Isaac of Nineveh: Discourse 1

ܕܹܚܠܲܬܼ ܐܲܠܵܗܵܐ: ܪܹܫܵܐ ܗ̣̄ܝ ܕܲܡܝܲܬܿܪܘܼܬܼܵܐ. ܝܲܠܕܵܐ ܓܹܝܪ ܡܸܬܼܐܲܡܪܵܐ ܕܗܲܝܡܵܢܘܼܬܼܵܐ. ܡܸܙܕܲܪܥܵܐ ܡܲܢ ܒܠܸܒܵܐ: ܟܲܕܼ ܠܪܸܥܝܵܢܵܐ ܐ̄ܢܵܫ: ܐܲܦܬܼܵܐ ܢܸܬܸܠ ܡ̣ܢ ܢܘܼܬܵܦܵܘ̈ܗܝ ܕܥܵܠܡܵܐ: ܕܲܢܤܲܝܸܟܼ ܠܙܵܘܥܵܘ̈ܗܝ ܦܗܲܝ̈ܐ: ܠܓܼܵܘ ܡ̣ܢ ܫܪܲܓܼܪ̈ܵܓܼܝܵܬܼܵܐ ܕܡܲܪ̈ܢܝܵܬܹܗ ܕܬܼܘܼܩܵܢܵܐ ܗܵܘ̇ ܕܲܥܬܼܝܼܕ. ܠܲܤܝܵܡ ܫܲܬܼܐܸܤܬܼܵܗ̇ ܕܲܡܝܲܬܿܪܘܼܬܼܵܐ: ܠܲܝܬܿ ܕܩܲܕܝܼܡ ܒܐܵܪܼ̈ܫܹܐ ܕܝܼܠܵܢܵܝܹ̈ܐ pb. 2 ܕܝܼܠܵܗ̇: ܠܗܵܝ̇ ܕܟܲܕܼ ܢܸܩܦܘܿܣ ܝܵܬܲܢ ܒܲܓܼܗܵܝܬܼܵܐ ܕܡ̣ܢ ܤܘܼܥܪ̈ܵܢܹܐ: ܠܘܵܬܼ ܡܸܠܬܼܵܐ ܕܢܘܼܗܪܵܐ ܕܲܬܼܪܝܼܨܘܼܬܼ ܫܒܼܝܼ̈ܠܹܐ ܩܲܕܝܼ̈ܫܹܐ: ܗܵܝ̇ ܕܲܡܚܵܘܝܵܢܝܼܬܼܵܐ ܡ̣ܢ ܡܙܲܡܪܵܢܵܐ ܒܝܲܕܼ ܪܘܼܚܵܐ ܐܸܬܼܟܲܢܝܲܬ̤܀ ܠܡܲܚܤܸܢ ܡܸܫܬܿܟܲܚ ܒܲܪܢܵܫܵܐ ܕܲܡܨܸܐ ܡܤܲܝܒܲܪ ܐܝܼܩܵܪܹ̈ܐ: ܐܵܘ ܕܲܠܡܵܐ ܟܠ ܟ̱ܠܹܗ. ܘܗܵܕܹܐ: ܡܸܛܠ ܡܩܲܒܿܠܵܢܘܼܬܼܵܐ ܩܲܠܝܼܠܬܼܵܐ ܕܫܘܼܓܼܢܵܝܹ̈ܐ: ܐܲܝܟܼ ܐ̄ܢܵܫ ܢܹܐܡܲܪ: ܘܐܸܢ ܐܲܝܟܼ ܡܲܠܲܐܟܼܵܐ ܐܝܼܬܼܵܘܗܝ ܒܲܙܢܵܐ܀ ܪܹܫ ܐܘܼܪܚܵܐ ܕܚܲܝܹ̈ܐ: ܠܡܲܥܢܵܝܘܼ ܗܵܘܢܵܐ ܒܡܸ̈ܠܲܝ ܐܲܠܵܗܵܐ: ܘܕܼܘܼܪܵܫܵܐ ܕܒܲܡܤܲܝܒܪܵܢܘܼܬܼܵܐ. ܫܸܩܝܵܐ ܕܹܝܢ ܕܡ̣ܢ ܬܲܡܵܢ: ܡܥܲܕܲܪ ܠܘܵܬܼ ܓܡܝܼܪܘܼܬܼܵܐ ܕܲܒܼܗܵܕܹܐ. ܗܵܟܲܢܵܐ ܡܲܢ ܘܕܲܫܩܝܼܠܘܼܬܼ ܬܲܪܒܿܝܼܬܼܵܐ ܕܲܠܘܵܬܼ ܫܘܼܡܠܵܝܵܐ ܕܲܒܼܗܵܕܹܐ: ܠܝܲܬܼܝܼܪܘܼܬܼ ܤܘܼܢܩܵܢܵܐ: ܕܲܠܗܵܝ̇ ܐܲܬܼܪܵܐ ܬܸܬܸܠ. ܘܥܘܼܕܼܪܵܐ ܕܡ̣ܢ ܬܲܪ̈ܬܲܝܗܹܝܢ: ܗܵܬܲܚ̇ ܩܲܠܝܼܠܵܐܝܼܬܼ ܠܘܵܬܼ ܡܲܤܲܩܬܼܵܐ ܕܟܼܠܹܗ ܒܸܢܝܵܢܵܐ܀ ܠܲܝܬܿ ܕܐܸܫܟܲܚ̣ ܡܸܬܼܩܲܪܲܒܼ ܠܘܵܬܼ ܐܲܠܵܗܵܐ: ܐܸܠܵܐ ܐܲܝܢܵܐ ܕܐܸܬܼܪܲܚܲܩ ܡ̣ܢ ܥܵܠܡܵܐ. ܫܘܼܢܵܝܵܐ ܕܹܝܢ: ܠܵܘ ܠܲܚܙܘܼܩܝܵܐ ܕܡ̣ܢ ܦܲܓܼܪܵܐ ܐܵܡܲ̇ܪܢܵܐ: ܐܸܠܵܐ ܕܡ̣ܢ ܨܸܒܼ̈ܘܵܬܹܗ܀ ܡܝܬܲܪܘܼܬܼܵܐ ܗܵܕܲܐ ܗ̣̄ܝ: ܕܐ̄ܢܵܫ ܒܪܸܥܝܵܢܹܗ ܡ̣ܢ ܥܵܠܡܵܐ ܢܸܗܘܸܐ ܤܦܝܼܩ. ܟܠ ܟܡܵܐ ܕܪܸ̈ܓܼܫܹܐ ܤܵܥ̇ܪܝܼܢ ܨܸܒܼ̈ܘܵܬܼܵܐ: ܠܸܒܵܐ ܕܢܸܫܟܲܬܼ ܡ̣ܢ ܗܲܓܵܓܲܝ̈ܗܹܝܢ: ܠܵܐ ܡܲܨܝܵܐ. ܘܠܵܐ ܚܲܫܹ̈ܐ ܒܵܛ̇ܠܝܼܢ: ܘܠܵܐ ܚܘܼ̈ܫܵܒܹܐ ܒܝܼ̈ܫܹܐ ܤܵܝ̇ܦܝܼܢ: ܒܸܠܥܵܕܼ ܡ̣ܢ ܡܲܕܼܒܿܪܵܐ ܘܚܘܼܪܒܵܐ܀ ܥܕܲܡܵܐ ܓܹܝܪ ܕܬܸܩܢܸܐ ܢܲܦܫܵܐ ܪܵܘܵܝܘܼܬܼܵܐ ܕܲܒܼܗܲܝܡܵܢܘܼܬܼܵܐ ܕܒܲܐܠܵܗܵܐ: ܒܲܡܩܲܒܿܠܵܢܘܼܬܼܵܐ ܕܲܪܓܸܫܬܼܵܐ ܕܚܲܝ̈ܠܹܝܗ̇: ܠܵܐ ܡܚܝܼܠܘܼܬܼܵܐ ܕܪܸܓܼܫܹܐ ܡܲܐܤܝܵܐ: ܘܠܵܐ ܒܚܲܝܠܵܐ ܡܸܬܼܡܲܨܝܵܐ ܠܲܡܕܼܵܫ ܠܗܘܼܠܹܗ ܡܸܬܼܚܲܙܝܵܢܝܼܬܼܵܐ: ܕܐܝܼܬܹܝܗ̇ ܤܝܵܓܼܵܐ ܕܗܵܘ̇ ܕܲܠܓܼܵܘ: ܘܠܵܐ ܪܓܼܝܼܫܵܐ܀ pb. 3 ܡܠܝܼܠܘܼܬܼܵܐ: ܥܸܠܬܼܵܐ ܗ̣̄ܝ ܕܚܹܐܪܘܼܬܼܵܐ. ܘܦܹܐܪܹ̈ܐ ܕܬܲܪ̈ܬܲܝܗܹܝܢ: ܡܸܨܛܲܠܝܵܢܘܼܬܼܵܐ. ܕܒܸܠܥܵܕܼ ܩܲܕܼܡܵܝܬܼܵܐ: ܐܵܦܠܵܐ ܕܬܲܪܬܹܝܢ. ܘܐܲܝܟܵܐ ܕܚܲܤܝܼܪܵܐ ܬܪܲܝܵܢܝܼܬܼܵܐ: ܬܲܡܵܢ ܐܲܝܟܼ ܕܒܲܦܓܼܘܼ̈ܕܹܐ ܐܲܤܝܼܪܵܐ ܬܠܝܼܬܼܵܝܬܼܵܐ܀ ܐܸܡܲܬܼܝ ܕܛܲܝܒܿܘܼܬܼܵܐ ܬܸܤܓܸܐ ܒܒܲܪܢܵܫܵܐ: ܗܵܝܕܹܝܢ ܒܪܸܚ̱ܡܬܼܵܐ ܕܙܲܕܝܼܩܘܼܬܼܵܐ: ܕܸܚܠܬܼܵܐ ܕܡܵܘܬܵܐ: ܬܸܬܼܒܿܤܸܐ. ܘܥܸܠ̈ܠܵܬܼܵܐ ܤܲܓܿܝܼ̈ܐܵܬܼܵܐ ܡܸܫܟܲܚ ܒܢܲܦܫܹܗ: ܕܲܒܼܘܵܠܝܼܬܼܵܐ ܐܝܼܬܹܝܗ̇ ܕܲܚܠܵܦ ܕܸܚܠܲܬܼ ܐܲܠܵܗܵܐ: ܐ̄ܢܵܫ ܐܘܼ̈ܠܨܵܢܹܐ ܢܸܤܒܿܘܿܠ. ܘܐܲܝܠܹܝܢ ܕܡܲܟܿܝܵܢ̈ܝܬܼܵܐ ܡܸܬܼܪ̈ܲܢܝܵܢ ܕܦܲܓܼܪܵܐ ܟܹܐܡܲܬܼ: ܘܲܥܪܝܼܨܵܐܝܼܬܼ ܕܢܸܤܡ̈ܟܼܵܢ ܠܘܵܬܼ ܟܝܵܢܵܐ: ܘܲܠܡܲܚܵܫܘܼ ܢܸܩܦܵܐܝܼܬܼ ܤܝܼ̈ܡܵܢ: ܐܲܝܟܼ ܠܵܐ ܡܸܕܸܡ ܒܦܸܚܡܵܐ ܕܗܵܘ̇ ܡܵܐ ܕܡܸܤܬܲܟܸܐ: ܡ̣ܢ ܟܲܕܼܘܼ ܒܥܲܝܢܵܘ̈ܗܝ ܚܫܝܼ̈ܒܼܵܢ. ܘܲܕܼܠܵܐ ܡܲܨܝܵܐ ܒܸܠܥܵܕܼ ܡ̣ܢ ܫܩܝܼܠܘܼܬܼ ܢܸܤܝܵܢܵܐ ܕܚܲܫܹ̈ܐ ܢܸܕܥܝܼܘܗܝ ܠܲܫܪܵܪܵܐ: ܦܝܵܤܵܐ ܕܥܲܠ ܗܵܕܹܐ ܡܸܢܹܗ ܡ̣ܢ ܪܸܥܝܵܢܵܐ: ܚܲܬܝܼܬܼܵܐܝܼܬܼ ܡܸܫܟܲܚ. ܘܕܲܒܼܛܝܼܠܘܼܬܼܵܐ ܤܲܓܿܝܼܐܬܼܵܐ ܐܝܼܬܼ ܠܹܗ ܠܐܲܠܵܗܵܐ ܥܲܠ ܒܲܪܢܵܫܵܐ: ܘܲܕܼܠܵܐ ܒܫܸܓܼܡܵܐ ܫܒܼܝܼܩ. ܘܝܲܬܿܝܼܪܵܐܝܼܬܼ ܢܲܦܝܼ̈ܩܲܝ ܒܲܒܼܥܵܬܹܗ: ܘܲܛܥܝܼ݁ܢܲܝ ܚܲܫܵܐ ܕܡܸܛܠܵܬܹܗ: ܐܲܝܟܼ ܕܲܒܼܨܒܼܥܵܐ ܚܵܙܹ̇ܝܢ ܢܲܗܝܼܪܵܐܝܼܬܼ. ܡܵܐ ܕܹܝܢ ܕܚܲܤܝܼܪܘܼܬܼ ܗܲܝܡܵܢܘܼܬܼܵܐ ܒܠܸܒܲܢ ܬܸܬ̱ܢܨܒܼ: ܗܵܝܕܹܝܢ ܒܕܲܠܩܘܼܒܼܠܵܝܘܼܬܼܵܐ ܡܸܫܬܲܟܼ̈ܚܵܢ ܟܠܗܹܝܢ. ܠܵܘ ܡܸܛܠ ܒܘܼܚܵܢܵܐ: ܘܲܕܼܗܵܝ̇ ܕܢܸܬܿܬܿܟܸܠ ܥܲܠ ܐܲܠܵܗܵܐ ܠܵܘ ܒܟܼܠܥܸܕܵܢ ܠܲܡ ܡܲܨܠܚܵܐ: ܘܲܕܼܠܵܘ ܗܵܟܲܢܵܐ ܒܛܝܼܠ ܠܹܗ ܠܲܐܠܵܗܵܐ ܥܠܲܝܟ ܠܲܡ ܐܲܝܟܼ ܕܡܸܬܼܪܲܢܝܵܐ: ܤܒܼܝܼܤܵܐܝܼܬܼ ܡܸܬܼܪ̈ܲܡܙܵܢ ܡ̣ܢ ܗܵܠܹܝܢ ܕܟܲܡܝܼܢܝܼܢ ܘܲܒܼܥܲܡܛܵܢܵܐ ܫܵܕܹܝܢ ܓܹܐܪ̈ܲܝܗܘܿܢ܀ ܪܹܫ ܚܲܝܵܘ̈ܗܝ ܫܲܪܝܼܪܹ̈ܐ ܕܒܲܪܢܵܫܵܐ: ܕܸܚܠܲܬܼ ܐܲܠܵܗܵܐ. ܘܗܵܕܹܐ ܥܲܡ ܦܸܗܝܵܐ ܕܨܸܒܼ̈ܘܵܬܼܵܐ ܕܲܬܼܟܲܬܲܪ ܒܢܲܦܫܵܐ: ܠܵܐ ܡܸܬܿܛܦܝܼܤܵܐ. ܡܸܬܼܦܲܠܗܲܕܼ pb. 4 ܓܹܝܪ ܠܸܒܵܐ: ܒܝܲܕܼ ܬܸܫܡܸܫܬܼܵܐ ܕܪܸ̈ܓܼܫܹܐ: ܡ̣ܢ ܗܲܢܝܼܐܘܼܬܼܵܐ ܕܒܲܐܠܵܗܵܐ܀ ܐܲܤܝܼܪܝܼܢ ܐܸܢܘܿܢ ܙܵܘ̈ܥܹܐ ܕܲܠܓܼܵܘ ܒܡܲܪܓܿܫܵܢܘܼܬܼܗܘܿܢ: ܒܝܲܕܼ ܪܸ̈ܓܼܫܹܐ ܡܫܲܡܫܵܢܲܝ̈ܗܘܿܢ܀ ܦܠܝܼܓܼܘܼܬܼܵܐ ܕܠܸܒܵܐ: ܡܲܥܠܵܐ ܥܲܠ ܢܲܦܫܵܐ ܕܸܚܠܬܼܵܐ. ܗܲܝܡܵܢܘܼܬܼܵܐ ܕܹܝܢ: ܐܵܦ ܒܲܦܤܵܩܵܐ ܕܗܲܕܵܡܹ̈ܐ: ܡܸܫܟܿܚܵܐ ܕܲܬܼܓܲܒܲܪ ܬܲܪܥܝܼܬܼܵܐ. ܟܡܵܐ ܕܪܸܚܡܲܬܼ ܦܲܓܼܪܵܐ ܚܲܤܝܼܢܵܐ ܒܵܟܼ: ܕܬܸܗܘܸܐ ܠܒܼܝܼܒܼܵܐ ܘܠܵܐ ܕܲܚܘܼܠܬܼܵܢܵܐ ܠܵܐ ܡܸܫܟܲܚ ܐܲܢ̄ܬܿ: ܡܸܛܠ ܤܲܩܘܼ̈ܒܼܠܹܐ ܤܲܓܿܝܼ̈ܐܹܐ: ܕܐܲܡܝܼܢܝܼܢ ܒܘܲܥܕܵܐ ܕܗܵܘ̇ ܕܐܸܬܼܪܚܸܡ܀ ܐܲܝܢܵܐ ܕܠܐܝܼܩܵܪܵܐ ܢܩܸܐ: ܠܵܐ ܡܸܫܟܚܵܐ ܕܢܸܚܤܪ̈ܵܢ ܠܹܗ ܥܸܠ̈ܠܵܬܼܵܐ ܕܥܵܩ̈ܵܬܼܵܐ܀ ܠܲܝܬܿ ܒܲܪܢܵܫܵܐ: ܕܥܲܡ ܫܘܼܚܠܵܦܵܐ ܕܨܸܒܼ̈ܘܵܬܼܵܐ: ܠܵܐ ܩܵܢܹ̇ܐ ܪܸܥܝܵܢܹܗ ܫܘܼܚܠܵܦܵܐ ܠܐܲܝܢܵܐ ܕܗ̤ܘ ܓܲܒܵܐ ܥܲܡ ܦܸܚܡܗܹܝܢ܀ ܐܸܢ ܡܲܢ ܪܓܸܫܬܼܵܐ ܬܪܲܝܵܢܝܼܬܼܵܐ ܐܝܼܬܹܝܗ̇ ܕܪܸ̈ܓܼܫܹܐ: ܗܵܝ̇ ܕܡܸܢܵܗ̇ ܪܸܓܿܬܼܵܐ ܡܟܼܵܢܵܐ ܠܡܸܬܼܝܼܠܵܕܼܘܼ: ܐܲܝܟܼ ܡܸܠܬܼܵܐ ܕܐܹܘܲܓܼܪܝܼܣ: ܢܸܫܠܘܿܢ ܡܵܕܹܝܢ ܐܲܝܠܹܝܢ ܕܥܲܡ ܦܘܼܪ̈ܬܵܟܹܐ: ܕܲܒܼܫܲܝܢܵܐ ܪܸܥܝܵܢܵܐ ܢܸܛܪܘܼܢ ܡܸܫܬܵܘܕܹܝܢ܀ ܢܲܟܦܵܐ ܗܵܢܵܘ: ܐܲܝܢܵܐ ܕܠܵܘ ܒܢܝܼܫܵܐ ܕܬܲܟܼܬܘܼܫܵܐ ܟܠܹܝܢ ܡ̣ܢ ܘܲܥܕܹܗ ܙܵܘ̈ܥܹܐ ܤܢܲܝ̈ܵܐ: ܐܸܠܵܐ ܕܗ̤ܘ ܫܪܵܪܵܐ ܕܠܸܒܹܗ ܡܢܲܟܸܿܦ ܚܵܘܪܵܐ ܕܪܸܥܝܵܢܹܗ: ܕܠܵܐ ܢܲܩܸܬܼ ܒܚܘܼ̈ܫܵܒܹܐ ܙܲܠܝܼ̈ܠܹܐ ܡܲܪܵܚܵܐܝܼܬܼ. ܘܟܲܕܼ ܚܲܤܝܘܼܬܼܵܐ ܕܬܹܐܪܬܹܗ: ܡܸܤܬܲܗܕܵܐ ܡ̣ܢ ܚܵܘܪܵܐ ܕܒܼܵܒܼ̈ܬܹܗ ܕܲܢܛܝܼܪ̈ܵܢ ܡܗܲܝܡܢܵܐܝܼܬܼ: ܟܘܼܚܵܕܼܵܐ ܐܲܝܟܼ ܐܲܦܲܝ̈ ܬܲܪܥܵܐ ܬܠܸܐ ܒܐܲܬܼܪܵܐ ܟܲܤܝܵܐ ܕܚܘܼܫܵܒܼܵܘ̈ܗܝ. ܕܐܲܝܟܼ ܒܬܼܘܼܠܬܼܵܐ ܡܢܲܟܲܦܬܼܵܐ: ܬܸܗܘܸܐ ܢܛܝܼܪܵܐ ܕܲܟܼܝܘܼܬܼܵܗ̇ ܡܗܲܝܡܢܵܐܝܼܬܼ ܠܲܡܫܝܼܚܵܐ܀ ܠܲܝܬ ܡܸܕܸܡ ܕܗܵܟܲܢܵܐ ܤܵܦܹ̇ܩ ܠܲܡܫܲܢܵܝܘܼ ܥܝܵܕܹ̈ܐ ܙܠܝܼ̈ܠܹܐ ܡ̣ܢ ܢܲܦܫܵܐ: ܘܲܠܡܸܬܼܟܲܣ ܠܥܘܼܗܕܵܢܹ̈ܐ ܡܙܝܼܥܵܢܹ̈ܐ ܡܩܝܼ̈ܡܲܝ ܫܲܠܗܸܒܼ̈ܝܵܬܼܵܐ ܫܓܼܝܼ̈ܫܬܼܵܐ ܒܓܼܘܼܫܡܵܐ: ܐܲܝܟܼ ܒܲܠܝܼܥܘܼܬܼܵܐ ܕܲܒܼܪܸܚܡܲܬܼ ܝܘܼܠܦܵܢܵܐ: ܘܗܸܦܝܵܐ ܕܒܼܵܬܲܪ ܥܘܼܩܵܪܹ̈ܐ ܕܤܘܼܟܵܠܲܝ̈ܗܘܿܢ pb. 5 ܕܦܸܬܼܓܼܵܡܹ̈ܐ ܕܲܟܼܬܼܵܒܹ̈ܐ܀ ܐܸܡܲܬܼܝ ܕܹܝܢ ܕܙܵܘܥܹ̈ܐ ܢܸܥܡܕܼܘܼܢ ܒܗܲܢܝܼܐܘܼܬܼܵܐ ܒܵܬܲܪ ܚܸܟܼܡܬܼܵܐ ܕܐܲܤܝܼܢܵܐ ܒܡܸܠܹ̈ܐ: ܒܝܲܕܼ ܚܲܝܠܵܐ ܕܡܵܬܹ̇ܩ ܒܘܼܝܵܢܵܐ ܡ̣ܢ ܬܲܡܵܢ: ܟܠ ܫܵܒܹ̇ܩ ܒܸܤܬܲܪ ܓܘܼܫܡܹܗ. ܟܲܕܼ ܛܵܥܹ̇ܐ ܠܬܹܒܹܝܠ ܘܲܠܟܼܠ ܕܒܼܵܗ̇: ܘܲܠܟܼܠܗܘܿܢ ܥܘܼ̈ܗܕܵܢܹܐ ܡܩܝܼ̈ܡܲܝ ܨܲܠܡܹ̈ܐ ܕܲܓܼܫܝܼܡܘܼܬܼ ܥܵܠܡܵܐ ܥܵܛܹ̇ܐ ܡ̣ܢ ܢܲܦܫܵܐ. ܘܡ̣ܢ ܚܫܲܝܬܼܵܐ ܟܡܵܐ ܙܲܒܼܢ̈ܝܼܢ ܕܚܘܼ̈ܫܵܒܹܐ ܕܲܥܝܵܕܵܐ: ܤܘܼܥܪ̈ܵܢܵܘ̈ܗܝ ܕܲܟܼܝܵܢܵܐ: ܒܬܸܡܗܵܐ ܘܗ̤ܝ ܢܲܦܫܵܐ ܒܪܸܢܝܵܗ̇ ܦܵܝ̇ܫܵܐ: ܒܚܲܕܼ̈ܬܼܵܬܼܵܐ ܕܦܵܓܼ̈ܥܵܢ ܒܵܗ̇ ܡ̣ܢ ܝܲܡܵܐ ܕܐ̄ܪ̈ܵܙܲܝܗܘܿܢ܀ ܘܐܵܦܸܢ ܒܡܵܘ̈ܗܝ ܥܸܠܵܝܹ̈ܐ ܢܸܗܘܸܐ ܛܵܐܹ̇ܦ ܪܸܥܝܵܢܵܐ: ܟܲܕܼ ܠܵܐ ܢܸܫܟܲܚ ܠܘܵܬܼ ܗܵܢܵܐ ܟ̱ܠܹܗ ܥܘܼܡܩܵܐ ܢܥܲܡܸܩ ܙܵܘܥܵܘ̈ܗܝ: ܠܡܸܚܙܵܐ ܠܟܼܠܗܘܿܢ ܓܲܙܹ̈ܐ ܕܒܲܬܼܗܘܿܡܵܘ̈ܗܝ. ܤܵܦܹ̇ܩ ܗ̄ܘ̣ ܗܸܪܓܵܐ ܒܪܸܚܡܬܹܗ ܦܵܟܲ̇ܪ ܠܚܘܼ̈ܫܵܒܹܐ ܚܲܝܠܬܼܵܢܵܐܝܼܬܼ ܒܝܲܕܼ ܚܘܼ̈ܫܵܒܹܐ ܕܬܲܗܪܵܐ: ܕܢܸܗܘܘܿܢ ܟܠܹܝܢ ܡ̣ܢ ܪܸܢܝܵܐ ܘܪܲܗܛܵܐ ܕܲܠܘܵܬܼ ܟܝܵܢܹܗ ܕܓܼܘܼܫܡܵܐ: ܐܲܝܟܲܢܵܐ ܕܐܸܡ݂ܲܪ ܐ̄ܢܵܫ ܡ̣ܢ ܠܒܼܝܼ̈ܫܲܝ ܐܲܠܵܗܵܐ܀ ܡܸܛܠ ܓܹܝܪ ܕܲܪܦܸܐ ܗ̣̄ܘ ܠܸܒܵܐ: ܐܵܡܲ݁ܪ: ܠܵܐ ܡܸܫܟܲܚ ܕܲܢܤܲܝܒܲܪ ܒܝܼ̈ܫܵܬܼܵܐ ܕܦܵܓܼ̈ܥܵܢ ܒܹܗ ܡ̣ܢ ܠܒܲܪ: ܘܲܩܪܵܒܼܵܐ ܕܡ̣ܢ ܠܵܓܼܵܘ. ܘܝܵܕܼܥܝܼܬܘܿܢ ܠܲܡ: ܕܝܲܩܝܼܪ ܗ̄ܘ̣ ܚܘܼܒܼܵܐ ܒܝܼܫܵܐ ܕܦܲܓܼܪܵܐ. ܘܐܸܢ ܗ̤ܘ ܕܠܸܒܵܐ ܒܝܘܼܠܦܵܢܵܐ ܠܵܐ ܢܸܬܼܥܢܸܐ: ܠܵܐ ܡܸܫܟܿܚܵܐ ܕܲܢܤܲܝܒܲ ܫܓܼܘܼܫܝܵܐ ܕܲܗܡܵܤܹܗ ܕܦܲܓܼܪܵܐ. ܐܲܝܟܼ ܝܲܩܝܼܪܘܼܬܹܗ ܓܹܝܪ ܕܡܲܬܼܩܵܠܵܐ ܠܚܲܪܝܼܦܘܼܬܼ ܢܸܙܠܵܐ ܕܡܲܤܲܐܬܼܵܐ ܠܘܼܩܒܲܠ ܫܓܼܘܼܫܚܵܐ ܕܡܲܫ̈ܒܹܐ: ܗܵܟܲܢܵܐ ܟܘܼܚܵܕܵܐ ܘܕܸܚܠܬܼܵܐ ܠܡܸܨܛܲܠܝܵܢܘܼܬܹܗ ܕܪܸܥܝܵܢܵܐ. ܘܗܵܘ̇ ܡܵܐ ܕܦܸܚܡܵܐ ܕܚܲܤܝܼܪܘܼܬܼܵܐ ܬܲܡܵܢ: ܗ̤ܘ ܟܲܕܼ ܗ̤ܘ ܝܲܬܝܼܪܘܼܬܼ ܡܫܲܠܛܘܼܬܼܵܗ̇ ܕܚܹܐܪܘܼܬܼܵܐ ܒܗܵܕܹܐ. pb. 6 ܟܡܵܐ ܕܬܲܡܵܢ ܬܵܘܤܲܦܬܼܵܐ ܒܚܲܤܝܼܪܘܼܬܼܵܐ: ܗܵܟܲܢܵܐ ܘܥܸܠܬܼܵܐ ܠܲܕܼܠܝܼܠܘܼܬܼ ܙܲܠܝܼܠܘܼܬܼܗܹܝܢ ܕܟܲܦܹ̈ܐ ܒܠܵܐ ܩܵܘܡܵܐ. ܘܗܵܪܟܵܐ ܟܡܵܐ ܕܚܹܐܪܘܼܬܼܵܐ ܒܝܲܕܼ ܡܸܬܿܬܿܪܝܼܡܵܢܘܼܬܼܵܐ ܕܕܸܚܠܬܼܵܐ ܡ̣ܢ ܢܲܦܫܵܐ: ܗܵܟܲܢܵܐ ܡܲܤܲܐܬܹܗ ܕܪܸܥܝܵܢܵܐ ܠܟܼܠ ܓܲܒܿ ܙܵܐ̇ܠܵܐ ܚܲܪܝܼܦܵܐܝܼܬܼ. ܡܵܕܹܝܢ ܡܸܬܿܬܿܙܝܼܥܵܢܘܼܬܼܵܐ: ܬܪܲܝܵܢܘܼܬܼܵܐ ܗ̣̄ܝ ܕܚܹܐܪܘܼܬܼܵܐ. ܘܫܘܼ̈ܓܼܢܵܝܹܐ ܪܸ̈ܥܝܵܢܵܝܹܐ: ܬܪ̈ܲܝܵܢܹܐ ܒܵܬܲܪ ܡܸܨܛܲܠܝܵܢܘܼܬܼܵܐ܀ ܐܸܬܼܚܲܟܲܡ ܠܲܡܤܵܡ ܫܲܬܼܐܸܤܬܼܵܐ ܠܡܲܪܕܝܼܬܼܵܟܼ ܒܐܘܼܪܚܵܐ ܕܐܲܠܵܗܵܐ: ܘܲܒܼܝܵܘ̈ܬܼܵܐ ܙܥܘܿܪܹ̈ܐ ܡܩܝܼܡܵܐ ܠܵܟܼ ܥܲܠ ܬܲܪܥܵܐ ܕܡܲܠܟܘܼܬܼܵܐ: ܕܠܵܐ ܟܪܘܼܟܼܝܵܐ ܕܐܘܼܪܚܵܐ܀ ܠܵܐ ܬܘܚܼܪ ܐܲܝܟܼ ܕܲܒܼܛܲܟܼܤܵܐ ܕܲܪ̈ܕܝܵܐ ܕܡܲܠܦܵܢܹ̈ܐ: ܒܡܸܠܹ̈ܐ ܕܡ̣ܢ ܒܘܼܚܵܢܵܐ ܤܝܼ̈ܡܵܢ ܠܬܲܪܒܿܝܼܬܼܵܐ ܕܕܼܘܼܒܵܪ̈ܲܝܟ: ܕܬܹܐܪܲܒܼ ܢܲܦܫܵܟܼ ܒܪܲܒܿܘܼܬܼ ܤܘܼ̈ܟܵܠܹܐ ܕܲܒܼܗܘܿܢ. ܦܪܘܿܫ ܢܝܼܫܵܐ ܕܡܸܠܬܼܵܐ ܒܟܼܠ ܫܲܪ̈ܒܿܝܼܢ ܕܲܒܼܗܘܿܢ ܬܹܦܓܲܥ ܒܲܟܼܬܼܝܼ̈ܒܼܵܬܼܵܐ: ܕܲܬܼܥܲܡܸܩ ܢܲܦܫܵܟܼ ܠܡܸܫܟܲܢ ܠܘܵܬܼ ܝܲܪܼ̈ܥܵܬܼܵܐ ܪܵܘܪ̈ܒܼܵܬܼܵܐ ܕܐܝܼܬܼ ܒܲܤܝܵܡܵܐ ܕܐ̄ܢܵܫܵܐ ܢܲܗܝܼܪܹ̈ܐ܀ ܐܲܝܠܹܝܢ ܕܲܒܼܕܼܘܼܒܼܵܪ̈ܲܝܗܘܿܢ ܡ̣ܢ ܛܲܝܒܿܘܼܬܼܵܐ ܡܸܬܼܗܲܕܹܝܢ ܠܡܸܬܼܢܲܗܵܪܘܼ: ܒܲܕܼܡܘܼܬܼ ܙܲܠܝܼܩܵܐ ܡܸܕܸܡ ܡܸܬܼܝܲܕܼܥܵܢܵܐ ܡܲܪܓܫܝܼܢ ܐܲܡܝܼܢܵܐܝܼܬܼ ܕܪܵܕܹܐ ܒܲܝܢܵܬܼ ܦܸܬܼܓܼܵܡܹ̈ܐ. ܘܗ̤ܘ ܦܵܪܹܫ ܩܕܼܵܡ ܪܸܥܝܵܢܵܐ ܡܲܡܠܠܵܐ ܫܚܘܼܡܵܐ: ܡ̣ܢ ܫܲܪ̈ܒܹܐ ܕܐܲܡܝܼܪܝܼܢ ܒܪܲܒܿܘܼܬܼ ܪܸܥܝܵܢܵܐ ܠܦܘܼܬܵܚܵܐ ܢܲܦܫܵܢܵܝܵܐ܀ ܒܲܪܢܵܫܵܐ ܕܲܫܚܝܼܡܵܐܝܼܬܼ ܩܵܪܹܐ ܒܦܸܬܼܓܼܵܡܹ̈ܐ ܪܵܘܪ̈ܒܹܐ: ܐܵܦ ܠܸܒܹܗ ܡܸܫܐܲܚܲܡ ܘܫܵܬܲܚܲܡ ܘܫܵܗܹ̇ܐ ܡ̣ܢ ܚܲܝܠܵܐ ܩܲܕܝܼܫܵܐ: ܗܵܘ̇ ܕܝܵܗܹ̇ܒܼ ܠܠܸܒܵܐ ܛܥܵܡܬܼܵܐ ܚܠܝܼܬܼܵܐ ܒܤܘܼ̈ܟܵܠܹܐ pb. 7 ܕܡܲܬܼܡܗܝܼܢ ܢܲܦܫܵܐ. ܟܠ ܡܸܕܼܡ: ܠܘܵܬܼ ܐ̄ܚܝܵܢܹܗ ܡܥܵܕܼ ܪܵܗܹ̇ܛ. ܘܢܲܦܫܵܐ ܕܐܝܼܬܼ ܒܵܗ̇ ܡܢܵܬܼܵܐ ܡ̣ܢ ܪܘܼܚܵܐ: ܡܵܐ ܕܫܵܡ̇ܥܵܐ ܡܸܕܹܡ ܕܲܛܡܝܼܪ ܒܹܗ ܚܲܝܠܵܐ ܪܘܼܚܵܢܵܐ: ܒܫܘܼܠܗܵܒܼܵܐ ܢܵܬܼ̇ܦܵܐ ܠܬܲܫܥܝܼܬܹܗ: ܐܵܦܸܢ ܠܵܘ ܠܟܼܠܢܵܫ ܡܥܝܼܪ ܠܬܲܗܪܵܐ: ܫܲܪܒܵܐ ܕܐܲܡܝܼܪ ܪܘܼܚܵܢܵܐܝܼܬܼ: ܘܲܛܡܝܼܪ ܒܹܗ ܚܲܝܠܵܐ ܪܲܒܵܐ܀ ܡܸܠܬܼܵܐ ܕܥܲܠ ܡܝܲܬܿܪܘܼܬܼܵܐ: ܠܸܒܵܐ ܒܵܥ̇ܝܵܐ ܕܲܡܤܲܪܲܩ ܡ̣ܢ ܐܲܪܥܵܐ ܘܥܸܢܝܵܢܹ̈ܝܗ̇܀ ܒܲܪܢܵܫܵܐ ܕܲܥܡܝܼܠ ܪܸܥܝܵܢܹܗ ܒܨܸܦܬܼܵܐ ܕܥܵܒܼܘܿܪ̈ܝܵܬܼܵܐ: ܫܲܪ̈ܒܹܐ ܕܥܲܠ ܡܝܲܬܿܪܘܼܬܼܵܐ ܠܵܐ ܡܥܝܼܪܝܼܢ ܡܲܚܫܲܒܼܬܹܗ: ܠܘܵܬܼ ܪܸܚܡܲܬܼ ܒܥܵܬܼܵܐ ܕܩܸܢܝܵܢܵܗ̇܀ ܩܲܕܝܼܡ ܐܲܝܟܼ ܕܒܲܗܘܵܝܵܐ ܫܪܵܝܵܐ ܕܡ̣ܢ ܗܘܼ̈ܠܹܐ: ܠܐܲܤܘܼܪܹ̈ܐ ܕܒܲܐܠܵܗܵܐ. ܘܐܵܦܸܢ ܐܲܝܟܼ ܕܲܒܼܦܘܼܪ̈ܢܵܤܹܐ ܛܲܝܒܿܘܼ̈ܬܼܵܢܵܝܹܐ ܒܚܲܕܼܚ̈ܕܼܵܢܹܐ ܐܝܼܬܼ ܐܸܡܲܬܼܝ ܕܩܵܕܹܡ ܗܵܢܵܐ ܠܗܵܘ̇: ܐܲܝܟܼ ܕܲܬܼܚܲܦܸܐ ܪܸܚܡܬܼܵܐ ܠܪܸܚܡܬܼܵܐ. ܒܛܲܟܼܤܵܐ ܕܹܝܢ ܕܲܥܝܵܕܼܵܐ ܕܲܡܕܲܒܿܪܵܢܘܼܬܼܵܐ: ܐ̄ܚܪܵܢܝܵܐܝܼܬܼ ܐܝܼܬܹܝܗ̇ ܒܤܸܕܼܪܵܐ ܕܓܼܵܘܵܐ. ܐܲܢ̄ܬܿ ܕܹܝܢ: ܛܲܟܼܤܵܐ ܓܵܘܢܵܝܵܐ ܛܲܪ. ܐܸܢ ܩܵܕܼܡܵܐ ܠܵܟܼ ܛܲܝܒܿܘܼܬܼܵܐ: ܕܝܼܠܵܗ̇ ܐܝܼܬܹܝܗ̇. ܘܐܸܢ ܠܵܐ: ܒܐܘܼܪܚܵܐ ܕܟܼܠܢܵܫ ܪܵܕܹܐ ܒܝܘܼܒܵܠܵܐ: ܤܲܩ ܠܘܵܬܼ ܡܲܤܲܩܬܼܵܐ ܕܡܲܓܼܕܠܵܐ ܪܘܼܚܵܢܵܝܵܐ܀ ܟܠܡܸܕܸܡ ܕܲܒܼܬܹܐܘܿܪܝܼܵܐ ܡܸܬܼܦܠܲܚ ܘܡܸܫܬܲܡܠܸܐ ܦܘܼܩܕܵܢܵܐ ܡܸܛܠܵܬܹܗ: ܐܵܦ ܗ̤ܘ ܠܵܐ ܡܸܬܼܚܲܙܝܵܢܵܐ ܗ̄ܘ̣ ܟ̱ܠܹܗ ܠܗܲܝ̈ܢܹܐ ܕܒܸܤܪܵܐ. ܘܟܼܠ ܕܲܒܼܤܵܥܘܿܪܘܼܬܼܵܐ: ܟ̱ܠܹܗ ܡܪܲܟܿܒܼܵܐ ܐܝܼܬܼܵܘܗܝ. ܕܚܲܕܼ ܗ̄ܘ̣ ܒܲܠܚܘܿܕܼ ܦܘܼܩܕܵܢܵܐ: ܕܡܸܛܠܵܬܹܗ ܤܢܝܼܩ ܥܲܠ ܬܲܪ̈ܬܲܝܗܹܝܢ. ܗܵܢܵܘ ܕܹܝܢ: ܘܥܲܠ ܬܹܐܘܿܪܝܼܵܐ: ܘܥܲܠ ܦܘܼܠܚܵܢܵܐ. ܡܸܛܠ ܕܲܡܓܲܫܡܘܼܬܼܵܐ ܘܠܵܐ ܡܓܲܫܡܘܼܬܼܵܐ ܘܲܡܠܲܚܡܘܼܬܼܵܐ ܕܬܲܪ̈ܬܲܝܗܹܝܢ: ܗ̤ܘܝܘܼ ܡ̣ܢ ܟܠ. pb. 8 ܡܸܛܠ ܗܵܢܵܐ: ܘܗܵܘ̇ ܕܡܸܛܠܵܬܹܗ: ܥܦܝܼܦܵܐܝܼܬܼ ܡܸܤܬܲܟܲܠ ܡܲܕܥܵܐ ܢܲܗܝܼܪܵܐ: ܐܲܝܟܼ ܕܩܲܕܸܡ̣ ܐܸܬܼܦܲܩܲܕܼ ܒܝܲܕܼ ܛܘܼܒܼܵܢܵܐ ܡܘܼܫܹܐ. ܘܗܵܝ̇ ܕܲܦܫܝܼܛܬܼܵܐ ܗ̣̄ܝ ܡܸܤܬܲܟܿܠܵܐ: ܘܗܵܝ̇ ܕܲܥܦܝܼܦܘܼܬܼܵܐ܀ ܕܩܲܕܝܼܡܘܼܬܼ ܗܘܵܝܵܐ ܡ̇ܢ ܕܡܸܕܸܡ ܥܕܼܝܼܠܵܐܝܼܬܼ: ܠܵܘ ܪܓܸܫܬܹܗ ܕܥܘܼܗܕܵܢܵܐ ܡܲܥܒܿܪܝܼܢ: ܥܲܡ̈ܠܹܐ ܕܠܲܕܼܟܲܝ̈ܐ ܡܸܬܼܝܲܨܦܝܼܢ. ܐܸܠܵܐ ܚܲܫܝܼܫܘܼܬܼ ܥܘܼܗܪܵܢܹܗ ܡ̣ܢ ܪܸܥܝܵܢܵܐ ܢܵܤܒܿܝܼܢ: ܕܲܡܝܲܬܿܪܵܐܝܼܬܼ ܬܸܗܘܸܐ ܗܵܝ̇ ܕܡ̣ܢ ܟܲܕܼܘܼ ܫܲܡܫܲܬ̤ ܡܲܥܒܲܪܬܵܐ ܕܲܒܼܪܸܥܝܵܢܵܐ܀ ܥܵܠܒܵܐ ܗ̣̄ܝ ܝܲܥܢܘܼܬܼܵܗ̇ ܕܢܲܦܫܵܐ ܒܩܸܢܝܵܢܵܐ ܕܲܡܝܲܬܿܪܘܼܬܼܵܐ: ܠܲܡܢܵܬܼ ܪܸܓܼܬܼܵܐ ܕܒܲܪ ܙܵܘܓܵܗ̇ ܒܲܕܼܡܸܬܼܚܲܙ̈ܝܵܢ܀ ܠܟܼܠܡܸܕܸܡ: ܡܫܘܼܚܵܬܼܵܐ ܡܨܲܒܿܬܼܵܐ. ܒܸܠܥܵܕܹܝܗ̇ ܕܹܝܢ ܘܐܵܦ ܐܲܝܠܹܝܢ ܕܲܠܥܘܼܕܼܪܵܢܵܐ ܡܚܝܼܪ̈ܲܢ: ܠܘܵܬܼ ܤܘܼܓܿܦܵܢܵܐ ܕܢܲܗ̈ܦܟܼܵܢ ܚܫܲܚܬܼܵܐ ܕܡܸܢܗܹܝܢ ܟܵܠܝܼܬܼܵܐ: ܘܠܵܐ ܡܸܕܸܡ܀ ܨܵܒܹ̇ܐ ܐܲܢ̄ܬܿ ܕܬܸܫܬܵܘܬܲܦ ܠܐܵܠܵܗܵܐ ܒܡܲܕܥܵܟܼ: ܒܲܫܩܝܼܠܘܼܬܼ ܡܲܪܓܫܵܢܘܼܬܼܵܐ ܕܗܵܝ̇ ܗܲܢܝܼܐܘܼܬܼܵܐ ܠܵܐ ܡܫܲܥܒܿܕܲܬܼ ܠܪܸ̈ܓܼܫܹܐ: ܠܲܡܪܲܚܡܵܢܘܼܬܼܵܐ ܩܲܦ. ܒܡܸܕܸܡ ܓܹܝܪ ܕܠܹܗ ܗ̄ܘ̣ ܡܲܤܒܲܗ: ܟܲܕܼ ܢܸܫܬܿܟܲܚ ܠܓܼܵܘ ܡܸܬܵܟܼ: ܡܸܬܿܬܿܨܝܼܪ ܒܹܗ ܗܵܘ̇ ܫܘܼܦܪܵܐ ܩܲܕܝܼܫܵܐ. ܟ̱ܠܵܢܵܝܘܼܬܼܵܐ ܕܤܘܼܥܪ̈ܵܢܹܐ ܕܲܡܪܲܚܡܵܢܘܼܬܼܵܐ: ܕܠܵܐ ܡܸܕܸܡ ܙܲܒܼܢܵܐ ܕܒܼܡܨܲܥܬܼܵܐ: ܠܲܚܕܼܵܢܵܝܘܼܬܼ ܬܸܫܒܿܘܿܚܬܼܵܗ̇ ܡܲܙܠܲܓܼܬܼܵܐ ܕܐܲܠܵܗܘܼܬܼܵܐ: ܫܵܘܬܵܦܬܼܵܐ ܡܲܩܦܵܐ ܠܢܲܦܫܵܐ܀ ܚܘܼܝܵܕܼܵܐ ܪܘܼܚܵܢܵܝܵܐ ܐܝܼܬܼܵܐܘܗܝ: ܥܘܼܗܕܵܢܵܐ ܠܵܐ ܛܵܒܼܘܿܥܵܐ: ܐܲܝܢܵܐ ܕܲܒܼܫܘܼܠܗܵܒܼܵܐ ܪܸܚ̱ܡܬܼܵܢܵܐ ܠܵܐ ܡܸܬܼܦܲܪܫܵܢܵܐܝܼܬܼ ܢܵܨܹ̇ܦ ܒܠܸܒܵܐ. ܗܵܘ̇ ܕܡ̣ܢ ܐܲܡܝܼܢܘܼܬܼܵܐ ܕܨܹܝܕܼ ܦܘܼ̈ܩܕܵܢܹܐ ܚܲܝܠܵܐ pb. 9 ܢܵܤܹ̇ܒܼ ܠܐܲܤܝܼܪܘܼܬܼܵܐ: ܘܠܵܐ ܫܐܝܼܠܵܐܝܼܬܼ ܘܠܵܐ ܟܝܵܢܵܐܝܼܬܼ: ܡܠܘܿܐܼܵܐ ܡܸܫܬܿܟܲܚ ܬܲܡܵܢ ܠܲܚܙܵܬܼܵܐ ܢܲܦܫܵܢܵܝܬܼܵܐ: ܕܬܸܤܬܿܡܸܟܼ ܥܠܵܘܗܝ ܩܢܘܿܡܵܐܝܼܬܼ. ܘܡܸܛܠܗܵܢܵܐ: ܠܘܵܬܼ ܬܲܗܪܵܐ ܡܸܬܼܢܓܸܕܼ: ܒܥܲܡܝܼܨܘܼܬܼܵܐ ܕܲܥܦܝܼܦܘܼܬܼ ܪܸ̈ܓܼܫܹܐ ܒܸܤܪ̈ܵܢܵܝܹܐ ܘܢܲܦܫܵܢܵܝܹ̈ܐ. ܘܠܵܐ ܐܝܼܬܼ ܫܒܼܝܼܠܵܐ ܐ̄ܚܪܹܢܵܐ ܨܹܝܕܼ ܚܘܼܒܵܐ ܪܘܼܚܵܢܵܐ: ܗܵܘ̇ ܕܐܝܼܬܼܵܘܗܝ ܨܵܝܘܿܪܵܐ ܕܝܘܼܩܢܵܐ ܠܵܐ ܡܸܬܼܚܲܙܝܵܢܵܐ: ܐܸܠܵܐ ܐܸܢ ܠܘܼܩܕܲܡ ܒܲܡܪܲܚܡܵܢܘܼܬܼܵܐ ܐ̄ܢܵܫ ܢܫܲܪܸܐ: ܐܲܝܟܼ ܒܲܪܬܼ ܩܵܠܹܐ ܕܡܵܪܲܢ: ܕܲܠܘܵܬܼ ܓܡܝܼܪܘܼܬܹܗ ܕܐܲܒܼܵܐ ܫܲܬܼܐܸܤܬܼܵܐ: ܠܗܵܕܹܐ ܦܵܩܹ̇ܕܼ ܠܡܸܫܬܲܡܥܵܢܵܘ̈ܗܝ܀ ܐ̄ܚܪܹܬܼܵܐ ܗ̣̄ܝ ܡܸܠܬܼܵܐ ܤܘܼܥܪܵܢܵܝܬܼܵܐ: ܘܲܐ̄ܚܪ̈ܵܢܝܵܬܼܵܐ ܐܸܢܹܝܢ ܡܸܠܹ̈ܐ ܫܲܦܝܼܪ̈ܵܬܼܵܐ. ܘܐܵܦ ܒܸܠܥܵܕܼ ܢܸܤܝܵܢܵܐ ܕܨܸܒܼ̈ܘܵܬܼܵܐ: ܝܵܕܼܥܵܐ ܗ̣̄ܝ ܚܸܟܼܡܬܼܵܐ ܡܸܠܹܝ̈ܗ̇ ܡܨܲܒܿܬܼܵܐ: ܘܠܲܡܡܲܠܵܠܘܼ ܫܪܵܪܵܐ ܟܲܕܼ ܠܵܐ ܡܦܵܤܵܐ ܒܹܗ: ܘܠܲܡܓܲܠܵܚܘܼ ܥܲܠ ܡܝܲܬܿܪܘܼܬܼܵܐ: ܟܲܕܼ ܠܵܐ ܡܬܼܘܿܡ ܫܸܩܠܲܬ̤ ܢܸܤܝܵܢܵܐ ܕܦܘܼܠܚܵܢܵܗ̇: ܡܸܠܬܼܵܐ ܕܡ̣ܢ ܦܘܼܠܚܵܢܵܐ: ܓܲܙܵܐ ܗ̣̄ܝ ܕܬܼܘܼܟܼܠܵܢܵܐ. ܘܚܸܟܼܡܬܼܵܐ ܒܲܛܝܼܠܬܼܵܐ: ܓܘܼܥܠܵܢܵܐ ܗ̣̄ܝ ܡܟܲܚܕܼܵܢܵܐ. ܐܲܝܟܼ ܐܘܼܡܵܢܵܐ ܕܨܵܐܲܪ ܡܲܝ̈ܵܐ ܒܐܸܤܹ̈ܐ: ܘܲܠܨܲܗܝܹܗ ܕܢܸܬܿܠܘܼܢ ܦܘܼܝܵܓܼܵܐ ܠܵܐ ܡܸܫܟܿܚܝܼܢ. ܘܐܲܝܟܼ ܕܚܵܙܹ̇ܐ: ܚܸܠܡܹ̈ܐ ܫܲܦܝܼܪܹ̈ܐ܀ ܐܲܝܢܵܐ ܕܹܝܢ ܕܡ̣ܢ ܢܸܤܝܵܢܵܐ ܕܥܲܡܠܹܗ ܡܡܲܠܸܠ ܥܲܠ ܡܝܲܬܿܪܘܼܬܼܵܐ: ܐܲܝܟܼ ܕܡ̣ܢ ܡܲܪ̈ܗܵܛܹܐ ܕܬܹܐܓܼܘܼܪܬܹܗ ܡܝܲܒܸܿܠ ܡܸܠܬܼܵܐ ܠܫܵܡܘܿܥܵܘ̈ܗܝ: ܘܐܲܝܟܼ ܕܡ̣ܢ ܩܸܢܝܵܢܵܐ ܕܢܲܦܫܹܗ ܙܵܪܲܥ̇ ܝܘܼܠܦܵܢܹܗ ܒܐܸܕܼܢܹ̈ܐ ܕܨܵܝܘܿܬܼܵܘ̈ܗܝ. ܦܵܬܲܚ̇ ܦܘܼܡܹܗ ܒܦܵܪܹܗ̄ܤܝܼܵܐ ܥܲܡ ܒܢܵܘ̈ܗܝ ܪ̈ܘܼܚܵܢܹܐ: ܒܲܕܼܡܘܼܬܼ ܝܲܥܩܘܿܒܼ ܤܵܒܼܵܐ ܠܝܵܘܤܸܦ ܢܲܟܼܦܵܐ. ܘܐܸܢܵܐ ܠܲܡ: ܗܵܐ ܝܸܗ̇ܒܹܿܬܼ ܠܵܟܼ ܡܢܵܬܼܵܐ ܚܕܼܵܐ ܝܲܬܝܼܪܬܵܐ ܥܲܠ ܐܲܚܲܝ̈ܟ: ܕܢܸܤ̇ܒܹܿܬܼ ܡ̣ܢ ܐܝܼܬܼܵܐ ܕܐܵܡܘܿܪ̈ܵܝܹܐ ܒܤܲܝܦܝ ܘܲܒܼܩܸܫܬܿܝ܀ pb. 10 ܟܠ ܒܲܪܢܵܫܵܐ ܗܵܟܹܝܠ ܕܲܡܟܲܬܿܡܝܼܢ ܕܘܼܒܵܪ̈ܵܘܗܝ: ܚܲܒܿܝܼܒܼܝܼܢ ܥܠܵܘܗܝ ܚܲܝܹ̈ܐ ܕܙܲܒܼܢܵܐ. ܘܲܬܼܪܲܝܵܢܵܐ ܕܹܝܢ ܗܵܢܵܐ: ܐܲܝܢܵܐ ܕܡ̣ܢ ܝܑܼܕܲܥܬܼܵܐ ܚܲܤܝܼܪ. ܘܫܲܦܝܼܪ ܐܸܡ݂ܲܪ ܐ̄ܢܵܫ: ܕܲܡܥܝܼܩܵܐ ܕܸܚܠܲܬܼ ܡܵܘܬܵܐ ܠܓܲܒܼܪܵܐ ܒܸܤܪܵܢܵܐ. ܘܐܲܝܢܵܐ ܕܐܝܼܬܼ ܠܹܗ ܤܵܗܕܘܼܬܼܵܐ ܛܵܒܼܬܼܵܐ ܒܢܲܦܫܹܗ: ܗ̤ܘܝܘܼ ܡܸܬܼܪܲܓܼܪܲܓܼ ܠܹܗ: ܐܲܝܟܼ ܕܲܠܚܲܝܹ̈ܐ܀ ܠܵܐ ܢܸܬܼܚܫܸܒܼ ܠܵܟܼ ܚܲܟܿܝܼܡܵܐ ܕܲܫܪܵܪܵܐ: ܐܲܝܢܵܐ ܕܲܚܠܵܦ ܚܲܝܹ̈ܐ ܕܙܲܒܼܢܵܐ: ܠܕܸܚܠܬܼܵܐ ܡܫܲܥܒܲܕܼ ܪܸܥܝܵܢܹܗ܀ ܟܠ ܛܵܒܼ̈ܬܼܵܐ ܘܒܼܝܼ̈ܫܵܬܼܵܐ ܕܨܹܝܕܼ ܦܲܓܼܪܵܐ ܓܵܕܼ̈ܫܵܢ: ܚܸܠܡܹ̈ܐ ܢܸܬܼܚܲܫ̈ܒܵܢ ܠܵܟܼ ܟܠܗܹܝܢ. ܕܠܵܘ ܒܲܠܚܘܿܕܼ ܒܝܲܕܼ ܡܵܘܬܵܐ ܐܝܼܬܼ ܠܵܟܼ ܠܡܸܫܬܪܵܝܘܼ ܡܸܢܗܹܝܢ: ܐܸܠܵܐ ܘܲܟܼܡܵܐ ܙܲܒܼܢ̈ܝܼܢ ܡ̣ܢ ܩܕܼܵܡ ܡܵܘܬܵܐ ܫܵܒܼ̈ܩܵܢ ܠܵܟܼ ܘܲܡܫܲܢ̈ܝܵܢ܀ ܐܸܢ ܐܝܼܬܼ ܡܸܢܗܹܝܢ ܕܲܡܫܵܘܬܿܦܵܐ ܒܗܹܝܢ ܢܲܦܫܵܟܼ: ܠܗܹܝܢ ܬܸܪܢܸܐ ܕܐܝܼܬܲܝܗܹܝܢ ܩܸܢܝܵܢܵܟܼ ܕܲܠܥܵܠܲܡ: ܕܐܵܦ ܠܥܵܠܡܵܐ ܕܲܥܬܼܝܼܕܼ ܥܲܡܵܟܼ ܐܵܙܵܠ̄ܢ̈. ܘܐܸܢ ܫܲܦܝܼܪ̈ܵܬܼܵܐ ܐܸܢܹܝܢ: ܚܕܼܝܼ: ܘܐܵܘܕܵܐ ܠܐܲܠܵܗܵܐ ܒܪܸܥܝܵܢܵܟܼ. ܘܐܸܢ ܒܝܼ̈ܫܵܬܼܵܐ ܐܝܼܬܲܝܗܹܝܢ: ܗ̤ܘܲܝܬܿ ܡܲܟܼܪܸܐ ܘܡܸܬܲܬܲܢܲܚ: ܘܲܒܼܥܝܼ ܓܗܵܝܬܼܵܐ ܕܡܸܢܗܹܝܢ: ܥܲܕܼ ܐܝܼܬܲܝܟ ܒܦܲܓܼܪܵܐ. ܟܠ ܛܵܒܼܬܼܵܐ ܕܹܝܢ ܕܡܸܤܬܲܥܪܵܐ ܠܘܵܬܼܵܟܼ ܡܸܬܼܝܲܕܼܥܵܢܵܐܝܼܬܼ ܘܲܒܼܟܸܤܝܵܐ: ܬܸܗܘܸܐ ܚܲܬܿܝܼܬܼܵܐ ܠܵܟܼ: ܕܡܲܥܡܘܿܕܼܝܼܬܼܵܐ ܘܗܲܝܡܵܢܘܼܬܼܵܐ ܗ̤ܘܲܝ̈ ܠܵܟܼ ܡܸܨܥܵܝܵܐ ܠܘܵܬܼܵܗ̇: ܗܵܢܹ̇ܝܢ ܕܲܒܼܗܹܝܢ ܐܸܬܼܩ̣ܪܝܼܬܿ ܒܝܼܫܘܼܥܡܫܝܼܚܵܐ ܠܲܥܒܼܵܕܹ̈ܐ ܛܵܒܹ̈ܐ. ܕܠܹܗ ܘܠܲܐܒܼܘܼܗܝ ܘܲܠܪܘܼܚܵܐ ܕܩܘܼܕܼܫܵܐ: ܫܘܼܒܼܚܵܐ ܘܐܝܼܩܵܪܵܐ ܘܤܸܓܼܕܬܼܵܐ: ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܐܵܡܹܝܢ.