܬܠܵܬܼܵܐ: ܐܵܘ ܐܲܝܟܼ ܐܲܝܢܵܐ ܕܐܸܫܬܲܚܠܲܦ ܒܲܕܼܡܘܼܬܹܗ ܘܒܸܐܤܟܹܿܡܹܗ:
ܠܲܕܼܡܘܼܬܼܵܐ ܘܠܸܐܤܟܹܿܡܐ ܕܒܲܪܢܵܫܵܬ ܒܝܲܕܼ ܐܘܼܤܝܼܵܐ: ܘܒܲܚܕܼܵܐ ܐܘܼܤܝܼܵܐ
ܕܐܲܠܵܗܵܐ ܡܸܬܼܪܢܸܐ ܡܫܝܼܚܵܐ: ܘܠܵܘ ܒܬܲܪܬܹܝܢ ܐܘܼܤ̈ܝܼܵܣ. ܘܐܸܢ
ܒܬܲܪܬܹܝܢ: ܕܐܲܝܟܼ ܐܲܝܟܲܢܵܐ: ܡ̣ܢ ܚܕܼܵܐ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ
ܬܲܪܬܹܝܢ؟ ܐܵܘ ܡ̣ܢ ܐܘܼܤܝܼ̈ܣ ܦܪ̈ܝܼܫܵܬܼܵܐ ܘܠܵܐ ܕܵܡܝܵ̈ܬܼܵܐ: ܘܲܒܼܬܲܪ̈ܬܲܝܗܹܝܢ
ܐܸܬܼܝܼܠܸܕܼ؟ ܐܵܘ ܚܕܼܵܐ ܡ̣ܢ ܗܵܠܹܝܢ ܐܸܬܼܝܼܠܸܕܼ: ܘܲܗܘ̤ܵܬܼ ܒܲܪ ܬܪܹܝܢ ܝܲܪ̈ܚܝܼܢ
ܘܒܲܪ ܬܠܵܬܼܵܐ: ܐܲܝܟܼ ܡ̇ܢ ܕܲܩܕܼܵܡ ܕܬܸܬܼܝܼܠܸܕܼ ܘܬܸܗܘܸܐ ܒܲܪ ܬܪܹܝܢ
ܝܲܪ̈ܚܝܼܢ ܘܒܲܪ ܬܠܵܬܼܵܐ: ܠܵܐ ܐܝܼܬܹܝܗ̇ ܗ̄ܘ̣ܵܬܼ. ܐܵܘ ܡܬܼܘܿܡܵܐܝܼܬܼ ܐܝܼܬܹܝܗ̇
ܗ̄ܘ̣ܵܬܼ: ܘܠܵܐ ܢܸܤܒܲܬ̤ ܐܘܼܤܝܼܵܐ ܫܘܼܪܵܝܵܐ ܕܬܸܬܼܝܼܠܸܕܼ: ܘܬܸܗܘܸܐ ܒܲܪ
ܬܪܹܝܢ ܝܲܪ̈ܚܝܼܢ ܐܵܘ ܒܲܪ ܬܠܵܬܼܵܐ: ܟܲܕܼ ܒܐܘܼܤܝܼܵܐ ܠܲܝܬܿ ܗ̄ܘ̣ܵܐ ܠܹܗ ܗܵܘ̇
pb. 204
ܡܵܐ ܕܗܵܘܹ̇ܐ ܠܐܲܝܠܹܝܢ ܕܡܸܬܿܝܲܠܕܝܼܢ ܡ̣ܢ ܐܵܢܲܢܩܹܐ: ܐܵܘ ܒܒܲܝܬܵܝܘܼܬܼܵܐ
ܕܐܘܼܤܝܼܵܐ ܐܸܬܼܝܼܠܸܕܼ ܒܝܼܠܝܼܕܼܘܼܬܼܵܐ ܕܒܸܤܪܵܐ. ܗܵܟܲܢܵܐ ܓܹܝܪ ܐܸܢ ܐܸܫܬܲܐܲܠ:
ܡ̣ܢ ܐܵܢܲܢܩܹܐ ܗܵܘ̇ ܡܵܐ ܕܐܸܡ݂ܲܪ ܩܕܼܵܡ ܐܲܦܸܤܩ̈ܘܿܦܹܐ ܡܲܕܢܚܵܝܹ̈ܐ: ܟܲܕܼ
ܐܸܫܬܲܐܲܠ ܒܲܟܼܬܼܝܼ̈ܒܼܵܬܼܵܐ ܡܵܘܕܸܐ ܗ̄ܘ̣ܵܐ: ܕܲܒܼܪܵܐ ܕܐܲܠܵܗܵܐ ܝܑܼܚܝܼܕܼܵܐ: ܒܪ̣ܵܐ:
ܘܐܸܬܼܒܿܪܝܼ. ܗ̤ܘ ܟܲܕܼ ܗ̤ܘ: ܘܠܵܘ ܒܵܗ̇ ܟܲܕܼ ܒܵܗ̇. ܒܪܵܐ ܕܐܲܠܵܗܵܐ
ܚܲܫ̣: ܘܠܵܐ ܚܲܫ̣. ܗ̤ܘ ܟܲܕܼ ܗ̤ܘ: ܘܠܵܘ ܒܵܗ̇ ܟܲܕܼ ܒܵܗ̇: ܡܸܢܗܹܝܢ
ܓܹܝܪ ܐܝܼܬܲܝܗܹܝܢ ܒܲܟܼܝܵܢܵܐ ܕܐܲܠܵܗܘܼܬܼܵܐ: ܘܡܸܢܗܹܝܢ ܒܲܟܼܝܵܢܵܐ ܕܐ̄ܢܵܫܘܼܬܼܵܐ.
ܟܠܗܹܝܢ ܐ̄ܢܵܫܝ̈ܬܼܵܐ ܒܐ̄ܢܵܫܘܼܬܼܵܐ ܚܲܫ̣: ܘܟܼܠܗܹܝܢ ܐܲܠܵܗܵܝ̈ܬܼܵܐ ܒܐܲܠܵܗܘܼܬܼܵܐ.
ܐ̄ܢܵܫܵܝܵܐ ܗ̄ܘ̣ ܓܹܝܪ ܡܵܘܠܵܕܼܵܐ ܕܡ̣ܢ ܐܲܢ̄ܬܿܬܼܵܐ: ܡܵܘܠܵܕܼܵܐ ܕܹܝܢ ܕܡ̣ܢ
ܐܲܒܼܵܐ ܕܠܵܐ ܫܘܼܪܵܝ: ܒܫܘܼܪܵܝܵܐ ܕܹܝܢ ܗܵܢܵܐ. ܘܲܡܬܼܘܿܡܵܝܵܐ ܗܵܘ̇: ܙܲܒܼܢܵܢܵܝܵܐ
ܕܹܝܢ ܗܵܢܵܐ܀ ܗܵܠܹܝܢ ܟܲܕܼ ܡܸܢܹܗ ܕܲܫܪܵܪܵܐ ܡܸܬܼܚܢܸܩ ܗ̄ܘ̣ܵܐ: ܠܵܐ
ܡܸܫܟܲܚ ܗ̄ܘ̣ܵܐ ܕܲܢܛܫܸܐ ܠܪܸܥܝܵܢܹܗ: ܗܵܘ̇ ܕܡ̣ܢ ܢܲܩܝܼܦܘܼܬܼܵܐ ܕܒܼܘܼܚܵܢܵܐ
ܐܸܬܼܐ̱ܠܸܨ ܗ̄ܘ̣ܵܐ ܠܡܸܥܒܲܕܼ ܐܸܢܹܝܢ ܒܲܟܼܬܼܝܼ̈ܒܼܵܬܼܵܐ. ܘܐܲܝܟܼ ܙܢܵܐ ܕܟܲܠܒܵܐ
ܟܲܕܼ ܒܲܩܛܝܼܪܵܐ ܡܸܬܼܐ̱ܤܲܪ: ܒܛܲܫܸܐ ܥܝܵܕܼܵܘ̈ܗܝ ܒܝܼ̈ܫܹܐ. ܘܒܲܪ ܫܵܥܬܹܗ
ܕܡܸܬܼܦܲܠܲܛ ܡ̣ܢ ܐܲܤܘܼܪܝܵܐ: ܥܵܪܹܩ ܠܢܸܩܥܹܗ ܠܘܵܬܼ ܚܲܒܼܪ̈ܵܘܗܝ:
ܘܢܵܒܲܚ ܒܐܲܝܠܹܝܢ ܕܠܲܒܼܟܿܘܼܗܝ. ܘܲܠܒܲܪ ܠܵܐ ܡܲܡܪܲܚ ܠܡܸܦܲܩ
ܘܲܠܡܸܬܼܟܲܬܵܫܘܼ ܒܓܸܠܝܵܐ: ܐܸܠܵܐ ܟܲܕܼ ܐܝܼܬܼܵܘܗܝ ܠܓܼܵܘ: ܡܲܪܦܸܐ
ܐܸܕܼܢܵܘ̈ܗܝ: ܘܡܲܪܡܸܐ ܕܘܼܢܒܹܿܗ ܡܸܨܥܲܬܼ ܥܲܛ̈ܡܵܬܹܗ. ܗܵܟܲܢܵܐ ܐܵܦ
ܗܵܢܵܐ ܠܵܐ ܐܲܡܪܲܚ ܠܡܸܫܬܵܘܕܵܝܘܼ ܠܗܘܿܢ ܕܲܢܡܲܠܸܠ ܘܲܕܼܢܸܙܟܸܿܐ ܟܲܕܼ
ܡܲܟܸܿܣ: ܘܠܵܐ ܡܸܕܸܡ ܕܐܲܝܟܼ ܗܵܢܵܐ: ܐܲܝܟܼ ܕܢܸܩܦܵܐܝܼܬܼ ܤܵܥ̇ܪܝܼܢ
ܐܲܝܠܹܝܢ ܕܲܬܼܟܼܝܼܠܝܼܢ ܒܕܝܼܢܵܐ ܕܝܼܠܗܘܿܢ. ܐܵܡܲ݁ܪ ܐ̄ܢܵܐ ܕܹܝܢ ܒܲܟܼܬܵܒܹ̈ܐ
pb. 205
ܐܲܠܵܗܵܝܹ̈ܐ: ܘܲܒܼܡܲܫܠܡܵܢ̈ܘܼܬܼܵܐ ܘܲܒܼܡܲܠܦܵܢ̈ܘܵܬܼܵܐ ܕܐܲܒܼ̈ܗܵܬܼܵܐ ܩܲܕܝܼ̈ܫܹܐ:
ܕܡܸܢܗܘܿܢ ܢܸܬܼܩܲܝܲܡ ܘܢܸܩܢܸܐ ܙܵܟܼܘܼܬܼܵܐ.
ܐܸܠܵܐ ܫܡܲܥܘ ܠܲܡ ܠܗܵܠܹܝܢ: ܠܵܘ ܕܹܝܢ ܕܐܲܝܟܼ ܕܐܸܢܵܐ ܐܵܡܲ݁ܪ ܐ̄ܢܵܐ.
ܠܵܐ ܡܲܡܪܵܚ ܠܡܹܐܡܲܪ ܒܓܸܠܝܵܐ ܥܲܠ ܐܲܝܠܹܝܢ ܕܐܸܵܡܲ݁ܪ: ܘܡ̣ܢ ܟܼܬܼܵܒܹ̈ܐ
ܐܲܠܵܗܵܝܹ̈ܐ ܘܡ̣ܢ ܐܲܒܼ̈ܗܵܬܼܵܐ ܠܲܡܩܲܝܵܡܘܼ ܗܵܘ̇ ܕܐܵܡ݂ܲܪܘ ܘܐܲܝܟܲܢܵܐ
ܕܐܸܡ݂ܲܪܘ. ܘܠܵܐ ܬܘܼܒܼ ܠܐܲܝܠܹܝܢ ܕܗ̤ܘ ܐܸܡ݂ܲܪ ܐܸܬܼܐ̱ܠܸܨ ܠܡܸܫܠܲܡ:
ܘܲܕܼܒܲܡܼܬܼܝܼ̈ܒܼܵܬܼܵܐ ܢܸܥܒܸܕܼ ܐܸܢܹܝܢ. ܐܸܠܵܐ ܙܵܕܹܩ ܠܲܡ ܠܡܹܐܡܲܪ ܗܵܘ̇
ܡܵܐ ܕܡܲܤܒܲܪ ܐ̄ܢܵܐ ܕܐܝܼܬܼܵܘܗܝ ܫܪܵܪܵܐ: ܗܵܢܵܐ ܐܝܼܬܼܵܘܗܝ ܗ̄ܘ̣ܵܐ
ܩܲܕܡܵܝ̇ܐ ܕܐܸܚܲܕܼ ܐܸܢܘܿܢ: ܕܠܵܐ ܢܸܕܿܥܘܼܢ ܠܟܼܠܹܗ ܡܲܡܠܵܠܐ: ܘܲܠܟܼܠܵܗ̇
ܒܥܵܬܼܵܐ ܕܲܗܘ̤ܵܬܼ ܠܲܢ: ܟܲܕܼ ܡܬܲܢܹܝܢ ܐܲܝܠܹܝܢ ܕܠܘܼܩܒܲܠܗܹܝܢ ܠܵܐ
ܐܸܫܟܲܚܘ ܠܡܹܐܡܲܪ ܡܸܕܸܵܡ. ܡܸܛܠ ܗܵܢܵܐ ܠܵܐ ܟܬܲܒܼܘ ܐܸܢܹܝܢ: ܐܵܦܠܵܐ
ܒܗܘܼܦܵܡ̈ܢܹܡܵܛܵܐ: ܐܸܠܵܐ ܐܸܢ ܒܲܠܚܘܿܕܼ ܕܠܵܐ ܙܵܕܹܩ ܠܡܹܐܡܲܪ
ܠܐܲܠܵܗܵܐ ܕܝܼܢܸܩ̣ ܚܲܠܒܼܵܐ: ܘܠܵܐ ܕܐܸܬܼܝܼܠܸܕܼ ܡ̣ܢ ܒܬܼܘܼܠܬܼܵܐ
ܫܚܝܼܡܵܐܝܼܬܼ: ܥܕܲܡܵܐ ܠܐܲܝܟܵܐ ܕܲܫܦܲܪ ܠܗܘܿܢ ܒܲܚܸܢܘ ܗ̄ܘ̣ܵܘ: ܐܸܠܵܐ
ܓܹܝܪ ܥܲܠ ܗܵܠܹܝܢ ܒܵܬܲܪ ܩܲܠܝܼܠ ܐܵܡ̇ܪܝܼܢܲܢ܀
ܡ̣ܢ ܒܵܬܲܪ ܗܵܢܵܐ ܐܸܬܼ݂ܵܐ ܐܵܩܵܩܝܼܣ: ܘܬܼܵܢܹ̇ܐ ܗ̄ܘ̣ܵܐ ܠܗܘܿܢ ܡܲܡܠܵܠܐ
ܕܲܗܘ̤ܵܐ ܠܹܗ ܥܲܡܲܝܼ. ܘܠܵܐ ܡܸܬܼܡܲܨ̈ܝܵܢܝܵܬܼܵܐ ܐܸܬܼܚܫܸܒܼ ܠܗܘܿܢ. ܗ̤ܘ
ܕܹܝܢ ܗܵܢܵܐ ܠܫܘܼܐܵܠܹܗ ܡܬܲܢܸܐ: ܟܲܕܼ ܡܩܲܛܪܸܓܼ ܠܝܼ. ܘܠܵܘ
ܒܡܲܟܿܤܵܢܘܼܬܼܵܐ: ܘܠܵܘ ܒܲܫܪܵܪܵܐ ܒܐܲܝܠܹܝܢ ܕܲܬܼܟܼܝܼܠ ܗ̄ܘ̣ܵܐ ܥܠܲܝܗܹܝܢ:
ܐܸܠܵܐ ܠܫܘܼܐܵܠܵܘ̈ܗܝ ܒܲܩܛܹܐ ܓܼܪ̈ܵܢܘܼܬܼܵܐ ܩܲܒܸܿܠܘ ܐܸܢܘܿܢ. ܘܲܕܼܠܵܐ
pb. 206
ܬܸܤܒܿܪܘܼܢ ܕܐܸܢܵܐ ܗ̄ܘ̣ ܕܒܼܵܪܹܐ ܐ̄ܢܵܐ ܗܵܠܹܝܢ: ܫܡܲܥܘ ܡܸܢܗܘܿܢ
ܕܗܦܵܡ̈ܢܹܡܵܛܵܐ ܕܝܼܠܗܘܿܢ.
ܡܲܡܠܠܵܐ ܕܐܵܩܵܩܝܼܣ ܐܲܦܸܤܩܘܿܦܵܐ ܕܡܝܼܠܝܼܛܝܼܢܘܿܣ.
ܡܸܚܕܼܵܐ ܕܐܸܬܹܝ̇ܬܼ ܠܐܲܦܸܤܘܿܣ ܡܕܼܝܼܢܬܼܵܐ: ܥܸܒܼ̇ܕܹܬܼ ܥܲܡ ܓܲܒܼܪܵܐ
ܗܵܢܵܐ ܕܐܸܬܼܐܐ̱ܡܪ ܡ̣ܢ ܠܥܸܠ ܕܪܵܫܵܐ. ܘܟܲܕܼ ܝܑܼܕܲܥ̇ܬܹܗ: ܕܠܵܘ
ܬܼܪܝܼܨܵܐܝܼܬܼ ܡܸܬܼܪܲܥܸܐ: ܒܟܼܠ ܦܘܼܪ̈ܤܝܼܢ ܗܘ̤ܵܐ ܠܝܼ ܫܩܵܠ ܛܲܥܢܵܐ
ܕܐܹܬܲܪܨܝܼܘܗܝ ܘܐܲܪܚܩܝܼܘܗܝ ܡ̣ܢ ܪܸܥܝܵܢܹܗ. ܘܚܵܙܹ̇ܐ ܗ̄ܘܹ̇ܝܬܼ ܠܹܗ:
ܕܲܒܼܤܸܦܘܼܬܼܵܐ ܗ̄ܘ̣ ܡܸܫܬܵܘܕܸܐ ܗ̄ܘ̣ܵܐ ܕܲܡܫܲܢܸܐ ܡ̣ܢ ܬܲܪܥܝܼܬܼܵܐ ܕܐܲܝܟܼ
ܗܵܕܹܐ. ܟܲܕܓܼ ܕܹܝܢ ܥܸܤܪܵܐ ܐܵܘ ܬܪܸܥܤܲܪ ܝܵܘܡ̈ܝܼܢ ܐܲܓܿܪܹܬܸ: ܬܘܼܒܼ
ܟܲܕܼ ܡܸܠܬܼܵܐ ܕܡܸܕܸܡ ܐܸܬܿܬܿܙܝܼܥܲܬ̤ ܒܲܝܢܵܬܲܢ: ܫܲܪܝܼܬܼ ܠܡܹܐܡܲܪ ܚܠܵܦ
ܗܲܝܡܵܢܘܼܬܼܵܐ ܬܪܝܼܨܬܵܐ: ܘܚܵܙܹ̇ܐ ܗܘܹ̇ܝܬܼ ܠܹܗ ܕܲܕܲܠܩܘܼܒܼܠܵܐ ܐܝܼܬܼܵܘܗܝ
ܗ̄ܘ̣ܵܐ ܕܗܵܕܹܐ. ܘܲܒܼܬܿܪ̈ܬܲܝܗܹܝܢ ܒܝܼ̈ܫܬܼܵܐ ܐܲܟܼܚ̄ܕܼܵܐ ܪܸܓܼܫܹ̇ܬܼ ܗ̄ܘܹ̇ܝܬܼ
ܕܲܢܦܲܠ̣. ܠܘܼܩܕܲܡ ܡ̇ܢ ܓܹܝܪ ܫܘܼܐܵܠܵܐ ܕܝܼܠܹܗ ܕܐܝܼܬܼܵܘܗܝ ܒܠܵܐ
ܘܵܠܝܼܬܼܵܐ: ܐܵܢܲܢܩܹܐ ܤܵܐܹ̇ܡ ܗ̄ܘ̣ܵܐ ܥܲܠ ܐܲܝܠܹܝܢ ܕܲܡܦܲܢܹܝܢ ܦܸܬܼܓܼܵܡܵܐ:
ܕܐܵܘ ܠܲܓܼܡܵܪ ܢܸܟܼܦܪܘܼܢ ܕܐܲܠܵܗܘܼܬܹܗ ܕܝܼܚܝܼܕܼܵܝܵܐ ܐܸܬܼܒܲܪܢܫܲܬ̤:
ܐܵܘ ܕܢܵܘܕܘܿܢ ܗܝ̇ ܕܐܝܼܬܹܝܗ̇ ܕܪܘܼܫܥܵܐ: ܕܐܵܦ ܐܲܠܵܗܘܼܬܼܵܐ ܕܐܲܒܼܵܐ
ܘܲܕܼܪܘܼܚܵܐ ܕܩܘܼܕܼܫܵܐ ܐܸܬܼܓܲܡܫܲܬ̤ ܥܲܡ ܡܸܠܬܼܵܐ.
ܢܸܤܛܘܼܪܝܼܣ. ܗܸܢܘܿܢ ܫܲܐܸܠ̣ܘ ܗܢܘܿܢ ܦܲܢ̣ܝܼܘ: ܕܒܲܫܟܼܝܼܪ̈ܵܬܼܵܐ
ܘܲܒܼܪܫܥܵܐ ܗ̤ܘܲܝ̈. ܗܸܢܘܿܢ ܡܵܘܕܹܝܢ ܘܫܵܠܡܝܼܢ ܒܒܲܪܬܼ ܩܵܠܵܐ
pb. 207
ܕܐܸܢܵܐ ܐܲܟܿܤܹ̇ܬܼ ܐܸܢܘܿܢ. ܘܡ̣ܢ ܐܲܝܠܹܝܢ ܕܐܵܘܕܝܼܘ: ܐܲܝܟܼ ܪ̈ܲܫܝܼܥܹܐ ܐܸܬܼܚܲܝܲܒܼܘ.
ܐܼܪܵܐ ܡܲܤܒܲܪ ܐ̄ܢܵܫ: ܕܲܛܠܘܼܡܝܵܐ ܐܝܼܬܼܵܘܗܝ ܟܲܕܼ ܠܗܵܠܹܝܢ
ܒܗܘܼܦܵܡ̈ܢܹܡܵܛܵܐ ܢܲܟܼܬܿܒܼܘܼܢ: ܘܲܠܟܼܠܗܘܿܢ ܢܸܥܒܿܕܼܘܼܢ ܕܢܲܤܗܕܘܼܢ
ܠܘܼܩܒܲܠ ܢܲܦܫܗܘܿܢ؟ ܬܸܗܘܸܐ ܓܹܝܪ ܕܐܝܼܬܼܵܘܗܝ ܫܟܼܝܼܪܵܐ ܫܘܼܐܵܠܵܐ
ܕܝܼܠܝܼ: ܙܵܕܹܩ ܗ̄ܘ̣ܵܐ ܠܵܟܼ ܕܠܵܐ ܬܩܲܒܿܠܝܼܘܗܝ: ܐܸܠܵܐ ܕܬܲܟܿܤܝܼܗ̇
ܠܲܫܟܼܝܼܘܼܬܹܗ ܕܫܘܼܐܵܠܵܐ. ܐܲܝܟܲܢܵܐ: ܕܡ̣ܢ ܬܪܝܼܨܘܼܬܹܗ ܕܫܘܼܐܵܠܵܐ:
ܠܵܐ ܬܸܦܸܠ ܒܡܲܥܒܲܪܬܵܐ ܕܪܘܫܥܵܐ ܘܕܲܫܟܼܝܼܪܘܼܬܼܵܐ: ܐܸܠܵܐ ܡܩܲܒܸܿܠ
ܗ̣̄ܘܲܝܬܿ ܫܘܼܐܵܠܵܐ ܫܟܼܝܼܪܵܐ ܒܕܼܚܠܲܬܼ ܐܲܠܵܗܵܐ܀ ܐܝܼܛܵܐ ܡ̣ܢ ܗܵܕܹܐ ܐܸܬܲܝܬܿ
ܠܪܘܪܫܥܵܐ: ܕܬܼܵܘܕܹܐ: ܕܐܵܘ ܠܵܐ ܐܸܬܼܒܲܪܢܲܫ ܐܲܠܵܗܵܐ ܡܸܠܬܼܵܐ ܒܪܵܐ
ܕܐܲܠܵܗܵܐ: ܐܵܘ ܐܵܦ ܐܲܒܼܵܐ ܘܪܘܼܚܵܐ ܐܸܬܼܒܲܪܢܲܫܘ. ܡܵܕܹܝܢ ܠܗܵܝ̇ ܕܲܫܠܸܡ̣ܬܿ
ܟܲܕܼ ܐܸܫܬܲܐܲܠܬܿ: ܙܵܕܹܩ ܗ̄ܘ̣ܵܐ ܠܵܟܼ ܕܲܬܼܒܲܛܠܝܼܗ̇: ܘܐܵܦܸܢ ܠܵܐ ܐܲܝܟܼ
ܗܵܘ̇ ܐ̄ܚܪܹܢܵܐ ܬܬܲܪܨܝܼܗ̇. ܢܸܬܸܿܠ ܕܠܵܐ ܢܦܲܠ̣ܬܿ ܠܲܫܟܼܝܼܘܼܬܼܵܐ ܗܵܕܹܐ:
ܟܲܕܼ ܨܵܒܹ̇ܐ ܐܲܢ̄ܬܿ ܘܟܲܕܼ ܠܵܐ ܨܒܹ̇ܐ ܐܲܢ̄ܬܿ: ܡܸܛܠ ܐܲܝܕܵܐ ܠܵܐ ܐܵܡܲ݁ܪ
ܐܲܢ̄ܬܿ ܠܫܘܼܐܸܠܵܐ ܗܵܘ̇ ܫܟܼܝܼܪܵܐ: ܕܡܸܢܹܗ ܨܒܲܝܬܿܘܿܢ ܕܲܬܼܚܲܝܒܼܘܼܢܵܢܝ؟
ܐܸܠܵܐ: ܘܠܵܐ ܐܢ̄ܬܿ ܐܵܡܲ݁ܪ ܐܲܢ̄ܬܿ: ܘܠܵܐ ܕܲܝܵܢܹ̈ܐ ܬܘܼܒܼ ܬܵܒܼܥ̇ܝܼܢ. ܘܐܸܢ
ܗܵܟܲܢܵܐ ܫܟܼܝܼܪ ܗ̄ܘ̣ܵܐ: ܐܲܝܟܲܢܵܐ ܕܠܵܐ ܡܲܟܿܤܵܢܘܼܬܼܵܐ ܐܸܫܬܿܒܸܩ: ܐܲܝܟܼ
ܕܡ̣ܢ ܟ̱ܠܵܗ̇ ܤܘܼܢܗܵܕܘܿܣ ܕܝܼܠܟܼܘܿܢ ܠܵܐ ܢܸܬܼܟܤܸܣ؟ ܘܐܸܢ ܟܠܟܼܘܿܢ
ܕܠܵܐ ܡܲܟܤܵܢܘܼܬܼܵܐ ܫܒܲܩܬܿܘܿܢܵܝܗܝ: ܘܠܲܝܬܿ ܒܟܼܘܢ ܐܲܝܢܵܐ ܕܤܵܦܹ̇ܿܩ
ܠܡܲܟܵܤܘܼܬܹܗ. ܐܸܡܲܪܘ ܠܫܘܼܐܵܠܵܐ ܫܟܼܝܼܪܵܐ: ܒܚܲܢܘ ܐܵܦܸܢ ܒܐܸܤܟܹܿܡܵܐ
ܐܝܼܬܲܝܟܿܘܿܢ ܕܲܝܵܢܹ̈ܐ: ܘܟܼܘܼܬܼܒܘܼܢܵܝܗܝ ܠܫܘܼܐܵܠܵܐ ܒܐܸܤܟܹܿܡܵܐ ܠܐܲܝܠܹܝܢ
pb. 208
ܕܐܝܼܬܼ ܒܗܘܿܢ ܗܵܘܢܵܐ: ܘܲܥܬܼܝܼܕܼܝܼܢ ܠܲܡܒܲܚܵܢܘܼ ܠܕܼܝܼܢܵܐ ܕܝܼܠܟܼܘܿܢ.
ܐܸܠܵܐ ܡ̣ܢ ܠܵܐ ܤܵܦܩܘܼܬܼܟܼܘܿܢ ܒܚܸܫܘܿܟܼܵܐ ܩܵܡܬܿܘܿܢ: ܕܐܵܦܠܵܐ ܐܲܝܠܹܝܢ
ܕܓܲܠ̈ܝܵܢ ܐܸܫܟܲܚܬܿܘܿܢ ܠܡܸܚܙܵܐ. ܝܲܬܿܝܼܪܵܐܝܼܬܼ ܕܹܝܢ ܐܲܠܵܗܵܐ ܥܲܕܲܪܟܼܘܿܢ
ܒܫܘܼܐܵܠܟܼܘܿܢ: ܐܲܝܟܼ ܕܬܸܟܼܬܿܒܼܘܼܢ ܐܸܢܹܝܢ ܠܗܵܠܹܝܢ: ܕܬܸܬܼܓܠܸܐ
ܠܟܼܠܢܵܫ: ܕܲܒܼܥܸܠܕܒܼܵܒܼܵܘܼܬܼܵܐ ܕܠܵܐ ܥܸܠܬܼܵܐ ܗܘ̤ܵܬܼ.
ܐܸܠܵܐ ܡ̣ܢ ܐܲܝܠܹܝܢ ܡ̇ܢ ܗܵܟܲܢܵܐ ܐܸܬܼܚ̈ܙܝܼ؟ ܡ̣ܢ ܐܲܝܠܹܝܢ
ܕܒܲܟܼܬܼܝܼ̈ܒܼܵܬܼܵܐ ܢܟܼܝܼ̈ܠܵܬܼܵܐ ܤܵܡ̣ܘ ܒܕܝܼܢܵܐ ܕܠܵܐ ܚܘܼܝܵܒܼ. ܫܡܲܥܘ ܡ̣ܢ
ܗܵܪܟܵܐ ܠܗܵܠܹܝܢ ܕܲܒܼܗܹܝܢ ܤܵܡ̣ܘ ܠܲܤܝܵܡܵܐ ܕܗܲܝܡܵܢܘܼܬܼܵܐ: ܕܡ̣ܢ
ܐܲܒܼܵܗܲܝ̈ܢ ܕܲܒܼܢܝܼܩܝܼܵܐ ܐܸܬܼܟܲܢܲܫܘ. ܕܡ̣ܢ ܬܲܪ̈ܬܲܝܗܹܝܢ ܢܸܬܼܚܲܝܲܠ ܐܲܝܟܼ
ܕܲܒܼܤܵܗ̈ܕܘܵܬܼܵܐ ܕܠܑܵܐ ܡܸܫܬܲܐܠܝܼܢܲܢ ܡܸܢܹܗ: ܘܠܘܼܩܒܲܠܗܘܿܢ
ܒܬܲܪ݁ܬܲܝܗܹܝܢ ܡܸܬܼܚܲܫܚܝܼܢ ܚ̄ܢܲܢ. ܐܵܘ ܐܸܢ ܟܲܕܼ ܒܒܼܘܼܚܵܢܵܐ ܥܵܒܼܕܝܼܢ:
ܐܵܘ ܐܸܢ ܒܲܕܡܼܘܼܬܼܵܐ ܕܗܵܠܹܝܢ ܕܠܵܐ ܒܘܼܚܵܢܵܐ ܡܩܲܒܿܠܝܼܢ ܠܗܹܝܢ:
ܡܸܛܠ ܕܢܸܢܘܿܢ ܐܝܼܬܲܝܗܘܿܢ ܕܲܝܵܢܹ̈ܐ: ܘܗܸܢܘܿܢ ܡܸܬܿܬܿܕܝܼ̈ܢܵܢܹܐ: ܐܲܝܟܼ
ܐܲܝܠܹܝܢ ܕܲܒܼܡܲܬܼ̈ܠܹܐ ܘܲܒܼܫܘܿܥܵܝܵܬܼܵܐ ܚܵܫ̇ܒܿܝܼܢ ܢܲܦܫܗܘܿܢ ܕܲܝܵܢܹ̈ܐ.
ܗܲܝܡܵܢܘܼܬܼܵܐ ܕܐܸܬܿܬܿܤܝܼܡܲܬ̤ ܡ̣ܢ ܐܲܒܼܵܗܲܝ̈ܢ ܕܲܒܼܢܝܼܩܵܝܼܵܐ.
ܡܗܲܝܡܢܝܼܢ ܚ̄ܢܲܢ ܒܝܲܕܼ ܐܲܠܵܗܵܐ ܐܲܒܼܵܐ ܐܲܚܝܼܕܼ ܟܠ: ܥܵܒܼܘܿܕܼܵܐ
ܕܟܼܠܗܹܝܢ ܐܲܝܠܹܝܢ ܕܡܸܬܼܚܲܙ̈ܝܵܢ ܘܲܕܸܠܵܐ ܡܸܬܼܚܲܙ̈ܝܵܢ. ܘܲܒܼܚܲܕܸ ܡܵܪܝܵܐ
ܝܑܼܫܘܿܥ ܡܫܝܼܚܵܐ ܒܪܹܗ ܕܐܲܠܵܗܵܐ ܝܑܼܚܝܼܕܼܵܝܵܐ: ܕܡ̣ܢ ܐܲܒܼܵܐ ܐܸܬܼܝܼܠܸܕܼ:
pb. 209
ܗܵܢܵܘ ܕܹܝܢ ܡ̣ܢ ܐܝܼܬܼܘܼܬܹܗ ܕܐܲܒܼܵܐ . . . . . . . . .
. . . . . . . . . . . . . . . . .
. . . . . . . . . . . . . . . . .
ܘܟܲܕܼ ܩܵܕܼܡ̇ܝܼܢ ܤܵܝ̇ܡܝܼܢ ܫܡܵܗܹ̈ܐ ܕܲܬܼܪ̈ܲܝܗܘܿܢ ܟܝܵܢܹ̈ܐ: ܕܐܝܼܬܲܝܗܘܿܢ
ܡܫܵܘܕܥܵܢܹ̈ܐ ܕܗܵܠܹܝܢ ܕܓܼܵܘܵܐ. ܠܵܐ ܗܵܝ̇ ܕܲܒܼܪܘܼܬܼܵܐ ܘܡܵܪܘܼܬܼܵܐ
ܬܸܤܬܕܸܩ: ܘܠܑܵ ܗܵܝ̇ ܕܲܟܼܝܵܢܹ̈ܐ ܒܲܚܕܼܵܝܘܼܬܼܵܐ ܕܲܒܼܪܘܼܬܼܵܐ ܠܩܹܘܲܢܕܝܢܘܿܣ
ܬܹܐܬܸܐ ܕܚܘܼܒܵܠܵܐ ܘܲܕܼܒܼܘܼܠܒܵܠܵܐ܀ ܐܸܬܼܒܲܩܵܘ ܗܵܟܹܝܠ ܩܲܕܼܡܵܝܑܬܼ: ܡܲܢ̣ܘܼ
ܦܵܤܹ̇ܩ ܘܲܡܪܝܼܡ ܡ̣ܢ ܤܝܵܡܵܐ ܕܐܸܬܿܬܿܤܝܼܡ ܡ̣ܢ ܐܲܒܼ̈ܗܵܬܼܵܐ. ܘܡܲܢ̣ܘܼ
ܦܪܲܥ̣ ܗܵܠܹܝܢ ܕܐܲܪܝܼܡ ܗܵܘ̇: ܘܠܵܐ ܫܒܲܩ̣ ܕܢܸܓܼܢܘܿܒܼ ܡܸܢܹܗ ܡܸܕܵܡ:
ܗܵܢܵܐ ܕܐܵܦܠܵܐ ܠܹܗ ܠܫܘܼܪܵܝܵܐ ܐܸܡ݂ܲܪ: ܐܸܠܵܐ ܥܪܲܩ̣ ܡ̣ܢ ܫܘܼܪܵܝܵܐ:
ܘܲܥܒܲܕܼ ܫܘܼܪܵܝܵܐ ܕܠܵܐ ܫܵܡ̣ܘ ܗܵܢ̇ܘܿܢ. ܐܸܠܵܐ ܒܕܲܐܝܟܼ ܗܵܠܹܝܢ ܥ̣ܒܲܪ
ܡ̣ܢ ܫܘܼܪܵܝܵܐ: ܘܠܵܐ ܨܒܼܵܐ ܕܡܸܢܗܘܿܢ ܢܸܥܒܸܿܕܼ ܫܘܼܪܵܝ̇ܐ. ܐܵܘ ܐܸܢܵܐ
ܕܩܲܝ̇ܡܹܬܼ ܠܐܲܝܠܹܝܢ ܕܐܲܒܼ̈ܗܵܬܼܵܐ ܙܵܕܼܩܵܐܝܼܬܼ ܬܸܡܲܪܘ: ܘܐܸܡ̇ܪܹܬܼ: ܕܡ̣ܢ
ܗܵܪܟܵܐ ܢܸܥܒܸܕܼ ܫܘܼܪܵܝܵܐ. ܟܲܕܼ ܚܵܙ̇ܝܼܬܼ ܐܵܦ ܠܥܸܠܬܼܵܐ ܕܡܸܢܵܗ̇ ܩܲܕܼܡܵܝܑܬܼ
ܤܵܡ̣ܘ ܫܡܵܗܹ̈ܐ: ܐܲܝܠܹܝܢ ܕܓܼܵܘܸܵܐ ܐܸܢܘܿܢ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ:
ܘܗܵܝ̇ܕܹܝܢ ܡܲܫܠ̱ܡܵܢܘܼܬܼܵܐ ܕܡܸܬܼܒܲܪܢܫܵܢܘܼܬܼܵܐ ܘܲܕܼܚܲܫܹ̈ܐ ܘܕܼܩܝܵܡܬܼܵܐ
ܥܠܹܝܗ̇ ܒܵܢܹ̇ܝܢ: ܟܲܕܼ ܩܵܕܼܡ̇ܝܼܢ ܤܵܝ̇ܡܝܼܢ ܫܡܵܗܹ̈ܐ ܕܲܬܼܪ̈ܲܝܗܘܿܢ ܟܝܵܢܹ̈ܐ:
ܕܐܝܼܬܲܝܗܘܿܢ ܡܫܵܘ̈ܕܥܵܢܹܐ ܕܗܵܠܹܝܢ ܕܓܼܵܘܵܐ. ܕܠܵܐ ܗܵܝ̇ ܕܲܒܼܪܘܼܿܬܼܵܐ
ܘܡܵܪܘܼܬܼܵܐ ܬܸܤܬܿܕܸܩ: ܘܠܵܐ ܗܵܝ ܕܲܟܼܝܵܢܹ̈ܐ ܒܲܚܕܼܵܝܘܼܬܼܵܐ ܕܲܒܼܪܘܼܬܼܵܐ
ܠܩܹܘܲܢܕܹܝܢܘܿܣ ܬܹܐܬܸܐ ܪܚܘܼܒܵܠܵܐ ܘܲܕܼܒܼܘܼܠܒܵܠܐ. ܡܵܢܵܐ ܗܵܟܹܝܠ
pb. 210
ܐܲܝܟܼ ܝܲܬܿܝܼܪ̈ܵܬܼܵܐ ܥܒܲܪܬܿ ܥܲܠ ܗܵܠܹܝܢ: ܐܲܝܟܼ ܐܲܝܠܹܝܢ ܕܠܵܐ ܙܵܕܼ̈ܩܵܢ
ܕܢܸܬܼܐܲܡܪܵܢ؟ ܐܵܘ ܡܸܛܠ ܕܐܲܤܒܲܪܬܿ: ܕܗ̤ܝ ܟܲܕܼ ܗ̤ܝ ܐܝܼܬܹܝܗ̇:
ܘܗܵܟܲܢܵܐ ܠܵܐ ܙܵܕܹܩ ܗ̄ܘ̣ܵܐ ܕܢܹܐܡܪܘܼܢ: ܐܸܠܵܐ ܤܵܦܩܵܐ ܗ̄ܘ̣ܵܬܼ ܠܗܘܿܢ
ܕܡ̣ܢ ܗܵܪܟܵܐ ܢܫܲܪܘܿܢ ܡ̣ܢ ܐܲܝܟܵܐ ܕܫܲܪܝܼܬܿ ܐܲܢ̄ܬ: ܘܲܥܒܲܕܬܿ ܫܘܼܪܵܝܵܐ
ܘܬܲܪܸܨܬܿ ܐܸܢܘܿܢ: ܐܸܠܵܐ ܠܐܲܝܠܹܝܢ ܕܡܵܘܤܦܝܼܢ ܐܵܘ ܡܒܲܨܪܝܼܢ ܡܲܚܪ̱ܡܝܼܢ
ܗܵܢ̇ܘܿܢ: ܐܸܠܵܐ ܘܵܠܝܵܐܝܼܬܼ: ܘܠܵܘ ܐܲܝܟܼ ܪܸܥܝܵܢܵܐ ܕܐܲܒܼܵܗܵܬܼܵܐ ܤܥܲܪܘ.
ܐܸܠܵܐ ܕܲܠܩܘܼܒܼܠܵܐ ܡܦܲܫܸܩ ܗ̄ܘ̣ܵܐ: ܟܲܕܼ ܐܸܢܵܐ ܐܵܡܲ݁ܪ ܗ̄ܘܹ̇ܝܬܼ ܠܹܗ
ܕܗܵܢܵܘ ܫܘܼܪܵܝܵܐ: ܘܡ̣ܢ ܗܵܪܟܵܐ ܝܲܬܿܝܼܪܵܐܝܼܬܼ ܙܵܕܹܩ ܕܲܢܫܲܪܸܐ: ܡ̣ܢ ܐܲܝܟܵܐ
ܕܐܸܢܵܐ ܐܲܪܬܝܼܬܵܟܼ. ܗ̤ܘ ܕܹܝܢ ܡܸܬܼܚܪܸܐ ܠܘܼܩܒܲܠܝ ܟܲܕܼ ܠܟܼܠܢܵܫ
ܡܲܠܸܦ ܗ̄ܘ̣ܵܐ ܒܚܲܟܿܝܼܡܘܼܬܹܗ: ܕܕܲܠܡܵܐ ܒܠܵܐ ܝܑܼܕܼܥܬܼܗܘܿܢ ܢܸܬܼܒܲܨܪܘܼܢ
ܡ̣ܢ ܪܘܼܫܥܵܐ ܗܵܘ̇. ܡܸܛܠ ܡܵܢܵܐ ܗܵܟܹܝܠ ܟܲܕܼ ܤܵܡ̣ܬܵܗ̇ ܠܗܲܝܡܵܢܘܼܬܼܵܐ:
ܠܵܐ ܗ̄ܘ̣ܵܐ ܡ̣ܢ ܬܲܡܵܢ ܫܲܪܝܼܬܿ ܐܵܦ ܐܲܢ̄ܬܿ: ܡ̣ܢ ܐܲܝܟܵܐ ܕܗܸܢܘܿܢ ܫܲܪܝܼܘ
ܥܲܠ ܗܵܝ̇ ܕܡܸܬܼܒܲܥܝܵܐ ܗ̄ܘ̣ܵܬܼ. ܒܵܥܹܝܢ ܗ̣̄ܘܲܝܢ ܕܹܝܢ: ܕܐܲܝܟܲܢܵܐ ܠܗܵܠܹܝܢ
ܕܝܼܠܵܝ̈ܬܼܵܐ ܕܒܸܤܪܵܐ ܘܲܕܢܲܦܫܵܐ ܡܠܝܼܠܬܼܵܐ: ܘܕܸܝܼܠܵܝ̈ܬܼܵܐ ܕܐܲܠܵܗܵܐ
ܡܸܠܬܼܵܐ: ܟܝܵܢܵܐܝܼܬܼ ܙܵܕܹܩ ܕܢܸܤܬܲܟܲܠ ܘܢܹܐܡܲܪ: ܐܲܝܟܼ ܡ̇ܢ ܕܬܲܪ̈ܬܲܝܗܹܝܢ
ܕܐܲܠܵܗܵܐ ܐܸܢܹܝܢ ܡܸܠܬܼܵܐ ܒܲܟܼܝܵܢܵܐ. ܐܵܘ ܥܲܠ ܡܫܝܼܚܵܐ: ܕܲܬܼܪ̈ܲܝܗܘܿܢ ܟܝܵܢܹ̈ܐ
ܐܸܬܼܚܲܝܲܕܼܘ ܒܵܗ̇ ܒܲܚܕܼܵܝܘܼܬܼܵܐ ܕܚܲܕܼ ܦܲܪܨܘܿܦܵܐ. ܐܸܠܵܐ ܐܵܡܲ݁ܪ ܗ̄ܘܹ̇ܝܬܼ
ܘܲܡܫܲܪܲܪ ܗ̄ܘܹ̇ܝܬܼ: ܕܲܚܕܼܵܝܘܼܬܼܵܐ ܐܝܼܬܹܝܗ̇ ܕܚܲܕܼ ܦܲܪܨܘܼܦܵܐ ܕܲܡܫܝܼܚܵܐ.
ܘܡܵܘܕܲܥ ܗ̄ܘܹ̇ܝܬܼ ܡ̣ܢ ܟܠ ܦܪܘܿܣ ܠܐܲܠܵܗܵܐ ܡܸܠܬܼܵܐ
ܕܐܬܼܒܪܲܢܲܫ: ܘܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ ܐܲܟܲܚ̄ܕ ܒܐ̄ܢܵܫܘܼܬܼܵܐ:
pb. 211
ܒܗܵܝ̇ ܕܒܼܵܗ̇ ܐܸܬܼܒܲܪܢܲܫ ܡܫܝܼܚܵܐ. ܘܡܸܛܠ ܗܵܢܵܐ ܟܲܕܼ ܡܲܠܦܝܼܢ ܠܲܢ
ܐܲܒܼ̈ܿܗܸܵܬܼܵܐ ܕܡܲܢ̣ܘܿ ܡܫܝܼܚܵܐ ܗܵܘ̇ ܕܥܠܵܘܗܝ ܡܸܬܼܚܪܹܝܢ ܗ̄ܘ̣ܵܘ: ܩܲܕܡ̣ܘ
ܤܵܡ̣ܘ ܗܵܠܹܝܢ ܕܡܢܗܹܝܢ ܐܝܼܬܼܵܘܗܝ ܡܫܝܼܚܵ. ܐܲܢ̄ܬܿ ܕܹܝܢ ܗܲܦܟܵܐܝܼܬܼ:
ܡܸܛܠ ܕܨܵܒܹ̇ܐ ܐܲܢ̄ܬܿ ܕܒܲܬܼܪ̈ܲܝܗܘܿܬ ܟܝܵܢܹ̈ܐ ܐܲܠܵܗܵܐ ܡܸܠܬܼܵܐ ܢܸܗܘܸܐ
ܦܲܪܨܘܿܦܵܐ ܕܲܚܕܲܝܘܼܬܼܵܐ: ܡܲܪܦܸܐ ܐܲܢ̄ܬܿ ܠܗܵܠܹܝܢ ܐܵܝܟܼ ܝܲܬܿܝܼܪ̈ܵܬܼܵܐ: ܘܥܵܒܹ̇ܕܼ
ܐܲܢ̄ܬܿ ܕܬܸܥܒܸܿܕ ܡܸܢܗܹܝܢ ܫܘܼܪܵܝܵܐ. ܘܡ̣ܢ ܗܵܢܵܐ ܥܲܠ ܗܵܢܵܐ ܡܲܤܸܩ
ܐܲܢ̄ܬܿ ܟܒܠܗܹܝܢ ܐܲܝܠܹܝܢ ܕܲܟܼܝܵܢܵܐܝܼܬܼ ܐܝܼܬܼܵܘܗܝ ܘܡܸܬܼܐ̱ܡܲܪ ܡܫܝܼܚܵܐ.
ܘܐܲܝܟܼ ܐܲܝܢܵܐ ܕܕܲܠܩܘܼܒܼܠܵܐ ܕܝܼܠܵܟܼ ܐܝܼܬܼܵܘܗܝ ܡܫܝܼܚܵܐ ܕܐܲܒܼ̈ܗܵܬܼܵܐ:
ܐܸܫܬܸܐܠܬܿ ܡܸܢܹܗ ܕܬܹܐܡܪܝܼܘܗܝ. ܘܥܲܡܝܼ ܐܵܡܲ݁ܪ ܐܲܢ̄ܬܿ ܟܲܕܼ
ܠܵܐ ܨܵܒܹ̇ܐ ܐܲܢ̄ܬܿ: ܕܐܝܼܬܼܵܘܗܝ ܡܫܝܼܚܵܐ ܒܲܬܼܪ̈ܲܝܗܘܿܢ ܟܝܵܢܹ̈ܐ: ܘܠܵܐ ܗ̄ܘ̣ܵܐ
ܐܲܠܗܵܐ ܡܸܠܬܼܵܐ ܐܝܼܬܼܵܘܗܝ ܒܲܬܼܪ̈ܲܝܗܘܿܢ ܟܝܵܢܹ̈ܐ.
ܫܡܲܥܘ ܕܹܝܢ ܡ̣ܢ ܐܲܝܠܹܝܢ ܕܲܟܼܬܲܒܼ ܠܘܵܬܼܝ: ܕܬܸܕܥܘܼܢ ܕܠܲܝܬܿ
ܠܹܗ ܡܸܕܸܡ ܕܟܹܐܝܢ. ܐܸܠܵܐ ܒܟܼܠܗܹܝܢ ܡܥܲܬܸܕܼ ܕܠܵܐ ܢܸܗܘܸܐ ܕܝܼܢܵܐ
ܘܒܼܘܼܚܵܢܵܐ: ܕܡܵܘܕܲܥ ܒܥܸܠܕܒܼܵܒܼܘܼܬܹܗ ܕܲܠܘܵܬܼܝ: ܕܠܵܘ ܡܸܛܠ
ܗܲܝܡܵܢܘܼܬܼܵܐ ܗܘ̤ܵܬܼ܀ ܡܫܲܚܠ̱ܦܝܼܢ ܠܲܡ ܡܝܵܢܹ̈ܐ ܕܐܸܬܼ݂ܵܘ ܠܘܵܬܼ ܚܕܼܵܝܘܼܬܼܵܐ
ܫܪܝܼܪܵܬܵܐ: ܚܲܕܸ ܕܹܝܢ ܡ̣ܢ ܬܪ̈ܲܝܗܘܿܢ ܡܫܝܼܚܵܐ ܘܲܒܼܪܵܐ: ܠܵܘ ܐܲܝܟܼ ܡ̇ܢ
ܕܫܘܼܚܠܵܦܵܐ ܕܲܟܼܝܵܢܹ̈ܐ ܐܸܬܿܬܿܪܝܼܡ ܡܸܛܠ ܚܕܼܵܝܘܼܬܼܵܐ: ܓܡܲܪܘ ܠܲܢ ܕܹܝܢ
ܝܲܬܼܝܼܪܵܐܝܼܬܼ ܠܚܲܕܼ ܡܵܪܝܵܐ ܘܲܡܫܝܼܚܵܐ ܘܲܒܼܪܵܐ. ܠܵܘ ܐܲܝܟܼ ܡ̇ܢ ܕܫܘܼܚܠܵܦܵܐ
ܕܲܟܼܝܵܢܹ̈ܐ ܐܸܬܼܓܲܡܪܲܬ̤ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ: ܗܵܘ̇ ܕܲܡܬܼܘܿܡܵܐܝܼܬܼ
ܐܲܝܟܼ ܕܐܝܼܬܼܵܘܗܝ ܡܩܵܘܸܐ: ܘܠܵܐ ܬܵܘܤܲܦܬܼܵܐ ܘܠܵܐ ܒܘܼܨܪܵܐ ܡܩܲܒܸܿܠ.
pb. 212
ܐܸܠܵܐ ܡ̣ܢ ܪܲܗܛܵܐ ܕܲܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܗܘ̤ܵܐ ܚܲܕܼ
ܡܫܝܼܚܵܐ: ܘܠܵܘ ܐܲܠܵܗܵܐ ܡܸܠܬܼܵܐ. ܐܝܼܬܼܵܘܗܝ ܗ̄ܘ̣ܵܐ ܓܹܝܪ ܡܬܼܘܿܡܵܐܝܼܬܼ.
ܡܵܕܹܝܢ ܡܫܝܼܚܵܐ ܦܵܪܨܘܼܦܵܐ ܐܝܼܬܼܵܘܗܝ ܕܲܚܕܼܵܝܘܼܬܼܵܐ: ܕܐܲܠܵܗܵܐ ܕܹܝܢ
ܡܸܠܬܼܵܐ ܠܵܐ ܗ̣̄ܘ̣ܵܐ ܕܚܲܕܼܵܝܘܼܬܼܵܐ: ܐܸܠܵܐ ܕܲܟܼܝܵܢܹܗ ܕܝܼܠܹܗ: ܘܠܵܘ ܗ̤ܝ
ܟܲܕܼ ܗ̤ܝ ܐܝܼܬܹܝܗ̇ ܠܡܹܐܡܲܪ ܘܲܠܡܸܤܬܲܟܵܠܘܼ. ܘܡܸܛܠ ܗܵܢܵܐ: ܐܘܿ
ܬܡܝܼܗܵܐ: ܐܵܦ ܐܲܒܼ̈ܗܵܬܼܵܐ: ܟܲܕ ܢܲܩܝܼܦܝܼܢ ܠܲܟܼܬܼܵܒܹ̈ܐ ܐܲܠܵܗܝܹ̈ܐ:
ܐܸܡ݂ܲܪܘ: ܚܲܕܼ ܡܵܪܝܵܐ ܝܼܫܥܘܿܥ ܡܫܝܼܚܵܐ ܒܪܵܐ ܝܑܼܚܝܼܕܼܵܝܵܐ: ܡ̣ܢ ܦܲܪܨܘܿܦܵܐ
ܕܲܚܕܲܝܘܼܬܼܵܐ: ܘܗܵܝܕܹܝܢ ܡܲܠܦܝܼܢ ܠܗܵܢܘܿܢ ܕܐܸܬܼܚܲܝܲܕܼܘ ܕܡ̇ܢ ܐܸܢܘܿܢ:
ܘܲܠܘܵܬܼܵ ܡ̇ܢ. ܗܵܘ̇ ܠܲܡ ܕܐܸܬܼܝܼܠܸܕܼ ܡ̣ܢ ܐܲܒܼܵܐ ܝܑܼܚܝܼܕܼܵܝܵܐ ܡ̇ܢ
ܗ̄ܘ̣ ܡܵܪܲܢ ܝܼܫܘܿܥ ܡܫܝܼܚܵܐ ܀ ܒܪܵܐ ܕܐܲܠܵܗܵܐ ܝܑܼܚܝܼܕܼܵܝܵܐ: ܗܵܢܵܘ
ܕܹܝܢ ܡ̣ܢ ܐܘܼܤܝܼܵܐ ܕܐܲܠܗܵܐ ܐܲܒܼܵܐ. ܐܲܠܵܗܵܐ ܕܡ̣ܢ ܐܲܠܵܗܵܐ: ܘܢܘܼܗܪܵܐ
ܕܡ̣ܢ ܢܘܼܗܪܵܐ: ܐܲܠܵܗܵܐ ܫܲܪܝܼܪܵܐ ܕܡ̣ܢ ܐܵܠܵܗܐ ܫܲܪܝܼܪܵܐ: ܝܑܼܠܝܼܕܼܵܐ ܘܠܵܐ
ܥܒܼܝܼܕܼܵܐ: ܒܲܪ ܟܝܵܢܵܐ ܕܐܲܒܼܵܐ. ܕܒܼܐܝܸܕܹܗ ܟܠ ܗܘ̤ܵܐ: ܕܒܲܫܡܲܝܵܐ
ܘܒܲܐܪܥܵܐ܀ ܥܲܠ ܐܲܝܢܵܐ ܐܵܡܪܝܼܬܿܘܿܢ: ܐܘܿ ܐܲܒܼ̈ܗܵܬܼܵܐ؟ ܥܲܠ ܡܸܕܸܡ
ܐ̄ܚܪܹܢܵܐ. ܐܵܘ ܥܲܠ ܗܵܘ̇ ܕܩܲܕܼܡܬܿܘܿܢ ܟܬܲܒܼܬܿܘܿܢ: ܚܲܕܼ ܡܵܪܝܵܐ
ܝܼܫܘܿܥ ܡܫܝܼܚܵܐ ܒܪܵܐ ܕܐܲܠܵܗܵܐ ܝܑܼܚܝܼܕܼܵܝܵܐ؟ ܗܵܢܵܐ ܡܲܢ ܐܝܼܬܼܵܘܗܝ:
ܘܡ̣ܢ ܡܲܢܘܼ؟ ܡ̣ܢ ܐܲܒܼܵܐ. ܐܲܠܵܗܵܐ ܫܲܪܝܼܪܵܐ ܕܡ̣ܢ ܐܲܠܵܗܵܐ ܫܲܪܝܼܪܵܐ:
ܝܑܼܠܝܼܕܼܵܐ ܘܠܵܐ ܥܒܼܝܼܕܼܵܐ: ܒܲܪ ܟܝܵܢܵܐ ܕܐܲܒܼܵܐ: ܕܒܼܐܝܼܕܹܗ ܟܠ ܗܘ̤ܵܐ. ܗܵܘ̇
ܕܡܸܛܠܵܬܲܢ ܒܢܲܝ̈ܢܵܫܵܐ ܘܡܸܛܠ ܦܘܼܪܩܵܢܲܢ ܢܚܸܬܼ: ܡܲܢ̣ܘܼ ܗܵܢܵܐ؟
ܐܸܡܲܪܘ: ܐܘܿ ܐܲܒܼ̈ܗܵܬܼܵܐ: ܠܝܼ ܘܲܠܗܵܢܵܐ ܘܲܠܟܼܠܢܵܫ: ܐܲܝܢܵܘ؟ ܐ̄ܚܪܹܢܵܐ:
pb. 213
ܐܵܘ ܝܑܼܚܝܼܕܼܵܝܑ؟ ܠܗܵܢܵܐ ܡܲܠܦܝܼܢܲܢ ܠܟܼܘܿܢ: ܘܠܵܘ ܠܲܐ̄ܚܪܹܢܸܐ. ܗܵܘ̇
ܕܡܸܛܠܵܬܲܢ ܒܢܲܝ̈ܢܵܫܵܐ ܘܡܸܛܠ ܦܘܼܪܩܵܢܲܢ ܢܚܸܬܼ: ܘܐܸܬܼܒܲܤܲܪ ܡ̣ܢ
ܪܘܼܚܵܐ ܕܩܘܼܕܸܫܵܐ ܘܡ̣ܢ ܡܲܪܝܲܡ ܒܬܼܘܼܠܬܼܵܐ: ܗܵܘ̇ ܕܐܵܦ ܐܸܬܼܒܲܪܢܲܫ.
ܥܕܲܡܵܐ ܓܹܝܪ ܕܲܢܚܸܬܼ ܐܸܬܼܒܲܤܲܪ ܘܐܸܬܼܒܲܪܢܲܫ: ܥܲܠ ܐܲܝܠܹܝܢ
ܕܐܲܠܵܗܘܼܬܹܗ ܕܲܡܫܝܼܚܵܐ ܐܵܠܸܦܘ ܠܲܢ. ܒܗܵܝ̇ ܕܹܝܢ ܕܐܸܬܼܒܲܤܲܪ: ܥܲܠ
ܚܕܼܵܝܘܼܬܹܗ ܕܲܠܘܵܬܼ ܒܸܤܪܵܐ. ܕܲܫܲܪܟܵܐ ܕܹܝܢ ܥܲܠ ܒܸܤܪܹܗ ܗܵܘ̇ ܕܒܹܗ
ܐܸܬܼܒܲܤܲܪ: ܚܲܕܼ ܡܵܪܝܵܐ ܝܼܫܘܿܥ ܡܫܝܼܚܵܐ: ܒܪܵܐ ܕܐܲܠܵܗܵܐ ܝܑܼܚܕܼܵܝܵܐ.
ܗܵܝ̇ ܓܹܝܪ ܕܡ̣ܢ ܪܘܼܚܵܐ ܕܩܘܼܕܼܫܵܐ ܘܡ̣ܢ ܡܲܪܝܲܡ ܒܬܼܘܼܠܬܐܼܵܐ:
ܠܵܘ ܥܲܠ ܡܵܘܠܵܕܼܵܐ ܕܒܸܤܪܵܐ ܡܲܠܸܦ ܠܲܢ؟ ܚܲܕܼ ܡܵܪܝܵܐ ܝܼܫܘܿܥ ܡܫܝܼܚܵܐ:
ܝܑܼܚܝܼܕܼܵܝܵܐ ܒܪܵܐ ܕܐܲܠܵܗܵܐ. ܡܵܢܵܘ ܟܝܵܢܹܗ؟ ܗܵܘ̇ ܡܵܐ ܕܐܝܼܬܹܝܗ̇ ܐܵܦ
ܐܸܡܹܗ: ܕܡܸܢܵܗ̇ ܐܸܬܼܝܼܠܸܕܼ ܒܸܤܪܵܐ ܚܵܫ̇ܘܿܫܵܐ. ܘܚܲܫ̣ ܘܩ̣ܵܡ ܠܲܬܼܠܵܬܼܵܐ
ܝܵܘܡ̈ܝܼܢ ܘܲܤܠܸܩ ܠܲܫܡܲܝܵܐ: ܘܐܵܬܹ̇̄ܐ ܠܲܡܕܵܢ ܚܲܝܹ̈ܐ ܘܡܝܼ̈ܬܹܐ. ܡܲܢ̣ܘܼ
ܗܵܢܸܐ؟ ܚܲܕܼ ܡܵܪܝܵܐ ܝܼܫܘܿܥ ܡܫܝܼܚܵܐ ܒܪܵܐ ܕܐܲܠܵܗܵܐ ܝܼܚܝܼܕܼܵܝܵܐ:
ܒܬܲܪ̈ܐܲܝܗܹܝܢ ܠܹܗ ܐܵܡ̇ܪܝܼܢ: ܒܲܪ ܟܝܵܢܵܐ ܕܐܲܒܼܵܐ: ܘܒܲܪ ܟܝܵܢܵܐ ܕܐܸܡܵܐ:
ܚܲܕܼ ܡܵܪܝܵܐ ܝܼܫܘܿܥ ܡܫܝܼܚܵܐ. ܠܵܘ ܠܐܲܠܵܗܵܐ ܡܸܠܬܼܵܐ ܒܬܲܪ݁ܬܲܝܗܹܝܢ
ܒܲܟܼܝܵܢܵܐ: ܐܸܠܵܐ ܠܚܲܕܼ ܡܵܪܝܵܐ ܝܼܫܘܿܥ ܡܫܝܼܚܵܐ ܒܪܵܐ ܕܐܲܠܵܗܵܐ ܝܑܼܚܝܼܕܵܝܵܐ.
ܠܦܲܪܨܘܿܦܵܐ ܓܹܝܪ ܐܝܼܬܹܝܗ̇ ܚܕܼܵܝܘܼܬܼܵܐ: ܘܠܵܘ ܠܲܟܼܝܵܢܵܐ. ܘܠܵܘ ܠܐܘܼܤܝܼܵܐ:
ܐܸܠܵܐ ܚܕܼܵܝܘܼܬܼܵܐ ܡ̇ܢ ܕܐܘܼܤ̈ܝܼܣ. ܐܘܼܤܝܼܵܐ ܓܹܝܪ ܕܐܲܠܵܗܵܐ ܡܸܠܬܼܵܐ:
ܘܐܘܼܤܝܼܵܐ ܕܒܸܤܪܵܐ. ܘܲܡܚܲܝܕܝܼܢ: ܠܵܘ ܠܐܘܼܤܝܼܵܐ: ܠܵܘ ܓܹܝܪ ܚܕܼܵܐ
ܐܘܼܤܝܼܵܐ ܗܘ̤ܵܐ ܐܲܠܵܗܵܐ ܡܸܠܬܼܵܐ ܘܒܸܤܪܵܐ: ܘܠܵܘ ܬܲܪ̈ܬܲܝܗܹܝܢ ܐܘܼܤ̈ܝܼܵܣ
ܒܸܤܪܵܐ: ܐܲܠܵܗܵܐ ܡܸܠܬܼܵܐ ܘܒܸܤܪܵܐ. ܘܲܒܼܗܵܠܹܝܢ ܟܠܗܹܝܢ ܡܵܘܕܸܐ
pb. 214
ܐܲܢ̄ܬܿ ܥܲܡܝܼ: ܟܲܕܼ ܐܵܡܲ݁ܪ ܐܲܢ̄ܬܿ: ܕܲܡܫܲܚ̱ܠܦܝܼܢ ܟܝܵܢܹ̈ܐ ܕܐܲܠܵܗܘܼܬܼܵܐ
ܘܲܕܼܐ̄ܢܵܫܘܼܬܼܵܐ: ܘܲܡܩܵܘܹܝܢ ܬܪ̈ܲܝܗܘܿܢ ܟܝܵܢܹ̈ܐ ܒܐܘܼܤܝܼܵܐ ܕܝܼܠܗܘܿܢ:
ܘܒܲܚܕܼܵܝܘܼܬܼܵܐ ܕܲܟܼܝܵܢܹ̈ܐ ܠܵܐ ܡܸܬܼܒܲܛܠܝܼܢ ܫܘܼܚ̈ܠܵܦܹܗ. ܫܲܡܠܝܼܘ ܓܹܝܪ
ܬܪ̈ܲܝܗܘܿܢ ܟܝܵܢܹ̈ܐ ܚܲܕܼ ܡܫܝܼܚܵܐ: ܘܠܵܘ ܚܲܕܼ ܐܲܠܵܗܵܐ܀
ܡܵܢܵܐ ܗܵܟܹܝܠ ܡܩܲܛܪܸܓܼ ܐܲܢ̄ܬܿ ܠܝܼ؟ ܐܸܡܲܪ ܩܕܼܵܡ ܟܠܗܘܿܢ
ܐܲܝܠܹܝܢ ܕܩܵܪܹܝܢ ܡܸܠܲܝ̈ܢ: ܗܵܠܹܝܬܢ ܓܹܝܪ ܐܵܡܲ݁ܪ ܐ̄ܢܵܐ: ܘܐܵܦ ܠܵܟܼ
ܕܐܸܡ݂ܲܪܬܿ ܘܐܵܘܕܝܼܬܿ ܫܲܒܲܚܬܵܟܼ ܒܲܐܝܠܹܝܢ ܕܐܸܡ݂ܲܪܬܿ: ܒܗܵܝ̇ ܕܲܒܼܡܸܠܬܼܵܟܼ
ܥܒܲܕܬܿ ܦܘܼܪܫܵܢܵܐ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܘܲܠܗܵܠܹܝܢ ܠܢܲܩܝܼܦܘܼܬܼܵܐ
ܕܚܲܕܼ ܦܲܪܨܘܿܦܵܐ. ܘܲܠܗܵܝ̇ ܕܐܸܡ̇ܪܹܬܼ: ܕܐܲܠܵܗܵܐ ܡܸܠܬܼܵܐ ܠܐ
ܤܢܝܼܩ ܗ̄ܘ̣ܵܐ ܥܲܠ ܡܵܘܠܵܕܼܾܵܐ ܕܵܬܼܪܹܝܢ ܕܡ̣ܢ ܐܲܢ̄ܬܿܬܼܵܐ: ܘܗܵܝ̇ ܕܠܵܐ
ܡܩܲܒܿܠܵܐ ܚܲܫܹ̈ܐ ܐܠܵܗܘܼܬܼܵܐ: ܡܗܲܝܡܢܵܐܝܼܬܼ ܐܸܡ̇ܪܹܬܼ. ܘܕܲܬܼܪ̈ܝܼܨܝ
ܒܗܲܝܡܵܢܘܼܬܼܗܘܿܢ ܐܝܼܬܲܝܗܹܝܢ ܗܵܠܹܝܢ: ܘܕܲܠܩܘܼ̈ܒܼܠܵܝܵܬܼܵܐ ܐܸܢܹܝܢ ܕܒܼܝܼܫܘܼܬܼ
ܗܲܝܡܵܢܘܼܬܼܵܐ ܕܟܼܠܗܹܝܢ ܗܹܪܹ̈ܤܝܼܵܣ ܕܥܲܠ ܟܝܵܢܵܐ ܡܵܪܵܢܵܝܐ. ܐܲܝܟܵܐ ܗܵܟܹܝܠ
ܐܬܸܡ̇ܪܹܬܼ ܐܸܢܵܐ ܥܲܠ ܡܫܝܼܚܵܐ ܕܒܲܪܢܵܫܵܐ ܗ̄ܘ̣ ܫܚܝܼܡܵܐ: ܐܵ. ܬܪܹܝܢ
ܡܫܝܼܚܹ̈ܐ: ܘܠܵܐ ܗ̄ܘ̣ܵܐ ܚܲܕܼ ܡܵܪܝܵܐ ܝܼܫܘܿܥ ܡܫܝܼܚܵܐ ܒܪܵܐ ܕܐܲܠܵܗܵܐ
ܝܑܼܚܝܼܕܼܵܝܵܐ: ܡ̣ܢ ܚܕܼܲܝܘܼܬܼܵܐ ܕܲܬܼܪܹܝܢ ܟܝܵܢܹ̈ܐ ܐܝܼܬܼܵܘܗܝ ܚܲܕܼ ܦܲܪܨܘܿܦܵܐ؟
ܘܐܵܦ ܠܵܟܼ ܐܸܡ̇ܪܹܬܼ ܠܵܟܼ ܐܲܝܟܼ ܐܲܚܵܐ ܠܘܵܬܼ ܐܲܚܵܐ: ܕܠܵܐ ܡܦܲܪܫܝܼܢܲܢ
ܠܲܚܕܼܵܝܘܼܬܼܵܐ ܘܲܠܦܲܪܨܘܿܦܵܐ ܕܡ̣ܢ ܚܕܼܵܝܘܼܬܼܵܐ. ܘܠܵܐ ܬܘܼܒܼ ܡ̣ܢ
ܐܲܠܵܗܵܐ ܡܸܠܬܼܵܐ ܡܫܲܪܹܝܢܲܢ: ܐܲܝܟܼ ܕܡ̣ܢ ܦܲܪܨܘܿܦܵܐ ܕܲܚܕܼܵܝܘܼܬܼܵܐ. ܐܸܠܵܐ
ܡ̣ܢ ܗܵܘ̇ ܕܡܢܸܗ ܫܲܪܝܼܘ ܐܲܒܼ̈ܗܵܬܼܵܐ: ܕܚܲܟܼܝܼܡܝܼܢ ܗ̄ܘ̣ܵܘ ܡܸܢܵܟܼ:
ܘܲܡܦܵܤܝܼܢ ܗ̄ܘ̣ܵܘ ܒܲܟܼܬܼܵܒܹ̈ܐ ܐܲܠܵܗܵܝܹ̈ܐ ܝܲܬܿܝܼܪܵܐܝܼܬܼ. ܘܲܚܙܝܼ: ܕܲܠܟܼܠ
pb. 215
ܐܲܝܠܹܝܢ ܕܫܙܼܚܠܵܦܵܐ ܤܵܥܪܵܢ ܥܵܩ̇ܪܝܼܢ ܠܗܹܝܢ ܐܲܝܟܼ ܕܡ̣ܢ ܫܲܬܼܐܸܤܬܼܵܐ:
ܘܫܵܪܹܝܢ ܠܗܹܝܢ. ܐܸܢ ܓܹܝܪ ܠܟܼܠܗܹܝܢ ܕܝܼ̈ܠܵܝܵܬܼܵܐ ܕܒܸܤܪܵܐ ܥܲܠ ܐܲܠܵܗܵܐ
ܡܸܠܬܼܵܐ ܡܲܤܸܩ ܐܲܢ̄ܬܿ ܠܗܹܝܢ: ܚܙܝܼ ܕܠܵܐ ܡ̣ܢ ܗܵܝ̇ ܕܓܼܵܢܹ̇ܒܼ ܐܲܢ̄ܬܿ
ܠܕܼܝ̈ܠܵܝܵܬܼܵܐ ܕܲܟܼܝܵܢܹ̈ܐ: ܐܲܝܟܼ ܕܐܸܡ݂ܲܪܬܿ: ܬܹܐܡܲܪ ܠܐܲܝܠܹܝܢ: ܕܐܲܒܼ̈ܗܵܬܼܵܐ
ܬܠܵܬܼܡܵܐܐ ܘܲܬܼܡܵܢܬܲܥܤܲܪ ܒܲܚܕܼܵܐ ܒܲܪܬܼ ܩܵܠܵܐ ܘܲܒܼܚܲܕܼ ܦܘܼܡܵܐ
ܘܒܲܚܕܼܵܐ ܬܲܪܥܝܼܬܼܵܐ ܐܲܤܠ̣ܝܼܘ: ܕܐܝܼܬܼ ܗ̄ܘ̣ܵܐ ܐܸܡܲܬܼܝ ܕܠܵܐ ܐܝܼܬܼܵܘܗܝ
ܗ̄ܘ̣ܵܐ ܐܲܠܵܗܵܐ ܡܸܠܬܼܵܐ. ܗܵܢܵܘ ܕܹܝܢ: ܐܸܡܲܬܼܝ ܕܒܸܤܪܹܗ ܠܵܐ ܐܝܼܬܼܵܘܗܝ
ܗ̄ܘ̣ܵܐ: ܗܵܝܕܹܝܟܼ ܠܵܐ ܐܝܼܬܼܵܘܗܝ ܗ̄ܘ̣ܵܐ ܠܲܠܵܗܵܐ ܡܸܠܬܼܵܐ. ܗܵܢܵܐ ܕܹܝܢ:
ܕܲܩܕܼܵܡ ܕܒܸܤܪܹܗ ܢܸܬܼܝܼܠܸܕܼ: ܠܵܐ ܐܝܼܬܼܵܘܗܝ ܗ̄ܘ̣ܵܐ. ܒܗܵܝ̇ ܕܐܸܡ݂ܲܪܬܼܿ:
ܕܲܠܟܼܠܗܹܝܢ ܥܒܲܕܼ ܐܸܢܹܝܢ ܠܹܗ ܕܝܼ̈ܠܝܵܬܼܵܐ. ܘܲܕܼܡ̣ܢ ܐܲܝܠܹܝܢ ܕܠܵܐ
ܐܝܼܬܲܝܗܹܝܢ: ܐܸܬܼܝܼܠܸܕܼ ܐܲܠܵܗܵܐ ܡܵܠܬܼܵܐ. ܡܸܛܠ ܕܡ̣ܢ ܐܲܝܠܹܝܢ ܕܠܐ
ܐܝܼܬܲܝܗܘܿܢ ܗ̄ܘ̣ܵܘ ܐܝܼܬܼܵܘܗܝ ܗ̄ܘ̣ܵܐ ܒܸܤܪܹܗ: ܐܸܠܵܐ ܐܸܢ ܕܲܠܡܵܐ ܐܵܦ
ܠܹܗ ܠܒܸܤܪܵܐ ܡܲܡܪܲܚ ܐܲܢ̄ܬܿ ܠܡܹܐܡܲܪ ܕܐܝܼܬܼܵܘܗܝ ܗ̄ܘ̣ܵܐ ܐܝܼܬܼܝܵܐܝܼܬܼ.
ܘܡ̣ܢ ܩܢܘܿܡܵܐ ܐ̄ܚܪܹܢܵܐ ܘܡ̣ܢ ܐܘܼܤܝܼܵܐ ܐ̄ܚܪܹܬܼܵܐ ܬܹܐܡܲܪ ܕܐܝܼܬܼܵܘܗܝ
ܐܲܠܵܗܵܐ ܡܸܠܬܼܵܐ: ܘܠܵܘ ܡ̣ܢ ܗܵܝ̇ ܕܐܲܠܵܗܵܐ ܐܲܒܼܵܐ: ܐܸܠܵܐ ܡ̣ܢ ܗܵܝ̇
ܕܡܸܢܵܗ̇ ܗܘ̤ܵܐ ܒܸܤܪܵܐ. ܘܐܝܼܬܼܵܘܗܝ ܡܸܫܬܲܚܠܦܵܢܵܐ ܘܡܸܬܼܚܲܒܿܠܵܢܵܐ
ܐܲܠܵܗܵܐ ܡܸܠܬܼܵܐ: ܡ̣ܢ ܒܸܤܪܹܗ ܕܐܝܼܬܼܵܘܗܝ ܒܗܵܠܹܝܢ. ܠܐܝܠܹܝܢ ܓܹܝܪ
ܕܗܵܠܹܝܢ ܐܵܡ̇ܪܝܼܢ ܥܲܠ ܐܲܠܵܗܵܐ ܡܸܠܬܼܵܐ: ܡܲܚܪܡܝܼܢ ܐܲܒܼ̈ܗܵܬܼܵܐ.
ܠܵܘ ܓܹܝܪ ܡ̣ܢ ܬܪ̈ܲܝܗܘܿܢ ܐܝܼܬܼܵܘܗܝ ܒܐܘܼܤܝܼܵܐ ܐܲܠܵܗܵܐ ܡܸܠܬܼܵܐ:
ܘܠܵܐ ܬܘܼܒܼ ܐܲܠܵܗܵܐ ܡܸܠܬܼܵܐ ܐܝܼܬܼܵܘܗܝ ܒܲܒܼܤܲܪ: ܘܠܵܘ ܡ̣ܢ ܬܪܹܝܢ
ܐܝܼܬܼܵܘܗܝ ܐܲܠܵܗ̇ܐ ܡܸܠܬܼܵܐ: ܘܠܵܐ ܬܪܹܝܢ ܟܝܵܢ̈ܝܼܢ ܐܝܼܬܼܵܘܗܝ ܐܲܠܵܗܵܐ
pb. 216
ܡܸܠܬܼܵܐ. ܒܗܵܝ̇ ܓܹܝܪ ܒܲܠܚܘܿܕܼ ܡܸܬܼܪܢܵܐ: ܒܗܵܝ̇ ܕܐܝܼܬܼܵܘܗܝ ܐܲܠܵܗܵܐ
ܡܵܠܬܼܵܐ ܒܲܪ ܐܝܼܬܼܘܼܬܼܵܐ ܕܐܲܒܼܵܐ: ܐܸܬܼܒܲܤܲܪ ܓܹܝܪ ܘܐܸܬܼܓܠܝܼ ܒܲܒܼܤܲܪ.
ܐܸܢ ܕܹܝܢ ܐܸܬܼܒܲܤܲܪ ܒܒܸܤܪܵܐ: ܓܠܝܵܐ ܗ̣̄ܝ ܕܲܒܼܗܵܘ̇ ܒܸܤܪܵܐ ܕܐܸܬܼܥܒܸܕܼ.
ܘܗܵܘ̇ ܕܒܲܥܒܼܝܼܕܼܵܐ ܐܸܬܼܤܲܒܲܪ: ܠܵܘ ܐܘܼܤܝܼܵܐ ܕܝܼܠܹܗ ܒܸܤܪܵܐ ܥܲܒܼܕܵܗ̇:
ܐܲܝܟܲܢܵܐ ܕܕܼܝܼܠܵܝ̈ܬܼܵܐ ܕܲܟܼܝܵܢܵܐ ܕܐܘܼܤܝܼܵܐ ܕܒܸܤܪܵܐ: ܕܝܼܠ̈ܝܵܬܼܵܐ ܕܝܼܠܹܗ
ܢܸܥܒܸܿܕܼ ܐܸܢܹܝܢ: ܐܸܠܵܐ ܠܟܼܠܗܹܝܢ ܐܲܝܠܹܝܢ ܕܲܠܦܲܪܨܘܿܦܹܗ ܤ̣ܥܲܪ ܠܓܸܠܝܵܢܵܐ.
ܒܲܕܼܡܘܼܬܼܵܐ ܓܹܝܪ ܘܲܒܼܦܲܪܨܘܿܦܵܐ ܐܸܬܼܚܲܫܲܚ ܕܥܲܒܼܕܵܐ: ܠܵܐ ܠܐܘܼܤܝܼܵܐ
ܘܠܵܐ ܠܲܟܼܝܵܢܵܐ: ܐܲܝܟܲܢܵܐ ܕܒܲܟܼܝܵܢܵܐ ܢܸܗܘܸܐ ܒܲܬܼܪ̈ܲܝܗܘܿܢ: ܐܲܟܙܢܵܐ ܕܗܵܝ̇
ܕܲܡܫܝܼܚܵܐ. ܠܡܵܢܵܐ ܗܵܟܹܝܠ ܚܵܛܹ̇ܦ ܗ̄ܘ̣ܵܐ ܠܹܗ ܕܢܸܥܒܸܿܕܼ ܐܘܼܪܚܵܐ
ܐ̄̈ܚܪܹܬܵܐ: ܘܫܘܼܪܵܝܵܐ ܠܒܲܪ ܡ̣ܢ ܡܵܐ ܕܲܥܒܲܕܼܘ ܐܲܒܼ̈ܗܵܬܼܵܐ: ܐܲܝܟܼ
ܕܢܸܦܘܿܩ ܗ̄ܘ̣ܵܐ ܠܡܲܚܪܵܡܘܼ ܠܟܼܠܗܹܝܢ ܐܲܝܠܹܝܢ ܕܐܲܡܝܼܪ̈ܵܢ ܠܗܘܿܢ:
ܘܲܠܡܹܐܡܲܪ ܡ̣ܢ ܐܵܢܲܢܩܹܐ: ܟܠܗܹܝܢ ܐܲܝܠܹܝܢ ܕܐܸܬܿܬܿܚܪܲܡ ܡܸܢܗܘܿܢ؟
ܐܸܠܵܐ ܡܩܲܕܼܡ ܤܵܐܹ̇ܩ ܗܵܠܹܝܢ ܕܐܲܒܼ̈ܗܵܬܼܵܐܐ: ܐܲܝܟܼ ܡ̇ܢ ܕܢܸܢܗܘܿܢ
ܨܵܒܹ̇ܐ ܠܲܡܦܵܤܘܼ: ܘܲܠܡܹܐܡܲܪ ܕܗܵܠܹܝܢ ܕܗܵܢ̇ܘܿܢ ܐܸܡ̇ܪܹܬܼ.
ܢܩܲܛܪܓܲܢܝ ܕܹܝܢ ܠܝܼ: ܐܲܝܟܼ ܕܠܲܐܝܢܵܐ ܕܠܵܘ ܗܵܠܹܝܢ ܐܵܡܲ݁ܪ. ܡ̣ܢ
ܕܹܝܢ ܕܐܸܫܟܚܲܢܝܼ ܠܝܼ ܕܗܵܠܹܝܢ ܐܵܡܲ݁ܪ ܐ̄ܢܵܐ: ܘܲܡܩܝܼܡ ܐ̄ܢܵܐ ܠܐܲܝܠܹܝܢ
ܕܕܸܝܼܠܗܘܿܢ: ܡܫܲܪܸܐ ܠܲܡܤܵܡ ܢܵܡܘܿܤܹ̈ܐ: ܘܠܲܡܫܲܚܠܵܦܘܿ ܫܡܵܗܹ̈ܐ
ܐܲܝܠܹܝܢ ܕܗܵܠܹܝܢ ܠܵܐ ܐܸܡ݂ܲܪܘ: ܘܡܲܥܸܠ ܥܲܠ ܗܲܝܡܵܢܘܼܬܼܵܐ: ܟܲܕܼ
ܡܦܝܼܣ ܕܲܠܗܵܠܹܝܢ ܙܵܕܹܩ ܕܢܸܠܒܿܘܿܟܼ ܚܠܵܦ ܕܗܸܢܘܿܢ. ܗܵܟܲܢܵܐ
ܠܲܡ ܓܹܝܪ ܡܸܬܼܐܲܡܪܵܐ ܥܲܠ ܐܲܠܵܗܵܐ ܡܸܠܬܼܵܐ ܟܲܕܼ ܐܵܡܲ݁ܪ: ܕܡ̣ܢ
pb. 217
ܩܕܼܵܡ ܥܵܠܡܹ̈ܐ ܐܝܼܬܼܵܘܗܝ: ܘܐܸܬܼܝܼܠܸܕܼ ܡ̣ܢ ܐܲܒܼܵܐ: ܘܐܸܬܼܝܼܠܸܕܼ ܒܲܒܼܤܲܪ
ܡ̣ܢ ܐܲܢ̄ܬܿܬܼܵܐ . . . ܐܲܝܟܵܐ ܕܹܝܢ ܐܸܡ݂ܲܪܘ ܐܲܒܼ̈ܗܵܬܼܵܐ: ܕܐܸܬܼܝܼܠܸܕܼ ܐܲܠܵܗܵܐ
ܡܸܠܬܼܵܐ ܒܲܒܼܤܲܪ ܡ̣ܢ ܐܲܢ̄ܬܿܬܼܵܐ؟ ܬܒܲܥܘܼܢܵܝܗܝ ܠܡܹܐܡܲܪ ܤܝܵܡܵܐ
ܕܐܲܒܼ̈ܗܵܬܼܵܐ: ܗܵܘ̇ ܕܤܵܡ̣ܘ ܗ̄ܘ̣ܵܘ ܠܟܼܠܢܵܫ: ܕܐܵܦ ܚܢܲܢ ܙܵܕܹܩ ܕܢܩܲܦ
ܠܹܗ. ܒܡܸܠܹ̈ܐ ܘܲܒܼܗܲܝܡܵܢܘܼܬܼܵܐ ܛܵܒܼܵܐܝܼܬܼ ܬܸܡ݂ܲܪܬܿ: ܐܸܢ ܗܟܹܝܠ
ܢܵܛܲܪ ܐܲܢ̄ܬܿ ܒܤܘܼܥܪ̈ܵܢܹܐ ܠܫܘܼܘܕܵܝ̈ܟܼ: ܫܲܪܝܼܪ ܗ̄ܘ̣. ܗܵܘ̇ ܓܹܝܪ ܕܠܵܐ
ܐܵܡܲܪ ܐܲܝܟܼ ܕܐܸܡ݂ܲܪܘ ܐܲܒܼ̈ܗܵܬܼܵܐ: ܚܲܝܵܒܼܵܐ ܐܝܼܬܼܵܘܗܝ: ܚܵܘܵܐ ܗܵܟܹܝܠ
ܕܗܵܕܹܐ ܡܵܠܬܼܵܐ ܐܸܡ݂ܲܪܘ ܐܲܒܼܗܵܬܼܵܐ: ܘܠܝܼ ܐܲܝܟܼ ܕܠܲܐܝܢܵܐ ܕܲܥ̣ܒܲܪ ܡ̣ܢ
ܟܬܼܵܒܹ̈ܐ ܘܡ̣ܢ ܤܝܵܡܵܐ ܕܐܲܒܼ̈ܗܵܬܼܵܐ ܚܲܝܒܼܘܼܢܝ ܒܚܸܪܡܵܐ: ܐܵܦܸܢ ܪܸܒܿܘܿ
ܙܲܒܼܢ̈ܝܵܢ ܢܵܦܹ̇ܩ ܐ̄̈ܢܵܐ ܪܘܼܚܵܐ ܘܐܵܡܲ݁ܪ ܐ̄ܢܵܐ: ܕܲܒܼܪܸܥܝܵܢܝ ܠܵܘ ܐ̄ܚܪܵܢܝܐܝܼܬܼ
ܐܸܬܼܪܲܥ̇ܝܼܬܼ. ܐܵܘ ܐܸܢ ܠܵܐ: ܠܐܲܝܢܵܐ ܕܡ̣ܢ ܗܵܘ̇ ܡܵܐ ܕܐܸܡ݂ܲܪܘ ܐܲܒܼ̈ܗܵܬܼܵܐ:
ܒܲܫܡܵܐ ܗܵܘ̇ ܕܐܸܬܿܬܿܤܝܼܡ ܡܸܢܗܘܿܢ ܤܵܪܲܚ: ܠܵܐ ܬܸܫܒܿܩܘܼܢ ܠܹܗ.
ܫܡܵܗܹ̈ܐ ܓܹܝܪ ܐܲܝܠܹܝܢ ܕܢܸܵܗܘܿܢ ܐܸܬܿܬܿܤܝܼܡܘ: ܒܟܼܠ ܦܘܼܪܤܝܼܢ
ܙܵܕܹܩ ܠܡܸܛܲܪ: ܐܵܦܸܢ ܠܲܡܦܲܫܵܩܘܼ ܟܡܵܐ ܙܲܒܼܢ̈ܝܼܢ ܡܲܪܦܹܝܢܵܢ.
ܒܲܕܼ ܐ̄ܚܪܵܢܝܵܐܝܼܬܼ ܐܲܝܟܼ ܕܐܝܼܬܲܝܗܘܿܢ ܡܸܬܼܚܲܫܲܚ ܒܗܘܿܢ ܐ̄ܢܵܫ: ܠܵܘ ܐܲܝܟܼ
ܕܲܠܒܼܘܼܛܵܠܵܐ: ܘܠܵܐ ܐܲܝܟܼ ܕܲܠܫܘܼܚܠܵܦܵܐ: ܘܠܵܐ ܐܲܝܟܼ ܕܲܠܫܘܼܓܼܢܵܝܵܐ:
ܐܸܠܵܐ ܕܲܒܼܗܹܝܢ ܟܲܕܼ ܒܗܹܝܢ ܢܵܛܲܪ ܥܲܡܝ ܪܸܥܝܵܢܵܐ ܐܲܒܢܵܐ ܕܐܝܼܬܼܵܘܗܝ
ܬܪܝܼܨܵܐ: ܐܵܡܲ݁ܪ ܐ̄ܢܵܐ ܕܐܲܒܼ̈ܗܵܬܼܵܐ.
ܡܵܢܵܐ ܗܵܟܹܝܠ ܐܝܼܬܼ ܠܵܟܼ ܥܲܠ ܗܵܕܹܐ ܠܲܡܚܵܘܵܝܘܼ: ܠܡܸܠܬܼܵܐ
ܕܐܝܼܬܹܝܗ̇ ܒܲܤܝܵܡܵܐ ܕܐܲܒܼ̈ܗܬܼܵܐ ܐܸܢܵܐ ܒܝܼܫܵܐܝܼܬܼ ܐܸܬܼܚܲܫܚܹܬܼ ܒܵܗ̇: ܘܙܵܕܹܩ
ܠܝܼ ܠܡܸܬܼܟܲܫܵܦܘܼ ܥܲܠ ܦܘܼܫܵܩܵܐ؟ ܚܵܘܵܐ ܠܝܼ ܕܐܸܬܼܝܼܠܸܕܼ ܐܲܠܵܗܵܐ
pb. 218
ܡܸܠܬܼܵܐ ܒܲܒܼܤܲܪ ܡ̣ܢ ܐܲܢ̄ܬܿܬܼܵܐ: ܘܗܵܝܕܹܝܢ ܕܐܲܝܟܲܢܵܐ ܡܤܬܲܟܲܠ ܐܲܢ̄ܬܿ
ܕܐܸܬܼܝܼܠܸܕܼ ܐܲܢ̄ܬܿ ܦܲܫܸܩ. ܐܸܢ ܓܹܝ ܐܲܢ̄ܬܿ ܗ̄ܘ̣ ܡܩܲܕܸܡ ܤܵܐܹ̇ܡ ܐܲܢ̄ܬܿ
ܠܵܗ̇: ܘܲܠܗܵܝ̇ ܕܡܸܢܵܟܼ ܐܸܬܿܬܿܤܝܼܡܲܬ̤ ܡܦܲܫܸܩ ܐܲܢ̄ܬܿ: ܠܵܐ ܡܸܬܼܩܲܒܲܠ
ܐܲܢ̄ܬܿ ܡ̣ܢ ܐܲܝܠܹܝܢ ܕܲܡܩܒܿܠܝܼ ܠܗ̇ܠܹܝܢ ܕܐܲܒܼ̈ܗܵܬܼܵܐ: ܕܠܵܐ ܒܘܼܨܵܪ
ܐܝܼܬܲܝܗܹܝܢ: ܘܡܸܛܠ ܗܵܢܵܐ: ܠܵܐ ܬܵܘܤܲܦܬܼܵܐ ܘܠܵܐ ܒܘܼܨܵܪܵܐ ܘܠܵܐ
ܫܘܼܚܠܵܦܵܐ ܡܩܲܒܿܠܝܼܢ. ܗܵܘ̇ ܓܹܝܪ ܕܲܢܦܲܫܸܩ: ܠܗܵܠܹܝܢ ܕܲܟܼܬܼܝܼ̈ܒܼܵܢ
ܡܩܝܼܡ: ܘܠܵܘ ܡܒܲܛܵܠܘܼ ܡܒܲܛܸܠ ܠܗܹܝܢ. ܘܐܸܠܵܐ ܕܐܸܢܵ ܒܝܼܫܵܐܝܼܬܼ
ܐܸܬܼܚܲܫ̇ܚܹܬܼ ܒܡܸܠܹ̈̄ܐ ܕܐܲܒܼ̈ܗܵܬܼܵܐ: ܕܲܡܦܝܼܣ ܗܘܹ̇ܝܬܼ ܡ̣ܢ ܡܸܠܹ̈ܐ ܕܠܵܐ
ܢܹܐܡܲܪ ܝܵܠܕܲܬܼ ܐܲܠܵܗܵܐ ܠܲܒܼܬܘܼܬܼܵܐ ܩܲܕܝܼܫܬܼܵܐ: ܘܠܲܡܫܝܼܚܵܐ ܠܵܐ ܐܵܡܲ݁ܪ
ܗ̄ܘܹ̇ܿܝܬܼ ܐܲܠܵܗܵܐ: ܘܐܸܬܼܐ̱ܠܸܨܬܿ ܕܬܹܐܬܸܐ ܒܕܲܠܩܘܼܒܼܠܵܐ: ܩܲܕܼܡܵܝܑܬܼ
ܚܵܘܵܢܝ: ܕܗܠܹܝܢ ܐܸܡ̇ܪܹܬܼ ܐܸܢܵܐ: ܩܕܼܵܡ ܐ̄ܢܵܫܵܐ ܐܲܝܠܹܝܢ ܕܘܵܠܝܵܐܝܼܬܼ
ܡܒܲܚܢܝܼܢ ܠܲܢ: ܘܠܵܘ ܩܕܲܡ ܐܝܠܹܝܢ ܕܲܨܠܹܝܢ ܒܵܬܼܪܵܟܼ. ܩܕܼܵܡ ܗܵܠܹܝܢ
ܓܹܝܪ ܙܟܲܝܬܿ: ܘܐܲܝܟܼ ܕܲܩܕܼܵܡ ܐܲܝܠܹܝܢ ܕܲܕܼܠܵܐ ܡܸܠܬܼܵܐ ܐܸܢܘܿܢ ܘܲܕܼܠܵܐ
ܢܲܦܫܵܐ ܐܸܬܼܚܲܫܚܬܿ: ܘܠܵܘ ܐܲܝܟܼ ܕܲܩܕܼܵܡ ܒܢܲܝ̈ܢܵܫܑܵܐ ܩܲܪܸܒܼܬܵܗ̇
ܠܐܸܓܲܪܬܵܐ ܕܝܼܠܝܼ: ܗܵܝ̇ ܕܒܼܵܗ̇ ܐܸܬܼܚ̇ܪܝܼܬܼ ܠܩܘܼܒܼܠܵܟܼ: ܕܠܵܐ
ܬܒܲܠܒܸܠ ܠܗܵܠܹܝܢ ܕܐܲܒܼ̈ܗܵܬܼܵܐ. ܐܸܠܵܐ ܕܬܼܵܘܕܸܐ ܚܲܕܼ ܡܵܪܝܵܐ ܝܼܫܘܿܥ
ܡܫܝܼܚܵܐ ܒܲܪ ܟܝܵܢܵܐ ܕܲܐܲܒܼܵܐ: ܠܵܘ ܐ̄ܚܪܹܢܵܐ. ܐܸܠܵܐ ܚܲܕܼ ܗ̤ܘ ܟܲܕܼ ܗ̤ܘ:
ܘܐܝܼܬܼܵܘܗܝ ܚܲܕܼ ܦܲܪܨܘܿܦܵܐ ܕܲܬܼܪ̈ܲܝܗܘܿܢ ܟܝܵܢܹ̈ܐ: ܕܐܲܠܵܗܘܼܬܼܵܐ
ܘܲܕܿܐ̄ܢܵܫܘܼܬܼܵܐ: ܡܵܪܝܵܐ ܘܲܡܫܝܼܚܵܐ. ܘܲܠܗܵܕܹܐ: ܐܵܦ ܐܲܢ̄ܬܿ ܐܵܘܕܝܼܬܿ. ܠܵܐ
ܗ̄ܘ̣ܵܐ ܡܵܕܹܝܢ ܡܸܛܠ ܕܠܵܐ ܡܵܘܕܹܐ ܐ̄ܢܵܐ ܠܹܗ ܐܲܠܵܗܵܐ ܠܲܡܫܝܼܚܵܐ:
ܕܐܵܦ ܐܲܠܵܗܵܐ ܗ̄ܘ̣: ܘܠܵܘ ܐ̄ܚܪܹܢܵܐ ܗ̄ܘ̣ ܠܒܲܪ ܡ̣ܢ ܐܲܠܵܗܵܐ ܡܸܠܬܼܵܐ
pb. 219
ܒܲܪ ܟܝܵܢܵܐ: ܐܸܠܵܐ ܡܸܛܠ ܕܡܵܘܕܸܐ ܐ̄ܢܵܐ ܕܐܵܦ ܒܲܪܢܵܫܵܐ ܗ̄ܘ̣. ܐܸܢܗ̤ܘ
ܕܐܝܼܬܹܝܗ̇ ܗ̄ܘ̣ܵܬܼ ܗܵܕܹܐ: ܘܠܵܐ ܡܵܘܕܹܐ ܗ̄ܘܹ̇ܝܬܼ ܗܵܟܼܵܢܵܐ: ܡܵܘܤܸܦ
ܗ̄ܘܹ̇ܝܬܼ ܟܲܕܼ ܡܲܠܸܦ: ܕܐܝܼܬܼܵܘܗܝ ܡܫܝܼܚܵܐ ܐܲܠܵܗܵܐ ܘܒܲܪ ܟܝܵܢܵܐ ܕܐܲܒܼܵܐ:
ܘܗܸܟܼܘܵܬܼ ܐܵܦ ܒܲܪܢܵܫܵܐ ܒܲܪ ܟܝܵܢܵܐ ܕܝܼܠܲܢ: ܟܲܕܼ ܠܵܐ ܥܒܲ݁ܪ ܗ̄ܘܹ̇ܝܬܼ
ܡܲܪܗܛܵܐܝܼܬܼ ܡ̣ܢ ܦܲܪܨܘܿܦܵܐ ܕܲܚܕܲܝܘܼܬܼܵܐ: ܘܡ̣ܢ ܐܘܼܤܝܼܵܐ ܕܐܲܠܵܗܘܼܬܼܵܐ
ܐܲܝܟܼ ܕܡ̣ܢ ܦܲܪܨܘܿܦܵܐ ܕܓܼܵܘܵܐ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܐܲܝܟܼ ܕܡ̣ܢ
ܚܕܼܵܐ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ: ܕܬܲܪ̈ܬܲܝܗܹܝܢ ܐܝܼܬܲܝܗܹܝܢ ܗ̣̄ܘܲܝ̈ ܡܫܲܪܸܐ
ܗ̄ܘܹ̇ܝܬܼ. ܘܟܼܠܗܹܝܢ ܐܲܝܠܹܝܢ ܕܲܥܠܵܘܗܝ: ܘܐܲܝܠܹܝܢ ܕܥܲܠ ܒܸܤܪܹܗ:
ܟܝܵܢܵܐܝܼܬܼ ܥܠܵܘܗܝ ܡܲܤܸܩ ܗ̄ܘܹ̇ܝܬܼ: ܕܐܝܼܬܼܵܘܗܝ ܒܐܘܼܤܝܼܵܐ
ܬܲܪ̈ܬܲܝܗܹܝܢ.
ܡܵܢܵܐ ܗܵܟܹܝܠ ܡܲܩܸܦ ܐܲܢ̄ܬܿ ܕܲܓܵܠܵܐܝܼܬܼ ܠܐܲܒܼ̈ܗܵܬܼܵܐ ܐܲܝܠܹܝܢ ܕܠܵܐ
ܐܵܡ̇ܪܝܼܢ؟ ܘܡܵܢܵܐ ܬܘܼܒܼ ܡܦܝܼܣ ܐܲܢ̄ܬܿ: ܕܕܼܝܼܠܵܟܼ ܢܩܲܒܿܠܘܼܢ ܡ̣ܢ
ܕܐܲܒܼ̈ܗܵܬܼܵܐ: ܠܐܲܝܠܹܝܢ ܕܠܵܐ ܨܵܒܹ̇ܝܢ ܕܡܸܕܸܡ ܠܒܲܪ ܡ̣ܢ ܤܝܵܡܵܐ
ܕܐܲܒܼ̈ܗܵܬܼܵܐ ܢܩܲܒܿܠܘܼܢ؟ ܐܸܠܵܐ ܗ̤ܘܝܼ ܨܹܝܕܼ ܢܲܦܫܵܟܼ: ܘܲܩܪܝܼ ܘܕܲܥ
ܘܲܚܙܝܼ: ܕܠܵܘ ܗܵܕܹܐ ܐܸܡ݂ܲܪܘ. ܘܲܚܢܲܢ: ܠܵܘ ܐܲܝܟܼ ܠܵܐ ܝܵܕܼ̈ܘܿܥܹܐ: ܐܵܘ
ܐܲܝܟܼ ܒܝܼ̈ܫܹܐ ܥܒܲܪܢ ܥܠܲܝܗܹܝܢ. ܐܸܠܵܐ ܠܵܐ ܡܸܫܟܲܚ ܐܲܢ̄ܬܿ: ܕܗܵܘ ܕܡ̣ܢ
ܐܲܒܼܵܐ ܐܸܬܼܝܼܠܸܕ: ܕܐܸܬܼܝܼܠܸܕܼ ܒܲܒܼܤܲܪ ܡ̣ܢ ܐܲܢ̄ܬܿܬܼܵܐ: ܐܸܡ݂ܲܪܘ ܐܲܝܠܹܝܢ
ܕܐܲܟܼܬܸܒܼܘ ܠܵܟܼ: ܐܸܢ ܟܠ ܟ̱ܠܹܗ ܡܥܲܗܕܝܢ ܝܲܠܕܼܵܐ ܕܡ̣ܢ ܐܲܢ̄ܬܿܬܼܵܐ.
ܐܲܝܟܲܢܵܐ ܡܵܕܹܝܢ ܐܵܡܲ݁ܪ ܐܲܢ̄ܬܿ: ܐܘܿ ܥܵܫܘܿܩܵܐ: ܕܗܵܟܲܢܵܐ ܐܸܫܟܲܚܢ ܐܸܢܘܿܢ
[ܠܐܲܒܼܵ̈ܗܵܬܼܵܐ] ܩܲܕܝܼ̈ܫܹܐ ܕܐܸܬܼܪܲܥܝܼܘ: ܘܗܵܟܲܢܵܐ ܐܸܬܿܬܿܟܸܠܘ: ܕܝܵܠܕܲܬܼ
ܐܲܠܵܗܵܐ ܢܸܩܪܘܿܢ ܠܲܒܼܬܼܘܼܠܬܼܵܐ ܩܲܕܝܼܫܬܼܵܐ: ܗܵܟܲܢܵܐ ܠܲܡ ܐܵܡܪܝܼܢܲܢ ܕܐܵܦ
pb. 220
ܚܲܫ̣ ܐܵܦ ܩ̣ܵܡ؟ ܩܲܕܼܡܵܝܑܬܼ ܚܵܘܵܐ ܠܲܢ ܕܐܵܡ̇ܪܝܼܢ ܠܵܗ̇ ܐܲܒܼܵ̈ܗܵܬܼܵܐ: ܝܵܠܕܲܬܼ
ܐܲܠܵܗܵܐ: ܐܵܘ ܕܐܲܠܵܗܵܐ ܡܸܠܬܐ ܐܸܬܼܝܼܠܸܕ ܒܲܒܼܣܲܪ: ܐܵܘ ܕܟܼܠ ܟ̱ܠܹܗ
ܐܸܬܼܝܼܠܸܕܼ: ܘܗܵܟܼܘܵܬܼ ܐܵܦ ܕܚܲܫ̣: ܐܵܦ ܕܡܝܼܬܼ: ܐܵܦ ܕܩ̣ܡ. ܘܕܲܐܝܟܲܢܵܐ
ܐܵܡ̇ܪܝܼܢ: ܕܚܲܫ̣ ܘܲܕܼܩ̣ܵܡ ܐܲܠܵܗܵܐ: ܦܲܫܸܩ ܠܲܢ: ܐܸܢܗ̤ܘ ܕܹܝܢ ܕܡܸܓܼܒܲܠ
ܓܒܼܝܼܠܵܐ ܠܵܟܼ: ܘܡܸܥܫܲܩ ܥܵܫܹ̇ܩ ܐܲܢ̄ܬܿ: ܐܲܝܟܲܢܵܐ ܢܩܲܒܸܿܠ ܐ̄ܢܵܫ
ܠܗܵܠܹܝܢ ܕܫܲܪܟܵܐ ܕܠܵܐ ܦܘܼܠܵܓܼܵܐ؟ ܟܠܗܹܝܢ ܓܹܝܪ ܥ̣ܒܲܕܬܿ ܐܸܢܹܝܢ
ܕܦܘܼܠܵܓܼܵܐ: ܕܠܵܐ ܐܸܡ݂ܲܪܬܿ ܐܲܝܠܹܝܢ ܓܕܐܸܡ݂ܲܪܘ ܐܲܒܼ̈ܗܵܬܼܵܐ: ܐܸܠܵܐ
ܫܲܚܠܸܦܬܵܝܗܝ ܐܵܦ ܠܹܗ ܠܲܫܡܵܐ. ܐܵܦܸܢ ܓܹܝܪ ܠܹܗ ܟܲܕܼ ܠܹܗ ܐܲܤܒܲܪܬܿ
ܕܲܡܫܵܘܕܥܝܼܢ: ܘܠܵܐ ܚܲܕܼ ܦܘܼܪܫܵܢܵܐ ܐܝܼܬܼ ܒܗܵܝ̇ ܕܡܵܪܝܵܐ ܘܝܼܫܘܿܥ
ܡܫܝܼܚܵܐ ܠܘܵܬܼ ܐܲܠܵܗܵܐ ܡܸܠܬܼܵܐ. ܘܲܒܼܝܲܕܼ ܗܵܢܵܐ ܫܡܵܐ ܘܲܒܼܝܲܕܼ ܗܵܘ̇: ܗ̤ܘ
ܟܲܕܼ ܗ̤ܘ ܡܸܫܬܵܘܕܲܥ ܐܲܢ̄ܬܿ: ܠܵܐ ܙܵܕܹܩ ܗ̄ܘ̣ܵܐ ܠܵܟܼ ܕܲܬܫܲܚܠܸܦ. ܐܸܠܵܐ
ܕܲܬܼܦܲܫܩܝܼܘܗܝ ܘܲܬܼܢܲܗܪܝܼܘܗܝ: ܘܬܸܬܼܚܲܫܲܚ ܒܲܫܡܵܗܹ̈ܐ ܕܐܸܬܿܬܿܤܝܼܡܘ
ܡ̣ܢ ܐܲܒܼ̈ܗܵܬܼܵܐ. ܐܸܠܵܐ ܠܵܐ ܡܸܫܟܲܚ ܗ̣̄ܘܲܝܬܿ: ܕܲܒܼܝܲܕܼ ܫܘܼܡܵܗܹ̈ܐ ܗܵܢܘܿܢ:
ܬܚܵܘܹܝܘܗܝ ܠܐܲܠܵܗܵܐ ܡܸܠܬܼܵܐ ܚܵܫܘܿܫܵܐ ܘܡܵܝܘܿܬܼܵܐ. ܘܡܸܛܠ ܗܵܢܵܐ
ܡܸܬܼܚܲܫ ܐܲܢ̄ܬܿ ܒܫܘܼܡܵܗܵܐ ܗܵܢܵܐ: ܕܒܹܗ ܡܸܫܟܲܚ ܐܲܢ̄ܬܿ ܠܡܸܚܛܲܦ
ܠܐܲܝܠܹܝܢ ܕܠܵܐ ܝܵܕܼܥ̇ܝܼܢ ܕܡ̇ܢ ܡܫܵܘܕܥܝܼܢ ܚܲܕܼ ܚܲܕܼ ܡ̣ܢ ܗܵܠܹܝܢ܀
ܗܵܟܲܢܵܐ ܠܲܡ: ܐܵܦ ܥܲܠ ܗܵܝ̇ ܕܡܝܼܬܼ ܡܸܤܬܲܟܿܠܝܼܢܲܢ. ܠܵܐ ܡܵܝܘܿܬܼܵܐ
ܡ̇ܢ ܓܹܝܪ ܐܝܼܬܼܵܘܗܝ ܒܲܟܼܵܢܹܗ ܘܠܵܐ ܡܸܬܼܚܲܒܿܠܵܢܵܐ: ܘܚܲܝܵܐ ܘܡܲܚܝܵܢܵܐ
ܐܝܼܬܼܵܘܗܝ ܡܸܠܬܼܵܐ ܐܲܠܵܗܵܐ. ܡܸܛܠ ܕܹܝܢ ܬܘܼܒܼ: ܕܦܲܓܼܪܹܗ
ܒܛܝܒܿܘܼܬܼܵܐ ܕܐܲܠܵܗܑܵܐ: ܐܲܝܟܼ ܕܐܸܡ݂ܲܪ ܦܘܼܠܘܼܣ: ܚܠܵܦ ܟܠ ܐ̄ܢܵܫ
ܛܥܸܡ̣ ܡܵܘܬܵܐ: ܡܸܬܼܐ̱ܡܲܪ ܕܤܲܒܲܠ̣ ܗ̤ܘ ܚܠܵܦܲܝܢ ܡܵܘܬܵܐ. ܡ̣ܢ
pb. 221
ܡ̇ܢ؟ ܡܸܵܢܵܟܼ ܐܵܘ ܡ̣ܢ ܐܲܒܼ̈ܗܵܬܼܵܐ؟ ܐܸܡ݂ܲܪ: ܠܵܐ ܐܲܛܥܸܐ ܠܫܵܡ̈ܘܿܥܹܐ ܡ̣ܢ
ܐܲܒܼ̈ܗܵܬܼܵܐ: ܒܐܲܝܠܹܝܢ ܕܐܸܡ݂ܲܪܬܿ ܕܫܵܠܡܲܬܿ ܠܡܸܠܲܝ̈ܗܘܿܢ
ܘܲܠܝܘܼܠܦܵܢܗܘܿܢ. ܡ̇ܕܹܝܢ ܩܪܝܼ: ܐܲܝܟܵܐ ܐܸܡ݂ܲܪܘ: ܕܐܲܠܵܗܵܐ ܡܸܠܬܼܵܐ
ܚܲܫ̣؟ ܘܐܸܠܵܐ ܟܬܼܵܒܼܵܐ ܐܲܠܵܥܗܵܝܵܐ ܐܵܡܲ݁ܪ ܐܲܢ̄ܬܿ ܕܐܸܡ݂ܲܪ: ܕܚܲܫ̣ ܐܲܠܵܗܵܐ
ܡܸܠܬܼܵܐ: ܩܪܝܼ ܘܠܵܐ ܬܛܲܫܸܐ. ܐܸܠܵܐ ܠܲܝܬܿ ܠܵܟܼ ܕܬܸܩܪܸܐ. ܒܡܵܢܵܐ
ܗܵܟܹܝܠ ܥܵܫܹ̇ܩ ܐܲܢ̄ܬܿ ܠܐܲܒܼ̈ܗܵܬܼܵܐ؟ ܐܵܘ ܡܵܢܵܐ ܢܵܤܹ̇ܒܼ ܐܲܢ̄ܬܿ ܠܗܲܝܡܵܢܘܼܬܼܵܐ
ܕܐܲܒܼ̈ܗܵܬܼܵܐ ܐܲܝܟܼ ܕܲܠܡܲܛܥܝܵܢܘܼܬܼܵܐ ܘܠܲܩܲܕܡܘܼܬܼܵܐ ܕܐܲܝܠܹܝܢ
ܕܲܫܚܝܼܡܵܐܝܼܬܼ ܡܗܲܝܡܢܝܼܢ ܘܠܵܐ ܡܥܲܩܒܼܝܼܢ؟ ܐܵܪܵܐ ܫܥܵܬܼܵܐ ܤܵܥܲ݁ܪ ܐܲܢ̄ܬܿ
ܒܐܲܝܠܹܝܢ ܕܩܵܪܹܝܢ: ܐܲܝܟܼ ܐܲܝܠܹܝܢ ܕܠܵܐ ܡܸܬܼܒܲܝܢܝܼܢ؟ ܐܵܘ ܠܗܲܝܡܵܢܘܼܬܼܵܐ
ܕܐܲܒܼ̈ܗܵܬܼܵܐ ܡܬܲܪܸܨ ܐܲܢ̄ܬܿ: ܕܐܲܝܠܹܝܢ ܕܙ̇ܕܼܩ ܗ̄ܘ̣ܵܐ ܕܢܸܟܼܬܿܒܼܘܼܢ ܠܵܐ
ܟܬܲܒܼܘ؟ ܡܩܲܕܸܡ ܐܲܢ̄ܬܿ ܓܹܝܪ ܤܵܐܹ̇ܡ ܐܲܢ̄ܬܿ ܠܵܗ̇: ܘܐܸܡܲ݁ܪ ܐܲܢ̄ܬܿ:
ܕܙܵܕܹܩ ܕܢܸܫܠܲܡ ܠܵܗ̇ ܒܡܸܠܹ̈ܐ ܘܲܒܼܗܲܝܡܵܢܘܼܬܼܵܐ: ܟܠ ܟ̱ܠܹܗ ܕܹܝܢ
ܠܵܐ ܢܵܩܹ̇ܦ ܐܲܢ̄ܬܿ ܠܵܗ̇: ܘܐܵܦܠܵܐ ܛܲܟܼܤܵܐ ܕܡܸܠܬܼܵܐ ܢܵܛ̇ܪܲܬܿ.
ܘܫܲܪܝܼܬܿ ܡ̣ܢ ܐܲܝܟܵܐ ܕܫܲܪܝܼܘ ܐܲܒܼ̈ܗܵܬܼܵܐ: ܘܥܲܠ ܗܵܠܹܝܢ ܐܲܤܸܩ̣ܬܿ ܟܠܗܹܝܢ
ܐܲܝܠܹܝܢ ܕܡܸܢܗܘܿܢ ܐܸܬܼܐ̱ܡܲܪ؟ ܘܐܵܦܠܵܐ ܒܲܫܡܵܗܹ̈ܐ ܐܲܤܒܲܪܬܿ
ܕܬܸܬܼܚܲܫܲܚ ܒܗܘܿܢ ܟܲܕܼ ܒܗܘܿܢ: ܘܐܵܦܠܵܐ ܠܝܘܼܠܦܵܢܗܘܿܢ ܢܩܸܬܿ.
ܠܲܒܼܪܝܼܬܼܵܐ ܓܹܝܪ ܘܠܲܥܒܝܼܕܼܵܐ ܘܲܠܚܵܫܘܿܫܵܐ ܘܲܠܡܵܝܘܿܬܼܵܐ: ܘܲܠܟܼܠܗܹܝܢ
ܕܐܲܝܟܼ ܗܵܠܹܝܢ ܕܡܲܤܠܹܝܢ ܐܲܒܼ̈ܗܵܬܼܵܐ: ܐܲܡܲ݁ܪ ܐܲܢ̄ܬܿ ܥܲܠ ܐܘܼܤܝܼܵܐ
ܕܐܲܠܵܗܵܐ ܡܸܠܬܼܵܐ. ܕܟܼܠܗܹܝܢ ܐܲܝܠܹܝܢ ܕܐܝܼܬܼ ܠܐܲܒܼܵܐ ܒܐܘܼܤܝܼܵܐ ܕܝܼܠܹܗ:
ܐܵܦ ܗ̤ܘ ܐܝܼܬܼܵܘܗܝ ܘܡܸܬܼܐ̱ܡܲܪ. ܕܵܪܹܿܫ ܐܲܢ̄ܬܿ ܓܹܝܪ ܕܗܵܟܲܢܵܐ ܢܹܐܡܲܪ:
ܐܲܝܟܼ ܐܲܝܠܹܝܢ ܕܗܸܢܘܿܢ ܠܵܐ ܐܸܡ݂ܲܪܘ. ܘܗܵܝܕܹܝܢ ܟܹܐܡܲܬܼ ܡܦܲܫܸܩ ܐܵܢ̄ܬܿ:
pb. 222
ܠܵܘ ܐܲܝܟܼ ܡ̇ܢ ܕܲܡܪܝܼܡ ܐܲܢ̄ܬܿ ܕܠܵܐ ܢܸܬܼܐ̱ܡܲܪ ܚܵܫܘܿܫܵܐ ܘܡܵܝܘܿܬܼܵܐ
ܐܲܠܵܗܵܐ ܡܸܠܬܼܵܐ: ܐܸܠܵܐ ܐܲܝܟܲܢܵܐ ܕܲܬܼܦܝܼܣ ܕܢܹܐܡܪܘܼܢ: ܗܵܠܹܝܢ
ܕܐܤܠܝܼܘ ܐܲܒܼ̈ܗܵܬܼܵܐ ܠܡܸܬܼܐ̱ܡܵܪܘܼ. ܗܵܟܲܢܵܐ ܠܲܡ ܚܲܕܼ ܡܵܪܝܵܐ
ܡܫܝܼܚܐ ܢܵܘܕܸܐ: ܠܗܵܘ̇ ܕܐܸܫܬܲܡܲܗ ܒܝܼܠܝܼܕܼܘܼܬܼܵܐ ܡ̣ܢ ܛܘܼܒܼܵܢܝܼܬܼܵܐ
ܡܲܪܝܲܡ: ܐܠܵܐ ܐܵܦ ܒܲܪܢܵܫܵܐ: ܐܸܠܵܐ ܐܵܦ ܒܡܵܘܬܵܐ: ܐܸܠܵܐ ܐܵܦ
ܒܲܩܝܵܡܬܼܵܐ: ܐܸܠܵܐ ܐܵܦ ܒܤܘܼܠܵܩܵܐ: ܐܸܠܵܐ ܐܵܦ ܒܡܹܐܬܼܝܼܬܹܗ ܕܡ̣ܢ
ܫܡܲܝܵܐ: ܡ̣ܢ ܟܠܗܹܝܢ ܡܲܦܸܩ ܐܲܢ̄ܬܿ ܠܹܗ ܗܵܫܵܐ. ܗܵܟܲܢܵܐ ܐܸܡ݂ܲܪܬܿ ܚܲܕܼ
ܡܫܝܼܚܵܐ ܘܡܵܪܝܵܐ ܢܵܘܕܸܐ: ܐܲܝܟܲܢܵܐ ܕܐܲܢ̄ܬܿ ܐܸܡܲ݁ܪ ܐܲܢ̄ܬܿ. ܡܵܕܹܝܢ ܗܵܝ̇
ܕܠܵܐ ܐܸܬܿܬܵܘܕܝܼܬ̤ ܢܵܘܕܼܵܐ: ܠܵܘ ܐܲܝܟܼ ܡ̇ܢ ܕܠܒܲܪܢܵܫܵܐ ܤܵܓܼܕܝܼܢܲܢ
ܥܲܡ ܡܸܠܬܼܵܐ: ܕܠܵܐ ܡܲܤܒܿܪܵܢܘܼܬܼܵܐ ܕܤܸܕܼܩܵܐ ܢܸܥܘܿܠ. ܒܲܕܼ ܗܵܝ̇
ܕܐܵܡܪܝܼܢܲܢ ܥܲܡ: ܐܸܠܵܐ ܐܲܝܟܼ ܕܲܠܚܲܕ: ܘܠܹܗ ܟܲܕܼ ܠܹܗ ܤܵܓܼܕܿܝܼܢܲܢ.
ܡܸܛܠ ܕܠܵܘ ܢܘܼܟܼܪܵܝܵܐ ܗ̄ܘ̣ ܠܹܗ ܦܲܓܼܪܹܗ: ܥܲܡ ܗܵܘ̇ ܕܐܵܦ ܝܲܬܿܝܼܒܼ
ܥܲܡ ܐܲܒܼܵܐ. ܐܵܘ ܡ̣ܢ ܥܘܼܝܼܪܘܼܬܼ ܝܑܼܕܲܥܬܹܗ ܐܲܡܪܹܗ: ܐܵܘ ܕܡ̣ܢ
ܐܵܢܲܢܩܹܐ ܕܐܲܠܵܗܵܐ ܐܸܬܼܥܨܝܼ: ܕܒܲܐܝܠܹܝܢ ܕܟܼܐܹ̇ܐ ܒܐܚ̄ܪ̈ܵܢܹܐ ܒܗܹܝܢ ܢܸܦܸܠ:
ܘܒܼܵܗ̇ ܒܡܟܿܤܵܢܘܼܬܼܵܐ.
ܥܵܦ̣ܵܗ̇ ܓܹܝܼܪ ܠܗܵܝ̇ ܕܥܲܡ: ܒܗܵܝ̇ ܕܐܸܡ݂ܲܪ: ܕܥܲܡ ܗܵܘ̇ ܕܝܲܬܿܝܼܒܼ
ܥܲܡ ܐܲܒܼܵܐ. ܠܵܐ ܗ̄ܘ̣ܵܐ ܓܹܝܪ ܥܲܠ ܚܲܕܼ ܡܸܬܼܐܲܡܪܵܐ ܗܵܝ̇ ܕܥܲܡ: ܐܸܠܵܐ
ܕܥܲܡ ܐ̄ܚܪܹܢܵܐ. ܘܗܵܘ̇ ܕܥܲܡ ܗܵܘ̇ ܕܝܲܬܿܝܼܒܼ ܥܲܡ ܐܲܒܼܵܐ: ܐܲܝܟܲܢ ܠܵܘ
ܡܲܤܒܿܪܵܢܘܼܬܼܵܐ ܕܤܸܕܼܩܵܐ ܡܲܥܠܵܐ؟ ܦܲܓܼܪܵܐ ܐܵܡܲ݁ܪ ܘܦܲܓܼܪܵܐ ܕܝܼܠܹܗ:
ܘܥܲܡܹܗ ܝܲܬܿܝܼܒܼ: ܘܡܲܤܒܿܪܵܢܘܼܬܼܵܐ ܕܤܸܕܼܩܵܐ ܠܵܐ ܥܵܒܹ̇ܕܼ. ܚܕܼ: ܘܠܹܗ
ܟܲܕܼ ܠܹܗ ܠܐܲܠܵܗܵܐ ܡܸܠܬܼܵܐ ܡܸܤܬܲܟܲܠ ܐܵܦ ܠܦܲܓܼܪܹܗ. ܘܲܠܦܲܓܼܪܵܐ
pb. 223
ܡܸܤܬܲܟܲܠ: ܘܬܼܘܼܒܼ ܠܵܐ ܡܸܤܬܲܟܲܠ ܦܲܓܼܪܵܐ. ܘܲܕܼܥܲܡܹܗ ܐܝܼܬܼܵܘܗܝ
ܦܲܓܼܪܹܗ ܡܸܤܬܲܟܲܠ: ܘܠܵܐ ܡܸܤܬܿܟܲܠ ܕܥܲܡܹܗ ܐܝܼܬܼܵܘܗܝ ܦܲܓܼܪܹܗ:
ܐܸܠܵܐ ܠܹܗ ܒܲܠܚܘܿܕܼ ܡܸܤܬܲܟܲܠ. ܘܕܼܝܼܬܿܝܼܒܼ ܥܲܡܹܗ ܥܲܡ ܐܲܒܼܵܐ
ܡܸܤܬܲܟܲܠ: ܘܬܼܘܼܒܼ ܠܵܐ ܡܸܤܬܲܟܲܠ ܕܝܲܬܿܝܼܒܼ ܥܲܡ ܐܲܒܼܵܐ: ܐܸܠܵܐ
ܠܹܗ ܒܲܠܚܘܿܕܼܵܘܗܝ ܡܸܤܬܲܟܲܠ: ܡܲܢ̣ܘܼ ܡܸܫܟܲܚ ܕܢܹܐܡܪܝܼܗ̇
ܠܚܸܟܼܡ̱ܬܹܗ ܠܵܐ ܡܸܬܼܡܲܠܠܵܢܝܼܬܼܵܐ؟ ܐܸܠܵܐ ܗ̤ܘ ܠܲܡ ܠܹܗ ܢܲܤܒܹܗ:
ܠܵܘ ܐܲܝܟܼ ܡ̇ܢ ܕܲܬܼܪܹܝܢ ܬܘܼܒܼ ܒܢܲܝ̈ܵܐ ܝܵܬܼ̇ܒܿܝܼܢ: ܐܸܠܵܐ ܚܲܕܼ ܒܲܚܕܼܲܝܘܼܬܼܵܐ
ܥܲܡ ܒܸܤܪܹܗ. ܘܬܼܘܼܒܼ ܐܸܡܲܪܬܿ: ܡܲܤܒܪܵܢܘܼܬܼܵܐ ܕܦܤܵܩܵܐ ܡܲܪܡܸܐ
ܐܲܢ̄ܬܿ: ܟܲܕܼ ܐ̄ܚܪܹܢܵܐ ܥܲܡ ܐ̄ܚܪܹܢܵܐ ܬܸܬܸܠ ܕܡܸܬܼܪ̱ܢܸܐ: ܐܸܠܵܐ
ܒܲܚܕܼܵܝܘܼܬܼܵܐ. ܕܡ̇ܢ؟ ܕܲܡܫܝܼܚܵܐ؟ ܡܵܕܹܝܢ ܦܲܪܨܘܿܦܵܐ ܕܵܚܕܼܵܝܘܼܬܼܵܐ:
ܐܝܼܬܼܵܘܗܝ ܡܫܝܼܚܵܐ. ܐܸܠܵܐ ܐܵܡܲ݁ܪ ܕܢܲܤܒܹܗ ܠܹܗ: ܗܵܘ̇ ܕܥܲܡܹܗ ܐܵܦ
ܗ̤ܘ ܝܲܬܿܝܼܒܼ ܥܲܡ ܐܲܒܼܵܐ . . . ܦܲܪܨܘܿܦܵܐ ܒܹܗ ܟܲܕܼ ܒܹܗ ܝܲܗ̄ܒܼܬܿ:
ܡܵܢܵܐ ܗܵܟܹܝܠ ܡܒܲܛܸܠ ܐܲܢ̄ܬܿ: ܐܲܝܟܼ ܡ̇ܢ ܕܥ̇ܘܵܠܵܐܝܼܬܼ ܐܸܬܼܐܲܡܪܲܬ̤
ܗܵܝ̇ ܕܥܲܡܹܗ ܐܵܦ ܗ̤ܘ ܝܲܬܿܝܼܒܼ ܥܲܡ ܐܲܒܼܵܐ؟ ܐܵܘ ܐܲܝܟܼ ܕܡ̣ܢ ܗܵܝ̇
ܕܥܲܡ: ܐܸܬܼܥܨܝܼܬ ܠܡܸܤܬܲܟܵܠܘܼ ܕܗܵܟܲܢܵܐ ܐܝܼܬܹܝܗ̇: ܘܡܸܫܟܚܵܐ
ܕܲܬܐܼܪܝܼܨܵܐܝܼܬܼ ܬܸܤܬܲܟܲܠ ܐܵܘ ܬܸܬܼܪ̱ܢܸܐ. ܠܵܘ ܕܬܼܵܘܕܲܥ ܕܬܼܪܹܝܢ ܒܢ̈ܝܼܢ
ܝܲܬܿܝܼܒܼܝܼܢ: ܐܸܠܵܐ ܕܚܲܕܼ ܒܲܚܕܼܵܝܘܼܬܼܵܐ ܕܥܲܡ ܒܸܤܪܹܗ. ܘܲܡܒܲܛܸܠ ܐܲܢ̄ܬܿ
ܠܗܵܝ̇ ܕܥܲܡ: ܕܠܵܐ ܬܪܹܝܢ ܢܸܬܼܪܢܘܿܢ. ܐܸܠܵܐ ܐܸܢܗ̤ܘ ܕܪܘܼܫܥܵܐ
ܐܝܼܬܹܝܗ̇ ܠܵܟܼ: ܗܵܝ̇ ܕܐܼܡ݂ܲܪܬܿ: ܥܛܘܿܦ ܐܵܦ ܥܲܠ ܪܹܫܵܐ ܗܵܘ̇
ܕܲܫܒܲܩ̣ܬܿ: ܕܝܼܠܹܗ ܓܹܝܪ ܐܝܼܬܼܵܘܗܝ ܢܝܼܫܵܐ. ܡܵܢܵܐ ܓܹܝܪ ܬܬܲܒܼܬ؟ ܠܵܘ
ܢܲܗܝܼܪܵܐܝܼܬܼ ܒܲܛܠܬܿ: ܕܠܵܐ ܙܵܕܹܩ ܕܢܸܟܼܬܿܘܿܒܼ ܥܲܡ: ܘܐܲܢ̄ܬܿ ܕܥܲܡܹܗ
pb. 224
ܝܲܬܿܝܼܒܼ ܥܡ ܐܲܒܼܵܐ ܟܬܲܒܼܬܿ؟ ܗܵܘ̇ ܓܹܝܪ ܕܗܵܠܹܝܢ ܐܵܡܲܪ: ܬܪܹܝܢ ܒܢ̈ܝܼܢ
ܐܵܡܲ݁ܪ ܕܝܲܬܿܝܼܒܼܝܼܢ. ܐܸܠܵܐ ܡܒܲܛܸܠ ܐܲܢ̄ܬܿ ܠܗܵܝ: ܕܠܵܐ ܙܵܕܹܩ ܕܲܬܼܪܹܝܢ
ܒܢܲܝ̈ܵܐ ܢܸܬܼܪܢܘܿܢ ܕܝܲܬܿܒܼܝܼܢ. ܘܗܵܟܲܢܵܐ ܤܝܼܡܵܐ ܐܲܝܟܼ ܕܐܸܬܿܬܿܤܝܼܡܲܬ̤.
ܘܐܲܦܝܼܬܿ ܠܗܵܝ̇ ܕܡܵܘܕܥܵܐ ܬܪܹܝܢ ܒܢ̈ܝܼܢ: ܐܵܡܲ݁ܪ ܐܲܢ̄ܬܿ ܕܹܝܢ ܕܠܵܐ
ܙܵܕܹܩ ܕܢܸܪܢܸܐ ܬܪܹܝܢ ܒܢ̈ܝܼܢ. ܐܸܠܵܐ ܕܡ̣ܢ ܐܵܢܲܢܩܹܐ ܡܸܬܼܪܢܹܝܢ ܬܪܹܝܢ:
ܐܲܝܟܼ ܕܲܥܠܲܝܟ ܕܝܼܠܵܟܼ ܡܸܤܬܿܒܼܪܵܐ. ܐܸܠܵܐ ܐ̄ܚܪܵܢܝܵܐܝܼܬܼ ܗܵܟܲܢܵܐ ܤܝܼܡܵܐ
ܘܡܸܬܼܐܲܡܪܵܐ: ܘܠܵܐ ܡܸܬܼܪܢܹܝܢ ܬܪܹܝܢ ܒܢ̈ܝܼܢ. ܡܵܢܵܐ ܡܩܲܛܪܸܓܼ
ܐܲܢ̄ܬܿ ܠܝܼ: ܕܲܬܼܪܹܝܢ ܐܵܡܲ݁ܪ ܐ̄ܢܵܐ ܕܲܡܚܲܝܕܼܢ ܒܚܲܕܼ ܒܪܵܐ: ܕܒܹܗ ܨܒܹܝ̇ܬܼ
ܠܲܡܵܚܵܘܵܝܘܼ ܠܵܐ ܡܒܲܠܒܿܠܘܼܬܼܵܐ ܕܲܟܼܝܵܢܹ̈ܐ ܕܒܲܚܕܼܵܝܘܼܬܼܵܐ: ܟܲܕܼ ܡܸܬܼܚܲܫܲܚ
ܐ̄ܢܵܐ ܒܕܼܝܼ̈ܠܵܝܵܬܼܵܐ ܕܲܟܼܝܵܢܹ̈ܐ؟ ܠܵܘ ܐܲܝܟܼ ܕܲܬܼܪܹܝܢ ܒܢ̈ܝܼܢ ܒܵܥܹ̇̄ܐ ܐ̄ܢܵܐ
ܠܡܸܥܒܲܕܼ:
ܘܠܵܐ ܬܘܼܒܼ ܫܪܵܝܵܐ ܕܲܚܕܼܵܝܘܼܬܼܵܐ: ܐܸܠܵܐ ܡ̣ܢ ܦܲܪܨܘܿܦܵܐ ܚܲܕܼ ܕܲܚܕܼܵܝܘܼܬܼܵܐ
ܡܸܬܼܚܲܫܲܚ ܐ̄ܢܵܐ ܐܲܝܟܼ ܕܲܒܼܬܲܪܬܹܝܢ ܐܘܼܤܝܼ̈ܤ: ܐܲܝܟܼ ܕܡܵܘܕܲܥ ܐܵܦ
ܟܬܼܵܒܼܵܐ ܐܲܠܵܗܵܝܵܐ.
ܐܸܠܵܐ ܒܲܚܕܼܵܐ ܐܘܼܤܝܼܵܐ: ܬܲܪܬܹܝܢ ܐܘܼܤܝܼܵܐ ܡܵܘܕܲܥ ܐܲܢ̄ܬܿ. ܐܸܠܵܐ
ܐܸܢܗ̤ܘ ܕܐܸܢܵܐ ܐܸܡܲ݁ܪ ܗ̄ܘܹ̇ܝܬܼ ܐܲܝܠܹܝܢ ܕܲܐܢ̄ܬܿ ܡܵܡܲ݁ܪ ܐܲܢ̄ܬܿ: ܕܪܘܼܫܥܵܐ
ܡܸܬܼܚܲܙܝܵܐ ܗ̄ܘ̣ܵܬܼ ܠܵܟܼ. ܐܸܢ ܕܹܝܢ ܐܲܢ̄ܬܿ ܠܐܲܝܠܹܝܢ ܕܐܲܝܟܼ ܕܲܒܼܕܼܚܠܲܬܼ
ܐܲܠܵܗܵܐ ܒܵܗ̇ ܟܲܕܼ ܒܵܗ̇ ܠܲܡܒܲܚܵܢܘܼ ܠܑܵܐ ܡܸܫܟ̈ܚܵܢ: ܠܗܵܠܹܝܢ
ܐܸܬܿܬܿܟܸܠܬܿ ܠܡܸܩܪܵܐ: ܠܢܲܦܫܵܟܼ ܩܪܲܝܬܿ ܐܸܢܘܿܢ ܘܠܵܘ ܠܗܵܢ̇ܘܿܢ.
ܥܪܲܩܬܿ ܬܘܼܒܼ ܐܵܦ ܡ̣ܢ ܒܘܼܚܵܢܵܐ ܕܟܼܠܵܗ̇ ܤܘܼܢܗܵܕܘܿܣ: ܒܲܕܼ ܕܵܢܬܿ
ܕܠܲܝܬܿ ܠܗܹܝܢ ܡܲܦܲܩ ܒܪܘܼܚܵܐ ܚܲܬܿܝܼܬܼܵܐ: ܘܟܲܕܼ ܠܲܝܬܲܝ ܗ̄ܘܹ̇ܝܬܼ ܐܸܢܵܐ:
pb. 225
ܐܲܢ̄ܬܿ ܠܗܹܝܢ ܕܛܵܒܼܵܐܝܼܬܼ ܐܵܡܲ݁ܪ ܗ̣̄ܘܲܝܬܿ: ܥܲܠ ܐܲܦܲܝ̈ ܐܵܡܲ݁ܪ ܗ̣̄ܘܲܬܿ.
ܘܟܲܕܼ ܒܝܼܫܵܐܝܼܬܼ ܕܲܠܩܘܼܒܼܠܵܐ ܕܢܲܦܫܵܟܼ ܐܸܡܲܪܬܿ: ܐܵܦ ܗܵܟܲܢܵܐ ܬܘܼܒܼ
ܥܲܠ ܐܲܦܲܝ̈ ܕܝܼܠܚ. ܐܸܢܓܹܝܪ ܗܵܕܹܐ ܡܥܵܘܕܵܐ ܠܗܵܝ̇ ܕܚܲܕܼ ܐܝܼܬܼܵܘܗܝ
ܒܪܵܐ ܗܵܝ̇ ܕܥܲܡ: ܘܥܲܡ ܒܸܤܪܹܗ ܝܲܬܿܝܼܪ ܥܲܡ ܐܲܒܼܵܐ: ܠܵܘ ܡܸܛܠ
ܕܡܸܤܬܿܓܸܕܼ ܥܲܡܹܗ: ܐܲܪܬܹܝܢ ܤܸܓܼ̈ܕܵܬܼܵܐ ܐܝܼܬܼܵܝܗܹܝܢ ܕܚܲܕܸ ܒܪܵܐ: ܟܲܕܼ
ܒܲܚܕܼܵܐ ܤܸܓܼܕܼܬܼܵܐ ܡܸܤܬܿܓܸܕܼ ܗܵܘ̇ ܕܝܲܬܿܝܼܒܼ ܥܲܡܹܗ ܕܲܡܢܲܟܼܪܲܝ.
ܒܲܟܼܝܵܢܹ̈ܐ ܓܹܝܪ ܐܝܼܬܹܝܗ̇ ܚܕܼܵܝܘܼܬܼܵܐ: ܘܐܵܦ ܐܲܢ̄ܬܿ ܡܵܘܕܹܐ ܐܲܢ̄ܬܿ ܥܲܡܝܼ:
ܠܵܐ ܠܲܡ ܡܸܬܼܒܲܛܲܠ ܦܘܼܪܫܵܢܵܐ ܕܲܟܼܝܵܢܹ̈ܐ ܡܸܛܠ ܚܕܼܵܝܘܼܬܼܵܐ܀ ܐܲܝܠܹܝܢ
ܓܹܝܪ ܕܛܵܒܼܵܐܝܼܬܼ ܐܲܡܝܼܪ̈ܵܢ: ܠܗܘܿܢ ܠܦܸܬܼܓܼܵܡܹ̈ܐ ܠܡܹܐܡܲܪ ܐܸܢܘܿܢ
ܙܲܒܢ̈ܝܼܢ ܤܲܓܝܼ̈ܐܵܢ ܫܲܦܝܼܪܵܐ. ܡܸܬܿܕܲܡܲܪ ܐܲܢ̄ܬܿ ܓܹܝܪ: ܟܲܕܼ ܫܵܡܲܥ̇ ܐܲܢ̄ܬܿ
ܒܗܵܠܹܝܢ ܕܝܼܠܵܟܼ: ܠܗܵܠܹܝܢ ܕܝܼܠܚ. ܕܠܲܝܬܿ ܓܹܝܪ ܚܕܼܵܝܘܼܬܼܵܐ: ܕܠܵܐ
ܡܚܵܘܝܵܐ ܐ̄ܚܪܵܢܵܝܘܼܬܼܵܐ: ܐܲܟܼܢܵܐ ܕܤܸܓܼܕܬܼܵܐ ܕܲܒܼܤܵܘܬܿܒܼܵܐ. ܐܸܠܵܐ ܡ̣ܢ
ܥܵܒܼ̇ܘܿܕܼܵܐ ܕܲܟܼܝܵܢܹ̈ܐ ܥܵܒܼ̇ܕܼ ܐܲܢ̄ܬܿ ܪܹܫܵܐ ܕܐܲܫܥܝܼܬܵܟܼ: ܘܠܵܘ ܡ̣ܢ ܦܲܪܨܘܿܦܵܐ
ܕܲܚܕܲܝܘܼܬܼܵܐ. ܐܵܘ ܥܪܘܿܩ ܐܲܢ̄ܬܿ ܗܵܟܹܝܠ ܡ̣ܢ ܕܬܹܐܡܲܪ ܬܪܹܝܢ ܟܝܵܢܹ̈ܐ
ܡܚܲܝ̈ܕܼܐ ܕܠܵܐ ܒܘܼܠܒܵܠܵܐ: ܐܵܘ ܐܘܕܼܵܐ ܘܐܸܡ݂ܲܪ ܗܵܠܹܝܢ. ܘܠܵܐ
ܡܸܬܼܚܲܙ̈ܝܵܢ ܠܵܟܼ ܠܵܐ ܡܸܬܼܡܲܨ̈ܝܵܢܝܵܬܼܵܐ: ܕܒܲܚܕܼܵܝܘܼܬܼܵܐ ܐ̄ܚܪܹܢܵܐ ܘܲܐ̄ܚܪܹܢܵܐ
ܬܹܐܡܲܪ ܒܡܸܠܬܼܵܐ ܕܐܘܼܤܝܼܵܐ: ܠܵܐ ܒܡܸܠܬܼܵܐ ܕܲܚܕܲܝܘܼܬܼܵܐ ܕܦܲܪܨܘܿܦܵܐ . . .
ܐܸܢܕܹܝܢ ܠܲܡ ܡ̣ܢ ܚܕܼܵܝܘܼܬܼܵܐ ܩܢܘܿܡܵܝܵܬܼܵܐ: ܐܵܘ ܐܲܝܟܼ ܠܵܐ ܡܸܬܿܕܲܪܟܵܢܝܼܬܼܵܐ:
ܐܵܘ ܠܵܟܼ ܦܐܝܼܬܼܵܐ: ܢܸܫܬܿܐܸܠ: ܢܵܦ̇ܠܝܼܢܲܢ ܠܲܢ ܒܗܵܝ̇ ܕܢܹܐܡܲܪ ܬܪܹܝܢ
ܒܢ̈ܝܼܢ. ܐܵܢܲܢܩܹܐ ܓܹܝܪ ܠܲܡܦܲܪܵܫܘܼ ܘܲܠܡܹܐܡܲܪ ܠܒܲܪܢܵܫܵܐ ܡܲܢ
pb. 226
ܠܚܘܿܕܵܐܝܼܬܼ ܕܲܡܝܲܩܲܪ ܒܲܫܡܵܐ ܕܲܒܼܪܵܐ: ܠܚܘܿܕܼܵܐܝܼܬܼ ܕܹܝܢ ܬܘܼܒܼ ܠܡܸܠܬܼܵܐ
ܐܲܠܵܗܵܐ ܕܲܩܢܸܐ ܩܪܵܝܬܼܵܐ ܘܤܘܼܥܪܵܢܹܐ ܕܲܒܼܪܘܼܬܼܵܐ ܟܝܵܢܵܐܝܼܬܼ. ܠܵܐ ܗܵܟܹܝܠ
ܙܵܕܹܩ ܠܲܡܦܲܪܵܫܘܼ ܠܲܬܼܪܹܝܢ ܒܢ̈ܝܼܢ ܠܚܲܕܼ ܡܵܪܝܵܐ ܝܼܫܘܿܥ ܡܫܝܼܚܵܐ.
ܐܸܡ̇ܪܹܬܼ ܠܵܟܼ ܐܵܦ ܒܐܸܓܲܪܬܵܐ: ܕܠܑܵܐ ܝܵܕܲܥ̇ ܐ̄ܢܵܐ ܐܲܝܠܹܝܢ
ܕܡܸܬܼܐܲܡܪ̈ܢ ܡܸܢܵܟܼ: ܘܲܒܼܡܲܤܒܪܵܢܘܼܬܼܵܐ ܐܸܤܬܲܒܼܪܲܬ̤ ܕܬܼܵܐܹ̇ܬܼ ܐܲܢ̄ܬܿ:
ܒܐܲܝܠܹܝܢ ܕܫܲܦܝܼܪ ܡ̣ܢ ܒܵܬܲܪܟܸܢ ܡܥܲܬܸܕܼ ܐܲܢ̄ܬܿ ܠܡܹܐܡܲܪ ܠܵܐ ܛܲܫܝܼܬܿ.
ܘܟܲܕܼ ܙܵܕܹܩ ܗ̄ܘ̣ܵܐ ܠܵܟܼ ܕܬܸܥܒܸܕܼ ܦܘܼܢܵܝ ܦܸܬܼܓܼܵܡܵܐ ܕܥܲܠ ܗܵܠܹܝܢ:
ܘܲܠܡܸܟܼܬܲܒܼ: ܘܠܲܡܦܵܤܘܼ: ܘܲܠܡܲܟܵܤܘܼ ܠܥܵܫܘܿܩܹ̈ܐ ܒܓܸܠܝܵܐ: ܩܵܡ̣ܬܿ
ܕܲܠܩܘܼܒܼܠܵܐ ܕܢܲܦܫܵܟܼ ܘܕܼܝܼܠܝ: ܘܐܲܗܡܝܼܬܿ ܥܲܠ ܐܲܒܼ̈ܗܵܬܼܵܐ ܘܥܲܠ
ܟܬܼܵܒܹ̈ܐ ܩܲܕܝܼ̈ܫܹܐ. ܡܵܢܵܐ ܨܵܒܹ̇ܐ ܐܲܢ̄ܬܿ ܕܬܸܗܘܸܐ ܚܕܼܵܝܘܼܬܼܵܐ ܩܢܘܿܡܵܝܬܼܵܐ:
ܗܵܝ̇ ܕܠܑܵ ܥܵܒܼ̇ܕܵܐ ܕܢܸܤܬܲܟܲܠ: ܕܐܝܼܬܼ ܐܘܼܤܝܼܵܐ ܕܒܲܪܢܵܫܵܐ. ܘܠܵܐ
ܕܢܸܤܬܲܟܲܠ ܒܲܪܢܵܫܵܐ ܒܲܟܼܝܵܢܵܐ: ܐܸܠܵܐ ܐܲܠܵܗܵܐ ܡܸܠܬܼܵܐ ܒܲܟܼܝܵܢܵܐ؟ ܗܵܢܵܘ
ܕܹܝܢ: ܘܠܲܐܠܵܗܵܐ ܕܒܲܟܼܝܵܢܵܐ ܠܵܐ ܐܝܼܬܼܵܘܗܝ ܗܵܘ̇ ܡܵܐ ܕܐܝܼܬܼܵܘܗܝ
ܒܲܟܼܝܵܢܹܗ ܡܸܛܠ ܚܕܼܵܝܘܼܬܼܵܐ ܩܢܘܿܡܵܝܬܼܵܐ: ܕܦܘܼܪ̈ܫܢܹܐ ܘܲܬܼܚܘܼ̈ܡܹܐ
ܕܲܐ̄ܚܪ̈ܵܢܬܼܵܐ ܠܲܝܬܿ ܒܵܗ̇. ܡܸܛܠ ܗܵܢܵܐ: ܐܵܦ ܗ̤ܝ ܚܕܼܵܝܘܼܬܼܵܐ: ܡ̣ܢ
ܐܲܝܠܹܝܢ ܕܲܡܬܲܚ̈ܡܵܢ ܒܡܸܠܬܼܵܐ ܕܐܘܤܝܼܵܐ ܐܝܼܬܹܝܗ̇ ܚܕܼܵܝܘܼܬܼܵܐ. ܘܐܸܢ
ܡܸܬܼܒܲܛܠܵܐ: ܠܵܐ ܬܘܼܒܼ ܐܝܼܬܹܝܗ̇ ܚܕܼܵܝܘܼܬܼܵܐ. ܐܸܠܵܐ ܡ̣ܢ ܚܕܼܵܝܘܼܬܼܵܐ:
ܠܵܘ ܕܹܝܢ ܚܕܼܵܝܘܼܬܼܵܐ. ܘܐܸܢ ܡܸܬܼܒܲܛܲܠ ܟ̱ܠܹܗ ܬܚܘܼܡܵܐ ܕܲܟܼܝܵܢܹ̈ܐ:
ܐܲܝܟܲܢܵܐ ܚܕܼܵܝܘܼܬܼܵܐ ܠܵܐ ܒܲܛܠܲܬ̤ ܠܦܘܼܪ̈ܫܵܢܹܐ ܕܲܟܼܝܵܢܹ̈ܐ؟ ܘܐܸܢ ܠܵܐ
ܡܸܬܼܪܢܹܝܢ ܒܲܟܼܝܵܢܵܐ ܘܠܵܐ ܒܲܚܕܼܵܝܘܼܬܼܵܐ: ܐܲܝܟܲܢܵܐ ܐܸܡ݂ܲܪܬܿ ܕܥܲܒܼܕܵܗ̇
pb. 227
ܕܝܼܠܹܗ ܠܕܼܝܠܵܝܘܼܬܼܵܐ ܕܒܸܤܪܵܐ: ܟܲܕܼ ܐܸܡܲ݁ܪ ܠܲܢ̄ܬܿ: ܕܒܼܗܵܝ̇ ܡ̇ܢ
ܒܲܟܼܝܵܢܵܐ: ܒܗܵܝ̇ ܕܹܝܢ ܒܲܚܕܼܵܝܘܼܬܼܵܐ؟ ܘܲܚܕܲܫ̣ ܡ̇ܢ ܒܲܟܼܝܵܢܵܐ ܐܵܦ ܕܡܝܼܬܼ:
ܕܗܵܘ̇ ܕܹܝܢ ܐܝܼܬܲܝܗܹܝܢ: ܡܸܛܠ ܕܲܥܒܲܕܼ ܐܸܢܹܝܢ ܕܝܼܠܹܗ܀ ܐܲܝܟܲܢܵܐ ܗܵܟܹܝܠ
ܐܸܬܼܚܲܫܲܒ̣ܬܿ ܠܲܡܩܲܝܵܡܘܼ ܚܕܼܵܝܘܼܬܼܵܐ ܩܡܘܿܡܵܝܬܼܵܐ؟ ܐܲܝܕܵܐ ܗ̣̄ܝ ܗܵܕܹܐ
ܚܕܼܵܝܘܼܬܼܵܐ ܩܢܘܿܡܵܝܬܼܵܐ ܕܠܵܐ ܤܘܼܟܵܠܵܐ؟ ܐܲܝܟܲܢܵܐ ܢܩܲܒܿܠܝܼܗ̇ ܕܠܵܐ
ܤܘܼܟܵܠܵܗ̇؟ ܐܵܘ ܐܲܝܟܵܢܵܐ ܐܸܤܬܲܟܲܠܬܵܗ̇ ܐܲܢ̄ܬܿ؟ ܐܲܝܟܲܢܵܐ ܐܝܼܬܹܝܗ̇ ܡܪ̈ܲܝܲܡܬܼܵܐ
ܘܠܵܐ ܡܸܬܿܕܲܪܟܵܢܘܼܬܼܵܐ: ܘܬܼܘܼܒܼ ܠܵܐ ܦܐܝܼܬܼܵܐ؟ ܐܲܠܸܦ ܠܲܢ. ܐܸܠܵܐ ܠܝܼ
ܠܵܐ ܨܵܒܹ̇ܐ ܐܲܢ̄ܬܿ ܠܡܲܠܵܦܘܼܬܲܢܝ: ܤܒܲܪܬܿ ܠܵܟܼ ܕܕܲܝܵܢܹ̈ܐ ܐܵܡ̇ܪܝܼܢ
ܠܵܟܼ ܘܲܡܝܼܤܝܼܢ ܠܵܟܼ: ܕܬܲܠܸܦ ܠܲܢ ܘܠܲܐܝܠܹܝܢ ܕܕܼܵܡܹ̇ܝܢ ܠܲܢ:
ܡܸܛܠ ܕܠܵܐ ܝܵܕܼܥ̇ܝܼܢ ܚ̄ܢܲܢ. ܘܐܸܢ ܕܹܝܢ ܠܵܐ: ܠܟܼܠܵܗ̇ ܤܘܼܢܗܵܕܘܿܣ
ܐܼܠܸܦ. ܠܵܐ ܓܹܝܪ ܐܲܢ̄ܬܿ: ܘܠܵܐ ܤܘܼܢܗܵܕܘܿܣ ܤܵܦܩܵܐ ܠܲܫܡܵܐ
ܕܲܚܕܼܵܝܘܼܬܼܵܐ. ܡܸܛܠ ܕܐܵܦ ܐܸܢܵܐ ܚܕܼܵܝܘܼܬܼܵܐ ܐܵܡܲ݁ܪ ܐ̄ܢܵܐ: ܐܲܢ̄ܬܿ ܕܹܝܢ
ܠܗܵܝ̇ ܕܐܸܢܵܐ ܐܸܡܲ݁ܪ ܐ̄ܢܵܐ ܠܵܐ ܡܩܲܒܸܿܠ ܐܲܢ̄ܬܿ: ܡܸܛܠ ܕܲܡܦܲܪܸܫ ܐ̄ܢܵܐ
ܚܕܼܵܝܘܼܬܼܵܐ. ܐܸܢ ܐܹܡܲܪ ܥܲܠ ܗܵܠܹܝܢ ܕܐܸܬܼܚܲܝܲܕܼܘ: ܕܐܝܼܬܼܵܘܗܝ ܓܘܼܫܡܵܐ
ܒܐܘܼܤܝܼܵܐ: ܘܲܕܼܠܵܐ ܓܫܘܼܡ ܒܐܘܼܤܝܼܵܐ: ܘܲܦܪܝܼܫܝܼܢ ܡ̣ܢ ܚܕܼܵܕܹ̈ܐ. ܗܵܘ̇
ܡ̇ܢ ܐܲܝܟܼ ܒܪܝܼܬܼܵܐ: ܗܵܘ̇ ܕܹܝܢ ܐܲܝܟܼ ܠܵܐ ܒܲܪܝܵܐ. ܘܗܵܘ̇ ܡ̇ܢ ܡܵܝܘܿܬܼܵܐ:
ܘܗܵܘ̇ ܠܵܐ ܡܵܘܝܿܬܼܵܐ. ܘܗܵܘ̇ ܡܬܼܘܿܡܵܝܵܐ ܗ̄ܘ̣ ܥܲܡ ܐܲܒܼܵܐ: ܘܗܵܘ̇
ܒܲܪܝܵܐ ܒܚܲܪܬܼܵܐ ܕܙܲܒܼܢܹ̈ܐ. ܘܗܵܘ̇ ܒܲܪ ܟܝܵܢܵܐ ܕܐܲܒܼܵܐ: ܘܗܵܢܵܐ ܒܲܪ
ܟܝܵܢܲܢ. ܠܵܘ ܓܹܝܪ ܚܕܼܵܝܘܼܬܼܵܐ ܠܐܘܼܤ̈ܝܼܵܣ ܕܐܸܬܼܚܲܝܲܕܼ ܡܒܲܛܠܵܐ: ܐܲܝܟܼ
ܕܠܵܐ ܢܸܬܼܝܲܕܼ̈ܥܵܢ.
pb. 228
ܐܵܡܲ݁ܪ ܐܲܢ̄ܬܿ ܠܝܼ ܕܲܡܦܲܪܸܫ ܐܲܢ̄ܬܿ: ܟܲܕܼ ܛܵܒܼ ܐܵܦ ܐܲܢ̄ܬܿ: ܥܕܲܡܵܐ
ܠܡܸܠܹ̈̄ܐ ܗܵܠܹܝܢ ܕܲܒܼܗܹܝܢ ܢܦܲܠܬܿ ܡܸܛܠ ܕܲܬܼܩܲܛܪ̱ܓܲܢܝ: ܗܵܠܹܝܢ
ܐܸܡ݂ܲܪܬܿ: ܡܫܲܚܠ̱ܦܝܼܢ ܠܲܡ ܟܝܵܢܹ̈ܐ ܕܐܸܬܼ݂ܵܘ ܠܘܵܬܼ ܚܕܼܵܝܘܼܬܼܵܐ ܫܲܪܝܼܪܬܵܐ:
ܚܲܕܼ ܕܹܝܢ ܡ̣ܢ ܬܪ̈ܲܝܗܘܿܢ ܡܫܝܼܚܵܐ ܘܲܒܼܪܵܐ: ܠܵܘ ܐܲܝܟܼ ܡ̇ܢ ܕܫܘܼܚܠܵܦܵܐ
ܕܲܟܼܝܵܢܹ̈ܐ ܐܸܬܿܬܿܪܝܼܡ ܡܸܛܠ ܚܕܼܵܝܘܼܬܼܵܐ܀ ܐܵܪܵܡ ܝܵܗܹ̇ܒܼ ܐܲܢ̄ܬܿ ܠܲܢ ܕܢܸܪܢܸܐ
ܗܵܕܹܐ ܐܵܦ ܥܲܠ ܚܕܼܵܝܘܼܬܼܵܐ ܩܢܘܿܡܵܝܵܬܼܵܐ؟ ܐܵܘ ܐܲܝܟܼ ܐܲܝܢܵܐ ܕܲܡܦܲܪܸܫ
ܒܗܵܝ̇ ܕܐܵܡܲ݁ܪ: ܕܡ̣ܢ ܫܘܼܚ̈ܠܵܦܹܐ ܡܫܲܚ̈ܠ̱ܦܹܐ ܐܝܼܬܲܝܗܘܿܢ ܗ̄ܘ̣ܵܘ ܟܝܵܢܹ̈ܐ
ܕܐܸܬܼܚܲܝܲܕܼܘ: ܘܚܵܛ̇ܦ ܐܲܢ̄ܬܿ ܠܘܵܬܼ ܬܵܘܕܝܼܬܼܵܟܼ ܕܝܼܠܵܟܼ: ܕܠܵܐ
ܡܲܤܒܲܪܵܢܘܼܬܼܵܐ ܕܤܸܕܩܵܐ ܬܲܥܸܠ؟ ܘܡܵܢܵܐ ܐܵܡܲ݁ܪ ܐ̄ܢܵܐ ܥܲܠ ܟܲܤܒܿܪܵܢܘܼܬܼܵܐ
ܕܤܸܕܼܩܵܐ ܬܲܥܸܠ؟ ܘܡܵܢܵܐ ܐܸܡܲ݁ܪ ܐ̄ܢܵܐ ܥܲܠ ܡܲܤܒܿܪܵܢܘܼܬܼܵܐ؟ ܗ̤ܘ
ܤܸܕܼܩܵܐ ܕܲܟܼܝܵܢ̈ܐ ܐܲܝܟܼ ܡܸܠܬܼܵܐ ܕܲܟܼܝܵܢܹ̈ܐ: ܘܐܲܝܟܼ ܠܵܐ ܒܘܼܠܒܵܠܵܐ
ܡܸܤܬܲܟܲܠ ܐܲܢ̄ܬܿ: ܟܲܕܼ ܐܵܦܠܵܐ ܚܕܼܵܐ ܡܲܤܒܿܪܵܢܘܿܬܼܵܐ ܕܲܬܼܚܘܼܡܵܐ ܕܲܟܼܝܵܢܹ̈ܐ
ܬܸܗܘܸܐ ܒܡܲܕܥܵܟܼ: ܕܒܼܵܗ̇ ܬܸܤܬܲܟܲܠ ܕܲܕܼܠܵܐ ܒܘܼܠܒܵܠܵܐ ܐܸܬܼܚܲܝܲܕܼܘ.
ܐܲܟܼܙܢܵܐ ܕܲܡܚܲܝܕܼܝܼܢ ܗ̄ܘ̣ܵܘ ܢܘܼܪܵܐ ܒܤܲܢܝܵܐ ܘܤܲܢܝܵܐ ܒܢܘܼܪܵܐ: ܘܲܕܼܠܵܐ
ܒܘܼܠܒܵܠܵܐ ܐܝܼܬܝܗܘܿܢ ܗ̄ܘ̣ܵܘ. ܐܲܢ̄ܬܿ ܗܵܟܹܝܠ ܕܠܵܐ ܬܚܘܼܡܵܐ ܡܚܵܘܸܐ
ܐܲܢ̄ܬܿ ܠܗܹܝܢ ܘܲܕܼܠܵܐ ܦܘܼܪܫܵܢܵܐ: ܐܸܢܵܐ ܕܹܝܢ ܡܬܲܚ̈ܡܵܬܼܵܐ ܘܲܦܪ̈ܝܼܫܵܬܼܵܐ
ܡ̣ܢ ܚܕܼܵܪܹ̈ܐ. ܐܸܢ ܗܵܟܹܝܠ ܚܕܼܵܝܘܼܬܼܵܐ ܩܢܘܿܡܵܝܬܼܵܐ ܐܸܡܲ݁ܪ ܐܲܢ̄ܬܿ: ܐܸܡ݂ܲܪ
ܢܲܗܝܼܪܵܐܝܼܬܼ. ܡܵܘܕܹܐ ܐ̄ܢܵܐ ܓܹܝܪ: ܕܠܵܐ ܗܵܝܕܹܝܢ ܐܸܤ̇ܬܲܟܿܠܹܬܼ ܘܠܵܐ
ܗܵܫܵܐ: ܤܢܝܼܩ ܐ̄ܢܵܐ ܕܬܲܠܦܲܢܝ: ܐܲܝܟܲܢܵܐ ܕܐܸܫܠܲܡ ܠܵܟܼ. ܐܵܘ ܐܸܢ ܠܵܐ
ܐܹܩܲܒܸܿܠ ܠܪܸܥܝܵܢܵܟܼ: ܐܹܡܲܪ ܕܠܵܐ ܡܩܲܒܸܿܠ ܐ̄ܢܵܐ. ܘܐܸܢ ܢܩܲܒܿܠܘܼܢ
pb. 229
ܡܸܢܵܟܼ ܕܲܝܵܢܹ̈ܐ: ܢܦܝܼܤܘܼܢܵܢܝ. ܐܵܘ ܢܚܲܝܒܼܘܼܢܵܢܝ: ܐܲܝܟܼ ܐܲܝܢܵܐ ܕܠܲܝܬܿ
ܠܵܗ̇ ܫܘܼܢܝܵܐ ܠܒܼܝܼܫܬܹܗ.
ܐܸܡܲܪ ܗܵܟܹܝܠ ܚܕܼܵܝܘܼܬܼܵܐ ܩܢܘܿܡܵܝܬܼܵܐ. ܐܵܪܵܐ ܩܢܘܿܡܵܐ ܨܵܒܹܿܐ ܐܲܢ̄ܬܿ
ܕܢܸܚܫܒܪܝܼܘܗܝ ܠܦܲܪܨܘܿܦܵܐ: ܐܲܝܟܼ ܕܐܵܡ̇ܪܝܼܢܲܢ ܚܕܵܐ ܐܘܼܣܝܼܵܐ
ܕܐܲܠܵܘܼܬܼܵܐ ܘܲܬܼܠܵܬܼܵܐ ܩܢܘܿܡܹ̈ܐ: ܘܠܲܩܢܘܼܡܹ̈ܐ ܦܲܪܨܘܿܦܹܐ ܡܸܤܬܲܟܿܠܝܼܢܲܢ؟
ܡܵܕܹܝܢ ܠܲܚܕܼܵܝܘܼܬܼܵܐ ܦܲܪܨܘܿܦܵܝܬܼܵܐ ܐܵܡܲ݁ܪ ܐܲܢ̄ܬܿ ܩܢܘܿܡܵܝܬܼܵܐ. ܐܸܠܵܐ ܠܵܐ
ܗ̄ܘ̣ܵܐ ܕܦܲܪ̈ܨܘܿܦܹܐ: ܐܸܠܵܐ ܕܲܟܼܝܵܢܹ̈ܐ ܗܘ̤ܵܬܼ ܚܕܼܵܝܘܼܬܼܵܐ. ܡܫܲܚ̱ܠܦܝܼܢ
ܠܲܡ ܟܝܵܢܹ̈ܐ ܕܐܸܬܼ݂ܵܘ ܠܘܵܬܼ ܚܕܼܵܝܘܼܬܼܵܐ ܫܲܪܝܼܪܵܐ: ܚܲܕܸ ܕܹܝܢ ܡ̣ܢ
ܬܪ̈ܲܝܗܘܿܢ ܡܫܝܼܚܵܐ. ܠܚܲܕܼ ܦܲܪܨܘܿܦܵܐ ܕܡܫܝܼܚܵܐ: ܐܵܘ ܠܲܩܢܘܿܡܵܐ
ܕܐܘܼܤܝܼܵܐ ܘܕܲܟܼܝܵܢܵܐ ܡܸܤܬܲܟܲܠ ܐܲܢ̄ܬܿ: ܐܲܟܼܙܢܵܐ ܕܨܘܼܪܬܵܐ ܕܲܩܢܘܿܡܹܗ:
ܘܲܚܕܲܝܘܼܬܼܵܐ ܕܲܟܼܝܵܢܹ̈ܐ ܒܲܚܕܼܵܝܘܼܬܼܵܐ ܩܢܘܿܡܵܝܬܼܵܐ ܐܵܡܲ݁ܪ ܐܲܢ̄ܬܿ. ܐܸܠܵܐ ܠܗܵܝ̇
ܐܸܢܵܐ ܐܵܡܲ݁ܪ ܐ̄ܢܵܐ: ܘܒܼܵܗ̇ ܫܲܒܲܚ̇ܬܵܟܼ ܕܐܸܡ݂ܲܪܬܿ ܘܲܥܒܲܕܬܿ ܦܘܼܪܫܵܢܵܐ
ܕܲܟܼܝܵܢܹ̈ܐ: ܒܡܸܠܬܼܵܐ ܕܐܲܠܵܗܘܼܬܼܵܐ ܘܲܕܐ̄ܢܵܫܘܼܬܼܵܐ: ܘܢܲܩܝܼܦܘܼܬܼܵܐ ܕܗܵܠܹܝܢ
ܠܚܲܕܼ ܦܲܪܨܘܼܦܵܐ. ܐܵܘ ܓܹܝܪ ܠܵܐ ܐܸܡ݂ܲܪܬܿ ܫܘܼ̈ܚܠܵܦܹܐ ܕܠܵܐ ܒܘܼܠܒܵܠܵܐ:
ܘܲܡܩܵܘܝܵܐ ܗ̄ܘ̣ܵܬܼ ܟܲܕܼ ܠܲܝܬܿ ܫܘܼܚܠܵܦܵܐ ܕܒܹܗ ܬܸܤܬܲܕܸܩ. ܘܐܸܢ
ܕܹܝܢ ܠܵܐ ܫܘܼܚܠܵܦܵܐ ܝܵܗܹ̇ܒܼ ܐܲܢ̄ܬܿ: ܘܫܘܼܚܠܵܦܵܐ ܗܵܢܵܘ ܕܲܟܼܝܵܢܹ̈ܐ:
ܤܸܕܼܩܵܐ ܟܝܵܢܵܝܵܐ ܝܵܗܹ̇ܒܼ ܐܲܢ̄ܬܿ ܟܲܕܼ ܠܵܐ ܝܵܕܲܥ̇ ܐܲܢ̄ܬܿ. ܐܸܠܵܐ ܠܵܐ ܗ̄ܘ̣ܵܐ
ܫܘܼܚܠܵܦܵܐ ܕܲܚܕܲܝܘܼܬܼܵܐ ܗ̄ܘ̣ܵܐ: ܟܲܕܼ ܐܲܝܠܹܝܢ ܕܒܼܵܗ̇ ܐܝܼܬܲܝܗܘܿܢ ܡܩܵܘܹܝܢ
ܕܠܵܐ ܒܘܼܠܒܵܠܵܐ: ܐܲܟܼܙܢܵܐ ܕܤܲܝܵܐ ܒܢܘܼܪܵܐ ܘܢܘܼܪܵܐ ܒܤܲܝܢܝܵܐ. ܐܸܠܵܐ
ܗܵܠܹܝܢ ܠܵܐ ܡܸܬܼܚܲܙܝܵܐ ܕܐܸܡܲ݁ܪ ܐܲܢ̄ܬܿ: ܘܐܲܝܟܼ ܐܲܝܢܵܐ ܕܠܵܐ ܡܩܲܒܸܿܠ
ܚܕܼܵܝܘܼܬܼܵܐ ܩܢܘܿܡܵܝܵܬܼܵܐ ܪܵܫܹ̇ܐ ܐܲܢ̄ܬܿ ܠܝܼ. ܐ̄ܚܪܹܬܼܵܐ ܕܹܝܢ ܚܕܼܵܝܘܼܬܼܵܐ
pb. 230
ܩܢܘܿܡܵܝܬܼܵܐ: ܕܡ̣ܢ ܟܝܵܢܹ̈ܐ ܐ̄ܚܪ̈ܵܢܹܐ: ܠܵܐ ܡܦܵܣ ܐ̄ܢܵܐ. ܘܐܵܦܠܵܐ ܡܸܕܸܡ
ܐ̄ܚܪܹܝܢ ܕܙܵܕܹܩ ܠܲܚܕܼܵܝܘܼܬܼܵܐ ܕܲܟܼܝܵܢܹ̈ܐ ܕܲܡܫܲܚܠܦܝܼܢ ܐܸܠܵܐ ܐܸܢ ܕܲܠܚܲܕܼ
ܦܲܪܨܘܿܦܵܐ: ܕܡܸܢܹܗ ܘܒܹܗ ܡܸܬܼܝܲܕܥܝܼܢ ܟܝܵܢܹ̈ܐ ܬܪ̈ܲܝܗܘܿܢ: ܟܲܕܼ ܗܵܠܹܝܢ
ܕܝܼܠܗܘܿܢ ܥܵܒܹ̇ܕ ܠܗܘܿܢ ܠܦܲܪܨܘܼܦܵܐ. ܕܐܝܼܬܼܵܘܗܝ ܗ̄ܘ̣ܵܐ ܓܹܝܪ
ܓܘܼܫܡܵܐ ܗܲܝܟܿܠܵܐ ܕܐܲܠܵܗܘܼܬܹܗ ܕܐܲܠܵܗܵܐ ܡܸܠܬܼܵܐ: ܘܗܲܝܟܿܠܵܐ
ܒܢܲܩܝܼܦܘܼܬܼܵܐ ܪܹܫܝܬܼܵܐ ܕܐܲܠܵܗܘܼܬܼܵܐ ܡܚܲܝܕܼ ܗ̄ܘ̣ܵܐ: ܐܲܝܟܼ ܕܢܸܥܒܸܿܕܼ ܠܹܗ
ܗܵܠܹܝܢ ܕܗܵܢܵܐ ܠܒܲܝܬܵܝܘܼܬܹܗ ܕܲܟܼܝܵܢܵܐ ܕܐܲܠܗܘܼܬܼܵܐ: ܫܲܦܝܼܪܵܐ ܠܡܵܘܕܵܝܘܼ
ܘܫܵܘܹ̇ܐ ܠܡܲܫܠܡܵܢܘܼܬܼܵܐ ܕܐܹ̇ܘܲܢ̈ܓܲܠܝܼܵܐ: ܠܵܘ ܟܲܕܼ ܠܐܘܼܤܝܼܵܐ ܕܝܼܠܹܗ
ܥܒܲܕܼ ܐܸܢܹܝܢ. ܐܲܝܕܵܐ ܗܵܟܹܝܠ ܚܕܼܵܝܘܼܬܼܵܐ ܐ̄ܚܪܹܬܼܵܐ ܩܢܘܿܡܵܝܬܼܵܐ ܨܵܒܹ̇ܐ
ܐܲܢ̄ܬܿ ܠܡܲܠܵܦܘܼܬܲܢܝ: ܕܒܲܚܕܼܵܝܘܼܬܼܵܐ ܪܹܫܝܬܼܵܐ ܘܐܲܠܵܗܵܝܬܼܵܐ ܘܠܵܐ
ܡܸܬܼܠܠܵܢܝܼܬܼܵܐ؟ ܠܵܐ ܝܵܕܲܥ̇ ܐ̄ܢܵܐ: ܐܸܠܵܐ ܐܸܢ ܕܚܲܕܸ ܦܲܪܨܘܿܦܵܐ: ܕܗܵܢܵܐ
ܗܵܘ̇ ܐܝܼܬܼܵܘܗܝ: ܐܵܦ ܗܵܘ̇ ܗܵܢܵܐ. ܘܡܸܛܠ ܗܵܢܵܐ ܒܟܼܠ ܕܘܼܟ
ܐܲܟܼܝܦܵܐܝܼܬܼ ܩܵܥܹ̇ܐ ܐ̄ܢܵܐ: ܕܠܵܐ ܗ̄ܘ̣ܵܐ ܠܲܟܼܝܵܢܵܐ: ܐܸܠܵܐ ܠܦܲܪܨܘܿܦܵܐ
ܙܵܕܹܩ ܕܢܼܬܼܢܲܤ̈ܒܵܢ ܐܲܝܠܹܿܝܢ ܕܡܸܬܼܡܲܠ̈ܠܵܢ: ܐܵܘ ܥܲܠ ܐܲܠܵܗܘܼܬܼܵܐ ܐܵܘ
ܥܲܠ ܐ̄ܢܵܫܘܼܬܼܵܐ. ܐܲܝܟܲܢܵܐ ܕܠܵܐ: ܟܲܕܼ ܒܐܘܼܤܝܼܵܐ ܡܚܲܝ̈ܕܼܵܢ ܬܲܪ̈ܬܲܝܗܹܝܢ:
ܬܸܗܘܸܐ ܦܲܢܛܵܤܝܼܵܠ ܥܲܠ ܐ̄ܢܵܫܝܬܼܵܐ. ܠܵܐ ܗ̄ܘ̣ܵܐ ܓܹܝܪ ܒܟܼܠܗܹܝܢ
ܡܸܬܼܐ̱ܡܲܪ ܒܐܘܼܤܝܼܵܐ ܗܵܘ̇ ܡܵܐ ܕܐܝܼܬܼܵܘܗܝ ܗ̄ܘ̣ܵܐ ܒܐܘܼܤܝܼܵܐ: ܐܸܠܵܐ
ܟܠܗܹܝܢ ܐܲܝܠܹܝܢ ܕܥܲܠ ܦܲܪܨܘܿܦܵܐ ܡܵܘ̈ܕܥܵܢ. ܘܡܸܢܼܝܼܕܲܥ ܐܲܠܵܗܵܐ
ܡܸܠܬܼܵܐ: ܕܒܸܤܪܵܐ ܡܸܬܼܐ̱ܡܲܪ ܕܲܗܘ̤ܵܐ ܘܲܒܼܪܹܗ ܕܐ̄ܢܵܫܵܐ: ܡ̣ܢ ܕܡܘܼܬܼܵܐ
ܘܡ̣ܢ ܦܲܪܨܘܿܦܵܐ ܕܒܸܤܪܵܐ ܘܲܕܼܒܲܪܢܵܫܵܐ ܕܒܹܗ ܐܸܬܼܚܲܫܲ: ܕܢܵܘܕܲܥ
ܢܲܦܫܹܗ ܠܥܵܠܡܵܐ. ܠܵܐ ܗ̄ܘ̣ܵܐ ܓܹܝܪ ܟܠܗܹܝܢ ܐܲܝܠܹܝܢ ܕܲܟܼܝܵܢܵܐܝܼܬܼ
pb. 231
ܡܸܬܼܐܡܲܪ ܒܸܤܪܵܐ: ܡܸܬܼܐ̱ܡܲܪ ܐܵܦ ܐܲܠܵܗܵܐ ܡܸܠܬܼܵܐ. ܐܲܝܟܼ ܕܢܸܗܘܸܐ
ܐܸܡܲܬܼܝ ܕܠܵܐ ܐܝܼܬܼܵܘܗܝ ܗ̄ܘ̣ܵܐ: ܐܵܘ ܡ̣ܢ ܐܲܝܠܹܝܢ ܕܠܵܐ ܐܝܼܬܲܝܗܘܿܢ
ܗ̄ܘ̣ܵܘ ܗܘ̤ܵܐ: ܐܵܘ ܟܠܡܵܐ ܕܡܸܬܼܐ̱ܡܲܪ ܒܸܤܪܵܐ ܡ̣ܢ ܩܕܼܵܡ ܕܢܸܗܘܸܐ:
ܘܟܲܕܼ ܗܘ̤ܵܐ: ܘܡ̣ܢ ܒܵܬܲܪ ܕܲܗܘ̤ܵܐ: ܒܫܘܼܚ̈ܠܵܦܹܐ ܕܬܲܪܒܿܝܼܬܼܵܐ ܘܕܲܚ̈ܒܼܵܠܹܐ:
ܘܕܲܒܼܦܵܤܝܼ̈ܩܵܬܼܵܐ ܒܲܪ ܟܝܵܢܵܐ ܕܝܼܠܲܢ. ܡܸܛܠ ܕܒܲܪ ܟܝܵܢܵܐ ܗ̄ܘ̣ ܕܝܼܠܲܢ
ܒܟܼܠ ܡܸܕܸܡ: ܐܲܝܠܹܝܢ ܕܒܼܐܘܼܤܝܼܵܐ ܡܸܬܼܐܲܡܲܪ: ܠܵܐ ܗ̄ܘ̣ܵܐ ܒܡܸܕܸܡ
ܐ̄ܚܪܹܝܢ ܡܸܬܼܐܲܡܪ̈ܵܢ: ܐܸܠܵܐ ܐܸܢ ܒܲܠܚܘܿܕܼ ܒܗܵܕܹܐ ܕܐܘܼܤܝܼܵܐ ܘܡܸܬܼܐ̱ܡܲܪ
ܒܲܪ ܟܝܵܢܵܐ. ܒܐܝܠܹܝܢ ܓܹܝܪ ܕܡ̣ܢ ܦܲܪܨܘܿܦܵܐ ܘܡ̣ܢ ܕܡܘܼܬܼܵܐ ܕܲܟܼܝܵܢܵܐ
ܡܸܬܼܐܲܡܪܵ̈ܢ: ܡܸܬܼܐ̱ܡܲܪ ܗܵܘ̇ ܡܵܐ ܕܡܵܘܕܲܥ ܠܹܗ: ܐܲܝܟܼ ܦܲܪܨܘܼܦܵܐ
ܠܐܘܼܣܝܼܵܐ ܗܵܘ̇ ܡܵܐ ܕܹܝܢ ܕܐܝܼܬܼܵܘܗܝ ܟܝܵܢܵܐܝܼܬܼ ܠܵܐ ܡܸܬܼܐ̱ܡܲܪ:
ܡܸܛܠ ܕܠܵܐ ܗ̄ܘ̣ܵܐ ܠܐܘܼܤܝܼܵܐ ܘܠܲܟܼܝܵܢܵܐ: ܐܸܠܵܐ ܠܦܲܪܨܘܼܦܵܐ ܗܘ̤ܵܬܼ
ܚܕܼܵܝܘܼܬܼܵܐ ܗܵܟܲܢܵܐ ܐܵܦ ܒܸܤܪܵܐ: ܠܵܐ ܗ̄ܘ̣ܵܐ ܟܠ ܡܵܐ ܕܐܝܼܬܼܵܘܗܝ
ܐܲܠܵܗܵܐ ܡܸܠܬܼܵܐ ܒܲܟܼܝܵܢܵܐ ܡܸܬܼܐ̱ܡܲܪ: ܠܵܐ ܗ̄ܘ̣ܵܐ ܓܹܝܪ ܕܠܵܐ ܫܘܼܪܵܝܵܐ
ܐܝܼܬܼܵܘܗܝ: ܘܠܵܐ ܗ̄ܘ̣ܵܐ ܠܵܐ ܥܒܼܝܼܕܼܵܐ: ܘܠܵܐ ܗ̄ܘ̣ܵܐ ܠܵܐ ܓܫܝܼܡܵܐ:
ܘܠܵܐ ܗ̄ܘ̣ܵܐ ܠܵܐ ܡܸܬܼܚܲܙܝܵܢܵܐ: ܘܠܵܐ ܗ̄ܘ̣ܵܐ ܒܲܪ ܟܝܵܢܵܐ ܕܐܲܒܼܵܐ ܘܲܕܼܪܘܼܚܵܐ
ܕܩܘܼܕܼܫܵܐ: ܐܵܦܸܢ ܗܵܘ̇ ܡܵܐ ܕܡܸܬܼܐ̱ܡܲܪ ܒܪܵܐ ܘܡܵܪܝܵܐ ܘܕܲܐܵܠܵܗܵܐ
ܡܸܬܼܐ̱ܡܲܪ ܐܵܦ ܒܸܤܪܵܐ: ܒܗܵܢܵܐ ܙܢܵܐ ܒܲܚܕܼܵܝܘܼܬܼܵܐ. ܡܸܛܠ ܕܲܠܦܲܪܨܘܿܦܵܐ
ܕܲܒܼܪܵܐ ܕܐܲܠܵܗܵܐ ܗܘ̤ܵܬܼ ܚܕܵܝܘܼܬܼܵܐ: ܘܠܵܐ ܗ̄ܘ̣ܵܐ ܠܐܘܼܤܝܼܵܐ ܘܠܵܐ ܗ̄ܘ̣ܵܐ
ܠܲܟܼܝܵܢܵܐ: ܐܸܠܵܐ ܡ̣ܢ ܟܝܵܢܹ̈ܐ: ܘܠܵܐ ܗ̄ܘ̣ܵܐ ܠܲܟܼܝܵܢܵܐ: ܐܸܠܵܐ
ܠܦܲܪܨܘܿܦܵܐ. ܕܟܼܠܗܹܝܢ ܕܦܲܪܨܘܿܦܵܐ ܐܝܼܬܼ ܠܹܗ: ܤܛܲܪ ܡ̣ܢ ܐܘܼܤܝܼܵܐ
ܕܦܲܪܨܘܿܦܵܐ.
pb. 232
ܐܲܝܕܵܐ ܗܵܟܹܝܠ ܚܕܼܵܝܘܼܬܼܵܐ ܐ̄ܚܪܹܬܼܵܐ ܩܢܘܿܡܵܝܬܼܵܐ ܐܵܡܲ݁ܪ ܐܲܢ̄ܬܿ: ܕܐܸܢܵܐ
ܠܵܐ ܡܩܲܒܸܿܠ ܐ̄ܢܵܐ ܠܵܗ̇: ܐܲܝܟܼ ܕܐܵܡܲ݁ܪ ܐܲܢ̄ܬܿ: ܐܵܘ ܐܲܝܟܼ ܠܵܐ
ܡܸܬܿܕܲܪܟܵܢܝܼܬܼܵܐ: ܐܵܘ ܐܲܝܟܼ ܠܵܐ ܦܐܝܼܬܼܵܐ. ܘܡܸܛܠ ܗܵܢܵܐ: ܢܵܦܹ̇ܐ
ܐ̄ܢܵܐ ܠܡܹܐܡܲܪ ܬܪܹܝܢ ܡܫܝܼ̈ܚܝܼܢ. ܚܲܕܼ ܒܲܪܢܵܫܵܐ: ܕܒܲܩܪܵܝܬܵܐ ܕܲܒܼܪܵܐ
ܡܝܲܩܲܪ. ܠܚܘܿܕܼܵܐܝܼܬܼ ܕܹܝܢ ܬܘܼܒܼ ܠܡܸܠܬܼܵܐ ܕܐܲܠܵܗܵܐ: ܕܲܩܢܸܐ ܫܡܵܐ
ܘܤܘܼܥܪܵܢܵܐ ܕܲܒܼܪܘܼܬܼܵܐ؟܀ ܗܵܘ̇ ܕܒܲܚܕܼܵܝܘܼܬܼܵܐ ܐܵܡܲ݁ܪ ܚܲܕܼ
ܒܪܵܐ ܚܲܕܼ ܡܫܝܼܚܵܐ ܚܲܕܼ ܡܵܪܝܵܐ: ܐܲܝܟܲܢܵܐ ܡܸܫܟܲܚ ܕܲܦܪܝܼܫܵܐܝܼܬܼ ܢܹܐܡܲܪ
ܠܵܐ ܬܘܼܒܼ ܓܹܝܪ ܚܕܼܵܝܘܼܬܼܵܐ ܡܸܬܼܐܲܡܪܵܐ ܗܵܕܹܐ: ܐܸܠܵܐ ܟܠܚܲܕܸ ܡ̣ܢ
ܟܝܵܢܹ̈ܐ ܒܐܘܼܤܝܼܵܐ ܕܝܼܠܹܗ. ܐܵܦܠܵܐ ܓܹܝܪ ܐܲܠܵܗܵܐ ܡܸܠܬܼܵܐ ܡܸܬܼܐ̱ܡܲܪ
ܕܲܗܘ̤ܵܐ ܒܸܤܪܵܐ ܒܐܘܼܪܤܝܼܵܐ ܕܝܼܠܹܗ: ܐܸܠܵܐ ܒܲܚܕܼܵܝܘܼܬܼܵܐ ܕܥܲܡ ܒܸܤܪܵܐ.
ܘܐܵܦܠܵܐ ܒܸܤܪܵܐ ܡܬܼܐ̱ܡܲܪ ܒܪܵܐ: ܒܸܠܥܵܕܼ ܚܕܼܵܝܘܼܬܼܵܐ ܕܲܒܪܵܐ ܕܐܲܠܵܗܵܐ.
ܡܸܛܠ ܗܵܢܵܐ ܚܲܕܼ ܒܸܤܪܵܐ ܒܬܲܪ̈ܬܲܝܗܹܝܢ: ܘܚܲܕܼ ܒܪܵܐ ܒܬܼܲܪ̈ܬܲܝܗܹܝܢ.
ܗܵܘ̇ ܓܹܝܪ ܕܒܲܚܕܼܵܝܘܼܬܼܵܐ ܐܝܼܬܼ ܠܹܗ ܕܢܸܗܘܸܐ ܐܝܼܬܼܵܘܗܝ ܘܡܸܬܼܐ̱ܡܲܪ:
ܒܲܬܼܚܘܼܡܵܐ ܘܲܒܼܦܘܼܪܫܵܢܵܐ ܡ̣ܢ ܚܕܼܵܕܹ̈ܐ ܠܵܐ ܐܝܼܬܼܵܘܗܝ ܘܠܵܐ ܡܸܬܼܐ̱ܡܲܪ.
ܐܲܟܼܙܢܵܐ ܕܐܲܠܵܗܵܐ ܡܸܠܬܼܵܐ ܒܲܟܼܝܵܢܹܗ ܐܝܬܼܵܘܗܝ ܐܲܠܵܗܵܐ ܠܵܐ ܡܓܲܫܡܵܐ:
ܒܲܚܕܼܵܝܘܼܬܼܵܐ ܕܹܝܢ ܕܥܲܡ ܒܸܤܪܵܐ ܡܸܬܐ̱ܡܲܪ ܒܸܤܪܵܐ. ܘܒܸܤܪܵܐ ܕܒܲܟܼܝܵܢܹܗ
ܓܘܼܫܡܵܐ ܗ̄ܘ̣: ܘܒܼܐܘܼܤܝܼܵܐ ܕܹܝܢ ܓܘܼܫܡܵܐ ܗ̄ܘ̣: ܒܲܚܕܼܵܝܘܼܬܼܵܐ ܕܹܝܢ
ܕܲܠܘܵܬܼ ܐܲܠܵܗܵܐ ܡܸܠܬܼܵܐ ܒܪܵܐ ܕܐܲܠܵܗܵܐ: ܐܲܠܵܗܵܐ ܐܝܼܬܼܵܘܗܝ ܘܲܒܼܪܵܐ.
ܘܠܵܐ ܬܪܹܝܢ ܒܸܤܪܹ̈ܐ ܡܸܬܼܐܲܡܪܝܼܢ: ܘܠܵܐ ܬܘܼܒܼ ܬܪܹܝܢ ܒܢ̈ܝܼܢ: ܗܵܢ̇ܘܿܢ
ܕܲܦܪܝܼܫܝܼܢ ܒܲܟܼܝܵܢܵܐ: ܘܒܲܚܕܼܵܝܘܼܬܼܵܐ ܕܲܟܼܝܵܢܹ̈ܐ ܐܝܼܬܲܝܗܘܿܢ. ܒܹܝܬܼ
pb. 233
ܒܢܲܝ̈ܢܵܫܵܐ ܓܹܝܪ ܤܲܓܿܝܼ̈ܐܹܐ ܕܐܝܼܬܲܝܗܘܿܢ ܒܢܲܝ̈ܵܐ: ܒܦܘܼܪܫܵܢܵܐ ܘܒܲܦܠܝܼܓܼܘܼܬܼܵܐ
ܕܲܟܼܝܵܢܹ̈ܐ ܡܸܬܼܐ̱ܡܪܝܼܢ: ܗܵܢ̇ܘܿܢ ܕܲܒܼܛܲܝܒܿܘܼܬܼܵܐ ܘܲܒܼܒܲܝܬܵܝܘܼܬܼܵܐ ܒܲܠܚܘܿܕܼ
ܡܸܬܼܝܼܗܸܒܼ ܠܟܼܠ ܚܲܕܼ ܡܸܢܗܘܿܢ: ܐܲܟܼܙܢܵܐ ܕܲܠܟܼܠ ܚܲܕܼ ܡ̣ܢ ܪܹ̈ܫܵܢܹܐ
ܡܸܬܼܝܼܗܸܒܼ ܐܝܼܩܵܪܵܐ ܡ̣ܢ ܡܲܠܟܵܐ. ܗܵܘ̇ ܓܹܝܪ ܡܵܐ ܕܐܝܼܬܼܵܘܗܝ ܒܲܠܚܘܿܕܼ
ܒܲܩܢܘܿܡܹܗ ܕܝܼܠܹܗ: ܗܵܢܵܐ ܐܝܼܬܼܵܘܗܝ ܐܵܦ ܠܤܲܓܿܝܼ̈ܐܹܐ ܐܲܝܟܼ ܕܲܒܼܛܲܝܒܿܘܼܬܼܵܐ.
ܐܝܼܬܼܵܘܗܝ ܓܹܝܪ ܒܲܩܢܘܿܡܹܗ: ܘܒܲܕܼܡܘܼܬܹܗ ܥܒܲܕܼ ܠܹܗ ܕܡܘܼܬܼܵܐ:
ܠܵܐ ܗ̄ܘ̣ܵܐ ܒܦܘܼܩܪܵܢܵܐ: ܘܠܵܐ ܗ̄ܘ̣ܵܐ ܒܐܝܼܩܵܪܵܐ: ܘܠܵܐ ܗ̄ܘ̣ܵܐ ܒܫܲܘܝܘܼܬܼܵܐ
ܕܛܲܝܒܿܘܼܬܼܵܐ ܫܚܝܼܡܵܐܝܼܬܼ: ܐܸܠܵܐ ܒܲܕܼܡܘܼܬܹܗ ܟܝܵܢܵܝܬܼܵܐ ܥܲܒܼܕܹܗ ܕܡܘܼܬܹܗ.
ܐܲܝܟܲܢܵܐ ܕܠܵܘ ܐ̄ܚܪܹܢܵܐ ܐܝܼܬܼܵܘܗܝ: ܐܸܠܵܐ ܗ̤ܘܝܘܼ ܗܵܘ̇ ܕܲܠܦܲܪܨܘܿܦܹܗ
ܕܝܼܠܹܗ ܢܲܗܒܹܿܗ. ܕܗܵܢܵܐ ܗܵܘ̇ ܢܸܗܘܸܐ: ܘܗܵܘ̇ ܗܵܢܵܐ: ܚܲܕܼ
ܘܗ̤ܘ ܟܲܕܼ ܗ̤ܘ ܒܬܲܪ̈ܬܲܝܗܹܝܢ ܐܘܼܤ̈ܝܼܵܣ. ܦܲܪܨܘܿܦܵܐ ܕܲܡܨܲܠܲܡ
ܒܒܸܤܪܵܐ: ܘܲܡܨܲܠܲܡ ܠܒܸܤܪܵܐ ܒܲܕܼܡܘܼܬܼܵܐ ܕܲܒܼܪܘܼܬܼܵܐ ܕܝܼܠܹܗ
ܒܲܬܼܪ̈ܲܝܗܘܿܢ ܟܝܵܢܹ̈ܐ: ܘܚܲܕܼ ܒܸܤܪܵܐ ܒܲܬܼܪ̈ܲܝܗܘܿܢ ܟܝܵܢܹ̈ܐ. ܗܵܢܵܐ ܡ̣ܢ
ܗܵܘ̇: ܘܗܵܘ̇ ܡ̣ܢ ܗܵܢܵܐ ܡܸܨܛܲܠܲܡ: ܗ̤ܝ ܟܲܕܼ ܗ̤ܝ ܘܲܚܕܼܵܐ ܕܡܘܼܬܼܵܐ
ܕܦܲܪܨܘܼܦܵܐ.
ܠܵܐ ܝܵܕܲܥ̇ ܐ̄ܢܵܐ ܗܵܟܹܝܠ ܒܐܲܝܢܵܐ ܪܸܥܝܵܢܵܐ ܐܵܡܲ݁ܪ ܐܲܢ̄ܬܿ ܠܲܚܕܼܵܝܘܼܬܼܵܐ
ܩܢܘܿܡܵܝܬܼܵܐ: ܐܲܝܟܲܢܵܐ ܕܬܸܗܘܸܐ ܠܵܐ ܡܸܬܿܕܲܪܟܵܢܝܼܬܼܵܐ: ܐܵܘ ܐܲܝܟܼ ܠܵܐ
ܦܐܝܼܬܼܵܐ: ܕܐܹܩܲܒܸܿܠ ܐܵܘ ܠܵܐ ܐܹܩܲܒܸܿܠ. ܘܡܸܛܠ ܗܵܕܹܐ ܡܸܬܿܬܿܚܲܡ
ܘܡܸܬܼܐ̱ܡܲܪ ܒܲܪܢܵܫܵܐ ܠܚܘܿܕܼܵܐܝܼܬܼ ܒܲܩܪܵܝܬܼܵܐ ܐܵܘ ܒܐܝܼܩܵܪܵܐ ܕܲܒܼܪܵܐ:
ܠܚܘܿܕܼܵܐܝܼܬܼ ܕܹܝܢ ܬܘܼܒܼ ܘܡܸܠܬܼܵܐ ܕܡ̣ܢ ܐܲܠܵܗܵܐ: ܕܲܒܼܪܘܼܬܼܵܐ ܘܫܘܼܡܵܗܵܐ
ܘܲܩܪܵܝܵܬܼܵܐ ܐܝܼܬܼ ܠܹܗ ܟܝܵܢܵܐܝܼܬܼ؟ ܗܵܝ̇ ܕܹܝܢ ܕܚܝܼܕܼܵܐܝܼܬܼ ܐܲܝܟܲܢ ܐܵܡܲ݁ܪ
ܐܲܢ̄ܬܿ؟
pb. 234
ܐܸܡܲܪ ܢܲܗܝܼܪܵܐܝܼܬܼ ܤܝܵܡܵܐ ܕܗܲܝܡܵܢܘܼܬܼܵܐ ܕܐܲܒܼ̈ܗܵܬܼܵܐ: ܘܤܝܼܡ ܠܐܲܝܠܹܝܢ
ܕܫܵܘܹ̇ܝܢ: ܘܐܵܦ ܥܠܲܝ ܘܐܵܦ ܥܲܠ ܟܠ ܐ̄ܢܵܫ: ܠܡܹܐܡܲܪ. ܒܲܕܼ ܠܵܐ
ܢܲܗܲܪܬܵܝܗܝ ܠܪܸܥܝܵܢܵܐ: ܕܐܲܝܟܲܢ ܙܵܕܹܩ ܠܲܢ ܠܡܸܬܼܪܲܥܵܝܘܼ ܘܲܠܡܹܐܡܲܪ.
ܐܲܝܟܲܢܵܐ ܐܵܡܲ݁ܪ ܐܲܢ̄ܬܿ ܕܠܵܐ ܢܸܤܬܲܟܲܠ ܟܝܵܢܵܐ ܕܒܲܪܢܵܫܵܐ ܝܑܼܚܝܼܕܼܵܐܝܼܬܼ:
ܝܲܬܿܝܼܪ ܡ̣ܢ ܐܘܼܝܤܝܼܵܐ ܕܐܲܠܵܗܵܐ ܡܸܠܬܼܵܐ: ܕܐܝܼܬܼܵܘܗܝ ܒܪܵܐ: ܠܵܘ ܡ̣ܢ
ܟܝܵܢܵܐ ܐܸܠܵܐ ܡ̣ܢ ܚܕܼܵܝܘܼܬܼܵܐ؟ ܐܸܠܵܐ ܐܵܦ ܫܘܼܚ̈ܠܵܦܹܐ ܐܵܡܲ݁ܪ ܐܲܢ̄ܬܿ ܕܐܝܼܬܼ
ܒܗܘܿܢ ܒܲܟܼܝܵܢܹ̈ܐ: ܐܲܝܠܹܝܢ ܕܐܸܬܼܟܲܢܲܫ ܠܲܚܕܼܵܝܘܼܬܼܵܐ ܕܚܲܕܸ ܒܪܵܐ.
ܘܠܵܐ ܒܛܸܠ̣ ܫܘܼܚܠܵܦܵܐ ܕܲܟܼܝܵܢܹ̈ܐ ܒܲܚܕܼܵܝܘܼܬܼܵܐ ܕܟܼܝܵܢܹ̈ܐ: ܠܵܐ ܗ̄ܘ̣ܵܐ ܐܲܝܟܼ
ܡ̇ܢ ܕܫܘܼܚܠܵܦܵܠ ܕܲܟܼܝܵܢܹ̈ܐ ܡܸܬܼܒܲܛܲܠ ܡܸܛܠ ܚܕܼܵܝܘܼܬܼܵܐ. ܐܸܢܗ̤ܘ
ܗܵܟܹܝܠ ܕܠܵܐ ܡܸܬܼܥܲܠܹܝܢ ܦܘܼܪ̈ܫܵܢܹܐ ܕܲܟܼܝܵܢܹ̈ܐ: ܟܝܵܢܵܐ ܕܒܸܤܪܵܐ
ܐܝܼܬܼܵܘܗܝ ܠܚܘܿܕܵܐܝܼܬܼ ܕܲܟܼܝܵܢܵܐ ܕܐ̄ܢܵܫܘܼܬܼܵܐ. ܗܵܘ̇ ܕܹܝܢ ܕܐܝܼܬܼܵܘܗܝ
ܒܪܵܐ ܒܲܪ ܟܝܵܢܵܐ ܕܐܲܠܵܗܵܐ ܐܲܒܼܵܐ ܘܲܕܼܪܘܼܚܵܐ ܕܩܘܼܕܼܫܵܐ: ܝܑܼܚܝܼܕܼܵܐܝܼܬܼ
ܘܲܠܚܘܿܕܵܐܝܼܬܼ ܐܝܼܬܼܵܘܗܝ ܕܐܲܠܵܗܘܼܬܼܵܐ. ܒܲܚܕܼܵܝܘܼܬܼܵܐ ܕܹܝܢ: ܒܸܤܪܵܐ
ܐܝܼܬܼܵܘܗܝ ܒܪܵܐ: ܘܐܲܠܵܗܵܐ ܡܸܠܬܼܵܐ ܐܝܼܬܼܵܘܗܝ ܒܸܤܪܵܐ. ܘܡܸܛܠ
ܗܵܢܵܐ ܗܵܘ̇ ܡ̇ܢ ܕܗܵܟܲܢܵܐ ܐܵܡܲ݁ܪ: ܠܵܐ ܐܵܫܲ݁ܪ ܬܪܹܝܢ ܒܢ̈ܝܼܢ: ܘܠܵܐ ܐܵܡܲ݁ܪ
ܬܪܹܝܢ ܒܸܤܪܹ̈ܐ: ܘܠܵܘ ܒܲܟܼܝܵܢܵܐ ܐܵܡܲ݁ܪ ܬܪܹܝܢ ܒܸܤܪܹ̈ܐ: ܘܐܵܦܠܵܐ
ܒܵܗ̇ ܒܸܤܪܵܐ: ܒܵܗ̇ ܒܪܘܼܬܼܵܐ: ܒܵܗ̇ ܟܲܕܼ ܒܵܗ̇ ܡܸܬܼܚܲܫܚܝܼܢ ܒܦܲܪ̈ܨܘܿܦܹܐ
ܟܝܵܢܝܹ̈ܐ ܕܲܚܕܲܕܹ̈ܐ ܒܕܝܼܠܗܘܿܢ: ܐܲܟܼܙܢܵܐ ܕܢܘܼܪܵܐ ܒܤܲܢܝܵܐ: ܘܲܕܼܤܲܢܝܵܐ
ܗ̄ܘ̣ܵܐ ܢܘܼܪܵܐ: ܘܢܘܼܪܵܐ ܤܲܢܝܵܐ. ܘܟܼܠܚܲܕܼ ܚܲܕܼ ܡܸܢܗܘܿܢ ܤܲܢܝܵܐ
ܘܢܘܼܪܵܐ: ܘܠܵܘ ܬܪܹܝܢ ܤܢܲܝ̈ܵܐ: ܘܠܵܘ ܬܹܪܹܝܢ ܢܘܼܪܹ̈ܐ. ܡܸܛܠ
pb. 235
ܕܲܒܼܢܘܼܪܵܐ ܬܪ݁ܲܝܗܘܿܢ: ܘܲܒܼܤܲܢܝܵܐ ܬܪ̈ܲܝܗܘܿܢ. ܠܵܘ ܓܹܝܪ ܒܦܘܼܠܓܼܵܐ:
ܐܸܠܵܐ ܒܲܚܕܼܵܝܘܼܬܼܵܐ. ܡ̣ܢ ܬܪ̈ܲܝܗܘܿܢ ܟܝܵܢܹ̈ܐ: ܦܲܪ̈ܨܘܿܦܹܐ ܟܝܵܢܵܝܹ̈ܐ
ܗܵܘܹ̇ܝ. ܐܵܘ ܗܵܟܹܝܠ ܠܵܐ ܬܹܐܡܲܪ ܟܝܵܢܹ̈ܐ ܡܦܲܪ̈ܫܹܐ: ܟܲܕܼ ܡܩܵܘܹܝܢ
ܒܦܘܼܪ̈ܫܵܢܹܐ ܕܲܟܼܝܵܢܹ̈ܐ ܘܠܵܐ ܡܸܬܼܒܲܛܠܝܼܢ. ܐܵܘ ܐܸܡܲܪ ܕܩܵܘܝܼܘ ܒܫܘܼܚܠܵܦܵܐ
ܕܲܟܼܝܵܢܹ̈ܐ: ܘܐܲܝܟܼ ܦܘܼܪܫܵܢܵܐ ܕܲܟܼܝܵܢܹ̈ܐ ܡܬܲܚܸܡ ܐܲܢ̄ܬܿ ܠܗܘܿܢ ܒܲܚܕܼܵܝܘܼܬܼܵܐ
ܕܠܵܐ ܡܸܤܬܲܕܼܩܵܐ: ܠܵܘ ܐܲܝܟܼ ܡ̇ܢ ܕܫܘܼܚ̈ܠܵܦܹܐ ܕܲܟܼܝܵܢܹ̈ܐ ܡܸܬܼܒܲܛܝܼܢ
ܒܲܚܕܼܵܝܘܼܬܼܵܐ. . . .
ܐܸܢܗ̤ܘ ܗܵܟܹܝܠ ܓܹܝܪ ܕܐܲܢ̄ܬܿ ܝܑܼܚܝܼܕܵܐܝܼܬܼ ܡܸܤܬܲܟܲܠ ܐܲܢ̄ܬܿ
ܠܗܘܿܢ: ܘܠܵܘ ܒܲܟܼܝܵܢܹ̈ܐ: ܐܸܠܵܐ ܒܦܘܼܪܫܵܢܗܘܿܢ ܕܡ̣ܢ ܚܕܼܵܕܹ̈ܐ:
ܡ̇ܢ ܚܲܝܵܒܼ ܐ̄ܢܵܐ ܕܡܵܘܕܸܐ ܐ̄ܢܵܐ ܒܲܚܕܼܵܝܘܼܬܼܵܐ ܠܵܐ ܡܸܬܼܦܲܪܫܵܢܝܼܬܼܵܐ
ܕܲܠܚܲܕܼ ܦܲܪܨܘܿܦܵܐ ܕܲܬܼܪ̈ܲܝܗܘܿܢ ܟܝܵܢܹ̈ܐ؟ ܘܲܠܘܵܬܼܵܟܼ ܐܲܝܟܼ ܕܲܦܠܝܼܓܼ
ܐܲܢ̄ܬܿ ܥܲܠ ܗܵܠܹܝܢ: ܡܸܠܲܝ̈ ܥܵܒܹ̇ܕܼ ܐ̄ܢܵܐ: ܐܸܠܵܐ ܐܵܪܵܐ ܕܲܠܡܵܐ ܠܚܲܕܼ ܟܝܵܢܵܐ
ܐܵܡܲ݁ܪ ܐܲܢ̄ܬܿ ܠܲܚܕܼܵܝܘܼܬܼܵܐ ܩܢܘܿܡܵܝܬܼܵܐ: ܐܲܝܟܼ ܕܡ̣ܢ ܒܵܬܲܪ ܚܕܼܵܝܘܼܬܼܵܐ
ܠܵܐ ܡܩܝܼܡܝܼܢ ܟܝܵܢܹ̈ܐ ܕܝܼܠܵܝܵܬܼ̈ܗܘܿܢ؟ ܘܠܲܐܝܠܹܝܢ ܕܡ̣ܢ ܩܕܝܼܡ
ܐܸܬܼܐ̱ܡܲܪ ܡܸܢܵܟܼ ܡܬܲܪܸܨ ܐܲܢ̄ܬܿ: ܝܲܬܿܝܼܪܵܐܝܼܬܼ ܕܹܝܢ ܡܒܲܛܵܠܘܼ ܡܒܲܛܸܠ
ܐܲܢ̄ܬܿ ܠܗܘܿܢ ܡ̣ܢ ܡܸܬܼܒܲܚܢܵܢܘܼܬܼܵܐ ܕܲܠܘܵܬܼܝ: ܟܲܕܼ ܕܲܠܩܘܼܒܼܠܵܐ
ܕܗܵܠܹܝܢ ܕܐܵܡܲ݁ܪ ܐ̄ܢܵܐ ܨܵܒܹ̇ܐ ܐܲܢ̄ܬܿ ܠܡܹܐܡܲܪ. ܡܸܛܠ ܕܠܵܘ ܐܲܝܟܼ
ܒܲܫܪܵܪܵܐ: ܐܸܠܵܐ ܒܕܲܠܩܘܼܒܼܠܵܝܘܼܬܼܵܐ: ܐܲܝܟܼ ܒܥܸܠܕܒܼܵܒܼܵܐ ܓܸܕܼܫܲܬ̤ ܠܵܟܼ
ܕܠܵܐ ܬܸܨܒܸܿܐ ܕܲܠܥܸܠܬܼܵܐ ܕܦܘܼܪܫܵܢܵܐ ܬܸܒܼܥܸܐ. ܗܵܕܹܐ ܓܹܝܪ ܐܲܝܟܼ
ܡܒܲܛܠܵܢܝܼܬܼܵܐ ܐܝܼܬܹܝܗ̇ ܕܲܟܼܝܵܢܹ̈ܐ: ܘܠܵܐ ܡܩܲܒܸܿܠ ܐ̄ܢܵܐ ܠܵܗ̇.
pb. 236
ܒܕܲܠܩܘܼܒܼܠܵܝܘܼܬܼܵܐ ܕܹܝܢ ܕܲܠܘܵܬܼܝ: ܥܲܡ ܬܚܘܼ̈ܡܹܐ ܒܡܸܠܹ̈ܐ ܥܲܙܝܼ̈ܙܵܬܼܵܐ
ܗܵܪܓܲܬܿ: ܐܲܟܼܙܢܵܐ ܕܠܸܤܛܵܝܹ̈ܐ ܕܲܬܿܛܲܫܸܐ ܪܸܥܝܵܢܵܟܼ ܘܠܵܐ ܬܸܬܼܝܼܕܲܥ.
ܘܗܵܕܹܐ ܐܵܡܲ݁ܪ ܐܲܢ̄ܬܿ: ܘܗܵܝ̇: ܘܟܼܠܗܹܝܢ: ܐܸܠܵܐ ܠܵܘ ܠܒܼܘܼܛܵܠܵܐ
ܕܲܟܼܝܵܢܹ̈ܐ ܐܵܡܲܪ ܐܲܢܬܿ ܚܕܼܵܝܘܼܬܼܵܐ ܩܘܿܡܵܝܬܵܐ: ܐܸܠܵܐ ܠܲܚܕܵܝܘܼܬܼܵܐ ܟܝܵܢܵܝܬܵܐ
ܕܲܒܼܪܘܼܟܵܒܼܵܐ ܕܠܚܲܕܼ ܟܝܵܢܵܐ. ܐܲܟܼܙܢܵܐ ܕܢܲܦܫܵܐ ܘܦܲܓܼܪܵܐ ܠܚܲܕ ܟܝܵܢܵܐ
ܕܲܒܼܪܢܵܫܵܐ ܐܲܢ̄ܬܿ ܚܕܼܵܝܘܼܬܼܵܐ ܩܢܘܿܡܵܝܬܵܐ. ܐܸܠܵܐ ܐܵܦ ܗܵܕܹܐ ܐܵܦܸܢ ܡܩܝܼܡܝܼܢ
ܟܝܵܢܹ̈ܐ: ܐܸܠܵܐ ܠܲܟܼܝܵܢܵܐ ܚܵܫܘܿܫܵܐ ܘܲܥܒܼܝܼܕܼܵܐ ܘܒܲܪܝܵܐ ܗܵܘܿܝܵܐ
ܟܝܵܢܹ̈ܐ: ܐܸܠܵܐ ܠܲܟܼܝܵܢܵܐ ܚܵܫܘܿܫܵܐ ܘܲܥܒܼܝܼܕܼܵܐ ܘܒܲܪܝܵܐ ܗܵܘ̇ܝܵܐ
ܚܕܼܵܝܘܼܬܼܵܐ. ܒܪܝܼܬܼܵܐ ܗ̣̄ܝ ܓܹܝܪ ܕܬܲܪܬܹܝܢ ܚܕܼܵܝܘܼܬܼܵܐ ܟܝܵܢܵܝܬܼܵܐ. ܐܲܝܠܹܝܢ
ܓܹܝܪ ܕܒܲܟܼܝܵܢܗܹܝܢ ܠܲܝܬܿ ܠܗܹܝܢ: ܗܵܠܹܝܢ ܒܲܚܕܼܵܝܘܼܬܼܵܐ ܕܲܟܼܝܵܢܵܐ ܡܩܲܒ̈ܠܵܢ
ܒܲܟܼܝܵܢܗܹܝܢ. ܐܸܠܵܐ ܐܲܝܠܹܝܢ ܕܠܲܚܕܼܵܝܘܼܬܼܵܐ ܟܝܵܢܝܬܼܵܐ ܡܸܬܼܚܝܕܝܼܢ: ܥܲܡ
ܚܵܫܘܿܫܘܼܬܼܵܐ ܟܝܵܢܵܝܬܼܵܐ ܕܲܐ̄ܚܪܹܢܵܐ ܡܸܬܼܚܲܝܕܝܼܢ. ܘܠܵܘ ܨܒܼܝܵܢܵܐܝܼܬܼ ܡܩܲܒܿܠܝܼܢ
ܚܲܫܹ̈ܐ ܕܲܚܕܼܵܕܹ̈ܐ: ܐܲܟܼܙܢܵܐ ܕܢܲܦܫܵܐ ܘܦܲܓܼܪܵܐ: ܒܲܟܼܝܵܢܗܘܿܢ ܐܝܼܬܲܝܗܘܿܢ
ܠܵܐ ܡܩܲܒܿܠܵܢܹ̈ܐ ܕܕܼܝܼ̈ܠܵܝܵܬܼܵܐ ܕܲܚܕܼܵܕܹ̈ܐ. ܒܚܲܕܼܵܝܘܼܬܼܵܐ ܕܹܝܢ ܕܲܟܼܝܵܢܵܐ
ܡܸܫܬܵܘܬܿܦܝܼܢ ܠܲܚܕܼܵܕܹ̈ܐ: ܘܝܵܗ̇ܒܿܝܼܢ ܘܢܵܤ̇ܒܿܝܼܢ ܚܲܫܹ̈ܐ ܕܲܚܼܵܕܹ̈ܐ ܒܐܵܢܲܢܩܹܐ
ܕܲܟܼܝܵܢܵܐ: ܘܲܒܼܡܸܕܸܡ ܡܡܲܙܓܼܵܐ ܕܲܟܼܝܵܢܵܐ. ܐܲܝܟܲܢܵܐ ܕܢܸܚܲܫ: ܗܵܘ̇ ܡ̇ܢ
ܕܠܵܐ ܚܵܐܹ̇ܫ ܗ̄ܘ̣ܵܐ ܡܸܢܹܗ ܘܠܹܗ. ܒܲܚܕܼܵܝܘܼܬܼܵܐ ܓܹܝܪ: ܠܵܘ ܢܲܦܫܵܐ
ܡܸܢܵܗ̇ ܘܠܵܗ̇ ܟܵܦ̇ܢܵܐ ܐܵܘ ܨܗܝܵܐ: ܐܵܘ ܟܵܐܹ̇ܒܼ ܠܵܗ̇ ܡ̣ܢ ܦܤܵܩܵܐ ܐܵܘ
ܡ̣ܢ ܝܲܩܪ̣ܵܢܵܐ ܐܵܘ ܡ̣ܢ ܡܚܘܿܬܼܵܐ. ܘܠܵܐ ܬܘܼܒܼ ܓܘܼܫܡܵܐ ܠܵܐ
ܡܢܲܦܫܵܐ: ܐܝܼܬܼ ܠܹܗ ܪܓܸܫܬܼܵܐ ܡܸܕܸܡ ܡ̣ܢ ܗܵܠܹܝܢ. ܡ̣ܢ ܚܕܼܵܝܘܼܬܼܵܐ
pb. 237
ܕܹܝܢ ܟܝܵܢܵܝܬܼܵܐ ܕܲܟܼܝܵܢܹ̈ܐ ܡܫܲܚ̈ܠ̱ܦܹܐ: ܚܲܫܹ̈ܐ ܗܵܠܹܝܢ ܕܲܚܕܼܵܕܹ̈ܐ ܚܵܫ̇ܝܼܢ
ܚܵܫܘܿܫܵܐܝܼܬܼ: ܘܡܸܫܬܵܘܬܿܦܝܼܢ ܒܐܵܢܲܢܩܹܐ ܕܲܚܕܼܵܝܘܼܬܼܵܐ.
ܐܸܢ ܗܵܟܲܢܵܐ ܐܵܡܲܪ ܐܲܢ̄ܬܿ ܚܕܼܵܝܘܼܬܼܵܐ ܩܢܘܿܡܵܝܬܵܐ ܒܲܟܼܝܵܢܵܐ: ܐܲܝܟܼ
ܐܵܪ̈ܝܵܢܹܐ ܐܵܡܲ݁ܪ ܐܲܢ̄ܬܿ. ܕܲܟܼܝܵܢܵܝܬܼܵܐ ܐܝܼܬܹܝܗ̇ ܘܠܵܘ ܨܒܼܝܵܢܵܝܬܼܐ: ܕܥܲܡ
ܚܵܫܘܿܫܘܼܬܼܵܐ ܟܝܵܢܵܝܬܼܵܐ ܚܲܫ̣: ܚܲܫ̣ ܠܲܡ ܡ̣ܢ ܚܕܼܵܝܘܼܬܼܵܐ ܟܝܵܢܵܝܬܼܵܐ. ܚܲܫܹ̈ܐ
ܓܹܝܪ
ܕܢܲܦܫܵܐ: ܚܲܫܹ̈ܐ ܕܦܲܓܼܪܵܐ ܒܪܘܼܟܵܒܼܵܐ ܟܝܵܢܵܝܵܐ. ܠܵܘ ܓܹܝܪ ܐܲܝܟܼ ܕܢܸܚܲܫ
ܐܸܬܼܪܲܟܲܒܼ ܠܵܐ ܥܒܼܝܼܕܼܵܐ: ܗܵܘ̇ ܕܒܲܟܼܝܵܢܹܗ ܠܵܐ ܒܲܪܝܵܐ ܐܝܼܬܼܵܘܗܝ: ܐܲܝܟܼ
ܒܲܪܝܵܐ ܘܲܥܒܼܝܼܕܼܵܐ. ܠܵܐ ܗ̄ܘ̣ܵܐ ܓܹܝܪ ܒܗܵܝ̇ ܕܐܝܼܬܹܝܗ̇ ܢܲܦܫܵܐ ܒܦܲܓܼܪܵܐ
ܘܦܲܓܼܪܵܐ ܒܢܲܦܫܵܐ ܡܚܵܘܹܝܢ ܚܲܕܸ ܟܝܵܢܵܐ ܕܲܚܕܼܵܝܘܼܬܼܵܐ. ܠܵܐ ܗ̄ܘ̣ܵܐ ܓܹܝܪ
ܒܟܼܠ ܓܘܼܫܡܵܐ ܕܗܵܘ̇ܝܵܐ ܒܹܗ ܢܲܦܫܵܐ ܥܵܒܼ̇ܕܼܵܐ ܒܹܗ ܚܕܼܵܝܘܼܬܼܵܐ: ܐܲܝܟܵܐ
ܕܐܵܦܠܵܐ ܠܗܵܘ̇ ܕܝܼܠܗ̇ ܡܸܫܟܚܵܐ ܒܟܼܠܙܒܲܢ ܠܡܲܚܵܝܘܼ: ܐܸܠܵܐ
ܒܪܘܼܟܵܒܼܵܐ: ܐܲܟܼܡܵܐ ܕܐܸܬܿܬܲܩܢܲܬ̤ ܠܚܲܕܼ ܟܝܵܢܵܐ ܡ̣ܢ ܥܵܒܼܘܿܕܼܵܐ.
ܘܒܲܬܼܚܘܼܡܵܐ ܟܵܝܵܢܝܵܐ ܘܲܡܬܲܚܡܵܐ ܘܲܕܼܠܵܐ ܥܵܒܲ݁ܪ: ܡܸܬܼܠܲܒܼܟܵܐ ܙܘܲܠܒܼܝܼܟܼܵܐ
ܕܠܵܐ ܒܨܒܼܝܵܢܹܗ̇. ܘܬܼܘܼܒܼ ܡܸܫܬܼܪܹܝܢ ܘܡܸܬܲܐܤܪܝܼܢ ܒܬܼܘܼܩܵܢܵܐ
ܒܲܚܕܼܵܝܘܼܬܼܵܐ ܕܲܟܼܝܵܢܵܐ. ܐܸܢ ܗܵܟܹܝܠ ܠܐܲܠܵܗܵܐ ܡܸܠܬܼܵܐ ܠܚܲܕܼ ܟܝܵܢܵܐ
ܗܘ̤ܵܬܼ ܠܹܗ ܚܕܼܵܝܘܼܬܼܵܐ ܥܲܡ ܐ̄ܢܵܫܘܼܬܼܵܐ: ܘܐܵܦܸܢ ܗܸܢܘܿܢ ܟܝܵܢܹ̈ܐ ܕܠܵܐ
ܒܘܼܠܒܵܠܵܐ ܩܵܘ̣ܝܘ: ܐܸܠܵܐ ܒܲܚܕܼܵܝܘܼܬܼܵܐ ܕܲܟܼܝܵܢܵܐ: ܒܫܘܼܚܠܵܦܵܐ ܐܸܬܿܬܲܩܲܢܘ
ܥܵܒܼܘܿܕܼܵܐ ܘܲܥܒܼܝܼܕܼܵܐ: ܟܲܕܼ ܨܵܒܹ̇ܐ ܘܟܲܕܼ ܠܵܐ ܨܵܒܹ̇ܐ. ܒܕܼܐܬܼܟܲܢܝܼܘ ܗܵܟܲܢܵܐ:
ܘܐܝܼܬܼܵܘܗܝ ܥܒܼܝܼܕܼܵܐ ܘܒܲܪܝܵܐ. ܘܗܵܘ̇ ܕܟܼܠ ܡܸܫܟܲܚ ܠܡܲܬܼܩܵܢܘܼ:
ܗܵܢܵܘ ܕܹܝܢ ܐܲܠܵܗܵܐ: ܟܝܵܢܵܐ ܕܲܚܕܲܝܘܼܬܼܵܐ ܢܸܗܘܸܐ. ܘܠܵܐ ܗ̄ܘ̣ܵܐ ܡܢܘܿܡܵܐ
ܕܐ̄ܢܵܫܘܼܬܼܵܐ: ܕܒܲܟܼܝܵܢܵܐ ܡܸܬܼܝܼܕܲܥ ܚܲܝܘܼܬܼܵܐ. ܐܲܟܼܙܢܵܐ ܕܐܵܦܠܵܐ ܦܲܓܼܪܵܐ
pb. 238
ܒܸܠܥܵܕܼ ܢܲܦܫܵܐ ܒܲܩܢܘܿܡܹܗ ܕܝܼܠܹܗ ܐܝܼܬܼܵܘܗܝ ܚܲܝܘܼܬܼܵܐ: ܐܸܠܵܐ ܒܬܼܘܼܩܵܢܵܐ
ܕܲܚܕܼܵܝܘܼܬܼܵܐ ܟܝܵܢܵܝܬܼܵܐ ܐܝܼܬܼ ܠܹܗ ܕܢܸܗܘܸܐ ܚܲܝܘܼܬܼܵܐ: ܐܸܢܗ̤ܘ ܕܗܵܟܲܢܵܐ:
ܘܐܵܦ ܗ̤ܘ ܒܲܪܢܵܫܵܐ ܒܐܲܠܵܗܵܐ ܐܝܼܬܼ ܠܹܗ ܕܢܸܗܘܸܐ ܚܲܝܘܼܬܼܵܐ: ܘܠܵܘ
ܩܢܘܿܡܹܗ ܕܝܼܠܹܗ ܘܲܟܼܝܵܢܹܗ ܐܝܼܬܼ ܠܹܗ: ܐܸܠܵܐ ܡ̣ܢ ܚܕܼܵܝܘܼܬܼܵܐ
ܩܢܘܿܡܵܝܬܼܵܐ ܕܲܠܚܕܼ ܟܝܵܢܵܐ ܡܩܲܝܡܵܐ.
ܡܸܛܠ ܗܵܢܵܐ ܡܸܫܐܸܠ ܠܡܹܐܡܲܪ: ܘܒܲܪܢܵܫܵܐ ܒܲܪܢܵܫܵܐ ܕܝܼܬܼܵܘܗܝ:
ܘܒܲܩܢܘܿܡܹܗ ܘܒܲܟܼܝܵܢܹܗ ܚܲܝܘܼܬܼܵܐ. ܘܐܲܠܵܗܵܐ ܡܸܠܬܼܵܐ: ܒܲܩܡܘܿܡܹܗ
ܐܲܠܵܗܵܐ ܡܸܠܬܼܵܐ. ܐܲܝܟܲܢܵܐ ܕܒܲܚܕܼܵܝܘܼܬܼܵܐ ܠܲܟܼܝܵܢܹܗ ܢܩܝܼܡ: ܘܲܕܼܠܵܐ ܡ̣ܢ
ܚܕܼܵܝܘܼܬܼܵܐ ܢܸܗܘܸܐ ܚܲܝܘܼܬܼܵܐ. ܕܢܸܗܘܸܐ ܓܹܝܪ ܒܲܪܢܵܫܵܐ: ܡ̣ܢ ܬܘܼܩܵܢܵܐ
ܕܲܒܼܪܝܼܬܼܵܐ ܕܐܲܒܼܵܐ ܘܕܲܒܼܪܵܐ ܘܲܕܼܪܘܼܚܵܐ ܕܩܘܼܕܸܫܵܐ ܢܤܲܒ̣. ܕܢܸܗܘܸܐ ܒܪܵܐ
ܝܑܼܚܝܼܕܼܵܐ ܢܤܲܒ̣ ܡ̣ܢ ܚܕܼܵܝܘܼܬܼܵܐ ܕܐܲܠܵܗܵܐ ܡܸܠܬܼܵܐ: ܠܵܐ ܗ̄ܘ̣ܵܐ ܡ̣ܢ
ܟܝܵܢܹܗ ܕܝܼܠܹܗ: ܘܠܵܐ ܗ̄ܘ̣ܵܐ ܒܲܚܕܼܵܝܘܬܼܵܐ ܟܝܵܢܵܬܐ ܘܲܩܢܘܿܡܵܝܬܼܵܐ. ܗܵܘ̇
ܓܹܝܪ ܕܒܲܚܕܼܵܝܘܼܬܼܵܐ ܟܝܵܢܵܝܬܼܵܐ ܐܝܼܬܼ ܠܹܗ ܕܢܸܗܘܸܐ: ܠܵܐ ܗ̄ܘ̣ܵܐ ܡ̣ܢ
ܐ̄ܚܪܹܢܵܐ ܐܝܼܬܼ ܠܹܗ ܕܢܸܗܢܸܐ: ܐܸܠܵܐ ܡ̣ܢ ܬܲܘܼܩܵܢܵܐ ܟܝܵܢܵܝܵܐ. ܐܲܝܟܲܢܵܐ
ܕܢܸܗܘܸܐ ܚܕܼܵܐ ܚܲܝܘܼܬܼܵܐ: ܗܵܝ̇ ܕܠܵܐ ܗ̄ܘ̣ܵܐ ܡ̣ܢ ܓܘܼܫܡܵܐ: ܘܠܵܐ
ܗ̄ܘ̣ܵܐ ܡ̣ܢ ܢܲܦܫܵܐ: ܘܠܵܐ ܗ̄ܘ̣ܵܐ ܡ̣ܢ ܬܪ̈ܲܝܗܘܿܢ: ܐܸܠܵܐ ܡ̣ܢ ܬܘܼܩܵܢܵܐ
ܟܝܵܢܵܝܵܐ. ܗܵܕܹܝܐ ܕܹܝܢ: ܡܸܬܼܚܲܒܠܵܢܝܼܬܼܵܐ ܘܚܵܫܘܿܫܬܼܵܐ ܐܝܼܬܹܝܗ̇. ܚܕܼܵܝܘܼܬܼܵܐ
ܕܹܝܢ ܕܲܠܦܲܪܨܘܿܦܵܐ ܕܴܲܟܼܝܵܢܹ̈ܐ: ܠܵܐ ܚܵܫܘܿܫܬܼܵܐ ܐܝܼܬܹܝܗ̇ ܡܸܬܼܚܲܒܿܠܵܢܝܼܬܼܵܐ
ܕܲܒܼܒܲܝܬܵܝܼܬܼܵܐ ܨܒܼܝܵܢܵܝܬܐ. ܘܠܵܘ ܕܠܵܐ ܒܨܒܼܝܵܢܵܐ ܐܝܼܬܼ ܠܹܗ ܚܕܼܵܝܘܼܬܼܵܐ:
ܒܡܸܬܼܢܲܚܬܼܵܢܘܼܬܼܵܐ ܘܲܒܼܪܡܪܵܡܵܐ: ܒܦܵܩܘܿܕܼܘܼܬܼܵܐ ܘܲܒܼܡܸܬܼܦܲܩܕܵܢܘܼܬܼܵܐ.
ܘܪܸܥܝܵܢܵܐ ܕܐܲܝܟܼ ܗܵܢܵܐ ܐܝܼܬܼ ܠܹܗ: ܠܵܘ ܒܒܼܘܼܛܵܠܵܐ ܘܠܵܘ
pb. 239
ܒܡܸܬܼܒܲܛܠܵܢܘܼܬܼܵܐ: ܘܠܵܘ ܒܲܥܩܘܼܪܝܵܐ ܕܚܲܕܼ ܟܝܵܢܵܐ: ܐܵܘ ܕܕܼܝܼ̈ܠܵܝܵܬܼܵܐ
ܕܬܼܪ̈ܲܝܗܘܿܢ ܟܵܝܵܢܹ̈ܐ. ܒܪܸܥܝܵܢܵܐ ܕܹܝܢ ܘܲܒܼܨܒܼܝܵܢܵܐ ܝܑܼܚܝܼ̈ܕܼܵܝܵܬܼܵܐ
ܒܲܟܼܝܵܢܵܝ̈ܬܐ
ܦܪ̈ܝܪܫܵܢ: ܐܲܝܟܼ ܦܘܼܪܫܵܢܵܐ ܕܲܟܼܝܵܢܹ̈ܐ ܒܲܚܕܼܵܐ ܫܲܘܝܘܼܬܼܵܐ. ܕܗ̤ܘ ܟܲܕܼ ܗ̤ܘ
ܗܘ̤ܵܐ ܨܸܒܼܝܵܢܵܐ ܘܪܸܥܝܵܢܵܐ ܒܲܚܕܸܵܝܘܼܬܼܵܐ ܕܲܟܼܝܵܢܹ̈ܐ: ܕܲܠܗܹܝܢ ܟܲܕܼ ܠܗܹܝܢ
ܢܸܨܒܿܘܿܢ ܬܪ̈ܲܝܗܘܿܢ ܐܵܘ ܠܵܐ ܢܸܨܒܿܘܿܢ. ܘܨܒܼܝܵܢܵܐ: ܘܨܒܼܝܵܢܵܐ ܕܲܚܕܲܕܹ̈ܐ
ܐܝܼܬܼ ܠܗܘܿܢ. ܡܸܛܠ ܕܐܵܦ ܦܲܪܨܘܼܦܵܐ ܕܗܵܢܵܐ: ܕܗܵܘ̇ ܐܝܼܬܼܵܘܗܝ.
ܘܲܕܼܗܵܘ̇: ܕܗܵܢܵܐ. ܡ̣ܢ ܗܵܘ̇: ܗܵܢܵܐ: ܘܡ̣ܢ ܗܵܢܵܐ: ܗܵܘ̇: ܐܲܝܟܼ ܕܡ̣ܢ
ܦܲܪܨܘܿܦܵܐ ܕܼܝܼܠܹܗ ܡܡܲܠܸܠ: ܒܚܲܕܼ ܦܲܪܨܘܿܦܵܐ ܗܵܘ ܕܐܝܼܬܼܵܘܗܝ
ܕܲܚܕܲܝܘܼܬܼܵܐ ܕܲܟܼܝܵܢܹ̈ܐ: ܠܵܘ ܠܚܲܕܼ ܩܢܘܿܡܵܐ ܐܵܘ ܟܝܵܢܵܐ. ܠܵܘ ܓܹܝܪ
ܒܦܲܓܼܪܵܐ ܡܬܲܚܡܵܐ ܐܲܠܵܗܘܼܬܼܵܐ: ܐܲܝܟܼ ܟܠܚܲܕܼ ܡ̣ܢ ܟܝܵܢ̈ܝܼܢ ܕܒܲܩܢܘܿܡܵܐ
ܡܸܬܼܚܲܝܕܼܝܼܢ. ܗܵܢ̇ܘܿܢ ܓܹܝܪ ܡܸܬܿܬܲܚܡܝܼܢ ܡ̣ܢ ܟܝܵܢܵܐ: ܕܲܒܼܝܵܬܼܗܘܿܢ
ܡܚܲܬܸܡ ܠܗܘܿܢ: ܘܲܠܒܲܪ ܡܸܢܗܘܿܢ ܠܵܐ ܐܝܼܬܲܝܗܘܿܢ. ܐܲܝܟܼ ܐܲܟܼܙܢܵܐ
ܕܢܲܦܫܵܐ ܘܦܲܓܼܪܵܐ ܒܝܵܬܼܗܘܿܢ ܐܝܼܬܲܝܗܘܿܢ ܐܲܤܝܼܪܹ̈ܐ: ܘܲܠܒܲܪ ܡܸܢܗܘܿܢ
ܠܵܐ ܐܝܼܬܲܝܗܘܿܢ.
ܐܸܢܗ̤ܘ ܗܵܟܹܝܠ ܕܗܵܟܲܢܵܐ ܐܸܡܲ݁ܪ ܐܲܢ̄ܬܿ: ܕܒܲܩܢܘܿܡܵܐ ܡܚܲܝܲܕܼ
ܐܲܠܵܗܵܐ ܡܸܠܬܼܵܐ ܘܒܸܤܪܵܐ: ܘܲܠܗܵܕܹܐ ܐܸܡܲ݁ܪ ܐܲܢ̄ܬܿ ܚܕܼܵܝܘܼܬܼܵܐ ܠܵܐ
ܡܸܬܿܕܲܪܟܵܢܝܼܬܼܵܐ ܘܠܵܐ ܦܐܝܼܬܼܵܐ: ܠܵܐ ܡܸܫܬܿܐܸܠ ܐ̄ܢܵܐ ܢܲܗܝܼܪܵܐܝܼܬܼ ܠܡܹܐܡܲܪ:
ܕܪ̈ܲܫܝܼܥܹܐ ܐܸܢܘܿܢ ܐܲܝܠܹܝܢ ܕܗܵܟܲܢܵܐ ܐܸܡ̇ܪܝܼܢ: ܘܠܵܐ ܐܝܼܬܼܵܘܗܝ ܡ̣ܢ
ܐܵܪ̈ܬܵܕܘܿܟܿܤܹܐ ܪܸܥܝܵܢܵܐ ܗܵܢܵܐ. ܐܸܢܗ̤ܘ ܓܹܝܪ ܕܠܵܐ ܢܲܢܩܹܐ ܕܲܟܼܝܵܢܵܐ
ܚܵܫܘܿܫܵܐ ܐܸܬ̤ܵܐ ܗ̄ܘ̣ܵܐ ܒܪܵܐ ܠܵܐ ܚܵܫܘܿܫܵܐ: ܐܲܝܟܲܢܵܐ ܕܒܲܪܓܸܫܬܼܵܐ ܢܸܚܲܫ̣:
ܡܚܵܘܹ̇ܝܢ ܠܵܗ̇ ܠܐܘܼܤܝܼܵܐ ܕܝܼܠܹܗ: ܕܠܵܐ ܗ̄ܘ̣ܵܐ ܠܵܐ ܚܵܫܘܿܫܬܼܵܐ
pb. 240
ܐܝܼܬܹܝܗ̇: ܐܸܠܵܐ ܟܝܵܢܵܐ ܚܵܫܘܿܫܵܐ: ܕܡܸܢܹܗ ܒܲܚܕܼܵܝܘܼܬܼܵܐ ܒܢܘܿܡܵܝܵܬܼܵܐ ܐܸܬܼܩܲܝܲܡ
ܘܒܹܗ ܚܲܫ̣. ܗܵܘ̇ ܓܹܝܪ ܕܠܲܝܬܿ ܠܹܗ ܠܲܟܼܝܵܢܹܗ ܕܢܚܲܫ: ܘܠܵܐ ܒܚܲܕܼ
ܙܢܵܐ ܚܵܐܹ̇ܫ ܒܲܩܢܘܿܡܹܗ: ܐܸܢܘܗ̤ܘ ܕܠܵܐ ܚܵܫܘܿܫܵܐ ܗ̄ܘ̣. ܐܲܝܢܵܐ ܓܹܝܪ
ܕܲܒܼܡܸܕܸܡ ܚܸܵܐܹ̇ܫ: ܠܵܐ ܐܝܼܬܼܵܘܗܝ ܒܲܩܢܘܿܡܹܗ ܠܵܐ ܚܫܵܘܿܫܵܐ: ܐܸܠܵܐ
ܒܲܙܢܵܐ ܠܵܐ ܚܵܫܘܿܫܵܐ: ܐܲܟܼܙܢܵܐ ܕܟܼܠܗܘܿܢ ܚܵܫܘܿܫܹ̈ܐ ܚܵܫܲܝ̈ ܒܲܟܼܝܵܢܵܐ:
ܠܵܐ ܗ̄ܘ̣ܵܐ ܒܟܼܠ ܙܢܝܼ̈ܢ ܚܵܐܹ̇ܫܝܼܢ: ܐܸܠܵܐ ܒܗܵܘ̇ ܙܢܵܐ ܕܐܝܼܬܼ ܠܹܗ
ܠܲܟܼܝܵܢܵܐ ܕܢܸܚܲܫ. ܠܵܐ ܗ̄ܘ̣ܵܐ ܒܵܗ̇ ܟܲܕܼ ܒܵܗ̇ ܟܠ ܡܸܕܸܡ ܚܵܐܹ̇ܫ: ܘܠܵܐ
ܢܘܼܗܪܵܐ: ܘܠܵܐ ܐܵܐܲܪ: ܘܠܵܐ ܢܘܼܪܵܐ: ܘܠܵܐ ܚܲܝ̈ܘܵܬܼܵܐ ܕܲܒܼܡܲܝ̈ܐ:
ܘܠܵܐ ܚܲܝ̈ܘܵܬܼܵܐ ܕܲܒܼܝܲܒܼܫܵܐ: ܘܠܵܐ ܦܵܪ̈ܚܵܬܼܵܐ: ܘܠܵܐ ܓܘܼܫܵܡܹ̈ܐܘ ܘܠܵܐ
ܢܲܦ̈ܫܵܬܼܵܐ: ܘܠܵܐ ܡܲܠܲܐܟܹ̈ܐ: ܘܠܵܐ ܕܲܝ̈ܘܹܐ: ܐܸܠܵܐ ܒܐܘܼܤܝܼܵܐ ܡ̇ܢ
ܘܒܲܩܢܘܿܡܵܐ ܐܝܼܬܲܝܗܘܿܢ ܚܵܫܘܿܫܹ̈ܐ. ܚܵܫ̇ܝܼܢ ܕܹܝܢ ܐܲܝܟܼ ܕܐܝܼܬܼ ܠܹܗ
ܠܲܟܼܝܵܢܗܘܿܢ ܥܲܗܢܘܼܬܼܵܐ ܕܢܸܚܲܫ: ܐܵܘ ܡܸܢܗܘܿܢ ܘܲܠܗܵܘܿܢ: ܐܵܘ
ܒܲܐ̄ܚܪܹܢܵܐ.
ܐܸܠܵܐ ܐܵܦܠܵܐ ܒܒܼܘܼܠܒܵܠܵܐ ܐܸܡܲ݁ܪ ܐܲܢ̄ܬܿ: ܘܠܵܐ ܬܘܼܒܼ ܒܫܘܼܚܠܵܦ
ܐܘܼܤܝܼܵܐ: ܘܠܵܐ ܒܡܸܬܼܚܲܒܿܠܵܢܘܼܬܼܵܐ: ܘܠܵܐ ܬܘܼܒܼ ܟܝܵܢܵܐܝܼܬܼ: ܐܲܝܟܼ
ܕܬܸܗܘܸܐ ܚܕܼܵܐ ܚܕܼܵܝܘܼܬܼܵܐ ܩܢܘܿܡܵܝܬܼܵܐ. ܡܵܕܹܝܢ ܠܗܵܝ̇ ܨܒܼܵܢܵܝܬܼܵܐ ܐܵܡܲ݁ܪ
ܐܲܢ̄ܬܿ: ܕܒܼܵܗ̇ ܡܸܬܼܪܲܢܝܵܐ ܚܕܼܵܝܘܼܬܼܵܐ ܕܠܵܐ ܒܘܼܠܒܵܠܵܐ ܘܲܕܼܠܵܐ ܚܲܫܵܐ
ܕܲܟܼܝܵܢܹ̈ܐ: ܠܚܲܕܼ ܦܲܪܨܘܿܦܵܐ: ܠܵܘ ܒܲܚܕܼܵܝܘܼܬܼܵܐ ܟܝܵܢܵܝܬܐ. ܦܲܪܨܘܿܦܵܐ ܓܹܝܪ
ܕܒܲܚܕܼܵܝܘܼܬܼܵܐ ܟܝܵܢܵܝܬܐ ܗܵܘܹ̇ܐ: ܡ̣ܢ ܬܪ̈ܲܝܗܘܿܢ ܟܝܵܢܹ̈ܐ ܕܐܸܬܼܚܲܝܲܕܸܘ
ܡܸܬܐܡܲܪ. ܐܲܟܼܙܢܵܐ ܕܒܲܪܢܵܫܵܐ: ܠܵܐ ܦܲܓܼܪܵܐ ܘܠܵܐ ܢܲܦܫܵܐ. ܠܲܟܼܝܵܢܵܐ
ܓܹܝܪ ܗܘ̤ܵܬܼ ܚܕܼܵܝܘܼܬܼܗܘܿܢ ܕܗܵܠܹܝܢ: ܘܲܠܦܲܪܨܘܼܦܵܐ ܕܲܟܼܝܵܢܵܐ. ܐܲܠܵܗܵܐ
pb. 241
ܕܹܝܢ: ܠܦܲܪܨܘܿܦܵܐ ܕܝܼܠܹܗ ܘܠܲܒܼܪܘܼܬܹܗ: ܢܤܲܒ̣ ܠܹܗ ܕܡܘܼܬܼܵܐ
ܕܥܲܒܼܕܵܐ: ܠܵܐ ܗ̄ܘ̣ܵܐ ܡ̣ܢ ܐ̄ܚܪܹܢܵܐ ܗܘ̤ܵܐ. ܕܐܲܝܟܼ ܗܵܠܹܝܢ ܓܹܝܪ
ܐܝܼܬܲܝܗܘܿܢ: ܐܲܝܠܹܝܢ ܕܠܲܟܼܝܵܢܵܐ ܡܸܬܼܚܲܝܕܝܼܢ. ܕܡܘܼܬܼܵܐ ܕܥܲܒܼܕܵܐ
ܢܤܲܒܼ: ܘܠܵܐ ܗ̄ܘ̣ܵܐ ܐܘܼܤܝܼܵܐ ܕܒܲܪܢܵܫܵܐ ܐܝܼܬܹܝܗ̇ ܗ̄ܘ̣ܵܬܼ ܕܡܘܼܬܼܵܐ
ܕܥܲܒܼܕܵܐ: ܐܸܠܵܐ ܗܵܘ̇ ܕܢܲܤܒܵܗ̇: ܠܲܕܼܡܘܼܬܼܵܐ ܘܲܠܦܲܪܨܘܿܦܵܐ ܐܲܩܝܼܡܵܗ̇.
ܘܒܲܕܡܘܼܬܼܵܐ ܕܒܲܢܲܝ̈ܢܵܫܵܐ ܗܘ̤ܵܐ: ܘܠܵܐ ܗ̄ܘ̣ܵܐ ܟܝܵܢܵܐ ܕܒܼܢܲܝ̈ܢܵܫܵܐ: ܐܵܦܸܢ
ܟܝܵܢܵܐ ܕܒܲܪܢܵܫܵܐ ܐܝܼܬܼܵܘܗܝ ܗ̄ܘ̣ܵܐ ܗܵܘ̇ ܕܲܢܤܲܒܼ. ܠܗܵܘ̇ ܕܢܲܤܒܹܗ:
ܒܲܕܡܘܼܬܼܵܐ ܕܒܲܪܢܵܫܵܐ ܗܘ̤ܵܐ. ܘܥܲܡ ܗܵܝ̇ ܕܒܸܐܤܟܹܡܵܐ ܐܸܫܬܿܟܲܚ ܐܲܝܟܼ
ܒܲܪܢܵܫܵܐ: ܗܵܘ̇ ܕܲܢܤܲܒܼ: ܘܠܵܘ ܗܵܘ̇ ܕܐܸܬܼܢܤܸܒܼ. ܗܵܘ̇ ܓܹܝܪ
ܕܐܸܬܼܢܤܸܒܼ: ܐܘܼܤܝܼܵܐ ܘܲܕܝܵܢܵܐ ܕܒܲܪܢܵܫܵܐ ܗ̄ܘ̣ܵܐ. ܗܵܘ̇ ܕܲܢܤܲܒܼ:
ܒܐܸܤܟܹܡܵܐ ܐܲܝܟܼ ܒܲܪܢܵܫܵܐ ܐܸܫܬܿܟܲܚ: ܟܲܕܼ ܠܵܐ ܐܝܼܬܼܵܘܗܝ ܟܝܵܢܵܐ
ܕܒܲܪܢܵܫܵܐ. ܠܵܐ ܗ̄ܘ̣ܵܐ ܓܹܝܪ ܠܲܟܼܝܵܢܵܐ ܢܲܤܒܹܿܗ ܠܹܗ: ܐܸܠܵܐ ܠܲܕܡܘܼܬܼܵܐ.
ܘܠܲܕܼܡܘܼܬܼܵܐ ܘܠܸܐܤܟܹܡܵܐ ܕܒܲܪܢܵܫܵܐ: ܒܟܼܠܗܹܝܢ ܐܲܝܠܹܝܢ ܕܦܲܪܨܘܿܦܐ
ܡܵܘܕܲܥ: ܟܲܕܼ ܠܡܸܤܟܹܢܘܼܬܼܵܐ ܕܐܸܤܟܹܡܵܐ ܡܸܫܬܲܥܸܐ: ܥܕܲܡܵܐ
ܠܡܵܘܬܵܐ ܐܸܬܼܢܲܚܲܬܼ: ܡܵܘܬܵܐ ܕܹܝܢ ܕܲܙܩܝܼܦܵܐ: ܕܒܹܗ ܢܲܦܫܹܗ ܤܲܪܸܩ.
ܐܲܝܟܲܢܵܐ ܕܒܲܟܼܝܵܢܵܐ ܠܡܲܟܿܝܼܟܼܘܼܬܼܵܐ ܕܲܕܡܘܼܬܼܵܐ ܕܥܲܒܼܕܵܐ ܢܚܵܘܸܐ:
ܘܲܠܨܲܥܪܵܐ ܕܒܹܝܬܼ ܒܢܲܝ̈ܢܵܫܵܐ ܢܤܲܝܒܲܪ. ܠܹܗ ܓܹܝܪ ܨܲܥܲܪܘ: ܠܗܵܘ̇
ܕܲܒܼܡܸܬܼܢܲܚܬܼܵܢܘܼܬܼܵܐ ܕܠܵܐ ܤܵܟܼܵܐ ܗ̄ܘ̣. ܐܵܘܕܲܥ̇ ܐܵܦ ܠܥܸܠܬܐ
ܕܡܸܛܠܵܬܼܵܗ̇ ܢܤܲܒܼ ܠܲܕܼܡܘܼܬܼܵܐ ܕܥܲܒܼܕܵܐ: ܟܲܕܼ ܒܲܕܡܘܼܬܼܵܐ ܕܲܒܼܢܲܝ̈ܢܵܫܵܐ
ܒܐܸܤܟܹܡܵܐ ܐܸܫܬܿܟܲܚ ܐܲܝܟܼ ܒܲܪܢܵܫܵܐ: ܘܡܲܟܸܟܼ ܢܲܦܫܹܗ ܥܕܲܡܵܐ
ܠܡܵܘܬܵܐ: ܡܵܘܬܵܐ ܕܹܝܢ ܕܲܙܩܝܼܦܵܐ. ܠܵܐ ܗ̄ܘ̣ܵܐ ܕܹܝܢ ܒܲܟܼܝܵܢܹܗ ܚܲܫ̣
pb. 242
ܐܸܢܹܝܢ: ܐܸܠܵܐ ܐܸܬܼܚܲܫܲܚ ܒܗܵܠܹܝܢ ܒܗܵܘ̇ ܕܲܟܼܝܵܢܵܐܝܼܬܼ ܚܵܐܹ̇ܫ: ܒܐܸܤܟܹܡܹܗ
ܘܲܒܼܦܲܪܨܘܼܦܹܗ: ܐܲܝܟܲܢܵܐ ܕܠܹܗ ܢܸܬܸܿܠ ܒܛܲܝܒܿܘܼ ܒܦܲܪܨܘܼܦܹܗ: ܫܡܵܐ
ܕܲܡܝܲܬܲܪ ܡ̣ܢ ܟܠ ܫܘܵܗ̈ܝܼܢ. ܕܠܹܗ ܟܠ ܒܪܘܿܟܿ ܬܸܟܿܘܿܦ ܕܒܲܫܡܲܝܵܐ
ܘܒܲܐܪܥܵܐ ܘܕܲܠܬܲܚܬܿ ܡ̣ܢ ܐܪܥܵܐ: ܘܟܼܠ ܠܸܫܵܢ ܢܵܘܕܸܐ ܠܹܗ. ܐܲܝܟܲܢܵܐ
ܕܲܒܼܦܘܼܚܵܡܵܐ ܕܐܲܠܵܗܵܐ: ܘܐܲܝܟܼ ܪܲܒܿܘܼܬܼܵܐ ܕܐܲܠܵܗܑܵܐ: ܢܸܬܼܪ̱ܢܸܐ ܒܪܵܐ: ܗܵܘ̇
ܕܲܢܤܲܒܼ ܕܡܘܼܬܼܵܐ ܕܥܲܒܼܕܵܐ: ܘܒܲܕܼܡܘܼܬܼܵܐ ܕܒܲܪܢܵܫܵܐ ܗܘ̤ܵܐ:
ܘܒܸܐܤܟܹܡܵܐ ܐܸܫܬܿܟܲܚ ܐܲܝܟܼ ܒܲܪܢܵܫܵܐ. ܘܡܲܟܸܿܟܼ ܢܲܦܫܹܗ ܥܕܲܡܵܐ
ܠܡܵܘܬܵܐ: ܡܵܘܬܵܐ ܕܹܝܢ ܕܲܙܩܝܼܦܵܐ. ܘܐܸܬܼܪܲܡܪܲܡ: ܒܕܸܐܬܼܝܼܗܸܒܼ ܠܹܗ
ܫܡܵܐ ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ: ܒܐܸܤܟܹܡܵܐ ܕܲܕܼܡܘܼܬܼܵܐ
ܕܥܲܒܼܕܵܐ ܕܐܸܬܼܢܲܤܒܲܬ̤ ܠܲܚܕܼܵܝܘܼܬܼܵܐ. ܗܵܘ̇ ܕܹܝܢ ܐܝܼܬܼܵܘܗܝ ܕܡܘܼܬܼܵܐ
ܕܥܲܒܼܕܵܐ: ܗ̄ܘ̣ܵܐ ܒܐܸܤܟܹܡܵܐ: ܐܸܠܵܐ ܒܐܘܼܤܝܼܵܐ. ܘܐܸܬܼܢܲܤܒܲܬ̤
ܠܲܕܼܡܘܼܬܼܵܐ ܘܠܸܐܤܟܹܿܡܵܐ ܘܲܠܡܲܘܼܟܵܟܼܵܐ ܕܲܥܕܲܡܵܐ ܠܡܵܘܬܵܐ
ܕܲܙܩܝܼܦܵܐ: ܡܸܛܠ ܗܵܢܵܐ ܐܸܬܼܪܲܡܪܡܲܬ̤ ܠܡܸܤܲܒܼ ܫܡܸܐ ܕܲܡܝܲܬܲܪ
ܡ̣ܢ ܟܠ ܫܡܵܗ̈ܝܼܢ.
ܠܡܸܤܬܲܟܵܠܘܼ ܕܹܝܢ ܐܘܼܤܝܼܵܐ ܠܲܕܼܡܘܼܬܼܵܐ ܕܥܲܒܼܕܵܐ: ܠܲܡܫܝܼܚܵܐ
ܤ̣ܵܡ ܗ̄ܘ̣ܵܐ ܠܡܸܤܬܲܟܵܠܘܼ. ܡܫܝܼܚܵܐ ܓܹܝܪ: ܒܲܟܼܝܵܢܵܐ ܐܝܼܬܼܵܘܗܝ
ܬܲܪ̈ܬܲܝܗܹܝܢ. ܡܸܛܠ ܗܵܢܵܐ: ܐܵܦ ܕܝܼܠܝ̈ܬܼܵܐ ܕܲܬܼܪ̈ܲܝܗܘܿܢ ܟܝܵܢܹ̈ܐ ܠܵܚ̈ܡܵܢ
ܒܚܲܕܼ ܦܲܪܨܘܼܦܵܐ: ܠܵܐ ܗ̄ܘ̣ܵܐ ܕܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ: ܘܠܵܐ ܗ̄ܘ̣ܵܐ
ܦܲܪܨܘܼܦܵܐ ܒܐܘܼܤܝܼܵܐ: ܠܵܐ ܗ̄ܘ̣ܵܐ ܓܹܝܪ ܒܐܘܼܤܝܼܵܐ ܐܝܼܬܼܵܘܗܝ ܕܐܲܠܵܗܵܐ
ܡܸܠܬܼܵܐ. ܘܠܵܐ ܗ̄ܘ̣ܵܐ ܦܲܪܨܘܿܦܵܐ ܕܲܚܕܼܵܝܘܼܬܼܵܐ ܐܝܼܬܼܵܘܗܝ ܕܲܟܼܝܵܢܹ̈ܐ
ܕܐܸܬܼܚܲܝܲܕܼ: ܐܲܝܟܲܢܵܐ ܕܲܒܼܚܲܕܼ ܦܲܪܨܘܿܦܵܐ ܕܐܲܠܵܗܵܐ ܡܸܠܬܼܵܐ ܢܠܲܚܸܡ
pb. 243
ܠܐܘܼܤ̈ܝܼܵܣ ܬܲܪ̈ܬܲܗܹܝܢ: ܠܵܐ ܓܹܝܪ ܐܝܼܬܼܵܘܗܝ ܒܐܘܼܤܝܼܵܐ ܬܲܪ̈ܬܲܝܗܹܝܢ.
ܠܵܘ ܐܲܝܟܼ ܡ̇ܢ ܕܲܐ̄ܚܪܹܢܵܐ ܗ̄ܘ̣ ܐܲܠܵܗܵܐ ܡܫܝܼܚܵܐ: ܠܒܲܪ ܡ̣ܢ ܐܠܵܗܵܐ
ܡܸܠܬܼܵܐ. ܐܸܠܵܐ ܕܡܵܘܕܥܵܢܵܐ ܗ̄ܘ̣ ܕܲܚܕܼܵܝܘܼܬܼܵܐ ܕܬܲܪ̈ܬܲܝܗܹܝܢ
ܐܘܼܤ̈ܝܼܵܣ: ܕܐܲܠܵܗܵܐ ܡܸܠܬܼܵܐ ܘܲܕܼܒܲܪܢܵܫܵܐ. ܐܲܠܵܗܵܐ ܕܹܝܢ ܘܒܲܪܢܵܫܵܐ:
ܡܸܢܗܘܿܢ ܐܝܼܬܼܵܘܗܝ ܡܫܝܼܚܵܐ: ܐܲܝܟܼ ܕܐܵܦ ܐܲܢ̄ܬܿ ܐܵܡܲ݁ܪ ܐܲܢ̄ܬܿ. ܠܵܐ
ܠܲܡ ܐܵܒܼ̇ܕܝܼܢ ܫܘܼܚ̈ܠܵܦܹܐ ܕܲܟܼܝܵܢܹ̈ܐ ܡܸܛܠ ܚܕܼܵܝܘܼܬܼܵܐ: ܐܸܠܵܐ ܓܡܲܪܘ
ܠܲܢ ܝܲܬܿܝܼܪܵܐܝܼܬܼ ܚܲܕܼ ܡܵܪܝܵܐ ܘܲܡܫܝܼܚܵܐ ܘܲܒܼܪܵܐ: ܒܚܲܕܼ ܪܲܗܛܵܐ ܠܵܐ
ܡܸܬܼܡܲܠܠܵܢܵܐ ܘܠܵܐ ܡܸܬܿܕܲܪܟܵܢܵܐ ܕܲܠܘܵܬܼ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ
ܘܲܕܐ̄ܢܵܫܘܼܬܼܵܐ. ܐܵܦܸܢ ܒܐܲܝܠܹܝܢ ܕܛܵܒܼܵܐܝܼܬܼ ܐܸܡܲܪܬܿ: ܕܡܸܬܼܚܙܸܐ ܐܲܢ̄ܬܿ
ܕܡܸܬܿܬܿܘܸܐ ܐܲܢ̄ܬܿ. ܠܵܐ ܗ̄ܘ̣ܵܐ ܓܹܝܪ ܡ̣ܢ ܐܲܠܵܗܘܼܬܼܵܐ ܘܡ̣ܢ ܐ̄ܢܵܫܘܼܬܼܵܐ:
ܐܸܬܼܓܲܡܪܲܬ̤ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ. ܡܸܛܠ ܕܠܵܘ ܡ̣ܢ ܚܕܼܵܝܘܼܬܼܵܐ
ܐܝܼܬܼ ܠܹܗ ܕܢܸܗܘܸܐ ܐܲܠܵܗܵܐ ܡܸܠܬܼܵܐ: ܐܲܝܟܼ ܕܐܝܼܬܼܵܘܗܝ ܡܫܝܼܚܵܐ ܡ̣ܢ
ܐܲܠܵܗܘܼܬܼܵܐ ܘܡ̣ܢ ܐ̄ܢܵܫܘܼܬܼܵܐ. ܡܵܘܕܥܵܢܝܼܬܼܵܐ ܓܹܝܪ ܕܐ̄ܢܵܫܘܼܬܼܵܐ: ܐܝܼܬܹܝܗ̇
ܡܸܬܼܒܲܪܢܫܵܢܘܼܬܼܵܐ. ܘܠܵܐ ܗ̄ܘ̣ܵܐ ܒܲܠܚܘܿܕܼ ܡ̣ܢ ܐܲܠܵܗܘܼܬܼܵܐ ܡܸܬܼܪܲܢܝܵܐ:
ܟ̱ܠܵܗ̇ ܗܵܝ̇ ܕܐܸܬܼܒܲܢܲܫ: ܐܸܠܵܐ ܐܵܦ ܡ̣ܢ ܡܸܬܼܒܲܪܢܫܵܢܘܼܬܼܵܐ ܕܒܲܪܢܫܲܬ̤.
ܡܸܛܠ ܗܵܢܵܐ ܤܵܐܹ̇ܡ ܫܠܝܼܚܵܐ ܦܲܪܨܘܿܦܵܐ ܕܲܚܕܼܵܝܘܼܬܼܵܐ: ܘܵܗܵܝܕܹܝܢ
ܗܵܢ̇ܘܿܢ ܕܡܸܢܗܘܿܢ ܐܝܬܹܝܗ̇ ܚܕܼܵܝܘܼܬܼܵܐ. ܐܵܡܲ݁ܪ ܩܲܕܼܡܵܝܑܬܼ ܕܡܘܼܬܼܵܐ
ܕܐܲܠܵܗܵܐ ܕܐܝܼܬܹܝܗ̇ ܦܸܚܡܵܐ ܕܐܵܠܵܗܵܐ: ܘܗܵܝܕܹܝܢ ܢܸܤܒܲܬ̤ ܕܡܘܼܬܼܵܐ
ܕܥܲܒܼܕܵܐ. ܠܵܘ ܠܐܘܼܤܝܼܵܐ: ܘܠܵܘ ܠܲܟܼܝܵܢܵܐ: ܐܸܠܵܐ ܠܐܸܤܟܹܡܵܐ
ܘܲܠܦܲܪܨܘܿܦܵܐ. ܐܲܝܟܲܢܵܐ ܕܢܸܫܬܵܘܬܲܦ ܒܲܕܼܡܘܼܬܼܵܐ ܕܥܲܒܼܕܵܐ: ܘܐܵܦ
ܕܡܘܼܬܼܵܐ ܕܥܲܒܼܕܵܐ ܬܸܫܬܵܘܬܲܦ ܠܲܕܼܡܘܼܬܼܵܐ ܕܐܲܠܵܗܵܐ. ܐܲܝܟܼ ܕܡ̣ܢ
pb. 244
ܐܵܢܲܢܩܹܐ ܡ̣ܢ ܬܪ̈ܲܝܗܘܿܢ ܟܝܵܢܹ̈ܐ: ܢܸܗܘܸܐ ܚܲܕܼ ܦܲܪܨܘܿܦܵܐ. ܐܝܼܬܼܵܘܗܝ
ܓܹܝܪ ܦܲܪܨܘܼܦܵܐ: ܕܡܘܼܬܼܵܐ. ܐܲܝܟܲܢܵܐ ܕܒܼܐܘܼܤܝܼܵܐ ܐܝܼܬܼܵܘܗܝ ܗܵܢܵܐ:
ܘܒܲܚܕܼܵܝܘܼܬܼܵܐ ܗܵܘ̇: ܒܡܸܠܬܼܵܐ ܕܡܘܼܟܵܟܼܵܐ ܘܲܕܼܪܘܼܡܪܵܡܵܐ. ܐܲܝܟܲܢܵܐ
ܗܵܟܹܝܠ ܦܵ̇ܩܹ̇ܕܼ ܐܲܢ̄ܬܿ ܠܲܢ: ܕܫܘܼܚ̈ܠܵܦܹܐ ܕܲܟܼܝܵܢܹ̈ܐ ܗܵܠܹܝܢ ܢܸܤܬܲܟܲܠ
ܒܲܚܕܼܵܝܘܼܬܼܵܐ؟ ܠܵܘ ܓܹܝܪ ܚܕܼܵܝܘܼܬܼܵܐ ܠܫܘܼܚ̈ܠܵܦܹܐ ܕܲܟܼܝܵܢܹ̈ܐ ܐܲܪܝܼܡܲܬ̤:
ܕܠܵܐ ܢܸܤܬܲܟܲܠ ܐܸܢܘܿܢ ܬܘܼܒܼ ܡ̣ܢ ܕܪܹܫ ܠܫܘܼܚ̈ܠܵܦܹܐ ܗܵܠܹܝܢ. ܗܵܘ̇
ܓܹܝܪ ܕܲܢܤܲܒܼ ܕܡܘܼܬܼܵܐ ܕܥܲܒܼܕܵܐ: ܠܚܘܿܕܼܵܐܝܼܬܼ ܕܝܼܠܵܢܵܝܬܼܵܐ ܗ̣̄ܝ
ܕܲܕܼܡܘܼܬܼܵܐ ܕܐܲܠܵܗܵܐܘ ܗܵܝ̇ ܕܹܝܢ ܕܐܸܬܼܢܲܤܒܲܬ̤: ܝܑܼܚܝܼܕܼܵܐܝܬܼ ܕܲܕܼܡܘܼܬܼܵܐ
ܗ̣̄ܝ ܕܥܲܒܼܕܵܐ. ܗܵܝ̇ ܕܹܝܢ: ܕܗܵܢܵܐ ܗܵܘ̇: ܘܗܵܘ̇ ܗܵܢܵܐ: ܒܲܚܕܼܵܝܘܼܬܼܵܐ
ܕܦܲܪܨܘܿܦܵܐ: ܘܠܵܘ ܕܐܘܼܤܝܼܵܐ. ܐܲܝܟܲܢܵܐ: ܕܐܲܝܟܲܢ ܕܐܝܼܬܹܝܗ̇ ܗܵܕܹܐ ܒܐܘܼܤܝܼܵܐ:
ܬܸܗܘܸܐ ܗܵܝ̇ ܒܲܚܕܼܵܝܘܼܬܼܵܐ: ܘܠܵܘ ܐ̄ܚܪܹܬܼܵܐ. ܗܵܝ̇ ܕܒܼܐܘܼܤܝܼܵܐ ܕܡܘܼܬܼܵܐ
ܕܐܲܠܵܗܵܐ ܐܝܼܬܹܝܗ̇: ܘܒܲܪܬܼ ܟܝܵܢܵܐ ܕܗܵܕܹܐ ܐܘܼܤܝܼܵܐ: ܒܗܵܝ̇ ܕܐܝܼܬܹܝܗ̇
ܕܡܘܼܬܼܵܐ ܟܝܵܢܵܝܬܼܵܐ. ܒܲܚܕܼܵܝܘܼܬܼܵܐ ܕܹܝܢ: ܕܡܘܼܬܼܵܐ ܕܐܲܠܵܗܵܐ ܠܲܕܼܡܘܼܬܼܵܐ
ܕܥܲܒܼܕܵܐ ܢܸܤܒܲܬ̤. ܘܲܕܡܘܼܬܼܵܐ ܕܐܲܠܵܗܑܵ: ܕܐܝܼܬܹܝܗ̇ ܟܝܵܢܵܐܝܼܬܼ ܕܐܲܠܵܗܵܐ:
ܒܐܸܤܟܹܡܵܐ ܕܡܘܼܬܼܵܐ ܕܥܲܒܼܕܵܐ ܗܘ̤ܵܬܼ. ܕܡܘܼܬܼܵܐ ܕܹܝܢ ܕܥܲܒܼܕܵܐ:
ܕܐܝܬܹܝܗ̇ ܟܝܵܢܵܐܝܼܬܼ ܕܡܘܼܬܼܵܐ ܕܥܲܒܼܕܵܐ: ܘܒܲܚܕܼܵܝܘܼܬܼܵܐ ܕܡܘܼܬܼܵܐ
ܕܐܲܠܵܗܵܐ: ܠܵܘ ܟܝܵܢܵܐܝܼܬܼ ܕܐܲܠܵܗܵܐ. ܐܲܝܟܲܢܵܐ ܕܝܼܚܝܼ̈ܕܼܵܝܬܼܵܐ ܒܲܟܼܝܵܢܵܐ ܕܟܼܠ
ܚܲܕܼ ܚܲܕܼ ܡܸܢܗܘܿܢ ܟܝܵܢ̈ܝܵܢ ܝܑܼܚܝܼܕܼܵܐܝܼܬܼ ܢܸܤܬܲܟܲܠ: ܘܲܒܼܟܼܠ ܚܲܕܼ ܚܲܕܼ
ܡ̣ܢ ܟܝܵܢܹ̈ܐ ܠܦܘܼܪ̈ܫܵܢܹܐ ܟܝܵܢܵܝܹ̈ܐ. ܘܠܲܐܝܠܹܝܢ ܕܕܲܚܕܼܵܝܘܼܬܼܵܐ ܐܸܢܹܝܢ:
ܝܑܼܚܝܼܕܼܵܐܝܼܬܼ ܕܲܚܕܲܝܘܼܬܼܵܐ: ܘܠܵܘ ܕܐܘܼܤܝܼܵܐ ܢܸܤܢܲܟܲܠ. ܐܲܝܟܲܢܵܐ ܗܵܟܹܝܠ
ܦܵܩܹ̇ܕܼ ܐܲܢ̄ܬܿ ܠܲܢ: ܕܠܵܐ ܢܸܪܢܸܐ ܡܸܕܸܡ ܡ̣ܢܡ ܗܵܠܹܝܢ ܠܚܘܿܕܵܐܝܼܬܼ ܡ̣ܢ
pb. 245
ܦܘܼܪܫܵܢܵܐ ܕܲܟܼܝܵܢܹ̈ܐ: ܗܵܢ̇ܘܿܢ ܕܐܸܡ݂ܲܪܬܿ ܕܠܵܐ ܐܵܒܼ̇ܕܝܼܢ ܡܸܛܠ ܚܕܼܵܝܘܼܬܼܵܐ؟
ܐܸܠܵܐ ܠܵܟܼ ܡ̇ܢ ܠܲܝܬܿ ܠܵܟܼ ܕܲܬܼܦܲܢܸܐ ܦܸܬܼܓܼܵܡܵܐ: ܘܠܵܐ ܕܬܲܟܿܤܲܢܝ
ܒܐܲܝܠܹܝܢ ܕܲܢܩܲܛܪܸܓܼ ܐܲܢ̄ܬܿ ܠܝܼ. ܐܸܠܵܐ ܠܢܲܦܫܵܟܼ ܡܩܲܛܪܸܓܼ ܐܲܢ̄ܬܿ:
ܒܐܲܝܠܹܝܢ ܕܠܝܼ ܨܵܒܹ̇ܐ ܐܲܢ̄ܬܿ ܠܲܡܩܲܛܪܵܓܼܿܘܼ: ܘܕܲܠܩܘܼܒܼܠܵܐ ܐܵܡܲ݁ܪ
ܐܲܢ̄ܬܿ ܕܢܲܦܫܵܟܼ܀
ܐܲܢ̄ܬܿܘܿܢ ܕܹܝܢ ܐܘܿ ܕܲܝܵܢܹ̈ܐ ܟܹܐܢܹ̈ܐ: ܡܵܢܵܐ ܒܲܚܸܢܬܿܘܿܢ ܡ̣ܢ ܗܵܠܹܝܢ؟
ܐܵܘ ܥܲܠ ܗܵܠܹܝܢ ܕܲܦܠܲܚܢ ܒܲܒܼܥܵܬܼܵܐ: ܐܵܘ ܡ̣ܢ ܗܵܠܹܝܢ ܕܐܸܡܲܪܢ: ܘܡ̣ܢ
ܗܵܠܹܝܢ ܕܐܵܘ̇ܕܝܼܬܼ: ܘܡ̣ܢ ܗܵܠܹܝܢ ܕܟܸܦ̇ܪܹܬܼ ܕܠܵܐ ܡܸܬܼܪܲܥܸܐ ܐ̄ܢܵܐ:
ܐܲܟܸܤܘ ܠܛܵܥܝܵܐ: ܐܵܘ ܐܲܠܸܦܘ ܠܠܵܐ ܝܵܕܼܘܿܥܵܐ. ܠܵܐ ܗ̄ܘ̣ܵܐ ܓܹܝܪ
ܡ̣ܢ ܐܲܝܠܹܝܢ ܕܟܼܵܦܲܪ ܐ̄ܢܵܫ: ܡ̣ܢ ܗܵܠܹܝܢ ܐܲܝܟܼ ܗܲܪܵܛܝܼܩܵܐ ܢܸܬܼܚܲܝܲܒܼ:
ܐܸܠܵܐ ܡ̣ܢ ܗܵܠܹܝܢ ܕܡܵܘܕܹܐ. ܗܵܟܲܢܵܐ ܐܵܪܝܼܘܿܣ: ܗܵܟܲܢܵܐ ܐܘܼܢܵܡܝܼܣ:
ܗܵܟܲܢܵܐ ܡܵܩܸܕܘܿܢܝܼܣ: ܗܵܟܲܢܵܐ ܟܠܚܲܕܼ ܡ̣ܢ ܗܲܪ̈ܲܛܝܼܩܹܐ: ܡ̣ܢ ܐܲܝܠܹܝܢ
ܕܐܵܘܕܝܼܘ ܕܲܠܩܘܼܒܼܠܵܐܝܼܬܼ: ܘܲܕܼܪܵܫ̣ܘ ܘܐܸܬܼܒܚܲܪܘ: ܘܐܸܬܼܚܲܝܲܒܼܘ ܡ̣ܢ
ܐܲܒܼ̈ܗܵܬܼܵܐ. ܡܵܢܵܐ ܗܵܫܵܐ ܐܵܦ ܐܲܢ̄ܬܿܘܿܢ: ܡܸܬܿܕܲܡ̈ܝܵܢܹܐ ܕܗܵܢ̇ܘܿܢ: ܡܵܢ ܡ̣ܢ
ܗܵܘ̇ ܕܐܵܘ̇ܕܝܼܬܼ ܘܕܸܪܫܹ̇ܬܼ ܐܝܼܬܼܵܘܗܝ ܕܠܩܘܼܒܼܠܗܘܿܢ: ܕܐܲܝܟܼ
ܗܲܪܵܛܝܼܩܵܐ ܚܲܝܒܼܘܼܢܝ؟ ܡܵܢܵܐ ܐܸܫܟܲܚܬܿܘܿܢ ܒܐܸܓܲܪܬܿܝ: ܕܐܝܼܬܼܵܘܗܝ
ܕܲܠܩܘܼܒܼܠܵܐ ܕܲܤܝܵܡܵܐ ܕܐܲܒܼ̈ܗܵܬܼܵܐ؟ ܐܸܢ ܐܸܡ̇ܪܹܬܼ: ܘܐܸܢ ܠܵܐ ܐܸܡ̇ܪܹܬܼ:
ܐܸܡܲܪܘ. ܗܵܘ̇ ܗܵܟܲܢܵܐ ܐܸܡ݂ܲܪ: ܕܟܼܠܗܹܝܢ ܐܲܝܠܹܝܢ ܕܥܲܠ ܡܫܝܼܚܵܐ
ܤܵܠ݁̈ܩܵܢ ܡ̣ܢ ܟܬܼܵܒܹ̈ܐ ܐܲܠܵܗܵܝܹ̈ܐ: ܥܲܠ ܐܲܠܵܗܵܐ ܡܸܠܬܼܵܐ ܙܵܕܹܩ ܕܢܸܤ̈ܩܵܢ:
ܡܵܘܠܵܕܼܵ ܕܡ̣ܢ ܐܲܢ̄ܬܿܬܼܵܐ: ܙܩܝܼܦܵܐ: ܡܵܘܬܵܐ: ܩܒܼܘܼܪܬܑܵܐ: ܩܝܵܡܬܼܵܐ:
ܤܘܼܠܵܩܵܐ: ܘܡܹܐܬܼܝܼܬܼܵܐ ܕܬܲܪܬܹܝܢ ܕܡ̣ܢ ܕܪܹܫ ܟܲܕܼ ܐܵܬܹ̇ܐ: ܠܵܐ ܗ̄ܘ̣ܵܐ
pb. 246
ܡ̣ܢ ܐܲܝܠܹܝܢ ܕܫܲܪܝܼܘ ܐܲܒܼ̈ܗܵܬܼܵܐ . . . ܐܸܢܵܐ ܕܹܝܢ ܐܸܡ̇ܪܹܬܼ ܠܘܵܬܼ
ܗܵܠܹܝܢ: ܠܡܵܐ ܠܵܘ ܗܵܠܹܝܢ ܐܸܡ݂ܲܪܘ ܐܲܒܼ̈ܗܵܬܼܵܐ: ܘܡܸܛܠ ܗܵܕܹܐ ܐܵܦܠܵܐ
ܡ̣ܢ ܗܵܪܟܵܐ ܙܵܕܹܩ ܕܲܢܫܲܪܸܐ. ܐܵܦ ܠܚܘܼܫܵܒܼܵܐ ܐܸܡ̇ܪܹܬܼ: ܠܵܐ ܓܹܝܪ
ܡܸܬܼܪܲܥܹܝܢ ܗ̄ܘ̣ܵܘ: ܕܠܲܐܠܵܗܵܐ ܡܸܠܬܼܵܐ: ܚܵܫܘܿܫܵܐ: ܡܵܝܘܿܬܼܵܐ: ܘܲܥܒܼܝܼܕܼܵܐ:
ܘܒܲܪܝܵܐ: ܘܡ̣ܢ ܐܲܝܠܹܝܢ ܕܠܲܝܬܿ ܗ̣̄ܘܲܝ̈ ܕܲܗܘ̤ܵܐ ܢܚܵܘܘܿܢܵܝܗܝ.
ܗܵܠܹܝܢ: ܕܗܵܢ̇ܘܿܢ ܕܡ̣ܢ ܬܲܡܵܢ ܡܫܲܪܹܝܢ: ܡܸܬܼܐܲܨܝܼܢ ܠܡܹܐܡܲܪ.
ܐܸܠܵܐ ܕܕܲܠܩܘܼ̈ܒܼܠܵܝܵܬܼܵܐ ܕܐܲܝܠܹܝܢ: ܕܐܸܡ݂ܲܪ ܘܐܲܠܸܦ̣ ܐܵܪܝܼܘܿܣ. ܡܸܛܠ
ܗܵܢܵܐ: ܡ̣ܢ ܚܕܼܵܝܘܼܬܼܵܐ ܕܦܲܪܨܘܼܦܵܐ ܕܲܡܫܝܼܚܵܐ ܥܒܲܕܼܘ ܫܘܼܪܵܝܵܐ
ܕܡܲܠܦܵܢܘܼܬܼܵܐ. ܐܲܝܟܲܢܵܐ ܕܲܠܗܵܠܹܝܢ ܕܐܲܠܵܗܘܼܬܼܵܐ؟ ܘܲܠܗܵܠܹܝܢ
ܕܐ̄ܢܵܫܘܼܬܼܵܐ: ܡܛܲܟܼܤܵܐܝܼܬܼ ܒܘܵܠܝܼܬܼܵܐ ܢܩܲܒܿܠܘܼܢ: ܠܵܘ ܕܒܼܘܼܠܒܵܠܵܐ
ܕܲܟܼܝܵܢܹ̈ܐ ܐܵܘ ܕܒܼܘܼܛܵܠܵܐ ܢܸܗܘܸܐ. ܐܸܠܵܐ ܠܘܼܩܒܲܠ ܟܠܗܹܝܢ ܗܹܪܹ̈ܤܝܼܵܣ
ܡܸܬܼܟܲܬܿܫܝܼܢ: ܘܒܼܵܐܪܬܵܕܘܿܤܝܼܵܐ ܡܫܲܪܪܝܼܢ ܡܫܲܪܪܐܝܼܬܼ ܟܲܕܼ ܡܦܲܢܹܝܢ
ܦܸܬܼܓܼܵܡܵܐ: ܟܲܕܼ ܐܵܡ̇ܪܝܼܢ ܦܸܬܼܓܼܵܡܹ̈ܐ ܗܵܠܹܝܢ: ܡܗܲܝܡܸܢ ܐ̄ܢܵܐ ܒܚܲܕܼ
ܡܵܪܝܵܐ ܝܼܫܘܿܥ ܡܫܝܼܚܵܐ ܒܪܵܐ ܝܑܼܚܝܼܕܼܵܝܵܐ. ܒܲܚܸܢ: ܐܸܡ̇ܪܹܬܼ ܠܹܗ: ܐܲܝܟܲܢܵܐ
ܡܵܪܝܵܐ: ܘܝܼܫܘܿܥ ܡܫܝܼܚܵܐ: ܘܝܼܚܝܼܕܼܵܝܵܐ: ܘܲܒܼܪܵܐ: ܩܲܕܼܡܵܝܑܬܼ ܤܵܡ̣ܘ
ܗ̄ܘ̣ܵ. ܫܡܵܗܹ̈ܐ ܕܓܼܵܘܵܐ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ ܐܲܝܟܼ ܫܲܬܼܐܸܤܬܼܵܐ:
ܘܗܵܝܕܹܝܢ ܠܡܲܫܡܵܢܘܼܬܼܵܐ ܕܡܸܬܼܒܲܪܢܫܵܢܘܼܬܼܵܐ ܘܲܕܼܚܲܫܹ̈ܐ ܘܕܲܩܝܵܡܬܼܵܐ
ܥܠܹܝܗ̇ ܒܵܢܹ̇ܝܢ. ܕܟܲܕܼ ܩܵܕܼܡ̇ܝܼܢ ܤܵܝ̇ܡܝܼܢ ܫܡܵܗܹ̈ܐ ܕܬܼܪ̈ܲܝܗܘܿܢ
ܟܝܵܢܹ̈ܐ: ܕܐܝܼܬܲܝܗܘܿܢ ܡܫܵܘ̈ܕܥܵܢܹܐ ܕܗܵܠܹܝܢ ܕܓܼܵܘܵܐ: ܠܵܐ ܗܵܝ̇ ܕܲܒܼܪܘܼܬܼܵܐ
ܘܡܵܪܘܼܬܼܵܐ ܐܸܤܬܿܕܸܩ: ܘܠܵܐ ܗܵܝ̇ ܕܲܟܼܝܵܢܹ̈ܐ ܒܲܚܕܼܵܝܘܼܬܼܵܐ ܕܲܒܼܪܘܼܬܼܵܐ
pb. 247
ܠܩܹܘܲܢܕܹܝܢܘܿܣ ܬܹܐܬܸܐ ܕܚܲܘܼܒܵܠܵܐ ܘܲܕܼܒܼܘܼܠܒܵܠܵܐ܀
. . . . . . . . . . .
ܡܵܢܵܐ ܡܸܟܹܝܠ ܡܸܬܼܚܙܸܐ ܠܟܼܘܿܢ: ܐܘܿ ܕܲܝܵܢܹ̈ܐ ܟܹܐܢܹ̈ܐ؟ ܡܸܛܠ
ܕܗܵܘ̇ ܟܬܲܒܼ ܪܸܥܝܵܢܵܐ ܕܲܫܦܲܪ ܠܹܗ: ܘܐܸܢܵܐ ܬܘܼܒܼ ܟܸܬܼܒܹܿܬܼ ܪܸܥܝܵܢܝ
ܒܵܗ̇ ܒܲܕܼܡܘܼܬܼܵܐ. ܕܲܝܵܢܹ̈ܐ ܕܹܝܢ ܬܘܼܒܼ ܠܟܼܘܿܢ ܓܵܒܹ̇ܝܢܲܢ: ܡܵܢܵܐ
ܐܸܬܼܚܲܫܲܒܼܬܿܘܿܢ ܥܲܠ ܗܵܠܹܝܢ؟ ܐܲܝܢܵܐ ܪܸܥܝܵܢܵܐ ܐܝܼܬܼ ܠܟܼܘܿܢ ܥܠܲܝܗܹܝܢ؟
ܡܲܢܘܼ ܟܹܐܝܢ: ܐܵܘ ܡܲܢ̣ܘܼ ܥܵܘ̇ܠ؟ ܘܒܲܐܝܢܵܐ ܚܘܼܫܵܒܼܵܐ ܒܲܚܸܢܬܿܘܿܢ؟
ܐܸܡܲܪܘ ܠܲܢ ܪܸܥܝܵܢܟܼܘܿܢ: ܟܬܼܘܿܒܼܘ ܠܲܢ: ܐܲܝܟܼ ܕܲܝܢܹ̈ܐ ܟܹܐܢܹ̈ܐ.
ܐܵܪܵܐ ܐܸܢܵܐ ܕܲܓܠܹ̇ܬܼ ܘܥܸܒܲܪܬܼ ܥܲܠ ܗܲܝܡܵܢܘܼܬܼܵܐ ܕܐܲܒܼ̈ܗܵܬܼܵܐ: ܥܲܠ
ܕܐܸܡ̇ܪܹܬܼ ܠܹܗ. ܕܡ̣ܢ ܗܵܪܟܵܐ ܫܲܪܝܼܘ: ܠܵܐ ܗ̄ܘ̣ܵܐ ܡ̣ܢ ܐܲܠܵܗܵܐ
ܡܸܠܬܼܵܐ: ܐܸܠܵܐ ܡ̣ܢ ܚܲܕܸ ܡܵܪܝܵܐ ܝܼܫܘܿܥ ܡܫܝܼܚܵܐ ܒܪܵܐ ܕܐܲܠܵܗܵܐ؟ ܐܲܝܟܼ
ܕܠܲܐܝܢܵܐ ܕܐܵܘܤܸܦ ܥܲܠ ܗܵܠܹܝܢ: ܠܝܼ ܚܲܝܸܒܼܬܿܘܿܢ. ܘܲܠܗܵܘ̇ ܙܲܟܿܝܼܬܘܿܢ:
ܠܐܲܝܢܵܐ ܕܠܲܓܼܡܵܪ ܠܵܐ ܢܛܲܪ ܗܲܝܡܵܢܘܼܬܼܗܘܿܢ: ܐܸܠܵܐ ܚܫܲܒܼ ܐܸܢܘܿܢ
ܕܲܫܚܝܸܡܵܐܝܼܬܼ ܘܲܕܼܠܵܐ ܦܘܼܪܫܵܢܵܐ ܐܸܬܼܚܲܫܲܚܘ ܒܲܫܡܵܗܹ̈ܐ ܗܵܠܹܝܢ. ܐܸܢܸܐ
ܕܹܝܢ ܐܸܡ̇ܪܹܬܼ: ܕܠܵܘ ܫܚܝܼܡܵܐܝܼܬܼ ܫܲܪܝܼܘ ܡ̣ܢ ܗܵܪܟܵܐ: ܐܸܠܵܐ ܒܢܝܼܫܵܐ
ܐܲܠܵܗܵܝܵܐ. ܐܸܢܗ̤ܘ ܕܲܒܼܗܵܕܹܐ ܐܲܪܫܥܹ̇ܬܼ: ܚܵܘܵܐܘܼܢܝ. ܘܐܸܠܵܐ: ܕܲܠܡܵܐ
ܠܥܸܠܬܼܵܐ ܗܵܝ̇ ܕܐܸܡ̇ܪܹܬܼ ܠܹܗ ܕܡ̣ܢ ܗܵܪܟܵܐ ܫܲܪܝܼܘܼ: ܐܲܤܠܝܼܬܿܘܿܢ ܐܲܝܟܼ
ܐܲܝܕܵܐ ܕܪܘܼܫܥܵܐ ܐܝܼܬܹܝܗ̇: ܕܢܸܗܘ̈ܝܵܢ ܗܵܠܹܝܢ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ
ܕܓܼܵܘܵܐ: ܐܲܝܟܼ ܡܵܐ ܕܲܡܫܵܘܕܥܝܼܢ ܫܡܵܗܹ̈ܐ؟ ܘܲܕܼܡܸܛܠ ܡܲܠܦܵܢܘܼܬܼܵܐ
pb. 248
ܡܫܲܡܠܲܝܬܼܵܐ ܘܲܙܗܝܼܪܬܵܐ ܨܒܼܵܘ ܠܲܡܫܲܪܵܝܘܼ ܡ̣ܢ ܫܡܵܗܹ̈ܐ ܗܵܠܹܝܢ:
ܐܲܝܟܼ ܡ̇ܢ ܕܐܝܼܬܼܵܘܗܝ ܫܲܪܝܼܪܵܐܝܼܬܼ ܫܡܵܐ ܕܲܡܫܝܼܚܵܐ ܒܲܟܼܝܵܢܹ̈ܐ ܬܪ̈ܲܝܗܘܿܢ:
ܒܲܪܢܵܫܵܐ ܘܐܲܠܵܗܵܐ. ܐܸܠܵܐ ܐܸܢ ܡܸܛܠ ܗܵܕܹܐ: ܐܵܦ ܠܗܵܢܵܐ ܙܵܕܹܩ ܗ̄ܘ̣ܵܐ
ܕܲܬܼܚܲܒܼܘܼܢ. ܐܸܡ݂ܲܪ ܗ̄ܘ̣ܵܐ ܓܹܝܪ: ܕܲܡܫܲܚܠܦܝܼܢ ܐܸܢܘܿܢ ܟܝܵܢܹ̈ܐ ܕܐܸܬܼܟܲܢܲܫܘ
ܠܪܲܗܛܵܐ ܕܲܚܕܼܵܝܘܼܬܼܵܐ. ܚܲܕܼ ܕܹܝܢ ܡ̣ܢ ܬܪ̈ܲܝܗܘܿܢ ܡܫܝܼܚܵܐ: ܠܵܐ ܗ̄ܘ̣ܵܐ
ܚܲܕܼ ܐܲܠܵܗܵܐ ܡܸܠܬܼܵܐ ܡ̣ܢ ܬܪ̈ܲܝܗܘܿܢ: ܠܵܐ ܓܹܝܪ ܡܸܬܿܬܿܪܝܼܡ ܫܘܸܚܠܵܦܵܐ
ܕܲܟܼܝܵܢܹ̈ܐ ܡܸܛܠ ܚܕܼܵܝܘܼܬܼܵܐ. ܡܵܕܹܝܢ ܕܲܡܫܝܼܚܵܐ ܐܝܼܬܲܝܗܘܿܢ ܬܪ̈ܲܝܗܘܿܢ
ܟܝܵܢܹ̈ܐ: ܘܠܵܐ ܗ̄ܘ̣ܵܐ ܕܐܲܠܵܗܵܐ ܡܸܠܬܼܵܐ. ܐܵܘ ܗܵܟܹܝܠ ܠܡܸܠܲܝ̈ ܕܝܼܠܝ
ܘܕܝܼܠܹܗ ܚܲܝܸܒܼܘ: ܐܵܘ ܒܗܵܠܹܝܢ ܕܗܵܘ̇: ܐܵܦ ܠܝܼ ܙܲܟܵܝܵܐ ܚܘܼܫܒܘܼܢܵܢܝ:
ܐܲܝܟܼ ܐܲܝܢܵܐ ܕܡܵܘܕܸܐ ܒܟܼܠܗܹܝܢ. ܐܸܢܕܹܝܢ ܠܵܐ: ܐܲܝܟܵܐ ܕܥܲܠ ܐܲܠܵܗܵܐ
ܡܸܠܬܼܵܐ ܡܵܘܕܲܥ ܕܗ̤ܘܝܘܼ ܒܐܘܼܤ̈ܝܼܵܣ ܬܲܪ̈ܬܲܝܗܹܝܢ: ܝܵܘܵܘ: ܐܵܘ ܗܵܢܵܐ
ܐܵܘ ܐܲܢ̄ܬܿܘܿܢ: ܡ̣ܢ ܐܲܝܕܵܐ ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ ܒܲܟܼܢܘܼܫܝܵܐ ܐܸܬܼܓܡܲܪ
ܐܲܠܵܗܵܐ ܡܸܠܬܼܵܐ؟ ܠܚܲܕܼ ܓܹܝܪ ܡܫܝܼܚܵܐ ܐܸܡ݂ܲܪ ܕܐܝܼܬܼܵܘܗܝ ܡ̣ܢ ܟܝܵܢܹ̈ܐ
ܡܫܲܚ̈ܠ̱ܦܹܐ: ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܘܐܸܬܼܓܹܡܲܪ ܠܵܐ ܡܸܬܼܡܲܠܠܵܢܵܐܝܼܬܼ
ܡ̣ܢ ܟܢܘܼܫܝܵܐ ܕܲܟܼܝܵܢܹ̈ܐ. ܡ̣ܢ ܐܲܝܠܹܝܢ ܟܝܵܢܹ̈ܐ؟ ܘܡ̣ܢ ܐܲܝܠܹܝܢ ܐܘܼܤ̈ܝܼܵܣ؟
ܡ̣ܢ ܐܲܝܕܵܐ ܐܲܠܵܗܘܼܬܼܵܐ: ܡ̣ܢ ܐܲܝܕܵܐ ܐ̄ܢܵܫܘܼܬܼܵܐ ܐܸܬܼܓܡܲܪ ܐܲܠܵܗܵܐ ܡܸܠܬܼܵܐ:
ܕܢܸܗܘܸܐ ܐܲܠܵܗܵܐ ܡܸܠܬܼܵܐ ܒܲܟܼܝܵܢܹ̈ܐ ܬܪ̈ܲܝܗܘܿܢ؟ ܐܵܘ ܐܲܢ̄ܬܿܘܿܢ ܐܵܘ ܗ̤ܘ:
ܐܸܡܲܪܘ ܠܲܢ ܐܵܦ ܗܵܫܵܐ: ܐܵܦܸܢ ܠܵܐ ܐܸܡܲܪܬܿܘܿܢ ܒܩܲܕܼܡܵܝܬܼܵܐ. ܐܸܡܲܪܘ:
ܐܲܠܵܗܵܐ ܡܸܠܬܼܵܐ ܒܐܘܼܤܝܼܵܐ ܐܝܼܬܼܵܘܗܝ ܒܬܲܪ̈ܬܲܝܗܹܝܢ: ܐܲܟܼܙܢܵܐ ܕܡܵܘܕܹܝܬܿܘܿܢ
ܥܲܠ ܡܫܝܼܚܵܐ ܕܐܝܼܬܼܵܘܗܝ ܒܐܘܼܤܝܼܵܐ ܒܬܲܪ̈ܬܲܝܗܹܝܢ: ܡ̣ܢ ܟܝܵܢܹ̈ܐ
ܡܫܲܚ̈ܠ̱ܦܹܐ ܘܲܟܼܝܵܢܹ̈ܐ ܡܫܲܚ̈ܠ̱ܦܹܐ. ܠܵܐ ܠܲܡ ܒܲܛܠܲܬ̤ ܚܕܼܵܝܘܼܬܼܵܐ
pb. 249
ܠܫܘܼܚܠܵܦܵܐ ܕܲܟܼܝܵܢܹ̈ܐ: ܐܸܠܵܐ ܟܝܵܢܹ̈ܐ ܡܫܲܚ̈ܠ̱ܦܹܐ ܐܵܡܪܝܼܬܿܘܿܢ ܕܐܝܼܬܼܵܘܗܝ
ܐܵܠܵܗܵܐ ܡܸܠܬܼܵܐ. ܐܸܢܗ̤ܘ ܓܹܝܪ: ܕܡ̣ܢ ܚܕܼܵܐ ܐܘܼܤܝܼܵܐ ܬܲܪܬܹܝܢ
ܐܘܤ̈ܝܼܵܣ ܗ̤ܘܲܝ̈: ܕܐܲܠܵܗܘܼܬܼܵܐ ܘܲܕܐ̄ܢܵܫܘܼܬܼܵܐ: ܤܸܕܼܩܵܐ ܘܠܵܐ ܗ̄ܘ̣ܵܐ
ܚܕܼܵܝܘܼܬܼܵܐ ܗܘ̤ܵܬܼ. ܠܲܡܫܝܼܚܵܐ ܕܹܝܢ ܒܲܚܕܼܵܝܘܼܬܼܵܐ ܐܵܡܲ݁ܪ ܕܲܗܘ̤ܵܐ:
ܘܐܝܼܬܼܵܘܗܝ ܒܲܟܼܝܵܢܹ̈ܐ ܬܪܹܝܢ. ܐܲܠܵܗܵܐ ܡܸܠܬܼܵܐ: ܒܲܚܕܼܵܝܘܼܬܼܵܐ ܗܘ̤ܵܐ
ܒܸܤܪܵܐ: ܘܠܵܘ ܒܐܘܼܤܝܼܵܐ: ܐܲܝܟܲܢܵܐ ܗܵܟܹܝܠ ܡܵܘܕܥܵܐ ܕܗ̤ܘܝܘܼ ܟܲܕܼ
ܗ̤ܘ ܚܲܕܼ. ܗܵܘ̇ ܕܐܝܼܬܼܵܘܗܝ ܬܪܹܝܢ ܒܲܚܕܼܵܝܘܼܬܼܵܐ: ܘܗܵܘ̇ ܕܐܝܼܬܼܵܘܗܝ
ܟܝܵܢܵܐ؟ ܐܵܘ ܗ̤ܘܝܘܼ ܟܲܕܼ ܗ̤ܘ ܟܝܵܢܵܐ ܘܲܚܕܼܵܝܘܼܬܼܵܐ: ܘܒܲܟܼܝܵܢܵܐ
ܘܒܲܚܕܼܵܝܘܼܬܼܵܐ: ܘܦܲܪܨܘܿܦܵܐ ܘܐܘܼܤܝܼܵܐ؟ ܐܵܦܸܢ ܓܹܝܪ ܠܵܐ ܐܝܼܬܼܵܘܗܝ
ܕܠܵܐ ܐܘܼܤܝܼܵܐ ܦܵܪܨܘܼܦܵܐ: ܠܵܐ ܗ̄ܘ̣ܵܐ ܗ̤ܘܝܘܼ ܟܲܕܼ ܗ̤ܘ ܐܘܼܤܝܼܵܐ
ܘܦܲܪܨܘܼܦܵܐ.
ܐܲܝܟܲܢܵܐ ܗܵܟܹܝܠ ܕܵܢܬܿܘܿܢ ܠܲܢ: ܐܘܿ ܕܲܝܵܢܹ̈ܐ ܚܲܟܿܝܼܡܹ̈ܐ؟ ܐܲܝܟܲܢܵܐ
ܐܸܬܼܪܲܥܝܼܬܿܘܿܢ ܥܲܠ ܗܵܠܹܝܢ ܕܐܲܒܼ̈ܗܵܬܼܵܐ؟ ܐܵܪܵܐ ܫܠܸܡ̣ܘ ܠܲܟܼܬܼܵܒܹ̈ܐ
ܐܲܠܵܗܵܝܹ̈ܐ: ܒܲܫܡܵܗܹ̈ܐ ܘܲܒܼܫܘܼܘܕܵܥܵܐ ܕܲܫܡܵܗܹ̈ܐ: ܘܲܚܦܝܼܛܵܐܝܼܬܼ ܘܢܲܗܝܼܪܵܐܝܼܬܼ
ܒܲܫܡܵܗܹ̈ܐ ܗܵܠܹܝܢ ܐܸܬܸܚܲܫܚܘ؟ ܘܡ̣ܢ ܗܵܪܟܵܐ: ܘܠܵܘ ܡ̣ܢ ܓܲܒܿ ܐ̄ܚܪܹܝܢ:
ܐܸܫܟܲܚܘ ܙܗܝܼܪܵܐܝܼܬܼ ܠܲܡܫܲܪܵܝܘܼ ܒܡܲܠܦܵܢܘܼܬܼܗܘܿܢ: ܐܸܠܵܐ ܐܸܢ ܡ̣ܢ
ܐܲܝܟܵܐ ܕܕܲܒܲܪ ܐܸܢܘܿܢ ܪܘܼܚܵܐ ܕܩܘܼܕܫܵܐ: ܕܠܵܐ ܡܸܕܸܡ ܢܸܬܼܒܲܨܲܪ: ܘܠܵܐ
ܡܸܕܸܡ ܢܸܗܘܸܐ ܝܲܬܿܝܼܪܵܐ: ܘܠܵܐ ܡܸܕܸܡ ܤܪܝܼܩܵܐ: ܘܐܲܝܟܼ ܕܐܵܬܼܝܵܐ
ܢܸܤܥܪܘܼܢ: ܐܸܠܵܐ ܟܠܗܹܝܢ ܒܒܼܘܼܚܵܢܵܐ. ܐܲܝܟܲܢܵܐ ܕܐܲܝܠܹܝܢ ܕܒܲܡܫܝܼܚܵܐ
ܢܸܬܼܚܲܙ̈ܝܵܢ: ܟܠܗܹܝܢ ܕܐܲܠܵܗܵܐ ܡܸܠܬܼܵܐ: ܕܐܝܼܬܼ ܠܹܗ ܟܝܵܢܵܐ ܠܵܐ ܚܵܫܘܿܫܵܐ
ܘܠܵܐ ܡܵܝܘܿܬܼܵܐ ܘܲܡܬܼܘܿܡܵܝܵܐ. ܘܟܼܠܗܹܝܢ ܕܐ̄ܢܵܫܘܼܬܼܵܐܐ: ܕܐܝܼܬܝܗܹܝܢ
pb. 250
ܟܝܵܢܵܐ ܡܵܝܘܿܬܼܵܐ ܘܚܵܫܘܿܫܵܐ ܘܒܲܪܝܵܐ. ܘܐܲܝܠܹܝܢ ܕܲܚܕܼܵܝܘܼܬܼܵܐ ܐܸܢܹܝܢ
ܘܲܕܼܡܼܬܼܒܲܢܫܵܢܘܼܬܼܵܐ: ܡܸܢܹܗ ܕܡܲܪܒܵܥܵܐ ܘܡ̣ܢ ܡܸܬܼܒܲܪܢܫܵܢܘܼܬܼܵܐ:
ܥܲܠ ܚܲܕܼ ܦܲܪܨܘܼܦܵܐ ܤܵܠ̈ܩܵܢ. ܥܲܠ ܗܵܘ̇ ܦܲܪܨܘܿܦܵܐ ܕܲܕܓܼܵܘܵܐ
ܐܝܼܬܼܵܘܗܝ: ܕܡܵܪܲܢ ܝܼܫܘܿܥ ܡܫܝܼܚܵܐ ܒܪܵܐ ܕܐܲܠܵܗܵܐ ܝܑܼܚܝܼܕܼܵܝܵܐ: ܕܡܸܢܹܗ
ܫܲܪܝܼܘ ܐܲܒܼ̈ܗܵܬܼܵܐ: ܘܗܵܝܕܹܝܢ ܒܦܘܼܪܫܵܢܵܐ ܕܡܸܠܬܼܵܐ. ܥܲܠ ܐܲܠܵܗܘܼܬܼܵܐ
ܐܵܠܸܦܘܼ: ܕܐܝܼܬܼܵܘܗܝ ܡ̣ܢ ܐܲܠܵܗܵܐ ܐܵܒܼܵܐ: ܒܲܪ ܟܝܵܢܵܐ ܕܐܲܒܼܵܐ: ܢܘܼܗܪܵܐ
ܕܡ̣ܢ ܢܘܼܗܪܵܐ: ܕܒܼܐܝܼܕܹܗ ܟܠ ܡܸܕܸܡ ܗܘ̤ܵܐ: ܐܲܝܠܹܝܢ ܕܒܲܐܪܥܵܐ
ܐܵܦ ܕܒܲܫܡܲܝܵܐ. ܘܗܵܝܕܹܝܢ ܡܸܬܼܒܲܤܪܵܢܘܼܬܼܵܐ ܕܐܲܠܵܗܵܐ ܡܸܠܬܼܵܐ
ܘܲܕܼܐ̄ܢܵܫܘܼܬܼܵܐ: ܐܸܡ݂ܲܪܘ: ܕܡܸܛܠܵܬܲܢ ܒܢܝ̈ܢܵܫܵܐ ܘܡܸܛܠ ܦܘܼܪܩܵܢܲܢ:
ܢܚܸܬܼ ܘܐܸܬܼܒܲܤܲܪ. ܘܗܵܝܕܹܝܢ ܐܸܡ݂ܲܪܘ ܠܗܵܠܹܝܢ ܕܒܸܤܪܵܐ: ܥܲܠ
ܡܵܘܠܵܕܼܵܐ ܘܥܲܠ ܓܒܼܝܼܠܘܼܬܼܵܐ: ܕܐܸܬܼܒܲܤܲܪ. ܐܸܡ݂ܲܪܘ: ܟܲܕܼ ܡܲܠܦܝܼܢ:
ܕܡ̣ܢ ܪܘܼܚܵܐ ܕܩܘܼܕܼܫܵܐ ܘܡ̣ܢ ܡܲܪܝܲܡ ܒܬܼܘܼܠܬܼܵܐ ܐܸܬܼܒܲܤܲܪ:
ܠܲܚܕܼܵܝܘܼܬܼܵܐ ܗܵܝ̇ ܕܠܵܗ̇ ܐܸܬܼܒܲܤܲܪ ܘܐܸܬܼܒܲܪܢܲܫ ܐܵܘܕܲܥ̣ܘ. ܥܕܲܡܵܐ
ܓܹܝܪ ܠܡܸܬܼܒܲܤܪܵܢܘܼܬܼܵܐ: ܡ̣ܢ ܐܲܠܵܗܵܐ ܡܸܠܬܼܵܐ ܡܲܠܦܝܼܢ ܗ̄ܘ̣ܵܘ ܠܲܢ
ܟܠܡܸܕܸܡ. ܘܡ̣ܢ ܗܵܝ̇ ܕܹܝܢ ܕܐܸܬܼܒܲܤܲܪ: ܥܲܠ ܚܕܼܵܝܘܼܬܼܵܐ ܗܵܝ̇ ܕܡ̣ܢ
ܪܘܼܚܵܐ ܕܩܘܼܕܼܫܵܐ ܘܡ̣ܢ ܡܲܪܝܲܡ ܒܬܼܘܼܠܬܼܵܐ: ܥܲܠ ܡܵܘܠܵܕܼܵܐ ܕܒܸܤܪܵܐ
ܕܐܸܬܼܒܲܤܲܪ: ܐܵܡ̇ܪܝܼܢ: ܚܲܫܵܐ ܘܡܵܘܬܵܐ ܘܲܩܝܡܬܼܵܐ ܘܤܘܼܠܵܩܵܐ
ܘܤܘܼܥܪ̈ܵܢܹܐ ܕܐܵܘܕܲܥ̣ܘ ܥܲܠ ܦܲܓܼܪܵܐ ܕܲܡܚܲܝܲܕܼ ܗ̄ܘ̣ܵܐ ܠܹܗ: ܐܲܝܟܼ
ܡܢܲܦܫܵܐ ܘܝܲܕܼܘܼܥܬܼܵܢܵܐ. ܐܲܝܟܼ ܕܠܵܐ ܠܒܼܘܼܠܒܵܠܵܐ ܢܸܤܒܲܪ ܕܲܗܘ̤ܵܬܼ
ܚܕܼܵܝܘܼܬܼܵܐ: ܘܠܑܵܐ ܬܘܼܒܼ ܒܫܘܼܚܠܵܦܵܐ ܕܐܘܼܤܝܼܵܐ ܘܕܲܟܼܝܵܢܵܐ: ܐܵܘ
pb. 251
ܠܡܘܼܙܵܓܼܵܐ ܐܵܘ ܠܪܘܼܟܵܒܼܵܐ ܟܝܵܢܵܝܵܐ: ܕܠܲܗܘܵܝܐ ܕܲܚܕܼܵܐ ܚܲܝܘܼܬܼܵܐ: ܐܸܠܵܐ
ܠܚܲܕܼ ܦܲܪܨܘܿܦܵܐ ܡ̣ܢ ܡܕܲܒܿܪܵܢܘܼܬܼܵܐ ܕܥܲܠ ܐܲܦܲܝ̈ܢ. ܐܲܝܟܲܢܵܐ ܕܢܸܫܬܵܘܬܲܦ
ܠܲܢ ܒܡܘܼܟܵܟܼܵܐ ܕܲܥܕܲܡܵܐ ܠܡܵܘܬܵܐ: ܡܵܘܬܵܐ ܕܹܝܢ ܕܲܙܩܝܼܦܵܐ.
ܢܸܫܬܵܘܬܲܦ ܠܹܗ ܕܹܝܢ ܚܢܲܢ ܒܲܫܡܵܐ ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ:
ܕܒܹܗ ܟܠ ܒܪܘܿܟ ܬܸܟܿܘܿܦ ܕܒܲܫܡܲܝܵܐ ܘܒܲܐܪܥܵܐ ܘܕܲܠܬܲܚܬܿ ܡ̣ܢ
ܐܲܪܥܵܐ: ܘܢܵܘܕܹܐ ܟܠ ܠܸܫܵܢ.
ܠܵܐ ܗ̄ܘ̣ܵܐ ܕܠܵܐ ܨܒܼܝܵܢܵܐ ܐܝܼܬܹܝܗ̇ ܗ̄ܘ̣ܵܬܼ ܢܲܦܫܵܐ: ܘܠܵܐ ܗ̄ܘ̣ܵܐ
ܕܠܵܐ ܪܸܥܝܵܢܵܐ: ܕܒܲܟܼܝܵܢܵܐ ܕܐ̄ܢܵܫܘܼܬܼܵܐ. ܘܠܵܐ ܗ̄ܘ̣ܵܐ ܕܠܵܐ ܪܓܸܫܬܼܵܐ
ܐܝܼܬܼܵܘܗܝ ܗ̄ܘ̣ܵܐ ܦܲܓܼܪܵܐ: ܒܲܪܓܸܫܬܼܵܐ ܕܚܲܝܘܼܬܼܵܐ ܕܝܵܬܹܗ: ܡ̣ܢ
ܚܕܼܵܝܘܼܬܼܵܐ ܟܝܵܢܵܝܬܼܵܐ ܕܦܲܓܼܪܵܐ ܘܲܕܢܲܦܫܵܐ. ܟܠܗܹܝܢ ܟܝܵܢܵܝܵܬܼܵܐ ܒܲܥ̇ܒܼܵܕܼܵܐ
ܕܲܟܼܝܵܢܵܐ ܘܲܕܼܚܲܝܠܵܐ ܕܠܵܐ ܒܘܼܨܵܪ ܐܝܼܬܲܝܗܹܝܢ: ܟܲܕܼ ܡܲܥ̈ܒܿܕܼܵܢ
ܘܡܸܬܼܥܲܒܼ̈ܕܵܢ. ܠܵܘ ܓܹܝܪ ܠܲܟܼܝܵܢܵܐ ܗܘ̤ܵܬܼ ܚܕܼܵܝܘܼܬܼܵܐ ܕܐܲܠܵܗܵܐ ܡܸܠܬܼܵܐ
ܕܲܠܘܵܬܼ ܐ̄ܢܵܫܘܼܬܼܵܐ: ܐܲܝܟܲܢܵܐ ܕܲܕܼܠܵܐ ܡܲܥܒܿܕܼܵܢܘܼܬܼܵܐ ܢܸܗܘܸܐ ܡܲܕܥܵܐ
ܕܐ̄ܢܵܫܘܼܬܼܵܐ. ܘܲܒܼܡܲܕܥܵܐ ܕܐܲܠܵܗܵܐ ܡܸܠܬܼܵܐ ܢܸܬܼܪܵܥܸܐ: ܘܠܵܐ ܗ̄ܘ̣ܵܐ
ܒܡܲܕܥܵܐ ܕܐ̄ܢܵܫܘܼܬܼܵܐ. ܘܲܕܼܢܸܪܓܲܫ: ܐܵܐ ܗ̄ܘ̣ܵܐ ܒܲܚܕܼܵܝܘܼܬܼܵܐ ܕܢܲܦܫܵܐ
ܚܲܝܬܼܵܐ: ܐܸܠܵܐ ܒܲܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܒܚܲܝܹ̈ܐ ܢܸܚܸܐ. ܘܲܕܼܢܸܚܸܐ ܚܲܝܹ̈ܐ
ܘܲܕܼܢܸܪܓܲܫ: ܠܵܐ ܗ̄ܘ̣ܵܐ ܒܡܲܥܒܿܕܼܵܢܘܼܬܼܵܐ ܕܲܪܓܸܫܬܼܵܐ ܕܢܲܦܫܵܐ: ܐܸܠܵܐ
ܒܚܲܝܠܵܐ ܕܐܲܠܵܗܘܼܬܼܵܐ. ܚܕܼܵܝܘܼܬܼܵܐ ܓܹܝܪ ܕܐܲܝܟܼ ܗܵܕܹܐ: ܚܵܫܘܿܫܬܼܵܐ
ܐܝܼܬܹܝܗ̇. ܐܲܝܟܲܢܵܐ ܕܝܼܗ̇ܒܵܐ ܢܲܦܫܵܐ ܟܝܵܢܵܐܝܼܬܼ ܪܓܸܫܬܼܵܐ ܠܦܲܓܼܪܵܐ: ܗܵܟܲܢܵܐ
ܒܐܝܼܕܼܵܗ̇ ܕܲܪܓܸܫܬܼܵܐ: ܠܵܗ̇ ܡܸܬܼܝܲܗܒܵܐ ܪܓܸܫܬܼܵܐ ܕܚܲܫܹ̈ܐ ܕܦܲܓܼܪܵܐ.
pb. 252
ܐܲܝܟܲܢܵܐ ܕܡ̣ܢ ܢܲܦܫܵܐ: ܘܲܠܢܲܦܫܵܐ ܬܸܬܼܝܼܗܸܒܼ ܪܓܸܫܬܼܵܐ ܕܚܲܫܹ̈ܐ ܕܦܲܓܼܪܵܐ.
ܚܵܫܘܿܫܬܼܵܐ ܗ̣̄ܝ ܓܹܝܪ. ܡܸܛܠ ܗܵܢܵܐ ܠܦܲܪܨܘܼܦܵܐ ܐܝܼܬܹܝܗ̇ ܚܕܼܵܝܘܼܬܼܵܐ:
ܘܠܵܘ ܠܲܟܼܝܵܢܵܐ. ܘܠܵܘ ܚܕܼܵܝܘܼܬܼܵܐ ܕܦܲܪ̈ܨܘܼܦܹܐ ܐܵܡ̇ܪܝܼܢܲܢ: ܐܸܠܵܐ ܕܲܟܼܝܵܢܹ̈ܐ.
ܚܲܕܼ ܕܹܝܢ ܦܲܪܨܘܿܦܵܐ: ܒܲܚܕܼܵܝܘܼܬܼܵܐ. ܒܲܟܼܝܵܢܹ̈ܐ ܡ̇ܢ: ܐ̄ܚܪܹܢܵܐ ܘܲܐ̄ܚܪܹܢܵܐ.
ܐܲܝܟܼ ܡ̣ܢ ܦܲܪܨܘܼܦܵܐ ܕܓܼܵܘܵܐ ܡܸܬܼܝܼܕܲܥ: ܕܲܠܦܲܨܘܵܦܵܐ ܕܝܼܠܹܗ
ܢܲܗܒܹܿܗ ܠܒܸܤܪܵܐ ܠܲܕܼܡܘܼܬܼܵܐ ܕܥܲܒܼܕܵܐ. ܘܡܸܢܹܗ ܡܡܲܠܸܠ ܗ̄ܘ̣ܵܐ:
ܟܲܕܼ ܡܲܠܸܦ ܗ̄ܘ̣ܵܐ: ܘܤܵܥܲ݁ܪ: ܘܡܲܥܒܸܿܕܼ. ܘܲܕܼܡܘܼܬܹܗ ܕܝܼܠܹܗ ܝܲܗܒܵܗ̇
ܠܲܕܼܡܘܼܬܼܵܐ ܕܥܲܒܼܕܵܐ: ܘܡܸܢܵܗ̇ ܐܲܝܟܼ ܕܡ̣ܢ ܦܲܪܨܘܼܦܹܗ ܕܝܼܠܹܗ ܘܡ̣ܢ
ܐܲܠܵܗܘܼܬܼܵܐ ܡܡܲܠܸܠ. ܕܓܼܵܘܵܐ ܓܹܝܪ ܐܝܼܬܼܵܘܗܝ: ܚܲܕܼ ܘܗ̤ܘ ܟܲܕܼ ܗ̤ܘ
ܦܲܪܨܘܿܦܵܐ. ܕܡܘܼܬܼܵܐ ܕܥܲܒܼܕܵܐ: ܕܐܲܠܵܗܘܼܬܼܵܐ. ܘܲܕܼܡܘܼܬܼܵܐ ܕܐܲܠܵܗܘܼܬܼܵܐ:
ܕܐ̄ܢܵܫܘܼܬܼܵܐ. ܚܲܕܼ ܘܗ̤ܘ ܟܲܕܼ ܗ̤ܘ ܦܲܪܨܘܼܦܵܐ: ܘܠܵܘ ܐܘܼܤܝܼܵܐ.
ܡܩܵܘܝܵܐ ܓܹܝܪ ܐܘܼܤܝܼܵܐ ܕܲܕܡܘܼܬܼܵܐ ܕܐܲܠܵܗܵܐ: ܘܐܘܼܤܝܼܵܐ ܕܲܕܡܘܼܬܼܵܐ
ܕܥܲܒܼܕܵܐ ܒܲܩܢܘܿܡܲܝ̈ܗܘܿܢ.
ܠܵܘ ܓܹܝܪ ܕܠܵܐ ܨܒܼܝܵܢܵܐ ܘܲܕܼܠܵܐ ܪܸܥܝܵܢܵܐ ܗܘ̤ܵܬܼ ܚܕܼܵܝܘܼܬܼܵܐ
ܕܲܟܼܝܵܢܹ̈ܐ: ܐܲܟܼܙܢܵܐ ܕܐܵܪܝܼܘܿܣ ܘܐܵܦܘܼܠܝܼܢܵܪܝܼܣ ܐܸܡ݂ܲܪܘ: ܐܸܠܵܐ
ܠܦܲܪܨܘܿܦܵܐ ܘܠܲܡܕܲܒܿܪܵܢܘܼܬܼܵܐ ܕܲܚܠܵܽܦܲܝܢ: ܘܠܲܚܕܼܵܝܘܼܬܼܵܐ ܕܲܨܠܡܹܗ
ܘܲܕܼܡܘܼܬܹܗ ܕܒܲܟܼܝܵܢܵܐ ܕܝܼܠܲܢ ܕܢܲܦܫܵܐ ܘܲܕܦܲܓܼܪܵܐ: ܟܲܕܼ ܠܵܐ ܡܸܬܼܒܲܨܲܪ
ܡܸܕܸܡ: ܠܒܲܪ ܡ̣ܢ ܚܛܵܗܹ̈ܐ ܒܲܠܚܘܿܕܼ. ܠܵܐ ܗ̄ܘ̣ܵܐ ܥܲܠ ܐܲܦܲܝ̈
ܐܲܠܵܗܘܼܬܼܵܐ ܐܸܬܿܕܲܒܲܪ: ܐܸܠܵܐ ܗ̤ܝ ܒܐܝܼܕܹܗ ܥܸܒܼܕܲܬ̤ ܕܢܸܬܼܟܲܬܲܫ
ܠܘܼܩܒܲܠ ܚܵܘܒܿܬܼܵܐ: ܟܲܕܼ ܡܡܲܠܸܐ ܠܟܼܠܗܘܿܢ ܦܘܼ̈ܩܕܵܢܹܐ ܕܢܵܡܘܿܤܵܐ
pb. 253
ܘܲܢܛܘܼܪ̈ܵܬܼܵܐ ܪܹ̈ܫܵܝܵܬܼܵܐ. ܐܲܝܟܲܢܵܐ ܕܐܵܦ ܒܲܓܼܒܼܝܼܬܼܵܐ ܘܒܲܢܛܘܼܪ̈ܵܬܼܵܐ
ܕܦܘܼ̈ܩܕܵܢܹܐ:
ܕܠܵܐ ܪܸܫܝܵܢ ܢܸܬܼܚܙܸܐ. ܐܲܝܟܲܢܵܐ ܕܟܲܕܼ ܕܲܕܼܠܵܐ ܚܛܵܗܹ̈ܐ ܐܝܼܬܼܵܘܗܝ:
ܢܸܬܼܝܼܗܸܒܼ ܡܸܵܛܠܵܬܲܢ ܠܡܵܘܬܵܐ: ܙܲܕܝܼܩܵܐ ܚܠܵܦ ܪ̈ܲܫܝܼܥܹܐ. ܐܲܝܕܵܐ ܗ̣̄ܝ
ܓܹܝܪ ܚܵܘܒܿܬܼܵܐ؟ ܘܐܲܝܕܵܐ ܗ̣̄ܝ ܙܵܟܼܘܼܬܼܵܐ؟ ܐܲܝܕܵܐ ܗ̣̄ܝ ܫܲܘܝܘܼܬܼܵܐ
ܕܦܘܼܪܥܵܢܵܐ ܕܕܼܘܼܒܵܪܹ̈ܐ ܕܐܲܠܵܗܵܐ ܘܲܕܼܒܲܪܢܵܫܵܐ؟ ܡܕܲܒܿܪܵܢܵܐ ܓܹܝܪ ܗܵܘ̇
ܗ̄ܘ̣: ܕܒܲܩܢܘܿܡܵܐ ܡܸܬܼܚܲܝܲܕܼ: ܐܲܝܟܲܢܵܐ ܕܢܸܫܬܵܘܬܲܦ ܒܚܲܝܹ̈ܐ ܘܲܒܼܕܼܘܼܒܵܪܹ̈ܐ:
ܘܲܒܼܡܵܘܬܵܐ ܡܸܬܿܬܿܚܸܕܼ. ܐܵܦ ܕܘܼܒܲܪܹ̈ܐ ܘܡܵܘܬܵܐ ܘܲܩܝܵܡܬܼܵܐ ܐܝܼܬܹܝܗ̇:
ܕܗܵܘ̇ ܕܲܡܕܲܒܲܪ ܘܲܕܼܗܵܘ̇ ܕܡܸܬܿܕܲܒܲܪ. ܐܵܘ ܓܹܝܪ ܩ̣ܵܘܝܼ ܐܲܠܵܗܵܐ
ܒܲܟܼܝܵܢܹܗ: ܐܲܝܟܼ ܕܐܝܼܬܼܵܘܗܝ ܒܲܟܼܝܵܢܵܐ ܕܠܵܐ ܚܛܵܗ̈ܝܼܢ: ܐܵܘ
ܒܡܲܛܥܝܵܢܘܼܬܼܵܐ ܗ̤ܘܲܝ̈ ܐܲܝܠܹܝܢ ܕܕܘܼܒܵܪܵܐ ܗ̣̄ܘܲܝ̈ ܕܲܡܫܝܼܚܵܐ:
ܕܐܲܝܟܼ ܒܲܪܢܵܫܵܐ ܐܠܵܗܵܐ ܡܸܠܬܼܵܐ ܡܸܬܿܕܲܒܲܪ ܗ̄ܘ̣ܵܐ. ܬܪ̈ܲܝܗܘܿܢ ܓܹܝܪ ܡ̣ܢ
ܚܕܼܵܕܹ̈ܐ ܡܸܬܼܢܲܓܼܕܝܼܢ ܗ̄ܘ̣ܵܘ ܘܡܸܬܼܢܲܬܼܦܝܼܢ: ܡ̣ܢ ܟܝܵܢܵܐ ܘܡ̣ܢ ܨܸܒܼܝܵܢܵܐ:
ܘܐܵܦ ܗ̤ܘ ܡܸܬܼܢܬܸܦ ܗ̄ܘ̣ܵܐ. ܕܘܼܒܵܪܵܐ ܓܹܝܪ ܒܦܘܼܩܕܵܢܵܐ ܐܝܼܬܼܵܘܗܝ:
ܠܵܐ ܗ̄ܘ̣ܵܐ ܕܲܟܼܝܵܢܵܐ ܠܵܐ ܡܸܫܬܲܚܠܦܵܢܵܐ ܘܝܼܚܝܼܕܼܵܝܵܐ ܘܲܕܼܠܵܐ ܡܵܪܵܐ
ܐܝܼܬܼܵܘܗܝ: ܕܲܠܨܒܼܝܵܢܵܐ ܘܲܠܪܸܥܝܵܢܵܐ ܕܐ̄ܚܪܹܢܵܐ ܠܵܐ ܡܸܬܼܢܬܸܦ. ܐܸܢܗ̤ܘ
ܕܹܝܢ ܕܒܲܫܪܵܪܵܐ ܐܝܼܬܼܵܘܗܝ ܗܘܼܦܵܟܼܵܐ ܘܕܘܼܒܵܪܵܐ ܐ̄ܢܵܫܵܝܵܐ: ܘܕܼܘܼܒܵܪܵܐ
ܕܐܲܠܵܗܵܐ ܡܸܠܬܼܵܐ ܒܲܟܼܝܵܢܵܐ ܐܝܼܬܼܵܘܗܝ ܗ̄ܘ̣ܵܐ: ܘܒܲܐܝܼܠܹܝܢ ܕܒܲܟܼܝܵܢܵܐ
ܡܸܬܿܕܲܒܲܪ ܗ̄ܘ̣ܵܐ: ܘܲܒܼܗܹܝܢ ܡܩܲܝܲܡ ܗ̄ܘ̣ܵܐ: ܒܗܵܝ̇ ܕܝܼܠܹܗ ܠܲܟܼܝܵܢܵܐ
ܩܲܒܸܿܠ̣: ܘܲܗܘ̤ܵܐ ܡܸܫܬܲܚܠܦܵܢܵܐ ܘܡܸܫܬܿܓܼܢܝܵܢܵܬ. ܡܸܟܹܝܠ ܠܵܐ ܗ̄ܘ̣ܵܐ
ܕܘܼܒܵܪܵܐ ܕܐܲܠܵܗܵܐ ܡܸܬܿܕܲܒܲܪ: ܐܸܠܵܐ ܕܗܵܢܵܐ ܟܝܵܢܵܐ ܕܒܹܗ ܐܸܬܿܕܲܒܲܪ.
ܡܵܢܵܐ ܗܵܟܹܝܠ ܐܸܫܟܲܚܬܿܘܿܢ ܒܐܸܓܲܪܬܵܐ ܕܝܼܠܝ: ܕܐܝܼܬܲܝ ܒܵܗ̇ ܪܲܫܝܼܥܵܐ:
pb. 254
ܘܚܲܝܸܒܼܬܿܘܿܢܵܢܝ: ܘܲܚܫܲܒܼܬܿܘܿܢܵܝܗܝ ܠܗܵܢܵܐ ܕܵܚܹ̇ܠ ܠܐܲܠܵܗܵܐ؟ ܩܲܕܼܡܵܝܑܬܼ
ܗܵܟܹܝܠ ܠܹܗ ܐܲܟܿܤܹ̇ܬܼ: ܐܲܝܟܼ ܐܲܝܢܵܐ ܕܲܡܕܲܓܸܠ ܥܲܠ ܐܲܒܼ̈ܗܵܬܼܵܐ:
ܘܲܡܪܝܼܡ ܠܟܼܠܹܗ ܪܹܫܵܗ̇ ܕܗܲܝܡܵܢܘܼܬܼܵܐ. ܘܫܘܼܪܵܝܵܐ ܡܸܢܹܗ ܘܠܹܗ
ܥܵܒܹ̇ܕܼ ܗ̄ܘ̣ܵܐ: ܡ̣ܢ ܐܲܝܟܵܐ ܕܐܵܠܨܵܐܝܼܬܼ ܚܵܫܘܿܫܵܐ ܥܵܒܹ̇ܕܼ ܠܹܗ ܠܐܲܠܵܗܵܐ
ܡܸܠܬܼܵܐ. ܘܲܕܼܠܵܐ ܗ̄ܘ̣ܵܐ ܗ̤ܝ ܟܲܕܼ ܗ̤ܝ ܡܵܘܕܥܵܐ: ܗܵܝ̇ ܕܐܲܠܵܗܵܐ
ܡܸܠܬܼܵܐ ܘܗܵܝ̇ ܕܲܡܫܝܼܚܵܐ. ܠܵܐ ܒܲܟܼܬܼܵܒܹ̈ܐ ܐܲܠܵܗܵܝܹ̈ܐ: ܘܠܵܐ ܐܲܝܟܼ ܕܗ̤ܘ
ܐܸܡ݂ܲܪ: ܐܵܦܸܢ ܠܵܐ ܗ̄ܘ̣ܵܐ ܠܒܲܪ ܡ̣ܢ ܐܲܠܵܗܵܐ ܡܸܠܬܼܵܐ ܐܝܼܬܼܵܘܗܝ
ܡܫܝܼܚܵܐ. ܘܐܵܦܠܵܐ ܥܝܵܕܼܵܐ ܕܲܟܼܬܼܵܒܹ̈ܐ ܐܲܠܵܗܵܝܹ̈ܐ ܐܲܠܸܦܬܹܗ: ܘܐܲܝܠܹܝܢ
ܕܓܼܵܕ̈ܫܵܢ ܡ̣ܢ ܫܡܵܗܹ̈ܐ ܗܵܠܹܝܢ ܘܗܵܠܹܝܢ ܚܵܘܝܼܬܹܗ. ܘܡ̣ܢ ܐܲܝܠܹܝܢ
ܕܛܵܒܼܵܐܝܼܬܼ ܐܸܡ݂ܲܪ: ܫܲܒܲܚܬܹܗ: ܕܲܕܼܠܵܐ ܒܘܼܠܒܵܠܵܐ ܢܛܲܪ ܠܲܟܼܝܵܢܹ̈ܐ
ܘܲܠܕܼܝܼ̈ܠܝܵܬܼܗܘܿܢ. ܐܲܝܟܲܢܵܐ ܕܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ: ܐܵܦ ܒܵܗ̇
ܒܲܚܕܼܵܝܘܼܬܼܵܐ ܠܵܐ ܚܵܫܘܿܫܵܐ. ܘܗܵܝ̇ ܕܕܝܼܠܹܗ ܥ̣ܒܲܕܼ ܐܸܢܹܝܢ ܠܕܼܝܼ̈ܠܵܝܵܬܼܵܐ
ܕܒܸܤܪܵܐ: ܚܵܘ̇ܝܼܬܼ ܠܹܗ ܕܠܵܐ ܗ̄ܘ̣ܵܐ ܠܐܘܼܤܝܼܵܐ ܕܝܼܠܹܗ: ܐܸܠܵܐ
ܠܦܲܪܨܘܿܦܹܗ ܤܵܠ̈ܩܵܢ. ܐܲܝܟܼ ܡ̇ܢ ܕܦܲܪܨܘܿܦܹܗ ܕܝܼܠܹܗ ܐܝܼܬܼܵܘܗܝ:
ܘܟܼܠܗܹܝܢ ܐܲܝܟܼ ܕܥܲܠ ܦܲܪܨܘܿܦܹܗ ܡܵܘܕ̈ܥܵܢ: ܠܵܐ ܗ̄ܘ̣ܵܐ ܟܠܗܹܝܢ
ܕܦܲܪܨܘܼܦܵܐ: ܕܐܘܼܤܝܼܵܐ ܐܸܢܹܝܢ: ܐܵܦܠܵܐ ܓܹܝܪ ܐܲܠܵܗܵܐ ܡܸܠܬܼܵܐ:
ܒܟܼܠܗܹܝܢ ܕܐܘܼܤܝܼܵܐ ܕܒܸܤܪܵܐ ܐܝܼܬܼܵܘܗܝ. ܘܠܵܐ ܬܘܼܒܼ ܒܸܤܪܵܐ:
ܒܟܼܠܗܹܝܢ ܕܒܼܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ ܡܸܬܼܐ̱ܡܲܪ. ܐܸܠܵܐ ܒܟܼܠܗܹܝܢ
ܐܲܝܠܹܝܢ ܕܥܲܠ ܦܲܪܨܘܿܦܑܵܐ ܡܵܘ̈ܕܥܵܢ ܘܐܝܼܬܲܝܗܹܝܢ: ܐܲܝܟܲܢܵܐ ܕܐܵܦ
ܒܫܘܼܚܠܵܦܵܐ ܕܲܟܼܝܵܢܹ̈ܐ ܬܸܬܼܢܛܲܪ ܚܕܼܵܝܘܼܬܼܵܐ ܕܠܵܐ ܒܘܼܠܒܵܠܵܐ:
pb. 255
ܘܦܲܪܨܘܿܦܵܐ ܕܲܚܕܼܵܝܘܼܬܼܵܐ ܕܲܟܼܝܵܢܹ̈ܐ ܠܵܐ ܢܸܬܼܦܲܠܲܓܼ. ܘܗܵܘ̇ ܡܵܐ ܕܠܵܐ
ܐܸܤ̇ܬܲܟܿܠܹܬܼ: ܘܡܸܬܼܚܪܸܐ ܗ̄ܘܹ̇ܝܬܼ ܒܹܗ: ܐܸܡܲܪܬܹܗ ܠܹܗ ܘܠܵܐ ܛܲܫ̇ܝܼܬܹܗ.
ܘܲܠܥܸܠܬܼܵܐ ܘܲܠܦܘܼܠܵܓܼܵܐ ܕܐܸܬܼܝܼܠܸܕܼ ܒܝܼ ܤܵܡ̇ܬܹܗ: ܕܠܵܐ ܐܸܫܒܿܩܹܗ
ܠܡܹܐܡܲܪ ܡܸܕܸܡ ܡ̣ܢ ܐܲܝܠܹܝܢ ܕܩܲܕܼܡܵܝܑܬܼ ܐܸܡ݂ܲܪ.
ܥܲܠ ܐܲܝܕܵܐ ܗܵܟܹܝܠ ܚܲܝܸܒܼܬܿܘܿܢܵܢܝ؟ ܡܸܛܠ ܕܐܲܟܸܤ̇ܬܹܗ ܕܠܵܐ
ܢܩܸܦ̣ ܠܲܒܼ̈ܢܵܬܼ ܩܵܠܹ̈ܐ ܕܐܲܒܼ̈ܗܵܬܼܵܐ: ܘܕܲܠܦܩܘܼܒܼܠܵܐ ܕܢܝܼܫܗܘܿܢ ܤܵܡ̣
ܗ̄ܘ̣ܵܐ ܚܵܫܘܿܫܵܐ ܘܒܲܪܝܵܐ ܘܲܥܒܼܝܼܕܼܵܐ: ܘܲܕܡ̣ܢ ܐܲܝܠܹܝܢ ܕܠܵܐ ܐܝܼܬܲܝܗܹܝܢ
ܗ̣̄ܘܲܝ̈ ܥܵܒܼ̇ܕܼ ܗ̄ܘ̣ܵܐ ܠܹܗ ܠܐܲܠܵܗܵܐ ܡܸܠܬܼܵܐ: ܟܲܕܼ ܡ̣ܢ ܗܵܢܵܐ ܡܫܲܪܸܐ
ܗ̄ܘ̣ܵܐ: ܘܟܲܕܼ ܥܲܠ ܗܵܢܵܐ ܠܟܼܠܗܹܝܢ ܕܝܼ̈ܠܵܝܵܬܼܵܐ ܡܲܤܸܩ ܗ̄ܘ̣ܵܐ: ܘܟܼܠܗܹܝܢ
ܐܲܠܸܦܬܹܗ. ܡܸܛܠ ܗܵܢܵܐ ܐܸܬܼܥܲܤܲܩܬܿܘܿܢ؟ ܐܵܘ ܡܸܛܠ ܗܵܝ̇ ܕܕܲܓܸܠ̣
ܥܲܠ ܐܲܒܼ̈ܗܵܬܼܵܐ ܕܐܲܟܸܤ̇ܬܹܗ ܗ̄ܘܹ̇ܝܬܼ: ܥܲܠ ܕܐܸܡ݂ܲܪ ܗ̄ܘ̣ܵܐ ܕܲܩܪܵܐܘܼܗ̇
ܐܲܒܼ̈ܗܵܬܼܵܐ ܠܲܒܼܬܼܘܼܠܬܼܵܐ ܩܲܕܝܼܫܬܼܵܐ ܝܵܠܕܲܬܼ ܐܲܠܵܗܵܐ. ܗܵܢ̇ܘܿܢ ܕܐܵܦܠܵܐ ܠܹܗ
ܠܝܲܠܕܵܐ ܡܸܬܼܥܲܗܕܹܝܢ؟ ܥܲܠ ܐܲܦܲܝ̈ ܗܵܠܹܝܢ ܢܲܟܼܪܝܼܬܿܘܿܢܵܢܝ؟ ܠܵܐ ܐ̄ܢܵܫ
ܢܲܪܫܸܐ ܛܲܝܒܿܘܼܬܼܵܐ ܥܲܠ ܐ̄ܢܵܫ. ܐܸܠܵܐ ܐܵܢܗ̤ܘ ܕܐܸܬܼܦܲܠܚܲܬ̤ ܒܲܕܼܪܵܫܵܐ
ܕܗܲܝܡܵܢܘܼܬܼܵܐ ܒܲܪܬܼ ܩܵܠܵܐ ܗܵܕܹܐ ܡ̣ܢ ܐܲܒܼ̈ܗܵܬܼܵ ܕܲܒܼܢܝܼܩܵܝܼܵܐ: ܕܲܒܼܗܘܿܢ
ܡܸܬܼܟܲܬܲܫ ܠܘܼܩܒܲܠܝ: ܩܪܵܐܘܼܢܵܗ̇: ܐܵܘ ܐܸܢ ܐܸܬܼܐܲܡܪܲܬ̤ ܡ̣ܢ
ܤܘܼܢܗܵܕܘܿܣ ܐ̄ܚܪܹܬܼܵܐ ܕܐܵܪ̈ܬܵܕܘܿܟܿܤܹܐ. ܕܗܲܪ̈ܲܛܝܼܩܹܐ ܓܹܝܪ
ܐܝܼܬܹܝܗ̇: ܟܠܗܘܿܢ ܐܲܝܠܹܝܢ ܕܡܲܩܪܒܼܝܼܢ ܠܘܼܩܒܲܠ ܐܲܠܵܗܘܼܬܹܗ
ܕܲܡܫܝܼܚܵܐ. ܡ̣ܢ ܗܵܢ̇ܘܿܢ ܕܹܝܢ: ܕܲܢܩܸܦ̣ܘ ܒܗܲܝܡܵܢܘܼܬܼܗܘܿܢ
ܠܐܪ̈ܬܵܕܘܿܤܹܐ: ܠܵܐ ܐܸܬܼܐܲܡܪܲܬ̤. ܐܸܢܹܝܢ ܡ̣ܢ ܤܘܼܢܗܵܕܘܿܣ
ܕܐܵܪ̈ܬܵܕܘܿܟܿܤܹܐ ܡܸܬܼܚܵܘܝܵܐ ܕܐܸܬܼܐܲܡܪܲܬ̤: ܗܵܝܕܹܝܢ ܐܵܦ ܐܸܢܸܐ ܡܵܘܕܸܐ
pb. 256
ܐ̄ܢܵܐ: ܕܐܲܝܟܼ ܐܲܝܢܵܐ ܕܕܲܠܩܘܼܒܼܠܵܐ ܐܝܼܬܼܵܘܗܝ ܐܸܬܼܚܲܝܒܹ̇ܬܼ. ܐܸܢܕܹܝܢ ܐ̄ܢܵܫ
ܠܵܐ ܠܲܒܼܟܵܗ̇ ܠܒܲܪܬܼ ܩܵܠܵܐ ܗܵܕܹܐ: ܐܲܢ̄ܬܿ ܒܡܲܪܵܚܘܼܬܼܵܐ ܩܵܡ̣ܬܿ
ܠܘܼܩܒܲܠ ܟܠܗܘܿܢ: ܕܬܲܥܸܠ ܒܗܲܝܡܵܢܘܼܬܼܵܐ ܒܲܪܬܼ ܩܵܠܵܐ ܕܠܵܐ
ܐܸܬܼܩܲܒܿܠܲܬ̤. ܘܗܵܕܹܐ ܗ̄ܘ̣ܵܬܼ ܕܬܼܵܒܲܥ̇ ܗ̄ܘܹ̇ܝܬܼ ܠܵܟܼ: ܠܲܡܚܵܘܵܝܘܼܬܼܵܟܼ
ܕܠܵܐ ܐܸܬܿܬܿܤܝܼܡܲܬ̤ ܡ̣ܢ ܐܲܒܼ̈ܗܵܬܼܵܐ. ܕܬܸܬܿܤܝܼܡ ܕܹܝܢ ܘܲܕܼܠܵܐ
ܬܸܬܿܤܝܼܡ: ܕܤܘܼܢܗܵܕܘܿܣ ܐܝܼܬܹܝܗ̇ ܕܲܬܿܕܘܼܢ. ܕܥܲܠ ܗܵܕܹܐ
ܐܸܬܼܟܲܢܫܲܬ̤: ܘܠܵܘ ܥܲܠ ܡܸܕܸܡ ܐ̄ܚܪܹܝܢ. ܠܵܐ ܗ̄ܘ̣ܵܐ ܓܹܝܪ ܕܠܝܼ
ܡ̣ܢ ܟܠ ܦܪܘܿܣ ܢܸܬܿܛܦܝܼܤܘܼܢ: ܐܸܠܵܐ ܕܐܸܢܵܐ ܒܐܲܝܠܹܝܢ ܕܲܡܒܲܚܢܝܼܢ
ܘܕܼܵܝ̇ܢܝܼܢ ܘܓܼܵܒܹ̇ܝܢ ܕܬܸܬܼܩܲܒܲܠ ܐܸܬܿܛܦܝܼܣ. ܕܝܵܢܹ̈ܐ ܓܹܝܪ
ܩܪܹܝܬܼܟܼܘܿܢ: ܘܕܲܝܵܢܹ̈ܐ ܕܕܝܼܢܵܐ ܟܹܐܢܵܐ ܠܟܼܠܟܼܘܿܢ ܥܸܒܼ̇ܕܹܿܬܼ. ܘܠܵܐ ܝܸܗ̇ܒܹܿܬܼ
ܐܲܝܕܵܐ ܕܟܹܐܢܵܐ ܠܤܘܼܢܗܵܕܘܿܣ ܠܚܲܕܼ ܓܲܒܼܪܵܐ: ܐܲܝܢܵܐ ܕܒܲܩܛܝܼܪܵܐ
ܕܵܒܲ݁ܪ ܘܥܵܨܹ̇ܐ ܠܟܼܠܵܗ̇ ܤܘܼܢܗܵܕܘܿܣ: ܕܲܠܗܲܝܡܵܢܘܼܬܼܵܐ ܕܠܹܐ
ܡܸܬܼܚܲܙܝܵܐ ܬܸܠܒܿܘܿܟܼ.
ܡܵܢܵܐ ܗܵܟܹܝܠ ܥܒܲܕܬܿܘܿܢ ܡ̣ܢ ܗܵܠܹܝܢ ܕܐܸܬܼܟܲܢܲܫܬܿܘܿܢ ܡܸܛܠܵܬܼܗܹܝܢ؟
ܠܵܐ ܫܪܲܝܬܿܘܿܢ ܐܲܝܕܵܐ ܕܙܵܕܼܩܵܐ: ܘܡ̣ܢ ܤܘܼܢܗܵܕܘܿܣ ܤܕܲܩܬܿܘܿܢ:
ܘܠܲܐܝܠܹܝܢ ܕܪܲܚܝܼܩܝܼܢ ܠܵܐ ܩܵܘܝܼܬܿܘܿܢ: ܘܠܵܐ ܢܛܲܪܬܿܘܿܢ ܗܵܝ̇ ܕܙܵܕܼܩܵܐ
ܠܐܲܝܠܹܝܢ ܕܐܸܬܼܩܪܝܼܘ ܠܤܘܼܢܗܵܕܘܿܣ. ܘܠܵܐ ܗ̄ܘ̣ܵܐ ܐܲܝܟܼ
ܕܐܸܬܼܩܪܝܼܬܿܘܿܢ ܐܸܬܼܟܲܢܲܫܬܿܘܿܢ: ܐܸܠܵܐ ܐܲܝܟܼ ܕܡܸܬܼܩܲܛܪܓܼܵܢܵܐ ܨܵܒܹ̇ܐ:
ܗܘ̤ܵܘ ܕܲܝܵܢܹ̈ܐ. ܚܠܵܦ ܡܸܬܼܩܲܛܪܓܼܵܢܵܐ: ܐܵܘܬܿܒܼܘܼܗܝ ܕܢܸܗܘܸܐ
ܕܲܝܵܢܵܐ ܠܲܒܼܥܸܠܕܝܼܢܵܐ. ܘܡܵܢܵܐ ܐܵܡܲ݁ܪ ܐ̄ܢܵܐ ܕܲܝܢܵܐ؟ ܒܪܹܫܵܐ ܕܝܼܠܵܗ̇
pb. 257
ܕܤܘܼܢܗܵܕܘܿܣ ܐܵܘܬܿܒܼܘܼܗܝ. ܘܡܵܢܵܐ ܐܵܡܲ݁ܪ ܐ̄ܢܵܐ ܠܐܲܝܠܹܝܢ ܕܩܲܪܝܼܒܼܝܼܢ
ܗ̄ܘ̣ܵܐ؟ ܘܕܲܐܝܠܹܝܢ ܕܪܲܚܝܼܩܝܼܢ ܗ̄ܘ̣ܵܘ: ܘܕܲܐܝܠܹܝܢ ܕܠܵܐ ܥܕܲܟܹܝܠ
ܐܲܬܼܝܼܐܝܼܢ ܗ̄ܘ̣ܵܘ: ܘܥܲܠ ܟܠܗܘܿܢ ܫܘܼܠܛܵܢܵܐ ܝܲܗ̄ܒܼܬܿܘܿܢ ܠܹܗ:
ܘܕܲܐܝܠܹܝܢ ܕܬܲܡܵܢ ܗ̄ܘ̣ܵܘ ܘܕܲܐܝܠܹܝܢ ܕܪܲܚܝܼܩܝܼܢ ܗ̄ܘ̣ܵܘ: ܘܕܲܐܝܠܹܝܢ
ܕܚܲܝܼܢ ܗ̄ܘ̣ܵܘ ܘܕܲܐܝܠܹܝܢ ܕܡܲܚܝܼܬܼܝܼܢ ܗ̄ܘ̣ܵܘ: ܡܲܢܘܼ ܢܗܲܝܡܸܢ ܠܗܵܠܹܝܢ:
ܡ̣ܢ ܐܲܝܠܹܝܢ ܕܠܵܐ ܦܓܼܝܼܥ ܠܗܘܿܢ ܒܡܲܟܼܬܿܒܼܵܢܘܼܬܼܵܐ ܕܲܗܘ̤ܵܬܼ ܡܸܢܗܘܿܢ
ܥܲܠ ܤܘܼܢܗܕܘܿܣ ܕܒܲܐܦܸܤܘܿܣ؟ ܐܵܪܵܐ ܕܡ̣ܢ ܤܘܼܢܗܵܕܘܿܣ
ܕܐܲܝܟܼ ܗܵܕܹܐ: ܡܸܫܟܿܚܵܐ ܗ̄ܘ̣ܵܬܼ ܕܢܸܗܘܸܐ ܕܝܢܵܐ ܟܹܐܢܵܐ؟ ܐܸܠܵܐ ܐܵܦܸܢ
ܐܸܢܵܐ ܕܡܸܤܬܿܒܲܪ ܐ̄ܢܵܐ ܕܡܸܛܠ ܕܚܸܫܹ̇ܬܼ ܐܸܡܲ݁ܪ ܐ̄ܢܵܐ ܗܵܠܹܝܢ: ܘܠܵܐ
ܗ̄ܘ̣ܵܐ ܒܚܘܼܫܵܒܼܵܐ ܟܹܐܢܵܐ ܡܒܲܚܸܢ ܐ̄ܢܵܐ ܠܗܹܝܢ: ܠܵܐ ܢܸܬܿܛܦܝܼܣ
ܐ̄ܢܵܫ ܠܡܸܠܲܝ̈. ܠܵܐ ܓܹܝܪ ܒܵܥܹ̇ܐ ܐ̄ܢܵܐ: ܕܢܸܗܘܸܐ ܠܝܼ ܡܸܕܸܡ ܥܘܼܕܼܪܵܢܵܐ
ܡ̣ܢ ܒܢܲܝ̈ܢܵܫܵܐ. ܐܸܢܵܐ ܓܹܝܪ ܡܸܟܹܿܝܠ ܡܸܬܼܢܲܩܸܐ ܐ̄ܢܵܐ: ܘܙܲܒܼܢܵܐ ܕܐܸܫܬܿܪܸܐ
ܡܛ̣ܵܐ: ܕܐܸܗܘܸܐ ܥܲܡ ܡܫܝܼܚܵܐ: ܕܡܸܛܠܵܬܹܗ ܐܲܩܪܸܒܼ ܗܵܢܵܐ ܥܲܡܝܼ.
ܐܸܠܵܐ ܕܠܵܐ ܢܸܛܥܘܿܢ ܐ̄ܢܵܫܵܐ ܡ̣ܢ ܗܲܝܡܵܢܘܼܬܼܵܐ ܬܪܝܼܨܬܵܐ: ܡܸܛܠ
ܫܡܵܐ ܕܕܝܼܢܵܐ ܕܤܘܼܢܗܵܕܘܿܣ: ܡܸܛܠ ܗܵܕܹܐ ܐܸܡ̇ܪܹܬܼ ܗܵܠܹܝܢ. ܒܪܲܡ
ܕܹܝܢ: ܐܸܢܵܐ ܒܨܝܼܪ ܐܸܡ̇ܪܹܬܼ ܡ̣ܢ ܐܲܝܠܹܝܢ ܕܢܸܗܘܿܢ ܟܬܲܒܼܘ. ܐܸܠܵܐ
ܡܸܢܗܘܿܢ ܕܗܵܢܘܿܢ ܕܚܲܝܒܼܘܼܢܝ: ܡܸܢܗܘܿܢ ܝܑܼܠܲܦܘ ܕܠܵܐ ܕܝܼܢܵܐ
ܗܘ̤ܵܐ: ܐܵܦܠܵܐ ܒܕܝܼܢܵܐ ܐܸܬܼܚܲܝܒܹܿܬܼ.
ܐܸܢܵܐ ܓܹܝܪ ܐܵܡܲ݁ܪ ܗ̄ܘܹ̇ܝܬܼ ܠܗܵܠܹܝܢ ܕܐܵܒܼ̈ܗܵܬܼܵܐ: ܘܐܵܡܲ݁ܪ ܗ̄ܘܹ̇ܝܬܼ
ܠܗܵܠܹܝܢ ܕܲܟܼܬܼܵܒܹ̈ܐ ܩܲܕܝܼ̈ܫܹܐ. ܘܲܡܩܲܕܸܡ ܗ̄ܘܹ̇ܝܬܼ ܚܵܐܲܪ ܗ̄ܘܹ̇ܝܬܼ
pb. 258
ܒܥܘܼܬܵܕܼܵܐ ܕܗܵܘܹ̇ܐ ܠܘܼܩܒܲܠ ܗܲܝܡܵܢܘܼܬܼܵܐ. ܘܲܡܩܲܕܸܡ ܗ̄ܘܹ̇ܝܬܼ ܘܐܵܡܲ݁ܪ
ܗ̄ܘܹ̇ܝܬܼ ܫܘܼܪܵܪܵܐ ܕܗܵܘܹ̇ܐ ܠܗܲܝܡܵܢܘܼܬܼܵܐ ܕܐܵܪ̈ܝܵܢܹܐ: ܡ̣ܢ ܚܕܼܵܝܘܼܬܼܵܐ
ܩܢܘܿܡܵܝܬܼܵܐ. ܗܵܝ̇ ܕܐܵܦ ܠܡܵܢܝܼܢܵܝܹ̈ܐ ܡܲܤܒܿܤܵܐ ܗ̄ܘ̣ܵܬܼ: ܒܗܵܝ̇ ܕܠܵܐ
ܚܵܫܘܿܫܵܐܝܼܬܼ ܚܲܫ̣. ܘܬܼܘܼܒܼ ܠܐܵܦܘܿܠܝܼܢܵܪܝܼܣ: ܕܲܒܼܬܲܪ̈ܬܲܝܗܹܝܢ ܐܝܼܕܼܵܘ̈ܗܝ
ܫܵܠܹ̇ܡ ܗ̄ܘ̣ܵܐ ܠܵܗ̇: ܘܲܠܟܼܠܗܹܝܢ ܗܹܪܹ̈ܤܝܼܵܣ ܐܸܬܼܚܲܛܸܦ ܗ̄ܘ̣ܵܐ.
ܡܸܛܠ ܕܲܡܒܲܛܸܠ ܗ̄ܘ̣ܵܐ ܠܡܹܐܡܲܪ ܕܝܼ̈ܠܵܝܵܬܼܵܐ ܕܟܼܠ ܚܲܕܼ ܡ̣ܢ ܟܝܵܢܹ̈ܐ
ܒܲܚܕܼܵܝܘܿܬܼܵܐ: ܘܡܲܤܸܩ ܗ̄ܘ̣ܵܬܠ ܠܗܹܝܢ ܠܟܼܠܗܹܝܢ ܥܲܠ ܐܲܠܵܗܵܐ ܡܸܠܬܼܵܐ:
ܐܵܦ ܠܗܵܠܹܝܢ ܕܒܸܤܪܵܐ. ܘܲܒܼܗܵܠܹܝܢ ܚܫܲܒܼܬܿܘܿܢ: ܠܐܵܪ̈ܬܵܕܘܿܟܿܤܹܐ
ܕܢܬܼܪܡܘܿܢ ܦܫܝܼܩܵܐܝܼܬܼ ܡ̣ܢ ܗܲܪ̈ܵܛܝܼܩܹܐ: ܕܠܲܝܬܿ ܠܗܘܿܢ ܐܲܝܠܹܝܢ
ܕܙܵܕܹܩ ܕܢܸܬܼܚܲܫܚܘܼܢ ܒܗܹܝܢ ܠܘܼܩܒܲܠܗܘܿܢ. ܡܸܛܠ ܕܐܲܫܠܸܡܬܿܘܿܢ
ܠܗܘܿܢ ܦܘܼܡܲܝ̈ܟܿܘܿܢ: ܘܐܸܤܲܪܬܿܘܿܢ ܐܝܼܕܲܝ̈ܟܿܘܿܢ ܘܪܸ̈ܓܼܠܲܝܟܿܘܿܢ:
ܘܐܲܫܠܸܡܬܿܘܿܢ ܢܲܦܫܟܼܘܿܢ ܠܗܘܿܢ. ܕܐܵܘ ܬܸܦܠܘܼܢ ܡ̣ܢ ܚܵܒܿܬܼܟܼܘܿܢ:
ܐܵܘ ܕܲܕܼܠܵܐ ܡܲܦܲܩ ܒܪܘܼܚܵܐ ܬܸܚܫܘܼܢ ܒܝܼ̈ܫܵܬܼܵܐ: ܐܲܝܟܼ ܠܵܐ ܡܸܬܼܟܲܚܕܵܢܹ̈ܐ
ܙܲܟܿܝܼܬܘܿܢ ܠܗܹܪܹ̈ܤܝܼܵܣ ܠܘܼܩܒܲܠ ܐܲܪ̈ܬܵܕܘܿܟܿܤܹܐ. ܐܵܦܸܢ ܓܹܝܪ ܐܵܪܝܵܢܵܐ
ܢܸܫܬܲܟܲܚ: ܠܟܼܘܿܢ ܩܵܪܹܐ ܒܤܵܗ̈ܕܹܐ ܠܘܼܩܒܲܠ ܐܲܝܠܹܝܢ ܕܐܸܬܼܟܲܢܲܫܘ
ܒܢܝܼܩܝܼܵܐ: ܐܲܝܟܼ ܡ̇ܢ ܕܲܒܼܓܼܘܼܡܕܵܢܘܼܬܼܵܐ ܩܵܡ̣ܘ ܓܲܠܝܵܐܝܼܬܼ ܠܘܼܩܒܲܠ
ܐܵܪܝܼܘܿܣ: ܠܡܹܐܡܲܪ ܐܲܝܠܹܝܢ ܕܠܵܐ ܙܵܕ̈ܩܵܢ. ܗܵܢܵܘ ܕܹܝܢ: ܕܲܠܗܘ̇
ܚܵܫܘܿܫܵܐ ܘܡܵܝܘܿܬܼܵܐ ܘܲܥܒܼܝܼܕܼܵܐ: ܒܲܪ ܟܝܵܢܵܐ ܐܵܡ̇ܪܝܼܢ ܠܹܗ ܕܠܵܐ ܚܵܫܘܿܫܵܐ:
ܘܠܵܐ ܡܵܝܘܿܬܼܵܐ: ܘܥܵܒܼ̇ܘܿܕܼܵܐ ܕܟܼܠܗܹܝܢ ܒܸܪ̈ܝܵܬܼܵܐ. ܘܐܵܦܸܢ ܡܵܢܘܼܝܢܵܝܐ ܢܸܗܘܸܐ:
ܤܵܗܕܝܼܬܿܘܿܢ ܠܹ݂ܗ: ܒܗܵܝ̇ ܕܠܵܐ ܚܵܫܘܿܫܵܐܝܼܬܼ ܚܲܫ̣: ܕܒܸܐܤܟܹܿܡܵܐ
pb. 259
ܚܲܫ̣. ܗܵܢܵܐ ܓܹܝܪ ܠܵܐ ܚܵܫܘܿܫܵܐܝܼܬܼ ܚܵܐܹ̇ܫ: ܗܵܘ̇ ܕܟܲܕܼ ܡܸܤܬܿܒܲܪ
ܗ̄ܘ̣ܵܐ ܕܚܵܐܹ̇ܫ: ܠܵܐ ܚܵܐܹ̇ܫ ܗ̄ܘ̣ܵܐ. ܗܵܘ̇ ܓܹܝܪ ܕܠܵܐ ܐܝܼܬܼܵܘܗܝ ܗ̄ܘ̣ܵܐ
ܡ̣ܢ ܟܵܝܵܢܵܐ: ܗܵܢܵܐ ܐܵܦܠܵܐ ܡܝܼܬܼ. ܠܡܲܚܤܸܢ ܐܵܘܕܝܼܬܿܘܿܢ ܫܪܵܪܵܐ:
ܘܐܲܟܸܤܬܿܘܿܢ ܠܲܬܼܠܵܬܼܡܵܐܐ ܘܲܬܼܡܸܵܢܬܲܥܤܲܪ: ܕܲܒܼܡܲܤܲܒܼ ܒܐܲܦܹ̈ܐ ܠܵܐ
ܐܸܡ݂ܲܪ. ܫܪܵܪܵܐ. ܐܸܢ ܥܲܡ ܗܵܕܹܐ ܐܵܦ ܠܗܵܝ̇ ܡܸܬܼܚܪܹܝܬܿܘܿܢ ܠܡܹܐܡܲܪ:
ܕܠܵܘ ܒܲܟܼܝܵܢܵܐ ܐܵܡ̇ܤܪܝܼܢܲܢ ܕܡܝܼܬܼ ܐܲܠܵܗܵܐ ܡܸܠܬܼܵܐ: ܡܸܛܠ ܕܲܟܼܝܵܢܵܐ
ܐܲܠܵܗܵܝܵܐ ܠܵܐ ܡܵܝܘܿܬܼܵܐ ܗ̄ܘ̣ ܘܠܵܐ ܚܵܫܘܿܫܵܐ. ܘܐܵܦܠܵܐ ܒܡܲܤܒܿܪܵܢܘܼܬܼܵܐ
ܕܒܸܤܪܵܐ: ܐܸܠܵܐ ܒܲܟܼܝܵܢܵܐ ܒ ܕܒܸܤܪܵܐ ܕܐܝܼܬܼܵܘܗܝ ܚܵܫܘܿܫܵܐ ܘܡܵܝܘܿܬܼܵܐ.
ܘܗܵܘ̇ ܡܵܐ ܕܲܗܘ̤ܵܐ ܐܲܠܵܗܵܐ ܡܸܠܬܼܵܐ ܒܸܤܪܵܐ ܗ̄ܘ̣ܵܐ: ܡܩܲܒܸܿܠ ܠܵܗ̇
ܠܡܸܠܬܼܵܐ ܗܵܕܹܐ ܚܲܢܦܵܐ: ܒܫܘܼܚܠܵܦ ܕܡܘܼܬܼܵܐ ܡܩܲܒܸܿܠ. ܘܲܒܼܫܘܼܚܠܵܦ
ܐܘܼܤܝܼܵܐ ܐܵܡܲ݁ܪ ܐܲܢ̄ܬܿ ܕܲܗܘ̤ܵܬܼ ܡܸܬܼܒܲܪܢܵܫܢܘܼܬܼܵܐ: ܕܠܵܐ ܐܸܫܬܲܚܠܦܲܬ̤
ܐܘܼܤܝܼܵܐ ܕܝܼܠܹܗ ܘܲܕܼܡܘܼܬܹܗ. ܟܲܕܼ ܚܵܐܹ̇ܫ ܒܲܟܼܝܵܢܵܐ ܚܵܫܘܿܫܵܐ: ܠܵܐ ܗ̄ܘ̣ܵܐ
ܩܕܼܵܡ ܕܢܸܗܘܸܐ ܒܐܘܼܤܝܼܵܐ. ܥܲܠ ܡܵܢܵܐ ܗܵܟܹܝܠ ܠܵܐ ܐܵܡ̇ܪܝܼܢ ܠܗܵܠܹܝܢ
ܕܝܼܠܲܢ: ܐܲܝܟܵܐ ܕܐܝܼܬܼ ܫܸܡܥܵܐ ܠܡܸܠܬܼܵܐ ܕܥܲܠ ܡܸܬܼܒܲܪܢܫܵܢܘܼܬܼܵܐ.
ܐܸܠܵܐ ܡܲܛܥܝܵܐ ܠܲܢ ܒܝܲܠܕܵܐ ܕܒܸܤܪܵܐ ܕܗܘܼܠܹܐ: ܕܲܓܼܒܼܝܼܠ ܗ̄ܘ̣ܵܐ
ܥܲܡܹܗ ܐܲܠܵܗܵܐ ܡܸܠܬܼܵܐ: ܘܲܓܼܒܼܝܼ̈ܠܵܢ ܫܘܿܥ̈ܝܵܬܼܵܐ ܕܠܵܐ ܦܝܵܣ: ܘܲܕܼܠܵܐ
ܫܵܘ̈ܝܵܢ ܠܡܸܬܼܗܲܝܡܢܘܼ؟
ܘܐܸܢ ܠܘܼܩܒܲܠ ܗܵܕܹܐ ܬܹܐܡܲܪ: ܕܠܵܐ ܒܫܘܼܚܠܵܦ ܐܘܼܤܝܼܵܐ
ܘܲܒܼܫܘܼܚܠܵܦ ܕܡܘܼܬܼܵܐ ܗܘ̤ܵܬܼ ܡܸܬܼܒܲܪܢܫܵܢܘܼܬܼܵܐ ܕܗܵܘ̇ ܕܗܘ̤ܵܐ
ܒܸܤܪܵܐ ܘܒܲܪܢܵܫܵܐ: ܐܸܠܵܐ ܒܲܪܢܵܫܵܐ ܗܵܘ̇ ܕܐܸܬܼܢܤܸܒܼ: ܗܵܢܵܐ ܕܐܸܬܼܝܼܠܸܕܼ
pb. 260
ܡ̣ܢ ܐܲܢ̄ܬܿܬܼܵܐ ܘܚܲܫ̣ ܘܡ̣ܝܼܬܼ ܘܦܵܡ̣: ܘܲܥܬܼܝܼܕܼ ܠܡܹܐܬܼܵܐ ܠܲܡܕܼܵܢ
ܚܲܝܹ̈ܐ ܘܡܝܼ̈ܬܹܐ: ܐܸܫܬܲܚܠܲܦ ܠܐܘܼܤܝܼܵܐ ܕܐܲܠܵܗܵܐ: ܘܠܵܐ ܬܘܼܒܼ ܒܲܪܢܵܫܵܐ
ܡܸܬܼܪܢܸܐ: ܠܒܲܪ ܡ̣ܢ ܫܡܵܐ ܒܲܠܚܘܿܕܼ. ܘܲܒܼܗܵܕܹܐ ܐܸܡܲ݁ܪ ܐܲܢ̄ܬܿ: ܕܐܲܠܵܗܵܐ
ܡܝܼܬܼ ܘܩܵܡ̣. ܬܘܼܒܼ ܚܲܢܦܵܐ ܦܵܐܹܡ̇ ܥܲܡܵܟܼ: ܗܵܘ̇ ܕܦܲܠܲܚ ܠܕܚܠܬܼܵܐ
ܗܵܝ̇ ܕܐܵܡ̇ܪܵܐ ܫܘܼܚܠܵܦܵܐ ܕܲܒܼܢܲܝ̈ܢܵܫܵܐ ܠܐܲܠܵܗܘܼܬܼܵܐ: ܘܡܸܟܹܝܠ ܐܲܝܟܼ
ܐܲܠܵܗܵܐ ܡܪܲܥܸܐ ܘܲܡܫܲܡܸܫ ܠܹܗ. ܐܲܝܟܲܢܵܐ ܗܵܟܹܝܠ ܐܸܡܲ݁ܪ ܐܲܢ̄ܬܿ ܪܸܥܝܵܢܵܐ
ܕܚܲܢܦܘܼܬܼܵܐ ܐܝܼܬܼ ܠܟܼܘܿܢ؟ ܛܵܥܹ̇ܝܬܿܘܿܢ ܠܟܼܘܿܢ: ܕܲܥܕܲܡܵܐ ܠܗܵܫܵܐ
ܒܗܵܠܹܝܢ ܡܸܬܼܟܲܬܿܫܝܼܢ ܗ̣̄ܘܲܝܬܿܘܿܢ ܠܘܼܩܒܲܠܝ: ܘܡ̣ܢ ܗܵܠܹܝܢ ܡܲܛܥܹܝܢ
ܗ̣̄ܘܲܝܬܿܘܿܢ ܠܲܒܼܢܲܝ̈ܢܵܫܵܐ. ܘܐܸܢ ܬܹܐܡܲܪ: ܕܠܵܐ ܒܫܘܼܚܠܵܦ ܐܘܼܤܝܼܵܐ
ܘܠܵܐ ܒܫܘܼܚܠܵܦ ܐܲܠܵܗܘܼܬܼܵܐ ܗܘ̤ܵܬܼ ܡܸܬܼܒܲܪܢܫܵܢܘܼܬܼܵܐ ܕܐܲܠܵܗܵܐ
ܡܸܠܬܼܵܐ: ܘܲܢܩܵܘܸܐ ܦܲܓܼܪܵܐ ܒܐܘܼܤܝܼܵܐ ܕܠܵܐ ܫܘܼܚܠܵܦܵܐ: ܐܸܠܵܐ ܠܲܚܕܼܵܝܘܼܬܼܵܐ
ܡܸܠܬܼܵܐ: ܘܲܡܩܵܘܸܐ ܦܲܚܼܪܵܐ ܒܐܘܼܤܝܼܵܐ ܕܠܵܐ ܫܘܼܚܠܵܦܵܐ: ܐܸܠܵܐ ܠܲܚܕܼܵܝܘܼܬܼܵܐ
ܩܢܘܿܡܵܝܬܼܵܐ ܘܲܟܼܝܵܢܵܝܬܼܵܐ ܗܘ̤ܵܐ ܒܲܪܢܵܫܵܐ: ܬܘܼܒܼ ܐܵܪܝܼܘܿܣ ܡܩܲܒܸܿܠ ܠܵܗ̇
ܠܬܼܵܘܕܝܼܬܼܵܐ: ܗܵܘ̇ ܕܲܡܒܲܙܲܚ ܒܲܬܼܠܵܬܼܡܵܐܐ ܘܲܬܼܡܵܢܬܲܥܤܲܪ.
ܘܲܡܩܲܒܿܠܝܼܬܿܘܿܢ ܠܹܗ: ܘܠܵܐ ܡܸܬܿܬܲܩܠܝܼܬܿܘܿܢ. ܘܒܼܐܝܼ̈ܕܲܝܵܐ ܘܪܸ̈ܓܼܠܹܐ
ܠܐܵܪܝܼܘܿܣ: ܕܒܲܫܪܵܪܵܐ ܐܵܡܲ݁ܪ: ܫܵܠܵܡ̇ܝܼܬܿܘܿܢ: ܕܲܬܼܒܲܥܬܼܵܐ ܥܵܒܼ̇ܕܼ:
ܕܒܲܩܡܘܿܡܵܐ ܟܝܵܢܝܵܬܐ ܗܘ̤ܵܐ ܒܲܪܢܵܫܵܐ: ܘܲܟܼܝܵܢܵܐܝܼܬܼ ܒܲܩܢܘܿܡܵܐ ܐܸܬܼܚܲܝܲܕܼ:
ܟܲܕܼ ܚܵܐܹ̇ܫ ܟܝܵܢܵܐܝܼܬܼ ܒܲܪܓܸܫܬܼܵܐ ܠܚܲܫܹ̈ܐ ܕܦܲܓܼܪܵܐ. ܠܗܵܢܵܐ ܡܲܡܪܲܚ ܐܲܢ̄ܬܿ
ܕܬܹܐܡܲܪ ܒܲܪ ܟܝܵܢܵܐ: ܗܵܘ̇ ܐܲܝܢܵܐ ܕܲܡܩܲܒܿܠܵܢܵܐ ܗ̄ܘ̣ ܕܚܲܫܹ̈ܐ.
ܘܐܸܢ ܡ̣ܢ ܗܵܢܵܐ ܡܸܫܬܲܐܠܝܼܬܿܘܿܢ: ܐܲܝܟܼ ܐܲܝܢܵܐ ܕܠܵܐ ܡܵܘܕܹܐ ܢܲܦܫܵܐ
ܘܦܲܓܼܪܵܐ: ܒܐܲܝܠܹܝܢ ܕܒܲܩܢܘܿܡܵܐ ܟܝܵܢܵܝܵܐ ܐܸܬܼܟܲܝܼܢ ܡܸܠܬܼܵܐ: ܘܚܲܫ̣ ܡ̣ܢ
ܕܵܗܘ̤ܵܐ ܚܵܫܘܿܫܵܐ ܒܲܟܼܝܵܢܵܐ ܚܵܫܘܿܫܵܐ ܒܚܲܫܹ̈ܐ ܟܝܵܢ̈ܝܵܐ: ܠܗܵܠܹܝܢ
pb. 261
ܕܐܵܪܝܼܘܿܣ ܘܐܵܦܘܿܠܝܼܢܵܪܝܼܣ ܩܵܥܹ̇ܐ. ܐܵܪܝܼܘܿܣ ܓܹܝܪ ܐܵܡܲ݁ܪ: ܕܲܒܼܡܵܢܵܐ
ܡܥܲܕܪܵܐ ܠܵܟܼ ܗܵܝ̇ ܕܢܸܗܘܸܐ ܟܝܵܢܵܐ ܚܵܫܘܿܫܵܐ ܐܵܠܲܗܵܐ ܒܲܚܕܼܵܝܘܼܬܼܵܐ ܩܢܘܿܡܵܝܬܐܵ
ܕܢܲܦܫܵܐ: ܕܢܸܚܲܫ ܒܦܲܓܼܪܹܗ ܐܵܦ ܒܢܲܦܫܹܗ ܚܲܫܹ̈ܐ ܟܝܵܢܝܹ̈ܐ ܟܝܵܢܵܐܝܼܬܼ؟
ܐܵܪܵܐ ܥܵܒܹ̇ܕܼ ܠܹܗ ܒܲܪ ܟܝܵܢܵܐ ܕܲܟܼܝܢܵܐ ܠܵܐ ܚܵܫܘܿܫܵܐ: ܠܗܵܘ̇ ܐܲܝܢܵܐ
ܕܲܒܼܚܲܫܹ̈ܐ ܗܵܠܹܝܢ ܚܵܫܘܿܫܹ̈ܐ ܐܝܼܬܼܵܘܗܝ؟ ܐܵܦܘܿܠܝܼܢܵܪܝܼܣ ܕܹܝܢ ܡܚܲܝܸܒܼ
ܠܐܲܝܠܹܝܢ ܕܗܵܠܹܝܢ ܐܵܡ̇ܪܝܼܢ: ܘܡܵܘܕܹܝܢ ܐܲܝܟܼ ܐܲܝܠܹܝܢ ܕܲܠܗܲܝܡܵܢܘܼܬܹܗ
ܕܝܼܠܹܗ ܠܒܼܒܿܟܼܝܼܢ. ܘܦܵܩܹ̇ܕܼ ܠܗܘܿܢ ܕܢܲܪܚܩܘܼܢ ܡ̣ܢ ܐܲܝܠܹܝܢ ܕܗܵܠܹܝܢ
ܐܵܡ̇ܪܝܼܢ: ܘܲܕܼܢܸܗܘܘܿܢ ܒܢܲܝ̈ ܓܲܒܵܐ ܕܝܼܠܹܗ: ܠܡܲܚܪܵܡܘܼ ܠܟܼܠܗܘܿܢ
ܐܲܝܠܹܝܢ ܕܲܤܕܲܩ̣ܘ ܡܸܢܹܗ. ܐܸܢ ܬܘܼܒܼ ܢܸܫܬܿܪܸܐ ܐܵܦ ܗܵܢܵܐ ܐܲܝܟܼ ܡ̇ܢ
ܕܠܵܐ ܡܵܘܕܸܐ ܠܵܐ ܡܲܕܥܵܐ ܘܠܵܐ ܨܒܼܝܵܢܵܐ: ܡܸܛܠ ܗܵܢܵܐ ܐܲܝܟܼ ܐܲܝܢܵܐ ܕܠܵܐ
ܡܵܘܕܸܐ ܒܲܚܕܼܵܝܘܼܬܼܵܐ ܟܝܵܢܵܝܬܼܵܐ ܘܲܡܫܲܡܠܲܝܬܼܵܐ ܡܸܠܬܼܵܐ ܒܒܸܤܪܵܐ ܘܲܒܼܢܲܦܫܵܐ
ܘܲܒܼܡܲܕܿܥܵܐ ܠܵܐ ܡܩܲܒܿܠܝܼܬܿܘܿܢ ܠܹܗ. ܡܸܛܠ ܕܲܠܟܼܠܗܹܝܢ ܗܵܠܹܝܢ
ܕܐܵܪܝܼܘܿܣ ܐܸܡܵ݁ܪ: ܬܸܗܘܸܐ ܕܲܠܢܲܦܫܵܐ ܘܲܠܦܲܓܼܪܵܐ ܘܲܠܡܲܕܥܵܐ ܐܸܬܼܚܲܝܲܕܼ:
ܐܝܼܬܹܝܗ̇ ܕܹܝܢ ܚܕܼܵܝܘܼܬܼܵܐ ܩܢܘܿܡܵܝܬܼܵܐ ܘܲܟܼܝܵܢܵܝܬܼܵܐ. ܬܵܘܤܲܦܬܼܵܐ ܥܵܒܼ̇ܕܼ
ܐܲܢ̄ܬܿ: ܘܠܵܘ ܒܘܼܨܪܵܐ. ܘܡ̣ܢ ܒܘܼܨܵܪܵܐ ܕܚܲܫܹ̈ܐ ܕܦܲܓܼܪܵܐ ܥܵܪܩܝܼܢ
ܐܢ̄ܬܿܘܿܢ: ܐܲܝܟܲܢܵܐ ܕܲܒܼܚܲܫܹ̈ܐ ܤܲܓܿܝܼ̈ܐܹܐ ܬܸܥܒܿܕܼܘܼܢܵܝܗܝ ܚܵܫܘܿܫܵܐ: ܠܒܲܪ
ܟܝܵܢܵܐ ܕܗܵܘ̇ ܕܐܝܼܬܼܵܘܗܝ ܠܵܐ ܚܵܫܘܿܫܵܐ. ܤܓܿܝܼܐܵܐ ܗ̣̄ܝ ܚܵܫܘܿܫܘܼܬܼܵܐ
ܕܐܲܝܠܹܝܢ ܕܗܵܠܹܝܢ ܡܲܤܒܲܪܝܼܢ. ܝܵܗܒܿܝܼܬܿܘܿܢ ܠܹܗ ܓܹܝܪ ܐܲܝܠܹܝܢ ܕܚܵܫܘܿܫܵܐ
ܥܵܒܼ̈ܕܵܢ: ܡܸܛܠ ܚܕܼܵܝܘܼܬܼܵܐ ܩܢܘܿܡܵܝܬܼܵܐ: ܕܡܲܚܝܲܕܼܪ ܒܪܘܼܟܵܒܼܵܐ ܟܝܵܢܝܵܐ:
ܕܲܕܼܠܵܐ ܒܨܒܼܝܵܢܹܗ ܢܸܚܲܫ ܠܚܲܫܹ̈ܐ ܕܦܲܓܼܪܵܐ ܘܲܕܼܢܲܦܫܵܐ ܘܲܕܼܡܲܕܥܵܐ:
ܘܲܡܚܲܝܲܕܼ ܒܐܘܼܤܝܼܵܐ ܘܒܲܟܼܝܵܢܵܐ. ܐܲܟܼܙܢܵܐ ܕܢܲܦܫܵܐ ܒܦܲܓܼܪܵܐ: ܠܚܲܫܹ̈ܐ
pb. 262
ܕܢܲܦܫܵܐ ܘܲܕܦܲܓܼܪܵܐ ܡ̣ܢ ܐܵܢܲܢܩܹܐ ܡܤܲܝܒܿܪܵܐ. ܐܸܠܵܐ ܚܵܫܘܿܫܵܐ ܠܵܐ
ܐܸܡܲ݁ܪ ܐܲܢ̄ܬܿ ܠܹܗ: ܡܵܕܹܝܢ ܠܵܘ ܚܕܼܵܝܘܼܬܼܵܐ ܩܢܘܿܡܵܝܬܼܵܐ ܗܘ̤ܵܬܼ
ܘܲܟܼܝܵܢܵܝܬܼܵܐ: ܐܸܠܵܐ ܨܸܒܼܝܵܢܵܝܬܼܵܐ: ܕܥܲܡ ܦܲܓܼܪܵܐ ܘܥܲܡ ܢܲܦܫܵܐ ܡܠܝܼܠܬܼܵܐ
ܘܝܲܕܼܘܼܥܬܼܵܢܝܼܬܼܵܐ ܕܲܡܝܲܚܕܝܼܢ ܩܢܘܿܡܵܐܝܼܬܼ ܘܲܟܼܝܵܢܵܐܝܼܬܼ ܠܲܟܼܝܵܢܵܐ ܕܒܲܪܢܵܫܵܐ.
ܚܕܼܵܝܘܼܬܼܵܐ ܕܹܝܢ ܕܐܲܠܵܗܵܐ ܡܸܠܬܼܵܐ ܕܲܠܘܵܬܼ ܗܵܠܹܝܢ: ܠܵܘ ܩܢܘܿܡܵܝܬܼܵܐ
ܘܠܵܘ ܟܝܵܢܵܝܬܼܵܐ ܐܝܼܬܹܝܗ̇: ܐܸܠܵܐ ܨܸܒܼܝܵܢܵܝܬܼܵܐ: ܐܲܝܟܼ ܕܲܒܼܕܼܝܼܠܵܝܘܼܬܼ
ܨܸܒܼܝܵܢܵܐ
ܘܠܵܘ ܕܲܟܼܝܵܢܵܐ. ܐܲܝܠܹܝܢ ܓܹܝܪ ܕܒܲܩܢܘܿܡܵܐ ܟܝܵܢܵܝܵܐ ܡܸܬܼܚܲܝܕܝܼܢ:
ܕܝܼܠܵܝܘܼܬܼܵܐ ܟܝܵܢܵܝܬܼܵܐ ܐܝܼܬܼ ܠܗܹܝ ܘܠܵܘ ܨܸܒܼܝܵܢܵܝܬܼܵܐ. ܠܦܲܪܨܘܿܦܹܗ
ܓܹܝܪ ܕܝܼܠܹܗ ܢܲܤܒܹܗ ܠܲܕܡܘܼܬܼܵܐ ܕܥܲܒܼܕܵܐ: ܘܠܵܘ ܠܲܟܼܝܵܢܹܗ: ܐܵܘ
ܒܫܘܼܚܠܵܦ ܐܘܼܤܝܼܵܐ. ܕܐܘܼܤܝܼܵܐ ܠܲܟܼܝܵܢܵܐ ܕܐ̄ܢܵܫܘܼܬܼܵܐ: ܐܵܘ ܕܐ̄ܢܵܫܘܼܬܼܵܐ
ܠܲܟܼܝܵܢܵܐ ܕܐܲܠܵܗܘܼܬܼܵܐ: ܐܵܘ ܒܒܼܘܼܠܒܵܠܵܐ ܐܸܬܼܚܲܝܕܲܬ̤ ܘܐܸܬܼܡܲܙܓܲܬ̤
ܠܲܟܼܝܵܢܵܐ ܐ̄ܢܵܫܵܝܵܐ: ܐܵܘ ܒܪܘܼܟܵܒܼܵܐ ܟܝܵܢܵܝܵܐ ܘܫܘܼܠܵܦܵܐ ܕܡܲܥܒܿܕܼܵܢܘܼܬܼܵܐ
ܕܟܼܝܵܢܵܐ. ܡܸܫܬܲܚܠܦܵܢܝܼܬܼܵܐ ܓܹܝܪ ܘܡܸܫܬܲܓܼܢܝܵܢܝܼܬܼܵܐ ܐܝܼܬܹܝܗ̇: ܗܵܕܹܐ
ܕܝܼܠܵܝܘܼܬܼܵܐ. ܗܵܝ̇ ܕܹܝܢ ܨܸܒܼܝܵܢܵܝܬܼܵܐ: ܠܵܐ ܚܵܫܘܿܫܬܼܵܐ ܘܠܵܐ ܡܸܫܬܲܚܠܦܵܢܝܼܬܼܵܐ
ܐܝܼܬܹܝܗ̇: ܠܵܘ ܒܐܘܼܤܝܼܵܐ ܟܝܵܢܵܝܬܼܵܐ ܚܵܫܵܐ ܕܠܵܐ ܨܸܒܼܝܵܢܵܐ ܠܚܲܫܹ̈ܐ ܕܢܲܦܫܵܐ
ܘܲܕܼܦܲܓܼܪܵܐ. ܗܵܢ̇ܘܿܢ ܕܲܟܼܝܵܢܵܐܝܼܬܼ ܡܚܲܝܕܝܼܢ: ܘܒܼܐܘܼܤܝܼܵܐ ܚܵܫܹ̇ܝܢ ܥܲܡ
ܚܕܼܵܕܹ̈ܐ: ܟܲܕܼ ܥܵܒܼ̇ܕܝܼܢ ܠܗܘܿܢ ܟܝܵܢܵܐܝܼܬܼ ܠܚܲܫܹ̈ܐ ܕܝܼܠܗܘܿܢ ܘܠܵܘ
ܨܸܒܼܝܵܢܵܐܝܼܬܼ. ܐܵܦܸܢ ܓܹܝܪ ܒܨܸܒܼܝܵܢܹܗ ܩܲܒܸܿܠ ܐܸܢܘܿܢ ܠܚܲܫܹ̈ܐ: ܒܪܲܡ ܟܲܕܼ
ܩܲܒܸܿܠ̣ ܐܸܢܘܿܢ ܘܚܲܫ̣ ܐܸܢܘܿܢ: ܟܝܵܢܵܐܝܼܬܼ ܚܲܫ̣ ܐܸܢܘܿܢ: ܒܗܵܝ̇ ܕܲܒܼܕܼܝܼܠܵܝܘܼܬܼܵܐ
ܟܝܵܢܝܬܼܵܐ ܘܒܲܪܓܸܫܬܼܵܐ ܚܲܫ̣ ܐܸܢܘܿܢ.
pb. 263
ܐܸܢ ܗܵܠܹܝܢ ܗܵܟܲܢܵܐ ܐܵܡܪܝܼܬܿܘܿܢ: ܫܘܲܪܬܿܘܿܢ ܟܠܟܼܘܿܢ:
ܘܐܲܚܸܦܬܿܘܿܢ ܠܡܹܐܡܲܪ ܐܲܝܠܹܝܢ ܕܐܸܡ݂ܲܪ ܗܵܘ̇ ܕܲܒܼܓܼܘܼܡܕܵܐ ܕܠܵܐ
ܟܘܼܚܵܕܼܵܐ ܐܸܡ݂ܲܪ ܗܵܠܹܝܢ. ܕܲܠܗܵܘ̇ ܕܗܵܠܹܝܢ ܐܸܡ݂ܲܪ: ܐܲܚܪܸܡ̣، ܗܵܢܘܿܢ:
ܕܲܕܼܠܵܐ ܫܘܼܒܼܩܵܢܵܐ ܐܲܝܬܿܝܼܘ ܥܠܵܘܗܝ ܡܤܵܡ ܒܪܹܫܵܐ: ܘܐܲܦܩܘܼܗܝ
ܡ̣ܢ ܥܹܕܬܵܐ: ܘܐܵܦ ܡ̣ܢ ܥܵܡܲܪܬܵܐ: ܐܲܝܟܼ ܐܲܝܢܵܐ ܕܲܡܛܲܢܲܦܬܼܵܐ ܐܝܼܬܹܝܗ̇
ܐܵܦ ܐܲܪܥܵܐ ܕܗܠܸܟܼ ܥܠܹܝܗ̇. ܐܲܝܟܲܢܵܐ ܗܵܟܹܝܠ ܐܵܡ̇ܪܝܼܢ ܐܢ̄ܬܿܘܿܢ
ܗܸܵܠܹܝܢ؟ ܐܸܢܕܹܝܢ ܢܹܐܡܲܪ ܥܠܲܝ: ܡܸܛܠ ܕܒܲܡ̈ܢܵܘܵܢ ܡ̈ܢܵܘܵܢ ܡܦܲܠܸܓܼ
ܘܤܵܕܹܩ ܠܲܟܼܝܵܢܹ̈ܐ: ܘܲܡܦܲܪܸܫ ܠܗܘܿܢ ܡ̣ܢ ܚܕܼܵܪܹ̈ܐ. ܘܠܵܘ ܡܸܛܠ
ܕܐܵܡܲ݁ܪ ܗܵܠܹܝܢ ܓܲܠ̈ܝܵܬܼܵܐ: ܐܸܠܵܐ ܡܸܛܠ ܕܲܡܦܲܪܸܫ ܠܗܘܿܢ ܡܢܵܬܼܢܵܐܝܼܬܼ
ܡ̣ܢ ܚܕܼܵܕܹ̈ܐ: ܘܐܵܡܲ݁ܪ: ܚܲܕܼ ܒܪܵܐ ܕܲܟܼܝܵܢܵܐ: ܘܚܲܕܼ ܒܪܵܐ ܕܛܲܝܒܿܘܼܬܼܵܐ:
ܐܲܝܟܼ ܡ̇ܢ ܕܐܝܼܬܲܝܗܘܿܢ ܬܪܹܝܢ ܒܢ̈ܝܼܢ. ܘܲܡܦܲܪܸܫ ܠܗܘܿܢ ܟܲܕܼ ܐܵܡܲ݁ܪ:
ܕܐܸܢܵܐ ܓܹܝܪ ܠܲܟܼܝܵܢܵܐ ܗ̄ܘ̣ ܡܦܲܪܸܫ ܐ̄ܢܵܐ: ܘܲܐܠܤܸܓܼܕܬܼܵܐ ܡܚܲܝܕܼ ܐ̄ܢܵܐ.
ܡܸܛܠ ܐܲܝܢܵܐ ܕܠܲܒܼܝܼܫ: ܠܲܠܒܼܘܼܫܵܐ ܤܵܓܹ̇ܕܼ ܐ̄ܢܵܐ. ܢܹܐܡܲܪ ܟܠܢܵܫ
ܠܘܵܬܼܟܼܘܿܢ: ܕܝܲܒܼܪ̈ܘܼܚܹܐ ܐܸܫܬܿܝܼܬܿܘܿܢ ܐ̄ܢܵܫܵܐ܀ ܕܐܵܦ ܠܐܲܒܼܵܐ: ܒܐܲܝܠܹܝܢ
ܕܡܸܢܟܼܘܿܢ ܡܸܬܼܐܲܡܪ̈ܵܢ ܡܸܤܬܲܟܿܠܝܼܬܿܘܿܢ. ܐܲܝܟܲܢܵܐ ܐܵܡ̇ܪܝܼܢ ܠܗܵܘ̇ ܐܲܝܢܵܐ
ܕܐܵܦܠܵܐ ܒܝܲܚܕܼܵܐ ܡܸܠܬܼܵܐ ܡܸܤܬܿܕܹܩ: ܕܲܢܤܲܒܼ ܘܕܸܐܬܼܢܤܸܒܼ: ܘܥܲܒܼܕܹܗ
ܕܝܼܠܹܗ ܘܕܲܗܘ̤ܵܐ ܕܝܼܠܹܗ: ܘܒܲܪܢܵܫܵܐ ܘܐܲܠܵܗܵܐ ܐܵܡ̇ܪܝܼܬܿܘܿܢ؟ ܗܵܠܹܝܢ
ܓܹܝܪ ܟܠܗܹܝܢ ܕܐܲܝܠܹܝܢ ܕܲܢܦܲܪܫܝܼܢ ܟܝܵܢܹ̈ܐ ܒܡܸܠܲܬܼܗܘܿܢ ܐܝܼܬܲܝܗܹܝܢ:
ܘܠܵܐ ܗ̄ܘ̣ܵܐ ܕܐܲܝܠܹܝܢ ܕܐܵܡ̇ܪܝܼܢ ܕܲܚܕܼܵܐ ܐܝܼܬܹܝܗ̇ ܐܘܼܤܝܼܵܐ. ܠܵܐ ܠܲܡ
ܡܵܘܒܿܕܼܵܐ ܚܕܼܵܝܘܼܬܼܵܐ ܠܫܘܼ̈ܚܠܵܦܹܐ ܕܲܟܼܝܵܢܹ̈ܐ. ܐܸܢܹܕܹܝܢ ܡܩܵܘܹܝܢ ܫܘܼܚ̈ܠܵܦܹܐ
pb. 264
ܕܲܟܼܝܵܢܹ̈ܐ ܒܲܚܕܼܵܝܘܼܬܼܵܐ ܒܫܘܼ̈ܚܠܵܦܹܐ ܕܲܟܼܝܵܢܹ̈ܐ ܤܕܼܝܼ̈ܩܹܐ ܐܝܼܬܲܝܗܘܿܢ: ܐܲܝܟܼ
ܡܵܐ ܕܲܡܫܲܚܠܦܝܼܢ. ܐܲܝܟܲܢܵܐ ܕܹܝܢ ܐܸܡܲܪܬܿܘܿܢ ܥܠܲܝ ܕܤܵܕܹܩ ܐ̄ܢܵܐ
ܠܵܗ̇ ܒܪܲܚܝܼܩܘܼܬܼܵܐ ܕܕܼܘܼܟܿܬܼܵܐ: ܡܸܛܠ ܕܐܵܡܲ݁ܪ ܐ̄ܢܵܐ: ܡܸܛܠ ܗܵܘ̇
ܕܲܠܒܼܝܼܫ: ܠܲܠܒܼܘܼܫܵܐ ܤܵܓܹ̇ܕܼ ܐ̄ܢܵܐ؟ ܠܵܐ ܓܿܝܪ ܐܝܼܬܼܵܘܗܝ ܠܒܲܪ ܡ̣ܢ
ܠܵܒܼܘܿܫܵܐ ܠܒܼܘܼܫܵܐ: ܘܠܵܐ ܗܵܘ̇ ܕܲܒܼܝܼܫ ܠܒܲܪ ܡ̣ܢ ܠܒܼܘܼܫܵܐ:
ܐܸܠܵܐ ܒܵܗ̇ ܟܲܕܼ ܒܵܗ̇ ܒܲܕܼܡܘܼܬܼܵܐ ܡܸܬܼܪܢܸܐ. ܘܡܸܛܠ ܗܵܢܵܐ: ܠܵܐ
ܡܸܫܟܿܚܵܐ ܠܡܸܤܓܲܕܼ ܠܗܵܘ̇ ܕܲܠܒܼܝܼܫ: ܠܒܲܪ ܡ̣ܢ ܠܒܼܘܼܫܵܐ ܕܥܲܡܹܗ:
ܕܒܹܗ ܝܲܬܿܝܼܒܼ ܥܲܡ ܐܲܒܼܵܐ ܟܲܕܼ ܠܒܼܝܼܫ ܠܹܗ: ܠܵܐ ܓܹܝܪ ܝܲܬܿܝܼܒܼ ܥܲܡܹܗ:
ܟܲܕܼ ܠܵܐ ܠܒܼܝܼܫ ܠܹܗ. ܘܲܕܼܝܲܬܿܝܼܒܼ ܥܲܡܹܗ: ܡܩܲܒܸܿܠ ܥܲܡܹܗ
ܐܵܦ ܤܸܓܼܕܬܼܵܐ. ܟܲܕܼ ܝܲܬܿܝܼܒܼ ܥܲܡܹܗ: ܡܸܤܬܿܓܸܕܼ ܡ̣ܢ ܟܠ ܦܪܘܿܣ.
ܠܵܘ ܡܸܛܠܵܬܹܗ: ܐܸܠܵܐ ܡܸܛܠ ܗܵܘ̇ ܕܲܠܒܼܝܼܫ ܠܹܗ.
ܡ̣ܢ ܐܲܝܠܹܝܢ ܗܵܟܹܝܠ ܕܐܵܡ̇ܪܝܼܢ ܡܸܬܼܒܲܪܢܵܫܢܘܼܬܼܵܐ ܡ̣ܢ ܚܕܼܵܝܘܼܬܼܵܐ:
ܐܵܘ ܒܫܘܼܚܠܵܦ ܕܡܘܼܬܼܵܐ ܕܐܝܼܬܹܝܗ̇ ܕܚܲܢ̈ܦܹܐ. ܐܵܘ ܒܲܫܪ̈ܲܓܼܪ̈ܵܚܼܝܵܬܼܵܐ ܐܵܘ
ܒܐܸܤܟܹܡܵܐ ܕܠܵܐ ܒܡܘܿܡܵܐ ܚܲܫ̣ ܠܵܐ ܚܵܫܘܿܫܵܐܝܼܬܼ: ܐܵܘ ܚܲܫܹ̈ܐ ܟܝܵܢܵܝܹ̈ܐ
ܢܹܐܡܲܪ ܥܲܠ ܐܲܠܵܗܵܐ ܡܸܠܬܼܵܐ ܐܵܘ ܕܒܲܩܢܘܿܡܵܐ ܐܝܼܬܼܵܘܗܝ ܒܲܚܕܼܵܝܘܼܬܼܵܐ:
ܐܵܘ ܒܲܒܼܤܲܪ ܒܒܸܤܪܵܐ: ܐܵܘ ܒܢܲܦܫܵܐ ܠܵܐ ܡܠܝܼܠܬܼܵܐ: ܐܵܘ ܒܲܡܠܝܼܠܬܼܵܐ:
ܘܠܲܓܼܡܵܪ ܕܠܲܩܢܘܿܡܵܐ ܕܲܟܼܝܵܢܵܐ ܘܠܵܘ ܦܲܪܨܘܿܦܵܐ ܨܒܼܝܵܢܵܝܵܐ ܗܘ̤ܵܬܼ
ܚܕܼܵܝܘܼܬܼܵܐ: ܥܵܪܩܝܼܢܲܢ ܡ̣ܢ ܟܠ ܦܪܘܼܣ. ܐܲܝܟܲܢܵܐ ܕܠܵܐ ܢܸܥܒܿܕܼܝܼܗ̇
ܡܸܬܼܚܲܒܿܠܵܢܝܼܬܼܵܐ ܘܡܸܫܬܲܚܠܦܵܢܝܼܬܼܵܬ: ܘܚܵܫܘܿܫܬܼܵܐ ܡܹܐܡܲܪܝܼܗ̇ ܠܲܚܕܼܵܝܘܼܬܼܵܐ
ܕܐܲܠܵܗܵܐ ܡܸܠܬܼܵܐ ܘܡ̣ܢ ܐܵܢܲܢܩܹܐ: ܐܸܠܵܐ ܚܕܼܵܝܘܼܬܵܐ ܨܸܒܼܝܵܢܵܝܬܼܵܐ ܕܠܦܲܪܨܘܿܦܵܐ
pb. 265
ܘܠܵܘ ܠܲܟܝܵܢܵܐ. ܐܵܘ ܡ̣ܢ ܡܸܠܲܝ̈ ܕܝܼܠܝ ܢܸܫܬܲܐܠܘܼܢ: ܟܲܕܼ ܡܩܲܒܿܠܝܼܢ
ܕܠܲܟܼܝܵܢܵܐ ܗܘ̤ܵܬܼ ܡܸܬܼܒܲܪܢܫܵܢܘܼܬܼܵܐ: ܘܚܵܫܘܿܫܬܼܵܐ ܢܸܥܒܿܕܼܘܼܢܵܗ̇ ܠܲܚܕܼܵܝܘܼܬܼܵܐ
ܘܡܸܫܬܲܚܠܦܵܢܝܼܬܼܵܐ ܐܲܝܟܼ ܐܵܪܝܼܘܿܣ: ܐܵܘ ܠܵܐ ܚܵܫܘܿܫܬܼܵܐ ܐܲܝܟܼ ܐܲܒܼܵܗܲܝ̈ܢ.
ܒܢܲܝ̈ ܐܲܝܢܵܐ ܓܲܒܵܐ ܒܵܥܹ̇ܝܬܿܘܿܢ ܠܡܸܗܘܵܐ: ܕܝܼܠܟܼܘܿܢ ܐܝܼܬܹܝܗ̇. ܐܵܘ ܡ̣ܢ
ܓܲܒܵܐ ܕܗܲܪ̈ܵܛܝܼܩܹܐ: ܐܵܘ ܡ̣ܢ ܓܲܒܵܐ ܕܐܲܒܼ̈ܗܵܬܼܐ ܐܵܪ̈ܬܵܕܘܿܟܿܤܹܐ. ܐܵܘ
ܡ̣ܢ ܓܲܒܵܐ ܕܐܲܝܠܹܝܢ ܕܐܵܡ̇ܪܝܼܢ: ܠܵܐ ܚܵܫܘܿܫܵܐ ܐܝܼܬܼܵܘܗܝ ܘܠܵܐ
ܡܸܬܼܚܲܒܿܠܵܢܵܐ. ܐܵܘ ܡ̣ܢ ܗܵܢ̇ܘܿܢ ܕܠܲܩܢܘܿܡܵܐ: ܐܵܘ ܡ̣ܢ ܗܢ̇ܘܢ ܕܐܵܡ̇ܪܝܼܢ
ܕܲܠܦܲܪܨܘܿܦܵܐ ܗܘ̤ܵܬܼ ܚܕܼܵܝܘܼܬܼܵܐ. ܐܸܢܵܐ ܕܹܝܢ: ܠܵܐ ܚܵܫܘܿܫܬܼܵܐ ܘܠܵܐ
ܡܵܝܘܿܬܬܵܐ ܘܠܵܐ ܡܸܫܬܲܚܠܦܵܢܝܬܼܵܐ ܐܵܡܲ݁ܪ ܐ̄ܢܵܐ ܠܲܚܕܼܵܝܘܼܬܼܵܐ ܕܐܲܠܵܗܵܐ
ܡܸܠܬܼܵܐ. ܥܲܠ ܗܵܠܹܝܢ: ܗܵܘ̇ ܕܡܲܚܪܸܡ ܠܝܪ ܢܲܚܪܡܲܢܝ. ܐܸܢܵܐ
ܠܗܲܝܡܵܢܘܼܬܼܵܐ ܕܐܲܒܼ̈ܗܵܬܼܵܐ ܬܠܵܬܼܡܵܐܐ ܘܲܬܼܡܵܢܬܲܥܤܲܪ ܕܲܒܼܢܝܼܩܵܝܼܵܐ
ܐܸܬܼܟܲܢܲܫܘ ܢܸܛ̇ܪܹܬܼ ܕܠܵܐ ܡܘܼܡܵܐ: ܟܲܕܼ ܐܵܡܲ݁ܪ ܐ̄ܢܵܐ ܠܹܗ ܠܵܐ
ܡܸܫܬܲܚܠܦܵܢܵܐ: ܠܵܐ ܡܵܝܘܿܬܼܵܐ: ܕܐܲܡܝܼܢܵܐܝܼܬܼ ܐܝܼܬܼܵܘܗܝ ܐܲܝܟܼ ܕܐܝܼܬܼܵܘܗܝ
ܒܲܡܬܼܘܿܡܵܝܘܼܬܹܗ ܕܐܲܒܼܵܐ: ܐܵܠܵܗܵܐ ܡܸܠܬܼܵܐ. ܠܵܐ ܗ̄ܘ̣ܵܐ ܡ̣ܢ ܐܲܝܠܹܝܢ ܕܠܵܐ
ܐܝܼܬܲܝܗܘܿܢ ܗ̄ܘ̣ܵܘ ܗܘ̤ܵܐ: ܘܠܵܐ ܡ̣ܢ ܩܢܘܿܡܵܐ ܐ̄ܚܪܹܢܵܐ: ܘܠܲܝܬܿ ܗ̄ܘ̣ܵܐ
ܐܸܡܲܬܼܝ ܕܠܵܐ ܐܝܼܬܼܵܘܗܝ ܗ̄ܘ̣ܵܐ. ܡܬܼܘܿܡܵܐܝܼܬܼ ܐܲܒܼܵܐ: ܡܬܼܘܿܡܵܐܝܼܬܼ
ܒܪܵܐ: ܡܬܼܘܿܡܵܐܝܼܬܼ ܪܘܼܚܵܐ ܕܩܘܼܕܼܫܵܐ. ܠܵܘ ܕܹܝܢ ܡܬܼܘܿܡܵܐܝܼܬܼ
ܐܝܼܬܼܵܘܗܝ ܒܸܤܪܵܐ ܗܵܘ̇ ܕܐܸܬܼܒܲܤܲܪ: ܗܵܘ̇ ܕܡ̣ܢ ܪܘܼܚܵܐ ܕܩܘܼܕܼܫܵܐ
ܘܡ̣ܢ ܡܲܪܝܲܡ ܒܬܼܘܼܠܬܼܵܐ. ܐܸܠܵܐ ܐܝܼܬܼ ܗ̄ܘ̣ܵܐ ܐܸܡܲܬܼܝ ܕܠܵܐ ܐܝܼܬܼܵܗܝ
ܗ̄ܘ̣ܵܐ: ܘܡ̣ܢ ܐܘܼܤܝܼܵܐ ܐ̄ܚܪܹܬܼܵܐ: ܘܡ̣ܢ ܟܝܵܢܵܐ ܐ̄ܚܪܹܢܵܐ: ܘܡ̣ܢ
ܩܢܘܿܡܵܐ ܐ̄ܚܪܹܢܵܐ ܕܒܼܢܲܝ̈ ܐ̄ܢܵܫܵܐ: ܘܠܵܐ ܗ̄ܘ̣ܵܐ ܡ̣ܢ ܐܘܼܤܝܼܵܐ ܕܐܲܠܵܗܵܐ
ܐܲܒܼܵܐ: ܡܸܫܬܲܚܠܦܵܢܵܐ ܘܡܵܝܘܿܬܼܵܐ ܘܚܵܫܘܿܫܵܐ ܘܡܸܬܼܚܲܒܿܠܵܢܵܐ. ܠܵܘ
pb. 266
ܡ̣ܢ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ ܐܸܫܬܲܚܠܦܲܬ̤ ܠܐܘܼܤܝܼܵܐ ܕܒܸܤܪܵܐ:
ܐܸܠܵܐ ܒܸܤܪܵܐ ܐܘܼܤܝܼܵܐ: ܘܒܸܤܪܵܐ ܟܝܵܢܵܐܝܼܐ: ܕܠܵܐ ܐܸܫܬܲܚܠܲܦ ܡ̣ܢ
ܐܘܼܤܝܼܵܐ ܕܝܼܠܹܗ. ܘܠܵܐ ܬܘܼܒܼ ܐܸܫܬܚܠܲܦ ܒܲܕܼܡܘܼܬܹܗ ܡ̣ܢ ܐܘܼܤܝܼܵܐ
ܕܐܲܠܵܗܵܐ ܠܐܘܼܤܝܼܵܐ ܕܒܸܤܪܵܐ: ܠܵܘ ܒܐܸܤܟܹܡܵܐ ܘܲܒܼܡܲܤܒܿܪܵܢܘܼܬܼܵܐ
ܕܒܸܤܪܵܐ ܐܝܼܬܼܵܘܗܝ ܒܸܤܪܵܐ: ܐܸܠܵܐ ܒܐܘܼܤܝܼܵܐ ܕܒܸܤܪܵܐ: ܡ̣ܢ ܐܘܼܤܝܼܵܐ
ܕܒܸܤܪܵܐ. ܠܵܐ ܐܸܫܬܲܚܠܦܲܬ̤ ܐܘܼܤܝܼܵܐ ܕܒܸܤܪܵܐ ܠܐܘܼܤܝܼܵܐ ܕܐܲܠܵܗܘܼܬܼܵܐ
ܘܐܸܬܼܠܲܗܲܬ̤: ܠܵܘ ܒܒܼܘܼܠܒܵܠܵܐ ܘܠܵܘ ܒܡܘܼܙܵܓܼܵܐ ܐܸܬܼܒܲܤܲܪ
ܘܐܸܬܼܒܲܪܢܲܫ. ܠܵܘ ܠܲܚܕܼܵܐ ܐܘܼܤܝܼܵܐ ܦܫܝܼܛܬܼܵܐ ܘܝܼܚܝܼܕܼܵܝܲܬܼ ܒܐܵܕܼܫܵܗ̇:
ܘܠܵܘ ܠܪܘܼܟܵܒܼܵܐ ܟܝܵܢܵܝܐ ܠܚܲܕܼ ܐܵܕܼܫܵܐ ܕܚܲܝܘܼܬܼܵܐ ܐܸܬܼܪܲܟܲܒܼ. ܘܠܵܐ
ܬܘܼܒܼ ܒܝܲܕܼ ܚܕܼܵܝܘܼܬܼܵܐ ܟܝܵܢܵܝܬܼܵܐ ܒܲܩܢܘܿܡܵܐ ܐܸܬܼܚܲܝܲܕܼ ܟܝܵܢܵܐܝܼܬܼ: ܘܚܲܫ̣
ܘܲܗܘ̤ܵܐ ܒܲܚܕܼܵܝܘܼܬܼܵܐ ܟܝܵܢܵܝܬܼܵܐ: ܟܲܕܼ ܡܸܫܬܵܘܬܿܦܝܼܢ ܒܗܹܝܢ ܟܲܕܼ ܒܗܹܝܢ
ܡܸܛܠ ܫܘܸܬܵܦܘܼܬܼܵܐ ܟܝܵܢܵܝܬܼܵܐ ܕܚܲܫܹ̈ܐ.
ܟܠ ܪܘܼܟܵܒܼܵܐ ܓܹܝܪ ܟܝܵܢܵܝܬܼܵܐ: ܕܠܲܟܼܝܵܢܵܐ ܚܲܕܸ ܚܵܫܘܿܫܵܐ ܘܡܸܫܬܲܚܠܦܵܢܵܐ
ܡܫܵܘܬܿܦܵܐܝܼܬܼ ܡܸܫܬܵܘܬܼܦܝܼܢ: ܟܲܕܼ ܡܸܫܬܲܡܠܹܝܢ ܡ̣ܢ ܟܝܵܢܹ̈ܐ: ܠܹܗ
ܠܲܟܼܝܵܢܵܐ ܕܐܲܠܵܗܵܐ ܕܹܝܢ ܡܸܠܬܼܵܐ: ܠܵܘ ܒܫܘܼܚܠܵܦܵܐ ܟܝܵܢܵܝܵܐ: ܐܸܠܵܐ
ܨܸܒܼܝܵܢܵܐܝܼܬܼ ܐܝܼܬܹܝܗ̇: ܐܲܝܟܼ ܕܲܠܦܲܪܨܘܿܦܵܐ ܕܝܼܠܹܗ: ܘܠܵܘ ܠܲܟܼܝܵܢܵܐ
ܕܝܼܠܹܗ ܗܘ̤ܵܬܼ ܚܕܼܵܝܘܼܬܼܵܐ ܕܲܟܼܝܵܢܹ̈ܐ. ܐܸܠܵܐ ܟܝܵܢܹ̈ܐ ܡܩܲܝܡܝܼܢ
ܒܕܼܝܼ̈ܠܵܝܵܬܼܗܘܿܢ: ܘܐܝܼܬܼܵܘܗܝ ܚܲܕܼ ܦܲܪܨܘܿܦܵܐ ܕܠܵܐ ܤܸܕܼܩܵܐ ܘܲܕܼܠܵܐ
ܦܘܼܪܫܵܢܵܐ: ܟܲܕܼ ܥܒܲܕܼ ܠܗܹܝܢ ܕܝܼܠܹܗ ܠܦܲܪܨܘܼܦܵܐ. ܒܐܘܼܤܝܼܵܐ
ܕܐ̄ܢܵܫܘܼܬܼܵܐ: ܩܢܵܬ̤ ܕܡܘܼܬܼܵܐ ܐܲܠܵܗܘܼܬܼܵܐ. ܘܒܼܐܘܼܤܝܼܵܐ ܕܐܲܠܵܗܘܼܬܼܵܐ:
pb. 267
ܩܢܵܬ̤ ܕܡܘܼܬܼܵܐ ܐ̄ܢܵܫܘܼܬܼܵܐ. ܐܲܝܟܲܢܵܐ: ܕܚܲܕܸ ܦܲܪܨܘܿܦܵܐ ܢܸܗܘܸܐ
ܕܲܚܕܲܝܘܼܬܼܵܐ. ܐܲܝܟܲܢܵܐ ܕܐܲܝܠܹܝܢ ܕܐ̄ܢܵܫܘܼܬܼܵܐ: ܕܐܲܠܵܗܵܐ ܡܸܠܬܼܵܐ. ܘܐܲܝܠܹܝܢ
ܕܐܲܠܵܗܘܼܬܼܵܐ: ܕܐ̄ܢܵܫܘܼܬܼܵܐ ܕܒܼܵܗ̇ ܐܸܬܼܒܲܪܢܫܲܬ̤: ܠܲܚܕܼܵܐ ܘܠܵܗ̇ ܟܲܕܼ
ܠܵܗ̇ ܠܲܡܕܲܒܪܵܢܘܼܬܼܵܐ ܕܥܲܠ ܐܲܦܲܝ̈ܢ ܢܸܬܼܚܲܕܼܘܼܢ ܢܩܝܼܦܵܐܝܼܬܼ. ܡܸܛܠ
ܕܲܤܡܝܼܩܝܼܢ ܗ̄ܘ̣ܵܘ ܥܲܠ ܐܲܠܵܗܘܼܬܼܵܐ: ܐܲܝܟܼ ܕܲܠܚܘܼܕܵܬܲܢ ܘܠܲܓܼܒܼܝܼܠܬܲܢ
ܕܡܸܢܕܪܹܫ: ܘܠܲܕܼܡܘܼܬܼܵܐ ܕܨܲܠܡܵܐ ܕܨܲܠܡܵܐ ܕܐܸܫܬܿܪܝܼ ܗ̄ܘ̣ܵܐ ܡܸܢܲܢ. ܥܲܠ
ܐ̄ܢܵܫܘܼܬܼܵܐ ܕܹܝܢ: ܕܐܸܬܼܚܲܕܼܬܲܬ̤ ܘܢܸܤܒܲܬ̤ ܡܸܢܕܪܹܫ ܕܡܘܼܬܼܵܗ̇. ܙܵܕܼܩܵܐ
ܗ̄ܘ̣ܵܬܼ ܓܹܝܪ ܐ̄ܢܵܫܘܼܬܼܵܐ: ܐܲܝܟܲܢܵܐ ܕܕܼܘܼܒܵܪܵܐ ܗܵܘ̇ ܕܐܝܼܬܼ ܗ̄ܘ̣ܵܐ ܬܸܛܲܪ.
ܗܵܘ̇ ܓܹܝܪ ܕܐܸܬܼܝܲܩܲܪ ܒܐܝܼܩܵܪܵܐ ܗܵܘ̇ ܕܝܲܩܪܹܗ: ܘܠܵܐ ܦܪܲܥ̣ ܠܹܗ
ܐܝܼܩܵܪܹܗ ܠܐܝܼܩܵܪܵܐ ܗܵܘ̇ ܕܲܢܤܲܒܼ: ܚܵܘܝܼ ܕܐܵܘܒܿܕܹܗ ܠܐܝܼܩܵܪܵܐ ܗܵܘ̇
ܕܐܸܬܼܝܲܩܲܪ ܒܹܗ. ܐܲܟܼܘܵܬܹܗ ܓܹܝܪ ܕܗܵܢܵܐ: ܐܸܬܼܝܲܩܲܪ ܐܵܦ ܗܵܘ̇. ܘܗܵܘ̇
ܠܵܐ ܩܲܒܿܠܹܗ ܐܲܝܟܼ ܢܲܦܫܹܗ: ܐܸܠܵܐ ܚܲܫܒܹܗ ܐܲܝܟܼ ܒܥܸܠܕܒܼܵܒܼܵܐ. ܟܲܕܼ
ܗܵܢܵܐ ܕܹܝܢ ܗܘ̤ܵܐ ܒܗܵܠܹܝܢ: ܗܵܟܲܢܵܐ ܢܛܲܪ ܢܲܦܫܹܗ: ܟܲܕ ܡܸܬܼܚܲܫܲܚ
ܒܗܵܠܹܝܢ ܕܗܵܘ̇ ܐܲܝܟܼ ܕܲܒܼܢܲܦܫܹܗ. ܗܵܢܵܐ ܢܛܲܪ ܫܲܪܝܼܪܵܐܝܼܬܼ ܠܨܲܠܡܵܐ
ܕܐܲܠܵܗܵܐ ܘܥܲܒܼܕܹܗ ܕܝܼܠܹܗ: ܗܵܘ̇ ܕܐܝܼܬܼܵܘܗܝ ܨܲܠܡܵܐ ܘܦܲܪܨܘܿܦܵܐ.
ܡܸܛܠ ܗܵܢܵܐ ܐܵܠܨܵܐ ܗ̄ܘ̣ܵܬܼ ܐܵܦ ܥܲܠ ܐܲܠܵܗܘܼܬܼܵܐ: ܐܲܝܟܼ ܕܲܬܼܚܲܕܼܬܼ
ܘܬܸܒܼܪܸܐ ܘܬܸܬܸܠ ܠܵܗ̇ ܕܡܘܼܬܼܵܐ: ܐܲܝܟܼ ܕܡ̣ܢ ܛܘܼܦܤܵܐ ܕܝܼܠܗ̇
ܠܲܕܼܿܡܘܼܬܼܵܐ ܕܥܲܒܼܕܵܐ. ܐܵܠܨܵܐ ܗ̄ܘ̣ܵܬܼ ܕܹܝܢ ܐܵܦ ܥܲܠ ܐ̄ܢܵܫܘܼܬܼܵܐ:
ܐܲܝܟܲܢܵܐ ܕܬܸܗܘܸܐ ܕܡܘܼܬܼܵܐ ܕܥܲܒܼܕܵܐ ܢܤܝܼܒܼܵܐ ܕܡܘܼܬܼܵܐ ܕܐܲܠܵܗܵܐ:
ܘܐܲܠܵܗܵܐ ܕܡܘܼܬܼܵܐ ܕܥܲܒܼܕܵܐ. ܘܢܸܗܘܸܐ ܗܵܢܵܐ ܗܵܘ̇: ܘܗܵܘ̇ ܗܵܢܵܐ:
pb. 268
ܒܦܲܪܨܘܿܦܵܐ. ܟܲܕܼ ܡܩܵܘܸܐ ܗܵܢܵܐ ܘܗܵܘ̇ ܒܲܟܼܝܵܢܲܝ̈ܗܘܿܢ: ܘܢܵܛܲܪ
ܡܸܫܬܲܢܥܵܢܘܼܬܼܵܐ ܕܠܵܐ ܚܛܵܗܹ̈ܐ: ܡܸܛܠ ܡܸܫܬܲܡܥܵܢܘܼܬܹܗ ܪܹܫܝܬܼܵܐ.
ܘܡܸܛܠ ܗܵܢܵܐ ܐܸܬܼܝܼܗܸܒܼ ܠܡܵܘܬܵܐ: ܚܠܵܦ ܦܘܼܪܩܵܢܵܐ ܕܟܼܠܹܗ
ܥܵܠܡܵܐ.
ܠܵܘ ܓܹܝܪ ܐܲܝܟܼ ܐܵܪܝܼܘܿܣ ܘܐܵܦܘܼܠܝܼܢܵܪܝܼܣ: ܗܵܢ̇ܘܿܢ ܕܨܵܒܼܪܝܼܢ
ܠܡܹܐܡܲܪ: ܕܲܒܼܛܝܒܿܘܼܬܹܗ ܩܲܒܸܿܠ̣ ܗܘܼܦܵܟܼܵܐ ܐܲܪܥܵܢܵܝܵܐ ܘܡܫܬܲܡܥܵܢܘܼܬܼܵܐ
ܕܡܵܘܬܵܐ ܒܡܸܬܼܒܲܪܢܫܵܢܘܼܬܹܗ ܐܲܠܵܗܵܐ ܡܸܠܬܼܵܐ. ܡܸܛܠ ܗܵܢܵܐ: ܒܲܕܼܝܵܢܵܐ
ܕܒܲܪܢܵܫܵܐ ܒܲܚܕܼܵܝܘܼܬܼܵܐ ܟܝܵܢܵܝܬܼܵܐ ܗܘ̤ܵܬܼ ܡܸܢܼܒܲܪܢܫܵܢܘܼܬܼܵܐ. ܐܝܟܲܢܵܐ
ܕܲܟܼܝܢܵܐܝܼܬܼ ܬܸܬܼܒܲܪܢܲܫ ܐܲܠܵܗܘܼܬܼܵܐ ܚܠܵܦ ܢܲܦܫܵܐ: ܘܬܸܬܿܕܲܒܲܪ ܘܬܸܚܲܫ
ܫܲܪܝܼܪܵܐܝܼܬܼ ܒܲܪܓܸܫܬܼܵܐ ܟܝܵܢܵܝܬܼܵܐ: ܕܥܲܠ ܐܲܦܲܝ̈ ܟܠܢܵܫ ܢܸܬܼܝܼܗܸܒܼ
ܠܡܵܘܬܵܐ. ܘܲܠܡܵܘܬܼܵܐ ܕܚܵܫܘܿܫܘܼܐܼܵܗ̇ ܕܢܲܦܫܵܐ ܟܝܵܢܵܐܝܼܬܼ ܢܩܲܒܸܿܠ:
ܒܲܚܕܼܵܝܘܼܬܼܵܐ ܕܲܩܢܘܿܡܑܵܐ ܟܝܵܢܵܝܐ: ܟܲܕܼ ܡܸܬܼܢܬܸܦ ܡ̣ܢ ܩܛܝܼܪܵܐ. ܡܸܛܠ
ܗܵܢܵܐ: ܗܵܢ̇ܘܿܢ ܝܲܗ̣̄ܒܼܘ ܠܵܗ̇ ܠܡܸܬܼܒܲܪܢܫܵܢܘܼܬܹܗ ܕܐܲܠܵܗܵܐ ܡܸܠܬܼܵܐ:
ܠܚܲܕܼ ܟܝܵܢܵܐ ܕܒܲܪܢܵܫܵܐ ܒܪܘܼܟܵܒܼܵܐ ܟܝܵܢܵܝܐ ܘܲܠܒܲܪܢܵܫܵܐ ܠܵܐ ܡܫܲܡܠܝܵܐ:
ܕܲܚܠܵܦ ܐܲܝܠܹܝܢ ܕܒܼܨܝܼܪ̈ܵܢ ܡ̣ܢ ܒܸܤܪܵܐ ܠܲܡܫܲܡܠܵܝܘܼ ܟܝܵܢܵܐ ܕܒܲܪܢܵܫܵܐ
ܬܸܗܘܸܐ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ. ܟܕܼ ܡܸܬܼܦܩܸܕܼ ܘܤܵܥܲ݁ܪ ܐܲܝܠܹܝܢ
ܕܲܕܼܡܸܬܼܦܲܩ̈ܕܵܢܹܐ ܐܝܼܬܲܝܗܹܝܢ: ܘܟܼܠܹܗ ܕܘܼܒܵܪܵܐ ܐ̄ܢܵܫܝܵܐ ܫܲܪܝܼܪܵܐܝܼܬܼ
ܒܲܢܛܘܼܪ݁ܵܬܼܵܐ ܥܵܤ̈ܩܵܬܼܵܐ ܘܡܲܟܼܐ̈ܒܵܬܼܵܐ ܘܡܲܚܫܵܢ̈ܝܵܬܼܵܐ ܟܲܕܼ ܡܤܲܝܒܲܪ ܟܲܕܼ
ܠܵܐ ܨܵܒܹ̇ܐ: ܗܵܘ̇ ܡܵܐ ܕܨܵܒܹ̇ܐ: ܡܸܛܠ ܕܚܸܠܬܼܵܐ ܕܥܲܒܼܵܪ ܦܘܼܩܕܵܢܵܐ
ܠܵܐ ܥܵܒܹ̇ܕܼ. ܟܲܕܼ ܨܵܗܹ̇ܐ ܘܟܼܵܦܹ̇ܢ ܘܕܼܵܚܹ̇ܠ ܕܸܚܠܬܼܵܐ ܐ̄ܢܵܫܝܬܼܵܐ: ܟܲܕܼ ܨܵܒܹ̇ܐ
pb. 269
ܨܸܒܼܝܵܢܵܐ ܐ̄ܢܵܫܝܵܐ. ܘܐܝܼܬܼܵܘܗܝ ܒܦܲܓܼܪܵܐ: ܒܟܼܠܗܹܝܢ ܐܲܝܠܹܝܢ ܕܢܲܦܫܵܐ:
ܕܲܒܼܩܵܘܡܬܼܵܐ ܡܲܥܒܿܕܼܵܐ ܡ̣ܢ ܓܒܼܝܼܠܘܼܬܼܵܐ ܘܨܘܼܪܬܵܐ ܕܪܓܘܼܫܬܵܢܘܼܬܼܵܐ:
ܟܲܕܼ ܡܸܤܬܲܟܲܠ: ܟܲܕܼ ܝܵܠܹ̇ܦ: ܟܲܕܼ ܡܸܬܼܓܡܲܪ ܒܲܒܼܤܲܪ ܒܲܟܼܝܵܢܵܐ
ܕܢܲܦܫܵܐ: ܒܲܚܕܼܵܝܘܼܬܼܵܐ ܟܝܵܢܵܝܬܼܵܐ ܘܲܩܢܘܿܡܵܝܬܼܵܐ. ܘܗܵܝ̇ ܚܕܼܵܝܘܼܬܼܵܐ
ܨܸܒܼܝܵܢܵܝܬܼܵܐ
ܕܲܠܦܲܪܨܘܼܦܵܐ: ܕܲܟܼܝܵܢܹ̈ܐ ܡܒܲܛܠܝܼܢ ܠܵܗ̇: ܟܲܕܼ ܡܩܝܼܡܝܼܢ ܕܝܼܠܵܝܘܼܬܼܵܐ
ܟܝܵܢܵܝܬܼܵܐ ܘܠܵܘ ܨܸܒܼܝܵܢܵܝܬܼܵܐ: ܐܲܝܟܲܢܵܐ ܕܐܲܠܵܗܵܐ ܡܸܠܬܼܵܐ ܒܚܲܫܹ̈ܐ ܕܢܲܦܫܵܐ
ܘܲܕܼܦܲܓܼܪܵܐ ܡܫܵܘܬܲܦ. ܘܕܝܼܠܵܝܘܼܬܼܵܐ ܕܡ̣ܢ ܩܛܝܼܪܵܐ: ܘܠܵܘ ܕܡ̣ܢ
ܨܸܒܼܝܵܢܵܐ: ܐܸܠܵܐ ܟܝܵܢܵܝܬܼܵܐ ܡ̣ܢ ܩܢܘܿܡܵܐ: ܚܕܼܵܝܘܼܬܼܵܐ ܕܲܩܢܘܿܡܵܐ ܟܝܵܢܵܝܐ
ܟܝܵܢܵܐܝܼܬܼ: ܐܲܝܟܼ ܕܢܸܗܘܸܐ ܟܝܵܢܵܐ ܟܲܕܼ ܚܵܐܹ̇ܫ.
ܙܵܕܹܩ ܕܹܝܢ ܕܠܵܐ ܢܸܗܘܸܐ ܐܵܪ̈ܝܵܢܹܐ ܘܠܵܐ ܬܘܼܒܼ ܡܵܢܵܝܹ̈ܢܵܝܹܐ:
ܕܒܸܐܤܟܹܡܵܐ ܗܘ̤ܵܬܼ ܡܸܬܼܒܲܪܢܫܵܢܘܼܬܼܵܐ. ܐܵܘ ܠܲܟܼܝܵܢܵܐ ܕܐܲܠܵܗܵܐ ܡܸܠܬܼܵܐ:
ܘܲܒܼܡܸܠܲܬܼܗܘܿܢ ܢܲܤܩܘܼܢ ܟܠܗܹܝܢ ܥܠܵܘܗܝ: ܕܘܼܒܵܪܵܐ ܘܚܲܫܹ̈ܐ ܘܡܵܘܬܵܐ.
ܠܵܘ ܓܹܝܪ ܟܝܵܢܵܐ ܕܐܲܠܵܗܵܐ ܡܸܠܬܼܵܐ ܚܛ̣ܵܐ ܐܵܘ ܥ̣ܒܲܪ ܥܲܠ ܦܘܼܩܕܵܢܵܐ:
ܕܐܲܠܵܗܵܐ ܢܸܬܿܕܲܒܲܪ ܘܢܸܛܲܪ ܟܠܗܘܿܢ ܦܘܼܩ̈ܕܵܢܹܐ: ܘܐܲܝܟܼ ܐܲܝܢܵܐ ܕܡ̣ܢ
ܕܘܼܒܵܪܹ̈ܐ ܐܸܫܬܿܟܲܚ ܕܠܵܐ ܚܛܵܗ̈ܝܼܢ ܡܝܼܬܼ ܚܠܵܦܲܝܢ. ܒܝܲܕܼ ܒܲܪܢܵܫܵܐ
ܠܲܡ ܡܵܘܬܵܐ: ܘܲܒܼܝܲܕܼ ܒܲܪܢܵܫܵܐ ܩܝܵܡܬܼܵܐ. ܡܸܛܠ ܗܵܢܵܐ ܐܵܦ ܐܵܠ̇ܨܵܐ
ܗ̄ܘ̣ܵܬܼ ܥܲܠ ܒܲܪܢܵܫܵܐ ܡܫܲܠܡܵܢܵܐ: ܠܡܸܬܼܒܲܪܢܫܵܢܘܼܬܹܗ ܕܐܲܠܵܗܵܐ
ܡܸܠܬܼܵܐ: ܕܲܡܫܲܡܠܲܝ ܒܦܲܓܼܪܵܐ ܘܲܒܼܢܲܦܫܵܐ. ܕܒܲܟܼܝܵܢܵܐ ܕܲܒܼܢܲܝ̈ܢܵܫܵܐ ܢܸܬܿܕܲܒܲܪ:
ܘܢܸܛܲܪ ܠܡܸܫܬܲܡܥܵܢܘܼܬܼܵܐ ܘܲܠܕܼܘܼܒܵܪܹ̈ܐ ܕܲܟܼܝܵܢܵܐ ܐ̄ܢܵܫܵܝܵܐ. ܘܡܸܬܼܝܲܐܒܼܝܼܢ
ܘܲܡܝܼܩܪܝܼܢ ܠܲܡܫܵܐ ܕܝܵܠܕܲܬܼ ܐܲܠܵܗܵܐ: ܡܸܛܠ ܕܢܹܐܡܪܘܼܢ ܕܐܲܠܵܗܵܐ
ܡܝܼܬܼ. ܘܲܒܼܗܵܝ̇ ܬܘܼܒܼ ܕܡ̣ܢ ܐܲܒܼ̈ܗܵܬܲܢ: ܗܵܢ̇ܘܿܢ ܕܲܥܕܲܡܵܐ ܠܡܵܘܬܵܐ
pb. 270
ܩܵܡ̣ܘ ܠܘܼܩܒܲܠ ܗܵܪ̈ܵܛܝܼܩܹܐ: ܕܐܲܡ̇ܪܝܼܢ ܝܵܠܕܲܬܼ ܐܲܠܵܗܵ. ܒܪܲܡ
ܘܠܵܘ ܒܕܘܼܟܿ ܒܗܵܠܹܝܢ ܫܡܵܗܹ̈ܐ ܐܸܬܼܚܲܚܘ: ܘܠܵܐ ܦܠܲܚ̣ܘ
ܐܸܢܘܿܢ ܒܲܟܼܬܼܝܼ̈ܒܼܵܐ ܕܤܘܼܢܡܗܵܕܘܿܣ. ܐܵܪܵܐ: ܒܲܕܼ ܠܵܘ ܝܵܕܼܥ̇ܝܼܢ ܗ̄ܘ̣ܵܘ؟
ܐܵܘ ܒܲܕܼ ܤܵܢܹ̇ܝܢ ܗ̄ܘ̣ܵܘ ܠܹܗ؟ ܐܵܘ ܡܸܠܬܼܵܐ ܡܸܕܸܡ ܩܢܹܝܢ ܗ̄ܘ̣ܵܘ
ܒܪܸ̈ܥܝܵܢܲܝܗܘܿܢ: ܐܲܝܟܼ ܡ̇ܢ ܕܒܼܵܗ̇ ܡܸܬܼܢܲܩܦܝܼܢ ܠܡܲܠܠܦܵܢܘܼܬܼܵܐ ܐܲܠܵܗܵܝܬܼܵܐ:
ܘܒܲܒܼܓܼܵܠܵܐ ܕܒܲܥܸܠܕܒܼܵܒܹ̈ܐ ܠܵܐ ܚܵܪܘ: ܘܠܵܐ ܝܲܗ̣̄ܒܼܘ ܪܹܫܵܐ ܠܲܡܒܲܨܵܪܘܼ
ܠܐܲܠܵܗܘܼܬܹܗ: ܟܲܕܼ ܥܵܒܼ̇ܕܝܼܢ ܠܵܗ̇ ܚܵܫܘܿܬܼܵܐ ܘܡܵܝܘܿܬܬܵܐ. ܠܵܘ ܓܹܝܪ
ܗܵܘ̇ ܕܒܲܫܡܵܐ ܡܡܲܠܸܠ ܐܲܠܵܗܵܝ̈ܬܼܵܐ: ܡܸܬܼܐܡܲܪ ܕܲܡܡܲܠܸܠ ܐܲܠܵܗܵܝ̈ܬܼܵܐ.
ܐܸܠܵܐ ܗܵܘ̇ ܕܒܲܥܒܼܵܕܼܵܐ ܘܒܲܫܡܵܐ ܡܡܲܠܸܠ ܐܲܠܵܗܵܝ̈ܬܼܵܐ: ܠܵܐ ܫܵܒܹ̇ܩ
ܠܐܲܝܠܹܝܢ ܕܲܡܥܲܬܿܕܹܝܢ ܕܢܸܥܒܿܘܼܘܼܢܵܝܗܝ ܥܒܼܝܼܕܼܵܐ ܘܒܲܪܝܵܐ. ܠܵܘ ܗܵܘ̇
ܕܝܵܗܹ̇ܒܼ ܗܘܼܠܹܐ ܠܓܼܘܼܕܵܦܵܐ: ܘܠܵܐ ܡܩܲܒܸܿܠ ܕܡܸܦܲܩ ܢܦܲܩ̣ ܡ̣ܢ
ܡܲܪܝܲܡ ܒܬܼܘܼܠܬܼܵܐ ܐܲܠܵܗܵܐ ܡܸܠܬܼܵܐ: ܐܲܝܟܼ ܐܲܝܢܵܐ ܕܐܝܼܬܼܵܘܗܝ ܘܡ̣ܢ
ܩܕܝܼܢܡ ܐܝܼܬܼܵܘܗܝ. ܘܡ̣ܢ ܗܵܝ̇ ܕܐܸܬܼܒܝܼܠܸܕܼ ܒܲܪܢܵܫܵܐ ܡܸܢܵܗ̇: ܐܲܝܟܼ ܐܲܝܢܵܐ
ܕܠܵܐ ܐܝܼܬܼܵܘܗܝ ܗ̄ܘ̣ܵܐ ܘܲܗܘ̤ܵܐ: ܡܸܫܬܿܐܸܠ. ܐܵܪܵܐ ܐܲܝܟܼ ܐܲܝܢܵܐ ܕܒܲܟܼܝܵܢܹ̈ܐ
ܬܪ̈ܲܝܗܘܿܢ ܐܵܡܲ݁ܪ ܠܹܗ ܠܐܲܠܵܗܵܐ ܡܸܠܬܼܵܐ ܐܲܠܵܗܵܐ ܘܒܲܪܢܵܫܵܐ: ܘܐܲܝܟܼ
ܕܐܸܬܼܝܼܠܸܕܼ ܒܲܪܢܵܫܵܐ ܒܲܟܼܝܵܢܵܐ ܕܐܲܠܵܗܵܐ ܡܸܠܬܼܵܐ ܐܝܼܬܼܵܘܗܝ: ܐܵܘ ܐܲܫܬܲܚܠܲܦ
ܠܐܘܼܤܝܼܵܐ ܐ̄ܚܪܹܬܼܵܐ ܕܒܲܪܢܵܫܵܐ: ܘܗܵܟܲܢܵܐ ܠܹܗ ܐܵܡܲ݁ܪ ܐܲܢ̄ܬܿ ܕܐܸܬܼܝܼܠܸܕܼ؟
ܠܵܐ ܠܲܡ ܓܹܝܪ ܐܝܼܬܼܵܘܗܝ ܗ̄ܘ̣ܵܐ ܡ̣ܢ ܐ̄ܢܵܫܵܐ: ܐܸܠܵܐ ܡ̣ܢ ܐܲܠܵܗܵܐ
ܡܸܠܬܼܵܐ ܐܝܼܬܼܵܘܗܝ ܗ̄ܘ̣ܵܐ. ܘܐܲܝܟܼ ܕܒܸܐܤܟܹܡܵܐ ܕܒܲܪܢܵܫܵܐ ܡܸܬܼܚܲܫܲܚ:
ܘܠܵܐ ܒܐܘܼܤܝܼܵܐ ܕܒܲܪܢܵܫܵܐ.
Book 2.1
pb. 271
ܐܸܠܵܐ ܐܵܬܵܢܵܤܝܼܣ ܠܵܐ ܫܵܒܹ̇ܩ ܠܵܟܼ ܟܲܕܼ ܐܵܡܲ݁ܪ . . . ܠܵܐ ܗ̄ܘ̣ܵܐ
ܒܲܫܐܝܼܠܘܼ ܗܵܠܹܝܢ ܗ̤ܘܲܝ̈: ܚܵܣ . . ܐܲܝܟܼ ܕܐ̄ܢܵܫ̈ܝܼܢ ܐܲܤܒܲܪܘ: ܐܸܠܵܐ
ܒܩܘܼܫܬܼܵܐ ܫܲܪܝܼܪܵܐܝܼܬܼ. ܟܲܕܼ ܗܘ̤ܵܐ ܒܲܪܢܵܫܵܐ ܦܵܪܘܿܩܲܢ: ܠܟܼܠܹܗ ܒܲܪܢܵܫܵܐ
ܦܘܼܪܩܵܢܵܐ ܗܘ̤ܸܵܐ. ܐܸܢܓܿܝܪ ܒܲܫܐܝܼܠܘܼ ܐܝܼܬܼܵܘܗܝ ܗ̄ܘ̣ܵܐ ܒܦܲܓܼܪܵܐ: ܐܲܝܟܼ
ܕܐܵܡ̇ܪܝܼܢ: ܗܵܘ̇ ܕܹܝܢ ܡܸܬܼܐ̱ܡܲܪ ܒܲܫܐܲܝܼܠܘܼ: ܦܲܢܛܵܤܝܼܵܐ ܐܝܼܬܼܵܘܗܝ.
ܡܸܫܬܿܟܲܚ ܠܹܗ ܦܘܼܪܩܵܢܵܐ ܘܲܩܝܵܡܬܼܵܐ ܕܲܒܼܢܲܝ̈ܢܵܫܵܐ ܕܲܒܼܡܲܤܒܿܪܵܢܘܼܬܼܵܐ
ܗܘ̤ܵܬܼ: ܐܲܝܟܼ ܕܸܐܸܡ݂ܲܪ ܪܲܫܝܼܥܵܐ ܡܵܐܢܝܼ. ܐܸܠܵܐ ܠܵܐ ܒܦܲܢܛܵܤܝܼܵܐ ܐܝܼܬܼܵܘܗܝ
ܦܘܼܪܩܵܢܲܢ. ܦܲܓܼܪܵܐ ܐ̄ܢܵܫܝܵܐ ܗܵܟܹܝܠ ܐܝܼܬܼܵܘܗܝ ܗܵܘ̇ ܕܡ̣ܢ ܡܲܪܝܲܡ:
ܐܲܝܟܼ ܟܬܼܵܒܹ̈ܐ ܐܲܠܵܗ̈ܝܹܐ: ܘܫܲܪܝܼܪܵܐܝܼܬܼ ܐܝܼܬܼܵܘܗܝ ܗ̄ܘ̣ܵܐ ܕܦܵܪܘܿܩܲܢ . .
ܠܵܐ ܐ̄ܢܵܫ ܡܩܲܒܸܿܠ ܒܲܫܐܝܼܠܘܼ ܠܡܹܡܲܪ ܒܦܲܓܼܪܵܐ ܠܐܲܠܵܗܵܐ ܡܸܠܬܼܵܐ:
ܐܸܠܵܐ ܠܐܲܠܵܗܵܐ ܐܲܝܟܼ ܐܲܠܵܗܵܐ ܡܸܠܬܼܵܐ: ܕܡ̣ܢ ܩܕܝܼܡ ܐܝܼܬܼܵܘܗܝ
ܘܲܡܬܼܘܿܡܵܐܝܼܬܼ ܐܝܼܬܼܵܘܗܝ: ܘܲܒܼܕܓܼܘܼܫܡܵܐ ܗܘ̤ܵܐ: ܘܐܝܼܬܼܵܘܗܝ ܐܵܦ
ܒܓܼܘܼܫܡܵܐ. ܟܲܕܼ ܠܵܐ ܢܦܲܩ̣ ܡ̣ܢ ܐܘܼܤܝܼܵܐ ܕܝܼܠܹܗ ܠܐܘܼܤܝܼܵܐ
ܕܒܸܤܪܵܐ: ܘܲܠܝܲܠܕܵܐ ܕܒܸܤܪܵܐ ܤܲܝܒܲܪ: ܐܸܠܵܐ ܡ̣ܢ ܐܘܼܤܝܼܵܐ ܕܝܼܠܲܢ . . .
ܐ̄ܢܵܫܵܝܵܐ ܓܹܝܪ ܐܝܼܬܼܵܘܗܝ ܟܝܵܢܵܐ ܗܵܘ̇ ܕܡ̣ܢ ܡܲܪܝܲܡ: ܐܲܝܟܼ ܕܐܵܡ̇ܪܝܼܢ
ܟܬܼܵܒܹ̈ܐ ܐܲܠܵܗܵܝܹ̈ܐ: ܘܫܲܪܝܼܪܵܐܝܼܬܼ ܐܝܼܬܼܵܘܗܝ ܗ̄ܘ̣ܵܐ ܕܦܵܪܘܿܩܲܢ. ܐܘܼܤܝܼܵܐ
ܓܹܝܪ ܕܐܲܠܵܗܵܐ ܡܸܠܬܼܵܐ: ܘܥܲܠ ܐܘܼܤܝܼܵܐ ܕܒܲܪܢܵܫܵܐ ܦܵܪܹܫ ܐ̄ܢܵܐ
ܡܸܢܟܼܘܿܢ: ܘܠܵܐ ܗ̄ܘ̣ܵܐ ܥܲܠ ܫܡܵܐ. ܠܵܐ ܓܹܝܪ ܚܵܤܹ̇ܡ ܐ̄ܢܵܐ: ܐܸܡ̇ܪܹܬܼ.
ܒܒܲܪܬܼ ܩܵܠܵܐ ܕܲܒܼܬܼܘܼܠܬܼܵܐ ܝܵܠܕܲܬܼ ܠܲܡܫܝܼܚܵܐ. ܐܸܠܵܐ ܝܵܕܲܥ̇ ܐ̄ܢܵܐ ܠܵܗ̇
ܡܝܲܩܲܪܬܵܐ ܠܗܵܝ̇ ܕܩܲܒܿܠܲܬ̤ ܠܐܲܠܵܗܵܐ: ܕܡܸܢܵܗ̇ ܢܦܲܩ̣ ܡܵܪܝܵܐ
ܕܟܼܠ. ܗܵܠܹܝܢ ܠܵܐ ܡܩܲܒܸܿܠ ܐܲܢ̄ܬܿ. ܘܐܲܝܟܲܢܵܐ ܢܸܫܒܿܩܵܟܼ ܐ̄ܢܵܫ
pb. 272
ܘܲܢܗܲܝܡܢܵܟܼ: ܐܲܝܟܼ ܕܠܲܐܝܢܵܐ ܕܲܒܼܗܵܢܵܐ ܙܢܵܐ ܐܵܡܲ݁ܪ ܕܐܸܬܼܝܼܠܸܕܼ ܐܲܠܵܗܵܐ؟
ܐ̄ܢܵܫܵܝܵܐ ܗ̄ܘ̣ ܗܵܟܹܝܠ ܗܵܘܿ ܕܡܼܢ ܛܘܼܒܼܵܢܝܼܬܼܵܐ ܡܲܪܝܲܡ: ܐܵܦܸܢ ܐܵܠܹܦ
ܙܲܒܼܢ̈ܝܵܢ ܬܸܬܼܚܕܸܐ ܠܘܼܩܒܲܠ ܐܵܬܵܢܵܣܝܼܣ: ܒܦܲܓܼܪܵܐ ܐܝܼܬܼܵܘܗܝ ܗ̄ܘ̣ܵܐ
ܐܲܠܵܗܵܐ ܡܸܠܬܼܵܐ: ܒܗܵܘ̇ ܕܲܢܤܲܒܼ ܫܘܼܪܝܵܐ ܕܢܸܗܘܸܐ ܡ̣ܢ ܛܘܼܒܼܵܢܝܼܬܼܵܐ
ܡܲܪܝܲܡ: ܠܵܐ ܗ̤ܘ ܢܤܲܒܼ ܫܘܼܪܵܝܵܐ ܕܢܸܗܘܸܐ. ܒܪܵܫܝܼܬܼ ܐܝܼܬܼܵܘܗܝ
ܗ̄ܘ̣ܵܐ ܡܸܠܬܼܵܐ: ܘܲܡܬܼܘܿܡܵܐܝܼܬܼ ܐܝܼܬܼܵܘܗܝ ܗ̄ܘ̣ܵܐ ܐܲܠܵܗܵܐ ܡܸܠܬܼܵܐ.
ܐܵܘܕܵܐ ܐܲܝܟܼ ܕܐܝܼܬܲܝܗܘܿܢ ܟܝܵܢ̈ܐ: ܐܵܘܕܵܐ ܐܲܝܟܼ ܕܐܸܬܼܦܩܸܕܼܬܿ: ܐܵܘܕܵܐ
ܐܲܝܟܼ ܕܲܨܒܼܵܐ ܐܲܠܵܗܵܐ ܕܲܢܫܵܘܙܒܼܵܟܼ ܒܝܲܕܼ ܦܲܓܼܪܵܐ. ܘܲܕܦܲܓܼܪܵܐ ܠܵܐ
ܗ̄ܘ̣ܵܐ ܡ̣ܢ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ ܐܸܫܬܲܚܠܲܦ ܠܐܘܼܤܝܼܵܐ ܕܒܸܤܪܵܐ
ܘܐܸܬܼܓܒܸܠ ܘܐܸܨܛܲܠܲܡ: ܘܲܪܒܼܵܐ ܘܐܸܬܼܓܿܡܲܪ ܒܲܟܼܝܵܢܵܐ ܕܲܒܼܢܲܝ̈ܢܵܫܵܐ
ܘܐܸܬܼܝܼܠܸܕ. ܐܸܠܵܐ ܡ̣ܢ ܓܘܼܫܡܵܐ ܕܓܼܒܼܝܼܠܵܬܐ ܕܝܼܠܲܢ: ܡ̣ܢ ܙܲܪܥܵܐ
ܕܲܒܼܢܲܝ̈ܢܵܫܵܐ. ܙܲܪܥܵܐ ܓܹܝܪ ܕܐܲܒܼܪܵܗܵܡ ܐܝܼܬܼܵܘܗܝ ܗ̄ܘ̣ܵܐ. ܡܵܢܵܐ ܥܵܒܹ̇ܕܼ
ܐܲܢ̄ܬܿ ܠܗܹܝܢ ܫܪܲܓܼܪܵܓܼܝܵܬܼܵܐ ܠܗܵܠܹܝܢ ܕܦܲܓܼܪܵܐ: ܘܲܡܒܲܛܸܠ ܐܲܢ̄ܬܿ
ܠܗܵܠܹܝܢ ܕܓܼܘܼܫܡܵܐ: ܘܤܵܐܹ̇ܡ ܐܲܢ̄ܬܿ ܠܗܹܝܢ ܥܲܠ ܐܲܠܵܗܵܐ: ܐܲܝܟܲܢܵܐ
ܕܲܬܼܪ̈ܝܗܘܿܢ ܡܵܘ̈ܠܵܕܹܐ ܒܦܘܼܠܵܓܼܵܐ ܬܸܥܒܸܿܕܼ ܐܸܢܘܿܢ: ܟܲܕܼ ܠܡܵܘܠܵܕܼܵܐ
ܡ̇ܢ ܕܓܼܘܼܫܡܵܐ ܕܠܵܐ ܫܘܼܪܵܝܵܐ ܡ̣ܢ ܐܲܠܵܗܵܐ ܐܲܒܼܵܐ ܥܵܒܹ̇ܕܼ ܐܲܢ̄ܬܿ. ܦܲܓܼܪܵܐ
ܓܹܝܪ ܘܒܲܪܢܵܫܵܐ ܐܵܡܲ݁ܪ ܐܲܢ̄ܬܿ ܠܐܲܠܵܗܵܐ ܡܸܠܬܼܵܐ: ܘܲܬܼܚܹܝܬܼ ܫܘܼܪܵܝܵܐ
ܘܲܬܼܚܹܝܬܼ ܫܘܼܡܠܵܝܵܐ: ܘܲܕܼܡ̣ܢ ܒܬܼܘܼܠܬܼܵܐ ܛܘܼܒܼܵܢܝܼܬܼܵܐ ܐܸܬܼܝܼܠܸܕܼ:
[ܡܸܛܠ ܕܲܗܘ̤ܵܐ ܒܲܪܢܵܫܵܐ]. ܐܲܝܟܲܢܵܐ ܐܸܡܲ݁ܪ ܐܲܢ̄ܬܿ ܝܲܠܕܵܐ ܕܦܲܓܪܵܐ؟
ܠܐܲܠܵܗܵܐ ܓܹܝܪ ܡܸܠܬܼܵܐ ܒܲܠܚܘܿܕܼ ܝܵܗܹ̇ܒܼ ܐܲܢ̄ܬܿ ܡܵܘܠܵܕܼܵܐ ܕܡ̣ܢ ܐܲܠܵܗܵܐ
ܐܲܒܼܵܐ: ܘܡ̣ܢ ܒܬܼܘܼܠܬܼܵܐ. ܐܸܡܲܪ ܢܲܗܝܼܪܵܐܝܼܬܼ: ܘܐܵܘܕܵܐ ܒܲܟܼܝܵܢܵܐ ܐ̄ܢܵܫܝܵܐ
pb. 273
ܕܡ̣ܢ ܛܘܼܒܼܵܢܝܼܬܼܵܐ ܡܲܪܝܲܡ: ܐܲܝܟܼ ܕܐܵܡ̇ܪܝܼܢ ܟܬܼܵܒܹ̈ܐ ܐܲܠܵܗܵܝܹ̈ܐ.
ܘܐܸܫܬܲܪܝܲܬ̤ ܗܵܝ̇ ܕܡܸܬܼܒܲܥܝܵܐ: ܕܲܬܼܚܹܝܬܼ ܫܘܼܪܵܝܵܐ ܘܬܲܪܒܿܝܼܬܼܵܐ
ܘܫܘܼܡܠܵܝܵܐ ܠܵܐ ܐܝܼܬܹܝܗ̇ ܐܘܼܤܝܼܵܐ ܕܐܲܠܵܗܵܐ: ܐܵܦܸܢ ܒܝܲܕܼ ܡܸܬܼܓܲܠܝܵܢܘܼܬܼܵܐ
ܕܲܒܼܩܲܠܝܼܠ ܩܲܠܝܼܠ ܡܸܬܼܐ̱ܡܲܪ ܗܵܟܲܢܵܐ. ܠܡܵܢܵܐ ܡܒܲܛܸܠ ܐܲܢ̄ܬܿ ܠܲܫܡܵܗܹ̈ܐ
ܡܵܘܕܥܵܢܹ̈ܐ ܕܐ̄ܢܵܫܘܼܬܼܵܐ: ܗܵܟܼܘܵܬܼ ܕܹܝܢ ܐܵܦ ܥܲܠ ܐܵܠܵܗܘܼܬܼܵܐ ܨܵܒܹ̇ܐ
ܐܲܢ̄ܬܿ ܠܲܡܗܲܝܡܵܢܘܼ؟ ܐܸܠܵܐ ܐܲܝܟܼ ܐܲܝܕܵܐ ܕܠܵܐ ܐܝܼܬܹܝܗ̇ ܕܲܟܼܦܘܼܪܝܵܐ:
ܘܲܠܗܵܝ̇ ܕܐܲܠܵܗܘܼܬܼܵܐ ܢܸܦܩܲܬ̤ ܡܸܢܵܗ̇: ܐܲܝܟܼ ܐܲܝܕܵܐ ܕܡܵܘܕܥܵܐ ܕܠܵܐ
ܢܸܤܒܲܬ̤ ܫܘܼܪܵܝܵܐ ܡܸܢܵܗ̇: ܡܒܲܛܸܠ ܐܲܢ̄ܬܿ: ܘܲܠܐ̄ܢܵܫܘܼܬܼܵܐ ܕܐܸܬܼܝܲܠܕܲܬ̤
ܡ̣ܢ ܛܘܼܒܼܵܢܝܼܬܼܵܐ ܡܲܪܝܲܡ ܡܒܲܛܸܠ ܐܲܢ̄ܬܿ. ܠܵܘ ܓܹܝܪ ܝܸܠܕܲܬ̤ ܒܲܪܢܵܫܵܐ
ܐܵܡܲ݁ܪ ܐܲܢ̄ܬܿ: ܐܸܠܑܵܐ ܐܲܝܟܼ ܕܲܝܘܹ̈ܐ ܡܲܛܥ̈ܝܵܢܹܐ: ܕܲܠܒܲܪܢܵܫܵܐ ܡܚܵܘܹܝܢ ܕܠܵܐ
ܐܝܼܬܼܵܘܗܝ ܒܲܪܢܵܫܵܐ. ܒܲܪܢܵܫܵܐ ܓܹܝܪ ܡܵܘܕܸܐ ܐܲܢ̄ܬܿ: ܐܸܠܵܐ ܐܲܠܵܗܵܐ ܡܸܠܬܼܵܐ.
ܘܐܲܠܵܗܵܐ ܡܸܠܬܼܵܐ ܡܵܘܕܸܐ ܐܲܢ̄ܬܿ: ܠܵܐ ܒܲܪܢܵܫܵܐ. ܡܲܛܥܸܐ ܐܲܢ̄ܬܿ ܓܹܝܪ
ܠܲܒܼܢܲܝ̈ܢܵܫܵܐ: ܡܫܲܚܠܸܦ ܐܲܢ̄ܬܿ ܠܐܘܼ̈ܤܝܼܵܣ ܡ̣ܢ ܫܡܵܗܹ̈ܐ. ܒܲܪܢܵܫܵܐ ܓܹܝܪ
ܐܸܡܲ݁ܪ ܐܲܢ̄ܬܿ: ܘܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ ܤܵܐܹ̇ܡ ܐܲܢ̄ܬܿ. ܘܬܼܘܼܒܼ ܐܲܠܵܗܵܐ
ܡܸܠܬܼܵܐ ܐܸܡܲ݁ܪ ܐܲܢ̄ܬܿ: ܘܠܐܘܼܤܝܼܵܐ ܕܒܲܪܢܵܫܵ ܤܵܐܹ̇ܡ ܐܲܢ̄ܬܿ: ܘܒܲܫܡܵܐ
ܕܐܲܠܵܗܵܐ ܡܸܠܬܼܵܐ ܐܵܪܝܼܡܬܵܗ̇: ܠܲܝܬܿ ܠܗܘܿܢ ܡܸܕܸܡ ܠܡܹܐܡܲܪ. ܟܵܝܵܢܵܐ
ܗ̄ܘ̣ ܐ̄ܢܵܫܵܝܵܐ ܗܵܘ̇ ܕܡ̣ܢ ܓܘܼܒܼܵܢܝܼܬܼܵܐ ܡܲܪܝܲܡ: ܡܵܕܹܝܢ ܝܵܠܕܲܬܼ ܒܲܪܢܵܫܵܐ
ܗ̣̄ܝ: ܗܵܘ̇ ܕܡܸܢܵܗ̇ ܫܩܲܠ̣ ܫܘܼܪܵܝܵܐ ܘܐܸܬܿܕܲܪܲܓܼ ܘܐܸܬܼܓܡܲܪ. ܠܵܐ
ܐܝܼܬܼܵܘܗܝ ܒܲܟܼܝܵܢܵܐ ܐܲܠܵܗܵܐ: ܐܵܦܸܢ ܡܸܬܼܐܡܲܪ ܗܵܟܲܢܵܐ: ܡܸܛܠ
ܡܸܬܼܓܲܠܝܵܢܘܼܬܼܵܐ ܕܲܒܼܩܲܠܝܼܠ ܩܲܠܝܼܠ . . . ܡܵܕܹܝܢ ܒܲܟܼܝܵܢܵܐ ܡ̇ܢ ܝܵܠܕܲܬܼ
ܒܲܪܢܵܫܵܐ: ܒܡܸܢܼܓܲܠܝܵܢܘܼܬܼܵܐ ܕܹܝܢ ܝܵܠܕܲܬܼ ܐܲܠܵܗܵܐ. ܐܸܢ ܒܡܬܼܓܲܠܝܵܢܘܼܬܼܵܐ
pb. 274
ܬܹܐܡܲܪ ܘܠܵܘ ܒܲܟܼܝܵܢܵܐ ܐܸܬܼܝܼܠܸܕܼ ܡܵܢܵܗ̇: ܡܵܕܹܝܢ ܢܦܲܩ̣ ܟܲܕܼ ܡܚܲܝܲܕܼ
ܒܗܵܘ̇ ܕܐܸܬܼܝܼܠܸܕܼ ܡܸܢܵܗ̇ ܒܲܒܼܤܲܪ. ܠܡܵܢܵܐ ܡܢܵܬܼܵܢܵܐܝܼܬܼ ܤܵܐܹ̇ܡ ܐܲܢ̄ܬܿ:
ܘܲܡܒܲܛܸܠ ܐܲܢ̄ܬܿ ܠܗܹܝܢ ܐܲܝܟܼ ܥܵܒܼܕܲܝ̈ ܬܸܕܼܡܪ̈ܵܬܼܵܐ: ܕܐܲܝܠܹܝܢ ܕܡܸܬܼܚܲܙ̈ܝܵܢ
ܠܵܐ ܡܸܬܼܚܲܙܝܵܢ̈ܝܵܬܼܵܐ ܥܵܒܼ̇ܕܝܢ ܠܗܹܝܢ: ܘܲܒܼܡܲܤܒܿܪܵܢܘܼܬܼܵܐ ܥܵܒܼ̇ܕܝܼܢ ܐܲܝܠܹܝܢ
ܕܡܸܬܼܚܲܙ̈ܝܵܢ ܘܠܵܐ ܡܸܬܼܚܲܙ̈ܝܵܢ؟ ܒܲܫܪܵܪܵܐ ܐܝܼܬܹܝܗ̇ ܟܪܸܤܛܝܵܢܘܼܬܼܵܐ: ܠܵܐ
ܬܸܛܥܘܿܢ ... ܐ̄ܢܵܫܵܝܵܐ ܗ̄ܘ̣ ܗܵܘ̇ ܕܡ̣ܢ ܛܘܼܒܼܵܢܝܼܬܼܵܐ ܡܲܪܝܲܡ ܐܸܬܼܝܼܠܸܕܼ ...
ܗܵܘ̇ ܕܲܢܤܲܒܼ ܫܘܼܪܵܝܵܐ ܘܐܸܬܿܕܲܪܲܓܼ ܘܐܸܬܼܕܡܲܪ. ܠܵܐ ܐܝܼܬܼܵܘܗܝ ܒܲܟܼܝܵܢܵܐ
ܐܲܠܵܗܵܐ: ܐܵܦܸܢ ܡܸܬܼܐ̱ܡܲܪ ܗܵܟܲܢܵܐ ܡܸܛܠ ܡܸܬܼܓܲܠܝܵܢܘܼܬܹܗ ܕܲܒܼܩܲܠܝܼܠ
ܩܲܠܝܼܠ . . .
ܡܗܲܝܡܢܝܼܢ ܐܢ̄ܬܿܘܿܢ ܠܐܲܝܠܹܝܢ ܕܐܸܡ݂ܲܪܘ ܗܵܠܹܝܢ: ܐܲܝܟܼ ܫܲܪܝܼܪܹ̈ܐ؟
ܡܗܲܝܡܢܝܼܢ ܐܢ̄ܬܿܘܿܢ ܠܐܲܝܠܹܝܢ ܕܲܟܼܬܲܒܼܬܿܘܿܢ: ܠܗܵܠܹܝܢ ܓܹܝܪ ܐܲܢ̄ܬܿܘܿܢ
ܟܬܲܒܼܬܿܘܿܢ: ܐܵܘ ܠܵܐ ܡܗܲܝܡܢܝܼܢ ܐܢ̄ܬܿܘܿܢ ܠܗܘܿܢ؟ ܐܵܘ ܒܲܪܢܵܫܵܐ
ܫܚܝܼܡܵܐ ܐܵܡ̇ܪܝܼܢ: ܡܸܛܠ ܕܗܵܠܹܝܢ ܐܵܡ̇ܪܝܼܢ ܥܲܠ ܡܫܝܼܚܵܐ؟ ܠܵܘ
ܒܲܫܐܝܼܠܘܼ ܐܵܡ̇ܪܝܼܢ ܕܐܝܼܬܼܵܘܗܝ ܒܦܲܓܼܪܵܐ ܐܲܠܵܗܵܐ: ܒܡܸܬܼܚܵܘܝܵܢܘܼܬܼܵܐ
ܐܵܡ̇ܪܝܼܢ ܥܲܠ ܐܲܠܵܗܵܐ ܕܫܲܪܝܼ ܘܐܸܬܿܕܲܪܲܓܼ. ܐܲܝܟܲܢܵܐ ܓܹܝܪ ܐܲܝܠܹܝܢ
ܕܲܡܚܲܝܕܹܝܢ ܫܚ̈ܝܼܡܹܐ ܡܵܬܼܐܲܡܪܝܼܢ؟ ܐܸܠܵܐ ܫܚܝܼ̈ܡܵܬܼܵܐ ܚܵܫܹ̇ܒܼ ܐܲܢ̄ܬܿ ܠܐܲܝܠܹܝܢ
ܕܠܵܐ ܐܝܼܬܲܝܗܹܝܢ ܒܐܘܼܤܝܼܵܐ ܬܲܪ̈ܬܲܝܗܹܝܢ: ܠܐܲܠܵܗܘܼܬܼܵܐ ܕܠܵܐ ܐܼܝܬܹܝܗ̇
ܐ̄ܢܵܫܘܼܬܼܵܐ: ܘܲܠܐ̄ܢܵܫܘܼܬܼܵܐ ܕܠܵܐ ܐܝܼܬܹܝܗ̇ ܐܲܠܵܗܘܼܬܼܵܐ. ܐܸܠܵܐ ܫܟܼܝܼܪܵܢ
ܗܵܠܹܝܢ ܠܡܹܐܡܲܪ: ܐܲܝܟܼ ܕܤܵܒܲܪ̇ ܐ̄ܢܵܐ: ܠܗܵܘ̇ ܕܐܸܡܲܪ ܕܠܵܐ ܡܸܬܼܒܲܛܲܠ
ܦܘܼܪܫܵܢܵܐ ܕܲܟܼܝܵܢܹ̈ܐ ܡܸܛܠ ܚܕܼܵܝܘܼܬܼܵܐ. ܡܵܕܹܝܢ: ܠܗܵܕܹܐ ܐܵܡܲ݁ܪ ܐܲܢ̄ܬܿ.
ܗܵܘ̇ ܡܵܐ ܕܐܵܦ ܐܸܢܵܐ: ܟܲܕܼ ܡܫܲܒܲܚ ܐ̄ܢܵܐ: ܕܐܲܠܵܗܘܼܬܼܵܐ ܐܝܼܬܹܝܗ̇ ܟܲܕܼ
ܡܚܲܝܕܼܵܐ ܒܐ̄ܢܵܫܘܼܬܼܵܐ: ܘܐ̄ܢܵܫܘܼܬܼܵܐ ܐܝܬܹܝܗ̇ ܒܲܟܼܝܵܢܵܐ ܘܲܡܚܲܝܕܼܵܐ
pb. 275
ܒܐܲܠܵܗܘܼܬܼܵܐ. ܘܒܲܐܝܠܹܝܢ ܕܲܒܼܕܝܼܠܝܼ ܡܲܚܪܸܡ ܐܲܢ̄ܬܿ؟ ܐܵܦ ܠܗܵܠܹܝܢ
ܕܝܼܠܵܟܼ ܐܲܚܪܸܡ. ܐܸܢܗ̤ܘ ܕܙܵܕܹܩ ܠܡܹܐܡܲܪ ܕܝܼܠܵܟܼ: ܗܵܠܹܝܢ ܕܠܵܐ
ܬܟܼܝܼܠ ܐܲܢ̄ܬܿ ܥܠܲܝܗܹܝܢ ܕܐܲܝܟܼ ܕܒܲܫܪܵܪܵܐ ܐܸܢܹܝܢ: ܟܲܕܼ ܡܩܵܘܸܐ ܐܲܢ̄ܬܿ
ܒܕܲܠܩܘܼܒܼܠܵܝܘܼܬܼܵܐ ܠܘܼܩܒܲܠ ܐܲܒܼ̈ܗܵܬܼܵܐ ܘܠܘܼܩܒܲܠ ܟܬܼܒܹ̈ܐ ܐܲܠܵܗܵܝܹ̈ܐ.
ܬܡܝܼܗܬܵܐ ܗ̣̄ܝܼ ܓܹܝܪ ܘܲܡܫܲܒܲܚܬܼܵܐ ܫܟܼܵܚܬܼܵܐ ܗܕܹܐ ܕܗܹܪܹܤܝܼܣ:
ܕܗܵܠܹܝܢ ܟܠܗܹܝܢ ܐܵܡܲ݁ܪ ܐܲܢ̄ܬܼ: ܕܗܵܠܹܝܢ ܕܐ̄ܢܵܫ ܠܵܐ ܡܵܘܕܹܐ ܒܗܹܝܢ:
ܕܘܿܓܡܵܐ ܕܝܼܠܵܟܼ ܠܚܘܿܕܲܝܟ ܩܲܝܸܡ̣ܬܿ ܠܘܼܩܒܲܠ ܟܠܢܵܫ: ܕܐܲܤܒܲܪܬܿ
ܕܡ̣ܢ ܟܠܢܵܫ ܡܸܬܼܠܲܒܼ̈ܟܵܢ. ܕܲܠܩܘܼܒܼܠܵܐ ܕܹܝܢ: ܐܲܝܟܼ ܐܲܝܢܵܐ ܕܲܠܟܼܠܢܵܫ
ܒܡܲܤܲܒܼ ܒܐܲܦܹ̈ܐ ܕܲܒܲܪܬܿ: ܐܲܝܟܼ ܢܵܤܹ̇ܒܼ ܠܐܲܦܹ̈ܐ ܡ̣ܢ ܟܠܢܵܫ ܡܸܤܬܿܢܸܐ
ܐܲܢ̄ܬܿ. ܐܲܝܟܲܢܵܐ ܕܢܸܬܼܓܠܸܐ ܫܪܵܪܵܐ: ܕܡ̣ܢ ܟܠܢܵܫ ܡܸܤܬܿܒܲܪ: ܕܡܸܕܲܥ
ܡ̇ܢ ܝܵܕܲܥ̇ ܐܲܢ̄ܬܿ ܠܹܗ: ܕܬܹܐܡܪܝܼܘܗܝ ܕܹܝܢ ܠܵܐ ܡܲܡܪܲܚ ܐܲܢ̄ܬܿ.
ܤܵܦܹ̇ܩ ܗܵܟܹܝܠ ܐܵܦ ܡ̣ܢ ܗܵܠܹܝܢ ܠܡܹܐܠܲܦ: ܠܐܲܝܠܹܝܢ ܕܒܼܵܥܹ̇ܝܢ
ܕܢܸܕܲܥܘܼܢ ܪܸܥܝܵܢܵܟܼ: ܕܒܲܐܝܕܵܐ ܥܵܕܹܠ ܐܲܢ̄ܬܿ ܠܝܼ: ܐܲܝܟܼ ܕܠܲܐܝܢܵܐ
ܕܲܒܼܪܲܚܝܼܩܘܼܬܼܵܐ ܕܕܘܼܟܿܬܼܵܐ ܐܸܡܲ݁ܪ ܐ̄ܢܵܐ ܕܲܦܪ̈ܝܵܫܵܢ ܐܘܼܤ̈ܝܼܵܣ:
ܒܢܲܩܝܼܦܘܼܬܼܵܐ ܕܹܝܢ ܘܲܒܼܚܘܼܒܵܐ ܡܸܫܬܵܘ̈ܬܿܦܵܢ ܒܫܲܘܝܘܼܬܼܵܐ. ܘܠܵܐ ܗ̄ܘ̣ܵܐ
ܒܗܵܝ̇ ܕܲܟܼܝܵܢܵܐܝܼܬܼ ܐܝܼܬܲܝܗܘܿܢ: ܒܡܸܠܬܼܵܐ ܗܵܟܹܝܠ ܕܲܟܼܝܵܢܹ̈ܐ ܡܦܲܪܫܝܼܢܲܢ.
ܐ̄ܚܪܹܬܼܵܐ ܓܹܝܪ ܐܲܠܵܗܘܼܬܼܵܐ: ܘܲܐ̄ܚܪܹܬܼܵܐ ܐ̄ܢܵܫܘܼܬܼܵܐ. ܡ̣ܢ ܢܲܦܩܝܼܦܘܼܬܼܵܐ ܕܹܝܢ
ܕܗܵܠܹܝܢ: ܠܵܘ ܐ̄ܚܪܹܢܵܐ ܘܲܐ̄ܚܪܹܢܵܐ ܒܦܲܪܨܘܿܦܵܐ. ܐܲܢ̄ܬܿ ܗܵܟܲܢܵܐ ܤܵܡ̣ܬܿ
ܕܢܸܪܢܘܿܢ ܥܠܲܝ: ܕܲܠܩܘܼܒܼܠܵܐ ܕܹܝܢ ܡܸܬܼܚܙܝܵܐ ܕܐܸܡܲ݁ܪ ܐ̄ܢܵܐ: ܐܲܝܟܼ
ܕܡܲܤܸܕܼ ܐܲܢ̄ܬܿ ܥܠܲܝ. ܕܲܡܚܲܝܸܕܼ ܐ̄ܢܵܐ ܡ̇ܢ: ܠܐܘܼܤ̈ܝܼܵܣ. ܡ̣ܢ ܚܕܼܵܝܘܼܬܼܵܐ
pb. 276
ܕܹܝܢ ܕܐܘܼܤ̈ܝܼܵܣ: ܚܲܕܼ ܦܲܪܨܘܿܦܵܐ ܐܸܡܲ݁ܪ ܐ̄ܢܵܐ ܠܲܚܕܼܵܐ ܫܲܘܝܘܼܬܼܵܐ ܒܟܼܠ
ܡܸܕܸܡ ܕܐܝܼܬܹܝܗ̇ ܠܦܲܪܨܘܿܦܵܐ: ܕܐܝܼܬܼ ܠܹܗ ܐܵܦ ܐܘܼܤܝܼܵܐ
ܐ̄ܚܪܹܬܼܵܐ ܘܲܐ̄ܚܪܹܬܼܵܐ. ܠܵܐ ܗ̄ܘ̣ܵܐ ܒܤܸܕܼܩܵܐ ܘܲܒܼܡܸܬܼܪܲܚܩܵܢܘܼܬܼܵܐ: ܐܸܠܵܐ
ܒܹܗ ܟܲܕܼ ܒܹܗ. ܒܪܲܡ ܐܵܦ ܥܲܠ ܐ̄ܚܪ̈ܵܢܝܵܬܼܵܐ ܡܲܪܗܛܵܐܝܼܬܼ ܐܲܝܟܼ
ܕܡܸܫܟܿܚܵܐ ܢܸܥܒܲܪ: ܕܠܵܐ ܐ̄ܢܵܫ ܕܲܒܼܗܵܠܹܝܢ ܐܝܼܬܼܵܘܗܝ ܓܘܼܕܵܦܵܐ: ܐܵܘ
ܒܝܲܕܼ ܗܸܢܹܝܢ ܘܐܵܦ ܗܵܠܹܝܢ ܡܸܬܼܟܲܤ̈ܤܵܢ.
. . . . . . . . . . . . . . . . . . .
ܗܵܝ̇ ܗܵܟܹܝܠ ܕܐܸܡ̇ܪܝܼܢ ܗ̣̄ܘܲܝܢ: ܠܵܐ ܬܸܕܼܚܲܠ ܠܡܸܕܼܒܲܪ ܠܡܲܪܝܲܡ
ܐܲܢ̄ܬܿܬܼܵܟܼ. ܗܵܘ̇ ܓܹܝܪ [ܕܐܸܬܼܝܼܠܸܕܼ ܒܵܗ̇: ܡ̣ܢ ܪܘܼܚܵܐ ܗ̄ܘ̣ ܕܩܘܼܕܫܵܐ.]
ܐܸܢ ܓܹܝܪ ܕܐܸܬܼܝܼܠܸܕܼ ܒܵܗ̇: ܬܹܐܡܲܪ: ܘܐܸܢ ܕܲܗܘ̤ܵܐ ܒܵܗ̇: ܠܤܘܼܡܟܵܠܵܐ
ܡܸܕܸܡ ܗܵܕܹܐ ܠܵܐ ܡܲܚܤܪܵܐ. ܗܵܘ̇ ܓܹܝܪ ܕܐܸܬܼܝܼܠܸܕܼ ܒܵܗ̇: ܡ̣ܢ ܪܘܼܚܵܐ
ܗ̄ܘ̣ ܕܩܘܼܕܼܫܵܐ. ܐܸܢ ܓܹܝܪ ܢܹܐܡܲܪ ܕܐܲܠܵܗܵܐ ܡܸܠܬܼܵܐ ܐܸܬܼܝܼܠܸܕܸ
ܒܟܲܪܤܵܐ: ܐ̄ܚܪܬܼܵܐ ܗ̣̄ܝ ܓܹܝܪ ܐܝܼܬܹܝܗ̇ ܗܵܝ̇ ܕܲܗܘ̤ܵܐ ܐܝܼܬܼܵܘܗܝ ܥܲܡ
ܗܵܘ̇ ܕܡܸܬܼܝܼܠܸܕܼ: ܘܲܐ̄ܚܪܹܬܼܵܐ ܗܵܝ̇ ܕܢܸܬܼܝܼܠܸܕܼ. ܗܵܘ̇ ܠܲܡ ܓܹܝܪ ܕܒܼܵܗ̇
ܐܸܬܼܝܼܠܸܕܼ: ܡ̣ܢ ܪܘܼܚܵܐ ܗ̄ܘ̣ ܕܩܘܼܕܼܫܵܐ. ܗܵܢܵܘ ܕܹܝܢ: ܪܘܼܚܵܐ ܕܩܘܼܕܼܫܵܐ
ܒܪ̣ܵܐ ܗܵܘ̇ ܕܒܼܵܗ̇. ܚܙܵܘ ܗܵܟܹܝܠ ܐܲܒܼ̈ܗܵܬܼܵܐ: ܐܲܝܟܼ ܝܵܕܼܘܿܥܹ̈ܐ ܕܲܟܼܬܼܵܒܹ̈ܐ
ܐܲܠܵܗܵܝܹ̈ܐ. ܘܐܸܢ ܥܲܠ ܗܵܘ̇ ܕܐܸܬܼܓܲܫܲܡ ܢܤܝܼܡ ܗܵܘ̇ ܕܐܸܬܼܝܼܠܸܕܼ:
ܡܸܫܬܿܟܲܚ ܠܹܗ ܒܪܵܐ ܕܪܘܼܚܵܐ ܐܲܠܵܗܵܐ ܡܸܠܬܼܵܐ: ܐܵܘ ܕܲܬܼܪܹܝܢ
ܐܲܒܼܵܗܹ̈ܐ ܐܝܼܬܼ ܠܹܗ. ܐܸܢܕܹܝܢ ܗܵܝ̇ ܕܲܗܘ̤ܵܐ ܢܹܐܡܲܪ: ܡܸܫܬܿܟܲܚ ܐܲܠܵܗܵܐ
pb. 277
ܡܸܠܬܼܵܐ ܕܐܝܼܬܼܵܘܗܝ ܒܪܝܼܬܼܵܐ ܕܩܘܼܕܼܫܵܐ. ܘܟܲܕܼ ܥܵܪܩܝܼܢ ܡ̣ܢ
ܡܸܠܬܼܵܐ ܕܝܲܠܬܼܵܐ: ܤܵܡ̣ܘ: ܕܢܚܸܬܼ ܡܸܛܠܵܬܲܢ ܒܢܲܝ̈ܢܵܫܵܐ ܘܡܸܛܠ
ܦܘܼܪܩܵܢܲܢ ܘܐܸܬܼܓܲܫܲܡ. ܡ̇ܢ ܐܝܼܬܹܝܗ̇ ܗܵܝ̇ ܕܐܸܬܼܓܲܫܲܬܡ: ܕܠܵܐ
ܐܸܫܬܲܚܠܲܦ ܡ̣ܢ ܐܲܠܵܗܘܼܬܼܵܐ ܠܒܸܤܪܵܐ؟ ܒܗܵܝ̇ ܓܹܝܪ ܕܐܸܬܼܓܲܫܲܡ ܡ̣ܢ
ܪܘܼܚܵܐ ܕܩܘܼܕܼܫܵܐ: ܐܸܬܿܕܢܝܼܘ ܠܐܹܘܲܢܓܲܠܸܤܛܵܐ. ܐܵܦ ܓܹܝܪ
ܐܹܘܲܢܓܲܠܸܤܛܵܐ: ܟܲܕܼ ܐܸܬܼ݂ܵܐ ܠܘܵܬܼ ܡܸܬܼܒܼܲܢܵܫܢܘܼܬܼܵܐ: ܥܪܲܩ̣ ܡ̣ܢ
ܕܲܠܡܹܐܡܲܪ ܝܲܠܕܵܐ ܥܲܠ ܡܸܠܬܼܵܐ: ܘܤܵܡ̣ ܡܸܬܼܓܲܫܡܵܢܘܼܬܼܵܐ.
ܐܲܝܟܲܢܵܐ؟ ܫܡܲܥ.
ܘܡܸܠܬܼܵܐ ܒܸܤܪܵܐ ܗܘ̤ܵܐ. ܠܵܐ ܐܸܡ݂ܲܪ: ܕܡܸܠܬܼܵܐ ܒܝܲܕܼ ܒܸܤܪܵܐ
ܐܸܬܼܝܼܠܸܕܼ. ܐܲܝܟܵܐ ܡ̇ܢ ܓܹܝܪ ܕܲܠܝܲܠܕܵܐ ܡܸܬܼܥܲܗܕܝܼܢ ܫܠܝܼܚܹ̈ܐ
ܘܐܹܘܲܢܓܲܠܸܤ̈ܛܹܐ: ܠܲܒܼܪܵܐ ܤܝ̇ܡܝܼܢ ܕܐܸܬܼܝܼܠܸܕܼ ܡ̣ܢ ܐܲܢ̄ܬܿܬܼܵܐ . . .
ܐܸܬܼܒܲܩܵܐ ܒܡ̇ܢ ܕܐܸܬܼܐ̱ܡܲܪ: ܒܵܥܹ̇ܐ ܐ̄ܢܵܐ ܡܸܢܵܟܼ. ܐܲܝܟܵܐ ܕܐܵܡ̇ܪܝܼܢ ܫܡܵܐ
ܕܲܒܼܪܵܐ ܘܕܐܸܬܼܝܼܠܸܕܼ ܡ̣ܢ ܐܲܢ̄ܬܿܬܼܵܐ: ܤܵܝ̇ܡܝܼܢ ܗܵܝ̇ ܕܐܸܬܼܝܼܠܸܕܼ. ܐܲܝܟܵܐ
ܕܹܝܢ ܕܡܸܬܼܥܲܗܕܝܼܢ ܠܡܸܠܬܼܵܐ: ܠܵܐ ܐ̄ܢܵܫ ܕܹܝܢ ܡܸܢܗܘܿܢ ܐܲܡܪܲܚ
ܠܡܹܐܡܲܪ ܝܲܠܕܵܐ ܒܝܲܕܼ ܐ̄ܢܵܫܘܼܬܼܵܐ. ܫܡܲܥ ܠܛܘܼܒܼܵܢܵܐ ܝܘܿܚܲܢܵܢ
ܐܹܘܲܢܓܲܠܸܤܛܵܐ ܟܲܕܼ ܐܸܬܼ݂ܵܐ ܠܘܵܬܼ ܡܸܠܬܼܵܐ ܡܸܠܬܼܵܐ ܕܡܸܬܼܒܲܪܢܫܵܢܘܼܬܹܗ: ܫܡܲܥ
ܐܲܝܠܹܝܢ ܐܸܡ݂ܲܪ: ܡܸܠܬܼܵܐ ܒܸܤܪܵܐ ܗܘ̤ܵܐ. ܗܵܢܵܘ ܕܹܝܢ: ܢܤܲܒܼ ܒܸܤܪܵܐ.
ܘܐܲܓܸܢ ܒܲܢ. ܗܵܢܵܘ ܕܹܝܢ: ܠܲܟܼܝܵܢܲܢ ܠܒܸܫ̣ ܟܲܕܼ ܥ̣ܡܲܪ ܒܲܢ. ܘܲܚܙܲܝܢ
ܫܘܼܒܼܚܹܗ ܫܘܼܒܚܵܐ ܕܲܒܼܪܵܐ. ܠܵܐ ܐܸܡ݂ܲܪ ܕܲܚܙܲܝܢ ܝܲܠܕܵܗ̇ ܕܡܸܠܬܼܵܐ.
ܐܸܢܵܐ ܗܵܟܹܝܠ ܐܸܡ̇ܪܹܬܼ ܠܥܸܠܬܼܵܐ: ܕܤܵܒܲܪ ܗ̄ܘܹ̇ܝܬܼ ܕܫܲܦܝܼܪܵܐ:
pb. 278
ܕܡܸܛܠܵܬܼܵܗ̇ ܠܑܵ ܐܸܡ݂ܲܪܘ ܐܲܒܼ̈ܗܵܬܼܵܐ ܒܲܤܝܵܡܵܐ ܕܗܲܝܡܵܢܘܼܬܼܵܐ: ܕܐܸܬܼܝܼܠܸܕܼ
ܡ̣ܢ ܪܘܼܚܵܐ ܕܩܘܼܕܼܫܵܐ ܘܡ̣ܢ ܡܲܪܝܲܡ ܒܬܼܘܼܠܬܼܵܐ: ܐܸܠܵܐ ܕܐܸܬܼܒܲܤܲܪ.
ܕܠܵܐ ܗ̄ܘ̣ܵܐ ܠܪܘܼܚܵܐ ܕܩܘܼܕܼܫܵܐ ܢܹܐܡܲܪܘܼܢ ܐܲܒܼܵܐ ܐܵܘ ܒܵܪܘܿܝܵܐ ܕܲܒܼܪܵܐ:
ܐܸܠܵܐ ܝܲܬܝܼܪܵܐܝܼܬܼ [ܕܐܸܬܼܒܲܤܲܪ ܡ̣ܢ ܪܘܼܚܵܐ ܕܩܘܼܕܼܫܵܐ ܘܡ̣ܢ ܡܲܪܝܡ
ܒܬܼܘܼܠܬܐ] ܐܲܝܟܲܢܵܐ ܗܵܝ̇ ܕܲܗܘ̤ܵܐ: ܢܸܬܿܠܘܼܢܵܗ̇ ܠܒܸܤܪܵܐ: ܡܸܛܠ
ܕܐܸܬܼܒܲܤܲܪ. ܬܲܫܥܝܼܬܼܵܐ ܗ̣̄ܝ ܓܹܝܪ ܕܥܵܒܼܘܿܕܼܘܼܬܼܵܐ. ܐܲܢ̄ܬܿܘܿܢ ܕܹܝܢ ܡܵܢܵܐ
ܐܵܡܪܝܼܬܿܘܿ؟ ܐܸܡܲܪܘ ܓܲܠܝܵܐܝܼܬܼ. ܐܲܟܸܤܘ ܠܐܲܝܠܹܝܢ ܕܓܲܕܼܦܘ ܢܲܗܝܼܪܵܐܝܼܬܼ:
ܡ̣ܢ ܪܘܼܚܵܐ ܕܩܘܼܕܼܫܵܐ ܐܸܬܼܝܼܠܸܕܼ. ܐܸܢ ܐܸܬܼܝܼܠܸܕܼ: ܐܲܒܼܵܐ ܐܝܼܬܼܵܘܗܝ ܪܘܼܚܵܐ
ܕܩܘܼܕܼܫܵܐ ܕܲܒܼܪܵܐ: ܐܵܘ ܒܵܪܘܿܝܵܐ ܕܐܲܠܵܗܵܐ ܡܸܠܬܼܵܐ. ܗܵܠܹܝܢ ܓܹܝܪ: ܐܸܡ̇ܪܹܬܼ
ܐܸܢܵܐ: ܕܠܵܐ ܐܸܡ݂ܲܪܘ ܬܲܒܼ̈ܗܵܬܼܵܐ: ܘܠܵܐ ܐܸܢܵܐ ܐܵܡܲ݁ܪ ܐ̄ܢܵܐ: ܓܲܕܦܹ̇ܬܼ ܕܐܸܡ̇ܪܹܬܼ
ܗܵܠܹܝܢ؟ ܐܵܘ ܡܸܥܫܲܩ ܥܸܫܩܹ̇ܬܼ ܠܐܲܒܼ̈ܗܵܬܼܵܐ؟ ܐܸܢ ܐܝܼܬܼ ܠܟܼܘܿܢ
ܠܲܡܚܵܘܵܝܘܼ ܕܗܵܠܹܝܢ ܐܸܡ݂ܲܪܘ. ܐܵܒܼ̈ܗܵܬܼܵܐ: ܐܸܡܲܪܘ ܓܲܠܝܵܐܝܼܬܼ. ܐܲܝܢܵܘ ܡ̣ܢ
ܗܵܠܹܝܢ؟ ܒܪܝܼܬܼܵܐ ܐܝܼܬܼܵܘܗܝ: ܐܵܘ ܒܪܵܐ ܕܪܘܼܚܵܐ ܕܩܘܼܕܫܵܐ: ܐܲܠܵܗܵܐ
ܡܸܠܬܼܵܐ؟ ܘܐܸܢ ܐܝܼܬܼܵܘܗܝ ܒܪܝܼܬܼܵܐ ܒܸܤܪܵܐ ܕܐܝܼܬܼܵܘܗܝ ܒܸܤܪܵܢܵܐ:
ܘܐܵܦܠܵܐ ܒܪܝܼܬܼܵܐ ܗ̄ܘ̣ ܕܪܘܼܚܵܐ ܕܩܘܼܕܼܫܵܐ: ܐܸܡܲܪܘ ܓܲܠܝܵܐܝܼܬܼ. ܗܵܝ̇
ܕܐܸܬܼܒܲܤܲܪ: ܒܲܟܼܝܵܢܹܗ ܡܸܬܼܐܡܲܪ ܕܐܸܬܼܒܲܤܲܪ ܡ̣ܢ ܟܠ ܦܪܘܿܣ. ܘܠܵܘ
ܟܲܕܼ ܐ̄ܚܪܹܢܵܐ ܕܐܸܬܼܒܲܤܪ: ܗ̤ܘ ܡܸܬܼܐ̱ܡܲܪ ܕܐܸܬܼܒܲܤܲܪ. ܐܸܠܵܐ ܗ̤ܘ
ܒܐܘܼܤܝܼܵܐ ܕܝܼܠܹܗ ܐܸܬܼܒܲܤܲܪ: ܒܒܸܤܪܵܐ ܕܲܗܘ̤ܵܐ ܘܐܸܬܼܝܼܠܸܕܼ ܡ̣ܢ ܪܘܼܚܵܐ
ܕܩܘܼܕܼܫܵܐ. ܗܵܝ̇ ܓܹܝܪ ܕܐܸܬܼܝܼܠܸܕܼ: ܐܲܝܟܼ ܕܲܐ̄ܬܿ: ܕܲܠܩܘܼܒܼܠܵܐ
ܗ̣̄ܝ ܕܗܵܝ̇ ܕܐܸܡ݂ܲܪܬܿ. ܕܟܲܕܼ ܐܸܬܼܝܼܠܸܕܼ: ܒܸܤܪܵܐ ܗ̄ܘ̣ ܡܸܬܼܐܡܲܪ
ܕܐܸܬܼܝܼܠܸܕܼ: ܐܲܝܟܼ ܡ̇ܢ ܕܝܲܠܕܵܐ ܕܒܸܤܪܵܐ ܕܝܼܠܹܗ ܥܲܒܼܕܹܗ. ܠܵܘ ܕܹܝܢ
pb. 279
ܕܲܒܼܕܼܝܼܠܵܝܘܼܬܼܵܐ ܐܸܬܼܤܲܒܲ: ܐܸܠܵܐ ܒܐܘܼܤܝܼܵܐ ܕܝܼܠܹܗ. ܠܵܐ ܡܵܕܹܝܢ ܗ̤ܝ
ܟܲܕܼ ܗ̤ܝ ܡܵܘܕܥܵܐ ܗܵܝ̇ ܕܐܸܬܼܒܲܤܲܪ: ܘܗܵܝ̇ ܕܐܸܬܼܝܼܠܸܕܼ. ܘܡܸܛܠ
ܗܵܢܵܐ ܤܵܡ̣ܘ ܗܵܝ̇ ܕܐܸܬܼܒܲܤܲܪ: ܘܠܵܐ ܗܵܝ̇ ܕܐܸܬܼܝܼܠܸܕܼ. ܡܸܛܠ ܕܗܵܝ̇
ܕܲܗܘ̤ܵܐ: ܥܲܠ ܒܸܤܪܵܐ ܢܲܤ̣ܒܿܘܼܗ̇. ܘܡܸܛܠ ܗܵܢܵܐ ܐܵܦ
ܐܹܘܲܢܓܲܠܸܤܛܵܐ: ܒܸܤܪܵܐ ܐܸܡ݂ܲܪ ܕܲܗܘ̤ܵܐ: ܘܠܵܐ ܐܸܡ݂ܹܲܪ ܕܐܸܬܼܝܼܠܸܕܼ.
ܐܲܝܟܲܢܵܐ ܕܲܒܼܗܵܝ̇ ܕܲܗܘ̤ܵܐ: ܠܵܐ ܗ̄ܘ̣ܵܐ ܠܐܲܠܵܗܵܐ ܡܸܠܬܼܵܐ ܡܤܲܝܸܟܸ: ܐܸܠܵܐ
ܥܲܠ ܒܸܤܪܵܐ ܕܲܗܘ̤ܵܐ: ܒܸܤܪܹܗ ܗܘ̤ܵܐ. ܘܐܲܓܸܢ ܒܲܢ ܐܲܠܵܗܵܐ ܡܸܠܬܼܵܐ:
ܠܵܘ ܐܲܠܵܗܵܐ ܡܸܠܬܼܵܐ ܗܘ̤ܵܐ: ܐܝܼܬܼܵܘܗܝ ܗ̄ܘ̣ܵܐ ܓܹܝܪ.
ܘܲܫܡܲܥ ܡܸܢܗܘܿܢ: ܠܵܐ ܓܹܝܪ ܡܸܫܬܲܐܠܝܼܢ ܐܢ̄ܬܿܘܿܢ ܡ̣ܢ ܓܒܼܪܹ̈ܐ
ܗܵܢ̇ܘܿܢ: ܕܐܲܢ̄ܬܿܘܿܢ ܐܲܝܬܝܼܬܘܿܢ ܥܠܲܝ ܠܲܩܛܹܐ ܓܼܪܵܢܘܼܬܼܵܐ. ܐܸܡܲܪ
ܗܵܟܹܝܠ ܐܘܿ ܐܲܡܒܿܪܘܿܤܝܼܵܐ: ܠܵܐ ܬܲܗܡܸܐ ܥܲܠ ܐܲܝܢܵܐ ܕܡܸܬܿܛܠܸܡ.
ܠܵܐ ܬܸܗܘܸܐ ܒܦܘܼܡܵܐ ܕܥܵܫܘܿܩܹ̈ܐ: ܘܠܵܐ ܬܚܲܝܸܒܼ ܕܡܵܐ ܙܲܟܝܵܐ ܩܕܼܵܡ
ܕܬܸܫܡܲܥ. ܐܸܢܵܐ ܠܒܸܤܪܵܐ ܐܵܡܲ݁ܪ ܐ̄ܢܵܐ ܕܲܗܘ̤ܵܐ ܡ̣ܢ ܡܲܪܝܲܡ ܒܬܼܘܼܠܬܼܵܐ:
ܠܵܐ ܗ̄ܘ̣ܵܐ ܠܐܲܠܵܗܵܐ ܡܸܠܬܼܵܐ. ܠܵܐ ܥܒܼܝܼܕܼܵܐ ܓܹܝܪ: ܘܠܵܐ ܗܲܘܝܵܐ: ܘܠܵܐ
ܒܲܪܝܵܐ ܡܵܘܕܐ ܐ̄ܢܵܐ ܠܹܗ. ܘܗܵܠܹܝܢ ܟܠܗܘܿܢ ܒܲܕܼܡܘܼܬܼ ܤܲܝ̈ܦܹܐ
ܩܵܝ̇ܡܝܼܢ ܠܘܼܩܒܲܠܝ: ܘܐܵܦ ܠܵܐ ܠܒܲܪܬܼ ܩܵܠܝܼ ܠܲܓܼܡܵܪ ܨܵܒܹ̇ܝܢ
ܠܡܸܫܡܲܥ: ܘܥܲܠ ܗܵܠܹܝܢ ܠܵܟܼ ܡܲܝܬܹܿܝܢ ܒܤܵܗ̈ܕܹܿܐ. ܠܵܐ ܗ̄ܘ̣ܵܐ ܡ̣ܢ
ܡܵܘܬܵܐ ܕܚܲܠܹ̇ܬܼ ܕܗܵܟܲܢܵܐ ܐܸܬܼܥܲܫܩܹ̇ܬܼ: ܐܸܠܵܐ ܕܲܒܼܦܲܪܨܘܼܦܵܟܼ ܕܝܸܠܵܟܼ
ܐܸܬܼܚܲܝ̇ܒܹܬܼ ܐܸܢܵܐ ܐܲܝܟܼ ܪܲܫܝܼܥܵܐ܀ ܐܸܢܵܐ ܡ̣ܢ ܐܲܡܒܘܿܤܝܼܤܘܿܣ ܐܸܡ̇ܪܹܬܼ:
ܘܲܒܼܡܸܕܸܡ ܕܐܸܡܹ̇ܬܼ ܠܵܐ ܟܵܦܲܪ ܐ̄ܢܵܐ: ܐܵܦܸܢ ܤܲܝܦܵܐ ܢܪܝܡܘܼܢ ܥܠܲܝ.
pb. 280
ܗܵܠܹܝܢ ܐܸܡ̇ܪܹܬܼ: ܠܗܵܢܵܐ ܠܲܡ ܡ̣ܢ ܒܵܬܲܪ ܗܵܠܹܝܢ ܡܥܲܬܲܕ ܕܢܸܗܘܸܐ
ܡ̣ܢ ܐܲܢ̄ܬܿܬܼܵܐ: ܐܲܝܟܼ ܗܵܝ̇ ܕܲܗܘ̤ܵܐ. ܠܵܐ ܗ̄ܘ̣ܵܐ ܠܐܲܠܵܗܘܼܬܼܵܐ: ܐܸܠܵܐ
ܠܦܲܓܼܪܵܐ ܕܐܸܬܼܢܤܸܒܼ ܬܤܲܝܸܟܼ. ܗܘ̤ܵܐ ܡ̣ܢ ܐܲܢ̄ܬܿܬܼܵܐ: ܒܝܲܕܼ ܦܲܓܼܪܵܐ
ܕܐܸܬܼܢܤܸܒܼ: ܗܵܢܵܘ ܓܹܝܪ: ܗܵܘ̇ ܕܵܢܚܸܬܼ: ܗܵܢܵܐ ܗ̄ܘ̣ ܗܵܘ̇ ܕܐܲܒܼܵܐ
ܩܲܕܼܫܹܗ ܘܫܲܕܪܹܗ ܠܥܵܠܡܵܐ. ܐܵܠܦܵܐ ܗ̤ܘ ܟܬܼܵܒܼܵܐ ܡܲܠܸܦ ܠܟܼܘܿܢ:
ܕܠܵܐ ܗ̄ܘ̣ܵܐ ܐܲܠܵܗܘܼܬܼܵܐ ܤܢܝܼܩܵܐ ܥܲܠ ܩܘܼܕܵܫܵܐ ܐܸܠܵܐ ܒܸܤܪܵܐ؟ ܐܸܢ
ܗܵܟܹܝܠ ܐܲܛܥܝܼܘ: ܠܢܲܦܫܗܘܿܢ ܐܲܛܥܝܼܘ: ܘܠܵܐ ܠܝܼ܀
ܡܵܢܵܐ [ܗܵܟܹܝܠ ܘܐܵܦ ܐܲܢ̄ܬܿ: ܐܘ ܓܪܝܓܘܪܝܼܘܣ ܐܲܠܵܗܝܵܐ؟] ܥܲܠ
ܗܵܠܹܝܢ: ܐܲܝܢܵܐ ܪܸܥܝܵܢܵܐ ܐܝܼܬܼ ܠܵܟܼ؟ ܡܫܲܐܸܠ ܐ̄ܢܵܐ: ܠܵܘ ܟܲܕܼ ܠܵܐ ܝܵܕܲܥ̇
ܐ̄ܢܵܐ: ܐܸܠܵܐ ܕܒܲܫܡܵܐ ܕܝܼܠܵܟܼ ܠܡܸܛܠܲܡ ܫܪܵܪܵܐ. ܐܲܝܟܲܢ ܝܵܕܵܥ̇ ܐܲܢ̄ܬܿ
ܠܗܵܘ̇ ܕܡ̣ܢ ܪܘܼܚܵܐ ܕܩܘܼܕܼܫܵܐ ܘܡ̣ܢ ܡܲܪܝܲܡ ܒܬܼܘܼܠܬܼܵܐ: ܕܫܲܪܝܼ
ܘܐܸܬܿܕܲܪܲܓܼ ܘܐܸܫܬܲܡܠܝܼ؟ ܠܵܘ ܒܦܲܪܨܘܿܦܵܐ ܐܵܡܲ݁ܪ ܐ̄ܢܵܐ: ܐܸܠܵܐ
ܒܐܘܼܤܝܼܵܐ. ܡܵܢܵܐ ܠܲܡ: ܡܸܵܕܸܡ ܐ̄ܚܪܹܝܢ ܝܵܗܹ̇ܿܒܼ ܐܲܢ̄ܬܿ: ܠܒܲܪ ܡ̣ܢ ܗܵܘ̇
ܡܸܕܸܡ ܕܝܲܗ̣̄ܒܼܬܿ ܠܗܘܿܢ ܒܲܟܼܬܼܝܼ̈ܒܼܵܬܼܵܐ؟ ܕܒܲܪܢܵܫܵܐ ܕܐܸܬܼܢܤܸܒܼ . . . .
ܗܵܘ̇ ܓܹܝܪ ܕܲܡܫܲܪܸܐ ܘܪܵܒܹ̇ܐ ܘܡܸܬܼܓܡܲܪ: ܠܵܐ ܗ̄ܘ̣ܵܐ ܐܲܠܵܗܵܐ ܗ̄ܘ̣:
ܐܵܦܸܢ ܡܸܛܠ ܡܸܬܼܓܲܠܝܵܢܘܼܬܼܵܐ ܕܲܒܼܩܲܠܝܼܠ ܩܲܠܝܼܠ ܡܸܬܼܐ̱ܡܲܪ ܗܵܟܲܢܵܐ.
ܐ̄ܚܪܹܢܵܐ ܓܹܝܪ ܘܲܐ̄ܚܪܹܢܵܐ: ܗܵܢ̇ܘܿܢ ܕܡܸܢܗܘܿܢ ܐܝܼܬܼܵܘܗܝ ܦܵܪܘܼܩܲܢ. ܐܸܢ
ܗ̤ܘ ܕܠܵܐ ܗ̤ܝ ܟܲܕܼ ܗ̤ܝ ܐܝܼܬܹܝܗ̇: ܗܵܝ̇ ܕܠܵܐ ܡܸܬܼܚܲܙܝܵܢܵܐ ܘܗܵܝ̇
ܕܡܸܬܼܚܲܙܝܵܢܵܐ: ܐܲܠܵܗܵܐ ܡ̇ܢ ܕܐܸܬܼܒܲܪܪܢܲܫ: ܒܲܪܢܵܫܵܐ ܕܹܝܢ ܕܐܸܬܼܐܲܠܲܗ܀ . .
ܐܸܡܲܪ ܕܹܝܢ ܐܵܦ ܐܲܢ̄ܬܿ: ܐܘܿ ܚܲܟܿܝܼܡܵܐ ܐܵܬܵܢܵܤܝܼܣ. ܒܤܲܓܿܝܼ̈ܐܹܐܬ ܓܹܝܪ
ܥܫܘܼ̈ܩܝܹܐ ܕܐܲܝܟܼ ܗܵܠܹܝܢ ܐܸܬܼܥܫܸܩ̣ܬܿ ܘܤܲܝ̣ܒܲܪܬܿ ܡ̣ܢ ܐܵܪ݁ܝܵܢܹܐ: ܚܠܵܦ
pb. 281
ܡܲܫܠܡܵܢܘܼܬܼܵܐ ܕܲܒܼܪܵܐ ܐܲܠܵܗܵܐ ܡܸܠܬܼܵܐ. ܐܲܝܢܵܐ ܪܸܥܝܵܢܵܐ ܐܝܼܬܼ ܠܵܟܼ
ܥܲܠ ܗܵܝ̇ ܕܐܸܬܼܝܼܠܸܕܼ ܡ̣ܢ ܪܘܼܚܵܐ ܕܩܘܼܕܼܫܵܐ ܘܡ̣ܢ ܡܲܪܝܲܡ ܒܬܼܘܼܠܬܼܵܐ؟
ܒܲܟܼܝܵܢܵܐ: ܘܠܵܘ ܒܦܲܪܨܘܿܦܵܐ ܕܡ̣ܢ ܚܕܼܵܝܘܼܬܼܵܐ. ܚܲܕܼ ܠܲܡ ܓܹܝܪ ܘܠܹܗ
ܟܲܕܼ ܠܹܗ ܠܲܒܼܪܵܐ ܐܵܡܪܝܼܢܲܢ ܕܐܸܬܼܝܼܠܸܕ ܡ̣ܢ ܩܲܕܝܼܫܬܼܵܐ ܡܲܪܝܲܡ: ܘܠܵܘ
ܠܲܐ̄ܚܪܹܢܵܐ. ܐܸܠܵܐ ܠܗܵܘ̇ ܚܲܕܼ ܘܠܹܗ ܠܚܘܿܕܼܵܘܗܝ ܕܐܸܬܼܝܼܠܸܕܼ ܒܪܵܐ.
ܡܫܝܼܚܵܐ ܐܲܠܵܗܵܐ ܡܸܠܬܼܵܐ ܥܲܡ ܒܸܤܪܹܗ: ܘܗ̤ܘܝܘܼ ܚܲܕܼ ܒܸܤܪܵܐ ܥܲܡ
ܐܲܠܵܗܵܐ ܡܸܠܬܼܵܐ. ܐܸܠܵܐ ܒܐܘܼܤܝܼܵܐ ܠܲܠܵܗܵܐ ܡܸܠܬܼܵܐ: ܐܝܼܬܼܵܘܗܝ ܡ̣ܢ ܐܲܠܵܗܵܐ
ܐܲܒܼܵܐ. ܘܒܸܤܪܵܐ: ܒܸܤܪܵܐ ܐܝܼܬܼܵܘܗܝ ܕܡ̣ܢ ܒܬܼܘܼܠܬܼܵܐ ܫܩܲܠ̣ ܕܢܸܗܘܸܐ.
ܠܵܐ ܗ̄ܘ̣ܵܐ ܐ̄ܚܪܹܢܵܐ ܘܲܐ̄ܚܪܹܢܵܐ ܐܵܡ̇ܪܝܼܢܲܢ: ܚܲܕܼ ܗ̄ܘ̣ ܓܹܝܪ ܦܲܪܨܘܿܦܵܐ
ܕܲܬܼܪ̈ܲܝܗܘܿܢ ܟܝܵܢܹ̈ܐ. ܗܵܘ̇ ܓܹܝܪ ܕܒܲܟܼܝܵܢܵܐ ܗܘ̤ܵܐ ܡ̣ܢ ܪܘܼܚܵܐ ܕܩܘܼܕܼܫܵܐ:
ܡܲܢܘܼ؟ ܘܡܵܢܵܘ ܟܝܵܢܹܗ؟ ܘܕܲܐܝܢܵܐ ܟܝܵܢܵܐ ܐܝܼܬܹܝܗ̇ ܒܬܼܘܼܠܬܼܵܐ ܐܸܡܵܐ؟ ܗܵܕܹܐ
ܓܹܝܪ ܡܸܬܼܒܲܥܝܵܐ: ܫܡܲܥܘ ܟܠܟܼܘܿܢ . . . . . . ܐ̄ܢܵܫܵܐ ܐܸܡ̇ܪܹܬܼ
ܕܐܝܼܬܼܵܘܗܝ ܗܵܘ̇ ܕܡ̣ܢ ܡܲܪܝܲܡ: ܐܲܝܟܼ ܟܬܼܵܒܹ̈ܐ ܐܲܠܵܗܵܝܹ̈ܐ: ܘܫܲܪܝܸܪܵܐܝܼܬܼ
ܐܝܼܬܼܵܘܗܝ ܗ̄ܘ̣ܵܐ ܕܦܲܪܘܿܩܲܢ. ܐܸܢ ܓܹܝܪ ܒܲܫܐܲܝܼܠܘܼ ܐܝܼܬܼܵܘܗܝ ܗ̄ܘ̣ܵܐ
ܡܸܠܬܼܵܐ ܒܦܲܓܼܪܵܐ: ܐܲܝܟܼ ܕܐܵܡ̇ܪܝܼܢ. ܗܵܘ̇ ܕܹܝܢ ܕܡܸܬܼܐܡܲܪ ܒܲܫܐܝܼܠܘܼ:
ܦܵܢܛܵܤܝܼܵܐ ܐܝܼܬܼܵܘܗܝ. ܡܸܫܬܿܟܲܚ ܠܹܗ ܦܘܼܪܩܵܢܵܐ ܘܲܩܝܵܡܬܼܵܐ ܕܲܒܼܢܲܝ̈ܢܵܫܵܐ:
ܕܲܒܼܡܲܤܒܿܪܵܢܘܼܬܼܵܐ ܗܘ̤ܵܐ: ܐܲܝܟܼ ܕܐܸܡ݂ܲܪ ܪܲܫܝܼܥܵܐ ܡܵܐܢܝܼ. ܐܸܠܵܐ ܠܵܘ
ܒܦܲܢܛܵܤܝܼܵܐ ܐܝܼܬܼܵܘܗܝ ܦܘܼܪܩܵܢܲܢ: ܐܵܦܠܵܐ ܕܦܲܓܼܪܵܐ ܒܠܚܘܿܕܼ. ܐܸܠܵܐ
ܕܟܼܠܹܗ ܒܲܪܢܵܫܵܐ: ܕܢܲܦܫܵܐ ܘܲܕܼܦܲܓܼܪܵܐ: ܫܲܪܝܼܪܵܐܝܼܬܼ ܗܘ̤ܵܐ ܦܘܼܪܩܵܢܵܐ.
ܐ̄ܢܵܫܝܵܐ ܗܵܟܹܝܠ ܐܝܼܬܼܵܘܗܝ ܗܵܘ̇ ܕܡ̣ܢ ܡܲܪܝܲܡ: ܐܲܝܟܼ ܕܲܟܼܬܼܵܒܹ̈ܐ ܐܲܠܵܗܵܝܹ̈ܐ
ܐܵܡ̇ܪܝܼܢ: ܘܫܲܪܝܼܪܵܐܝܼܬܼ ܐܝܼܬܼܵܘܗܝ ܗ̄ܘ̣ܵܐ ܕܦܵܪܘܿܩܲܢ . . . . . .
pb. 282
. . . . ܗܵܟܲܢܵܐ ܠܲܡ ܘܠܲܡܫܝܼܚܵܐ ܕܒܲܒܼܤܲܪ: ܡ̣ܢ ܢܲܩܝܼܦܘܼܬܼܵܐ
ܕܠܘܵܬܼ ܐܲܠܵܗܵܐ ܡܸܠܬܼܵܐ ܐܲܠܵܗܵܐ ܡܫܲܡܗܝܼܢܲܢ: ܟܲܕܼ ܝܵܕܼܥܝܼܢܲܢ ܠܗܵܘ̇
ܕܡܸܬܼܚܙܸܐ ܐܲܝܟܼ ܒܲܪܢܵܫܵܐ.
ܫܡܲܥ ܠܦܵܘܠܘܿܣ ܕܐܵܡܲ݁ܪ ܒܬܲܪ̈ܬܲܝܗܹܝܢ: ܡ̣ܢ ܝܗ̄ܘܼ̈ܕܵܝܹܐ: ܠܲܡ
ܡܫܝܼܚܵܐ ܕܒܲܒܼܤܲܪ: ܗܵܘ̇ ܕܐܝܼܬܼܵܘܗܝ ܐܲܠܵܗܵܐ ܕܥܲܠ ܟܠܝ. ܡܵܘܕܹܐ
ܠܒܲܪܢܵܫܵܐ ܠܘܼܩܕܲܡ: ܘܗܵܝܕܹܝܢ ܒܢܲܩܝܼܦܘܼܬܼܵܐ ܕܲܠܘܵܬܼ ܐܲܠܵܗܵܐ ܡܸܠܬܼܵܐ
ܐܸܡܲ݁ܪ ܠܗܵܘ̇ ܕܡܸܬܼܚܙܸܐ ܐܲܠܵܗܵܐ. ܕܠܵܐ ܐ̄ܢܵܫ ܢܲܤܒܲܪ ܥܲܠ ܟܪܸܤܛܝܵܢܘܼܬܼܵܐ:
ܕܕܼܵܚܠܲܬܼ ܠܒܲܪܢܵܫܵܐ ܐܝܼܬܹܝܗ̇. ܚܘܼܪܘ ܘܐܸܬܼܒܲܩܵܘ: ܕܠܵܐ ܠܕܘܼܟ
ܡܩܲܛܪܸܓܼ ܠܝܼ: ܐܲܝܟܼ ܕܠܲܐܝܢܵܐ ܒܲܪܢܵܫܵܐ ܫܚܝܼܡܵܐ ܐܵܡܲ݁ܪ ܐ̄ܢܵܐ ܕܪܲܚܝܼܩ
ܡ̣ܢ ܐܲܠܵܗܘܼܬܼܵܐܐ. ܠܲܡܫܝܼܚܵܐ ܕܒܲܒܼܤܲܪ ܐܸܡܲ݁ܪ ܐ̄ܢܵܐ: ܐܲܝܟܼ ܕܐܵܦ
ܒܐܲܠܵܗܘܼܬܼܵܐ ܠܹܗ ܟܲܕܼ ܠܹܗ ܐܵܡܲ݁ܪ ܐ̄ܢܵܐ. ܠܵܐ ܓܹܝܪ ܐܸܡ̇ܪܹܬܼ
ܠܲܡܫܝܼܚܵܐ ܒܸܤܪܵܢܵܝܵܐ: ܐܸܠܵܐ ܠܲܡܫܝܼܚܵܐ ܕܒܲܒܼܤܲܪ. ܠܒܸܤܪܵܐ ܕܲܡܫܝܼܚܵܐ
ܐܸܡܲ݁ܪ ܐܢܵܐ: ܡ̣ܢ ܢܲܩܝܼܦܘܼܬܼܵܐ ܕܲܠܘܵܬܼ ܐܲܠܵܗܵܐ ܡܸܠܬܼܵܐ: ܐܲܝܟܼ ܡ̇ܢ
ܕܲܡܚܲܝܲܕܼ: ܘܠܵܐ ܦܪܝܼܫ ܡ̣ܢ ܐܲܠܵܗܵܐ ܡܸܠܬܼܵܐ. ܠܵܐ ܗ̄ܘ̣ܵܐ ܡ̇ܢ ܒܫܲܘܝܘܼܬܼܵܐ
ܡܚܲܝܲܕܼ: ܐܸܠܵܐ ܠܹܗ ܠܐܲܠܵܗܵܐ ܡܸܠܬܼܵܐ. ܘܲܠܗܵܘ̇ ܕܒܼܐܘܼܤܝܼܵܐ ܡܸܬܼܚܙܸܐ
ܗ̄ܘ̣ܵܐ ܐܸܡ̇ܪܹܬܼ ܕܐܝܼܬܼܵܘܗܝ ܡ̣ܢ ܝܗ̄ܘܼ̈ܕܲܝܹܐ: ܘܠܵܐ ܗ̄ܘ̣ܵܐ ܠܐܲܠܵܗܵܐ
ܡܸܠܬܼܵܐ. ܡܸܛܠ ܕܲܠܒܲܪܢܵܫܵܐ ܒܐܘܼܤܝܼܵܐ ܘܒܲܟܼܝܢܵܐ ܡܵܘܕܹܐ ܐ̄ܢܵܐ
ܕܐܝܼܬܼܵܘܗܝ ܡ̣ܢ ܝܗ̄ܘܼ̈ܕܵܝܹܐ: ܘܠܵܐ ܗ̄ܘ̣ܵܐ ܠܐܲܠܗܵܐ ܡܸܠܬܼܵܐ ܒܲܟܼܝܵܢܵܐ.
ܘܲܠܒܲܪܢܵܫܵܐ ܐܵܡܲ݁ܪ ܐ̄ܢܵܐ ܒܲܟܼܝܵܢܵܐ: ܠܒܲܪ ܡ̣ܢ ܟܝܵܢܵܐ ܕܐܲܠܵܗܵܐ ܡܸܠܬܼܵܐ.
pb. 283
ܐܲܠܵܗܵܐ ܕܹܝܢ: ܒܲܚܕܼܵܝܘܼܬܼܵܐ ܗܵܝ̇ ܕܲܒܼܦܲܪܨܘܿܦܵܐ ܗܘ̤ܵܬܼ: ܐܝܼܬܼܵܘܗܝ.
ܡܸܛܠ ܗܵܢܵܐ ܡܸܬܼܚܲܡܲܬܼ ܐܲܢ̄ܬܿ ܠܘܼܩܒܲܠܝ؟
ܐܸܠܵܐ ܫܡܲܥ ܡܵܢܵܐ ܩܵܥܹ̇ܐ ܠܘܵܬܼܵܟܼ ܐܵܬܵܢܵܤܝܼܣ: ܐ̄ܢܵܫܵܝܵܐ ܗܵܟܹܝܠ
ܐܝܼܬܼܵܘܗܝ ܗܵܘ̇ ܕܡ̣ܢ ܡܲܪܝܲܡ: ܐܲܝܟܼ ܟܬܼܵܒܹ̈ܐ ܐܲܠܵܗܵܝܹ̈ܐ. ܠܵܘ ܒܡܲܤܒܿܪܵܢܘܼܬܼܵܐ
ܘܠܵܘ ܒܦܲܢܛܵܤܝܼܵܐ ܐܝܼܬܼܵܘܗܝ ܦܘܼܪܩܵܢܲܢ: ܘܲܩܝܵܡܬܼܵܐ ܕܲܒܼܢܲܝ̈ ܐ̄ܢܵܫܵܐ:
ܐܲܝܟܼ ܕܐܸܡ݂ܲܪ ܪܲܫܝܼܥܵܐ ܡܵܐܢܝܼ. ܘܐܵܦܠܵܐ ܕܦܲܓܼܪܵܐ ܒܲܠܚܘܿܕܼ: ܐܸܠܵܐ
ܕܟܼܠܹܗ ܒܲܪܢܵܫܵܐ: ܕܢܲܦܫܵܐ ܘܲܕܼܦܲܓܼܪܵܐ: ܫܲܪܝܼܪܵܐܝܼܬܼ ܗܘ̤ܸܵܐ ܦܘܼܪܩܵܢܲܢ.
ܐ̄ܢܵܫܝܵܐ ܐܝܼܬܼܵܘܗܝ ܗܵܟܹܝܠ ܗܵܘ̇ ܕܡ̣ܢ ܡܲܪܝܲܡ: ܐܲܝܟܼ ܟܬܼܵܒܹ̈ܐ ܐܲܠܵܗܵܝܹ̈ܐ:
ܘܫܲܪܝܼܪܵܐܝܼܬܼ ܐܝܼܬܼܵܘܗܝ ܗ̄ܘ̣ܵܐ ܕܦܵܪܘܼܩܲܢ . . . ܡܵܢܵܐ ܗܵܟܹܝܠ
ܟܵܦܲܪ ܐܲܢ̄ܬܿ ܒܦܘܼܪܩܵܢܲܢ؟ ܡܵܢܵܐ ܗܟܹܝܠ: ܠܐܲܝܢܵܐ ܕܠܵܐ ܟܵܦܲܪ ܐܸܠܵܐ
ܡܵܘܕܸܐ ܚܲܝܸܒܼܬܿܘܿܢ ܐܲܝܟܼ ܪܲܫܝܼܥܵܐ؟ ܐܵܘ ܓܹܝܪ ܟܵܦ̇ܪܝܼܢ ܐܢ̄ܬܿܘܿܢ ܕܐ̄ܢܵܫܵܝܵܐ
ܐܝܼܬܼܵܘܗܝ: ܐܲܝܟܼ ܡܵܢܝܼ̈ܢܵܝܹܐ. ܐܵܘ ܐܸܢ ܠܵܐ ܟܵܦ̇ܪܝܼܢ ܐܢ̄ܬܿܘܿܢ: ܠܗܵܘ̇ ܕܠܵܐ
ܟܵܦܲܪ ܐܸܠܵܐ ܡܵܘܕܸܐ: ܠܵܐ ܡܸܫܟܿܚܝܼܢ ܐܢ̄ܬܿܘܿܢ ܠܲܡܝܼܚܵܒܼܘܼܬܹܗ. ܫܡܲܥܘ
ܠܲܓܼܪܝܼܓܼܘܿܪܝܼܘܿܣ ܟܲܕܼ ܩܵܥܹ̇ܐ: ܕܒܲܪܢܵܫܵܐ ܗ̄ܘ̣ ܕܐܸܢܤܸܒܼ. ܗܵܘ̇
ܓܹܝܪ ܕܲܡܫܲܪܸܐ ܘܡܸܬܿܪܲܪܲܓܼ ܘܡܸܬܼܓܡܲܪ: ܠܵܘ ܐܲܠܵܗܵܐ ܗ̄ܘ̣: ܐܵܦܸܢ
ܡܸܛܠ ܡܸܬܼܓܲܠܝܵܢܘܼܬܼܵܐ ܕܲܒܼܩܲܠܝܼܠ ܡܸܬܼܐ̱ܡܲܪ ܗܵܟܲܢܵܐ܀ ܚܵܙܹ̇ܐ
ܐܲܢ̄ܬܿ ܕܒܲܟܼܝܵܢܵܐ ܐܵܡܲ݁ܪ ܕܐܝܼܬܼܵܘܗܝ ܒܲܪܢܵܫܵܐ ܗܵܘ̇ ܕܐܸܬܼܢܤܸܒܼ: ܕܲܡܫܲܪܸܐ
ܘܡܸܬܿܕܲܪܲܓܼ ܘܡܸܬܼܓܡܲܪ: ܐܲܠܵܗܵܐ ܕܹܝܢ ܒܡܸܬܼܓܲܠܝܵܢܘܼܬܼܵܐ؟ ܐܲܝܢܵܘ
ܗܵܟܹܝܠ ܚܸܫܘܿܟܼܵܐ ܕܲܩܪܝܼܡ ܩܕܼܵܡ ܥܲܝܢܲܝ̈ܟܿܘܿܢ: ܕܗܵܠܹܝܢ ܠܵܐ ܬܸܚܙܘܿܢ؟
ܐܸܢ ܕܹܝܢ ܠܗܵܠܹܝܢ ܕܝܠܝܼ ܡܩܲܛܪܓܼܝܼܢ ܐܢ̄ܬܿܘܿܢ: ܗܵܠܹܝܢ ܠܵܐ ܙܵܕܹܩ
ܗ̄ܘ̣ܵܐ ܕܲܬܼܦܲܚܡܘܼܢ ܠܗܵܠܹܝܢ: ܡܸܛܠ ܕܲܕܼܥܘܼܕܼܪܵܢܗܹܝܢ ܐܝܼܬܲܝܗܹܝܢ.
pb. 284
ܐܸܢ ܕܹܝܢ ܠܗܵܠܹܝܢ ܘܲܠܕܲܐܝܟܼ ܗܵܠܹܝܢ ܡܩܲܒܿܠܝܼܬܿܘܿܢ: ܠܵܐ ܙܵܕܹܩ ܗ̄ܘ̣ܵܐ
ܕܬܸܟܼܬܿܒܼܘܼܢ ܐܸܢܹܝܢ ܐܲܝܟܼ ܪ̈ܲܫܝܼܥܵܬܼܵܐ. ܐܸܢܵܐ: ܠܘܵܬܼ ܐܲܝܠܹܝܢ ܕܟܼܵܦ̇ܪܝܼܢ
ܒܐ̄̈ܢܵܫܘܼܬܼܵܐ ܕܐܸܬܼܢܲܤܒܲܬ̤ ܡܸܢܲܢ: ܘܡܵܘܕܹܝܢ ܐܲܝܟܼ ܡܵܢܝܼܢܵܝܹ̈ܐ: ܥܸܒܼ̇ܕܹܬܼ
ܠܡܸܠܲܝ̈ ܗܵܠܹܝܢ: ܘܠܵܘ ܫܚܝܼܡܵܐܝܼܬܼ. ܐܸܠܵܐ ܥܲܡ ܬܚܘܼ̈ܡܹܐ ܤܵܡܹ̇ܬܼ
ܠܕܼܝܼ̈ܠܵܬܼܵܐ ܕܟܝܵܢܹ̈ܐ: ܘܲܕܼܦܲܪܨܘܼܦܵܐ ܚܲܕܼ. ܘܲܒܼܡܸܕܸܡ ܬܘܼܒܼ ܬܪܹܝܢ:
ܒܡܸܕܸܡ ܡ̇ܢ ܕܲܟܼܝܵܢܹ̈ܐ: ܒܡܸܕܸܡ ܕܹܝܢ ܒܢܲܩܝܼܦܘܼܬܼܵܐ. ܘܐܲܢ̄ܬܿ
ܠܦܲܪܨܘܼܦܵܐ ܕܗܵܢܘܿܢ: ܥܠܲܝܟܼ ܩܲܒܸܿܠܬܵܝܗܝ. ܡܵܕܹܝܢ ܒܟܼܠ ܡܸܕܸܡ
ܐܝܼܬܲܝܟܼ ܒܥܸܠܕܒܼܵܒܼܵܐ ܕܐܲܝܠܹܝܢ ܕܲܡܩܲܒܿܠܝܼܢ ܡܸܠܲܝ̈: ܐܲܝܟܼ ܡ̇ܢ ܕܡ̣ܢ
ܗܵܠܹܝܢ ܐܝܼܬܲܝܟܼ. ܚܲܢܲܢ ܓܹܝܪ ܡ̣ܢ ܗܵܠܹܝܢ ܢܵܤ̇ܒܿܝܼܢܲܢ ܘܡܲܪܡܹܝܢܲܢ
ܩܕܼܵܡܲܝܟ ܟܲܕܼ ܩܵܥܹ̇ܝܢܲܢ: ܕܠܵܐ ܗ̄ܘ̣ܵܐ ܒܦܲܢܛܵܤܝܼܵܐ ܐܝܼܬܼܵܘܗܝ
ܦܘܼܪܩܵܢܲܢ: ܐܘܿ ܒܲܪܢܵܫܵܐ. ܐ̄ܢܵܫܵܝܐ ܗ̄ܘ̣ ܟܝܵܢܵܐ ܕܡ̣ܢ ܡܲܪܝܲܡ: ܐܲܝܟܼ
ܕܐܵܡ̇ܪܝܼܢ ܟܬܼܵܒܹ̈ܐ ܐܲܠܵܗܵܝܹ̈ܐ . . . ܗܵܘ̇ ܡ̇ܢ ܕܲܡܫܲܪܸܐ ܘܡܸܬܿܕܲܪܲܓܼ
ܘܡܸܬܼܓܲܡܲܪ: ܠܵܐ ܗ̄ܘ̣ܵܐ ܐܲܠܵܗܵܐ ܗ̄ܘ̣: ܐܵܦܸܢ ܡܸܛܠ ܡܸܬܼܚܵܘܝܵܢܘܼܬܹܗ
ܕܲܒܼܩܲܠܝܼܠ ܩܲܠܝܼܠ ܡܸܬܼܐ̱ܡܲܪ ܗܵܟܲܢܵܐ . . . . . . . . .
ܐܸܠܵܐ ܐܲܟܼܙܢܵܐ ܕܐܵܡ̇ܪܝܼܢܲܢ ܐܲܠܵܗܵܐ ܠܒܼܵܪܘܿܝܵܐ ܕܟܼܠ: ܘܐܲܠܵܗܵܐ
ܠܡܘܼܫܹܐ. ܘܐܲܠܵܗܵܐ ܠܲܡ ܓܹܝܪ ܤܵܡ̇ܬܵܟܼ ܠܦܸܪܥܘܿܢ. ܘܲܒܼܪܵܐ ܕܐܲܠܵܗܵܐ
ܠܝܼܤܪܵܝܼܠ: ܒܹܪܝ ܠܲܡ ܒܘܼܟܼܪܝ ܝܑܼܤܪܵܝܹܠ. ܘܐܲܝܟܼ ܕܐܵܡ̇ܪܝܼܢ ܗ̣̄ܘܲܝܢ
ܡܫܝܼܚܵܐ ܠܫܵܐܘܿܠ: ܠܵܐ ܠܲܡ ܓܹܝܪ ܐܲܪܡܸܐ ܐܝܼܕܼܝܼ ܥܠܵܘܗܝ: ܡܸܛܠ
ܕܲܡܫܝܼܚܹܗ ܕܡܵܪܝܵܐ ܐܝܼܬܼܵܘܗܝ. ܘܲܠܟܼܘܼܪܸܫ ܗ̤ܘ ܗܵܟܲܢܵܐ: ܗܵܟܲܢܵܐ ܠܲܡ
ܐܵܡܲ݁ܪ ܡܵܪܝܵܐ ܠܲܡܫܝܼܚܵܐ ܠܟܼܘܼܪܸܫ. ܘܲܠܒܼܵܒܼ̈ܠܵܝܹܐ ܩܲܕܝܼ̈ܫܹܐ: ܐܸܢܵܐ ܠܲܡ
pb. 285
ܓܹܝܪ ܐܸܦܩܘܿܕܼ ܠܗܘܿܢ: ܩܲܕܼܝܼ̈ܫܹܐ ܐܝܼܬܲܝܗܘܿܢ: ܘܐܸܢܵܐ ܐܲܝܬܸܐ ܐܸܢܘܿܢ.
ܗܵܟܲܢܵܐ ܐܵܡ̇ܪܝܼܢܲܢ ܘܲܠܡܵܪܲܢ ܡܫܝܼܚܵܐ: ܘܐܲܠܵܗܵܐ ܘܲܒܼܪܵܐ ܘܩܲܕܝܼܫܵܐ
ܘܲܡܫܝܼܚܵܐ: ܐܸܠܵܐ ܘܫܵܘܬܵܦܘܼܬܼܵܐ ܡ̇ܢ ܕܲܫܡܵܗܹ̈ܐ ܕܵܡ̇ܝܵܐ: ܐܝܼܩܵܪܵܐ
ܕܹܝܢ ܠܵܘ ܗ̤ܘ ܟܲܕܼ ܗ̤ܘ ܐܝܼܬܼܵܘܗܝ. ܒܡܵܢܵܐ ܐܸܬܼܥܲܕܲܠܬܿܘܿܢ ܒܗܵܠܹܝܢ:
ܐܘܿ ܥܵܫܘܿܩܹ̈ܐ ܘܚܲܟܿܝܼ̈ܡܹܐ؟ ܡܸܛܠ ܕܐܸܡ̇ܪܹܬܼ ܕܐܲܟܼܙܢܵܐ ܕܐܵܡ̇ܪܝܼܢܲܢ
ܐܲܠܵܗܵܐ ܠܒܼܵܪܘܿܝܵܠ ܕܟܼܠ: ܘܐܲܠܵܗܵܐ ܠܡܘܪܫܹܐ: ܗܵܟܲܢܵܐ ܐܵܦ ܠܡܵܪܲܢ
ܡܫܝܼܚܵܐ ܐܲܠܵܗܵܐ ܕܟܼܠ ܘܥܵܒܼܘܿܕܼܵܐ؟ ܘܠܵܐ ܗ̄ܘ̣ܵܐ ܡܸܛܠ ܕܡܸܬܼܐܡܲܪ
ܐܲܠܵܗܵܐ ܡܘܼܫܹܐ: ܐܲܠܵܗܵܐ ܕܹܝܢ ܡܫܝܼܚܵܐ ܡ̣ܢ ܟܲܕܘܼ ܒܵܪܘܿܝܵܐ ܕܟܼܠ.
ܐܵܡ̇ܪܝܼܢܲܢ ܠܹܗ ܠܡܘܼܫܹܐ ܐܲܟܼܙܢܵܐ ܕܲܡܫܝܼܚܵܐ. ܐܵܘ ܡܸܛܠ ܕܐܝܼܬܼܵܘܗܝ
ܡܘܼܫܹܐ ܐܲܠܵܗܵܐ ܕܦܸܪܥܘܿܢ: ܡ̣ܢ ܟܲܕܘܼ ܥܵܒܼܘܿܕܼܵܐ ܕܟܼܠ ܐܵܡܪܝܼܢܲܢ
ܕܐܝܼܬܼܵܘܗܝ؟ ܚܵܣ. ܠܵܘ ܓܹܝܪ ܫܵܘܬܵܦܘܼܬܼܵܐ ܕܲܫܡܵܗܹ̈ܐ: ܫܵܘܬܵܦܘܼܬܼܵܐ
ܕܐܝܼܩܵܪܵܐ ܘܫܲܘܝܘܼܬܼܵܐ ܥܵܒܼܕܵܐ. ܐ̄ܚܪܹܢܵܐ ܗ̄ܘ̣ ܓܹܝܪ ܐܝܼܩܵܪܵܐ ܕܒܼܵܪܘܼܝܵܐ
ܕܟܼܠ: ܘܲܐ̄ܚܪܹܢܵܐ ܗ̄ܘ̣ ܕܡܼܘܼܫܹܐ. ܕܗܵܢܵܐ ܡ̇ܢ: ܐܲܝܟܼ ܒܵܪܘܿܝܵܐ. ܕܗܵܘ̇
ܕܹܝܢ: ܐܲܝܟܼ ܒܲܪܝܵܐ ܕܐܸܬܼܦܩܸܕܼ ܕܢܸܗܘܸܐ ܪܹܫܵܐ. ܗܵܟܲܢܵܐ ܐܵܦ ܒܪܵܐ
ܡܸܬܼܐܡܲܪ: ܐܵܦ ܡܵܪܲܢ ܐܵܦ ܝܑܼܤܪܵܝܹܠ. ܠܵܘ ܓܹܝܪ ܫܵܘܬܵܦܘܼܬܼܵܐ ܕܲܫܡܵܗܹ̈ܐ:
ܫܘܵܬܵܦܘܼܬܼܵܐ ܕܐܝܼܩܵܪܐ ܥܵܒܼ̇ܕܵܐ. ܗܵܟܲܢܵܐ ܠܲܡ ܕܹܝܢ: ܒܲܟܼܝܵܢܵܐ ܐܲܠܵܗܵܐ:
ܒܲܪ ܟܝܵܢܵܐ ܕܐܲܒܼܵܐ ܒܵܪܘܿܝܵܐ ܘܥܵܒܼܘܿܕܼܵܐ ܕܟܼܠ: ܗܵܘ̇ ܕܹܝܢ ܠܵܐ. ܗܵܟܲܢܵܐ:
ܐܵܦ ܟܠܚܲܕܼ ܚܲܕܼ ܡ̣ܢ ܗܵܠܹܝܢ ܕܫܲܪܟܵܐ. ܐܲܝܟܲܢܵܐ ܕܐܵܡ̇ܪܝܼܢ ܚ̄ܢܲܢ ܥܲܠ
ܐܲܠܵܗܵܐ ܒܵܪܘܿܝܵܐ ܕܟܼܠ: ܗܵܟܲܢܵܐ ܐܵܦ ܠܡܵܪܲܢ ܝܼܫܘܿܥ ܡܫܝܼܚܵܐ:
ܐܲܠܵܗܵܐ ܘܲܒܼܪܵܐ ܘܲܡܫܝܼܚܵܐ ܐܵܡ̇ܪܝܼܢܲܢ. ܟܲܕܼ ܠܘܵܬܼ ܟܠܚܲܕܼ ܡ̣ܢ ܗܵܠܹܝܢ:
ܕܒܹܗ ܒܲܫܡܵܐ ܡܸܬܼܩܪܹܝܢ: ܐܝܼܬܼ ܠܹܗ ܫܘܼܚܠܵܦܵܐ ܕܲܟܼܝܵܢܵܐ ܒܵܪܘܿܝܵܐ
pb. 286
ܕܟܼܠ: ܘܕܐܝܼܩܵܪܹ̈ܐ ܐܲܝܠܹܝܢ ܕܡܸܬܼܝܼܗܵܒܼܘܼ ܡܸܬܼܝܲܗܒܿܝܼܢ. ܫܲܘܝܘܼܬܼܵܐ ܓܹܝܪ
ܘܐܝܼܩܵܪܵܐ ܕܝܲܬܿܝܼܪ ܡ̣ܢ ܟܠ: ܟܝܵܢܵܐ ܐܝܼܬܼܵܘܗܝ. ܡܫܵܘܕܥܵܬܢܵܐ ܓܹܝܪ
ܕܲܬܼܪܹܝܢ ܟܝܵܢ̈ܝܼܢ ܐܸܡ̇ܪܹܬܼ ܕܐܝܼܬܼܵܘܗܝ ܫܡܵܐ ܕܲܡܫܝܼܚܵܐ ܘܕܲܒܼܪܵܐ:
ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܗܵܘ̇ ܡܵܐ ܕܠܲܝܬܿ ܡܸܕܸܡ ܕܲܫܘܸܐ ܥܲܡܹܗ
ܒܐܲܝܠܹܝܢ ܕܐܸܬܼܐܡܲܪ. ܐܲܝܟܲܢܵܐ ܕܠܵܘ ܒܲܫܡܵܐ ܙܵܕܹܩ ܠܲܡܚܵܪ:
ܐܸܠܵܐ ܒܗܵܘ̇ ܡܵܐ ܕܡܵܘܕܲܥ. ܐܲܠܵܗܵܐ ܡ̇ܢ ܕܟܼܠ ܘܒܼܵܪܘܿܝܵܐ ܐܝܼܬܼܵܘܗܝ
ܡܫܝܼܚܵܐ: ܐܲܠܵܗܵܐ ܕܹܝܢ ܡܸܬܼܐܡܲܪ ܐܵܦ ܡܘܼܫܹܐ: ܠܵܘ ܓܹܝܪ ܗܵܟܲܢܵܐ
ܡܸܬܼܐܡܲܪ ܐܲܠܵܗܵܐ: ܘܡܸܬܼܪܢܸܐ ܐܲܝܟܼ ܐܲܠܵܗܵܐ.
ܐܸܠܑܵܐ ܓܹܝܪ ܡܲܤܒܿܪܝܼܢ ܕܫܵܚ̇ܩܝܼܢ ܠܝܼ: ܡܸܛܠ ܥܸܠܬܼܵܐ ܕܐ̄ܢܵܫܘܼܬܼܵܐ.
ܕܐܸܢܗ̤ܘ ܠܲܡ ܕܲܟܼܝܵܢܵܐ ܐ̄ܢܵܫܝܵܐ ܐܝܼܬܼܵܘܗܝ ܗܵܘ̇ ܕܡ̣ܢ ܡܲܪܝܲܡ: ܐܲܝܟܼ
ܟܬܼܵܒܹ̈ܐ ܩܲܕܝܼ̈ܫܹܐ: ܐܝܼܬܼܵܘܗܝ ܕܹܝܢ ܐܲܠܵܗܵܐ: ܡ̣ܢ ܡܸܬܼܚܵܘܝܵܢܘܼܬܼܵܐ ܘܠܵܘ
ܡ̣ܢ ܟܝܵܢܵܐ: ܚܲܕܼ ܡ̣ܢ ܗܵܠܹܝܢ ܒܛܲܝܒܿܘܼ ܐܵܡܲ݁ܪ ܐܲܢ̄ܬܿ ܠܹܗ ܐܲܠܵܗܵܐ
ܘܲܒܼܪܵܐ ܘܩܲܕܝܼܫܵܐ. ܐܸܢܵܐ ܕܹܝܢ ܠܘܵܬܼܟܼܘܿܢ ܗܵܕܹܐ ܒܲܠܚܘܿܕܼ ܐܸܵܡܲ݁ܪ ܐ̄ܢܵܐ:
ܕܐܸܢܗ̤ܘ ܕܐܲܝܟܼ ܓܪܝܼܓܼܘܿܪܝܼܘܿܣ ܘܐܵܬܵܢܤܝܼܣ ܡܵܘܕܹܝܢ ܐܢ̄ܬܿܘܿܢ
ܟܝܵܢܵܐ: ܐ̄ܢܵܫܝܵܐ ܠܗܵܘ̇ ܕܡ̣ܢ ܡܲܪܝܲܡ: ܘܲܕܼܫܲܪܝܼ ܘܐܸܬܿܕܲܪܲܓܼ
ܘܐܸܬܼܓܿܡܲܪ: ܒܡܸܬܼܓܲܠܝܵܢܘܼܬܼܵܐ ܕܹܝܢ ܐܲܠܵܗܵܐ: ܘܲܦܪܝܼܫ ܡ̣ܢ ܟܠ ܐ̄ܢܵܫ
ܒܪܸܥܝܵܢܵܐ ܕܲܫܡܵܐ ܗܵܘ̇ ܕܒܹܗ ܐܸܬܼܚܲܫܲܚ ܠܦܘܼܪܫܵܢܵܐ: ܐܲܝܟܼ ܟܡܵܐ ܕܐܝܼܬܼ
ܠܒܼܵܪܘܿܝܵܐ ܠܘܵܬܼ ܒܪܝܼܬܼܵܐ: ܡܸܛܠ ܕܚܲܕܼ ܦܲܪܨܘܼܦܵܐ ܐܝܼܬܼܵܘܗܝ:
ܗܵܟܲܢܵܐ ܐܵܦ ܐܸܢܵܐ ܡܵܘܕܸܐ ܐ̄ܢܵܐ. ܐܸܢ ܕܹܝܢ ܠܵܐ ܡܵܘܕܹܝܢ ܐܢ̄ܬܿܘܿܢ ܒܲܟܼܝܵܐ
ܐ̄ܢܵܫܵܝܐ ܕܫܲܪܝܼ ܘܐܸܬܿܕܲܪܲܓܼ ܘܐܸܫܬܲܡܠܝܼ: ܐܵܘ ܕܠܵܐ ܫܲܪܝܼ ܐܵܘ
ܐܸܬܿܕܲܪܲܓܼ ܘܐܸܫܬܲܡܠܝܼ: ܐܲܝܟܼ ܕܐܸܡ݂ܲܪ ܐܵܬܵܢܵܤܝܼܣ ܘܲܓܼܪܝܼܓܼܘܿܪܝܼܘܿܣ:
pb. 287
ܐܵܦܠܵܐ ܡܸܫܬܲܐܠܝܼܬܿܘܿܢ ܐܲܝܟܼ ܐܵܪ̈ܬܵܕܘܿܟܿܤܹܐ. ܐܸܠܵܐ ܥܲܡ ܡܵܢܝܼܢܵܝܹ̈ܐ
ܩܘܼܡܘ: ܘܲܡܫܲܠܝܼܢ ܠܟܼܘܿܢ ܓܪܝܼܓܼܘܿܪܝܼܘܿܣ ܘܐܵܬܵܢܵܤܝܼܣ
ܘܐܲܡܒܿܪܘܿܤܝܼܣ: ܕܐܸܢ ܒܸܤܪܵܐ ܗ̄ܘ̣ ܒܲܪ ܟܝܵܢܲܢ: ܘܐܸܢ ܢܲܦܫܵܐ
ܒܲܪܬܼ ܟܝܵܢܲܢ. ܟܠ ܡܵܐ ܕܐܝܼܬܼܵܘܗܝ: ܐܵܦ ܗ̤ܘ ܒܐܘܼܤܝܼܵܐ ܕܒܲܪܢܵܫܵܐ
ܗ̄ܘ̣. ܒܲܪܢܵܫܵܐ ܡܵܕܹܝܢ ܐܝܼܬܼܵܘܗܝ: ܕܒܼܐܝܼܩܵܪܵܐ ܘܲܒܼܫܲܘܝܘܼܬܼܵܐ ܦܪܝܼܫ
ܡܸܢܲܢ. ܐܲܝܟܼ ܙܢܵܐ ܕܝܼܤܪܵܝܼܠ ܡܸܬܼܐܡܲܪ ܒܪܵܐ: ܘܐܲܝܟܼ ܕܡܘܼܫܹܐ
ܐܲܠܵܗܵܐ: ܘܲܡܫܝܼܚܵܐ ܒܵܗ̇ ܒܲܕܼܡܘܼܬܼܵܐ: ܠܵܘ ܒܲܟܼܝܵܢܵܐ ܐܲܠܵܗܑܵ: ܘܠܵܘ
ܒܲܟܼܝܵܢܵܐ ܒܪܵܐ ܕܐܲܠܵܗܵܐ. ܘܐܲܝܟܲܢܵܐ ܗܵܘ̇ ܐܲܠܵܗܵܐ ܐܸܬܼܒܲܪܢܲܫ: ܐܸܠܵܐ ܒܲܟܼܝܵܢܵܐ
ܕܲܒܼܢܲܝ̈ܢܵܫܵܐ: ܐܸܬܼܒܲܪܢܲܫ ܒܗܵܘ̇ ܕܡ̣ܢ ܡܲܪܝܲܡ. ܐܸܢ ܕܹܝܢ ܠܵܘ ܒܒܲܪܢܵܫܵܐ
ܐܸܬܼܒܲܪܢܲܫ: ܠܹܗ ܦܪܲܩ̣: ܘܠܵܘ ܠܲܢ. ܐܸܢܕܹܝܢ ܠܲܢ ܦܲܪܩ̣: ܒܲܢ
ܐܸܬܼܒܲܪܢܲܫ: ܘܲܗܘ̤ܵܐ ܒܲܕܼܡܘܼܬܼܵܐ ܕܒܼܢܲܝ̈ܢܵܫܵܐ: ܘܒܸܐܤܟܹܡܵܐ ܐܸܫܬܿܟܲܚ
ܐܲܝܟܼ ܒܲܪܢܵܫܵܐ: ܘܠܵܘ ܗ̤ܘ ܗܘ̤ܵܐ ܒܲܪܢܵܫܵܐ.
ܐܸܡܲܪܘ ܡܵܕܹܝܢ ܓܲܠܝܵܐܝܼܬܼ ܗܵܠܹܝܢ ܘܕܲܐܝܟܼ ܗܵܠܹܝܢ. ܡܵܢܵܐ
ܡܸܤܬܲܟܿܡܝܼܢ ܐܢ̄ܬܿܘܿܢ ܕܠܵܐ ܐܵܡ̇ܪܝܼܢ ܐܢ̄ܬܿܘܿܢ ܒܗܵܠܹܝܢ: ܘܕܼܵܪܫܝܼܢ
ܐܢ̄ܬܿܘܿܢ ܥܠܲܝܗܹܝܢ ܐܲܝܟܼ ܐܲܝܠܹܝܢ ܕܗܵܠܹܝܢ ܐܵܡ̇ܪܝܼܢ: ܘܲܠܗܵܠܹܝܢ ܠܵܐ
ܐܵܡ̇ܪܝܼܢ ܐܢ̄ܐܬܿܘܿܢ؟ ܘܠܲܐܝܠܹܝܢ ܕܐܵܡ̇ܪܝܼܢ ܐܢ̄ܬܿܘܿܢ: ܒܐܸܤܟܹܡܵܐ ܐܵܡ̇ܪܝܼܢ
ܐܢ̄ܬܿܘܿܢ: ܘܠܵܐ ܨܵܒܹ̇ܝܢ ܐܢ̄ܬܿܘܿܢ ܠܡܹܐܡܲܪ ܟܝܵܢܵܐ ܐ̄̈ܢܵܫܵܝܵܐ ܠܗܵܘ̇ ܕܡ̣ܢ
ܡܲܪܝܲܡ: ܐܲܝܟܼ ܕܐܲܡܝܼܪ ܒܲܟܼܬܼܵܒܹ̈ܐ: ܗܵܘ̇ ܕܠܵܐ ܐܸܡܲ݁ܪ ܠܹܗ ܟܝܵܢܵ ܐ̄ܢܵܫܵܝܵܐ
ܐܲܝܟܼ ܚܲܕܼ ܡ̣ܢ ܒܢܲܝ̈ܢܵܫܵܐ: ܡ̣ܢ ܦܲܓܼܪܵܐ ܟܝܵܢܵܝܵܐ ܕܐܲܒܼܵܗܲܝ̈ܢ: ܕܡܸܢܗܘܿܢ
ܐܵܦ ܚܢܲܢ ܐܝܼܬܲܝܢ ܡ̣ܢ ܢܲܦܫܵܐ ܘܡ̣ܢ ܦܲܓܼܪܵܐ: ܘܐܝܼܬܼ ܠܹܗ ܟܠܗܹܝܢ
pb. 288
ܕܲܡܠܝܼܠܘܼܬܼܵܐ ܕܢܲܦܫܵܐ: ܤܛܲܪ ܡ̣ܢ ܚܛܝܼܬܼܵܐ. ܠܗܵܢܵܐ: ܐܲܝܟܼ ܡܵܢܝܼܢܵܝܹ̈ܐ:
ܡܩܲܛܪܸܛܼ ܠܹܗ ܓܪܝܼܓܼܘܿܪܝܼܘܿܣ: ܗܵܘ̇ ܠܲܡ ܓܹܝܪ ܕܲܡܫܲܪܸܐ
ܘܡܸܬܿܕܲܪܲܓܼ ܘܡܸܬܼܓܡܲܪ: ܠܵܘ ܐܲܠܵܗܵܐ ܗ̄ܘ̣: ܐܵܦܸܢ ܡܸܛܠ
ܡܸܬܼܓܲܠܝܵܢܘܼܬܼܵܐ ܕܲܒܼܩܲܠܝܼܠ ܩܲܠܝܼܠ ܡܸܬܼܐܡܲܪ ܗܵܟܲܢܵܐ. ܒܗܵܝ̇
ܕܐ̄ܢܵܫܘܼܬܼܵܐ: ܠܲܝܬܵܘܗܝ ܒܲܟܼܝܵܢܵܐ ܐܲܠܵܗܵܝܵܐ: ܐܸܠܵܐ ܒܡܸܬܼܓܲܠܝܵܢܘܼܬܼܵܐ.
ܒܲܟܼܝܵܢܵܐ ܕܹܝܢ ܕܐܲܠܵܗܘܼܬܼܵܐ: ܡ̣ܢ ܟܠܗܘܿܢ ܐܲܝܠܹܝܢ ܕܡܸܬܼܩܪܹܝܢ ܐܲܠܵܗܹ̈ܐ
ܐܵܘ ܡܵܪ̈ܵܘܼܬܼܵܐ ܐܵܘ ܡܫܝܼܚܵܐ: ܦܘܼܪܫܵܢܵܐ ܪܲܒܵܐ ܩܢܸܐ. ܒܐ̄ܢܵܫܘܼܬܼܵܐ ܕܹܝܢ:
ܠܟܼܠܗܘܿܢ ܕܵܡܹ̇ܐ. ܘܦܲܪܨܘܿܦܵܐ ܚܲܕܼ ܐܝܼܬܼܵܘܗܝ: ܒܲܬܼܪܹܝܢ ܟܝܵܫ̈ܝܼܢ.
ܗ̤ܘ ܐܝܼܬܼܵܘܗܝ ܐܲܠܵܗܵܐ: ܘܗܘ̣ ܐܝܼܬܼܵܘܗܝ ܡܵܪܝܵܐ: ܘܗ̣ܘ ܐܝܼܬܼܵܘܗܝ
ܡܫܝܼܚܵܐ. ܠܵܘ ܓܹܝܪ ܒܦܲܪܨܘܼܦܵܐ ܕܲܩܢܸܐ ܦܘܼܠܵܓܼܵܐ ܡܸܬܼܚܲܫܲܚ: ܐܸܠܵܐ
ܒܗܵܢܵܐ ܐܸܬܼܚܲܫܲܚ ܐܲܝܟܼ ܕܼܒܼܦܲܪܨܘܿܦܹܗ. ܟܠܗܹܝܢ ܓܹܝܪ ܕܐܘܼܤܝܼܵܐ:
ܐܝܼܬܼ ܠܹܗ ܒܲܚܕܼܵܝܘܼܬܼܵܐ: ܘܠܵܘ ܒܲܟܼܝܵܢܵܐ. ܐܵܘ ܠܵܐ ܡܩܲܒܿܠܝܼܢ ܐܢ̄ܬܿܘܿܢ
ܡܫܝܼܚܵܐ ܒܐܲܠܵܗܘܼܬܹܗ: ܕܐܲܠܵܗܵܐ ܗ̄ܘ̣ ܥܵܒܼ̇ܘܿܕܼܵܐ ܕܟܼܠ: ܠܵܐ ܗ̄ܘ̣ܵܐ
ܒܲܕܼܡܘܼܬܼ ܡܘܪܫܹܐ: ܐܵܦܸܢ ܡܸܬܼܩܪܸܐ ܡܘܼܫܹܐ ܐܲܠܵܗܵܐ. ܠܵܐ ܗ̄ܘ̣ܵܐ ܓܹܝܪ
ܫܵܘܬܵܦܘܼܬܼܵܐ ܕܲܫܡܵܗܹ̈ܐ: ܫܵܘܬܵܦܘܼܬܼܵܐ ܕܐܝܼܩܵܪܵܐ ܥܵܒܼ̇ܕܵܐ. ܐ̄ܚܪܹܢܵܐ ܗ̄ܘ̣
ܓܹܝܪ ܐܝܼܩܵܪܵܐ ܕܥܲܒܼܕܵܐ: ܘܲܐ̄ܚܪܹܢܵܐ ܗ̄ܘ̣ ܕܡܵܪܵܐ: ܐܵܦܸܢ ܒܗܵܝ̇ ܕܦܲܓܼܪܵܐ
ܦܪܝܼܫ ܡ̣ܢ ܥܲܒܼ̈ܕܹܐ.
ܐܸܢ ܕܹܝܢ ܬܹܐܡܲܪ: ܕܦܲܓܼܪܵܐ ܘܲܟܼܝܵܢܵܐ ܕܦܲܓܼܪܵܐ: ܘܢܲܦܫܵܐ ܡܠܝܼܠܬܼܵܐ
ܘܝܲܕܼܘܼܥܬܼܵܢܝܼܬܼܵܐ ܡܩܵܘܝܵܐ ܕܠܵܐ ܫܘܼܚܠܵܦܐ ܘܲܕܼܠܵܐ ܫܘܼܓܼܢܵܝܵܐ: ܠܵܐ ܕܹܝܢ
ܬܩܲܒܸܿܠ ܠܐܲܝܠܹܝܢ ܟܡܵܘ̈ܕܥܵܢ ܠܢܲܦܫܵܐ ܘܲܠܦܲܓܼܪܵܐ. ܡܸܢܗܹܝܢ
ܒܲܚܕܼܵܝܘܼܬܼܵܐ: ܘܡܸܢܗܹܝܢ ܒܲܟܼܝܵܢܵܐ. ܐܸܠܵܐ: ܥܲܠ ܚܲܕܼ ܟܝܵܢܵܐ ܟܠܗܹܝܢ
pb. 289
ܢܵܤܹ̇ܒܼ ܐܲܢ̄ܬܿ. ܡܕܲܓܸܠ ܐܲܢ̄ܬܿ ܠܲܫܪܵܪܵܐ: ܟܲܕܼ ܥܵܒܹ̇ܕܼ ܐܲܢ̄ܬܿ ܠܐܹܝܢ:
ܠܵܐ. ܘܲܠܠܵܐ: ܐܹܝܢ. ܘܐܲܝܟܼ ܕܲܠܡܲܛܥܝܵܢܘܼܬܼܵܐ ܐܵܡܲ݁ܪ ܐܲܢ̄ܬܿ ܟܝܵܢܵܐ ܐ̄ܢܵܫܵܝܵܐ
ܗܵܘ̇ ܕܡ̣ܢ ܡܲܪܝܲܡ: ܐܲܝܟܼ ܟܬܼܵܒܹ̈ܐ ܐܲܠܵܗܵܝܹ̈ܐ: ܘܠܵܐ ܥܵܒܹ̇ܕܼ ܐܵܢ̄ܬܿ ܠܗܹܝܢ
ܕܝܼܠܹܗ ܒܲܟܼܝܵܢܵܐ ܠܗܵܠܹܝܢ ܕܐ̄ܢܵܫܘܼܬܼܵܐ. ܒܲܦܪܨܘܿܦܵܐ ܕܹܝܢ ܡܥܲܠܸܐ ܐܲܢ̄ܬܿ
ܠܹܗ ܡ̣ܢ ܟ̱ܠܵܗ̇ ܐ̄ܢܵܫܘܼܬܼܵܐ: ܐܲܝܟܼ ܡ̇ܢ ܕܲܐ̄ܚܪܹܢܵܐ ܐܝܼܬܼܵܘܗܝ ܒܐܘܼܤܝܼܵܐ:
ܗܵܘ̇ ܕܲܡܬܼܘܿܡܵܐܝܼܬܼ ܐܝܼܬܼܵܘܗܝ ܐܲܝܟܼ ܕܐܝܼܬܼܵܘܗܝ: ܘܠܵܐ ܫܲܪܝܼ ܐܵܦܠܵܐ
ܐܸܬܿܕܲܪܲܓܼ ܐܵܦܠܵܐ ܐܸܬܼܓܡܲܪ. ܐ̄ܚܪܹܢܵܐ ܗ̄ܘ̣ ܕܹܝܢ ܗܵܘ̇ ܕܫܲܪܝܼ
ܘܐܸܬܿܕܲܪܲܓܼ ܘܐܸܬܼܓܡܲܪ: ܘܒܲܚܕܼܵܝܘܼܬܼܵܐ ܒܡܸܬܼܚܵܘܝܵܢܘܼܬܼܵܐ ܒܦܲܪܨܘܿܦܵܐ
ܚܲܕܼ: ܐܲܠܵܗܵܐ ܕܐܸܬܼܒܲܪܢܲܫ: ܘܒܲܪܢܵܫܵܐ ܕܐܸܬܼܐܲܠܲܗ. ܠܵܐ ܐܸܫܬܲܓܼܢܝܼ
ܘܐܸܫܬܲܚܠܲܦ ܡ̣ܢ ܐܲܠܵܗܘܼܬܹܗ: ܐܲܝܟܼ ܕܐܵܦܠܵܐ ܐ̄ܢܵܫܘܼܬܹܗ ܕܲܡܫܝܼܚܵܐ
ܒܲܟܼܝܵܢܵܐ ܡܫܲܚܠܦܵܐ ܡ̣ܢ ܒܢܲܝ̈ܢܵܫܵܐ: ܐܸܠܵܐ ܒܐܝܼܩܵܪܵܐ ܘܲܒܼܦܲܪܨܘܿܦܵܐ.
ܕܟܼܠ ܓܹܝܪ ܐܝܼܬܼܵܘܗܝ ܐܲܠܵܗܵܐ: ܘܡܵܪܝܵܐ: ܘܲܒܼܪܵܐ: ܘܲܒܼܟܼܠܗܹܝܢ ܐܲܝܠܹܝܢ
ܕܐܝܼܬܹܝܗ̇ ܒܐܘܼܤܝܼܵܐ ܐܲܠܵܗܘܼܬܼܵܐ: ܒܗܵܠܹܝܢ ܐܝܼܬܹܝܗ̇ ܒܐܝܼܩܵܪܵܐ ܐ̄ܢܵܫܘܼܬܼܵܐ.
ܠܵܘ ܒܐܝܼܩܵܪܵܐ ܐ̄ܚܪܹܢܵܐ: ܐܸܠܵܐ ܒܹܗ ܚܲܕܼ ܒܹܗ ܒܗܵܘ̇ ܕܗܵܘ̇ ܕܢܲܤܒܹܿܗ
ܠܦܲܪܨܘܿܦܵܐ: ܟܲܕܼ ܐ̄ܢܵܫܘܼܬܼܵܐ ܡܸܬܼܚܲܫܚܵܐ ܒܦܲܪܨܘܼܦܵܐ ܕܐܲܠܵܗܘܼܬܼܵܐ:
ܘܐܲܠܵܗܘܼܬܼܵܐ ܒܦܲܪܨܘܿܦܵܐ ܕܐ̄ܢܵܫܘܼܬܼܵܐ. ܕܲܠܗܵܕܹܐ ܐܸܬܼܢܤܸܒܼ: ܘܲܠܗܵܕܹܐ
ܢܲܤܒܹܿܗ. ܠܵܘ ܐܲܝܟܼ ܡ̇ܢ ܕܠܵܐ ܢܵܘܕܸܐ ܒܹܗ ܕܐܸܬܼܢܤܸܒܼ: ܐܸܠܵܐ ܐܲܝܟܼ
ܕܢܵܘܕܸܐ ܒܹܗ. ܐܵܘܕܵܐ ܗܵܟܹܝܠ: ܐܲܝܟܼ ܕܲܢܤܲܒܼ ܢܵܤ̇ܘܿܒܹܿܐ: ܐܲܝܟܼ
ܕܐܸܬܼܢܤܸܒܼ ܡܸܬܼܢܲܤܒܵܢܵܐ. ܒܐܲܝܕܵܐ ܕܹܝܢ ܐ̄ܚܪܹܢܵܐ ܘܒܲܐ̇ܚܪܹܢܵܐ: ܘܒܲܐܝܕܵܐ
ܚܲܕܼ ܘܠܵܘ ܬܪܹܝܢ: ܒܹܗ ܒܲܙܢܵܐ ܐܲܝܟܼ ܙܢܵܐ ܕܲܬܼܠܝܼܬܼܵܝܘܼܬܼܵܐ.
pb. 290
ܒܵܗ̇ ܒܲܕܸܡܘܼܬܼܵܐ ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ ܕܚܲܡܫܲܥܸܤܪܹ̈ܐ.
ܗܵܕܹܐ ܐܸܬܼܪܲܥܵܘ ܒܢܲܦܫܟܼܘܿܢ: ܗܵܝ̇ ܕܐܵܦ ܝܼܫܘܿܥ ܡܫܝܼܚܵܐ: ܗܵܘ̇
ܕܟܲܕܼ ܐܝܼܬܼܵܘܗܝ ܒܲܕܼܡܘܼܬܼܵܐ ܕܐܲܠܵܗܵܐ: ܢܲܦܫܹܗ ܤܵܪܸܩ̣ ܘܲܕܼܡܘܼܬܼܵܐ
ܕܥܲܒܼܕܵܐ ܢܤܲܒܼ. ܠܵܐ ܐܵܡܲ݁ܪ: ܗܵܕܹܐ ܐܸܬܼܪܲܥܵܘ ܒܢܲܦܫܟܼܘܿܢ: ܗܵܝ̇
ܕܐܵܦ ܐܲܠܵܗܵܐ ܡܸܠܬܼܵܐ. ܕܟܲܕܼ ܐܝܼܬܼܵܘܗܝ ܒܲܕܼܡܘܼܬܼܵܐ ܕܐܲܠܵܗܵܐ: ܕܡܘܼܬܼܵܐ
ܕܥܲܒܼܕܵܐܬ ܢܤܲܒܼ. ܐܸܠܵܐ ܤܵܡ̣ ܫܡܵܐ ܕܲܡܫܝܼܚܵܐ: ܗܵܘ̇ ܕܐܝܼܬܼܵܘܗܝ
ܡܫܘܕܥܵܢܵܐ ܕܲܬܼܪܗܲܝܗܘܿܢ ܟܝܵܢܹ̈ܐ ܕܠܵܐ ܩܹܘܲܢܕܝܡܘܿܣ. ܘܕܼܡܘܼܬܼܵܐ
ܕܥܲܒܼܕܵܐ ܗܵܝ̇ ܕܢܤܲܒܼ: ܘܕܲܐܠܵܗܵܐ ܡܫܲܡܲܗ ܠܹܗ: ܟܲܕܼ ܡܸܬܼܦܲܠ̈ܓܼܵܢ
ܗܵܠܹܝܢ ܕܡܸܬܼܐܲܡܪ̈ܵܢ ܕܠܵܐ ܥܸܕܼܠܵܝ ܠܲܥܦܝܼܦܘܼܬܼܵܐ ܕܲܟܼܝܵܢܹ̈ܐ. ܙܵܕܸܩ
ܐܵܦ ܡ̣ܢ ܗܵܠܹܝܢ ܠܲܡܒܲܚܵܢܘܼ ܪܸܥܝܵܢܵܐ ܕܟܼܠ ܐ̄ܢܵܫ: ܘܩܲܕܼܡܵܝܑܬܼ ܕܝܼܠܝܼ:
ܐܸܢ ܐܲܝܟܼ ܕܗܵܢܵܐ ܐܵܡܲ݁ܪ ܐܝܼܬܹܝܗ̇. ܕܲܐ̄ܚܪܹܢܵܐ ܘܵܐ̄ܚܪܹܢܵܐ ܐܵܡܲ݁ܪ ܐ̄ܢܵܐ:
ܘܲܡܦܲܪܸܫ ܐ̄ܢܵܐ ܠܐܲܠܵܗܘܼܬܼܵܐ ܒܲܡܢܵܬܼܵܐ ܡܸܕܸܡ ܐܲܝܟܼ ܕܲܒܼܪܲܚܝܼܩܘܼܬܼܵܐ
ܕܕܼܘܼܟܿܬܼܵܐ: ܘܠܵܐ ܗ̄ܘ̣ܵܐ ܚܲܕܼܘܼ ܘܠܹܗ ܟܲܕܼ ܠܹܗ ܡܵܘܕܸܐ ܐ̄ܢܵܐ. ܕܠܵܐ
ܩܹܘܲܢܕܼܝܢܘܿܣ ܕܹܝܢ ܐܸܡ̇ܪܹܬܼ: ܕܠܲܕܼܡܘܼܬܼܵܐ ܕܥܲܒܼܕܵܐ ܘܠܲܐܠܵܗܵܐ
ܫܲܡܲܗ. ܠܵܐ ܠܗܵܝ̇ ܕܢܸܤܒܲܬ̤ ܘܠܵܐ ܠܗܵܝ̇ ܕܐܸܬܼܢܲܤܒܲܬ̤: ܡܦܲܪܫܵܐܝܼܬܼ
ܡܸܤܬܲܟܿܠܝܼܢ ܚ̄ܢܲܢ. ܐܸܠܵܐ ܒܗܵܝ̇ ܕܢܸܤܒܲܬ̤ ܠܗܵܝ̇ ܕܐܸܬܼܢܲܤܒܲܬ̤:
ܘܲܒܼܗܵܝ̇ ܕܐܸܬܼܢܲܤܒܲܬ̤ ܗ̤ܝ ܗܵܝ̇ ܕܢܸܤܒܲܬ̤ ܡܸܬܼܪܲܢܝܵܐ. ܠܵܐ ܓܹܝܪ
ܡܸܬܼܪܲܢܝܵܐ ܡܸܟܹܿܝܠ ܗܵܝ̇ ܕܢܸܒܲܬ̤ ܡܸܢܵܗ̇ ܘܠܵܗ̇: ܘܠܵܐ ܬܘܼܒܼ ܗܵܝ̇
ܕܐܸܬܢܲܤܒܲܬ̤. ܕܠܵܐ ܗ̄ܘ̣ܵܐ ܒܗܵܘ̇ ܦܲܪܨܘܿܦܵܐ ܕܗܵܝ̇ ܕܢܸܤܒܲܬ̤
ܘܲܕܼܗܵܝ̇ ܕܐܸܬܼܢܵܤܒܲܬ̤ ܐܝܼܬܼܵܘܗܝ.
pb. 291
ܡܵܕܹܝܢ ܠܵܘ ܒܗܵܕܹܐ ܟܵܐܹ̇ܐ ܐܲܢ̄ܬܿ ܒܝܼ: ܐܸܠܵܐ ܡܸܛܠ ܕܲܡܦܲܪܸܫ
ܐ̄ܢܵܐ ܠܕܝܼ̈ܠܝܵܬܼܵܐ ܕܲܚܕܼܵܝܘܼܬܼܵܐ ܕܐܝܼܬܼ ܠܟܼܠ ܚܲܕܼ ܡ̣ܢ ܟܝܵܢܹ̈ܐ: ܐܲܝܟܲܢܵܐ
ܕܲܡܩܲܝܲܡ ܟܠ ܚܲܕܼ ܡܸܢܗܘܿܢ ܒܲܩܢܘܿܡܹܗ. ܘܠܵܐ ܗ̄ܘ̣ܵܐ ܥܲܠ
ܐܲܠܵܗܵܐ ܡܸܠܬܼܵܐ ܐܵܡܲ݁ܪ ܐ̄ܢܵܐ ܕܤܵܠ̈ܩܵܢ: ܐܲܝܟܼ ܐܲܝܢܵܐ ܕܒܼܐܘܼܤܝܼܵܐ ܐܝܼܬܼܵܘܗܝ
ܬܵܪ̈ܬܲܝܗܹܝܢ: ܐܵܘ ܕܗܵܠܹܝܢ ܕܒܸܤܪܵܐ ܕܠܵܐ ܩܢܘܿܡܵܐ ܥܲܠ ܐܲܠܵܗܵܐ
ܡܸܬܼܢܲܤ̈ܒܵܢ. ܕܢܸܬܼܓܠܸܐ ܒܲܠܚܘܿܕܼ ܒܲܕܡܘܼܬܼܵܐ ܕܒܸܤܪܵܐ: ܘܲܕܼܢܸܬܼܚܲܫܚ
ܘܲܕܼܢܸܚܲܫ ܟܠܗܹܝܢ ܗܵܠܹܝܢ ܕܒܸܤܪܵܐ. ܐܵܘ ܕܠܲܟܼܝܵܢܵܐ ܕܒܸܤܪܵܐ
ܐܸܬܫܲܚܠܲܦ: ܐܵܘ ܠܚܲܕܼ ܟܝܵܢܵܐ ܐܸܬܼܡܲܙܲܓܼܘ. ܐܵܘ ܒܒܼܘܼܠܒܵܠܵܐ ܐܵܘ
ܒܡܸܫܬܲܢܝܵܢܘܼܬܼܵܐ ܤܠ̈ܩܵܢ ܗܵܠܹܝܢ ܕܒܸܤܪܵܐ ܠܐܘܼܤܝܼܵܐ ܕܐܲܠܵܗܵܐ: ܐܵܘ
ܒܪܘܼܟܵܒܼܵܐ ܟܝܵܢܵܝܵܐ ܠܫܘܼܡܠܵܝܵܐ ܕܪܘܼܟܵܒܼܵܐ ܟܝܵܢܵܐܝܵܐ: ܕܢܸܚܲܫ ܚܵܫܘܿܫܵܐܝܼܬܼ
ܚܲܫܹ̈ܐ ܕܦܲܓܼܪܵܐ. ܟܲܕܼ ܠܵܐ ܡܡܲܠܸܐ ܡܸܕܸܡ ܓܘܼܫܡܵܐ ܒܲܟܼܝܵܢܹܗ ܕܝܼܠܹܗ
ܠܲܡܕܲܒܿܪܵܢܘܼܬܼܵܐ ܕܲܚܠܵܦܲܝܢ: ܘܠܵܐ ܡܥܒܸܿܕܼ ܡܲܥܒܿܕܼܵܢ̈ܘܵܬܼܵܐ ܐ̄ܢܵܫܝ̈ܬܼܵܐ:
ܠܵܐ ܒܨܒܼܝܵܢܵܐ ܕܢܲܦܫܵܐ: ܘܠܵܐ ܒܪܸܥܝܵܢܵܐ ܐܐ̄ܢܵܫܵܝܵܐ: ܘܠܵܐ ܒܲܪܓܸܫܬܼܵܐ
ܕܦܲܓܼܪܵܐ: ܐܸܠܵܐ ܒܪܸܥܝܵܢܵܬܼܵܐ ܘܲܒܼܨܒܼܝܵܢܵܐ ܕܐܲܠܵܗܵܐ: ܐܵܦ ܒܲܪܓܸܫܬܼܵܐ ܕܐܲܠܵܗܵܐ
ܪܓܲܫ̣ ܟܠܗܹܝܢ ܐ̄ܢܵܫܝ̈ܬܼܵܐ. ܒܲܫܡܵܐ ܕܹܝܢ ܒܲܠܚܘܿܕܼ: ܕܠܵܐ ܩܢܘܿܡܵܐ
ܘܲܕܼܠܵܐ ܡܲܥܒܿܕܼܵܢܘܼܬܼܵܐ ܐܝܼܬܼ ܠܹܗ ܦܲܓܼܪܵܐ. ܘܡܸܛܠ ܗܵܢܵܐ ܐܲܝܟܼ
ܡܸܕܸܡ ܝܲܬܿܝܼܪܵܐ ܒܒܲܪܬܼ ܩܵܠܵܐ ܒܲܠܚܘܿܕܼ ܘܒܲܫܡܵܐ ܩܵܪܹܐ ܐܲܢ̄ܬܑܿ ܒܲܪܢܵܫܵܐ:
ܒܗܵܝ̇ ܕܐܘܼܤܝܼܵܐ ܘܡܲܥܒܿܕܼܵܢܘܼܬܼܵܐ ܕܒܲܪܢܵܫܵܐ ܠܵܐ ܡܩܲܒܸܿܠ ܐܲܢ̄ܬܿ
ܠܡܹܐܡܲܪ. ܘܠܵܐ ܬܪܹܝܢ ܟܝܵܢ̈ܝܼܢ ܢܸܗܘܘܿܢ: ܒܕܼܝܼ̈ܠܝܵܬܼܵܐ ܘܒܲܩܢܘܼܡܹ̈ܐ
ܘܒܼܐܘܼܤܝܼܵܐ ܟܠ ܚܲܕܼ ܡܸܢܗܘܿܢ.
ܐܸܠܵܐ ܟܒܲܪ ܐܵܡܲ݁ܪ ܐ̄ܢܵܫ: ܕܡܸܛܠ ܕܠܵܐ ܡܵܘܕܹܝܬܿ ܕܗ̤ܝ ܟܲܕܼ
pb. 292
ܗ̤ܝ ܐܲܠܵܗܵܐ ܡܸܠܬܼܵܐ ܘܲܡܫܝܼܚܵܐ: ܘܡܸܛܠ ܗܵܢܵܐ ܒܐܲܝܠܹܝܢ ܕܲܐ̄ܚܪܹܢܵܐ
ܐܵܡ̇ܪܝܼܢ ܠܹܗ ܠܲܡܫܝܼܚܵܐ: ܘܲܐ̄ܚܪܹܪܢܵܐ ܠܐܲܠܵܗܵܐ ܡܸܠܬܼܵܐ: ܤܛܲܪ ܡ̣ܢ
ܡܫܝܼܚܵܐ: ܟܵܐܹ̇ܐ ܐܲܢ̄ܬܿ. ܐܸܢܗ̤ܘ ܗܵܟܹܝܠ ܕܐܸܡ̇ܪܹܬܼ ܠܲܡܫܝܼܚܵܐ: ܘܲܐ̄ܚܪܹܢܵܐ
ܠܐܲܠܵܗܵܐ ܡܸܠܬܼܵܐ ܤܛܲܪ ܡ̣ܢ ܡܫܝܼܚܵܐ: ܐܵܘ ܠܲܡܫܝܼܚܵܐ ܤܛܲܪ ܡ̣ܢ
ܐܲܠܵܗܵܐ ܡܸܠܬܼܵܐ: ܛܵܒܼܵܐܝܼܬܼ ܐܵܡ̇ܪܝܼܢ ܗ̣̄ܘܲܝܬܿܘܿܢ. ܐܸܢ ܕܹܝܢ ܗܵܕܹܐ ܠܵܐ
ܐܸܡ̇ܪܹܬܼ ܘܠܵܐ ܐܸܡܲ݁ܪ ܐ̄ܢܵܐ: ܐܸܠܵܐ ܕܲܐ̄ܚܪܹܢܵܐ ܡܫܵܘܕܲܥ: ܐܵܦ ܗܵܫܵܐ ܠܵܗ̇
ܠܗܵܕܹܐ ܐܵܡܲ݁ܪ ܐ̄ܢܵܐ. ܠܵܐ ܬܲܗܦܵܟܼ ܠܗܵܝ̇ ܕܐܵܡܲ݁ܪ ܐ̄ܢܵܐ: ܘܒܼܵܗ̇ ܟܲܕܼ
ܒܵܗ̇ ܡܸܫܟܲܚ ܐܲܢ̄ܬܿ ܦܘܼܪܫܵܢܵܐ ܕܗܵܘ̇ ܡܸܕܸܡ ܕܡܵܘܕܲܥ. ܐܸܡ̇ܪܹܬܼ
ܓܹܝܪ: ܕܲܫܡܵܐ ܕܲܡܫܝܼܚܵܐ: ܡܫܵܘܕܥܵܢܵܐ ܕܲܬܼܪܹܝܢ ܟܝܵܢ̈ܝܼܢ ܐܝܼܬܼܵܘܗܝ.
ܕܐܲܠܵܗܵܐ ܕܹܝܢ: ܚܲܕܼ ܟܝܵܢܵܐ. ܐ̄ܚܪܹܢܵܐ ܗ̄ܘ̣ ܕܹܝܢ ܫܡܵܐ ܕܡܵܘܕܲܥ
ܬܪܹܝܢ: ܘܲܐ̄ܚܪܹܢܵܐ ܕܡܵܘܕܲܥ ܚܲܕܼ: ܕܠܵܐ ܗܵܘ̇ ܡܸܕܸܡ ܐ̄ܚܪܹܝܢ
ܐܝܼܬܼܵܘܗܝ: ܐܲܟܼܙܢܵܐ ܕܐܵܦ ܥܲܠ ܒܲܪܢܵܫܵܐ ܐܸܢ ܢܹܐܡܲܪ ܐ̄ܢܵܫ: ܕܲܐ̄ܚܪܹܢܵܐ
ܡܫܵܘܕܲܥ ܫܡܵܐ ܕܒܲܪܢܵܫܵܐ: ܘܲܐ̄ܚܪܹܢܵܐ ܕܢܲܦܫܵܐ ܡܠܝܼܠܢܼܵܐ. ܠܵܘ
ܕܲܐ̄ܚܪܹܢܵܐ ܗ̄ܘ̣ ܒܲܪܢܵܫܵܐ: ܐ̄ܚܪܹܬܼܵܐ ܕܹܝܢ ܢܲܦܫܵܐ ܤܛܲܪ ܡ̣ܢ ܒܲܪܢܵܫܵܐ.
ܠܵܐ ܗ̄ܘ̣ܵܐ ܓܹܝܪ ܗܵܘ̇ ܕܐܸܡܲ݁ܪ ܒܲܪܢܵܫܵܐ: ܒܸܠܥܵܕܼ ܢܲܦܫܵܐ ܐܵܡܲ݁ܪ ܠܹܗ.
ܡܸܛܠ ܕܲܠܒܲܪ ܡ̣ܢ ܢܲܦܫܵܐ: ܒܵܪܢܵܫܵܐ ܠܵܐ ܐܝܼܬܼܵܘܗܝ. ܐܸܠܵܐ ܗܵܘ̇
ܡ̇ܢ ܕܒܲܪܢܵܫܵܐ: ܡܵܘܕܥܵܢܵܐ ܐܝܼܬܼܵܘܗܝ ܕܲܚܕܼܵܝܘܼܬܼܵܐ ܕܲܬܼܪܹܝܢ ܟܝܵܢ̈ܝܵܢ:
ܕܢܲܦܫܵܐ ܘܲܕܼܦܲܓܼܪܵܐ. ܗܵܘ̇ ܕܹܝܢ: ܕܲܟܼܝܵܢܵܐ. ܐ̄ܚܪܹܝܢ ܗ̄ܘ̣ ܓܹܝܪ ܟܝܵܢܵܐ:
ܘܐ̄ܚܪܹܬܼܵܐ ܗ̣̄ܝ ܚܕܼܵܝܘܼܬܼܵܐ ܕܲܟܼܝܵܢܹ̈ܐ. ܡܵܢܵܐ ܗܵܟܹܝܠ؟ ܐܸܢ ܠܵܐ ܗ̄ܘ̣ܵܐ
ܡܸܕܸܡ ܗ̄ܘ̣ ܐ̄ܚܪܹܝܢ ܐܲܠܵܗܵܐ ܡܸܠܬܼܵܐ ܤܛܲܪ ܡ̣ܢ ܡܫܝܼܚܵܐ: ܘܲܡܫܝܼܚܵܐ
ܤܛܲܪ ܡ̣ܢ ܐܲܠܵܗܵܐ ܡܸܠܬܼܵܐ: ܠܡܵܢܵܐ ܠܵܐ ܦܵܪܘܿܫܵܐܝܼܬܼ ܡܸܚܲܫܲܚ ܐܲܢ̄ܬܿ
ܒܲܫܡܵܗܹ̈ܐ: ܐܲܝܟܼ ܡ̇ܢ ܕܗ̤ܝ ܟܲܕܼ ܗ̤ܝ ܡܫܵܘܕܥܵܐ ܒܝܲܕܼ ܗܵܢܵܐ: ܐܵܘ
pb. 293
ܒܝܲܕܼ ܗܵܘ̇؟ ܐܸܠܵܐ ܠܲܡ ܡܦܲܠܸܓܼ ܐܲܢ̄ܬܿ: ܕܠܵܐ ܐܵܡܲ݁ܪ ܐ̄ܢܵܐ؟ ܠܲܐܲܠܵܗܵܐ
ܡܸܠܬܼܵܐ ܐܸܠܵܐ ܠܲܡܫܝܼܚܵܐ. ܐܲܝܟܼ ܡ̇ܢ ܕܲܐ̄ܚܪܹܢܵܐ ܐܝܼܬܼܵܘܗܝ ܡܫܝܼܚܵܐ:
ܐ̄ܚܪܹܢܵܐ ܕܹܝܢ ܐܲܠܵܗܵܐ ܡܸܠܬܼܵܠܐ.
ܐܸܠܵܐ ܫܡܲܥ ܐܵܦ ܡܸܢܲ: ܐ̄ܚܪܹܢܵܐ ܘܲܐ̄ܚܪܹܢܵܐ ܠܵܐ ܐܝܼܬܼܵܘܗܝ. ܐ̄ܚܪܹܢܵܐ
ܓܹܝܪ ܘܲܐ̄ܚܪܹܢܵܐ ܐܝܼܬܼܵܘܗܝ ܗ̄ܘ̣ܵܐ: ܐܸܢ ܤܛܲܪ ܡ̣ܢ ܐܵܠܵܗܵܐ ܡܸܠܬܼܵܐ
ܐܝܼܬܼܵܘܗܝ ܗ̄ܘ̣ܵܐ ܡܫܝܼܚܵܐ. ܐ̄ܚܪܹܢܵܐ ܕܹܝܢ ܘܲܐ̄ܚܪܹܢܵܐ ܡܫܵܘܕܲܥ: ܐܸܢܗ̤ܘ
ܕܠܵܐ ܗ̄ܘ̣ܵܐ ܗ̤ܘܝܘܼ ܟܲܕܼ ܗ̤ܘ ܒܐܘܼܤܝܼܵܐ: ܡܸܬܼܚܲܙܝܵܢܵܐ ܘܠܵܐ ܡܸܬܼܚܲܙܝܵܢܵܐ.
ܘܐܲܝܠܹܝܢ ܕܡܸܢܗܘܿܢ ܐܝܼܬܼܵܘܗܝ ܡܫܝܼܚܵܐ: ܒܐܘܼܤ̈ܝܼܵܣ ܕܝܼܠܗܹܝܢ
ܐܝܼܬܼܵܝܗܹܝܢ: ܘܠܵܐ ܗ̄ܘ̣ܵܐ ܐܲܠܵܗܸܐ ܡܸܠܬܼܵܐ ܐܝܼܬܼܵܘܗܝ ܒܲܟܼܝܵܢܵܐ ܕܬܲܪ̈ܬܲܝܗܹܝܢ.
ܟܝܵܢܹ̈ܐ ܕܹܝܢ ܦܪ̈ܝܼܫܹܐ ܡܲܘܕܸܐ ܐܲܢ̄ܬܿ ܕܐܲܠܵܗܵܘܼܬܼܵܐ ܘܲܕܐ̄ܚܢܵܫܘܼܬܼܵܐ: ܚܲܕܼ ܕܹܝܢ
ܡ̣ܢ ܬܪ̈ܲܝܗܘܿܢ ܡܫܝܼܚܵܐ. ܠܵܐ ܗ̄ܘ̣ܵܐ ܟܝܵܢܹ̈ܐ ܡܫܲܚ̈ܠ̱ܦܹܐ ܐܵܡܲ݁ܪ ܐܲܢ̄ܬܿ ܠܹܗ
ܠܐܲܠܵܗܵܐ ܡܸܠܬܼܵܐ ܐܸܠܵܐ ܚܲܕ: ܦܘܼܪܫܵܢܵܐ ܕܹܝܢ ܐܝܼܬܼ ܠܹܗ ܠܘܵܬܼ ܚܲܒܼܪܹܗ.
ܡܵܕܹܝܢ ܐ̄ܚܪܹܢܵܐ ܘܲܐ̄ܚܪܹܢܵܐ ܐܵܡܲ݁ܪ ܐܲܢ̄ܬܿ ܠܹܗ ܠܲܡܫܝܼܚܵܐ: ܡܸܛܠ ܕܐܵܡܲ݁ܪ
ܐܲܢ̄ܬܿ ܠܹܗ ܟܝܵܢܹ̈ܐ ܡܫܲܚ̈ܠ̱ܦܹܐ: ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ. ܚܲܕܼ ܕܹܝܢ
ܟܝܵܢܵܐ ܕܐܲܠܵܗܵܐ ܡܸܠܬܼܵܐ: ܠܵܘ ܟܝܵܢܹ̈ܐ ܡܫܲܚ̈ܠ̱ܦܹܐ ܐܝܼܬܼܵܘܗܝ. ܐܵܘ ܐܲܝܟܼ
ܡܵܐ ܕܐܸܢܵܐ ܐܸܡ̇ܪܹܬܼ: ܕܲܐ̄ܚܪܹܢܵܐ ܘܲܐ̄ܚܪܹܢܵܐ ܠܵܐ ܐܝܼܬܼܵܝܘܗܝ: ܒܗܵܝ̇ ܕܠܵܐ
ܗ̄ܘ̣ܵܐ ܤܛܲܪ ܡ̣ܢ ܐܲܠܵܗܵܐ ܡܸܠܬܼܵܐ ܐܝܼܬܼܵܘܗܝ ܡܫܝܼܚܵܐ: ܘܠܸܐ ܬܘܼܒܼ
ܐܲܠܵܗܵܐ ܡܸܠܬܼܵܐ ܤܛܲܪ ܡ̣ܢ ܡܫܝܼܚܵܐ. ܐ̄ܚܪܹܢܵܐ ܕܹܝܢ ܘܲܐ̄ܚܪܹܢܵܐ ܡܵܘܕܵܥ:
ܡܸܛܠ ܕܲܡܫܝܼܚܵܐ ܡ̣ܢ ܐܲܠܵܗܵܐ ܡܸܠܬܼܵܐ ܘܡ̣ܢ ܐ̄ܢܵܫܘܼܬܼܵܐ ܐܝܼܬܼܵܘܗܝ
ܒܲܚܕܼܵܝܘܼܬܼܵܐ. ܐܲܠܵܗܵܐ ܕܹܝܢ ܡܸܠܬܼܵܐ ܚܲܕܼ ܟܝܵܢܵܐ ܐܝܼܬܼܵܘܗܝ: ܘܠܵܐ ܗ̄ܘ̣ܵܐ
ܡ̣ܢ ܬܪܹܝܢ ܟܝܵܢ̈ܝܼܢ: ܘܠܵܐ ܗ̄ܘ̣ܵܐ ܒܲܚܕܼܵܝܘܼܬܼܵܐ ܐܝܼܬܼ ܠܹܗ ܕܢܸܗܘܸܐ
ܐܲܠܵܗܵܐ ܡܸܠܬܼܵܐ.
pb. 294
ܘܲܠܗܵܠܹܝܢ ܡܸܠܹ̈ܐ ܕܐܸܢܵܐ ܐܵܡܲ݁ܪ ܐ̄ܢܵܐ: ܐܵܦ ܐܲܢ̄ܬܿ ܡܲܤܗܸܕܼ ܐܲܢ̄ܬܿ
ܟܲܕܼ ܠܵܐ ܨܵܒܹ̇ܐ ܐܲܢ̄ܬܿ. ܒܪܲܡ ܕܹܝܢ ܡܲܗܗܸܕܼ ܐܲܢ̄ܬܿ ܟܲܕܼ ܐܵܡܲ݁ܪ ܐܲܢ̄ܬܿ:
ܕܲܡܫܲܚܠ̱ܦܝܼܢ ܟܝܵܢܹ̈ܐ ܕܐܸܬܼܟܲܢܲܫ ܠܲܚܕܼܵܝܘܼܬܼܵܐ: ܚܲܕܼ ܕܹܝܢ ܡ̣ܢ
ܬܪ̈ܲܝܗܘܿܢ ܡܫܝܼܚܵܐ. ܐܸܢܗ̤ܘ ܓܹܝܪ ܕܠܵܐ ܐ̄ܚܪܹܢܵܐ ܘܲܐ̄ܚܪܹܢܵܐ ܡܵܘܕܲܥ
ܐܲܢ̄ܬܿ: ܡܸܛܠ ܡ̇ܢ ܗܵܘ̇ ܡܵܐ ܕܠܝܼ ܡܦܝܼܣ ܐܲܢ̄ܬܿ ܠܡܹܐܡܲܪ: ܠܵܐ
ܗ̄ܘ̣ܵܐ ܩܲܕܼܡܵܝܑܬܼ ܐܲܢ̄ܬܿ ܐܲܡܪܲܚ̣ܬܿ ܠܡܹܐܡܲܪ: ܕܚܲܕܼ ܡ̣ܢ ܬܪ̈ܲܝܗܘܿܢ
ܐܲܠܵܗܵܐ ܡܸܠܬܼܵܐ؟ ܐܸܠܵܐ ܠܵܐ ܡܸܫܟܲܚ ܗ̣̄ܘܲܝܬܿ ܠܡܹܐܡܲܪ: ܐܵܘ ܠܵܐ
ܡܸܫܟܲܚ ܗ̄ܘܹ̇ܝܬܼ ܐܸܢܵܐ ܠܡܸܫܡܲܥ ܥܲܪܛܸܠܵܝܐܝܼܬܼ ܠܪܘܼܫܥܵܟܼ: ܘܡܸܛܠ
ܗܵܢܵܐ ܥܒܲܪܬܵܝܗܝ ܟܲܕܼ ܠܵܐ ܡܵܘܕܲܥ ܐܲܢ̄ܬܿ ܠܹܗ. ܐܲܝܟܲܢܵܐ ܕܠܵܐ ܡ̣ܢ
ܗܵܪܟܵܐ ܬܸܬܼܟܲܚܲܕܼ: ܘܠܵܐ ܢܸܗܘܸܐ ܠܵܟܼ ܒܹܝܬܼ ܡܲܥܪܩܵܐ: ܐܸܬܼܐ̱ܠܸܨܬܿ
ܠܡܵܘܕܵܝܘܼ ܢܲܗܝܼܪܵܐܝܼܬܼ ܫܪܵܪܵܐ. ܐ̄ܚܪܹܢܵܐ ܘܲܐ̄ܚܪܹܢܵܐ ܡܵܘܕܲܥ ܗܵܘ̇ ܘܗܵܘ̇:
ܘܠܵܘ ܐ̄ܚܪܹܢܵܐ ܘܲܐ̄ܚܪܹܬܵܐ ܐܝܼܬܼܵܘܝܗ. ܐ̄ܚܪܹܢܵܐ ܓܹܝܪ ܘܲܐ̄ܚܪܹܢܵܐ ܕܡܸܢܗܘܿܢ
ܐܝܼܬܼܵܘܗܝ ܦܵܪܘܿܩܲ: ܠܵܘ ܕܹܝܢ ܐ̄ܚܪܹܢܵܐ ܘܲܐ̄ܚܪܹܢܵܐ: ܚܣ: ܐܲܝܟܼ ܕܐܵܦ
ܥܲܠ ܬܠܝܼܬܼܵܝܘܼܬܼܵܐ ܐܝܼܬܹܝܗ̇. ܐܸܠܵܐ ܥܲܠ ܐܲܠܵܗܵܐ ܡܸܠܬܼܵܐ ܡܲܤܸܩ ܐܲܢ̄ܬܿ
ܠܗܵܠܹܝܢ ܕܒܸܤܪܵܐ: ܕܢܸܚܙܸܐ ܘܲܢܡܲܠܸܠ ܘܢܸܚܲܫ ܗܵܠܹܝܢ ܕܦܲܓܼܪܵܐ:
ܒܲܠܚܘܿܕܼ ܕܹܝܢ ܡܸܬܼܚܲܫܵܚܘܼ ܡܸܬܼܚܲܫܲܚ ܒܒܸܤܪܵܐ: ܐܲܝܟܼ ܕܐܵܡ̇ܪܝܼܢ
ܐܵܪ̈ܝܢܹܐ: ܘܝܵܗ̈ܒܿܝܼܢ ܠܡܲܥܒܿܕܼܵܢ̈ܘܵܬܼܵܐ ܘܲܠܚܲܫܹ̈ܐ ܠܐܲܠܵܗܘܼܬܼܵܐ ܟܝܵܢܵܐܝܼܬܼ.
ܘܐܲܝܟܼ ܐܵܦܘܿܠܝܼܢܵܪܝܼܣ: ܕܲܚܠܵܦ ܡܲܕܥܵܐ ܤܵܥܲ݁ܪ ܟܝܵܢܵܐܝܼܬܼ ܗܵܠܹܝܢ
ܕܢܲܦܫܵܐ ܘܲܕܼܦܲܓܼܪܵܐ. ܗܵܟܲܢܵܐ ܘܗܵܢܵܐ ܒܟܼܠܗܹܝܢ ܡܸܚܲܫܲܚ ܒܐܲܠܵܗܵܐ
ܡܸܠܬܼܵܐ: ܘܲܒܼܦܲܓܼܪܵܐ ܘܲܒܼܢܲܦܫܵܐ ܝܲܕܼܘܼܥܬܼܵܢܝܼܬܼܵܐ: ܕܢܸܚܲܫ ܚܲܫܹ̈ܐ ܕܦܲܓܼܪܵܐ:
ܘܲܕܼܢܥܒܸܿܕܼ ܗܵܠܹܝܢ ܕܢܲܦܫܵܐ ܡܠܝܼܠܬܼܵܐ: ܠܗܘܼܦܵܟܼܵܐ ܘܲܠܕܼܘܼܒܵܪܵܐ ܕܐܲܠܵܗܵܐ
ܡܠܬܼܵܐ. ܘܠܗܵܠܹܝܢ ܕܦܲܪܨܘܿܦܵܐ ܕܝܼܠܹܗ: ܠܲܟܼܝܵܢܹܗ ܕܐܲܠܵܗܵܐ ܡܸܠܬܼܵܐ
pb. 295
ܝܵܗܹ̇ܒܼ: ܘܠܵܘ ܠܦܲܪܨܘܿܦܵܐ ܕܐ̄ܢܵܫܘܼܬܼܵܐ: ܕܡ̣ܢ ܐ̄ܢܵܫܘܼܬܼܵܐ ܡܸܬܿܬܿܙܝܼܥܵܐ
ܐܲܝܟܼ ܟܝܵܢܵܐ ܕܒܲܪܢܵܫܵܐ: ܐܸܠܵܐ ܡ̣ܢ ܐܲܠܵܗܵܐ ܡܸܠܬܼܵܐ.
ܡܲܢ̣ܘܼ ܕܹܝܢ ܐܝܼܬܼܵܘܗܝ ܒܲܪܢܵܫܵܐ ܡܫܲܠܡܵܢܵܐ: ܕܠܵܐ ܗ̄ܘ̣ܵܐ ܐܲܝܟܼ
ܟܝܵܢܵܐ ܕܒܲܪܢܵܫܵܐ ܡܲܥܒܸܿܕܼ ܘܡܸܬܿܬܲܥܒܲܕܼ؟ ܒܲܫܡܵܐ ܕܹܝܢ ܒܲܠܚܘܿܕܼ
ܐܝܼܬܼܵܘܗܝ ܒܲܪܢܵܫܵܐ: ܘܒܲܫܡܵܐ ܦܲܓܼܪܵܐ: ܘܒܲܫܡܵܐ ܢܲܦܫܵܐ ܡܠܝܼܠܵܬܼܵܐ:
ܗܵܘ̇ ܕܒܲܟܼܝܵܢܵܐ ܕܝܵܬܹܗ ܠܵܐ ܡܬܿܬܿܙܝܼܥ. ܠܵܐ ܐܲܝܟܼ ܢܲܦܫܵܐ ܒܪܸܥܝܵܢܵܐ
ܘܲܒܼܨܒܼܝܵܢܵܐ: ܘܠܵܐ ܬܘܼܒܼ ܐܲܝܟܼ ܦܲܓܼܪܵܐ ܒܲܪܓܸܫܬܼܵܐ ܢܲܦܫܵܢܵܝܬܼܵܐ. ܐܸܠܵܐ
ܐܸܬܼܩܲܝܲܡ ܐܲܠܵܗܵܐ ܡܸܠܬܼܵܐ: ܕܢܸܗܘܸܐ ܠܨܸܒܼܝܵܢܵܐ ܘܲܠܪܸܥܝܵܢܵܐ ܘܠܲܪܓܸܫܬܼܵܐ
ܒܦܲܓܼܪܵܐ ܘܲܒܼܢܲܦܫܵܐ: ܐܲܝܟܲܢܵܐ ܕܢܸܥܒܸܿܕܼ ܘܢܸܚܲܫ ܐܲܠܵܗܵܐ ܡܸܵܠܬܼܵܐ ܗܵܠܹܝܢ
ܦܲܓܼܪ̈ܵܢܵܝܬܼܵܐ ܪܲܚܿܫܘܼܬܼܵܢܵܐܝܼܬܼ. ܘܗܵܠܹܝܢ ܢܲܦܫܵܢܵܝ̈ܬܼܵܐ: ܠܪܘܼܓܼܙܵܐ:
ܘܲܠܚܸܡܬܼܵܐ: ܘܠܲܪ̈ܓܼܝܼܓܼܵܝܼܬܼܵܐ: ܘܲܠܕܼܚܠܬܼܵܐ: ܘܠܲܪܬܹܝܵܬܼܵܐ: ܘܲܠܡܲܚܫ̈ܒܼܵܬܐ:
ܘܲܠܤܘܼܥܪ݁ܵܢܹܐ: ܘܲܠܕܼܝܼܢܵܐ: ܘܠܲܓܼܒܼܝܼܬܼܵܐ ܨܸܒܼܝܵܢܵܝܬܼܵܐ: ܗܵܠܹܝܢ ܟܠܗܹܝܢ
ܗ̤ܘ ܡܲܥܒܸܿܕܼ ܘܚܵܐܹ̇ܫ: ܚܠܵܦ ܢܲܦܫܵܐ ܘܲܚܠܵܦ ܦܲܓܼܪܵܐ. ܐܲܝܟܲܢܵܐ
ܕܲܒܼܙܵܟܼܘܼܬܼܵܐ ܚܵܫܘܿܫܬܼܵܐ ܘܲܟܼܝܵܢܵܝܬܼܵܐ ܕܐܲܠܵܗܵܐ ܡܸܠܬܼܵܐ: ܢܸܙܟܸܿܐ ܟܝܵܢܵܐ ܗܵܘ̇
ܕܚܵܒܼ ܗ̄ܘ̣ܵܐ: ܟܲܕܼ ܝܲܗ̣̄ܒܼ ܠܹܗ ܙܵܟܼܘܼܬܼܵܐ ܕܝܼܠܹܗ: ܕܒܼܐܝܼܕܹܗ ܘܒܹܗ
ܢܸܙܟܸܐ ܗ̄ܘ̣ܵܐ: ܕܢܲܤܒܹܿܗ ܠܲܟܼܝܵܢܹܗ. ܗܵܠܹܝܢ ܟܠܗܹܝܢ ܡܫܲܚܠܦܵܢ̈ܝܬܼܵܐ
ܐܸܢܹܝܢ ܕܲܟܼܝܵܢܹܗ ܕܐܲܠܵܗܵܐ ܡܸܠܬܼܵܐ: ܟܲܕܼ ܟܝܵܢܵܐܝܼܬܼ ܡܸܬܼܝܲܗ̈ܒܵܢ ܠܹܗ
ܕܢܸܚܲܫ: ܘܲܟܼܝܵܢܵܐ ܚܵܫܘܿܫܵܐ ܘܡܸܬܿܚ̱ܠܦܵܢܵܐ ܘܡܸܬܲܓܼܢܝܵܢܵܐ ܐܸܡܲ݁ܪ ܐܲܢ̄ܬܿ
ܠܹܗ. ܗܵܘ̇ ܓܹܝܪ ܕܒܲܟܼܝܼܢܹܗ ܐܝܼܬܼܵܘܗܝ ܗ̄ܘ̣ܵܐ ܠܵܐ ܚܵܫܘܿܫܵܐ: ܒܲܟܼܝܵܢܵܐ
ܕܹܝܢ ܚܵܫܘܿܫܵܐ ܟܝܵܢܵܐ ܕܗܵܢܵܐ ܗܘ̤ܵܐ: ܚܵܫܘܿܫܵܐ ܐܝܼܬܼܵܘܗܝ ܘܡܸܬܼܚܲܒܿܠܵܢܵܐ
ܘܡܸܫܬܿܓܼܢܝܵܢܵܐ. ܗܘ̇ ܓܹܝܪ ܕܒܲܟܼܝܵܢܵܐ ܠܵܐ ܚܵܫܘܿܫܵܐ ܗ̄ܘ̣ ܘܠܵܐ
pb. 296
ܡܸܫܬܲܚܠ̱ܦܵܢܵܐ ܘܠܵܐ ܡܸܫܬܲܓܼܢܝܵܢܵܐ: ܘܠܵܐ ܒܚܲܕܼ ܙܢܵܐ ܚܵܐܹ̇ܫ ܒܲܟܼܝܵܢܵܐ
ܐ̄ܢܵܫܵܝܵܐ: ܗܵܘ̇ ܡܵܐ ܕܠܲܝܬܿ ܠܹܗ ܒܲܟܼܝܵܢܹܗ ܕܢܸܚܲܫ. ܐܸܢ ܕܹܝܢ ܠܗܵܘ̇
ܕܠܲܝܬܿ ܠܹܗ ܕܢܸܚܲܫ ܒܲܟܼܝܵܢܹܗ: ܠܗܵܢܵܐ ܐܵܡܲ݁ܪ ܐܲܢ̄ܬܿ ܕܚܲܫ̣ ܒܲܟܼܝܵܢܵܐ:
ܒܸܕܼܝܵܐ ܗ̄ܘ̣ ܗܵܢܵܐ ܕܢܹܐܡܲܪ ܕܚܲܫ̣ ܒܲܟܼܝܵܢܵܐ ܐ̄ܚܪܹܢܵܐ. ܗܵܘ̇ ܕܹܝܢ ܕܲܠܒܸܕܼܝܵܐ
ܐܵܬܹ̇ܐ: ܡܲܛܥܵܝܘܼ ܡܲܛܥܸܐ. ܘܐܲܝܟܼ ܡܵܢܝܼܢܵܝܹ̈ܐ ܥܵܒܹ̇ܕܼ ܠܹܗ ܠܦܘܼܪܩܵܢܲܢ:
ܕܲܒܼܡܲܛܥ̱ܝܵܢܘܼܬܼܵܐ ܗܘ̤ܵܐ.
ܐܸܡܲܪܘ: ܡܵܢܵܐ ܐܵܡ̇ܪܝܼܢ ܐܢ̄ܬܿܘܿܢ؟ ܐܲܝܕܵܐ ܗ̣̄ܝ ܓܒܼܝܼܬܼܵܐ
ܕܐܵܪ̈ܬܵܕܘܿܟܿܤܹܐ: ܕܗܵܢ̇ܘܿܢ ܕܠܵܐ ܡܸܫܬܲܚ̱ܠܦܵܢܵܐ ܘܠܵܐ ܡܸܫܬܲܓܼܢܝܵܢܵܐ
ܡܲܠܦܝܼܢ ܥܲܠ ܐܲܠܵܗܵܐ ܡܸܠܬܼܵܐ: ܐܵܘ ܕܗܵܢ̇ܘܿܢ ܕܲܟܼܝܵܢܵܐ ܐ̄ܢܵܫܵܝܵܐ ܐܵܡ̇ܪܝܼܢ
ܠܹܗ ܡ̣ܢ ܡܲܪܝܲܡ؟ ܗܵܢ̇ܘܿܢ ܕܚܵܫܵܒܿܝܼܢ ܠܹܗ ܢܲܦܫܵܐ ܡܠܝܼܠܬܼܵܐ
ܘܝܲܕܘܼܥܬܼܵܢܝܼܬܼܵܐ ܘܒܲܪܢܵܫܵܐ ܡܫܲܠܡܵܢܵܐ: ܘܗܵܝܕܹܝܢ ܟܵܦ̇ܪܝܼܢ ܒܕܼܝܼ̈ܠܵܝܵܬܼܵܐ
ܕܐ̄ܢܵܫܘܼܬܼܵܐ: ܘܠܵܐ ܡܵܘܕܹܝܢ ܕܐܝܼܲܝܗܹܝܢ ܐܲܝܟܼ ܕܐܝܼܬܼ ܒܲܟܼܝܵܢܵܐ ܕܒܲܪܢܵܫܵܐ:
ܘܡܵܘܠܵܕܼܵܐ ܘܪܘܼܒܵܝܵܐ ܘܬܲܪܒܿܝܼܬܼܵܐ: ܘܡܸܬܿܕܲܪܓܼܵܢܘܼܬܼܵܐ ܕܩܵܘܡܬܼܵܐ
ܘܲܕܚܸܟܼܡ̱ܬܼܵܐ ܘܲܕܼܛܲܝܒܿܘܼܬܼܵܐ: ܘܦܘܼܩ̈ܕܵܢܹܐ ܘܲܢܛܘܼܪ̈ܵܬܼܗܘܿܢ
ܘܲܡܫܲܡܠ̱ܝܘܼܬܼܗܘܿܢ: ܘܚܲܫܵܐ ܘܲܨܠܝܼܒܼܵܐ ܘܡܵܘܬܵܐ ܘܲܩܝܵܡܬܼܵܐ:
ܠܐܲܠܵܗܵܐ ܡܸܠܬܼܵܐ ܐܲܝܟܼ ܕܲܠܡܸܫܬܲܚ̱ܠܦܵܢܵܐ ܘܡܸܫܬܿܓܼܢܝܵܢܵܐ ܝܵܗ̇ܒܿܝܼܢ ܠܹܗ
ܟܠܗܹܝܢ. ܡܵܢܵܐ ܐܵܡ̇ܪܝܼܢ ܐܢ̄ܬܿܘܿܢ؟ ܐܲܠܸܦܘ ܠܲܒܼܢܲܝ̈ܢܵܫܵܐ: ܐܲܝܟܲܢܵܐ ܙܵܕܹܩ
ܠܡܸܬܼܪܲܥܵܝܘܼ ܘܲܠܡܵܘܕܵܝܘܼ؟ ܐܲܠܵܗܵܐ ܡܸܠܬܼܵܐ ܒܲܟܼܝܵܢܵܐ ܐܝܼܬܼܵܘܗܝ ܬܪܹܝܢ
ܐܘܼܤ̈ܝܼܵܣ: ܐܵܘ ܠܒܲܪܢܵܫܵܐ ܒܲܟܼܝܵܢܹܗ ܬܲܪܬܹܝܢ ܐܘܼܤ̈ܝܼܵܣ ܡܸܬܼܪܲܥܸܐ
ܐܲܢ̄ܬܿ ܕܐܝܼܬܼܵܘܗܝ: ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ؟ ܐܵܘ ܐܲܠܵܗܵܐ ܡܸܠܬܼܵܐ
ܚܕܼܵܐ ܐܘܼܤܝܼܵܐ ܐܝܼܬܼܵܘܗܝ: ܘܐܘܼܤܝܼܵܐ ܕܝܼܠܹܗ ܬܵܘܤܲܦܬܼܵܐ ܠܵܐ ܩܲܒܿܠܲܬ̤:
pb. 297
ܐܲܝܟܼ ܡܵܐ ܕܲܡܬܼܘܿܡܵܐܝܼܬܼ ܐܝܼܬܹܝܗ̇ ܗ̄ܘ̣ܵܬܼ. ܘܐܘܼܤܝܼܵܐ ܕܒܲܪܢܵܐ ܚܕܼܵܐ
ܐܝܼܬܹܝܗ̇ ܡ̣ܢ ܟܝܵܢܵܐ ܕܲܒܼܢܲܝ̈ܢܵܫܵܐ: ܘܐܲܝܟܼ ܟܝܵܢܵܐ ܕܲܒܼܢܲܝ̈ ܐ̄ܢܵܫܵܐ ܐܵܦ
ܐܝܼܬܼܵܘܗܝ ܗ̄ܘ̣ܵܐ ܐܵܦ ܡܸܬܿܕܲܒܲܪ ܗ̄ܘ̣ܐ؟ ܠܵܐ ܬܵܘܕܹܐ ܗܵܠܹܝܢ: ܘܬܼܘܼܒܼ
ܬܸܟܼܦܘܿܪ ܒܗܹܝܢ.
ܐܸܬܼܒܲܪܢܲܫ ܐܲܠܵܗܵܐ ܡܸܠܬܼܵܐ: ܕܢܸܥܒܿܕܼܝܼܗ̇ ܠܐ̄ܢܵܫܘܼܬܼܵܐ ܕܡܘܼܬܼܵܐ
ܕܐܲܠܵܗܵܐ ܒܹܗ: ܘܲܢܚܲܕܬܼܝܼܗ̇ ܒܹܗ ܒܲܟܼܝܵܢܵܐ ܕܐ̄ܢܵܫܘܼܬܼܵܐ. ܘܗܵܝܕܹܝܢ
ܚܲܕܲܬܼܵܗ̇ ܠܲܓܼܒܼܝܼܠܬܹܗ: ܘܚܵܘܝܵܗ̇ ܕܠܵܐ ܚܛܵܗ̈ܝܼܢ ܒܲܢܛܘܼܪ̈ܵܬܼܵܐ
ܕܦܘܼܩ̈ܕܵܢܹܐ. ܐܲܝܟܼ ܡ̇ܢ ܕܗ̤ܘ ܒܲܠܚܘܿܕܼܵܘܗܝ ܤܵܦܹ̇ܩ ܗ̄ܘ̣ܵܐ
ܕܲܢܚܲܕܬܼܘܼܗܝ: ܠܗܵܘ̇ ܕܩܲܕܼܡܵܝܑܬܼ ܢܦܲܠ̣ ܗ̄ܘ̣ܵܐ ܒܡܸܬܼܥܲܒܼܪܵܢܘܼܬܼܵܐ
ܕܲܢܛܘܼܪܬܵܐ ܕܦܘܼܩ̈ܕܵܢܹܬ. ܐܵܘ ܢܲܦܫܹܗ ܝܲܗ̣̄ܒܼ ܚܠܵܦܵܘܗܝ ܠܡܸܛܲܪ
ܐܸܢܘܿܢ: ܡܸܛܠ ܕܠܵܐ ܤܵܦܹ̇ܩ ܗ̄ܘ̣ܵܐ ܕܲܕܼܠܵܐ ܚܛܵܗ̈ܝܼܢ ܢܼܬܼܢܛܲܪ.
ܡܵܕܹܝܢ: ܡܩܵܝܵܐ ܡܲܦܘܼܠܬܲܢ ܕܠܵܐ ܐܵܤܝܘܼܬܼܵܐ. ܐܲܟܼܙܢܵܐ ܕܲܡܫܲܪܝܵܐ
ܕܡܸܬܼܐܲܤܸܐ ܘܲܡܩܵܘܸܐ ܟܲܕܼ ܠܵܐ ܡܗܲܠܸܟܼ: ܐܸܠܵܐ ܡܗܲܠܸܟܼ ܚܠܵܦܵܘܗܝ
ܐܵܤܝܼܵܐ: ܐܵܘ ܛܵܥܹ̇ܝܢ ܠܹܗ. ܘܠܵܐ ܐܵܡܲ݁ܪ ܠܹܗ: ܕܩܘܼܡ ܗܲܠܵܟܼ:
ܕܡܸܛܠ ܗܵܕܹܐ ܐܵܦ ܐܸܬܼܚܠܸܡܬܿ ܕܲܬܼܗܲܠܸܟܼ. ܡܸܛܠ ܗܵܢܵܐ ܓܹܝܪ
ܢܤܲܒ̣ ܕܡܘܼܬܼܵܐ ܕܥܲܒܼܕܵܐ: ܕܲܕܼܠܵܐ ܚܛܵܗ̈ܝܼܢ ܒܲܒܼܪܝܼܬܼܵܗ̇ ܐܝܼܬܹܝܗ̇
ܗ̄ܘ̣ܵܬܼ: ܐܲܝܟܲܢܵܐ ܕܐܵܦ ܒܲܢܛܘܼܪ̈ܵܬܼܵܐ ܕܦܘܼ̈ܩܕܵܢܹܐ ܢܩܲܒܸܿܠ ܫܡܵܐ
ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ. ܘܲܕܼܗܵܘ̇ ܡܵܐ ܕܐܝܼܬܼ ܗ̄ܘ̣ܵܐ ܒܚܘܼܕܵܬܼܵܐ
ܕܲܓܼܒܼܝܼܠܬܹܗ: ܢܸܫܬܲܪܲܪ ܒܲܢܛܘܼܪ̈ܵܬܼܵܐ ܘܒܲܙܗܝܼܪܘܼܬܼܵܐ. ܕܡܸܛܠ ܗܵܕܹܐ
ܗܘ̤ܵܐ ܐܵܦ ܚܘܼܕܵܬܼܵܐ ܕܓܲܒܼܝܼܠܬܼܵܐ: ܡܸܛܠ ܡܸܬܼܒܲܪܢܫܵܢܘܼܬܼܵܐ. ܕܒܼܐܝܼܕܹܗ
ܢܸܬܼܟܲܬܲܫ ܠܘܼܩܒܲܠ ܚܵܘܒܿܬܼܵܐ. ܐܸܢ ܕܹܝܢ ܠܵܐ ܐܸܫܬܲܡܠܝܲܬ̤ ܗܵܝ̇
pb. 298
ܕܡܸܛܠܵܬܼܵܗ̇ ܐܵܦ ܐܸܬܼܒܲܪܢܲܫ: ܠܲܓܼܡܵܪ ܐܵܦܠܵܐ ܡܸܗܘܵܐ ܗܘ̤ܵܬܼ. ܐܸܠܵܐ
ܟܠܗܹܝܢ ܕܡܲܤܒܿܪܵܢܘܼܬܼܵܐ ܘܲܕܼܒܸܕܼܿܝܵܐ ܐܝܼܬܲܝܗܹܝܢ: ܗܵܢܹ̇ܝܢ ܕܠܵܐ
ܡܸܫܬܲܡܥܵܢܘܼܬܼܵܐ ܕܒܲܪܢܵܫܵܐ ܩܲܕܼܡܵܝܵܐ: ܘܐܵܦ ܗܵܠܹܝܢ ܕܚܲܝܒܼܵܝ̈ܗܝ
ܠܡܵܘܬܵܐ. ܗܵܘ̇ ܓܹܝܪ ܕܠܲܝܬܿ ܗ̄ܘ̣ܵܐ ܠܹܗ ܟܝܵܢܵܐ ܕܡܸܫܟܲܚ ܕܢܸܛܲܪ:
ܐܵܦܠܵܐ ܡܸܫܟܲܚ ܗ̄ܘ̣ܵܐ ܕܢܸܛܲܪ. ܡܸܛܠ ܗܵܢܵܐ ܐܵܠܦܵܐ ܒܲܪܢܵܫܵܐ
ܕܲܬܼܪܹܝܢ ܢ̣ܛܲܪ: ܐܸܠܵܐ ܚܠܵܦܵܘܗܝ ܐܲܠܵܗܵܐ ܐܸܬܿܕܲܒܲܪ ܘܲܢ̣ܛܲܪ ܠܦܘܼܩ̈ܕܵܢܹܐ:
ܡܸܛܠ ܕܐܝܼܬܼܵܘܗܝ ܗ̄ܘ̣ܵܐ ܒܲܟܼܝܵܢܵܐ ܗܵܘ̇ ܕܠܵܐ ܚܵܛܹ̇ܐ. ܘܐܸܢ ܗܵܕܹܐ
ܐܝܼܬܹܝܗ̇: ܡ̇ܢ ܐܵܠ̇ܨܵܐ ܗ̄ܘ̣ܵܬܼ ܥܲܠ ܕܘܼܒܵܪܹ̈ܐ ܕܐ̄ܢܵܫܘܼܬܼܵܐ ܕܲܢܚܵܘܸܐ:
ܕܗܵܘ̇ ܕܐܲܠܵܗܵܐ ܡܸܠܬܼܵܐ ܐܝܼܬܼܵܘܗܝ ܗ̄ܘ̣ܵܐ: ܐܸܫ̣ܟܲܚ ܠܡܸܛܲܪ ܠܐ̄ܢܵܫܝ̈ܬܼܵܐ.
ܗܵܠܹܝܢ ܕܠܵܐ ܐܸܫܟܲܚ ܠܡܸܛܲܪ: ܗܵܘ̇ ܕܒܲܪܢܵܫܵܐ ܐܝܼܬܼܵܘܗܝ ܗ̄ܘ̣ܵܐ؟
ܘܐܸܠܵܐ ܕܲܢܚܵܘܸܐ ܕܠܲܝܬܿ ܗ̄ܘ̣ܵܐ ܠܹܗ ܫܘܼܠܛܵܢܵܐ: ܕܟܲܕܼ ܨܵܒܹ̇ܐ ܗ̄ܘ̣ܵܐ
ܕܲܢܫܵܘܙܒܼܝܼܘܗܝ ܡ̣ܢ ܡܵܘܬܵܐ: ܡܸܛܠ ܕܐܲܒܼܵܐ ܠܵܐ ܨܵܒܹ̇ܐ ܗ̄ܘ̣ܵܐ: ܗ̤ܘ
ܚܠܵܦ ܟܠ ܐܸܬܿܕܲܒܲܪ ܘܐܸܬܼܢܛܲܪ ܕܠܵܐ ܚܛܵܗܹ̈ܐ: ܘܐܲܝܟܼ ܐܲܝܢܵܐ ܕܠܵܐ
ܚܛ̣ܵܐ: ܚܠܵܦ ܦܘܼܪܩܵܢܵܐ ܝܲܗ̣̄ܒܼ ܢܲܦܫܹܗ ܥܲܠ ܐܲܦܲܝ̈ ܟܠܗܘܿܢ
ܒܢܲܝ̈ܢܵܫܵܐ.
ܗܵܠܹܝܢ ܐܝܼܬܲܝܗܹܝܢ ܕܐܵܪ̈ܬܵܕܘܿܟܿܤܹܐ: ܕܡܵܘܕܹܝܢ ܚܕܼܵܐ ܐܘܼܤܝܼܵܐ
ܕܐܲܒܼܵܐ ܘܕܲܒܼܪܵܐ: ܘܚܲܕܼ ܨܸܒܼܝܵܢܵܐ ܘܚܲܕܼ ܚܲܝܠܵܐ. ܗܵܠܹܝܢ ܐܝܼܬܲܝܗܹܝܢ
ܕܐܲܝܠܹܝܢ ܕܡܵܘܕܹܝܢ: ܕܠܵܐ ܗ̄ܘ̣ܵܐ ܒܸܕܼܝܵܐ ܘܠܵܐ ܡܲܤܒܿܪܵܢܘܼܬܼܵܐ ܐܝܼܬܲܝܗܹܝܢ
ܗܵܠܹܝܢ ܕܲܡܫܝܼܚܵܐ. ܠܵܐ ܗ̄ܘ̣ܵܐ ܒܐܸܤܟܹܡܵܐ ܒܕܸܡ ܥܵܒܹ̇ܕܼ ܗ̄ܘ̣ܵܐ ܟܲܕܼ
ܟܦܸܢ ܘܲܨܗܝܼ ܘܲܕܼܚܸܠ̣: ܟܲܕܼ ܝܵܠܹ̇ܦ ܗ̄ܘ̣ܵܐ ܟܲܕܼ ܠܵܐ ܝܵܕܲܥ̇: ܘܟܼܠܗܹܝܢ
ܐܲܝܠܹܝܢ ܕܡܸܫ̈ܟܿܚܵܢ ܗ̣̄ܘܲܝ̈ ܠܲܡܦܵܤܘܼ ܕܒܲܪܢܵܫܵܐ ܐܝܼܬܼܵܘܗܝ. ܡܸܛܠ
pb. 299
ܕܐܲܠܵܗܵܐ ܐܝܼܬܼܵܘܗܝ ܗ̄ܘ̣ܵܐ ܒܲܟܼܝܵܢܐ ܒܲܫܪܵܪܵܐ: ܘܒܲܢܵܫܵܐ ܒܲܡܼܝܵܢܵܐ
ܘܒܲܫܪܵܪܵܐ. ܘܡܸܛܠ ܗܵܕܹܐ: ܐܵܠ̇ܨܵܐ ܗ̄ܘ̣ܵܬܼ ܥܲܠ ܐܲܠܵܗܘܼܬܼܵܐ ܕܲܬܼܚܕܼܬܼ
ܠܒܲܪܢܵܫܵܐ: ܘܥܲܠ ܐ̄ܢܵܫܘܼܬܼܵܐ ܕܬܸܬܼܚܲܕܲܬܼ. ܘܲܕܲܬܸܤܲܒܼ ܠܨܲܠܡܵܐ ܗܵܘ̇
ܕܲܒܼܪܵܗ̇: ܘܠܵܘ ܠܐܘܼܤܝܼܵܐ ܕܝܼܠܹܗ. ܘܐܵܠ̇ܵܨܵܐ ܗ̄ܘ̣ܵܬܼ ܕܬܸܛܲܪ ܙܗܝܼܪܵܐܝܼܬܼ
ܠܕܘܼܒܵܪܵܐ ܕܒܲܪܢܵܫܵܐ ܗܵܘ̇ ܕܲܢܦܲܠ̣ ܗ̄ܘ̣ܵܐ: ܡܸܛܠ ܕܐܵܦ ܥܲܠ ܗܵܕܹܐ
ܐܸܬܼܒܲܪܝܲܬ̤: ܐܲܝܟܼ ܕܲܒܼܢܵܡܘܿܤܵܐ ܕܒܲܟܼܝܵܢܵܐ ܕܲܒܼܢܲܝ̈ܢܵܫܵܐ ܬܸܬܿܕܲܒܲܪ: ܘܬܸܛܲܪ
ܨܲܠܡܵܐ ܗܵܘ̇ ܕܒܼܵܪܘܿܝܵܐ: ܒܲܢܛܘܼܪ̈ܵܬܼܵܐ ܕܦܘܼܩ̈ܕܵܢܹܐ ܕܠܵܐ ܚܘܼܒܵܠ:
ܟܲܕܼ ܐܲܠܵܗܘܼܬܼܵܐ ܡܸܚܲܫܚܵܐ ܒܦܲܪܨܘܿܦܵܐ ܕܝܼܠܵܗ̇ ܒܲܕܼܡܘܼܬܼܵܐ
ܕܥܲܒܼܕܵܐ. ܐܲܝܟܲܢܵܐ ܕܲܒܼܗܵܘ̇ ܦܲܪܨܘܿܦܵܐ ܕܒܹܗ ܐܸܬܼܟܲܬܿܫܲܬ̤ ܐ̄ܢܵܫܘܼܬܼܵܐ:
ܒܗܵܢܵܐ ܟܲܕܼ ܬܸܙܟܸܐ ܬܸܫܬܲܪܲܪ ܙܵܟܼܘܼܬܼܵܗ̇. ܐܝܼܬܼ ܗ̄ܘ̣ ܗ̄ܘ̣ܵܐ ܠܵܗ̇ ܓܹܝܪ
ܡ̣ܢ ܚܲܕܼܬܘܼܬܼܵܐ ܕܲܓܼܒܼܝܼܠܬܵܗ̇: ܨܲܠܡܵܐ ܕܲܒܼܪܘܼܬܼܵܐ ܡ̣ܢ ܗܵܘ̇ ܕܲܒܼܪܵܗ̇.
ܤܢܝܼܩܵܐ ܗ̄ܘ̣ܵܬܼ ܕܹܝܢ ܐܵܦ ܥܲܠ ܦܘܼܪܥܵܢܵܐ ܕܲܢܛܘܼܪ̈ܵܬܼܵܐ ܕܦܘܼܩ̈ܕܵܢܹܐ:
ܐܲܝܟܲܢܵܐ ܕܲܕܼܓܼܵܘܵܐ ܢܸܗܘܸܐ ܦܲܪܨܘܼܦܵܐ: ܕܗܵܘ̇ ܕܝܲܗ̣̄ܒܼ: ܘܲܕܼܗܵܘ̇ ܕܢܲܤܒܹܿܗ
ܠܨܲܠܡܵܐ ܡܸܛܠ ܡܸܫܬܲܡܥܵܢܘܼܬܹܗ. ܗܵܘ̇ ܕܡܸܛܠ ܕܠܵܐ ܢܲܛܪܹܗ
ܗ̄ܘ̣ܵܐ ܐܵܕܼܵܡ: ܟܲܕܼ ܐܸܬܼܝܼܗܸܒܼ ܠܹܗ ܡ̣ܢ ܓܒܼܝܼܠܘܼܬܹܗ: ܐܸܬܼܢܤܸܒܼ ܡܸܢܹܗ.
ܠܵܐ ܗܵܟܹܝܠ ܬܵܘܒܸܿܕܼ ܢܝܼܫܵܐ ܕܡܸܬܼܒܲܪܢܫܵܢܘܼܬܼܵܐ: ܐܸܠܵܐ ܗܲܒܼ ܕܝܼ̈ܠܵܝܬܼܵܐ
ܕܐܲܠܵܗܘܼܬܼܵܐ: ܘܗܲܒܼ ܕܝܼ̈ܠܵܝܵܬܼܵܐ ܕܐ̄ܢܵܫܘܼܬܼܵܐ: ܘܗܲܒܼ ܚܲܕܼ ܦܲܪܨܘܿܦܵܐ
ܕܲܚܕܼܵܝܘܼܬܼܵܐ. ܘܟܼܠܗܹܝܢ ܫܲܪܝܼܪ̈ܵܢ ܐܸܢܹܝܢ: ܘܟܼܠܗܹܝܢ ܐܵܪ̈ܕܘܿܟܿܤܵܝܵܢ. ܐܸܢ
ܨܵܒܹ̇ܝܢ ܐܢ̄ܬܿܘܿܢ ܠܡܸܫܡܲܥ: ܗܸܢܹܝܢ ܟܲܕܼ ܗܸܢܹܝܢ ܥܠܲܝܗܹܝܢ ܟܲܕܼ ܥܠܲܝܗܹܝܢ
ܡ̣ܢ ܤܵܗ̈ܕܘܵܬܼܵܐ ܐܲܝܠܹܝܢ ܕܐܲܝܬܿܝܼܬܿܘܿܢ ܫܡܲܥܘ.
ܐܸܡ̇ܪܹܬܼ ܐܸܢܵܐ: ܗܵܕܹܐ ܐܸܬܼܪܲܥܵܘ ܒܢܲܦܫܟܼܘܿܢ: ܗܵܝ̇ ܕܐܵܦ ܝܼܫܘܿܥ
pb. 300
ܡܫܝܼܚܵܐ. ܗܵܘ̇ ܕܟܲܕܼ ܐܝܼܬܼܵܘܗܝ ܒܲܕܼܡܘܼܬܼܵܐ ܕܐܲܠܵܗܵܐ: ܢܲܦܫܹܗ ܤܲܪܸܩ̣:
ܘܲܕܼܡܘܼܬܼܵܐ ܕܥܲܒܼܕܵܐ ܢܤܲܒܼ. ܠܑܵܐ ܐܸܡ݂ܲܪ: ܗܵܕܹܐ ܐܸܬܼܪܲܥܵܘ: ܗܵܝ̇ ܕܐܵܦ
ܐܲܠܵܗܵܐ ܡܸܠܬܼܵܐ: ܕܟܲܕܼ ܐܝܼܬܼܵܘܗܝ ܒܲܕܼܡܘܼܬܼܵܐ ܕܐܲܠܵܗܵܐ: ܕܡܘܼܬܼܵܐ
ܕܥܲܒܼܕܵܐ ܢܤܲܒܼ. ܐܸܠܵܐ ܢܤܲܒܼ ܫܡܵܐ ܕܲܡܫܝܼܚܵܐ: ܐܲܝܟܼ ܩܪܵܝܬܼܵܐ
ܡܫܵܘܕܥܵܢܝܼܬܼܵܐ ܕܲܬܼܪܹܝܢ ܟܝܵܢ̈ܝܼܢ: ܕܠܵܐ ܩܹܘܲܢܕܹܝܢܘܿܣ. ܘܒܹܗ ܡܫܲܡܲܗ:
ܠܲܕܼܡܘܼܬܼܵܐ ܕܥܲܒܼܕܵܐ ܗܵܝ̇ ܕܲܢܤܲܒܼ: ܘܠܲܐܠܵܗܵܐ. ܚܲܕܼ ܗ̤ܘ ܟܲܕܼ ܗ̤ܘ
ܡܫܝܼܚܵܐ. ܬܪܹܝܢ ܟܝܵܢ̈ܝܼܢ ܐܸܡ̇ܪܹܬܼ: ܠܲܕܼܡܘܼܬܼܵܐ ܕܥܲܒܼܕܵܐ ܗܵܝ̇ ܕܲܢܤܲܒܼ:
ܘܠܲܐܠܵܗܵܐ: ܕܠܵܐ ܦܘܼܪܫܵܢܵܐ. ܐܸܡܲܪܘ ܗܵܠܹܝܢ ܕܲܓܼܪܝܼܓܼܘܿܪܝܼܘܿܣ:
ܟܝܵܢܹ̈ܐ ܡ̇ܢ ܬܪܹܝܢ: ܐܲܠܵܗܵܐ ܘܒܲܪܢܵܫܵܐ. ܒܢܲܝ̈ܐ ܕܹܝܢ: ܠܵܘ ܬܪܹܝܢ.
ܐ̄ܚܪܹܝܢ ܓܹܝܪ ܘܲܐ̄ܚܪܹܝܢ ܐܝܼܬܲܝܗܘܿܢ ܗܵܢܘܿܢ: ܕܡܸܗܘܿܢ ܐܝܼܬܼܵܘܗܝ
ܦܵܪܘܿܩܲܢ. ܠܵܘ ܕܹܝܢ ܐ̄ܚܪܹܢܵܐ ܘܲܐ̄ܚܪܹܢܵܐ: ܚܵܣ: ܐܸܠܵܐ ܚܲܕܼ ܒܡܘܼܙܵܓܼܵܐ:
ܐܲܠܵܗܵܐ ܕܐܸܬܼܒܲܪܢܲܫ: ܘܒܲܪܢܵܫܵܐ ܕܐܸܬܼܐܲܠܲܗ. ܘܬܼܘܼܒܼ: ܗܵܘ̇ ܕܲܡܫܲܪܸܐ
ܘܡܸܬܿܕܲܪܲܓܼ ܘܡܸܫܬܲܡܠܸܐ: ܠܵܐ ܐܝܼܬܼܵܘܗܝ ܐܲܠܵܗܵܐ: ܐܵܦܸܢ ܡܸܛܠ
ܡܸܬܼܓܲܠܝܵܢܘܼܬܼܵܐ ܕܲܒܼܩܲܠܝܼܠ ܩܲܠܝܼܠ ܡܸܬܼܐܡܲܪ ܗܵܟܲܢܵܐ. ܠܵܘ
ܠܐܲܠܵܗܵܐ ܡܸܠܬܼܵܐ ܐܸܡ݂ܲܪ ܬܪܹܝܢ ܟܝܵܢ̈ܝܼܢ: ܘܠܵܐ ܗ̄ܘ̣ܵܐ ܕܡ̣ܢ ܬܪܹܝܢ
ܟܝܵܢ̈ܝܼܢ ܗܘ̤ܵܐ. ܘܠܵܐ ܗ̄ܘ̣ܵܐ ܠܒܲܪܢܵܫܵܐ ܬܪܹܝܢ ܟܝܵܢ̈ܝܼܢ: ܘܠܵܐ ܗ̄ܘ̣ܵܐ
ܕܡ̣ܢ ܬܪܹܝܢ ܟܝܵܢ̈ܝܼܢ ܐܝܼܬܼܵܘܗܝ. ܐܸܠܵܐ ܬܪܹܝܢ ܟܝܵܢ̈ܝܼܢ: ܐܲܠܵܗܵܐ ܘܒܲܪܢܵܫܵܐ.
ܢܤܲܒܼ ܓܹܝܪ ܠܫܘܼܡܵܗܵܐ ܕܓܼܵܘܵܐ ܕܲܟܼܝܵܢܹ̈ܐ: ܒܪܵܐ ܘܦܵܪܘܿܩܵܐ. ܘܲܕܼܠܵܐ
ܤܸܕܼܩܵܐ: ܐܲܠܵܗܵܐ ܘܒܲܪܢܵܫܵܐ ܡܫܲܡܲܗ. ܘܠܲܬܼܪܹܝܢ ܟܝܵܢ̈ܝܼܢ ܡܦܲܠܸܓܼ
ܠܗܵܘ̇ ܥܦܝܼܦܵܐ: ܠܗܵܢܘܿܢ ܕܡܸܗܘܿܢ ܐܝܼܬܼܵܘܗܝ ܦܵܪܘܿܩܲܢ. ܘܒܲܚܕܼܵܝܘܼܬܼܵܐ
ܡܸܬܼܐܡܲܪ ܐ̄ܚܪܹܢܵܐ: ܗܵܘ̇ ܡܵܐ ܕܐܝܼܬܼܵܘܗܝ ܗܵܘ̇ ܐ̄ܚܪܹܢܵܐ. ܗܵܟܲܢܵܐ
pb. 301
ܐܲܠܵܗܵܐ ܕܐܸܬܼܒܲܪܢܲܫ: ܘܒܲܪܢܵܫܵܐ ܕܐܸܬܼܐܲܠܲܗ: ܠܵܐ ܗ̄ܘ̣ܵܐ ܕܐܸܫܬܲܚܠܲܦ
ܡ̣ܢ ܐܲܠܵܗܘܼܬܹܗ. ܘܗܵܘ̇ ܕܲܡܫܲܪܸܐ ܘܡܸܬܿܕܲܪܲܓܼ ܘܡܸܫܬܲܡܠܸܐ: ܠܵܐ
ܐܝܼܬܼܵܘܗܝ ܐܲܠܵܗܵܐ: ܐܵܦܸܢ ܡܸܛܠ ܡܸܬܼܓܲܠܝܵܢܘܼܬܹܗ ܕܲܒܼܩܲܠܝܼܠ
ܩܲܠܝܼܠ ܡܸܬܼܐ̱ܡܲܪ ܗܵܟܲܢܵܐ. ܠܡ̇ܢ ܗܵܟܹܝܠ ܐܸܡ݂ܲܪ ܚܲܕܼ؟ ܘܲܒܡ̇ܢ
ܬܪܹܝܢ؟ ܘܲܠܡ̇ܢ ܒܐܘܼܤܝܼܵܐ؟ ܘܲܠܡ̇ܢ ܒܲܚܕܼܵܝܘܼܬܼܵܐ؟܀
ܘܐܵܦ ܐܲܡܒܿܪܘܿܤܝܼܣ ܕܹܝܢ ܗܸܢܹܝܢ ܟܲܕܼ ܗܸܢܹܝܢ ܐܸܡ݂ܲܪ ܘܠܵܘ
ܢܘܼܟܼܪ̈ܵܝܵܬܼܵܐ: ܥܲܠ ܚܕܼܵܝܘܼܬܼܵܐ ܕܐܲܠܵܗܵܐ ܘܲܕܼܒܸܤܪܵܐ. ܒܬܲܪ̈ܬܲܝܗܹܝܢ
ܡܡܲܠܸܠ ܒܪܵܐ ܕܐܲܠܵܗܵܐ: ܡܸܛܠ ܕܒܹܗ ܐܝܼܬܲܝܗܘܿܢ ܗ̄ܘ̣ܵܘ ܬܪ̈ܲܝܗܘܿܢ
ܡܡܲܠܸܠ ܒܪܵܐ ܕܐܲܠܵܗܵܐ: ܡܸܛܠ ܕܒܹܗ ܐܝܼܬܲܝܗܘܿܢ ܗ̄ܘ̣ܵܘ ܬܪ̈ܲܝܗܘܿܢ
ܟܝܵܢ̈ܝܼܢ. ܚܘܼܪܘ ܒܹܗ: ܫܘܼܒܼܚܵܐ ܡ̇ܢ ܕܐܲܠܵܗܵܐ: ܚܲܫܹ̈ܐ ܕܹܝܢ ܕܒܲܪܢܵܫܵܐ܀
ܐܵܦ ܗܵܢܵܐ ܓܹܝܪ ܠܲܚܕܼܵܝܘܼܬܼܵܐ ܕܲܬܼܪ̈ܲܝܗܘܿܢ ܟܝܵܢܹ̈ܐ ܐܵܡܲ݁ܪ: ܠܵܘ ܕܚܲܕܼ
ܟܝܵܢܵܐ ܬܪܹܝܢ ܟܝܵܢ̈ܝܼܢ: ܐܸܠܵܬ ܒܚܲܕܼ ܦܲܪܨܘܼܦܵܐ ܕܲܒܼܪܵܐ ܬܪ̈ܲܝܗܘܿܢ ܟܝܵܢܹ̈ܐ.
ܫܘܼܒܼܚܵܐ ܡ̇ܢ ܕܐܲܠܵܗܘܼܬܼܵܐ: ܚܲܫܹ̈ܐ ܕܹܝܢ ܕܐ̄ܢܵܫܘܼܬܼܵܐ. ܠܵܐ ܗ̄ܘ̣ܵܐ ܓܹܝܪ
ܐ̄ܚܪܹܢܵܐ ܐܵܡܲ݁ܪ ܒܪܵܐ: ܐ̄ܚܪܹܢܵܐ ܕܹܝܢ ܒܪܵܐ ܠܐܲܠܗܵܐ ܡܸܠܬܼܵܐ. ܐܸܠܵܐ
ܕܡܸܕܸܡ ܐ̄ܚܪܹܝܢ ܡܫܵܘܕܲܥ: ܐܲܝܟܼ ܦܲܪܨܘܿܦܵܐ ܘܐܘܼܤܝܼܵܐ. ܐܲܟܼܙܢܵܐ
ܕܲܡܫܵܐ ܕܐܲܠܵܗܵܐ: ܗܵܟܲܢܵܐ ܐܵܦ ܫܡܵܐ ܕܲܒܼܪܵܐ. ܗܵܢܵܐ ܡ̇ܢ: ܡܵܘܕܥܵܢܵܐ
ܗ̄ܘ̣ ܕܲܟܼܝܵܢܹ̈ܐ. ܗܵܘ̇ ܕܹܝܢ: ܕܦܲܪܨܘܿܦܵܠܐ ܕܲܒܼܪܵܐ: ܗ̤ܘ ܟܲܕܼ ܗ̤ܘ ܐܲܠܵܗܵܐ
ܘܲܒܼܪܵܐ ܘܚܲܕܼ ܦܲܪܨܘܼܦܵܐ ܐܝܼܬܼܵܘܗܝ ܕܲܬܼܪ̈ܲܝܗܘܿܢ ܟܝܵܢܹ̈ܐ: ܘܠܵܘ ܕܲܚܕܼܵܐ
ܐܘܼܤܝܼܵܐ. ܡܸܛܠ ܗܵܢܵܐ: ܚܲܕܼ ܒܪܵܐ ܬܪ̈ܲܝܗܘܿܢ: ܘܲܒܼܚܲܕܼ ܒܪܵܐ ܬܪ̈ܵܝܗܘܿܢ
ܟܝܵܢܹ̈ܐ. ܠܵܘ ܚܲܕܼ ܐܲܠܵܗܵܐ ܡܸܠܬܼܵܐ ܬܪܹܝܢ ܟܝܵܢ̈ܝܼܢ: ܘܠܵܘ ܚܕܼܵܐ ܐܲܠܵܗܘܼܬܼܵܐ
ܬܪܹܝܢ ܟܝܵܢ̈ܝܼܢ. ܠܵܐ ܗ̄ܘ̣ܵܐ ܓܹܝܪ ܒܘܼܠܒܵܠܵܐ ܗܘ̤ܵܐ: ܘܠܵܐ ܗܘ̤ܵܐ
ܡܘܼܙܵܓܵܪܐ: ܘܠܵܐ ܬܘܼܒܼ ܫܘܼܚܠܵܦܵܐ ܕܐܘܼܤ̈ܝܼܵܣ ܕܲܠܚܲܕܼ ܟܝܵܢܵܐ
ܕܐܘܼܤܝܼܵܐ: ܘܐܵܦܠܵܐ ܬܘܼܒܼ ܒܪܘܼܟܵܒܼܵܐ ܟܝܵܢܵܝܵܐ ܠܲܟܼܝܵܢܵܐ ܡܪܲܟܿܒܼܵܐ.
pb. 302
ܡܵܢܵܐ ܗܵܟܹܝܠ ܫܡܲܥܬܿܘܿܢ ܒܡܸܠܲܝ̈ ܕܐܝܼܬܼܵܘܗܝ ܢܘܼܟܼܪܵܝܵܐ
ܘܚܲܝܸܒܼܬܿܘܿܢܵܝܗܝ: ܘܤܵܡܬܿܘܿܢ ܗܵܠܹܝܢ؟ ܗܵܘ̇ ܓܹܝܪ ܫܡܵܐ ܕܲܒܼܪܵܐ
ܤܵܐܹ̇ܡ: ܘܗܵܘ̇ ܕܦܵܪܘܿܩܵܐ: ܘܐܵܬܵܢܵܤܝܼܣ ܕܡܵܪܝܵܐ. ܐܲܝܟܲܢܵܐ ܕܹܝܢ
ܐܲܡܪܲܚܘ ܠܡܸܬܼܦܲܠܵܓܼܘܼ ܗܵܢ̇ܘܿܢ ܕܡܸܬܼܩܪܹܝܢ ܟܪܸ̈ܤܛܝܵܢܹܐ: ܐܸܢܗ̤ܘ
ܕܡܵܪܝܵܐ ܗܵܘ̇ ܕܐܸܬܼܝܼܠܸܕܼ ܡ̣ܢ ܡܲܪܝܲܡ ܒܪܵܐ ܐܝܼܬܼܵܘܗܝ ܒܐܘܼܤܝܼܵܐ
ܘܒܲܟܼܝܵܢܵܐ ܕܐܲܠܵܗܵܐ ܐܲܒܼܵܐ: ܒܲܒܼܤܲܪ ܕܹܝܢ ܡ̣ܢ ܙܲܪܥܵܐ ܕܒܹܝܬܼ ܕܵܘܝܼܕܼ
ܐܸܬܼܝܼܠܸܕܼ؟ ܒܸܤܪܵܐ ܓܹܝܪ ܡ̣ܢ ܡܲܪܝܲܡ ܒܬܼܘܼܠܬܼܵܐ. ܕܟܼܝܵܢܵܐ ܗ̄ܘ̣ ܓܹܝܪ
ܐ̄ܢܵܫܵܝܵܐ ܗܵܘ̇ ܕܡ̣ܢ ܡܲܪܝܲܡ ܒܬܼܘܼܠܬܼܵܐ: ܐܵܦ ܐܲܢ̄ܬܿ ܝܵܕܲܥ̇ ܐܲܢ̄ܬܿ.
ܒܲܟܼܝܵܢܵܐ ܡ̇ܢ ܘܒܼܐܘܼܤܝܼܵܐ ܒܪܵܐ ܕܐܲܠܵܗܵܐ: ܒܐܘܼܤܝܼܵܐ ܘܒܲܟܼܝܵܢܵܐ ܕܐܲܠܵܗܵܐ
ܐܲܒܼܵܐ. ܒܲܒܼܤܲܪ ܕܹܝܢ: ܟܝܵܢܵܐ ܐ̄ܢܵܫܵܝܵܐ ܡ̣ܢ ܡܲܪܝܲܡ. ܤܵܡ̣ ܓܹܝܪ ܫܡܵܐ
ܓܵܘܵܢܵܝܵܐ ܕܡܵܪܝܵܐ: ܕܕܲܟܼܝܵܢܵܐ ܘܒܲܟܼܝܵܢܵܐ ܡܸܬܼܪܢܸܐ. ܘܐܝܼܬܼ ܕܐܲܝܠܹܝܢ
ܕܡܵܘܕ̈ܥܵܢܝܵܬܼܵܐ ܐܸܢܹܝܢ ܕܕܼܝܼ̈ܠܵܝܵܬܼܵܐ ܕܲܟܼܝܵܢܹ̈ܐ: ܟܲܕܼ ܡܵܘܕܲܥ ܬܲܪ̈ܬܲܝܗܹܝܢ:
ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ. ܗܵܘ̇ ܡ̣ܢ ܐܲܠܵܗܵܐ ܐܲܒܼܵܐ ܒܲܟܼܝܵܢܵܐ: ܘܗܵܘ̇ ܡ̣ܢ
ܐܲܢ̄ܬܿܬܼܵܐ ܒܲܟܼܝܢܵܐ. ܠܵܘ ܟܲܕܼ ܐܸܡܲ݁ܪ ܠܗܵܘ̇ ܕܡ̣ܢ ܐܲܠܵܗܵܐ ܐܲܒܼܵܐ ܐ̄ܢܵܫܵܝܵܐ:
ܒܲܟܼܝܵܢܹܗ ܡ̣ܢ ܐܲܠܵܗܵܐ ܐܲܒܼܵܐ ܐܵܡܲ݁ܪ ܠܹܗ. ܐܸܠܵܐ ܐܵܦ ܒܕܸܝܼ̈ܠܵܝܵܬܼܵܐ ܟܝܵܢܵܝ̈ܬܼܵܐ
ܠܲܬܼܪ̈ܲܝܗܘܿܢ ܟܝܵܢܹ̈ܐ ܡܵܘܕܲܥ. ܠܵܐ ܗ̄ܘ̣ܵܐ ܕܠܵܐ ܦܲܪܨܘܿܦܵܐ ܘܲܕܼܠܵܐ
ܩܢܘܿܡܵܐ ܥܵܒܹ̇ܕܼ ܠܲܟܼܝܵܢܵܐ ܐ̄ܢܵܫܵܝܵܐ: ܘܠܵܐ ܠܗܵܘ̇ ܐܲܠܵܗܵܝܵܐ. ܘܠܵܘ ܐܲܝܟܼ ܡܸܕܸܡ
ܝܼܬܿܝܼܪܵܐ ܕܠܵܐ ܡܫܲܡܠܲܝ: ܗܘ̤ܵܬܼ ܡܸܬܼܒܲܪܢܫܵܘܼܬܼܵܐ ܕܥܲܠ ܐܲܦܲܝ̈ܢ:
ܐܲܝܟܲܢܵܐ ܕܥܲܠ ܐܲܠܵܗܵܐ ܢܲܤܸܩ ܐ̄ܢܵܫܝ̈ܬܼܵܐ: ܐܲܝܟܼ ܕܐܵܡ̇ܪܝܼܢ ܐܵܪ̈ܝܵܢܹܐ:
ܕܚܲܫ̣ ܒܲܟܼܝܵܢܵܐ ܚܲܫܹ̈ܐ ܕܝܼܠܲܢ: ܒܲܟܼܝܵܢܹܗ ܕܝܼܠܹܗ ܘܲܒܼܦܲܪܨܘܿܦܹܗ:
ܟܲܕܼ ܡܸܕܸܡ ܠܵܐ ܡܵܘܬܲܪ ܒܸܤܪܵܐ. ܐܸܠܵܐ ܐܲܝܟܼ ܡܵܐ ܕܲܡܫܲܡܠܝܵܐܝܼܬܼ
ܡܸܬܼܪܲܢܝܵܐ ܐ̄ܢܵܫܘܼܬܼܵܐ ܐܲܝܟܼ ܟܝܵܢܵܐ ܕܒܲܪܢܵܫܵܐ: ܟܠܗܹܝܢ ܕܲܒܼ̈ܢܲܝ ܐ̄ܢܵܫܵܐ
pb. 303
ܡܫܲܡܠܝܵܐܝܼܬܼ ܐܝܼܬܼ ܠܹܗ: ܟܲܕܼ ܥܵܒܹ̇ܕܼ ܟܲܕܼ ܚܵܐܹ̇ܫ: ܐܲܟܼܡܵܐ ܕܲܡܟܼܵܢ
ܟܝܵܢܵܐ ܕܲܒܼܢܲܝ̈ܢܵܫܵܐ.
ܒܵܗ̇ ܒܲܕܼܡܘܼܬܼܵܐ ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ ܕܫܸܬܿܬܲܥܸܤܪܹ̈ܐ.
ܕܒܲܫܡܹܗ ܠܲܡ ܕܝܼܫܘܿܥ ܟܠ ܒܪܘܿܟ ܬܸܟܿܘܿܦ ܕܒܲܫܡܲܝܵܐ
ܘܒܲܐܪܥܵܐ ܘܕܲܠܬܲܚܬܿ ܡ̣ܢ ܐܲܪܥܵܐ: ܘܟܼܠ ܠܸܫܵܢ ܢܵܘܕܹܐ ܕܡܵܪܝܵܐ
ܗ̄ܘ̣ ܝܼܫܘܿܥ ܡܫܝܼܚܵܐ. ܡܸܛܠ ܕܗܵܘ̇ ܕܲܠܒܸܫ̣: ܠܗܵܘ̇ ܕܐܸܬܼܠܒܸܫ
ܡܝܲܩܲܪ ܐ̄ܢܵܐ. ܘܡܸܛܠ ܗܵܘ̇ ܕܠܵܐ ܡܸܬܼܚܙܸܐ: ܤܵܓܹ̇ܕܼ ܐ̄ܢܵܐ ܠܗܵܘ̇
ܕܡܸܬܼܚܙܸܐ. ܠܵܐ ܡܸܬܼܦܲܪܸܫ ܐܲܠܵܗܵܐ ܡ̣ܢ ܗܵܘ̇ ܕܡܸܬܼܚܙܸܐ: ܡܸܛܠ
ܗܵܢܵܐ ܐܝܼܩܵܪܹܗ ܕܗܵܘ̇ ܕܠܵܐ ܡܸܬܼܦܪܸܫ ܠܵܐ ܡܦܲܪܸܫ̣ ܐ̄ܢܵܐ. ܡܦܲܪܸܫ
ܐ̄ܢܵܐ ܟܝܵܢܹ̈ܐ: ܘܲܡܚܲܝܸܕܼ ܐ̄ܢܵܐ ܠܤܸܓܼܕܬܼܵܐ܀ ܒܵܥܹ̇ܐ ܐ̄ܢܵܐ ܘܲܡܦܝܼܣ ܐ̄ܢܵܐ
ܠܟܼܘܿܢ: ܕܲܒܼܟܼܠ ܕܘܼܟ ܙܗܝܼܪܵܐܝܼܬܪ ܬܸܬܼܒܲܩܘܿܢ: ܕܠܵܐ ܥܵܕܹܠ ܠܝܼ
ܐܲܝܟܼ ܕܒܲܡܢܵܬܼܵܐ ܡܢܵܬܼܵܐ ܤܵܐܹ̇ܩ ܐ̄ܢܵܐ ܘܲܡܦܲܠܸܓܼ ܐ̄ܢܵܐ ܐܲܠܵܗܘܼܬܼܵܐ
ܘܲܠܐ̄ܢܵܫܘܼܬܼܵܐ: ܒܲܕܼܡܘܼܬܼ ܐܲܝܠܹܝܢ ܕܲܒܼܕܼܘܼܬܼܵܐ ܦܪܝܼܫܝܼܢ ܡ̣ܢ ܚܕܼܵܕܹ̈ܐ.
ܐܲܝܟܲܢܵܐ ܓܹܝܪ ܡܸܬܼܦܪܸܫ ܗܵܘ̇ ܠܵܒܼܘܿܫܵܐ ܡ̣ܢ ܠܒܼܘܼܫܹܗ: ܘܗܵܘ̇
ܕܲܟܼܤܸܐ ܡ̣ܢ ܗܵܘ̇ ܕܲܓܼܠܸܐ: ܐܲܝܟܲܢܵܐ ܕܐܵܦ ܒܗܹܝܢ ܒܡܸ̈ܠܲܝܢ ܐܵܘܤܸܦܢ:
ܕܠܵܐ ܦܪܝܼܫ ܐܲܠܵܗܵܐ ܡ̣ܢ ܗܵܘ̇ ܕܡܸܬܼܚܙܸܐ܀
ܐܸܠܵܐ ܐܵܡܲ݁ܪ ܐܲܢ̄ܬܿ ܠܝܼ: ܕܲܡܦܲܪܸܫ ܐ̄ܢܵܐ ܠܲܟܼܝܵܢܹ̈ܐ. ܐܲܝܟܲܢܵܐ ܗܵܟܹܝܠ
ܡܸܬܼܦܟ̇ܫܝܼܢ ܟܝܵܢܹ̈ܐ: ܗܵܢܘܿܢ ܕܠܵܐ ܡܸܢܼܦܲܪܫܝܼܢ؟ ܒܡܸܠܬܼܵܐ ܗ̄ܘ̣ ܓܹܝܪ
ܡܸܬܼܝܲܕܼܥܝܼܢ ܐܲܝܟܼ ܠܘܼܤ̈ܝܼܵܣ: ܕܠܵܐ ܒܘܼܠܒܵܠܵܐ ܕܠܵܐ ܡܘܼܙܵܓܼܵܐ. ܐܲܝܟܲܢܵܐ
ܕܒܲܚܕܼܵܝܘܼܬܼܵܐ ܢܛܝܼܪܝܼܢ ܬܪ̈ܲܝܗܘܿܢ ܟܝܵܢܹ̈ܐ ܒܲܟܼܝܵܢܵܝܵܬܼ̈ܗܘܿܢ: ܘܲܒܼܕܼܝ̈ܠܵܝܵܬܼܵܐ
pb. 304
ܕܐܘܼܤܝܼܵܐ ܟܝܵܢܵܐܝܼܬܼ. ܐܲܝܟܼ ܕܲܟܼܝܵܢܵܐ ܐܲܠܵܗܵܝܵܐ ܒܲܟܼܝܵܐ ܕܐܲܠܵܗܵܐ ܢܸܬܼܪܢܸܐ:
ܘܲܟܼܝܵܢܵܐ ܐ̄ܢܵܫܵܝܵܐ ܒܲܟܼܝܵܢܵܐ ܕܐ̄ܢܵܫܘܼܬܼܵܐ ܒܐܘܼܤܝܼܵܐ ܢܸܬܼܪܢܸܐ. ܗܵܢܵܐ ܡܦܲܪܸܫ
ܒܲܡ̈ܢܵܘܵܢ ܡ̈ܢܵܘܵܢ: ܗܵܘ̇ ܕܐܸܡܲ݁ܪ ܕܒܲܐܠܵܗܘܼܬܼܵܐ ܡܸܬܼܪܲܢܝܵܐ ܐ̄ܢܵܫܘܼܬܼܵܐ
ܒܲܟܼܝܵܢܵܐ: ܘܠܵܐ ܗ̄ܘ̣ܵܐ ܐ̄ܢܵܫܘܼܬܼܵܐ ܐܲܠܵܗܘܼܬܼܵܐ ܡܸܬܼܪܲܢܝܵܐ. ܘܠܵܐ ܗ̄ܘ̣ܵܐ
ܐܲܠܵܗܵܐ ܡܸܠܬܼܵܐ ܒܲܬܼܪ̈ܲܝܗܘܿܢ ܟܝܵܢܹ̈ܐ: ܐܵܘ ܒܐܸܤܟܹܿܡܵܐ: ܐܵܘ ܒܠܵܐ ܩܘܼܝܵܡܵܐ
ܕܒܸܤܪܵܐ: ܐܵܘ ܒܚܵܫܘܿܫܘܼܬܼܵܐ: ܐܵܘ ܒܲܡܥܒܿܕܼܵܢܘܼܬܼܵܐ ܕܲܪܓܸܫܵܬܼܵܐ ܘܒܲܟܼܝܵܢܵܐ
ܕܒܸܤܪܵܐ. ܐܸܢ ܓܹܝܪ ܠܵܘ ܗܵܟܲܢܵܐ ܡܸܬܼܪܢܸܐ. ܐܵܦܠܵܐ ܐܚܪܵܢܝܵܐܝܼܬܼ
ܡܸܬܼܪܢܸܐ. ܘܠܵܐ ܬܘܼܒܼ ܐ̄ܚܪܵܢܝܵܐܝܼܬܼ ܠܒܲܪ ܡ̣ܢ ܗܵܟܲܢܵܐ ܡܸܫܟܿܚܵܐ:
ܕܗܵܘ̇ ܕܲܕܼܠܵܐ ܬܚܘܼܡ ܐܝܼܬܼܵܘܗܝ ܘܠܵܐ ܡܸܤܬܲܝܟܼܵܢܵܐ: ܒܦܘܼܪܫܵܢܵܐ
ܢܤܲܝܟܼܝܼܘܗܝ. ܐܵܦ ܓܹܝܪ ܒܹܗ ܒܗܵܘ̇ ܡܵܐ ܕܒܸܐܓܲܪܬܹܗ ܐܵܡܲ݁ܪ ܗ̄ܘ̣ܵܐ:
ܗ̤ܘ ܗܵܢܵܐ ܪܸܥܝܵܢܵܐ ܐܝܼܬܼ ܠܹܗ. ܠܵܐ ܠܲܡ ܡܸܬܼܒܲܛܠܝܼܢ ܫܘܼܚ̈ܠܵܦܹܐ
ܕܲܟܼܝܵܢܹ̈ܐ: ܡܸܛܠ ܚܕܼܵܝܘܼܬܼܵܐ. ܒܫܘܼܚ̈ܠܵܦܹܐ ܓܹܝܪ ܟܝܵܢܵܝܹ̈ܐ: ܠܗܵܠܹܝܢ
ܕܲܡܚܲܝܕܹܝܢ ܡܦܲܪܸܫ: ܟܲܕܼ ܠܵܐ ܡܸܬܼܦܲܪܫܵܢܵܐܝܼܬܼ ܦܪܲܫ̣: ܒܡܸܠܬܼܵܐ ܓܹܝܪ
ܕܐܘܼܤܝܼܵܐ ܦܪܲܫ̣. ܐ̄ܚܪܹܬܼܵܐ ܗ̣̄ܝ ܓܹܝܪ ܡܸܠܬܼܵܐ ܘܪܸܥܝܵܢܵܐ ܕܐܲܠܵܗܘܼܬܼܵܐ:
ܘܲܐ̄ܚܪܹܬܼܵܐ ܗ̣̄ܝ ܕܐ̄ܢܵܫܘܼܬܼܵܐ. ܗܵܢ̇ܘܿܢ ܓܹܝܪ ܡܸܬܼܦܲܪ̈ܫܵܢܹܐ: ܡܸܬܼܦܲܪ̈ܫܵܢܹܐ
ܐܝܼܬܲܝܗܘܿܢ. ܐܸܠܵܐ ܬܪܹܝܢ ܟܝܵܢ̈ܝܼܢ ܐܸܡܲ݁ܪ ܐ̄ܢܵܐ: ܕܲܐ̄̇ܚܪܹܢܵܐ ܡ̇ܢ ܗܵܘ̇
ܕܲܠܒܸܫ̣: ܘܲܐ̄ܚܪܹܢܵܐ ܗܵܘ̇ ܕܡܸܬܼܠܒܸܫ. ܘܲܬܼܪܹܝܢ ܐܸܢܘܿܢ ܦܲܪ̈ܨܘܿܦܹܐ:
ܕܗܵܘ̇ ܕܲܠܒܸܫ̣: ܘܲܕܼܗܵܘ̇ ܕܡܸܬܼܠܒܸܫ. ܐܸܠܵܐ ܡ̣ܢ ܬܪܹܝܢ ܟܝܵܢ̈ܝܼܢ:
ܐܵܦ ܐܲܢ̄ܬܿ ܡܵܘܕܸܐ ܐܲܢ̄ܬܿ. ܠܵܘ ܕܠܵܐ ܦܲܪܨܘܿܦܵܐ ܘܠܵܘ ܕܠܵܐ ܩܢܘܿܡܵܐ:
ܒܫܘܼܚ̈ܠܵܦܹܐ ܕܲܟܼܝܵܢܹ̈ܐ ܡܸܬܼܝܼܕܲܥ ܟܠܚܲܕܼ ܡܸܢܘܗܘܿܢ. ܠܵܘ ܬܪܹܝܢ
ܦܲܪ̈ܨܘܿܦܹܐ ܕܲܒܼ̈ܢܲܝܵܐ ܡܸܬܼܪܢܹܝܢ: ܘܠܵܐ ܬܘܼܒܼ ܬܪܹܝܢ ܦܵܪ̈ܨܘܿܦܹܐ
pb. 305
ܕܲܒܼܢܲܝ̈ܢܵܫܵܐ: ܐܸܠܵܐ ܕܚܲܕܼ ܒܲܪܢܵܫܵܐ. ܕܒܹܗ ܟܲܕܼ ܒܹܗ ܒܲܙܢܵܐ ܡܸܤܬܲܥܪܵܐ:
ܐܵܦ ܡ̣ܢ ܗܵܘ̇ ܐ̄ܚܪܹܢܵܐ. ܠܦܲܪܨܘܿܦܵܐ ܓܹܝܪ: ܘܠܵܘ ܠܐܘܼܤܝܼܵܐ ܘܠܲܟܼܝܵܢܵܐ
ܗܘ̤ܵܬܼ ܚܕܼܵܝܘܼܬܼܵܐ ܕܦܲܪ̈ܨܘܼܦܹܐ. ܠܵܐ ܗ̄ܘ̣ܵܐ ܐܲܝܟܼ ܡ̇ܢ ܕܲܚܕܼܵܐ ܐܘܼܤܝܼܵܐ
ܕܠܵܐ ܩܢܘܿܡܵܐ ܡܸܬܼܪܲܢܝܵܐ: ܐܲܝܟܼ ܐܲܝܕܵܐ ܕܠܲܚܕܼܵܐ ܐܘܼܤܝܼܵܐ ܐܸܬܼܚܲܕܲܬ̤.
ܘܚܲܕܼ ܦܲܪܨܘܿܦܵܐ ܕܼܵܚܕܵܐ ܐܘܼܤܝܼܵܐ ܐܝܼܬܼܵܘܗܝ. ܐܸܠܵܐ ܡܩܝܼܡܝܼܢ ܟܝܵܢܹ̈ܐ
ܒܦܲܪ̈ܨܘܿܦܲܝܗܘܿܢ ܘܒܲܟܼܝܵܢܲܝ̈ܗܘܿܢ: ܘܲܒܼܦܲܪܨܘܿܦܵܐ ܕܲܚܕܼܵܝܘܼܬܼܵܐ.
ܒܦܲܪܨܘܿܦܵܬ ܓܹܝܪ ܟܝܵܢܵܝܵܐ ܕܲܐ̄ܚܪܹܢܵܐ: ܐܵܦ ܐ̄ܚܪܹܢܵܐ ܒܹܗ ܟܲܕܼ ܒܹܗ
ܡܸܬܼܚܲܫܲܚ ܡܸܛܠ ܚܕܼܵܝܘܼܬܼܵܐ. ܘܗܵܟܲܢܵܐ: ܚܲܕܼ ܦܲܪܨܘܿܦܵܐ ܕܲܬܼܪ̈ܲܝܗܘܿܢ
ܟܝܵܢܹ̈ܐ. ܒܦܲܪܨܘܿܦܵܐ ܕܲܚܕܼܵܐ ܐܘܼܤܝܼܵܐ: ܦܲܪܨܘܿܦܵܐ ܕܐܘܼܤܝܼܵܐ ܐ̄ܚܪܹܬܼܵܐ
ܡܸܬܼܚܲܫܲܚ ܒܹܗ ܟܲܕܼ ܒܹܗ. ܠܐܲܝܕܵܐ ܓܹܝܪ ܐܘܼܤܝܼܵܐ: ܕܠܵܐ ܦܲܪܨܘܿܦܵܐ
ܒܵܥܹ̇ܐ ܐܲܢ̄ܬܿ ܠܡܸܥܒܲܕܼ؟ ܠܗܵܝ̇ ܕܐܲܠܵܗܘܿܬܼܵܐ؟ ܘܲܠܗܵܝ̇ ܕܐ̄ܢܵܫܘܼܬܼܵܐ؟
ܡܵܕܹܝܢ ܠܵܐ ܐܲܠܵܗܵܐ ܡܸܠܬܼܵܐ ܬܹܐܡܲܪ ܒܸܤܪܵܐ: ܘܐܵܦ ܠܵܐ
ܠܒܸܤܪܵܐ ܒܪܵܐ.
ܐܸܢ ܕܹܝܢ ܠܐܲܠܵܗܵܐ ܡܸܠܬܼܵܐ ܬܹܐܡܲܪ ܒܲܬܼܪ̈ܲܝܗܘܿܢ ܟܝܵܢܹ̈ܐ: ܐܵܠܵܗܵܐ
ܘܒܲܪܢܵܫܵܐ: ܠܒܲܪܢܵܫܵܐ ܕܹܝܢ ܘܠܵܐ ܡܸܕܸܡ. ܡܸܕܸܡ ܐ̄ܚܪܹܢܵܐ ܙܵܕܹܩ
ܠܡܸܪܢܵܐ ܥܠܲܝܟܼ. ܕܐܵܘ ܫܡܵܐ ܘܐܸܤܟܹܡܵܐ ܒܲܠܚܘܿܕܼ ܕܒܲܪܢܵܫܵܐ
ܕܠܵܐ ܟܝܵܢܵܐ ܡܸܕܸܡ ܐܵܡ݂ܲܪ ܐܲܢ̄ܬܿ ܕܡܸܢܹܗ ܡܸܫܬܲܡܲܗ ܐܲܠܵܗܵܐ ܡܸܠܬܼܵܐ:
ܐܵܘ ܐܲܝܟܼ ܡ̇ܢ ܕܐ̄ܢܵܫܘܼܬܼܵܐ ܡܸܕܸܡ ܠܵܐ ܐܵܘܬܿܪܲܬ̤ ܒܲܟܼܝܵܢܵܐ ܠܦܲܪܨܘܿܦܵܐ
ܕܲܡܕܲܒܿܪܵܢܘܼܬܼܵܐ ܕܲܚܠܵܦܲܝܢ: ܐܵܘ ܡܸܛܠ ܕܢܸܫܟܲܚ ܕܢܸܬܼܓܿܠܸܐ ܘܲܕܼܢܸܚܲܫ
ܚܲܫܹ̈ܐ ܐ̄ܢܵܫܵܝܹ̈ܐ ܐܲܠܵܗܵܐ ܡܸܠܬܼܵܐ ܒܠܵܐ ܨܸܒܼܝܵܢܹܗ. ܕܟܲܕܼ ܒܠܵܐ
ܪܲܓܿܘܼܫܬܼܵܢܘܼܬܼܵܐ
ܚܵܐܹ̇̄ܫܵܐ ܗ̄ܘ̣ܵܬܼ ܐ̄̈ܢܵܫܘܼܬܼܵܐ: ܐܲܠܵܗܵܐ ܡܸܠܬܼܵܐ ܚܵܐܹ̇ܫ ܗ̄ܘ̣ܵܐ ܚܲܫܹ̈ܐ ܕܦܲܓܼܪܵܐ
pb. 306
ܘܚܲܫܹ̈ܐ ܕܢܲܦܫܵܐ ܘܚܲܫܹ̈ܐ ܕܡܲܕܿܥܵܐ. ܘܥܵܒܹ̇ܕܼ ܗ̄ܘ̣ܵܐ: ܘܡܸܬܼܥܒܸܕܼ.
ܘܡܸܛܠ ܗܵܢܵܐ ܠܟܼܠܗܹܝܢ ܥܵܒܹ̇ܕܼ ܐܲܢ̄ܬܿ ܠܗܹܝܢ ܕܐܲܠܵܗܵܐ ܡܸܠܬܼܵܐ:
ܘܡܲܦܸܩ ܐܲܢ̄ܬܿ ܠܐ̄ܢܵܫܘܼܬܼܵܐ. ܐܸܢ ܡ̣ܢ ܗܵܕܹܐ ܕܲܬܼܪܹܝܢ ܟܝܵܢ̈ܝܼܢ ܕܐܵܘܕܝܼܬܿ
ܥܲܡܝ ܡܸܫܬܸܿܠ ܐܲܢ̄ܬܿ: ܒܵܗ̇ ܟܲܕܼ ܒܵܗ̇ ܒܡܸܠܬܼܵܐ ܐܸܫܬܲܐܠ ܐܵܦ
ܡ̣ܢ ܕܬܹܐܡܲܪ ܕܐܸܬܼܒܲܤܲܪ ܐܲܠܵܗܵܐ ܡܸܠܬܼܵܐ: ܐܵܦ ܡ̣ܢ ܒܸܤܪܵܐ ܕܒܹܗ
ܐܸܬܼܒܲܤܲܪ ܐܵܘ ܐܸܬܼܒܲܪܢܲܫ. ܒܵܗ̇ ܒܲܕܼܡܘܼܬܼܵܐ: ܐܵܦ ܥܲܠ ܒܲܪܢܵܫܵܐ ܐܵܦ
ܥܲܠ ܐܲܠܵܗܵܐ. ܐܸܠܵܐ ܠܵܘ ܬܪܹܝܢ ܐܲܠܵܗܹ̈ܐ ܡܸܠܹ̈ܐ: ܘܠܵܘ ܬܪܹܝܢ ܒܸܤܪܹ̈ܐ
ܥܵܒܹ̇ܕܼ ܗܵܘ̇ ܕܗܵܟܲܢܵܐ ܐܵܡܲ݁ܪ. ܐܸܠܵܐ ܡܫܲܡܠܝܵܐܝܼܬܼ ܕܠܵܐ ܒܘܼܨܵܪ
ܥܵܒܹ̇ܕܼ ܬܵܘܕܝܼܬܼܵܐ: ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ ܕܒܼܵܗ̇ ܐܸܬܼܒܲܪܢܫܲܬ̤. ܕܠܵܐ
ܒܡܲܤܒܿܪܵܢܘܼܬܼܵܐ ܬܸܬܼܪܢܸܐ ܐ̄ܢܵܫܘܼܬܼܵܐ: ܐܵܦܠܵܐ ܬܘܼܒܼ ܒܫܘܼܚܠܵܦ
ܐܘܼܤܝܼܵܐ ܘܲܒܼܫܘܼܚܠܵܦ ܕܡܘܼܬܼܵܐ: ܕܲܟܼܝܵܢܵܐ ܕܐܲܠܵܗܵܐ ܡܸܠܬܼܵܐ ܠܲܟܼܝܵܢܵܐ
ܕܒܲܪܢܵܫܵܐ. ܘܟܲܕܼ ܗܵܟܲܢܵܐ ܗܵܘ̇ܝܵܐ: ܐܵܦ ܠܵܐ ܒܡܘܼܙܵܓܼܵܐ ܘܲܒܼܒܼܘܼܠܒܵܠܵܐ
ܐܵܘ ܒܫܘܼܚܠܵܦ ܐܘܼܤܝܼܵܐ: ܘܐܵܦܠܵܐ ܬܘܼܒܼ ܒܪܘܼܟܵܒܼܵܐ ܟܝܵܢܵܐ
ܕܐ̄ܢܵܫܘܼܬܼܵܐ ܡܸܬܼܪܢܸܐ. ܟܠܗܹܝܢ ܡܲܤ̈ܠܲܝܵܬܼܵܐ ܐܸܢܹܝܢ
ܘܲܕܼܚܘܼܒܵܠܵܐ: ܘܲܠܚܲܢܦܘܼܬܼܵܐ ܘܲܠܗܲܪ̈ܵܛܝܼܩܹܐ ܠܵܚ̈ܡܵܢ: .ܘܲܠܕܼܝܼ̈ܠܵܝܵܬܼܵܐ
ܕܟܼܠ ܟܝܵܢ̈ܝܼܢ ܡܚܲܒ̈ܠܵܢ.
ܐܸܠܵܐ ܐܘܿ ܕܲܝܵܢܹ̈ܐ ܡܝܲܬܿܪܹ̈ܐ: ܨܵܒܹ̇ܝܢ ܐܢ̄ܬܿܘܿܢ ܠܡܲܝܬܝܘܼ ܤܵܗܕܘܼܬܼܵܐ
ܕܡ̣ܢ ܐܲܒܼ̈ܗܵܬܼܵܐ ܕܐܸܬܼܟܲܬܼܒܲܬ̤ ܡܸܢܟܼܘܿܢ ܕܐܸܬܼܚܲܫܲܚ ܒܵܗ̇؟ ܕܟܲܕܼ
ܒܤܵܗ̈ܕܹܐ ܕܠܵܐ ܦܘܼܠܓܼܵܐ ܐܸܬܼܚܲܫܲܚ: ܬܹܐܠܦܘܼܢ ܕܐܵܦ ܐܸܢܵܐ ܗܸܢܹܝܢ
ܗܵܠܹܝܢ ܐܸܡ̇ܪܹܬܼ. ܘܚܲܝܸܒܼܬܿܘܿܢܵܢܝ ܐܲܝܟܼ ܕܠܲܐܝܢܵܐ ܕܠܵܘ ܗܵܠܹܝܢ ܐܸܡܲ݁ܪ:
ܘܐܲܝܟܼ ܕܲܒܼܚܸܡܬܼܵܐ ܒܲܥܪܝܼܪܵܝܬܼܵܐ ܘܲܒܼܚܸܫܘܿܡܟܼܵܐ ܚܲܝܸܒܼܬܿܘܿܢܵܝܢ. ܡܵܢܵܐ ܓܹܝܪ
pb. 307
ܡܸܕܸܡ ܐ̄ܚܪܹܝܢ ܐܸܡ̇ܪܹܬܼ: ܠܒܲܪ ܡ̣ܢ ܗܵܘ̇ ܕܲܓܼܪܝܼܓܼܘܿܪܝܼܘܼܣ ܐܸܡ݂ܲܪ؟
ܐ̄ܚܪܹܝܢ ܓܹܝܪ ܘܲܐ̄ܚܪܹܝܢ ܐܝܼܬܲܝܗܘܿܢ ܗܵܢ̇ܘܿܢ ܕܡܸܢܗܘܿܢ ܐܝܼܬܼܵܘܗܝ
ܦܵܪܘܼܩܲܢ. ܐܸܢܗ̤ܘ ܕܠܵܘ ܗ̤ܝ ܟܲܕܼ ܗ̤ܝ ܐܝܼܬܹܝܗ̇ ܗܵܝ̇ ܕܠܵܐ ܡܸܬܼܚܲܙܝܵܢܵܐ
ܠܗܵܝ̇ ܕܡܸܬܼܚܲܙܝܵܢܵܐ: ܘܗܵܝ̇ ܕܲܕܼܠܵܐ ܙܲܒܼܢܵܐ ܠܗܵܝ̇ ܕܲܬܼܚܹܝܬܼ ܙܲܒܼܢܵܐ.
ܠܵܘ ܕܹܝܢ ܐ̄ܚܪܹܢܵܐ ܘܲܐ̄ܚܪܹܢܵܐ: ܚܵܣ: ܬܪ̈ܲܝܗܘܿܢ ܓܹܝܪ ܚܲܕܼ ܒܡܘܼܙܵܓܼܵܐ:
ܐܲܠܵܗܵܐ ܡ̇ܢ ܕܐܸܬܼܒܲܪܢܲܫ: ܒܲܪܢܵܫܵܐ ܕܹܝܢ ܕܐܸܬܼܐܲܠܗ܀ ܚܙܝܼ ܓܹܝܪ
ܕܠܲܠܒܼܘܼܫܵܐ ܐܵܡܲ݁ܪ ܡܸܬܼܚܲܙܝܵܢܵܐ: ܘܲܠܗܵܘ̇ ܕܲܠܒܸܫ̣ ܠܵܐ ܡܸܬܼܚܲܙܝܵܢܵܐ.
ܐ̄ܚܪܹܝܢ ܓܹܝܪ ܘܲܐ̄ܚܪܹܝܢ ܐܝܼܬܼܵܘܗܝ: ܐܲܠܵܗܵܐ ܘܒܲܪܢܵܫܵܐ. ܠܵܘ ܕܹܝܢ ܐ̄ܚܪܹܢܵܐ
ܘܲܐ̄ܚܪܹܢܵܐ ܐܝܼܬܼܵܘܗܝ: ܐܸܠܵܐ ܒܦܲܪܨܘܿܦܵܐ ܚܲܕܼ ܒܲܚܕܼܵܝܘܼܬܼܵܐ: ܕܐܲܠܵܗܵܐ
ܕܐܸܬܼܒܲܪܢܲܫ: ܘܒܲܪܢܵܫܵܐ ܕܐܸܬܼܐܲܠܲܗ. ܐܲܠܵܗܵܐ ܡ̇ܢ ܡ̣ܢ ܒܲܪܢܵܫܵܐ
ܡܸܬܼܐ̱ܡܲܪ ܕܐܸܬܼܒܲܪܢܲܫ: ܘܒܲܪܢܵܫܵܐ ܡ̣ܢ ܐܲܠܵܗܵܐ ܡܸܬܼܐ̱ܡܲܪ ܕܐܸܬܼܐܲܠܲܗ:
ܠܵܐ ܗ̄ܘ̣ܵܐ ܕܐܸܫܬܲܚܠܲܦ ܡ̣ܢ ܐܲܠܵܗܘܼܬܼܵܐ. ܐܲܠܵܗܵܐ ܡ̇ܢ ܐܲܠܵܗܵܐ ܩ̣ܵܘܝܼ
ܘܐܸܬܼܒܲܪܢܲܫ: ܘܒܲܪܢܵܫܵܐ ܒܲܪܢܵܫܵܐ ܩܵܘܝܼ ܘܐܼܬܲܠܲܗ. ܠܦܲܪܨܘܿܦܵܐ ܓܹܝܪ
ܕܲܚܕܼܵܕܹ̈ܐ ܢܵܤ̇ܒܿܝܼܢ: ܘܠܵܘ ܠܲܟܼܝܵܢܹ̈ܐ. ܡܸܛܠ ܗܵܕܹܐ ܐ̄ܚܪܹܝܢ ܘܲܐ̄ܚܪܹܝܢ:
ܘܠܵܘ ܐ̄ܚܪܹܢܵܐ ܘܲܐ̄ܚܪܹܢܵܐ ܒܦܲܪܨܘܼܦܵܐ. ܒܡܸܠܬܼܵܐ ܓܹܝܪ ܕܡܸܬܼܐ̱ܡܲܪ
ܕܐܸܬܼܐܲܠܲܗ ܒܲܪܢܵܫܵܐ: ܒܵܗ̇ ܟܲܕܼ ܒܵܗ̇ ܒܡܸܠܬܼܵܐ ܡ̣ܢ ܟܠ ܦܪܘܿܣ
ܝܵܗ̇ܒܿܝܼܢ ܠܹܗ ܕܢܸܤܬܿܓܸܕܼ ܘܢܸܬܲܡܲܫ. ܒܗܵܢܵܐ ܕܒܹܗ ܘܡܸܢܹܗ ܗܘ̤ܵܬܼ
ܠܹܗ ܕܢܸܬܼܐܲܠܲܗ: ܒܲܚܕܼܵܐ ܤܸܓܼܕܬܼܵܐ ܒܵܗ̇ ܟܲܕܼ ܒܵܗ̇: ܐܵܦܸܢ ܐܲܝܟܼ ܐ̄ܚܪܹܢܵܐ
ܘܲܐ̄ܚܪܹܢܵܐ ܡܸܬܼܪ̱ܢܸܐ ܒܲܟܼܝܵܢܹ̈ܐ: ܘܲܕܼܠܵܐ ܦܘܼܪܵܫ ܒܲܚܕܼܵܝܘܼܬܼܵܐ. ܒܡܸܠܬܼܵܐ
ܕܹܝܢ ܕܲܟܼܝܵܢܹ̈ܐ ܕܲܦܪܝܼܫܝܼܢ: ܐ̄ܚܪܹ݂ܢܵܐ ܘܲܐ̄ܚܪܹܢܵܐ ܐܵܦ ܐܝܼܬܼܵܘܗܝ ܘܡܸܬܼܐܢܸܐ.
ܐܲܝܠܹܝܢ ܕܫܵܠ̈ܡܵܢ ܠܗܵܠܹܝܢ ܐܸܡ݂ܲܪ ܘܐܵܦ ܐܵܬܵܢܵܤܝܼܣ. ܗܵܫܵܐ ܟܲܕܼ
ܡܸܠܬܼܵܐ ܗܘ̤ܵܐ ܒܲܪܢܵܫܵܐ: ܘܲܥܒܲܕܼ ܐܸܢܹܝܢ ܕܝܼܠܹܗ ܠܗܵܠܹܝܢ ܕܒܸܤܪܵܐ:
pb. 308
ܠܵܐ ܡܸܟܹܿܝܠ ܗܸܢܹܝܢ ܟܲܕܼ ܗܸܢܹܝܢ ܡܸܬܼܩܲܪ̈ܒܼܵܢ ܠܦܲܓܼܪܵܐ: ܡܸܛܠ ܡܸܠܬܼܵܐ
ܕܲܗܘ̤ܵܐ ܒܹܗ܀ ܐܸܡ݂ܲܪ ܓܹܝܪ: ܕܲܒܼܦܲܓܼܪܵܐ ܗܘ̤ܵܐ ܐܲܠܵܗܵܐ ܡܸܠܬܼܵܐ: ܐܲܝܟܼ
ܠܵܒܼܘܿܫܵܐ ܒܲܠܒܼܘܼܫܵܐ: ܘܲܒܼܡܸܬܼܚܲܙܝܵܢܵܐ ܠܵܐ ܡܸܬܼܚܲܙܝܵܢܵܐ. ܠܵܘ ܐܲܝܟܼ ܡ̇ܢ
ܕܐܸܬܼܒܲܠܒܲܠܘ: ܘܠܵܘ ܐܲܝܟܼ ܡ̇ܢ ܕܐܸܫܬܲܚܠܲܦܘ: ܐܸܠܵܐ ܐܲܝܟܼ ܡ̣ܢ
ܕܲܡܩܵܘܹܝܢ ܒܲܟܼܝܵܢܲܝ̈ܗܘܿܢ ܬܪ̈ܲܝܗܘܿܢ: ܘܥܵܒܼ̇ܕܝܼܢ ܠܗܹܝܢ ܕܝܼ̈ܠܵܝܵܬܼܵܐ ܕܓܼܵܘܵܐ.
ܕܗܵܘ̇ ܕܥܵܒܹ̇ܕܼ ܘܲܕܼܗܵܘ̇ ܕܐܝܼܬܼܵܘܗܝ ܒܐܘܼܤܝܼܵܐ ܕܝܼܠܵܗ̇: ܘܐܝܼܬܼ
ܠܹܗ ܗܵܠܹܝܢ ܐܲܝܠܹܝܢ ܕܡܸܬܼܥܲܒܼ̈ܕܵܢ ܕܝܼ̈ܠܵܝܵܬܼܵܐ. ܘܓܲܠܝܵܐ ܕܲܬܼܪܹܝܢ ܐܵܡܲ݁ܪ:
ܐܲܠܵܗܵܐ ܡܸܠܬܼܵܐ: ܘܦܲܓܼܪܵܐ ܗܵܘ̇ ܗܘ̤ܵܐ: ܘܕܲܥܒܲܕܼ ܐܸܢܹܝܢ ܕܝܼܠܹܗ.
ܕܗܵܠܹܝܢ ܕܗܵܢܵܐ ܢܸܗܘ̈ܝܵܢ ܕܗܵܘ̇: ܘܲܕܼܗܵܘ̇ ܕܗܵܢܵܐ. ܟܲܕܼ ܡܩܵܘܸܐ ܒܹܗ
ܒܦܲܓܼܪܵܐ: ܗܵܢܵܘ ܕܹܝܢ ܐܲܠܵܗܵܐ ܡܸܠܬܼܵܐ ܠܵܐ ܚܵܫܘܿܫܵܐ: ܠܵܐ ܬܘܼܒܼ
ܡܸܬܼܩܲܪܲܒܼ ܠܹܗ ܚܲܫܵܐ ܕܒܸܤܪܵܐ. ܡܸܛܠ ܐܲܠܵܗܵܐ ܡܸܠܬܼܵܐ ܕܒܹܗ ܗܘ̤ܵܐ:
ܐܝܼܬܼ ܠܹܗ ܡܵܘܠܵܕܼܵܐ ܕܡ̣ܢ ܐܲܠܵܗܵܐ. ܡܸܛܠ ܡܸܠܬܼܵܐ ܫܡܲܝܵܢܵܐ ܗܵܘ̇
ܕܒܹܗ ܗܘ̤ܵܐ: ܫܡܲܝܵܢܵܐ ܗܘ̤ܵܐ. ܡܸܛܠ ܕܹܝܢ ܗܵܘ̇ ܕܒܹܗ ܗܘ̤ܵܐ: ܐܵܦ
ܗ̤ܘ ܡܸܤܬܿܓܸܕܼ ܥܲܡ ܐܲܠܵܗܵܐ ܡܸܠܬܼܵܐ ܕܐܝܼܬܼܵܘܗܝ ܤܓܼܝܼܕܼܵܐ. ܡܸܛܠ
ܗܵܘ̇ ܕܲܠܒܸܫ̣: ܡܝܲܩܲܪ ܐ̄ܢܵܐ ܠܲܠܒܼܘܼܫܵܐ. ܠܒܸܫ̣ ܗ̄ܘ̣ܵܐ ܓܹܝܪ ܕܡܘܼܬܼܵܐ
ܕܥܲܒܼܕܵܐ: ܐܲܝܟܼ ܕܐܸܡ݂ܲܪ ܓܪܝܼܓܼܘܿܪܝܼܘܿܣ: ܡܲܠܟܵܐ ܕܡܲܠܟܹ̈ܐ ܘܡܵܪܵܐ
ܕܡܵܪ̈ܵܘܵܬܼܵܐ: ܕܡܘܼܬܼܵܐ ܕܥܲܒܼܕܵܐ ܠܒܸܫ̣ ܗ̄ܘ̣ܵܐ.
ܠܡܵܢܵܐ ܗܵܟܹܝܠ: ܟܲܕܼ ܠܗܵܠܹܝܢ ܩܲܒܸܿܠܬܿܘܿܢ: ܠܡܸܠܲܝ̈ ܕܹܝܢ
ܩܲܛܪܸܓܼܬܿܘܿܢ ܒܪܘܼܫܥܵܐ؟ ܘܠܵܐ ܗ̄ܘ̣ܵܐ ܐܵܦ ܠܗܵܠܹܝܢ ܕܗܵܡ̇ܘܿܢ:
ܕܲܠܡܸܠܲܝ̈ ܕܝܼܠܝܼ ܫܲܪܲܪܘ؟ ܐܵܘ ܕܲܠܡܵܐ ܤܵܒܼܪܝܼܢ ܐܢ̄ܬܿܘܿܢ: ܕܠܵܘ
ܒܡܸܠܲܝ̈ ܕܝܼܠܝ ܡܸܤ̈ܬܲܠܝܵܢ ܐܵܦ ܗܵܠܹܝܢ: ܕܲܒܼܡܸܠܬܼܵܐ ܘܲܒܼܪܸܥܝܵܢܵܐ ܗܸܢܹܝܢ
pb. 309
ܟܲܕܼ ܗܸܢܹܝܢ ܐܝܼܬܲܝܗܹܝܢ. ܐܵܘ ܕܲܠܡܵܐ ܠܗܵܠܹܝܢ ܘܲܠܗܵܠܹܝܢ ܡܒܲܛܠܝܼܢ ܐܢ̄ܬܿܘܿܢ
ܕܠܵܐ ܢܸܬܼܐܲܡܪ̈ܵܢ: ܘܤܵܝ̇ܡܝܼܢ ܐܢ̄ܬܿܘܿ ܬܘܼܒܼ ܠܗܵܠܹܝܢ ܕܝܼܠܝ: ܟܲܕܼ
ܡܵܘܒܿܕܝܼܢ ܐܢ̄ܬܿܘܿܢ ܠܗܵܘ̇ ܡ̇ܢ ܕܗܵܠܹܝܢ ܐܸܡ݂ܲܪ. ܘܐܵܦ ܐܲܢ̄ܬܿܘܿܢ: ܟܲܕܼ
ܠܵܐ ܨܵܒܹ̇ܝܢ ܐܢ̄ܬܿܘܿܢ: ܤܵܗ̈ܕܹܐ ܐܝܼܬܲܟܿܘܿܢ ܠܝܼ. ܘܤܵܗܕܝܼܢ ܐܢ̄ܬܿܘܿܢ
ܠܝܼ: ܒܗܵܠܹܝܢ ܕܤܵܒܼܪܝܼܢ ܐܢ̄ܬܿܘܿܢ ܕܫܵܪܹܝܢ ܐܢ̄ܬܿܘܿܢ ܠܗܵܠܹܝܢ ܕܝܼܠܝ.
ܡܸܛܠ ܕܐܵܦ ܐܲܢ̄ܬܿܘܿܢ ܫܵܠܡ̇ܝܼܢ ܐܢ̄ܬܿܘ ܠܗܵܠܹܝܢ: ܘܲܠܢܲܦܫܟܼܘܿܢ
ܫܪܹܝܢ ܐܢ̄ܬܿܘܿܢ. ܡܸܛܠ ܕܕܲܠܩܘܼܒܼܠܵܐ ܕܢܲܦܫܟܼܘܿܢ ܐܵܡ̇ܪܝܼܢ ܐܢ̄ܬܿܘܿܢ.
ܘܐܸܢ ܡܸܫܟܲܚ ܐ̄ܢܵܐ ܕܲܝܵܢܹ̈ܐ ܕܠܵܐ ܕܵܡܹ̇ܝܢ ܠܟܼܘܿܢ: ܠܵܐ ܗܵܘܹ̇ܐ ܠܝܼ
ܥܲܡܠܵܐ ܠܲܡܦܵܤܘܼ: ܕܚܲܕܼ ܗ̤ܘ ܟܲܕܼ ܗ̤ܘ ܪܸܥܝܵܢܵܐ ܐܝܼܬܼܵܘܗܝ ܘܐܵܦ
ܗܵܠܹܝܢ ܕܫܲܪܟܵܐ: ܘܠܵܐ ܤܵܒܲܪ̇ ܐ̄ܢܵܐ ܕܙܵܕܸܩ ܠܡܸܦܠܲܚ ܤܲܓܿܝܼܵܐܝܼܬܼ.
ܒܵܗ̇ ܒܲܕܼܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ
ܕܲܫܒܲܥܸܤܪܹ̈ܐ: ܕܥܲܠ ܗܲܝܡܵܢܘܼܬܼܵܐ.
ܐܝܼܬܼܵܘܗܝ ܗ̄ܘ̣ܵܐ ܓܹܝܪ ܐܲܠܵܗܵܐ ܡܸܠܬܼܵܐ ܐܵܦ ܡ̣ܢ ܩܕܵܡ
ܡܸܬܼܒܲܪܢܫܵܢܘܼܬܼܵܐ ܒܪܵܐ ܘܐܲܠܵܗܵܐ: ܘܐܝܼܬܼܵܘܗܝ ܗ̄ܘ̣ܵܐ ܥܲܡ ܐܲܒܼܘܼܗܝ.
ܢܤܲܒ̣ ܕܹܝܢ ܒܙܲܒܼ̈ܢܹܐ ܐ̄ܚܪ̈ܵܝܹܐ: ܕܡܘܼܬܼܵܐ ܕܒܲܒܼܕܵܐ. ܐܸܠܵܐ ܟܲܕܼ
ܐܝܼܬܼܵܘܗܝ ܗ̄ܘ̣ܵܐ ܡ̣ܢ ܩܕܼܝܡ ܒܪܵܐ: ܘܡܸܬܼܩܪܸܐ ܗ̄ܘ̣ܵܐ ܐܵܦ ܡ̣ܢ
ܒܵܬܲܪ ܡܲܤܒܼܵܐ. ܠܵܐ ܡܸܫܟܿܚܵܐ ܕܢܸܬܼܩܪܸܐ ܒܪܵܐ ܒܦܘܼܪܫܵܢܵܐ: ܕܠܵܐ
ܬܪܹܝܢ ܒܢܲܝ̈ܐ ܢܲܥܸܠ ܒܗܲܝܡܵܢܘܼܬܲܢ. ܐܸܠܵܐ ܡܸܛܠ ܕܲܠܗܵܘ̇ ܢܩܸܦ̣
ܕܡ̣ܢ ܒܪܵܫܝܼܬܼ ܐܝܼܬܼܵܘܗܝ ܗ̄ܘ̣ܵܐ ܒܪܵܐ: ܗܵܘ̇ ܕܲܢܩܸܦ̣ ܠܹܗ ܠܵܐ
ܡܸܫܟܿܚܵܐ ܕܒܼܐܝܼܩܵܪܵܐ ܕܲܒܼܪܘܼܬܼܵܐ ܒܦܘܼܪܫܵܢܵܐ ܢܸܥܒܿܕܹܗ. ܒܐܝܼܩܵܪܵܐ ܐܵܡܲ݁ܪ
pb. 310
ܐ̄ܢܵܐ ܕܲܒܼܪܘܼܬܼܵܐ: ܘܠܵܘ ܒܲܟܼܝܵܢܵܐ. ܡܸܛܠ ܗܵܢܵܐ: ܐܵܦ ܡܸܠܬܼܵܐ ܡܫܝܼܚܵܐ
ܡܸܫܬܲܡܲܗ: ܡܸܛܠ ܕܐܝܼܬܼ ܠܹܗ ܢܲܩܝܼܦܘܼܬܼܵܐ ܕܲܠܘܵܬܼ ܡܫܝܼܚܵܐ
ܐܲܡܝܼܢܵܐܝܼܬܼ. ܐܸܠܵܐ ܡܸܛܠ ܕܠܵܐ ܗܸܢܹܝܢ ܟܲܕܼ ܗܸܢܹܝܢ ܢܹܐܡܲܪ ܥܠܲܝܗܹܝܢ
ܟܲܕܼ ܥܗܠܲܝܗܹܝܢ ܢܲܠܸܙ ܠܩܵܪܘܿܝܵܐ: ܢܹܐܬܸܐ ܠܲܢ ܥܲܠ ܤܵܗ̈ܕܘܵܬܼܗܘܿܢ:
ܗܵܠܹܝܢ ܕܐܲܝܟܼ ܕܤܵܒܼ̇ܪܝܼܢ ܠܘܼܩܒܲܠܝ ܓܲܒܿܝܼܘ ܐܸܢܹܝܢ: ܘܐܲܝܟܼ ܕܲܫܦܲܪܘ
ܠܗܘܿܢ ܤܵܡ̣ܘ ܐܸܢܹܝܢ. ܕܲܒܼܗܹܝܢ ܚܵܘ̇ܝܼܬܼ ܘܲܡܚܵܘܸܐ ܐ̄ܢܵܐ: ܕܠܵܐ ܡܸܕܸܡ
ܕܢܘܼܟܼܪܵܝ ܐܲܡܝܼܪ ܠܝܼ: ܕܐܸܬܼܚܲܝܒܹܬܼ ܒܕܼܝܼܢܵܐ ܗܵܢܵܐ ܕܠܵܐ ܒܘܼܚܵܢܵܐ.
ܫܡܲܥ̣ܘ ܠܲܓܼܪܝܼܓܼܘܿܪܝܼܘܿܣ ܐܲܦܸܤܩܘܿܦܵܐ ܕܐܵܢܲܙܝܲܢܙܘܼ ܡܵܢܵܐ ܐܵܡܲ݁ܪ. ܡ̣ܢ
ܐܲܝܠܹܝܢ ܕܗܸܢܘܿܢ ܟܬܲܒܼܘ . . . ܠܵܘ ܓܹܝܪ ܠܒܲܪܢܵܫܵܐ ܚܢܲܢ ܡ̣ܢ
ܐܲܠܵܗܘܼܬܼܵܐ: ܚܲܕܼ ܘܠܹܗ ܟܲܕܼ ܠܹܗ ܐܵܡ̇ܪܝܼܢ ܚ̄ܢܲܢ. ܩܲܕܼܡܵܝܑܬܼ ܓܹܝܪ ܠܵܘ
ܠܒܲܪܢܵܫܵܐ: ܐܸܠܵܐ ܠܐܲܠܵܗܵܐ ܘܲܒܼܪܵܐ ܘܝܼܚܝܼܕܼܵܝܵܐ ܕܡ̣ܢ ܩܕܼܵܡ ܥܵܠܡܹ̈ܐ.
ܕܠܵܐ ܡܡܲܙܲܓܼ ܗ̄ܘ̣ܵܐ ܒܓܼܘܪܫܡܵܐ: ܘܠܵܐ ܒܐܲܝܠܹܝܢ ܕܲܒܼܓܼܘܼܫܡܵܐ.
ܒܚܲܪܬܼܵܐ ܕܹܝܢ: ܐܵܦ ܠܒܲܪܢܵܫܵܐ ܢܤܲܒܼ܀ ܡܵܢܵܐ ܗܵܟܹܝܠ ܡܸܬܼܚܙܸܐ
ܠܟܼܘܿܢ؟ ܕܲܠܩܘܼܒܼܠܵܐ ܐܝܼܬܼܵܘܗܝ؟ ܦܲܚܸܡܘ ܐܸܢܹܝܢ ܥܲܡ ܚܕܼܵܕܹ̈ܐ:
ܠܬܵܪ̈ܬܲܝܗܹܝܢ. ܐܝܼܬܼܵܘܗܝ ܗ̄ܘ̣ܵܐ ܓܹܝܪ ܐܲܠܵܗܵܐ ܡܸܠܬܼܵܐ: ܐܵܦ ܩܕܵܪܡ
ܡܸܬܼܒܲܪܢܫܵܢܘܼܬܼܵܐ: ܒܪܵܐ ܘܐܲܠܵܗܵܐ: ܘܐܝܼܬܼܵܘܗܝ ܗ̄ܘ̣ܵܐ ܥܲܡ ܐܲܒܼܵܐ.
ܤܝܼܡܘܼ ܗܵܠܹܝܢ ܕܲܓܼܪܝܼܓܼܘܿܪܝܼܘܿܣ. ܩܲܕܼܡܵܝܑܬܼ ܡ̇ܢ ܓܵܘ ܒܲܪܢܵܫܵܐ:
ܐܸܠܵܐ ܐܲܠܵܗܵܐ ܘܲܒܼܪܵܐ ܒܲܠܚܘܿܕ. ܗܵܠܹܝܢ ܕܲܠܩܘܼ̈ܒܼܠܵܝܵܬܼܵܐ ܡܸܤܬܲܒܼܪ̈ܵܢ
ܠܟܼܘܿܢ. ܐܸܡܲܪܘ ܠܐܲܝܠܹܝܢ ܕܐܸܬܼܐܡܲܪ ܡܹܢܝ ܐܸܢ ܢܸܩ̈ܦܵܢ: ܢܤܲܒܼ ܕܹܝܢ
ܒܚܲܪܬܼܵܐ ܕܙܲܒܼ̈ܢܹܐ ܕܙܲܒܼ̈ܢܹܐ ܕܡܘܼܬܼܵܐ ܕܥܲܒܼܕܵܐ܀ ܤܝܼܡܘ ܠܘܼܩܒܲܠܗܹܝܢ
ܕܲܓܼܪܝܼܓܼܪܝܼܘܿܣ܀ ܒܚܲܪܬܼܵܐ ܕܹܝܢ: ܐܵܦ ܠܒܲܪܢܵܫܵܐ ܢܤܲܒܼ. ܕܲܠܡܵܐ
pb. 311
ܕܲܠܩܘܼ̈ܒܼܠܵܝܵܬܼܵܐ ܡܸܤܬܲܒܼܪ̈ܵܢ ܠܟܼܘܿܢ: ܤܝܼܡܘ ܠܗܵܠܹܝܢ ܕܐܸܬܼܐܡܲܪ
ܡܹܢܝ. ܐܸܠܵܐ ܐܝܼܬܼܵܗܝ ܗ̄ܘ̣ܵܐ ܩܕܼܵܡ ܗܵܢܵܐ: ܘܡܸܬܼܩܪܸܐ ܗ̄ܘ̣ܵܐ ܒܪܵܐ.
ܡ̣ܢ ܒܵܬܲܪ ܡܲܤܒܹܗ ܕܹܝܢ: ܠܵܐ ܡܫܟܿܚܵܐ ܕܢܸܤܬܿܕܸܩ ܘܢܸܬܼܦܪܸܫ
ܡܦܲܪܫܵܐܝܼܬܼ ܘܲܕܼܢܸܬܼܩܪܸܐ ܒܪܵܐ܀ ܤܝܼܡܘ ܕܲܓܼܪܝܼܓܼܘܿܪܝܼܘܿܣ܀ ܐܵܦܠܵܐ
ܓܹܝܪ ܠܒܲܪܢܵܫܵܐ ܤܵܕܼܩ̇ܝܼܢ ܚ̄ܢܲܢ ܡ̣ܢ ܐܲܠܵܗܘܼܬܼܵܐ. ܐܸܡܲܪܘ ܠܗܵܠܹܝܢ
ܕܡܹܝܢ ܕܫܲܪܟܵܐ: ܕܲܡܒܲܨܪ ܐܲܢ̄ܬܿ ܐܸܬܿܬܿܤܝܼܡ ܐܲܝܟܼ ܕܡܹܢܝ: ܕܠܵܐ
ܬܪܹܝܢ ܒܢܲܝ̈ܐ ܢܹܐܡܲܪ܀ ܤܝܼܡܘ ܠܗܵܠܹܝܢ ܕܲܓܼܪܝܼܓܼܘܿܪܝܼܘܿܣ܀ ܐܸܠܵܐ
ܠܚܲܕܼ ܗ̄ܘ̣: ܘܠܹܗ ܟܲܕܼ ܠܹܗ ܐܵܡ̇ܪܝܼܢ ܚ̄ܢܲ. ܐܸܡܲܪܘ ܗܵܠܹܝܢ ܕܫܲܪܟܵܐ
ܕܝܼܠܝܼ. ܐܸܠܵܐ ܡܸܛܠ ܕܲܠܗܵܘ̇ ܐܸܬܼܢܩܸܦ ܕܲܒܼܫܘܼܪܵܐ ܐܝܼܬܼܵܘܗܝ ܗ̄ܘ̣ܵܐ
ܒܪܵܐ: ܗܵܘ̇ ܕܐܸܬܼܢܩܸܦ ܠܹܗ: ܠܵܐ ܡܸܫܟܿܚܵܐ ܕܐܝܼܩܵܪܵܐ ܕܲܒܼܪܘܼܬܼܵܐ
ܒܦܘܼܪܫܵܢܵܐ ܢܩܲܒܸܠ. ܕܐܝܼܩܵܪܵܐ ܐܸܡ̇ܪܹܬܼ: ܘܠܵܘ ܒܲܟܼܝܵܢܵܐ܀ ܤܝܼܡܘ
ܠܗܵܠܹܝܢ ܕܲܓܼܪܝܼܓܼܘܿܪܝܼܘܿܣ܀ ܟܝܵܢܹ̈ܐ ܡ̇ܢ ܓܹܝܪ ܬܪܹܝܢ: ܐܲܠܵܗܵܐ
ܘܒܲܪܢܵܫܵܐ: ܐܲܝܟܼ ܕܐܵܦ ܢܲܦܫܵܐ ܘܦܲܓܼܪܵܐ. ܒܢܲܝ̈ܐ ܕܹܝܢ ܠܵܘ ܬܪܹܝܢ.
ܐ̄̈ܚܪܹܝܢ ܗ̄ܘ̣ ܓܹܝܪ ܘܲܐ̄ܚܪܹܝܢ: ܗܵܢ̇ܘܿܢ ܕܡܸܗܘܿܢ ܐܝܼܬܼܵܘܗܝ ܦܵܪܘܼܩܲܢ.
ܠܵܘ ܕܹܝܢ ܐ̄ܚܪܹܢܵܐ ܘܲܐ̄ܚܪܹܢܵܐ: ܚܵܣ. ܬܪ̈ܲܝܗܘܿܢ ܓܹܝܪ ܚܲܕܼ: ܒܲܚܕܼܵܝܘܼܬܼܵܐ.
ܘܒܲܟܼܝܵܢܹ̈ܐ ܘܠܵܘ ܒܦܲܪ̈ܘܿܦܹܐ ܥܒܲܕܼ ܦܘܼܪܫܵܢܵܐ: ܟܲܕܼ ܐܸܡܲ݁ܪ ܐ̄ܚܪܹܢܵܐ
ܘܲܐ̄ܚܪܹܢܵܐ: ܚܲܕܼ ܕܹܝܢ ܒܪܵܐ. ܘܬܼܘܼܒܼ: ܗܵܝ̇ ܕܒܲܟܼܝܵܢܵܐ ܐ̄ܚܪܹܬܼܵܐ ܗ̣̄ܝ ܡ̣ܢ
ܗܵܝ̇ ܕܒܲܚܕܼܵܝܘܼܬܼܵܐ: ܐܲܟܼܡܵܐ ܕܡܸܬܼܐܡܲܪ ܐ̄ܚܪܹܢܵܐ ܒܦܲܪܨܘܿܦܵܐ ܘܠܵܘ
ܒܲܟܼܝܵܢܵܐ. ܡ̣ܢ ܒܸܤܪܵܐ ܓܹܝܪ: ܐܵܠܵܗܵܐ ܡܸܠܬܼܵܐ ܒܸܤܪܵܐ ܗ̄ܘ̣. ܡ̣ܢ
ܐܲܠܵܗܘܼܬܼܵܐ ܕܹܝܢ: ܒܸܤܪܵܐ ܐܵܘ ܒܲܪܢܵܫܵܐ ܒܪܵܐ ܡܸܬܼܐܡܲܪ. ܐܲܝܟܲܢܵܐ ܕܐܵܦ
ܡ̣ܢ ܗܵܘ̇ ܕܐܸܬܼܢܤܸܒܼ ܒܸܤܪܵܐ: ܐܲܠܵܗܵܐ ܡܸܠܬܼܵܐ ܡܫܝܼܚܵܐ ܡܸܬܼܐܡܲܪ.
ܩܪܝܼ ܠܗܵܠܹܝܢ ܕܝܼܠܝ ܐܲܝܟܼ ܕܲܟܼܬܼܝܼ̈ܒܼܵܢ . . . ܡܸܛܠ ܗܵܢܵܐ ܐܵܦ ܐܲܠܵܗܵܐ
pb. 312
ܡܸܠܬܼܵܐ ܡܫܝܼܚܵܐ ܡܸܫܬܲܡܲܗ: ܡܸܛܠ ܕܐܝܼܬܼ ܠܹܗ ܢܲܩܝܼܦܘܼܬܼܵܐ: ܠܵܘ
ܡܫܝܼܚܵܐ ܐܲܡܝܼܢܵܐܝܼܬܼ܀ ܐܸܡܲܪܘ ܗܵܠܹܝܢ ܕܲܓܼܪܝܼܓܼܘܿܪܝܼܘܿܣ܀ ܬܪ̈ܲܝܗܘܿܢ
ܓܹܝܪ ܒܲܚܕܼܵܝܘܼܬܼܵܐ: ܐܲܠܵܗܵܐ ܕܐܸܬܼܒܲܪܢܲܫ: ܘܒܲܪܢܵܫܵܐ ܕܐܸܬܼܐܲܠܲܗ܀ ܡ̣ܢ
ܢܲܩܝܼܦܘܼܬܼܵܐ ܓܹܝܪ ܕܲܠܘܵܬܼ ܒܲܪܢܵܫܵܐ: ܡܸܬܼܐܡܲܪ ܐܲܠܵܗܵܐ ܡܸܠܬܼܵܐ
ܕܐܸܬܼܒܲܪܢܲܫ. ܐܲܝܟܲܢܵܐ ܕܐܵܦ ܒܲܪܢܵܫܵܐ ܡܸܬܼܐܡܲܪ ܕܐܸܬܼܐܲܠܲܗ: ܒܲܚܕܼܵܝܘܼܬܼܵܐ
ܕܲܠܘܵܬܼ ܐܲܠܗܵܐ ܡܸܠܬܼܵܐ. ܡܘܙܵܓܼܵܐ ܓܹܝܼܪ: ܠܲܚܕܼܵܝܘܼܬܼܵܐ ܐܵܡܲ݁ܪ܀
ܐܸܡܲܪ ܗܵܠܹܝܢ ܕܐܲܡܒܿܪܘܿܤܝܼܘܿܣ. ܘܐܵܦܠܵܐ ܗ̤ܘ ܟܬܼܵܒܼܵܐ ܡܲܠܸܦ
ܠܟܼܘܿܢ: ܕܠܵܐ ܤܢܝܼܩܵܐ ܐܲܠܵܗܘܼܬܼܵܐ ܥܲܠ ܩܘܼܕܵܫܵܐ: ܐܸܠܵܐ ܒܸܤܪܵܐ؟
ܡܵܕܹܝܢ ܡ̣ܢ ܒܤܸܪܵܐ ܕܐܸܬܡܫܲܚ ܐܵܘ ܡ̣ܢ ܒܲܪܢܵܫܵܐ: ܐܲܠܵܗܵܐ ܡܸܠܬܼܵܐ
ܡܫܝܼܚܵܐ ܡܸܬܼܐܡܲܪ: ܐܲܝܟܼ ܕܐܸܡ݂ܲܪ ܐܲܡܒܿܪܘܿܤܝܼܘܿܣ. ܐܸܠܵܐ ܡ̣ܢ
ܒܸܤܪܵܐ ܒܸܤܪܵܐ ܡܸܫܬܲܡܲܗ: ܐܵܘ ܡ̣ܢ ܒܲܪܢܵܫܵܐ ܒܲܪܢܵܫܵܐ. ܘܡ̣ܢ ܒܸܤܪܵܐ
ܕܐܸܬܼܡܫܲܚ: ܡܫܝܼܚܵܐ ܠܵܐ ܡܸܫܬܲܡܲܗ؟ ܘܡ̣ܢ ܒܤܸܪܵܐ ܒܸܤܪܵܐ
ܡܸܫܬܲܡܲܗ: ܘܲܬܼܪܹܝܢ ܒܸܤܪܹ̈ܐ ܠܵܐ ܥܵܒܼ̇ܕܝܼܢ. ܘܠܵܐ ܬܪܹܝܬ ܒܢܲܝ̈ ܐ̄ܢܵܫܵܐ:
ܡ̣ܢ ܒܲܪܢܵܫܵܐ ܕܡܸܫܬܲܡܲܗ ܐܲܠܵܗܵܐ ܡܸܠܬܼܵܐ. ܡܸܛܠ ܕܡܸܫܬܲܡܲܗ
ܐܲܠܵܗܵܐ ܡܫܝܼܚܵܐ: ܡ̣ܢ ܡܫܝܼܚܵܐ: ܬܪܹܝܬ ܡܫܝܼܚܹ̈ܐ ܥܵܒܹ̇ܕ؟ ܛܲܪܘ
ܡܠܲܚܡܘܼܬܼܵܐ ܕܲܠܘܵܬܼ ܢܲܦܫܟܼܘܿܢ ܘܕܲܠܘܵܬܼ ܐܲܒܼ̈ܗܵܬܼܵܐ: ܠܗܵܝ̇
ܕܒܲܚܕܼܵܝܘܼܬܼܵܐ: ܘܲܠܗܵܝ̇ ܕܒܲܟܼܝܵܢܵܐ: ܘܲܠܗܵܝ̇ ܕܒܼܐܘܼܤܝܼܵܐ: ܘܲܠܕܼܝܼܠܵܝܘܼܬܼܵܐ
ܕܦܲܪܨܘܿܦܵܐ. ܕܝܲܗ̣̄ܒܼ ܠܲܢ ܗܵܠܹܝܢ ܕܝܼܠܹܗ: ܘܲܢܤܲܒܼ ܗܵܠܹܝܢ ܕܝܼܠܲܢ . .
ܘܐܲܢ̄ܬܿ ܠܟܼܠܗܹܝܢ ܕܝܼ̈ܠܝܵܬܼܵܐ ܕܒܸܤܪܵܐ ܠܹܗ ܝܵܗܹ̇ܒܼ ܐܲܢ̄ܬܿ: ܘܚܲܫܹ̈ܐ
ܘܲܨܠܝܼܒܼܵܐ ܘܡܵܘܬܵܐ. ܘܲܕܼܢܸܗܘܸܐ ܡܫܝܼܚܵܐ ܫܲܪܝܼܪܵܐܝܼܬܼ ܡ̣ܢ ܒܲܪܢܵܫܵܐ
ܕܐܸܬܼܡܫܲܚ ܒܲܫܪܵܪܵܐ ܠܵܐ ܝܵܗܹ̇ܒܼ ܐܲܢ̄ܬܿ: ܟܲܕܼ ܠܵܐ ܐܝܼܬܼܵܘܗܝ ܬܪܹܝܢ
ܡܫܝܼܚܹ̈ܐ: ܡܸܛܠ ܕܐܵܦܠܵܐ ܬܪܹܝܢ ܒܸܤܪ̈ܝܼܢ: ܘܠܵܐ ܬܪܹܝܢ ܒܢܲܝ̈ܢܵܫܵܐ.
pb. 313
ܢܵܘܤܸܦ ܕܹܝܢ ܐܵܽܦ ܗܵܠܹܝܢ ܕܫܲܪܟܵܐ: ܘܠܵܐ ܬܪܹܝܢ ܡܵܘ̈ܠܵܕܹܐ: ܘܠܵܐ
ܬܪܹܝܢ ܚܲܫܹ̈ܐ: ܘܠܵܐ ܬܪܹܝܢ ܨܠܝܼܒܼ̈ܝܼܢ: ܘܠܵܐ ܬܪܹܝܢ ܡܵܘ̈ܬܝܼܢ: ܘܠܵܐ
ܬܲܪܬܹܝܢ ܩܝ̈ܡܵܬܼܵܐ ܕܡ̣ܢ ܒܹܝܬܼ ܡܝܼ̈ܬܹܐ: ܘܲܕܼܫܲܪܟܵܐ ܘܕܲܐ̄ܚܪ̈ܵܢܝܬܼܵܐ
ܟܠܗܹܝܢ: ܕܡ̣ܢ ܒܸܤܪܵܐ ܥܲܠ ܐܲܠܵܗܵܐ ܡܸܠܬܼܵܐ ܡܲܤܸܩ ܐܲܢ̄ܬܿ. ܗܵܢܵܐ
ܗܵܟܹܝܠ ܡܫܲܚܠܸܦ ܠܹܗ ܒܲܫܡܵܐ ܡ̣ܢ ܒܸܤܪܵܐ: ܘܠܟܼܠܗܹܝܢ ܥܵܒܹ̇ܕܼ
ܠܗܹܝܢ ܕܐܲܠܵܗܵܐ ܡܸܠܬܼܵܐ ܟܝܵܢܵܐܝܼܬܼ. ܘܟܼܵܐܹ̇ܐ ܒܐܲܝܠܹܝܢ ܕܲܫܪܵܪܵܐ ܐܵܡ̇ܪܝܼܢ:
ܐܲܝܟܼ ܡ̇ܢ ܕܲܬܼܪܹܝܢ ܒܢܝܼ̈ܢ ܥܵܒܼ̇ܕܝܼܢ. ܐܸܠܵܐ ܐܸܡܲܬܼܝ ܕܐܲܢ̄ܬܿ ܐܵܡܲ݁ܪ ܐܲܢ̄ܬܿ:
ܥܵܪܹܩ ܐܲܢ̄ܬܿ ܡ̣ܢ ܫܘܼܚܠܵܦܵܐ ܘܫܘܼܓܼܢܝܵܐ ܘܗܲܓܵܓܼܵܐ ܘܡܲܤܒܿܪܵܢܘܼܬܼܵܐ:
ܘܡܸܤܬܲܟܲܡ ܠܡܸܤܬܿܒܼܵܪܘܼ ܕܗܵܠܹܝܢ ܐܸܡܲ݁ܪ ܐܲܢ̄ܬܿ ܐܲܝܟܼ ܕܬܲܛܥܸܐ. ܟܲܕܼ
ܕܹܝܢ ܐܸܢܵܐ ܠܗܵܠܹܝܢ ܐܵܡܲ݁ܪ ܐ̄ܢܵܐ: ܫܵܘܲܪ ܐܲܢ̄ܬܿ ܡ̣ܢ ܕܘܼܟܿܬܼܵܟܼ: ܐܲܝܟܼ
ܐܲܝܢܵܐ ܕܲܬܼܪܹܝܢ ܒܢ̈ܝܼܢ ܐܸܡܲ݁ܪ ܐ̄ܢܵܐ. ܘܬܼܘܼܒܼ ܟܵܦܲܪ ܐܲܢ̄ܬܿ: ܘܡܸܤܬܲܟܲܡ
ܐܲܢ̄ܬܿ ܐܲܝܟܼ ܕܠܵܐ ܟܵܦܲܪ ܐܲܢ̄ܬܿ.
ܒܗܵܕܹܐ ܓܹܝܪ ܗܘ̤ܵܐ ܦܘܼܪܫܵܢܵܐ ܕܝܼܠܲܢ. ܕܡܵܢܵܘ ܒܲܟܼܝܵܢܹ̈ܐ: ܘܡܵܢܵܘ
ܒܲܚܕܵܝܘܼܬܼܵܐ. ܐܲܝܟܲܢܵܐ ܕܠܵܐ ܢܸܟܼܦܘܿܪ ܒܐܲܝܠܹܝܢ ܕܲܟܼܝܢܹ̈ܐ: ܡܸܛܠ ܗܵܠܹܝܢ
ܕܡܸܬܼܐܲܡܪ̈ܵܢ ܒܲܚܕܼܵܝܘܼܬܼܵܐ. ܘܠܵܐ ܬܘܼܒܼ ܗܵܘ̇ ܡܵܐ ܕܡܸܬܼܐܡܲܪ
ܒܲܚܕܼܵܝܘܼܬܼܵܐ: ܡܸܛܠ ܕܒܲܟܼܝܵܢܹ̈ܐ ܗ̄ܘ̣: ܬܸܤܒܲܪ ܕܐܝܼܬܼܵܘܗܝ ܟܝܵܢܵܐ:
ܒܗܵܠܹܝܢ ܕܠܵܐ ܫܵܠܹ̇ܡ ܐܲܢ̄ܬܿ ܥܲܠ ܐܲܝܠܹܝܢ ܕܒܲܚܕܼܵܝܘܼܬܼܵܐ ܡܼܬܼܐܲܡܪ̈ܵܢ.
ܘܐܲܝܟܼ ܡ̇ܢ ܕܒܲܟܼܝܵܢܵܐ ܐܸܢܹܝܢ ܬܵܒܲܥ̇ ܐܲܢ̄ܬܿ: ܘܲܠܡܹܐܡܵܪ ܚܕܼܵܝܘܼܬܼܵܐ ܠܵܐ
ܫܵܒܹ̇ܩ ܐܲܢ̄ܬܿ. ܐܸܠܵܐ ܒܲܕܼ ܠܵܐ ܡܸܫܟܲܚ ܐܲܢ̄ܬܿ ܟܲܕܼ ܬܸܦܘܿܩ ܪܘܼܚܵܐ ܕܠܵܐ
ܬܹܐܡܪܝܼܗ̇: ܗܵܝܕܹܝܢ ܡܚܵܘܸܐ ܐܲܢ̄ܬܿ ܟܲܕܼ ܡܩܲܛܪܸܓܼ ܐܲܢ̄ܬܿ ܠܝܼ:
ܘܪܲܫܝܼܥܵܐ ܚܵܫܹ̇ܒܼ ܐܲܢ̄ܬܿ ܠܝܼ. ܒܡܲܦܲܩ ܒܪܘܼܚܵܟܼ ܕܹܝܢ ܕܥܲܠ ܐܲܦܲܝ̈
ܐܲܝܠܹܝܢ ܕܐܸܢܵܐ ܪܵܫܹ̇ܐ ܐ̄ܢܵܐ ܠܵܟܼ: ܡܲܤܗܸܕܼ ܐܲܢ̄ܬܿ ܥܠܲܝ ܕܕܼܵܚܹ̇ܠ ܠܐܲܠܵܗܵܐ
pb. 314
ܐܝܼܬܲܝ. ܘܗܸܢܹܝܢ ܗܵܠܹܝܢ: ܒܝܼ: ܪ̈ܲܫܝܼܥܬܼܵܐ ܡܸܬܼܢܵܤ̈ܒܵܢ. ܒܗܵܘ̇ ܕܹܝܢ:
ܫܲܦܝܼܪ̈ܬܼܵܐ. ܐܵܘ ܟܒܲܪ ܡ̣ܢ ܝܑܼܕܲܥܬܼܵܟܼ ܕܝܼܠܵܟܼ ܐܝܼܬܲܝܗܹܝܢ: ܕܥܲܠ
ܐܲܦܲܝ̈ܗܹܝܢ ܡܸܬܼܟܲܬܲܫ ܐܲܢ̄ܬܿ ܘܥܵܡ݂̇ܠ. ܠܗܵܝ̇ ܕܹܝܢ ܐܲܝܟܼ ܕܡ̣ܢ ܐܵܢܲܢܩܹܐ
ܘܡ̣ܢ ܩܛܝܼܪܵܐ: ܠܡܲܚܤܸܢ ܡܩܲܒܸܿܠ ܐܲܢ̄ܬܿ ܠܵܗ̇: ܘܒܼܵܗ̇ ܡܵܘܕܹܐ ܐܲܢ̄ܬܿ
ܠܗܵܠܹܝܢ ܐ̄ܢܵܫܵܝ̈ܬܼܵܐ. ܒܐܲܝܠܹܝܢ ܗܵܟܹܝܠ ܐ̄ܚܪ̈ܵܢܝܵܬܼܵܐ: ܝܲܬܿܝܼܪ ܡ̣ܢ ܗܵܠܹܝܢ
ܐܸܬܿܬܿܟܸܠܬܿ ܥܲܠ ܕܝܼܢܵܐ ܟܹܐܢܵܐ. ܒܪܲܡ ܐܵܦ ܒܐܲܝܠܹܝܢ ܕܡ̣ܢ ܒܵܬܲܪܟܸܢ:
ܗ̤ܘ ܗܵܢܵܐ ܒܘܼܚܵܢܵܐ ܐܝܼܬܼ ܠܟܼܘܿܢ: ܕܲܒܼܗܹܝܢ ܟܲܕܼ ܒܗܹܝܢ ܡܫܲܪܪܝܼܢ
ܐܢ̄ܬܿܘܿܢ ܠܗܵܠܹܝܢ ܕܝܼܠܝܼ.
ܒܵܗ̇ ܒܲܕܼܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ
ܕܲܫܒܲܥܸܤܪܹ̈ܐ: ܕܥܲܠ ܗܲܝܡܵܢܘܼܬܼܵܐ.
ܕܠܵܐ ܒܟܼܠܒܵܠܵܐ ܢܸܛܪܝܼܗ̇ ܠܢܲܩܝܼܦܘܼܬܼܵܐ ܕܲܟܼܝܵܢܹ̈ܐ. ܡܵܘܕܸܐ ܐܲܢ̄ܬܿ
ܗܵܝܟܹܝܠ ܐܲܠܵܗܵܐ ܕܲܒܼܒܲܪܢܵܫܵܐ. ܕܵܚܹ̇ܠ ܐ̄ܢܵܐ ܕܹܝܢ ܠܢܲܩܝܼܦܘܼܬܼܵܐ
ܕܐܠܵܗܘܼܬܼܵܠ: ܕܒܲܪܢܵܫܵܐ ܒܐܲܠܵܗܵܐ ܐܲܚܝܼܕܼ ܟܠ ܡܸܤܬܿܓܸܕܼ. ܐܸܠܵܐ ܕܠܵܐ
ܢܸܬܼܚܲܫܲܚ ܒܤܵܗܕܘܼܬܼܵܐ ܕܐ̄ܢܵܫ ܐ̄ܚܪܹܬܢܵܐ: ܫܲܦܝܼܪ ܕܲܒܼܤܵܗܕܘܼܬܹܗ
ܕܝܼܠܹܗ ܢܸܬܼܚܲܫܲܚ ܥܲܠ ܗܵܠܹܝܢ ܕܝܼܠܲܢ. ܕܐܸܡܲ݁ܪ ܕܲܕܼܠܵܐ ܒܘܼܠܒܵܠܵܐ
ܢܵܛ̇ܪܝܼܢ ܚ̄ܢܲܢ ܠܢܲܩܝܼܦܘܼܬܼܵܐ ܕܲܟܼܝܵܢܹ̈ܐ: ܒܗܵܝ̇ ܕܠܵܐ ܗ̄ܘ̣ܵܐ ܫܘܼܚܠܵܦܵܐ
ܕܲܟܼܝܵܢܹ̈ܐ ܡܸܬܼܒܲܛܲܠ ܡܸܛܠ ܚܕܵܝܘܼܬܼܵܐ܀ ܒܗܵܕܹܐ: ܠܚܲܕܼ ܘܠܹܗ ܟܲܕܸ
ܠܹܗ ܡܵܘܕܲܥ: ܘܬܼܘܼܒܼ ܡܵܘܕܲܥ ܠܐܲܠܵܗܵܐ ܕܲܒܼܒܲܪܢܵܫܵܐ ܐܝܼܬܼܵܘܗܝ
ܗ̄ܘ̣ܵܐ. ܐܝܼܬܼܵܘܗܝ ܗ̄ܘ̣ܵܐ ܠܲܡ ܓܹܝܪ ܐܲܠܵܗܵܐ ܠܵܐ ܚܵܫܘܿܫܵܐ: ܒܓܼܘܼܫܡܵܐ
ܚܵܫܘܿܫܵܐ. ܒܗܵܠܹܝܢ ܐܝܼܬܼ ܫܘܼܚܠܵܦܵܐ: ܘܠܵܐ ܗ̄ܘ̣ܵܐ ܗ̤ܝ ܟܲܕܸ ܗ̤ܝ
pb. 315
ܡܵܘܕܥܵܐ. ܗܵܝ̇ ܕܕܼܵܚܹ̇ܠ ܐ̄ܢܵܐ ܠܢܲܩܝܼܦܘܼܬܼܵܐ ܕܐܲܠܵܗܘܼܿܬܼܵܐ: ܕܒܲܪܢܵܫܵܐ
ܒܐܲܠܵܗܵܐ ܐܲܚܝܼܕܼ ܟܠ ܡܸܤܬܿܓܸܕܼ. ܘܗܵܝ̇ ܕܠܵܐ ܓܹܝܪ ܢܘܼܕܪܵܝ ܠܹܗ
ܦܲܓܼܪܹܗ: ܕܥܲܡܹܗ ܕܥܲܡܹܗ ܐܵܦ ܗ̤ܘ ܝܲܬܿܝܼܒܼ ܥܲܡ ܐܲܒܼܵܐ. ܠܵܐ ܗ̄ܘ̣ܵܐ ܓܹܝܪ
ܕܬܸܫܬܿܐܸܠ ܡ̣ܢ ܗܵܠܹܝܢ ܐܸܡܲܪܢ ܠܵܟܼ: ܐܸܠܵܐ ܕܠܵܐ ܠܗܵܠܹܝܢ
ܕܛܵܒܼܵܐܝܼܬܼ ܐܲܡܝܼܪ̈ܵܢ ܠܵܟܼ ܬܸܥܕܘܿܠ. ܐܲܢ̄ܬܿܘܿܢ ܕܹܝܢ ܐܘܿ ܢܡܝܼ̈ܡܹܗ
ܕܝܵܢܹ̈ܐ ܕܠܵܐ ܟܹܐܢܘܼܬܼܵܐ: ܒܗܵܠܹܝܢ ܠܵܐ ܐܸܤܬܲܟܲܠܬܿܘܿܢ ܟܲܕܼ ܡܸܬܼܦܪܹܝܢ
ܩܕܼܵܡܲܝܟܿܘܿܢ: ܐܵܘ ܐܵܦܠܵܐ ܡܸܬܼܩܪܵܝܘܼ ܐܸܬܼܩܪ̈ܵܝܼܢ. ܐܵܘ ܕܗܵܕܹܐ ܒܲܠܚܘܿܕܼ
ܝܵܨ̇ܦܝܼܢ ܐܢ̄ܬܿܘܿܢ: ܕܲܬܼܩܲܕܿܡܘܼܢ ܠܐܲܝܠܹܝܢ ܕܲܥܬܼܝܼܕܼܝܼܢ ܗ̄ܘ̣ܵܘ ܠܡܹܐܬܼܵܐ
ܠܒܘܼܚܵܢܵܐ. ܥܵܒܲ̇ܪ ܐ̄ܢܵܐ ܠܗܵܠܹܝܢ ܕܐܲܡܒܿܪܘܿܤܝܼܘܿܣ: ܕܲܕܼܠܵܐ
ܒܘܼܠܒܵܠܵܐ ܐܸܡܲ݁ܪ ܠܲܚܕܼܵܝܘܼܬܼܵܐ ܕܐܲܠܵܗܵܐ ܘܲܕܒܸܤܪܵܐ. ܒܬܲܪ̈ܬܲܝܗܹܝܢ
ܗ̤ܘ ܡܡܲܠܸܠ ܒܪܵܐ ܕܐܲܠܵܗܵܐ: ܕܒܹܗ ܐܝܼܬܲܝܗܘܿܢ ܬܪܹܝܢ ܟܝܵܢ̈ܝܼܢ:
ܒܲܪܢܵܫܵܐ ܘܐܲܠܵܗܵܐ. ܐܵܬܵܢܵܤܝܼܣ ܕܹܝܢ ܬܘܼܒܼ ܐܵܡܲ݁ܪ: ܕܐܸܢܗ̤ܘ ܕܐܲܝܟܼ
ܕܒܲܫܐܝܼܠܘܼ ܐܝܼܬܼܵܘܗܝ ܗ̄ܘ̣ܵܐ ܒܦܲܓܼܪܵܐ ܐܲܠܵܗܵܐ ܡܸܠܬܼܵܐ: ܐܲܝܟܼ ܕܗܵܠܹܝܢ
ܐܵܡ̇ܪܝܼܢ: ܗܵܘ̇ ܓܹܝܪ ܕܒܲܫܐܝܼܠܘܼ ܡܸܬܼܐܡܲܪ ܦܲܢܛܵܤܝܼܵܐ ܐܝܼܬܼܵܘܗܝ:
ܡܸܫܬܲܟܲܚ ܠܹܗ ܦܲܢܛܵܤܝܼܵܐ ܐܵܦ ܦܘܼܪܩܵܢܵܐ ܘܵܩܝܡܬܼܵܐ ܕܲܒܼܝ̈ܢܵܫܵܐ܀
ܬܘܼܒܼ ܕܹܝܢ ܥܲܠ ܢܲܩܝܼܦܘܼܬܼܵܐ ܐܵܠܵܗܵܝܬܼܵܐ ܡܹܐܡܲܪ: ܡܸܛܠ ܕܐܵܦ
ܡ̣ܢ ܫܡܵܐ ܕܢܲܩܝܼܦܘܼܬܼܵܐ ܥܵܪܹܩ ܐܲܢ̄ܬܿ ܐܲܝܟܼ ܕܡ̣ܢ ܪܘܼܫܥܸܵܐ. ܐܲܢ̄ܬܿ
ܕܐܵܦ ܠܗܵܕܹܐ ܐܸܡܲ݁ܪ ܐܲܢ̄ܬܿ: ܕܡܲܢ ܕܢܹܐܡܲܪ ܕܐܲܝܟܼ ܕܒܲܢܒܼܝܹ̈ܐ: ܐܵܘ
ܕܲܒܼܛܲܝܒܿܘܼ ܐܸܬܼܢܩܸܦ ܠܹܗ: ܘܠܵܬ ܕܒܼܬܘܼܤܝܼܵܐ ܐܸܬܼܢܩܸܦ: ܗܵܢܵܘ ܕܹܝܢ
ܕܢܸܤܬܿܓܸܕܼ ܥܲܡܹܗ ܡܸܛܠ ܚܕܼܵܝܘܼܬܼܵܐ܀ ܘܬܼܘܼܒܼ ܡ̣ܢ ܓܪܝܼܓܼܘܿܪܝܼܘܿܣ:
ܐܲܠܵܗܵܐ ܡ̇ܢ ܕܐܸܬܼܒܲܪܢܲܫ: ܒܲܪܢܵܫܵܐ ܕܹܝܢ ܕܐܸܬܼܐܲܠܲܡ. ܠܵܘ ܓܹܝܪ ܡ̣ܢ
pb. 316
ܟܝܵܢܵܐ ܕܝܼܠܹܗ ܐܝܼܬܼ ܠܹܗ ܗܵܕܹܐ: ܐܸܠܵܐ ܡ̣ܢ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ.
ܒܤܸܓܼܕܬܼܵܐ ܓܹܝܪ ܕܐܲܠܵܗܘܼܬܼܵܐ: ܗܵܝ̇ ܕܲܡܚܲܝܕܼܵܐ ܠܹܗ: ܡܸܤܬܿܓܸܕܼ
ܥܲܡܵܗ̇: ܠܵܘ ܒܤܸܓܼܕܬܵܪܐ ܕܝܼܠܹܗ. ܐܲܝܟܲܢܵܐ ܕܗܵܝ̇ ܕܐܸܬܼܐܲܠܲܗ: ܠܵܐ
ܗ̄ܘ̣ܵܐ ܢܸܫܬܲܚܠܲܦ ܠܐܲܠܵܗܘܼܬܼܵܐ: ܘܠܵܐ ܗ̄ܘ̣ܵܐ ܡ̣ܢ ܟܝܵܢܵܐ ܕܝܼܠܹܗ
ܐܸܬܼܐܲܠܲܗ: ܐܸܠܵܐ ܡ̣ܢ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ. ܒܤܸܓܼܕܬܼܵܐ ܓܹܝܪ
ܕܐܲܠܵܗܘܼܬܼܵܐ ܗܵܝ̇ ܕܲܡܚܲܝܲܕܼܵܐ ܠܹܗ ܡܸܬܿܓܼܕܼ: ܘܠܵܘ ܒܤܸܓܼܕܬܼܵܐ
ܕܝܼܠܹܗ. ܐܲܝܟܼ ܡܵܐ ܕܐܵܦ ܐܸܬܼܐܲܠܲܗ: ܠܵܐ ܗ̄ܘ̣ܵܐ ܕܲܢܦܲܩ̣ ܡ̣ܢ
ܐ̄ܢܵܫܘܼܬܹܗ: ܘܠܵܘ ܡ̣ܢ ܟܝܵܢܹܗ ܐܸܬܼܐܲܠܲܗ: ܐܸܠܵܐ ܡ̣ܢ ܚܕܼܵܝܘܼܬܼܵܐ
ܕܐܲܠܵܗܘܼܬܼܵܐ. ܐܲܝܠܹܝܢ ܡ̇ܢ ܕܲܡܫܲܚ̱ܠܦܝܼܢ ܒܐܘܼܤܝܼܵܐ: ܒܲܚܕܼܵܐ ܕܹܝܢ
ܤܸܓܼܕܬܼܵܐ ܡܸܤܬܲܓܼܕܝܼܢ: ܡܸܬܼܐܲܡܪܵܐ ܕܥܲܡ ܚܕܼܵܕܹ̈ܐ ܡܸܤܬܲܓܼܕܝܼܢ.
ܐܸܡܲܬܼܝ ܕܹܝܢ ܕܐܲܝܟܼ ܕܒܲܚܕܼܵܝܘܼܬܼܵ ܕܦܲܪܨܘܿܦܵܐ ܡܸܬܼܐܲܡܪܝܼܢ: ܡܸܛܠ
ܕܲܒܼܦܲܪܨܘܿܦܵܐ ܠܲܝܬܿ ܠܹܗ ܦܘܼܪܫܵܢܵܐ: ܐܲܝܟܲܢ ܡܸܫܟܿܚܵܐ ܕܚܲܕܼ ܢܸܤܬܿܕܼܩ
ܘܢܸܬܼܐ̱ܡܲܪ ܕܗ̤ܘ ܡܸܤܬܿܓܼܕܼ؟ ܟܲܕܼ ܕܝܼܢ ܡ̣ܢ ܐܘܼܤ̈ܝܼܵܣ ܐܸܬܼܐ̱ܡܲܪ:
ܡܸܛܠ ܦܘܼܪܫܵܢܵܐ ܕܐܝܼܬܼ ܒܗܹܝܢ: ܡܸܬܼܐ̱ܡܲܪ ܕܥܲܡܹܗ ܡܸܤܬܿܓܸܕܼ:
ܡܸܛܠ ܕܐܲܝܟܼ ܕܲܒܼܬܿܪܬܹܝܢ ܐܘܼܤ̈ܝܼܵܣ. ܐܲܝܟܲܢܵܐ ܡܸܢܼܐܡܲܪ ܐܵܦ ܥܲܠ
ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ: ܗܵܘ̇ ܡܵܐ ܕܐܝܼܬܲܝܗܘܿܢ ܚܲܕܼ ܒܲܟܼܝܵܢܵܐ
ܕܐܲܠܵܗܘܼܬܼܵܐ: ܕܐܲܠܵܗܵܐ ܡܸܤܬܿܓܸܕܼ. ܘܲܒܗܵܘ̇ ܡܵܐ ܕܡܸܬܼܦܲܪܫܝܼܢ
ܒܦܲܪܨܘܿܦܵܐ: ܟܲܕܼ ܛܵܒܼܻ ܒܲܟܼܝܵܢܵܐ ܠܵܐ ܡܸܬܼܦܲܪܫܝܼܢ: ܐܸܠܵܐ ܒܝܵܬܼܗܘܿܢ
ܐܲܝܬܲܝܗܘܿܢ ܒܟܼܠܙܒܲܢ: ܐܵܡ̇ܪܝܼܢ ܚ̄ܢܲܢ: ܕܥܲܡ ܐܲܒܼܵܐ ܘܥܲܡ ܪܘܼܚܵܐ
ܕܩܘܼܕܼܫܵܐ ܡܸܤܬܿܓܸܕܼ ܒܪܵܐ. ܐܲܝܟܲܚܢܵܐ: ܕܠܵܐ ܒܲܕܼܡܘܼܬܼ ܤܵܒܹܠܝܼܘܿܣ:
ܕܠܵܐ ܩܢܘܿܡܵܐ ܘܲܕܼܠܵܐ ܐܘܼܤܝܼܵܐ ܢܸܥܒܸܕܼ ܐܸܢܘܿܢ ܠܦܪ̈ܨܘܿܦܹܐ. ܗܵܘ̇
ܓܹܝܪ ܕܲܡܒܲܛܸܠ ܠܗܵܝ̇ ܕܡܼܬܲܐܡܪܵܐ ܕܡܸܤܬܿܓܸܕܼ ܒܪܵܐ ܥܲܡ ܐܲܒܼܵܐ:
pb. 317
ܡܒܲܛܸܠ ܠܗܵܝ̇ ܕܐܝܼܬܼܵܘܗܝ ܒܪܵܐ ܒܲܩܢܘܿܡܵܐ. ܗܵܟܲܢܵܐ ܐܵܦ ܥܲܠ
ܡܫܝܼܚܵܐ: ܐܸܡܲܬܼܝ ܕܥܲܠ ܦܲܪܨܘܿܦܵܐ ܐܵܡ̇ܪܝܼܢ ܚ̄ܢܲܢ: ܒܪܵܐ ܕܐܲܠܵܗܵܐ
ܐܵܡ̇ܪܝܼܢ ܚ̄ܢܲܢ ܕܡܸܤܬܿܓܸܕܼ: ܟܲܕܼ ܪܵܢܹܝܢ ܚ̄ܢܲܢ ܐܵܦ ܥܲܠ ܒܸܤܪܵܐ
ܕܲܡܚܲܝܲܕܼ ܥܲܡܹܗ. ܟܲܕܼ ܕܹܝܢ ܡ̣ܢ ܟܝܵܢܹ̈ܐ ܢܸܥܒܸܿܕܼ ܡܸܠܬܲܢ: ܘܲܬܼܪܹܝܢ
ܟܝܵܢ̈ܝܼܢ ܐܵܡ̇ܪܝܼܢ ܚ̄ܢܲܢ: ܐܵܡ̇ܪܝܼܢ ܚ̄ܢܲܢ ܕܡܸܤܬܲܓܼܕܵܐ ܐ̄ܢܵܫܘܼܬܼܵܐ ܥܲܡ
ܐܲܠܵܗܘܼܬܼܵܐ ܕܲܡܚܲܝܕܼܵܐ ܠܵܗ̇. ܘܗܵܘ̇ ܡ̇ܢ ܕܲܡܥܵܘܸܟܼ ܕܠܵܐ ܢܸܬܼܐܲܡܪ̈ܵܢ
ܬܲܪܬܹܿܝܢ ܐܘܼܤ̈ܝܼܵܣ ܘܲܕܼܢܸܤܬܿܓܸܕܼ ܥܲܡܹܗ: ܡܒܲܛܸܠ ܠܗܵܝ̇ ܕܒܼܐܘܼܤܝܼܵܐ
ܘܒܲܩܢܘܿܢܡܵܐ ܐܝܼܬܹܝܗ̇ ܐ̄ܢܵܫܘܼܬܼܵܐ ܘܐܲܠܵܗܘܼܬܼܵܐ. ܐܲܟܼܙܢܵܐ ܕܐܵܦ ܥܲܠ
ܬܠܝܼܬܼܵܝܘܼܬܼܵܐ ܗܘ̤ܵܬܼ ܡܸܠܬܲܢ: ܐܲܝܟܼ ܕܐܵܦ ܓܪܝܼܓܼܘܿܪܝܼܘܿܣ ܐܵܡܲ݁ܪ.
ܕܝܼܠܲܢ ܕܐܲܝܟܼ ܗܵܠܹܝܢ ܐܝܼܬܲܝܗܹܝܢ: ܕܐܲܝܟܼ ܗܵܠܹܝܢ ܐܵܦ ܕܐܲܝܒܼ̈ܗܵܬܼܵܐ.
ܐܸܬܼܒܲܩܵܘ ܗܵܟܹܝܠ ܒܕܼܝܼܢܵܐ ܕܲܗܘ̤ܵܐ ܥܲܠ ܗܵܠܹܝܢ: ܕܐܲܝܟܼ ܕܐܵܬܼ̇ܝܵܐ
ܗ̄ܘ̣ܵܬܼ ܥܵܒܼ̇ܪܝܼܢ ܗ̄ܘ̣ܵܘ ܠܟܼܠܗܹܝܢ: ܟܲܕܼ ܥܵܪܩܝܼܢ ܗ̄ܘ̣ܵܘ ܡ̣ܢ
ܒܘܼܚܲܢܵܐ ܐܲܝܟܼ ܕܡ̣ܢ ܢܘܼܪܵܐ.
ܒܵܗ̇ ܒܲܕܼܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ ܕܫܸܬܼ.
ܐܸܬܼܒܲܝܲܢ ܒܗܵܠܹܝܢ: ܕܒܲܪ ܫܵܥܬܹܗ ܢܵܩ̈ܦܵܢ ܠܗܹܝܢ. ܕܲܡܪܲܚܡܵܢܵܐ
ܠܲܡ ܢܸܗܘܸܐ ܘܪܲܒܿ ܟܘܼܡܪܹ̈ܐ ܡܗܲܝܡܢܵܐ ܒܗܵܠܹܝܢ ܕܲܠܘܵܬܼ ܐܲܠܵܗܵܐ:
ܒܗܵܝ̇ ܓܹܝܪ ܕܚܲܫ̣ ܘܐܸܬܼܢܲܤܝܼ: ܡܸܫܟܲܚ ܕܲܢܥܲܕܲܪ ܠܐܲܝܠܹܝܢ ܕܡܸܬܼܢܲܤܹܝܢ.
ܡܵܕܹܝܢ ܗܵܘ̇ ܕܚܲܫ̣: ܪܲܒܿ ܟܘܼܡܪܹ̈ܐ ܗ̄ܘ̣. ܚܵܫܘܿܫܵܐ ܕܹܝܢ ܐܝܼܬܼܵܘܗܝ
ܗܲܝܟܿܠܵܐ: ܠܵܐ ܐܲܠܵܗܵܐ ܠܵܐ ܚܵܫܘܿܫܵܐ: ܕܐܲܚܝܼ ܠܗܲܝܟܿܠܵܐ ܚܵܫܘܿܫܵܐ.
ܡܲܢ̣ܘܼ ܓܹܝܪ ܡܸܫܟܲܚ ܕܢܸܥܒܸܿܕܼ ܤܢܹܐܓܼܪܘܼܬܼܵܐ ܠܓܼܘܼ̈ܕܵܦܹܐ ܕܐܲܝܟܼ
pb. 318
ܗܵܠܹܝܢ؟ ܚܵܫܘܿܫܵܐ ܐܸܡ̇ܪܹܬܼ ܠܗܲܝܟܿܠܵܐ: ܘܠܵܐ ܗ̄ܘ̣ܵܐ ܠܐܲܠܵܗܵܐ ܡܫܝܚܵܢܵܐ
ܕܗܲܝܟܿܠܵܐ ܗܵܘ̇ ܕܚܲܫ̣. ܡܸܛܠ ܗܵܠܹܝܢ ܚܲܝܸܒܼܬܿܘܿܢܵܢܝ: ܐܲܝܟܼ ܟܵܗ̈ܢܹܐ
ܥܲܠ ܓܘܼܕܵܦܹ̈ܐ: ܕܐܸܡ̇ܪܹܬܼ ܕܠܵܐ ܡܸܬܼܚܲܒܿܠܵܢܵܐ ܘܠܵܐ ܡܵܝܘܿܬܼܵܐ ܘܡܲܚܝܵܢܵܐ
ܕܟܼܠ ܐܝܼܬܼܵܘܗܝ ܐܲܠܵܗܵܐ. ܐܵܘ ܕܠܩܘܼܒܼܠܵܐ: ܡܸܬܼܚܲܒܿܠܵܢܵܐ ܘܡܵܝܘܿܬܼܵܐ
ܘܲܤܢܝܼܩ ܥܲܠ ܚܲܝܹ̈ܐ؟ ܐܵܦܠܵܐ ܓܹܝܪ ܗ̤ܘ ܟܬܼܵܒܼܵܐ ܡܠܸܦ ܠܟܼܘܿܢ:
ܕܠܵܐ ܗ̄ܘ̣ܵܐ ܐܲܠܵܗܘܼܬܼܵܐ ܤܢܝܼܩܵܐ ܥܲܠ ܩܘܼܕܵܫܵܐ: ܐܸܠܵܐ ܒܸܤܪܵܐ؟
ܗܵܢܵܐ ܟ̱ܠܹܗ ܩܵܥܹ̇ܐ ܠܘܵܬܼܟܼܘܿܢ ܐܲܡܒܿܪܘܿܤܝܼܣ: ܘܠܵܐ ܫܵܡ̇ܥܝܼܢ
ܐܢ̄ܬܿܘܿܢ. ܐܸܠܵܐ ܗܵܟܹܝܠ ܫܵܡ̇ܥܝܼܢ ܐ̄ܢܬܿܘܿܢ ܘܠܵܐ ܫܵܡ̇ܥܝܼܢ ܐܢ̄ܬܿܘܿܢ:
ܘܚܵܙܹ̇ܝܢ ܐܢ̄ܬܿܘܿܢ ܘܠܵܐ ܚܵܙܹ̇ܝܢ ܐܢ̄ܬܿܘܿܢ: ܘܕܼܠܩܘܼ̈ܒܼܠܵܝܵܬܼܵܐ ܡܩܲܒܿܠܝܼܢ
ܐܢ̄ܬܿܘܿܢ. ܐܲܝܟܲܢܵܐ ܗܵܟܹܝܠ ܠܗܵܠܹܝܢ ܡܩܲܒܿܠܝܼܢ ܐܢ̄ܬܿܘܿܢ: ܘܲܠܕܼܝܠܝܼ
ܠܵܐ ܩܲܒܸܿܠܬܿܘܿܢ؟ ܠܵܐ ܡܸܕܸܡ ܕܢܘܼܟܼܪܵܝ ܐܸܡ̇ܪܹܬܼ: ܘܠܵܐ ܬܘܼܒܼ
ܡܸܕܡ ܕܲܡܫܲܚܠܲܦ ܒܦܸܬܼܓܼܵܡܵܘ̈ܗܝ ܙܥܘܿܪܹ̈ܐ ܠܗܵܠܹܝܢ ܕܝܼܠܹܗ
ܟܸܬܼ̇ܒܹܿܬܼ: ܕܲܒܼܗܵܘ̇ ܡܵܐ ܕܚܲܫ̣ ܘܐܸܬܼܢܲܤܝܼ: ܡܸܫܟܲܚ ܕܲܢܥܲܕܲܪ ܠܐܲܝܠܹܝܢ
ܕܡܸܬܼܢܲܤܹܝܢ.
ܘܩܵܥܹ̇ܐ ܟܝܵܢܵܐ ܗܵܘ̇ ܕܚܲܫ̣: ܘܠܵܐ ܤܢܝܼܩܷܼܢ ܗ̣̄ܘܲܝܬܿܘܿܬ ܕܡܹܢܝ
ܐܵܘ ܡ̣ܢ ܐ̄ܚܪ̈ܵܢܹܐ ܬܹܐܠܦܘܼܢ. ܗ̤ܘ ܟܬܼܵܒܼܵܐ ܩܵܥܹ̇ܐ: ܐܵܘܕܵܘ ܠܲܡ ܗܵܟܹܝܠ
ܫܘܼܒܼܚܵܐ ܕܐܲܠܵܗܵܐ: ܘܚܲܫܹ̈ܐ ܕܒܲܪܢܵܫܵܐ. ܗܵܠܹܝܢ ܐܲܡܒܿܪܘܿܤܝܼܣ ܐܵܡܲ݁ܪ
ܠܘܵܬܼ ܟܠܟܼܘܿܢ. ܡ̇ܢ ܡܸܬܼܩܲܢܛܝܼܢ ܐܢ̄ܬܿܘܿܢ ܠܲܡܩܲܒܵܠܘܼ ܗܵܠܹܝܢ
ܕܐܲܡܒܿܪܘܿܤܝܼܣ؟ ܘܲܒܼܗܹܝܢ ܒܡܸܠܲܝ̈: ܐܵܦ ܠܗܵܠܹܝܢ ܕܝܼܠܹܗ ܡܲܚܪ̱ܡܝܼܢ
ܐܢ̄ܬܿܘܿܢ. ܗܵܠܹܝܢ ܐܸܡ݂ܲܪ ܗܵܘ̇: ܥܲܠ ܗܵܠܹܝܢ ܚܲܒܸܒܼܬܿܘܿܢܵܢܝ. ܡܵܕܹܝܢ ܠܵܘ
ܠܝܼ: ܐܸܠܵܐ ܐܵܦ ܠܗܵܘ̇. ܠܗܵܠܹܝܢ ܗ̄ܘ̣ ܓܹܝܪ ܕܗܵܘ̇ ܐܸܡ̇ܪܹܬܼ: ܗܵܠܹܝܢ
ܕܐܲܢ̄ܬܿܘܿܢ ܐܲܝܬܿܝܼܬܿܘܿܢ. ܡܲܢ̣ܘܼ ܡ̣ܢ ܒܢܲܝ̈ ܐ̄ܢܵܫܵܐ ܗ̄ܘ̣ ܕܲܠܗܵܠܹܝܢ
pb. 319
ܡܫܲܚܠܸܦ: ܘܐܲܝܟܼ ܕܲܠܩܘܼ̈ܒܼܠܵܝܬܼܵܐ ܡܸܫܟܲܚ ܠܲܡܩܲܒܵܠܘܼܬܹܗܹܝܢ؟ ܠܵܘ
ܥܲܠ ܒܘܼܚܵܢܵܐ ܤܲܓܿܝܼܐܵܐ ܤܢܝܼܩ ܐ̄ܢܵܐ ܠܲܡܩܲܝܵܡܘܼ ܗܵܠܹܝܢ ܕܝܼܠܝ:
ܐܸܠܘܼ ܠܒܼܘܼܚܵܢܵܐ ܘܲܐܠܕܼܝܼܢܵܐ ܐܸܬܼܵܘ. ܘܠܵܘ ܡ̣ܢ ܓܸܢ̄ܒܼ ܐ̄ܚܪܹܝܢ: ܐܸܠܵܐ
ܡ̣ܢ ܗܵܠܹܝܢ ܕܗܸܢܘܿܢ ܐܸܡ݂ܲܪܘ ܘܐܸܬܼܚܲܫܲܚܘ ܒܤܵܗ̈ܕܘܵܬܼܵܐ ܡܲܠܸܦ
ܗ̄ܘܹ̇ܝܬܼ: ܕܡܲܢ̣ܘܼ ܬܟܼܝܼܾ ܗ̄ܘ̣ܵܐ ܥܲܠ ܕܝܼܢܵܐ: ܘܡܲܢܘܼ ܕܲܥܕܲܩ̣ ܡܸܢܹܗ
ܘܚܲܛܦܹܗ ܒܲܩܛܝܼܪܵܐ: ܘܡܸܛܠ ܡ̇ܢ؟ ܘܡ̣ܢܟܠ ܦܘܿܪܣ: ܐܵܦ
ܠܠܵܐ ܡܸܤܬܲܟܿܠܵܢܹ̈ܐ ܓܲܠܝܵܐ ܗ̄ܘ̣ܵܬܼ. ܐܲܢ̄ܬܿ ܐܸܡ݂ܲܪܬܿ: ܕܐܝܼܬܼܵܘܗܝ ܗ̄ܘ̣ܵܐ
ܠܵܐ ܚܵܫܘܿܫܵܐ ܒܦܲܓܼܪܵܐ ܚܵܫܘܿܫܸܐ. ܘܠܝܼ ܡܩܲܛܪܸܓܼ ܐܲܢ̄ܬܿ ܐܲܝܟܼ ܕܠܲܐܝܢܵܐ
ܕܪܘܼܫܥܵܠܐ ܐܵܡܲ݁ܪ ܐ̄ܢܵܐ: ܕܗܲܝܟܿܠܵܐ ܕܐܲܠܵܗܵܐ ܐܝܼܬܼܵܘܗܝ ܚܵܫܘܿܫܵܐ: ܘܠܵܐ
ܗ̄ܘ̣ܵܐ ܕܡܲܚܝܵܢܵܐ ܕܗܲܝܟܿܠܵܐ ܐܝܼܬܼܵܘܗܝ ܚܵܫܘܿܫܵܐ. ܐܸܢ ܗ̤ܘ ܕܒܲܫܪܲܪܵܐ
ܐܵܡܲ݁ܪ ܐܲܢ̄ܬܿ: ܕܐܝܼܬܼܵܘܗܝ ܐܲܠܵܗܵܐ ܠܵܐ ܚܵܫܘܿܫܵܐ ܒܦܲܓܼܪܵܐ ܚܵܫܘܿܫܵܐ: ܘܠܵܐ
ܗ̄ܘ̣ܵܐ ܫܚܝܼܡܵܐܝܼܬܼ ܐܲܝܟܼ ܕܲܠܡܲܛܥܝܵܢܘܼܬܼܵܐ ܐܸܬܼܚܲܫܲܚܬܿ ܗܵܟܲܢܵܐ ܒܲܫܡܵܐ
ܕܠܑܵ ܚܵܫܘܿܫܐ: ܐܲܝܟܲܢܵܐ ܕܢܸܫܒܿܩܘܼܢܵܟܼ ܒܝܲܕܼ ܟܠܗܹܝܢ ܠܡܹܐܡܲܪ
ܘܲܠܡܸܕܼܪܲܫ: ܕܚܵܫܘܿܫܵܐ ܗ̄ܘ̣ ܐܲܠܵܗܵܐ ܘܡܵܝܘܿܬܼܵܐ: ܘܥܲܠ ܗܵܠܹܝܢ
ܡܩܲܛܪܸܓܼ ܐܲܢ̄ܬܿ ܠܝܼ: ܕܐܵܡܲ݁ܪ ܐ̄ܢܵܐ ܕܚܵܫܘܿܫܵܐ ܗ̄ܘ̣ ܗܲܝܟܿܠܵܐ
ܕܐܲܠܵܗܵܐ: ܘܠܵܐ ܗ̄ܘ̣ܵܐ ܡܲܚܝܵܢܵܐ ܕܗܲܝܟܿܠܵܐ ܕܚܲܫ̣ ܒܪܲܡ ܠܕܼܝܼܢܵܐ
ܕܕܲܝܵܢܹ̈ܐ ܕܕܲܐܲܝܟܼ ܐܲܝܟܲܢܵܐ ܐܝܼܬܼܵܘܗܝ ܚܲܟܿܝܼܡܵܐ ܝܑܼܠܸܦܬܿܘܿܢ: ܘܲܕܼܡܸܛܠ
ܐܲܝܕܵܐ ܐܸܬܿܬܿܕܝܼܢܹ̇ܬܼ ܐܸܫܬܵܘܕܲܥܬܿܘܿܢ. ܒܪܲܡ ܫܲܦܝܼܪ̈ܵܢ ܕܢܸܬܼܦܵܪ̈ܝܵܢ ܐܵܦ
ܗܵܠܹܝܢ ܕܫܲܪܟܵܐ.
pb. 320
ܒܵܗ̇ ܒܲܕܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ
ܕܥܸܤܪܝܼܢ ܘܲܫܒܲܥ.
ܕܬܹܐܠܦܘܼܢ ܠܲܡ ܕܲܟܼܡܵܐ ܪܵܘܪܒܼܵܐܝܼܬܼ ܐܝܼܬܼ ܗ̄ܘ̣ܵܐ ܠܹܗ
ܢܲܩܝܼܦܘܼܬܼܵܐ ܠܘܵܬܼ ܐܲܠܵܗܵܐ: ܕܐܵܦ ܒܥܘܸܠܵܐ ܡܸܬܼܚܙܸܐ ܗ̄ܘ̣ܵܐ ܒܸܤܪܵܐ
ܡܵܪܵܢܵܝܵܐ. ܐܝܼܬܼܵܘܗܝ ܓܹܝܪ ܗ̤ܘ ܟܲܕܼ ܗ̤ܘ: ܥܘܸܠܵܐ ܘܡܵܪܹܗ ܕܥܘܸܠܵܐ.
ܫܲܒܲܚܬܿܘܿܢ ܠܡܸܠܲܬܼܝ: ܐܸܠܵܐ ܕܠܵܐ ܒܘܼܚܵܢܵܐ ܠܵܐ ܬܩܲܠܤܘܼܢܵܗ̇.
ܐܸܡ̇ܪܹܬܼ ܓܹܝܪ: ܕܗ̤ܘ ܟܲܕܼ ܗ̤ܘ ܐܝܼܬܼܵܘܗܝ: ܥܘܸܠܵܐ ܘܥܵܡ̇ܘܿܪܵܐ
ܒܥܘܸܠܵܐ. ܬܸܗܘܸܐ ܓܹܝܪ ܕܗܵܟܲܢܵܐ ܐܸܡ̇ܪܹܬܼ. ܠܵܐ ܗܵܦܹ̇ܟܼ ܐ̄ܢܸܵܐ ܡ̣ܢ
ܗܵܝ̇ ܕܐܝܼܬܼܵܘܗܝ ܗ̤ܘ ܟܲܕܼ ܗ̤ܘ: ܥܘܸܠܵܐ ܘܡܵܪܹܗ ܕܥܘܸܠܵܐ. ܐܸܡ̇ܪܹܬܼ
ܕܐܝܼܬܼܵܘܗܝ: ܥܘܸܠܵܐ ܘܥܵܡ̇ܘܿܪܵܐ ܕܲܒܼܥܘܸܠܵܐ. ܐܸܠܵܐ ܡܦܲܫܸܩ ܐ̄ܢܵܐ
ܕܒܲܐܝܢܵܐ ܙܢܵܐ ܗ̤ܘ ܟܲܕܼ ܗ̤ܘ: ܥܘܸܠܵܐ ܘܡܵܪܹܗ ܕܥܘܸܠܵܐ. ܐܲܝܟܲܢܵܐ
ܕܠܵܐ ܬܸܤܒܲܪ ܥܠܲܝ ܕܐܵܡܲ݁ܪ ܐ̄ܢܵܐ ܬܲܪ̈ܬܲܝܗܹܝܢ ܒܐܘܼܤܝܼܵܐ ܥܲܠ
ܐܲܠܵܗܵܐ ܡܸܠܬܼܵܐ: ܐܲܝܟܼ ܕܐܝܼܬܼܵܘܗܝ ܒܐܘܼܤ̈ܝܼܵܣ ܬܲܪ̈ܬܲܝܗܹܝܢ. ܐܸܠܵܐ ܐܲܝܟܼ
ܡܵܐ ܕܡܸܬܼܚܙܸܐ ܗ̄ܘ̣ܵܐ ܥܘܸܠܵܐ: ܐܝܼܬܼܵܘܗܝ ܗ̄ܘ̣ܵܐ ܡ̣ܢ ܟܝܵܢܵܐ ܕܝܼܠܲܢ:
ܥܒܼܝܼܕܼܵܐ ܘܒܲܪܝܵܐ. ܐܲܝܟܼ ܡܵܐ ܕܹܝܢ ܕܲܟܼܤܸܐ ܗ̄ܘ̣ܵܐ: ܡܵܪܵܐ ܘܥܵܒܼ̇ܘܿܕܼܵܐ
ܕܥܘܸܠܵܐ ܕܲܓܼܠܸܐ ܗ̄ܘ̣ܵܐ. ܚܲܕܼ ܓܹܝܪ ܦܲܪܨܘܿܦܵܐ ܕܲܬܼܪ̈ܲܝܗܘܿܢ: ܘܠܵܘ
ܚܕܼܵܐ ܐܘܼܤܝܼܵܐ. ܡܸܛܠ ܗܵܠܹܝܢ ܐܸܡ̇ܪܹܬܼ: ܕܲܒܼܦܲܪܨܘܿܦܵܐ ܚܲܕܼ:
ܘܒܼܐܘܼܤ̈ܝܼܵܣ ܐ̄ܚܪܹܢܵܐ ܘܲܐ̄ܚܪܹܢܵܐ ܐܝܼܬܼܵܘܗܝ ܗ̄ܘ̣ܵܐ: ܥܘܸܠܵܐ ܘܡܵܪܹܗ
ܕܥܘܸܠܵܐ. ܗܵܘ̇ ܓܹܝܪ ܕܲܡܫܲܪܸܐ ܘܡܸܬܿܕܲܪܲܓܼ ܘܡܸܫܬܲܡܠܸܐ: ܠܵܐ
ܐܝܼܬܼܵܘܗܝ ܐܲܠܐܵܗܵܐ: ܐܵܦܸܢ ܡܸܛܠ ܡܸܬܼܚܵܘܝܵܢܘܼܬܹܗ ܕܲܒܼܩܲܠܝܼܠ ܩܲܠܝܼܠ
pb. 321
ܡܸܬܼܐܡܲܪ ܗܵܟܲܢܵܐ. ܐܵܦ ܓܪܝܼܓܼܘܿܪܝܼܘܿܣ ܠܗܵܝ̇ ܕܡܸܬܼܐܡܲܪ ܐܲܠܵܗܵܐ
ܒܬܲܪ̈ܬܲܝܗܹܝܢ: ܕܲܒܼܚܲܕܼ ܦܲܪܨܘܿܦܵܐ ܐܝܼܬܼܵܘܗܝ ܡܦܲܫܸܩ. ܕܠܵܐ ܢܸܤܒܲܪ
ܕܚܲܕܼ ܐܝܼܬܼܵܘܗܝ ܟܝܵܢܵܐ: ܐܵܡ݁ܲܪ: ܗܵܘ̇ ܕܲܡܫܲܪܸܐ ܘܡܸܬܿܕܲܪܲܓܼ
ܘܡܸܫܬܡܠܸܐ ܠܵܐ ܐܝܼܬܼܵܘܗܝ ܐܲܠܵܗܵܐ: ܐܵܦ ܐܸܢ ܡܸܛܠ ܡܸܬܼܚܵܘܝܵܢܘܼܬܼܵܐ
ܕܲܒܼܩܲܠܝܼܠ ܡܸܬܼܐܡܲܪ ܗܵܟܲܢܵܐ܀
ܠܗܵܕܹܐ ܐܵܦ ܬܹܐܘܿܦܝܼܠܘܿܣ ܐܸܡܲ݁ܪ: ܗܵܘ̇ ܐܘܼܡܵܢܵܐ ܪܹܫܵܝܵܐ ܕܟܼܠ.
ܡܸܠܬܼܵܐ ܕܐܲܠܵܥܗܵܐ: ܚܲܝ ܘܤܵܥܲ݁ܪ ܟܠ: ܗܵܘ̇ ܕܨܲܒܸܿܬܼ ܠܟܼܠ
ܒܠܵܚܡܘܼܬܼܵܐ ܡܛܲܟܲܤܝܼܵܬܼܵܐ: ܠܵܘ ܡ̣ܢ ܟܝܵܢܵܐ ܝܲܩܝܼܪܵܐ ܘܡ̣ܢ ܫܡܲܝܢܹ̈ܐ
ܫܩܲܠ̣ ܦܲܓܼܪܵܐ ܘܐܸܬܼ݂ܵܐ ܠܘܵܬܲܢ: ܐܸܠܵܐ ܒܛܝܼܢܵܐ ܚܵܘܝܼ ܪܲܒܿܘܼܬܼܵܐ
ܕܐܘܼܡܵܢܘܼܬܹܥܗ: ܟܲܕܼ ܡܬܲܪܸܨ ܠܒܲܪܢܵܫܵܐ ܕܐܸܬܼܓܒܸܠ ܡ̣ܢ ܛܝܼܢܵܐ܀
ܠܵܐ ܛܲܫܝܼ ܗ̄ܘ̣ܵܐ ܕܐܝܼܬܼܵܘܗܝ ܥܒܼܝܼܕܼܵܐ: ܘܐܝܼܬܼܵܘܗܝ ܬܘܼܒܼ ܥܵܒܼ̇ܘܿܕܼܵܐ.
ܠܵܐ ܗ̄ܘ̣ܵܐ ܠܥܵܒܼ̇ܘܿܕܼܵܐ ܥܒܼܝܼܕܼܵܐ ܘܲܠܡܵܪܵܐ ܥܲܒܼܕܵܐ: ܒܵܗ̇ ܟܲܕܼ ܒܵܗ̇
ܒܐܘܼܤܝܼܵܐ ܥܵܒܹ̇ܕܼ ܗ̄ܘ̣ܵܐ: ܐܲܝܟܼ ܕܐܲܢ̄ܬܿ ܕܵܪܹܫ ܐܲܢ̄ܬܿ ܥܲܡܲܢ. ܗ̤ܘܝܘܼ
ܓܹܝܪ ܟܲܕܼ ܗ̤ܘ ܐܝܼܬܼܵܘܗܝ ܐܲܪܥܵܢܵܐ ܘܲܫܡܲܝܵܢܵܐ: ܡܸܬܼܚܲܙܝܵܢܵܐ ܘܠܵܐ
ܡܸܬܼܚܲܙܝܢܵܐ: ܡܸܤܬܲܝܟܼܵܢܵܐ ܘܠܵܐ ܡܸܤܬܲܝܟܼܵܢܵܐ܀ ܐܲܝܟܿ ܕܐܸܡ݂ܲܪ
ܓܪܝܼܓܼܘܿܪܝܼܘܿܣ: ܗ̤ܘܝܘܼ ܟܲܕܼ ܗ̤ܘ ܐܝܼܬܼܵܘܗܝ ܥܘܸܠܵܐ ܘܡܵܪܹܗ
ܕܥܘܸܠܵܐ. ܐܸܠܵܐ ܠܵܐ ܒܵܗ̇ ܟܲܕܼ ܒܵܗ̇ ܗ̤ܘ ܟܲܕܼ ܗ̤ܘ: ܐܸܠܵܐ ܒܦܲܪܨܘܿܦܵܐ.
ܥܘܸܠܵܐ ܕܹܝܢ ܘܡܵܪܹܗ ܕܥܘܸܠܵܐ: ܒܲܟܼܝܵܢܹ̈ܐ. ܐ̄ܚܪܹܢܵܐ ܓܹܝܪ ܘܲܐ̄ܚܪܹܢܵܐ
ܐܝܼܬܲܝܗܘܿܢ ܗܵܠܹܝܢ ܕܡܸܢܗܘܿܢ ܐܝܼܬܼܵܘܗܝ ܡܫܝܼܚܵܐ: ܠܵܘ ܕܹܝܢ ܐ̄ܚܪܹܢܵܐ
ܘܲܐ̄ܚܪܹܢܵܐ: ܚܵܣ܀ ܠܡܵܢܵܐ ܗܵܟܹܝܠ ܗܵܠܹܝܢ ܕܦܲܪܨܘܿܦܵܐ: ܕܐܘܼܤܝܼܵܐ
ܘܕܲܟܼܝܵܢܵܐ ܥܵܒܹ̇ܕܼ ܐܲܢ̄ܬܿ ܠܗܹܝܢ؟ ܘܚܵܛܹ̇ܦ ܐܲܢ̄ܬܿ ܠܐܘܼܤܝܼܵܐ ܕܐܲܠܵܗܵܐ:
pb. 322
ܠܐܘܼܤ̈ܝܼܵܣ ܬܲܪ̈ܬܲܝܗܹܝܢ. ܘܡܲܦܸܩ ܐܲܢ̄ܬܿ ܠܲܟܼܝܵܢܵܐ ܕܝܼܠܲܢ ܘܲܠܪܹܫܝܼܬܼܵܐ
ܕܡܸܢܲܢ: ܟܲܕܼ ܠܵܐ ܝܵܗܹ̇ܒܼ ܐܲܢ̄ܬܿ ܠܵܐ ܠܥܘܸܠܵܐ ܘܠܵܐ ܠܡܵܪܹܗ ܕܥܘܸܠܵܐ
ܫܘܼܚܠܵܦܵܐ ܕܲܟܼܝܵܢܹ̈ܐ. ܐܸܠܵܐ ܒܵܗ̇ ܟܲܕܼ ܒܵܗ̇ ܒܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ
ܐܸܡܲ݁ܪ ܐܲܢ̄ܬܿ ܕܐܝܼܬܹܝܗ̇ ܐܘܼܤܝܼܵܐ ܕܥܘܸܠܵܐ: ܘܐܘܼܤܝܼܵܐ ܕܥܵܒܼ̇ܘܿܕܹܗ
ܕܥܘܸܠܵܐ. ܐܲܝܟܼ ܗܵܘ̇: ܕܗ̤ܘ ܥܲܒܼܕܵܗ̇ ܠܐܘܼܤܝܼܵܐ ܕܝܼܠܹܗ. ܘܲܕܿܬܲܪܬܹܝܢ
ܐܘܼܤ̈ܝܼܵܣ ܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ: ܡ̣ܢ ܚܕܼܵܐ ܐܘܼܤܝܼܵܐ ܕܐܲܠܵܗܵܐ
ܡܸܠܬܼܵܐ. ܐܵܘ ܕܐܘܼܤܝܼܵܐ ܕܒܲܪܢܵܫܵܐ: ܐܸܫܬܲܚܠܦܲܬ̤ ܠܐܘܼܤܼܵܐ ܕܐܲܠܵܗܵܐ
ܡܸܠܬܼܵܐ. ܐܸܢ ܓܹܝܪ ܥܵܪܹܩ ܐܲܢ̄ܬܿ ܡ̣ܢ ܕܲܠܡܹܐܡܲܪ ܗܵܟܲܢ: ܡܵܢܵܐ ܟܵܐܹ̇ܐ
ܐܲܢ̄ܬܿ ܒܐܲܝܢܵܐ ܕܢܲܗܝܼܪܵܐܝܼܬܼ ܐܸܡܲ݁ܪ: ܘܲܕܼܪܘܼܫܥܵܐ ܚܵܫܹ̇ܒܼ ܐܲܢ̄ܬܿ: ܘܲܒܼܪܘܼܫܥܵܐ
ܡܩܲܛܪܸܓܼ ܐܲܢ̄ܬܿ ܠܹܗ؟
ܡܸܛܠ ܡܵܢܵܐ ܕܹܝܢ ܐܲܢ̄ܬܿܘܿܢ ܕܲܝܵܢܹ̈ܐ: ܕܲܒܼܒܸܕܼܝܵܐ ܘܲܒܼܡܲܛܥܝܵܢܘܼܬܼܵܐ
ܘܒܲܩܛܝܼܪܵܐ ܗ̤ܘܲܝܬܿܘܿܢ: ܠܵܐ ܒܲܚܸܢܬܿܘܿܢ ܠܤܵܗ̈ܕܘܵܬܼܵܐ ܕܡ̣ܢ ܬܲܒܼ̈ܗܵܬܼܵܐ
ܐܸܬܼܟܬܸܒܼ؟ ܡܚܵܘܹ̇ܝܢ ܗ̣̄ܘܲܝܬܿܘܿܢ ܠܹܗ ܓܹܝܪ ܡ̣ܢ ܕܝܼܠܹܗ: ܕܗܵܢܵܐ ܡ̇ܢ
ܡܵܘܕܹܐ ܬܪܹܝܢ ܟܝܵܢܹ̈ܐ: ܐ̄ܚܪܹܢܵܐ ܘܲܐ̄ܚܪܹܢܵܐ. ܡ̣ܢ ܐܘܼܤܝܼܵܐ ܐ̄ܚܪܹܬܼܵܐ
ܘܲܐ̄ܚܪܹܬܼܵܐ: ܐܲܝܟܼ ܕܐܸܡ݂ܲܪܘ ܐܲܒܼ̈ܗܵܬܼܵܐ ܩܲܕܝܼ̈ܫܹܐ. ܘܐܵܦ ܐܲܢ̄ܬܿ ܐܸܡܲ݁ܪ ܐܲܢ̄ܬܿ
ܕܲܡܫܲܚܠܦܝܼܢ ܟܝܵܢܹ̈ܐ: ܚܲܕܼ ܕܹܝܢ ܡ̣ܢ ܬܪ̈ܲܝܗܘܿܢ ܡܫܝܼܚܵܐ: ܠܵܐ ܗ̄ܘ̣ܵܐ
ܐܲܝܟܼ ܡ̇ܢ ܕܲܚܕܼܵܝܘܼܬܼܵܐ ܠܫܘܼ̈ܚܠܵܦܹܐ ܕܲܟܼܝܵܢܹ̈ܐ ܡܒܲܛܠܵܐ܀ ܗܵܠܹܝܢ:
ܡܸܬܼܚܲܙܝܵܐ: ܕܐܲܢ̄ܬܿ ܐܸܡ݂ܲܪܬܿ. ܘܗ̤ܝ ܟܲܕܼ ܗ̤ܝ ܐܝܼܬܹܝܗ̇ ܐܵܦ ܗܵܝ̇
ܕܥܘܸܠܵܐ ܘܥܵܡ̇ܘܿܪܵܐ ܕܲܒܼܥܘܸܠܵܐ: ܗܵܘ̇ ܡܵܐ ܕܐܸܡܲܪܬܿ ܐܲܢ̄ܬܿ: ܐܵܡܲ݁ܪ:
ܕܐܝܼܬܼܵܘܗܝ ܗ̄ܘ̣ܵܐ ܠܵܐ ܚܵܫܘܿܫܵܐ ܒܦܲܓܼܪܐ ܚܵܫܘܿܫܵܐ: ܕܐܝܼܬܼ ܠܹܗ ܢܲܦܫܵܐ
ܡܠܝܼܠܬܼܵܐ ܐܲܝܟܼ ܡܵܐ ܕܐܝܼܬܼܵܘܗܝ ܥܘܸܠܵܐ: ܒܲܪܢܵܫܵܐ ܗ̄ܘ̣ ܓܹܝܪ ܐܵܦ
ܥܘܸܠܵܐ. ܐܲܝܟܲܢܵܐ ܗܵܟܹܝܠ: ܟܲܕܼ ܐܲܢ̄ܬܿ ܠܗܵܠܹܝܢ ܐܵܡܲ݁ܪ ܐܲܢ̄ܬܿ ܘܲܡܦܝܼܣ
pb. 323
ܐܲܢ̄ܬܿ ܕܢܸܫܠܲܡ ܠܲܫܪܵܪܵܐ ܕܗܲܝܡܵܢܘܼܬܼܵܐ: ܒܗܹܝܢ ܟܲܕܼ ܒܗܹܝܢ
ܠܗܵܢܐ ܚܲܒܼܬܿ؟ ܠܵܐ ܓܠܸܐ ܥܵܘ̣ܠܵܐ؟ ܐܲܢ̄ܬܿ ܐܸܡܲ݁ܪ ܐܲܢ̄ܬܿ ܟܝܵܢܹ̈ܐ
ܡܫܲܚ̈ܠܦܹܐ ܒܲܡܫܝܼܚܵܐ: ܘܗܵܢܵܐ: ܗܸܢܹܝܢ ܟܲܕܼ ܗܸܢܹܝܢ ܡܵܘܕܹܐ: ܘܲܡܩܲܒܸܿܠ
ܠܵܟܼ ܕܗܵܠܹܝܢ ܐܸܡܲ݁ܪ ܐܲܢ̄ܬܿ. ܘܲܕܼܚܲܕܼ ܐܝܼܬܼܵܘܗܝ ܦܲܪܨܘܿܦܵܐ ܒܲܟܼܝܵܢܹ̈ܐ
ܡܫܲܚ̈ܠ̱ܦܹܐ: ܘܐܵܦ ܗ̤ܘ ܗܵܟܲܢܵܐ ܡܵܘܕܹܐ: ܘܠܵܟܼ ܕܡܵܘܕܸܐ ܐܲܢ̄ܬܿ
ܒܗܵܠܹܝܢ ܡܩܲܒܸܿܠ ܠܵܟܼ. ܘܐܲܢ̄ܬܿ ܐܵܡܲ݁ܪ ܐܲܢ̄ܬܿ ܕܝܼܠܵܝܘܼܬܼܵܐ ܘܒܲܝܬܵܝܘܼܬܼܵܐ
ܡ̣ܢ ܚܕܼܵܝܘܼܬܼܵܐ: ܘܕܲܐ̄ܚܪܹܬܢܵܐ ܗܵܘ̇ ܡܵܐ ܕܲܐ̄ܚܪܹܢܵܐ ܐܝܼܬܼܵܘܗܝ ܘܡܸܬܼܐܡܲܪ
ܡܩܲܒܸܿܠ ܐܲܢ̄ܬܿ: ܘܐܵܦ ܗܵܢܵܐ ܕܝܼܠܵܝܘܼܬܼܵܐ ܘܒܲܝܬܵܝܘܼܬܼܵܐ ܐܵܡܲ݁ܪ: ܟܲܕܼ
ܠܵܐ ܗ̄ܘ̣ܵܐ ܡ̣ܢ ܕܝܼܠܵܝܘܼܬܼܵܐ ܒܲܝܬܵܝܬܼܵܐ ܘܨܒܼܝܵܢܝܬܼܵܐ: ܠܲܟܼܝܵܢܵܐ ܕܠܵܐ ܨܒܼܝܵܢܵܐ
ܗܘ̤ܵܬܼ: ܕܢܸܚܲܫ ܚܲܫܹ̈ܐ ܟܝܵܢܵܝܹ̈ܐ. ܐܸܠܵܐ ܐܲܢ̄ܬܿ ܡܟܲܢܸܫ ܐܲܢ̄ܬܿ ܠܐܲܝܠܹܝܢ
ܕܐܸܬܼܐܡܪܹ̈ܝܢ: ܐܲܝܟܼ ܡ̇ܢ ܕܠܝܬܿ ܠܵܐ ܗܵܘ̇ ܕܲܥ̣ܒܲܕܼ ܐܸܢܹܝܢ ܠܹܗ ܕܝܼ̈ܠܵܝܵܬܼܵܐ:
ܘܠܵܐ ܗܵܠܹܝܢ ܕܲܗ̤ܘܲܝ̈ ܕܝܼܠܹܗ: ܐܸܠܵܐ ܚܲܕܼ ܐܝܼܬܼܵܘܗܝ. ܠܵܐ ܗ̄ܘ̣ܵܐ
ܦܲܪܨܘܿܦܵܐ: ܐܸܠܵܐ ܐܵܦ ܐܘܼܤܝܼܵܐ: ܕܲܬܼܒܲܛܸܠ ܠܟܼܠܗܹܝܢ ܐܲܝܠܹܝܢ
ܕܐܵܘܕܝܼܬܿܘܿܢ ܥܲܡ ܚܕܼܵܕܹ̈ܐ.
ܐܸܢ ܠܗܵܠܹܝܢ ܬܪܼܨܵܐ ܐܵܡܲ݁ܪ ܐܲܢ̄ܬܿ: ܘܠܵܐ ܡܫܲܚ̈ܠܦܵܢ ܡ̣ܢ ܫܪܵܪܵܐ:
ܐܵܦ ܠܵܐ ܕܬܸܤܬܿܪܘܼܢ ܐܸܢܘܿܢ ܙܵܕܸܩ ܗ̄ܘ̣ܵܐ: ܠܵܐ ܠܗܵܝ̇ ܕܚܲܕܸ
ܦܲܪܨܘܿܦܵܐ: ܘܠܵܐ ܬܘܼܒܼ ܠܗܵܝ̇ ܕܲܬܼܪܹܝܢ ܟܝܵܢܹ̈ܐ. ܥܲܠ ܠܵܐ ܡܸܕܸܡ
ܚܲܝܸܒܼܬܿܘܿܢܵܢܝ: ܠܵܐ ܐܲܝܟܼ ܐܲܝܢܵܐ ܕܠܵܐ ܡܵܘܕܸܐ ܚܲܕܼ ܦܲܪܨܘܿܦܵܐ: ܒܕܸܐܡܪܹܬܼ
ܕܗ̤ܘ ܟܲܕܼ ܗ̤ܘ ܥܘܸܠܵܐ ܘܥܵܡ̇ܘܿܪܵܐ ܕܲܒܼܥܘܸܠܵܐ. ܗܵܝ̇ ܓܹܝܪ ܕܗ̤ܘܝܘܼ
ܟܲܕܼ ܗ̤ܘ: ܠܚܲܕܼ ܘܠܹܗ ܟܲܕܼ ܠܹܗ ܠܦܲܪܨܘܿܦܵܐ ܡܵܘܕܥܵܐ. ܘܠܵܐ
ܗ̄ܘ̣ܵܐ ܐܲܝܟܼ ܐܲܝܢܵܐ ܕܠܵܐ ܡܵܘܕܸܐ ܬܪܹܝܢ ܟܝܵܢ̈ܝܼܢ. ܥܵܡ̇ܘܿܪܵܐ ܓܹܝܪ ܠܲܟܼܝܵܢܵܐ
pb. 324
ܡܵܘܕܲܥ: ܐܲܝܟܼ ܡ̇ܢ ܕܐܝܼܿܬܼܵܘܗܝ ܒܥܘܸܠܵܐ ܐܲܝܟܼ ܕܲܒܼܓܼܘܼܫܡܵܐ. ܕܠܵܐ
ܗ̤ܝ ܟܲܕܼ ܗ̤ܝ ܬܸܤܬܿܒܲܪ ܐܘܼܤܝܼܵܐ ܕܐܲܠܵܗܵܐ: ܘܐܘܼܤܝܼܵܐ ܕܥܘܸܠܵܐ.
ܐܸܢ ܗܵܟܹܝܠ ܐܲܢ̄ܬܿ ܠܵܐ ܡܲܟܼܪܸܙ ܐܲܢ̄ܬܿ ܗܵܕܹܐ: ܘܠܵܐ ܗܵܢܵܐ ܕܲܟܼܬܲܒܼ
ܗܵܠܹܝܢ: ܠܵܐ ܙܵܕܹܩ ܗ̄ܘ̣ܵܐ ܠܲܡܩܲܛܪܵܓܼܘܼܬܲܢܝ ܘܲܠܡܸܥܫܩܲܢܝ: ܕܠܵܐ
ܡܵܘܕܸܐ ܐ̄ܢܵܐ ܚܲܕܼ ܦܲܪܨܘܿܦܵܐ ܒܲܬܼܪ̈ܲܝܗܘܿܢ ܟܝܵܢܹ̈ܐ. ܐܵܘ ܐܲܝܟܼ
ܕܲܒܼܦܘܼܪܫܵܢܵܐ ܘܲܒܼܦܘܼܠܵܓܼܵܐ ܡܢܵܬܼܵܢܵܐܝܼܬܼ ܤܵܐܹ̇ܦ ܐ̄ܢܵܐ ܠܗܘܿܢ: ܐܲܝܟܼ
ܐܲܝܠܹܝܢ ܕܲܦܪܝܼܫܝܼܢ ܒܕܘܼܟܿܬܼܵܐ ܘܪܲܚܝܼܩܝܼܢ ܡ̣ܢ ܚܕܼܵܪܹ̈ܐ. ܥܵܡ̇ܘܿܪܵܐ ܓܹܝܪ
ܐܸܡ̇ܪܹܬܼ: ܠܐܲܝܢܵܐ ܕܒܲܟܼܝܵܢܵܐ ܥ̣ܡܲܪ ܡ̣ܢ ܟܠ ܦܪܘܼܣ. ܘܥܵܡܘܿܪܵܐ
ܗ̄ܘ̣ ܐܲܝܢܵܐ ܕܥܵܡܲܪ ܒܗܵܘ̇ ܐܲܝܢܵܐ ܕܡܸܬܼܥܡܲܪ: ܘܐܝܼܬܼ ܠܹܗ
ܦܲܪܨܘܿܦܹܗ. ܘܗܵܘ̇ ܕܡܸܬܼܥܡܲܪ: ܐܝܼܬܼ ܠܹܗ ܦܲܪܨܘܿܦܵܐ ܕܗܵܘ̇
ܕܥܵܡܲܪ. ܟܲܕܼ ܒܲܚܫܲܚܬܼܵܐ ܕܦܲܪ̈ܨܘܿܦܲܝܗܘܿܢ: ܐܲܝܟܼ ܕܲܒܼܕܝܼܠܗܘܿܢ
ܡܸܬܼܚܲܫܚܝܼܢ ܡܫܲܠܛܵܐܝܼܐܼ. ܗܵܢܵܐ ܗܵܘ̇ ܐܝܼܬܼܵܘܗܝ: ܘܗܵܘ̇ ܗܵܢܵܐ. ܟܲܕܼ
ܡܩܵܘܸܐ ܗܵܢܵܐ ܘܗܵܘ̇: ܐܲܟܼܡܵܐ ܕܐܝܼܬܲܝܗܘܿܢ ܒܲܟܼܝܵܢܹ̈ܐ. ܐܸܢܗ̤ܘ ܕܫܲܪܝܼܪܵܐܝܼܬܼ
ܐܲܠܵܗܵܐ ܗ̄ܘ̣: ܫܲܪܝܼܪܵܐܝܼܬܼ ܕܐܵܦ ܒܲܟܼܝܵܢܹܗ ܗ̄ܘ̣: ܘܲܡܫܲܡܠܝܵܐ ܐܝܼܬܼܵܘܗܝ
ܡܵܘܕܹܝܢ ܚ̄ܢܲܢ: ܟܲܕܼ ܒܡܸܕܸܡ ܠܵܐ ܡܒܲܨܲܪ ܡ̣ܢ ܟܝܵܢܵܐ ܕܐܲܒܼܵܐ. ܘܲܠܒܲܪܢܵܫܵܐ
ܕܫܲܪܝܼܪܵܐܝܼܬܼ ܒܲܪܢܵܫܵܐ ܗ̄ܘ̣ ܒܲܟܼܝܵܢܹܗ ܡܫܲܡܠܝܵܐܝܼܬܼ ܡܲܘܕܹܝܢ ܚ̄ܢܲܢ: ܟܲܕܼ
ܒܡܸܕܸܡ ܠܵܐ ܡܒܲܨܲܪ ܡ̣ܢ ܟܝܵܢܵܐ ܕܲܒܼܢܲܝ̈ܢܵܫܵܐ: ܠܵܐ ܒܦܲܓܼܪܵܐ ܘܠܵܐ
ܒܢܲܦܫܵܐ ܘܠܵܐ ܒܝܼܕܲܥܬܼܵܐ. ܟܠܗܹܝܢ ܗܵܠܹܝܢ ܐܝܬܼ ܠܹܗ ܒܲܕܼܡܘܼܬܲܢ:
ܤܛܲܪ ܡ̣ܢ ܚܛܝܼܬܼܵܐ: ܠܵܐ ܗ̄ܘ̣ܵܐ ܕܠܵܐ ܡܲܥܒܿܕܼܵܢܘܼܬܼܵܐ ܐܝܼܬܼܵܘܗܝ
ܒܲܟܼܝܵܢܹܗ ܕܝܼܠܹܗ. ܐܵܦܸܢ ܓܹܝܪ ܐܲܠܵܗܵܐ ܒܦܲܪܨܘܼܦܹܗ ܕܝܼܠܹܗ ܡܸܬܼܚܲܫܲܚ
ܒܗܵܠܹܝܢ: ܐܲܝܟܼ ܕܒܼܐܝܠܹܝܢ ܕܲܕܼܒܲܪܢܵܫܵܐ ܐܸܢܹܝܢ ܡܸܢܚܲܫܚ. ܐܲܝܟܲܢܵܐ ܕܐܵܦ
pb. 325
ܐ̄ܢܵܫܘܼܬܼܵܐ ܒܐܲܠܵܗܘܼܬܼܵܐ ܡܸܬܼܚܲܫܚܵܐ: ܒܐܲܝܠܹܝܢ ܕܕܲܐܠܵܗܘܼܬܼܵܐ ܐܸܢܹܝܢ.
ܠܦܲܪܨܘܿܦܵܐ ܓܹܝܪ ܐܝܼܬܼ ܠܗܘܿܢ ܚܕܼܵܝܘܼܬܼܵܐ: ܘܠܵܘ ܠܐܘܼܤܝܼܵܐ.
ܡܸܛܠ ܗܵܢܵܐ ܙܵܕܹܩ ܠܲܡܤܵܡ ܩܕܼܵܡܲܝܢ ܘܲܠܡܵܘܕܵܝܘܼ: ܕܐܲܝܟܲܢܵܐ
ܕܡ̣ܢ ܨܲܠܡܵܐ ܪܹܫ ܛܘܼܦܤܵܐ ܡܸܬܿܬܵܘܕܸܐ: ܡܸܛܠ ܕܡܸܢܹܗ ܐܝܼܬܼ
ܠܹܗ ܗܵܕܹܐ ܕܐܸܬܼܐܡܲܪ: ܕܗܵܘ̇ ܐܝܼܬܼܵܘܗܝ. ܗܵܟܼܘܵܬܼ ܐܵܦ ܟܲܕܼ ܡܸܬܼܐܡܲܪ
ܐܲܠܵܗܵܐ ܡܸܠܬܼܵܐ ܒܸܤܪܵܐ: ܡܸܬܿܬܵܘܕܸܐ ܒܸܤܪܵܐ: ܕܡܸܢܹܗ ܡܸܬܼܐܡܲܪ
ܒܸܤܪܵܐ: ܘܒܸܤܪܵܐ ܐܲܠܵܗܵܐ ܘܡܵܪܝܵܐ ܘܲܒܼܪܵܐ ܕܐܲܠܵܗܵܐ. ܡܵܪܝܵܐ: ܕܡܸܢܹܗ
ܡܸܬܼܐܡܲܪ ܕܐܝܼܬܼܵܘܗܝ ܒܗܵܠܹܝܢ: ܕܠܵܐ ܒܒܼܘܼܠܒܵܠܵܐ ܐܵܘ ܒܫܘܼܚܠܵܦܵܐ
ܐܵܘ ܒܦܲܢܛܵܤܝܼܵܐ: ܕܐܲܠܵܗܘܼܬܼܵܐ ܘܲܕܐ̄ܢܵܫܘܼܬܼܵܐ: ܢܸܬܼܪܢܸܐ. ܐܸܢ ܕܹܝܢ
ܢܫܲܚܠܸܦ ܐ̄ܢܵܫ ܗܵܠܹܝܢ ܕܨܲܠܡܵܐ: ܐܲܝܟܼ ܕܢܹܐܡܲܪ ܐܸܢܹܝܢ ܕܪܹܫ
ܛܘܼܦܤܵܐ: ܐܵܠܨܵܐ ܕܲܒܼܬܲܪ̈ܬܲܝܗܹܝܢ ܢܲܤܟܸܠ: ܘܒܲܐܠܵܗܘܼܬܼܵܐ ܘܲܒܼܐ̄ܢܵܫܘܼܬܼܵܐ.
ܒܐ̄ܢܵܫܘܼܬܼܵܐ: ܕܠܲܟܼܝܵܢܵܐ ܕܐܲܠܵܗܘܼܬܼܵܐ ܤܵܐܹ̇ܡ ܠܵܗ̇. ܘܒܲܐܠܵܗܘܼܬܼܵܐ:
ܡܸܛܠ ܕܲܠܗܵܠܹܝܢ ܕܐܲܠܵܗܘܼܬܼܵܐ: ܠܲܟܼܝܵܢܵܐ ܕܐ̄ܢܵܫܘܼܬܼܵܐ ܝܵܗܹ̇ܒܼ:
ܘܲܡܫܲܚܠܸܦ ܠܬܲܪ̈ܬܵܝܗܹܝܢ. ܐܸܠܵܐ ܗܵܠܹܝܢ ܡ̇ܢ ܗܵܟܲܢܵܐ ܗܵܘ̈ܝܵܢ ܗ̣̄ܘܲܝ̈:
ܟܲܕܼ ܡܸܬܼܒܲܚ̈ܢܵܢ ܡ̣ܢ ܕܲܝ̈ܢܹܐ. ܐܸܢܗܘ̤ ܕܐܝܼܬܲܝܗܘܿܢ ܗ̄ܘ̣ܵܘ ܕܲܝܢܹ̈ܐ:
ܘܒܲܐܝܠܹܝܢ ܕܐܵܪ̈ܬܵܕܘܿܟܿܤܹܐ ܐܝܼܬܲܝܗܹܝܢ ܗ̣̄ܘܲܝ̈ ܡܸܙܕܲܗܪܝܼܢ ܗ̄ܘ̣ܵܘ:
ܕܠܵܐ ܡܸܨܛܲܠܝܵܢܘܼܬܼܵܐ ܕܲܠܓܲܒܵܐ ܕܗܲܪ̈ܵܛܝܼܩܹܐ: ܘܠܵܐ ܫܵܒܼܩ̇ܝܼܢ ܗ̄ܘ̣ܵܘ
ܕܲܠܒܲܪ ܡ̣ܢ ܬܚܘܼ̈ܡܹܐ ܢܸܤܬܲܥܪ̈ܵܢ. ܐܸܠܵܐ ܠܵܐ ܐܝܼܬܲܝܟܿܘܿܢ ܗ̣̄ܘܲܝܬܿܘܿܢ
ܕܲܝܵܢܹ̈ܐ: ܡܵܘܤܸܦ ܐ̄ܢܵܐ ܕܹܝܢ ܕܐܵܦ ܠܵܐ ܐܵܪ̈ܬܵܕܘܿܟܿܤܹܐ. ܘܐܸܢ ܠܵܐ:
ܐܵܦܠܵܐ ܠܗܵܠܹܝܢ ܡܚܲܦܹܝܢ ܗ̣̄ܘܲܝܬܿܘܿܢ. ܘܡܵܢܵܐ ܐܹܡܲܪ؟ ܠܟܼܠܟܼܘܿܢ ܚܲܕܼ
ܪܸܥܝܵܢܵܐ ܘܗ̤ܘ ܟܲܕܼ ܗ̤ܘ ܐܝܼܬܼ ܠܟܼܘܿܢ: ܒܪܲܡ ܩܪܵܘ ܘܐܵܦ ܠܗܵܠܹܝܢ
ܕܒܼܵܬܲܪܟܸܢ.
pb. 326
ܒܵܗ̇ ܒܲܕܼܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ ܩܲܕܼܡܵܝܬܼܵܐ.
ܕܓܼܵܘܵܐ ܓܹܝܪ ܐܝܼܬܹܝܗ̇ ܡܲܥܒܿܕܵܢܘܼܬܼܵܐ ܕܲܬܼܠܝܼܬܼܵܝܘܼܬܼܵܐ ܩܲܕܝܼܫܵܬܐ:
ܘܒܲܠܚܘܿܕܼ ܒܦܲܪ̈ܨܘܿܦܹܐ ܦܪܝܼܫܝܼܢ. ܪܲܒܘܼܬܼ ܫܘܼܒܼܚܵܐ ܓܹܝܪ ܕܝܼܚܝܼܕܝܵܐ:
ܒܲܙܒܲܢ ܠܐܲܒܼܵܐ ܡܵܩܸܦ ܠܵܗ̇. ܐܝܼܬܼܵܘܗܝ ܓܹܝܪ ܐܵܒܼܝ: ܗܵܘ̇ ܕܲܡܫܲܒܲܚ
ܠܝܼ. ܒܲܙܒܲܢ ܕܹܝܢ: ܠܪܘܼܚܵܐ ܕܩܘܼܕܸܫܵܐ. ܪܘܼܚܵܐ ܕܲܫܪܵܪܵܐ: ܗ̤ܘ
ܢܫܲܒܿܚܲܢܝ. ܒܲܙܒܲܢ ܕܹܝܢ: ܒܚܲܝܠܵܐ ܕܲܡܫܝܼܚܵܐ. ܡܵܢܵܐ ܟܲܝ ܐܝܼܬܼ ܒܗܵܠܹܝܢ
ܕܠܲܓܼܡܵܪ ܐܲܙܝܼܥ ܐܸܢܘܿܢ: ܥܲܠ ܕܐܸܡ̇ܪܹܬܼ ܕܲܕܓܼܵܘܵܐ ܐܝܼܬܹܝܗ̇ ܡܲܥܒܲܕܼܵܢܘܼܬܼܵܐ
ܕܲܬܼܠܝܼܬܼܵܝܘܼܬܼܵܐ: ܘܒܲܠܚܘܿܕܼ ܒܲܩܢܘܿܡܹ̈ܐ ܐܝܼܬܼ ܠܵܗ̇ ܦܘܼܠܵܓܼܵܐ؟ ܐܵܘ
ܕܲܠܡܵܐ ܐ̄ܚܪܵܢܝܵܐܝܼܬܼ ܐܝܼܬܼ ܠܟܼܘܿܢ ܠܡܲܤܒܵܪܘܼ ܕܐܸܡ̇ܪܹܬܼ ܠܟܼܘܿܢ ܥܲܠ
ܬܠܝܼܬܼܵܝܘܼܬܼܵܐ: ܕܡܸܫܬܲܒܲܚ ܒܪܵܐ ܡ̣ܢ ܐܲܒܼܵܐ ܘܡ̣ܢ ܪܘܼܚܵܐ ܕܩܘܼܕܼܫܵܐ:
ܠܵܘ ܕܠܵܐ ܤܵܦܹ̇ܩ ܠܫܘܼܒܼܚܹܗ ܕܝܼܠܹܗ: ܐܸܠܵܐ ܝܲܬܿܝܼܪܵܐܝܼܬܼ ܩܲܕܿܡܹ̇ܬܼ
ܤܲܗ̇ܕܹܬܼ ܘܡܸܛܠ ܗܵܕܹܐ ܤܵܡܹ̇ܬܼ: ܕܒܲܙܒܲܢ ܕܹܝܢ ܒܚܲܝܠܵܐ ܕܲܡܫܝܼܚܵܐ.
ܐܲܝܡܟܼ ܡ̇ܢ ܕܤܵܦܹ̇ܩ ܠܫܘܼܒܼܚܵܐ ܕܝܼܠܹܗ ܘܠܵܐ ܤܢܝܼܩ: ܡܸܛܠ ܕܠܵܐ
ܤܢܝܼܩܵܐ ܐܝܼܬܼܵܘܗܝ. ܡܲܢ̣ܘܼ ܗܵܟܹܝܠ ܐܲܛܥܝܼܟܼܘܿܢ؟ ܐܸܠܵܐ ܟܒܲܪ ܪܵܢܹܝܢ
ܐܢ̄ܬܿܘܿܢ ܕܐܵܡܲ݁ܪ ܐ̄ܢܵܐ ܥܲܠ ܐ̄ܢܵܫܘܼܬܼܵܐ: ܕܡ̣ܢ ܐܲܒܼܵܐ ܡܸܫܬܒܿܚܵܐ ܗ̄ܘ̣ܵܬܼ:
ܘܡ̣ܢ ܪܘܼܚܵܐ ܕܩܘܼܕܼܫܵܐ: ܘܡܸܢܹܗ ܕܐܲܠܵܗܵܐ ܡܸܠܬܼܵܐ.
ܤܲܓܿܝܼ ܡܲܩܪܒܼܝܼܢ ܐܢ̄ܬܿܘܿܢ: ܘܠܵܐ ܡܸܕܸܡ ܕܲܡܕܲܒܿܪܵܢܘܼܬܼܵܐ
ܨܵܒܹ̇ܝܢ ܐܢ̄ܬܿܘܿܢ ܕܲܬܼܫܲܡܗܘܼܢ. ܘܢܼܗܘܸܐ: ܕܗܵܟܲܢܵܐ ܐܲܡܝܼܪ ܠܝܼ. ܠܵܐ
ܓܹܝܪ ܡܸܫܬܿܐܸܠ ܐ̄ܢܵܐ ܡ̣ܢ ܗܵܝ̇: ܕܥܲܠ ܐܵܦܹܝ̈ܗ̇ ܡܲܩܪܒܼܝܼܢ ܐܢ̄ܬܿܘܿܢ:
ܐܸܠܵܐ ܗܵܫܵܐ ܡܩܝܼܡ ܐ̄ܢܵܐ ܡܸܠܲܬܼܝ ܓܲܠܝܵܐܝܼܬܼ. ܠܵܘ ܓܹܝܪ ܡܸܕܸܡ
pb. 327
ܐ̄ܚܪܹܝܢ ܐܝܼܬܼܵܘܗܝ ܩܪܵܒܼܟܼܘܿܢ ܕܠܘܼܩܒܲܠܝ ܒܝܲܕܼ ܟܠܗܹܝܢ: ܤܛܲܪ
ܡ̣ܢ ܗܵܢܵܐ: ܥܲܠ ܒܸܤܪܵܐ ܕܲܬܼܠܝܼܬܵܝܘܼܬܼܵܐ ܠܵܐ ܡܵܘܕܹܝܢ ܐܢ̄ܬܿܘܿܢ
ܕܒܲܪܝܵܐ ܐܝܼܬܼܵܘܗܝ. ܘܡ̣ܢ ܟܝܵܢܵܐ ܕܝܼܠܲܢ ܐܝܼܬܼܵܘܗܝ ܐܵܕܼܵܡ ܬܪܲܝܵܢܵܐ: ܘܗܵܘ̇
ܕܒܲܪܝܵܐ ܐܝܼܬܼܵܘܗܝ. ܠܵܐ ܝܵܗ̇ܒܿܝܼܢ ܐܢ̄ܬܿܘܿܢ ܕܒܼܵܪܘܿܝܘܼܬܼܵܐ ܗ̄ܘ̣ ܕܐܲܒܼܵܐ
ܘܕܲܒܼܪܵܐ ܘܲܕܼܪܘܼܚܵܐ ܕܩܘܼܕܼܫܵܐ: ܘܲܕܼܡܸܫܬܲܒܲܚ ܬܘܼܒܼ ܡ̣ܢ ܒܵܪܘܿܝܵܐ.
ܡܵܢܵܐ ܡܦܲܠܸܓܼ ܐܲܢ̄ܬܿ؟ ܡܵܢܵܐ ܢܸܥܒܸܿܕܼ ܠܒܲܪܢܵܫܵܐ ܗܵܘ̇؟ ܐܵܘ ܠܵܐ
ܡܵܘܘܕܹܝܢ ܐܢ̄ܬܿܘܿܢ ܕܲܥܒܼܝܼܕܼܵܐ ܐܝܼܬܼܵܘܗܝ ܒܸܤܪܵܐ: ܐܵܘ ܡܵܘܕܹܝܢ ܐܢ̄ܬܿܘܿܢ
ܕܲܥܒܝܼܕܼܵܐ ܐܝܼܬܼܵܘܗܝ ܒܸܤܪܵܐ: ܐܸܠܵܐ ܠܵܐ ܗ̄ܘ̣ܵܐ ܡ̣ܢ ܐܘܼܤܝܼܵܐ ܐ̄ܚܪܹܬܼܵܐ:
ܐܸܠܵܐ ܡ̣ܢ ܕܐܲܠܵܗܵܐ ܡܸܠܬܼܵܐ. ܘܐܲܝܟܲܢܵܐ ܕܠܵܐ ܢܸܗܘܸܐ ܒܪܝܼܬܼܵܐ ܕܐܲܒܼܵܐ ܐܵܘ
ܕܪܘܼܚܵܐ ܕܩܘܼܕܼܫܵܐ: ܥܵܒܼܕܝܼܢ ܐܢ̄ܬܿܘܿܢ ܠܹܗ ܒܵܪܘܿܝܵܐ ܕܝܵܬܹܗ. ܤܲܓܿܝܼ
ܓܹܝܪ ܙܗܝܼܪܝܼܢ ܐܢ̄ܬܿܘܿܢ ܒܗܵܠܹܝܢ: ܘܗ̤ܘ ܠܝܵܬܹܗ ܥܵܒܼ̇ܕܝܼܢ ܐܢ̄ܬܿܘܿܢ
ܠܹܗ ܥܵܒܼܘܿܕܼܵܐ. ܘܲܕܼܠܵܘ ܡ̣ܢ ܐ̄ܚܪܹܢܵܐܠ ܐܵܡ̇ܪܝܼܢ ܐܢ̄ܬܿܘܿܢ ܕܐܸܬܼܥܒܸܕܼ:
ܐܸܠܵܐ ܡ̣ܢ ܝܵܬܹܗ. ܗܵܢܵܐ ܟ̱ܠܹܗ ܫܲܦܝܪܵܐ ܠܟܼܘܿܢ ܘܟܹܐܢܵܐ ܟܲܕܼ ܗܵܟܲܢܵܐ
ܬܸܬܼܐ̱ܡܲܪ: ܠܡܵܢܵܐ ܠܵܘ ܢܲܗܝܼܪܵܐܝܼܬܼ ܐܵܡ̇ܪܝܼܢ ܐܢ̄ܬܿܘܿܢ ܗܵܘ̇ ܡܵܐ
ܕܡܲܤܒܿܪܝܼܢ ܐܢ̄ܬܿܘܿܢ ܕܫܲܪܝܼܪ ܗ̄ܘ̣؟ ܐܸܠܵܐ ܒܲܫܡܵܐ ܡ̇ܢ ܥܵܪܩܝܼܢ
ܐܢ̄ܬܿܘܿܢ: ܒܲܥܒܼܵܕܹ̈̇ܐ ܕܹܝܢ ܗܵܦ̇ܟܿܝܼܢ ܐܢ̄ܬܿܘܿܢ ܥܠܵܘܗܝ. ܘܥܲܠ ܟܝܵܢܵܐ
ܕܐܵܠܵܗܵܐ ܡܸܠܬܼܵܐ ܡܲܤܩܝܼܢ ܐܢ̄ܬܿܘܿܢ ܠܗܹܝܢ ܟܝܵܢܵܐܝܼܬܼ: ܠܟܼܝܼ̈ܠܝܵܬܼܵܐ
ܕܒܸܤܪܵܐ ܟܝܵܢܵܝܵܐ. ܠܵܐ ܥܵܒܼܕܵܐ ܬܪܹܝܢ ܒܢ̈ܝܼܢ ܐܵܘ ܬܪܹܝܢ ܡܫܝܼܚ̈ܝܼܢ:
ܗܵܝ̇ ܕܲܬܼܪܹܝܢ ܟܝܵܢ̈ܝܼܢ ܕܲܡܚܲܝܕܝܼܢ ܒܚܲܕܼ ܦܲܪܨܘܿܦܵܐ: ܟܲܕܸ ܫܘܼܚܠܵܦܵܐ
ܕܟܼܠ ܚܲܕܼ ܚܲܕܼ ܡ̣ܢ ܟܝܵܢܹ̈ܐ ܢܛܝܼܪ.
pb. 328
ܝܵܕܲܥ̇ ܐܲܢ̄ܬܿ ܒܕܘܼܟ ܠܗܵܘ̇ ܕܐܸܡ݂ܲܪ ܠܗܵܠܹܝܢ ܡ̣ܢ ܟܠ ܦܘܿܪܣ:
ܐܸܡ݂ܲܪܬܿ ܗܵܟܹܝܠ ܠܫܘܼܚ̈ܠܵܦܹܐ ܕܡܸܬܼܩܲܝܡܹܝܢ ܘܠܵܐ ܡܸܬܼܒܲܛܠܝܼܢ:
ܡܸܛܠ ܚܕܼܵܝܘܼܬܼܵܐ ܕܲܟܼܝܵܢܹ̈ܐ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ. ܐܸܡ݂ܲܪ ܚܲܕܼ
ܦܲܪܨܘܿܦܵܐ ܒܲܬܼܪܹܝܢ ܟܝܵܢ̈ܝܼܢ: ܘܠܲܬܼܪܹܝܢ ܟܝܵܢܹ̈ܐ ܒܚܲܕܼ ܦܲܪܨܘܿܦܵܐ: ܐܲܝܟܼ
ܓܪܝܼܓܼܘܿܪܝܼܘܿܣ: ܘܐܲܝܟܼ ܠܲܡܒܿܪܘܿܣܝܼܘܿܣ: ܘܐܲܝܟܼ ܐܵܬܵܢܵܤܝܼܣ: ܐܲܝܟܼ
ܟܠܗܘܿܢ ܐܲܒܼ̈ܗܵܬܼܵܐ. ܐܲܝܟܼ ܕܐܵܦ ܐܲܢ̄ܬܿ ܐܸܡ݂ܲܪܬܿ: ܕܠܵܐ ܗܸܢܹܝܢ ܟܲܕܼ
ܗܵܢܹܝܢ ܢܸܟܼܬܿܘܿܒܼ. ܐܸܢ ܐܝܼܬܲܝܟܿܘܿܢ ܗ̣̄ܘܲܬܿܘܿܢ ܕܲܝܵܢܹ̈ܐ ܟܹܐܢܹ݂̈ܐ: ܠܵܐ
ܡܸܬܬܟܸܠ ܗ̄ܘ̣ܵܐ. ܐܸܠܵܐ ܥ̣ܒܲܪ ܗ̄ܘ̣ܵܐ ܠܟܼܠܟܼܘܿܢ ܕܬܸܫܬܵܘܬܿܦܘܼܢ
ܒܪܘܼܫܥܵܐ: ܕܐܵܦ ܐܵܢ̄ܬܿܘܿܢ ܬܸܥܪܩܘܼܢ ܡ̣ܢ ܫܲܘܝܘܼܬܼܵܐ ܕܕܼܝܼܢܵܐ.
ܒܲܕܼ ܕܵܚ̇ܠܝܼܢ ܗ̣̄ܘܲܝܬܿܘܿܢ ܡ̣ܢ ܡܲܟܿܤܵܢܘܼܬܼܵܐ: ܕܐܲܝܠܹܝܢ ܕܠܘܼܩܒܲܠ
ܢܲܦܫܟܼܘܿܢ ܤܥܲܪܬܿܘܿܢ. ܨܵܒܹ̇ܝܢ ܐܢ̄ܬܿܘܿܢ ܕܐܵܦ ܠܲܐ̄ܚܪ̈ܵܢܝܵܬܼܵܐ ܐܲܝܠܹܝܢ
ܕܲܟܼܬܲܒܼܘ ܬܒܲܚܢܘܼܢ: ܠܵܐ ܬܸܡܐܲܢ ܠܟܼܘܿܢ ܕܲܥܠܲܝܗܹܝܢ ܟܲܕܼ ܥܠܲܝܗܹܝܢ
ܙܲܒܼܢ̈ܝܼܢ ܤܲܓܿܝܼ̈ܐܵܢ ܬܸܫܡܥܘܼܢ. ܒܪܲܡ ܡܤܲܒܿܪܝܼܢ ܐܢ̄ܬܿܘܿܢ ܐܵܠܨܵܐܝܼܬܼ
ܠܐܵܢܲܢܩܹܐ ܕܗܵܠܹܝ ܕܡܸܬܼܐܲܡܪܵܢ.
ܒܵܗ̇ ܒܲܕܼܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ ܕܫܸܬܿܬܲܥܸܤܪܹܵܐ:
ܟܲܕܼ ܐܵܡܲ݁ܪ ܥܵܠ ܒܪܵܐ.
ܗܵܢܵܘ ܗܵܘ̇ ܕܐܸܡ݂ܲܪ: ܐܲܠܵܗܝ ܐܲܠܵܗܝ ܠܡܵܢܵܐ ܫܒܲܩ̣ܬܵܢܝ: ܗܵܢܵܘ
ܕܲܠܡܵܘܬܵܐ ܬܠܵܬܼܵܐ ܝܵܘܡ̈ܝܼܢ ܤܲܝܒܲܪ: ܤܵܓܹ̇ܕܼ ܐ̄ܢܵܐ ܕܹܝܢ ܥܲܡ ܐܲܠܵܗܘܼܬܼܵܐ
ܠܗܵܢܵܐ܀ ܘܡ̣ܢ ܒܵܬܲܪ ܐ̄ܚܪ̈ܵܢܝܵܬܼܵܐ: ܡܸܛܠ ܠܵܒܼܘܼܫܵܐ ܤܵܓܹ̇ܕܼ
ܐ̄ܢܵܐ. ܡܸܛܠ ܟܲܤܝܵܐ: ܠܓܲܠܝܵܐ: ܕܠܵܐ ܡܸܬܼܦܪܸܫ ܡ̣ܢ ܡܸܬܼܚܲܙܝܵܢܵܐ.
ܡܸܛܠ ܗܵܢܵܐ ܗܵܘ̇ ܕܠܵܐ ܡܸܬܼܦܲܪܸܫ: ܐܵܦܠܵܐ ܠܐܝܼܩܵܪܵܐ ܡܦܲܪܸܫ
pb. 329
ܐ̄ܢܵܐ. ܡܦܲܪܸܫ ܐ̄ܢܵܐ ܠܲܟܼܝܵܢܹ̈ܐ: ܘܲܡܚܲܝܸܕܼ ܐ̄ܢܵܐ ܠܤܸܓܼܕܬܼܵܐ. ܠܵܐ ܗ̄ܘ̣ܵܐ
ܡܸܢܹܗ ܘܠܹܗ ܐܲܠܵܗܵܐ ܐܸܬܼܓܒܸܠ ܒܡܲܪܒܿܥܵܐ: ܘܠܵܐ ܬܘܼܒܼ ܡܸܢܹܗ
ܘܠܹܗ ܐܲܠܵܗܵܐ ܐܸܬܼܒܿܪܝܼ ܡ̣ܢ ܪܘܼܚܵܐ ܕܩܘܼܕܫܵܐ: ܘܐܵܦܠܵܐ ܡܸܢܹܗ
ܘܠܹܗ ܐܲܠܵܗܵܐ ܐܸܬܼܩܒܲܪ ܒܩܲܒܼܪܵܐ. ܗܵܟܲܢܵܐ ܓܹܝܪ ܐܸܠܘܼ ܐܝܼܬܹܝܗ̇ ܗ̄ܘ̣ܵܬܼ:
ܕܲܚ̈ܠܲܝ ܠܒܲܪܢܵܫܵܐ ܘܕܵܚ̈ܠܲܝ ܠܡܝܼ̈ܬܹܐ ܐܝܼܬܲܝܢ ܗ̣̄ܘܲܝܢ ܓܲܠܝܵܐܝܼܬܼ. ܐܸܠܵܐ
ܡܸܛܠ ܕܲܒܼܗܵܘ̇ ܕܐܸܬܼܢܤܸܒܼ ܐܲܠܵܗܵܐ ܐܝܼܬܼܵܘܗܝ: ܡ̣ܢ ܗܵܘ̇ ܕܲܢܤܲܒܼ
ܐܵܦ ܗܵܘ̇ ܕܐܸܬܼܢܤܸܒܼ ܐܲܠܵܗܵܐ ܥܲܡܹܗ ܡܸܬܐܡܲܪ܀ ܙܵܕܹܩ ܕܠܵܐ
ܢܲܡܐܢܘܼܢ ܩܵܪ̈ܘܿܝܹܐ: ܐܲܝܟܼ ܐܲܝܠܹܝܢ ܕܠܵܐ ܤܢܝܼܩܝܼܢ ܬܘܼܒܼ ܥܲܠ
ܥܘܼܗܕܵܢܵܐ. ܐܸܠܵܐ ܢܸܨܒܼܘܼܢ ܠܡܸܥܒܲܪ ܒܲܤܝܵܡܵܐ ܕܡܸܠܲܝ̈ܗܘܿܢ:
ܒܗܵܠܹܝܢ ܕܩܲܝܼܒܼܵܐܝܼܬܼ ܤܵܡ̣ܘܼ ܠܘܼܩܒܲܠܝ: ܕܠܑܵ ܗ̄ܘ̣ܵܐ ܡܸܢܹܗ ܘܠܹܗ
ܐܝܼܬܼܵܘܗܝ ܓܘܼܫܡܵܐ. ܗܵܠܹܝܢ ܕܲܒܼܗܹܝܢ ܕܲܓܿܠܘܼܢܝ ܥܵܘ̈ܠܐܝܼܬܼ: ܐܲܝܟܼ
ܡ̇ܢ ܕܒܲܪܢܵܫܵܐ ܫܚܝܼܡܵܐ ܐܵܡܲ݁ܪ ܐ̄ܢܵܐ: ܘܒܲܡܢܵܬܼܵܐ ܡܦܲܪܸܫ ܐ̄ܢܵܐ ܠܹܗ:
ܐܲܝܟܼ ܕܠܵܐܝܠܹܝܢ ܕܲܒܼܕܼܘܼ̈ܟܿܝܵܬܼܵܐ ܡܸܬܼܦܵܪܫܝܼܢ ܡ̣ܢ ܚܕܼܵܕܹ̈ܐ. ܘܬܼܘܼܒܼ
ܕܠܩܘܼܒܼܠܵܐ ܕܗܵܠܹܝܢ ܡܩܲܛܪܓܼܝܼܢ ܠܝܼ: ܕܡܸܛܠ ܡܵܢܵܐ ܠܵܐ
ܡܸܬܼܦܲܪܫܵܢܵܐ ܘܠܵܐ ܡܸܤܬܲܝܟܼܵܢܵܐ ܐܵܡܲ݁ܪ ܐ̄ܢܵܐ ܠܹܗ: ܟܲܕܼ ܫܵܡ̇ܥܝܼܢ ܕܠܵܐ
ܗ̄ܘ̣ܵܐ ܡܸܢܹܗ ܘܠܹܗ ܐܵܦ ܠܵܐ ܒܲܚܕܼܵܐ ܫܵܥܵܐ: ܐܸܠܵܐ ܐܲܟܲܚ̄ܕܼ ܡ̣ܢ ܗܘܵܝܹܗ
ܐܵܦ ܐܲܠܵܗܵܐ ܐܝܼܬܼܵܗܝ ܒܹܗ. ܡܸܛܠ ܕܐܵܦ ܕܢܵܗܘܸܐ ܒܹܗ ܐܝܼܬܼܵܘܗܝ
ܒܹܗ ܐܲܠܵܗܵܐ. ܐܝܬܼܵܘܗܝ ܠܲܡ ܓܹܝܪ ܠܵܐ ܚܵܫܘܿܫܵܐ ܒܦܲܓܼܪܵܐ ܚܵܫܘܿܫܵܐ:
ܕܲܒܼܫܘܼܠܵܡܵܐ ܕܙܲܒܼ̈ܢܹܐ ܢܤܲܒܼ ܒܲܪܢܵܫܵܐ: ܕܠܵܐ ܡܸܢܼܦܲܪܫܵܢܵܐܝܼܬܼ ܗܵܘ̇
ܕܢܤܲܒܼ ܒܗܵܘ̇ ܕܐܸܬܼܢܤܸܒܼ ܢܸܗܘܸܐ. ܘܠܵܐ ܗ̄ܘ̣ܵܐ ܒܲܫܐܝܼܠܘܼ ܐܝܼܬܼܵܘܗܝ
ܗ̄ܘ̣ܵܐ ܒܦܲܓܼܪܵܐ: ܐܸܠܵܐ ܫܲܪܝܼܪܵܐܝܼܬܼ ܐܝܼܬܼܵܘܗܝ ܗ̄ܘ̣ܵܐ ܒܦܲܓܼܪܵܐ: ܘܠܵܐ
pb. 330
ܗ̄ܘ̣ܵܐ ܟܲܕܼ ܦܪܝܼܫ ܡ̣ܢ ܦܲܓܼܪܵܐ. ܟܝܵܢܵܐ ܗ̄ܘ̣ ܠܲܡ ܐ̄ܢܵܫܵܝܵܐ ܗܵܘ̇ ܕܡ̣ܢ
ܡܲܪܝܲܡ: ܘܠܵܐ ܗ̄ܘ̣ܵܐ ܒܦܲܢܛܵܤܝܼܵܐ ܗ̄ܘ̣ ܦܘܼܪܩܵܢܲܢ.
ܝܵܕܲܥ̇ ܐܢ̄ܬܿܘܿܢ ܡ̣ܢ ܐܲܝܠܹܝܢ ܕܗܵܠܹܝܢ ܐܵܡ̇ܪܝܼܢ: ܐܵܦ ܠܗܵܠܹܝܢ
ܕܝܼܠܝܼ. ܘܲܕܿܡ̣ܢ ܗܵܘ̇ ܕܲܢܤܲܒܼ: ܗܵܘ̇ ܕܐܸܬܼܢ̱ܤܸܒܼ ܐܲܠܵܗܵܐ ܡܸܫܬܲܡܲܗ.
ܠܵܐ ܗ̄ܘ̣ܵܐ ܡ̣ܢ ܟܝܵܢܹܗ ܕܝܼܠܹܗ: ܐܝܼܬܼ ܗ̄ܘ̣ܵܐ ܠܹܗ ܗܵܕܹܐ. ܗܵܘ̇ ܓܹܝܪ
ܕܐܸܬܼܢ̱ܤܸܒܼ: ܒܲܪܢܵܫܵܐ ܗ̄ܘ̣ ܚܵܫܘܿܫܵܐ: ܕܒܹܗ ܐܝܼܬܼܵܘܗܝ ܗ̄ܘ̣ܵܐ ܠܵܐ
ܚܵܫܘܿܫܵܐ. ܟܝܵܢܵܐ ܐ̄ܢܵܫܵܝܵܐ: ܗܵܘ̇ ܕܠܵܐ ܗ̄ܘ̣ܵܐ ܒܲܫܐܝܼܠܘܼ ܐܝܼܬܼܵܘܗܝ ܗ̄ܘ̣ܵܐ
ܒܹܗ ܐܲܠܵܗܵܐ. ܛܝܼܢܵܐ: ܕܒܹܗ ܐܘܼܡܵܬܢܘܼܬܹܗ ܚܵܘܝܼ ܗ̄ܘ̣ܵܐ ܐܘܼܡܵܢܵܐ
ܚܲܟܿܝܼܡܵܐ. ܡ̣ܢ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܐܝܼܬܼ ܠܹܗ ܕܢܸܗܘܸܐ ܒܪܵܐ:
ܘܲܕܼܢܸܗܘܸܐ ܐܲܠܵܗܵܐ. ܗܵܘ̇ ܓܹܝܪ ܕܲܡܫܲܪܸܐ ܘܡܫܲܪܸܐ ܘܡܸܬܿܕܲܪܲܓܼ ܘܡܸ̇ܬܼܓܲܡܲܪ:
ܠܵܐ ܐܝܼܬܼܵܘܗܝ ܐܲܠܵܗܵܐ: ܐܵܦܸܢ ܡܸܛܠ ܡܸܬܼܚܵܘܝܵܢܘܼܬܹܗ ܕܲܒܼܩܲܠܝܼܠ
ܩܲܠܝܼܠ ܡܸܬܼܐ̱ܡܲܪ ܗܵܟܲܢܵܐ. ܘܗܵܢܵܐ ܡܸܬܼܐܡܲܪ: ܗܵܘ̇ ܡܵܐ ܕܲܡܚܲܝܲܕܼ
ܠܹܗ ܒܲܟܸܝܵܢܵܐ ܐܲܠܵܗܵܐ. ܐ̄ܚܪܹܝܢ ܓܹܝܪ ܘܲܐ̄ܚܪܹܝܢ ܐܸܢܘܿܢ: ܗܵܢ̇ܘܿܢ ܕܡܸܢܗܘܿܢ
ܐܝܼܬܼܵܘܗܝ ܦܵܪܘܿܩܲܢ. ܠܵܘ ܕܹܝܢ ܐ̄ܚܪܹܢܵܐ ܘܲܐ̄ܚܪܹܢܵܐ: ܚܵܣ: ܐܸܠܵܐ ܚܲܕܼ
ܒܢܲܩܝܼܦܘܼܬܼܵܐ. ܐܲܠܵܗܵܐ ܡ̇ܢ ܕܐܸܬܼܒܲܪܢܲܫ: ܘܒܲܪܢܵܫܵܐ ܕܹܝܢ ܕܐܸܬܼܐܲܠܲܗ.
ܡ̣ܢ ܢܲܩܝܼܦܘܼܬܹܗ ܐܸܬܼܐܲܠܲܗ: ܘܠܵܘ ܡ̣ܢ ܟܝܵܢܹܗ. ܒܲܚܕܼܵܝܘܼܬܼܵܐ
ܕܐܲܠܵܗܘܼܬܼܵܐ ܘܲܕܒܸܤܪܵܐ: ܗܘ̤ܵܐ ܚܲܕܼ ܒܪܵܐ. ܐܝܼܬܼ ܒܹܗ ܓܹܝܪ ܬܪ̈ܲܝܗܘܿܢ
ܟܝܵܢܹ̈ܐ. ܒܗܵܝ̇ ܗܵܟܹܝܠ ܕܡܸܐܡܲܪ ܒܲܪܢܵܫܵܐ ܐܲܠܵܗܵܐ ܒܲܚܕܼܵܝܘܼܬܼܵܐ
ܕܐܲܠܵܗܘܼܬܼܵܐ: ܘܡܸܬܼܐܡܲܪ ܕܐܝܼܬܼܵܘܗܝ ܚܲܕܼ ܒܪܵܐ: ܕܢܸܗܘܸܐ ܚܲܕܼ ܒܪܵܐ:
ܒܗܵܕܹܐ ܡܸܠܬܼܵܐ ܡܸܤܬܿܓܸܕܼ ܒܤܸܓܼܕܬܼܵܐ ܕܐܲܠܵܗܘܼܬܼܵܐ. ܘܡܸܤܬܿܓܸܕܼ
ܥܲܡܹܗ: ܘܠܵܐ ܗ̄ܘ̣ܵܐ ܬܲܪܬܹܝܢ ܤܸܓܼ̈ܕܵܬܼܵܐ: ܐܸܠܵܐ ܚܕܼܵܐ. ܒܵܗ̇ ܓܹܝܪ
pb. 331
ܒܲܚܕܼܵܐ ܤܸܓܼܕܬܼܵܐ ܕܗܵܕܹܐ ܚܕܼܵܐ ܐܘܼܤܝܼܵܐ: ܐܵܦ ܐ̄ܚܪܹܬܵܐ ܡܸܤܬܲܓܼܕܵܐ.
ܡܸܛܠ ܕܠܵܐ ܗ̄ܘ̣ܵܐ ܒܤܸܓܼܕܬܼܵܐ ܕܝܼܠܹܗ ܡܸܤܬܿܓܸܕܼ: ܗܵܘ̇ ܕܥܲܡ
ܐ̄ܚܪܹܢܵܐ ܡܤܸܬܿܓܸܕܼ: ܐܸܠܵܐ ܬܪ̈ܲܝܗܘܿܢ ܥܲܡ ܚ̈ܕܼܵܕܹܐ. ܒܤܸܓܼܕܬܼܵܐ ܕܹܝܢ
ܕܲܐ̄ܚܪܹܢܵܐ: ܐܵܦ ܗܵܘ̇ ܕܥܲܡ ܗܵܘ̇ ܕܲܒܼܤܸܓܼܕܬܼܵܐ ܡܸܤܬܿܓܸܕܼ: ܡ̣ܢ ܐܵܢܲܢܩܹܐ
ܡܚܲܝܲܕܼ ܘܠܵܐ ܡܸܬܼܦܪܲܫ. ܐܵܦܠܵܐ ܓܹܝܪ ܗܵܘ̇ ܤܓܼܝܼܕܼܵܐ ܡܲܨܝܵܐ ܕܠܵܐ
ܢܸܤܬܿܓܸܕܼ: ܘܐܵܦܠܵܐ ܠܒܲܪ ܡ̣ܢ ܗܵܢܵܐ ܕܒܹܗ ܐܝܼܬܼܵܘܗܝ ܡܸܤܬܿܓܸܕܼ:
ܘܐܵܦܠܵܐ ܬܘܼܒܼ ܒܗܵܢܵܐ ܡܸܤܬܿܓܸܕܼ ܕܠܵܐ ܐܵܦ ܗܵܢܵܐ ܡܸܤܸܬܿܓܸܕܼ
ܕܒܹܗ ܡܩܲܒܸܿܠ ܤܸܓܼܕܬܼܵܐ. ܠܵܘ ܓܹܝܪ ܒܦܲܪܨܘܿܦܵܐ ܕܝܼܠܹܗ
ܡܸܤܬܿܓܸܕܼ. ܐܸܠܵܐ ܒܦܲܪܨܘܿܦܵܐ ܗܵܘ̇ ܕܲܡܚܲܝܲܕܼ ܠܹܗ: ܗܵܘ̇ ܕܐܝܼܬܼܵܘܗܝ
ܕܓܼܵܘܵܐ ܡܸܛܠ ܚܕܼܵܝܘܼܬܼܵܐ. ܠܦܲܪܨܘܿܦܵܐ ܓܹܝܪ ܗܘ̤ܵܬܼ ܚܕܼܵܝܘܼܬܼܵܐ:
ܐܲܝܟܲܢܵܐ ܕܗܵܢܵܐ ܗܵܘ̇: ܘܗܵܘ̇ ܗܵܢܵܐ. ܡ̣ܢ ܗܵܘ̇ ܗܵܟܹܝܠ ܕܢܲܗܒܹܿܗ
ܠܦܲܪܨܘܿܦܹܗ: ܐܝܼܬܼ ܠܹܗ ܠܗܵܘ̇ ܕܐܸܬܼܢܤܸܒܼ: ܕܢܸܗܘܸܐ ܦܲܪܨܘܿܦܹܗ
ܕܗܵܘ̇ ܕܢܲܗܒܹܿܗ: ܡܸܛܠ ܗܵܕܹܐ ܥܲܡܹܗ ܡܸܬܼܟܲܢܸܐ ܒܸܤܪܵܐ ܕܐܲܠܵܗܵܐ
ܡܸܠܬܼܵܐ: ܘܠܵܐ ܗ̄ܘ̣ܵܐ ܐܲܠܵܗܵܐ ܡܸܠܬܼܵܐ ܕܲܒܼܒܸܤܪܵܐ ܢܸܗܘܸܐ ܐܲܠܵܗܵܐ ܘܲܒܼܪܵܐ
ܘܡܵܪܝܵܐ. ܐܲܠܵܗܵܐ ܓܹܝܪ ܡܸܠܬܼܵܐ ܒܲܟܼܝܵܢܹܗ ܐܝܼܬܼܵܘܗܝ: ܘܡ̣ܢ ܐ̄ܚܪܹܢܵܐ
ܠܵܐ ܡܸܬܼܐܡܲܪ ܐܲܠܵܗܵܐ ܐܵܘ ܒܪܵܐ: ܒܗܵܠܹܝܢ ܕܡ̣ܢ ܟܝܵܢܵܐ. ܒܸܤܪܵܐ ܕܹܝܢ
ܡ̣ܢ ܐܲܠܵܗܵܐ ܢܤܲܒܼ ܕܢܸܫܬܿܡܲܗ ܗܵܘ̇ ܡܵܐ ܕܡܸܬܼܐܡܲܪ: ܐܲܠܵܗܵܐ
ܡܸܬܼܐܡܲܪ ܟܲܕܼ ܡܸܬܼܟܲܢܸܐ ܥܲܡܹܗ. ܟܲܕܼ ܡܸܬܼܚܲܫܲܚ ܥܲܡܹܗ ܒܲܫܡܵܐ
ܕܐܲܠܵܗܵܐ: ܠܵܘ ܡ̣ܢ ܟܝܵܢܹܗ ܐܝܼܬܼ ܠܹܗ. ܐܵܘ ܗܵܟܹܝܠ ܦܲܠܹ̇ܓܼ ܠܲܚܕܼܵܝܘܼܬܼܵܐ:
ܘܐܵܡܲ݁ܪ ܬܲܪ̈ܬܲܝܗܹܝܢ ܡܸܢܹܗ.
ܘܲܟܼܐܝܼ ܒܐܲܝܢܵܐ ܕܡܸܢܹܗ ܘܠܹܗ ܐܵܡ݁ܲܪ ܕܐܝܼܬܼܵܘܗܝ ܦܲܓܼܪܵܐ: ܘܲܕܼܠܵܐ
ܗ̄ܘ̣ܵܐ ܡ̣ܢ ܐܲܠܵܗܘܼܬܼܵܐ ܕܲܒܼܦܲܓܪܵܐ ܗ̤ܘܲܝ̈ ܠܹܗ ܗܵܠܹܝܢ ܕܐܲܠܵܗܘܼܬܼܵܐ.
pb. 332
ܘܲܩܕܼܵܡ ܟܠܡܸܕܸܡ: ܟܐܝܼ؟ ܒܢܲܦܫܵܟܼ: ܕܗܵܟܲܢܵܐ ܐܸܡܲܪܬܿ. ܘܐܸܢ
ܕܹܝܢ ܠܵܐ ܡܲܡܪܲܚ ܐܲܢ̄ܬܿ ܠܡܹܐܡܲܪ: ܕܠܵܐ ܗ̄ܘ̣ܵܐ ܡ̣ܢ ܚܕܼܵܝܘܼܬܼܵܐ ܗܘ̤ܵܐ
ܠܹܗ ܒܸܤܪܵܐ ܦܲܪܨܘܿܦܵܐ ܕܐܲܠܵܗܘܼܬܼܵܐ: ܘܠܲܐܠܵܗܵܐ ܡܸܠܬܼܵܐ ܒܲܠܚܘܿܕܼ
ܡܲܤܸܩ ܐܲܢ̄ܬܿ ܠܗܵܠܹܝܢ ܕܐ̄ܢܵܫܘܼܬܼܵܐ ܘܕܲܐܠܵܗܘܼܬܼܵܐ. ܥܲܠ ܐ̄ܢܵܫܘܼܬܼܵܐ
ܕܹܝܢ: ܠܵܐ ܗܵܠܹܝܢ ܕܐ̄ܢܵܫܘܼܬܼܵܐ: ܘܠܵܐ ܗܵܠܹܝܢ ܕܐܲܠܵܗܘܼܬܼܵܐ. ܡܛܲܫܸܐ
ܐܲܢ̄ܬܿ ܕܹܝܢ: ܒܗܵܝ̇ ܕܠܲܠܵܗܵܐ ܡܸܠܬܼܵܐ ܡܫܲܡܲܗ ܐܲܢ̄ܬܿ ܒܬܲܪ̈ܬܲܝܗܹܝܢ.
ܕܵܡܹ̇ܐ ܐܲܢ̄ܬܿ ܠܝܼ ܕܡܸܬܼܟܲܚܲܕܼ ܐܲܢ̄ܬܿ ܒܐ̄ܢܵܫܘܼܬܼܵܐ: ܕܤܵܒܲܪ̇ ܐܲܢ̄ܬܿ ܕܠܵܐ
ܫܵܘ̇ܝܵܐ ܠܦܲܪܨܘܿܦܵܐ. ܘܡܲܗܦܸܟܼ ܐܲܢ̄ܬܿ ܠܲܚܕܼܵܝܘܼܬܼܵܐ ܗܵܝ̇ ܕܡܵܘܕܹܐ
ܐܲܢ̄ܬܿ ܠܵܗ̇ ܒܐܸܤܟܹܿܡܵܐ: ܕܐܝܼܬܲܝܗܘܿܢ ܬܪܹܝܢ ܟܝܵܢܹ̈ܐ ܚܲܕܼ ܦܲܪܨܘܿܦܵܐ.
ܕܤܵܐܹ̇ܡ ܐܲܢ̄ܬܿ: ܕܐܲܠܵܗܵܐ ܗ̄ܘ̣ ܡܸܠܬܼܵܐ ܕܲܡܚܲܕܼ ܒܒܸܤܪܵܐ ܐܵܘ ܒܒܲܪܢܵܫܵܐ:
ܘܡܸܬܼܐܡܲܪ ܒܬܲܪ̈ܬܲܝܗܹܝܢ ܒܲܟܼܝܵܢܵܐ ܕܐܲܠܵܗܵܐ. ܘܒܲܚܕܼܵܝܘܼܬܼܵܐ ܒܲܪܢܵܫܵܐ:
ܒܲܪܢܵܫܵܐ ܕܹܝܢ ܕܠܵܐ ܡܚܲܝܲܕܼ ܒܐܲܠܗܘܼܬܼܵܐ: ܐܵܘ ܕܐܵܦ ܠܵܐ ܐܝܼܬܼܵܘܗܝ.
ܘܡܸܛܠ ܗܵܢܵܐ: ܐܵܦܠܵܐ ܡ̣ܢ ܟܝܵܢܹܗ ܒܲܪܢܵܫܵܐ ܡܸܫܬܲܡܲܗ ܒܪܵܐ: ܘܠܵܐ
ܡ̣ܢ ܚܕܼܵܝܘܼܬܼܵܐ ܕܐܲܠܵܗܵܐ ܡܸܠܬܼܵܐ. ܗܵܟܲܢܵܐ ܕܹܝܢ ܡܸܬܼܚܙܸܐ ܐܲܢ̄ܬܿ ܕܲܡܥܲܬܸܕܼ
ܐܲܢ̄ܬܿ ܠܐܲܠܵܗܵܐ ܡܸܠܬܼܵܐ ܒܬܲܪ̈ܬܲܝܗܹܝܢ: ܠܒܲܪܢܵܫܵܐ ܕܹܝܢ ܐܵܦ ܠܵܐ ܚܕܼܵܐ
ܡ̣ܢ ܬܲܪ̈ܬܲܝܗܹܝܢ: ܐܵܘ ܒܲܟܼܝܵܢܵܐ ܐܵܘ ܒܲܚܕܼܵܝܘܼܬܼܵܐ ܒܗܵܘ̇ ܡܵܐ ܕܲܡܚܲܝܲܕܼ.
ܐܵܠܵܗܵܐ ܡ̇ܢ ܕܐܸܬܼܒܲܪܢܲܫ: ܒܲܪܢܵܫܵܐ ܕܹܝܢ ܕܐܸܬܼܐܲܠܲܗ. ܗܵܘ̇ ܠܲܡ
ܓܹܝܪ ܕܲܡܫܲܪܸܐ ܘܡܸܬܿܕܲܪܲܓܼ ܘܡܸܫܬܲܡܠܸܐ: ܠܵܐ ܠܐܝܼܬܼܵܘܗܝ ܐܲܠܵܗܵܐ:
ܐܵܦܸܢ ܡܸܛܠ ܡܸܬܼܚܵܘܝܵܢܘܼܬܼܵܐ ܕܒܼܩܲܠܝܼܠ ܩܲܠܝܼܠ ܡܬܼܐܡܲܪ ܗܵܟܲܢܵܐ܀
ܘܟܼܠܗܹܝܢ ܐܲܝܠܹܝܢ ܕܡܸܬܼܐܲܡܪ̈ܵܢ ܡ̣ܢ ܚܕܼܵܝܘܼܬܼܵܐ: ܒܲܬܼܪ̈ܵܝܗܘܿܢ
pb. 333
ܗܵܠܹܝܢ ܕܲܡܚܲܝܕܼܝܼܢ: ܗܢܘ̈ܝܵܢ ܠܘܵܬܼ ܚܲܕܼ ܦܲܪܨܘܿܦܵܐ. ܘܕܲܠܚܕܼ
ܦܲܪܨܘܿܦܵܐ ܗܘ̤ܵܬܼ ܚܕܼܵܝܘܼܬܼܵܐ ܕܲܟܼܝܵܢܹ̈ܐ ܐܸܡܲ݁ܪ ܐܲܢ̄ܬܿ: ܒܲܥ̇ܒܼܵܕܼܵܐ ܕܹܝܢ
ܠܡܸܬܼܒܲܪܢܵܫܢܘܼܬܼܵܐ ܕܐܵܪ̈ܝܵܢܹܗ ܘܕܼܵܐܦܘܼܠܝܼܢܵܪ̈ܝܢܹܐ ܕܐܲܠܵܗܵܐ ܡܸܠܬܼܵܐ ܡܥܲܬܸܕܼ
ܐܲܢ̄ܬܿ ܒܟܼܠܹܗ ܚܲܝܠܵܟܼ. ܘܲܡܚܵܘܸܐ ܐܲܢ̄ܬܿ ܠܐܲܝܠܹܝܢ ܕܐܝܼܬܼ ܠܗܘܿܢ
ܥܲܝ̈ܢܹܐ ܠܡܸܬܼܒܲܩܵܝܘܼ ܒܵܟܸ: ܕܐܲܝܟܼ ܕܒܼܐܘܿܪܓܼܵܝܢܘܿܢ ܕܠܵܐ ܢܲܦܫܵܐ ܘܲܕܼܠܵܐ
ܡܸܠܬܼܵܐ ܘܲܕܼܠܵܐ ܨܸܒܼܝܢܵܐ ܡܸܬܼܚܲܫܲܚ ܒܦܲܓܼܪܵܐ ܘܲܒܼܢܲܦܫܵܐ ܐܲܝܟܼ ܕܠܲܟܼܝܵܢܵܐ
ܕܝܼܠܹܗ: ܟܲܕܼ ܥܵܒܹ̇ܕܼ ܘܚܵܐܹ̇ܫ ܚܲܫܹ̈ܐ ܕܦܲܓܼܪܵܐ ܕܲܗܘ̤ܵܐ ܒܲܪ ܟܝܵܢܹܗ. ܘܡܸܛܠ
ܗܵܢܵܐ: ܠܵܐ ܡܵܢܹ̇ܐ ܐܲܢ̄ܬܿ ܠܹܗ ܥܲܡܹܗ. ܘܐܲܝܟܼ ܕܥܲܠ ܐܘܼܡܵܢܵܐ: ܗܵܟܲܢܵܐ
ܡܲܤܸܩ ܐܲܢ̄ܬܿ ܠܟܼܠܗܹܝܢ ܗܵܠܹܝܢ ܕܐܘܼܪܓܵܢܘܿܢ ܥܲܠ ܐܠܵܗܵܐ ܡܸܠܬܼܵܐ:
ܘܠܵܐ ܝܵܗܹ̇ܒܼ ܐܲܢ̄ܬܿ ܠܗܹܝܢ ܕܐܘܼܡܵܢܵܐ ܠܐܘܼܪܓܵܢܘܿܢ. ܡܸܛܠ ܕܠܵܐ
ܗ̄ܘ̣ܵܐ ܠܗܵܕܹܐ ܐܸܬܼܢܤܸܒܼ: ܕܢܸܥܒܸܿܕ ܘܢܸܚܲܫ ܨܸܒܼܝܵܢܵܐܝܼܬܼ ܒܲܟܼܝܵܢܹܗ. ܐܸܠܵܐ
ܕܲܠܟܼܠܗܹܝܢ ܐ̄̈ܢܵܫܝ̈ܬܼܵܐ ܢܸܚܲܫ ܘܢܸܥܒܸܿܕܼ ܐܸܢܹܝܢ ܐܲܠܵܗܵܐ ܡܸܠܬܼܵܐ: ܟܲܕܼ
ܠܲܝܬܿ ܠܹܗ ܨܸܒܼܝܵܢܵܐ ܕܢܵܦܫܹܗ: ܐܵܘ ܪܓܸܫܬܼܵܐ ܐܵܘ ܚܲܫܹ̈ܐ ܐܵܘ ܐ̄ܢܵܫܘܼܬܼܵܐ.
ܐܸܠܵܐ ܠܐܲܠܵܗܵܐ ܡܸܠܬܼܵܐ ܝܵܗܹ̇ܒܼ ܐܲܢ̄ܬܿ: ܕܢܸܪܓܲܫ ܘܲܕܼܢܸܨܒܸܿܐ ܘܲܕܼܢܸܚܲܫ
ܒܟܼܠܗܹܝܢ ܕܐ̄ܢܵܫܘܼܬܼܵܐ ܒܲܟܼܝܵܢܹܗ. ܘܡܸܛܠ ܗܵܢܵܐ ܡܸܫܬܿܐܸܠ ܐܲܢ̄ܬܿ ܡ̣ܢ
ܕܲܠܡܹܐܡܲܪ: ܕܲܗܘ̤ܵܐ ܠܵܗ̇ ܡܸܕܸܡ ܠܐ̄ܢܵܫܘܼܬܼܵܐ ܡ̣ܢ ܚܕܼܵܝܘܼܬܼܵܐ
ܕܐܲܠܵܗܘܼܬܼܵܐ: ܡ̣ܢ ܗܵܘ̇ ܡܵܐ ܕܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ ܒܦܲܪܨܘܿܦܵܐ:
ܗܵܢܵܘ ܕܹܝܢ ܐܲܠܵܗܵܐ ܘܡܵܪܝܵܐ ܘܲܒܼܪܵܐ ܕܐܲܠܵܗܵܐ. ܒܸܠܥܵܕܼ ܡ̣ܢ ܐܘܼܤܝܼܵܐ
ܓܹܝܪ: ܟܠܗܹܝܢ ܕܐܘܼܤܝܼܵܐ ܐܝܼܬܼ ܠܹܗ. ܡ̣ܢ ܚܕܼܵܝܘܼܬܼܵܐ: ܘܠܵܐ ܗ̄ܘ̣ܐ
ܡ̣ܢ ܟܝܵܢܵܐ. ܒܦܲܪܨܘܿܦܵܐ ܓܹܝܪ ܕܐ̄ܢܵܫܘܼܬܼܵܐ ܡܸܬܼܚܲܫܚܵܐ ܐܲܠܵܗܘܼܬܼܵܐ:
ܘܐ̄ܢܵܫܘܼܬܼܵܐ ܒܗܵܘ̇ ܕܐܲܠܵܗܘܼܬܼܵܐ. ܘܗܵܟܲܢܵܐ: ܚܲܕܼ ܦܲܪܨܘܿܦܵܐ ܕܲܬܼܪ̈ܲܝܗܘܿܢ
pb. 334
ܐܵܡ̇ܪܝܼܢ ܚ̄ܢܲܢ. ܗܵܟܲܢܵܐ ܐܲܠܵܗܵܐ ܡܫܲܠܡܵܢܵܐ ܡܸܬܼܚܵܘܸܐ: ܟܲܕܼ ܠܵܐ ܡܸܬܼܢܟܸܐ
ܒܡܸܕܸܡ ܟܝܵܢܹܗ ܡ̣ܢ ܚܕܼܵܝܘܼܬܼܵܐ. ܘܗܵܟܲܢܵܐ ܬܘܼܒܼ ܒܲܪܢܵܫܵܐ ܡܫܲܠܡܵܢܵܐ:
ܕܠܵܐ ܡܒܲܨܲܪ ܒܡܸܕܸܡ ܡ̣ܢ ܡܲܥܒܿܕܼܵܢܘܼܬܼܵܐ ܘܡ̣ܢ ܚܲܫܹ̈ܐ ܕܲܟܼܝܵܢܵܐ ܕܝܼܠܹܗ
ܡ̣ܢ ܚܕܼܵܝܘܼܬܼܵܐ. ܗܵܘ̇ ܓܹܝܪ ܕܲܠܚܲܕܼ ܦܲܪܨܘܿܦܵܐ ܕܐܲܠܵܗܵܐ ܡܸܠܬܼܵܐ:
ܡܲܤܸܩ ܠܗܵܠܹܝܢ ܕܐܲܠܵܗܵܐ ܡܸܠܬܼܵܐ ܘܲܠܗܵܠܹܝܢ ܕܐ̄ܢܵܫܘܼܬܼܵܐ: ܘܠܵܐ
ܦܲܪܲܥ ܦܲܪܨܘܿܦܵܐ ܕܐܲܠܵܗܵܐ ܡܸܠܬܼܵܐ ܠܐ̄ܢܵܫܘܼܬܼܵܐ: ܗܵܢܵܐ ܓܵܢܹ̇ܒܼ
ܠܲܚܕܼܵܝܘܼܬܼܵܐ ܕܐܵܪ̈ܬܵܕܘܿܟܿܤܹܐ: ܘܲܡܕܲܡܸܐ ܒܗܵܝ̇ ܕܗܲܪ̈ܵܛܝܼܩܹܐ.
ܝܑܼܠܦܬܿܘܿܢ ܓܹܝܪ ܡ̣ܢ ܐܵܪ̈ܬܵܕܘܿܟܼܤܹܐ ܒܗܵܗ̈ܕܘܼܬܼܵܐ ܕܐܲܟܼܬܸܒܼܘ:
ܕܦܵܪܥܝܼܢ ܗܵܠܹܝܢ ܕܐ̄ܢܵܫܘܼܬܼܵܐ ܠܐܲܠܵܗܘܼܬܼܵܐ: ܘܗܵܠܹܝܢ ܕܐܲܠܵܗܘܼܬܼܵܐ
ܠܐ̄ܢܵܫܘܼܬܼܵܐ. ܘܲܕܼܗܵܢܵܐ ܡ̣ܢ ܗܵܘ̇ ܡܸܬܼܐܡܲܪ: ܘܲܕܼܗܵܘ̇ ܡ̣ܢ ܗܵܢܵܐ: ܐܲܝܟܼ
ܕܥܲܠ ܟܝܵܢܹ̈ܐ ܡܫܲܠܵܡܵܢܹ̈ܐ ܘܲܡܚܲܝ̈ܕܹܐ. ܘܲܡܫܚܲܝܕܝܼܢ ܕܠܵܐ ܒܘܼܠܒܵܠܵܐ:
ܘܡܸܬܼܚܲܫܚܝܼܢ ܒܦܲܪ̈ܨܘܿܦܹܐ ܕܲܚܕܼܵܕܹ̈ܐ.
ܐܲܝܟܲܢܵܐ ܗܵܟܹܝܠ ܫܒܼܵܟܼܘܿܢ ܠܟܼܠ ܡܵܐ ܕܲܨܒܼܵܐ: ܐܘܿ ܕܲܝܵܢܹ̈ܐ ܚܲܟܿܝܼ̈ܡܹܐ؟
ܐܵܘ ܓܹܝܪ ܫܪܵܘ ܠܗܵܠܹܝܢ ܕܐܵܒܼ̈ܗܵܬܼܵܐ: ܐܲܝܠܹܝܢ ܕܐܲܝܬܿܝܼܬܿܘܿܢ ܠܤܵܗܕܘܼܬܼܵܐ.
ܐܵܘ ܐܸܢ ܕܹܝܢ ܠܵܐ: ܡ̣ܢ ܐܵܢܲܢܩܹܐ ܐܝܼܬܹܝܗ̇ ܥܠܲܝܟܿܘܿܢ: ܕܲܬܼܩܲܒܿܠܘܼܢ
ܠܐܲܝܢܵܐ ܕܐܲܝܟܼ ܡܲܠܦܵܢܘܼܬܼܗܘܿܢ ܡܡܲܠܸܠ ܒܓܲܒܵܐ ܕܝܼܠܗܘܿܢ. ܬܪܹܝܢ
ܡ̇ܢ ܒܲܟܼܝܵܢܵܐ: ܘܚܲܕܼ ܦܲܪܨܘܿܦܵܐ ܒܲܚܕܼܵܝܘܼܬܼܵܐ: ܒܡܘܼܙܵܓܼܵܐ:
ܒܡܸܬܼܓܲܠܝܵܢܘܼܬܼܵܐ: ܒܢܲܩܝܼܦܘܼܬܼܵܐ: ܐܲܠܵܗܵܐ ܡ̇ܢ ܕܐܸܬܼܒܲܪܢܲܫ: ܒܲܪܢܵܫܵܐ
ܕܐܸܬܼܐܲܠܲܗ. ܗܵܢܵܐ ܡ̣ܢ ܗܵܘ̇ ܡܸܬܼܐܡܪ ܕܐܸܬܼܒܲܪܢܲܫ: ܘܗܵܘ̇ ܡ̣ܢ
ܗܵܢܵܐ ܡܸܬܼܐܡܲܪ ܕܐܸܬܼܐܲܠܲܗ. ܡܵܢܵܐ ܗܵܟܹܝܠ ܡܸܕܸܡ ܕܲܡܢܲܟܼܪܲܝ ܡܸܢܗܘܿܢ
ܐܸܡ̇ܪܹܬܼ: ܕܒܹܗ ܚܲܝܸܒܼܬܿܘܿܢܵܢܝ؟ ܠܵܐ ܙܵܕܹܩ ܗ̄ܘ̣ܵܐ ܠܡܵܘܕܵܝܘܼ ܬܪܹܝܢ
ܟܝܵܢ̈ܝܼܢ؟ ܠܵܐ ܙܵܕܩ ܠܡܵܘܕܵܝܘܼ ܠܚܲܕܼ ܦܲܪܨܘܿܦܵܐ ܕܲܬܼܪܹܝܢ ܟܝܵܢ̈ܝܼܢ
pb. 335
ܕܐܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܠܗܵܘ̇ ܕܐܲܠܵܗܘܼܬܼܵܐ ܘܲܕܐ̄ܢܵܫܘܼܬܼܵܐ؟ ܐܸܠܵܐ
ܐܵܦܸܢ ܟܵܦ̇ܪܝܼܢ ܐܢ̄ܬܿܘܿܢ ܒܐܲܝܠܹܝܢ ܕܲܟܼܬܲܒܼܬܿܘܿܢ: ܡܸܢܼܟܲܤܤܝܼܢ ܐܢ̄ܬܿܘܿܢ.
ܩܪܵܘ ܗܵܟܹܝܠ ܗܵܠܹܝܢ ܕܒܼܵܬܵܪܟܸܢ.
ܒܵܗ̇ ܒܲܕܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ ܕܲܬܼܠܵܬܼ:
ܠܘܼܩܒܲܠ ܗܲܪ̈ܵܛܝܼܩܹܐ: ܥܲܠ ܪܘܼܚܵܐ ܕܩܘܼܕܼܫܵܐ.
ܐܲܝܟܲܢܵܐ ܓܹܝܪ ܐܝܼܬܼܵܘܗܝ ܥ̇ܒܼܵܕܵܐ ܗܵܘ̇ ܕܥܲܡ ܐܲܒܼܵܐ ܗ̄ܘ̣ ܘܥܲܡ
ܒܪܵܐ: ܘܲܒܼܡܸܕܸܡ ܠܵܐ ܒܨܝܼܪ ܡܸܢܗܘܿܢ؟ ܠܵܐ ܗ̄ܘ̣ܵܐ ܐܲܝܟܼ ܡ̇ܢ ܕܲܚܕܼܵܐ
ܐܲܠܵܗܘܼܬܼܵܠ ܡܸܬܼܦܲܠܓܼܵܐ: ܐܸܠܵܐ ܟܬܼܵܒܼܵܐ ܐܲܠܵܗܵܝܵܐ ܕܲܚܕܼܵܐ ܡܚܵܘܸܐ ܚܲܝܠܵܐ:
ܘܲܕܼܡܸܬܼܦܲܪܫܵܐ ܠܟܼܠ ܚܲܕܼ ܚܲܕܼ ܡ̣ܢ ܩܢܘܼܡܹ̈ܐ ܠܬܲܚܘܝܼܬܼܵܐ ܘܲܕܼܡܘܼܬܼܵܐ
ܕܲܬܼܠܝܼܬܼܵܝܘܼܬܼܵܐ. ܘܐܸܬܼܒܲܩܵܘ ܒܵܗ̇ ܒܲܕܡܘܼܬܼܵܐ: ܡ̣ܢ ܥ̇ܒܼܵܕܹ̈ܐ ܕܫܲܪܝܼܘ
ܒܲܙܒܲܢ ܙܒܲܢ. ܐܲܠܵܗܵܐ ܡܸܠܬܼܵܐ ܗܘ̤ܵܐ ܒܸܤܪܵܐ ܘܐܲܓܸܢ ܒܲܢ: ܘܐܵܘܬܿܒܼܵܗ̇
ܥܲܡܹܗ ܥܲܡ ܐܲܒܼܵܐ ܠܐ̄ܢܵܫܘܼܬܼܵܐ ܕܐܸܬܼܢܲܤܒܲܬ̤. ܐܸܡ݂ܲܪ ܠܲܡ ܡܵܪܝܵܐ
ܠܡܵܪܝ ܕܬܸܒܼ ܠܵܟܼ ܡ̣ܢ ܚܲܡܝܼܢܝܼ: ܠܗܵܝ̇ ܕܡܘܼܬܼܵܐ ܕܐܸܬܼܢܲܤܒܲܬ̤. ܪܘܼܚܵܐ
ܕܩܘܼܕܸܫܵܐ ܢܚܸܬܼ: ܘܚܵܘܝܼ ܫܘܼܒܼܚܹܗ܀ ܠܵܐ ܡܸܟܹܿܝܠ ܤܢܝܼܩ ܩܵܪܘܿܝܵܐ:
ܕܢܸܥܛܘܿܦ ܥܲܠ ܟܠ ܚܕܼܵܐ ܡ̣ܢ ܐܲܝܠܹܝܢ ܕܩܲܕܸܡ ܐܸܬܼܐܡܲܪ:
ܘܲܕܼܢܹܐܡܲܪ ܗܸܢܹܝܢ ܟܲܕܼ ܗܸܢܹܝܢ. ܐܸܠܵܐ ܢܹܐܡܲܪ ܠܘܵܬܼܗܘܿܢ: ܒܲܪܝܵܐ ܗ̄ܘ̣
ܒܸܤܪܵܐ: ܐܵܘ ܠܵܐ ܒܲܪܝܵܐ؟ ܐܸܡܲܪܘ ܢܲܗܝܼܪܵܐܝܼܬܼ. ܐܸܢ ܐܵܡܲ݁ܪ ܐܲܢ̄ܬܿ ܕܒܲܪܝܵܐ
ܗ̄ܘ̣: ܒܟܼܠ ܙܢܵܐ ܕܐܝܼܬܼ ܝܗܹ̇ܒܼ ܐܲܢ̄ܬܿ ܕܡ̣ܢ ܐܲܒܼܵܐ ܘܡ̣ܢ ܒܪܵܐ ܘܡ̣ܢ
ܪܘܼܚܵܐ ܕܩܘܼܕܼܫܵܐ ܐܸܬܼܥܒܸܕܼ. ܒܡܸܕܸܡ ܓܹܝܪ ܠܲܓܼܡܵܐ ܠܵܐ ܡܸܬܼܦܲܪܫܝܼܢ
ܒܥܵܒܼܘܿܕܘܼܬܼܵܐ: ܘܟܼܠܗܹܝܢ ܡ̣ܢ ܚܲܕܼ ܘܡܸܢܹܗ ܟܲܕܼ ܡܸܢܹܗ ܕܨܒܼܝܵܢܵܐ
pb. 336
ܘܲܕܚܸܟܼܡܬܼܵܐ ܡܸܤܬܲܥܪܵܢ. ܐܸܢ ܕܹܝܢ ܠܵܐ ܡܦܲܪܸܫ ܐܲܢ̄ܬܿ ܒܗܵܠܹܝܢ: ܘܤܵܕܹܩ
ܐܲܢ̄ܬܿ ܠܹܗ ܠܲܒܼܪܵܐ ܡ̣ܢ ܐܲܒܼܵܐ ܘܡ̣ܢ ܪܘܼܚܵܐ ܕܩܘܼܕܸܫܵܐ: ܐܸܠܵܐ ܕܐܵܦ
ܕܲܗܘ̤ܵܐ ܒܸܤܪܵܐ ܡ̣ܢ ܒܸܤܪܵܐ ܘܕܲܐܓܸܢ ܒܲܢ: ܘܲܠܟܼܠܵܗ̇ ܡܕܲܒܿܪܤܵܢܘܼܬܼܵܐ
ܕܥܲܠ ܐܲܦܵܝ̈ܢ: ܡ̣ܢ ܚܲܕܼ ܘܡܸܢܹܗ ܟܲܕܼ ܡܸܢܹܗ ܕܨܒܼܝܵܢܵܐ ܘܲܕܼܚܸܟܼܡܬܼܵܐ
ܘܲܕܼܚܲܝܠܵܐ ܐܵܡܲ݁ܪ ܐܲܢ̄ܬܿ ܕܐܸܬܼܦܲܪܢܲܤܲܬ̤ ܐܲܝܟܼ ܕܐܵܦ ܐܸܬܼܦܲܪܢܤܲܬ̤: ܐܵܦ
ܐܸܢܵܐ ܐܵܡܲ݁ܪ ܐ̄ܢܵܐ: ܘܟܼܠܵܗ̇ ܓܘܼܕܵܐ ܕܐܵܪ̈ܬܵܕܘܿܟܿܤܹܐ ܐܲܝܟܼ ܟܬܼܵܒܹ̈ܐ
ܐܲܠܵܗܵܝܹ̈ܐ. ܐܸܢ ܗܵܟܹܝܠ ܗܵܕܹܐ ܫܘܵܝܵܐ ܠܲܩܛܹܐ ܓܼܪܵܢܘܼܬܼܵܐ: ܢܸܬܼܒܲܛܸܠ
ܠܵܟܼ ܕܠܵܐ ܢܸܫܬܿܒܸܩ ܡܸܕܸܡ ܕܠܵܐ ܩܛܹܐ ܓܼܪܵܢܘܼܬܼܵܐ. ܘܐܸܠܵܐ: ܠܵܐ
ܒܲܪܝܵܐ ܐܵܡܲ݁ܪ ܐܲܢ̄ܬܿ ܠܹܗ ܐܸܡܲܪ̈ܲܝܗܝ ܢܲܗܝܼܪܵܐܝܼܬܼ: ܘܒܲܛܸܠ ܠܗܵܝ̇
ܕܲܗ̤ܵܐ ܒܸܤܪܵܐ ܐܲܠܵܗܵܐ ܡܸܠܬܼܵܐ. ܗܵܘ ܓܹܝܪ ܕܠܵܐ ܗܘ̤ܵܐ: ܐܲܝܟܲܢ
ܡܸܬܼܐܡܲܪ ܕܲܗܘ̤ܵܐ؟ ܗܵܪܟܵܐ ܓܹܝܪ ܠܵܐ ܡܸܬܼܩܲܒܿܠܵܐ ܐܲܝܟܼ ܥ̇ܒܼܵܕܼܵܐ:
ܡܲܥܒܿܕܼܵܢܘܼܬܼܵܐ ܕܐܲܒܼܵܐ ܘܕܼܒܼܪܵܐ ܘܲܕܼܪܘܼܚܵܐ ܕܩܘܼܕܼܫܵܐ. ܒܗܵܕܹܐ ܓܹܝܪ
ܡܸܬܼܚܲܙܝܵܐ ܕܡܸܬܼܐ̱ܠܸܨ ܐܲܢ̄ܬܿ ܠܡܹܐܡܲܪ: ܕܲܤܢܝܼܩ ܗ̄ܘ̣ܵܐ ܥܲܠ ܐܲܒܼܵܐ
ܘܪܘܼܚܵܐ ܕܩܘܼܕܼܫܵܐ: ܒܸܤܪܵܐ ܕܐܲܠܵܗܵܐ ܡܸܠܬܼܵܐ: ܗܵܘ̇ ܐܲܝܢܵܐ ܕܠܵܘ
ܡܸܕܸܡ ܐ̄ܚܪܹܝܢ ܐܝܼܬܼܵܘܗܝ ܒܐܘܼܤܝܼܵܐ ܕܝܼܠܹܗ: ܠܒܲܪ ܡ̣ܢ ܐܲܠܵܗܵܐ
ܡܸܠܬܼܵܐ. ܘܠܵܐ ܗ̄ܘ̣ܵܐ ܗ̤ܘ ܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ: ܗܵܘ̇ ܕܠܵܐ
ܤܢܝܼܩ ܥܲܠ ܐܲܒܼܵܐ ܘܥܲܠ ܪܘܼܚܵܐ ܕܩܘܼܕܼܫܵܐ.
ܐܸܢ ܗܵܟܲܢܵܐ ܪܵܢܹ̇ܐ ܐܲܢ̄ܬܿ ܥܲܠ ܒܤܸܪܵܐ: ܛܵܒܼܵܐܝܼܬܼ ܡܬܲܚܡܲܬܿ
ܐܲܢ̄ܬܿ ܕܗܵܟܲܢܵܐ ܐܝܼܬܹܝܗ̇. ܒܪܲܡ ܐܸܬܼܒܲܩܵܐ ܒܐܲܒܼ̈ܗܵܬܼܵܐ ܕܕܲܠܩܘܼܒܼܠܵܐ
ܡܸܬܼܪܲܥܹܝܢ ܥܲܠ ܒܸܤܪܵܐ: ܗܵܢ̇ܘܿܢ ܕܡܸܢܗܘܿܢ ܐܲܝܬܿܝܼܬܿܘܿܢ ܤܗ̈ܕܘܵܬܼܵܐ
ܟܲܕܼ ܐܵܡ̇ܪܝܼܢ: ܟܝܵܢܵܐ ܗ̄ܘ̣ ܓܹܝܪ ܐ̄ܢܵܫܝܵܐ ܗܵܘ̇ ܕܡ̣ܢ ܡܲܪܝܲܡ. ܘܬܼܘܼܒܼ
pb. 337
ܗܵܘ̇ ܕܲܡܫܲܪܸܐ ܘܡܸܬܿܕܲܪܵܓܼ ܘܡܸܫܬܲܡܠܸܐ: ܠܵܐ ܐܝܼܬܼܵܘܗܝ ܐܲܠܵܗܵܐ:
ܐܵܦܸܢ ܡܸܛܠ ܡܸܬܼܚܵܘܝܵܢܘܼܬܹܗ ܕܲܒܼܩܲܠܝܼܠ ܩܲܠܝܼܠ ܡܸܬܼܐ̱ܡܲܪ ܗܵܟܲܢܵܐ.
ܬܪܹܝܢ ܓܹܝܪ ܟܝܵܢܹ̈ܐ ܕܡܸܗܘܿܢ ܐܝܼܬܼܵܘܗܝ ܦܵܪܘܿܩܲܢ: ܐ̄ܚܪܹܢܵܐ ܘܲܐ̄ܚܪܹܢܵܐ:
ܐܲܝܟܼ ܕܐܵܦ ܐܲܢ̄ܬܿ ܩܲܕܼܡܬܿ ܫܠܸܡܬܿ ܠܗܘܿܢ ܠܡܹܐܡܲܪ ܗܸܢܹܝܢ ܟܲܕܼ
ܗܸܢܘܿܢ. ܡܫܲܚܠܦܝܼܢ ܠܲܡ ܟܝܵܢܹ̈ܐ ܕܐܸܬܼܟܲܢܲܫܘ ܠܲܚܕܼܵܝܘܼܬܼܵܐ: ܚܲܕܼ ܓܹܝܪ
ܡ̣ܢ ܬܪ̈ܲܝܗܘܿܢ ܡܫܝܼܚܵܐ. ܠܵܘ ܐܲܝܟܼ ܡ̇ܢ ܕܫܘܼܚܠܵܦܵܐ ܕܲܟܼܝܵܢܹ̈ܐ
ܡܸܬܼܒܲܛܲܠ ܡܸܛܠ ܚܕܼܵܝܘܼܬܼܵܐ: ܐܝܼܬܼܵܘܗܝ ܓܹܝܪ ܐܲܠܵܗܵܐ ܠܵܐ ܚܵܫܘܫܵܐ
ܒܦܲܓܼܪܵܐ ܚܵܫܘܿܫܵܐ. ܠܵܐ ܓܹܝܪ ܢܘܼܟܼܪܵܝ ܠܹܗ ܦܲܓܼܪܹܗ: ܕܥܲܡܹܗ ܐܵܦ
ܗ̤ܘ ܝܲܬܿܝܼܒܼ ܥܲܡ ܐܲܒܼܵܐ. ܡܵܢܵܐ ܗܵܟܹܝܠ ܐܝܼܬܼ ܠܡܸܥܒܲܕܼ ܠܗܵܠܹܝܢ
ܕܐܡ̇ܪܹܬܼ: ܕܲܡܫܲܪܪܵܢ ܠܗܵܠܹܝܢ ܕܗܵܘ̇ ܘܲܠܗܵܠܹܝܢ ܕܗܵܢܵܐ؟ ܘܲܡܒܲܛ̈ܠܵܢ
ܠܗܵܠܹܝܢ ܕܝܼܠܵܟܼ: ܘܲܠܗܵܠܹܝܢ ܕܐܲܝܬܿܝܼܬܿ ܠܤܵܗܕܘܼܬܼܵܟܼ ܟܠܗܹܝܢ ܫܵܪܹܐ
ܐܲܢ̄ܬܿ. ܡܸܛܠ ܗܵܠܹܝܢ ܗ̄ܘ̣ ܠܵܐ ܐܸܬܼ݂ܵܘ ܠܒܼܘܼܚܵܢܵܐ: ܕܠܵܐ ܟܲܕܼ ܗܵܠܹܝܢ
ܘܕܲܐܝܟܼ ܗܵܠܹܝܢ ܢܸܫܡܥܘܼܢ: ܢܸܗܘܘܿܢ ܡܚܲܝܒܼܷܝܼܢ ܢܲܦܫܗܘܿܢ. ܐܲܝܬܸܐ
ܕܹܝܢ ܐܵܦ ܗܵܠܹܝܢ ܕܫܲܪܟܵܐ ܕܕܼܵܡ̈ܝܵܢ ܠܗܵܠܹܝܢ: ܘܢܸܥܒܲܪ ܥܠܲܝܗܹܝܢ:
ܕܬܸܚܙܘܿܢ ܒܝܲܕܼ ܟܠܗܹܝܢ ܠܥܸܠܬܼܵܐ ܕܡܸܫܬܲܐܠܵܢܘܼܬܹܗ ܕܡ̣ܢ ܕܝܼܢܵܐ.
ܒܵܗ̇ ܒܲܕܼܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ ܕܫܸܬܼ:
ܟܲܕܼ ܐܵܡܲ݁ܪ ܥܲܠ ܡܫܝܼܚܵܐ.
ܐܸܫܬܿܠܲܚ ܠܡܲܟܼܪܵܙܘܼ ܠܲܫܒܲܝ̈ܐ ܫܘܼܒܼܩܵܢܵܐ: ܐܲܝܟܼ ܫܠܝܼܚܵܐ.
ܘܡܲܝܬܸܐ: ܗܵܢܵܐ ܕܐܸܬܼܗܲܝܡܲܢ ܡ̣ܢ ܐܲܠܵܗܵܐ: ܘܐܸܬܼܥܒܸܕܼ ܪܲܒܿ ܟܘܼܡܪܹ̈ܐ.
ܡܸܗܘܵܐ ܓܹܝܪ ܗܘ̤ܵܐ: ܘܠܵܐ ܗ̄ܘ̣ܵܐ ܡܬܼܘܿܡܵܐܝܼܬܼ ܡ̣ܢ ܩܕܝܼܡ ܐܝܼܬܼܵܘܗܝ
ܗ̄ܘ̣ܵܐ. ܗܵܢܵܘ ܗܵܘ̇ ܕܲܒܼܩܲܠܝܼܠ ܩܲܠܝܼܠ ܐܸܬܿܕܲܪܲܓܼ ܠܐܝܼܩܵܪܵܐ ܕܪܲܒܿܘܼܬܼ
pb. 338
ܟܵܗܢܘܼܬܼܵܐ: ܐܘܿ ܗܲܪܵܛܝܼܩܵܐ. ܫܡܲܥ ܠܒܲܪܬܼ ܩܵܠܵܐ ܕܢܲܗܝܼܪܵܐܝܼܬܼ ܩܵܥ̈ܝܵܐ
ܠܵܟܼ: ܕܲܒܼܝܵܘ̈ܡܵܬܼܵܐ ܠܲܡ ܕܒܸܤܪܹܗ: ܒܵܥܘܼܬܼܵܐ ܠܲܡ ܘܬܲܟܼܫܲܦܬܼܵܐ ܒܲܓܼܥܵܬܼܵܐ
ܚܲܝܠܬܼܵܢܝܼܬܼܵܐ ܘܲܒܼܕܼܡ̈ܥܹܐ ܩܲܪܸܒܼ ܗ̄ܘ̣ܵܘܐ: ܘܐܸܬܿܡܲܥ ܡ̣ܢ ܙܲܕܝܼܩܘܼܬܹܗ.
ܘܟܲܕܼ ܛܵܒܼ ܒܪܵܐ ܐܝܼܬܼܵܘܗܝ ܗ̄ܘ̣ܵܐ: ܡ̣ܢ ܐܲܝܠܹܝܢ ܕܲܤܒܲܠ̣ ܝܲܠܦܵܗ̇
ܠܡܸܫܬܲܡܥܵܢܘܼܬܼܵܐ: ܘܐܸܬܼܓܿܡܲܪ ܘܲܗܘ̤ܵܐ ܠܟܼܠܗܘܿܢ ܐܲܝܠܹܝܢ
ܕܡܸܫܬܲܡܥܝܼܢ ܠܹܗ ܥܸܠܬܼܵܐ ܕܚܲܝܹ̈ܐ ܕܲܠܥܵܠܲܡ. ܡܸܫܬܲܡܠܵܝܘܼ ܡܸܫܬܲܡܠܸܐ
ܘܡܸܬܼܓܿܡܲܪ: ܗܵܘ̇ ܕܲܒܼܩܲܠܝܼܠ ܩܲܠܝܼܠ ܡܸܬܿܕܲܪܲܓܼ: ܗܵܪܵܛܝܼܩܵܐ.
ܥܲܠ ܗܵܘ̇ ܕܐܵܦ ܠܘܼܩܵܐ ܩܵܥܹ̇ܐ ܗ̄ܘ̣ܵܐ ܒܐܹܘܲܢܓܲܝܼܘܿܢ: ܕܝܼܫܘܿܥ ܠܲܡ
ܪܵܒܹܿܐ ܗ̄ܘ̣ܵܐ ܒܩܵܘܡܬܼܵܐ ܘܲܒܼܚܸܟܼܡܬܼܵܐ. ܕܫܵܠ̈ܡܵܢ ܠܗܵܠܹܝܢ ܐܵܦ ܦܵܘܠܘܿܣ
ܐܸܡ݂ܲܪ ܗ̄ܘ̣ܵܐ: ܕܐܸܬܼܓܡܲܪ ܘܲܗܘ̤ܵܐ ܠܟܼܠܗܘܿܢ ܐܲܝܠܹܝܢ ܕܡܸܫܬܿܡܥܝܼܢ
ܠܹܗ ܥܸܠܬܼܵܐ ܕܚܲܝܹ̈ܐ ܕܲܠܥܵܠܲܡ: ܘܐܸܫܬܲܡܲܗ ܡ̣ܢ ܐܲܠܵܗܵܐ ܪܲܒܿ ܟܘܼܡܪܹ̈ܐ
ܒܲܕܡܘܼܬܹܗ ܕܡܲܠܟܿܝܼܙܹܩ. ܘܡ̣ܢ ܒܵܬܲܪ ܐ̄ܚܪ̈ܵܢܝܵܬܼܵܐ: ܪܲܒܿ ܟܘܼܡܪܹ̈ܐ
ܐܸܬܼܩܪܝܼ. ܡܵܢܵܐ ܗܵܟܹܝܠ ܡܦܲܫܸܩ ܐܲܢ̄ܬܿ ܠܘܼܩܒܲܠ ܦܵܘܠܘܿܣ:
ܕܠܲܐܠܵܗܵܐ ܡܸܠܬܼܵܐ ܠܵܐ ܚܵܫܘܿܫܵܐ ܒܲܕܼܡܘܼܬܼܵܐ ܐܲܪܥܵܢܵܝܬܼܵܐ ܡܚܲܒܸܟܼ ܐܲܢ̄ܬܿ:
ܘܥܵܒܹ̇ܕܼ ܐܲܢ̄ܬܿ ܠܹܗ ܪܲܒܿ ܟܘܼܡܪܹ̈ܐ ܚܵܫܘܿܫܵܐ؟
ܡܸܬܼܪܲܥܸܐ ܐ̄ܢܵܐ ܗܵܟܹܝܠ ܥܲܠ ܟܠܟܼܘܿܢ: ܡ̣ܢ ܗܵܝ̇ ܕܐܲܡܝܼܢܵܐܝܼܬܼ
ܗܵܠܹܝܢ ܐܵܡ̇ܪܝܼܢ: ܘܲܡܩܲܪܸܒܼ ܗܵܘ̇ ܠܤܵܗܕܘܼܬܹܗ ܒܟܼܠܙܒܲܢ: ܕܕܼܵܡܹ̇ܝܢ
ܐܢ̄ܬܿܘܿܢ ܠܐܲܝܠܹܝܢ ܕܲܡܒܲܙܚܝܼܢ ܒܐܲܝܠܹܝܢ ܕܝܲܩܝܼܪܝܼܢ ܒܫܸܢܲܬܼܗܘܿܢ:
ܘܲܐ̄ܚܪ̈ܵܢܝܵܬܼܵܐ ܚܠܵܦ ܐ̄ܚܪ̈ܵܢܝܵܬܼܵܐ ܡܦܲܢܹܝܢ: ܠܐܲܝܠܹܝܢ ܕܲܡܫܲܐܠܝܼܢ ܠܗܘܿܢ ܟܲܕܼ
ܩܵܥܹ̇ܝܢ. ܡܸܛܠ ܗܵܢܵܐ: ܟܲܕܼ ܠܤܵܗ̈ܕܘܵܬܼܵܟܼ ܕܝܼܠܵܟܼ ܫܵܪܹܐ ܐܲܢ̄ܬܿ: ܠܵܐ
ܡܸܤܬܲܟܲܠ ܐܲܢ̄ܬܿ. ܗܵܘ̇ ܠܲܡ ܓܹܝܪ ܕܲܡܫܲܪܸܐ ܘܡܸܬܿܕܲܪܲܓܼ ܘܡܸܫܬܲܡܠܸܐ
ܠܵܐ ܐܝܼܬܼܵܘܗܝ ܐܲܠܵܗܑܵܐ: ܐܵܦܸܢ ܡܸܛܠ ܡܸܬܼܚܵܘܝܵܢܘܼܬܼܵܐ ܕܒܼܐܝܼܕܼܵܐ ܒܐܝܼܕܵܐ
pb. 339
ܡܸܬܼܐܡܟܲܪ ܗܵܟܲܢܵܐ: ܐܵܡܲ݁ܪ ܤܵܗܕܵܟܼ ܓܪܝܼܓܼܘܿܪܝܼܘܼܿܣ. ܡܸܟܹܿܝܠ ܕܹܝܢ
ܠܵܘ ܤܵܗܕܵܐ ܗ̄ܘ̣ ܕܝܼܠܵܟܼ: ܐܸܠܵܐ ܤܢܹܐܓܼܪܵܐ ܕܝܼܠܝܼ: ܕܲܠܗܵܠܹܝܢ ܤܵܡ̣
ܒܡܸܠܵܘ̈ܗܝ. ܡܵܢܵܐ ܗܵܟܹܝܠ ܡܚܲܒܸܟܼ ܐܲܢ̄ܬܿ ܠܗܵܠܹܝܢ ܕܗܵܘ̇: ܐܲܝܢܵܐ
ܕܲܒܼܗܹܝܢ ܒܡܸܠܵܘ̈ܗܝ ܤܵܡ̣ ܐܸܢܹܝܢ؟ ܐܸܠܵܐ ܐܵܦ ܐܲܡܒܿܪܘܿܤܝܼܣ: ܐܵܦ
ܠܵܐ ܗ̤ܘ ܟܬܼܵܒܼܵܐ ܡܲܠܸܦ ܠܟܼܘܿܢ: ܕܐܲܠܵܗܘܼܬܼܵܐ ܠܵܐ ܤܢܝܼܩܵܐ ܥܲܠ
ܩܘܼܕܵܫܵܐ: ܐܸܠܵܐ ܒܸܤܪܵܐ؟ ܐܵܘܕܵܐ ܫܘܼܒܼܚܵܠܐ ܕܐܲܠܵܗܵܐ: ܪܚܲܫܹ̈ܐ
ܕܒܲܪܢܵܫܵܐ܀ ܗܵܘ̇ ܕܲܠܘܵܬܼ ܢܲܦܫܵܟܼ. ܠܵܐ ܓܹܝܪ ܝܵܕܲܥ̇ ܐܲܢ̄ܬܿ ܡܵܢܵܐ ܐܵܡܲ݁ܪ
ܐܲܢ̄ܬܿ. ܡܵܢܵܐ ܗܵܟܹܝܠ ܡܸܕܸܡ ܐ̄ܚܪܹܝܢ ܐܸܡ݂ܲܪ ܠܵܟܼ ܗܵܢܵܐ؟ ܗܵܘ̇ ܓܹܝܪ
ܕܲܠܗܵܠܹܝܢ ܡܩܲܒܸܿܠ: ܥܲܠ ܗܵܠܹܝܢ ܠܵܐ ܡܸܬܼܚܪܸܐ. ܐܸܢ ܠܗܵܢܵܐ
ܡܩܲܛܪܸܓܼ ܐܲܢ̄ܬܿ: ܐܲܝܟܼ ܐܲܝܢܵܐ ܕܬܲܪܬܹܝܢ ܐܘܼܤ̈ܝܼܵܣ ܐܵܡܲ݁ܪ: ܩܲܛܪܸܓܼ
ܐܵܦ ܠܗܵܘ̇ ܕܐܵܡܲ݁ܪ ܬܪܹܝܢ ܟܝܵܢ̈ܝܼܢ: ܐ̄ܚܪܹܢܵܐ ܘܲܐ̄ܚܪܹܢܵܐ.
ܐܸܠܵܐ ܐܵܡܲ݁ܪ ܐܲܢ̄ܬܿ: ܕܗܵܘ̇ ܕܲܬܼܪܹܝܢ ܟܝܵܢ̈ܝܼܢ ܡܵܘܕܹܐ: ܐ̄ܚܪܹܢܵܐ
ܘܲܐ̄ܚܪܹܢܵܐ: ܬܪܹܝܢ ܦܲܪ݁ܨܘܿܦܹܐ ܡ̣ܢ ܐܵܢܲܢܩܹܐ ܥܵܒܹ̇ܿܕܼܘ ܬܪܹܝܢ ܓܹܝܪ
ܦܲܪ̈ܨܘܿܦܹܐ ܕܢܸܗܘܘܿܢ ܚܲܕܸ ܦܲܪܨܘܿܦܵܐ: ܠܵܐ ܡܸܫܟܿܚܵܐ. ܐܸܢ ܕܹܝܢ ܚܲܕܼ
ܦܲܪܨܘܿܦܵܐ ܙܵܕܹܩ ܠܡܵܘܕܼܵܝܘܼ: ܟܠܗܹܝܢ ܥܲܠ ܚܲܕܼ ܦܲܪܨܘܿܦܵܐ ܕܐܲܠܵܗܵܐ
ܡܸܠܬܼܵܐ ܐܲܤܸܩ. ܐܲܝܟܲܢܵܐ ܕܥܲܠ ܚܲܕܼ ܦܲܪܨܘܿܦܵܐ ܢܼܬܼܐܲܡܪ̈ܵܢ: ܘܠܵܐ
ܥܲܠ ܬܪܹܝܢ. ܐܲܝܟܼ ܕܐܲܢ̄ܬܿ ܐܵܡܲ݁ܪ ܐܲܢ̄ܬܿ: ܕܗܵܢܵܘ ܕܚܲܫ̣: ܘܲܡܦܲܠܸܓܼ
ܐܲܢ̄ܬܿ ܒܬܲܪܬܹܝܢ ܨܸܒܼ̈ܥܵܬܼܵܟܼ: ܘܲܡܚܵܘܸܐ ܐܲܢ̄ܬܿ ܐܲܝܟܼ ܕܥܲܠ ܐܲܝܠܹܝܢ
ܕܲܡܦܲܠܓܼܝܼܢ. ܡܸܕܸܡ ܓܹܝܪ ܒܗܵܠܹܝܢ ܠܲܝܬܿ ܠܵܟܼ ܠܘܵܬܼܝ: ܐܘܿ ܬܡܝܼܗܵܐ.
ܗܵܘ̇ ܕܲܒܼܡܸܠܬܼܵܐ ܡܩܲܒܸܿܠ ܠܐܲܒܼ̈ܗܵܬܼܵܐ ܘܲܠܡܸܠܲܝ̈ܗܘܿܢ ܕܐܲܒܼ̈ܗܵܬܼܵܐ:
ܡܩܲܒܸܿܠ ܐܵܦ ܠܡܸܠܲܝ̈ ܒܹܗ ܒܲܙܢܵܐ. ܗܵܘ̇ ܕܐܸܵܡܲ݁ܪ: ܕܐܵܦ ܠܵܐ ܗ̤ܘ
pb. 340
ܟܬܼܵܒܼܵܐ ܡܲܠܸܦ ܠܟܼܘܿܢ: ܕܐܲܠܵܗܘܼܬܼܵܐ ܠܵܐ ܤܢܝܼܩܵܐ ܥܲܠ ܩܘܼܕܵܫܵܐ:
ܐܸܠܵܐ ܒܸܤܪܵܐ؟ ܦܲܪܨܘܿܦܵܐ ܕܒܸܤܪܵܐ ܘܕܲܐܠܵܗܘܼܬܼܵܐ ܐܵܡܲ݁ܪ. ܘܲܕܼܚܲܕܼ
ܤܢܝܼܩ ܗ̄ܘ̣ܵܐ ܥܲܠ ܩܘܼܕܸܫܵܐ: ܘܲܐ̄ܚܪܹܢܵܐ ܠܵܐ ܤܢܝܼܩ ܗ̄ܘ̣ܵܐ.
ܘܗܵܘ̇ ܠܲܡ ܕܲܡܫܲܪܸܐ ܘܡܸܬܿܕܲܪܲܓܼ ܘܡܸܫܬܲܡܠܸܐ: ܠܵܘ ܐܲܠܵܗܵܐ ܗ̄ܘ̣:
ܐܵܦܸܢ ܡܸܛܠ ܡܸܬܼܚܵܘܝܵܢܘܼܬܹܗ ܕܲܒܼܩܲܠܝܼܠ ܩܲܠܝܼܠ ܡܸܬܼܐܡܲܪ ܗܵܟܲܢܵܐ.
ܘܗܵܢܵܐ ܬܪܹܝܢ ܐܸܡ݂ܲܪ: ܗܵܘ̇ ܕܫܲܪܝܼ: ܘܗܵܘ̇ ܕܠܵܐ ܫܲܪܝܼ. ܘܗܵܘ̇
ܕܐܸܬܿܕܲܪܲܓܼ ܘܐܸܫܬܲܡܠܝܼ: ܘܗܵܘ̇ ܬܘܼܒܼ ܕܲܡܬܼܘܿܡܵܐܝܼܬܼ ܐܝܼܬܼܵܘܗܝ
ܐܲܝܟܼ ܕܐܝܼܬܼܵܘܗܝ. ܘܗܵܘ̇ ܕܠܵܐ ܐܝܼܬܼܵܘܗܝ ܐܲܠܵܗܵܐ ܒܲܟܼܝܵܢܵܐ: ܐܵܦܸܢ
ܒܡܸܬܼܚܵܘܝܵܢܘܼܬܼܵܐ ܡܸܬܼܐܡܲܪ ܐܲܠܵܗܵܐ: ܘܗܵܘ̇ ܕܒܲܟܼܝܵܢܵܐ ܐܝܼܬܼܵܘܗܝ.
ܒܲܟܼܝܵܢܹ̈ܐ ܓܹܝܪ ܡܦܲܠܸܓܼ ܐܵܦ ܠܦܲܪ̈ܨܘܿܦܹܐ: ܠܒܲܪܢܵܫܵܐ ܘܠܲܐܠܵܗܵܐ.
ܠܵܘ ܬܪܹܝܢ ܢܒܲܝ̈ܵܐ: ܘܠܵܘ ܬܪܹܝܢ ܒܢܲܝ̈ܢܵܫܵܐ: ܐܸܠܵܐ ܠܵܐ ܡܸܫܬܵܘܕܲܥ
ܐܲܢ̄ܬܿ: ܕܐܲܒܼ̈ܗܵܬܼܵܐ ܠܚܲܕܼ ܦܲܪܨܘܿܦܵܐ ܕܲܬܼܪܹܝܢ ܟܝܵܢ̈ܝܼܢ ܐܲܝܟܲܢܵܐ ܡܵܘܕܹܝܢ؟
ܘܲܕܼܠܵܐ ܗ̄ܘ̣ܵܐ ܫܘܼܚ̈ܠܵܦܹܐ ܕܲܟܼܝܵܢܹ̈ܐ ܡܒܲܛܠܝܼܢ ܡܸܛܠ ܚܕܼܵܝܘܼܬܼܵܐ: ܐܵܘ
ܕܐܲܠܵܗܘܼܬܼܵܐ ܐܵܘ ܕܐ̄ܢܵܫܘܼܬܼܵܐ: ܕܡ̣ܢ ܗܵܠܹܝܢ ܠܚܲܕܸ ܦܲܪܨܘܿܦܵܐ
ܡܟܲܢ̈ܫܵܢ: ܕܐܝܼܬܼܵܘܗܝ ܕܲܟܼܝܵܢܹ̈ܐ ܘܲܕܼܦܲܪ̈ܨܘܿܦܹܐ. ܡܩܵܘܹ̇ܝܢ ܓܹܝܪ
ܫܘܼ̈ܠܵܦܹܐ: ܠܵܐ ܗ̄ܘ̣ܵܐ ܓܹܝܪ ܒܘܼܠܒܵܠܵܐ ܗܵܘܹ̇ܐ ܘܐܵܦܠܵܐ ܒܘܼܛܵܠܵܐ:
ܐܲܝܟܲܢܵܐ ܕܲܠܦܘܼܪܫܵܢܵܐ ܕܲܟܼܝܵܢܹ̈ܐ: ܟܝܵܢܵܐܝܼܬܼ ܥܲܠ ܚܲܕܼ ܟܝܵܢܵܐ ܘܥܲܠ ܚܲܕܼ
ܦܲܪܨܘܿܦܵܐ: ܕܝܼܠܹܗ ܟܲܕܼ ܕܝܼܠܹܗ ܕܲܟܼܝܵܢܵܐ ܬܲܤܸܩ: ܘܲܬܼܒܲܛܸܠ ܠܗܵܝ̇
ܕܲܕܼܠܵܐ ܦܲܪܨܘܿܦܵܐ ܘܲܕܼܠܵܐ ܐܘܼܤܝܼܵܐ ܕܝܼܠܵܗ̇ ܐܝܼܬܹܝܗ̇: ܗܵܢܵܘ ܕܹܝܢ
ܠܐ̄ܢܵܫܘܼܬܼܵܐ: ܘܐܲܠܵܗܵܐ ܘܒܲܪܢܵܫܵܐ: ܠܐܲܠܵܗܵܐ ܒܲܠܚܘܿܕܼ ܡܫܲܡܲܗ ܐܲܢ̄ܬܿ.
ܗܵܘ̇ ܓܹܝܪ ܕܗܵܟܲܢܵܐ ܡܫܲܡܲܗ ܚܲܕܼ ܦܲܪܨܘܿܦܵܐ ܕܲܬܼܪ̈ܲܝܗܘܿܢ ܟܝܵܢܹ̈ܐ
pb. 341
ܠܐܲܠܵܗܵܐ ܡܸܠܬܼܵܐ: ܠܵܐ ܬܘܼܒܼ ܝܵܗܹ̇ܕܼ ܠܦܲܪܨܘܿܦܵܐ ܕܐ̄ܢܵܫܘܼܬܼܵܐ ܗܵܠܹܝܢ
ܕܐܲܠܵܗܘܼܬܼܵܐ. ܐܲܝܟܲܢܵܐ ܕܚܲܕܼ ܦܲܪܨܘܿܦܵܐ ܢܸܗܘܸܐ ܕܐܲܠܵܗܘܼܬܼܵܐ
ܘܲܕܼܐ̄ܢܵܫܘܼܬܼܵܐ: ܦܲܪܨܘܿܦܵܐ ܕܐܲܠܵܗܘܼܬܼܵܐ ܘܦܲܪܨܘܿܦܵܐ ܕܐ̄ܢܵܫܘܼܬܼܵܐ ܚܲܕܼ
ܦܲܪܨܘܿܦܵܐ. ܗܵܘ̇ ܡ̇ܢ ܒܤܘܼܪܵܩܵܐ: ܗܵܘ̇ ܕܹܝܢ ܒܪܘܼܡܪܵܡܵܐ. ܐܵܘ
ܒܘܼܠܒܵܠܵܐ ܕܲܟܼܝܵܢܹ̈ܐ ܡܵܘܕܸܐ ܐܲܢ̄ܬܿ: ܐܵܘ ܒܘܼܛܵܠܵܐ ܓܡܝܼܪܵܐ: ܐܵܘ
ܠܲܚܕܼܵܝܘܼܬܼܵܐ ܐܘܿܪܓܵܢܵܝܬܼܵܐ ܘܲܟܼܝܵܢܝܬܼܵܐ ܕܗܲܪ̈ܵܛܝܼܩܹܐ ܡܵܘܕܸܐ ܐܲܢ̄ܬܿ.
ܕܡܸܛܠ ܕܢܸܫܟܲܚ ܠܡܸܬܿܕܲܒܵܪܘܼ ܘܲܠܡܸܚܲܫ ܐܲܝܟܼ ܟܝܵܢܵܐ ܐ̄ܢܵܫܝܵܐ:
ܒܟܼܠܗܹܝܢ ܕܲܒܼܢܲܝ̈ܢܵܫܵܐ ܐܸܬܼܚܲܝܲܕܼ. ܘܗܵܠܹܝܢ ܕܐ̄̇ܢܵܫܘܼܬܼܵܐ: ܐܲܝܟܼ ܐܘܿܪܓܵܢܘܿܢ
ܥܲܠ ܐܘܼܡܵܢܵܐ. ܗܵܢܵܘ ܕܹܝܢ: ܥܲܠ ܐܲܠܵܗܵܐ ܡܸܠܬܼܵܐ ܡܲܤܸܩ ܐܲܢ̄ܬܿ
ܠܗܹܝܢ: ܘܠܵܐ ܝܵܗ̇ܒܼ ܐܲܢ̄ܬܿ ܠܐܘܿܪܓܵܢܘܿܢ ܗܵܠܹܝܢ ܕܐܘܼܡܵܢܵܐ: ܗܵܢܵܘ
ܕܹܝܢ ܠܐ̄ܢܵܫܘܼܬܼܵܐ. ܘܲܠܗܵܠܹܝܢ ܕܐ̄ܢܵܫܘܼܬܼܵܐ: ܐܲܝܟܼ ܕܡ̣ܢ ܐܘܼܪܓܵܢܘܿܢ
ܥܲܠ ܐܲܠܵܗܵܐ ܡܸܠܬܼܵܐ ܡܲܤܸܩ ܐܲܢ̄ܬܿ ܠܗܹܝܢ. ܗܵܠܹܝܢ ܕܹܝܢ ܕܐܲܠܵܗܵܐ
ܡܸܠܬܼܵܐ: ܠܐ̄ܢܵܫܘܼܬܼܵܐ ܠܵܐ ܝܵܗܹ̇ܒܼ ܐܲܢ̄ܬܿ. ܛܵܥܹ̇ܐ ܐܲܢ̄ܬܿ ܗܵܟܹܝܠ: ܕܒܲܫܡܵܐ
ܒܲܠܚܘܿܕܼ ܕܝܼܠܲܢ: ܘܲܒܼܦܲܪܨܘܿܦܵܐ ܕܝܼܠܲܢ ܡܸܬܼܚܲܫܲܚ ܐܲܢ̄ܬܿ: ܒܗܵܠܹܝܢ
ܕܐܵܡ̇ܪܝܼܢ ܚ̄ܢܲܢ: ܒܲܥܒܼܵܕܼܵܐ ܕܹܝܢ ܕܲܠܩܘܼܒܼܠܵܐ ܡܒܲܛܸܠ ܐܲܢ̄ܬܿ ܠܗܹܝܢ.
ܘܥܵܒܹ̇ܕܼ ܐܲܢ̄ܬܿ ܠܹܗ ܚܵܫܘܿܫܵܐ ܠܐܲܠܵܗܵܐ ܡܸܠܬܼܵܐ: ܟܲܕܼ ܓܘܼܫܬܼܵܢܘܼܬܼܵܐ
ܘܲܠܨܒܼܝܵܢܵܐ ܕܐ̄ܢܵܫܘܼܬܼܵܐ ܡܒܲܛܸܠ ܐܲܢ̄ܬܿ. ܕܒܲܟܼܝܵܢܵܗ̇ ܠܲܡ ܠܵܐ ܪܵܓܼܫܵܐ:
ܐܸܠܵܐ ܒܲܟܼܝܵܢܵܐ ܕܠܲܠܵܗܵܐ ܡܸܠܬܼܵܐ ܪܵܓܼܫܵܐ. ܘܨܵܒܼ̇ܝܵܐ ܗ̄ܘ̣ܵܬܼ ܠܵܘ ܒܲܟܼܝܵܢܵܐ
ܕܝܼܠܵܗ̇: ܐܸܠܵܐ ܒܲܟܼܝܵܢܵܐ ܕܐܲܠܵܗܵܐ ܡܸܠܬܼܵܐ ܨܵܒܼ̇ܝܵܐ ܗ̄ܘ̣ܵܬܼ. ܘܡܸܛܠ
ܗܵܢܵܐ: ܠܲܟܼܝܵܢܵܐ: ܘܠܵܐ ܠܦܲܪܨܘܿܦܵܐ ܝܵܗܹ̇ܒܼ ܐܲܢ̄ܬܿ ܗܵܠܹܝܢ ܕܐ̄ܢܵܫܘܼܬܼܵܐ
ܠܐ̄ܢܵܫܘܼܬܼܵܐ. ܐܸܠܵܐ ܠܗܵܠܹܝܢ ܕܐ̄ܢܵܫܘܼܬܼܵܐ ܠܐܲܠܵܗܵܐ ܝܵܗܹ̇ܒܼ ܐܲܢ̄ܬܿ ܠܗܹܝܢ:
ܘܗܵܠܹܝܢ ܕܐܲܠܵܗܘܼܬܼܵܐ ܠܐ̄ܢܵܫܘܼܬܼܵܐ ܠܵܐ ܝܵܗܹ̇ܒܼ ܐܲܢ̄ܬܿ. ܚܢܲܢ ܕܹܝܢ ܒܲܟܼܝܵܢܹ̈ܐ:
pb. 342
ܐ̄ܚܪܹܢܵܐ ܘܲܐ̄ܚܪܹܢܵܐ ܐܵܡ̇ܪܝܼܢ ܚ̄ܢܲܢ. ܒܲܚܕܼܵܝܘܼܬܼܵܐ ܕܹܝܢ: ܚܲܕܼ ܦܲܪܨܘܿܦܵܐ:
ܒܲܫܚܫܲܚܬܼܵܐ ܕܚܲܕܼ ܥܲܡ ܚܲܕܼ. ܐܲܠܵܗܵܐ ܡ̇ܢ ܕܐܸܬܼܒܲܪܢܲܫ: ܒܲܪܢܵܫܵܐ ܕܹܝܢ
ܕܐܸܬܼܐܲܠܲܗ.
ܬܘܼܒܼ ܕܹܝܢ ܐܲܝܟܼ ܕܥܲܠ ܬܠܝܼܬܼܵܝܘܼܬܼܵܐ. ܬܲܡܵܢ ܚܕܼܵܐ ܐܘܼܤܝܼܵܐ
ܬܠܵܬܲܝ̈ܗܘܿܢ ܦܲܪ̈ܨܘܿܦܹܿܐ: ܬܠܵܬܼܵܐ ܕܹܝܢ ܦܲܪ̈ܨܘܿܦܹܐ ܕܲܚܕܼܵܐ ܐܘܼܤܝܼܵܐ.
ܗܵܪܟܵܐ ܚܲܕܼ ܦܲܪܨܘܿܦܵܐ ܕܬܲܪܬܹܝܢ ܐܘܼܤ̈ܝܼܵܣ: ܘܬܲܪܬܹܝܢ ܐܘܼܤ̈ܝܼܵܣ
ܕܚܲܕܼ ܦܲܪܨܘܿܦܵܐ. ܠܵܐ ܗ̄ܘ̣ܵܐ ܕܠܵܐ ܐܘܼܤܝܼܵܐ ܐܝܼܬܲܝܗܘܿܢ ܬܲܡܵܢ
ܦܲܪ̈ܨܘܿܦܹܐ: ܘܠܵܐ ܬܘܼܒܼ ܗܵܪܟܵܐ ܐܘܼܤܝܼܵܐ ܕܠܵܐ ܦܲܪܨܘܿܦܵܐ ܐܝܼܬܹܝܗ̇.
ܘܠܵܐ ܬܘܼܒܼ ܟܝܵܢܵܐ ܕܠܵܐ ܦܲܪܨܘܿܦܵܐ: ܘܠܵܐ ܬܘܼܒ ܦܲܪܨܘܿܦܵܐ ܕܠܵܐ
ܟܝܵܢܵܐ. ܒܦܲܪܨܘܿܦܵܐ ܓܹܝܪ ܕܲܚܕܼܵܐ ܐܘܼܤܝܼܵܐ: ܐܘܼܤܝܼܵܐ ܐ̄ܚܪܹܬܼܵܐ ܒܹܗ ܟܲܕܼ
ܒܹܗ ܒܲܙܢܵܐ ܡܸܬܼܚܲܫܚܵܐ: ܘܠܵܐ ܒܲܐ̄ܚܪܹܢܵܐ: ܡܸܛܠ ܚܕܼܵܝܘܼܬܼܵܐ. ܥ̣ܒܲܕܼ
ܐܸܢܹܝܢ ܓܹܝܪ ܠܹܗ ܠܗܵܠܹܝܢ ܕܝܼܠܲܢ ܕܝܼ̈ܠܵܝܵܬܹܗ: ܟܲܕܼ ܝܲܗ̣̄ܒܼ ܠܹܗ
ܕܝܼܠܹܗ ܠܗܵܘ̇ ܕܐܝܼܬܼ ܠܹܗ ܟܠܗܹܝܢ ܗܵܠܹܝܢ ܡܫܲܡܠ̱ܝܵܐܝܼܬܼ ܤܛܲܪ
ܡ̣ܢ ܚܛܝܼܬܼܵܐ. ܠܲܡܥܲܕܵܪܘܼ ܓܹܝܪ ܠܲܟܼܝܵܢܲܢ: ܠܵܘ ܕܢܸܤܲܒ ܗܵܠܹܝܢ
ܕܐܝܼܬܼ ܠܹܗ. ܘܕܲܒܼܡܸܫܬܲܡܥܵܢܘܼܬܼܵܐ ܪܹܫܵܝܬܼܵܐ ܢܸܦܪܘܿܩ ܘܲܢܚܲܕܼܬܼ
ܠܲܟܼܝܵܢܲܢ ܒܹܗ: ܘܠܵܐ ܗ̄ܘ̣ܵܐ ܕܲܢܪܝܼܡܹܗ ܡ̣ܢ ܡܸܫܬܲܡܥܵܢܘܼܬܼܵܐ: ܟܲܕܼ ܗ̤ܘ
ܡܸܫܬܲܡܲܥ ܚܠܵܦܵܘܗܝ ܒܟܼܠܗܘܢܿܢ ܚܲܫܹ̈ܐ ܐ̄ܢܵܫܝܵ̈ܐ: ܘܗ̤ܘ ܠܵܐ
ܢܸܫܬܿܡܲܥ ܒܡܸܕܸܡ: ܘܒܲܟܼܝܵܢܵܐ ܐ̄ܢܵܫܵܝܵܐ ܕܲܒܼܢܲܝ̈ܢܵܫܵܐ ܠܵܐ ܢܸܫܬܵܘܬܲܦ.
ܘܠܵܐ ܗ̄ܘ̣ܵܐ ܡ̣ܢ ܒܢܲܝ̈ܬܢܵܫܵܐ: ܘܠܵܐ ܬܘܼܒܼ ܡ̣ܢ ܗܵܠܹܝܢ ܕܐܵܠܵܗܘܼܬܼܵܐ:
ܐܸܠܵܐ ܠܗܵܠܹܝܢ ܕܐ̄̇ܢܵܫܘܼܬܼܵܐ ܠܐܲܠܵܗܘܼܬܼܵܐ ܝܵܗܹ̇ܒܼ. ܗܵܠܹܝܢ ܕܹܝܢ ܕܐܲܠܵܗܘܼܬܼܵܐ
ܠܐ̄ܢܵܫܘܼܬܼܵܐ ܠܵܐ ܝܵܗܹ̇ܒܼ: ܐܸܠܵܐ ܐܲܝܟܼ ܕܒܲܚܫܲܚܬܼܵܐ ܕܐܘܿܪܓܵܢܘܿܢ
ܐܸܬܼܢܤܸܒܼ. ܠܵܐ ܗ̄ܘ̣ܵܐ ܨܸܒܼܝܵܢܵܐܝܼܬܼ ܤܲܥܪܵܗ̇ ܠܡܸܫܬܲܡܥܵܢܘܼܬܼܵܐ ܐܲܝܟܼ
pb. 343
ܟܝܵܢܵܐ ܡܠܝܼܠܵܐ: ܒܚܘܼܫܵܒܼܵܐ ܘܲܒܼܒܼܘܼܚܪܵܢܵܐ ܘܒܲܓܼܒܼܝܼܬܼܵܐ ܕܛܵܒܼܬܼܵܐ:
ܘܒܼܤܸܬܲܠܝܵܢܘܼܬܼܵܐ ܕܒܼܝܼܫܬܼܵܐ.
ܐܸܢ ܕܹܝܢ ܡܫܲܠܡܵܢܵܐ ܐܵܡܲ݁ܪ ܐܲܢ̄ܬܿ ܠܹܗ ܠܲܟܼܝܵܢܵܐ ܕܲܒܼܢܲܝ̈ܢܵܫܵܐ: ܗܲܒܼ
ܠܹܗ ܫܘܼܡܠܵܝܵܐ ܐܵܦ ܒܤܘܼܥܪ̈ܵܢܹܐ: ܕܲܒܼܗܘܿܢ ܡܸܬܼܚܵܘܸܐ ܕܗ̤ܘ
ܐܝܼܬܼܵܘܗܝ. ܗܵܢܵܘ ܕܐܸܬܼܗܲܝܡܲܢ ܠܐܲܠܵܗܵܐ ܘܐܸܬܼܥ̱ܒܸܕܼ ܪܲܒܿ ܟܘܼܡܪܹ̈ܐ:
ܘܒܼܵܥܵܘܼܬܼܵܐ ܘܬܲܟܼܫܲܦܬܼܵܐ ܘܬܲܚܢܲܢܬܼܵܐ ܩܲܪܸܒܼ: ܠܘܵܬܼ ܗܵܘ̇ ܕܡܸܟܲܚ
ܗ̄ܘ̣ܵܐ ܕܡ̣ܢ ܡܵܘܬܵܐ ܢܲܚܹܝܘܗܝ ܘܲܢܫܵܙܒܼܝܼܘܗܝ. ܒܲܓܥܵܬܼܵܐ ܚܲܝܠܬܼܵܢܝܼܬܼܵܐ
ܘܲܒܼܕܼܡ̈ܥܹܐ: ܘܬܸܫܬܲܡܲܥ ܡ̣ܢ ܙܲܕܝܼܩܘܼܬܹܗ. ܘܟܲܕܼ ܛܲܒܼ ܒܪܵܐ
ܐܝܼܬܼܵܘܗܝ ܗ̄ܘ̣ܵܐ: ܡ̣ܢ ܐܲܝܠܹܝܢ ܕܲܤܒܲܠ̣ ܝܲܠܦܵܗ̇ ܠܡܸܫܬܲܡܥܵܢܘܼܬܼܵܐ.
ܘܲܗܘ̤ܵܐ ܠܟܼܠܗܘܿܢ ܐܲܝܠܹܝܢ ܕܡܸܫܬܲܡܥܝܼܢ ܠܹܗ: ܥܸܠܬܼܵܐ ܕܚܲܝܹ̈ܐ
ܕܲܠܥܵܠܲܡ. ܬܘܼܒܼ: ܗܵܘ̇ ܕܲܡܫܲܪܸܐ ܘܡܸܬܿܕܲܪܲܓܼ ܘܡܸܫܬܲܡܠܸܐ: ܠܵܐ
ܐܝܼܬܼܵܘܗܝ ܐܲܠܵܗܵܐ: ܐܵܦܸܢ ܡܸܛܠ ܡܸܬܼܓܲܠܝܵܢܘܼܬܹܗ ܕܲܒܼܩܲܠܝܼܠ ܩܲܠܝܼܠ
ܡܸܬܼܐܡܲܪ ܗܵܟܲܢܵܐ. ܘܬܼܘܼܒܼ: ܐܵܦ ܠܵܐ ܗ̤ܘ ܟܬܼܵܒܼܵܐ ܡܲܠܸܦ ܠܟܼܘܿܢ:
ܕܠܵܐ ܗ̄ܘ̣ܵܐ ܐܲܠܵܗܘܼܬܼܵܐ ܤܡܝܼܩܵܐ ܥܲܠ ܩܘܼܕܵܫܵܐ: ܐܸܠܵܐ ܒܸܤܪܵܐ؟
ܟܲܕܼ ܛܵܒܼ ܐܝܼܬܼܵܘܗܝ ܒܪܵܐ: ܡܸܛܠ ܚܕܼܵܝܘܼܬܼܵܐ ܓܹܝܪ ܕܐܲܠܵܗܘܼܬܼܵܐ
ܘܲܕܼܒܸܤܪܵܐ: ܒܬܲܪ̈ܬܲܝܗܹܝܢ ܡܡܲܠܸܠ ܒܪܵܐ ܕܐܲܠܵܗܵܐ: ܡܸܛܠ ܕܒܹܗ
ܐܝܼܬܲܝܗܘܿܢ ܗ̄ܘ̣ܵܘ ܬܪ̈ܲܝܗܘܿܢ ܟܝܵܢܹ̈ܐ. ܗܵܫܵܐ ܡ̇ܢ ܫܘܼܒܼܚܵܐ ܕܐܲܠܵܗܵܐ:
ܗܵܫܵܐ ܕܹܝܢ ܚܲܫܹ̈ܐ ܕܒܲܪܢܵܫܵܐ. ܠܵܐ ܓܹܝܪ ܟܲܕܼ ܐܵܡ̇ܪܝܼܢ ܚ̄ܢܲܢ ܐܲܠܵܗܵܐ
ܘܒܲܟܼܝܵܢܵܐ ܐܵܡ̇ܪܝܼܢ ܚ̄ܢܲܢ: ܒܸܠܥܵܕܼ ܡ̣ܢ ܒܲܪܢܵܫܵܐ ܪܵܢܹܝܢ ܚ̄ܢܲܢ ܠܹܗ. ܘܐܵܦ
ܠܵܐ ܬܘܼܒܼ ܟܲܕܼ ܒܲܪܢܵܫܵܐ ܐܵܡ̇ܪܝܼܢ ܚ̄ܢܲܢ ܠܹܗ: ܘܒܲܟܼܝܵܢܵܐ ܐܵܡ̇ܪܝܼܢ ܚ̄ܢܲܢ
ܠܹܗ: ܒܸܠܥܵܕܼ ܡ̣ܢ ܗܵܘ̇ ܕܐܝܼܬܼܵܘܗܝ ܐܲܠܵܗܵܐ ܐܵܡ̇ܪܝܼܢ ܚ̄ܢܲܢ ܠܹܗ. ܐܸܠܵܐ
pb. 344
ܐܲܠܵܗܵܐ ܡ̇ܢ ܠܒܲܪܢܵܫܵܐ ܡܫܲܡܗܝܼܢ ܚ̄ܢܲܢ ܒܲܚܕܼܵܝܘܼܬܼܵܐ ܕܐܲܠܵܗܘܼܬܼܵܐ:
ܒܲܪܢܵܫܵܐ ܕܹܝܢ ܒܲܟܼܝܵܢܵܐ. ܗܵܟܼܘܵܬܼ ܕܹܝܢ ܐܵܦ ܡܸܢܕܪܹܫ: ܐܲܠܵܗܵܐ ܡ̇ܢ ܒܲܟܼܝܵܢܵܐ
ܐܲܠܵܗܵܐ ܡܸܠܬܼܵܐ: ܒܲܪܢܵܫܵܐ ܕܹܝܢ ܐܵܡ̇ܪܝܼܢ ܚ̄ܢܲܢ ܠܐܲܠܵܗܵܐ: ܡܸܛܠ ܚܕܼܵܝܘܼܬܼܵܐ
ܕܠܦܲܪܨܘܿܦܵܐ ܕܐ̄ܢܵܫܘܼܬܼܵܐ. ܠܵܐ ܗܵܟܹܝܠ ܗܵܠܹܝܢ ܕܲܡܟܼܝܵܢܹ̈ܐ ܠܲܚܕܼܵܝܘܼܬܼܵܐ:
ܘܠܵܐ ܗܵܠܹܝܢ ܕܲܚܕܲܝܘܼܬܼܵܐ ܠܲܟܼܝܵܢܹ̈ܐ ܡܫܲܚ̈ܠܦܵܢ ܠܗܘܿܢ: ܘܓܼܵܠ̈ܙܵܢ
ܠܲܬܼܪܲܝܗܘܿܢ ܡ̣ܢ ܕܝܼܠܵܝ̈ܬܼܵܐ ܕܲܟܼܝܵܢܹ̈ܐ: ܐܵܘ ܡ̣ܢ ܐܲܝܠܹܝܢ ܕܐܸܤܬܥܲܪ
ܒܲܚܕܼܵܝܘܼܬܼܵܐ ܠܲܡܕܲܒܿܪܵܢܘܼܬܼܵܐ ܕܲܚܠܵܦܲܝܢ. ܢܸܬܼܟܲܬܼ̈ܒܵܢ ܕܹܝܢ ܐܵܦ
ܐ̄ܚܪ̈ܵܢܝܵܬܼܵܐ:
ܕܢܸܗܘ̈ܝܵܢ ܠܡܲܟܿܤܵܢܘܼܬܼܵܐ ܕܚܘܼܝܵܒܼܵܐ ܕܲܥ̣ܒܲܕܼܘ ܥܠܲܝ ܕܲܝܵܢܹ̈ܐ.
ܒܵܗ̇ ܕܲܒܼܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ ܕܲܫܒܲܥ.
ܡܸܟܹܝܠ ܐܲܚܲܝ̈ ܩܲܕܝܼ̈ܫܹܐ ܕܐܸܬܼܩܪܝܼܢ ܐܢ̄ܬܿܘܿܢ ܒܩܸܪܝܢܵܐ ܕܡ̣ܢ ܫܡܲܝܵܐ:
ܚܙܵܐܘܼܗܝ ܠܗܵܢܵܐ ܫܠܝܼܚܵܐ ܘܪܲܒܿ ܡܘܼܡܪܹ̈ܐ ܕܬܼܵܘܕܝܼܬܲܢ ܝܼܫܘܿܥ
ܡܫܝܼܚܵܐ: ܕܲܡܗܲܝܡܲܢ ܠܡ̇ܢ ܕܥܲܒܼܕܹܗ ܐܲܝܟܼ ܡܘܼܫܹܐ ܒܟܼܠܹܗ ܒܲܝܬܹܗ.
ܘܒܼܵܬܲܪ ܐ̄ܚܪ̈ܵܢܝܬܼܵܐ: ܟܲܓܕܼ ܐܝܼܬܼ ܠܟܼܘܿܢ ܗ̤ܘ ܗܵܢܵܐ ܪܲܒܿ ܡܘܼܡܪܹ̈ܐ ܕܚܵܐܹ̇ܫ
ܥܲܡܟܼܘܿܢ: ܘܒܲܪ ܓܸܢܤܟܼܘܿܢ ܘܲܡܫܲܪܲܪ ܥܲܡܟܼܘܿܢ: ܠܵܐ ܬܸܦܠܘܼܢ
ܡ̣ܢ ܗܲܝܡܵܢܘܼܬܼܵܐ. ܗ̤ܘ ܓܹܝܪ ܒܝܲܕܼ ܒܘܼܪܟܿܬܼܵܐ ܕܐܸܬܼܡܲܠܟܿܬ̤ ܠܹܗ:
ܡ̣ܢ ܙܲܪܥܹܗ ܕܐܲܒܼܪܵܗܵܡ ܐܸܫܬܲܕܲܪ ܐܲܝܟܼ ܕܴܵܚܠܵܦܵܘܗܝ ܘܲܚܠܵܦ ܒܢܲܝ̈
ܓܸܢܤܹܐ: ܠܕܼܒܼܚܬܼܵܐ ܢܸܬܸܠ ܢܲܦܹܫܹܗ܀ ܬܸܬܿܤܝܼܡ ܐܵܬ݂ܼܵܐ ܕܐܵܘ̇ܕܝܼܬܼ:
ܕܟܼܠܗܘܿܢ ܥܲܠ ܕܒܼܚܹ̈ܐ ܤܢܝܼܩܝܼܢ ܗ̄ܘ̣ܵܘ: ܘܐܲܪܝܼܡܹܬܼ ܠܲܡܫܝܼܚܵܐ ܐܲܝܟܼ
ܡ̇ܢ ܕܠܵܐ ܤܢܝܼܩ ܗ̄ܘ̣ܵܐ. ܘܲܚܠܵܦ ܠܲܡ ܢܲܦܫܹܗ ܘܲܚܠܵܦ ܓܸܢܤܹܗ
ܩܲܪܸܒܼ ܢܲܦܫܹܗ ܠܕܒܼܚܬܼܵܐ. ܡܲܢ̣ܘܼ ܗܵܟܹܝܠ ܕܐܝܼܬܼܵܘܗܝ ܡܗܲܝܡܢܵܐ:
pb. 345
ܠܡ̇ܢ ܕܥܲܒܼܕܹܗ ܪܲܒܿܟܘܼܡܪܹ̈ܐ؟ ܦܲܢܵܘ ܦܸܬܼܓܼܵܡܵܐ: ܐܲܠܵܗܵܐ ܡܸܠܬܼܵܐ؟
ܥܠܵܘܗܝ ܓܹܝܪ ܐܸܡ݂ܲܪ ܕܐܸܬܼܥܒܸܕܼ ܪܲܒܿܟܘܼܡܪܹ̈ܐ: ܠܗܵܘ̇ ܕܥܲܒܼܕܹܗ.
ܡܲܢ̣ܘ ܐܝܼܬܼܵܘܗܝ ܗܵܘ̇ ܕܥܲܒܼܕܹܗ ܪܲܒܿ ܟܘܼܡܪܹ̈ܐ: ܗܵܘ̇ ܕܲܡܗܲܝܡܲܢ
ܠܹܗ: ܐܵܘ ܗܵܘ̇ ܠܢܲܦܫܹܗ ܥ̣ܒܲܕܼ: ܐܵܘ ܡ̣ܢ ܐܲܒܼܵܐ؟ ܐܸܠܵܐ ܐܸܢܗ̤ܘ
ܠܢܲܦܫܹܗ ܥ̣ܒܲܕܼ ܪܲܒܿܟܘܼܡܪܹ̈ܐ: ܐܸܢܗ̤ܘ ܕܒܲܚܕܼܵܝܘܼܬܼܵܐ ܐܲܡܲ݁ܪ ܐܲܢ̄ܬܿ:
ܐܲܟܼܙܢܵܐ ܕܐܵܦ ܒܸܤܪܵܐ ܗܘ̤ܵܐ ܡܸܠܬܼܵܐ: ܡܸܬܼܐܠܸܨ ܐܲܢ̄ܬܿ ܕܬܸܬܸܿܠ
ܠܒܸܤܪܵܐ ܟܝܵܢܵܐ ܡ̣ܢ ܐܘܼܤܝܼܵܐ ܕܝܼܠܲܢ: ܕܡܸܢܹܗ ܡܸܬܼܐܡܲܪ ܐܵܦ ܗ̤ܘ
ܒܸܤܪܵܐ. ܒܲܚܕܼܵܝܘܼܬܼܵܐ: ܘܠܵܘ ܒܲܟܼܝܵܢܵܐ. ܗܵܢܵܘ ܫܲܪܝܼܪܵܐܝܼܬܼ ܪܲܒܿ ܟܘܼܡܪܹ̈ܐ:
ܗܵܘ̇ ܕܒܲܪ ܟܝܵܢܲܢ ܘܒܲܪ ܓܸܢܤܲܢ ܐܝܼܬܼܵܘܗܝ: ܕܡܸܢܹܗ ܐܵܦ ܐܲܠܵܗܵܐ
ܡܸܠܬܼܵܐ ܪܲܒܿ ܟܘܼܡܪܹ̈ܐ ܡܸܬܼܐܡܲ. ܠܲܝܬܿ ܓܹܝܪ ܐ̄ܢܵܫ ܕܐܵܡܲ݁ܪ ܠܗܵܘ̇
ܕܡ̣ܢ ܗܵܢܵܐ ܗܘ̤ܸܵܐ: ܘܲܒܼܗܵܢܵܐ ܕܡܸܢܹܗ ܗܘ̤ܵܐ ܗܵܘ̇ ܟܵܦܲܪ: ܐܵܘܕܵܐ
ܗܵܟܹܝܠ ܩܲܕܼܡܵܝܑܬܼ ܗܵܢܵܐ ܡܵܢܵܐ ܐܝܼܬܼܵܘܗܝ ܒܲܟܼܝܵܢܵܐ: ܘܗܵܝܕܹܝܢ ܡܵܢܵܐ
ܡܸܬܼܐܡܲܪ ܒܲܚܕܼܵܝܘܼܬܼܵܐ. ܐܸܢ ܠܵܐ ܓܹܝܪ ܬܸܫܬܲܪܲܪ ܗܵܝ̇: ܐܲܬܼܪܵܐ ܠܗܵܕܹܐ
ܠܲܝܬܿ ܠܵܗ̇.
ܟܠܚܲܕܼ ܡ̣ܢ ܫܡܵܗܹ̈ܐ ܓܹܝܪ ܕܐܘܼܤܝܼܵܐ ܡܵܘܕܝܼܢ: ܩܲܕܼܡܵܝܑܬܼ
ܥܠܹܝܗ̇ ܕܐܘܼܤܝܼܵܐ ܕܕܼܝܼܠܵܗ̇ ܐܝܼܬܼܵܘܗܝ ܫܡܵܐ. ܩܲܪܸܒܲܝܗܝ ܠܫܵܡ̇ܘܿܥܵܐ:
ܘܗܵܝܕܹܝܢ ܒܵܬܲܪܟܸܢ ܐܵܦ ܥܲܠ ܕܲܐ̄ܚܪܵܢܝܵܐܝܼܬܼ ܘܠܵܘ ܒܐܘܼܤܝܼܵܐ ܡܸܬܼܐܲܡܪ̈ܵܢ
ܐܵܬܹ̇ܐ ܐܲܢ̄ܬܿ. ܒܲܪ ܓܼܘܿܢ ܐܵܦ ܒܗܵܠܹܝܢ ܐܲܝܠܹܝܢ ܕܡܸܬܼܐܲܡܪܵܢ ܟܲܕܼ ܢܵܤ̇ܒܿܝܼܢ
ܩܲܕܼܡܵܝܑܬܼ ܫܡܵܐ ܕܥܲܠ ܟܝܵܢܵܐ: ܘܗܵܝܕܹܝܢ ܥܲܠ ܐܲܝܠܹܝܢ ܕܲܐ̄ܚܪܵܢܝܐܝܼܬܼ
ܐܲܝܟܲܢ ܕܗ̤ܘ: ܐܵܘ ܒܲܙܢܵܐ ܕܫܲܘܝܘܼܬܼ ܫܡܵܐ: ܐܵܘ ܘܠܵܘ ܒܲܟܼܝܵܢܵܐ
ܡܸܫܬܲܡܗܝܼܢ. ܡܸܛܠ ܗܵܢܵܐ ܡܟܲܪܟܼܝܼܢ ܠܗܘܿܢ: ܐܲܝܟܼ ܕܥܲܠ ܐܲܝܠܹܝܢ
ܕܟܲܤ̈ܝܵܢ ܘܡܸܬܿܛܲܥ̈ܝܵܢ. ܐܸܡܲܬܼܝ ܗܵܟܹܝܠ ܕܲܐܗܵܠܹܝܢ ܕܲܚܕܼܵܝܘܼܬܼܵܐ ܐܵܡ̇ܪܝܼܢ
pb. 346
ܚ̄ܢܲܢ: ܐܵܡܲ݁ܪ ܐܲܢ̄ܬܿ ܘܡܸܬܼܒܲܪܢܲܫ. ܐܲܢ̄ܬܿ ܘܠܵܐ ܗ̄ܘ̣ܵܐ ܕܥܲܠ ܚܕܼܵܝܘܼܬܼܵܐ
ܤܵܐܹ̇ܡ ܐܲܢ̄ܬܿ ܠܗܵܠܹܝܢ: ܐܸܠܵܐ ܐܲܝܟܼ ܕܥܲܠ ܟܝܵܢܵܐ. ܠܐܲܝܠܹܝܢ ܕܹܝܢ
ܕܕܼܟܼܝܵܢܵܐ ܐܸܢܹܝܢ: ܡܛܲܫܸܐ ܐܲܢ̄ܬܿ. ܘܠܲܐܝܠܹܢ ܕܐܵܡ̇ܪܝܼܢ: ܡܥܵܘܼܟܼ ܐܲܢ̄ܬܿ:
ܐܲܝܟܼ ܕܠܲܐܝܠܹܝܢ ܕܡܲܪܫܥܝܼܢ. ܡ̣ܢ ܡܸܕܸܡ ܐ̄ܚܪܹܝܢ ܡܲܪܦܸܐ ܐܲܢ̄ܬܿ: ܕܠܵܘ
ܥܲܠ ܟܝܵܢܵܐ ܕܐܲܠܵܗܵܐ ܢܵܤܹ̇ܒܼ ܐܲܢ̄ܬܿ ܠܗܵܝ̇ ܕܲܗܘ̤ܵܐ ܘܐܸܬܼܥܒܸܕܼ: ܐܵܦܸܢ
ܪܸܒܿܘܼ ܙܲܒܼܢ̈ܝܼܡ ܬܹܐܡܲܪ ܠܵܐ ܡܸܫܬܲܚܠܵܦܵܢܵܐ: ܘܬܼܵܘܕܹܐ ܕܗܵܘ̇ ܕܲܥܒܲܕܼ
ܐܸܬܼܥܒܸܕܼ: ܘܒܲܟܼܝܵܢܹܗ ܐܝܼܬܼܵܘܗܝ: ܘܡܸܬܼܐܡܲܪ ܗܵܘ̇ ܡܵܐ ܕܲܗܘ̤ܵܐ. ܐܵܘ
ܕܲܠܡܵܐ ܕܲܠܩܘܼܒܼܠܵܐ ܒܦܲܢܛܵܤܝܼܵܐ ܐܵܡܲ݁ܪ ܐܲܢ̄ܬܿ: ܐܲܝܠܹܝܢ ܕܡܵܘܕܹܝܢ
ܬܪܹܝܢ ܟܝܵܢ̈ܝܼܢ ܕܡܸܢܗܘܿܢ ܐܝܼܬܼܵܘܗܝܒ ܡܫܝܼܚܵܐ: ܘܲܟܼܝܵܢܹ̈ܐ ܡܫܲܚ̈ܠܦܹܐ:
ܕܐܝܼܬܼܵܝܗܘܿܢ ܟܝܵܢܹ̈ܐ ܡܫܲܚ̈ܠ̱ܦܹܐ. ܐܲܝܟܲܢ ܡܸܫܟܿܚܝܼܢ ܠܡܹܐܡܲܪ ܐ̄ܚܪܵܢܝܵܐܝܼܬܼ
ܟܝܵܢܹ̈ܐ: ܐܸܢ ܠܵܐ ܒܲܫܡܵܐ ܕܲܟܼܝܵܢܹ̈ܐ ܢܸܬܼܚܲܫܚܘܼܢ: ܒܗܵܢܵܐ ܘܲܒܼܗܵܘ̇؟
ܐܸܠܵܐ ܗܵܕܹܐ ܝܲܩܝܼܪܵܐ: ܡܸܛܠ ܗܵܕܹܐ ܐܵܦ ܬܸܡ̇ܪܹܬܼ: ܕܬܸܬܿܤܝܼܡ
ܒܵܗ̇ ܐܵܬ̤ܵܐ. ܗ̤ܘ ܓܹܝܪ ܐܸܫܬܲܕܲܪ ܠܲܢ: ܒܝܲܕܼ ܒܘܼܪܟܿܬܼܵܐ ܕܐܸܬܼܡܲܠܟܲܬ̤
ܡ̣ܢ ܙܲܪܥܹܗ ܕܐܲܒܼܪܵܗܵܡ: ܕܲܚܠܵܦܵܘܗܝ ܘܲܚܠܵܦ ܒܢܲܝ̈ ܓܸܢܤܹܗ:
ܦܠܲܓܼܪܹܗ ܕܸܒܼܚܬܼܵܐ ܢܩܲܪܸܒܼ. ܤܝܼܡ ܠܲܡ ܓܹܝܪ ܠܐܵܬ̤ܵܐ ܕܐܵܘ̇ܕܝܼܬܼ:
ܕܟܼܠ ܪ̈ܲܒܲܝ ܟܘܼܡܪܹ̈ܐ ܤܢܝܼܩܝܼܢ ܥܲܠ ܕܲܒܼܚܹ̈ܐ. ܘܲܡܫܝܼܚܵܐ ܐܲܝܟܿ ܡ̇ܢ
ܕܠܵܐ ܤܢܝܼܩ ܒܗܵܕܹܐ: ܥܲܠ ܐܲܦܲܝ̈ ܢܲܦܫܹܗ ܘܥܲܠ ܐܲܦܲܝ̈ ܓܸܢܤܹܗ
ܩܲܪܸܒܼ ܢܲܦܫܹܗ ܠܕܒܼܚܬܼܵܐ. ܬܸܗܘܸܐ ܕܗܵܟܲܢܵܐ ܐܲܡܝܼܪ ܠܝܼ. ܠܵܐ ܓܹܝܪ
ܡܸܫܬܿܐܸܠ ܐ̄ܢܵܐ ܠܡܲܟܵܤܘܼ ܫܘܼܚܠܵܦܵܐ ܕܡܸܠܲܝ̈ܟܿܘܿܢ: ܕܠܵܐ ܐܸܤܬܿܒܲܪ
ܕܡܸܛܠ ܕܐܸܬܼܟܲܤ̇ܤܹܬܼ: ܡ̣ܢ ܠܵܐ ܤܵܦܩܘܼܬܼܵܐ ܠܲܩܛܹܐ ܓܼܪܵܢܘܼܬܼܵܐ
ܐܸܬܼܪܡܝܼܬܼ. ܐܵܦ ܓܹܝܪ ܒܗܹܝܢ ܒܗܵܠܹܝܢ: ܠܵܐ ܐܵܪܦܝܲܢܝ ܐܲܠܵܗܵܐ ܕܠܵܐ
pb. 347
ܡܲܦܲܩ ܒܪܘܼܚܵܐ ܕܥܲܠ ܐܲܦܲܝ̈ ܪܸܥܝܵܢܝ: ܗܵܘ̇ ܕܢܲܗܝܼܪ ܠܟܼܠܢܵܫ
ܐܸܡ̇ܪܹܬܼ ܓܹܝܪ: ܕܟܼܠ ܪܲܒܿܟܘܼܡܪܹ̈ܿܐ ܤܢܝܼܩ ܥܲܠ ܕܲܒܼܚܹ̈ܐ ܕܲܚܠܵܦ
ܚܛܵܗܵܘ̈ܗܝ: ܐܸܠܵܐ ܠܵܐ ܗ̄ܘ̣ܵܐ ܡܫܝܼܚܵܐ. ܚܠܵܦ ܢܲܦܫܹܗ ܕܹܝܢ ܘܲܚܠܵܦ
ܓܸܢܤܹܗ: ܐܸܡ̇ܪܹܬܼ: ܕܩܲܪܸܒܼ ܡܫܝܼܚܵܐ ܕܲܒܼܚܬܼܵܐ ܕܢܲܦܫܹܗ. ܚܠܵܦ
ܓܸܢܤܹܗ ܓܹܝܪ: ܕܢܸܫܪܸܐ ܐܸܢܘܿܢ ܡ̣ܢ ܚܘܼܝܵܒܼܵܐ ܕܐܸܫܛܵܪܵܐ ܕܲܪܡܵܝ
ܐܝܼܕܼܵܐ ܕܲܚܛܝܼܬܼܵܐ. ܟܲܕܼ ܒܲܪ ܚܹܐܪܹ̈ܐ ܐܝܼܬܼܵܘܗܝ ܗ̄ܘ̣ܵܐ ܡ̣ܢ ܚܛܝܼܬܼܵܐ:
ܚܠܵܦ ܢܲܦܫܹܗ ܕܹܝܢ ܕܢܸܬܼܝܸܗܸܒܼ ܠܹܗ ܫܡܵܐ ܕܲܡܝܲܬܲܪ ܡ̣ܢ ܟܠ
ܫܡܵܗ̈ܝܼܢ. ܘܐܸܫܬܿܡܲܥ ܥܕܲܡܵܐ ܠܡܵܘܬܵܐ: ܡܵܘܬܵܐ ܪܕܹܝܢ ܕܲܙܩܝܼܦܵܐ
ܩܲܒܸܿܠ̣: ܗܵܘ̇ ܕܡ̣ܢ ܚܛܝܼܬܼܵܐ ܡܚܲܪܲܪ ܗ̄ܘ̣ܵܐ. ܗܵܘ̇ ܓܹܝܪ
ܕܒܲܚܛܵܗܹ̈ܐ ܠܵܐ ܐܸܫܬܿܟܲܚ: ܡܸܫܬܲܡܥܵܢܵܐ ܕܹܝܢ ܗܘ̤ܵܐ ܗ̄ܘ̣ܵܐ ܕܲܢܡܘܼܬܼ
ܚܠܵܦܲܝܢ: ܩܲܒܸܿܠ̣ ܗ̄ܘ̣ܵܐ ܫܡܵܐ ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ: ܗܵܘ̇
ܡܵܐ ܕܐܝܼܬܼܵܘܗܝ ܗ̄ܘ̣ܵܐ ܠܹܗ ܡ̣ܢ ܫܘܼܪܵܝܵܐ ܡ̣ܢ ܝܑܼܠܝܼܕܘܼܬܼܵܐ: ܡ̣ܢ ܟܲܕܼ
ܛܲܠܝܵܐ ܫܲܒܼܪܵܐ ܐܝܼܬܼܵܘܗܝ ܗ̄ܘ̣ܵܐ. ܘܟܲܕܼ ܛܵܒܼ ܐܝܼܬܼܵܘܗܝ ܗ̄ܘ̣ܵܐ ܒܪܵܐ:
ܘܠܵܐ ܡܸܕܸܡ ܝܲܬܿܝܼܪܵܐ ܘܲܒܼܨܝܪܵܐ ܐܝܼܬܼ ܗ̄ܘ̣ܵܐ ܠܹܗ ܒܲܒܼܪܘܼܬܹܗ
ܒܫܘܼܠܛܵܢܵܐ: ܘܐܸܬܼܓܿܡܲܪ ܕܢܸܗܘܸܐ ܒܪܵܐ ܡܫܲܠܛܵܐ. ܗܵܟܲܢܵܐ ܟܲܕܼ ܡ̣ܢ
ܝܲܠܕܵܐ ܐܝܼܬܼ ܗ̄ܘ̣ܵܐ ܠܵܗ̇ ܠܐ̄ܢܵܫܘܼܬܼܵܐ: ܕܬܸܗܘܸܐ ܒܪܵܐ ܡ̣ܢ ܚܕܼܵܝܘܼܬܼܵܐ:
ܐܸܠܵܐ ܠܵܐ ܗ̄ܘ̣ܵܐ ܫܘܼܠܛܵܢܵܐ ܐܝܼܬܼ ܗ̄ܘ̣ܵܐ ܠܵܗ̇: ܐܸܠܵܐ ܡܸܫܬܲܥܒܿܕܼܵܢܘܬܼܵܐ.
ܘܡ̣ܢ ܡܸܫܬܲܥܒܿܕܼܵܢܘܼܬܼܵܐ ܐܸܬܼܓܲܡܪܲܬ̤ ܒܫܘܼܠܛܵܢܵܐ: ܘܢܸܤܒܲܬ̤ ܫܡܵܐ
ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ. ܠܵܐ ܡܸܟܹܝܠ ܚܵܫܘܿܫܵܐ ܘܠܵܐ ܬܘܼܒܼ
ܡܵܝܘܿܬܼܵܐ: ܐܸܠܵܐ ܐܵܦ ܒܵܗ̇ ܒܲܡܫܲܠܛܘܼܬܼܵܐ ܘܒܹܗ ܒܐܝܼܩܵܪܵܐ: ܒܗܵܠܹܝܢ
pb. 348
ܟܠܗܹܝܢ ܗܘ̤ܵܐ: ܤܛܲܪ ܡ̣ܢ ܐܘܼܤܝܼܵܐ: ܟܠܗܹܝܢ ܕܐܘܼܤܝܼܵܐ ܐܝܬܼ ܗ̄ܘ̣ܵܐ
ܠܹܗ. ܗ̤ܘܝܘܼ ܚܲܕܼ ܒܪܵܐ: ܕܐܝܼܬܼܵܘܗܝ ܒܲܚܕܼܵܝܘܼܬܼܵܐ.
ܘܟܼܠ ܪܲܒܿܟܘܼܡܪܹ̈ܐ ܤܢܝܼܩ ܥܲܠ ܕܒܼܚܹ̈ܐ ܕܲܚܠܵܦ ܚܛܵܗܵܘ̈ܗܝ:
ܘܲܡܫܝܼܚܵܐ ܠܵܐ ܤܢܝܼܩ ܗ̄ܘ̣ܵܐ ܚܠܵܦ ܚܛܵܗܵܘ̈ܗܝ: ܐܸܠܵܐ ܚܠܵܦ
ܓܸܢܤܹܗ ܕܢܸܫܪܸܬ ܐܸܢܘܿܢ ܡ̣ܢ ܚܛܵܗܹ̈ܐ. ܗ̤ܝ ܕܹܝܢ ܗܵܕܹܐ ܗܘ̤ܵܬܼ ܐܵܦ
ܥܲܠ ܐܲܦܲܝ̈ ܢܲܦܫܹܗ: ܡܸܛܠ ܡܸܫܬܲܡܥܵܢܘܼܬܼܵܗ ܕܠܵܐ ܤܵܟܼ: ܕܥܲܠ
ܐܲܦܲܝ̈ ܚܲܛܵܝܹ̈ܐ ܡܝܼܬܼ. ܘܲܒܼܨܒܼܝܵܢܹܗ ܘܲܒܼܪܸܥܝܵܢܹܗ: ܠܵܐ ܩܢܸܐ ܗ̄ܘ̣ܵܐ ܤܵܟܼ
ܡܸܕܸܡ ܐ̄ܚܪܹܝܢ: ܤܛܲܪ ܡ̣ܢ ܗܵܝ̇ ܕܢܸܒܼܥܸܐ ܘܲܕܢܸܨܒܸܿܐ ܗܵܘ̇ ܡܵܐ
ܕܐܲܠܵܗܵܐ ܨܵܒܹ̇ܐ ܒܹܗ. ܡܸܛܠ ܗܵܢܵܐ ܐܵܦ ܐܲܠܵܗܵܐ ܗܘ̤ܵܐ ܒܹܗ: ܗܵܘ̇
ܡܵܐ ܕܗ̤ܘ ܐܝܼܬܼܵܘܗܝ ܗ̄ܘ̣ܵܐ. ܐܲܝܟܲܢܵܐ ܕܗܵܘ̇ ܡܵܐ ܕܲܗܘ̤ܵܐ ܒܹܗ ܐܲܠܵܗܵܐ
ܒܨܘܼܪܬܵܐ ܕܲܗܘܵܝܹܗ ܒܲܕܼܡܘܼܬܹܗ: ܐܵܦ ܗ̤ܘ ܒܐܲܠܵܗܵܐ: ܦܲܪܨܘܿܦܵܐ
ܕܐܲܠܵܗܵܐ ܢܸܗܘܸܐ. ܘܗܵܘ̇ ܡܵܐ ܕܲܗܘ̤ܵܬܼ ܐ̄ܢܵܫܘܼܬܼܵܐ ܒܡܸܫܬܲܡܥܵܢܘܼܬܼܵܐ
ܕܢܸܛܪܲܬ̤: ܠܵܐ ܗ̄ܘ̣ܵܐ ܠܦܲܪܨܘܿܦܵܗ̇ ܒܵܗ̇: ܐܸܠܵܐ ܠܦܲܪܨܘܿܦܵܐ ܕܐܲܠܵܗܵܐ
ܒܐܲܠܵܗܵܐ. ܗܵܢܵܐ ܦܲܪܨܘܿܦܵܐ ܢܸܗܘܸܐ ܠܹܗ ܘܐܵܦ ܐܲܠܵܗܵܐ. ܐܲܝܟܲܢܵܐ ܕܲܒܼܗܵܘ̇
ܡܵܐ ܕܐܝܼܬܼܵܘܗܝ ܚܲܕܼ: ܟܲܕܼ ܦܘܼܪܫܵܢܵܐ ܒܦܲܪܨܘܿܦܵܐ ܠܵܐ ܩܢܸܐ: ܐܵܢܲܢܩܹܐ
ܠܡܸܬܲܠ ܠܹܗ ܦܘܼܪܫܵܢܵܐ ܕܲܟܼܝܵܢܹ̈ܐ ܡܫܲܡ̈ܠܲܝܵܐ. ܒܦܲܪ̈ܨܘܿܦܹܐ ܕܹܝܢ
ܕܲܚܕܼܵܝܘܼܬܼܵܐ: ܚܲܕܼ ܒܚܲܕܼ. ܠܵܘ ܒܒܼܘܼܨܵܪܵܐ ܘܠܵܘ ܒܒܼܘܼܛܵܠܐ ܘܠܵܘ
ܒܒܼܘܼܠܒܵܠܵܐ ܡܸܬܼܪܢܸܐ ܗܵܢܵܐ ܚܲܕܼ: ܐܸܠܵܐ ܒܡܲܤܒܼܵܐ ܘܲܒܼܡܲܬܿܠܵܐ:
ܘܒܲܚܫܲܚܬܼܵܐ ܕܲܚܕܼܵܝܘܼܬܼܵܐ ܕܥܲܡ ܚܕܼܵܕܹ̈ܐ: ܢܵܤ̇ܒܿܝܼܢ ܘܝܵܗ̇ܒܿܝܼܢ ܦܲܪ̈ܨܘܿܦܹܐ
ܠܲܚܕܼܵܕܹ̈ܐ ܘܠܵܘ ܠܐܘܼܤ̈ܝܼܵܣ. ܠܗܵܢܵܐ ܗܵܘ̇ ܪܵܢܹܝܢ ܚ̄ܢܲܢ: ܘܠܲܗܵܘ̇
ܗܵܢܵܐ: ܟܲܕܼ ܡܩܵܘܸܐ ܗܵܢܵܐ ܘܗܵܘ̇. ܟܲܕܼ ܓܹܝܪ ܡܸܬܼܐܡܵܪ ܐܲܠܵܗܵܐ ܡܸܠܬܼܵܐ:
ܐܲܠܵܗܵܐ ܘܒܲܪܢܵܫܵܐ: ܠܵܐ ܬܪܹܝܢ ܦܲܪ̈ܨܘܿܦܹܐ ܗܵܘܹ̇ܝܢ ܕܐܲܠܵܗܵܐ ܡܸܠܬܼܵܐ.
pb. 349
ܡܸܛܠ ܕܠܵܐ ܗ̄ܘ̣ܵܐ ܒܐܘܼܤܝܼܵܐ ܡܸܬܼܐܲܡܪܝܼܢ ܬܪ̈ܲܝܗܘܿܢ. ܐܸܠܵܐ ܗܵܘ̇
ܡ̇ܢ ܒܐܘܼܤܝܼܵܐ: ܗܵܢܵܐ ܕܹܝܢ ܒܲܚܕܼܵܝܘܼܬܼܵܐ: ܘܒܲܚܫܲܚܬܼܵܐ ܕܥܲܡ ܚܕܼܵܕܹ̈ܐ
ܕܡ̣ܢ ܬܪ̈ܲܝܗܘܿܢ ܟܝܵܢܹ̈ܐ ܗܵܘ̇ܝܵܐ. ܗ̤ܘ ܓܹܝܪ ܡܸܬܼܐܡܲܪ ܒܬܲܪ̈ܬܲܝܗܹܝܢ:
ܒܗܵܘ̇ ܘܲܒܼܗܵܢܵܐ. ܒܗܵܘ̇ ܡ̇ܢ ܒܐܘܼܤܝܼܵܐ: ܒܗܵܢܵܐ ܕܹܝܢ ܒܲܚܕܼܵܝܘܼܬܼܵܐ.
ܗܵܟܲܢܵܐ ܕܹܝܢ ܐܵܦ ܠܵܐ ܟܲܕܼ ܠܐ̄ܢܵܫܘܼܬܼܵܐ ܝܵܗ̇ܒܿܝܼܢ ܚ̄ܢܲܢ ܡܸܛܠܵܬܼܵܗ̇
ܕܝܼܠܵܗ̇ ܕܲܚܕܼܵܝܘܼܬܼܵܐ: ܕܒܼܐܘܼܤܝܼܵܐ ܘܒܲܚܕܼܵܝܘܼܬܼܵܐ ܒܬܲܪ̈ܬܲܝܗܹܝܢ ܬܸܬܼܐܡܲܪ:
ܬܪܹܝܢ ܦܲܪ̈ܨܘܿܦܹܐ ܕܲܚܕܼܵܝܘܼܬܼܵܐ ܡ̣ܢ ܐܵܢܲܢܩܹܐ ܥܵܒܼ̇ܕܝܼܢ ܚ̄ܢܲܢ. ܒܗܵܝ̇ ܕܚܲܕܼ
ܐܝܼܬܼܵܘܗܝ ܕܲܬܼܪ̈ܲܝܗܘܿܢ ܟܝܵܢܹ̈ܐ: ܕܐܲܠܵܗܘܼܬܼܵܐ ܘܲܕܐ̄ܢܵܫܘܼܬܼܵܐ: ܘܲܕܼܐ̄ܢܵܫܘܼܬܼܵܐ
ܘܕܲܐܠܵܗܘܼܬܼܵܐ: ܟܲܕܼ ܐܵܡܲ݁ܪ: ܐܲܠܵܗܵܐ ܡ̇ܢ ܕܐܸܬܼܒܲܪܢܲܫ: ܘܠܵܐ ܫܲܒܼܩܵܗ̇
ܠܡܸܬܼܦܲܪܥܵܢܘܼܬܼܵܐ: ܐܲܝܟܲܢܵܐ ܕܐܲܢ̄ܬܿ ܬܸܪܢܸܐ ܗܵܕܹܐ ܒܲܚܕܼܵܝܘܼܬܼܵܐ: ܕܠܲܐܠܵܗܵܐ
ܡܸܠܬܼܵܐ ܙܵܕܼܩܵܐ ܚܕܼܵܝܘܼܬܼܵܐ ܕܲܠܘܵܬܼ ܐ̄ܢܵܫܘܼܬܼܵܐ: ܐܲܝܟܲܢܵܐ ܕܲܒܼܬܲܪ̈ܬܲܝܗܹܝܢ
ܢܸܬܼܩܪܸܬ ܐܵܠܵܗܵܐ. ܘܠܵܐ ܬܘܼܒܼ ܐܵܦ ܒܲܪܢܵܫܵܐ: ܒܲܪܢܵܫܵܐ ܘܐܲܠܵܗܵܐ:
ܡܲܦܸܩ ܐܲܢ̄ܬܿ ܦܘܼܪܥܵܢܵܐ ܡ̣ܢ ܚܕܼܵܝܘܼܬܼܵܐ ܕܬܲܪ̈ܬܵܝܗܹܝܢ ܐܘܼܤ̈ܝܼܵܣ.
ܡܸܛܠ ܗܵܢܵܐ ܗܵܦܹ̇ܟܼ ܥܲܠ ܡܸܠܬܹܗ: ܘܒܲܪܢܵܫܵܐ ܕܐܸܬܼܐܲܠܗ. ܐܲܝܟܼ
ܕܡ̣ܢ ܚܕܼܵܝܘܼܬܼܵܐ ܗܵܝ̇: ܕܥܵܒܼܕܵܐ ܠܓܼܵܘܵܐ ܠܦܲܪ̈ܨܘܿܦܹܐ ܘܠܵܘ
ܠܲܟܼܝܵܢܹ̈ܐ.
ܘܲܡܫܲܥ ܬܘܼܒܼ ܡܸܢܹܗ ܟܲܕܼ ܡܸܢܹܗ: ܗܵܘ̇ ܕܲܡܫܲܪܸܐ ܘܡܸܬܿܕܲܪܲܓܼ
ܘܡܸܫܬܲܡܠܸܐ ܠܵܐ ܐܝܼܬܼܵܘܗܝ ܐܲܠܵܗܵܐ: ܐܵܦܸܢ ܡܸܛܠ ܡܸܬܼܚܵܘܝܵܢܘܼܬܼܵܐ
ܕܲܒܼܩܲܠܝܼܠ ܩܲܠܝܼܠ ܡܸܬܼܐܡܲܪ ܗܵܟܲܢܵܐ. ܠܵܘ ܐܲܝܟܼ ܕܠܵܐ ܦܲܪܨܘܿܦܵܐ
ܘܐܲܝܟܼ ܕܠܵܐ ܟܝܵܢܵܐ ܡܸܬܼܪܢܸܐ ܒܲܪܢܵܫܵܐܜ: ܡܸܛܠ ܕܡܸܬܼܐܡܲܪ ܐܲܠܵܗܵܐ
ܒܡܸܬܼܚܵܘܝܵܢܘܼܬܼܵܐ. ܡܸܛܠ ܓܹܝܪ ܕܐܝܼܬܼܵܘܗܝ ܒܲܪܢܵܫܵܐ ܒܲܟܼܝܵܢܵܐ: ܡܸܛܠ
ܗܵܢܵܐ ܐܝܼܬܼܵܘܗܝ ܐܲܠܵܗܵܐ ܒܡܸܬܼܚܵܘܝܵܢܘܼܬܼܵܐ. ܐܲܝܟܲܢܵܐ ܕܠܵܐ ܬܸܤܬܿܒܲܪ
pb. 350
ܕܲܠܒܼܘܼܛܵܠܵܐ ܕܲܟܼܝܵܢܹ̈ܐ ܘܲܕܕܼܝܼܠ̈ܝܵܬܼܗܘܿܢ ܡ̣ܢ ܚܕܼܵܝܘܼܬܼܵܐ ܡܸܬܼܐܡܲܪ
ܐܲܠܵܗܵܐ: ܐܵܘ ܕܲܚܕܼܵܝܘܼܬܼܵܐ ܕܐܲܠܵܗܵܐ ܗܘ̤ܸܵܬܼ ܒܲܠܚܘܿܕܼ ܨܝܕ ܒܲܪܢܵܫܵܐ.
ܕܡܸܛܠ ܗܵܢܵܐ ܗܵܘ̇ ܡܵܐ ܕܐܝܼܬܼܵܘܗܝ ܒܲܟܼܝܵܢܵܐ ܐܲܠܵܗܵܐ: ܐܵܦ ܒܲܚܕܼܵܝܘܼܬܼܵܐ
ܡܸܬܼܐܡܲܪ ܒܗܵܘ̇ ܡܵܐ ܕܲܡܚܲܝܲܕܼ: ܗܵܢܵܘ ܕܹܝܢ ܒܲܪܢܵܫܵܐ. ܒܲܪܢܵܫܵܐ ܕܹܝܢ
ܐܲܝܟܼ ܠܵܐ ܡܚܲܝܲܕܼܵܐ: ܕܠܵܐ ܗ̄ܘ̣ܵܐ ܗܵܘ̇ ܡܵܐ ܕܐܝܼܬܼܵܘܗܝ ܒܲܟܼܝܵܢܵܐ
ܒܲܪܢܵܫܵܐ: ܢܸܬܼܐܡܲܪ ܒܗܵܘ̇ ܡܵܐ ܕܲܡܚܲܝܲܕܼ ܐܲܠܵܗܵܐ. ܟܠܗܹܝܢ ܓܹܝܪ:
ܥܵܒܼ̈ܕܵܢ ܡܲܪܤܵܢ̈ܘܵܬܼܵܟܼ ܫܟܼܝܼܪ̈ܵܬܼܵܐ. ܐܸܢ ܗ̤ܘ ܓܹܝܪ ܕܢܹܐܡܲܪ ܐ̄ܢܵܫ
ܐ̄ܚܪܹܝܢ: ܕܒܲܪܢܵܫܵܐ ܗ̄ܘ̣ܵܐ ܗܵܘ̇ ܕܫܲܪܝܼ: ܘܡܸܛܠ ܗܵܢܵܐ ܠܵܐ ܐܝܼܬܼܵܘܗܝ
ܐܲܠܵܗܵܐ: ܐܵܦܸܢ ܡܸܛܠ ܚܕܼܵܝܘܼܬܼܵܐ ܡܸܬܼܐ̱ܡܲܪ ܗܵܟܲܢܵܐ: ܠܵܐ ܡܲܤܟܸܿܠ.
ܗܵܢܵܐ ܓܹܝܪ ܐܝܼܬܼܵܘܗܝ ܕܲܡܫܲܪܸܐ ܘܡܸܬܿܕܲܪܲܓܼ ܘܡܸܫܬܲܡܠܸܐ ܘܠܵܘ
ܐܲܠܵܗܵܐ: ܘܲܒܼܡܸܕܸܡ ܠܵܐ ܡܲܟܿܝܵܐ ܠܡܲܫܡܲܥܬܼܘܿܢ. ܐܸܢ ܕܹܝܢ ܐܸܢܵܐ
ܐܹܡܲܪ: ܕܗܵܢܵܐ ܐܝܼܬܼܵܘܗܝ ܗܵܘ̇ ܕܐܸܬܿܕܲܪܲܓܼ ܘܐܸܬܼܓܡܲܪ ܠܪܲܒܿܘܼܬܼ
ܟܘܼܡܪܘܼܬܼܵܐ: ܐܲܝܟܼ ܕܠܲܐܝܢܵܐ ܕܦܲܪܨܘܿܦܵܐ ܐ̄ܚܪܹܢܵܐ ܡܲܥܸܠ ܐ̄ܢܵܐ: ܪܵܫܹ̇ܐ
ܐܲܢ̄ܬܿ ܠܝܼ. ܠܲܝܬܿ ܒܵܗ̇ ܓܹܝܪ ܦܘܼܪܫܵܢܵܐ: ܒܗܵܝ̇ ܕܢܹܐܡܲܪ ܐ̄ܢܵܫ:
ܒܲܪܢܵܫܵܐ ܕܲܡܫܲܪܸܐ: ܐܵܘ ܢܹܐܡܲܤ: ܗܵܘ̇ ܕܲܡܫܲܪܸܐ. ܟܠܗܹܝܢ ܓܹܝܪ ܗܵܠܹܝܢ:
ܗܸܢܹܝܢ ܟܲܕܼ ܗܸܢܹܝܢ ܡܵܘܕ̈ܥܵܢ. ܗܵܢܵܘ ܕܹܝܢ: ܠܒܲܪܢܵܫܵܐ. ܐܸܡܲܪ ܫܘܼܒܼܚܵܐ
ܕܐܲܠܵܗܵܐ: ܘܚܲܫܵܐ ܕܒܲܪܢܵܫܵܐ. ܐܵܦ ܠܵܐ ܗ̤ܘ ܟܬܼܵܒܼܵܐ ܡܲܠܸܦ ܠܟܼܘܿܢ:
ܕܐܲܠܵܗܘܼܬܼܵܐ ܠܵܐ ܤܢܝܼܩܵܐ ܥܲܠ ܩܘܼܕܵܫܵܐ: ܐܸܠܵܐ ܒܸܤܪܵܐ ܡܵܢܵܐ
ܡܛܲܫܸܐ ܐܲܢ̄ܬܿ ܠܗܵܠܹܝܢ ܐܲܝܟܼ ܐܲܝܢܵܐ ܕܒܼܵܗܹ̇ܒܼ ܒܗܹܝܢ: ܘܲܠܚܲܫܹ̈ܿܐ ܕܗܵܘ̇
ܕܚܲܫ̣ ܥܲܠ ܐܲܦܲܝ̈ܢ: ܥܵܒܹ̇ܕ ܐܲܢ̄ܬܿ ܠܗܘܿܢ ܕܠܵܐ ܚܵܫܘܿܫܵܐ؟ ܐܲܝܟܲܢܵܐ
ܕܲܕܼܠܵܐ ܚܲܫܹ̈ܐ ܬܸܬܼܝܼܗܸܒܼ ܘܬܸܫܬܿܪܸܐ ܚܵܘܒܿܬܼܵܐ ܕܲܚܠܵܦ ܦܘܼܪܩܵܢܲܡ: ܟܲܕܼ
pb. 351
ܡܸܕܸܡ ܠܵܐ ܢܤܲܒܼ. ܐܸܠܵܐ ܒܐܸܤܟܹܡܵܐ ܘܲܒܼܡܲܤܒܿܪܵܢܘܼܬܼܵܐ ܟܠܗܹܝܢ
ܥܵܒܹ̇ܕܼ ܐܲܢ̄ܬܿ: ܘܠܵܐ ܠܢܲܦܫܵܟܼ ܘܠܵܐ ܠܐܲܒܼ̈ܗܵܬܼܵܐ ܫܵܠܹ̇ܡ ܐܲܢ̄ܬܿ. ܠܵܘ ܓܹܝܪ
ܥܲܡܝ ܡܲܩܪܒܼܝܼܢ ܐܢ̄ܬܿܘܿܢ: ܐܸܠܵܐ ܒܐܝܼ̈ܕܲܝ ܡܲܩܪܒܼܝܼܢ ܐܢ̄ܬܿܘܿܢ
ܠܘܼܩܒܲܠ ܗܵܠܹܝܢ. ܒܐܲܝܠܹܝܢ ܬܘܼܒܼ ܥܲܠ ܗܵܠܹܝܢ ܡܩܲܛ̱ܪܓܼܝܼܢ
ܠܝܼ: ܢܸܫܡܲܥ ܐܸܢܹܝܢ ܐܵܦ ܠܗܵܠܹܝܢ.
ܒܵܗ̇ ܒܲܕܼܡܘܼܬܼܵܐ ܕܼܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ ܕܐܲܪܒܲܥ.
ܫܡܲܥܘ ܗܵܟܹܝܠ ܐܲܝܠܹܝܢ ܕܡܸܬܼܒܲܩܹܝܢ ܒܦܸܬܼܓܼܵܡܹ̈ܐ: ܡ̇ܢ
ܕܐܵܟܹ̇ܠ ܦܲܓܼܪܝܼ. ܐܸܬܿܕܲܟܼܪ ܕܥܲܠ ܦܲܓܪܵܐ ܐܵܡܲ݁ܪ: ܘܠܵܐ ܐܸܢܵܐ
ܐܵܘܤ̇ܦܹܬܼ ܫܡܵܐ ܕܦܲܓܼܪܵܐ: ܕܠܵܐ ܬܸܤܬܿܒܲܪ ܠܗܵܢ̇ܘܿܢ ܕܕܲܠܩܘܼܒܼܠܵܐ
ܡܦܲܫܸܩ ܐ̄ܢܵܐ. ܗܵܘ̇ ܕܐܵܟܹ̇ܠ ܦܲܓܼܪܝ ܘܫܵܬܹ̇ܐ ܕܹܡܝ: ܒܝܼ ܡܩܵܘܸܐ
ܘܐܸܢܵܐ ܒܹܗ. ܘܒܼܵܬܲܪ ܐ̄ܚܪܵܢܝܵܬܼܵܐ: ܐܸܠܵܐ ܥܲܠ ܡܸܕܸܡ ܕܲܩܕܼܵܡܲܝܢ ܐܸܡ݂ܲܪ:
ܗܵܘ̇ ܕܐܵܟܹ̇ܠ ܦܲܓܼܪܝ ܘܫܵܬܹ̇ܐ ܕܹܡܝ: ܒܝܼ ܡܩܵܘܸܐ ܘܐܸܢܵܐ ܒܹܗ.
ܐܸܬܿܕܲܟܼܪ ܕܥܲܠ ܦܲܓܼܪܵܐ ܐܵܡܲ݁ܪ ܡܸܵܕܸܡ ܕܐܵܡܲ݁ܪ: ܐܲܝܟܼ ܕܫܲܕܲܪܲܢܝ ܐܲܒܼܵܐ
ܚܲܝܵܐ܀ ܗ̤ܘ ܗܵܟܹܝܠ ܐܸܡ݂ܲܪ ܠܗܵܠܹܝܢ ܥܲܠ ܐܲܠܵܗܘܼܬܼܵܐ: ܐܸܢܵܐ ܕܹܝܢ
ܥܲܠ ܐ̄ܢܵܫܘܼܬܼܵܐ: ܢܸܚܙܸܐ ܡܲܢ̣ܘܼ ܗܵܘ̇ ܕܕܲܠܩܘܼܒܼܠܵܐ ܡܦܲܫܸܩ. ܐܲܝܟܲܢܵܐ
ܕܫܲܕܼܪܲܢܝ ܐܲܒܼܵܐ ܚܲܝܹ̈ܐ: ܐܲܝܟܼ ܕܐܵܡ̇ܪܝܼܢ ܗܵܢ̇ܘܿܢ ܐܵܦ ܐܸܢܵܐ ܚܲܝ
ܐ̄ܢܵܐ: ܡܸܠܬܼܵܐ ܡܸܛܠ ܐܲܒܼܵܐ: ܘܗܵܝܕܹܝܢ ܡ̣ܢ ܒܵܬܲܪ ܗܵܕܹܐ: ܗܵܘ̇ ܡ̣ܢ
ܕܐܵܟܹ̇ܠ ܠܝܼ: ܐܵܦ ܗ̤ܘ ܢܸܚܸܐ. ܠܐܲܝܢܵܐ ܐܵܟ̇ܠܝܼܢ ܚ̄ܢܲܢ؟ ܠܐܲܠܵܗܘܼܬܼܵܐ: ܐܵܘ
ܠܒܸܤܪܵܐ؟ ܕܠܵܐ ܗ̄ܘ̣ܵܐ ܗܵܟܹܝܠ ܐܸܢܵܐ ܦܲܫܩܹ̇ܬܼ ܕܲܠܩܘܼܒܼܠܵܐ ܕܲܟܼܒܹ̈ܐ
pb. 352
ܐܲܠܵܗܵܝܹ̈ܐ. ܐܵܦܸܢ ܠܵܐ ܨܵܒܹ̇ܝܢ ܠܡܹܐܡܲܪ: ܡ̣ܢ ܟܠ ܐ̄ܢܵܫ ܡܸܬܼܟܲܤܤܝܼܢ.
ܒܪܲܡ ܡܸܛܠ ܕܫܲܐܠܹܝܬܼ ܐܸܢܵܐ: ܠܹܗ ܠܫܘܼܐܵܠܝ ܚܫܲܒܼܬܿܘܿܢܵܝܗܝ ܐܲܝܟܼ
ܪܲܫܝܼܥܵܐ. ܐܵܪܵܐ ܐܲܝܟܼ ܡ̇ܢ ܕܠܵܐ ܙܵܕܹܩ ܗ̄ܘ̣ܵܐ ܠܝܼ ܠܡܹܐܡܲܪ: ܗܵܘ̇ ܡܵܐ
ܕܲܟܼܬܼܵܒܼܵܐ ܐܲܠܵܗܵܝܵܐ ܐܵܡܲ݁ܪ ܕܒܸܤܪܵܐ ܡܸܬܼܐܟܸܠ: ܐܸܠܵܐ ܫܚܝܼܡܵܐܝܼܬܼ ܐܸܡ݂ܲܪ
ܟ̣ܬܼܵܒܼܵܐ ܐܲܠܵܗܵܝܵܐ ܠܒܸܤܪܵܐ. ܐܸܢܵܐ ܕܹܝܢ ܡܸܛܠ ܕܲܠܒܸܤܪܵܐ ܒܸܤܪܵܐ
ܪܵܡܹܐ ܐ̄ܢܵܐ ܘܠܵܘ ܠܐܲܠܵܗܘܼܬܼܵܐ: ܐܲܝܟܼ ܐܲܝܢܵܐ ܕܲܡܦܲܪܸܫ ܐ̄ܢܵܐ ܚܲܝܸܒܼܬܿܘܿܢܵܢܝ.
ܕܠܲܐ̄ܚܪܹܢܵܐ ܪܵܢܹ̇ܐ ܐ̄ܢܵܐ ܒܸܤܪܵܐ: ܘܠܲܐ̄ܚܪܹܢܵܐ ܐܲܠܵܗܘܼܬܼܵܐ. ܠܵܐ ܗ̄ܘ̣ܵܐ
ܠܲܚܕܼܵܝܘܼܬܼܵܐ ܕܲܟܼܝܵܢܹ̈ܐ ܡܦܲܪܸܫ ܐ̄ܢܵܐ: ܐܸܠܵܐ ܠܲܟܼܝܵܢܹ̈ܐ ܕܲܡܚܲܝܕܝܼܢ ܒܡܸܠܬܼܵܐ
ܕܐܘܼܤ̈ܝܼܵܣ: ܘܐܲܝܟܼ ܕܠܵܐ ܒܘܼܠܒܵܠܵܐ ܕܲܐ̄ܚܪܹܢܵܐ ܘܲܐ̄ܚܪܹܢܵܐ ܐܝܼܬܲܝܗܘܿܢ.
ܐܸܡ̇ܪܹܬܼ ܠܒܸܤܪܵܐ ܘܠܲܐܠܵܗܘܼܬܼܵܐ: ܢܸܗܘܸܐ ܕܠܵܐ ܗ̄ܘ̣ܵܐ ܗ̄ܘ̣ ܒܚܲܬܿܝܼܬܼܘܼܬܼܵܐ
ܡܡܲܠܸܠ ܐ̄ܢܵܐ: ܐܸܢܵܐ ܡܚܲܝܸܒܼ ܐ̄ܢܵܐ ܠܠܵܐ ܝܲܠܝܼܦܘܼܬܼܵܐ ܘܲܠܪܘܼܥܵܐ
ܕܝܼܠܝܼ. ܒܲܠܚܘܿܕܼ ܩܵܘܵܘ ܠܝܼ ܕܬܹܐܡܪܘܼܢܵܗ̇ ܗܵܕܹܐ ܢܲܗܝܼܪܵܐܝܼܬܼ:
ܕܚܲܕܼ ܐܝܼܬܼܵܘܗܝ ܘܗ̤ܘܝܘܼ ܟܲܕܼ ܗ̤ܘ ܐܵܦ ܒܐܘܼܤܝܼܵܐ ܐܵܦ ܒܦܲܪܨܘܿܦܵܐ:
ܒܸܤܪܵܐ ܘܐܲܠܵܗܘܼܬܼܵܐ؟ ܘܠܲܐܝܠܹܝܢ ܕܡܸܕܼܡ ܐ̄ܚܪܹܝܢ ܠܒܲܪ ܡ̣ܢ ܗܵܕܹܐ
ܚܵܫ̇ܒܿܝܢ: ܐܲܝܟܼ ܕܲܠܪ̈ܲܫܝܼܥܹܐ ܡܲܟܼܪܙܝܼܢ ܚ̄ܢܲܢ. ܐܸܢ ܗܵܕܹܐ ܢܲܗܝܼܪܵܐܝܼܬܼ ܠܵܐ
ܐܵܡ̇ܪܝܼܢ ܐܢ̄ܬܿܘܿܢ: ܡܸܛܠ ܐܲܝܕܵܐ ܚܲܝܸܒܼܬܿܘܿܢܵܢܝ ܩܕܼܵܡ ܐܲܠܵܗܵܐ؟
ܐܸܠܵܐ ܟܒܲܪ ܐܵܡܲ݁ܪ ܐ̄ܢܵܫ: ܐܲܢ̄ܬܿ ܠܡ̇ܢ ܫܚܝܼܩ ܐܲܢ̄ܬܿ؟ ܠܡܵܘܬܵܐ
ܕܐܲܠܵܗܵܐ ܐܵܘܕܝܼܘ: ܘܐܵܦ ܠܵܟܼ ܠܡܵܘܬܵܐ ܚܲܝܸܒܼܘ. ܡܵܢܵܐ ܕܸܡܸܡ ܐ̄ܚܪܹܝܢ
ܐܸܬܼܚܲܫܲܒܼܬܿ: ܠܘܼܩܒܲܠ ܐܲܝܠܹܝܢ ܕܥܲܠ ܐܲܦܲܝ̈ ܗܵܠܹܝܢ ܩܵܝ̇ܡܝܼܢ؟ ܘܠܵܐ
ܒܵܒܼܩ̇ܝܼܢ ܕܠܵܐ ܢܲܝܬܿܘܿܢ ܡܵܘܬܵܐ ܥܲܠ ܐܲܠܵܗܵܐ: ܘܒܲܥܒܼܵܕܼܵܐ ܠܘܼܩܒܲܠ
ܗܵܢ̇ܘܿܢ ܕܠܵܐ ܡܵܘܕܹܝܢ ܩܵܝ̇ܡܝܼܢ. ܗܵܕܹܐ ܗܵܟܹܝܠ ܝܵܕܲܥ̇ ܐ̄ܢܵܐ ܕܡ̣ܢ
pb. 353
ܟܲܕܘܼ ܤܵܥ̇ܪܝܼܢ: ܐܸܠܵܐ ܐܸܢܵܐ ܗܵܫܵܐ ܠܘ̣ܵܬܼ ܐܲܝܠܹܝܢ ܕܒܲܫܪܵܪܵܐ ܒܵܥܹ̇ܝܢ
ܠܡܹܐܠܲܦ ܥܵܒܹ̇ܕܼܢܵܐ ܠܡܸܠܲܝ̈ ܗܵܠܹܝܢ. ܕܠܑܵܐ ܢܸܛܥܘܿܢ ܒܲܫܡܵܐ
ܕܤܘܼܢܗܵܕܘܿܣ: ܕܡ̣ܢ ܕܝܼܢܵܐ ܕܐܲܒܼ̈ܗܸܵܬܼܵܐ ܘܡ̣ܢ ܤܵܗ̈ܕܘܵܬܼܵܐ ܕܐܲܝܬܿܝܼܘ
ܐܸܬܼܚܲܝܒܹܬܼ. ܡ̣ܢ ܟܠܗܹܝܢ ܡܚܵܘܸܐ ܐ̄ܢܵܐ: ܕܕܝܼܢܵܐ ܠܵܐ ܗܘ̤ܵܐ. ܡܸܛܠ
ܕܠܵܐ ܥ̣ܒܲܕܼ ܒܘܼܚܵܢܵܐ: ܘܠܵܐ ܥܲܡ ܢܲܦܫܗܘܿܢ ܘܠܵܐ ܥܲܡ ܐܚܪ̈ܵܢܹܐ.
ܐܵܦ ܠܵܐ ܥܕܲܡܐ ܠܐܸܤܟܹܡܵܐ ܩܲܒܸܿܠ̣ܘ ܥܠܲܝܗܘܿܢ ܕܢܸܤܬܲܟܿܡܘܼܢ:
ܡ̣ܢ ܥܸܠܵܝܘܼܬܼܵܐ ܕܪܘܼܫܥܵܐ. ܕܲܐ̄ܚܪܹܢܵܐ ܗ̄ܘ̣ ܓܹܝܪ ܒܐܘܼܤܝܼܵܐ ܒܸܤܪܹܗ
ܕܡܵܪ̈ܲܢ: ܘܲܐ̄ܚܪܹܬܼܵܐ ܗ̣̄ܝ ܐܲܠܵܗܘܼܬܼܵܐ: ܐܵܡܲ݁ܪ ܓܪܝܼܓܼܘܿܪܝܼܘܿܣ. ܐ̄ܚܪܹܝܢ
ܓܹܝܪ ܘܲܐ̄ܚܪܹܝܢ ܐܝܼܬܲܝܘܿܢ: ܗܵܢ̇ܘܿܢ ܕܡܸܢܗܘܿܢ ܐܝܼܬܼܵܘܗܝ ܦܵܪܘܿܩܲܢ.
ܐܸܢ ܗ̤ܘ ܕܠܵܐ ܗ̤ܘܝܘܼ ܟܲܕܼ ܗ̤ܘ ܡܸܬܼܚܲܙܝܵܢܵܐ ܘܠܵܐ ܡܸܬܼܚܲܙܝܵܢܵܐ:
ܘܗܵܘ̇ ܕܲܡܫܲܪܸܐ ܘܡܸܬܿܕܲܪܲܓܼ ܘܡܸܬܼܓܿܡܲܪ ܠܵܐ ܐܝܼܬܼܵܘܗܝ ܐܲܠܵܗܵܐ:
ܐܵܦܸܢ ܡܸܛܠ ܡܸܬܼܚܵܘܝܵܢܘܼܬܼܵܐ ܕܲܒܼܩܲܠܝܼܠ ܩܲܠܝܼܠ ܡܸܬܼܐܡܲܪ ܗܵܟܲܢܵܐ:
ܘܠܵܐ ܗ̄ܘ̣ܵܐ ܒܲܫܐܝܼܠܘܼ ܐܝܼܬܼܵܘܗܝ ܗ̄ܘ̣ܵܐ ܒܦܲܓܼܪܵܐ. ܘܲܟܼܝܵܢܵܐ ܗ̄ܘ̣ܵܐ ܐ̄ܢܵܫܵܝܵܐ
ܗܵܘ̇ ܕܡ̣ܢ ܡܲܪܝܲܡ: ܒܸܤܪܵܐ ܕܹܝܢ ܡ̣ܢ ܩܲܕܝܼܫܬܼܵܐ ܡܲܪܝܲܡ܀ ܗܵܠܹܝܢ
ܐܸܡ݂ܲܪ ܐܵܬܵܢܵܤܝܼܣ: ܦܲܓܼܪܵܐ ܒܲܕܡܘܼܬܼܵܐ ܕܗܵܢܵܐ ܢܤܲܒܼ ܡ̣ܢ ܒܬܼܘܼܠܬܼܵܐ.
ܠܵܐ ܗ̄ܘ̣ܵܐ ܠܲܡ ܓܹܝܪ ܡ̣ܢ ܗܘܼܠܹܐ ܡܝܲܩܲܪܬܵܐ ܘܲܡܫܲܝܵܢܝܼܬܼܵܐ ܢܤܲܒܼ
ܦܲܓܼܪܵܐ ܘܐܸܬܼ݂ܵܐ ܠܘܵܬܲܢ: ܐܸܠܑܵ ܒܛܝܼܢܵܐ. ܕܲܢܚܵܘܸܐ ܪܲܒܿܘܼܬܼܵܐ ܕܐܘܼܡܵܢܘܼܬܹܗ:
ܕܲܠܗܵܘ̇ ܒܲܪܢܵܫܵܐ ܕܐܸܬܼܓܒܸܠ ܡ̣ܢ ܛܝܼܢܵܐ ܢܬܲܪܨܝܼܘܗܝ: ܐܲܝܟܼ ܕܐܸܡ݂ܲܪ
ܬܹܐܘܿܦܝܼܠܘܿܣ.
ܐܲܡܒܿܪܘܿܤܝܼܣ ܕܹܝܢ ܠܲܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܘܲܕܒܸܤܪܵܐ ܐܵܡܲ݁ܪ:
ܒܬܲܪ̈ܬܲܝܗܹܝܢ ܡܡܲܠܸܠ ܒܪܵܐ ܕܐܲܠܵܗܐ: ܡܸܛܠ ܕܒܹܗ ܗܘ̤ܵܘ
pb. 354
ܬܪ̈ܲܝܗܘܿܢ ܟܝܵܢܹ̈ܐ. ܗܵܢܵܐ ܐܝܼܬܼܵܘܗܝ ܠܲܚܡܵܐ ܚܲܝܵܐ ܗܵܘ̇ ܕܲܢܚܸܬܼ ܡ̣ܢ
ܫܡܲܝܵܐ. ܗܵܢܵܐ ܠܲܚܡܵܐ ܐܝܼܬܼܵܘܗܝ ܦܲܓܼܪܵܐ: ܦܲܓܼܪܵܐ ܐܲܝܟܼ ܕܐܸܡ݂ܲܪ ܗ̤ܘ.
ܗܵܢܵܐ ܠܲܚܡܵܐ ܕܐܸܢܵܐ ܐܸܬܸܠ ܠܟܼܘܿܢ: ܦܲܓܼܪܝ ܐܝܼܬܼܵܘܗܝ. ܗܵܢܵܘ ܗܵܘ̇
ܕܲܢܚܸܬܼ: ܗܵܢܵܘ ܗܵܘ̇ ܕܐܲܒܼܾܵܐ ܩܲܕܫܹܗ ܘܫܲܕܪܹܗ ܠܥܵܠܡܵܐ. ܐܵܦ ܠܵܐ
ܗ̤ܘ ܟܬܼܵܒܼܵܐ ܡܲܠܸܦ ܠܟܼܘܿܢ: ܕܠܵܐ ܤܢܝܼܩܵܐ ܐܲܠܵܗܘܼܬܼܵܐ ܥܲܠ
ܩܘܼܕܵܫܵܐ: ܐܸܠܵܐ ܒܸܤܪܵܐ؟ ܕܲܠܡܵܐ ܐܸܢܵܐ ܒܲܠܚܘܿܕܲܝ ܐܸܡ̇ܪܹܬܼ ܗܵܕܹܐ؟
ܠܡܵܐ ܐܸܤܬܲܢܩܹ̇ܬܼ ܥܲܠ ܤܵܗ̈ܕܹܐ ܐ̄ܚܪ̈ܵܢܹܐ: ܠܡܲܪܤܵܢܘܼܬܼܵܐ ܕܠܵܐ
ܐܝܼܬܼܵܘܗܝ ܒܸܤܪܵܐ ܒܵܗ̇ ܟܲܕܼ ܒܵܗ̇ ܐܲܠܵܗܵܐ ܡܸܠܬܼܵܐ؟ ܐܵܘ ܕܐܝܼܬܼ ܠܹܗ
ܕܢܸܗܘܸܐ ܗܵܘ̇ ܡܵܐ ܕܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ: ܐܵܘ ܕܐܲܠܵܗܵܐ ܡܸܠܬܼܵܐ
ܐܝܼܬܼ ܠܹܗ ܕܢܸܗܘܸܐ ܒܸܤܪܵܐ: ܐܵܦܸܢ ܒܲܚܕܼܵܝܘܼܬܼܵܐ ܐ̄ܚܪܹܢܵܐ ܡܸܬܼܐܡܲܪ؟
ܐܸܢ ܠܢܲܦܫܟܼܘܿܢ ܠܵܐ ܡܸܬܿܛܦܝܼܤܝܼܢ ܐܢ̄ܬܿܘܿܢ: ܘܲܠܗܵܠܹܝܢ ܟܠܗܹܝܢ
ܠܑܵܐ ܡܗܲܝܡܢܝܼܢ ܐܢ̄ܬܿܘܿܢ: ܘܠܘܼܩܒܲܠ ܟܠܢܵܫ ܩܵܝ̇ܡܝܼܢ ܐܢ̄ܬܿܘܿܢ:
ܡܵܢܵܐ ܐܝܼܬܼ ܠܟܼܘܿܢ ܥܲܡܝܼ ܥܲܡ ܗܵܠܹܝܢ ܟܠܗܘܿܢ؟ ܗܵܘ̇ ܕܥܵܠܹ̇ܒܼ
ܠܝܼ ܢܸܥܠܒܲܢܝ: ܘܗܵܘ̇ ܕܪܵܕ݂ܹܦ ܠܝܣܼ ܢܸܪܕܦܲܢܝ: ܘܗܵܘ̇ ܕܩܵܛܹ̇ܠ ܠܝܼ
ܢܸܩܛܠܲܢܝ. ܘܲܒܼܛܝܒܿܘܼܬܼܵܐ ܪܲܒܿܬܼܵܐ ܚܵܫܒܿܝܼܢ ܚ̄ܢܲܢ ܠܵܗ̇: ܕܡܸܫܬܿܘܹܝܢܲܢ
ܐܵܦ ܚܢܲܢ ܠܡܸܛܥܲܢ ܫܘܼ̈ܡܵܬܹܗ ܕܲܡܫܝܼܚܵܐ ܒܦܲܓܼܪܲܢ. ܐܸܢ ܫܵܦ̇ܪܵܐ
ܠܟܼܘܿܢ ܠܡܸܫܡܲܥ: ܐܵܦ ܐ̄ܚܪ̈ܵܢܝܵܬܼܵܐ ܫܡܲܥܘ. ܘܕܘܼܢܘ ܐܸܢ ܫܵܘ̈ܝܵܢ
ܠܕܝܼܢܵܐ: ܐܸܢ ܠܵܐ ܗ̄ܘ̣ܵܐ ܕܐ̄ܢܵܫܵܐ ܕܚܵܝ̇ܪܝܼܢ ܒܲܫܡܲܝܵܐ ܘܡܸܬܼܟܲܬܿܫܝܼܢ ܥܲܡ
ܐܲܠܵܗܵܐ ܐܝܼܬܲܝܗܹܝܢ ܗܵܠܹܝܢ.
pb. 355
ܒܵܗ̇ ܒܲܕܼܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ ܕܫܸܬܿܬܲܥܸܤܪܹ̈ܐ.
ܛܵܒܼܵܐܝܼܬܼ ܠܲܡ ܐܸܢ ܠܟܼܠܵܗ̇ ܚܕܼܵܬܵܐ ܬܒܲܚܸܢ: ܠܵܐ ܡܸܫܟܲܚ ܐܲܢ̄ܬܿ
ܒܕܼܘܼܟܿ ܕܡܸܬܼܩܲܪܲܒܼ ܡܵܘܬܵܐ ܠܐܲܠܵܗܵܐ. ܐܸܠܵܐ ܐܵܘ ܠܲܡܫܝܼܚܵܐ: ܐܵܘ
ܠܲܒܼܪܵܐ: ܐܵܘ ܠܡܵܪܝܵܐ. ܫܡܵܐ ܓܹܝܪ ܕܲܡܫܝܚܵܐ ܘܕܲܒܼܪܵܐ ܘܲܕܼܡܵܪܝܵܐ:
ܕܥܲܠ ܝܑܼܚܝܼܕܼܵܝܵܐ ܡ̣ܢ ܟܬܼܵܒܹ̈ܐ ܐܲܠܵܗܵܝܹ̈ܐ ܡܸܬܼܢܤܸܒܼ: ܡܫܵܘܕܥܵܢܵܐ ܐܝܼܬܼܵܘܗܝ
ܕܲܬܼܪܹܝܢ ܟܝܵܢ̈ܝܼܢ. ܘܒܲܙܒܲܢ ܡܵܘܕܲܥ ܥܲܠ ܐܲܠܵܗܘܼܬܼܵܐ: ܒܲܙܒܲܢ ܕܹܝܢ
ܥܲܠ ܐ̄ܢܵܫܘܼܬܼܵܐ: ܘܒܲܙܒܲܢ ܥܲܠ ܬܪ̈ܲܝܗܘܿܢ. ܟܲܕܼ ܦܵܘܠܘܿܣ ܗܵܘ̇
ܕܐܸܫܬܿܠܲܚ ܠܡܲܟܼܪܵܙܘܼ ܐܵܡܲ݁ܪ: ܕܲܒܼܥܸܠܕܒܼܵܒܹ̈ܐ ܐܝܼܬܲܝܢ ܗ̣̄ܘܲܝܢ: ܘܐܸܬܼܪܲܥܝܼ
ܥܲܡܢ ܐܲܠܵܗܵܐ ܒܡܵܘܬܵܐ ܕܲܒܼܪܹܗ. ܥܲܠ ܐ̄ܢܵܫܘܼܬܼܵܐ ܩܵܥܹ̇ܐ ܒܲܫܡܵܐ ܕܲܒܼܪܵܐ:
ܟܲܕܼ ܐܵܡܲ݁ܪ ܗ̤ܘ ܟܲܕܼ ܗ̤ܘ ܠܘܵܬܼ ܥܵܒܼܪܵܝܹܐ: ܕܐܲܠܵܗܵܐ ܡܲܠܸܠ̣ ܒܲܒܼܪܹܗ:
ܕܒܼܐܝܼܕܹܗ ܥ̣ܒܲܕ ܠܥܵܠܡܹ̈ܐ: ܥܲܠ ܐܲܠܵܗܘܼܬܼܵܐ ܡܵܘܕܲܥ. ܠܵܐ ܗ̄ܘ̣ܵܐ
ܓܹܝܪ ܒܸܤܪܵܐ ܒܪܘܿܝܵܐ ܗ̄ܘ̣ ܕܥܵܠܡܹ̈ܐ: ܗܵܘ̇ ܕܡ̣ܢ ܒܵܬܲܪ ܥܵܠܡܹ̈ܐ
ܤܲܓܿܝܼ̈ܠܐܹܐ ܐܸܬܼܥܒܸܕܼ܀ ܘܡ̣ܢ ܒܵܬܲܪ ܐ̄ܚܪ̈ܵܢܝܬܼܵܐ: ܘܐܵܦ ܠܵܐ ܠܐܲܠܵܗܘܼܬܼܵܐ
ܝܲܜܩܘܿܒܼ ܗܘ̤ܵܐ ܠܵܗ̇ ܐܲܚܵܐ: ܘܐܵܦ ܠܵܐ ܠܡܵܘܬܵܐ ܕܐܲܠܵܗܵܐ ܡܸܠܬܼܵܐ
ܡܲܟܼܪܙܝܼܢ ܚ̄ܢܲܢ: ܦܲܓܼܪܵܐ ܗ̄ܘ̣ ܡܵܪܵܢܵܝܵܐ ܐܵܟܹ̇ܠܝܼܢ ܚ̄ܢܲܢ. ܐܵܪܵܐ ܡܲܨܝܵܐ
ܕܬܸܬܼܗܲܝܡܲܢ: ܕܐܝܼܬܼ ܒܗܵܠܹܝܢ ܩܛܹܐܓܼܪܵܢܘܼܬܼܵܐ ܕܒܼܵܗ̇ ܐܸܬܼܩܲܛܪܲܓܼ:
ܘܕܲܐܚܫ ܗܵܠܹܝܢ ܕܚܸܫܹ̇ܬܼ؟ ܡܸܛܠ ܕܐܸܡ̇ܪܹܬܼ: ܕܠܵܐ ܐܲܠܵܗܵܐ ܡܸܠܬܼܵܐ
ܡܝܼܬܼ: ܗܵܘ̇ ܕܲܟܼܝܵܢܵܐ ܠܵܐ ܡܵܝܘܿܬܼܵܐ ܐܝܼܬܼ ܠܹܗ: ܐܸܠܵܐ ܒܸܤܪܵܐ: ܡܸܛܠ
ܗܵܕܹܐ ܐܸܬܼܩܲܛ̇ܪ̱ܓܹܬܼ. ܤܵܒܲ̇ܪ ܐ̄ܢܵܐ ܕܐܵܦ ܠܵܐ ܕܲܝܘܹ̈ܐ: ܘܐܲܝܠܹܝܢ
ܕܒܲܒܼܥܸܠܕܒܼܵܒܼܘܼܬܼܵܐ ܐܸܢܘܿܢ ܠܘܵܬܼ ܐܲܠܵܗܵܐ: ܗܵܕܹܐ ܐܲܡܪܲܚܘ ܠܡܹܐܡܲܪ
ܒܒܲܪܬܼ ܩܵܠܗܘܿܢ ܐܵܘ ܐܲܠܸܦ̣ܘ. ܐܵܘ ܕܲܠܡܵܐ ܠܵܐ ܗ̄ܘ̣ܐ ܡܸܛܠܵܬܼܗܘܿܢ
pb. 356
ܕܗܵܠܹܝܢ ܐܲܝܠܹܝܢ ܕܠܵܐ ܡ̣ܢ ܐܲܠܵܗܵܐ ܕܵܚ̇ܠܝܼܢ ܘܠܵܐ ܡ̣ܢ ܒܢܲܝ̈ܢܵܫܵܐ
ܡܸܬܼܟܲܚܕܝܼܢ ܐܸܡ̇ܪܹܬܼ: ܕܐܸܢ ܠܟܼܠܵܗ̇ ܚܕܲܬܵܐ ܐܲܟܼܚ̄ܕܼܵܐ ܬܒܲܚܸܢ: ܠܵܐ
ܡܸܫܟܲܚ ܐܲܢ̄ܬܿ ܕܘܼܟܿܬܼܵܐ ܕܡܵܘܬܵܐ ܠܐܲܠܵܗܵܐ ܡܸܠܬܼܵܐ ܡܸܬܼܩܲܪܲܒܼ: ܐܸܠܵܐ
ܐܵܘ ܠܲܡܫܝܼܚܵܐ: ܐܵܘ ܠܡܵܪܝܵܐ: ܐܵܘ ܠܲܒܼܪܵܐ. ܫܡܵܐ ܓܹܝܪ ܕܲܫܡܝܼܚܵܐ
ܘܲܕܼܡܵܪܝܵܐ ܘܕܼܒܼܪܵܐ: ܕܥܲܠ ܝܑܼܚܝܼܕܼܵܝܵܐ ܡܸܬܼܢܤܸܒܼ ܡ̣ܢ ܟܬܼܵܒܹ̈ܐ:
ܡܵܘܕܥܵܢܵܐ ܗ̄ܘ̣ ܕܲܬܼܪܹܝܢ ܟܝܵܢܹ̈ܐ. ܐܵܪܵܐ ܕܲܓܠܹܬܼ؟ ܐܝܼܬܼ ܠܵܟܼ ܟܬܼܒܹ̈ܐ
ܐܲܠܵܗܵܝܹ̈ܐ: ܩܪܝܼ.
ܡܵܢܵܐ ܐܵܠܨܵܐ ܕܡܲܪܗܛܵܐܝܼܬܼ ܡܹܐܡܲܪ؟ ܐܸܡ݂ܲܪ ܐܲܠܵܗܵܐ ܡܸܠܬܼܵܐ ܚܲܫ̣:
ܘܐܸܠܵܐ: ܠܵܐ ܐܝܼܬܼܵܘܗܝ ܡܫܝܼܚܵܐ ܐܲܠܵܗܵܐ ܘܒܲܪܢܵܫܵܐ ܡ̣ܢ ܬܪܹܝܢ ܟܝܵܢ̈ܝܼܢ
ܘܲܬܼܪܹܝܢ ܟܝܵܢ̈ܝܼܢ: ܩܪܝܼ. ܐܵܘ ܠܐܲܠܵܗܵܐ ܡܸܠܬܼܵܐ ܒܐܘܼܤܝܼܵܐ ܐܵܡܲ݁ܪ ܐܲܢ̄ܬܿ
ܒܲܬܼܪ̈ܲܝܗܘܿܢ ܟܝܵܢܹ̈ܐ: ܡ̣ܢ ܬܪܹܝܢ ܟܝܵܢ̈ܝܼܢ ܘܲܬܼܪܹܝܢ ܟܝܵܢܹ̈ܐ. ܘܡ̣ܢ ܚܕܼܵܐ
ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ: ܬܲܪܬܹܝܢ ܐܘܼܤ̈ܝܼܵܣ ܐܸܬܼܦܲܠܲܓܼ: ܐܲܝܟܲܢܵܐ
ܕܐܝܢܵܐ ܕܗ̤ܘ ܟܝܵܢܵܐ ܕܢܹܐܡܲܪ ܕܚܲܫ̣: ܠܐܲܠܵܗܵܐ ܡܸܠܬܼܵܐ ܢܸܬܸܿܠ ܕܚܲܫ̣
ܒܲܟܼܝܵܢܵܐ ܒܬܲܪ̈ܬܲܝܗܹܝܢ. ܐܵܘ ܬܪܹܝܢ ܟܝܵܢܹ̈ܐ ܦܪ̈ܝܼܫܲܝ ܡ̣ܢ ܚܕܼܵܕܹ̈ܐ ܐܸܬܼܟܲܢܲܫܘ
ܠܲܚܕܼܵܐ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ: ܕܐܲܝܟܲܢ ܕܗ̤ܘ ܕܢܹܐܡܲܪ ܕܚܲܫ̣:
ܠܲܚܕܼܵܐ ܐܘܼܤܝܼܵܐ ܘܠܵܗ̇ ܟܲܕܸ ܠܵܗ̇ ܢܹܐܡܲܪ ܕܚܸܫܲܬ̤ ܗܵܝ̇ ܕܐܸܬܼܟܲܢܫܲܬ̤.
ܐܵܘ ܐܘܼܤܝܼܵܐ ܕܐ̄ܢܵܫܘܼܬܼܵܐ ܠܲܚܫܲܚܬܼܵܐ ܒܲܠܚܘܿܕܼ ܐܸܬܼܢܲܤܒܲܬ̤ ܕܢܸܬܼܚܙܸܐ؟
ܘܲܕܼܢܸܚܲܫ: ܘܠܵܐ ܗ̄ܘ̣ܵܐ ܕܢܸܬܼܚܲܫܚܘܼܢ ܐܲܟܲܚ̄ܕܼ ܥܲܡ ܚܕܸܵܕܹ̈ܐ: ܘܡܸܛܠ
ܗܵܢܵܐ ܠܵܐ ܤܸܥܪܲܬ̤ ܗܵܝ̇ ܥܲܡ ܗܵܝ̇ ܡܸܕܸܡ ܠܲܡܕܲܒܪܵܢܘܼܬܼܵܐ ܕܥܲܠ
ܐܲܦܲܝ̈ܢ. ܘܐܲܝܟܼ ܕܠܵܐ ܪܓܸܫܬܼܵܐ ܘܲܕܼܠܵܐ ܡܸܠܬܼܵܐ ܘܲܕܼܠܵܐ ܢܲܦܫܵܐ: ܗ̤ܘ
pb. 357
ܡܸܬܼܚܲܫܚ ܗ̄ܘ̣ܵܐ ܒܵܗ̇ ܐܲܝܟܼ ܨܼܒܼܝܵܢܹܗ ܕܝܼܠܹܗ: ܟܲܕܼ ܡܸܕܼܡ ܠܵܐ ܐܵܘܬܿܪܲܬ̤:
ܐܲܝܟܼ ܕܐܵܡ̇ܪܝܼܢ ܐܲܪ̈ܝܵܢܹܐ. ܠܵܐ ܓܹܝܪ ܡܸܬܼܐܠܸܨ ܗܵܘ̇ ܕܲܠܗܵܠܹܝܢ ܡܩܲܒܸܿܠ:
ܕܠܦܲܪܨܘܿܦܵܐ ܢܸܤܸܩ ܐܸܢܹܝܢ: ܕܗܵܘ̇ ܕܗܵܠܹܝܢ ܤܲܝܒܲܪ. ܡܸܛܠ ܕܠܵܐ
ܗ̄ܘ̣ܵܐ ܐܲܝܟܼ ܕܲܬܼܥܲܕܿܪܝܼܘܗܝ ܐܸܬܼܚܲܫܲܚ ܒܵܗ̇: ܐܸܠܵܐ ܕܢܸܫܟܲܚ ܢܸܚܲܫ
ܘܲܢܫܲܡܠܸܐ ܟܠܗܹܝܢ ܐ̄ܢܵܫܝ̈ܬܼܵܐ ܟܝܵܢܵܐܝܼܬܼ: ܟܲܕܼ ܠܵܐ ܡܸܬܼܚܫܸܒܼ ܒܵܗ̇
ܕܒܹܗ ܚܲܫ̣: ܐܵܘ ܕܒܼܐܝܼܕܹܗ ܚܲܫ̣: ܥܲܡ ܗܵܘ̇ ܕܚܲܫ̣. ܐܸܡܲܪ ܢܲܗܝܼܪܵܐܝܼܬܼ
ܗܵܘ̇ ܡܵܐ ܕܨܵܒܹ̇ܐ ܐܲܢ̄ܬܿ: ܒܲܠܚܘܿܕܸ ܢܲܗܝܼܪܵܐܝܼܬܼ. ܡܵܢ ܟܵܐܹ̇ܐ ܐܲܢ̄ܬܿ ܒܝܼ
ܐܲܝܟܼ ܪܲܫܝܼܥܵܐ: ܡܸܛܠ ܕܐܸܡ̇ܪܹܬܼ ܕܐܸܢ ܠܟܼܠܵܗ̇ ܚܕܼܵܬܵܐ ܬܒܲܚܸܢ: ܠܵܐ
ܡܸܫܟܲܚ ܐܲܢ̄ܬܿ ܒܵܗ̇ ܕܡܵܘܬܵܐ ܠܐܲܠܵܗܵܐ ܡܸܠܬܼܵܐ ܡܸܬܼܩܲܪܲܒܼ: ܐܸܠܵܐ
ܠܲܡܫܝܼܚܵܐ: ܐܵܘ ܠܲܒܼܪܵܐ: ܐܵܘ ܠܡܵܪܝܵܐ. ܫܡܵܐ ܓܹܝܪ ܕܲܡܫܝܼܚܵܐ ܘܕܲܒܼܪܵܐ
ܘܲܕܼܡܵܪܝܵܐ: ܕܥܲܠ ܝܑܼܚܝܼܕܼܵܝܵܐ ܡܼܬܼܢܤܸܒܼ ܒܲܟܼܬܼܵܒܹ̈ܐ ܐܲܠܵܗܵܝܹ̈ܐ: ܡܫܵܘܕܥܵܢܵܐ
ܐܝܼܬܼܵܘܗܝ ܕܲܬܼܪܹܝܢ ܟܝܵܢ̈ܝܼܢ: ܘܒܲܙܒܲܢ ܡܵܘܕܲܥ ܠܐܲܠܵܗܘܼܬܼܵܐ: ܘܒܲܙܒܲܢ
ܠܐ̄ܢܵܫܘܼܬܼܵܐ: ܘܒܲܙܒܲܢ ܠܬܲܪ̈ܬܲܝܗܹܝܢ؟ ܗܵܠܹܝܢ ܐܸܡ̇ܪܹܬܼ: ܥܲܠ ܗܵܠܹܝܢ
ܡܸܬܿܬܿܕܝܼܢ ܐ̄ܢܵܐ. ܘܕܲܝܵܢܹ̈ܐ ܕܐܲܝܠܹܝܢ ܕܡܸܬܼܐܲܡܪ̈ܵܢ ܐܝܼܬܲܝܟܿܘܿܢ:
ܐܸܡܲܪ ܐܲܢ̄ܬܿ.
ܙܵܕܹܩ ܠܝܼ ܓܹܝܪ ܕܐܵܦ ܠܗܵܠܹܝܢ ܕܝܼܠܵܟܼ ܐܹܤܝܼܡ: ܐܲܝܟܲܢܵܐ ܕܐܵܦ
ܐܲܢ̄ܬܿ ܠܗܵܪܟܵܐ ܤܵܡ̣ܬܿ ܠܘܼܩܒܲܠܝ: ܘܲܕܼܠܵܐ ܐܹܛܲܫܸܐ ܡܸܕܸܵܡ. ܘܐܵܦ
ܠܵܐ ܬܘܼܒܼ ܐܸܬܿܕܲܡܸܐ ܒܟܼܘܿܢ: ܕܲܕܼܠܵܐ ܒܘܼܚܵܢܵܐ ܘܲܕܼܠܵܐ ܦܘܼܚܵܡܵܐ
ܕܵܢܬܿܘܿܢ ܠܡܸܠܲܝ̈. ܗܵܕܹܐ ܐܸܡ̇ܪܹܬܼ: ܕܟܲܕܼ ܐܵܡܲ݁ܪ ܐܲܢ̄ܬܿ ܕܐܲܠܵܗܵܐ ܠܵܐ
ܚܲܫ: ܡܫܝܼܚܵܐ ܕܹܝܢ ܠܵܐ ܚܲܫ̣: ܘܠܵܐ ܡܸܕܸܡ ܐ̄ܚܪܹܝܢ ܡܪܸܢܸܫ ܐܲܢ̄ܬܿ
ܡ̣ܢ ܗܵܕܹܐ: ܐܸܠܵܐ ܐܸܢ ܕܠܵܐ ܐܝܼܬܼܵܘܗܝ ܐܲܠܸܵܗܵܐ ܡܫܝܼܚܵܐ. ܐܸܢ ܓܹܝܪ
ܬܹܐܡܲܪ ܕܐܲܠܵܗܵܐ ܡܸܠܬܼܵܐ ܚܲܫ̣: ܡܵܘܕܸܐ ܐܲܢ̄ܬܿ ܠܹܗ ܠܲܡܫܝܼܚܵܐ ܕܐܲܠܵܗܵܐ
pb. 358
ܗ̄ܘ̣. ܡܵܕܹܝܢ ܙܵܕܹܩ ܗ̄ܘ̣ܵܐ ܠܟܼܘܿܢ ܕܠܵܐ ܗ̄ܘ̣ܵܐ ܠܟܼܠܹܗ ܦܵܤܘܿܩܵܐ
ܬܤܝܼܡܘܼܢ: ܐܸܠܵܐ ܥܕܲܡܵܐ ܕܐܵܝܬܝܼܬܘܿܢ ܠܗܵܠܹܝܢ ܕܡܸܫ̈ܟܿܚܵܢ ܗ̣̄ܘܲܝ̈
ܕܢܵܘ̈ܕܥܵܢܵܢܝ ܕܗܵܠܹܝܢ ܐܵܡܲ݁ܪ ܐ̄ܢܵܐ. ܠܫܲܪܟܵܐ ܕܹܝܢ: ܙܵܕܹ̇ܩ ܗ̄ܘ̣ܵܐ
ܕܲܬܿܛܲܫܘܿܢ. ܕܐܲܝܟܼ ܐܲܝܟܲܢܸܵܐ؟ ܐܸܢ ܠܟܼܠܵܗ̇ ܚܕܼܵܬܵܐ ܬܸܩܪܸܐ: ܠܵܐ ܡܸܫܟܲܚ
ܐܲܢ̄ܬܿ ܒܵܗ̇ ܡܵܘܬܵܐ ܕܠܲܐܠܵܗܵܐ ܡܸܠܬܼܵܐ ܡܸܬܼܩܲܪܲܒܼ: ܐܸܠܵܐ ܐܵܘ ܠܲܡܫܝܼܚܵܐ:
ܐܵܘ ܠܡܵܪܝܵܐ: ܐܵܘ ܠܲܒܼܪܵܐ܀ ܥܕܲܡܵܐ ܓܹܝܪ ܠܗܵܠܹܝܢ ܡܸܫܟܲܚ ܗ̄ܘ̣ܵܐ
ܕܲܢܓܲܒܸܐ ܐܸܢܘܿܢ: ܘܲܕܼܢܸܬܸܿܠ ܡܲܤܒܿܪܵܢܘܼܬܼܵܐ ܕܠܵܐ ܡܵܘܕܹܐ ܐ̄ܢܵܐ ܠܹܗ
ܐܲܠܵܗܵܐ ܠܲܡܫܝܼܚܵܐ. ܗܵܠܹܝܢ ܕܹܝܢ ܕܫܲܪܟܵܐ ܕܤܝܼ̈ܡܵܢ ܠܟܼܘܿܢ: ܢܲܗܝܼܪܵܐܝܼܬܼ
ܫܵܪ̈ܝܵܢ ܠܵܗ̇ ܠܡܲܤܒܿܪܵܢܘܼܬܼܵܐ ܗܵܕܹܐ: ܡܫܝܼܚܵܐ ܠܲܡ ܓܹܝܪ ܘܡܵܪܪܝܵܐ
ܘܲܒܼܪܵܐ: ܕܥܲܠ ܝܑܼܚܝܼܕܼܵܝܵܐ ܡܸܬܼܢܤܸܒܼ ܒܲܟܼܬܼܵܒܹ̈ܐ ܐܲܠܵܗܵܝܹ̈ܐ: ܘܡܵܘܕܥܵܢܵܐ
ܐܝܼܬܼܵܘܗܝ ܕܲܬܼܪܹܝܢ ܟܝܵܢܹ̈ܐ: ܒܲܙܒܲܢ ܡ̇ܢ ܡܵܘܕܲܥ ܥܲܠ ܐܲܠܵܗܘܼܬܼܵܐ:
ܒܲܙܒܲܢ ܕܹܝܢ ܥܲܠ ܐ̄ܢܵܫܘܼܬܼܵܐ: ܘܒܲܙܒܲܢ ܥܲܠ ܬܪ̈ܲܝܗܘܿܢ. ܠܵܐ ܓܹܝܪ
ܟܸܦ̇ܟܹܿܬܼ ܕܠܵܐ ܐܝܼܬܼܵܘܗܝ ܡܫܝܼܚܵܐ ܐܲܠܵܗܵܐ: ܐܸܠܵܐ ܕܐܵܦ ܐܲܠܵܗܵܐ:
ܘܒܲܟܼܝܵܢܵܐ ܐܲܠܵܗܵܐ. ܬܪܹܝܢ ܓܹܝܪ ܟܝܵܢܹ̈ܐ ܐܸܡ̇ܪܹܬܼ ܕܡܵܘܕܲܥ: ܠܐܲܠܵܗܘܼܬܼܵܐ
ܘܲܠܐ̄ܢܵܫܘܼܬܼܵܐ. ܠܵܐ ܡܵܕܹܝܢ ܡܸܫܟܿܚܵܐ ܕܐܸܬܼܩܲܛܪܲܓܼ: ܕܠܵܐ ܡܵܘܕܹܐ
ܐ̄ܢܵܐ ܠܹܗ ܐܲܠܵܥܗܵܐ ܠܲܡܫܝܼܚܵܐ: ܒܝܲܕܼ ܐܲܝܠܹܝܢ ܕܟܸܬܼ̇ܒܹܿܬܼ.
ܐܸܠܵܐ ܟܒܲܪ ܡܸܛܠ ܕܐܸܡ̇ܪܹܬܼ ܐܵܦ ܒܲܪܢܵܫܵܐ: ܘܲܬܼܪܹܝܢ ܟܝܵܢ̈ܝܼܢ
ܕܐܲܠܵܗܘܼܬܼܵܐ ܘܲܕܿܐ̄ܢܵܫܘܼܬܼܵܐ: ܚܲܕܼ ܚܵܫܘܿܫܵܐ ܘܲܐ̄ܚܪܹܢܵܐ ܠܵܐ ܚܵܫܘܿܫܵܐ
ܠܲܡܫܝܼܚܵܐ : ܘܠܵܐ ܐܵܘܕܝܼܬܼ ܕܐܲܠܵܗܵܐ ܡܸܠܬܼܵܐ ܒܲܟܼܝܵܢܹ̈ܐ ܬܪ̈ܲܝܗܘܿܢ
ܘܒܼܐܘܼܤܝܼܵܐ ܚܲܫ̣: ܐܲܠܵܗܵܐ ܡܸܠܬܼܵܐ ܕܲܗܘ̤ܵܐ ܐܘܼܤܝܼܵܐ ܕܒܲܪܢܵܫܵܐ. ܐܵܘ ܕܐܲܝܟܼ
ܕܒܸܐܤܟܹܿܡܵܐ ܐܝܼܬܼܵܘܗܝ ܗ̄ܘ̣ܵܐ ܡ̇ܢ ܕܡܝܼܬܼ ܚ̣ܝܵܐ: ܘܥܲܠ ܐܲܠܵܗܵܐ
pb. 359
ܡܸܠܬܼܵܐ ܡܲܤܩܝܼܢ ܚ̄ܢܲܢ ܚܲܫܹ̈ܐ ܒܟܼܠ ܙܢܵܐ ܕܐܝܼܬܼ: ܘܠܵܐ ܗ̄ܘ̣ܵܐ ܠܐܘܼܤܝܼܵܐ
ܕܒܲܪܢܵܫܵܐ: ܘܲܕܼܐ̄ܢܵܫܘܼܬܼܵܐ ܡܸܕܸܡ ܠܵܐ ܤܸܥܪܲܬ̤ ܠܲܡܕܲܒܿܪܵܢܘܼܬܼܵܐ. ܐܵܘ
ܡܸܛܠ ܕܢܸܬܼܚܙܸܐ ܘܢܸܫܟܲܚ ܠܡܸܚܲܫ ܒܹܗ ܒܲܟܼܝܵܢܵܐ ܐ̄ܢܵܫܝܵܐ: ܡܸܛܠ
ܗܵܢܵܐ ܠܵܐ ܡܸܬܼܚܫܸܒܼ ܥܲܡ ܐܲܠܵܗܘܼܬܼܵܐ: ܘܟܼܠܗܹܝܢ ܗܵܠܹܝܢ ܕܐܲܠܵܗܘܼܬܼܵܐ
ܘܲܕܼܐ̄ܢܵܫܘܼܬܼܵܐ ܠܐܲܠܵܗܘܼܬܼܵܐ ܢܲܤܸܩ: ܐܲܟܼܙܢܵܐ ܕܗܵܠܹܝܢ ܕܐܘܿܪܓܵܢܘܿܢ
ܥܲܠ ܐܘܼܡܵܢܵܐ. ܘܠܵܐ ܝܵܗܹ̇ܒܼ ܠܗܵܠܹܝܢ ܕܐܵܗܘܼܬܼܵܐ ܠܗܵܠܹܝܢ ܕܐ̄ܢܵܫܘܼܬܼܵܐ:
ܐܲܝܟܼ ܙܢܵܐ ܕܐܵܦ ܠܵܐ ܠܐܘܿܪܓܵܢܘܿܢ ܡܸܬܼܝܲܗ̈ܒܵܢ ܗܵܠܹܝܢ ܕܐܘܼܡܵܢܵܐ:
ܕܡܸܕܸܡ ܒܨܒܼܝܵܢܹܗ ܠܵܐ ܡܸܬܼܥܒܸܕܼ. ܠܵܐ ܓܠܸܐ ܪܸܥܝܵܢܹܗ ܕܗܵܢܵܐ:
ܒܐܲܝܠܹܝܢ ܕܲܡܩܲܛܪܸܓܼ ܠܝܼ. ܕܲܝܵܢܹ̈ܐ ܕܹܝܢ ܚܲܪ̈ܫܹܐ ܘܲܕܼܠܵܐ ܒܲܪܬܼ ܩܵܠܵܐ
ܝܵܬܼ̇ܒܿܝܼܢ ܗ̄ܘ̣ܵܘ: ܟܲܕܼ ܡܸܕܸܡ ܠܵܐ ܡܒܲܚܢܝܼܢ ܗ̄ܘ̣ܵܘ. ܬܘܼܒܼ ܐܵܠܨܵܐ
ܕܲܒܼܗܹܝܢ ܟܲܕܼ ܒܗܹܝܢ ܒܤܵܗ̈ܕܘܼܬܼܵܐ؟ ܢܸܬܼܚܲܫܲܚ ܠܘܼܩܒܲܠܗܘܿܢ:
ܟܲܕܼ ܡܩܝܼܡ ܐ̄ܢܵܐ ܠܗܹܝܢ ܕܝܼܠܝܼ: ܘܡܲܟܸܿܣ ܐ̄ܢܵܐ ܠܗܵܢ̇ܘܿܢ: ܕܡܸܛܠ
ܗܵܕܹܐ ܥܪܲܩ̣ܘ ܡ̣ܢ ܕܝܼܢܵܐ: ܕܡܲܦܲܩ ܒܪܘܼܚܵܐ ܠܲܝܬܿ ܗ̄ܘ̣ܵܐ ܠܗܘܿܢ.
ܐܵܘ ܐܸܢ ܕܹܝܢ ܠܵܐ: ܥܵܒܼ̇ܘܿܪܵܐܝܼܬܼ ܢܹܐܡܲܪ ܗܵܘ̇ ܐܲܝܢܵܐ ܕܓܲܒܿܝܼ ܡܸܠܲܝ̈:
ܕܠܵܐ ܐܝܼܬܼܵܘܗܝ ܫܡܵܐ ܕܲ:ܡܫܝܼܚܵܐ ܐܵܘ ܕܲܒܼܪܵܐ ܐܵܘ ܕܡܵܪܝܵܐ ܡܵܘܕܥܵܢܵܐ
ܕܲܬܼܪܹܝܢ ܟܝܵܢ̈ܝܼܢ: ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܡܸܕܸܡ ܐ̄ܚܪܹܝܢ ܠܵܐ
ܐܵܡܲ݁ܪ ܐ̄ܢܵܐ.
ܩܪܝܼ ܗܵܘ̇ ܡܵܐ ܕܐܝܼܬܼ ܠܵܟܼ ܗܤܵܗ̈ܕܘܵܬܼܵܟܼ ܐܘܿ ܒܲܪܢܵܫܵܐ: ܘܠܵܐ
ܬܸܬܼܟܲܬܲܫ ܥܲܡ ܛܸܠܵܠܵܐ. ܟܝܵܢܹ̈ܐ ܡ̇ܢ ܬܪܹܝܢ: ܐܲܠܵܗܵܐ ܘܒܲܪܢܵܫܵܐ:
ܒܢܲܝ̈ܐ ܕܹܝܢ ܠܵܘ ܬܹܪܹܝܢ. ܐ̄ܚܪܹܝܢ ܓܹܝܪ ܘܲܐ̄ܚܪܹܝܢ ܐܝܼܬܲܝܗܘܿܢ ܗܵܢܘܿܢ
ܕܡܸܢܗܘܿܢ ܐܝܼܬܼܵܘܗܝ ܦܵܪܘܿܩܲܢ: ܠܵܘ ܕܹܝܢ ܐ̄ܚܪܹܢܵܐ ܘܲܐ̄ܚܪܹܢܵܐ: ܗܵܣ܀
pb. 360
ܐܸܠܵܐ ܚܲܕܼ ܒܡܘܼܙܵܓܼܵܐ: ܐܲܠܵܗܵܐ ܕܐܸܬܼܒܲܪܢܲܫ: ܘܒܲܪܢܵܫܵܐ ܕܐܸܬܼܐܲܠܲܗ.
ܗܵܘ̇ ܕܲܡܫܲܪܸܐ ܘܡܸܬܿܕܲܪܲܓܼ ܘܡܸܬܼܓܡܲܪ: ܠܵܐ ܐܝܼܬܼܵܘܗܝ ܐܲܠܵܗܵܐ:
ܐܵܦ ܐܸܢ ܡܸܛܠ ܡܬܼܚܵܘܝܵܢܘܼܬܹܗ ܕܲܒܼܩܲܠܝܼܠ ܡܸܬܼܐܡܲܪ
ܗܵܟܲܢܵܐ. ܕܲܠܡܵܐ ܐܸܢܵܐ ܟܸܬܲܒܹܿܬܼ ܗܵܠܹܝܢ؟ ܕܲܠܡܵܐ ܐܲܥ̇ܠܹܬܼ ܡܸܕܸܡ
ܒܟܼܠܗܹܝܢ؟ ܠܵܘ ܐܲܢ̄ܬܿܘܿܢ ܟܬܲܒܼܬܿܘܿܢ ܐܸܢܹܝܢ؟ ܠܡܵܢܵܐ ܗܵܟܹܝܠ
ܡܩܲܛܪܓܼܝܼܢ ܐܢ̄ܬܿܘܿܢ ܠܝܼ: ܐܲܝܟܼ ܕܠܲܐܝܢܵܐ ܕܲܬܼܪܹܝܢ ܟܝܵܢ̈ܝܼܢ ܐܸܡ̇ܪܹܬܼ
ܠܦܵܪܘܿܩܲܢ؟ ܐ̄ܚܪܹܢܵܐ ܡ̇ܢ ܒܲܟܼܝܵܢܵܐ ܒܐܲܠܵܗܘܼܬܼܵܐ: ܘܲܐ̄ܚܪܹܢܐ ܕܹܝܢ ܒܲܟܼܝܵܢܵܐ
ܒܐ̄ܢܵܫܘܼܬܼܵܐ. ܠܵܘ ܬܪܹܝܢ ܟܝܵܢ̈ܝܼܢ ܐܲܠܵܗܘܼܬܼܵܐ: ܘܠܵܘ ܡ̣ܢ ܐ̄ܚܪܹܢܵܐ
ܘܲܐ̄ܚܪܹܢܵܐ: ܘܠܵܘ ܒܡܘܼܙܵܓܼܵܐ ܐܝܼܬܲܝܗܘܿܢ ܒܐܲܠܵܗܵܐ ܡܸܠܬܼܵܐ. ܐܸܠܵܐ ܬܪܹܝܢ
ܒܲܟܼܝܵܢܵܐ ܐܝܼܬܲܝܗܘܿܢ: ܘܒܲܚܕܼܵܝܘܼܬܼܵܐ ܚܲܕܼ ܦܲܪܨܘܿܦܵܐ ܕܲܬܼܪ̈ܲܝܗܘܿܢ. ܬܘܼܒܼ
ܕܹܝܢ ܐܲܝܟܼ ܕܥܲܠ ܬܠܝܼܬܼܵܝܘܼܬܼܵܐ: ܠܵܐ ܡܲܤܠܲܝ ܦܲܪܨܘܿܦܵܐ ܕܐ̄ܢܵܫܘܼܬܼܵܐ:
ܕܐܲܠܵܗܵܐ ܕܐܸܬܼܒܲܪܢܲܫ: ܘܒܲܪܢܵܫܵܐ ܕܐܸܬܼܐܲܠܲܗ. ܗܵܘ̇ ܓܹܝܪ ܕܲܡܫܲܪܸܐ
ܘܡܸܬܿܕܲܪܵܓܼ ܘܡܸܫܬܲܡܠܸܐ: ܠܵܐ ܐܝܼܬܼܵܘܗܝ ܐܲܠܵܗܵܐ: ܐܵܦܸܢ ܡܸܛܠ
ܡܸܬܼܚܵܘܝܵܢܘܼܬܼܵܗ ܕܲܒܼܩܲܠܝܼܠ ܩܠܝܼܠ ܡܸܬܼܐܡܲܪ ܗܵܟܲܢܵܐ. ܘܐܵܦ ܠܵܐ
ܠܐܲܠܵܗܵܐ ܡܸܠܬܼܵܐ: ܐܵܡܲ݁ܪ ܕܐܝܼܬܼܵܘܗܝ ܒܐܘܼܤܝܼܵܐ ܬܪ̈ܲܝܗܘܿܢ: ܘܐܵܦ ܠܵܐ
ܦܵܪܹܫ ܠܐ̄ܢܵܫܘܼܬܼܵܐ ܡ̣ܢ ܐܲܠܵܗܘܼܬܼܵܐ. ܐܲܝܟܲܢܵܐ ܕܐܲܠܵܗܵܐ ܡܸܠܬܼܵܐ ܐܵܦ ܚܲܫܹ̈ܐ
ܕܒܸܤܪܵܐ ܢܸܚܲܫ̣: ܘܲܢܩܲܒܸܿܠ ܒܲܟܼܝܵܢܹܗ ܒܦܲܪܨܘܿܦܹܗ: ܒܸܤܪܵܐ ܕܹܝܢ ܡ̣ܢ
ܠܒܲܪ ܐܝܼܬܼܵܘܗܝ: ܟܲܕܼ ܠܵܐ ܡܸܫܬܵܘܬܲܦ ܒܗܵܠܹܝܢ ܕܐܲܠܵܗܘܼܬܼܵܐ
ܒܦܲܪܨܘܿܦܵܐ ܕܝܼܠܹܗ. ܐܸܠܵܐ ܒܦܘܼܪܥܵܢܵܐ ܕܡܲܤܒܼܵܐ ܘܲܕܼܡܲܬܿܠܵܐ
ܕܦܲܪ̈ܨܘܿܦܲܝܗܘܿܢ: ܠܲܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ ܐܵܡܲ݁ܪ.
ܠܐܲܠܵܗܵܐ ܡ̇ܢ: ܡ̣ܢ ܐ̄ܢܵܫܘܼܬܼܵܐ ܕܐܸܬܼܒܲܪܢܲܫ ܒܲܚܕܼܵܝܘܼܬܼܵܐ ܐܵܡܲ݁ܪ.
pb. 361
ܠܐ̄ܢܵܫܘܼܬܼܵܐ ܕܹܝܢ: ܡ̣ܢ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܐܵܡܲ݁ܪ ܕܐܸܬܼܐܲܠܗܲܬ̤:
ܘܠܵܐ ܗ̄ܘ̣ܵܐ ܕܢܸܦܩܲܬ̤ ܡ̣ܢ ܐܲܠܵܗܘܼܬܼܵܐ. ܗܵܘ̇ ܓܹܝܪ ܕܲܡܫܲܪܸܐ
ܘܡܸܬܿܕܲܪܲܓܼ ܘܡܸܫܬܲܡܠܸܐ: ܠܵܐ ܗ̄ܘ̣ܵܐ ܐܲܠܵܗܵܐ ܗ̄ܘ̣: ܐܵܦܸܢ ܡܸܛܠ
ܡܸܬܼܓܲܠܝܵܢܘܼܬܼܵܐ ܕܲܒܼܩܲܠܝܼܠ ܩܲܠܝܼܠ ܡܸܬܼܐܡܲܪ ܗܵܟܲܢܵܐ.
ܗܸܢܹܝܢ ܟܲܕܼ ܗܸܢܹܝܢ ܐܵܦ ܐܲܡܒܿܪܘܿܤܝܼܣ ܐܸܡ݂ܲܪ ܠܲܚܕܼܵܝܘܼܬܼܵܐ
ܕܐܲܠܵܗܘܼܬܼܵܐ ܘܲܕܼܒܸܤܪܵܐ: ܒܢܲܪ̈ܬܲܝܗܹܝܢ ܡܡܲܠܸܠ ܒܪܵܐ ܕܐܲܠܵܗܵܐ:
ܡܸܛܠ ܕܒܹܗ ܐܝܼܬܲܝܗܘܿܢ ܗ̄ܘ̣ܵܘ ܬܪ̈ܲܝܗܘܿܢ ܟܝܵܢܹ̈ܐ܀ ܐܵܦ ܐܵܬܵܢܵܤܝܼܣ
ܗܵܕܹܐ ܐܵܡܲ݁ܪ: ܕܡ̣ܢ ܡܲܪܝܲܡ ܢܦܲܩ̣ ܡܵܪܲܢ ܘܠܵܘ ܐܲܠܵܗܘܼܬܼܵܐ.
ܘܠܲܟܼܝܵܢܹ̈ܐ ܐܸܡܲ݁ܪ ܬܪ̈ܲܝܗܘܿܢ: ܐ̄ܚܪܹܢܵܐ ܡ̇ܢ ܐܵܡܲ݁ܪ ܠܗܵܘ̇ ܕܐܲܠܵܗܘܼܬܼܵܐ:
ܘܲܐ̄ܚܪܹܢܵܐ ܠܒܸܤܪܵܐ: ܘܲܕܼܗܵܠܹܝܢ ܐܵܡܲ݁ܪ ܚܕܼܵܝܘܼܬܼܵܐ. ܒܗܵܢܵܐ ܐܝܼܬܲܝܗܘܿܢ
ܬܪ̈ܲܝܗܘܿܢ ܟܝܵܢܹ̈ܐ: ܠܵܘ ܒܐܲܠܵܗܵܐ ܡܸܠܬܼܵܐ: ܐܸܠܵܐ ܒܲܒܼܪܵܐ. ܠܵܘ ܐܲܝܟܼ
ܡ̇ܢ ܕܲܐ̄ܚܪܹܢܵܐ ܐܝܼܬܼܵܘܗܝ ܒܪܵܐ: ܘܲܐ̄ܚܪܹܢܵܐ ܐܲܠܵܗܵܐ ܡܸܠܬܼܵܐ. ܐܸܠܵܐ
ܗܵܘ̇ ܡ̇ܢ ܠܲܚܕܼܵܝܘܬܼܵܐ ܡܵܘܕܲܥ: ܘܗܵܘ̇ ܠܐܘܼܤܝܼܵܐ. ܐ̄ܚܪܹܢܵܐ ܗ̄ܘ̣
ܓܹܝܪ ܦܲܪܨܘܿܦܵܐ: ܘܲܐ̄ܚܪܹܬܼܵܐ ܗ̣̄ܝ ܐܘܼܤܝܼܵܐ. ܐܲܝܟܲܢܵܐ ܕܥܠ ܐܲܒܼܵܐ
ܘܵܒܼܪܵܐ: ܒܦܲܪܨܘܿܦܐ ܡ̇ܢ ܐ̄ܚܪܹܢܵܐ ܘܲܐ̄ܚܪܹܢܵܐ: ܒܐܲܠܵܗܘܼܬܼܵܐ ܕܹܝܢ ܠܵܘ
ܐ̄ܚܪܹܢܵܐ ܘܲܐ̄ܚܪܹܢܵܐ. ܬܘܼܒܼ ܥܲܠ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܘܲܕܼܒܸܤܪܵܐ:
ܒܦܲܪܨܘܿܦܵܐ ܕܐܲܠܵܗܘܼܬܼܵܐ ܕܐܲܠܵܗܵܐ ܡܸܠܬܼܵܐ: ܠܵܘ ܐ̄ܚܪܹܢܵ ܘܲܐ̄ܚܪܹܢܵܐ:
ܐܸܠܵܐ ܗ̤ܘ ܟܲܕܼ ܗ̤ܘ. ܒܲܟܼܝܵܢܹ̈ܐ ܕܹܝܢ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܐ̄ܚܪܹܢܵܐ
ܘܲܐ̄ܚܪܹܢܵܐ: ܘܡܸܛܠ ܗܵܢܵܐ ܙܗܝܼܪܵܐܝܼܬܼ ܐܵܡܲ݁ܪ ܟܬܼܵܒܼܵܐ ܐܲܠܵܗܵܝܵܐ ܡ̣ܢ
ܦܲܪܨܘܿܦܵܐ ܕܐܲܠܵܗܘܼܬܼܵܐ: ܘܲܒܼܦܲܪܨܘܿܦܵܐ ܕܲܚܕܝܘܼܬܼܵܐ ܬܪ̈ܲܝܗܘܿܢ
ܡܫܵܘܕܲܥ. ܡ̣ܢ ܐܘܼܤܝܼܵܐ ܕܹܝܢ ܕܐܲܠܵܗܘܼܬܼܵܐ ܘܒܼܐܘܼܤܝܼܵܐ ܕܐܲܠܵܗܵܐ
pb. 362
ܡܸܠܬܼܵܐ: ܠܵܐ ܐܝܼܬܲܝܗܘܿܢ ܬܪ̈ܲܝܗܘܿܢ. ܐܲܝܠܹܝܢ ܓܹܝܪ ܕܒܼܐܘܼܤܝܼܵܐ ܗ̄ܘ̣
ܡܸܬܼܐܲܡܪܵܢ: ܒܚܲܕܼ ܡܸܕܸܡ ܡܸܬܼܪ̈ܲܢܝܵܢ: ܒܗܵܘ̇ ܡܵܐ ܕܡܼܬܼܐܲܡܪ̈ܵܢ
ܒܲܠܚܘܿܕܼ ܒܐܘܼܤܝܼܵܐ.
ܡܸܛܠ ܗܵܢܵܐ ܐܵܦ ܐܲܡܒܿܪܘܿܤܝܼܣ ܐܵܡܲ݁ܪ ܠܲܚܕܼܵܝܘܼܬܼܵܐ ܕܐܲܠܵܗܘܼܬܼܵܐ:
ܘܠܵܐ ܐܸܡ݂ܲܪ ܠܲܚܕܼܵܝܘܼܬܼܵܐ ܕܲܒܼܪܵܐ. ܟܲܕܼ ܛܵܒܼ ܠܵܘ ܐ̄ܚܪܹܢܵܐ: ܐܸܠܵܐ ܡܸܢܹܗ
ܟܲܕܼ ܡܸܢܹܗ. ܐܸܠܵܐ ܗܵܘ̇ ܡ̇ܢ: ܐܝܼܬܼܵܘܗܝ ܡܫܵܘܕܥܵܢܵܐ ܕܦܲܪܨܘܿܦܵܐ.
ܗܵܘ̇ ܕܹܝܢ: ܡܫܵܘܕܥܵܢܵܐ ܕܲܟܼܝܵܢܵܐ. ܘܡܸܛܠ ܗܵܢܵܐ: ܒܗܵܝ̇ ܕܲܚܕܼܵܝܘܼܬܼܵܐ
ܕܐܘܼܤ̈ܝܼܵܣ ܗܘ̤ܵܬܼ: ܠܲܚܕܼܵܝܘܼܬܼܵܐ ܐܵܡܲ݁ܪ ܕܐܲܠܵܗܘܼܬܼܵܐ ܘܲܕܼܒܸܤܪܵܐ.
ܘܡܸܛܠ ܕܲܠܚܲܕܼ ܦܲܪܨܘܿܦܵܐ ܗܘ̤ܵܬܼ ܚܕܼܵܝܘܼܬܼܵܐ ܕܲܟܼܝܵܢܹ̈ܐ: ܐܵܘܤܸܦ
ܕܒܲܬܼܪ̈ܲܝܗܘܿܢ ܡܡܲܠܠ ܒܪܵܐ ܕܐܲܠܵܗܵܐ. ܡܸܛܠ ܕܒܹܗ ܗܘ̤ܵܘ
ܬܪ̈ܲܝܗܘܿܢ ܟܝܵܢܹ̈ܐ: ܠܵܐ ܗ̄ܘ̣ܵܐ ܕܐܲܠܵܗܵܐ ܡܸܠܬܼܵܐ. ܚܲܕܼ ܓܹܝܪ: ܘܠܵܘ
ܬܪܹܝܢ: ܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ. ܐ̄ܚܪܹܢܵܐ ܗ̄ܘ̣ ܗܵܟܹܝܠ ܗܵܘ̇
ܕܡܸܬܼܝܲܕܲܥ ܡ̣ܢ ܐܘܼܤܝܼܵܐ: ܘܲܐ̄ܚܪܹܢܵܐ ܗ̄ܘ̣ ܗܵܘ̇ ܕܡ̣ܢ ܦܲܪܨܘܿܦܵܐ.
ܘܲܐ̄ܚܪܹܢܵܐ ܗ̄ܘ̣ ܗܵܘ̇ ܕܡ̣ܢ ܟܝܵܢܹ̈ܐ: ܘܲܐ̄ܚܪܹܢܵܐ ܗ̄ܘ̣ ܗܵܘ̇ ܕܡܵܘܕܲܥ
ܚܕܼܵܝܘܼܬܼܵܐ. ܡܸܛܠ ܗܵܢܵܐ ܐܸܡ̇ܪܹܬܼ: ܕܐܵܦܠܵܐ ܒܕܼܘܼܟܿ ܟܬܼܵܒܼܵܐ ܐܲܠܵܗܵܝܵܐ
ܡܩܲܪܸܒܼ ܡܵܘܬܵܐ ܠܐܲܠܵܗܵܐ: ܐܸܠܵܐ ܐܵܘ ܠܲܒܼܪܵܐ: ܐܵܘ ܠܲܡܫܝܼܚܵܐ: ܐܵܘ
ܠܡܵܪܝܵܐ. ܐܲܝܟܲܢܵܐ ܕܠܵܐ ܢܸܤܒܲܪ ܐ̄ܢܵܫ: ܕܠܐܘܼܤܝܼܵܐ ܗܘ̤ܵܬܼ ܚܕܼܵܝܘܼܬܼܵܐ
ܘܠܵܐ ܗ̄ܘ̣ܵܐ ܠܦܲܪܨܘܿܦܵܐ. ܘܦܲܪܨܘܿܦܵܐ ܠܵܐ ܦܪܝܼܫܵܐ: ܐܲܟܲܢܵܐ ܕܚܲܕܼ
ܟܝܵܢܵܐ ܕܐ̄ܢܵܫܘܼܬܼܵܐ ܢܸܗܢܸܐ ܝܲܬܿܝܼܪܵܐ: ܡܸܛܠ ܕܒܲܚܫܲܚܬܼܵܐ ܕܲܚܕܼܵܕܹ̈ܐ
ܕܡܲܤܒܼܵܐ ܘܲܕܼܡܲܪܠܵܐ ܬܸܬܼܪܢܸܐ ܡܸܬܼܒܲܪܢܫܵܢܘܼܬܼܵܐ. ܐܸܠܵܐ ܒܲܙܒܲܢ ܡ̣ܢ
ܦܲܪܨܘܿܦܵܐ ܕܐܲܠܵܗܘܼܬܼܵܐ ܡܫܲܡܲܗ ܠܹܗ: ܒܲܙܒܲܢ ܕܹܝܢ ܡ̣ܢ ܦܲܪܨܘܿܦܵܐ
pb. 363
ܕܐ̄ܢܵܫܘܼܬܼܵܐ: ܒܪܵܐ ܘܲܡܫܝܼܚܵܐ ܘܡܵܪܝܵܐ. ܗܵܠܹܝܢ ܐܸܡ݂ܲܪ ܓܪܝܼܓܼܘܿܪܝܼܘܿܣ:
ܗܵܠܹܝܢ ܐܸܡ݂ܲܪ ܠܲܡܒܪܘܿܤܝܼܣ. ܗܵܠܹܝܢ ܐܵܬܵܢܵܤܝܼܣ: ܗܵܘ̇ ܕܡ̣ܢ ܡܲܪܝܲܡ
ܢܦܲܩ̣ ܡܵܪܝܵܐ. ܒܪܵܐ ܡ̇ܢ: ܒܐܘܼܤܝܼܵܐ ܒܲܟܼܝܵܢܵܐ ܕܐܲܒܼܵܐ. ܒܲܒܼܤܲܪ ܕܹܝܢ:
ܡ̣ܢ ܙܲܪܥܵܐ ܕܒܹܝܬܼ ܕܵܘܝܼܕܼ. ܒܸܤܪܵܐ ܕܹܝܢ: ܡ̣ܢ ܡܲܪܝܲܡ ܒܬܼܘܼܠܬܼܵܐ܀
ܕܲܠܡܵܐ ܡܸܕܸܡ ܚܕܼܬܼ ܐܸܡ̇ܪܹܬܼ؟ ܠܵܘ ܗܸܢܹܝܢ ܟܲܕܼ ܗܸܢܹܝܢ ܒܗܘܿܢ
ܒܦܸܬܼܓܼܵܡܹ̈ܐ: ܘܒܹܗ ܟܲܕܼ ܒܹܗ ܒܪܸܥܝܵܢܵܐ؟ ܥܲܠ ܐܲܝܠܹܝܢ ܚܲܝܸܒܼܬܿܘܿܢܵܢܝ؟
ܐܵܪܵܐ ܡܸܫܟܿܚܵܐ ܠܡܸܬܼܪܢܵܝܘܼ: ܕܡܸܛܠ ܐܲܝܕܵܐ: ܡܸܢܟܼܘܿܢ ܘܲܠܟܼܘܿܢ
ܗܵܠܹܝܢ ܥܒܲܕܬܿܘܿܢ: ܘܠܵܐ ܩܵܘܝܼܬܿܘܿܢ ܕܥܲܡ ܟܠܗܘܿܢ ܐܲܦܸܤܩ̈ܘܿܦܹܐ
ܬܸܥܒܿܕܼܘܼܢ ܒܘܼܚܵܢܟܼܘܿܢ؟ ܐܸܠܵܐ ܐܵܦ ܠܲܩܛܹܐܓܼܪܵܢܘܼܬܼܵܗܘܿܢ ܗܵܝ̇
ܕܐܲܝܬܿܝܼܘ ܥܠܲܝ ܠܲܝܬܿ ܠܡܸܥܪܲܩ ܡܸܢܵܗ̇: ܙܵܕܹܩ ܠܡܲܟܼܬܵܒܼܘܼ: ܗܵܝ̇
ܕܲܕܼܠܵܐ ܡܲܟܼܤܵܢܘܼܬܼܵܐ ܐ̄ܚܪܵܝܑܬܼ ܟܬܲܒܼܘ ܗ̄ܘ̣ܵܘ.
ܒܵܗ̇ ܒܲܕܼܡܘܼܬܼܵܐ: ܕܝܼܠܹܗ ܟܲܕܼ ܕܝܼܠܹܗ: ܡ̣ܢ ܟܘܼܪܵܤܵܐ
ܕܥܸܤܪܝܼܢ ܘܐܲܪܒܲܥ.
ܚܵܐܲܪ ܐ̄ܢܵܐ ܕܹܝܢ ܒܥܲܡܵܐ ܕܝܼܠܲܢ: ܕܢܲܟܼܦܘܼܬܼܵܐ ܤܲܓܝܼܐܬܼܵܐ ܩܢܸܐ
ܘܪܸܬܼܚܵܐ ܕܕܼܚܸܠܲܬܼ ܐܲܠܵܗܵܐ. ܡ̣ܢ ܫܲܪܒܵܐ ܕܹܝܢ ܕܗܲܝܡܵܢܘܼܬܼܵܐ ܕܝܼܕܲܥܬܼܵܐ
ܕܐܲܠܵܗܵܐ: ܫܪܲܥ̣. ܗܵܕܹܐ ܕܹܝܢ ܠܵܐ ܗ̄ܘ̣ܵܐ ܠܪ̈ܲܫܝܼܥܹܐ ܕܥܲܡܵܐ: ܐܸܠܵܐ
ܐܲܝܟܼ ܕܙܵܕܼܩܵܐܝܼܬܼ ܐܹܡܲܪ: ܕܡܸܛܠ ܕܠܵܐ ܗܘ̤ܵܐ ܠܗܘܿܢ ܠܡܲܠܦܵܢܹ̈ܐ
ܙܲܒܼܢܵܐ ܡܸܕܸܡ: ܕܲܢܤܝܼܡܘܼܢ ܒܹܗ ܩܕܼܵܡܲܝܟܿܘܿܢ ܡܲܠܦܵܢܘܼܬܼܵܐ
ܕܗܲܝܡܵܢܘܼܬܼܵܐ ܚܲܬܿܝܼܬܿܬܵܐ܀ ܗܵܢܵܐ ܠܲܡ ܓܲܠܝܵܐܝܼܬܼ ܐܸܡ݂ܲܪ ܒܗܵܠܹܝܢ:
ܕܐ̄ܢܵܫ ܡ̣ܢ ܡܲܠܦܵܢܹ̈ܐ ܕܲܩܕܼܵܡܵܘܗܝ: ܠܵܐ ܡܲܠܸܠ̣ ܩܕܼܵܡ ܥܲܡܵܐ:
pb. 364
ܗܵܘ̇ ܡܸܕܸܡ ܕܗ̤ܘ ܡܲܠܸܠ̣. ܫܡܲܥܘ ܕܹܝܢ ܐܵܦ ܥܲܠ ܗܵܕܹܐ: ܠܵܐ ܓܹܝܪ
ܤܲܓܿܝܼ ܩܲܫܝܵܐ ܘܝܲܩܝܼܪܵܐ ܡܸܠܬܼܵܐ ܗܵܕܹܿܐ. ܘܲܠܗܘܿܢ ܠܗܵܠܹܝܢ ܫܲܐܸܠܘ:
ܗ̤ܢܘܿܢ ܓܹܝܪ ܐܵܡ̇ܪܝܼܢ ܫܪܵܪܵܐ ܐܵܦܸܢ ܟܲܕܼ ܠܵܐ ܨܵܒܹ̇ܿܢ. ܒܐܲܝܢܵܐ ܫܲܪܒܵܐ
ܐܲܡܝܼܪ̈ܵܢ ܠܝܼ ܗܵܠܹܝܢ؟ ܠܵܘ ܒܲܤܝܵܡܵܐ ܕܐܸܬܿܬܿܤܝܼܡ ܡ̣ܢ ܐܲܒܼ̈ܗܵܬܼܵܐ
ܩܲܕܝܼ̈ܫܹܐ ܕܐܸܬܼܟܲܢܲܫܘ ܒܢܝܼܩܝܼܵܐ؟ ܘܡܵܢܵܐ ܢܝܼܫܵܐ ܐܝܼܬܼ ܗ̄ܘ̣ܵܐ ܠܝܼ؟ ܐܵܪܵܐ
ܠܡܲܟܿܤܵܢܘܼܬܼܵܗܘܿܢ ܕܒܼܝܼܵܫܐܝܼܬܼ ܐܲܠܸܦ̣ܘ: ܐܵܘ ܕܲܬܼܪܝܼܨܵܐܝܼܬܼ ܘܩܲܕܝܼܫܵܐܝܼܬܼ
ܘܲܒܼܕܼܚܠܲܬܼ ܐܲܠܵܗܵܐ ܐܲܠܸܦ̣ܘ؟ ܘܲܠܡܲܠܦܵܢܘܼܬܼܵܐ ܕܝܼܠܝܼ ܕܲܠܡܲܠܦܵܢܘܼܬܼܵܐ
ܕܗܵܠܹܝܢ ܫܵܠ̇ܡܵܐ: ܡܚܵܘܸܐ ܗ̄ܘ̇ܵܝܬܼ ܠܥܲܡܵܐ. ܕܲܟܼܕܼ ܠܵܐ ܝܵܕܲܥ̇ ܗ̄ܘ̣ܵܐ
ܠܡܲܠܦܵܢܘܼܬܼܵܐ ܕܐܲܒܼ̈ܗܵܬܼܵܐ: ܥܲܡܝܼ ܡܲܩܪܸܒܼ ܗ̄ܘ̣ܵܐ: ܕܲܠܒܲܪ ܡ̣ܢ
ܤܝܵܡܵܐ ܕܐܲܒܼ̈ܗܵܬܼܵܐ ܡܲܠܸܦ ܐ̄ܢܵܐ. ܘܐܲܟܿܤܹ̇ܬܼ ܐܸܢܘܿܢ ܡܸܢܹܗ ܕܲܤܝܵܡܵܐ
ܕܲܐܼܒܼ̈ܗܵܬܼܵܐ: ܕܠܵܐ ܡܸܫܬܵܘܕܥܝܼܢ ܠܗܵܘ̇ ܡܵܐ ܕܚܲܝܵܒܼܝܼܢ ܗ̄ܘ̣ܵܘ
ܕܲܒܼܦܘܼܡܗܘܿܢ ܢܸܗܘܸܐ ܐܲܡܝܼܢܵܐܝܼܬܼ. ܘܲܕܼܠܵܐ ܒܲܟܼܐܵܬܼܵܐ ܝܲܬܿܝܼܪܵܬܵܐ ܐܲܟܸܣ
ܐܸܢܘܿܢ: ܘܐܸܥܒܸܿܕܼ ܐܸܢܘܿܢ ܒܥܵܩܬܼܵܐ: ܟܠܹ̇ܝܬܼ ܢܲܦܫܝܼ ܡ̣ܢ ܩܛܹܐ ܓܼܪܵܢܘܼܬܼܵܐ:
ܘܐܸܡ̇ܪܹܬܼ ܥܲܠ ܦܲܪܨܘܿܦܵܐ ܕܠܲܝܬܿ ܗ̄ܘ̣ܵܐ ܥܠܵܘܗܝ ܩܛܹܐ ܓܼܪܵܢܘܼܬܼܵܐ.
ܕܠܲܝܬܿ ܗ̄ܘ̣ܵܐ ܠܗܘܿܢ ܙܲܒܼܢܵܐ ܠܡܲܠܦܵܢܹ̈ܐ ܕܗܲܝܡܵܢܘܼܬܼܵܐ: ܕܲܢܤܝܼܡܘܼܢ
ܩܕܼܵܡܲܝܟܿܘܿܢ ܚܲܬܿܝܼܬܼܘܼܬܼܵܐ ܕܗܲܝܡܵܢܘܼܬܼܵܐ. ܫܚܝܼܡܵܐܝܼܬܼ ܐܸܡ̇ܪܹܬܼ: ܕܠܵܐ
ܬܚܘܼܡܵܐ. ܐܲܝܟܲܢܵܐ ܗܵܟܹܝܠ ܠܟܼܠܗܘܿܢ ܐܲܒܼ̈ܗܵܬܼܵܐ ܕܡ̣ܢ ܩܕܼܵܡܲܝ
ܩܲܛ̇ܪܓܹܬܼ: ܐܲܝܟܼ ܕܠܲܐܝܠܹܝܢ ܕܡܸܕܸܡ ܠܵܐ ܐܲܠܸܦ̣ܘ: ܡ̣ܢ ܗܵܠܹܝܢ
ܕܢܸܢܵܐ ܐܲܠܦܹ̇ܬܼ ܠܥܲܡܵܐ: ܟܲܕܼ ܢܝܼܫܵܐ ܕܝܼܠܝ ܘܲܥ̇ܒܼܵܕܝ ܗܵܢܵܐ ܗ̄ܘ̣ܵܐ:
ܠܡܲܠܵܦܘܼܬܼܗܘܿܢ ܘܠܲܡܚܵܘܵܝܘܼ ܡܸܢܹܗ ܕܲܤܝܵܡܵܐ ܕܗܵܠܹܝܢ ܐܲܠܸܦ̣ܘ:
ܘܡܸܕܸܡ ܐ̄ܚܪܹܝܢ ܠܒܲܪ ܡ̣ܢ ܤܝܵܡܵܐ ܕܐܲܒܼ̈ܗܵܬܼܵܐ ܠܵܐ ܐܸܡ̇ܪܹܬܼ؟ ܡ̣ܢ ܠܵܐ
ܝܑܼܕܲܥܬܼܗܘܿܢ ܕܹܝܢ ܘܡ̣ܢ ܠܵܐ ܝܲܠܝܼܦܘܼܬܼܗܘܿܢ ܕܲܩܛܹܐܓܼܪ̈ܵܢܹܐ: ܐܲܤܒܲܪܘ
pb. 365
ܥܠܲܝ: ܕܲܠܒܲܪ ܡ̣ܢ ܡܲܠܦܵܢܘܼܬܼܵܐ ܕܐܲܒܼ̈ܗܵܬܼܵܐ ܗܵܠܹܝܢ ܕܲܠܟܼܠܲܢ ܐܲܠܸܦ̣ܘ:
ܡܲܠܸܦ ܠܲܢ.
ܠܵܘ ܗܵܟܹܝܠ ܕܲܐ̄ܚܪܵܢܝܵܐܝܼܬܼ ܐܵܠܸܦ̣ܘ ܐܸܢܘܿܢ ܡܲܠܦܵܢܹ̈ܐ ܕܒܲܙܒܲܢ ܙܒܲܢ
ܐܸܡ̇ܪܹܬܼ: ܐܲܝܟܲܢܵܐ ܡܵܕܹܝܢ ܐܸܵܡܲ݁ܪ ܗ̄ܘܹ̇ܝܬܼ ܕܐܸܢ ܙܵܕܩܵܐܝܼܬܼ: ܐܸܠܵܐ ܐܸܡ̇ܪܹܬܼ:
ܕܠܵܘ ܝܑܼܕܝܼܥܵܐܝܼܬܼ ܘܲܡܦܲܪܫܵܐܝܼܬܼ ܐܲܫܠܸܡ̣ܘ ܤܝܵܡܵܐ ܕܐܲܒܼ̈ܗܵܬܼܵܐ ܠܥܲܡܵܐ:
ܡܸܛܠ ܕܢܸܫܡܥܘܼܢ ܗܵܠܹܝܢ ܘܢܸܬܿܕܲܡܪܘܼܢ. ܐ̄ܚܪܹܬܼܵܐ ܗ̣̄ܝ ܓܹܝܪ
ܕܢܹܐܡܲܪ ܕܕܲܠܩܘܼܒܼܠܵܐ ܐܲܠܸܦ̣ܘ: ܘܲܐ̄ܚܪܹܬܼܵܐ ܗ̣̄ܝ ܕܢܹܐܡܲܪ ܕܲܕܼܠܵܐ
ܦܘܼܫܵܩܵܐ ܐܲܫܠܸܡܘ ܐܸܢܘܿܢ ܠܦܸܬܼܓܼܵܡܹ̈ܐ. ܘܲܐ̄ܚܪܹܬܼܵܐ ܗ̣̄ܝ ܕܡܸܛܠ
ܕܠܵܐ ܤܦܝܼܩܝܼܢ ܗ̄ܘ̣ܵܘ: ܠܵܐ ܐܸܫܟܲܚܘ ܠܡܲܠܵܦܘܼ ܐܲܝܟܼ ܡܵܐ ܕܐܝܼܬܼܵܘܗܝ
ܗ̄ܘ̣ܵܐ ܪܸܥܝܵܢܗܘܿܢ: ܘܲܐ̄ܚܪܹܬܼܵܐ ܗ̣̄ܝ ܕܠܵܐ ܝܵܕܼܥ̇ܝܼܢ ܗ̄ܘ̣ܵܘ: ܐܵܘ ܕܐܲܝܟܼ
ܗܲܪ̈ܵܛܝܼܩܹܐ ܡܩܲܛܪܸܓܼ ܗ̄ܘܹ̇ܝܬܼ ܠܗܘܿܢ. ܐܸܠܘܼ ܓܹܝܪ ܕܠܲܓܼܡܵܪ
ܡܩܲܛܪܸܓܼ ܗ̄ܘܹ̇ܝܬܼ ܠܡܲܠܦܵܢܹ̈ܐ ܕܡ̣ܢ ܩܕܼܵܡܲܝ: ܡܩܲܛܪܸܓܼ ܗ̄ܘ̇ܝܬܼ
ܐܵܦ ܠܲܬܼܠܵܬܼܡܵܐܐ ܘܬܼܡܵܢܬܲܥܤܲܪ: ܗܵܢܘܿܢ ܕܒܲܤܝܵܡܗܘܿܢ ܡܩܝܼܡ
ܗ̄ܘܹ̇ܝܬܼ ܢܲܦܫ ܥܲܡ ܐܲܒܼܵܗ̈ܬܼܵܐ ܕܲܗܘ̤ܵܘ ܡ̣ܢ ܩܕܼܵܡܲܝ. ܠܵܐ ܐ̄ܢܵܫ ܓܹܝܪ
ܐܵܡܲ݁ܪ ܕܐܸܡ̇ܪܹܬܼ ܐܸܢܵܐ ܗܵܠܹܝܢ ܘܐܲܠܦܹ̇ܬܼ: ܠܒܲܪ ܡ̣ܢ ܡܲܠܦܵܢܹ̈ܐ ܕܡ̣ܢ
ܩܕܼܵܡܲܝ. ܐܸܢܵܐ ܡܸܕܸܡ ܠܵܐ ܐܸܡ̇ܪܹܬܼ: ܠܵܐ ܒܡܸܠܬܼܵܐ ܘܠܵܐ ܒܪܸܥܝܵܢܵܐ:
ܘܠܵܐ ܠܡܲܠܵܦܘܼ ܥܲܠ ܗܵܠܹܝܢ ܡܵܠܦܵܢܹ̈ܐ ܕܡ̣ܢ ܩܕܼܵܡܲܝ. ܘܐܸܢ ܕܹܝܢ
ܠܵܐ ܩܪܵܘ: ܐܲܢ̄ܬܿܘܿܢ ܟܬܲܒܼܬܿܘܿܢ. ܐܸܠܵܐ ܠܲܝܬܿ ܠܟܼܘܿܢ ܡܸܕܸܡ: ܡܸܛܠ
ܕܠܵܐ ܡܸܕܸܡ ܐܸܡ̇ܪܹܬܼ ܡ̣ܢ ܐܲܝܠܹܝܢ ܕܩܲܛܪܸܓܼܬܿܘܿܢܵܢܝ ܒܗܹܝܢ. ܠܗܵܢܵܐ
ܒܲܚܠܘܿܕܼ ܪܹܫܵܐ ܠܒܲܟܼܬܿܘܿܢ: ܡ̣ܢ ܗܵܢܵܐ ܠܟܼܠܟܼܘܿܢ ܐܲܟܿܤܹ̇ܬܼ. ܘܐܵܦ
ܠܵܐ ܠܗܵܠܹܝܢ ܐ̄ܚܪ̈ܵܢܹܐ ܙܵܕܹܩ ܗ̄ܘ̣ܵܐ ܕܲܬܼܗܲܝܡܢܘܼܢ: ܕܗܵܟܲܢܵܐ ܠܵܐ
ܡܸܬܼܟܲܚܕܼܵܢܵܐܝܼܬܼ ܩܲܛܪܓܼܘܼܢܝ: ܐܲܝܟܼ ܐܲܝܠܹܝܢ ܕܠܵܐ ܡ̣ܢ ܐܲܠܵܗܵܐ ܕܵܚ̇ܠܝܼܢ
pb. 366
ܘܠܵܐ ܡ̣ܢ ܒܢܲܝ̈ܢܵܫܵܐ ܡܸܬܼܟܲܚܕܝܼܢ. ܐܸܠܵܐ ܡܸܬܿܛܦܝܼܤܝܼܢ ܗ̣̄ܘܲܝܬܿܘܿܢ
ܝܲܬܿܝܼܪܵܐܝܼܬܼ ܠܗܵܘ̇ ܕܝܲܬܿܝܼܒܼ ܗ̄ܘ̣ܵܐ ܥܲܡܟܼܘܿܢ ܒܲܟܼܢܘܼܫܬܿܟܼܘܿܢ: ܐܲܝܟܼ
ܡ̇ܢ ܕܠܵܐ ܡܸܫܟܿܚܝܼܢ ܐܢ̄ܬܿܘܿܢ ܐ̄ܚܪܵܢܝܵܐܝܼܬܼ ܠܡܸܬܼܦܲܠܵܛܘܼ: ܐܸܠܵܐ ܐܸܢ
ܟܲܕܼ ܡܸܬܼܚܪܹܝܢ ܐܢ̄ܬܿܘܿܢ ܘܥܵܫ̇ܩܝܼܢ ܐܢ̄ܬܿܘܿܢ.
ܐܲܝܠܹܝܢ ܕܐܸܤܬܿܥܲܪܘ ܒܵܬܲܪ ܓܘܼܒܵܝܹ̈ܐ ܕܪܹ̈ܫܹܐ ܗܵܠܹܝܢ.
ܐܸܠܵܐ ܡ̣ܢ ܕܗܵܟܲܢܵܐ ܒܲܚܸܢ̣ܘܼ ܒܟܼܠܵܗ̇ ܚܲܬܿܝܿܬܼܘܼܬܼܵܐ: ܐܲܝܟܼ ܡ̇ܢ
ܕܲܡܫܝܼܚܵܐ ܚܵܙܹ̇ܐ ܗ̄ܘ̣ܵܐ: ܚܲܝܒܼܘܼܢܝ. ܟܲܕܼ ܒܡܸܕܸܡ ܠܵܐ ܐܸܬܼܥܲܤܲܩܘ
ܘܐܸܬܼܚܪܝܼܘ: ܘܠܵܐ ܤܵܡ̣ܘ ܡܸܕܸܡ ܒܫܘܼܐܵܠܵܐ ܐܵܘ ܒܦܘܼܢܵܝ ܦܸܬܼܓܼܵܡܵܐ.
ܐܸܠܵܐ ܡܤܲܪܗܒܼܝܼܢ ܗ̄ܘ̣ܵܘ ܕܠܵܐ ܢܲܕܪܟܼܘܼܢ ܐܸܢܘܿܢ ܐܲܝܠܹܝܢ ܕܲܥܬܼܝܼܕܼܝܼܢ
ܗ̄ܘ̣ܵܘ ܠܡܹܐܬܼܵܐ: ܗܵܢܵܘ ܕܹܝܢ ܤܘܼܢܗܵܕܘܿܣ ܕܡܲܕܢܚܵܐ ܕܩܲܪܝܼܒܼܵܐ
ܗ̄ܘ̣ܵܬܼ: ܘܗܵܠܹܝܢ ܕܡ̣ܢ ܪܗܘܿܡܹܐ. ܘܠܵܐ ܒܲܚܸܢ̣ܘ: ܘܐܵܦܠܵܐ ܩ̣ܪܵܘ.
ܘܐܲܝܟܼ ܕܤܵܒܲܪ̇ ܐ̄ܢܵܐ ܕܹܝܢ: ܘܐܵܦ ܠܗ̇ܠܹܝܢ ܕܲܟܼܬܲܒܼܘ: ܡ̣ܢ ܒܵܬܲܪܟܸܢ
ܟܬܲܒܼܘ ܐܸܢܹܝܢ. ܒܲܕܼ ܠܵܐ ܡܦܲܩ̣ܘ ܝܵܘ̈ܡܵܬܼܵܐ ܘܙܲܒܼܢܵܐ ܗܵܘ̇: ܠܡܸܟܼܬܲܒܼ
ܘܲܠܡܲܪܡܵܝܘܼ ܐܝܼܕܼܵܐ. ܡܸܬܼܚܲܙܝܵܐ ܓܹܝܪ ܕܲܚܘܝܼܚܵܐܝܼܬܼ ܘܲܡܩܲܒܿܠܵܢܵܐܝܼܬܼ
ܡܲܪܡܹܝܢ ܗ̄ܘ̣ܵܘ ܐܝܼܕܼܵܐ ܠܘܼܩܒܲܠܝ: ܐܵܦ ܒܸܠܥܵܕܼ ܡ̣ܢ ܥܸܠ̈ܠܵܬܼܵܐ. ܐܵܦ
ܠܵܐ ܓܹܝܪ ܚܲܕܼ ܡܸܢܗܘܿܢ ܟܬܲܒܼ ܥܸܠܬܼܵܐܬ ܕܡܸܛܠܵܬܼܵܗ̇ ܫܪܵܐܘܼܢܝ: ܐܸܠܵܐ
ܐܸܢ ܒܲܠܚܘܿܕܼ ܗܵܘ̇ ܚܲܟܿܝܼܡܵܐ ܘܡܸܤܬܲܟܲܠ ܝܲܬܿܝܼܪ ܡ̣ܢ ܟܠ ܐ̄ܢܵܫ:
ܘܡܸܫܟܲܚ ܕܡܸܕܼܡ ܕܡܸܤܬܲܟܲܠ ܢܹܐܡܲܪܝܼܘܗܝ: ܗܵܢܵܘ ܕܹܝܢ ܐܵܩܩܝܼܣ
ܕܡ̣ܢ ܡܝܼܠܝܼܛܼܢܹܐ. ܡܸܛܠ ܠܲܡ ܕܠܵܐ ܐܵܘܕܝܼ ܕܡܝܼܬܼ ܐܲܠܵܗܵܐ ܡܸܠܬܼܵܐ:
ܫܵܘܹ̇ܐ ܗ̄ܘ̣ܵܐ ܕܢܸܫܬܿܪܸܐ: ܕܕܓܸܠ̣ ܠܲܟܼܬܼܵܒܼܵܐ ܐܲܠܵܗܵܝܵܐ. ܘܬܼܘܼܒܼ ܡܸܛܠ
ܕܥܲܫܩܹܗ ܠܩܘܼܪܸܛܠܘܿܣ: ܕܠܲܐܠܵܗܵܐ ܡܸܠܬܼܵܐ ܐܵܡܲ݁ܪ ܗ̄ܘ̣ܵܐ ܕܡܝܼܬܼ:
pb. 367
ܟܲܕܼ ܗ̤ܘ ܠܵܐ ܐܸܡ݂ܲܪ. ܘܕܲܓܸܠ̣ ܐܵܦ ܠܲܟܼܬܼܵܒܼܵܐ: ܕܝܼܠܕܵܐ ܘܚܲܫܵܐ ܠܵܐ
ܗ̄ܘ̣ܵܐ ܥܲܠ ܐܲܠܵܗܘܼܬܼܵܐ ܡܲܠܸܦ: ܐܸܠܵܐ ܥܲܠ ܐ̄ܢܵܫܘܼܬܼܵܐ. ܘܲܥܫܲܩ̣ ܐܸܢܹܝܢ
ܐܵܦ ܠܲܟܼܬܼܝܼ̈ܬܼܵܐ ܕܩܲܕܝܼܫܵܐ ܘܪܵܚܹܡ ܐܲܠܵܗܵܐ ܩܘܼܪܸܠܘܿܣ ܐܲܦܸܤܩܘܿܦܵܐ:
ܐܲܝܟܼ ܐܲܝܠܹܝܢ ܕܐܵܡܪ̈ܵܢ ܠܹܗ ܚܵܫܘܿܫܵܐ ܠܐܲܠܵܗܵܐ ܡܸܠܬܼܵܐ. ܗܵܘ̇ ܡܵܐ:
ܕܠܵܐ ܗ̤ܘ ܘܠܵܐ ܐ̄ܢܵܫ ܐ̄ܚܪܹܝܢ ܡ̣ܢ ܐܲܝܠܹܝܢ ܕܲܒܼܕܼܚܸܠܲܬܼ ܐܲܠܵܗܵܐ
ܡܸܬܼܪܲܥܹܝܢ: ܐܲܡܪܲܚܘ ܠܡܹܐܡܲܪ . . .
ܥܲܠ ܚܕܼܵܐ ܡ̣ܢ ܗܵܠܹܝܢ ܓܹܝܪ ܙܵܕܹܩ ܕܲܢܩܲܛܪܓܼܘܼܢܵܢܝ: ܘܠܵܘ
ܥܲܠ ܬܲܪ̈ܬܲܝܗܹܝܢ. ܐܸܠܵܐ ܥܠܲܝ ܕܲܠܩܘܼ̈ܒܼܠܵܝܵܬܼܵܐ ܡܩܲܒܿܠܝܼܢ ܗ̄ܘ̣ܵܘ:
ܘܡ̣ܢ ܤܘܿܓܼܵܐܐ ܕܝܼܨܝܼܦܘܼܬܼܗܘܿܢ: ܕܢܸܦܤܩܘܼܢ ܗܵܘ̇ ܡܵܐ ܕܲܡܤܲܪܗܒܼܝܼܢ
ܗ̄ܘ̣ܵܘ ܥܠܵܘܗܝ ܠܵܐ ܨܵܒܹ̇ܝܢ ܗ̄ܘ̣ܵܘ: ܘܲܚܦܝܼܛܝܼܢ ܗ̄ܘ̣ܵܘ ܠܡܸܚܛܲܦ
ܢܲܦܫܗܘܿܢ ܘܲܠܡܸܤܕܲܩ: ܕܠܵܐ ܢܸܗܘܘܿܢ ܒܕܼܝܼܢܵܐ ܕܕܲܝܵܢܹ̈ܐ. ܐܸܠܵܐ ܐܲܝܟܼ
ܕܡ̣ܢ ܒܥܸܠܕܒܼܵܒܹ̈ܐ ܡܸܫܬܲܐܠܝܼܢ ܗ̄ܘ̣ܵܘ: ܐܲܝܟܲܢܵܐ ܕܲܢܚܵܘܘܿܢ ܗ̄ܘ̣ܵܘ
ܝܲܨܝܼܦܘܼܬܼܗܘܿܢ ܘܝܲܐܝܼܒܼܘܼܬܼܗܘܿܢ: ܘܲܢܸܤܬܲܒܼܪܘܼܢ ܕܚܝܼ̈ܠܹܐ ܥܲܠ
ܐܲܦܸܤܩ̈ܘܿܦܹܐ ܕܩܲܪܝܼܒܼܝܼܢ ܗ̄ܘ̣ܵܘ ܘܲܕܼܪܲܚܝܼܩܝܼܢ ܗ̄ܘ̣ܵܘ. ܘܟܼܠܗܹܝܢ
ܥ̣ܒܲܕܼܘ ܗ̄ܘ̣ܵܘ ܐܲܝܟܼ ܐܲܝܠܹܝܢ ܕܒܲܩܪ̈ܵܒܹܐ ܗܵܘ̈ܝܵܢ. ܘܐܲܝܠܹܝܢ ܕܡܸܨܪܵܝܵܐ
ܗ̄ܘ̣ܵܘ: ܘܐܲܝܠܹܝܢ ܕܡܲܡܢܘܿܢ ܕܡܸܢܗܘܿܢ ܡܸܬܼܥܲܕܪܝܼܢ ܗ̄ܘ̣ܵܘ: ܒܓܼܵܘ
ܡܕܝܼܢܬܼܵܐ ܡܸܬܼܟܲܪܟܼܝܼܢ ܗ̄ܘ̣ܵܘ: ܟܲܕܼ ܡܚܲܙܩܝܼܢ ܘܲܡܙܲܝܢܝܼܢ ܒܚܘܼܛܪܹ̈ܐ.
ܐ̄ܢܵܫܵܐ ܪܵܡܲܝ ܩܕܼܠܵܐ: ܕܥܲܠ ܐܝܼܕܲܝ̈ܗܘܿܢ ܡܫܵܘܪܝܼܢ ܗ̄ܘ̣ܵܘ: ܥܲܡ
ܩܥܵܬܼܵܐ ܕܒܲܪܒܿܪܵܝܹܐ. ܘܲܒܼܝܲܕܼ ܢܚܝܼܪ̈ܲܝܗܘܿܢ ܐܵܠܨ̇ܝܼܢ ܗ̄ܘ̣ܵܘ ܠܪܘܼܚܵܐ
ܚܸܡܬܼܵܢܵܝܬܼܵܐ: ܥܲܡ ܦܸܩ̈ܥܹܐ ܕܚܝܼ̈ܠܹܐ ܕܠܵܐ ܒܲܥܝܵܕܼܵܐ: ܟܲܕܼ ܢܵܫ̇ܡܝܼܢ ܗ̄ܘ̣ܵܘ
ܕܠܵܐ ܚܵܘܤܵܢ ܥܲܡ ܟ̱ܠܵܗ̇ ܪܵܡܘܼܬܼܵܐ: ܠܘܼܩܒܲܠ ܐܲܝܠܹܝܢ ܕܝܵܕܼܥ̇ܝܼܢ
ܗ̄ܘ̣ܵܘ ܕܠܵܐ ܫܵܠ̇ܡܝܼܢ ܠܐܲܝܠܹܝܢ ܕܡܸܤܬܲܥܪ̈ܵܢ ܡܸܢܗܘܿܢ. ܟܲܕܼ
pb. 368
ܡܲܟܼܪܟܼܝܼܢ ܗ̄ܘ̣ܵܘ ܙܲܓܹ̈ܐ ܒܲܡܕܼܝܼܢ̄ܬܼܵܐ: ܘܡܲܕܼܠܩܝܼܢ ܗ̄ܘ̣ܵܐ ܢܘܼܪܵܐ
ܒܕܼܘܼ̈ܟܿܝܵܬܼܵܐ ܤܲܓܿܝܼ̈ܐܵܬܼܵܐ: ܘܡܲܪܡܹܝܢ ܗ̄ܘ̣ܵܘ ܩܲܪ̈ܛܲܝܤܹܐ ܕܡܸܕܸܡ
ܡܸܕܼܡ. ܘܟܼܠܗܹܝܢ ܐܲܝܠܹܝܢ ܕܗܵܘ̈ܝܵܢ ܗ̣̄ܘܲܝ̈: ܕܕܼܘܼܡܵܪܵܐ ܗ̣̄ܘܲܝ̈
ܘܲܕܲܕܚܠܬܼܵܐ. ܐܲܝܟܲܢܵܐ ܕܠܐܘܼܪ̈ܚܵܬܼܵܐ ܟܠܗܹܝܢ ܢܤܘܼܓܼܘܼܢ: ܘܲܠܟܼܠܢܵܫ
ܢܸܥܒܿܕܼܘܼܢ ܕܢܸܥܪܘܿܩ ܘܠܵܐ ܢܸܬܼܚܙܸܐ. ܘܲܡܫܲܠܛܵܐܝܼܬܼ ܡܸܢܼܗܲܦܟܼܝܼܢ
ܗ̄ܘ̣ܵܘ: ܟܲܕܼ ܢܲܦܝܼܠܝܼܢ ܗ̄ܘ̣ܵܘ ܒܪܵܘܵܝܘܼܬܼܵܐ ܘܲܒܼܨܘܼܕܵܪܵܐ ܘܒܲܩܥܵܬܼܵܐ
ܫܟܼܝܼܪܬܵܐ. ܘܠܲܝܬܿ ܗ̄ܘ̣ܵܐ ܐ̄ܢܵܫ ܕܲܡܥܵܘܟܼ ܘܐܵܦ ܠܵܐ ܕܲܡܥܲܕܲܪ:
ܘܗܵܟܲܢܵܐ ܬܵܘܝܼܪܝܼܢ ܗ̄ܘ̣ܵܘ. ܟܠܗܹܝܢ ܕܹܝܢ ܠܩܘܼܒܼܠܲܢ ܡܸܤܬܲܥܪ̈ܵܢ
ܗ̣̄ܘܲܝ̈: ܘܡܸܛܠ ܗܵܢܵܐ ܐܸܬܼܚܲܫܲܚܢ ܒܥܘܼܕܼܪܵܢܵܐ ܕܡ̣ܢ ܡܠܟܵܐ:
ܘܲܒܼܫܘܼܠܛܵܢܵܐ ܕܐܸܤܛܪ̈ܵܛܝܸܓܹܐ: ܗܵܢ̇ܘܿܢ ܕܚܲܡܝܼܬܼܝܼܢ ܗ̄ܘ̣ܵܘ
ܒܐܲܝܠܹܝܢ ܕܡܸܤܬܲܥܪ̈ܵܢ ܘܫܵܒܼܩ̇ܝܼܢ ܗ̄ܘ̣ܵܘ ܕܢܸܗܘ̈ܝܵܢ.
ܐܸܬܼ݂ܵܐ ܗ̄ܘ̣ܵܐ ܕܹܝܢ ܐܲܦܸܤܩܘܿܦܵܐ ܕܐܲܢܛܝܵܟܼܝܵܐ ܥܲܡ ܐܲܦܸܤܩ̈ܘܿܦܹܐ
ܐ̄ܚܪ̈ܵܢܹܐ ܤܲܓܿܝܼ̈ܐܹܐ: ܗܵܢ̇ܘܿܢ ܕܒܼܵܥܹ̇ܝܢ ܗ̄ܘ̣ܵܘ ܕܢܸܬܿܦܘܼܢ ܐܸܢܘܿܢ
ܠܫܲܠܡܘܼܬܼܵܠ ܕܝܼܠܗܘܿܢ: ܒܐܲܝܠܹܝܢ ܕܥܵܘܠܵܐܝܼܬܼ ܐܸܤܬܿܥܲܪ ܘܡܲܪܵܝܵܐܝܼܬܼ:
ܘܲܠܢܲܦܫܗܘܿܢ ܤܘܼܢܗܵܕܘܿܣ ܬܹܒܹܠܵܝܬܼܵܐ ܡܫܲܡܗܝܼܢ ܗ̄ܘ̣ܵܘ. ܘܡ̣ܢ
ܕܝܼܕܲܥ̣ܘ ܗ̄ܘ̣ܵܘ ܐܲܝܠܹܝܢ ܕܡܲܪܵܚܵܐܝܼܬܼ ܡܸܫܬܼܿܥܪ̈ܵܢ ܗ̣̄ܘܲܝ̈:
ܘܲܠܓܼܘܼܡܕܵܢܘܼܬܼܗܘܿܢ ܫܟܼܝܼܪܬܵܐ: ܘܠܲܩܪܵܒܼܗܘܿܢ ܕܡ̣ܢ ܫ݂ܠܝ:
ܘܚܹܐܦܵܐ ܕܫܵܢܝܘܼܬܼܵܐ ܕܲܡܥܲܬܿܕܵܐܝܼܬܼ ܟܠܗܹܝܢ ܤܵܥ̇ܪܝܼܢ ܗ̄ܘ̣ܵܘ: ܠܗܘܿܢ
ܠܲܡܕܲܒܿܪ̈ܵܢܹܐ ܕܲܒܼܠܸܠܘܼܬܼܵܐ ܗܵܝ̇: ܗܵܢܘܿܢ ܕܲܠܟܼܠܵܗ̇ ܒܝܼܫܬܼܵܐ ܗܵܕܹܐ
ܐܲܩܝܼܡܘ ܗ̄ܘ̣ܵܘ: ܫܪܵܘ ܐܸܢܘܿܢ ܡ̣ܢ ܕܪܓܼܵܐ ܕܐܲܦܸܤܩܘܿܦܘܼܬܼܗܘܿܢ.
ܐܵܡܲ݁ܪ ܐ̄ܢܵܐ ܕܹܝܢ ܥܲܠ ܖܩܘܼܪܸܠܘܿܣ ܘܡܲܡܢܘܿܢ. ܠܫܲܪܟܵܐ ܕܹܝܢ
pb. 369
ܕܲܡܕܲܒܿܪ̈ܵܢܲܝܗܘܿܢ ܒܚܸܪܡܵܐ ܥ̣ܒܲܕܼܘ ܐܸܢܘܿܢ: ܕܠܵܐ ܢܸܤܥܪܘܼܢ
ܡܸܕܼܡ ܒܲܥܒܼܵܕܼܵܐ ܕܐܵܦܸܤܩܘܿܦܘܼܬܼܵܐ: ܐܲܝܟܼ ܕܠܲܐܝܼܠܹܝܢ ܕܠܵܐ ܐܸܬܼܚܲܫܚܘ
ܒܢܝܼܫܵܐ ܘܲܒܼܩܵܢܘܿܢܵܐ ܕܐܲܦܸܤܩܘܿܦܘܼܬܼܵܐ: ܐܸܠܵܐ ܒܫܘܼܠܛܵܢܵܐ. ܘܐܲܝܟܲܢܵܐ
ܕܠܵܐ ܢܸܟܼܦܪܘܼܢ ܐܵܘ ܢܛܲܫܘܿܢ ܠܐܲܝܠܹܝܢ ܕܠܘܼܩܒܲܠܗܘܿܢ ܐܸܤܬܿܥܲܪ:
ܟܬܲܒܼܘ ܫܪܵܝܗܘܿܢ ܒܟܼܠܗܹܝܢ ܕܘܼ̈ܟܿܝܵܬܼܵܐ ܕܲܡܕܼܝܸܢ̄ܬܼܵܐ: ܕܢܸܗܘܿܢ ܠܗܘܿܢ
ܟܠܗܘܿܢ ܤܵܗ̈ܕܹܐ ܕܐܸܫܬܿܪܝܼܘ ܠܗܘܿܢ: ܘܲܕܼܡܸܛܠ ܐܲܝܠܹܝܢ ܐܸܫܬܿܪܝܼܘ.
ܠܗܵܠܹܝܢ ܐܵܘܕܲܥ̣ܘ ܐܸܢܹܝܢ ܠܡܲܠܟܵܐ ܒܝܲܕܼ ܟܬܼܝܼ̈ܒܼܵܬܼܵܐ ܕܤܘܼܢܗܵܕܘܿܣ:
ܘܲܠܡܲܪܵܚܘܼܬܼܗܘܿܢ ܕܲܒܼܟܼܠܗܹܝܢ: ܘܠܲܩܪܵܒܼܵܐ ܕܲܗܘ̤ܵܐ ܒܛܲܟܼܤܵܐ
ܕܒܲܪܒܿܪܵܐܝܹܐ. ܘܡܸܛܠ ܗܵܕܹܐ ܐܵܦ ܠܵܐ ܠܲܡܨܲܠܵܝܘܼ ܡܲܪܦܹܝܢ ܗ̄ܘ̣ܵܘ
ܠܗܘܿܢ ܒܒܹܝܬܼ ܫܠܝܼܚܹ̈ܐ ܕܩܲܕܝܼܫܵܐ ܝܘܿܚܲܢܵܢ: ܘܕܲܗܘ̤ܵܘ ܠܗܘܿܢ
ܪ̈ܵܓܼܘܿܡܹܐ: ܘܕܲܠܡܲܚܤܸܢ ܥܪܲܩ̣ܘ ܘܐܸܫܬܵܘܙܲܒܼܘ. ܘܐܸܡ݂ܲܪܘ ܐܵܦ ܠܥܸܠܬܼܵܐ
ܕܡܸܛܠܵܬܼܵܗ̇ ܗܵܕܹܐ ܐܲܡܪܲܚܘ ܠܡܸܥܒܲܕܼ: ܐܲܝܟܲܢܵܐ ܕܠܵܐ ܢܸܬܼܒܲܚܲܢ ܡ̣ܢ
ܤܘܼܢܗܵܕܘܿܣ: ܗܵܘ̇ ܡܵܐ ܕܲܫܓܼܘܼܫܝܵܐ ܕܦܵܠܓܘܼܬܼܵܐ ܗܵܕܹܐ ܥ̣ܒܲܕܼ ܗ̄ܘ̣ܵܐ
ܒܥܹ̈ܕܵܬܼܵܐ. ܐܵܡܲ݁ܪ ܐ̄ܢܵܐ ܕܹܝܢ ܥܲܠ ܪܹ̈ܫܹܐ ܬܪܸܥܤܲܪ: ܗܵܢ̇ܘܿܢ ܕܲܒܼܠܵܐ
ܟܘܼܚܵܕܼܵܐ ܘܒܸܗܬܿܬܼܵܐ ܐܸܬܼܟܬܸܒܼܘ ܠܘܼܩܒܲܠ ܐܲܠܵܗܵܐ ܡܸܠܬܼܵܐ: ܠܵܐ
ܡܵܝܘܿܬܼܵܐ ܘܠܵܐ ܡܸܬܼܚܲܒܿܠܵܢܵܐ. ܘܲܕܼܙܵܕܹܩ ܤܲܓܿܝܼܵܐܝܼܬܼ ܠܡܹܐܨܲܦ: ܕܠܵܐ
ܢܸܫܬܲܒܼܩܘܼܢ ܕܠܵܐ ܒܘܼܚܵܢܵܐ ܓܘܼ̈ܕܵܦܹܐ ܕܐܲܝܟܼ ܗܵܠܹܝܢ: ܕܐܵܦܠܵܐ ܕܒܹܝܬܼ
ܐܵܪܝܼܘܿܣ ܐܲܡܪܲܚܘ ܠܡܹܐܡܲܪ ܓܲܠܝܵܐܝܼܬܼ ܠܘܼܩܒܲܠ ܐܲܠܵܗܵܐ ܡܸܠܬܼܵܐ.
ܟܬܲܒܼ ܕܹܝܢ ܠܡܲܠܟܵܐ ܐܵܦ ܩܘܼܪܸܠܘܿܣ ܘܲܒܼ̈ܢܲܝ ܐܸܤܛܵܤܝܼܢ
ܕܝܠܹܗ: ܟܲܕܼ ܒܤܲܓܿܝܼ̈ܐܵܬܼܵܐ ܗܵܕܼܠܝܼܢ ܗ̄ܘ̣ܵܘ ܠܝܘܿܗܲܢܝܼܣ: ܐܲܝܟܼ ܡܲܢ
pb. 370
ܕܡܲܪܵܚܵܐܝܼܬܼ ܫܪܵܝܗܝ ܗ̄ܘ̣ܵܐ ܠܩܘܼܪܸܠܘܼܣ: ܡܸܛܠ ܪܵܚܡܘܼܬܼܵܐ
ܕܲܡܫܲܟܿܢܵܐ ܗ̄ܘ̣ܵܬܼ ܠܹܗ ܠܘܵܬܼܝ. ܘܲܤܢܝܼܩܝܼܢ ܗ̄ܘ̣ܵܘ ܕܐܵܦ ܗܵܢ̇ܘܿܢ
ܕܲܢܫܲܪܪܘܼܢ ܩܵܬܼܵܪܵܤܝܼܣ ܕܝܼܠܝܼ: ܘܢܸܫܪܘܼܢ ܠܗܵܝ̇ ܕܩܘܼܪܸܠܘܿܣ
ܘܲܕܼܡܲܡܢܘܿܢ. ܠܵܐ ܓܹܝܪ ܐܲܡܪܲܚܘ ܗ̄ܘ̣ܵܘ ܠܡܸܟܼܬܲܒܼ ܗܵܠܹܝܢ
ܕܝܘܿܗܲܢܝܼܣ ܘܲܕܼܤܘܼܢܗܵܕܘܿܣ ܕܥܲܡܹܗ ܘܲܠܡܸܠܲܝ̈ܗܘܿܢ: ܕܐܲܝܟܲܢܵܐ
ܕܡ̣ܢ ܟܬܼܝܼ̈ܒܼܵܬܼܵܐ ܕܕܼܚܸܠܲܬܼ ܐܲܠܵܗܵܐ ܕܲܒܼܟܼܘܿܢ ܐܸܫܬܲܕܲܪ: ܓܵܘܵܢܵܐܝܼܬܼ ܥܲܡܲܢ
ܟܢܝܼܫܝܼܢ ܗ̄ܘ̣ܵܘ: ܘܲܡܫܲܝܢܵܐܝܼܬܼ ܘܚܲܬܿܝܼܬܼܵܐܝܼܬܼ ܠܐܲܝܠܹܝܢ ܕܡܸܬܿܬܲܒܼ̈ܥܵܢ
ܗ̣̄ܘܲܝ̈ ܒܲܚܸܢ ܚ̄ܢܲܢ: ܠܲܡܫܲܪܵܪܘܼ ܗܲܝܡܵܢܘܼܬܼܵܐ ܕܕܸܚܠܲܬܼ ܐܲܠܵܗܵܐ ܕܐܲܒܼ̈ܗܵܬܼܵܐ.
ܗܵܢܹܝܢ ܕܡ̣ܢ ܡܲܠܟܵܐ ܐܸܬܼܦܲܩܲܕܼ: ܘܐܵܦ ܡ̣ܢ ܡܲܕܢܚܵܝܹ̈ܐ ܡܸܬܿܬܲܒܼ̈ܥܵܢ
ܗ̣̄ܘܲܝ̈: ܘܐܲܡܝܼܢܵܐܝܼܬܼ ܡܤܲܟܹܿܝܢ ܗ̄ܘ̣ܵܘ ܠܗܵܠܹܝܢ. ܗܵ̇ܢ̇ܘܿܢ ܕܒܲܟܼܬܼܵܒܹ̈ܐ
ܐܲܠܵܗܵܝܹ̈ܐ ܬܟܼܝܼܠܝܼܢ ܗ̄ܘ̣ܵܘ: ܘܲܒܼܡܲܠܦܵܢܘܼܬܼܵܐ ܕܐܲܒܼ̈ܗܵܬܼܵܐ: ܠܵܐ ܐܲܡܪܲܚܘ
ܕܐܵܦܸܢ ܒܐܸܤܟܹܡܵܐ ܢܹܐܡܪܘܼܢ: ܢܸܗܘܸܐ ܕܝܼܢܵܐ: ܐܵܦܠܵܐ ܡܸܛܠ
ܕܢܸܥܪܩܘܼܢ ܡ̣ܢ ܡܹܐܟܲܠ ܩܲܪܨܵܐ. ܒܪܲܡ ܠܵܐ ܡܲܡܪܚܝܼܢ ܗ̄ܘ̣ܵܘ
ܠܡܸܥܒܲܕܼ ܒܥܵܬܼܵܐ ܘܕܝܼܢܵܐ ܕܐܲܝܠܹܝܢ ܕܡܼܬܿܬܲܒܼ̈ܥܵܢ ܗ̣̄ܘܲܝ̈ ܠܡܸܗܘܵܐ:
ܡܸܛܠ ܕܠܵܐ ܬܟܼܝܼܠܝܼܢ ܗ̄ܘ̣ܵܘ ܒܐܲܝܠܹܝܢ ܕܲܟܼܬܲܒܼܘ. ܘܲܕܼܗܵܠܹܝܢ
ܫܲܪܝܼܪܵܐܝܼܬܼ ܐܵܡܲ݁ܪ ܐ̄ܢܵܐ: ܩܪܵܘ ܠܐܲܢܵܦ̇ܘܿܪܵܐ ܕܗܵܠܹܝܢ ܘܲܕܼܗܵܢ̇ܘܿܢ.
ܐܲܝܟܲܢܵܐ ܕܬܸܕܲܥܘܼܢ: ܕܗܵܠܹܝܢ ܒܟܼܠܙܒܲܢ ܒܵܥܹ̇ܝܢ ܗ̄ܘ̣ܵܘ ܕܢܸܗܘܸܐ ܕܝܼܢܵܐ:
ܗܵܢ̇ܘܿܢ ܕܹܝܢ ܥܵܪܩܝܼܢ ܗ̄ܘ̣ܵܘ.
pb. 371
ܐܸܓܲܪܬܵܐ ܕܐܸܫܬܲܕܪܲܬ̤ ܠܘܵܬܼ ܡܲܠܟܵܐ ܡ̣ܢ ܝܘܿܚܲܢܵܢ ܐܲܦܸܤܩܘܿܦܵܐ
ܕܐܲܢܛܝܵܟܼܝܵܐ ܘܡ̣ܢ ܐܲܦܸܤܩ̈ܘܿܦܹܐ ܐ̄ܚܪ̈ܢܹܐ ܕܐܸܬܼܟܲܢܲܫܘ ܥܲܡܹܗ.
ܟܲܕܼ ܐܸܬܼܦܩܸܕܼܢܲܢ ܚܢܲܢ ܡ̣ܢ ܟܬܼܝܼ̈ܒܼܵܟܼܘܿܢ: ܡܲܢܲܥܢ ܚ̄ܢܲܢ ܠܐܲܦܸܤܘܿܣ
ܡܝܼܛܪܵܦܘܿܠܝܼܣ ܘܐܸܫܟܲܚܢ ܚ̄ܢܲܢ ܟܠ ܫܵܓܼܘܿܫܝܼ̈ܢ: ܘܲܩܪܵܒܹܐ ܕܓܼܵܘܵܐ
ܕܲܡܠܹܝܢ ܤܘܼܥܪܵܢܹܐ ܕܥܹ̈ܕܵܬܼܵܐ. ܕܐܸܬܼܐܵܘܝܘܼ ܓܹܝܪ ܐܲܟܼܚ̄ܕܼܵܐ ܩܘܼܪܸܠܹܐ
ܕܐܵܠܹܟܼܤܲܢܕܪܝܼܵܐ ܘܡܲܡܢܘܿܢ ܕܐܲܦܸܤܘܿܣ: ܘܲܟܼܢܘܼܫܝܵܐ ܪܲܒܵܐ ܕܩܘܼܪ̈ܚܹܐ
ܟܲܢܸܫ̣ܘ. ܘܥܹܐܕܼܵܐ ܕܦܲܢܛܹܩܘܼܤܛܹܐ ܩܲܕܝܼܫܬܼܵܐ ܠܵܐ ܫܩܲܒ̣ܘ ܕܢܸܗܘܸܐ:
ܘܠܵܐ ܬܸܫܡܸܫܬܼܵܐ ܕܪܲܡܫܵܐ ܘܲܕܼܨܲܦܪܵܐ. ܘܥܲܡ ܗܵܠܹܝܢ: ܐܵܦ ܥܹ̈ܕܼܵܬܼܵܐ
ܘܒܹܝܬܼ ܤܵܗ̈ܕܘܵܬܼܵܐ ܐܸܚܲܕܼܘܼ. ܥܲܡ ܢܲܦܫܗܘܿܢ ܕܹܝܢ ܘܥܲܡ ܐܲܝܠܹܝܢ
ܕܐܲܝܛܥܝܼܘ ܐܸܬܼܟܲܢܲܫܘ: ܘܪܸܒܿܘܿ ܥܵܘܼ̈ܠܝܼܢ ܤ̣ܥܲܪܘ: ܘܩܵܢܘܿܢܹ̈ܐ ܕܐܲܒܼܵܗܲܝ̈ܢ
ܩܲܕܝܼ̈ܫܹܐ ܥܲܡ ܦܘܼܩܪܵܡܟܼܘܿܢ ܕܵܫܘ. ܘܗܵܠܹܝܢ ܟܲܕܼ ܫܒܝܼܚ ܒܪܲܒܿܘܼܬܹܗ
ܩܘܿܡܹܣ ܩܲܢܕܝܼܕܝܵܢܵܐ: ܗܵܘ̇ ܕܡ̣ܢ ܫܘܼܠܛܵܢܟܼܘܿܢ ܪܵܚܹܡ ܠܲܡܫܝܼܚܵܐ
ܐܸܫܬܲܕܲܪ: ܤܲܗܸܕܼ ܐܸܢܘܿܢ ܒܲܟܼܬܼܵܒܼܵܐ ܘܲܕܼܠܵܐ ܟܬܼܵܒܼܵܐ: ܕܲܢܤܲܟܿܘܿܢ
ܠܡܹܐܬܼܝܼܬܼܵܐ ܕܟܼܠܗܘܿܢ ܩܲܕܼܝܼ̈ܫܹܐ ܐܲܦܸܤܩ̈ܘܿܦܹܐ: ܘܗܵܝܕܹܝܢ ܢܸܗܘܸܐ ܗܵܘ̇
ܡܸܕܸܡ ܕܡܸܬܼܚܙܸܐ ܠܲܟܼܢܘܼܫܝܵܐ ܕܓܼܵܘܵܐ: ܐܲܝܟܼ ܟܬܼܝܼ̈ܒܼܵܬܼܵܐ ܕܕܼܚܠܲܬܼ
ܐܲܠܵܗܵܐ ܕܲܒܼܟܼܘܿܢ. ܟܲܕܼ ܐܵܦ ܗ̤ܘ ܩܘܼܪܸܠܹܐ ܐܵܠܹܟܼܤܲܢܕܪܵܝܐ ܫܠܲܚ̣
ܠܘܵܬܼܝ ܒܲܟܼܬܼܝܼ̈ܒܼܵܬܼܵܐ ܡ̣ܢ ܩܵܕܼܵܡ ܬܪܹܝܢ ܝܵܘܡ̈ܝܼܢ ܕܢܸܥܒܸܿܕܼ ܟܢܘܼܫܝܵܐ:
ܐܲܝܟܼ ܕܤܘܼܢܗܵܕܘܿܣ ܟ̱ܠܸܗ̇ ܡܩܵܘܝܵܐ ܠܡܹܐܬܼܝܼܬܼܝ. ܡܸܛܠ ܗܵܕܹܐ:
ܕܲܬܼܪ̈ܝܗܘܿܢ ܗܵܠܹܝܢ ܕܐܸܬܼܐܡܲܪܘ ܡ̣ܢ ܠܥܸܠ: ܕܩܘܼܪܸܠܹܐ
ܘܲܕܡܲܡܢܘܿܢ: ܥܒܲܕܼܢ ܚ̄ܢܲܢ ܩܵܬܼܪܵܤܝܼܣ: ܘܡ̣ܢ ܟ̱ܠܵܗ̇ ܬܸܫܡܸܫܬܼܵܐ
pb. 372
ܪܘܼܚܵܢܵܝܬܼܵܐ ܢܲܟܼܪܝܼܢ ܐܸܢܘܿܢ. ܠܗܵܢܘܿܢ ܕܹܝܢ ܕܫܲܪܟܵܐ: ܕܐܸܫܬܵܘܬܲܦ
ܥܲܡܗܘܿܢ ܠܥܵܘ̣ܠܵܐ: ܒܟܸܠܝܵܢܵܐ ܥܒܲܕܼܢܲܢ. ܥܕܲܡܵܐ ܕܪܹ̈ܫܹܐ ܐܲܝܠܹܝܢ
ܕܐܸܫܬܲܕܲܪܘ ܡ̣ܢ ܩܘܼܪܸܠܘܿܣ ܕܲܡܠܹܝܢ ܬܲܪܥܝܼܬܼܵܐ ܒܝܼܫܬܼܵܐ: ܘܠܵܚܡܝܼܢ
ܠܡܲܠܦܵܢܘܼܬܼܵܐ ܕܐܵܦܘܿܠܝܼܢܵܪܝܼܣ ܘܕܼܵܐܪܝܼܘܿܣ ܘܕܼܐܘܼܢܵܡܝܼܣ ܐܲܚܪܡܘܼܢ.
ܘܐܲܝܟܼ ܟܐܼܝܼ݁ܒܼܵܬܼܵܐ ܕܕܼܚܠܲܬܼ ܐܲܠܵܗܵܐ ܕܲܒܼܟܼܘܿܢ: ܐܵܘܝܵܐܝܼܬܼ ܐܲܟܼܚ̄ܕܼܵܐ
ܢܸܬܼܟܲܢܫܘܼܢ ܥܲܡܲܢ ܒܢܝܼܚܘܼܬܼܵܐ: ܘܚܲܬܿܝܼܬܵܐܝܼܬܼ ܢܸܒܼܨܘܿܢ ܥܲܡܲܢ ܡܸܕܸܡ
ܕܡܸܬܼܒܿܥܸܐ: ܘܗܲܝܡܵܢܘܼܬܼܵܐ ܫܲܪܝܪܬܵܐ ܕܐܲܒܼܵܗܲܝܣ̈ܢ ܢܫܲܪܪܘܼܢ. ܡܸܛܠ
ܕܹܝܢ ܙܥܘܿܪܘܼܬܼܝ ܕܝܼܠܝܼ ܗܘ̤ܵܬܼ ܝܵܕܼܥܵܐ ܡܲܠܟܿܘܼܬܼܟܼܘܿܢ: ܕܲܠܦܘܼܬܼ
ܢܘܼܓܼܪܵܐ ܕܐܘܼܪܚܵܐ: ܘܥܲܡ ܗܵܝ̇ ܕܲܒܼܝܲܒܼܫܵܐ ܪܕܲܝܢ ܚ̄ܢܲܢ: ܡܤܲܪܗܒܼܵܐܝܼܬܼ
ܘܩܲܠܝܼܠܵܐܝܼܬܼ ܩܲܕܡܸܢ ܐܸܢܘܿܢ. ܐܲܪܒܿܥܝܼܢ ܓܹܝܪ ܡܲܤܝܘܿܢܝܼ̈ܢ ܚܙܲܩܢ ܚ̄ܢܲܢ:
ܟܲܕ ܐܵܦܠܵܐ ܚܲܕܼ ܢܚܵܝܵܐ ܦܓܲܥ̣ ܒܲܢ ܒܡܲܪܕܝܼܬܲܢ. ܘܫܲܠܝܼܛ
ܠܡܲܠܟܿܘܼܬܼܟܼܘܿܢ ܪܵܚܡܲܬܼ ܠܲܡܫܝܼܚܵܐ: ܕܠܵܦ ܡ̣ܢ ܥܵܡܘܿܪܹ̈ܐ
ܕܒܲܡܕܼܝܼ̈ܢܵܬܼܵܐ ܟܠܗܹܝܢ ܕܲܥܒܲܪܢ ܚ̄ܢܲܢ ܒܗܹܝܢ ܬܹܐܠܦܘܼܢ. ܥܲܡ ܗܵܠܹܝܢ
ܕܹܝܢ ܐܵܦ ܡ̣ܢ ܟܲܦܢܵܐ ܕܲܗܘ̤ܵܐ ܒܐܲܢܛܝܵܟܼܝܵܐ: ܘܡ̣ܢ ܫܚܵܩܵܐ ܕܓܲܒܹ̈ܐ
ܕܲܒܼܟܼܠܝܘܿܡ: ܘܡ̣ܢ ܡܸܛܪܹ̈ܐ ܤܲܓܿܝܼ̈ܐܹܐ ܘܲܢܼܟܼܝܼ̈ܒܹܐ ܕܲܕܠܵܐ ܒܙܲܒܼܢܵܐ
ܗܘ̤ܵܘ: ܘܡ̣ܢ ܩܹܘܲܢܕܹܝܡܘܿܣ ܕܲܗܘ̤ܵܐ ܒܛܵܘܦܵܢܵܐ ܕܲܩܪܸܒܼ ܠܲܡܕܼܝܼܢ̄ܬܼܵܐ:
ܠܵܘ ܝܵܘ̈ܡܵܬܼܵܐ ܙܥܘܼܕܹ̈ܐ ܐܵܦ ܒܵܗ̇ ܒܲܡܕܝܼܢ̄ܬܼܵܐ ܐܸܬܼܠܒܸܟܼܢ ܚ̄ܢܲܢ.
ܡ̣ܢ ܕܹܝܢ ܕܲܠܗܵܠܹܝܢ ܚ̣ܙܵܐ ܗ̄ܘ̣ܵܐ ܡܲܠܟܵܐ: ܐܸܬܼܚܲܡܲܬܼ ܥܲܠ ܐܲܝܠܹܝܢ
ܕܗ̤ܘܲܝ̈ ܠܘܼܩܒܲܠܝ: ܕܠܵܐ ܒܘܼܚܵܢܵܐ ܘܲܕܼܠܵܐ ܕܝܼܢܵܐ. ܘܝܼܡ̣ܵܐ ܗ̄ܘ̣ܵܐ ܕܠܵܐ
ܗܵܘܹ̇ܐ ܡܸܕܸܡ ܐ̄ܚܪܹܝܢ ܠܒܲܪ ܡ̣ܢ ܗܵܘ̇ ܡܵܐ ܕܡ̣ܢ ܩܕܝܼܡ ܐܸܬܿܬܿܤܝܡ
ܗ̄ܘ̣ܵܐ ܕܢܸܗܘܸܐ: ܗܵܢܵܘ ܕܹܝܢ ܕܝܼܢܵܐ ܘܒܼܘܼܚܵܢܵܐ ܕܐܲܝܠܹܝܢ ܕܡܸܬܿܬܲܒܼ̈ܥܵܢ
ܗ̣̄ܘܲܝ̈. ܡܸܛܠ ܕܐܵܦ ܥܲܠ ܗܵܕܹܐ ܗ̄ܘ̣ ܐܸܬܼܟܲܢܫܲܬ̤ ܤܘܼܢܗܵܕܘܿܣ
pb. 373
ܬܹܒܹܠܵܝܬܼܵܐ: ܕܬܸܬܿܦܝܼܣ ܐܲܟܲܚ̄ܕܼ ܥܲܠ ܒܘܼܚܵܢܵܐ ܕܗܵܘܹ̇ܐ ܒܘܵܠܝܼܬܼܵܐ.
ܟܲܕܼ ܕܹܝܢ ܚ̣ܙܵܘ ܗܵܠܹܝܢ ܕܒܹܝܬܼ ܩܘܼܪܸܠܘܿܣ ܠܚܹܐܦܹܗ ܕܡܲܠܟܵܐ
ܕܲܠܗܵܕܹܐ ܢܩܸܐ: ܡ̣ܢ ܗܵܝܕܝܟ ܫܓܼܘܼܫܝܵܐ ܘܐܸܤܛܵܤܝܼܣ ܡܙܝܼܥܝܼܢ
ܗ̄ܘ̣ܵܘ ܒܥܲܡܵܐ ܥܲܡ ܩܥܵܬܼܵܐ: ܐܲܝܟܼ ܡ̇ܢ ܕܠܘܼܩܒܲܠ ܐܲܠܵܗܵܐ ܐܝܼܬܼܵܘܗܝ
ܡܲܠܟܵܐ. ܟܲܕܼ ܩܵܝ̇ܡܝܼܢ ܗ̄ܘ̣ܵܘ ܠܘܼܩܒܲܠ ܪܵܘܪ̈ܒܼܵܢܹܐ ܘܪܹ̈ܫܵܢܹܐ: ܐܲܝܠܹܝܢ
ܕܠܵܐ ܡܢܵܚܝܼܢ ܗ̄ܘ̣ܵܘ ܒܐܲܝܠܹܝܢ ܕܐܸܬܿܬܥܲܪ ܡܸܢܗܘܿܢ: ܘܲܠܟܼܠ ܕܘܼܟܿ
ܡܲܪܗܛܝܼܢ ܗ̄ܘ̣ܵܘ. ܢܤܲܒ̣ܘ ܗ̄ܘ̣ܵܘ ܕܹܝܢ ܥܲܡܗܘܿܢ ܠܪܵܡܘܼܬܼܵܐ
ܘܲܠܡܵܪܵܚܘܼܬܼܵܐ ܗܵܕܹܐ: ܐܵܦ ܠܐܲܝܠܹܝܢ ܕܡ̣ܢ ܕܲܝܪ̈ܬܼܵܐ ܤܕܸܝܼܩܝܼܢ
ܗ̄ܘ̣ܵܘ ܘܲܦܠܝܼܓܼܝܼܢ: ܡܸܛܠ ܚܲܝܲܝ̈ܗܘܿܢ ܘܕܼܘܼܒܵܪ݁̈ܲܝܗܘܿܢ ܦܲܪ̈ܝܼܫܹܐ:
ܘܡܸܛܠ ܗܵܕܹܐ ܐܸܬܿܛܪܸܕܼܘ ܗ̄ܘ̣ܵܘ: ܘܲܐܠܟܼܠܗܘܿܢ ܐܲܝܠܹܝܢ ܕܐܝܼܬܲܝܗܘܿܢ
ܗ̄ܘ̣ܵܘ ܡ̣ܢ ܕܼܚ̈ܠܵܬܼܵܐ ܕܗܹܪܹ̈ܤܝܼܵܣ: ܘܐܲܚܝܼܕܹܝܢ ܗ̄ܘ̣ܵܘ ܒܕܼܚܠܬܼܵܐ
ܘܲܒܼܤܸܢܵܐܬܼܵܐ ܕܠܘܼܩܒܲܠܝ. ܘܚܲܕܼ ܡܲܫܒܼܵܐ ܗܘ̤ܵܐ ܠܟܼܠܗܘܿܢ: ܠܲܝܗܘܼ̈ܕܼܵܝܹܐ
ܘܲܠܚܲܢ̈ܦܹܐ ܘܲܠܟܼܠܗܹܝܢ ܕܚ̈ܠܵܬܼܵܐ: ܘܝܼܨܦܝܼܢ ܗ̄ܘ̣ܵܘ ܕܠܵܐܝܠܹܝܢ ܕܲܕܼܠܵܐ
ܒܘܼܚܵܢܵܐ ܐܸܤܬܿܥܲܪ ܥܠܲܝ: ܕܠܵܐ ܒܘܼܚܵܢܵܐ ܢܩܲܒܿܠܘܼܢ ܐܸܢܹܝܢ. ܘܐܲܟܲܚ̇ܕ
ܟܠܗܘܿܢ ܡܸܬܼܪܲܥܹܝܢ ܗܘ̣ܵܘ: ܐܵܦ ܐܲܝܠܹܝܢ ܕܡܸܫܬܵܘܬܿܦܝܼܢ ܗ̄ܘ̣ܵܘ ܠܝܼ
ܒܦܵܬܼܘܿܪܵܐ ܘܲܒܲܨܠܘܿܬܼܵܐ ܘܲܒܼܪܸܥܝܵܢܵܐ: ܐܸܬܼܚܲܒܲܟܼܘ ܥܲܡܗܘܿܢ ܒܪܵܚܡܘܼܬܼܵܐ
ܕܠܵܐ ܦܘܼܪܵܫ: ܘܲܒܼܦܸܓܼܥܵܐ ܕܒܲܚܕܼܵܕܹ̈ܐ: ܘܲܒܼܩܘܼܒܵܠܵܐ ܕܲܒܼ̈ܒܼܵܬܹܐ:
ܘܲܒܼܬܿܫܕܲܪܬܵܐ: ܘܲܒܼܫܘܼܪܵܪܵܐ ܕܐܲܝܠܹܝܢ ܕܲܥܠܲܝ: ܘܢܵܕܪܝܼܢ ܗ̄ܘ̣ܵܘ ܠܲܚܕܼܵܕܹ̈ܐ
ܢܸܕܼܪܹ̈ܐ ܕܲܥܠܲܝ. ܗܵܠܹܝܢ ܒܩܲܕܼܡܵܝܑܬܼ ܐܵܦ ܠܵܐ ܕܡܸܤܬܿܒܼܵܪܘܼ
ܡܸܤܬܲܒܼܪܝܼܢ ܕܝܵܗ̇ܒܿܝܼܢ ܫܠܵܡܵܐ ܠܗܲܪ̈ܵܛܝܼܩܹܐ: ܐܵܦܸܢ ܡܸܤܬܲܒܼܪܝܼܢ
pb. 374
ܗ̄ܘ̣ܵܘ ܕܐܵܪ̈ܬܵܕܘܿܟܿܤܹܐ ܐܝܼܬܲܝܗܘܿܢ ܨܵܒܹ̇ܝܢ ܗ̄ܘ̣ܵܘ: ܥܲܠ ܠܵܐ ܡܸܕܸܡ
ܐܸܬܼܦܲܠܲܓܼܘ ܗ̄ܘ̣ܵܘ.
ܤܲܓܿܝܼܐܵܐ ܗ̣̄ܝ ܓܹܝܪ ܠܡܹܐܡܲܪ ܠܡܸܠܬܼܵܐ ܕܚܸܠܡܹ̈ܐ ܕܲܡܬܲܢܹܝܢ
ܗ̄ܘ̣ܵܘ: ܕܗܵܢ̇ܘܿܢ ܗܵܠܹܝܢ ܐܵܡ̇ܪܝܼܢ ܗ̄ܘ̣ܵܘ ܕܲܚ̣ܙܵ ܥܲܠܝ: ܘܲܐ̄ܚܪ̈ܵܢܹܐ
ܐ̄ܚܪ̈ܵܢܝܵܬܼܵܐ. ܘܡܲܬܡܗܝܼܢ ܗ̄ܘ̣ܵܘ ܠܫܵܡ̈ܘܿܥܹܐ: ܒܩܲܕܝܼ̈ܫܹܐ ܟܹܐܡܲܬܼ ܕܚܵܙܹ̇ܝܢ
ܗ̄ܘ̣ܵܘ: ܘܲܒܼܓܸܠܝܵܢܹ̈ܐ ܕܡܸܬܿܬܲܢܹܝܢ ܗ̄ܘ̣ܵܘ ܡܸܢܗܘܿܢ: ܘܒܲܢܒܝܼܘܼܬܼܵܐ
ܕܡܸܬܼܓܲܒܼܠܵܐ ܗ̄ܘ̣ܵܬܼ. ܠܲܝܬܿ ܗ̄ܘ̣ܵܐ ܓܹܝܪ ܐ̄ܢܵܫ ܡܸܢܗܘܿܢ ܕܒܲܛܝܼܠ
ܗ̄ܘ̣ܵܐ: ܘܠܵܐ ܕܦܲܪܝܼܩ ܗ̄ܘ̣ܵܐ ܡ̣ܢ ܫܵܘܬܵܽܦܘܼܬܼܗܘܿܢ. ܠܵܐ ܐܵܡܲ݁ܪ ܐ̄ܢܵܐ
ܥܲܠ ܟܪܸ̈ܤܛܝܵܢܹܐ ܒܲܠܚܘܿܕܼ: ܐܸܠܵܐ ܐܵܦ ܚܲܢ̈ܦܹܐ. ܠܟܼܠ ܐ̄ܢܵܫ ܓܹܝܪ
ܡܦܝܼܤܝܼܢ ܗ̄ܘ̣ܵܘ ܥܲܠ ܟܠܗܹܝܢ ܐܲܝܠܹܝܢ ܕܚܵܙܹ̇ܝܢ ܗ̄ܘ̣ܵܘ: ܟܲܕܼ ܡܕܲܡܹܝܢ
ܗ̄ܘ̣ܵܘ ܢܲܦܫܗܘܿܢ ܒܡܲܠܲܐܟܹ̈ܐ ܕܢܘܼܗܪܵܐ. ܘܲܒܼܟܼܠܗܹܝܢ ܗܵܠܹܝܢ ܩܲܕܸܡ̣ܘ
ܗ̄ܘ̣ܵܘ ܘܐܲܒܼܗܸܠ̣ܘ ܘܐܲܙܝܼܥ̣ܘ ܗ̄ܘ̣ܵܘ ܪܸܥܝܵܢܵܐ ܕܡܲܠܟܵܐ: ܕܠܵܐ ܬܸܗܘܸܐ
ܠܥܵܬܼܵܐ ܗܵܝ̇ ܕܡܸܬܼܬܿܬܲܒܼܥܵܐ ܗ̄ܘ̣ܵܬܼ: ܕܡܸܛܠܵܬܼܵܗ̇ ܐܸܬܼܟܲܢܫܲܬ̤ ܤܘܼܢܗܵܕܘܿܣ
ܬܹܒܹܠܵܝܬܼܵܐ. ܟܲܕܼ ܕܹܝܢ ܗ̤ܘ ܠܘܼܩܒܲܒ ܒܵܥܘܼܬܼܗܘܿܢ ܫܟܼܝܼܪܬܵܐ ܕܠܵܐ
ܟܘܼܚܵܕܼܵܐ ܐܝܼܬܼܵܘܗܝ ܗ̄ܘ̣ܵܐ: ܕܒܼܵܥܹ̇ܝܢ ܗ̄ܘ̣ܵܘ ܕܠܵܐ ܢܸܗܘܸܐ ܕܝܼܢܵܐ: ܝܵܗ̇ܒܿܝܼܢ
ܗ̄ܘ̣ܵܘ ܡܠܘܿܐܵܐ ܕܩܸܢܵܢܹ̈ܐ ܠܐܲܝܠܹܝܢ ܕܩܲܪܝܼܒܼܝܼܢ ܗ̄ܘ̣ܵܘ ܠܹܗ: ܠܲܝܬܿ
ܠܝܼ ܡܸܕܸܡ ܕܐܹܡܲܪ. ܒܟܼܠܗܹܝܢ ܓܹܝܪ ܕܲܠܩܘܼܒܼܠܵܐ ܕܗܵܘ̇ ܡܵܐ
ܕܒܸܐܤܟܹܡܵܐ ܠܒܼܝܼܟܼ ܗ̄ܘ̣ܵܐ: ܐܲܪܦܝܼ ܗ̄ܘ̣ܵܐ ܡܲܠܟܵܐ ܕܢܸܗܘܸܐ ܒܤܘܼܥܪ̈ܵܢܹܐ:
ܟܲܕܼ ܠܵܐ ܡܸܬܼܩܲܢܛܝܼܢ ܗ̄ܘ̣ܵܘ ܡܸܢܹܗ: ܐܵܦ ܠܵܐ ܠܡܸܥܒܲܕܼ ܐܸܤܛܵܤܝܼܣ:
ܘܲܠܡܲܪܗܵܛܘܼ ܥܲܠ ܟܠܢܵܫ.
ܐܸܬܿܬܵܘܤܲܦ ܕܹܝܢ ܥܠܲܝܗܘܿܢ ܐܵܦ ܥܘܼܬܼܵܕܼܵܐ ܕܒܼܝܼ̈ܫܵܬܼܵܐ: ܟܢܘܼ̈ܫܝܹܐ
ܕܹܝܢ ܥ̣ܒܲܕܼܘ ܗ̄ܘ̣ܵܘ ܟܵܗ̈ܢܹܐ ܘܓܼܘܼ̈ܕܹܐ ܕܕܲܝܪ݁̈ܵܝܹܐ: ܘܡܸܬܼܡܲܠܟܼܝܼܢ ܗ̄ܘ̣ܵܘ
pb. 375
ܥܠܲܝ: ܟܲܕܼ ܡܥܲܕܪܝܼܢ ܗ̄ܘ̣ܵܘ ܠܗܘܿܢ ܒܪܸܥܝܵܢܵܐ ܗܵܢܵܐ. ܘܐܝܼܬܲܝܗܘܿܢ
ܗ̄ܘ̣ܵܘ ܠܗܘܿܢ ܡܥܲܕܪ̈ܵܢܹܐ ܒܗܵܠܹܝܢ: ܟܠܗܘܿܢ ܡܗܲܝ̈ܡܢܹܐ ܕܡܲܒܟܵܐ
ܕܲܡܢܲܤܹܝܢ ܗ̄ܘ̣ܵܘ ܠܹܗ ܠܪܸܥܝܢܹܗ: ܘܲܠܗܵܢ̇ܘܿܢ ܝܵܗ̇ܒܝܼܢ ܗ̄ܘ̣ܵܘ ܬܘܼܟܼܠܵܢܵܐ:
ܐܲܝܟܼ ܡ̇ܢ ܕܤܲܓܼܝܼ ܪܚܝܼܡ ܥܠܵܘܗܝ ܐܸܤܟܹܡܵܐ ܕܕܲܝܪ̈ܵܝܹܐ: ܘܗܸܢ̇ܘܿܢ
ܟܠܗܘܿܢ ܐܸܫܬܿܘܝܼܘ ܒܚܲܕܼ ܪܸܥܝܵܢܵܐ: ܕܲܢܦܝܼܤܘܼܢܵܝܗܝ ܕܠܵܐ ܢܸܗܘܸܐ
ܕܝܼܢܵܐ: ܐܸܠܵܐ ܢܩܵܘ̈ܝܵܢ ܗܵܠܹܝܢ ܕܠܘܼܩܒܲܠܝ ܐܸܤܬܼܥܲܪ ܕܠܵܐ ܒܘܼܚܵܢܵܐ.
ܘܐܸܫܬܵܘܬܲܦܲܘ ܗ̄ܘ̣ܵܘ ܟܠܗܘܿܢ ܕܲܝܪ̈ܵܝܹܐ ܡܸܛܵܠܵܬܼܝ ܠܚܲܕܼ ܪܸܥܝܵܢܵܐ:
ܗܵܢ̇ܘܿܢ ܕܲܒܼܫܲܪܟܵܐ ܕܲܐ̄ܚܪ̈ܵܢܝܬܼܵܐ ܐܝܼܬܲܝܗܘܿܢ ܗ̄ܘ̣ܵܘ ܕܠܵܐ ܚܘܼܒܵܐ ܨܝܕܼ
ܢܲܦܫܗܘܿܢ: ܟܲܕܼ ܚܵܤ̇ܡܝܼܢ ܗ̄ܘ̣ܵܘ ܘܡܸܬܼܚܲܤܡܝܼܢ: ܝܲܬܿܝܼܪܵܐܝܼܬܼ ܡܸܛܠ
ܫܘܼܒܼܚܵܐ ܕܲܒܼܢܲܝ̈ܢܵܫܵܐ. ܘܲܢܤܲܒܼܘ ܠܗܘܿܢ ܡܕܲܒܿܪܵܢܵܐ ܘܪܹܫܵܐ: ܐܲܝܟܼ
ܕܲܒܼܬܡܗܵܐ ܢܸܫܒܿܘܿܢܵܝܗܝ ܠܡܲܠܟܵܐ: ܠܕܲܠܡܵܛܝܼܣ ܪܹܫ ܕܲܝܪܵܐ: ܗܵܘ̇
ܕܲܫ̈ܢܲܝܵܐ ܤܲܓܿܝܼ̈ܐܬܼܵܐ ܠܵܐ ܢܲܦܝܼܩ ܗ̄ܘ̣ܵܐ ܠܹܗ ܡ̣ܢ ܕܲܝܪܹܗ. ܘܤܘܿܓܼܵܐܐ
ܕܕܲܝܪ̈ܝܹܿܐ ܟܲܪܟܼܘܼܗܝ ܗ̄ܘ̣ܵܘ ܒܡܸܨܥܲܬܼ ܡܕܝܼܢ̄ܬܼܵܐ ܟܲܕܼ ܡܫܲܡܫܝܼܢ ܗ̄ܘ̣ܵܘ:
ܐܲܝܟܼ ܕܬܸܬܼܟܲܢܲܫ ܠܘܵܬܼܗܘܿܢ ܟ̱ܠܵܗ̇ ܡܕܝܼܢ̄ܬܼܵܐ: ܘܢܹܐܙܠܘܼܢ ܨܝܕܼ
ܡܲܠܟܵܐ: ܕܢܸܫܟܿܚܘܼܢ ܕܢܥܵܘܟܼܘܼܢܵܝܗܝ ܠܪܸܥܝܵܬܹܗ. ܟܠܗܹܝܢ ܓܹܝܪ
ܗܵܠܹܝܢ ܩܲܕܼܡ̣ܘܼ ܗ̄ܘ̣ܵܘ ܘܥܲܬܸܕܼܘ: ܐܲܝܟܲܢܵܐ ܕܡܸܕܸܡ ܠܵܐ ܢܸܗܘܸܐ
ܡܥܵܘܟܼܵܢܵܐ. ܘܥܲܠ̣ܘ ܗ̄ܘ̣ܵܘ ܒܬܸܫܡܸܫܬܼܵܐ: ܥܕܲܡܵܐ ܠܘܵܬܼ ܡܲܠܟܵܐ.
ܟܲܕܼ ܚ̣ܙܵܐ ܕܹܝܢ ܡܲܠܟܵܠ ܠܕܲܠܡܵܛܝܼܣ: ܐܲܙܝܼܥ ܪܹܫܹܗ. ܘܤܵܡ̣
ܐܝܼܕܹܗ ܐܲܝܟܼ ܐܲܝܢܵܐ ܕܲܒܼܕܼܘܼܡܵܪܵܐ ܗܘ̤ܵܐ: ܡܸܛܠ ܚܙܵܬܼܵܐ ܕܦܲܪܨܘܿܦܵܐ.
ܘܐܸܡ݂ܲܪ: ܐܲܝܕܵܐ ܗ̣̄ܝ ܥܸܠܬܼܵܐ ܕܐܲܠܲܨܬܼܵܟܼ ܠܡܸܫܪܵܐ ܬܸܢܘܲܝ ܕܝܼܠܵܟܼ؟
ܚܢܲܢ ܓܹܝܪ ܐܵܬܹ̇ܝܢ ܗ̣̄ܘܲܝܢ ܠܘܵܬܼܵܟܼ: ܗܵܫܵܐ ܕܹܝܢ ܠܡܵܢܵܐ ܐܲܢ̄ܬܿ ܬܸܬܲܝܬܿ
ܠܘܵܬܲܢ؟ ܝܲܬܿܝܼܪܵܝܼܬܼ ܕܹܝܢ ܒܡܸܨܥܲܬܼ ܡܕܼܝܼܢ̄ܬܼܵܐ! ܗܵܘ ܡܵܐ ܕܐܵܦ ܠܵܐ
pb. 376
ܒܕܲܝܪܵܟܼ ܠܒܲܪ ܡ̣ܢ ܩܸܠܵܝܬܵܟܼ ܡܸܬܼܚܲܙܸܐ ܗ̣̄ܘܲܝܬܿ: ܘܐܵܦ ܠܵܐ ܠܓܲܒܼܪܹ̈ܐ
ܟܠܗܘܿܢ ܝܵܗܹ̇ܒܼ ܗ̄ܘ̣ܵܝܬܿ ܢܲܦܫܵܟܼ ܕܬܸܬܼܚܙܸܐ: ܗܵܫܵܐ ܐܵܦ ܠܕܲܒܼܪܹ̈ܐ
ܐܵܦ ܠܢܸܫܹ̈ܐ ܤܵܡ̣ܬܿ ܢܲܦܫܵܟܼ ܐܲܝܟܼ ܕܠܲܚܙܵܬܼܵܐ. ܠܡܵܐ ܓܹܝܪ ܠܵܐ ܗ̤ܘܲܝ̈
ܐܵܠ̈ܨܵܬܼܵܐ ܤܲܓܿܝܼ̈ܐܵܬܼܵܐ: ܕܲܤܢܝܼ̈ܩܵܢ ܗ̣̄ܘܲܝ̈ ܥܲܠ ܡܦܲܩܬܵܟܼ؟ ܟܘܙܼܪܗܵܢܵܐ
ܕܲܥܕܲܡܵܐ ܠܡܵܘܬܵܐ ܕܝܼܠܝܼ ܘܲܕܩܲܪ̈ܝܼܒܲ: ܫܲܓܼܘܼܫ̈ܝܹܐ ܘܲܕܼܠܘܼܚ̈ܚܹܐ
ܕܒܲܡܕܝܼܢ̄ܬܼܵܐ ܗܘ̤ܵܘ: ܘܲܤܢܝܼܩܝܼܢ ܗ̄ܘ̣ܵܘ ܥܲܠ ܡܸܨܥܵܝܘܼܬܼܵܐ ܘܒܼܵܥܘܼܬܼܵܐ
ܕܐ̄ܢܵܫ: ܕܠܵܐ ܢܸܫܪܟܼܘܼܢ ܥܕܲܡܵܐ ܠܲܕܼܡܵܐ ܘܲܠܡܵܘܬܵܐ. ܩܪ̈ܵܒܹܐ:
ܘܐܲܒܼܕܵܢܵܐ: ܘܚܘܼܒܵܠܵܐ: ܘܟܲܦܢܹ̈ܐ: ܘܙܵܘ̈ܥܹܐ: ܗܵܠܹܝܢ ܕܡ̣ܢ ܒܵܥܘܼܬܼܵܐ
ܒܲܚܠܘܿܕܼ ܕܐܲܠܵܗܵܐ ܡܸܫܬܲܪ̈ܝܵܢ ܗ̣̄ܘܲܝ̈: ܘܠܵܐ ܚܕܼܵܐ ܡ̣ܢ ܗܵܠܹܝܢ
ܐܲܦܝܼܤܬܼܵܟܼ ܕܬܸܦܘܿܩ ܡ̣ܢ ܕܝܪܵܟܼ܀
ܕܲܠܡܵܛܝܼܣ ܐܵܡܲ݁ܪ: ܐܹܝܢ ܠܲܡ ܡܲܠܟܵܐ: ܠܐܵܐ ܗܘ̤ܵܐ ܐܘܼܠܨܵܢܵܐ
ܕܐܲܝܟܼ ܗܵܢܵܐ ܒܗܵܠܹܝܢ: ܕܲܤܢܝܼܩ ܗ̄ܘ̣ܵܐ ܥܲܠ ܡܲܦܲܩܬܝ. ܡܸܛܠ
ܗܵܢܵܐ ܐܵܦ ܠܵܐ ܐܠܵܗܵܐ ܐܵܘܕܥܲܢܝ: ܒܗܵܝ̇ ܕܲܐ̄ܚܪܵܢܝܵܐܝܼܬܼ ܫ̣ܪܵܐ ܗ̄ܘ̣ܵܐ
ܠܗܘܿܢ. ܗܵܫܵܐ ܕܹܝܢ ܠܝܼ ܐܲܠܵܗܵܐ ܦܲܩܕܲܢܝ: ܕܐܸܡܠܘܿܟܼ
ܠܡܲܠܟܿܘܼܘܿܢ: ܘܐܸܬܼܦܲܩ̇ܕܹܬܼ ܠܡܲܤܗܵܕܘܼܬܼܵܟܼ: ܕܲܒܼܢܲܦܫܵܟܼ ܡܲܥܘܸܠ
ܐܲܢ̄ܬܿ: ܟܲܕܼ ܒܤܘܘܼܢܗܵܕܘܿܣ ܡܲܘܸܠ ܐܲܢ̈ܬܿ: ܘܲܠܕܼܝܼܢܵܗ̇ ܡܲܗܦܸܟܼ
ܐܲܢ̄ܬܿ. ܤܘܼܢܗܵܕܘܿܣ ܟܸܢܫܲܬ̤ ܠܕܼܝܼܢܵܐ: ܘܗ̤ܝ ܕܵܢܲܬ̤. ܗ̤ܝ ܝܵܕܼܥܵܐ
ܐܲܝܟܲܢܵܐ ܕܵܢܲܬ̤: ܗ̤ܝ ܝܵܗ̇ܒܵܐ ܦܘܼܢܵܝ ܦܸܬܼܓܼܵܡܵܐ ܠܐܲܠܵܗܵܐ.
ܡܲܠܟܵܐ ܐܸܡ݂ܲܪ ܠܘܵܬܹܗ: ܐܸܢܵܐ ܐܵܦ ܠܵܐ ܪܘܼܫܥܵܐ ܡܸܫܟܲܚ ܐ̄ܢܵܐ
ܒܓܲܒܼܪܵܐ ܗܵܢܵܐ: ܘܐܵܽܦܠܵܐ ܥܸܠܬܼܵܐ ܡܸܕܡ ܕܫܵܘ̇ܝܵܐ ܠܲܫܪܵܝܵܐܘ ܡܤܲܗܸܕܼ ܐ̄ܢܵܐ
ܠܵܟܼ ܘܲܠܟܼܠ ܐ̄ܢܵܫ: ܐܸܢܵܐ ܡܚܲܤܲܝ ܐ̄ܢܵܐ: ܠܵܘ ܓܹܝܪ ܒܡܸܨܛܲܠܝܵܢܘܼܬܼܵܐ
pb. 377
ܐ̄ܢܵܫܵܝܬܼܵܐ ܐܲܚ̇ܒܹܬܼ ܠܗܵܢܵܐ: ܘܤܸܥ̇ܪܹܬܼ ܠܐܲܝܠܹܝܢ ܕܲܗ̤ܘܲܝ̈: ܐܲܝܟܲܢܵܐ
ܕܐܸܬܿܬܿܕܝܼܢ ܘܐܸܬܼܚܲܝܲܒܼ: ܐܲܝܟܼ ܐܲܝܠܹܝܢ ܕܠܘܼܩܒܲܠ ܐܲܠܵܗܵܐ ܩܵܝ̇ܡܝܼܢ:
ܘܚܵܛ̇ܦܝܼܢ ܠܢܲܦܫܗܘܿܢ ܗܵܠܹܝܢ ܕܟܼܵܗ̈ܢܹܐ. ܠܵܐ ܗܵܫܵܐ ܐܵܦܠܵܐ ܡ̣ܢ
ܩܕܝܼܡ ܐܸܬܼܚܲܦ̇ܛܹܬܼ ܥܲܠ ܤܝܵܡ ܐܝܼܕܼܵܐ ܗܵܢܵܐ: ܐܲܝܟܲܢܵܐ ܕܐܸܤܬܿܒܲܪ
ܕܡܸܬܼܢܲܩܵܡܘܼ ܡܸܬܼܢܲܩܲܡ ܘܬܼܵܒܲܥ ܥܝ̇ܪܬܵܐ ܥܲܠ ܐܲܦܲܝ̈ ܓܒܼܝܼܬܼܵܐ
ܕܝܼܠܹܗ. ܐܸܠܵܐ ܒܫܵܘܬܵܦܘܼܬܼܵܐ ܕܟܼܠܟܼܘܿܢ ܐܲܝܬܝܼܬܹܗ ܠܓܲܒܼܪܵܐ ܗܵܢܵܐ
ܒܲܩܛܝܼܪܵܐ: ܟܲܕܼ ܠܹܗ ܚܲܒܿܝܼܒܼ ܗ̄ܘ̣ܵܐ ܠܹܗ ܒܹܝܬܼ ܐܲܒܼܵܗܵܘ̈ܗܝ ܘܓܸܢܤܹܗ.
ܐܲܢ̄ܬܿܘܿܢ ܗ̤ܘܲܝܬܿܘܿܢ ܥܸܠܬܼܵܐ ܕܗܵܠܹܝܢ: ܘܠܵܘ ܐܸܢܵܐ. ܟܲܕܼ ܠܵܟܼ ܐܘܿ
ܕܲܠܡܵܛܝܲܐ: ܡܸܬܼܟܲܫܲܦ ܗ̄ܘܹ̇ܝܬܼ ܠܵܟܼ ܕܬܸܗܘܸܐ ܒܤܘܼܥܪܵܢܵܐ ܗܵܢܵܐ:
ܘܒܼܵܥܹ̇ܐ ܗ̄ܘܹ̇ܝܬܼ ܡܸܢܵܟܼ ܒܤܲܓܿܝܼ̈ܐܵܬܼܵܐ: ܕܠܵܐ ܬܸܫܬܿܐܸܠ ܡ̣ܢ ܬܸܫܡܸܫܬܼܵܐ
ܕܐܲܠܵܗܵܐ. ܐܲܢ̄ܬܿ ܕܹܝܢ ܐܸܫܬܿܐܸܠܬܿ: ܘܕܲܠܩܘܼܒܼܠܵܐ ܐܲܢ̄ܬܿ ܡܸܬܼܟܲܫܲܦ
ܗ̣̄ܘܲܝܬܿ ܠܝܼ: ܕܠܵܐ ܠܲܡ ܬܹܐܠܨܲܢܝ: ܡܸܛܠ ܕܗܸܕܝܘܿܛܵܐ ܐܝܼܬܲܝ.
ܘܐܵܦ ܠܐ̄ܢܵܫ ܐ̄ܚܪܹܢܵܐ ܡ̣ܢ ܕܲܝܪ̈ܝܹܐ: ܐܲܝܢܵܐ ܕܡܸܤܬܿܒܲܪ ܗ̄ܘ̣ܵܐ ܕܡܸܕܸܡ
ܗ̄ܘ̣: ܘܡܸܫܬܲܒܲܚ ܗ̄ܘ̣ܵܐ ܒܕܼܝܠܲܬܼ ܐܲܠܵܗܵܐ: ܒܥܹ̇ܝܬܼ: ܘܐܵܦ ܗ̤ܘ
ܐܸܫܬܿܐܸܠ: ܐܲܝܟܼ ܐܲܝܢܵܐ ܕܠܵܐ ܝܑܼܕܲܥ̣ ܬܸܫܡܸܫܬܼܵܐ ܗܵܕܹܐ ܠܲܡܕܲܒܵܪܘܼ:
ܡܸܛܠ ܕܗܸܕܼܝܼܘܿܛܵܐ ܐܝܼܬܼܵܘܗܝ. ܐܸܡܲܪܬܿܘܿܢ ܓܹܝܪ ܟܠܟܼܘܿܢ: ܕܲܤܢܝܼܩܵܐ
ܩܘܼܤܛܲܢܛܝܼܢܵܦܘܿܠܝܼܣ ܥܲܠ ܐܲܦܸܤܩܘܿܦܵܐ: ܐܲܝܢܵܐ ܕܲܒܼܡܸܠܹ̈ܐ
ܘܲܒܼܕܼܘܼܒܵܪܹ̈ܐ ܪܚܝܼܡ ܥܲܠ ܟܠܢܵܫ. ܘܲܕܸܢܸܗܘܸܐ ܡܲܠܦܵܢܵܐ ܠܥܹ̈ܕܵܬܼܵܐ:
ܘܦܘܼܡܵܐ ܕܟܼܠܢܵܫ ܒܟܼܠ ܡܸܕܸܡ. ܐܸܠܵܐ ܟܲܕܼ ܐܲܢ̄ܬܿܘܿܢ ܡܸܛܠ ܗܵܠܹܝܢ
ܐܸܫܬܐܸܠܬܿܘܿܢ: ܕܲܠܡܵܐ ܐܸܠܵܐ ܒܫܘܼܛܵܢܝ ܤܸܥ̇ܪܹܬܼ ܡܸܕܸܡ؟ ܠܵܐ
ܬܘܼܒܼ ܡܸܢܟܼܘܿܢ ܒܥܹ̇ܝܬܼ: ܕܬܸܓܼܒܿܘܿܢ ܠܐܲܝܢܸܐ ܕܐܲܝܟܼ ܗܵܢܵܐ ܐܝܼܬܼܵܘܗܝ؟
pb. 378
ܠܵܘ ܠܲܶܩܠܹܝܪܘܿܣ ܕܩܘܼܤܛܲܢܛܝܼܢܵܦܘܿܠܝܼܣ ܐܸܬܼܟܲܫ̇ܦܹܬܼ ܒܵܗ̇
ܒܲܕܼܡܘܼܬܼܵܐ: ܕܢܸܓܼܒܿܘܿܢ ܗܵܘ̇ ܡ̣ܢ ܕܥܵܗܹ̇ܢ؟ ܠܵܘ ܠܲܐܦܸܤܩ̈ܘܿܦܹܐ ܗܸܢܹܝܢ
ܟܲܕܼ ܗܸܢܹܝܢ ܐܸܡ̇ܪܹܬܼ: ܕܕܸܝܼܠܟܼܘܿܢ ܐܝܼܬܹܝܗ̇ ܠܡܸܓܼܒܵܐ ܘܲܠܡܸܥܒܲܕܼ
ܐܲܦܸܤܩܘܿܦܵܐ؟ ܘܐܵܦ ܠܟܼܘܿܢ ܒܵܗ̇ ܒܲܕܼܡܘܼܬܼܵܐ ܐܸܬܼܟܲܫ̇ܦܹܬܼ: ܠܵܐ
ܫܸܒܼܩܹ̇ܬܼ ܒܐܝܼܕܲܝ̈ܟܿܘܿܢ ܟ̱ܠܹܗ ܗܵܢܵܐ ܙܲܒܼܢܵܐ: ܟܲܕܼ ܡܲܓܪ ܗ̄ܘܹ̇ܝܬܼ ܪܘܼܚܵܐ
ܕܬܸܓܼܒܿܘܿܢ ܢܝܼܚܵܐܝܼܬܼ: ܕܠܵܐ ܡܸܛܠ ܡܤܲܪܗܒܼܘܼܬܼܵܐ ܬܸܗܘܸܐ ܛܘܼܥܝܲܝ
ܥܲܠ ܐܲܝܢܵܐ ܕܡܸܬܼܓܒܸܐ؟ ܘܐܸܠܵܐ ܓܒܲܝܬܿܘܿܢ: ܘܠܵܐ ܩܲܒܿܠܹ̇ܬܼ ܠܲܓܼܒܼܝܼܬܼܟܼܘܿܢ.
ܒܵܥܹ̇ܐ ܐܲܢ̄ܬܿ ܐܹܡܲܪ ܡܸܕܸܡ ܥܠܲܝܟܿܘܿܢ؟ ܐܹܡܲܪ ܚܦܝܼܛܘܼܬܼܗܘܿܢ
ܘܲܪܗܵܛܗܘܿܢ ܘܡܵܘܗ̈ܒܼܵܬܼܗܘܿܢ ܘܫܘܼܘܕܵܣܝܗܘܿܢ ܘܡܵܘ̈ܡܵܬܼܗܘܿܢ:
ܘܟܼܠܗܹܝܢ ܐܲܝܠܹܝܢ ܕܐܲܝܟܼ ܕܒܲܙܒܼܝܼܘܼܬܼܵܐ ܒܵܥܹ̇ܝܢ ܗ̄ܘ̣ܵܘ ܕܢܸܗܘܘܿܢ؟ ܡ̣ܢ
ܗܵܠܹܝܢ: ܡܲܢ̣ܘܼ ܒܵܥܹ̇ܝܢ ܗ̣̄ܘܲܝܬܿܘܿܢ ܕܢܸܗܘܸܐ؟ ܐܸܠܵܐ ܥܵܒܲܪ ܐ̄ܢܵܐ ܡ̣ܢ
ܗܵܠܹܝܢ: ܐܲܝܕܵܐ ܓܒܼܝܼܬܼܵܐ ܒܵܥܹ̇ܝܢ ܗ̄ܘ̣ܝܬܿܘܿܢ ܕܢܸܗܘܸܐ؟ ܗܵܝ̇ ܕܝܼܠܵܟܼ؟
ܐܵܘ ܕܗܵܘ̇؟ ܐܵܘ ܕܲܐ̄ܚܪܹܢܵܐ؟ ܐ̄ܚܪ̈ܵܢܹܐ ܓܹܝܪ ܠܲܐ̄ܚܪ̈ܵܢܹܐ ܓܵܒܹ̇ܝܢ ܗ̄ܘ̣ܵܘ:
ܠܵܘ ܐܲܝܟܼ ܕܒܲܓܼܿܒܼܝܼܬܼܵܐ: ܕܐܲܝܟܼ ܕܲܡܝܲܬܿܝܼܢ ܥܵܒܼܕܝܼܢ ܗ̄ܘ̣ܵܘ ܕܒܼܝܼܬܼܗܘܿܢ:
ܐܸܠܵܐ ܥܲܠ ܐܲܝܠܹܝܢ ܕܒܼܝܼܫܝܼܢ ܗ̄ܘ̣ܵܘ. ܘܟܼܠ ܐ̄ܢܵܫ ܡܝܲܩܲܪ ܠܗܵܘ̇
ܕܡܸܕܼܡ ܡܸܬܼܚܿܒܸܐ ܗ̄ܘ̣ܵܘ: ܘܐܵܡܲ݁ܪ ܗ̄ܘ̣ܵܐ ܒܝܼܫܵܐܝܼܬܼ ܕܠܲܐܝܢܵܐ ܕܡ̣ܢ
ܐ̄ܚܪ̈ܵܢܹܐ ܐܸܬܼܓܿܒܼܝܼ: ܘܒܲܩܛܹܐ ܓܼܪ̈ܵܢܘܵܬܼܵܐ ܒܝܼ̈ܫܬܼܵܐ ܡܩܲܛܪܸܓܼ ܗ̄ܘ̣ܵܐ
ܠܹܗ. ܐܸܠܵܐ ܐܲܢ̄ܬܿܘܿܢ: ܥܲܠ ܚܲܕܼ ܠܵܐ ܫܠܸܡܬܿܘܿܢ. ܘܥܲܠ ܗܵܘ̇ ܕܥܲܡܵܐ
ܫܠܸܡ̣ ܠܹܗ: ܐܲܢ̄ܬܿܘܿܢ ܠܵܐ ܫܵܠܡ̇ܝܼܢ ܗ̣̄ܘܲܝܬܿܘܿܢ. ܩܪܹܝܬܼ ܩܕܼܵܝܡܲܟܿܘܿܢ
ܒܢܵܬܼ̈ ܩܵܠܹ̈ܐ ܕܥܲܡܵܐ: ܥܲܠ ܟܠ ܚܲܕܼ ܚܲܕܼ ܡ̣ܢ ܐܲܝܠܹܝܢ ܕܐܸܬܿܓܿܒܼܝܼܘ.
ܡܵܢܵܐ ܗܵܟܹܝܠ ܙܵܕ݂ܹܩ ܗ̄ܘ̣ܵܐ ܠܝܼ ܠܡܸܥܒܲܕܼ: ܘܠܵܐ ܥܸܒܼ̇ܕܹܬ؟ ܐܲܢ̄ܬܿܘܿܢ
pb. 379
ܕܲܝܪ̈ܝܹܐ ܠܑܵܐ ܫܠܸܡܬܿܘܿܢ ܠܲܡܠܹܝܪܘܿܣ: ܘܠܵܐ ܒܠܹܝܪܘܿܣ ܩܢܵܬ̤
ܚܲܕܼ ܪܸܥܝܵܢܵܐ: ܘܐܲܦܸܤܩ̈ܘܿܦܹܐ ܐܸܬܼܦܲܠܲܓܼܘ: ܘܥܲܡܵܐ ܒܵܗ̇ ܒܲܕܼܡܘܼܬܼܵܐ
ܦܠܝܼܓܼ ܗ̄ܘ̣ܵܐ: ܘܲܐ̄ܚܪܹܢܵܐ ܥܲܠ ܐܲܦܲܝ̈ ܐ̄ܚܪܹܢܵܐ ܡܸܬܼܟܲܬܲܫ ܗ̄ܘ̣ܵܐ.
ܘܐܵܦܠܵܐ ܗܵܟܲܢܵܐ ܝܼܗ̇ܒܹܿܬܼ ܡܫܠܛܘܼܬܼܵܐ ܠܢܲܦܫܝ: ܐܸܠܵܐ ܥܠܲܝܟܿܘܿܢ
ܐܲܪܦܝܼܬܼܵܗ̇ ܠܲܓܼܒܼܝܼܬܼܵܐ. ܡ̣ܢ ܕܹܝܢ ܕܟܼܠܗܘܿܢ ܩܵܡܬܿܘܿܢ ܒܲܡܙܲܠܗܙܘܼܬܼܵܐ:
ܐܸܬܲܝܬܿܘܿܢ ܟܠܟܼܘܿܢ ܘܝܲܗ̄ܒܼܬܿܘܿܢ ܠܝܼ ܕܐܸܓܼܒܸܿܐ ܐܲܝܢܵܐ ܕܒܼܵܥܹ̇ܐ ܐ̄ܢܵܐ:
ܗܵܝܕܹܝܟܼ ܕܹܝܢ ܡ̣ܢ ܕܲܠܡܲܚܤܸܢ ܐܸܬܿܬܿܦܝܼܤܹܗ: ܟܲܕܼ ܟܠܟܼܘܿܢ
ܐܸܬܼܟܲܫܲܦܬܿܘܿܢ. ܐܸܬܼܚܲܫ̇ܒܹܬܼ ܕܠܵܐ ܙܵܕܹܩ ܕܢܸܬܼܥܒܸܕܼ ܡ̣ܢ ܗܵܪܟܵܐ
ܐ̄ܢܵܫ: ܕܕܲܠܡܵܐ ܗܵܘ̇ܝܵܐ ܠܹܗ ܒܥܸܠܕܒܼܵܒܼܘܼܬܼܵܐ ܘܢܸܤܬܿܢܸܐ. ܟܠܗܘܿܢ
ܓܹܝܪ ܤܵܢܹ̇ܝܢ ܗ̄ܘ̣ܵܘ ܠܲܚܕܼܵܕܹ̈ܐ: ܘܡܸܤܬܿܢܹܝܢ ܗ̄ܘ̣ܵܘ ܡ̣ܢ ܚܵܕܼܵܕܹ̈ܐ: ܐܲܝܟܼ
ܡ̇ܢ ܕܲܚܦܝܼܛܝܼܢ ܗ̄ܘ̣ܵܘ ܥܠܵܘܗܝ ܕܤܘܼܥܪܵܢܵܐ. ܐܸܠܵܐ ܒܥܹ̇ܝܬܼ ܗ̄ܘܹ̇ܝܬܼ
ܐ̄ܢܵܫ ܢܘܼܟܼܪܵܝܵܐ: ܕܠܵܐ ܝܑܼܕܼܥ ܗ̄ܘ̣ܵܐ ܡ̣ܢ ܐܲܝܠܹܝܢ ܕܗܵܪܟܵܐ: ܘܠܵܐ ܗ̤ܘ
ܝܵܕܲܥ̇ ܗ̄ܘ̣ܵܐ ܠܗܘܿܢ: ܐܲܝܢܵܐ ܕܢܲܗܝܼܪ ܒܡܸܠܬܹܗ ܘܲܒܼܗܘܼܦܵܟܼܵܘ̈ܗܝ.
ܐܵܘܕܥܘܼܢܝ ܓܹܝܪ ܕܕܼܐܲܝܟܼ ܗܵܢܵܐ ܐܝܼܬܼ ܒܐܲܢܛܝܵܟܼܝܵܐ: ܥܲܠ ܢܸܤܛܘܿܪܝܼܣ.
ܠܗܵܢܵܐ ܫܲܕܪܹܿܬܼ ܕܸܒܼܪܹܬܼ: ܟܲܕܼ ܐܲܥܝܼܩܹ̇ܬܼ ܠܲܡܕܼܝܼܢ̄ܬܼܵܐ ܗܵܝ̇ ܟ̱ܠܵܗ̇. ܕܕܲܐܲܝܟܼ
ܗܵܕܹܐ ܟ̱ܠܵܗ̇ ܐܝܼܬܹܝܗ̇ ܗ̄ܘ̣ܵܬܼ. ܘܐܲܝܬܝܼܬܹܗ ܡܸܛܠ ܝܘܼܐܼܪܵܢܟܼܘܿܢ
ܕܝܼܠܟܼܘܿܢ: ܕܝܲܬܿܝܼܪ ܡܝܲܩܲܪ ܗ̄ܘ̣ܵܬܐ ܥܠܲܝ ܡ̣ܢ ܕܗܵܢ̇ܘܿܢ. ܐܸܠܵܐ ܟܲܕܼ
ܗܘ̤ܵܐ: ܠܵܐ ܐܸܤܬܿܒܲܪ ܡܸܢܟܼܘܿܢ ܕܐܲܝܟܼ ܗܵܟܲܢܵܐ. ܡܵܢܵܐ ܗܵܟܹܝܠ ܙܵܕܹܩ
ܗ̄ܘ̣ܵܐ ܠܡܸܥܒܲܕܼ ܠܓܲܒܼܪܵܐ؟ ܠܵܐ ܒܲܚܬܘܿܢܵܝܗܝ: ܕܥܲܠ ܐܲܝܠܹܝܢ
ܕܡܸܬܼܪܫܸܐ ܗ̄ܘ̣ܵܐ ܢܸܦܘܼܩ ܪܘܼܚܵܐ. ܘܠܵܐ ܒܲܚܕܼܵܐ ܫܲܘܝܘܼܬܼܵܐ ܐܸܬܿܬܿܕܝܼܢ
ܐܲܦܸܩܘܿܦܟܼܘܿܢ: ܐܸܠܵܐ ܕܢܸܗܘܸܐ ܐܲܦܸܩܘܿܦܵܐ ܕܐܵܠܹܟܼܤܲܢܕܪܝܼܵܐ
pb. 380
ܘܲܕܼܪܗܘܿܡܹܐ: ܐܲܝܟܼ ܕܠܲܐܝܢܵܐ ܕܠܵܘ ܬܪܝܼܨܵܐܝܼܬܼ ܡܗܲܝܡܸܢ: ܘܙܵܕܹܩ
ܗ̄ܘ̣ܵܐ ܕܢܸܬܿܛܦܝܼܣ ܠܬܼܘܼܚܵܡܵܐ ܕܝܼܠܗܘܿܢ. ܗ̤ܘ ܕܹܝܢ ܒܵܥܹ̇ܐ ܗ̄ܘ̣ܵܐ
ܘܲܡܤܲܟܸܿܐ ܗ̄ܘ̣ܵܐ ܠܕܝܼܢܵܐ: ܐܲܝܟܼ ܡ̇ܢ ܕܥܵܘ̣ܠܵܐ ܐܸܬܼܥܒܸܕܼ ܒܹܗ. ܘܥܵܕܸܠ
ܗ̄ܘ̣ܵܐ ܠܗܘܿܢ: ܕܠܵܘ ܬܪܝܼܨܵܬܝܼܬܼ ܩܲܛܪܓܼܘܼܗܝ. ܡܸܛܠ ܕܐܲܦܸܤܩܘܿܦܵܐ
ܗ̄ܘ̣ܵܐ: ܘܙܵܕܹܩ ܗ̄ܘ̣ܵܐ ܕܲܠܕܼܝܼܢܵܐ ܕܐܲܦܸܤܩ̈ܘܿܦܹܐ ܢܸܬܼܩܪܸܐ: ܘܠܵܘ
ܠܕܝܼܢܵܐ ܕܝܼܠܝܼ. ܘܠܵܐ ܗ̄ܘ̣ܵܐ ܕܐܲܝܢܵܐ ܕܐܝܟܲܢ ܕܗ̤ܘ ܐܝܼܬܼܵܘܗܝ ܗ̄ܘ̣ܵܐ
ܕܲܝܢܵܐ: ܘܐܵܦ ܠܵܐ ܙܵܕܹܩ ܗ̄ܘ̣ܵܐ ܠܡܸܫܬܿܡܵܥܘܼ ܩܕܼܵܡ ܚܲܕܼ ܐ̄ܢܵܫ:
ܐܲܦܤܩܘܿܦܵܐ ܕܩܘܼܤܛܲܢܛܝܼܢܵܦܘܿܠܝܼܣ. ܕܲܠܡܵܐ ܐܸܢܵܐ ܕܵܢܹ̇ܿܝܬܼ ܐܲܝܟܼ ܕܲܫܦܲܪ
ܠܝܼ؟ ܐܸܢܐ ܠܤܘܼܢܗܵܕܘܿܣ ܐܲܫ̇ܠ̱ܛܹܬܼ. ܡ̇ܢ ܗ̄ܘ̣ ܕܒܼܵܥܹ̇ܐ ܕܝܼܢܵܐ: ܘܠܵܐ
ܡܸܬܼܝܼܗܸܒܼ ܠܹܗ؟ ܡܲܢ̣ܘܼ ܟܹܐܝܢ؟ ܗܵܘ̇ ܕܲܠܕܼܝܼܢܵܐ ܡܸܬܼܝܲܐܲܒܼ ܘܒܼܵܥܹ̇ܐ؟ ܐܵܘ
ܗܵܘ̇ ܕܡ̣ܢ ܕܝܼܢܵܐ ܥܵܪܹܩ؟ ܕܲܠܡܵܐ ܠܵܐ ܡܸܫܟܲܚ ܗ̄ܘ̣ܵܐ ܕܢܸܬܿܕܲܡܸܐ
ܒܗܵܢܘܿܢ: ܠܡܸܥܒܲܕܼ ܒܗܘܿܢ ܗܵܘ̇ ܡܵܐ ܕܗ̤ܘ ܚܲܫ̣: ܘܠܲܡܟܲܢܵܫܘܼ
ܠܐܲܦܸܤܩ̈ܘܿܦܹܐ ܕܲܬܼܚܹܝܬܼ ܐܝܼܕܹܗ ܐܝܼܬܲܝܗܘܿܢ: ܘܠܲܐܝܠܹܝܢ ܕܲܒܼܡܲܕܢܚܵܐ
ܕܡܸܬܿܛܦܝܼܣܝܼܢ ܗ̄ܘ̣ܵܘ ܠܹܗ: ܘܐܲܝܟܼ ܕܠܚܲܝܵܒܼܵܐ ܢܕܘܼܢܘܼܢܵܝܗܝ
ܘܲܢܩܲܛܪܓܼܘܼܢܵܝܗܝ ܠܗܵܘ̇؟ ܐܸܠܵܐ ܡ̇ܢ ܗܵܕܹܐ ܥ̣ܒܲܕܼ: ܐܸܠܵܐ ܠܕܝܼܢܵܐ
ܡܸܬܼܝܲܐܲܒܼ ܗ̄ܘ̣ܵܐ: ܝܲܬܿܝܼܪܵܐܝܼܬܸ ܠܡܵܫܪܵܐ ܦܵܠܓ̈ܘܵܬܼܵܐ ܗܵܠܹܝܢ. ܠܲܝܬܿ ܓܹܝܪ
ܢܵܡܘܿܤܵܐ: ܕܐܲܦܸܤܩܘܼܦܵܐ ܕܐܵܠܹܟܼܤܲܢܕܪܝܼܵܐ ܐܵܘ ܕܐܲܝܕܵܐ ܕܗ̤ܝ ܡܕܝܼܢ̄ܬܼܵܐ:
ܕܟܲܕܼ ܢܸܬܿܬܿܕܝܼܢ: ܠܵܐ ܢܸܬܿܬܿܕܝܼܢ: ܐܸܠܵܐ ܐܵܦ ܟܲܕܼ ܟܸܢܫܲܬ̤ ܤܘܼܢܗܵܕܘܿܣ
ܘܝܸܬܼܒܲܬ̤: ܒܥ̣ܵܘ ܡܸܢܹܗ ܚܕܼܵܐ ܙܒܲܢ ܘܬܲܪܬܹܝܢ: ܘܐܲܤܠܝܼ ܐܸܢܘܿܢ ܐܵܦ
ܡ̣ܢ ܦܘܼܢܵܝ ܦܸܬܼܓܼܵܡܵܐ. ܡܸܛܠ ܡܵܢܵܐ؟ ܐܸܡܲܪܘ: ܠܵܐ ܬܛܲܫܘܿܢ. ܠܵܐ
ܓܹܝܪ ܛܲܥ̈ܝܵܢ ܠܝܼ ܐܲܝܠܹܝܢ ܕܲܗ̤ܘܲܝ̈: ܗܵܟܲܢܵܐ ܕܠܵܐ ܟܘܼܚܵܕܼܵܐ ܐܸܬܼܥܒܸܕܼ:
pb. 381
ܐܲܝܟܲܢܵܐ ܕܠܵܐ ܡܸܫܟܿܚܵܐ ܕܢܸܬܿܛܲܫܸܐ ܥܘܼܬܵܕܼܵܐ ܕܥܲܬܸܕܼܘ. ܠܵܐ ܗ̄ܘ̣ܵܐ
ܓܹܝܪ ܡ̣ܢ ܕܝܼܢܵܐ ܐܸܫܬܿܐܸܠ ܗ̄ܘ̣ܵܐ: ܐܸܠܵܐ ܡ̣ܢ ܥܘܼܬܵܕܼܵܐ ܕܤܘܼܢܗܵܕܘܿܣ:
ܕܐܸܬܼܟܲܢܫܲܬ̤ ܡܢܵܬܼܵܢܵܐܝܼܬܼ ܠܲܡܕܼܵܢ: ܐܲܝܠܹܝܢ ܕܠܲܢ ܠܵܐ ܫ̣ܦܲܪ ܠܲܢ. ܗܵܝ̇
ܕܐܵܦܠܵܐ ܤܘܼܢܗܵܕܘܿܣ ܐܝܼܬܹܝܗ̇: ܐܲܝܕܵܐ ܕܲܒܼܥܸܠܕܝܼܢܵܐ ܒܕܲܝܵܢܹ̈ܐ ܝܵܬܹ̇ܒܼ.
ܘܐܵܦܠܵܐ ܚܲܢܲܢ ܦܩܲܕܼܢ ܚ̄ܢܲܢ: ܕܲܩܕܼܵܡ ܕܬܸܬܼܟܲܢܲܫ ܤܘܼܢܗܵܕܘܿܣ
ܟ̱ܠܵܗ̇ ܠܵܐ ܢܸܗܘܸܐ ܡܸܕܸܡ. ܠܲܟܼܢܘܼܫܝܵܐ ܓܹܝܪ ܕܟܼܠܗܘܿܬܢ ܩܪܲܝܢ ܚ̄ܢܲܢ
ܤܘܼܢܗܵܕܘܿܣ: ܘܠܵܐ ܕܐ̄ܢܵܢܵܫ̈ܝܼܿܢ. ܡܸܛܠ ܕܩܲܕܡܢ ܚ̄ܢܲܢ ܚܙܲܝܢ ܚ̄ܢܲܢ
ܠܥܘܼܬܵܕܼܵܐ ܘܲܠܢܸܟܼܠܵܐ ܕܲܗܘ̤ܵܐ: ܦܩܲܕܼܢ ܚ̄ܢܲܢ ܕܠܵܐ ܬܸܗܘܸܐ
ܤܘܼܢܗܵܕܘܿܣ ܡܢܵܬܼܵܢܵܐܝܼܬܼ: ܐܸܠܵܐ ܕܲܢܩܵܘܘܿܢ ܠܲܟܼܢܘܼܫܝܵܐ ܕܟܼܠܗܘܿܢ
ܐܲܦܸܤܩ̈ܘܿܦܹܿܐ. ܕܒܼܘܼܚܵܐ ܕܐܲܝܠܹܝܢ ܕܡܸܬܿܬܲܒܼ̈ܥܵܢ: ܢܸܗܘܸܐ ܒܫܘܼܐܵܠܵܐ
ܘܲܒܼܦܘܼܢܵܝ ܦܸܬܼܓܼܵܡܵܐ. ܗܸܢܘܿܢ ܡܵܕܹܝܢ ܫ̣ܪܵܘ ܠܤܘܼܢܗܵܕܘܿܣ ܬܹܒܹܠܵܝܬܼܵܐ:
ܘܲܠܢܵܡܘܿܤܵܐ ܕܒܹܝܬܼ ܕܝܼܢܵܐ. ܗܸܢܘܿܢ ܐܝܼܬܲܝܗܘܿܢ ܕܲܠܨܸܒܼܝܵܢܵܐ ܕܝܼܠܲܢ
ܒܡܸܕܸܡ ܠܵܐ ܚܫܲܒܼܘ: ܘܛܵܒܼܵܐܝܼܬܼ ܥܒܲܕܼ ܠܗܘܿܢ ܐܲܦܸܤܩܘܿܦܵܐ
ܕܐܲܢܛܝܵܟܼܝܵܐ: ܕܲܫ̣ܪܵܐ ܐܸܢܘܿܢ ܡ̣ܢ ܕܲܪܓܼܵܐ ܕܐܲܦܸܤܩܘܿܦܘܼܬܼܗܘܿܢ. ܕܠܵܐ
ܟܲܕܼ ܒܗܘܿܢ ܒܕܲܪ̈ܓܲܝܗܘܿܢ ܢܩܵܘܘܿܢ: ܢܨܲܥܪܘܼܢ ܠܕܲܪܓܲܝܗܘܿܢ. ܡܵܢܵܐ
ܗܵܟܹܝܠ ܐܲܤܟܸܠ̣ ܗܵܘ̇ ܕܒܼܵܥܹ̇ܐ ܗ̄ܘ̣ܵܐ ܡܸܢܗܘܿܢ: ܕܲܢܩܵܘܘܿܢ ܠܗܵܢܘܿܢ
ܕܪܲܚܼܩܝܼܢ ܗ̄ܘ̣ܵܘ: ܘܲܕܼܠܵܐ ܢܸܫܬܿܪܸܐ ܛܘܼܦܘܿܣ ܕܐܸܬܼܝܼܗܸܒܼ: ܘܠܵܐ
ܢܸܗܘܸܐ ܤܸܕܼܩܵܐ ܕܤܘܼܢܗܵܕܘܿܣ؟ ܥܲܠ ܥܵܠܹܝܢ ܙܵܕܹܩ ܗ̄ܘ̣ܵܐ ܕܢܸܫܬܿܪܸܐ
ܗܵܘ̇ ܕܠܵܐ ܥ̣ܒܲܪ ܒܡܸܕܸܡ ܡ̣ܢ ܐܲܝܠܹܝܢ ܕܐܸܬܿܬܲܚܲܡ ܗ̣̄ܘܲܝ̈
ܕܢܸܤܬܲܥܪ̈ܵܢ: ܐܸܠܵܐ ܡܛܲܝܲܒܼ ܗ̄ܘ̣ܵܐ ܕܡ̣ܢ ܟܠܢܵܫ ܢܸܬܿܬܿܕܝܼܢ ܟܲܕܼ ܠܵܐ
ܡܸܫܬܿܐܸܠ ܗ̄ܘ̣ܵܐ؟
pb. 382
ܡ̣ܢ ܕܫܲܠܸܡ̣ ܠܡܹܐܡܲܪ ܗܵܠܹܝܢ: ܐܲܝܬܿܝܼ ܘܐܸܡ݂ܲܪ: ܐܵܦܠܵܐ ܥܸܠܬܼܵܐ
ܕܥܸܕܼܠܵܝܵܐ ܡܸܫܟܲܚ ܐ̄ܢܵܐ ܒܵܬܲܪ ܓܲܒܼܪܵܐ ܗܵܢܵܐ: ܡܚܲܤܲܝ ܐ̄ܢܵܐ ܘܡܲܠܟܿܘܼܬܼܝ
ܕܓܸܢܤܝ ܡ̣ܢ ܪܘܼܥܵܐ ܗܵܢܵܐ. ܘܗܸܢ̣ܘܿܢ ܐܸܤܬܲܪܗܲܒܼܘ ܥܠܵܘܗܝ
ܕܦܸܬܼܓܼܵܡܵܐ ܗܵܢܵܐ ܘܠܲܒܼܟܿܘܼܗܝ: ܕܟܹܐܡܲܬܼ ܬܲܪܦܝܼ ܘܲܫܒܲܩ̣ ܐܸܢܹܝܢ
ܠܐܲܝܠܹܝܢ ܕܐܸܤܬܿܥܲܪ ܠܘܼܩܒܲܠܝ ܒܗܵܘ̇ ܡܵܐ ܕܲܤܥܲܪܘ. ܘܲܩܥ̣ܵܐ ܗ̄ܘ̣ܵܐ
ܕܲܠܡܵܛܝܼܣ ܘܐܲܝܠܹܝܢ ܕܥܲܡܹܗ: ܥܠܲܝ ܢܸܗܘܸܐ ܪܘܼܫܥܵܐ ܗܵܢܵܐ:
ܐܘܿ ܡܲܠܟܵܐ: ܐܸܢܵܐ ܠܵܟܼ ܘܲܠܕܼܝܼܠܵܟܼ ܪܵܫܹܐ ܐ̄ܢܵܐ ܥܲܠ ܐܲܦܲܝ̈ ܗܵܠܹܝܢ.
ܐܸܢܵܐ ܢܵܦܹ̇ܩ ܐ̄ܢܵܐ ܪܘܼܚܵܐ ܥܲܠ ܗܵܠܹܝܢ ܩܕܼܵܡ ܒܹܝܡ ܕܲܡܫܝܼܚܵܐ: ܕܐܸܢܵܐ
ܗ̄ܘ̣ ܥܒܲܕܬܹܗ ܠܲܥܒܼܵܕܼܐ ܠܲܥܒܼܵܕܼܵܐ ܗܵܢܵܐ . . . ܘܡ̣ܢ ܕܲܢܤܲܒܼ ܗ̄ܘ̣ܵܐ ܫܘܼܘܕܵܝܵܐ
ܗܵܢܵܐ ܕܲܕܼܠܵܐ ܡܲܪܢܝܼܬܼܵܐ ܢܸܗܘܸܐ: ܥܲܠ ܬܲܦܲܝ̈ ܐܲܝܠܹܝܢ ܕܡܲܪܫܥܝܼܢ ܒܝܼ:
ܦܤܲܩ̣ ܗ̄ܘ̣ܵܐ ܘܫܲܪܲܪ ܠܐܲܝܠܹܝܢ ܕܠܘܼܩܒܲܠ ܐܸܤܬܿܥܲܪ. ܗܵܟܲܢܵܐ
ܐܸܬܿܬܿܕܝܼܢܹܬܼ: ܘܗܵܟܲܢܵܐ ܗܘ̤ܵܐ ܐܵܦ ܒܘܼܚܵܢܵܐ.
ܘܡ̣ܢ ܕܐܸܫܬܲܠܲܡ ܗܵܠܹܝܢ ܕܡܸܢܗܘܿܢ ܐܸܬܼܥܲܬܲܕܼ ܥܠܲܝ: ܢܸܦܩܲܬ̤
ܡ̣ܢ ܡܲܠܟܿܘܼܬܼܵܐ ܓܘܼܕܵܐ ܕܪܘܼܫܥܵܐ. ܘܲܐ̄ܚܪ̈ܵܢܹܐ ܐ̄ܚܪ̈ܵܢܝܬܼܵܐ ܐܲܛܸܒܼܘ
ܥܠܲܝ. ܘܐܲܥܒܿܪܘܼܗܝ ܠܕܲܠܡܵܛܼܣ: ܟܲܕܼ ܡܲܓܸܿܣ ܗ̄ܘ̣ܵܐ ܥܲܠ
ܥܲܪܤܵܐ ܕܲܡܫܲܘܝܵܐ ܗ̄ܘ̣ܵܬܼ ܘܲܩܪܝܼܡܵܐ. ܘܲܛܥܝܼ̈ܢܵܢ ܗ̄ܘ̣ܵܝ̈ ܠܹܗ
ܟܘܿܕܲܢ̈ܘܵܬܼܵܐ ܒܡܸܨܥܲܬܼ ܕܲܡܕܼܝܼܢ̄ܬܼܵܐ: ܐܲܝܟܲܢܵܐ ܕܢܸܬܼܝܼܕܲܥ ܠܟܼܠ
ܐ̄ܢܵܫ: ܕܲܛܥܝܼܢ ܙܵܟܼܘܼܬܼܵܐ ܕܪܸܥܝܵܢܹܗ ܕܡܲܐܟܵܐ: ܥܲܡ ܟܸܢܫܵܐ ܤܲܓܿܝܼܐܵܐ
ܕܥܲܡܵܐ ܘܲܕܿܕܲܝܼܪ̈ܵܝܹܐ: ܕܲܡܪܲܩܕܼܝܼܢ ܗ̄ܘ̣ܵܘ ܘܢܵܩ̇ܫܝܼܢ ܟܲܦܵܐ: ܘܩܵܥܹ̇ܝܢ
ܗ̄ܘ̣ܵܘ ܐܲܝܠܹܝܢ ܕܢܵܫ̈ܟܿܚܵܢ ܕܢܸܬܼܐܲܡܪ̈ܵܢ ܥܲܠ ܐܲܝܢܵܐ ܕܒܼܥܵܘܼܠܵܐ ܐܸܫܬܿܪܝܼ.
ܡ̣ܢ ܕܹܝܢ ܕܐܸܬܼܝܲܕܼܥܲܬ̤ ܕܐܸܬܿܬܿܚܸܕܼ ܡܸܢܗܘܿܢ ܪܸܥܝܵܢܹܗ ܕܡܲܠܟܵܐ:
pb. 383
ܐܸܬܿܬܵܘܤܲܦܘ ܥܠܲܝܗܘܿܢ ܟܠܗܘܿܢ ܗܲܪ̈ܲܛܝܼܩܹܐ: ܐܲܝܠܹܝܢ ܕܡ̣ܢ ܩܕܝܼܡ
ܡܹܢܝ ܐܸܫܬܿܪܝܼܘ ܗ̄ܘ̣ܵܘ. ܘܟܼܠܗܘܿܢ ܡ̣ܢ ܚܲܕܼ ܦܘܼܡ ܩܵܥܹ̇̄ܝܢ ܗ̄ܘ̣ܵܘ
ܚܸܪܡܝܼ ܫܲܘܝܵܐܝܼܬܼ: ܟܲܕܼ ܠܒܼܝܼܟܼܝܼܢ ܗ̄ܘ̣ܵܘ ܦܲܪܹܗ̄ܤܝܼܵܐ ܕܗܵܘ̇ ܡܸܕܸܡ
ܕܲܗܘ̤ܵܐ ܗ̄ܘ̣ܵܐ: ܒܟܼܠ ܕܘܼܟܿܬܼܵܐ ܕܡܕܼܝܼܢ̄ܬܼܵܐ: ܝܲܬܿܝܼܪܵܐܝܼܬܼ ܕܹܝܢ
ܒܙܼܕܼ̈ܟܿܝܵܬܼܵܐ
ܕܒܹܝܬܼ ܡܲܩܕܫܵܐ. ܐܲܝܟܲܢܵܐ ܕܢܵܘܤܦܘܼܢ ܥܠܲܝܗܘܿܢ ܟܸܢܫܵܐ ܕܥܲܡܵܐ:
ܕܢܲܪܫܥܘܼܢ ܕܠܵܐ ܟܘܼܚܵܕܼ. ܠܒܼܝܼܟܼܝܼܢ ܗ̄ܘ̣ܵܘ ܕܹܝܢ ܦܵܪܹܗ̄ܤܝܼܵܐ ܗܵܕܹܐ:
ܟܲܕܼ ܢܲܩ̇ܫܝܼܢ ܗ̄ܘ̣ܵܘ ܟܲܦܹ̈ܐ: ܘܡܸܕܼܡ ܐ̄ܚܪܹܝܢ ܠܵܐ ܐܵܡ̇ܪܝܼܢ ܗ̄ܘ̣ܵܘ. ܐܸܠܵܐ
ܐܸܢ ܕܡܝܼܬܼ ܐܲܠܵܗܵܐ ܡܸܠܬܼܵܐ.
ܘܠܲܝܬܿ ܗ̄ܘ̣ܵܐ ܦܘܼܪܫܵܢܵܐ ܡܸܕܸܡ ܒܹܝܬܼ ܗܲܪ̈ܛܝܼܩܹܐ ܠܐܵܪ̈ܬܵܕܘܿܟܿܤܹܐ:
ܟܠܗܘܿܢ ܐܲܟܲܚ̄ܕܼ ܩܵܝ̇ܡܝܼܢ ܗ̄ܘ̣ܵܘ ܠܘܼܩܒܲܠ ܐܲܠܵܗܵܐ ܡܸܠܬܼܵܐ. ܘܲܠܗܵܢܘܿܢ
ܕܠܵܐ ܡܸܬܿܛܝܼܦܝܼܤܝܼܢ ܗ̄ܘ̣ܵܘ ܕܢܹܐܡܪܘܼܢ ܚܲܫܵܐ ܥܲܠ ܟܝܵܢܹܗ ܕܐܲܠܵܗܵܐ
ܡܸܠܬܼܵܐ: ܐܲܝܟܼ ܕܠܘܼܩܒܲܠ ܪ̈ܲܫܝܼܥܹܐ ܕܠܵܐ ܪ̈ܲܚܡܝܼܢ ܡܲܩܪܒܼܝܼܢ ܗ̄ܘ̣ܵܘ:
ܟܲܕܼ ܐܵܡ̇ܪܝܼܢ ܗ̄ܘ̣ܵܘ: ܕܠܵܐ ܠܲܡ ܐܸܬܼܢܩܸܦ ܠܵܐ ܡܵܝܘܿܬܼܵܐ ܠܡܵܝܘܿܬܼܵܐ:
ܕܲܢܡܝܼܬܼܘܗܝ ܠܡܵܝܘܿܢܬܼܵܐ ܒܠܵܐ ܡܵܝܘܿܬܼܘܼܬܹܗ. ܐܸܠܵܐ ܕܲܠܩܘܼܒܼܠܵܐ:
ܕܢܸܗܘܸܐ ܠܵܐ ܡܵܝܘܿܬܼܵܐ ܡܵܝܘܿܬܼܵܐ: ܠܡܵܝܘܿܬܼܵܐ ܢܩܸܦ̣. ܘܗܵܟܲܢܵܐ ܩܵܡ̣
ܟܲܕܼ ܡܝܼܬܼ ܥܲܡܹܗ: ܒܠܵܐ ܡܵܝܘܿܬܼܬܼܵܐ ܕܗܵܘ̇ ܕܩܵܡ̣. ܘܟܼܠ ܐܲܝܟܼ
ܢܸܗܘܸܐ ܠܵܐ ܡܵܝܘܿܬܼܵܐ. ܐܲܝܟܲܢܵܐ ܕܲܗܘ̤ ܒܲܟܼܝܵܢܹܗ ܢܸܗܘܸܐ ܡܩܲܒܸܿܠ ܗܵܝ̇
ܕܠܵܐ ܡܵܝܘܿܬܼܵܐ ܘܗܵܝ̇ ܕܡܵܝܘܿܬܼܵܐ: ܠܦܘܼܬܼ ܚܲܝܠܵܐ ܕܦܵܩܘܿܕܸܼܵܐ. ܗܵܝ̇
ܕܡܸܫܟܲܚ ܕܠܠܵܐ ܡܵܝܘܿܬܼܵܐ ܡܵܝܘܿܬܼܵܐ ܢܸܥܒܿܕܝܼܘܗܝ: ܘܲܠܡܵܝܘܿܬܼܵܐ ܠܵܐ
ܡܵܝܘܿܬܼܵܐ. ܘܗܵܠܹܝܢ ܥܲܪܛܸܠܵܐܝܼܬܼ ܡܸܬܼܐܲܡܪ̈ܵܢ ܗ̄ܘ̣ܵܝ̈ ܡ̣ܢ ܗܵܠܹܝܢ ܘܡ̣ܢ
ܗܵܠܹܝܢ: ܘܡ̣ܢ ܗܲܪ̈ܵܛܝܼܩܹܐ ܐ̄ܚܪ̈ܵܢܹܐ: ܒܒܼܵܬܹ̈ܐ ܘܲܒܼܫܘܼ̈ܩܹܐ ܘܲܒܼܟܼܠܗܹܝܢ
pb. 384
ܥܹ̈ܕܵܬܼܵܐ ܡܸܙܕܲܡܪ̈ܵܢ ܗ̣̄ܘܲܝ̈ ܘܡܸܬܼܢܲܩ̈ܫܵܢ ܗ̣̄ܘܲܝ̈. ܕܡ̣ܢ ܗܵܠܹܝܢ: ܠܵܐ
ܬܸܫܟܲܚ ܠܲܡܦܲܪܵܫܘܼ ܠܐܲܝܠܹܝܢ ܕܡܼܬܼܐܲܡܪܵܢ ܗ̣̄ܘܲܝ̈ ܒܥܹ̈ܕܼܵܬܼܵܐ: ܐܵܘ
ܕܬܸܕܲܥ ܠܗܹܝܢ ܥܹ̈ܕܵܬܼܵܐ: ܕܐܸܢ ܕܗܲܪ̈ܵܛܝܼܩܹܐ ܐܝܼܬܲܝܗܹܝܢ ܗ̣̄ܘܲܝ̈: ܘܐܸܢ
ܕܐܵܪ̈ܬܵܕܘܿܟܿܤܹܐ. ܕܐܲܝܟܼ ܗܵܕܹܐ ܫܲܠܡܘܼܬܼܵܐ ܘܲܚܦܝܼܛܘܼܬܼܵܐ ܗܘ̤ܵܬܼ:
ܠܡܸܠܒܲܟܼ ܗܲܝܡܵܢܘܼܬܼܵܐ: ܘܲܠܡܵܘܕܵܝܘܼ ܐܲܠܵܗܵܐ ܚܵܫܘܿܫܵܐ. ܘܲܒܼܬܲܚܘ̈ܝܬܼܵܐ
ܕܐܲܝܟܼ ܗܵܠܹܝܢ ܡܸܬܼܚܲܫܚܝܼܢ ܗ̄ܘ̣ܵܘ: ܕܲܥܠܲܝܗܹܝܢ ܟܲܕܼ ܥܠܲܝܗܹܝܢ
ܡܸܬܼܩܲܛܪܓܼܝܢ ܗ̄ܘ̣ܵܘ: ܘܲܥܠܲܝܗܹܝܢ ܢܲܦܩ̇ܝܼܢ ܗ̄ܘ̣ܵܘ ܪܘܼܚܵܐ ܒܗܹܝܢ ܟܲܕܼ
ܒܗܹܝܢ. ܘܚܲܕ ܦܘܼܡܵܐ ܐܝܼܬܼ ܗ̄ܘ̣ܵܐ ܠܟܼܠܗܘܿܢ: ܘܚܲܕܼ ܠܸܵܒܵܐ: ܘܲܚܕܼܵܐ
ܫܲܠܡܘܼܬܼܵܐ ܠܘܼܩܒܲܠ ܐܲܠܵܗܵܐ ܡܸܠܬܼܵܐ. ܐܲܝܟܲܢܵܐ ܕܢܸܬܼܒܲܤ̈ܝܵܢ ܬܸܫܡ̈ܫܵܬܼܵܐ
ܕܲܒܼܥܹ̈ܕܵܬܼܵܐ ܘܲܒܼܕܲܪ̈ܵܬܼܵܐ: ܘܢܹܐܨܦܘܼܢ ܠܐܸܤܛܵܤܝܼܣ ܘܠܲܪ̈ܕܼܘܼܦܝܹܐ
ܘܲܠܤܘܼܥܪ̈ܵܢܹܐ ܕܐܲܝܟܼ ܗܵܠܹܝܢ: ܕܐܲܝܠܹܝܢ ܕܲܡܦܲܪܢܤܝܼܢ ܠܗܘܿܢ ܩܸܢܝܵܢܹ̈ܐ
ܘܬܲܪ̈ܤܝܵܬܼܵܐ ܘܲܡܫܲܪܬܿܚܘܼܬܼܵܐ ܡ̣ܢ ܟܠܗܹܝܢ ܐܲܝܠܹܝܢ ܕܝܵܗ̇ܒܿܝܼܢ:
ܘܲܡܥܲܬܿܕܹܝܢ ܗ̄ܘ̣ܵܘ ܠܗܘܿܢ ܘܬܼܵܒܼܥ̇ܝܼܢ ܗ̄ܘ̣ܵܘ ܠܗܘܿܢ: ܕܲܕܼܠܵܐ ܫܲܠܘܵܐ
ܒܗܵܠܹܝܢ ܢܸܗܪܓܼܘܼܢ.
ܐܸܬܼܚܲܙܝܲܬ̤ ܗܵܟܹܝܠ ܠܡܲܠܟܵܐ: ܕܐܸܗܘܸܐ ܐܸܢܵܐ ܒܲܫܪܵܝܵܐ: ܘܢܸܗܘܸܐ
ܐܵܦ ܩܘܼܪܸܠܘܿܣ ܘܡܲܡܢܘܿܢ ܒܲܫܪܵܝܵܐ: ܒܵܗ̇ ܒܲܕܼܡܘܼܬܼܵܐ. ܡܸܤܬܲܒܼܪܵܐ
ܗ̄ܘ̣ܵܬܼ ܗܵܟܹܝܠ: ܕܡܸܛܠ ܕܢܹܐܠܘܲܨ ܠܟܼܠܲܢ ܕܢܹܐܬܸܐ ܠܫܲܠܡܘܼܬܼܵܐ:
ܘܲܕܢܸܬܼܩܲܒܲܠ ܘܕܲܢܩܲܒܸܿܠ ܠܲܚܕܼܵܕܹ̈ܐ ܥܵܒܹ̇ܕܼ ܗܵܕܹܿܐ. ܘܲܕܢܸܥܒܸܕܼ ܠܟܼܠܲܢ
ܒܚܲܕܼ ܪܸܥܝܵܢܵܐ: ܡܲܓܲܪ ܪܘܼܚܹܐ ܒܲܫܪܵܝܵܐ ܕܝܼܠܝ. ܘܲܡܩܵܘܸܐ ܬܘܼܒܼ
ܕܠܵܐ ܬܲܪܥܘܼܬܼܵܐ ܠܘܼܩܒܲܠ ܗܵܢ̇ܘܿܢ: ܐܲܝܟܲܢܵܐ ܕܢܲܥܠܲܢܝ ܐܵܦ ܠܝܼ
ܡ̣ܢ ܟܠ ܦܪܘܿܣ: ܒܲܚܦܝܼܛܘܼܬܼܗܘܿܢ ܘܲܒܼܒܼܵܥܘܼܬܼܗܘܿܢ ܕܲܚܠܵܦ
ܩܘܼܪܸܠܘܿܣ: ܕܬܸܤܬܿܒܲܪ ܕܚܸܟܼܡܬܼܵܐ ܕܡܲܠܟܿܘܼܬܼܵܐ ܚܸܤܢܲܬ̤
pb. 385
ܠܪܸ̈ܥܝܵܢܲܝܗܘܿܢ. ܗܵܕܹܐ ܟܹܝܢ ܠܵܘ ܗܵܟܲܢܵܐ ܐܝܼܬܹܝܗ̇ ܗ̄ܘ̣ܵܬܼ: ܐܸܠܵܐ ܐܵܘ
ܡܸܛܠ ܕܐܸܫܬܲܚܠܲܦ ܪܸܥܝܵܢܹܗ ܕܡ̣ܢ ܫܘܼܪܵܝܵܐ ܐܝܼܬܼܵܘܗܝ ܗ̄ܘ̣ܵܐ
ܬܪܝܼܨܵܐܝܼܬܼ: ܐܵܘ ܕܡ̣ܢ ܫܘܼܪܵܝܵܐ ܗ̤ܘ ܪܸܥܝܵܢܵܐ ܗܵܢܵܐ ܐܝܼܬܼ ܗ̄ܘ̣ܵܐ ܠܹܗ:
ܒܐܸܤܟܹܡܵܐ ܕܹܝܢ ܐܝܼܬܼܵܘܗܝ ܗ̄ܘ̣ܵܐ ܠܘܵܬܼܝ: ܥܲܕܼ ܡܸܫܟܲܚ ܗ̄ܘ̣ܵܐ
ܡܲܓܿܪܲܬܼ ܪܘܼܚܵܐ ܠܤܵܦܩܘܼܬܼܵܐ ܕܲܡܙܲܒܿܢܵܢܘܼܬܼܵܐ ܕܲܒܼܩܸܢܝܵܢܹ̈ܐ. ܒܪܲܡ
ܕܹܝܢ ܟܠ ܐܲܝܟܲܢ ܕܗ̤ܘ ܕܗܵܘ̇ܝܵܐ ܗ̄ܘ̣ܬܼ: ܐܸܢܵܐ ܠܗܵܕܹܐ
ܡܛܹ̇ܝܬܼ.
ܟܲܕܼ ܕܹܝܢ ܐܸܫܬܲܕܲܪ ܝܘܿܚܲܢܵܢ ܩܘܿܡܹܣ ܕܩܵܐܹ̇ܩ ܗ̄ܘ̣ܵܐ ܥܲܠ ܓܲܙܵܐ
ܠܐܲܦܸܤܘܿܣ: ܘܡܸܬܲܒܼܪܵܐ ܗ̄ܘ̣ܵܬܼ ܕܡܸܛܠ ܕܲܢܡܲܠܸܠ ܐܸܢܵܐ
ܤܘܼܬܢܗܵܕܘܿܣ: ܘܡܸܟܹܝܠ ܕܠܵܐ ܡܸܫܬܲܐܠܵܢܘܼܬܼܵܐ ܐܝܼܬܼܵܘܗܝ ܗ̄ܘ̣ܵܐ
ܤܘܼܥܪܵܢܵܐ. ܒܟܼܠܗܹܝܢ ܗܘ̤ܵܬܼ ܗ̄ܘ̣ܵܬܼ ܠܕܚܠܬܼܵܐ ܘܲܠܬܸܡܗܵܐ ܕܗܵܢ̇ܘܿܢ.
ܗܵܟܲܢܵܐ ܗܵܘ̇ܝܵܐ ܗ̄ܘ̣ܵܬܼ ܠܗܘܿܢ ܕܲܚܠܬܼܵܐ ܘܙܵܘܸܥܬܼܵܐ ܕܲܢܡܲܠܠܘܼܬ ܥܲܡܝ:
ܘܲܕܢܸܗܘܸܐ ܒܡܸܠܲܝ̈ܢ ܕܝܼܢܵܐ: ܥܲܠ ܐܲܝܠܹܝܢ ܕܡܸܬܿܬܲܒܼ̈ܥܵܢ ܗ̣̄ܘܲܝ̈. ܒܪܲܡ
ܠܵܐ ܫܡܠܝܼ ܗ̄ܘ̣ܵܐ ܚܹܐܦܹܐ: ܐܸܠܵܐ ܐܸܬܼܪܲܦܝܼ ܗ̄ܘ̣ܵܐ. ܡܸܛܠ ܕܲܢܩܲܫ̣
ܒܹܗ ܗܵܘ̇ ܕܲܪܚܝܼܡ ܥܲܠ ܒܢܲܝ̈ ܐ̄ܢܵܫܵܐ: ܗܵܘ̇ ܡܵܐ ܕܐܵܦ ܗܵܝܕܹܝܼܟܼ
ܡܸܬܼܐܡܲܪ ܗ̄ܘ̣ܵܐ ܐܲܝܟܼ ܕܲܒܼܛܸܒܵܐ. ܠܚܲܪܬܼܵܐ ܕܹܝܢ ܗܵܘ̇ ܕܲܠܟܲܤ̈ܝܵܬܼܵܐ
ܓܵܠܹ̇ܐ: ܓܠܵܝܗܝ ܗ̄ܘ̣ܵܐ ܘܲܠܡܘܼܗܪܵܐ ܐܲܝܬܹܝܗ̇: ܕܲܠܥܹܝܢ ܟܠܢܵܫ
ܐܵܘܕܥܹܗ. ܘܲܒܼܚܲܝ̈ܘܗܝ ܐܲܒܼܗܬܹܗ: ܘܡ̣ܢ ܒܵܬܲܪ ܡܵܘܬܹܗ ܐܸܬܼܟܿܤܸܣ.
ܘܗܵܘ̇ ܕܙܲܒܿܢܹܗ ܠܲܫܪܵܪܵܐ: ܗܵܢܵܘ ܕܹܝܢ ܝܘܿܚܲܢܵܢ. ܘܗܵܘ̇ ܕܝܲܬܿܝܼܪ
ܡܸܢܹܗ: ܗܵܢܵܘ ܕܹܝܢ ܩܘܼܪܸܠܘܼܣ: ܟܲܕܼ ܕܲܗܒܼܵܐ ܗܵܘ̇ ܕܥܵܘ̣ܠܵܐ ܐܸܬܿܬܿܒܲܥ
pb. 386
ܗ̄ܘ̣ܵܐ. ܐܸܠܵܐ ܬܸܬܿܤܝܼܡ ܗܵܕܹܐ ܒܲܡܨܲܥܬܼܵܐ: ܘܐܲܝܟܼ ܕܲܗ̤ܘܲܝ̈ ܐܲܝܟܼ
ܕܲܒܼܒܲܬܼ ܩܵܠܵܐ ܩܵܥ̈ܝܵܢ ܗ̣̄ܘܲܝ̈ ܘܲܡܚܵܘ̈ܝܵܢ ܗ̣̄ܘܲܝ̈: ܕܢܠ̈ܦܵܢ ܠܟܼܠܗܘܿܢ
ܒܢܲܝ̈ܢܵܫܵܐ.
ܡ̣ܢ ܕܐܸܬܼ݂ܵܐ ܗ̄ܘ̣ܵܐ ܓܹܝܪ ܝܘܿܚܲܢܵܢ ܠܐܲܦܸܤܘܿܣ: ܦܩܲܕܼ ܗ̄ܘ̣ܵܐ
ܠܟܼܠܢܵܫ ܠܡܹܐܬܼܵܐ. ܘܡܲܡܢܘܿܢ ܥܪܲܩ̣ ܡ̣ܢ ܐܲܝܠܹܝܢ ܕܗܵܘ̈ܝܵܢ ܗ̣̄ܘܲܝ̈:
ܘܟܲܕܼ ܡܲܦܩܝܼܢ ܠܹܗ ܡ̣ܢ ܡܲܕܼܒܿܚܵܐ: ܘܲܩܪܵܝܗܝ ܐܲܝܟܼ ܕܲܠܡܡܲܠܠܵܐ
ܕܚܘܼܒܵܐ: ܐܲܫܠ̱ܡܹܗ ܕܢܸܬܼܢܛܲܪ: ܕܲܒܼܡܸܕܸܡ ܠܵܐ ܢܸܬܼܒܲܨܲܪ ܡ̣ܢ ܐܲܝܠܹܝܢ
ܕܙܵܕ̈ܩܵܢ ܠܒܼܘܼܚܵܢܵܐ ܕܪܹܫܵܢܘܼܬܼܵܐ: ܕܐܲܝܠܹܝܢ ܕܙܵܕ̈ܩܵܢ ܠܟܼܠ ܐ̄ܢܵܫ
ܠܡܸܥܒܲܕܼ. ܡ̣ܢ ܕܹܝܢ ܕܐܸܬܼܟܲܢܲܫܢܲܢ ܚܢܲܢ ܟ̱ܠܲܢ: ܐܲܝܟܼ ܕܢܸܫܡܲܥ ܓܵܘܵܢܵܐܝܼܬܼ
ܟܬܼܝܼܵ̈ܒܼܵܬܐ ܕܡܲܠܟܵܐ: ܕܐܲܝܟܼ ܗܵܟܲܢܐ ܐܸܬܼܪܲܦܝܼ ܪܸܥܝܵܢܹܗ: ܘܲܐ̄ܚܪܹܢܵܐ
ܚܠܵܦ ܐ̄ܚܪܹܢܵܐ ܗ̄ܘ̣ܵܐ: ܐܲܝܟܲܢܵܐ ܕܲܫܥܵܬܼܵܐ ܢܸܤܥܘܿܪ: ܝܲܬܼܝܼܪ ܡ̣ܢ
ܕܢܸܬܼܚܲܦܛ ܥܲܠ ܐܲܝܠܹܝܢ ܕܗܵܟܲܢܵܐ ܫܵܘ̈ܝܵܢ ܗ̣̄ܘܲܝ̈ ܠܲܚܦܝܼܛܘܼܬܼܵܐ.
ܟܲܕܼ ܓܹܝܪ ܥܬܝܼܪܼܵܐ ܗ̄ܘ̣ܵܬܼ ܕܬܸܬܼܩܪܸܐ ܐܸܓܲܪܬܵܐ ܕܡܲܠܟܿܘܼܬܼܵܐ ܕܲܠܘܵܬܼ
ܟܠ ܐ̄ܢܵܫ ܟܬܼܝܼܒܼܵܐ ܗ̄ܘ̣ܵܬܼ: ܐܲܦܝܼܤܹܗ ܩܘܼܪܸܠܘܿܣ ܘܐܲܝܠܹܝܢ
ܕܥܲܡܹܗ: ܕܠܵܐ ܐܹܬܸܐ ܐܸܢܵܐ ܩܕܼܵܡ ܐܲܦܲܘ̈ܗܝ: ܐܸܠܵܐ ܠܓܼܵܘ ܡ̣ܢ ܐܲܦܲܝ̈
ܬܲܪܥܵܐ ܐܸܫܡܲܥ ܠܐܲܝܠܹܝܢ ܕܲܟܼܬܲܒܼ ܡܲܠܟܵܐ. ܗܵܠܹܝܢ ܤ̣ܥܲܪ ܗ̄ܘ̣ܵܐ: ܟܲܕܼ
ܡܸܕܸܡ ܡ̣ܢ ܐܲܝܠܹܝܢ ܕܙܵܕܼ̈ܩܵܢ ܗ̣̄ܘܲܝ̈ ܠܵܐ ܐܲܥܸܠ ܠܪܸܥܝܵܢܹܗ: ܡܸܛܠ
ܕܡ̣ܢ ܟܲܕܼܘܼ ܡܕܲܗܲܒܼ ܗ̄ܘ̣ܵܐ. ܘܟܲܕܼ ܡܲܪܓܿܫܝܼܢ ܗ̄ܘ̣ܵܘ ܕܗܵܠܹܝܢ ܕܝܼܠܝ
ܡܸܬܼܩܲܪ̈ܝܼܢ ܗ̣̄ܘܲܝ̈: ܒܩܘܼܠܵܤܹ̈ܐ ܤܲܓܿܝܼ̈ܐܹܐ ܡܩܲܠܤܝܼܢ ܗ̄ܘ̣ܵܘ ܠܡܲܠܟܵܐ.
ܘܟܲܕܼ ܐܸܬܼ݂ܵܐ ܥܲܠ ܐܲܝܠܹܝܢ ܕܩܘܼܪܸܠܘܿܣ: ܩܵܥܹ̇ܝܢ ܗ̄ܘ̣ܵܘ ܘܡܵܘܡܹܝܢ
ܕܠܵܐ ܢܸܬܼܩܲܪ̈ܝܵܢ ܗܵܠܹܝܢ. ܒܕܲܐܝܟܼ ܗܵܢܵܐ ܦܵܪܹܗ̄ܤܝܼܵܐ ܕܲܛܠܵܝܹ̈ܐ
pb. 387
ܡܸܬܼܚܲܫܚܝܼܢ ܗ̄ܘ̣ܵܘ: ܗܵܢ̇ܘܿܢ ܕܡ̣ܢ ܕܩܝܼܡ ܪܵܥܠ̇ܝܼܢ ܗ̄ܘ̣ܵܘ:
ܘܲܠܡܸܬܿܛܲܒܵܥܘܼ ܒܐܲܪܥܵܐ ܐܸܢ ܡܫܟܿܚܵܐ ܗ̄ܘ̣ܵܬܼ ܚܦܝܼܛܝܼܢ ܗ̄ܘ̣ܵܘ: ܟܲܕܼ
ܐܵܦ ܠܵܐ ܚܲܕܼ ܡܲܦܲܩ ܒܪܘܼܚܵܐ ܐܝܼܬܼ ܗ̄ܘ̣ܵܐ ܠܗܘܿܢ: ܠܵܐ ܥܲܠ ܐܲܝܠܹܝܢ
ܕܐܲܡܪܲܚܘܼ ܘܲܤ̣ܥܲܪܘ ܠܒܲܪ ܡ̣ܢ ܦܘܼܩܕܵܢܵܐ: ܘܠܵܐ ܥܲܠ ܒܘܼܚܵܢܵܐ
ܕܗܲܝܡܵܢܘܼܬܼܵܐ. ܡ̣ܢ ܕܹܝܢ ܕܐܸܬܼܝܲܗ̇ܒܹܬܼ ܐܸܢܵܐ ܠܲܢܛܘܼܪܬܵܐ: ܘܗܵܟܲܢܵܐ ܐܵܦ
ܩܘܼܪܸܠܘܿܣ: ܐܲܝܟܼ ܕܲܒܼܤܲܡܒܪܵܢܘܼܬܼܵܐ ܕܠܵܐ ܢܸܥܘܿܠ ܘܢܲܕܪܸܟܼ ܠܲܡܕܼܝܼ̈ܢܵܬܲܢ.
ܗܵܝ̇ ܕܲܗܘ̤ܵܬܼ ܗ̄ܘ̣ܵܬܼ ܐܵܦ ܡ̣ܢ ܩܕܝܼܡ ܡ̣ܢ ܦܘܼܩܕܵܢܵܐ ܕܡܲܠܟܵܐ: ܕܠܵܐ
ܢܸܬܼܩܲܒܲܠ ܡ̣ܢ ܪܹ̈ܫܵܢܹܐ ܘܡ̣ܢ ܐܲܝܠܹܝܢ ܕܲܦܩܝܼܕܝܼܢ ܥܲܠ ܝܲܨܝܼܦܘܼܬܼܵܐ
ܕܲܡܕܝܼ̈ܢܵܬܼܵܐ.
ܐ̄ܚܪܵܝܑܬܼ ܕܹܝܢ ܠܝܼ ܦܩܲܕܼ ܠܡܸܥܡܲܪ ܒܲܡܕܼܝܼܢ̄ܬܿܝ: ܐܲܝܟܵܐ ܕܫܵܦܲܪ
ܠܝܼ. ܠܵܘ ܒܡܲܦܤܵܢܘܼܬܼܵܐ: ܐܸܠܵܐ ܡ̣ܢ ܒܵܥܘܼܬܼܵܐ ܕܝܼܠܝ. ܒܥܹ̇ܝܬܼ ܗ̄ܘܹ̇ܝܬܼ
ܓܹܝܪ ܙܲܒܼܢ̈ܝܼܢ ܤܲܓܝܼ̈ܐܵܢ: ܘܛܲܝܒܿܘܼܬܼܵܐ ܒܼܥܹ̇ܝܬܼ ܡ̣ܢ ܐܲܝܠܹܝܢ ܕܐܝܼܬܼ ܗ̄ܘ̣ܵܐ
ܠܗܘܿܢ ܦܲܪܹܗ̄ܤܝܼܵܐ ܨܸܝܕܼ ܡܲܠܟܵܐ: ܘܡܸܤܬܲܒܼܪܝܼܢ ܗ̄ܘ̣ܵܘ ܪ̈ܵܚܡܲܝ:
ܕܢܲܠܦܘܼܢ ܠܡܲܠܟܵܐ: ܕܐܸܢܵܐ ܥܲܠ ܫܘܼܒܼܚܵܐ ܐ̄ܢܵܫܵܝܵܐ ܕܐܲܦܸܤܩܘܿܦܘܼܬܼܵܐ
ܡܸܠܬܼܵܐ ܠܲܝܬܿ ܠܝܼ. ܐܸܠܵܐ ܪܓܼܝܼܓܼ ܐ̄ܢܵܐ ܠܟܼܘܼܪܚܵܐ ܕܝܼܠܝܪ: ܗܵܕܹܐ
ܛܲܝܒܿܘܼܬܼܵܐ ܥܒܸܕܼ ܒܝܼ. ܘܲܩܕܼܵܡ ܗܵܕܹܐ: ܕܢܸܗܘܸܐ ܐܵܦ ܒܸܠܵܕܲܝ
ܒܘܼܚܵܢܵܐ ܕܗܲܡܵܢܘܼܬܼܵܐ. ܐܲܝܟܲܢܵܐ ܕܠܵܐ ܒܝܲܕܼ ܚܲܫܵܐ ܕܠܘܼܩܒܲܠܝ:
ܢܹܐܒܼܕܘܼܢ ܡ̣ܢ ܗܲܝܡܵܢܘܼܬܼܵܐ. ܚܵܙܹ̇ܐ ܗ̄ܘܹ̇ܝܬܼ ܓܹܝܪ ܐܸܢܵܐ ܠܥܘܼ̈ܬܵܕܹܐ
ܘܠܲܩܪ̈ܵܒܹܐ ܕܲܗܘ̤ܵܘ ܩܲܕܼܡܵܝܑܬܼ ܠܘܼܩܒܲܠܝ: ܘܟܲܕܼ ܠܲܝܬܿ ܗ̄ܘ̣ܵܐ
ܠܘܼܩܒܲܠ ܦܲܪܨܘܿܦܝ ܥܸܠܬܼܵܐ ܕܲܩܛܹܐܓܼܪܵܢܘܼܬܼܵܐ ܐܲܝܟܼ ܕܲܢܲܦܩܘܼܢܵܢܝ
ܘܢܸܫܪܘܿܢܵܢܝ ܡ̣ܢ ܩܘܼܤܛܲܢܝܼܢܵܦܘܿܠܝܼܣ: ܥܲܠ ܗܲܝܡܵܢܘܼܬܼܵܐ ܐܸܬܼ݂ܵܘ
ܗ̄ܘ̣ܵܘ. ܘܲܒܼܝܲܕܼ ܚܲܫܗܘܿܢ ܕܠܘܼܩܒܲܠܝ: ܚܲܫ̣ܘ ܐܵܦ ܠܘܩܒܲܠ
ܗܲܝܡܵܢܘܼܬܼܵܐ. ܘܐܸܤܬܲܒܼܪܲܬ̤ ܠܝܼ: ܕܗܵܕܹܐ ܦܵܩ̇ܚܵܐ ܘܲܡܥܲܕܪܵܐ: ܕܐܸܢܵܐ
pb. 388
ܡ̣ܢ ܢܲܦܫܝ ܐܲܗܡܸܐ: ܕܬܸܗܘܸܐ ܗܵܝ̇ ܕܐܵܠ̇ܨܵܐ ܗ̄ܘ̣ܵܬܼ ܥܠܹܝܗ̇
ܝܲܬܿܝܼܪܵܐܝܼܬܼ. ܡܵܐ ܓܹܝܪ ܕܡܸܫܬܲܪܝܵܐ ܒܥܸܠܕܒܼܵܒܼܘܼܬܼܵܐ: ܟܡܵܐ ܙܲܒܼܢ̈ܝܼܢ
ܥܵܛ̇ܦܝܼܢ ܠܘܵܬܼ ܢܲܦܫܗܘܿܢ.
ܠܝܼ ܕܹܝܢ ܝܲܗ̣̄ܒܼ ܗ̄ܘ̣ܵܐ ܦܸܪܢܝܼܬܼܵܐ ܕܛܲܝܒܿܘܼܬܼܵܐ: ܕܠܵܗ̇ ܟܲܕܼ ܠܵܗ̇
ܙܲܒܿܢܵܗ̇ ܗ̄ܘ̣ܵܐ ܠܩܘܼܪܸܠܘܿܣ. ܐܲܝܟܲܢܵܐ ܕܐܵܦ ܗܵܕܹܐ ܐܸܬܼܓܲܠܝܲܬ̤: ܒܵܬܲܪ
ܡܵܘܬܹܗ ܕܗܵܢܵܐ: ܒܬܼܵܘܕܝܼܬܼܵܐ ܕܲܥܠܲܝ ܕܒܲܟܼܬܼܝܼ̈ܒܼܵܬܼܵܐ ܐܸܫܬܲܟܼܚܲܬ̤. ܒܲܪ
ܫܵܥܬܹܗ ܓܹܝܪ ܕܲܗܘ̤ܵܐ ܬܵܘܕܝܼܬܼܵܐ ܗܵܕܹܐ: ܢܦܲܩ̣ ܗ̄ܘ̣ܵܐ ܡܵܘܬܵܐ ܗܵܘ̇
ܕܲܠܟܼܠ ܐ̄ܢܵܫ ܡܲܟܸܿܣ ܘܠܵܐ ܚܵܐܹ̇ܣ: ܒܕܲܐܝܟܼ ܗܵܠܹܝܢ ܥܘܼܕܼܪ̈ܵܢܹܐ
ܡܸܬܼܚܲܫܲܚ ܗ̄ܘܹ̇ܝܬܼ. ܐܸܠܵܐ ܡ̇ܢ ܐܸܢܵܐ ܒܐܝܼܩܵܪܵܐ ܕܐܲܝܟܼ ܗܵܢܵܐ ܐܸܫܬܲܟܼܪܹܬܼ:
ܩܘܼܪܸܠܘܿܣ ܕܹܝܢ ܐܸܬܼܢܛܲܪ ܗ̄ܘ̣ܵܐ ܥܲܕܼ ܙܲܒܼܢܵܐ. ܐܸܠܵܐ ܗܵܘ̇ ܕܲܒܼܟܼܠܵܗ̇
ܙܗܝܼܪܘܼܬܼܵܐ ܡܸܬܼܢܛܲܪ ܗ̄ܘ̣ܵܐ: ܐܸܬܿܛܲܫܝܼ ܗ̄ܘ̣ܵܐ ܡ̣ܢ ܐܲܝܠܹܝܢ ܕܢܵܛ̇ܪܝܼܢ
ܗ̄ܘ̣ܵܘ ܠܹܗ ܒܐܲܦܸܤܘܿܣ: ܘܡ̣ܢ ܪܹ̈ܫܵܢܹܐ ܕܐܸܬܼܦܲܩܲܕܼܘ ܗ̄ܘ̣ܵܘ ܕܠܵܐ
ܢܸܫܒܿܩܘܼܢܵܝܗܝ ܢܸܥܒܲܪ ܠܐܵܠܹܟܼܤܲܢܕܪܝܼܵܐ. ܘܡ̣ܢ ܐܲܦܸܤܘܿܣ ܐܸܙܲܠ
ܗ̄ܘ̣ܵܐ ܘܲܠܒܲܟܼ ܡܕܼܝܼ̄ܢܬܹܗ: ܟܲܕܼ ܡ̣ܢ ܐ̄ܢܵܫ ܠܵܐ ܐܸܬܼܥܵܘܲܟܼ. ܡܩܲܕܼܡܵܐ
ܓܹܝܪ ܘܲܙܒܼܝܼܢܵܐ ܗ̄ܘ̣ܵܬܼ ܠܹܗ ܐܵܦ ܗܵܕܹܐ ܒܩܸܢܝܵܢܹ̈ܐ: ܠܵܘ ܓܹܝܪ
ܒܲܩܛܝܼܪܵܐ ܢܵܦܹ̇ܩ ܗ̄ܘ̣ܵܐ ܡ̣ܢ ܡܕܝܼܢ̄ܢܬܼܵܐ: ܘܡ̣ܢ ܟܬܼܝܼ̈ܒܼܵܬܼܵܐ ܥܵܒܲܪ ܗ̄ܘ̣ܵܐ
ܕܡܲܠܟܿܘܼܬܼܵܐ ܠܒܲܪ ܡ̣ܢ ܨܸܒܼܝܵܢܵܐ ܕܡܲܠܟܵܐ: ܗܵܢܵܐ ܕܐܸܬܼܦܲܠܲܛ ܗ̄ܘ̣ܵܐ
ܐܵܦ ܡ̣ܢ ܐܘܼܠܨܵܢܵܐ ܘܲܡܤܵܡ ܒܪܹܫܵܐ ܕܥܲܠ ܐܲܦܲܝ̈ ܥܒܼܘܼܪܝܹܗ ܕܥܲܠ
ܦܘܼܩܕܵܢܵܐ ܕܡܲܠܟܿܘܼܬܼܵܐ. ܐܸܠܵܐ ܗܵܠܹܝܢ ܟܠܗܹܿܝܢ: ܡܸܬܼܝܼܗܵܒܼܘܼ ܐܸܬܼܝܼܗܸܒܼ
ܕܗܵܟܲܢܵܐ ܢܸܗܘܸܐ: ܡ̣ܢ ܪܘܼܓܼܙܵܐ ܗܵܘ̇ ܕܐܲܝܟܼ ܕܲܒܼܒܸܕܼܝܵܐ ܕܡܲܛܥܝܵܢܘܼܬܼܵܐ
ܐܝܼܬܼܵܘܗܝ ܗ̄ܘ̣ܵܐ ܥܠܵܘܗܝ: ܕܒܲܕܡܘܼܬܼܵܗ̇ ܐܝܼܬܹܝܗ̇ ܗ̄ܘ̣ܵܬܼ ܘܐܵܦ
ܪܵܚܡܘܼܬܼܵܐ ܕܲܠܘܵܬܼܝ. ܕܡܸܛܠ ܗܵܢܵܐ: ܗܵܝ̇ ܕܲܠܘܵܬܼܝ ܡܸܤܬܲܒܼܪܵܐ
pb. 389
ܗ̄ܘ̣ܵܬܼ ܪܵܚܡܘܼܬܼܵܐ: ܒܟܼܠ ܙܒܲܢ ܠܝܼ ܡܲܟܿܝܵܢܘܼܬܼܵܐ ܐܝܼܬܹܝܗ̇ ܗ̄ܘ̣ܵܬܼ.
ܡܸܛܠ ܕܲܕܙܘܼܒܵܢܵܐ ܐܝܼܬܹܝܗ̇ ܗ̄ܘ̣ܵܬܼ ܘܠܵܘ ܕܝܼܠܝܼ. ܒܥܸܠܕܒܼܵܒܼܘܼܬܼܵܐ
ܓܹܝܪ ܕܲܠܘܵܬܼ ܗܵܘ̇: ܒܲܥ̇ܒܼܵܕܼܵܐ ܥܠܲܝ ܫܲܢܝܲܬ̤.
ܗܵܠܹܝܢ ܗܵܟܹܝܠ ܕܲܥܠܲܝ: ܗܵܟܲܢܵܐ ܐܸܤܬܿܥܲܪ ܡ̣ܢ ܫܘܼܪܵܝܵܐ. ܘܡܸܕܸܡ
ܠܵܐ ܐܵܪܦܝܼܘ: ܕܡܸܫܟܲܚ ܠܡܲܟܵܤܘܼܬܼܵܢܝ ܕܕܲܓܵܠܘܼܬܼܵܐ ܐܸܡ̇ܪܹܬܼ. ܘܡ̣ܢ
ܐܲܝܠܹܝܢ ܕܢܸܗܢܘܿܢ ܟܬܲܒܼܘ: ܡܸܬܼܟܲܤܤܝܼܢ. ܫܲܠܝܼܛ ܓܹܝܪ ܠܟܼܠ ܐ̄ܢܵܫ
ܐܲܝܢܵܐ ܕܨܵܒܹ̇ܐ ܕܲܒܼܟܼܠܵܗ̇ ܚܲܬܿܝܼܬܼܘܼܬܼܵܐ ܢܒܲܚܸܢ: ܘܠܵܐ ܗ̄ܘ̣ܵܐ ܒܲܡܩܲܕܿܡܘܼܬܼܵܐ
ܢܸܥܒܲܪ ܥܲܠ ܐܲܝܠܹܝܢ ܕܡ̣ܢ ܗܵܢ̇ܘܿܢ ܐܸܬܼܟܿܬܸܒܼܘ ܠܐܲܦܸܤܘܿܣ. ܕܡ̣ܢ
ܟܬܼܝܼ̈ܒܼܵܗܘܿܢ ܢܸܤܬܲܟܲܠ ܒܚܘܼܫܵܒܼܵܐ ܢܸܩܦܵܐܝܼܬܼ: ܕܡܲܢ̣ܘܼ ܗܵܘ̇ ܕܐܲܙܝܼܥ
ܗܵܠܹܝܢ ܟܠܗܹܝܢ: ܘܲܕܼܡܸܛܠ ܐܲܝܕܵܐ ܐܲܙܝܼܥ ܐܸܢܹܝܢ. ܘܲܕܡܸܛܠ ܐܲܝܕܵܐ ܠܵܘ
ܢܸܩܦܵܐܝܼܬܼ ܤܵܥܲ݁ܪ ܗܵܘ̇: ܐܲܝܟܼ ܐܲܚܵܐ ܠܘܵܬܼ ܐܲܚܘܢܼܗܝ: ܟܲܕܼ ܡܲܟܸܿܣ:
ܟܲܕܼ ܡܵܠܹ̇ܟܼ: ܟܲܕܼ ܒܵܥܹ̇ܐ: ܟܲܕܼ ܚܵܙܹ̇ܐ ܠܗܵܠܹܝܢ ܡܸܢܹܗ ܘܠܹܗ. ܐܸܠܵܐ
ܩܲܕܸܡ ܓܠ̣ܵܐ ܗ̄ܘ̣ܵܐ: ܘܫܲܕܲܪ ܘܲܡܠ̣ܵܐ ܠܟܼܠ: ܕܘܼܘܵܕܼܵܐ ܘܲܩܪܵܒܼܵܐ
ܘܲܒܼܥܸܠܕܒܼܵܒܼܘܼܬܼܵܐ ܒܐܸܓܿܪ̈ܵܬܼܵܐ ܕܲܟܼܬܲܒܼ ܗ̄ܘ̣ܵܐ: ܡܸܛܠ ܐܲܝܕܵܐ: ܟܲܕܼ
ܟܼܬܲܒܹܿܬܼ ܐܸܢܵܐ ܦܘܼܢܵܝ ܦܸܬܼܓܼܵܡܵܐ ܕܐܼܓܲܪܬܹܗ: ܘܲܕܼܡܸܢܗܹܝܢ ܩܲܒܿܠܹ̇ܬܼ
ܕܲܬܼܪܝܼܨܵܐܝܼܬܼ ܐܲܡܝܼܪ̈ܲܢ: ܘܥܲܠ ܐܲܝܠܹܝܢ ܕܐܝܼܬܼ ܗ̄ܘ̣ܵܐ ܠܝܼ ܒܗܹܝܢ
ܦܘܼܠܵܓܼܵܐ ܕܠܵܐ ܛܵܒܼܵܐܝܼܬܼ ܐܲܡܝܼܪ̈ܵܢ: ܐܵܦ ܠܪܸܥܝܵܢܵܐ ܕܡܸܛܠܵܬܹܗ ܠܵܐ
ܩܲܒܿܠܹ̇ܬܼ ܐܸܢܹܝܢ ܐܵܘ̇ܕܵܥܬܹܗ: ܠܵܐ ܥ̣ܒܲܕܼ ܠܝܼ ܦܘܼܢܝ ܦܸܬܼܓܼܵܡܵܐ: ܐܵܘ
ܟܲܕܼ ܡܲܠܸܦ: ܐܵܘ ܐܲܝܟܼ ܡ̇ܢ ܕܠܵܐ ܐܸܤܬܲܟܲܠ ܗ̄ܘ̣ܵܐ: ܐܵܘ ܕܹܝܢ ܗܵܟܲܢ
ܐܝܼܬܹܝܗ̇ ܗ̄ܘ̣ܵܬ: ܕܲܢܩܝܼܡ ܠܲܐܝܼܠܹܝܢ ܕܐܸܬܼܟܿܬܸܒܼ؟ ܡܸܛܠ ܐܲܝܕܵܐ ܐܲܙܝܼܥ
ܠܤܘܼܢܗܵܕܘܿܣ ܡܸܨܪܵܝܬܼܵܐ ܘܪܗܘܿܡܵܝܬܼܵܐ ܥܲܠ ܗܵܠܹܝܢ ܕܠܘܼܩܒܲܠܝ؟
pb. 390
ܕܲܠܡܵܐ ܒܥܲܝܬܵܢܝ ܕܐܲܩܝܼܡ ܠܗܵܠܹܝܢ ܕܝܼܠܝ: ܐܲܝܟܼ ܚܲܝܵܐ ܠܘܵܐܼ ܚܲܝܵܐ؟
ܐܸܠܵܐ ܡܸܢܵܟܼ ܘܠܵܟܼ ܨܠܲܝܬܿ ܕܲܬܼܓܲܒܸܐ ܠܗܵܠܹܝܢ ܕܝܼܠܝ: ܘܬܸܥܒܸܿܕܼ
ܥܠܲܝ ܦܘܼܤܩܵܢܵܐ ܟܲܕܼ ܪܲܚܝܼܩ ܗ̄ܘܹ̇ܝܬܼ ܡܸܢܵܟܼ. ܡܸܛܠ ܡܵܢܵܐ ܠܵܐ
ܐܲܢ̄ܬܿ ܐܸܬܲܝܬܿ ܠܘܵܬܼܝ ܥܲܡ ܤܘܼܢܗܵܕܘܿܣ ܕܝܼܠܵܟܼ: ܐܲܝܟܼ ܐܲܝܢܵܐ ܕܒܼܵܥܹ̇ܐ
ܡܹܢܝ: ܐܵܘ ܐܲܝܟܼ ܕܡܲܟܸܿܣ ܠܝܼ: ܐܲܝܟܼ ܗܵܢ̇ܘܿܢ ܕܲܥ̣ܒܲܕܼ ܗܵܢܘܿܢ
ܕܡ̣ܢ ܩܕܼܵܡܲܝܟ: ܠܗܵܢ̇ܘܿܢ ܕܲܚ̣ܙܵܘ ܕܲܤܢܝܼܩܝܼܢ ܗ̄ܘ̣ܵܘ ܥܲܠ
ܡܹܐܬܼܝܼܬܼܗܘܿܢ ܕܝܼܠܗܘܿܢ: ܐܲܝܟܼ ܐܵܠܹܟܼܤܲܢܕܪܘܿܣ ܥܲܠ ܐܵܪܝܼܘܿܣ:
ܘܐܲܝܟܼ ܛܝܼܡܵܬܹܐܘܿܣ ܥܲܠ ܓܪܝܼܓܼܘܿܪܝܼܘܿܣ: ܐܵܘ ܐܲܝܟܼ ܬܹܐܘܿܦܝܼܠܘܿܣ
ܥܲܠ ܝܘܿܗܲܢܝܼܣ؟ ܠܵܐ ܓܹܝܪ ܐܝܼܬܼܵܘܗܝ ܗ̄ܘ̣ܵܐ ܐ̄ܢܵܫ ܕܲܡܥܵܘܼܟܼ ܗ̄ܘ̣ܵܐ
ܠܵܟܼ: ܘܐܵܦ ܠܵܐ ܕܓܼܵܠܹ̇ܙ ܗ̄ܘ̣ܵܐ ܠܗܵܘ̇ ܕܡܸܬܼܩܲܛܪܲܓܼ: ܕܠܵܐ
ܢܸܦܘܼܩ ܪܘܼܚܵܐ ܡܸܛܠ ܢܲܦܫܹܗ. ܠܲܝܬܿ ܐ̄ܢܵܫ ܕܪܲܚܝܼܩ ܘܒܼܵܥܹ̇ܐ
ܠܡܸܬܿܬܿܕܵܢܘܼ: ܘܕܼܵܐܹ̇ܢ ܠܲܐ̄ܚܪܹܢܵܐ. ܠܲܝܬܿ ܩܛܹܐܓܼܪܵܢܵܐ: ܕܗܵܘܹ̇ܐ ܕܲܝܢܵܐ
ܠܲܒܼܥܸܠܕܝܼܢܹܗ ܟܲܕܼ ܪܲܚܝܼܩ. ܡܸܛܠ ܐܲܝܕܵܬ ܟܲܕ ܩܵܪܹܝܬܿ ܠܤܘܼܢܗܵܕܘܿܣ
ܬܹܒܹܠܵܝܬܼܵܐ: ܐܸܫܬܿܐܸܠܬܿ ܕܬܹܐܬܸܐ ܥܲܡ ܤܘܼܢܗܵܕܘܿܣ ܡܢܵܬܼܵܢܵܝܬܐ:
ܘܲܕܼܬܸܦܘܿܩ ܪܘܼܚܵܐ ܥܲܠ ܐܲܝܠܹܝܢ ܕܩܲܛܪܸܓܼܬܵܢܝ ܘܚܲܝܸܒܼܬܵܢܝ ܟܲܕܼ
ܠܵܐ ܩܲܪܝܼܒܼ ܗ̄ܘܹ̇ܝܬܼ؟ ܡܸܛܠ ܐܲܝܕܵܐ ܟܲܕܼ ܐܸܬܲܝܬܿ ܠܵܐ ܩ̣ܵܘܝܼܬܿ
ܠܤܘܼܢܗܵܕܘܿܣ ܕܐܸܬܼܒܲܝܲܬ̤: ܐܸܠܵܐ ܩܢܲܛ̣ܬܿ ܡܸܢܵܗ̇؟ ܡܸܛܠ ܡܵܢܵܐ
ܟܲܕܼ ܒܵܥܹ̇ܐ ܗ̄ܘܹ̇ܝܬܼ ܡܸܢܵܟܼ ܘܲܡܥܵܘܸܟܼ ܗ̄ܘܹ̇ܝܬܼ ܠܵܟܼ: ܘܡܵܘܡܸܐ ܗ̄ܘܹ̇ܝܬܼ
ܠܵܟܼ ܠܲܡܩܵܘܵܝܘܼ ܠܤܘܼܢܗܵܕܘܿܣ: ܐܸܫܬܿܐܸܠܬܿ ܡ̣ܢ ܡܹܐܬܼܝܼܬܼܵܐ
ܕܐܲܦܸܤܩ̈ܘܿܦܹܐ ܡܲܕܡܚܵܝܹ̈ܐ: ܘܲܠܩܘܼܡܹܣ ܕܲܦܩܝܼܕܼ ܗ̄ܘ̣ܵܐ ܥܲܠ
pb. 391
ܝܲܨܝܼܦܘܼܬܼܵܐ ܕܲܡܛܲܟܿܤܘܼܬܼܵܐ ܠܵܐ ܩܵܘܝܼܬܿ: ܐܸܠܵܐ ܥܲܠ ܟܠܗܘܿܢ ܐܲܟܲܚ̄ܕܼ
ܒܲܤܲܪܬܿ؟ ܡܸܛܠ ܐܲܝܕܵܐ: ܡ̣ܢ ܒܵܬܲܪ ܕܐܸܬ݂ܵܘ ܟܠܗܘܿܢ ܐܲܦܸܤܩ̈ܘܿܦܹܐ:
ܘܲܦ̣ܩܲܕܼ ܡܲܠܟܵܐ ܐܲܝܟܼ ܡ̇ܢ ܕܡ̣ܢ ܩܕܼܝܼܡ ܠܵܐ ܗܘ̤ܵܬܼ ܒܥܵܬܼܵܐ ܘܒܼܘܼܚܵܢܵܐ:
ܕܢܸܬܿܬܲܒܼ̈ܥܵܢ ܒܲܝܢܲܝ ܘܠܵܟܼ ܘܠܲܐܦܸܤܩ̈ܘܿܦܹܐ ܕܡܲܕܢܚܵܐ: ܟܠܗܹܝܢ
ܥܒܲܕܬܿ ܕܠܵܐ ܢܸܗܘܸܐ ܒܘܼܚܵܢܵܐ ܘܕܝܼܢܵܐ؟
ܚܲܕܼ ܐܝܼܬܼܵܘܗܝ ܗ̄ܘ̣ܵܐ ܢܝܼܫܹܗ ܘܚܲܕܼ ܪܸܥܝܵܢܹܗ ܡ̣ܢ ܫܘܼܪܵܝܵܐ ܘܲܥܕܲܡܵܐ
ܠܫܘܼܠܵܡܵܐ: ܕܠܵܐ ܢܸܗܘܸܐ ܕܝܼܢܵܐ ܘܒܼܘܼܚܵܢܵܐ: ܥܲܠ ܐܲܦܲܝ̈ ܐܲܝܠܹܝܢ
ܕܩܲܛܪܓܲܢܝ. ܘܕܝܼܠܝ: ܕܢܸܗܘܸܐ ܕܝܼܢܵܐ ܘܒܼܘܼܚܵܢܵܐ ܥܲܠ ܐܲܦܲܝ̈ ܐܲܝܠܹܝܢ
ܕܩܲܛܪܓܲܢܝ: ܐܵܦܸܢ ܠܵܐ ܗ̄ܘ̣ܵܐ ܡܸܛܠ ܕܲܙܟܼܵܬ̤ ܗ̄ܘ̣ܵܬܼ ܥܵܪܘܿܩܘܼܬܹܗ
ܘܡܲܗܛܘܼܬܹܗ ܕܗܵܢܵܐ. ܡܸܛܠ ܐܲܝܕܵܐ ܐܸܢܵܐ ܚܦܝܼܛ ܗ̄ܘܹ̇ܝܬܼ: ܐܲܢ̄ܬܿ
ܕܹܝܢ ܡܸܵܫܬܿܐܸܠ ܗ̣̄ܘܲܝܬܿ: ܐܸܢܗ̤ܘ ܕܲܬܼܟܼܝܼܠ ܗ̣̄ܘܲܝܬܿ ܥܲܠ ܡܚܵܘܝܵܢܘܼܬܼܵܐ
ܕܐܝܼܬܼ ܗ̄ܘ̣ܵܐ ܠܵܟܼ ܡ̣ܢ ܟܬܼܵܒܹ̈ܐ ܘܡ̣ܢ ܐܲܒܼ̈ܗܵܬܼܵܐ؟ ܐܸܠܵܐ ܕܵܚܹ̇ܠ ܗ̄ܘ̣ܵܐ
ܡܹܢܝ: ܡܸܛܠ ܥܘܼܕܪܵܢܵܐ ܕܡ̣ܢ ܡܲܠܟܵܐ. ܗܵܘ̇ ܕܝܵܕܼܥ̇ܝܼܢ:
ܕܲܠܡܲܫܠܡܵܢܘܼܬܼܵܐ ܝܲܬܿܝܼܪܬܵܐ ܗܘ̤ܵܐ ܠܝܼ ܒܗܘܿܢ ܒܤܘܼܥܪ̈ܵܢܹܐ: ܘܠܵܘ
ܠܥܘܼܕܼܪܵܢܵܐ. ܐܸܠܵܐ ܕܬܸܗܘܸܐ ܗܵܕܹܐ: ܡ̇ܢ ܗܵܟܹܝܠ ܥܵܘܸܟܼ ܗ̄ܘ̣ܵܐ
ܕܢܸܗܘܸܐ ܕܝܼܢܵܐ ܒܸܠܥܵܕܼ ܥܘܼܕܼܪܵܢܵܐ ܕܡܲܒܟܵܐ؟ ܡ̣ܢ ܕܲܗܘ̤ܵܬܼ ܗ̄ܘ̣ܵܬܼ
ܓܹܝܪ ܡ̣ܢ ܟܲܕܘܼ ܕܐܸܦܘܿܩ ܡ̣ܢ ܩܘܼܤܛܲܢܛܝܼܢܵܦܘܿܠܝܼܣ:
ܘܤܘܼܢܗܵܕܘܿܣ ܕܡܲܕܢܚܵܐ ܒܵܥܝܵܐ ܗ̄ܘ̣ܵܬܼ ܢܸܗܘܸܐ ܕܝܼܢܵܐ ܘܒܼܘܼܚܵܢܵܐ
ܕܗܲܝܡܵܢܘܼܬܼܵܐ: ܘܐܵܦ ܒܸܠܥܵܕܲܝ ܕܝܼܠܝܼ. ܘܐܵܦ ܡܲܐܟܵܐ ܦ̣ܩܲܕܼ ܗ̄ܘ̣ܵܐ:
ܕܲܬܼܪ̈ܲܝܥܗܘܿܢ ܫܪ̈ܵܝܹܐ ܕܗܵܢ̇ܘܿܢ ܕܐܲܝܟܲܢ ܕܗ̤ܘ ܡ̣ܢ ܤܘܼܢܗܵܕܘܿܣ
ܐܸܫܬܿܪܝܼ. ܗ̄ܘ̣ܵܘ: ܕܠܵܐ ܒܘܼܚܵܐ ܢܸܬܼܠܲܒܼܟܿܘܼܢ. ܢܸܓܼܒܿܘܿܢ ܕܹܝܢ
ܐܲܦܸܩ̈ܘܿܦܹܐ ܫܲܒܼܥܵܐ ܫܲܒܼܥܵܐ: ܘܢܸܫܬܲܕܪܘܼܢ ܡ̣ܢ ܬܲܪ̈ܬܲܝܗܹܝܢ
pb. 392
ܤܘ̣̈ܢܗܵܕܘܿ ܠܩܘܼܤܛܲܢܛܝܼܢܵܦܘܿܠܝܼܣ: ܐܲܝܟܲܢܵܐ ܕܲܩܕܼܵܡܵܘܗܝ
ܕܡܲܠܟܵܐ ܢܡܲܠܠܘܼܢ ܥܲܠ ܐܲܝܠܹܝܢ ܕܡܸܬܼܒܲܥ̈ܝܵܢ: ܘܢܸܫܬܿܪܘܿܢ ܫܲܪܟܵܐ
ܐܵܪܵܐ ܡܲܠܸܠ̣ܘ ܥܲܡ ܚܕܲܕܹ̈ܐ؟ ܐܸܵܠܵܐ ܡܸܛܠ ܕܗܵܢ̇ܘܿܢ ܡ̣ܢ
ܟܬܼܝܼ̈ܒܼܵܬܼܵܐ ܕܡܲܠܟܿܘܼܬܼܵܐ ܐܸܙܲܠ̣ܘ ܠܩܲܠܟܝܼܕܘܢܵܐ ܕܒܸܬܼܘܼܢܚܵܐ: ܩܲܒܸܠܘ
ܐܸܢܘܿܢ ܠܲܬܼܪ̈ܲܝܗܘܿܢ ܓܲܒܹ̈ܐ ܕܐܲܦܸܤܩ̈ܘܿܦܹܐ ܕܐܸܫܬܲܕܲܪܘ ܡ̣ܢ
ܤܘܸܢܗܵܕܘܿܣ. ܡ̣ܢ ܕܹܝܢ ܕܫܲܐܸܠ̣ ܠܡܲܕܼܢ̈ܚܵܝܹܐ ܠܥܸܠܬܼܵܐ ܕܠܵܦܓܘܼܬܼܵܐ
ܕܲܗܘ̤ܵܬܼ: ܐܸܡܲܪܘ: ܕܐܲܠܵܗܵܐ ܚܵܫܘܿܫܵܐ ܡܲܥܠܝܼܢ. ܘܲܕܼܠܵܐ ܡܸܬܿܛܦܝܼܤܝܼܢ
ܗ̤ܢܘܿܢ ܕܢܸܫܠܡܘܼܢ: ܩܕܼܵܡ ܕܗܵܠܹܝܢ ܢܸܬܿܬܲܒܼ̈ܜܥܵܢ. ܕܐܵܦ ܠܲܡ
ܐܸܢ ܒܲܩܛܝܼܪܵܐ ܬܸܕܼܒܿܪܲܢ ܡܲܠܟܵܐ: ܡܸܬܿܛܦܝܼܢܲܢ ܠܲܡܩܲܒܵܠܘܼ ܐܲܠܵܗܵܐ
ܚܵܫܘܿܫܵܐ: ܗܵܘ̇ ܓܹܝܪ ܕܠܲܝܬܿ ܠܹܗ ܠܲܟܼܝܵܢܹܗ ܢܸܟܼܝܵܢܹܗ ܟܝܵܢܵܐ ܗ̄ܘ̣ ܕܗܵܘ̇
ܐܲܝܢܵܐ ܕܐܲܝܟܼ ܗܵܢܵܐ ܠܹܗ. ܐܸܢ ܕܹܝܢ ܒܲܪ ܟܝܵܢܵܐ ܗ̄ܘ̣ ܗܵܘ̇ ܕܠܵܐ
ܚܵܐܹ̇ܫ ܕܗܵܘ̇ ܐܲܝܢܵܐ ܕܗܵܐܹ̇ܫ: ܐܵܦ ܗܵܘ̇ ܕܠܵܐ ܚܲܫ̣ ܡܸܫܟܲܚ ܠܡܸܚܲܫ.
ܘܐܲܝܟܼ ܕܲܒܼܡܲܤܒܿܪܵܢܘܼܬܼܵܐ ܪܲܥܹܠ ܗ̄ܘ̣ܵܐ ܡܲܠܟܵܐ: ܘܠܵܐ ܤܲܝܒܿܪܲܬ̤ ܐܵܦ
ܠܵܐ ܡܲܫܡܲܥܬܹܗ ܠܓܼܘܼ̈ܕܵܦܹܐ ܗܵܠܹܝܢ. ܘܲܢܦܲܨ ܐܲܪ̈ܓܘܵܢܵܘܗܝ ܟܲܕܼ
ܐܵܡܲ݁ܪ: ܕܐܵܦ ܠܵܐ ܚܕܼܵܐ ܫܵܘܬܵܦܘܼܬܼܵܐ ܐܝܼܬܼ ܠܝܼ ܠܘܵܬܼ ܗܵܠܹܝܢ ܕܗܵܟܲܢܵܐ
ܐܝܼܬܲܝܗܘܿܢ. ܐܵܦ ܠܵܐ ܠܡܹܐܠܲܨ ܐܸܢܘܿܢ ܒܲܩܛܝܼܪܵܐ: ܐܸܠܵܐ ܕܲܠܩܘܼܒܼܠܵܐ
ܕܐܵܦ ܠܵܐ ܕܬܸܫܬܿܒܸܩ ܦܩܲܕܼ ܐܸܢܘܿܢ: ܐܸܠܵܐ ܕܐܸܬܿܬܿܒܲܥ ܫܪܵܪܵܐ ܕܟܼܠ
ܙܢܵܐ ܕܐܝܼܬܼ: ܒܐܲܝܠܹܝܢ ܕܡܸܬܼܒܲܚ̈ܢܵܢ. ܘܲܒܼܗܵܠܹܝܢ ܫ̣ܪܵܐ ܐܸܢܘܿܢ ܥܲܡ ܬܸܫܒ̈ܚܵܬܐ
ܤܲܓܿܝܼ̈ܐܵܬܼܵܐ: ܟܲܕܼ ܦܩܲܕܼ ܐܸܢܘܿܢ: ܕܢܸܗܘܘܿܢ ܡܛܲܝܒܼܝܼܢ ܠܒܼܘܼܚܵܢܵܐ ܗܵܢܵܐ.
pb. 393
ܡ̣ܢ ܕܹܝܢ ܕܐܸܫܬܲܡܥܲܬ̤ ܗܵܕܹܐ: ܐܸܬܿܬܿܙܝܼܥܘ ܬܘܼܒܼ ܥܗܵܠܹܝܢ: ܕܠܵܐ
ܢܸܗܘܸܐ ܕܝܼܢܵܐ ܘܒܼܘܼܚܵܢܵܐ ܕܗܵܠܹܝܢ. ܐܸܠܵܐ ܡܫܲܠܛܘܼܬܼܵܐ ܕܡܲܠܟܿܘܼܬܼܟܼܘܿܢ
ܠܡܲܕܼܢ̈ܚܵܝܹܐ ܫܲܕܲܪܲܬ̤ ܐܸܢܘܿܢ: ܠܟܼܘܿܢ ܕܹܝܢ ܦܸܩ̇ܕܲܬ̤: ܠܟܼܘܿܢ ܕܹܝܢ
ܩܵܤܹܐ ܐ̄ܢܵܐ: ܠܲܒܼܸܢܲܝ̈ ܪܸܥܝܵܢܵܐ ܕܝܼܠܵܟܼ: ܗܵܢ̇ܘܿܢ ܕܥܵܒܼ̇ܕܝܼܢ ܗ̄ܘ̣ܵܘ
ܬܒܲܥܬܼܵܟܼ: ܕܢܸܠܘܼܢ ܠܩܘܼܤܛܲܢܝܼܢܵܦܘܿܠܝܼܣ: ܘܲܢܩܝܼܡܘܼܢ
ܐܲܦܸܤܘܿܦܵܐ ܐ̄ܚܪܹܢܵܐ ܒܕܼܘܼܟܿܬܼܵܐ ܕܝܼܠܝܼ. ܐܲܝܟܵܐ ܗܵܟܹܝܠ ܗܘ̤ܵܐ ܗ̄ܘ̣ܵܐ
ܕܝܼܢܵܐ؟ ܘܲܩܕܼܵܡ ܐܲܝܠܹܝܢ؟ ܐܸܡ̣ܪܘ: ܒܩܲܪܝܼܒܼܘܼܬܼܵܐ ܕܐܲܝܠܹܝܢ؟ ܕܐܵܦܸܢ
ܕܝܢܵܐ ܕܒܸܕܼܝܵܐ ܗ̄ܘ̣ܵܐ: ܐܸܡܲܪܘ ܐܲܢ̄ܬܿܘܿܢ ܕܲܟܼܬܲܒܼܬܿܘܿܢ ܐܲܝܠܹܝܢ ܕܲܗܘ̤ܵܝ̈:
ܐܲܝܟܲܢܵܐ ܐܸܤܬܿܥܲܪ؟ ܤܲܓܿܝܼ̈ܐܹܐ ܓܹܝܪ ܐܝܼܬܲܝܗܘܿܢ: ܠܵܐ ܬܸܬܿܦܝܼܤܘܼܢ
ܠܐ̄ܢܵܫ ܡ̣ܢ ܐܲܝܠܹܝܢ ܕܕܼܝܼܠܲܢ: ܕܕܲܠܡܵܐ ܬܹܐܡܪܘܼܢ ܕܲܒܼܚܘܼܒܵܐ ܐ̄ܢܵܫܵܝܵܐ
ܟܬܲܒܼ: ܠܗܵܢܘܿܢ ܕܝܼܠܟܼܘܿܢ ܕܐܲܟܼܬܸܒܼܘ ܥܲܠ ܐܲܝܠܹܝܢ ܕܐܸܤܬܿܥܲܪ
ܩܲܦܘ. ܐܸܠܵܐ ܠܵܐ ܡܸܫܟܿܚܝܼܢ ܐܢ̄ܬܿܘܿܢ ܠܡܸܥܛܵܐ: ܠܐܲܝܠܹܝܢ ܕܗܵܟܲܢܵܐ
ܗ̤ܘܲܝ̈ ܘܐܸܬܼܟܬܸܒܼ ܒܙܲܒܼܢܵܐ ܗܵܘ̇. ܐܸܠܵܐ ܟܒܲܪ ܐܵܡܲ݁ܪ ܐ̄ܢܵܫ: ܕܒܸܕܼܝܵܢܵܐ
ܐܝܼܬܼܵܘܗܝ ܢܲܗܝܼܪܵܐܝܼܬܼ ܗܵܘ̇ ܡܵܐ ܕܐܸܤܬܿܥܲܪ: ܐܸܠܵܐ ܕܠܵܐ ܟܘܼܚܵܕܼܵܐ
ܗܘ̤ܵܐ: ܕܲܠܗܵܠܹܝܢ ܕܠܵܐ ܡܸܬܼܗܲܝ̈ܡܢܵܢ: ܘܲܠܫܘܼܒܼܩܵܢܵܐ ܤܲܓܿܝܼܐܵܐ ܤܢܝܼ̈ܩܵܢ
ܢܸܤܥܘܿܪ. ܠܵܐ ܓܹܝܪ ܡܸܬܼܗܲܝ̈ܡܢܵܢ ܗܵܠܹܝܢ ܕܗܵܟܲܢܵܐ ܐܸܬܼܥܒܸܕܼ: ܐܸܠܵܐ
ܒܪܲܡ ܗܵܟܲܢܵܐ ܐܸܬܼܥܲܬܲܕܼܘ: ܠܵܐ ܗ̄ܘ̣ܵܐ ܒܲܠܚܘܿܕܼ ܠܘܼܩܒܲܠܝ: ܐܸܠܵܐ
ܬܘܼܒܼ ܠܘܼܩܒܲܠ ܗܲܝܡܵܢܘܼܬܼܵܐ: ܕܡܸܛܠܵܬܼܵܗ̇ ܐܸܬܿܬܿܙܝܼܥܹܬܼ ܘܲܗܘ̤ܵܬܼ
ܠܝܼ ܝܲܨܝܼܦܘܼܬܼܵܐ: ܠܡܸܟܼܬܲܒܼ ܘܲܠܡܲܠܵܦܘܼ ܐܲܝܠܹܝܢ ܕܲܗ̤ܘܲܝ̈ ܐܲܝܟܲܢܵܐ
ܕܲܗ̤ܘܲܝ̈. ܕܠܵܐ ܢܸܤܒܿܪܘܼܢ ܕܕܼܝܼܢܵܐ ܘܒܼܘܼܚܵܢܵܐ ܗܘ̤ܸܵܐ: ܘܲܟܼܠܵܐ ܡܸܠܬܼܵܐ
ܢܗܲܝܢܘܼܢ ܘܢܸܦܩܘܼܢ ܡ̣ܢ ܗܲܝܡܵܢܘܼܬܼܵܐ. ܡܦܲܪܢܤܵܢܘܼܬܼܵܐ ܓܹܝܪ
pb. 394
ܘܕܼܝܼܢܵܐ ܕܐܲܠܵܗܵܐ ܐܸܬܼܓܠܝܼ ܠܟܼܠ ܐ̄ܢܵܫ: ܐܵܦܸܢ ܐܝܼܬܼ ܕܚܵܙܹ̇ܝܢ: ܘܠܵܐ
ܚܵܙܹ̇ܝܢ: ܕܡ̣ܢ ܒܥܸܠܕܒܼܵܒܼܘܼܬܼܵܐ ܡ̣ܢ ܫܘܼܪܵܝܵܐ ܩܵܡ̣ܘܼ ܥܠܲܝ. ܕܐܵܦ ܗܵܫܵܐ
ܨܵܒܹ̇ܐ ܗ̄ܘ̣ܵܐ ܕܢܸܩܕܘܿܩ ܘܢܲܕܼܪܸܟܼ ܠܟܼܠ ܐ̄ܢܵܫ ܠܒܼܝܼܫܘܼܬܼܵܐ
ܕܠܘܼܩܒܲܠܝ: ܕܲܕܼܠܵܐ ܕܝܼܢܵܐ ܐܸܬܼܚܲܝ̇ܒܹܬܼ. ܘܲܩܕܼܵܡ ܟܠ ܐ̄ܢܵܫ ܐܲܟܲܚܕܼ
ܥ̣ܒܲܕܼ ܤܝܵܓܼܵܐ: ܕܬܘܼܒܼ ܠܵܐ ܢܸܗܘܸܐ ܠܝܼ ܦܘܼܢܵܝܵܐ. ܘܚܲܒܼܫܹܗ ܗ̄ܘ̣ܵܐ
ܒܗܵܕܹܐ ܓܲܒܵܐ ܕܡܲܕܼܢܚܵܝܹ̈ܐ ܘܲܕܼܫܲܪܟܵܐ ܕܐܲܬܼܪ̈ܵܘܼܬܼܵܐ: ܕܠܵܐ ܐܸܫܬܵܘܬܲܦܘ
ܗ̄ܘ̣ܵܘ ܠܗܘܿܢ ܒܗܵܘ̇ ܡܵܐ ܕܲܤܥܲܪܘ: ܘܝܲܗ̣̄ܒܼܘ ܗ̄ܘ̣ܵܘ ܠܝܼ ܥܘܼܕܼܪܵܢܵܐ.
ܘܠܵܐ ܝܵܕܲܥ̇ ܗ̄ܘܹ̇ܝܬܼ ܡܸܕܸܡ ܡ̣ܢ ܐܲܝܠܹܝܢ ܕܗܵܘ̈ܝܵܢ: ܘܐܵܦ ܠܵܐ
ܡܩܲܕܸܡ ܗ̄ܘܹ̇ܝܬܼ ܚܵܐܲܪ ܗ̄ܘܹ̇ܝܬܼ ܕܐܸܪܫܸܐ ܘܐܹܩܲܛܪܸܓܼ ܐܸܢܘܿܢ ܒܕܼܝܼܢܵܐ
ܕܠܵܐ ܒܟܹܐܢܘܼܬܼܵܐ.
ܘܲܩ̇ܪܹܝܬܼ ܠܤܘܼܢܗܵܕܘܿܣ ܬܹܒܹܠܵܝܬܼܵܐ: ܠܘܼܩܒܲܠ ܪܘܼܢܗܵܕܘܿܣ
ܗܵܝ̇ ܕܲܡܢܵܬܼܵܢܵܐܝܼܬܼ ܗܘ̤ܵܬܼ: ܐܲܝܟܲܢܵܬܐ ܕܬܸܬܼܚܵܘܸܐ ܠܥܹ̇̄ܝܢ ܟܠ ܐ̄ܢܵܫ:
ܕܡܸܛܠ ܐܲܝܕܵܐ ܥܒܲܕܼܘ ܗܵܠܹܝܢ ܕܲܥܒܲܕܼܘ. ܕܠܵܐ ܗ̄ܘ̣ܵܐ ܡܸܛܠ
ܗܲܝܡܵܢܘܼܬܼܵܐ ܬܟܼܝܼܠ ܗ̄ܘ̣ܵܐ ܘܛܵܐܹ̇ܢ ܗ̄ܘ̣ܵܐ: ܐܸܠܵܐ ܕܠܵܐ ܢܸܬܼܒܲܚ̈ܢܵܢ
ܐܵܦ ܠܵܐ ܢܸܬܿܬܿܕܝܼ̈ܢܵܢ ܗܵܠܹܝܢ ܕܝܼܸܠܹܗ ܘܕܝܼܠܝܼ: ܕܲܒܼܝܲܕܼ ܐܸܓܿܪ̈ܵܬܼܵܐ
ܘܲܒܼܡܸܕܸܡ ܡܸܕܸܡ ܐ̄ܚܪܹܝܢ ܚܲܒܸܿܠ̣ ܗ̄ܘ̣ܵܐ ܠܐܲܝܠܹܝܢ ܕܩܲܪܝܼܒܼܝܼܢ ܗ̄ܘ̣ܵܘ
ܠܡܲܠܟܵܐ ܘܲܠܡܲܠ̈ܟܸܬܼܵܐ: ܘܲܡܦܝܼܣ ܗ̄ܘ̣ܵܐ ܕܠܵܐ ܬܸܗܘܸܐ ܤܘܼܢܗܵܕܘܿܣ.
ܘܗܵܕܹܐ ܐܸܬܼܐܲܡܪܲܬ̤ ܠܡܲܠܟܵܐ: ܘܐܸܬܼܟܿܤܸܣ ܤܲܓܿܝܼ ܒܲܟܼܬܼܝܼ̈ܒܼܵܬܼܵܐ: ܕܠܵܐ
ܢܸܫܟܲܚ ܕܲܢܛܲܫܸܐ: ܙܵܕܹܩ ܗ̄ܘ̣ܵܐ ܓܹܝܪ ܕܢܸܚܕܹܐ ܒܕܝܼܢܵܐ: ܐܸܠܘ ܠܵܘ
ܒܡܲܤܒܿܪܵܢܘܼܬܼܵܐ ܐܝܼܬܲܝܗܹܝܢ ܗ̣̄ܘܲܝ̈ ܗܵܠܹܝܢ: ܕܢܸܬܼܚܲܦܲܛ ܠܲܡܚܵܘܵܝܘܼ
ܠܡܲܠܟܵܐ ܪܸܥܝܵܢܹܗ: ܕܲܬܼܪܝܼܨ ܘܟܹܐܝܢ. ܗܵܕܹܐ ܓܹܝܪ ܐܸܬܼܥܲܒܼܕܲܬ̤: ܐܲܝܟܲܢܵܐ
pb. 395
ܕܠܵܐ ܢܸܗܘܸܐ ܠܹܗ ܡܲܦܲܩ ܒܪܘܼܚܵܐ: ܐܲܝܟܼ ܐܲܝܢܵܐ ܕܠܵܐ ܝܵܕܲܥ̇ ܥܲܠ
ܐܲܝܠܹܝܢ ܕܡܸܬܼܪܫܸܐ: ܘܟܼܵܦܲܪ ܗ̄ܘ̣ܵܐ. ܘܥܵܘܟܹܗ ܠܕܝܼܢܵܐ: ܠܵܘ ܚܕܼܵܐ
ܙܒܲܢ ܘܠܵܐ ܬܲܪܬܹܝܢ ܐܸܠܵܐ ܥܕܲܡܵܐ ܠܡܵܘܬܵܐ. ܡܲܠܟܵܐ ܕܹܝܢ: ܠܘܵܬܼ
ܗܵܘ̇ ܕܐܸܬܼܥܕܸܠ ܡܸܢܹܗ: ܕܠܩܘܼܒܼܠܵܐ ܥ̣ܒܲܕܼ ܗ̄ܘ̣ܵܐ. ܘܠܝܼ
ܕܡܸܫܬܲܒܲܚ ܗ̄ܘܹ̇ܝܬܼ ܘܡܸܬܼܩܲܠܲܣ: ܘܤܵܗ̇ܕܝܼܢ ܗ̄ܘ̣ܵܘ ܤܲܓܿܝܼ̈ܐܹܐ
ܕܐܸܬܼܥܲܠ̇ܒܹܬܼ: ܚܲܝܒܲܢܝ. ܗܵܟܲܢܵܐ ܤܓܼܝܼ̈ ܗ̣̄ܘܲܝ̈ ܫܟܼܝܼܪ̈ܵܬܼܵܐ: ܐܲܝܟܲܢܵܐ ܕܠܵܐ
ܢܸܬܼܚܲܦ̈ܝܵܢ. ܐܸܠܵܐ ܕܬܸܬܼܓܿܠܸܐ ܛܵܠܘܿܡܘܼܬܼܗܘܿܢ: ܐܵܦ ܠܗܵܘ̇ ܥܲܒܼܕܹܗ
ܠܝܼ ܤܵܗܕܵܐ ܘܕܲܝܵܢܵܐ ܘܵܠܝܵܐܝܼܬܼ: ܐܲܝܟܼ ܕܢܸܗܘܸܐ ܛܠܘܼܿܡܝܵܐ ܕܠܵܐ
ܡܲܦܲܩ ܒܪܘܼܚܵܐ. ܟܠܗܘܿܢ ܓܹܝܪ ܐܲܤܗܸܕܼܘ ܕܠܵܐ ܡܸܫܟܿܚܝܼܢܲܢ ܥܵܘ̣ܠܵܐ:
ܘܲܕܼܠܵܐ ܡܸܠܬܼܵܐ ܚܲܝܒܼܘܼܢܝ. ܘܟܲܕܼ ܐܸܢܵܐ ܐܝܼܬܲܝ ܗ̄ܘܹ̇ܝܬܼ ܒܝܗܹܝܢ ܟܲܕܼ
ܒܗܹܝܢ ܕܠܵܐ ܒܘܼܚܵܢܵܐ ܘܲܕܼܠܵܐ ܕܝܼܢܵܐ: ܗܸܢܘܿܢ ܒܲܝܢܵܬܼܗܘܿܢ ܤܥܲܪܘ:
ܘܫܲܚܠܸܦ ܟܠܗܹܝܢ ܐܲܝܠܹܝܢ ܕܲܥܠܲܝ.
ܥܲܠ ܐܲܝܠܹܝܢ ܕܐܸܤܬܥܲܪ ܟܲܕܼ ܐܸܫܬܿܘܝܼܘ ܩܘܼܪܸܠܘܿܣ. ܘܡܲܕܼܢܚܵܝܹ̈ܐ:
ܘܲܩܕܼܵܡ ܕܢܸܫܬܲܕܿܪܘܼܢ ܫܲܒܼܥܵܐ ܫܲܒܼܥܵܐ ܡ̣ܢ ܗܵܠܹܝܢ ܘܡ̣ܢ ܗܵܠܹܝܢ.
ܐܸܠܵܐ ܢܹܐܡܲܪ ܐܲܝܟܼ ܕܲܒܼܦܵܤܝܼ̈ܩܵܬܼܵܐ: ܟܒܲܪ ܡܫܲܐܸܠ ܐ̄ܢܵܫ: ܕܐܲܝܟܲܢܵܐ
ܡܵܕܹܝܢ ܐܵܦ ܤܘܼܢܗܵܕܘܿܣ ܡܲܕܢܚܵܝܬܼܵܐ ܚܲܝܸܒܼܬܼܵܟܼ: ܐܲܝܟܲܢܵܐ ܕܐܵܦ ܠܵܐ
ܚܕܼܵܐ ܥܸܠܬܼܵܐ ܕܡܲܦܲܖ ܒܪܘܼܚܵܐ ܡܸܟܹܝܠ ܬܸܫܬܿܒܸܩ ܠܵܟܼ؟ ܒܲܦܝܵܤܵܐ
ܓܹܝܪ ܕܡܲܠܟܿܘܼܬܼܵܐ: ܘܲܒܼܗܵܕܹܐ ܟܠ ܐ̄ܢܵܫ ܡܦܵܣ ܝܲܬܿܝܼܪܵܐܝܼܬܼ: ܘܲܕܼܠܵܐ
ܡܸܫܟܲܚ ܐ̄ܢܵܫ ܕܲܢܛ:ܫܹܝܗ̇. ܗ̤ܝ ܓܹܝܪ ܟܲܕܼ ܗ̤ܝ ܘܲܚܕܼܵܐ ܡܸܠܬܼܵܐ
ܕܥܲܠ ܟܠܢܵܫ: ܕܐܲܝܠܹܝܢ ܕܲܫܝܠܹܝܢ ܕܲܫܘܹܝܢ ܗ̄ܘ̣ܘ ܥܲܡܝܼ: ܘܲܡܩܲܒܿܠܝܼܢ ܗ̄ܘ̣ܵܘ
pb. 396
ܠܝܼ ܘܡܸܬܼܟܲܬܿܫܝܼܢ ܗ̄ܘ̣ܵܘ ܥܲܡܝܼ: ܘܕܲܐܝܠܹܝܢ ܕܡܸܬܼܩܲܛܪܓܼܝܼܢ ܗ̄ܘ̣ܵܘ
ܥܲܡܝܼ ܘܡܸܨܛܲܥܪܝܼܢ ܗ̄ܘ̣ܵܘ ܥܲܡܝܼ: ܟܲܕܼ ܐܵܦܠܵܐ ܚܕܼܵܐ ܥܸܠܬܼܵܐ
ܕܫܘܼܚܠܵܦܵܐ ܗܘ̤ܸܵܐ ܠܗܘܼܢ ܡܢܹܝ: ܗܸܢܘܿܢ ܐܸܫܬܲܚܠܲܦܘ ܥܲܡܗܘܿܢ.
ܐܸܡܲܪ ܠܲܢ ܐܲܢ̄ܬܿ ܥܸܠܬܼܵܐ ܕܐܸܫܬܲܚܠܲܦܘ ܡܸܢܵܟܼ: ܡܲܪܵܚܘܼܬܼܵܟܼ ܓܿܝܪ
ܕܲܗܘ̤ܵܬܼ ܠܘܼܩܒܲܠܝܼ: ܘܲܟܼܬܼܝܼ̈ܒܼܵܬܼܵܟܼ ܘܪܹ̈ܫܹܐ ܕܲܥܒܲܕܼܬܿ: ܐܲܚܪܡܘܼܟܼ
ܘܲܫܪܵܐܘܼܟܼ ܗ̄ܘ̣ܵܘ ܒܐܲܦܸܤܘܿܣ. ܘܠܵܐ ܡܸܫܟܲܚ ܐܲܢ̄ܬܿ ܠܡܸܟܼܦܲܪ: ܠܵܐ
ܐܲܢ̄ܬܿ ܘܠܵܐ ܗܵܢ̇ܘܿܢ: ܒܗܵܘ̇ ܡܵܐ ܕܒܲܟܼܬܼܝܼ̈ܒܼܸܵܬܼܵܐ ܥܒܲܕܬܿܘܿܢ. ܡܵܕܹܝܢ
ܟܲܕܼ ܗܵܠܹܝܢ ܤܵܥ̇̄ܪܝܼܢ ܗ̄ܘ̣ܵܘ: ܥܲܠ ܬܲܪ̈ܬܲܗܹܝܢ ܤܵܗ̇ܕܝܼܢ ܗ̄ܘ̣ܵܘ
ܥܠܲܝ: ܘܥܲܠ ܡܛܲܟܼܤܘܼܬܼܵܐ ܘܥܲܠ ܕܲܚܠܲܬܼ ܐܲܠܵܗܵܐ. ܠܵܟܼ ܕܹܝܢ ܐܲܝܟܼ
ܕܲܠܩܘܼܒܼܠܵܐ ܡܩܲܛܪܓܼܝܼܢ ܗ̄ܘ̣ܵܘ: ܘܐܲܝܟܼ ܕܲܠܡܲܪܵܚܵܬܐ ܘܐܲܝܟܼ
ܕܲܠܗܲܪܵܛܝܼܩܵܐ: ܘܲܩܪܵܐܘܼܟܼ ܠܕܝܼܢܵܐ ܕܥܲܠ ܬܲܪ̈ܬܲܝܗܹܝܢ ܡܲܟܿܤܘܼܢܵܟܼ:
ܘܕܵܢ̣ܘ ܗ̄ܘ̣ܵܘ ܕܫܵܘܹ̇ܐ ܐܲܢ̄ܬܿ ܠܩܵܬܼܵܪܵܤܝܼܣ. ܘܟܲܕܼ ܐܸܬܼܩܵܪܝܼܬܿܘܿܢ ܡ̣ܢ
ܡܲܠܟܵܐ ܐܲܝܟܼ ܕܲܠܟܼ ܕܲܠܕܼܝܼܢܵܐ: ܢܸܗܘܿܢ ܩܲܕܼܡܘ ܩܲܛܪܓܼܘܼܟܼ: ܡܦܵܤܝܼܢ
ܗ̄ܘ̣ܵܘ ܓܹܝܪ ܒܡܲܪܵܚܘܼܬܼܟܼܘܼܢ ܘܒܲܛܪܘܼܢܘܼܬܼܘܿܢ: ܘܲܒܼܟܼܠܗܹܝܢ ܒܝܼ̈ܫܬܼܵܐ
ܕܲܥܒܲܕܬܿܘܿܢ ܒܐܲܦܸܤܘܿܣ. ܐܵܦ ܓܹܝܪ ܒܩܲܠܟܼܝܼܕܘܿܢܵܐ: ܠܥܹ̈ܕܵܬܼܵܐ
ܟܠܗܹܝܢ ܐܸܚܲܕܬܿܘܿܢ ܐܸܢܹܝܢ ܡ̣ܢ ܩܕܼܵܡܲܝܗܘܿܢ ܩܕܼܵܡ ܕܢܸܗܘܸܐ ܕܝܼܢܵܐ:
ܐܲܝܟܼ ܕܠܵܐ ܢܸܥܠܘܼܢ ܢܨܲܠܘܿܢ. ܘܠܐܘܼܪ̈ܚܵܬܼܵܐ ܕܡܲܠܟܵܐ ܤܵܓܼܬܿܘܿܢ
ܐܸܢܹܝܢ: ܘܥܲܡ ܟܹܐܦܹ̈ܐ ܘܩܲܝ̈ܤܹܐ ܐܵܪܥܝܼܢ ܗ̣̄ܘܲܝܬܿܘܿܢ ܠܗܘܿܢ. ܘܛܵܪܕܝܼܢ
ܗ̣ܘܲܝܬܿܘܿܢ ܠܗܘܿܢ ܠܕܼܘܼ̈ܟܿܝܵܬܼܵܐ ܐܲܠܨܵܬܼܵܐ: ܐܲܝܟܼ ܕܲܠܘܼ̈ܟܿܝܵܬܼܵܐ ܕܠܲܝܬܿ
ܠܡܸܥܪܲܩ ܡܸܢܗܹܝܢ ܠܐ̄ܢܵܫܵܐ ܐܲܟܸܤ̈ܢܵܝܹܐ: ܐ̄ܢܵܫܵܐ ܠܵܐ ܡܕܲܪ̈ܫܲܝ ܒܐܘܼܪ̈ܚܵܬܼܵܐ:
pb. 397
ܕܥܲܠ ܤܲܒܼܪܵܐ ܕܲܡܛܲܟܿܤܘܼܬܼܵܐ ܕܡ̣ܢ ܡܲܠܟܵܐ ܐܲܬܝܼܐܝܼܢ ܗ̄ܘ̣ܵܘ: ܘܗܵܟܲܢܵܐ
ܠܡܲܚܤܸܢ ܐܸܫܬܵܘܙܲܒܼܘ ܗ̄ܘ̣ܵܘ: ܡ̣ܢ ܐܲܝܠܹܝܢ ܕܐܵܨ̇ܝܼܢ ܗ̄ܘ̣ܵܘ ܠܗܘܿܢ:
ܥܕܲܡܵܐ ܕܫܲܕܲܪ ܡܲܠܟܵܐ ܥܘܼܕܼܪܵܢܵܐ ܕܐܸܤܛܪ̈ܵܛܝܼܘܿܛܹܐ ܕܲܢܫܵܙܸܒܼ ܐܸܢܘܿܢ.
ܐܝܼܬܼܵܘܗܝ ܗ̄ܘ̣ܵܐ ܕܹܝܢ ܟܸܢܫܵܐ ܕܐܲܝܠܹܝܢ ܕܒܸܐܤܛܵܤܝܼܢ ܡܸܬܼܗܲܦܟܼܝܼܢ
ܗ̄ܘ̣ܵܘ ܕܠܵܐ ܡܸܢܝܵܢ. ܗܵܝܕܹܝܢ ܡ̣ܢ ܐܲܦܸܤܘܿܣ ܐܸܬܼܩ̇ܪܝܼܬܼ: ܗܵܝܕܹܝܟ
ܡ̣ܢ ܡܸܨܪ̈ܵܝܹܐ ܘܡ̣ܢ ܕܲܝܪ̈ܵܝܹܐ ܕܲܒܼܩܘܼܤܛܲܢܛܝܼܢܵܦܘܿܠܝܼܣ: ܘܡ̣ܢ ܐܲܝܠܹܝܢ
ܕܡܲܤܠܹܝܢ ܗ̄ܘ̣ܵܘ ܡ̣ܢ ܕܲܝܪܵܝܘܼܬܼܵܐ: ܘܟܼܠܗܘܿܢ ܐܲܝܠܹܝܢ ܕܒܲܐܝܕܵܐ
ܕܗ̤ܝ ܥܸܠܵܬܼܵܐ ܠܒܲܪ ܛܪܝܼܕܼܝܼܢ ܗ̄ܘ̣ܵܘ: ܘܲܚܦܝܼܛܝܼܢ ܗ̄ܘ̣ܵܘ ܒܲܥܹ̇ܒܼܵܕܼܵܐ
ܕܐܸܤܛܵܤܝܼܪܹ̈ܐ. ܘܡܸܛܠ ܐܸܤܟܹܡܵܐ ܕܕܲܝܪ̈ܵܝܹܐ: ܡܸܤܬܲܒܼܪܝܼܢ ܗ̄ܘ̣ܵܘ
ܕܐܲܝܟܼ ܕܲܒܼܛܲܢܵܢܘܼܬܼܵܐ ܥܵܒܼ̇ܕܝܼܢ. ܗܵܝܕܝܼܢ. ܗܵܝܕܹܝܢ ܡܹܐܟܗܪܠܵܬܼܵܐ ܘܤܲܝܒܵܪܵܬܼܵܐ
ܡ̣ܢ
ܕܲܝܪ̈ܵܬܼܵܐ ܢܵܤ̇ܒܿܝܼܢ ܗ̄ܘ̣ܵܘ ܥܲܡ ܢܲܚ̈ܬܹܐ: ܕܐܲܝܟܼ ܕܒܲܐܓܼܪܵܐ ܕܪܸܬܼܚܵܐ
ܕܚܘܼܒܵܐ ܡܸܬܼܝܲܗܒܿܝܼܢ ܗ̄ܘ̣ܵܘ ܠܗܘܿܢ. ܘܲܠܦܲܪ̈ܲܝܗܘܿܢ ܒܗܵܠܹܝܢ ܚܠܵܦ
ܚܘܼܡܤܵܢܵܐ ܡܦܲܛܡܝܼܢ ܗ̄ܘ̣ܵܘ. ܡ̣ܢ ܐܲܝܠܹܝܢ ܕܲܡܫܲܕܲܪ ܗ̣̄ܘܲܝܬܿ
ܘܡܲܝܬܸܐ ܡ̣ܢ ܒܹܝܬܼ ܚܡܵܠܹ̈ܐ: ܘܐܵܦܘܿܬܹܩܵܣ̈ ܕܚܲܡܪܵܐ ܘܲܕܡܸܫܚܵܐ
ܘܲܕܕܼܩܵܐ ܘܟܼܠ ܙܢܝܼ̈ܢ ܕܲܠܒܼܘܗܼܫܹܐ. ܘܲܡܠܲܝܬܿ ܐܸܢܹܝܢ ܠܕܲܝܪ̈ܵܬܼܵܐ ܐܲܝܠܹܝܢ
ܕܥܲܠ ܗܵܕܹܐ ܦܪ̈ܝܼܫܵܢ ܗ̣̄ܘܲܝ̈: ܘܲܠܕܼܘܼ̈ܟܿܝܵܬܼܵܐ ܐ̄ܚܪ̈ܵܢܝܵܬܼܵܐ. ܐܲܝܟܲܢܵܐ ܕܐܵܦ
ܕܘܼ̈ܟܿܝܵܬܼܵܐ ܩܲܕܝܼ̈ܫܵܬܼܵܐ ܕܲܨܠܘܵܬܼܵܐ ܡܸܬܼܐܲܠ̈ܨܵܢ ܗ̣̄ܘܲܝ̈: ܘܡܲܩܵܢܹ̈ܐ
ܘܡܲܥܠܵܢܹ̈ܐ ܕܟܼܠ ܕܘܼܟܿܬܼܵܐ ܕܡܸܫܟܿܚܵܐ ܗ̄ܘ̣ܬܼ ܠܲܡܩܲܒܵܠܘܼ ܡܵܠܹ̇ܝܢ
ܗ̄ܘ̣ܵܘ ܠܵܗ̇. ܗܵܠܹܝܢ ܕܲܩܕܵܪܡ ܟܠ ܐ̄ܢܵܫ ܐܝܼܬܲܝܗܹܝܢ ܗ̣̄ܘܲܝ̈. ܘܲܡܤܲܦܸܩ
ܗ̣̄ܘܲܝܬܿ ܠܗܹܝܢ ܒܐܲܝܠܹܝܢ ܕܡܸܬܼܩܪ̈ܝܵܢ ܒܘܼܪ̈ܟܵܬܼܵܐ: ܕܡܸܬܼܝܲܗ̈ܒܵܢ ܗ̣̄ܘܲܝ̈
ܚܠܵܦ ܐܲܓܼܪܵܐ ܕܡܸܛܠ ܗܵܠܹܝܢ. ܗܵܘ̇ ܡܵܐ ܕܠܵܐ ܡ̣ܢ ܩܕܼܵܡ ܙܲܒܼܢܵܐ:
pb. 398
ܘܠܵܐ ܡ̣ܢ ܒܵܬܲܪ ܙܲܒܼܢܵܐ ܥ̣ܒܲܕܬܿ. ܘܲܠܗܵܠܹܝܢ ܤܵܥܲ݁ܪ ܗ̣̄ܘܲܝܬܿ: ܐܲܝܟܼ
ܕܠܵܐ ܬܸܤܬܿܒܲܪ ܕܡܸܛܠ ܗܵܠܹܝܢ ܡܫܲܕܲܪ ܗ̄ܘܲܝܬܿ ܐܲܝܟܼ ܕܲܬܼܥܲܬܸܕܼ
ܐܸܤܛܵܤܝܼܣ: ܐܸܠܵܐ ܐܲܝܟܼ ܐܲܝܠܹܝܢ ܕܲܠܕܲܝܪ̈ܵܬܼܵܐ ܐܵܬܼ̈ܝܵܢ ܗ̣̄ܘܲܝ̈ ܘܡ̣ܢ
ܕܲܝܪ̈ܵܬܼܵܐ ܡܸܬܼܢܲܤ̈ܒܵܢ ܗ̣̄ܘܲܝ̈: ܕܠܵܐ ܢܸܬܼܟܲܤܤܘܼܢ ܢܵܤܘܿܒܹ̈ܐ: ܕܡܸܛܠ
ܡ̇ܢ ܢܵܤ̇ܒܿܝܼܢ ܗ̄ܘ̣ܵܘ ܠܗܹܝܢ. ܘܲܕܼܠܵܐ ܟܘܼܚܵܕܼ ܫܓܼܘܼܫ̈ܝܹܐ ܘܲܕܼܠܘܼܚ̈ܝܹܐ
ܤܵܥ̇̄ܪܝܼܢ ܗ̄ܘ̣ܵܘ: ܟܲܕܼ ܡܸܤܬܲܒܼܪܝܼܢ ܗ̄ܘ̣ܵܘ ܛܲܢܵܢܹ̈ܐ. ܡܲܪܦܸܐ ܗ̣̄ܘܲܝܬܿ
ܠܗܘܿܢ ܓܹܝܪ: ܕܟܼܠ ܡܸܕܸܡ ܢܸܤܥܪܘܼܢ. ܘ:ܠܟܼܠ ܥܵܒܹ̇ܕܼ ܗ̣̄ܘܲܝܬܿ:
ܕܠܵܐ ܢܗܲܝܡܢܘܼܢ ܕܗܵܠܹܝܢ ܥܵܒܼ̇ܕܝܼܢ.
ܐܸܡܲܪ ܠܝܼ ܗܵܟܹܝܠ ܐܲܢ̄ܬܿ: ܡܸܛܠ ܐܲܝܕܵܐ ܡܲܪܦܸܐ ܗ̣̄ܘܲܝܬܿ
ܕܗܵܠܹܝܢ ܢܸܬܼܥܲܒܼ̈ܕܵܢ؟ ܘܥܲܠ ܐܲܦܲܝܝ̈ ܐܲܝܠܹܝܢ ܠܐܲܝܠܹܝܢ ܗܵܠܹܝܢ
ܚܵܫܹ̇ܝܢ ܗ̄ܘ̣ܵܘ ܛܵܪܹܕܼ ܗ̣̄ܘܲܝܬܿ ܠܗܘܿܢ: ܐܲܝܟܼ ܕܠܵܐ ܢܸܫܬܿܘܘܿܢ ܐܵܦ ܠܵܐ
ܕܢܸܫܬܲܡܥܘܼܢ ܥܲܠ ܡܵܐ ܕܡܸܬܿܛܲܪܕܝܼܢ ܗ̄ܘ̣ܵܘ؟ ܐܲܝܢܵܐ ܪܸܥܝܵܢܵܐ ܐܝܼܬܼ
ܗ̄ܘ̣ܵܐ ܠܗܘܿܢ ܥܠܲܝܟ: ܘܐܲܝܢܵܐ ܥܠܲܝ: ܟܲܕܼ ܡܦܲܟܼܘ ܠܡܲܕܼܢܚܵܐ؟
ܘܟܼܠ ܚܲܕܼ ܚܲܕܼ ܡܸܢܗܘܿܢ ܠܲܡܕܼܝܼܢ̄ܬܹܗ ܡܙܲܗܲܪ ܗ̄ܘ̣ܵܐ: ܕܠܵܐ
ܢܸܫܠܡܘܼܢ ܠܐܲܝܠܹܝܢ ܕܐܸܬܿܥܲܪ ܠܘܩܒܲܠܝ. ܡܸܛܠ ܐܲܝܕܵܐ ܐܸܫܬܲܕܲܪ
ܗ̄ܘ̣ܵܐ ܕܝܵܛܲܓܡܵܐ ܡ̣ܢ ܡܲܠܟܵܐ ܒܐܝܼܕܲܝ̈ ܠܵܪܸܤܛܘܿܠܵܐܘܿܣ:
ܕܢܹܐܠܘܿܨ ܐܸܢܘܿܢ ܕܲܢܩܲܒܿܠܘܼܢ ܗܵܘ̇ ܡܵܐ ܕܠܘܼܩܒܲܠܝ ܐܸܤܬܿܥܲܪ؟
ܘܐܲܝܟܼ ܕܲܠܘܵܬܼ ܐܲܝܠܹܝܢ ܘܲܒܼܕܲܐܝܟܼ ܐܲܝܠܹܝܢ ܐܝܼܬܲܝܗܘܿܢ ܗ̄ܘ̣ܵܘ ܠܘܵܬܼܝ:
ܐܸܫܬܲܕܲܪ ܗܵܘ̇ ܠܘܵܬܼܗܘܿܢ؟ ܡܸܛܠ ܐܲܝܕܵܐ ܦܵܩܹ̇ܕܼ ܗ̄ܘ̣ܵܐ ܠܗܘܿܢ:
ܕܲܢܩܲܒܿܠܘܼܢܵܟܼ ܒܐܲܦܸܤܩ̈ܘܿܦܹܐ؟ ܘܐܲܝܕܵܐ ܗ̣̄ܝ ܥܸܠܬܼܵܐ ܕܐܲܦܝܼܤܲܬ̤ ܐܸܢܘܿܢ:
pb. 399
ܕܲܢܖܲܒܿܠܘܿܢܵܟܼ ܒܐܲܦܸܤܩ̈ܘܿܦܹܐ؟ ܚܕܼܵܕܹ̈ܐ ܠܵܐ ܚܙܲܝܬܿܘܿܢ: ܘܠܵܐ ܡܲܠܸܠܬܿܘܿܢ
ܥܲܡ ܚܕܼܵܕܹ̈ܐ: ܘܠܵܐ ܐܸܡܲܪܬܿܘܿܢ ܘܠܵܐ ܫܡܲܥܬܿܘܿܢ: ܕܡܸܛܠ ܐܲܝܕܵܐ
ܥܸܠܬܼܵܐ ܠܦܝܼܓܼܝܼܢ ܗ̣̄ܘܲܝܬܿܘܿܢ. ܘܲܕܼܠܵܐ ܕܝܼܢܵܐ ܘܠܵܐ ܒܘܼܚܵܢܵܐ ܘܠܵܐ
ܤܘܼܢܗܵܕܘܿܣ ܗܘ̤ܵܬܼ: ܐܲܝܟܲܢܵܐ ܕܐܲܢ̄ܬܿ ܒܕܼܝܼܢܵܐ ܗܵܘ̇ ܡܵܐ ܕܠܵܐ
ܩܲܒܸܿܠܬܿ ܬܩܲܒܸܠ: ܗܸܢܘܿܢ ܕܹܝܢ ܗܵܘ̇ ܡܵܐ ܕܠܵܐ ܩܲܒܸܿܠ̣ܘ ܢܩܲܒܿܠܘܼܢ.
ܐܸܠܵܐ ܡܸܢܟܼܘܿܢ ܘܲܠܟܼܘܿܢ ܐܸܬܼܚܲܫܲܒܼܬܿܘܿܢ: ܥܲܡ ܐ̄ܚܪ̈ܵܢܹܐ ܐܸܬܼܪܲܥܝܼܬܘܿܢ:
ܥܲܠ ܗܵܠܹܝܢ ܕܲܒܼܗܹܝܢ ܟܹܐܢܵܐܝܼܬܼ ܡܸܬܼܥܲܕܼܾܝܼܢ ܗ̣̄ܘܲܝܬܿܘܿܢ. ܐܲܝܟܲܢܵܐ
ܕܲܠܬܼܪ̈ܬܲܝܗܹܝܢ ܤܘܼ̈ܢܗܵܕܘܿ ܟܹܐܢܵܐܝܼܬܼ ܬܲܫܪܘܼܢ: ܐܵܘ
ܒܕܼܚܠܬܼܵܐ: ܐܵܘ ܒܲܡܤܲܝܒܿܪܵܢܘܼܬܼܵܐ: ܐܵܘ ܒܡܲܤܲܒܼ ܒܐܲܦܹ̈ܐ: ܐܵܘ ܒܟܼܠܗܹܝܢ
ܐܲܟܲܚ̄ܕܼ. ܐܲܝܢܵܐ ܡܲܦܲܩ ܒܪܘܼܚܵܐ ܐܝܼܬܼ ܠܟܼܘܿܢ ܠܘܵܬܼ ܐܲܝܠܹܝܢ
ܕܡܸܬܼܥܲܕܿܠܝܼܢ ܒܟܼܘܿܢ: ܕܲܒܼܡܲܤܲܒܼ ܒܐܲܦܹ̈ܐ ܘܲܒܼܡܲܛܥܝܵܢ̈ܘܵܬܼܵܐ
ܥܒܲܕܬܿܘܿܢ ܫܠܵܡܵܐ ܡܚܲܦܝܵܐ؟ ܦܘܼܩܕܵܢܵܐ ܠܲܡ ܕܡܲܠܟܵܐ: ܡܲܠܟܵܐ
ܗ̄ܘ̣ ܕܲܦܩܲܕܼ ܠܲܢ ܘܥܲܬܸܕܼ ܠܲܢ ܠܗܵܕܹܐ.
ܐܸܡܲܪ: ܡܵܢܵܐ ܡܵܕܹܝܢ ܡܫܲܐܸܠ ܐܲܢ̄ܬܿ ܠܝܼ: ܕܐܲܝܟܲܢܵܐ ܩܲܒܸܿܠ̣ܘ
ܠܩܵܬܼܵܪܵܤܝܼܣ ܕܝܼܠܝ: ܗܵܠܹܝܢ ܕܡ̣ܢ ܩܕܝܼܡ ܠܵܐ ܡܩܲܒܿܠܝܼܢ ܗ̄ܘ̣ܵܘ؟
ܠܵܘ ܠܝܼ ܬܫܲܐܸܠ: ܐܸܠܵܐ ܐܸܢܵܐ ܠܵܟܼ: ܐܲܝܟܲܢܵܐ ܩܲܒܸܠܬܵܗ̇ ܠܗܲܝܡܵܢܘܼܬܼܵܐ
ܗܵܝ̇ ܕܡ̣ܢ ܩܕܝܼܡ ܠܵܐ ܡܩܲܒܸܠ ܗ̣̄ܘܲܝܬܿ؟ ܐܲܝܟܲܢܵܐ ܛܲܫܝܼܬܿ ܠܪܹ̈ܫܲܝܟ:
ܗܵܠܹܝܢ ܕܡܸܛܠܵܬܼܗܘܿܢ ܐܸܫܬܿܪܝܼܬܿ؟ ܐܲܝܟܲܢܵܐ ܩܲܒܿܠܘܼܟܼ ܗܵܠܹܝܢ
ܕܲܠܟܼܝܼܠܵܟܼ ܠܵܐ ܩܲܒܸܿܠ̣ܘ؟ ܐܲܝܟܲܢܵܐ ܕܹܝܢ ܩܲܒܸܠ̣ܘ ܩܵܬܼܵܪܵܤܝܼܣ ܗܵܝ̇
ܕܲܗܘ̤ܵܬܼ ܥܠܲܝ: ܗܵܢ̇ܘܿܢ ܕܠܵܐ ܩܲܒܸܿܠ̣ܘ ܠܪܹ̈ܫܲܝܟ ܪ̈ܲܫܝܼܥܹܐ؟ ܗܵܠܹܝܢ
ܤܢܝܼܩܝܼܢ ܥܲܠ ܫܘܼܐܵܠܵܐ: ܐܵܘ ܥܲܠ ܦܘܼܢܵܝ ܦܸܬܼܓܼܵܡܵܐ. ܠܵܐ ܗ̄ܘ̣ܵܐ
pb. 400
ܓܹܝܪ ܕܠܵܐ ܡܲܦܲܩ ܒܪܘܼܚܵܐ ܥܵܒܹ̇ܕܼ ܠܝܼ ܤܘܼܥܪܵܢܵܐ: ܗܵܘ̇ ܕܒܹܗ
ܓܲܠܝܵܐܝܼܬܼ ܡ̣ܢ ܟܠ ܐ̄ܢܵܫ ܐܸܬܿܬܿܕܝܼܢܹ̇ܬܼ: ܟܲܕܼ ܨܵܒܹ̇ܝܢ ܘܟܲܕܼ ܠܵܐ
ܨܵܒܹ̇ܝܢ: ܐܸܠܵܐ ܕܲܠܩܘܼܒܼܠܵܐ: ܐܵܦ ܥܲܠ ܡܲܦܲܩ ܒܪܘܼܚܵܐ ܐ̄ܚܪܹܢܵܐ
ܡܲܤܢܸܩ ܠܝܼ. ܠܐܲܝܠܹܝܢ ܗܵܟܹܝܠ ܕܒܼܵܥܹ̇ܝܢ ܠܲܡܒܲܚܵܢܘܼ: ܗܸܢܹܝܢ ܗܵܠܹܝܢ
ܡܵܘ̈ܕܥܵܢ ܠܗܘܿܢ ܐܲܝܲܟܲܢܵܐ ܗ̤ܘܲܝ̈: ܟܲܕܼ ܐܵܦ ܐܲܢ̄ܬܿܘܿܢ ܥܲܡܝܼ ܡܵܘܕܹܝܢ
ܐܢ̄ܬܿܘܿܢ ܒܗܵܕܹܐ. ܗܸܢܘܿܢ ܓܹܝܪ ܠܢܲܦܫܗܘܿܢ ܫܵܪܹܝܢ. ܘܲܒܼܕܼܝܼܢܵܐ ܕܝܼܠܗܘܿܢ
ܢܲܦܫܗܘܿܢ ܚܲܝܸܒܼܘ. ܕܠܵܐ ܗ̄ܘ̣ܵܐ ܠܐܲܝܠܹܝܢ ܕܡ̣ܢ ܤܘܼܢܗܵܕܘܿܣ
ܐܸܬܼܒܿܚܸܢ ܩܲܒܸܠ̣ܘ ܗ̄ܘ̣ܵܘ: ܐܸܠܵܐ ܠܐܲܝܠܹܝܢ ܕܡ̣ܢ ܫܵܘܬܵܦܘܼܬܼܵܐ ܕܲܬܼܪ̈ܲܝܟܿܘܿܢ
ܩܲܒܸܿܠܬܿܘܿܢ ܠܡܸܫܪܵܐ: ܟܲܕܼ ܨܵܒܹ̇ܝܢ ܐܢ̄ܬܿܘܿܢ ܘܟܲܕܼ ܠܵܐ ܨܵܒܹ̇ܝܢ ܐܲܢ̄ܬܿܘܿܢ:
ܠܒܲܪ ܡ̣ܢ ܫܲܪܟܵܐ ܕܲܐ̄ܚܪ̈ܵܢܹܐ. ܐܲܝܟܲܢܵܐ ܕܠܵܐ ܒܲܫܡܵܐ ܕܤܘܼܢܗܵܕܘܿܣ
ܢܸܫܪܘܿܢ: ܠܗܵܠܹܝܢ ܕܐܵܘ ܛܵܒܼܵܐܝܼܘܼ ܐܵܘ ܒܝܼܫܵܐܝܼܬܼ ܒܥ̣ܵܘ ܗ̄ܘ̣ܘ ܚܕܼܵܐ
ܙܒܲܢ. ܐܸܠܵܐ ܕܲܢܚܵܘܘܿܢ ܕܐܲܝܠܹܝܢ ܕܫܵܦ̇ܪ̈ܵܢ ܠܡܲܠܟܵܐ ܥ̣ܒܲܕܼܘ:
ܠܲܡܩܲܒܵܠܘܼ ܠܗܵܠܹܝܢ ܕܐܸܤܬܿܥܲܪ ܠܘܼܩܒܲܠܝ: ܟܲܕܼ ܡ̣ܢ ܩܕܝܼܡ ܠܵܐ
ܡܩܲܒܿܠܝܼܢ ܗ̄ܘ̣ܵܘ. ܒܪܲܡ ܕܹܝܢ ܐܵܦ ܠܡܸܥܪܲܩ ܡ̣ܢ ܥܘܼܗܕܵܢܵܐ
ܕܩܹܦܵܠܹ̈ܐܹܐ ܚܦܝܼܛܝܼܢ ܗ̄ܘ̣ܵܘ: ܘܐܲܚܝܼܕܝܼܢ ܗ̄ܘ̣ܵܘ ܒܗܵܠܹܝܢ ܬܪܹܝܢ
ܓܲܒܿܝܼ̈ܢ: ܠܘܼܩܒܲܠ ܚܕܼܵܕܹ̈ܐ. ܐܲܢ̄ܬܿ ܠܲܫܪܵܝܵܐ ܕܝܼܠܝܼ: ܘܗܵܢ̇ܘܿܢ ܠܲܫܪܵܝܵܐ
ܕܩܹܦܵܠ̈ܐܹܐ ܕܝܼܠܵܟܼ: ܗܵܢ̇ܘܿܢ ܕܡܸܛܠܵܬܼܗܘܿܢ ܩܲܒܸܠܢ ܟ̱ܠܹܗ ܬܥܵܫܵܐ.
ܐܸܢܵܐ ܕܹܝܢ ܟܠ ܚܲܫ̈ܝܼܢ ܩܲܒܿܠܹ̇ܬܼ ܘܠܵܐ ܐܲܫ̇ܠ̱ܡܹܬܼ: ܬܸܬܼܐܡܲܪ ܕܹܝܢ
ܒܥܘܼܕܼܪܵܢܵܐ ܕܐܲܠܵܗܵܐ ܐܵܦ ܠܵܐ ܡܲܫܠܸܡ ܐ̄ܢܵܐ: ܥܕܲܡܵܐ ܠܡܲܦܲܩܬܵܗ̇
ܐ̄ܚܪܵܝܬܼܵܐ ܕܲܢܫܲܡܬܼܝ. ܡܸܛܠ ܗܵܢܵܐ ܒܗܵܝ̇ ܕܩܲܒܸܿܠ̣ܘ ܠܗܵܠܹܝܢ ܕܡ̣ܢ
pb. 401
ܩܕܼܵܝܡ ܠܵܐ ܩܲܒܸܠ̣ܘ: ܠܢܲܦܫܗܘܿܢ ܗܵܘܹ̇ܝܢ ܡܚܲܝ̈ܒܼܵܢܹܐ: ܘܲܡܒܲܛܠܝܼܢ
ܐܵܦ ܠܐܲܝܠܹܝܢ ܕܐܸܤܬܿܥܗܲܪ ܠܘܼܩܒܲܠܝ. ܒܒܼܘܼܛܵܠܵܐ ܓܹܝܪ ܕܩܹܦܵܠܹ̇ܐܹܐ:
ܡܸܬܼܒܲܛܠܵܐ ܥܲܡܗܘܿܢ ܐܵܦ ܩܵܬܼܵܪܵܤܝܼܣ ܕܝܼܠܝܼ. ܐܵܘ ܠܵܐ ܗ̄ܘ̣ܵܐ
ܡܸܛܠ ܕܠܵܐ ܩܲܒܿܠܹ̇ܬܼ ܠܗܵܠܹܝܢ: ܗܘ̤ܵܐ ܗ̄ܘ̣ܵܐ ܫܪܵܝܵܐ ܕܝܼܠܝܼ؟ ܥܸܠܬܼܵܐ
ܓܹܝܪ ܐ̄ܚܪܹܬܼܵܐ ܠܲܝܬܿ ܠܵܗ̇ ܠܩܵܬܼܵܪܤܝܼܣ ܕܝܼܠܝܼ.
ܐܸܠܵܐ ܐܵܡܲ݁ܪ ܐܲܢ̄ܬܿ: ܕܠܵܐ ܠܲܡ ܒܲܛ̇ܠܹܬܼ ܐܸܢܘܿܢ ܠܩܹܦܵܠܹ̇̄ܐܹܐ. ܩܲܒܿܠܹ̇ܬܼ
ܕܹܝܢ ܠܝܘܿܗܲܝܢܝܼܣ ܕܐܵܘܕܝܼ ܥܲܡܝܼ ܘܲܫܠܸܡ̣ ܠܝܼ ܒܗܲܝܡܵܢܘܼܬܼܵܐ
ܕܲܠܩܘܼܒܼܠܵܟܼ. ܗܸܢܹܝܢ ܗܵܠܹܝܢ ܐܸܡ݂ܲܪ ܐܵܦ ܝܘܿܗܲܢܝܼܣ: ܕܩܲܒܸܿܠ̇ܬܵܟܼ
ܠܲܡ ܩܘܼܪܸܠܘܿܣ: ܕܐܵܘܕܝܼܬܿ ܥܲܡܝܼ ܒܡܸܠܹ̈ܐ ܕܗܲܝܡܵܢܘܼܬܼܵܐ. ܡܲܢ̣ܘܼ
ܗܵܟܹܝܠ ܗܵܘ̇ ܕܩܲܒܸܿܠ̣ ܚܲܒܼܪܹܗ؟ ܘܡܲܢ̣ܘܼ ܗܵܘ̇ ܕܐܸܬܼܩܲܒܲܠ؟ ܗܸܢܹܝܢ
ܓܹܝܪ ܟܲܕܼ ܗܸܢܹܝܢ ܐܵܡ̇ܪܝܼܢ ܐܢ̄ܬܿܘܿܢ ܬܪ̈ܲܝܟܿܘܿܢ: ܘܲܡܦܝܼܤܝܼܢ ܐܢ̄ܬܿܘܿܢ
ܠܐܲܝܠܹܝܢ ܕܲܤܕܲܩ̣ܘ ܢܲܦܫܗܘܿܢ: ܡܲܦܪܲܫ̣ܘ ܡ̣ܢ ܫܲܝܢܵܐ ܡܲܛܥܝܵܢܵܐ
ܕܲܥܒܲܕܬܿܘܿܢ. ܐܲܢ̄ܬܿ ܡ̇ܢ: ܒܗܵܝ̇ ܕܩܲܒܸܿܠ̣ܘ ܗܵܢ̇ܘܿܢ ܠܲܫܪܵܝܵܐ ܕܝܼܠܝܼ:
ܗܵܘ̇ ܕܠܵܐ ܡܩܲܒܿܠܝܼܢ ܗ̄ܘ̣ܵܘ ܠܹܗ ܡ̣ܢܪ ܩܕܼܝܼܡ. ܕܩܲܒܸܿܠ̣ܘ ܐܵܦ
ܠܩܹ̈ܦܵܠܹܐܹܐ ܗܵܠܹܝܢ ܕܠܵܐ ܡܩܲܒܸܿܠ ܗ̄ܘܹ̇ܝܬܼ ܐܸܢܵܐ: ܡܲܤܒܲܪ ܗ̣̄ܘܲܝܬܿ.
ܘܗܵܘ̇: ܡܸܛܠ ܕܠܵܐ ܡܩܲܒܸܿܠ ܠܡܸܟܼܬܲܒܼ ܒܲܤܝܵܡܵܐ ܕܗܲܝܡܵܢܘܼܬܼܵܐ
ܠܩܹ̈ܦܵܠܹܐܹܐ ܕܝܼܠܵܟܼ: ܗܵܢ̇ܘܿܢ ܕܲܒܼܗܘܿܢ ܡܸܬܼܥܲܫܲܢ ܗ̣̄ܘܲܝܬܿ ܕܢܸܫܠ̱ܡܘܼܢ
ܥܲܡܵܟܼ: ܒܐܲܠܹܝܢ ܕܲܬܼܪܝܼܨܵܐܝܼܬܼ ܡܩܲܛ̱ܪܓܼܝܼܢ ܗ̄ܘ̣ܵܘ ܠܗܘܿܢ. ܐܵܘ
ܓܹܝܪ ܠܵܘ ܡܸܛܠ ܗܵܠܹܝܢ ܐܝܼܬܹܝܗ̇ ܗ̄ܘ̣ܵܬܼ ܟ̱ܠܵܗ̇ ܒܥܵܬܲܢ ܘܲܩܪܵܒܲܢ
ܘܬܲܟܼܬܿܘܼܫܲܢ: ܕܠܵܐ ܢܩܲܒܸܿܠ ܐܸܢܘܿܢ؟ ܐܸܠܵܐ ܐܝܼܬܼ ܠܡܹܐܡܲܪ: ܕܠܵܐ
ܗ̄ܘ̣ܵܐ ܡܸܛܠ ܕܐܸܬܼܒܲܛܲܠܘ: ܠܵܐ ܐܸܬܼܟܬܸܒܼܘ ܒܲܤܝܵܡܵܐ ܕܗܲܝܡܵܢܘܼܬܼܵܐ:
pb. 402
ܟܲܕܼ ܐܸܬܼܥܒܸܕܼ ܫܠܵܡܵܐ: ܐܸܠܵܐ ܡܸܛܠ ܕܐܝܼܬܲܝܗܘܿܢ ܗ̄ܘ̣ܵܘ ܕܠܵܐ
ܦܘܼܠܵܓܼܵܐ ܘܲܕܼܠܵܐ ܒܥܵܬܼܵܐ. ܐܸܢܗ̤ܘ ܕܟܼܠܵܗ̇ ܒܥܵܬܲܢ ܘܚܸܪܝܼܢܲܢ ܡܸܛܠ
ܒܘܼܛܵܠܵܐ ܘܲܫܪܵܝܵܐ ܕܗܵܠܹܝܢ ܐܝܼܬܹܝܗ̇ ܗ̄ܘ̣ܵܬܼ: ܠܵܐ ܗ̄ܘ̣ܵܐ ܡܸܛܠ
ܡܸܕܸܡ ܐ̄ܚܪܹܝܢ ܠܵܐ ܐܸܬܼܟܹܬܸܒܼܘ ܟܲܕܼ ܐܸܬܼܥܒܸܕܼ ܫܠܵܡܵܐ: ܐܸܠܵܐ ܐܸܢ
ܕܠܵܐ ܐܸܬܼܩܲܒܲܠܘ ܗ̄ܘ̣ܵܘ ܡ̣ܢ ܪܸܥܝܵܢܵܐ ܘܫܲܠܡܘܼܬܼܵܐ ܕܓܼܵܘܵܐ: ܐܲܝܟܲܢܵܐ
ܗܵܟܹܝܠ ܠܝܒܼܝܼܟܼ ܐܲܢ̄ܬܿ ܠܗܘܿܢ: ܠܗܵܠܹܝܢ ܐܲܝܟܼ ܐܲܝܠܹܝܢ ܕܐܸܬܼܩܲܒܲܠܘ:
ܗܵܢ̇ܘܿܢ ܕܠܵܐ ܐܸܬܼܩܲܒܲܠܘ ܒܬܼܵܘ̈ܕܝܵܬܼܟܼܘܿܢ؟ ܠܵܐ ܓܹܝܪ ܡܸܫܬܲܒܼܩܝܼܢ
ܗ̄ܘ̣ܵܘ ܗܵܠܹܝܢ: ܒܡܸܨ ܥܲܬܼ ܐܵܘܝܘܼܬܼܵܐ: ܕܐܲܢ̄ܬܿ ܘܗܵܠܟܼ ܒܗܘܿܢ
ܐܲܝܟܼ ܕܒܼܵܐܪ̈ܬܵܕܘܿܟܼܿܤܹܐ ܬܸܬܼܚܲܫܚܘܼܢ: ܗܵܢ̇ܘܿܢ ܕܹܝܢ ܕܲܒܼܡܲܕܢܚܵܐ ܐܲܝܟܼ
ܕܒܼܗܲܪ̈ܵܛܝܼܩܹܐ. ܗܵܕܹܐ ܓܹܝܪ: ܠܵܐ ܐܝܼܬܹܝܗ̇ ܚܕܼܵܐ ܐܵܘܝܘܼܬܼܵܐ ܕܗܲܝܡܵܢܘܼܬܼܵܐ:
ܐܸܠܵܐ ܚܸܪ̈ܝܵܢܹܐ ܘܦܵܠܓ̈ܘܵܬܼܵܐ.
ܒܪܲܡ ܡܸܛܠ ܐܲܝܕܵܐ ܠܵܐ ܗ̄ܘ̣ܵܐ ܒܬܼܵܘܕܝܼܬܼܵܐ ܕܒܲܟܼܬܼܝܼܗܒܼܵܬܐ ܗܘ̤ܵܐ
ܒܘܼܛܵܠܵܐ ܕܗܵܠܹܝܢ: ܐܸܠܵܐ ܐܸܫܬܿܒܸܩܘ ܗ̄ܘ̣ܵܘ؟ ܩܲܕܼܡܵܝܑܬܼ ܡ̇ܢ: ܡܸܛܠ
ܕܝܵܗ̇ܒܿܝܼܢ ܗ̄ܘ̣ܵܘ ܐܲܬܼܪܵܐ ܠܲܩܛܝܼܪܵܐ ܕܡܲܠܟܿܘܼܬܼܵܐ: ܘܒܼܵܥܹ̇ܝܢ ܗ̄ܘ̣ܵܘ
ܕܟܼܠ ܐܲܝܟܼ ܕܗ̤ܘ ܢܸܥܒܿܕܘܼܢ ܫܲܝܢܵܐ. ܒܵܬܲܪ ܗܵܕܹܐ: ܡܸܛܠ ܕܒܼܵܥܹ̇ܝܢ
ܗ̄ܘ̣ܵܘ ܕܢܸܥܒܿܕܼܘܼܢ ܒܹܗ ܛܲܝܒܿܘܼܬܼܵܐ: ܕܠܵܐ ܒܲܟܼܬܼܝܼ̈ܒܼܵܬܼܵܐ ܢܲܚܪܸܡ
ܠܩ݂̈ܦܵܠܹܐܹܐ ܕܝܼܠܹܡ. ܒܲܕܼ ܡܸܤܦܩܲܬ̤ ܠܗܘܿܢ ܕܠܵܐ ܢܩܲܒܿܠܘܼܢ ܐܸܢܘܿܢ:
ܘܐܵܦ ܠܵܐ ܒܲܟܼܬܼܝܼ̈ܒܼܵܬܼܵܐ ܢܲܟܼܬܿܒܼܘܼܢ ܐܸܢܘܿܢ: ܠܗܵܢܘܿܢ ܕܒܲܩܛܝܼܪܵܐ ܒܵܥܹ̇ܐ
ܗ̄ܘ̣ܵܐ ܕܢܸܬܼܩܲܒܠܘܼܢ ܩܲܕܼܡܵܝܑܬܼ. ܡܸܛܠ ܐܲܝܕܵܐ ܕܹܝܢ ܗܵܢܵܐ ܩܲܒܸܿܠ̣
ܗ̄ܘ̣ܵܐ: ܕܒܸܠܥܵܕܼ ܡ̣ܢ ܟܬܼܝܼ̈ܒܼܵܬܼܵܐ ܢܸܫܬܲܒܼܩܘܼܢ: ܐܸܢ ܗܵܕܹܐ ܨܵܒܹ̇ܐ ܗ̄ܘ̣ܵܐ:
ܐܲܝܟܼ ܡܵܐ ܕܐܵܦ ܨܵܒܹ̇ܐ: ܕܢܼܬܼܩܲܒܿܠܘܼܢ ܐܲܝܟܼ ܐܵܪ̈ܬܵܕܘܿܟܿܤܹܐ؟
pb. 403
ܩܲܕܼܡܵܝܑܬܼ ܡ̇ܢ: ܕܠܵܐ ܢܹܐܬܸܐ ܠܐܲܢܲܢܩܹܐ ܕܲܕܪܵܫܵܐ ܘܢܸܦܸܠ̣. ܘܲܢܩܘܼܡܘܼܢ
ܠܩܘܼܒܼܠܹܗ ܡܲܕܢܚܵܝ̈ܐ: ܘܡ̣ܢ ܩܕܼܵܡ ܟܠ ܡܸܕܸܡ ܢܸܒ̣ܥܘܿܢ ܕܢܸܫܬܿܪܸܐ
ܥܲܠ ܗܵܠܹܝܢ: ܐܲܝܟܼ ܐܲܝܢܵܐ ܕܐܸܬܼܚܲܝܲܒܼ: ܗܵܕܹܐ ܕܕܼܵܚܹ̇ܠ ܗ̄ܘ̣ܵܐ ܡܸܢܵܗ̇.
ܐܵܐܲܢܩܹܐ ܗ̄ܘ̣ܵܬܼ ܓܹܝܪ: ܕܟܲܕܼ ܡܸܬܼܐܠܸܨ ܗ̄ܘ̣ܵܐ ܘܡܸܬܼܚܢܸܩ: ܕܢܲܗܝܼܪܵܐܝܼܬܼ
ܢܹܐܡܲܪ ܗܵܘ̇ ܡܵܐ ܕܲܡܗܲܝܡܸܢ ܗ̄ܘ̣ܵܐ. ܕܐܵܘ ܐܲܝܟܼ ܡܵܐ ܕܐܝܼܬܼ ܗ̄ܘ̣ܵܐ
ܒܩܹ̈ܦܵܠܹܐܹܐ ܘܒܸܐܓܲܪܬܹܗ ܢܸܬܼܚܙܸܐ ܕܲܡܗܲܝܡܵܢ: ܐܵܘ ܐܸܢܕܹܝܢ ܠܵܐ: ܘܐܲܝܟܼ
ܡܲܕܼܢܚܵܝܹ̈ܐ ܐܵܦ ܗ̤ܘ ܡܸܬܼܪܲܥܸܐ ܗ̄ܘ̣ܵܐ. ܒܬܲܪ̈ܬܲܝܗܹܝܢ ܡܸܬܼܩܲܟܛܪܲܓܼ
ܗ̄ܘ̣ܵܐ. ܐܵܘ ܕܗܸܢܹܝܢ ܟܲܕܼ ܗܸܢܹܝܢ ܐܵܡܲ݁ܪ: ܘܡܸܬܼܚܙܸܐ ܗ̄ܘ̣ܵܐ ܐܵܘ ܐܲܝܟܼ
ܥܸܵܒܹ̇ܕܼ ܒܝܼ̈ܫܬܼܵܠܐ: ܐܵܘ ܐܲܝܟܼ ܗܲܪܵܛܝܼܩܵܐ ܢܲܗܝܼܪܵܐܝܼܬܼ ܡܸܬܼܓܠܸܐ ܗ̄ܘ̣ܵܐ.
ܐܲܝܟܼ ܕܠܵܐ ܕܹܝܢ ܢܸܚܲܫ ܗܵܕܹܐ: ܒܨܒܼܝܵܢܹܗ ܫܠܸܡ̣ ܘܲܢܤܲܒܼ: ܐܲܝܟܲܢܵܐ
ܕܢܸܗܘܸܐ ܠܗܘܿܢ ܫܠܵܡܵܐ: ܒܸܥܵܕܼ ܡ̣ܢ ܟܬܼܝܼ̈ܒܼܵܬܼܵܐ ܕܩܹ̈ܦܵܠܹܐܹܐ.
ܒܵܬܲܪܟܸܢ ܕܹܝܢ: ܕܢܸܬܿܠܘܼܢ ܠܹܗ ܗܵܠܹܝܢ ܕܲܥܠܲܝ: ܗܵܘ̇ ܡܵܐ ܕܲܒܼܵܥܹ̇ܐ
ܗ̄ܘ̣ܵܐ: ܗܵܢܵܘ ܕܹܝܢ ܫܪܵܝܵܐ ܕܝܼܠܝܼ: ܐܲܝܟܲܢܵܐ ܕܠܵܐ ܢܸܗܘܸܐ ܠܝܼ ܬܘܼܒܼ
ܦܘܼܢܵܝܐ. ܒܗܵܝ̇ ܕܟܼܠܗܘܿܢ ܐܲܡܲܚ̄ܕܼ ܐܸܫܬܼܿܘܝܼܘ ܥܠܲܝ: ܗܵܘ̇ ܡܵܐ ܕܡ̣ܢ
ܫܘܼܪܵܝܵܐ ܚܦܝܼܛ ܗ̄ܘ̣ܵܐ ܥܠܵܘܗܝ. ܒܪܲܡ ܕܹܝܢ ܠܵܐ ܐܲܨܠܲܚ: ܡܸܛܠ
ܕܡ̣ܢ ܩܛܝܼܪܵܐ ܕܡܲܠܟܿܘܼܬܼܵܐ ܗ̄ܘ̣ܵܐ: ܘܠܵܘ ܡ̣ܢ ܕܝܼܢܵܐ ܟܹܐܢܵܐ.
pb. 404
ܐܸܓܲܪܬܵܐ ܕܩܘܼܪܸܠܘܿܣ ܕܲܠܘܵܬܼ ܐܵܩܵܩܝܼܣ ܐܲܦܸܤܩܘܿܦܵܐ ܕܡܝܼܠܝܼܛܝܼܢܵܐ:
ܠܘܵܬܼ ܐܲܝܠܹܝܢ ܕܡܸܬܼܥܲܕܿܠܝܼܢ ܗ̄ܘ̣ܵܘ ܒܹܗ: ܥܲܠ ܫܠܵܡܵܐ ܕܲܥ̣ܒܲܕܼ
ܠܘܵܬܼ ܡܲܕܼܢܚܵܝܹ̈ܐ. ܘܕܲܐܝܟܲܢܵܐ ܐܝܼܬܲܝܗܘܿܢ ܠܘܵܬܼ ܗܵܢܘܿܢ ܕܡܸܬܼܥܲܕܿܠܝܼܢ
ܒܲܫܠܵܡܵܐ ܕܲܗܘ̤ܵܐ: ܡܲܦܲܩ ܒܪܘܼܚܵܐ ܥܸܒܼ̇ܕܹܬܼ.
ܗܵܘ̇ ܡ̇ܢ ܢܦܲܩ̣ ܪܘܼܚܵܐ: ܐܲܝܟܼ ܡ̇ܢ ܕܠܵܐ ܩܲܒܸܠ̣ ܐܸܢܘܿܢ ܠܩܹ̈ܦܵܠܹܠܹܐ
ܕܝܼܠܵܟܼ: ܐܸܠܵܐ ܐܲܦܸܩ̣ ܐܵܢܘܿܢ: ܗܵܢܘܿܢ ܕܟܼܠܗܘܿܢ ܚܦܝܼܛܝܼܢ ܗ̣̄ܘܲܝܬܿܘܿܢ
ܥܠܲܝܗܘܿܢ. ܗܵܢܵܐ ܕܹܝܢ ܐܵܡܲ݁ܪ: ܕܠܵܐ ܩܲܒܸܿܠ̣ ܗ̄ܘ̣ܵܐ ܕܢܲܚܪܸܡ ܐܸܢܘܿܢ:
ܟܲܕܼ ܛܵܒܼ ܥܲܠ ܗܵܕܹܐ ܚܦܝܼܛܝܼܢ ܗ̄ܘ̣ܵܘ ܕܢܲܚܪܡܘܼܢ ܠܪܹ̈ܫܹܐ. ܘܗܵܘ̇
ܡ̇ܢ ܠܲܡ ܕܐܵܨܵܐ ܗ̄ܘ̣ܵܬܼ ܠܟܼܘܿܢ ܥܠܵܘܗܝ: ܕܠܵܐ ܕܹܝܢ
ܡܸܬܼܗܲܝܡܢܵܐ ܗ̄ܘ̣ܵܬܼ ܥܸܒܼ̇ܕܹܬܼ: ܕܲܒܼܨܒܼܝܵܢܗܘܿܢ ܩܲܒܸܿܠ̣ܘ ܠܩܵܬܼܵܪܵܤܝܼܣ
ܕܢܸܤܛܘܿܪܝܼܣ: ܕܒܼܐܝܼܕܹܗ ܐܵܦ ܠܩܹ̈ܦܵܠܹܐܹܐ ܩܲܒܸܿܠ̣ܘ. ܗܵܘ̇ ܕܹܝܢ:
ܕܩܲܒܸܿܠ̣ ܠܩܵܬܼܵܪܵܤܝܼܣ ܠܵܐ ܟܵܦܲܪ. ܐܸܠܵܐ ܡܸܛܠ ܕܩܲܒܼܠܬܿ ܘܐܵܘܕܲܝܼܬܿ
ܒܲܟܼܬܼܝܼ̈ܒܼܵܬܼܵܐ ܠܗܲܝܡܵܢܘܼܬܼܵܐ ܗܵܝ̇ ܕܡܸܫܬܲܪܝܵܐ ܒܵܗ̇ ܩܵܬܼܵܪܵܤܝܼܣ ܟܲܕܼ
ܐܵܡܲ݁ܪ: ܕܲܕܠܵܐ ܚܸܪܝܵܢܵܐ ܐܝܼܬܼ ܠܵܟܼ ܠܘܵܬܲܢ ܗܲܝܡܵܢܘܼܬܼܵܟܼ ܒܲܟܼܬܼܝܼ̈ܒܼܵܬܼܵܐ
ܠܟܹܐܢܘܼܬܼܵܐ ܕܡܸܠܲܝ̈ܢ: ܕܲܡܦܲܪܸܫ ܐܲܢ̄ܬܿ ܠܲܟܼܝܵܢܹ̈ܐ ܘܠܲܒܼ̈ܢܵܬܼ ܩܵܠܹ̈̄ܐ
ܐܲܠܵܗܵܝ̈ܬܼܵܐ ܕܥܲܠ ܬܪ̈ܲܝܗܘܿܢ ܟܝܵܢܹ̈ܐ: ܗܵܘ̇ ܡܵܐ ܕܲܚܦܝܼܛܝܼܢ ܗ̄ܘ̣ܵܝܢ
ܟ̱ܠܲܢ ܠܡܵܘܕܼܵܝܘܼ: ܘܠܵܐ ܐܵܘܕܝܼܬܿ. ܗܵܕܹܐ ܠܲܡ ܗܵܫܵܐ ܗܘ̤ܵܬܼ. ܡܩܲܕܡܵܐ
ܓܹܝܪ ܘܲܡܩܝܼܡܵܐ ܒܟܼܠ ܙܢܵܐ ܕܐܝܼܬܼ: ܠܗܵܘ̇ ܡܵܐ ܕܐܵܠ̇ܨܵܐ
ܥܠܵܘܗܝ ܒܗܲܝܡܵܢܘܼܬܼܵܐ. ܠܲܡܩܲܝܵܡܘܼ ܕܹܝܢ ܐܵܦ ܠܐܲܝܠܹܝܢ ܕܲܐܸܬܼܥܫܸܩܘ
ܥܠܲܝܗܹܝܢ ܠܵܐ ܟܠܲܝܢ: ܐܸܠܵܐ ܝܲܬܿܝܼܪܵܐܝܼܬܼ ܥܒܲܕܼܢ ܚ̄ܢܲܢ ܫܒܼܝܼܠܵܐ.
pb. 405
ܘܗܵܘ̇ ܡ̇ܢ ܐܵܡܲ݁ܪ: ܕܥܸܒܼ̇ܕܹܬܼ ܐܸܢܘܿܢ ܕܢܹܐܡܪܘܼܢ ܝܵܠܕܲܬܼ ܐܲܠܵܗܵܐ:
ܗܵܘ̇ ܡܵܐ ܕܠܵܐ ܡܩܲܒܿܠܝܼܢ ܗ̄ܘ̣ܵܘ ܩܲܕܼܡܵܝܑܬܼ. ܡܸܬܼܪܵܘܪܲܒܼ ܕܹܝܢ
ܘܡܸܬܿܬܿܪܝܼܡ: ܒܠܘܼܩܒܲܠ ܐܲܝܠܹܝܢ ܕܡܸܬܼܚܪܹܝܢ ܗ̄ܘ̣ܵܘ ܠܘܼܩܒܲܠ
ܬܵܘܕܝܼܬܼܵܐ ܗܵܕܹܐ. ܗܵܢܵܐ ܕܹܝܢ ܐܵܘܕܝܼ: ܕܲܠܝܵܠܕܲܬܼ ܐܵܠܗܵܐ ܐܵܘ ܫܚܝܼܡܵܐܝܼܬܼ
ܩܲܒܿܠܹ̇ܬܼ. ܐܵܠܨܵܐ ܓܹܝܪ ܠܡܹܐܡܲܪ ܪܸܥܝܵܢܵܐ: ܗܵܘ̇ ܕܡܸܛܠܵܬܹܗ
ܡܸܬܼܒܲܛܠܵܐ ܚܕܸܿܝܘܼܬܼܵܐ ܩܢܘܿܡܵܝܬܼܵܐ ܘܲܟܼܝܵܢܵܝܬܼܵܐ ܕܐܲܠܵܗܵܐ: ܘܝܲܠܕܵܐ
ܟܝܵܢܵܝܵܐ ܕܡ̣ܢ ܐܲܢ̄ܬܿܬܼܵܐ. ܐܵܡܲ݁ܪ ܓܹܝܪ: ܕܡܵܘܕܹܝܢ ܚ̄ܢܲܢ ܠܩܲܕܝܼܫܬܼܵܐ
ܡܲܪܝܲܡ ܝ̇ܠܕܲܬܼ ܐܵܠܵܗܵܐ: ܡܸܛܠ ܕܐܸܬܼܒܲܤܲܪ ܘܐܸܬܼܒܲܪܢܲܫ ܡܸܢܵܗ̇
ܐܠܵܗܵܐ ܡܸܠܬܼܵܐ. ܘܡܸܢܹܗ ܕܒܲܛܢܵܐ: ܐܸܬܼܚܲܝܲܕܼ ܒܹܗ ܠܗܲܝܟܿܠܵܐ ܕܐܸܬܼܢܤܸܒܼ.
ܘܠܵܐ ܗ̄ܘ̣ܵܐ ܕܐܸܬܼܝܼܠܸܕܼ: ܐܸܠܵܐ ܕܐܸܬܼܚܲܝܲܕܼ ܠܗܲܝܟܿܠܵܐ ܕܐܸܬܼܢܤܸܒܼ.
ܘܐܸܬܼܝܼܠܸܕܼ ܡܸܢܵܗ̇. ܠܵܐ ܓܹܝܪ ܡ̣ܢ ܫܡܵܐ ܕܝܲܠܕܵܐ ܡܸܫܬܲܐܠܝܼܢ ܚ̄ܢܲܢ:
ܐܸܠܵܐ ܡ̣ܢ ܚܵܕܼܵܝܘܼܬܼܵܐ ܩܢܘܿܡܵܝܬܼܵܐ ܕܐܲܠܵܗܵܐ ܡܸܠܬܼܵܐ. ܡܸܛܠ ܗܵܕܹܐ:
ܥܒܲܕܸܢ ܕܬܸܬܼܒܲܛܲܠ. ܘܗܵܘ̇ ܡ̇ܢ: ܐܲܠܵܗܵܐ ܡܫܲܠܡܵܢܵܐ ܘܒܲܪ ܐ̄ܢܵܫܵܐ
ܡܫܲܠܡܵܢܵܐ ܐܵܡܲ݁ܪ ܥܲܠ ܐܲܠܵܗܵܐ ܡܸܠܬܼܵܐ: ܕܐܝܼܬܼܵܘܗܝ ܒܐܘܼܤܝܼܵܐ
ܬܲܪ̈ܬܲܝܗܹܝܢ. ܘܡܸܛܠ ܗܵܕܹܐ ܠܲܡ ܟܬܲܒܼ ܟܲܕܸ ܐܵܡܲ݁ܪ: ܡ̣ܢ ܩܕܼܵܡ
ܥܵܠܡܹ̈ܐ ܡ̣ܢ ܐܲܒܼܵܐ ܐܸܬܼܝܼܠܸܕܼ: ܒܐܲܠܵܗܘܼܬܹܗ. ܒܚܲܪܬܼܵܐ ܕܹܝܢ ܕܝܵܘ̈ܡܵܬܼܵܐ:
ܗ̤ܘ ܟܲܕܼ ܗ̤ܘ ܡܸܛܠܵܬܲܢ ܘܡܸܛܠ ܦܘܼܪܩܵܢܲܢ: ܐܸܬܼܠܸܕܼ ܡ̣ܢ ܡܲܪܝܲܡ
ܒܬܼܘܼܠܬܼܵܐ: ܒܐ̄ܢܵܫܘܼܬܹܗ. ܗ̤ܘ ܠܲܡ ܟܲܕܼ ܗ̤ܘ ܐܵܡܲ݁ܪ ܕܡ̣ܢ ܐܲܒܼܵܐ:
ܘܡ̣ܢ ܡܲܪܝܲܢ ܒܬܼܘܼܠܬܼܵܐ ܐܸܬܼܝܼܠܸܕܼ ܒܐ̄ܢܵܫܘܼܬܼܵܐ. ܐܵܦ ܗܵܪܟܵܐ ܬܘܼܒܼ:
ܡܸܛܠ ܕܠܵܐ ܒܲܚܸܢܘ ܢܲܗܝܼܪܵܐܝܼܬܼ ܠܲܡܩܲܝܵܡܘܼ ܠܐܲܝܠܹܝܢ ܕܐܸܬܼܒܿܥܝܼ ܐܵܘ
ܕܡܸܬܼܒܲܥ̈ܝܼܢ: ܗܵܢܵܘ ܕܹܝܢ ܠܚܲܕܼ ܡܵܪܝܵܐ ܝܼܫܘܿܥ ܡܫܝܼܚܵܐ: ܒܲܪܢܵܫܵܐ
ܡܫܲܠܡܵܢܵܐ ܡ̣ܢ ܢܲܦܫܵܐ ܡܠܝܼܠܬܼܵܐ ܘܡ̣ܢ ܦܲܓܼܪܵܐ: ܐܲܝܟܲܢܐ ܕܲܡܫܝܼܚܵܐ
pb. 406
ܘܲܒܼܪܵܐ ܘܝܼܫܘܿܥ ܐܝܼܬܼܵܘܗܝ ܒܐܘܼܤ̈ܝܼܵܣ ܬܲܪ̈ܬܲܝܗܹܝܢ. ܘܲܒܼܟܼܠ ܡܸܕܸܡ
ܐܝܼܬܼܵܘܗܝ ܐܲܠܵܗܵܐ: ܐܲܟܼܙܢܵܐ ܕܒܲܪܢܵܫܵܐ ܒܲܟܼܝܵܢܵܐ. ܘܲܒܼܟܸܠ ܡܸܕܸܡ
ܐܝܼܬܼܵܘܗܝ ܒܲܟܼܝܵܢܵܐ ܒܲܪܢܵܫܵܐ: ܐܲܝܟܼ ܙܢܵܐ ܕܐܲܠܵܗܵܐ ܡܸܠܬܼܵܐ. ܒܐܘܼܤܝܼܵܐ
ܐܝܼܬܲܝܗܘܿܢ ܬܪ̈ܲܝܗܘܿܢ: ܡܸܛܠ ܗܵܢܵܐ ܟܠܚܲܕܼ ܡܸܢܗܘܿܢ ܡܸܢܹܗ ܘܠܹܗ.
ܡܸܛܠ ܕܲܕܼܠܵܐ ܦܘܼܚܵܡܵܐ ܐܸܬܿܬܿܤܝܼܡ ܗܵܠܹܝܢ: ܢܵܬܹ̇ܦ ܠܗܹܝܢ
ܠܪܸܥܝܵܢܵܐ ܠܦܘܼܬܼ ܢܝܼܫܵܐ ܕܝܼܠܹܗ. ܘܢܵܦܹ̇ܩ ܪܘܼܚܵܐ ܠܲܒܼܢܲܝ̈ ܪܸܥܵܢܹܗ:
ܘܡܲܛܥܸܐ ܠܗܘܿܢ. ܟܲܕܼ ܠܲܝܬܿ ܐ̄ܢܵܫ ܐܲܝܟܼ ܡ̇ܢ ܕܡܸܬܼܥܫܵܩܘܼ ܐܸܬܼܥܫܸܩ:
ܘܚܲܕܼ ܠܚܲܒܼܪܹܗ ܢܵܓܹܿܕܼ ܠܘܵܬܼ ܢܝܼܫܵܐ ܕܝܼܠܹܗ. ܘܠܝܼ ܡܩܲܛܪܸܓܼ:
ܕܠܵܐ ܐܸܡ̇ܪܹܬ ܬܪܝܼܨܵܐܝܼܬܼ ܠܐܲܝܠܹܝܢ ܕܡ̣ܢ ܡܲܕܼܢܚܵܝܹ̈ܐ ܐܸܬܼܐܡܲܪ. ܕܐܵܡ̇ܪܝܼܢ:
ܕܐܲܠܵܗܵܐ ܡ̣ܢ ܐܲܢ̄ܬܿܬܼܵܐ ܐܸܬܼܝܼܠܸܕܼ: ܘܕܸܐܢܵܐ ܠܵܐ ܐܸܡܲ݁ܪ ܐ̄ܢܵܐ. ܘܤܵܐܹ̇ܡ
ܠܡܸܠܲܝ̈ ܕܝܼܠܝ: ܐܲܝܟܼ ܕܲܠܫܸܡܥܵܐ. ܐܵܡܲ݁ܪ ܓܹܝܪ: ܕܐܸܡܲܪ ܠܲܡ ܕܲܥܒܲܪ
ܐܲܠܵܗܵܐ ܒܲܒܼܬܼܘܼܠܬܼܵܐ ܝܵܠܕܲܬܼ ܡܫܝܼܚܵܐ: ܡ̣ܢ ܟܬܼܵܒܼܵܐ ܐܲܠܵܗܵܝܵܐ ܝܑܼܠܸܦܢܲܢ.
ܕܐܸܬܼܝܼܠܸܕܼ ܕܹܝܢ ܡܸܢܵܗ̇: ܘܠܵܐ ܒܕܘܼܟܿ ܝܵܠܦ̇ܝܼܢܲܢ. ܘܲܒܼܕܘܼܟܿܬܼܵܐ ܠܲܡ
ܐ̄ܚܪܹܬܼܵܐ ܒܬܼܘܼܪܓܵܡܹܗ ܐܸܡ݂ܲܪ: ܘܠܵܐ ܒܕܘܼܟܿ ܗܵܟܹܝܠ ܐܵܡܲ݁ܪ ܟܬܼܵܒܼܵܐ
ܐܲܠܵܗܵܝܵܐ: ܕܐܲܠܵܗܵܐ ܡ̣ܢ ܒܬܼܘܼܠܬܼܵܐ ܝܵܠܕܲܬܼ ܠܲܡܫܝܼܚܵܐ ܗܘ̤ܵܐ: ܐܸܠܵܐ
ܝܼܫܘܿܥ ܡܫܝܼܚܵܐ ܘܲܒܼܪܵܐ ܘܡܵܪܝܵܐ. ܥܲܠ ܕܗܵܠܹܝܢ ܓܹܝܪ ܐܵܡܲ݁ܪ:
ܠܲܬܼܪܹܝܢ ܒܢ̈ܝܼܢ ܡܦܲܠܸܓܼ ܠܹܗ ܠܡܵܪܲܢ. ܕܐ̄ܚܪܹܢܵܐ ܗ̄ܘ̣ ܠܲܡ ܫܪܵܐ
ܝܑܼܚܝܼܕܼܵܐܝܼܬܼ: ܒܪܵܐ ܘܲܡܫܝܼܚܵܐ ܘܡܵܪ̈ܲܢ. ܗܵܘ̇ ܕܡ̣ܢ ܐܲܠܵܗܵܐ ܐܲܒܼܵܐ ܐܸܬܼܝܼܠܸܕܼ
ܐܲܠܵܗܵܐ ܡܸܠܬܼܵܐ. ܘܲܐ̄ܚܪܹܢܵܐ ܗ̄ܘ̣ ܬܘܼܒܼ ܝܑܼܚܝܼܕܼܵܐܝܼܬܼ ܒܪܵܐ ܘܲܡܫܝܼܚܵܐ
ܘܡܵܤܪܝܵܐ: ܗܵܘ̇ ܕܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ ܐܸܬܼܝܼܠܸܕܼ. ܐܲܝܟܲܢܸܵܐ ܡܛܲܫܸܐ
ܐܲܢ̄ܬܿ ܫܪܵܪܵܐ؟ ܗܵܕܹܐ ܒܲܠܚܘܿܕܼ ܓܲܠܝܵܐܝܼܬܼ ܠܵܐ ܐܵܡܲ݁ܪ ܗܵܘ̇. ܗܵܢ̇ܘܿܢ
pb. 407
ܕܹܝܢ ܝܵܠܕܲܬܼ ܐܲܠܵܗܵܐ ܡܫܲܡܗܝܼܢ ܠܵܗ̇ ܠܲܒܼܬܼܘܼܠܬܼܵܐ ܩܲܕܝܼܫܬܼܵܐ: ܡܸܛܠ
ܕܚܲܕܼ ܐܵܡ̇ܪܝܼܢ ܒܪܵܐ ܪܘܲܡܫܝܼܚܵܐ ܘܡܵܪܝܵܐ. ܡܫܲܠܡܵܢܵܐ ܒܐܲܠܵܗܘܼܬܹܗ:
ܘܲܡܫܲܠܡܵܢܵܐ ܒܐ̄ܢܵܫܘܼܬܹܗ.
ܐܸܠܵܐ ܐܵܘܤܸܦ ܗܵܘ̇ ܡܵܐ ܕܩܲܒܸܠܬܿ ܘܐܵܘܕܝܼܬܿ ܐܲܢ̄ܬܿ: ܕܲܚܕܲܝܘܼܬܼܵܐ
ܕܲܬܼܪܹܝܢ ܟܝܵܢ̈ܝܼܢ ܗܘ̤ܵܬܼ. ܘܡܸܛܠ ܗܵܕܹܐ: ܚܲܕܼ ܡܫܝܼܚܵܐ ܚܲܕܼ ܒܪܵܐ ܚܲܕܼ
ܡܵܪܝܵܐ ܡܵܘܕܹܝܢ ܚ̄ܢܲܢ. ܘܠܵܐ ܐܲܛܥܹܝܘܗܝ ܠܚܲܟܿܝܼܡܵܐ ܐܵܩܵܩܝܼܣ:
ܘܒܼܐܝܼܕܼܵܘ̈ܗܝ ܕܝܼܠܹܗ ܠܫܲܪܟܵܐ. ܠܵܐ ܓܹܝܪ ܥܵܒܼܪܵܐ ܗ̄ܘ̣ܬܼ ܠܓܲܒܼܪܵܐ
ܕܐܲܝܟܼ ܗܵܢܵܐ: ܐܲܝܟܲܢܵܐ ܕܢܸܬܼܥܲܕܲܠ ܒܗܲܝܡܵܢܘܼܬܼܵܐ ܕܡܸܬܼܪܲܥܸܐ ܒܵܗ̇
ܕܲܠܩܘܼܒܼܠܵܟܼ. ܕܠܡܵܐ ܗܵܟܲܢܵܐ ܬܸܠܒܿܘܿܟܼ ܐܵܦ ܠܗܵܠܹܝܢ ܕܝܼܠܝ:
ܝܲܬܿܝܼܪܵܐܝܼܬܼ ܕܹܝܢ ܠܗܵܠܹܝܢ ܕܐܵܪܬܵܕܘܿܤܝܼܵܐ: ܕܲܒܼܗܵܢܵܐ ܟ̱ܠܹܗ̇ ܕܠܘܼܚܝܵܐ
ܩܲܒܸܠܬܹܗ. ܬܪܹܝܢ ܓܹܝܪ ܟܝܵܢ̈ܝܼܢ ܕܲܡܚܲܝܕܹܝܢ ܐܵܘ̇ܕܝܼܬܼ: ܐܲܢ̄ܬܿ ܕܹܝܢ
ܟܵܦܲܪ ܗ̣̄ܘܲܝܬܿ: ܕܡ̣ܢ ܐܲܠܵܗܘܼܬܼܵܐ ܘܡ̣ܢ ܐ̄ܢܵܫܘܼܬܵܐ ܐܝܼܬܼܵܘܗܝ ܚܲܕܼ
ܡܫܝܼܚܵܐ: ܘܚܲܕܼ ܡܵܪܝܵܐ: ܘܚܲܕܼ ܒܪܵܐ. ܠܵܐ ܗ̄ܘ̣ܵܐ ܒܐܲܠܵܗܘܼܬܼܵܐ ܐܸܬܼܝܼܠܸܕܼ
ܡ̣ܢ ܐܲܢ̄ܬܿܬܼܵܐ: ܐܸܠܵܐ ܒܐ̄ܢܵܫܘܼܬܼܵܐ. ܠܵܐ ܗ̄ܘ̣ܵܐ ܐܲܝܟܼ ܕܐܝܼܬܼܵܘܗܝ ܐܲܠܵܗܵܐ
ܐܝܼܬܼܵܘܗܝ ܚܲܕܼ ܒܪܵܐ: ܕܡ̣ܢ ܬܪܹܝܢ ܟܝܵܢ̈ܝܼܢ ܕܲܡܚܝܕܝܼܢ: ܐܸܠܵܐ ܚܲܕܼ
ܐܝܼܬܼܵܘܗܝ ܐܲܝܟܼ ܒܲܪܢܵܫܵܐ. ܐܲܝܟܵܐ ܗܵܠܹܝܠ ܐܵܡܲ݁ܪ ܐ̄ܢܵܐ ܬܪܹܝܢ ܒܢ̈ܝܼܢ:
ܚܲܕܼ ܡ̇ܢ ܠܚܘܿܕܼܵܐܝܼܬܼ ܒܪܵܐ ܘܲܡܫܝܼܚܵܐ ܘܡܵܪܝܵܐ: ܕܡ̣ܢ ܐܲܒܼܵܐ ܐܸܬܼܝܼܠܸܕܼ
ܐܲܠܵܗܵܐ ܡܸܠܬܼܵܐ: ܐ̄ܚܪܹܢܵܐ ܕܹܝܢ ܡܫܝܼܚܵܐ ܡܸܢܹܗ ܘܠܹܗ ܠܚܘܿܕܼܵܐܝܼܬܼ ܡ̣ܢ
ܒܬܼܘܼܠܬܼܵܐ ܩܲܕܝܼܫܬܐ؟ ܐܵܦ ܠܵܐ ܗܵܠܹܝܢ ܡܩܲܛ̈ܥܵܬܼܵܐ ܕܲܟܼܬܲܒܼܬܿ
ܡܸܤܬܲܟܲܠ ܐܲܢ̄ܬܿ: ܕܲܥ̣ܒܲܪ ܐܲܠܵܗܵܐ ܠܲܡ ܒܲܒܼܬܼܘܼܠܬܼܵܐ ܩܲܕܝܼܫܬܐ
ܝܵܠܕܲܬܼ ܠܲܡܫܝܼܚܵܐ ܡ̣ܢ ܟܬܼܵܒܼܵܐ ܐܲܠܵܗܵܝܵܐ ܝܑܼܠܸܦܢܲܢ. ܗܵܠܹܝܢ ܕܲܟܼܬܲܒܼܬܿ
pb. 408
ܕܐܵܡܲ݁ܪ ܐ̄̈ܢܵܐ: ܐܲܝܟܲܢܵܐ ܗܵܟܹܝܠ ܩܵܥܹ̇̄ܐ ܐܲܢ̄ܬܿ ܕܐܵܡܲ݁ܪ ܐ̄ܢܵܐ: ܚܲܕܼ
ܡܫܝܼܚܵܐ ܝܑܼܚܝܼܕܼܵܐܝܼܬܼ ܐܲܠܵܗܵܐ ܡܸܠܬܼܵܐ ܕܡ̣ܢ ܐܲܒܼܵܐ ܐܸܬܼܝܼܠܸܕܼ: ܐ̄ܚܪܹܢܵܐ ܕܹܝܢ
ܡܫܝܼܚܵܐ ܠܒܲܪܢܵܫܵܠ ܕܡ̣ܢ ܩܲܕܝܼܫܬܼܵܐ ܡܲܪܝܲܡ؟ ܥܲܠ ܐܲܝܢܵܐ ܗܵܟܹܝܠ
ܐܵܡܲ݁ܪ ܐܲܢ̄ܬܿ ܕܐܬܸܡ̇ܪܹܬܼ ܕܐܲܠܵܗܵܐ ܥ̣ܒܲܪ ܒܵܗ̇؟ ܓܠܸܐ ܗ̄ܘ̣ ܕܥܲܠ
ܗܵܘ̇ ܕܡ̣ܢ ܐܲܒܼܵܐ ܐܸܬܼܝܼܠܸܕܼ ܐܲܠܵܗܵܐ ܡܸܠܬܼܵܐ. ܐܲܝܟܲܢ ܡܵܪܕܹܝܢ ܐ̄ܚܪܹܢܵܐ ܐܵܡܲ݁ܪ
ܐ̄ܢܵܐ ܠܲܡܫܝܼܚܵܐ: ܤܛܲܪ ܡ̣ܢ ܐܲܠܵܗܵܐ ܡܸܠܬܼܵܐ: ܗܵܘ̇ ܕܡ̣ܢ ܐܲܒܼܵܐ
ܐܸܬܼܝܼܠܸܕܼ؟ ܐܸܡ̇ܪܹܬܼ: ܕܲܥ̣ܒܲܪ ܐܵܦ ܒܛܘܼܒܼܵܢܝܬܼܵܐ ܡܲܪܝܲܡ: ܟܲܕܼ ܫܘܼܪܵܝܵܐ
ܕܝܲܠܕܵܐ ܡܸܢܵܗ̇ ܠܵܐ ܢܤܲܒܼ: ܐܲܟܼܙܢܵܐ ܕܓܼܘܼܫܡܵܐ ܕܐܸܬܼܝܼܠܸܕܼ ܡܸܢܵܗ̇. ܡܸܛܠ
ܗܵܢܵܐ ܐܸܡ̇ܪܹܬܼ: ܕܡܸܥܒܲܪ ܥ̣ܒܲܪ ܗܵܘ̇ ܕܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ:
ܡܸܬܼܝܼܠܵܕܼܘܼ ܕܹܝܢ ܠܵܐ ܐܸܬܼܝܼܠܸܕܸܼ: ܡܸܛܠ ܕܠܵܘ ܡܸܢܵܗ̇ ܢܤܲܒܼ
ܫܘܼܪܵܝܵܐ. ܚܲܕܼ ܕܹܝܢ ܡܫܝܼܚܵܐ: ܬܪ̈ܲܝܗܘܿܢ ܟܲܕܼ ܡܚܲܕܝܼܢ: ܘܐܝܼܬܼܵܘܗܝ
ܘܡܸܫܬܲܡܲܗ. ܗܵܘ̇ ܕܡ̣ܢ ܐܲܒܼܵܐ ܐܸܬܼܝܼܠܸܕܼ ܒܐܲܠܵܗܘܼܬܼܵܐ: ܡ̣ܢ ܒܬܼܘܼܠܬܼܵܐ
ܩܲܕܝܼܫܬܼܵܐ ܒܐ̄ܢܵܫܘܼܬܼܵܐ. ܕܲܬܼܪܹܝܢ ܓܹܝܪ ܟܝܵܢܹ̈ܐ ܗܘ̤ܵܬܼ ܚܕܼܵܝܘܼܬܼܵܐ.
ܘܙܵܕܼܩܵܐ ܕܢܹܐܡܲܪ ܠܘܵܬܼܵܟܼ ܐܵܩܵܩܝܼܣ: ܕܲܬܼܪܹܝܢ ܟܝܵܢ̈ܝܼܢ ܕܠܵܐ
ܒܘܼܠܒܵܠܵܐ ܐܵܘܕܝܼܬܿ ܠܚܲܕܼ ܡܫܝܼܚܵܐ. ܒܚܲܕܼܸ ܡ̇ܢ ܟܝܵܢܵܐ: ܗܵܢܵܘ ܕܹܝܢ
ܕܐܲܠܵܗܘܼܬܼܵܐ: ܐܸܬܼܝܼܠܸܕܼ ܡ̣ܢ ܐܲܠܵܗܵܐ ܐܲܒܼܵܐ. ܒܲܐ̄ܚܪܹܢܵܐ ܕܹܝܢ: ܗܵܢܵܘ ܕܹܝܢ
ܠܐ̄ܢܵܫܘܼܬܼܵܐ: ܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ. ܐܲܝܟܲܢܵܐ ܗܵܟܹܝܠ ܡܸܫܟܲܚ ܐܲܢ̄ܬܿ
ܠܲܡܫܲܡܵܗܘܼܬܼܵܗ̇ ܝܵܠܕܲܬܼ ܐܲܠܵܗܵܐ: ܟܲܕܼ ܐܵܘܕܝܼܬܿ ܕܠܵܐ ܐܸܬܼܝܼܠܸܕܼ ܡܸܢܵܗ̇؟
ܐܸܢܗ̤ܘ ܓܹܝܪ ܕܐܸܡ݂ܲܪܬܿ: ܕܒܲܐܠܵܗܘܼܬܼܵܐ ܐܸܬܼܝܼܠܸܕܼ ܡ̣ܢ ܒܬܼܘܼܠܬܼܵܐ
ܩܲܕܝܼܫܬܼܵܐ: ܬܸܬܼܐܡܲܪ ܝܵܠܕܲܬܼ ܐܲܠܵܗܵܐ: ܡ̣ܢ ܟܝܵܢܵܐ ܕܡܸܢܵܗ̇ ܐܸܬܼܝܼܠܸܕܼ.
ܐܸܢ ܕܹܝܢ ܡܵܘܕܹܐ ܐܲܢ̄ܬܿ ܐܵܦ ܐܲܢ̄ܬܿ: ܕܠܵܐ ܐܸܬܼܝܼܠܸܕܼ ܒܐܲܠܵܗܘܼܬܼܵܐ. ܒܗܵܝ̇
pb. 409
ܕܡܵܘܕܹܐ ܐܲܢ̄ܬܿ ܕܠܵܐ ܐܸܬܼܝܼܠܸܕܼ: ܐܲܝܟܲܢܵܐ ܡܵܘܕܸܐ ܐܲܢ̄ܬܿ ܠܵܗ̇ ܝܵܠܕܲܬܼ
ܐܲܠܵܗܵܐ؟ ܐܲܝܟܲܢܵܐ ܡܸܫܟܲܚ ܐܲܢ̄ܬܿ ܠܲܡܩܲܟܛܪܵܓܼܘܼ ܠܗܵܘ̇ ܕܲܬܼܪܹܝܢ
ܡܫܝܼܚ̈ܝܼܢ ܐܵܡܲ݁ܪ: ܗܵܘ̇ ܡܵܐ ܕܐܵܦ ܐܲܢ̄ܬܿ ܐܵܘܕܝܼܬܿ ܕܬܼܪܹܝܢ ܟܝܵܢ̈ܝܼܢ
ܐܝܼܬܼܵܘܗܝ ܡܫܝܼܚܵܐ. ܚܲܕܼ ܟܝܵܢܵܐ ܕܐܲܠܵܗܵܘܼܬܼܵܐ: ܕܡܸܬܼܐܡܲܪ ܡܫܝܼܚܵܐ.
ܘܚܲܕܼ ܟܝܵܢܵܐ ܕܐ̄ܢܵܫܘܼܬܼܵܐ: ܕܐܵܦ ܠܹܗ ܡܫܝܼܚܵܐ ܡܫܲܡܲܗ ܐܲܢ̄ܬܿ؟ ܐܵܘ
ܬܪܹܝܢ ܡܫܝܼܚ̈ܝܼܢ ܡܵܘܕܹܐ ܐܲܢ̄ܬܿ ܒܝܲܕܼ ܫܘܼܠܵܦܵܐ ܕܲܟܼܝܵܢܹ̈ܐ: ܚܲܕܼ ܡ̇ܢ
ܐ̄ܢܵܫܘܼܬܼܵܐ: ܕܐܸܬܼܝܼܠܸܕܼ ܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ. ܐ̄ܚܪܹܢܵܐ ܕܹܝܢ: ܐܲܠܵܗܵܐ
ܡܸܠܬܼܵܐ ܕܡ̣ܢ ܐܲܠܵܗܵܐ ܐܲܒܼܵܐ ܐܸܬܼܝܼܠܸܕܼ. ܐܵܘ ܚܲܕܼ ܐܵܡܲ݁ܪ ܐܲܢ̄ܬܿ: ܐܲܝܟܼ ܕܐܸܡ݂ܲܪ
ܗܵܘ̇ ܒܲܚܕܼܵܝܘܼܬܼܵܐ: ܘܡܸܕܸܼܡ ܝܲܬܿܝܼܪܵܐ ܠܵܐ. ܘܡܸܛܠ ܐܲܝܕܵܐ ܠܗܵܕܹܐ
ܟ̱ܠܵܗ̇ ܢܦܲܩ̣ܬܿ: ܘܐܲܦܸܩ̣ܬܿ ܥܲܡܵܟܼ ܠܲܐ̄ܚܪ̈ܵܢܹܐ ܠܡܸܥܒܲܕܼ ܗܵܠܹܝܢ: ܨܝܕ
ܓܲܒܼܪܵܐ ܕܗܵܠܹܝܢ ܐܵܡܲ݁ܪ ܗ̄ܘ̣ܵܐ؟
ܩܘܼܪܸܠܘܿܣ. ܐܸܠܵܐ ܠܵܐ ܗ̄ܘ̣ܵܐ ܠܲܡ ܒܪܵܐ ܐ̄ܚܪܹܢܵܐ ܐܝܼܬܼܵܘܗܝ
ܐܲܠܵܗܵܐ ܡܸܠܬܼܵܐ ܕܡ̣ܢ ܐܲܠܵܗܵܐ ܐܲܒܼܵܐ: ܐ̄ܚܪܹܢܵܐ ܕܹܝܢ ܬܘܼܒܼ ܗܵܘ̇ ܕܡ̣ܢ
ܒܬܼܘܼܠܬܼܵܐ ܩܲܕܝܼܫܬܼܵܐ: ܐܲܝܟܼ ܕܡܸܤܬܲܒܼܪܵܐ ܠܢܸܤܛܘܿܪܝܼܣ: ܚܲܕܼ ܗ̄ܘ̣
ܕܹܝܢ ܘܗ̤ܘ ܟܲܕܼ ܗ̤ܘ. ܡܸܬܼܢܲܗܪܵܐ ܓܹܝܪ ܘܡܸܬܼܦܲܫܩܵܐ ܒܵܬܲܪܟܸܢ:
ܡܲܝܬܸܐ ܓܹܝܪ ܕܡܵܢܵܐ ܡܫܵܘܕܲܥ ܐܲܠܵܗܵܐ ܡܫܲܠܡܵܢܵܐ ܘܒܲܪܢܵܫܵܐ
ܡܫܲܠܡܵܢܵܐ. ܗܵܘ̇ ܕܡ̣ܢ ܩܕܼܵܡ ܥܵܠܡܹ̈ܐ ܐܸܬܼܝܼܠܸܕܼ ܡ̣ܢ ܐܲܒܼܵܐ
ܒܐܲܠܵܗܘܼܬܹܗ: ܒܚܲܪܬܼܵܐ ܕܹܝܢ ܕܝܘ̈ܡܵܬܼܵܐ ܡܸܛܠܵܬܲܢ ܘܡܸܛܠ
ܦܘܼܩܵܢܲܢ ܡ̣ܢ ܡܲܪܝܲܡ ܒܬܼܘܼܠܬܼܵܐ ܠܐ̄ܢܵܫܘܼܬܼܵܐ. ܒܲܪ ܟܝܵܢܵܐ ܕܐܲܒܼܵܐ
ܒܐܲܠܵܗܘܼܬܼܵܐ: ܗ̤ܘ ܟܲܕܼ ܗ̤ܘ. ܒܲܪ ܟܝܵܢܵܐ ܕܝܼܠܲܢ ܒܐ̄ܢܵܫܘܼܬܼܵܐ: ܗ̤ܘ
ܟܲܕܼ ܗ̤ܘ. ܡܵܕܹܝܢ ܠܵܐ ܡܦܲܠܓܼܝܼܢ ܠܹܗ ܒܪܵܐ ܘܲܡܫܝܼܚܵܐ ܘܡܵܪܝܵܐ
pb. 410
ܘܝܼܫܘܿܥ. ܠܹܗ ܕܹܝܢ ܟܲܕܼ ܠܹܗ ܐܵܡ̇ܪܝܼܢ ܕܐܝܼܬܼܵܘܗܝ ܡ̣ܢ ܩܕܼܵܡ
ܥܵܠܡܹ̈ܐ: ܘܲܒܼܚܲܪܬܵܐ ܕܙܲܒܼܢܹ̈ܐ. ܝܑܼܕܼܝܼܥܵܐ ܕܹܝܢ ܕܗܵܘ̇ ܕܡ̣ܢ ܐܲܠܵܗܵܐ ܐܲܒܼܵܐ
ܐܲܠܵܗܵܐ: ܐܵܦ ܡ̣ܢ ܐܲܢ̄ܬܿܬܼܵܐ ܒܐ̄ܢܵܫܘܼܬܼܵܐ ܒܲܪܢܵܫܵܐ . . . ܐܲܝܟܲܢܵܐ ܓܹܝܪ
ܡܸܬܼܪܢܸܐ ܒܲܪ ܟܝܵܢܲܢ ܒܐ̄ܢܵܫܘܼܬܼܵܐ: ܟܲܕܼ ܡ̣ܢ ܐܲܒܼܵܐ ܐܸܬܼܝܼܠܸܕܼ ܐܲܝܟܼ
ܕܐܸܡܲܪܬܿ ܒܐܲܠܵܗܘܼܬܼܵܐ: ܐܸܢܗܘ̤ ܕܠܵܐ ܡܸܬܼܪܢܸܐ ܘܡܸܬܼܐܡܪ ܐܲܠܵܗܵܐ
ܘܒܲܪܢܵܫܵܐ ܗ̤ܘ ܟܲܕܼ ܗ̤ܘ؟ ܘܐܸܢ ܗ̤ܘ ܕܲܚܕܼܵܐ ܐܘܼܤܝܼܵܐ ܗ̤ܝ ܟܲܕܼ ܗ̤ܝ
ܕܐܲܠܵܗܵܐ ܡܸܠܬܼܵܐ: ܕܐܸܬܼܝܲܠܕܲܬ̤ ܡ̣ܢ ܐܲܒܼܵܐ ܘܡ̣ܢ ܒܬܼܘܼܠܬܼܵܐ ܡܲܪܝܲܡ:
ܡܸܛܠ ܐܲܝܕܵܐ ܐܲܢ̄ܬܿ ܡܵܘܕܸܐ ܐܲܢ̄ܬܿ ܬܪܹܝܢ ܟܝܵܢ̈ܝܼܢ ܕܲܚܕܼܵܝܘܼܬܼܵܐ: ܘܠܵܐ
ܗ̄ܘ̣ܵܐ ܚܲܕܼ ܠܹܗ ܠܹܗ ܕܐܸܬܼܝܼܠܸܕܼ ܡ̣ܢ ܐܲܒܼܵܐ ܘܡ̣ܢ ܐܸܡܵܐ: ܐܲܝܟܼ
ܕܐܲܢ̄ܬܿ ܒܵܥܹ̇ܬܿ: ܘܐܵܦ ܠܲܢ ܐܵܠܹ̇ܨ ܐܲܢ̄ܬܿ ܠܲܢ ܕܢܸܪܢܸܐ: ܘܲܕܢܸܫܒܿܩܵܟܼ
ܐܵܦ ܠܵܟܼ ܕܬܸܪܢܸܐ؟ ܐܸܠܵܐ ܐܲܝܠܹܝܢ ܕܩܲܒܸܿܠ̣ܘ ܠܬܼܵܘܕܝܼܬܼܵܐ ܗܵܕܹܐ: ܠܵܐ
ܡܲܪܦܹܝܢ ܠܵܟܼ ܕܬܸܓܸܕܼ ܐܸܢܘܿܢ ܠܐܲܝܟܵܐ ܕܒܼܵܥܹ̇ܐ ܐܲܢ̄ܬܿ. ܐܸܠܵܐ ܐܲܝܟܼ
ܕܲܠܡܲܛܥܝܵܢܵܐ ܐܵܠܨ̇ܝܼܢ ܠܵܟܼ ܘܚܵܪܩܝܼܢ ܠܵܟܼ: ܕܲܬܼܩܵܘܸܐ ܒܐܲܝܠܹܝܢ
ܕܐܵܘܕܝܼܬܿ ܥܲܡܗܘܿܢ.
ܚܕܼܵܝܘܼܬܼܵܐ ܓܹܝܪ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ ܐܵܘܕܝܼܬܿ: ܕܲܬܼܪܝܢ
ܓܹܝܪ ܟܝܵܢܹ̈ܐ ܗܘ̤ܵܬܼ ܚܕܼܵܝܘܼܬܼܵܐ. ܬܪܹܝܢ ܐܵܘܕܝܼܬܿ: ܘܚܲܕܼ ܐܵܡܲ݁ܪ ܐܲܢ̄ܬܿ
ܕܐܵܘܕܝܼܘ ܗܵܢ̇ܘܿܢ. ܤܲܓܿܝܼܐܵܐ ܗ̣̄ܝ ܡܕܲܡܪܘܼܬܼܵܟܼ: ܘܲܚܕܼܵܝܘܼܬܼܵܐ ܐܵܘܕܝܼܬܿ:
ܘܦܘܼܠܵܓܼܵܐ ܕܲܚܕܼܵܝܘܼܬܼܵܐ ܐܵܡܲ݁ܪ ܐܲܢ̄ܬܿ ܕܐܵܘܕܝܼܘ ܗܵܢ̇ܘܿܢ. ܐܲܝܟܲܢܵܐ ܕܲܚܕܼܵܐ
ܐܘܼܤܝܼܵܐ ܗ̤ܝ ܟܲܕܼ ܗ̤ܝ: ܠܬܲܪܬܹܝܢ ܐܘܼܤ̈ܝܼܵܣ ܕܠܵܐ ܕܵܡ̈ܝܵܢ ܠܲܚܕܼܵܕܹ̈ܐ
ܬܸܬܼܦܲܠܲܓܼ: ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ. ܘܕܲܚܕܼܵܐ ܐܘܼܤܝܼܵܐ ܢܸܗܢܸܐ ܒܲܪ
ܟܝܵܢܵܐ: ܗܵܝ̇ ܕܡܸܬܼܦܲܠܓܼܵܐ ܠܐܘܼܤ̈ܝܼܵܣ ܕܠܵܐ ܕܵܡ̈ܝܵܢ ܘܲܐ̄ܚܪ̈ܵܝܵܢ
pb. 411
ܠܲܚ̈ܕܼܵܕܹܐ. ܠܵܐ ܓܹܝܪ ܡܸܫܟܚܵܐ ܕܬܸܬܼܪܬܢܸܐ ܚܕܼܵܐ ܐܘܼܤܝܼܵܐ ܬܲܪܬܹܝܢ
ܐܘܼܤ̈ܝܼܵܣ: ܕܠܵܐ ܕܵܡ̈ܝܵܢ ܘܲܐ̄ܚܪ̈ܵܝܵܢ ܠܲܚ̈ܕܼܵܕܹܐ. ܘܲܕܲܕܼܵܡ̈ܝܵܢ: ܕܲܒܼ̈ܢܵܬܼ
ܟܝܵܢܵܐ ܐܸܢܹܝܢ ܕܲܚ̈ܕܼܵܕܹܐ: ܐܲܝܟܼ ܡܵܐ ܕܐܝܼܬܹܝܗ̇ ܗܵܝ̇ ܡܕܲܡܝܘܼܬܼܵܐ. ܒܐܲܝܢܵܐ
ܓܹܝܪ ܟܝܵܢܵܐ ܐܝܼܬܼܵܘܗܝ ܒܪܵܐ ܒܲܪ ܕܐܲܒܼܵܐ: ܘܒܲܐܝܢܵܐ ܒܲܪ ܟܝܵܢܵܐ
ܕܝܼܠܲܢ؟ ܐܘܼܤܝܼܵܐ ܓܹܝܪ ܕܐܲܠܵܗܵܐ ܐܲܒܼܵܐ ܘܐܘܼܤܝܼܵܐ ܕܝܼܠܲܢ: ܢܘܼܟܼܪܵܝܵܢ
ܠܲܚ̈ܕܼܵܕܹܐ. ܡܵܕܹܝܢ ܐܵܦ ܗ̤ܘ ܠܝܵܬܹܗ ܢܘܼܟܼܪܵܝ ܗ̄ܘ̣: ܘܐܝܼܬܼܵܘܗܝ
ܡ̣ܢ ܬܪܹܝܢ ܟܝܵܢ̈ܝܼܢ ܕܢܘܼܟܼܪܵܝܑܝܼܢ ܠܲܚ̈ܕܼܵܕܹܐ. ܐܲܝܟܲܢܵܐ ܗܵܟܹܝܠ ܡܸܬܼܪܢܸܐ
ܕܒܲܪ ܟܝܵܢܵܐ ܗ̄ܘ̣ ܕܝܼܠܲܢ ܒܐ̄ܢܵܫܘܼܬܼܵܐ: ܟܲܕܼ ܠܵܐ ܐܝܼܬܼܵܘܗܝ ܒܐܘܼܤܝܼܵܐ
ܕܐ̄ܢܵܫܘܼܬܼܵܐ؟ ܐܲܝܟܲܢܵܐ ܕܹܝܢ ܒܲܪ ܟܝܵܢܵܐ ܗ̄ܘ̣ ܕܐܲܒܼܵܐ: ܕܠܵܐ ܐܝܼܬܼܵܘܗܝ
ܒܐܘܼܤܝܼܵܐ ܕܝܼܠܹܗ؟ ܐܵܘ ܐܲܝܟܲܢܵܐ ܒܐܘܼܤܝܼܵܐ ܗ̤ܘ ܟܲܕܼ ܗ̤ܘ ܡ̣ܢ ܐܘܼܤܝܼܵܐ
ܕܐܲܠܵܗܵܐ ܐܲܒܼܵܐ: ܘܡ̣ܢ ܐܘܼܤܝܼܵܐ ܕܝܼܠܲܢ: ܘܗ̤ܝ ܟܲܕܼ ܗ̤ܝ ܐܘܼܤܝܼܵܐ
ܐܝܼܬܹܝܗ̇. ܘܲܚܕܵܐ: ܬܲܪܬܹܝܢ ܐܘܿܤ̈ܝܼܵܣ ܕܢܘܼܟܼܪ̈ܵܝܵܢ ܠܲܚ̈ܕܼܵܕܹܐ:
ܕܟܼܠ ܚܕܼܵܐ ܡ̣ܢ ܐܘܼܤ̈ܝܼܵܣ ܒܲܚܕܼܵܐ ܐܘܼܤܝܼܵܐ ܐܵܦ ܐܝܼܬܹܝܗ̇ ܐܵܦ
ܡܸܬܼܪܲܢܝܵܐ؟ ܐܸܢ ܕܹܝܢ ܗܵܕܹܐ ܠܵܐ ܡܸܫܟܿܚܵܐ: ܐܵܦ ܠܵܐ ܡܸܬܼܩܲܒܿܠܵܐ
ܕܬܸܬܼܪܢܸܐ ܒܡܸܠܬܼܵܐ ܕܲܫܪܵܪܵܐ: ܠܵܘ ܗ̤ܘܝܘܼ ܟܝܵܢܵܐ ܒܲܟܼܝܵܢܹܗ ܡ̣ܢ ܐܘܼܤܝܼܵܐ
ܕܐܲܒܼܵܐ: ܘܡ̣ܢ ܐܘܼܤܝܼܵܐ ܕܐ̄ܢܵܫܘܼܬܼܵܐ: ܕܠܲܬܼܪ̈ܲܝܘܿܢ ܢܸܗܘܸܐ ܒܲܪ ܟܝܵܢܵܐ.
ܐܸܠܵܐ ܒܐܘܼܤܝܼܵܐ ܕܐܲܠܵܗܵܐ ܐܲܒܼܵܐ ܒܲܠܚܘܿܕܼ: ܒܲܪ ܟܝܵܢܹܗ ܗ̄ܘ̣ ܕܐܲܠܵܗܵܐ
ܐܲܒܼܵܐ. ܒܐܘܼܤܝܼܵܐ ܕܹܝܢ ܕܝܼܠܲܢ: ܒܲܪ ܟܝܵܢܵܐ ܗ̄ܘ̣ ܕܝܼܠܲܢ. ܘܚܲܕܼܸ ܗ̤ܘ ܟܲܕܼ
ܗ̤ܘ ܐܵܦ ܐܝܼܬܼܵܘܗܝ ܘܐܵܦ ܡܸܫܬܲܡܲܗ: ܕܡ̣ܢ ܟܝܵܢܵܐ ܕܐܲܠܵܗܵܐ ܘܲܕܼܡ̣ܢ
ܟܝܵܢܵܐ ܕܝܼܠܲܢ: ܒܦܲܪܨܘܿܦܵܐ ܡ̇ܢ ܕܲܚܕܼܵܝܘܼܬܼܵܐ. ܒܲܟܼܝܵܢܹ̈ܐ ܓܹܝܪ ܟܝܵܢܵܐܝܼܬܼ
pb. 412
ܦܪܝܼܫ: ܒܫܘܼܚܠܵܦܵܐ ܕܲܟܼܝܵܢܹ̈ܐ ܠܵܐ ܡܫܵܘܬܿܦܲܝ̈ ܠܲܚ̈ܕܼܵܕܹܐ: ܐܲܝܟܼ ܡܸܠܬܼܵܐ
ܕܐܘܼܤ̈ܝܼܵܣ. ܘܲܕܲܬܸܫܪܸܐ ܗܵܘ̇ ܡܸܕܸܡ ܕܐܸܤܲܪܬܿ: ܠܵܐ ܡܸܫܟܲܚ ܐܲܢ̄ܬܿ.
ܚܕܼܵܝܘܼܬܼܵܐ ܠܲܡ ܕܲܬܼܪܹܝܢ ܟܝܵܢ̈ܝܼܢ: ܘܠܵܘ ܬܪܹܝܢ ܟܝܵܢ̈ܝܼܢ ܚܲܕܼ ܟܝܵܢܵܐ.
ܚܕܼܵܝܘܼܬܼܵܐ ܓܹܝܪ ܕܫܘܼܚܠܵܦܵܐ ܕܲܟܼܝܵܢܹ̈ܐ ܡܫܲܚ̈ܠܦܹܐ ܡܸܬܼܪܲܢܝܵܐ ܕܲܗܘ̤ܵܬܼ
ܐܵܦ ܡܸܬܼܐܲܡܢܪܵܐ: ܘܠܵܐ ܗ̄ܘ̣ܵܐ ܕܫܘܼܚ̈ܠܵܦܹܐ ܕܼܠܵܗ̇ ܟܲܕܼ ܕܝܼܠܵܗ̇
ܕܐܘܼܤܝܼܵܐ. ܗܘܵܝܵܐ ܓܹܝܼܪ: ܕܲܚܕܼܵܐ ܐܘܼܤܝܼܵܐ ܐܝܼܬܼܵܘܗܝ. ܚܕܵܝܘܼܬܼܵܐ ܕܹܝܢ:
ܟܢܝܼܫܘܼܬܼܵܐ ܕܐܘܼܤ̈ܝܼܵܣ ܐܝܼܬܹܝܗ̇.
ܩܘܼܪܸܠܘܿܣ. ܐܸܠܵܐ ܠܲܡ ܗܵܠܹܝܢ: ܠܵܘ ܗܵܟܲܢܵܐ ܡܸܬܼܚܲܙ̈ܝܵܢ
ܠܢܸܤܛܘܿܪܝܼܣ: ܐܸܠܵܐ ܝܲܬܿܝܼܪܵܐܝܼܬܼ ܕܢܝܼܫܹܗ ܠܘܵܬܼ ܕܲܠܩܘܼܒܼܠܵܐ
ܚܵܐܲܪ ܒܟܼܠܡܸܕܸܡ. ܐܵܡܲ݁ܪ ܗ̄ܘ̣ܵܐ ܗܵܟܹܝܠ ܒܥܹܕܬܵܐ ܟܲܕܼ ܡܬܲܪܓܸܡ
ܗ̄ܘ̣ܵܐ: ܡܸܛܠ ܗܵܢܵܐ ܘܐܵܦ ܐܲܠܵܗܵܐ ܡܸܠܬܼܵܐ ܡܫܝܼܚܵܐ ܡܸܫܬܲܡܲܗ:
ܡܸܛܠ ܕܐܝܼܬܼ ܠܹܗ ܢܲܩܝܼܦܘܼܬܼܵܐ ܠܘܵܬܼ ܡܫܝܼܚܵܐ ܐܲܡܝܼܢܵܐܝܼܬܼ. ܘܬܼܘܼܒܼ:
ܕܠܵܐ ܒܘܼܠܒܵܠܵܐ ܠܲܡ ܢܛܲܪ ܠܢܲܩܝܼܦܘܼܬܼܵܐ ܕܲܟܼܝܵܢܹ̈ܐ. ܘܡܵܘܕܹܝܢ
ܚ̄ܢܲܢ ܠܐܲܠܵܗܵܐ ܕܲܒܼܒܲܪܢܵܫܵܐ. ܡܝܲܩܪܝܼܢ ܚ̄ܢܲܢ ܠܒܲܪܢܵܫܵܐ: ܗܵܘ̇
ܕܲܒܼܢܲܩܝܼܦܘܼܬܼܵܐ ܕܐܲܠܵܗܵܘܼܬܼܵܐ: ܥܲܡ ܐܲܠܵܗܵܐ ܐܲܚܝܼܕܼ ܟܠ ܡܸܤܬܿܓܸܕܼ.
ܚܵܙܹ̇ܐ ܐܲܢ̄ܬܿ ܟܡܵܐ ܪܲܚܝܼܩܵܐ ܡܸܠܬܹܗ؟ ܪܘܼܫܥܵܐ ܓܹܝܪ ܤܲܓܿܝܼܐܵܐ ܡܲܐܝܵܐ.
ܐܸܡܲ݁ܪ ܓܹܝܪ ܕܲܡܫܝܼܚܵܐ ܠܚܘܿܕܼܵܐܝܼܬܼ ܐܸܫܬܿܡܲܗ ܐܲܠܵܗܵܐ ܡܸܠܬܼܵܐ: ܐܝܼܬܼ
ܠܹܗ ܕܹܝܢ ܢܲܩܝܼܦܘܼܬܼܵܐ ܠܘܵܬܼ ܡܫܝܼܚܵܐ ܐܲܡܝܼܢܵܐܝܼܬܼ: ܠܵܪܵܐ ܠܵܘ ܬܪܹܝܢ
ܡܫܝܼܚܹ̈ܐ ܒܲܥ̇ܒܼܵܕܼܵܐ ܐܵܡܲ݁ܪ؟ ܠܵܘ ܠܒܲܪܢܵܫܵܐ ܕܥܲܡ ܐܲܠܵܗܵܐ ܡܸܤܬܿܓܸܕܼ
ܡܵܘܕܸܐ ܕܲܡܝܲܩܲܪ؟ ܗܵܠܹܝܢ ܗܵܟܹܝܠ ܐܘܿ ܐܲܚܘܼܢ: ܡܸܬܼܚܲܙ̈ܝܵܢ
ܕܲܡܚܲܝ̈ܢܵܢ ܠܘܵܬܼ ܗܵܠܹܝܢ ܕܡ̣ܢ ܗܵܢ̇ܘܿܢ ܡܸܬܼܐܲܡܪ̈ܵܢ: ܐܵܦ ܠܵܐ ܚܲܕܼ
pb. 413
ܚܲܝܠܵܐ ܕܪܸܥܝܵܢܵܐ ܐܝܼܬܼ ܠܗܹܝܢ ܠܘܵܬܼ ܚ̈ܕܼܵܕܹܐ. ܗܵܘ̇ ܡ̇ܢ: ܬܪܹܝܢ ܐܸܡܲ݁ܪ
ܒܹܗ ܒܤܘܼܥܪܵܢܵܐ. ܗܵܢ̇ܘܿܢ ܕܹܝܢ ܠܚܲܝܕܼ: ܗܵܢܵܘ ܕܹܝܢ ܠܚܲܕܼ ܒܪܵܐ
ܘܡܵܪܝܵܐ ܘܐܲܠܵܗܵܐ ܡܵܘܕܹܝܢ ܘܤܵܓܼܕܝܼܢ. ܠܹܗ ܟܲܕܼ ܠܹܗ ܡ̣ܢ ܐܲܒܼܵܐ
ܒܐܲܠܵܗܘܼܬܼܵܐ: ܘܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ ܒܐ̄ܢܵܫܘܼܬܼܵܐ. ܚܕܼܵܝܘܼܬܼܵܐ ܡ̇ܢ
ܕܲܬܼܪܹܝܢ ܟܝܵܢ̈ܝܼܢ ܐܵܡ̇ܪܝܼܢ ܕܲܗܘ̤ܵܬ: ܒܪܲܡ ܚܲܕܼ ܡܫܝܼܚܵܐ: ܘܚܲܕܼ ܒܪܵܐ
ܘܚܲܕܼ ܡܵܪܝܵܐ: ܡܵܘܕܹܝܢ ܢܲܗܝܼܪܵܐܝܼܬܼ.
ܢܸܤܛܘܿܪܝܼܣ. ܙܵܕܹܩ ܗ̄ܘ̣ܵܐ ܕܢܹܐܡܲܪ ܠܘܵܬܼܵܟܼ ܚܲܟܿܝܼܡܵܐ
ܐܵܩܵܩܝܼܣ: ܕܡܵܢܵܐ ܡܲܛܥܸܐ ܐܲܢ̄ܬܿ ܠܲܢ؟ ܚܕܼܵܝܘܼܬܼܵܐ ܓܹܝܪ ܕܲܬܼܪܹܝܢ
ܟܝܵܢ̈ܝܼܢ ܕܠܵܐ ܕܵܡܹ̇ܝܢ ܠܲܚ̈ܕܼܵܕܹܐ ܐܵܘܕܝܼܬܿ: ܘܲܒܼܗܵܘ̇ ܡܵܐ ܕܲܡܩܲܛܪܸܓܼ
ܐܲܢ̄ܬܿ ܠܹܗ ܠܢܸܤܛܘܿܪܝܼܣ: ܡܸܬܼܚܙܸܐ ܐܲܢ̄ܬܿ ܕܥܲܡܹܗ ܡܵܘܕܸܐ ܐܲܢ̄ܬܿ:
ܐܵܦܸܢ ܠܵܐ ܐܵܡܲ݁ܪ ܐܲܢ̄ܬܿ ܕܲܬܼܪܹܝܢ ܡܫܝܼܚܹ̈ܐ ܡܸܬܼܐܲܡܪܝܼܢ. ܐܵܦ ܠܵܐ ܓܹܝܪ
ܢܸܤܛܘܿܪܝܼܣ: ܡܸܬܼܚܲܙܝܵܐ ܕܲܬܼܚܲܙܝܵܐ ܕܲܬܼܪܹܝܢ ܡܫܝܼܚܹ̈ܐ ܐܵܘܕܝܼ. ܐܸܠܵܐ ܡ̣ܢ
ܐܲܝܠܹܝܢ ܕܐܲܢ̄ܬܿ ܡܲܛܸܒܼ ܐܲܢ̄ܬܿ ܥܠܵܘܗܝ ܕܗܵܟܲܢܵܐ ܐܵܡܲ݁ܪ ܟܲܕܼ ܠܵܐ
ܡܵܘܕܸܐ: ܕܢܸܬܼܐܲܡܪܘܼܢ ܬܪܹܝܢ ܡܫܝܼܚܹ̈ܐ: ܒܗܵܕܹܐ ܐܵܦ ܐܲܢ̄ܬܿ ܡܸܬܼܚܙܸܐ
ܐܲܢ̄ܬܿ ܕܲܬܼܪܹܝܢ ܡܫܝܼܚܹ̈ܐ ܐܵܡܲ݁ܪ ܐܲܢ̄ܬܿ. ܠܵܐ ܗ̄ܘ̣ܵܐ ܓܹܝܪ ܒܚܲܕܼ ܟܝܵܢܵܐ
ܐܸܡܲ݁ܪ ܐܲܢ̄ܬܿ ܠܲܡܫܝܼܚܵܐ: ܐܸܠܵܐ ܕܒܲܬܼܪܹܝܢ ܟܝܵܢܹ̈ܐ ܡܫܲܠܡܵܢܹ̈ܐ ܐܝܼܬܼܵܘܗܝ
ܒܐܘܤܝܼܵܐ ܕܝܼܠܗܘܿܢ ܕܠܵܐ ܕܵܡܹ̇ܝܢ ܠܲܚ̈ܕܼܵܕܹܐ. ܒܐܲܠܵܗܘܼܬܼܵܐ ܘܲܒܼܐ̄ܢܵܫܘܼܬܼܵܐ
ܐܝܼܬܼܵܘܗܝ ܡܫܝܼܚܵܐ. ܒܗܵܝ̇ ܓܹܝܪ ܕܲܬܼܪܹܝܢ ܐܝܼܬܼܵܘܗܝ ܐܵܦ ܬܪܹܝܢ
ܡܫܝܼܚ̈ܝܼܢ ܬܪ̈ܲܝܗܘܿܢ ܟܝܵܢ̈ܝܼܢ ܡܸܫܬܲܡܗܝܼܢ: ܒܚܲܕܼ ܘܒܹܗ ܟܲܕܼ ܒܹܗ
ܒܲܫܡܵܐ ܕܲܡܫܝܼܚܵܐ. ܐܸܡܲܬܼܝ ܓܹܝܪ ܕܲܬܼܪܹܝܢ ܟܝܵܢ̈ܝܼܢ ܕܠܵܐ ܕܵܡܹ̇ܝܢ
ܠܲܚ̈ܕܸܵܕܹܐ: ܒܹܗ ܟܲܕܼ ܒܹܗ ܒܲܫܡܵܐ ܡܸܫܬܲܡܗܝܼܢ: ܬܪܹܝܢ ܡܸܬܼܐܲܡܪܝܼܢ
pb. 414
ܒܫܲܘܝܘܼܬܼ ܫܡܵܐ: ܐܸܠܵܐ ܒܲܚܕܼܵܝܘܼܬܼܵܐ ܐܸܡܲ݁ܪ ܐܲܢ̄ܬܿ ܚܲܕܼ. ܠܗܵܕܹܐ ܐܵܦ
ܢܸܤܛܘܿܪܝܼܣ ܐܸܡܲ݁ܪ: ܕܲܬܼܪܹܝܢ ܟܝܵܢ̈ܝܼܢ ܚܲܕܼ ܡܫܝܼܚܵܐ. ܗܵܢ̇ܘܿܢ
ܕܒܲܟܼܝܵܢܲܝ̈ܗܘܿܢ ܢܛܝܼܪܝܼܢ: ܘܠܵܐ ܤܢܝܼܩܝܼܢ ܠܲܡܩܲܝܵܡܘܼ ܚ̈ܕܼܵܕܹܐ:
ܕܢܸܬܼܩܲܝܡܘܼܢ ܡ̣ܢ ܚܕܼܵܝܘܼܬܼܗܘܿܢ: ܐܸܠܵܐ ܠܲܡܕܲܒܿܪܵܢܘܼܬܼܵܐ ܕܲܚܠܵܦܲܝܢ
ܩܲܝܸܡ̣ܘ. ܠܵܐ ܐܲܠܵܗܘܼܬܼܵܐ ܤܢܝܼܩܵܐ ܥܲܠ ܐ̄ܢܵܫܘܼܬܼܵܐ: ܘܠܵܐ ܬܘܼܒܼ
ܐ̄ܢܵܫܘܼܬܼܵܐ ܤܢܝܼܩܵܐ ܥܲܠ ܐܲܠܵܗܘܼܬܼܵܐ. ܡܸܛܠ ܕܒܲܟܼܝܵܢܵܐ ܕܝܼܠܗܘܿܢ:
ܕܠܵܐ ܤܢܝܼܩܘܼ ܐܸܢܘܿܢ. ܠܵܐ ܗ̄ܘ̣ܵܐ ܓܹܝܪ ܡ̣ܢ ܚܕܼܵܝܘܼܬܼܵܐ ܕܐ̄ܢܵܫܘܼܬܼܵܐ:
ܐܝܼܬܼ ܠܵܗ̇ ܠܐܲܠܵܗܘܼܬܼܵܐ ܕܢܸܗܘܸܐ ܐܲܠܵܗܵܐ ܐܲܠܵܗܵܐ ܠܵܐ ܤܢܝܼܩܵܐ. ܘܠܵܐ ܬܘܼܒܼ
ܐ̄ܢܵܫܘܼܬܼܵܐ ܕܬܸܗܘܸܐ ܒܲܪܢܵܫܵܐ: ܡ̣ܢ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܐܝܼܬܼ ܠܵܗ̇.
ܐܸܠܵܐ ܡ̣ܢ ܒܵܪܘܿܝܘܼܬܼܵܐ ܕܐܲܠܵܗܘܼܬܼܵܐ ܒܲܟܼܝܵܢܵܐ ܕܓܼܵܘܵܐ: ܐܵܦܸܢ ܡ̣ܢ ܒܪܝܼܬܼܵܗ̇
ܗܘ̤ܵܬܼ ܠܵܗ̇ ܐܵܦ ܚܕܼܵܝܘܼܬܼܵܐ. ܠܵܐ ܗ̄ܘ̣ܵܐ ܓܹܝܪ ܠܫܘܼܡܠܵܝܵܐ ܕܲܚܕܼܵܐ
ܐܘܼܤܝܼܵܐ ܗܘ̤ܵܬܼ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ: ܐܸܠܵܐ ܠܦܲܪܨܘܿܦܵܐ
ܕܲܡܕܲܒܪܵܢܘܼܬܼܵܐ ܕܲܚܠܵܦܲܝܢ. ܘܠܵܐ ܬܘܼܒܼ ܐܲܠܵܗܘܼܬܼܵܐ ܠܫܘܼܡܠܵܝܵܐ
ܕܲܟܼܝܵܢܵܐ ܗܘ̤ܵܬܼ ܠܹܗ ܐ̄ܢܵܫܘܼܬܼܵܐ: ܐܸܠܵܐ ܠܦܲܪܨܘܿܦܵܐ ܕܲܡܒܿܪܵܢܘܼܬܼܵܐ
ܕܲܚܠܵܦܲܝܢ. ܦܲܪܨܘܿܦܵܐ ܓܹܝܪ ܕܲܚ̈ܕܼܵܕܹܐ ܛܥܝܼܢܝܼܢ. ܘܡܸܛܠ ܗܵܢܵܐ
ܒܦܲܪܨܘܿܦܵܐ ܕܲܟܼܝܵܢܵܐ ܚܲܕܼ: ܟܝܵܢܵܐ ܐ̄ܚܪܹܢܵܐ ܡܸܬܼܚܲܫܲܚ ܐܲܝܟܼ ܕܲܒܼܕܼܝܼܠܹܗ.
ܠܵܘ ܒܲܐ̄ܚܪܹܢܵܐ ܘܲܐ̄ܚܪܹܢܵܐ ܓܵܘܢܵܐܝܼܬܼ ܬܪ̈ܲܝܗܘܿܢ: ܠܵܐ ܗ̄ܘ̣ܵܐ ܡ̣ܢ ܪܘܼܟܵܒܼܵܐ
ܠܫܘܼܡܠܵܝܵܐ ܕܲܟܼܝܵܢܵܐ: ܐܲܝܟܲܢܵܐ ܕܢܲܦܫܵܐ ܘܦܲܓܼܪܵܐ ܠܲܟܼܝܵܢܵܐ ܕܒܲܪܢܵܫܵܐ. ܐܸܠܵܐ
ܒܦܲܪܨܘܿܦܵܐ ܕܲܟܼܝܵܢܵܐ ܚܲܕܼ: ܟܝܵܢܵܐ ܐ̄ܚܪܹܢܵܐ ܒܹܗ ܟܲܕܼ ܒܹܗ ܐܲܝܟܼ ܕܲܒܼܕܼܝܼܸܠܹܗ
ܡܸܬܼܚܲܫܲܢ. ܘܡܸܛܠ ܗܵܢܵܐ ܡ̣ܢ ܐ̄ܢܵܫܘܼܬܼܵܐ ܕܐܸܬܼܡܲܫܚܲܬ̤: ܐܵܦ
ܐܲܠܵܗܘܼܬܼܵܐ ܡܸܛܠ ܚܕܼܵܝܘܼܬܼܵܐ ܡܫܝܼܚܵܐ ܡܸܫܬܲܡܗܵܐ. ܘܐܝܼܬܼܵܘܗܝ
pb. 415
ܡܫܝܼܚܵܐ ܡ̣ܢ ܬܪܹܝܢ ܟܝܵܢ̈ܝܼܢ: ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܚܲܕܼ ܒܪܵܐ:
ܚܲܕܼ ܡܵܪܝܵܐ. ܡ̣ܢ ܚܕܼܵܝܘܼܬܼܵܐ ܕܐܲܠܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܗ̤ܘ ܟܲܕܼ ܗ̤ܘ
ܒܪܵܐ ܘܡܵܪܝܵܐ ܘܐܲܠܵܗܵܐ. ܐܲܝܠܹܝܢ ܓܹܝܪ ܕܒܲܚܕܼܵܝܘܼܬܼܵܐ ܚܲܕܼ ܡܸܬܼܐܲܡܪܝܼܢ:
ܚܲܕܼ ܗܵܘ̇ ܡܵܐ ܕܲܡܚܲܝܲܕܼ ܒܲܟܼܝܵܢܵܐ ܐܝܼܬܼܵܘܗܝ. ܘܲܡܦܲܪܫܵܐܝܼܬܼ ܠܵܐ
ܡܸܬܼܐܲܡܪܝܼܢ: ܐܲܝܟܼ ܐܲܝܠܹܝܢ ܕܲܒܼܫܲܘܝܘܼܬܼ ܫܡܵܐ ܡܸܬܼܐܲܡܪܝܼܢ. ܐܸܠܵܐ
ܐܸܢܗ̤ܘ ܕܲܬܼܠܲܠܸܓܼ ܐܸܢܘܿܢ: ܠܵܐ ܡܸܬܼܦܲܠܲܓܼ ܗܵܘ̇ ܚܲܕܼ ܥܲܡܗܘܿܢ.
ܒܲܟܼܝܵܢܵܐ ܓܹܝܪ ܕܝܼܠܹܗ ܐܝܼܬܲܝܗܹܝܢ ܐܘܼܤ̈ܝܼܵܣ ܥܲܡ ܚ̈ܕܼܵܕܹܐ: ܘܲܒܼܬܲܪ̈ܬܲܝܗܹܝܢ
ܡ̣ܢ ܟܝܵܢܵܐ ܕܝܼܠܹܗ ܡܸܫܬܲܡܲܗ. ܐܲܟܼܙܢܵܐ ܕܲܚܕܼܵܐ ܚܲܝܘܼܬܼܵܐ ܡܸܫܬܲܡܲܗ
ܢܲܦܫܵܐ ܘܦܲܓܼܪܵܐ ܕܲܡܚܲܕܝܼܿܢ: ܘܬܲܪܬܹܝܢ ܚܲܝ̈ܘܵܬܼܵܐ ܠܵܐ ܡܸܬܼܐܲܡܪܝܼܢ:
ܚܲܕܼ ܚܝܵܐ ܢܲܦܫܵܐ ܘܦܲܓܼܪܵܐ. ܡܸܛܠ ܕܠܵܐ ܗ̄ܘ̣ܵܐ ܒܚܲܝܹ̈ܐ ܕܝܼܠܹܗ
ܚܲܝ ܦܲܓܼܪܵܐ: ܐܸܠܵܐ ܒܲܚܕܼܵܝܘܼܬܼܵܐ ܕܢܲܦܫܵܐ. ܘܡܸܛܠ ܗܵܢܵܐ ܐܸܢܗ̤ܘ
ܕܢܸܬܼܦܲܠܓܼܘܼܢ: ܠܵܐ ܡܸܬܼܦܲܠܓܼܝܼܢ ܚܲܝܹ̈ܐ. ܐܸܠܵܐ ܒܲܠܚܘܿܕܼ ܐܝܼܬܲܝܗܘܿܢ
ܕܢܲܦܫܵܐ: ܕܲܬܼܪ̈ܲܝܗܘܿܢ ܡ̣ܢ ܟܝܵܢܵܗ̇ ܡܸܫܬܲܡܗܝܼܢ ܚܕܼܵܐ ܚܲܝܘܼܬܼܵܐ.
ܬܸܬܼܢܤܸܒܼ ܗܵܟܹܝܠ ܒܬܲܚܘܝܼܬܼܵܐ ܐܵܦ ܥܲܠ ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ:
ܕܐܝܼܬܼܵܘܗܝ ܚܲܕܼ ܦܲܪܨܘܿܦܵܐ ܕܲܒܼܦܘܼܪܵܫܵܐ ܬܪܹܝܢ. ܗܵܘ̇ ܕܢܸܬܼܪܸܢܸܐ
ܕܠܵܐ ܚܕܼܵܝܘܼܬܼܵܐ ܚܲܕܼ: ܠܵܐ ܡܸܫܟܿܚܵܐ. ܐܸܠܵܐ ܒܲܪܢܵܫܵܐ ܒܲܪܢܵܫܵܐ: ܘܐܲܠܵܗܵܐ
ܐܲܠܵܗܵܐ. ܬܪ̈ܲܝܗܘܿܢ ܚܲܕܼ ܒܪܵܐ: ܚܲܕܼ ܡܵܪܝܵܐ. ܠܵܘ ܓܹܝܪ ܟܲܕܼ ܡܦܲܪܫܝܼܢ
ܐܝܼܬܼ ܠܗܘܿܢ ܕܢܸܬܼܐܡܲܪ ܗܵܢܵܐ: ܗܵܘ̇ ܡܵܐ ܕܐܝܼܬܼܵܘܗܝ ܗܵܘ̇. ܡܸܛܠ
ܗܵܢܵܐ ܐܵܦ ܐܲܢ̄ܬܿ ܡܵܘܕܸܐ ܐܲܢ̄ܬܿ ܚܕܼܵܝܘܼܬܼܵܐ ܕܲܬܼܪܹܝܢ ܟܝܵܢ̈ܝܼܢ: ܘܕܲܬܼܪܹܝܢ
ܟܝܵܢ̈ܝܼܢ ܗܵܢ̇ܘܿܢ ܕܠܵܐ ܕܵܡܹ̇ܝܢ ܠܲܚ̈ܕܼܸܵܕܹܐ: ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ.
pb. 416
ܐܲܠܵܗܘܼܬܼܵܐ ܡܫܲܡܠܲܝܬܼܵܐ: ܘܐ̄ܢܵܫܘܼܬܼܵܐ ܡܫܲܡܠܲܝܬܼܵܐ. ܚܲܕܼ ܡܫܝܼܚܵܐ: ܚܲܕܼ
ܒܪܵܐ: ܚܲܕܼ ܡܵܪܝܵܐ. ܐܵܘ ܕܲܠܡܵܐ ܠܚܲܕܼ ܟܝܵܢܵܐ ܐܵܡܲ݁ܪ ܐܲܢ̄ܬܿ ܡܫܝܼܚܵܐ:
ܘܠܵܐ ܗ̄ܘ̣ܵܐ ܠܲܬܼܪܹܝܢ ܟܝܵܢ̈ܝܼܢ ܚܲܕܼ ܡܫܝܼܚܵܐ: ܘܝܲܬܼܝܼܪܬܵܐ ܐܝܼܬܹܝܗ̇ ܚܕܼܵܝܘܼܬܼܵܐ
ܕܠܵܐ ܒܘܼܠܒܵܠܵܐ ܕܲܟܼܝܵܢܹ̈ܐ؟ ܐܸܢ ܕܹܝܢ ܕܲܬܼܪܹܝܢ ܟܝܵܢ̈ܝܼܢ ܐܝܼܬܼܵܘܗܝ ܚܲܕܼ
ܡܫܝܼܚܵܐ: ܒܲܚܕܼܵܝܘܼܬܼܵܐ ܐܸܡܲ݁ܪ ܐܲܢ̄ܬܿ ܐܲܝܟܼ ܢܸܤܛܘܿܪܝܼܣ: ܕܡ̣ܢ ܚܲܕܼ
ܐ̄ܚܪܹܢܵܐ ܡܸܫܬܿܡܲܗ: ܘܡܵܢܵܐ ܒܲܪܵܢܵܐܝܼܬܼ ܪܵܗܹ̇ܛ ܐܲܢ̄ܬܿ ܠܲܡܨܵܕܼ ܠܲܐ̄ܚܪ̈ܵܢܹܐ:
ܟܲܕܼ ܥܲܠ ܐܲܦܲܝ̈ܗܘܿܢ ܢܵܦܹ̇ܩ ܐܲܢ̄ܬܿ ܪܘܼܚܵܐ: ܘܒܼܵܟܼ ܐܝܼܬܼܵܝܗܹܝܢ
ܬܲܪ̈ܬܲܝܗܹܝܢ. ܗܵܢܹܝܢ: ܘܕܲܠܩܘܼܒܼܠܵܐ ܕܝܼܠܗܹܝܢ؟ . . . .
ܘܬܼܘܼܒܼ ܠܗܹܝܢ ܟܲܕܼ ܠܗܹܝܢ ܡܚܵܘܸܐ. ܠܵܐ ܗ̄ܘ̣ܵܐ ܠܲܡ ܓܹܝܪ:
ܐܲܝܟܲܢܵܐ ܕܐ̄̇ܢܵܫ̈ܝܼܢ ܗܲܪ̈ܵܛܝܼܩܹܗ ܩܲܕܼܡܵܝܹ̈ܐ ܐܲܤܒܲܪܘ ܢܤܲܒܼ ܟܝܵܢܵܐ:
ܗܵܢܵܐ ܕܹܝܢ ܡ̣ܢ ܐܲܠܵܗܘܼܬܼܵܐ ܬܲܩܸܢ ܠܹܗ ܓܘܼܫܡܵܐ ܡܸܠܬܼܵܐ ܕܡ̣ܢ
ܐܲܠܵܗܵܐ: ܡܲܤܒܪܝܼܢ ܚ̄ܢܲ. ܐܸܠܵܐ ܟܲܕܼ ܢܵܩ̇ܦܝܼܢ ܚ̄ܢܲܢ ܒܟܼܠܕܘܼܟ
ܠܲܟܼܬܼܵܒܹ̈ܐ ܐܲܠܵܗܵܝܹ̈ܐ: ܕܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ ܢܤܲܒܼ ܡܫܲܪܪܝܼܢ ܚ̄ܢܲܢ.
ܟܲܕܼ ܒܗܵܕܹܐ ܠܗܵܢܘܿܢ ܕܡܸܢܗܘܿܢ ܐܝܼܬܼܵܘܗܝ ܚܲܕܼ ܒܲܠܚܘܿܕܼ ܒܪܵܐ
ܘܡܵܪܝܵܐ ܘܝܼܫܘܿܥ ܡܫܝܼܚܵܐ: ܐܲܝܟܼ ܕܲܒܼܤܘܼܟܵܠܵܐ ܡܩܲܒܿܠܝܼܢ ܚ̄ܢܲܢ:
ܬܪܹܝܢ ܟܝܵܢ̈ܝܼܢ ܐܵܡ̇ܪܝܼܢ ܚ̄ܢܲܢ ܡܚܲܝ̈ܕܹܐ. ܡ̣ܢ ܒܵܬܲܪ ܚܕܼܵܝܘܼܬܼܵܐ ܕܹܝܢ:
ܐܲܝܟܼ ܡ̇ܢ ܕܐܸܬܿܬܿܪܝܼܡ ܠܹܗ ܡ̣ܢ ܟܲܕܘܼ ܫܘܼܚܠܵܦܵܐ ܕܲܬܼܪܹܝܢ ܟܝܵܢ̈ܝܼܢ:
ܕܚܲܕܼ ܐܝܼܬܼܵܘܗܝ ܟܝܵܢܹܗ ܕܲܒܼܪܵܐ ܡܵܘܕܹܝܢ ܚ̄ܢܲܢ: ܒܪܲܡ ܕܹܝܢ ܕܐܸܬܼܒܲܪܢܲܫ
ܘܐܸܬܿܒܲܤܲܪ. ܐܸܢ ܕܹܝܢ ܡܸܬܼܐܲܡܪܵܐ ܕܗܵܘ̇ ܕܐܸܬܼܒܲܤܲܪ ܐܵܘ ܕܐܸܬܼܒܲܪܢܲܫ:
ܐܲܠܵܗܵܐ ܐܝܼܬܼܵܘܗܝ ܗ̄ܘ̣ܵܐ ܡܸܠܬܼܵܐ: ܗܘ̤ܵܬܼ ܡܲܒܼܥܕܼܵܐ ܡܲܤܒܿܪܵܢܘܼܬܼܵܐ
pb. 417
ܕܫܘܼܚܠܵܦܵܐ. ܩܵܘܝܼ ܓܹܝܪ ܗܵܘ̇ ܡܵܐ ܕܐܝܼܬܼܵܘܗܝ ܗ̄ܘ̣ܵܐ. ܬܸܬܵܘܕܸܐ
ܕܹܝܢ ܡܸܢܲܢ ܐܵܦ ܚܕܼܵܝܘܼܬܼܵܐ ܕܠܵܐ ܒܘܼܠܒܵܠܵܐ.
ܢܸܤܛܘܿܪܝܼܣ. ܡܵܘܕܹܐ ܐܲܢ̄ܬܿ ܓܹܝܪ ܕܒܵܢ̇ܘܿܢ ܕܡܸܢܗܘܿܢ ܐܝܼܬܼܵܘܗܝ
ܡܫܝܼܚܵܐ: ܗܵܢܵܘ ܕܹܝܢ ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ. ܘܐܵܘܕܝܼܬܿ ܫܘܼܚܠܵܦܵܐ
ܒܐܘܼܤ̈ܝܼܵܣ: ܘܲܒܼܩܵܘܝܼܘ ܕܠܵܐ ܒܘܼܠܒܵܠܵܐ. ܕܠܵܐ ܒܘܼܠܒܵܠܵܐ ܕܹܝܢ
ܩܵܘܝܼܘ: ܐܲܝܟܼ ܡܵܐ ܕܐܝܼܬܲܝܗܘܿܢ ܟܝܵܢܹ̈ܐ: ܡܵܕܹܝܢ ܐܵܦ ܒܲܚܕܼܵܝܘܼܬܼܵܐ
ܗܵܟܼܘܵܬܼ ܩܵܘܝܼܘ: ܐܲܝܟܲܢܵܐ ܗܵܟܹܝܠ ܡܩܵܘܹܝܢ ܟܝܵܢܹ̈ܐ ܕܠܵܐ ܒܘܼܠܒܵܠܵܐ:
ܕܡ̣ܢ ܒܵܬܲܪ ܚܕܼܵܝܘܼܬܼܵܐ ܠܵܐ ܡܩܵܘܹܝܢ ܐܲܝܟܼ ܕܐܝܼܬܲܝܗܘܿܢ ܒܲܟܼܝܵܢܵܐ؟ . . .
ܡ̣ܢ ܒܵܬܲܪ ܠܲܡ ܓܹܝܪ ܚܕܼܵܝܘܼܬܼܵܐ: ܐܸܬܼܒܲܛܲܪ ܦܘܼܪܫܵܢܵܐ ܕܠܲܬܼܪܹܝܢ:
ܘܲܕܚܲܕܼ ܐܝܼܬܼܵܘܗܝ ܟܝܵܢܵܐ ܕܲܒܼܪܵܐ ܡܵܘܕܹܝܢ ܚ̄ܢܲܢ. ܐܸܢ ܓܹܝܪ ܠܵܐ ܩ̣ܵܘܝܼܘ
ܐܵܦ ܒܲܚܕܼܵܝܘܼܬܼܵܐ ܐܲܝܟܼ ܡܵܐ ܕܐܝܼܬܲܝܗܘܿܢ ܟܝܵܢܹ̈ܐ: ܐܸܠܵܐ ܡܸܬܼܒܲܛܠܝܼܢ
ܦܘܼܪ̈ܫܵܢܹܐ ܕܝܼܠܗܘܿܢ ܕܲܒܼܗܘܿܢ ܡܸܬܼܪܢܹܝܢ ܬܪܹܝܢ: ܐܵܦ ܒܲܚܕܼܵܝܘܼܬܼܵܐ:
ܟܲܕܼ ܡܩܵܘܹܝܢ ܟܝܵܢܹ̈ܐ ܕܠܵܐ ܒܘܼܠܒܵܠ: ܒܘܼܠܒܵܠܵܐ ܗܵܘܹ̇ܐ. ܘܒܼܘܼܠܒܵܠܵܐ
ܕܫܘܼܚܠܵܦܵܐ ܘܲܕܫܘܓܼܢܵܝܵܐ: ܗܵܘܵܝܵܐ ܗ̄ܘ̣ ܕܲܠܚܲܕܼ ܟܝܵܢܵܐ. ܡܵܢܵܐ ܗܵܟܹܝܠ
ܡܸܬܼܚܙܸܐ ܠܵܟܼ: ܕܠܵܐ ܒܘܼܠܒܵܠܵܐ ܗܘ̤ܵܬܼ ܚܕܼܵܝܘܼܬܼܵܐ ܒܲܟܼܝܵܢܹ̈ܐ
ܕܐܸܬܼܚܲܝܕܼܵܬ̤: ܡܵܕܹܝܢ ܬܪܹܝܢ ܗܵܢ̇ܘܿܢ ܕܡܸܗܘܿܢ ܐܝܼܬܼܵܘܗܝ ܚܲܕܼ ܠܚܘܿܕܼ
ܒܪܵܐ ܘܡܵܪܝܵܐ ܘܝܼܫܘܿܥ ܡܫܝܼܚܵܐ: ܐܵܦ ܒܲܚܕܼܵܝܘܼܬܼܵܐ ܬܪܹܝܢ. ܘܠܵܐ
ܡܸܬܼܒܲܛܠܝܼܢ ܫܘܼܚ̈ܠܵܦܹܐ ܟܝܵܢܵܝܹ̈ܐ: ܕܲܒܼܗܘܿܢ ܬܪܹܝܢ ܡܸܬܼܪܢܹܝܢ.
ܕܗܵܢܵܐ ܠܵܐ ܐܝܼܬܼܵܘܗܝ ܗܵܘ̇ ܒܐܘܼܤܝܼܵܐ: ܐܵܦ ܠܵܐ ܗܵܘ̇ ܗܵܢܵܐ
ܒܐܘܼܤܝܼܵܐ. ܠܵܐ ܓܹܝܪ ܡܸܪܢܵܐ ܬܸܪܢܸܐ ܗܵܟܲܢܵܐ: ܠܵܐ ܕܹܝܢ ܬܹܐܡܲܪ ܐܲܝܟܼ
pb. 418
ܕܪܵܢܹܐ ܐܲܢ̄ܬܿ. ܐܲܝܟܲܢܵܐ ܗܵܟܹܝܠ ܒܚܘܼܫܵܒܲܝ̈ܟ ܡܩܲܒܸܿܠ ܐܲܢ̄ܬܿ ܬܪܹܝܢ
ܕܡܸܢܗܘܿܢ ܐܝܼܬܼܵܘܗܝ ܡܫܝܼܚܵܐ: ܡ̣ܢ ܒܵܬܲܪ ܚܕܼܵܝܘܼܬܼܵܐ ܕܹܝܢ ܐܲܝܟܼ ܡ̇ܢ
ܕܲܡܒܲܛܸܠ ܦܘܼܪܫܵܢܵܐ ܕܠܲܬܼܪܹܝܢ ܟܝܵܢ̈ܝܼܢ: ܚܲܕܼ ܟܝܵܢܵܐ ܐܵܡܲ݁ܪ ܐܲܢ̄ܬܿ
ܕܲܒܼܪܵܐ؟ ܠܥܸܠ ܐܵܡܲ݁ܪ ܐܲܢ̄ܬܿ ܕܲܬܼܪܹܝܢ ܐܝܼܬܲܝܗܘܿܢ ܗܵܢܘܿܢ ܕܡܸܢܗܘܿܢ
ܐܝܼܬܼܵܘܗܝ ܚܲܕܼ ܒܪܵܐ: ܘܲܠܬܲܚܬܿ ܕܚܲܕܼ ܗ̄ܘ̣ ܟܝܵܢܵܐ ܕܲܒܼܪܵܐ. ܐܲܝܟܼ ܡ̇ܢ
ܕܠܲܟܼܝܵܢܵܐ: ܘܠܵܐ ܗ̄ܘ̣ܵܐ ܠܦܲܪܨܘܼܦܵܐ: ܗܘ̤ܵܬܼ ܚܕܼܵܝܘܼܬܼܵܐ ܕܲܟܼܝܵܢܹ̈ܐ.
ܠܲܟܼܝܵܢܹ̈ܐ ܕܲܬܼܪ̈ܲܝܗܘܿܢ ܗܵܢ̇ܘܿܢ ܕܐܸܬܼܚܲܝܲܕܼܘ: ܗܘ̤ܵܘ ܚܲܕܼ. ܗܵܕܹܐ ܓܹܝܪ
ܚܕܼܵܝܘܼܬܼܵܐ: ܡܸܫܬܿܓܼܢܝܵܢܝܼܬܼܵܐ ܗ̣̄ܝ ܘܡܸܫܬܲܚܠܦܵܢܝܼܬܼܵܐ: ܒܗܵܝ̇ ܕܠܲܟܼܝܵܢܵܐ
ܗܵܘ̇ܝܵܐ ܘܲܠܫܘܼܡܠܵܝܵܐ ܕܲܟܼܝܵܢܵܐ. ܗܵܕܹܐ ܠܵܐ ܐܝܼܬܹܝܗ̇ ܡ̣ܢ ܬܪܹܝܢ ܟܝܵܢ̈ܝܼܢ
ܡܫܲܡ̈ܠܲܝܵܐ: ܐܸܠܵܐ ܡ̣ܢ ܬܪܹܝܢ ܕܠܵܐ ܡܫܲܡܠܹܝܢ.
ܟܠ ܟܝܵܢܵܐ ܓܹܝܪ ܡܫܲܡܠܝܵܐ: ܕܢܸܗܘܸܐ ܘܢܚܸܐ ܠܵܐ ܤܢܝܼܩ ܕܢܸܗܘܸܐ.
ܒܪܘܼܟܵܒܼܵܐ ܓܹܝܪ ܟܝܵܢܵܝܵܐ ܡܸܬܼܚܲܙܝܵܐ: ܕܐܵܦ ܠܵܐ ܚܲܕܼ ܡ̣ܢ ܟܝܵܢܹ̈ܐ ܗܵܢܘܿܢ
ܕܡܸܢܗܘܿܢ ܐܝܼܬܼܵܘܗܝ: ܐܝܼܬܼܵܘܗܝ ܡܫܲܡܠܝܵܐ. ܐܸܠܵܐ ܥܲܠ ܚܕܼܵܕ̈ܐ
ܤܢܝܼܩܝܼܢ ܕܢܸܗܘܘܿܢ ܘܢܸܬܼܩܲܝܡܘܼܢ: ܐܲܝܟܼܙܢܵܐ ܕܦܲܓܼܪܵܐ ܤܢܝܼܩ ܕܢܸܚܸܐ
ܥܲܠ ܢܲܦܫܵܐ: ܠܵܐ ܗ̄ܘ̣ܵܐ ܓܹܝܪ ܡܸܢܹܗ ܘܠܹܗ ܚܲܝ. ܘܢܲܦܫܵܐ ܕܬܲܪܓܸܫ:
ܤܢܝܼܩܵܐ ܥܲܠ ܦܲܓܼܪܵܐ. ܘܐܸܢ ܕܹܝܢ ܠܵܐ: ܚܵܙ̇ܝܵܐ ܗ̄ܘ̣ܵܬܼ ܐܵܦ ܟܲܕܼ ܠܲܝܬܿ
ܗ̄ܘ̣ܵܐ ܠܵܗ̇ ܥܲܝ̈ܢܹܐ: ܘܫܵܡ̇ܥܵܐ ܗ̄ܘ̣ܵܬܼ ܐܵܦ ܟܲܕܼ ܢܲܟܼܝܵܐ ܗ̄ܘ̣ܵܬܼ ܡܲܫܡܲܥܬܼܵܐ:
ܗܵܟܲܢܵܐ ܐܵܦ ܥܲܠ ܪܸ̈ܓܼܫܹܐ ܐ̄ܚܪ̈ܵܢܹܐ. ܐܲܝܟܲܢܵܐ ܓܹܝܪ ܡ̣ܢ ܬܪܹܝܢ ܟܝܵܢܹ̈ܐ
ܡܫܲܠܡܵܢܹ̈ܐ ܐܸܡܲ݁ܪ ܐܲܢ̄ܬܿ ܚܲܕܼ ܟܝܵܢܵܐ: ܟܲܕܼ ܐ̄ܢܵܫܘܼܬܼܵܐ ܡܫܲܡܠܲܝܵܬܐ
ܐܝܼܬܹܝܗ̇: ܕܠܵܐ ܤܢܝܼܩܵܐ ܕܬܸܗܘܸܐ ܒܲܪܢܵܫܵܐ ܡ̣ܢ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ؟
pb. 419
ܠܵܐ ܗ̄ܘ̣ܵܐ ܓܹܝܪ ܡ̣ܢ ܚܕܼܵܝܘܼܬܼܵܐ ܕܐܲܠܵܗܘܼܬܼܵܐ ܐܝܼܬܼ ܠܵܗ̇ ܕܬܸܗܘܸܐ
ܒܲܪܢܵܫܵܐ: ܐܸܠܵܐ ܡ̣ܢ ܚܲܝܠܵܐ ܒܵܪܘܿܝܵܐ ܕܐܲܠܵܗܑܵܐ: ܗܵܘ̇ ܕܲܠܟܼܠ ܐܲܝܠܹܝܢ
ܕܠܵܐ ܐܝܼܬܲܝܗܘܿܢ ܗ̄ܘ̣ܵܘ ܐܲܝܬܝܼ ܠܲܗܘܵܝܵܐ: ܐܵܦܸܢ ܥܲܡܵܗ̇ ܕܲܒܼܪܝܼܬܹܗ
ܗܘ̤ܵܬܼ ܚܕܼܵܝܘܼܬܼܵܐ. ܘܠܵܐ ܗ̄ܘ̣ܵܐ ܐܲܠܵܗܘܼܬܼܵܐ: ܐܲܝܟܼ ܕܠܝܼܕܲܥܬܼܵܐ ܐܵܘ ܐܲܝܟܼ
ܕܠܪܓܸܫܬܼܵܐ ܕܐ̄ܢܵܫܝ̈ܬܼܵܐ: ܤܢܝܼܩܵܐ ܗ̄ܘ̣ܵܬܼ ܥܲܠ ܐ̄ܢܵܫܘܼܬܼܵܐ. ܐܲܝܟܲܢܵܐ ܡܵܕܹܝܢ
ܠܚܲܕܼ ܟܝܵܢܵܐ ܗܘ̤ܵܬܼ ܚܕܼܵܝܘܼܬܼܵܐܐ ܕܲܒܼܪܵܐ؟ ܒܲܛܸܠ ܐܸܢܘܿܢ ܡܵܕܹܝܢ ܠܲܬܼܪܹܝܢ
ܟܝܵܢܹ̈ܐ ܓܡܝܼܪܵܐܝܼܬܼ: ܘܐܝܼܬܼ ܠܵܗ̇ ܐܲܬܼܪܵܐ ܠܗܵܝ̇ ܕܚܲܕܼ ܟܝܵܢܵܐ. ܕܠܵܐ
ܢܲܦܫܵܐ: ܐܲܝܟܼ ܕܐܼܡ݂ܲܪ ܐܵܪܝܼܘܿܣ. ܐܵܘ ܕܠܵܐ ܡܲܕܿܥܵܐ: ܐܲܝܟܼ ܕܐܸܡ݂ܲܪ
ܐܵܦܘܿܠܝܼܢܵܪܝܼܣ. ܘܝܵܗܹ̇ܒܼ ܐܲܢ̄ܬܿ ܠܒܲܪܢܵܫܵܐ ܚܲܕܼ ܟܝܵܢܵܐ: ܠܒܲܪ ܡ̣ܢ
ܟܠܗܘܿܢ ܟܝܵܢܹ̈ܐ. ܘܡ̣ܢ ܒܵܬܲܪ ܗܵܕܹܐ: ܕܠܵܐ ܐܝܼܬܼܵܘܗܝ ܠܵܐ ܤܢܝܼܩܵܐ
ܐܲܠܵܗܵܐ ܡܸܠܬܼܵܐ: ܡܸܛܠ ܕܠܵܐ ܐܝܼܬܼܵܘܗܝ ܟܝܵܢܵܐ ܡܫܲܡܠܝܵܐ: ܒܗܵܝ̇
ܕܲܤܤܝܼܩ ܥܲܠ ܟܝܵܢܵܐ ܕܒܲܪܢܵܫܵܐ. ܗܵܫܵܐ ܕܹܝܢ ܕܲܠܩܘܼܒܼܠܵܐ ܟܠܗܹܝܢ
ܒܵܗ̇ ܟܲܕܼ ܒܵܗ̇ ܐܸܡܲ݁ܪ ܐܲܢ̄ܬܿ. ܘܲܬܼܪܹܝܢ ܟܝܵܢܹ̈ܐ ܡܫܲܠܡܵܢܹ̈ܐ ܕܡܸܢܗܘܿܢ
ܐܝܼܬܼܵܘܗܝ ܒܪܵܐ: ܘܕܲܠܚܲܕܼ ܟܝܵܢܵܐ ܕܲܒܼܪܵܐ ܗܘ̤ܵܬܼ ܚܕܼܵܝܘܼܬܼܵܐ. ܘܠܵܐ
ܗ̄ܘ̣ܵܐ ܡܸܟܹܝܠ ܡ̣ܢ ܗܵܠܹܝܢ ܡܸܬܼܪܢܸܐ ܕܐܝܼܬܼܵܘܗܝ ܚܲܕܼ ܒܪܵܐ: ܘܲܬܼܪܹܝܢ
ܟܝܵܢ̈ܝܼܢ ܕܲܡܚܲܕܝܼܢ ܐܸܡܲܪܬܿ: ܘܬܼܘܼܒܼ ܕܲܠܚܲܕܼ ܟܝܵܢܵܐ ܕܲܒܼܪܵܐ: ܘܲܡܪܝܼܡ
ܐܲܢ̄ܬܿ ܠܗܵܘ̇ ܕܒܸܤܪܵܐ. ܘܡܸܛܠ ܗܵܢܵܐ: ܡ̣ܢ ܒܵܬܲܪ ܚܕܼܵܝܘܼܬܼܵܐ:
ܡܒܲܛܸܠ ܐܲܢ̄ܬܿ ܦܘܼܪܫܵܢܵܐ ܕܲܬܼܪܹܝܢ. ܒܗܵܝ̇ ܕܲܟܼܝܵܢܵܐ ܕܒܸܤܪܵܐ ܐܸܬܼܒܲܛܲܠ
ܠܹܗ. ܐܵܘ ܡܸܛܠ ܕܐܸܬܼܚܲܒܲܠ: ܐܵܘ ܡܸܛܠ ܕܐܸܬܲܚܠܲܦ. ܘܲܠܚܲܕܼ
ܟܝܵܢܵܐ ܕܲܒܼܪܵܐ ܡܗܲܝܡܸܢ ܐܲܢ̄ܬܿ: ܒܪܲܡ ܕܐܸܬܼܒܲܪܢܲܫ ܘܐܸܬܼܓܲܫܲܡ. ܠܐܲܝܢܵܐ
ܘܠܲܐܝܢܵܐ ܟܝܵܢܵܐ ܐܸܡ݂ܲܪܬܿ: ܕܡܸܢܗܘܿܢ ܐܝܼܬܼܵܘܗܝ ܚܲܕܼ ܒܪܵܐ؟ ܘܐܲܝܢܵܘ
pb. 420
ܚܲܕܼ ܟܝܵܢܵܐ ܕܲܒܼܪܵܐ؟ ܗܵܠܹܝܢ ܕܹܝܢ ܕܡ̣ܢ ܬܪܹܝܢ ܟܝܵܢ̈ܝܼܢ ܠܚܲܕܼ ܟܝܵܢܵܐ
ܡܸܬܼܚܲܝܕܝܼܢ: ܡ̣ܢ ܬܪ̈ܲܝܗܘܿܢ ܟܝܵܢܹ̈ܐ ܕܐܸܬܼܚܲܝܲܕܼܘ ܡܸܬܼܪܢܹܝܢ. ܐܲܝܟܼ
ܙܢܵܐ: ܕܡ̣ܢ ܦܫܝܼܛܹ̈ܐ ܡܪܲܟܹܒܼܵܐ. ܡܵܕܹܝܢ ܡܪܲܟܿܒܼܵܐ ܗ̄ܘ̣ ܚܲܕܼ ܟܝܵܢܵܐ
ܕܲܒܼܪܵܐ: ܘܡܸܛܠ ܗܵܢܵܐ ܐܸܡ݂ܲܪܬܿ: ܒܪܲܡ ܡܓܲܫܲܡ. ܐܲܝܟܲܢܵܐ ܬܘܼܒܼ
ܡܸܬܼܒܲܛܲܠ ܦܘܼܪܫܵܢܵܐ ܕܠܲܬܼܪܹܝܢ: ܕܠܵܐ ܢܸܬܼܪܢܸܐ ܥܲܡ ܒܸܤܪܵܐ؟
ܘܲܬܼܪܹܝܢ ܐܸܡܲ݁ܪ ܐܲܢ̄ܬܿ: ܘܲܕܼܠܵܐ ܙܵܕܹܩ ܕܢܸܬܼܪܢܘܿܢ ܬܪܹܝܢ ܒܵܬܲܪ
ܚܕܼܵܝܘܼܬܼܵܐ: ܐܲܝܟܼ ܡ̇ܢ ܕܲܡܒܲܛܸܠ ܦܘܼܪܫܵܢܵܐ ܕܲܬܼܪܹܝܢ. ܘܲܠܚܲܕܼ ܟܝܵܢܵܐ
ܕܲܒܪܵܐ ܐܸܡܲ݁ܪ ܐܲܢ̄ܬܿ: ܘܲܕܼܡܸܬܼܪܢܿܢ ܬܪܹܝܢ ܡ̣ܢ ܐܵܢܲܢܩܹܐ ܝܵܗܹ̇ܒܼ ܐܲܢ̄ܬܿ.
ܒܗܵܝ̇ ܕܐܵܡܲ݁ܪ ܐܲܢ̄ܬܿ: ܕܲܡܓܲܫܲܡ ܡ̣ܢ ܒܵܬܲܪ ܚܕܼܵܝܘܼܬܼܵܐ. ܒܒܸܤܪܵܐ ܓܹܝܪ
ܡܒܲܤܲܪ: ܕܒܲܟܼܝܵܢܵܐ ܐܝܼܬܼܵܘܗܝ ܒܸܤܪܵܐ. ܡܵܕܹܝܢ ܬܪܹܝܢ ܟܝܵܢ̈ܝܼܢ ܝܵܗܹ̇ܒܼ
ܐܲܢ̄ܬܿ ܠܡܵܪܝܵܐ ܡ̣ܢ ܒܵܬܲܪ ܚܕܼܵܝܘܼܬܼܵܐ: ܚܲܕܼ ܟܝܵܢܵܐ ܕܲܒܼܪܵܐ: ܘܚܲܕܼ ܒܸܤܪܵܐ
ܕܲܡܒܲܤܲܪ ܒܹܗ. ܐܵܘ ܡ̣ܢ ܩܕܼܵܡ ܚܕܼܵܝܘܼܬܼܵܐ ܟܝܵܢܹ̈ܐ ܡܦܲܪ̈ܫܹܐ ܡܸܬܼܪܢܹܝܢ:
ܕܐܲܠܵܗܘܼܬܹܗ ܕܲܒܼܪܵܐ ܘܲܕܼܐ̄ܢܵܫܘܼܬܹܗ. ܘܗܵܝܕܹܝܢ ܐܸܬܼܟܲܢܲܫܘ ܗ̄ܘ̣ܵܘ
ܠܒܼܘܼܛܵܠܵܐ ܕܚܲܕܼ ܟܝܵܢܵܐ. ܘܗܵܟܲܢܵܐ ܕܹܝܢ: ܐܵܦ ܠܵܐ ܡ̣ܢ ܩܕܼܵܡ
ܚܕܼܵܝܘܼܬܼܵܐ: ܐܵܦ ܠܵܐ ܡ̣ܢ ܒܵܬܲܪ ܚܕܼܵܝܘܼܬܼܵܐ: ܡܸܬܼܪܢܸܐ ܒܪܵܐ ܡ̣ܢ ܬܪܹܝܢ
ܟܝܵܢ̈ܝܼܢ. ܐܵܘ ܗܵܕܹܐ ܐܸܡܲ݁ܪ ܐܲܢ̄ܬܿ: ܕܲܡܩܵܘܹܝܢ ܟܲܕܼ ܠܵܐ ܡܚܲܝܕܝܼܢ ܐܵܦ
ܠܵܐ ܡܦܲܪܫܝܼܢ: ܘܦܲܚܫ ܠܚܘܿܪܵܘܗܝ ܟܝܵܢܵܐ ܕܲܒܼܪܵܐ ܡ̣ܢ ܟܝܵܢܵܐ
ܕܐ̄ܢܵܫܘܼܬܼܵܐ: ܐܲܝܟܼ ܡ̇ܢ ܕܲܡܒܲܛܸܠ ܦܘܼܪܫܵܢܵܐ ܕܠܲܬܼܪܹܝܢ. ܘܠܵܐܩܵܩܝܼܣ
ܐܲܝܟܼ ܕܲܠܟܲܠܒܵܐ ܕܲܡܓܲܪܲܝ ܘܲܡܒܲܥܪܲܪ ܠܩܘܼܒܼܠܵܟܼ: ܫܵܕܹܐ ܐܲܢ̄ܬܿ
ܩܕܼܵܡܵܘܗܝ: ܗܵܝ̇ ܕܡ̣ܢ ܒܵܬܲܪ ܚܕܼܵܝܘܼܬܼܵܐ ܡܒܲܛܲܠ ܦܘܼܪܫܵܢܵܐ
ܕܠܲܬܼܪܹܝܢ: ܘܐܸܡܲ݁ܪ ܐܲܢ̄ܬܿ: ܕܲܡܗܲܡܢܝܼܢ ܚ̄ܢܲܢ ܕܲܚܕܼܵܐ ܐܝܼܬܹܝܗ̇ ܐܘܼܤܝܼܵܐ
pb. 421
ܕܲܒܼܪܵܐ. ܘܬܼܘܼܒܼ ܩܕܼܵܡ ܡܲܕܼܢܚܝܹ̈ܐ ܕܲܒܼܪܲܡ ܕܲܡܒܲܤܲܪ: ܐܲܝܟܲܢܵܐ ܕܠܵܐ
ܢܸܬܼܓܲܪܘܿܢ. ܐܸܡܲܪܬܿ ܐܵܦ ܠܗܵܝ̇: ܕܲܕܼܠܵܐ ܒܘܼܠܒܵܠܵܐ ܓܡܝܼܪܵܐܝܼܬܼ ܗܘ̤ܵܬܼ
ܚܕܼܵܝܘܼܬܼܵܐ. ܘܲܠܟܼܠ ܐ̄ܢܵܫ: ܐܲܝܟܼ ܕܒܼܵܥܹ̇ܐ ܝܵܗܹ̇ܒܼ ܐܲܢ̄ܬܿ.
ܐܵܩܵܩܝܼܣ. ܐܸܠܵܐ ܠܲܡ ܓܹܝܪ ܘܲܟܼܡܵܐ ܙܲܒܼܢ̈ܝܼܢ ܐܵܡ̇ܪܝܼܢ ܗܵܠܹܝܢ
ܕܲܠܩܘܼܒܼܠܵܐ: ܕܗܵܐ ܓܲܠܝܵܐܝܼܬܼ ܟܲܕܼ ܥܵܒܼ̇ܕܝܼܢ ܗܵܠܹܝܢ ܬܵܘܕܝܼܬܼܵܐ
ܕܗܲܝܡܵܢܘܼܬܼܵܐ ܬܪܝܼܨܬܵܐ: ܬܪܹܝܢ ܟܝܵܢ̈ܝܼܢ ܡܫܲܡܗܝܼܢ. ܘܲܡܦܲܪܫܝܼܢ
ܢܒܵܬܼ̈ ܩܵܠܹ̈ܐ ܕܲܡ̈ܡܲܠܲܠܝ ܐܲܠܵܗܵܝ̈ܬܼܵܐ: ܐܲܝܟܼ ܫܘܼܚܠܵܦܵܐ ܕܲܟܼܝܵܢܹ̈ܐ. ܘܗܵܐ
ܐܲܝܟܲܢܵܐ ܕܠܵܐ ܗ̄ܘ̣ܵܐ ܕܲܠܩܘܼܒܼܠܵܐ ܠܘܵܬܼ ܗܵܠܹܝܢ ܕܝܼܠܵܟܼ ܐܝܼܬܲܝܗܹܝܢ
ܗܵܠܹܝܢ: ܠܵܐ ܓܹܝܪ ܡܸܬܿܛܦܝܼܣ ܐܲܢ̄ܬܿ ܕܠܲܬܼܪܹܝܢ ܦܲܪ̈ܨܘܿܦܹܐ ܐܵܘ
ܩܢܘܿܡܹ̈ܐ ܠܲܡܦܲܠܵܓܼܵܘܼ ܠܲܒܼ̈ܢܵܬܼ ܩܵܠܹ̈ܐ.
ܩܘܼܪܸܠܘܿܣ. ܐܸܠܵܐ ܐܘܿ ܚܲܟܿܝܼܡܵܐ: ܐܵܡܲ݁ܪ ܐ̄ܢܵܐ ܕܲܟܼܬܼܝܼ̈ܒܼܵܢ ܐܸܢܹܝܢ
ܒܪ̈ܫܹܐ: ܕܐܲܝܢܵܐ ܕܲܠܦܲܪ̈ܨܘܿܦܹܐ ܬܪܹܝܢ ܐܵܘ ܩܢܘܿܡܹ̈ܐ ܡܦܲܠܸܓܼ ܠܲܒܼ̈ܢܵܬܼ
ܩܵܠܹ̈ܐ: ܘܡܸܢܗܹܝܢ ܐܲܝܟܼ ܕܲܠܒܲܪܢܵܫܵܐ ܕܲܠܚܘܿܕܼܵܐܝܼܬܼ ܡܸܬܼܝܼܕܲܥ ܠܒܲܪ
ܡ̣ܢ ܡܸܠܬܼܵܐ ܕܐܲܠܵܗܵܐ: ܡܸܢܗܹܝܢ ܕܹܝܢ ܐܲܝܟܼ ܡ̇ܢ ܕܦܲܐ̈ܝܵܢ ܠܐܲܠܵܗܵܐ
ܒܲܠܚܘܿܕܼ ܠܡܸܠܬܼܵܐ ܕܡ̣ܢ ܐܲܠܵܗܵܐ ܐܲܒܼܵܐ. ܗܵܢܵܐ ܢܸܗܘܸܐ ܡܚܲܝܲܒܼ.
ܫܘܼܚܠܵܦܵܐ ܕܹܝܢ ܕܲܒܼ̈ܢܵܬܼ ܩܵܠܹ̈ܐ: ܘܠܵܐ ܒܚܲܕܼ ܡ̣ܢ ܙܢܝܼ̈ܢ ܐܵܪܝܼܡܢ ܚ̄ܢܲܢ
ܐܵܦ ܕܚܲܩܢ ܚ̄ܢܲܢ ܠܒܲܪ ܠܗܵܝ̇ ܕܲܢܦܲܠܸܓܼ ܐܸܢܹܝܢ: ܐܲܝܟܼ ܕܠܲܒܼܪܵܐ
ܠܚܘܿܕܵܐܝܼܬܼ ܠܡܸܠܬܼܵܐ ܕܡ̣ܢ ܐܲܒܼܵܐ: ܘܐܲܝܟܼ ܕܲܠܒܲܪܢܵܫܵܐ ܬܘܼܒܼ
ܠܚܘܿܕܵܐܝܼܐܬܼ ܒܪܵܐ ܡܸܬܼܝܼܕܲ ܡ̣ܢ ܐܲܢ̄ܬܿܬܼܵܐ. ܚܲܕܼ ܗ̄ܘ̣ ܓܹܝܪ ܫܲܪܝܼܪܵܐܝܼܬܼ
ܟܝܵܢܵܗ̇ ܕܡܸܠܬܼܵܐ: ܝܵܕܼܥܝܼܢ ܚ̄ܢܲܢ ܓܹܝܪ ܕܐܸܬܼܓܲܫܲܡ ܘܐܸܬܼܒܲܪܢܲܫ.
ܢܸܤܛܘܿܪܝܼܣ. ܐܵܪܵܐ ܒܪܸܥܝܵܢܵܐ ܘܲܒܼܢܲܩܝܼܦܘܼܬܼܵܐ ܕܒܼܘܼܚܵܝܵܐ ܐܲܦܝܼܤܹܗ
pb. 422
ܗ̄ܘ̣ܵܐ: ܒܡܸܠܹ̈ܐ ܗܸܠܹܝܢ ܠܐܵܩܵܩܝܼܣ: ܘܠܵܐ ܗ̄ܘ̣ܵܐ ܐܲܝܟܼ ܕܠܲܐܝܢܵܐ
ܕܒܲܦܓܼܘܼܕܹ̈ܐ ܪܡܸܐ: ܢܓܲܕܼ ܠܹܗ ܠܡܸܩܲܦ ܠܟܼܠ ܐܲܝܟܵܐ ܕܢܸܒܼܥܸܐ؟
ܐܸܡ݂ܲܪ ܓܹܝܪ: ܕܲܚܕܼܵܝܘܼܬܼܵܐ ܕܲܬܼܪܹܝܢ ܟܝܵܢ̈ܝܼܢ ܗܘ̤ܵܬܼ: ܕܡܸܢܗܘܿܢ ܐܝܼܬܼܵܘܗܝ
ܚܲܕܼ ܒܲܠܚܘܿܕܼ ܒܪܵܐ ܘܡܵܪܝܵܐ ܘܝܼܫܘܿܥ ܡܫܝܼܚܵܐ: ܘܲܓܼܡܝܼܪܵܐܝܼܬܼ: ܕܠܵܐ
ܒܘܼܠܒܵܠܵܐ ܗܘ̤ܵܬܼ ܚܕܼܵܝܘܼܬܼܵܐ. ܐܲܝܟܲܢܵܐ ܗܵܟܹܝܠ ܚܲܕܼ ܗ̄ܘ̣ ܟܝܵܢܹܗ ܕܲܒܼܪܵܐ:
ܗܵܘ̇ ܕܐܸܡܲܪܬܿ ܕܲܬܼܪܹܝܢ ܟܝܵܢ̈ܝܼܢ ܐܝܼܬܼܵܘܗܝ. ܗܵܢܵܘ ܕܹܝܢ ܒܲܟܼܝܵܢܹ̈ܐ: ܗܵܘ̇
ܒܘܼܠܒܵܠܵܐ ܗܘ̤ܵܬܼ ܚܕܼܵܝܘܼܬܼܵܐ. ܐܲܝܟܲܢܵܐ ܗܵܟܹܝܠ ܚܲܕܼ ܗ̄ܘ̣ ܟܝܵܢܹܗ ܕܲܒܼܪܵܐ:
ܗܵܘ̇ ܕܐܸܡܲܪܬܿ ܕܲܬܼܪܹܝܢ ܟܝܵܢ̈ܝܼܢ ܐܝܼܬܼܵܘܗܝ. ܗܵܢܵܘ ܕܹܝܢ ܒܲܟܼܝܵܢܹ̈ܐ: ܗܵܘ̇
ܡܵܐ ܕܡܸܢܗܘܿܢ ܐܝܼܬܼܵܘܗܝ؟ ܠܲܝܬܿ ܓܹܝܪ ܟܝܵܢܵܐ ܕܢܸܗܘܸܐ ܬܪܹܝܢ ܟܝܵܢ̈ܝܼܢ:
ܗܵܢ̇ܘܿܢ ܕܡܸܢܗܘܿܢ ܢܸܗܘܸܐ ܚܲܕܼ ܘܠܵܐ ܗ̄ܘ̣ܵܐ ܬܪܹܝܢ. ܐܸܠܵܐ ܠܲܡ ܗ̤ܘ
ܒܲܚܕܼܵܝܘܼܬܼܵܐ ܐܝܼܬܼ ܠܹܗ ܕܢܸܗܘܸܐ ܚܲܕ: ܘܬܼܘܼܒܼ ܠܵܐ ܗ̄ܘ̣ܵܐ ܒܲܚܕܼܵܝܘܼܬܼܵܐ
ܚܲܕܼ ܗ̄ܘ̣. ܘܕܲܬܼܪܹܝܢ ܢܸܪܢܸܐ ܕܠܵܐ ܒܘܼܠܒܵܠܵܐ: ܘܲܠܫܘܼܚܠܵܦܵܐ
ܕܐܘܼܪܤ̈ܝܼܵܣ: ܘܬܼܘܼܒܼ ܕܠܵܐ ܢܸܪܢܸܐ ܬܪܹܝܢ: ܐܸܠܵܐ ܚܲܕܼ. . ܡܲܢܘܼ
ܡܸܤܬܲܟܲܠ ܒܠܵܐ ܒܘܼܠܒܵܠܵܐ ܒܘܼܠܒܵܠܵܐ: ܘܕܲܢܦܲܠܸܓܼ ܠܲܒܼ̈ܢܵܬܼ ܩܵܠܹ̈ܐ
ܠܦܲܪ̈ܨܘܿܦܹܐ ܐܵܘ ܠܲܩܢܘܿܡܹ̈ܐ ܬܪܹܝܢ: ܘܲܕܼܠܵܐ ܢܦܲܠܸܓܼ ܠܦܲܪ̈ܨܘܿܦܹܐ
ܐܵܘ ܠܲܩܢܘܿܡܹ̈ܐ ܬܪܹܝܢ؟ ܗܵܠܹܝܢ ܤܢܝܼ̈ܩܵܢ ܥܲܠ ܒܘܼܚܵܢܵܐ ܤܲܓܿܝܼܐܵܐ:
ܠܒܼܘܼܚܵܢܵܐ ܚܲܬܿܝܼܬܼܵܐ ܕܗܵܚܲܘܼܬܼܵܐ ܘܕܲܐ̄ܚܪܵܢܵܝܘܼܬܼܵܐ. ܐܸܢ ܐ̄ܢܵܫ ܠܲܡ
ܠܦܲܪ̈ܨܘܿܦܹܐ ܬܪܹܝܢ ܐܵܘ ܠܲܩܢܘܿܡܹ̈ܐ ܡܦܲܠܸܓܼ ܠܲܒܼ̈ܢܵܬܼ ܩܵܠܹ̈ܐ: ܘܬܼܘܼܒܼ
ܕܫܘܼܚܠܵܦܵܐ ܕܹܝܢ ܕܲܒܼ̈ܢܵܬܼ ܩܵܠܹ̈ܐ ܘܠܵܐ ܒܚܲܕܼ ܡ̣ܢ ܙܢܝܼ̈ܢ ܐܲܪܝܼܡܢ ܚ̄ܢܲܢ.
ܗܵܘ̇ ܕܐܸܡܲ݁ܪ ܕܠܵܐ ܙܵܕܹܩ ܠܲܡܦܲܠܵܓܼܘܼ ܠܲܒܼ̈ܢܵܬܼ ܩܵܠܹ̈ܐ ܠܦܲܪ̈ܨܘܿܦܹܐ
ܐܵܘ ܠܲܩܢܘܿܡܹ̈ܐ: ܬܘܼܒܼ ܠܲܬܼܪܹܝܢ ܫܘܼܚ̈ܠܵܦܹܐ ܕܲܒܼ̈ܢܵܬܼ ܩܵܠܹ̈ܐ ܐܵܦ
ܠܵܐ ܒܚܲܕܼ ܙܢܵܐ ܡܟܪܝܼܡ. ܒܐܲܝܢܵܐ ܓܝܼܪ ܙܢܵܐ ܡ̣ܢ ܟܠ ܦܪܘܿܣ ܠܵܐ
ܙܵܕܹܩ ܠܲܡܦܲܠܵܓܼܘܼ ܠܲܒܼ̈ܢܵܬܼ ܩܵܠܹ̈ܐ ܠܦܲܪ̈ܨܘܿܦܹܐ ܐܵܘ ܠܲܩܢܘܿܡܹ̈ܐ؟ ܡ̣ܢ
pb. 423
ܬܪܹܝܢ ܡܲܪܚܸܩ ܐܲܢ̄ܬܿ ܠܲܢ. ܐܲܝܟܲܢܵܐ ܡܵܕܹܝܢ ܫܘܼܚܠܵܦܵܐ ܕܲܒܼ̈ܢܵܬܼ ܩܵܠܹ̈ܐ:
ܘܠܵܐ ܒܚܲܕܼ ܡ̣ܢ ܙܢܝܼ̈ܢ ܐܲܪܝܼܡ̣ܬܿ؟ ܐܵܦܸܢ ܠܲܡ ܕܚܲܩܢܲܢ ܠܒܲܪ: ܠܗܵܝ̇
ܕܲܢܦܲܠܸܓܼ ܐܸܢܹܝܢ ܐܲܝܟܼ ܕܠܲܒܼܪܵܐ: ܠܚܘܿܕܵܐܝܼܬܼ ܠܡܸܠܬܼܵܐ ܕܡ̣ܢ ܐܲܒܼܵܐ:
ܘܐܲܝܟܼ ܕܲܠܒܲܪܢܵܫܵܐ ܬܘܼܒ ܕܲܠܚܘܿܕܵܐܝܼܬܼ ܒܪܵܐ ܡܸܬܼܝܼܕܲܥ ܡ̣ܢ ܐܲܢ̄ܬܿܬܼܵܐ.
ܚܲܕܼ ܗ̄ܘ̣ ܓܹܝܪ ܘܫܲܪܝܼܪܵܐܝܼܬܼ ܟܝܵܢܹܗ ܕܡܸܠܬܼܵܐ: ܝܵܕܼܥ̇ܝܼܢ ܚ̄ܢܲܢ ܓܹܝܪ
ܕܐܸܬܼܓܲܫܲܡ ܘܐܸܬܼܒܲܪܢܲܫ. .
ܒܐܲܝܢܵܐ ܡܵܕܹܝܢ ܙܢܵܐ ܠܫܘܼܚܠܵܦܵܐ ܕܲܒܼ̈ܢܵܬܼ ܩܵܠܹ̈ܐ ܠܵܐ ܒܲܛܸܠܬܿ:
ܐܸܠܵܐ ܐܵܡܲ݁ܪ ܐܲܢ̄ܬܿ ܠܲܒܼܪܵܐ ܡܬܼܘܿܡܵܝܵܐ ܕܒܲܟܼܝܵܢܵܐ ܐܝܼܬܼܵܘܗܝ ܐܲܠܵܗܵܐ
ܡܸܠܬܼܵܐ؟ ܐܸܡܲܪ ܘܒܲܚܕܼܵܝܘܼܬܼܵܐ: ܘܠܵܘ ܒܡܸܬܼܪܲܡܩܵܢܘܼܬܼܵܐ: ܬܸܬܸܿܠ ܐܵܦ
ܒܸܤܪܵܐ. ܐܲܝܢܵܐ ܗ̄ܘ̣ ܫܘܼܚܠܵܦܵܐ ܕܲܒܼ̈ܢܵܬܼ ܩܵܠܹ̈ܐ ܕܠܵܐ ܐܪܝܼܡ̣ܬܿ؟
ܫܘܼܚ̈ܠܵܦܹܐ ܓܹܝܪ ܕܤܘܼܥܪ̈ܵܢܹܐ ܕܤܝܼܡܝܼܢ ܩܕܼܵܡܲܝܢ ܐܝܼܬܲܝܗܘܿܢ:
ܘܫܘܼܚ̈ܠܵܦܹܐ ܡ̣ܢ ܒܢܵܬܼ̈ ܩܵܠܹ̈ܐ ܡܸܬܿܬܿܤܝܼܡܝܼܢ. ܟܲܕܼ ܠܵܐ ܓܹܝܪ
ܐܝܼܬܼܵܘܗܝ ܫܘܼܚܠܵܦܵܐ: ܐܵܦ ܫܘܼܚܠܵܦܵܐ ܕܲܒܼ̈ܢܵܬܼ ܩܵܠܹ̈ܐ ܡܸܬܼܒܲܛܲܠ.
ܬܪܹܝܢ ܟܝܵܢܹ̈ܐ ܡܵܘܕܹܐ ܕܚܲܕܼ ܡܫܝܼܚܵܐ ܘܲܒܼܪܵܐ: ܐܵܦ ܬܪܹܝܢ ܫܘܼܚ̈ܠܵܦܹܐ.
ܘܲܠܦܘܼܬܼ ܫܘܼܚ̈ܠܵܦܹܐ ܕܲܟܼܝܵܢܹ̈ܐ: ܫܘܼܚ̈ܠܵܦܹܐ ܕܒܼ̈ܢܵܬܼ ܩܵܠܹ̈ܐ ܥܵܒܹ̇ܕܼ:
ܘܲܡܦܲܠܸܓܼ ܐܵܦ ܠܲܒܼ̈ܢܵܬܼ ܩܵܠܹ̈ܐ ܕܲܡ̈ܡܲܠܠܲܝ ܐܲܠܵܗܵܝ̈ܬܼܵܐ. ܐܲܝܟܲܢܵܐ ܕܲܒܸܩܬܿ
ܐܸܢܘܿܢ ܠܗܵܢܘܿܢ ܕܡܦܲܠܓܼܝܼܢ: ܐܲܢ̄ܬܿ ܕܲܠܗܵܘ̇ ܕܲܡܦܲܠܸܓܼ ܠܗܹܝܢ:
ܒܒܲܪܬܼ ܩܵܠܵܐ ܡܲܦܪܲܓܼܬܼܵܐ ܡܩܲܒܸܿܠ ܐܲܢ̄ܬܿ ܠܹܗ؟ ܐܲܝܟܲܢܵܐ ܬܪܹܝܢ
ܟܝܵܢ̈ܝܼܢ ܕܲܚܕܼܵܝܘܼܬܼܵܐ ܡܵܘܕܸܐ ܐܲܢ̄ܬܿ: ܕܚܲܕܼ ܡܫܝܼܚܵܐ ܘܚܲܕܼ ܒܪܵܐ:
ܘܬܼܘܼܒܼ ܚܲܕܼ ܟܝܵܢܵܐ ܕܐܲܠܵܗܵܐ ܡܸܠܬܼܵܐ؟ ܐܸܡܲܪܬܿ ܓܹܝܪ: ܕܚܲܕܼ ܟܝܵܢܵܐ
pb. 424
ܡܵܘܕܹܝܢ ܚ̄ܢܲܢ ܕܐܲܠܵܗܵܐ ܡܸܠܬܼܵܐ: ܘܠܵܐ ܗ̄ܘ̣ܵܐ ܬܪܹܝܢ ܕܲܡܚܲܕܝܼܢ. ܚܲܕܼ
ܒܪܵܐ ܐܵܡܲ݁ܪ ܐܲܢ̄ܬܿ: ܬܪܹܝܢ ܓܹܝܪ ܟܝܵܢܹ̈ܐ ܕܠܵܐ ܦܘܼܪܫܵܢܵܐ ܐܵܡܲ݁ܪ ܐܲܢ̄ܬܿ
ܠܲܒܼܪܵܐ. ܘܬܼܘܼܒܼ ܚܲܕܼ ܟܝܵܢܵܐ ܒܲܠܚܘܿܕܼ: ܘܠܵܐ ܬܘܼܒܼ ܬܪܹܝܢ ܕܠܵܐ
ܦܘܼܪܫܵܢܵܐ ܝܵܗܹ̇ܒܼ ܐܲܢ̄ܬܿ ܠܐܲܠܵܗܵܐ ܡܸܠܬܼܵܐ. ܘܕܐܝܼܬܼܵܘܗܝ ܒܪܵܐ
ܡܒܲܤܪܵܐ ܐܵܡܲ݁ܪ ܐܲܢ̄ܬܿ: ܘܬܼܘܼܒܼ ܕܠܵܐ ܗ̄ܘ̣ܵܐ ܒܒܸܤܪܵܐ. ܐܸܠܵܐ ܐܸܢ
ܕܲܠܡܵܐ ܐ̄ܚܪܹܢܵܐ ܒܪܵܐ ܐܵܡܲ݁ܪ ܐܲܢ̄ܬܿ ܠܐܲܠܵܗܵܐ ܡܸܠܬܼܵܐ ܒܚܲܕܼ ܟܝܵܢܵܐ
ܡܒܲܤܪܵܐ: ܐ̄ܚܪܹܢܵܐ ܠܲܒܼܪܵܐ ܕܡ̣ܢ ܬܪܹܝܢ ܟܝܵܢ̈ܝܼܢ ܡܚܲܝ̈ܕܹܐ: ܠܚܲܕܼ
ܡܫܝܼܚܵܐ ܘܚܲܕܼ ܒܪܵܐ. ܚܲܕܼ ܟܝܵܢܵܐ ܡܒܲܤܪܵܐ ܠܵܐ ܡܲܡܪܲܚ ܐܲܢ̄ܬܿ
ܠܡܹܐܡܲܪ: ܠܚܲܕܼ ܟܝܵܢܵܐ ܕܹܝܢ ܕܐܲܠܵܗܵܐ ܡܸܠܬܼܵܐ ܕܲܡܒܲܤܲܪ ܬܟܼܝܼܠܵܐܝܼܬܼ
ܦܵܤܹ̇ܩ ܐܲܢ̄ܬܿ. ܡܵܢܵܐ ܗܵܟܹܝܠ؟ ܐ̄ܚܪܹܢܵܐ ܐܝܼܬܼܵܘܗܝ ܒܪܵܐ ܐܲܠܵܗܵܐ ܡܸܠܬܼܵܐ
ܚܲܕܼ ܟܝܵܢܵܐ: ܐ̄ܚܪܹܢܵܐ ܕܹܝܢ ܒܪܵܐ ܒܲܬܼܪܹܝܢ ܟܝܵܢ̈ܝܼܢ: ܕܡܸܢܗܘܿܢ ܐܝܼܬܼܵܘܗܝ
ܒܪܵܐ ܚܲܕܼ ܒܲܠܚܘܿܕܼܵܘܗܝ. ܠܵܐ ܗ̄ܘ̣ܵܐ ܓܹܝܪ ܟܝܵܢܵܐ ܕܐܲܠܵܗܵܐ ܡܸܬܼܐܡܲܪ
ܕܲܬܼܪܹܝܢ ܟܝܵܢ̈ܝܼܢ ܐܝܼܬܼܵܘܗܝ: ܐܸܠܵܐ ܚܲܕܼ ܟܝܵܢܵܐ. ܐܲܝܟܲܢܵܐ ܕܲܡܫܝܼܚܵܐ ܚܲܕܼ
ܒܪܵܐ ܬܹܐܡܲܪ ܐܲܢ̄ܬܿ ܒܲܬܼܪܹܝܢ ܟܝܵܢ̈ܝܼܢ: ܘܗܸܢܹܝܢ ܗܵܠܹܝܢ ܐܲܢ̄ܬܿ ܐܵܡܲ݁ܪ ܐܲܢ̄ܬܿ:
ܘܲܬܼܪܹܝܢ ܟܝܵܢ̈ܝܼܢ ܕܚܲܕܼ ܒܼܪܵܐ: ܘܚܲܕܼ ܟܝܵܢܵܐ ܕܐܲܠܵܗܵܐ ܡܸܠܬܼܵܐ. ܘܡ̣ܢ
ܬܪܹܝܢ ܟܝܵܢ̈ܝܼܢ ܠܵܐ ܕܵܡ̈ܝܲܝ ܠܲܚ̈ܕܼܵܕܹܐ ܠܲܒܼܪܵܐ ܐܵܡܲ݁ܪ ܐܲܢ̄ܬܿ: ܘܲܡܝܼܡ
ܐܲܢ̄ܬܿ ܠܹܗ ܬܘܼܒܼ: ܘܚܲܕܼ ܟܝܵܢܵܐ ܒܲܠܚܘܿܕܼ ܝܵܗܹ̇ܒܼ ܐܲܢ̄ܬܿ ܠܹܗ. ܘܲܡܪܝܼܡ
ܐܲܢ̄ܬܿ ܠܚܲܕܼ: ܐܵܡܲ݁ܪ ܐ̄ܢܵܐ ܕܹܝܢ ܠܐ̄ܢܵܫܘܼܬܼܵܐ: ܐܲܝܟܼ ܕܠܵܐ ܬܸܘܗܸܐ
ܒܲܚܕܼܵܝܘܼܬܼܵܐ ܒܪܵܐ. ܘܐܵܠܹ̇ܨ ܐܲܢ̄ܬܿ ܒܡܸܠܬܼܵܐ ܕܲܟܼܝܵܢܹ̈ܐ: ܕܲܠܕܼܝܼ̈ܠܵܝܵܬܼܵܐ
ܕܟܼܠ ܚܲܕܼ ܡܸܢܗܘܿܢ ܢܦܲܪܸܫ: ܟܲܕܼ ܨܵܒܹ̇ܐ ܐܲܢ̄ܬܿ ܘܟܲܕܼ ܠܵܐ
ܨܵܒܹ̇ܐ ܐܲܢ̄ܬܿ.
pb. 425
ܡܸܛܠ ܐܲܝܕܵܐ ܓܹܝܪ ܠܚܲܕܼ ܟܝܵܢܵܐ ܕܐܲܠܵܗܵܐ ܡܵܠܬܼܵܐ ܐܸܡܲܪܬܿ: ܘܠܵܐ
ܗ̄ܘ̣ܵܐ ܬܪܹܝܢ ܟܝܵܢ̈ܝܼܢ ܕܲܡܚܲܝܕܝܼܢ؟ ܘܠܵܐ ܬܘܼܒܼ: ܕܡܸܢܗܘܿܢ ܐܝܼܬܼܵܘܗܝ
ܚܲܕܼ ܒܲܠܚܘܿܕܼ ܐܲܠܵܗܵܐ ܡܸܠܬܼܵܐ ܐܲܡܪܲܚܬܿ ܠܡܸܐܡܲܪ: ܐܲܝܟܲܢܵܐ ܕܐܸܡ݂ܲܪܬܿ:
ܕܡܸܢܗܘܿܢ ܚܲܕܼ ܒܲܠܚܘܿܕܼ ܒܪܵܐ. ܢܸܗܘܸܐ ܐܲܝܟܼ ܕܐܸܡܲܪܬܿ: ܕܲܒܼܪܸܥܝܵܢܵܐ
ܡܸܬܼܩܲܒܿܠܝܼܢ ܬܪܹܝܢ ܟܝܵܢ̈ܝܼܢ ܕܲܡܚܲܝܕܝܼܢ ܐܵܡ̇ܪܝܿܢ. ܗܵܟܲܢܵܐ ܐܸܡܲܪ
ܐܵܦ ܥܲܠ ܐܲܠܵܗܵܐ ܡܸܠܬܼܵܐ: ܕܡܸܢܗܘܿܢ ܐܝܼܬܼܵܘܗܝ ܚܲܕܼ ܒܲܠܚܘܿܕܼ
ܐܲܠܵܗܵܐ ܡܸܠܬܼܵܐ ܬܪܹܝܢ. ܐܸܢܵܐ ܡ̇ܢ ܬܪܹܝܢ ܟܝܵܢ̈ܝܼܢ ܕܲܡܚܲܕܝܼܢ ܐܸܡܲ݁ܪ
ܐ̄ܢܵܐ: ܟܲܕܼ ܢܵܩܹ̇ܦ ܐ̄ܢܵܐ ܠܲܟܼܬܼܵܒܹ̈ܐ ܐܲܠܵܗܵܝܹ̈ܐ ܘܲܠܡܲܠܦܲܢ̈ܘܵܬܼܵܐ
ܐܲܠܵܗܵܝ̈ܬܼܵܐ:
ܘܕܲܐܠܵܗܵܐ ܡܸܠܬܼܵܐ ܡܵܘܕܥܵܢܵܐ ܐܝܼܬܼܵܘܗܝ ܕܲܟܼܝܵܢܵܐ: ܒܪܵܐ ܕܹܝܢ ܕܦܲܪܨܘܿܦܵܐ.
ܚܲܕܼ ܗ̄ܘ̣ ܕܹܝܢ ܗ̤ܘ ܟܲܕܼ ܗ̤ܘ ܐܲܠܵܗܵܐ ܡܸܠܬܼܵܐ. ܐܲܟܼܙܢܵܐ ܕܐܲܠܵܗܵܐ
ܡܵܘܕܥܵܢܵܐ ܐܝܼܬܼܵܘܗܝ ܕܲܟܼܝܵܢܵܐ: ܐܲܒܼܵܐ ܕܹܝܢ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ
ܕܦܲܪ̈ܨܘܿܦܹܐ. ܡܸܛܠ ܗܵܢܵܐ ܐܲܠܵܗܘܼܬܼܵܐ ܡ̇ܢ ܚܕܼܵܐ. ܦܲܪ̈ܨܘܿܦܹܐ ܕܹܝܢ
ܬܠܵܬܼܵܐ. ܐܲܠܵܗܵܐ ܗ̄ܘ̣ ܓܹܝܪ ܐܲܒܼܵܐ: ܘܐܲܠܵܗܵܐ ܒܪܵܐ: ܘܐܲܠܵܗܵܐ ܪܘܚܵܐ
ܕܩܘܼܕܼܫܵܐ. ܠܵܐ ܗ̄ܘ̣ܵܐ ܕܠܵܐ ܐܘܼܤܝܼܵܐ ܐܼܬܲܝܗܘܿܢ ܦܲܪ̈ܨܘܿܦܹܐ. ܬܘܼܒܼ
ܕܹܝܢ ܒܹܗ ܒܲܙܢܵܐ: ܗܵܟܲܢܵܐ ܐܵܦ ܥܲܠ ܡܫܝܼܚܵܐ. ܬܪܹܝܢ ܟܝܵܢܹ̈ܐ: ܚܲܕܼ
ܕܐܲܠܵܗܵܐ ܡܸܠܬܼܵܐ: ܘܚܲܕܼ ܕܐ̄ܢܵܫܘܼܬܼܵܐ. ܚܲܕܼܸ ܕܹܝܢ ܦܲܪܨܘܿܦܵܐ ܕܲܒܼܪܵܐ: ܗܵܘ̇
ܕܐܵܦ ܐ̄ܢܵܫܘܼܬܼܵܐ ܒܹܗ ܟܲܕܼ ܒܹܗ ܡܸܬܼܚܲܫܚܵܐ. ܘܚܲܕܼ ܒܲܪܢܵܫܵܐ: ܗܵܘ̇
ܕܐܵܦ ܐܲܠܵܗܘܼܬܼܵܐ ܒܹܗ ܟܲܕܼ ܒܹܗ ܡܸܬܼܚܲܫܚܵܐ. ܠܵܐ ܗ̄ܘ̣ܵܐ ܒܲܟܼܝܵܢܵܐ:
ܐܸܠܵܐ ܒܦܲܪܨܘܿܦܵܐ ܟܝܵܢܵܝܵܐ ܕܲܟܼܝܵܢܹ̈ܐ. ܟܝܵܢܹ̈ܐ ܓܹܝܪ ܐܵܦ ܒܲܚܕܼܵܝܘܼܬܼܵܐ:
ܕܠܵܐ ܒܘܼܠܒܵܠܵܐ ܡܩܵܘܹܝܢ. ܘܠܵܐ ܟܝܵܢܹ̈ܐ ܕܠܵܐ ܦܲܪ̈ܨܘܿܦܹܐ: ܘܠܵܐ
ܬܘܼܒܼ ܦܵܪ̈ܨܘܿܦܹܐ ܕܠܵܐ ܐܘܼܤܝܼܵܐ. ܘܐܵܦ ܠܵܐ ܐܲܝܟܼ ܕܒܲܟܼܝܵܢܵܐ ܕܚܲܝܘܼܬܼܵܐ
ܗܘ̤ܵܬܼ ܚܕܼܵܝܘܼܬܼܵܐ ܠܫܘܼܡܠܵܝܵܐ ܕܲܚܕܼܵܐ ܚܲܝܘܼܬܼܵܐ: ܗܵܝ̇ ܕܬܸܗܘܸܐ
pb. 426
ܡܫܲܡܠܝܵܐ ܢܸܤܒܲܬ̤ ܡ̣ܢ ܬܪ̈ܲܝܗܘܿܢ. ܐܸܠܵܐ ܡ̣ܢ ܬܪܹܝܢ ܟܝܵܢ̈ܝܼܢ
ܡܫܲܡ̈ܠܲܝܵܐ: ܡ̣ܢ ܐ̄ܚܪܹܢܵܐ ܐ̄ܚܪܹܢܵܐ ܒܒܲܝܬܵܝܘܼܬܼܵܐ ܡܸܬܼܐܡܲܪ. ܘܠܵܐ ܗ̄ܘ̣ܵܐ
ܒܲܟܼܝܵܢܵܐ: ܐܸܠܵܐ ܒܦܲܪܨܘܿܦܵܐ ܟܝܵܢܵܝܵܐ ܕܲܟܼܝܵܢܹ̈ܐ: ܘܠܵܐ ܗ̄ܘ̣ܵܐ ܒܲܟܼܝܵܢܵܐ
ܐ̄ܚܪܹܢܵܐ.
ܗܵܘ̇ ܕܐܝܬܼܵܘܗܝ ܐ̄ܚܪܹܢܵܐ: ܒܲܟܼܝܵܢܵܐ ܡܸܬܼܐܡܲ. ܒܲܟܼܝܵܢܵܐ ܓܹܝܪ ܒܪܵܐ
ܕܐܲܠܵܗܵܐ: ܐܲܠܵܗܵܐ ܡܸܠܬܼܵܐ. ܐܲܝܟܲܢܵܐ ܕܐܵܦ ܐ̄ܢܵܫܘܼܬܼܵܐ ܒܹܗ ܟܲܕܼ ܒܹܗ
ܡܸܬܼܚܲܫܚܵܐ: ܒܒܲܝܬܵܝܘܼܬܼܵܐ ܕܲܚܕܼܵܝܘܼܬܼܵܐ: ܘܠܵܐ ܗ̄ܘ̣ܵܐ ܒܲܟܼܝܵܢܵܐ. ܡܫܝܼܚܵܐ
ܠܲܡ ܓܹܝܪ ܐܸܬܼܸܡܵܠܝ ܘܝܵܘܡܵܢܵܐ ܗ̤ܘܝܘܼ ܘܠܥܵܠܲܡ. ܗ̤ܘܝܘܼ
ܒܦܲܪܨܘܿܦܵܐ: ܠܵܐ ܗ̄ܘ̣ܵܐ ܒܹܗ ܟܲܕܼ ܒܹܗ ܒܲܟܼܝܵܢܵܐ:
ܡܵܢܵܐ ܡܒܲܪܸܟܼ ܢܲܦܫܵܟܼ ܘܡܵܘܕܸܐ ܐܲܢ̄ܬܿ: ܕܠܵܐ ܗ̄ܘ̣ܵܐ ܗ̤ܘܝܘܼ ܟܲܕܼ
ܗ̤ܘ ܒܐܘܼܤܝܼܵ. ܐܵܘ ܐܲܝܟܼ ܕܐܲܢ̄ܬܿ ܐܸܡܲܪܬܿ: ܒܲܙܢܵܐ ܟܝܵܢܵܝܵܐ ܕܐ̄ܢܵܫܘܼܬܼܵܐ
ܘܕܲܐܠܵܗܘܼܬܼܵܐ: ܐܸܢܗܘ̤ ܕܲܙܢܵܐ ܙܵܕܹܩ ܠܡܸܩܪܵܐ ܠܲܟܼܝܵܢܵܐ؟ ܘܬܘܼܒܼ
ܕܲܟܼܝܵܢܵܐ ܕܐܲܠܵܗܘܼܬܼܵܐ ܘܲܕܼܐ̄ܢܵܫܘܼܬܼܵܐ: ܕܲܡܚܲܝܕܝܼܢ ܕܹܝܢ ܕܠܵܐ ܒܘܼܠܒܵܠܵܐ
ܡܵܘܕܸܐ ܐܲܢ̄ܬܿ. ܬܪܹܝܢ ܕܠܵܐ ܡܒܲܠܒܿܠܝܼܢ: ܘܲܕܼܒܲܚ̈ܕܼܵܕܹܐ ܡܟܲܢܫܝܼܢ
ܡܸܤܬܿܟܲܠ ܐܲܢ̄ܬܿ. ܐܵܦ ܡܵܘܕܸܐ ܐܲܢ̄ܬܿ ܠܦܘܼܬܼ ܟܝܵܢܹ̈ܐ: ܡܸܛܠ ܕܲܕܼܠܵܐ
ܒܘܼܠܒܵܠܵܐ ܡܩܵܘܹܝܢ. ܘܒܲܟܼܝܵܢܵܐ ܕܟܼܠ ܚܲܕܼ ܚܲܕܼ ܡܸܢܗܘܿܢ ܡܸܬܼܪܢܹܝܢ
ܚܲܕܼ: ܟܲܕܼ ܠܵܘ ܒܦܲܪܨܘܿܦܵܐ ܡܵܘܕܹܐ ܐܲܢ̄ܬܿ: ܐܸܠܵܐ ܒܲܟܼܝܵܢܵܐ. ܘܲܡܒܲܛܸܠ
ܐܲܢ̄ܬܿ ܠܲܬܼܪܹܝܢ: ܕܲܕܼܠܵܐ ܒܘܼܠܒܵܠܵܐ ܐܸܬܿܬܵܘܕܝܼܘ ܡܸܢܵܟܼ. ܕܲܕܼܠܵܐ
ܒܘܼܠܵܒܵܠܵܐ ܓܹܝܪ ܐܸܐܬܼܚܲܝܲܕܼܘ ܬܪܹܝܢ ܡܵܘܕܸܐ ܐܲܢ̄ܬܿ: ܘܬܼܘܼܒܼ ܐܲܝܟܼ ܡ̇ܢ
ܕܲܡܒܛܸܠ ܦܘܼܪܫܵܢܵܐ ܕܲܬܼܪܹܝܢ: ܠܵܐ ܡܸܬܼܪܢܹܝܢ ܬܪܹܝܢ ܗܵܘ̇ ܡܵܐ ܕܚܲܕܼ.
ܐܸܢܗ̤ܘ ܕܠܵܐ ܐܝܼܬܼ ܗ̄ܘ̣ܵܐ ܒܪܸܥܝܵܢܵܟܼ ܠܵܐ ܒܘܼܠܒܵܠܵܐ ܕܬܲܪܬܹܝܢ
ܐܘܼܤ̈ܝܼܵܣ: ܒܗܵܝ̇ ܕܠܲܚܕܼܵܐ ܐܘܼܤܝܼܵܐ ܐܸܬܼܟܲܢܲܫ: ܐܲܝܟܲܢܵܐ ܡܵܕܹܝܢ ܐܵܡܵ݁ܪ
pb. 427
ܐܲܢ̄ܬܿ: ܕܙܵܕܹܩ ܠܡܵܘܕܵܝܘܼ ܕܠܵܐ ܒܘܼܠܒܵܠܵܐ ܠܲܚܕܼܵܝܘܼܬܼܵܐ ܗܵܕܹܐ؟
ܘܬܼܘܼܒܼ ܠܵܐ ܢܸܪܢܸܐ ܕܲܕܼܠܵܐ ܒܘܼܠܒܵܠܵܐ ܐܸܬܼܚܲܝܲܕܼܘ: ܗܵܡ̇ܘܿܢ ܕܲܕܼܠܵܐ
ܒܘܼܠܒܵܠܵܐ ܐܸܬܼܚܲܝܲܕܼܘ. ܐܵܘ ܐܲܟܼܙܢܵܐ ܕܗܵܝ̇ ܕܐܸܡܲܪܬܿ: ܕܲܚܕܼܵܝܘܼܬܼܵܐ
ܗܘ̤ܵܬܼ ܡ̣ܢ ܬܪܹܝܬ ܟܝܵܢ̈ܝܼܢ ܠܚܲܕܼ ܒܪܵܐ. ܡ̣ܢ ܒܵܬܲܪ ܚܕܼܵܝܘܼܬܼܵܐ ܕܹܝܢ:
ܡܪܝܼܡ ܐܲܢ̄ܬܿ ܡ̣ܢ ܚܕܼܵܝܘܼܬܼܵܐ ܕܲܠܚܲܕܼ ܒܪܵܐ ܠܐ̄̈ܢܵܫܘܼܬܼܵܐ: ܕܐܸܬܿܕܲܚܩܲܬ̤
ܡ̣ܢ ܚܕܼܵܝܘܼܬܼܵܐ ܕܲܠܚܲܕܼ ܒܪܵܐ: ܘܲܠܒܲܪ ܡ̣ܢ ܚܕܼܵܝܘܼܬܼܵܐ ܡܸܟܹܝܠ
ܡܸܬܼܪܲܢܝܵܐ. ܗܵܝ̇ ܕܹܝܢ ܒܲܠܚܘܿܕܹܝܗ̇ ܡܸܬܼܪܲܢܝܵܐ ܐܘܼܤܝܼܵܐ ܕܲܒܼܪܵܐ: ܘܠܵܐ
ܬܘܼܒܼ ܗܵܢ̇ܘܿܢ ܕܡܸܢܗܘܿܢ ܐܝܼܬܼܵܘܗܝ ܡܸܬܼܪܢܹܝܢ ܒܚܲܕܼ ܒܪܵܐ: ܐܸܠܵܐ
ܚܲܕܼ ܟܝܵܢܵܐ ܒܲܠܚܘܿܕܼ. ܐܸܠܵܐ ܐܸܡܲ݁ܪ ܐܲܢ̄ܬܿ: ܕܚܲܕܼ ܟܝܵܢܵܐ ܒܲܠܚܘܿܕܼ ܐܝܼܬܼܵܘܗܝ.
ܐܸܡܬܼܝ ܠܲܡ ܕܹܝܢ ܕܗ̤ܘ ܙܢܵܐ ܕܡܸܬܼܓܲܫܡܵܢܘܼܬܼܵܐ ܡܸܬܼܥܲܩܲܒܼ:
ܬܪܹܝܢ ܡܸܕܸܡ ܕܠܲܚ̈ܕܼܵܕܹܐ ܠܵܐ ܡܸܬܼܡܲܠܠܵܢܵܐܝܼܬܼ ܘܠܵܐ ܡܒܲܠܒܿܠܵܐܝܼܬܼ
ܒܲܚܕܼܵܝܘܼܬܼܵܐ ܚܕܼܵܐ: ܚܵܙܹ̇ܐ ܡ̣ܢ ܟܠ ܦܘܿܪܣ ܡܲܕܥܵܐ ܐ̄ܢܵܫܵܝܵܐ. ܡܵܐ ܕܹܝܢ
ܕܐܸܬܼܚܲܝܲܕܼܘ: ܠܲܓܼܡܵܪ ܠܵܐ ܡܦܲܪܸܫ. ܐܸܠܵܐ ܕܚܲܕܼ ܡ̣ܢ ܬܪ̈ܲܝܗܘܿܢ
ܐܝܼܬܼܵܗܝ: ܘܐܲܠܵܗܵܐ ܘܲܒܼܪܵܐ ܘܡܵܪܝܵܬ ܘܲܡܫܝܼܚܵܐ ܡܗܲܝܡܸܢ. ܕܚܲܕܼ
ܒܡܵܢܵܐ ܐܸܡܲ݁ܪ ܐܲܢ̄ܬܿ؟ ܒܦܲܪܨܘܿܦܵܐ ܕܲܚܕܼܵܝܘܼܬܼܵܐ ܕܲܟܼܝܵܢܹ̈ܐ ܕܐܸܬܼܚܲܝܲܕܼܘ؟
ܗܵܟܲܢܵܐ ܡܵܕܹܝܢ ܚܵܘܹ̇ܐ ܡܲܕܥܵܐ ܐ̄ܢܵܫܵܝܵܐ: ܠܗܵܢ̇ܘܿܢ ܕܲܡܚܲܕܝܼܢ ܕܠܵܐ
ܒܘܼܠܒܵܠܵܐ. ܕܠܵܐ ܒܘܼܠܒܵܠܵܐ ܕܹܝܢ ܐܝܼܬܲܝܗܘܿܢ ܒܟܼܝܵܢܹ̈ܐ ܕܝܼܠܗܘܿܢ
ܘܒܼܐܘܼܤܝܼܵܐ ܕܝܼܠܗܘܿܢ: ܘܲܡܩܵܘܹܝܢ ܘܡܸܬܼܪܢܹܝܢ ܗܵܟܲܢܵܐ. ܗܵܢܵܐ ܗܵܘ̇
ܠܵܐ ܡܸܬܼܪܢܸܐ ܒܐܘܼܤܝܼܵܐ: ܘܐܵܦ ܠܵܐ ܗܵܘ̇ ܗܵܢܵܐ. ܒܡܸܠܬܼܵܐ ܓܹܝܪ
ܕܐܘܼܤܝܼ̈ܣ: ܦܘܼܪܫܵܢܵܐ ܐܝܼܬܼ ܒܲܟܼܝܵܢܵܐ ܕܟܼܠ ܚܲܕܼ ܡܸܢܗܘܿܢ: ܐܵܦ
ܡܸܬܼܪܢܸܐ ܐܵܦ ܐܝܼܬܼܵܘܗܝ. ܒܟܼܘܼܢܵܫܵܐ ܕܹܝܢ ܕܲܟܼܝܵܢܹ̈ܐ: ܒܗܘܿܢ ܟܲܕܼ
pb. 428
ܒܗܘܿܢ ܕܠܵܐ ܦܘܼܪܵܫܵܐ ܐܝܼܬܼܵܘܗܝ ܘܲܕܼܠܵܐ ܦܘܼܠܵܓܼܵܐ ܚܲܕܼ ܦܲܪܨܘܼܦܵܐ.
ܒܦܲܪܨܘܿܦܵܐ ܟܝܵܢܵܝܵܐ: ܚܲܕܼ ܟܝܵܢܵܐ: ܒܦܲܪܨܘܿܦܵܐ ܕܲܟܼܝܵܢܵܐ ܐ̄ܚܪܹܢܵܐ
ܡܸܬܼܚܲܫܲܚ ܒܹܗ ܟܲܕܼ ܒܹܗ. ܗܵܟܲܢܵܐ ܗܵܟܹܝܠ ܟܝܵܢܹ̈ܐ ܕܐܸܬܼܚܲܝܲܕܼܘ: ܕܠܵܐ
ܒܘܼܠܒܵܠܵܐ ܐܸܢܘܿܢ: ܘܠܵܐ ܡܬܼܘܿܡ ܡܸܬܼܦܲܠܓܼܝܢ ܒܵܗ̇ ܟܲܕܼ ܒܵܗ̇. ܒܗܵܝ̇
ܕܲܒܼܡܸܠܬܼܵܐ ܕܲܟܼܝܵܢܹ̈ܐ ܐܝܼܬܲܝܗܘܿܢ: ܒܦܘܼܪܫܵܢܵܐ ܕܲܟܼܝܵܢܹ̈ܐ ܕܝܼܠܹܗܘܿܢ
ܡܸܬܼܪܢܹܝܢ.
ܩܘܼܪܸܠܘܿܣ. ܐܸܠܵܐ ܕܲܐ̄ܚܪܹܬܼܵܐ ܠܲܡ ܐܝܼܬܹܝܗ̇ ܠܲܓܼܡܵܪ ܠܒܲܪ ܡ̣ܢ
ܗܵܕܹܐ: ܒܝܼܫܘܼܬܼ ܬܲܪܥܝܸܬܹܗ ܕܢܸܤܛܘܿܪܝܼܣ. ܡܚܵܘܸܐ ܓܹܝܪ ܕܡܵܘܕܹܐ:
ܕܐܸܬܼܓܲܫܲܡ ܘܕܸܐܬܼܒܲܪܢܲܫ ܡܸܠܬܼܵܐ ܕܐܝܼܬܼܵܘܗܝ ܐܲܠܵܗܵܐ: ܟܲܕܼ ܕܹܝܢ
ܠܚܲܝܠܵܐ ܕܗܵܝ̇ ܕܐܸܬܼܓܲܫܲܡ ܠܵܐ ܝܵܕܲܥ̇. ܬܪܹܝܢ ܟܝܵܢ̈ܝܼܢ ܡܫܲܡܲܗ:
ܘܲܡܦܲܪܸܫ ܠܗܘܿܢ ܡ̣ܢ ܚܕܼܵܕܹ̈ܐ. ܟܲܕܼ ܤܵܐܹ̇ܩ ܐܲܠܵܗܵܐ ܠܚܘܿܕܼܵܐܝܼܬܼ
ܡܸܢܹܗ ܘܠܹܗ: ܘܒܼܵܗ̇ ܒܲܕܼܡܘܼܬܼܵܐ ܠܒܲܪܢܵܫܵܐ ܡܸܢܹܗ ܘܠܹܗ: ܕܐܸܬܼܢܩܸܦ
ܠܐܲܠܵܗܵܐ: ܒܩܲܪܝܼܒܼܘܼܬܼܵܐ ܘܲܒܼܫܲܘܝܘܼܬܼܵܐ ܕܐܝܼܩܵܪܵܐ ܒܲܠܚܘܿܕܼ ܘܲܒܼܫܘܼܠܛܵܢܵܐ.
ܐܵܡܲ݁ܪ ܓܹܝܪ ܗܵܟܲܢܵܐ: ܕܠܵܐ ܦܪܝܼܫ ܐܲܠܵܗܵܐ ܡ̣ܢ ܗܵܘ̇ ܕܡܸܬܼܚܙܸܐ.
ܡܸܛܠ ܗܵܢܵܐ: ܕܗܵܘ̇ ܕܠܵܐ ܡܸܬܼܦܪܸܫ: ܐܝܼܩܪܵܐ ܠܵܐ ܡܦܲܪܸܫ ܐ̄ܢܵܐ.
ܡܦܲܪܸܫ ܐ̄ܢܵܐ ܟܝܵܢܹ̈ܐ: ܘܲܡܚܲܝܸܕܼ ܐ̄ܢܵܐ ܤܸܓܼܕܬܼܵܐ . . ܐܲܚܲܝ̈ܢ ܕܹܝܢ ܗܵܠܹܝܢ
ܕܒܲܐܢܛܵܝܵܟܼܝܵܐ: ܠܗܵܠܹܝܢ ܕܡܸܢܗܘܿܢ ܡܸܬܼܝܼܕܲܥ ܡܫܝܼܚܵܐ: ܐܲܝܟܼ ܡ̇ܢ
ܕܲܒܼܪܸܥܝܵܢܵܐ ܒܲܠܚܘܿܕܼ ܫܚܝܼܡܵܐܝܼܬܼ ܡܩܲܒܿܠܝܼܢ: ܫܘܼܚܠܵܦܵܐ ܐܵܡ̇ܪܝܼܢ
ܕܲܟܼܝܵܢܹ̈ܐ. ܡܸܛܠ ܕܠܵܐ ܗ̄ܘ̣ܵܐ ܚܲܕܼ ܡܸܕܸܡ ܐܝܼܬܹܝܗ̇ ܐܲܝܟܼ ܕܐܸܡ̇ܪܹܬܼ:
ܒܲܙܢܵܐ ܟܝܵܢܵܝܵܐ ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ: ܚܲܕܼ ܕܹܝܢ ܒܪܵܐ ܘܲܡܫܝܼܚܵܐ
ܘܡܵܪܝܵܐ. ܘܐܲܝܟܼ ܡ̇ܢ ܕܚܲܕܼ ܗ̄ܘ̣ ܫܲܪܝܼܪܵܐܝܼܬܼ: ܕܚܲܕܼ ܐܝܼܬܼܵܘܗܝ
pb. 429
ܦܲܪܨܘܿܦܹܗ ܐܵܡ̇ܪܝܼܢ: ܠܵܐ ܕܹܝܢ ܡܦܲܪܫܝܼܢ ܒܚܲܕܼ ܡ̣ܢ ܙܢܝܼ̈ܢ ܠܐܲܝܠܹܝܢ
ܕܐܸܬܼܚܲܝܲܕܼܘ.
ܢܸܤܛܘܿܪܝܼܣ. ܘܟܲܕܼ ܛܵܒܼ ܐܸܢ ܗܵܕܹܐ ܫܲܪܝܼܪܵܐܝܼܬܼ ܐܝܼܬܹܝܗ̇
ܗ̄ܘ̣ܵܬܼ: ܐܵܦ ܐܲܢ̄ܬܿ ܝܲܬܿܝܼܪܵܐܝܼܬܼ ܡܸܬܿܬܿܟܸܠ ܗ̄ܘ̣ܵܬܼ ܒܡܸܠܬܼܵܐ ܗܵܕܹܐ:
ܕܐܸܢܵܐ ܠܵܐ ܡܫܟܲܚ ܐ̄ܢܵܐ ܕܲܬܼܟܼܝܼܠܵܐܝܼܬܼ ܐܸܬܼܝܼܕܵܥ ܒܵܗ̇. ܐܸܠܵܐ ܐܲܝܟܼ
ܕܐܲܢ̄ܬܿ ܐܵܡܲ݁ܪ ܐܲܢ̄ܬܿ: ܒܐܸܤܟܹܡܵܐ ܡܸܬܼܚܲܫܲܚ ܐ̄ܢܵܐ. ܘܙܵܕܼܩ ܗ̄ܘ̣ܵܐ ܠܵܟܼ
ܠܡܲܟܵܤܘܼܬܲܢܝ ܩܕܵܪܡ ܟ̱ܠܵܗ̇ ܤܘܼܢܗܵܕܘܿܣ: ܘܐܵܦ ܠܵܐ ܟܲܕܼ ܒܵܥܹ̇ܐ
ܗ̄ܘܹ̇ܝܬܼ ܒܒܼܵܥܘܼܬܼܵܐ ܡܸܢܵܟܼ ܙܵܕܹܩ ܗ̄ܘ̣ܵܐ ܠܵܟܼ ܠܲܡܚܲܦܵܝܘܼܬܼܵܗ̇: ܐܸܠܵܐ
ܕܬܼܩܵܘܸܐ ܠܟܼܠܵܗ̇ ܪܘܼܢܗܵܕܘܿܣ. ܘܟܲܕܼ ܬܘܼܒܼ ܐܸܬܼܩ̇ܪܝܼܬܼ
ܠܤܘܼܢܗܵܕܘܿܣ: ܠܵܐ ܙܵܕܹܩ ܗ̄ܘ̣ܵܐ ܕܬܸܫܬܿܐܸܠ. ܟܡܵܐ ܙܲܒܼܢ̈ܝܼܢ ܓܹܝܪ
ܥܵܒܹ̇ܕܼ ܗ̄ܘ̣ܘܲܬܼ ܠܵܗ̇ ܠܗܵܕܹܐ: ܘܡܲܟܸܣ ܗ̣̄ܘܲܝܬܿ ܠܒܝܼܝܼܫܘܼܬܼ ܬܲܪܥܝܼܬܼܵܐ
ܕܝܼܠܝ. ܘܠܵܐ ܬܘܼܒܼ ܠܡܸܬܼܚܲܫܵܚܘܼ ܒܡܲܦܲܩ ܒܪܘܼܚܵܐ ܡܸܕܸܡ
ܡܸܫܟܲܚ ܗ̄ܘܹ̇ܝܬܼ. ܗܵܘ̇ ܓܹܝܪ ܕܡܸܬܼܡܤܸܣ ܕܕܲܠܩܘܼܒܼܠܵܐ ܡܸܢܼܪܲܥܸܐ:
ܕܗܵܘ̇ ܡܵܐ ܕܵܒܼܡܲܤܲܒܼ ܠܐܲܦܹ̈ܿܐ ܠܝܼܟܼ: ܒܟܼܠ ܚܘܼ̈ܝܵܒܼܝܼܢ ܗ̄ܘ̣ ܡܚܲܝܸܒܼ
ܠܒܼܝܼܫܘܼܬܼ ܪܸܥܝܵܢܹܗ. ܐܸܠܵܐ ܕܲܠܡܵܐ ܠܵܐ ܗ̄ܘ̣ܵܐ ܗܵܟܲܢܵܐ ܐܝܼܬܹܝܗ̇:
ܐܸܠܵܐ ܕܲܠܩܘܼܒܼܠܵܐ. ܡ̣ܢ ܐܲܝܟܵܐ ܝܵܕܲܥ ܐܲܢ̄ܬܿ ܕܡܵܘܕܹܐ ܐ̄ܢܵܐ: ܕܐܸܬܼܒܲܤܲܪ
ܘܐܸܬܼܒܲܪܢܲܫ ܐܲܠܵܗܵܐ ܡܸܠܬܼܵܐ. ܘܠܵܐ ܕܹܝܢ ܐܵܡܲ݁ܪ ܐ̄ܢܵܐ ܕܐܸܬܼܒܲܤܲܪ
ܘܕܸܐܬܼܒܲܪܢܲܫ؟ ܗܵܘ̇ ܓܹܝܪ ܕܡܸܬܼܒܲܤܲܪ: ܒܒܸܪܪܵܐ ܡܸܬܼܒܲܤܲܪ. ܗܵܘ̇
ܕܹܝܢ ܕܐܵܡܲ݁ܪ: ܕܲܦܠܝܼܓܼܝܼܢ ܘܲܦܪܝܼܫܝܼܢ ܡ̣ܢ ܚ̈ܕܼܵܕܹܐ: ܘܐܵܦܠܵܐ
ܡܸܬܼܒܲܤܪܵܢܘܼܬܼܵܐ ܟܠ ܟ̱ܠܹܗ ܡܵܘܕܸܐ. ܐܸܠܵܐ ܐܸܢ ܕܲܠܡܵܐ ܠܗܵܝ̇ ܕܠܵܐ
pb. 430
ܐܸܬܼܒܲܤܲܪ: ܕܐܸܬܼܒܲܤܲܪ ܡܵܘܕܹܐ. ܗܵܢ̇ܘܿܢ ܓܹܝܪ ܕܦܲܪܝܼܩܝܼܢ ܡ̣ܢ
ܚ̈ܕܼܵܕܹܐ ܕܠܵܐ ܢܸܬܼܚܲܝܕܼܘܼܢ: ܐܲܝܟܲܢ ܡܸܬܼܒܲܤܪܝܼܢ؟ ܐܸܢܗ̤ܘ ܗܵܟܹܝܠ
ܕܲܬܼܪܹܝܢ ܟܝܵܢ̈ܝܼܢ ܡܵܘܕܸܐ ܐ̄ܢܵܐ ܘܕܼܐܬܼܒܲܤܲܪ: ܡ̣ܢ ܐܲܝܟܵܐ ܐܸܤ̇ܬܲܒܼܪܹܬܼ
ܕܐܸܡܲ݁ܪ ܐ̄ܢܵܐ ܕܲܦܪܝܼܫܝܼܢ ܘܪܲܚܝܼܩܝܼܢ ܟܝܵܢܹ̈ܐ ܡ̣ܢ ܚ̈ܕܼܵܕܹܐ: ܕܠܵܐ ܐܸܬܸܠ
ܡܸܬܼܒܲܤܪܵܢܘܼܬܼܵܐ ܘܡܸܬܼܒܲܪܢܫܵܢܘܼܬܼܵܐ ܕܐܲܠܵܗܵܐ ܡܸܠܬܼܵܐ؟
ܐܸܡܲܪܬܿ ܓܹܝܪ ܕܐܸܡ݂ܲܪ: ܕܠܵܐ ܦܪܝܼܫ ܐܲܠܵܗܵܐ ܡ̣ܢ ܗܵܘ̇
ܕܡܸܬܼܚܙܸܐ. ܡܸܛܠ ܗܵܢܵܐ: ܗܵܘ̇ ܕܠܵܐ ܦܪܝܼܫ: ܐܝܼܩܵܪܵܐ ܠܵܐ ܡܦܲܪܸܫ
ܐ̄ܢܵܐ. ܗܵܘ̇ ܕܐܸܡܲ݁ܪ: ܕܠܵܐ ܦܪܝܼܫ ܐܲܠܵܗܵܐ ܡ̣ܢ ܗܵܘ̇ ܕܡܸܬܼܚܙܸܐ:
ܐܲܝܟܲܢܵܐ ܡܦܲܪܸܫ؟ ܗܵܘ̇ ܓܹܝܪ ܕܡܸܬܼܚܙܸܐ ܡ̣ܢ ܗܵܘ̇ ܕܠܵܐ ܡܸܬܼܚܙܸܐ:
ܐܸܡܲܪܬܿ ܕܠܵܐ ܡܦܲܪܸܫ: ܘܐܵܦܠܵܐ ܠܐܝܼܩܵܪܵܐ ܕܐܲܠܵܗܵܐ ܕܠܵܐ ܡܸܬܼܦܪܸܫ.
ܘܐܸܠܵܐ ܐܸܢ: ܠܹܗ ܠܐܲܠܵܗܵܐ ܡ̣ܢ ܗܵܘ̇ ܕܡܸܬܼܚܙܸܐ ܠܵܐ ܡܦܲܪܸܫ
ܐ̄ܢܵܐ: ܡܸܛܠ ܕܠܵܐ ܡܼܬܼܦܲܪܸܫ: ܐܵܦ ܠܵܐ ܠܐܝܼܩܵܪܵܐ ܡܦܲܪܸܫ ܐ̄ܢܵܐ:
ܠܡ̇ܢ ܐܸܡܲܪܬܿ ܕܠܵܐ ܡܸܬܼܦܪܸܫ؟ ܘܡ̣ܢ ܐܲܝܢܵܐ ܠܵܐ ܡܸܬܼܦܪܸܫ؟
ܕܡܸܛܠ ܗܵܢܵܐ: ܐܵܦ ܐܝܼܩܵܪܵܐ ܕܗܵܘ̇ ܕܠܵܐ ܡܸܬܼܦܲܪܸܫ: ܠܵܐ
ܡܦܲܪܸܫ ܐ̄ܢܵܐ. ܐܸܠܵܐ ܠܲܡ ܐܸܡܲ݁ܪ: ܕܲܡܦܲܪܸܫ ܐ̄ܢܵܐ ܟܝܵܢܹ̈ܐ: ܐܸܠܵܐ
ܡܚܲܝܼܕܼ ܐ̄ܢܵܐ ܤܸܓܼܕܬܼܵܐ. ܐܲܝܟܲܢܵܐ ܕܐܵܦ ܐܲܢ̄ܬܿ ܩܲܒܸܿܠ̣ܬܿ ܚܕܼܵܝܘܼܬܼܵܐ
ܕܲܟܼܝܵܢܹ̈ܐ:
ܐܵܘ ܒܲܫܪܵܪܵܐ ܐܵܘ ܒܐܸܤܟܹܿܡܵܐ: ܕܠܵܐ ܒܘܼܠܒܵܠܵܐ. ܘܐܸܢ ܨܵܒܹ̇ܐ ܐܲܢ̄ܬܿ
ܘܐܸܢ ܠܵܐ ܨܵܒܹ̇ܐ ܐܲܢ̄ܬܿ: ܡܦܲܪܸܫ ܐܲܢ̄ܬܿ ܠܲܟܼܝܵܢܹ̈ܐ ܒܡܸܠܬܼܵܐ ܕܐܘܼܤ̈ܝܼܵܣ:
ܕܡܸܢܗܹܝܢ ܡܸܬܼܪܢܸܐ ܡܫܝܼܚܵܐ: ܟܲܕܼ ܐܸܡܲ݁ܪ ܐܲܢ̄ܬܿ ܐܵܦ ܫܘܼܚܠܵܦܵܐ. ܘܲܕܼܠܵܐ
pb. 431
ܗ̄ܘ̣ܵܐ ܗ̤ܝ ܟܲܕܼ ܗ̤ܝ ܐܝܼܬܹܝܗ̇ ܒܲܙܢܵܐ ܟܝܵܢܵܝܐ ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ:
ܐܲܝܟܼ ܕܐܲܢ̄ܬܿ ܐܸܡܲ݁ܪ ܐܲܢ̄ܬܿ. ܗܵܘ̇ ܓܹܝܪ ܕܐܸܡܲ݁ܪ: ܕܠܵܐ ܗ̄ܘ̣ܵܐ ܗ̤ܝ ܟܲܕܼ
ܗ̤ܝ ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ: ܡܦܲܪܸܫ ܒܫܘܼܚܠܵܦܵܐ ܟܝܵܢܵܝܵܐ: ܕܗܵܢܵܐ
ܠܵܐ ܐܝܼܬܼܵܘܗܝ ܗܵܘ̇: ܘܐܵܦ ܠܵܐ ܗܵܘ̇ ܗܵܢܵܐ. ܫܘܼܚܠܵܦܵܐ ܕܹܝܢ ܟܝܵܢܵܝܵܐ:
ܦܘܼܪܫܵܢܵܐ ܐܝܼܬܼܵܘܗܝ. ܐ̄ܚܪܹܢܵܐ ܗ̄ܘ̣ ܡܵܕܹܝܢ ܦܘܼܪܫܵܢܵܐ ܕܲܒܼܫܘܼܚܠܵܦܵܐ
ܕܒܼܐܘܼܤܝܼܵܐ ܕܲܟܼܝܵܢܹ̈ܐ: ܘܲܐ̄ܚܪܹܢܵܐ ܗ̄ܘ̣ ܦܘܼܪܫܵܢܵܐ ܕܲܒܼܪܲܚܝܼܩܘܼܬܼܵܐ
ܕܐܘܼܤ̈ܝܵܣ: ܕܐܸܬܼܟܲܢܲܫܘ ܘܐܸܬܼܚܲܝܲܕܼܘ ܒܲܟܼܢܘܼܫܝܵܐ. ܠܲܚܕܵܝܘܼܬܼܵܐ
ܗܵܟܹܝܠ ܕܲܟܢܘܼܫܝܵܐ ܕܲܟܼܝܵܢܹ̈ܐ: ܕܐܲܠܵܗܘܼܬܼܵܐ ܘܲܕܿܐ̄ܢܵܫܘܼܬܼܵܐ: ܐܸܢܵܐ ܕܠܵܐ
ܦܘܼܪܵܫܵܐ ܐܸܡܲܪܬܵܗ̇: ܕܠܵܐ ܦܪܝܼܫ ܐܲܠܵܗܵܐ ܡ̣ܢ ܗܵܘ̇ ܕܡܸܬܼܚܙܸܐ.
ܠܲܚܕܼܵܝܘܼܬܼܵܐ ܕܹܝܢ ܕܠܵܐ ܒܘܼܠܒܵܠܵܐ ܕܲܟܼܝܵܢܹ̈ܐ: ܒܫܘܼܚܠܵܦܵܐ ܟܝܵܢܵܝܵܐ
ܐܸܡ̇ܪܹܬܼ ܕܲܡܦܲܪܫܝܼܢ. ܤܸܓܼܕܬܼܵܐ ܕܹܝܢ ܕܗܵܢܘܿܢ: ܕܗܵܟܲܢܵܐ ܠܵܐ
ܡܸܬܼܦܲܪܫܝܼܢ ܘܡܸܬܼܦܲܪܫܝܼܢ: ܚܕܼܵܐ ܐܸܡ̇ܪܹܬܼ. ܐܲܝܟܼ ܡ̇ܢ ܕܲܠܚܲܕܼ
ܦܲܪܨܘܿܦܵܐ ܐܸܬܼܢܲܫܘ: ܘܠܵܘ ܠܲܚܕܼܵܐ ܐܘܼܤܝܼܵܐ: ܘܠܵܘ ܠܚܲܕܼ ܟܝܵܢܵܐ.
ܡܸܛܠ ܕܠܵܐ ܗ̄ܘ̣ܵܐ ܒܒܼܘܼܠܒܵܠܵܐ ܗܘ̤ܵܬܼ ܚܕܼܵܝܘܼܬܼܵܐ ܕܲܟܼܝܵܢܹ̈ܐ: ܐܵܦ
ܠܵܐ ܬܘܼܒܼ ܒܘܼܠܒܵܠܵܐ ܠܫܘܼܡܠܵܝܵܐ ܕܚܲܕܼ ܟܝܢܵܐ. ܡܸܛܠ ܕܠܵܐ ܗ̄ܘ̣ܵܐ
ܡ̣ܢ ܠܵܐ ܡܫܲܡ̈ܠܲܝܵܐ ܗܘ̤ܵܬܼ ܚܕܼܵܝܘܼܬܼܵܐ: ܐܸܠܵܐ ܡ̣ܢ ܬܪܹܝܢ ܟܝܵܢܹ̈ܐ
ܡܫܲܠܡܵܢܹ̈ܐ.
ܟܠ ܓܹܝܪ ܚܕܼܵܝܘܼܬܼܵܐ ܕܲܒܼܪܘܼܟܵܒܼܵܐ ܟܝܵܢܵܝܵܐ ܠܫܘܼܡܠܵܝܵܐ ܕܲܟܼܝܵܢܵܐ
ܗܵܘ̇ܝܵܐ: ܡ̣ܢ ܟܝܵܢܹ̈ܐ ܠܵܐ ܡܫܲܡ̈ܠܲܝܵܐ ܗܵܘ̇ܝܵܐ. ܗܵܝ̇ ܕܹܝܢ ܕܡ̣ܢ ܟܝܵܢܹ̈ܐ
ܡܫܲܡ̈ܠܲܝܵܐ: ܠܚܲܕܼ ܦܲܪܨܘܿܦܵܐ ܗܵܘ̇ܝܵܐ: ܘܲܒܼܗܵܕܹܐ ܡܸܬܼܩܲܝܡܵܐ. ܠܵܐ
ܗ̄ܘ̣ܵܐ ܓܹܝܪ ܒܓܼܘܼܫܡܵܐ ܕܠܵܐ ܢܲܦܫܵܐ: ܘܐܵܦ ܠܵܐ ܒܢܲܦܫܵܐ ܕܠܵܐ
pb. 432
ܨܼܒܼܝܵܢܵܐ ܘܲܕܼܠܵܐ ܪܸܥܝܵܢܵܐ ܐܸܬܼܚܲܫܲܚ: ܘܲܚܠܵܽܦ ܢܲܦܫܵܐ ܘܡܲܕܥܵܐ ܠܓܼܘܼܫܡܵܐ
ܘܲܠܢܲܦܫܵܐ ܗܘܑ̤ܵܐ ܐܲܠܵܗܵܐ ܡܸܠܬܼܵܐ. ܡܢ ܗܵܕܹܐ ܕܹܝܢ: ܥܹܕܬܵܐ ܕܐܵܪ̈ܝܵܢܹܐ
ܘܕܼܵܐܦܘܼܠܝܼܢܵܪ̈ܝܵܢܹܐ ܦܸܪܫܲܬ̤: ܕܲܬܼܪܹܝܢ ܟܝܵܢܹ̈ܐ ܡܫܲܠܡܵܢܹ̈ܐ ܕܐܸܬܼܚܲܝܲܕܼܘ
ܠܵܐ ܡܩܲܒܿܠܵܐ. ܘܐܵܦ ܠܵܐ ܒܫܘܼܢܵܝܵܐ ܘܒܲܡܫܵܘܚܕܼܘܼܬܼܵܐ ܡܦܲܪܸܫ ܐ̄ܢܵܐ
ܠܲܟܼܝܵܢܹ̈ܐ: ܕܐܸܬܼܚܲܝܲܕܼܘ ܡ̣ܢ ܚ̈ܕܼܵܕܹܐ. ܘܐܵܦ ܠܵܐ ܠܢܲܩܝܼܦܘܼܬܼܵܐ ܕܲܒܼܚܘܼܒܵܐ
ܘܕܼܒܼܩܲܪܝܼܒܼܘܼܬܼܵܐ ܐܵܡܲ݁ܪ ܐ̄ܢܵܐ: ܐܲܝܟܼ ܕܐܝܼܬܼ ܠܐܲܝܠܹܝܢ ܕܪܲܚܝܼܩܝܼܢ:
ܕܲܒܼܚܘܼܒܵܐ ܡܚܲܝܕܼܝܼܢ: ܘܠܵܐ ܗ̄ܘ̣ܵܐ ܒܐܘܼܤ̈ܝܼܵܣ. ܘܠܵܐ ܗ̄ܘ̣ܵܐ ܬܘܼܒܼ
ܒܫܲܘܝܘܼܬܼ ܐܝܼܩܵܪܵܐ ܘܒܲܡܫܲܠܛܘܼܬܼܵܐ ܐܸܡ̇ܪܹܬܼ ܠܲܚܕܼܵܝܘܼܬܼܵܐ: ܐܸܠܵܐ
ܕܲܟܼܝܵܢܹ̈ܐ: ܘܕܲܟܼܝܵܢܹ̈ܐ ܡܫܲܠܡܵܢܹ̈ܐ. ܘܲܒܼܟܼܘܼܢܵܫܵܐ ܕܐܘܼܤ̈ܝܼܵܣ ܝܵܗܹ̇ܒܼ ܐ̄ܢܵܐ
ܠܲܚܕܼܵܝܘܼܬܼܵܐ ܕܠܵܐ ܒܘܼܠܒܵܠܵܐ. ܠܚܲܕܼ ܕܹܝܢ ܐܝܼܩܵܪܵܐ ܘܠܲܚܕܼܵܐ
ܡܫܲܠܛܘܼܬܼܵܐ. ܚܕܼܵܝܘܼܬܼܵܐ ܓܹܝܪ ܕܲܟܼܝܵܢܹ̈ܐ ܐܸܢܡ̇ܪܹܬܼ: ܘܠܵܐ ܗ̄ܘ̣ܵܐ ܕܐܝܼܩܵܪܵܐ
ܘܕܲܡܫܲܠܛܘܼܬܼܵܐ. ܘܐܸܢ ܕܹܝܢ ܠܵܐ: ܚܵܘܵܐ ܒܐܲܝܠܹܝܢ ܕܐܸܡ̇ܪܹܬܼ. ܠܵܐ
ܡܸܬܼܦܪܸܫ ܐܲܠܵܗܵܐ ܡ̣ܢ ܗܵܘ̇ ܕܡܸܬܼܚܙܸܐ: ܡܸܛܠ ܗܵܢܵܐ ܐܝܼܩܵܪܵܐ ܕܠܵܐ
ܡܸܬܼܦܪܸܫ ܠܵܐ ܡܦܲܪܸܫ ܐ̄ܢܵܐ. ܐܲܝܟܵܐ ܗܵܟܹܝܠ ܐܸܡ̇ܪܹܬܼ ܒܗܠܹܝܢ:
ܕܲܡܦܲܪܸܫ ܐ̄ܢܵܐ ܠܲܟܼܝܵܢܹ̈ܐ ܡ̣ܢ ܚ̈ܕܼܵܕܹܐ: ܘܡܸܢܹܗ ܘܠܹܗ ܐܵܡܲ݁ܪ ܐ̄ܢܵܐ
ܠܐܲܠܵܗܵܐ ܡܸܠܬܼܵܐ: ܘܡܸܢܹܗ ܘܠܹܗ ܠܒܲܪܢܵܫܵܐ: ܕܐܸܬܼܢܩܸܦܘ ܒܩܲܪܝܼܒܼܘܼܬܼܵܐ
ܕܚܘܼܒܵܐ: ܘܲܒܼܫܲܘܝܘܼܬܼ ܐܝܼܩܵܪܵܐ: ܐܵܘ ܒܲܡܫܲܠܛܘܼܬܼܵܐ؟ ܠܐܲܠܵܗܵܐ ܓܹܝܪ
ܠܵܐ ܡܦܲܪܸܫ ܐ̄ܢܵܐ ܡ̣ܢ ܗܵܘ̇ ܕܡܸܬܼܚܙܸܐ ܐܸܡ̇ܪܹܬܼ: ܠܵܐ ܗ̄ܘ̣ܵܐ
ܠܩܲܪܝܼܒܼܘܼܬܼܵܐ ܘܠܵܐ ܗ̄ܘ̣ܵܐ ܠܫܲܘܝܘܼܬܼ ܐܝܼܩܵܪܵܐ: ܘܠܵܐ ܗ̄ܘ̣ܵܐ ܠܫܲܘܝܘܼܬܼܵܐ:
ܐܸܠܵܐ ܠܹܗ ܐܲܠܵܗܵܐ ܒܲܟܼܝܵܢܹܗ ܡ̣ܢ ܟܝܵܢܵܐ ܡܸܬܼܚܲܙܝܵܢܵܐ ܐܸܡ̇ܪܹܬܼ ܕܠܵܐ
ܡܦܲܪܸܫ ܐ̄ܢܵܐ. ܘܡܸܛܠ ܐܲܠܵܗܵܐ ܕܠܵܐ ܡܸܬܼܪܸܫ: ܐܵܦ ܠܵܐ ܐܝܼܩܵܪܵܐ
ܡܦܲܪܸܫ ܐ̄ܢܵܐ. ܐ̄ܚܪܹܢܵܐ ̄ܗ̄ܘ̣ ܓܹܝܪ ܗ̤ܘ: ܘܲܐ̄ܚܪܹܢܵܐ ܗ̄ܘ̣ ܐܝܼܩܵܪܹܗ:
pb. 433
ܘܲܐ̄ܚܪܹܢܵܐ ܗ̄ܘ̣ ܐܘܼܤܝܼܵܐ ܕܝܼܠܹܗ: ܘܲܐ̄ܚܪܹܢܵܐ ܗ̄ܘ̣ ܗܵܘ̇ ܡܵܐ ܕܐܘܼܤܝܼܵܐ
ܐܝܼܬܼܵܘܗܝ. ܐܸܠܵܐ ܐܵܦܸܢ ܐܸܡ̇ܪܹܬܼ ܕܲܡܦܲܪܸܫ ܐ̄ܢܵܐ ܠܲܟܼܝܵܢܹ̈ܐ ܘܲܡܚܲܝܸܕܼ ܐ̄ܢܵܐ
ܤܸܓܼܕܬܼܵܐ: ܠܵܐ ܗ̄ܘ̣ܵܐ ܒܦܘܼܪܫܵܢܵܐ ܕܪܲܚܝܼܩܘܼܬܼܵܐ ܐܸܡ̇ܪܹܬܼ ܕܲܡܦܲܪܸܫ
ܐ̄ܢܵܐ ܠܲܟܼܝܵܢܹ̈ܐ ܡ̣ܢ ܚ̈ܕܼܵܕܹܐ: ܐܲܝܟܼ ܕܲܡܩܲܛܪܸܓܼ ܐܲܢ̄ܬܿ ܠܝܼ
ܒܥܵܫܘܿܩܘܼܬܼܵܟܼ.
ܐܸܠܘܼ ܓܹܝܪ ܠܲܝܬܿ ܗ̄ܘ̣ܵܐ ܙܢܵܐ ܐ̄ܚܪܹܢܵܐ ܕܦܘܼܪܫܵܢܵܐ ܕܲܟܼܝܵܢܹ̈ܐ: ܐܸܠܵܐ
ܐܸܢ ܒܲܠܚܘܿܕܼ ܗܵܘ̇ ܕܲܒܼܪܲܚܝܼܩܘܼܬܼܵܐ: ܛܵܒܼܵܐܝܼܬܼ ܡܲܝܬܸܐ ܗ̣̄ܘܲܝܬܿ ܒܵܬܲܪܝ:
ܕܗܵܟܲܢܵܐ ܡܦܲܪܸܫ ܐ̄ܢܵܐ: ܐܸܢ ܕܹܝܢ ܐ̄ܚܪ̈ܵܢܹܐ ܤܲܓܿܝܼ̈ܐܹܐ ܐܝܼܬܼ: ܝܲܬܿܝܼܪܵܐܝܼܬܼ
ܕܹܝܢ ܒܡܸܠܬܼܵܐ ܕܲܟܼܝܵܢܹ̈ܐ ܕܲܗܠܹܝܗ̇ ܐܝܼܬܹܝܗ̇ ܟ̱ܠܵܗ̇ ܒܥܵܬܲܢ: ܕܠܵܐ ܗ̄ܘ̣ܵܐ
ܒܒܼܘܼܠܒܵܠܵܐ ܐܵܘ ܒܫܘܼܠܵܦܵܐ ܗܘ̤ܵܬܼ ܚܕܼܵܝܘܼܬܼܵܐ ܕܲܟܼܝܵܢܹ̈ܐ ܕܐܸܡ̇ܪܹܬܼ:
ܐܲܝܟܲܢܵܐ ܐܝܼܬܹܝܗ̇ ܩܕܼܵܡ ܐܲܦܲܝ̈ܟܼ: ܘܲܠܥܸܠ ܘܲܠܬܲܚܬܿ ܗܵܕܹܐ ܡܒܲܚܸܢ
ܐܲܢ̄ܬܿ: ܐܲܝܟܼ ܡ̇ܢ ܕܲܒܼܪܸܥܝܵܢܵܐ ܗܵܢܵܐ ܐܸܡ̇ܪܹܬܼ ܕܲܡܦܲܪܸܫ ܐ̄ܢܵܐ ܟܝܵܢܹ̈ܐ؟
ܘܐܲܢ̄ܬܿ ܡܲܝܬܸܐ ܐܲܢ̄ܬܿ ܕܐܵܦ ܠܵܐ ܠܚܲܕܼ ܙܢܵܐ ܡܦܲܓܼܝܼܢ ܗܵܢܘܿܢ ܠܗܵܠܹܝܢ
ܕܐܸܬܼܚܲܝܲܕܼܘ: ܐܲܢ̄ܬܿ ܩܲܕܡܵܝܑܬܼ ܩܲܕܼܡܬܿ ܐܸܡܲܪܬܿ ܕܲܠܦܲܪܫܝܼܢ. ܐܲܚܲܝ̈ܢ
ܠܲܡ ܕܹܝܢ ܗܵܠܹܝܢ ܕܒܲܐܢܛܝܵܟܼܝܵܐ: ܠܗܵܠܹܝܢ ܕܢܸܢܗܘܿܢ ܡܸܬܼܝܼܕܲܥ
ܡܫܝܼܚܵܐ: ܐܲܝܟܼ ܡ̇ܢ ܕܲܒܼܪܸܥܝܵܢܵܐ ܒܲܠܚܘܿܕܼ ܫܚܝܼܡܵܐܝܼܬܼ ܡܩܲܒܿܠܝܼܢ:
ܫܘܼܚܠܵܦܵܐ ܐܵܡ̇ܪܝܼܢ ܕܲܟܼܝܵܢܹ̈ܐ. ܡܸܛܠ ܕܠܵܐ ܗ̄ܘ̣ܵܐ ܚܲܕܼ ܡܸܕܸܡ ܐܝܼܬܹܝܗ̇
ܐܲܝܟܼ ܕܐܸܡ̇ܪܹܬܼ: ܒܲܙܢܵܐ ܟܝܵܢܵܝܵܐ ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ: ܚܲܕܼ ܕܹܝܢ ܒܪܵܐ
ܘܲܡܫܝܼܚܵܐ ܘܡܵܪܝܵܐ. ܘܐܲܝܟܼ ܡ̇ܢ ܕܚܲܕܼ ܗ̄ܘ̣ ܫܲܪܝܼܪܵܐܝܼܬܼ: ܘܲܕܚܲܕܼ
ܐܝܼܬܼܵܘܗܝ ܦܲܪܨܘܼܦܵܐ ܐܵܡ̇ܪܝܼܢ ܚ̄ܢܲܢ. ܐܵܡܲ݁ܪ ܐܲܢ̄ܬܿ ܕܹܝܢ: ܕܐܵܦ ܠܵܐ
ܒܚܲܕܼ ܙܢܵܐ ܡܦܲܠܓܼܝܼܢ ܠܲܟܼܝܵܢܹ̈ܐ ܕܐܸܬܼܚܲܝܲܕܼܘ. ܟܲܕܼ ܐܸܡ݂ܲܪܘ ܫܘܼܚܠܵܦܵܐ:
pb. 434
ܐܵܡ̇ܪܝܼܢ ܚ̄ܢܲܢ. ܗܵܟܲܢܵܐ ܐܲܠܵܗܵܐ ܡܫܲܠܡܵܢܵܐ ܡܸܬܼܚܵܘܸܐ: ܟܲܕܼ ܠܵܐ ܡܸܬܼܢܟܸܐ
ܒܡܸܕܸܡ ܟܝܵܢܹܗ ܡ̣ܢ ܚܕܼܵܝܘܼܬܼܵܐ. ܘܗܵܟܲܢܵܐ ܬܘܼܒܼ ܒܲܪܢܵܫܵܐ ܡܫܲܠܡܵܢܵܐ:
ܕܠܵܐ ܡܒܲܨܲܪ ܒܡܸܕܸܡ ܡ̣ܢ ܡܲܥܒܿܕܼܵܢܘܼܬܼܵܐ ܘܡ̣ܢ ܚܲܫܹ̈ܿܐ ܕܲܟܼܝܵܢܵܐ ܕܝܼܠܹܗ
ܡ̣ܢ ܚܕܼܵܝܘܼܬܼܵܐܘ ܗܵܘ̇ ܓܹܝܪ ܕܲܠܚܲܕܼ ܦܲܪܨܘܿܦܵܐ ܕܐܲܠܵܗܵܐ ܡܸܠܬܼܵܐ:
ܡܲܤܸܩ ܠܗܵܠܹܝܢ ܕܐܲܠܵܗܵܐ ܡܸܠܬܼܵܐ ܘܲܠܗܵܠܹܝܢ ܕܐ̄ܢܵܫܘܼܬܼܵܐ: ܘܠܵܐ
ܦܵܪܲܥ ܦܲܪܨܘܼܦܵܐ ܕܐܲܠܵܗܵܐ ܡܸܠܬܼܵܐ ܠܐ̄ܢܵܫܘܼܬܼܵܐ: ܗܵܢܵܐ ܓܵܢܹ̇ܒܼ
ܠܲܚܕܼܵܝܘܼܬܼܵܐ ܕܐܵܪ̈ܬܵܕܘܿܟܿܤܹܐ: ܘܲܡܕܲܡܸܐ ܒܗܵܝ̇ ܕܗܲܪ̈ܵܛܝܼܩܹܐ.
ܝܑܼܠܸܦܬܿܘܿܢ ܓܹܝܪ ܡ̣ܢ ܐܵܪ̈ܬܵܕܘܿܟܿܤܹܐ ܒܤܵܗ̈ܕܘܵܬܼܵܐ ܕܐܲܟܸܬܼܒܼܘ:
ܕܦܵܪܥܝܼܢ ܗܵܠܹܝܢ ܕܐ̄ܢܵܫܘܼܬܼܵܐ ܠܐܲܠܵܗܘܼܬܼܵܐ: ܘܗܵܠܹܝܢ ܕܐܲܠܵܗܘܼܬܼܵܐ
ܠܐ̄ܢܵܫܘܼܬܼܵܐ. ܘܲܕܼܗܵܢܵܐ ܡ̣ܢ ܗܵܘ̇ ܡܸܬܼܐܡܲܪ: ܘܲܕܼܗܵܘ̇ ܡ̣ܢ ܗܵܢܵܐ: ܐܲܝܟܼ
ܕܥܲܠ ܟܝܵܢܹ̈ܐ ܡܫܲܠܵܡܵܢܹ̈ܐ ܘܲܡܚܲܝ̈ܕܐ. ܘܲܡܚܲܕܝܼܢ ܕܠܵܐ ܒܘܼܠܒܵܠܵܐ:
ܘܡܸܬܼܚܲܫܚܝܼܢ ܒܦܲܪ̈ܨܘܿܦܹܐ ܕܚܲܕܼܵܕܹ̈ܐ.
ܐܲܝܟܲܢܵܐ ܗܵܟܹܝܠ ܫܒܼܵܟܼܘܿܢ ܠܟܼܠ ܡܵܐ ܕܲܨܒܼܵܐ: ܐܘܿ ܕܲܝܢܹ̈ܐ ܚܲܟܿܝܼ̈ܡܹܐ؟
ܐܵܘ ܓܹܝܪ ܫܪܵܘ ܠܗܵܠܹܝܢ ܕܐܲܒܼ̈ܗܵܬܼܵܐ: ܐܲܝܠܹܝܢ ܕܐܲܝܬܿܝܼܬܿܘܿܢ ܠܤܵܗܕܘܼܬܼܵܐ.
ܐܵܘ ܐܸܢ ܕܹܝܢ ܠܵܐ: ܡ̣ܢ ܐܵܢܢܩܹܐ ܐܝܼܬܹܝܗ̇ ܥܠܲܝܟܿܘܿܢ: ܕܲܬܼܩܲܒܿܠܘܼܢ
ܠܐܲܝܢܵܐ ܕܐܲܝܟܼ ܡܲܠܦܵܢܘܼܬܗܘܿܢ ܡܡܲܠܸܠ ܒܓܲܒܵܐ ܕܝܼܠܗܘܿܢ. ܬܪܹܝܢ
ܡ̇ܢ ܒܲܟܼܝܵܢܵܐ: ܘܚܲܕܼ ܦܲܪܨܘܿܦܵܐ ܒܲܚܕܼܵܝܘܼܬܼܵܐ: ܒܡܘܼܙܵܓܼܵܐ:
ܒܡܸܬܼܓܲܠܝܵܢܘܼܬܼܵܐ: ܒܢܲܩܝܼܦܘܼܬܼܵܐ. ܐܲܠܵܗܵܐ ܡ̇ܢ ܕܐܸܬܼܒܲܢܲܫ: ܒܲܪܢܵܫܵܐ
ܕܐܸܬܼܐܲܠܲܗ. ܗܵܢܵܐ ܡ̣ܢ ܗܵܘ̇ ܡܸܬܐܡܲܪ ܕܐܸܬܼܒܲܪܢܲܫ: ܘܗܵܘ̇ ܡ̣ܢ
ܗܵܢܐ ܡܸܬܼܐܡܲܪ ܕܐܸܬܼܐܲܠܲܗ. ܡܵܢܵܐ ܗܵܟܹܝܠ ܡܸܕܸܡ ܕܲܡܢܲܟܼܪܲܝ ܡܸܢܗܘܿܢ
ܐܸܡ̇ܪܹܬܼ: ܕܒܹܗ ܚܲܝܸܒܼܬܿܘܿܢܵܢܝ؟ ܠܵܐ ܙܵܕܹܩ ܗ̄ܘ̣ܵܐ ܠܡܵܘܕܵܝܘܼ ܬܪܹܝܢ
ܟܝܵܢ̈ܝܼܢ؟ ܠܵܐ ܙܵܕܹܩ ܠܡܵܘܕܵܝܘܼ ܠܚܲܕܼ ܦܲܪܨܘܼܦܵܐ ܕܲܬܼܪܹܝܢ ܟܝܵܢ̈ܝܼܢ
pb. 435
ܕܗܵܘ̇ ܡܵܐ ܕܒܸܐܤܟܹܿܡܵܐ ܐܸܡܲ݁ܪ ܕܡܵܘܕܸܐ ܥܲܡ ܡܲܕܢܚܵܝܹ̈ܐ. ܐܸܢ ܓܹܝܪ
ܠܵܐ ܐܝܼܬܼܵܘܗܝ ܦܘܼܪܫܵܢܵܐ ܕܲܟܼܵܢܹ̈ܐ: ܐܲܝܟܲܢܵܐ ܐܸܡ݂ܲܪܬܿ ܕܫܘܼܚܠܵܦܵܐ
ܕܲܟܼܝܵܢܹ̈ܐ ܐܸܡ݂ܲܪܘ؟ ܘܐܲܝܟܲܢܵܐ ܠܵܐ ܗ̄ܘ̣ܵܐ ܗ̤ܝ ܟܲܕܼ ܗ̤ܝ ܐܝܼܬܹܝܗ̇ ܒܲܙܢܵܐ
ܟܝܵܢܝܵܐ ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ: ܕܒܲܟܼܝܵܢܵܐ ܡܦܲܠܓܼܝܼܓܼܝܼܢ ܐܲܝܟܼ ܡܵܐ
ܕܐܝܼܬܼܵܘܗܝ ܫܘܼܚܠܵܦܵܐ؟ ܒܗܵܕܹܐ ܓܹܝܪ ܐܸܢ ܡܲܤܒܲܪ ܥܠܲܝ ܕܦܘܼܪܫܵܢܵܐ
ܟܝܵܢܵܝܵܐ ܐܵܡܲ݁ܪ ܐ̄ܢܵܐ: ܠܵܐ ܡܕܲܓܸܠ. ܒܪܲܡ ܠܵܘ ܕܲܡܦܲܫ̈ܩܵܢܹܐ ܕܲܫ̈ܟܼܵܚܵܬܼܵܐ
ܬܵܚ̈ܘܿܒܼܵܬܼܵܐ ܐܝܼܬܲܝܗܹܝܢ: ܠܵܐ ܗ̄ܘ̣ܵܐ ܓܹܝܪ ܫ̈ܟܼܵܚܵܬܼܵܐ ܕܝܼܠܝ ܐܝܼܬܲܝܗܹܝܢ.
ܐܸܠܵܐ ܗܲܝܡܵܬܢܘܼܬܼܵܐ ܫܠܝܼܚܵܬܼܵܐ ܘܡܲܠܦܵܢܘܼܬܼܵܐ ܕܐܲܒܼ̈ܗܵܬܼܵܐ: ܘܬܼܵܘܕܝܼܬܼܵܐ
ܕܹܝܢ ܐܵܦ ܕܝܼܠܵܟܼ: ܟܲܕܼ ܐܲܠܝܼܨ ܐܲܢ̄ܬܿ ܘܡܲܗܦܸܟܼ ܐܲܢ̄ܬܿ ܠܵܗ̇ ܠܟܼܵܐ
ܘܲܠܟܼܵܐ: ܕܬܹܐܡܟܪܝܼܗ̇ ܘܲܕܼܠܵܐ ܬܹܐܡܪܝܼܗ̇.
ܘܐܵܘܕܝܼܬܿ ܕܲܬܼܪܹܝܢ ܟܵܝܵܢ̈ܝܼܢ ܐܸܢܘܿܢ ܗܵܢ̇ܘܿܢ ܕܡܸܢܗܘܿܢ ܐܝܼܬܼܵܘܗܝ
ܡܫܝܼܚܵܐ: ܘܢܘܼܟܼܪܵܝܝܑܼܿܢ ܒܐܘܤܝܼܵܐ ܠܲܚܕܼܵܕܹ̈ܐ. ܠܵܐ ܗ̄ܘ̣ܵܐ ܠܲܡ ܕܡ̣ܢ
ܟܝܵܢܵܐ ܕܝܼܠܹܗ ܢܤܲܒܼ: ܗܵܢܵܘ ܕܹܝܢ ܐܲܠܵܗܵܝܵܐ: ܘܬܲܩܸܢ ܠܹܗ ܓܘܼܫܡܵܐ
ܐܲܠܵܗܵܐ ܡܸܠܬܼܵܐ ܢܸܪܢܸܐ. ܟܲܕܼ ܢܵܩ̇ܦܝܼܢ ܚ̄ܢܲܢ ܒܟܼܠ ܕܘܼܟ ܠܲܟܼܬܼܵܒܹ̈ܐ
ܐܲܠܵܗܵܝܹ̈ܐ: ܕܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ ܢܤܲܒܼ ܡܫܲܪܪܝܼܢ ܚ̄ܢܲܢ. ܗܵܢ̇ܘܿܢ
ܕܡܸܢܗܘܿܢ ܚܲܕܼ ܒܲܠܚܘܿܕܼ ܒܪܵܐ ܘܡܵܪܝܵܐ ܘܝܼܫܘܿܥ ܡܫܝܼܚܵܐ: ܐܲܝܟܼ
ܕܲܒܼܪܸܥܝܵܢܵܐ ܡܩܲܒܿܠܝܼܢ ܚ̄ܢܲܢ: ܬܪܹܝܢ ܟܝܵܢܹ̈ܐ ܕܐܸܬܼܚܲܝܲܕܼܘ ܡܵܘܕܹܝܢ ܚ̄ܢܲܢ:
ܘܦܘܼܪܫܵܢܵܐ ܟܝܵܢܝܵܐ ܠܵܐ ܥܵܒܹ̇ܪ. ܫܘܼܘܕܵܥܵܐ ܓܹܝܪ ܕܦܘܼܪܫܵܢܵܐ ܟܝܵܢܵܝܵܐ:
ܒܗܵܝ̇ ܕܢܸܬܼܐܲܡܪܘܼܢ ܬܪܹܝܢ ܐܝܼܬܼܵܘܗܝ. ܒܲܟܼܝܵܢܹ̈ܐ ܕܹܝܢ ܡܸܬܼܐܲܡܪܝܼܢ
ܬܪܹܝܢ. ܕܲܟܼܝܵܢܹ̈ܐ ܓܹܝܪ ܐܝܼܬܼܵܘܗܝ ܦܘܼܪܫܵܢܵܐ ܟܝܵܢܵܝܵܐ: ܕܒܹܗ ܬܪܹܝܢ ܐܵܘܕܝܼܬܿ:
ܐܸܠܵܠ ܕܲܡܚܲܝܕܹܝܢ ܕܠܵܐ ܒܘܼܠܒܵܠܵܐ. ܡܸܛܠ ܗܵܢܵܐ: ܐܵܦ ܬܪܹܝܢ.
pb. 436
ܡܸܕܸܡ ܐ̄ܚܪܹܝܢ ܬܘܼܒܼ ܐܵܡܲ݁ܪ ܐܲܢ̄ܬܿ ܕܲܠܩܘܼܒܼܠܵܐ ܕܡ̣ܢ ܒܵܬܲܪ
ܚܕܼܵܝܘܼܬܼܵܐ ܚܲܕܼ ܟܝܵܢܵܐ. ܡܸܛܠ ܕܡ̣ܢ ܟܲܕܼܘ ܐܸܬܿܬܪܝܼܡ ܠܹܗ ܦܘܼܪܫܵܢܵܐ
ܕܲܬܼܪܹܝܢ: ܗܵܠܹܝܢ ܬܲܪ̈ܬܵܝܗܹܝܢ ܕܝܼܠܹܗ: ܒܗܵܘܕܹܐ ܠܡܸܬܼܐܵܘܵܝܘܼ ܥܲܡ
ܡܲܕܼܢܚܵܝܹ̈ܐ ܠܲܝܬܿ ܠܹܗ. ܒܪܲܡ ܕܐܵܦ ܠܵܐ ܫܘܼܘܕܵܥܵܐ ܕܦܘܼܪܫܵܢܵܐ
ܕܲܬܼܪܹܝܢ ܐܝܼܬܼܵܘܗܝ ܐܵܡܲ݁ܪ ܐܲܢ̄ܬܿ: ܦܘܼܪܫܵܢܵܐ ܕܹܝܢ ܠܵܘ ܕܲܚܕܼܵܝܘܼܬܼܵܐ:
ܐܸܠܵܐ ܠܫܘܼܚܠܵܦܵܐ ܕܐܘܼܤ̈ܝܼܵܣ. ܐܲܢ̄ܬܿ ܕܹܝܢ ܐܘܿ ܚܲܟܝܼܡܵܐ: ܒܟܼܠܵܗ̇
ܚܸܟܼܡܬܼܵܟܿ: ܡ̣ܢ ܒܵܬܲܪ ܚܕܼܵܝܘܼܬܼܵܐ ܐܵܦ ܬܪܹܝܢ ܡܵܘܕܹܐ ܐܲܢ̄ܬܿ. ܘܡ̣ܢ
ܒܵܬܲܪ ܚܕܼܵܝܘܼܬܼܵܐ: ܕܠܵܐ ܐܝܼܬܲܝܗܘܿܢ ܬܘܼܒܼ ܬܪܹܝܢ ܟܝܵܢ̈ܝܼܢ ܦܵܤܹ̇ܩ
ܐܲܢ̄ܬܿ ܠܡܵܘܕܲܝܘܼ. ܬܪܹܝܢ ܓܹܝܪ ܟܝܵܢ̈ܝܼܢ ܕܲܡܚܲܝܕܝܼܢ ܐܸܡܲܪܬܿ. ܓܲܠܝܵܐ
ܗ̣̄ܝ ܕܡ̣ܢ ܒܵܬܲܪ ܚܕܼܵܝܘܼܬܼܵܐ ܐܝܼܬܲܝܗܘܿܢ ܡܚܲܝ̈ܕܹܐ: ܘܠܵܐ ܗ̄ܘ̣ܵܐ ܡ̣ܢ
ܩܕܼܵܡ ܚܕܼܵܝܘܼܬܼܵܐ. ܐܲܝܟܲܢܵܐ ܡܵܕܹܝܢ ܡ̣ܢܡ ܒܵܬܲܪ ܚܕܼܵܝܘܼܬܼܵܐ ܬܪܹܝܢ ܟܝܵܢ̈ܝܼܢ
ܡܵܘܕܸܐ ܐܲܢ̄ܬܿ: ܘܲܕܼܡ̣ܢ ܒܵܬܲܪ ܚܕܼܵܝܘܼܬܼܵܐ ܕܢܵܘܕܹܐ ܬܪܹܝܢ ܟܝܵܢ̈ܝܼܢ
ܡܦܲܪܓܸܠ ܐܲܢ̄ܬܿ؟ ܠܐܲܝܕܵܐ ܢܗܲܝܡܸܡܢ؟ ܠܗܵܝ̇ ܩܲܕܼܡܵܝܬܼܵܐ: ܐܵܘ ܠܗܵܝ̇
ܕܬܲܪܬܹܝܢ؟ ܐܵܘ ܠܗܵܝ̇ ܕܝܼܠܵܟܼ؟ ܕܥܲܡ ܡܲܕܸܢܚܵܝܹ̈ܐ ܕܡܵܘܕܹܝܢ ܬܪܹܝܢ
ܟܝܵܢ̈ܝܼܢ: ܡܵܘܕܸܐ ܐܲܢ̄ܬܿ. ܠܵܘ ܕܹܝܢ ܐܵܩܵܩܝܼܣ: ܕܡ̣ܢ ܒܵܬܲܪ ܚܕܼܵܝܘܼܬܼܵܐ
ܠܵܐ ܙܵܕܹܩ ܠܡܵܘܕܵܝܘܼ ܬܪܹܝܢ ܟܝܵܢ̈ܝܼܢ: ܐܸܠܵܐ ܚܲܕܼ. ܡܸܛܠ ܕܡ̣ܢ ܟܲܕܼܘܼ
ܡܒܲܛܲܠ ܦܘܼܪܫܵܢܵܐ ܕܠܲܬܼܪܹܝܢ. ܠܟܼܠ ܐ̄ܢܵܫ: ܐܲܝܟܼ ܕܒܼܵܥܹ̇ܐ ܐܲܢ̄ܬܿ . .
ܐܸܠܵܐ ܠܲܡ ܦܘܼܪܫܵܢܵܐ ܟܝܵܢܵܝܵܐ ܠܵܐ ܡܩܲܒܿܠܝܼܢ: ܒܲܠܚܘܿܕܼ ܕܹܝܢ ܒܢܵܬܼ̈ܿ
ܩܵܠܹ̈ܐ ܕܥܲܠ ܡܵܪ̈ܲܢ ܡܬܲܚܡܝܼܢ ܘܲܡܦܲܪܫܝܼܢ ܟܲܕܼ ܐܵܡ̇ܪܝܼܢ
ܕܦܲܐ̈ܝܼܢ. ܘܠܵܐ ܐܵܡ̇ܪܝܼܢ ܕܡܸܢܗܹܝܢ ܐܲܝܟܼ ܕܠܲܒܼܪܵܐ ܠܚܘܿܕܼܵܐܝܼܬܼ ܠܡܸܠܬܼܵܐ
ܕܡ̣ܢ ܐܲܠܵܗܵܐ ܐܲܒܼܵܐ: ܡܸܢܗܹܝܢ ܕܹܝܢ ܐܲܝܟܼ ܕܠܲܐ̄ܚܪܹܢܸܐ ܒܪܵܐ ܬܘܼܒܼ:
pb. 437
ܗܵܘ̇ ܕܡ̣ܢ ܐܲܢ̄ܬܿܬܼܵܐ. ܐܸܠܵܐ ܕܡܸܢܗܹܝܢ ܠܐܲܠܵܗܘܼܬܼܵܐ: ܡܸܢܗܹܝܢ
ܕܹܝܢ ܬܘܼܒܼ ܠܐ̄ܢܵܫܘܼܬܹܗ. ܐܲܠܵܗܵܐ ܓܹܝܪ ܐܝܼܬܼܵܘܗܝ ܗ̤ܘ ܟܲܕܼ ܗ̤ܘ
ܘܒܲܪ ܐ̄ܢܵܫܵܐ . . . ܘܠܝܼ ܥܵܫܹ̇ܩ ܠܝܼ ܟܲܕܼ ܡܕܲܓܸܠ: ܐܲܝܟܼ ܡ̇ܢ
ܕܲܬܼܪܹܝܢ ܒܢ̈ܝܼܢ ܐܸܡܲ݁ܪ ܐ̄ܢܵܐ. ܘܐܵܦ ܗܵܢܹܝܢ ܕܡܸܢܹܗ ܐܲܝܬܿܝܼ ܥܠܲܝ ܦܵܥ̇ܝܵܢ:
ܐܸܢ ܡ̣ܢ ܐܸܓܿܪ̈ܵܬܼܵܐ ܘܐܸܢ ܡ̣ܢ ܬܘܼܪ̈ܓܵܡܹܐ ܗܵܠܹܝܢ ܕܲܡܩܲܛܥܝܼܢ ܗ̄ܘ̣ܵܘ
ܠܹܗ. ܗܵܝ̇ ܕܹܝܢ ܕܐܼܡ݂ܲܪ: ܗܵܫܵܐ ܕܠܵܐ ܡܩܲܒܿܠܝܼܢ ܦܘܼܪܫܵܢܵܐ ܟܝܵܢܵܝܵܐ:
ܒܲܠܚܘܿܕܼ ܕܹܝܢ ܒܢܵܬܼ̈ ܩܵܠܹ̈ܐ ܕܥܲܠ ܡܵܪܲܢ ܡܬܲܚܡܝܼܢ ܘܲܡܦܲܪܫܝܼܢ.
ܢܸܚܙܸܐ ܡܵܢ ܐܸܡ݂ܲܪܘ ܗܵܢ̇ܘܿܢ ܕܡ̣ܢ ܡܲܕܼܢܚܵܐ: ܘܲܕܒܲܐܝܢܵܐ ܙܢܵܐ
ܒܗܵܠܹܝܢ ܗ̤ܘ ܡܸܬܼܚܲܫܲܚ. ܠܲܒܼ̈ܢܵܬܼ ܩܵܠܹ̈ܐ ܠܲܡ ܕܐܹܘܲܢ̈ܓܲܠܝܵܐ ܕܥܲܠ
ܡܵܪܲܢ: ܝܵܕܼܥ̇ܝܼܢ ܚ̄ܢܲܢ ܠܐ̄ܢܵܫܵܐ ܡܡܲܠܸܠܝ̈ ܐܲܠܵܥܵܝ̈ܬܼܵܐ: ܕܡܸܢܗܹܝܢ ܕܓܼܵܘܵܐ
ܥܵܒܲܕܝܼܢ ܠܗܹܝܢ ܐܲܝܟܼ ܕܥܲܠ ܚܲܕܼ ܦܲܪܨܘܿܦܵܐ. ܫܵܡܲܥ ܐܲܢ̄ܬܿ ܕܐܲܝܟܲܢܵܐ
ܐܵܘܕܝܼܘ؟ ܥܲܠ ܚܲܕܼ ܦܲܪܨܘܿܦܵܐ: ܘܠܵܐ ܗ̄ܘ̣ܵܐ ܥܲܠ ܚܲܕܼ ܟܝܵܢܵܐ. ܡܵܢܵܐ
ܡܫܲܚܠܸܦ ܐܲܢ̄ܬܿ ܠܬܼܵܘܕܝܼܬܼܗܘܿܢ: ܟܲܕܼ ܗܸܢܼܘܿܢ ܕܓܼܵܘܵܐ ܥܵܒܼ̇ܕܝܼܢ
ܠܗܹܝܢ: ܐܲܝܟܼ ܕܐܲܢ̄ܬܿ ܐܸܡ݂ܲܪܬܿ: ܥܲܠ ܚܲܕܼ ܦܲܪܨܘܿܦܵܐ ܕܓܼܵܘܵܐ؟
ܕܓܼܵܘܵܐ: ܐܲܢ̄ܬܿ ܘܠܵܐ ܡܸܕܸܡ ܥܵܒܹ̇ܕܼ ܐܵܢ̄ܬܿ. ܠܘܵܬܼ ܡ̇ܢ ܥܵܒܼ̇ܕܝܼܢ ܠܗܹܝܢ
ܕܓܼܵܘܵܐ: ܟܲܕܼ ܓܵܘܵܐ ܠܲܝܬܿ: ܐܸܠܵܐ ܐܲܝܠܹܝܢ ܕܡܸܬܼܚܲܫܚܝܼܢ ܒܚܲܕܼ
ܦܲܪܨܘܿܦܵܐ؟ ܐܸܡ݂ܲܪ ܗܵܟܹܝܠ ܦܲܪܨܘܿܦܵܐ ܕܓܼܵܘܵܐ: ܐܸܡܲܪ ܠܗܵܠܹܝܢ
ܕܥܵܒܼ̈ܕܵܢ ܕܓܼܵܘܵܐ ܠܚܲܕܼ ܦܲܪܨܘܼܿܦܵܐ. ܠܚܲܕܼ ܦܲܪܨܘܿܦܵܐ ܕܝܼܠܹܗ ܕܓܼܵܘܵܐ
ܥܵܒܹ̇ܕܼ ܠܹܗ. ܓܵܘܵܐ ܓܹܝܪ ܡܸܬܼܥܒܕܼ: ܗܵܘ̇ ܕܡ̣ܢ ܕܲܠܩܘܼܒܼ̈ܠܵܝܬܼܵܐ
ܕܡܸܕܸܡ ܡܸܬܼܥܒܸܕܼ. ܐܲܝܟܼ ܕܠܵܐ ܗ̄ܘ̣ܵܐ ܡܸܟܹܿܝܠ ܠܚܘܿܕܼܵܝܵܐ: ܐܸܠܵܐ
pb. 438
ܕܓܼܵܘܵܐ. ܐܲܟܼܙܢܵܐ ܗܵܟܹܝܠ ܕܚܸܘܝܵܐ ܫܵܩܹ̇ܠ ܡܚܘܿܬܼܵܐ ܘܡܸܬܼܟܪܸܟܼܿ ܥܠܹܝܗ̇
ܕܲܡܚܘܿܬܼܵܐ: ܘܲܡܫܟܲܤܸܐ ܠܵܗ̇ ܠܲܡܚܘܿܬܼܵܐ: ܘܡ̣ܢ ܟܹܐܒܼܵܐ ܡܸܬܼܦܫܸܛ
ܡܸܢܕܪܹܫ: ܘܲܡܚܵܘܸܐ ܠܵܗ̇ ܟܲܕܼ ܠܵܐ ܨܵܒܹ̇ܐ: ܗܵܟܲܢܸܵܐ ܐܵܦ ܐܲܢ̄ܬܿ ܡܲܡܪܲܚ
ܐܲܢ̄ܬܿ ܠܲܡܛܲܫܵܝܘܼ ܗܵܘ̇ ܡܵܐ ܕܐܵܘܕܝܼܬܿ: ܘܒܼܵܬܲܪܟܸܢ ܐܵܘܕܝܼܬܿ: ܟܲܕܼ ܠܵܐ
ܨܵܒܹ̇ܐ ܐܲܢ̄ܬܿ ܒܐܲܝܠܹܝܢ ܕܐܸܬܿܬܵܘ̈ܕܝܼ.
ܫܡܲܥ ܓܹܝܪ ܠܬܼܵܘܕܝܼܬܼܵܐ ܕܝܼܠܵܟܼ: ܠܵܟܼ ܓܹܝܪ ܬܒܲܥ̣ܘ ܕܬܼܵܘܕܸܐ
ܥܲܡܗܘܿܢ ܗܵܠܹܝܢ ܕܲܟܼܬܿܒܼܬܿ . . ܥܲܠ ܒܢܵܬܼ̈ ܩܵܠܹ̈ܐ ܕܹܝܢ ܕܐܹܘܢ̈ܓܲܠܝܵܐ
ܘܕܲܫܠܝܼܚܹ̈ܐ ܕܥܲܠ ܡܵܪ̈ܲܢ ܐܲܡܝܼܪ̈ܵܢ: ܝܵܕܼܥ̇ܝܼܢ ܚ̄ܢܲܢ ܠܐ̄ܢܵܫܵܐ ܡܡܲܠܸܠܝ̈
ܐܲܠܵܗܵܝ̈ܬܼܵܐ: ܕܲܠܡܸܢܗܹܝܢ ܕܓܼܵܘܵܐ ܥܵܒܹ̇ܕܝܼܢ ܠܗܹܝܢ ܐܲܝܟܼ ܕܲܠܚܲܕܼ ܦܲܪܨܘܿܦܵܐ:
ܡܸܢܗܹܝܢ ܕܹܝܢ ܡܦܲܠܓܼܝܼܢ ܐܲܝܟܼ ܕܥܲܠ ܬܪܹܝܢ ܟܝܵܢܹ̈ܐ. ܐܲܝܠܹܝܢ ܠܲܡ
ܕܦܲܐ̈̄ܝܵܢ ܠܐܲܠܵܗܵܐ: ܠܦܘܼܬܼ ܐܲܠܵܗܘܼܬܹܗ ܕܲܡܫܝܼܚܵܐ. ܡܸܢܗܹܝܢ ܕܹܝܢ
ܘܲܠܗܹܝܢ ܠܫܝܼ̈ܛܵܬܼܵܐ: ܥܲܠ ܐ̄ܢܵܫܘܼܬܼܵܐ ܝܵܗ̇ܒܿܝܼܢ ܠܗܹܝܢ . . . ܗܵܠܹܝܢ ܐܵܘܕܝܼܬܿ
ܠܡܸܬܼܪܲܥܵܝܘܼ ܘܲܠܡܲܠܵܦܘܼ: ܠܡܵܢܵܐ ܗܵܫܵܐ ܡܚܲܦܸܐ ܐܲܢ̄ܬܿ؟ ܐܸܡ݂ܲܪܬܿ
ܓܹܝܪ ܕܐܲܝܠܹܝܢ ܕܦܵܪܫܝܼܢ: ܐܲܝܟܼ ܕܥܲܠ ܬܪܹܝܢ ܟܝܵܢ̈ܝܼܢ: ܘܠܵܐ ܗ̄ܘ̣ܵܐ
ܕܥܲܠ ܚܲܕܸ ܟܝܵܢܵܐ: ܘܠܵܐ ܗ̄ܘ̣ܵܐ ܗ̤ܝ ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ ܐܝܼܬܹܝܗ̇
ܗ̤ܝ ܡܲܕܼ ܗ̤ܝ. ܐܸܠܵܐ ܗܵܠܹܝܢ ܡ̇ܢ ܕܠܲܐܠܵܗܘܼܬܼܵܐ ܠܐܲܠܵܗܘܼܬܼܵܐ:
ܘܕܼܠܐ̄ܢܵܫܘܼܬܼܵܐ ܠܐ̄ܢܵܫܘܼܬܼܵܐ. ܠܵܐ ܗ̄ܘ̣ܵܐ ܒܲܬܼܪܹܝܢ ܫܡܵܗܹ̈ܐ ܩ̣ܪܵܘ ܠܚܲܕܼ
ܟܝܵܢܵܐ: ܕܲܒܼܒܲܪܬܼ ܩܵܠܵܐ ܒܲܠܚܘܿܕܸ ܦܪܝܼܫ ܘܠܵܐ ܗ̄ܘ̣ܵܐ ܒܐܘܼܤܝܼܐ: ܐܲܝܟܼ
ܕܐܲܢ̄ܬܿ ܡܸܬܼܪܲܥܸܐ ܐܲܢ̄ܬܿ. ܐܵܡܲ݁ܪ ܐܲܢ̄ܬܿ ܓܹܝܪ: ܕܫܘܼܚ̈ܠܵܦܹܐ ܕܲܒܼ̈ܢܵܬܼ
ܩܵܠܹ̈ܐ ܠܵܐ ܒܛܸܠ̣ܘ: ܐܸܠܵܐ ܒܒܲܪܪܬܼ ܩܵܠܵܐ ܐܵܘܕܵܥ̣ܘ ܟܵܝܵܢܹ̈ܐ ܘܦܘܼܪܫܵܢܵܐ
pb. 439
ܕܲܟܼܝܵܢܹ̈ܐ. ܘܕܲܠܡܹܐܡܲܪ ܕܐܝܼܬܼ ܦܘܼܪܫܵܢܵܐ ܕܲܟܼܝܵܢܹ̈ܐ ܡܵܘܕܹܐ ܐܲܢ̄ܬܿ: ܐܸܡ݂ܲܪܬܿ
ܓܹܝܪ ܕܲܡܦܲܠܓܼܝܼܢ ܠܲܒܼ̈ܢܵܬܼ ܩܵܠܹ̈ܐ ܐܲܝܟܼ ܕܥܲܠ ܬܪܹܝܢ ܟܝܵܢ̈ܝܼܢ. ܡܸܢܗܹܝܢ
ܠܲܡ ܐܲܝܠܹܝܢ ܕܦܲܐ̈ܝܵܢ ܠܐܲܠܵܗܵܐ ܠܐܲܠܵܗܘܼܬܼܵܗ̇ ܕܲܡܫܝܼܚܵܐ: ܘܠܵܐ ܗ̄ܘ̣ܵܐ
ܠܵܗ̇ ܟܲܕܼ ܠܵ̄ܗ̇ ܠܐܘܼܤܝܼܵܐ ܒܐ̄ܢܵܫܘܼܬܼܵܐ: ܐܸܠܵܐ ܒܲܟܼܝܵܢܵܐ ܒܐܲܠܵܗܘܼܬܼܵܐ.
ܠܵܐ ܗ̄ܘ̣ܵܐ ܓܹܝܪ ܠܐܲܠܵܗܘܼܬܼܵܐ ܐܵܡ̇ܪܝܼܢ ܬܪܹܝܢ ܟܝܵܢ̈ܝܼܢ: ܐܸܠܵܐ ܚܲܕܼ ܟܝܵܢܵܐ:
ܘܚܲܕܼ ܟܝܵܢܵܐ ܠܐ̄ܢܵܫܘܼܬܼܵܐ. ܠܵܐ ܗ̄ܘ̣ܵܐ ܓܹܝܪ ܡ̣ܢ ܚܲܕܼ ܟܝܵܢܵܐ ܬܪܹܝܢ ܟܝܵܢ̈ܝܼܢ
ܡܸܫܬܲܡܗܝܼܢ: ܘܠܵܐ ܗ̄ܘ̣ܵܐ ܡ̣ܢ ܬܪܹܝܢ ܟܝܵܢ̈ܝܼܢ ܚܲܕܼ ܟܝܵܢܵܐ. ܥܲܠ ܬܪܹܝܢ
ܟܝܵܢ̈ܝܼܢ ܓܹܝܪ ܐܸܡ݂ܲܪ. ܕܢܼܬܼܥܒܸܕܼ ܦܘܼܪܫܵܢܵܐ: ܘܠܵܐ ܗ̄ܘ̣ܵܐ ܥܲܠ
ܬܲܪܬܹܝܢ ܒܢܵܬܼ̈ ܩܵܠܹ̈ܐ ܕܡܵܘܕ̈ܥܵܢ ܚܲܕܼ ܡܝܵܢܵܐ: ܐܸܠܵܐ ܕܲܬܼܪܹܝܢ ܟܝܵܢ̈ܝܼܢ
ܡܵܘܕ̈ܥܵܢ ܒܦܘܼܪܢܵܫܵܐ ܕܫܘܼܚܠܵܦܵܐ ܕܐܘܼܤܝܼܵܐ ܕܲܬܼܪ̈ܝܗܘܿܢ ܟܝܢܹ̈ܐ.
ܗܵܠܹܝܢ ܡ̇ܢ ܡܸܬܼܥܲܒܼ̈ܕܵܢ ܕܓܼܵܘܵܐ: ܐܲܝܟܼ ܕܥܲܠ ܚܲܕܼ ܦܲܪܨܘܿܦܵܐ.
ܡܸܢܹܗܹܝܢ ܕܹܝܢ ܡܸܬܼܦܲܠ̈ܓܼܵܢ: ܐܲܝܟܼ ܕܥܲܠ ܬܪܹܝܢ ܟܝܵܢ̈ܝܼܢ. ܐܲܝܠܹܝܢ ܕܦܲܐ̈ܝܵܢ
ܠܐܲܠܵܗܵܐ: ܠܐܲܠܵܗܘܼܬܹܗ ܕܲܡܫܝܼܚܵܐ. ܦܲܪܨܘܿܦܵܐ ܕܓܼܵܘܵܐ ܕܲܬܼܪ̈ܝܗܘܿܢ
ܟܝܵܢܹ̈ܐ: ܡܫܝܼܚܵܐ ܕܒܹܗ ܟܲܕܼ ܒܹܗ ܒܦܲܪܨܘܿܦܵܐ: ܘܒܼܵܗ̇ ܟܲܕܼ ܒܵܗ̇
ܡܸܬܼܚܲܫܚܝܼܢ ܟܝܢܹ̈ܐ: ܒܗܵܘ̇ ܕܒܹܗ ܘܡܸܢܹܗ ܡܸܬܼܝܲܕܼܥܝܼܢ ܒܐܘܼܤܝܼܵܐ
ܬܪ̈ܲܝܗܘܿܢ. ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ: ܕܠܵܐ ܦܘܼܪܵܫܵܐ ܘܲܒܼܦܲܘܼܪܵܫܵܐ.
ܠܵܐ ܗ̄ܘ̣ܵܐ ܐܲܠܵܗܘܼܬܼܵܐ ܘܐܵܦ ܠܵܐ ܐ̄ܢܵܫܘܼܬܼܵܐ: ܒܦܲܪܨܘܿܦܵܐ ܕܓܼܵܘܵܐ
ܐܝܼܬܹܝܗ̇: ܕܲܬܼܪ̈ܲܝܗܘܿܢ ܓܹܝܪ ܟܝܵܢܹ̈ܐ ܐܝܼܬܹܝܗ̇. ܐܲܝܟܲܢܵܐ ܕܲܗܵܢܵܐ ܘܡ̣ܢ
ܗܵܢܵܐ ܢܸܬܼܝܲܕܼܥܘܼܢ ܬܪ̈ܲܝܗܘܿܢ ܟܝܵܢܹ̈ܐ. ܚܲܕܼ ܓܹܝܪ ܐܝܼܬܼܵܘܗܝ ܒܐܘܼܤܝܼܵܐ.
ܒܦܲܪܨܘܿܦܵܐ ܓܹܝܪ ܕܐܘܼܤܝܼܵܐ ܕܐܲܠܵܗܘܼܬܼܵܐ: ܒܹܗ ܟܲܕܼ ܒܹܗ ܐܵܦ ܐܘܼܤܝܼܵܐ
ܕܐ̄ܢܵܫܘܼܬܼܵܐ ܡܸܬܼܚܲܫܚܵܐ. ܘܠܵܐ ܗ̄ܘ̣ܵܐ ܒܐܘܼܤܝܼܵܐ: ܘܲܒܼܦܲܪܨܘܿܦܵܐ
pb. 440
ܕܐ̄ܢܵܫܘܼܬܼܵܐ: ܐܘܼܤܝܼܵܐ ܕܐܲܠܵܗܵܘܼܬܼܵܐ ܡܸܬܼܚܲܫܚܵܐ ܒܹܗ ܟܲܕܼ ܒܹܗ. ܘܠܵܐ
ܗ̄ܘ̣ܵܐ ܒܐܘܼܤܝܼܵܐ: ܐܲܝܟܲܢܵܐ ܕܐܲܢ̄ܬܿ ܡܥܲܬܸܕܼ ܐܲܢ̄ܬܿ. ܘܠܵܐ ܠܲܡ ܐܵܡ̇ܪܝܼܢ
ܠܡܸܢܗܹܝܢ ܐܲܝܟܼ ܕܠܲܒܼܪܵܐ ܠܚܘܿܕܼܵܐܝܼܬܼ ܠܡܸܠܬܼܵܐ ܕܡ̣ܢ ܐܲܠܵܗܵܐ ܐܲܒܼܵܐ:
ܡܸܢܗܹܝܢ ܕܹܝܢ ܐܲܝܟܼ ܕܠܲܐ̄ܚܪܹܢܵܐ ܒܪܵܐ ܬܘܼܒܼ ܗܵܘ̇ ܕܡ̣ܢ ܐܲܢ̄ܬܿܬܼܵܐ.
ܐܸܠܵܐ ܕܡܸܢܗܹܝܢ ܠܐܲܠܵܗܘܼܬܹܗ: ܡܸܢܗܹܝܢ ܕܹܝܢ ܬܘܼܒܼ ܠܐ̄ܢܵܫܘܼܬܹܗ.
ܐܲܠܵܗܵܐ ܓܹܝܪ ܐܝܼܬܼܵܘܗܝ ܘܗ̤ܘ ܟܲܕܼ ܗ̤ܘ ܘܒܲܪܢܵܫܵܐ . . .
ܐܸܢ ܗ̤ܘ ܕܲܠܚܘܿܕܼܵܐܝܼܬܼ ܐܵܡܲ݁ܪ ܐܲܢ̄ܬܿ ܒܪܲܚܝܼܩܘܼܬܼ ܦܘܼܪܫܵܢܵܐ ܕܲܟܼܝܵܢܹ̈ܐ:
ܠܵܐ ܗ̄ܘ̣ܵܐ ܠܐܲܝܠܹܝܢ ܕܡܵܘܕܹܝܢ ܕܲܡܚܝܕܹܝܢ ܟܝܵܢܹ̈ܐ ܐܸܡܲ݁ܪ ܐܲܢ̄ܬܿ:
ܘܕܸܐܬܼܚܲܝܲܕܼ ܠܚܲܕܼ ܦܲܪܨܘܿܦܵܐ: ܘܐܝܼܬܲܝܗܘܿܢ ܬܪܹܝܢ ܟܝܵܢ̈ܝܼܢ: ܘܡܵܘܕܥܝܼܢ
ܘܡܸܬܼܝܲܕܼܥܝܼܢ ܒܹܗ ܘܡܸܢܹܗ ܬܪܹܝܢ ܡܝܵܢ̈ܝܼܢ. ܐܸܢ ܕܹܝܢ ܒܲܟܼܝܵܢܵܐ ܐܸܡܵ݁ܪ
ܐܲܢ̄ܬܿ ܗ̤ܘ ܟܲܕܼ ܗ̤ܘ: ܐܲܝܟܲܢܵܐ ܕܐܲܠܵܗܘܼܬܼܵܐ ܚܲܕܼ ܟܝܵܢܵܐ ܐܝܼܬܹܝܗ̇ ܕܡ̣ܢ
ܐܲܠܵܗܵܐ ܐܲܒܼܵܐ ܐܸܬܼܝܲܠܕܲܬ̤: ܘܡ̣ܢ ܐܲܢ̄ܬܿܬܼܵܐ ܬܘܼܒܼ ܒܵܗ̇ ܒܲܕܼܡܘܼܬܼܵܐ
ܐܵܡܲ݁ܪ ܐܲܢ̄ܬܿ: ܕܲܒܼܒܲܪܬܼ ܩܵܠܵܐ ܒܲܠܚܘܿܕܼ ܦܪܝܼܫ ܐܲܠܵܗܵܐ ܡ̣ܢ ܒܲܪܢܵܫܵܐ:
ܘܒܼܐܘܼܤܝܼܵܐ ܗ̤ܘ ܟܲܕܼ ܗ̤ܘ. ܘܲܠܒܲܪ ܡ̣ܢ ܬܵܘܕܝܼܬܼܵܟܼ ܕܝܼܠܵܟܼ ܐܸܡܲ݁ܪ
ܐܲܢ̄ܬܿ: ܘܬܼܘܼܒܼ ܪܵܗܹ̇ܛ ܐܲܢ̄ܬܿ ܕܥܲܡ ܢܲܦܫܵܟܼ ܬܫܲܪܸܐ ܩܪܵܒܼܵܐ. ܐܲܝܟܲܢܵܐ
ܓܹܝܪ ܐܵܘܕܝܼܬܿ ܦܘܼܪܫܵܢܵܐ ܕܥܲܠ ܬܪܹܝܢ ܟܝܵܢ̈ܝܼܢ ܥܲܡ ܡܲܕܼܢܚܵܝܹ̈ܐ:
ܡܸܢܗܹܝܢ ܡ̇ܢ ܕܲܒܼ̈ܢܵܬܼ ܩܵܠܹ̈ܐ ܐܲܝܠܹܝܢ ܕܦܲܐ̈ܝܵܢ ܠܐܲܠܵܗܘܼܬܼܵܐ: ܠܐܲܠܵܗܘܼܬܹܗ
ܕܲܡܫܝܼܚܵܐ. ܘܐܲܝܠܹܝܢ ܕܫܝܼ̈ܛܵܢ: ܠܐ̄ܢܵܫܘܼܬܹܗ ܕܲܡܫܝܼܚܵܐ. ܕܒܲܟܼܝܵܢܵܐ ܐܝܼܬܹܝܗ̇
ܐ̄ܢܵܫܘܼܬܼܵܐ: ܘܒܲܟܼܝܵܢܵܐ ܐܲܠܵܗܘܼܬܼܵܐ. ܠܵܐ ܗ̄ܘ̣ܵܐ ܠܐܲܠܵܗܘܼܬܹܗ ܕܐܲܠܵܗܵܐ
ܡܸܠܬܼܵܐ: ܘܐܵܦ ܠܵܐ ܬܘܼܒܼ ܠܐ̄ܢܵܫܘܼܬܹܗ ܕܐܲܠܵܗܵܐ ܡܸܠܬܼܵܐ. ܠܵܐ ܗ̄ܘ̣ܵܐ
ܓܹܝܪ ܬܪܹܝܢ ܟܝܵܢ̈ܝܼܢ ܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ ܘܡ̣ܢ ܬܪܹܝܢ ܟܝܵܢ̈ܝܼܢ:
pb. 441
ܐܵܘ ܬܪܹܝܢ ܫܡܵܗ̈ܝܼܢ ܐܵܘ ܤܲܓܝܼ ܫܡܵܗܹ̈ܐ: ܕܠܲܚܕܼܵܐ ܐܘܼܤܝܸܿܐ ܐܝܼܬܼ ܠܵܗ̇
ܫܡܵܗܹ̈ܐ. ܘܠܵܐ ܗ̄ܘ̣ܵܐ ܒܲܟܼܝܵܢܵܐ ܐܲܠܵܗܘܼܬܼܵܐ ܡܸܬܼܪܲܢܝܵܐ: ܐܸܠܵܐ ܒܒܲܪܬܼ
ܩܵܠܵܐ ܒܲܠܚܘܿܕܼ. ܠܡܵܢܵܐ ܚܵܛܹ̇ܦ ܐܲܢ̄ܬܿ ܥܲܡܵܟܼ ܠܐܵܩܵܩܝܼܣ: ܓܲܒܼܪܵܐ
ܡܲܚܒܼܵܢܵܟܼ ܘܒܲܪ ܢܲܦܫܵܟܼ: ܕܠܵܐ ܙܵܕܹܩ ܗ̄ܘ̣ܵܐ ܕܐܲܝܟܼ ܕܐܵܬܼܝܵܐ ܬܸܫܪܹܝܘܗܝ؟
ܕܒܲܫܡܵܐ ܒܲܠܚܘܿܕܼ ܫܚܝܼܡܵܐ ܘܲܒܼܒܲܪܬܼ ܩܵܠܵܐ ܢܸܫܠܲܡ ܠܵܟܼ ܕܲܡܦܲܠܸܓܼ
ܐܲܢ̄ܬܿ ܠܲܡܼܝܵܢܹ̈ܐ: ܠܵܐ ܗ̄ܘ̣ܵܐ ܒܐܘܼܤ̈ܝܼܵܣ ܕܝܼܠܗܘܿܢ: ܐܸܠܵܐ ܒܲܒܼ̈ܢܵܬܼ
ܩܵܠܹ̈ܐ ܕܲܒܼܪܸܥܝܵܢܵܐ ܡܸܬܼܩܲܝ̈ܡܵܢ. ܐܲܟܼܙܢܵܐ ܕܲܒܼ̈ܢܵܬܼ ܩܵܠܹ̈ܐ: ܐܲܝܠܹܝܢ ܕܠܵܐ
ܬܚܘܼܡܵܐ ܘܠܵܐ ܟܝܵܢܵܐ ܡܵܘ̈ܕܥܵܢ. ܒܲܟܼܿܝܵܢܵܐ ܡ̇ܢ ܘܒܼܐܘܼܤ̈ܝܼܵܣ ܠܲܝܬܿ
ܠܗܹܝܢ ܦܘܼܪܫܵܢܵܐ: ܡܸܛܠ ܕܐܵܦ ܠܵܐ ܐܝܼܬܲܝܗܹܝܢ ܐܘܼ̈ܤܝܼܣ. ܒܲܒܼ̈ܢܵܬܼ
ܩܵܠܹ̈ܐ ܕܹܝܢ ܒܲܠܚܘܿܕܼ ܕܲܟܼܝܵܢܹ̈ܐ ܐܝܼܬܼ ܠܗܹܝܢ ܦܘܼܪܫܵܢܵܐ: ܡܸܛܠ ܕܐܵܦ
ܒܗܵܕܹܐ ܐܝܼܬܼ ܠܗܹܝܢ ܕܢܸܬܼܩܲܝ̈ܡܵܢ.
ܗܵܟܲܢܵܐ ܐܵܦ ܥܲܠ ܡܫܝܼܚܵܐ ܐܸܡ݂ܲܪܬܿ ܬܪܹܝܢ ܟܝܵܢ̈ܝܼܢ: ܠܵܐ ܗ̄ܘ̣ܵܐ
ܒܲܟܼܝܵܢܹ̈ܐ ܘܒܼܐܘܼ̈ܤܝܼܵܣ: ܐܸܠܵܐ ܒܤܘܼܟܵܠܵܐ ܘܒܲܒܼ̈ܢܵܬܼ ܩܵܠܹ̈ܐ ܒܲܠܚܘܿܕܼ
ܐܵܡܲ݁ܪ ܐܲܢ̄ܬܿ ܕܐܝܼܬܼ ܠܗܘܿܢ ܦܘܼܪܫܵܢܵܐ. ܐܲܚܲܝ̈ܢ ܠܲܡ ܗܵܢ̇ܘܿܢ ܕܒܲܐܢܛܝܵܟܼܝܵܐ:
ܠܗܵܢ̇ܘܿܢ ܕܡܸܢܗܘܿܢ ܡܸܬܼܝܼܕܲܥ ܡܫܝܼܚܵܐ: ܐܲܝܟܼ ܡ̇ܢ ܕܲܒܼܪܸܥܝܵܢܵܐ ܒܲܠܚܘܿܕܼ
ܫܚܝܼܡܵܐܝܼܬܼ ܡܩܲܒܿܠܝܼܢ: ܫܘܼܚܠܵܦܵܐ ܕܲܟܼܝܵܢܹ̈ܐ ܐܵܡ̇ܪܝܼܢ. ܡܸܛܠ ܕܠܵܐ
ܗ̄ܘ̣ܵܐ ܚܲܕܼ ܡܸܕܸܡ ܐܝܼܬܹܝܗ̇ ܐܲܝܟܼ ܕܐܸܡ̇ܪܹܬܼ: ܒܲܙܢܵܐ ܟܝܵܢܵܝܵܐ ܐܲܠܵܗܘܼܬܼܵܐ
ܘܐ̄ܢܵܫܘܼܬܼܵܐ . . . ܒܲܙܢܵܐ ܐܸܡ݂ܲܪܬܿ: ܘܠܵܐ ܗ̄ܘ̣ܵܐ ܒܐܘܼܤܝܼܵܐ. ܐܸܠܵܐ ܙܢܵܐ
ܕܹܝܢ: ܠܵܐ ܐܝܼܬܼܵܘܗܝ ܟܝܵܢܵܐ ܕܐܘܼܤܝܼܵܐ. ܐܸܠܵܐ ܐܵܘ ܐܸܤܟܹܡܵܐ ܕܐܘܼܤܝܼܵܐ:
ܐܵܘ ܕܲܟܼܝܵܢܵܐ: ܐܵܘ ܕܠܵܐ ܐܘܼܤܝܼܵܐ: ܐܵܘ ܚܙܵܬܼܵܐ ܕܲܒܼܪܸܥܝܵܢܵܐ ܒܲܠܚܘܿܕܼ
ܫܚܝܼܡܵܐ ܡܸܬܼܐܡܲܪ ܥܲܠ ܟܝܵܢܹ̈ܐ. ܗܵܢܵܐ ܙܢܵܐ ܠܵܐ ܗ̄ܘ̣ܵܐ ܫܘܼܚܠܵܦܵܐ ܟܝܵܢܵܝܵܐ
pb. 442
ܕܲܟܼܝܵܢܹ̈ܐ ܐܝܼܬܼ ܠܹܗ: ܐܸܠܵܐ ܫܘܼܚܠܵܦܵܐ ܕܲܟܼܝܵܢܹ̈ܐ ܕܠܵܐ ܐܘܼܤܝܼܵܐ: ܐܸܠܵܐ
ܒܲܒܼ̈ܢܵܬܼ ܩܵܠܹ̈ܐ ܒܲܠܚܘܿܕܼ ܕܲܒܼܪܸܥܝܵܢܵܐ ܕܲܟܼܝܵܢܹ̈ܐ ܕܠܵܐ ܐܘܼ̈ܤܝܼܵܣ ܐܵܡܲ݁ܪ
ܕܐܝܼܬܼ̇ܝܗܹܝܢ. ܘܲܠܗܵܕܹܐ ܐܵܡܲ݁ܪ: ܕܐܲܝܠܹܝܢ ܕܡܸܢܗܘܿܢ ܡܸܬܼܝܼܕܲܥ ܡܫܝܼܚܵܐ:
ܐܲܝܟܼ ܡ̇ܢ ܕܲܒܼܪܸܥܝܵܢܵܐ ܒܲܠܚܘܿܕܼ ܫܚܝܼܡܵܐܝܼܬܼ ܡܩܲܒܿܠܝܼܢ ܫܘܼܚܠܵܦܵܐ
ܐܵܡ̇ܪܝܼܢ ܕܲܟܼܝܵܢܹ̈ܐ. ܡܸܛܠ ܕܠܵܐ ܗ̄ܘ̣ܵܐ ܚܲܕܼ ܡܸܕܸܡ ܐܝܼܬܹܝܗ̇: ܐܲܝܟܼ
ܕܐܸܡ̇ܪܹܬܼ ܒܲܙܢܵܐ ܟܝܵܢܝܵܐ: ܐܲܠܵܗܘܼܬܼܵܐ ܘܐ̄ܢܵܫܘܼܬܼܵܐ . . . ܐܸܠܵܐ ܠܵܘ
ܗܵܕܹܐ ܡܩܲܒܿܠܝܼܢ ܗܵܢܘܿܢ ܕܡ̣ܢ ܐܲܢܛܝܵܟܼܝܵܐ: ܐܵܘ ܕܢܹܐܡܪܘܼܢ: ܐܵܘ
ܕܲܠܐ̄ܢܵܫ ܕܐܵܡܲ݁ܪ ܢܸܫܡܥܘܼܢ. ܐܸܠܵܐ ܐܵܡ̇ܪܝܼܢ: ܕܠܲܒܼ̈ܢܵܬܼ ܩܵܠܹ̈ܿܐ ܕܐܹܘܲܢ̈ܓܲܠܝܼܵܐ
ܕܥܲܠ ܫܡܝܼܚܵܐ ܡܵܪܲܢ: ܝܵܕܼܥ̇ܝܼܢ ܚ̄ܢܲܢ ܠܐ̄ܢܵܫܵܐ ܐܲܠܵܗܵܝܹ̈ܐ: ܕܡܸܢܗܹܝܢ
ܕܓܼܵܘܵܐ ܥܵܒܼ̇ܕܝܼܢ ܠܗܹܝܢ: ܐܲܝܟܼ ܕܥܲܠ ܚܲܕܼ ܦܲܪܨܘܼܦܵܐ. ܡܸܢܗܹܝܢ ܕܹܝܢ:
ܡܦܲܠܓܼܝܼܢ ܥܲܠ ܬܪܹܝܢ ܟܝܵܢ̈ܝܼܢ . . . ܕܲܡܦܲܠܵܓܼܘܼ ܡܦܲܠܓܼܝܼܢ ܐܸܡ݂ܲܪܘ:
ܠܲܒܼ̈ܢܵܬܼ ܩܵܠܹ̈ܐ ܐܸܡ݂ܲܪܘ ܥܲܠ ܬܪܹܝܢ ܟܝܵܢ̈ܝܼܢ: ܘܠܵܘ ܒܪܸܥܝܵܢܵܐ ܒܲܠܚܘܿܕܼ
ܫܚܝܼܡܵܐܝܼܬܼ ܡܩܲܒܿܠܝܼܢ ܫܘܼܚܠܵܦܐ. ܠܵܐ ܗ̄ܘ̣ܵܐ ܒܲܒܼ̈ܢܵܬܼ ܩܵܠܹ̈ܐ: ܐܸܠܵܐ
ܒܼܒܼ̈ܢܵܬܼ ܩܵܠܹ̈ܐ ܕܥܲܠ ܬܪܹܝܢ ܟܝܵܢ̈ܝܼܢ: ܕܲܡܦܲܪܫܝܼܢ ܒܡܸܠܬܼܵܐ ܕܐܘܼܤ̈ܝܼܵܣ.
ܡܦܲܪ̈ܫܹܐ ܐܝܼܬܲܝܗܘܿܢ ܬܪܹܝܢ ܟܝܵܢܹ̈ܐ: ܕܡܸܢܼܦܲܪܫܝܼܢ ܒܲܒܼ̈ܢܵܬܼ ܩܵܠܹ̈ܐ
ܡܫܵܘ̈ܕܥܵܢܝܵܬܼܗܘܿܢ. ܠܵܐ ܗ̄ܘ̣ܵܐ ܟܝܵܢܹ̈ܐ ܕܠܵܐ ܩܢܘܿܡܹ̈ܐ: ܘܠܵܐ ܗ̄ܘ̣ܵܐ
ܒܪܸܥܝܵܢܵܐ ܕܠܵܐ ܩܢܘܿܡܹ̈ܐ ܕܲܟܼܝܵܢܹ̈ܐ: ܒܲܒܼ̈ܢܵܬܼ ܩܵܠܹ̈ܐ ܒܪܸܥܝܵܢܵܐ ܡܩܝܼܡܝܼܢ.
ܐܸܠܵܐ ܒܪܸܥܝܵܢܵܐ ܕܒܲܟܼܝܵܢܹ̈ܐ ܕܒܼܐܘܼܤ̈ܝܼܵܣ: ܐܸܠܵܐ ܒܐܘܼܤ̈ܝܼܵܣ ܘܒܲܟܼܝܵܢܹ̈ܐ
ܡܩܝܼܡܝܼܢ ܠܪܸ̈ܥܝܵܢܹܐ ܘܠܲܟܼܝܵܢܹ̈ܐ.
ܤܲܓܿܝܼ ܓܹܝܪ ܦܪܝܼܫ ܗܵܢܵܐ ܡ̣ܢ ܗܵܘ̇. ܗܵܘ̇ ܓܹܝܪ ܐܵܡܲ݁ܪ: ܕܲܒܼܪܸܥܝܵܢܵܐ
ܒܲܠܚܘܿܕܼ ܫܚܝܼܡܵܐܝܼܬܼ ܡܩܲܒܿܠܝܼܢ ܒܢܵܬܼ̈ ܩܵܠܹ̈ܐ ܕܫܘܼܚܠܵܦܵܐ ܕܲܟܼܝܵܢܹ̈ܐ:
pb. 443
ܘܲܠܪܸܥܝܵܢܵܐ ܕܲܟܼܝܵܢܹ̈ܐ ܕܒܼܐܘܼܤ̈ܝܼܵܣ ܠܵܐ ܡܩܲܒܸܿܠ. ܐܸܠܵܐ ܕܠܵܐ ܩܢܘܿܡܹ̈ܐ
ܘܠܵܐ ܡܩܲܝ̈ܡܹܐ: ܡܸܢܹܗ ܕܪܸܥܝܵܢܵܐ ܡ̇ܢ ܫܘܼܪܵܝܵܐ ܐܝܼܬܼ ܠܗܘܿܢ:
ܘܲܒܼܫܘܼܠܵܡܵܐ ܡܫܲܠܡܝܼܢ. ܗܵܘ̇ ܕܲܠܪܸܥܝܵܢܵܐ ܘܠܲܒܼ̈ܢܵܬܼ ܩܵܠܹ̈ܐ ܕܲܟܼܝܵܢܹ̈ܐ:
ܕܒܼܐܘܼ̈ܤܝܼܵܣ ܡܫܵܘܕܥܝܼܢ ܐܵܡܲ݁ܪ: ܘܲܠܫܘܼܪܵܝܵܐ ܒܪܸܥܝܵܢܵܐ ܘܒܲܟܼܝܵܢܹ̈ܐ
ܘܒܼܐܘܼܤ̈ܝܼܵܣ. ܐܲܝܟܲܢܵܐ ܕܬܸܗܘܸܐ ܡ̣ܢ ܟܝܵܢܵܐ ܕܐܘܼܤܝܼܵܐ ܠܗܵܘ̇ ܐܲܝܢܵܐ
ܕܚܵܫܹ̇ܒܼ: ܬܠܵܬܼܵܐ ܙܢܲܝ̈ܵܐ ܕܡܸܬܿܬܲܒܼܥܝܼܢ. ܗ̤ܝ ܐܘܼܤܝܼܵܐ: ܘܪܸܥܝܵܢܵܐ
ܕܐܘܼܤܝܼܵܐ: ܘܒܲܪܬܼ ܩܵܠܵܐ ܡܫܵܘܕܥܵܢܝܼܬܼܵܐ ܕܪܸܥܝܵܢܵܐ. ܡ̇ܢ ܕܲܒܼܪܸܥܝܵܢܵܐ
ܕܹܝܢ ܐܸܡ݂ܲܪ ܕܒܲܠܚܘܿܕܼ ܫܚܝܼܡܵܐܝܼܬܼ ܐܸܢܹܝܢ: ܬܪܹܝܢ ܙܢܲܝ̈ܵܐ ܐܵܡܲ݁ܪ. ܗ̤ܘ
ܪܸܥܝܵܢܵܐ ܫܚܝܼܡܵܐܝܼܬܼ: ܘܒܲܪܬܼ ܩܵܠܵܐ ܕܝܼܠܹܗ. ܡܸܛܠ ܗܵܢܵܐ ܒܪܸܥܝܵܢܵܐ
ܒܲܠܚܘܿܕܼ ܕܲܟܼܝܵܢܵܐ ܝܵܗܹ̇ܒܼ ܫܘܼܚܠܵܦܵܐ: ܘܠܵܐ ܗ̄ܘ̣ܵܐ ܒܐܘܼܤܝܼܵܐ: ܐܸܠܵܐ
ܒܲܙܢܵܐ ܕܲܒܼܗܲܓܵܓܼܵܐ ܘܲܒܼܡܲܪܤܒܿܪܵܢܘܼܬܼܵܐ ܕܲܟܼܝܵܢܵܐ. ܒܐܸܤܟܹܡܵܐ ܕܲܟܼܝܵܢܵܐ: ܘܠܵܐ
ܗ̄ܘ̣ܵܐ ܒܐܘܼܤܝܼܵܐ ܕܲܟܼܝܵܢܵܐ. ܙܢܵܐ ܗ̄ܘ̣ ܓܹܝܪ ܕܲܟܼܝܵܢܵܐ: ܘܐܸܤܟܹܡܵܐ ܐܵܦ
ܚܙܵܬܼܵܐ ܕܐܘܼܤܝܼܵܐ. ܠܗܵܕܹܐ ܓܹܝܪ ܠܟܼܠܗܹܝܢ ܡܲܝܬܸܐ ܘܲܡܟܲܢܸܫ: ܕܲܕܼܠܵܐ
ܐܘܼܤܝܼܵܐ ܐܝܼܬܼܵܘܗܝ. ܡܲܢ̣ܘܼ ܢܸܤܒܲܪ ܥܲܠ ܐܲܝܢܵܐ ܕܕܲܐܝܟܼ ܗܵܟܲܢܵܐ
ܡܒܲܤܪܵܐܝܼܬܼ ܡܸܬܼܚܲܫܚ ܒܐܲܠܵܗܵܝ̈ܬܼܵܐ؟ ܘܠܵܘ ܚܲܕܼ ܪܸܥܝܵܢܵܐ ܕܲܟܼܝܵܐ
ܘܲܬܼܟܼܝܼܠܵܐ ܐܝܼܬܼ ܠܹܗ: ܘܲܠܟܼܠ ܡܸܕܸܡ ܒܹܗ ܒܲܙܢܵܐ ܚܵܫܹ̇ܒܼ: ܘܡܸܫܬܿܥܵܝܘܼ
ܡܸܫܬܿܥܸܐ ܒܐܲܝܠܹܝܢ ܕܡܲܛܝܼ ܐܘܼܠܨܵܢܵܐ ܥܕܲܡܵܐ ܠܢܲܦܫܗܘܿܢ:
ܘܲܚܦܝܼܛܝܼܢ ܠܡܹܐܠܲܦ ܫܪܵܪܵܐ.
ܘܡܸܬܿܕܲܡܸܐ ܒܐܘܿܪܸܓܹܢܝܼܣ: ܕܟܼܠ ܡܸܕܸܡ ܐܵܡܲ݁ܪ: ܐܲܝܟܼ ܕܡ̣ܢ
ܟܠ ܐ̄ܢܵܫ ܢܸܬܼܩܲܒܲܠ: ܟܲܕܼ ܡܫܲܟܸܢ ܠܟܼܠܢܵܫ ܛܲܝܒܿܘܼܬܼܵܐ ܒܗܵܘ̇ ܡܵܐ
pb. 444
ܕܐܵܡܲ݁ܪ ܘܲܡܦܝܼܣ ܠܟܼܠ: ܒܗܵܠܹܝܢ ܕܗ̤ܘ ܡ̣ܢ ܟܠ ܐ̄ܢܵܫ ܡܸܤܬܿܢܸܐ:
ܟܲܕܼ ܡܲܗܦܸܟܼ ܘܲܡܒܲܛܸܠ ܠܗܵܠܹܝܢ ܕܥܲܬܸܕܼ ܒܝܲܕܼ ܕܲܠܩܘܼܒܼ̈ܠܵܝܵܬܼܵܐ.
ܒܐܲܝܠܹܝܢ ܓܹܝܪ ܕܫܵܦܪ̈ܵܢ ܠܹܗ ܠܐ̄ܢܵܫ: ܒܗܹܝܢ ܒܵܥܹ̇ܐ ܟܠ ܐ̄ܢܵܫ
ܕܲܢܩܵܘܸܐ. ܐܲܝܢܵܐ ܓܹܝܪ ܕܐܲܝܟܼ ܒܥܸܠܕܒܼܵܒܼܵܐ ܡܫܲܚܠܸܦ ܠܗܹܝܢ: ܐܲܝܟܼ
ܒܥܸܠܕܒܼܵܒܼܵܐ ܐܝܼܬܼܵܘܗܝ ܠܟܼܠ ܐ̄ܢܵܫ. ܘܠܵܐ ܗ̄ܘ̣ܵܐ ܒܐܲܝܠܹܝܢ ܕܥܲܬܼܕܼܘ
ܚܵܕܹܝܢ ܘܡܸܬܿܬܿܢܝܼܚܝܼܢ: ܐܲܝܟܼ ܕܲܠܩܘܼܒܼܠܵܐ: ܒܐܲܝܠܹܝܢ ܕܥܲܬܸܕܼܘ
ܡܸܬܼܒܿܐܵܫܘܼ ܡܸܬܒܿܐܸܫ ܠܗܘܿܢ. ܒܐܲܝܠܹܝܢ ܓܹܝܪ ܕܠܹܗ ܡܢܝܼܚܝܼܢ: ܗܸܢܘܿܢ
ܠܵܐ ܚܵܕܹܝܢ. ܗܵܕܹܐ ܓܹܝܪ ܠܒܲܪ ܡ̣ܢ ܫܪܵܪܵܐ ܡܲܤܒܿܪܝܼܢ ܕܐܝܼܬܲܝܗܹܝܢ.
ܐܸܠܵܐ ܒܐܲܝܠܹܝܢ ܕܡܸܬܼܪܲܡܪܡܝܼܢ ܠܩܘܼܒܼܠܹܗ ܐܲܝܟܼ ܕܠܘܼܩܒܲܠ
ܒܥܸܠܕܒܼܵܒܼܵܐ ܕܲܫܪܵܪܵܐ: ܢܵܦܹ̇ܩ ܪܘܼܚܵܐ ܟܹܐܡܲܬܼ ܥܲܠ ܐܲܦܲܝ̈ ܗܲܝܡܵܢܘܼܬܼܵܐ
ܗܵܝ̇ ܕܡܲܕܼܢܚܵܝܹ̈ܐ: ܘܠܵܐ ܢ̣ܛܲܪ ܡܲܦܲܩ ܒܪܘܼܚܵܐ ܕܝܼܠܗܘܿܢ ܕܠܵܐ
ܚܘܼܠܛܵܢܵܐ ܐܲܝܟܼ ܡܵܐ ܕܐܝܼܬܼܵܘܗܝ.
ܩܘܼܪܸܠܘܿܣ. ܡܸܛܠ ܓܹܝܪ ܕܲܒܼܢܲܝ̈ ܪܘܼܫܥܹܗ ܕܐܵܪܝܼܘܿܣ: ܟܲܕܼ
ܚܵܠܛ̇ܝܼܢ ܙܹܐܦܵܐ ܪܲܫܝܼܥܵܐܝܼܬܼ ܒܚܲܝܠܹܗ ܕܲܫܪܵܪܵܐ: ܐܵܡ̇ܪܝܼܢ ܕܡܸܠܬܼܵܐ ܕܡ̣ܢ
ܐܲܠܵܗܵܐ ܗܘ̤ܵܐ ܡ̣ܢ ܒܲܪܢܵܫܵܐ: ܒܪܲܡ ܕܹܝܢ ܒܦܲܓܼܪܵܐ ܠܵܐ ܢܲܦܫܵܢܵܐ
ܐܸܬܼܚܲܫܲܚ. ܤܵܥ̇ܪܝܼܢ ܕܹܝܢ ܗܵܕܹܐ ܨܢܝܼܥܵܐܝܼܬܼ: ܕܟܲܕܼ ܒܲܒܼ̈ܢܵܬܼ ܩܵܠܹ̈ܐ
ܐ̄ܢܵܫܝܵ̈ܬܼܵܐ ܦܵܪܫܝܼܢ ܠܹܗ: ܘܲܡܚܵܘܹ̇ܝܢ ܕܐܝܼܬܼܵܘܗܝ ܒܲܒܼܨܝܼܪܘܼܬܼܵܐ ܡ̣ܢ
ܡܥܲܠܝܘܼܬܼܵܐ ܕܐܲܒܼܵܐ: ܠܐܲܝܠܹܝܢ ܕܡܲܛܥܝܼܢ ܒܗܘܿܢ: ܕܲܟܼܝܵܢܵܐ ܐ̄ܚܪܹܢܵܐ
ܐܝܼܬܼܵܘܗܝ ܠܒܲܪ ܡܸܢܹܗ ܢܹܐܡܪܘܼܢ. ܟܲܕܼ ܕܵܚ̇ܠܝܼܢ ܗܵܟܹܝܠ ܡ̣ܢ ܗܵܕܹܐ
ܡܲܕܼܢ̈ܚܵܝܹܐ: ܕܕܲܠܡܵܐ ܐܵܪܵܐ ܫܘܼܒܼܚܵܐ ܕܲܟܼܝܵܢܵܐ ܕܐܲܠܵܗܵܐ ܡܸܠܬܼܵܐ ܡܸܬܼܒܲܨܲܪ:
ܡ̣ܢ ܐܲܝܠܹܝܢ ܕܐ̄̇ܢܵܫܐܝܼܬܼ ܐܲܡܝܼܪ̈ܵܢ: ܡܸܛܠ ܡܕܲܒܿܪܵܢܘܼܬܼܵܐ ܕܥܲܡ
pb. 445
ܒܸܤܪܵܐ: ܡܦܲܪܫܝܼܢ ܒܢܵܬܼ̈ ܩܵܠܹ̈ܐ. ܠܵܐ ܟܲܕܼ ܠܲܬܼܪܹܝܢ ܦܲܪ̈ܨܘܿܦܹܐ
ܡܦܲܠܓܼܝܼܢ ܐܲܝܟܼ ܕܐܸܡ̇ܪܹܬܼ: ܠܚܲܕܼ ܒܪܵܐ ܘܡܵܪܝܵܐ. ܐܸܠܵܐ ܡܸܢܗܹܝܢ ܡ̇ܢ
ܠܐܲܠܵܗܘܼܬܹܗ ܦܵܪܫܝܼܢ: ܡܸܢܹܗܹܝܢ ܕܹܝܢ ܬܘܼܒܼ ܠܐ̄ܢܵܫܘܼܬܹܗ. ܒܪܲܡ
ܕܹܝܢ: ܟܠܗܹܝܢ ܠܚܲܕܼ.
ܢܸܤܛܘܿܪܝܼܣ. ܐܸܢ ܓܹܝܪ ܠܚܲܕܼ ܟܝܵܢܵܐ ܕܐܲܠܵܗܵܐ ܡܸܠܬܼܵܐ ܝܵܗ̇ܒܿܝܼܢ
ܠܲܒܼ̈ܢܵܬܼ ܩܵܠܹ̈ܐ ܐܲܠܵܗܝ̈ܬܼܵܐ ܘܐ̄ܢܵܫܵܝ̈ܬܼܵܐ: ܕܒܲܒܼ̈ܢܵܬܼ ܩܵܠܹ̈ܐ ܒܲܚܠܘܿܕܼ
ܡܫܲܚ̱ܠܦܝܼܢ:
ܐܲܝܟܲܢܵܐ ܥܵܪܩܝܼܢ ܠܡܹܐܡܲܪ: ܕܐ̄ܢܵܫܝ̈ܬܼܵܐ ܠܵܐ ܐܝܼܬܲܝܗܹܝܢ ܕܐܘܼܤܝܼܵܐ
ܕܐܲܠܵܗܵܐ ܡܸܠܬܼܵܐ؟ ܥܲܠ ܐ̄ܢܵܫܝ̈ܬܼܵܐ ܕܹܝܢ ܐܸܡ݂ܲܪܬܿ: ܕܠܵܘ ܠܚܘܿܕܼܵܐܝܼܬܼ
ܐܸܢܹܝܢ: ܕܢܘܼܟܼܪ̈ܵܝܵܢ ܠܲܟܼܝܵܢܵܐ ܕܐܲܒܼܵܐ ܡ̇ܢ: ܗܵܝ̇ ܕܲܚܕܼܵܐ ܐܝܼܬܹܝܗ̇.
ܠܵܐ ܗ̄ܘ̣ܵܐ ܓܹܝܪ ܒܒܲܪܬܼ ܩܵܠܵܐ ܐܝܼܬܼܵܘܗܝ ܐ̄ܚܪܹܢܵܐ ܒܲܟܼܝܢܵܐ: ܐܸܠܵܐ
ܐܵܦ ܒܐܘܼܤܝܼܵܐ. ܐܘܼܤܝܼܵܐ ܓܹܝܪ ܕܒܲܪܢܵܫܵܐ ܐܲܝܟܼ ܕܐܸܡܲܪܬܿ: ܐܘܼܤܝܼܵܐ
ܗ̣̄ܝ ܕܐܲܠܵܗܵܐ. ܐܝܼܬܼܵܘܗܝ ܠܲܡ ܐܲܠܵܗܵܐ: ܘܒܲܪܢܵܫܵܐ. ܡܵܕܹܝܢ ܢܘܼܟܼܪܵܝ
ܠܐܲܒܼܵܐ ܒܟܼܠ ܙܢܵܐ ܕܐܝܼܬܼ: ܘܲܒܼܨܝܼܪ ܒܟܼܠ ܡܸܕܸܡ ܠܦܘܼܬܼ ܪܸܥܝܵܢܵܐ
ܕܝܼܠܵܟܼ: ܕܡܸܬܼܪܲܥܸܐ ܐܲܢ̄ܬܿ ܕܒܼܵܗ̇ ܟܲܕܼ ܒܵܗ̇ ܒܲܚܕܼܵܐ ܐܘܼܤܝܼܵܐ ܐܝܼܬܼܵܘܗܝ
ܐܵܦ ܒܲܪܢܵܫܵܐ. ܠܵܐ ܓܹܝܪ ܟܲܕܼ ܡܸܬܼܚܲܟܿܡܝܼܢ ܐܢ̄ܬܿܘܿܢ ܒܲܩܛܝܼܪܵܐ
ܬܕܲܒܿܪܘܼܢ: ܘܠܵܐ ܬܸܗܘܘܿܢ ܫܲܪܝܼܪܝܼܢ. ܦܪܲܫ̣ܘ ܗ̄ܘ̣ܵܘ ܠܲܒܼ̈ܢܵܬܼ ܩܵܠܹ̈ܐ:
ܕܢܸܤܬܲܒܼܪܘܼܢ ܕܐܲܝܟܼ ܗܵܘ̇ ܕܥܲܠ ܬܪܹܝܢ ܟܝܵܢ̈ܝܼܢ ܕܐܘܼܤ̈ܝܼܵܣ ܡܦܲܪܫܝܼܢ
ܠܗܹܝܢ. ܘܡܸܬܼܥܲܕܠܝܼܢ ܒܥܘܼܬܵܕܼܵܐ ܕܠܘܼܩܒܲܠ ܐܲܠܵܗܵܐ ܡܸܠܬܼܵܐ: ܕܲܠܗܵܠܹܝܢ
ܕܠܵܐ ܐܘܼܤܝܼܵܐ ܒܪܸܥܝܵܢܵܐ ܒܲܠܚܘܿܕܼ ܥܲܠ ܟܝܢܹ̈ܐ ܢܸܬܼܪܲܥܘܿܢ ܐܸܢܹܝܢ:
ܐܲܝܟܼ ܕܐܲܢ̄ܬܿ ܡܸܤܬܲܟܲܡ ܐܲܢ̄ܬܿ: ܕܗܵܠܹܝܢ ܘܗܵܠܹܝܢ ܐܵܡܲ݁ܪ ܐܲܢ̄ܬܿ. ܐܸܠܵܐ
ܗܵܢ̇ܘܿܢ ܐܲܝܟܼ ܕܥܲܠ ܬܪܹܝܢ ܟܝܵܢ̈ܝܼܢ ܕܒܼܐܘܼܤܝܼܵܐ ܐܝܼܬܲܝܗܘܿܢ:
pb. 446
ܡܦܲܪܫܝܼܢ ܠܲܒܼ̈ܢܵܬܼ ܩܵܠܹ̈ܐ ܗܵܠܹܝܢ: ܐܲܝܟܼ ܡܵܐ ܕܒܲܫܪܵܪܵܐ ܐܝܼܬܲܝܗܹܝܢ.
ܘܲܠܥܵܫܘܿܩܘܼܬܼܵܐ ܕܐܵܪ̈ܝܵܢܹܐ ܕܠܘܼܩܒܲܠ ܐܲܠܵܗܵܐ ܡܸܠܬܼܵܐ ܕܵܚ̇ܩܝܼܢ. ܗܵܘ̇ ܓܹܝܪ
ܕܲܠܚܲܕܼ ܟܝܵܢܵܐ ܘܗ̤ܝ ܟܲܕܼ ܗ̤ܝ ܐܘܼܤܝܼܵܐ: ܟܝܵܢܵܐܝܼܬܼ ܠܬܲܪ̈ܬܲܝܗܹܝܢ ܒܢܵܬܼ̈
ܩܵܠܹ̈ܐ ܡܲܠܘܸܬܼ: ܠܐܵܪ̈ܝܵܢܹܐ ܒܟܼܠ ܙܢܵܐ ܕܐܝܼܬܼ ܡܥܲܬܸܕܼ ܘܲܡܥܲܕܲܪ:
ܕܢܘܼܟܼܪܵܝ ܐܲܠܵܗܵܐ ܡܸܠܬܼܵܐ ܠܐܲܠܵܗܵܐ ܐܲܒܼܵܐ.
ܩܘܼܪܸܠܘܿܣ. ܠܵܐ ܠܲܡ ܛܲܥܝܵܐ ܗܵܕܹܐ ܠܚܲܤܝܘܼܬܼܵܟܼ: ܕܟܲܕܼ
ܡܘܼ̈ܡܹܐ ܕܪܸܥܝܵܢܵܐ ܕܐܵܦܘܿܠܝܼܢܵܪܝܼܣ ܐܵܫ̇ܕܝܼܢ ܥܲܠ ܐܸܓܿܪ̈ܵܬܼܝ: ܐܲܤܒܲܪܘ
ܐܵܦ ܕܲܕܼܠܵܐ ܢܲܦܫܵܐ ܐܝܼܬܼܵܘܗܝ ܐܵܡܲ݁ܪ ܐ̄ܢܵܐ: ܦܲܓܼܪܹܗ ܩܲܕܝܼܫܵܐ ܕܲܡܫܝܼܚܵܐ.
ܘܲܕܼܡܘܼܙܵܓܼܵܐ ܘܒܼܘܼܠܒܵܠܵܐ ܘܲܚܒܼܘܼܟܼܝܵܐ ܘܫܘܼܚܠܵܦܵܐ ܕܐܲܠܵܗܵܐ ܡܸܠܬܼܵܐ
ܗܘ̤ܵܐ ܠܘܵܬܼ ܒܸܤܪܵܐ: ܐܵܘ ܐܲܝܟܼ ܕܒܸܤܪܵܐ ܐܸܫܬܲܓܼܢܝܼ ܠܲܟܼܝܵܢܵܐ ܕܐܲܠܵܗܘܼܬܼܵܐ.
ܐܲܝܟܼ ܕܠܵܐ ܢܸܬܼܢܛܲܪ ܡܸܕܸܡ ܕܲܟܼܝܵܐܝܼܬܼ: ܘܠܵܐ ܕܲܗܘ̤ܵܐ ܐܝܼܬܼܵܘܗܝ
ܗܵܘ̇ ܡܵܐ ܕܐܝܼܬܼܵܘܗܝ. ܥܲܡ ܗܵܕܹܐ ܕܹܝܢ ܐܲܤܒܲܪܘ: ܕܐܵܦ
ܒܓܼܘܼܕܵܦܵܘ̈ܗܝ ܕܐܵܪܝܼܘܿܣ ܡܥܲܪܙܲܠ ܐ̄ܢܵܐ. ܒܗܵܝ̇ ܕܠܵܐ ܨܵܒܹ̇ܐ ܗ̄ܘܹ̇ܝܬܼ
ܕܐܸܕܲܥ ܫܘܼܚܠܵܦܵܐ ܕܲܒܼ̈ܢܵܬܼ ܩܵܠܹ̈ܐ: ܘܕܹܐܡܲܪ ܕܡܸܢܗܹܝܢ ܐܝܼܬܲܝܗܹܝܢ ܕܦܲܐ̈ܝܵܢ
ܠܐܲܠܵܗܵܐ: ܡܸܢܗܹܝܢ ܕܹܝܢ ܐ̄ܢܵܫܵܝ̈ܬܼܵܐ: ܘܦܲܐ̈ܝܵܢ ܝܲܬܿܝܼܪܵܐܝܼܬܼ ܠܲܡܕܲܒܿܪܵܢܘܼܬܼܵܐ
ܕܥܲܡ ܒܸܤܪܵܐ. ܕܐܸܢܵܐ ܕܹܝܢ ܡ̣ܢ ܐܲܝܠܹܝܢ ܕܕܲܐܝܟܼ ܗܵܠܹܝܢ ܐܝܼܬܲܝܗܹܝܢ
ܡܒܲܪܲܝ ܐ̄ܢܵܐ: ܤܵܗܕܵܐ ܥܠܲܝ ܠܲܐ̄ܚܪ̈ܵܢܹܐ ܗ̤ܝ ܓܡܝܼܪܘܼܬܼܵܟܼ. ܒܪܲܡ ܕܹܝܢ
ܙܵܕܹܩ ܗ̄ܘ̣ܵܐ: ܕܠܲܐܝܠܹܝܢ ܕܐܸܬܼܟܿܫܸܠܘ ܢܸܦܘܿܩ ܪܘܼܚܵܐ. ܘܲܒܼܗܵܕܹܐ
ܟܸܬܼܒܹ̇ܬܼ ܠܘܵܬܼ ܕܸܚܠܲܬܼ ܐܲܠܵܗܵܐ ܕܒܼܵܟܼ: ܕܠܵܐ ܗܵܠܹܝܢ ܕܒܹܝܬܼ ܐܵܪܝܼܘܿܣ
ܐܵܘ ܕܒܹܝܬܼ ܐܵܦܘܿܠܝܼܢܵܪܝܼܣ ܐܸܬܼܪܲܥܝܼܬܼ ܡܸܡܬܼܘܿܡ. ܘܠܵܐ ܕܐܸܬܼܗܦܸܟܼ
ܐܲܠܵܗܵܐ ܡܸܠܬܼܵܐ ܠܒܸܤܪܵܐ ܐܵܡܲ݁ܪ ܐ̄ܢܵܐ: ܘܠܵܐ ܕܠܲܟܼܝܵܢܵܐ ܕܐܲܠܵܗܘܼܬܼܵܐ
pb. 447
ܫܲܢܝܼ ܒܸܤܪܵܐ. ܡܸܛܠ ܕܠܵܐ ܡܫܬܲܚܠܦܵܢܵܐ ܐܝܼܬܼܵܘܗܝ ܕܠܵܐ ܡܸܫܬܲܓܼܢܝܵܢܵܐ
ܡܸܠܬܼܵܐ ܕܐܲܠܵܗܵܐ: ܘܠܵܐ ܡܸܬܿܕܲܪܟܵܢܵܐ ܗ̄ܘ̣ ܒܟܼܠܗܹܝܢ: ܘܠܵܐ ܬܘܼܒܼ
ܫܘܼܚܠܵܦܵܐ ܕܲܒܼ̈ܢܵܬܼ ܩܵܠܹ݁̈ܐ ܡܸܡܬܼܘܿܡ ܐܲܪܝܼܡܹ̇ܬܼ. ܐܸܠܵܐ ܝܵܕܼܥ̇ ܐ̄ܢܵܐ
ܠܡܵܪ̈ܲܢ: ܕܲܡܡܲܠܸܠ ܐܲܟܼܚ̄ܕܼܵܐ ܐܲܠܵܗܵܐܝܼܬܼ ܘܐ̄ܢܵܫܐܝܼܬܼ: ܡܸܛܠ ܕܐܝܼܬܼܵܘܗܝ
ܐܲܟܼܚ̄ܕܼܵܐ ܐܲܠܵܗܵܐ ܘܒܲܪܢܵܫܵܐ.
ܢܸܤܛܘܿܪܝܼܣ. ܐܲܝܟܲܢܵܐ ܟܠܗܹܝܢ ܗܵܠܹܝܢ ܐܸܡܲܪܬܿ ܕܡܲܤܒܿܪܝܼܢ
ܥܲܠܝܼ: ܡܸܛܠ ܕܠܵܐ ܨܵܒܹ̇ܐ ܐܲܢ̄ܬܿ ܠܡܸܕܲܥ ܦܘܼܪܫܵܢܵܐ ܕܲܒܼ̈ܢܵܬܼ ܩܵܠܹ̈ܐ:
ܟܲܕܼ ܫܘܼܚܠܵܦܵܐ ܕܲܒܼ̈ܢܵܬܼ ܩܵܠܹ̈ܐ ܠܵܐ ܐܲܪܝܼܡ̣ܬܿ؟ ܐܲܝܟܲܢܵܐ ܡ̣ܢ ܐܝܠܹܝܢ
ܕܠܵܐ ܐܲܪܝܼܡ̣ܬܿ: ܐܸܤܬܲܒܼܪܵܐ ܘܗܵܠܹܝܢ ܕܐܵܪܝܼܘܿܣ ܡܸܬܼܪܲܥܸܐ ܐܲܢ̄ܬܿ ܐܵܘ
ܕܗܵܠܹܝܢ ܕܐܵܦܘܼܠܝܼܢܵܪܝܼܣ: ܕܲܠܒܸܤܪܵܐ ܐܸܫܬܲܚܠܲܦ ܐܲܠܵܗܵܐ ܡܸܠܬܼܵܐ:
ܐܵܘ ܠܲܟܼܝܵܢܵܐ ܕܐܲܠܵܗܘܼܬܼܵܐ ܐܸܫܬܲܚܠܲܦ ܒܸܤܪܵܐ؟ ܒܗܵܝ̇ ܓܹܝܪ ܕܬܸܦܘܿܩ
ܪܘܼܚܵܐ: ܕܡܲܤܒܿܪܝܼܢ ܥܠܲܝܟܼ ܐ̄ܢܫ̈ܝܼܢ: ܕܠܵܐ ܨܵܒܹ̇ܐ ܐܲܢ̄ܬܿ ܠܡܸܕܲܥ
ܠܫܘܼܚܠܵܦܵܐ ܕܲܒܼ̈ܢܵܬܼ ܩܵܠܹ̈ܐ: ܒܵܗ̇ ܒܥܸܠܬܼܵܐ ܕܡܲܦܲܩ ܒܪܘܼܚܵܐ:
ܠܢܲܦܫܵܟܼ ܡܩܲܛܪܸܓܼ ܐܲܢ̄ܬܿ: ܐܲܝܟܼ ܡ̇ܢ ܕܥܸܠܬܼܵܐ ܝܲܗ̣̄ܒܼܬܿ ܕܢܲܤܒܿܪܘܼܢ
ܥܠܲܝܟ. ܒܐܲܠܹܝܢ ܕܹܝܢ ܕܥܲܠ ܐܲܦܲܝ̈ ܢܲܦܫܵܟܼ ܢܵܦܹ̇ܩ ܐܲܢ̄ܬܿ ܪܘܼܚܵܐ ܟܲܕܼ
ܐܵܡܲ݁ܪ ܐܲܢ̄ܬܿ: ܕܫܘܼܚܠܵܦܵܐ ܕܲܒܼ̈ܢܵܬܼ ܩܵܠܹ̈ܐ ܠܵܐ ܐܲܪܝܼܡܹ̇ܬܼ: ܡܩܲܛܪܸܓܼ
ܐܲܢ̄ܬܿ ܢܲܦܫܵܟܼ ܕܝܼܠܵܟܼ: ܘܠܐܲܝܠܹܝܢ ܕܐܲܤܒܲܪܘ ܥܠܲܝܟܼ: ܒܸܠܥܵܕܼ ܫܟܼܵܚܬܼܵܐ
ܕܡܲܤܒܿܪܵܢܘܼܬܼܵܐ ܝܲܬܿܝܼܪܵܐܝܼܬܼ ܠܐܵܩܵܩܝܼܣ. ܗܵܘ̇ ܕܝܲܬܿܝܼܪܵܐܝܼܬܼ ܗ̤ܘ ܐܲܤܒܲܪ
ܗ̄ܘ̣ܵܐ: ܐܲܝܟܼ ܡ̇ܢ ܕܗ̤ܘ ܩܲܒܸܿܠ̣ ܗ̄ܘ̣ܵܐ ܐܸܢܹܝܢ ܠܲܒܼ̈ܢܵܬܼ ܩܵܠܹ̈ܐ ܗܵܠܹܝܢ:
ܕܩܲܕܼܡܵܝܑܬܼ ܠܵܐ ܡܩܲܒܸܿܠ ܗ̣̄ܘܲܝܬܿ. ܐܵܘ ܐܲܝܟܲܢܵܐ ܝܵܕܲܥ ܠܵܟܼ
ܕܲܠܫܘܼܚܠܵܦܵܐ ܕܲܒܼ̈ܢܵܬܼ ܩܵܠܹ̈ܐ ܠܵܐ ܐܲܪܝܼܡ̣ܬܿ: ܘܕܲܠܩܘܼܒܼܠܵܐ ܡܸܤܬܿܒܲܪ
pb. 448
ܐܲܢ̄ܬܿ؟ ܐܵܘ ܐܲܝܟܲܢܵܐ ܐܸܡܲܪܬܿ: ܕܠܵܐ ܐܸܫܬܲܚܠܲܦ ܐܲܠܵܗܵܐ ܡܸܠܬܼܵܐ
ܠܒܸܤܪܵܐ: ܘܠܵܐ ܒܸܤܪܵܐ ܠܐܲܠܵܗܵܐ ܡܸܠܬܼܵܐ. ܘܫܘܼܚܠܵܦܵܐ ܒܲܠܚܘܿܕܸ ܕܲܒܼ̈ܢܵܬܼ
ܩܵܠܹ̈ܐ ܐܝܼܬܼܵܘܗܝ: ܘܠܵܐ ܗ̄ܘ̣ܵܐ ܐܵܦ ܕܐܘܼܤ̈ܝܼܵܣ. ܘܕܐܘܼܤܝܼܵܐ ܕܐܲܠܵܗܘܼܬܼܵܐ
ܒܵܗ̇ ܒܲܟܼܝܵܢܵܗ̇ ܩܵܘܝܲܬ̤: ܘܐܘܼܤܝܼܵܐ ܕܒܸܤܪܵܐ ܒܹܗ ܒܲܟܼܝܵܢܵܐ ܕܒܸܤܪܵܐ
ܩܵܘܝܲܬ̤: ܐܢܗ̤ܘ ܕܠܵܐ ܐܸܫܬܲܚܠܲܦ ܐܘܼܤ̈ܝܼܵܣ ܕܝܼܠܗܘܿܢ؟ ܐܵܘ
ܐܲܝܟܲܢܵܐ ܥܲܠ ܚܲܕܼ ܟܝܵܢܵܐ ܕܐܲܠܵܗܵܐ ܡܸܠܬܼܵܐ ܤܵܐܹ̇ܩ ܐܲܢ̄ܬܿ ܠܐ̄ܢܵܫܵܝ̈ܬܼܵܐ
ܘܠܲܐܠܵܗܵܝܵܬܼܵܐ: ܐܲܝܟܲܢܵܐ ܕܐܲܠܵܗܵܐ ܡܸܠܬܼܵܐ ܒܵܗ̇ ܟܲܕܼ ܒܵܗ̇ ܐܝܼܬܼܵܘܗܝ: ܐܵܦ
ܐܲܠܵܗܵܐ ܐܵܦ ܒܲܪܢܵܫܵܐ: ܘܠܵܐ ܐܸܫܬܲܚܠܲܦ ܠܒܸܤܪܵܐ ܐܵܘ ܠܒܲܪܢܵܫܵܐ؟
ܠܵܐ ܓܹܝܪ ܡܸܫܟܿܚܵܐ ܕܬܸܗܘܸܐ ܒܵܗ̇ ܟܲܕܼ ܒܵܗ̇ ܒܐܘܼܤܝܼܵܐ ܬܲܪ̈ܬܲܝܗܹܝܢ:
ܟܲܕܼ ܠܵܐ ܗܵܘ̇ܝܵܐ ܐܘܼܤܝܼܵܐ ܗܵܝ̇ ܐ̄ܚܪܹܬܼܵܐ: ܐܲܝܟܼ ܕܐܵܦ ܗܵܝ̇ ܐ̄ܚܪܹܬܼܵܐ.
ܐܵܘ ܕܲܠܡܵܐ ܗܵܘ̇ܝܵܐ ܟܲܕܼ ܠܵܐ ܗܵܘ̇ܝܵܐ؟ ܘܐܝܼܬܹܝܗ̇ ܗܵܘ̇ ܡܵܐ ܕܲܗܘ̤ܵܬܼ:
ܘܡܸܫܬܲܚܠܦܵܐ ܠܗܵܘ̇ ܕܲܗܘ̤ܵܬܼ؟ ܗܵܢܵܘ ܕܹܝܢ: ܠܐܘܼܤܝܼܵܐ ܕܒܲܪܢܵܫܵܐ: ܘܐܵܦ
ܐܘܼܤܝܼܵܐ ܕܒܲܪܢܵܫܵܐ ܠܐܘܼܤܝܼܵܐ ܕܐܲܠܵܗܵܐ. ܐܸܗܘ̤ܘ ܕܒܼܵܗ̇ ܟܲܕܸ ܒܵܗ̇
ܒܲܚܕܼܵܐ ܐܘܼܤܝܼܵܐ ܐܝܼܬܼܵܘܗܝ ܐܲܠܵܗܵܐ ܘܒܲܪܢܵܫܵܐ: ܘܲܒܼܚܲܕܼ ܟܝܵܢܵܐ: ܟܲܕܼ
ܡܸܬܼܒܲܛܲܠ ܕܹܝܢ ܦܘܼܪܫܵܢܵܐ ܕܠܲܬܼܪܹܝܢ: ܐܲܝܟܲܢܵܐ ܐܘܼܤܝܼܵܐ ܕܒܸܤܪܵܐ
ܘܐܘܼܤܝܼܵܐ ܕܐܲܠܵܗܵܐ ܒܝܼܬܹܗܹܝܢ ܐܝܼܬܲܝܗܹܝܢ ܘܠܵܐ ܐܸܫܬܲܚܠܲܦ: ܒܲܕܼܠܵܐ
ܡܸܬܸܪ̈ܲܢܝܵܢ ܒܲܟܼ̈ܝܵܢܹܐ ܕܲܒܼܗܘܿܢ ܐܝܼܬܲܝܗܹܝܢ ܕܠܵܐ ܫܘܼܚܠܵܦ؟ ܘܐܸܢ
ܡܸܬܼܪܢܹܝܢ ܕܹܝܢ ܕܠܵܐ ܫܘܼܚܠܵܦ: ܐܲܝܟܲܢܵܐ ܠܵܘ ܬܪܼܝܢ ܢܸܬܼܪܢܘܿܢ
ܗܵܢ̇ܘܿܢ ܕܲܬܼܪܹܝܢ ܐܝܼܬܲܝܗܘܿܢ؟ ܐܲܝܟܲܢܵܐ ܡܸܬܿܬܿܪܝܼܡ ܘܡܸܬܼܒܲܛܲܠ
ܦܘܼܪܫܵܢܵܐ ܕܠܲܬܼܪܹܝܢ؟ ܗܵܠܹܝܢ ܠܡܵܐ ܠܵܐ ܢܙܝܼ̈ܥܵܢ ܘܢܸܚ̈ܬܼܵܢ ܠܲܪܓܸܫܬܼܵܐ
ܕܲܫܟܼܝܼܪܘܼܬܼܗܹܝܢ: ܐܵܦܸܢ ܟܹܐܦܵܐ ܬܸܗܘܸܐ: ܐܵܦܸܢ ܕܲܝܘܵܐ ܗܵܘ̇ ܕܠܵܐ ܫܦܲܪ
pb. 449
ܠܹܗ ܡܸܕܸܡ ܕܫܲܦܝܼܪ؟ ܩܵܥܹ̇ܐ ܓܹܝܪ ܕܕܼܝܼܠܹܗ ܐܝܼܬܼܵܘܗܝ ܥܒܼܵܕܼܵܐ:
ܘܐܲܝܟܼ ܐܲܝܠܹܝܢ ܕܡܸܫܢܵܐ ܫܢܝܼܐܝܼܢ: ܟܠܗܹܝܢ ܤܵܥܲ݁ܪ. ܘܗܵܠܹܝܢ ܐܸܡܲ݁ܪ
ܘܗܸܢܹܝܢ ܘܲܐ̄ܚܪ̈ܵܢܝܵܬܼܵܐ: ܘܟܼܠܗܹܝܢ ܘܠܵܐ ܡܸܕܸܡ.
ܘܲܒܼܪܲܡ ܠܟܼܠܢܵܫ ܥܵܒܹ̇ܕܼ: ܕܠܲܫܟܼܝܼܪ̈ܵܬܼܵܐ ܕܐܲܝܟܼ ܗܵܠܹܝܢ ܢܸܩܲܦ:
ܟܲܕܼ ܠܵܐ ܡܸܤܬܿܟܿܠܝܼܢ: ܠܵܐ ܕܥܲܠ ܐܲܝܠܹܝܢ ܐܵܡ̇ܪܝܼܢ: ܘܠܵܐ ܕܥܲܠ
ܐܲܝܠܹܝܢ ܡܫܲܪܪܝܼܢ. ܠܵܐ ܗ̄ܘ̣ܵܐ ܓܹܝܪ ܚܲܕܼ ܪܸܥܝܵܢܵܐ ܘܗ̤ܘ ܟܲܕܼ ܗ̤ܘ:
ܐܝܼܬܼ ܠܗܘܿܢ ܥܠܹܝܗ̇ ܟܲܕܼ ܥܠܹܝܗ̇: ܐܸܠܵܐ ܟܵܦ̇ܪܝܼܢ. ܘܒܲܐܝܠܹܝܢ
ܕܟܼܵܦ̇ܪܝܼܢ ܕܠܵܐ ܠܗܹܝܢ ܡܵܘܕܹܝܢ: ܒܗܹܝܢ ܡܩܵܘܹܝܢ ܐܲܝܟܼ ܡ̇ܢ
ܕܗܲܝܡܵܢܘܼܬܼܵܐ ܕܲܫܪܵܪܵܐ ܐܝܼܬܲܝܗܹܝܢ. ܘܠܲܐܝܠܹܝܢ ܕܲܕܼܠܵܐ ܗܲܝܡܵܢܘܼܬܼܵܐ ܐܸܢܹܝܢ:
ܒܗܲܝܡܵܢܘܼܬܼܵܐ ܠܵܒܼܟܿܝܼܢ ܠܗܹܝܢ. ܘܠܲܐܝܠܹܝܢ ܕܓܲܠܝܵܢ ܘܡܸܬܿܬܵܘ̈ܕܝܵܢ
ܠܟܼܠ ܐ̄ܢܵܫ: ܠܵܐ ܡܗܲܝܡܢܝܼܢ. ܐ̄ܚܪܹܬܼܵܐ ܗ̣̄ܝ ܓܹܝܪ ܗܲܝܡܵܢܘܼܬܼܵܐ:
ܘܲܐ̄ܚܪܹܢܵܐ ܗ̄ܘ̣ ܟܝܵܢܵܐ. ܗܵܘ̇ ܓܹܝܪ ܕܠܲܐܝܼܠܹܝܢ ܕܒܼܐܘܼܤܝܼܵܐ ܓܲܠ̈ܝܵܢ
ܘܝܼܕܝ̈ܥܵܢ: ܐܵܡܲ݁ܪ ܕܲܒܼܗܲܝܡܵܢܘܼܬܼܵܐ ܡܸܕܸܡ ܐ̄ܚܪܹܢܵܐ ܐܝܼܬܲܝܗܹܝܢ: ܠܵܐ
ܗ̄ܘ̣ܵܐ ܠܗܵܠܹܝܢ ܕܒܲܟܼܝܵܢܵܐ ܡܒܲܛܸܠ: ܐܸܠܵܐ ܥܲܠ ܗܵܠܹܝܢ ܒܵܥܹ̇ܐ ܕܲܢܦܝܼܣ:
ܗܵܠܹܝܢ ܕܠܵܐ ܐܝܼܬܲܝܗܹܝܢ ܒܲܟܼܝܵܢܵ. ܐܸܠܵܐ ܗܵܘ̇ ܡܵܐ ܕܒܲܟܼܝܵܢܵܐ ܗ̄ܘ̣:
ܒܚܲܝܠܵܐ ܐܝܼܬܼܵܘܗܝ ܗܵܘ̇ ܡܵܐ ܕܐܝܼܬܼܵܘܗܝ ܦܲܪܨܘܿܦܵܐ. ܕܐܲܝܟܼ ܐܲܝܟܲܢܵܐ:
ܡܵܐ ܕܐܵܡܲ݁ܪ ܥܲܠ ܠܲܚܡܵܐ ܕܗܵܢܵܘ ܦܲܓܼܪܝܼ: ܠܵܐ ܐܵܡܲ݁ܪ ܕܠܲܚܡܵܐ
ܠܵܐ ܐܝܼܬܼܵܘܗܝ ܠܲܡܚܵܐ. ܘܲܕܼܦܲܓܼܪܵܐ ܕܝܼܠܹܗ: ܠܵܐ ܐܝܼܬܼܵܘܗܝ ܦܲܓܼܪܵܐ.
ܠܲܚܡܵܐ ܓܹܝܪ ܐܸܡ݂ܲܪ ܘܦܲܓܼܪܵܐ ܡܚܵܘܝܵܐܝܼܬܼ: ܗܵܘ̇ ܡܵܐ ܕܐܝܼܬܼܵܘܗܝ
ܒܐܘܼܤܝܼܵܐ. ܐܸܠܵܐ ܡܦܵܤܝܼܢ ܚ̄ܢܲܢ: ܕܠܲܚܡܵܐ ܠܲܚܡܵܐ ܐܝܼܬܼܵܘܗܝ: ܒܲܟܼܝܵܢܵܐ
ܘܒܼܐܘܼܤܝܼܵܐ. ܠܲܡܗܲܝܡܵܢܘܼ ܕܹܝܢ ܕܠܲܚܡܵܐ ܦܲܓܼܪܹܗ ܐܝܼܬܼܵܘܗܝ:
pb. 450
ܒܗܲܝܡܵܢܘܼܬܼܵܐ ܘܠܵܘ ܒܲܟܼܝܵܢܵܐ. ܠܗܵܘ̇ ܡܵܐ ܕܠܵܐ ܐܝܼܬܼܵܘܗܝ ܒܐܘܼܤܝܼܵܐ:
ܒܵܥܹ̇ܐ ܠܲܡܦܵܤܘܼܬܲܢ ܕܲܢܗܲܝܡܸܢ. ܐܲܝܟܲܢܵܐ ܕܲܒܼܗܲܝܡܵܢܘܼܬܼܵܐ ܢܸܗܘܸܐ ܗܵܢܵܐ:
ܘܠܵܐ ܗ̄ܘ̣ܵܐ ܒܐܘܼܤܝܼܵܐ. ܐܸܢܗܘ̤ ܕܐܘܼܤܝܼܵܐ ܐܝܼܬܼܵܘܗܝ: ܠܡܵܢܵܐ ܐܵܙܠܐ
ܗܲܝܡܵܢܘܼܬܼܵܐ؟ ܠܵܐ ܓܹܝܪ ܐܸܡ݂ܲܪ: ܕܗܲܝܡܸܢܘ ܒܠܲܚܡܵܐ ܕܠܲܚܡܵܐ ܐܝܼܬܼܵܘܗܝ.
ܡܸܛܠ ܕܟܼܠ ܕܚܵܙܹ̇ܐ ܠܹܗ ܠܠܲܚܡܵܐ: ܝܵܕܲܥ̇ ܕܠܲܚܡܵܐ ܐܝܼܬܼܵܘܗܝ.
ܘܐܵܦ ܠܵܐ ܬܘܼܒܼ ܕܦܲܓܼܪܵܐ. ܢܸܥܒܸܿܕܼ ܕܢܸܬܼܗܲܝܡܲܢ ܕܦܲܓܼܪܵܐ ܐܝܼܬܼܵܘܗܝ.
ܡܸܬܼܚܙܸܐ ܓܹܝܪ ܘܡܸܬܼܝܼܕܲܥ ܡ̣ܢ ܟܠ ܐ̄ܢܵܫ: ܕܐܝܼܬܼܵܘܗܝ ܦܲܓܼܪܵܐ.
ܒܗܘ̇ ܕܹܝܢ ܡܵܐ ܕܠܵܐ ܐܝܼܬܼܵܘܗܝ: ܕܗܵܢܵܐ ܐܝܼܬܼܵܘܗܝ ܒܵܥܹ̇ܐ ܠܲܢ
ܕܲܢܗܲܝܡܸܢ: ܐܲܝܟܲܢܵܐ ܕܲܒܼܗܲܝܡܵܢܘܼܬܼܵܐ ܢܸܗܘܸܐ ܗܵܢܵܐ ܠܐܲܝܠܹܝܢ ܕܲܡܗܲܝܡܢܝܼܢ.
ܡܵܕܹܝܢ ܠܵܐ ܡܸܫܟܿܚܵܐ ܕܐܲܝܠܹܝܢ ܕܒܼܐܘܼܤܝܼܵܐ ܐ̄ܚܪܹܬܼܵܐ ܘܲܐ̄ܚܪܹܬܼܵܐ ܐܝܼܬܲܝܗܘܿܢ:
ܕܲܢܗܲܝܡܸܢ ܒܚܲܕܼ ܕܲܐ̄ܚܪܹܢܵܐ ܡܸܬܼܐܡܲܪ ܕܐܝܼܬܼܵܘܗܝ: ܟܲܕܼ ܠܵܐ ܐܝܼܬܼܵܐܘܗܝ
ܒܐܘܼܤܝܼܵܐ ܕܝܼܠܹܗ: ܘܢܸܗܘܘܿܢ ܬܪܹܝܢ ܘܲܕܼܢܘܼܟܼܪܵܝܝܑܼܢ ܐܸܢܘܿܢ ܒܐܘܼܤܝܼܵܐ
ܕܠܲܚܕܼܵܕܹ̈ܐ. ܗܵܘ̇ ܕܹܝܢ ܕܠܐܘܼܤܝܼܵܐ ܒܗܵܠܹܝܢ ܡܒܲܛܸܠ: ܥܲܡܵܗ̇
ܡܒܲܛܸܠ ܐܵܦ ܠܗܵܘ̇ ܡܵܐ ܕܲܒܼܗܲܝܡܵܢܘܼܬܼܵܐ ܡܸܬܼܪܢܸܐ.
ܡܵܕܹܝܢ: ܐܵܦ ܠܵܐ ܒܚܲܕܼ ܙܢܵܐ ܫܲܦܝܼܪܵܐ ܕܢܸܬܼܚܲܫܲܚ ܓܲܠܝܵܐܝܼܬܼ ܡ̇ܢ
ܕܗܵܟܲܢܵܐ ܐܵܡܲ݁ܪ. ܐܸܠܵܐ ܡܲܛܥܵܝܘܼ ܡܲܛܥܸܐ: ܕܲܠܗܵܠܹܝܢ ܡܩܲܒܸܠ ܐܵܦ
ܡܒܲܛܸܠ. ܕܲܢܚܵܘܸܐ ܠܟܼܠ ܐ̄ܢܵܫ: ܕܒܹܗ ܐܝܼܬܲܝܗܹܝܢ ܫܲܪܝܼܪ̈ܵܬܼܵܐ ܘܕܲܓܵܠܵܬܼ̈ܐ:
ܘܕܼܵܐܪܬܵܕܘܿܟܿܤܝܼܵܐ ܘܲܕܼܗܲܪܵܛܝܼܩܘܼܬܼܵܐ: ܘܐܲܝܟܼ ܕܠܲܐܝܢܵܐ ܕܒܲܐܝܠܹܝܢ
ܕܒܼܵܥܹ̇ܐ ܗ̄ܘ̣ܵܐ ܐܸܫܬܲܡܥܲܬ̤ ܠܹܗ. ܐܵܦ ܠܵܐ ܒܲܚܕܼܵܐ ܡ̣ܢ ܐܲܝܠܹܝܢ ܕܡܹܢܝ
ܐܸܬܼܐܡܲܪ: ܐܸܫܟܲܚܘ ܠܲܡܚܵܘܵܝܘܼ ܕܐܝܼܬܲܝ ܗܲܪܵܛܝܼܩܵܐ: ܐܸܠܵܐ ܒܟܼܠܗܹܝܢ
pb. 451
ܕܐܵܪܬܵܕܘܿܤܝܼܵܐ ܚܵܘܝܲܢܝ. ܘܗܵܠܹܝܢ ܕܠܵܐ ܐܲܙܝܼܥ ܗ̄ܘ̣ܵܐ ܒܫܘܼܪܵܝܵܐ:
ܐܲܙܝܼܥ ܗ̄ܘ̣ܵܐ ܐܸܢܹܝܢ ܒܗܵܠܹܝܢ ܕܲܢܦܲܩ̣ ܒܗܹܝܢ ܪܘܼܚܵܐ. ܐܲܝܟܲܢܵܐ ܕܐܵܦ
ܗܵܫܵܐ ܢܦܲܩ̣ ܪܘܼܚܵܐ ܚܠܵܦ ܡܲܕܼ ܢܚܵܝܹ̈ܐ: ܐܵܦ ܐܸܢ ܡܕܲܪܡܵܐܝܼܬܼ
ܘܢܲܟܿܘܼܠܬܼܵܢܵܐܝܼܬܼ. ܐܸܠܵܐ ܐܵܡܲ݁ܪ ܐ̄ܢܵܫ: ܕܡܸܛܠ ܐܲܝܕܵܐ ܩܲܒܸܿܠ̣ܘ ܡܲܕܼܢܚܵܝܹ̈ܐ
ܠܩܵܬܼܵܪܵܤܝܼܣ ܕܪܘܼܫܥܵܐ ܕܝܼܠܵܟܼ: ܕܒܼܵܗ̇ ܡܩܲܛܪܓܼܝܼܢ ܠܹܗ. ܐܵܦܸܢ ܕܹܝܢ
ܘܠܵܐ ܡܸܕܸܡ ܕܢܘܼܟܼܪܵܝ ܐܲܠ̇ܦܹܬܼ: ܐܸܠܵܐ ܒܐܲܝܠܹܝܢ ܕܐܲܢ̄ܬܿ ܡܩܲܛܪܸܓܼ
ܐܲܢ̄ܬܿ ܠܗܵܢܵܐ: ܐܵܦ ܢܸܗܘܿܢ ܒܗܹܝܢ ܟܲܕܼ ܒܗܹܝܢ ܡܸܬܼܚܙܹܝܢ ܕܲܢܩܲܛܪܓܼܝܼܢ.
ܘܲܠܗܵܠܹܝܢ ܡܲܦܩܝܼܢ: ܘܲܠܗܵܠܹܝܢ ܠܗܵܠܹܝܢ ܐܵܦ ܡܩܲܒܿܠܝܼܢ: ܘܡܸܕܸܡ
ܝܲܬܿܝܼܪ ܠܲܝܬܿ . . ܥܲܠ ܗܵܠܹܝܢ ܓܹܝܪ ܠܗܵܢܵܐ ܙܵܕܹܩ ܕܲܢܫܲܐܸܠ: ܘܲܠܗܵܢܘܿܢ
ܒܵܗ̇ ܒܲܕܼܡܘܼܬܼܵܐ. ܐܸܢ ܕܹܝܢ ܨܵܒܹ̇ܝܢ ܐܢ̄ܬܿܘܿܢ ܐܵܦ ܡܢܹܝ ܠܡܹܐܠܲܦ: ܐܵܡܲ݁ܪ
ܐ̄ܢܵܐ ܒܐܲܝܠܹܝܢ ܕܒܼܐܝܼܕܼܵܐ ܒܐܝܼܕܼܵܐ ܠܟܼܠ ܐ̄ܢܵܫ. ܠܵܐ ܗ̄ܘ̣ܵܐ ܡܸܛܠ
ܕܐܸܬܼܩܲܒܲܠ ܐܸܢܵܐ ܘܐܸܬܼܥܲܕܲܪ ܡ̣ܢ ܐ̄ܢܵܫ̈ܝܼܢ. ܡܲܗܡܲܝ ܠܝܼ ܓܹܝܪ ܥܲܠ
ܟܠܗܹܝܢ ܐ̄̈ܢܵܫܵܝ̈ܬܼܵܐ. ܐܸܢܵܐ ܓܹܝܪ ܠܥܵܠܡܵܐ ܡܝܲܬܹܬܼ: ܚܲܝ ܐ̄ܢܵܐ ܕܹܝܢ ܠܡ̇ܢ
ܕܚܲܝ ܐ̄ܢܵܐ. ܐܸܠܵܐ ܡܸܛܠ ܐܲܝܠܹܝܢ ܕܐܸܬܢܼܟܫܸܠܘ ܐܹܡܲܪ: ܠܵܐ ܡܹܢܝ:
ܘܠܵܘ ܡ̣ܢ ܕܝܼܠܝܼ: ܐܸܠܵܐ ܡܸܢܹܗ ܕܗܵܢܵܐ ܕܐܲܠܨܗ ܡܫܝܼܚܵܐ ܠܡܸܦܲܩ
ܪܘܼܚܵܐ ܚܠܵܦܲܝ. ܡܸܕܸܡ ܓܹܝܪ ܐ̄ܚܪܹܝܢ ܠܵܐ ܐܸܡ݂ܲܪܘ: ܐܸܠܵܐ ܕܡ̣ܢ
ܦܘܼܩܕܵܢܵܐ ܕܡܲܠܟܵܐ ܐܸܬܼܐܠܸܨܘ ܠܲܡܩܲܒܵܠܘܼ ܗܵܠܹܝܢ ܟܠܗܹܝܢ.
ܩܘܼܪܸܠܘܿܣ. ܐܲܦܸܤܩ̈ܘܿܦܹܐ ܠܲܡ ܕܲܒܼܩܘܼܤܛܲܢܛܝܼܢܵܦܘܿܠܝܼܣ
ܐܸܡ݂ܲܪܘ: ܙܵܕܹܩ ܠܕܼܵܚܹ̇ܠ ܠܐܲܠܵܗܵܐ ܐܲܦܸܤܩܘܿܦܵܐ ܝܘܿܚܲܢܵܢ: ܕܢܲܚܪܸܡ
pb. 452
ܠܝܘܼܠܦܵܢܹܗ ܕܢܸܤܛܘܿܪܝܼܣ: ܘܒܲܟܼܬܼܵܒܼܵܐ ܢܵܘܕܸܐ ܠܩܵܬܼܵܪܵܤܝܼܣ
ܕܝܼܠܹܗ.
ܢܸܤܛܘܿܪܝܼܣ. ܡܵܕܹܝܢ ܥܕܲܡܸܐ ܠܗܵܝܕܹܝܟ: ܡ̣ܢ ܐܲܦܸܤܩܘܿܦܵܐ
ܕܐܲܢܛܝܵܟܼܝܵܐ ܘܡ̣ܢ ܡܲܕܼܢܚܵܝܹ̈ ܡ̣ܢ ܐܵܦܸܤܩ̈ܘܿܦܹܐ ܐܵܪ̈ܬܵܘܕܘܿܟܿܤܹܐ:
ܐܵܦܸܤܩܘܿܦܵܐ ܐܝܼܬܲܝ ܗ̄ܘܹ̇ܝܬܼ. ܟܲܕܼ ܗܵܟܹܝܠ ܫܠܸܡ̣ ܠܗܘܿܢ ܛܵܒܼ
ܚܵܕܼܝܵܐܝܼܬܼ ܒܗܵܠܹܝܢ ܗܵܘ̇ ܕܵܚܹ̇ܠ ܠܐܲܠܵܗܵܐ ܡܲܠܟܵܐ: ܐܸܫܬܲܕܲܪ ܠܬܼܘܼܪܵܨܵܐ
ܕܗܵܕܹܐ: ܡܵܪܝ ܬܡܝܼܗܵܐ ܛܪܝܼܒܼܘܼܢܵܐ ܘܢܘܼܛܵܪܵܐ ܐܵܪܝܼܤܛܘܿܠܵܐܘܿܣ.
ܩܘܼܪܸܠܘܿܣ. ܟܲܕܼ ܕܹܝܢ ܠܡܲܕܼܢܚܵܝܹ̈ܐ ܦܘܼܩܕܵܢܵܐ ܕܡܲܠܟܵܐ ܐܸܬܼܚܵܘܝܼ:
ܐܲܝܟܼ ܡ̇ܢ ܕܲܒܼܨܒܼܝܵܢܵܐ ܗܘ̤ܵܐ ܕܩܲܕܼܝܼ̈ܫܹܐ ܐܲܦܸܤܩ̈ܘܿܦܹܐ ܐܲܝܠܹܝܢ ܕܐܸܬܼܟܲܢܲܫܘ
ܒܩܘܼܤܛܲܢܛܝܼܢܵܦܘܿܠܝܼܣ ܡܕܝܼܢ̄ܬܼܵܐ ܪܲܒܿܬܼܵܐ: ܟܲܕܼ ܠܵܐ ܝܵܕܲܥ̇ ܐ̄ܢܵܐ
ܡܵܢܵܐ ܐܸܬܼܚܲܫܲܒܼܘܼ. ܐܸܬܼܟܲܢܲܫܘ ܠܘܵܬܼ ܚܲܤܝܵܐ ܘܕܵܚܹ̇ܠ ܠܐܲܠܵܗܵܐ ܐܵܩܵܩ
ܐܲܦܸܤܩܘܿܦܵܐ ܕܚܵܠܵܒܿ: ܘܥܲܒܼܕܘܼܘܼܗܝ ܠܡܸܟܼܬܲܒܼ ܠܘܵܬܼܝ ܒܲܙܢܵܐ
ܕܬܲܪܥܘܼܬܼܵܐ ܕܫܲܝܢܵܐ ܕܥܹ̈ܕܵܬܼܵܐ. ܠܵܐ ܙܵܕܼܩ ܐ̄ܚܪܵܢܝܵܐܝܼܬܼ ܠܡܸܗܘܵܐ:
ܐܸܠܵܐ ܐܲܟܼܡܵܐ ܕܲܠܗܘܿܢ ܡܸܬܼܚܲܙܝܵܐ. ܐܝܼܬܹܝܗ̇ ܗ̄ܘ̣ܵܬܼ ܕܹܝܢ ܗܵܕܹܐ ܫܸܐܠܬܼܵܐ
ܩܫܝܼܬܼܵܐ ܘܝܲܩܝܼܪܬܵܐ: ܒܵܥܹ̇ܝܢ ܗ̄ܘ̣ܵܘ ܓܹܝܪ ܕܢܸܒܼܛ̈ܠܵܢ ܟܠܗܹܝܢ ܐܲܝܠܹܝܢ
ܕܐܸܬܼܟܿܬܸܒܼ ܒܐܸܓܪ̈ܵܬܼܵܐ ܘܛܘܼܡ̈ܤܹܐ ܘܲܟܼܬܼܵܒܹ̈ܐ ܥܲܠ ܐܲܝܠܹܝܢ ܕܱܲܗ̤ܘܲܝ̈:
ܡ̣ܢ ܒܵܬܲܪ ܫܲܝܢܵܐ ܕܲܩܛܝܼܪܵܐ.
ܢܸܤܛܘܿܪܝܼܣ. ܥܕܲܡܵܐ ܠܗܵܝܕܹܝܟ ܕܗܵܠܹܝܢ ܟܬܲܒܼܘ: ܐܵܦ ܗܵܢܵܐ
ܒܗܲܪ̈ܵܛܝܼܩܹܐ ܐܝܼܬܼܵܘܗܝ ܗ̄ܘ̣ܵܐ: ܟܲܕܼ ܟܠ ܐ̄ܢܵܫ ܝܵܕܲܥ̇ ܗ̄ܘ̣ܵܐ ܘܡܸܬܼܥܲܕܲܠ
ܒܐܲܝܠܹܝܢ ܕܡ̣ܢ ܗܵܢܵܐ ܐܸܬܼܟܬܸܒܼ: ܘܠܵܐ ܗ̄ܘ̣ܵܐ ܐ̄ܢܵܫ̈ܝܼܢ ܚܲܕܼܚ̈ܕܼܵܢܹܐ.
ܐܝܼܕܼܵܐ ܗ̄ܘ̣ܵܬܼ ܠܲܡ ܗܵܝ̇ ܕܒܲܩܛܝܼܪܵܐ ܕܸܒܼܪܲܬ̤ ܐܸܢܘܿܢ: ܟܲܕܼ ܡܸܕܸܡ
pb. 453
ܠܲܝܬܿ ܗ̄ܘ̣ܵܐ ܒܲܡܨܲܥܬܼܵܐ: ܕܕܲܠܩܘܼܒܼܠܵܐ ܕܗܵܘ̇ ܡܵܐ ܕܒܼܵܥܹ̇ܝܢ ܗ̄ܘ̣ܵܘ
ܢܸܬܼܥܒܸܕܼ. ܐܸܤܬܲܟܲܠܘ ܟܠ ܐܲܝܠܹܝܢ ܕܫܵܡ̇ܥܝܼܢ ܠܲܢ: ܚܵܐܹ̇ܫ ܗ̄ܘ̣ܵܐ ܓܹܝܪ
ܐ̄ܢܵܫ ܥܲܡܲܢ: ܒܲܩܛܝܼܪܵܐ ܕܲܗܘ̤ܵܐ ܡ̣ܢ ܦܘܼܩܕܵܢܵܐ ܕܡܲܠܟܵܐ: ܕܠܵܐ ܢܲܢܩܹܐ
ܕܐܲܝܟܼ ܗܵܕܹܐ ܐܲܝܬܿܘܼܢܝ. ܐܸܠܵܐ ܡܸܬܼܚܲܡܲܬܼ ܐ̄ܢܵܫ: ܕܡܸܛܠ ܐܲܝܕܵܐ
ܠܵܐ ܩܵܘ̣ܝܼܘ ܒܐܲܝܠܹܝܢ ܕܲܚܕܸܵܐ ܙܒܲܢ ܕܵܢܘ؟ ܒܲܒܼܨܝܼܪ ܓܹܝܪ ܝܑܼܨܦ̣ܘ
ܠܘܼܩܒܲܠ ܐܲܝܠܹܝܢ ܕܐܸܤܬܿܥܲܪ ܥܠܲܝ: ܡܸܛܠ ܬܘܼܪܵܨܵܐ ܘܬܼܵܘܕܝܼܬܼܵܐ
ܕܗܲܝܡܵܢܘܼܬܼܵܐ ܘܲܫܠܵܡܵܐ ܕܥܹ̈ܕܵܬܼܵܐ. ܒܪܲܡ ܐܲܝܟܼ ܙܢܵܐ ܕܛܲܪܘܼܢܵܐ ܐܸܡܲܬܼܝ
ܕܐܵܬܹ̇ܐ ܕܢܸܫܒܸܐ: ܘܠܵܐ ܡܸܫܟܲܚ ܕܠܲܡܕܼܝܼܢ̄ܬܼܵܐ ܢܸܤܲܒܼ: ܠܬܼܵܘܕܝܼܬܼܵܐ
ܕܹܝܢ ܕܫܲܝܢܵܐ: ܡܵܘܬܵܐ ܕܗܵܘ̇ ܕܡܲܩܪܸܒܼ ܚܠܵܦܲܝܗܘܿܢ ܠܩܘܼܒܼܠܹܗ ܒܵܥܹ̇ܐ
ܠܡܸܤܲܒܼ. ܕܡܵܐ ܕܢܤܒܹܗ: ܬܸܬܼܚܲܝܲܒܼ. ܗܵܟܲܢܵܐ ܫܐܸܠ̣ ܗ̄ܘ̣ܐ ܐܵܦ
ܗܵܢܵܐ ܠܩܵܬܼܵܪܵܤܝܼܣ ܕܝܼܠܝܼ: ܕܲܕܠܵܐ ܕܝܼܢܵܐ ܬܸܬܼܝܼܗܸܒܼ. ܬܸܗܘܸܐ ܗܵܕܹܐ:
ܠܝܼ ܠܵܐ ܐܵܬܼ̇ܝܵܐ ܠܝܼ ܒܐܲܝܠܹܝܢ ܕܲܥܠܝܼ ܐܸܤܬܿܥܲܪ. ܒܲܠܚܘܿܕܼ ܕܹܝܢ
ܕܫܲܝܢܵܐ ܕܥܹ̈ܕܵܬܼܵܐ ܢܸܗܘܸܐ: ܘܲܚܠܵܦ ܛܘܼܟܵܤܵܐ ܕܥܹ̈ܕܼܵܬܼܵܐ ܟܠܗܹܝܢ
ܡܤܲܝܒܲܪ ܐ̄ܢܵܐ. ܐܸܠܵܐ ܟܠܗܹܝܢ ܕܲܠܩܘܼܒܼܠܵܐ ܗ̤ܘܲܝ̈.
ܡ̣ܢ ܕܩܲܒܸܠ̣ ܓܹܝܪ ܗܵܘ̇ ܕܝܼܐܲܝܒܼ ܗ̄ܘ̣ܵܐ ܠܹܗ: ܘܲܟܼܒܲܫ̣
ܐܸܢܘܿܢ ܬܸܚܘܿܬܼ ܐܝܼܕܹܗ ܡܸܛܠ ܫܲܝܢܵܐ ܕܐܸܤܟܹܡܵܐ: ܘܵܕܲܥ̇ ܗ̄ܘ̣ܵܐ
ܕܡܸܕܸܡ ܠܵܐ ܝܑܼܬܵܪ ܒܐܲܝܠܹܝܢ ܕܠܘܼܩܒܲܠܝ ܐܸܤܬܿܥܲܪ: ܐܸܠܵܐ ܐܸܫܬܲܪܪܲܬ̤
ܬܵܘܕܝܼܬܼܵܐ ܕܗܲܢܵܢܘܼܬܼܵܐ: ܕܡܸܛܠܵܬܼܵܗ̇ ܗܘ̤ܵܐ ܥܠܲܝ ܩܪܵܒܼܵܐ. ܘܐܸܬܼܓܲܠܝܲܬ̤
ܗ̄ܘ̣ܵܬܼ ܕܲܒܼܥܸܠܕܒܼܵܒܼܘܼܬܼܵܐ ܗ̄ܘ̣ܵܬܼ ܘܲܩܛܝܼܪܵܐ: ܘܕܲܡܚܵܘܝܵܢܘܼܬܼܵܐ ܗ̄ܘ̣ܵܬܼ
ܕܗܵܠܹܝܢ ܕܲܗ̤ܘܲܝ̈: ܘܲܕܼܡܸܫܟܿܚܵܐ ܗ̣̄ܝ ܕܐܵܦ ܦܫܝܼܩܵܐܝܼܬܼ ܢܸܤܬܲܬܼܪ̈ܵܢ.
ܕܠܵܐ ܕܹܝܢ ܗܵܕܹܐ ܬܸܗܘܸܐ: ܘܲܕܼܠܵܐ ܬܘܼܒܼ ܒܥܸܠܕܒܼܵܒܹ̈ܐ ܕܝܼܠܝܼ
pb. 454
ܩܛܹܓܼܪ̈ܵܢܵܘܗܝ ܢܸܗܘܘܿܢ: ܗܵܢ̇ܘܿܢ ܕܩܲܕܼܡܵܝܑܬܼ ܥܲܕܪܘܼܗܝ ܗ̄ܘ̣ܵܘ
ܒܐܲܝܠܹܝܢ ܕܐܸܤܬܿܥܲܪ ܠܘܼܩܒܲܠܝ: ܡܫܲܪܸܐ ܠܡܸܬܼܢܬܵܦܘܼ ܠܬܼܵܘܕܝܼܬܼܵܐ
ܕܗܲܝܡܵܢܘܼܬܼܵܐ: ܡܸܬܼܚܲܬܼ ܘܡܸܫܬܿܥܸܐ ܒܲܬܼܪ̈ܲܝܗܘܿܢ ܓܲܒܼ̈ܐ ܒܬܼܵܘ̈ܕܝܵܬܼܵܐ
ܕܕܼܠܩܘܼܒܼܠܵܐ. ܝܑܼܕܲܥ̣ܘ ܕܹܝܢ ܘܒܲܚܸܢܼܘ ܚܲܬܿܝܼܬܼܵܐܝܼܬܼ ܕܐ̄ܢܵܫܵܐ ܐܸܬܼܡܚܸܠܘ
ܠܗܘܿܢ. ܘܤܲܓܿܝ̈ܐܵܬܼܵܐ ܚܲܫ̣ܘ ܗ̄ܘ̣ܵܘ: ܟܲܕܼ ܐܵܦ ܠܵܐ ܠܚܲܕܼ ܥܘܼܕܪܵܢܵܐ
ܐܸܫܬܿܘܝܘܼ ܗ̄ܘ̣ܵܘ. ܘܡܸܛܠ ܗܵܕܹܐ ܠܵܘ ܦܫܝܼܩܵܐܝܼܬܼ ܫܸܪܹܝܢ ܠܹܗ ܠܫܲܝܢܵܐ
ܕܲܥ̣ܒܲܕܼܘ: ܡ̣ܢ ܟܬܼܝܼ̈ܒܼܵܬܼܵܐ ܕܐܸܬܼܟܬܸܒܼ ܠܗܘܿܢ ܡ̣ܢ ܨܼܝܕ ܚܕܼܵܕܹ̈ܐ: ܟܲܕܼ
ܡܲܚܒܼܝܼܢ ܕܲܒܼܗܹܝܢ ܟܲܕܼ ܒܗܹܝܢ ܢܸܫܬܲܒܼܩܘܼܢ ܕܗܵܟܲܢܵܐ ܢܸܬܼܪܲܥܘܿܢ. ܡܸܛܠ
ܕܹܝܢ ܕܐܸܬܼܩܲܟܪܲܓ ܗ̄ܘ̣ܵܐ ܡ̣ܢ ܐܲܝܠܹܝܢ ܕܕܼܝܼܠܹܗ ܠܒܼܝܼܟܼܝܼܢ ܗ̄ܘ̣ܵܘ
ܘܥܲܡܹܗ ܡܵܘܕܹܝܢ ܗ̄ܘ̣ܵܘ: ܐܲܝܟܼ ܐܲܝܢܵܐ ܕܥ̣ܒܲܪ ܡ̣ܢ ܪܸܥܝܢܵܐ ܕܓܼܵܘܵܐ:
ܘܲܚܦܝܼܛܘܼܬܼܵܐ ܕܟܼܠܗܘܿܢ ܗ̤ܘ ܒܲܠܚܘܿܕܼܵܘܗܝ ܒܲܡܫܲܠܛܘܼܬܹܗ
ܘܒܲܡܒܲܤܪܵܢܘܼܬܼܵܐ ܕܲܥܠܲܝܗܘܿܢ ܫ̣ܪܵܐ ܗ̄ܘ̣ܵܐ: ܕܚܸܠ ܕܕܲܠܡܵܐ
ܢܸܫܬܲܢܘܿܢ ܡܸܢܹܗ: ܐܵܘ ܢܩܘܼܡܘܼܢ ܠܩܘܼܒܼܠܹܗ: ܘܐܸܚܲܦܲܛ ܗ̄ܘ̣ܵܐ
ܕܝܲܬܿܝܼܪ ܡ̣ܢ ܡܵܐ ܕܒܼܵܥܹ̇ܝܢ ܗ̄ܘ̣ܵܘ ܢܸܤܥܘܿܪ.
ܘܐܲܝܟܼ ܙܢܵܐ ܕܐܲܝܠܹܝܢ ܕܡܸܬܼܠܲܒܼܟܿܝܼܢ ܒܲܩܪܵܒܼܵܐ: ܟܲܕܼ ܒܵܥܹ̇ܝܢ ܕܲܢܚܵܘܘܿܢ
ܕܲܒܼ̈ܢܲܝ ܪܸܥܝܵܢܵܐ ܕܐܵܚܘܿܕܲܝ̈ܗܘܿܢ ܐܸܢܘܿܢ: ܠܵܐ ܚܵܝ̇ܤܝܼܢ: ܠܵܐ ܥܲܠ
ܪ̈ܵܚܡܹܐ: ܘܠܵܐ ܥܲܠ ܒܢܲܝ̈ܐ: ܘܠܵܐ ܥܲܠ ܐܲܒܼܵܗܹ̈ܐ: ܡܸܛܠ ܕܢܸܥܒܿܕܼܘܼܢ
ܐܸܢܘܿܢ ܕܲܢܗܲܝܡܢܘܼܢ ܕܤܵܢܹ̇ܝܢ ܠܓܸܢܤܗܘܿܢ: ܗܵܟܲܢܵܐ ܐܵܦ ܗܵܢܵܐ:
ܒܵܪ ܫܵܥܬܹܗ ܫܪܸܟܼ ܠܲܡܩܵܡ ܠܘܼܩܒܲܠ ܠܘܼܩܒܲܠ ܐܲܒܼܵܗ̈ܬܼܵܐ: ܕܡ̣ܢ ܩܕܼܵܡ
ܙܲܒܼܢܵܐ ܥܲܢܝܼܕܝܼܢ ܗ̄ܘ̣ܵܘ. ܠܘܼܩܒܲܠ ܕܝܵܕܘܿܪܘܿܣ ܘܬܹܐܵܕܘܿܪܘܿܣ:
ܗܵܢܘܿܢ ܕܐܲܒܼܵܗܹ̈ܐ ܐܝܼܬܲܝܗܘܿܢ ܗ̄ܘ̣ܵܘ ܕܓܼܵܘܵܐ: ܐܵܦ ܟܲܕܼ ܚܲܝܝܼܢ ܗ̄ܘ̣ܵܘ:
pb. 455
ܐܵܽܦ ܟܲܕܼ ܥܢܲܕܼܘ. ܐܵܦ ܕܝܼܠܹܗ ܕܗܵܢܵܐ: ܗܸܢܘܿܢ ܟܲܕܼ ܗܸܢܘܿܢ ܐܵܦ
ܕܝܼܠܲܢ. ܐܵܦܸܢ ܗܵܢܵܐ ܦܪܲܫ ܐܸܢܘܿܢ ܐܲܝܟܼ ܒܥܸܠܕܒܼܵܒܹ̈ܐ ܕܟܼܠ ܐ̄ܢܵܫ:
ܗܵܢ̇ܘܿܢ ܕܐܵܦ ܗ̤ܘ ܡܸܫܬܵܘܬܲܦ ܗ̄ܘ̣ܵܐ ܠܗܘܿܢ: ܘܒܲܐܒܼܵܗ̈ܬܼܵܐ
ܘܒܼܵܐܪ̈ܬܵܕܘܼܟܿܤܹܐ ܠܝܒܼܝܼܟܼ ܗ̄ܘ̣ܵܐ ܠܗܘܿܢ. ܘܲܠܡ̈ܠܹܐ ܕܝܼܠܗܘܿܢ ܕܥܲܠ
ܐܲܦܲܝ̈ ܗܲܝܡܵܢܘܼܬܼܵܐ: ܥܲܡ ܟ̱ܠܵܗ̇ ܚܦܝܼܛܘܼܬܼܵܐ ܐܵܦ ܗ̤ܘ ܩܢܸܐ ܗ̄ܘ̣ܵܐ:
ܘܲܠܡܸܫܬܲܕܵܪܘܼ ܠܟܼܠ ܦܵܩܹ̇ܕܼ ܗ̄ܘ̣ܵܐ. ܐܸܠܵܐ ܒܪܵܡ ܟܲܕܼ ܒܵܥܹ̇ܐ ܗ̄ܘ̣ܵܐ
ܠܵܡܦܵܤܘܼ: ܕܠܵܐ ܐܲܗܡ̣ܝܼ ܒܤܸܢ̱ܐܬܼܵܐ ܕܠܘܼܩܒܲܠܝ: ܠܗܵܢܘܿܢ ܕܐ̄ܢܵܫ
ܠܵܐ ܡܤܲܟܸܐ ܗ̄ܘ̣ܵܐ ܘܐܵܦ ܠܵܐ ܠܡܸܬܼܪܲܥܝܵܘܼ: ܕܡܲܡܪܲܚ ܗ̄ܘ̣ܵܐ ܡܸܕܸܡ
ܕܐܲܝܟܼ ܗܵܟܲܢܵܐ ܥܠܲܝܗܘܿܢ: ܒܵܥܹ̇ܐ ܗ̄ܘ̣ܵܐ ܠܡܲܚܪܵܡܘܼ. ܘܕܲܫܟܼܝܼܪܵܐ
ܡ̣ܢ ܟܠܗܹܝܢ: ܐܵܦ ܠܡܹܐܡܲܪ ܕܐܸܬܼܥܒܸܕܼܘ ܠܘܼܩܒܲܠ ܐܵܦܘܿܠܝܼܢܵܪܝܼܣ
ܫܵܪܹܐ ܗ̄ܘ̣ܵܐ: ܘܲܡܩܝܼܡ ܗ̄ܘ̣ܵܐ ܠܗܵܢܘܿܢ ܕܐܵܦܘܿܠܝܼܢܵܪܝܼܣ: ܟܲܕܼ
ܐܵܡܲ݁ܪ: ܕܗܵܝ̇ ܐܝܼܬܹܝܗ̇ ܗܲܝܡܵܢܘܼܬܼܵܐ ܕܥܹܕܬܵܐ. ܕܒܲܐܝܢܵܐ ܓܲܒܵܐ ܡܤܲܡܲܟܼ
ܐ̄ܢܵܫ: ܒܓܲܒܵܐ ܕܲܕܝܵܕܼܘܿܪܘܿܣ: ܗܵܘ̇ ܕܐܲܒܼܵܗ̈ܬܼܵܐ ܩܲܕܝܼ̈ܫܹܐ ܕܒܼܟܼܠܵܗ̇
ܥܵܡܲܪܬܵܐ: ܘܐܵܦ ܟܠܵܗ̇ ܥܵܡܲܪܬܵܐ ܡܫܲܒܿܚܵܐ ܠܗܘܿܢ: ܘܠܘܼܩܒܲܠ
ܐܵܦܘܿܠܝܼܢܵܪܝܼܣ ܘܐܵܪܝܼܘܿܣ ܘܡܵܩܹܕܘܿܢܝܼܣ ܘܐܘܼܢܵܡܝܼܣ ܘܟܼܠܗܹܝܢ
ܗܹܪܹ̈ܤܝܼܵܣ: ܒܲܚܕܼܵܐ ܚܦܝܼܛܘܼܬܼܵܐ ܐܲܝܟܼ ܦܘܼܡܵܐ ܕܓܼܵܘܵܐ ܚܸܫܒܲܬ̤
ܐܸܢܘܿܢ: ܐܵܘ ܒܓܲܒܵܐ ܕܐܵܦܘܿܠܝܼܢܵܪܝܣ؟ ܬܸܗܘܸܐ ܕܐܸܢܵܐ ܗܘܹ̇ܝܬܼ ܠܵܟܼ
ܒܥܸܠܕܒܼܵܒܼܵܐ: ܕܠܵܐ ܐܸܫܬܲܡ̇ܥܹܬܼ ܒܐܲܝܠܹܝܢ ܕܲܒܼܥܲܝܬܿ ܡܹܢܝ. ܡܸܛܠ ܐܲܝܕܵܐ
ܥܲܡ ܗܵܢܘܿܢ ܕܒܼܵܐܪܬܵܕܘܿܟܿܤܝܼܵܐ ܥܢܲܕܼܘ: ܡܸܛܠܵܬܼܝ ܡܲܩܪܸܒܼ ܐܲܢ̄ܬܿ؟
ܐܵܘ ܕܲܠܡܵܐ: ܡܸܛܠܵܬܼܗܘܿܢ ܕܗܵܢܘܿܢ ܥܲܡܝ ܡܲܩܪܸܒܼ ܐܲܢ̄ܬܿ؟
pb. 456
ܕܲܫܪܵܪܵܐ ܕܹܝܢ ܐܹܡܲܪ: ܡܸܛܠ ܪܘܼܫܥܵܟܼ ܕܲܒܼܟܼܠܗܹܝܢ: ܥܲܡ ܟܠ ܐ̄ܢܵܫ
ܡܲܩܪܸܒܼ ܐܲܢ̄ܬܿ.
ܐܸܡܲܪ ܠܝܼ ܐܲܢ̄ܬܿ: ܠܵܐ ܗܘ̤ܵܘ ܒܝܵܘ̈ܡܲܝ ܕܝܵܕܘܿܪܘܼܣ:
ܒܵܤܹܠܝܼܘܿܣ ܘܲܓܼܪܝܼܓܼܘܿܪܝܼܘܿܣ؟ ܠܵܐ ܗܘ̤ܵܘ ܐܵܦ ܒܐܵܠܹܟܼܤܲܢܕܪܝܼܵܐ
ܐܲܦܸܤܩ̈ܘܿܦܹܐ ܝܑܼܕܼܝܼܥܹ̈ܐ ܒܕܼܘܼܒܵܪܹ̈ܐ ܘܲܒܼܡܸܠܬܼܵܐ؟ ܠܵܐ ܗܘ̤ܵܘ ܒܪܗܘܿܡܹܐ
ܐ̄ܢܵܫܵܐ ܡܫܲܡ̈ܠܲܝܵܐ: ܕܤܵܦ̇ܩܝܼܢ ܗ̄ܘ̣ܵܘ ܠܲܡܩܵܡ ܒܐܲܦܲܝ̈ ܥܹܕ̈ܬܼܵܐ؟ ܘܠܵܐ
ܗܵܢܘܿܢ ܕܲܒܼܟܼܠܗ̇ ܥܵܡܲܪܬܵܐ ܐܝܼܬܲܝܗܘܿܢ ܗ̄ܘ̣ܵܘ ܡܲܠܦܵܢܹ̈ܐ ܠܲܡܩܵܡ
ܒܐܲܦܲܝ̈ ܥܹ̈ܕܵܬܼܵܐ؟ ܗܵܢܘܿܢ ܕܠܵܐ ܒܦܘܼܪ̈ܦܵܥܹܐ ܘܲܒܼܫܘܼܒܼܚܵܐ ܘܒܼܐܝܼܩܪܵܐ
ܘܲܒܼܒܼܘܼܤܵܡܵܐ ܐܝܼܬܲܝܗܘܿܢ ܗ̄ܘ̣ܵܘ: ܐܸܠܵܐ ܕܒܲܪ̈ܕܘܼܦܝܹܐ ܘܒܼܐܘܼ̈ܠܨܵܢܹܐ
ܘܒܲܩܪ̈ܵܒܹܐ ܘܲܒܼܕܼܚܠܬܼܵܐ: ܕܲܢܛܲܪܘ ܗ̄ܘ̣ܵܘ ܘܐܸܚܲܕܼܘ ܗܲܝܡܵܢܘܼܬܼܵܐ ܕܲܫܪܵܪܵܐ
ܕܠܵܐ ܙܘܼܥܙܵܥ. ܡ̣ܢ ܗܵܘ̇ ܕܐܝܼܬܼܵܘܗܝ ܗ̄ܘ̣ܵܐ ܗܲܪܵܛܝܼܩܵܐ ܘܛܵܥܹ̇ܐ
ܗ̄ܘ̣ܵܐ: ܗܵܢܵܘ ܕܹܝܢ ܕܝܵܕܘܿܪܘܿܣ. ܗܵܘ̇ ܕܲܒܼܦܘܼܡܵܐ ܕܟܼܠ ܐ̄ܢܵܫ
ܐܝܼܬܼܵܘܗܝ ܗ̄ܘ̣ܵܐ ܘܡܸܬܼܝܲܒܲܠ ܒܲܟܼܬܼܵܒܹ̈ܐ: ܘܕܚܠܬܼܵܐ ܗ̄ܘ̣ܵܐ ܠܗܲܪ̈ܵܛܝܼܩܹܐ.
ܗܵܘ̇ ܕܲܒܼܡܸܠܬܼܵܐ ܕܡܲܠܦܵܢܘܼܬܼܵܐ ܘܲܒܼܛܲܝܒܿܘܼܬܼܵܐ ܐܲܠܵܗܵܝܵܬܼܵܐ: ܩܲܝܸܡ̣ ܢܲܦܫܹܗ
ܠܘܼܩܒܲܠ ܦܘܼܩ̈ܕܵܢܹܐ ܕܡܲܠܟܿܘܼܬܼܵܐ: ܚܠܵܦ ܥܲܡܹܗ ܕܐܲܠܵܗܵܐ ܘܠܵܐ
ܐܵܘܒܿܕܹܗ: ܐܸܠܵܐ ܒܐܲܥܦܹ̈ܐ ܤܲܓܿܝܼ̈ܐܹܐ ܐܵܘܤܦܹܗ. ܘܲܠܗܵܢܵܐ ܟ̱ܠܹܗ ܫܠܵܡܵܐ
ܐܸܬܿܬܼܿܓܲܪ ܠܥܹ̈ܕܵܬܼܵܐ: ܗܵܝܕܹܝܟ ܠܵܐ ܐܝܼܬܼܵܘܗܝ ܗ̄ܘ̣ܵܐ ܗܲܪܵܛܝܼܩܵܐ ܘܠܵܐ
ܠܗܵܢ̇ܘܿܢ ܕܗܵܝܕܹܝܟ: ܘܠܵܐ ܬܘܼܒܼ ܠܵܟܼ ܕܝܼܠܵܟܼ: ܘܠܵܐ ܠܐܲܝܠܹܝܢ
ܕܕܼܝܼܠܵܟܼ: ܘܠܵܐ ܬܘܼܒܼ ܒܹܗ ܒܲܫܓܼܘܼܫܝܵܐ ܗܵܘ̇ ܕܥܒܲܕܬܿ ܥܠܲܝ. ܐܸܠܵܐ
ܡ̣ܢ ܒܵܬܲܪ ܕܐܸܬܼܥܲܫܲܢ̣ܬܿ ܘܲܠܒܲܟܼܬܿ ܐܲܝܟܼ ܕܲܠܒܲܟܼܬܿ: ܘܡܲܢܲܥܬܿ ܠܲܛܪܘܼܢܘܼܬܼܵܐ
ܗܵܕܹܐ ܕܲܫܠܵܡܵܐ: ܗܵܝܕܼܝܟ ܗܘ̤ܵܐ ܠܵܟܼ ܗܲܪܵܛܝܼܩܵܐ ܕܝܵܕܼܘܿܪܘܿܣ
pb. 457
ܘܬܹܐܵܕܘܿܪܘܿܣ ܘܫܲܪܟܵܐ ܕܐ̄ܚܪ̈ܵܢܹܐ. ܐܘܼܪܚܵܐ ܓܹܝܪ ܗܵܘ̇ܝܵܐ ܗ̄ܘ̣ܵܬܼ
ܠܵܟܼ ܐܵܦ ܥܲܠ ܒܵܤܹܠܝܼܘܿܣ ܘܲܓܼܪܝܼܓܼܘܿܪܝܼܘܿܣ ܘܐܵܬܵܢܵܤܝܼܣ
ܘܐܲܡܒܿܪܘܿܤܝܼܣ: ܘܥܲܠ ܫܲܪܟܵܐ ܕܲܐ̄ܚܪ̈ܵܢܹܐ: ܐܲܝܠܹܝܢ ܕܗܸܢܹܝܢ ܗܵܠܹܝܢ
ܐܸܡ݂ܲܪܘ ܐܲܟܲܚ̄ܕܼ.
ܡܲܢ̣ܘܼ ܕܠܵܐ ܢܼܬܿܬܲܢܲܚ؟ ܕܲܠܪܸܥܝܵܢܵܐ ܗܵܢܵܐ ܐܸܬܼ݂ܵܐ: ܕܟܲܕܼ ܒܦܘܼ̈ܩܕܵܢܹܐ
ܕܡܲܠܟܿܘܼܬܼܵܐ ܘܲܒܼܕܸܚ̱ܠܬܼܵܐ ܘܲܡܤܵܡܒܿܪܹ̈ܫܹܐ ܡܥܲܫܢܝܼܢ ܗ̄ܘ̣ܵܘ: ܐܵܠܨ̇ܝܼܢ
ܗ̄ܘ̣ܵܘ ܠܡܲܕܼܢܚܵܝܹ̈ܐ: ܘܡ̣ܢ ܒܵܬܲܪ ܫܲܝܢܵܐ: ܐܲܝܟܼ ܫܒܲܝ̈ܐ ܢܵܘܒܿܠܘܼܢ
ܘܢܲܝܬܿܘܿܢ ܐܸܢܘܿܢ: ܘܢܲܟܼܪܟܼܘܼܢ ܐܸܢܘܿܢ: ܕܢܲܚܪܡܘܼܢ ܠܐܲܒܼܵܗ̈ܬܼܗܘܿܢ:
ܠܗܵܢܵܐ ܫܲܝܢܵܐ ܡܲܢܲܥ̣ܘ ܘܲܠܗܵܕܹܐ ܐܵܘܝܘܼܬܼܵܐ: ܗܵܟܲܢܵܐ ܐܸܬܼܪܲܥܝܼܘ ܚܲܕܼ
ܪܸܥܢܵܝܵܐ. ܗܵܟܲܢܵܐ ܢܵܚܘ ܗ̄ܘ̣ܵܘ ܡ̣ܢ ܕܲܠܡܸܚܲܫ ܒܝܼ̈ܫܵܬܼܵܐ: ܟܲܕܼ ܐܲܫܠ̱ܡܘܿܢܝ
ܠܝܼ ܠܲܒܼܥܸܠܕܒܼܵܒܼܝ: ܗܵܢܘܿܢ ܕܡܸܛܠ ܕܕܼܵܚ̇ܠܝܼܢ ܗ̄ܘ̣ܵܘ ܐܵܡ̇ܪܝܼܢ
ܗ̄ܘ̣ܵܘ: ܕܦܲܩܵܚ ܕܚܲܕܼ ܐ̄ܢܵܫ ܢܸܬܼܥܠܸܒܼ: ܘܬܸܠܒܿܘܿܟܼ ܗܲܝܡܵܢܘܼܬܼܵܐ.
ܘܲܠܘܲܝ ܕܹܝܢ ܗܵܕܹܐ ܫܲܪܝܼܪܵܐ ܗ̄ܘ̣ܵܬܿ: ܐܲܝܟܵܐ ܕܠܝܼ ܠܵܐ ܬܹܐܬܸܐ ܠܝܼ
ܗܵܕܹܐ. ܐܸܠܵܐ ܕܲܠܩܘܼܒܼܠܵܐ ܡܸܚܕܼܵܐ ܚܵܕܹܐ ܗ̄ܘܹ̇ܝܬܼ: ܟܲܕܼ ܗܵܘ̇ ܡܸܕܸܡ
ܕܲܚܦܝܼܛܝܼܢ ܗ̄ܘ̣ܵܘ ܥܠܵܘܗܝ ܬܘܼܪܵܨܵܐ ܢܵܤܹ̇ܒܼ ܗ̄ܘ̣ܵܐ. ܐܸܠܵܐ ܕܠܩܘܼܒܼܠܵܐ
ܚܲܫ̣ܘ ܗ̄ܘ̣ܵܘ ܒܐܲܝܠܹܝܢ ܕܐܲܪܦܝܘܼܢܝ: ܘܒܲܐܝܠܹܝܢ ܕܲܫܒܲܩ̣ܘ ܗ̄ܘ̣ܵܘ
ܕܢܸܬܼܐܲܡܪ̈ܵܢ. ܘܲܕܼܠܵܐ ܬܘܼܒܼ ܐܲܪܦܝܼܘ ܐܸܢܘܿܢ ܕܢܹܐܡܪܘܼܢ: ܐܲܝܟܼ ܡ̇ܢ
ܕܗܸܢܹܝܢ ܟܲܕܸ ܗܸܢܹܝܢ ܐܵܡܲ݁ܪ ܐ̄ܢܵܐ ܐܵܦ ܐܸܢܵܐ. ܘܲܒܼܗܵܠܹܝܢ ܐܲܦܩܘܼܢܝ
ܗ̄ܘ̣ܵܘ: ܘܡ̣ܢ ܒܵܬܲܪ ܗܵܝܕܹܝܢ: ܩ̣ܪܸܒܼܘ ܗ̄ܘ̣ܵܘ ܥܲܠ ܬܹܐܵܕܘܿܪܘܿܣ.
ܘܡ̣ܢ ܒܵܬܼܪܹܗ: ܥܲܠ ܕܝܵܕܘܿܪܘܼܿܣ. ܘܗܵܝܕܹܝܢ ܐܵܦ ܥܲܠ ܟܠ ܚܲܕܼ
pb. 458
ܚܲܕܼ ܡ̣ܢ ܫܲܪܟܵܐ ܕܲܐ̄ܚܪ̈ܵܢܹܐ: ܘܒܹܗ ܒܚܘܼܫܵܒܼܵܐ ܡܸܬܼܚܲܫܒܼܝܼܢ ܗ̄ܘ̣ܵܘ:
ܟܲܕܼ ܐܵܠܨ̇ܝܼܢ ܗ̄ܘ̣ܵܘ ܠܡܲܦܵܩܘܼܬܼܗܘܿܢ ܥܲܡܝܼ: ܐܲܝܟܼ ܡ̇ܢ ܕܗܸܢܘܿܢ
ܗܵܠܹܝܢ ܐܵܡ̇ܪܝܼܢ: ܘܠܵܘ ܡܸܕܸܡ ܐ̄ܚܪܹܢܵܐ. ܘܙܵܕܹܩ ܗ̄ܘ̣ܵܐ ܕܐܵܘ ܢܸܦܩܘܼܢ
ܥܲܡܝܼ ܒܗܹܝܢ ܟܲܕܼ ܒܗܹܝܢ: ܐܵܘ ܕܵܢܩܲܒܿܠܘܼܢܵܢܝ ܐܵܦ ܠܝܼ: ܘܲܢܩܒܿܠܘܼܢ
ܐܵܦ ܠܗܵܠܹܝܢ. ܐܸܠܵܐ ܕܐܸܢܵܐ ܐܸܬܼܩܲܒܲܠ: ܠܵܐ ܡܲܡܪܚܝܼܢ ܗ̄ܘ̣ܵܘ ܠܡܹܐܡܲܪ.
ܡܸܛܠ ܕܲܚܕܼܵܐ ܙܒܲܢ ܐܲܦܩܘܼܢܝ ܗ̄ܘ̣ܵܘ: ܘܐܸܢܲܢܩܹܐ ܐܝܼܬܹܝܗ̇ ܗ̄ܘ̣ܵܬܼ:
ܕܐܵܦ ܠܗܵܢܘܿܢ ܟܲܕܼ ܐܲܒܼܝܼܠܝܼܢ ܢܲܦܩܘܼܢ ܐܸܢܘܿܢ. ܘܡ̣ܢ ܒܵܬܲܪܟܸܢ ܒܗܹܝܢ
ܟܲܕܼ ܒܗܹܝܢ ܒܗܵܠܹܝܢ: ܢܲܦܩܘܼܢ ܐܵܦ ܠܗܘܿܢ ܠܗܵܠܹܝܢ. ܡܸܛܠ
ܕܗܸܢܘܿܢ ܗܵܠܹܝܢ: ܗܸܢܹܝܢ ܟܲܕܼ ܗܸܢܹܝܢ ܡܸܬܼܪܲܥܹܝܢ ܘܡܲܠܦܝܼܢ:
ܘܲܕܼܗܵܠܹܝܢ ܐܝܼܬܲܝܗܹܝܢ ܫܲܪܝܼܪ̈ܵܬܼܵܐ. ܘܒܼܗܵܕܹܐ ܡܲܪܵܚܘܼܬܼܵܐ ܤܵܒܲܪ̇ ܗ̄ܘ̣ܵܐ
ܕܩܵܐܹ̇ܡ ܠܘܼܩܒܲܠ ܟܠܗܘܿܢ ܩܲܕܝܼ̈ܫܹܐ: ܠܲܡܩܲܒܵܠܘܼ ܘܬܼܘܼܒܼ ܠܡܸܥܛܲܦ
ܘܲܠܡܸܫܪܵܐ ܠܗܵܠܹܝܢ ܕܩܲܒܸܠ̣.
ܚܵܘܝܼ ܓܹܝܪ ܢܲܦܫܹܗ ܗ̤ܘ ܗܵܢܵܐ ܡ̣ܢ ܬܵܘ̈ܕܝܵܬܼܵܐ ܕܡ̣ܢ ܫܘܼܪܵܝܵܐ:
ܘܒܼܐܝܼܕܼܵܐ ܒܐܝܼܕܼܵܐ ܡܵܘܤܸܦ ܘܲܡܒܲܨܲܪ: ܘܗܸܢܹܝܢ ܟܲܕܼ ܗܸܢܹܝܢ
ܐܵܡܲ݁ܪ. ܘܟ̣ܦܲܪ ܒܗܹܝܢ ܒܐܘܼܠܨܵܢܵܐ ܘܲܒܼܫܘܼܠܛܵܢܵܐ ܟܲܕܼ ܥܵܒܹ̇ܕܼ
ܘܡܼܬܼܦܲܪܲܣ: ܥܕܲܡܵܐ ܕܲܢܒܲܛܸܠ ܕܲܬܼܪܹܝܢ ܟܝܵܢ̈ܝܼܢ ܐܝܼܬܲܝܗܘܿܢ: ܗܵܢ̇ܘܿܢ
ܕܡܸܢܗܘܿܢ ܐܝܼܬܼܵܘܗܝ ܡܫܝܼܚܵܐ. ܘܲܒܼܫܘܼܡܵܗܹ̈ܐ: ܘܠܵܐ ܗ̄ܘ̣ܵܐ ܒܐܘܼܤ̈ܝܵܣ:
ܤܵܐܹ̇ܡ ܠܲܟܼܝܵܢܹ̈ܐ. ܘܲܠܚܲܕܼ ܟܝܵܢܵܐ: ܐܲܝܟܼ ܕܲܒܼܢܵܡܘܿܤܵܐ ܤܵܐܹ̇ܡ ܗ̄ܘ̣ܵܐ
ܠܡܵܘܕܵܝܘܼ: ܗܵܝܕܹܝܢ ܟܲܕܼ ܡܸܬܼܟܲܬܲܫ ܠܡܸܫܪܵܐ ܘܲܠܡܲܗܦܵܟܼܘܼ ܠܐܲܝܠܹܝܢ
ܕܐܸܡ̣ܪܘ ܬܪܹܝܢ ܟܝܵܢ̈ܝܼܢ. ܒܪܡ ܠܵܐ ܗ̄ܘ̣ܵܐ ܠܟܼܠܗܘܿܢ ܐܲܟܲܚ̄ܕܪ: ܐܸܠܵܐ
pb. 459
ܩܲܕܼܡܵܝܑܬܼ ܒܐ̄ܢܵܫ̈ܝܼܢ ܐ̄ܢܵܫ̈ܝܼܢ. ܐܲܝܟܲܢܵܐ ܕܡܵܐ ܕܥܲܠ ܗܵܠܹܝܢ ܡܸܬܼܥܲܫܲܢ:
ܢܸܬܼܩܲܪܲܒܼ ܒܩܲܠܝܼܠ ܩܲܠܝܼܠ ܐܵܦ ܗܵܠܹܝܢ ܕܫܲܪܟܵܐ: ܐܲܝܟܼ ܕܥܲܠ
ܐܲܝܠܹܝܢ ܕܐܵܡ̇ܪܝܼܢ ܗܵܠܹܝܢ ܕܗܵܢ̇ܘܿܢ. ܒܐܲܝܠܹܝܢ ܓܹܝܪ ܕܲܒܼܤܵܗܕܘܼܬܼܵܐ
ܡܸܬܼܚܲܫܚܝܼܢ ܗ̄ܘ̣ܵܘ ܒܗܘܿܢ ܕܗܵܠܹܝܢ ܐܸܡ݂ܲܪܘ: ܘܐܵܦ ܗܸܢ̇ܘܿܢ
ܐܵܡ̇ܪܝܼܢ ܗ̄ܘ̣ܵܘ. ܘܠܵܐ ܗ̄ܘ̣ܵܐ ܫܟܼܵܚܬܼܵܐ ܗ̣̄ܝ ܚܕܼܵܬܵܐ: ܠܗܵܠܹܝܢ ܡܲܦܸܩ
ܗ̄ܘ̣ܵܐ: ܐܲܝܟܼ ܗܲܪ̈ܵܛܝܼܩܹܐ. ܘܲܕܼܗܵܠܹܝܢ ܕܗܵܢ̇ܘܿܢ ܐܵܡܲ݁ܪ ܐ̄ܢܵܐ ܐܵܦ ܐܸܢܵܐ:
ܘܗܵܟܲܢܵܐ ܡܵܘܕܹܝܢ ܐܲܝܟܼ ܗܵܪ̈ܵܛܝܼܩܹܐ. ܘܠܘܼܩܒܲܠ ܟܠ ܐ̄ܢܵܫ ܡܪܲܒܹܝܢ
ܗ̄ܘ̣ܵܘ ܠܵܗ̇ ܠܲܫܟܼܝܼܪܘܼܬܼܵܐ ܗܵܕܹܐ ܕܪܘܼܫܥܵܐ: ܘܟܼܠܗܘܿܢ ܐܲܟܲܚ̄ܕܼ. ܠܵܐ
ܗ̄ܘ̣ܵܐ ܓܹܝܪ ܐܲܝܟܼ ܕܲܢܚܵܘܹܝܢܝ ܕܗܲܪܵܛܝܼܩܵܐ ܐܝܼܬܲܝ: ܡܲܝܬܸܐ ܗ̄ܘ̣ܵܐ
ܠܗܵܠܹܝܢ ܕܐܵܪ̈ܬܵܕܘܿܟܿܤܹܐ ܘܲܕܼܡܲܠܦܵܢܹ̈ܐ ܗܵܢ̇ܘܿܢ ܕܡ̣ܢ ܩܕܼܵܡܲܒ. ܐܸܠܵܐ
ܕܲܠܩܘܼܒܼܠܵܐ: ܠܗܵܠܹܝܢ ܕܝܼܠܝܼ ܠܘܼܩܒܲܠ ܗܵܢ̇ܘܿܢ ܢܵܤܹ̇ܒܼ ܗ̄ܘ̣ܵܐ:
ܕܲܢܚܵܘܸܐ ܕܗܲܪ̈ܵܛܝܼܩܹܐ ܐܸܢܘܿܢ. ܒܲܪ ܕܵܡ̈ܝܵܢ ܐܸܢܹܝܢ ܗܵܠܹܝܢ ܕܐܸܬܼܐܡܲܪ
ܡܸܢܗܘܿܢ ܠܗܵܠܹܝܢ ܕܝܼܠܝܼ. ܢܚܵܘܸܐ ܕܹܝܢ ܐܵܦ ܐܲܝܠܹܝܢ ܕܲܗ̤ܘܲܝ̈ ܡ̣ܢ
ܒܵܬܲܪ ܗܵܠܹܝܢ: ܘܡܸܢܹܗ ܢܤܲܒ ܫܘܼܪܵܝܵܐ.
Book 2.2
ܥܲܠ ܐܲܝܠܹܝܢ ܕܲܒܼܙܲܒܼܢܹܗ ܕܲܦܠܵܘܝܵܢܘܿܣ ܐܸܤܬܿܥܲܪ.
ܡ̣ܢ ܒܵܬܲܪ ܓܹܝܪ ܦܘܿܩܠܘܿܣ: ܗܘ̤ܵܐ ܗ̄ܘ̣ܵܐ ܐܲܦܸܤܩܘܿܦܵܐ
ܕܩܘܼܤܛܲܢܛܝܼܢܵܦܘܿܠܝܼܣ ܦܠܵܘܝܵܢܘܿܣ: ܓܲܒܼܪܵܐ ܕܲܒܼܢܲܩܢܘܼܬܼܵܐ
ܘܲܒܼܢܲܟܼܦܘܼܬܼܵܐ ܡܸܬܿܕܲܒܲܕܼܒܲܪ ܗ̄ܘ̣ܵܐ. ܠܵܐ ܕܹܝܢ ܐܝܼܬܼ ܗ̄ܘ̣ܵܐ ܠܹܗ
ܡܸܬܼܡܲܨܝܵܢܘܼܬܼܵܐ:
ܗܵܝ̇ ܕܓܲܠܝܵܐܝܼܬܼ ܢܹܐܡܲܪ ܘܲܢܚܵܘܸܐ ܡܸܠܵܘ̈ܗܝ. ܐܸܬܼܠܲܒܲܒܼ ܗ̄ܘ̣ܵܐ ܕܹܝܢ
ܗܵܘ̇ ܕܲܠܟܼܠܗܘܿܢ ܐܲܦܸܤܩ̈ܘܿܦܹܐ ܡܩܲܛܪܸܓܼ ܗ̄ܘ̣ܵܐ: ܗܵܘ̇ ܕܗ̤ܘ
pb. 460
ܒܲܠܚܘܿܕܼ ܐܸܫܬܲܚܲܪ ܗ̄ܘ̣ܵܐ ܡ̣ܢ ܫܲܪܟܵܐ ܕܲܐ̄ܚܪ̈ܵܢܹܐ ܕܲܥܢܲܕܼܘ ܗ̄ܘ̣ܵܘ:
ܗܵܢܵܘ ܕܹܝܢ ܐܘܼܛܝܼܟܼܝܼܣ. ܘܡܸܛܠ ܕܗ̤ܘ ܠܵܐ ܗ̄ܘ̣ܵܐ ܐܲܦܸܤܩܘܿܩܦܵܐ:
ܐ̄ܚܪܵܢܝܵܐܝܼܬܼ ܤܵܐܹ̇ܡ ܗ̄ܘ̣ܵܐ ܢܲܦܫܹܗ ܒܝܲܕܼ ܫܘܼܠܛܵܢܵܐ ܕܡܲܠܟܿܘܼܬܼܵܐ:
ܐܲܝܟܼ ܐܲܦܸܤܩܘܿܩܦܵܐ ܕܐܲܦܸܤܩ̈ܘܿܦܹܐ. ܗ̤ܘ ܓܹܝܪ ܦܵܩܹ̇ܕܼ ܗ̄ܘ̣ܵܐ ܠܨܒܼ̈ܘܵܬܼܵܐ
ܕܥܹܕܬܵܐ: ܟܲܕܼ ܡܸܬܼܚܲܫܲܚ ܗ̄ܘ̣ܵܐ ܐܲܝܟܼ ܕܒܲܡܫܲܡܫܵܢܵܐ ܒܲܦܠܵܘܝܵܢܘܿܣ:
ܒܐܲܝܠܹܝܢ ܕܡܸܬܼܦܲܩ̈ܕܵܢ ܗ̣̄ܘܲܝ̈ ܒܩܘܼܤܛܲܢܛܝܼܢܵܦܘܿܠܝܼܣ. ܗܵܘ̇ ܕܡܸܛܠ
ܤܘܿܓܼܵܐܐ ܕܡܲܟܿܝܼܟܼܘܼܬܹܗ: ܠܵܐ ܝܵܕܲܥ̇ ܗ̄ܘ̣ܵܐ ܐܲܝܠܹܝܢ ܕܡܸܬܼܥܲܬ̈ܕܼܵܢ
ܗ̣̄ܘܲܝ̈. ܟܲܕܼ ܡܲܦܸܩ ܗ̄ܘ̣ܵܐ ܐܲܝܟܼ ܕܠܗܲܪ̈ܵܛܝܼܩܹܐ ܡ̣ܢ ܥܹܕܬܵܐ: ܠܟܼܠܗܘܿܢ
ܐܲܝܠܹܝܢ ܕܠܵܐ ܡܸܬܼܪܲܥܹܝܢ ܗ̄ܘ̣ܵܘ ܗܵܠܹܝܢ ܕܝܼܠܹܗ. ܠܗܵܢ̇ܘܿܢ ܕܹܝܢ ܐܲܝܠܹܝܢ
ܕܲܡܥܲܕܪܝܼܢ ܗ̄ܘ̣ܵܘ ܠܹܗ: ܡܩܝܼܡ ܗ̄ܘ̣ܵܐ ܘܲܡܥܲܕܲܪ ܠܗܘܿܢ. ܠܒܲܪ
ܕܹܝܢ ܒܫܘܼܠܛܵܢܵܐ ܕܡܲܠܟܵܐ ܡܸܬܼܚܲܫܲܚ ܗ̄ܘ̣ܵܐ: ܫܘܼܠܛܵܢܵܐ ܬܟܼܝܼܠܵܐ:
ܘܕܼܵܐܦ ܠܵܐ ܒܒܲܪܬܼ ܩܵܠܵܐ ܨܵܒܹ̇ܐ ܗ̄ܘ̣ܵܐ ܕܢܸܬܼܐܲܡܪܘܼܢ ܬܪܹܝܢ ܟܝܵܢ̈ܝܼܢ
ܥܲܠ ܡܫܝܼܚܵܐ. ܘܒܲܐܒܼܵܗ̈ܬܼܵܐ ܐܲܝܠܹܝܢ ܕܕܲܐܝܟܼ ܗܵܟܲܢܵܐ ܐܵܡ̇ܪܝܼܢ ܗ̄ܘ̣ܵܘ
ܡܒܲܙܲܚ ܗ̄ܘ̣ܵܐ: ܟܲܕܼ ܥܵܕܹܠ ܗ̄ܘ̣ܵܐ ܠܗܘܿܢ ܐܲܝܟܼ ܕܲܠܢܵܤܒܲܝ̈
ܒܐܲܦܹ̈ܐ. ܕܲܒܼܡܲܤܲܒܼ ܒܐܲܦܹ̈ܐ ܡܛܲܫܹܝܢ ܗ̄ܘ̣ܵܘ ܠܹܗ ܠܲܫܪܵܪܵܐ: ܐܵܘ ܐܲܝܟܼ
ܗܲܪ̈ܵܛܝܼܩܹܐ ܐܸܡ݂ܲܪܘ ܠܗܵܠܹܝܢ ܕܝܼܠܝܼ. ܒܲܕܼ ܠܵܐ ܙܵܕܹܩ ܕܡܲܠܦܵܢ̈ܘܵܬܼܗܘܿܢ
ܕܗܵܢ̇ܘܿܢ: ܒܕܼܝܼܢܵܐ ܕܗܲܝܡܵܢܘܼܬܼܵܐ ܢܸܬܼܠܲܒܼ̈ܟܵܢ. ܗܵܟܲܢܵܐ ܟܲܕܼ ܒܫܘܼܠܛܵܢܵܐ
ܕܡܲܠܟܿܘܼܬܼܵܐ ܘܲܒܼܦܘܼܩ̈ܕܵܢܹܐ ܗܵܠܹܝܢ ܡܫܲܪܲܪ ܗ̄ܘ̣ܵܐ ܘܲܡܬܸܕܼ: ܡܲܕܼܢܚܵܐ
ܟ̱ܠܵܗ̇ ܫܓܼܝܼܫܵܐ ܗ̄ܘ̣ܵܬܼ ܥܲܠ ܗܵܠܹܝܢ: ܘܠܲܝܬܿ ܗ̄ܘ̣ܵܐ ܕܘܼܟܿܬܼܵܐ ܕܠܵܐ
ܐܸܬܿܬܿܙܝܼܥܲܬ̤ ܗ̄ܘ̣ܵܬܼ. ܡܸܛܠ ܕܲܠܟܼܠܗܹܝܢ ܫܪܵܐ ܗ̄ܘ̣ܵܐ: ܐܲܝܟܼ ܐܲܝܠܹܝܢ
pb. 461
ܕܒܸܾܐܤܟܹܿܡܵܐ ܗ̤ܘܲܝ̈. ܘܡ̣ܢ ܟܲܕܿܘܼ ܓܲܠܝܵܐܝܼܬܼ ܐܵܠܹ̇ܨ ܗ̄ܘ̣ܵܐ
ܠܗܘܿܢ: ܕܐܵܘ ܢܹܐܡܪܘܼܢ ܐܲܝܠܹܝܢ ܕܠܵܐ ܒܵܥܹ̇ܝܢ ܗ̄ܘ̣ܵܘ: ܐܵܘ ܢܸܚܫܘܼܢ
ܒܝܼ̈ܫܵܬܼܵܐ ܘܲܢܩܲܒܿܠܘܼܢ ܡܤܵܡ ܒܪܹܫܵܐ.
ܫܡܲܥ̣ ܗ̄ܘ̣ܵܐ ܓܹܝܪ ܦܵܠܵܘܝܵܢܘܿܣ: ܕܐܸܫܬܿܓܸܫ ܗ̄ܘ̣ܵܝ̈ ܥܹ̈ܕܼܵܬܼܵܐ
ܡܸܢܕܪܹܫ ܥܲܠ ܗܵܠܹܝܢ: ܘܕܸܐܬܼܦܲܠܲܓܼ ܗ̣̄ܘܲܝ̈ ܕܲܝܪ̈ܵܬܼܵܐ: ܘܥܲܡܵܐ
ܒܦܵܠܓܼܘܼܬܼܵܐ ܩܵܐܹ̇ܡ ܗ̄ܘ̣ܵܐ. ܘܲܕܼܡ̣ܢ ܟܲܕܼܘܼ ܕܵܠܩܵܐ ܗ̄ܘ̣ܵܬܼ ܢܘܼܪܵܐ
ܒܟܼܠܵܗ̇ ܥܵܡܲܪܬܵܐ: ܡ̣ܢ ܐܲܝܠܹܝܢ ܕܐܵܙ̇ܠܝܼܢ ܗ̄ܘ̣ܵܘ ܘܐܵܬܹ̇ܝܢ ܗ̄ܘ̣ܵܘ:
ܘܕܲܐ̄ܚܪ̈ܵܢܹܐ ܐ̄ܚܪ̈ܵܢܝܵܬܼܵܐ ܡܲܟܼܪܙܝܼܢ ܗ̄ܘ̣ܵܘ ܐܲܝܠܹܝܢ ܕܡܲܠ̈ܝܵܢ ܪܘܼܫܥܵܐ.
ܘܫܲܕܲܪ ܠܘܵܬܹܗ ܐܲܝܟܼ ܕܐܵܡ̇ܪܝܼܢ: ܟܲܕܼ ܒܵܥܹ̇ܐ ܡܸܢܹܗ ܘܡܸܬܼܟܲܫܲܦ ܠܹܗ:
ܕܲܢܚܘܼܣ ܥܲܠ ܥܹ̈ܕܵܬܼܵܐ ܕܐܲܠܵܗܵܐ: ܗܵܠܹܝܢ ܕܤܲܓܿܝܼ ܐܸܫܬܿܚܸܩ ܗ̣̄ܘܲܝ̈
ܒܲܫܓܼܘܼ̈ܫܝܹܐ ܕܲܩܕܼܵܡ ܙܲܒܼܢܵܐ ܗܘ̤ܵܘ ܗ̄ܘ̣ܵܘ: ܘܤܵܦ̈ܩܵܢ ܠܗܹܝܢ ܗܵܠܹܝܢ
ܕܐܵܬܿܬܿܤܝܼܡ ܟܲܕܼ ܗܘ̤ܵܐ ܫܲܝܢܵܐ. ܘܲܕܼܠܵܐ ܢܙܝܼܥ ܥܠܵܘܗܝ: ܠܗܵܠܹܝܢ
ܕܠܵܐ ܐܸܬܿܬܿܙܝܼܥ ܥܲܠ ܐܲܝܠܹܝܢ ܕܡ̣ܢ ܩܵܕܼܵܡܲܝ ܗܘ̤ܵܘ. ܕܼܸܠܵܐ ܬܸܤܬܿܒܲܪ
ܕܥܲܠ ܗܵܢ̇ܘܿܢ ܡܸܛܠ ܕܸܚܠܬܼܵܐ ܠܵܐ ܐܸܬܿܬܿܙܝܼܥ: ܒܝܵܘ̈ܡܵܬܼܵܐ ܕܹܝܢ
ܕܝܼܠܝ ܡܛܠ ܤܘܿܓܼܵܐܐ ܕܡܲܗܡܝܵܢܘܼܬܼܵܐ: ܕܐܝܼܬܲܝ ܓܹܝܪ ܕܲܒܼܪܵܐ
ܡܸܤܟܹܢܵܐ ܡܵܘܕܸܐ ܐ̄ܢܵܐ: ܡ̇ܢ ܕܹܝܢ ܝܲܬܿܝܼܪ ܡ̣ܢ ܐ̄ܚܪ̈ܵܢܹܐ ܡܸܫܟܿܚܵܐ ܕܢܸܗܘܸܐ
ܠܵܟܼ؟ ܡܸܛܠܵܬܼܵܗ̇ ܕܹܝܢ ܕܡܲܟܿܝܼܟܼܘܼܬܼܝ: ܐܵܦ ܐܲܢ̄ܬܿ ܡܕܲܒܲܪ ܐܲܢ̄ܬܿ
ܒܵܗ̇ ܒܐܲܦܸܩܘܿܦܘܼܬܼܵܐ. ܘܟܼܠ ܡܸܕܸܡ ܕܲܦܩܲܕܬܿ: ܥܸܒ̇ܕܼܬܼ
ܕܠܵܐ ܡܸܫܬܲܐܠܵܢܘܼܬܼܵܐ.
ܗ̤ܘ ܕܹܝܢ ܕܲܠܩܘܼܒܼܠܵܐ ܐܵܡܲ݁ܪ ܗ̄ܘ̣ܵܐ: ܕܲܡܥܲܕܲܪ ܐ̄ܢܵܐ ܠܵܟܼ
pb. 462
ܒܐܲܦܸܤܩܘܿܦܘܼܬܼܵܐ: ܘܲܕܼܙܵܕܹܩ ܠܵܟܼ ܕܬܸܚܕܸܐ ܒܫܘܼܚܠܵܦܵܐ. ܕܐܲܝܟܲܢܵܐ
ܗܵܠܹܝܢ ܕܠܵܐ ܗ̤ܘܲܝ̈ ܥܲܠ ܗܵܢ̇ܘܿܢ ܕܡ̣ܢ ܩܕܼܵܡܲܝܟ ܡܸܛܠ ܘܲܤܲܒܼ
ܒܐܲܦܹ̈ܐ: ܗܵܠܹܝܢ ܢܸܤܘ̈ܝܵܢ ܒܝܵܘ̈ܡܵܬܼܵܟܼ ܕܠܵܐ ܡܲܤܲܒܼ ܒܐܲܦܹ̈ܐ. ܗܵܫܵܐ
ܓܹܝܪ ܟܹܐܡܲܬܼ ܡܸܤܬܲܬܲܒܼܪܵܐ: ܕܐܸܬܿܕܲܟܿܝܼܘ ܐ̄ܢܵܫܵܐ ܡ̣ܢ ܗܵܠܹܝܢ ܕܢܸܤܛܘܿܪܝܼܣ:
ܠܒܼܝܼܟܼܝܼܢ ܕܹܝܢ ܠܗܵܠܹܝܢ ܕܝܼܠܹܗ. ܘܡܸܤܬܲܒܼܪܝܼܢ ܚ̄ܢܲܢ ܕܒܲܒܼܥܸܠܕܒܼܵܒܼܘܼܬܼܵܐ
ܐ̄ܢܵܫܵܝܬܼܵܐ ܐܝܼܬܲܝܢ ܠܘܵܬܼ ܓܲܒܼܪܵܐ: ܘܠܵܐ ܗ̄ܘ̣ܵܐ ܡܸܛܠ ܪܘܼܫܥܹܗ. ܕܠܹܗ
ܡ̇ܢ ܚܲܝܸܒܼܢܵܝܗܝ: ܠܗܲܝܡܵܢܘܼܬܹܗ ܕܹܝܢ ܫܒܲܩܢܵܗ̇ ܠܡܸܫܬܲܪܬܵܚܘܼ. ܐܸܠܵܐ
ܙܵܕܹܩ ܠܲܢ ܕܗܵܠܹܝܢ ܕܐܸܡ݂ܲܪ ܐܵܦ ܐܵܘܕܝܼ: ܢܲܦܸܩ ܐܸܢܹܝܢ ܠܲܓܼܡܵܪ.
ܠܵܘ ܓܹܝܪ ܐܲܝܟܼ ܕܡܵܘܕܸܐ ܬܪܹܝܢ ܒܢ̈ܝܼܢ ܕܲܡܦܲܪܫܝܼܢ ܡ̣ܢ ܚܕܼܵܕܹ̈ܐ:
ܘܡܸܢܹܗ ܘܠܹܗ ܐܝܼܬܼܵܘܗܝ ܟܠ ܚܲܕܼ ܚܲܕܼ ܡܸܢܗܘܿܢ ܒܪܑܵܐ: ܐܸܫܬܲܕܲܪ
ܗ̄ܘ̣ܵܐ. ܐܸܠܵܐ ܡܸܛܠ ܕܐܵܘܕܝܼ ܬܪܹܝܢ ܟܝܵܢܹ̈ܐ ܡܫܲܠܡܵܢܹ̈ܐ: ܘܚܲܕܼ
ܦܲܪܨܘܿܦܵܐ ܕܲܬܼܪܹܝܢ. ܡܵܢ̇ܘܿܢ ܕܐܵܠܵܨܐܝܼܬܼ ܡܸܬܢܼܐܲܡܪܝܼܢ ܬܪܹܝܢ ܒܢ̈ܝܼܢ: ܒܗܵܝ̇
ܕܲܒܼܪܵܐ ܡܸܫܬܲܡܲܗ ܒܟܼܠ ܚܲܕܼ ܚܲܕܼ ܡ̣ܢ ܟܝܵܢܹ̈ܐ ܚܲܕܼ ܒܪܵܐ. ܟܲܕܼ ܕܹܝܢ
ܐܸܬܼ݂ܵܐ ܗ̄ܘ̣ܵܐ ܐܵܦ ܐܘܼܤܹܒܼܝܼܣ ܕܐܵܠܹܟܼܤܲܢܕܪܝܼܵܐ: ܕܐܝܼܬܼܵܘܗܝ ܗ̄ܘ̣ܵܐ
ܐܲܦܸܤܩܘܿܦܵܐ ܕܕܼܘܿܪܸܠܘܿܢ ܠܘܵܬܼ ܐܘܼܛܸܟܼܘܿܣ: ܗܵܘ̇ ܕܡ̣ܢ
ܡܸܠܹ̈ܐ ܕܡܸܬܼܐܲܡܪ̈ܵܢ ܗ̣̄ܘܲܝ̈ ܠܘܼܩܒܲܠܝ ܐܲܝܟܼ ܡܵܘܕܝܵܢܵܐ ܚܫܝܼܒܼ ܗ̄ܘ̣ܵܐ:
ܘܫܲܒܿܚܵܗ̇ ܠܦܵܪܹܗ̄ܝܼܵܐ ܕܲܗܘ̤ܵܬܼ ܠܹܗ ܠܘܼܩܒܲܝܠܝ ܒܗܵܢܹܝܢ ܕܠܘܼܩܒܲܠܝ
ܐܸܤܬܿܥܲܕ: ܐܸܡ݂ܲܪ ܕܲܦܐܸܐ ܠܵܗ̇ ܠܦܵܪܹܗ̄ܤܝܼܵܐ ܕܝܼܠܵܟܼ: ܕܠܲܐܝܠܹܝܢ
ܕܡܸܬܼܥܲܫܢܝܼܢ ܒܪܘܼܫܥܵܐ ܕܢܸܤܛܘܿܪܝܼܣ ܬܸܥܩܘܿܪ. ܐܵܦ ܡܸܛܠ ܗܵܕܹܐ
ܗ̄ܘ̣ ܫܲܕܼܪܵܟܼ ܐܲܠܵܗܵܐ: ܠܵܘ ܐܲܝܟܼ ܡ̇ܢ ܕܡܸܕܸܡ ܤܢܝܼܩ ܐܲܢ̄ܬܿ: ܟܠ
ܡܸܕܸܡ ܓܹܝܪ ܡܩܲܕܲܡ ܘܲܡܥܲܬܲܕܼ ܡ̣ܢ ܡܲܒܟܵܐ. ܐܸܠܵܐ ܐܲܝܟܼ ܡ̇ܢ
pb. 463
ܕܬܸܬܼܒܲܤܲܡ ܒܲܫܚܵܩܵܟܼ: ܐܸܢܗ̤ܘ ܕܐܵܦ ܗܵܕܹܐ ܒܐܝܼܕܼܵܟܼ ܬܸܘܗܸܐ.
ܗܵܟܲܢܵܐ ܕܹܝܢ ܐܸܢܗ̤ܘ ܕܬܸܬܼܩܲܪܲܒܼ ܠܡܲܠܟܵܐ: ܟܲܕܼ ܡܸܬܼܥܲܕܲܠ ܐܲܢ̄ܬܿ
ܒܐܲܝܠܹܝܢ ܕܲܤܢܝܼܩܝܼܢ ܠܲܡܩܲܒܵܠܘܼ ܬܪܹܝܢ: ܐܵܘ ܟܹܝܬܼ ܐܵܡܲ݁ܪ ܐܲܢ̄ܬܿ
ܕܠܵܐ ܢܸܗܘ̈ܝܵܢ ܒܲܛܝܼ̈ܠܵܬܼܵܐ: ܗܵܠܹܝܢ ܕܲܒܼܤܘܼܢܗܵܕܘܿܣ ܗ̤ܘܲܝ̈
ܒܝܵܘ̈ܡܵܬܼܵܟܼ . . .
ܗܵܢܵܐ ܕܹܝܢ ܟܲܕܼ ܤܵܒܲܪ̇ ܗ̄ܘ̣ܵܐ ܕܠܵܐ ܡܸܫܬܿܓܸܫ: ܐܵܦ ܠܵܐ ܬܘܼܒܼ
ܒܗܵܠܹܝܢ ܡܸܬܼܚܡܸܡ ܗ̄ܘ̣ܵܐ: ܐܸܠܵܐ ܕܛܵܒܼ ܬܲܩܝܵܐ ܐܝܼܬܼܵܘܗܝ ܗ̄ܘ̣ܵܐ:
ܐܵܡܲ݁ܪ ܠܹܗ: ܫܬܼܘܿܩ ܠܲܟܼ. ܘܠܵܐ ܤܪܝܼܩܵܐܝܼܬܼ ܬܸܥܡܠܘܼܢ: ܕܒܼܵܥܹ̇ܝܼܢ
ܐܢ̄ܬܿܘܿܢ ܕܢܸܗܘ̈ܝܵܢ ܐܲܝܠܹܝܢ ܕܠܵܐ ܡܸܫܟܿܚܵܐ: ܘܐܵܦ ܠܵܐ ܟ̱ܠܵܗ̇
ܤܘܼܢܗܵܕܘܿܣ ܕܲܗܘ̤ܵܬܼ ܒܐܲܦܸܤܘܿܣ ܒܲܛܠܲܬ̤ ܐܸܵܢܹܝܢ: ܘܐܵܦ ܠܵܐ
ܗ̤ܘ ܩܘܼܪܸܠܘܿܣ: ܐܸܠܵܐ ܫܠܸܡ̣ ܗ̄ܘ̣ܵܐ ܥܲܡܗܘܿܢ ܕܡܲܕܹܢܚܵܝܹ̈ܐ. ܘܒܼܵܬܲܪܟܸܢ
ܬܘܼܒܼ ܒܗܹܝܢ ܒܗܵܠܹܝܢ ܗܘ̤ܵܐ ܗ̄ܘ̣ܵܐ ܫܠܵܡܵܐ: ܘܐܲܪܦܝܼ ܠܐܲܝܠܹܝܢ
ܕܛܵܒܼܵܐܝܼܬܼ ܗ̤ܘܲܝ̈ ܕܢܸܬܼܠܲܒܼ̈ܟܢ. ܠܵܐ ܓܹܝܪ ܡܸܫܟܿܚܵܐ ܕܬܸܬܼܪܝܼܡ ܡ̣ܢ
ܥܹܕܬܵܐ: ܕܠܵܐ ܢܸܬܼܐܲܡܪܘܼܢ ܬܪܹܝܢ ܟܝܵܢ̈ܝܼܢ ܒܲܡܫܝܼܚܵܐ ܕܠܵܐ ܒܘܼܠܒܵܠܵܐ:
ܕܐܲܒܵܗܘܼܬܼܵܐ ܘܲܕܐ̄ܢܵܫܘܼܬܼܵܐ. ܒܲܪ ܟܝܵܢܵܐ ܕܐܲܒܼܘܼܗܝ ܒܐܲܠܵܗܘܼܬܼܵܐ: ܘܒܲܪ
ܟܝܵܢܵܐ ܕܝܼܠܲܢ ܒܐ̄ܢܵܫܘܼܬܼܵܐ . . . ܘܐܸܬܿܕܲܠܲܚ ܗ̄ܘ̣ܵܐ ܠܩܘܼܒܼܠܹܗ ܐܘܼܛܟܼܘܿܣ
ܘܐܸܡ݂ܲܪ: ܕܢܲܟܿܤܵܟܼ ܐܲܠܵܗܵܐ. ܕܐܵܦܠܵܐ ܩܲܕܼܡܵܝܑܬܼ ܐܸܡ݂ܲܪ ܗ̄ܘ̣ܵܐ ܡܸܕܸܡ
ܥܲܠ ܐܲܠܵܗܵܐ ܢܸܤܛܘܿܪܝܼܣ. ܐܸܠܵܐ ܐܸܢ ܕܕܼܵܠܘܿܚܵܐ ܘܪܵܚܹܡ ܫܘܼܒܼܚܵܐ.
ܐܲܝܟܲܢܵܐ ܓܹܝܪ ܕܗܵܘ̇ ܕܗܵܠܹܝܢ ܕܢܸܤܛܘܿܪܝܼܣ ܐܸܡܲ݁ܪ: ܡܸܫܟܲܚ ܠܲܡܩܵܡ
ܠܘܼܩܒܲܠ ܢܸܤܛܘܿܪܝܼܣ؟ ܕܗܵܘ̇ ܓܹܝܪ ܐܝܼܬܲܝܗܘܿܢ ܦܸܬܼܓܼܵܡܹ̈ܐ ܗܵܠܹܝܢ:
ܗܵܘ̇ ܕܲܒܼܥܲܡܠܵܐ ܤܲܓܿܝܼܐܵܐ ܐܲܫܠܸܡܬܿܘܿܢ ܠܹܗ. ܐܘܼܤܹܒܝܼܣ ܕܹܝܢ ܐܸܡ݂ܲܪ
pb. 464
ܠܹܗ: ܠܵܐ ܝܵܕܲܥ̇ ܐ̄ܢܵܐ ܡ̇ܢ ܕܐܸܡܲ݁ܪ ܐܲܢ̄ܬܿ. ܠܵܐ ܗ̄ܘ̣ܵܐ ܓܹܝܪ ܡܸܛܠ
ܕܐܸܡ݂ܲܪ ܬܪܹܝܢ ܟܝܵܢ̈ܝܼܢ ܡܸܬܼܚܪܸܐ ܐ̄ܢܵܐ ܠܩܘܼܒܼܠܹܗ: ܐܵܘ ܤܘܼܢܗܵܕܘܿܣ
ܒܗܵܕܹܐ ܥܲܕܼܠܬܹܗ. ܐܸܠܵܐ ܡܸܛܠ ܕܒܲܡ̈ܢܵܘܵܢ ܡ̈ܢܵܘܵܢ ܡܦܲܪܸܫ ܘܤܵܐܹ̇ܡ:
ܠܐܲܠܵܗܵܐ ܡܸܢܹܗ ܘܠܹܗ: ܘܲܠܒܲܪܢܵܫܵܐ ܗܵܟܼܘܵܬܼ ܡܸܢܹܗ ܘܠܹܗ: ܕܒܼܐܝܼܩܵܪܵܐ
ܒܲܠܚܘܿܕܼ ܘܲܒܼܫܲܘܝܘܼܬܼܵܐ ܒܵܗ̇ ܟܲܕܼ ܒܵܗ̇ ܡܸܬܼܚܲܫܚܝܼܢ ܘܡܼܬܼܐܲܡܪܝܼܢ.
ܘܲܒܼܗܵܢܵܐ ܙܢܵܐ ܬܪܹܝܢ ܒܢܲܝ̈ܐ ܐܸܡܲ݁ܪ: ܘܲܕܼܠܵܐ ܐܝܼܬܹܝܗ̇ ܝܵܠܕܲܬܼ ܐܲܠܵܗܵܐ
ܒܬܼܘܼܠܬܼܵܐ ܩܲܕܝܼܫܬܼܵܐ: ܡܸܛܠ ܕܐܲܠܵܗܵܐ ܥܲܒܼܕܹܗ ܕܝܼܠܹܗ ܠܗܵܘ̇
ܝܲܠܕܵܐ ܕܒܸܤܪܹܗ.
ܘܐܘܼܛܸܟܼܘܿܣ ܐܵܡܲ݁ܪ: ܡܕܲܛܸܠ ܐܲܢ̄ܬܿ ܥܠܵܘܗܝ. ܡܸܛܠ
ܕܕܼܝܼܠܹܗ ܡܸܬܼܪܲܥܹܝܢ ܐܢ̄ܬܿܘܿܢ: ܕܠܵܐ ܬܸܤܬܲܒܼܪܘܼܢ ܕܕܼܝܼܠܹܗ
ܠܒܼܝܼܟܼܝܼܢ ܐ̄ܢܵܘܿܢ. ܗ̤ܘ ܓܹܝܪ ܪܵܒܿܘܿ ܙܲܒܢ̈ܝܼܢ ܩܵܥܹ̇ܐ ܗ̄ܘ̣ܵܐ: ܕܠܵܐ
ܐܸܡܲ݁ܪ ܐ̄ܢܵܐ ܬܪܹܝܢ ܒܢ̈ܝܼܢ: ܚܲܕܼ ܐܸܡܲ݁ܪ ܐ̄ܢܵܐ. ܬܪܹܝܢ ܠܲܟܼܝܵܢܹ̈ܐ ܐܸܡܲ݁ܪ ܐ̄ܢܵܐ:
ܘܠܵܘ ܬܪܹܝܢ ܒܢ̈ܝܼܢ. ܒܪܹܗ ܓܹܝܪ ܕܐܲܠܵܗܵܐ ܥܦܝܼܦܵܐ ܗ̄ܘ̣ ܒܲܟܼܝܵܢܹ̈ܐ.
ܡܸܛܠ ܗܵܢܵܐ ܠܵܐ ܝܸܠܕܲܬ̤ ܠܲܒܼܪܵܐ ܕܐܲܠܵܗܵܐ: ܝܸܠܕܲܬ̤ ܕܹܝܢ ܠܐ̄ܢܵܫܘܼܬܼܵܐ:
ܗܵܝ̇ ܕܐܝܼܬܹܝܗ̇ ܒܪܵܐ ܡܸܛܠ ܒܪܵܐ ܕܲܡܚܲܝܲܕܼ ܠܵܗ̇. ܘܬܼܘܼܒܼ: ܕܠܵܐ
ܡܸܬܼܦܪܸܫ ܐܲܠܵܗܵܐ ܡ̣ܢ ܗܵܘ̇ ܕܡܸܬܼܚܙܸܐ. ܐܲܝܟܲܢܵܐ ܡܵܕܹܝܢ ܦܵܪܹܫ ܐ̄ܢܵܐ
ܠܐܝܼܩܵܪܵܐ ܕܗܵܘ̇ ܕܠܵܐ ܡܸܬܼܦܪܸܫ؟ ܠܵܐ ܗ̄ܘ̣ܵܐ ܓܹܝܪ ܡܸܛܠ ܕܐܸܡ݂ܲܪ
ܗ̄ܘ̣ܵܐ ܫܚܝܼܡܵܐܝܼܬ ܬܪܹܝܢ ܒܢ̈ܝܼܢ: ܘܠܵܐ ܗ̄ܘ̣ܵܐ ܡܸܛܠ ܕܐܸܡ݂ܲܪ ܕܠܵܐ
ܡܚܲܝܕܼܝܼܢ ܟܝܵܢܹ̈ܐ. ܡܵܘܕܸܐ ܐ̄ܢܵܐ ܠܲܡ ܓܹܝܪ ܒܲܥܦܝܼܦܵܐ: ܤܵܓܹ̇ܕܼ ܐ̄ܢܵܐ ܕܹܝܢ
ܒܚܲܕܼ ܠܲܬܼܪܹܝܢ ܡܸܛܠ ܚܕܼܵܝܘܼܬܼܵܐ. ܐܸܠܵܐ ܕܐܵܽܦ ܡ̣ܢ ܒܵܬܲܪ ܚܕܼܵܝܘܼܬܼܵܐ:
pb. 465
ܬܪܹܝܢ ܟܝܵܢܹ̈ܐ ܐܵܡܲ݁ܪ. ܘܕܲܥܦܝܼܦܵܐ ܐܝܼܬܼܵܘܗܝ ܒܪܵܐ ܒܲܟܼܝܵܢܹ̈ܐ:
ܘܲܚܕܼܵܝܘܼܬܼܵܐ ܠܚܲܕܼ ܦܲܪܨܘܿܦܵܐ ܐܸܡܲ݁ܪ ܕܲܗܘ̤ܵܬܼ: ܘܠܵܘ ܠܚܲܕܼ ܟܝܵܢܵܐ.
ܠܗܵܕܹܐ ܕܹܝܢ ܐܵܦ ܐܲܢ̄ܬܿܘܿܢ ܟܲܕܼ ܡܲܪܫܥܝܼܢ ܐܢ̄ܬܿܘܿܢ ܐܵܡ̇ܪܝܼܢ ܐܢ̄ܬܿܘܿܢ:
ܘܡܸܕܸܡ ܝܲܬܿܝܼܪ ܠܵܐ. ܘܙܵܕܹܩ ܗ̄ܘ̣ܵܐ ܕܢܸܬܼܵܥܲܦܪܘܼܢ ܟܠܗܘܿܢ ܢܵܤܒܲܝ̈
ܒܐܲܦܹ̈ܐ. ܐܸܢܵܐ ܓܹܝܪ ܡ̣ܢ ܒܵܬܲܪ ܚܕܼܵܝܘܼܬܼܵܐ: ܐܘܼܤܝܼܵܐ ܐ̄ܚܪܹܬܼܵܐ ܠܵܐ ܝܵܕܲܥ̇
ܐ̄ܢܵܐ ܒܡܵܪܲܢ. ܘܐܵܦ ܠܵܐ ܡܸܪܢܵܐ ܪ̈ܵܢܹܐ ܐ̄ܢܵܐ ܥܲܠ ܡܵܪܲܢ: ܕܒܲܪ ܟܝܵܢܵܐ
ܗ̄ܘ̣ ܕܼܠܲܢ: ܗܵܘ̇ ܕܐܝܼܬܼܵܘܗܝ ܡܵܪܲܢ ܘܐܲܠܵܗܲܢ: ܒܲܪ ܟܝܵܢܵܐ ܕܹܝܢ
ܕܐܲܒܼܵܐ ܒܐܲܠܵܗܘܼܬܼܵܐ.
ܘܐܘܼܤܹܒܝܼܣ ܐܵܡܲ݁ܪ ܠܹܗ: ܐܸܢ ܗܵܟܲܢܵܐ ܐܸܡܲ݁ܪ ܢܸܤܛܘܿܪܝܼܣ:
ܐܲܝܟܼ ܕܐܲܢ̄ܬܿ ܐܸܡܲ݁ܪ ܐܲܢ̄ܬܿ: ܘܐܸܢ ܠܵܐ: ܐܸܢܵܐ ܗܵܫܵܐ ܠܵܐ ܪܡܸܐ
ܠܝܼ ܠܲܡܥܲܩܼܵܘܼ. ܒܪܲܡ ܗܵܕܹܐ ܐܵܡܲ݁ܪ ܐ̄ܢܵܐ: ܕܗܵܘ̇ ܕܗܵܠܹܝܢ ܐܸܡܲ݁ܪ:
ܬܪܝܼܨܵܐܝܼܬܼ ܐܸܡܲ݁ܪ. ܘܐܲܢ̄ܬܿ ܕܠܵܐ ܡܵܘܕܸܐ ܐܲܢ̄ܬܿ ܥܲܡ ܐܵܪ̈ܬܵܕܘܿܟܿܤܹܐ:
ܘܐܵܡܲ݁ܪ ܐܲܢ̄ܬܿ ܠܒܸܤܪܵܐ ܕܒܲܪ ܟܝܵܢܵܐ ܗ̄ܘ̣ ܕܝܼܠܲܢ. ܐܵܘ ܡܒܲܛܸܠ
ܐܲܢ̄ܬܿ ܠܹܗ: ܐܵܘ ܡܫܲܚܠܸܦ ܐܲܢ̄ܬܿ ܠܹܗ ܠܲܟܼܝܵܢܵܐ ܕܐܲܠܵܗܘܼܬܼܵܐ. ܡܸܛܠ
ܗܵܢܵܐ ܙܵܕܹܩ ܕܢܹܐܬܼ̈ܝܵܢ ܗܵܠܹܝܢ ܠܲܒܼܥܵܬܼܵܐ: ܕܗܵܠܹܝܢ ܐܵܡܲ݁ܪ ܐܲܢ̄ܬܿ
ܕܢܸܤܛܘܿܪܝܼܣ: ܕܲܡܩܲܛܪܸܓܼ ܒܗܹܝܢ ܠܤܘܼܢܗܵܕܘܿܣ ܘܲܠܩܘܼܪܸܠܘܿܣ
ܕܲܡܕܲܓܵܠܘܼ ܡܕܲܓܸܠ ܥܠܵܘܗܝ: ܟܲܕܼ ܗܵܟܲܢܵܐ ܡܸܬܼܪܲܥܹܝܢ ܗܵܢ̇ܘܿܢ.
ܘܲܡܫܲܪܲܪ ܐܲܢ̄ܬܿ ܠܲܩܛܹܐ ܓܼܪܵܢܘܼܬܼܵܐ ܕܗܵܘ̇: ܕܫܲܪܝܼܪܬܵܐ ܐܝܼܬܹܝܗ̇ ܕܗܵܟܲܢܵܐ
ܡܸܬܼܪܲܥܸܐ. ܠܗܵܢܵܐ ܪܸܥܝܵܢܵܐ: ܟܠ ܐ̄̈ܢܵܫ ܡܲܚܪܸܡ ܐܲܝܟܼ ܕܲܠܪܲܫܝܼܥܵܐ.
ܘܲܡܚܵܘܸܐ ܐ̄ܢܵܐ ܒܙܲܒܼܢܵܐ ܕܚܵܫܲܚ: ܐܸܢ ܓܹܝܪ ܠܵܐ ܐܝܼܬܼ ܟܝܵܢܵܐ ܒܡܵܪܲܢ:
pb. 466
ܘܐܵܦ ܠܵܐ ܗ̤ܘ ܒܲܪ ܟܝܵܢܵܐ ܗ̄ܘ̣ ܕܝܼܠܲܢ: ܐܸܬܼܒܲܛܠܲܬ̤ ܠܵܗ̇ ܐܘܼܤܝܼܵܐ
ܕܒܸܤܪܵܐ. ܘܥܲܠ ܗܵܠܹܝܢ ܩܲܛܪܓܹܗ ܗ̄ܘ̣ܵܐ ܩܕܼܵܡ ܦܵܠܵܘܝܵܢܘܿܣ: ܘܲܩܕܼܵܡ
ܤܘܼܢܗܵܕܘܿܣ ܕܥܲܡܹܗ ܟܢܝܼܫܵܐ ܗ̄ܘ̣ܵܬܼ ܒܩܘܼܤܢܛܝܼܢܵܦܘܿܠܝܼܣ.
ܘܐܵܘܕܝܼ ܗ̄ܘ̣ܵܐ ܒܗܹܝܢ: ܘܩܵܘܝܼ ܟܲܕܼ ܚܵܘܝܹܗ ܠܪܘܼܫܥܹܗ: ܕܠܵܐ ܗ̄ܘ̣ܵܐ
ܒܲܪ ܟܝܵܢܵܐ ܕܝܼܠܲܢ ܡܵܘܕܸܐ ܠܦܲܓܼܪܹܗ ܕܲܡܫܝܼܚܵܐ: ܐܲܝܟܼ ܕܥܲܠ ܬܪܹܝܢ
ܟܝܵܢ̈ܝܼܢ: ܐܸܠܵܐ ܐܲܝܟܼ ܕܥܲܠ ܚܲܕܼ ܟܝܵܢܵܐ.
ܗܵܕܹܐ ܐܲܙܝܼܥܬܹܗ ܗ̄ܘ̣ܵܬܼ ܠܡܲܠܟܵܐ: ܘܒܼܵܥܹ̇ܐ ܗ̄ܘ̣ܵܐ ܕܠܵܐ ܢܬܼܪܡܸܐ
ܒܩܵܬܼܵܪܵܤܝܼܣ. ܟܲܕܼ ܠܵܐ ܕܹܝܢ ܐܸܫܬܿܡܲܥ ܗ̄ܘ̣ܵܐ: ܡܸܟܹܝܠ ܟܠܗܹܝܢ
ܡܥܲܬܸܕܼ ܗ̄ܘ̣ܵܐ ܥܲܠ ܩܵܬܼܵܪܵܤܝܼܣ ܕܲܦܠܵܘܝܵܢܘܿܣ: ܘܥܲܠ ܩܘܼܝܵܡܵܐ
ܕܐܘܼܛܸܟܼܘܿܣ. ܟܲܕܼ ܩܲܕܸܡ̣ ܗ̄ܘ̣ܵܐ ܠܒܲܟܼ ܥܲܡܹܗ ܠܐܲܦܸܤܩܘܿܦܵܐ
ܕܐܵܒܠܹܟܼܤܲܢܕܪܝܼܵܐ ܘܠܲܐܦܸܤܘܿܦܵܐ ܕܪܗܘܿܡܹܗ: ܒܲܟܼܬܼܝܼ̈̄ܒܼܵܬܼܵܐ ܕܥܲܠ
ܐܲܠܝܹܝܢ ܕܐܸܤܬܿܥܲܪ ܠܘܼܩܒܲܠ ܐܘܼܛܸܟܼܘܿܣ: ܘܚܲܕܼ ܫܠܸܡ̣ ܘܚܲܕܼ
ܠܵܐ ܫܠܸܡ̣. ܩ̣ܪܵܐ ܗ̄ܘ̣ܵܐ ܓܹܝܪ ܐܲܦܸܤܩܘܼܦܵܐ ܕܪܗܘܿܡܹܐ ܠܗܵܠܹܝܢ
ܕܐܸܤܬܿܥܲܪ ܠܘܼܩܒܲܠ ܐܘܼܛܸܟܼܘܿܣ: ܘܚܲܝܒܹܗ ܗ̄ܘ̣ܵܐ ܒܪܘܼܫܥܵܐ
ܠܐܘܼܛܸܟܼܘܿܣ. ܐܸܢܵܐ ܕܹܝܢ: ܠܲܤܝܵܡܵܐ ܗܵܘ̇ ܟܲܕܼ ܐܸܫܟܼܚ̇ܬܹܗ ܘܲܩ̇ܪܹܝܬܹܗ:
ܐܵܘ̇ܕܝܼܬܼ ܠܐܲܠܵܗܵܐ ܕܲܬܼܪܝܼܨܵܐܝܼܬܼ ܡܵܘܕܝܵܐ ܥܹܕܬܵܐ ܕܪܗܘܿܡܹܐ ܘܲܕܼܠܵܐ
ܡܘܼܡܵܐ: ܐܵܦܸܢ ܥܠܲܝ ܕܝܼܠܝ ܐ̄ܚܪܵܢܝܵܐܝܼܬܼ ܐܝܼܬܲܝܗܘܿܢ. ܐܲܦܪܸܩ ܕܹܝܢ
ܡܸܢܹܗ ܐܵܦ ܠܲܪܟܵܐ ܕܐܲܦܸܤܩ̈ܘܿܦܹܐ: ܘܲܥܒܲܕܼ ܐܸܢܘܿܢ ܕܢܸܪܗܛܘܼܢ
ܠܘܵܬܼ ܐܘܼܛܸܟܼܘܿܣ: ܟܲܕܼ ܡܨܲܥܲܪ ܗ̄ܘ̣ܵܐ ܐܗܵܢܘܿܢ ܕܥܲܡ ܦܠܵܘܝܵܢܘܿܣ:
ܘܲܕܼܠܵܐ ܦܵܪܹܗ̄ܤܝܼܵܐ ܥ̣ܒܲܕܼ ܗ̄ܘ̣ܵܐ ܩܕܼܵܡܵܘܗܝ ܘܲܩܕܼܵܡ ܪܹ̈ܫܵܢܹܐ.
ܘܡܸܬܼܪܫܵܝܘܼܸ ܡܸܬܼܪܫܹܝܢ ܗ̄ܘ̣ܵܘ: ܡܸܫܬܿܡܵܥܘܼ ܕܹܝܢ ܠܵܐ ܡܸܫܬܲܡܥܝܼܢ
pb. 467
ܗ̄ܘ̣ܵܘ ܥܲܠ ܡܵܐ ܕܡܸܬܼܪܫܹܝܢ ܗ̄ܘ̣ܵܘ. ܐܸܠܵܐ ܒܨܲܥܪܵܐ ܩܵܝ̇ܡܝܼܢ ܗ̄ܘ̣ܵܘ
ܥܠܲܝܗܘܢ: ܘܠܵܒܼ̇ܟܿܝܼܢ ܗ̄ܘ̣ܵܘ ܠܗܘܿܢ: ܘܐܵܠܨ̇ܝܼܢ ܗ̄ܘ̣ܵܘ ܠܗܘܿܢ.
ܐܲܦܪܸܩ̣ ܕܹܝܢ ܡܸܢܹܗ ܐܵܦ ܠܲܩܠܹܝܪܘܿܣ: ܟܲܕܼ ܐܵܠܹ̇ܨ ܗ̄ܘ̣ܵܐ ܘܪܵܕܹܦ
ܗ̄ܘ̣ܵܐ ܠܗܘܿܢ: ܒܐܲܝܠܹܝܢ ܕܠܵܐ ܡܸܬܼܚܲܗ̈ܒܵܢ ܗ̣̄ܘܲܝ̈ ܠܬܲܪܤܝܼܬܼܗܘܿܢ.
ܘܐܲܝܠܹܝܢ ܕܲܦܩܲܕܼ ܗ̄ܘ̣ܵܐ ܕܠܵܐ ܢܸܬܿܬܼܿܒܼ̈ܥܵܢ ܡ̣ܢ ܥܹ̈ܕܵܬܼܵܐ. ܒܲܪ
ܡܸܬܼܟܲܚܕܼܵܐ ܡ̣ܢ ܥܹܕܬܵܐ ܘܡ̣ܢ ܐܲܠܵܗܵܐ: ܠܗܵܠܹܝܢ ܒܚܸܡܬܼܵܐ ܒܲܥܝܼܪܵܝܬܼܵܐ
ܦܩܲܕܼ ܗ̄ܘ̣ܵܐ ܕܢܸܬܼܒܿܥܘܼܢ ܡܸܢܗܘܿܢ ܥܲܡ ܨܘܿܚ̈ܝܵܬܼܵܐ ܕܠܵܐ ܡܸܫܬܲܐܠܵܢܘܼܬܼܵܐ.
ܘܪ̈ܲܒܲܝ ܒܵܬܹ̈ܐ ܓܲܠܝܵܐܝܼܬܼ ܡܸܢܼܠܲܒܼܟܿܝܼܢ ܗ̄ܘ̣ܵܘ: ܘܲܒܼܟܸܢܫܹ̈ܐ ܡܸܬܼܪܫܹܝܢ
ܗ̄ܘ̣ܵܘ. ܘܟܼܠ ܐܲܦܸܤܩܘܿܦܵܐ ܕܠܵܐ ܗ̄ܘ̣ܵܐ ܒܲܪ ܓܲܒܵܐ ܕܐܘܼܛܸܟܼܘܿܣ
ܡܸܬܼܠܒܸܟܼ ܗ̄ܘ̣ܵܘ. ܘܟܼܠܵܗ̇ ܡܲܕܲܐܬܼܵܐ: ܕܡܸܢܹܗ ܘܡ̣ܢ ܡܲܠܟܹ̈ܐ
ܕܲܩܕܼܵܡܵܘܗܝ ܐܸܫܬܲܒܼܩܲܬ̤ ܠܗܘܿܢ: ܡܸܛܠ ܩܸܢܝܵܢܹ̈ܐ ܕܥܹ̈ܕܵܬܼܗܘܿܢ:
ܦܩܲܕܼ ܗ̄ܘ̣ܵܐ ܕܡ̣ܢ ܚܕܼܵܐ ܙܒܲܢ ܬܸܬܼܒܲܥ ܡܸܢܗܘܿܢ ܡܲܕܲܐܬܼܵܐ ܕܟܼܠܗܹܝܢ
ܗܵܠܹܝܢ ܫܢܲܝ̈ܵܐ. ܘܠܲܐܝܠܹܝܢ ܕܐܝܼܬܲܝܗܘܿܢ ܗ̄ܘ̣ܵܘ ܪܵܘܪ̈ܒܹܐ ܐܵܘ ܡ̣ܢ
ܛܘܼܗܡܵܐ ܕܐ̄ܢܵܫܵܐ ܪܵܘܪ̈ܒܹܐ: ܚܠܵ ܐܝܼܩܵܪܵܐ ܕܐܝܼܬܼ ܗ̄ܘ̣ܵܐ ܠܗܘܿܢ:
ܬܵܒܲܥ̇ ܗ̄ܘ̣ܵܐ ܡܸܢܗܘܿܢ ܓܲܠܝܵܐܝܼܬܼ ܟܡܵܝܘܼܬܼܵܐ ܕܕܲܗܒܼܵܐ. ܕܲܒܼܗܹܝܢ
ܒܗܵܠܹܝܢ ܐܵܦ ܠܐܘܼܤܹܒܝܼܣ ܩܛܹܐܓܼܪܵܢܵܐ ܕܐܘܼܛܸܟܼܘܿܣ: ܦܩܲܕܼ
ܗ̄ܘ̣ܵܐ ܕܢܸܬܿܬܿܒܲܥ ܡܸܢܹܗ ܕܠܵܐ ܪ̈ܲܚܡܝܼܢ. ܗܵܠܹܝܢ ܓܹܝܪ ܬܲܪ̈ܬܲܝܗܹܝܢ
ܐܸܬܿܬܿܤܝܼܡ ܗ̱̄ܘܲܝ̈: ܥܲܡ ܟܠܗܹܝܢ ܡܲܚ̈ܘܵܬܼܵܐ ܕܟܲܦܢܵܐ ܘܲܕܼܚܘܼܒܵܠܵܐ
ܘܕܲܫܒܼܝܼܬܼܵܐ: ܗܵܠܹܝܢ ܕܠܵܐ ܡܸܬܼܡܲܢ̈ܝܵܢ: ܘܲܥܝܒܲܕܼ ܗ̄ܘ̣ܵܐ ܠܪܹܫܵܢܘܼܬܼܵܐ
ܕܪ̈ܗܘܿܡܵܝܹܐ: ܠܡܸܦܲܠ ܥܲܠ ܒܘܼܪ̈ܟܹܝܗ̇ ܘܲܠܡܸܬܿܬܲܢܵܚܘܼ.
pb. 468
ܘܟܲܕܼܿ ܒܗܵܠܹܝܢ ܟܠܗܹܝܢ ܐܸܬܿܬܿܚܸܕܼ ܦܠܵܘܝܵܢܘܿܣ: ܢܵܛܲܪ ܗ̄ܘ̣ܵܐ
ܠܥܹܐܕܼܵܬ ܕܦܸܨܚܸܵܐ: ܕܒܹܗ ܥܵܐܹ̇ܠ ܗ̄ܘ̣ܵܐ ܡܲܠܟܵܐ ܠܥܹܕܬܵܐ. ܠܵܐ ܕܹܝܢ
ܚܵܐܲܪ ܗ̄ܘ̣ܵܐ ܒܹܗ ܐܲܝܟܼ ܒܥܸܠܕܒܼܵܒܼܵܐ: ܘܲܢܤܲܒܼ ܗ̄ܘ̣ܵܐ ܠܐܹܘܲܢܓܲܠܝܼܘܿܢ
ܩܲܕܝܼܫܵܐ ܕܢܸܬܼܪܲܚܲܡ ܥܠܲܝܗܘܿܢ: ܟܲܕܼ ܟܢܝܼܫܝܼܢ ܥܲܡܹܗ ܟܠܗܘܿܢ
ܐܲܦܸܩ̈ܘܿܦܹܐ ܘܲܩܠܹܝܪܘܿܣ: ܘܲܥܡ̈ܝܼܕܹܐ ܒܹܗ ܒܐܸܤܟܹܡܵܐ ܕܝܼܠܗܘܿܢ:
ܟܲܕܼ ܩܵܥܹ̇ܝܢ ܥܲܡܹܗ ܥܲܡܵܐ. ܘܲܢܦܲܠ̣ ܥܲܠ ܐܲܦܵܘ̈ܗܝ ܘܲܫܕܼܵܐ ܢܲܦܫܹܗ
ܒܥܹܕܬܵܐ: ܟܲܕܼ ܡܸܢܼܟܲܫܲܦ ܕܲܢܩܲܒܿܠܝܼܘܗܝ ܕܢܸܦܘܿܩ ܠܹܗ ܪܘܼܚܵܐ:
ܒܲܕܼ ܤܒܲܪ ܕܡܸܬܼܟܲܚܲܕܼ ܡ̣ܢ ܐܹܘܲܢܓܲܠܝܼܘܿܢ. ܗ̤ܘ ܕܹܝܢ ܒܨܲܥܪܵܐ ܫܲܡܪܹܗ
ܗ̄ܘ̣ܵܐ: ܟܲܕܼ ܡܸܢܬܼܠܲܚܲܡ ܠܹܗ ܐܲܝܟܼ ܡ̇ܢ ܕܨܲܥܲܪ ܗ̄ܘ̣ܵܐ ܕܲܥܒܲܕܼ ܠܹܗ:
ܟܲܕܼ ܡܸܬܼܟܲܫܦܝܼܢ ܥܲܡܹܗ ܐܲܦܸܤܩ̈ܘܿܦܹܐ ܘܲܩܠܹܝܪܘܿܣ: ܘܲܥܡܝܼܸ̈ܕܹܐ ܟܲܕܼ
ܫܕܹܝܢ ܗ̄ܘ̣ܵܘ ܥܲܠ ܐܲܪܥܵܐ: ܥܲܡ ܒܢܵܬܼ̈ ܩܵܠܹ̈ܐ ܕܥܲܡܵܐ: ܘܐܲܝܟܼ
ܕܠܲܡܨܲܥܪ̈ܵܢܹܐ ܪܵܕܼܦ̇ܝܼܢ ܗ̄ܘ̣ܵܐ ܠܗܘܿܢ. ܘܲܦܤܲܩ̣ ܗ̄ܘ̣ܵܐ ܢܲܦܫܹܗ ܡ̣ܢ
ܗܵܘ̇ ܙܲܒܼܢܵܐ: ܐܵܦ ܡ̣ܢ ܡܲܥܲܠܬܼܵܐ ܕܲܠܥܹܕܬܵܐ. ܘܲܦܩܲܕܼ ܗ̄ܘ̣ܵܐ ܕܥܲܡ
ܨܲܥܪܵܐ ܢܼܬܿܬܿܒܲܥ ܗܵܘ̇ ܡܵܐ ܕܡܸܬܿܬܿܚܝܼܒܼ ܗ̄ܘ̣ܵܐ: ܘܠܵܐ ܬܸܼܝܼܗܸܒܼ
ܠܹܗ ܡܲܓܼܪܲܬܼ ܪܘܼܚܵܐ. ܐܲܝܟܲܢܵܐ ܕܢܸܬܼܐܠܸܨ ܗ̄ܘ̣ܵܐ ܡܸܟܹܿܝܠ ܕܢܸܫܠܘܿܚ
ܠܡܲܠܟܵܐ: ܕܠܲܝܬܿ ܠܹܗ ܩܸܢܝܵܢܹ̈ܐ ܡ̣ܢ ܕܝܼܠܹܗ: ܡܸܛܠ ܕܡܸܤܟܹܿܢܵܐ
ܗ̄ܘ̣. ܘܠܵܐ ܤܵܦ̇ܩܝܼܢ ܐܵܦ ܠܵܐ ܩܸܢܝܵܢܹ̈ܐ ܕܥܹܕܬܵܐ ܟܲܕܼ ܢܸܙܕܲܒܿܢܘܼܢ:
ܠܲܟܼܡܵܝܘܼܬܼܵܐ ܕܕܲܗܒܼܸܵܐ ܕܡܸܬܿܬܿܒܲܥ ܗ̄ܘ̣ܵܐ ܡܸܢܹܗ. ܐܝܼܬܼ ܠܹܗ ܕܹܝܢ
ܡܵܐܢܲܝ̈ ܩܘܼܕܼܫܵܐ ܕܥܹܕܬܵܐ: ܗܵܢ̇ܘܿܢ ܕܤܵܡ̣ܘ ܗ̄ܘ̣ܵܘ ܗ̤ܘ ܘܡܲܠܟܹ̈ܐ
ܐܲܒܼܵܘ̈ܗܝ. ܘܐܵܠ̇ܨܵܐ ܠܝܼ ܕܐܸܤܘܿܟܼ ܐܸܢܘܿܢ: ܡܸܛܠ ܕܒܲܩܛܝܼܪܵܐ
pb. 469
ܡܸܬܿܕܒܲܪ ܐ̄ܢܵܐ. ܘܗ̤ܘ ܕܹܝܢ ܐܸܡ݂ܲܪ: ܕܠܵܐ ܒܵܥܹ̇ܐ ܐ̄ܢܵܐ ܠܡܸܕܲܥ. ܐܸܢܵܐ
ܕܹܝܢ ܕܲܗܒܼܵܐ ܒܵܥܹ̇ܐ ܐ̄ܢܵܐ: ܒܟܼܠ ܙܢܵܐ ܕܐܝܼܬܼ. ܘܡ̣ܢ ܗܵܕܹܐ ܐܲܚܸܬܼ ܗ̄ܘ̣ܵܐ
ܠܡܵܐܢܹ̈ܐ ܕܥܹܕܬܵܐ: ܘܐܸܬܼܢܤܸܟܼܘ ܓܲܠܝܵܐܝܼܬܼ. ܐܲܝܟܼ ܕܢܸܗܘܸܐ ܒܸܟܼܝܵܐ
ܘܲܩܥܵܬܼܵܬ: ܠܟܼܠ ܐܲܝܠܹܝܢ ܕܡܸܫܬܵܘܬܿܦܝܼܢ ܗ̄ܘ̣ܵܘ ܠܗܵܠܹܝܢ ܕܡܸܬܿܬܲܒܼܥܝܼܢ
ܗ̄ܘ̣ܵܘ: ܐܲܝܟܼ ܐܲܝܠܹܝܢ ܕܡܸܬܼܪܡܹܝܢ ܒܲܪܕܼܘܼܦܝܵܐ.
ܡ̣ܢ ܕܹܝܢ ܕܲܫܡܲܥ̣ ܗ̄ܘ̣ܵܐ ܡܲܠܟܵܐ ܗܵܠܹܝܢ ܕܲܗ̤ܘܲܝ̈: ܝܲܬܿܝܼܪܵܐܝܼܬܼ
ܐܸܬܼܚܲܡܲܬܼ ܘܩܲܫܝܵܐܝܼܬܼ ܘܒܲܥܪܝܼܪܵܐܝܼܬܼ: ܘܐܲܝܟܼ ܡ̇ܢ ܕܲܠܔܲܥܪܹܗ ܤ̣ܥܲܪ
ܗܵܠܹܝܢ: ܘܲܦ̣ܩܲܕܼ ܗ̄ܘ̣ܵܐ ܕܬܸܬܼܟܲܢܲܫ ܤܘܼܢܗܵܕܘܿܣ ܬܹܒܹܠܵܝܬܼܵܐ ܠܩܘܼܒܼܐܠܹܗ:
ܘܬܸܬܼܠܒܸܟܼ ܩܵܬܼܵܪܵܤܝܼܣ ܕܝܼܠܹܗ ܕܲܦܠܵܘܝܵܢܘܿܣ. ܡ̣. ܕܹܝܢ ܕܡ̣ܢ
ܟܠ ܓܲܒܼ̈ܝܼܢ ܐܸܬܼܐܠܸܨ ܗ̄ܘ̣ܵܐ ܦܠܵܘܝܵܢܘܿܣ: ܘܲܚ̣ܙܵܐ ܗ̄ܘ̣ܵܐ ܕܟܼܠ ܡܵܐ
ܕܥܵܒܹ̇ܕܼ ܗ̄ܘ̣ܵܐ ܘܐܸܡܲ݁ܪ ܗ̄ܘ̣ܵܐ: ܠܥܸܕܼܠܵܝܵܐ ܕܝܼܠܹܗ ܘܲܠܪܸܫܝܵܢܹܗ ܥܵܒܹ̇ܕܼ
ܗ̄ܘ̣ܵܐ ܠܹܗ: ܘܥܘܼܕܼܪܵܢܵܐ ܕܡ̣ܢ ܡܲܠܟܿܘܼܬܼܵܐ ܠܲܝܬܿ ܗ̄ܘ̣ܵܐ ܠܹܗ. ܡܸܛܠ
ܓܹܝܪ ܕܐܲܝܟܼ ܕܐܵܡ̇ܪܝܼܢ ܕܒܲܓܼܒܼܝܼܬܼܵܐ ܘܒܲܚܦܝܼܛܘܼܬܼܵܠܐ ܕܚܵܬܹܗ ܗ̄ܘ̣ܵܐ:
ܠܵܐ ܨܵܒܼ̇ܝܵܐ ܗ̄ܘ̣ܵܬܼ ܕܲܒܼܡܸܕܸܡ ܬܚܵܘܸܐ ܡܫܲܠܛܘܼܬܼܵܐ ܒܗܵܠܹܝܢ ܕܓܼܵܘܵܐ.
ܕܲܒܼܡܲܤܒܪܵܢܘܼܬܼܵܗ̇ ܗܘ̤ܵܐ ܗ̄ܘ̣ܵܐ ܕܡܸܛܠܵܬܼܵܗ̇ ܡܸܬܼܒܿܐܸܫ ܗ̄ܘ̣ܵܐ ܠܹܗ:
ܐܸܬܼܪܲܥܝܼ ܗ̄ܘ̣ܵܐ ܕܢܲܦܪܸܩ ܢܲܦܫܹܗ ܡ̣ܢ ܐܲܦܸܤܩܘܿܦܘܼܬܼܵܐ: ܘܢܹܐܙܲܠ
ܠܕܲܝܪܹܗ ܘܬܲܡܵܢ ܢܕܲܝܼܪ. ܘܲܥ̣ܒܲܪ ܗ̄ܘ̣ܵܐ ܠܝܼܒܹܠܘܿܣ ܕܡܸܫܬܲܐܠܵܢܘܼܬܼܵܐ:
ܘܝܲܗ̣̄ܒܼ ܗ̄ܘ̣ܵܐ. ܘܡ̣ܢ ܕܝܼܕܲܥ̣ ܗ̄ܘ̣ܵܐ ܡܲܠܟܵܐ ܕܗܵܕܹܐ ܥ̣ܒܲܕܼ ܗ̄ܘ̣ܵܐ:
ܫܲܕܲܪ ܗ̄ܘ̣ܵܐ ܒܵܬܼܪܹܗ ܕܢܸܥܛܘܿܦ ܠܹܗ: ܐܲܝܟܼ ܡ̇ܢ ܕܐܵܦ ܗܵܕܹܐ
ܠܡܹܐܟܲܠ ܩܲܪܨܵܐ ܕܝܼܠܹܗ ܥܲܒܼܕܵܗ̇ ܗ̄ܘ̣ܵܐ ܘܲܠܓܼܘܼܕܵܦܵܐ ܕܥܠܵܘܗܝ.
ܘܕܸܐܢ ܠܵܐ ܢܸܗܦܘܿܟܼ ܠܥܹܕܼܬܹܗ: ܠܩܹܘܲܢܕܹܝܢܘܿܣ ܢܸܦܸܠ. ܠܵܐ ܗ̄ܘ̣ܵܐ
pb. 470
ܠܲܡ ܓܹܝܪ ܐܲܝܟܼ ܕܲܠܒܼܝܼܫܵܬܵܟܼ ܦܸܩ̇ܕܹܬܼ ܕܬܸܗܘܸܐ ܤܘܼܢܗܵܕܘܿܣ:
ܐܸܠܵܐ ܥܲܠ ܒܘܼܚܵܢܵܐ ܫܲܪܝܼܪܵܐ: ܘܡܲܡܠܸܐ ܒܠܸܒܵܐ ܕܲܫܪܵܪܵܐ ܕܐܲܝܠܹܝܢ
ܕܡܸܬܼܒܲܥ̈ܝܵܢ.
ܟܲܕܼ ܕܹܝܢ ܥܛܲܦ: ܒܲܪ ܫܵܥܬܹܗ ܥܲܬܸܕܼ ܗ̄ܘ̣ܵܐ ܩܟܹܐ ܓܼܪ̈ܵܢܹܐ ܟܲܕܼ
ܐܵܡ̇ܪܝܼܢ: ܕܲܒܼܪܲܓܵܠܘܼܬܼܵܐ ܗܘ̤ܵܘ ܡܘܼܦܵܡ̈ܢܹܡܵܛܵܐ: ܗܵܠܹܝܢ ܕܲܗܘ̤ܵܘ
ܒܐܲܦܸܤܘܿܣ ܠܘܼܩܒܲܠ ܐܘܼܛܸܟܿܘܿܣ. ܩܛܹܐܓܼܪ̈ܵܢܹܐ ܕܹܝܢ ܐܝܼܬܲܝܗܘܿܢ
ܗ̄ܘ̣ܵܘ ܗܵܢ̇ܘܿܢ ܕܐܸܚܲܕܼܘ ܓܵܘܤܵܐ ܒܐܘܼܛܸܟܼܘܿܣ. ܕܗܸܢܘܿܢ ܗ̄ܘ̣ܵܘ
ܕܐܲܟܼܬܸܒܼܘ ܗ̄ܘ̣ܵܘ ܗܵܠܹܝܢ ܕܐܸܤܬܿܥܲܪ ܠܩܘܼܒܼܠܹܗ: ܘܲܠܢܲܦܫܗܘܿܢ
ܝܲܬܿܝܼܪܵܐܝܼܬܼ ܡܩܲܛܪܓܼܝܼܢ ܗ̄ܘ̣ܵܘ ܝܲܬܲܝܼܪ ܡ̣ܢ ܕܠܲܦܠܵܘܝܵܢܘܿܣ:
ܐܲܝܟܲܢܵܐ ܕܢܸܫܬܲܒܿܚܘܼܢ ܝܲܬܿܝܼܪܵܐܝܼܬܼ ܘܠܵܐ ܢܸܬܼܿܬܿܕܝܼܢܘܼܢ. ܒܝܲܕܼ ܦܵܪܹܗ̄ܤܝܼܵܐ
ܕܡ̣ܢ ܡܲܠܟܵܐ: ܟܠܗܹܝܢ ܤܵܥ̇ܪܝܼܢ ܗ̄ܘ̣ܵܘ ܒܲܩܛܝܼܪܵܬ. ܕܟܲܕܼ ܡܸܬܼܐܠܸܨ:
ܕܠܵܐ ܢܸܗܘܸܐܬ ܠܹܗ ܢܦܹܐܫܵܐ ܒܟܼܠܗܹܝܢ ܩܟܹܐ ܓܼܪܵܢܘܵܬܹܗ: ܡ̣ܢ ܫܸܠܝܵܐ
ܢܸܗܘܸܐ ܫܘܼܢܵܝܵܐ ܕܢܲܦܫܹܗ: ܘܢܸܬܼܡܲܗ ܘܢܹܐܒܲܕܼ. ܡܸܛܠ ܕܹܝܢ ܕܲܤܦܲܩ̣
ܗ̄ܘ̣ܵܐ ܠܲܡܩܵܘܵܝܘܼ: ܒܲܫܟܼܝܼܪ̈ܵܬܼܵܐ ܡܦܲܬܼ̈ܟܼܵܬܼܵܐ ܡܸܬܼܪܡܸܐ ܗ̄ܘ̣ܵܐ: ܘܲܕܼܠܵܐ
ܤܒܲܪ ܟܠܗܹܝܢ ܤܵܥܲ݁ܪ ܗ̄ܘ̣ܵܐ. ܐܵܦ ܓܹܝܪ ܠܐܦܸܤܩ̈ܘܿܦܹܐ ܗܵܢ̇ܘܿܢ
ܕܲܒܼܤܲܡܒܿܪܵܢܘܼܬܼܵܐ ܐܝܼܬܲܝܗܘܿܢ ܗ̄ܘ̣ܵܘ: ܘܙܵܕܸܩܝܼܢ ܗ̄ܘ̣ܵܘ ܕܲܒܼܛܲܟܼܤܵܐ
ܕܕܲܝܵܢܹ̈ܐ ܢܸܬܿܒܼܘܼܢ ܗ̄ܘ̣ܵܘ: ܩܲܕܸܡ ܗ̄ܘ̣ܵܐ ܘܐܲܕܼܪܸܟܼ ܐܸܢܘܿܢ ܘܲܥ̣ܒܲܕܼ
ܐܸܢܘܿܢ ܕܝܼܠܹܗ. ܐܲܝܟܼ ܙܢܵܐ ܕܐܲܦܸܤܩܘܿܦܵܐ ܕܐܲܢܩܘܼܪܵܐ: ܗܵܘ̇
ܕܩܹܤܲܪܝܵܐ ܕܩܵܦܵܕܘܿܩܝܼܵܐ: ܟܲܕܼ ܡܫܲܕܲܪ ܗ̄ܘ̣ܵܐ ܒܵܬܲܪܗܘܿܢ ܘܲܡܫܲܐܸܠ
ܗ̄ܘ̣ܵܐ ܠܗܘܿܢ: ܐܲܝܟܼ ܡ̇ܢ ܕܟܲܪܝܵܐ ܠܹܗ ܠܐܲܝܠܹܝܢ ܕܐܸܤܬܿܥܲܪ ܥܲܠ
pb. 471
ܐܘܼܛܸܟܼܝܼܣ: ܐܸܢܗ̤ܘ ܕܐܲܝܠܹܝܢ ܕܐܸܤܬܿܥܲܪ ܥܠܵܘܗܝ ܒܲܫܪܵܪܵܐ ܐܸܤܬܿܥܲܪ.
ܘܕܲܡܒܲܨܪ̈ܵܢ ܗܵܠܹܝܢ ܕܐܸܤܬܿܥܲܪ ܒܤܘܼܢܗܵܕܘܿܣ: ܐܸܡܲ݁ܪ ܗ̄ܘ̣ܵܐ:
ܘܲܕܼܩܲܝܵܡܝܼܢ ܐܸܢܘܿܢ ܩܟܹܐܓܼܪ̈ܵܢܹܐ: ܘܒܼܵܥܹ̇ܝܢ ܚ̄ܢܲܢ ܕܢܒܲܚܸܢ ܐܸܢܹܝܢ ܩܕܼܵܡ
ܡܲܓܸܤܛܪܝܼܵܢܘܿܣ: ܘܲܩܕܼܵܡ ܕܚܠܲܬܼ ܐܲܠܵܗܵܐ ܕܲܒܼܟܼܘܿܢ. ܘܠܲܒܸܿܒܼ ܐܸܢܘܿܢ
ܒܗܵܠܹܝܢ: ܕܠܵܐ ܢܩܲܒܹܠܘܼܢ ܐܲܝܠܹܝܢ ܕܲܗ̤ܘܲܝ̈: ܐܸܠܵܐ ܢܙܲܕܩܘܼܢ ܟܠܗܹܝܢ
ܠܚܸܟܼܡܬܹܗ ܕܡܲܠܟܵܐ.
ܟܠܗܹܝܢ ܕܹܝܢ ܗܵܠܹܝܢ ܡܸܤܬܲܥܪ̈݁ܵܢ ܗ̣̄ܘܲܝ̈: ܐܲܝܟܲܢܵܐ ܕܠܵܐ ܢܸܗܘܸܐ
ܒܘܼܚܵܢܵܐ ܕܗܲܝܡܵܢܘܼܬܼܵܐ. ܐܸܠܵܐ ܡ̣ܢ ܐܲܝܠܹܝܢ ܕܡ̣ܢ ܠܒܲܪ ܡܸܬܼܥܲܬ̈ܕܼܵܢ
ܗ̣̄ܘܲܝ̈ ܢܸܫܬܿܪܸܐ ܦܲܠܵܘܝܵܢܘܿܣ: ܘܲܕܼܠܵܐ ܒܘܼܚܵܢܵܐ ܢܩܲܒܿܠܘܼܢ ܠܗܵܠܹܝܢ
ܕܐܘܼܛܸܟܼܝܼܣ. ܐܸܢܗ̤ܘ ܗܵܟܹܝܠ ܕܗܵܠܹܝܢ ܐܸܡ݂ܲܪ ܗ̄ܘ̣ܵܐ ܠܹܗ
ܦܲܒܵܘܝܵܢܘܼܣ: ܘܲܕܼܡ̣ܢ ܬܪܹܝܢ ܟܝܵܢ̈ܝܼܢ ܐܝܼܬܼܵܘܗܝ ܡܫܝܼܚܵܐ: ܘܲܕܼܡ̣ܢ
ܒܵܬܲܪ ܚܕܼܵܝܘܼܬܼܵܐ ܩܲܝܡܝܼܢ ܟܝܵܢܹ̈ܐ: ܐܲܝܟܼ ܐܲܝܠܹܝܢ ܕܲܕܼܠܼܵܐ ܒܘܼܠܒܵܠܵܐ
ܐܸܬܼܚܲܝܲܕܼܸ. ܘܐܝܼܬܼܵ.ܗܥܝ ܒܐܲܠܵܗܘܼܬܼܵܐ ܒܲܪ ܟܝܵܢܵܐ ܕܐܲܒܼܵܐ: ܘܲܒܼܐ̄ܢܵܫܘܼܬܼܵܐ
ܒܲܪ ܟܝܵܢܵܐ ܕܝܼܠܲܢ ܡ̣ܢ ܐܸܡܵܐ. ܘܗܵܠܹܝܢ ܒܲܨܲܪܘ ܐܸܢܹܝܢ ܠܲܒܼ̈ܢܵܬܼ ܩܵܠܵܘ̈ܗܝ:
ܘܠܲܐܝܠܹܝܢ ܕܲܠܼܵܝܵܢܹ̈ܐ ܙܵܕܗܼܩܵܢ ܗ̣̄ܘܲܝ̈ ܫܲܚܠܸܦ̣ܘ. ܘܐܲܝܟܼ ܐܲܝܢܵܐ ܕܕܲܠܩܘܼܒܼܠܵܐ
ܡܸܬܼܪܲܥܸܐ ܚܲܝܒܼܘܼܗܝ: ܥܲܠ ܥܘܼܕܼܪܵܢܵܐ ܫܵܘܹ̇ܐ ܗ̄ܘ̣ܵܐ ܓܲܒܼܪܵܐ: ܥܲܠ
ܕܡܸܬܼܥܫܵܩܘܼ ܐܸܬܼܥܫܸܩ. ܐܸܢ ܕܹܝܢ ܐܲܝܟܼ ܡ̇ܢ ܕܠܵܘ ܗܵܠܹܝܢ ܐܸܡ݂ܲܪ
ܫܕܼܵܐܘܼܗܝ ܗ̄ܘ̣ܵܘ: ܐܸܠܵܐ ܐܲܝܟܼ ܡ̇ܢ ܕܐܵܦ ܒܗܹܝܢ ܒܗܵܠܹܝܢ ܕܝܼܠܹܗ
ܡܩܵܘܸܐ ܐܵܦ ܗܵܝܕܹܝܢ: ܟܲܕܼ ܡܵܘܕܸܐ ܕܗܵܟܲܢܵܐ ܡܸܬܼܪܲܥܸܐ: ܘܲܒܼܗܲܪ̈ܵܛܝܼܩܹܐ
ܠܒܼܝܼܟܼ ܠܐܲܝܠܹܝܢ ܕܠܵܘ ܗܵܟܲܢܵܐ ܡܸܬܼܪܲܥܹܝܢ: ܠܡܵܢܵܐ ܡܲܪܦܹܝܢ ܒܘܼܚܵܢܵܐ
ܕܥܠܵܘܗܝ؟ ܘܲܠܗܵܠܹܝܢ ܕܡ̣ܢ ܠܒܲܪ ܤܵܝ̇ܡܝܼܢ ܕܐܝܼܬܼ ܒܗܹܝܢ
pb. 472
ܡܲܪܒܼܪܵܐܢܘܼܬܼܵܐ: ܡܸܛܠ ܕܡ̣ܢ ܩܛܹܐܓܼܪ̈ܵܢܹܐ ܗ̤ܘܲܝ̈ ܗ̤̄ܘܲܝ̈ ܗ̄ܘܲܝ̈. ܗܸܢܘܿܢ
ܓܹܝܪ ܐܝܼܬܝܗܘܿܢ ܗ̄ܘ̣ܵܘ ܗܵܠܹܝܢ ܕܲܟܼܬܲܒܼܘ: ܘܲܚܦܝܼܛܘܼܬܼܵܐ ܤܲܓܿܝܼܐܬܼܵܐ
ܥ̣ܒܲܕܼܘ ܥܲܠ ܐܲܝܠܹܝܢ ܕܡܸܬܼܒܲܚ̈ܢܵܢ.
ܬܸܗܘܸܐ ܓܹܝܪ ܕܐܸܬܼܒܲܨܲܪ ܡܸܕܸܡ ܡ̣ܢ ܐܵܦܵܦܲܤܝܼܣ ܕܕܼܝܼܢܵܐ: ܐܵܘ
ܡ̣ܢ ܗܵܠܹܝܢ ܡ̣ܢ ܗܵܢ̇ܘܿܢ: ܕܲܠܡܵܐ ܐܵܦ ܗܵܝ̇ ܕܡܸܢܗܘܿܢ ܐܸܫܬܿܪܝܼ
ܡܸܬܼܒܲܨܵܪܘܼ ܐܸܬܼܒܲܨܪܲܬ̤. ܠܗܵܝ̇ ܗܵܟܹܝܠ ܕܐܸܬܼܒܲܨܪܲܬ̤: ܡܸܛܠ ܐܲܝܕܵܐ
ܠܵܘ ܥܠܹܝܗ̇ ܒܲܚܸܢܬܿܘܿܢ؟ ܒܐܲܝܠܹܝܢ ܕܫܲܪܝܼܪܵܐܝܼܬܼ ܫܪܵܐܘܼܗܝ: ܒܐܲܝܠܹܝܢ
ܕܒܲܫܪܵܪܵܐ ܠܵܐ ܫܠܸܡ̣ ܗ̄ܘ̣ܵܐ ܠܗܘܿܢ. ܗܵܘ̇ ܓܹܝܪ ܕܐܵܡܲ݁ܪ ܕܲܡܒܲܨܵܪܘܼ
ܒܲܨܲܪܘ ܥܠܲܝ: ܕܡܸܬܼܥܫܵܩܘܼ ܐܸܬܼܥܲܫ̇ܩܹܬܼ: ܟܵܦܲܪ ܕܢܹܐܡܲܪ ܗܵܠܹܝܢ
ܕܡܸܛܠܵܬܼܗܹܝܢ ܐܸܬܼܩܲܛܪܲܓܼ ܘܐܸܫܬܿܪܝܼ. ܐܸܢ ܕܹܝܢ ܐܵܘܕܝܼ ܕܠܵܘ ܬܪܹܝܢ
ܐܸܢܘܿܢ ܟܝܵܢܹ̈ܐ ܕܐܸܬܼܚܲܝܲܕܼܘ: ܘܠܵܐ ܬܘܼܒܼ ܒܲܪ ܟܝܵܢܵܐ ܗ̄ܘ̣ ܕܝܼܠܲܢ
ܓܘܼܫܡܹܗ ܕܡܵܪ̈ܲܢ: ܘܐܵܦ ܗܵܫܵܐ ܡܚܵܘܸܐ ܕܩܵܐܹ̇ܡ ܒܗܹܝܢ ܟܲܕܼ ܒܗܹܝܢ.
ܐܲܝܕܵܐ ܐܝܼܬܹܝܗ̇ ܗܵܝ̇ ܕܐܸܬܼܒܲܨܪܲܬ̤: ܐܲܝܟܼ ܡ̇ܢ ܕܠܵܐ ܤܵܦ̈ܩܵܢ ܗ̣̄ܘܲܝ̈
ܗܵܠܹܝܢ ܕܲܢܚܘ̈ܝܵܢܵܝܗܝ ܒܲܪ ܪܸܥܝܵܢܵܐ ܢܘܼܟܼܪܵܝܵܐ؟ ܐܸܠܵܐ ܒܡܸܕܸܡ ܡ̇ܢ
ܟܦܲܪ ܗ̄ܘ̣ܵܐ ܡ̣ܢ ܗܵܠܹܝܢ ܕܐܸܡ݂ܲܪ: ܒܗܵܠܹܝܢ ܕܹܝܢ ܡܸܢܬܼܚܲܝܲܠ ܗ̄ܘ̣ܵܐ
ܠܘܼܩܒܲܠ ܩܟܹܐ ܓܼܪ̈ܵܢܵܘܗܝ ܕܲܫܕܼܵܐܘܼܗܝ. ܗܵܕܹܐ ܗܵܟܹܝܠ ܐܸܬܼܒܲܚܢܲܬ̤
ܠܵܗ̇ ܡ̣ܢ ܟܲܕܘܼ: ܘܐܵܦ ܕܝܼܢܵܐ ܩܲܒܸܠ̣ ܗ̄ܘ̣ܵܐ. ܐܲܝܢܵܐ ܕܝܼܢܵܐ ܐܵܘ ܒܘܼܚܵܢܵܐ
ܐ̄ܚܪܹܢܵܐ ܙܵܕܹܩ ܗ̄ܘ̣ܵܐ: ܝܲܬܿܝܼܪ ܡ̣ܢ ܗܵܘ̇ ܕܐܲܦܸܤܩܘܿܦܵܐ ܕܪܤܗܘܿܡܹܐ
ܥܒܲܕܼ ܗ̄ܘ̣ܵܐ؟ ܗ̤ܘ ܓܹܝܪ ܟܲܕܼ ܩܲܒܸܿܠ̣ ܗ̄ܘ̣ܵܐ ܐܲܝܠܹܝܢ ܕܐܸܤܬܿܥܲܪ
ܡ̣ܢ ܬܪ̈ܲܝܗܘܿܢ ܓܲܒܹ̈ܐ: ܠܗܵܘ̇ ܡ̇ܢ ܫܲܒܲܚ̣: ܠܗܵܘ̇ ܕܹܝܢ ܚܲܝܸܒܼ ܒܚܘܼܫܵܒܼܵܐ
pb. 473
ܐܲܠܵܗܵܝܵܐ: ܘܠܵܐ ܗ̄ܘ̣ܵܐ ܫܚܝܼܡܵܐܝܼܬܼ ܦܤܲܩ̣ ܗ̄ܘ̣ܵܐ ܥܠܲܝܗܘܿܢ. ܘܡܸܛܠ
ܕܐܲܚܦܲܪܘ ܠܗܘܿܢ ܡ̣ܢ ܐܲܦܸܤܩܘܿܦܵܐ ܕܪܗܘܿܡܹܐ: ܥܛܲܦ̣ܘ ܠܗܘܿܢ
ܥܲܠ ܐܲܦܸܤܩܘܿܦܵܐ ܕܐܵܠܹܝܟܼܤܲܢܕܪܝܼܵܐ: ܐܲܝܟܼ ܠܘܵܬܼ ܐܲܝܢܵܐ ܕܪܵܚܹܡ
ܠܡܸܪܗܲܛ ܠܘܵܬܼ ܗܵܠܹܝܢ: ܘܐܝܼܬܼܵܘܗܝ ܒܥܸܠܕܒܼܵܒܼܵܐ ܕܐܲܦܸܤܩܘܿܦܵܐ
ܕܩܘܼܤܛܲܢܛܝܼܢܵܦܦܘܿܠܝܼܣ.
ܥܲܠ ܐܲܝܠܹܝܢ ܕܐܸܬܿܥܲܪ ܒܐܲܦܸܤܘܿܣ ܥܲܠ ܦܵܠܵܘܝܵܢܘܿܣ.
ܘܬܼܘܼܒܼ ܓܹܝܪ ܐܸܕܼܪܸܟܼܘ ܗ̄ܘ̣ܵܘ ܠܵܗ̇ ܠܐܲܦܸܤܘܿܣ: ܐܲܝܕܵܐ ܕܥܗ̤ܝ
ܤܝܼܡܵܐ ܘܲܡܬܲܚܡܵܐ ܠܩܵܬܼܵܪܵܤܝܼܣ ܕܐܲܦܸܤܩ̈ܘܿܦܹܐ
ܕܩܘܼܤܛܲܢܛܝܼܢܵܦܘܿܠܝܼܣ. ܘܬܼܘܼܒܼ ܐܸܫܬܵܘܕܝܼܘ ܗ̄ܘ̣ܵܘ ܐܲܦܸܤܩ̈ܘܿܦܹܐ
ܕܐܵܠܹܟܼܤܲܢܕܪܝܼܵܐ ܘܕܲܐܦܸܤܘܿܣ: ܘܲܡܥܲܕܪܝܼܢ ܗ̄ܘ̣ܵܘ ܠܲܚܕܼܵܕܹ̈ܐ
ܠܘܼܩܒܲܠ ܐܲܦܸܤܘܿܦܵܐ ܕܩܘܼܤܛܲܢܛܝܼܢܵܦܘܿܠܝܼܣ. ܠܲܝܬܿ ܗ̄ܘ̣ܵܐ
ܐܲܦܸܤܩܘܿܦܵܐ ܕܪܗܘܿܡܹܐ: ܘܠܵܐ ܤܵܘܬܿܒܹܗ ܕܦܲܛܪܘܿܣ ܩܲܕܝܼܫܵܐ:
ܘܠܵܐ ܐܝܼܩܵܪܵܐ ܫܠܝܼܚܵܝܵܐ: ܘܠܵܐ ܪܹܫܵܐ ܪܵܚܡܵܐ ܕܪ̈ܗܘܿܡܵܝܹܵܐ. ܐܸܠܵܐ
ܝܲܬܿܝܼܒܼ ܗ̄ܘ̣ܵܐ ܗܵܘ̇ ܕܐܵܠܹܟܼܤܲܢܕܪܝܼܵܐ ܒܫܘܼܠܛܵܢܵܐ: ܘܐܵܘܬܸܒܼ ܥܲܡܹܗ
ܐܵܦ ܠܗܵܘ̇ ܕܐܲܦܸܤܘܿܣ. ܘܡܸܫܬܲܐܲܠ ܗ̄ܘ̣ܵܐ ܗܵܘ̇ ܕܪܗܘܿܡܹܐ:
ܢܹܐܡܲܪ ܠܲܢ ܕܹܝܢ ܝܘܼܠܝܵܢܘܿܣ: ܗܵܘ̇ ܕܲܡܡܲܠܸܐ ܕܘܼܟܬܼܵܐ ܕܩܲܕܝܼܫܵܐ
ܐܲܦܸܤܩܘܿܦܵܐ ܕܪܗܘܿܡܹܐ: ܐܸܢ ܗܵܘܹ̇ܿܐ ܒܲܪ ܫܲܠܡܘܼܬܼܵܐ ܕܩܲܕܝܼܫܬܼܵܐ
ܤܘܼܢܗܵܕܘܿܣ: ܘܨܵܒܹ̇ܐ ܠܡܸܩܪܵܐ ܐܲܝܠܹܝܢ ܕܐܸܤܬܿܥܲܪ
ܒܩܘܼܤܛܲܢܛܝܼܢܵܦܘܿܠܝܼܣ ܒܲܤܝܵܡܵܐ ܗܵܢܵܐ؟ ܗ̤ܘ ܗܵܟܹܝܠ ܡܫܲܐܸܠ
pb. 474
ܐܲܝܟܼ ܐܲܝܢܵܐ ܕܐܝܼܬܼ ܠܹܗ ܫܘܼܠܛܵܢܵܐ: ܘܲܡܡܲܠܸܠ ܟܲܕܼ ܦܵܤܹ̇ܩ ܐܵܦ
ܠܘܼܩܒܲܠܗܘܿܢ. ܒܪܵܡ ܕܹܝܢ ܝܵܗ̇ܒܿܝܼܢ ܠܹܗ ܨܸܒܼܝܵܢܵܐ ܕܪܸܥܝܵܢܗܘܿܢ: ܠܵܐ
ܗ̄ܘ̣ܵܐ ܕܗܵܘ̇ ܡܵܐ ܕܨܵܒܹ̇ܝܢ ܢܩܲܒܸܿܠ: ܘܠܵܐ ܬܘܼܒܼ ܕܪܹܫܵܢܘܼܬܼܵܐ ܠܗܘܿܢ
ܢܸܬܿܠܝܼܗ̇: ܐܸܠܵܐ ܕܐܸܢ ܗ̤ܘ ܕܫܵܠܹ̇ܡ ܠܹܗ ܬܲܦܸܤܩܘܿܦܵܐ ܕܪܗܘܿܡܹܐ:
ܐܲܝܟܼ ܕܲܒܼܬܵܘܤܲܦܬܼܵܐ ܢܩܲܒܿܠܝܼܘܗܝ ܒܓܲܒܹܗ. ܘܐܸܢ ܕܹܝܢ ܠܵܐ:
ܘܠܘܼܩܒܲܠܗܘܿܢ ܡܸܫܬܿܟܲܚ: ܐܲܝܟܼ ܕܠܲܐܝܢܵܐ ܕܐܵܦ ܠܵܐ ܒܲܚܕܵܐ ܡܢܵܬܼܵܐ
ܡܫܲܠܲܛ ܢܸܕܚܩܝܼܘܗܝ. ܟܲܕܼ ܒܵܥܹ̇ܐ ܕܲܢܚܵܘܸܐ ܠܟܼܠܢܵܫ: ܕܠܵܐ
ܢܚܘܼܪܘܼܢ ܒܐܲܦܸܤܩܘܿܦܵܐ ܕܕܗܘܿܡܹܐ: ܒܲܕܼ ܠܵܐ ܡܸܫܟܲܚ ܕܲܢܥܲܕܲܪ
ܠܗܵܘ̇ ܕܩܘܼܤܛܲܢܛܝܼܢܵܦܘܿܠܝܼܣ. ܡ̣ܢ ܕܐܸܡܲܪ ܗ̄ܘ̣ܵܐ ܓܹܝܪ ܝܘܼܠܝܵܢܘܿܣ:
ܕܲܒܼܗܵܕܹܐ ܨܵܒܹܝ̇ܢ ܚ̄ܢܲܢ: ܕܢܸܬܼܩܪܸܬ ܤܘܼܥܪܵܢܵܐ ܗܵܘ̇ ܕܐܸܤܬܿܥܲܪ: ܐܸܢܗ̤ܘ
ܕܩܲܕܼܡܟܵܝܑܬܼ ܡܸܬܼܩܲܪܝܵܐ ܐܸܓܲܪܬܵܐ ܕܐܲܒܼܘܼܢ ܠܹܐܘܿܢ. ܘܡ̣ܢ ܒܵܬܼܪܹܗ
ܐܸܡ݂ܲܪ ܗ̄ܘ̣ܵܐ ܗܸܠܵܪܘܿܣ ܡܫܲܡܫܵܢܵܐ ܕܩܲܕܝܼܫܵܐ ܐܲܦܸܤܩܘܿܦܵܐ
ܕܪܗܘܿܡܹܐ: ܡ̣ܢ ܕܐܸܬܼܩܪܝܼܘ ܗ̄ܘ̣ܵܘ ܩܕܼܵܡܵܘܗܝ ܗܘܼܦܵܡ̈ܢܹܡܵܛܵܐ
ܗܵܠܹܝܢ ܕܗܵܫܵܐ ܒܵܥܹ̇ܝܢ ܐܬܢ̄ܬܿܘܿܢ ܠܡܸܩܪܵܐ: ܗܵܝܕܹܝܢ ܫܠܲܚ ܗܵܘ̇ ܡܵܐ
ܕܲܫܠܲܚ̣. ܟܲܕܼ ܗܵܠܹܝܢ ܫܡܲܥ̣ ܗ̄ܘ̣ܵܐ: ܘܡܸܕܸܡ ܕܙܵܕܹܩ ܗ̄ܘ̣ܵܐ ܠܲܝܬܿ
ܗ̄ܘ̣ܵܐ ܠܹܗ ܠܡܹܐܡܲܪ: ܦܤܲܩ̣ ܗ̄ܘ̣ܵܐ ܥܠܲܝܗܹܝܢ ܕܲܠܩܘܼܒܼܠܵܐ.
ܕܗܵܕܹܐ ܠܲܡ ܐܝܼܬܹܝܗ̇ ܢܵܩܦܘܼܬܼܵܐ ܐܵܦ ܫܲܦܝܼܪܵܐ: ܕܢܸܬܼܦܲܪ̈ܵܝܵܢ ܗܵܠܹܝܢ
ܕܐܸܬܿܥܲܪ: ܘܗܵܝܓܕܹܝܢ ܟܬܼܝܼ̈ܒܼܵܬܼܵܐ ܕܕܼܵܚܹ̇ܠ ܠܐܲܠܵܗܵܐ ܐܲܦܸܤܩܘܿܦܵܐ
ܕܪܗܘܿܡܹܐ.
ܒܐܲܝܕܵܐ ܐܝܼܬܹܝܗ̇ ܢܵܩܦܘܼܬܼܵܐ ܐܵܘ ܫܲܦܝܼܪܵܐ؟ ܕܩܲܕܼܡܵܝܑܬܼ ܗܵܠܹܝܢ
pb. 475
ܢܸܬܼܩܲܪ̈ܝܵܢ: ܘܗܵܝܕܹܝܢ ܗܵܠܹܝܢ: ܟܲܕܼ ܡܸܬܼܩܲܪ̈ܝܵܢ ܘܡܼܬܿܬܿܤܝܼܡ
ܥܠܲܝܗܹܝܢ ܬܚܘܼܿܡܵܐ ܕܝܼܠܵܟܼ ܐܲܝܢܵܐ ܕܒܼܵܥܹ̇ܐ ܐܲܢ̄ܬܿ؟ ܒܵܬܲܪܟܸܢ ܥܲܠ
ܐܲܝܕܵܐ ܦܵܩ̇ܕܲܬܿ ܕܢܸܬܿܩܲܪ̈ܝܵܢ: ܟܲܕܼ ܐܲܬܼܪܵܐ ܠܩܸܪܝܵܢܗܹܝܢ ܠܵܐ ܡܲܪܦܸܐ
ܐܲܢ̄ܬܿ؟ ܗܵܝܕܹܝܟ ܦܵܩܹ̇ܕܼ ܐܲܢ̄ܬܿ ܕܢܸܬܼܩܲܪ̈ܝܵܢ: ܕܒܼܵܥܹ̇ܐ ܗ̣̄ܘܲܝܬܿ
ܕܬܸܥܒܿܕܝܼܘܗܝ ܠܪܸܥܝܵܢܹܗ ܒܲܛܝܼܠܵܐ. ܝܵܕܲܥ̇ ܗ̣̄ܘܲܝܬܿ ܓܹܝܪ: ܝܵܕܼܥ̇
ܗ̣̄ܘܲܝܬܿ ܚܲܬܿܝܼܬܵܐܝܼܬܼ ܠܐܲܝܠܹܝܢ ܕܡ̣ܢ ܠܹܐܘܿܢ ܥܲܠ ܗܵܠܹܝܢ ܐܸܫܬܿܕܲܪ
ܠܡܲܠܟܵܐ ܐܵܦ ܠܡܲܠܟܿܬܼܵܐ ܘܠܹܗ ܠܲܦ̇ܠܵܘܝܵܢܘܿܣ: ܘܕܲܠܩܘܼܒܼܾܠܵܐ ܐܸܬܲܝܬܿ
ܠܐܘܼܪܚܵܐ ܐܲܝܕܵܐ ܕܲܠܟܵܐ ܡܲܝܬܿܝܵܐ ܗ̄ܘ̣ܵܬܼ: ܗܵܝ̇ ܕܠܵܗ̇ ܐܵܦ
ܐܸܫܬܿܥܒܲܕܬܿ: ܘܲܫܒܲܩ̣ܬܿ ܠܗܵܝ̇ ܕܲܠܘܵܬܼ ܐܲܠܵܗܵܐ ܡܵܘܒܿܠܵܐ ܗ̄ܘ̣ܵܬܼ:
ܘܲܒܼܨܝܼܪ ܝܑܼܨܦ̣ܬܿ ܕܝܼܠܵܗ̇. ܒܨܝܼܪ ܕܹܝܢ ܐܸܡ̇ܪܹܬܼ: ܗܵܢܵܘ ܕܹܝܢ ܕܟܼܠ
ܟܠܹܗ ܒܡܸܕܸܡ ܠܵܐ ܚܫܲܒܼܬܵܗ̇: ܘܥܲܠ ܗܵܢܵܐ ܒܲܤܲܪܬܿ. ܘܲܚܛܲܦܬܿ
ܐܵܦ ܠܡܵܘ̈ܡܵܬܼܵܐ ܕܐܲܦܸܤܩܘܿܦܵܐ ܕܐܲܢܛܝܵܟܼܝܵܐ: ܕܲܒܼܡܵܘ̈ܡܬܼܵܐ ܕܤܘܼܪܵܕܼܵܐ
ܐܵܘܡܝܵܟܼ ܗ̄ܘ̣ܵܐ: ܒܐ̄ܪ̈ܵܙܹܐ ܩܲܕܝܼ̈ܫܹܐ: ܕܠܵܐ ܬܸܬܼܚܲܦܲܛ ܥܲܠ ܩܵܬܼܵܪܵܤܝܼܣ
ܕܲܦܠܵܘܝܵܢܘܿܣ: ܐܵܦ ܠܵܐ ܥܲܠ ܢܸܟܼܝܵܢܹܗ. ܙܵܕܹܩ ܠܲܡ ܠܲܡܚܵܪ: ܠܵܐ
ܗ̄ܘ̣ܵܐ ܒܐܲܝܠܹܝܢ ܕܲܠܡܸܡܠܵܐ ܒܠܸܒܵܐ ܕܡܲܠܟܵܐ ܗܵܘ̈ܝܵܢ: ܐܸܠܵܐ ܒܐܲܝܠܹܝܢ
ܕܲܒܼܝܲܕܼ ܗܵܠܹܝܢ ܡܸܬܿܬܿܥܝܼܪ̈ܵܢ. ܡܒܲܚܸܢ ܐ̄ܢܵܐ ܠܹܗ ܠܲܡ ܓܹܝܪ: ܘܲܡܪܲܥܸܐ
ܐ̄ܢܵܐ ܠܡܲܠܟܵܐ. ܠܡܸܬܼܚܲܦܵܛܘܼ: ܠܵܐ ܗ̄ܘ̣ܵܐ ܠܚܵܘܒܿܬܼܵܐ: ܐܸܠܵܐ ܠܙܵܟܼܘܼܬܼܵܐ.
ܡܸܛܠ ܕܐ̄ܚܪܵܢܝܵܐܝܼܬܼ ܠܲܡܥܲܕܵܪܘܼܬܹܗ: ܐܵܦ ܟܲܕܼ ܤܲܓܿܝܼ ܢܸܬܼܚܲܦܲܛ
ܠܵܐ ܡܸܫܟܿܚܝܼܢ ܚ̄ܢܲܢ: ܟܲܕܼ ܡܸܬܼܟܲܬܲܫ ܥܲܡܹܗ ܘܡܸܬܼܚܲܡܲܬܼ ܡܲܠܟܵܐ.
ܘܲܕܼܗܵܢܵܐ ܟܠܹܗ ܡܼܬܼܚܲܡܲܬܼ: ܕܲܠܡܲܪܕܘܼܬܼܵܐ ܡܸܬܼܗܦܸܟܼ: ܐܸܠܵܐ
ܢܸܬܸܿܠ ܐܲܬܼܪܵܐ ܗܵܘ̇ ܕܲܡܢܝܼܚ ܠܪܘܼܓܼܙܹܗ. ܗܵܟܲܢܵܐ ܒܗܵܠܹܝܢ ܡܸܠܹ̈ܐ
pb. 476
ܐܲܛܥܝܹܗ ܗ̄ܘ̣ܵܐ: ܘܥܲܒܼܕܹܗ ܗ̄ܘ̣ܵܠ ܬܚܹܝܬܼ ܐܝܼܕܹܗ. ܘܢܲܓܼܕܹܗ ܗܵܟܹܝܠ
ܒܡܸܠܬܼܵܐ ܗܵܕܹܐ ܕܐܵܡܲ݁ܪ ܐܲܝܟܼ ܕܒܲܦܓܼܘܼܕܬܵܐ: ܘܩܲܒܿܠܹܗ ܗ̄ܘ̣ܵܐ:
ܘܥܲܠ ܫܲܪܟܵܐ ܕܲܐ̄ܚܪ̈ܵܢܝܵܬܼܵܐ ܐܸܫܬܵܘܬܲܦ ܗ̄ܘ̣ܵܐ ܠܹܗ. ܘܡܲܩܪܸܒܼ ܗ̄ܘ̣ܵܐ
ܥܲܡܹܗ: ܘܲܫܪܵܝܗܝ ܗ̄ܘ̣ܵܐ ܐܵܦ ܠܗܵܘ̇ ܘܠܲܐ̄ܚܪ̈ܵܢܹܿܐ: ܘܠܲܐܝܢܵܐ ܕܒܲܐܝܢܵܐ
ܕܗ̤ܘ ܙܢܵܐ ܡܸܤܬܿܒܲܪ ܗ̄ܘ̣ܵܐ ܕܗܵܠܹܝܢ ܕܲܦܠܵܘܝܵܢܘܿܣ ܡܸܬܼܪܲܥܸܐ.
ܘܥܲܠ ܗܵܠܹܝܢ: ܗܵܟܲܢܵܐ ܐܸܬܼܚܲܙܝܲܬ̤ ܠܡܲܠܟܵܐ.
ܥܵܒܲ݁ܪ ܐ̄ܢܵܐ ܓܹܝܪ ܥܲܠ ܗܵܠܹܝܢ ܕܥܲܠ ܦܲܪܨܘܿܦܵܐ ܕܝܼܠܝ
ܘܕܲܦܠܵܘܝܵܢܘܿܣ ܤܵܠ̈ܩܵܢ ܗ̣̄ܘܲܝ̈: ܘܥܲܠ ܟܠܗܹܝܢ ܐܲܝܠܹܝܢ ܕܒܼܵܥܹ̇ܝܢ
ܗ̄ܘ̣ܵܘ ܠܡܲܦܵܩܘܼܬܼܗܘܿܢ: ܠܐܲܝܠܹܝܢ ܕܐܵܦ ܠܵܐ ܠܡܲܚܪܵܡܘܼܬܲܢ ܒܵܥܹ̇ܝܢ.
ܒܪܲܡ: ܐܵܦ ܠܹܗ ܐ̄ܚܪܵܝܑܬܼ ܒܗܹܝܢ ܟܲܕܼ ܒܗܹܝܢ ܫܪܵܐܘܼܗܝ. ܐ̄ܚܪ̈ܵܢܹܐ ܕܹܝܢ
ܐܲܝܠܹܝܢ ܕܐܸܬܼܥܠܸܒܼܘ: ܕܠܵܐ ܕܝܼܢܵܐ ܐܸܫܬܿܪܝܼܘ. ܠܵܐ ܓܹܝܪ ܚ̣ܙܵܘ ܕܝܼܢܵܐ:
ܘܠܵܐ ܒܹܝܬܼ ܕܝܼܢܵܐ: ܘܠܵܐ ܡܲܦܲܩ ܒܪܘܼܚܵܐ: ܘܠܵܐ ܡܸܠܬܼܵܐ ܐܸܬܼܝܲܗܒܲܬ̤
ܠܗܘܿܢ: ܐܸܠܵܐ ܠܐܲܝܢܵܐ ܕܲܫܦܲܪ ܗ̄ܘ̣ܵܐ ܠܡܲܠܟܵܐ ܘܠܐ ܘܛܸܟܼܘܿܣ: ܫܵܪܹܝܢ
ܗ̄ܘ̣ܵܘ ܘܡܲܦܩܝܼܢ ܗ̄ܘ̣ܵܘ ܠܗܘܿܢ ܡ̣ܢ ܡܕܝܼ̈ܢܵܬܼܗܘܿܢ. ܘܐܝܼܬܼ ܗ̄ܘ̣ܵܐ
ܠܗܘܿܢ ܡܲܦܲܩ ܒܪܘܼܚܵܐ ܤܲܓܿܝܼܐܵܐ ܠܘܵܬܼ ܒܢܲܝ̈ܢܵܫܵܐ ܥܲܠ ܗܵܘ̇: ܗܵܠܹܝܢ
ܕܡ̣ܢ ܗܵܘ̇ ܕܐܲܢܛܝܵܟܼܵܐ: ܠܗܵܘ̇ ܕܠܵܐ ܐܸܬܼܝܲܗܒܲܬ̤ ܠܹܗ ܗܵܕܹܐ. ܒܐܲܝܠܹܝܢ
ܓܹܝܪ ܕܲܥ̣ܒܲܕܼ ܥܲܠ ܐ̄ܚܪ̈ܵܢܹܐ: ܒܗܹܝܢ ܡܸܟܹܝܠ ܡܸܬܼܚܢܸܩ ܗ̄ܘ̣ܵܐ ܕܠܵܐ
ܥܘܼܕܼܪܵܢܵܐ: ܟܲܕܼ ܚܵܐܹ̇ܫ ܥܠܲܝܗܹܝܢ ܟܲܕܼ ܥܠܲܝܗܹܝܢ: ܘܠܵܘ ܚܠܵܦ
ܐ̄ܚܪܵܢܹܐ. ܘܲܠܗܵܠܹܝܢ ܟܠܗܹܝܢ ܐܲܝܬܝܵܬܹܗ: ܗܵܝ̇ ܕܐܵܦ ܠܵܐ ܟܘܼܚܵܕܼܵܐ
ܩܲܢܝܵܐ ܗ̄ܘ̣ܵܬܼ: ܗܵܢܵܘ ܕܹܝܢ ܥܵܠܘܿܒܼܘܼܬܹܗ ܘܲܥܒܲܘܪܝܵܐ ܕܡܵܘ̈ܡܵܬܹܗ:
ܗܵܝ̇ ܕܠܲܝܬܿ ܡܸܢܵܗ̇ ܠܡܸܥܪܲܩ. ܥܲܒܼܕܹܗ ܗ̄ܘ̣ܵܐ ܓܹܝܪ ܠܗܵܘ̇ ܕܐܲܢܛܝܵܟܼܝܵܐ
pb. 477
ܐܘܿܪܓܵܢܘܿܢ ܠܘܼܩܒܲܠ ܐܲܦܸܤܩܘܿܦܵܐ ܕܪܗܘܿܡܹܐ: ܘܠܘܼܩܒܲܠ
ܐܦܸܤܩܘܿܦܵܐ ܕܩܘܼܤܛܲܢܛܝܼܢܵܦܘܿܠܝܼܣ. ܕܗܵܟܲܢܵܐ ܠܲܡ ܡܸܬܼܪܲܥܸܐ
ܗ̄ܘ̣ܵܐ: ܟܲܕܼ ܛܵܒܼ ܠܵܐ ܛܲܥܝܵܐ ܗ̄ܘ̣ܵܬܼ ܠܹܗ. ܕܐܸܢ ܗܵܟܲܢܵܐ ܡܸܬܼܪܲܥܸܐ
ܗ̄ܘ̣ܠܵܐ: ܥܲܠ ܗܵܠܹܝܢ ܓܹܝܪ ܙܲܒܼ̈ܢܵܬܼܵܐ ܤܲܓܝܼ̈ܠܵܬܼܵܐ ܟܬܲܒܼܘ ܗ̄ܘ̣ܵܘ ܠܘܵܬܼ
ܚܕܼܵܕܹ̈ܐ. ܐܸܠܵܐ ܒܪܲܡ ܒܗܵܘ̇ ܕܐܲܝܟܼ ܗܵܢܵܐ ܐܝܼܬܼܵܘܗܝ ܗ̄ܘ̣ܵܐ ܐܸܬܼܚܲܫܲܚ:
ܒܩܲܕܝܼܫܵܐ ܐܲܦܸܤܩܘܿܦܵܐ ܕܐܲܢܛܝܵܟܼܝܵܐ: ܐܸܬܼܚܲܫܲܚ ܗ̄ܘ̣ܵܐ ܕܹܝܢ: ܥܕܲܡܵܐ
ܕܥܲܒܼܕܹܗ ܠܵܐ ܚܵܫܚܵܐ ܘܠܵܐ ܫܵܘܹ̇ܐ ܠܲܥ̇ܒܼܵܕܼܵܐ ܕܐܲܦܸܤܩܘܿܦܘܼܬܼܵܐ:
ܘܐܲܡܹܝܗ ܗ̄ܘ̣ܵܐ ܘܲܫܕܼܵܝܗܝ: ܟܲܕܼ ܥܕܲܟܹܝܠ ܥܲܠ ܠܸܫܵܢܹܗ ܗ̣̄ܘܲܝ̈
ܡܵܘ̈ܡܵܬܼܵܐ. ܐܵܘ ܐܲܝܢܵܐ ܕܡܸܟܹܝܠ ܠܵܐ ܚܵܫܲܚ ܠܹܗ: ܐܵܘ ܡܸܛܠ
ܕܡܸܬܼܩܲܢܲܛ ܗ̄ܘ̣ܵܐ ܡܸܢܹܗ: ܐܲܝܟܼ ܡ̇ܢ ܕܲܒܼܢܸܤܝܘܿܢܵܐ ܕܲܥܒܼܵܪ ܡܵܘ̈ܡܵܬܼܵ
ܗܘ̤ܵܐ ܗ̄ܘ̣ܵܐ: ܡܸܛܠ ܗܵܢܵܐ ܫܪܵܝܗܝ ܗ̄ܘ̣ܵܐ ܒܵܗ̇ ܒܗܵܕܹܐ: ܕܒܼܐܝܼܕܼܵܗ̇
ܡܸܫܟܲܚ ܗ̄ܘ̣ܵܐ ܘܐܵܦ ܐ̄ܚܪܵܢܝܵܐܝܼܬܼ ܠܡܸܬܼܒܲܥ ܬܒܲܥܬܹܗ. ܠܵܘ ܕܹܝܢ
ܒܲܠܚܘܿܕܼ ܡܸܢܹܗ ܡܼܬܼܩܲܢܲܛ ܗ̄ܘ̣ܵܐ: ܐܸܢܗ̤ܘ ܕܐܝܼܬܼ ܗ̄ܘ̣ܵܐ ܠܹܗ ܪܸܥܝܵܢܵܐ
ܗܵܢܵܐ: ܐܸܠܵܐ ܐܵܦ ܡ̣ܢ ܡܲܠܟܵܐ. ܘܟܼܠܗܹܝܢ ܥܵܒܹ̇ܕܼ ܗ̄ܘ̣ܵܐ: ܕܕܲܠܡܵܐ
ܟܲܕܼ ܤܵܥܲ݁ܪ ܒܹܗ ܗܵܠܹܝܢ ܟܠܗܹܝܢ ܐܲܝܟܼ ܨܸܒܼܝܵܢܹܗ: ܒܵܬܲܪܟܸܢ ܢܸܬܼܗܦܸܟܼ
ܢܸܤܢܹܝܘܗܝ ܐܲܝܟܼ ܠܵܐ ܫܲܪܝܼܪܵܐ ܘܥܵܒܲ݁ܪ ܥܲܠ ܡܵܘ̈ܡܵܬܼܵܐ: ܘܲܕܼܟܼܠܗܹܝܢ
ܡܸܛܠ ܢܝܵܚܵܐ ܕܗܵܘ̇ ܕܫܲܠܝܼܛ ܗ̄ܘ̣ܵܐ ܤܵܥܲ݁ܪ ܗ̄ܘ̣ܵܐ ܕܠܵܐ ܒܟܹܐܢܘܼܬܼܵܐ:
ܘܗܵܝܕܹܝܢ ܢܸܤܥܘܿܪ ܐܵܦ ܠܩܘܼܒܼܠܹܗ ܘܢܲܪܡܹܝܘܗܝ.
ܐܵܦ ܓܹܝܪ ܕܕܲܐܝܟܼ ܗܵܢܵܐ ܐܝܼܬܼܵܘܗܝ ܗ̄ܘ̣ܵܐ: ܥܲܠ ܐܲܦܲܝ̈ ܐܲܝܢܵܐ
ܕܲܡܢܝܼܚ ܗ̄ܘ̣ܵܐ ܠܹܗ: ܕܲܡܩܲܪܸܒܼ ܗ̄ܘ̣ܵܐ ܠܹܗ ܠܘܵܬܹܗ. ܘܒܲܐܝܠܹܝܢ
pb. 478
ܕܒܼܵܥܹ̇ܐ ܗ̄ܘ̣ܵܐ: ܘܲܡܥܲܕܲܪ ܗ̄ܘ̣ܵܐ ܠܹܗ: ܘܡܵܘܪܸܒܼ ܗ̄ܘ̣ܵܐ ܠܹܗ.
ܘܟܼܠܗܹܝܢ ܤܵܥܲ݁ܪ ܗ̄ܘ̣ܵܐ: ܘܲܡܦܝܼܣ ܗ̄ܘ̣ܵܐܬ ܠܟܼܠܢܵܫ: ܐܲܝܟܼ ܡ̇ܢ
ܕܚܘܼܒܵܐ ܩܢܸܐ ܠܘܵܬܹܗ ܠܵܐ ܡܵܝܘܿܬܼܵܐ. ܘܟܲܕܼ ܡܸܤܬܿܒܲܪ ܗ̄ܘ̣ܵܐ ܕܗܵܐ
ܝܲܬܿܝܼܪ ܡܲܚܸܒܼ ܠܹܗ: ܡܵܐ ܕܦܹܐܪܵܐ ܕܗܵܘ̇ ܡܵܐ ܕܒܼܵܥܹ̇ܐ ܗ̄ܘ̣ܵܐ ܥܵܦܹ̇ܐ
ܗ̄ܘ̣ܵܐ: ܕܠܵܐ ܡܸܨܥܵܝܘܼܬܼܵܐ ܕܲܡܝܹܗ ܗ̄ܘ̣ܵܐ ܠܓܲܒܼܪܵܐ: ܘܡܸܟܹܝܠ ܗܘ̤ܵܐ
ܠܹܗ ܤܵܢܐܵܐ: ܘܐܸܬܼܗܦܸܟܼ ܡܸܢܹܗ: ܘܡܲܒܼܐܸܫ ܗ̄ܘ̣ܵܐ ܠܹܗ. ܘܐܲܫܠܡܹܗ
ܗ̄ܘ̣ܵܐ ܠܲܒܼܥܸܠܕܒܼܵܒܼܵܘ̈ܗܝ ܠܡܸܨܛܲܥܲܪܘܼ: ܐܲܝܟܼ ܕܲܠܓܲܒܼܪܵܐ ܕܤܲܓܿܣܝܼ
ܒܝܼܫ: ܘܕܲܠܒܲܪ ܡ̣ܢ ܨܸܒܼܝܵܢܹܗ ܐܲܥܘܸܠ̣ ܗ̄ܘ̣ܵܐ: ܘܨܲܥܲܪ ܘܲܥܒܲܪ ܥܲܠ
ܡܵܘ̈ܡܵܬܼܵܐ. ܘܡܸܛܠ ܗܵܢܵܐ: ܡ̣ܢ ܕܝܼܕܲܥ ܗ̄ܘ̣ܵܐ: ܐܵܦ ܠܗܵܘ̇ ܨܒܼܵܐ
ܗ̄ܘ̣ܵܐ ܕܢܸܤܢܹܝܘܗܝ: ܕܒܲܐܝܠܹܝܢ ܕܐܲܥܘܸܠ̣ ܢܸܬܼܥܵܘܲܠ ܒܹܗ. ܐܲܝܟܲܢܵܐ
ܕܡ̣ܢ ܗܵܠܹܝܢ ܢܸܗܘܸܐ ܡܵܪܵܐ: ܘܢܹܐܟܼܘܿܠ ܩܲܪ̈ܨܐ ܕܓܲܒܼܪܵܐ ܩܕܼܵܡ
ܟܠܢܵܫ. ܘܲܕܼܗܵܠܹܝܢ ܢܤܝܼܒܼ ܗ̄ܘ̣ܵܐ ܠܹܗ ܢܸܤܝܵܢܗܹܝܢ ܠܹܗ ܠܗܵܢܵܐ:
ܠܵܘ ܓܹܝܪ ܩܕܼܵܡ ܙܲܒܼܢܵܐ ܤܲܓܝܼܐܵܐ ܗ̤ܘܲܝ̈ ܗܵܠܹܝܢ.
ܥܲܠ ܐܲܝܠܹܝܢ ܕܥܲܠ ܩܘܼܪܸܠܘܿܣ ܗ̤ܘܲܝ̈: ܟܲܕܼ ܐܸܬܿܬܿܒܲܥ
ܡܸܢܹܗ ܕܲܗܒܼܵܐ.
ܩܘܼܪܸܠܘܿܣ ܓܹܝܪ ܗܵܘ̇ ܕܡܸܛܠܵܬܲܢ ܤܲܓܿܝܼ̈ܐܵܬܼܵܐ ܝܲܗ̣̄ܒܼ ܗ̄ܘ̣ܵܐ:
ܟܲܕܼ ܥܦ̣ܵܐ ܗ̄ܘ̣ܵܐ ܦܹܐܪܵܐ ܗܵܘ̇ ܕܝܗ̣̄ܒܼ ܗ̄ܘ̣ܵܐ ܠܹܗ: ܡܸܛܠ ܕܝܵܕܲܥ̇
ܗ̄ܘ̣ܵܐ ܡܲܠܟܵܐ ܕܲܥܕܲܟܹܝܠ ܐܝܼܬܼ ܠܹܗ ܩܸܢܝܵܢܹ̈ܐ: ܘܚܲܝܵܒܼ ܗ̄ܘ̣ܵܐ ܒܲܟܼܬܼܝܼ̈ܒܼܵܬܼܵܐ
ܕܲܗܒܼܵܐ ܬܪܹܝܢ ܐܲܠܦ̈ܝܼܢ ܠܝܼܛܪ̈ܝܼܢ: ܐܲܝܟܼ ܕܐܵܡ̇ܪܝܼܢ: ܥܲܠ ܐܲܝܠܹܝܢ
ܕܐܸܬܿܥܲܪ ܠܘܼܩܒܲܠܝ ܕܢܸܫܬܲܪܪ̈ܵܢ. ܡܸܛܠ ܕܹܝܢ ܕܐܸܫܬܲܪܲܪ ܗ̣̄ܘܲܝ̈:
pb. 479
ܘܗܵܘ̇ ܕܤܵܡ̣ ܗ̄ܘ̣ܵܐ ܠܹܗ ܬܸܢܘܲܝ ܕܢܸܬܸܠ ܠܹܗ: ܗܵܢܵܘ ܕܹܝܢ ܝܘܿܚܲܢܵܢ:
ܥ̣ܢܲܕܼ ܗ̄ܘ̣ܵܐ ܒܨܲܥܪܵܐ ܘܲܒܼܫܝܼܛܘܼܬܼܵܐ ܥܲܡ ܗܵܘ̇ ܐܲܝܢܵܐ ܕܲܥܡܲܠ̣ ܥܲܡܹܗ
ܥܲܠ ܐܲܝܠܹܝܢ ܕܐܸܤܬܿܥܲܪ ܠܘܼܩܒܲܠܝ ܒܐܲܦܸܤܘܿܣ. ܡܸܛܠ ܕܹܝܢ
ܕܐܸܬܼܹܵܐ ܗܵܘ̇ ܡܸܕܸܡ ܕܲܥܒܲܕܼ ܗ̄ܘ̣ܵܐ ܒܲܟܼܬܼܝܼ̈ܒܼܵܬܼܵܐ ܠܘܵܬܹܗ: ܕܢܸܤܲܒܼ
ܐܵܦ ܗܵܠܹܝܢ ܕܦܵܫ̣ ܘܢܸܫܪܹܝܘܗܝ ܠܓܲܒܼܪܵܐ: ܡܵܢܵܐ ܥ̣ܒܲܕܼ ܗ̄ܘ̣ܵܐ ܐܲܝܟܼ
ܕܐܵܡ̇ܪܝܼܢ؟ ܟܬܲܒܼ ܠܹܗ ܐܸܓܲܪܬܵܐ ܕܚܘܼܒܵܐ ܟܲܕܼ ܡܸܬܼܟܲܫܲܦ ܠܹܗ
ܕܢܸܫܡܥܝܼܘܗܝ: ܘܢܹܐܬܸܐ ܥܲܡܹܗ ܥܕܲܡܵܐ ܠܐܲܦܸܤܘܿܣ. ܡܸܛܠ
ܕܐܝܼܬܼ ܠܹܗ ܢܸܕܼܪܵܐ ܥܲܠ ܐܲܦܲܝ̈ ܢܲܦܫܹܗ: ܘܥܲܠ ܐܲܦܲܝ̈ ܐܲܝܠܹܝܢ ܕܐܸܤܬܿܥܲܪ
ܒܐܲܦܸܤܘܿܣ: ܕܢܵܘܒܸܿܠ ܘܲܢܫܲܡܠܸܐ ܒܹܝܬܼ ܡܵܪܝ ܝܘܿܚܲܢܵܢ: ܥܲܠ ܐܲܦܲܝ̈
ܡܵܘܬܵܐ ܕܒܼܐܝܼܕܼܵܘ̈ܗܝ. ܘܐܸܢ ܠܲܡ ܐܝܼܬܼ ܡܸܕܸܡ ܕܠܵܐ ܛܵܒܼܵܐܝܼܬܼ
ܤܸܥ̇ܪܹܬܼ ܡܸܛܠ ܕܠܵܐ ܝܵܕܼܥ̇ ܗ̄ܘܹ̇ܝܬܼ: ܒܵܥܹ̇ܐ ܐ̄ܢܵܐ ܕܐܸܬܼܪܫܸܐ ܡܸܢܵܟܼ:
ܘܐܸܦܘܿܥ ܠܵܟܼ ܐܝܼܩܵܪܵܐ ܕܚܲܝܵܒܼ ܐ̄ܢܵܐ ܠܵܟܼ: ܟܲܕܼ ܡܵܘܕܲܥ ܥܲܠ
ܥܪܘܼܩܝܹܗ ܕܡ̣ܢ ܐܲܦܸܤܘܿܣ: ܘܥܲܠ ܐܲܝܠܹܝܢ ܕܲܥܠܵܘܗܝ ܤ̣ܥܲܪ
ܗ̄ܘ̣ܵܐ: ܘܲܠܗܵܠܹܝܢ ܒܵܥܹ̇ܐ ܗ̄ܘ̣ܵܐ ܕܲܢܬܲܪܸܨ. ܡܸܛܠ ܐܲܝܠܹܝܢ ܕܚܵܕܹܝܢ
ܗ̄ܘ̣ܵܘ ܒܲܥܪܘܼܩܝܹܗ ܕܡ̣ܢ ܐܲܦܸܤܘܿܣ: ܘܡܲܤܒܿܪܝܼܢ ܗ̄ܘ̣ܵܘ ܡܸܛܠ
ܕܤܵܢܹ̇ܐ ܠܹܗ: ܘܥܲܠ ܐܲܦܲܝ̈ ܢܸܤܛܘܿܪܝܼܣ ܡܸܬܼܟܲܢܲܫ: ܘܒܼܵܥܹ̇ܐ ܗ̄ܘ̣ܵܐ
ܠܦܘܼܢܵܝܹܗ: ܐܲܝܟܲܢܵܐ ܕܟܲܠ ܐ̄ܢܵܫ ܢܸܬܿܛܦܝܼܣ ܘܠܵܐ ܢܸܤܒܲܪ ܗܵܠܹܝܢ.
ܕܠܵܐ ܟܲܕܼܸ ܒܤܲܒܼܪܵܐ ܤܪܝܼܩܵܐ ܐܝܼܬܲܝܗܘܿܢ ܢܸܗܘܘܿܢ ܕܲܠܩܘܼܒܼܠܵܐ:
ܠܟܼܠܗܘܿܢ ܬܚܹܝܬܼ ܐܝܼܕܼܵܟܼ ܢܸܥܒܸܿܕܼ ܐܸܢܘܿܢ:
ܗܵܘ̇ ܕܹܝܢ ܟܲܕܼ ܡܸܕܸܡ ܡ̣ܢ ܗܵܢܹܝܢ ܠܵܐ ܝܵܕܲܥ̇ ܗ̄ܘ̣ܵܐ: ܚܦܝܼܛܵܐܝܼܬܼ
pb. 480
ܥܲܒܼܕܹܗ ܗ̄ܘ̣ܵܐ ܠܤܘܼܥܪܵܢܵܐ. ܘܲܡܠ̣ܵܐ ܐܸܠܦܹ̈ܐ ܡ̣ܢ ܟܠ ܨܒܼ̈ܬܝܼܢ
ܘܩܘܼܪ̈ܒܵܢܝܼܢ: ܐܲܝܟܼ ܕܲܠܡܲܠܟܵܐ ܘܠܲܒܼ̈ܢܲܝ ܒܲܝܬܼܵܐ ܕܡܲܠܟܿܘܼܬܼܵܐ:
ܘܲܠܟܼܗܘܿܢ ܪܹ̈ܫܵܢܹܐ ܠܦܘܼܬܼ ܛܲܟܼܤܲܝ̈ܗܘܿܢ ܘܲܠܦܘܼܬܼ ܐܝܼܩܵܪܗܘܿܢ:
ܐܲܝܟܼ ܟܡܵܐ ܕܤܵܦ̇ܩܝܼܢ ܗ̄ܘ̣ܵܘ. ܘܐܸܬܼ݂ܵܐ ܗ̄ܘ̣ܵܐ ܠܐܲܦܸܤܘܿܣ: ܘܝܲܗ̣̄ܒܼ
ܗ̄ܘ̣ܵܐ ܩܘܼܪ̈ܵܢܵܘܗܝ ܘܐܸܬܼܝܲܩܲܪ: ܘܐܲܬܼܡܲܗ ܗ̄ܘ̣ܵܐ ܠܟܼܠ ܐ̄ܢܵܫ.
ܘܲܠܦܘܼܬܼ ܐܝܼܩܵܪܹܗ: ܒܦܘܼܡܵܐ ܕܟܼܠ ܐ̄ܢܵܫ ܐܝܼܬܼܵܘܗܝ ܗ̄ܘ̣ܵܐ. ܒܟܼܠ
ܐܝܼܩܵܪ ܐܸܬܼܝܲܩܲܪ: ܐܲܝܟܲܢܵܐ ܕܝܼܬܸܒܼ ܥܲܡ ܡܲܠܟܵܐ ܒܟܼܘܼܪܤܝܵܐ
ܩܲܕܼܡܵܝܵܐ: ܐܵܡܲ݁ܪ ܐ̄ܢܵܐ ܕܹܝܢ ܕܡܲܠܟܵܐ: ܒܗܵܘ̇ ܕܹܝܢ ܕܬܼܪܹܝܢ ܢܸܬܸܒܼ
ܡܲܠܟܵܐ. ܘܗܵܕܹܐ ܐܵܦ ܒܹܝܬܼ ܡܲܠܟܿܘܼܬܼܵܐ ܘܲܒܼܡܲܪܟܲܒܼܬܼܵܐ ܘܲܒܼܕܹܡܘܿܤܝܼܵܐ
ܗܘ̤ܵܬܼ: ܐܲܝܟܲܢܵܐ ܕܢܸܬܼܩܲܕܲܫ ܡܵܘܬܿܒܼܵܐ ܕܡܲܠܟܵܐ ܒܡܵܘܬܿܒܼܵܐ ܕܝܼܠܹܗ.
ܘܡܸܛܠ ܗܵܢܵܐ: ܐܵܦ ܠܩܘܼܤܛܲܢܛܝܼܢܵܦܘܿܠܝܼܣ ܐܲܥܠܹܗ. ܐܲܝܟܲܢܵܐ
ܕܐܵܦ ܐܲܚܵܘ̈ܗܝ ܕܡܲܠܟܵܐ ܘܒܹܝܬܼ ܡܲܠܟܵܐ: ܘܲܡܕܼܝܼܢ̄ܬܐ ܬܸܬܼܩܲܕܲܫ
ܡ̣ܢ ܡܹܐܬܼܝܼܬܹܗ. ܡ̣ܢ ܕܹܝܢ ܕܐܵܦ ܗܵܪܟܵܐ ܡܲܠܝܼ ܗ̄ܘ̣ܵܐ ܪܸܓܲܬܼܗܘܿܢ
ܕܒܼܢܲܝ̈ܢܵܫܵܐ ܒܩܘܼܪ̈ܒܵܢܹܐ: ܘܡܸܟܹܝܠ ܠܲܝܬܿ ܗ̄ܘ̣ܵܐ ܠܹܗ ܡܸܕܸܡ:
ܗܵܝܕܹܝܟ ܦ̣ܩܲܕܼ ܗ̄ܘ̣ܵܐ ܕܐܸܬܿܬܿܒܲܥ ܕܲܗܒܼܵܐ ܗܘ̇ ܕܚܲܝܵܒܼ ܗ̄ܘ̣ܵܐ
ܒܲܟܼܬܼܝܼ̈ܒܼܵܬܼܵܐ: ܬܪܹܝܢ ܐܲܠܦܹ̈ܐ ܠܝܼܛܪܹ̈ܐ. ܗܵܠܹܝܢ: ܕܐܵܦ ܠܵܐ ܕܢܸܟܼܦܘܿܪ
ܒܗܹܝܢ ܡܸܫܟܲܚ ܗ̄ܘ̣ܵܐ. ܕܠܵܐ ܬܘܼܒܼ ܟܲܕܼ ܟܵܦܲܪ ܘܡܸܬܼܟܿܤܸܣ:
ܢܸܫܬܕܸܐ ܡ̣ܢ ܐܝܼܩܵܪܹܗ: ܡ̣ܢ ܕܝܼܕܲܥ̣ ܗ̄ܘ̣ܵܐ ܕܹܝܢ ܘܐܲܪܓܸܫ ܒܚܲܫܵܐ
ܕܐܸܬܼ݂ܵܐ ܗ̄ܘ̣ܵܐ ܥܠܵܘܗܝ ܕܒܼܝܼܫܬܼܵܐ ܪܲܒܿܬܼܵܐ: ܝܲܗ̣̄ܒܼ ܗ̄ܘ̣ܵܐ ܥܲܪ̈ܵܒܹܐ ܥܲܠ
ܐܲܦܲܝ̈ ܗܵܠܹܝܢ: ܘܲܪܕܼܵܐ ܗ̄ܘ̣ܵܐ ܒܝܲܡܵܐ ܒܟܼܝܼܡ̈ܘܿܢܹܐ ܘܒܲܫܓܼܘܼܫܝܵܐ ܪܲܒܵܐ:
pb. 481
ܘܲܥܪܲܩ̣ ܗ̄ܘ̣ܵܐ: ܕܕܲܠܡܵܐ ܢܸܦܸܠ ܒܒܼܝܼ̈ܫܵܬܼܵܐ ܐ̄ܚܪ̈ܵܢܝܵܬܼܵܐ: ܡ̣ܢ ܩܛܹܐ ܓܼܪ̈ܵܢܹܐ
ܕܲܡܩܲܛܪܓܼܝܼܢ ܗ̄ܘ̣ܵܘ ܠܹܗ. . .
ܐܸܠܵܐ ܬܘܼܒܼ ܠܬܲܡܵܢ ܥܵܛܹ̇ܦ ܐ̄ܢܵܐ: ܥܲܠ ܕܝܼܢܵܐ ܟܹܐܢܵܐ
ܕܲܕܼܝܵܤܩܘܿܪܘܿܣ: ܗܵܘ̇ ܕܩܲܒܸܿܠ̣ ܗ̄ܘ̣ܵܐ ܡ̣ܢ ܩܘܼܪܸܠܘܿܣ ܪܹܫܵܢܘܼܬܼܵܐ
ܘܤܸܢܐܬܼܵܐ ܕܠܘܼܩܒܲܠ ܐܲܦܸܤܩܘܿܦܵܐ ܕܩܘܼܤܛܲܢܛܝܢܵܦܘܿܠܝܼܣ. ܠܵܐ
ܗ̄ܘ̣ܵܐ ܓܹܝܪ ܢܝܼܫܘܿܢ ܗܵܢܵܐ ܐܝܼܬܼܵܘܗܝ ܗ̄ܘ̣ܵܐ ܕܲܫܪܵܪܵܐ ܢܸܠܒܿܟܼܘܼܢ: ܐܸܠܵܐ
ܕܟܼܠ ܐܲܝܟܲܢ ܕܗ̤ܘ ܢܸܬܼܥܲܫܢܘܼܢ. ܩܵܕܼܵܡ ܓܹܝܪ ܕܢܸܥܘܿܠ ܗ̄ܘ̣ܵܐ ܠܲܟܼܢܘܼܫܝܵܐ
ܦܠܵܘܝܵܢܘܿܣ: ܐܲܝܟܼ ܕܐܵܡ̇ܪܝܼܢ: ܗ̤ܘ ܗܵܢܵܐ ܢܲܤܒܹܗ ܗ̄ܘ̣ܵܐ ܠܡܵܘܬܿܒܼܵܐ
ܘܲܠܕܼܘܼܟܿܬܼܵܐ ܕܐܲܦܸܤܩܘܿܦܵܐ ܕܩܘܼܤܛܲܢܛܝܼܢܵܦܘܿܠܝܼܣ: ܘܥܲܒܼܕܹܗ
ܗ̄ܘ̣ܵܐ ܕܲܢܩܲܕܡܘܼܢܵܝܗܝ ܐ̄ܚܪ̈ܵܢܹܐ: ܐܲܝܟܼ ܕܢܸܬܸܒܼ ܗ̄ܘ̣ܵܐ ܒܚܲܪܬܼܵܐ: ܐܲܝܟܼ
ܕܲܒܼܫܝܼܛܘܼܬܼܵܐ. ܗܵܘ̇ ܕܹܝܢ ܘܠܵܐ ܡܸܕܸܡ ܕܐܲܝܟܼ ܗܵܢܵܐ ܚܫܲܒܼ ܗ̄ܘ̣ܵܐ:
ܘܝܼܬܸܒܼ ܗ̄ܘ̣ܵܐ. ܗ̤ܘ ܕܹܝܢ ܗܵܘ̇: ܟܲܕܼ ܒܵܥܹ̇ܐ ܗ̄ܘ̣ܵܐ ܠܲܡܚܵܘܵܝܘܼ
ܛܪܘܼܢܘܼܬܹܗ: ܗܵܕܹܐ ܩܲܕܼܡܵܝܑܬܼ ܐܲܙܝܼܥ ܗ̄ܘ̣ܵܐ. ܘܲܥܒܲܕܬܹܗ ܗ̄ܘ̣ܵܐ
ܕܢܲܚܸܫ ܠܗܵܘ̇ ܕܪܗܘܿܡܹܐ: ܐܲܝܟܼ ܕܐܵܡ̇ܪܝܼܢ. ܘܩܵܡ̣ ܗ̄ܘ̣ܵܐ ܘܐܲܠܨܗ
ܗ̄ܘ̣ܵܐ: ܘܐܲܝܬܿܝܹܗ ܘܐܵܘܬܿܒܹܗ ܥܲܠ ܟܘܼܪܤܝܹܗ ܕܝܼܠܹܗ. ܘܗܵܝܕܹܝܢ
ܩܘܿܡܛܹ̈ܐ ܗܵܢܘܿܢ ܕܲܦܩܝܼܕܝܼܢ ܗ̄ܘ̣ܵܘ ܥܲܠ ܗܵܕܹܐ: ܠܐܲܦܸܤܩ̈ܘܿܦܹܐ
ܐܲܝܠܹܝܢ ܕܲܟܼܢܝܼܫܝܼܢ ܗ̄ܘ̣ܵܘ ܘܒܼܵܥܹ̇ܝܢ ܗ̄ܘ̣ܵܘ ܕܲܢܛܠܠܘܼܢ ܚܠܵܦܵܘܗܝ:
ܟܵܠܹ̇ܝܢ ܗ̄ܘ̣ܵܘ: ܐܲܝܟܼ ܡ̇ܢ ܕܠܲܝܬܿ ܠܗܘܿܢ ܫܘܼܠܛܵܢܵܐ ܕܲܢܡܲܠܠܘܼܢ:
ܠܒܲܪ ܡ̣ܢ ܐܲܝܠܹܝܢ ܕܡܸܫܬܲܐܠܝܼܢ ܡܸܢܗܘܿܢ ܡ̣ܢ ܐܲܦܸܤܩ̈ܘܿܦܹܐ
ܕܐܵܠܹܟܼܤܲܢܕܪܝܼܵܐ: ܗܵܢܵܐ ܕܐܝܼܬܼ ܠܹܗ ܫܘܼܪܵܪܵܐ ܕܲܡܫܲܠܛܘܼܬܼܐ.
pb. 482
ܘܲܠܗܵܢܘܿܢ ܕܡ̣ܢ ܠܒܲܪ ܐܸܬܼ݂ܵܘ ܗ̄ܘ̣ܵܘ: ܠܤܵܗܕܘܼܬܼܵܐ ܥܲܠ ܟܠܗܹܝܢ
ܐܲܝܠܹܝܢ ܕܡ̣ܢ ܩܕܼܝܼܡ ܗ̤ܘܲܝ̈: ܘܡܸܫܟܿܚܝܼܢ ܗ̄ܘ̣ܵܘ ܠܡܲܟܵܤܘܼܬܹܗ
ܠܐܘܼܛܸܟܼܝܼܣ: ܕܐܵܦ ܡ̣ܢ ܩܕܼܵܡ ܩܛܹܐ ܓܼܪܵܢܘܼܬܼܵܐ ܗܵܠܹܝܢ ܐܵܡܲ݁ܪ ܗ̄ܘ̣ܵܐ:
ܠܲܡܚܵܘܵܝܘܼ ܕܠܵܐ ܐܝܼܬܹܝܗ̇ ܥܵܫܘܿܩܘܼܬܼܵܐ: ܐܵܡܲ݁ܪ ܐ̄ܢܵܐ ܕܹܝܢ ܥܠ ܚܒܼܝܼ̈ܫܹܐ
ܕܒܼܕܲܝܪܵܬܼܵܐ. ܘܥܲܠ ܟܠܗܘܿܢ ܐܲܝܠܹܝܢ ܕܡܸܤܬܲܒܼܪܝܼܢ ܗ̄ܘ̣ܵܘ ܕܥܲܠ
ܐܲܦܲܝ̈ ܦܵܠܵܘܝܵܢܘܿܣ ܐܸܬܼ݂ܵܘ ܗ̄ܘ̣ܵܘ: ܥܒܲܕܼܘ ܐܸܢܘܿܢ ܕܢܸܬܿܛܲܫܘܼܢ:
ܘܕܲܒܼܩܸܢܛܵܐ ܢܸܗܘܘܿܢ ܡܸܛܠ ܡܹܐܬܼܝܼܬܼܗܘܿܢ. ܐܲܝܟܼ ܡ̇ܢ ܕܲܤܪܝܼܩܵܐܝܼܬܼ
ܘܡܲܪܵܚܵܐܝܼܬܼ ܝܲܗ̣̄ܒܼܘ ܗ̄ܘ̣ܵܘ ܢܲܦܫܗܘܿܢ ܥܲܠ ܐܲܦܲܝ̈ ܗܵܘ̇: ܕܐܵܦ ܡ̣ܢ
ܩܘܼܤܛܲܢܛܝܼܢܵܦܘܿܠܝܼܣ ܡ̣ܢ ܡܲܠܟܵܐ ܐܸܫܬܿܪܝܼ ܗ̄ܘ̣ܵܐ.
ܒܦܵܪܹܗ̄ܤܝܼܵܐ ܕܹܝܢ ܤܲܓܿܝܼܐܬܼܵܐ ܘܲܒܼܫܘܼܠܛܵܢܵܐ ܐܝܼܬܲܝܗܘܿܢ ܗ̄ܘ̣ܵܘ:
ܟܠܗܘܿܢ ܐܲܝܠܹܝܢ ܕܥܲܡ ܐܘܼܛܸܟܼܝܼܣ ܕܲܝܪ̈ܵܝܹܐ ܐܝܼܬܲܝܗܘܿܢ ܗ̄ܘ̣ܵܘ. ܐܲܝܟܲܢܵܐ
ܕܗܵܘ̇ ܡܵܐ ܕܒܼܵܥܹ̇ܝܢ ܗ̄ܘ̣ܵܘ ܕܲܒܼܫܘܼܠܛܵܢܵܐ ܢܸܗܘܸܐ: ܒܐܝܼܕܲܝ̈ܗܘܿܢ
ܢܸܬܼܥܒܸܕܼ. ܐܲܝܟܲܢܵܐ ܕܐܵܦ ܗܸܢܘܿܢ ܠܟܼܠܗܘܿܢ ܐܲܝܠܹܝܢ ܕܡܸܫܬܵܘܕܥܝܼܢ
ܗ̄ܘ̣ܵܘ ܠܗܘܿܢ: ܡܲܫܠܡܝܼܢ ܗ̄ܘ̣ܵܘ ܠܗܘܿܢ ܠܪܹ̈ܫܵܢܹܐ ܘܠܲܒܼܢܲܝ̈ ܡܕܼܝܼܢ̄ܬܐ.
ܟܠ ܐ̄ܢܵܫ ܓܹܝܪ ܠܗܘܿܢ ܡܸܫܬܲܥܒܲܕܼ ܗ̄ܘ̣ܵܐ: ܘܲܡܫܲܡܫܝܼܢ ܗ̄ܘ̣ܵܘ
ܠܗܘܿܢ: ܟܲܕܼ ܨܵܒܹ̇ܝܢ ܗ̄ܘ̣ܵܘ: ܘܟܲܕܼ ܠܵܐ ܨܵܒܹ̇ܝܢ ܗ̄ܘ̣ܵܘ. ܠܤܲܓܿܝܼ̈ܐܹܐ ܓܹܝܪ
ܠܵܐ ܫܵܦܪܵܢ ܗ̣̄ܘܲܝ̈ ܠܗܘܿܢ ܐܲܝܠܹܝܢ ܕܡܸܤܬܲܥܪ̈ܵܢ ܗ̣̄ܘܲܝ̈: ܐܸܠܵܐ
ܡܸܬܼܐܲܠܨܝܼܢ ܗ̄ܘ̣ܵܘ ܘܒܼܵܟܹ̇ܝܢ. ܘܲܒܼܟܼܠ ܦܪܘܿܣ: ܗܵܠܹܝܢ ܕܡܸܬܼܦܲܩܕܝܼܢ
ܗ̄ܘ̣ܵܘ ܤܵܥܹ̇ܪܝܼܢ. ܘܢܵܓܼܕܝܼܢ ܗ̄ܘ̣ܵܘ ܠܐ̄ܢܵܫ̈ܝܼܢ ܡܢܗܘܿܢ ܡ̣ܢ ܐܸܠܦܹ̈ܐ:
ܘܡܸܢܗܘܿܢ ܡ̣ܢ ܫܘܼ̈ܩܹܐ: ܘܡܸܢܗܘܿܢ ܡ̣ܢ ܒܵܬܹ̈ܐ: ܘܡܸܢܗܘܿܢ ܡ̣ܢ
ܥܹ̈ܕܼܵܬܼܵܐ ܟܲܕܼ ܡܨܲܠܹܝܢ. ܘܲܠܡܸܢܗܘܿܢ ܪܵܕܹܦܝܼܢ ܗ̄ܘ̣ܵܘ ܠܗܘܿܢ:
pb. 483
ܕܢܸܥܪܩܘܼܢ. ܘܠܲܐܝܠܹܝܢ ܕܲܛܫܹܝܢ ܗ̄ܘ̣ܵܘ ܒܲܡܥܲܪܹ̈ܐ ܘܲܒܼܦܲܥܪܹ̈ܐ
ܕܐܲܪܥܵܐ: ܡܒܲܨܝܢ ܗ̄ܘ̣ܵܘ ܘܲܡܚܲܦܪܝܼܢ ܒܵܬܲܪܗܘܿܢ ܒܟܼܠܵܗ̇ ܚܦܝܼܛܘܼܬܼܵܐ.
ܘܲܕܲܕܸܚܠܬܼܵܐ ܗ̄ܘ̣ܵܬܼ ܤܲܓܼܿܝܼܐܬܼܵܐ ܘܲܕܩܹܘܲܢܕܹܝܢܘܿܣ: ܕܲܢܡܲܠܸܠ ܐ̄ܢܵܫ
ܥܲܡ ܕܒܹܝܬܼ ܦܠܵܘܝܵܢܘܿܣ. ܡ̣ܢ ܐܲܝܠܹܝܢ ܕܲܒܼܩܘܼܒܵܐ ܥܵܡܪܝܼܢ ܗ̄ܘ̣ܵܘ:
ܘܲܡܥܲܩܒܼܝܼܢ ܗ̄ܘ̣ܵܘ: ܘܐܲܝܟܼ ܓܵܫܘܿܫܹ̈ܐ ܐܝܼܬܲܗܘܿܢ ܗ̄ܘ̣ܵܘ: ܠܡܸܚܙܵܐ
ܠܐܲܝܠܹܝܢ ܕܥܵܐܹ̇ܠܝܼܢ ܗ̄ܘ̣ܵܘ ܠܘܵܬܼ ܦܠܵܘܝܵܢܘܿܣ. ܘܡ̣ܢ ܗܵܕܹܐ: ܐܵܙ̇ܠܝܼܢ
ܗ̄ܘ̣ܵܘ ܘܡܸܬܿܬܵܘܤܦܝܼܢ ܗ̄ܘ̣ܵܘ ܥܲܠ ܕܒܹܝܬܼ ܐܘܼܛܸܟܼܝܼܣ. ܡܸܢܗܘܿܢ
ܕܹܝܢ: ܒܲܕܼ ܕܵܚ̇ܠܝܼܢ ܗ̄ܘ̣ܵܘ ܕܠܵܐ ܢܸܤܒܿܠܘܼܢ ܒܝܼ̈ܫܵܬܼܵܐ: ܘܡܸܢܗܘܿܢ: ܟܲܕܼ
ܩܵܕܼܡ̇ܪܝܼܢ ܗ̄ܘ̣ܵܘ ܘܠܵܒܼ̇ܟܿܝܼܢ ܥܘܼܕܼܪܵܢܵܐ ܕܝܼܠܹܗ: ܘܐܵܡ̇ܪܝܼܢ ܗ̄ܘ̣ܵܘ
ܘܲܡܕܲܓܠܝܼܢ ܤܲܓܿܝܼ̈ܐܵܬܼܵܐ. ܘܟܼܠ ܡܵܐ ܕܐܵܡ̇ܪܝܼܢ ܗ̄ܘ̣ܵܘ ܠܹܗ ܠܘܼܩܒܲܠ
ܗܵܘ̇: ܡܲܫܲܪ ܗ̄ܘ̣ܵܐ: ܘܐܲܝܟܼ ܕܲܒܼܗܲܢܝܼܐܘܼܬܼܵܐ ܡܸܬܼܐܲܡܪܵܢ ܗ̣̄ܘܲܝ̈ ܠܹܗ.
ܦܪܲܫ̣ܘ ܗ̄ܘ̣ܵܘ ܕܹܝܢ ܡܸܢܹܗ ܠܐܘܼܤܹܒܝܼܣ ܐܦܸܤܩܘܿܦܵܐ
ܕܕܼܘܿܪܝܼܠܝܼܣ ܕܐܝܼܬܼܵܘܗܝ ܩܛܹܐܓܼܪܵܢܵܐ ܕܐܘܼܛܸܟܼܝܼܣ ܘܠܵܐ
ܫܲܒܼܩܘܼܗܝ ܗ̄ܘ̣ܵܘ ܕܢܸܥܘܿܠ ܘܢܸܦܘܿܩ ܪܘܼܚܵܐ. ܦܪܲܫ̣ܘ ܗ̄ܘ̣ܵܘ ܕܹܝܢ
ܐܵܦ ܠܟܼܠܵܗ̇ ܤܘܢܗܵܕܘܿܣ: ܗܵܝ̇ ܕܫܸܡܥܲܬ̤ ܗ̄ܘ̣ܵܬܼ ܘܲܫܪܵܬܹܗ
ܒܩܘܼܤܛܲܢܛܝܼܢܵܦܘܿܠܝܼܣ: ܗܵܝ̇ ܕܙܵܕܹܩ ܗ̄ܘ̣ܵܐ ܠܵܗ̇ ܕܬܹܐܡܲܪ ܥܲܡܹܗ:
ܘܲܬܼܩܝܼܡ ܗܵܠܹܝܢ ܕܤܸܥܪܲܬ̤. ܘܡ̣ܢ ܟܠ ܓܲܒܿܝܼ̈ܢ ܫܵܘܚܕܘܼܗܝ:
ܘܲܠܟܼܠܗܘܿܢ ܩܛܹܐܓܼܪ̈ܵܢܵܘܗܝ ܥܵܒܼ̇ܕܝܼܢ ܗ̄ܘ̣ܵܘ: ܟܲܕܼ ܡ̣ܢ ܕܚܸܠܬܼܵܐ
ܚܲܫ̣ܘ: ܕܕܲܠܡܵܐ ܢܸܤܒܿܠܘܼܢ ܒܝܼ̈ܫܬܼܵܐ. ܘܐܸܢ ܠܵܐ ܢܸܬܿܛܦܝܼܣ ܗ̄ܘ̣ܵܐ
ܓܹܝܪ ܐ̄ܢܵܫ ܘܐܸܢ ܡܸܬܿܛܦܝܼܣ: ܡ̣ܢ ܟܠ ܦܪܘܿܣ ܝܑܼܕܼܝܼܥܵܐ ܗ̄ܘ̣ܵܬܼ:
pb. 484
ܕܒܼܝܼ̈ܫܵܬܼܵܐ ܤܵܒܹ̇ܠ ܗ̄ܘ̣ܵܐ: ܐܸܢ ܗ̤ܘ ܕܠܵܐ ܢܕܲܓܿܠܹܗ ܠܲܦܠܵܘܝܵܢܘܿܣ:
ܘܢܸܗܘܸܐ ܒܲܪ ܓܲܒܵܐ ܕܐܘܼܛܸܟܼܝܼܣ. ܗܵܟܲܢܵܐ ܕܹܝܢ ܩܲܕܸܡ̣ܘ ܤܵܡ̣ܘܼܗܝ:
ܘܥܲܒܼܘܼܗܝ ܥܲܪܛܸܠܵܝܵܐ ܡ̣ܢ ܟܠ ܓܲܒܿܝܼ̈ܢ: ܘܲܕܼܠܵܐ ܤܒܲܪ ܘܲܕܼܠܵܐ
ܦܵܪܹܗ̄ܤܝܼܵܐ ܐܲܩܝܼܡܘܼܗܝ: ܐܲܝܟܼ ܕܐܵܦ ܠܵܐ ܒܲܪܬܼ ܩܵܠܵܐ ܬܸܗܘܸܐ ܠܹܗ.
ܟܠܗܘܿܢ ܓܹܝܪ ܥܲܬܸܕܼܘ ܢܲܦܫܗܘܿܢ: ܐܲܝܟܼ ܕܠܵܐ ܢܸܫܡܥܘܼܢܵܝܘܗܝ:
ܐܸܠܵܐ ܕܲܢܚܝܒܼܘܼܢܵܝܗܝ ܡ̣ܢ ܟܠ ܦܪܘܿܣ. ܘܐܲܥܠܘܼܗܝ ܗ̄ܘ̣ܵܘ
ܠܲܟܼܢܘܼܫܬܿܗܘܿܢ ܟܲܕܼ ܡܨܲܥܪܝܼܢ ܠܹܗ: ܘܠܵܐ ܫܵܒܼܩ̇ܝܼܢ ܠܹܗ ܕܢܸܦܘܿܩ
ܪܘܼܚܵܐ ܥܲܠ ܐܲܝܠܹܝܢ ܕܡܸܬܼܪܫܸܐ ܗ̄ܘ̣ܵܐ. ܘܲܩܕܼܵܡ ܐܲܦܲܝ̈ܗܘܿܢ ܕܩܘܿܡܛܹ̈ܐ
ܕܲܦܩܝܼܕܹܝܢ ܗ̄ܘ̣ܵܘ: ܡܙܝܼܥܝܼܢ ܗ̄ܘ̣ܵܘ ܘܡܲܬܼܘܪܝܼܢ ܠܹܗ: ܟܲܕܼ ܦܵܩ̇ܕܝܼܢ
ܠܹܗ ܕܠܵܐ ܢܡܲܠܸܠ. ܘܲܒܼܪܲܡ ܫܘܼܡܥܘܼܗ̇ ܐܵܦ ܠܗܵܝ̇ ܒܲܪܬܼ ܩܵܠܵܐ
ܕܡ̣ܢ ܩܛܝܼܪܵܐ ܘܡ̣ܢ ܐܘܼܠܨܵܢܵܐ ܗܵܘ̇ܝܵܐ ܗ̄ܘ̣ܵܬܼ: ܠܒܝܼܘܼܙܵܚܵܐ
ܕܒܼܘܼܚܵܢܹܗ ܕܗܵܢܵܐ.
ܟܲܕܼ ܓܹܝܪ ܡܸܬܼܩܪܹܝܢ ܗ̄ܘ̣ܵܘ ܗܘܼܦܵܡ̈ܢܹܡܵܛܵܐ ܕܲܗܘ̤ܵܘ
ܒܩܘܼܛܲܢܛܝܼܢܵܦܘܿܠܝܼܣ ܠܘܼܩܒܲܠ ܐܘܼܛܸܟܼܝܼܣ: ܘܫܲܠܡܘܼܬܼܵܐ
ܘܲܪܡܵܝ ܐܝܼܕܼܵܐ ܕܬܲܦܸܤܩ̈ܘܿܦܹܐ ܕܠܘܼܩܒܲܠ ܐܘܼܛܸܟܼܝܼܣ: ܘܩܲܕܼܡܵܝܑܬܼ
ܕܤܹܠܵܘܩܘܿܣ: ܐܲܦܸܤܩܘܿܦܵܐ ܕܐܲܡܵܤܝܼܵܐ ܕܦܘܼܢܛܘܿܣ ܕܚܲܝܒܹܗ
ܗ̄ܘ̣ܵܐ. ܘܠܵܐ ܒܚܲܕܼ ܛܲܟܼܤܵܐ ܕܕܲܝܵܢܘܼܬܼܵܐ ܡܒܲܚܢܝܼܢ ܗ̄ܘ̣ܵܘ: ܘܠܵܐ
ܒܚܲܕܼܵܐ ܡܛܲܟܼܤܘܼܬܼܵܐ: ܐܲܝܟܼ ܕܢܸܬܼܒܿܥܘܼܢܵܝܗܝ ܠܲܡܩܲܝܵܡܘܼ ܪܡܵܝ
ܐܝܼܕܹܿܗ: ܕܐܲܝܟܲܢܵܐ ܡܸܤܬܿܒܲܪ ܠܹܗ: ܘܕܸܐܢ ܬܪܝܼܨܵܐܝܼܬܼ ܐܸܬܼܐܲܡܪܲܬ̤
ܡܸܢܹܗ. ܐܸܠܵܐ ܕܠܵܐ ܒܘܼܚܵܢܵܐ ܦܵܤ̇ܩܝܼܢ ܗ̄ܘ̣ܵܘ: ܘܐܲܝܟܼ ܕܡ̣ܢ ܥܲܡܠܵܐ
pb. 485
ܒܠܝܼܠܵܐ ܕܠܵܐ ܦܘܼܪܫܵܢ: ܕܐܝܼܬܼܵܘܗܝ ܕܠܵܐ ܪܹܫܵܐ ܘܲܕܼܠܵܐ ܫܘܼܥܒܵܕܼܵܐ:
ܩܵܥܹ̇ܝܢ ܗ̄ܘܹ̇ܝܘ: ܕܠܵܐ ܐܝܼܬܲܝܗܹܝܢ ܕܐܲܦܸܤܩܘܿܦܵܐ ܕܐܲܡܵܤܝܼܵܐ: ܠܵܐ
ܬܦܲܠܸܓܼ ܠܠܵܐ ܡܸܢܼܦܲܠܓܼܵܢܵܐ. ܐܲܝܟܲܢܵܐ ܕܡ̣ܢ ܗܵܕܹܐ ܢܲܬܼܡܗܘܼܢܵܝܗܝ
ܠܓܲܒܼܪܵܐ: ܕܒܲܐܝܠܹܝܢ ܕܲܡܩܲܛܪܓܼܝܼܢ ܠܹܗ ܢܸܫܠܲܡ. ܘܡ̣ܢ ܗܵܕܹܐ
ܬܲܚܘܝܼܬܼܵܐ ܢܸܥܒܿܕܘܼܢ: ܕܐܵܦ ܐ̄ܚܪ̈ܵܢܹܐ ܢܸܕܼܚܠܘܼܢ: ܘܢܸܟܼܦܪܘܼܢ
ܒܐܵܦܵܦܲܤܝܼܣ ܕܲܥܒܲܕܼܘ: ܘܢܸܥܫܘܼܢܵܝܗܝ ܠܲܦܠܵܘܝܵܢܘܿܣ: ܒܚܲܕܼ
ܘܒܹܗ ܟܲܕܼ ܒܹܗ ܒܲܙܢܵܐ. ܕܓܼܵܘܵܐ ܓܹܝܪ ܕܟܼܠܗܘܿܢ ܐܲܝܠܹܝܢ ܕܩܲܒܹܠܘܼܗܝ
ܘܲܫܠܸܡ̣ܘ ܠܹܗ: ܐܝܼܬܹܝܗ̇ ܗ̄ܘ̣ܵܬܼ ܗܵܕܹܐ.
ܡܵܕܹܝܢ ܐܵܦ ܕܝܼܢܵܐ ܕܓܼܵܘܵܐ ܙܵܕܹܩ ܗ̄ܘ̣ܵܐ ܕܢܸܗܘܸܐ: ܕܗܵܢ̇ܘܿܢ
ܕܚܲܝܒܼܘܼܗܝ ܗ̄ܘ̣ܵܘ ܘܲܫܠܸܡ̣ܘ ܠܹܗ: ܘܲܗܦܲܟܼܘ ܡ̣ܢ ܪܡܵܝ ܐܝܼܕܼܵܐ
ܕܐܸܬܼܥܒܸܕܼ ܠܘܼܩܒܲܠ ܐܘܼܛܸܟܼܝܼܣ. ܐܸܠܵܐ ܒܪܲܡ ܗܵܠܹܝܢ ܤܵܥ̇ܪܝܼܢ
ܗ̄ܘ̣ܵܘ: ܐܲܝܟܲܢܸܐ ܕܲܢܚܵܘܘܿܢ: ܕܡ̣ܢ ܟܠ ܦܪܘܿܣ ܙܵܕܹܩ ܗ̄ܘ̣ܵܐ
ܕܲܢܚܲܝܒܼܘܼܢܵܝܗܝ ܠܲܦ̇̄ܠܵܘܝܵܢܘܿܣ: ܐܲܝܟܼ ܡ̇ܢ ܕܒܲܨܲܪ ܗ̄ܘ̣ܵܐ ܡ̣ܢ ܡܸܠܲܝ̈ܗܘܿܢ
ܘܲܓܼܙܵܪ ܕܝܼܢܗܘܿܢ: ܘܠܲܝܬܿ ܠܗܘܿܢ ܐ̄ܚܪܵܢܝܵܐܝܼܐܬܼ ܠܡܸܦܲܩ ܒܪܘܼܚܵܐ:
ܐܸܠܵܐ ܐܸܢ ܟܲܕܼ ܢܩܲܛܪܓܼܘܼܢ ܠܲܦܠܵܘܝܵܢܘܿܣ. ܕܝܵܤܩܘܿܪܘܿܣ:
ܡܫܲܡܫܵܢܵܐ ܕܒܼܘܼܚܵܢܵܐ ܗܵܢܵܐ: ܟܲܕܼ ܡܫܲܬܸܩ ܠܟܸܢܫܵܐ ܠܵܐ ܡܛܲܟܿܤܵܐ:
ܒܠܵܐ ܡܛܟܿܤܘܼܬܹܗ ܩܵܥܹ̇ܐ ܗ̄ܘ̣ܵܐ: ܫܬܼܘܿܩܘ ܠܲܡ ܩܠܲܝܠ: ܢܸܫܡܲܥ
ܐܵܦ ܓܘܼ̈ܕܵܦܹܐ ܐ̄ܚܪ̈ܵܢܹܐ. ܡܵܢܵܐ ܥܵܕܼܠܝܼܢ ܚ̄ܢܲܢ ܠܢܸܤܛܘܿܪܝܼܣ
ܒܲܠܚܘܿܕܿ؟ ܤܲܓܿܝܼ̈ܐܹܐ ܐܸܢܘܿܢ ܢܸܤܛܘܿܪܝܼܣ. ܚܲܕܼ ܠܵܐ ܐܲܟܿܤܹܗ ܕܗܵܠܹܝܢ
ܕܝܼܠܝ ܡܸܬܼܪܲܥܸܐ: ܘܠܵܐ ܬܘܼܒܼ ܗܵܘ̇ ܐܲܪܦܝܼ ܗ̄ܘ̣ܵܐ ܕܒܼܝܼ ܢܸܥܫܩܹܗ.
pb. 486
ܐܸܠܵܐ ܡ̇ܢ: ܠܝܼ ܐܵܡܲ݁ܪ ܗ̄ܘ̣ܵܐ ܐܵܦ ܠܗܵܘ̇. ܐܵܦ ܗ̤ܘ ܓܹܝܪ ܗܵܢܵܐ:
ܐܝܼܬܵܘܗܝ ܗ̄ܘ̣ܵܐ ܡ̣ܢ ܐܲܝܠܹܝܢ ܕܐܵܡ̇ܪܝܼܢ ܬܪܝܼܨܵܐܝܼܬܼ. ܒܪܲܡ ܐܵܡܲ݁ܪ ܗ̄ܘ̣ܵܐ
ܕܲܐ̄ܚܪܵܢܝܬܼܵܐ ܐܵܡܲ݁ܪ ܐ̄ܢܵܐ ܐܸܢܵܐ: ܘܲܐ̄ܚܪ̈ܵܢܝܬܼܵܐ ܗ̤ܘ. ܘܟܼܵܦܲܪ ܗ̄ܘ̣ܵܐ ܕܠܵܘ
ܗܸܢܹܝܢ
ܗܵܠܹܝܢ ܐܵܡܲ݁ܪ ܐ̄ܢܐ: ܐܵܘ ܡܸܛܠ ܠܵܐ ܝܑܼܕܲܥܬܹܗ: ܐܵܘ ܡܸܛܠ ܕܸܚܠܬܼܵܐ.
ܟܲܕܼ ܠܵܐ ܗܵܟܹܝܠ ܝܲܗ̣̄ܝܒܼ ܗ̄ܘ̣ܵܐ ܠܹܗ ܐܲܬܼܪܵܐ ܠܡܸܦܲܩ ܒܪܘܼܚܵܐ:
ܩܲܕܼܡ ܗ̄ܘ̣ܵܐ ܘܚܲܝܒܹܗ. ܕܠܵܐ ܟܲܕܼ ܢܸܦܘܿܩ ܪܘܼܚܵܐ: ܢܸܬܼܩܲܝܲܡ ܫܪܵܪܵܐ
ܒܐܲܝܠܹܝܢ ܕܡܸܬܼܩܲܛܪܲܓܼ ܕܠܵܐ ܐܝܼܬܲܝܗܹܝܢ ܕܢܸܤܛܘܿܪܝܼܣ: ܐܸܠܵܐ
ܕܲܟܼܬܼܵܒܹ̈ܐ ܐܲܠܵܗܵܝܹ̈ܐ ܘܕܲܐܒܼ̈ܗܵܬܼܵܐ ܩܲܕܝܼ̈ܫܹܐ ܕܡ̣ܢ ܩܕܼܵܡ ܬܠܵܬܼܡܵܐܐ
ܘܲܬܼܡܵܢܬܲܥܤܲܪ: ܘܕܝܼܠܗܘܿܢ ܕܲܬܼܠܵܬܼܡܵܐܐ ܘܲܬܼܡܵܢܬܲܥܤܲܪ: ܘܕܲܐܝܠܹܝܢ
ܕܡ̣ܢ ܒܵܬܲܪܗܘܿܢ. ܒܟܼܠܡܸܕܸܡ ܓܹܝܪ ܡܵܛܝܵܐ ܗ̄ܘ̣ܵܬܼ ܒܐܝܼܕܼܵܘ̈ܗܝ
ܠܲܡܚܵܘܵܝܘܼ: ܕܐܵܪ̈ܬܵܕܘܿܟܿܤܹܐ ܐܝܼܬܲܝܗܹܝܢ.
ܕܠܵܐ ܗܵܟܹܝܠ ܟܲܕܼ ܢܸܬܼܒܲܚ̈ܢܵܢ ܗܵܠܹܝܢ: ܒܗܵܝ̇ ܕܠܵܐ ܡܸܫܟܿܚܝܼܢ
ܗ̄ܘ̣ܵܘ ܠܡܸܟܼܦܲܪ ܒܗܹܝܢ ܕܠܵܐ ܐܝܼܬܝܗܹܝܢ ܕܐܵܪ̈ܬܵܘܘܿܟܿܤܹܐ: ܘܲܕܼܠܵܐ
ܬܘܼܒܼ ܟܲܕܼ ܡܩܲܒܿܠܝܼܢ ܠܗܹܝܢ ܐܲܝܟܼ ܕܐܵܪ̈ܬܵܕܘܼܟܿܤܹܐ: ܢܸܫܒܿܩܘܼܢ
ܠܗܵܝ̇ ܕܲܚܦܝܼܛܝܼܢ ܗ̄ܘ̣ܵܘ ܠܡܸܥܒܲܕܼ: ܠܲܡܚܝܵܒܼܘܼ ܠܲܦܠܵܘܝܵܢܘܿܣ
ܘܠܲܡܙܲܟܵܝܘܼ ܠܐܘܼܛܸܟܹܐ: ܥ̣ܒܲܪܘ ܡ̣ܢ ܡܸܠܹ̈ܐ ܗܵܠܹܝܢ: ܘܥܲܠ ܐ̄ܚܪ̈ܵܢܝܬܼܵܐ
ܐܸܬܼ݂ܵܘ ܠܲܡܩܲܛܪܵܓܼܘܼܬܹܗ: ܐܲܝܟܼ ܡ̇ܢ ܕܲܡܒܲܨܵܪܘܼ ܡܒܲܨܲܪ ܠܹܗ ܓܙܵܪ
ܕܝܼܢܐ. ܘܝܵܗ̇ܒܿܝܼܢ ܠܹܗ ܠܥܸܠܬܼܵܐ ܗܵܕܹܐ ܠܡܲܦܲܩܒܿܪܘܼܚܵܐ: ܘܠܵܘ ܠܗܵܝ̇
ܕܡܸܛܠܵܬܼܵܗ̇ ܘܒܼܐܝܼܕܼܵܗ̇ ܡܸܬܼܦܲܪܤܸܐ ܗ̄ܘ̣ܵܐ ܩܘܼܪܸܠܘܿܣ
ܘܤܘܼܢܗܵܕܘܿܣ ܕܒܐܦܸܤܘܿܣ: ܒܐܲܝܠܹܝܢ ܕܐܸܡ݂ܲܪܘ ܗ̄ܘ̣ܵܘ. ܡܠܲܩܛܝܼܢ
ܗ̄ܘ̣ܵܘ ܓܹܝܪ ܗܵܢܘܿܢ ܕܒܹܝܬܼ ܩܘܼܪܸܠܘܿܣ ܘܕܐܘܼܛܸܟܼܝܼܣ: ܐܲܝܠܹܝܢ
pb. 487
ܕܫܵܠ̈ܡܵܢ ܗ̣̄ܘܝ̈ ܠܗܘܿܢ ܘܲܡܓܲܒܹܿܝܢ ܗ̄ܘ̣ܵܘ ܐܲܝܠܹܝܢ ܕܫܵܦܪ̈ܵܢ ܠܗܘܿܢ.
ܘܗܵܟܼܘܵܬܼ ܐܵܦ ܒܢܲܝ̈ ܓܲܒܵܐ ܕܲܠܦܵܘܝܵܢܘܿܣ: ܕܲܠܩܘܼܒܼܠܵܐ ܕܗܵܢ̇ܘܿܢ.
ܩܘܼܪܸܠܘܿܣ ܕܹܝܢ ܐܝܼܬܼܵܘܗܝ ܗ̄ܘ̣ܵܐ ܐܲܒܼܵܐ ܕܤܘܿܓܼܵܐܐ ܕܗܹܪܹ̈ܤܝܼܵܣ:
ܘܗܵܠܹܝܢ ܘܗܸܢܹܝܢ ܘܲܐ̄ܚܪ̈ܵܢܝܬܼܵܐ ܐܵܡܲ݁ܪ ܗ̄ܘ̣ܵܐ ܒܵܗ̇ ܟܲܕܼ ܒܵܗ̇. ܐܲܝܟܲܢܵܐ
ܕܠܵܐ ܟܲܕܼ ܢܸܬܼܚܲܫܚܘܼܢ ܒܐܲܝܠܹܝܢ ܕܕܲܠܩܘܼܒܼܠܵܐ ܐܸܢܹܝܢ: ܢܩܝܼܡܘܼܢ
ܒܐܘܼܠܨܵܢܵܐ ܠܗܵܠܹܝܢ ܕܗ̤ܘܲܝ̈ ܒܙܲܒܼܢܹܗ ܕܩܘܪܸܠܘܿܣ: ܘܠܲܐܝܠܹܝܢ
ܕܲܗ̤ܘܲܝ̈ ܒܐܲܦܸܤܘܿܣ. ܘܡ̣ܢ ܐܵܢܲܢܩܹܐ ܢܩܝܼܡܘܼܢ ܠܡܸ̈ܠܲܝ ܕܝܼܠܝ:
ܠܒܼܘܼܛܵܠܵܐ ܕܐܲܝܠܹܝܢ ܕܐܸܤܬܿܥܲܤ ܠܘܼܩܒܲܠܝ: ܘܠܵܐ ܢܸܗܘܸܬ ܠܗܘܿܢ
ܐܲܬܼܪܵܐ ܠܐܲܝܠܹܝܢ ܕܡܸܤܬܲܥܪ̈ܵܢ ܠܘܼܩܒܲܠ ܠܦܵܘܝܵܢܘܿܣ: ܡܸܛܠ
ܩܘܼܛܪܵܓܼܵܐ ܕܐܘܼܛܸܟܹܐ. ܡܸܛܠ ܗܵܠܹܝܢ: ܠܵܐ ܡܲܪܦܹܝܢ ܗ̄ܘ̣ܵܘ ܠܹܗ
ܠܤܹܠܵܘܩܘܿܣ ܠܡܸܦܲܩ ܪܘܼܚܵܐ: ܘܐܵܦ ܠܲܡܩܲܝܵܡܘܼ ܠܐܲܝܠܹܝܢ
ܕܐܸܬܼܟܬܸܒܼ ܡܸܢܹܗ. ܐܸܠܵܐ ܒܲܩܥܵܬܼܐ ܦܵܤܘܿܩܵܐܝܼܬܼ ܡܸܬܼܚܲܫܚܝܼܢ ܗ̄ܘ̣ܵܘ:
ܐܲܝܟܲܢܐ ܕܠܵܐ ܢܲܡܪܲܚ ܐ̄ܚܪܹܢܵܐ ܠܡܸܦܲܩ ܪܘܼܚܵܐ: ܐܸܠܵܐ ܠܡܹܐܡܲܪ
ܗܵܠܹܝܢ ܕܒܼܵܥܹ̇ܝܢ ܗ̄ܘ̣ܵܘ ܠܘܼܩܒܲܠ ܦܠܵܘܝܵܢܘܿܣ: ܕܲܡܒܲܨܪ̈ܵܢ ܠܹܗ
ܗܵܠܹܝܢ ܕܐܸܬܿܥܲܪ ܒܲܓܼܙܵܪ ܕܝܼܢܵܐ ܕܐܘܼܛܸܟܼܝܼܣ: ܕܲܢܩܲܒܹܿܠܘܼܢ ܕܠܵܐ
ܡܸܠܬܼܵܐ ܠܲܪܡܵܝ ܐܝܼܕܼܵܐ ܕܐܲܝܟܼ ܗܵܟܲܢܵܐ. ܡ̣ܢ ܗܵܠܹܝܢ ܓܹܝܪ ܐܸܬܼܝܼܕܲܥ
ܗ̄ܘ̣ܵܐ ܢܝܼܫܗܘܿܢ ܠܟܼܠܢܵܫ: ܡ̣ܢ ܪܡܵܝ ܐܝܼܕܼܵܐ ܕܐܲܬܿܬܿܝܼܟܘܿܣ
ܝܲܬܼܿܪܵܐܝܼܬܼ ܡܸܬܼܝܼܕܲܥ.
ܐܲܬܿܬܿܝܸܟܘܿܣ ܓܹܝܪ ܓܲܒܼܪܵܐ ܗ̄ܘ̣ܵܐ ܕܩܘܼܪܝܵܝ ܗ̄ܘ̣ܵܐ ܘܲܒܼܪܝܼܪ
pb. 488
ܗ̄ܘ̣ܵܐ: ܘܠܵܐ ܡܸܫܟܲܚ ܗ̄ܘ̣ܵܐ ܐܵܦ ܠܵܐ ܒܓܲܠܝ̈ܬܼܵܐ. ܡܗܲܣܡܢܵܐ ܓܹܝܪ
ܐܝܼܬܼܵܘܗܝ ܗ̄ܘ̣ܵܐ: ܘܲܒܼܓܼܵܘ ܒܲܝܬܼܵܐ ܡܟܪܲܒܲܝ ܗ̄ܘ̣ܵܐ ܐܲܝܟܼ ܥܲܒܼ̈ܕܹܐ: ܘܐܸܬܼܝܼܗܸܒܼ
ܗ̄ܘ̣ܵܐ ܒܒܲܝܬܼܵܐ ܪܲܒܵܐ ܕܒܹܝܬܼ ܡܲܠܟܿܘܼܬܼܵܐ. ܘܟܲܕܼ ܗܵܟܲܢܵܐ ܗܘ̤ܵܬܼ ܠܹܗ
ܦܵܪ݂ܗ̄ܤܝܼܵܐ ܕܡܸܬܼܥܲܫܢܵܢܘܼܬܼܵܐ ܘܪܲܒܿܘܼܬܼܵܐ: ܒܐܲܦܸܤܩ̈ܘܿܦܹܐ ܐܸܬܼܓܿܒܼܝܼ
ܗ̄ܘ̣ܵܐ: ܟܲܕܼ ܒܐܘܼܪ̈ܚܵܬܼܵܐ ܘܲܒܼܒܸܕܼܝܹ̈ܐ ܘܲܒܼܦܘܼܪ̈ܤܹܐ ܕܐܲܝܟܼ ܗܵܠܹܝܢ: ܠܵܐ
ܡܕܲܪܲܫ ܗ̄ܘ̣ܵܐ ܘܠܵܐ ܡܸܤܬܲܟܲܠ ܗ̄ܘ̣ܵܐ. ܘܐܵܠܨ̇ܝܼܢ ܗ̄ܘ̣ܵܘ ܠܹܗ ܕܲܓܵܠܵܐܝܼܬܼ
ܢܹܐܡܲܪ ܕܲܡܒܲܨܵܪܘܼ ܡܒܲܨܪܵܐ. ܘܗ̤ܘ ܐܵܠܹ̇ܨ ܗ̄ܘ̣ܵܐ ܠܗܘܿܢ ܕܢܹܐܡܪܘܼܢ
ܘܢܵܘܕܥܘܼܢܵܝܗܝ ܠܲܩܛܝܼܪܵܐ: ܒܲܕܼ ܠܵܐ ܡܸܤܬܲܟܲܠ ܗ̄ܘ̣ܵܐ ܡ̇ܢ ܕܐܵܡ̇ܪܝܼܢ
ܗ̄ܘ̣ܵܘ ܠܹܗ. ܐܲܬܿܬܿܝܼܟܘܿܣ ܓܹܝܪ ܐܲܦܸܤܦܘܿܦܵܐ ܐܸܡ݂ܲܪ ܗ̄ܘ̣ܵܐ: ܡ̣ܢ
ܫܹܠܝ ܥܸܠܹ̇ܬܼ ܠܩܘܼܤܛܲܢܛܝܼܢܵܦܘܿܠܝܼܣ: ܘܚܵܪܹܬܼ ܒܫܵܡ̈ܘܿܘܿܥܹܐ: ܘܠܹܗ
ܠܕܲܝܪܵܝܵܐ ܕܐܸܡܲ݁ܪ ܗ̄ܘ̣ܵܐ: ܡܵܪܝ ܐܲܪܡܵܐ ܐܝܼܕܼܵܐ. ܐܸܡܲ݁ܪ ܐ̄ܢܵܐ ܠܹܗ:
ܛܹܐܘܿܣ: ܐܲܪܦܵܢܝ ܕܐܸܚܙܸܐ. ܘܫܸܡ̇ܥܹܬܼ ܡܸܢܹܗ ܟܲܕܼ ܩܵܪܹܐ ܡܸܕܸܡ
ܕܓܼܵܠܵܐ. ܘܡ̣ܢ ܒܵܬܲܪ ܗܵܠܹܝܢ ܐܸܡ݂ܲܪ ܠܝܼ: ܡܵܪܝ ܐܲܪܡܵܐ ܐܝܼܕܼܵܐ.
ܐܸܡ̇ܪܹܬܼ: ܠܡܲܪܡܵܝܘܼ ܐܝܼܕܼܵܐ ܠܵܐ ܡܸܫܟܲܚ ܐ̄ܢܵܐ. ܫܲܪܝܼܪܵܐܝܼܬܼ ܡ̇ܢ ܝܵܕܲܥ̇
ܐ̄ܢܵܐ: ܐܸܠܵܐ ܠܵܐ ܡܸܫܟܲܚ ܐ̄ܢܵܐ ܠܡܹܐܡܲܪ ܡܸܕܸܡ. ܒܪܲܡ ܐܵܡܲ݁ܪ ܐ̄ܢܵܐ:
ܕܐܸܢ ܐ̄ܢܵܫ ܠܵܐ ܡܗܲܝܡܸܢ: ܐܲܝܟܼ ܐܲܒܼܵܗ̈ܬܼܵܐ ܬܠܵܬܼܡܵܐܐ ܘܲܬܼܡܵܢܬܲܥܤܲܪ
ܕܲܒܼܢܝܼܩܵܝܼܵܐ ܘܐܲܝܟܼ ܗܵܢܘܿܢ ܕܒܲܐܸܤܘܿܣ: ܢܸܗܘܸܐ ܚܪܸܡ: ܒܗܵܢܵܐ
ܥܵܠܡܵܐ ܘܲܒܼܗܵܘ̇ ܕܲܥܬܼܝܼܕܼ. ܘܲܕܼܝܵܤܩܘܿܪܵܐ: ܐܲܝܟܼ ܕܥܲܠ ܛܲܠܝܵܐ
ܕܡܸܬܼܩܲܛܪܲܓܼ: ܦܵܩܹ̇ܕܼ ܗ̄ܘ̣ܵܐ ܠܹܗ ܠܐܲܬܿܬܿܝܼܟܘܿܣ ܕܢܸܟܼܦܘܿܪ
ܘܲܢܕܲܓܸܠ ܢܲܦܫܹܗ. ܘܐܸܡܲ݁ܪ ܗ̄ܘ̣ܵܐ ܗ̤ܘ ܗܵܘ̇ ܡܵܐ ܕܒܼܵܥܹ̇̄ܐ ܗ̄ܘ̣ܵܐ
pb. 489
ܠܡܹܐܡܲܪ: ܗܵܠܹܝܢ ܡܵܕܹܝܢ ܕܐܸܬܼܩܪܝܼ ܕܲܓܵܠܵܬܼ̈ܐ ܐܸܢܹܝܢ ܘܲܕܒܸܕܼܝܵܐ.
ܘܐܲܬܿܬܿܝܼܟܘܿܣ ܠܵܐ ܝܵܕܲܥ̇ ܗ̄ܘ̣ܵܐ ܡ̇ܢ ܕܒܼܵܥܹ̇ܐ ܗ̄ܘ̣ܵܐ ܠܡܹܐܡܲܪ ܠܹܗ:
ܘܐܸܡ݂ܲܪ: ܐܸܠܵܐ ܝܵܕܲܥ̇ܢܵܐ. ܡܸܛܠ ܕܪܵܡ̇ܙܝܼܢ ܗ̄ܘ̣ܵܘ ܠܹܗ ܕܢܹܐܡܲܪ
ܕܲܓ̈ܠܵܬܼܵܐ ܐܸܢܹܝܢ ܘܒܸܕܼܝܵܐ: ܘܠܵܐ ܝܵܕܲܥ̇ ܗ̄ܘ̣ܵܐ ܐܲܬܿܬܿܝܼܟܘܿܣ. ܬܘܼܒܼ
ܐ̄ܚܪܵܢܝܵܐܝܼܬܼ ܡܫܲܐܸܠ ܗ̄ܘ̣ܵܐ ܠܹܗ ܟܲܕܼ ܪܵܡܹܙ ܠܹܗ: ܗܵܠܹܝܢ ܠܵܐ
ܐܸܡܲܪܬܿ؟ ܘܡ̣ܢ ܡܲܚܤܸܢ ܟܲܕܼ ܕܵܩܪܝܼܢ ܠܹܗ: ܝܑܼܕܥ̣ ܗ̄ܘ̣ܵܐ ܡܵܐ ܕܒܼܵܥܹ̇ܐ
ܗ̄ܘ̣ܵܐ ܡܸܢܹܗ ܕܢܹܐܡܲܪ: ܘܐܸܡ݂ܲܪ ܐܲܬܿܬܿܝܼܟܘܿܣ ܠܵܐ. ܘܬܼܘܼܒܼ ܟܲܕܼ
ܒܵܥܹ̇ܝܢ ܗ̄ܘ̣ܵܘ ܕܲܢܫܲܪܪܘܼܢ ܠܗܵܘ̇ ܡܵܐ ܕܒܼܵܥܹ̇ܐ ܗ̄ܘ̣ܵܐ ܕܢܹܐܡܲܪ: ܐܸܬܿܬܿܟܸܠ
ܗ̄ܘ̣ܵܐ ܠܲܡܫܲܐܵܠܘܼܬܹܗ ܥܠܲܝܗܹܝܢ ܟܲܕܼ ܥܠܲܝܗܹܝܢ: ܐܵܡܲ݁ܪ ܗ̄ܘ̣ܵܐ ܠܲܡ
ܕܝܵܤܩܘܿܪܘܿܣ: ܫܵܡ̇ܥܹܬܼ ܐܲܝܠܹܝܢ ܕܡܸܢܵܟܼ ܟܹܐܡܲܬܼ ܐܸܬܼܐܡܲܪ. ܗ̤ܘ
ܐܸܡܲ݁ܪ ܗ̄ܘ̣ܵܐ ܗܵܘ̇ ܡܵܐ ܕܒܼܵܥܹ̇ܐ ܗ̄ܘ̣ܵܐ ܠܡܹܿܐܡܲܪ ܘܲܐܡܲܠܵܦܘܼ: ܒܲܕܼ ܕܵܚܹ̇ܠ
ܗ̄ܘ̣ܵܐ ܕܕܲܠܡܵܐ ܐ̄ܚܪ̈ܵܢܝܬܼܵܐ ܚܠܵܦ ܐ̄ܚܪ̈ܵܢܝܵܬܼܵܐ ܢܸܥܢܸܐ ܠܹܗ: ܘܐܲܬܿܬܿܝܼܟܘܿܣ
ܐܸܡܲ݁ܪ: ܫܸܡ̇ܥܹܬܼ. ܘܲܕܝܵܤܩܘܿܪܘܿܣ ܪܡܲܙ ܠܹܗ ܟܲܕܼ ܐܵܡܲ݁ܪ: ܡܵܕܹܝܢ
ܠܵܐ ܐܸܡܲܪܬܿ ܐܸܢܹܝܢ؟ ܘܐܲܬܿܬܿܝܼܟܘܿܣ: ܟܲܕܼ ܪܵܡܹܙ ܥܲܡܹܗ
ܕܡܲܠܦܵܢܹܗ: ܐܵܦ ܗ̤ܘ ܐܸܡ݂ܲܪ ܗܸܢܹܝܢ ܟܲܕܼ ܗܸܢܹܝܢ: ܠܵܐ ܐܸܡܲܪܬܿ؟
ܗܵܟܲܢܵܐ ܐܵܦ ܩܕܼܵܡ ܡܲܠܟܵܐ: ܐܵܦ ܩܕܼܵܡ ܐ̄ܢܵܫ̈ܝܼܢ ܐ̄ܚܪܵܢܝܼܢ: ܒܵܗ̇
ܟܲܕܼ ܒܵܗ̇ ܒܲܡܥܲܬܕܘܼܬܼܵܐ ܐܸܬܼܚܲܫܲܚ ܗ̄ܘ̣ܵܐ. ܐܲܝܟܲܢܵܐ ܕܒܲܪܡܵܝ ܐܝܼܕܼܵܐ
ܕܝܼܠܗܘܿܢ ܢܸܟܼܦܪܘܼܢ: ܘܠܘܼܩܒܲܠ ܦܵܠܵܘܝܵܢܘܿܣ ܕܠܵܐ ܟܘܼܚܵܕܼܵܐ
ܘܲܒܼܥܵܘܠܵܐ ܢܸܤܥܪܘܼܢ. ܗܵܠܹܝܢ ܡ̇ܢ ܕܡ̣ܢ ܗܵܢܘܿܢ: ܕܠܵܐ ܒܘܼܚܵܢܵܐ
pb. 490
ܡܩܲܒܸܿܠ ܗ̄ܘ̣ܵܐ. ܗܵܠܹܝܢ ܕܹܝܢ ܕܡ̣ܢ ܩܛܝܼܪܵܐ ܡܸܬܼܐܲܡܪܵܢ ܗ̣̄ܘܲܝ̈
ܕܲܡܒܲܨܪ̈ܵܢ ܐܸܢܹܝܢ: ܕܠܵܐ ܦܘܼܠܵܓܼܵܐ ܡܩܲܒܸܿܠ ܗ̄ܘ̣ܵܐ ܠܗܹܝܢ.
ܒܵܥܹ̇ܐ ܗ̄ܘ̣ܵܐ ܕܹܝܢ ܕܢܹܐܡܲܪ ܠܘܼܩܒܲܠܗܘܿܢ ܦܠܵܘܝܵܢܘܿܣ: ܘܟܲܕܼ
ܛܵܒܼ ܒܐܘܼܠܨܵܢܵܐ ܕܐܲܝܟܼ ܗܵܢܵܐ ܘܒܲܩܛܝܪܵܐ ܐܝܼܬܼܵܘܗܝ ܗ̄ܘ̣ܵܐ: ܠܵܐ
ܡܲܪܦܹܝܢ ܗ̄ܘ̣ܵܘ ܠܹܗ. ܐܸܠܵܐ ܡܵܚܹ̇ܝܢ ܗ̄ܘ̣ܵܘ ܠܹܗ: ܐܲܝܟܼ ܕܐܵܡ̇ܪܝܼܢ
ܩܘܿܡܛܹ̈ܐ: ܕܐܵܦ ܠܵܐ ܡܡܲܠܵܠܘܼ ܡܢܲܠܸܠ: ܥܕܲܡܵܐ ܕܢܸܫܬܿܡܠܸܐ
ܪܡܵܝ ܐܝܼܕܼܵܐ ܕܲܥܠܵܘܗܝ. ܘܗܵܟܲܢܵܐ ܢܸܫܬܲܪܪ̈ܵܢ ܗܵܠܹܝܢ ܕܐܘܼܛܸܟܼܝܼܣ:
ܘܢܸܫܩܘܿܠ ܫܘܼܠܵܡܵܐ ܗܵܘ̇ ܡܵܐ ܕܲܚܦܝܼܛܝܼܢ ܗ̄ܘ̣ܵܘ ܥܠܵܘܗܝ. ܐܲܝܟܼ
ܕܥܲܠ ܡܝܼܬܼܵܐ ܓܹܝܪ ܡܸܟܹܝܠ ܟܢܝܼܫܝܼܢ ܗ̄ܘ̣ܵܘ. ܟܲܕܼ ܓܹܝܪ ܡܸܢܼܩܪܸܐ
ܗܵܘ̇ ܡܵܐ ܕܐܸܤܬܿܥܲܪ ܒܗܘܼܦܵܡ̈ܢ݂ܡܵܛܵܐ ܠܘܼܩܒܲܠ ܐܘܼܛܸܟܼܝܼܣ:
ܘܐܵܡܲ݁ܪ ܗ̄ܘ̣ܵܐ ܠܘܼܩܒܲܠܗܘܿܢ ܦܠܵܘܝܵܢܘܿܣ: ܐܵܡ̇ܪܝܼܢ ܗ̄ܘ̣ܵܘ ܕܲܡܕܲܓܵܠܘܼ
ܡܕܲܓܸܠ ܗܵܢܵܐ ܒܲܪܡܵܝ ܐܝܼܕܼܵܐ ܕܝܼܠܲܢ. ܘܡܵܚܹ̇ܝܢ ܗ̄ܘ̣ܵܘ ܠܹܗ:
ܐܲܝܟܼ ܕܐܵܡ̇ܪܝܼܢ. ܗܵܝܕܹܝܢ ܡ̣ܢ ܒܵܬܲܪ ܕܐܸܫܬܲܪܲܪ ܓܙܵܪ ܕܼܝܼܢܵܐ ܘܐܵܦܦܲܤܝܼܣ
ܕܲܥܠܵܘܗܝ ܐܲܝܟܼ ܕܲܫܦܲܪ ܠܗܘܿܢ: ܦܲܩܕܹܗ ܗ̄ܘ̣ܵܐ ܕܝܵܤܩܘܿܪܘܿܣ
ܠܲܡܡܲܠܠܵܘܼ ܘܐܸܡ݂ܲܪ: ܐܸܢܗ̤ܘ ܕܝܵܕܲܥ̇ ܡܸܕܸܡ ܪܵܚܹܡ ܐܲܠܵܗܵܐ ܠܦܵܘܝܵܢܘܿܣ
ܐܲܦܸܤܩܘܿܦܵܐ ܕܥܵܕܲܪ ܠܹܗ: ܢܹܐܡܲܪ ܒܲܟܼܬܼܝܼ̈ܒܼܵܬܐ. ܡܵܢܵܐ ܙܵܕܹܩ ܗ̄ܘ̣ܵܐ
ܠܹܗ ܕܢܹܐܡܲܪ: ܠܗܵܘ̇ ܕܲܒܼܟܼܠܗܹܝܢ ܝܵܕܲܥ̇ ܗ̄ܘ̣ܵܐ ܕܡ̣ܢ ܩܛܝܼܪܵܐ
ܕܐܲܝܟܼ ܗܵܢܵܐ ܐܸܤܪܬܿܠܝܼ̈ ܗ̣̄ܘܲܝ̈ ܡܸܠܵܘ̈ܗܝ ܟܹ̈ܐܢܵܬܼܵܐ: ܘܡܸܟܹܝܠ ܐܲܝܟܼ
ܕܒܲܫܥܵܬܼܵܐ ܦܵܩ̇ܕܝܼܢ ܗ̄ܘ̣ܵܐ ܠܹܗ ܠܡܹܐܡܲܪ: ܝܲܬܿܝܼܪ ܡ̣ܢ ܗܵܘ̇ ܡܵܐ
ܕܐܸܡܲܪ ܗ̄ܘ̣ܵܐ: ܕܐܸܚܲܕܬܿ ܒܐܲܦܲܝ̈ ܟܠܗܹܝܢ ܡܸܠܲܝ̈ ܟܹ̈ܐܢܵܬܼܵܐ: ܒܗܵܝ̇
ܕܲܠܟܼܠܵܗ̇ ܥܵܫܘܿܩܘܼܬܼܵܐ ܩܲܒܸܿܠܬܿ ܥܠܲܝ ܕܠܵܐ ܦܘܼܠܵܓܼܵܐ؟
pb. 491
ܐܸܠܵܐ ܐܲܝܟܲܢܵܐ ܕܬܸܬܼܚܵܘܸܐ ܐܵܦ ܗܵܕܹܐ ܕܕܲܫܥܵܬܼܵܐ ܗ̄ܘ̣ܵܬܼ: ܠܡܲܦܵܢܘܼܬܼܵܐ
ܕܒܲܐܝܢܵܐ ܙܢܵܐ ܚܒܲܫ̣ܘ: ܠܟܼܠܗܹܝܢ ܡܸܠܵܘ̈ܗܝ ܟܹ̈ܐܢܵܬܼܵܐ: ܐܵܦ ܟܲܕܼ ܠܵܐ
ܨܵܒܹ̇ܝܢ: ܤܵܡ̣ܘ ܗ̄ܘ̣ܵܘ ܒܗܘܼܦܵܡ̈ܢ݂ܡܵܛܵܐ. ܕܐܸܡ݂ܲܪ ܕܝܵܤܩܘܿܪܘܿܣ
ܠܘܵܬܼ ܦܠܵܝܵܢܘܿܣ: ܝܵܕܼܥܵܐ ܤܘܼܢܥܗܵܕܘܿܣ ܩܲܕܼܝܼܫܬܼܵܐ ܐܸܢ ܐܸܡ̇ܕܹܬܼ
ܒܐܲܦܲܝ̈ܟ. ܘܲܦܠܵܘܝܵܢܘܿܣ ܓܲܠܝܵܐܝܼܬܼ ܐܲܡܪܹܗ ܠܲܩܛܝܼܪܵܐ ܕܲܗܘ̤ܵܐ
ܒܹܗ: ܕܠܵܐ ܐܸܫܬܲܒܼܩܹ̇ܬܼ ܘܠܵܐ ܐܸܬܼܦܤܸܣ ܠܝܼ ܐܵܦ ܠܵܐ ܠܲܡܡܠܵܠܘܼ.
ܘܐܲܝܟܼ ܕܬܸܬܼܝܼܕܲܥ ܕܲܒܼܒܼܘܼܙܵܚܵܐ ܗ̤ܘܲܝ̈ ܐܲܝܠܹܝܢ ܕܡܸܬܿܐܲܡܪ̈ܲܢ:
ܐܵܡܲ݁ܪ ܗ̄ܘ̣ܵܐ: ܐܸܡܲܪ ܐܲܝܠܹܝܢ ܕܥܵܕܼܪ̈ܵܢ ܠܵܟܼ. ܘܐܸܡ݂ܲܪ ܗ̄ܘ̣ܵܐ: ܕܤܘܼܥܪ̈ܵܢܵܐ
ܕܗܘܼܦܵܢ݂ܡܵܛܵܐ ܡܸܕܸܡ ܕܒܸܕܼܝܵܐ ܘܲܕܼܕܓܵܠܘܼܬܼܵܐ ܠܲܝܬܿ ܒܹܗ. ܘܝܵܕܼܥ̇
ܐܵܦ ܡܵܪܝ ܐܘܼܤܹܒܝܼܣ ܘܡܵܪܝ ܬܵܠܵܤܝܼܣ: ܕܐܲܪܡܝܼܘ ܐܝܼܕܼܵܐ
ܘܒܲܚܸܢܘ ܥܲܡܝܼ. ܘܐܲܤܠܝܘܼܗ̇ ܠܡܸܠܬܹܗ: ܕܠܵܐ ܠܲܡ ܒܲܚܸܢܘ
ܗ̄ܘ̣ܵܐ ܬܵܠܵܤܝܼܣ ܘܐܘܼܤܒܝܼܣ. ܗܵܝܕܹܝܢ ܒܗܵܝ̇ ܕܠܲܡܒܲܙܵܚܘܼ
ܒܲܠܚܘܿܕܼ ܤܝܼܡܵܐ ܗ̄ܘ̣ܵܬܼ ܠܗܘܿܢ: ܡܸܟܹܝܠ ܡ̣ܢ ܒܵܬܲܪ ܐܵܦܵܦܲܤܝܼܣ:
ܬܵܠܵܤܝܼܘܿܣ ܗܵܠܹܝܢ ܕܲܕܼܝܵܤܩܘܿܪܘܿܣ ܐܵܡܲ݁ܪ ܗ̄ܘ̣ܵܐ: ܠܲܝܬܿ ܐ̄ܢܵܫ
ܕܕܼܵܠܹ̇ܐ ܠܚܲܤܝܘܼܬܼܵܟܼ ܡ̣ܢ ܕܬܹܠܡܲܪ. ܘܲܕܼܝܵܤܩܘܿܪܘܿܣ ܡܒܲܙܚܵܢܵܐܝܼܬܼ
ܐܸܬܼܦܢܝܼ ܠܘܵܬܼ ܚܲܕܼ ܚܲܕܼ ܡ̣ܢ ܐܲܦܸܤܩ̈ܘܿܦܹܐ: ܐܲܝܠܹܝܢ ܕܲܪܓܼܝܼܫܝܼܢ ܗ̄ܘ̣ܵܘ
ܒܥܘܼܬܵܕܼܵܐ ܗܵܢܵܐ: ܟܲܕܼ ܐܸܡܲ݁ܪ: ܡܵܪܝ ܐܘܼܤܹܒܼܝܼܣ ܐܸܡ݂ܲܪ: ܐܸܢ ܠܵܐ
ܗ̄ܘ̣ܵܐ ܗܵܠܹܝܢ ܗܵܟܲܢܵܐ ܐܝܼܬܲܝܗܹܝܢ: ܘܒܲܚܸܢ: ܕܲܕܼܠܵܐ ܚܘܼܝܵܒܼܵܐ ܢܸܫܬܿܟܲܚ.
ܐܸܠܵܐ ܡ̇ܢ ܟܠܲܝܬܵܝܗܝ ܕܢܹܐܡܲܪ: ܘܬܼܘܼܒܼ ܡܓܲܪܸܓܼ ܐܲܢ̄ܬܿ ܠܹܗ
ܠܡܹܐܡܲܪ؟ ܘܡ̣ܢ ܕܐܸܡ݂ܲܪ ܠܹܗ: ܬܘܼܒܼ ܠܗܹܝܢ ܟܲܕܼ ܠܗܹܝܢ ܐܸܡ݂ܲܪ:
pb. 492
ܕܲܩܕܼܵܡ ܡܵܪܝ ܬܵܠܵܤܝܼܣ ܘܡܵܪܝ ܐܘܼܤܹܒܼܝܼܣ: ܟܲܕܼ ܩܲܪܝܼܒܼ
ܐܵܦ ܡܵܪܝ ܤܸܠܲܢܛܵܪܝܼܘܿܣ ܡܲܓܿܢܘܿܣ: ܗܘ̤ܵܐ ܤܘܼܥܪܵܢܵܐ ܗܵܢܵܐ
ܘܐܸܬܼܒܲܚܲܢ. ܘܡܸܕܸܡ ܕܐܲܝܟܼ ܗܵܢܵܐ ܠܵܐ ܐܸܫܬܿܟܲܚ. ܟܒܠ ܚܲܕܼ ܚܲܕܼ
ܡ̣ܢ ܐܲܦܸܤܩ̈ܘܿܦܹܐ: ܐܲܝܠܹܝܢ ܕܩܲܪܝܼܒܼܝܼܢ ܗ̄ܘ̣ܵܘ ܬܲܡܵܢ: ܗܵܢ̇ܘܿܢ ܕܲܡܫܲܥ̣ܘ:
ܢܹܐܡܲܪܘܼܢ ܐܲܝܟܼ ܕܲܩܕܼܵܡ ܐܲܠܵܗܵܐ ܐܸܢ ܒܕܲܓܵܠܘܼܬܼܵܐ ܐܸܬܼܐܡܲܪ.
ܕܝܵܤܩܘܿܪܘܿܣ ܬܘܼܒܼ ܟܲܕܼ ܡܒܲܙܲܚ ܒܹܗ: ܕܟܹܐܡܲܬܼ ܠܵܐ
ܐܝܼܬܼܵܘܗܝ ܗܵܢܵܐ ܡܲܦܲܩܒܪܘܼܚܵܐ. ܘܗ̤ܘ ܡܲܤܒܲܪ ܗ̄ܘ̣ܵܐ ܕܒܲܫܪܵܪܵܐ
ܡܩܲܪܸܒܼ ܗ̄ܘ̣ܵܐ ܠܹܗ ܠܡܹܐܡܲܪ: ܫܵܒܹ̇ܩ ܗ̄ܘ̣ܵܐ ܕܠܗܵܠܹܝܢ ܢܒܲܚܸܢ.
ܘܬܼܘܼܒܼ ܟܲܕܼ ܡܡܲܝܸܩ: ܐܸܬܼܦܢܝܼ ܗ̄ܘ̣ܵܐ ܠܘܵܬܼ ܐܸܤܛܲܦܵܢܘܿܣ:
ܘܐܸܡ݂ܲܪ ܠܹܗ: ܡܵܪܝ ܐܸܤܛܲܦܵܢܲܐ: ܐܸܢ ܟܠܲܝܬܵܝܗܝ: ܘܲܠܘܵܬܼ ܟܠܗܘܿܢ:
ܐܸܡܲܪܘ ܟܠܟܼܘܿܢ. ܘܗܵܟܲܢܵܐ ܡܸܫܬܿܥܸܐ ܗ̄ܘ̣ܵܐ ܒܹܗ ܒܓܲܒܼܪܵܐ: ܕܠܵܐ
ܡܦܵܣ ܗ̄ܘ̣ܵܐ ܘܠܵܐ ܝܵܕܲܥ̇ ܗ̄ܘ̣ܵܐ ܠܒܼܝܼܫܘܼܬܼܵܐ ܘܠܢܸܟܼܠܹ̈̄ܐ ܕܡܸܨܪ̈ܵܝܹܐ.
ܤ̣ܒܲܪ ܗ̄ܘ̣ܵܐ ܕܹܝܢ ܕܲܒܼܕܼܚܠܲܬܼ ܐܲܠܵܗܵܐ ܐܝܼܬܲܝܗܹܝܢ: ܘܠܲܐܝܠܹܝܢ
ܕܲܒܼܡܹܐܟܲܠ ܩܲܪܨܵܐ ܡܸܬܿܛܲܒ̈ܒܼܵܢ ܗ̣̄ܘܲܝ̈: ܚܦܝܼܛܝܼܢ ܗ̄ܘ̣ܵܘ ܠܡܹܐܡܲܪ
ܝܲܬܿܝܼܪ ܡ̣ܢ ܫܪܵܪܵܐ. ܘܡ̣ܢ ܕܝܼܕܲܥ ܗ̄ܘ̣ܵܐ ܡܸܟܹܝܠ ܗܵܘ̇ ܡܵܐ ܕܤܵܥ̇ܪܝܼܢ
ܗ̄ܘ̣ܵܘ: ܘܲܕܼܠܵܐ ܐܵܠܨܵܐ ܥܲܠ ܡܲܦܲܩܒܪܘܼܚܵܐ ܘܲܡܚܵܘܝܵܢܘܼܬܼܵܐ ܡܸܕܸܡ:
ܐܸܬܿܬܿܢܝܼܚ ܗ̄ܘ̣ܵܐ. ܘܐܲܤܗܸܕܼ ܗ̄ܘ̣ܵܐ ܒܟܼܠ ܐ̄ܢܵܫ ܟܲܕܼ ܐܸܡܲ݁ܪ: ܕܲܒܼܥܘܼܕܼܪܵܢܵܐ
ܕܐܲܠܵܗܵܐ ܒܡܸܕܸܡ ܡ̣ܢ ܐܲܝܠܹܝܢ ܕܲܤܥܲܪܬܘܿܢ ܒܝܼ ܠܵܐ ܩܲܪܝܼܒܼ ܐ̄ܢܵܐ.
ܐܵܦ ܠܵܐ ܓܹܝܪ ܡܸܕܸܡ ܐ̄ܚܪܵܢܝܵܐܝܼܬܼ ܐܵܘܕܝܼܬܼ ܘܐܸܬܼܪܲܥܝܼܬܼ ܟܠ
ܟܠܹܗ: ܐܵܘ ܡܵܘܕܸܐ ܐ̄ܢܵܐ. ܘܲܫܬܸܩ̣ ܗ̄ܘ̣ܵܐ ܡܸܟܹܝܠ ܠܲܡܦܲܢܵܝܘܼ
pb. 493
ܠܹܗ ܦܸܬܼܓܼܵܡܵܐ ܐܲܝܟܼ ܕܲܠܘܵܬܼ ܗܲܪܵܛܝܼܩܵܐ ܓܲܠܝܵܐ. ܘܡܸܛܠ ܗܵܕܹܐ
ܥܲܬܿܕܼܘܼܗܝ ܗ̄ܘ̣ܵܘ ܠܡܹܐܡܲܪ: ܘܲܒܼܗܵܕܹܐ ܬܵܘܕܝܼܬܼܵܐ ܩܵܘܝܼ ܗ̄ܘ̣ܵܐ:
ܡܸܕܸܡ ܕܠܵܐ ܙܵܕܹܩ ܠܵܐ ܚܲܫ̣: ܘܠܵܐ ܐܸܬܿܕܲܡܝܼ ܗ̄ܘ̣ܵܐ ܠܐܲܦܸܤܩ̈ܘܿܦܹܐ
ܕܙܲܒܼܢܹܗ ܕܥܵܠܡܵܐ ܗܵܢܑܵܐ: ܕܒܼܿܟܼܠ ܐܲܝܠܹܝܢ ܕܒܼܵܥܹ̇ܝܢ ܗ̄ܘ̣ܵܘ ܠܗܘܿܢ:
ܫܵܠܡ̇ܝܼܢ ܗ̄ܘ̣ܵܘ. ܘܐܵܦ ܠܵܐ ܫܲܚܠܸܦ̣ ܕܡܘܼܬܼܵܐ ܕܪܸܥܝܵܢܹܗ: ܐܸܠܵܐ
ܩܵܘܝܼ ܗ̄ܘ̣ܵܐ ܟܲܕܼ ܝܲܗ̣̄ܒܼ ܢܲܦܫܹܗ ܠܡܸܚܲܫ. ܘܠܵܐ ܐܸܬܼܡܲܠܲܟܼ ܗ̄ܘ̣ܵܐ
ܘܐܵܦ ܠܵܐ ܐܸܬܼܪܲܥܝܼ ܗ̄ܘ̣ܵܐ ܠܡܹܐܡܲܪ: ܕܓܲܒܼܪܵܐ ܗܵܢܵܐ ܗܸܕܼܝܘܿܛܵܐ:
ܘܡ̣ܢ ܚܲܬܿܝܼܬܼܘܼܬܼܵܐ ܗܵܕܹܐ ܪܲܚܝܼܩ ܐ̄ܢܵܐ. ܘܕܼܵܐܦ ܡ̣ܢ ܩܕܝܼܩ ܠܐܘܼܛܸܟܹܐ
ܡܲܠܦܝܼܢ ܗ̣̄ܘܲܝܢ ܘܲܡܦܝܼܤܝܼܢ ܗ̣̄ܘܲܝܢ: ܘܐܲܝܟܼ ܡ̇ܢ ܕܐܸܬܛܦܝܼܤܹܬܼ
ܠܲܩܛܹܐܓܼܪ̈ܵܢܵܘܗܝ ܕܡܸܤܬܿܒܼܪܝܼܢ ܗ̄ܘ̣ܵܘ ܕܡܸܕܸܡ ܝܵܕܥ̇ܝܼܢ ܚܲܝܸܒܼܬܹܗ
ܗ̄ܘܹ̇ܝܬܼ: ܟܲܕܼ ܠܪܸܥܝܵܢܵܐ ܕܤܲܓܿܝܼܐܹܐ ܡܸܬܿܛܦܝܼܣ ܗ̄ܘܹ̇ܝܬܼ ܘܠܵܘ
ܠܢܲܦܫܝ. ܘܗܵܫܵܐ ܐܸܢܗ̤ܘ ܕܲܠܐܟܼܠܘܿܢ ܐܲܟܼܚ̄ܕܼܸܵܐ ܐܸܬܼܚܲܙܝܲܬ̤:
ܘܒܲܚܸܢܬܿܘܿܢ ܕܐܝܼܬܿܝܗܹܝܢ ܗܵܠܹܝܢ ܕܐܘܼܛܸܟܼܝܼܣ ܕܐܵܪܬܵܕܘܿܟܿܤܝܼܵܐ: ܗܵܠܹܝܢ
ܕܟܼܠܟܼܘܿܢ ܡܸܬܿܛܦܝܼܤܝܼܢ ܐܢ̄ܬܿܘܿܢ ܒܗܹܝܢ ܐܵܦ ܐܸܢܵܐ ܡܸܬܿܛܦܝܼܣ ܐ̄ܢܵܐ.
ܘܡܲܪܡܸܐ ܐ̄ܢܵܐ ܥܲܡܟܼܘܿܢ ܐܝܼܕܼܵܐ ܠܡܸܠܒܲܟܼ ܠܗܵܠܹܝܢ ܕܐܵܪܬܵܕܘܿܟܿܤܝܼܵܐ:
ܘܲܒܼܓܲܒܵܐ ܕܐܲܦܸܤܩ̈ܘܿܦܹܐ ܗܵܠܹܝܢ ܕܲܤܢܝܼܩܝܼܢ ܥܲܠ ܫܘܼܒܼܩܵܢܵܐ
ܚܘܼܫܒܘܼܢܵܢܝ ܐܵܦ ܠܝܼ.
ܟܠܗܹܝܢ ܓܹܝܪ ܒܗܵܕܹܐ ܡܸܠܬܼܵܐ ܡܸܫܬܿܪ̈ܝܵܢܡ ܗ̣̄ܘܲܝ̈: ܘܐܵܦ ܚܸܡܬܹܗ
ܕܡܲܠܟܵܐ ܗܵܘ̇ ܪܸܠܒܲܟܼ ܗ̄ܘ̣ܵܐ ܡܹܐܟܲܠ ܩܲܪܨܵܐ: ܘܐܸܬܼܚܲܦܲܛ ܗ̄ܘ̣ܵܐܠ ܥܲܠ
ܛܪܘܼܢܘܼܬܼܵܐ: ܕܡܸܛܠܵܬܼܵܗ̇ ܐܵܦ ܠܤܘܼܢܗܵܕܘܿܣ ܟܲܢܸܫ ܗ̄ܘ̣ܵܐ. ܐܸܠܵܐ
ܐܵܦ ܠܵܐ ܒܩܘܼܤܛܲܢܛܝܼܢܵܦܘܿܠܝܼܣ ܐܸܬܿܛܦܝܼܣ ܗ̄ܘ̣ܵܐ: ܟܲܕܼ ܟܠܗܘܿܢ
pb. 494
ܡܦܝܼܤܝܼܢ ܗ̄ܘ̣ܵܘ ܠܹܗ ܘܡܸܬܼܟܲܫܦܝܼܢ ܕܗܵܕܹܐ ܢܸܤܥܘܿܪ. ܘܠܵܐ ܬܘܼܒܼ
ܒܐܲܦܸܤܘܿܣ ܕܡܸܟܹܝܠ ܩܲܪܝܼܝܼܒܼܵܐ ܗ̄ܘ̣ܵܬܼ ܒܝܼܫܬܼܵܐ: ܟܲܕܼ ܬܠܸܐ ܗ̄ܘ̣ܵܐ
ܠܡܵܘܬܵܐ. ܘܡ̣ܢ ܟܠ ܐ̄ܢܵܫ ܡܸܬܼܐܲܡܪܵܐ ܗ̄ܘ̣ܵܬܼ: ܕܗܵܢܵܐ ܒܲܠܚܘܿܕܼ
ܗܵܘܹ̇ܐ ܠܹܗ ܥܪܘܼܩܝܵܐ ܡ̣ܢ ܡܵܘܬܵܐ: ܟܲܕܼ ܚܵܙܹ̇ܐ ܗ̄ܘ̣ܵܐ ܠܟܼܠܗܘܿܢ
ܗܵܠܹܝܢ ܕܥܵܪܩܝܼܢ ܗ̄ܘ̣ܵܘ ܡܸܢܹܗ ܘܡܸܬܿܬܵܘܤܦܝܼܢ ܥܲܠ ܐܘܼܛܸܟܼܝܼܣ:
ܘܡܸܫܬܵܘܙܒܼܝܼܢ ܗ̄ܘ̣ܵܘ ܡܸܛܠ ܗܵܕܹܐ. ܘܬܲܚܘܝܼܬܼܵܐ ܐܝܼܬܲܝ ܗ̄ܘܹ̇ܝܬܼ
ܠܹܗ ܐܸܢܵܐ: ܕܠܵܐ ܤܦܲܩ̣ ܠܝܼ ܫܪܵܝܵܐ ܕܡ̣ܢ ܐܲܦܸܤܩܘܿܦܘܼܬܼܵܐ
ܕܲܡܕܼܝܼܢ̄ܬܼܵܐ: ܘܠܵܐ ܬܘܼܒܼ ܫܸܬܼܩܵܐ ܕܠܵܐ ܐܸܬܸܿܠ ܠܗܘܿܢ ܥܸܠܬܼܵܐ
ܕܫܘܼܚܠܵܦܵܐ: ܐܸܠܵܐ ܥܸܠܬܼܵܐ ܕܡܸܛܠܵܬܼܵܗ̇ ܒܝܼ̈ܫܵܬܼܵܐ ܚܵܐܹ̇ܫ ܗ̄ܘܹ̇ܝܬܼ:
ܕܟܼܠ ܟܠܹܗ ܡܸܫܬܿܡܲܥ ܗ̄ܘܹ̇ܝܬܼ ܕܒܹܝܬܼ ܚܲܝܹ̈ܐ ܐܝܼܬܲܝ ܗ̄ܘܹ̇ܝܬܼ.
ܟܡܵܐ ܓܹܝܪ ܙܲܒܼܢܵܐ ܕܚܲܝ ܐܲܢ̄ܬܿ: ܠܡܵܘܬܵܐ ܕܡ̣ܢ ܒܝܼ̈ܫܹܐ ܤܲܟܵܐ. ܕܠܵܐ
ܗܵܟܹܝܠ ܬܲܫܠܸܡ ܠܗܲܝܡܵܢܘܼܬܼܵܐ: ܠܲܡܤܲܝܒܵܪܘܼ ܟܠܗܹܝܢ ܗܵܠܹܝܢ
ܩܕܼܵܡ ܥܲܝܢܲܝ̈ܟ ܢܸܗܘ̈ܝܵܢ. ܒܲܪ ܫܵܥܬܹܗ ܓܹܝܪ ܡ̣ܢ ܒܵܬܲܪ ܗܵܝ
ܕܡܸܤܬܲܒܼܪܵܐ ܗܘ̣ܵܬܼ ܩܵܬܼܵܪܵܤܝܼܣ: ܡܸܬܼܚܛܸܦ ܗ̄ܘ̣ܵܐ ܐܲܝܟܼ ܕܡ̣ܢ
ܕܐܹܒܹ̈ܐ ܘܡ̣ܢ ܐܪ̈ܝܵܘܼܬܼܵܐ: ܡ̣ܢ ܩܘܿܡܛܹ̈ܐ ܗܵܢ̇ܘܿܢ ܕܲܩܕܼܵܡܲܝܗܘܿܢ
ܗܘ̤ܵܐ ܫܪܵܝܵܐ ܗܵܢܵܐ. ܘܐܲܝܟܼ ܕܡܸܬܼܢܬܸܦ ܗ̄ܘ̣ܵܐ ܘܡܸܤܬܿܚܸܦ ܗ̄ܘ̣ܵܐ:
ܘܲܐ̄ܚܪܵܢܹܐ ܐ̄ܚܪܵܢܝܵܬܼܵܐ ܐܵܡ̇ܪܝܼܢ ܗ̄ܘ̣ܵܘ ܘܐܵܦ ܤܵܥ̇̄ܪܝܼܢ ܗ̇ܘ̣ܵܘ. ܘܲܡܫܵܘܚܲܕܼ
ܗ̄ܘ̣ܵܐ: ܘܡ̣ܢ ܟܠܗܘܿܢ ܡܸܫܬܿܓܸܫ ܗ̄ܘ̣ܵܐ: ܘܐܸܬܼܟܲܪܝܲܬ̤ ܪܘܼܚܹܗ.
ܘܐܲܫܠ̱ܡܘܼܗܝ ܠܐܸܤܛܪ̈ܵܛܘܼܘܿܛܹܐ: ܘܲܦܩܲܕܼܘ ܐܸܢܘܿܢ ܕܢܸܓܿܪܘܼܢ
ܘܢܲܦܩܘܼܢܵܝܗܝ ܡ̣ܢ ܕܘܼ̈ܟܿܝܵܬܼܵܐ ܩܲܕܼܝܼ̈ܫܬܼܵܐ. ܘܢܲܛܕܘܼܗܝ ܘܐܵܘܬܿܒܼܘܼܗܝ
pb. 495
ܒܹܝܬܼ ܢܛܘܼܪܬܵܐ: ܓܲܒܼܪܵܐ ܕܠܵܐ ܢܵܦܹ̇ܩ ܗ̄ܘ̣ܵܐ ܢܸܫܡܹܗ. ܘܲܩܕܼܵܡ
ܕܢܹܐܬܸܐ ܠܘܵܬܼ ܢܲܦܫܹܗ: ܘܢܸܬܼܢܲܦܲܫ ܘܢܲܥܸܠ ܐܵܐܲܪ ܚܲܝܵܐ ܘܕܲܟܼܝܵܐ:
ܘܢܸܤܲܒܼ ܬܲܪܤܝܼܬܼܵܐ: ܕܢܸܗܘܸܐ ܒܹܗ ܚܲܝܠܵܐ ܩܲܠܝܼܠ: ܐܲܫܠܡܘܼܗܝ
ܠܐܲܪܟܿܘܿܢ. ܘܐܸܬܼܠܲܚܲܡܘ ܠܹܗ: ܕܲܢܫܲܕܪܝܼܘܗܝ ܠܓܼܒܼܪܵܐ ܟܲܕܼ ܡܬܲܒܲܪ.
ܘܠܵܐ ܡܸܫܟܲܚ ܗ̄ܘ̣ܵܐ ܠܲܡܤܲܝܒܵܪܘܼ ܥܘܼܙܵܐ ܕܐܘܼܪܚܵܐ: ܐܲܝܟܼ
ܕܠܲܐܝܢܵܐ ܕܠܵܐ ܝܵܨܹ̇ܦ ܗ̄ܘ̣ܵܐ ܡܲܠܟܵܐ ܥܲܠ ܚܲܝܵܘ̈ܗܝ: ܐܸܠܵܐ ܠܲܡܤܵܡ
ܒܪܹܫܹܗ ܒܵܥܹ̇̄ܐ ܗ̄ܘ̣ܵܐ: ܘܠܵܐ ܗ̄ܘ̣ܵܐ ܠܡܲܚܵܝܘܼܬܹܗ. ܘܗܵܟܲܢܵܐ ܒܲܩܛܝܼܪܵܐ
ܐܲܚܬܼܘܼܗܝ: ܘܝܲܗ̣ܒܿܘܼܗܝ ܠܓܼ̇ܒܼܪܵܐ ܩܵܛܘܿܠܵܐ: ܐܲܝܟܼ ܕܢܵܘܒܿܕܝܼܘܗܝ.
ܘܲܕܼܸܠܵܐ ܪ̈ܲܚܡܝܼܢ ܢܫܲܕܪܝܼܘܗܝ: ܒܡܸܠܬܼܵܐ ܡ̣ܢ ܠܐܲܬܼܪܹܗ: ܒܲܥ̇ܒܼܵܕܼܵܐ
ܕܹܝܢ ܠܐܲܒܼܕܵܢܵܐ. ܘܗܵܟܲܢܵܐ ܟܲܕܼ ܡܸܬܼܢܬܸܦ ܘܡܸܬܼܢܛܓܸܕܼ: ܤܵܦܹ̇ܩ ܗ̄ܘ̣ܵܐ
ܒܲܠܚܘܿܕܼ ܕܲܢܩܵܘܸܐ ܝܵܘ̈ܡܵܬܼܵܐ ܐܲܪܒܿܥܵܐ: ܐܲܝܟܼ ܕܐܵܡ̇ܪܝܼܢ: ܟܲܕܼ ܟܠ ܝܵܘܡܵܐ
ܡܸܫܬܲܪܝܵܐ ܗ̄ܘ̣ܵܬܼ ܢܲܦܫܹܗ ܡ̣ܢ ܦܲܓܼܪܹܗ: ܘܚܲܫܒܿܘܼܗܝ ܠܥܘܼܢܵܕܹܗ
ܠܗܘܿܢ ܥܹܐܕܼܵܐ. ܘܒܼܝܼ̈ܫܵܬܼܵܐ ܠܘܼܩܒܠܲܠ ܟܠܗܘܿܢ ܐܲܠܝܹܢ ܕܫܵܠ̇̄ܡܝܼܢ ܗ̄ܘ̣ܵܘ
ܠܹܗ: ܘܲܒܼ̈ܢܲܝ ܗܲܝܡܵܢܘܼܬܹܗ ܗ̄ܘ̣ܵܘ: ܡܸܬܿܬܵܘ̈ܤܦܵܢ ܗ̣̄ܘܲܝ̈. ܘܬܼܘܼܒܼ
ܒܩܲܕܼܡܵܝܹ̈ܐ ܐܸܢܵܐ: ܒܲܪ̈ܕܼܘܼܦܝܹܐ ܝܲܩܝܼܪܹ̈ܐ ܘܒܲܥܪܘܼܩܝܵܐ: ܘܒܸܼܐܟܿܤܘܼܪ̈ܵܝܼܣ
ܘܲܒܼܦܘܼ̈ܕܹܐ ܕܲܠܟܼܠ ܐܲܬܲܪ ܠܕܲܠܗܘܿܢ ܡܸܬܼܝܼܗܸܒܼ ܗ̄ܘ̣ܵܐ ܫܘܼܠܛܵܢܵܐ:
ܠܡܸܥܒܲܕ ܠܐܲܝܠܹܝܢ ܕܗܵܠܹܝܢ ܡܸܬܼܪܲܥܹܝܢ. ܕܗܸܢܹܝܢ ܟܲܕܼ ܗܸܢܹܝܢ
ܟܹܐܡܲܬܼ ܡܸܪܪܲܥܸܐ ܗ̄ܘܹ̇ܝܬܼ ܐܸܬܵܐ ܘܲܦܠܵܘܝܵܢܘܿܣ: ܘܲܠܥܲܡܵܐ ܐܸܬܼܝܼܗܸܒܼ
ܗ̄ܘ̣ܵܐ ܫܘܼܠܛܵܢܵܐ ܠܡܸܓܲܪ ܘܲܠܡܸܚܛܲܦ ܘܲܠܡܲܫܠܵܡܘܼ. ܥܲܒܼ̈ܕܹܐ
pb. 496
ܠܡܵܪ̈ܲܝܗܘܿܢ ܒܗܹܝܢ ܒܗܵܠܹܝܢ ܡܩܲܛܪܓܼܝܼܢ ܗ̄ܘ̣ܵܘ: ܘܡ̣ܢ ܦܘܼܩܵܕܵܢܵܐ
ܡܸܬܼܝܼܗܸܒܼ ܗ̄ܘ̣ܵܐ ܠܗܘܿܢ ܫܘܼܠܛܵܢܵܐ. ܘܟܼܠܵܗ̇ ܚܦܝܼܛܘܼܬܼܵܐ ܐܝܼܬܹܝܗ̇
ܗ̄ܘ̣ܵܬܼ: ܕܢܲܤܛܘܿܢ ܢܲܦܫܗܘܿܢ ܕܝܼܠܗܘܿܢ: ܐܵܦ ܠܢܲܦ̈ܫܬܼܵܐ ܕܪ̈ܵܢܝܵܢ
ܐܵܘ ܡܸܬܼܚܲܫ̈ܒܵܢ ܕܠܵܐ ܡܵܝܘܿܬܼܵܐ ܗ̄ܘ̣ ܐܲܠܵܗܵܐ ܡܸܠܬܼܵܐ. ܘܐܲܝܠܹܝܢ ܕܡ̣ܢ
ܗܵܠܹܝܢ ܪ̈ܲܫܝܼܥܵܢ ܗ̣̄ܘܲܝ̈ ܐܵܡ̇ܪܝܼܢ ܗ̄ܘ̣ܵܘ: ܐܲܝܟܲܢܵܐ ܕܢܹܐܠܨܘܼܢ ܠܡܹܐܡܲܪ:
ܕܕܼܝܼܠܸܗ ܗ̣̄ܝ ܐܘܼܤܝܼܵܐ ܕܐܲܠܵܗܵܐ ܡܸܠܬܼܵܐ ܕܡܝܼܬܲܬ̤. ܘܝܲܗ̣̄ܒܼ ܗ̄ܘ̣ܵܐ
ܠܗܘܿܢ ܫܘܼܠܛܵܢܵܐ ܠܘܼܩܒܲܠ ܟܠܢܵܫ: ܟܲܕܼ ܠܵܐ ܡܗܲܝܡܢܝܼܢ ܗ̄ܘ̣ܵܘ
ܠܪܹ̈ܫܵܢܹܐ: ܘܠܵܐ ܠܲܐܦܸܤܩ̈ܘܿܦܹܐ: ܘܠܵܐ ܠܥܵܠܡܵܐ ܟܠܹܗ: ܘܠܵܐ
ܠܲܒܼܥܸܠܕܒܼܵܒܹ̈ܐ: ܘܠܵܐ ܠܥܲܒܼ̈ܕܹܐ: ܐܸܠܵܐ ܐܲܝܟܼ ܡ̇ܢ ܕܲܒܼܨܝܼܪܝܼܢ ܡ̣ܢ ܪܸܓܲܬܼܗܘܿܢ
ܘܲܚܦܝܼܛܘܼܬܼܗܘܿܢ: ܕܥܲܠ ܗܵܢ̇ܘܿܢ ܕܐܵܡ̇ܪܝܼܢ ܗ̄ܘ̣ܵܘ ܠܵܐ ܡܵܝܘܿܬܼܵܐ
ܘܠܵܐ ܚܵܫܘܿܫܵܐ ܠܐܲܠܵܗܵܐ ܡܸܠܬܼܵܐ: ܠܗܵܠܹܝܢ ܐܲܩܝܼܡܘ ܗ̄ܘ̣ܵܘ ܠܡܸܒܼܥܵܐ
ܠܐܲܝܠܹܝܢ ܕܥܵܪܩܝܼܢ ܗ̄ܘ̣ܵܘ: ܠܗܵܢ̇ܘܿܢ ܕܲܠܡܸܒܼܨܵܐ ܘܠܲܡܥܲܩܵܒܼܘܼ
ܝܲܬܿܝܼܪ ܚܦܝܼܛܝܼܢ ܗ̄ܘ̣ܵܘ. ܘܟܼܠܗܹܝܢ ܕܕܸܚܠܬܼܵܐ ܐܲܟܪܸܟܼ ܐܸܢܘܿܢ.
ܘܤܲܒܼܪܵܐ ܘܤܘܟܵܝܵܐ ܕܚܲܫܹ̈ܐ ܒܝܼܫ ܗ̄ܘ̣ܵܐ ܠܗܘܿܢ ܠܗܘܿܢ ܡܸܢܗܘܿܢ ܕܚܲܫܹ̈ܐ:
ܘܓܲܠܝܵܐܝܼܬܼ ܐܝܼܬܼܵܘܗܝ ܗ̄ܘ̣ܵܐ ܬܲܟܼܬܿܘܼܫܵܐ ܦܸܪܥܘܿܢܵܝܵܐ ܕܠܘܼܩܒܲܠ
ܐܲܠܵܗܵܐ.
pb. 497
ܡܸܢܝܵܢܵܐ ܕܲܡܢܵܬܼܵܐ ܡܸܕܸܡ ܕܒܼܝܼ̈ܫܵܬܼܵܐ ܕܲܗ̤ܘܲܝ̈ ܒܥܵܡܲܪܬܵܐ: ܡܸܛܠ
ܥܒܼܘܼܪܝܵܐ ܕܥܲܠ ܗܲܝܡܵܢܘܼܬܼܵܐ ܫܲܪܝܼܪܬܵܐ ܕܐܲܠܵܗܵܐ ܠܵܐ ܚܵܫܘܿܫܵܐ: ܥܲܡ
ܢܒܝܼܘܼܬܼܵܐ.
ܡ̣ܢ ܕܹܝܢ ܕܗܵܠܹܝܢ ܫܪܝܼܪ ܗ̣̄ܘܲܝ̈ ܕܢܸܗ̈ܝܵܢ: ܒܗܲܝܡܵܢܘܼܬܼܵܐ
ܘܒܲܕܼܪܵܫܵܐ ܕܠܘܼܩܒܲܠ ܐܲܠܵܗܵܐ ܡܸܠܬܼܵܐ: ܕܠܵܐ ܐܝܼܬܼܵܘܗܝ ܠܵܐ ܡܵܝܘܿܬܼܵܐ
ܘܠܵܐ ܚܵܫܘܿܫܵܐ: ܡܸܟܹܝܠ ܐܲܝܟܼ ܡ̇ܢ ܕܠܵܐ ܡܸܬܼܒܿܛܸܠ ܠܹܗ ܠܐܲܠܵܗܵܐ
ܠܵܐ ܡܵܝܘܿܬܼܵܐ ܥܠܲܝܗܘܿܢ. ܠܗܵܡ̇ܘܿܢ ܓܹܝܪ ܕܠܵܐ ܡܸܟܹܝܠ ܐܝܼܬܼܵܘܗܝ ܗ̄ܘ̣ܵܐ
ܐܲܠܵܗܵܐ ܠܵܐ ܡܸܝܘܿܬܼܵܐ: ܫܲܪܝܼܘ ܗ̄ܘ̣ܵܘ ܠܡܸܬܼܗܲܓܵܡܘܼ ܘܲܡܠܡܸܫܬܲܥܒܵܕܼܘܼ.
ܐ̄ܚܪܵܢܝܵܐܝܼܬܼ: ܘܲܐ̄ܚܢܝܵܐܝܼܬܼ. ܘܡܸܢܗܘܿܢ: ܒܟܼܠܗܹܝܢ. ܘܠܲܝܬܿ ܗ̄ܘ̣ܵܐ
ܡ̇ܢ ܕܡܲܗܦܸܟܼ ܠܹܗ ܠܪܘܼܓܼܙܵܐ.
ܐܲܝܠܹܝܢ ܕܲܗ̤ܘܲܝ̈ ܒܙܵܘ̈ܥܹܐ ܘܒܲܩܪ̈ܵܒܹܐ. ܐ. ܒܚܘܼ̈ܒܵܠܹܐ:
ܘܲܒܼܟܲܦܢܹ̈ܐ: ܘܒܲܓܼܠܝܙܘܼܬܼ ܡܸܛܪܹ̈ܐ: ܘܲܒܼܒܲܪܕܼܵܐ: ܘܲܒܼܫܘܼܠܗܵܒܼܵܐ:
ܘܲܒܼܙܵܘ̈ܥܹܐ ܕܡܝܼܪܹ̈ܐ: ܘܒܲܫܒܼܝܼܬܼܵܐ: ܘܲܒܼܕܸܚܠܬܼܵܐ: ܘܒܲܪܘܼܩܝܵܐ:
ܘܒܼܟܼܠܗܹܝܢ ܒܝܼ̈ܫܵܬܼܵܐ ܐܸܬܼܡܸܠܘ ܗ̄ܘ̣ܵܘ: ܘܠܵܐ ܐܸܬܼ݂ܵܘ ܠܲܪܓܸܫܬܼܵܐ
ܕܥܸܠܬܼܵܐ ܕܒܼܝܼ̈ܫܬܼܵܐ ܕܐܲܝܟܼ ܗܵܠܹܝܢ. ܐܸܠܵܐ ܝܲܬܿܝܼܪ ܡܸܫܬܲܠܗܒܼܝܼܢ ܗ̄ܘ̣ܵܘ
ܘܡܸܬܼܡܲܪܡܪܝܼܢ ܗ̄ܘ̣ܵܘ: ܠܘܼܩܒܲܠ ܐܲܝܢܵܐ ܕܡܲܡܪܲܚ ܗ̄ܘ̣ܵܐ ܕܢܹܐܡܪܝܼܘܗܝ
ܠܐܵܠܵܗܵܠܐ ܡܸܠܬܼܵܐ ܠܵܐ ܚܵܫܘܿܫܵܐ: ܐܲܝܟܼ ܡ̇ܢ ܕܡܸܛܠ ܕܐܵܡ̇ܪܝܼܢ ܠܹܗ
ܠܐܲܠܵܗܵܐ ܡܸܠܬܼܵܐ ܚܵܫܘܿܫܵܐ ܘܠܵܐ ܡܵܝܘܿܬܼܵܐ: ܚܵܫ̇ܝܼܢ ܒܝܼ̈ܫܵܬܼܵܐ ܗܵܠܹܝܢ:
ܘܠܲܝܬܿ ܗ̄ܘ̣ܵܐ ܒܹܝܬܼ ܡܲܥܪܩܵܐ.
pb. 498
ܒ. ܐܲܙܝܼܥ ܗ̄ܘ̣ܵܐ ܐܸܢܘܿܢ ܙܵܘܥܵܐ ܥܦܝܼܦܵܐ ܕܡ̣ܢ ܒܲܪܒܿܪ̈ܵܝܹܐ
ܘܲܤܩ̈ܘܼܬܼܵܝܹܐ: ܕܲܠܟܼܠܢܵܫ ܡܵܘܒܿܕܝܼܢ ܗ̄ܘ̣ܵܘ ܘܫܵܒܹ̇ܝܢ ܗ̄ܘ̣ܵܘ: ܘܠܲܝܬܿ
ܗ̄ܘ̣ܵܐ ܐܵܦ ܠܵܐ ܚܲܕܼ ܤܲܒܼܪܵܐ ܕܫܘܼܘܙܵܒܼܵܐ. ܘܠܵܐ ܥܕܲܟܹܝܠ ܐܸܤܬܲܟܲܠܘ:
ܕܗܵܕܹܐ ܟ̱ܠܵܗ̇ ܠܵܐ ܐܝܼܬܝܗ̇ ܐ̄ܢܵܫܵܝܬܼܵܐ ܫܚܝܼܡܵܐܝܼܬܼ.
ܓ. ܘܐܲܙܝܼܥ ܗ̄ܘ̣ܵܐ ܥܲܡܹܗ ܐܵܦ ܠܐܲܪܥܵܐ ܒܙܵܘ̈ܥܹܐ: ܕܠܲܝܬܿ
ܗ̄ܘ̣ܵܐ ܕܲܥܗܝܼܕܼ ܗ̄ܘ̣ܵܐ ܐܲܟܼܘܵܬܼܗܘܿܢ. ܗܵܟܲܢܵܐ ܓܹܝܪ ܡܸܬܿܬܿܙܝܼܥܵܐ ܗ̣̄ܘܼܵܬܼ:
ܕܐܲܝܟܼ ܗܵܘ̇ ܕܗܵܐ ܡܸܬܼܗܲܦܟܵܐ ܗ̄ܘ̣ܵܬܼ ܘܡܸܬܼܦܲܚܬܼܵܐ ܗ̄ܘ̣ܵܬܼ: ܐܵܘ ܡ̣ܢ
ܟܠ ܦܪܘܿܣ ܐܵܒܼܕܵܐ ܗ̄ܘ̣ܵܬܼ. ܟܲܕܼ ܕܹܝܢ ܬܘܼܒܼ ܫܵܬܼܩܵܐ ܗ̄ܘ̣ܵܬܼ ܘܬܼܵܩ̇ܢܵܐ
ܗ̣̄ܘܵܬܼ ܐܲܝܟܼ ܕܡ̣ܢ ܩܕܝܼܡ: ܕܵܡ̇ܝܵܐ ܗ̄ܘ̣ܵܬܼ ܐܲܝܟܼ ܐܲܝܕܵܐ ܕܐ̄ܢܵܫ ܠܵܒܹ̇ܟܼ ܗ̄ܘ̣ܵܐ
ܠܵܗ̇ ܠܒܲܪ ܡ̣ܢ ܟܝܵܢܵܐ. ܗܵܘ̇ ܡ̇ܢ ܕܲܡܙܝܼܥ ܗ̄ܘ̣ܵܐ ܠܵܗ̇: ܘܥܲܡܵܗ̇
ܡܸܬܿܬܿܙܝܼܥ ܗ̄ܘ̣ܵܐ. ܒܲܠܚܘܿܕܼ ܕܠܵܐ ܗ̄ܘ̣ܵܐ ܒܥܲܝܢܹ̈ܐ ܡܚܵܘܝܵܐ ܗ̄ܘ̣ܵܬܼ
ܠܵܗ̇: ܠܙܵܘܥܵܐ ܕܲܡܙܝܼܥܵܢܵܗ̇ ܘܲܠܩܘܼܝܵܡܵܐ ܕܲܡܩܝܼܡܵܢܵܗ̇: ܘܠܲܪܓܸܫܬܼܵܐ
ܡܲܝܬܵܐ ܗ̄ܘ̣ܵܬܼ ܠܗܘܿܢ ܠܟܼܠܗܘܿܢ ܒܢܲܝ̈ܢܵܫܵܐ. ܘܲܒܼܚܲܕܼ ܪܲܒܿܘܼܬܼܵܐ
ܕܟܼܠܗܹܝܢ: ܐܝܼܬܹܝܗ̇ ܗ̄ܘ̣ܵܬܼ ܡܫܵܘܕܥܵܢܝܼܬܼܵܐ ܠܪܸ̈ܥܝܵܢܹܐ ܝܲܬܿܝܼܪ ܡ̣ܢ
ܒܲܪܬܼ ܩܵܠܵܐ.
ܕ. ܩ̣ܪܸܒܼܘ ܗ̄ܘ̣ܵܘ ܓܹܝܪ ܒܲܪܒܿܪܵܝܹܐ: ܘܲܡܚܵܘ ܗ̄ܘ̣ܵܘ ܠܪ̈ܗܘܿܡܵܝܹܐ.
ܘܲܠܟܼܠܹܗ ܦܤܵܩ ܤܲܒܼܪܵܐ ܐܲܝܬܿܝܼܘ ܐܸܢܘܿܢ.
ܗ. ܒܩܘܼܤܛܲܢܛܝܼܢܵܦܘܿܠܝܼܣ ܕܹܝܢ ܡܕܝܼܢܬܼܵܐ ܕܡܲܠܟܿܘܼܬܼܵܐ:
ܐܸܬܼܦܤܸܩܘ ܗ̄ܘ̣ܵܘ ܡܓܼܕ̈ܠܹܐ ܕܫܘܼܪܵܐ ܕܲܒܼܢܹܝܢ ܗ̄ܘ̣ܵܘ ܥܲܡܹܗ. ܘܐܲܪܦܝܼܘ
ܗ̄ܘ̣ܵܘ ܠܫܘܼܪܵܐ: ܟܲܕܼ ܡܸܕܸܡ ܠܵܐ ܚܲܫ̣ ܗ̄ܘ̣ܵܐ ܡ̣ܢ ܐܲܝܠܹܝܢ ܕܐܸܬܿܬܿܙܝܼܥ
ܡܸܢܸܗܘܿܢ. ܘܦܵܫ̣ܘ ܗ̄ܘ̣ܵܘ ܐܲܝܟܼ ܐܲܝܠܹܝܢ ܕܠܵܐ ܐܸܬܿܬܿܙܝܼܥܘ: ܟܲܕܼ ܠܲܝܬܿ
pb. 499
ܗ̄ܘ̣ܵܐ ܠܗܘܿܢ ܐܵܦ ܠܵܐ ܚܲܕܼ ܫܘܼܘܕܵܥܵܐ ܕܙܵܘܥܵܐ. ܘܡܸܢܗܹܝܢ ܕܕܼܘܼ̈ܟܿܝܵܬܼܵܐ
ܡ̣ܢ ܡܨܲܥܬܹܗ ܕܒܸܢܝܵܢܵܐ: ܫܘܲܪ ܗ̣̄ܘܲܝ̈ ܟܹܐܦܹ̈ܐ ܡ̣ܢ ܟܠܹܗ ܒܸܢܝܵܢܵܐ
ܘܡ̣ܢ ܚܕܼܵܪܵܘܗܝ ܕܒܸܢܝܵܢܵܐ: ܐܵܦ ܟܸܠܢܵܫ ܐܸܬܿܬܿܙܝܼܥ ܗ̄ܘ̣ܵܐ.
ܘ. ܘܲܐ̄ܚܪ̈ܵܢܝܵܬܼܵܐ ܐ̄ܚܪܵܢܝܵܐܝܼܬܼ ܒܓܲܒܵܐ ܐ̄ܚܪܹܢܵܐ ܕܲܡܕܼܝܼܢܬܼܵܐ ܡܸܬܼܚܵܘ̈ܝܵܢ
ܗ̣̄ܘܲܝ̈ ܓܲܠܝܵܐܝܼܬܼ: ܘܠܵܐ ܗ̄ܘ̣ܵܐ ܒܙܵܘܥܵܐ ܕܓܼܵܘܵܐ ܡܸܬܿܬܿܙܝܼܥ̈ܢ ܗ̣̄ܘܲܝ̈:
ܐܸܠܵܐ ܡܲܟܿܤܵܢܵܐܝܼܬܼ. ܕܠܵܐ ܗ̄ܘ̣ܵܐ ܡܵܝܘܿܬܼܵܐ ܐܝܼܬܼܵܘܗܝ ܗܵܘ̇ ܕܥܵܒܹ̇ܕܼ
ܠܗܵܠܹܝܢ: ܐܝܼܬܼ ܠܹܗ ܫܘܼܠܛܵܢܵܐ ܥܠܲܝܗܹܝܢ.
ܙ. ܒܦ̇ܘܿܪܘܿܣ ܕܬܹܐܵܕܵܤܝܼܣ ܪܲܒܵܐ. ܐܵܦ ܓܹܝܪ ܟܹܐܦܹ̈ܐ ܕܐܲܤܝܼܪܵܢ
ܗ̣̄ܘܲܝ̈ ܒܦܲܪܙܠܵܐ ܘܒܲܐܒܼܵܪܵܐ: ܐܸܫܬܿܡܸܛ ܗ̣̄ܘܲܝ̈. ܟܲܕܼ ܡܸܬܼܝܼܒ̈ܠܵܢ
ܗ̣̄ܘܲܝ̈ ܒܓܼܵܘ ܐܵܐܲܪ: ܘܢܘܼܓܼܪܵܐ ܡܩܵܘ̈ܝܵܢ ܗ̣̄ܘܲܝ̈ ܟܲܕܼ ܫܵܒ̈ܵܢ: ܘܗܵܝܕܹܝܢ
ܢܵܦ̈ܠܵܢ ܗ̣̄ܘܲܝ̈. ܘܟܲܕܼ ܢܵܦܩ̇ܝܼܢ ܗ̄ܘ̣ܵܘ ܗܵܢ̇ܘܿܢ ܕܲܥܬܼܝܼܕܝܼܢ ܗ̄ܘ̣ܵܘ
ܠܲܡܩܲܒܵܠܘܼܬܼܗܹܝܢ: ܒܲܪ ܫܵܥܬܹܗ ܢܵܦ̈ܠܵܢ ܗ̣̄ܘܲܝ̈. ܘܪܸܒܿܘܿ ܐ̄ܚܪ̈ܵܢܝܵܬܼܵܐ
ܤܲܓܿܝܼ̈ܐܵܬܼܵܐ: ܕܒܲܐܬܼܪ̈ܵܘܼܬܼܵܐ ܐ̄ܚܪ̈ܵܢܹܐ ܗܵܘ̈ܝܵܢ ܗ̣̄ܘܲܝ̈: ܘܡܸܫܬܲܡ̈ܥܵܢ
ܗ̣̄ܘܲܝ̈: ܘܪܸܥܠܵܐ ܘܕܸܚܠܬܼܵܐ ܡܲܠ̈ܝܵܢ ܗ̣̄ܘܲܝ̈: ܐܲܝܟܼ ܕܢܲܚ̈ܬܿܝܵܢ ܐܸܢܘܿܢ
ܟܲܕܼ ܠܵܐ ܨܵܒܹ̇ܝܢ ܠܒܼܵܥܘܼܬܼܵܐ: ܘܲܠܡܸܬܼܟܲܫܵܦܘܼ ܡ̣ܢ ܐܲܠܵܗܵܐ ܕܢܸܬܼܪܲܚܲܡ
ܥܠܲܝܗܘܿܢ. ܒܪܲܡ ܠܵܐ ܐܲܝܟܼ ܕܗ̤ܘ ܨܵܒܹ̇ܐ ܗ̄ܘ̣ܵܐ: ܐ̄ܚܪ̈ܵܢܹܐ ܓܹܝܪ
ܒܲܐ̄ܚܪ̈ܵܢܝܵܬܼܵܐ ܐܲܝܟܼ ܕܐܝܼܬܼ ܗ̄ܘ̣ܵܐ ܠܗܘܿܢ ܚܘܼܫܵܒܼܵܐ ܡܸܬܼܟܲܫܦܝܼܢ ܗ̄ܘ̣ܵܘ:
ܘܲܡܨܲܠܹܝܢ ܗ̄ܘ̣ܵܘ ܠܹܗ ܒܐܲܝܠܹܝܢ ܕܐܲܚܕܝܼܢ ܗ̄ܘ̣ܵܘ. ܘܗܵܢܵܐ: ܐܲܠܵܗܵܐ
ܕܚܲܫ̣ ܘܡܝܼܬܼ ܚܠܵܦܲܝܢ ܐܸܡܲ݁ܪ ܗ̄ܘ̣ܵܐ ܘܡܸܬܼܟܲܫܲܦ ܗ̄ܘ̣ܵܐ: ܘܲܐ̄̈ܚܪ̈ܵܢܹܐ
ܕܹܝܢ ܐ̄ܚܪ̈ܵܢܝܵܐܝܼܬܼ: ܐܲܝܟܼ ܡ̇ܢ ܕܲܡܚܲܩܪܵܐ ܗ̄ܘ̣ܵܬܼ ܥܠܲܝܗܘܿܢ ܗܵܕܹܐ
ܐܵܡ̇ܪܝܼܢ ܗ̄ܘ̣ܵܘ. ܒܪܘܼܓܼܙܵܐ ܓܹܝܪ ܐܝܼܬܲܝܗܘܿܢ ܗ̄ܘ̣ܵܘ ܘܲܒܼܚܸܡܬܼܵܐ: ܠܘܼܩܒܲܠ
pb. 500
ܐܲܝܠܹܝܢ ܕܡܲܡܪܚܝܼܢ ܗ̄ܘ̣ܵܘ ܠܡܹܐܡܲܪ ܠܵܐ ܡܵܝܘܿܬܼܵܐ ܘܠܵܐ ܚܵܫܘܿܫܵܐ.
ܘܡܸܛܠ ܗܵܢܵܐ ܝܲܬܿܝܼܪܵܐܝܼܬܼ ܡܸܨܛܲܝ̈ܒܵܢ ܗ̣̄ܘܲܝ̈ ܠܗܘܿܢ ܥܵܩ̈ܬܼܵܐ: ܘܕܸܚ̈ܠܵܬܼܵܐ
ܕܝܲܬܿܝܼܪ ܕܚܝܼܠܝܼܢ ܗ̄ܘ̣ܵܘ: ܟܲܕܼ ܡܸܬܼܡܲܬܼ̈ܚܵܢ ܗ̣̄ܘܲܝ̈ ܥܠܲܝܗܘܿܢ
ܒܝܼ̈ܫܬܼܗܘܿܢ: ܐܲܝܟܲܢܵܐ ܕܠܵܐ ܢܸܗܘܸܐ ܠܗܘܿܢ ܙܲܒܼܢܵܐ ܕܢܸܤܬܲܦܩܘܼܢ:
ܕܢܸܥܒܿܕܼܘܼܢ ܒܝܼܫܵܐܝܼܬܼ ܠܕܼܵܚ̈ܠܲܝ ܐܲܠܵܗܵܐ ܕܐܝܼܬܼ ܗ̄ܘ̣ܵܘ ܒܗܘܿܢ.
ܥܲܠ ܩܲܕܝܼܫܵܐ ܐܵܠܲܗܵܐ. ܟܲܕܼ ܨܵܒܹ̇ܐ ܗ̄ܘ̣ܵܐ ܕܹܝܢ ܕܢܲܝܬܸܿܐ ܐܸܢܘܿܢ
ܠܲܪܓܸܫܬܼܵܐ ܕܓܼܘܼܕܵܦܗܘܿܢ: ܘܕܲܢܫܲܢܘܿܢ ܡܸܢܹܗ. ܡܸܛܠ ܕܗܸܢܘܿܢ
ܠܵܐ ܐܸܬܼ݂ܵܘ ܠܗܵܕܹܐ: ܗ̤ܘ ܐܲܠܵܗܵܐ ܝܲܗ̣̄ܒܼ ܠܗܘܿܢ ܙܢܵܐ ܕܬܲܚܢܲܢܬܼܵܐ
ܠܵܐ ܓܹܝܪ ܐܸܫܬܿܟܲܚ ܗ̄ܘ̣ܵܐ ܗܵܘ̇ ܕܗܵܕܹܐ ܤܵܥܲܪ̇ ܗ̄ܘ̣ܵܐ: ܕܢܹܐܡܪܘܼܢ:
ܩܲܕܝܼܫܵܐ ܐܲܠܵܗܵܐ: ܩܲܕܝܼܫܵܐ ܚܲܝܠܬܼܵܢܵܐ: ܩܲܕܝܼܫܵܐ ܠܵܐ ܡܵܝܘܿܬܼܵܐ: ܐܸܬܼܪܲܚܲܡ
ܥܠܲܝܢ. ܘܲܠܗܵܕܹܐ: ܟܠܢܵܫ ܐܸܫܬܿܘܝܼ ܗ̄ܘ̣ܵܐ ܒܚܲܕܼ ܪܸܥܝܵܢܵܐ. ܘܲܫܒܲܩ̣ܘ
ܗ̄ܘ̣ܵܘ ܠܗܵܠܹܝܢ ܕܲܪܓܼܝܼܓܼܝܼܢ ܗ̄ܘ̣ܵܘ ܠܗܹܝܢ: ܗܵܠܹܝܢ ܕܠܵܐ ܪܓܼܝܼܓܼ
ܗ̄ܘ̣ܵܐ ܒܗܹܝܢ ܐܲܠܵܗܵܐ: ܘܲܠܗܵܕܹܐ ܟܲܬܼܒܿܘܼܗ̇ ܗ̄ܘ̣ܵܘ ܒܒܼܵܤܹܠܝܼܩܹܐ:
ܒܕܹܡܘܿܤܝܼܵܐ: ܘܤܵܡ̣ܘܼܗ̇ ܗܵܟܲܢܵܐ: ܬܸܫܬܿܘܿܚܬܼܵܐ ܘܩܘܼܒܵܠ ܛܲܝܒܿܘܼܬܼܵܐ:
ܠܩܲܕܼܝܼܫܵܐ ܘܲܠܠܵܐ ܡܵܝܘܿܬܼܵܐ: ܦܵܪܘܿܩܵܐ ܕܟܼܠ ܐܲܠܵܗܵܐ. ܘܩܲܠܝܼܠ
ܠܩܲܟܼܘ ܗ̄ܘ̣ܵܘ: ܘܐܵܘܕܝܼܘ ܠܐܲܠܵܗܵܐ ܠܵܐ ܡܵܝܘܿܬܼܵܐ. ܘܲܒܼܗܵܗ̇ ܡܵܐ
ܕܲܠܒܲܟܼܘ ܠܵܐ ܟܵܦܪܝܼܢ ܗ̄ܘ̣ܵܘ: ܐܸܠܵܐ ܡܸܙܕܲܡܪܵܐ ܗ̄ܘ̣ܬܼ ܗܵܕܹܐ ܒܟܼܠ
ܕܘܼܟܼ. ܡ̣ܢ ܕܹܝܢ ܕܲܫܠܝܼ ܗ̄ܘ̣ܵܐ ܙܵܘܥܵܐ: ܘܩܲܠܝܼܠ ܩܪ̈ܵܒܹܐ ܗܵܘܹ̇ܝܢ
ܗ̄ܘ̣ܵܘ: ܬܘܼܒܼ ܐܸܬܿܬܿܥܝܼܪܘ ܘܐܸܬܼܓܠܝܼܘ ܠܘܼܩܒܲܠ ܐܲܠܵܗܵܐ. ܘܲܠܬܼܵܘܕܝܼܬܼܵܐ
ܕܲܠܘܵܬܼ ܐܲܠܵܗܵܐ ܡܛܲܫܹܝܢ ܗ̄ܘ̣ܵܘ: ܐܲܝܟܼ ܐܲܝܠܹܝܢ ܕܠܵܐ ܥܗܝܼܕܝܼܢ ܗ̄ܘ̣ܵܘ
ܠܗܵܝ̇ ܕܩܲܕܼܝܼܫܵܐ ܐܲܠܵܗܵܐ ܘܚܲܝܠܬܼܵܢܵܐ ܘܠܵܐ ܡܵܝܘܿܬܼܵܐ: ܕܡܸܫܟܲܚ ܗ̄ܘ̣ܵܐ
pb. 501
ܩܪ̈ܵܒܹܐ ܠܲܡܫܲܝܵܢܘܼ ܐܵܦ ܒܸܠܵܥܵܕܼ ܚܲܝܠܵܐ ܐ̄ܢܵܫܝܵܐ. ܕܒܹܗ ܐܝܼܬܹܝܗ̇ ܗ̄ܘ̣ܵܬܼ
ܚܲܝܠܬܼܵܢܘܼܬܹܗ: ܘܠܵܐ ܗ̄ܘ̣ܵܐ ܡ̣ܢ ܥܘܼܬܵܕܼܵܐ ܕܲܠܒܲܪ ܡܸܢܹܗ. ܘܲܢܤܲܒ̣ܘ
ܢܸܤܝܵܢܵܗ̇ ܕܗܵܕܹܐ ܒܲܥܒܼܵܕܼܵܐ: ܗܵܫܵܐ ܡ̇ܢ ܐܵܦ ܡܸܢܵܗ̇ ܕܒܼܵܥܘܼܬܼܵܐ
ܫܠܝܼܘ ܗ̄ܘ̣ܵܘ.
ܡ̣ܢ ܩܕܼܵܡ ܩܲܠܝܼܠ ܕܹܝܢ ܩܕܼܸܵܡ ܩܪܵܒܼܵܐ ܕܝܼܠܗܘܿܢ ܕܒܲܪܒܿܪ̈ܵܝܹܐ
ܗܵܠܹܝܢ: ܗ̤ܘ ܨܠܝܼܒܼܵܐ ܒܲܠܚܘܿܕܼ ܡܲܠܸܦ ܗ̄ܘ̣ܵܐ ܠܗܘܿܢ: ܘܡܲܝܬܸܐ
ܗ̄ܘ̣ܵܐ ܠܗܘܿܢ ܠܲܡܗܲܝܡܵܢܘܼ ܒܐܲܠܵܗܵܐ: ܝܲܬܿܝܼܪܵܐܝܼܬܼ ܗܵܘ̇ ܕܒܸܠܥܕܼ
ܙܲܝܢܵܐ ܤܚܲܦ̣ ܠܲܩܪ̈ܲܒܼܬܼܵܢܹܐ. ܡ̣ܢ ܩܕܼܵܡ ܕܹܝܢ ܗܵܕܹܐ: ܟܲܕܼ ܒܚܲܝܠܵܐ
ܐܸܬܿܬܿܙܝܼܥ ܗ̄ܘ̣ܵܐ ܒܲܪܢܵܫܵܝܵܐ: ܒܦܲܩ̈ܥܹܐ ܘܲܒܼܒܲܪ̈ܩܹܐ ܐܸܬܼܪܡܝܼ ܗ̄ܘ̣ܵܐ.
ܡܸܛܠ ܓܹܝܪ ܕܥܲܡܵܐ ܕܲܤܩܘܼܬܼܵܝܹ̈ܐ ܪܲܒܿ ܗ̄ܘ̣ܵܐ ܐܵܦ ܤܲܓܿܝܼ: ܘܡ̣ܢ
ܩܕܝܼܡ ܒܥܲܡܡܹ̈ܐ ܘܲܒܼܡܲܠܟ̈ܘܵܬܼܵܐ ܡܦܲܠܲܓܼ ܗ̄ܘ̣ܵܐ: ܘܐܲܝܟܼ ܓܲܝܵܤܹ̈ܐ
ܥܒܼܝܼܕܝܼܢ ܗ̄ܘ̣ܵܘ: ܠܵܐ ܤܲܓܿܝܼ ܡܲܒܼܐܫܝܼܢ ܗ̄ܘ̣ܵܘ: ܐܸܠܵܐ ܐܸܢ ܐܲܝܟܼ
ܕܲܒܼܚܵܛܘܿܦܘܼܬܼܵܐ ܘܒܲܡܤܲܪܗܒܼܘܼܬܼܵܐ ܒܲܠܚܘܿܕܼ. ܐ̄ܚܪܵܝܑܬܼ ܕܹܝܢ: ܥ̣ܒܲܕܼܘ
ܠܗܘܿܢ ܡܲܠܟܿܘܼܬܼܵܐ. ܘܡ̣ܢ ܕܲܗܘ̤ܵܘ ܒܡܲܠܟܿܘܼܬܼܵܐ: ܐܸܬܼܥܲܫܲܢܘ ܤܲܓܿܝܼ:
ܐܲܝܟܲܢܵܐ ܕܢܸܥܒܿܪܘܼܢ ܒܪܲܒܿܘܼܬܼܗܘܿܢ ܠܟܼܠܹܗ ܥܘܼܬܵܕܼܵܐ ܕܪ̈ܗܘܿܡܵܝܹܐ.
ܘܚܵܘܝܼ ܐܸܢܘܿܢ ܐܲܠܵܗܵܐ ܕܠܵܐ ܐܸܬܼܡܚܸܠ: ܗܵܘ̇ ܕܡ̣ܢ ܟܲܕܼܘ̣ ܫܠܸܡ̣ܘ
ܗ̄ܘ̣ܵܘ ܥܠܵܘܗܝ ܘܥܲܒܼܕܘܼܗܝ ܬܚܹܝܬܼ ܚܲܫܵܐ ܘܲܬܼܚܹܝܬܼ ܡܲܘܬܵܐ.
ܘܐܲܥܫܸܢܘ ܗ̄ܘ̣ܵܘ ܪ̈ܕܘܼܦܝܹܐ ܠܘܼܩܒܲܠ ܐܲܝܠܹܝܢ ܕܡܵܘܕܹܝܢ ܗ̄ܘ̣ܵܘ
ܒܐܲܠܵܗܵܐ ܩܲܕܝܼܫܵܐ ܘܚܲܝܠܬܼܵܢܵܐ ܘܠܵܐ ܡܵܝܘܿܬܼܵܐ: ܘܲܫܒܲܩ̣ܘ ܗ̄ܘ̣ܵܘ ܠܗܵܘ̇
ܕܒܹܗ ܤܲܒܲܪܘ ܘܐܸܫܬܵܘܙܲܒܼܘ ܡ̣ܢ ܡܵܘܬܵܐ: ܘܝܲܗ̣̄ܒܼ ܒܗܘܿܢ ܝܑܼܕܲܥܬܼܵܐ
pb. 502
ܕܢܲܤܠܘܿܢ ܡܵܘܬܵܐ ܕܐܲܠܵܗܵܐ: ܢܸܕܥܘܼܢܵܝܗܝ ܕܹܝܢ ܘܢܵܘܕܘܿܢ ܕܠܵܐ
ܡܵܝܘܿܬܼܵܐ ܐܝܼܬܼܵܘܗܝ.
ܡܸܛܠ ܕܹܝܢ ܕܗܵܕܹܐ ܗܘ̤ܵܬܼ ܗ̄ܘ̣ܵܬܼ: ܘܠܵܐ ܐܸܬܼܦܢܝܼܘ ܗ̄ܘ̣ܵܘ
ܠܲܡܫܲܒܵܚܘܼ ܠܐܲܠܵܗܵܐ ܗܵܘ̇ ܕܫܵܘܙܸܒܼ ܐܸܢܘܿܢ: ܐܸܠܵܐ ܕܲܢܓܲܕܦܘܼܢ
ܘܢܹܐܠܨܘܼܢ ܠܟܼܠ ܐ̄ܢܵܫ ܠܡܵܘܕܵܝܘܼ ܡܵܘܬܵܐ ܕܐܵܠܵܗܵܐ: ܡ̣ܢ ܠܵܐ ܡܵܝܘܿܬܼܵܐ
ܕܹܝܢ ܢܸܥܪܩܘܼܢ ܐܲܝܟܼ ܕܡ̣ܢ ܪܘܼܫܥܵܐ: ܬܘܼܒܼ ܐܸܬܿܬܿܙܝܼܥ ܥܠܲܝܗܘܿܢ
ܒܲܪܒܿܪܵܝܵܐ ܟܲܕܼ ܡܩܲܛܸܠ ܗ̄ܘ̣ܵܐ ܘܡܸܫܬܲܦܲܥ ܥܲܠ ܟܠܵܗ̇ ܐܲܪܥܵܐ
ܕܪ̈ܗܘܿܡܵܝܹܐ: ܘܗܵܦܹ̇ܟܼ ܗ̄ܘ̣ܵܐ ܟܠܡܸܕܸܡ. ܘܠܲܝܬܿ ܗ̄ܘ̣ܵܐ ܦܘܼܪܤܵܐ
ܘܠܵܐ ܡܲܥܪܩܵܐ: ܐܸܠܵܐ ܡܢܵܘܪܝܼܢ ܗ̄ܘ̣ܵܘ ܒܕܸܚܠܬܼܵܐ: ܘܠܲܝܬܿ ܗ̄ܘ̣ܵܐ
ܤܲܒܼܪܵܐ. ܘܲܚܒܲܫ̣ ܗ̄ܘ̣ܵܐ ܐܸܢܘܿܢ: ܘܲܥ̣ܒܲܕܼ ܗ̄ܘ̣ܵܐ ܐܸܢܘܿܢ ܠܵܐ ܤܵܦܩܹ̈ܐ
ܒܟܼܠ ܡܵܐ ܕܤܵܥܹ̇ܪܝܼܢ ܗ̄ܘ̣ܵ. ܠܦܘܼܪܩܵܢܗܘܿܢ. ܘܡܸܛܠ ܕܲܠܦܘܼܩܵܢܗܘܿܢ
ܩܲܕܼܡܵܝܵܐ ܠܵܐ ܐܸܤܬܲܟܲܠܘ: ܫܲܕܲܪ ܗ̄ܘ̣ܵܐ ܠܓܲܒܼܪܵܐ ܗܵܘ̇ ܕܢܲܤܒܹܿܗ
ܗ̄ܘ̣ܵܐ ܡ̣ܢ ܪܵܥܝܘܼܬܼܵܐ ܕܥܵܢ̈ܐ: ܗܵܘ̇ ܕܟܲܤ̈ܝܵܬܼܵܐ ܕܠܸܒܹܗ ܕܡܲܠܟܵܐ
ܐܲܟܸܿܣ ܗ̄ܘ̣ܵܐ. ܘܡ̣ܢ ܟܲܕܼܘܼ ܐܸܬܿܬܿܙܝܼܥ ܗ̄ܘ̣ܵܐ ܡ̣ܢ ܐܲܠܵܗܵܐ: ܘܲܦܩܲܕܼ
ܗ̄ܘ̣ܵܐ ܠܡܸܥܒܲܕܼ ܨܠܝܼܒܼܵܐ. ܘܐܲܝܟܼ ܡ̇ܢ ܕܠܵܐ ܡܗܲܝܡܸܢ ܗ̄ܘ̣ܵܐ ܠܹܗ:
ܗܘ̣ ܩܲܝܤܵܐ ܥ̣ܒܲܕܼ ܗ̄ܘ̣ܵܐ ܒܐܝܼܕܼܵܘ̈ܗܝ ܕܝܼܠܹܗ: ܘܫܲܕܲܪ ܠܘܼܩܒܲܠ
ܒܲܪܒܿܪ̈ܵܝܹܐ. ܢܩܲܫ̣ ܗ̄ܘ̣ܵܐ ܕܹܝܢ ܐܵܦ ܒܹܝܬܼ ܡܲܠܟܿܘܼܬܼܵܐ ܨܠܝܼܒܼܵܐ ܐ̄ܚܪܹܢܵܐ:
ܘܲܐ̄ܚܪܹܢܵܐ ܒܦ̇ܘܿܪܘܿܣ ܕܩܘܼܤܛܲܢܛܝܼܢܵܦܘܿܠܝܼܣ ܒܲܡܨܲܥܬܼܵܗ̇
ܕܲܡܕܼܝܼܢܬܼܵܐ: ܕܢܸܬܼܚܙܸܐ ܠܟܼܠܢܵܫ. ܐܲܝܟܲܢܵܐ ܕܐܵܦ ܒܲܪܒܿܪ̈ܵܝܹܐ ܟܲܕܼ ܚܙܵܐܘܼܗܝ:
ܥܪܲܩ̣ܘ ܘܐܸܬܼܡܚܝܼܘ. ܘܗ̤ܘ ܡܲܠܟܵܐ: ܐܸܬܿܬܿܟܸܠ ܗ̄ܘ̣ܵܐ ܠܲܡܩܵܘܵܝܘܼ:
pb. 503
ܗܵܘ̇ ܕܡ̣ܢ ܟܲܕܼܘ ܡܲܛܲܝܲܒܼ ܗ̄ܘ̣ܵܐ ܠܡܸܥܪܲܩ. ܘܐܸܫܬܲܪܲܪܘ ܓܝܵܕܹܝܗ̇
ܕܲܡܕܼܝܼܢܬܐ: ܗܵܝ̇ ܪܹܡܪܲܫܠܵܐ ܗ̄ܘ̣ܵܬܼ. ܘܟܼܠܗܹܝܢ ܗܵܟܲܢܵܐ ܗ̤ܘܲܝ̈ ܗ̣̄ܘܲܝ̈.
ܟܲܕܼ ܓܹܝܪ ܥܲܪܲܩ̣ ܗ̄ܘ̣ܵܐ ܒܲܪܒܿܪܵܝܵܐ ܥܲܡ ܡܚܘܿܬܼܵܐ: ܟܲܕܼ ܐ̄ܢܵܫ
ܠܲܝܬܿ ܗ̄ܘ̣ܵܐ ܕܪܵܕܹܦ ܠܹܗ: ܘܡܲܠܟܵܐ ܐܸܬܼܚܲܝܲܠ ܗ̄ܘ̣ܵܐ ܠܲܡܩܵܡ
ܒܪܸܥܝܵܢܵܐ ܕܡܲܠܟܿܘܼܬܹܗ: ܘܲܡܕܼܝܼܢܬܐ ܚܲܝܠܬܼܵܢܵܐܝܼܬܼ ܡܲܠܝܵܐ ܗ̄ܘ̣ܵܬܼ
ܠܒܼܝܼܒܼܘܼܬܼܵܐ: ܥܸܠܬܼܵܐ ܐ̄ܚܪܹܬܼܵܐ ܕܫܘܼܚܠܵܦܵܐ ܕܡ̣ܢ ܫܹܠܝ ܠܵܐ ܐܸܫܟܲܚܘ
ܗ̄ܘ̣ܵܘ: ܡܸܛܠ ܕܠܲܝܬܿ ܗ̄ܘ̣ܵܐ ܐ̄ܢܵܫ ܐ̄ܚܪܹܝܢ ܕܗܵܕܹܐ ܤܵܥܲ݁ܪ ܗ̄ܘ̣ܵܐ:
ܕܲܠܗܵܘ̇ ܢܸܡܚܵܐ ܘܲܠܗܵܢܵܐ ܢܠܲܒܸܿܒܼ: ܐܸܠܵܐ ܐܸܢ ܒܲܠܚܘܿܕܼܸ ܨܠܝܼܒܼܵܐ
ܕܐܸܬܿܬܿܤܝܼܡ ܗ̄ܘ̣ܵܐ: ܡ̣ܢ ܗܵܘ̇ ܕܒܲܟܼܝܵܢܵܐ ܘܒܲܫܪܵܪܵܐ ܐܸܨܟܠܸܒܼ
ܗ̄ܘ̣ܵܐ. ܗܵܢܵܘ ܕܹܝܢ: ܓܘܼܫܡܵܐ ܗܵܘ̇ ܕܲܟܼܝܵܢܵܐܝܼܬܼ ܐܸܨܛܠܸܒܼ ܗ̄ܘ̣ܵܐ.
ܘܡܸܬܼܝܼܕܲܥ ܠܲܢ ܕܠܵܐ ܢܸܒܼܗܲܬܼ ܟܲܕܼ ܢܹܐܡܲܪ: ܕܗܵܢܵܐ ܡܝܼܬܼ ܘܠܵܘ
ܐܲܠܵܗܵܐ: ܗܵܘ̇ ܕܚܲܝܸܠ̣ ܠܓܼܘܼܫܡܵܐ ܡܚܝܼܠܵܐ ܘܚܵܫܘܿܫܵܐ ܘܡܵܝܘܿܬܼܵܐ:
ܗܵܘ̇ ܕܚܲܫ̣ ܘܡܝܼܬܼ ܒܲܙܩܝܼܦܐ. ܡܸܛܠ ܗܵܢܵܐ ܐܵܦ ܗ̤ܘ ܩܲܝܤܵܐ ܗܵܘ̇
ܕܒܹܗ ܐܸܨܛܠܸܒܼ: ܠܦܘܼܪܩܵܢܵܐ ܗܘ̤ܵܐ: ܐܲܝܟܼ ܡ̇ܢ ܓܹܝܪ ܕܠܲܐܝܢܵܐ ܕܠܵܐ
ܡܗܲܝܡܸܢ: ܘܡܲܤܠܸܐ ܗ̄ܘ̣ܵܐ ܠܲܨܠܝܼܒܼܵܐ ܕܦܲܓܼܪܵܐ ܡܵܝܘܿܬܼܵܐ: ܡ̇ܢ
ܕܡܼܫܟܲܚ ܗ̄ܘ̣ܵܐ ܠܡܸܦܪܲܩ: ܦܵܩܹ̇ܕܼ ܗ̄ܘ̣ܵܐ ܕܡ̣ܢ ܩܲܝܤܵܐ ܢܸܥܒܿܕܹܗ
ܗ̄ܘ̣ܵܐ ܠܲܨܠܝܼܒܼܵܐ: ܠܡܸܥܒܲܕܼ ܒܹܗ ܦܘܼܪܩܵܢܵܐ ܕܐܲܝܟܼ ܗܵܢܵܐ ܒܲܡܕܼܝܢܬܐ
ܘܒܼܒܲܪܒܿܪ̈ܵܝܹܐ. ܐܲܝܟܲܢܵܐ ܕܠܵܐ ܢܸܬܼܦܲܠܲܓܼ ܕܲܨܠܝܼܒܼܘܼܬܼܵܐ ܕܦܲܓܼܪܵܐ ܐܝܼܬܹܝܗ̇:
ܗܵܘ̇ ܕܲܠܟܼܠܹܗ ܥܵܠܡܵܐ ܐܲܚ̣ܝ: ܘܠܵܐ ܗ̄ܘ̣ܵܐ ܕܐܲܠܵܗܵܐ: ܗܵܘ̇ ܕܲܒܼܝܲܕܼ
ܙܩܝܼܦܘܼܬܼܵܐ ܕܦܲܓܼܪܵܐ ܘܲܨܠܝܼܒܼܵܐ: ܕܐܲܝܟܼ ܗܵܕܹܐ ܓܲܢܒܵܪܘܼܬܼܵܐ ܥ̣ܒܲܕܼ ܗ̄ܘ̣ܵܐ.
pb. 504
ܡܸܛܠ ܕܹܝܢ ܕܐܵܦ ܒܗܵܕܹܐ ܐܸܬܼܚܲܟܲܡܘ ܗ̄ܘ̣ܵܘ: ܐܲܝܟܼ ܡ̇ܢ
ܕܐܲܠܵܗܘܼܬܼܵܐ ܐܝܼܬܼܵܘܗܝ ܗ̄ܘ̣ܵܐ ܨܠܝܼܒܼܵܐ ܘܠܵܐ ܗ̄ܘ̣ܵܐ ܕܦܲܓܼܪܵܐ:
ܬܘܼܒܼ ܠܘܼܩܒܲܠ ܕܵܚ̈ܠܝ ܐܲܠܵܗܵܐ ܫܪܸܟܼܘ ܗ̄ܘ̣ܵܘ: ܗܵܢ̇ܘܿܢ ܕܐܵܡ̇ܪܝܼܢ
ܗ̄ܘ̣ܵܘ ܕܠܵܐ ܗ̄ܘ̣ܵܐ ܕܐܲܠܵܗܘܼܬܼܵܐ ܐܝܼܬܼܵܘܗܝ ܨܠܝܼܒܼܵܐ: ܐܸܠܵܐ ܕܦܲܓܼܪܵܐ
ܕܐܲܠܵܗܘܼܬܼܵܐ: ܘܡܸܛܠ ܗܵܢܵܐ ܒܝܲܕܼ ܨܠܝܼܒܼܵܐ ܦܪܲܩ̣ ܠܲܢ. ܬܘܼܒܼ
ܐܲܠܵܗܵܐ: ܠܘܼܩܒܲܠ ܪܸܥܝܵܢܵܐ ܦܸܪܥܘܿܢܵܝܵܐ: ܐܲܩܝܼܡ̣ ܡܸܢܕܪܹܫ ܠܥܘܼܙܵܐ
ܕܒܲܪܒܿܪ̈ܵܝܹܐ: ܘܲܠܙܵܘܥܹ̈ܐ. ܘܡܸܛܠ ܬܘܼܒܼ ܕܒܼܵܥܹ̇ܐ ܗ̄ܘ̣ܵܐ ܕܢܸܟܼܠܸܐ
ܐܸܢܘܿܢ ܡ̣ܢ ܕܲܚ̈ܠܲܝ ܐܲܠܵܗܵܐ ܘܡ̣ܢ ܚܲܫܹ̈ܐ ܕܡܲܤܒܿܠܝܼܢ ܗ̄ܘ̣ܵܘ ܠܗܘܿܢ:
ܗܵܝܕܹܝܢ ܓܹܝܪ ܒܲܠܚܘܿܕܼ ܡܸܬܼܢܲܦܫܝܼܢ ܗ̄ܘ̣ܵܘ ܘܡܸܬܼܚܲܪܪܝܼܢ: ܡܲܠܸܦ
ܗ̄ܘ̣ܵܐ ܒܬܲܪ̈ܬܲܝܗܹܝܢ: ܕܠܵܐ ܫܵܦܲܪ ܗ̄ܘ̣ܵܐ ܠܹܗ ܪܸܥܝܵܢܵܐ ܪܲܫܝܼܥܵܐ:
ܕܐܝܼܬܼ ܗ̄ܘ̣ܵܐ ܒܹܗ ܬܵܘܕܝܼܬܼܵܐ ܕܡܵܘܬܵܐ. ܐܵܦܸܢ ܓܹܝܪ ܠܗܵܘ̇ ܕܡ̣ܢ
ܒܲܪܒܿܪܵܝܹܐ: ܡܵܘܬܵܐ ܕܡ̣ܢ ܒܢܲܝ̈ܢܵܫܵܐ ܡܲܤܒܿܪܝܼܢ ܗ̄ܘ̣ܵܘ ܕܐܝܼܬܼܵܘܗܝ:
ܐܸܠܵܐ ܥܲܠ ܗܵܘ̇ ܕܡ̣ܢ ܙܵܘܥܵܐ ܗܵܘܹ̇ܐ ܗ̄ܘ̣ܵܐ: ܠܵܐ ܡܸܫܟܿܚܝܼܢ ܗ̄ܘ̣ܵܘ
ܗܵܕܹܐ ܠܡܲܤܒܵܪܘܼ ܥܠܵܘܗܝ. ܡ̣ܢ ܕܹܝܢ ܕܐܵܦ ܠܵܐ ܗܵܟܲܢܵܐ ܐܸܬܼ݂ܵܘ
ܗ̄ܘ̣ܵܘ ܠܲܪܓܸܫܬܼܵܐ ܕܫܘܼܒܼܚܵܐ ܕܐܲܠܵܗܵܐ ܠܵܬ ܡܸܬܼܚܲܒܿܠܵܢܵܐ: ܘܡܵܘܬܵܐ
ܘܚܲܫܵܐ ܘܲܡܚܝܼܠܘܼܬܼܵܐ ܡܩܲܪܒܼܝܼܢ ܗ̄ܘ̣ܵܘ ܠܹܗ: ܒܓܲܢܒܵܪܘܼܬܼܵܐ ܘܲܒܼܠܵܐ
ܡܵܝܘܿܬܼܘܼܬܼܵܐ ܕܐܲܝܟܼ ܗܵܕܹܐ: ܗܵܝܕܹܝܢ ܒܗܘܿܢ ܒܦܸܬܼܓܼܵܡܹ̈ܐ ܐܵܠܸܦ̣ ܗ̄ܘ̣ܵܐ
ܐܸܢܘܿܢ: ܕܠܵܐ ܬܩܲܪܒܼܘܼܢ ܠܐܲܠܵܗܵܐ ܡܘܼܡܵܐ ܘܢܼܟܼܝܵܢܵܐ: ܡܸܛܠ
ܕܩܲܕܝܼܫܵܐ ܐܝܼܬܼܵܘܗܝ ܘܲܡܚܲܪܲܪ ܡ̣ܢ ܟܠܗܘܿܢ ܚܲܫܹ̈ܐ. ܘܐܵܦ ܠܵܐ
ܡܚܝܼܠܘܼܬܼܵܐ: ܠܗܵܘ̇ ܕܒܲܨܠܝܼܒܼܵܐ ܡܚܝܼܠܵܐ ܐܸܬܼܓܲܢܒܲܪ ܗ̄ܘ̣ܵܐ ܓܲܢܒܵܪܵܐܝܼܬܼ:
ܘܲܒܼܟܼܠܵܗ̇ ܓܲܢܒܵܪܘܼܬܼܵܐ ܐܝܼܬܼܵܘܗܝ ܗ̄ܘ̣ܵܐ. ܘܐܵܦ ܠܵܐ ܡܵܘܬܵܐ ܬܩܲܪܒܼܘܼܢ:
pb. 505
ܠܗܵܘ̇ ܕܗ̤ܘ ܒܲܠܚܘܿܕܼܸܵܘܗܝ ܐܝܼܬܼܵܘܗܝ ܠܵܐ ܡܵܝܘܿܬܼܵܐ: ܘܲܒܼܡܵܘܬܵܐ
ܕܝܼܠܲܢ ܚ̣ܵܘܝܼ ܕܠܵܐ ܡܵܝܘܿܬܼܵܐ ܐܝܼܬܼܵܘܗܝ: ܒܝܲܕܼ ܬܵܘܕܝܼܬܼܵܐ ܕܩܲܕܝܼܫܵܐ
ܘܲܕܼܚܲܝܠܬܼܵܢܵܐ ܘܲܕܼܠܵܐ ܡܵܝܘܿܬܼܵܐ.
ܡܸܛܠ ܕܹܝܢ ܕܠܵܐ ܩܵܘܝܘܼ ܒܐܲܝܠܹܝܢ ܕܐܸܬܼܥܨܝܼܘ ܗ̄ܘ̣ܵܘ ܠܡܵܘܕܵܝܘܼ:
ܘܠܵܐ ܗܲܝܡܸܢܘ ܗ̄ܘ̣ܵܘ ܒܐܲܠܵܗܵܐ ܚܲܝܠܬܼܵܢܵܐ ܘܠܵܐ ܡܵܝܘܿܬܼܵܐ: ܗܵܘ̇
ܕܡܸܫܟܲܚ ܠܲܡܫܲܬܲܩܘܼ ܐܵܦ ܠܲܩܪ̈ܵܒܹܐ: ܗܘ̤ܵܘ ܗ̄ܘ̣ܵܘ ܥܲܒܼ̈ܕܹܐ
ܕܒܲܪܒܿܪ̈ܵܝܹܐ: ܘܐܸܬܲܥܒܲܕܼܘ ܒܥܲܒܼܕܘܼܬܼܵܐ ܠܡܲܤܵܩܘܼ ܠܗܘܿܢ ܡܲܕܲܐܬܼܵܐ
ܒܬܼܵܘܕܝܼܬܼܵܐ ܕܲܟܼܬܼܝܼ̈ܒܼܵܬܼܵܐ. ܝܵܗ̇ܒܿܝܼܢ ܗ̄ܘ̣ܵܘ ܕܹܝܢ: ܐܵܦ ܠܐܲܝܠܹܝܢ ܕܡܲܩܪܒܼܝܼܢ
ܗ̄ܘ̣ܵܘ ܥܲܡܹܗ. ܘܠܲܝܬܿ ܡܸܕܸܡ ܕܠܵܐ ܥ̣ܒܲܕܼ: ܗܵܘ̇ ܕܚܵܘܝܹܗ ܠܒܲܪܒܿܪܵܝܵܐ
ܡܵܪܵܐ: ܘܲܠܪ̈ܗܘܿܡܵܝܹܐ ܥܲܒܼ̈ܕܹܐ. ܘܗܵܟܲܢܵܐ ܐܸܫܬܲܢܝܲܬ̤ ܗ̄ܘ̣ܵܬܼ ܥܲܠ
ܒܲܪܒܿܪ̈ܵܝܹܐ ܪܹܫܵܢܘܼܬܼܵܐ: ܐܲܝܟܼ ܡ̇ܢ ܕܠܲܝܬܿ ܗ̄ܘ̣ܵܐ ܠܗܘܿܢ ܠܪ̈ܗܘܿܡܵܝܹܐ
ܐܲܠܵܗܵܐ ܕܥܲܠ ܟܠ: ܩܲܕܝܼܫܵܐ ܘܚܲܝܠܬܼܵܢܵܐ ܘܠܵܐ ܡܵܝܘܿܬܼܵܐ. ܡܸܛܠ
ܗܵܢܵܐ: ܠܘܵܬܼ ܗܵܘ̇ ܥܩܲܩ̣ܘ ܐܵܦ ܫܲܪܟܵܐ ܕܥܲܡܡܹ̈ܐ. ܗܪܲܩ̣ܘ ܕܹܝܢ
ܡ̣ܢ ܠܘܵܬܼ ܪ̈ܗܘܿܡܵܝܹܐ: ܐܲܟܼܡ̇ܢ ܕܐܵܦ ܠܵܐ ܠܢܲܦܫܗܘܿܢ ܐܸܫܟܲܚܘ
ܠܲܡܫܵܘܙܵܒܼܘܼ. ܘܡܸܛܠ ܕܗܵܟܲܢܵܐ ܤܵܡ̣ܘܼܗ̇ ܗ̄ܘ̣ܵܘ ܠܪܹܫܵܢܘܼܬܼܵܐ: ܐܲܝܟܼ
ܡ̇ܢ ܕܠܵܐ ܐܵܠܨܵܐ ܠܗܘܿܢ ܥܲܠ ܥܘܼܕܪܵܢܵܐ ܐܲܠܵܗܵܝܵܐ: ܘܠܵܐ ܐܸܬܼ݂ܵܘ
ܠܘܵܬܼ ܢܲܦܫܗܘܿܢ: ܐܵܦ ܠܵܐ ܐܸܬܼܥܲܗܲܕܼܘ ܠܬܼܵܘܕܝܼܬܼܵܐ ܗܵܝ̇ ܕܐܲܚܝܼܕܹܝܢ
ܗ̄ܘ̣ܵܘ ܒܦܘܼܡܗܘܿ: ܕܩܲܕܝܼܫܵܐ ܘܚܲܝܠܬܼܵܢܵܐ ܘܠܵܐ ܡܵܝܘܿܬܼܵܐ: ܐܸܠܵܐ
ܕܲܠܩܘܼܒܼܠܵܐ ܬܘܼܒܼ ܕܵܪܫܝܼܢ ܗ̄ܘ̣ܵܘ ܥܲܠ ܚܲܫܹ̈ܐ ܕܐܲܠܵܗܘܼܬܼܵܐ: ܕܒܼܐܝܼܕܼܗܘܿܢ
ܡܚܵܘܹ̇ܝܢ ܗ̄ܘ̣ܵܘ ܕܠܲܝܬܵܘܗܝ ܚܲܕܼ ܡ̣ܢ ܗܵܠܹܝܢ. ܥܲܡ ܚܲܫܹ̈ܐ ܓܹܝܪ
ܘܡܵܘܬܵܐ ܐܵܦ ܗܵܕܹܐ ܡܸܬܼܢܲܤܒܵܐ ܗ̄ܘ̣ܵܬܼ: ܕܐܵܦ ܠܵܐ ܩܲܕܝܼܫܵܐ ܐܝܼܬܼܵܘܗܝ
pb. 506
ܒܲܟܼܝܵܢܵܐ: ܘܠܵܐ ܡܵܝܘܿܬܼܵܐ ܒܲܟܼܝܵܢܵܐ: ܘܠܵܐ ܚܲܝܠܬܼܵܢܵܐ ܒܲܟܼܝܵܢܵܐ.
ܥܕܲܡܵܐ ܕܡܸܢܗܘܿܢ ܬܘܼܒܼ ܐܲܩܝܼܡ̣ ܗ̄ܘ̣ܵܐ ܐܲܠܵܗܵܐ: ܟܲܕܼ ܒܵܥܹ̇ܝܢ ܘܟܲܕܼ
ܠܵܐ ܒܵܥܹ̇ܝܢ: ܠܡܲܟܿܤܵܢܘܼܬܼܵܐ ܕܪܘܼܫܥܗܘܿܢ: ܘܲܠܡܲܦܲܩ ܒܪܘܼܚܵܐ
ܕܐܲܝܠܹܝܢ ܕܒܼܝܼܫܵܐܝܼܬܼ ܚܲܫܘ ܗ̄ܘ̣ܵܘ: ܘܲܠܡܲܠܦܵܢܘܼܬܼܵܐ ܕܐܲܝܠܹܝܢ
ܕܒܲܡܩܲܕܡܘܼܬܼܵܐ ܨܠܹܝܢ ܗ̄ܘ̣ܵܘ: ܠܲܦܠܵܘܝܵܢܘܿܣ ܘܠܐܘܼܤܹܒܝܼܣ:
ܗܵܢ̇ܘܿܢ ܕܩܵܛ̇ܠܝܼܢ ܗ̄ܘ̣ܵܘ ܠܗܘܿܢ. ܒܲܕ ܦܘܼܪܥܵܢܵܐ ܕܐܲܠܵܗܵܐ ܥܵܒܼ̇ܕܝܼܢ
ܗ̄ܘ̣ܵܘ: ܕܡܵܘܕܹܝܢ ܗ̄ܘ̣ܵܘ ܠܹܗ ܐܵܦ ܩܲܕܝܼܫܵܐ ܐܵܦ ܚܲܝܠܬܼܵܢܵܐ ܐܵܦ ܠܵܐ
ܡܵܝܘܿܬܼܵܐ. ܘܲܒܼܿܢܵܡܘܿܤܵܐ ܘܲܒܼܦܘܼܩ̈ܕܵܢܹܐ ܘܒܼܚܘܼܤܪܵܢܹܐ ܡܫܲܪܪܝܼܢ ܗ̄ܘ̣ܵܘ:
ܠܘܼܩܒܲܠ ܐܲܝܠܹܝܢ ܕܡܵܘܕܹܝܢ ܗ̄ܘ̣ܵܘ ܩܲܕܝܼܫܵܐ ܘܚܲܝܠܬܼܵܢܵܐ ܘܠܵܐ ܡܵܝܘܿܬܼܵܐ
ܠܐܵܠܵܗܵܐ ܡܸܠܬܼܵܐ. ܘܲܒܼܒܸܙܬܼܵܐ ܘܒܸܐܟܼܤܘܿܪܝܼܵܐ ܘܲܒܼܡܵܘ̈ܬܹܐ: ܥܕܲܡܵܐ
ܕܐܸܬܼܢܤܸܒܼ ܡ̣ܢ ܡܨܲܥܬܼܵܐ ܬܹܐܵܕܓܵܤܝܼܣ: ܗܵܘ̇ ܕܡܸܫܬܿܩܲܠ ܗ̄ܘ̣ܵܐ
ܠܘܼܩܒܲܠ ܐܲܠܵܗܵܐ: ܘܐܸܬܼܦܗܲܚ ܗ̄ܘ̣ܵܐ ܦܘܼܡܵܐ ܠܡܵܘܕܼܵܝܘܼ ܘܠܲܡܫܲܒܵܚܘܼ
ܘܲܠܡܸܤܓܲܕܼ: ܠܐܲܠܵܗܵܐ ܩܲܕܝܼܫܵܐ ܘܚܲܝܠܬܼܵܢܵܐ ܘܠܵܐ ܡܵܝܘܿܬܼܵܐ: ܟܲܕܼ ܕܠܵܐ
ܕܸܚܠܵܐ ܐܵܡ̇ܪܝܼܢ ܗ̄ܘ̣ܵܘ. ܠܵܐ ܗ̄ܘ̣ܵܐ ܓܹܝܪ ܗܵܘ̇ ܕܐܵܡܲ݁ܪ ܠܲܡܫܝܼܚܵܐ
ܐܲܠܵܗܵܐ ܚܵܫܘܿܫܵܐ ܘܡܵܝܘܿܬܼܵܐ: ܐܠܵܗܵܐ ܡܵܘܕܸܐ ܠܲܡܫܝܼܚܵܐ: ܐܸܠܵܐ ܗܵܘ̇
ܕܐܸܡܲ݁ܪ ܠܲܡܫܝܼܚܵܐ ܒܐܲܠܵܗܘܼܬܹܗ ܕܒܲܟܼܝܵܢܹܗ ܐܝܼܬܼܵܘܗܝ: ܘܒܲܟܼܝܵܢܹܗ
ܡܵܘܕܸܐ ܠܐܲܠܵܗܵܐ ܠܵܐ ܚܵܫܘܿܫܵܐ ܘܠܵܐ ܡܵܝܘܿܬܼܵܐ ܘܚܲܝܠܬܼܵܢܵܐ ܘܩܲܕܝܼܫܵܐ.
ܚܵܫܘܿܫܵܐ ܕܹܝܢ ܒܐ̄ܢܵܫܘܼܬܹܗ: ܒܗܵܝ̇ ܕܡܵܘܕܸܐ ܠܹܗ ܕܐܝܼܬܼܵܘܗܝ ܒܲܟܼܝܵܢܵܐ
ܒܲܪܢܵܫܵܐ.
ܐܸܠܵܐ ܐܸܡܲ݁ܪ ܐ̄ܢܵܫ: ܕܐܲܝܕܵܐ ܫܵܘܬܵܦܘܼܬܼܵܐ ܐܝܼܬܼ ܠܵܟܼ ܠܘܵܬܼ
ܦܠܵܘܝܵܢܘܿܣ: ܘܠܲܐܝܠܹܝܢ ܕܲܥܠܵܘܗܝ ܘܡܸܛܠܵܬܹܗ ܐܸܤܬܿܥܲܪ؟ ܠܵܟܼ
pb. 507
ܓܹܝܪ: ܟܠܢܵܫ ܐܲܚܪܡ̣ܵܟܼ ܘܐܲܟܼܪܙܵܟܼ. ܘܡ̣ܢ ܗܵܕܹܐ ܒܐܲܝܠܹܝܢ ܕܡܵܘܤܸܦ
ܐܲܢ̄ܬܿ: ܥܲܠ ܫܡܵܟܼ ܒܝܼܫܵܐ ܦܵܠܲܚ ܐܲܢ̄ܬܿ: ܘܠܲܩܛܹܐ ܓܼܪܵܢܘܼܬܼܵܟܼ ܘܠܵܐ
ܗ̄ܘ̣ܵܐ ܠܡܲܦܲܩ ܒܪܘܘܼܚܵܐ ܦܫܝܼܛܵܐ ܘܟܹܐܢܵܐ. ܗܵܘ̇ ܕܲܠܥܸܠ ܘܲܠܬܲܚܬܿ
ܘܲܒܼܟܼܠ ܙܒܲܢ ܠܹܗ ܐܵܡܲܪܢܵܐ: ܕܠܵܐ ܐܵܬܼܵܝܵܐ ܠܝܼ ܕܐܸܬܼܪܲܚܡܹ̇ܬܼ ܡ̣ܢ
ܐ̄ܢܵܫܵܐ ܕܐܲܝܟܼ ܗܵܠܹܝܢ: ܐܸܠܵܐ ܕܐܵܦ ܛܵܒܼ ܝܲܐܝܼܒܼ ܐ̄ܢܵܐ: ܕܐܸܢ ܒܝܲܕܼ ܚܸܪܡܵܐ
ܕܝܼܠܝ ܢܸܫܬܵܘܙܒܼܘܼܢ ܡ̣ܢ ܓܘܼܕܵܦܵܐ. ܘܐܲܝܠܹܝܢ ܕܡܸܫܬܵܘܙܒܼܝܼܢ: ܢܵܘܕܘܿܢ
ܠܐܲܠܵܗܵܐ ܩܲܕܝܼܫܵܐ ܘܚܲܝܠܬܼܵܢܵܐ ܘܠܵܐ ܡܵܝܘܿܬܼܵܐ: ܟܲܕ ܠܵܐ ܡܚܲܠܦܝܼܢ
ܠܨܲܠܡܵܐ ܕܐܲܠܵܗܵܐ ܕܠܵܐ ܡܸܬܼܚܲܒܲܠ: ܒܨܠܡܵܐ ܕܒܲܪܢܵܫܵܐ ܕܡܸܬܼܚܲܒܲܠ.
ܘܲܒܼܓܼܵܘ ܟܪܸܤܛܝܵܢܘܼܬܼܵܐ: ܢܚܲܛܘܼܢ ܚܲܢܦܘܼܬܼܵܐ. ܐܸܠܵܐ ܠܹܗ ܠܐܲܠܵܗܵܐ
ܐܲܝܟܼ ܕܐܝܼܬܼܵܘܗܝ ܨܲܠܡܹܗ ܢܵܘܕܘܿܢܵܝܗܝ: ܘܲܠܒܲܪܢܵܫܵܐ ܐܲܝܟܼ ܕܐܝܼܿܬܼܵܘܗܝ
ܒܨܲܠܡܹܗ ܢܵܘܕܘܿܢܵܝܗܝ. ܐܲܝܟܲܢܵܐ ܕܚܵܫܘܿܫܵܐ ܘܐܵܦ ܠܵܐ ܡܵܝܘܿܬܼܵܐ:
ܒܨܲܠܡܹ̈ܐ ܕܲܟܼܝܵܢܲܝ̈ܗܘܿܢ ܢܸܬܿܬܵܘܕܘܿܢ. ܐܲܝܟܼ ܕܠܵܐ ܫܘܼܚܠܵܦܵܐ ܕܐܲܠܵܗܵܐ:
ܘܠܵܐ ܬܘܼܒܼ ܫܘܼܚܠܵܦܵܐ ܕܒܲܪܢܵܫܵܐ: ܕܡܘܼܬܼܵܐ ܕܪܘܼܫܥܵܐ ܕܚܲܢܦܘܼܬܼܵܐ
ܬܵܘܕܸܐ ܟܪܸܤܛܝܵܢܘܼܬܼܵܐ. ܢܸܗܘܸܐ ܕܹܝܢ ܒܲܫܪܵܪܵܐ ܐܹܝܢ ܐܹܝܢ: ܘܠܵܐ ܠܵܐ:
ܦܵܪܘܿܩܵܐ ܘܡܸܬܼܦܲܪܩܵܢܵܐ: ܐܲܝܟܼ ܕܲܡܫܝܼܚܵܐ ܒܲܫܪܵܪܵܐ ܘܒܲܟܼܝܵܢܵܐ ܬܸܬܵܘܕܸܐ
ܕܐܝܼܬܼܵܘܗܝ: ܐܲܠܵܗܵܐ ܘܒܲܪܢܵܫܵܐ. ܕܐܝܼܬܼܵܘܗܝ ܒܲܟܼܝܵܢܵܐ ܠܵܐ ܡܵܝܘܿܬܼܵܐ
ܘܠܵܐ ܚܵܫܘܿܫܵܐ ܐܲܝܟܼ ܐܵܠܵܗܵܐ: ܘܡܵܝܘܿܬܼܵܐ ܘܚܵܫܘܿܫܵܐ ܒܲܟܼܝܵܢܵܐ ܐܲܝܟܼ
ܒܲܪܢܵܫܵܐ. ܠܵܐ ܗ̄ܘ̣ܵܐ ܐܲܠܵܗܵܐ ܒܲܟܼܝܵܢܹ̈ܐ ܬܲܪ̈ܲܝܗܘܿܢ: ܘܠܵܐ ܬܘܼܒܼ ܒܲܪܢܵܫܵܐ
ܒܲܟܼܝܵܢܹ̈ܐ ܐܪ̈ܲܝܗܘܿܢ. ܡܵܕܹܝܢ ܢܝܼܫܵܐ ܕܝܼܠܝ ܘܚܦܝܼܛܘܼܬܼܝ ܐܝܼܬܹܝܗ̇:
ܕܢܸܬܼܒܲܪܲܟܼ ܘܢܸܫܬܿܒܲܚ ܐܲܠܵܗܵܐ: ܐܲܝܟܼ ܕܒܲܫܡܲܝܵܐ ܐܵܦ ܠܐܲܪܥܵܐ.
pb. 508
ܢܸܬܬܲܚܪܲܡ ܕܹܝܢ ܢܸܤܛܘܿܪܝܼܣ: ܢܹܐܡܲܪܘܼܢ ܕܹܝܢ ܗܵܘ̇ ܡܵܐ ܕܲܡܨܲܠܸܐ
ܐ̄ܢܵܐ ܥܠܲܝܗܘܿܢ ܕܢܹܐܡܲܪܘܼܢ ܥܲܠ ܐܲܠܵܗܵܐ. ܡ̣ܢ ܗܵܢܘܿܢ ܓܹܝܪ ܐܝܼܬܲܝ
ܕܥܲܡ ܐܲܠܵܗܵܐ: ܘܠܵܐ ܗ̄ܘ̣ܵܐ ܡ̣ܢ ܗܵܢܘܿܢ ܕܠܘܼܩܒܲܠ ܐܲܠܵܗܵܐ.
ܕܒܸܐܤܟܹܡܵܐ ܕܕܼܚܠܲܬܼ ܐܲܠܵܗܵܐ ܡܨܲܥܪܝܼܢ ܠܹܗ ܠܐܲܠܵܗܵܐ: ܘܲܡܒܲܛܠܝܼܢ
ܕܐܝܼܬܼܵܘܗܝ ܐܲܠܵܗܵܐ. ܡܲܩܪܸܒܼ ܓܹܝܪ ܒܐܲܝܠܹܝܢ ܕܐܸܢܵܐ ܡܲܩܪܸܒܼ ܐ̄ܢܵܐ:
ܘܡܲܩܪܒܼܝܼܢ ܠܩܘܼܒܼܠܹܗ ܐܲܝܠܹܝܢ ܕܡܲܩܪܒܝܼܢ ܥܲܡܝܼ. ܘܡܸܠܛܠ ܗܵܢܵܐ:
ܡܸܛܠܵܬܹܗ ܐܸܢܵܐ ܚܲܝܵܒܼ ܐ̄ܢܵܐ ܟܠ ܡܸܕܸܡ ܠܲܡܤܲܝܒܵܪܘܼ ܘܲܠܡܸܚܲܫ.
ܐܲܝܟܲܢܵܐ ܕܲܠܘܲܝ ܒܚܤܡܵܐ ܕܝܼܠܝ: ܢܸܤܦܲܩ ܟܠܢܵܫ ܠܡܸܬܼܪܲܥܵܝܘܼ
ܠܐܲܠܵܗܵܐ. ܡܸܛܠ ܕܠܲܝܬܿ ܠܝܼ ܡܸܕܸܡ ܕܡ̣ܢ ܗܵܢܵܐ ܪܲܒܿ ܘܝܲܩܝܼܪ:
ܘܐܵܦ ܠܵܐ ܐܸܫܬܿܐܠܹܬܼ ܕܕܲܠܩܘܼܒܼܠܵܐ ܕܐܲܝܠܹܝܢ ܕܐܵܡܲ݁ܪ ܐ̄ܢܵܐ ܐܹܡܲܪ:
ܐܸܢܗ̤ܘ ܕܕܲܠܩܘܼܒܼܠܵܐ ܕܗܵܠܹܝܢ ܕܐܸܡܲ݁ܪ ܐ̄ܢܵܐ ܒܟܼܠ ܙܢܵܐ ܕܐܝܼܬܼ:
ܝܵܕܲܥ̇ ܗ̄ܘܹ̇ܝܬܼ ܕܒܼܵܥܹ̇ܝܢ ܗ̄ܘ̣ܵܘ ܠܡܹܐܡܲܪ: ܘܗܸܢܘܿܢ ܗܵܘܹ̇ܝܢ ܗ̄ܘ̣ܵܘ
ܕܐܲܠܵܗܵܐ. ܘܐܸܢܵܐ ܒܗܵܠܹܝܢ ܡܸܬܼܝܲܩܲܪ ܗ̄ܘܹ̇ܝܬܼ ܠܘܵܬܼ ܐܲܠܵܥܗܵܐ: ܥܲܠ
ܐܵܦܲܝ̈ ܗܵܠܹܝܢ ܕܐܲܠܵܗܵܐ: ܕܐܸܬܼܪܲܥ̇ܝܼܬܼ ܐܲܝܟܼ ܐܲܠܵܗܵܐ ܘܠܵܘ ܐܲܝܟܼ
ܒܲܪܢܵܫܵܐ. . .
ܬܘܼܒܼ ܕܹܝܢ ܐ̄ܚܪܵܢܝܵܐܝܼܬܼܸ: ܕܐܵܦ ܠܵܐ ܫܚܝܼܡܵܐܝܼܬܼ ܐܸܡ̇ܪܹܬܼ ܗܵܠܹܝܢ
ܕܦܠܵܘܝܵܢܘܿܣ: ܐܸܠܵܐ ܠܬܲܚܘܝܼܬܼܵܐ ܐܲܝܣ̇ܬܿܝܼܬܼ ܐܸܢܹܝܢ: ܕܗܵܢܹܝܢ ܕܐܸܤܬܿܥܲܪ
ܠܘܼܩܒܲܠܝ ܒܪܘܼܫܥܵܐ ܘܲܒܼܥܵܘ̣ܠܵܬܐ. ܐܲܝܟܲܢܵܐ ܕܠܵܐ ܢܸܛܥܘܿܢ ܐ̄ܢܵܫ̈ܝܼܢ ܒܲܫܡܵܐ
ܕܤܘܼܢܗܵܕܘܿܣ: ܐܸܠܵܐ ܢܸܒܼܥܘܿܢ ܐܲܝܠܹܝܢ ܕܲܗ̤ܘܲܝ̈ ܥܲܡ ܟܠܹܗ ܫܪܵܪܵܐ.
ܘܡܸܢܗܹܝܢ ܢܕܘܼܢܘܼܢ ܩܕܼܵܡ ܐܲܠܵܗܵܐ: ܐܵܦܸܢ ܐ̄ܚܪܵܢܝܵܐܝܼܬܼ ܗ̤ܘܝ̈.
ܡܸܤܬܲܟܲܡ ܓܹܝܪ ܤܵܛܵܢܵܐ ܒܐܸܤܟܹܡܵܐ ܕܡܲܠܲܐܟܼܵܐ ܕܢܘܼܗܪܵܐ: ܘܡܲܛܥܸܐ
pb. 509
ܠܗܘܿܢ ܠܲܒܼܢܲܝ̈ܢܵܫܵܐ ܠܡܲܪܚܵܩܘܼ ܐܲܠܵܗܵܐ. ܬܘܼܒܼ ܕܹܝܢ ܒܲܕܼܸ ܕܵܢܹ̇ܬܼ
ܒܪܸܥܝܵܢܝ: ܕܠܲܡܛܲܫܵܝܘܼ ܠܲܡܪܒܿܪܵܢܘܼܬܼܵܐ ܕܲܗܘ̤ܵܬܼ ܒܚܲܝܠܵܐ ܘܲܒܼܚܸܟܼܡܬܼܵܐ
ܕܐܲܠܵܗܵܐ: ܕܐܘܼܠܨܵܢܵܐ ܪܲܒܵܐ ܐܝܼܬܹܝܗ̇ ܘܲܕܼܟܼܠܹܗ ܪܘܼܫܥܵܐ ܘܕܲܟܼܦܘܼܪܝܵܐ
ܕܒܲܛܲܝܒܿܘܼܬܼܵܐ: ܕܠܵܐ ܢܚܵܘܸܐ ܘܢܸܓܼܠܸܐ ܐܸܢܹܝܢ ܠܟܼܠܗܘܿܢ ܒܢܲܝ̈ܢܵܫܵܐ.
ܡܸܛܠ ܗܵܢ̇ܘܿܢ ܓܹܝܪ ܥ̣ܒܲܕܼ ܗ̄ܘ̣ܵܐ ܐܸܢܹܝܢ: ܕܢܸܫܪܸܐ ܠܨܢ̈ܥܵܬܼܗܘܿܢ:
ܘܲܢܦܲܪܤܸܐ ܐܸܢܘܿܢ: ܗܵܢܘܿܢ ܕܲܡܫܲܪܪܝܼܢ ܗ̄ܘ̣ܵܘ ܠܪܘܼܫܥܵܐ ܘܡܲܢܗܪܝܼܢ
ܗ̄ܘ̣ܵܘ ܠܹܗ: ܟܲܕܼܸ ܐܲܝܠܹܝܢ ܕܐܸܢܵܐ ܐܸܡܲ݁ܪ ܗ̄ܘܹ̇ܝܬܼ ܠܵܐ ܡܸܢܼܗܲܝܡܲܢ
ܗ̄ܘܹ̇ܝܬܼ. ܗܸܬܢܘܿܢ ܕܹܝܢ ܥܵܒܼ̇ܕܝܼܢ ܗ̄ܘ̣ܵܘ ܗܵܕܹܐ: ܘܐܵܦ ܥ̣ܒܲܕܼܘ ܗ̄ܘ̣ܵܘ
ܒܲܟܼܢܘܼܫܝܼܗܢܘܿܢ ܒܤܘܼܢܗܵܕܘܿܣ: ܟܠܗܹܝܢ ܐܲܝܠܹܝܢ ܕܚܵܐܹ̇ܫ ܗ̄ܘܹ̇ܝܬܼ ܐܸܢܵܐ:
ܘܠܵܐ ܡܗܲܝܡܢܝܼܢ ܗ̄ܘ̣ܵܘ ܠܝܼ. ܠܡܲܟܵܤܘܼ ܕܹܝܢ ܘܲܠܡܸܫܪܵܐ ܐܸܢܹܝܢ
ܒܤܘܼܢܗܵܕܘܿܣ ܠܗܵܠܹܝܢ ܕܐܸܬܿܥܲܪ: ܠܵܐ ܡܸܫܟܿܚܵܐ ܗ̄ܘ̣ܵܬܼ. ܐܸܬܼܥܲܫܲܢ
ܗ̄ܘ̣ܵܐ ܕܹܝܢ ܨܒܼܝܵܢܵܐ ܕܪܘܼܫܥܵܐ ܡ̣ܢ ܨܸܒܼܝܵܢܵܐ ܕܐܲܠܵܗܵܐ: ܕܒܼܐܝܼܕܹܗ
ܐܸܬܼܟܿܤܸܤܘ ܪ̈ܲܫܝܼܥܹܐ ܕܪ̈ܲܫܝܼܥܹܐ ܐܝܼܬܲܝܗܘܿܢ: ܘܕܼܵܚ̈ܠܲܝ ܐܲܠܵܠܵܗܵܐ ܕܕܼܵܚ̈ܠܲܝ
ܠܐܲܠܵܗܵܐ ܠܝܼܬܲܗܘܿܢ. ܘܲܥܕܲܡܵܐ ܠܡܵܘܬܵܐ ܐܸܬܼܟܲܬܲܫܘ: ܘܲܢܛܲܪܘ
ܗ̄ܘ̣ܵܘ. ܠܫܲܦܝܘܼܬܼ ܪܸܥܝܵܢܵܐ ܗܵܝ̇ ܕܚܲܝܵܒܼܵܐ ܗ̄ܘ̣ܵܬܼ ܠܐܲܠܵܗܵܐ.
ܕܠܵܐ ܙܲܒܼܢܵܐ ܓܹܝܪ ܗܵܢܵܐ ܕܒܲܡܨܲܥܬܼܵܐ: ܕܲܗܘ̤ܵܐ ܒܡܲܓܿܪܲܬܼ ܪܘܼܚܹܗ
ܕܐܲܠܵܗܵܐ: ܕܒܹܗ ܚܲܫ̣ܘ ܗܵܠܹܝܢ ܘܐܲܚܸܫ̣ܘ ܐܸܢܘܿܢ ܗܵܢ̇ܘܿܢ: ܠܵܐ ܡܸܬܼܓܠܹܝܢ
ܗ̄ܘ̣ܵܘ: ܠܵܐ ܪ̈ܲܫܝܼܥܹܐ ܪ̈ܲܫܝܼܥܹܐ: ܘܠܵܐ ܗܵܢ̇ܘܿܢ ܕܐܸܫܬܿܘܝܘܼ ܠܲܒܼܛܝܼܠܘܼܬܼܵܐ
ܕܐܲܝܟܼ ܗܵܕܹܐ: ܕܡܲܗܦܟܼܵܐ ܗ̄ܘ̣ܵܬܼ ܠܗܘܿܢ ܡ̣ܢ ܬܲܟܼܬܿܘܼܫܵܐ ܕܠܘܼܩܒܲܠ
ܐܲܠܵܗܵܐ. ܕܲܒܼܗܘܿܢ ܒܤܘܼܥܪ̈ܵܢܹܐ ܡܲܩܪܸܒܼ ܗ̄ܘ̣ܵܐ ܘܩܵܐܹ̇ܡ ܗ̄ܘ̣ܵܐ
ܠܘܼܩܒܲܠܗܘܿܢ: ܘܟܼܵܠܹ̇ܐ ܗ̄ܘ̣ܵܐ ܠܗܘܿܢ ܕܠܵܐ ܢܒܲܥܛܘܼܢ ܠܘܼܩܒܲܠ
pb. 510
ܥܘܼܩ̈ܤܹܐ ܕܐܲܠܵܗܵܐ. ܘܐܵܦ ܠܵܐ ܬܘܼܒܼ ܗܵܟܲܢܵܐ ܡܸܬܼܦܢܹܝܢ ܗ̄ܘ̣ܵܘ
ܡ̣ܢ ܥܵܘܼܠܗܘܿܢ: ܟܲܕܼ ܕܵܚ̈ܠܲܝ ܐܲܠܵܗܵܐ ܠܵܐ ܐܸܬܼܦܲܠܗܲܕܼܘ ܗ̄ܘ̣ܵܘ:
ܘܠܵܐ ܬܘܼܒܼ ܐܸܬܼܩܲܛܲܥܘ ܗ̄ܘ̣ܵܘ ܟܲܕܼ ܡܲܓܲܪ ܗ̄ܘ̣ܵܐ ܪܘܼܚܹܗ ܐܲܠܵܗܵܐ:
ܕܢܸܚܫܘܼܢ ܒܟܼܠܗܘܿܢ ܚܲܝܲܝ̈ܗܘܿܢ: ܟܲܕܼ ܢܲܩܝܼܦܝܼܢ ܗ̄ܘ̣ܵܘ ܠܪܸܥܝܵܢܹܗ
ܕܐܲܠܵܗܵܐ. ܡܸܛܠ ܗܵܢܵܐ ܡܸܫܟܲܚ ܐ̄ܢܵܫ ܠܝܲܨܝܼܦܘܼܬܼܵܐ ܘܠܲܡܥܲܕܪܵܢܘܼܬܼܵܐ
ܕܐܸܬܲܢܝܲܬ̤ ܡ̣ܢ ܗܵܢ̇ܘܿܢ ܕܢܲܤܒܿܘܼܗ̇: ܘܐܲܗܡ̣ܝܘܼ ܡ̣ܢ ܐܲܝܠܹܝܢ ܕܐܝܼܬܲܝܗܘܿܢ
ܗ̄ܘ̣ܵܘ ܒܗܹܝܢ. ܘܝܲܨܝܼܦܘܼܬܼܵܐ ܗܘ̤ܵܬܼ ܠܗܘܿܢ: ܟܲܕܼ ܡܸܤܬܲܟܿܡܝܼܢ ܒܠܵܐ
ܝܑܼܕܲܥܬܼܵܐ ܥܲܠ ܐܲܝܠܹܝܢ ܕܙܵܕܹܩ ܗ̄ܘ̣ܵܐ ܕܢܸܬܿܬܲܪ̈ܨܵܢ: ܗܵܠܹܝܢ ܕܡ̣ܢ
ܗܵܢ̇ܘܿܢ ܐܸܬܼܒܿܤ̈ܝܼ ܐܵܦ ܐܸܫܬܵܪ̈ܝܼ. ܙܵܕܹܩ ܗ̄ܘ̣ܵܐ ܓܹܝܪ ܠܡܸܦܤܲܩ
ܠܐܲܝܠܹܝܢ ܕܒܼܝܼܫܵܐܝܼܬܼ ܗ̤ܘܲܝ̈: ܘܠܵܐ ܗ̄ܘ̣ܵܐ ܠܲܡܛܲܫܵܝܘܼܬܼܗܹܝܢ. ܗܵܠܹܝܢ
ܗܵܟܹܝܠ ܕܐܲܝܟܼ ܕܲܠܬܼܘܼܪܵܨܵܐ ܗ̤ܘܲܝ̈ ܡ̣ܢ ܐܲܠܵܗܵܐ: ܐܲܝܠܹܝܢ ܕܲܡܛܲܫܹܝܢ
ܠܗܹܝܢ ܠܵܐ ܗ̄ܘ̣ܵܘ ܕܐܲܠܵܗܵܐ: ܐܸܠܵܐ ܕܗܵܢ̇ܘܿܢ ܕܫܵܪܹܝܢ ܠܗܵܢܹܝܢ
ܕܝܼܠܹܗ.
ܡܸܛܠ ܐܲܝܕܵܐ ܓܝܪ ܡܲܤܒܿܪܝܼܢ ܐܢ̄ܬܿܘܿܢ: ܕܗܵܢܘܿܢ ܕܲܠܥܵܡܲܪܬܵܐ
ܒܲܝܬܿܘܿܢ ܐܲܚܝܼܕܝܼܢ ܗ̄ܘ̣ܵܘ: ܗܘ̤ܵܘ ܩܸܢܝܵܢܵܐ ܠܒܲܪܒܿܪ̈ܵܝܹܐ؟ ܠܵܐ ܗ̄ܘ̣ܵܐ
ܡܸܛܠ ܕܲܒܼܪܹܫܵܢܘܼܬܼܵܐ ܕܐܸܬܼܝܲܗܒܲܬ̤ ܠܗܘܿܢ ܠܵܐ ܐܸܬܼܚܲܫܲܚܘ ܐܲܝܟܼ
ܕܙܹܵܩ: ܕܢܸܕܥܘܼܢ ܥܲܡܡܹ̈ܐ ܠܛܲܝܒܿܘܼܬܼܵܐ ܕܐܸܬܼܝܲܗܒܲܬ̤ ܠܗܘܿܢ؟
ܐܲܝܟܲܢܵܐ ܕܡܸܛܠ ܕܐܲܝܟܼ ܡܵܪ̈ܲܝܵܐ ܠܵܐ ܐܲܠܸܦ̣ܘ: ܐܲܝܟܼ ܥܲܒܼ̈ܕܹܐ ܢܹܐܠܦܘܼܢ
ܗܵܝ̇ ܕܡܸܬܼܒܲܥܝܵܐ. ܡܸܛܠ ܐܲܝܕܵܐ ܬܘܼܒܼ ܠܵܐ ܗ̄ܘ̣ܵܐ ܡ̣ܢ ܐܵܪ̈ܬܵܕܘܿܟܿܤܹܐ:
ܫܡܲܥ̣ܘ ܠܡܸܠܬܼܵܐ ܕܐܹܘܲܢܓܠܝܼܘܿܢ: ܐܸܠܵܐ ܡ̣ܢ ܤܵܓܼܕܲܝ̈ ܠܒܸܪ̈ܝܵܬܼܵܐ؟ ܘܠܵܐ
pb. 511
ܠܪܹܫܵܢܘܼܬܼܵܐ ܡܲܠܟܿܘܼܬܼܵܐ: ܘܐܵܦ ܠܵܐ ܘܘܼܒܼ ܬܚܹܝܬܼ ܕܸܚܬܼܵܐ ܗܵܝ̇
ܕܐܝܼܬܲܝܗܘܿܢ ܗ̄ܘ̣ܵܘ ܒܵܗ̇: ܐܸܫܬܲܥܒܲܕܼܘ. ܕܢܸܕܥܘܼܢ ܕܟܲܕܼ ܢܤܲܒܼܘ
ܠܪܹܫܵܢܘܼܬܼܵܐ ܕܡܲܠܟܿܘܼܬܼܵܐ: ܘܲܒܼܡܲܠܟܿܘܼܬܼܵܐ ܠܪܹܫܵܢܘܼܬܼܵܐ ܕܕܲܚܠܲܬܼܗܘܿܢ
ܠܵܐ ܢܛܲܪܘ ܒܠܵܗܵܐ: ܡܸܛܠ ܗܵܢܵܐ ܐܵܦ ܠܵܐ ܒܕܸܕܸܡ ܐ̄ܚܪܹܢܵܐ ܗܘ̤ܵܘ
ܪܹ̈ܫܵܢܹܐ: ܒܗܵܝ̇ ܕܐܸܫܬܲܢܝܲܬ̤ ܠܵܗ̇ ܪܹܫܵܢܘܼܬܼܵܐ ܥܲܠ ܒܥܸܠܕܒܼܵܒܹ̈ܐ.
ܒܐܲܝܠܹܝܢ ܓܹܝܪ ܕܐܲܗܡ̣ܝܼܘ ܡ̣ܢ ܐܹܘܲܢܓܲܠܝܼܘܿܢ: ܒܗܹܝܢ ܒܗܵܠܹܝܢ ܐܵܦ
ܡ̣ܢ ܪܹܫܵܢܘܼܬܼܵܐ ܐܸܤܬܿܠܝܼܘ. ܘܲܠܤܵܓܼܕܲܝ̈ ܠܒܸܪ̈ܝܵܬܼܵܐ ܐܸܫܬܵܘܬܲܦܘ ܐܵܦ
ܒܗܲܝܡܵܢܘܼܬܼܵܐ: ܘܒܲܫܡܵܐ ܦܪܝܼܫܝܼܢ ܗ̄ܘ̣ܵܘ ܘܲܒܼܗܵܝ̇ ܕܒܲܪ ܟܝܵܢܵܐ. ܐܲܝܟܲܢܵܐ
ܕܗܵܢ̇ܘܿܢ ܒܲܪܝܵܐ ܘܠܵܐ ܒܲܪܝܵܐ ܡܵܘܕܹܝܢ: ܘܲܐ̄ܚܪܵܢܝܵܐܝܼܬܼ ܐܲܝܟܼ ܕܲܒܼܩܘܼܠܵܤܵܐ
ܐܵܡ̇ܪܝܼܢ ܒܲܪ ܟܝܵܢܵܐ: ܘܲܒܼܦܘܼܪܫܵܢܵܐ ܕܒܲܪܝܵܐ ܘܲܕܼܒܼܵܪܘܿܝܵܐ ܐ̄ܚܪܵܢܵܝܘܼܬܼ
ܟܝܵܢܵܐ ܝܵܗ̇ܒܿܝܼܢ. ܗܵܟܲܢܵܐ ܐܵܦ ܗܵܠܹܝܢ: ܒܚܵܫܘܿܫܵܐ ܘܲܒܼܠܵܐ ܚܵܫܘܿܫܵܐ:
ܒܲܪܝܵܐ ܘܠܵܐ ܒܲܪܝܵܐ: ܐ̄ܚܪܵܢܵܝܘܼܬܼ ܟܝܵܢܵܐ ܝܵܗ̇ܒܿܝܼܢ: ܘܲܐ̄ܚܪܵܢܝܵܐܝܼܬܼ ܐܵܡ̇ܪܝܼܢ
ܐܲܝܟܼ ܕܲܒܼܩܘܼܠܵܤܵܐ ܡܸܕܸܡ ܠܗܵܝ̇ ܕܒܲܪ ܟܝܵܢܵܐ: ܒܲܫܡܵܐ ܒܲܠܚܘܿܕܼ ܟܲܕܼ
ܠܪܹܫܵܢܘܼܬܼܵܐ ܘܲܠܕܼܚܠܬܼܵܐ ܕܡ̣ܢ ܕܲܠܩܘܼܒܼܠܵܝܘܼܬܼܵܐ ܐܲܚܝܼܕܝܼܢ: ܘܠܵܐ ܗ̄ܘ̣ܵܐ
ܡ̣ܢ ܬܵܘܕܝܼܬܼܵܐ ܕܲܟܼܝܵܢܵܐ: ܕܐܝܼܬܹܝܗ̇ ܒܦܵܪܹܿܗ̄ܤܝܼܵܐ. ܥܕܲܡܵܐ ܓܹܝܪ
ܕܬܸܬܿܕܲܟܸܿܐ ܐܵܦ ܗܵܝ̇ ܕܒܲܟܼܝܵܢܵܐ: ܕܬܸܤܲܒܼ ܪܹܫܵܢܘܼܬܼܵܐ ܠܕܸܚܠܬܼܵܐ:
ܘܕܸܚܠܬܼܵܐ ܠܪܹܫܵܢܘܼܬܼܵܐ: ܟܲܕܸ ܡܸܬܼܩܲܝܡܵܐ ܡ̣ܢ ܐܲܠܵܗܵܐ: ܕܐܲܝܟܲܢܵܐ
ܕܒܲܫܡܝܵܐ ܢܸܫܬܲܒܲܚ ܐܵܦ ܒܐܲܪܥܵܐ ܢܸܫܬܲܒܲܚ: ܘܫܘܼܒܼܚܵܐ ܒܲܫܡܲܝܵܐ
ܘܫܲܝܢܵܐ ܥܲܠ ܐܲܪܥܵܐ: ܒܩܘܼܒܲܪܢܹܝܛܘܼܬܼܵܐ ܕܤܘܼܥܪ̈ܵܢܹܐ ܕܗܵܕܹܐ: ܠܵܐ
ܫܵܠܹ̇ܐ ܐܲܠܵܗܵܐ ܡܸܢܲܢ ܕܲܢܕܲܒܲܪ ܠܲܢ ܘܢܲܠܸܦ ܠܲܢ. ܐܲܟܼܙܢܵܐ ܕܐܲܝܠܹܝܢ
pb. 512
ܕܠܲܛܠܵܝܹ̈ܐ ܡܲܠܦܝܼܢ: ܟܲܕܼ ܒܡܲܚ̈ܘܼܬܼܵܐ ܘܲܒܼܡܲܟܿܤܵܢ̈ܘܵܬܼܵܐ ܕܙܵܕܼ̈ܩܵܢ
ܡܸܬܼܚܲܫܲܚ: ܠܡܲܠܵܦܘܼܬܲܢ ܘܠܲܡܦܵܤܘܼܬܲܢ ܕܛܵܥܹ̇ܝܢ ܚ̄ܢܲܢ: ܘܢܵܦܹ̇ܩ
ܪܘܼܚܵܐ ܥܲܠ ܐܲܦܲܝ̈ ܫܲܬܼܝܼ̈ܩܹܐ: ܘܲܡܚܵܘܸܐ ܙܵܟܼܘܼܬܼܗܘܿܢ.
ܡܵܢܵܐ ܓܹܝܪ ܬܸܒܼ̇ܕܹܬܼ ܐܸܢܵܐ ܡ̣ܢ ܗܵܠܹܝܢ ܕܲܗ̤ܘܲܝ̈ ܐܲܝܟܼ ܕܲܗ̤ܘܲܝ̈: ܘܠܵܐ
ܗ̄ܘ̣ܵܐ ܗ̤ܘ ܐܲܠܵܗܵ؟ ܡܸܛܠ ܓܹܝܪ ܕܲܗܘ̤ܵܐ ܡܲܫ̈ܠܡܵܢܹܐ ܠܡܲܫܠܡܵܢܘܼܬܼܵܐ
ܕܐܲܒܼܵܗ̈ܬܼܵܐ: ܘܐܬܸܚܲܕܼܘ ܦܘܼܡܵܐ ܕܗܵܢܘܿܢ ܕܬܼܵܒܼܥ̇ܝܼܢ ܗ̄ܘ̣ܵܘ ܙܸܕ̈ܩܵܬܼܵܐ
ܕܐܲܒܼܵܗ̈ܬܼܵܐ:
ܘܡܸܛܠ ܗܵܢܵܐ ܡܸܨܛܠܹܝܢ ܗ̄ܘ̣ܵܘ ܡܸܢܗܘܿܢ ܠܐܵܪܝܵܢܘܼܬܼܵܐ: ܡ̣ܢ ܐܲܝܠܹܝܢ
ܕܡܸܬܿܬܵܘ̈ܕܝܵܢ ܗ̣̄ܘܲܝ̈: ܘܡܸܢܗܘܿܢ ܠܡܵܢܝܼܢܵܝܘܼܬܼܵܐ: ܘܡܸܢܗܘܿܢ
ܠܲܝܗܘܼܕܵܝܘܼܬܼܵܐ: ܘܡܸܢܗܘܿܢ ܠܲܐ̄ܚܪ̈ܵܢܝܵܬܼܵܐ: ܠܚܲܕܼ̈ܬܼܵܬܼܵܐ ܘܲܠܥܲܬܿܝܼ̈ܩܵܬܼܵܐ.
ܐܲܩܝܼܡ̣ ܐܲܠܵܗܵܐ ܡܢܗܘܿܢ ܘܲܒܼܗܘܿܢ ܕܝܼܠܗܘܿܢ: ܐܲܝܟܼ ܕܡ̣ܢ ܝܗ̄ܘܼ̈ܕܼܵܝܹܐ
ܡܩܝܼܡ ܗ̄ܘ̣ܵܐ ܠܕܲܝܵܢܹ̈ܐ: ܕܢܲܟܿܤܘܼܢ ܐܸܢܘܿܢ ܥܲܠ ܐܲܦܲܝ̈ ܥܒܼܘܼܪܝܼܗܘܿܢ
ܕܥܲܠ ܐܲܠܵܗܵܐ: ܗܵܢܵܘ ܕܹܝܢ ܠܲܦܠܵܘܝܵܘܿܣ: ܗܵܘ̇ ܕܲܡܡܲܠܸܐ ܗ̄ܘ̣ܵܐ
ܕܘܼܟܿܬܼܵܐ ܕܝܼܠܝܼ. ܕܲܒܼܗܵܕܹܐ ܙܵܕܹܩ ܗ̄ܘ̣ܵܐ ܕܢܸܗܘܸܐ ܠܝܼ ܒܥܸܠܕܒܼܵܒܼܵܐ:
ܐܲܝܟܼ ܕܐܵܦ ܗܘ̤ܵܐ ܠܝܼ. ܘܡ̣ܢ ܠܵܐ ܝܑܼܕܲܥܬܼܵܐ: ܐܵܘ ܡܸܛܠ ܡܸܕܸܡ
ܐ̄ܚܪܹܝܢ. ܘܠܐܘܼܤܹܒܝܼܣ: ܗܵܘ̇ ܕܡܲܩܪܸܒܼ ܗ̄ܘ̣ܵܐ ܠܘܼܩܒܲܠܝ. ܕܲܠܒܲܪ
ܡ̣ܢ ܟܠ ܥܸܠܬܼܵܐ ܕܩܸܢܛܵܐ ܡܵܘܕܹܝܢ ܗ̄ܘ̣ܵܘ: ܡܲܩܪܒܼܝܼܢ ܗ̄ܘ̣ܵܘ ܠܘܼܩܒܲܠ
ܗܵܢ̇ܘܿܢ ܕܒܹܝܬܼ ܩܘܼܪܸܠܘܿܣ: ܕܲܡܓܲܕܦܝܼܢ ܗ̄ܘ̣ܵܘ ܘܒܼܵܥܹ̇ܝܢ ܗ̄ܘ̣ܵܘ
ܠܡܲܨܠܵܚܘܼ. ܘܠܵܐ ܐܲܪܦܝܼ ܐܸܢܘܿܢ ܐܲܠܵܗܵܐ: ܥܕܲܡܵܐ ܕܚܵܘܝܼܘ
ܕܲܠܩܘܼܒܼܠܵܝܘܼܬܼܵܐ ܒܩܘܼܪܸܠܘܿܣ. ܕܗܵܢ̇ܘܿܢ ܡ̇ܢ: ܠܘܼܩܒܲܠ ܗܵܠܹܝܢ
ܡܲܝܬܹܝܢ ܗ̄ܘ̣ܵܘ ܠܡܸܠܵܘ̈ܗܝ. ܘܗܵܠܹܝܢ ܬܘܼܒܼ: ܡܓܲܒܹܿܝܢ ܗ̄ܘ̣ܵܘ ܠܗܵܠܹܝܢ
pb. 513
ܕܲܠܩܘܼ̈ܒܼܠܵܝܵܬܼܵܐ ܕܗܵܢܘܿܢ: ܘܤܵܝ̇ܡܝܼܢ ܗ̄ܘ̣ܵܘ ܠܘܼܩܒܲܠܗܘܿܢ. ܘܡܸܢܹܗ
ܘܒܹܗ ܡܸܬܼܚܲܪܹܝܢ ܗ̄ܘ̣ܵܘ: ܗܵܠܹܝܢ ܘܗܵܠܹܝܢ. ܘܗܵܠܹܝܢ ܐܵܡ̇ܪܝܼܢ: ܕܡܵܢܝܼܢܵܝܹ̈ܐ
ܐܝܼܬܲܝܗܘܿܢ: ܕܲܠܟܼܠܗܹܝܢ ܥܲܠ ܐܵܠܵܗܵܐ ܡܸܠܬܼܵܐ ܘܲܤܩܝܼܢ ܗ̄ܘ̣ܵܘ: ܐܵܦ
ܠܕܼܝܼ̈ܠܵܝܵܬܼܵܐ ܕܒܸܤܪܵܐ. .ܘܗܸܢܘܿܢ ܕܹܝܢ ܡܩܲܛܪܓܼܝܼܢ ܗ̄ܘ̣ܵܘ ܠܗܵܠܹܝܢ
ܕܕܼܝܼܠܝ ܡܸܬܼܪܲܥܹܝܢ: ܕܐܵܦ ܐܸܢܵܐ ܗܵܠܹܝܢ ܐܵܡܲ݁ܪ ܐ̄ܢܵܐ. ܘܲܠܕܼ̈ܠܵܝܵܬܼܵܐ
ܕܐܲܠܵܗܵܐ ܥܲܠ ܟܝܵܢܵܐ ܕܐܲܠܵܗܘܼܬܼܵܐ ܡܲܤܩܝܼܢ: ܘܲܠܕܼ̈ܠܵܝܬܼܵܐ ܕܐ̄̈ܢܵܫܘܼܬܼܵܐ
ܥܲܠ ܐ̄ܢܵܫܘܼܬܼܵܐ. ܘܲܠܦܲܪܨܘܿܦܵܐ ܡܩܲܒܿܠܝܼܢ ܕܲܗܘ̤ܵܬܼ ܚܕܼܵܝܝܘܼܬܼܵܐ: ܘܠܵܘ
ܠܲܟܼܝܵܢܵܐ. ܘܲܒܼܨܝܼܪ ܩܲܠܝܼܠ ܟܠܢܵܫ ܡܸܬܼܚܪܸܐ ܗ̄ܘ̣ܵܐ ܠܘܵܬܼ ܚܲܒܼܪܹܗ
ܟܲܕܸܼ ܡܲܟܸܿܣ ܠܹܗ ܡܸܛܠܵܬܼܝ: ܐܲܝܟܼ ܡ̇ܢ ܕܡܸܬܼܥܫܵܩܘܼ ܐܸܬܼܥܲܫ̇ܩܹܬܼ.
ܘܡܼܐܬܼܐܲܡܪ̈ܵܢ ܗ̣̄ܘܲܝ̈ ܗܵܠܹܝܢ ܕܝܼܠܝ ܒܼܟܼܠܵܗ̇ ܚܦܝܼܛܘܼܬܼܵܐ: ܘܗܵܠܹܝܢ
ܡܲܪܤܝܼܢ ܗ̄ܘ̣ܵܘ ܠܲܐܲܝܠܹܝܢ ܕܐܵܡ̇ܪܝܼܢ ܗ̄ܘ̣ܵܘ ܕܲܬܼܪܹܝܢ ܒܢ̈ܝܼܢ ܐܸܡܲ݁ܪ ܐ̄ܢܵܐ:
ܐܲܝܟܼ ܡ̇ܢ ܕܡ̣ܢ ܡܬܼܘܿܡ ܠܵܐ ܐܲܡܝܼܪ ܠܝܼ. ܘܗܵܢ̇ܘܿܢ ܠܐܲܝܠܹܝܢ ܛܕܐܵܡ̇ܪܝܼܢ
ܗ̄ܘ̣ܵܘ ܚܲܕܼ ܟܝܵܢܵܐ ܡܲܟܼܤܝܼܢ ܗ̄ܘ̣ܵܘ ܠܗܘܿܢ: ܕܚܵܫܘܿܫܵܐ ܐܵܡܪܝܼܢ ܠܹܗ
ܠܐܲܠܵܗܵܐ: ܐܲܝܟܼ ܕܐܵܡܲ݁ܪ ܗ̄ܘܹ̇ܝܬܼ ܐܸܢܵܐ ܥܠܲܝܗܘܿܢ ܕܐܵܡ̇ܪܝܼܢ ܗ̄ܘ̣ܵܘ.
ܡܲܢ̣ܘܼ ܗܵܘ̇ ܕܐܵܠܹ̇ܝܨ ܗ̄ܘ̣ܵܐ ܠܗܘܿܢ ܠܡܹܐܡܲܪ ܗܵܠܹܝܢ ܕܝܼܠܝܼ:
ܕܲܒܼܝܲܕܼ ܦܘܼܩ̈ܕܵܢܹܐ ܡܼܬܼ̈ܟܲܠܝܵܢ ܗ̣̄ܘܲܝ̈ ܕܠܵܐ ܢܸܬܼܩܵܪ̈ܝܵܢ: ܕܡܸܢܗܘܿܢ
ܘܲܒܼܗܘܿܢ ܡܲܩܪܒܼܝܼܢ ܗ̄ܘ̣ܵܘ ܠܲܡܡܲܠܵܠܘܼܬܼܗܹܝܢ ܒܟܼܠܵܗ̇ ܚܦܝܼܛܘܼܬܼܵܐ؟
ܘܟܲܕܼ ܐܸܢܵܐ ܫܲܬܿܝܼܩ ̄ܐ̄ܢܵܐ: ܘܲܫܩܝܼܠ ܡܹܢܝ ܫܘܼܠܛܵܢܵܐ ܕܐܸܢܵܐ ܐܹܡܲܪ
ܐܸܢܹܝܢ: ܘܐܸܢܵܐ ܠܵܐ ܡܸܬܼܗܲܝܡܲܢ ܗ̄ܘܹ̇ܝܬܼ: ܐܲܩܝܼܡ̣ ܗ̄ܘ̣ܵܐ ܐܲܠܵܗܵܐ ܠܗܵܢܘܿܢ
ܕܡܸܬܼܗܲܝܡܢܝܼܢ ܗ̄ܘ̣ܵܘ ܟܲܕܼ ܐܵܡ̇ܪܝܼܢ ܗ̄ܘ̣ܵܘ ܗܵܠܹܝܢ ܕܝܼܠܝ:
pb. 514
ܕܐܝܼܬܲܝܗܹܝܢ ܫܪܵܪܵܐ: ܟܲܕܼ ܠܵܐ ܐܝܼܬܼ ܗ̄ܘ̣ܵܐ ܥܠܲܝܗܹܝܢ ܡܲܤܒܿܪܵܢܘܼܬܼܵܐ
ܡܸܕܸܡ: ܕܐܵܘ ܡܸܛܠ ܪܵܚܡܘܼܬܼܵܐ ܐܵܘ ܡܸܛܠ ܚܘܼܒܵܐ ܕܝܼܠܝ ܗܵܠܹܝܢ
ܐܵܡ̇ܪܝܼܢ ܗ̄ܘ̣ܵܘ. ܘܗܵܠܹܝܢ ܤܵܥܲܪ ܗ̄ܘ̣ܵܐ ܐܲܠܵܗܵܐ: ܠܵܘ ܡܸܛܠܵܬܼܝ. ܡܲܢ̣ܘܼ
ܓܹܝܪ ܢܤܸܛܘܿܪܝܼܣ؟ ܐܵܘ ܡܵܢܵܐ ܐܸܢܘܿܢ ܚܲܝܵܘ̈ܗܝ؟ ܐܵܘ ܡܵܢܵܐ ܡܵܘܬܹܗ
ܒܥܵܠܡܵܐ؟ ܐܸܠܵܐ ܡܸܛܠ ܫܪܵܪܵܐ ܕܝܲܗ̣̄ܒܼ ܠܥܵܠܡܵܐ: ܗܵܘ̇ ܕܲܒܼܛܸܠ̣
ܗ̄ܘ̣ܵܐ ܡ̣ܢ ܥܸܠ̈ܠܵܬܼܵܐ ܡܲܛܥܝܵܢ̈ܝܵܬܼܵܐ: ܘܐܲܟܸܣ ܗ̄ܘ̣ܵܐ ܕܹܝܢ ܠܡܲܛܥܝܵܢܹ̈ܐ.
ܘܡܸܛܠ ܕܲܒܼܡܲܤܒܿܪܵܢܘܼܬܼܵܐ ܐܝܼܬܲܝܗܘܿܢ ܗ̄ܘ̣ܵܘ ܥܠܝ: ܘܠܵܐ ܡܗܲܝܡܢܝܼܢ
ܗ̄ܘ̣ܵܘ ܠܐܲܝܠܹܝܢ ܕܐܵܡܲ݁ܪ ܗ̄ܘܹ̇ܝܬܼ: ܐܲܝܟܼ ܐܲܝܢܵܐ ܕܲܡܛܲܫܸܐ ܠܲܫܪܵܪܵܐ
ܘܟܼܵܠܹ̇ܐ ܠܡܸܐܬܼܵܐ ܚܲܬܿܝܼܬܬܵܐ: ܝܲܗ̣̄ܒܼ ܗ̄ܘ̣ܵܐ ܐܲܠܵܗܵܐ ܟܵܪܘܿܙܵܐ ܠܗܵܕܹܐ:
ܠܗܵܘ̇ ܕܲܟܼܟܸܐ ܗ̄ܘ̣ܵܐ ܡ̣ܢ ܡܲܤܒܿܪܵܢܘܼܬܼܵܐ ܗܵܕܹܐ: ܠܠܹܐܘܿܢ: ܗܵܘ̇
ܕܲܕܼܠܵܐ ܩܸܢܛܵܐ ܡܲܟܼܪܸܙ ܗ̄ܘ̣ܵܐ ܠܲܫܪܵܪܵܐ. ܘܡܸܛܠ ܕܲܡܩܲܕܡܘܼܬܼܵܐ
ܕܤܘܼܢܗܵܕܘܿܣ ܐܲܬܼܘܪܲܬ̤ ܠܤܲܓܿܝܼ̈ܐܹܐ: ܘܐܵܦ ܠܦܲܪܨܘܿܦܵܐ ܕܪ̈ܗܘܿܡܵܝܹܐ:
ܕܠܵܐ ܢܗܲܝܡܢܘܼܢ ܠܐܲܝܠܹܝܢ ܕܐܵܡܲ݁ܪ ܗ̄ܘܹ̇ܝܬܼ ܐܸܢܵܐ: ܘܲܕܼܠܵܐ ܒܘܼܚܵܢܵܐ
ܦܵܫ̣ ܗ̣̄ܘܲܝ̈: ܐܲܪܦܝܼ ܐܲܠܵܗܵܐ ܕܢܸܗܘ̈ܝܵܢ ܗܵܠܹܝܢ ܕܲܠܩܘܼܒܼܠܵܐ: ܕܲܢܫܲܢܸܐ
ܠܐܲܦܸܤܩܘܿܦܵܐ ܕܪܗܘܿܡܹܐ: ܗܵܘ̇ ܕܡܵܪܘܼܬܼܵܐ ܕܥܘܼܬܵܕܼܵܐ ܕܤܘܼܢܗܵܕܘܿܣ
ܕܒܲܐܦܸܤܘܧܣ ܥܵܒܹ̇ܕܼ ܗ̄ܘ̣ܵܐ ܠܘܼܩܒܲܠܝ: ܘܢܸܥܒܿܕܹܗ ܕܢܸܫܠܲܡ ܘܲܢܫܲܪܲܪ
ܠܐܲܝܠܹܝܢ ܕܡ̣ܢ ܐܲܦܸܤܩܘܿܦܵܐ ܕܩܘܼܤܛܲܢܛܝܼܢܵܦܘܿܠܝܼܣ ܐܸܬܼܐܡܲܪ.
ܘܗܵܘ̇ ܕܟܼܠ ܡܸܕܸܡ ܡܸܫܟܲܚ ܗ̄ܘ̣ܵܐ: ܒܠܵܐ ܡܸܕܸܡ ܐܸܬܼܚܫܸܒܼ
ܗ̄ܘ̣ܵܐ. ܗܵܢܵܘ ܕܹܝܢ ܕܝܵܤܩܘܿܪܘܿܣ: ܐܲܦܸܤܩܘܿܦܵܐ ܕܐܵܠܹܟܼܤܲܢܕܪܝܼܵܐ.
ܒܠܵܐ ܡܸܕܸܡ ܕܹܝܢ ܐܵܡܲ݁ܪ ܐ̄ܢܵܐ: ܕܒܲܥܪܘܼܩܝܵܐ ܐܸܬܼܚܲܫܲܚ ܗ̄ܘ̣ܵܐ:
ܘܐܸܬܼܦܲܪܲܣ ܕܠܵܐ ܢܸܫܬܿܪܸܐ ܘܢܸܫܬܿܕܸܐ ܠܐܸܟܿܤܘܿܪܝܼܵܐ. ܕܒܲܐܝܼܠܹܝܢ ܕܚܵܫ̇ܝܼܢ
pb. 515
ܢܗܲܝܡܢܘܼܢ: ܐܵܦ ܠܐܲܝܠܹܝܢ ܕܲܒܼܤܘܼܬܢܗܵܕܘܿܣ ܩܲܕܼܡܵܝܬܼܵܐ ܐܸܪܬܿܥܲܪ
ܗ̣̄ܘܲܝ̈ ܡ̣ܢ ܡܸܨܪܵܝܵܐ ܠܘܼܩܖܒܲܠܝ. ܘܡܸܛܠ ܪܵܚܡܘܼܬܼܵܐ ܕܒܸܕܼܝܵܐ
ܕܡܲܠܟܵܐ ܘܲܕܼܪܹ̈ܫܵܢܹܐ ܕܒܹܝܬܼ ܡܲܠܟܿܘܼܬܼܵܐ: ܡܸܤܬܿܒܲܪ ܗ̄ܘܹ̇ܝܬܼ ܐܸܢܵܐ
ܕܐܵܠܹ̇ܨ ܐ̄ܢܵܐ ܠܤܘܼܢܗܵܕܘܿܣ: ܗܵܝ̇ ܕܠܵܐ ܐܲܙܝܼܥܬܲܢܝ ܕܡ̣ܢ ܫܪܵܪܵܐ
ܐܸܬܼܪܲܦܸܐ: ܘܐܸܬܼܐܠܸܨ ܠܡܸܫܠܲܡ ܠܡܲܠܟܵܐ: ܡܸܛܠ ܐܲܝܠܹܝܢ ܕܐܸܤܬܿܥܲܪ
ܠܘܼܩܒܲܠܝ. ܕܡܸܛܠ ܕܠܵܐ ܡܸܕܸܡ ܒܲܚܸܢܘ ܗ̄ܘ̣ܵܘ ܒܲܫܪܵܪܵܐ: ܤܵܒܼ̇ܪܝܼܢ
ܗ̄ܘ̣ܵܘ ܕܲܡܓܲܕܦܵܢܵܐ ܐܝܼܬܲܝ. ܐܲܝܟܲܢܵܐ ܕܹܝܢ ܕܲܢܚܵܘܸܐ ܐܲܠܵܗܵܐ: ܕܚܘܼܒܵܐ
ܗ̄ܘ̣ܵܐ ܢܟܼܝܼܠܵܐ ܕܡܲܠܟܵܐ ܕܲܩܢܸܐ ܗ̄ܘ̣ܵܐ ܠܘܵܬܼܝ: ܘܠܵܘ ܒܲܫܪܵܪܵܐ ܐܸܠܵܐ
ܡܸܛܠ ܩܸܢܝܵܢܹ̈ܐ: ܚܵܘܝܹܗ ܗ̄ܘ̣ܵܐ ܒܐܘܼܛܸܟܼܝܼܣ ܘܒܲܦܠܵܘܝܵܢܘܿܣ
ܠܥܘܼܕܼܪܵܢܹܗ. ܒܐܲܝܠܹܝܢ ܕܐܸܬܼܚܙܝܼ̈ ܕܠܵܐ ܝܲܗ̣̄ܒܼ ܠܵܐ ܠܡܸܬܼܟܲܢܵܫܘܼ: ܘܠܵܐ
ܠܐܲܝܠܹܝܢ ܕܐܸܬܼܟܲܢܲܫܘ ܫܵܒܼܩ̇ܝܼܢ ܗ̄ܘ̣ܵܐ ܠܡܹܐܡܲܪ ܡܸܕܸܡ: ܠܒܲܪ ܡ̣ܢ
ܗܵܘ̇ ܡܵܐ ܕܡܸܢܼܦܲܩܕܝܼܢ ܗ̄ܘ̣ܵܘ: ܐܸܠܵܐ ܒܕܼܚܸܠܬܼܵܐ ܘܲܒܼܬܲܚܡܲܨܬܵܐ
ܡܚܲܝܒܼܝܼܢ ܗ̄ܘ̣ܵܘ ܐܵܦ ܠܢܲܦܫܗܘܿܢ.
ܡܸܛܠ ܬܘܼܒܼ ܕܡܲܤܒܿܪܝܼܢ ܗ̄ܘ̣ܵܘ ܕܲܩܪܵܝܬܼܵܐ ܕܝܼܠܝ ܠܒܼܘܼܚܵܢܵܐ
ܘܲܐܕܼܝܼܢܵܐ ܗܘ̤ܵܬܼ ܗ̄ܘ̣ܵܬܼ: ܐܸܢܵܐ ܕܹܝ ܡܸܒܼܕܵܐ ܒ̇ܕܹܝܬܼ. ܕܠܵܐ ܗ̄ܘ̣ܵܐ
ܠܕܼܝܼܢܵܐ: ܐܵܠܵܐ ܠܩܵܬܼܵܪܵܤܝܣ ܘܲܠܢܸܟܼܠܵܐ ܕܐܲܒܼܕܵܢܵܐ ܘܲܕܼܡܵܘܬܵܐ ܩܪܵܐܘܼܢܝ.
ܟܲܕܼ ܡܲܟܸܿܣ ܠܗܘܿܢ ܐܲܠܵܗܵܐ ܕܩܵܛ̈ܘܿܠܹܐ ܐܝܼܬܲܝܗܘܿܢ: ܐܲܪܦܝܼ ܗ̄ܘ̣ܵܐ
ܐܲܠܵܗܵܐ ܠܲܦܠܵܘܝܵܢܘܼܣ ܕܢܸܥܘܿܠ ܠܤܘܼܢܗܵܕܘܿܣ ܘܲܠܡܸܚܲܫ ܗܵܘ̇ ܡܵܐ
ܕܚܲܫ̣ ܡܸܢܗܘܿܢ. ܓܲܠܝܵܐ ܓܹܝܪ ܕܗܵܠܹܝܢ ܐܝܼܬܲܝܗܹܝܢ: ܗܵܠܹܝܢ ܕܗܵܢ̇ܘܿܢ
ܐܵܦ ܠܘܼܩܒܲܠܝܣ ܤܵܥ̇ܪܝܼܢ ܗ̄ܘ̣ܵܘ ܡ̣ܢ ܩܕܝܼܡ. ܘܡܸܛܠ ܕܡܸܤܬܲܒܼܪܵܐ
ܗ̄ܘ̣ܵܬܼ: ܕܠܵܐ ܡܸܬܼܪܡܹܝܢ ܗܵܢ̇ܘܿܢ ܕܐܲܦܸܤܩ̈ܘܿܦܹܐ ܐܝܼܬܲܝܗܘܿܢ ܗ̄ܘ̣ܵܘ:
pb. 516
ܕܲܠܒܲܪ ܡ̣ܢ ܕܝܼܢܵܐ ܕܫܵܦܲܪ ܠܗܘܿܢ ܡܸܕܸܡ ܠܡܸܥܒܲܕܼ: ܐܵܘ ܡܸܛܠ
ܚܘܼܒܵܐ ܕܡܲܠܟܵܐ: ܐܵܘ ܒܕܚܸܠܬܼܵܐ: ܐܵܘ ܒܲܫܓܼܘܼܫ̈ܝܹܐ: ܬܘܼܒܼ ܦܲܪܤܝܼ
ܐܸܢܘܿܢ ܐܲܠܵܗܵܐ ܟܲܕܼ ܥܵܒܼ̇ܕܝܼܢ ܕܲܠܩܘܼܒܼܠܵܐ: ܘܐܲܟܸܿܣ̣ ܐܸܢܘܿܢ ܩܕܼܵܡ
ܟܠܢܵܫ. ܘܠܵܐ ܫܒܲܩ̣ܘ ܡܸܕܸܡ ܕܠܵܐ ܤܗܸܕܼܘ. ܐܸܠܵܐ ܒܝܲܕܼ ܟܠܗܹܝܢ
ܠܥܸܠ̈ܠܵܬܼܵܐ ܕܡܲܛܥܝܵܢܘܼܬܼܵܐ ܐܲܟܸܿܣ ܗ̄ܘ̣ܵܐ: ܘܥܲܠ ܐܸܓܼܵܪܹ̈ܐ ܐܲܟܼܪܸܙ
ܐܸܢܹܝܢ. ܐܲܝܟܲܢܵܐ ܕܠܵܐ ܢܸܗܘܸܐ ܐܵܦ ܠܵܐ ܚܲܕܼ ܡܲܦܲܩܒܪܘܼܚܵܐ: ܠܐܲܝܠܹܝܢ
ܕܲܡܤܲܟܿܡܝܼܢ ܬܲܦܫܗܘܿܢ ܒܠܵܐ ܝܑܼܕܲܥܬܼܵܐ. ܐܸܠܵܐ ܐܲܝܟܲܢܵܐ ܕܲܒܼܝܲܕܼ ܟܠܗܹܝܢ
ܐܸܬܼܟܿܤܸܣ ܗ̄ܘ̣ܵܐ ܦܸܪܥܘܿܢ ܡ̣ܢ ܐܲܠܵܗܵܐ: ܘܲܕܼܠܵܐ ܡܲܦܲܩܒܪܘܼܚܵܐ
ܩܵܪܝܼ: ܕܠܵܐ ܒܢܲܩܝܼܦܘܼܬܼܵܐ ܕܡܸܠܹ̈ܐ: ܘܠܵܐ ܒܗܘܿܢ ܒܤܘܼܥܪ̈ܵܢܹܐ:
ܘܠܵܐ ܒܡܲܟܿܤܵܢܘܼܬܼܵܐ ܕܡ̣ܢ ܒܢܲܝ̈ܢܵܫܵܐ: ܘܠܵܐ ܬܘܼܒܼ ܒܗܵܠܹܝܢ ܕܡ̣ܢ
ܐܲܠܵܗܵܐ ܨܒܼܵܐ ܗ̄ܘ̣ܵܐ ܠܡܸܬܿܛܦܵܤܘܼ: ܘܲܒܼܓܼܘܼܕܵܦܹܗ ܡܝܼܬܼ ܗ̄ܘ̣ܵܐ:
ܗܵܟܲܢܵܐ ܐܵܦ ܗܵܠܹܝܢ ܕܠܵܐ ܡܲܦܲܩ ܒܪܘܼܚܵܐ ܡܩܵܘܹ̇ܝܢ. . .
ܟܲܕܼ ܗܵܠܹܝܢ ܗܵܟܹܝܠ ܚܙܹ̇ܝܬܼ ܗ̄ܘܹ̇ܝܬܼ ܕܬܸܬܼܥܒܸܕܼ ܡ̣ܢ ܐܲܠܵܗܵܐ:
ܨܵܒܹ̇ܝܢ ܗ̄ܘ̣ܘܲܝܬܿܘܿܢ ܕܐܸܫܬܘܿܩ ܘܐܹܛܲܫܸܐ ܠܲܡܕܒܿܪܵܢܘܼܬܼܵܐ ܕܐܲܠܵܗܵܐ
ܕܐܲܝܟܼ ܗܵܕܹܐ ܟܠܵܗ̇؟ . . ܠܵܐ ܡܸܢܼܦܲܪܫܝܼܢ ܗ̄ܘ̣ܵܘ ܢܒܼܝܼ̈ܘ̈ܗܝ ܕܐܲܠܵܗܵܐ:
ܗܵܢ̇ܘܿܢ ܕܡ̣ܢ ܢܒܼܝܹ̈ܐ ܕܓܵܠܹ̈ܐ ܐܲܝܟܼ ܕܡ̣ܢ ܢܒܼܝܹ̈ܐ ܡܸܬܿܬܲܚܪܡܝܼܢ
ܗ̄ܘ̣ܵܘ ܐܲܝܟܼ ܢܒܼܝܹ̈ܐ ܕܲܓܵܠܹ̈ܐ: ܐܸܠܘܼ ܠܵܐ ܩܲܒܸܿܠ̣ܘ ܕܢܸܬܿܬܲܚܪܡܘܼܢ
ܡܸܛܠ ܐܲܠܵܗܵܐ ܡ̣ܢ ܢܒܼܝܹ̈ܐ: ܕܲܓܵܠܹ̈ܐ. ܠܵܐ ܡܸܫܬܿܘܹܝܢ ܗ̄ܘ̣ܵܘ ܠܫܘܼܒܼܚܵܐ
ܘܲܠܡܲܠܦܵܢܘܼܬܼܵܐ ܕܢܒܼܝܹ̈ܐ: ܐܸܢܗ̤ܘ ܕܲܢܛܲܪܘ ܒܢܲܝ̈ܗܘܿܢ ܕܗܵܢ̇ܘܿܢ
ܠܫܲܡܘܼܬܼܵܐ ܕܲܢܒܼܝܹ̈ܐ ܕܲܓܵܠܹ̈ܐ. ܘܠܵܐ ܡܸܬܼܦܲܪܩܝܼܢ ܗ̄ܘ̣ܵܘ ܘܡܸܫܬܵܘܙܒܼܝܼܢ
pb. 517
ܗ̄ܘ̣ܵܘ ܗܵܢ̇ܘܿܢ ܕܡ̣ܢ ܝܗ̄ܘܼ̈ܕܵܝܹܐ ܗܘ̤ܵܘ ܟܪܸ̈ܤܛܝܵܢܹܐ: ܐܸܢܗ̤ܘ ܕܲܠܕܼܝܼܸܢܵܐ
ܕܲܒܼܛܵܠܘܿܡܘܼܬܼܵܐ ܕܐܲܒܼܵܗܲܝ̈ܗܘܿܢ ܕܠܘܼܩܒܲܠ ܡܫܝܼܚܵܐ: ܐܲܝܟܼ ܕܡ̣ܢ ܐ̄ܢܵܫܵܐ
ܩܲܕܼܝܼ̈ܫܹܐ ܘܙܲܕܼܝܼܩܹ̈ܐ ܢܛܲܪܘ ܗ̄ܘ̣ܵܘ. ܠܵܐ ܗܵܘܹ̇ܝܢ ܗ̄ܘ̣ܵܘ ܫܠܝܼܚܹ̈ܐ
ܕܲܡܫܝܼܚܵܐ: ܐܸܢܗ̤ܘ ܕܲܠܟܼܠܹܗ ܟܸܢܫܵܐ ܕܲܝܗܘܼ̈ܕܵܝܹܐ: ܘܲܠܟܼܵܗ̈ܢܹܐ:
ܘܲܠܡܲܦܲܝ̈ ܢܲܡܘܿܤܵܐ: ܘܠܪܹ̈ܫܵܢܹܐ: ܐܲܝܟܼ ܡܲܠܦܵܢܹ̈ܐ ܕܢܵܡܘܿܤܵܐ
ܘܕܲܬܒܼܝܹ̈ܐ ܐܸܬܼܢܩܸܦܘ ܗ̄ܘ̣ܵܘ. ܠܵܐ ܡܗܲܝܡܢܝܼܢ ܗ̄ܘ̣ܵܘ ܒܲܡܫܝܼܚܵܐ:
ܘܐܵܦܠܵܐ ܡܵܝ̇ܬܝܼܢ ܗ̄ܘ̣ܵܘ ܚܠܵܦ ܡܫܝܼܚܵܐ: ܠܐܸܗ̤ܘ ܕܠܡܵܘܬܵܐ
ܘܲܠܫܝܼܛܘܼܬܼܵܐ: ܠܵܐ ܗ̄ܘ̣ܵܐ ܒܐܝܼܩܵܪܵܐ ܐܸܠܵܐ ܒܫܝܼܛܘܼܬܼܵܐ ܡܤܲܒܿܪܝܼܢ
ܗ̄ܘ̣ܵܘ. ܘܐܵܦܠܵܐ ܗܵܫܵܐ ܡ̣ܢ ܟܸܢܫܹ̈ܐ ܘܡ̣ܢ ܪܹ̈ܫܵܢܹܐ ܘܡ̣ܢ ܡܵܪ̈ܵܘܵܬܼܵܐ
ܡܸܬܼܝܲܩܪܝܼܢ ܗ̄ܘ̣ܵܘ: ܐܸܢܗ̤ܘ ܕܠܡܵܘܬܵܐ ܘܲܠܒܸܗܬܿܬܼܵܐ ܕܡ̣ܢ ܪܹ̈ܫܢܹܐ
ܘܥܲܡܡܹ̈ܐ ܠܵܐ ܤܲܝܒܲܪܘ. ܠܵܐ ܡ̣ܢ ܡܲܠܟܹ̈ܐ ܘܪܹ̈ܫܵܢܹܐ ܘܚܲܝ̈ܠܵܘܵܬܼܵܐ
ܠܝܲܨܝܼܦܘܼܬܼܵܐ ܕܐܲܝܟܼ ܗܵܕܹܐ ܡܸܫܬܿܘܹܝܢ ܗ̄ܘ̣ܵܘ: ܐܸܢܗ̤ܘ ܕܦܘܼܩ̈ܕܵܢܹܐ
ܘܢܵܡ̈ܘܿܤܹܐ ܕܡܲܠܟܹ̈ܐ ܘܲܕܲܕܲܝܵܢܹ̈ܐ ܘܲܕܼܪܹ̈ܫܵܢܹܐ ܢܛܲܪܘ ܗ̄ܘ̣ܵܘ. ܠܵܐ
ܡܸܬܼܚܲܫܒܝܼܢ ܗ̄ܘ̣ܵܘ ܒܗܵܢܵܐ ܐܵܪ̈ܬܵܕܘܿܟܿܤܹܐ ܘܡܲܠܦܵܢܹ̈ܐ ܐܲܒܼܵܝ̈ܢ: ܐܸܢ ܡ̣ܢ
ܚܘܼܝܵܒܼܵܐ ܕܤܘܼܢܗܵܕܘܿܣ ܕܗܲܪ̈ܛܝܼܩܹܐ ܒܥ̣ܵܘ ܗ̄ܘ̣ܵܘ ܠܡܸܥܪܲܩ:
ܘܲܠܡܹܐܡܲܪ ܗܵܠܹܝܢ ܕܗܵܢܘܿܢ ܐܵܡ̇ܪܝܼܢ ܗ̄ܘ̣ܵܘ: ܘܗܵܘܹ̇ܝܢ ܗ̄ܘ̣ܵܘ
ܢܵܤ̈ܒܲܝ ܒܐܲܦܹ̈ܐ. ܠܵܘ ܚܢܲܢ ܡܸܫܬܘܹܝܢ ܗ̣̄ܘܲܝܢ ܠܡܲܠܦܵܢܘܼܬܼܵܐ ܕܥܲܡ̈ܠܹܐ
ܕܗܵܢܘܿܢ: ܐܸܢܗ̤ܘ ܕܲܕܼܠܵܐ ܒܘܼܚܵܢܵܐ ܡܩܲܒܿܠܝܼܢ ܗ̣̄ܘܲܝܢ ܠܫܲܠܡܘܼܬܼܵܐ
ܕܠܘܼܩܒܲܠܗܘܿܢ ܕܐܲܝܟܼ ܕܡ̣ܢ ܤܘܼܢܗܵܕܘܿܣ.
ܘܕܲܒܼܦܵܤܝܼ̈ܩܵܬܼܵܐ ܐܹܡܲܪ: ܠܵܐ ܐܝܼܬܼܵܘܗܝ ܡܝܼܠܹܛܘܿܣ ܘܐܘܼܤܛܵܬܝܼܣ
ܐܲܦܸܤܩ̈ܘܿܦܹܐ ܕܐܲܢܛܝܵܟܼܝܵܐ: ܐܸܢ ܠܲܓܼܒܼܝܼܵܬܼܵܐ ܘܲܠܕܼܝܼܢܵܐ ܕܡ̣ܢ ܤܘܼܢܗܵܕܘܿܣ
pb. 518
ܕܗܲܪ̈ܵܛܝܼܩܹܐ ܕܠܘܼܩܒܲܠܗܘܿܢ ܡܩܲܒܿܠܝܼܢ ܗ̄ܘ̣ܵܘ. ܘܠܵܐ ܐܝܼܬܼܵܘܗܝ
ܐܵܬܵܢܵܤܝܼܣ ܐܲܦܸܤܩܘܿܦܵܐ ܕܐܵܠܹܟܼܤܲܢܕܪܝܼܵܐ: ܐܸܢܗ̤ܘ ܕܲܠܕܼܝܼܢܵܐ
ܕܗܵܢ̇ܘܿܢ ܕܲܫܕܼܵܐܘܼܗܝ: ܕܠܵܐ ܦܘܼܠܵܓܼܵܐ ܘܲܕܼ ܡ̣ܢ ܐܵܪ̈ܬܵܕܘܿܟܿܤܹܐ ܢܩܲܒܸܿܠ.
ܠܵܐ ܐܝܼܬܼܵܘܗܝ ܝܘܿܗܲܢܝܼܣ ܐܲܦܸܤܩܘܿܦܵܐ ܕܩܘܼܤܛܲܢܛܝܼܢܵܦܘܿܠܝܼܣ:
ܐܸܢ ܠܕܝܼܢܵܐ ܘܠܲܫܪܵܝܵܐ ܕܲܗܘ̤ܵܐ ܥܠܵܘܗܝ ܐܲܝܟܼ ܕܡ̣ܢ ܤܘܼܢܗܵܕܘܿܣ
ܕܠܵܐ ܒܘܼܚܵܢܵܐ ܢܩܲܒܸܿܠ. ܘܠܵܐ ܬܘܼܒܼ ܐܝܼܬܼܵܘܗܝ ܗ̄ܘ̣ܵܐ ܦܠܵܘܝܵܢܘܿܣ
ܐܲܦܸܤܩܘܿܦܵܐ ܕܩܘܼܤܛܲܢܛܝܼܢܵܦܘܿܠܝܼܣ: ܐܸܢܗ̤ܘ ܕܠܚܘܼܪܩܵܢܵܐ
ܕܤܘܼܢܗܵܕܘܿܣ ܬܹܒܹܠܵܝܬܼܵܐ ܕܲܫܪܵܬܹܗ: ܐܲܝܟܼ ܚܘܼܪܩܵܢܵܐ ܕܡ̣ܢ
ܤܘܼܢܗܵܕܘܿܣ ܢܸܫܠܲܡ. ܠܵܐ ܐܝܼܬܼܵܘܗܝ ܗ̄ܘ̣ܵܐ ܟܠܢܵܫ: ܐܲܝܕܵܐ ܕܡ̣ܢ
ܐܲܝܕܵܐ ܕܗ̤ܝ ܡܕܝܼܢܬܐ ܐܝܼܬܼܵܘܗܝ: ܕܲܒܼܗܵܠܹܝܢ ܚܲܫ ܗ̄ܘ̣ܵܐ ܡܸܛܠܵܬܼܝ:
ܘܐܲܝܟܼ ܫܸܡܫܵܐ ܡܲܢܗܪܝܼܢ ܗ̄ܘ̣ܵܘ: ܐܸܢܗ̤ܘ ܕܲܠܘܵܬܼ ܩܛܹܐ ܓܼܪ̈ܵܢܹܐ ܚܵܪܹܬܼ
ܘܠܵܘ ܠܘܵܬܼ ܐܲܠܵܗܵܐ. ܘܒܲܐܝܠܹܝܢ ܕܟܼܠ ܚܲܕܼ ܚܲܕܼ ܡ̣ܢ ܗܵܠܹܝܢ ܗܘ̤ܵܐ
ܗ̄ܘ̣ܵܐ ܒܐܲܠܵܗܵܐ: ܐܵܦ ܐܸܢܵܐ ܐܸܫ̇ܬܘܝܼܬܼ ܠܡܸܗܵܘܵܐ. ܠܵܘ ܓܹܝܪ ܕܝܼܠܝ
ܐܝܼܬܼܵܘܗܝ ܤܘܼܥܪܵܢܵܐ: ܐܸܠܵܐ ܕܡܫܝܼܚܵܐ ܕܚܲܝܠܢܝ. ܟܠ ܐ̄ܢܵܫ ܕܹܝܢ
ܝܵܗܹ̇ܒܼ ܦܸܬܼܓܼܵܡܵܐ ܠܐܲܠܵܗܵܐ: ܥܲܠ ܐܲܦܲܝ̈ ܗܵܠܹܝܢ ܕܐܸܡ݂ܲܪ ܐܵܘ ܤ̣ܥܲܪ
ܐܵܘ ܐܲܟܼܫܸܠ̣: ܐܵܘ ܕܢܸܫܪܸܐ ܠܟܸܫ̈ܠܹܐ ܒܟܼܠܵܗ̇ ܚܦܝܼܛܘܼܬܼܵܐ ܐܸܬܼܚܲܦܲܛ.
ܐܸܢ ܕܹܝܢ ܟܲܕܼ ܟܠܡܸܕܸܡ ܥܵܒܹ̇ܕܼ ܐ̄ܢܵܫ: ܗܵܘ̇ ܕܡܸܬܼܟܲܫܸܠ ܠܵܐ
ܡܸܬܿܛܦܝܼܣ: ܢܸܬܼܟܿܫܸܠ ܡܸܛܠ ܢܲܦܫܹܗ: ܘܠܵܘ ܡܸܛܠ ܗܵܘ̇ ܕܐܵܡܲܪ
ܘܩܵܥܹ̇ܐ ܠܹܗ: ܘܠܵܐ ܡܸܫܬܿܡܲܥ ܠܹܗ.
ܡܸܛܠ ܕܹܝܢ ܕܥܵܕܼܠܝܼܢ ܗ̄ܘ̣ܵܘ ܠܝܼ ܤܲܓܿܝܼ̈ܐܹܐ ܙܲܒܼܢ̈ܝܸܢ ܤܲܓܿܝܼ̈ܐܵܢ:
pb. 519
ܕܠܵܐ ܟܸܬܼܒܹ̇ܬܼ ܠܘܵܬܼ ܠܹܐܘܿܢ ܐܲܦܸܤܩܘܿܦܵܬ ܕܪܗܘܿܡܹܐ: ܠܡܲܠܵܦܘܼܬܹܗ
ܟܠܗܹܝܢ ܐܲܝܠܹܝܢ ܕܐܸܬܿܥܲܪ ܐܲܝܟܼ ܕܲܗ̤ܘܲܝ̈: ܘܲܠܫܘܼܚܠܵܦܵܐ
ܕܗܲܝܡܵܢܘܼܬܼܵܐ: ܐܲܝܟܼ ܕܲܠܘܵܬܼ ܓܲܒܼܪܵܐ ܕܲܬܼܪܝܼܨܵܐ ܐܝܼܬܼܵܘܗܝ
ܒܗܲܝܡܵܢܘܼܬܹܗ. ܘܐܵܦ ܟܲܕܼ ܠܝܼ ܐܸܬܼܝܲܗܒܲܬ̤ ܠܝܼ ܡܵܢܵܬܼܵܐ ܕܐܸܓܲܪܬܵܐ
ܕܕܼܝܼܢܵܐ ܕܥܲܠ ܠܦܵܘܝܵܢܘܿܣ ܘܐܘܼܛܸܟܼܝܼܣ: ܕܒܼܵܗ̇ ܡܸܬܼܓܲܠܝܵܐ ܗ̄ܘ̣ܵܬܼ
ܕܠܵܐ ܕܚܸܠ̣ܘ ܡ̣ܢ ܪܵܚܡܘܼܬܼܵܐ ܕܡܲܠܟܿܘܼܬܼܵܐ. ܡܸܛܠ ܗܵܕܹܐ ܠܵܐ
ܟܸܬܼܒܹ̇ܬܼ: ܠܵܐ ܗ̄ܘ̣ܵܐ ܡܸܛܠ ܕܓܲܒܼܪܵܐ ܐܝܼܬܲܝ ܚܬܼܝܼܪܵܐ ܘܕܲܠܵܐ ܒܘܼܝܵܢܵܐ.
ܐܸܠܵܐ ܐܲܝܟܲܢܵܐ ܕܠܵܐ ܐܲܥܘܟܹܗ ܡ̣ܢ ܪܲܗܛܗ ܠܗܵܘ̇ ܕܫܦܝܼܪ ܪܵܗܹ̇ܛ
ܗ̄ܘ̣ܵܐ: ܡܸܛܠ ܡܩܲܕܡܘܼܬܼܵܐ ܕܥܲܠ ܦܲܪܨܘܿܦܵܐ ܕܝܼܠܝ. ܩܲܒܿܠܹ̇ܬܼ
ܕܹܝܢ ܕܐܹܤܲܝܒܲܪ ܠܐܲܝܠܹܝܢ ܕܩܲܛܪܓܼܘܼܢܝ ܒܗܹܝܢ: ܐܲܝܟܲܢܵܐ ܕܟܲܕܼ ܒܗܵܠܹܝܢ
ܡܸܬܼܩܲܛܪܲܓܼ ܐ̄ܢܵܐ: ܕܠܵܐ ܥܘܼܘܵܟܼܵܐ ܢܩܲܒܿܠܘܼܢ ܗܵܢܘܿܢ ܡܲܠܦܵܢܘܼܬܼܵܐ
ܕܐܲܒܼܵܗ̈ܬܼܵܐ. ܠܲܝܬܿ ܠܝܼ ܓܹܝܪ ܡܸܠܬܼܵܐ: ܥܲܠ ܐܲܝܠܹܝܢ ܕܐܸܬܿܥܲܪ
ܠܘܼܩܒܲܠܝ. ܘܡܸܛܠ ܗܵܝ̇ ܬܘܼܒܼ ܠܵܐ ܟܸܬܼܒܹ̇ܬܼ: ܕܠܵܐ ܐܸܤܬܿܒܲܪ
ܕܡܸܥܪܲܩ ܥܵܪܹܩ ܐ̄ܢܵܐ ܡ̣ܢ ܐܵܓܼܘܿܢܵܐ: ܒܲܕܼ ܕܵܚܹ̇ܠ ܐ̄ܢܵܐ ܡ̣ܢ ܥܲܡܠܹ̈ܐ.
ܕܲܫ̈ܢܲܝܵܐ ܤܲܓܿܝܼ̈ܠܵܬܼܵܐ: ܟܲܕܼ ܐܵܦ ܠܵܐ ܚܲܕܼ ܢܦܹܐܫܵܐ ܗܘ̤ܵܐ ܠܝܼ: ܐܵܦ
ܠܵܐ ܒܘܼܝܵܐܵܐ ܐ̄ܢܵܫܝܵܐ: ܤܵܦ̇ܩܵܢܡ ܐܸܢܹܝܢ ܓܹܝܪ ܗܵܠܹܝܢ ܒܝܼ̈ܫܬܼܵܐ ܕܐܸܬܼ݂ܵܝ̈ ܥܲܠ
ܥܵܠܡܵܐ: ܕܝܲܬܿܝܼܪ ܡܹܢܝ ܡܸܫ̈ܟܿܚܵܢ ܕܲܢܕܲܢ̈ܚܢ ܠܥܹܝܢ ܟܠܢܵܫ: ܛܠܘܼܡܝܵܐ
ܕܗܲܝܡܵܢܘܼܬܼܵܐ ܕܲܫܪܵܪܵܐ.
ܐܸܠܵܐ ܡܸܛܠ ܕܥܵܕܹܠ ܐܲܢ̄ܬܿ ܠܝܼ: ܕܐܲܝܟܼ ܡ̇ܢ ܕܒܲܨܲܪܹܬܼ ܡ̣ܢ
ܕܢܲܗܝܼܪܵܐܝܼܬܼ ܐܹܡܲܪ ܗܵܠܹܝܢ ܕܲܓܼܕܲܫ ܗ̣̄ܘܲܝ̈: ܐܘܿ ܪܹܫܵܝ ܩܲܕܝܼ̈ܫܹܐ
pb. 520
ܤܘܿܦܪܘܿܢܝܲܐ: ܫܡܲܥ ܡܸܟܹܝܠ ܐܵܦ ܐܲܢ̄ܬܿ ܠܗܵܠܹܝܢ ܕܝܵܕܲܥ̇ ܐܲܢ̄ܬܿ:
ܘܡܲܤܗܸܕܼ ܐܲܢ̄ܬܿ ܥܲܠ ܫܪܵܪܵܐ ܕܗܵܠܹܝܢ ܕܡܸܬܼܐܲܡܪ̈ܵܢ. ܒܲܪ ܫܵܥܬܹܗ
ܓܹܝܪ: ܐܲܝܟܼ ܡ̇ܢ ܕܲܡܦܵܣ ܐܲܢ̄ܬܿ: ܩܲܕܼܡ̣ܬܿ ܚ̣ܙܲܝܬܿ: ܕܠܒܲܪܬܹܗ
ܕܗܵܘ̇ ܕܗܵܝܕܝܼܟܼ ܡܲܡܠܸܟܼ ܗ̄ܘ̣ܵܐ: ܚܲܛ̣ܦܵܗ̇ ܗ̄ܘ̣ܵܐ ܡܵܘܬܵܐ. ܘܡ̣ܢ
ܒܵܬܲܪ ܗܵܕܹܐ: ܠܕܲܝܘܵܐ ܗܵܘ̇ ܪܹܫܵܐ ܕܓܲܝܵܪܘܼܬܼܵܐ: ܕܲܠܡܲܠܟܿܬܼܵܐ ܒܨܲܥܪܵܐ
ܘܲܒܼܚܸܤܕܵܐ ܐܲܪܡܝܼ ܗ̄ܘ̣ܵܐ. ܬܘܼܒܼ ܠܲܡܕܼܝܼ̈ܢܵܬܼܵܐ ܕܐܲܦܪܝܼܩܹܐ ܘܕܐܸܤܦܵܢܝܼܵܐ
ܘܲܕܼܡܘܼܙܝܼܩܵܢܘܿܣ ܘܲܠܓܼܵܙܪ̈ܵܬܼܵܐ ܪܵܘܪ̈ܒܼܬܼܵܐ ܘܲܡܫܲܒ̈ܚܵܬܼܵܐ: ܐܵܡܲ݁ܪ ܐ̄ܢܵܐ
ܕܹܝܢ ܠܤܝܼܩܝܼܠܝܼܵܐ ܘܲܠܪܘܿܕܼܘܿܣ ܘܲܠܤܲܓܿܝܼ̈ܐܵܬܼܵܐ ܪܵܘܪ̈ܒܼܵܬܼܵܐ ܐ̄ܚܪܵܢܝܵܬܼܵܐ:
ܘܠܵܗ̇ ܠܪܗܘܿܡܹܐ: ܕܲܠܒܼܵܐܢܕܝܼܠܘܿܣ ܒܲܪܒܿܪܵܝܵܐ ܠܒܸܙܬܼܵܐ ܐܸܫܬܿܠܸܡ
ܗ̣̄ܘܲܝ̈. ܒܪܲܡ ܕܹܝܢ ܗܵܘ̇ܝܵܐ ܥܠܹܝܗ̇ ܕܪܗܘܿܡܹܐ ܩܲܪܝܼܒܼܵܐܝܼܬܼ ܘܠܵܘ
ܠܪܘܼܚܩܵܐ: ܡܹܐܬܼܝܼܬܹܗ ܕܬܲܪܬܹܝܢ ܕܒܲܪܒܿܪܵܝܵܐ: ܕܒܼܵܗ̇ ܐܵܦ ܠܹܐܘܿܢ:
ܗܵܘ̇ ܕܲܠܗܲܝܡܵܢܘܼܬܼܵܐ ܡ̇ܢ ܛܵܒܼܵܐܝܼܬܼ ܐܲܚܝܼܕܼ ܗ̄ܘ̣ܵܐ: ܒܗܵܠܹܝܢ ܕܹܝܢ ܕܲܥܠܲܝ
ܕܠܵܐ ܒܘܼܚܵܢܵܐ ܘܲܕܼܠܵܐ ܕܝܼܢܵܐ ܠܥܵܘ̣ܠܵܐ ܕܗܵܠܹܝܢ ܕܲܤܥܲܪܘ ܥܠܲܝ
ܫܠܸܡ̣ ܗ̄ܘ̣ܵܐ: ܒܐܝܼܕܼܵܘ̈ܗܝ ܕܝܼܠܹܗ ܠܡܵܐܢܲܝ̈ ܩܘܼܕܼܫܵܐ ܐܲܠܵܗܵܝܹ̈ܐ ܡܲܫܠܸܡ
ܠܗܘܿܢ ܒܐܝܼܕܲܝ̈ ܒܲܪܒܿܪ̈ܵܝܹܐ. ܘܠܲܒܼ̈ܢܵܬܼܵܐ ܕܡܲܠܟܵܐ ܗܵܘ̇ ܕܡܲܡܠܸܟܼ
ܗ̄ܘ̣ܵܐ ܒܗܵܘ̇ ܙܲܒܼܢܵܐ: ܚܵܙܹ̇ܐ ܒܥܲܝܢܵܘ̈ܗܝ ܟܲܕܼ ܡܸܬܿܕܲܒܼܪ̈ܵܢ ܒܲܫܒܼܝܼܬܼܵܐ.
ܐܸܢܵܐ ܕܹܝܢ ܠܲܫܚܵܩܵܐ ܕܚܲܝܲܝ̈: ܘܲܠܟܼܠ ܡܸܕܸܡ ܕܝܼܠܝ ܕܲܒܼܥܵܠܡܵܐ.
ܗܵܢܵܐ: ܐܲܝܟܼ ܫܚܵܩܵܐ ܕܚܲܕܼܸ ܝܵܘܡܵܐ ܤܲܝ̇ܒܿܪܹܬܼ: ܘܠܵܐ ܐܸܫܬܲܚ̇ܠܦܹܬܼ
ܗܵܐ ܗܵܠܹܝܢ ܟܠܗܹܝܢ ܫܢܲܝ̈ܵܐ. ܕܗܵܐ ܗܵܫܵܐ ܡ̣ܢ ܟܲܕܼܘܼ ܡܲܢ̇ܥܹܬܼ ܠܝܼ
pb. 521
ܠܡܸܫܬܿܪܵܝܘܼ: ܘܟܼܠ ܒܝܘܿܡ ܡܸܬܼܟܲܫܲܦ ܐ̄ܢܵܐ ܠܐܲܠܵܗܵܐ ܕܢܸܫܪܹܝܢܝ:
ܠܝܼ ܕܲܚܙܲܝ̈ ܥܲܝ̈ܢܲܝ ܦܘܼܪܩܵܢܹܗ ܕܐܲܠܵܗܵܐ.
ܫܘܼܠܵܡܵܐ. ܚܕܝܼ ܠܝܼ ܚܲܒܿܝܼܒܼܝܼ ܘܲܡܪܲܒܿܝܵܢܝ ܘܒܹܝܬܼ ܡܲܥܡܲܪܝ
ܡܲܕܼܒܿܪܵܐ: ܘܐܹܡܝ ܐܸܟܿܤܘܿܪܝܼܵܐ. ܕܐܵܦ ܡ̣ܢ ܒܵܬܲܪ ܡܵܘܬܿܝ: ܢܵܛܲܪ
ܦܲܓܼܪܝ ܥܕܲܡܵܐ ܠܲܩܝܵܡܬܼܵܐ ܒܨܒܼܝܵܢܹܗ ܕܐܲܠܵܗܵܐ. ܐܵܡܹܝܢ.
ܫܠܸܡ̣ ܠܡܸܟܼܬܲܒܼ ܟܬܼܵܒܼܵܐ ܕܡܸܬܼܩܪܸܐ ܬܹܐܓܼܘܼܬܵܐ ܕܗܹܪܤܲܩܠܝܼܕܘܿܣ:
ܕܲܥܒܼܝܼܕܼ ܠܢܲܨܝܼܚ ܒܩܲܕܝܼ̈ܫܹܐ ܘܛܘܼܒܼܬܼܵܢ ܒܟܼܠ ܡܵܪܝ ܢܸܤܛܘܿܪܝܼܣ:
ܐܲܩܸܤܩܘܿܦܵܐ ܕܩܘܼܤܛܲܢܛܝܼܢܵܦܘܿܠܝܼܣ: ܤܵܕܵܐ ܕܟܼܠܝܘܿܡ: ܘܗ̤ܕܼܪܵܐ
ܕܐܵܪܬܵܕܘܿܟܤܝܼܵܐ: ܟܵܪܘܿܙܵܐ ܫܲܪܝܼܪܵܐ ܕܲܬܼܠܝܼܬܼܵܝܘܼܬܼܵܐ ܡܫܲܒܲܚܬܼܵܐ: ܘܲܠܝܹܗܘܲܗ
ܫܘܼܒܼܚܵܐ ܐܲܡܝܼܢܵܐ. ܐܵܡܹܝܢ.
pb. 523
ܬܩܦܬܐ. ܐ.
ܦܘܼܫܵܩܵܐ ܘܐܸܓܪ̈ܵܬܼܵܐ ܕܡܵܪܝ ܩܘܼܪܸܠܘܿܣ ܕܐܵܠܹܟܼܤܲܢܕܪܝܼܵܐ: ܘܲܕܼܡܵܪܝ
ܝܘܿܚܲܢܵܢ ܕܐܢܛܝܵܟܼܝܵܐ: ܘܲܕܼܡܵܪܝ ܐܵܬܵܢܵܤܝܼܣ: ܘܲܕܼܡܵܪܝ ܦܪܘܿܩܠܘܿܣ
ܕܩܘܼܛܲܢܝܼܢܵܦܘܿܠܝܼܣ: ܥܲܠ ܡܸܬܼܒܲܪܢܫܵܢܘܼܬܼܵܐ ܕܡܵܪܲܢ.
ܜܘܼܫܵܩܵܐ ܕܪܹ̈ܫܹܐ ܬܪܸܥܤܲܪ: ܕܪܹܫܵܐ ܕܐܲܦܸܤ̈ܩܘܿܦܹܐ ܕܐܵܠܹܟܼܤܲܢܕܪܝܼܵܐ
ܩܘܼܪܸܠܘܿܣ.
ܟܠ ܡܸܕܸܡ ܕܠܝܼܠ ܠܐܲܝܠܹܝܢ ܕܡܸܬܼܒܲܝܢܝܼܢ: ܘܲܬܼܪܝܼܨ ܠܐܲܝܠܹܝܢ
ܕܡܸܫܟܿܚܝܼܢ ܝܑܼܕܲܥܬܼܵܐ: ܐܲܝܟܼ ܕܲܟܼܬܼܝܼܒܼ. ܐܲܝܠܹܝܢ ܓܹܝܪ ܕܲܒܼܥܲܝ̈ܢܹܐ
ܢܲܗܝܼܪ̈ܵܬܼܵܐ ܘܕܲܟܼ̈ܝܵܬܼܵܐ ܕܪܸ̈ܥܝܵܢܹܐ: ܦܵܓܼ̇ܥܝܼܢ ܒܡܸܠܹ̈ܐ ܐܲܠܵܗ̈ܝܵܬܼܵܐ
ܕܲܟܼܬܼܵܒܹ̈ܐ
ܩܲܕܝܼ̈ܫܹܐ: ܡܸܢܗܹܝܢ ܝܘܼܬܼܪ̈ܵܢܹܐ ܪ̈ܘܼܚܵܢܹܐ: ܐܲܝܟܼ ܤܝܼܡܬܼܵܐ ܡܸܕܸܡ ܫܡܲܝܵܢܵܝܬܼܵܐ
ܠܢܲܦ̈ܫܵܬܼܗܘܿܢ ܡܟܲܢܫܝܼܢ. ܐܲܝܠܹܝܢ ܕܹܝܢ ܕܲܩܢܹܝܢ ܪܸܥܝܵܢܵܐ ܕܲܨܠܸܐ ܠܘܵܬܼ
ܕܲܓܵܠܘܼܬܼܵܐ: ܘܒܼܵܬܲܪ ܦܘܼܡܵܠܐܐ ܬܪ̈ܲܝܵܢܵܐ ܕܐ̄ܢܵܫ̈ܝܼܢ ܢܬܼܝܼܦ: ܘܐܝܼܬܼܵܘܗܝ
ܡܲܚܒܼܵܢܵܐ ܕܝܼܕܲܥܬܼܵܐ ܛܲܢܦܵܬܼܵܐ: ܕܗܢܘܿܢ ܢܸܗܘܘܿܢ ܫܵܘ̈ܬܵܦܹܐ: ܕܗܵܢܘܿܢ
ܕܲܥܠܲܝܗܘܿܢ ܛܘܼܒܼܵܢܵܐ ܦܵܘܠܘܿܣ ܟܬܲܒܼ: ܕܐܲܝܠܹܝܢ ܕܐܲܠܵܗܹܗ
ܕܥܵܠܡܵܐ ܗܵܢܵܐ ܡܲܕܥܲܝ̈ܗܘܿܢ: ܕܐܲܝܠܹܝܢ ܕܠܵܐ ܡܗܲܝܡܢܝܼܢ:
ܕܠܵܐ ܢܸܵܨܡܲܚ ܠܗܘܿܢ ܢܘܼܗܪܵܐ ܕܐܹܘܲܢܓܲܠܝܼܘܿܢ ܕܫܘܼܒܼܚܹܗ
pb. 524
ܕܲܡܫܝܼܚܵܐ. ܤܡܹܝܢ ܐܸܢܘܿܢ ܓܹܝܪ: ܘܐܝܼܬܲܝܗܘܿܢ ܡܕܲܒܿܪ̈ܵܢܹܐ ܕܲܤ̈ܡܲܝܵܐ.
ܘܲܒܼܓܼܘܼ̈ܡܵܨܐ ܕܐܲܒܼܕܵܢܵܐ ܢܵܦ̇ܠܝܼܢ: ܐܲܝܟܼ ܡܵܐ ܕܐܸܡ݂ܲܪ ܗ̤ܘ ܦܵܪܘܿܩܲܢ:
ܕܤܲܡܝܵܐ ܠܤܲܡܝܵܐ ܐܸܢ ܢܕܲܒܲܪ: ܬܪ̈ܲܝܗܘܿܢ ܒܓܼܘܼܡܵܨܵܐ ܢܵܦ̇ܠܝܼܢ.
ܤܵܬ̇ܪܝܼܢ ܓܹܝܪ ܐ̄ܢܵܫ̈ܝܼܢ ܠܝܘܿܠܦܵܢܵܐ ܕܲܫܪܵܪܵܐ: ܘܟܲܕܼ ܡܠܹܝܢ ܡܲܕܥܲܝ̈ܗܘܿܢ
ܡ̣ܢ ܒܝܼܫܘܼܬܹܗ ܕܐܵܟܹ̇ܠ ܩܲܪܨܵܐ: ܡܸܤܬܲܪܗܒܼܝܼܢ ܠܲܡܫܲܚܠܵܦܘܼ ܠܐ̄ܪܵܙܵܐ
ܕܕܸܚܠܲܬܼ ܐܲܠܵܗܵܐ. ܘܕܲܡܕܲܒܿܪܵܢܘܼܬܼܵܐ ܕܥܲܡ ܒܸܤܪܵܐ ܕܝܼܚܝܼܕܼܵܐ:
ܩܘܼܛܪܵܓܼܵܐ ܪܲܒܵܐ ܥܵܒܼ̇ܕܝܼܢ: ܟܲܕܼ ܠܵܐ ܡܸܤܬܲܟܿܠܝܼܢ: ܠܵܐ ܐܲܝܠܹܝܢ
ܕܲܡܡܲܠܠܝܼܢ: ܘܠܵܐ ܡܸܕܸܡ ܕܲܥܠܵܘܗܝ ܡܸܢܼܚܪܹܝܢ: ܐܲܝܟܼ
ܕܲܟܼܒܼܝܼܒܼ. ܡܸܫ̈ܟܿܚܵܢܹܐ ܕܹܝܢ ܕܪܘܼܫܥܵܐ ܕܐܲܝܟܼ ܗܵܢܵܐ: ܤܲܓܿܝܼ̈ܐܹܐ ܡ̇ܢ
ܗܘ̤ܵܘ ܐ̄ܚܪ̈ܵܢܹܐ: ܒܙܲܒܼ̈ܢܹܐ ܗܵܠܹܝܢ ܩܲܕܼ̈ܡܵܝܹܐ ܕܲܥ̣ܒܲܪܘ. ܗܵܫܵܐ ܕܹܝܢ ܡ̣ܢ
ܪܘܼܫܥܵܐ ܕܗܵܢܘܿܢ: ܠܵܐ ܒܨܝܼܪܝܼܢ ܒܡܸܕܸܡ ܢܸܤܛܘܿܪܝܼܣ ܘܐܲܝܠܹܝܢ
ܕܥܲܡܹܗ: ܟܲܕܼ ܩܵܝ̇ܡܝܼܢ ܐܲܝܟܼ ܦܪ̈ܝܼܫܹܐ ܗܵܢܘܿܢ ܜܲܬܼܝܼ̈ܩܹܐ ܠܘܼܩܒܲܠ
ܡܫܝܼܚܵܐ ܘܩܵܥܹ̇ܝܢ ܓܘܼܡܕܵܢܵܐܝܼܬܼ: ܕܲܠܡܵܢܵܐ ܐܲܢ̄ܬܿ ܟܲܕܼ ܐܝܼܬܲܝܟ ܒܲܪ
ܐ̄ܢܵܫܵܐ: ܥܵܒܹ̇ܕܼ ܐܲܢ̄ܬܿ ܢܲܦܵܫܟܼ ܐܲܠܵܗܵܐ؟ ܐܵܠܵܨܵܐ ܗ̄ܘ̣ܵܬܼ ܗܵܟܹܝܠ:
ܕܐܵܦ ܚܢܲܢ ܠܘܼܩܒܲܠ ܡܸܠܲܝ̈ܗܘܿܢ ܕܗܵܠܹܝܢ ܢܸܬܿܛܲܝܲܒܲ: ܘܢܲܚܪܸܡ
ܠܝܼܠܘܼܦܵܢܲܝ̈ܢܗܘܿܢ ܛܲܢ̈ܦܹܐ ܘܲܡܤܲܝ̈ܒܹܐ: ܟܲܕܼ ܥܲܗܝܼܕܝܼܢ ܚ̄ܢܲܢ ܠܐܲܠܵܗܵܐ
ܕܐܸܡ݂ܲܪ ܒܝܲܕܼ ܩܵܠܵܐ ܕܲܢܒܼܝܸ̈ܐ: ܕܟܼܵܗ̈ܢܹܐ ܫܡܲܥܘ ܘܲܘܗܸܕܼܘ
ܠܒܲܝܬܹܗ ܕܝܲܥܩܘܿܒܼ: ܐܵܡܲ݁ܪ ܡܲܪܝܵܐ ܕܟܼܠ ܐܲܚܝܼܕ: ܘܬܼܘܼܒܼ:
ܥܒܲܪܘ ܒܬܲܪ݁ܥܲܝ: ܘܡ̣ܢ ܐܘܼܪܚܵܐ ܩܘܿܠܘ ܟܹܐܦܹ̈ܐ. ܙܵܕܹܩ
ܠܲܬ ܓܹܝܪ ܕܟܲܕܼ ܡܸܬܼܟܲܬܿܫܝܼܢ ܚ̄ܢܲܢ ܚܠܵܦ ܝܘܼܠܦܵܢܵܐ ܕܲܫܪܵܪܵܐ: ܢܪܝܼܡ
pb. 525
ܠܟܼܫ̈ܠܹܐ ܡ̣ܢ ܡܨܲܥܬܼܵܐ. ܕܟܲܕܼ ܒܚܲܕܼ ܡ̣ܢ ܙܢܝܼ̈ܢ ܥܲܡܡܹ̈ܐ ܠܵܐ
ܡܸܬܿܬܲܩܠܝܼܢ: ܐܲܝܟܼ ܕܲܒܼܝܲܕܼ ܐܘܼܪܚܵܐ ܫܦܝܼܬܼܵܐ ܢܸܪܕܘܿܢ: ܠܘܵܬܼ ܛܝܵܪܹ̈ܐ
ܩܲܕܝܼ̈ܫܹܐ ܘܐܲܠܵܗܵܝܹ̈ܐ: ܟܲܕܼ ܐܵܡ̇ܪܝܼܢ ܥܲܠ ܟܠܚܲܕܼ ܡܸܢܗܘܿܢ: ܕܗܵܢܵܘ
ܬܲܪܥܹܗ ܕܡܵܪܝܵܐ: ܕܙܲܕܝܼܩܹ̈ܐ ܥܵܐ̇ܠܝܼܢ ܒܹܗ.
ܢܸܤܛܘܿܪܝܼܣ ܗܵܟܹܝܠ: ܐܲܝܟܼ ܡ̇ܢ ܕܲܟܼܢܘܼܫܝܵܐ ܕܓܼܘܼ̈ܕܵܦܹܐ ܢܘܼܟܼܪ̈ܵܝܹܐ
ܘܪ̈ܲܫܝܼܥܹܐ ܤܵܡ̣ ܒܲܟܼܬܼܵܒܼܵܘ̈ܗܝ: ܐܵܠܨܵܐܝܼܬܼ ܐܲܝܟܼ ܡ̇ܢ ܕܝܲܨܝܼܦܝܼܢ
ܚ̄ܢܲܢ ܕܚܲܝܹ̈ܐ ܕܐܲܝܠܹܝܢ ܕܦܵܓܼܥ̇ܝܼܢ ܒܗܘܿܢ: ܤܵܡ̣ܢܲܢ. ܠܵܘ ܟܲܕܼ ܗܵܘ̇
ܡܸܕܸܡ ܕܐܸܬܼ݂ܵܐ ܠܪܸܥܝܵܢܲܢ: ܫܚܘܼܡܵܐܝܼܬܼ ܤܵܡ̣ܢܲܢ ܒܐܸܓܲܪܬܵܐ ܕܡܲܪܬܿܝܵܢܘܼܬܼܵܐ
ܕܐܸܬܼܟܲܬܼܒܲܬ̤ ܠܘܵܬܹܗ: ܐܸܠܵܐ ܐܲܝܟܼ ܕܐܸܡ̇ܪܹܬܼ ܗܵܫܵܐ: ܟܲܕܼܸ ܡܒܲܪܹܝܢܲܢ
ܘܲܡܢܲܟܼܪܹܝܢܲܢ ܡ̣ܢ ܝܘܼܠܦܵܢܵܐ ܕܕܸܚܠܲܬܼ ܐܲܠܐܵܗܵܐ: ܠܲܫ̈ܟܼܵܚܵܬܼܵܐ ܕܚܲܤܝܼܪܘܼܬܼ
ܪܸܥܝܵܢܹܗ ܕܗܵܘ̇. ܩܵܨ̇ܦܝܼܢ ܕܹܝܢ ܟܒܲܪ ܐ̄ܢܵܫܝܼ̈ܢ ܒܐܲܝܠܹܝܢ ܕܐܸܬܼܐܡܲܪ
ܡܸܢܲܢ: ܐܵܘ ܟܲܕܼ ܠܵܐ ܡܸܬܼܒܲܝܢܝܼܢ ܫܲܪܝܼܪܵܐܝܼܬܼ ܒܚܲܝܠܵܐ ܕܐܲܝܠܹܝܢ ܕܲܟܼܬܼܝܼ̈ܒܼܵܢ:
ܐܵܘ ܟܲܕܼ ܗܵܘܹ̇ܝܢ ܡܥܲܕܼܪ̈ܵܢܹܐ ܕܗܹܪܹܤܝܼܣ ܛܲܢܦܬܼܵܐ ܕܢܸܤܛܘܿܪܝܼܣ:
ܘܲܡܦܲܠܓܼܝܼܢ ܠܪܘܼܫܥܵܐ ܥܲܡܹܗ: ܒܲܕܼ ܡܸܬܼܪܲܥܹܝܢ ܐܲܟܼܘܵܬܹܗ. ܠܐܲܝܠܹܝܢ
ܗܵܟܹܝܠ ܕܲܡܥܵܕܝܼܢ ܬܪܝܼܨܵܐܝܼܬܼ ܠܡܸܬܼܪܲܥܝܵܘܼ: ܫܪܵܪܵܐ ܠܵܐ ܛܵܥܹ̇ܐ.
ܡܸܛܠ ܕܹܝܢ ܕܲܟܼܡܵܐ ܙܲܒܼܢ̈ܝܼܢ: ܐ̄ܢܵܫ̈ܝܼܢ ܟܲܕܼ ܐܵܙ̇ܠܝܼܢ ܒܵܬܲܪ ܫܟܼܵܚ̈ܬܼܵܐ
ܕܡܸܠܲܝ̈ܗܘܿܢ ܕܗܵܠܹܝܢ: ܠܵܐ ܡܸܤܬܲܟܿܠܝܼܬ ܕܐܲܝܟܲܢܵܐ ܘܒܲܐܝܢܵܐ ܙܢܵܐ
ܗܘ̤ܵܘ: ܐܸܬܼܚܲܙܲܬ̤ ܠܝܼ ܕܙܵܕܹܩ: ܕܲܠܟܼܠ ܚܲܕܼ ܡ̣ܢ ܚܸܪ̈ܡܹܐ ܐܹܦܲܫܸܩ
ܒܝܲܕܼ ܟܲܪ̈ܝܵܬܼܵܐ: ܘܚܲܝܠܗܘܿܢ ܐܲܝܟܼ ܕܡܸܫܟܿܚܵܐ ܫܦܝܼܪ ܐܸܫܬܲܥܸܐ. ܗܵܘܹ̇ܐ
ܓܹܝܪ: ܐܲܝܟܼ ܕܡܤܒܲܪ ܐ̄ܢܵܐ: ܤܘܼܥܪܵܢܵܐ ܠܐܲܝܠܹܝܢ ܕܦܵܓܼܥ̇ܝܼܢ ܒܹܗ
ܡܠܘܿܐܵܐ ܕܝܘܼܬܼܪܵܢܵܐ.
pb. 526
ܚܸܪܡܵܐ ܩܲܕܼܡܵܝܵܐ.
ܡ̇ܢ ܕܠܵܐ ܡܵܘܕܸܐ: ܕܐܲܠܵܗܵܐ ܐܝܼܬܼܵܘܗܝ ܒܲܫܪܵܪܵܐ ܥܲܡܲܢܘܼܐܹܝܠ:
ܘܡܸܛܠ ܗܵܕܹܐ ܝܵܠܕܲܬܼ ܐܲܠܵܗܐ ܠܲܒܼܬܼܘܼܬܼܠܬܼܵܐ ܩܲܕܝܼܫܬܼܵܐ: ܝܸܠܕܲܬ̤ ܓܹܝܪ
ܒܸܤܪܵܐܝܼܬܼ ܠܡܸܠܬܼܵܐ ܕܡ̣ܢ ܐܲܠܵܗܵܐ ܕܲܗܘ̤ܵܐ ܒܸܤܪܵܐ: ܚܸܪܡܵܐ ܢܸܗܘܸܐ.
ܦܘܼܫܵܩܵܐ. ܛܘܼܒܼܵܢܹ̈ܐ ܐܲܒܼܵܗ̈ܬܼܵܐ ܐܲܝܠܹܝܢ ܕܒܲܙܒܲܢ ܒܢܝܼܩܝܼܵܐ ܡܕܼܝܢܬܐ
ܐܸܬܼܟܲܢܲܫ: ܟܲܕܼ ܤܵܝ̇ܡܝܼܢ ܬܚܘܼ̈ܡܹܐ ܕܗܲܝܡܵܢܘܼܬܼܵܐ ܬܪܝܼܨܬܵܐ ܘܲܕܼܠܵܐ
ܥܵܒܲܘܿܕܼܵܐ ܕܟܼܠܗܹܝܢ ܐܲܝܠܹܝܢ ܕܡܸܬܼܚܲܙ̈ܝܵܢ ܘܲܕܼܠܵܐ ܡܸܬܼܚܲܘ̈ܝܵܢ. ܘܲܒܼܚܲܕܼ
ܡܵܪܝܵܐ ܝܼܫܘܿܥ ܡܫܝܼܚܵܐ ܒܪܹܗ. ܘܲܒܼܪܘܼܚܵܐ ܕܩܘܼܕܸܫܵܐ. ܟܲܕܼ ܐܵܡ̇ܪܝܼܢ
ܠܹܗ ܠܡܸܠܬܼܵܐ: ܕܡ̣ܢ ܐܲܠܵܗܵܐ ܐܲܒܼܵܐ ܐܸܬܼܝܼܠܸܕܼܸ: ܠܗܵܘ̇ ܕܒܼܐܝܼܕܹܗ
ܟܠ. ܠܢܘܼܗܪܵܐ: ܕܡ̣ܢ ܢܘܼܗܪܵܐ. ܠܐܲܠܵܗܵܐ ܫܪܝܼܪܵܐ: ܕܡ̣ܢ ܐܲܠܵܗܵܐ
ܫܲܪܝܼܪܵܐ. ܕܐܸܬܼܓܲܫܲܡ: ܘܐܸܬܼܒܲܢܲܫ. ܘܚܲܫ̣ ܘܡܝܼܬܼ: ܘ.ܩܵܡ̣. ܟܲܕܼ
ܓܹܝܪ ܐܝܼܬܼܵܘܗܝ ܒܲܟܼܝܵܢܵܠ ܐܲܠܵܗܵܐ: ܝܑܼܚܝܼܕܵܝܐ ܡܸܠܬܼܵܐ ܕܐܲܠܵܗܵܐ: ܠܙܲܪܥܹܗ
ܕܐܲܒܼܪܵܗܵܡ ܢܤܲܒܼ: ܐܲܝܟܼ ܕܐܸܡ݂ܲܪ ܛܘܼܒܵܢܸܐ ܦܵܘܠܘܿܣ. ܘܒܼܵܗ̇
ܒܲܕܡܘܼܬܲܢ ܐܸܫܬܵܘܢܬܲܦ: ܠܒܸܤܪܵܐ ܘܲܕܼܡܵܐ. ܗܘ̤ܵܐ ܓܹܝܪ ܒܲܒܼܤܲܪ ܡ̣ܢ
ܒܬܼܘܼܠܬܼܵܐ ܩܲܕܼܝܸܫܬܼܵܐ: ܘܒܲܪ ܐ̄ܢܵܫܵܐ ܐܸܬܼܚܵܘܝܼ ܐܲܟܼܘܵܬܲܢ. ܠܵܐ ܟܲܕܼ
ܫܲܪܲܥ̣ ܡ̣ܢ ܗܵܝ̇ ܕܐܼܝܼܬܼܵܘܗܝ ܐܲܠܵܗܵܐ: ܚܵܣ! ܐܸܠܵܐ ܟܲܕܼ ܐܝܼܬܼܵܘܗܝ
ܗܵܘ̇ ܡܵܐ ܕܐܝܼܬܼܵܘܗܝ ܗ̄ܘ̣ܵܐ: ܟܲܬܲܪ ܒܲܟܼܝܵܢܵܐ ܘܫܘܼܒܼܚܵܐ ܕܐܲܠܵܗܘܼܬܹܗ.
ܐܸܡ̇ܪܝܼܢܲܢ ܗܵܟܹܝܠ ܕܲܗܘ̤ܵܐ ܒܲܪܢܵܫܵܐ: ܠܵܐ ܗ̄ܘ̣ܵܐ ܟܲܕܼ ܤܲܝܒܲܪ ܫܘܼܚܠܵܦܵܐ
ܠܗܵܘ̇ ܡܵܐ ܕܠܵܐ ܐܝܼܬܼܵܘܗܝ ܗ̄ܘ̣ܵܐ ܐܵܘ ܫܘܼܓܼܢܵܝܵܐ. ܐܲܡܝܼܢܵܐܝܼܬܼ ܓܹܝܪ
pb. 527
ܐܝܼܬܲܘܗܝ ܗܵܘ̇ ܡܵܐ ܕܐܝܼܬܼܵܘܗܝ: ܘܛܸܠܢܝܼܬܼܵܐ ܕܫܘܼܚܠܵܦܵܐ ܠܡܸܤܒܲܠ
ܠܵܐ ܡܩܲܒܸܠ: ܐܵܦܠܵܐ ܒܘܼܠܒܵܠܵܐ: ܐܵܘ ܚܒܼܘܼܟܼܝܵܐ: ܐܵܘ ܡܘܼܙܵܓܼܵܐ ܕܲܟܼܝܵܢܵܐ
ܕܝܼܠܹܗ: ܕܲܗܘ̤ܵܐ ܠܘܵܬܼ ܒܸܤܪܵܐ ܡܬܲܚܡܝܼܢܲܢ. ܐܵܡ̇ܪܝܼܢ ܚ̄ܢܲܢ ܕܹܝܢ:
ܕܲܠܒܸܤܪܵܐ ܕܐܝܼܬܼ ܒܹܗ ܢܲܦܫܵܐ ܡܠܝܼܠܬܼܵܐ ܐܸܬܼܚܲܝܲܕܼ ܡܸܠܬܼܵܐ: ܠܥܸܠ ܡ̣ܢ
ܗܵܘܢܵܐ ܘܠܵܐ ܡܸܬܼܡܲܠܠܵܢܵܐܝܼܬܼ ܘܐܲܝܟܼ ܕܗ̤ܘ ܒܲܠܚܘܿܕܼܵܘܗܝ ܝܵܕܲܥ̇.
ܡܵܕܹܝܢ ܟܲܬܲܪ ܐܲܠܵܗܵܐ: ܐܵܦ ܒܲܢܤܝܼܒܼܘܼܬܼܵܐ ܕܒܸܤܪܵܐ. ܘܐܝܼܬܼܵܘܗܝ
ܚܲܕܼ ܒܪܵܐ ܕܐܲܠܵܗܵܐ ܘܐܲܒܼܵܐ ܡܵܪܲܢ ܝܼܫܘܿܥ ܡܫܝܼܚܵܐ: ܗ̤ܘ ܟܲܕܼ ܗ̤ܘ
ܩܕܼܵܡ ܟܠܗܘܿܢ ܙܲܒܼܢܹ̈ܐ ܘܛܵܘܪܹ̈ܐ: ܒܗܵܝ̇ ܕܡܸܬܿܝܼܕܲܥ ܡܸܠܬܼܵܐ
ܘܨܡܚܵܐ ܕܲܩܢܘܿܡܹܗ: ܘܲܒܼܙܲܒܼ̈ܢܹܐ ܐ̄ܚܪ̈ܵܝܹܐ ܡܕܲܒܿܪܵܢܵܐܝܼܬܼ ܒܲܪܢܵܫܵܐ
ܡܸܛܠܵܬܲܢ. ܡܸܛܠ ܕܹܝܢ ܕܲܡܪܝܼܡܝܼܢ ܐ̄ܢܵܫ̈ܝܼܢ ܠܝܲܠܕܹܗ ܕܒܲܒܼܤܲܪ: ܗܵܘ̇
ܕܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ ܗܘ̤ܵܐ ܠܚܲܝܹ̈ܐ ܕܟܼܠ: ܠܵܘ ܟܲܕܼ ܩܵܪܹܐ ܠܹܗ
ܠܫܘܼܪܵܝܵܐ ܕܲܗܘ̤ܵܐ ܐܝܼܬܼܵܘܗܝ ܐܲܠܵܗܵܐ: ܐܸܠܵܐ ܕܠܲܢ ܢܦܲܨܐ ܡ̣ܢ ܡܵܘܬܵܐ
ܘܲܚܒܼܵܠܵܐ ܟܲܕܼ ܗܘ̤ܵܐ ܐܲܟܼܘܵܬܲܢ. ܡܸܛܠ ܗܵܕܹܐ ܥܸܠܬܼܵܐ: ܚܸܪܡܵܐ ܕܲܥܒܲܕܼܢ
ܚ̄ܢܲܢ ܩܲܕܼܡܵܝܵܐ: ܡܲܙܥܸܩ ܠܘܼܩܒܲܠ ܒܝܼܫܘܼܬܼ ܗܲܝܡܵܢܘܼܬܼܗܘܿܢ ܕܗܵܢܘܿܢ.
ܗܵܝ̇ ܕܹܝܢ ܕܲܬܼܪܝܼܨܵܐ ܡܵܘܕܸܐ ܟܲܕܼ ܐܵܡܲ݁ܪ: ܕܐܲܠܵܗܵܐ ܐܝܼܬܼܵܘܗܝ ܒܲܫܪܵܪܵܐ
ܥܲܡܲܢܘܼܐܹܝܠ: ܘܡܸܛܠ ܗܵܕܹܐ ܝܵܠܕܲܬܼ ܐܲܠܵܗܵܐ ܠܲܒܼܬܼܘܼܠܬܼܵܐ ܩܲܕܝܼܫܬܼܵܐ.
ܚܸܪܡܵܐ ܕܲܬܼܪܹܝܢ.
ܡ̇ܢ ܕܠܵܐ ܡ̇ܘܕܸܐ: ܕܐܸܬܼܚܲܝܲܕܼ ܩܢܘܿܡܵܐܝܼܬܼ ܠܒܸܤܪܵܐ ܡܸܠܬܼܵܐ ܕܡ̣ܢ
ܐܲܠܵܗܵܐ ܐܲܒܼܵܐ: ܘܚܲܕܼ ܐܝܼܬܼܵܘܗܝ ܡܫܝܼܚܵܐ ܥܲܡ ܒܸܤܪܹܗ: ܗܵܢܵܘ ܕܹܝܢ:
ܗ̤ܘ ܟܲܕܼ ܗ̤ܘ ܐܲܠܵܗܵܐ ܘܒܿܪܢܵܫܵܐ: ܚܸܪܡܵܐ ܢܸܗܘܸܐ.
ܦܘܼܫܵܩܵܐ. ܛܘܼܒܼܵܢܵܐ ܦܵܘܠܘܿܣ ܟܵܬܹ̇ܒܼ ܡܦܲܫܩܵܢܵܐ ܕܐ̄ܪ̈ܵܙܹܐ
pb. 528
ܐܲܠܵܗܵܝܹ̈ܐ: ܕܫܲܪܝܼܪܵܐܝܼܬܼ ܪܲܒܿ ܗ̄ܘ̣ ܐ̄ܪܵܙܵܐ ܕܕܼܚܸܠܲܬܼ ܐܲܠܵܗܵܐ: ܗܵܘ̇
ܕܐܸܬܼܓܠܝܼ ܒܲܒܼܤܲܪ: ܘܐܸܙܕܲܕܲܩ ܒܪܘܼܚ: ܘܐܸܬܼܚܙܝܼ ܠܡܲܠܲܐܟܹ̈ܐ:
ܘܐܸܬܼܟܪܸܙ ܒܹܝܬܼ ܥܲܡܡܹ̈ܐ: ܘܐܸܬܼܗܲܝܡܲܢ ܒܥܵܠܡܵܐ: ܘܐܸܤܬܲܠܲܡ
ܒܫܘܼܒܼܚܵܐ. ܡܵܢܵܐ ܐܝܼܬܹܝܗ̇ ܕܐܸܬܼܓܠܝܼ ܒܒܸܪܵܐ؟ ܗܵܢܵܘ ܕܹܝܢ:
ܕܡܸܠܬܼܵܐ ܕܡ̣ܢ ܐܲܠܵܗܵܐ ܐܲܒܼܵܐ: ܒܸܤܪܵܐ ܗܘ̤ܵܐ. ܠܵܐ ܗ̄ܘ̣ܵܐ ܐܲܝܟܼ
ܕܲܒܼܫܘܼܢܵܝܵܐ ܐܵܘ ܫܘܼܚܠܵܦܵܐ ܕܲܟܼܝܵܢܹܗ: ܐܲܝܟܼ ܡܵܐ ܕܡ̣ܢ ܟܲܕܼܘܼ ܐܸܡ݂ܲܪܢܲܢ:
ܐܸܠܵܐ ܕܟܲܕܼ ܥܲܒܼܕܹܗ ܕܝܼܠܹܗ ܠܒܸܤܪܵܐ ܕܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ:
ܚܲܕܼ ܘܗ̤ܘ ܟܲܕܼ ܗ̤ܘ ܡܸܬܼܐܡܲܪ ܒܪܵܐ. ܩܕܼܵܡ ܡ̇ܢ ܡܸܬܼܒܲܪܢܵܫܢܘܼܬܼܵܐ:
ܡܸܠܬܼܵܐ ܥܕܲܟܹܝܠ: ܕܠܵܐ ܒܸܤܪܵܐ. ܒܵܬܲܪ ܕܹܝܢ ܡܸܬܼܒܲܪܢܵܫܢܘܼܬܼܵܗ:
ܗ̤ܘ ܟܲܕܼ ܗ̤ܘ: ܦܲܓܼܪܵܢܵܐ. ܒܗܵܕܹܐ ܗܵܟܹܝܠ ܐܵܡ̇ܪܝܼܢ ܚ̄ܢܲܢ: ܕܗ̤ܘ
ܟܲܕܼ ܗ̤ܘ ܐܝܼܬܼܵܘܗܝ ܐܲܠܵܗܵܐ ܐܲܟܼܚ̄ܕܼܵܐ ܘܒܲܪ ܐ̄ܢܵܫܵܐ. ܠܵܐ ܗ̄ܘ̣ܵܐ ܟܲܕܼ
ܡܦܲܪܫܝܼܢܲܢ ܠܤܘܼܟܵܠܵܐ ܕܲܥܠܵܘܗܝ: ܠܒܲܪ ܐ̄ܢܵܫܵܐ ܠܚܘܿܕܼܵܐܝܼܬܼ ܕܡܸܢܹܗ
ܘܠܹܗ ܤܝܼܡ: ܘܠܲܐܠܵܗܵܐ ܡܸܠܬܼܵܐ ܠܚܘܿܕܵܐܝܼܬܼ: ܕܠܵܐ ܬܪܹܝܢ ܒܢܲܝ̈ܵܐ
ܢܸܤܬܲܟܲܠ: ܐܸܠܵܐ ܚܲܕܼ ܘܗ̤ܘ ܟܲܕܼ ܗ̤ܘ ܡܵܘܕܹܝܢܲܢ ܕܐܝܼܬܼܵܘܗܝ ܡܫܝܼܚܵܐ
ܘܲܒܼܪܵܐ ܘܡܵܪܝܵܐ. ܠܐܲܝܠܹܝܢ ܕܹܝܢ ܕܠܵܐ ܗ̄ܘ̣ܵܐ ܗܵܟܲܢܵܐ ܐܝܼܬܲܝܗܹܝܢ ܗܵܠܹܝܢ
ܡܲܤܒܲܪܝܼܢ: ܐܵܘ ܨܵܒܹ̇ܝܢ ܠܲܡܗܲܝܡܵܢܘܼ: ܡܦܲܠܚܼܝܼܢ ܕܹܝܢ ܠܲܬܼܪܹܝܢ ܒܢܝܼ̈ܢ
ܠܚܲܕܼܸ: ܘܲܡܦܲܪܫܝܼܢ ܡ̣ܢ ܚܕܼܵܕܗܹܐ ܠܐܲܝܠܹܝܢ ܕܐܵܬܼܚܲܝܲܕܼܘ ܒܲܫܪܵܪܵܐ.
ܐܵܡܲ݁ܪܝܼܢ ܕܹܝܢ: ܕܐܲܝܟܼ ܕܒܼܐܝܼܩܵܪܵܐ ܒܲܠܚܘܿܕܼ ܘܫܘܼܒܛܵܢܵܐ ܗܘ̤ܵܬܼ
ܢܲܩܝܼܦܘܼܬܼܵܐ ܠܒܲܪ ܐ̄ܢܵܫܵܐ ܥܲܡ ܐܲܠܵܗܵܐ. ܕܐܝܼܬܲܝܗܘܿܢ ܢܘܼܟܼܪ̈ܵܝܹܐ
ܕܗܲܝܡܵܢܘܼܬܼܵܐ ܬܪܝܼܨܬܵܐ ܘܲܕܼܠܵܐ ܡܘܼܡܵܐ: ܐܵܡ̇ܪܝܼܢ ܚ̄ܢܲܢ. ܡܵܕܹܝܢ: ܐܵܦܸܢ
ܫܠܝܼܚܹ̈ܐ ܡܸܫܬܲܡܲܗ: ܘܐܵܦܸܢ ܕܐܸܬܼܡܫܲܚ ܡܸܬܼܐܡܲܪ: ܘܕܲܒܼܪܵܐ ܐܸܬܿܬܲܚܲܡ
pb. 529
ܐܲܠܵܗܵܐ: ܠܵܐ ܒܵܗ̇ܬܝܼܢ ܚ̄ܢܲܢ ܒܲܡܕܲܒܿܪܵܢܘܼܬܼܵܐ. ܐܸܠܵܐ ܠܹܗ ܐܵܡ̇ܪܝܼܢܲܢ
ܠܡܸܠܬܼܵܐ ܕܡ̣ܢ ܐܲܠܵܗܵܐ ܐܲܒܼܵܐ: ܕܟܲܕܼ ܗܘ̤ܵܐ ܒܲܪ ܐ̄ܢܵܫܵܐ ܐܲܟܼܘܵܬܲܢ:
ܗܵܝܕܹܝܢ ܐܸܫܬܲܡܲܗ ܐܵܦ ܫܠܝܼܚܵܐ: ܘܐܸܬܼܡܫܲܚ ܥܲܡܲܢ ܐ̄ܢܵܫܐܝܼܐܬܼ. ܗܵܘ̇
ܓܹܝܪ ܕܲܗܘ̤ܵܐ ܐܲܟܼܘܵܬܲܢ: ܘܐܵܦܸܢ ܟܲܬܲܪ ܗܵܘ̇ ܡܵܐ ܕܐܝܼܬܼܵܘܗܝ ܗ̄ܘ̣ܵܐ:
ܠܵܐ ܡܸܫܬܿܐܸܠ ܡ̣ܢ ܗܵܠܹܝܢ ܕܝܼܠܲܢ. ܐܸܠܵܐ ܡܩܲܒܸܿܠ ܥܲܡ ܡܘܼ̈ܫܚܵܬܼܵܐ
ܕܐ̄ܢܵܫܘܼܬܼܵܐ: ܠܗܵܠܹܝܢ ܐ̄ܢܵܫܵܝ̈ܬܼܵܐ: ܡܸܛܠ ܡܕܲܒܿܪܵܢܘܼܬܼܵܐ. ܟܲܕܼ ܒܡܸܕܸܡ
ܡ̣ܢ ܗܵܪܟܵܐ: ܠܵܐ ܡܸܬܼܢܟܸܐ ܒܫܘܼܒܼܚܹܗ: ܐܵܘ ܒܲܟܼܝܵܢܹܗ. ܐܝܼܬܼܵܘܗܝ
ܓܹܝܪ ܐܵܦ ܗܵܟܲܢܵܐ ܐܲܠܵܗܵܐ: ܘܡܵܪܝܵܐ ܕܟܼܠ.
ܚܸܪܡܵܐ ܕܲܬܼܠܵܬܼܵܐ.
ܡ̇ܢ ܕܲܡܦܲܪܸܫ ܩܢܘܿܡܹ̈ܐ ܒܚܲܕܼ ܫܡܝܼܚܵܐ ܡ̣ܢ ܒܵܬܲܪ ܚܕܼܵܝܘܼܬܵܠܼܐ:
ܟܲܕܼ ܒܲܠܚܘܿܕܼ ܒܢܲܩܝܼܦܘܼܬܼܵܐ ܕܐܝܼܩܵܪܵܐ ܐܵܘ ܕܫܘܼܠܛܵܢܵܐ ܐܵܘ ܕܲܚܲܠܵܐ
ܡܲܩܸܦ ܠܗܘܿܢ: ܘܠܵܐ ܗ̄ܘ̣ܵܐ ܝܲܬܿܝܼܪܵܐܝܼܬܼ ܒܲܟܼܢܘܼܫܝܵܐ ܕܲܚܕܲܝܘܼܬܼܵܐ
ܕܝܵܢܵܝܬܐ: ܚܸܪܡܵܐ ܢܸܗܘܸܐ.
ܦܘܼܫܵܩܵܐ. ܟܲܕܼ ܡܥܲܩܒܼܝܼܢܲܢ ܠܐ̄ܪܵܙܵܐ ܕܲܡܕܲܒܿܪܵܢܘܼܬܼܵܐ ܕܥܲܡ ܒܸܤܪܵܐ
ܕܝܼܚܝܼܕܼܵܝܵܐ ܐܵܡ̇ܪܝܼܢ ܚ̄ܢܲܢ: ܕܲܒܼܬܲܗܪܵܐ: ܘܠܵܐ ܡܸܬܼܡܲܠܠܵܢܵܐܝܼܬܼ ܐܸܬܼܚܲܝܲܕܼ
ܡܸܠܬܼܵܐ ܕܡ̣ܢ ܐܲܠܵܗܵܐ ܐܲܒܼܵܐ: ܠܦܲܓܼܪܵܐ ܩܲܕܝܼܫܵܐ ܕܐܝܼܬܼ ܒܹܗ ܢܲܦܫܵܐ
ܡܠܝܼܠܬܼܵܐ. ܘܗܵܟܲܢܵܐ: ܚܲܕܼ ܡܸܤܬܲܟܿܠܝܼܢܲܢ ܒܪܵܐ. ܐܲܝܟܼ ܕܐܵܦ ܒܲܢ
ܫܲܠܝܼܛ ܠܡܸܚܙܵܐ: ܕܲܐ̄ܚܪܹܢܵܐ ܗ̄ܘ̣ ܟܝܵܢܵܐ ܕܦܲܓܼܪܵܐ ܡ̣ܢ ܕܢܲܦܫܵܐ:
ܒܪܲܡ ܕܹܝܢ ܬܪ̈ܲܝܗܘܿܢ ܠܲܚܕܼܵܐ ܚܕܼܵܝܘܼܬܼܵܐ ܡܪܲܟܿܒܼܝܼܢ. ܐܸܠܵܐ: ܠܵܐ ܗ̄ܘ̣ܵܐ
ܕܗܵܟܲܢܵܐ ܐܝܼܬܲܝܗܹܝܢ ܗܵܠܹܝܢ ܡܲܤܒܲܪܝܼܢ ܐ̄ܢܵܫ̈ܝܼܢ. ܒܲܪܢܵܫܵܐ ܕܹܝܢ ܡܩܝܼܡܝܼܢ
ܠܹܗ ܡܸܢܹܗ ܘܠܹܗ: ܠܚܘܿܕܼܵܐܝܼܬܼ. ܘܕܐܸܬܼܢܲܩܲܦ ܐܵܡ̇ܪܝܼܢ ܠܡܸܠܬܼܵܐ:
pb. 530
ܕܡ̣ܢ ܐܲܠܵܗܵܐ ܐܲܒܼܵܐ ܐܸܬܼܝܼܠܸܕܼ. ܐܲܝܟܼ ܕܒܼܐܝܼܩܵܪܵܐ ܒܲܠܚܘܿܕܼ ܘܫܘܼܠܛܵܢܵܐ:
ܘܠܵܐ ܗ̄ܘ̣ܵܐ ܒܲܚܕܼܵܝܘܼܬܼܵܐ ܟܝܵܢܵܝܬܼܵܐ: ܗܵܢܵܘ ܕܹܝܢ ܫܲܪܝܼܪܬܵܐ: ܐܲܝܟܼ ܡܵܐ
ܕܲܚܢܲܢ ܡܗܲܝܡܢܝܼܢܲܢ. ܗܵܟܲܢܵܐ ܓܹܝܪ ܐܸܡ݂ܲܪ ܐܵܦ ܟܬܼܵܒܼܵܐ ܐܲܠܵܗܵܐ: ܕܐܝܼܬܲܝܢ
ܗ̣̄ܘܲܝܢ ܒܲܟܼܝܵܢܵܐ ܒܢܲܝ̈ܵܐ ܕܪܘܼܓܼܙܵܐ: ܐܲܝܟܼ ܕܐܵܦ ܗܵܠܹܝܢ ܕܫܲܪܟܵܐ. ܗܵܝ̇
ܕܹܝܢ ܕܒܲܟܼܝܵܢܵܐ: ܚܠܵܦ ܗܵܝ ܕܫܲܪܝܼܪܵܐܝܼܬܼ ܢܤܲܒ̣. ܠܵܐ ܗ̄ܘ̣ܵܐ ܗܵܟܹܝܠ
ܟܲܕܼ ܡܦܲܪܫܝܼܢ ܚ̄ܢܲܢ ܠܗܘܿܢ ܠܲܩܢܘܿܡܹ̈ܐ ܒܵܬܲܪ ܚܕܼܵܝܘܼܬܼܵܐ: ܘܡܸܢܹܗ
ܘܠܹܗ ܤܵܝܡܝܼܢܲܢ ܠܟܼܠ ܚܲܕܼ ܡܸܢܗܘܿܢ: ܗܵܢܵܘ ܕܹܝܢ ܠܒܲܪܢܵܫܵܐ
ܘܠܲܐܠܵܗܵܐ: ܘܡܲܥܠܝܼܢ ܚ̄ܢܲܢ ܥܠܲܝܗܘܿܢ ܢܲܩܝܼܦܘܼܬܼܵܐ: ܗܵܝ̇ ܕܐܲܝܟܼ
ܕܒܼܐܝܼܩܵܪܵܐ ܒܲܠܚܘܿܕܼ: ܬܪܹܝܢ ܡ̣ܢ ܟܠܦܪܘܿܣ ܡܩܝܼܡܝܼܢܲܢ ܒܢܲܝ̈ܵܐ:
ܟܲܕܼ ܟܬܼܵܒܼܵܐ ܩܲܕܝܼܫܵܐ ܚܲܕܼ ܒܪܵܐ ܐܸܡܲ݁ܪ ܘܡܵܪܝܵܐ. ܡܵܕܹܝܢ ܒܵܬܲܪ ܚܕܼܵܝܘܼܬܼܵܐ
ܠܵܐ ܡܸܬܼܡܲܠܠܵܢܝܼܬܼܵܐ: ܘܐܸܢ ܐܲܠܵܗܵܐ ܬܫܲܡܲܗ ܠܥܲܡܲܢܘܼܐܹܝܠ: ܚܢܲܢ
ܠܡܸܠܬܼܵܐ ܕܡ̣ܢ ܐܲܠܵܗܵܐ ܕܐܸܬܼܓܲܫܲܡ ܘܐܸܬܼܒܲܪܢܲܫ ܡܸܤܬܲܟܿܠܝܼܢ ܚ̄ܢܲܢ.
ܘܐܸܢ ܒܲܪ ܐ̄ܢܵܫܵܐ ܬܹܐܡܲܪ: ܒܵܗ̇ ܒܲܕܼܡܘܼܬܼܵܐ ܠܹܗ ܟܲܕܼ ܠܹܗ: ܕܐܸܬܼܢܲܚܲܬܼ
ܠܡܘܼ̈ܫܚܵܬܼܵܐ ܕܐ̄ܢܵܫܘܼܬܼܵܐ ܡܕܲܒܿܪܵܢܵܐܝܼܬܼ ܡܸܫܬܵܘܕܥܝܼܢ ܚ̄ܢܲܢ. ܐܵܡ̇ܪܝܼܢ ܚ̄ܢܲܢ
ܕܹܝܢ ܕܲܗܘ̤ܵܐ ܡܸܬܼܓܲܫܫܵܢܵܐ: ܗܵܘ̇ ܕܠܵܐ ܡܸܬܼܓܫܸܫ. ܘܡܸܬܼܚܲܙܝܵܢܵܐ: ܗܵܘ̇
ܕܠܵܐ ܡܸܬܼܞܚܙܸܐ. ܠܵܐ ܗ̄ܘ̣ܵܐ ܓܹܝܪ ܢܘܼܟܼܪܵܝܵܐ ܐܝܼܬܼܵܘܗܝ ܗ̄ܘ̣ܵܐ ܠܹܗ
ܦܲܓܼܪܵܐ ܕܐܸܬܼܚܲܝܲܕܼ ܠܹܗ: ܗܵܘ̇ ܕܐܵܦ ܡܸܬܼܓܲܫܫܵܢܵܐ ܐܵܡ̇ܪܝܼܢܲܢ ܕܐܝܼܬܼܵܘܗܝ
ܘܡܸܬܼܚܲܙܝܵܢܵܐ. ܠܲܐܲܝܠܹܝܢ ܕܹܝܢ ܕܠܵܐ ܗ̄ܘ̣ܵܐ ܗܵܟܲܢܵܐ ܡܗܲܝܡܢܝܼܢ: ܐܸܠܵܐ
ܡܦܲܪܫܝܼܢ ܠܗܘܿܢ ܐܲܝܟܼ ܕܐܸܡ̇ܪܹܬܼ ܠܲܩܢܘܿܡܹ̈ܐ ܒܵܬܲܪ ܚܕܼܸܵܝܘܼܬܼܵܐ:
ܘܢܲܩܝܼܦܘܼܬܼܵܐ ܫܚܝܼܡܬܼܵܐ ܡܲܥܠܝܼܢ ܥܠܲܝܗܘܿܢ ܐܲܝܟܼ ܕܒܼܐܝܼܩܵܪܵܐ ܒܲܠܚܘܿܕܼ
ܘܫܘܼܠܛܵܢܵܐ: ܡܒܲܪܸܐ ܠܗܘܿܢ ܡ̣ܢ ܐܲܝܠܹܝܢ ܕܲܬܼܪܝܼܨܵܐܝܼܬܼ ܡܥܵܕܹܝܢ
ܠܡܸܬܼܪܲܥܵܝܘܼ ܚܸܪܡܵܐ ܗܵܢܵܐ ܕܤܝܼܡ ܡ̣ܢ ܠܥܸܠ.
pb. 531
ܚܸܪܡܵܐ ܕܐܲܪܒܿܥܵܐ.
ܡ̇ܢ ܕܠܲܬܼܪܹܝܢ ܦܲܪ̈ܨܘܿܦܹܐ ܐܵܘ ܩܢܘܿܡܹ̈ܐ ܡܦܲܠܸܓܼ ܒ̈ܢܵܬܼ ܩܵܠܹ̈ܐ
ܕܤܝܼ̈ܡܵܢ ܒܲܟܼܬܼܵܒܹ̈ܐ ܘܕܹܐܘܲܢܛܲܓܸܤ̈ܛܹܐ ܘܕܲܫܠܝܼܚܹ̈ܐ: ܐܵܘ ܐܲܝܠܹܝܢ ܕܡ̣ܢ
ܩܲܕܝܼܫܹ̈ܐ ܥܲܠ ܡܝܼܚܵܐ ܐܸܬܼܐܡܲܪ: ܐܵܘ ܡܸܢܹܗ ܥܲܠ ܢܲܦܫܹܗ: ܘܡܸܢܗܹܝܢ
ܐܲܝܟܼ ܕܲܠܒܲܪ ܐ̄ܢܵܫܵܐ ܕܡܸܬܼܝܼܕܲܥ ܠܚܘܿܕܸܼܵܐܝܼܬܼ: ܠܒܲܪ ܡ̣ܢ ܡܸܠܬܼܵܐ
ܕܡ̣ܢ ܐܲܠܵܗܵܐ ܡܲܩܸܦ: ܡܸܢܗܹܝܢ ܕܹܝܢ ܐܲܝܟܼ ܡ̇ܢ ܕܦܲܐ̈ܝܵܢ ܠܐܲܠܵܗܵܐ:
ܠܹܗ ܒܲܠܚܘܿܕܼܵܘܗܝ ܠܡܸܠܬܼܵܐ ܕܡ̣ܢ ܐܲܠܵܗܵܐ ܐܲܒܼܵܐ: ܚܸܪܡܵܐ ܢܸܗܘܸܐ.
ܦܘܼܫܵܩܵܐ. ܟܲܕ ܒܲܕܼܡܘܼܬܼܵܐ ܘܫܲܘܝܘܼܬܼܵܐ ܕܐܲܠܵܗܵܐ ܘܐܲܒܼܵܐ ܐܝܼܬܼܵܘܗܝ
ܡܸܠܬܼܵܐ ܕܡܸܢܹܗ: ܠܵܐ ܗ̄ܘ̣ܵܐ ܚܛܘܼܦܝܵܐ ܚܲܫܒܵܗ̇ ܕܢܸܗܘܸܐ ܫܘܸܐ ܥܲܡ
ܐܲܠܵܗܵܐ: ܐܲܝܟܼ ܕܲܟܼܬܼܝܼܒܼ. ܐܸܠܵܐ ܬܲܚܬܝܼ ܢܲܦܫܹܗ ܠܤܘܼܪܵܩܵܐ
ܨܸܒܼܝܵܢܵܝܵܐ: ܘܐܸܬܼ݂ܵܐ ܟܲܕܼ ܒܵܥܹ̇ܐ ܠܘܵܬܼ ܗܵܠܹܝܢ ܕܝܼܠܲܢ: ܠܵܐ ܗ̄ܘ̣ܵܐ ܟܲܕܼ
ܫܲܢܝܼ ܡ̣ܢ ܗܵܝ̇ ܕܲܗܘ̤ܵܐ ܐܝܼܬܼܵܗܝ ܗܵܘ̇ ܡܵܐ ܕܐܝܼܬܼܵܘܗܝ. ܐܸܠܵܐ ܟܲܬܲܪ
ܐܵܦ ܗܵܟܲܢܵܐ ܐܲܠܵܗܵܐ: ܘܲܠܡܘܸ̈ܫܚܵܬܼܵܐ ܕܐ̄ܢܵܫܘܼܬܼܵܐ ܠܵܐ ܫܵܛ̣. ܟܠܗܹܝܢ
ܗܵܟܹܝܠ ܐܲܠܵܥܵܝ̈ܬܼܵܐ ܘܐ̄ܢܵܫܝ̈ܬܵܐ: ܕܝܼܠܹܗ ܐܸܢܹܝܢ. ܐܲܝܟܲܢܵܐ ܓܹܝܪ ܤܲܪܸܩ̣
ܢܲܦܫܹܗ: ܐܸܢ ܒܡܘܼ̈ܫܚܵܬܼܵܐ ܕܐ̄ܢܵܫܘܼܬܼܵܐ ܡܸܬܼܚܲܡܲܨ؟ ܘܐܸܢ ܡܸܫܬܿܐܸܠ
ܢܸܤܲܒܼ ܗܵܠܹܝܢ ܐ̄ܢܵܫܵܝ̈ܬܼܵܐ: ܡܲܢ̣ܘܼ ܕܐܲܚܬܝܹܿܗ ܐܲܝܟܼ ܕܡ̣ܢ ܐܵܢܲܢܩܹܐ
ܘܲܩܛܝܼܪܵܠ ܕܢܸܗܘܸܐ ܐܲܟܼܘܵܬܲܢ؟ ܟܠܗܹܝܢ ܗܵܟܹܝܠ ܒܢܵܬܼ̈ ܩܵܠܹ̈ܐ
ܕܒܹܐܘܲܢܓܲܠܝܼܘܿܢ: ܐ̄ܢܵܫܝ̈ܬܼܵܐ ܘܐܲܠܵܗܵܝ̈ܬܼܵܐ: ܠܚܲܕܼ ܦܲܪܨܘܿܦܵܐ ܡܲܩܦܝܼܢܲܢ.
ܡܸܛܠ ܕܐܵܦ ܚܲܕܼ ܡܗܲܝܡܢܝܼܢ ܚ̄ܢܲܢ ܒܪܵܐ ܠܲܡܫܝܼܚܵܐ ܝܼܫܘܿܥ: ܗܵܢܵܘ
ܕܹܝܢ ܠܡܸܠܬܼܵܐ ܕܐܲܠܵܗܵܐ ܕܐܸܬܼܒܲܪܢܲܫ ܘܐܸܬܼܓܲܫܲܡ . . . ܡܵܕܹܝܢ ܘܐܸܢ ܐܸܡܲ݁ܪ
pb. 532
ܡܸܕܸܡ ܐ̄ܢܵܫܵܝܵܐ ܠܲܡܫܘܼܚܬܼܵܐ ܕܐ̄ܢܵܫܘܼܬܼܵܐ: ܕܝܼܠܹܗ ܚܵܫ̇ܒܿܝܼܢ ܚ̄ܢܲܢ ܠܗܹܝܢ
ܠܐ̈ܢܵܫܵܝ̈ܬܼܵܐ: ܕܝܼܠܹܗ ܓܹܝܪ ܬܘܼܒܼ ܐܝܼܬܹܝܗ̇ ܐܵܦ ܐ̄ܢܵܫܘܼܬܼܵܐ. ܘܐܸܢ ܐܲܝܟܼ
ܐܲܠܵܗܵܐ ܡܡܲܠܸܠ: ܟܲܕܼ ܡܗܲܝܡܢܹܝܢ ܚ̄ܢܲܢ ܕܐܲܠܵܗܵܐ ܐܝܼܬܼܵܘܗܝ ܗܵܘ̇
ܕܐܸܬܼܒܲܪܢܲܫ: ܬܘܼܒܼ ܐܲܝܟܼ ܕܲܠܚܕܼ ܡܫܝܼܚܵܐ ܘܲܒܼܪܵܐ: ܒܢܵܬܼ̈ ܩܵܠܹ̈ܐ
ܕܲܡ̈ܥܲܠܝܵܢ ܡ̣ܢ ܟܝܵܢܵܐ ܕܒܲܪ ܐ̄ܢܵܫܵܐ ܚܵܫ̇ܒܿܝܼܢ ܚ̄ܢܲܢ: ܐܲܝܠܹܝܢ ܕܹܝܢ ܕܲܡܦܲܪܫܝܼܢ
ܠܲܬܼܪܹܝܢ ܦܲܪ̈ܨܘܿܦܹܐ: ܬܪܹܝܢ ܡ̣ܢ ܟܠ ܦܪܘܿܣ ܡܲܥܠܝܼܢ ܒܢܝ̈ܐ.
ܐܲܟܼܙܢܵܐ ܓܹܝܪ ܕܲܠܒܲܪܢܵܫܵܐ ܕܐܲܟܼܘܵܬܲܢ: ܠܵܐ ܫܲܠܝܼܛ ܠܲܬܼܪܹܝܢ ܦܲܪ̈ܨܘܿܦܹܐ
ܠܲܡܦܲܠܵܓܼܘܼ: ܐܵܦܸܢ ܡ̣ܢ ܢܲܦܫܵܐ ܡܸܬܼܝܼܕܲܥ ܘܦܲܓܼܪܵܐ: ܐܸܠܵܐ ܚܲܕܼ
ܐܝܼܬܼܵܘܗܝ ܗ̤ܘ ܟܲܕܼ ܗ̤ܘ ܒܲܪܢܵܫܵܐ: ܗܵܟܲܢܵܐ ܐܵܦ ܥܲܡܲܢܘܼܐܹܝܠ: ܡܸܛܠ
ܕܐܝܼܬܼܵܘܗܝ ܒܪܵܐ ܘܡܵܪܝܵܐ ܡܸܠܬܼܵܐ ܕܐܲܠܵܗܵܐ ܕܐܸܬܼܓܲܫܲܡ ܘܐܸܬܼܒܲܪܢܲܫ:
ܚܲܕܼ ܡ̣ܢ ܟܠ ܦܪܘܿܣ ܐܝܼܬܼܵܘܗܝ ܐܵܦ ܦܲܪܨܘܿܦܹܗ. ܘܠܹܗ ܦܵܪܫܝܼܢܲܢ
ܗܵܠܹܝܢ ܐ̄ܢܵܫܝ̈ܬܼܵܐ: ܡܸܛܠ ܡܕܲܒܿܪܵܢܘܼܬܼܵܐ ܕܥܲܡ ܒܸܤܪܵܐ. ܘܗܵܠܹܝܢ
ܬܘܼܒܼ ܐܲܠܵܗܵܝ̈ܬܼܵܐ: ܡܸܛܠ ܝܲܠܕܵܐ ܠܵܐ ܡܸܬܼܡܲܠܠܵܢܵܐ ܕܡ̣ܢ ܐܲܠܵܗܵܐ
ܘܐܲܒܼܵܐ. ܐܲܝܠܹܝܢ ܕܹܝܢ ܕܲܡܦܲܪ ܫܝܢ ܘܲܡܦܲܠܓܼܝܼܢ ܠܒܲܪ ܐ̄ܢܵܫܵܐ ܠܚܘܿܕܲܐܝܼܬܼ:
ܐܲܝܟܼ ܡ̇ܢ ܕܲܒܼܪܵܐ ܐ̄ܚܪܹܢܵܐ ܐܝܼܬܼܵܗܝ: ܠܒܲܪ ܡ̣ܢ ܡܸܠܬܼܵܐ ܕܡ̣ܢ ܐܲܠܵܗܵܐ:
ܘܠܲܐܠܵܗܵܐ ܠܚܘܿܕܼܵܐܝܼܬܼ ܐܲܝܟܼ ܡ̇ܢ ܕܲܐ̄ܚܪܹܢܵܐ ܒܪܵܐ ܐܝܼܬܼܵܘܗܝ ܟܲܕܼ
ܐܵܡ̇ܪܝܼܢ ܬܪܹܝܢ ܒܢܲܝ̈ܵܐ: ܡܸܬܼܚܲܒܼܫܝܼܢ ܟܹܐܢܵܐܝܼܬܼ ܚܲܝܠܹܗ ܕܚܸܪܡܵܐ
ܕܤܝܼܡ ܡ̣ܢ ܠܥܸܠ.
ܚܸܪܡܵܐ ܕܚܲܡܫܵܐ.
ܡ̇ܢ ܕܡܲܡܪܲܚ ܕܢܹܐܡܲܪ ܒܲܪܢܵܫܵܐ ܕܥܵܡܲ݁ܪ ܒܹܗ ܐܲܠܵܗܵܐ ܠܲܡܫܝܼܚܵܐ:
ܘܠܵܐ ܝܲܬܝܼܪܵܐܝܼܬܼ ܕܐܲܠܵܗܵܐ ܐܝܼܬܼܵܘܗܝ ܒܲܫܪܵܪܵܐ ܐܲܝܟܼ ܒܪܵܐ ܚܲܕܼ ܐܵܦ
pb. 533
ܒܲܟܼܝܵܢܵܐ: ܐܲܝܟܼ ܡ̇ܢ ܕܲܗܘ̤ܵܐ ܡܸܠܬܼܵܐ ܒܸܤܪܵܐ: ܘܐܸܫܬܵܘܬܲܦ ܒܵܗ̇
ܒܲܕܼܡܘܼܬܲܢ ܒܲܕܼܡܵܐ ܘܒܸܤܪܵܐ: ܚܵܪܡܵܐ ܢܸܗܘܸܐ.
ܦܘܼܫܵܩܵܐ. ܕܡܸܠܬܼܵܐ ܒܸܤܪܵܐ ܗܘ̤ܵܐ: ܐܸܡܲ݁ܪ ܛܘܼܒܼܵܢܵܐ ܝܘܿܚܲܢܵܢ
ܐܹܘܲܢܓܲܠܸܤܛܵܐ: ܠܵܐ ܗ̄ܘ̣ܵܐ ܕܲܒܼܫܘܼܢܵܝܵܐ ܐܵܘ ܫܘܼܚܠܵܦܵܐ ܕܲܟܼܝܵܢܹܗ ܐܸܬܼܗܦܸܟܼ
ܠܒܸܤܪܵܐ: ܐܲܝܟܼ ܡܵܐ ܕܡ̣ܢ ܟܲܕܘ ܐܵܡ̇ܪܝܼܢ. ܩܢܸܐ ܗ̄ܘ̣ ܓܹܝܪ ܗܵܝ̇
ܕܠܵܐ ܢܸܫܬܿܓܼܢܸܐ: ܐܲܝܟܼ ܐܲܠܵܗܵܐ. ܐܸܠܵܐ ܕܐܸܫܬܵܘܬܲܦ ܒܵܗ̇ ܒܲܕܼܡܘܼܬܲܢ
ܠܲܕܼܡܵܐ ܘܒܸܤܪܵܐ: ܘܲܗܘ̤ܵܐ ܒܲܪ ܐ̄ܢܵܫܵܐ. ܥܝܵܕܼܵܐ ܓܹܝܪ ܐܝܼܬܼ ܠܲܟܼܬܼܵܒܼܵܐ
ܩܲܕܝܼܫܵܐ: ܕܒܸܤܪܵܠ ܢܫܲܡܲܗ ܠܒܲܪ ܐ̄ܢܵܫܵܐ. ܟܬܼܝܼܒܼ ܓܹܝܪ: ܕܢܸܚܙܸܐ
ܟܠ ܒܸܪܤܪܵܐ ܦܘܼܪܩܵܢܹܗ ܕܐܲܠܵܗܵܐ. ܐܸܠܵܐ ܡܫܲܒܿܚܵܢܹ̈ܐ ܕܝܘܼܠܦܵܢܹ̈ܐ
ܪ̈ܲܫܝܼܥܹܐ ܕܢܸܤܛܘܿܪܝܼܣ ܘܐܲܝܠܹܝܢ ܕܥܲܡܹܗ: ܗܵܢܵܘ ܕܹܝܢ ܐܲܝܠܹܝܢ
ܕܐܲܟܼܘܵܬܹܗ ܡܸܬܼܪܲܥܹܝܢ ܡܚܵܘܹܝܢ ܡ̇ܢ ܕܡܵܘܕܹܝܢ ܒܒܲܪܬܼ ܩܵܠܵܐ
ܕܡܸܬܼܓܲܫܡܵܢܘܼܬܼܵܐ. ܠܵܐ ܗ̄ܘ̣ܵܐ ܕܹܝܢ ܕܐܸܬܼܓܲܫܲܡ ܫܲܪܝܼܪܵܐܝܼܬܼ ܐܵܡ̇ܪܝܼܢ
ܡܸܠܬܼܵܐ ܕܐܲܠܵܗܵܐ: ܗܵܢܵܘ ܕܹܝܢ ܕܲܗܘ̤ܵܐ ܒܲܪ ܐ̄ܢܵܫܵܐ ܐܲܟܼܘܵܬܲܢ: ܥܲܡ
ܗܵܝ̇ ܕܟܲܬܲܪ ܗܵܘ̇ ܡܵܐ ܕܐܝܼܬܼܵܘܗܝ ܗ̄ܘ̣ܵܐ. ܐܸܠܵܐ: ܐܲܝܟܼ ܕܲܒܼܒܲܪ ܐ̄ܢܵܫܵܐ
ܚܲܕܼ ܡ̣ܢ ܩܲܕܝܼ̈ܫܹܐ: ܒܗܵܘ̇ ܕܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ: ܡܸܬܼܚܪܹܝܢ
ܕܲܥ̣ܡܲܪ ܝܑܼܚܝܼܕܼܵܝܵܐ ܡܸܠܬܼܵܐ ܕܐܲܠܵܗܵܐ. ܐܲܝܟܼ ܕܠܵܐ ܡܸܟܹܝܠ ܚܲܕ ܡܫܝܼܚܵܐ
ܢܸܬܿܬܵܘܕܹܐ: ܘܲܒܼܪܵܐ ܘܡܵܪܝܵܐ ܘܲܤܓܼܝܼܕܼܵܐ. ܐܸܠܵܐ: ܐܲܝܟܼ ܒܲܪ ܐ̄ܢܵܫܵܐ
ܕܲܠܚܘܿܕܼܵܐܝܼܬܼ ܘܡܸܢܹܗ ܘܠܹܗ ܡܸܬܼܝܼܕܲܥ: ܒܲܠܚܘܿܕܼ ܕܲܒܼܢܲܩܝܼܦܘܼܬܼܵܐ
ܕܲܚܕܼܵܝܘܼܬܼܵܐ ܕܐܝܼܩܵܪܵܐ ܡܝܲܩܲܪ: ܢܸܤܬܿܓܸܕܼ ܥܲܡܹܗ ܘܢܸܫܬܲܒܲܚ. ܥܵܡܲ݁ܪ
ܒܲܢ ܓܹܝܪ ܐܲܠܵܗܵܐ ܕܟܼܠ: ܒܝܲܕܼ ܪܘܼܚܵܐ ܕܩܘܼܕܼܫܵܐ. ܐܲܝܟܼ ܕܐܵܦ ܡ̣ܢ
ܩܕܝܼܡ ܐܸܡ݂ܲܪ ܒܝܲܕܼ ܚܲܕܼ ܡ̣ܢ ܢܒܼܝܹ̈ܐ ܩܲܕܼ̈ܫܹܐ: ܕܐܸܥܡܲܪ ܒܗܘܿܢ
pb. 534
ܘܐܹܗܲܠܸܟܼ ܒܗܘܿܢ. ܘܐܸܗܘܸܐ ܠܗܘܿܢ ܐܲܠܵܗܵܐ: ܘܗܸܢܘܿܢ ܢܸܗܘܘܿܢ ܠܝܼ
ܥܲܡܵܐ. ܟܵܐܹ̄ܒܼ ܕܹܝܢ ܐܵܦ ܛܘܼܒܼܵܢܵܐ ܦܵܘܠܘܿܣ: ܕܠܵܐ ܝܵܕܼܥ̇ܝܼܢ
ܐܢ̄ܬܿܘܿܢ ܕܗܲܝ̈ܟܿܠܹܐ ܐܲܢ̄ܬܿܘܿܢ ܕܐܲܠܵܗܵܐ: ܘܪܘܼܚܹܗ ܕܐܲܠܵܗܵܐ ܥܵܡܲܪ
ܒܟܼܘܿܢ؟ ܐܸܡ݂ܲܪ ܕܹܝܢ ܐܵܦ ܗ̤ܘ ܡܫܝܼܚܵܐ: ܡܸܛܠ ܢܒܼܝܹ̈ܐ ܩܲܕܝܼ̈ܫܹܐ:
ܘܡܸܛܠ ܟܹܐܢܹ̈ܐ ܩܲܕܼܡܵܝܹ̈ܐ: ܕܐܸܢ ܠܗܵܢܘܿܢ ܐܸܡ݂ܲܪ ܐܲܠܵܗܹ̈ܐ: ܠܘܵܬܼ
ܗܵܢܘܿܢ ܕܲܗܘ̤ܵܬܼ ܡܸܠܬܼܵܐ ܕܐܲܠܵܗܵܐ: ܗܵܘ̇ ܕܐܲܒܼܵܐ ܩܲܕܸܫ̣ ܘܫܲܕܲܪ
ܠܥܵܠܡܵܐ: ܐܲܢ̄ܬܿܘܿܢ ܐܵܡ̇ܪܝܼܢ ܐܢ̄ܬܿܘܿܢ ܕܡܓܲܕܸܦ ܐܲܢ̄ܬܿ: ܥܲܠ ܕܐܸܡ̇ܪܹܬܼ
ܕܲܒܼܪܵܐ ܐܝܼܬܲܝ ܕܐܲܠܵܗܵܐ؟ ܐܸܠܵܐ ܠܵܐ ܗ̄ܘ̣ܵܐ ܐܲܝܟܼ ܡܵܐ ܕܒܲܢ ܥܵܡܪ
ܐܠܵܗܵܐ: ܗܵܟܲܢܵܐ ܐܵܦ ܒܲܡܫܝܼܚܵܐܘ ܐܲܠܵܗܵܐ ܓܹܝܪ ܐܝܼܬܼܵܘܗܝ ܒܲܟܼܝܵܢܵܐ:
ܕܐܸܬܼܚܵܘܝܼ ܐܲܟܼܘܵܬܲܢ. ܘܚܲܕܼ ܐܝܼܬܼܵܘܗܝ ܒܪܵܐ: ܐܵܦ ܟܲܕܼ ܗܘ̤ܵܐ ܒܸܤܪܵܐ. .
ܐܲܝܠܹܝܢ ܗܵܟܹܝܠ ܕܡܲܡܪܝܼܚܢ ܕܢܹܐܡܪܘܼܢ: ܕܒܲܪܢܵܫܵܐ ܕܥܵܡܲ݁ܪ ܒܹܗ
ܐܲܠܵܗܵܐ ܐܝܼܬܼܵܘܗܝ: ܘܠܵܐ ܗ̄ܘ̣ܵܐ ܕܹܝܢ ܝܲܬܝܼܪܵܐܝܼܬܼ ܐܲܠܵܗܵܐ ܕܐܸܬܸܒܲܪܢܲܫ:
ܢܵܦ̇ܠܝܼܢ ܐܵܠܵܨܵܐܝܼܬܼ ܬܚܹܝܬܼ ܚܸܪܡܵܐ ܕܤܝܼܡ ܡ̣ܢ ܠܥܸܠ.
ܚܸܪܡܵܐ ܕܐܸܫܬܼܵܐ.
ܡ̇ܢ ܕܐܸܡܲ݁ܪ: ܕܐܲܠܵܗܹܗ ܗ̄ܘ̣ ܕܲܡܫܝܼܚܵܐ ܐܵܘ ܡܵܪܹܗ: ܡܸܠܬܼܵܐ
ܕܡ̣ܢ ܐܲܠܵܗܵܐ ܐܲܒܼܵܐ. ܘܠܵܐ ܗ̄ܘ̣ܵܐ ܝܲܬܝܼܪܵܐܝܼܬܼ ܠܹܗ ܟܲܕܼ ܠܹܗ ܡܵܘܕܸܐ:
ܐܲܠܵܗܵܐ ܐܲܟܼܚ̄ܕܼܸܵܐ ܘܒܲܪ ܐ̄ܢܵܫܵܐ: ܐܲܝܟܼ ܡ̇ܢ ܕܲܗܘ̤ܵܐ ܡܸܠܬܼܵܐ ܒܸܤܪܵܐ:
ܐܲܝܟܼ ܕܲܟܼܬܼܝܼܒܼ: ܚܸܪܡܵܐ ܢܸܗܘܸܐ.
ܦܘܼܫܵܩܵܐ. ܡܵܪܲܢ ܝܼܫܘܿܥ ܡܫܝܼܚܵܐ: ܐܲܝܟܼ ܡ̇ܢ ܕܚܲܕܼ ܐܝܼܬܼܵܘܗܝ
ܘܒܲܠܚܘܿܕܼܵܘܗܝ ܫܲܪܝܼܪܵܐܝܼܬܼ ܒܪܵܐ ܕܐܲܠܵܗܵܐ ܘܐܲܒܼܵܐ: ܐܵܦ ܟܲܕܼ ܗܘ̤ܵܐ
pb. 535
ܡܠܬܼܵܐ ܒܸܤܪܵܐ: ܐܲܚܝܼܕܼ ܗ̄ܘ̣ ܟܠ: ܥܲܡ ܝܵܠܘܿܕܹܗ. ܘܟܼܵܦܵܐ ܠܹܗ
ܟܠ ܒܘܼܪܟܵܐ: ܕܲܡܫܲܝܵܢܹ̈ܐ ܘܕܲܐܪ̈ܥܵܢܹܐ: ܘܕܼܲܠܬܲܚܬܿ ܡ̣ܢ ܐܲܪܥܵܐ. ܘܡܵܘܕܸܐ
ܟܠ ܠܸܫܵܢܵܐ: ܕܡܵܪܝܵܐ ܗ̄ܘ̣ ܝܼܫܘܿܥ ܡܫܝܼܚܵܐ: ܠܬܸܫܒܿܘܿܚܵܐ ܕܐܲܠܵܗܵܐ
ܘܐܲܒܼܵܐ. ܐܝܼܬܼܵܘܗܝ ܗܵܟܹܝܠ ܗ̤ܘ ܡܵܪܝܵܐ ܕܟܼܠ: ܒܗܵܝ̇ ܕܡܸܬܼܝܼܕܲܥ
ܘܐܝܼܬܸܵܘܗܝ ܐܲܠܵܗܵܐ: ܐܵܦܸܢ ܠܵܐ ܗ̄ܘ̣ܵܐ ܠܒܲܪ ܡ̣ܢ ܒܸܤܪܵܐ ܒܵܬܲܪ
ܡܸܬܼܒܲܪܢܫܵܢܘܼܬܼܵܐ. ܗ̤ܘ ܕܹܝܢ ܕܢܲܦܫܹܗ: ܠܵܐ ܐܲܠܵܗܵܐ ܐܝܼܬܼܵܘܗܝ: ܘܠܵܐ
ܡܵܪܵܐ. ܐܵܦ ܓܹܝܪ ܛܵܒܼ ܫܟܼܝܼܪܵܐ: ܗܵܢܵܘ ܕܹܝܢ: ܟܠܹܗ ܪܘܼܫܥܵܐ
ܡܲܠܝܵܐ ܫܲܪܝܼܪܵܐܝܼܬܼ: ܗܵܝ̇ ܕܗܵܟܲܢܵܐ ܢܸܬܼܪܲܥܐ ܐܵܘ ܢܹܐܡܲܪ. ܙܵܕܼܩܵܐܝܼܬܼ
ܗܵܟܹܝܠ ܥܠܹܝܗ̇ ܥܲܠ ܗܵܕܹܐ: ܗܘ̤ܵܐ ܚܸܪܡܵܐ ܕܤܝܼܡ ܡ̣ܢ ܠܥܸܠ.
ܚܸܪܡܵܐ ܕܫܲܒܼܥܵܐ.
ܡ̇ܢ ܕܐܵܡܲܪ: ܕܐܲܝܟܼ ܕܲܒܼܒܲܪ ܐ̄ܢܵܫܵܐ ܐܲܥܒܸܿܕܼ ܐܲܠܵܗܵܐ ܡܸܠܬܼܵܐ ܒܝܼܫܘܿܥ:
ܘܲܫܒܼܝܼܚܘܼܬܼܵܐ ܕܚܝܼܕܼܵܝܵܐ ܐܲܩܸܦ̣ ܠܹܗ: ܐܲܝܟܼ ܗܵܘ̇ ܕܲܐ̄ܚܪܹܢܵܐ ܐܝܼܬܼܵܘܗܝ
ܠܒܲܪ ܡܸܢܹܗ: ܚܸܪܡܵܐ ܢܸܗܘܸܐ.
ܦܘܼܫܵܩܵܐ. ܟܲܕܼ ܠܝܲܠܕܵܐ ܕܒܲܒܼܤܲܪ ܕܚܝܼܕܼܵܝܵܐ ܒܪܵܐ ܕܐܲܠܵܗܵܐ: ܡܤܲܒܲܪ
ܗ̄ܘ̣ܵܐ ܠܲܒܼܬܼܘܼܬܼܵܐ ܩܕܝܼܫܵܬܼܵܐ ܛܘܼܒܼܵܢܵܐ ܓܲܒܼܪܝܹܠ: ܐܸܡ݂ܲܪ: ܕܬܹܐܠܕܝܼܢ
ܒܪܵܐ: ܘܬܸܩܪܹܝܢ ܫܡܹܗ ܝܼܫܘܿܥ. ܗ̤ܘ ܓܹܝܪ ܢܸܦܪܩܝܼܘܗܣ ܠܥܲܡܹܗ
ܡ̣ܢ ܚܛܵܗܲܝ̈ܗܘܿܢ. ܐܸܬܼܡܫܲܚ ܕܹܝܢ ܐܵܦ ܡܫܝܼܚܵܐ: ܥܲܠ ܕܐܸܬܼܡܫܲܚ
ܥܲܡܲܢ ܐ̄ܢܵܫܵܐܝܼܬܼ: ܐܲܝܟܼ ܩܵܠܹܗ ܕܗܵܘ̇ ܕܲܡܙܲܡܲܪ: ܕܲܪܚܸܡ̣ܬܿ ܙܲܕܝܼܩܘܼܬܼܵܐ:
ܘܲܤ̣ܢܲܝܬܿ ܥܵܘ̣ܠܵܐ. ܡܸܛܠ ܗܵܢܵܐ ܡܲܫܚ̣ܵܟܼ ܐܲܠܵܗܵܐ ܐܲܠܵܗܵܟܼ: ܡܸܫܚܵܐ
pb. 536
ܕܚܲܕܼܘܼܬܼܵܐ ܝܲܬܿܝܼܪ ܡ̣ܢ ܚܲܒܼܪ̈ܲܝܟܼ. ܘܟܲܕܼ ܛܵܒܼ ܐܝܼܬܼܵܘܗܝ ܗ̤ܘ
ܝܵܗܘܿܒܼܵ ܕܪܘܼܚܵܐ ܕܩܘܼܕܼܫܵܐ: ܘܠܵܐ ܗ̄ܘ̣ܵܐ ܡ̣ܢ ܡܫܘܼܚܬܼܵܐ ܝܵܗܹ̇ܒܼ
ܠܹܗ ܠܐܲܝܠܹܝܢ ܕܫܵܘܹ̇ܝܢ. ܡܲܠܝܵܐ ܓܹܝܪ ܐܝܼܬܼܵܘܗܝ: ܘܡ̣ܢ ܡܲܠܝܘܼܬܹܗ
ܚܢܲܢ ܟ̱ܠܲܢ ܢܤܲܒܼܢ: ܐܝܟ ܕܲܟܼܬܼܝܼܒܼ. ܡܕܲܒܿܪܵܢܵܐܝܼܬܼ: ܐܲܝܟܼ ܒܲܪ
ܐ̄ܢܵܫܵܐ ܡܸܬܼܐܡܲܪ ܕܐܸܬܼܡܫܲܚ: ܟܲܕܼ ܡܤܲܬܬܼܵܐܝܼܬܼ ܐܲܓܸܢ ܥܠܵܘܗܝ
ܪܘܼܚܵܐ ܕܩܘܼܕܼܫܵܐ: ܕܐܵܦ ܒܲܢ ܢܸܥܡܲܪ ܗܵܘ̇ ܕܡܸܛ ܡܸܬܼܥܲܒܼܪܵܢܘܼܬܼܵܐ
ܕܒܼܵܐܕܼܵܡ ܫܲܢܝܼ ܒܫܘܼܪܵܝܵܐ. ܗ̤ܘ ܗܵܟܹܝܠ ܝܑܼܚܝܼܕܼܵܝܵܐ ܡܸܠܬܼܵܐ ܕܐܲܠܵܗܵܐ:
ܟܲܕܼ ܗܘ̤ܵܐ ܒܸܤܪܵܐ: ܐܸܬܼܩܪܝ ܡܫܝܼܚܵܐ. ܘܟܲܕܼ ܚܲܝܠܵܐ ܕܲܦܐܸܐ ܠܐܲܠܵܗܵܐ:
ܕܝܼܠܹܗ ܐܝܼܬܼܵܘܗܝ ܤܵܥܲܪ ܬܡܝܼ̈ܗܵܬܼܵܐ. ܐܲܝܠܹܝܢ ܗܵܟܹܝܠ ܕܐܵܡ̇ܪܝܼܢ:
ܕܲܫܒܼܝܼܚܘܼܬܹܗ ܕܝܼܚܝܼܕܼܵܝܵܐ ܠܡܸܬܼܡܲܨܝܵܢܘܼܬܹܗ ܕܲܡܫܝܼܚܵܐ ܐܸܬܼܢܲܩܦܲܬ̤:
ܐܲܝܟܼ ܡ̇ܢ ܕܲܐ̄ܚܪܹܢܵܐ ܐܝܼܬܼܵܘܗܝ ܝܑܼܚܝܼܸܕܼܵܝܵܐ ܠܒܲܪ ܡ̣ܢ ܡܫܝܼܚܵܐ: ܬܪܹܝܢ
ܒܢܝܼ̈ܢ ܡܸܬܼܪܲܥܹܝܢ. ܚܲܕܼ ܕܡܲܥܒܸܿܕܼ: ܘܲܐܚ̄ܪܹܢܵܐ ܕܒܹܗ ܗܵܘ̇ܝܵܐ ܡܲܥܒܿܕܼܵܢܘܼܬܼܵܐ:
ܐܲܝܟܼ ܒܲܪܢܵܫܵܐ ܚܲܕܼ ܡ̣ܢ ܐܲܝܠܹܝܢ ܕܐܲܟܼܘܵܬܲܢ. ܘܲܒܼܗܵܕܹܐ: ܗܵܘܹ̇ܝܢ ܐܚܹܝܬܼ
ܚܲܝܠܹ̈ ܕܚܸܪܡܵܐ.
ܚܸܪܡܵܐ ܕܲܬܼܡܲܬܢܝܵܐ.
ܡ̇ܢ ܕܡܲܡܪܲܚ ܕܢܹܐܡܲܪ ܠܒܲܪ ܐ̄ܢܵܫܵܐ ܕܐܸܬܼܢܤܸܒܼ: ܕܥܲܡ
ܐܲܠܵܗܵܐ ܡܸܠܬܼܵܐ ܘܵܠܹ̇ܐ ܕܢܸܤܬܿܓܸܕܼ: ܘܥܲܡܹܗ ܢܸܫܬܲܒܲܚ: ܘܥܲܡܹܗ
ܢܸܫܬܲܡܲܗ ܐܲܠܵܗܵܐ: ܐܲܝܟܼ ܐ̄ܚܪܹܢܵܐ ܥܲܡ ܐ̄ܚܪܹܢܵܐ. ܗܵܝ̇ ܓܹܝܪ ܕܥܲܡ
ܕܐܲܡܝܼܢܵܐܝܼܬܼ ܡܸܬܬܵܘܤܦܵܐ: ܗܵܕܹܐ ܥܵܨ̇ܝܵܐ ܠܡܸܤܬܲܟܵܠܘܼ. ܘܠܵܐ ܗ̄ܘ̣ܵܐ
ܝܲܬܿܝܼܪܵܐܝܼܬܼ ܒܲܚܕܼܵܐ ܤܸܓܼܕܬܼܵܐ ܡܝܲܩܲܪ ܠܥܲܡܲܢܘܼܐܹܝܠ: ܘܲܚܕܼܵܐ ܬܸܫܒܿܘܿܚܬܐ
pb. 537
ܡܩܲܪܸܒܼ ܠܹܗ: ܐܲܝܟܼ ܡ̇ܢ ܕܲܗܘ̤ܵܐ ܡܸܠܬܼܵܐ ܒܸܤܪܵܐ: ܚܸܪܡܵܐ
ܢܸܗܘܸܐ.
ܦܘܼܫܵܩܵܐ. ܒܚܲܕܼ ܐܲܠܵܗܵܐ ܐܲܒܼܵܐ ܐܲܚܝܼܕܼ ܟܠ: ܘܲܒܼܚܲܕܼ ܒܪܵܐ ܡܵܪܲܢ
ܝܼܫܘܿܥ: ܘܲܒܼܚܲܕܼ ܪܘܼܚܵܐ ܕܩܘܼܕܼܫܵܐ ܥܡܝܼܕܼܝܼܢܲܢ. ܐܸܡ݂ܲܪ ܕܹܝܢ ܐܵܦ
ܛܘܼܒܼܵܢܵܐ ܦܵܘܠܘܿܣ: ܕܠܵܐ ܝܵܕܼܥ̇ܝܼܢ ܐܢ̄ܬܿܘܿܢ ܕܐܲܝܠܹܝܢ ܕܒܲܡܫܝܼܚܵܐ
ܥܡܲܕܼܢܲܢ: ܒܡܵܘܬܹܗ ܗ̄ܘ̣ ܥܡܲܕܼܢ؟ ܐܸܬܼܩܒܲܪܢ ܗܵܟܹܝܠ ܥܲܡܹܗ
ܒܝܲܕܼ ܡܲܥܡܘܿܕܼܝܼܬܼܵܐ ܒܡܵܘܬܵܐ. ܕܐܲܝܟܲܢܵܐ ܕܩܵܡ̣ ܡܫܝܼܚܵܐ ܡ̣ܢ ܒܹܝܬܼ
ܡܝܼ̈ܬܹܐ ܒܝܲܕܼ ܫܘܼܒܼܚܵܐ ܕܐܲܒܼܵܐ: ܗܵܟܲܢܵܐ ܐܵܦ ܚܢܲܢ ܒܚܲܝܹ̈ܐ ܚܲܕ̈ܬܹܐ
ܡܗܲܠܸܟ. ܗܲܝܡܸܢܢ ܗܵܟܹܝܠ ܘܲܥܡܲܕܼܢ ܚ̄ܢܲܬܢ: ܐܲܝܟܼ ܡܵܐ ܕܐܸܡ̇ܪܹܬܼ:
ܒܚܲܕܼ ܒܪܵܐ ܡܵܪܲܢ ܝܫܘܿܥ ܡܫܝܼܚܵܐ. ܗܵܢܵܘ ܕܹܝܢ: ܒܡܸܠܬܼܵܐ ܕܡ̣ܢ
ܐܲܠܵܗܵܐ ܐܲܒܼܵܐ: ܕܐܸܬܼܓܲܫܲܡ ܘܐܸܬܼܒܲܪܢܲܫ. ܘܲܠܚܕܼ ܕܐܝܼܬܼܵܘܗܝ ܐܲܠܵܗܵܐ
ܫܲܪܝܼܪܑܵܝܼܬܼ ܠܡܸܤܓܲܕܼ ܝܑܼܠܸܦܢܲܢ. ܘܥܲܡܲܢ: ܐܵܦ ܚܲܝ̈ܠܹܐ ܥܸܠܵܝܹ̈ܐ. ܟܬܼܝܼܒܼ
ܓܹܝܪ: ܕܐܸܡܲܬܼܝ ܕܡܲܥܸܠ ܒܘܼܟܼܪܵܐ ܠܬܹܒܹܝܠ: ܐܸܡ݂ܲܪ: ܘܢܸܤܓܕܘܼܢ
ܠܹܗ ܟܠܗܘܿܢ ܡܲܠܲܐܟܼܵܘ̈ܗܝ ܕܐܲܠܵܗܵܐ. ܗܘ̤ܵܐ ܕܹܝܢ ܒܘܼܟܼܪܵܐ
ܝܑܼܚܝܼܕܼܵܝܐ: ܟܲܕܼ ܐܸܬܼܚܵܘܝܼ ܒܲܪ ܐܲܟܼܘܵܬܲܢ. ܗܵܝܕܹܝܢ ܓܹܝܪ: ܐܵܦ
ܐܲܚܵܐ ܐܸܬܼܩܪܝܼ ܕܐܲܝܠܹܝܢ ܕܡܲܚܒܼܝܼܢ ܠܹܗ. . ܐܲܝܢܵܐ ܗܵܟܹܝܠ ܕܐܵܡܲ݁ܪ:
ܕܤܡܸܬܓܸܕܼ ܥܲܡܹܗ ܐܲܝܟܼ ܒܲܪܢܵܫܵܐ ܠܚܘܿܕܼܵܐܝܼܬܼ: ܕܐܝܼܬܼܵܘܗܝ ܐ̄ܚܪܹܢܵܐ
ܠܒܲܪ ܡ̣ܢ ܡܸܠܬܼܵܐ ܕܡ̣ܢ ܐܲܠܵܗܵܐ: ܘܠܵܐ ܗ̄ܘ̣ܵܐ ܟܲܕܼ ܡܟܲܢܲܫ
ܒܲܚܕܼܵܝܘܼܬܼܵܐ ܫܲܪܝܪܬܵܐ ܠܚܲܕܼ ܡܫܝܚܵܐ ܘܲܒܼܪܵܐ ܘܡܵܪܝܵܐ: ܒܲܚܕܼܵܐ ܤܸܓܼܕܬܼܵܐ
ܡܝܲܩܲܪ ܠܹܗ: ܡܸܬܼܚܒܸܫ ܟܹܐܢܵܐܝܼܬܼ ܬܚܹܝܬܼ ܚܲܝܠܹܗ ܕܚܸܪܡܵܐ.
pb. 538
ܚܸܪܡܵܐ ܕܬܸܫܥܵܐ.
ܡ̇ܢ ܕܐܵܡܲ݁ܪ ܥܲܠ ܚܲܕܼ ܡܵܪܝܵܐ ܝܼܫܘܿܥ ܡܫܝܼܚܵܐ ܕܡ̣ܢ ܪܘܼܚܵܐ
ܐܸܫܬܲܒܲܚ: ܐܲܝܟܼ ܗܵܘ̇ ܕܲܒܼܚܝܠܵܐ ܢܘܼܟܼܪܵܝܵܐ ܕܝܼܠܹܗ ܕܪܘܼܚܵܐ ܡܸܬܼܚܲܫܲܚ
ܗ̄ܘ̣ܵܐ: ܘܡܸܢܹܗ ܢܤܲܒܼ ܗܵܝ̇ ܕܢܸܬܼܡܨܐ ܠܡܲܥܒܵܕܼܘܼ ܠܘܼܩܒܲܠ ܪ̈ܘܼܚܹܐ
ܛܲܢ̈ܦܵܬܼܵܐ: ܘܕܲܢܫܲܡܠܸܐ ܒܲܒܼܢܲܝ̈ܢܵܫܵܐ ܐܵܬܼ̈ܘܼܬܼܵܐ ܕܐܲܠܵܗܵܐ: ܘܠܵܐ ܗ̄ܘ̣ܵܐ
ܝܲܐܝܼܪܵܐܝܼܬܼ ܕܕܼܸܝܼܠܹܗ ܗ̄ܘ̣ ܪܘܼܚܵܐ ܐܵܡܲ݁ܪ: ܕܒܼܐܝܼܕܼܗ ܐܵܦ ܤ̣ܥܲܪ ܐܸܬܼ̈ܘܼܬܼܵܐ
ܕܐܲܠܵܗܵܐ: ܚܸܪܡܵܐ ܢܸܗܘܸܐ.
ܦܘܼܫܵܩܵܐ. ܟܲܕܼ ܗܘ̤ܵܐ ܒܲܪܢܵܫܵܐ ܝܑܼܚܝܼܕܼܵܝܵܐ ܡܸܠܬܼܵܐ ܕܐܲܠܵܗܵܐ: ܟܲܬܲܪ
ܐܵܦ ܗܵܟܲܢܵܐ ܐܲܠܵܗܵܐ. ܟܲܕܼ ܐܝܼܬܼܵܘܗܝ ܡܸܕܸܡ ܕܐܝܼܬܼܵܘܗܝ ܐܵܦ ܐܲܒܼܵܐ:
ܤܛܲܪ ܡ̣ܢ ܗܵܝ̇ ܕܢܸܗܘܸܐ ܐܲܒܼܵܐ. ܘܟܲܕܼ ܐܝܼܬܼ ܠܹܗ ܪܘܼܚܵܐ ܩܲܕܝܼܫܵܐ
ܕܡܸܢܹܗ ܐܝܼܬܼܵܘܗܝ: ܘܲܟܼܝܵܢܵܐܝܼܬܼ ܐܝܼܬܼܵܘܗܝ ܒܹܗ: ܤܵܥܲܪ ܗ̄ܘ̣ܵܐ ܐܵܬܼ̈ܘܵܬܼܵܐ
ܕܐܲܠܵܗܵܐ. ܡܵܕܹܝܢ ܐܵܦ ܟܲܕܼ ܗܘ̤ܵܐ ܒܲܪܢܵܫܵܐ: ܡܸܛܠ ܕܟܲܬܲܪ ܐܵܦ
ܗܵܟܲܢܵܐ ܐܲܠܵܗܵܐ: ܐܲܝܟܼ ܕܒܼܚܲܝܠܵܐ ܕܝܼܠܹܗ: ܒܗܵܘ̇ ܕܲܒܼܝܲܕܼ ܪܘܼܚܵܐ
ܡܫܲܡܠܸܐ ܗ̄ܘ̣ܵܐ ܬܸܕܼܡܪܗܵܬܼܵܐ: ܐܲܝܠܹܝܢ ܕܹܝܢ ܕܐܵܡ̇ܪܝܼܢ ܕܐܲܝܟܼ ܒܲܪ ܐ̄ܢܵܫܵܐ
ܕܐܲܟܼܘܵܬܲܢ: ܗܵܢܵܘ ܕܹܝܢ ܚܲܕܼ ܡ̣ܢ ܩܲܕܝܼ̈ܫܹܐ: ܐܸܫܬܲܒܲܚ ܒܝܲܕܼ ܡܲܥܒܿܕܼܵܢܘܼܬܼܵܐ
ܕܪܘܼܚܵܐ: ܘܠܵܐ ܗ̄ܘ̣ܵܐ ܐܲܝܟܼ ܕܲܒܼܚܝܠܵܐ ܕܝܼܠܹܗ: ܐܸܠܵܐ ܐܲܝܟܼ ܕܲܒܼܢܘܼܟܼܪܵܝܐ
ܐܸܬܼܚܲܫܲܚ ܕܲܦܐܸܐ ܠܐܲܠܵܗܵܐ: ܘܒܲܡܢܵܬܼܵܐ ܕܛܲܝܒܿܘܼܬܼܵܐ ܢܤܲܒܼ ܡ̣ܢ ܪܘܼܚܵܐ
ܕܩܘܼܕܼܫܵܐ ܡܲܤܲܩܬܼܵܐ ܕܠܲܫܡܲܝܵܐ: ܡܸܫܬܲܥܒܿܕܝܼܢ ܟܹܐܢܵܐܝܼܬܼ ܠܚܲܝܠܹܗ
ܕܚܸܪܡܵܐ.
pb. 539
ܚܸܪܡܵܐ ܕܥܸܤܪܵܐ.
ܕܲܗܘ̤ܵܐ ܡܫܝܼܚܵܐ ܪܹܫ ܟܘܼܡܪܹ̈ܐ ܘܲܫܠܝܼܚܵܐ ܕܬܼܵܘܕܝܬܲܢ: ܟܬܼܵܒܼܵܐ
ܐܲܠܵܗܵܝܵܐ ܐܸܡ݂ܲܪ: ܘܲܕܼܲܪܸܒܼ ܢܲܦܫܹܗ ܚܠܵܦܲܝܢ ܪܹܚܵܝܐ ܒܲܤܝܼܡܵܐ ܠܐܲܠܵܗܵܐ
ܘܐܲܒܼܵܐ. ܡ̇ܢ ܕܐܵܡܲ݁ܪ ܗܵܟܹܝܠ: ܕܪܹܫ ܟܘܼܡܪܹ̈ܐ ܘܲܫܠܝܼܚܵܐ ܕܬܼܵܘܕܝܼܬܲܢ:
ܠܵܘ ܗ̤ܘ ܡܸܠܬܼܵܐ ܕܡ̣ܢ ܐܲܠܵܗܵܐ ܐܝܼܬܼܵܘܗܝ: ܟܲܕܼ ܗܘ̤ܵܐ ܒܸܤܪܵܐ ܘܒܲܪ
ܐ̄ܢܵܫܵܐ ܐܲܟܼܘܵܬܲܢ: ܐܸܠܵܐ ܐܲܝܟܼ ܒܲܪܢܵܫܵܐ ܐ̄ܚܪܹܢܵܐ ܡ̣ܢ ܐܲܢ̄ܬܿܬܼܵܐ ܠܚܘܿܕܼܵܐܝܼܬܼ
ܠܒܲܪ ܡܸܢܹܗ. ܐܵܘ ܐܸܢ ܐ̄ܢܵܫ ܢܹܐܡܲܪ: ܕܲܚܠܵܦ ܢܲܦܫܹܗ ܩܲܪܸܒܼ
ܩܘܼܪܒܵܢܵܐ: ܘܠܵܐ ܕܹܝܢ ܝܲܬܿܝܼܪܵܐܝܼܬܼ ܚܠܵܦܲܝܢ ܕܝܼܠܲܢ ܒܲܠܚܘܼܕܼܸ: ܠܵܐ ܓܹܝܪ
ܤܢܝܼܩ ܗ̄ܘ̣ܵܐ ܥܲܠ ܩܘܼܪܒܵܢܵܐ ܗܵܘ̇ ܕܠܑܵ ܝܑܼܕܲܥ̣ ܚܛܝܼܬܼܵܐ: ܚܸܪܡܵܐ
ܢܸܗܘܸܐ.
ܦܘܼܫܵܩܵܐ. ܕܲܙܥܘܿܪ̈ܝܵܢ ܐ̄ܢܵܫܝ̈ܬܼܵܐ ܠܡܸܠܬܼܵܐ ܕܡ̣ܢ ܐܲܠܵܗܵܐ ܐܸܬܼܝܼܠܸܕܼ:
ܡܵܘܕܹܝܢܲܢ. ܒܪܲܡ ܕܹܝܢ: ܠܵܐ ܗ̄ܘ̣ܵܐ ܡܲܤ̈ܠܲܝܵܬܼܵܐ ܐܸܢܹܝܢ ܡܸܛܠ
ܡܕܲܒܿܪܵܢܘܼܬܼܵܐ. ܟܲܕܼ ܓܹܝܪ ܐܝܼܬܼܵܘܗܝ ܡܵܪܝܵܐ ܕܟܼܠ ܒܲܟܼܝܵܢܵܐ: ܬܲܚܬܝܼ
ܢܲܦܫܹܗ ܠܗܵܠܹܝܢ ܕܝܼܠܲܢ: ܟܲܕܼ ܢܤܲܒܼ ܕܡܘܼܬܼܵܐ ܕܥܲܒܼܕܵܐ: ܘܐܸܬܼܩܪܝܼ
ܪܹܫ ܟܘܼܡܪܹ̈ܐ ܕܝܼܠܲܢ ܘܲܫܠܝܼܚܵܐ: ܟܲܕܼ ܩܵܪܹܝܢ ܠܹܗ ܠܘܵܬܼ ܗܵܕܹܐ
ܡܫܘܼܚܬܼܵܐ ܕܐ̄ܢܵܫܘܼܬܼܵܐ. ܩܲܪܸܒܼ ܕܹܝܢ ܢܲܦܫܹܗ ܚܠܵܦܲܝܢ ܪܹܚܝܵܐ ܤܒܲܝܼܡܵܐ
ܠܐܲܠܵܗܵܐ ܘܐܲܒܼܵܐ: ܒܚܲܕܼ ܓܹܝܪ ܩܘܼܪܒܵܢܵܐ ܓܡܲܪ ܠܐܲܝܠܹܝܢ ܕܡܸܬܼܩܲܕܫܝܼܢ
ܠܥܵܠܲܡ: ܐܲܝܟܼ ܕܲܟܼܬܼܝܼܒܼ. ܐܸܠܵܐ ܠܵܐ ܝܵܕܲܥ̇ܢܵܐ ܐܲܝܟܲܢܵܐ ܗܵܠܹܝܢ
ܕܲܐ̄ܚܪܵܢܝܵܐܝܬܼ ܡܸܬܼܪܲܥܹܝܢ ܡܸܬܼܚܪܹܝܢ: ܕܠܵܐ ܗ̄ܘ̣ܵܐ ܗ̤ܘ ܡܸܠܬܼܵܐ ܕܡ̣ܢ
ܐܲܠܵܗܵܐ ܗܘ̤ܵܐ ܒܲܪܢܵܫܵܐ: ܘܐܸܬܼܩܪܝܼ ܫܠܝܼܚܵܐ ܘܪܹܫ ܟܘܼܡܪܹ̈ܐ ܕܬܼܵܘܕܝܼܬܲܢ.
pb. 540
ܐܸܠܵܐ ܒܲܪ ܐ̄ܢܵܫܵܐ ܐ̄ܚܪܹܢܵܐ ܠܒܲܪ ܡܸܢܹܗ: ܕܲܠܚܘܿܕܼܵܐܝܼܸܬܼ ܡ̣ܢ ܒܬܼܘܼܠܬܼܵܐ
ܩܲܕܝܼܫܬܼܵܐ ܐܸܬܼܝܠܸܕܼ: ܐܵܡ̇ܪܝܼܢ: ܕܐܸܬܼܩܪܝܼ ܫܠܝܼܚܵܐ ܘܪܹܫ ܟܘܼܡܪܹ̈ܐ:
ܘܲܒܼܬܲܪܒܿܝܼܬܼܵܐ ܠܗܵܕܹܐ ܐܸܬܼ݂ܵܐ. ܘܠܵܐ ܗ̄ܘ̣ܵܐ ܚܠܵܦܲܝܢ ܕܝܼܠܲܢ ܝܲܬܼܝܼܪܵܐܝܼܬܼ:
ܐܸܠܵܐ: ܚܠܵܦܵܘܗܝ ܕܝܼܠܹܗ: ܩܲܪܸܒܼ ܢܲܦܫܹܗ ܕܼܒܼܚܵܬ ܠܐܲܠܵܗܵܐ ܘܐܲܒܼܵܐ.
ܗܵܝ̇ ܕܐܝܼܬܹܝܗ̇: ܢܘܼܟܼܪܵܝܬܼܵܐ ܠܲܓܼܡܵܪ ܕܗܲܝܡܵܢܘܼܬܼܵܐ ܬܪܝܼܨܬܵܐ ܘܲܕܼܠܵܐ
ܡܘܼܡܵܐ. ܠܵܐ ܓܹܝܪ ܥ̣ܒܲܕܼ ܚܛܝܼܬܼܵܐ. ܗܵܘ̇ ܕܹܝܢ ܕܲܡܥܲܠܲܝ ܡ̣ܢ ܒܘܼܨܵܪܹ̈ܐ:
ܘܲܡܒܲܪܲܝ ܟܠ ܟܠܹܗ ܡ̣ܡ ܟܠܵܗ̇ ܚܛܝܼܬܼܵܐ: ܠܵܐ ܡܸܤܬܿܢܸܩ ܗ̄ܘ̣ܵܐ
ܥܲܠ ܕܸܒܼܚܬܼܵܐ ܕܲܚܠܵܦܵܘܗܝ. ܡܸܛܠ ܕܹܝܢ: ܕܟܲܕܼ ܠܗܵܝ̇ ܕܲܬܼܪܝܼܨܵܐ
ܕܵܚ̇ܩܝܼܢ ܗܵܠܹܝܢ ܕܲܐ̄ܚܪܵܢܝܵܐܝܼܬܼ ܡܸܬܼܪܲܥܹܝܢ: ܬܘܼܒܼ ܬܪܹܝܢ ܒܢܲܝ̈ܐ
ܡܲܥܠܝܼܢ: ܐܵܠܨܵܐܝܼܬܼ ܗܘ̤ܵܐ ܚܸܪܬܵܐ ܗܵܢܵܐ: ܕܲܡܚܵܘܸܐ ܠܪܘܼܫܥܗܘܿܢ
ܓܲܠܝܵܐܝܼܬܼ.
ܚܸܪܡܵܐ ܕܲܚܕܲܥܤܲܪ.
ܡ̇ܢ ܕܠܵܐ ܡܵܘܓܸܐ: ܕܒܸܤܪܹܗ ܕܡܵܪܝܵܐ ܡܲܚܝܵܢܵܐ ܐܝܼܬܼܵܘܗܝ:
ܘܕܝܠܹܗ ܕܡܸܠܬܼܵܐ ܕܡ̣ܢ ܐܲܠܵܗܵܐ ܐܲܒܼܵܐ: ܐܸܠܵܐ ܕܲܐ̄ܚܪܹܢܵܐ ܠܒܲܪ ܡܸܢܹܗ
ܕܲܡܚܲܝܲܕܼ ܠܹܗ ܒܐܝܼܦܵܪܵܐ. ܐܵܘ ܕܒܲܠܚܘܿܕܼ ܥܡܘܼܪܝܵܐ ܐܲܠܵܗܵܐ ܩܢܸܐ:
ܘܠܵܐ ܗ̄ܘ̣ܵܐ ܕܹܝܢ ܝܲܬܝܼܪܵܐܝܼܬܼ ܡܲܚܝܵܢܵܐ: ܐܲܝܟܼ ܕܐܸܡ̇ܪܹܬܼ: ܐܲܝܟܼ ܡ̇ܢ
ܕܲܗܘ̤ܵܐ ܕܝܼܠܹܗ ܕܡܸܠܬܼܵܐ ܗܵܘ̇ ܕܲܡܨܸܐ ܠܡܲܚܵܝܘܼ ܟܠ: ܚܸܪܡܵܐ
ܢܸܗܘܸܐ.
ܦܘܼܫܵܩܵܐ. ܕܸܒܼܚܬܼܵܐ ܚܲܝܬܼܵܐ ܘܩܲܕܝܼܫܬܼܵܐ ܘܲܕܼܠܵܐ ܕܡܵܐ: ܒܥܹ̈ܕܵܬܼܵܐ:
ܡܫܲܠܡܝܼܢܲܢ. ܠܵܐ ܗ̄ܘ̣ܵܐ ܕܚܲܕܼ ܡ̣ܢ ܗܵܠܹܝܢ ܕܐܲܟܼܘܵܬܲܢ: ܕܐܝܼܬܵܘܗܝ
ܦܲܓܼܪܵܐ ܫܚܝܼܡܵܐ ܕܒܲܪ ܐ̄ܢܵܫܵܐ: ܡܸܕܸܡ ܕܡܸܬܼܩܲܪܲܒܼ ܡܗܲܝܡܢܝܼܢܲܢ.
pb. 541
ܒܵܗ̇ ܕܹܿܝܢ ܒܲܕܼܡܘܼܬܼܵܐ: ܐܵܦ ܕܡܵܐ ܝܲܩܝܼܪܵܐ. ܐܸܠܵܐ ܡܩܲܒܿܠܝܼܢ ܚ̄ܢܲܢ.
ܐܲܝܟܼ ܡ̇ܢ ܕܲܗܘ̤ܵܐ ܦܲܓܼܪܵܐ ܘܲܕܼܡܵܐ ܕܡܸܠܬܼܵܐ ܡܲܚܸܐ ܟܠ. ܒܸܤܪܵܐ ܓܹܝܪ
ܫܚܝܼܡܵܐ ܠܡܲܚܵܝܘܼ: ܠܵܐ ܡܨܸܐ. ܘܲܕܼܗܵܕܹܐ ܐܝܼܬܼܵܘܗܝ ܤܵܗܕܵܐ ܗ̤ܘ
ܦܵܪܘܿܩܲܢ ܟܲܕܼ ܐܵܡܲ݁ܪ: ܕܒܸܤܪܵܐ ܡܸܕܸܡ ܠܵܐ ܡܲܗܢܸܐ: ܪܘܼܚܵܐ ܗ̄ܘ̣
ܕܡܲܚܸܐ. ܡܸܛܠ ܓܹܝܪ ܕܕܼܝܼܠܹܗ ܕܡܲܚܝܵܢܵܐ ܗܘ̤ܵܐ: ܒܗܵܕܹܐ
ܡܸܬܼܝܼܕܲܥ ܕܐܝܼܬܼܵܘܗܝ ܡܲܚܝܵܢܵܐ: ܐܲܝܟܼ ܡܵܐ ܕܐܸܡ݂ܲܪ ܗ̤ܘ ܦܵܪܘܿܩܲܢ:
ܕܐܲܝܟܲܢܵܐ ܕܫܲܕܪܲܢܝ ܐܲܒܼܵܐ ܚܲܝܵܐ: ܐܵܦ ܐܸܢܵܐ ܚܲܝ ܐ̄ܢܵܐ ܡܸܛܠ ܐܲܒܼܵܐ.
ܘܐܲܝܢܵܐ ܕܐܵܟܹ̇ܠ ܠܝܼ: ܐܵܦ ܗ̤ܘ ܢܸܚܸܐ ܡܸܛܠܵܬܼܝ. ܡܸܛܠ ܕܹܝܢ
ܕܢܸܤܛܘܼܪܝܼܣ ܘܐܲܝܠܹܝܢ ܕܢܲܦܝܼܠܝܼܢ ܒܟܼܘܼܪܗܵܢܵܐ ܕܪܸܥܝܵܢܹܗ: ܡܙܲܥܙܥܝܼܢ
ܠܹܗ ܒܚܲܤܝܼܪܘܼܬܼ ܝܘܼܠܦܵܢܗܘܿܢ ܠܚܲܝܠܹܗ ܕܐ̄ܪܵܙܵܐ: ܒܗܵܕܹܐ: ܛܵܒܼ
ܙܵܕܼܩܵܐܝܼܬܼ ܗܘ̤ܵܐ ܚܸܪܡܵܐ ܗܵܢܵܐ.
ܚܸܪܡܵܐ ܕܲܬܼܪܸܥܤܲܪ.
ܡ̇ܢ ܕܠܵܐ ܡܵܘܕܸܐ: ܕܡܸܛܠܬܼܵܐ ܕܡ̣ܢ ܐܲܠܵܗܵܐ ܚܲܫ̣ ܒܒܸܤܪܵܐ:
ܘܐܸܙܕܩܸܦ ܒܒܸܪܵܐ: ܘܲܛܥܸܡ̣ ܡܵܘܬܵܐ ܒܒܸܪܵܐ: ܘܲܗܘ̤ܵܐ ܒܘܼܟܼܪܵܐ
ܕܡ̣ܢ ܒܹܝܬܼ ܡܝܼ̈ܬܹܐ: ܐܲܝܟܼ ܡ̇ܢ ܕܚܲܝܵܐ ܐܝܼܬܼܵܘܗܝ ܘܡܲܚܵܢܵܐ ܐܲܝܟܼ ܐܲܠܵܗܵܐ:
ܚܸܪܡܵܐ ܢܸܗܘܸܐ.
ܦܘܼܫܵܩܵܐ. ܠܵܐ ܚܵܫܘܿܫܵܐ: ܘܠܵܐ ܡܵܝܘܿܬܼܵܐ ܐܝܼܬܼܵܘܗܝ ܡܸܠܬܼܵܐ ܕܡ̣ܢ
ܐܲܠܵܗܵܐ. ܡܥܲܠܲܝ ܗ̄ܘ̣ ܓܹܝܪ ܡ̣ܢ ܕܢܸܚܲܫ ܟܝܵܢܵܐ ܐܲܠܵܗܵܝܵܐ: ܘܠܵܐ
ܡܸܬܼܡܲܠܠܵܢܵܐ. ܘܗ̤ܘ ܟܠ ܡܸܕܸܡ ܡܲܚܸܐ: ܘܲܡܒܲܪܲܝ ܗ̄ܘ̣ ܡ̣ܢ ܚܒܼܵܠܵܐ:
ܘܡ̣ܢ ܟܠ ܡܸܕܸܡ ܕܲܡܥܵܕܼ ܠܲܡܥܵܩܘܼ. ܐܸܠܵܐ: ܘܟܲܕܼ ܗܵܠܹܝܢ ܐܝܼܬܼܵܘܗܝ
pb. 542
ܟܝܵܢܵܐܝܼܬܼ ܡܸܠܬܼܵܐ ܕܡ̣ܢ ܐܲܠܵܗܵܐ ܐܲܒܼܵܐ: ܕܝܼܠܹܗ ܥܲܒܼܕܹܗ ܠܒܸܤܪܵܐ
ܡܩܲܒܿܠܵܢܵܐ ܕܡܵܘܬܵܐ. ܕܲܒܼܗܵܘ̇ ܕܲܡܥܵܕܲ ܠܡܸܚܲܫ: ܟܲܕܼ ܠܚܲܫܵܐ
ܕܲܚܠܵܦܲܝܢ ܘܡܸܛܠܵܬܲܢ ܠܹܗ ܢܤܲܒܼ: ܠܟܼܠܲܢ ܢܦܲܨܸܐ ܡ̣ܢ ܡܵܘܬܵܐ
ܘܲܚܒܼܸܵܠܵܐ. ܟܲܕܼ ܐܲܚܝܼ ܐܲܠܵܗܵܐ ܠܦܲܓܼܪܵܐ ܕܝܼܠܹܗ: ܘܲܗܘ̤ܵܐ ܪܹܫܝܼܬܼܵܐ
ܕܕܲܡ̈ܟܹܿܐ ܘܒܼܘܼܟܼܪܵܐ ܕܡ̣ܢ ܒܹܝܬܼ ܡܝܼ̈ܬܹܐ. ܠܵܐ ܗ̄ܘ̣ܵܐ ܓܹܝܪ ܒܲܪܢܵܫܵܐ
ܫܚܝܼܡܵܐ ܕܲܠܚܘܿܕܼܵܐܝܼܬܼ ܘܡܸܢܹܗ ܘܠܹܗ ܡܸܬܼܝܼܕܥ: ܠܒܲܪ ܡ̣ܢ ܡܸܠܬܼܵܐ
ܕܡ̣ܢ ܐܲܠܵܗܵܐ ܐܲܒܼܵܐ ܐܝܼܬܼܵܘܗܝ ܗ̄ܘ̣ܵܐ: ܗܵܘ̇ ܕܡܸܛܠܵܬܲܢ ܤܲܝܒܲܪ
ܨܒܝܼܒܼܵܐ ܝܲܩܝܼܪܵܐ ܘܲܛܥܸܡ̣ ܡܵܘܬܵܐܘ ܐܸܠܵܐ ܗ̤ܘ ܡܵܪܵܐ ܕܐܸܫܒܿܘܿܚܬܼܵܐ
ܚܲܫ̣ ܒܒܸܤܪܵܐ: ܐܲܝܟܼ ܟܬܼܒܹ̈ܐ. ܡܸܛܠ ܕܹܝܢ ܕܗܵܠܹܝܢ ܝܘܼܠܵܢܹ̈ܐ ܚܲܕܼ̈ܬܹܐ
ܘܪ̈ܲܫܝܼܥܹܐ: ܥܲܠ ܗܲܝܡܵܢܘܼܬܼܵܐ ܐܪܝܼܨܬܵܐ ܘܲܕܼܠܵܐ ܡܘܼܡܵܐ ܠܡܲܥܵܠܘܼ
ܨܵܒܹ̇ܝܢ: ܟܲܕܼ ܐܵܡ̇ܪܝܼܢ: ܕܒܲܪ ܐ̄ܢܵܫܵܐ ܫܚܝܼܡܵܐ ܤܲܝܒܲܪ ܙܩܝܼܦܵܐ ܕܲܚܠܵܦܝܼܢ:
ܐܵܠܨܵܐܝܼܬܼ ܗܘ̤ܵܐ ܚܸܪܡܵܐ ܗܵܢܵܐ: ܕܲܡܚܵܘܸ̇ܐ ܪܲܒܿܘܼܬܼܵܐ ܕܪܘܼܫܥܵܐ ܕܐܝܼܬܼ ܒܗܘܿܢ.
ܫܠܸܡ̣ ܦܘܼܫܩܵܐ ܕܪܹ̈ܫܹܐ ܬܪܸܥܤܲܪ: ܕܛܘܼܒܼܵܢܵܐ ܩܘܼܪܸܠܘܿܣ.
ܐܸܓܲܪܬܵܐ ܕܫܲܕܲܪ ܡܵܪܝ ܩܘܼܪܸܠܘܿܣ: ܠܛܘܼܒܼܵܢܵܐ ܘܵܠܹܪܝܵܢܵܐ
ܐܲܦܸܤܩܘܿܦܵܐ ܕܐܝܼܩܘܿܢܝܘܿܢ.
ܠܡܵܪܝ ܘܚܲܒܿܝܼܒܼ ܢܲܦܫܝ ܘܐܵܚܝ ܬܸܫܡܸܫܬܿܝ ܘܵܠܹܪܝܵܢܵܐ.
ܩܘܼܪܸܠܘܿܣ ܒܡܵܪܲܢ ܫܠܵܡ.
ܤܵܦ̇ܩܵܐ ܗ̣̄ܝ ܐܲܝܟܼ ܕܡܲܤܒܲܪ ܐ̄ܢܵܐ: ܗܵܢܵܘ ܕܹܝܢ ܐܲܝܟܼ ܕܐܵܦ
pb. 543
ܫܲܪܝܼܪܵܐ ܗ̣̄ܝ: ܕܥܝܪܘܼܬܼܵܐ ܕܚܲܤܝܘܼܬܼܵܟܼ ܬܸܫܟܲܚ ܚܲܝܠܬܼܵܢܵܐܝܼܬܼ ܕܲܬܼܩܘܼܡ
ܠܘܼܩܒܲܠ ܡܸܠܹ̈ܐ ܡܪ̈ܝܼܩܵܬܼܵܐ ܕܐ̄ܢܵܫ̈ܝܼܢ. ܦܲܟܿܝܼܗܵܐܝܼܬܼ ܓܹܝܪ ܠܥܸܠ
ܘܲܠܬܲܚܬܿ: ܟܠܡܸܕܼܸܡ ܕܵܠܚ̇ܝܼܢ. ܘܲܡܕܲܡܹܝܢ ܕܐܲܝܟܼ ܗܵܘ̇ ܕܩܲܛܝܼܢܵܐܝܼܬܼ
ܒܵܨ̇ܝܢ ܠܐ̄ܪܵܙܵܐ ܕܦܲܓܼܪܵܢܘܼܬܹܗ ܕܚܝܼܕܼܵܝܵܐ: ܘܡܲܤܒܿܪܝܼܢ ܕܲܡܦܵܤܝܼܢ
ܒܵܗ̇. ܦܫܝܼܩܵܐܝܼܬܼ ܕܹܝܢ ܡܲܗܦܟܼܝܼܢ ܠܹܗ ܠܡܸܕܸܡ ܕܠܵܐ ܘܵܠܹ̇ܐ:
ܘܲܡܦܲܬ̈ܠܵܬܼܵܐ ܡܸܤܬܲܟܿܠܝܼܢ. ܕܡܲܪܝܼܪܵܐ ܡ̣ܢ ܟܠ: ܗܵܕܼܵܐ ܗ̣̄ܝ:
ܒܵܕܹܝܢ ܓܹܝܪ ܘܲܡܕܲܡܹܝܢ: ܐܲܝܟܼ ܗܵܘ̇ ܕܲܬܼܪ̈ܝܼܨܵܬܼܵܐ ܒܵܥܹ̇ܝܢ ܠܡܸܬܼܚܲܫܵܒܼܘܼ.
ܘܟܲܕܼ ܡܲܤܒܿܪܵܢܘܼܬܼܵܐ ܠܢܲܦܫܥܗܘܿܢ ܝܵܗ̇ܒܿܝܼܢ: ܘܐܲܝܟܼ ܡ̇ܢ ܕܲܠܘܵܬܼ ܗܵܕܹܐ
ܨܠܹܝܢ: ܥܲܠ ܦܲܪ̈ܨܘܿܦܲܝܗܘܿܢ ܤܵܝ̇ܡܝܼܢ: ܡܸܪܬܹܗ ܕܪܲܫܝܼܥܵܐ
ܢܸܤܛܘܿܪܝܼܣ: ܥܲܠ ܢܲܦ̈ܫܵܬܼܵܐ ܕܲܦܫܝܼ̈ܛܹܐ ܐܵܫ̇ܕܝܼܢ. ܕܵܡܹ̇ܝܢ ܕܹܝܢ ܠܗܵܢܘܿܢ
ܕܲܡܥܵܕܹܝܢ ܕܢܲܐܤܘܿܢ ܓܘܼ̈ܫܡܹܐ: ܗܵܢܘܿܢ ܕܲܒܼܤܲܡ̈ܡܵܢܹܐ ܡܲܪܝܼܪܹ̈ܐ ܕܸܒܼܫܵܐ
ܚܲܝܠܵܐ ܚܵܠܛ̇ܝܼܢ ܕܢܸܓܼܒܼܘܼܢܵܝܗܝ ܠܛܲܥܡܵܐ. ܠܵܐ ܕܹܝܢ ܥܵܪܩܝܼܢ ܡܸܢܲܢ
ܚܘܼܫܵܒܲܝ̈ܗܘܿܢ: ܕܬܲܪܥܝܼܬܹܗ ܕܲܡܫܝܼܚܵܐ ܐܝܼܬܼ ܠܲܢ: ܐܲܝܟܼ ܡܸܠܬܹܗ
ܕܦܵܘܿܠܘܿܣ. ܐܸܠܘ̣ ܓܹܝܪ ܐܝܼܬܼ ܗ̄ܘ̣ܵܐ ܐ̄̇ܢܵܫ ܕܐܵܡܲ݁ܪ: ܕܗܵܘ̇ ܕܡ̣ܢ
ܐܲܠܵܗܵܐ ܐܲܒܼܵܐ ܐܸܬܼܝܼܠܸܕܼ: ܝܑܼܚܝܼܕܼܵܝܵܐ ܐܲܠܵܗܵܐ ܡܸܠܬܼܵܐ ܥܵܒܼܘܿܕܸܼܗܘܿܢ
ܕܥܵܠܡܹ̈ܐ:
ܪܹܫܝܼܬܼܵܐ ܕܲܗܘܵܝܹܗ ܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ ܩܲܒܸܿܠ̣: ܡܸܤܬܲܒܼܪܵܐ
ܗ̄ܘ̣ܵܬܼ: ܕܫܵܠ̇ܡܵܐ ܠܢܝܼܫܗܘܼܿܢ: ܕܛܵܒܼܵܐܝܼܬܼ ܐܵܡ̇ܪܝܼܢ: ܕܐܸܢ ܪܘܼܚܵܐ ܗ̄ܘ̣
ܒܲܟܼܝܵܢܹܗ ܐܲܠܵܗܵܐ ܡܸܠܬܼܵܐ: ܐܲܝܟܲܢܵܐ ܡܸܬܼܝܼܠܸܕܼ ܗ̄ܘ̣ܵܐ ܡ̣ܢ ܦܲܓܼܪܵܐ:
ܟܲܕܼ ܡܵܪܲܢ ܐܸܡ݂ܲܪ: ܕܡܸܕܸܡ ܕܝܼܠܝܼܕܼ ܡ̣ܢ ܒܸܪܵܐ ܒܸܤܪܵܐ ܗ̄ܘ̣؟
ܡܸܛܠ ܕܹܝܢܡ ܕܡܸܠܬܼܵܐ ܕܥܲܠ ܐ̄ܪܵܙܵܐ ܕܲܡܫܝܼܚܵܐ: ܒܲܫܒܼܝܼܠܵܐ ܐ̄ܚܪܹܢܵܐ
ܪܵܕܹܝܵܐ ܕܲܦܫܝܼܛ ܘܲܬܼܪܝܼܨ: ܘܲܕܼܠܲܝܬܿ ܒܹܗ ܡܸܕܸܡ ܕܲܦܬܼܝܼܠ: ܡܸܛܠ
pb. 544
ܡܵܢܵܐ ܤܪܝܼܩܵܐܝܼܬܼ ܡܦܲܪܡܝܼܢ: ܟܲܕܼ ܠܵܐ ܡܸܤܬܿܟܿܠܝܼܢ ܡܸܕܸܡ ܕܐܵܡ̇ܪܝܼܢ:
ܘܠܵܐ ܕܲܠܡܵܐ ܫܵܠ̇ܡܝܼܢ؟
ܐܵܡ̇ܪܝܼܢܲܢ ܓܹܝܪ: ܕܝܼܚܝܼܕܼܵܝܵܐ ܡܸܠܬܼܵܐ ܐܲܠܵܗܵܐ: ܪܘܼܚܵܐ ܐܝܼܬܼܵܘܗܝ ܐܲܝܟܼ
ܐܲܠܵܗܵܐ: ܐܲܝܟܼ ܕܲܟܼܬܼܝܼܒܼ: ܘܡܸܛܠ ܦܘܼܩܵܢܵܐ ܕܟܼܠܲܢ ܐܸܬܼܓܲܫܲܡ
ܘܲܗܘ̤ܵܐ ܒܲܪܢܡܵܫܵܐ. ܟܲܕܼ ܠܵܘ ܡ̣ܢ ܟܝܵܢܹܗ ܕܝܼܠܹܗ ܫܲܚܠܸܦ ܠܹܗ ܓܘܼܫܡܵܐ:
ܘܠܵܐ ܟܲܕܼ ܐܲܪܦܝܼ ܡ̣ܢ ܗܵܝ̇ ܕܐܝܼܬܼܵܘܗܝ ܗ̄ܘ̣ܵܐ: ܘܠܵܐ ܐܸܫܬܿܚܠܲܦ
ܘܠܵܐ ܐܸܫܬܲܓܿܢܝܼ: ܐܸܠܵܐ ܡ̣ܢ ܒܬܼܘܼܠܬܼܵܐ ܩܲܕܝܼܫܬܐ ܓܘܼܫܡܵܐ ܕܠܵܐ
ܡܘܼܡ ܢܤܲܒܼ: ܘܐܝܼܬܼܵܘܗܝ ܒܢܲܦܫܵܐ ܡܸܠܝܼܠܬܼܵܐ. ܘܕܝܼܠܹܗ ܥܲܒܼܕܹܗ
ܒܲܚܕܼܵܝܘܼܬܼܵܐ ܕܠܵܐ ܡܸܬܼܪܲܢܝܵܐ: ܘܠܵܐ ܡܸܬܼܒܲܠܒܿܠܵܐ: ܘܠܵܐ ܡܸܬܼܡܲܠܠܵܐ
ܠܲܓܼܡܵܪ. ܘܲܕܼܠܵܘ ܕܲܐ̄ܚܪܹܝܢ: ܐܸܠܵܐ ܕܝܼܠܹܗ ܗܵܢܵܐ ܡܸܬܼܝܼܕܲܥ. ܘܗܵܟܲܢܵܐ
ܥܲܠ̣ ܠܥܵܠܵܡ ܝܑܼܚܝܼܕܼܵܝܵܐ: ܘܒܼܘܼܟܼܪܵܐ ܕܐܲܚܹ̈ܐ ܤܲܓܝܼ̈ܐܹܐ ܗܘ̤ܵܐ. ܗܵܘ̇
ܠܵܐ ܡܸܬܼܐܡܢܸܐ ܥܲܡ ܒܪܝܼܬܼܵܐ: ܒܗܵܝ̇ ܕܐܝܼܬܼܵܘܗܝ ܐܲܠܵܗܵܐ. ܡܵܐ ܗܵܟܹܝܠ
ܕܡܸܬܼܐܡܲܪ ܕܐܸܬܼܝܼܠܸܕܼ ܡ̣ܢ ܐܲܢ̄ܬܿܬܼܵܐ: ܐܵܠܖܵܐܒܼܝܼܬܼ: ܗܵܝ̇ ܕܒܲܒܼܤܲܪ
ܢܵܩ̇ܦܵܐ: ܕܠܵܐ ܢܸܤܬܿܒܲܪ ܕܪܹܫܝܼܬܼܵܐ ܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ ܢܤܲܒܼ.
ܟܲܕܼ ܛܵܒܼ ܩܕܼܵܡ ܥܵܠܡܹ̈ܐ: ܐܝܼܬܼܵܘܗܝ ܐܲܡܝܼܢܵܐܝܼܬܼ ܥܲܡ ܐܲܒܼܘܼܗܝ
ܐܲܠܵܗܵܐ ܡܸܠܬܼܵܐ: ܐܸܠܵܐ ܟܲܕܼ ܒܨܒܼܝܵܢܹܗ ܕܐܲܒܼܵܐ ܕܡܘܼܬܼܵܐ ܕܥܲܒܼܕܵܐ
ܢܤܲܒܼ: ܗܵܝܕܹܝܢ ܘܕܸܐܬܼܝܼܠܸܕܼ ܡ̣ܢ ܐܲܢ̄ܬܿܬܼܵܐ ܦܲܓܼܪܵܢܵܐܝܼܬܼ ܡܸܬܼܐܡܲܪ.
ܡܵܕܹܝܢ: ܟܲܕܼ ܝܑܼܕܼܝܼܥܵܐ ܗ̣̄ܝ: ܕܡܸܕܸܡ ܕܡ̣ܢ ܒܸܤܪܵܐ ܒܸܤܪܵܐ ܗ̄ܘ̣: ܘܡܸܕܸܼܡ
ܕܡ̣ܢ ܐܲܠܵܗܵܐ ܐܲܠܵܗܵܐ ܗ̄ܘ̣: ܐܝܼܬܼܵܘܗܝ ܕܹܝܢ ܬܲܪ̈ܢܲܝܗܹܝܢ ܐܲܟܼܚ̄ܕܼܵܐ ܚܲܕܼ
ܡܫܝܼܚܵܐ: ܚܲܕܼ ܒܪܵܐ ܘܡܵܪܝܵܐ ܥܲܡ ܦܲܓܼܪܹܗ ܢܲܦܫܵܢܵܝܵܐ: ܐܲܝܟܼ ܕܐܸܡ̇ܪܹܬܼ
ܐܝܼܬܼܵܘܗܝ: ܠܵܐ ܗܵܟܹܝܠ ܢܦܲܪܫܘܼܢ ܠܲܢ ܠܲܬܼܪܹܝܢ ܠܚܲܕܼ ܒܪܵܐ:
pb. 545
ܘܝܼܚܝܼܕܼܵܐܝܼܬܼ ܢܩܝܼܡܘܼܢ ܠܗܘ̇ ܡܵܠܬܼܵܐ ܘܲܒܼܪܵܐ: ܘܝܼܚܝܼܕܼܵܐܝܼܬܼ ܠܒܲܪܢܵܫܵܐ
ܗܵܘ̇ ܕܡ̣ܢ ܐܲܢ̄ܬܿܬܸܵܐ: ܐܲܝܟܼ ܕܗܸܢܘܿܢ ܐܵܡ̇ܪܝܼܢ. ܐܸܠܵܐ ܢܸܕܲܥܘܼܢ: ܕܠܵܐ
ܗ̄ܘ̣ܵܐ ܒܲܪܢܵܫܵܐ ܢܩܸܦ̣ ܠܐܲܠܵܗܵܐ ܡܸܠܬܼܵܐ. ܐܸܠܵܐ: ܗ̤ܘ ܡܸܬܼܐܡܲܪ
ܕܲܗܘ̤ܵܐ ܒܲܪܢܵܫܵܐ: ܟܲܕܼ ܡ̣ܢ ܙܲܪܥܹܗ ܕܐܲܒܼܪܵܗܵܡ ܢܤܲܒܼ: ܐܲܝܟܼ ܕܲܟܼܬܼܝܼܒܼ.
ܘܲܒܼܟܼܠ ܡܸܕܸܡ ܐܸܬܿܕܲܡܝܼ ܠܐܲܚܵܘ̈ܗܝ: ܤܛܲܪ ܡ̣ܢ ܚܛܝܼܬܼܵܐ. ܕܵܡܝܘܼܬܼܵܐ
ܕܹܝܢ ܕܲܒܼܟܼܠܡܸܕܸܡ ܐܝܼܬܼ ܠܹܗ ܩܕܼܵܡ ܟܠ: ܝܲܠܕܵܐ ܕܡ̣ܢ ܐܲܢ̄ܬܿܬܼܵܐ:
ܗܵܘ̇ ܕܡܸܬܼܪܢܸܐ ܡ̇ܢ ܐܵܦ ܥܠܲܝܼܢ: ܐ̄ܢܵܫܵܐܝܼܬܼ. ܥܲܠ ܝܑܼܚܝܼܕܼܵܝܵܐ ܕܹܝܢ:
ܠܥܸܠ ܡ̣ܢ ܗܵܕܹܐ. ܐܲܠܵܗܵܐ ܗ̄ܘ̣ܵܐ ܓܹܝܪ ܕܲܡܓܲܫܲܡ: ܘܡܸܛܠ ܗܵܕܹܐ
ܝܵܠܕܲܬܼ ܐܲܠܵܗܵܐ ܡܸܬܼܩܲܪܝܵܐ ܒܬܼܘܼܠܬܼܵܐ ܩܲܕܝܼܫܬܼܵܐ.
ܐܸܢ ܕܹܝܢ ܢܹܐܡܲܪܘܼܢ: ܕܐܲܠܵܗܵܐ ܘܒܲܪ ܐ̄ܢܵܫܵܐ ܐܸܬܼ݂ܵܘ ܠܘܵܬܼ ܚܕܼܵܕܹ̈ܐ:
ܘܲܥ̣ܒܲܕܼܘ ܚܲܕܼ ܡܫܝܼܚܵܐ: ܟܲܕܼ ܢܛܝܪ ܩܢܘܿܡܵܐ ܕܟܼܠ ܚܲܕܼ ܚܲܕܼ
ܡܸܢܗܘܿܢ ܕܠܵܐ ܒܘܼܠܒܵܠܵܐ: ܠܵܘ ܚܠܝܼܡܵܐܝܼܬܼ ܗܵܕܹܐ ܡܸܤܬܲܟܿܠܝܼܢ
ܘܐܵܡ̇ܪܝܼܢ. ܠܵܘ ܓܹܝܪ ܐܲܝܟܼ ܕܐܵܡ̇ܪܝܼܢ ܐܲܠܵܗܵܐ ܘܒܲܪܢܵܫܵܐ: ܐܸܬܼ݂ܵܘ ܠܘܵܬܼ
ܚܕܼܵܕܹ̈ܐ: ܘܲܥ̣ܒܲܕܼܘ ܚܲܕܼ ܡܫܝܼܚܵܐ. ܐܸܠܵܐ: ܐܲܝܟܼ ܕܩܲܕܿܡܹ̇ܬܼ ܐܸܡ̇ܪܹܬܼ:
ܕܟܲܕܼ ܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ: ܒܲܕܼܡܘܼܬܲܢ ܐܸܫܬܵܘܬܲܦ ܒܒܸܤܪܵܐ
ܘܲܕܼܡܵܐ: ܕܐܲܠܵܗܵܐ ܕܲܗܘ̤ܸܵܐ ܒܲܪܢܵܫܵܐ ܢܸܬܼܝܼܕܲܥ. ܘܦܲܓܼܪܲܢ ܫܩܲܠ̣: ܘܕܝܼܠܹܗ
ܥܲܒܼܕܹܗ. ܕܐܲܟܼܙܢܵܐ ܕܲܠܘܵܬܲܢ ܚܲܕܼܸ ܒܲܪܢܵܫܵܐ ܡܸܬܼܝܼܕܲܥ: ܗܵܘ̇ ܕܡ̣ܢ
ܢܲܦܫܵܐ ܘܦܲܓܼܪܵܐ ܐܝܼܬܼܵܘܗܝ ܩܘܼܝܵܡܹܗ: ܗܵܟܵܢܵܐ ܐܵܦ ܗ̤ܘ ܚܲܕܼ ܒܪܵܐ
ܘܚܲܕܼ ܡܵܪܝܵܐ ܢܸܬܿܬܵܘܕܸܐ ܕܐܝܼܬܼܵܘܗܝ. ܚܲܕܼ ܓܹܝܪ ܡܸܬܿܬܵܘܕܸܐ ܟܝܵܢܵܐ
ܕܒܲܪܢܵܫܵܐ ܘܩܘܼܝܵܡܹܗ: ܐܵܦܸܢ ܡ̣ܬ ܨܸܒܼ̈ܘܵܬܼܵܐ ܡܫܲܚ̈ܠܦܵܬܼܵܐ: ܘܲܕܼܠܵܐ
pb. 546
ܕܵܡ̈ܝܵܢ ܠܲܚܕܼܵܕܹ̈ܐ ܐܝܼܬܼܵܘܗܝ. ܐ̄ܚܪܹܢܵܐ ܗ̄ܘ̣ ܓܹܝܪ ܟܝܵܢܹܗ ܕܓܼܘܼܫܡܵܐ
ܨܝܕ ܢܲܦܫܵܐ: ܐܸܠܵܐ ܕܝܼܠܵܗ̇ ܗ̄ܘ̣. ܘܲܡܫܲܠܡܵܢܵܐ ܗ̄ܘ̣ ܕܲܩܢܘܿܡܵܐ
ܕܚܲܕܼ ܒܲܪܢܵܫܵܐ: ܘܲܒܼܬܲܪܥܝܼܬܼܵܐ ܘܲܒܼܤܘܼܟܵܠܵܐ ܕܐܲܝܠܹܝܢ ܕܐܸܬܼܐܡܲܪ ܠܵܐ
ܡܚܲܦܲܝ. ܟܢܘܼܫܝܼܗܘܿܢ ܕܹܝܢ ܐܵܘ ܡܹܐܬܼܝܼܗܘܿܢ ܕܲܠܚܲܕܼ ܕܠܵܐ ܡܸܬܼܦܪܸܫ:
ܚܕܼܵܐ ܚܲܝܘܼܬܼܵܐ ܥܵܒܹ̇ܕܼ ܠܹܗ ܠܒܲܪܢܵܫܵܐ. ܝܑܼܚܝܼܕܼܵܝܐ ܗܵܟܹܝܠ ܐܲܠܵܗܵܐ ܡܸܠܬܼܵܐ:
ܠܵܘ ܒܲܪܢܵܫܵܐ ܢܤܲܒܼ ܠܹܗ ܘܲܢܦܲܩ̣ ܒܲܪܢܵܫܵܐ: ܐܸܠܵܐ ܟܲܕܼ ܛܵܒܼ ܝܲܠܕܵܐ
ܕܠܵܐ ܡܸܬܼܡܲܠܲܠ ܐܝܼܬܼ ܠܹܗ ܡ̣ܢ ܐܲܒܵܐ: ܒܝܲܕܼ ܪܘܼܚܵܐ ܕܩܘܼܕܼܫܵܐ ܒܲܪ
ܟܝܵܢܹܗ: ܗܲܝܟܠܵܐ ܥ̣ܒܲܕܼ ܠܹܗ: ܘܲܗܘ̤ܵܐ ܒܲܪܢܵܫܵܐ. ܡܸܛܠ ܗܵܕܹܐ ܒܵܗ̇
ܒܗܵܕܹܐ: ܚܲܕܼ ܡܸܬܼܝܼܕܲܥ: ܐܵܦܸܢ ܒܤܘܼܟܵܠܵܐ ܡܸܤܬܿܒܲܪ ܕܲܐ̄ܚܪܹܢܵܐ ܗ̄ܘ̣
ܟܝܵܢܵܐ ܕܓܼܘܼܫܡܹܗ ܡܸܢܹܗ. ܬܸܬܵܘܕܸܐ ܕܹܝܢ ܒܟܼܠ ܕܘܼܟ: ܕܢܲܦܫܵܢܵܝܵܐ
ܗ̄ܘ̣ܵܐ ܓܘܼܫܡܹܗ: ܒܢܲܦܫܵܐ ܡܸܠܝܼܠܬܼܵܐ.
ܝܸܠܦܹ̇ܬܼ ܕܹܝܢ ܕܲܠܗܵܕܹܐ ܫܵܢܝܘܼܬܼܵܐ ܐܸܬܼ݂ܵܘ ܐ̄ܢܵܫ̈ܝܼܢ: ܕܠܵܐ ܢܸܕܼܚܠܘܼܢ
ܕܢܹܐܡܪܘܼܢ: ܕܲܒܼܐ̄ܢܵܫ ܝܼܫܘܿܥ ܕܡ̣ܢ ܒܬܼܘܼܠܬܼܵܐ ܐܸܬܼܝܼܠܸܕܼ: ܥ̣ܡܲܪ
ܐܲܠܵܗܵܐ ܡܸܠܬܼܵܐ: ܘܲܠܗܵܢܵܐ ܥܲܒܼܕܹܗ ܐܲܠܵܗܵܐ. ܐܸܠܵܐ ܐܵܡ̇ܪܝܼܢܲܢ ܠܗܘܿܢ:
ܕܗܵܕܹܐ: ܐܘܿ ܚܲܒܼܝ̈ܒܲܝܢ: ܠܵܘ ܗܵܝ̇ ܗ̣̄ܝ ܕܐܸܬܼܓܲܫܲܡ: ܘܲܗܘ̤ܵܐ ܒܲܪܢܵܫܵܐ
ܡܸܠܬܼܵܐ ܕܡ̣ܢ ܐܲܠܵܗܵܐ: ܕܢܸܥܡܲܪ ܕܹܝܢ ܒܒܲܪܢܵܫܵܐ ܐܲܝܟܼ ܚܲܕܼ ܡ̣ܢ ܢܒܼܝܹ̈ܐ
ܩܲܕܝܼ̈ܫܹܐ: ܠܵܘ ܡܲܫܠܡܵܢܘܼܬܼܵܐ ܗ̣̄ܝ ܕܐ̄ܪܵܙܵܐ. ܐܸܠܵܐ: ܐܲܝܟܼ ܡܸܕܸܡ
ܕܩܲܕܸܡ̣ܢ ܚ̄ܢܲܢ ܐܸܡ݂ܲܪܢܲܢ: ܨܒܼܵܐ ܕܗܵܘ̇ ܡܸܠܬܼܵܐ ܕܐܸܬܼܝܼܠܸܕܼ ܡ̣ܢ ܐܲܒܼܵܐ:
ܦܲܓܼܪܵܐ ܢܸܗܘܸܐ: ܐܲܝܟܼ ܕܲܟܼܬܼܝܼܒܼ: ܠܵܘ ܒܫܘܼܢܵܝܵܐ ܕܲܟܼܝܵܢܵܐ ܐܵܘ ܒܫܘܼܚܠܵܦܵܐ:
ܐܵܘ ܒܫܘܼܓܼܢܝܵܐ ܕܲܠܘܵܬܼ ܦܲܓܼܪܵܐ. ܐܸܠܵܐ ܠܦܲܓܼܪܵܐ ܢܲܦܫܵܢܵܝܵܐ: ܕܝܼܠܹܗ
ܥܲܒܼܕܹܗ. ܘܐܸܬܼܝܼܠܸܕܼ ܘܲܢܦܲܩ̣: ܒܲܪܢܵܫܵܐ. ܠܵܘ ܟܲܕܼ ܠܒܲܪܢܵܫܵܐ ܢܩܸܦ̣:
pb. 547
ܘܠܵܐ ܥ̣ܡܲܪ: ܐܲܝܟܼ ܕܐܵܡ̇ܪܝܼܢ. ܗܵܝ̇ ܕܹܝܢ ܕܲܗܘ̤ܵܐ ܒܲܪܢܵܫܵܐ ܐܲܠܵܗܵܐ
ܡܸܛܠ ܗܵܘ̇ ܕܲܥ̣ܡܲܪ ܒܹܗ: ܐܲܝܟܼ ܕܗܸܢܘܿܢ ܐܵܡ̇ܪܝܼܢ: ܗܵܕܹܐ ܓܹܝܪ
ܡܲܤܠܝܵܐ ܗ̣̄ܝ ܠܲܢ ܠܲܓܼܡܵܪ: ܐܲܝܟܲܢܵܐ ܠܵܘ ܬܲܚܘܝܼܬܼܵܐ ܕܫܵܢܝܘܼܬܼܵܐ ܐܝܼܬܼ
ܒܵܗ̇؟ ܢܵܨ̇ܝܵܐ ܓܹܝܪ ܢܝܼܫܹܗ ܕܲܟܼܬܼܵܒܼܵܐ ܠܲܠܵܗܵܝܵܐ. ܡܫܲܒܿܚܵܐ ܓܹܝܪ
ܫܠܝܼܚܵܐ: ܠܐܲܠܵܗܵܐ ܡܸܠܬܼܵܐ ܕܐܝܼܬܼܵܘܗܝ ܒܲܕܼܡܘܼܬܼܵܐ ܘܲܒܼܫܲܘܝܘܼܬܼܵܐ ܕܐܲܒܼܵܐ
ܒܟܼܠܡܸܕܸܡ: ܐܸܡ݂ܲܪ: ܕܠܵܐ ܗ̄ܘ̣ܵܐ ܒܲܚܛܘܼܦܝܵܐ ܚܲܫܒܵܗ̇ ܗܵܕܹܐ
ܕܐܝܼܬܼܵܘܗܝ ܦܸܚܡܵܐ ܕܐܲܠܵܗܵܐ. ܢܲܦܫܹܗ ܕܹܝܢ ܤܲܪܸܩ̣ ܘܲܢܤܲܒܼ
ܕܡܘܼܬܼܵܐ ܥܲܒܼܕܵܐ: ܘܒܲܕܼܡܘܼܬܼܵܐ ܕܲܒܼܢܲܝ̈ܢܵܫܵܐ ܗܘ̤ܵܐ ܒܲܪܢܵܫܵܐ: ܘܡܲܟܸܟܼ
ܢܲܦܫܹܗ. ܗܵܢܘܿܢ ܕܹܝܢ ܠܕܲܠܩܘܼܒܼܠܵܐ: ܟܠܗܹܝܢ ܨܼܒܼ̈ܘܵܬܼܵܐ
ܡܲܗܦܟܼܝܼܢ. ܘܲܠܚܲܝܠܵܗ̇ ܕܫܲܪܝܼܬܵܐ: ܡܙܲܒܿܢܝܼܢ. ܘܐܵܡ̇ܪܝܼܢ: ܕܒܲܪܢܵܫܵܐ
ܗܘ̤ܵܐ ܐܲܠܵܗܵܐ. ܘܡܲܢ̣ܘܼ ܟܲܝ ܗܵܘ̇ ܕܤܲܪܸܩ̣ ܢܲܦܫܹܗ: ܚܲܒܿܝܼ̈ܒܲܝܢ؟
ܘܐܲܝܟܲܢܵܐ ܐܸܬܼܡܲܟܲܟܼ؟ ܘܐܲܝܕܵܐ ܕܡܘܼܬܼܵܐ ܕܥܲܒܼܕܵܐ ܢܤܲܒܼ؟ ܐܸܡܲܪܘ
ܠܝܼ ܡܲܥܠܵܐ ܓܹܝܪ ܐܲܝܟܼ ܕܕܼܵܡܝܵܐ ܡܸܠܲܬܼܗܘܿܢ: ܒܲܪܢܵܫܵܐ ܚܲܕܼ ܡܸܢܲܢ
ܕܐܸܬܿܬܿܪܝܼܡ. ܘܡ̣ܢ ܤܘܼܪܵܩܵܐ ܕܝܼܠܲܢ: ܕܲܤܠܸܩ̣ ܠܫܘܼܡܠܵܝܵܐ
ܕܐܲܠܵܗܘܼܬܼܵܐ. ܘܡ̣ܢ ܕܡܘܼܬܼܵܐ ܕܥܲܒܼܕܵܐ: ܕܲܡܫܲܢܸܐ ܠܲܕܼܡܘܼܬܼܵܐ
ܕܡܵܪܘܼܬܼܵܐ. ܘܐܲܝܟܲܢܵܐ ܐܵܡ̇ܪܝܼܢ ܕܐܸܤܬܿܪܲܩ ܝܑܼܚܝܼܕܼܵܝܵܐ: ܐܵܘ ܐܲܝܟܲܢ
ܤܲܝܒܲܪ ܡܘܼܟܵܟܲܢ: ܠܐ ܡܸܫܟܲܚܢܵܐ ܕܐܸܕܲܥ: ܐܸܢ ܗ̤ܘ ܕܤܘܼܪܵܩܹܗ
ܠܵܐ ܗ̄ܘ̣ܵܐ ܗܵܢܵܐ ܐܵܡ̇ܪܝܼܢ: ܕܲܒܼܫܘܼܒܼܚܹܗ ܝܲܩܪܹܗ ܠܒܲܪܢܵܫܵܐ. ܘܐܸܢ
ܟܲܕܼ ܡܝܲܩܲܪ ܡܸܤܬܿܓܸܦ: ܘܟܲܕܼ ܡܫܲܒܲܚ ܡܸܤܬܲܪܲܩ: ܐܲܝܟܲܢܵܐ
ܠܵܘ ܝܲܬܿܝܼܪܵܐܝܼܬܼ ܐܵܡܲ݁ܪ ܐ̄ܢܵܫ: ܕܦܵܩ̇ܚܵܐ ܠܹܗ ܗܵܝ̇ ܕܠܵܐ ܗ̄ܘ̣ܵܐ ܡܝܲܩܲܪ
ܘܠܵܐ ܗ̄ܘ̣ܵܐ ܡܫܲܒܲܚ ܠܐ̄ܢܵܫ؟ ܡܩܵܘܸ̇ܐ ܗ̄ܘ̣ܵܐ ܓܹܝܪ ܒܪܲܒܿܘܼܬܹܗ:
pb. 548
ܐܸܠܘܼ ܠܵܐ ܝܲܩܪܹܗ ܘܠܵܐ ܫܲܒܿܚܹܗ: ܠܗܵܘ̇ ܒܲܪܢܵܫܵܐ: ܕܐܲܝܟܼ ܕܗܸܢܘܿܢ
ܐܵܡ̇ܪܝܼܢ: ܢܩܸܦ̣ ܠܹܗ. ܐܵܪܵܐ ܠܵܘ ܠܓܼܘܼܚܟܵܐ ܫܵܘ̈ܝܵܢ ܗܵܠܹܝܢ: ܘܠܸܠܘܼܬܼܵܐ
ܡܲܠ̈ܝܵܢ: ܕܲܢܼܟܼܝܼܠܝܼܢ ܥܠܲܝܗܹܝܢ ܕܚܲܟܿܝܼ̈ܡܵܢ؟ ܐܸܠܵܐ ܡܸܠܬܼܵܐ ܕܲܫܪܵܪܵܐ:
ܠܵܐ ܪܵܢܝܵܐ ܐܸܤܬܲܪܲܩ ܡܸܕܸܡ ܡ̣ܢ ܡܬܼܘܿܡ: ܐܸܠܵܐ ܐܝܼܬܼܵܘܗܝ ܡܲܠܝܵܐ
ܘܲܡܫܲܠܡܵܢܵܐ ܒܲܟܼܝܵܢܹܗ. ܘܠܵܐ ܡܲܤܒܿܪܵܐ ܕܐܸܬܼܡܲܟܲܟܼ ܡܸܕܵܡ: ܐܸܠܵܐ
ܪܵܡ ܘܲܡܥܲܠܲܝ ܡ̣ܢ ܟܠ: ܘܒܼܵܬܲܪܟܸܢ ܢܚܸܬܼ ܠܗܵܘ̇ ܡܸܕܸܡ ܕܠܵܐ
ܐܝܼܬܼܵܘܗܝ ܗ̄ܘ̣ܵܐ. ܠܗܵܘ̇ ܕܹܝܢ ܕܲܢܤܒܼ ܕܡܘܼܬܼܵܐ ܕܥܲܒܼܕܵܐ: ܝܵܕܼܥܵܐ
ܕܒܲܟܼܝܵܢܹܗ: ܒܲܪ ܚܹܐܪܹ̈ܐ ܗ̄ܘ̣ ܡ̣ܢ ܩܕܼܝܼܡ. ܘܲܠܗܵܘ̇ ܕܲܗܘ̤ܵܐ ܒܲܪ
ܐ̄ܢܵܫܵܐ: ܠܵܐ ܝܵܕܼܥܵܐ ܠܹܗ ܒܲܪܢܵܫܵܐ ܡ̣ܢ ܩܕܼܵܡ ܕܢܸܗܘܸܐ ܒܲܪܢܵܫܵܐ.
ܕܲܟܼܬܼܵܒܼܵܐ ܗܵܟܹܝܠ ܐܲܠܵܗܵܝܵܐ: ܤܘܼܪܵܩܵܐ ܘܲܕܼܡܘܼܬܼܵܐ ܕܥܲܒܼܕܵܐ ܡܫܲܡܲܗ:
ܘܬܼܘܼܒܼ ܐ̄ܢܵܫܘܼܬܼܵܐ: ܘܲܠܗܵܘ̇ ܕܗܵܠܹܝܢ ܩܲܒܸܠ ܒܨܒܼܝܵܢܹܗ: ܕܐܲܠܵܗܵܐ ܗ̄ܘ̣
ܡܸܠܬܼܵܐ ܐܸܡܲ݁ܪ: ܡܵܢܵܐ ܡܲܗܦܟܼܝܼܢ ܠܵܗ̇ ܗܵܢܘܿܢ ܠܕܲܠܩܘܼܒܼܠܵܐ:
ܠܗܵܕܹܐ ܡܕܲܒܿܪܵܢܘܼܬܼܵܐ ܡܲܠܝܲܬܼ ܚܸܟܼܡܬܼܵܐ: ܘܐܵܡ̇ܪܝܼܢ ܕܒܲܪ ܐ̄ܢܵܫܵܐ ܗܘ̤ܵܐ
ܐܲܠܵܗܵܐ: ܕܠܵܐ ܗܘ̤ܵܘ ܦܪܝܼܫܝܼܢ ܟܪܸ̈ܤܛܝܵܢܹܐ: ܡ̣ܢ ܗܵܢܘܿܢ ܕܲܦܠܲܚ̣ܘ
ܠܲܒܼܪܝܼܬܼܵܐ ܛܵܒܼ ܡ̣ܢ ܕܲܠܒܼܵܪܘܿܝܵܗ̇؟ ܐܵܘ ܟܒܲܪ ܡܲܤܒܿܪܝܼܢ: ܕܐܵܦ
ܡܲܠܲܐ̈ܟܹܐ ܩܲܕܝܼ̈ܫܹܐ ܥܲܡܢ ܛܥ̣ܵܘ: ܗܵܢܘܿܢ ܕܲܦܩܲܕܼ ܠܗܘܿܢ ܟܬܼܵܒܼܵܐ
ܩܲܕܝܼܫܵܐ: ܕܢܸܤܓܕܘܼܢ ܠܒܘܼܟܼܪܵܐ ܕܥܲܠ̣ ܠܥܵܠܡܵܐ؟ ܫܡܵܐ ܕܹܝܢ
ܕܒܼܘܼܟܼܪܵܐ: ܐܲܝܟܲܢܵܐ ܠܵܚܹ̇ܡ ܠܝܼܚܝܼܕܼܵܝܵܐ: ܐܸܠܵܐ ܗܘ̤ܵܐ ܒܲܪܢܵܫܵܐ؟ ܐܸܢ
ܓܹܝܪ ܫܲܪܝܼܪܵܐ: ܕܡܸܛܠ ܐܲܚܹ̈ܐ ܤܲܓܼܝܼ̈ܐܹܐ ܡܸܬܼܝܼܕܲܥ ܒܘܼܟܼܪܵܐ: ܗܵܝܕܹܝܢ
ܢܚܸܬܼ ܠܐܲܚܘܼܬܼܵܐ ܗܵܝ̇ ܕܲܠܘܵܬܲܢ: ܟܲܕܼ ܐܲܟܼܘܵܬܲܢ ܗܘ̤ܵܐ ܒܲܪ ܐ̄ܢܵܫܵܐ:
ܘܐܸܬܿܕܲܡܝܼ ܠܲܢ: ܤܛܲܪ ܡ̣ܢ ܚܛܝܼܬܼܵܐ. ܤܦ̇ܩܵܐ ܠܲܢ ܕܹܝܢ ܠܕܸܚܠܲܬܼ
ܐܲܠܵܗܵܐ ܕܢܸܪܢܸܐ ܘܢܸܤܬܲܟܲܠ: ܕܕܲܗܘ̤ܵܐ ܦܲܓܼܪܵܐ ܕܐܲܠܵܗܵܐ ܗܵܘ̇ ܕܟܼܠ
pb. 549
ܡܲܚܵܐ: ܚܲܝܠܹܗ ܘܤܵܥܘܿܪܘܼܬܹܗ ܐܝܼܬܼ ܠܹܗ: ܥܲܬܼܝܼܪ ܕܹܝܢ ܒܫܘܼܒܼܚܵܐ
ܕܠܵܐ ܡܸܬܼܡܲܠܲܠ.
ܐܲܝܠܹܝܢ ܕܹܝܢ ܕܗܵܠܹܝܢ ܡܸܬܼܪܲܥܹܝܢ: ܐ̄ܚܪܹܢܵܐ ܛܠܘܼܡܝܵܐ ܡܲܥܠܝܼܢ
ܥܲܠ ܟܬܼܵܒܼܵܐ ܐܲܠܵܗܵܝܵܐ: ܘܐܵܡ̇ܪܝܼܢ: ܕܠܵ. ܠܦܲܪܨܘܿܦܹܗ ܕܝܼܚܝܼܕܼܵܝܵܐ
ܠܵܚܹ̇ܡ ܨܲܥܪܵܐ ܕܲܗܘ̤ܵܐ ܡ̣ܢ ܝܗ̄ܘܼ̈ܕܵܝܹܐ: ܘܠܵܐ ܬܘܼܒܼ ܡܵܘܬܵܐ ܦܲܓܼܪܵܢܵܝܵܐ:
ܐܸܠܵܐ ܠܕܲܐ̄ܚܪܹܢܵܐ ܒܪܵܐ: ܗܵܘ̇ ܕܡ̣ܢ ܐܲܢ̄ܬܿܬܼܵܐ ܐܸܬܼܝܼܠܸܕܼܸ. ܘܠܵܐ ܝܵܕܲܥܢܵܐ
ܒܐܲܝܕܵܐ ܡܲܤܒܿܪܵܢܘܼܬܼܵܐ ܕܦܲܪܨܘܿܦܵܐ ܕܚܸܠܲܬܼ ܐܲܠܵܗܵܐ: ܡܲܪܦܹܝܢ ܐܘܼܪܚܵܐ
ܬܪܝܼܨܬܵܐ: ܘܫܵܘܪܝܼܢ ܒܐܘܼܪܚܵܐ ܕܓܼܘܼܡܵܨܵܐ: ܘܠܸܐܫܬܵܗ̇ ܕܲܫܝܘܿܠ: ܐܲܝܟܼ
ܕܲܟܼܬܼܝܼܒܼ؟ ܐܝܼܬܼܵܘܗܝ ܓܹܝܪ ܫܲܪܝܼܪܵܐܝܼܬܼ ܐܲܠܵܗܵܐ: ܠܵܐ ܚܵܫܘܿܫܵܐ ܘܠܵܐ
ܡܸܬܼܓܲܫܫܵܢܵܐ. ܡܸܛܠ ܕܲܕܼܠܵܐ ܓܘܼܫܡܵܐ ܗ̄ܘ̣: ܐܸܠܵܐ ܠܗܲܠ ܡ̣ܢ
ܒܪܝܼܬܼܵܐ ܗ̄ܘ̣ ܕܡܸܬܼܝܼܕܼܥܵܐ ܘܡܸܬܼܚܲܙܝܵܐ: ܘܲܕܼܠܵܐ ܓܫܘܿܡ ܐܝܼܬܼܵܘܗܝ
ܒܲܟܼܝܵܢܵܐ ܕܠܵܐ ܡܸܬܼܝܼܕܲܥ. ܡܸܛܠ ܕܹܝܢ ܕܝܼܚܝܼܕܵܝܵܐ ܐܲܠܵܗܵܐ ܡܸܠܬܼܵܐ:
ܓܘܼܫܡܵܐ ܫܩܲܠ̣ ܡ̣ܢ ܡܲܪܝܲܢ ܒܬܼܘܼܠܬܼܵܐ: ܟܲܕܸ: ܐܲܝܟܼ ܕܐܸܡ̇ܪܹܬܼ ܙܲܒܼ̈ܢܝܼܢ
ܤܲܓܝܼ̈ܐܢ: ܕܝܼܠܹܗ ܥܲܒܼܕܹܗ: ܘܩܲܪܸܒܼ ܢܲܦܫܹܗ ܚܠܵܦܲܝܢ ܠܪܹܚܝܵܐ
ܒܲܤܝܼܡܵܐ: ܕܸܒܼܚܬܼܵܐ ܠܐܲܠܵܗܵܐ ܐܲܒܼܵܐ ܕܠܵܐ ܡܘܼܡ: ܒܗܵܕܹܐ ܡܸܬܼܐܡܲܪ
ܡܸܢܲܢ ܕܗ̤ܘ ܤܲܝܒܲܪ ܟܠ ܡܸܕܸܡ ܕܲܓܼܕܲܫ̣ ܠܦܲܓܼܪܹܗ. ܕܗܵܘ̇ ܡ̇ܢ
ܓܹܝܪ ܕܐܝܼܬܼܵܘܗܝ ܦܲܓܼܪܵܐ: ܒܵܬܼܪܹܗ ܐܵܙ̈ܠܢ ܟܠܗܹܝܢ ܗܵܠܹܝܢ ܕܦܲܓܼܪܹܗ:
ܤܛܲܪ ܡ̣ܢ ܚܛܝܼܬܼܵܐ. ܘܡܸܛܠ ܕܐܲܠܵܗܵܐ ܡܸܠܬܼܵܐ ܗܘ̤ܵܐ ܒܲܪܢܵܫܵܐ:
ܦܵܫ̣ ܐܲܠܵܗܵܐܝܼܬܼ ܕܠܵܐ ܚܲܫܵܐ: ܟܲܕܼ ܚܲܫܹ̈ܐ ܕܦܲܓܼܪܹܗ ܕܝܼܠܹܗ ܥ̣ܒܲܕܼ
ܐܸܢܘܿܢ: ܘܡܸܬܼܐܡܲܪ ܕܚܲܫ̣ ܒܲܦܓܲܪ: ܟܲܕܼ ܠܵܐ ܡܢܲܤ̣ܝ ܒܚܲܫܹ̈ܐ:
ܒܗܵܝ̇ ܕܐܝܼܬܼܵܘܗܝ ܐܲܠܵܗܵܐ.
ܡܲܤܒܿܪܵܢܘܼܬܼܵܐ ܗܵܟܹܝܠ ܕܕܸܚܠܲܬܼ ܐܲܠܵܗܑܵܐ: ܡܲܤܛܝܵܐ ܠܗܘܿܢ
pb. 550
ܡ̣ܢ ܫܪܵܪܵܐ. ܘܠܵܐ ܢܸܤܬܲܟܿܠܝܼܢ ܕܲܢܛܝܼܪܵܐ ܗ̣̄ܝ ܠܵܐ ܚܵܫܘܿܫܘܼܬܹܗ:
ܒܗܵܝ̇ ܕܐܝܼܬܼܵܘܗܝ ܐܲܠܵܗܵܐ. ܟܬܼܝܼܒܼ ܕܹܝܢ ܥܠܵܘܗܝ: ܕܚܲܫ̣ ܚܠܵܦܲܝܢ
ܒܲܦܓܿܪ. ܒܗܵܝ̇ ܕܟܲܕܼ ܐܝܼܬܼܵܘܗܝ ܐܲܠܵܗܵܐ ܒܲܟܼܝܵܢܹܗ: ܗܘ̤ܵܐ ܦܲܓܼܪܵܐ.
ܒܲܦܓܿܪ: ܒܗܵܝ̇ ܕܟܲܕܼ ܐܝܼܬܼܵܘܗܝ ܐܲܠܵܗܵܐ ܒܲܟܼܝܝܵܢܹܗ: ܗܘ̤ܵܐ ܦܲܓܼܪܵܐ.
ܗܵܢܵܘ ܕܹܝܢ: ܒܲܪܢܵܫܵܐ ܡܫܲܠܡܵܢܵܐ. ܡܲܢ̣ܘܼ ܓܹܝܪ ܗܵܘ̇ ܕܐܸܡ݂ܲܪ ܗ̄ܘ̣ܵܐ
ܠܐܲܒܼܵܐ: ܘܠܲܐܠܵܗܵܐ ܗܵܘ̇ ܕܐܝܼܬܼܵܘܗܝ ܗ̄ܘ̣ܵܐ ܒܲܫܡܲܝܵܐ: ܕܕܼܒܼ̈ܚܹܐ
ܘܩܘܼܪ̈ܒܵܢܹܐ ܠܵܐ ܨܒܲܝܬܿ: ܘܝܲܩ̈ܕܹܐ ܫܲܠܡܹ̈ܐ ܕܲܚܠܵܦ ܚܛܵܗܹ̈ܐ ܠܵܐ
ܫܐܸܠܬܿ: ܦܲܓܼܪܵܐ ܓܹܝܪ ܬܲܩܸܢܬܿ ܠܝܼ. ܗܵܝܕܹܝܢ ܐܸܡ̇ܪܹܬܼ: ܕܗܵܐ ܐܵܬܹ̇ܐ
ܐ̄ܢܵܐ: ܠܡܸܥܒܲܕܼ ܨܒܼܝܵܢܵܟܼ ܐܲܠܵܗܵܐ؟ ܗܵܘ̇ ܓܹܝܪ ܕܐܝܼܬܼܵܘܗܝ ܠܒܲܪ
ܡ̣ܢ ܓܘܼܫܡܵܐ ܐܲܝܟܼ ܐܲܠܵܗܵܐ: ܕܐܲܢܸܩܸܢ ܠܹܗ ܓܘܼܫܡܵܐ ܐܵܡܲ݁ܪ: ܕܲܢܩܲܒܸܿܠ
ܒܹܗ ܚܠܵܦܲܝܢ ܚܲܫܹ̈ܐ: ܘܲܒܼܫܘܼ̈ܡܵܬܹܗ ܠܟܼܠܲܢ ܢܲܐܤܸܐ: ܐܲܝܟܼ ܦܸܬܼܓܼܵܡܹܗ
ܕܲܬܒܼܝܼܵܐ. ܐܲܝܟܲܢܵܐ ܕܹܝܢ ܚܲܕܼ ܚܠܵܦ ܤܲܓܝܼ̈ܐܹܐ ܡܝܼܬܼ: ܘܲܫ̣ܘܵܐ ܕܲܚܠܵܦ
ܟܠܢܵܫ ܢܡܘܼܬܼ: ܐܸܢ ܕܡܲܢ ܕܗ̤ܘ ܒܲܪܢܵܫܵܐ ܐܝܼܬܼܵܘܗܝ ܗ̄ܘ̣ܵܐ ܚܲܫܵܐ؟
ܐܸܢ ܕܹܝܢ ܚܲܫ̣ ܐ̄ܢܵܫܵܐܝܼܬܼ: ܐܲܝܟܼ ܡܲܢ ܕܚܲܫܹ̈ܐ ܕܚܘܼܫܡܹܗ ܕܝܼܠܹܗ
ܐܝܼܬܲܝܗܘܿܢ: ܡܵܕܹܝܢ ܐܵܡ̇ܪܝܼܢ ܚ̄ܢܲܢ ܬܪܝܼܨܵܐܝܼܬܼ: ܕܲܫܘܸܐ ܗ̄ܘ̣ ܡܵܘܬܹܗ
ܕܒܼܦܓܲܪ ܕܚܲܕܼ: ܕܢܸܬܼܩܘܿܠ ܠܘܼܩܒܲܠ ܚܲܝܹ̈ܐ ܕܟܼܠ. ܠܵܐ ܗ̄ܘ̣ܵܐ ܐܲܝܟܼ
ܡܲܢ ܕܐܲܝܟܼ ܚܲܕܼ ܡܸܢܲܢ ܐܝܼܬܼܵܘܗܝ: ܐܸܠܵܐ ܕܟܲܕܼ ܐܝܼܬܼܵܘܗܝ ܐܲܠܵܗܵܐ
ܒܲܟܼܝܵܢܹܗ: ܗܘ̤ܵܐ ܒܲܪܢܵܫܵܐ: ܐܲܝܟܼ ܬܵܘܕܝܼܬܼܵܐ ܕܐܲܒܼܵܗܲܝ̈ܢ ܐܸܢ ܕܹܝܢ ܡܲܥܒܿܪܝܼܢ
ܐ̄ܢܵܫ̈ܝܼܢ ܡ̣ܢ ܝܑܼܚܝܼܕܼܵܝܵܐ: ܐܲܝܟܼ ܡܲܢ ܕܠܵܐ ܠܵܚ̇ܡܵܐ ܘܠܵܐ ܦܲܐܝܵܐ ܠܹܗ ܗܵܝ̇
ܕܢܸܚܲܫ ܒܲܦܓܲܪ: ܢܒܲܛܠܘܼܢ ܡܸܢܹܗ: ܐܵܦ ܗܵܝ̇ ܕܐܸܬܼܝܼܠܸܕܼ ܒܲܒܼܤܲܪ ܡ̣ܢ
ܒܬܼܘܼܠܬܼܵܐ. ܐܸܢ ܓܹܝܪ ܠܵܐ ܦܲܐܝܵܐ ܠܹܗ ܕܬܸܬܐܡܲܪ ܥܠܵܘܗܝ ܕܚܲܫ̣
ܒܲܦܓܲܪ: ܩܲܕܝܼܡܵܐ ܗ̣̄ܝ ܠܵܗ̇ ܗܵܝ̇ ܕܐܸܬܼܝܼܠܸܕܼ ܒܲܦܓܲܪ. ܘܡܸܟܹܝܠ
pb. 551
ܒܗܵܠܹܝܢ: ܒܛܸܠ̣ ܥ̇ܒܼܵܕܼܵܗ̇ ܕܲܡܕܲܒܿܪܵܢܘܼܬܼܵܐ: ܘܒܼܛܸܠ̣ܘ ܠܗܘܿܢ
ܐ̄ܪ̈ܵܙܹܐ ܕܲܟܼܪܸ̈ܛܝܵܢܹܐ: ܘܲܗܘ̤ܵܐ ܠܹܗ ܠܲܗܪܝܼܩܘܼܬܼܵܐ ܤܲܒܼܪܵܐ
ܕܦܘܼܪܩܵܢܲܢ.
ܐܸܠܵܐ ܐܵܡ̇ܪܝܼܢ: ܕܐܲܝܟܲܢܵܐ ܚܵܐܹ̇ܫ ܗܵܘ̇ ܕܠܵܐ ܝܵܕܲܥ̇ ܕܢܸܚܲܫ؟
ܡܸܢܬܿܬܵܘܕܸܐ ܗ̄ܘ̣: ܐܲܝܟܼ ܕܐܸܡ̇ܪܹܬܼ: ܠܵܐ ܚܵܫܘܿܫܵܐ ܒܲܟܼܝܵܢܹܗ ܐܲܠܵܗܵܐ
ܡܸܠܬܼܵܐ. ܡܸܬܼܐܡܲܪ ܕܹܝܢ ܕܲܒܼܦܲܓܼܪܹܗ ܚܲܫ̣: ܐܲܝܟܼ ܡܸܕܸܡ ܕܲܟܼܬܼܝܼܒܼ:
ܐܝܼܬܼܵܘܗܝ ܗ̄ܘ̣ܵܐ ܓܹܝܪ ܒܓܼܘܼܫܡܵܐ ܚܵܫ̇ܘܫܵܐ. ܘܲܡܫܲܪܲܪ ܠܵܗ̇ ܐܵܦ
ܦܲܛܪܘܿܣ: ܟܲܕܼ ܟܵܬܹ̇ܒܼ ܥܠܵܘܗܝ: ܕܗܵܘ̇ ܡܲܢ ܠܲܡ ܕܐܲܤܸܩ̣
ܚܛܵܗܲܝ̈ܢ ܒܓܼܘܼܫܡܹܗ ܥܲܠ ܩܲܝܤܵܐ: ܡܵܕܹܝܢ ܠܵܐ ܚܵܫܘܿܫܵܐ ܗ̄ܘ̣
ܡܸܠܬܼܵܐ ܒܗܵܝ̇ ܐܝܼܬܼܵܘܗܝ ܐܲܠܵܗܵܐ: ܕܝܼܠܹܗ ܕܹܝܢ: ܡܕܲܒܿܪܵܢܵܐܝܼܬܼ
ܡܸܬܼܪܢܹܝܢ ܚܲܫܹ̈ܐ ܕܦܲܓܼܪܵܐ. ܘܐܸܠܵܐ: ܒܐܲܝܢܵܐ ܙܢܵܐ ܒܘܼܟܼܪܵܐ ܕܟܼܠܗܹܝܢ
ܒܸܪ̈ܝܵܬܼܵܐ: ܗܵܘ̇ ܕܒܹܗ ܗܘ̤ܵܘ ܪܹ̈ܫܹܐ ܘܫܘܼ̈ܠܛܵܢܹܐ: ܘܡܵܪ̈ܵܘܼܬܼܵܐ ܘܡܵܘ̈ܬܿܒܹܐ:
ܗܵܘ̇ ܕܟܼܠ ܒܹܗ ܩܵܡ̣: ܒܘܼܟܼܪܵܐ ܕܡ̣ܢ ܒܹܝܬܼ ܡܝܼ̈ܬܹܐ: ܕܲܗܘ̤ܵܐ
ܘܪܹܫܝܼܬܼܵܐ ܕܟܼܠܗܘܿܢ ܕܲܡ̈ܟܹܿܐ: ܐܸܠܘܼ ܓܘܼܫܡܵܐ ܕܲܡܟܼܵܢ ܕܢܸܚܲܫ: ܕܝܼܠܹܗ
ܠܵܐ ܥܲܒܼܕܹܗ ܐܲܠܵܗܵܐ ܡܸܠܬܼܵܐ؟ ܐܲܟܼܙܢܵܐ ܓܹܝܪ ܕܐܸܬܼܝܼܠܸܕܼ ܦܲܓܼܪܵܢܵܐܝܼܬܼ
ܡ̣ܢ ܐܲܢ̄ܬܿܬܼܵܐ: ܟܲܕܼ ܡܸܫܬܵܘܬܲܦ ܒܡܵܘܠܵܕܼܵܐ ܕܝܼܠܲܢ ܐ̄ܢܵܫܵܐܝܼܬܼ: ܟܲܕܼ
ܛܵܒܼ ܐܝܼܬܼ ܠܹܗ ܡܵܘܠܵܕܼܵܐ ܡ̣ܢ ܐܲܒܼܘܼܗܝ: ܗܵܟܲܢܵܐ ܡܸܬܼܐܡܲܪ ܕܚܲܫ̣
ܒܲܦܓܼܪ ܐܲܟܼܘܵܬܲܢ ܐ̄ܢܵܫܵܐܝܼܬܼ: ܟܲܕܼ ܐܝܼܬܼ ܠܹܗ ܒܲܟܼܝܵܢܹܗ ܠܵܐ ܚܵܫܘܿܫܘܼܬܼܵܐ:
ܒܗܵܝ̇ ܕܐܝܼܬܼܵܘܗܝ ܐܲܠܐܵܗܵܐ:. ܗܵܟܲܢܵܐ ܓܹܝܪ ܡܸܬܼܝܼܕܲܥ ܕܚܲܕܼ ܐܝܼܬܼܵܘܗܝ
ܡܫܝܼܚܵܐ: ܘܗܵܟܲܢܵܐ ܐܝܼܬܼܵܘܗܝ ܒܲܪ ܡܵܘܬܿܒܼܵܐ ܕܐܲܒܼܘܼܗܝ. ܠܵܐ ܐܲܝܟܼ
pb. 552
ܒܲܪ ܐ̄ܢܵܫܵܐ ܕܲܡܝܲܩܲܪ ܒܲܥܡܘܼܪܝܵܐ ܕܐܲܠܵܗܵܐ ܡܸܠܬܼܵܐ: ܐܸܠܵܐ ܐܲܝܟܼ ܒܪܵܐ
ܫܲܪܝܼܪܵܐ: ܘܟܲܕܼ ܗܘ̤ܵܐ ܒܲܪܢܵܫܵܐ. ܢܛܝܼܪܵܐ ܗ̣̄ܝ ܓܹܝܪ ܡܝܲܬܿܪܘܼܬܼܵܐ
ܕܲܟܼܝܵܢܹܗ: ܐܵܦܸܢ ܗܘ̤ܵܐ ܡܕܲܒܿܪܵܢܵܐܝܼܬܼ ܒܲܕܼܡܘܼܬܼܵܐ ܕܥܲܒܼܕܵܐ. ܡܵܕܹܝܢ ܐܲܝܟܼ
ܕܐܸܡܲܪܢܲܢ: ܐܵܦܸܢ ܡܫܵܘܬܲܦ ܗ̄ܘ̣ܵܐ ܠܲܟܼܝܵܢܲܢ ܒܗܵܝ̇ ܕܲܗܘ̤ܵܐ ܒܲܪܢܵܫܵܐ:
ܐܸܠܵܐ ܥܲܡ ܗܵܕܹܐ: ܠܥܸܠ ܡ̣ܢ ܟܠܵܗ̇ ܒܪܝܼܬܼܵܐ ܐܝܼܬܼܵܘܗܝ ܗ̄ܘ̣ܵܐ
ܐܲܠܵܗܵܐ.
ܝܸܠܦܹ̇ܬܼ ܕܹܝܢ ܕܐ̄ܢܵܫ̈ܝܼܢ: ܟܲܕܼ ܡܦܲܫܩܝܼܢ ܥܸܠܲܬܼ ܡܲܤܲܩܬܹܗ
ܕܲܠܲܫܡܲܝܵܐ: ܐܵܡ̇ܪܝܼܢ: ܕܠܲܐܬܼܪܵܐ ܠܲܡ ܐܸܙܲܠ̣ ܢܛܝܼܪܵܐ: ܕܠܵܐ
ܡܸܬܼܚܲܒܲܨ. ܫܘ̣ܵܐ ܕܹܝܢ: ܕܐܵܦ ܒܲܪ ܡܵܘܬܿܒܼܵܐ ܕܐܲܒܼܵܐ ܢܸܗܘܸܐ. ܐܲܝܟܲܢܵܐ
ܠܲܡ ܕܸܒܼܥܸܠܕܒܼܵܒܹܗ ܕܲܟܼܝܵܢܲܢ: ܠܵܐ ܡܸܫܟܲܚ ܕܢܸܩܪܘܿܒܼ ܘܢܲܟܼܝܘܗܝ:
ܢܵܛܘܿܪܵܐ ܗܵܟܹܝܠ: ܐܸܡ݂ܲܪ ܠܝܼ: ܗܘ̤ܵܐ ܠܹܗ ܫܡܲܝܵܐ. ܘܲܥܪܘܼܩܝܵܐ
ܗ̣̄ܝ ܘܠܵܘ ܤܘܼܠܵܩܵܐ: ܡܲܤܲܩܬܹܗ ܕܡ̣ܢ ܠܘܵܬܲܢ ܕܒܼܵܗ̇ ܡܸܫܬܲܒܼܗܪܝܼܢܲܢ؟
ܐܸܢ ܕܲܚܝܼܠ ܗ̄ܘ̣ܵܐ ܕܹܝܢ ܐܲܝܟܼ ܕܡܸܤܬܲܒܼܪܵܐ: ܕܕܲܡ ܬܘܼܒܼ ܢܲܩܪܸܒܼ
ܥܲܡܹܗ ܒܝܼܫܵܐ: ܐܸܠܘܼ ܠܵܐ ܤܠܸܩ̣: ܘܒܼܵܬܼܵܪ ܩܝܵܡܬܹܗ ܡܤܲܓܸܦ
ܗ̄ܘ̣ܵܐ ܠܹܗ. ܡܲܢ ܠܵܐ ܢܸܥܪܘܿܩ ܡ̣ܢ ܗܵܢܵܐ ܬܝܘܿܒܼܵܐ؟ ܘܡܲܢ ܠܵܐ
ܢܲܪܚܸܩ ܘܲܢܫܲܢܸܐ ܡ̣ܢ ܗܵܕܹܐ ܛܘܼܥܝܲܝ: ܘܢܸܫܒܿܩܘܼܢ ܐܸܢܘܿܢ ܠܗܵܢܘܿܢ
ܕܗܵܠܹܝܢ ܡܲܡܪܚܝܼܢ ܠܡܹܐܡܲܪ؟ ܠܲܝܬܿ ܡܸܕܸܡ ܕܦܲܟܿܝܼܗ ܡ̣ܢ ܗܵܠܹܝܢ
ܡܸܠܹ̈ܐ: ܠܦܲܛܥܘܼܬܼ ܬܪܥܝܼܬܼܵܐ ܓܹܝܪ ܫܵܪܟܵܐ ܨܒܼܘܼܬܼܗܘܿܢ. ܡ̣ܢ ܕܫܲܡܠܝܼ
ܓܹܝܪ ܡܫܝܼܚܵܐ ܡܕܲܒܿܪܵܢܘܼܬܼܵܐ ܕ:ܚܠܵܦܲܝܢ: ܘܕܵܫܹܗ ܠܤܵܛܵܢܵܐ ܘܐܲܙܝܼܥ̣
ܠܟܼܠܹܗ ܚܲܝܠܹܗ: ܘܲܫ̣ܪܵܝܗܝ ܠܫܘܼܠܛܵܢܹܗ ܕܡܵܘܬܵܐ: ܕܪܲܫ̣ ܠܲܢ
ܐܘܼܪܚܵܐ ܚܕܼܵܬܵܐ ܘܚܲܝܬܼܵܐ: ܟܲܕܼ ܣܠܸܩ̣ ܠܲܫܡܲܝܵܐ: ܘܐܸܬܼܚܙܝܼ ܚܠܵܦܲܝܢ
ܩܕܼܵܡ ܐܲܠܵܗܵܐ ܐܲܒܼܵܐ: ܐܲܝܟܼ ܕܲܟܼܬܼܝܼܒܼ. ܐܝܼܬܼܵܘܗܝ ܕܹܝܢ ܒܲܪ ܡܵܘܬܿܒܹܗ:
pb. 553
ܘܦܲܓܼܪܵܢܵܐܝܼܬܼ. ܠܵܘ ܐܲܝܟܼ ܒܲܪ ܐ̄ܢܵܫܵܐ ܕܼܚܝܼܕܼܵܐܝܼܬܼ ܡܬܼܪܢܸܐ ܐ̄ܚܪܹܢܵܐ
ܒܪܵܐ: ܠܒܲܪ ܡ̣ܢ ܡܸܠܬܼܵܐ ܐܲܠܵܗܵܐ. ܘܠܵܘ ܐܲܝܟܼ ܗܵܘ̇ ܕܡܸܥܡܲܪ ܥ̣ܡܲܪ
ܒܒܲܪ ܐ̄ܢܵܫܵܐ: ܐܸܠܵܐ ܐܲܝܟܼ ܒܪܵܐ ܫܲܪܝܼܪܵܐ: ܚܲܕܼ ܘܒܲܠܚܘܿܕܼܵܘܗܝ. ܘܟܲܕܼ
ܗܘ̤ܵܐ ܒܲܪ ܐ̄ܢܵܫܵܐ: ܘܝܵܬܹ̇ܒܼ ܐܲܝܟܼ ܐܲܠܵܗܵܐ ܥܲܡ ܐܲܠܵܗܵܐ: ܘܡܵܪܝܵܐ ܥܲܡ
ܡܵܪܝܵܐ: ܘܲܒܼܪܵܐ ܥܲܡ ܐܲܒܼܵܐ. ܥܲܡ ܗܵܘ̇ ܕܐܝܼܬܼܵܘܗܝ ܒܲܪ ܟܝܵܢܹܗ ܫܲܪܝܼܪܵܐܝܼܬܼ:
ܐܵܦܸܢ ܐܝܼܬܼ ܠܹܗ ܦܲܓܼܪܵܐ.
ܡܸܫܟܿܚܵܐ ܗ̄ܘ̣ܵܬܼ ܓܹܝܼ: ܕܲܒܼܡܸܠܹ̈ܐ ܐܲܪ̈ܝܼܟܼܵܬܼܵܐ ܠܚܲܒܼܪܹ̈ܐ ܕܦܲܛܥܘܼܬܼܗܘܿܢ
ܕܗܵܢܘܿܢ ܢܲܟܸܣ: ܕܲܒܼܤܲܓܝܼ̈ܐܵܬܼܵܐ ܕܹܝܢ ܢܹܐܡܲܪ ܠܘܼܩܒܲܠ ܦܲܟܿܝܼ̈ܗܵܬܼܵܐ:
ܐܲܟܼܒܲܪ ܦܲܟܵܢܘܼܬܼܗܘܿܢ ܥܲܡ ܦܲܛܥܘܼܬܼܗܘܿܢ ܟܵܕܼܢܵܐ ܗ̄ܘ̣ܵܬܼ ܠܲܢ.
ܐܵܠ̇ܨܐ ܕܹܝܢ ܠܡܲܩܵܦܘܼ ܠܐܲܝܠܹܝܢ ܕܐܸܡ̇ܪܹܬܼ: ܗܵܠܹܝܢ ܕܡܲܤܒܿܪܝܼܢ
ܕܲܒܼܗܹܝܢ ܡܸܫܟܿܚܝܼܢ ܠܲܡܕܲܚܵܠܘܼ ܠܲܟܼܢܘܼܫܬܹܗ ܕܡܵܪܝܵܐ: ܐܲܝܟܼ ܕܲܟܼܬܼܝܼܒܼ:
ܠܡܸܫܕܵܐ ܒܥܲܡܛܵܢܵܐ ܒܲܬܼܪ̈ܝܼܨܲܣ ܠܸܒܵܐ. ܗܵܢܵܘ ܕܹܝܢ: ܒܗܵܢܘܿܢ
ܕܲܒܼܬܲܡܝܼܡܘܼܬܼ ܬܲܪܥܝܼܬܼܵܐ ܡܥܵܕܝܼܢ ܠܡܸܚܵܐ: ܘܲܠܡܲܫܡܵܢܘܼܬܼܵܐ
ܕܗܲܝܡܵܢܘܼܬܼܵܐ: ܐܲܝܟܼ ܓܘܼܥܠܵܢܵܐ ܢܵܛ̇ܪܝܼܢ ܒܠܸܒܵܐ: ܟܲܕܼ ܚܠܝܼܡܵܐ ܘܠܵܐ
ܡܒܲܠܒܿܠܵܐ. ܗܵܢܘܿܢ ܓܹܝܪ ܕܲܨܢܝܼܥܝܼܢ ܠܘܵܬܼ ܛܘܼܥܝܲܝ: ܘܡܸܟܿܚܝܼܢ
ܫܘܼ̈ܐܵܠܹܐ ܡܥܲܩ̈ܡܹܐ: ܡܲܝܬܹܿܝܢ ܡ̣ܢ ܫܲܪܝܼܪܹ̈ܐ: ܠܐܲܝܠܹܝܢ ܕܠܵܐ ܡܕܲܪܫܝܼܢ.
ܘܲܡܫܲܐܠܝܼܢ ܠܵܐ ܪܲܕܼܝܵܐܝܼܬܼ: ܐܲܝܟܼ ܕܐܵܦ ܗܲܪ̈ܵܛܝܼܩܘܿ ܚܲܒܼܪ̈ܲܝܗܘܿܢ ܡܥܵܕܹܝܢ
ܠܲܡܫܲܐܵܠܘܼ: ܟܕܲ ܠܵܐ ܡܸܤܬܲܟܿܠܝܼܢ ܗܵܝ̇ ܕܲܟܼܬܼܝܼܒܼܵܐ: ܕܘܵܝ ܠܡܲܢ
ܕܡܲܫܩܸܐ ܠܚܲܒܼܪܹܗ ܬܸܛܪܵܐ ܗܦܝܼܟܼܵܐ! ܡܥܲܕܼܪ̈ܵܢܹܐ ܓܹܝܪ ܕܪܘܼܫܥܹܗ
ܕܐܵܪܝܼܘܿܣ ܠܝܼܚܝܼܕܼܵܝܵܐ ܡܸܠܬܼܵܐ ܐܲܠܵܗܵܐ: ܡ̣ܢ ܟܝܵܢܵܐ ܐ̄ܚܪܹܢܵܐ ܐܵܡ̇ܪܝܼܢ
ܕܐܝܼܬܼܵܘܗܝ. ܘܕܲܬܼܪܹܝܢ ܠܝܵܠܘܿܕܹܗ: ܤܵܝ̇ܡܝܼܢ ܠܹܗ. ܒܲܪܝܵܐ ܘܲܥܒܼܝܼܕܼܸܵܐ:
pb. 554
ܐܵܡ̇ܪܝܼܢ ܠܹܗ. ܘܥܲܡ ܒܪܝܼܬܼܵܐ ܚܵܫ̇ܒܿܝܼܢ ܠܹܗ: ܠܗܵܘ̇ ܕܟܼܠ ܒܐܝܼܕܹܗ
ܗܘ̤ܵܐ.
ܘܬܼܘܼܒܼ ܟܲܕܼ ܡܥܲܩܒܼܝܼܢ ܥܲܠ ܐ̄ܪܵܙܵܐ ܕܦܲܓܼܪܵܢܘܼܬܹܗ: ܨܢܝܼܥܵܐܝܼܬܼ
ܡܚܲܒܿܠܝܼܢ ܠܹܗ ܠܚܲܝܠܹܗ ܕܲܫܪܵܪܵܐ: ܘܲܒܼܬܲܪܥܝܼܬܹܗ ܕܐܵܦܘܿܠܝܼܢܵܪܝܼܣ
ܡܩܲܕܲܡܝܼܢ ܡܸܬܼܟܲܪܗܝܼܢ ܘܐܵܡ̇ܪܝܼܢ: ܕܦܲܓܼܪܵܐܠ ܡܲܢ ܫܩܲܠ̣ ܐܲܠܵܗܵܐ
ܡܸܠܬܼܵܐ: ܠܲܝܬܿ ܗ̄ܘ̣ܵܐ ܠܲܡ ܕܹܝܢ ܒܹܗ ܢܲܦܫܵܐ ܡܠܝܼܠܬܼܵܐ. ܐܝܼܬܼܵܘܗܝ
ܕܹܝܢ ܒܦܲܓܼܪܵܐ: ܚܠܵܦ ܗܵܘܢܵܐ ܘܢܲܦܫܵܐ. ܕܲܨܢܝܼܥܵܐܝܼܬܼ ܕܹܝܢ ܥܵܒܼܕܝܼܢ
ܗܵܕܹܐ: ܥܓܲܠ ܡܸܬܿܬܲܚܕܝܼܢ. ܕܠܵܐ ܓܹܝܪ ܢܲܤܒܲܪ ܕܡܸܠܹ̈ܐ: ܕܐ̄ܢܵܫܐܝܼܬܼ
ܐܲܡܝܼܪܵܢ ܥܲܠ ܡܵܪܲܢ: ܥܲܠ ܡܕܲܒܿܪܵܢܘܼܬܹܗ ܘܠܹ̇ܐ ܕܢܸܫܬܲܩ̈ܠܵܢ:
ܘܐܲܝܟܼ ܡܵܐ ܕܲܦܐܸܐ ܠܲܡܫܝܼܚܵܐ ܕܐ̄ܢܵܫܘܼܬܹܗ: ܡܸܛܠ ܕܲܗܘ̤ܵܐ ܒܲܪܢܵܫܵܐ:
ܓܵܢ̇ܒܿܝܼܢ ܠܵܗ̇ ܠܢܲܦܫܵܐ ܡܠܝܼܠܬܼܵܐ ܡ̣ܢ ܦܲܓܼܪܵܐ: ܘܲܡܬܲܚܬܹܝܢ ܠܹܗ
ܠܲܒܼܪܵܐ ܡ̣ܢ ܟܝܵܢܵܐ ܕܐܲܒܼܘܼܗܝ. ܘܥܵܒܼ̇ܕܝܼܢ ܠܹܗ ܕܘܼܟܲܬܼ ܢܲܦܫܵܐ:
ܠܦܲܓܼܪܵܐ. ܘܲܡܠܲܩܛܝܼܢ ܡܸܠܹ̈ܐ ܡ̣ܢ ܟܬܼܵܒܹ̈ܐ: ܠܥܲܠܲܬܼ ܛܠܘܡܝܼܗܘܿܢ.
ܐܸܠܵܐ ܗܵܐ ܐܵܦ ܗܵܫܵܐ ܡܡܲܪ̈ܝܵܢܹܐ ܕܠܵܐ ܪܲܕܝܘܼܬܼܗܘܿܢ ܕܗܵܠܹܝܢ:
ܡܲܪܝܼܪܵܐܝܼܬܼ ܢܒܲܥ̣ܘ ܒܡܸܠܹ̈ܐ ܚܲܕܼ̈ܬܼܵܬܼܵܐ ܕܢܸܤܛܘܿܪܝܼܣ: ܕܢܲܩܪܒܼܘܼܢ
ܥܲܡ ܗܲܝܡܵܢܘܼܬܼܵܐ ܒܫܘܼ̈ܐܵܠܲܝܗܘܿܢ. ܐܵܡ̇ܪܝܼܢ ܓܹܝܪ: ܕܛܘܼܒܼܸܵܢܵܐ ܦܵܘܠܘܿܣ
ܐܸܡ݂ܲܪ ܥܲܠ ܡܫܝܼܚܵܐ ܦܵܪܘܿܩܲܢ: ܕܤܲܪܸܩ̣ ܢܲܦܫܹܗ ܘܲܕܼܡܘܼܬܼܵܐ ܕܥܲܒܼܕܵܐ
ܢܤܲܒܼ. ܘܲܗܘ̤ܵܐ: ܒܲܕܼܡܘܼܬܼܵܐ ܕܲܒܼܢܲܝ̈ ܐ̄ܢܵܫܵܐ: ܘܒܸܐܤܟܹܡܵܐ ܐܸܫܬܿܟܲܚ:
ܐܲܝܟܼ ܒܲܪܢܵܫܵܐ. ܘܡܲܟܸܟܼ ܢܲܦܫܹܗ ܘܐܸܫܬܿܡܲܥ: ܥܕܲܡܵܐ ܠܡܵܘܬܵܐ.
ܡܵܘܬܵܐ ܕܹܝܢ: ܕܲܙܩܝܼܦܵܐ. ܡܸܛܠ ܗܵܢܵܐ ܐܵܦ ܐܲܠܵܗܵܐ ܐܲܤܓܝܼ:
ܘܪܲܡܪܡܸܗ. ܘܝܲܗ̣̄ܒܼ ܠܹܗ ܫܡܵܐ ܕܲܡܝܲܬܲܪ: ܡ̣ܢ ܟܠ ܫܡܵܗܝܼ̈ܢ.
pb. 555
ܘܬܼܘܼܒܼ ܐܵܦ ܒܕܼܘܼܟܿܬܼܵܐ ܐ̄ܚܪܹܬܼܵܐ: ܐܲܠܵܗܵܐ ܗ̄ܘ̣ܵܐ ܓܹܝܪ ܒܲܡܫܝܼܚܵܐ:
ܗܵܘ̇ ܕܪܲܥ̣ܝ ܠܥܵܠܡܵܐ ܥܲܡ ܪܲܒܿܘܼܬܹܗ. ܘܬܼܘܼܒܼ: ܕܒܹܗ
ܥ̣ܡܲܪ ܟܠܹܗ ܡܘܼܠܵܝܵܐ ܕܐܲܠܵܗܘܼܬܼܵܐ ܓܘܼܫܡܵܢܵܐܝܼܬܼ. ܬܵܢܹ̇ܝܢ ܕܹܝܢ
ܐܵܦ ܠܲܒܼ̈ܢܵܬܼ ܩܵܠܵܘ̈ܗܝ ܕܦܲܛܪܘܿܣ ܕܐܸܡ݂ܲܪ: ܝܼܫܘܿܥ ܢܵܨܪܵܝܵܐ:
ܗܵܘ̇ ܕܲܡܫܲܚ̣ ܐܲܠܵܗܵܐ ܒܪܘܼܚܵܐ ܕܩܘܼܕܼܫܵܐ ܘܲܒܼܚܲܝܠܵܐ. ܗܵܘ̇ ܕܡܸܬܼܟܿܪܸܟܼ
ܗ̄ܘ̣ܵܐ ܘܡܲܐܤܸܐ ܠܟܼܠܗܘܿܢ ܐܲܝܠܹܝܢ ܕܡ̣ܢ ܒܝܼܫܵܐ ܡܸܬܼܢܟܹܝܢ ܗ̄ܘ̣ܵܘ:
ܡܸܛܠ ܕܐܲܠܵܗܵܐ ܗ̄ܘ̣ܵܐ ܥܲܡܹܗ. ܘܬܼܘܼܒܼ: ܕܐܲܥܒܲܪ ܐܲܠܵܗܵܐ ܠܙܲܒܼ̈ܢܹܐ
ܕܛܵܥܝܘܼܬܼܵܐ: ܘܗܵܫܵܐ ܡܦܲܩܸܕܼ ܠܟܼܠܗܘܿܢ ܒܢܲܝ̈ܢܵܫܵܐ: ܕܲܒܼܟܼܠܕܘܼܟܼ:
ܢܬܼܘܼܒܼܘܼܢ. ܐܲܝܟܼ ܡܸܕܸܡ ܕܩܲܕܸܩ̣ ܪܫܲܡ̣ ܝܵܘܡܵܐ ܕܕܼܝܼܢܵܐ ܕܒܹܗ
ܥܬܼܝܕܼ ܕܲܢܕܲܘܼܢܵܗ̇ ܠܟܼܠܵܗ̇ ܐܲܪܥܵܐ: ܒܝܲܕܼ ܓܲܒܼܪܵܐ ܐܲܝܢܵܐ ܕܲܦܪܲܫ̣.
ܘܐܲܦܢܝܼ ܠܟܼܠ ܐ̄ܢܵܫ ܠܗܲܝܡܵܢܘܼܬܹܗ: ܒܐܲܩܝܼܡܸܗ ܡ̣ܢ ܒܹܝܬܼ
ܡܝܼ̈ܬܹܐ. ܠܗܵܠܹܝܢ ܤܵܝ̇ܡܝܼܢ ܘܠܲܐܝܠܹܝܢ ܕܒܲܙܢܵܐ ܐ̄ܚܪܹܢܵܐ ܐ̄ܢܵܫܐܝܼܬܼ
ܐܲܡܝܼܪܵܢ: ܘܒܲܪ ܫܵܥܬܹܗ ܡ̣ܢ ܬܲܪܥܝܼܬܼܵܐ ܒܝܼܫܬܼܵܐ: ܡܸܠܹ̈ܐ ܡܲܪܝܼܪ̈ܵܬܼܵܐ
ܓܵܤܹ̇ܝܢ. ܠܡܲܢ̣ܘܼ ܠܲܡ ܝܲܗ̣̄ܒܼ ܐܲܠܵܗܵܐ ܫܡܵܐ ܕܲܡܝܲܬܲܪ؟ ܠܐܲܠܵܗܵܐ
ܡܸܠܬܼܵܐ؟ ܘܐܲܝܟܲܢܵܐ ܠܲܡ ܡܸܬܼܩܲܒܿܠܵܐ ܗܵܕܹܐ؟ ܐܝܼܬܼܵܘܗܝ ܗ̄ܘ̣ܵܐ ܠܹܗ
ܓܹܝܪ ܒܟܼܠܙܒܲܢ ܐܲܠܵܗܵܐ: ܐܲܝܟܼ ܡ̇ܢ ܕܡܸܢܹܗ ܟܝܵܢܵܐܝܼܬܼ ܝܑܼܠܝܼܕܼ. ܫܡܵܐ
ܓܹܝܪ ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ: ܗܵܢܵܐ ܐܝܼܬܼܵܘܗܝ. ܡܵܢܵܐ ܓܹܝܪ
ܐܝܼܐܼ ܕܥܸܠܵܝ: ܡ̣ܢ ܗܵܘ̇ ܕܲܟܼܝܵܢܵܐܝܼܬܼ ܐܝܼܬܼܵܘܗܝ ܐܲܠܵܗܵܐ؟ ܠܡܲܢ̣ܘܼ ܕܹܝܢ
ܡܫܲܚ̣ ܒܪܘܼܚܵܐ ܕܩܘܼܕܼܫܵܐ؟ ܐܵܘ ܥܲܡ ܡܲܢ̣ܘܼ ܐܝܼܬܼܵܘܗܝ ܗ̄ܘ̣ܵܐ
ܐܲܠܵܗܵܐ؟
pb. 556
ܡܵܘܤܦܝܼܢ ܕܹܝܢ ܥܲܠ ܗܵܠܹܝܢ: ܐ̄ܚܪ̈ܵܢܝܵܬܼܵܐ. ܘܲܡܦܲܩܩܝܼܢ: ܘܕܼܵܠ̇ܚܝܼܢ
ܬܲܪ̈ܥܝܵܬܼܵܐ ܕܲܦܫܝܼ̈ܛܹܐ: ܟܲܕܼ ܕܹܝܢ ܡܦܲܪܫܝܼܢ ܒܟܼܠ ܕܘܼܟܼ. ܢܲܦ̈ܫܵܢܹܐ
ܓܹܝܪ ܐܝܼܬܲܝܗܘܿܢ: ܕܪܘܼܚܵܐ ܠܲܝܬܿ ܒܗܘܿܢ. ܘܲܡܦܲܠܓܼܝܼܢ ܠܲܬܼܪܹܝܢ
ܒܢܝܼ̈ܢ ܠܚܲܕܼ ܡܫܝܼܚܵܐ ܕܐܝܼܬܼܵܘܗܝ ܒܪܵܐ ܘܡܵܪܝܵܐ ܕܟܼܠ: ܒܡܸܕܸܡ
ܕܗܵܡ̇ܤܝܼܢ ܢܵܦ̇ܠܝܼܢ. ܚܲܕܼ ܓܹܝܪ ܡܫܝܼܚܵܐ ܘܡܵܪܝܵܐ ܘܲܒܼܪܵܐ ܡܕܲܡܹܝܢ
ܕܡܵܘܕܹܝܢ: ܘܚܲܕܼ ܦܲܪܨܘܿܦܵܐ ܐܵܡ̇ܪܝܼܢ ܕܐܝܼܬܼ ܠܹܗ. ܘܟܲܕܼ ܡܦܲܪܫܝܼܢ
ܠܹܗ ܬܘܼܒܼ ܠܲܬܼܪܹܝܢ ܩܢܘܿܡ̈ܝܼܢ ܕܢܘܼܟܼܪܵܝܝܑܼܢ ܠܲܚܕܼܵܕܹ̈ܐ: ܒܟܼܠܗܹܝܢ
ܛܵܠܡ̇ܝܼܢ ܠܹܗ ܠܐ̄ܪܵܙܵܐ. ܐܵܡ̇ܪܝܼܢ ܓܹܝܪ: ܕܗܵܘ̇ ܕܡ̣ܢ ܐܲܢ̄ܬܿܬܼܵܐ: ܐܵܘ
ܗܵܝ̇ ܕܡܘܼܬܼܵܐ ܕܥܲܒܼܕܵܐ: ܝܑܼܚܝܼܕܼܵܐܝܼܬܼܵ ܘܒܲܠܚܘܿܕܼܵܘܗܝ ܩܲܒܸܠ̣ ܫܡܵܐ
ܕܲܡܝܲܬܲܪ. ܘܗ̤ܘ ܠܲܡ ܐܸܬܼܡܫܲܚ ܒܪܘܼܚܵܐ ܕܩܘܼܕܼܫܵܐ: ܘܗ̤ܘ
ܐܝܼܬܼܵܘܗܝ ܗܵܘ̇ ܕܥܲܡܹܗ ܗ̄ܘ̣ܵܐ ܐܲܠܵܗܵܐ ܡܸܠܬܼܵܐ. ܤܘܼܠܦܵܢܵܐ ܕܹܝܢ:
ܘܪܹܝܚܵܐ ܤܲܪܝܵܐ ܓܵܤܹ̇ܝܢ ܠܲܢ ܒܗܵܠܹܝܢ ܡܸܠܹ̈̄ܐ. ܡܸܛܠ ܕܒܼܝܼ̈ܫܹܐ ܐܸܢܘܿܢ:
ܘܛܵܒܼ̈ܬܼܵܐ ܕܲܢܡܲܠܠܘܼܢ ܠܵܐ ܡܸܫܟܿܚܝܼܢ: ܐܲܝܟܼ ܡܸܠܬܹܗ ܕܦܵܪܘܿܩܲܢ.
ܐܝܼܬܼܵܘܗܝ ܗ̄ܘ̣ܵܐ ܓܹܝܪ ܐܲܠܵܗܵܐ ܒܟܼܠ ܙܒܲܢ ܫܲܪܝܼܪܵܐܝܼܬܼ ܘܡܵܪܝܵܐ: ܗܵܘ̇
ܕܡ̣ܢ ܐܲܠܵܗܵܐ ܐܲܒܼܵܐ ܐܸܬܼܝܼܠܸܕܼ ܠܵܐ ܡܸܬܼܚܲܙܝܵܢܵܐܝܼܬܼ: ܘܐܲܝܟܼ ܡܸܕܸܡ
ܕܲܠܡܹܐܡܲܪ ܠܵܐ ܡܟܸܫܟܿܚܵܐ. ܡܸܛܠ ܕܹܝܢ ܕܒܲܦܓܲܪ ܗܘ̤ܵܐ ܡ̣ܢ ܐܲܢ̄ܬܿܬܼܵܐ
ܫܒܼܝܼܚܵܐܝܼܬܼ ܘܲܠܥܸܠ ܡ̣ܢ ܟܝܵܢܲܢ: ܒܡܹܐܬܼܝܼܬܹܗ ܕܪܘܼܚܵܐ ܕܩܘܼܕܼܫܵܐ:
ܘܲܒܼܗܵܝ̇ ܕܐܲܓܸܢ ܚܲܝܠܹܗ ܕܐܲܠܵܗܵܐ: ܘܤܲܝܒܲܪ ܝܲܠܕܵܐ ܕܐܲܟܼܘܵܬܲܢ.
ܗܵܟܲܢܵܐ ܓܹܝܪ ܡܸܬܼܐܡܲܪ ܕܐܸܤܬܲܪܲܩ: ܘܡܲܟܸܟܼ ܢܲܦܫܹܗ ܘܐܸܫܬܡܲܥ
ܥܕܲܡܵܐ ܠܡܵܘܬܵܐ ܕܲܙܩܝܼܦܵܐ. ܒܗܵܕܹܐ ܡܸܬܼܐܡܲܪ ܕܲܫܩܲܠ̣ ܫܡܵܐ
ܕܲܡܝܲܬܲܪ ܡ̣ܢ ܟܠ ܫܡܵܗܝܼ̈ܢ: ܘܠܹܗ ܟܠ ܒܪܘܿܟ ܟܵܦܵܐ: ܕܒܲܫܡܲܝܵܐ
ܘܒܲܐܪܥܵܐ ܘܕܲܠܬܲܚܬܿ ܡ̣ܢ ܐܲܪܥܵܐ: ܘܟܼܠ ܠܸܫܵܢ ܡܵܘܕܸܐ ܕܡܵܪܝܵܐ
pb. 557
ܗ̄ܘ̣ ܝܼܫܘܿܥ ܡܫܝܼܚܵܐ: ܠܫܘܼܒܼܚܵܐ ܕܐܲܠܵܗܵܐ ܐܲܒܼܘܼܗܝ. ܠܵܐ ܓܹܝܪ
ܛܥܵܬܼܵܗ̇ ܠܲܒܼܪܝܼܬܼܵܐ ܝܲܕܘܼܥܬܵܢܝܼܬܼܵܐ ܘܲܡܠܝܼܠܬܼܵܐ: ܕܐܲܠܵܗܵܐ ܗ̄ܘ̣ܵܐ ܡܸܠܬܼܵܐ
ܗܵܘ̇ ܕܲܗܘ̤ܵܐ ܒܲܪܢܵܫܵܐ. ܐܵܦܸܢ ܗܘ̤ܵܐ ܓܹܝܪ ܒܗܵܠܹܝܢ ܕܝܼܠܲܢ: ܘܐܲܟܼܘܵܬܲܢ
ܐܸܫܬܵܘܬܲܦ ܒܒܸܤܪܵܐ ܘܲܕܼܡܵܐ: ܐܸܠܵܐ: ܠܵܘ ܟܲܕܼ ܫܲܢ̣ܝܼ ܡ̣ܢ ܗܵܝ̇
ܕܐܝܼܬܼܵܘܗܝ ܐܲܠܵܗܵܐ: ܘܠܵܐ ܫܲܒܼܩ̣ܵܗ̇ ܠܗܵܝ̇ ܕܲܗܘ̤ܵܐܠ ܐܝܼܬܼܵܘܗܝ ܐܲܝܟܼ
ܕܐܝܼܬܼܵܘܗܝ ܗ̄ܘ̣ܵܐ. ܦܵܫ̣ ܓܹܝܪ ܤܓܼܝܼܕܼܵܐ: ܠܬܸܫܒܿܘܿܚܬܼܵܐ ܕܐܲܠܵܗܵܐ ܐܲܒܼܵܐ.
ܬܸܫܒܘܿܚܬܹܗ ܗ̣̄ܝ ܓܹܝܪ ܕܢܲܡܠܸܟܼ ܘܢܸܤܬܿܓܸܕܼ ܥܲܡܹܗ ܒܪܹܗ: ܐܵܦ
ܐܸܢ ܗܘ̤ܵܐ ܡܕܲܒܿܪܵܢܵܐܝܼܬܼ ܒܲܪ ܐ̄ܢܵܫܵܐ ܠܦܘܼܪܩܵܢܵܐ ܕܗܵܢܘܿܢ ܕܲܬܼܚܹܝܬܼ
ܫܡܲܝܵܐ.
ܡܵܕܹܝܢ ܟܲܕܼ ܡ̣ܢ ܡܲܠܲܐܟܹ̈ܐ ܘܡܸܢܲܢ ܒܢܲܝ̈ ܐ̄ܢܵܫܵܐ ܐܸܬܼܗܲܝܡܲܢ: ܘܟܲܕܼ
ܐܝܼܬܼ ܠܹܗ ܦܲܓܼܪܵܐ: ܕܐܲܠܵܗܵܐ ܐܝܼܬܼܵܘܗܝ ܒܲܟܼܝܵܢܵܐ ܫܲܪܝܼܪܵܐܝܼܬܼ: ܗܵܝܕܹܝܢ
ܡܸܬܼܐܡܲܪ ܕܲܢܤܲܒܼ ܫܡܵܐ ܕܲܡܝܲܬܲܪ ܡ̣ܢ ܟܠ ܫܡܵܗ̈ܝܼܢ: ܠܵܐ ܗ̄ܘ̣ܵܐ
ܐܲܝܟܼ ܕܒܲܡܢܵܬܼܵܐ ܕܬܼܵܘܤܲܦܬܼܵܐ ܝܑܼܬܲܪ ܠܹܗ ܒܤܘܼܥܪܲܢܵܐ. ܗܵܘ̇ ܡܵܐ ܓܹܝܪ
ܕܐܝܼܬܼܵܘܗܝ ܗ̄ܘ̣ܵܐ ܒܟܼܠܙܒܲܢ: ܐܲܝܟܲܢ ܫܵܩܹ̇ܠ ܗ̄ܘ̣ܵܐ ܐܲܝܟܼ ܡ̇ܢ ܕܠܲܝܬܿ
ܠܹܗ؟ ܐܸܠܵܐ ܒܗܵܝ̇ ܕܲܕܢܲܚ̣ ܒܠܸܒܵܘ̈ܬܼܵܐ ܕܟܼܠܢܵܫ ܐܲܠܵܗܵܐ ܘܐܲܒܼܵܐ:
ܡܸܠܬܼܵܐ ܕܐܸܬܼܓܲܫܲܡ ܕܐܲܠܵܗܵܐ ܐܝܼܬܼܵܘܗܝ ܒܲܟܼܝܵܢܵܐ: ܠܵܐ ܫܒܲܩ̣ ܕܬܸܛܥܸܐ
ܐܸܢܘܿܢ: ܠܵܐ ܠܲܡ ܓܹܝܪ ܐ̄ܢܵܫ ܡܸܫܟܲܚ ܕܢܹܐܬܸܐ ܠܘܵܬܼܝ: ܐܸܠܵܐ
ܢܲܛܕܹܗ ܐܲܒܼܵܐ ܕܫܲܪܲܢܝ. ܗܘ̤ܵܬܼ ܕܹܝܢ ܡܫܝܼܚܘܼܬܹܗ: ܡܸܛܠ
ܐ̄ܢܵܫܘܼܬܹܗ. ܟܲܕܼ ܓܹܝܪ ܩܲܕܝܼܫܵܐ ܒܲܟܼܝܵܢܵܐ ܐܲܝܟܼ ܐܲܒܼܘܼܗܝ ܐܝܼܬܼܵܘܗܝ:
ܝܑܼܚܝܼܕܼܵܝܵܐ ܒܪܵܐ ܕܝܼܠܝܼܕܼ ܡܸܢܹܗ: ܕܐܸܬܼܡܫܲܚ ܐܲܟܼܘܵܬܲܢ ܡܸܵܬܼܐܡܲܪ:
ܐܵܘ ܕܐܸܬܼܩܲܕܲܫ ܡ̣ܢ ܐܲܒܼܘܼܗܝ: ܒܗܵܝ̇ ܕܲܗܘ̤ܵܐ ܒܲܪܢܵܫܵܐ. ܟܬܲܒܼ ܓܹܝܪ
pb. 558
ܥܠܵܘܗܝ ܚܲܟܝܼܡܵܐ ܦܵܘܠܘܿܣ ܘܲܥܠܲܝܢ ܕܗܵܘ̇ ܕܲܡܩܲܕܸܫ ܘܗܵܢܘܿܢ
ܕܡܸܬܼܩܲܕܲܫܝܼܢ: ܡ̣ܢ ܚܲܕܼ ܐܸܢܘܿܢ ܟܠܗܘܿܢ. ܡܸܛܠ ܗܵܢܵܐ: ܠܵܐ ܒܗܸܬܼ
ܕܢܸܩܪܸܐ ܐܸܢܘܿܢ ܐܲܚܵܘ̈ܗܝ: ܟܲܕܼ ܐܸܡܲ݁ܪ: ܕܐܹܤܲܒܲܪ ܫܡܵܟܼ ܠܐܲܚܲܝ̈.
ܡܵܕܹܝܢ ܕܐܝܼܬܼܵܘܗܝ ܩܲܕܝܼܫܵܐ ܒܲܟܼܝܵܢܹܗ ܝܑܼܚܝܼܕܼܵܝܵܐ ܘܕܲܡܩܲܕܸܫ ܒܪܝܼܬܹܗ:
ܒܗܵܝ̇ ܕܲܗܘ̤ܵܐ ܒܲܪܢܵܫܵܐ ܘܐܲܚܵܐ ܥܲܡܲܢ: ܐ̄ܢܵܫܵܐܝܼܬܼ ܗ̄ܘ̣ ܡܸܬܼܐܡܲܪ
ܕܐܸܬܼܡܫܲܚ. ܡܸܕܸܡ ܕܙܵܕܹܩ ܘܲܦܐܸܐ ܠܐ̄ܢܵܫܘܼܬܼܵܐ: ܟܲܕܼ ܠܵܐ ܐܸܨܛܲܥܪܲܬ̤
ܡܸܛܠ ܐ̄ܢܵܫܘܼܬܹܗ ܡܫܘܼܚܬܹܗ. ܗܵܟܲܢܵܐ ܓܹܝܪ ܐܸܡ݂ܲܪ ܐܵܦ ܠܘܵܬܼ
ܡܫܲܒܿܚܵܐ ܝܘܿܚܲܢܵܢ: ܕܘܵܠܹ̇ܐ ܠܲܢ ܕܲܢܡܲܠܸܐ ܟܠܵܗ̇ ܟܹܐܢܘܼܬܼܵܐ. ܐܸܢ
ܕܹܝܢ ܬܸܬܼܐܡܲܪ ܘܕܲܐܠܵܗܵܐ ܗܘ̤ܵܐ ܥܲܡܹܗ: ܐܲܝܟܲܢ ܛܥܵܬ̤ ܐܸܢܘܿܢ
ܠܤܘܿܦܸܤ̈ܛܹܐ ܨܢܝܼ̈ܥܹܐ: ܕܐܝܼܬܼܵܘܗܝ ܟܝܵܢܵܐܝܼܬܼ ܒܟܼܠܙܒܲܢ ܐܲܒܼܵܐ ܥܲܡ
ܒܪܵܐ: ܘܗ̤ܘ ܐܝܼܬܼܵܘܗܝ ܒܹܗ؟ ܐܵܘ ܠܵܐ ܥܵܗ̇ܕܝܼܢ ܕܐܸܡ݂ܲܪ ܡܫܝܼܚܵܐ:
ܕܗܵܢܵܐ ܟܠܹܗ ܙܲܒܼܢܵܐ ܗܘܹ̇ܝܬܼ ܥܲܡܟܼܘܿܢ: ܘܠܵܐ ܝܑܼܕܲܥܬܵܢܝ ܦܝܼܠܝܼܦܲܐ؟
ܡ̇ܢ ܕܠܝܼ ܚ̣ܙܵܐ: ܚ̣ܙܵܐ ܠܐܲܒܼܵܐ. ܘܐܸܢܵܐ ܘܐܵܒܼܝ: ܚܲܕܼ ܚܢܲܢ.
ܠܵܐ ܡܗܲܝܡܸܢ ܐܲܢ̄ܬܿ ܕܐܸܢܵܐ ܒܐܵܒܼܝ: ܘܐܵܒܼܝ ܒܝܼ ܐܝܼܬܼܵܘܗܝ؟
ܐܸܡ݂ܲܪ ܬܘܼܒܼ: ܟܲܕܼ ܡܡܲܠܸܠ ܥܲܡ ܬܲܠܡܝܼܕܼܵܘ̈ܗܝ: ܕܐܵܬܼ̇ܝܵܐ ܫܵܥܬܼܵܐ
ܘܐܵܦ ܗܵܫܵܐ ܐܝܼܬܹܝܗ̇: ܕܬܸܬܼܒܲܕܪܘܼܢ ܐ̄ܢܵܫ ܠܐܲܬܼܪܹܗ: ܘܬܸܫܒܿܩܘܼܢܵܢܝ
ܒܲܠܚܘܿܕܲܝ. ܘܠܵܐ ܗܘܹ̇ܝܬܼ ܒܲܠܚܘܿܕܲܝ: ܕܐܵܒܝܼ ܥܲܡܝ ܐܝܼܬܼܵܘܗܝ.
ܠܵܐ ܓܹܝܪ ܐܲܝܟܼ ܕܡܲܤܒܿܪܝܼܢ ܗܵܢܘܿܢ ܕܲܡܠܹܝܢ ܬܝܘܿܒܼܵܐ ܢܘܼܟܼܪܵܝܵܐ: ܕܟܲܕܼ
ܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ ܐ̄ܚܪܹܢܵܐ ܒܪܵܐ: ܥܲܡ ܐ̄ܚܪܹܢܵܐ ܒܪܵܐ ܒܲܪ
ܐ̄ܢܵܫܵܐ ܕܐܸܬܼܢܤܸܒܼ ܗܘ̤ܵܐ. ܦܤܵܩܵܐ ܗ̄ܘ̣ ܓܹܝܪ ܗܵܢܵܐ: ܐܵܦ ܦܘܼܪܫܵܢܵܐ
pb. 559
ܕܲܬܼܪܹܝܢ ܒܢܝܼ̈ܢ. ܐܸܠܵܐ ܐܝܼܬܼܵܘܗܝ ܗ̄ܘ̣ܵܐ ܐܲܠܵܗܵܐ ܘܐܲܒܼܵܐ: ܥܲܡ ܒܪܵܐ.
ܗܵܢܵܘ ܕܹܝܢ: ܥܲܡ ܐܵܠܵܗܵܐ ܡܸܠܬܼܵܐ ܕܐܸܬܼܓܲܫܲܡ ܘܲܗܘ̤ܵܐ ܒܲܪܢܵܫܵܐ. ܠܵܐ
ܓܹܝܪ ܡܸܬܼܦܪܸܫ ܐܲܒܼܵܐ ܡ̣ܢ ܒܪܵܐ.
ܐܸܢ ܕܹܝܢ ܬܘܼܒܼ ܗܵܝ̇ ܕܲܥܬܼܝܼܕܼ ܐܲܠܵܗܵܐ ܕܲܢܕܼܘܼܬܢܵܗ̇ ܠܐܲܪܥܵܐ ܒܝܲܕܼ
ܓܲܒܼܪܵܐ ܝܼܫܘܿܥ: ܢܲܤܒܲܪ ܐ̄ܢܵܫ ܕܗܵܟܲܢܵܐ ܐܸܡ݂ܲܪ ܟܬܼܵܒܼܵܐ: ܕܝܼܚܝܼܕܼܵܝܵܐ
ܒܪܵܐ: ܒܒܲܪܢܵܫܵܐ ܗܵܘ̇ ܕܐܸܬܼܝܼܠܸܕܼ ܡ̣ܢ ܐܲܢ̄ܬܿܬܼܵܐ ܥܬܼܝܼܕܼ ܕܲܢܕܲܘܼܢ
ܠܐܲܪܥܵܐ: ܢܵܦܹ̇ܠ ܡ̣ܢ ܫܪܵܪܵܐ. ܦܲܐܝܵܐ ܕܹܝܢ ܠܕܼܚܠܲܬܼ ܐܲܠܵܗܵܐ ܕܬܸܤܬܲܟܲܠ:
ܗܵܝ̇ ܕܐܸܡ݂ܲܪ ܡܫܝܼܚܵܐ: ܕܐܲܒܼܵܐ ܠܐ̄ܢܵܫ ܠܵܐ ܢܕܼܘܼܢ. ܐܸܠܵܐ ܟܠܹܗ
ܕܝܼܢܵܐ: ܝܲܗܒܹܗ ܠܲܒܼܪܵܐ. ܕܟܼܠ ܐ̄ܢܵܫ ܢܝܲܩܲܪ ܠܲܒܼܪܵܐ: ܐܲܝܟܼ ܕܲܡܝܲܩܲܪ
ܠܐܲܒܼܵܐ. ܐܲܠܵܗܵܐ ܓܹܝܪ ܡܸܠܬܼܵܐ ܕܲܗܘ̤ܵܐ ܒܲܪܢܵܫܵܐ: ܘܐܸܬܼܡܢܝܼ ܥܲܡ
ܒܢܲܝ̈ܢܵܫܵܐ: ܘܐܸܫܬܲܡܲܗ ܥܲܡܲܢ ܐܲܟܼܘܵܬܲܢ: ܠܵܐ ܡܸܕܸܡ ܒܨܝܼܪ ܐܝܼܬܼܵܘܗܝ
ܕܲܝܵܢܵܐ ܐܲܝܟܼ ܐܲܠܵܗܵܐ ܘܡܵܪܝܵܐ. ܕܚܲܕܼ ܗ̄ܘ̣ ܒܪܵܐ: ܕܐܝܼܬܼ ܒܹܗ ܐܲܠܵܗܵܐ
ܘܐܲܒܼܵܐ. ܐܝܼܬܼܵܘܗܝ ܒܹܗ ܓܹܝܪ: ܐܲܝܟܼ ܕܐܸܡ̇ܪܹܬܼ: ܝܵܠܘܿܕܹܗ. ܘܗ̤ܘ
ܬܘܼܒܼ: ܐܝܼܬܼܵܘܗܝ ܒܹܗ. ܐܲܟܼܙܢܵܐ ܓܹܝܪ ܕܚܲܕܼ ܗ̄ܘ̣ ܐܲܠܵܗܵܐ ܐܲܒܼܵܐ
ܕܡܸܢܹܗ ܟܠ: ܗܵܟܲܢܵܐ ܐܵܦ ܚܲܕܼ ܗ̄ܘ̣ ܡܵܪܝܵܐ ܝܼܫܘܿܥ ܡܫܝܼܚܵܐ
ܕܒܼܐܝܼܕܹܗ ܟܠ. ܡܲܗܦܟܼܝܼܢ ܕܹܝܢ ܠܡܸܕܸܡ ܕܠܵܐ ܫܲܦܝܼܪ: ܐܵܦ
ܗܵܝ̇ ܕܐܲܡܝܼܪܵܐ ܠܛܘܼܒܼܵܢܵܐ ܦܵܘܠܘܿܣ: ܗ̤ܘ ܓܹܝܪ ܐܸܡ݂ܲܪ ܬܪܝܼܨܵܐܝܼܬܼ:
ܕܐܲܠܵܗܵܐ ܗ̄ܘ̣ܵܐ ܒܲܡܫܝܼܚܵܐ: ܗܵܘ̇ ܕܪܲܥܝܼ ܠܥܵܠܡܵܐ ܥܲܡ ܪܲܒܿܘܼܬܹܗ.
ܗܸܢܘܿܢ ܬܘܼܒܼ ܦܤܵܩܵܐ ܥܲܒܼܝܵܐ ܥܲܠ ܚܲܕܼ ܡܫܝܼܚܵܐ ܡܲܝܬܹܝܢ: ܘܲܡܦܲܪܫܝܼܢ
ܠܹܗ ܠܐܲܠܵܗܵܐ ܡܸܠܬܼܵܐ: ܐܲܝܟܼ ܡ̇ܢ ܕܒܲܡܫܝܼܚܵܐ ܐ̄ܚܪܹܢܵܐ ܕܝܼܚܝܼܕܼܵܐܝܼܬܼ
ܡܸܬܼܝܼܕܲܥ ܕܐܝܼܬܼܵܘܗܝ. ܕܲܗܘ̤ܵܐ ܡܸܬܼܪܢܸܐ ܕܲܥ̣ܡܲܪ ܒܒܲܪ ܐ̄ܢܵܫܵܐ:
pb. 560
ܘܠܵܐ ܕܲܗܘ̤ܵܐ ܒܲܪܢܵܫܵܐ. ܐܸܠܵܐ ܢܝܼܫܵܐ ܕܲܟܼܬܼܵܒܼܵܐ ܐܲܠܵܗܵܝܵܐ: ܠܵܐ ܫܵܒܹ̇ܩ
ܕܗܵܟܲܢܵܐ ܢܸܤܬܲܟܲܠ: ܐܘܿ ܚܲܟܿܝܼ̈ܡܹܐ. ܡܒܲܠܒܿܠܝܼܢ ܐܢ̄ܬܿܘܿܢ ܓܹܝܪ ܩܸܪܝܵܢܵܐ:
ܕܡܵܘܒܿܠܝܼܢ ܐܢ̄ܬܿܘܿܢ ܚܲܝܠܵܐ ܕܤܘܼܟܵܠܵܐ ܠܡܸܕܸܡ ܕܠܵܐ ܙܵܕܹܩ. ܘܵܠܹ̇ܐ
ܗ̄ܘ̣ܵܐ ܠܟܼܘܿܢ ܓܹܝܪ: ܕܟܼܠ ܚܘܼ̈ܫܵܒܼܝܼܢ ܬܸܫܒܘܿܢ ܠܡܲܫܡܲܥܬܹܗ
ܕܲܡܫܝܼܚܵܐ: ܐܲܝܟܼ ܕܲܟܼܬܼܝܼܒܼ. ܐܝܼܬܼܵܘܗܝ ܗ̄ܘ̣ܵܐ ܓܹܝܪ ܐܲܠܵܗܵܐ: ܕܡܪܲܥܸܐ
ܠܥܵܠܡܵܐ ܥܲܡ ܪܲܒܿܘܼܬܹܗ: ܒܲܡܫܝܼܚܵܐ. ܒܗܵܝ̇ ܓܹܝܪ ܕܡܸܬܼܪܲܥܹܝܢ
ܗ̣̄ܘܲܝܢ ܒܲܡܫܝܼܚܵܐ: ܬܲܪܥܘܼܬܲܢ ܥܲܡ ܐܲܠܵܗܵܐ ܐܲܒܼܵܐ ܗܵܘ̇ܝܵܐ ܗ̄ܘ̣ܵܬܼ.
ܠܵܐ ܗ̄ܘ̣ܵܐ ܓܹܝܪ ܐ̄ܚܪܹܢܵܐ ܠܒܲܪ ܡܸܢܹܗ ܗ̄ܘ̣ ܒܲܟܼܝܵܢܵܐ ܐܲܠܵܗܵܐ ܡܸܠܬܼܵܐ
ܕܡܸܢܹܗ. ܠܵܐ ܓܹܝܪ ܐܸܤܬܼܓܸܦ ܡܸܕܸܡ ܟܝܵܢܹܗ ܕܲܒܼܪܵܐ: ܐܵܦܸܢ ܗܘ̤ܵܐ
ܒܲܪܢܵܫܵܐ. ܐܝܼܬܼܵܘܗܝ ܗ̄ܘ̣ܵܐ ܓܹܝܪ ܗ̤ܘ ܟܲܕܼ ܗ̤ܘ ܚܲܕܼ: ܥܲܡ ܕܓܘܼܫܡܹܗ.
ܕܬܲܪܥܘܼܬܼܵܐ ܕܹܝܢ ܗܘ̤ܵܬܼ ܠܲܢ ܒܲܡܫܝܼܚܵܐ: ܘܲܕܼܗ̤ܘ ܐܝܼܬܼܵܘܗܝ ܫܲܝܢܲܢ:
ܡ̇ܢ ܡܲܡܪܲܚ ܕܠܵܐ ܡܹܐܡܲܪ؟ ܗ̤ܘܝܘܼ ܓܹܝܪ ܠܘܼܪܚܵܐ ܘܬܲܪܥܵܐ: ܘܒܹܗ
ܥ̣ܡܲܪ ܟܠܹܗ ܡܘܼܠܵܝܵܐ ܕܐܲܠܵܗܘܼܬܼܵܐ ܓܘܼܫܡܵܢܵܐܝܼܬܼ.
ܐܸܠܵܐ ܬܘܼܒܼ ܙܵܩܹ̇ܦ ܠܝܼ ܐܸܕܢܹܗ ܠܫܸܡܥܵܗ̇ ܕܗܵܕܹܐ: ܗܵܢܵܐ
ܡܲܪܝܼܪܵܐ ܘܥܵܫܘܿܩܵܐ ܨܢܝܼܥܵܐ ܘܐܸܡܲ݁ܪ: ܐܸܢ ܐ̄ܚܪܹܢܵܐ ܗ̄ܘ̣ ܠܲܢ ܗܵܘ̇
ܕܲܥܡܲܪ: ܘܲܐ̄ܚܪܹܢܵܐ ܗ̄ܘ̣ ܗܵܘ̇ ܕܐܸܬܼܥܡܲܪ ܒܹܗ: ܐܲܝܟܲܢܵܐ ܠܵܐ ܐܵܠ̇ܨܵܐ
ܕܢܸܬܼܦܲܪܫܘܼܢ ܩܢܘܿܡܹ̈ܐ ܘܢܸܬܼܝܲܕܼܥܘܼܢ ܝܑܼܚܝܼܕܼܵܐܝܼܬܼ؟ ܐܸܡܲܪ ܠܝܼ:
ܘܐܲܝܟܵܐ ܗ̣̄ܝ ܡܸܟܹܝܠ ܗܵܝ̇ ܕܚܲܕܼ ܦܲܪܨܘܿܦܵܐ؟ ܚܲܕܼ ܓܹܝܪ ܦܲܪܨܘܿܦܵܐ:
ܐܵܡ̇ܪܝܼܢ: ܕܐܝܼܬܼܵܘܗܝ ܕܲܡܫܝܼܚܵܐ. ܐܸܢ ܕܹܝܢ ܬܪܹܝܢ ܩܢܘܿܡ̈ܝܼܢ ܕܡܸܬܼܦܲܪܫܝܼܢ
ܡ̣ܢ ܚܕܼܵܕܹ̈ܐ ܢܸܗܘܘܿܢ: ܗܵܘܹ̇ܝܢ ܠܗܘܿܢ ܘܲܬܼܪܹܝܢ ܦܲܪ̈ܨܘܿܦܝܼܢ. ܐܸܠܵܐ
ܢܵܡܘܿܤܵܐ ܡܲܥܠܝܼܢ ܐܲܝܟܼ ܕܲܫܦܲܪ ܠܗܘܿܢ ܘܐܵܡ̇ܪܝܼܢ: ܕܲܡܦܲܪܫܝܼܢܲܢ
pb. 561
ܩܢܘܿܡܹ̈ܐ: ܘܲܡܚܲܕܝܼܢܲܢ ܦܲܪܨܘܿܦܵܐ. ܘܐܲܝܟܲܢܵܐ ܠܵܘ ܫܵܛܝܼܘܼܬܼܵܐ ܗ̄ܝ̣
ܗܵܕܹܐ: ܘܲܕܼܠܵܐ ܫܸܡܥܵܐ: ܘܡ̣ܢ ܗܵܠܹܝܢ ܕܠܵܐ ܗܵܘ̈ܝܵܢ؟ ܒܲܡܫܝܼܚܵܐ
ܗ̄ܘ̣ ܓܹܝܪ: ܐܲܝܟܼ ܕܐܸܡ̇ܪܹܬܼ: ܕܲܐ̄ܚܪܹܢܵܐ ܗ̄ܘ̣ ܟܝܵܢܵܐ ܕܒܸܤܪܵܐ ܡ̣ܢ
ܕܡܸܠܬܼܵܐ: ܗܵܘ̇ ܕܲܗܘ̤ܵܐ ܥܲܡܹܗ ܚܲܕܼ ܐܝܼܬܼ ܠܡܸܕܲܥ. ܡܸܛܠ ܕܹܝܢ
ܕܚܲܕܼ ܒܪܵܐ ܘܡܵܪܝܵܐ ܐܵܡ̇ܪܝܼܢ ܟܬܼܵܒܹ̈ܐ: ܐܵܦ ܡܲܫܠܡܵܢܘܼܬܼܵܐ
ܕܗܲܝܡܵܢܘܼܬܼܵܐ ܗܵܟܲܢܵܐ ܐܝܼܬܼ ܒܵܗ̇: ܐܲܥܸܠܢ ܚ̄ܢܲܢ ܕܹܝܢ ܚܢܲܢ ܚܕܲܝܘܼܬܼܵܐ
ܕܠܵܐ ܡܸܬܼܦܲܪܫܵܐ: ܕܗܘ̤ܵܬܼ ܠܡܸܠܬܼܵܐ ܕܡ̣ܢ ܐܲܒܼܵܐ ܥܲܡ ܦܲܓܼܪܵܐ:
ܕܐܝܼܬܼ ܒܹܗ ܢܲܦܫܵܐ ܡܠܝܼܠܬܼܵܐ: ܡܵܘܕܹܝܢܲܢ ܕܚܲܕܼ ܐܝܼܬܼܵܘܗܝ ܒܪܵܐ:
ܘܚܲܕܼ ܐܝܼܬܼܵܘܗܝ ܡܫܝܼܚܵܐ: ܘܡܸܛܠ ܕܚܲܕܼ ܗ̄ܘ̣ ܒܪܵܐ: ܚܲܕܼ ܦܲܪܨܘܿܦܵܐ
ܐܵܡ̇ܪܝܼܢܲܢ: ܟܲܕܼ ܢܵܩ̇ܦܝܼܢܲܢ ܒܟܼܠܕܘܼܟ ܠܟܼܵܪܘܿܙܘܼܬܼܵܐ ܐܲܠܵܗܵܐ: ܘܲܠܗܵܢܘܿܢ
ܕܡ̣ܢ ܪܹܫܝܼܬܼܵܐ ܗܘ̤ܵܘ ܚܲܙܵܝܹ̈ܐ ܘܲܡܫܲܡ̈ܫܵܢܹܐ ܕܝܼܠܵܗ̇ ܕܡܸܠܬܼܵܐ. ܠܗܵܢܘܿܢ
ܕܹܝܢ ܕܲܠܒܲܪ ܡ̣ܢ ܗܵܕܹܐ ܡܸܕܸܡ ܐ̄ܚܪܹܝܢ ܡܸܤܬܲܟܿܠܝܼܢ: ܘܲܒܼܫܘܼ̈ܐܵܠܹܐ
ܤܲܟܼ̈ܠܹܿܐ ܕܲܫ̈ܟܼܵܚܵܬܼܗܘܿܢ: ܠܡܸܕܸܡ ܕܠܵܐ ܦܐܸܐ ܫܵܪܟܿܝܼܢ: ܕܵܚ̇ܩܝܼܢܲܢ ܡ̣ܢ
ܫܵܘܬܵܦܘܼܬܲܢ: ܟܲܕܼ ܐܵܡ̇ܪܝܼܢܲܢ ܠܗܘܿܢ: ܕܙܸܠܘ ܒܙܲܗܪܵܐ ܕܢܘܼܪܟܼܘܿܢ:
ܘܲܒܼܫܲܠܗܹܒܼܝܼܬܼܵܐ ܕܝܲܩܕܵܢܟܼܘܿܢ.
ܡܸܛܠ ܕܹܝܢ ܕܝܵܠܹ̇ܦ ܐ̄ܢܵܐ: ܕܐ̄ܢܵܫ̈ܝܼܢ ܡ̣ܢ ܤܲܟܼ̈ܠܹܐ ܡܸܬܼܟܲܪܟܝܼܢ
ܘܐܵܡ̇ܪܝܼܢ: ܕܠܸܒܼܟܲܬ̤ ܠܲܡ ܠܘܵܬܼ ܟܠܗܘܿܢ ܐܲܦܸܤܩ̈ܘܿܦܹܐ ܕܡܲܕܢܚܵܐ
ܒܝܼܫܘܼܬܼ ܬܲܪܥܝܼܬܹܗ ܕܢܸܤܛܘܿܪܝܼܣ: ܘܲܕܼܫܲܦܝܼܪ ܠܲܡ ܐܝܼܬܹܝܗ̇
ܐܵܡ̇ܪܝܼܢ: ܘܲܕܼܙܵܕܹܩ ܠܲܡ ܠܵܗ̇ ܠܡܸܩܲܦ: ܨܒܹܿܝܬܼ ܐܵܦ ܗܵܕܹܐ
ܠܡܵܘܕܵܕܵܥܘܼ. ܟܠܗܘܿܢ ܗܵܠܹܝܢ ܐܲܦܸܤܩ̈ܘܿܦܹܐ ܕܡܲܕܼ ܢܚܵܐ: ܥܲܡ ܡܝܼܩܪܵܐ
ܡܵܪܝ ܝܘܿܚܲܢܵܢ ܐܲܦܸܤܩܘܿܦܵܐ ܕܐܲܢܛܝܘܿܟܼ: ܒܝܲܕܼ ܟܬܼܵܒܼܵܐ ܓܲܠܝܵܐܬܼ
pb. 562
ܠܟܼܠ ܐ̄ܢܵܫ ܐܵܘܕܲܥ̣ܘ: ܕܪܙܼܥܵܐ ܐܝܼܬܼܵܘܗܝ ܝܘܼܠܦܵܢܹܗ ܕܢܸܤܛܘܿܪܝܼܣ:
ܘܚܲܝܒܼܘܼܗܝ ܘܐܲܚܪܡܘܼܗܝ ܥܲܡܲܢ: ܘܲܠܝܘܼܠܦܵܢܵܐ ܕܲܫܠܝܼ̈ܚܹܐ ܩܲܕܝܼܫܹ̈ܐ
ܘܕܲܐܒܼܵܗܲܝ̈ܢ: ܫܵܠܡ̇ܝܼܢ. ܘܐܸܡ݂ܲܪܘ ܐܵܦ ܗܸܢܘܿܢ ܥܲܡܲܢ: ܕܝܵܠܕܲܬܼ
ܐܲܠܵܗܵܐ ܗ̣̄ܝ ܒܬܼܘܼܠܬܼܵܐ ܩܲܕܝܼܫܬܼܵܐ: ܟܲܕܼ ܠܵܐ ܐܵܘܤܸܦ̣ܘ ܕܝܵܠܕܲܬܼ
ܡܫܝܼܚܵܐ ܗ̣̄ܝ ܝܵܠܕܲܬܼ ܒܲܪܢܵܫܵܐ: ܐܲܝܟܼ ܕܐܵܡ̇ܪܝܼܢ ܗܵܠܹܝܢ ܕܵܘܲܝ̈ܵܐ ܕܫܵܠܡ̇ܝܼܢ
ܠܢܸܤܛܘܿܪܝܼܣ. ܐܸܠܵܐ ܐܸܡ݂ܲܪܘ ܓܲܠܝܵܐܝܼܬܼ: ܕܚܲܕܼ ܐܝܼܬܼܵܘܗܝ ܡܫܝܼܚܵܐ
ܘܲܒܼܪܵܐ ܘܡܵܪܝܵܐ. ܗܵܘ̇ ܕܡ̣ܢ ܐܲܠܵܗܵܐ ܐܲܒܼܵܐ: ܩܕܼܵܡ ܟܠܗܘܿܢ ܥܵܠܡܹ̈ܐ
ܐܸܬܼܠܸܕܸܼ. ܕܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ. ܒܙܲܒܼ̈ܢܹܐ ܕܹܝܢ ܐ̄ܚܪ̈ܵܝܹܐ: ܗ̤ܘ
ܟܲܕܼ ܗ̤ܘ ܒܲܒܼܤܲܪ ܐܸܬܼܝܼܠܸܕܼ ܡ̣ܢ ܐܲܢ̄ܬܿܬܼܵܐ: ܘܠܹܗ ܟܲܕܼ ܠܹܗ ܐܵܡ̇ܪܝܼܢ
ܕܐܝܼܬܼܵܘܗܝ ܡܫܲܠܡܵܢܵܐ ܒܐܲܠܵܗܘܼܬܹܗ: ܘܲܡܫܲܠܡܵܢܵܐ ܒܐ̄ܢܵܫܘܼܬܹܗ. ܚܲܕܼ
ܦܲܪܨܘܿܦܵܐ ܡܵܘܕܹܝܢ ܕܐܝܼܬܼܵܘܗܝ: ܟܲܕܼ ܠܵܐ ܡܦܲܪܫܝܼܢ ܒܡܸܕܸܡ: ܠܲܬܼܪܹܝܢ
ܒܢܝܼ̈ܢ ܐܵܘ ܠܲܬܼܪܹܝܢ ܡܫܝܼ̈ܚܝܼܢ. ܐܸܢ ܐ̄ܢܵܫ ܗܵܟܹܝܠ ܛܵܠܹ̇ܡ ܠܗܘܿܢ:
ܕܲܠܒܲܪ ܡ̣ܢ ܗܵܠܹܝܢ ܡܗܲܝܡܢܝܼܢ: ܠܵܠ ܢܲܫܪܹܗ. ܐܸܠܵܐ ܐܲܝܟܼ ܡܲܛܥܝܵܢܵܐ
ܘܐܲܝܟܼ ܒܪܹܗ ܕܐܵܟܹ̇ܠ ܩܲܪܨܵܐ: ܠܒܲܪ ܢܸܫܬܿܕܸܐ: ܕܠܵܐ ܢܕܲܚܘܼܢ
ܠܐܲܝܠܹܝܢ ܕܨܵܒܹ̇ܝܢ ܕܲܬܼܪܝܼܨܵܐܝܼܬܼ ܢܸܪܕܘܿܢ. ܘܐܢ ܗ̤ܘ ܕܲܟܼܬܼܝܼ̈ܒܼܵܬܼܵܐ
ܢܲܝܬܿܘܿܢ ܐܲܝܟܼ ܕܡ̣ܢ ܦܲܪܨܘܿܦܵܐ ܕܐ̄ܢܵܫܵܐ ܪܵܘܡ̈ܒܹܐ: ܗܵܠܹܝܢ ܠܵܐ ܢܸܬܼܩܲܒ̈ܠܵܢ.
ܚܕܼܵܐ ܓܹܝܪ ܙܒܲܢ ܐܵܘܕܝܼܘ ܠܗܘܿܢ ܒܲܟܼܬܼܵܒܼܵܐ ܗܲܝܡܵܢܘܼܬܼܗܘܿܢ: ܘܬܼܘܼܒܼ
ܡܸܕܸܡ ܕܲܠܩܘܼܒܼܠܵܐ ܠܡܸܟܼܬܲܒܼ ܠܑܵ ܡܸܫܟܿܚܝܼܢ.
ܫܸܠܡܲܬ̤ ܐܸܓܲܪܬܵܐ ܕܫܲܕܲܪ ܩܘܼܪܸܠܘܿܣ ܠܛܘܼܒܼܵܢܵܐ ܘܵܠܹ̇ܪܝܵܢܵܐ.
pb. 563
ܠܝܼܒܹܝܠܘܿܣ ܕܐܸܬܼܝܼܗܸܒܼ ܠܪܹܫܵܐ ܕܐܲܦܸܤܩ̈ܘܿܦܹܐ ܩܘܼܪܸܠܘܿܣ: ܡ̣ܢ
ܦܵܘܠܹܐ ܐܲܦܸܤܩܘܿܦܵܐ ܕܲܚܡܸܨ: ܕܐܸܬܲܕܲܪ ܡ̣ܢ ܝܘܿܚܲܢܵܢ.
ܠܡܵܪܝ ܕܡܸܛܠ ܟܠܗܹܝܢ ܩܲܕܝܼܫܵܐ ܘܚܲܤܝܵܐ ܐܲܦܸܤܩܘܿܦܵܐ
ܩܘܼܪܸܠܘܿܣ: ܦܵܘܠܘܿܣ. ܒܡܵܪܲܢ ܫܠܵܡ.
ܕܵܚܠܲܝ̈ ܠܐܲܠܵܗܑܵܐ ܘܙܲܟܵܝܹ̈ܐ ܡܲܠܟܼܝ̈ܢ: ܟܲܕܼ ܡܚܵܘܹ̇ܝܢ ܐܲܟܼܝܼܦܘܼܬܼܵܐ
ܘܲܫܩܵܠ ܛܲܥܬܵܐ: ܗܵܘ̇ ܕܡ̣ܢ ܠܥܸܠ ܩܢܹܝܢ ܠܘܵܬܼ ܐܲܝܠܹܝܢ ܕܐܝܼܬܲܝܗܘܿܢ
ܒܫܘܼܥܒܵܕܼܗܘܿܢ: ܘܝܲܬܿܝܼܪܵܐܝܼܬܼ ܠܘܵܬܼ ܥܹ̈ܕܵܬܼܵܐ ܩܲܕܝܼ̈ܫܬܼܵܐ ܕܐܲܠܵܗܵܐ:
ܘܲܠܘܵܬܼ ܗܲܝܡܵܢܘܼܬܼܵܐ ܬܪܝܼܨܬܵܐ ܘܫܲܪܝܼܪܬܵܐ ܘܲܕܼܟܼܝܼܬܼܵܐ: ܗܵܝ̇ ܕܡ̣ܢ
ܐܲܒܼܵܝ̈ܗܘܿܢ ܩܲܒܸܠ̣ܘ. ܟܬܼܝܼ̈ܒܼܵܬܼܵܐ ܫܲܕܼܪܲܘ ܒܝܲܕܼ ܢܲܨܝܼܚܵܐ ܛܪܝܼܒܘܼܢܵܐ
ܘܢܘܿܛܵܪܵܐ ܐܵܪܝܼܤܛܘܼܠܵܐܘܿܣ ܠܘܵܬܼ ܚܲܤܝܘܼܬܼܵܟܼ: ܘܲܠܘܵܬܼ ܚܲܤܝܵܐ
ܘܩܲܕܝܼܫܵܐ ܐܲܦܸܤܩܘܿܦܵܐ ܝܘܿܚܲܢܵܢ: ܘܲܠܘܵܬܼ ܚܲܤܝܵܐ ܘܩܲܕܝܼܫܵܐ ܐܲܒܼܘܼܢ
ܐܵܩܵܩ ܐܲܦܸܤܘܿܦܵܐ ܕܚܵܠܵܒܿ: ܕܦܵܩ̈ܕܵܢ ܕܟܲܕܼ ܡܸܬܼܘܲܥܕܝܢ ܐܢ̄ܬܿܘܿܢ:
ܐܵܘ ܐܲܦܝܼ̈ܢ ܠܘܼܩܒܲܠ ܐܲܦܝ̈ܢ: ܐܵܘ ܒܪܸܥܝܵܢܵܐ ܫܲܠܡܵܐ: ܬܸܬܿܠܘܼܢ ܫܪܵܝܵܐ
ܠܪ̈ܘܼܥܵܡܹܐ ܕܲܢܒܲܥ̣ܘ: ܒܲܝܢܵܬܼ ܪ̈ܵܚܡܲܝ ܐܲܠܵܗܵܐ ܐܲܦܸܤܩ̈ܘܿܦܹܐ ܐܲܝܠܹܝܢ
ܕܒܲܐܦܸܤܘܿܣ ܐܸܬܼܟܲܢܲܫܘ ܘܒܲܝܢܵܬܲܢ ܕܝܼܠܲܢ. ܘܲܒܼܥܹ̈ܕܵܬܼܵܐ ܩܲܕܝܼ̈ܫܵܬܼܵܐ
ܕܐܲܠܵܗܵܐ: ܫܲܝܢܵܐ ܗܵܘ̇ ܕܲܡܪܲܥܸܐ ܠܐܲܠܵܗܵܐ ܬܲܪܡܘܿܢ. ܘܲܬܼܛܠܘܼܢ
ܠܲܫܓܼܘܼ̈ܫܹܝܐ ܕܗܵܘܹ̇ܝܢ ܐܲܡܝܼܢܵܐܝܼܬܼ ܒܥܹ̈ܕܵܬܼܵܐ ܩܲܕܝܼ̈ܫܵܬܼܵܐ ܕܐܲܠܵܗܵܐ: ܬܸܫܠܡܘܼܢ
ܕܹܝܢ ܘܲܠܩܵܬܼܵܪܵܤܝܼܣ ܕܢܸܤܛܘܿܪܝܼܣ: ܘܬܲܚܪܡܘܼܢ ܠܝܘܼܠܦܵܢܹܗ
ܒܝܼܫܵܐ.
pb. 564
ܟܲܕܼ ܗܵܟܹܝܠ ܩܲܒܸܠ̣ܘ ܟܬܼܝܼ̈ܒܼܵܬܼܵܐ ܗܵܠܹܝܢ ܕܕܸܚܠܲܬܼ ܐܲܠܵܗܵܐ ܘܲܕܼܪܸܚܡܲܬܼ
ܠܲܡܫܝܼܚܵܐ: ܩܲܕܝܼܫܵܐ ܐܲܦܸܤܩܘܿܦܵܐ ܚܘܿܚܲܢܵܢ ܗܵܘ̇ ܕܐܲܡܝܼܪ ܡ̣ܢ ܠܥܸܠ:
ܘܩܲܕܝܼܫܵܐ ܐܲܦܸܤܩܘܿܦܵܐ ܐܵܩܵܩ: ܘܐܸܬܼܚܲܫܲܒܼܘ ܕܤܲܓܝܼ̈ܐܵܬܼܵܐ ܐܝܼܬܼ ܕܲܤܢܝܼ̈ܩܵܢ
ܥܲܠ ܦܸܓܼܥܟܼܘܿܢ ܕܐܲܦܝܼ̈ܢ ܠܘܼܩܒܲܠ ܐܲܦܝܼ̈ܢ: ܡܸܛܠ ܕܠܵܐ ܙܲܒܼܢܵܐ
ܤܲܓܝܼܐܵܐ ܢܸܥܒܲܪ ܒܬܼܘܼܗܵܝܵܐ: ܫܲܕܪܘܼܢܝ ܠܘܵܬܼ ܚܲܤܝܘܼܬܼܵܟܼ: ܕܐܸܬܼܪܲܢܸܐ
ܥܲܡ ܩܲܕܝܼܫܘܼܬܼܵܟܼ: ܕܒܲܐܝܢܵܐ ܙܢܵܐ ܙܵܕܹܩ ܗܵܠܹܝܢ ܕܫܲܝܢܵܐ ܙܗܝܼܪܵܐܝܼܬܼ
ܢܸܬܼܦܲܪ̈ܢܤܵܢ: ܘܲܠܗܵܢܵܐ ܤܘܼܥܪܵܢܵܐ ܡܝܲܬܿܪܵܐ: ܫܘܼܠܵܡܵܐ ܕܚܵܫܲܚ
ܘܡܵܘܬܲܪ ܡܤܝܼܡ. ܟܲܕܼ ܗܵܟܹܝܠ ܐܸܬܹ̇̄ܝܬܼ ܘܦܸܓܼ̇ܥܹܬܼ ܘܡܲܠ̇ܠܹܬܼ:
ܐܸܫ̇ܟ̇ܚܹܬܼ ܠܚܲܤܝܘܼܬܼܵܟܼ ܕܲܡܥܲܬܿܕܼܵܐ ܢܝܼܚܵܐܝܼܬܼ ܘܲܡܫܲܝܢܵܐܝܼܬܼ ܘܐܲܝܟܼ ܡܵܐ
ܕܲܦܐܸܐ ܠܟܼܵܗ̈ܢܹܐ: ܠܲܡܦܲܪܢܸܤܘܼ ܤܘܼܥܪܵܢܵܐ ܗܵܢܵܐ. ܐܵܦ ܕܹܝܢ ܟܬܼܵܒܼܵܐ
ܝܸܗ̇ܒܹܿܬܼ ܠܩܲܕܝܼܫܘܼܬܼܵܟܼ ܕܡܲܟܼܪܸܙ ܗܲܝܡܵܢܘܼܬܼܵܐ: ܗܵܝ̇ ܕܡ̣ܢ ܐܲܒܼܵܗ̈ܬܼܵܐ
ܩܲܒܸܠܢܲܢ: ܬܪܝܼܨܵܬܵܐ: ܘܲܕܼܠܵܐ ܛܘܼܠܫܵܐ. ܗܵܘ̇ ܕܪܹܫܝܵܐ ܐܝܼܬܼܵܘܗܝ
ܗ̄ܘ̣ܵܐ: ܘܲܕܼܫܵܘܹ̇ܐ ܠܥܲܡܠܵܐ ܘܲܠܨܲܝܼܦܘܼܬܼܵܐ. ܡܸܛܠ ܕܹܝܢ ܕܙܵܕܹܩ
ܗ̄ܘ̣ܵܐ ܕܐܵܦ ܗܵܠܹܝܢ ܕܥܲܠ ܢܸܤܛܘܿܪܝܼܣ ܢܸܤ̈ܒܼܵܢ ܦܤܵܩܵܐ: ܗܵܘ̇
ܕܡ̣ܢ ܠܥܸܠ ܫ̣ܦܲܪ ܠܲܢ: ܥܵܒܹ̇ܕܼ ܐ̄ܢܵܐ ܟܲܕܼ ܩܲܪܝܼܒܼ ܐ̄ܢܵܐ ܠܘܵܬܼ ܚܲܤܝܘܼܬܼܵܟܼ
ܕܩܲܪܝܼܒܼܵܐ: ܟܬܼܵܒܼܵܐ ܗܵܢܵܐ. ܒܝܲܕܼ ܗܵܘ̇ ܕܡܵܘܕܸܐ ܐ̄ܢܵܐ: ܕܲܡܩܲܒܿܠܝܼܢܲܢ
ܠܟܼܝܼܪܵܛܘܿܢܝܼܵܐ ܕܚܲܤܝܵܐ ܘܩܲܕܝܼܫܵܐ ܡܲܟܤܝܼܡܵܢܘܿܣ. ܘܲܠܩܵܬܼܵܪܵܤܝܼܣ
ܕܢܸܤܛܘܿܪܝܼܣ: ܗܵܘ̇ ܕܡ̣ܢ ܩܕܼܝܼܡ ܗܘ̤ܵܐ ܒܩܘܼܤܛܲܢܛܝܼܢܵܦܘܿܠܝܼܣ
ܫܵܠܡ̇ܝܼܢܲܢ. ܘܡܲܚܪܡܝܼܢܲܢ ܠܐܲܝܠܹܝܢ ܕܒܲܡܢܵܬܼܵܐ ܕܡܲܠܦܵܢܘܼܬܼܵܐ: ܪܲܫܝܼܥܵܐܝܼܬܼ
ܐܲܡܝܼܪܵܢ ܠܹܗ. ܘܚܲܕܼܝܵܐܝܼܬܼ ܡܩܲܒܿܠܝܼܢܲܢ ܠܫܵܘܬܵܦܘܼܬܼܵܐ ܕܟܼܝܼܬܼܵܐ ܘܫܲܪܝܼܪܬܵܐ
ܕܲܠܘܵܬܼܟܼܘܿܢ: ܐܲܝܟܼ ܡܝܵܤܵܐ ܕܐܸܬܼܝܗܸܒܼ ܠܕܼܸܚܠܲܬܼ ܐܲܠܵܗܵܐ ܕܒܼܵܟܼ ܡܸܢܲܢ:
pb. 565
ܡܸܛܠ ܡܸܬܼܒܲܪܢܫܵܢܘܼܬܼܵܐ ܕܐܲܠܵܗܵܐ ܡܸܠܬܼܵܐ. ܗܵܘ̇ ܕܐܵܦ ܫܲܒܲܚܬܿ:
ܘܐܲܝܟܼ ܗܲܝܡܵܢܘܼܬܼܵܐ ܕܝܼܠܵܟܼ ܩܲܒܸܿܠܬܹܗ: ܕܗܵܘ̇ ܕܐܵܦ ܦܸܚܡܵܐ ܕܝܼܠܹܗ
ܤܝܼܡ ܒܲܟܼܬܼܵܒܼܵܐ ܗܵܢܵܐ. ܘܲܒܼܗܵܕܹܐ ܫܵܘܬܵܦܘܼܬܼܵܐ ܕܟܼܝܼܬܼܵܐ: ܫܪܵܝܵܐ ܝܵܗ̇ܒܝܼܢ
ܚ̄ܢܲܢ: ܠܟܼܠܗܹܝܢ ܐܲܝܠܹܝܢ ܕܒܲܡܨܲܥܬܼܵܐ ܡ̣ܢ ܬܪ̈ܲܝܗܘܿܢ ܓܲܒܼ̈ܐ ܐܲܝܟܼ
ܕܒܲܫܓܼܫܝܵܐ ܗ̤ܘܲܝ̈. ܘܥܵܛܦܝܼܢܲܢ ܒܛܲܝܒܿܘܼܬܼܵܐ ܕܐܲܠܵܗܵܐ: ܠܘܵܬܼ ܫܲܝܢܵܐ
ܩܲܕܝܼܡܵܝܵܐ ܕܥܹ̈ܕܵܬܼܵܐ.
ܐܸܓܲܪܬܵܐ ܕܡܵܪܝ ܝܘܿܚܲܢܢ ܕܐܲܢܛܝܘܿܟܼ ܕܲܠܘܵܬܼ ܡܵܪܝ ܩܘܼܪܸܠܘܿܣ
ܕܐܵܠܹܟܼܤܲܢܕܪܝܼܵܐ.
ܠܚܲܤܝܵܐ ܘܪܵܚܹܡ ܐܲܠܵܗܵܐ ܐܲܦܸܤܦܘܿܦܵܐ ܩܘܼܪܸܠܘܿܣ: ܝܘܿܚܲܢܵܢ
ܒܡܵܪܲܢ ܫܠܵܡ.
ܩܕܵܡ ܙܲܒܼܢܵܐ: ܡ̣ܢ ܦܘܼܩܕܵܢܵܐ ܕܕܲܚ̈ܠܲܝ ܐܲܠܵܗܵܐ ܡܲܠܟܼܝ̈ܢ ܐܸܬܼܦܩܸܕܼܸ:
ܕܤܘܼܢܗܵܕܘܿܣ ܕܪ̈ܵܚܡܲܝ ܐܲܠܵܗܵܐ ܐܲܦܸܤܩ̈ܘܿܦܹܐ ܒܐܲܦܸܤܘܿܣ
ܡܸܛܪܵܦܘܿܠܝܼܣ ܬܸܬܼܟܲܢܲܫ: ܡܸܛܠ ܤܘܼܥܪ̈ܵܢܹܐ ܥܹܕܬܵܢܵܝܹ̈ܐ ܘܗܲܝܡܵܢܘܼܬܼܵܐ
ܬܪܝܼܨܬܵܐ. ܟܲܕܼ ܕܹܝܢ ܐܸܬܼܘܲܥܲܕܼܢܲܢ ܐܵܦ ܚܢܲܢ ܠܲܡܕܼܝܼܢ̄ܬܼܵܐ ܗܵܝ̇
ܕܐܸܬܼܥܲܗܕܲܬ̤: ܘܲܥܛܲܦܢܲܢ ܟܲܕܼ ܠܵܐ ܦܓܲܥܢ ܚ̄ܢܲܢ ܒܹܿܚܕܼܵܕܹ̈ܐ. ܝܲܐܝܼܪܬܵܐ
ܗ̣̄ܝ ܕܹܝܢ: ܕܲܠܥܸܠ̈ܠܵܬܼܵܐ ܕܦܵܠܓ̈ܘܼܬܼܵܐ ܒܙܲܒܼܢܵܐ ܕܫܲܝܢܵܐ ܠܡܹܐܡܲܪ.
ܐܸܤܬܲܕܲܡ ܕܹܝܢ ܠܘܵܬܼ ܦܵܠܓ̈ܘܼܬܼܵܐ ܥܹ̈ܕܵܬܼܵܐ ܡ̣ܢ ܗܵܕܹܐ: ܡܸܛܠ
ܕܙܵܕܹܩ ܗ̄ܘ̣ܵܐ ܕܗܵܕܹܐ ܝܲܬܼܝܼܪܵܐܝܼܬܼ ܠܡܹܐܨܲܦ ܠܟܼܠ ܐ̄ܢܵܫ:
pb. 566
ܕܐܲܝܟܲܢܵܐ ܢܹܐܬܼ̈ܝܵܢ ܠܐܵܘܝܘܼܬܼܵܐ: ܟܲܕܼ ܡܸܬܿܬܿܪܝܼܡܵܐ ܡ̣ܢ ܡܨܲܥܬܼܵܐ ܟܠܵܗ̇
ܦܵܠܓܘܼܬܼܵܐ. ܐܵܦ ܕܵܚ̈ܠܲܝ ܠܐܲܠܵܗܵܐ ܘܪ̈ܵܚܡܲܝ ܠܲܡܫܝܼܚܵܐ ܡܲܠܟܹ̈ܐ ܗ̤ܝ
ܗܵܕܹܐ ܕܬܸܗܘܸܐ ܦܩܲܕܼܘ: ܕܢܲܝܬܸܐ ܠܲܚܕܼܵܝܘܼܬܼܵܐ ܠܥܹ̈ܕܵܬܹܗ ܕܲܡܫܝܼܚܵܐ.
ܘܡܸܛܠܵܬܼܵܗ̇ ܕܝܼܠܵܗ̇ ܕܗܵܕܹܐ ܫܲܕܼܪܘ ܠܡܵܪܝ ܬܡܝܼܗܵܐ ܘܢܲܨܝܼܚܵܐ
ܛܪܝܼܒܘܼܬܼܵܐ ܐܵܪܝܼܤܛܘܼܠܵܐܘܿܣ: ܕܢܲܝܬܸܐ ܟܬܼܝܼ݁̈ܒܼܵܬܼܗܘܿܢ ܡܗܲܝܡ̈ܢܵܬܼܵܐ
ܕܦܵܩ̈ܕܵܢ: ܕܢܸܚܕܼܵܐ ܡ̣ܢ ܟܲܕܼܘܼ ܢܸܬܼܪܲܥܸܐ: ܘܲܢܪܝܼܡ ܠܟܸܫ̈ܠܹܐ ܡ̣ܢ
ܡܨܲܥܬܼܵܐ: ܘܲܢܪܲܝܲܚ ܠܟܼܠܗܹܝܢ ܕܠܘܼܚܵܐ ܘܲܠܟܼܠܵܠܵܗ̇ ܥܵܩܬܼܵܐ. ܚܢܲܢ ܕܹܝܢ
ܟܲܕܼ ܡܸܬܼܥܢܹܝܢ ܚ̄ܢܲܢ ܠܲܟܼܬܼܝܼ̈ܒܼܵܬܼܵܐ ܡܗܲܝ̈ܡܢܵܬܼܵܐ: ܘܡܸܚܕܼܵܐ ܘܒܲܪ
ܫܥܬܹܗ ܫܲܕܲܪܢܲܢ: ܠܡܵܪܝ ܩܲܕܼܝܼܫ ܒܟܼܠ ܪܵܚܹ̇ܡ ܐܲܠܵܗܵܐ ܐܲܦܸܤܩܘܿܦܵܐ
ܦܵܘܠܘܿܣ: ܟܲܕܼ ܫܸܦܪܲܬ̤ ܗܵܕܹܐ: ܐܵܦ ܠܩܲܕܝܼܫܵܐ ܚܲܤܝܵܐ ܐܲܒܼܘܼܢ
ܐܵܩܵܩ: ܘܲܠܪ̈ܵܚܡܲܝ ܐܲܠܵܗܵܐ ܐܲܦܸܤܩ̈ܘܿܦܹܐ ܕܲܠܘܵܬܲܢ. ܚܠܵܦ ܕܹܝܢ
ܙܗܝܼܪܘܼܬܼܵܐ ܤܲܓܝܼܐܬܼܵܐ ܗܵܕܹܐ ܥܒܲܕܼܢܲܢ: ܥܲܠ ܕܠܵܐ ܐܸܫܟܲܚܢܲܢ ܕܢܸܬܼܘܲܥܲܕܼ
ܠܘܵܬܼ ܚܕܼܵܕܹ̈ܐ: ܘܐܲܝܠܹܝܢ ܕܐܸܬܼܦܩܸܕܼ ܡ̣ܢ ܕܵܚ̈ܠܲܝ ܠܐܲܠܵܗܵܐ ܡܲܠܟܲܝ̈ܢ:
ܐܲܦܝܼ̈ܢ ܠܘܼܩܒܲܠ ܐܲܦܝܼ̈ܢ ܠܘܵܬܼ ܫܘܼܠܵܡܵܐ ܢܲܝܬܸܐ. ܟܲܕܼ ܦܲܩܸܕܼܢܵܝܗܝ:
ܕܒܼܕܼܘܼܟܿܬܲܢ ܘܲܚܠܵܦܲܝܢ ܘܲܒܼܦܲܪܨܘܿܦܵܐ ܕܝܼܠܲܢ: ܢܦܲܪܢܸܣ ܗܵܠܹܝܢ ܕܫܲܝܢܵܐ.
ܗܵܝ̇ ܕܐܝܼܬܹܝܗ̇: ܩܕܼܵܡ ܟܠܡܸܕܸܡ. ܡܸܬܸܠ ܕܹܝܢ ܠܕܵܚܠܲܬܸ ܐܲܠܵܗܵܐ
ܕܒܼܵܟܼ: ܤܝܵܡܵܐ ܐܲܝܢܵܐ ܕܡܸܢܲܢ ܫܲܘܝܵܐܝܼܬܼ ܗܘ̤ܵܐ ܡܸܛܠ ܡܸܬܼܒܲܪܢܵܫܢܘܼܬܼܵܐ
ܕܡܵܪ̈ܲܢ ܝܼܫܘܿܥ ܡܫܝܼܚܵܐ: ܗܵܘ̇ ܕܫܲܕܲܪܢܲܢ ܠܕܸܚܠܲܬܼ ܐܠܵܗܵܐ ܕܒܼܵܟܼ:
ܒܝܲܕܼ ܪܵܚܹ̇ܡ ܐܲܠܵܗܵܐ ܓܲܒܼܪܵܐ ܗܵܘ̇ ܕܐܸܬܼܥܲܗܲܕܼܢ ܡ̣ܢ ܠܥܸܠ:
ܕܐܝܼܬܼܵܘܗܝ ܗܵܢܵܐ.
ܡܸܛܠ ܕܹܝܢ ܒܬܼܘܼܠܬܼܵܐ ܝܵܠܕܲܬܼ ܐܲܠܵܗܵܐ: ܕܐܲܝܟܲܢ ܡܸܬܼܪܲܥܹܝܢܲܢ
pb. 567
ܘܐܵܡ̇ܪܝܼܢܲܢ: ܘܥܲܠ ܙܢܵܐ ܕܡܸܬܼܒܲܪܢܫܵܢܘܼܬܹܗ ܕܝܼܚܝܼܕܼܷܵܝܵܐ ܒܪܹܗ ܕܐܲܠܵܗܵܐ:
ܐܵܠܵܨܵܐܝܼܬܼ ܠܵܘ ܒܲܡܢܵܬܼܵܐ ܕܬܼܵܘܤܲܦܬܼܵܐ: ܐܸܠܵܐ ܒܐܵܕܼܫܹ̈ܐ ܕܫܘܼܪܵܪܵܐ: ܐܲܝܟܼ
ܕܡ̣ܢ ܠܥܸܠ ܡ̣ܢ ܟܬܼܵܒܹ̈ܐ ܩܲܕܝܼܫܹ̈ܐ: ܘܡ̣ܢ ܡܲܫܠܡܵܢܘܼܬܼܵܐ ܕܐܲܒܼ̈ܗܵܬܼܵܐ
ܩܲܕܝܼ̈ܫܹܐ: ܩܲܒܸܿܠܢܲܢ ܘܲܠܒܲܟܼܢܲܢ: ܒܟܲܪ̈ܝܵܬܼܵܐ ܐܸܡ̇ܪܝܼܢܲܢ: ܟܲܕܼ ܠܵܐ ܡܵܘܤܦܝܼܢ
ܚ̄ܢܲܢ ܟܠ ܟܠܹܗ ܡܸܕܸܡ: ܒܗܲܝܡܵܢܘܼܬܼܵܐ ܕܐܸܬܿܬܿܤܝܼܡܲܬ̤ ܡ̣ܢ ܐܲܒܼܵܗ̈ܬܼܵܐ
ܩܲܕܝܼ̈ܫܹܿܐ ܕܲܒܼܢܝܼܩܝܼܵܐ. ܐܲܝܟܼ ܓܹܝܪ ܕܩܕܸܡܢ ܐܸܡܲܪܢ: ܠܘܵܬܼ ܟܠܵܗ̇
ܝܑܼܕܲܥܬܼܵܐ ܕܕܸܚܠܲܬܼ ܐܲܠܵܗܵܐ ܤܵܦ̇ܩܵܐ: ܘܲܠܟܼܠܹܗ ܝܘܼܠܦܵܢܵܐ ܒܝܼܫܵܐ
ܕܗܲܪ̈ܵܛܝܼܩܘܿ ܡܒܲܛܠܵܐ. ܐܵܡܪܝܼܢ ܚ̄ܢܲܢ ܕܹܝܢ: ܟܲܕܼ ܦܵܤ̇ܥܝܼܢܲܢ ܥܲܠ
ܠܵܐ ܡܸܬܿܕܲܪ̈ܟܵܢܝܵܬܼܵܐ: ܐܸܠܵܐ ܒܬܼܵܘܕܝܼܬܼܵܐ ܕܲܡܚܝܼܠܘܼܬܲܢ: ܐܵܚ̇ܕܝܼܢܲܢ ܒܐܲܦܲܝ̈
ܗܵܠܹܝܢ ܕܒܼܵܥܹ̇ܝܢ ܠܡܹܐܬܼܵܐ ܥܠܲܝܢ: ܒܗܵܠܹܝܢ ܕܡܸܢܼܚܲܫܲܒܼܝܼܢ ܚ̄ܢܲܢ: ܕܲܡ̈ܥܲܠܝܵܢ
ܡ̣ܢ ܒܢܲܝ̈ ܐ̄ܢܵܫܵܐ.
ܡܵܘܕܝܼܢܲܢ ܗܵܟܹܝܠ ܠܡܵܪܲܢ ܝܼܫܘܿܥ ܡܫܝܼܚܵܐ: ܒܪܹܗ ܕܐܲܠܵܗܵܐ
ܝܑܼܚܝܼܕܼܵܝܵܐ: ܐܲܠܵܗܵܐ ܡܫܲܠܡܵܢܵܐ: ܘܒܲܪ ܐܲܢܵܫܵܐ ܡܫܲܠܡܵܢܵܐ ܡ̣ܢ ܢܲܦܫܵܐ
ܡܠܝܼܠܬܼܵܐ ܘܦܲܓܼܪܵܐ. ܕܡ̣ܢ ܩܕܼܵܡ ܥܵܠܡܹ̈ܐ ܡ̇ܢ ܐܸܬܼܝܼܠܸܕܼ ܡ̣ܢ ܐܲܒܼܵܐ
ܒܐܲܠܵܗܘܼܬܹܗ: ܒܫܘܼܠܵܡܵܐ ܕܹܝܢ ܕܝܵܘ̈ܡܵܬܼܵܐ: ܗ̤ܘ ܟܲܕܼ ܗ̤ܘ ܡܸܛܠܵܬܲܢ
ܘܡܸܛܠ ܦܘܼܪܩܵܢܲܢ: ܡ̣ܢ ܡܲܪܝܲܡ ܒܬܼܘܼܬܼܵܐ ܒܐ̄ܢܵܫܘܬܹܗ. ܒܲܪ
ܟܝܵܢܹܗ ܕܐܲܒܼܵܐ ܒܐܲܠܵܗܘܼܬܹܗ: ܘܒܲܪ ܟܝܵܢܲܢ ܕܝܼܠܲܢ ܒܐ̄ܢܵܫܘܼܬܹܗ.
ܚܕܼܵܝܘܼܬܼܵܐ ܓܹܝܪ ܗܘ̤ܵܬܼ: ܕܲܬܼܪܹܝܢ ܟܝܵܢܹ̈ܐ. ܘܥܲܠ ܗܵܕܹܐ: ܚܲܕܼ ܡܫܝܼܚܵܐ:
ܚܲܕܼ ܒܪܵܐ: ܚܲܕܼ ܡܵܪܝܵܐ ܡܵܘܕܼܝܢܲܢ. ܐܲܝܟܼ ܤܘܼܟܵܠܵܐ ܗܵܟܹܝܠ ܕܲܚܕܼܵܝܘܼܬܼܵܐ
ܗܵܕܹܐ ܕܠܵܐ ܒܘܼܠܒܵܠܵܐ: ܡܵܘܕܝܼܢܲܢ ܠܲܒܼܬܼܘܼܠܬܼܵܐ ܩܲܕܝܼܫܬܼܵܐ ܝܵܠܕܲܬܼ
ܐܲܠܵܗܵܐ: ܥܲܠ ܕܐܠܵܗܵܐ ܡܸܠܬܼܵܐ ܐܸܬܼܓܲܫܲܡ ܘܐܸܬܼܒܲܪܢܲܫ: ܘܡܸܢܹܗ
pb. 568
ܕܒܲܛܢܵܐ ܚܲܝܼܕܼ ܠܹܗ ܠܗܲܝܟܼܠܵܐ ܕܐܸܬܼܢܤܸܒܼ ܡܸܢܵܗ̇. ܠܩܵܠܹ̈ܐ ܕܹܝܢ
ܕܡܸܛܠ ܡܵܪܲܢ ܕܲܫܠܝܼܚܹ̈ܐ ܘܲܡܤܲܒܿܪ̈ܵܢܹܐ: ܝܵܕܼܥ̇ܝܼܢ ܚ̄ܢܲܢ ܠܐ̄ܢܵܫܵܐ
ܡܡܲܠܠܲܝ̈ ܐܲܠܵܥܵܝ̈ܬܼܵܐ: ܕܡܸܢܗܘܿܢ ܥܒܲܕܼܘ ܕܓܼܵܘܵܐ: ܐܲܝܟܼ ܕܲܠܚܲܕܼ
ܦܲܪܨܘܿܦܵܐ: ܠܡܸܢܗܘܿܢ ܕܹܝܢ ܦܪܲܫ̣ܘ: ܐܲܝܟܼ ܕܠܲܬܼܪܹܝܢ ܟܝܵܢܹ̈ܐ: ܘܗܵܠܹܝܢ
ܡ̇ܢ ܕܦܲܐ̈ܝܵܢ ܠܐܲܠܵܗܵܐ: ܠܐܲܠܵܗܘܼܬܹܗ ܕܲܡܫܝܼܚܵܐ. ܗܵܠܹܝܢ ܕܹܝܢ
ܡܲܟܿܝܼ̈ܟܼܵܬܼܵܐ: ܠܐ̄ܢܵܫܘܼܬܹܗ ܐܲܫܠܸܡ̣ܘ.
ܕܡܵܐ ܕܐܸܬܼܩܲܒܲܠ ܗܵܢܵܐ: ܫܸܠܡܲܬ̤. ܕܡܸܛܠ ܕܢܸܬܿܬܿܪܝܼܡ
ܟܠܹܗ ܚܸܪܝܵܢܵܐ: ܘܫܲܝܢܵܐ ܬܹܒܹܝܠܵܝܵܐ ܢܸܫܪܸܐ ܒܥܹ̈ܕܵܬܼܵܐ ܩܲܕܝܼ̈ܫܵܬܼܵܐ:
ܘܲܕܼܢܸܬܿܬܿܪܝܼܡܘܼܢ ܡ̣ܢ ܡܨܲܥܬܼܵܐ ܟܸܫ̈ܠܹܐ ܕܲܢܒܲܥ̣ܘ: ܢܩܲܒܸܠ ܩܵܬܼܵܪܵܤܝܼܣ
ܕܢܸܤܛܘܿܪܝܼܣ: ܗܵܘ̇ ܕܡ̣ܢ ܩܕܝܼܡ ܗܘ̤ܵܐ ܐܲܦܸܤܩܘܿܦܵܐ
ܒܩܘܼܤܛܲܢܛܝܼܢܵܦܘܿܠܝܼܣ: ܟܲܕܼ ܡܲܚܪܡܝܼܢܲܢ ܩܵܠܵܘ̈ܗܝ ܒܝܼ̈ܫܹܐ ܘܛܲܢ̈ܦܹܐ:
ܒܗܵܝ̇ ܕܥܹ̈ܕܬܼܵܐ ܩܲܕܝܼ̈ܫܬܼܵܐ ܕܲܠܘܵܬܲܢ: ܗܲܝܡܵܢܘܼܬܼܵܐ ܬܪܝܼܨܬܵܐ ܘܲܚܠܝܼܡܬܼܵܐ
ܩܲܢ̈ܝܵܢ. ܘܗܵܕܹܐ ܡܵܛܪ̈ܵܢ ܘܡܲܫ̈ܠܡܵܢ ܠܥܲܡ̈ܡܹܐ: ܐܲܝܟܼ ܕܐܵܦ ܚܲܤܝܘܼܬܼܵܟܼ
ܕܝܼܠܵܟܼܫ ܫܵܠܡ̇ܝܼܢܲܢ ܕܹܝܢ: ܘܲܠܟܼܝܼܪܵܛܘܿܢܝܼܵܐ ܕܚܲܤܝܵܬ ܘܕܼܵܚܹ̇ܠ ܠܐܲܠܵܗܵܐ
ܐܲܦܸܤܩܘܿܦܵܐ ܟܲܟܤܝܼܡܵܢܘܿܣ: ܕܥܹܕܬܵܐ ܩܲܕܝܼܫܬܼܵܐ ܕܐܲܠܵܗܵܐ
ܕܩܘܼܤܛܲܢܝܼܢܵܦܘܿܠܝܼܣ. ܘܲܒܼܢܲܝ̈ ܫܵܘܬܵܦܘܼܬܼܵܐ ܐܝܼܬܲܝܢ: ܕܟܼܠܗܘܿܢ
ܐܲܝܠܹܝܢ ܕܐܝܼܬܼ ܒܟܼܠܵܗ̇ ܬܹܒܹܝܠ: ܕܵܚܲܝ̈ ܠܐܲܠܵܗܵܐ ܐܲܦܸܤܩ̈ܘܿܦܹܐ:
ܐܲܝܠܹܝܢ ܕܗܲܝܡܵܢܘܼܬܼܵܐ ܬܪܝܼܨܬܵܐ ܘܲܕܼܠܵܐ ܡܘܼܡܲܠ ܐܲܚܝܼܕܝܼܢ ܘܢܵܛ̇ܪܝܼܢ.
ܗ̤ܘܲܝܬܿ ܚܠܝܼܡ ܘܲܡܨܲܠܸܐ ܥܠܲܝܢ: ܡܵܪܝ ܕܵܚܹ̇ܠ ܠܐܲܠܵܗܵܐ ܘܚܲܤܝܵܐ:
ܐܲܚܘܼܢ ܫܲܪܝܼܪܵܐ.
pb. 569
ܐܸܓܲܪܬܵܐ ܕܛܘܼܒܼܵܢܵܐ ܩܘܼܪܸܠܘܿܣ ܠܘܵܬܹܗ ܓܝܘܿܚܲܢܵܢ
ܕܐܲܢܛܝܘܿܟܼܝܵܐ.
ܠܡܵܪܝ ܐܲܚܘܼܢ ܚܲܒܿܝܼܒܼܵܐ ܘܒܲܪ ܬܸܫܡܸܫܬܲܢ ܝܘܿܚܲܢܵܢ: ܩܘܼܪܸܠܘܿܣ
ܒܡܵܪܲܢ ܫܠܵܡ.
ܢܸܚܕܘܿܢ ܫܡܲܝܵܐ: ܘܐܲܪܥܵܐ ܬܕܘܼܨ. ܐܸܬܬܿܪܲܥ ܓܹܝܪ ܤܝܵܓܼܵܐ
ܕܒܲܡܨܲܥܬܼܵܐ: ܘܐܸܬܼܒܲܛܲܠ ܗܵܘ̇ ܡܵܐ ܕܲܡܥܝܼܩ ܗ̄ܘ̣ܵܐ. ܘܲܙܢܵܐ ܕܟܼܠܵܗ̇
ܦܠܝܼܓܼܘܼܬܼܵܐ ܐܸܬܿܬܿܪܝܼܡ: ܟܲܕܼ ܦܵܪܘܿܩܵܐ ܕܟܼܠ ܡܫܝܼܚܵܐ ܝܲܗ̣̄ܒܼ ܫܲܝܢܵܐ
ܠܥܹ̈ܕܵܬܹܗ. ܙܲܡܸܢ̣ܘ ܠܲܢ ܕܹܝܢ ܠܘܵܬܼ ܗܵܕܹܐ: ܘܲܡܗܲܝ̈ܡܢܹܐ ܘܪ̈ܲܚܡܲܝ
ܐܲܠܵܗܵܐ ܡܲܠܟܹ̈ܐ: ܗܵܢܘܿܢ ܕܐܝܼܬܲܝܗܘܿܢ ܛܲܢܵܢܹ̈ܐ ܚܠܝܼ̈ܨܐ ܕܗܲܝܡܵܢܘܼܬܼܵܐ
ܕܐܲܒܼܵܗܲܝ̈ܗܘܿܢ. ܘܚܲܬܼܝܼܬܼܵܐܝܼܬܼ ܡ̇ܢ: ܕܠܵܐ ܙܘܼܥܙܵܥܵܐ ܠܗܲܝܡܵܢܘܼܬܼܵܐ
ܬܪܝܼܨܬܵܐ: ܒܢܲܦ̈ܫܵܬܼܗܘܿܢ ܢܵܛ̇ܪܝܼܢ ܕܲܗܘ̤ܵܘ ܩܢܹܝܢ ܫܘܼܡܵܗܵܐ
ܕܬܸܫܒܿܘܿܚܬܼܵܐ ܠܥܵܠܲܡ: ܟܲܕܼ ܠܡܲܠܟܿܘܼܬܼܗܘܿܢ ܡܚܵܘܹ̇ܝܢ ܡܢܲܨܲܚܬܼܵܐ.
ܠܗܵܠܹܝܢ ܕܐܵܦ ܡܵܪܝܵܐ ܕܚܲܝ̈ܠܵܘܼܬܼܵܐ: ܒܐܝܼܕܼܵܐ ܥܲܬܝܼܪܬܵܐ ܡܦܲܠܸܓܼ
ܛܵܒܼ̈ܬܼܵܐ. ܘܝܵܗܹ̇ܒܼ ܠܗܘܿܢ ܡ̇ܢ: ܕܢܹܐܚܕܘܼܢ ܠܐܲܝܠܹܝܢ ܕܩܵܝ̇ܡܝܼܢ
ܠܘܼܩܒܲܠܗܘܿܢ: ܡܫܲܟܸܿܢ ܠܗܘܿܢ ܕܹܝܢ ܘܙܵܟܼܘܼܬܼܵܐ. ܠܵܐ ܓܹܝܪ ܡܕܲܓܸܠ
ܟܲܕܼ ܐܵܡ݂ܲܪ: ܕܚܲ ܐ̄ܢܵܐ ܐܵܡܲ݁ܪ ܡܵܪܝܵܐ: ܕܠܲܡܫܲܒܿܚܵܢܲܝ̈ ܐܹܫܲܒܲܚ.
ܟܲܕܼ ܐܸܬܼ݂ܵܐ ܗܵܟܹܝܠ ܠܐܵܠܹܟܼܤܲܢܕܪܝܼܵܐ: ܪܵܚܹ̇ܡ ܐܲܠܵܗܵܐ ܒܲܪ ܬܸܫܡܸܫܬܲܢ
ܐܲܚܘܼܢ ܡܵܪܝ ܦܵܘܠܹܐ ܐܲܦܸܤܩܘܿܦܵܐ: ܚܲܕܼܘܼܬܼܵܐ ܐܸܬܼܡܠܝܼܢܲܢ: ܘܛܵܒܼ
pb. 570
ܙܵܕܼܩܵܐܝܼܬܼ: ܐܲܝܟܼ ܡ̇ܢ ܕܓܲܒܼܪܵܐ ܕܐܲܝܟܼ ܗܵܢܵܐ ܗܘ̤ܵܐ ܡܸܨܥܵܝܵܐ: ܘܩܲܒܸܿܠ̣
ܥܠܵܘܗܝ ܕܢܸܬܼܩܲܪܲܒܼ ܠܥܲܡܠܹ̈ܐ ܕܲܩܫܹܝܢ ܡ̣ܢ ܚܲܝܠܹܗ: ܡܸܛܠ
ܕܠܲܝܤܵܡܵܐ ܕܐܵܟܹ̇ܠ ܩܲܪܨܵܐ ܢܸܙܟܸܿܐ: ܘܠܲܐܝܠܹܝܢ ܕܐܸܬܼܦܲܠܲܓܼܘ ܠܘܵܬܼ
ܚܕܼܵܕܹ̈ܐ ܢܩܲܪܸܒܼ: ܟܲܕܼ ܡܪܝܼܡ ܠܟܸܫ̈ܠܹܐ ܕܲܫܕܹܝܢ ܒܲܡܨܲܥܬܼܵܐ: ܒܐܵܘܝܘܼܬܼܵܐ
ܘܲܫܠܵܡܵܐ ܢܟܲܠܸܠ ܠܥܹ̈ܕܵܬܼܵܐ ܕܲܠܘܵܬܼܟܼܘܿܢ ܘܲܠܘܵܬܲܢ. ܠܲܙܢܵܐ ܡ̇ܢ ܓܹܝܪ
ܗܵܘ̇ ܕܡܸܛܠܵܬܹܗ ܐܸܬܼܦܲܠܲܓܼ: ܝܲܬܿܝܼܪܘܼܬܼܵܐ ܗ̣̄ܝ ܠܡܹܐܡܲܪ: ܤܵܒܲܪ ܐ̄ܢܵܐ
ܕܹܝܢ ܕܙܵܕܹܩ: ܕܗܵܠܹܝܢ ܕܦܲܐ̈̄ܝܵܢ ܠܙܲܒܼܢܵܐ ܕܲܫܠܵܡܵܐ ܠܡܸܬܼܪܲܥܵܝܘܼ
ܘܲܠܡܹܐܡܲܪ.
ܚܕܲܝܢ ܚ̄ܢܲܢ ܗܵܟܹܝܠ ܒܦܸܓܼܥܹܗ ܕܪܵܚܹ̇ܡ ܐܲܠܵܗܵܐ: ܓܲܒܼܪܵܐ ܗܵܘ̇
ܕܡ̣ܢ ܠܥܸܠ ܐܲܥܗܸܕܼܢܲܢ. ܗܵܘ̇ ܕܲܟܼܒܲܪ ܤ̣ܒܲܪ ܠܹܗ: ܕܐܵܓܼܘܿܢܵܐ ܤܲܓܝܼܐܵܐ
ܗܵܘܹ̇ܐ ܠܹܗ ܕܲܢܦܝܼܣ ܠܲܢ: ܕܙܵܕܹܩ ܠܡܲܝܬܵܝܘܼ ܠܥܹ̈ܕܵܬܼܵܐ ܕܐܲܠܵܗܵܐ
ܠܘܵܬܼ ܫܲܝܢܵܐ: ܘܲܢܒܲܛܸܠ ܠܓܼܘܼܚܟܵܐ ܕܒܲܪܵܝܹܐ. ܥܲܡ ܕܹܝܢ ܗܵܠܹܝܢ:
ܘܲܠܥܘܼܩܤܵܐ ܕܚܵܪܥܘܼܬܹܗ ܕܐܵܟܹ̇ܠ ܩܲܪܨܵܐ ܢܲܩܗܸܐ. ܗܵܟܲܢ ܕܹܝܢ ܐܸܫܟܲܚ
ܠܲܢ ܕܲܡܛܲܝܒܼܝܼܢܲܢ ܠܘܵܬܼ ܗܵܕܹܐ: ܐܲܝܟܼ ܕܐܵܦ ܠܵܐ ܚܲܕܼ ܥܲܡܠܵܐ ܢܸܗܘܸܐ
ܠܹܗ ܟܠ ܟܠܹܗ: ܥܲܗܝܼܕܝܼܢܲܢ ܓܹܝܪ ܠܦܵܪܘܿܩܲܢ ܕܐܸܡ݂ܲܪ: ܫܠܵܡܵܐ
ܕܝܼܠܝ ܝܵܗܹ̇ܒܼ ܐ̄ܢܵܐ ܠܟܼܘܼܢ: ܫܠܵܡܵܐ ܕܝܼܠܝ ܡܲܪܦܸܐ ܐ̄ܢܵܐ ܠܟܼܘܿܢ.
ܝܲܠܝܼܦܝܼܢ ܚ̄ܢܲܢ ܕܹܝܢ ܘܒܲܨ̈ܠܵܘܵܬܼܵܐ ܠܡܹܐܡܲܪ: ܡܵܪܝܵܐ ܐܲܠܵܗܲܢ ܫܠܵܡܵܐ
ܗܲܒܼ ܠܲܢ. ܟܠܡܸܕܸܡ ܓܹܝܪ. ܝܲܗ̣̄ܒܼܬܿ ܠܲܢ. ܐܲܝܟܼ ܕܐܸܢܗ̤ܘ ܕܐ̄ܢܵܫ
ܡܸܫܬܵܘܬܲܦ ܒܲܫܠܵܡܵܐ ܕܡܸܬܼܝܼܗܸܒܼ ܡ̣ܢ ܐܲܠܵܗܵܐ: ܠܵܐ ܤܢܝܼܩܵܐ ܗܵܘܹ̇ܐ
ܕܟܼܠܗܹܝܢ ܛܵܒܼ̈ܬܼܵܐܘ ܕܡ̣ܢ ܝܲܬܿܝܼܪܘܼ ܕܹܝܢ ܟܠ ܟܠܹܗ: ܘܲܕܼܠܵܐ ܥܸܠܬܼܵܐ
ܕܫܵܘ̇ܝܵܐ ܗܘ̤ܵܐ ܤܸܕܼܩܵܐ ܕܥܹ̇ܕܼܵܬܼܵܐ: ܗܵܫܵܐ ܝܲܬܿܝܼܪܵܐܝܼܬܼ ܐܸܫܬܲܪܲܪܢܲܢ. ܒܗܵܝ̇
pb. 571
ܕܪܵܚܹ̇ܡ ܐܲܠܵܗܵܐ ܡܵܪܝ ܦܵܘܠܹܐ ܐܲܦܸܤܩܘܿܦܵܐ: ܟܲܪܛܲܝܤܵܐ ܝܲܗ̣̄ܒܼ ܠܲܢ:
ܕܐܝܼܬܼ ܒܹܗ ܬܵܘܕܝܼܬܼܵܐ ܠܵܐ ܥܕܼܝܼܠܬܼܵܐ ܕܗܲܝܡܵܢܘܼܬܼܵܐ. ܘܗܵܕܹܐ ܐܵܡܲܪ
ܗ̄ܘ̣ܵܐ ܟܲܕܼ ܡܚܲܬܸܡ: ܕܐܸܬܿܬܿܤܝܼܡܲܬ̤ ܡ̣ܢ ܚܲܤܝܘܼܬܼܵܟܼ: ܘܡ̣ܢ ܪ̈ܵܚܡܲܝ
ܐܲܠܵܗܵܐ ܐܲܦܸܤ̈ܩܘܿܦܹܐ ܕܬܲܡܵܢ. ܗܵܝ̇ ܕܹܝܢ ܡܲܟܼܬܿܒܼܵܢܘܼܬܼܵܐ ܐܝܼܬܹܿܝܗ̇ ܗܵܟܲܢܵܐ:
ܘܲܒܼܗܹܝܢ ܒܡܸܠܹ̈ܐ ܐܸܬܿܬܿܤܝܼܡܲܬ̤ ܒܐܸܓܲܪܬܵܐ ܗܵܕܹܐ.
ܡܸܛܠ ܕܹܝܢ ܒܬܼܘܼܠܬܼܵܐ ܝܵܠܕܲܬܼ ܐܲܠܵܗܵܐ: ܕܐܲܝܟܲܢ ܡܸܬܼܪܲܥܹܝܢ ܚ̄ܢܲܢ
ܘܐܵܡ̇ܪܝܼܢܲܢ: ܘܥܲܠ ܙܢܵܐ ܕܡܸܬܼܒܲܪܢܫܵܢܘܼܬܹܗ ܕܝܼܚܝܼܕܼܵܝܵܐ ܒܪܹܬ ܕܐܲܠܵܗܵܐ:
ܐܵܠܨܵܐܝܼܬܼ ܠܵܘ ܒܲܡܢܬܐ ܕܬܼܵܘܤܲܦܬܼܵܐ: ܐܸܠܵܐ ܒܐܵܕܼܫܹ̈ܐ ܕܫܘܼܪܵܪܵܐ: ܐܲܝܟܼ
ܕܡ̣ܢ ܠܥܸܠ ܡ̣ܢ ܟܬܼܵܒܹ̈ܐ ܩܲܕܝܼ̈ܫܹܐ: ܘܡ̣ܢ ܡܲܫܠܡܵܢܘܼܬܼܵܐ ܕܐܲܒܲܗ̈ܬܼܵܐ
ܩܲܕܝܼ݁̈ܫܹܐ: ܩܲܒܸܿܠܢܲܢ ܘܲܠܒܲܟܼܢܲܢ: ܒܟܲܪ̈ܝܵܬܼܵܐ ܐܵܡ̇ܪܝܼܢ ܚ̄ܢܲܢ: ܟܲܕܼܸ ܠܵܐ
ܡܵܘܤܦܝܼܢ ܚ̄ܢܲܢ ܟܠ ܟܠܹܗ: ܒܗܲܝܡܵܢܘܼܬܼܵܐ ܕܐܸܬܿܬܿܤܪܝܼܡܲܬ̤ ܡ̣ܢ ܐܲܒܼܵܗ̈ܬܼܵܐ
ܩܲܕܝܼ̈ܫܹܐ ܕܲܒܼܢܝܼܩܝܼܵܐ. ܐܲܝܟܼ ܓܹܝܪ ܕܩܲܕܸܡܢ ܐܸܡܲܪܢ: ܠܘܵܬܼ ܟܠܵܗ̇
ܝܑܼܕܲܥܬܼܵܐ ܕܕܸܚܠܲܬܼ ܐܵܠܵܗܵܐ ܤܵܦ̇ܩܵܐ: ܘܲܠܟܼܠܹܗ ܝܘܼܠܦܵܢܵܐ ܒܝܼܫܵܐ
ܕܗܲܪ̈ܵܛܝܼܩܘ ܡܒܲܛ̇ܠܵܐ. ܐܵܡ̇ܪܝܼܢܲܢ ܕܹܝܢ: ܠܵܘ ܟܲܕܼ ܦܵܤ̇ܥܝܼܢܲܢ ܥܲܠ
ܠܵܐ ܡܸܬܿܕܼܪ̈ܟܢܝܵܬܼܵܐ: ܐܸܠܵܐ ܒܬܼܵܘܕܝܼܬܼܵܐ ܕܲܡܚܝܼܠܘܼܬܲܢ: ܐܵܚ̇ܕܝܼܢܲܢ ܒܐܲܦܲܝ̈
ܗܵܠܹܝܢ ܕܒܼܵܥܹ̇ܝܢ ܠܡܹܐܬܼܵܐ ܥܠܲܝܢ: ܒܗܵܠܹܝܢ ܕܡܸܚܲܫܒܼܝܼܢ ܚ̄ܢܲܢ:
ܕܲܡܥܲܠ̈ܝܵܢ ܡ̣ܢ ܒܢܲܝ̈ ܐ̄ܢܵܫܵܐ. .
ܡܵܘܕܹܝܢ ܚܢܲܢ ܗܵܟܹܝܠ ܠܡܵܪܲܢ ܝܼܫܘܿܥ ܡܫܝܼܚܵܐ: ܒܪܹܗ ܕܐܲܠܵܗܵܐ
ܝܑܼܚܝܼܕܼܵܝܵܐ: ܐܲܠܵܗܵܐ ܡܫܲܠܡܵܢܵܐ: ܘܒܲܪ ܐ̄ܢܵܫܵܐ ܡܫܲܠܡܢܵܐ ܡ̣ܢ ܢܲܦܫܵܐ
ܡܠܝܼܠܬܼܵܐ ܘܦܲܓܼܪܵܐ. ܕܡ̣ܢ ܩܕܼܵܡ ܥܵܠܡܹ̈ܐ ܡ̇ܢ ܐܸܬܼܝܼܠܸܕܼ ܡ̣ܢ ܐܲܒܼܵܐ
ܒܐܲܠܵܗܘܼܬܹܗ: ܒܫܘܼܠܵܡܵܐ ܕܹܝܢ ܕܝܵܘ̈ܡܵܬܼܵܐ: ܗ̤ܘ ܟܲܕܸ ܗ̤ܘ ܡܸܛܠܵܬܲܢ
pb. 572
ܘܡܸܛܠ ܦܘܼܪܩܵܢܲܢ: ܡ̣ܢ ܡܲܪܝܲܡ ܒܬܼܘܼܠܬܼܵܐ ܒܐ̄ܢܵܫܘܼܬܹܗ. ܒܲܪ ܟܝܵܢܹܗ
ܕܐܲܒܼܵܐ ܒܐܲܠܵܗܘܼܬܹܗ: ܘܒܲܪ ܟܝܵܢܲܢ ܕܝܼܠܲܢ ܒܐ̄ܢܵܫܘܼܬܹܗ. ܚܕܼܵܝܘܼܬܼܵܐ ܓܹܝܪ
ܗܘ̤ܵܬܼ: ܕܲܬܼܪܹܝܢ ܟܝܵܢܹ̈ܐ. ܘܥܲܠ ܗܵܕܹܐ: ܚܲܕܼ ܡܫܝܼܚܵܐ: ܚܲܕܼ ܒܪܵܐ:
ܚܲܕܼ ܡܵܪܝܵܐ ܡܵܘܕܝܼܢܲܢ. ܐܲܝܟܼ ܤܘܼܟܵܠܵܐ ܕܲܚܕܼܵܝܘܼܬܼܵܐ ܗܵܕܹܐ ܕܠܵܐ
ܒܘܼܠܒܵܠܵܐ: ܡܵܘܕܹܝܢ ܚ̄ܢܲܢ ܠܲܒܼܬܼܘܼܠܬܼܵܐ ܩܲܕܝܼܫܬܼܵܐ ܝܵܠܕܲܬܼ ܐܲܠܵܗܵܐ: ܥܲܠ
ܕܐܲܠܵܗܵܐ ܡܸܠܬܼܵܐ ܐܸܬܼܓܲܫܲܡ ܘܐܸܬܼܒܲܪܢܲܫ: ܘܡܸܢܹܗ ܕܒܲܛܢܵܐ ܚܲܝܸܕܼ ܠܹܗ
ܠܗܲܝܟܿܠܵܐ ܕܐܸܬܼܢܤܸܒܼ ܡܸܢܵܗ̇. ܠܩܵܠܹ̈ܐ ܕܹܝܢ ܕܡܸܛܠ ܡܵܪܲܢ ܕܲܫܠܝܼܚܹ̈ܐ
ܘܕܲܡܤܲܒܿܪܵܢܹܐ: ܝܵܕܼܥ̇ܝܼܢܲܢ ܠܐ̄ܢܵܫܵܐ ܡܡܲܠܠܲܝ̈ ܐܲܠܵܗܵܝ̈ܬܼܵܐ: ܕܡܸܢܗܘܿܢ
ܥ̣ܒܲܕܼܘ ܕܓܼܵܘܵܐ: ܐܲܝܟܼ ܕܲܠܚܲܕܼ ܦܲܪܨܘܿܦܵܐ. ܠܡܸܢܗܘܿܢ ܕܹܝܢ ܦܪܲܫ̣ܘ:
ܐܲܝܟܼ ܕܠܲܬܼܪܹܝܢ ܟܝܵܢ̈ܐ. ܘܗܵܠܹܝܢ ܡ̇ܢ ܕܲܦܐܹܝܢ ܠܐܲܠܵܗܵܐ: ܠܐܲܠܵܗܘܼܬܹܗ
ܕܲܡܫܝܼܚܵܐ. ܗܵܠܹܝܢ ܕܹܝܢ ܡܲܟܿܝܼ̈ܟܹܐ: ܠܐ̄ܢܵܫܘܼܬܹܗ ܐܲܫܠܸܡ̣ܘ.
ܟܲܕܼ ܦܓܲܥܢܲܢ ܒܡܸܠܲܝ̈ܟܿܘܿܢ ܗܵܠܹܝܢ ܐܲܠܵܗܵܝ̈ܬܼܵܐ: ܘܐܸܫܟܲܚܢ ܚ̄ܢܲܢ
ܘܠܢܲܦܫܲܢ ܕܗܵܟܲܢܵܐ ܡܗܲܝܡܢܼܢܲܢ: ܚܲܕܼ ܓܹܝܪ ܡܵܪܝܵܐ: ܚܕܼܵܐ ܗܲܝܡܵܢܘܼܬܼܵܐ:
ܚܕܼܵܐ ܡܲܥܡܘܿܕܼܝܼܬܼܵܐ. ܫܲܒܲܚܢܲܢ ܠܐܲܠܵܗܵܐ ܦܵܪܘܿܩܵܐ ܕܟܼܠ: ܟܲܕܼ ܚܵܕܼܝܢܲܢ
ܒܲܚܕܼܵܕܹ̈ܐ: ܕܗܲܝܡܵܢܘܼܬܼܵܐ ܕܫܵܠ̇ܡܵܐ ܠܲܟܼܬܼܵܒܹ̈ܐ ܐܲܠܵܗܵܝܹ̈ܐ: ܘܲܠܡܲܫܠܡܵܢܘܼܬܼܵܐ
ܕܐܲܒܼܵܗ̈ܬܼܵܐ ܩܲܕܝܼ̈ܫܹܐ: ܐܲܚܝܼ̈ܕܼܵܢ ܥܹܕܵܬܼ̈ܐ ܕܲܠܘܵܬܲܢ ܘܲܠܘܵܬܼܟܼܘܿܢ.
ܡܸܛܠ ܕܹܝܢ ܕܝܼܠܦܹ̇ܬܼ: ܕܐ̄ܢܵܫ̈ܝܼܢ ܕܲܡܥܵܕܝܼܢ ܠܡܸܬܼܥܲܕܵܠܘܼ:
ܘܒܲܕܡܘܼܬܼ ܕܲܒܿܘܿܪܹ̈ܐ ܕܒܲܪܵܐ ܙܵܐܡ̇ܝܼܢ: ܘܡܸܠܹ̈ܐ ܒܝܼ̈ܫܵܬܼܵܐ ܥܠܲܝ ܓܵܤܹ̇ܝܢ:
ܐܲܝܟܼ ܗܵܘ̇ ܕܡ̣ܢ ܫܡܲܝܵܐ ܐܵܡܲ݁ܪ ܐ̄ܢܵܐ ܕܐܸܬܼ݂ܵܐ ܦܲܓܼܪܹܗ ܩܲܕܝܼܫܵܐ ܕܲܡܫܝܼܚܵܐ:
ܘܠܵܘ ܡ̣ܢ ܒܬܼܘܼܠܬܼܵܐ: ܐܸܬܼܚܲܙܝܲܬ̤ ܠܝܼ ܕܐܵܠܨܵܐ: ܕܡܸܠܹ̈ܐ ܙܥܘܿܪ̈ܝܵܬܼܵܐ
ܡܸܛܠ ܗܵܕܹܐ ܠܘܵܬܼܗܘܿܢ ܐܹܡܲܪ. ܐܘܿ ܤܲܟܼ̈ܠܹܐ: ܗܵܠܹܝܢ ܕܒܲܠܚܘܿܕܼ
pb. 573
ܠܡܸܛܠܲܡ ܝܵܕܼܥ̇ܝܼܢ: ܐܲܝܟܲܢ ܠܗܵܕܹܐ ܬܲܪܥܝܼܬܼܵܐ ܫܪܸܟܼܬܿܘܿܢ: ܘܗܵܕܹܐ
ܟܠܵܗ̇ ܠܸܠܘܼܬܼܵܐ ܐܸܬܼܪܲܢܝܼܬܿܘܿܢ؟ ܙܵܕܹܩ ܗ̄ܘ̣ܵܐ ܠܟܼܘܿܢ ܓܹܝܪ ܚܲܬܿܝܼܬܼܵܐܝܼܬܼ
ܠܡܸܬܼܪܲܢܵܝܘܼ: ܕܐܲܝܟܼ ܕܲܒܼܤܘܿܓܼܵܐܐ: ܟܠܹܗ ܐܵܓܼܘܿܢܵܐ ܕܲܗܘ̤ܵܐ ܠܲܢ ܡܸܛܠ
ܗܲܝܡܵܢܘܼܬܼܵܐ: ܥܲܠ ܕܐܵܡ̇ܪܝܼܢܲܢ ܕܝܵܠܕܲܬܼ ܐܲܠܵܗܵܐ ܐܝܼܬܹܿܝܗ̇ ܒܬܼܘܼܠܬܼܵܐ. ܐܸܠܵܐ
ܐܸܢ ܗ̤ܘ ܕܡ̣ܢ ܫܡܲܝܵܐ: ܘܠܵܘ ܡܸܢܵܗ̇ ܐܵܡ̇ܪܝܼܢܲܢ ܕܲܗܘ̤ܵܐ ܦܲܓܼܪܵܐ ܩܲܕܝܼܫܵܐ
ܕܦܵܪܘܿܩܵܐ ܕܟܼܠܲܢ ܡܫܝܼܚܵܐ: ܐܲܝܟܲܢ ܡܸܬܼܝܲܕܼܥܵܐ ܝܵܠܕܲܬܼ ܐܲܒܠܵܗܵܐ؟ ܠܡ̇ܢ
ܓܹܝܪ ܝܸܠܓܕܲܬ̤: ܐܸܢ ܗ̤ܘ ܕܠܵܐ ܫܲܪܝܼܪܵܐ ܕܝܸܠܕܲܬ̤ ܒܲܒܼܤܲ ܠܥܲܡܲܢܘܼܐܹܝܠ؟
ܢܸܬܼܒܲܤܪܘܼܢ ܗܵܟܹܝܠ ܐܲܝܠܹܝܢ ܕܗܵܠܹܝܢ ܒܕܼܵܘ ܡܸܛܠܵܬܼܝ. ܠܵܐ
ܓܹܝܪ ܡܕܲܓܸܠ ܛܘܼܒܼܵܢܵܐ ܐܹܫܲܥܝܵܐ ܢܒܼܝܼܵܐ ܕܐܸܡ݂ܲܪ: ܕܗܵܐ ܒܬܼܘܼܠܬܼܵܐ
ܬܸܒܼܛܲܢ ܘܬܹܐܠܲܕܼ ܒܪܵܐ: ܘܢܸܩܪܘܿܢ ܫܡܹܗ ܥܲܡܲܢܘܼܐܹܝܠ. ܗܵܘ̇
ܕܡܸܢܼܦܲܫܲܩ: ܥܲܡܲܢ ܐܲܠܵܗܲܢ. ܫܲܪܝܼܪ ܗ̄ܘ̣ ܕܹܝܢ ܡ̣ܢ ܟܠ ܦܪܘܿܣ:
ܐܵܦ ܛܘܼܒܼܵܢܵܐ ܓܲܒܼܪܝܹܠ ܕܐܸܡ݂ܲܪ ܠܘܵܬܼ ܛܘܼܒܼܵܢܝܼܬܼܵܐ ܒܬܼܘܼܠܬܼܵܐ: ܠܵܐ
ܬܸܕܚܠܝܼܢ ܡܲܪܝܲܡ: ܐܸܫܟܲܚܬܿܝ ܓܹܝܪ ܛܝܒܿܘܼܬܼܵܐ ܠܘܵܬܼ ܐܲܠܵܗܵܐ. ܗܵܐ
ܓܹܝܪ ܬܸܒܼܛܝܼܢ ܘܬܹܐܠܕܝܼܢ ܒܪܵܐ: ܘܬܸܩܪܹܝܢ ܫܡܹܗ ܝܼܫܘܿܥ: ܗ̤ܘ
ܓܹܝܪ ܢܲܚܝܘܗܝ ܠܥܲܡܹܗ ܡ̣ܢ ܚܛܵܗܲܝ̈ܗܘܿܢ. ܐܸܡܲܬܼܝ ܕܹܝܢ
ܕܐܵܡ̇ܪܝܼܢܲܢ ܡ̣ܢ ܫܡܲܝܵܐ: ܘܡ̣ܢ ܠܥܸܠ ܠܡܵܪܲܢ ܝܼܫܘܿܥ ܡܫܝܼܚܵܐ:
ܠܵܘ ܐܲܝܟܼ ܡ̇ܢ ܕܡ̣ܢ ܠܥܸܠ ܘܡ̣ܢ ܫܡܲܝܵܐ ܢܚܸܬܼ ܦܲܓܼܪܹܗ ܩܲܕܝܼܫܵܐ:
ܕܐܲܝܟܼ ܗܵܠܹܝܢ ܐܵܡ̇ܪܝܼܢܲܢ: ܐܸܠܵܐ ܟܲܕܼ ܡܸܬܿܕܢܹܝܢ ܚ̄ܢܲܢ ܠܛܘܼܒܼܵܢܵܐ
ܦܵܘܠܘܿܣ ܕܩܵܥܹ̇ܐ ܓܲܠܝܵܐܝܼܬܼ: ܕܒܲܪܢܵܫܵܐ ܩܲܕܝܼܡܵܝܵܐ ܥܲܦܪܵܢܵܐ ܕܡ̣ܢ
ܐܲܪܥܵܐ: ܘܒܲܪܢܵܫܵܐ ܕܲܬܼܪܹܝܢ ܡܵܪܝܵܐ ܡ̣ܢ ܫܡܲܝܵܐ. ܥܲܗܝܼܕܝܼܢܲܢ ܕܹܝܢ:
pb. 574
ܘܠܹܗ ܠܦܵܪܘܿܩܲܢ ܕܐܸܡ݂ܲܪ: ܕܠܵܐ ܐ̄ܢܵܫ ܤܠܸܩ̣ ܠܲܫܡܲܝܵܐ: ܐܸܠܵܐ
ܗܵܘ̇ ܕܲܢܚܸܬܼ ܡ̣ܢ ܫܡܲܝܵܐ ܒܪܹܗ ܕܐ̄ܢܵܫܵܐ: ܟܲܕܼ ܛܵܒܼ ܗܘ̤ܵܐ
ܒܲܒܼܤܲܪ: ܐܲܝܟܼ ܕܐܸܡ̇̄ܪܹܬܼ ܗܵܫܵܐ: ܡ̣ܢ ܒܬܼܘܼܠܬܼܵܐ ܩܲܕܝܼܫܬܼܵܐ. ܡܸܛܠ
ܕܹܝܢ ܕܐܲܠܵܗܵܐ ܡܸܠܬܼܵܐ: ܗܵܘ̇ ܕܐܸܬܼ݂ܵܐ ܡ̣ܢ ܠܥܸܠ ܘܡ̣ܢ ܫܡܲܝܵܐ: ܤܲܪܸܩ̣
ܗ̤ܘ ܠܹܗ ܘܲܢܤܲܒܼ ܕܡܘܼܬܼܵܐ ܕܥܲܒܼܕܵܐ: ܘܐܸܬܼܩܪܝܼ ܒܲܪ ܐ̄ܢܵܫܵܐ: ܟܲܕܼ
ܟܲܬܲܪ ܐܲܝܟܼ ܕܐܝܼܬܼܵܘܗܝ ܗ̄ܘ̣ܵܐ: ܗܵܢܵܘ ܕܹܝܢ ܐܲܠܵܗܵܐ. ܠܵܐ ܡܸܫܬܲܚܠܦܵܢܵܐ
ܓܹܝܪ ܘܠܵܐ ܡܸܫܬܲܓܼܢܝܵܢܵܐ ܐܝܼܬܼܵܘܗܝ ܒܲܟܼܝܵܢܹܗ: ܐܲܝܟܼ ܡ̇ܢ ܕܚܲܕܼ
ܡܸܬܼܝܼܕܲܥ ܥܲܡ ܦܲܓܚܼܪܹܗ: ܡ̣ܢ ܫܡܲܝܵܐ ܡܸܬܼܐܡܲܪ ܕܲܢܚܸܬܼ. ܐܸܫܬܲܡܲܗ
ܕܹܝܢ ܘܒܲܪܢܵܫܵܐ ܡ̣ܢ ܫܡܲܝܵܐ: ܟܲܕܼ ܐܝܼܬܼܵܘܗܝ ܡܫܲܠܡܵܢܵܐ ܒܐܲܠܵܗܘܼܬܹܗ:
ܘܲܡܫܲܠܡܵܢܵܐ ܗ̤ܘ ܟܲܕܼ ܗ̤ܘ ܒܐ̄ܢܵܫܘܼܬܹܗ. ܘܐܲܝܟܼ ܕܲ:ܒܼܚܲܕܼ ܦܲܪܨܘܿܦܵܐ:
ܡܸܬܼܝܼܕܥ. ܚܲܕܼ ܓܹܝܪ ܡܵܪܝܵܐ ܡܫܝܼܚܵܐ: ܐܵܦܸܢ ܝܑܼܕܼܝܼܥ ܫܘܼܚܠܵܦܵܐ
ܕܲܟܼܝܵܢܹ̈ܐ: ܕܡ̣ܢ ܗܵܠܹܝܢ ܚܕܼܵܝܘܼܬܼܵܐ ܠܵܐ ܡܸܬܼܡܲܠܠܵܢܝܼܬܼܵܐ ܐܵܡ̇ܪܝܼܢܲܢ
ܕܐܸܤܬܲܥܪܲܬ̤.
ܠܐܲܝܠܹܝܢ ܕܹܝܢ ܕܐܵܡ̇ܪܝܼܢ: ܓܡܘܼܙܵܓܼܵܐ ܐܵܘ ܒܘܼܠܒܵܠܵܐ: ܐܵܘ
ܚܒܼܘܼܟܵܝܵܐ ܗ̤ܘܵܐ ܠܐܲܠܵܗܵܐ ܡܸܠܬܼܵܐ ܥܲܡ ܒܸܤܪܵܐ: ܬܸܬܿܛܦܝܼܣ
ܚܤܝܘܼܬܼܵܟܼ ܠܲܡܫܲܬܲܩܘܼ. ܟܡܵܐ ܙܲܒܼ̈ܢܝܼܢ ܓܹܝܪ ܐ̄ܢܵܫ̈ܝܼܢ ܘܗܵܠܹܝܢ ܥܠܲܝ
ܡܲܛܒܼܝܼܢ: ܐܲܝܟܼ ܡ̇ܢ ܕܗܵܟܲܢ ܐܸܬܼܪܲܥ̇ܝܼܬܼ ܐܵܘ ܐܸܡ̇ܪܹܬܼ. ܐܸܠܵܐ ܕܹܝܢ ܗܵܢܵܐ
ܟܠܹܗ ܡܲܒܼܥܲܕܼ ܐ̄ܢܵܐ ܕܐܸܬܼܪܲܥܸܐ ܡܸܕܸܡ ܕܐܲܝܟܼ ܗܵܢܵܐ: ܕܤܵܒܲ̇ܪܢܵܐ
ܕܲܦܩܲܪܘ ܠܗܘܿܢ ܗܵܠܹܝܢ ܕܐܵܦܸܵܢ ܤ̣ܒܲܪܘ ܕܛܸܠܵܢܝܼܬܼܵܐ ܕܫܘܼܚܠܵܦܵܐ:
ܠܐܲܦܲܝ̈ ܟܝܵܢܹܗ ܕܐܲܠܵܗܵܐ ܡܸܫܟܿܚܵܐ ܕܬܸܕܼܟܲܫ. ܡܩܵܘܸܐ ܓܹܝܪ ܗܵܘ̇ ܡܵܐ
ܕܐܝܼܬܼܵܘܗܝ ܐܲܡܝܼܢܵܐܝܼܬܼ: ܘܠܵܐ ܐܸܫܬܲܚܠܲܦ. ܐܸܠܵܐ: ܐܵܦ ܠܵܐ ܡܸܫܬܲܚܠܲܦ
pb. 575
ܒܡܸܕܸܡ: ܐܵܘ ܡܩܲܒܸܿܠ ܫܘܼܓܼܢܵܝܵܐ. ܥܲܡ ܕܹܝܢ ܗܵܕܹܐ: ܘܲܕܼܠܵܐ ܚܵܫܘܿܫܵܐ
ܐܝܼܬܼܵܘܗܝ ܡܸܠܬܹܗ ܕܐܲܠܵܗܵܐ ܡܵܘܕܹܝܢ ܚ̄ܢܲܢ: ܐܵܦܸܢ ܗ̤ܘ ܒܚܸܟܼܡܬܼܵܐ
ܡܥܲܠܲܝܬܼܵܐ: ܒܲܡܕܲܒܿܪܵܢܘܼܬܹܗ ܕܐ̄ܪܵܙܵܐ ܠܚܲܫܹ̈ܐ ܕܲܓܼܕܲܫ̣ܘ ܠܒܸܤܪܹܗ: ܚܵܙܹ̇ܝܢܲܢ
ܕܲܠܢܲܦܫܹܗ: ܒܲܡܕܲܒܿܪܵܢܘܼܬܼܵܗ ܕܐ̄ܪܵܙܵܐ ܠܚܲܫܹ̈ܐ ܕܲܓܼܕܲܫ̣ܘ ܠܒܸܤܪܹܗ: ܚܵܙܹ̇ܝܢܲܢ
ܕܲܠܢܲܦܫܹܗ ܡܙܲܕܸܩ ܠܗܘܿܢ. ܗܵܟܲܢ ܗܵܟܹܝܠ ܐܵܦ ܚܲܟܿܝܼܡ ܒܟܼܠ
ܦܲܛܪܘܿܣ ܐܸܡ݂ܲܪ: ܕܲܡܫܝܼܚܵܐ: ܚܠܵܦܝܢ ܚܲܫ̣ ܒܲܒܼܤܲܪ: ܘܠܵܘ ܒܲܟܼܝܵܢܵܐ
ܕܐܲܠܵܗܘܼܬܹܗ ܠܵܐ ܡܸܬܼܡܲܠܠܵܢܝܼܬܼܵܐ. ܡܸܛܠ ܓܹܝܪ ܕܢܸܬܼܗܲܝܡܲܢ ܕܗ̤ܘ
ܐܝܼܬܼܵܘܗܝ ܦܵܪܘܿܩܵܐ ܕܟܼܠ: ܕܝܼܠܹܗ ܥܵܒܹ̇ܕܼ ܠܗܘܿܢ ܡܕܲܒܿܪܵܢܵܐܝܼܬܼ
ܠܚܲܫܹ̈ܐ ܕܒܸܤܪܵܐ: ܘܲܠܘܵܬܹܗ ܐܲܝܟܼ ܕܐܸܡ̇ܪܹܬܼ ܡܲܤܸܩ ܠܗܘܿܢ. ܐܲܝܟܼ
ܗܵܝ̇ ܕܲܒܼܝܲܕܼ ܩܵܠܵܐ ܕܲܢܒܼܝܼܵܐ ܩܕܲܡ ܙܲܒܼܢܵܐ ܐܸܬܼܐܲܡܪܲܬ̤ ܐܲܝܟܼ ܕܡܸܢܹܗ:
ܕܝܲܨܝ ܝܸܗ̇ܒܹܿܬܼ ܠܡܲܚ̈ܘܼܬܼܵܐ ܘܦܲܟܲܝ̈ ܠܫܘܼܩܵܦܵܐ: ܦܲܪܨܘܿܦܝ ܕܹܝܢ
ܠܵܐ ܐܲܦ̇ܢܝܼܬܼ ܡ̣ܢ ܒܸܤܬܿܬܼܵܐ ܕܪܘܼܩܵܐ.
ܕܲܠܝܘܼܠܦܵܢܵܐ ܕܹܝܢ ܕܐܲܒܼܵܗ̈ܬܼܵܐ ܫܠܡ̇ܝܼܢܲܢ ܒܟܼܠ ܕܘܼܟ: ܝܲܬܿܝܼܪܵܐܝܼܬܼ
ܕܹܝܢ ܠܲܕܲܛܘܼܒܼܵܢܵܐ ܘܢܲܨܝܼܚܵܐ ܐܲܒܼܘܼܢ ܐܵܬܵܢܵܤܝܼܘܿܣ: ܟܲܕܼ ܡܸܫܬܲܐ ܠܝܼܢܲܢ
ܕܟܼܠ ܟܠܹܗ ܒܡܸܕܸܡ ܠܵܐ ܢܸܤܛܸܐ ܡܸܢܹܗ: ܬܸܬܿܛܦܝܼܣ ܡ̇ܢ
ܚܲܤܝܘܼܬܼܟܼܘܿܢ: ܠܵܐ ܕܹܝܢ ܐ̄ܢܵܫ ܡ̣ܢ ܗܵܠܹܝܢ ܐ̄ܚܪ̈ܵܢܹܐ ܡܸܬܼܦܲܠܲܓܼ. ܤܵܐܹ̇ܡ
ܗ̄ܘܹ̇ܝܬܼ ܕܹܝܢ ܘܬܲܚܘ̈ܝܵܬܼܵܐ ܡܸܢܗܘܿܢ ܤܲܓܿܝܼ̈ܐܵܬܼܵܐ: ܟܲܕܼ ܡܫܲܪܲܪ ܐ̄ܢܵܐ
ܠܡܸ̈ܠܲܝ ܡܸܢܗܹܝܢ: ܐܸܠܘܼ ܠܵܐ ܕܵܚܹ̇ܠ ܗ̄ܘܹ̇ܝܬܼ ܡ̣ܢ ܡܸܬܼܚܵܐ ܕܐܸܓܲܪܬܵܐ:
ܕܕܲܠܡܵܐ ܐܵܪܵܐ ܡܸܛܠ ܗܵܕܹܐ ܢܲܡܐܸܢ ܐ̄ܢܵܫ ܒܩܸܪܝܵܢܵܗ̇. ܠܵܐ ܕܹܝܢ
ܡܩܲܒܿܠܝܼܢ ܚ̄ܢܲܢ: ܘܠܵܐ ܒܚܲܕܼ ܡ̣ܢ ܙܢܝܼ̈ܢ: ܠܡܸܙܕܲܥܙܵܥܘܼ ܡ̣ܢ ܐ̄ܢܵܫ̈ܝܼܢ
ܗܲܝܡܵܢܘܼܬܼܵܐ ܕܐܸܬܿܬܲܚܡܲܬ̤. ܗܵܢܵܘ ܕܹܝܢ ܤܝܵܡܵܐ ܕܗܲܝܡܵܢܘܼܬܼܵܐ
pb. 576
ܕܐܸܬܿܬܿܤܝܼܡ ܡ̣ܢ ܐܲܒܼܵܗܵܝ̈ܢ ܩܲܕܝܼ̈ܫܹܐ: ܗܵܠܹܝܢ ܕܒܲܙܒܲܢ ܒܢܝܼܩܝܼܵܐ
ܐܸܬܼܟܲܢܲܫܘ. ܐܵܦܠܵܐ ܕܹܝܢ ܡܲܦܤܝܼܢܬ ܠܢܲܦܫܲܢ ܐܵܘ ܠܲܐ̄ܚܪ̈ܵܢܹܐ: ܕܐܵܘ
ܡܸܠܬܼܵܐ ܢܫܲܚܠܦܘܼܢ ܒܐܲܝܠܹܝܢ ܕܐܸܬܿܬܿܤܝܼܡ ܬܲܡܵܢ: ܐܵܘ ܕܐܵܦܸܢ ܚܕܸܵܐ
ܐܵܬܼܘܼܬܼܵܐ ܢܸܥܒܿܪܘܼܢ. ܒܲܕܼ ܥܲܗܼܕܼܝܼܢ ܚܢܲܢ ܠܗܵܘ̇ ܕܐܸܡ݂ܲܪ: ܕܠܵܐ
ܬܫܲܚܠܸܦ ܬܚܘܼ̈ܡܹܐ ܕܡ̣ܢ ܥܵܠܲܡ: ܗܵܠܹܝܢ ܕܤܵܡ̣ܘ ܐܲܒܼܵܗܲܝܣ̈ܟ.
ܠܵܐ ܓܹܝܪ ܐܝܼܬܲܝܗܘܿܢ ܗ̄ܘ̣ܵܘ ܗܸܢ̣ܘܿܢ ܗܵܠܹܝܢ ܕܲܡܡܲܠܠܝܼܢ: ܐܸܠܵܐ
ܪܘܼܚܵܐ ܕܐܲܠܵܗܵܐ ܘܐܲܒܼܵܐ ܗܵܘ̇ ܕܢܵܦܹ̇ܿܩ ܡܸܢܹܗ. ܠܵܐ ܕܹܝܢ ܐܝܼܬܼܵܘܗܝ
ܢܘܼܟܼܪܵܝܵܐ ܕܲܒܼܪܵܐ ܒܡܸܠܬܼܵܐ ܕܐܝܼܬܼܵܘܼܬܼܵܐ. ܘܒܼܵܗ̇ ܒܗܵܕܹܐ: ܡܸܠܹ̈ܐ ܕܩܲܕܝܼ̈ܫܹܐ:
ܡܓܼܵܘܝܲܝ̈ ܒܐ̄ܪܵܙܹܐ: ܡܫܲܪܪ̈ܵܢ ܠܲܢ. ܒܲܦܪܲܟܿܤܝܼܣ ܡ̇ܢ ܓܹܝܪ ܕܲܫܠܝܼܚܹ̈ܿܐ
ܟܬܼܝܼܒܼ: ܟܲܕܼ ܕܹܝܢ ܐܸܬܼ݂ܵܘ ܠܡܘܼܤܝܼܵܐ: ܒܵܥܹ̇ܝܢ ܗ̄ܘ̣ܵܘ ܠܡܹܐܙܲܠ
ܠܒܼܝܼܬܼܘܼܢܝܼܵܐ: ܘܠܵܐ ܐܲܪܦܝܼ ܐܸܢܘܿܢ ܪܘܼܚܹܗ ܕܝܼܫܘܿܥ. ܟܵܬܹ̇ܒܼ ܕܹܝܢ
ܘܛܘܼܒܼܵܢܵܐ ܦܵܘܠܘܿܣ: ܗܵܠܹܝܢ ܕܹܝܢ ܕܐܝܼܬܲܝܗܘܿܢ ܒܲܒܼܤܲܪ: ܠܡܸܫܦܲܪ
ܠܐܲܠܵܗܵܐ ܠܵܐ ܡܸܫܟܿܚܝܼܢ. ܐܲܢ̄ܬܿܘܢ ܕܹܝܢ: ܠܵܐ ܐܝܼܬܲܝܟܿܘܿܢ ܒܲܒܼܤܲܪ:
ܐܸܠܵܐ ܒܪܘܼܚ: ܐܸܢ ܗ̤ܘ ܕܪܘܼܚܹܗ ܕܐܲܠܵܗܵܐ ܥܵܡܲ݁ܪ ܒܟܼܘܿܢ. ܐܸܢ
ܕܹܝܢ ܐ̄ܢܵܫ ܪܘܼܚܹܗ ܕܲܡܫܝܼܚܵܐ ܠܲܝܬܿ ܒܹܗ: ܗܵܢܵܐ ܠܵܐ ܐܝܼܬܼܵܘܗܝ
ܕܼܝܼܠܹܗ.
ܡܵܐ ܕܹܝܢ ܕܐ̄ܢܵܫܝܼ̈ܢ ܗܵܠܹܝܢ ܕܲܡܥܵܕܝܼܢ ܠܲܡܥܲܩܵܡܘܼ ܬܪ̈ܝܼܨܵܬܼܵܐ:
ܠܡܸ̈ܠܲܝ ܕܝܼܠܝ ܡܫܲܚܠܦܝܼܢ ܠܡܸܕܼܡ ܕܫܵܦܲܪ ܠܗܘܿܢ: ܠܵܐ ܬܸܬܿܕܲܡܲܪ
ܒܗܵܕܹܐ ܚܤܝܘܼܬܼܵܟܼ: ܟܲܕܼ ܝܵܕܼܥܵܐ ܕܟܼܠܗܘܿܢ ܗܲܪ̈ܲܤܝܘܿܛܹܐ: ܡ̣ܢ
ܟܬܼܵܒܹ̈ܐ ܐܲܠܵܗܵܝܹ̈ܐ ܡܟܲܢܫܝܼܢ ܡܠܘܿܐܵܐ ܠܛܵܥܝܘܼܬܼܗܘܿܢ: ܟܲܕܼ ܠܐܲܝܠܹܝܢ
ܕܲܬܼܪܝܼܨܵܐܝܼܬܼ ܒܝܲܕܼ ܪܘܼܚܵܐ ܩܲܕܝܼܫܵܐ ܐܸܬܼܐܡܲܪ: ܒܚܘܼܫܵܒܲܝ̈ܗܘܿܢ ܒܝܼ̈ܫܹܐ
pb. 577
ܡܫܲܚܠܦܝܼܢ: ܘܥܲܠ ܪܹܫܗܘܿܢ ܕܵܠܹ̇ܝܢ ܠܫܲܠܗܹܒܼܝܼܬܼܵܐ ܕܠܵܐ ܕܵܥ̇ܟܵܐ.
ܡܸܛܠ ܕܹܝܢ ܕܝܼܠܸܦܢ ܚ̄ܢܲܢ ܕܐܵܦ ܠܐܸܓܲܪܬܵܐ ܕܐܲܒܼܘܼܢ ܢܵܨܝܼܚܵܐ
ܐܵܬܵܢܵܤܝܼܘܿܣ ܕܲܠܘܵܬܼ ܛܘܼܒܼܵܢܵܐ ܐܹܦܝܼܩܛܛܘܿܣ: ܕܐܝܼܬܼ ܒܵܗ̇
ܬܪܝܼܨܘܼܬܼܵܐ ܕܗܲܝܡܵܢܘܼܬܼܵܐ: ܐ̄ܢܵܫ̈ܝܼܢ ܫܲܚܠܸܦ̣ܘ ܘܝܲܗ̣̄ܒܼܘ: ܐܲܝܟܼ ܕܡ̣ܢ
ܗܵܕܹܐ ܢܸܚܤܪܘܼܢ ܤܲܓܝܼ̈ܐܹܐ: ܥܲܠ ܗܵܕܹܐ: ܟܲܕܼ ܡܸܕܸܡ ܕܚܵܫܲܚ ܘܡܸܬܼܒܿܥܸܐ
ܠܐܲܚܹ̈ܐ ܡܸܫܟܿܚܝܼܢ ܚܢܲܢ ܡ̣ܢ ܨܚܵܝܵܐ ܩܲܕܡܵܝܵܐ ܕܲܠܘܵܬܲܢ: ܕܗܵܘ̇
ܕܡܸܕܸܡ ܠܵܐ ܛܵܥܹ̇ܐ ܒܹܗ: ܘܫܲܕܲܪܢܲܢ ܕܹܝܢ ܦܸܚܡܵܐ ܠܚܲܤܝܘܼܬܼܟܼܘܿܢ.
ܦܸܚܡܵܐ ܕܐܸܓܲܪܬܵܐ ܕܐܸܬܼܟܲܬܼܒܲܬ̤ ܠܛܘܼܒܼܵܢܵܐ ܐܹܦܝܼܩܛܹܛܘܿܣ
ܐܲܦܸܤܩܘܿܦܵܐ ܕܩܘܿܪܲܢܬܘܿܣ: ܡ̣ܢ ܩܲܕܝܼܫܵܐ ܐܸܵܬܵܢܵܤܝܼܣ ܐܲܦܸܤܩܘܿܦܵܐ
ܕܐܵܠܹܟܼܤܲܢܕܪܝܼܵܐ: ܗܵܘ̇ ܕܡ̣ܢ ܐܵܪ̈ܝܵܢܘܿ ܥܲܠ ܐܲܦܲܝ̈ ܗܲܝܡܵܢܘܼܬܼܵܐ ܫܲܪܝܼܪܬܵܐ
ܪܕܼܘܦܝܵܐ ܤܲܝܒܲܪ: ܘܐܸܬܼܢܲܨܲܚ ܒܡܵܘܕܝܵܢܘܼܬܼܵܐ.
ܐ. ܐܸܢܵܐ ܤܵܒܲܪ ܗ̄ܘܹ̇ܝܬܼ ܕܡ̣ܢ ܟܲܕܼܘ: ܟܠܵܗ̇ ܤܪܝܼܩܘܼܬܼ ܡܲܡܠܠܵܐ
ܕܗܲܪܲܤܝܘܿܛܹܐ ܕܲܒܼܟܼܠ ܐܲܬܲܪ ܫܲܠܝܵܐ ܗ̄ܘ̣ܵܬܼ: ܡ̣ܢ ܒܵܬܲܪ ܟܢܘܼܫܝܵܐ
ܩܲܕܝܼܫܵܐ ܕܲܗܘ̤ܵܐ ܒܢܝܼܩܝܼܵܐ. ܗܲܝܡܵܢܘܼܬܼܵܐ ܓܹܝܪ ܕܒܼܵܗ̇: ܐܲܝܟܼ ܟܬܼܵܒܹ̈ܐ
ܐܲܠܵܗܵܝܹ̈ܐ ܐܸܬܼܬܵܘܕܝܲܬ̤: ܘܤܵܦܩܵܐ ܗ̣̄ܝ ܠܲܥܩܘܼܪܝܵܐ ܕܟܼܠ ܪ̈ܘܼܫܥܝܼܬܢ:
ܘܲܠܩܘܼܝܵܡܵܐ ܕܗܲܝܡܵܢܘܼܬܼܵܐ ܫܲܪܝܼܪܬܵܐ ܕܒܲܡܫܝܼܚܵܐ. ܡܸܛܠ ܗܵܕܹܐ ܟܹܝܬܼ
ܐܵܦ ܗܵܫܵܐ: ܟܢܘܼ̈ܫܝܹܐ ܡܦܲܪ̈ܫܹܐ ܗܘ̤ܵܘ ܒܓܲܐܠܝܼܵܐ ܘܒܸܐܤܦܵܢܝܼܵܐ
ܘܲܒܼܪܗܘܿܡܹܐ. ܘܟܼܠܗܘܿܢ ܐܲܝܠܹܝܢ ܕܐܸܬܼܘܲܥܲܕܸܼܘ: ܠܘܵܬܼ ܐܲܝܠܹܝܢ
pb. 578
ܕܲܥܕܲܟܹܝܠ ܟܤܹܝܢ ܗ̄ܘ̣ܵܘ ܒܢܲܝ̈ ܪܸܥܝܵܢܹܗ ܕܐܵܪܝܼܘܿܣ: ܐܵܡܲ݁ܪ ܐ̄ܢܵܐ
ܕܹܝܢ ܠܐܵܘܟܤܲܢܛܝܼܣ ܕܡܲܕܝܘܿܠܵܢܹܐ: ܘܠܐܘܼܪܤܵܩܝܼܣ ܘܲܠܘܵܠܝܼܣ
ܘܲܠܓܼܵܐܝܘܿܣ ܕܡ̣ܢ ܦܲܢܢܘܿܢܝܵܐ: ܒܚܲܕܼ ܚܘܼܫܵܒܼܵܐ ܐܲܝܟܼ ܕܡ̣ܢ ܚܲܕܼ
ܪܘܼܚܵܐ ܐܲܚܪܸܡ̣ܘ. ܘܲܟܼܬܲܒܼܘ ܠܟܼܠ ܕܘܼܟܿ: ܡܸܛܠ ܕܗܵܠܹܝܢ ܫܡܵܗܹ̈ܐ
ܕܲܟܼܢܘܼ̈ܫܝܹܐ ܠܢܲܦܫܗܘܿܢ ܡܸܬܼܦܲܪܤܝܼܢ ܗ̄ܘ̣ܵܘ ܘܲܡܟܲܢܹܝܢ: ܕܐܵܦܠܵܐ ܚܲܕܼ
ܟܢܘܼܫܝܵܐ ܢܸܫܬܲܡܲܗ ܒܥܹܕܬܵܐ ܩܵܬܼܘܿܠܝܼܩܹܐ: ܐܸܠܵܐ ܒܲܠܚܘܿܕܼ ܗܵܘ̇
ܕܲܒܼܢܝܼܩܝܼܵܐ: ܕܐܝܼܬܼܵܘܗܝ ܙܵܟܼܘܼܬܼܵܐ ܘܲܥܩܘܼܪܝܵܐ ܕܟܼܠ ܗܹܪܹ̈ܤܝܼܵܣ:
ܝܲܬܿܝܼܪܵܐܝܼܬܼ ܕܹܝܢ ܕܐܵܪܝܵܢܘܼܬܼܵܐ: ܕܡܸܛܠܵܬܼܵܗ̇ ܟܢܲܫ̣ܘ ܗܵܝܕܹܝܢ ܐܵܠܨܵܐܝܼܬܼ.
ܐܲܝܟܲܢܵܐ ܬܘܼܒܼ ܗܵܟܹܝܠ ܡ̣ܢ ܒܵܬܲܪ ܗܵܠܹܝܢ ܟܠܗܹܝܢ: ܠܲܡܦܲܠܵܓܼܘܼ
ܐܵܘ ܠܲܡܥܲܩܵܡܘܼ ܐ̄ܢܵܫ̈ܝܼܢ ܡܲܡܪܚܝܼܢ: ܐܸܢ ܠܵܘ ܡ̣ܢ ܐܵܪ̈ܵܝܵܢܘܿ ܐܝܼܬܲܝܗܘܿ؟
ܠܵܘ ܓܹܝܪ ܡܸܕܸܡ ܕܬܸܡܗܵܐ ܥܵܒܼܕܼܝܼܢ: ܐܸܢ ܗܵܠܹܝܢ ܕܲܥܠܲܝܗܘܿܢ
ܟܬܼܝܼ̈ܒܼܵܢ ܡܨܲܚܹܝܢ: ܐܲܝܟܲܢܵܐ ܕܐܵܦ ܚܲܠܦܹ̈ܐ ܡܵܐ ܕܫܵܡ̇ܥܝܼܢ: ܕܲܦܬܲܟܼܪܹ̈ܐ
ܕܥܲܡܡܹ̈ܐ ܤܹܐܡܵܐ ܘܕܲܗܒܼܵܐ: ܫܵܛܝܘܼܬܼܵܐ ܚܵܫ̇ܒܿܝܼܢ ܠܡܲܠܦܵܢܘܼܬܼܵܐ ܕܲܨܠܝܼܒܼܵܐ
ܐܲܠܵܗܵܝܵܐ. ܐܸܢ ܕܹܝܢ ܡ̣ܢ ܗܵܠܹܝܢ ܕܡܸܤܬܲܒܼܪܝܼܢ ܕܲܬܼܪܝܼܨܵܐܝܼܬܼ ܡܗܲܝܡܢܝܼܢ:
ܘܡܲܚܒܼܝܼܢ ܡܸܕܡ ܕܐܸܫܬܿܠܲܚ ܡ̣ܢ ܐܲܒܼܵܗ̈ܬܼܵܐ ܐܝܼܬܲܝܗܘܿܢ ܗܵܠܹܝܢ ܕܲܒܼܝܲܕܼ
ܥܘܼܩܵܒܹ̈ܐ ܠܲܡܒܲܒܠܵܠܘܼ ܨܵܒܹ̇ܝܢ: ܠܵܐ ܡܸܕܵܡ ܐ̄ܚܪܹܝܢ ܥܵܒܼ̇ܕܝܼܢ: ܐܸܠܵܐ
ܐܲܝܟܼ ܕܲܟܼܝܼܒܼ: ܕܡܲܫܩܹܝܢ ܠܩܲܪ̈ܝܼܒܹܐ ܬܸܛܪܵܐ ܕܪܘܼܓܼܙܵܐ. ܗܵܪܓܝܼܢ
ܕܹܝܢ ܕܠܵܐ ܝܘܼܬܪܵܢ: ܠܗܲܡܦܟܼܵܢܘܼܬܼܵܐ ܕܲܦܫܝܼ̈ܛܹܐ.
ܒ. ܗܵܠܹܝܢ ܕܹܝܢ ܗܵܟܲܢܵܐ ܟܵܬܹ̇̄ܒܼ ܐ̄ܢܵܐ: ܡܸܛܠ ܕܲܩܹ̇ܝܬܼ ܗܵܠܹܝܢ
ܕܲܩܕܼܵܡ ܐܲܒܼܵܗܘܼܬܼܵܟܼ ܗ̤ܘܲܝ̈ ܘܐܸܬܼܟܿܬܸܒܼ ܒܥܘܼܗܕܵܢܵܐ. ܐܲܝܠܹܝܢ ܕܐܸܫܬܿܘܿܦ
ܕܹܝܢ ܠܵܐ ܐܸܬܼܟܿܬܸܒܼ: ܕܐܵܦ ܠܵܐ ܥܘܼܗܕܵܢܗܹܝܢ ܢܵܫܪܲܟܼ ܠܗܵܠܹܝܢ
pb. 579
ܕܡ̣ܢ ܒܵܬܲܪܟܸܢ. ܡܲܢܘܼ ܓܹܝܪ ܫܡܲܥ̣ ܡܸܡܬܼܘܿܡ: ܐܵܘ ܡܲܢ̣ܘܼ ܝܑܼܠܸܦ̣
ܐܵܘ ܐܲܠܸܦ̣؟ ܡ̣ܢ ܨܸܗܝܘܿܢ ܓܹܝܪ ܢܦܲܩ̣ ܢܵܡܘܿܤܵܐ: ܘܦܸܬܼܓܼܵܡܹܗ
ܕܡܵܪܝܵܐ ܡ̣ܢ ܐܘܿܪܵܫܠܸܵܡ. ܗܵܠܹܝܢ ܡ̣ܢ ܐܲܝܡܸܢܵܐ ܢܒܲܥ̣ ܗ̣̄ܘܲܝ̈؟ ܐܵܘ
ܐܲܝܕܵܐ ܫܝܘܿܠ ܓܤܵܬ̤: ܕܢܸܬܼܐܡܲܪ ܕܒܲܪ ܟܝܵܢܵܐ ܗ̄ܘ̣ ܕܐܲܠܵܗܵܘܼܬܹܗ
ܕܡܸܠܬܼܵܐ ܦܲܓܼܪܵܐ ܕܡ̣ܢ ܡܲܪܝܲܡ؟ ܐܵܘ ܕܗ̤ܘ ܡܸܠܬܼܵܐ ܠܒܸܤܪܵܐ ܘܓܲܪ̈ܡܹܐ
ܘܤܲܥܪܵܐ ܘܲܠܟܼܠܹܗ ܦܲܓܼܪܵܐ ܐܬܸܫܬܲܚܠܲܦ ܘܐܸܫܬܲܓܼܢܝܼ ܡ̣ܢ ܟܝܵܢܹܗ؟ ܡܲܢ̣ܘܼ
ܕܹܝܢ ܫܡܲܥ̣ ܒܥܹܕܬܵܐ: ܐܵܘ ܠܲܓܼܡܵܪ ܡ̣ܢ ܟܪܸ̈ܤܛܝܵܢܹܐ: ܕܲܒܼܡܲܤܒܿܪܵܢܘܼܬܼܵܐ
ܘܠܵܐ ܒܲܟܼܝܵܢܵܐ ܦܲܓܼܪܵܐ ܠܒܸܫ̣ ܡܵܪܲܢ؟ ܐܵܘ ܡܲܢ̣ܘܼ ܗܵܢܵܐ ܟܠܹܗ ܐܲܪܫܲܥ̣
ܠܡܸܬܼܚܲܫܲܒܼܘܼ ܘܲܠܡܹܐܡܲܪ: ܕܗ̤ܝ ܐܲܠܵܗܘܼܬܼܵܐ ܒܲܪܬܼ ܟܝܵܢܹܗ ܕܐܲܒܼܵܐ
ܐܸܬܼܓܲܙܪܲܬ̤: ܘܠܵܐ ܡܫܲܡܠܲܝܬܼܵܐ ܡ̣ܢ ܡܫܲܡܠܝܼܘܼܬܼܵܐ ܗܘ̤ܵܬܼ. ܘܗܵܘ̇
ܕܲܒܼܩܲܤܝܵܐ ܒܨܨ̈ܐ ܐܸܬܼܩܲܒܲܥ ܠܵܐ ܗ̄ܘ̣ܵܐ ܦܲܓܼܪܵܐ ܗܵܘ̇: ܐܸܠܵܐ ܗܵܘ̇ ܠܲܡ
ܟܝܵܢܵܐ ܡܟܼܝܼܢܵܢܵܐ ܕܚܟܼܡܬܼܵܐ؟ ܡܲܢ̣ܘ ܕܹܝܢ ܫܡܲܥ̣: ܕܠܵܐ ܗ̄ܘ̣ܵܐ ܡ̣ܢ
ܡܲܪܝܲܡ: ܐܸܠܵܐ ܡ̣ܢ ܟܝܵܢܹܗ ܕܝܼܠܹܗ ܓܒܲܠ̣ ܠܝܵܬܹܗ ܦܲܓܼܪܵܐ ܚܵܫܘܿܫܵܐ
ܗ̤ܘ ܡܸܠܬܼܵܐ؟ ܘܢܸܩܪܸܐ ܟܪܸܤܛܝܵܢܵܐ ܠܐܵܝܠܹܝܢ ܕܗܵܠܹܝܢ ܡܡܲܠܸܠ.
ܡܲܢ̣ܘܼ ܕܹܝܢ ܐܸܫܟܲܚ ܗܵܢܵܐ ܪܘܼܫܥܵܐ ܕܲܕܼܠܵܐ ܢܡܵܘܿܣ: ܕܐܵܦܸܢ ܥܲܠ
ܬܲܪܥܝܼܬܹܗ ܢܲܝܬܸܐ ܘܢܹܐܡܲܪ: ܕܡ̇ܢ ܕܐܵܡܲ݁ܪ ܠܲܡ ܕܡ̣ܢ ܡܲܪܝܲܡ ܗ̄ܘ̣
ܦܲܓܼܪܹܗ ܕܡܵܪܲܢ: ܠܵܐ ܗ̄ܘ̣ܵܐ ܒܲܬܼܠܝܼܬܼܵܝܘܼܬܼܵܐ: ܐܸܠܵܐ ܒܲܪܒܼܝܼܥܵܝܘܼܬܼܵܐ ܥܲܠ
ܐܲܠܵܗܘܼܬܼܵܐ ܡܸܬܼܚܲܫܲܒܼ؟ ܘܡܸܛܠ ܗܵܢܵܐ ܗܵܠܹܝܢ ܕܗܵܟܲܢܸܵܐ ܐܵܡ̇ܪܝܼܢ:
ܡ̣ܢ ܟܝܵܢܵܐ ܕܐܲܠܵܗܘܼܬܼܵܐ ܤܵܝ̇ܡܝܼܢ ܠܦܲܓܼܪܵܐ ܗܵܘ̇ ܕܦܵܪܘܿܩܲܢ ܠܒܸܫ̣.
ܡ̣ܢ ܐܲܝܟܵܐ ܕܹܝܢ ܬܘܼܒܼ ܟܲܝ ܒܕܼܵܘ ܐ̄ܢܵܫ̈ܝܼܢ ܪܘܼܫܥܵܐ ܕܦܵܚܹ̇ܡ ܠܗܵܢܵܐ
ܕܐܸܬܼܐܡܲܪ: ܐܲܝܟܼ ܕܢܹܐܡܪܘܼܢ ܕܠܵܐ ܛܠܸܐ ܗ̄ܘ̣ܵܐ ܦܲܓܼܪܵܐ ܡ̣ܢ ܐܲܠܵܗܘܼܬܹܗ
ܕܡܸܠܬܼܵܐ: ܐܸܠܵܐ ܐܝܼܬܼܵܝܵܐܝܼܬܼ ܥܲܡܹܗ ܐܝܼܬܼܵܘܗܝ: ܡܸܛܠ ܕܡ̣ܢ ܟܝܵܢܵܗ̇
pb. 580
ܕܚܸܟܼܡܬܼܵܐ ܐܸܬܼܩܲܝܲܡ؟ ܐܲܝܟܲܢܵܐ ܕܹܝܢ ܠܡܸܬܼܦܲܪܬܵܟܼܘܼ ܐܲܡܪܲܚ̣ܘ ܗܵܠܹܝܢ
ܕܡܸܬܼܩܪܹܝܢ ܟܪܸ̈ܤܛܝܵܢܹܐ: ܕܡܵܪܲܢ ܗܵܘ̇ ܕܡ̣ܢ ܡܲܪܝܲܡ ܕܢܵܚ̣: ܒܪܵܐ
ܕܐܲܠܵܗܵܐ ܐܝܼܬܼܵܘܗܝ ܒܲܟܼܝܵܢܵܐ. ܒܲܒܼܤܲܒܪ ܕܹܝܢ: ܡ̣ܢ ܙܲܪܥܵܐ ܗܵܘ̇ ܕܒܹܝܬܼ
ܕܵܘܝܼܕܼ: ܡ̣ܢ ܦܲܓܼܪܵܐ ܕܲܙܗܝܼܬܼܵܐ ܡܲܪܝܡ؟ ܗܵܠܹܝܢ ܕܹܝܢ ܗܵܟܲܢܵܐ ܗܘ̤ܵܘ
ܡܲܪ̈ܲܚܹܐ ܕܢܹܐܡܪܘܼܢ: ܕܲܡܫܝܼܚܵܐ ܗܵܘ̇ ܕܚܲܫ̣ ܒܲܒܼܤܲܪ ܘܐܸܨܛܠܸܒܼ:
ܠܵܐ ܠܲܡ ܐܝܼܬܼܵܘܗܝ ܡܵܪܝܵܐ ܘܦܵܪܘܿܩܵܐ ܘܐܲܠܵܗܵܐ ܘܲܒܼܪܹܗ ܕܐܲܒܼܵܐ؟
ܐܵܘ ܐܲܝܟܲܢܵܐ ܟܪܸ̈ܤܛܝܵܢܹܐ ܨܵܒܹ̇ܝܢ ܠܡܸܬܼܩܪܵܝܘܼ: ܐܲܝܠܹܝܢ ܕܐܵܡ̇ܪܝܼܢ ܕܥܲܠ
ܒܲܪܢܵܫܵܐ ܙܲܕܝܼܩܵܐ ܐܲܝܟܼ ܕܥܲܠ ܚܲܕܼ ܡ̣ܢ ܢܒܿܝܹ̈ܐ ܐܸܬܼ݂ܵܐ ܡܸܠܬܼܵܐ: ܘܠܵܘ
ܗ̤ܘ ܗܘ̤ܵܐ ܒܲܪ ܐ̄ܢܵܫܵܐ ܒܲܢܤܝܒܼܘܼܬܼܵܐ ܕܦܲܓܼܪܵܐ ܕܡ̣ܢ ܡܲܪܝܲܡ. ܐܸܠܵܐ
ܐ̄ܚܪܹܝܢ ܠܲܡ ܐܝܼܬܼܵܘܗܝ ܡܫܝܼܚܵܐ: ܘܲܐ̄ܚܪܹܝܢ ܐܝܼܬܼܵܘܗܝ ܡܸܠܬܼܵܐ ܗܵܘ̇
ܕܲܩܕܼܵܡ ܡܲܪܝܲܡ: ܘܲܩܕܼܵܡ ܥܵܠܡܹ̈ܐ ܐܝܼܬܼܵܘܗܝ ܒܪܵܐ ܕܐܲܒܼܵܐ. ܘܲܐ̄ܚܪܹܝܢ
ܠܲܒܼܪܹܗ ܕܐ̄ܢܵܫܵܐ ܤܵܝܡ̇ܪܝܼܢ: ܘܲܐ̄ܚܪܹܝܢ ܠܐܲܠܵܗܵܐ ܡܸܠܬܼܵܐ ܐܵܡ̇ܪܝܼܢ؟
ܓ. ܗܵܠܹܝܢ ܗܵܟܲܢܵܐ ܡܦܲܪܫܵܐܝܼܬܼ ܪ̈ܫܝܼܡܵܢ ܗ̣̄ܘܲܝ̈ ܕܐܸܬܼܐܡܲܪ
ܒܥܘܼܗܕܵܢܵܐ: ܟܲܕܼ ܚܲܕܼ ܪܸܥܝܵܢܵܐ: ܕܲܠܚܲܕܼ ܢܝܼܫܵܐ ܕܪܘܼܫܥܵܐ ܚܲܬܿܝܼܬܼܵܐ
ܩܲܢ̈ܝܵܢ ܗ̣̄ܘܲܝ̈. ܘܡܸܛܠ ܗܵܠܹܝܢ ܡܸܬܼܚܪܹܝܢ ܗ̄ܘ̣ܵܘ ܘܢܵܨ̇ܝܢ ܥܲܡ
ܚܕܼܵܕܹ̈ܐ: ܗܵܠܹܝܢ ܕܡܸܫܬܲܒܼܗܪܝܼܢ ܒܬܼܵܘܕܝܼܬܼܵܐ ܕܐܲܒܼܵܗ̈ܬܼܵܐ ܕܵܗܘ̤ܵܬܼ
ܒܢܝܼܩܝܼܵܐ. ܐܸܢܵܐ ܕܹܝܢ ܬܸܗ̇ܪܹܬܼ ܒܕܸܚܠܲܬܼ ܐܲܠܵܗܵܐ ܕܒܼܵܟܼ: ܕܚܲܡܡܤܸܢ̣ܬܿ
ܘܠܵܐ ܒܠܲܡ̣ܬܼܿ ܠܐܲܝܠܹܝܢ ܕܗܵܠܹܝܢ ܐܵܡ̇ܪܝܼܢ: ܗܲܝܡܵܢܘܼܬܼܵܐ ܕܹܝܢ ܕܕܸܚܠܲܬܼ
ܐܲܠܵܗܵܐ ܤܵܡ̣ܬܿ ܩܕܼܸܵܡܲܝܗܘܿܢ. ܕܗܵܐ ܕܫܲܡ̣ܥܘܼܗ̇: ܐܵܘ ܢܸܫܬܿܩܘܼܢ:
ܐܵܘ ܐܸܢ ܡܸܬܼܚܪܹܝܢܬ: ܥܲܡ ܫܲܪܟܵܐ ܕܗܲܪ̈ܲܤܝܘܿܛܹܐ ܢܸܬܼܚܲܫܒܘܼܢ. ܗܵܠܹܝܢ
ܓܹܝܪ ܕܐܸܬܼܡܲܠܲܠ: ܠܵܐ ܠܡܸܐܡܵܪܘܼ ܘܠܵܐ ܠܡܸܫܬܿܡܵܥܘܼ ܒܹܝܬܼ
ܟܪܸ̈ܤܛܝܵܢܹܐ ܙܵܕܹܩ: ܐܸܠܵܐ ܢܘܼܟܼܪ̈ܵܝܵܢ ܐܸܢܹܝܢ ܒܟܼܠ ܙܬܝܼ̈ܢ ܠܡܲܠܦܵܢܘܼܬܼܵܐ
pb. 581
ܕܲܫܠܝܼܚܘܼܬܼܵܐ. ܡܸܛܠ ܗܵܢܵܐ ܕܹܝܢ ܐܵܦ ܐܸܢܵܐ ܗܵܠܹܝܢ ܕܡܸܢܗܘܿܢ
ܐܸܬܼܐܡܲܪ: ܕܒܸܐܓܲܪܬܵܐ ܓܲܠܝܵܐܝܼܬܼ ܢܸܬܼܪ̈ܲܫܡܵܢ ܥܸܒܼ̇ܕܼܬܼ ܐܸܢܹܝܢ. ܕܤܵܦܩܵܐܝܼܬܼ
ܡ̣ܢ ܫܸܡܥܵܐ ܒܲܠܚܘܿܕܼ: ܟܠܢܵܫ ܢܸܚܙܸܐ ܒܸܗܬܿܬܼܵܐ ܘܪܘܼܫܥܵܐ ܕܲܒܼܗܘܿܢ.
ܘܐܵܦܸܢ ܙܵܕܹܩ ܗ̄ܘ̣ܵܐ ܓܹܝܪ ܒܝܲܕܼ ܐܲܪ̈ܝܼܟܼܵܬܼܵܐ: ܠܲܡܩܲܛܪܵܓܼܘܼ ܘܲܠܡܲܟܵܤܘܼ
ܠܠܵܐ ܝܑܼܕܲܥܬܼܵܐ ܕܗܵܢܘܿܢ ܕܗܵܠܹܝܢ ܬܸܬܼܚܲܫܲܒܼܘ. ܐܸܠܵܐ ܤܵܦܹ̇ܩ ܥܕܲܡܵܐ
ܠܗܵܠܹܝܢ ܒܐܸܓܲܪܬܲܢ: ܕܠܵܐ ܢܵܘܤܸܦ ܬܘܼܒܼ ܠܡܸܟܼܬܲܒܼ ܓܘܼܕܵܦܵܐ
ܕܡܸܢܗܘܿܢ: ܗܵܠܹܝܢ ܓܹܝܪ ܕܗܵܟܲܢܵܐ ܓܲܠܝܵܐ ܫܟܼܝܼܪܘܼܬܼܗܹܝܢ: ܠܡܲܗܦܵܟܼܘܼ
ܘܠܲܡܥܲܩܵܒܼܘܼ ܒܝܲܬܿܝܼܪ̈ܵܬܼܵܐ ܠܵܐ ܘܵܠܹ̇ܐ. ܕܠܵܐ ܠܗܵܠܹܝܢ ܕܡܸܬܼܚܪܹܝܢ
ܚܠܵܦܲܝܗܹܝܢ: ܐܲܝܟܼ ܗܵܘ̇ ܕܦܘܼܫܵܟܼܵܐ ܐܝܼܬܼ ܥܠܲܝܗܹܝܢ ܢܸܤܬܲܒܼܪ̈ܵܢ. ܐܸܠܵܐ
ܒܲܠܚܘܿܕܼ ܤܵܦܹ̇ܩ ܠܲܡܦܲܢܵܝܘܼ ܘܲܠܡܹܐܡܲܪ ܠܘܼܩܒܲܠ ܗܵܠܹܝܢ: ܕܗܵܠܹܝܢ
ܠܵܐ ܐܝܼܬܲܝܗܹܝܢ ܕܥܹܕܬܵܐ ܩܲܕܝܼܫܬܼܵܐ ܕܲܒܼܟܼܠ ܐܲܬܲܪ: ܘܠܵܐ ܗ̄ܘ̣ܵܐ ܗܵܠܹܝܢ
ܐܸܬܼܪܲܥܝܼܘ ܐܲܒܼܵܗܲܝܣ̈ܢ ܛܘܼ̈ܒܼܵܢܹܐ. ܕܠܵܐ ܕܹܝܢ ܗܵܠܹܝܢ ܥܸܠܬܼܵܐ ܓܘܼܡܕܵܢܝܼܬܼܵܐ
ܡܸܫܟܿܚܵܢܹ̈ܐ ܕܒܼܝܼ̈ܫܬܼܵܐ ܢܸܤܒܼܘܼܢ ܠܢܦܫܗܘܿܢ: ܫܲܦܝܼܪ ܗ̄ܘ̣ ܕܡ̣ܢ ܟܬܼܵܒܹ̈ܐ
ܐܲܠܵܗܵܝܹ̈ܐ ܩܲܠܝܼܠ ܢܥܲܗܸܕܼ: ܕܲܟܼܒܪ ܐܵܦܸܢ ܗܵܟܲܢܵܐ ܢܸܬܼܟܲܚܕܼܘܼܢ ܘܢܸܫܬܲܐܠܘܼܢ
ܡ̣ܢ ܚܘܼܫܵܒܲܝ̈ܗܘܿܢ ܨܵܐܹ̈ܐ.
ܕ. ܡ̣ܢ ܐܲܝܟܵܐ ܠܟܼܘܿܢ ܠܡܹܐܡܲܪ ܐܘܿ ܛܵܠܘܿܡܹ̈ܐ: ܕܦܲܓܼܪܵܐ ܒܲܪ
ܟܝܵܢܵܐ ܗ̄ܘ̣ ܕܐܲܠܵܗܘܼܬܹܗ ܕܡܸܠܬܼܵܐ؟ ܡ̣ܢ ܗܵܕܹܐ ܓܹܝܪ ܫܲܦܝܼܪ ܠܲܡܫܲܪܵܝܘܼ:
ܕܡܵܐ ܕܗܵܕܹܐ ܐܸܬܼܚܲܙܝܲܬ̤ ܢܲܫܝܼܫܬܼܵܐ: ܐܵܦ ܗܵܠܹܝܢ ܐ̄ܚܪ̈ܵܢܝܵܬܼܵܐ ܐܲܝܟܼ ܗܵܕܹܐ
ܥܲܡܵܗ̇ ܢܸܬܼܝܲܕܼ̈ܥܵܢ. ܡ̣ܢ ܟܬܼܵܒܹ̈ܐ ܗܵܠܹܝܢ ܠܵܐ ܡܲܨܝܵܐ ܠܡܸܫܟܵܚܘܼ.
ܕܐܲܠܵܗܵܐ ܓܹܝܪ ܒܦܲܓܼܪܵܐ ܐ̄ܢܵܫܝܵܐ ܗܘ̤ܵܐ: ܐܵܡ̇ܪܝܼܢ. ܘܐܲܒܼܵܗܲܝ̈ܢ ܬܘܼܒܼ
ܕܲܒܼܢܝܼܩܵܝܼܵܐ ܐܸܬܼܟܲܬܲܫܘ: ܠܵܘ ܗ̄ܘ̣ܵܐ ܠܦܲܕܓܼܪܵܐ: ܐܸܠܵܐ ܠܹܗ ܠܲܒܼܪܵܐ ܐܸܡ݂ܲܪܘ
ܕܐܝܼܬܼܵܘܗܝ ܒܲܪ ܟܝܵܢܹܗ ܕܐܲܒܼܵܐ. ܠܦܲܓܼܪܵܐ ܕܹܝܢ ܡ̣ܢ ܡܲܪܝܲܡ ܐܵܘܕܝܼܘ
pb. 582
ܕܐܝܼܬܼܵܘܗܝ: ܐܲܝܟܼ ܟܬܼܵܒܹ̈ܐ ܐܲܠܵܗܵܝܹ̈ܐ: ܐܵܘ ܗܵܟܹܝܠ ܟܦܘܿܪܘ ܒܤܘܼܢܗܵܕܘܿܣ
ܕܢܝܼܩܝܼܵܐ: ܘܝܼܕܼܝܼܥܵܐ ܕܐܲܝܟܼ ܗܵܪ̈ܲܤܝܘܿܛܹܐ ܗܵܠܹܝܢ ܡܲܥܠܝܼܢ ܐܢ̄ܬܿܘܿܢ: ܐܵܘ
ܐܸܢ ܨܸܒܹ̇ܝܢ ܐܢ̄ܬܿܘܿܢ ܕܲܒܼ̈ܢܲܝܵܐ ܕܐܲܒܼܵܗ̈ܬܼܵܐ ܢܬܸܗܘܘܿܢ: ܠܵܐ ܬܸܬܼܪܲܥܘܿܢ
ܠܒܲܪ ܡ̣ܢ ܡܵܐ ܕܢܸܡܘܿܢ ܐܲܟܼܬܸܒܼܘ. ܐܵܦ ܗܵܕܹܐ ܓܹܝܪ: ܠܲܫܟܼܝܼܪܘܼܬܼܗܹܝܢ
ܕܡܸܠܝ̈ܟܿܘܿܢ ܡܨܝܢ ܐܢ̄ܬܿܘܿܢ ܠܡܸܤܬܲܟܵܠܘܼ. ܐܸܢ ܓܹܝܪ ܒܲܪ ܟܝܵܢܹܗ
ܗ̄ܘ̣ ܡܸܠܬܼܵܐ ܕܦܲܓܼܪܵܐ ܕܐܝܼܬܼܵܘܗܝ ܡ̣ܢ ܐܲܪܥܵܐ ܟܝܵܢܹܗ: ܒܲܪ ܟܝܵܢܹܗ
ܗ̄ܘ̣ ܕܹܝܢ ܡܸܠܬܼܵܐ ܕܐܲܒܼܵܐ: ܐܲܝܟܼ ܬܵܘܕܝܼܬܼܵܐ ܕܐܲܒܼܵܗܝ̈ܢ: ܡܸܫܬܿܟܲܚ ܠܹܗ
ܐܵܦ ܗ̤ܘ ܐܲܒܼܵܐ: ܟܝܵܢܹܗ ܕܦܲܓܼܪܵܐ ܗܵܘ̇ ܕܡ̣ܢ ܐܲܪܥܵܐ ܐܝܼܬܼܵܘܗܝ.
ܘܡܵܢܵܐ ܡܸܟܹܝܠ ܥܵܕܼܠܝܼܢ ܐܢ̄ܬܿܘܿܢ ܠܐܲܪ̈ܝܵܢܘܿ ܕܩܵܪܹܝܢ ܠܲܒܼܪܵܐ ܒܪܝܼܬܼܵܐ:
ܟܲܕܼ ܐܲܢ̄ܬܿܘܿܢ ܐܵܦ ܠܹܗ ܠܐܲܒܼܵܐ: ܒܲܪ ܟܝܵܢܵܐ ܕܲܒܼܪܝܼܬܼܵܐ ܤܵܝ̇ܡܝܼܢ ܐܢ̄ܬܿܘܿܢ؟
ܘܡܸܫܬܼܿܪܓܠܝܼܢ ܐܢ̄ܬܿܘܿܢ ܬܘܼܒܼ ܠܲܐ̄ܚܪܹܝܢ ܪܘܼܫܥܵܐ: ܒܕܼܵܐܡ̇ܪܝܼܢ ܐܢ̄ܬܿܘܿܢ
ܕܲܠܒܸܤܪܵܐ ܘܲܠܓܲܪ̈ܡܹܐ ܘܲܠܤܲܥܪܵܐ ܘܠܲܓܼܝܵܕܹ̈ܐ ܘܲܠܟܼܠܹܗ ܦܲܓܼܪܵܐ
ܐܸܬܼܗܦܸܟܼ ܡܸܠܬܼܵܐ ܘܐܸܫܬܲܚܠܲܦ ܡ̣ܢ ܟܝܵܢܹܗ. ܘܲܠܡܵܢܵܐ ܡܸܟܹܝܠ ܠܵܐ
ܐܵܡ̇ܪܝܼܢ ܐܢ̄ܬܿܘܿܢ ܓܲܠܝܵܐܝܼܬܼ: ܕܡ̣ܢ ܐܲܪܥܵܐ ܗܘ̤ܵܐ؟ ܡ̣ܢ ܐܲܪܥܵܐ ܓܹܝܪ
ܐܝܼܬܼܵܘܗܝ ܟܝܵܢܹܗ ܕܦܲܓܼܪܵܐ. ܡ̣ܢ ܐܲܝܟܵܐ ܕܹܝܢ ܗܵܕܹܐ ܟܠܵܗ̇ ܤܲܟܼܠܘܼܬܼܵܐ:
ܕܐܲܢ̄ܬܿܘܿܢ ܥܲܡܟܼܘܿܢ ܬܸܬܼܟܵܬܼܿܫܘܼܢ؟ ܐܵܦܸܢ ܓܹܝܪ ܟܲܕܼ ܐܵܡ̇ܪܝܼܢ ܐܢ̄ܬܿܘܿܢ
ܕܒܲܪ ܟܝܵܢܹܗ ܗ̄ܘ̣ ܡܸܠܬܼܵܐ ܕܦܲܓܼܪܵܬܐ: ܐ̄ܚܪܹܢܵܐ ܥܲܡ ܐ̄ܚܪܹܢܵܐ ܡܸܫܬܵܘܕܥܝܼܢ
ܐܢ̄ܬܿܘܿܢ. ܒܡܸܫܬܲܠܦܵܢܘܼܬܼܵܠ ܕܹܝܢ ܕܲܠܒܸܤܪܵܐ. ܫܘܼܚܠܵܦܵܐ ܕܝܼܠܹܗ
ܕܡܸܠܬܼܵܐ ܐܲܝܟܼ ܕܒܲܫܪܲܓܼܪ̈ܲܓܼܝܵܬܼܵܐ ܚܵܙܹ̇ܝܢ ܐܢ̄ܬܿܘܿܢ. ܘܡܲܢ̣ܘܼ ܡܸܟܹܝܠ: ܕܟܲܕܼ
ܗܵܠܹܝܢ ܡܡܲܠܠܝܼܢ ܐܢ̄ܬܿܘܿܢ: ܢܤܲܝܒܲܪܟܼܘܿܢ؟ ܝܲܬܿܝܼܪ ܓܹܝܪ ܡ̣ܢ ܟܠ
ܗܹܪܹܤܝܼܣ: ܐܲܢ̄ܬܼܿܘܿܢ ܠܪܘܼܫܥܵܐ ܐܸܨܛܠܝܼܬܿܘܿܢ. ܐܸܢ ܓܹܝܪ ܒܲܪ ܟܝܵܢܹܗ
ܗ̄ܘ̣ ܡܸܠܬܼܵܐ ܕܦܲܓܼܪܵܐ: ܝܲܬܿܝܼܪ ܗ̄ܘ̣ ܥܘܼܗܕܵܢܵܐ ܕܲܚܫܲܚܬܼܵܗ̇ ܕܡܪܝܲܡ.
pb. 583
ܡܸܛܠ ܕܡܸܫܟܿܚܵܐ ܗ̣̄ܝ ܕܢܸܗܘܸܐ ܐܝܼܬܼܵܘܗܝ ܦܲܓܼܪܵܐ ܐܲܡܝܼܢܵܐܝܼܬܼ: ܐܲܝܟܼ
ܕܐܝܼܬܼܵܘܗܝ ܗ̤ܘ ܡܸܠܬܼܵܐ. ܐܸܢ ܐܲܝܟܼ ܕܐܲܢ̄ܬܿܘܿܢ ܡܸܬܼܪܲܥܹܝܢ ܕܒܲܪ ܟܝܵܢܹܗ
ܗ̄ܘ̣ ܕܦܲܓܼܪܵܐ: ܡܵܢܵܐ ܕܹܝܢ ܡܸܬܼܒܿܥܸܐ ܗ̄ܘ̱ܵܐ ܡܹܐܬܼܝܹܗ ܕܡܸܠܬܼܵܐ: ܐܵܘ
ܕܗ̤ܘ ܒܲܪ ܟܝܵܢܹܗ ܢܸܠܒܲܫ ܗ̄ܘ̣ܵܐ: ܐܵܘ ܢܸܫܬܲܚܠܲܦ ܡ̣ܢ ܟܝܵܢܹܗ
ܘܢܸܗܘܸܐ ܦܲܓܼܪܵܐ؟ ܠܵܐ ܗ̄ܘ̣ܵܐ ܓܹܝܪ ܝܵܬܼܵܗ̇ ܢܸܤܒܲܬ̤ ܐܲܠܵܗܘܼܬܼܵܐ: ܐܵܘ
ܒܲܪ ܟܝܵܢܵܗ̇ ܠܸܒܼܫܲܬ̤. ܠܵܐ ܓܹܝܪ ܚܛ̣ܵܐ ܡܸܠܬܼܵܐ ܗܵܘ̇ ܕܠܲܐ̄ܚܪ̈ܵܢܹܐ ܡ̣ܢ
ܚܛܵܗܹ̈ܐ ܦܵܪܹܩ: ܕܢܸܫܲܚܠܲܦ ܠܦܲܓܼܪܵܐ: ܘܲܢܩܲܪܸܒܼ ܝܵܬܹܗ ܚܠܵܦܵܘܗܝ
ܕܸܒܼܚܬܼܵܐ: ܘܗ̤ܘ ܠܹܗ ܢܸܦܪܘܿܩ.
ܗ. ܐܸܠܵܐ ܠܵܘ ܗܵܟܲܢܵܐ: ܚܵܣ! ܡ̣ܢ ܙܲܪܥܹܗ ܓܹܝܪ ܕܐܲܒܼܪܵܗܵܡ
ܢܤܲܒܼ: ܐܲܝܟܼ ܕܐܸܡ݂ܲܪ ܫܠܝܼܚܵܐ: ܘܡܸܛܠ ܗܵܢܵܐ ܙܵܕܹܩ ܗ̄ܘ̣ܵܐ ܕܢܸܬܿܕܲܡܸܐ
ܠܐܲܚܵܘ̈ܗܝ: ܘܢܸܤܲܒܼ ܦܲܓܼܪܵܐ ܒܲܪ ܕܡܘܼܬܲܢ. ܡܸܛܠ ܗܵܢܵܐ ܐܵܦ
ܒܩܘܼܫܬܼܵܐ ܡܸܬܼܒܲܥܝܵܐ ܡܲܪܝܲܡ: ܕܡܸܢܵܗ̇ ܢܲܤܒܹܗ: ܘܐܲܝܟܼ ܕܝܼܠܹܗ ܚܠܵܦܲܝܢ
ܩܲܪܒܹܗ. ܘܲܠܗܵܕܹܐ ܡܚܵܘܸ̇ܐ ܗ̄ܘ̣ܵܐ ܒܲܢܒܼܝܼܘܼܬܹܗ ܐܹܫܲܥܝܵܐ ܟܲܕܼ ܐܵܡܲ݁ܪ: ܕܗܵܐ
ܒܬܼܘܼܠܬܼܵܐ ܒܵܛ̇ܢܵܐ ܘܝܵܠ̇ܕܵܐ ܒܪܵܐ: ܘܢܸܬܼܩܪܸܐ ܫܡܹܗ ܥܲܡܲܢܘܼܐܹܝܠ.
ܘܲܠܓܲܒܼܪܝܹܠ ܕܡܸܫܬܲܕܲܪ ܠܘܵܬܼܵܗ̇: ܠܵܐ ܗ̄ܘ̣ܵܐ ܫܚܝܼܡܵܐܝܼܬܼ ܠܘܵܬܼ
ܒܬܼܘܼܠܬܼܵܐ: ܐܸܠܵܐ ܠܘܵܬܼ ܒܬܼܘܼܠܬܼܵܐ ܕܲܡܟܼܝܼܪܵܐ ܗ̄ܘ̣ܵܬܼ ܠܓܲܒܼܪܵܐ: ܕܡ̣ܢ
ܡܟܼܝܼܪܵܗ̇ ܢܚܵܘܹܝܗ̇ ܠܡܲܪܝܲܡ ܕܐܲܢ̄ܬܿܬܼܵܐ ܗ̣̄ܝ ܫܲܪܝܼܪܬܵܐ. ܘܲܡܗܲܗܸܕܼ
ܟܬܼܵܒܼܵܐ ܝܲܠܕܹܗ: ܘܐܵܡܲ݁ܪ: ܕܲܟܼܪܲܟܼܬܹܗ ܒܥܲܙܪܘܼܪܹ̈ܐ: ܘܐܲܪܡܝܵܬܹܗ
ܒܐܘܿܪܝܵܐ. ܘܬܼܘܼܒܼ ܐ̄ܚܪ̈ܵܢܹܐ: ܟܲܕܼ ܝܵܗ̇ܒܿܝܼܢ ܛܘܼܒܼܵܐ ܠܲܬܿܕܲܝ̈ܵܐ
ܕܐܲܢܩ̣ܘܼܗܝ. ܘܲܕܩܲܪܸܒܼ ܩܘܼܪܒܵܢܵܐ: ܡܸܛܠ ܕܦܵܬܲܚ ܡܲܪܒܿܥܵܐ ܗ̄ܘ̣ܵܐ
ܗܵܘ̇ ܕܐܸܬܼܝܼܠܸܕܼ. ܗܵܠܹܝܢ ܗܵܟܹܝܠ ܟܠܗܹܝܢ: ܡܫܵܘ̈ܕܥܵܢܝܵܬܼܵܐ ܗ̣̄ܘܲܝ̈
pb. 584
ܕܝܲܠܕܵܗ̇ ܕܲܒܼܬܼܘܼܠܬܼܵܐ. ܐܵܦ ܓܲܒܼܪܝܹܠ ܕܹܝܢ ܙܗܝܼܪܵܐܝܼܬܼ ܤܲܒܿܪܵܗ̇ ܗ̄ܘ̣ܵܐ
ܘܐܸܡ݂ܲܪ: ܠܵܐ ܗ̄ܘ̣ܵܐ ܫܚܝܼܡܵܐܝܼܬܼ ܗܵܘ̇ ܕܡܸܬܼܝܼܠܸܕܼ ܒܹܟܼܝ: ܕܠܵܐ ܢܸܤܬܿܒܲܪ
ܕܡ̣ܢ ܠܒܲܪ ܥܵܐܹ̇ܠ ܠܹܗ ܓܘܼܫܡܵܐ: ܐܸܠܵܐ ܡܸܢܹܟܼܝ ܠܲܡ: ܕܬܸܬܼܗܲܝܡܲܢ
ܕܡܸܢܵܗ̇ ܐܝܼܬܼܵܘܗܝ ܟܝܵܢܵܐܝܼܬܼ ܗܵܘ̇ ܕܡܸܬܼܝܼܠܸܕܼ. ܟܲܕܼܸ ܓܹܝܪ ܓܲܠܝܵܐܝܼܬܼ
ܐܵܦ ܗ̤ܘ ܟܝܵܢܵܐ ܗܵܕܹܐ ܡܚܵܘܸܐ: ܕܠܵܐ ܡܲܨܝܵܐ ܒܬܼܘܼܠܬܼܵܐ ܠܡܲܝܬܵܝܘܼ
ܚܲܠܒܼܵܐ: ܐܸܠܵܐ ܠܘܼܩܕܲܡ ܝܼܠܸܕܼܬ̤: ܘܠܵܐ ܡܲܨܝܵܐ ܕܲܒܼܚܲܠܒܼܵܐ ܢܸܬܼܪܲܒܸܿܐ
ܦܲܓܼܪܵܐ ܘܢܸܬܼܟܪܸܟܼ ܒܥܲܙܪܘܼܪܹ̈ܐ: ܟܲܕܼ ܠܵܐ ܠܘܼܩܕܲܡ ܟܝܵܢܵܐܝܼܬܼ ܐܸܬܼܝܼܠܸܕܼ
ܒܲܫܪܵܪܵܐܘ ܗܵܢܵܘ ܗܵܘ̇ ܕܐܸܬܼܓܙܲܪ ܒܲܪ ܬܡܵܢܝܵܐ ܝܵܘܡ̈ܝܼܢ: ܠܗܵܢܵܐ
ܫܸܡܥܘܿܢ ܥܲܠ ܕܪ̈ܵܥܵܘܗܝ ܩܲܒܸܠ̣: ܗܵܢܵܐ ܗܘ̤ܵܐ ܛܲܠܝܵܐ ܘܲܪܒܵܐ:
ܘܲܠܬܲܪܬܲܥܸܤܪܹ̈ܐ ܫܢ̈ܝܼܢ ܤ̣ܡܲܟܼ: ܘܲܠܫܲܢ̄ܬܼܵܐ ܕܬܼܠܵܬܼܝܼܢ ܡܲܛܝܼ. ܘܠܵܐ
ܗ̄ܘ̣ܵܐ ܐܲܝܟܼ ܕܐ̄ܢܵܫ̈ܝܼܢ ܐܲܤܒܲܪܘ: ܕܗ̤ܘ ܟܝܵܢܵܐ ܕܡܸܠܬܼܵܐ ܐܸܫܬܲܚܠܲܦ
ܘܐܸܬܼܓܙܲܪ: ܗܵܘ̇ ܕܠܵܐ ܡܸܫܬܲܚܠܦܵܢܵܐ ܘܠܵܐ ܡܸܫܬܲܓܼܢܝܵܢܵܐ ܐܝܼܬܼܵܘܗܝ:
ܐܲܝܟܲܢܵܐ ܗ̤ܘ ܦܵܪܘܩܲܢ ܐܸܡ݂ܲܪ: ܚܙܵܐܘܼܢܵܢܝ ܚܙܵܐܘܼܢܵܢܝ: ܕܐܸܢܵܐ ܐ̄ܢܵܐ
ܘܠܵܐ ܐܸܫܬܲܚ̇ܠܦܹܬܼ. ܘܦܵܘܠܘܿܣ ܫܠܝܼܚܵܐ ܡܲܟܼܬܸܒܼ: ܕܝܼܫܘܿܥ
ܡܫܝܼܚܵܐ: ܐܸܬܼܡܵܠܝ ܘܝܵܘܡܵܢܵܐ ܗ̤ܘܝܘܼ ܘܠܥܵܠܲܡ ܥܵܠܡܝܼܢ. ܐܸܠܵܐ
ܒܗܵܘ̇ ܦܲܓܼܪܵܐ ܕܐܸܬܼܝܼܠܸܵܕܼ: ܘܐܸܬܼܓܙܲܪ ܘܐܸܬܿܛܥܸܢ: ܘܐܸܟܲܠ̣ ܘܲܠ̣ܠܝܼ:
ܘܲܒܼܩܲܤܵܐ ܒܨܨ̈ܐ ܐܸܬܼܩܲܒܲܥ ܘܚܲܫ̣: ܒܹܗ ܐܝܼܬܼܵܘܗܝ ܗ̄ܘ̣ܵܐ ܗܵܘ̇ ܠܵܐ
ܚܵܫܘܿܫܵܐ ܘܠܵܐ ܓܫܝܼܡܵܐ ܡܸܠܬܼܵܐ ܐܲܠܵܗܵܐ. ܗܵܢܵܐ ܗܘ̤ܵܐ ܗܵܘ̇ ܕܲܒܼܩܲܒܼܪܵܐ
ܐܸܬܿܬܿܤܝܼܡ: ܟܲܕܼ ܐܸܙܲܠ̣ ܒܢܲܦܫܹܗ ܠܡܲܟܼܪܵܙܘܼ ܠܪ̈ܘܼܚܬܼܵܐ ܕܲܒܼܒܹܝܬܼ
ܐܲܤܝܪܹ̈ܐ: ܐܲܝܟܼ ܡܵܐ ܕܐܸܡ݂ܲܪ ܦܲܛܪܘܿܣ.
pb. 585
ܘ. ܗܵܝ̇ ܕܝܲܬܿܝܼܪܵܐܝܼܬܼ ܡܚܵܘ̇ܝܵܐ ܠܵܐ ܝܑܼܕܲܥܬܼܗܘܿܢ ܕܗܵܠܹܝܢ ܕܐܵܡ̇ܪܝܼܢ:
ܕܠܲܓܲܪ̈ܡܹܐ ܘܒܸܤܪܵܐ ܐܸܫܬܲܚܠܲܦ ܐܵܠܵܗܵܐ ܡܸܠܬܼܵܐ. ܐܵܢ ܓܹܝܪ ܗܵܕܹܐ
ܐܝܼܬܹܝܗ̇ ܗ̄ܘ̣ܵܬܼ: ܠܵܐ ܡܸܬܼܒܿܥܸܐ ܗ̄ܘ̣ܵܐ ܒܹܝܬܼ ܩܒܼܘܼܪܵܐ: ܐܸܠܵܐ ܗ̤ܘ
ܓܘܼܫܡܵܐ ܐܵܙܹ̇ܠ ܗ̄ܘ̣ܵܐ ܠܡܲܟܼܪܵܙܘܼ ܠܢܲܦ̈ܫܵܬܼܵܐ ܕܒܲܫܝܘܿܠ. ܗܵܫܵܐ ܕܲܒܼܿܢܲܦܫܹܗ
ܗ̄ܘ̣ ܐܸܙܲܠ̣: ܠܦܲܓܼܪܵܐ ܕܹܝܢ ܟܪܲܟܼ ܝܵܘܤܸܦ ܒܟܸܠܬܼܵܐ: ܘܤܵܡܹܗ
ܒܓܼܵܓܼܘܼܠܬܼܵܐ. ܘܓܲܠܝܵܐ ܗ̣̄ܝ ܠܟܼܠܢܵܫ: ܕܠܵܘ ܗ̤ܘ ܦܲܓܼܪܵܐ ܐܝܼܬܼܵܘܗܝ
ܗ̄ܘ̣ܵܐ ܡܸܠܬܼܵܐ: ܐܸܠܵܐ ܦܲܓܼܪܵܐ ܗ̄ܘ̣ܵܐ ܕܡܸܠܬܼܵܐ. ܘܲܠܗܵܢܵܐ: ܬܐܘܿܡܵܐ:
ܟܲܕܼ ܩܵܡ̣ ܡ̣ܢ ܒܹܝܬܼ ܡܝܼ̈ܬܹܐ: ܓܲܫ̣ ܘܲܚ̣ܙܵܐ ܫܘܼ̈ܡܬܼܵܐ ܕܨܨ̈ܐ: ܗܵܠܹܝܢ
ܕܤܲܝܒܲܪ ܗ̄ܘ̣ܵܐ ܗ̤ܘ ܡܸܠܬܼܵܐ ܟܲܕܼ ܡܸܬܼܩܲܒܥܝܼܢ ܒܦܲܓܼܪܹܗ. ܘܟܲܕܼ ܡܨܐ
ܗ̄ܘ̣ܵܐ ܕܢܸܟܼܠܸܬܐ: ܠܵܐ ܟܠ̣ܵܐ. ܐܸܠܵܐ ܐܲܝܟܼ ܕܝܼܠܹܗ ܢܵܤܹ̇ܒܼ ܗ̄ܘ̣ܵܐ ܠܗܹܝܢ
ܥܠܵܘܗܝ: ܠܗܵܠܹܝܢ ܕܦܲܓܼܪܵܐ ܐܝܼܬܵܝܗܹܝܢ. ܗܵܟܲܢܵܐ ܕܟܲܕܼ ܦܲܓܼܪܵܐ ܒܵܠܲܥ̇
ܗ̄ܘ̣ܵܐ ܡܹܐܢܲܪ: ܐܲܝܟܼ ܡ̇ܢ ܕܗ̤ܘ ܚܵܐܹܫ̇ ܗ̄ܘ̣ܵܐ: ܕܲܠܡܵܢܵܐ ܡܚܲܝܬܵܢܝ؟
ܘܟܲܕܼ ܛܵܒܼ ܠܵܐ ܡܓܲܫܡܐ ܐܝܼܬܼܵܘܗܝ ܒܠܲܟܼܝܵܢܹܗ: ܩܲܕܸܡ ܐܸܡ݂ܲܪ:
ܕܓܘܼܫܡܝ ܝܼܗ̇ܒܹܿܬܼ ܠܡܲܚ̈ܘܵܬܼܵܐ ܘܦܲܟܲܝ̈ ܠܫܘܼܩܵܦܵܐ: ܘܐܲܦܲܝ̈ ܠܵܐ
ܐܲܦܢ̇ܝܼܬܼ ܡ̣ܢ ܪܘܿܩܵܐ. ܗܵܠܹܝܢ ܓܹܝܪ ܕܦܲܓܼܪܹܗ ܕܡܸܠܬܼܵܐ ܚܲܫ̣
ܒܗܹܝܢ: ܗ̤ܘ ܡܸܠܬܼܵܐ ܥܲܡܹܗ ܤܒܲܠ̣ ܐܸܢܹܝܢ: ܕܲܚܢܲܢ ܒܚܲܫܵܐ ܕܝܼܚܝܼܕܵܝܹܗ
ܕܐܲܠܵܗܵܐ ܢܸܬܼܦܪܸܩ. ܘܲܬܼܡܝܼܗܵܐ ܗ̄ܘ̣ܵܬܼ ܘܲܦܪܝܼܫܵܐ: ܕܗ̤ܘ ܗ̄ܘ̣ܵܐ ܟܲܕܼ
ܗ̤ܘ ܗܵܘ̇ ܕܚܵܐܹ̇ܫ ܘܠܵܐ ܚܵܐܹ̇ܫ: ܚܲܫ̣ ܓܹܝܪ: ܕܦܲܓܼܪܹܗ ܕܝܼܠܹܗ ܚܵܐܹ̇ܫ
ܗ̄ܘ̣ܵܐ: ܘܗ̤ܘ ܐܝܼܬܼܵܘܗܝ ܗ̄ܘ̣ܵܐ ܒܗܵܘ̇ ܕܚܵܐܹ̇ܫ. ܠܵܐ ܚܲܫ̣ ܕܹܝܢ: ܡܸܛܠ
ܕܗ̤ܘ ܡܸܠܬܼܵܐ ܟܝܵܢܵܐܝܼܬܼ ܐܝܼܬܼܵܘܗܝ ܠܵܐ ܚܵܫܘܿܫܵܐ. ܘܗܵܘ̇ ܠܵܐ ܓܫܝܼܡܵܐ
ܐܝܼܬܼܵܘܗܝ ܗ̄ܘ̣ܵܐ ܒܗܘ̇ ܦܲܓܼܪܵܐ ܚܵܫܘܿܫܵܐ: ܦܲܓܼܪܵܐ ܕܹܝܢ ܐܝܼܬܼܵܘܗܝ
pb. 586
ܗ̄ܘ̣ܵܐ ܕܐܲܠܵܗܵܐ ܡܸܠܬܼܵܐ ܠܵܐ ܚܵܫܘܿܫܵܐ. ܥܵܒܹ̇ܕܼ ܗ̄ܘ̣ܵܐ ܓܹܝܪ ܗܵܕܹܐ: ܡܸܛܠ
ܚܵܘܒܿܬܲܢ ܕܲܦܪܲܥ̣ ܒܲܩܢܘܿܡܹܗ. ܕܡܵܐ ܕܩܲܒܸܿܠ̣ ܕܝܼܠܲܢ ܥܠܵܘܗܝ:
ܘܩܲܪܒܲܢ ܒܢܲܦܫܹܗ ܕܸܒܼܚܬܼܵܐ ܠܐܲܒܼܘܼܗܝ: ܬܫܸܬܿܘܼܗܝ: ܬܸܫܬܿܒܸܩ ܤܲܟܼܠܘܼܬܲܢ
ܒܚܘܼܤܵܝܹܗ. ܘܢܸܗܦܘܿܟܼ ܢܚܲܕܬܲܢ ܒܡܵܘܗܲܒܼܬܹܗ: ܐܲܝܟܼ ܡܸܠܬܹܗ
ܕܲܠܝܼܚܵܐ: ܕܟܼܠ ܡܸܕܸܡ ܢܸܬܼܚܲܕܲܬܼ ܡ̣ܢ ܕܪܹܫ ܒܲܡܫܝܼܚܵܐ.
ܙ. ܘܗܵܠܹܝܢ ܠܵܐ ܗ̄ܘ̣ܵܐ ܒܡܲܤܒܿܪܵܢܘܼܬܼܵܐ ܗ̤ܘܲܝ̈: ܐܲܝܟܼ ܕܐ̈ܢܵܫ̈ܝܼܢ
ܐܲܤܒܲܪܘ: ܐܸܠܵܐ ܫܲܪܝܼܪܵܐܝܼܬܼ ܒܩܘܼܫܬܼܵܐ ܒܗܵܝ̇ ܕܲܗܘ̤ܵܐ ܒܲܪ ܐ̄ܢܵܫܵܐ ܦܵܪܘܿܩܲܢ:
ܕܟܼܠܹܗ ܒܲܪܢܵܫܵܐ ܦܵܪܘܿܩܵܐ ܗܘ̤ܵܐ. ܐܸܢ ܓܹܝܪ ܒܡܲܤܒܿܪܵܢܘܼܬܼܵܐ
ܐܝܼܬܼܵܘܗܝ ܗ̄ܘ̣ܵܐ ܒܦܲܓܼܪܵܐ ܐܲܠܵܗܵܐ ܡܸܠܬܼܵܐ: ܐܲܝܟܼ ܪܸܥܝܵܢܵܐ ܕܗܵܠܹܝܢ:
ܗܲܓܵܓܼܵܐ ܐܝܼܬܼܵܘܗܝ ܗ̄ܘ̣ܵܐ: ܘܡܸܫܬܿܟܲܚ ܠܹܗ ܕܲܒܼܟܲܕܵܒܼܘܼܬܼܵܐ ܡܸܬܼܐܡܲܪ
ܦܘܼܪܩܵܢܲܢ: ܘܲܩܝܵܡܬܼܵܐ ܕܡ̣ܢ ܒܹܝܬܼ ܡܝܼ̈ܬܹܐ: ܐܲܝܟܼ ܪܘܼܫܥܹܗ ܡܚܲܒܿܠܵܐ
ܕܡܵܐܢܝܼ. ܐܸܠܵܐ ܗܵܐ: ܠܵܘ ܒܗܲܓܵܓܼܵܐ ܗ̄ܘ̣ ܦܘܼܪܩܵܢܲܢ: ܘܠܵܐ ܕܦܲܓܼܪܵܐ
ܒܲܠܚܘܿܕܼ: ܐܸܠܵܐ ܕܟܼܠܹܗ ܒܲܪ ܐ̄ܢܵܫܵܐ: ܕܢܲܦܫܵܐ ܘܲܕܼܦܲܓܼܪܵܐ. ܒܩܘܼܫܬܼܵܐ
ܓܹܝܪ: ܗܘ̣ܵܐ ܦܘܼܪܩܵܢܲܢ. ܡܵܕܹܝܢ: ܐ̄ܢܵܫܵܝܵܐ ܗ̄ܘ̣ ܟܝܵܢܵܐܝܼܬܼ ܗܵܘ̇ ܕܡ̣ܢ
ܡܲܪܝܲܢ: ܐܲܝܟܼ ܤܘܼܟܵܠܵܐ ܕܲܟܼܬܼܵܒܹ̈ܐ ܐܲܠܵܗܵܝܹ̈ܐ. ܘܫܲܪܝܼܪܵܐܝܼܬܼ: ܦܲܓܼܪܵܐ
ܐܝܼܬܼܵܘܗܝ ܗ̄ܘ̣ܵܐ ܗܵܘ̇ ܕܦܵܪܘܿܩܲܢ. ܡܸܛܠ ܕܗ̤ܘ ܗܘ̤ܵܐ ܟܲܕܼܸ ܗ̤ܘ ܗܵܢܵܐ
ܕܝܼܠܲܢ. ܚܵܬܲܢ ܓܹܝܪ ܐܝܼܬܹܝܗ̇ ܡܲܪܝܲܡ: ܡܸܛܠ ܕܟܼܠܲܢ ܡ̣ܢ ܐܵܕܼܵܡ ܚܲܕܼ
ܚܢܲܢ. ܘܥܲܠ ܗܵܕܹܐ: ܠܡܸܬܼܦܲܠܵܓܼܘܼ ܐ̄ܢܵܫ ܠܵܐ ܡܵܨܐ: ܐܸܢ ܡܵܐ ܕܐܲܟܼܬܸܒܼ
ܠܘܼܩܵܐ ܢܸܥܗܲܕܼ. ܡ̣ܢ ܒܵܬܲܪ ܓܹܝܪ ܕܩܵܡ̣ ܡܵܪܲܢ ܡ̣ܢ ܒܹܝܬܼ ܡܝܼ̈ܬܹܐ:
ܟܲܕܼ ܤܵܒܼ̇ܪܝܼܢ ܗ̄ܘ̣ܵܘ ܬܲܠܡܝܼ̈ܕܹܐ: ܕܠܵܐ ܒܦܲܓܼܪܵܐ ܗ̄ܘ̣ ܕܡ̣ܢ ܡܲܪܝܲܡ
ܚܵܙܹ̇ܝܢ ܠܹܗ. ܐܸܠܵܐ ܚܠܵܦ ܗܵܢܵܐ ܒܪܘܼܚܵܐ ܡܸܬܼܒܲܩܹܝܢ: ܐܸܡ݂ܲܪ ܠܘܵܬܼܗܘܿܢ
pb. 587
ܟܲܕܼ ܡܠܲܒܸܿܒܼ ܠܲܪܗܝܼܒܼܘܼܬܼܗܘܿܢ: ܕܲܚܙܵܘ ܐܝܼܕܲܝ̈ ܘܪܸ̈ܓܼܠܲܝ: ܘܩܘܼܒܵܥܵܐ
ܕܨܨ̈ܐ: ܕܐܸܢܵܐ ܐ̄ܢܵܐ. ܓܘܿܫܘܼܢܵܢܝ ܘܲܚܙܵܘ: ܠܪܘܼܚܵܐ ܒܸܤܪܵܐ
ܘܓܲܪ̈ܡܹܐ ܠܲܝܬܿ ܠܵܗ̇: ܐܲܝܟܼ ܕܚܵܙܹ̇ܝܢ ܐܢ̄ܬܿܘܿܢ ܕܐܝܼܬܼ ܠܝܼ. ܘܟܲܕܼ
ܗܵܠܹܝܢ ܐܸܡ݂ܲܪ: ܚ̣ܵܘܝܼ ܐܸܢܘܿܢ ܐܝܼܕܼܵܘ̈ܗܝ ܘܪܸ̈ܓܼܠܵܘܗܝ. ܡ̣ܢ ܗܵܠܹܝܢ
ܕܹܝܢ ܬܘܼܒܼ ܡܨܝܢ ܠܡܸܬܼܡܟܤܵܤܘܼ ܗܵܠܹܝܢ ܕܐܲܡܪܲܚ̣ܘ ܠܡܹܐܡܲܪ:
ܕܲܠܒܸܤܪܵܐ ܘܓܲܪ̈ܡܹܐ ܐܸܫܬܲܓܼܢܝܼ ܡܵܪܲܢ. ܠܵܐ ܓܹܝܪ ܐܸܡ݂ܲܪ: ܐܲܝܟܼ
ܕܚܵܙܹ̇ܝܢ ܐܢ̄ܬܿܘܿܢ ܕܐܝܼܬܲܝ ܒܸܤܪܵܐ ܘܓܲܪ̈ܡܹܐ: ܐܸܠܵܐ ܕܐܝܼܬܼ ܠܝܼ. ܕܠܵܐ
ܢܸܤܬܿܒܲܪ ܕܗ̤ܘ ܐܲܠܵܗܵܐ ܡܸܠܬܼܵܐ ܐܸܫܬܲܚܠܲܦ ܠܗܵܠܹܝܢ: ܐܸܠܵܐ ܒܕܲܗܘ̤ܵܐ
ܒܗܵܠܹܝܢ: ܘܕܲܩܕܼܵܡ ܡܵܘܬܵܐ ܘܒܼܵܬܲܪ ܩܝܵܡܬܼܵܐ ܕܐܝܼܬܼܵܘܗܝ ܢܸܬܼܗܝܡܲܢ.
ܚ. ܐܸܢ ܬܲܚܘܝܼܬܼܵܐ ܕܗܵܠܹܝܢ ܗܵܟܲܢܵܐ ܗܵܟܹܝܠ ܐܝܼܬܹܝܗ̇: ܝܲܬܿܝܼܪܬܵܐ
ܗ̣̄ܝ ܠܡܸܬܼܩܲܪܵܒܼܘܼ ܠܗܵܠܹܝܢ ܐ̄ܚܪ̈ܵܢܝܵܬܼܵܐ: ܘܲܠܡܸܕܼܪܲܫ ܡܸܕܸܡ ܥܠܲܝܗܹܝܢ:
ܡܵܐ ܕܦܲܓܼܪܵܐ ܗܵܘ̇ ܕܐܝܼܬܼ ܗ̄ܘ̣ܵܐ ܒܹܗ ܡܸܠܬܼܵܐ: ܠܵܐ ܐܝܼܬܼܵܘܗܝ ܗ̄ܘ̣ܵܐ
ܒܲܪ ܟܝܵܢܵܗ̇ ܕܐܲܠܵܗܘܼܬܼܵܐ: ܐܸܠܵܐ ܡ̣ܢ ܡܲܪܝܲܡ ܫܲܪܝܼܪܵܐܝܼܬܼ ܐܸܬܼܝܼܠܸܕܼ.
ܘܗ̤ܘ ܡܸܠܬܼܵܐ ܠܒܸܪܵܐ ܘܓܲܪ̈ܡܹܐ ܠܵܐ ܐܸܫܬܲܚܠܲܦ: ܐܸܠܵܐ ܒܒܸܪܤܪܵܐ
ܥ̣ܡܲܪ ܘܥܲܒܼܕܹܗ ܕܝܼܠܹܗ: ܘܚܲܕܼ ܐܝܼܬܼܵܘܗܝ ܥܲܡܹܗ ܠܥܗܵܠܲܡ܀ ܗܵܝ̇
ܕܹܝܢ ܕܐܸܡ݂ܲܪ ܝܘܿܚܲܢܵܢ ܛܘܼܒܼܵܢܵܐ: ܕܡܸܠܬܼܵܐ ܒܸܤܪܵܐ ܗܘ̤ܵܐ: ܗܵܢܵܘ
ܪܸܥܝܵܢܵܗ̇: ܘܡܲܨܝܵܐ ܕܢܸܤܬܲܟܲܠ ܗܵܕܹܐ ܡ̣ܢ ܗܵܝ̇ ܕܕܼܵܡ̇ܝܵܐ ܠܵܗ̇:
ܕܐܲܝܟܲܢܵܐ ܕܐܸܡ݂ܲܪ ܦܵܘܠܘܿܣ: ܕܲܡܫܝܼܚܵܐ ܗܘ̤ܵܐ ܠܵܘܛܬܼܵܐ ܚܠܵܦܲܝܢ.
ܘܠܵܘ ܗ̤ܘ ܒܲܩܢܘܿܡܹܗ ܗܘ̤ܵܐ ܠܵܘܛܬܼܵܐ: ܐܸܠܵܐ ܡܸܛܠ ܕܠܵܘܛܬܼܵܐ
ܕܠܵܦܲܢ ܢܲܤܲܒܼ: ܐܲܡܝܼܪܵܐ ܕܠܵܘܛܬܼܵܐ ܗܘ̤ܵܐ. ܗܵܟܲܢܵܐ ܐܵܦ ܗܵܝ̇ ܕܒܸܪܵܐ
ܗܘ̤ܵܐ: ܠܵܐ ܗ̄ܘ̣ܵܐ ܕܐܸܫܬܲܚܠܲܦ ܠܒܸܪܵܐ: ܐܸܠܵܐ ܕܲܢܤܲܒܼ ܦܲܓܼܪܵܐ
pb. 588
ܚܠܵܦܲܝܢ: ܘܲܗܘ̤ܵܐ ܒܲܪܢܵܫܵܐ ܐܵܡ̇ܪܝܼܢܲܢ. ܫܲܘܝܵܐ ܗ̣̄ܝ ܓܹܝܪ ܕܢܹܐܡܲܪ
ܕܡܸܠܬܼܵܐ ܒܸܤܪܵܐ ܗܘ̤ܵܐ: ܘܲܕܼܢܹܐܡܲܪ ܕܒܲܪܢܵܫܵܐ ܗܘ̤ܵܐ. ܐܲܝܟܼ ܗܵܝ̇
ܕܲܟܼܬܼܝܼܒܼܵܐ ܒܝܘܠܹܝܠ: ܕܐܹܫܘܿܕܼܸ ܪܘܼܚܝ ܥܲܠ ܟܠܒܲܤܲܪ. ܘܗܵܐ
ܠܵܐ ܗ̄ܘ̣ܵܐ ܥܕܲܡܵܐ ܠܚܲܝ̈ܘܵܬܼܵܐ ܐܝܼܬܼܵܘܗܝ ܗ̄ܘ̣ܵܐ ܫܘܼܘܼܕܵܝܵܐ: ܐܸܠܵܐ
ܠܲܒܼܢܲܝ̈ ܐ̄ܢܵܫܵܬ ܒܲܠܚܘܿܕܼ: ܗܵܢ̇ܘܿܢ ܕܡܸܛܠܵܬܼܗܘܿܢ ܐܵܦ ܒܲܪܢܵܫܵܐ ܗܘ̤ܵܐ
ܡܵܪܲܢ܀ ܡܵܐ ܗܵܟܹܝܠ ܕܪܸܥܝܵܢܹܗ ܕܦܸܬܼܓܼܵܡܵܐ ܗܵܢܵܐ ܐ̄ܢܵܫ ܢܸܤܬܲܟܲܠ:
ܘܵܠܝܵܐܝܼܬܼ ܡܸܬܸܼܤܲܪܝܼܢ ܡܸܢܹܗ: ܐܲܝܠܹܝܢ ܕܐܲܤܒܲܪܘ ܕܡ̣ܢ ܩܕܼܵܡ
ܡܲܪܝܲܡ ܐܝܼܬܼܵܘܗܝ ܗܵܘ̇ ܕܡܸܢܵܗ̇ ܐܸܬܼܢܤܸܒܼ. ܘܲܩܕܼܵܡܹܝܗ̇ ܐܝܼܬܼ ܗ̄ܘ̣ܵܐ
ܢܲܦܫܵܐ ܐ̄ܢܵܫܝܵܬܼܵܐ ܠܡܸܠܬܼܵܐ: ܘܒܼܵܗ̇ ܡ̣ܢ ܩܕܼܵܡ ܡܹܐܬܼܝܼܬܹܗ ܗܘ̤ܵܐ
ܒܟܼܠܙܒܲܢ ܀ ܀ ܢܸܬܼܒܲܠܡܘܼܢ ܕܹܝܢ ܐܵܦ ܐܲܝܠܹܝܢ ܕܐܸܡܲܪܘ: ܕܠܵܘ
ܡܩܲܒܿܠܵܐ ܗ̄ܘ̣ ܕܡܵܘܬܵܐ ܦܲܓܼܪܹܗ ܕܡܵܪܲܢ: ܐܸܠܵܐ ܡ̣ܢ ܗܵܘ̇ ܗ̄ܘ̣
ܠܲܡ ܟܝܵܢܐ ܠܵܐ ܡܵܝܘܿܬܼܵܐ. ܐܸܢ ܓܹܝܪ ܠܵܐ ܡܝܼܬܼ: ܐܲܝܟܲܢܵܐ ܦܵܘܠܘܿܣ
ܡܲܫܠܸܡ ܗ̄ܘ̣ܵܐ ܠܩܘܿܪ̈ܲܢܬܵܝܹܐ ܗܵܘ̇ ܡܸܕܸܡ ܕܐܵܦ ܗ̤ܘ ܡ̣ܢ ܫܠܝܼܚܹ̈ܐ
ܕܲܩܕܼܵܡܵܘܗܝ ܡܩܲܒܸܿܠ ܗ̄ܘ̣ܵܐ ܠܹܗ ܟܲܕܼ ܐܵܡܲ݁ܪ: ܕܲܡܫܝܼܚܵܐ ܡܝܼܬܼ
ܚܠܵܦ ܚܛܵܗܲܝ̈ܢ: ܐܲܝܟܼ ܕܲܟܼܬܼܝܼܒܼ. ܘܕܐܸܬܼܩܒܲܠ ܘܩ̣ܵܡ ܠܲܬܼܠܵܬܼܵܐ
ܝܵܘܡ̈ܝܼܢ: ܐܲܝܟܼ ܕܲܟܼܬܼܝܼܒܼ؟ ܐܵܘ ܐܲܝܟܲܢܵܐ ܩܵܡ̣: ܐܸܠܵܐ ܠܘܼܩܕܲܡ
ܡܝܼܬܼ؟ . . ܢܸܬܼܚܲܡܨܘܼܢ ܕܹܝܢ ܪܵܘܡ̇ܒܼܵܐܝܼܬܼ ܐܵܦ ܗܵܠܹܝܢ ܕܐܸܬܼܸܪܲܥܝܼܘ:
ܕܡܲܨܝܵܐ ܕܲܚܠܵܦ ܬܠܝܼܬܼܵܝܘܼܬܼܵܐ ܬܸܗܘܸܐ ܪܒܼܝܼܥܵܝܘܼܬܼܵܐ: ܐܸܢ ܬܸܬܼܐܡܲܪ
ܠܲܡ ܕܡ̣ܢ ܡܲܪܝܲܡ ܗ̄ܘ̣ ܦܲܓܼܪܵܐ. ܐܸܢ ܕܹܝܢ ܠܲܡ: ܐܵܡ̇ܪܝܼܢ: ܕܒܲܪ
ܟܝܵܢܹܗ ܗ̄ܘ̣ ܦܲܓܼܪܵܐ ܕܡܸܠܬܼܵܐ: ܡܩܵܘܝܵܐ ܬܠܝܼܬܼܵܝܘܼܬܼܵܐ ܒܫܲܒܡܘܼܬܼܵܐ:
pb. 589
ܒܗܵܝ̇ ܕܠܵܐ ܡܸܕܸܡ ܚܲܕܼܬܼܵܐ ܡܲܥܬܼܵܐ ܥܠܹܝܗ̇ ܡܸܠܬܼܵܐ. ܐܸܢ ܕܹܝܢ ܐ̄ܢܵܫܝܵܐ
ܠܲܡ ܡܹܐܡܪܝܼܘܗܝ ܠܦܲܓܼܪܵܐ ܕܡ̣ܢ ܡܪܝܲܡ: ܐܵܠܨܵܐ ܡܸܛܠ ܕܢܘܼܟܼܪܵܝ
ܗ̄ܘ̣ ܒܲܟܼܝܵܢܹܗ ܦܲܓܼܪܵܐ ܘܐܝܼܬܼܵܘܗܝ ܒܹܗ ܡܸܠܬܼܵܐ: ܕܲܪܒܼܝܼܥܵܝܘܼܬܼܵܐ ܬܸܗܘܸܐ:
ܘܠܵܐ ܬܠܝܼܬܼܵܝܘܼܬܼܵܐ: ܡܸܛܠ ܬܵܘܤܲܦܬܹܗ ܕܦܲܓܼܪܵܐ.
ܛ. ܘܟܲܕܼ ܗܵܠܹܝܢ ܐܵܡ̇ܪܝܼܢ: ܠܵܐ ܡܸܬܼܒܲܝܢܝܼܢ: ܐܲܝܟܲܢܵܐ ܐܵܦ ܗܸܢ̣ܘܿܢ
ܒܵܗ̇ ܟܲܕܼ ܒܵܗ̇ ܢܵܦ̇ܠܝܼܢ. ܐܵܦܸܢ ܓܹܝܪ ܢܹܐܡܲܪܘܼܢ ܕܠܵܘ ܡ̣ܢ ܡܪܝܲܡ
ܗ̄ܘ̣ ܦܲܓܼܪܵܐ: ܐܸܠܵܐ ܒܲܪ ܟܝܵܢܵܐ ܗ̄ܘ̣ ܕܡܸܠܬܼܵܐ: ܠܵܐ ܡܸܕܸܡ ܒܨܝܼܪܵܐ
ܡ̣ܢ ܗܵܝ̇ ܕܩܢܘܿܛ̣ܘ: ܕܕܲܠܡܵܐ ܪܒܼܝܼܥܵܝܘܼܬܼܵܐ ܢܸܤܬܲܒܼܪܘܼܢ ܕܡܲܥܠܝܼܢ.
ܗ̤ܝ ܓܹܝܪ ܟܲܕܼ ܗ̤ܝ ܡܸܫܬܲܟܼܚܝܼܢ ܐܵܡ̇ܪܝܼܢ: ܐܲܝܟܼ ܡܲܚܫܲܒܼܬܼܗܘܿܢ.
ܐܲܝܟܲܢܵܐ ܓܹܝܪ ܕܲܒܼܪܵܐ ܡ̣ܢ ܐܲܒܼܵܐ ܐܝܼܬܼܵܘܗܝ: ܘܟܲܕܼ ܒܲܪ ܟܝܵܢܹܗ ܗ̄ܘ̣ ܠܵܐ
ܗ̄ܘ̣ܵܐ ܗ̤ܘ ܟܲܕܼ ܗ̤ܘ ܐܲܒܼܵܐ: ܐܸܠܵܐ ܒܪܵܐ ܡܸܬܼܐܡܲܪ ܠܘܵܬܼ ܐܲܒܼܵܐ: ܗܵܟܲܢܵܐ
ܐܵܦ ܦܲܓܼܪܵܐ ܐܸܢ ܒܲܪ ܟܝܵܢܹܗ ܕܡܸܠܬܼܵܐ ܢܸܬܼܐܡܲܪ: ܠܵܐ ܗ̄ܘ̣ܵܐ ܗ̤ܘ
ܐܝܼܬܼܵܘܗܝ ܡܸܠܬܼܵܐ: ܐܸܠܵܐ ܐ̄ܚܪܹܝܢ ܗ̄ܘ̣ ܡܸܢܹܗ ܕܡܸܠܬܼܵܐ. ܐܸܢ ܕܹܝܢ
ܐ̄ܚܪܹܝܢ ܗ̄ܘ̣: ܡܸܫܬܲܟܼܚܵܐ ܠܵܗ̇ ܐܲܝܟܼ ܬܲܪܥܝܼܬܼܗܘܿܢ ܐܵܦ ܗܵܟܲܢܵܐ
ܬܠܝܼܬܼܵܝܘܼܬܼܵܐ: ܪܒܼܝܼܥܵܝܘܼܬܼܵܐ. ܠܵܐ ܗ̄ܘ̣ܵܐ ܕܹܝܢ ܗ̤ܝ ܬܠܝܼܬܼܵܝܘܼܬܼܵܐ
ܫܲܪܝܼܪܬܵܐ ܘܲܒܼܩܘܼܫܬܼܵܐ ܡܫܲܡܠܲܝܬܼܵܐ ܘܠܵܐ ܡܸܬܼܦܲܠܓܼܵܢܝܼܬܼܵܐ ܡܩܲܒܿܠܵܐ
ܬܵܘܤܲܦܬܼܵܐ: ܐܸܠܵܐ ܗܵܝ̇ ܕܡ̣ܢ ܗܵܠܹܝܢ ܐܸܬܼܒܲܕܼܝܲܬ̤. . ܬܘܼܒܼ ܕܹܝܢ
ܦܫܝܼܩ ܠܡܸܬܼܒܲܩܵܝܘܼ ܒܠܵܐ ܝܑܼܕܲܥܬܼܗܘܿܢ: ܡܸܢܵܗ̇ ܕܚܸܟܼܡܲܬܼ
ܤܪܝܼܩܘܼܬܼܗܘܿܢ. ܕܐܸܢ ܡܸܛܠ ܕܐܝܼܬܼܵܘܗܝ ܘܡܸܬܼܐܡܲܪ ܡ̣ܢ ܟܐܼܵܒܹ̈ܐ:
ܕܡ̣ܢ ܡܲܪܝܲܡ ܗ̄ܘ̣ ܘܐ̄ܢܵܫܝܵܐ ܗ̄ܘ̣ ܦܲܓܼܪܹܗ ܕܦܵܪܘܿܩܲܢ: ܤܵܒܼ̇ܪܝܼܢ
ܕܲܚܠܵܦ ܬܠܝܼܬܼܵܝܘܼܬܼܵܐ ܪܒܼܝܼܥܵܝܘܼܬܼܵܐ ܡܸܫܬܲܟܼܚܵܐ: ܐܲܝܟܼ ܗܵܘ̇ ܕܬܼܵܘܤܲܦܬܼܵܐ
ܗܘ̤ܵܬܼ ܒܐܲܠܵܗܘܼܬܼܵܐ ܡܸܛܠ ܦܲܓܼܪܵܐ: ܤܲܓܿܝܼ ܫܵܓܹ̇ܝܢ ܕܲܥܒܼܝܼܕܼܵܐ ܡܲܫܘܹܝܢ
pb. 590
ܥܲܡ ܥܵܒܼܘܿܕܹܗ: ܘܤܵܒܼ̇ܪܝܼܢ ܕܡܲܨܝܵܐ ܐܲܡܩܲܒܵܠܘܼ ܢܵܘܤܵܦܬܼܵܐ
ܐܲܠܵܗܘܼܬܼܵܐ. ܘܠܵܐ ܐܸܤܬܲܟܲܠܘ ܕܠܵܐ ܗ̄ܘ̣ܵܐ ܡܸܛܠ ܬܵܘܤܲܦܬܼܵܐ
ܕܐܲܠܵܗܘܼܬܼܵܐ: ܗܘ̤ܵܐ ܡܸܠܬܼܵܐ ܒܦܲܓܼܪܵܐ: ܐܸܠܵܐ ܕܗ̤ܘ ܦܲܓܼܪܵܐ ܢܩܘܼܡ.
ܘܠܵܐ ܕܢܸܬܼܝܲܬܲܪ ܒܲܫܒܼܝܼܚܘܼܬܼܵܐ ܗ̤ܘ ܡܸܠܬܼܵܐ ܕܢܲܚ̣ ܡ̣ܢ ܡܲܪܝܲܡ:
ܐܸܠܵܐ ܕܓܸܢܤܵܐ ܐ̄ܢܵܫܵܝܵܐ ܢܸܬܼܦܪܸܩ. ܐܲܝܟܲܢܵܐ ܗܵܟܹܝܠ ܡܲܨܝܵܐ: ܕܗܵܘ̇
ܦܲܓܼܪܵܐ ܕܒܪܝܲܕܼ ܡܸܠܬܼܵܐ ܐܸܬܼܦܪܸܩ ܘܐܸܬܼܢܲܚܲܡ: ܬܵܘܤܲܦܬܼܵܐ ܕܐܲܠܵܗܘܼܬܼܵܐ
ܠܡܸܥܒܲܕ ܒܡܸܠܬܼܵܐ؟ ܗܵܝ̇ ܕܹܝܢ ܕܫܲܪܝܼܪܵܐ ܗܵܕܲܐ ܗ̣̄ܝ: ܕܠܹܗ ܗ̄ܘ̣
ܠܐ̄ܢܵܫܵܐ ܗܘ̤ܵܬܼ ܬܸܵܘܤܲܦܬܼܵܐ ܘܲܡܝܲܬܿܪܘܼܬܼܵܐ ܪܲܒܿܬܼܵܐ: ܡ̣ܢ ܚܕܼܵܝܘܼܬܼܵܐ
ܘܫܵܘܬܵܦܘܼܬܼܵܐ ܕܡܸܠܬܼܵܐ ܕܲܠܘܵܬܹܗ. ܡ̣ܢ ܡܵܝܘܿܬܼܵܐ ܓܹܝܪ: ܗܘ̤ܵܐ ܠܵܐ
ܡܵܝܘܿܬܼܵܐ. ܡ̣ܡ ܢܲܦܫܵܢܵܝܵܐ: ܗܘ̤ܵܐ ܪܘܼܚܵܢܵܝܵܐ. ܘܟܲܕܼ ܡ̣ܢ ܥܲܦܪܵܐ ܥܒܼܝܼܕܼ:
ܠܬܲܪ̈ܥܝ ܫܡܲܝܵܐ ܥ̣ܒܲܪ: ܘܡ̣ܢ ܝܲܡܝܼܢܵܐ ܕܐܲܒܼܵܐ ܒܲܡܪ̈ܵܘܡܹܐ ܝܑܼܬܸܒܼ.
ܬܠܝܼܬܼܵܝܘܼܬܼܵܐ ܕܹܝܢ: ܘܡ̣ܢ ܕܲܢܤܲܒܼ ܡܸܠܬܼܵܐ ܦܲܓܼܪܵܐ ܕܡ̣ܢ ܡܲܪܝܲܡ:
ܬܠܝܼܬܼܵܝܘܼܬܼܵܐ ܗ̣̄ܝ ܐܲܝܟܼ ܕܐܝܼܬܹܝܗ̇: ܟܲܕܼ ܠܵܐ ܬܵܘܤܲܦܬܼܵܐ ܘܠܵܐ
ܒܨܝܼܪܘܼܬܼܵܐ ܡܩܲܒܿܠܵܐ. ܐܸܠܵܐ ܐܲܡܝܼܢܵܐܝܼܬܼ ܡܫܲܠܡܵܢܝܼܬܼܵܐ ܐܝܼܬܹܝܗ̇:
ܘܒܲܬܼܠܝܼܬܼܵܝܘܼܬܼܵܐ ܚܕܼܵܐ ܠܐܲܠܵܗܘܼܬܼܵܐ ܡܸܬܼܚܲܕܼܥܵܐ. ܘܗܵܟܲܢܵܐ ܒܥܹܕܬܵܐ: ܚܲܕܼ
ܐܲܠܵܗܵܐ ܡܸܬܼܟܿܪܸܙ: ܐܲܒܼܵܐ ܕܡܸܠܬܼܵܐ.
ܝ. ܡ̣ܢ ܗܵܕܹܐ ܗܵܟܹܝܠ ܢܸܙܕܓܪܘܼܢ ܗܵܠܹܝܢ ܕܒܲܙܒܲܢ ܐܸܡ݂ܲܪܘ:
ܕܗܵܘ̇ ܕܡ̣ܢ ܡܲܪܝܲܡ ܕܢܲܚ̣: ܠܵܐ ܐܝܼܬܼܵܘܗܝ ܡܫܝܼܚܵܐ ܘܡܵܪܝܵܐ
ܘܝܼܫܘܿܥ. ܐܸܢ ܓܹܝܪ ܠܵܘ ܐܲܠܵܗܵܐ ܗ̄ܘ̣ܵܐ ܕܒܲܦܓܲܪ: ܐܲܝܟܲܢܵܐ ܡܸܚܕܼܵܐ
ܕܲܕܼܢܚ̣ ܡ̣ܢ ܡܲܪܝܲܡ ܐܸܬܼܩܪܝܼ ܥܲܡܲܢܘܼܐܹܝܠ: ܕܡܸܬܿܬܲܪܓܲܡ ܐܲܠܵܗܲܢ
ܥܲܡܲܢ؟ ܦܵܘܠܘܿܣ ܕܹܝܢ: ܐܸܢ ܠܵܘ ܡܸܠܬܼܵܐ ܐܲܠܵܗܵܐ ܐܸܬܼܝܼܠܸܕܼ
pb. 591
ܒܲܦܓܲܪ: ܐܲܝܟܲܢܵܐ ܟܵܬܹ̇ܒܼ ܠܪ̈ܗܘܿܡܵܝܹܐ: ܕܡܸܢܗܘܿܢ ܠܲܡ ܕܲܝܗܘܼ̈ܕܵܝܹܐ
ܐܸܬܼܚܙܝܼ ܡܫܝܼܚܵܐ ܒܲܒܼܤܲܪ: ܕܐܝܼܬܼܵܘܗܝ ܐܲܠܵܗܵܐ ܥܲܠ ܟܠ؟
ܡܵܕܹܝܢ ܐܵܦ ܗܵܢ̇ܘܿܢ ܕܡ̣ܢ ܩܕܝܼܡ ܟܦܲܪܘ: ܗܵܘ̇ ܕܐܸܨܛܠܸܒܼ ܠܵܘ
ܐܲܠܵܗܵܐ ܗ̄ܘ̣: ܢܸܬܿܛܦܝܼܤܘܼܢ ܠܟܼܠܗܘܿܢ ܟܬܼܵܒܹ̈ܐ ܐܲܠܵܗܵܝܹ̈ܐ: ܘܢܵܘܕܘܿܢ
ܕܐܲܤܟܸܿܠ̣ܘ ܘܲܛܥ̣ܵܘ: ܘܲܢܬܼܘܼܒܼܘܼܢ ܘܡܸܬܼܩܲܒܿܠܝܼܢ. ܘܝܲܬܿܝܼܪܵܐܝܼܬܼ
ܠܲܫܠܝܼܚܵܐ ܬܐܘܿܡܵܐ ܢܲܫܪܘܼܢ: ܗܵܘ̇ ܕܡ̣ܢ ܒܵܬܲܪ ܕܲܚ̣ܙܵܐ ܒܹܗ ܫܘܼ̈ܡܵܬܼܵܐ
ܕܨܨܹ̈ܐ: ܒܩܵܠܵܐ ܪܵܡܵܐ ܩܥ̣ܵܐ ܘܐܸܡ݂ܲܪ: ܡܵܪܝ ܘܐܲܠܵܘܗܝ. ܟܲܕܼ ܐܲܠܵܗܵܐ ܓܹܝܪ
ܘܡܵܪܝܵܐ ܕܬܸܫܒܿܘܿܚܬܼܵܐ ܐܝܼܬܼܵܘܗܝ ܒܪܵܐ: ܒܠܵܐ ܡܫܲܒܿܚܵܐ ܦܲܓܼܪܵܐ
ܒܨܨ̈ܐ ܡܸܬܼܩܲܒܲܥ ܗ̄ܘ̣ܵܐ ܘܡܸܨܛܲܥܲܪ. ܐܵܦܸܢ ܓܹܝܪ ܦܲܓܼܪܵܐ ܒܲܥ̇ܒܼܵܕܼܵܐ
ܚܵܐܹ̇ܫ ܗ̄ܘ̣ܵܐ: ܘܡ̣ܢ ܕܲܦܢܹܗ ܕܡܵܐ ܘܡܲܝܵ̈ܐ ܐܵܪܕܝܼ ܗ̄ܘ̣ܵܐ: ܐܸܠܵܐ ܫܸܡ
ܚܲܫܵܐ ܟܠܹܗ ܕܐܲܠܵܗܵܐ ܐܝܼܬܼܵܘܗܝ ܗ̄ܘ̣ܵܐ. ܡܸܛܠ ܗܵܕܹܐ: ܐܵܦ ܫܸܡܫܵܐ
ܟܲܕܼ ܚ̣ܙܵܐ ܠܥܵܒܼ̇ܘܿܕܹܗ ܕܡܸܨܛܲܥܲܪ ܒܦܲܓܼܪܹܗ ܘܡܲܗܡܸܐ: ܩܦܲܣ̣
ܙܲܠܝܼܩܵܘ̈ܗܝ ܘܐܲܥܡܛ̣ܵܗ̇ ܠܐܲܪܥܵܐ. ܗܵܘ̇ ܕܹܝܢ ܦܲܓܼܪܵܐ ܕܐܝܼܬܼ ܗ̄ܘ̣ܵܐ
ܠܹܗ ܟܝܵܢܵܐ ܡܼܬܼܚܲܒܿܠܵܢܵܐ: ܠܒܲܪ ܡ̣ܢ ܟܝܵܢܹܗ ܩ̣ܵܡ: ܡܸܛܠ ܚܲܝܠܵܐ
ܕܒܹܗ. ܐܸܬܼܥܲܠܝܼ ܕܹܝܢ ܘܐܸܬܼܚܲܪܲܪ ܡ̣ܢ ܚܒܼܵܠܵܐ ܕܲܟܼܝܵܢܹܗ: ܡܸܛܠ
ܕܲܗܘ̤ܵܐ ܗ̄ܘ̣ܵܐ ܠܹܗ ܕܐܲܠܵܗܵܐ ܡܸܠܬܼܵܐ ܕܥܸܠܵܝ ܡ̣ܢ ܗܵܠܹܝܢ
ܝܐ. ܥܲܠ ܗܵܝ̇ ܕܹܝܢ ܕܤܵܒܼ̇ܪܝܼܢ ܐ̄ܢܵܫܵܐ ܘܐܵܡ̇ܪܝܼܢ: ܕܐܲܝܟܲܢܵܐ ܕܲܠܚܲܕܼ
ܡ̣ܢ ܢܒܼܝܹ̈ܐ ܗܵܘܹ̇ܐ ܗ̄ܘ̣ܵܐ: ܗܵܟܲܢܵܐ ܐܵܦ ܥܲܠ ܚܲܕܼ ܡ̇ܢ ܕܗ̤ܘ ܒܲܪܢܵܫܵܐ
ܕܡ̣ܢ ܡܲܪܝܲܡ ܐܸܬܼ݂ܵܐ ܡܸܠܬܼܵܐ: ܝܲܬܿܝܼܪܵܐ ܗ̣̄ܝ ܐܵܦ ܠܡܸܗܪܲܓܼ: ܕܢܝܼܚܵܐ
ܗ̣̄ܝ ܓܹܝܪ ܒܗܸܬܿܬܼܵܐ ܕܠܵܐ ܝܑܼܕܲܥܬܼܗܘܿܢ ܥܲܠ ܒܹܝܬܼ ܐܲܦܲܝ̈ܗܘܿܢ:
ܕܲܠܟܼܠܢܵܫ ܢܸܬܼܝܲܕܼܥܘܼܢ ܒܛܵܥܝܘܼܬܼܗܘܿܢ. ܐܸܢ ܓܹܝܪ ܐܲܝܟܼ ܕܲܒܼܚܲܕܼ ܡ̣ܢ
pb. 592
ܢܒܼܝܹ̈ܐ ܐܸܬܼ݂ܵܐ: ܠܡܵܢܵܐ ܗܵܢܵܐ ܒܲܠܚܘܿܕܼ ܡ̣ܢ ܒܬܼܘܼܠܬܼܵܐ: ܘܠܵܐ ܐܵܦ
ܗ̤ܘ ܡ̣ܢ ܓܲܒܼܪܵܐ ܘܐܲܢ̄ܬܿܬܼܵܐ؟ ܗܵܟܲܢܵܐ ܓܹܝܪ ܟܠ ܚܲܕܼ ܚܲܕܼ ܡ̣ܢ
ܙܲܕܝܼ̈ܩܹܐ ܐܸܬܼܝܼܠܸܕܼ. ܐܵܘ ܥܲܠ ܡܵܢܵܐ ܠܵܐ ܡܸܬܼܐܡܲܪ ܕܲܗܘ̤ܵܐ ܚܠܵܦܲܝܢ
ܡܵܘܬܵܐ ܕܚܲܕܼ ܚܲܕܼܸ ܡܸܢܗܘܿܢ: ܐܸܠܵܐ ܐܸܢ ܕܗܵܢܵܐ ܒܲܠܚܘܿܕܼ؟ ܥܲܠ
ܡܵܢܵܐ ܕܹܝܢ ܟܲܕܼ ܥܲܠ ܟܠ ܚܲܕܼ ܚܲܕܼ ܡܸܢܗܘܿܢ ܐܵܬܹ̇ܐ ܗ̄ܘ̣ܵܐ: ܠܵܐ
ܡܸܬܼܐܡܲܪ ܕܲܒܼܪܹܗ ܕܐܲܠܵܗܵܐ: ܐܸܠܵܐ ܒܲܠܚܘܿܕܼ ܒܗܵܘ̇ ܕܡ̣ܢ ܡܲܪܝܲܡ:
ܐܲܝܟܼ ܡ̇ܢ ܕܲܚܕܼܵܐ ܙܒܲܢ ܐܸܬܼ݂ܵܐ ܒܫܘܼܠܵܡܵܐ ܕܥܵܠܡܹ̈ܐ؟ ܐܵܘ ܐܸܢ ܗܵܟܲܢܵܐ
ܐܸܬܼ݂ܵܐ: ܐܲܝܟܼ ܕܐܸܵܬܼ݂ܵܐ ܒܩܲܕܝܼ̈ܫܹܐ ܩܲܕܼܡܵܝܹ̈ܐ: ܠܡܵܢܵܐ ܟܠܗܘܿܢ ܗܵܠܹܝܢ
ܡܝܼܬܼܘ ܘܲܥܕܲܟܹܝܠ ܠܵܐ ܩܵܡ̣ܘ: ܗܵܘ̇ ܕܹܝܢ ܕܲܕܼܢܲܚ̣ ܡ̣ܢ ܡܲܪܝܲܡ
ܒܲܠܚܘܿܕܼ ܩܵܡ̣ ܠܲܬܼܠܵܬܼܵܐ ܝܵܘܡ̈ܝܼܢ؟ ܐܵܘ ܥܲܠ ܡܵܢܵܐ ܐܸܢ ܐܲܝܟܼ
ܕܒܲܕܼܡܘܼܬܼܗܘܿܢ ܕܗܵܢ̇ܘܿܢ ܐܸܬܼ݂ܵܐ ܡܸܠܬܼܵܐ: ܗܵܘ̇ ܕܡ̣ܢ ܡܲܪܝܲܡ ܒܲܠܚܘܿܕܼ
ܡܸܬܼܐܡܲܪ ܥܲܡܲܢܘܼܐܹܝܠ: ܐܲܝܟܼ ܡ̇ܢ ܕܐܸܬܼܝܼܠܸܕܼ ܡܸܢܵܗ̇ ܐܲܠܵܗܵܐ ܒܲܦܓܲܪ؟
ܥܲܡܲܢܘܼܐܹܝܠ ܓܹܝܪ: ܥܲܡܲܢ ܐܲܠܵܗܲܢ ܡܸܬܼܦܲܫܲܩ. ܠܡܵܢܵܐ ܕܹܝܢ ܐܸܢ
ܗܵܟܲܢܐ ܐܸܬܼ݂ܵܐ: ܟܲܕܼ ܐܵܟܹ̇ܠ ܗ̄ܘ̣ܵܐ ܟܠ ܚܲܕܼ ܡ̣ܢ ܩܲܕܝܼ̈ܫܹܐ ܘܫܵܬܹ̇ܐ ܗ̄ܘ̣ܵܐ
ܘܥܵܡܹ̇ܠ ܘܡܵܐܹ̇ܬܼ: ܠܵܐ ܡܸܬܼܐܡܲܪ ܐܲܝܟܼ ܗܵܘ̇ ܕܗ̤ܘ ܡܸܠܬܼܵܐ ܐܸܟܸܿܠ̣
ܘܐܸܫܬܿܝܼ ܘܲܥܡܲܠ̣ ܘܡܝܼܬܼ: ܐܸܠܵܐ ܒܲܠܚܘܿܕܼ ܒܗܵܘ̇ ܕܡ̣ܢ ܡܲܪܝܲܡ؟
ܐܲܝܠܹܝܢ ܓܹܝܪ ܕܦܲܓܼܪܵܐ ܚܵܐܹ̇ܫ ܗ̄ܘ̣ܵܐ: ܐܲܝܟܼ ܗܵܘ̇ ܕܗ̤ܘ ܚܲܫ̣ ܐܸܢܹܝܢ
ܐܲܡܝܼܪ̈ܵܢ. ܘܟܲܕܼ ܟܠܗܘܿܢ ܡܸܬܼܐܲܡܪܝܼܢ ܕܲܗܘ̤ܵܘ ܘܐܸܬܼܝܼܠܸܕܼܘ: ܥܠ
ܗܵܘ̇ ܕܡ̣ܢ ܡܲܪܝܲܡ ܒܠܚܘܿܕܼ ܡܸܬܼܐܡܲܪ ܕܡܸܠܬܼܵܐ ܒܸܪܤܪܵܐ ܗܘ̤ܵܐ.
ܝܒ. ܗܵܕܹܐ ܕܝܼܕܼܝܼܥܵܐ ܗ̣̄ܝ: ܕܲܠܘܵܬܼ ܟܠܗܘܿܢ ܗܵܢܘܿܢ ܕܫܲܪܟܵܐ:
ܐܝܼܬܼܵܘܗܝ ܗ̄ܘ̣ܵܐ ܡܸܠܬܼܵܐ ܒܪܘܼܚܹܗ ܡܸܛܠ ܢܒܼܝܼܘܼܬܼܵܐ. ܡ̣ܢ ܡܪܝܲܡ
ܕܹܝܢ: ܗ̤ܘ ܡܸܠܬܼܵܐ ܒܲܩܢܘܿܡܹܗ ܢܤܲܒܼ ܠܹܗ ܒܸܤܪܵܐ ܘܲܕܼܢܲܚ̣ ܒܲܪܢܵܫܵܐ
pb. 593
ܟܲܕܼ ܐܝܼܬܼܵܘܗܝ ܒܲܟܼܝܵܢܹܗ ܘܒܼܐܝܼܬܼܘܼܬܹܗ ܡܸܠܬܼܵܐ ܐܲܠܵܗܵܐ. ܒܲܒܼܤܲܪ
ܕܹܝܢ ܡ̣ܢ ܙܲܪܥܵܐ ܕܒܹܝܬܼ ܕܵܘܝܼܕܼ: ܡ̣ܢ ܒܸܤܪܵܐ ܕܡܲܪܝܲܡ ܗܘ̤ܵܐ
ܒܲܪܢܫܵܐ: ܐܲܝܟܼ ܕܐܸܡ݂ܲܪ ܦܵܘܠܘܿܣ. ܠܗܵܢܵܐ ܐܲܒܼܵܐ ܡܚܵܘܸ̇ܐ ܗ̄ܘ̣ܵܐ
ܒܝܘܿܪܕܢܵܢ ܘܲܒܼܛܘܼܪܵܐ ܟܲܕܼ ܐܵܡܲ݁ܪ: ܕܗܵܢܵܘ ܒܹܪܝ ܘܚܲܒܿܝܼܒܼܝ ܕܒܹܗ
ܐܸܨ̇ܛܒܼܝܼܬܼ. ܒܗܵܢܵܐ ܐܵܪ̈ܝܵܢܘܿ ܟܲܕܼܒܼܘ: ܘܲܚܢܲܢ ܐܵܘܕܹܝܢ ܘܲܤܓܸܕܼܢ: ܠܵܘ
ܟܲܕܼ ܡܦܲܪܫܝܼܢ ܚ̄ܢܲܢ ܒܪܵܐ ܡܸܠܬܼܵܐ ܡ̣ܢ ܦܲܓܼܪܹܗ. ܐܸܠܵܐ ܠܹܗ ܗ̄ܘ̣ ܟܲܕܼ
ܠܹܗ ܝܵܕܼܥܝܼܢܲܢ ܕܐܝܼܬܼܵܘܗܝ ܒܪܵܐ ܕܐܲܠܵܗܵܐ: ܕܒܼܐܝܼܕܹܗ ܟܠ ܗܘ̤ܵܐ:
ܘܲܚܢܲܢ ܐܸܬܼܦܸܩܢ. ܡܸܛܠ ܗܵܕܹܐ: ܐܵܦ ܬܵܗܪܝܼܢܲܢ. ܐܲܝܟܲܢܵܐ ܗܵܟܹܝܠ
ܒܗܵܠܹܝܢ ܕܗܵܟܲܢܵܐ ܓܠܹܝܢ: ܗܘ̤ܵܐ ܠܟܼܘܿܢ ܚܸܪܝܵܢܵܐ؟ ܐܸܠܵܐ ܛܲܝܒܿܘܼ ܠܡܵܪܲܢ
ܕܲܟܼܡܵܐ ܕܐܸܬܿܬܿܥܝܼܩܢܲܢ ܒܩܸܪܝܵܢܵܐ ܕܥܘܼܗܕܵܢܵܐ: ܗܵܟܲܢܵܐ ܚܕܲܝܢ ܒܫܘܼܠܵܡܹܗ
ܕܤܘܼܥܪܵܢܵܐ. ܒܫܲܝܢܵܐ ܓܹܝܪ ܘܲܒܼܫܲܠܡܘܼܬܼܵܐ ܫܲܢܝܼܘ ܡ̣ܢ ܨܠܕܲܝܢ ܒܬܼܵܘܕܝܼܬܼܵܐ
ܕܕܸܚܠܲܬܼ ܐܲܠܵܗܵܐ: ܘܲܒܼܗܲܝܡܵܢܘܼܬܼܵܐ ܬܪܝܼܨܬܵܐ ܘܫܲܪܝܼܪܬܵܐ. ܗܵܕܹܐ ܗܵܟܹܝܠ
ܐܵܦ ܠܝܼ ܒܚܘܼܫܵܒܼܵܐ ܤܲܓܿܝܼܐܵܐ ܐܲܦܝܼܤܲܬ̤: ܕܐܸܟܼܬܿܘܿܒܼ ܗܵܠܹܝܢ ܙܥܘܿܪ݁ܝܵܬܼܵܐ
ܕܐܸܬܼܚܲܫܒܹܬܼ: ܕܕܲܠܡܵܐ ܡ̣ܢ ܫܸܬܼܩܵܐ ܥܵܩܬܼܵܐ ܚܠܵܦ ܚܲܕܼܸܘܼܬܼܵܐ ܬܸܗܘܸܐ:
ܠܗܵܢ̇ܘܿܢ ܕܒܼܵܐܘܝܘܼܬܼܗܘܿܢ ܥܸܠܬܼܵܐ ܕܚܲܕܼܘܼܬܼܵܐ ܗܘ̤ܵܘ ܠܲܢ. ܒܵܥܹ̇ܐ ܐ̄ܢܵܐ
ܗܵܟܹܝܠ ܠܘܼܩܕܲܡ ܡ̣ܢ ܚܲܤܝܘܼܬܼܵܟܼ: ܘܲܕܿܬܲܪܬܹܝܢ ܡ̣ܢ ܟܠ ܕܫܵܡܲܥ̇:
ܕܲܒܼܬܹܐܪܬܵܐ ܛܵܒܼܬܼܵܐ ܗܵܠܹܝܢ ܬܩܲܒܿܠܘܼܢ. ܘܐܸܢ ܡܸܕܸܡ ܠܕܸܚܠܲܬܼ
ܐܲܠܵܗܵܐ ܚܲܤܝܼܪ ܒܗܹܝܢ: ܬܬܲܪܨܘܼܢ ܘܬܵܘܕܿܥܘܼܢܵܢܝ. ܐܸܢ ܕܹܝܢ ܐܲܝܟܼ
ܕܡ̇ܢ ܗܸܕܼܝܘܿܛ ܒܡܸܠܬܹܗ: ܐܵܘ ܐܲܝܟܼ ܕܠܵܐ ܫܵܘܹ̇ܐ ܗ̄ܘ̣ܵܐ: ܘܠܵܐ
ܡܫܲܡܠܝܵܐܝܼܬܼ ܐܲܟܼܬܸܒܼ: ܟܠܟܼܘܿܢ ܬܸܫܒܿܩܘܼܢ ܠܲܡܚܝܼܠܘܼܬܹܗ ܕܡܹܐܡܪܲܢ.
ܫܸܠܡܲܬ̤ ܐܸܓܲܪܬܵܐ ܕܐܵܬܵܢܵܤܝܼܣ ܕܲܠܘܵܬܼ ܐܹܦܝܼܩܛܹܛܝܼܣ.
pb. 594
ܦܸܚܡܵܐ ܕܠܝܼܒܹܠܘܿܢ ܕܐܸܬܼܝܼܗܸܒܼ ܡ̣ܢ ܐܲܦܸܤܩ̈ܘܿܦܹܐ ܘܩܲܫܝܼ̈ܫܹܐ ܕܐܝܼܬܼ
ܒܐܲܪܡܸܢܝܼܵܐ ܪܲܒܿܬܼܵܐ: ܠܲܦܪܘܿܩܠܘܿܣ ܐܲܦܸܤܩܘܿܦܵܐ ܡܗܲܝܡܢܵܐ
ܕܩܘܼܤܛܲܢܛܝܼܢܵܦܘܿܠܝܼܣ: ܡܸܛܠ ܟܬܼܵܒܼܵܘ̈ܗܝ ܕܐܸܬܵܕܘܿܪܘܿܣ
ܕܡܘܿܦܤܘܼܵܝܤܛܝܼܵܐ.
ܠܩܲܕܝܼܫܵܐ ܘܪܵܚܹ̇ܡ ܐܲܠܵܗܵܐ ܐܲܦܸܤܩܘܿܦܵܐ ܕܥܹܕܬܵܐ ܩܵܬܼܘܿܠܝܼܩܹܐ
ܘܕܲܫܚܝܼܚܹ̈ܐ ܦܘܿܩܠܘܿܣ: ܡ̣ܢ ܠܹܐܵܢܛܝܼܘܿܣ ܘܗܵܒܹܝܠ ܩܲܫܝܼ̈ܫܹܐ
ܕܐܲܪܡܸܢܝܼܵܐ ܪܲܒܿܬܼܵܐ: ܘܡ̣ܢ ܐܲܚܹ̈ܐ ܕܥܲܡܲܢ.
ܚܢܲܢ ܐܘܿ ܚܤܝܵܐ ܐܲܝܟܼ ܡܲܫܠܡܵܢܘܼܬܼܵܐ ܕܐܲܒܼܵܗܲܝ̈ܢ ܐܲܦܸܤܩ̈ܘܿܦܹܐ:
ܗܵܢ̇ܘܿܢ ܕܲܒܼܢܝܼܩܵܝܼܵܐ ܡܕܼܝܼܢ̄ܬܼܵܐ: ܡܗܲܝܡܢܝܼܢ ܚ̄ܢܲܢ ܘܡܵܘܕܹܝܢ ܚ̄ܢܲܢ ܬܵܘܕܝܼܬܼܵܐ
ܫܲܪܝܼܪܬܵܐ ܘܲܬܼܪܝܼܬܵܐ. ܡܸܛܠ ܕܹܝܢ ܕܐ̄ܢܵܫ̈ܝܼܢ ܡ̣ܢ ܒܢܲܝ̈ ܡܲܕܢܚܵܐ
ܐܸܬܼ݂ܵܘ ܠܘܵܬܲܢ: ܘܲܨܒܼܵܘ ܕܲܢܙܝܼܥܘܼܢ ܠܲܢ ܐܲܝܟܼ ܕܲܠܐ̄ܢܵܫܵܐ ܦܫܝܼ̈ܛܹܐ:
ܟܲܕܼ ܡܲܝܬܹܿܝܢ ܥܲܡܗܘܿܢ ܟܬܼܵܒܼܵܐ ܕܬܹܐܵܕܘܿܪܘܿܣ: ܡ̇ܢ ܕܗ̤ܘ
ܕܐܝܼܬܼܵܘܗܝ ܗ̄ܘ̣ܵܐ ܐܲܦܸܤܩܘܿܦܵܐ ܕܡܘܿܦܪܘܼܤܛܝܼܵܐ. ܕܗ̤ܘ ܗܵܢܵܐ
ܐܲܝܟܼ ܕܝܼܠܸܦܢܲܢ ܡ̣ܢ ܟܬܼܝܼ̈ܒܼܵܬܹܗ ܕܩܲܕܝܼܫܵܐ ܡܵܪܝ ܪܲܒܿܘܼܠܵܐ ܐܲܦܸܤܩܘܿܦܵܐ
ܕܐܘܿܪܗܵܝ: ܘܡ̣ܢ ܡܵܪܝ ܐܵܩܵܩܝܼܣ ܕܡܝܼܠܝܼܛܝܼܢܹܗ: ܕܗܸܢ̣ܘܿܢ ܚܲܬܿܝܼܬܼܵܐܝܼܬܼ
ܐܵܘܕܲܥ̣ܘ: ܕܲܡܚܲܒܿܠܵܐ ܗ̄ܘ̣ܵܐ ܗ̤ܘ ܗܵܢܵܐ ܬܹܐܵܕܘܿܪܘܿܣ: ܘܲܡܕܲܠܚܵܢܵܐ
ܕܗܲܝܡܵܢܘܼܬܼܵܐ ܕܠܵܐ ܡܸܬܿܕܲܠܚܵܐܘ ܐ̄ܢܵܫ̈ܝܼܢ ܕܹܝܢ ܡ̣ܢ ܩܝܼܠܝܼܩܝܼܵܐ ܐܸܬܼ݂ܵܘ
ܠܘܵܬܲܢ: ܘܪܲܡܝܼܘ ܥܲܠ ܩܲܕܝܼܫܵܐ ܐܵܩܵܩܝܼܣ ܐܲܦܸܤܩܘܿܦܵܐ ܕܡܝܼܠܝܼܛܝܼܢܹܐ:
ܘܥܠ ܪܵܚ̇ܡܵܐ ܕܐܵܠܵܗܵܐ ܪܲܒܿܘܼܠܵܐ ܐܲܦܸܤܩܘܿܦܵܐ ܕܐܘܼܪܗܵܝ ܟܲܕܼ ܐܵܡ̇ܪܝܼܢ:
pb. 595
ܕܡܸܛܠ ܒܥܸܠܕܒܼܵܒܼܘܼܬܼܵܐ ܘܤܸܢܐܬܼܵܐ ܐܲܤܠ̣ܝܘܼ ܠܲܟܼܬܼܵܒܼܵܘ̈ܗܝ
ܕܬܹܐܵܕܘܿܪܘܿܣ. ܡܸܛܠ ܗܵܢܵܐ ܐܲܦܸܤܩ̈ܘܿܦܹܐ ܩܲܕܝܼ̈ܫܹܐ: ܟܠܗܘܿܢ ܡ̣ܢ
ܪܸܚܡܲܬܼ ܐܲܠܵܗܵܐ ܕܒܼܵܟܼ ܘܲܒܼܚܘܼܫܵܒܼܵܐ ܘܲܒܼܨܦܬܼܵܐ ܤܲܓܝܼܐܬܼܵܐ ܙܲܕܸܩ̣ܘ:
ܕܲܚܢܲܢ ܠܗܵܪܟܵܐ ܢܸܫܬܲܕܲܪ ܕܢܹܐܠܲܦ ܚܲܬܿܝܼܬܵܐܝܼܬܼ ܡܸܢܵܟܼ: ܕܐܸܢ ܗܸܢܘ̣ܿܢ
ܟܬܼܵܒܹ̈ܐ ܘܲܕܼܡܸܢܗܘܿܢ ܕܲܤܝܵܡܹ̈ܐ ܫܲܪܝܼܪܵܐܝܼܬܼ ܡܥܲܩܡܝܼܢ.
ܒܵܥܹ̇ܝܢܲܢ ܗܵܟܹܝܠ ܡܸܢܵܟܼ: ܕܬܲܫܘܸܐ ܠܲܢ ܠܲܟܼܬܼܝܼ̈ܒܼܵܬܼܵܐ: ܕܡܸܢܗܹܝܢ ܚܢܲܢ
ܘܗܵܬܢ̇ܘܿܢ ܕܫܲܕܪܘܼܢ ܢܹܐܠܲܦ: ܐܸܢ ܘܵܠܹ̇ܐ ܕܢܸܫܠܲܡ ܠܗܵܢ̇ܘܿܢ ܕܐܸܬܼ݂ܵܘ
ܡ̣ܢ ܩܝܼܠܝܼܩܝܼܵܐ: ܘܐܲܝܬܿܝܼܘ ܟܬܼܵܒܼܵܘ̈ܗܝ ܕܬܹܐܵܕܘܿܪܘܿܣ: ܘܐܸܢ
ܒܲܟܼܬܼܝܼܒܼܢܗܘܿܢ ܕܩܲܕܝܼ̈ܫܹܐ ܪܲܒܿܘܼܠܵܐ ܘܐܵܩܵܩܼܝܼܣ ܐܲܦܸܤܩ̈ܘܿܦܹܐ ܘܵܠܹ̇ܐ
ܕܵܢܚܘܼܪ ܪܸܥܝܵܢܲܢ: ܡ̣ܢ ܝܲܬܿܝܼܪ ܕܹܝܢ: ܐܵܦ ܟܬܼܵܒܹ̈ܐ ܕܲܤܝܵܡܵܘ̈ܗܝ
ܕܬܹܐܕܘܿܪܘܿܣ ܐܝܼܬܼ ܒܐܝܼܕܲܢ. ܕܗ̤ܘ ܗܵܢܵܐ ܟܲܕܼܸ ܒܵܥܹ̇̄ܝܢܲܢ ܡܸܢܵܟܼ:
ܬܸܚܙܸܐ ܐܸܢ ܫܲܦܝܼܪ ܡܸܕܸܡ ܕܒܹܗ ܟܲܟܼܬܲܒܼ. ܕܲܒܼܒܼܘܼܚܪܵܢܵܐ ܕܩܲܕܝܼܫܘܼܬܼܵܟܼ:
ܓܲܒܼܪܹ̈ܐ ܘܢܸܫܹ̈ܐ ܘܲܛܠܵܝܹ̈ܐ ܕܐܝܼܬܼ ܒܐܲܪܡܸܢܝܼܵܐ ܪܲܒܿܬܼܵܐ: ܟܠܹܗ ܥܲܡܵܐ
ܕܥܹܕܬܵܐ ܩܲܕܝܼܫܬܼܵܐ: ܢܸܬܿܬܲܠܡܲܪ ܠܗܲܝܡܵܢܘܼܬܼܵܐ ܕܐܸܬܿܬܲܤܝܼܬ̤
ܡܫܲܠܡܵܢܵܐܝܼܬܼ ܘܲܡܫܲܪܪܵܐܝܼܬܼ ܠܘܵܬܼ ܪ̈ܗܘܿܡܵܝܹܐ. ܘܬܼܘܼܒܼ ܥܲܡ ܗܵܠܹܝܢ
ܒܛܲܝܒܿܘܼܬܼܵܐ ܕܐܵܠܵܗܵܐ: ܘܐܵܦ ܗܵܢ̇ܘܿܢ ܕܐܸܬܼ݂ܵܘ ܕܢܛܲܥܘܿܢ ܠܲܢ ܡ̣ܢ
ܩܝܼܠܝܼܩܝܼܵܐ: ܒܝܲܕܼ ܟܐܼܝܼ̈ܒܼܵܬܼܵܐ ܕܗܲܝܡܵܢܘܼܬܼܵܟܼ ܢܸܬܿܬܲܪܨܘܼܢ. ܘܡ̣ܢ ܗܵܘ̇
ܡܗܲܦܟܵܢܵܐ ܢܸܬܼܦܢܘܿܢ: ܘܲܠܗܲܡܵܢܘܼܬܼܵܐ ܕܲܫܠܝܼܚܹ̈ܐ ܗܵܝ̇ ܕܤܵܡ̣ܘ
ܬܠܵܬܼܡܵܐܐ ܘܲܬܼܡܵܢܬܲܥܤܲܪ ܐܲܒܼܵܗ̈ܬܼܵܐ ܒܒܼܘܼܚܪܵܢܵܐ: ܐܵܦ ܗܸܢ̣ܘܿܢ
ܢܸܬܿܬܵܘܤܦܘܼܢ: ܕܐܵܦ ܚܢܲܢ ܒܵܗ̇ ܡܵܘܕܹܝܢ ܚ̄ܢܲܢ. ܕܡܵܐ ܕܲܗܘ̤ܵܬܼ ܠܲܢ
ܗܵܕܹܐ: ܠܚܲܕܼ ܪܸܥܝܵܢܵܐ ܘܒܲܚܕܼܵܐ ܫܲܠܡܘܼܬܼܵܐ: ܐܲܝܟܼ ܐܲܚܹ̈ܐ ܕܲܫܪܵܪܵܐ ܘܐܲܝܟܼ
ܗܲܕܵܡܹ̈ܐ ܕܲܒܼܦܲܓܼܪܵܐ: ܢܸܬܼܪܲܟܲܒܼ ܒܟܼܠ ܫܸܪ̈ܝܵܢܝܼܢ ܥܲܡ ܚܕܼܵܕܹ̈ܐ. ܘܲܚܢܲܢ
pb. 596
ܕܠܵܐ ܐܸܫܬܲܓܸܫܢܲܢ: ܘܗܵܢ̇ܘܿܢ ܕܕܠܩܘܼܒܼܠܵܐ ܡܸܬܼܚܲܫܒܼܝܼܢ ܗ̄ܘ̣ܵܘ:
ܢܸܗܘܸܐ ܒܐܵܘܝܘܼܬܼܵܐ: ܟܲܕܼ ܡܵܘܕܹܝܼܢܲܢ ܒܚܲܕܼ ܡܵܪܝܵܐ: ܘܒܲܚܕܼܵܐ ܗܲܝܡܵܢܘܼܬܼܵܐ
ܫܲܪܝܼܪܬܵܐ ܕܡܸܫܬܲܪܪܵܐ ܒܢܲܦ̈ܫܵܬܲܢ: ܗ̤ܘܲܝܢܲܢ ܥܲܗܝܼܕܝܼܢ ܚ̄ܢܲܢ ܠܕܸܚܠܲܬܼ
ܐܲܠܵܗܵܐ ܕܒܼܵܟܼ.
ܬܘܼܒܼ ܕܝܠܹܗ ܕܛܘܼܒܼܵܢܵܐ ܡܵܪܝ ܦܪܘܿܩܠܘܿܣ ܐܲܦܸܤܩܘܿܦܵܐ:
ܠܘܵܬܼܗܘܿܢ ܕܐܲܦܸܤܩ̈ܘܿܦܹܐ ܕܐܲܪܡܸܢܝܼܵܐ.
ܠܢܲܟܼ̈ܦܹܐ ܘܪ̈ܲܚܡܲܝ ܐܲܠܵܗܵܐ ܒܢܲܝ̈ ܬܸܫܡܸܫܬܿܝ: ܐܲܦܸܤܩ̈ܘܿܦܹܿܐ ܘܩܲܫܝܼ̈ܫܹܐ
ܘܕܲܝܪ̈ܵܝܹܐ ܕܐܝܼܬܼ ܒܐܲܪܡܸܢܝܼܵܐ: ܒܢܲܝ̈ ܥܹܕܬܵܐ ܩܲܕܝܼܫܬܼܵܐ ܕܝܘܼܠܦܵܢܵܐ
ܫܲܪܝܼܪܵܐ: ܦܪܘܼܩܒܠܘܿܣ ܒܡܵܪܲܢ ܫܠܵܡ.
ܐ. ܛܸܒܵܐ ܕܛܵܥܝܼܘܼܬܼܗܘܿܢ: ܐܲܚܲܝ̈: ܕܙܝܼܙܵܢܹ̈ܐ ܚܲܕܼ̈ܬܹܐ: ܠܢܲܦܫܲܢ
ܕܠܵܐ ܡܘܼܫܚܵܐ ܐܲܕܼܘܝܼ: ܘܲܠܪܸܥܝܵܢܲܢ ܒܥܵܩܬܼܵܐ ܩܫܝܼܬܼܵܐ ܡܲܚ̣ܝܼ: ܗܵܢܘܿܢ
ܕܲܩܕܼܵܡ ܙܲܒܼܢܵܐ ܒܐܲܪܥܟܼܘܿܢ ܨܢܝܼܥܵܐܝܼܬܼ ܙܪܲܥ̣: ܗܵܘ̇ ܕܐܝܼܬܼܵܘܗܝ
ܒܥܸܠܕܒܼܵܒܼܵܐ ܕܟܼܠܹܗ ܟܝܵܢܵܐ ܕܓܼܵܘܐ. ܡܥܵܕ ܗ̄ܘ̣ ܓܹܝܪ ܫܸܡܥܵܐ
ܕܒܼܝܼ̈ܫܵܬܼܵܐ ܩܲܫܝܵܐܝܼܬܼ ܡܲܚܸܫ ܠܢܲܦܫܵܐ: ܕܠܵܐ ܡܢܲܦܩܵܐ ܒܕܼܘܼܪܵܫܵܐ
ܕܫܵܡܘܿܥܵܘ̈ܗܝ. ܘܗܵܟܲܗܢܵܐ ܝܲܬܿܝܼܪ ܡܡܲܚܸܐ ܓܹܐܪ̈ܵܘܗܝ ܒܥܘܼܡܩܵܐ:
ܟܡܵܐ ܕܐܵܦ ܛܸܒܹܿܗ ܕܐܲܒܼܕܵܢܵܐ: ܠܵܘ ܥܕܲܡܵܐ ܠܦܲܓܼܪܵܐ ܘܥܲܒܼܝܘܼܬܹܗ
ܒܲܠܚܘܿܕܼ ܐܝܼܬܼܵܘܗܝ ܘܟܲܕܼܘܼ: ܐܸܠܵܐ ܠܢܲܦܫܵܐ ܕܥܸܠܵܝܵܐ ܒܩܲܛܝܼܢܘܼܬܼܵܗ̇
ܫܵܒܹ̇ܐ ܒܫܸܡ̈ܥܹܐ: ܕܡܵܐܢܵܐ ܓܡܝܼܪܵܐ ܕܗܲܝܡܵܢܘܼܬܼܵܐ ܡܸܬܼܐܠܸܨ: ܕܐܵܘ
pb. 597
ܕܠܵܐ ܚܵܘܤܵܢ ܢܸܤܬܲܪܲܩ: ܐܵܘ ܠܲܓܼܡܵܪ ܢܸܬܼܚܲܠܲܨ. ܟܠ ܡܝܲܬܿܪܘܼܬܼܵܐ
ܓܹܝܪ ܓܲܒܼܝܵܐ ܗ̣̄ܝ ܥܲܠ ܗܵܢ̇ܘܿܢ: ܕܫܘܼܦܪܵܐ ܕܲܬܼܪ̈ܲܝܗܘܿܢ ܠܵܐ ܐܸܬܼܚܲܒܲܠ
ܡ̣ܢ ܚܲܫܹ̈ܐ. ܘܟܼܠ ܒܝܼܫܬܼܵܐ ܡܲܤܠܲܝܬܼܵܐ: ܠܵܘ ܕܠܵܐ ܒܙܸܕܼܩܵܐ ܡ̣ܢ
ܤܲܟܿܘܼ̈ܠܬܼܵܢܹܐ ܚܫܝܼܒܼܵܐ: ܡܸܛܠ ܕܐܝܼܬܹܝܗ̇ ܕܲܠܩܘܼܒܼܠܵܐ: ܘܡܲܩܪܒܼܵܐ
ܠܒܲܪ ܡ̣ܢ ܟܝܵܢܵܐ ܥܲܡܹܗ ܕܲܟܼܝܵܢܵܐ. ܐܲܟܼܙܢܵܐ ܓܹܝܪ ܕܲܓܼܒܸܐ ܗ̄ܘ̣ ܥܘܼܕܼܪܵܢܵܐ
ܠܐܝܠܹܝܢ ܕܐܲܠܝܼܨܝܼܢ ܥܠܵܘܗܝ: ܗܵܟܲܢܵܐ ܐܵܦ ܤܘܼܓܦܵܢܵܐ: ܐܵܘ ܟܲܕܼ
ܩܲܪܝܼܒܼ ܢܸܥܪܘܿܩ ܡܸܢܹܗ: ܐܵܘ ܟܲܕܼ ܪܲܚܝܼܩ ܕܐܲܝܟܲܢ ܠܵܐ ܢܹܐܬܸܐ ܙܵܕܹܩ
ܕܢܹܐܨܲܦ. ܤܲܚܿܝܼܐܝܼܢ ܗܵܟܹܝܠ ܙܢܲܝ̈ܐ ܕܲܡܝܲܬܿܪܘܼܬܼܵܐ: ܡܦܲܪܫܵܐܝܼܬܼ ܕܹܝܢ
ܐܲܟܼܬܸܒܼܘ ܥܠܹܝܗ̇ ܚܲܢ̈ܦܹܐ ܚܢܝܼ̈ܩܲܝ ܡ̣ܢ ܛܵܥܝܘܼܬܼܵܐ: ܘܡ̣ܢ ܚܲܬܿܝܼܬܼܘܼܬܼܵܐ
ܕܦܵܪܘܿܫܘܼܬܼܵܐ: ܡܸܛܠ ܠܵܐ ܝܑܼܕܼܥܬܼܵܐ ܕܐܲܠܵܗܵܐ ܐܸܬܼܥܵܘܲܪܘ. ܟܪܸ̈ܤܛܝܵܢܹܐ
ܕܹܝܢ ܡܸܛܠ ܗܲܝܡܵܢܘܼܬܼܗܘܿܢ: ܥܲܝܵܢܹܐ ܕܠܸܒܵܘܵܬܼ̈ܗܘܿܢ ܢܗܲܪ. ܘܲܒܼܫܵܡܫܵܐ
ܕܙܲܕܝܼܩܘܼܬܼܵܐ: ܫܲܦܝܵܐܝܼܬܼ ܒܝܲܕܼ ܬܵܘܕܝܼܬܼܗܘܿܢ ܐܸܫܟܲܚ̣ܘ ܕܲܢܚܘܼܪܘܼܢ.
ܒ. ܚܲܢ̈ܦܹܐ ܓܹܝܪ ܐܲܝܟܼ ܐܲܒܿܝܼ̈ܕܲܝ ܡ̣ܢ ܗܵܘܢܵܐ ܡܕܲܒܿܪܵܢܵܐ ܘܡܸܬܿܬܩ̈ܠܲܝ
ܒܚܸܫܘܿܟܼܵܐ: ܒܬܼܵܘܫܵܐ ܪ̈ܵܕܼܝܵܢ ܡܸܠܲܝ̈ܗܘܿܢ. ܘܗܵܢܵܐ ܟܝܵܢܵܐ ܕܡܸܬܼܚܙܸܐ
ܘܲܕܼܠܵܐ ܫܲܠܘܵܐ ܪܵܕܹܐ: ܡܵܫ̣ܘ ܒܲܠܚܘܿܕܼ ܘܐܵܟܼܬܸܒܼܘ ܒܝܘܼܠܦܵܢܲܝ̈ܗܘܿܢ.
ܡ̣ܢ ܡܼܬܿܕܪܟܵܢܘܼܬܼܵܐ ܕܹܝܢ ܕܲܫܪܵܪܵܐ: ܐܵܘ ܡ̣ ܢܘܼܓܼܪܵܐ ܕܙܲܒܼܢܵܐ ܓܗܲܪܘ:
ܐܵܘ ܡ̣ܢ ܛܵܥܝܘܼܬܼܵܐ ܐܸܤܬܡܝܼܘ. ܐܵܡ̇ܪܝܼܢ ܓܹܝܪ: ܕܐܲܪܒܿܥܵܐ ܐܸܢܘܿܢ
ܙܢܹ̈ܝܗ̇ ܕܲܡܝܲܬܿܪܘܼܬܼܵܐ. ܗܵܢܵܘ ܕܹܝܢ: ܟܹܐܢܘܼܬܼܵܐ: ܘܚܸܟܼܡܬܼܵܐ: ܘܢܲܟܼܦܘܼܬܼܵܐ:
ܘܲܚܠܝܼܨܘܼܬܼܵܐ: ܗܵܠܹܝܢ ܕܐܵܦܸܢ ܡܸܤܬܲܒܼܪ̈ܵܢ ܕܫܲܦܝܼܪ̈ܵܢ: ܐܸܠܵܐ ܠܬܲܚܬܿ
ܪ̈ܵܕܼܝܵܢ: ܘܥܲܠ ܐܲܪܥܵܐ ܪ̈ܵܦܬܵܢ: ܘܲܠܟܼܵܐ ܡ̣ܢ ܟܦܵܦܵܐ ܕܲܫܡܲܝܵܐ ܐܝܼܬܲܝܗܹܝܢ.
ܐܵܡ̇ܪܝܼܢ ܓܹܝܪ: ܕܲܚܠܝܼܨܘܼܬܼܵܐ ܐܝܼܬܹܝܗ̇ ܬܟܼܬܿܘܼܫܵܐ ܕܥܲܡ ܟܝܵܢܹ̈ܐ ܩܫܲܝ̈ܵܐ.
pb. 598
ܘܢܲܟܼܦܘܼܬܼܵܐ: ܙܵܟܼܘܼܬܼܵܐ ܕܥܲܠ ܚܲܫܹ̈ܐ. ܘܚܸܟܼܡܬܼܵܐ: ܢܸܨܚܵܢ ܐܘܼܚܕܵܢܵܐ
ܕܒܲܡܕܼܝܼ̈ܢܵܬܼܵܐ. ܘܟܹܐܢܘܼܬܼܵܐ: ܦܘܼ̈ܠܵܓܹܐ ܬܪ̈ܝܼܨܵܐ: ܛܲܟܸܿܤ̣ܘ ܐܲܝܟܼ
ܕܲܒܼܢܵܡܘܿܤܵܐ ܘܤܵܡ̣ܘ ܠܥܵܠܡܵܐ: ܘܬܲܚܸܡ̣ܘ ܘܦܲܓܸܕܼܘ ܠܥܵܠܘܼܒܼܘܼܬܼܵܐ
ܡ̣ܢ ܬܪ̈ܵܝܗܘܿܢ ܓܵܒܼ̈ܐ. ܡܸܕܸܡ ܕܹܝܢ ܕܲܡܝܲܬܲܪ ܘܥܸܠܵܝ ܡ̣ܢ ܗܵܢܵܐ
ܡܸܬܼܚܲܙܝܵܢܵܐ ܠܵܐ ܐܸܤܬܲܟܲܠܘ: ܘܐܵܦ ܠܵܐ ܕܢܲܟܼܬܿܒܼܘܼܢ ܐܸܫܟܲܚ̣ܘ. ܐܸܠܵܐ
ܒܲܥܘܝܼܪܘܼܬܼܵܐ ܕܪܸܥܝܵܢܗܘܿܢ: ܥܨܵܠܐܘܼܗ̇ ܠܲܡܝܲܬܿܪܘܼܬܼܵܐ. ܘܲܒܗܵܢܵܐ ܡܸܕܸܡ
ܕܡܸܬܼܚܙܸܐ ܚܲܒܼܫܘܼܗ̇ ܒܲܠܚܘܿܕܼ: ܘܠܵܐ ܫܒܲܩ̣ܘ ܕܡܸܕܸܡ ܕܪܵܡ
ܘܡܸܬܼܦܲܚܡ ܠܫܘܼܦܪܵܗ̇ ܕܲܫܡܲܝܵܐ ܢܸܗܘܸܐ ܠܵܗ̇.
ܓ. ܚܪܸ̈ܤܛܝܵܢܹܐ ܗܵܢ̇ܘܿܢ ܕܲܒܼܗܲܝܡܵܢܘܼܬܼܗܘܿܢ ܢܗܲܪ ܥܲܝ̈ܢܹܐ
ܕܠܸܒܵܘ̈ܲܬܼܗܘܿܢ: ܗܵܢܘܿܢ ܕܡܬܲܠܡܕܵܢܗܘܿܢ ܘܡܲܠܦܵܢܗܘܿܢ ܐܝܼܬܼܵܘܗܝ
ܛܘܼܒܼܵܢܵܐ ܦܵܘܠܘܿܣ: ܡܝܲܬܿܪܘܼܬܼܵܐ ܐܸܡ݂ܲܪܘ ܕܐܝܼܬܹܝܗ̇: ܐܲܝܕܵܐ ܕܲܠܘܵܬܼ
ܐܲܠܵܗܵܐ ܡܥܲܠܝܵܐ: ܘܗܵܠܹܝܢ ܕܒܲܐܪܥܵܐ ܡܛܲܟܿܤܵܐܝܼܬܼ ܡܕܲܒܿܪܵܐ ܗ̤ܘ
ܗܵܢܵܐ ܗܵܟܹܝܠ ܢܲܨܝܼܚ ܒܟܼܠ ܦܵܘܠܘܿܣ: ܤܲܓܝܼ̈ܐܵܬܼܵܐ ܚ̣ܫܲܒܼ ܙܢܲܝܵ̈ܐ
ܕܲܡܝܲܬܿܪܘܼܬܼܵܐ. ܥܲܠ ܗܵܢ̇ܘܿܢ ܕܹܝܢ ܬܠܵܬܼܵܐ ܝܲܬܿܝܼܪܵܐܝܼܬܼ ܐܲܟܼܪܸܙ ܕܐܝܼܬܲܝܗܘܿܢ:
ܗܲܝܡܵܢܘܼܬܼܵܐ: ܘܤܲܒܼܪܵܐ: ܘܚܘܼܒܵܐ. ܗܲܝܡܵܢܘܼܬܼܵܐ ܓܹܝܪ: ܝܵܗ̇ܒܵܐ ܠܲܒܼܢܲܝ̈ܢܵܫܵܐ
ܡܸܕܸܡ ܕܡܥܲܠܲܝ ܡ̣ܢ ܟܝܵܢܵܐ. ܘܲܡܚܠܛܵܐ ܥܲܡ ܪ̈ܘܼܚܵܢܹܐ: ܠܗܵܘ̇
ܕܥܕܲܟܹܝܠ ܠܒܼܝܼܫ ܡܵܐܢܵܐ ܕܦܲܓܼܪܵܐ ܤܲܓܿܝܼ ܚܲܫܹ̈ܐ. ܡܸܕܸܡ ܓܹܝܪ
ܕܡܲܠܲܐܟܹ̈ܐ ܘܲܟܼܝܵܢܵܐ ܕܚܲܝ̈ܠܵܘܵܬܼܵܐ ܪ̈ܘܼܚܵܢܹܐ ܠܵܐ ܝܑܕܲܥ̣ܘ ܡܸܛܠ ܪܲܒܿܘܼܬܼܵܗ:
ܗܲܝܡܵܢܘܼܬܹܗ ܝܸܗܒܲܬ̤ ܝܑܼܕܲܥܬܹܗ ܠܲܒܼܢܲܝ̈ ܐ̄ܢܵܫܵܐ ܕܲܡܗܲܠܟܼܝܼܢ ܥܲܠ
ܐܲܪܥܵܐ: ܘܡܸܬܼܥܲܪܓܠܝܼܢ ܒܐܪܥܵܐ ܒܥܲܦܪܵܐ: ܘܲܡܩܲܪܒܼܵܐ ܠܗܘܿܢ
ܠܲܬܼܪܘܿܢܘܿܣ ܕܡܲܠܟܿܘܼܬܼܵܐ ܫܲܪܝܼܪܵܐܬܵܐ. ܘܲܒܼܨܡܚܵܐ ܚܲܬܿܝܼܬܼܵܐ ܕܡܸܢܵܗ̇:
pb. 599
ܡܫܵܘܕܥܵܐ ܥܲܠ ܟܝܵܢܵܐ ܕܐܝܼܬܼܵܘܗܝ ܕܠܵܐ ܫܘܼܪܵܝܵܐ ܘܠܵܐ ܒܲܪܝܵܐ.
ܘܲܒܼܙܲܠܝܼܩܵܐ ܕܡܵܢܵܗ̇: ܛܵܪܕܵܐ ܥܵܪܦܸܠܵܐ ܕܚܲܫܹ̈ܐ. ܘܡܵܐ ܕܡܸܪܩܲܬ̤ ܡ̣ܢ
ܠܸܒܵܐ ܟܠܵܗ̇ ܥܲܡܘܼܛܘܼܬܼܵܐ ܘܥܲܒܼܝܘܼܬܼܵܐ: ܝܵܗ̇ܒܵܐ ܕܫܲܦܝܵܐܝܼܬܼ ܢܸܬܼܚܙܸܐ
ܗܵܘ̇ ܡܸܕܸܡ ܕܵܒܼܠܵܐ ܡܸܬܿܕܲܪܟܵܢܘܼܬܹܗ ܡܸܬܼܚܙܸܐ: ܘܲܒܼܠܵܐ ܡܸܬܼܚܲܙܝܵܢܘܼܬܼܵܗ
ܡܸܬܿܕܪܸܟܼ܀ ܤܲܒܼܪܵܐ ܕܹܝܢ: ܠܵܘ ܐܲܝܟܼ ܕܲܒܼܚܸܠܡܵܐ ܡܸܫܟܲܚ ܐ̄ܢܵܫ
ܕܢܹܐܡܲܪ: ܐܸܠܵܐ ܚܠܝܼܨܵܐܝܼܬܼ ܡ̣ܢ ܗܵܪܟܐ ܡܚܵܘܸ̇ܐ ܗܵܠܹܝܢ ܕܲܥܬܼܝܼ̈ܕܵܢ.
ܘܲܕܼܠܵܐ ܦܘܼܠܵܓܼ ܡܫܲܪܲܪ ܒܚܘܼܫܵܒܼܵܐ ܡܸܕܸܡ ܕܲܥܬܼܝܼܕܼ: ܐܲܝܟܼ ܗܵܘ̇
ܕܡܸܬܼܚܙܸܐ. ܘܐܲܝܟܼ ܐ̄ܢܵܫ ܢܹܐܡܲܪ: ܡܸܕܸܡ ܕܐ̄ܢܵܫ ܡܤܲܟܸܿܐ: ܩܕܼܵܡ
ܥܲܝܢܵܘ̈ܗܝ ܨܵܐܲܪܘ ܥܸܠܵܝ ܗ̄ܘ̣ ܓܹܝܪ ܤܲܒܼܪܵܐ: ܡ̣ܢ ܟܠܹܗ ܥܘܼܘܵܟܼܵܐ.
ܘܲܡܖܩܲܪܸܒܼ ܕܠܵܐ ܥܘܼܟܵܪ: ܤܘܼܟܵܝܵܐ ܠܘܵܬܼ ܡܤܲܟܿܝܵܢܹܗ. ܘܵܠܪܸܕܹܝܗ
ܕܙܲܒܼܢܵܐ: ܒܲܐ̄ܚܵܢܘܼܬܼܵܐ ܕܗܵܘ̇ ܡܸܕܸܡ ܕܲܥܬܼܝܼܕܼ ܙܵܟܹ̇ܐ܀ ܚܘܼܒܵܐ ܕܹܝܢ
ܐܝܼܬܼܵܘܗܝ ܪܹܿܫܵܐ: ܕܟܼܠܹܗ ܐ̄ܪܵܙܲܢ. ܗ̤ܘ ܓܹܝܪ ܐܲܦܝܼܣ ܠܐܲܠܵܗܵܐ
ܡܸܠܬܼܵܐ ܟܲܕܼ ܐܝܼܬܼܵܘܗܝ ܟܠ ܫܵܥ ܒܐܪܥܵܐ: ܢܹܐܬܸܐ ܒܝܲܕܼ ܦܲܚܼܪܵܐ.
ܬܲܪ̈ܬܲܝܗܹܝܢ ܗܵܝܟܹܝܠ: ܚܕܼܵܐ ܠܲܚܕܼܵܐ ܠܵܚ̈ܡܵܢ. ܗܲܝܡܵܢܘܼܬܼܵܐ ܓܹܝܪ
ܡܲܚܙܝܼܬܹܗ ܗ̣̄ܝ ܕܚܘܼܒܵܐ: ܘܚܘܼܒܵܐ ܓܡܝܼܪܘܼܬܼܵܐ ܗ̄ܘ̣ ܕܗܲܝܡܵܢܘܼܬܼܵܐ.
ܡܗܲܝܡܢܝܼܢ ܚ̄ܢܲܢ ܗܵܟܹܝܠ: ܕܐܲܠܵܗܵܐ ܡܸܠܬܼܵܐ ܕܠܵܬܐ ܚܲܫܵܐ ܐܸܬܼܓܲܫܲܡ:
ܘܙܕܼܩܵܐܝܼܬܼ ܡܗܲܝܡܢܝܼܢܲܢ. ܗܵܕܹܐ ܓܹܝܪ ܐܝܼܬܹܝܗ̇ ܫܲܬܼܐܸܤܬܼܵܐ ܕܦܘܼܪܩܵܢܲܢ.
ܐܸܠܵܐ: ܐܵܦ ܡܲܚܒܿܝܼܢܲܢ ܠܗܵܘ̇ ܕܡܸܛܠܵܬܲܢ ܕܡܘܼܬܼܵܐ ܕܥܲܒܼܕܵܐ ܢܤܲܒܼ.
ܘܠܵܐ ܟܝܵܢܹܗ ܩܲܒܸܠ̣ ܫܘܼܚܠܵܦܵܐ: ܘܠܵܐ ܬܵܘܤܲܦܬܼܵܐ ܥ̣ܒܲܕܼ ܒܲܬܼܠܝܼܬܼܵܝܘܼܬܼܵܐ.
ܟܠ ܗܵܟܹܝܠ ܟܪܸܤܛܝܵܢܵܐ ܐܝܢܵܐ ܕܠܵܐ ܥܲܬܿܝܼܪ ܒܗܲܝܡܵܢܘܼܬܼܵܐ ܘܲܒܼܤܲܒܼܪܵܐ
ܘܲܒܼܚܘܼܒܵܐ: ܠܵܐ ܐܝܼܬܼܵܘܗܝ ܗܵܘ̇ ܡܸܕܸܡ ܕܡܸܬܼܦܪܸܐ. ܐܸܠܵܐ ܐܵܦܸܢ
pb. 600
ܡܸܤܬܿܒܲܪ ܕܫܲܥܒܸܿܕܼ ܦܲܓܼܪܗ: ܘܐܸܬܼܚܲܪܲܪ ܡ̣ܢ ܚܲܫܹ̈ܐ ܕܢܲܦܫܵܐ: ܠܲܟܼܠܝܼܠܵܐ
ܕܙܵܟܼܘܼܬܼܵܐ ܠܵܐ ܡܸܫܬܿܘܸܐ. ܡܸܛܠ ܕܐܸܤܟܹܿܡܹ̈ܐ ܡܸܬܼܚܲܙܝܵܢܹ̈ܐ ܕܲܡܝܲܬܿܪܘܼܬܼܵܐ
ܢܛܲܪ: ܘܠܵܐ ܐܸܬܼܩܲܪܲܒܼ ܠܘܵܬܼ ܡܟܲܠܠܵܢܵܐ ܕܙܵܟܼܘܼܬܼܵܐ: ܕܐܲܝܠܹܝܢ
ܕܲܚܠܵܦ ܡܝܲܬܿܪܘܘܼܬܼܵܐ ܚܠܝܼܨܵܐܝܼܬܼ ܐܸܬܼܟܲܬܲܫܘ.
ܕ. ܗܲܝܡܵܢܘܼܬܼܵܐ ܗܵܟܹܝܠ: ܐܲܝܟܼ ܡܸܕܸܡ ܕܐܸܡܲܪܢܲܢ: ܪܹܫܵܐ ܐܝܼܬܹܝܗ̇
ܕܟܼܠܗܹܝܢ ܛܲܒܼ̈ܬܼܵܐ. ܬܸܬܼܢܲܛܲܪ ܗܵܟܹܝܠ ܡܸܢܲܢ ܕܠܵܐ ܢܸܟܼܠܵܐ: ܘܠܵܐ
ܢܟܲܬܼܡܵܗ̇ ܒܙܹܐܦܵܐ ܕܚܘܼ̈ܫܵܒܹܐ ܐ̄ܢܵܫܵܝܹ̈ܐ: ܘܠܵܐ ܢܸܫܓܫܵܗ̇ ܒܲܒܼ̈ܢܵܬܼ ܩܵܠܹ̈ܐ
ܡܕܲܠܚܵܢ̈ܝܵܬܼܵܐ. ܐܸܠܵܐ ܠܓܼܵܘ ܡ̣ܢ ܬܚܘܼܡܵܠ ܬܩܵܘܸܐ ܕܐܹܘܲܢܓܲܠܝܼܘܿܢ
ܘܕܲܫܠܝܼܚܹ̈ܐ: ܟܲܕܼ ܠܵܐ ܐ̄ܢܵܫ ܡܲܡܪܲܚ ܕܢܸܬܼܟܲܬܲܫ ܥܲܡ ܗܲܝܡܵܢܘܼܬܼܵܐ:
ܕܒܼܵܗ̇ ܐܸܬܼܦܪܸܩ ܘܒܼܵܗ̇ ܐܵܘܕܝܼ ܒܲܥܡܵܕܼܵܐ: ܒܝܲܕܼ ܟܬܼܝܼ̈ܒܼܵܬܼܵܐ ܕܠܸܫܵܢܹܗ.
ܚܵܕܹ̇ܩ ܓܹܝܪ ܪܵܘܡܵܗ̇ ܕܗܲܝܡܵܢܘܼܬܼܵܐ: ܟܠܹܗ ܚܹܐܦܵܐ ܕܓܼܘܼܡܕܵܢܘܼܬܼܵܐ
ܘܡܲܪܵܚܘܼܬܼܵܐ. ܠܵܘ ܒܲܠܚܘܿܕܼ ܕܡ̣ܢ ܒܢܲܝ̈ܢܵܫܵܐ: ܐܸܠܵܐ ܕܡ̣ܢ ܟܝܵܢܵܐ
ܪܘܼܚܵܢܵܐ ܬܸܬܼܥܲܫܲܢ. ܘܤܵܗܹ̇ܕܼ ܦܵܘܠܘܿܣ ܟܲܕܼ ܩܵܥܹ̇ܐ: ܕܐܸܢ ܚܢܲܢ
ܐܵܘ ܡܲܠܲܐܟܼܵܐ ܡ̣ܢ ܫܡܲܝܵܐ: ܢܤܲܒܲܪܟܼܘܿܢ ܠܒܲܪ ܡ̣ܢ ܡܵܐ ܕܩܲܒܸܿܠܬܿܘܿܢ:
ܢܸܗܘܸܐ ܚܪܸܡ. ܕܢܫܲܡܸܫ ܓܹܝܪ ܤܝܼܡ ܡܲܠܲܐܟܼܵܐ: ܘܠܵܘ ܕܢܲܟܼܪܸܙ
ܝܘܼܠܦܵܢܵܐ. ܘܲܡܤܵܡ ܒܪܹܫܵܐ ܡܲܝܬܸܐ ܗܠܵܘܗܝ ܕܐܲܝܢܵܐ ܕܠܵܐ ܡܩܵܘܸܐ
ܒܡܸܕܸܡ ܕܲܦܩܝܼܕܼ: ܐܸܠܵܐ ܗܵܕܹܣ ܒܡܸܕܸܡ ܕܲܡܥܲܠܲܝ ܡ̣ܢ ܟܝܵܢܹܗ.
ܐܸܠܵܐ ܐܵܦܸܢ ܡܚܵܘܸ̇ܐ ܡܥܲܠܝܘܼܬܼܵܐ ܕܲܟܼܝܵܬܹܗ: ܠܵܐ ܬܸܬܼܩܲܒܲܠ ܚܲܕܼܬܼܘܼܬܼܵܐ
ܕܟܼܵܪܘܿܙܘܼܿܬܹܗ.
ܗ. ܢܸܛܸܪ ܗܵܟܹܝܠ ܕܠܵܐ ܕܲܡܟܼܘܼܬܼܵܐ: ܡܸܕܸܡ ܕܩܲܒܸܿܠܢܲܢ.
ܘܒܲܤܝܼܡܘܼܬܼܵܐ ܕܗܲܝܡܵܢܘܼܬܲܢ ܟܠ ܫܵܥ: ܥܲܝܢܵܠ ܕܢܵܦܫܲܢ ܬܦܲܬܲܚ.
pb. 601
ܡܵܢܵܐ ܕܹܝܢ ܩܲܒܸܿܠܢܲܢ ܡ̣ܢ ܟܬܼܵܒܹ̈ܐ: ܐܸܠܵܐ ܐܸܢ ܗܵܕܹܐ ܕܐܲܠܵܗܵܐ ܒܡܸܠܬܹܗ
ܒܪܵܐ ܥܵܠܡܵܐ. ܘܲܒܼܪܝܼܬܼܵܐ ܕܠܵܐ ܐܝܼܬܹܝܗ̇ ܗ̄ܘ̣ܵܬܼ: ܐܲܝܬܝܼ ܠܲܗܘܵܝܵܐ.
ܘܲܒܼܡܵܢܘܿܤܵܐ ܕܲܟܼܝܵܢܵܐ: ܝܲܩܹܪܹܗ ܠܒܲܪܢܵܫܵܐ. ܘܝܲܗ̣̄ܒܼ ܦܘܼܪܩܵܢܵܐ
ܠܚܹܐܪܘܼܬܼܵܐ: ܘܚܵܘܝܼ ܠܵܗ̇ ܥܘܼܕܼܪܵܢܵܗ̇: ܕܲܒܼܓܲܒܼܝܘܼܬܼܵܐ ܕܛܵܒܼܬܼܵܐ:
ܬܸܥܪܘܿܩ ܡ̣ܢ ܒܝܼܫܬܼܵܐ. ܘܡܸܨܟܲܠܝܵܢܘܼܬܹܗ ܕܒܲܪܢܵܫܵܐ ܒܨܒܼܝܵܢܹܗ
ܕܲܠܘܵܬܼ ܒܝܼܫܬܼܵܐ: ܐܲܦܸܩܬܹܗ ܠܠܵܐ ܡܸܬܿܛܦܝܼܤܵܢܵܐ ܡ̣ܢ ܦܲܪܕܲܝܤܵܐ.
ܘܬܼܘܼܒܼ ܒܝܲܕܼ ܐܲܒܼܵܗ̈ܬܼܵܐ ܘܪܹ̈ܫܲܝ ܐܲܒܼܵܗ̈ܬܼܵܐ: ܘܲܒܼܝܲܕܼ ܢܵܡܘܿܤܵܐ ܘܕܲܝܵܢܹ̈ܐ
ܘܲܢܒܼܝܹ̈ܐ: ܪܕܼܵܝܗܝ ܥܵܒܼ̇ܘܿܕܼܵܐ ܠܲܟܼܝܵܢܲܢ ܕܢܲܪܚܸܩ ܡ̣ܢ ܚܛܝܼܬܼܵܐ: ܘܢܹܐܨܲܦ
ܕܢܸܤܥܘܿܪ ܛܲܒܼ̈ܬܼܵܐ. ܠܚܲܪܬܼܵܐ ܕܹܝܢ ܟܲܕܼ ܐܲܡܠܟܲܬ̤ ܥܠܲܝܢ ܒܨܸܒܼܝܵܢܲܢ:
ܘܒܼܝܼܫܵܐ ܬܒܲܥܬܼܵܐ ܢܵܤܹ̇ܒܼ ܗ̄ܘ̣ܵܐ ܒܐܲܒܼܕܵܢܵܐ ܕܟܼܠܹܗ ܟܝܵܢܲܢ. ܡܸܛܠ ܕܐܵܦ
ܢܵܡܘܿܤܵܐ ܕܲܟܼܝܵܢܵܐ ܐܸܬܼܚܲܒܲܠ ܗ̄ܘ̣ܵܐ: ܘܢܵܡܘܿܤܵܐ ܟܬܼܝܼܒܼܵܐ ܐܸܬܿܬܿܫܝܼܛ
ܗ̄ܘ̣ܵܐ. ܘܲܢܒܼܝܼ̈ܐ ܐܲܝܟܼ ܒܢܲܝ̈ܢܵܫܵܐ ܐܲܥܗܸܕܼܘ ܥܲܠ ܤܘܼܥܪܵܢܵܐ: ܐܸܠܵܐ
ܠܵܐ ܕܲܠܝܘܼܗ̇ ܠܐ̄ܢܵܫܘܼܬܼܵܐ ܡ̣ܢ ܥܘܼܡܩܵܐ ܕܒܼܝܼ̈ܫܵܬܼܵܐ. ܗ̤ܘ ܐܲܠܵܗܵܐ
ܡܸܠܬܼܵܐ ܗܵܘ̇ ܕܐܝܼܬܼܵܘܗܝ ܕܠܵܐ ܫܘܼܪܵܝܵܐ ܘܠܵܐ ܡܸܬܿܕܲܪܟܵܢܵܐ ܘܠܵܐ
ܡܸܬܼܚܲܙܝܵܢܵܐ: ܘܚܲܝܠܬܼܵܢܵܐ ܒܟܼܠ ܐܲܠܵܗܵܐ ܡܸܠܬܼܵܐ ܐܸܬܼ݂ܵܐ ܘܐܸܬܼܓܲܫܲܡ. ܡܨܐ
ܗ̄ܘ̣ܵܐ ܓܹܝܪ ܕܢܸܗܘܸܐ ܡܸܕܸܡ ܕܨܵܒܹ̇ܐ: ܢܤܲܒܼ ܕܹܝܢ ܕܡܘܼܬܼܵܐ ܕܥܲܒܼܕܵܐ:
ܘܲܗܘ̤ܵܐ ܦܲܓܼܪܵܐ: ܘܐܸܬܼܝܼܠܸܕܼ ܡ̣ܢ ܒܬܼܘܼܠܬܼܵܐ. ܘܲܒܼܟܼܠ ܕܘܼܟܼ ܨܒܼܵܐ
ܕܲܢܚܵܘܸܐ: ܕܒܲܫܪܵܪܵܐ ܗܘ̤ܵܐ ܒܲܪܢܵܫܵܐ. ܐܵܠܨܵܐܝܼܬܼ ܓܹܝܪ ܢܲܩܝܼܦܝܼܢ ܠܲܟܼܝܵܢܵܐ:
ܫܘܼܪܵܝܵܐ: ܘܐܸܤܟܹܿܡܹ̈ܐ: ܘܚܲܫܹ̈ܐ. ܠܵܐ ܓܹܝܪ ܐܸܡ݂ܲܪ ܐܹܘܲܢܲܓܲܠܸܤܛܵܐ ܕܥܲܠ̣
ܒܒܲܪ ܐ̄ܢܵܫܵܐ ܓܡܝܼܪܵܐ: ܐܸܠܵܐ ܕܵܗܘ̤ܵܐ ܦܲܓܼܪܵܐ. ܥܲܠ ܫܘܼܪܵܝܹܗ ܓܹܝܪ
ܕܲܟܼܝܵܢܵܐ ܐܸܡ݂ܲܪ: ܘܲܠܪܹܫܝܼܬܼܵܐ ܕܲܒܼܛܝܼܢܘܼܬܼܵܐ ܪܗܸܛ̣. ܐܲܛܼܙܢܵܐ ܓܹܝܪ ܕܒܲܪ
pb. 602
ܐ̄ܢܵܫܵܐ ܕܡܸܬܼܝܼܠܸܕܼ ܟܝܵܢܵܐܝܼܬܼ: ܠܵܘ ܟܲܕܼ ܡܫܲܠܡܵܢ ܒܲܓܼܡܝܼܪܘܼܬܼܵܐ
ܕܤܵܥܘܿܪܘܼܬܼܵܐ ܒܲܪ ܫܵܥܬܹܗ ܢܵܦܹ̇ܩ: ܐܸܠܵܐ ܗ̤ܘ ܙܲܪܥܵܐ ܕܲܟܼܝܵܢܵܐ ܩܲܕܼܡܵܝܑܬܼ
ܗܵܘܹ̇ܐ ܦܲܓܼܪܵܐ: ܘܡ̣ܢ ܒܵܬܲܪܟܸܢ ܒܩܲܠܝܼܠ ܩܲܠܝܼܠ: ܠܢܘܼܓܼܪܵܐ ܢܵܤܹ̇ܒܼ
ܚܲܝܠܵܐ ܕܚܲܫܹ̈ܐ ܘܲܕܼܟܼܠܵܗ̇ ܤܵܥܘܿܪܘܼܬܼܵܐ. ܗܵܟܲܢܵܐ ܡܸܠܬܼܵܐ ܐܲܠܵܗܵܐ ܠܘܵܬܹܗ
ܕܫܘܼܪܵܝܵܐ ܘܥܸܩܵܪܵܐ ܕܲܒܼܛܝܼܢܘܼܬܼܵܐ ܕܲܒܼܢܲܝ̈ ܐ̄ܢܵܫܵܐ ܪܗܸܛ̣: ܘܲܗܘ̤ܵܐ
ܩܲܕܼܡܵܝܑܬܼ ܦܲܓܼܪܵܐ: ܟܲܕܼ ܠܵܐ ܐܸܫܬܲܚܠܲܦ ܠܦܲܓܼܪܵܐ: ܚܵܣ! ܐܸܢ ܓܹܝܪ
ܐܲܠܵܗܘܼܬܼܵܐ ܠܥܸܠ ܡ̣ܢ ܡܸܫܬܲܚܠܵܦܢܘܼܬܼܵܐ ܗ̣̄ܝ: ܡܸܛܠ ܕܡܸܫܬܲܚܠܵܦܢܘܼܬܼܵܐ
ܚܲܫܵܐ ܐܝܼܬܹܝܗ̇ ܕܲܟܼܝܵܢܵܐ ܥܵܒܼܘܿܪܵܐ: ܠܵܐ ܡܸܫܬܲܚܠܦܵܢܘܼܬܼܵܐ ܕܹܝܢ ܕܲܩܢܘܿܡܹܗ
ܗܵܝ̇ ܒܲܠܚܘܼܕܼ: ܕܗ̤ܘ ܕܐܝܼܬܼܵܘܗܝ ܐܲܝܟܼ ܕܐܝܼܬܼܵܘܗܝ.
ܘ. ܡܸܬܼܚܲܫܚܝܼܢܲܢ ܗܵܟܹܝܠ ܒܬܲܪ̈ܬܲܝܗܹܝܢ ܠܢܵܬܼ̈ ܩܵܠܹ̈ܐ ܕܲܟܼܒܹ̈ܐ:
ܘܐܵܡ̇ܪܝܼܢ ܚ̄ܢܲܢ: ܕܲܗܘ̤ܵܐ ܦܲܓܼܪܵܐ: ܘܕܲܢܤܲܒܼ ܕܡܘܼܬܼܵܐ ܕܥܲܒܼܕܵܐ.
ܘܬܲܪ̈ܬܲܝܗܹܝܢ: ܐܸܢ ܫܲܦܝܼܪ ܢܸܤܬܲܟܲܠ: ܥܸܠܬܼܵܐ ܕܚܲܝܲܝ̈ܢ ܐܝܼܬܲܝܗܹܝܢ.
ܒܗܵܝ̇ ܓܹܝܪ ܕܲܗܘ̤ܵܐ ܦܲܓܼܪܵܐ: ܠܵܐ ܡܦܲܪܫܘܼܬܼܵܐ ܕܲܚܕܼܵܝܘܼܬܼܵܐ ܓܡܝܼܪܬܵܐ
ܐܹܘܲܢܛܲܠܸܤܛܵܐ ܚܵܘܝܼ ܠܲܢ. ܐܲܟܼܙܢܵܐ ܓܹܝܪ ܕܲܚܕܼܵܝܘܼܬܼܵܐ ܠܵܐ ܡܸܢܼܦܲܤܩܵܐ
ܠܲܬܼܪܹܝܢ: ܘܐܸܢ ܕܹܝܢ ܬܸܬܼܦܪܸܫ: ܠܵܐ ܡܸܟܹܝܠ ܐܝܼܬܹܝܗ̇ ܚܕܼܵܝܘܼܬܼܵܐ:
ܐܸܠܵܐ ܬܪܲܝܵܢܘܼܬܼܵܐ. ܗܵܟܲܢܵܐ ܗܵܘ̇ ܚܲܕܼ ܒܲܚܕܼܵܝܘܼܬܼܵܐ ܓܡܝܼܪܬܵܐ: ܠܵܐ
ܡܸܬܼܦܤܸܩ ܠܲܬܼܪܹܝܢ. ܗܵܝ̇ ܕܹܝܢ ܕܲܢܤܲܒܼ ܩܵܥ̇ܝܵܬ: ܥܲܠ ܠܵܐ ܫܘܼܚܠܵܦܵܐ
ܪܲܟܼܝܵܬܹܗ. ܡܸܛܠ ܓܹܝܪ ܕܟܼܠ ܡܸܕܸܡ ܕܲܗܘ̤ܵܐ ܟܲܕܼ ܠܵܐ ܐܝܼܬܼܵܘܗܝ
ܐܸܬܼ݂ܵܐ ܠܲܗܘܵܝܵܐ: ܐܲܝܟܼ ܫܡܲܝܵܐ ܕܟܲܕܼ ܠܵܐ ܠܘܼܩܕܲܡ ܐܝܼܬܲܝܗܘܿܢ ܗ̄ܘ̣ܵܘ.
ܐܵܘ ܐܲܝܟܼ ܡܸܕܸܡ ܕܐܝܼܬܼܵܘܗܝ ܗ̄ܘ̣ܵܐ ܘܐܸܬܼ݂ܵܐ ܠܫܘܼܚܠܵܦܵܐ: ܐܲܝܟܼ ܡܲܝ̈ܵܐ
ܕܓܼܝܼܚܘܿܢ ܕܐܸܫܬܲܚܠܲܦܘ ܗ̄ܘ̣ܵܘ ܠܲܕܼܡܵܐ. ܬܲܪ̈ܬܲܝܗܹܝܢ ܕܹܝܢ ܠܘܵܬܼ
ܗܵܘ̇ ܟܝܵܢܵܐ ܕܐܲܠܵܗܘܼܬܼܵܐ ܠܵܐ ܠܵܚ̈ܡܵܢ: ܠܵܐ ܓܹܝܪ ܟܲܕܼ ܠܵܐ ܐܝܼܬܼܵܘܗܝ
pb. 603
ܐܸܫܬܲܚܠܲܦ ܗܵܘ̇ ܠܵܐ ܡܸܫܬܲܚܠܦܵܢܵܐ ܐܲܠܵܗܵܐ ܡܸܛܬܼܵܐ. ܡܸܛܠ ܗܵܢܵܐ:
ܒܬܲܪ̈ܬܲܝܗܹܝܢ: ܠܵܐ ܡܸܫܬܲܚܠܦܵܢܘܼܬܼܵܐ ܕܐܲܠܵܗܘܼܬܼܵܐ: ܘܠܵܐ ܡܦܲܪܫܘܼܬܼܵܐ
ܕܐ̄ܪܵܙܵܐ: ܟܲܕܼ ܡܚܵܘܸ̇ܐ ܟܬܼܵܒܼܵܐ ܩܲܕܝܼܫܵܐ ܗܵܝ̇ ܕܗܘ̤ܵܐ ܐܸܡ݂ܲܪ: ܘܗܵܝ̇
ܕܲܢܤܲܒܼ ܐܲܟܼܪܸܙ. ܕܲܒܼܗܵܝ̇ ܩܲܕܼܡܵܝܬܼܵܐ ܕܲܗܘ̤ܵܐ: ܚܕܼܵܝܘܼܬܼܵܐ ܒܦܲܪܨܘܿܦܵܐ
ܢܩܝܼܡ. ܘܲܒܼܗܵܝ̇ ܕܬܲܪܬܹܝܢ: ܥܲܠ ܠܵܐ ܡܸܫܬܚܠܦܵܢܘܼܬܼܵܐ ܕܲܟܼܝܵܢܹܗ
ܢܲܟܼܪܸܙ.
ܙ. ܗܘ̤ܵܐ ܗܵܟܹܝܠ ܐܠܵܗܵܐ ܡܸܠܬܼܵܐ ܒܲܪܢܵܫܵܐ ܓܡܝܼܪܵܐ: ܟܲܕܼ ܠܵܐ
ܐܲܙܥܪܹܗ ܠܗܵܘ̇ ܟܝܵܢܵܐ ܠܵܐ ܡܸܫܬܲܚܠܦܵܢܵܐ ܒܬܸܕܼܡܘܼܪܬܵܐ ܕܲܤܥܲܪ:
ܕܠܵܐ ܡܬܼܘܿܡ ܤܸܠܩܲܬ̤ ܥܲܠ ܠܸܒܵܐ. ܐܸܠܵܐ ܗܵܠܹܝܢ ܒܗܲܝܡܵܢܘܼܬܼܵܐ
ܝܑܼܠܸܦܢܲܢ: ܘܠܵܐ ܗ̄ܘ̣ܵܐ ܒܲܒܼܨܵܬܼܵܐ ܐܲܕܼܪܸܟܼܢܲܢ. ܘܟܲܕܼ ܗܘ̤ܵܐ ܒܪ ܐ̄ܢܵܫܵܐ:
ܐܲܚܝܼ ܒܦܲܓܼܪܵܐ ܕܲܢܤܲܒܼ ܠܟܼܠܹܗ ܓܸܢܤܵܐ ܕܐ̄ܢܵܫܵܐ. ܘܲܦܪܲܥ̣ ܚܵܘܒܿܬܼܵܐ
ܕܲܚܛܝܼܬܼܵܐ: ܒܗܵܝ̇ ܕܡܝܼܬܼ ܚܠܵܦ ܟܠܢܵܫ ܐܲܝܟܼ ܒܲܪܢܵܫܵܐ. ܒܲܛܸܠ̣ ܕܹܝܢ
ܠܗܵܘ̇ ܕܐܲܚܝܼܕܼ ܫܘܼܠܛܵܢܵܐ ܕܡܵܘܬܵܐ ܕܐܝܼܬܼܵܘܗܝ ܤܵܛܵܢܵܐ: ܐܲܝܟܼ ܐܲܠܵܗܵܐ
ܤܵܢܐܹܗ ܕܒܼܝܼܫܵܐ. ܡܸܬܼܡܲܨܝܵܢܘܼܬܹܗ ܕܹܝܢ ܕܢܵܡܘܿܤܵܐ ܚ̣ܵܘܝܼ: ܒܗܵܝ̇
ܕܡܲܠܝܼ ܟܠܵܗ̇ ܟܹܐܢܘܼܬܼܵܐ: ܘܠܲܟܼܝܵܢܲܢ ܫܘܼܦܹܗ ܩܲܕܼܡܵܝܵܐ ܝܲܗ̣̄ܒܼ.
ܘܲܒܼܗܵܝ̇ ܕܲܗܘ̤ܵܐ ܒܲܪܢܵܫܵܐ: ܝܲܩܪܹܗ ܠܲܟܼܝܵܢܵܐ ܕܡ̣ܢ ܐܲܪܥܵܐ ܕܗ̤ܘܝܘܼ
ܓܵܒܼ̇ܘܿܠܹܗ. ܚܲܕܼ ܗܵܟܹܝܠ ܐܝܼܬܼܵܘܗܝ ܒܪܵܐ. ܠܲܬܼܠܝܼܬܼܵܝܘܼܬܼܵܐ ܓܹܝܪ ܕܒܲܚܕܼܵܐ
ܐܝܼܬܼܘܼܬܼܵܐ ܤܸܓܼܕܝܼܢܲܢ: ܘܲܪܒܼܝܼܥܵܝܵܐ ܥܲܠ ܗܵܢܵܐ ܠܵܐ ܡܲܥܠܝܼܢ ܚ̄ܢܲܢ.
ܐܸܠܵܐ ܚܲܕܼ ܐܝܼܬܸܵܘܗܝ ܒܪܵܐ ܕܐܸܬܼܝܼܠܸܕܼ ܡ̣ܢ ܐܲܒܼܘܼܗܝ ܕܠܵܐ ܫܘܼܪܵܝܵܐ:
ܕܒܼܐܝܼܕܹܗ ܡܗܲܝܡܢܝܼܢ ܚ̄ܢܲܢ ܕܲܗܘ̤ܵܘ ܥܵܠܡܹ̈ܐ. ܗܵܘ̇ ܕܐܝܼܬܼܵܘܗܝ ܤܵܘܟܿܬܼܵܐ
ܡ̣ܢ ܗܵܘ̇ ܥܸܩܵܪܵܐ: ܗܵܘ̇ ܕܲܕܼܠܵܐ ܪܸܕܼܝܵܐ ܨܡܲܚ̣ ܡ̣ܢ ܐܲܒܼܘܼܗܝ: ܗܵܘ̇
ܡܸܠܬܼܵܐ ܕܲܕܼܠܵܐ ܢܵܦܹ̇ܩ ܘܦܵܐܹ̇ܫ ܒܐܲܒܼܵܐ. ܕܐܵܦܸܢ ܓܹܝܪ ܒܐܲܪܥܵܐ ܐܸܬܼܚܙܝܼ:
pb. 604
ܐܸܠܵܐ ܡ̣ܢ ܗܵܘ̇ ܕܝܲܠܕܹܗ ܠܵܐ ܫܲܢܝܼ. ܨܒܼܵܐ ܗܵܟܹܝܠ ܗܵܢܵܐ ܕܢܲܚܹܝܘܗܝ
ܠܗܵܘ̇ ܕܲܓܼܒܲܠ̣: ܘܲܥ̣ܡܲܪ ܒܡܲܪܒܿܥܵܐ ܕܐܝܼܬܼܵܘܗܝ ܬܲܪܥܵܐ ܕܟܼܠܹܗ
ܟܝܵܢܵܐ ܕܓܼܵܘܵܐ ܘܐܲܚܝܹܗ. ܘܲܒܼܥܘܼܡܪܹܗ: ܒܲܪܟܹܗ ܠܡܲܪܒܿܥܵܐ. ܘܲܒܼܡܲܦܩܹܗ:
ܚܲܬܿܡܹܗ. ܘܲܒܝܲܠܕܗ ܕܲܠܒܲܪ ܡ̣ܢ ܟܝܵܢܵܐ: ܚ̣ܵܘܝܼ ܢܲܦܫܹܗ ܕܐܸܬܼܓܲܫܲܡ
ܠܥܸܠ ܡ̣ܢ ܡܸܠܬܼܵܐ.
ܚ. ܠܵܘ ܗܵܟܹܝܠ ܐ̄ܚܪܹܝܢ ܗ̄ܘ̣ ܡܫܝܼܚܵܐ: ܘܐ̄ܚܪܹܝܢ ܡܸܠܬܼܵܐ
ܐܲܠܵܗܵܐ: ܚܵܣ! ܗܵܘ̇ ܓܹܝܪ ܟܝܵܢܵܐ ܐܲܠܵܗܵܝܵܐ: ܬܪܹܝܢ ܒܢܝܼ̈ܢ ܠܵܐ ܝܵܕܲܥ̇.
ܝܑܼܚܝܼܕܼܵܝܵܐ ܗܵܟܹܝܠ ܐܸܬܼܝܼܠܸܕܼ ܡ̣ܢ ܚܲܕܼ. ܐܲܝܟܵܐ ܓܹܝܪ ܕܠܲܝܬܿ ܙܘܼܘܵܓܼܵܐ
ܕܡܵܘ̈ܠܕܼܵܢܹܐ: ܬܲܡܵܢ ܠܵܐ ܡܸܫܬܲܟܼܚܵܐ ܬܪ̈ܲܝܵܢܘܼܬܼܵܐ ܕܝܼܠܝܼ̈ܕܹܐ. ܒܲܫܡܹܗ
ܠܲܡ ܕܝܼܫܘܿܥ ܡܫܝܼܚܵܐ ܟܠ ܒܪܘܿܟܼ ܬܸܟܿܘܿܦ: ܕܒܲܫܡܲܝܵܐ ܘܒܲܐܪܥܵܐ
ܘܕܲܠܬܲܚܬܿ ܡ̣ܢ ܐܲܪܥܵܐ. ܐܸܢ ܕܹܝܢ ܐ̄ܚܪܹܢܵܐ ܗ̄ܘ̣ ܡܫܝܼܚܵܐ: ܘܠܵܘ
ܗ̤ܘܝܘܼ ܐܲܠܵܗܵܐ ܡܸܠܬܼܵܐ: ܐܵܐܲܢܩܹܐ: ܕܒܲܪܢܵܫܵܐ ܗ̄ܘ̣ ܫܚܝܼܡܵܐ ܡܫܝܼܚܵܐ:
ܐܵܦܸܢ ܢܸܗܘܸܐ ܕܢܵܘܤܵܐ ܗ̄ܘ̣ ܕܐܲܠܵܗܵܐ: ܐܝܟܼ ܡܸܠܬܼܗܘܿܢ ܕܫܵܢܲܝ̈ܵܐ.
ܐܸܢ ܕܹܝܢ ܒܲܪܢܵܫܵܐ ܗ̄ܘ̣ ܫܚܝܼܡܵܐ ܡܫܝܼܚܵܐ: ܐܲܝܟܲܢܵܐ ܗܵܘ̇ ܟܝܵܢܵܐ ܡܥܲܠܝܵܐ
ܕܲܫܡܲܝܵܢܹ̈ܐ: ܟܦ̇ܝܼܢ ܒܘܼܪܟܵܐ ܘܤܵܓܼ̇ܕܝܼܢ ܠܲܫܡܹܗ ܕܗܵܘ̇ ܕܲܙܥܘܿܪ؟ ܐܵܘ
ܐܲܝܟܲܢܵܐ ܢܩܲܒܸܠ ܒܢܵܬܼ̈ ܩܵܠܹ̈ܐ ܕܲܢܒܼ̈ܝܹܐ ܕܩܵܥ̈ܝܵܢ: ܕܐܲܠܵܗܲܢ ܒܐܲܪܥܵܐ
ܐܸܬܼܚܙܝܼ: ܘܥܲܡ ܒܢܲܝ̈ܢܵܫܵܐ ܐܸܬܼܗܲܦܲܟܼ؟ ܥܲܠ ܓܸܠܝܵܢܹܗ ܓܹܝܪ
ܕܲܒܼܦܲܓܼܪܵܐ ܐܸܡ݂ܲܪ: ܗܵܝ̇ ܕܐܸܬܼܚܙܝܼ. ܘܗܵܝ̇ ܕܐܸܬܼܗܲܦܲܟܼ: ܥܲܠ
ܡܸܬܼܗܲܦܟܼܵܢܘܼܬܹܗ ܕܥܲܡ ܒܢܲܝ̈ ܐ̄ܢܵܫܵܐ ܒܲܐ̄ܚܪ̈ܵܝܲܬܼ ܥܵܠܡܹ̈ܐ ܐܵܘܕܲܥ̣.
ܕܒܼܵܗ̇ ܒܗܵܕܹܐ ܗܵܘ̇ ܕܥܸܠܵܝ ܒܪܲܒܿܘܼܬܹܗ: ܚܝܠܵܬܼܵܢܘܼܬܹܗ ܒܟܼܠ ܚ̣ܵܘܝܼ.
pb. 605
ܕܐܲܝܟܼ ܐܲܚܝܼܕܼ ܟܠ ܗܵܘ̇ ܡܸܕܸܡ ܕܐܝܼܬܼܵܘܗܝ: ܩܵܘ̣ܝܼ ܡܸܛܠܵܬܹܗ.
ܘܡܸܛܠ ܕܲܨܒܼܵܐ: ܗܘ̤ܵܐ ܡܸܛܠܵܬܲܢ.
ܛ. ܐܸܢ ܐܹܝܢ ܥܸܠܲܬܼ ܟܸܫܠܵܐ ܠܐ̄ܢܵܫ̈ܝܼܢ ܗܵܘܹ̇ܝܢ ܥܲܙܪܘܼܪܹ̈ܐ ܘܡܲܓܿܤܵܐ
ܕܒܼܐܘܿܪܝܵܐ: ܘܟܲܦܢܵܐ ܕܲܗܘ̤ܵܐ ܒܲܙܒܲܢ: ܘܟܼܠܗܹܝܢ ܐܲܝܠܹܝܢ ܕܲܓܼܕܲܫ ܠܗܵܘ̇
ܕܒܲܫܪܵܪܵܐ ܗܘ̤ܵܐ ܒܲܪܢܵܫܵܐ: ܢܸܗܘܘܿܢ ܝܵܕܼܥ̇ܝܼܢ: ܕܟܲܕܼ ܡܸܬܼܦܲܠܓܼܝܼܢ ܥܲܠ
ܚܲܫܹ̈ܐ: ܟܵܦ̇ܪܝܼܢ ܒܲܟܼܝܵܢܵܐ. ܡܵܐ ܕܹܝܢ ܕܟܼܦܲܪܘ ܒܲܟܼܝܵܢܵܐ: ܠܵܐ ܡܗܲܝܡܢܝܼܢ
ܒܲܡܕܒܿܪܵܢܘܼܬܼܵܐ. ܡܵܐ ܕܹܝܢ ܕܠܵܐ ܗܲܝܡܸܢܘ ܒܲܡܕܲܒܿܪܵܢܘܼܬܼܵܐ: ܚܤܲܪܘ
ܚܲܝܲܝ̈ܗܘܿܢ. ܐܸܢ ܓܹܝܪ ܗܵܐ ܡ̣ܢ ܬܲܪ̈ܡܝܵܬܹܗ ܕܥܵܠܡܵܐ ܐܸܬܼܝܼܠܸܕܼ:
ܒܲܪܢܵܫܵܐ ܕܲܪܕܼܵܐ ܐܲܝܟܼ ܗܵܕܹܐ ܐܘܼܪܚܵܐ ܕܝܼܠܝܼܕܼܘܼܬܼܵܐ: ܢܚܵܘܘܿܢ ܠܲܢ
ܗܵܢ̇ܘܿܢ ܚܸܪ̈ܚܹܐ: ܘܟܸܢ ܡܸܬܼܓܿܠܸܐ ܒܸܕܼܝܵܐ ܕܠܙܝܼܙܘܼܬܼܗܘܿܢ. ܐܸܢ ܕܹܝܢ
ܗܵܕܲܐ ܗ̣̄ܝ ܪܹܫܝܼܬܼܵܐ ܕܲܟܼܝܵܢܵܐ ܕܓܼܵܘܵܐ: ܘܐܲܠܵܗܵܐ ܡܸܠܬܼܵܐ ܒܲܫܪܵܪܵܐ ܗܘ̤ܵܐ
ܒܲܪܢܵܫܵܐ: ܐܲܝܟܲܢܐ ܟܲܕܼ ܡܵܘܕܹܝܢ ܥܲܡܲܢ ܒܲܟܼܝܵܢܵܐ ܟܵܦ̇ܪܝܼܢ ܒܚܲܫܹ̈ܐ؟ ܚܕܼܵܐ
ܡ̣ܢ ܬܲܪܬܹܝܢ ܗܵܟܹܝܠ ܢܸܓܼܒܿܘܼܢ ܠܗܘܿܢ: ܐܵܘ ܟܲܕܼ ܒܵܗ̇ܬܿܝܼܢ ܒܚܲܫܹ̈ܐ:
ܢܸܟܼܦܪܘܼܢ ܒܲܟܼܝܵܢܵܐ ܕܥܲܡ ܡܵܐܢܝܼ ܢܸܫܬܼܿܬܿܩܘܼܢ: ܘܥܲܡ ܪ̈ܲܫܝܼܥܹܐ
ܢܸܬܼܚܲܫܒܿܘܼܢ. ܐܵܘ ܐܸܢ ܡܩܲܒܿܠܝܼܢ ܝܘܼܬܼܪܵܢܵܐ ܕܡ̣ܢ ܦܲܓܼܪܵܢܘܼܬܼܵܐ: ܠܵܐ
ܢܸܒܼܗܬܼܘܼܢ ܒܚܲܫܹ̈ܐ ܕܲܓܼܕܲܫ̣ܘ ܠܲܟܼܝܵܢܵܐ. ܬܵܗܲܗ ܐ̄ܢܵܐ ܕܹܝܢ ܒܲܥܘܼܝܼܪܘܼܬܼ
ܠܸܒܿܗܘܿܢ ܕܗܵܢܘܿܢ ܕܚܲܕܼܬܼܵܐܝܼܬܼ ܕܪܲܫܘ ܐܘܼܪܚܵܐ ܕܛܵܥܝܘܼܬܼܵܐ. ܐܸܢܵܐ
ܓܹܝܪ ܟܲܕܼ ܚܕܼ ܒܪܵܐ ܝܵܕܲܥ̇ ܐ̄ܢܵܐ: ܘܙܵܕܼܩܵܐܝܼܬܼ ܝܸܠܦܹ̇ܬܼ: ܘܲܒܼܚܲܕܼ
ܩܢܘܿܡܵܠ ܡܵܘܕܸܐ ܐ̄ܢܵܐ: ܕܐܲܠܵܗܵܐ ܡܸܠܬܼܵܐ ܕܠܒܸܫ̣ ܦܲܓܼܪܵܐ. ܟܲܕܼ ܕܹܝܢ
ܐܝܼܬܼܵܘܗܝ ܚܕܼ ܗܵܘ̇ ܕܲܤܒܲܠ̣ ܚܲܫܹ̈ܐ ܘܲܥܒܲܕܼܸ ܬܸܕܼܡܪ̈ܵܬܼܵܐ: ܡܸܛܠ ܡܵܢܵܐ
ܫܵܬܼܩ̇ܝܼܢ ܡ̣ܢ ܐܲܠܵܗܵܝ̈ܬܼܵܐ: ܘܥܲܠ ܡܚܝܼ̈ܠܵܬܼܵܐ ܫܵܓܼܫ̇ܝܼܢ؟ ܕܲܢܚܵܘܸܐ ܓܹܝܪ
ܕܐܝܼܬܼܵܘܗܝ ܐܲܠܵܗܵܐ ܘܗ̤ܘܝܘܼ ܡܸܠܬܼܵܐ: ܩܵܘ̣ܝܼ ܒܗܵܘ̇ ܡܸܕܸܡ ܕܐܝܼܬܼܵܘܗܝ
pb. 606
ܘܲܗܘ̤ܵܐ ܦܲܓܼܪܵܐ ܘܝܲܠܘܼܕܼܵܐ ܘܒܲܪܢܵܫܵܐ ܕܠܵܐ ܫܘܼܚܠܵܦܵܐ: ܟܲܕܼ ܒܲܚܕܼܵܐ
ܡܸܢܗܹܝܢ ܠܵܐ ܨܲܥܲܪ ܠܐ̄ܪܵܙܢ. ܘܗ̤ܘ ܟܲܕܼ ܗ̤ܘ ܥܒܲܕܼ ܬܸܕܼܡܪ̈ܵܬܼܵܐ
ܘܚܲܫ̣. ܕܲܒܼܝܲܕܼ ܐܵܬܼ̈ܘܵܬܼܵܐ: ܕܩܵܘܼܝܼ ܐܲܝܟܼ ܕܐܝܼܬܼܵܘܗܝ: ܐܲܝܟܼ ܕܒܼܦܸܠܵܐ̈̄ܬܼܵܐ
ܚ̣ܵܘܝܼ. ܘܲܒܚܲܕܼ ܚܲܫܹ̈ܐ: ܕܲܗܘ̤ܵܐ ܗܵܘ̇ ܡܸܕܸܡ ܕܲܓܼܒܲܠ̣ ܢܸܬܼܗܲܡܲܢ. ܚܲܕܼ
ܗܵܟܹܝܠ: ܘܗ̤ܘ ܟܲܕܼ ܗ̤ܘ ܕܐܝܼܬܼܵܘܗܝ ܡ̣ܢ ܥܵܠܲܢ: ܗ̤ܘ ܐܸܬܼܓܲܫܲܡ
ܒܚܲܪܬܼܵܐ ܕܥܵܠܡܹ̈ܐ. ܘܡܵܘܕܝܼܢܲܢ ܕܗ̤ܝܘܼ ܒܪܵܐ: ܘܡܸܕܸܡ ܙܐܦܵܐ ܥܲܠ
ܟܝܵܢܵܐ ܕܐܲܗܘܼܬܼܵܐ ܠܵܐ ܡܲܥܠܝܼܢ ܚ̄ܢܲܢ: ܠܲܝܬܿ ܓܹܝܪ ܡܸܕܸܡ ܝܲܬܿܝܼܪܵܐ
ܒܗܵܘ̇ ܟܘܿܪܤܝܵܐ ܕܐܝܼܬܼܘܼܬܼܵܐ.
ܝ. ܐܸܠܵܐ ܟܒܲܪ ܗܵܕܹܐ ܒܲܫܓܼܝܼܫܘܼܬܼܗܘܿܢ ܡܪܝܼܒܼܝܼܢ ܥܠܲܝܢ: ܒܲܪ
ܚܵܫ̇ܠܝܼܢ ܚܘܼ̈ܫܵܒܹܐ ܕܲܡܚܝܼܠܝܼܬ ܡ̣ܢ ܓܵܘܵܓܲܝ. ܕܐܸܢ ܠܲܡ ܬܠܝܼܬܼܵܝܘܼܬܼܵܐ
ܚܕܼܵܐ ܗ̣̄ܝ ܐܝܼܬܼܘܼܬܼܵܐ: ܡܵܕܹܝܢ ܬܠܝܼܬܼܵܝܘܼܬܼܵܐ ܕܠܵܐ ܚܲܫܵܐ ܐܝܼܬܹܝܗ̇.
ܘܡܸܠܬܼܵܐ ܐܲܠܵܗܵܐ: ܒܲܬܼܠܝܼܬܼܵܝܘܼܬܼܵܐ ܡܸܬܼܡܢܸܐ. ܘܡܵܕܹܝܢ ܐܵܦ ܗ̤ܘ
ܡܸܠܬܼܵܐ: ܕܠܵܐ ܚܲܫܵܐ ܗ̄ܘ̣. ܘܐܸܢ ܕܹܝܢ ܐܲܠܵܗܵܐ ܕܠܵܐ ܚܲܫܵܐ ܐܝܼܬܼܵܘܗܝ:
ܡܸܫܬܿܟܲܚ ܗܵܘ̇ ܕܐܸܨܛܠܸܒܼ ܕܲܐ̄ܚܪܹܢܵܐ ܗ̄ܘ̣. ܘܠܵܘ ܗ̤ܘܝܘܼ ܐܲܠܵܗܵܐ
ܡܸܠܬܼܵܐ: ܗܵܘ̇ ܕܐܝܼܬܼܵܘܗܝ ܠܵܐ ܚܵܫܘܿܫܵܐ ܫܲܪܝܼܪܵܐܝܼܬܼ. ܢܵܘܠܵܐ ܕܲܓܼܘܵܠܲܝ
ܙܵܩ̇ܪܝܼܢ: ܗܵܢ̇ܘܿܢ ܕܗܵܟܲܢܵܐ ܐܵܡ̇ܪܝܼܢ. ܘܥܲܠ ܡܲܝ̈ܵܐ ܟܬܼ̇ܒܿܝܼܢ: ܗܵܢ̇ܘܿܢ
ܕܗܵܠܹܝܢ ܬܲܚܘ̈ܝܵܬܼܵܐ ܚܲܕܼ̈ܬܼܵܬܼܵܐ ܡܸܬܼܚܫܒܼܝܼܢ. ܘܟܲܕܼ ܐܵܡ̇ܪܝܼܢ ܕܚܲܟܿܝܼܡܝܼܢ
ܐܸܢܘܿܢ: ܫܛ̣ܵܘ ܠܗܘܿܢ: ܘܐܸܬܼܚܲܫܲܡܟܼ ܠܸܒܿܗܘܿܢ ܕܠܵܐ ܡܸܤܬܲܟܲܠ. ܥܲܝܢܵܐ
ܓܹܝܪ ܕܓܼܵܗ̇ܪܵܐ ܒܙܲܠܝܼ̈ܩܹܐ ܕܫܸܡܫܵܐ: ܫܲܦܝܵܐܝܼܬܼ ܠܵܐ ܡܲܨܝܵܐ ܕܲܬܼܚܘܿܪ.
ܘܪܸܥܝܵܢܵܐ ܟܪܝܼܗܵܐ: ܠܵܐ ܡܩܲܒܸܿܠ ܪܵܘܡܵܗ̇ ܕܗܲܝܡܵܢܘܼܬܼܵܐ. ܡܵܢܵܐ ܗܵܟܹܝܠ
ܐܵܡ̇ܪܝܼܢ ܚ̄ܢܲܢ: ܕܐܲܝܟܼ ܡܸܠܬܼܵܐ ܕܐܲܠܵܗܘܼܬܼܵܐ ܕܗܲܝܡܵܢܘܼܬܼܵܐ. ܬܠܝܼܬܼܵܝܘܼܬܼܵܐ
ܡ̇ܢ ܚܕܼܵܐ ܗ̣̄ܝ ܐܝܼܬܼܘܼܬܼܵܐ: ܘܥܸܠܵܝܵܐ ܗ̣̄ܝ ܡ̣ܢ ܚܲܫܹ̈ܐ. ܘܟܲܕܼ ܐܵܡ̇ܪܝܼܢܲܢ
pb. 607
ܕܲܒܼܪܵܐ ܚܲܫ̣: ܠܵܘ ܥܲܪܛܸܠܵܐܝܼܬܼ ܐܵܡ̇ܪܝܼܢܲܢ: ܕܐܲܠܵܗܵܐ ܡܸܠܬܼܵܐ ܚܲܫ̣.
ܥܸܠܵܝ ܗ̄ܘ̣ ܓܹܝܪ ܟܝܵܢܵܐ ܕܐܠܵܗܘܼܬܼܵܐ ܡ̣ܢ ܟܠ ܚܲܫ̈ܝܼܢ. ܐܸܠܵܐ ܟܲܕܼ
ܡܵܘܕܝܼܢܲܢ: ܕܐܲܠܵܗܵܐ ܡܸܠܬܼܵܐ ܚܲܕܼ ܡ̣ܢ ܬܠܝܼܬܼܵܝܘܼܬܼܵܐ ܐܸܬܼܓܲܫܲܡ: ܝܵܗ̇ܒܿܝܼܢ
ܚ̄ܢܲܢ ܥܸܠܬܼܵܐ ܠܤܘܼܠܟܵܠܵܐ: ܠܐܲܝܠܹܝܢ ܕܲܒܼܗܲܝܡܵܢܘܼܬܼܵܐ ܡܫܲܐܠܝܼܢ: ܕܥܠ
ܡܵܢܵܐ ܐܸܬܼܓܲܫܲܡ. ܘܡܸܛܠ ܓܹܝܪ ܕܨܵܒܹ̇ܐ ܗ̄ܘ̣ܵܐ ܗ̤ܘ ܐܲܠܵܗܵܐ ܡܸܠܬܼܵܐ
ܕܲܢܒܲܛܸܠ ܚܲܫܹ̈ܐ ܗܵܢ̇ܘܿܢ ܕܚܲܪܬܼܗܘܿܢ ܡܵܘܬܵܐ ܗ̄ܘ̣: ܕܲܢܩܲܒܸܠ ܕܹܝܢ
ܚܲܫܹ̈ܐ ܗܵܘ̇ ܟܝܵܢܵܐ ܠܵܐ ܡܸܬܼܚܲܒܿܠܵܢܵܐ ܠܵܐ ܡܨܐ ܗ̄ܘ̣ܵܐ. ܟܠ ܚܲܫܝܼ̈ܢ
ܓܹܝܪ: ܬܲܟܼܬܿܘܼ̈ܫܹܐ ܐܸܢܘܿܢ ܓܕܲܘܼܒܼܠܵܐ ܕܟܼܠܗܘܿܢ ܡܪ̈ܲܟܿܒܹܿܐ. ܠܘܵܬܼ
ܓܹܝܪ ܗܵܘ̇ ܕܥܸܠܵܝ ܒܲܠܚܘܹܿܕܼܵܘܗܝ ܡ̣ܢ ܟܠ ܠܲܝܬܿ ܡܪܲܟܿܒܼܘܼܬܼܵܐ. ܠܵܐ
ܗܵܟܹܝܠ ܡܸܫܟܲܚ ܗ̄ܘ̣ܵܐ ܚܲܫܵܐ ܕܢܸܬܼܡܲܛܸܐ ܠܐܲܝܟܵܐ ܕܐܵܦܵܐ ܡܪܲܟܿܒܼܘܼܬܼܵܐ
ܫܟܼܝܼܚܵܐ: ܨܒܼܵܐ ܗܵܟܹܝܠ ܕܲܢܒܲܛܸܠ ܚܲܫܹ̈ܐ ܕܡܲܡܠܟܼܝܼܢ ܥܲܠ ܟܝܵܢܵܐ
ܚܵܫܘܿܫܵܐ: ܐܲܝܟܼ ܕܡ̣ܢ ܩܕܝܼܡ ܐܸܡܲܪܢܲܢ: ܗܵܢ̇ܘܿܢ ܕܒܹܝܬܼ ܡܸܪܕܗܘܿܢ
ܐܝܼܬܼܵܘܗܝ ܗ̄ܘ̣ܵܐ ܡܵܘܬܵܐ: ܘܲܢܤܲܒܼ ܦܲܓܼܪܵܐ ܡ̣ܢ ܡܲܪܝܲܡ ܒܬܼܘܼܠܬܼܵܐ:
ܐܲܝܟܼ ܕܝܼܕܲܥ̣ ܗ̤ܘ ܐܠܵܗܵܐ ܡܸܠܬܼܵܐ: ܘܲܗܘ̤ܵܐ ܒܲܪܢܵܫܵܐ. ܗܵܟܲܢܵܐ ܓܹܝܪ
ܐܸܨܛܒܼܝܼ: ܘܤܲܪܸܵܩ̣ ܢܲܦܫܹܗ ܒܲܕܼܡܘܼܬܼܵܐ ܕܥܲܒܼܕܵܐ: ܟܲܕܼ ܒܡܸܕܸܡ ܠܵܐ
ܐܸܬܼܚܲܒܼܫܲܬ̤ ܐܲܠܵܗܘܼܬܹܗ: ܘܗܵܟܲܢܵܐ ܡܲܚܸܐ ܠܹܗ ܓܸܢܤܵܐ ܕܒܼܢܲܝ̈ܢܵܫܵܐ.
ܒܦܲܓܼܪܹܗ ܓܹܝܪ ܒܲܛܸܠ̣ ܚܲܫܹ̈ܐ: ܢ̣ܛܲܪ ܕܹܝܢ ܐܲܠܗܘܼܬܹܗ ܕܠܵܐ ܚܲܫܵܐ.
ܝܐ. ܡܸܛܠܗܵܢܵܐ ܐܵܦ ܓܲܒܼܪܝܼܠ: ܟܲܕܼ ܡܤܲܒܲܪ ܚܲܝܠܹܗ ܘܫܘܼܠܛܵܢܹܗ
ܕܗܵܘ̇ ܕܐܸܬܼܝܼܠܸܕܼ: ܩܵܥܹ̇ܐ ܗ̄ܘ̣ܵܐ ܠܘܵܬܼ ܛܘܼܒܼܵܢܝܼܬܼܵܐ ܡܲܪܝܲܡ: ܕܗ̤ܘ
ܠܲܡ ܢܲܚܹܝܘܗܝ ܠܥܲܡܹܗ ܡ̣ܢ ܚܛܵܗܲܝ̈ܗܘܿܢ. ܥܲܡܵܐ ܕܹܝܢ ܠܵܐ
pb. 608
ܗ̄ܘ̣ܵܐ ܕܒܲܪܢܵܫܵܐ: ܐܸܠܵܐ ܕܐܲܠܵܗܵܐ. ܘܠܵܐ ܡܸܫܟܲܚ ܕܲܢܦܲܨܝܘܗܝ ܠܥܵܠܡܵܐ
ܡ̣ܢ ܚܵܛܗܹ̈ܐ: ܗܵܘ̇ ܕܒܲܚܒܼܵܠܵܐ ܥܲܠ ܠܹܗ ܠܥܵܠܡܵܐ. ܘܫܘܼܪܵܝܹܗ
ܕܡܵܘܠܵܕܹܗ ܐܝܼܬܼܵܘܗܝ ܡܸܬܼܩܲܛܪܓܼܵܢܵܐ: ܐܸܠܵܐ ܐܵܠܨܵܐܝܼܬܼ ܗ̤ܘ ܟܲܕܼ
ܗ̤ܘ ܐܝܼܬܼܵܘܗܝ ܐܲܠܵܗܵܐ ܘܒܲܪܢܵܫܵܐ: ܟܲܕܼ ܠܵܐ ܡܸܬܼܦܲܠܲܓܼ ܠܲܬܼܪܹܝܢ:
ܐܸܵܠܵܐ ܟܲܕܼ ܡܩܵܘܸ̇ܐ ܚܲܕܸ. ܕܲܒܼܗܵܝ̇ ܕܐܸܬܼܝܼܠܸܕܼ ܡ̣ܢ ܐܲܢ̄ܬܿܬܼܵܐ: ܡܚܵܘܸ̇ܐ
ܕܒܲܪ ܐ̄ܢܵܫܵܐ ܗ̄ܘ̣. ܘܲܒܼܗܵܝ̇ ܕܹܝܢ ܕܲܕܼܠܵܐ ܙܘܼܘܵܓܼܵܐ: ܢܛܲܪ ܘܚ̣ܵܘܝܼ
ܒܬܼܘܼܠܘܼܬܼܵܐ ܠܝܵܠܹܕܬܹܗ: ܐܵܘܕܲܥ̣ ܕܐܲܠܵܗܵܐ ܗ̄ܘ̣. ܐܲܚܝܼ ܠܥܵܠܡܵܐ
ܝܼܫܘܿܥ ܡܫܝܼܚܵܐ: ܗܵܘ̇ ܕܐܸܬܼ݂ܵܐ ܠܥܵܠܡܵܐ: ܘܥܲܡ ܒܢܲܝ̈ ܐ̄ܢܵܫܵܐ
ܐܸܬܼܗܦܲܟܼ. ܐܸܢ ܕܹܝܢ ܡܸܫܝܼܚܵܐ ܒܲܪܢܵܫܵܐ ܗ̄ܘ̣ ܫܚܝܼܡܵܐ: ܘܠܵܘ ܗ̤ܘܝܘܼ
ܐܲܠܵܗܵܐ ܡܸܠܬܼܵܐ. ܐܲܝܟܲܢܵܐ ܒܪ̣ܵܐ ܟܠ ܡܸܕܸܡ ܡ̣ܢ ܒܪܵܫܝܼܬܼ: ܟܲܕܼ ܠܵܐ
ܐܝܼܬܼܵܘܗܝ ܗ̄ܘ̣ܵܐ؟ ܐܸܢ ܓܹܝܪ ܛܠܸܐ ܗ̄ܘ̣ ܡ̣ܢ ܒܸܪ̈ܝܵܬܼܵܐ ܒܲܪܢܵܫܵܐ: ܝܑܼܕܼܝܼܥܵܐ
ܕܲܠܗܵܢ̇ܘܿܢ ܕܲܩܕܼܵܡܵܘܗܝ ܠܵܐ ܐܲܝܬܿܝܼ ܠܲܗܘܵܝܵܐ ܗ̤ܘ ܡܫܝܼܚܵܐ. ܡܸܛܠ
ܕܡ̣ܢ ܒܵܬܲܪܗܹܝܢ ܐܸܬܼܒܿܪܝܼ: ܐܲܝܟܼ ܒܲܪ ܐ̄ܢܵܫܵܐ ܫܚܝܼܡܵܐ. ܘܐܲܝܟܲܢܵܐ ܗܵܟܹܝܠ
ܦܵܠܘܠܘܿܣ ܩܵܥܹ̇ܐ: ܕܚܲܕܼ ܗ̄ܘ̣ ܡܵܪܝܵܐ ܝܼܫܘܿܥ ܡܫܝܼܚܵܐ ܕܒܹܗ ܗܘ̤ܵܐ
ܟܠ. ܐܸܢ ܓܹܝܪ ܒܝܲܕܼ ܡܫܝܼܚܵܐ ܗܘ̤ܵܐ ܟܠ: ܝܑܼܕܼܝܼܥܵܐ ܕܲܡܫܝܼܚܵܐ:
ܗ̤ܘܝܘܼ ܐܲܠܵܗܵܐ ܡܸܠܬܼܵܐ. ܘܤܵܗܹ̇ܕܼ ܐܹܘܢܛܲܠܸܤܛܵܐ ܟܲܕܼ ܩܵܥܹ̇ܐ:
ܕܲܒܼܪܵܫܝܼܬܼ ܐܝܼܬܼܵܘܗܝ ܗ̄ܘ̣ܵܐ ܡܸܠܬܼܵܐ: ܘܗ̤ܘ ܡܸܠܬܼܵܐ ܐܝܼܬܼܵܘܗܝ ܗ̄ܘ̣ܵܐ
ܠܘܵܬܼ ܐܠܵܗܵܐ: ܘܐܲܠܵܗܵܐ ܐܝܼܬܼܵܘܗܝ ܗ̄ܘ̣ܵܐ ܗ̤ܘ ܡܸܠܬܼܵܐ. ܗܵܢܵܐ
ܐܝܼܬܼܵܘܗܝ ܗ̄ܘ̣ܵܐ ܪܵܫܝܼܬܼ ܠܘܵܬܼ ܐܲܠܵܗܵܐ: ܘܟܼܠ ܡܸܕܸܡ ܒܹܗ
ܗܘ̤ܵܐ. ܐܸܢ ܗ̤ܘ ܗܵܟܹܝܠ ܕܐܹܘܲܢܛܲܠܸܤܛܵܐ ܩܵܥܹ̇ܐ: ܕܲܒܼܡܸܠܬܼܵܐ
pb. 609
ܗܘ̤ܵܐ ܟܠ ܡܵܕܸܡ: ܘܦܵܘܠܘܿܣ ܡܦܲܫܸܩ ܠܵܗ̇ ܠܗܵܕܹܐ ܘܐܵܡܲ݁ܪ:
ܕܚܲܕܼ ܗ̄ܘ̣ ܡܵܪܝܵܐ ܝܼܫܘܿܥ ܡܫܝܼܚܵܐ: ܕܒܹܗ ܗܘ̤ܵܐ ܟܠ ܡܸܕܸܡ:
ܝܑܼܕܼܝܼܥܵܐ ܕܲܡܫܝܼܚܵܐ: ܗ̤ܘܝܘܼ ܐܲܠܵܗܵܐ ܡܸܠܬܼܵܐ.
ܝܒ. ܐܸܢ ܕܹܝܢ ܢܹܐܡܪܘܼܢ ܠܲܢ ܒܢܵܬܼ̈ ܩܵܠܹ̈ܐ ܕܲܟܼܬܼܵܒܹ̈ܐ: ܕܲܒܼܗܹܝܢ
ܐܸܬܼܩܪܝܼ ܒܲܪܢܵܫܵܐ: ܗܵܝ̇ ܕܦܲܛܘܿܪܣ ܐܸܡ݂ܲܪ: ܕܝܼܫܘܿܥ ܕܡ̣ܢ ܢܵܨܪܲܬܼ
ܓܲܒܼܪܵܐ. ܘܲܕܼܦܵܘܠܘܿܣ ܕܩܥ̣ܵܐ: ܕܒܼܓܲܒܼܪܵܐ ܕܒܹܗ ܦܪܲܫ̣ ܐܲܠܵܗܵܐ
ܕܲܢܗܲܝܡܸܢ. ܘܕܝܼܠܹܗ ܕܡܵܪܲܢ ܕܐܸܡ݂ܲܪ ܥܲܠ ܢܲܦܫܹܗ: ܕܡܵܢܵܐ ܒܵܥܹ̇ܝܢ
ܐܢ̄ܬܿܘܿܢ ܕܬܸܩܛܠܘܼܢܵܢܝ ܠܓܲܒܼܪܵܐ. ܢܸܗܘܘܿܢ ܝܵܕܼܥ̇ܝܼܢ: ܕܐܵܘ ܡܸܛܠ
ܡܲܬܿܝܼܢܘܼܬܼܘܿܢ ܦܵܫ̣ܘ ܡ̣ܢ ܤܘܼܟܵܠܹܗ ܕܲܟܼܬܼܵܒܼܵܐ: ܐܵܘ ܡܸܛܠ
ܒܝܼܫܘܼܬܼܗܘܿܢ ܡܲܗܦܟܼܝܼܢ ܡܸܕܸܡ ܕܫܲܦܝܼܪ ܐܸܬܼܟܿܬܸܒܼ: ܐܲܝܟܼ
ܡܥܲܩܡܘܼܬܼܗܘܿܢ. ܐܵܦ ܒܲܪ ܐ̄ܢܵܫܵܐ ܓܹܝܪ ܫܲܪܝܼܪܵܐܝܼܬܼ ܗܘ̤ܵܐ ܡܫܝܼܚܵܐ.܆
ܐܸܠܵܐ ܗܘ̤ܵܐ: ܟܲܕܼ ܠܵܐ ܐܝܼܬܼܵܘܗܝ ܗ̄ܘ̣ܵܐ ܡ̣ܢ ܠܘܼܩܕܲܡ: ܐܸܠܵܐ ܐܸܢ
ܒܲܠܚܘܿܕܼ ܐܲܠܵܗܵܐ. ܐܲܟܼܙܢܵܐ ܗܵܟܹܝܠ ܕܐܠܵܗܵܐ ܐܝܼܬܼܵܘܗܝ ܠܵܐ ܒܲܪܝܵܐ:
ܗܵܟܲܢܸܐܬ ܗ̤ܘ ܟܲܕܼ ܗ̤ܘ ܒܲܪܢܵܫܵܐ ܐܝܼܬܼܵܘܗܝ ܒܲܫܪܵܪܵܐ. ܘܐܲܝܟܲܢܵܐ ܕܒܲܪ
ܟܝܵܢܹܗ ܗ̄ܘ̣ ܕܐܲܒܼܘܼܗܝ ܒܐܠܵܘܼܬܹܗ: ܗܵܟܲܢܵܐ ܐܝܼܬܼܵܘܗܝ ܒܲܪ ܟܝܵܢܵܗ̇
ܕܲܒܼܬܼܘܼܠܬܼܵܐ ܒܦܲܓܼܪܵܢܘܼܬܹܗ. ܕܲܒܼܟܼܠ ܕܘܿܟܿ ܫܪܵܪܹܗ ܕܐ̄ܪܵܙܲܢ ܡܲܨܡܲܚ:
ܕܪܲܚܝܼܩ ܡ̣ܢ ܟܠܵܗ̇ ܛܘܼܥܝܲܝ. ܐܸܢ ܕܹܝܢ ܠܵܐ ܝܸܠܕܲܬ̤ ܒܬܼܘܼܠܬܼܵܐ
ܐܠܵܗܵܐ: ܐܵܦ ܠܵܐ ܠܕܘܼܡܵܪܵܐ ܫܵܘܝܵܐ: ܗܵܝ̇ ܕܩܵܘܝܲܬ̤ ܕܠܵܐ ܚܒܼܵܠܵܐ.
ܤܵܓܝܼ̈ܐܵܬܼܵܐ ܓܹܝܪ ܐܵܦ ܢܸܫܹ̈ܐ ܐ̄ܚܪ̈ܵܢܝܵܬܼܵܐ ܐܵܘܠܸܕܼ: ܘܝܲܗ̣̄ܒܼ ܠܥܵܠܡܵܐ
ܙܲܕܝܼ̈ܩܹܐ. ܐܸܢ ܕܹܝܢ ܠܸܫܢܹ̈ܐ ܕܲܢܒܼܝܹ̈ܐ: ܟܲܕܼ ܩܲܕܼܡ̣ܘ ܐܵܘܕܲܥ̣ܘ ܠܵܐ
ܡܸܬܿܕܲܪܟܵܢܘܼܬܼܗ ܓܐ̄ܪܵܙܲܢ: ܩܵܥܹ̇ܝܢ ܗ̄ܘ̣ܵܘ: ܕܗܵܐ ܒܬܼܘܼܠܬܼܵܐ ܒܵܛܵܢܵܐ
pb. 610
ܘܝܵܠܕܵܐ ܒܪܵܐ: ܘܢܸܩܪܘܿܢ ܫܡܹܗ ܥܲܡܲܢܘܼܐܹܝܠ: ܕܗ̤ܝ ܗܵܕܹܐ ܡܦܲܫܸܩ
ܓܵܒܼܪܝܹܠ ܘܐܵܡܲ݁ܪ: ܕܐܵܠܵܗܲܢ ܥܲܡܢ: ܡܸܛܠ ܡܢܵܐ ܬܸܫܠܿܘܿܚܬܵܗ̇
ܕܵܠܹܕܬܵܐ ܦܵܤ̇ܩܝܼܢ ܡܸܛܠ ܡܸܬܼܢܲܚܬܼܵܢܘܼܬܹܗ ܕܗܵܘ̇ ܕܐܸܬܼܝܼܠܸܕܼ؟
ܐܸܠܵܐ ܟܒܲܪ ܐܵܡ̇ܪܝܼܢ ܠܩܘܼܒܼܠܲܢ ܗܵܕܹܐ: ܕܟܼܠ ܠܲܡ ܕܡܸܬܼܝܼܠܸܕܼ:
ܒܲܪ ܟܝܵܢܵܗ̇ ܗ̄ܘ̣ ܕܗܵܝ̇ ܕܝܼܠܸܕܬܹܗ. ܐܸܢ ܗܵܟܹܝܠ ܒܲܪܬܼ ܐ̄ܢܵܫܵܐ ܗ̣̄ܝ
ܗܵܝ̇ ܕܝܸܠܕܲܬ̤: ܐܵܠܨܵܐܝܼܬܼ ܐܵܦ ܒܲܪܢܵܫܵܐ ܗ̄ܘ̣ ܗܵܘ̇ ܕܐܸܬܼܝܼܠܸܕܼ. ܫܲܦܝܼܪ
ܐܵܡ̇ܪܝܼܢ ܐܢ̄ܬܿܘܿܢ: ܐܘܿ ܦܲܛܥܹ̈ܐ. ܐܸܠܵܐ ܗܵܝܕܹܝܢ ܗ̄ܘ̣ ܝܲܠܕܵܐ ܒܲܪ ܟܝܵܢܵܗ̇:
ܗܵܝ̇ ܕܡܵܚܹ̇ܝܢ ܠܵܗ̇ ܚܸܒܼܠܹ̈ܐ: ܐܸܡܲܬܼܝ ܕܐܲܝܟܼ ܟܝܵܢܵܐ ܪܵܕܹܐ ܗܵܘ̇ ܕܡܸܬܼܝܼܠܸܕܼ.
ܝܲܠܕܵܐ ܕܹܝܢ ܕܲܟܼܝܵܢܵܐ ܚܸܒܼܠܹ̈ܐ ܗ̄ܘ̣ ܡ̣ܢ ܫܘܼܪܵܝܹܗ: ܡܸܛܠ ܕܐܵܦ ܙܘܼܘܵܓܼܵܐ
ܐܵܬܹ̇ܐ ܩܕܼܵܡ ܚܸܒܼܠܹ̈ܐ. ܐܲܝܟܵܐ ܕܹܝܢ ܕܗܵܢܵܐ ܨܲܥܪܵܐ: ܐܵܦܠܵܐ ܥܠ
ܒܵܠܵܐ ܤܵܠܹ̇ܩ. ܐܸܠܵܐ ܗܘ̤ܵܐ ܬܸܕܼܡܘܼܪܬܵܐ ܕܥܵܒܼܪܵܐ ܠܡܸܠܬܼܵܐ. ܐܲܝܟܵܐ
ܕܲܠܒܲܪ ܡ̣ܢ ܟܝܵܢܵܐ ܗ̄ܘ̣ ܝܲܠܕܵܐ: ܬܲܡܵܢ ܗܵܘ̇ ܕܐܸܬܼܝܼܠܸܕܼ ܐܠܵܗܵܐ ܗ̄ܘ̣.
ܡܵܘܕܹܝܢ ܚ̄ܢܲܢ ܗܵܟܹܝܠ: ܕܗ̤ܘܝܘܼ ܗܵܘ̇ ܕܒܼܪܵܐ ܥܵܠܡ̈ܐ: ܘܝܲܗ̣̄ܒܼ
ܢܵܡܘܿܤܵܐ: ܘܲܗ̣̄ܒܼ ܐܵܦ ܪܘܼܚܵܐ ܠܢܼܝܹ̈ܐ: ܘܒܲܐ̄ܚܪܵܝ݂ܹܐ ܙܒܼ̈ܢܹܐ ܐܸܬܼܫܓܫܲܡ:
ܘܫܲܕܲܪ ܫܠܝܼܚܹ̈ܐ: ܫܠܝܼܚܹ̈ܐ ܕܥܲܡܡܹ̈ܐ ܘܐܸܡ̈ܘܸܬܼܵܐ.
ܝܓ. ܢܸܥܪܘܹܩ ܗܵܟܹܝܠ ܡ̣ܢ ܪ̈ܲܨܝܼܢܹܐ ܕܠܝܼܚܹ̈ܐ ܘܲܬܿܛܼܪܹ̈ܐ ܕܛܵܥܝܘܼܬܼܵܐ:
ܐܸܡܲ݁ܪ ܐ̄ܢܵܐ ܕܹܝܢ ܥܲܠ ܝܘܼܠܦܵܢܹ̈ܐ ܡܸܬܼܟܲܐܼܫܲܝ̈ ܥܲܡ ܐܲܠܵܗܵܐ: ܡ̣ܢ
ܫܵܢܘܼܬܹܗ ܕܐܵܪܝܼܘܿܣ ܕܲܡܦܲܠܓܼܵܐ ܬܠܝܼܬܼܵܝܘܼܬܼܵܐ ܕܠܵܐ ܡܸܬܼܦܲܠܓܼܵܐ.
ܘܡ̣ܢ ܡܲܪܵܚܘܼܬܹܗ ܕܐܘܼܢܵܡܝܼܣ: ܗܵܐ ܕܚܒܲܫ̣ ܬܚܹܝܬܼ ܝܑܼܕܲܥܬܹܗ:
ܠܗܵܘ̇ ܟܝܵܢܵܐ ܕܠܵܐ ܡܸܬܿܕܪܸܟܼ. ܘܡ̣ܢ ܦܲܩܪܘܼܬܹܗ ܕܡܵܩܸܕܘܿܢܝܼܣ:
pb. 611
ܕܡܲܪܚܸܩ ܡ̣ܢ ܐܲܠܵܗܘܼܬܼܵܐ ܠܪܘܼܚܵܐ. ܕܡܲܪܚܸܩ ܟܲܕܼ ܠܵܐ ܡܫܲܢܸܐ
ܘܡ̣ܢ ܗܵܢܵܐ ܝܘܼܠܦܵܢܵܐ ܚܲܕܼܬܼܵܐ ܘܓܼܘܼܕܵܦܵܐ ܡܬܲܩܢܵܐ: ܕܤܲܓܿܝܼ ܥܵܒܲ݁ܪ
ܠܲܝܗܘܼܕܵܝܘܼܬܼܵܐ ܒܓܼܘܼܕܵܦܵܐ. ܗܵܢ̇ܘܿܢ ܓܹܝܪ ܛܵܠܡ̇ܝܼܢ ܠܲܒܼܪܵܐ ܗܵܘ̇
ܕܐܝܼܬܼܵܘܗܝ: ܘܓܼܵܠܙ̇ܝܼܢ ܠܥܸܩܵܪܵܐ ܡ̣ܢ ܦܹܐܪܹܗ. ܗܵܠܹܝܢ ܕܹܝܢ ܥܲܠ
ܗܵܘ̇ ܕܐܝܼܬܼܵܘܗܝ ܚܸܛܹ̈ܐ: ܙܝܼ̈ܙܵܢܹܐ ܡܲܥܠܝܼܢ. ܕܲܠܗܵܘ̇ ܟܝܵܢܵܐ ܠܵܐ ܡܸܬܼܚܲܒܿܠܵܢܵܐ:
ܤܲܓܿܝܼ ܒܢܲܝ̈ܐ ܢܩܝܼܡܘܼܢ. ܢܹܐܡܲܪ ܗܵܟܹܝܠ ܚܢܲܢ ܥܲܡ ܦܵܘܠܘܿܣ:
ܕܡܫܝܼܚܵܐ ܐܝܼܬܼܵܘܗܝ ܫܲܝܢܲܢ: ܗܵܘ̇ ܕܲܥܒܲܕܼܸ ܬܲܪ̈ܬܲܝܗܹܝܢ ܚܕܼܵܐ.
ܠܲܝܗܘܼ̈ܕܵܝܹܐ ܓܹܝܪ ܘܲܠܚܲܢ̈ܦܹܐ: ܒܝܲܕܼ ܡܲܥܡܘܿܕܼܝܼܬܼܵܐ ܒܪ̣ܵܐ ܠܚܲܕܼ ܒܲܪ
ܐ̄ܢܵܫܵܐ ܚܲܕܼܬܼܵܐ. ܘܲܒܼܚܠܬܼܵܢܘܼܬܹܗ ܥ̣ܒܲܕܼ ܚܲܕܼ: ܠܗܵܘ̇ ܡܸܕܸܡ
ܕܲܒܼܚܹܐ ܪܘܼܬܹܗ ܡܦܲܠܲܓܼ ܗ̄ܘ̣ܵܐ. ܢܸܕܼܚܠܘܼܢ ܗܵܟܹܝܠ ܡ̣ܢ ܓܙܵܪ ܕܝܼܢܵܐ:
ܗܵܢܘܿܢ ܗܲܪܵܕܹ̈ܐ ܕܪܘܼܫܥܵܐ. ܕܐܸܢ ܡܸܕܸܡ ܕܲܡܦܲܠܲܓܼ ܗ̄ܘ̣ܵܐ: ܒܐܵܘܝܘܼܬܼܵܐ
ܗܘ̤ܵܐ ܚܲܕܼ. ܗܵܘ̇ ܕܹܝܢ ܕܲܥܒܲܕܼ ܐܸܢܘܿܢ ܚܲܕܼ: ܠܲܬܼܪܹܝܢ ܐܲܝܟܼ ܕܡ̣ܢ
ܠܘܵܬܼܘܿܢ ܐܸܬܼܦܲܠܲܓܼ.
ܝܕ. ܐܸܠܵܐ ܡܸܟܹܝܠ ܢܸܫܒܿܘܿܩ ܠܤܘܿܓܼܵܐܐ ܕܡܸܠ̈ܝܼܢ: ܘܢܹܐܬܸܐ
ܠܘܵܬܼ ܦܵܤܝܼ̈ܩܵܬܼܵܐ ܕܝܼܠܦܵܢܵܐ ܫܲܪܝܼܪܵܐ. ܡ̇ܢ ܕܨܵܒܹ̇ܐ ܕܢܸܕܲܥ ܕܒܲܫܪܵܪܵܐ
ܗ̤ܘܝܘܼ ܟܲܕܼ ܗ̤ܘ ܒܲܠܚܘܿܕܼܵܘܗܝ ܒܪܵܐ: ܗܵܘ̇ ܕܐܝܼܬܼܵܘܗܝ ܗ̄ܘ̣ܵܐ
ܡ̣ܢ ܩܕܼܵܡ ܕܢܸܗܘܸܐ ܐܲܒܼܪܵܗܵܡ: ܘܲܒܼܚܲܪܬܼܵܐ ܪܵܒܹ̇ܐ ܗ̄ܘ̣ܵܐ ܒܩܵܘܡܬܹܗ
ܘܒܼܚܸܟܼܡܬܼܵܐ ܒܲܦܓܪ. ܐܝܼܬܼ ܗ̄ܘ̣ ܓܹܝܪ ܠܐܲܠܵܗܘܼܬܹܗ ܓܡܝܼܪܘܼܬܼܵܐ:
ܒܟܼܠ ܙܒܲܢ ܢܫܲܐܸܠ ܠܦܵܘܠܘܿܣ: ܘܗ̤ܘ ܢܸܪܥܲܡ ܟܲܕܼ ܡܚܵܘܸ̇ܐ
ܙܵܕܼܩܵܐܝܼܬܼ: ܕܗܵܘ̇ ܡ̇ܢ ܕܡ̣ܢ ܝܗ̄ܘܼ̈ܕܼܵܝܹܐ ܐܸܬܼܝܼܠܸܕܼ ܒܲܦܓܲܪ: ܗ̤ܘ
ܐܝܼܬܼܵܘܗܝ ܐܠܵܗܵܐ ܕܡ̣ܢ ܥܵܠܲܡ. ܟܲܕܼ ܓܹܝܪ ܐܵܡܲ݁ܪ ܘܲܡܚܵܘܸ̇ܐ
pb. 612
ܛܵܠܘܿܡܘܼܬܼܗܘܿܢ ܕܥܸܒܼܪ̈ܵܝܹܐ ܘܢܲܨܵܝܘܼܬܹܗ ܕܥܲܡܵܐ ܕܥܲܡ ܐܲܠܵܗܵܐ:
ܘܥܸܩܵܪܵܐ ܕܐܝܼܿܬܼܵܘܗܝ ܐܲܒܼܪܵܗܵܡ: ܘܙܲܪܥܵܐ ܕܐܝܼܬܼܵܘܗܝ ܡܫܝܼܚܵܐ ܡܵܪ̈ܲܢ:
ܗܵܟܢܵܐ ܐܸܡ݂ܲܪ: ܕܕܼܝܼܠܗܘܿܢ ܗܘ̤ܵܬܼ ܤܝܼܡܲܬܼ ܒܢܲܝ̈ܵܐ. ܩܵܥܹ̇̄ܐ
ܗ̄ܘ̣ܵܐ ܓܹܝܪ ܐܲܠܵܗܵܐ ܒܝܲܕܼ ܢܒܼܝܼܵܐ: ܕܝܼܤܪܵܝܹܠ ܒܹܪܝ ܒܘܼܟܼܪܝ:
ܘܬܸܫܒܿܘܿܚܬܿܝܼ: ܬܸܫ̈ܒܿܚܬܼܵܐ ܓܹܝܪ ܕܠܵܐ ܡܘܼܫܚܵܐ ܩܵܛ̇ܦܝܼܢ ܗ̄ܘ̣ܵܘ ܡ̣ܢ
ܬܸܕܼܡܪ̈ܵܬܼܵܐ ܤܒܼܝܼ̈ܤܵܬܼܵܐ: ܘܡ̣ܢ ܕܝܵܬܹܩܵܣ̈ ܕܲܠܘܵܬܼ ܐܲܒܼܪܵܗܵܡ: ܕܥܲܠ
ܤܲܓܿܝܼܐܘܼܬܼ ܥܲܡܵܐ ܘܥܲܠ ܒܘܼܪ̈ܟܵܬܼܵܐ ܡܵܘ̈ܕܥܵܢ ܗ̣̄ܘܲܝ̈. ܘܲܤܝܵܡ ܢܵܡܘܿܤܵܐ
ܗܵܘ̇ ܕܲܒܼܛܘܼܪ ܤܝܼܢܲܝ: ܕܲܒܼܨܒܼܥܵܐ ܕܐܲܠܵܗܵܐ ܐܸܬܼܟܬܸܒܼ. ܘܫܸܘܼܘ̈ܕܵܝܹܐ:
ܘܐܲܪܥܵܐ ܕܦܵܠܸܤܛܝܼܢܹܐ. ܘܕܼܲܙܲܪܥܹܗ ܕܐܲܒܼܪܵܗܵܡ ܢܸܬܼܒܲܪܟܼܘܼܢ ܥܲܡܡܹ̈ܐ:
ܕܡܸܢܗܘܿܢ ܐܲܒܼܵܗ̈ܬܼܵܐ: ܗܵܢ̇ܘܿܢ ܕܲܒܼܠܸܠܝܵܐ ܕܛܵܥܝܘܼܬܼܵܐ ܕܢܲܚ̣ܘ: ܐܲܝܟܼ
ܟܵܘ̈ܟܿܒܹܐ ܒܗܲܝܡܵܢܘܼܬܼܵܐ: ܘܡܸܢܗܘܿܢ ܐܸܬܼܚܙܝܼ ܡܫܝܼܚܵܐ ܒܲܒܼܤܲܪ. ܘܠܵܘ
ܗܵܕܹܐ ܒܲܠܚܘܿܕܼ ܐܸܡ݂ܲܪ ܦܵܪܘܠܘܿܣ ܘܟܲܕܼܘ: ܐܵܦܠܵܐ ܓܹܝܪ ܡ̣ܢ ܟܲܕܼ
ܐܝܼܬܼܵܘܗܝ ܝܠܕܼܵܐ ܕܡ̣ܢ ܡܲܪܝܲܡ: ܡ̣ܢ ܬܲܡܵܢ ܐܝܼܬܼܵܘܗܝ ܫܘܼܪܵܝܹܗ
ܕܡܸܠܬܼܵܐ ܐܲܠܵܗܵܐ: ܗܵܘ̇ ܕܐܝܼܬܼܵܘܗܝ ܕܠܵܐ ܫܘܼܪܵܝܵܐ. ܐܸܠܵܐ ܡܸܚܕܼܵܐ
ܐܸܡ݂ܲܪ: ܕܒܲܦܓܲܪ. ܕܥܲܡ ܓܸܠܝܵܢܹܗ ܕܒܲܦܓܲܪ ܢܵܘܕܲܥ: ܐܵܦ ܡܵܘܠܵܕܹܗ
ܕܡ̣ܢ ܐܲܠܵܗܘܼܬܼܵܐ. ܡܲܢ̣ܘܼ ܗܵܟܹܝܠ ܐܝܼܬܼܵܘܗܝ ܗܵܢܵܐ ܡܫܝܼܚܵܐ؟ ܗܵܘ̇
ܕܐܸܬܼܝܼܠܸܕܼ ܡ̇ܢ ܡ̣ܢ ܒܬܼܘܼܠܬܼܵܐ: ܗܵܘ̇ ܕܐܸܤܬܲܝܲܟܼ ܒܡܲܪܒܿܥܵܐ ܐܲܝܟܼ
ܕܗ̤ܘ ܝܵܕܲܥ̇. ܗܵܘ̇ ܕܲܪܡܸܐ ܗ̄ܘ̣ܵܐ ܒܐܘܿܪܝܵ. ܗܵܘ̇ ܕܪܵܒܹ̇ܐ ܗ̄ܘ̣ܵܐ
ܒܲܦܓܲܪ: ܗܵܘ̇ ܕܲܥܕܲܡܵܐ ܠܬܲܚ̈ܬܵܝܵܬܼܵܗ̇ ܕܐܲܪܥܵܐ ܢܚܸܬܼ. ܗܵܘ̇ ܕܤܒܲܠ̣
ܗܵܠܹܝܢ ܟܠܗܹܝܢ ܕܦܲܓܼܪܵܐ: ܕܢܸܬܼܗܝܡܲܢ ܕܒܲܫܪܵܪܵܐ ܐܝܼܬܼܵܘܗܝ ܒܲܪܢܵܫܵܐ.
ܘܠܵܘ ܟܲܕܼ ܐܝܼܬܼܵܘܗܝ ܐ̄ܚܪܹܢܵܐ ܠܒܲܪ ܡ̣ܢ ܗܵܘ̇ ܕܲܢܚܸܬܼ: ܐܸܠܵܐ ܗ̤ܘܝܘܼ
pb. 613
ܟܲܕܼ ܗ̤ܘ ܕܲܢܚܸܬܼ ܘܗܵܘ̇ ܕܲܤܠܸܩ̣. ܠܵܐ ܓܹܝܪ ܤܠܸܩ̣ ܠܘܼܩܕܼܵܡ:
ܐܸܠܵܐ ܢܚܸܬܼ. ܠܵܐ ܗܘ̤ܵܐ ܓܹܝܪ ܒܬܼܵܘܤܵܦܬܼܵܐ ܐܲܠܵܗܵܐ: ܚܵܣ! ܐܸܠܵܐ
ܒܲܡܪܲܚܡܵܢܘܿܬܼܵܐ ܗܘ̤ܵܐ ܒܲܪܢܵܫܵܐ. ܥܲܠ ܗܵܢܵܐ ܓܹܝܪ ܤܢܝܼܩܝܼܢ ܗ̣̄ܘܲܝܢ.
ܘܠܵܘ ܡܹܢܝ ܬܹܐܠܦܘܼܢ ܗܵܕܹܐ ܐܵܘ ܡ̣ܢ ܐ̄ܚܪܹܝܢ: ܐܸܠܵܐ ܡ̣ܢ ܦܵܘܠܘܿܣ:
ܗܵܘ̇ ܕܲܒܼܓܸܠܝܵܢܵܐ ܝܑܼܠܸܦ ܡ̣ܢ ܐܲܒܼܵܐ ܥܲܠ ܒܪܵܐ ܘܐܸܡ݂ܲܪ: ܕܟܲܕܼ ܨܸܒ̣ܵܐ
ܐܲܠܵܗܵܐ: ܗܵܘ̇ ܕܦܲܪܫܲܢܝ ܡ̣ܢ ܟܪܸܣ ܐܹܡܝ: ܘܲܩ̣ܪܵܢܝ ܒܛܲܝܒܿܘܼܬܹܗ
ܕܢܸܓܼܠܸܐ ܒܪܹܗ ܒܐܝܼܕܲܝ̈. ܗܵܢܵܐ ܓܹܝܪ ܢܠܦܵܟܼ ܫܲܪܝܼܪܵܐܝܼܬܼ ܡܲܢ̣ܘ
ܝܼܫܘܿܥ ܡܫܝܼܚܵܐ: ܟܲܕܼ ܩܵܥܹ̇̄ܐ: ܕܡܸܢܗܘܿܢ ܐܸܬܼܚܙܝܼ ܡܫܝܼܚܵܐ ܒܲܒܼܤܲܪ:
ܗܵܘ̇ ܕܐܝܼܬܼܵܘܗܝ ܐܲܠܵܗܵܐ ܥܲܠ ܟܠ ܡܒܲܪܟܼܵܐ ܕܲܠܥܵܠܡܝܼܢ. ܐܲܝܕܵܐ
ܡܥܲܠܝܘܼܬܼܵܐ ܕܲܥܫܘܼܩܝܵܐ ܠܵܐ ܕܵܚ̈ܩܵܢ ܡܸܠܵܘ̈ܗܝ ܕܦܵܘܠܘܿܣ: ܠܐܲܝܠܹܝܢ
ܕܪܵܚܡ̇ܝܼܢ ܥܫܘܼܩܵܝܵܐ؟ ܐܲܡܪܹܗ ܓܹܝܪ ܡܫܝܼܚܵܐ: ܕܲܢܚܵܘܸܐ ܕܫܲܪܝܼܪܵܐܝܼܬܼ
ܗܘ̤ܵܐ ܒܲܪܢܵܫܵܐܘ ܐܸܡ݂ܲܪ ܕܡ̣ܢ ܝܗ̄ܘܼ̈ܕܵܝܹܐ ܗܘ̤ܵܐ ܒܲܦܓܲܪ: ܕܲܢܚܵܘܸܐ ܕܠܵܘ
ܡ̣ܢ ܟܲܕܼ ܐܸܬܼܚܲܫܲܡ: ܡ̣ܢ ܬܲܡܵܢ ܒܲܠܚܘܿܕܼ ܐܝܼܬܼܵܘܗܝ. ܐܲܡܪܹܗ ܗܵܘ̇
ܕܐܝܼܬܼܵܘܗܝ: ܕܢܸܪܥܲܡ ܒܡܸܠܬܹܗ: ܕܲܕܼܠܵܐ ܫܘܼܪܵܝܵܐ ܐܝܼܬܼܵܘܗܝ.
ܐܲܡܪܹܗ ܗܵܘ̇ ܕܐܝܼܬܼܵܘܗܝ ܥܲܠ ܟܠ: ܕܡܵܪܵܐ ܕܲܒܼܪܝܼܬܼܵܐ ܢܲܟܼܪܙܝܼܗܝ.
ܐܲܡܪܹܗ ܕܐܝܼܬܼܵܘܗܝ ܐܲܠܵܗܵܐ: ܕܠܵܐ ܡܸܛܠ ܐܸܤܟܹܿܡܵܐ ܘܚܲܫܹ̈ܐ: ܢܸܬܼܢܛܸܕܼ
ܕܢܸܟܼܦܘܿܪ ܒܲܟܼܝܵܢܹܗ ܠܵܐ ܡܸܬܼܚܒܿܠܵܢܵܐ. ܐܲܡܪܹܗ ܡܒܲܪܟܼܵܐ: ܕܐܲܝܟܼ
ܕܲܠܚܝܼܕܵܝ ܟܠ ܢܸܤܓܿܘܿܕܼ: ܘܠܵܘ ܐܲܝܟܼ ܕܠܲܟܼܢܵܬܼܵܐ ܢܸܥܫܩܝܼܘܗܝ.
ܐܲܡܪܹܗ ܕܲܠܥܵܠܡܝܼܢ: ܕܲܢܚܵܘܸܐ ܕܗ̤ܘ ܒܡܸܠܹܗ ܥܒܲܪ ܐܸܢܘܿܢ
ܒܲܠܚܘܿܕܼܵܘܗܝ: ܘܲܒܼܗܘܿܢ ܐܲܠܵܗܘܼܬܹܗ ܡܸܫܬܲܒܿܚܵܐ.
pb. 614
ܝܗ. ܐܝܼܬܼ ܠܲܢ ܗܵܟܹܝܠ ܡܫܝܼܚܵܐ ܗܵܘ̇ ܕܐܝܼܬܼܵܘܗܝ: ܘܐܲܠܵܗܵܐ:
ܘܲܡܒܲܪܟܼܵܐ: ܠܹܗ ܢܸܤܓܿܘܿܕܼ. ܘܡܹܐܡܲܪ ܠܘܵܬܼ ܗܲܪ̈ܲܤܝܘܿܛܹܐ: ܕܡ̇ܢ
ܕܪܘܼܚܹܗ ܕܲܡܫܝܼܚܵܐ ܠܲܝܬܿ ܒܹܗ: ܗܵܢܵܐ ܠܵܐ ܗܘ̤ܵܐ ܕܝܼܠܹܗ. ܚܢܲܢ
ܓܹܝܪ ܪܸܥܝܵܢܵܐ ܕܲܡܫܝܼܚܵܐ ܐܝܼܬܼ ܠܲܢ. ܘܡܸܛܠ ܗܵܢܵܐ ܡܤܲܟܹܿܝܢܲܢ ܚ̄ܢܲܢ
ܠܓܸܠܝܵܢܵܐ ܕܬܸܫܒܿܘܿܚܬܹܗ ܕܐܲܠܵܗܵܐ ܪܲܒܵܐ: ܡܲܚܢܵܢ ܝܼܫܘܿܥ ܡܫܝܼܚܵܐ:
ܗܵܘ̇ ܕܗ̤ܘ ܢܸܦܪܘܿܥ ܠܥܵܒܼܕܝ̈ ܛܵܒܼ̈ܬܼܵܐ ܟܠܝܼܠܵܐ ܕܬܸܫܒܿܘܿܚܬܼܵܐ.
ܠܛܵܠܘܿܡܹ̈ܐ ܕܹܝܢ: ܦܘܼܪܥܵܢܵܐ ܕܡܲܪܲܚܘܼܬܼܗܘܿܢ. ܗܵܠܹܝܢ ܠܘܵܬܼ ܚܘܼܒܿܟܼܘܿܢ
ܟܬܲܒܼܢܲܢ: ܟܲܕܼ ܡ̣ܢ ܐܸܓܿܪ̈ܵܬܼܟܼܘܿܢ ܠܘܼܩܕܲܡ ܐܸܬܼܚܲܦܲܛܢܲܢ: ܕܲܒܼܗܹܝܢ
ܐܵܘܕܲܥܬܿܘܿܢ ܥܲܠ ܐ̄ܢܵܫ̈ܝܼܢ ܥܲܢܵܬܹ̈ܐ ܘܲܡܡܲܠܠܲܝ̈ ܚܲܕܼ̈ܬܼܵܬܼܵܐ: ܕܐܲܥܸܠ̣ܘ
ܢܲܦܫܗܘܿܢ ܠܐܲܪܥܟܼܘܿܢ: ܘܨܵܒܹ̇ܝܢ ܕܲܒܼܝܲܕܼ ܡܸܠܬܼܵܐ ܕܪܘܼܫܥܵܐ ܘܒܼܝܼܕܲܥܬܼܵܐ
ܒܲܛܵܠܬܼܵܐ ܢܗܲܦܟܼܘܼܢ ܦܫܝܼܛܘܼܬܼܵܐ ܘܠܵܐ ܡܨܲܒܿܬܼܘܼܬܼܵܐ ܕܫܘܼܦܪܵܐ ܫܲܦܝܵܐ
ܕܗܲܝܡܵܢܘܼܬܼܵܐ. ܐܸܠܵܐ ܬܘܼܒܼ ܡܸܠܬܼܵܐ ܬܵܢܹ̇ܐ ܐ̄ܢܵܐ ܠܘܵܬܼܟܼܘܿܢ: ܚܙܵܘ
ܠܡܵܐ ܐ̄ܢܵܫ ܢܚܲܠܸܨܟܼܘܿܢ ܒܦܝܼܠܵܤܘܿܦܘܼܬܼܵܐ ܘܲܒܼܛܵܥܝܘܼܬܼܵܐ ܡܪܝܼܩܬܼܵܐ
ܕܡܲܫܠܡܵܢܘܼܬܼܵܐ ܕܐ̄ܢܵܫܵܐ ܡܸܫܟܿܚܲܝ̈ ܒܝܼ̈ܫܬܼܵܐ: ܘܠܵܐ ܐܲܝܟܼ ܡܫܝܼܚܵܐ.
ܫܲܬܼܐܤܬܼܵܐ ܓܹܝܪ ܐ̄ܚܪܹܬܼܵܐ ܕܗܲܝܡܵܢܘܼܬܼܵܐ ܫܲܪܝܼܪܬܵܐ: ܐ̄ܢܵܫ ܠܵܐ ܡܸܫܟܲܚ
ܠܲܡܤܵܡ ܤܛܲܪ ܡ̣ܢ ܗܵܕܹܐ ܕܤܝܼܡܵܐ: ܕܐܝܼܬܼܵܘܗܝ ܝܼܫܘܿܥ
ܡܫܝܼܚܵܐ. ܩܘܼܡܘ ܗܵܟܹܝܠ ܒܲܚܕܼܵܐ ܪܘܼܚ ܘܒܲܚܕܼܵܐ ܢܦܸܫ:
ܘܐܸܬܼܟܲܬܲܫܘ ܚܠܵܦ ܗܲܝܡܵܢܘܼܬܼܵܐ ܕܐܹܘܲܢܓܲܠܝܼܘܿܢ: ܘܲܒܼܡܸܕܸܡ ܠܵܐ
ܬܸܬܼܙܝܼܥܘܼܢ ܡ̣ܢ ܗܵܢ̇ܘܿܢ ܕܐܝܼܬܲܝܗܘܿܢ ܕܲܠܩܘܼܒܼܠܵܐ. ܐܸܠܵܐ ܛܲܪܘ
ܡܲܫܠܡܵܢܘܼܬܼܵܐ ܕܩܲܒܸܿܠܬܿܘܿܢ ܡ̣ܢ ܐܲܒܼܵܗܲܝ̈ܢ ܩܲܕܝܼ̈ܫܹܐ ܘܛܘܼ̈ܒܼܵܢܹܐ: ܗܵܢܘܿܢ
ܕܲܒܼܢܝܼܩܝܼܵܐ ܡܕܝܼܢܬܼܵܐ ܫܲܪܝܼܪܬܵܐ ܐܲܟܼܪܸܙܘ. ܘܡ̣ܢ ܗܵܝ ܕܒܹܝܬܼ ܛܘܼ̈ܒܼܵܢܹܐ
pb. 615
ܘܲܩܕܼܝܼ̈ܫܹܐ ܒܵܤܹܠܝܼܣ ܘܲܓܼܪܝܼܓܘܼܪܝܼܣ ܘܫܲܪܟܵܐ ܕܲܐ̄ܚܪ̈ܵܢܹܐ ܒܢܲܝ̈ ܪܸܥܝܵܢܗܘܿܢ:
ܗܵܢܘܿܢ ܕܲܫܡܵܗܲܝ̈ܗܘܿܢ ܟܬܼܝܼܒܼܝܼܢ ܒܤܸܦ̣ܪܵܐ ܕܚܲܝܹ̈ܐ.
ܫܠܸܡ̣.
ܦܹܿܠܸܟܿܣ ܐܲܦܸܤܩܘܿܦܵܐ ܕܪܗܘܿܡ݂ܐ.
ܡܸܛܠ ܦܲܓܼܪܵܢܘܼܬܹܗ ܕܐܲܠܵܗܵܐ ܡܸܠܬܼܵܐ ܘܗܲܝܡܵܢܘܼܬܹܗ: ܡܗܲܝܡܢܝܼܢ
ܚ̄ܢܲܬ ܕܡܵܪܲܢ ܝܼܫܘܿܥ ܡܫܝܼܚܵܐ ܗܵܘ̇ ܕܡ̣ܢ ܡܲܪܝܲܡ ܒܬܼܘܼܠܬܼܵܐ ܐܸܬܼܝܼܠܸܕܼ
ܘܗ̤ܘܝܘܼ ܒܪܹܗ ܕܐܲܠܵܗܵܐ ܕܡ̣ܢ ܩܕܼܵܡ ܥܵܠܡܹ̈ܐ. ܘܠܵܘ ܒܲܪܢܵܫܵܐ ܕܡ̣ܢ
ܐܲܠܵܗܵܐ ܐܸܬܼܢܤܸܒܼ: ܐܲܝܟܼ ܕܢܸܗܘܸܐ ܐ̄ܚܪܹܝܢ ܠܒܲܪ ܡ̣ܢ ܗܵܘ̇. ܐܵܦ ܠܵܐ
ܓܹܝܪ ܒܲܪ ܐ̄ܢܵܫܵܐ ܢܤܲܒܼ ܗ̤ܘ ܒܪܵܐ ܕܐܲܠܵܗܵܐ: ܕܢܸܗܘܸܐ ܐ̄ܚܪܹܝܢ ܠܒܲܪ
ܡܸܢܹܗ: ܐܸܠܵܐ ܟܲܕܼ ܐܝܼܬܼܵܘܗܝ ܐܲܠܵܗܵܐ ܡܫܲܠܡܵܢܵܐ: ܗܘ̤ܸܵܐ ܒܲܪܢܵܫܵܐ
ܡܫܲܠܡܵܢܵܐ ܘܐܸܬܼܓܲܫܲܡ ܡ̣ܢ ܒܬܼܘܼܠܬܼܵܐ.
pb. 616
ܬܩܦܬܐ. ܒ.
ܩܵܢܘܿܢܹ̈ܐ ܕܐܸܬܿܬܿܤܝܼܡܘ ܒܤܘܼܢܗܵܕܘܿܣ ܕܒܼܘܲܙܢܛܝܼܵܐ. ܒ: ܥܲܠ
ܬܠܵܬܼܵܐ ܩܹܦܵܠܹ̈ܐܹܐ: ܗܵܢܵܘ ܕܹܝܢ ܥܲܠ ܟܬܼܵܒܹ̈ܐ ܕܬܹܐܵܕܘܿܪܘܿܣ:
ܕܬܹܐܘܿܕܘܿܪܹܝܬܘܿܣ: ܘܕܼܝܼܗܝܼܒܼܵܐ: ܒܲܫܢܲܬܼ ܡܵܪܲܢ 553.
ܩܵܢܘܿܢܵܐ ܩܲܕܼܡܵܝܵܐ. ܐܸܢ ܐ̄ܢܵܫ ܠܵܐ ܡܵܘܕܸܐ ܕܒܲܐܒܼܵܐ ܘܲܒܼܪܵܐ ܘܪܘܼܚܵܐ
ܕܩܘܼܕܼܫܵܐ ܘܵܠܹ̇ܐ ܕܢܸܤܓܘܿܕܼ ܠܚܲܕܼ ܟܝܵܢܵܐ ܐܵܘ ܐܝܼܬܼܘܼܬܼܵܐ: ܠܚܲܕܼܸ ܚܲܝܠܵܐ
ܘܫܘܼܛܵܢܵܐ: ܠܲܬܼܠܝܼܬܼܵܝܘܼܬܼܵܐ ܕܒܲܚܕܼܵܐ ܐܘܼܤܝܼܵܐ: ܠܲܚܕܼܸܵܐ ܐܲܠܵܗܘܼܬܼܵܐ
ܒܲܬܼܠܵܬܼܵܐ ܩܢܘܿܡܝܼ̈ܢ ܐܵܘ ܦܲܪ̈ܨܘܿܦܝܼܢ: ܬܸܗܘܸܐ ܩܵܬܼܵܪܵܤܝܼܣ ܕܝܼܠܹܗ.
ܚܲܕܼ ܗ̄ܘ̣ ܓܹܝܪ ܐܲܠܵܗܵܐ ܐܲܒܼܵܐ: ܕܟܼܠ ܡܸܢܹܗ. ܘܚܲܕܼ ܡܵܪܝܵܐ ܝܼܫܘܿܥ: ܕܟܼܠ
ܒܐܝܼܕܹܗ. ܘܚܲܕܼ ܪܘܼܚܵܐ ܕܩܘܼܕܼܫܵܐ: ܕܟܼܠ ܒܹܗ. ܩܵܢܘܿܢܵܐ ܕܲܬܼܪܹܝܢ.
ܐܸܢ ܐ̄ܢܵܫ ܠܵܐ ܡܵܘܕܸܐ ܒܲܬܼܪܹܝܢ ܡܵܘ̈ܠܵܕܹܝܢ ܕܐܲܠܵܗܵܐ ܡܸܠܬܼܵܐ: ܚܲܕܼ
ܕܹܝܢ ܡ̣ܢ ܐܲܒܼܵܐ ܪܘܼܚܵܢܵܐܝܼܬܼ ܡ̣ܢ ܩܕܲܡ ܕܵܪܹ̈ܐ ܘܲܕܼܠܵܐ ܙܲܒܼܢܵܐ: ܘܲܐ̄ܚܪܹܢܵܐ
ܒܝܵܘ̈ܡܵܬܼܵܐ ܐ̄ܚܪ̈ܵܝܹܐ ܟܲܕܼ ܢܚܸܬܼ ܡ̣ܢ ܫܡܲܝܵܐ ܘܐܸܬܼܓܲܫܲܡ ܡ̣ܢ ܡܵܪܬܝ
ܡܲܪܝܲܡ ܐܲܡܝܼܢܵܐܝܼܬܼ ܒܬܼܘܼܠܬܼܵܐ ܝܵܠܕܲܬܼ ܐܲܠܵܗܵܐ ܡܫܲܒܲܚܬܼܵܐ ܘܐܸܬܼܝܼܠܸܕܼ
ܡܸܢܵܗ̇: ܬܸܗܘܸܐ ܩܸܬܼܵܪܵܤܝܼܣ ܕܝܼܠܹܗ. ܩܵܢܘܿܢܵܐ ܕܲܬܼܠܵܬܼܵܐ. ܐܸܢ ܐ̄ܢܵܫ
ܐܵܡܲ݁ܪ: ܕܲܐ̄ܚܪܹܝܢ ܗ̄ܘ̣ ܡܸܠܬܹܗ ܕܐܲܠܵܗܵܐ ܕܲܤ̣ܥܲܪ ܚܲܝܠܹ̈ܐ: ܘܲܐ̄ܚܪܹܝܢ ܗ̄ܘ̣
ܡܫܝܼܚܵܐ ܕܲܤܒܲܠ̣ ܚܲܫܹ̈ܐ. ܐܵܘ ܐܵܡܲ݁ܪ: ܕܐܲܠܵܗܵܐ ܡܸܠܬܼܵܐ ܥܲܡ ܡܫܝܼܚܵܐ
ܐܝܼܬܼܵܘܗܝ ܗ̄ܘ̣ܵܐ ܡܵܐ ܕܡܸܬܼܝܼܠܸܕܼ ܗ̄ܘ̣ܵܐ ܡ̣ܢ ܐܲܢ̄ܬܿܬܼܵܐ: ܐܵܘ ܒܹܗ ܗ̄ܘ̣ܵܐ
ܐܲܝܟܼ ܚܲܕܼ ܒܲܐ̄ܚܪܹܢܵܐ: ܘܡܸܠܬܹܗ ܕܐܲܠܵܗܵܐ ܕܐܸܬܼܓܲܫܲܡ ܠܲܝܬܵܘܗܝ ܗ̤ܘ
ܟܲܕܼ ܗ̤ܘ ܚܲܕܼ ܡܵܪܲܢܝܼܫܘܿܥܡܫܝܼܚܵܐ. ܘܬܸܕܼܡܪ̈ܵܬܼܵܐ ܕܲܥ̣ܒܲܕܼ ܘܚܲܫܹ̈ܐ
pb. 617
ܕܲܒܼܦܲܓܼܪܹܗ ܤܲܝܒܲܪ ܒܨܒܼܝܵܢܹܗ: ܠܵܐ ܐܝܼܐܲܝܗܘܿܢ ܕܗ̤ܘ ܟܲܕܼ ܗ̤ܘ ܚܲܕܼ
ܩܢܘܿܡܵܐ: ܬܸܗܘܸܐ ܩܵܬܼܵܪܵܤܝܼܣ ܕܝܼܠܹܗ. ܩܵܢܘܿܢܵܐ ܕܐܲܪܒܿܥܵܐ. ܐܸܢ
ܐ̄ܢܵܫ ܐܵܡܲ݁ܪ: ܕܐܲܠܵܗܵܐ ܡܸܠܬܼܵܐ ܐܸܬܼܚܲܝܲܕܼ ܠܒܲܪܢܵܫܵܐ ܒܛܲܝܒܿܘܼܬܼܵܐ: ܐܵܘ
ܒܥܵܒܼܘܿܕܼܘܼܬܼܵܐ: ܐܵܘ ܒܕܲܪܓܼܵܐ: ܐܵܘ ܒܫܘܝܘܼܬܼ ܐܝܼܩܵܪܵܐ: ܐܵܘ ܒܫܘܼܠܛܵܢܵܐ:
ܐܵܘ ܒܢܲܩܝܼܦܘܼܬܼܵܐ: ܐܵܘ ܒܤܘܼܥܪܵܢܵܐ: ܐܵܘ ܒܚܲܝܠܵܐ. ܐܵܘ ܒܡܸܨܛܲܒܼܝܵܢܘܼܬܼܵܐ:
ܐܲܝܟܼ ܗܵܝ̇ ܕܐܲܠܵܗܵܐ ܡܸܠܬܼܵܐ ܨܒܼܵܐ ܒܹܗ ܒܒܲܪܢܵܫܵܐ ܡܸܛܠ ܕܲܫ̣ܦܲܪ
ܒܥܲܝܢܵܘ̈ܗܝ: ܐܲܝܟܼ ܕܲܫܛ̣ܵܐ ܘܐܸܡ݂ܲܪ ܬܹܐܵܕܘܿܪܘܿܣ. ܐܵܘ ܒܕܼܵܡܝܘܼܬܼ ܫܡܵܐ
ܒܲܠܚܘܿܕܼܸ: ܕܒܼܵܗ̇ ܢܸܤܛܘܼܪ̈ܝܵܢܘܿ ܠܐܲܠܵܗܵܐ ܡܸܠܬܼܵܐ ܩܵܪܹܝܢ ܝܼܫܘܿܥ
ܘܲܡܫܝܼܚܵܐ: ܘܲܠܒܲܪܢܵܫܵܐ ܒܲܠܚܘܿܕܼܸܵܘܗܝ ܡܫܲܡܗܝܼܢ ܡܫܝܼܚܵܐ ܘܲܒܼܪܵܐ. ܟܲܕܼ
ܓܲܠܝܵܐܝܼܬܼ ܬܪܹܝܢ ܩܢܘܿܡܝܼ̈ܢ ܐܵܡ̇ܪܝܼܢ: ܘܡܲܤܒܪܝܼܢ ܕܡܵܘܕܹܝܢ ܒܚܲܕܼ
ܦܵܪܨܘܿܦܵܐ ܘܲܒܚܲܕܼ ܡܫܝܼܚܵܐ ܒܲܠܚܘܿܕܼ ܘܒܼܐܝܼܩܵܪܵܐ ܘܲܒܼܕܲܪܓܼܵܐ
ܘܲܒܼܤܸܓܼܕܬܼܵܐ. ܐܸܠܵܐ ܠܵܐ ܡܵܘܕܸܐ: ܐܲܝܟܼ ܕܐܲܠܸܦ̣ܘ ܐܲܒܼ̈ܗܵܬܼܵܐ ܩܲܕܝܼ̈ܫܹܐ:
ܒܚܘܼܝܵܕܼܵܐ ܕܐܲܠܵܗܵܐ ܡܸܠܬܼܵܐ ܠܦܲܓܼܪܵܐ ܕܲܡܢܲܦܲܫ ܒܢܲܦܫܵܐ ܡܠܝܼܠܬܼܵܐ
ܘܝܼܕܘܼܥܬܼܵܢܝܼܬܼܵܐ: ܗܵܘ̇ ܕܲܗܘ̤ܵܐ ܒܪܘܘܼܟܵܒܼܵܐ: ܗܵܢܵܘ ܕܹܝܢ ܩܢܘܿܡܵܐܝܼܬܼ.
ܘܡܸܛܠܗܵܢܵܐ ܚܲܕܼ ܗ̄ܘ̣ ܩܢܘܿܡܹܗ ܕܐܝܼܬܼܵܘܗܝ ܡܵܪܲܢܝܼܫܘܿܥܡܫܝܼܚܵܐ:
ܚܲܕܼ ܡ̣ܢ ܬܠܝܼܬܼܵܝܘܼܬܼܵܐ ܩܲܕܝܼܫܬܼܵܐ: ܬܸܗܘܸܐ ܩܵܬܼܵܪܵܤܝܼܣ ܕܝܼܠܹܗ.
ܡܸܛܠ ܕܹܝܢ ܕܲܚܕܼܵܝܘܼܬܼܵܐ ܒܤܘܼ̈ܟܵܠܹܐ ܤܲܓܝܼ̈ܐܹܐ ܡܸܬܼܢܲܤܒܵܐ: ܐܝܼܬܼ
ܕܢܵܩ̇ܦܝܼܢ ܠܪܘܼܫܥܵܐ ܕܐܵܦܘܿܠܝܼܢܵܪܝܼܣ ܘܕܐܘܼܛܝܼܟܹܐ ܡܲܐܠ̇ܦܝܼܢ
ܒܘܼܛܵܠܵܐ ܕܐܲܝܠܹܝܢ ܟܝܵܢܹ̈ܐ ܕܲܗܘ̤ܵܘ ܚܲܕܼ: ܘܡܲܟܼܪܙܝܼܢ ܚܘܼܝܵܕܼܗܘܿܢ
ܕܲܒܼܚܘܼܠܛܵܢܵܐ. ܘܲܒܼܢܲܝ̈ ܬܲܪܥܝܼܬܼܵܐ ܕܹܝܢ ܕܬܹܐܵܕܘܿܪܘܿܣ ܘܲܕܢܸܤܛܘܿܪܝܼܣ
ܡܩܒܿܠܝܼܢ ܦܘܼܪܫܵܢܗܘܿܢ: ܘܡܲܥ̇ܠܝܼܢ ܚܘܼܵܕܼܵܐ ܚܘܼܒܵܢܵܝܵܐ. ܒܪܲܡ ܥܹܕܬܹܗ
ܕܐܲܠܵܗܵܐ ܩܲܕܝܼܫܬܼܵܐ ܡܲܚܪܡܵܐ ܠܪܘܼܫܥܵܐ ܕܬܲܪ̈ܬܲܝܗܹܝܢ ܗܵܠܹܝܢ ܗܹܪܹ̈ܤܝܼܵܣ:
pb. 618
ܘܡܵܘܕܝܵܐ ܒܲܡܚܲܕܘܼܬܼܵܐ ܕܐܲܠܵܗܵܐ ܡܸܠܬܼܵܐ ܠܦܲܓܼܪܵܐ ܒܪܘܼܟܵܒܼܵܐ: ܗܵܢ̇ܘܿ
ܕܹܝܢ: ܒܚܘܼܝܵܕܼܵܐ ܩܢܘܿܡܵܝܵܐ. ܡܸܛܠ ܕܚܘܼܝܵܕܼܵܐ ܕܲܒܼܪܘܼܟܵܒܼܵܐ: ܒܐ̄ܪܵܙ
ܡܸܬܼܒܲܪܢܫܵܢܘܼܬܹܗ ܕܲܡܫܝܼܚܵܐ: ܠܵܐ ܒܲܠܚܘܿܕܼ ܢܵܛܲܪ ܠܵܐ ܡܡܲܙ̈ܓܹܐ
ܠܐܲܝܠܹܝܢ ܡܝܵܢܹ̈ܐ ܕܐܸܬܼܚܲܝܲܕܼܘ: ܐܸܠܵܐ ܐܵܦܠܵܐ ܡܩܲܒܸܠ ܦܘܼܪܫܵܢܗܘܿܢ
ܠܲܬܼܪܹܝܢ ܩܢܘܿܡܝܼ̈ܢ. ܩܵܢܘܿܢܵܐ ܕܚܲܡܫܵܐ. ܐܸܢ ܐ̄ܢܵܫ ܒܚܲܕܼ ܩܢܘܿܡܹܗ
ܕܡܵܪܲܢ ܝܼܫܘܿܥ ܡܫܝܼܚܵܐ ܗܵܟܲܢܵܐ ܡܸܤܬܲܟܲܠ ܐܲܝܟܼ ܐܲܚܝܼܕܼ ܤܘܼܟܵܠܵܐ
ܕܲܩܢܘܿܡܹ̈ܐ ܤܵܓܝܼ̈ܐܹܐ: ܘܡܸܛܠܗܵܢܵܐ ܡܸܬܼܟܲܬܲܫ ܕܢܲܥܸܠ ܒܐ̄ܪܵܙ
ܡܸܬܼܒܲܤܢܫܵܢܘܼܬܹܗ ܕܲܡܫܝܼܚܵܐ ܬܪܹܝܢ ܩܢܘܿܡܝܼ̈ܢ ܐܵܘ ܦܲܪ̈ܨܘܿܦܝܼܢ. ܘܒܼܵܬܲܪ
ܕܐܲܥܸܠ ܐܸܢܘܿܢ: ܩܵܪܹܐ ܠܗܘܿܢ ܚܲܕܼ ܦܲܪܨܘܿܦܵܐ ܒܕܲܪܓܼܵܐ ܘܒܼܐܝܼܩܵܪܵܐ
ܘܲܒܼܤܸܓܕܬܼܵܐ: ܐܲܝܟܼ ܕܲܫܛܵܘ ܘܲܟܼܬܲܒܼܘ ܬܹܐܵܕܘܿܪܘܼܣ ܘܢܸܤܛܘܿܪܝܼܣ.
ܘܲܡ̇ܥܲܩܝܼܢ ܠܤܘܼܢܗܵܕܘܿܣ ܩܲܕܝܼܫܬܼܵܐ ܕܩܲܠܟܼܝܼܕܘܿܢܵܐ ܟܲܕܼ ܐܵܡ̇ܪܝܼܢ:
ܕܲܒܼܗܵܢܵܐ ܤܘܼܟܵܠܵܐ ܪܲܫܝܼܥܵܐ ܐܸܬܼܚܲܫܚܲܬ̤ ܒܲܫܡܵܐ ܗܵܢܵܐ ܕܚܲܕܼܸ ܩܢܘܿܡܵܐ.
ܐܸܠܵܐ ܠܵܐ ܡܵܘܕܸܐ: ܕܡܸܠܬܹܗ ܕܐܲܠܵܗܵܐ ܐܸܬܼܚܲܝܲܕܼ ܐܘܼܤܼܵܐܝܼܬܼ ܠܦܲܓܼܪܵܐ:
ܘܡܸܛܠܗܵܢܵܐ ܗܘ̤ܵܐ ܚܲܕܼ ܩܢܘܿܡܵܐ ܘܚܲܕܼ ܦܲܪܨܘܿܦܵܐ. ܘܲܕܼܗܵܟܲܢܵܐ
ܤܘܼܢܗܵܕܘܿܣ ܩܲܕܝܼܫܬܼܵܐ ܕܩܲܠܟܝܼܕܘܿܢܵܐ ܡܵܘܕܝܵܐ ܒܚܲܕܼ ܩܢܘܿܡܵܐ
ܒܡܵܪܲܢ ܝܼܫܘܿܥ ܡܫܝܼܚܵܐ: ܬܸܗܘܸܐ ܩܵܬܼܵܪܵܤܝܼܣ ܕܝܼܠܹܗ. ܐܵܦܠܵܐ ܕܹܝܢ
ܬܠܝܼܬܼܵܝܘܼܬܼܵܐ ܩܲܕܝܼܫܬܼܵܐ ܩܲܒܿܠܲܬ̤ ܬܵܘܤܲܦܬܼܵܐ ܕܦܪܨܘܿܦܵܐ ܐܵܘ ܕܲܩܢܘܿܡܵܐ:
ܐܵܦ ܡ̣ܢ ܒܵܬܲܪ ܕܚܲܕܼ ܡ̣ܢ ܗ̤ܝ ܗܵܝ̇ ܬܠܝܼܬܼܵܝܘܼܬܼܵܐ ܩܲܕܝܼܫܬܼܵܐ ܐܲܠܵܗܵܐ
ܡܸܠܬܼܵܐ ܗܘ̤ܵܐ ܒܲܪܢܵܫܵܐ. ܩܵܢܘܿܢܵܐ ܕܸܫܬܼܵܐ. ܐܸܢ ܐ̄ܢܵܫ ܐܵܡܲ݁ܪ: ܕܛܵܠܘܿܡܵܐܝܼܬܼ
ܘܠܵܘ ܫܲܪܝܼܪܵܐܝܼܬܼ ܡܵܪܬܿܝ ܡܲܪܝܲܡ ܐܲܡܝܼܢܵܐܝܼܬܼ ܒܬܼܘܼܠܬܼܵܐ ܡܫܲܒܲܚܬܼܵܐ
ܡܸܬܼܩܲܪܝܵܐ ܝܵܠܕܲܬܼ ܐܲܠܵܗܵܐ. ܐܵܘ ܫܐܝܼܠܵܐܝܼܬܼ: ܐܲܝܟܼ ܗܵܝ̇ ܕܗܵܘ̇ ܕܐܸܬܼܝܼܠܸܕܼ
ܡܵܢܵܗ̇ ܒܲܪܢܵܫܵܐ ܗ̄ܘ̣ܵܐ ܫܚܝܼܡܵܐ: ܘܠܵܘ ܐܲܠܵܗܵܐ ܡܸܠܬܼܵܐ ܕܐܸܬܼܓܲܫܲܡ ܡܸܢܵܗ̇.
pb. 619
ܘܗܵܘ̇ ܡܵܘܠܵܕܹܗ ܕܒܲܪܢܵܫܵܐ: ܐܲܝܟܼ ܕܗܸܢܘ̣ܿܢ ܐܵܡ̇ܪܝܼܢ: ܫܐܝܼܠܵܐܝܼܬܼ
ܡܼܬܿܬܿܤܝܼܡ ܥܲܠ ܐܲܠܵܗܵܐ ܡܸܠܬܼܵܐ ܕܕܲܒܼܝܲܩ ܗ̄ܘ̣ܵܐ ܒܒܲܪܢܵܫܵܐ ܕܡܸܬܼܝܼܠܸܕܼ
ܗ̄ܘ̣ܵܐ. ܘܛܵܠܹ̇ܡ ܠܤܘܼܢܗܵܕܘܿܣ ܩܲܕܝܼܫܬܼܵܐ ܕܩܲܠܟܼܝܼܕܘܿܢܵܐ ܐܲܝܟܼ ܗܵܝ̇
ܕܡܲܠܦܵܐ: ܕܲܒܼܬܼܘܼܠܬܼܵܐ ܐܝܼܬܹܝܗ̇ ܝܵܠܕܲܬܼ ܐܲܠܵܗܵܐ ܒܗܵܢܵܐ ܤܘܼܟܵܠܵܐ ܪܲܫܝܼܥܵܐ
ܕܐܸܬܼܦܲܫܲܩ ܡ̣ܢ ܬܹܐܕܘܿܪܘܿܣ. ܐܵܘ ܐܸܢ ܐ̄ܢܵܫ ܩܵܪܹܐ ܠܵܗ̇ ܝܵܠܕܲܬܼ
ܒܲܪܬܵܫܵܐ: ܐܵܘ ܝܵܠܕܲܬܼ ܡܫܝܼܚܵܐ ܐܲܝܟܼ ܗܵܝ̇ ܕܠܵܐ ܗ̄ܘ̣ܵܐ ܡܫܝܼܚܵܐ ܐܲܠܵܗܵܐ:
ܘܠܵܐ ܡܵܘܕܸܐ ܕܝܼܠܵܢܵܐܝܼܬܼ ܕܐܝܼܬܹܝܗ̇ ܒܲܫܪܵܪܵܐ ܝܵܠܕܲܬܼ ܐܲܠܵܗܵܐ: ܡܸܛܠ
ܗܵܝ̇ ܕܡܸܠܬܼܵܐ ܐܵܠܵܗܵܐ ܕܐܸܬܼܝܼܠܸܕܼ ܡ̣ܢ ܐܲܒܼܵܐ ܡ̣ܢ ܩܵܕܵܡ ܕܵܕܹ̈ܐ ܡܸܢܵܗ̇
ܐܸܬܼܓܲܫܲܡ ܘܐܸܬܿܝܼܠܸܕܼ ܒܝܵܘ̈ܡܵܬܼܵܐ ܐ̄ܚܪ̈ܵܝܹܐ: ܘܗܵܟܲܢܵܐ ܤܘܼܢܗܵܕܘܿܣ
ܩܲܕܝܼܫܬܵܪܐ ܕܩܲܠܟܝܼܕܘܼܢܵܐ ܟܹܐܢܵܐܝܼܬܼ ܡܵܘܕܝܵܐ ܒܵܗ̇ ܕܐܝܼܬܹܗ̇ ܝܵܠܕܲܬܼ
ܐܵܠܵܗܵܐ: ܬܸܗܘܸܐ ܩܵܬܼܪܵܤܝܼܣ ܕܝܼܠܹܗ. ܩܵܢܘܿܢܵܐ ܕܫܲܒܼܥܵܐ. ܐܸܢ ܐ̄ܢܵܫ
ܐܵܡܲ݁ܪ ܒܲܬܼܪܹܝܢ ܟܝܵܢ̈ܝܼܢ: ܠܵܐ ܡܵܘܕܸܐ ܕܒܲܐܠܵܗܘܼܬܼܵܐ ܘܲܒܼܐ̄ܢܵܫܘܼܬܼܵܐ ܚܲܕܼ
ܡܵܪܲܢܝܼܫܘܿܥܡܫܝܼܚܵܐ ܡܸܬܼܝܼܓܲܥ: ܕܲܒܼܗܵܕܹܐ ܢܵܘܕܲܥ ܦܘܼܪܵܫ ܟܝܵܢܹ̈ܐ
ܕܡܸܢܗܘܿܢ ܐܸܫܬܲܡܠܝܼ ܚܘܼܝܵܕܲܐ ܕܠܵܐ ܚܘܼܠܛܵܢܵܐ ܘܵܕܼܠܵܐ ܡܸܬܼܡܲܠܲܠ:
ܟܲܕܼ ܠܵܠ ܡܸܠܬܼܵܐ ܐܸܫܬܲܚܠܲܦ ܠܵܟܼܝܵܢܵܐ ܕܒܸܤܪܵܐ ܘܠܵܐ ܒܸܤܪܵܐ ܐܸܫܬܲܓܼܢܝܼ
ܠܲܟܼܝܵܢܵܐ ܕܡܸܠܬܼܵܐ: ܡܸܛܠ ܕܲܬܼܪܲܝܗܘܿܢ ܡܩܵܘܹܝܢ ܐܲܝܟܼ ܕܐܝܼܬܲܝܗܘܿܢ
ܒܲܟܼܝܵܢܗܘܿܢ ܐܵܦ ܒܵܬܲܪ ܚܘܼܝܵܕܿܗܘܿܢ ܩܢܘܿܡܵܝܵܐ: ܐܸܠܵܐ ܢܵܤܹ̇ܒܼ ܠܡܸܠܬܼܵܐ
ܗܵܕܹܐ ܒܐ̄ܪܵܙܵܐ ܕܡܸܬܼܒܲܪܢܵܫܢܘܼܬܹܗ ܕܲܡܫܝܼܚܵܐ ܐܲܝܟܼ ܕܲܠܦܘܼܠܵܓܼܵܐ
ܕܒܲܡ̈ܢܵܘܼܬܼܵܐ. ܐܵܘ ܡܵܘܕܸܐ ܒܡܸܢܝܵܢܵܐ ܕܲܟܼܝܵܢܹ̈ܐ ܒܹܗ ܒܚܲܕܼ ܡܵܪܲܢܝܼܫܘܼܥܡܫܝܼܚܵܐ
ܐܲܠܵܗܵܐ ܡܸܠܬܼܵܐ ܕܐܸܬܼܒܲܤܲܪ: ܠܵܐ ܒܲܠܚܘܿܕܼ ܒܬܹܐܘܿܪܝܼܵܐ ܫܵܩܹ̇ܠ ܠܲܦܪܝܼܫܘܼܬܼ
ܐܲܝܠܹܝܢ ܕܡܸܢܗܘܿܢ ܡܸܬܼܪܲܟܲܒܼ ܟܲܕܼ ܠܵܐ ܡܸܬܼܠܲܚܝܵܐ ܕܝܼܠܵܝܬܗܘܿܢ
ܒܚܘܼܝܵܕܼܵܐ: ܡܸܛܠ ܕܚܲܕܼ ܗ̄ܘ̣ ܡ̣ܢ ܬܪ̈ܲܝܗܘܿܢ: ܘܲܒܼܚܲܕܼ ܐܸܢܘܿܢ
pb. 620
ܬܪ̈ܲܝܗܘܿܢ: ܐܸܠܵܐ ܡܸܛܠܵܗܵܕܹܐ ܡܸܬܼܚܲܫܲܚ ܒܡܸܢܝܵܢܵܐ: ܐܲܝܟܼ ܗܵܝ̇ ܕܲܡܫܝܼܚܵܐ
ܐܝܼܬܼ ܠܹܗ ܟܝܵܢܝܼ̈ܢ ܕܡܸܬܼܦܲܠܓܼܝܼܢ: ܘܲܕܼܩܵܝ̇ܡܝܼܢ ܟܠ ܚܲܕܼ ܡܸܢܗܘܿܢ
ܒܲܩܢܘܿܡܵ ܕܝܵܬܹܗ: ܬܸܗܘܸܐ ܩܵܬܼܵܪܵܤܝܼܣ ܕܝܼܠܹܗ. ܩܵܢܘܿܢܵܐ ܕܲܬܼܡܵܢܝܵܐ.
ܐܸܢ ܐ̄ܢܵܫ ܡܵܘܕܸܐ: ܕܚܘܼܝܵܕܼܵܐ ܗܘ̤ܵܐ ܡ̣ܢ ܬܪܹܝܢ ܟܝܵܢܝܼ̈ܢ ܡ̣ܢ ܐܲܠܵܗܘܼܬܼܵܐ
ܘܡ̣ܢ ܐ̄ܢܵܫܘܼܬܼܵܐ: ܐܵܘ ܐܵܡܲ݁ܪ ܕܚܲܕܼ ܗ̄ܘ̣ ܟܝܵܢܹܗ ܕܐܲܠܵܗܵܐ ܡܸܠܬܼܵܐ
ܕܐܸܬܼܓܲܫܲܡ: ܘܲܠܡܸܠܹ̈ܐ ܗܵܠܹܝܢ ܠܵܐ ܡܸܤܬܲܟܲܠ ܐܲܝܟܼ ܕܐܲܠܸܦ̣ܘ
ܐܲܒܼ̈ܗܵܬܼܵܐ ܩܲܕܝܼ̈ܫܹܐ: ܕܡ̣ܢ ܟܝܵܢܵܐ ܐܲܠܵܗܵܝܵܐ ܘܲܟܼܝܵܢܵܐ ܐ̄ܢܵܫܵܝܵܐ ܒܵܬܲܪ
ܕܲܩܢܘܿܡܵܐܝܼܬܼ ܐܸܬܼܚܲܝܲܕܼܘ ܗܘ̤ܵܐ ܚܲܕܼܸ ܡܫܝܼܚܵܐ. ܐܸܠܵܐ ܡܸܬܼܟܲܬܲܫ
ܕܡ̣ܢ ܡܸܠܹ̈ܐ ܕܐܲܝܟܼ ܗܵܠܹܝܢ ܢܲܥܸܠ ܚܲܕܼ ܟܝܵܢܵܐ ܐܵܘ ܚܕܼܵܐ ܐܘܼܤܝܼܵܐ
ܕܐܲܠܵܗܘܼܬܹܗ ܘܲܕܼܐ̄ܢܵܫܘܼܬܹܗ ܕܲܡܫܝܼܚܵܐ: ܬܸܗܘܸܐ ܩܵܬܼܵܪܵܤܝܼܣ ܕܝܼܠܹܗ.
ܡܸܛܠ ܕܟܲܕܼ ܐܵܡ̇ܪܝܼܢܲܢ ܕܡܸܠܬܼܵܐ ܝܼܚܝܼܕܼܵܝܵܐ ܐܸܬܼܚܲܝܲܕܼ ܠܦܲܓܼܪܵܐ ܩܢܘܿܡܵܐܝܼܬܼ:
ܠܵܐ ܐܵܡܪܝܼܢܲܢ ܕܲܗܘ̤ܵܐ ܡܘܼܙܵܓܼܵܐ ܡܸܕܸܡ ܕܲܟܼܝܵܢܹ̈ܐ ܚܲܕܼ ܒܲܐ̄ܚܪܹܢܵܐ: ܐܸܠܵܐ
ܡܸܤܬܲܛܿܐܝܼܢܲܢ: ܕܡܸܠܬܼܵܐ ܐܸܬܼܚܲܝܲܕܼ ܠܦܲܓܼܪܵܐ: ܟܲܕܼ ܩ̣ܵܘܝܼ ܟܠ ܚܲܕܼ
ܡܸܢܗܘܿܢ ܗܵܘ̇ܡܵܐ ܕܐܝܼܬܼܵܘܗܝ. ܡܸܛܠܗܵܢܵܐ ܚܲܕܼ ܗ̄ܘ̣ ܡܫܝܼܚܵܐ:
ܗ̤ܘ ܟܲܕܼ ܗ̤ܘ ܐܲܠܵܗܵܐ ܘܒܲܪܢܵܫܵܐ: ܒܲܪ ܟܝܵܢܵܐ ܕܐܲܒܼܘܼܗܝ ܒܐܲܠܵܗܘܼܬܹܗ:
ܘܒܲܪ ܟܝܵܢܵܐ ܕܝܼܠܲܢ ܒܐ̄̇ܢܵܫܘܼܬܹܗ. ܒܹܗ ܒܲܙܢܵܐ ܓܹܝܪ ܥܹܕܬܹܗ ܕܐܲܠܵܗܵܐ
ܩܵܬܼܘܿܠܝܼܩܵܝܬܼܵܐ ܤܵܡ̇ܝܵܐ ܘܡܲܚܪܡܵܐ ܐܵܦ ܠܐܲܝܠܹܝܢ ܕܲܡܦܲܠܓܼܝܼܢ ܘܲܡܦܲܤܩܝܼܢ
ܠܲܡ̈ܢܵܘܵܬܼܵܐ ܠܐ̄ܪܵܙܵܐ ܕܲܡܕܲܒܿܪܵܢܘܼܬܹܗ ܕܡܫܝܼܚܵܐ: ܘܐܵܦ ܒܐܲܝܠܹܝܢ
ܕܲܡܡܲܙܓܼܝܼܢ ܠܹܗ. ܩܵܢܘܿܢܵܐ ܕܬܸܫܥܵܐ. ܐܸܢ ܐ̄ܢܵܫ ܐܵܡܲ݁ܪ: ܕܲܡܫܝܼܚܵܐ
ܒܲܬܼܪܹܝܢ ܟܝܵܢ̈ܝܼܢ ܡܸܤܬܿܓܸܕܼ: ܘܡ̣ܢ ܗܵܕܹܐ ܡܲܥܸܠ ܬܲܪܬܹܝܢ ܤܸܵܓ̈ܕܵܬܼܵܐ:
ܚܕܼܵܐ ܦܪܝܼܫܵܐܝܼܬܼ ܠܐܲܠܵܗܵܐ ܡܸܠܬܼܵܐ ܘܲܐ̄ܚܪܹܬܼܵܐ ܦܪܝܼܫܵܐܝܼܬܼ ܠܒܲܪܢܵܫܵܐ.
ܐܵܘ ܐܸܢ ܐ̄ܢܵܫ ܠܒܼܘܼܛܵܠ ܦܲܓܼܪܵܐ ܐܵܘ ܠܚܘܼܠܛܵܢ ܐܠܵܗܘܼܬܼܵܐ ܘܐ̄ܢܵܫܘܼܬܼܵܐ
pb. 621
ܓܵܕܹܦ ܘܐܵܡܲ݁ܪ: ܕܚܲܕܼ ܗ̄ܘ̣ ܟܝܵܢܵܐ ܘܲܚܕܼܵܐ ܗ̣̄ܝ ܐܘܼܤܝܼܵܐ ܕܐܲܝܠܹܝܢ
ܕܐܸܬܼܚܲܝܲܕܼܘ: ܘܗܵܟܲܢܵܐ ܤܵܓܹܕܼ ܠܲܡܫܝܼܚܵܐ. ܐܸܠܵܐ ܒܲܚܕܼܵܐ ܤܸܓܼܬܼܵܐ ܠܵܐ
ܤܵܓܹ̇ܕܼ ܠܐܲܠܵܗܵܐ ܡܸܠܬܼܵܐ ܕܐܸܬܼܓܲܫܲܡ ܥܲܡ ܦܲܓܼܪܹܗ: ܐܲܝܟܼ ܕܡ̣ܢ
ܫܘܼܪܵܝܵܐ ܐܸܬܿܬܿܫܠܲܡ ܠܥܹܕܬܹܗ ܕܐܲܠܵܗܵܐ ܩܲܕܝܼܫܬܼܵܐ: ܬܸܗܘܸܐ ܩܵܬܼܵܪܵܤܝܼܣ
ܕܝܼܠܹܗ. ܩܵܢܘܿܢܵܐ ܕܥܸܤܪܵܐ. ܐܸܢ ܐ̄ܢܵܫ ܠܵܐ ܡܵܘܕܸܐ: ܕܡܵܪ̈ܲܢ ܝܼܫܘܿܥ
ܕܐܸܨܛܠܸܒܼ ܒܦܲܓܼܪܵܐ ܐܝܼܬܼܵܘܗܝ ܐܲܠܵܗܵܐ ܫܲܪܝܼܪܵܐ: ܘܡܵܪܝܵܐ ܕܬܸܫܒܿܘܿܚܬܼܵܐ:
ܘܚܲܕܼ ܡ̣ܢ ܬܠܝܼܬܼܵܝܘܼܬܼܵܐ ܩܲܕܝܼܫܬܼܵܐ: ܬܸܗܘܸܐ ܩܵܬܼܵܪܵܤܝܼܣ ܕܝܼܠܹܗ.
ܩܵܢܘܿܢܵܐ ܕܲܚܕܲܥܤܲܪ. ܐܸܢ ܐ̄ܢܵܫ ܠܵܐ ܡܲܚܪܸܡ ܠܐܵܪܝܼܘܿܣ:
ܠܐܘܼܢܘܿܡܝܼܣ: ܠܡܵܩܹܕܘܿܢܝܼܣ: ܠܐܵܦܘܿܠܝܼܢܵܪܝܼܣ:
ܠܢܸܤܛܘܿܪܝܼܣ: ܠܐܘܼܛܝܼܟܼܝܼܣ: ܘܠܐܘܼܪܸܓܵܝܢܲܝܣ: ܠܗܘܿܢ
ܘܠܲܟܼܬܼܵܒܲܝ̈ܗܘܿܢ ܒܝܼ̈ܫܹܐ: ܘܲܠܟܼܠܗܘܿܢ ܗܲܪ̈ܲܛܝܼܩܹܐ ܐ̄ܚܪ̈ܵܢܹܐ ܕܐܸܬܼܚܲܝܲܒܼܘ
ܘܐܸܬܼܚܪܸܡܘ ܡ̣ܢ ܥܹܕܬܹܗ ܕܐܲܠܵܗܵܐ ܩܲܕܝܼܫܬܼܵܐ ܫܠܝܼܚܵܬܐ ܘܩܵܬܼܘܿܠܝܼܩܝܼ:
ܐܵܘ ܡ̣ܢ ܐܲܪܒܲܥ ܤܘܼ̈ܢܗܵܕܘܿ ܩܲܕܝܼ̈ܫܵܬܼܵܐ ܕܲܥܗܲܝܼ̈ܕܼܵܢ: ܐܸܠܵܐ ܐܵܦ ܠܐܲܝܠܹܝܢ
ܕܐܸܬܼܚܲܫܲܒܼܘ ܐܵܘ ܝܑܼܕܝܼܥܝܼܢ ܕܡܸܬܼܚܲܫܒܼܝܼܢ ܐܲܝܟܼ ܗܲܪ̈ܲܛܝܼܩܘ ܕܲܪܫܝܼܡܝܼܢ
ܡ̣ܢ ܠܥܸܠ: ܘܲܥܕܲܡܵܐ ܠܚܲܪܬܼܵܐ ܟܲܬܲܪܘ ܒܲܟܼܦܘܼܪܝܼܗܘܿܢ: ܬܸܗܘܸܐ
ܩܵܬܼܵܪܵܤܝܼܣ ܕܝܼܠܹܗ. ܩܵܢܘܿܢܵܐ ܕܲܬܼܪܸܥܤܲܪ. ܐܸܢ ܐ̄ܢܵܫ ܐܵܚܹ̇ܕܼ ܓܲܒܵܐ
ܕܬܹܐܵܕܘܿܪܘܼܣ ܥܵܘ̇ܠܵܐ ܕܡܘܿܦܤܘܼܵܝܤܛܝܼܵܐ ܕܐܸܡ݂ܲܪ: ܕܲܐ̄ܚܪܹܝܢ ܗ̄ܘ̣
ܐܲܠܵܗܵܐ ܘܲܐ̄ܚܪܹܝܢ ܗ̄ܘ̣ ܡܫܝܼܚܵܐ ܕܠܐܝܼ ܒܚܲܫܹ̈ܐ ܕܢܲܦܫܵܐ ܘܒܲܪ̈ܓܼܝܼܓܼܵܬܐ
ܕܦܲܓܼܪܵܐ: ܘܲܕܼܩܲܠܝܼܠ ܩܲܠܝܼܠ ܦܲܨܝܼ ܢܲܦܫܹܗ ܡ̣ܢ ܒܝܼ̈ܫܵܬܼܵܐ: ܘܗܵܟܲܢܵܐ
ܒܫܘܼܫܵܛܵܐ ܕܒܲܥ̈ܒܼܵܕܹܐ ܐܲܛܐܸܒܼ ܢܲܦܫܹܗ: ܘܡ̣ܢ ܗܘܼܦܵܟܼܵܐ ܕܚܲܝܵܘ̈ܗܝ
ܐܸܬܼܩܲܝܲܡ ܕܠܵܐ ܡܘܼܡܵܐ: ܐܲܝܟܼ ܒܲܪܢܵܫܵܐ ܫܚܝܼܡܵܐ ܐܸܬܼܥܡܸܕܼ ܒܫܸܡ
ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ: ܘܲܒܼܡܲܥܡܘܿܕܼܝܼܬܼܵܐ ܢܤܲܒܼ ܛܲܝܒܘܼܬܼܵܐ
pb. 622
ܕܪܘܼܚܵܐ ܕܩܘܼܕܼܫܵܐ: ܘܐܸܫܬܿܘܝܼ ܠܤܝܼܡܲܬܼ ܒܢܲܝ̈ܐ: ܘܒܲܕܼܡܘܼܬܼ
ܨܲܠܡܹܗ ܕܡܲܠܟܵܐ ܒܦܲܪܨܘܿܦܹܗ ܕܐܲܠܵܗܵܐ ܡܸܠܬܼܵܐ ܡܸܤܬܿܓܸܕܼ: ܒܵܬܲܪ
ܩܝܵܡܬܹܗ ܗܘ̤ܵܐ ܠܵܐ ܡܸܫܬܲܚܠܦܵܢܵܐ ܒܤܘܼܟܵܠܵܐ ܘܲܗܘ̤ܵܐ ܟܠ ܟܠܵܢܵܐܝܼܬܼ
ܕܠܵܐ ܚܛܝܼܬܼܵܐ. ܘܬܼܘܼܒܼ ܗ̤ܘ ܟܲܕܼ ܗ̤ܘ ܬܹܐܵܕܘܿܪܘܿܣ ܪܲܫܝܼܥܵܐ ܐܸܡ݂ܲܪ:
ܕܚܘܼܝܵܕܼܵܐ ܕܐܲܠܵܗܵܐ ܡܸܠܬܼܵܐ ܠܲܡܫܝܼܚܵܐ ܗܵܟܲܢܵܐ ܗܘ̤ܵܐ: ܐܲܝܟܼ ܗܵܘ̇ ܕܐܸܡ݂ܲܪ
ܫܠܝܼܚܵܐ ܥܲܠ ܓܲܒܼܪܵܐ ܘܐܲܢ̄ܬܿܬܼܵܐ: ܢܸܗܘܘܿܢ ܬܪ̈݁ܲܝܗܘܿܢ ܚܲܕܼ ܒܤܲܪ.
ܘܥܲܠ ܓܘܼܕܵܦܵܘ̈ܗܝ ܐ̄ܚܪ̈ܵܢܹܐ ܕܠܵܐ ܡܸܢܝܵܢܵܐ ܐܲܤܓܝܼ ܡܲܪܵܚܵܐܝܼܬܼ
ܘܐܸܡ݂ܲܪ: ܕܟܲܕ ܡܵܪܲܢ ܒܵܬܲܪ ܩܝܵܡܬܹܗ ܢܦܲܚ ܒܬܲܠܡܝܼܕܼܵܘܗܝ
ܘܐܸܡ݂ܲܪ: ܩܲܒܸܿܠܘ ܪܘܼܚܵܐ ܕܩܘܼܕܫܵܐ: ܠܵܐ ܝܲܗ̣̄ܒܼ ܠܗܘܿܢ ܪܘܼܚܵܐ
ܕܩܘܼܕܫܵܐ: ܐܸܠܵܐ ܛܘܼܦܤܵܢܵܐܝܼܬܼ ܒܲܠܚܘܿܕܼ ܢܦܲܚ̣ ܒܗܘܿܢ. ܗܵܢܵܘ
ܕܹܝܢ: ܬܹܐܵܕܘܿܪܘܿܣ ܐܲܡܪܲܚ̣ ܘܐܸܡܲܪ: ܕܐܵܦ ܟܲܕܼ ܬܐܘܿܡܑܵܐ ܓܲܫ ܐܝܼܕܼܵܘ̈ܗܝ
ܕܡܵܪ̈ܲܢ ܘܤܸܛܪܹܗ ܒܵܬܲܪ ܩܝܵܡܬܹܗ ܘܐܵܘܕܝܼ ܕܐܸܡܲܪ݂: ܡܵܪܝ
ܘܐܲܠܵܗܵܝ: ܠܵܐ ܐܲܡ̣ܪܵܗ̇ ܬܐܘܿܡܵܐ ܗܵܕܹܐ ܥܲܠ ܡܫܝܼܚܵܐ: ܡܸܛܠ
ܕܠܵܐ ܐܸܡ݂ܲܪ ܕܗ̤ܘ ܐܲܠܵܗܵܐ ܐܝܼܬܼܵܘܗܝ: ܐܸܠܵܐ ܐܸܬܿܕܲܡܲܪ ܬܐܘܿܡܵܐ
ܒܬܸܕܡܘܼܪܬܵܐ ܕܲܩܝܵܡܬܼܵܐ: ܝܲܗ̣̄ܒܼ ܬܸܫܒܿܘܿܚܬܼܵܐ ܠܐܲܠܵܗܵܐ ܕܐܲܩܝܡ
ܠܲܡܫܝܼܚܵܐ. ܗܵܝ̇ ܕܒܼܝܼܫܵܐ ܡ̣ܢ ܗܵܠܹܝܢ ܟܠܗܹܝܢ ܗܵܕܲܐ ܗ̄ܝ̣: ܕܗ̤ܘ ܗܵܢܵܐ
ܬܹܐܵܕܘܿܪܘܿܣ: ܐܵܦ ܒܢܘܼܗܵܪܵܐ ܕܲܥܒܲܕܼ ܥܲܠ ܦܪܲܟܿܤܝܼܣ ܕܲܫܠܝܼܚܹ̈ܐ:
ܐܲܝܟܼ ܡܕܲܡܵܝܘܼ ܡܕܲܡܸܐ ܠܹܗ ܡܫܝܼܚܵܐ ܠܲܦܠܵܛܘܿܢ: ܐܵܘ ܠܡܵܐܢܝܼ:
ܘܠܲܐ ܦܝܼܩܘܿܪܘܿܣ: ܘܲܠܡܲܪܩܝܼܘܿܢ: ܘܐܵܡܲ݁ܪ: ܡܸܛܠ ܕܐܲܝܟܼ ܕܟܼܠ
ܚܕܼ ܡ̣ܢ ܗܵܠܹܝܢ ܐܸܫܟܲܚ ܕܘܿܓܡܵܐ ܚܲܕܼ: ܘܲܥܒܲܕܸ ܕܬܲܠܡܝܼܕܼܵܘ̈ܗܝ
ܢܸܬܼܩܪܘܿܢ ܦܠܵܛܘܿܬܝܼ̈ܩܝܹܐ ܘܡܵܐܢܝܼܩܵܝܹ̈ܐ ܘܐܲܦܝܼܩܘܿܪ̈ܵܝܹܐ ܘܡܲܪ̈ܩܝܘܿܢܵܝܹܐ:
ܒܹܗ ܒܲܙܢܵܐ ܐܵܦ ܡܫܝܼܚܵܐ ܟܲܕܼ ܐܸܫܟܲܚ ܝܘܼܠܦܵܢܹܗ: ܡܸܢܹܗ ܐܸܬܼܩܪܝܼܘ
pb. 623
ܡܫܝܼܚܹ̈ܝܐ. ܐܸܢ ܐ̄ܢܵܫ ܗܵܟܹܝܠ ܐܵܚܹ̇ܕܼ ܓܲܒܵܐ ܕܬܹܐܵܕܘܿܪܘܿܣ ܪܲܫܝܼܥܵܐ
ܕܲܥܗܝܼܸܕܼ: ܐܵܘ ܕܲܟܼܬܼܵܒܼܵܘ̈ܗܝ ܚܲܝܢ̈ܦܹܐ ܕܲܒܼܗܘܿܢ ܓܘܼ̈ܕܵܦܹܐ ܕܲܪܫܝܼܡܝܼܢ
ܘܲܐܚܪ̈ܵܢܹܐ ܕܠܵܐ ܡܸܢܝܵܢܵܐ ܓܤ̣ܵܐ ܠܘܼܩܒܲܠ ܐܲܠܵܗܵܐ ܪܲܒܵܐ ܘܦܵܪܘܿܩܲܢ
ܝܼܫܘܿܥ ܡܫܝܼܚܵܐ: ܘܠܵܐ ܡܲܚܪܸܡ ܠܹܗ ܘܠܲܟܼܬܼܝܼ̈ܒܼܵܬܹܗ ܪ̈ܲܫܝܼܥܵܬܼܵܐ:
ܘܲܠܟܼܠܗܘܿܢ ܐܲܝܠܹܝܢ ܕܲܡܩܲܒܿܠܝܼܢ ܠܹܗ ܘܐܵܚ̇ܕܝܼܢ ܓܲܒܹܗ ܐܵܘ ܕܐܵܡ̇ܪܝܼܢ
ܕܲܬܼܪܝܼܨܵܐܝܼܬܼ ܡܦܲܫܸܩ: ܘܠܲܐܝܠܹܝܢ ܕܲܟܼܬܲܒܼܘ ܡܸܛܠܵܬܹܗ ܘܐܸܬܼܚܲܫܲܒܼܘ
ܐܲܟܼܘܵܬܹܗ ܐܵܘ ܕܟܼܵܬܼܒܼܝܼܢ ܚܠܵܦܵܘܗܝ ܐܵܘ ܚܠܵܦ ܟܬܼܵܒܼܵܘ̈ܗܝ ܪ̈ܲܫܝܼܥܹܐ:
ܘܠܲܐܝܠܹܝܢ ܕܐܲܟܼܘܵܬܹܗ ܡܸܬܼܚܲܫܒܼܝܼܢ ܐܵܘ ܐܸܬܼܚܲܫܲܒܼܘ: ܘܥܕܲܡܵܐ ܠܚܲܪܬܼܵܐ
ܩ̣ܵܘܝܘܼ ܐܵܘ ܡܩܵܘܹ̇ܝܢ ܒܲܟܼܦܘܼܪܝܵܐ ܕܐܲܝܟܼ ܗܵܢܵܐ: ܬܸܗܘܸܐ ܩܵܬܼܵܪܵܤܝܼܣ
ܕܝܼܠܹܗ. ܩܵܢܘܿܢܵܐ ܕܲܬܼܠܵܬܲܥܤܲܪ. ܐܸܢ ܐ̄ܢܵܫ ܐܵܚܹ̇ܕܼ ܓܲܒܵܐ ܕܲܟܼܬܼܵܒܹ̈ܐ
ܪ̈ܲܫܝܼܥܹܐ ܕܬܹܐܘܿܕܘܿܪܹܝܬܘܿܣ ܕܲܟܼܬܼܝܼܒܼܝܼܢ ܠܘܼܩܒܲܠ ܗܲܝܡܵܢܘܼܬܼܵܐ
ܬܪܝܼܨܬܵܐ: ܘܠܘܼܩܒܲܠ ܤܘܼܢܗܵܕܘܿܣ ܩܲܕܝܼܫܬܼܵܐ ܕܐܲܦܸܤܘܿܣ
ܩܲܕܼܡܵܝܬܼܵܐ: ܘܠܘܼܩܒܲܠ ܬܪܸܥܤܲܪ ܩܸܦܵܠܹ̈ܠܹܐ ܕܡܵܪܝ ܩܘܼܪܸܠܘܿܣ:
ܘܕܲܐܝܠܹܝܢ ܕܲܟܼܬܲܒܼ ܡܸܛܠ ܬܹܐܵܕܘܿܪܘܿܣ ܘܢܸܤܛܘܿܪܝܼܣ ܪ̈ܲܫܝܼܥܹܐ
ܘܡܸܛܠ ܐ̄ܚܪ̈ܵܢܹܐ: ܕܥܵܘܠܵܐܝܼܬܼ ܐܸܬܼܚܲܫܲܒܼܘ ܐܲܝܟܼ ܬܹܐܵܕܘܿܪܘܿܣ
ܘܢܸܤܛܘܿܪܝܼܣ ܥܗܝܼ̈ܕܹܐ: ܘܲܡܩܲܒܸܿܠ ܠܗܘܿܢ ܐܵܘ ܠܲܟܼܦܘܼܪܝܼܗܘܿܢ.
ܘܡܸܛܠܗܵܢܵܐ ܩܵܪܹܐ ܠܗܘܿܢ ܟܵܦܘܿܪܹ̈ܐ ܡܲܦܠܦܵܢܹ̈ܐ ܕܥܹܕܬܵܐ ܕܡܵܘܕܹܝܢ
ܒܚܘܼܝܵܕܼܵܐ ܩܢܘܿܡܵܝܵܐ ܕܐܲܠܵܗܵܐ ܡܸܠܬܼܵܐ ܠܦܲܓܼܪܵܐ: ܘܠܵܐ ܡܲܚܪܸܡ
ܠܲܟܼܬܼܵܝܼ̈ܒܼܵܬܼܵܐ ܪ̈ܲܫܝܼܥܵܬܼܵܐ ܕܐܲܡܝܼܪ̈ܵܢ ܘܠܲܐܝܠܹܝܢ ܕܐܲܝܟܼ ܗܸܢܹܝܢ ܐܸܬܼܚܲܫܲܒܼܘ
ܐܵܘ ܡܸܬܼܚܲܫܒܼܝܼܢ: ܐܸܠܵܐ ܐܵܦ ܠܟܼܠܗܘܿܢ ܐܲܝܠܹܝܢ ܕܐܲܟܼܬܸܒܼܘ
ܠܘܼܩܒܲܠ ܗܲܝܡܵܢܘܼܬܼܵܐ ܬܪܝܼܨܬܵܐ ܐܵܘ ܠܘܼܩܒܲܠ ܡܵܪܝ ܩܘܼܪܸܠܘܿܣ
ܕܘܼܟܼܪܵܢܹܗ ܠܒܼܘܼܪܟܿܬܼܵܐ ܐܵܘ ܠܘܼܩܒܲܠ ܬܪܸܥܤܲܪ ܩܸܦܵܠܹܐܵܘ̈ܗܝ:
pb. 624
ܘܲܒܼܗܵܕܹܐ ܟܵܦܘܿܪܘܼܬܼܵܐ ܡܝܼܬܲܘ: ܬܸܗܘܸܐ ܩܵܬܼܵܪܵܤܝܼܣ ܕܝܼܠܹܗ.
ܩܵܢܘܿܢܵܐ ܕܐܲܪܒܲܥܤܲܪ. ܐܸܢ ܐ̄ܢܵܫ ܐܵܚܹ̇ܕܼ ܓܲܒܵܐ ܕܐܸܓܲܪܬܵܐ ܗܵܝ̇:
ܕܐܵܡ̇ܪܝܼܢ ܕܝܼܗܝܼܒܼܵܐ ܐܲܟܼܬܒܼܵܗ̇ ܠܡܵܐܪܝܼ ܦܵܪܤܵܝܵܐ: ܕܒܼܵܗ̇ ܟܵܦܲܪ
ܘܠܵܐ ܡܩܲܒܸܠ ܕܡܸܠܬܹܗ ܕܐܲܠܵܗܵܐ ܐܸܬܼܓܲܫܲܡ ܘܲܗܘ̤ܵܐ ܒܲܪܢܵܫܵܐ
ܡ̣ܢ ܡܵܪܬܝ ܡܲܪܝܲܡ ܐܲܡܝܼܢܵܐܝܼܬܼ ܒܬܼܘܼܠܬܼܵܐ ܝܵܠܕܲܬܼ ܐܲܠܵܗܵܐ. ܐܵܡܲ݁ܪ
ܕܹܝܢ: ܕܒܲܪܢܵܫܵܐ ܫܚܝܼܡܵܐ ܐܸܬܼܝܼܠܸܕܼ ܡܸܢܵܗ̇: ܘܩܵܪܹܐ ܠܹܗ ܗܲܝܟܿܠܵܐ:
ܐܲܝܟܼ ܗܵܝ̇ ܕܲܐ̄ܚܪܹܢܵܐ ܐܝܼܬܼܵܘܗܝ ܐܲܠܵܗܵܐ ܡܸܠܬܼܵܐ ܘܲܐ̄ܚܪܹܝܢ ܗ̄ܘ̣ ܒܲܪܢܵܫܵܐ.
ܐܸܠܵܐ ܐܵܦ ܠܡܵܪܝ ܩܘܼܪܸܠܘܿܣ ܕܐܲܟܼܪܸܙ ܗܲܝܡܵܢܘܼܬܼܵܐ ܬܪܝܼܨܬܵܐ
ܕܲܟܼܪܸ̈ܤܛܝܵܢܹܐ ܡܲܟܸܿܣ ܠܹܗ ܐܲܝܟܼ ܗܲܪܵܛܝܼܩܵܐ: ܘܟܼܵܬܹ̇ܒܼ ܝܘܼ̈ܠܦܵܢܹܐ
ܕܕܼܵܡܹ̇ܝܢ ܠܗܵܢ̇ܘܿܢ ܕܐܵܦܘܿܠܝܼܢܵܪܝܼܣ ܪܲܫܝܼܥܵܐ: ܘܲܡܩܲܟܛܪܸܓܼ
ܠܤܘܼܢܗܵܕܘܿܣ ܩܲܕܝܼܫܬܼܵܐ ܕܐܲܦܤܘܿܣ ܩܲܕܼܫܵܝܵܬܼܵܐ ܐܲܝܟܼ ܗܵܝ̇ ܕܠܵܐ
ܒܕܼܝܼܢܵܐ ܘܲܕܼܠܵܐ ܥܘܼܩܵܒܼܵܐ ܫܕܲܬ̤ ܠܢܸܤܛܘܿܪܝܼܣ ܡ̣ܢ ܕܲܪܓܹܗ.
ܘܒܸܐܓܲܪܬܵܐ ܒܝܼܫܬܼܵܐ ܕܲܥܗܝܼܕܼܵܐ ܡ̣ܢ ܠܥܸܠ ܠܲܬܼܪܸܥܤܲܪ ܩܸܦܵܠܹ̈ܐܹܐ
ܕܡܵܪܝ ܩܘܼܪܸܠܘܿܣ ܕܘܼܟܼܪܵܢܹܗ ܠܒܼܘܼܪܟܿܬܼܵܐ ܩܵܪܹܐ ܪ̈ܲܫܝܼܥܹܐ
ܘܤܲܩܘܼ̈ܒܼܠܹܐ ܕܗܲܝܡܵܢܘܼܬܼܵܐ ܬܪܝܼܨܬܵܐ: ܘܐܵܚܹ̇ܬܼ ܓܲܒܵܐ ܕܬܹܐܵܕܘܿܪܘܿܣ
ܘܲܕܢܸܤܛܘܿܪܝܼܣ ܘܲܕܕܘܿܓܡܵܛܲܝ̈ܗܘܿܢ ܘܕܲܟܼܬܼܵܒܲܝ̈ܗܘܿܢ ܒܝܼ̈ܫܹܐ.
ܐܸܢ ܐ̄ܢܵܫ ܗܵܟܹܝܠ ܐܵܚܹ̇ܕܼ ܓܲܒܼܵܐ ܕܗܵܝ̇ ܐܸܓܲܪܬܵܐ: ܘܠܵܐ ܤܵܐܹ̇ܡ
ܠܵܗ̇ ܬܚܹܝܬܼ ܚܸܪܡܵܐ ܘܥܲܡ ܐܲܝܠܹܝܢ ܕܐܵܚ̇ܕܝܼܢ ܓܲܒܵܗ̇ ܘܐܵܡ̇ܪܝܼܢ:
ܕܲܬܼܪܝܼܨܵܐ ܗ̣̄ܝ ܟܠܵܗ̄ ܐܵܘ ܡܢܵܬܼܵܐ ܡܸܢܵܗ̇. ܘܐܲܝܠܹܝܢ ܕܐܲܟܼܬܸܒܼܘ
ܘܲܕܼܡܲܟܼܬܼܒܼܝܼܢ ܡܸܛܠܵܬܼܵܗ̇: ܐܸܘ ܡܸܛܠ ܟܦܘܼܪ̈ܝܹܐ ܕܐܝܼܬܼ ܒܵܗ̇: ܟܲܕܼ
ܡܲܡܪܚܝܼܢ ܕܢܹܐܚܕܘܼܢ ܓܲܒܵܗ̇: ܐܵܘ ܓܲܒܵܐ ܕܪ̈ܘܼܫܥܹܐ ܕܤܝܼܡܝܼܢ
ܒܵܗ̇ ܒܲܫܡܵܐ ܕܐܲܒܼ̈ܗܵܬܼܵܐ ܩܲܕܝܼ̈ܫܹܐ ܐܵܘ ܕܤܘܼܢܗܵܕܘܿܣ ܩܲܕܝܼܫܬܐ
pb. 625
ܕܩܲܠܟܝܼܕܘܿܢܵܐ: ܘܲܥܕܲܡܵܐ ܠܚܲܪܬܼܵܐ ܟܲܬܲܪܘ ܒܗܘܿܢ: ܬܸܗܘܸܐ
ܩܵܬܼܵܪܵܤܝܼܣ ܕܝܼܠܹܗ.
ܒܵܬܲܪ ܗܵܟܹܝܠ ܕܗܵܟܲܢܵܐ ܐܵܘܕܝܼܢܲܢ ܒܗܵܠܹܝܢ ܕܩܲܒܸܿܠܢܲܢ ܡ̣ܢ ܟܬܼܵܒܼܵܐ
ܐܲܠܵܗܵܝܵܐ ܘܡ̣ܢ ܝܘܼܠܦܵܢܵܐ ܕܐܲܒܼ̈ܗܵܬܼܵܐ ܩܲܕܼܝܼ̈ܫܹܐ: ܘܕܼܐܬܿܬܲܚܲܡܘ ܡ̣ܢ
ܐܲܪܥܲܥ ܤܘܼ̈ܢܗܵܕܘܿ ܩܲܕܝܼ̈ܫܵܬܼܵܐ ܕܲܥܗܝܼ̈ܕܼܵܢ ܥܲܠ ܗ̤ܝ ܗܵܝ̇ ܚܕܼܵܐ
ܗܲܝܡܵܢܘܼܬܼܵܐ. ܘܒܼܵܬܲܪ ܕܹܝܢ ܕܐܵܦ ܚܢܲܢ ܐܲܚܸܡܢܲܢ ܥܲܠ ܗܲܪ̈ܵܛܝܼܩܹܐ
ܐܵܘ ܥܲܠ ܪܘܼܫܥܗܘܿܢ: ܘܐܵܦ ܠܘܼܩܒܲܠ ܐܲܝܠܹܝܢ ܕܐܲܡܪܲܚܘ ܘܐܸܚܲܕܼܘ
ܐܵܘ ܐܵܚ̇ܕܝܼܢ ܓܲܒܵܐ ܕܲܬܼܠܵܬܼܵܐ ܩܸܦܵܠܹ̈ܐܹܐ ܥܗܝܼ̈ܕܹܐ: ܐܵܘ ܕܟܲܬܲܪܘ
ܘܕܲܡܟܲܬܪܝܼܢ ܒܛܵܥܝܼܘܼܬܼܗܘܿܢ ܘܲܒܼܿܚܘܼܝܵܒܼܗܘܿܢ. ܐܸܢ ܐ̄ܢܵܫ ܡܸܬܼܟܲܬܲܫ
ܕܢܲܫܠܸܡ ܐܵܘ ܕܢܲܠܸܦ ܐܵܘ ܕܢܲܟܼܬܸܒܼ ܠܘܼܩܒܲܠ ܗܵܠܹܝܢ ܕܟܹܐܢܵܐܝܼܬܼ
ܡܸܢܲܢ ܐܲܬܿܬܲܚܲܡܘ: ܐܸܢ ܐܲܦܸܤܩܘܿܦܵܐ ܗ̄ܘ̣ ܕܹܝܢ ܐܵܘ ܡܢܸܐ
ܒܡܸܢܝܵܢܵܐ ܕܲܩܠܹܝܪܘܿܣ: ܗܵܘ̇ ܕܲܥܒܲܕܼ ܕܲܐܝܟܼ ܗܵܠܹܝܢ ܕܪܲܚܝܼܩܝܼܢ ܡ̣ܢ
ܩܵܢܘܿܢܹ̈ܐ ܕܥܹܕܬܵܐ ܘܲܕܼܟܼܵܗܢܘܼܬܼܵܐ: ܢܸܫܬܿܠܲܚ ܡ̣ܢ ܐܲܦܸܤܩܘܿܦܘܼܬܹܗ
ܐܵܘ ܡ̣ܢ ܩܠܹܝܪܝܼܩܘܼܬܹܗ. ܘܐܸܢ ܕܲܝܪܵܝܵܐ ܗ̄ܘ̣ ܐܵܘ ܥܵܠܡܵܝܵܐ:
ܢܸܬܼܚܪܸܡ.
ܫܠܸܡ̣.
Corpus Text ID:
NHSL Work ID(s):
http://syriaca.org/work/8875Source:
Paulus Bedjan (ed.), Nestorius. Le Livre d’Héraclide de Damas (Paris / Leipzig: Otto Harrassowitz, 1910).Publication Date: February 17, 2019
Preparation of Electronic Edition:
TEI XML encoding by James E. Walters.Syriac text transcribed by William Toma.
Open Access and Copyright:
This electronic edition is designed for open access reuse. The Syriac
base text is in the public domain. The TEI XML edition is copyrighted by
James E. Walters and is released under a Creative Commons Attribution
4.0 International Public License (CC BY 4.0).
The HTML page is copyrighted by Vanderbilt University and released
under a under a Creative Commons Attribution 4.0 International Public
License (CC-BY 4.0, https://creativecommons.org/licenses/by/4.0/).
Attribution for reuse should follow the suggested citation and also
credit the copyright holder of the TEI XML edition.
See details...
How to Cite this Electronic Edition
Note:
Nestorius, “The Book of Heraclides” based upon Paulus Bedjan (ed.), Nestorius. Le Livre d’Héraclide de Damas (Paris / Leipzig: Otto Harrassowitz, 1910), Digital Syriac Corpus, last modified February 17, 2019, https://syriaccorpus.org/391.Bibliography:
“The Book of Heraclides.” In Nestorius. Le Livre d’Héraclide de Damas, edited by . Syriaca.org, 2016-. Entry published . https://syriaccorpus.org/391.Show Citation Styles