Isaac of Nineveh: Discourse 2

ܩܘܼܒܵܠܛܲܝܒܿܘܼܬܼܵܐ ܕܢܵܤܘܿܒܼܵܐ ܡܓܲܪܸܓܼ ܠܝܵܗܘܿܒܼܵܐ: ܥܵܠ ܡܵܘ̈ܗܒܼܵܬܼܵܐ ܕܪܵܘܪ̈ܒܼܵܢ ܡ̣ܢ ܩܲܕܼ̈ܡܵܝܬܼܵܐ. ܐܲܝܢܵܐ ܕܟܼܵܐܹ̇ܡ ܥܲܠ ܙܥܘܿܪ̈ܝܵܬܼܵܐ: ܘܐܵܦ ܒܪܵܘܪ̈ܒܼܵܬܼܵܐ ܕܲܓܵܠܵܐ ܐܝܼܬܼܵܘܗܝ ܘܛܵܠܘܿܡܵܐ܀ ܟܪܝܼܗܵܐ ܕܲܡܦܵܣ ܒܟܼܘܼܪܗܵܢܹܗ: ܕܠܝܼܠܵܐ ܐܵܪܤܝܘܼܬܹܗ. ܘܐܲܝܢܵܐ ܕܲܒܼܟܹܐܒܹܗ ܡܵܘܕܸܐ: ܩܲܪܝܼܒܼ ܗ̄ܘ̣ ܠܚܘܼܠܡܵܢܵܐ܀ ܠܸܒܵܐ ܩܲܫܝܵܐ: ܢܸܤܓܿܘܿܢ ܟܹܐܒܼܵܘ̈ܗܝ. ܘܲܟܼܪܝܼܗܵܐ ܕܲܡܪܲܕܼ ܥܲܠ ܐܵܤܝܵܐ: ܫܘܼܢܵܩܹܗ ܡܸܬܿܬܵܘܤܲܦ܀ ܠܲܝܬܿ ܚܛܝܼܬܼܵܐ ܕܠܵܐ ܫܘܼܒܼܩܵܢܵܐ: ܐܸܠܵܐ ܐܲܝܕܵܐ ܕܲܕܠܵܐ ܬܝܵܒܼܘܼܬܼܵܐ ܐܝܼܬܹܝܗ̇. ܘܠܲܝܬܿ ܡܵܘܗܲܒܼܬܼܵܐ ܕܲܕܼܠܵܐ ܬܵܘܤܲܦܬܼܵܐ ܡܩܵܘܝܵܐ: ܐܸܠܵܐ ܐܲܝܕܵܐ ܕܚܲܤܝܼܪܵܐ ܡ̣ܢ ܬܵܘܕܝܼܬܼܵܐ. ܤܲܟܼܠܵܐ ܠܲܡ: ܙܥܘܿܪܝܵܐ ܡܢܵܬܹܗ ܒܥܲܝܢܵܘ̈ܗܝ܀ ܗ̤ܘܲܝܬܿ ܡܸܬܼܥܲܗܲܕܼ ܐܲܡܝܼܢܵܐܝܼܬܼ ܠܐܲܝܠܹܝܢ ܕܲܡܥܲܠܹܝܢ ܡܸܢܵܟܼ ܒܲܡܝܲܬܿܪܘܼܬܼܵܐ: ܕܲܒܼܨܝܼܪܵܐ ܬܸܚܙܸܐ ܢܲܦܫܵܟܼ ܡ̣ܢ ܦܸܚܡܗܘܿܢ ܒܟܼܠܙܒܲܢ. ܘܲܗ̤ܘܲܝܬܿ ܡܸܬܼܒܲܩܸܐ ܒܟܼܠܙܒܲܢ ܒܐܘܼ̈ܠܨܵܢܹܐ ܚܲܤܝܼ̈ܢܹܐ ܕܐܲܝܠܹܝܢ ܕܥܲܤܩܝܼܢ ܘܒܼܝܼܫܝܼܢ ܛܘܼܪ̈ܵܦܲܝܗܘܿܢ: ܕܩܘܼܒܵܠܛܲܝܒܿܘܼܬܼܵܐ ܬܸܬܸܠ ܥܲܠ ܙܥܘܿܪ̈ܝܵܬܼܵܐ ܕܲܫܟܼܝܼ̈ܚܵܢ ܨܹܐܕܲܝܟ: ܘܬܸܫܟܲܚ ܠܲܡܤܲܝܒܵܪܘܼ ܐܸܢܹܝܢ ܒܚܲܕܘܼܬܼܵܐ܀ ܒܙܲܒܼܢܵܐ ܕܐܝܼܬܲܝܟ ܒܡܸܙܕܲܟܼܝܵܢܘܼܬܼܵܐ ܘܫܲܦܠܘܼܬܼܵܐ ܘܡܲܐܝܼܢܘܼܬܼܵܐ: ܘܐܲܤܝܼܪ ܘܲܡܦܲܟܲܪ ܐܲܢ̄ܬܿ ܠܲܒܼܥܸܠܕܲܪܵܟܼ ܒܕܼܵܘܝܘܼܬܼܵܐ ܓܢܝܼܚܵܬܐ ܘܒܲܬܼܥܝܼܫܘܼܬܼܵܐ ܕܦܘܼܠܚܵܢܵܐ ܕܲܚܛܝܼܵܬܼܵܐ: ܐܲܝܵܬܐ ܥܲܠ ܒܵܠܵܟܼ ܙܲܒܼ̈ܢܹܐ ܩܲܕܼ̈ܡܵܝܹܐ ܕܟܲܫܝܼܪܘܼܬܼܵܐ: ܘܕܲܐܝܟܲܢ ܐܵܦ ܥܕܲܡܵܐ ܠܲܙܥܘܿܪ̈ܝܵܬܼܵܐ ܫܩܵܠܛܲܥܢܵܐ ܡܚܵܘܸܐ ܗ̣̄ܘܲܝܬܿ: ܘܒܲܛܢܵܢܵܐ ܡܸܬܿܬܿܙܝܼܥ ܗ̣̄ܘܲܝܬܿ ܠܘܼܩܒܲܠ ܡܥܵܘ̈ܟܼܵܢܹܐ ܕܡܲܪܕܝܼܬܼܵܟܼ. ܘܬܸܢ̈ܚܵܬܼܵܐ ܡܲܤܪܲܚ ܗ̣̄ܘܲܝܬܿ ܥܲܠ ܐܲܦܲܝ̈ pb. 12 ܒܨܝܼܪ̈ܵܬܼܵܐ ܕܡܸܬܼܒܲܤ̈ܝܵܢ ܗ̣̄ܘܲܝ̈ ܡܸܢܵܟܼ ܐܲܝܟܼ ܕܲܒܼܓܸܕܼܫܵܐ: ܘܟܼܠܹܗ ܐܲܢ̄ܬܿ: ܩܵܛܲܪ ܗ̣̄ܘܲܝܬܿ ܟܠܝܼܠܵܐ ܒܙܵܟܼܘܼܬܼܵܐ ܕܲܒܼܗܹܝܢ. ܘܗܵܝܕܹܝܢ ܡܸܟܹܝܠ ܒܗܵܠܹܝܢ ܘܕܲܐܝܟܼ ܗܵܠܹܝܢ ܥܘܼ̈ܗܕܵܢܹܐ: ܡܸܬܿܬܿܥܝܼܪܵܐ ܢܲܦܫܵܟܼ ܐܲܝܟܼ ܕܡ̣ܢ ܥܘܼܡܩܵܐ: ܘܠܵܒܼ̇ܫܵܐ ܫܲܠܗܹܒܼܝܼܬܼܵܐ ܕܲܛܢܵܢܵܐ. ܘܐܲܝܟܼ ܕܡ̣ܢ ܡܝܼ̈ܬܹܐ ܩܵܝ̇ܡܵܐ ܡ̣ܢ ܛܘܼܒܵܥܵܗ̇: ܘܙܵܩ̇ܦܵܐ ܗ̤ܝ ܠܵܗ̇ ܘܐܵܬܼ̇ܝܵܐ ܠܛܲܟܼܤܵܗ̇ ܩܲܕܼܡܵܝܵܐ: ܒܐܵܓܼܘܿܢܵܐ ܚܲܡܝܼܡܵܐ ܕܠܘܼܩܒܲܠ ܤܵܛܵܢܵܐ ܘܲܚܛܝܼܬܼܵܐ܀ ܐܸܬܿܕܲܟܼܪ ܡܲܦܘܼܠܬܼܵܐ ܕܚܲܝ̈ܠܬܼܵܢܹܐ: ܕܬܸܬܼܡܲܟܲܟܼ ܒܲܡܝܲܬܿܪ̈ܵܬܼܵܟܼ. ܘܲܥܗܲܕܼܥܲܤܩܘܼܬܼ ܚܛܵܗܹ̈ܐ ܕܐܲܝܠܹܝܢ ܕܲܢܦܲܠ̣ܘ ܘܬܼܵܒܼܘ: ܘܪܘܼܡܪܵܡܵܐ ܘܐܝܼܩܵܪܵܐ ܕܩܲܒܸܿܠ̣ܘ ܡ̣ܢ ܒܵܬܲܪܟܸܢ: ܕܬܸܬܼܠܲܒܲܒܼ ܒܲܬܼܝܵܒܼܘܼܬܼܵܟܼ܀ ܗ̤ܘܝܼ ܪܵܕܼܘܿܦܵܐ ܠܲܩܢܘܿܡܵܟܼ: ܘܡܸܬܼܪܕܸܦ ܡ̣ܢ ܘܲܥܕܵܟܼ ܒܥܸܠܕܲܪܵܟܼ܀ ܐܸܫܬܲܝܲܢ ܐܲܢ̄ܬܿ ܥܲܡ ܢܲܦܫܵܟܼ: ܘܡܸܫܬܲܝܢܝܼܢ ܥܲܡܵܟܼ ܫܡܲܝܵܐ ܘܐܲܪܥܵܐ. ܐܸܬܼܚܲܦܲܛ ܠܡܸܥܲܠ ܠܒܹܝܬܼ ܓܲܙܵܐ ܕܲܠܓܼܵܘ ܡܸܢܵܟܼ: ܘܲܚܙܲܝܬܵܝܗܝ ܠܗܵܘ̇ ܕܒܲܫܡܲܝܵܐ. ܚܲܕܼ ܐܝܼܬܼܵܘܗܝ ܗܵܢܵܐ ܘܗܵܘ̇: ܘܒܲܚܕܼܵܐ ܡܲܥܲܠܬܼܵܐ ܬܸܚܙܸܐ ܬܪ̈ܲܝܗܘܿܢ. ܤܸܒܿܠܬܼܵܐ ܕܗܵܝ̇ ܡܲܠܟܿܘܼܬܼܵܐ ܠܓܼܵܘ ܡܸܢܵܟܼ ܡܛܲܫܝܵܐ: ܘܲܒܼܓܼܵܘ ܢܲܦܫܵܟܼ. ܥܡܲܕܼ ܐܲܢ̄ܬܿ ܒܵܟܼ ܡ̣ܢ ܚܛܝܼܬܼܵܐ: ܘܬܲܡܵܢ ܡܸܫܟܲܚ ܐܲܢ̄ܬܿ ܡܲܤܩܵܢܹ̈ܐ ܕܲܒܼܗܘܿܢ ܬܸܤܲܩ܀ ܕܡܵܢܵܐ ܐܸܢܹܝܢ ܨܸܒܼ̈ܘܵܬܼܵܐ ܕܥܵܠܡܵܐ ܕܲܥܬܼܝܼܕܼ: ܠܵܐ ܦܲܫܸܩ̣ܘ ܟܬܼܵܒܹ̈ܐ. ܕܐܲܝܟܲܢܵܐ ܕܹܝܢ ܢܩܲܒܸܠ ܡܲܪܓܿܫܵܢܘܼܬܼܵܐ ܕܒܼܘܼܤܵܡܗܹܝܢ ܡ̣ܢ ܟܲܕܼܘܼ: ܤܛܲܪ ܡ̣ܢ ܫܘܼܚܠܵܦܵܐ ܟܝܵܢܵܝܵܐ ܘܫܘܼܢܵܝܵܐ ܐܲܬܼܪܵܢܵܝܵܐ: ܦܫܝܼܩܵܐܝܼܬܼ ܐܲܠܸܦ̣ܘ ܠܲܢ܀ ܘܐܵܦܸܢ ܫܡܵܗܹ̈ܐ ܪ̈ܚܝܼܡܹܐ ܕܨܸܒܼ̈ܘܵܬܼܵܐ ܫܒܼܝܼ̈ܚܵܬܼܵܐ ܕܗܲܢܝܼ̈ܐܵܢ ܘܝܲܦܝܼܪ̈ܵܢ ܠܘܵܬܲܢ ܤܵܡ̣ܘ ܠܗܹܝܢ ܠܓܼܘܼܪܵܓܲܢ: ܒܗܵܝ̇ ܕܐܸܡ݂ܲܪܘ ܕܥܲܝܢܵܐ ܠܵܐ ܚܙܵܬ̤ ܘܐܸܕܼܢܵܐ ܠܵܐ ܫܸܡܥܲܬ̤ ܘܫܲܪܟܵܐ: ܐܸܠܵܐ ܩܲܢܝܵܘܼܬܼ ܕܵܡܝܘܼܬܼܵܐ pb. 13 ܒܠܵܐ ܡܸܬܿܕܲܟܵܢܘܼܬܼܗܹܝܢ ܠܲܚܕܼܵܐ ܡ̣ܢ ܕܲܬܼܢܵܢ: ܫܵܘܕܲܥ ܠܲܢ ܗܵܢܹܝܢ ܕܲܥܬܼܝܼ̈ܕܼܵܢ. ܒܘܼܤܵܡܵܐ ܟܹܝܬܼ ܪܘܼܚܵܢܵܝܵܐ: ܠܵܐ ܗ̄ܘ̣ܵܐ ܚܫܲܚܬܼܵܐ ܗ̄ܘ̣ ܕܨܸܒܼ̈ܘܵܬܼܵܐ ܩܢ̈ܘܿܡܵܝܵܬܼܵܐ: ܕܲܠܒܲܪ ܡ̣ܢ ܝܵܬܼܵܐ ܕܢܵܤܘܿܒܹ̈ܐ ܫܟܼܝܼ̈ܚܵܢ ܒܬܼܘܼܩܵܢܵܐ ܗܵܘ̇ ܕܲܥܬܼܝܼܕܼ ܠܲܢ ܢܸܤܬܲܒܼ̈ܵܢ. ܘܐܸܢ ܠܵܐ ܗܵܝ̇ ܕܡܲܠܟܿܘܼܬܼܵܐ ܕܲܫܡܲܝܵܐ ܠܓܼܵܘ ܡܸܢܟܼܘܿܢ ܗ̣̄ܝ: ܘܗܵܝ̇ ܕܬܹܐܬܸܐ ܡܲܠܟܿܘܼܬܼܵܟܼ: ܡܵܕܹܝܢ ܡܠܘܿܐܵܐ ܕܨܸܒܼ̈ܘܵܬܼܵܐ ܡܸܬܼܪ̈ܲܓܼܫܵܢܝܬܼܵܐ ܩܢܹܝܢܲܢ ܠܓܼܵܘ ܡܸܢܲܢ: ܠܪܲܗܒܼܘܿܢܵܐ ܕܒܼܘܼܤܵܡܵܐ ܕܲܒܼܗܹܝܢ. ܐܵܢܲܢܩܹܐ ܓܹܝܪ: ܕܐܲܟܼܘܵܬܼܗܹܝܢ ܢܸܗܘܸܐ ܐܝܼܬܼ ܠܹܗ ܩܲܢܝܵܘܼܬܼ ܕܘܼܡܝܵܐ ܘܲܠܪܲܗܒܼܘܿܢܵܐ: ܘܐܵܦܸܢ ܡܸܟܵܐ ܒܲܡܢܵܬܼܵܐ: ܒܫܘܼܡܠܵܝܵܐ ܕܹܝܢ ܟ̱ܠܹܗ ܠܗܲܠ. ܒܕܼܵܐܦ ܗܵܝ̇ ܕܐܲܝܟܼ ܕܲܒܼܡܲܚܙܝܼܬܼܵܐ: ܘܐܵܦܸܢ ܠܵܘ ܩܢܘܿܡܵܐܝܼܬܼ: ܡ̣ܢ ܟܠܦܪܘܼܣ: ܩܲܢܵܝܘܼܬܼ ܕܘܼܡܝܵܐ ܡܫܵܘܕܥܵܐ. ܐܸܢ ܕܹܝܢ ܐܲܝܟܼ ܤܵܗ̈ܕܘܵܬܼܵܐ ܫܲܪܝܼܪ̈ܲܬܼܵܐ ܕܲܡܦܲܫ̈ܩܲܝ ܟܬܼܵܒܹ̈ܐ: ܡܲܥܒܿܕܼܵܢܘܼܬܼܵܐ ܗ̣̄ܝ ܡܸܬܼܝܲܕܼܥܵܢܝܼܬܼܵܐ ܕܪܘܼܚܵܐ ܕܩܘܼܕܼܫܵܐ: ܘܗܵܕܹܐ ܡܢܵܬܼܵܐ ܗ̣̄ܝ ܡ̣ܢ ܗܵܝ̇ ܟ̱ܠܵܢܵܝܬܼܵܐ: ܡܵܕܹܝܢ ܤܛܲܪ ܡ̣ܢ ܡܲܥܒܿܕܼܵܢܘܼܬܼܵܐ ܪܘܼܚܵܢܵܝܬܼܵܐ ܕܲܒܼܡܲܪܓܫܵܢܘܼܬܼܵܐ ܡܸܬܼܝܲܕܼܥܵܢܝܼܬܼܵܐ ܗܵܘ̇ܝܵܐ ܒܹܝܬܼ ܠܵܗ̇ ܘܲܠܗܘܿܢ. ܘܠܵܐ ܡܸܕܸܡ ܡܸܬܼܪܲܓܼܫܵܢܵܐ ܠܒܼܘܼܤܵܡܵܐ ܕܩܲܕܼܝܼ̈ܫܹܐ ܡܸܨܥܵܝܵܐ ܡ̣ܢ ܪܸ̈ܓܼܫܹܐ ܘܪ̈ܵܓܼܘܿܫܹܐ ܬܲܡܵܢ: ܤܛܲܪ ܡ̣ܢ ܥܘܼ̈ܒܹܐ ܚܵܒܼ̈ܫܲܝ ܠܟܼܠ ܡܬܲܚܡܵܐܝܼܬܼ. ܕܐܸܢ ܐܲܫܝܼܕܼܘܼܬܼ ܢܘܼܗܪܵܐ ܢܹܐܡܲܪ: ܠܵܐ ܝܲܕܘܼܥܬܼܵܢܝܵܐ ܒܪܲܡ܀ ܪܵܚܹ̇ܡ ܡܝܲܬܿܪܘܼܬܼܵܐ ܐܝܼܬܼܵܘܗܝ: ܠܵܘ ܐܲܝܢܵܐ ܕܫܲܦܝܼܪ̈ܵܬܼܵܐ ܤܵܥ݁ܲܪ ܚܦܝܼܛܵܐܝܼܬܼ: ܐܸܠܵܐ ܐܲܝܢܵܐ ܕܒܼܝܼ̈ܫܵܬܼܵܐ ܕܢܲܩܝܼ̈ܦܵܢ ܠܹܗ: ܒܚܲܕܼܘܼܬܼܵܐ ܡܩܲܒܸܿܠ܀ ܠܵܐ ܪܲܒܵܐ ܕܲܚܠܵܦ ܡܝܲܬܿܪܘܼܬܼܵܐ ܐ̄ܢܵܫ ܒܐܘܼ̈ܠܨܵܢܹܐ ܢܚܲܡܤܸܢ: ܐܲܝܟܼ ܗܵܝ ܕܲܒܼܫܘܼܕܵܠܵܐ ܕܚܘܼ̈ܬܼܚܵܬܹܐ ܠܵܐ ܢܸܬܿܕܵܘܲܕܼ ܪܸܥܝܵܢܵܐ ܡ̣ܢ ܓܒܼܝܼܬܼܵܐ ܕܨܸܒܼܝܵܬܹܗ ܫܲܦܝܼܪܵܐ܀ ܟܠ ܡܸܬܿܬܵܘܝܵܢܘܼܬܼܵܐ ܓܹܝܪ ܕܒܼܵܬܲܪ ܡܸܬܿܬܿܪܝܼܡܵܢܘܼܬܼܵܐ ܕܚܹܐܪܘܼܬܼܵܐ pb. 14 ܗܵܘ̇ܝܵܐ: ܠܵܐ ܚܲܕܼܘܼܬܼܵܐ ܡܸܢܵܗ̇ ܢܵܒܼ̇ܥܵܐ: ܘܠܵܐ ܠܦܘܿܘܼܪܥܵܢܘܼܬܼܵܐ ܡܸܬܼܚܲܫܒܵܐ ܕܩܲܡܵܝ݂ܝ̈ܗ̇܀ ܚܲܦܵܐ ܥܲܠ ܚܲܛܵܝܵܐ: ܟܲܕܼ ܠܵܐ ܚܵܤܲܪ ܐܲܢ̄ܬܿ ܒܹܗ. ܐܸܠܵܐ ܬܠܲܒܿܒܼܝܼܘܗܝ ܠܚܲܝܹ̈ܐ: ܕܢܸܛܥܢܘܼܢܵܟܼ ܪ̈ܲܚܡܹܐ ܕܡܵܪܘܼܬܼܵܐ܀ ܤܡܘܿܟܼ ܠܲܡܚܝܼ̈ܠܹܐ ܘܥܲܚ̈ܝܼܩܲܝ ܪܘܼܚܵܐ ܒܡܸܠܬܼܵܐ ܟܡܵܐ ܕܡܵܛ̇ܝܵܐ ܒܐܝܼܕܲܝ̈ܟ: ܕܲܬܼܤܲܡܟܼܵܟܼ ܝܲܡܝܼܢܵܐ ܛܥܝܼܢܲܬܼ ܠܟܼܠ܀ ܗ̤ܘܝܼ ܫܵܘܬܵܦܵܐ ܥܲܡ ܚܲܫܝܼ̈ܫܲܝ ܠܸܒܵܐ ܒܚܲܫܵܐ ܕܨܲܠܘܿܬܼܵܐ ܘܲܚܢܲܓܼܬܼܵܐ ܕܠܸܒܵܐ: ܘܢܸܬܼܦܬܲܚ ܩܕܼܵܡ ܫܸܐ̈ܠܵܬܼܵܟܼ ܡܲܒܿܘܼܥܵܐ ܕܲܚܢܵܢܵܐ. ܐܲܥܡܸܠ ܝܵܬܼܵܟܼ ܒܒܼܵܥܘܼܬܼܵܐ ܕܟܼܠܥܸܕܵܢ ܩܕܼܵܡ ܐܲܠܵܗܵܐ: ܒܠܸܒܵܐ ܕܲܛܥܝܼܢ ܡܲܚܫܲܒܼܬܼܵܐ ܙܗܝܼܬܼܵܐ ܕܡܲܠܝܵܐ ܚܲܫܵܐ: ܘܲܢܢܲܛܲܪ ܪܸܥܝܵܢܵܟܼ ܡ̣ܢ ܚܘܼ̈ܫܵܒܹܐ ܨܵܐܹ̈ܐ: ܕܠܵܐ ܬܸܙܕܲܠܲܠ ܒܵܟܼ ܐܘܼܪܚܹܗ ܕܐܲܠܵܗܵܐ. ܐܲܦܗܵܐ ܚܙܵܬܼܵܟܼ ܒܥܸܢܝܵܢܵܐ ܐܲܡܝܼܢܵܐ ܕܩܸܪܝܵܢܵܐ ܕܦܘܼܪܫܵܢܵܐ: ܕܕܲܠܡܵܐ ܒܥܸܠܲܬܼ ܒܸܛܠܵܢܵܐ ܢܸܬܼܟܲܬܲܡ ܒܲܚܝܵܪܵܟܼ ܚܸܙܘܵܐ ܢܘܼܟܼܪܵܝܵܐ܀ ܠܵܐ ܬܢܲܤܸܐ ܠܪܸܥܝܵܢܵܟܼ ܐܲܝܟܼ ܕܲܠܒܼܘܼܩܝܵܐ ܒܚܵܘܪܵܐ ܕܚܘܼ̈ܫܵܒܹܐ ܙܲܠܝܼ̈ܠܹܐ ܕܲܡܢܲܤܹܝܢ: ܟܲܕܼ ܤܵܒܲ̇ܪ ܐܲܢ̄ܬܿ ܗ̄ܘ̣ ܕܠܵܐ ܡܸܙܕܟܸܐ ܐܲܢ̄ܬܿ. ܐܵܦ ܚܲܟܿܝܼ̈ܡܹܐ ܐܸܬܿܕܵܘܲܕܼܘ ܒܕܼܘܼܟܿܬܼܵܐ ܗܵܕܹܐ: ܘܲܫܛ̣ܵܘ. ܠܵܐ ܬܸܚܡܘܿܠ ܫܲܠܗܹܒܼܝܼܬܼܵܐ ܒܥܘܼܒܵܟܼ: ܐܲܝܟܼ ܕܐܲܡܝܼܪ: ܕܠܵܐ ܐܘܼ̈ܠܨܵܢܹܐ ܚܲܤܝܼ̈ܢܹܐ ܕܦܲܓܼܪܵܐ: ܥܲܤܩܵܐ ܗ̣̄ܝ ܠܠܵܐ ܡܢܲܦܩܘܼܬܼܵܐ ܕܛܲܠܝܘܼܬܼܵܐ: ܠܡܸܬܼܟܕܼܵܢܘܼ ܬܚܹܝܬܼ ܢܝܼܪܵܗ̇ ܕܩܲܕܝܼܫܘܼܬܼܵܐ܀ ܠܫܘܼܪܵܝ ܥܲܡܛܵܢܵܐ ܕܗܵܘܢܵܐ ܟܲܕܼ ܬܸܬܼܚܵܘܸܐ ܐܵܬ̤ܵܐ ܒܢܲܦܫܵܐ ܗܵܕܲܐ ܗ̣̄ܝ: ܒܡܲܐܝܼܢܘܼܬܼܵܐ ܩܲܕܼܡܵܝܑܬܼ ܕܲܠܘܵܬܼ ܬܸܫܡܸܫܬܼܵܐ ܘܲܨܠܘܿܬܼܵܐ ܡܫܲܪܝܵܐ. ܐ̄ܚܪܵܢܝܵܐܝܼܬܼ ܓܹܝܪ ܕܢܸܬܿܕܪܸܫ ܫܒܼܝܼܠܵܐ ܕܲܠܬܼܵܘܫܵܐ ܒܢܲܦܫܵܐ: ܠܵܐ ܡܲܨܝܵܐ: ܐܸܠܵܐ ܐܸܢ ܠܘܼܩܕܲܡ ܡ̣ܢ ܬܲܡܵܢ ܬܸܦܸܠ. ܐܲܝܟܼ pb. 15 ܕܟܲܕܼ ܬܸܬܼܓܠܸܙ ܡ̣ܢ ܥܘܼܕܼܪܵܢܵܐ ܐܲܠܵܗܵܐ: ܗܵܘ̇ ܕܡܲܪܕܝܼܬܹܗ ܡ̣ܢ ܬܲܡܵܢ ܗܵܘ̇ܝܵܐ ܠܘܵܬܹܗ: ܕܠܝܼܠܵܐܝܼܬܼ ܒܐܝܼܕܲܝ̈ܗܘܿܢ ܕܒܲܥ̈ܠܲܝ ܕܲܪܵܐ ܬܸܦܸܠ. ܘܲܐ̄ܚܪܹܬܼܵܐ. ܕܟܲܕܼ ܬܸܗܘܸܐ ܬܘܼܒܼ ܕܠܵܐ ܨܸܦܬܼܵܐ ܡ̣ܢ ܗܵܠܹܝܢ ܕܲܡܝܲܬܪܘܼܬܼܵܐ: ܡ̣ܢ ܟܠܦܪܘܿܣ: ܠܘܵܬܼ ܗܵܢܹܝܢ ܕܕܲܠܩܘܼܒܼܠܵܐ ܬܸܬܼܓܿܪܸܦ. ܫܘܼܢܵܝܵܐ ܡ̇ܢ ܕܡ̣ܢ ܐܲܝܢܵܐ ܕܗ̤ܘ ܓܲܒܵܐ: ܫܘܼܪܵܝܵܐ ܐܝܼܬܼܵܘܗܝ ܕܲܠܘܵܬܼ ܓܲܒܵܐ ܕܕܲܠܩܘܼܒܼܠܵܐ. ܬܸܥܫܲܢ ܥܒܼܝܼܕܬܵܐ ܕܲܡܝܲܬܿܪܘܼܬܼܵܐ ܥܲܠ ܢܲܦܫܵܐ: ܘܬܸܪܢܸܐ ܒܵܗ̇: ܘܫܲܪܟܵܐ܀ ܚܵܘܵܐ ܩܕܼܵܡ ܐܲܠܵܗܵܐ ܡܚܝܼܠܘܼܬܼܵܟܼ ܒܟܼܠܥܸܕܵܢ. ܕܠܵܐ ܢܸܒܼܨܘܿܢ ܢܘܼܟܼܪ̈ܵܝܹܐ ܚܲܝܠܵܟܼ: ܟܲܕܼ ܬܸܫܬܵܘܚܲܕܼ ܡ̣ܢ ܡܥܲܕܪܵܢܵܟܼ. ܥܦܝܼܦܵܐ ܐܝܼܬܼܵܘܗܝ: ܦܘܼܠܚܵܢܹܗ ܕܲܙܩܝܼܦܵܐ. ܘܗܵܕܹܐ: ܠܦܘܼܬܼ ܥܦܝܼܦܘܼܬܹܗ ܕܲܟܼܝܵܢܵܐ. ܕܡܸܬܼܦܲܠܲܓܼ ܠܲܡ̈ܢܵܘܵܬܼܵܐ: ܬܲܪܬܹܝܢ. ܠܲܡܤܲܝܒܿܪܵܢܘܼܬܼܵܐ ܕܐܘܼ̈ܠܨܵܢܹܐ ܕܦܲܓܼܪܵܐ: ܕܡܸܬܼܓܲܡܪܵܐ ܒܡܲܥܒܿܕܼܵܢܘܼܬܼܵܐ ܕܚܸܡܬܼܵܐ ܕܢܲܦܫܵܐ: ܘܡܸܬܼܩܲܫܝܵܐ ܤܵܥܘܿܪܘܼܬܼܵܐ. ܘܲܠܦܘܼܠܚܵܢܵܐ ܩܲܛܝܼܢܵܐ ܕܡܲܕܥܵܐ: ܒܥܸܢܝܵܢܹ̈ܐ ܐܲܠܵܗܵܝܹ̈ܐ ܘܐܲܡܝܼܢܘܼܬܼܵܐ ܕܲܨܠܘܿܬܼܵܐ ܘܫܲܪܟܵܐ: ܕܡܸܬܼܦܲܠܚܵܐ ܒܲܡܢܵܬܼܵܐ ܗܵܝ̇ ܪܸܓܿܬܼܵܢܵܝܬܼܵܐ: ܘܡܸܫܬܲܡܗܵܐ ܬܹܐܘܿܪܝܼܵܐ. ܘܲܚܕܼܵܐ ܡ̇ܢ: ܠܲܡܢܵܬܼܵܐ ܚܵܫܘܿܫܬܼܵܐ ܡܕܲܟܿܝܵܐ ܒܝܲܕܼ ܚܲܝܠܹܗ ܕܲܛܢܵܢܵܐ. ܘܲܐ̄ܚܪܹܬܼܵܐ: ܒܝܲܕܼ ܡܲܥܒܿܕܼܵܢܘܼܬܼܵܐ ܕܚܘܼܒܵܐ ܕܢܲܦܫܵܐ: ܕܐܝܼܬܹܝܗ̇ ܡܸܬܼܝܲܐܒܼܵܢܘܼܬܼܵܐ ܟܝܵܢܵܝܬܼܵܐ: ܠܲܡܢܵܬܼܵܐ ܡܸܤܬܲܟܿܠܵܢܝܼܬܼܵܐ ܡܨܲܠܠܵܐ܀ ܟܠܡ̇ܢ ܗܵܟܹܝܠ ܕܡܸܢܩܕܵܡ ܢܘܼܦܵܩܵܐ ܕܒܲܡܢܵܬܼܵܐ ܩܲܕܼܡܵܝܬܼܵܐ ܦܵܤܲܥ̇ ܥܲܠܗܵܝ̇ ܕܬܲܪܬܹܝܢ ܡܸܛܠ ܗܲܢܝܼܐܘܼܬܼܵܗ̇: ܘܝܲܐܝܼܒܼܵܐܝܼܬܼ ܕܠܵܐ ܐܹܡܲܪ ܚܒܸܢܵܢܵܐܝܼܬܼ: ܪܘܼܓܼܙܵܐ ܡܥܲܬܸܕܼ ܕܢܸܢܫܲܡ ܠܩܘܼܒܼܠܹܗ. ܒܗܵܝ̇ ܕܟܲܕܼ ܠܵܐ ܠܘܼܩܕܲܡ pb. 16 ܐܲܡܝܼܬܼ ܗܲܕܵܡܵܘ̈ܗܝ ܕܒܲܐܪܥܵܐ: ܗܵܢܵܘ ܕܹܝܢ: ܐܲܤܝܼ ܟܪܝܼܗܘܼܬܼܵܐ ܕܚܘܼܫܵܒܼܵܘ̈ܗܝ ܒܲܡܤܲܝܒܿܪܵܢܘܼܬܼܵܐ ܕܥܲܡܠܹܗ ܘܨܲܗܪܹܗ ܕܲܙܩܝܼܦܵܐ: ܐܲܡܪܲܚ̣ ܠܲܡܗܲܓܵܓܼܘܼ ܒܗܵܘܢܹܗ ܫܘܼܒܼܚܹܗ ܕܲܙܝܼܦܵܐ. ܘܗܵܕܹܐ ܐܝܼܬܹܝܗ̇ ܗܵܝ̇ ܕܡ̣ܢ ܩܲܕܼܝܼ̈ܫܹܐ ܩܲܕ̈ܡܵܝܹܐ ܐܲܡܝܼܪܵܐ: ܕܡ̣ܢ ܩܕܼܵܡ ܕܢܸܫܠܘܿܢ ܡ̣ܢ ܡܚܝܼܠܘܼܬܼܵܐ ܗܸܢܘܿܢ ܪܸ̈ܓܼܫܹܐ: ܐܸܢ ܨܵܒܹ̇ܐ ܗܵܘܢܵܐ ܠܡܸܤܲܩ ܠܲܙܩܝܼܦܵܐ: ܪܘܼܓܼܙܹܗ ܕܐܲܠܵܗܵܐ ܐܵܬܹ̇ܐ ܥܠܵܘܗܝ܀ ܡܲܤܲܩܬܼܵܐ ܕܠܲܙܩܝܼܦܵܐ ܡܲܥܒܿܕܲܬܼ ܪܘܼܓܼܙܵܐ: ܠܵܘ ܠܲܡܢܵܬܼܵܐ ܗܵܝ̇ ܩܲܕܼܡܵܝܬܼܵܐ ܕܲܡܤܲܝܒܿܪܵܢܘܼܬܼܵܐ ܕܐܘܼ̈ܠܨܵܢܹܐ ܕܐܝܼܬܹܝܗ̇ ܙܩܝܼܦܘܼܬܼܵܐ ܕܦܲܓܼܪܵܐ ܩܵܪܹܐ: ܐܸܠܵܐ ܠܡܲܤܲܩܬܼܵܐ ܕܬܹܐܘܿܪܝܼܵܐ ܕܐܝܼܬܹܝܗ̇ ܡܢܵܬܼܵܐ ܕܬܲܪܬܹܝܢ: ܗܵܝ̇ ܕܡ̣ܢ ܒܵܬܲܪ ܚܘܼܠܡܵܢܵܐ ܕܢܲܦܫܵܐ ܗܵܘ̇ܝܵܐ. ܕܐܲܝܢܵܐ ܠܲܡ ܕܟܲܕܼ ܡܟܲܬܼܡ ܪܸܥܝܵܢܹܗ ܒܚܲܫܹ̈ܐ ܡܨܲܗܪܹ̈ܐ: ܪܵܗܹ̇ܛ ܠܲܡܗܲܓܵܓܼܵܘܼ ܒܠܸܒܹܗ ܫܪܲܓܼܪ̈ܵܓܼܝܵܬܼܵܐ ܕܚܘܼ̈ܫܵܒܹܐ ܕܲܥܬܼܝܼ̈ܕܼܵܬܼܵܐ: ܒܲܡܤܵܡ ܒܪܹܫܵܐ ܡܸܫܬܲܬܲܩ. ܒܗܵܝ̇ ܕܟܲܕܼ ܠܵܐ ܠܘܼܩܕܲܡ ܙܲܗܝܼ ܪܸܥܝܵܢܹܗ ܒܐܘܼ̈ܠܨܵܢܹܐ ܕܟܼܘܼܒܵܫ ܪ̈ܓܼܝܼܓܼܵܬܼܵܐ ܕܒܸܤܪܵܐ: ܪܗܸܛ̣ ܡ̣ܢ ܡܲܫܡܲܥ ܐܸܕܼܢܵܐ ܘܲܕܼܝܘܿܬܼܵܐ ܠܘܼܩܒܲܠ ܐܲܦܵܘ̈ܗܝ: ܠܡܸܪܕܵܐ ܒܐܘܼܪܚܵܐ ܡܲܠܝܲܬܼ ܥܲܡܛܵܢܵܐ ܟܲܕܼ ܤܲܡ̈ܝܵܢ ܒܵܒܼ̈ܬܹܗ. ܗܵܝ̇ ܕܐܵܦ ܐܲܝܠܹܝܢ ܕܲܚܠܝܼܡܵܐ ܚܙܵܬܼܗܘܿܢ ܘܡܲܠܝܵܐ ܢܘܼܗܪܵܐ: ܘܗܲܕܿܝܵܝܵܐ ܩܢܹܝܢ ܛܲܝܒܿܘܼܬܼܵܐ: ܒܩܹܘܲܢܕܹܝܢܘܿܣ ܐܝܼܬܲܝܗܘܿܢ ܕܠܹܠܲܝ ܐܝܼܡܵܩ. ܟܲܕܼ ܡܲܠ̈ܝܵܢ ܒܵܒܼܵܬܼ̈ܗܘܿܢ ܕܸܡ̈ܥܹܐ: ܘܒܲܨܠܘܿܬܼܵܐ ܘܒܲܒܼܟܼܵܬܼܵܐ ܡܲܩܦܝܼܢ ܠܸܠܝܵܐ ܠܐܝܼܡܵܡܵܐ: ܡܸܛܠ ܩܸܢܛܵܐ ܕܡܲܪܕܝܼܬܼܵܐ: ܘܲܫܩܝܼ̈ܦܹܐ ܚܲܤܝܼ̈ܢܹܐ ܕܲܒܼܗܘܿܢ ܦܵܓܼܥ̇ܝܼܢ: ܘܐܸܤܟܹ̈ܡܹܐ ܕܲܫܪܵܪܵܐ ܕܲܤܒܼܝܼܤܵܐܝܼܬܼ ܫܟܝܼܚܝܼܢ ܒܐܘܼܪܚܵܐ ܥܲܡ ܡܕܲܡ̈ܝܵܢܹܐ. ܗܵܠܹܝܢ ܠܲܡ ܕܐܲܠܵܗܵܐ: ܡ̣ܢ ܢܲܦܫܗܹܝܢ ܐܵܬܼ̈ܝܵܢ: ܟܲܕܼ ܐܲܢ̄ܬܿ ܠܵܐ ܪܓܼܝܼܫ ܐܲܢ̄ܬܿ: ܐܸܢ ܢܸܗܘܸܐ ܐܲܬܼܪܵܐ ܕܠܸܒܵܐ ܕܲܟܼܝܵܐ ܘܠܵܐ ܡܛܵܘܫܵܐ. ܐܸܢ ܠܵܐ ܡܕܲܟܲܝ pb. 17 ܒܵܒܼܘܿܢܵܐ ܙܥܘܿܪܵܐ ܕܢܲܦܫܵܟܼ: ܠܵܐ ܬܲܡܪܲܚ ܠܡܲܨܵܕܼܘܼ ܒܐܸܤܦܹܝܪ ܫܸܡܫܵܐ: ܕܲܠܡܵܐ ܬܸܬܼܓܠܸܙ ܘܐܵܦ ܡ̣ܢ ܚܙܵܬܼܵܐ ܕܲܥܝܵܕܼܵܐ: ܕܐܝܼܬܹܝܗ̇ ܗܲܝܡܵܢܘܼܬܼܵܐ ܦܫܝܼܛܬܼܵܐ ܘܡܲܟܿܝܼܟܼܘܼܬܼܵܐ: ܘܬܼܵܘܕܝܼܬܼܵܐ ܠܸܒܵܢܵܝܬܼܵܐ: ܘܦܘܼܠܚܵܢܵܐ ܙܥܘܿܪܵܐ ܕܐܲܝܟܼ ܚܲܝܠܵܟܼ: ܘܬܸܫܬܕܸܐ ܠܚܲܕܼ ܡ̣ܢ ܐܲܬܼܪ̈ܵܘܵܬܼܵܐ ܡܸܬܼܝܲܕܼܥܵܢܹ̈ܐ: ܕܐܝܼܬܼܵܘܗܝ ܚܸܫܟܵܐ ܕܲܠܒܲܪ ܡ̣ܢ ܐܲܠܵܗܵܐ: ܠܡܸܥܲܠ ܐܲܝܟܼ ܗܵܘ̇ ܕܐܲܡܪܲܚ̣ ܒܢܲܚ̈ܬܹܐ ܨܵܐܹ̈ܐ ܠܡܸܫܬܿܘܼܬܼܵܐ܀ ܡ̣ܢ ܥܲܡܠܵܐ ܘܲܙܗܝܼܪܘܼܬܼܵܐ: ܘܲܙܗܝܼܪܘܼܬܼܵܐ: ܢܵܒܼ̇ܥܵܐ ܙܲܗܝܼܘܼܬܼܵܐ ܕܚܘܼ̈ܫܵܒܼܵܐ. ܘܡ̣ܢ ܙܲܗܝܘܼܬܼܵܐ ܕܚܘܼ̈ܫܵܒܹܐ: ܢܘܼܗܪܵܐ ܕܬܲܪܥܝܼܬܼܵܐ. ܘܡܸܟܵܐ: ܡ̣ܢ ܛܲܝܒܿܘܼܬܼܵܐ ܡܸܬܼܗܲܕܸܐ ܗܵܘܢܵܐ: ܠܘܵܬܼ ܗܵܘ̇ ܡܸܕܸܡ ܕܠܵܐ ܫܲܠܝܼܛ ܠܪܸ̈ܓܼܫܹܐ: ܠܵܐ ܠܡܲܠܵܦܘܼ ܘܠܵܐ ܠܡܹܐܠܲܦ܀ ܬܸܬܼܚܫܸܒܼ ܠܵܟܼ ܡܝܲܬܿܪܘܼܬܼܵܐ ܕܐܝܼܬܹܝܗ̇: ܦܲܓܼܪܵܐ. ܬܹܐܘܿܪܝܼܵܐ ܕܹܝܢ: ܢܲܦܫܵܐ. ܬܲܪ̈ܬܲܝܗܹܝܢ ܕܹܝܢ: ܚܲܕܼ ܒܲܪܢܵܫܵܐ ܡܫܲܠܡܵܢܵܐ ܕܪܘܼܚ: ܡܚܲܝܲܕܼ ܡ̣ܢ ܡܢܵܘ̈ܵܬܼܵܐ ܡܸܬܼܪ̈ܲܓܼܫܵܢܝܵܬܼܵܐ ܘܡܸܬܼܝܲܕܼܥܵܢ̈ܝܵܬܼܵܐ. ܘܐܲܝܟܲܢܵܐ ܡܲܨܝܵܐ ܕܠܵܐ ܡܲܨܝܵܐ ܕܬܹܐܬܸܐ ܠܲܗܘܵܝܵܐ ܘܲܠܡܵܘܠܵܕܼܵܐ ܢܲܦܫܵܐ ܒܸܠܥܵܕܼ ܡܗܲܕܡܘܼܬܼܵܐ ܕܲܡܫܲܡܠ̱ܝܘܼܬܼ ܓܒܼܝܼܠܘܼܬܹܗ ܕܦܲܓܼܪܵܐ: ܗܵܟܲܢܵܐ ܠܵܐ ܡܲܨܝܵܐ ܬܹܐܘܿܪܝܼܵܐ ܢܲܦܫܵܐ ܕܬܲܪܬܹܝܢ ܕܐܝܼܬܹܝܗ̇ ܪܘܼܚܵܐ ܕܓܸܠܝܵܢܹ̈ܐ: ܕܬܸܬܿܨܝܼܪ ܒܟܲܪܤܹܗ ܕܡܲܕܿܥܵܐ ܡܩܲܒܿܠܵܢܵܐ ܕܲܡܠܘܿܐܵܐ ܕܙܲܪܥܵܐ ܪܘܼܚܵܢܵܝܵܐ: ܒܸܠܥܵܕܼ ܓܫܝܼܡܘܼܬܼ ܦܘܼܠܚܵܢܵܐ ܕܲܡܝܲܬܿܪܘܼܬܼܵܐ ܒܲܝܬܵܗ̇ ܕܝܼܕܲܥܬܼܵܐ ܡܩܲܒܿܠܵܢܝܼܬܼܵܐ ܕܓܸܠܝܵܢܹ̈ܐ܀ ܬܹܐܘܿܪܝܼܵܐ ܕܝܼܬܹܝܗ̇: ܪܓܸܫܬܼܵܐ ܕܐ̄ܪ̈ܵܙܹܐ ܐܲܠܵܗܵܝܹ̈ܐ: ܕܲܛܡܝܼܪܝܼܢ ܒܨܸܒܼ̈ܘܵܬܼܵܐ ܕܡܸܬܼܡܲܠ̈ܠܵܢ܀ ܐܸܡܲܬܼܝ ܕܹܝܢ ܕܬܸܫܡܲܥ ܪܚܘܼܩܝܵܐ ܕܡ̣ܢ ܥܵܠܡܵܐ: ܐܵܘ ܫܒܼܝܼܩܘܼܬܼܵܐ ܕܥܵܠܡܵܐ: ܐܵܘ ܕܲܟܼܝܼܘܼܬܼܵܐ ܕܡ̣ܢ ܥܵܠܡܵܐ: ܠܘܼܩܕܲܡ ܤܢܝܼܩ ܐܲܢ̄ܬܿ ܠܡܹܐܠܲܦ pb. 18 ܘܲܠܡܸܕܲܥ: ܠܵܘ ܗܸܕܝܼܘܿܛܵܐܝܼܬܼ ܐܸܠܵܐ ܒܙܵܘ̈ܥܹܐ ܝܲܕܘܼ̈ܥܬܼܵܢܹܐ: ܕܡܵܢܵܘ ܟܘܼܢܵܝܹܗ ܕܥܵܠܡܵܐ: ܘܡ̣ܢ ܟܡܵܐ ܦܘܼܪ̈ܫܵܢܹܐ ܡܸܬܼܩܲܝܲܡ ܗܵܢܵܐ ܫܡܵܐ: ܘܗܵܝܕܹܝܢ ܬܸܫܟܲܚ ܬܸܕܲܥ ܢܲܦܫܵܟܼ: ܕܲܟܼܡܵܐ ܗ̣̄ܝ ܠܵܟܼ ܪܲܚܝܼܩܘܼܬܼܵܐ ܐܵܘ ܚܘܼܠܛܵܢܵܐ ܕܲܠܘܵܬܼ ܥܵܠܡܵܐ. ܐܸܠܵܐ ܠܘܼܩܕܲܡ ܝܑܼܕܲܥ̣ ܐ̄ܢܵܫ ܡܵܢܵܘ ܥܵܠܡܵܐ: ܐܵܦ ܠܵܐ ܡܲܕܼܪܸܟܼ ܕܒܲܟܼܡܵܐ ܗܲܕܵܡܝܼ̈ܢ ܪܲܚܝܼܩ ܐܵܦ ܡܦܲܟܲܪ ܒܓܼܵܘܹܗ܀ ܤܲܓܿܝܼ̈ܐܹܐ ܐܸܢܘܿܢ ܐܲܝܠܹܝܢ ܕܲܒܼܬܲܪܬܹܝܢ ܘܲܬܼܠܵܬܼ ܨܸܒܼ̈ܘܵܢ ܕܲܟܼܠܵܘ ܢܲܦܫܗܘܿܢ ܡ̣ܢ ܥܵܠܡܵܐ: ܐܲܤܒܲܪܘ ܥܲܠ ܢܲܦܫܗܘܿܢ ܕܝܲܬܝܼܪܹ̈ܐ ܐܸܢܘܿܢ ܠܒܲܪ ܡܸܢܹܗ ܒܕܼܘܼܒܵܪ̈ܲܝܗܘܿܢ. ܒܗܵܝ̇ ܕܠܵܐ ܐܸܤܬܲܟܲܠܘ ܘܲܚܙܵܘ ܚܲܟܿܝܼܡܵܐܝܼܬܼ: ܕܲܒܼܚܲܕܼ ܘܲܬܼܪܹܝܢ ܗܲܕܵܡܹ̈ܐ ܡܲܝܝܼܬܼܝܼܢ ܠܥܵܠܡܵܐ: ܫܲܪܟܵܐ ܕܹܝܢ ܕܗܲܕܵܡܲܝ̈ܗܘܿܢ ܚܲܝܝܼܢ ܐܸܢܘܿܢ ܒܓܼܵܘ ܓܘܼܫܡܹܗ ܕܥܵܠܡܵܐ. ܘܒܲܕܼܓܼܘܿܢ: ܐܵܦܠܵܐ ܒܚܲܫܲܝ̈ܗܘܿܢ ܐܸܫܟܲܚ̣ܘ ܠܡܲܪܓܵܫܘܼ. ܘܲܒܼܗܵܝ̇ ܕܠܵܐ ܐܲܪܓܸܫ̣ܘ: ܐܵܦܠܵܐ ܥܲܠ ܐܵܤܝܘܼܬܼܗܘܿܢ ܐܸܬܼܒܛܸܠ ܠܗܘܿܢ܀ ܥܵܠܡܵܐ ܡܸܬܼܐܡܲܪ ܡ̣ܢ ܒܘܼܚܵܢܵܐ ܕܬܹܐܘܿܪܝܼܵܐ: ܡܩܲܝܡܘܼܬܼ ܫܡܵܐ ܓܵܘܵܢܵܝܵܐ: ܕܢܵܦܹ̇ܠ ܥܲܠ ܚܲܫܹ̈ܐ ܡܦܲܪ̈ܫܹܐ. ܐܸܡܲܬܼܝ ܕܹܝܢ ܕܲܠܚܲܫܹ̈ܐ ܓܵܘܵܢܵܐܝܼܬܼ ܨܵܒܹ̇ܝܢܲܢ ܕܢܸܩܪܸܐ: ܩܵܪܹܝܢܲܢ ܠܗܘܿܢ ܥܵܠܡܵܐ. ܟܲܕܼ ܕܹܝܢ ܡܦܲܪܫܵܐܝܼܬܼ: ܚܲܫܹ̈ܐ ܩܵܪܹܝܢܲܢ: ܒܦܘܼܪܵܫ ܫܡܵܗܹ̈ܐ ܕܝܼܠܗܘܿܢ܀ ܚܲܫܹ̈ܐ: ܡܢܵܘ̈ܬܼܵܐ ܐܸܢܘܿܢ ܕܪܲܗܛܵܐ ܕܝܘܼܒܵܠܹܗ ܕܥܵܠܡܵܐ. ܘܐܲܝܟܵܐ ܕܚܲܫܹ̈ܐ ܒܛܸܠ̣ܘ: ܬܲܡܵܢ ܦܵܫ̣ ܠܹܗ ܥܵܠܡܵܐ ܡ̣ܢ ܝܘܼܒܵܠܹܗ. ܕܐܝܼܬܲܝܗܘܿܢ: ܪܸܚܡܲܬܼ ܥܘܼܬܼܪܵܐ. ܟܘܼܢܵܫ ܨܸܒܼ̈ܘܵܬܼܵܐ. ܦܛܵܡܵܐ ܕܦܲܓܼܪܵܐ: ܕܡܸܢܹܗ ܡܲܪܕܝܼܬܼܵܐ ܕܚܲܫܵܐ ܕܙܘܼܘܵܓܼܵܐ. ܪܸܚܡܲܬܼ ܐܝܼܩܵܪܹ̈ܐ: ܕܐܝܼܬܹܝܗ̇ ܢܸܒܼܥܵܐ ܕܲܚܤܵܡܵܐ. ܡܕܲܒܿܪܵܢܘܼܬܼܵܐ ܕܪܹܫܵܢܘܼܬܼܵܐ. ܚܘܼܬܼܪܵܐ ܘܓܲܐܝܘܼܬܼܵܐ ܕܫܘܼܠܛܵܢܵܐ. pb. 19 ܤܸܩܠܵܐ. ܬܸܫܒܿܘܿܚܬܼܵܐ ܐ̄ܢܵܫܵܝܬܼܵܐ: ܕܐܝܼܬܹܝܗ̇ ܥܸܠܬܼܵܐ ܕܐܲܟܿܬܼܵܢܘܼܬܼܵܐ. ܕܸܚܠ̱ܬܼܵܐ ܕܦܲܓܼܪܵܐ܀ ܐܲܝܟܵܐ ܕܹܝܢ ܕܗܵܠܹܝܢ ܐܸܫܬܲܠܝܼ ܡ̣ܢ ܪܲܗܛܵܐ: ܬܲܡܵܢ ܒܲܡܢܵܬܼܵܐ ܐܲܝܟܼ ܦܘܼܚܵܡܵܐ ܕܦܵܪܫܗܹܝܢ: ܥܵܠܡܵܐ ܒܛܸܠ̣ ܡ̣ܢ ܩܘܼܝܵܡܹܗ ܘܦܵܫ̣. ܐܲܝܟܼ ܕܲܒܼܚܲܕܼ ܚܲܕܼ ܡ̣ܢ ܩܲܕܝܼ̈ܫܹܐ ܕܟܲܕ ܚܲܚܝܼܢ: ܡܲܝܝܼܬܝܼܢ ܐܸܢܘܿܢ. ܚܲܚܝܼܢ ܡ̇ܢ ܒܲܦܓܲܪ: ܐܸܠܵܐ ܠܵܘ ܕܹܝܢ ܒܸܤܪܵܢܵܐܝܼܬܼ ܚܵܐܹ̇ܝܢ. ܚܙܝܼ ܕܒܲܐܝܼܠܹܝܢ ܡ̣ܢ ܗܵܠܹܝܢ ܚܲܝ ܐܲܢ̄ܬܿ: ܘܗܵܝܕܹܝܢ ܝܵܕܲܥ̇ ܐܲܢ̄ܬܿ ܕܒܲܟܼܡܵܐ ܡܢܵܘ̈ܵܬܼܵܐ ܐܝܼܬܲܝܟ ܚܲܝܵܐ ܠܥܵܠܡܵܐ: ܘܒܲܟܼܡܵܐ ܡܝܼܬܼܵܐ܀ ܐܸܡܲܬܼܝ ܕܝܼܠܸܦ̣ܬܿ ܡܵܢܵܘ ܥܵܠܡܵܐ: ܡܸܢܗܘܿܢ ܕܗܵܠܹܝܢ ܦܘܼܪ̈ܫܵܢܹܐ ܝܵܠܹ̇ܦ ܐܲܢ̄ܬܿ: ܘܐܵܦ ܥܘܼܪܓܵܠܵܟܼ ܕܒܹܗ: ܐܵܘ ܤܦܝܼܩܘܼܬܼܵܟܼ ܕܡܸܢܹܗ܀ ܤܵܟܼܵܐ: ܥܵܠܡܵܐ ܐܝܼܬܼܵܘܗܝ: ܕܘܼܒܵܪܵܐ ܦܲܓܼܪܵܢܵܝܵܐ ܘܬܲܪܥܝܼܬܼܵܐ ܕܒܸܤܪܵܐ. ܡܸܛܠ ܕܐܵܦ ܡܪܝܼܡܘܼܬܼܵܐ ܕܡܸܢܹܗ: ܒܗܵܠܹܝܢ ܬܲܪܬܹܝܢ ܡܸܬܼܝܲܕܼܥܵܐ. ܡ̣ܢ ܫܘܼܓܼܢܵܝܵܐ ܕܕܼܘܼܒܵܪܹ̈ܐ: ܘܡ̣ܢ ܦܘܼܪܫܵܢܵܐ ܕܙܵܘ̈ܥܹܐ܀ ܡ̣ܢ ܢܸܒܼ̈ܗܹܐ ܕܪܸܥܝܵܢܵܟܼ ܥܲܠ ܨܸܒܼ̈ܘܵܬܼܵܐ ܕܲܥܠܲܝܗܹܝܢ ܦܵܗܹ̇ܐ ܒܙܵܘܥܵܘ̈ܗܝ: ܡܲܕܼܪܸܟܼ ܐܲܢ̄ܬܿ ܡܫܘܼܚܬܼܵܐ ܕܕܼܘܼܒܵܪ̈ܲܝܟ. ܕܥܲܠ ܐܲܝܠܹܝܢ ܤܵܘܲܚ ܟܝܵܢܵܐ ܕܠܵܐ ܥܲܡܠܵܐ: ܘܐܲܝܠܹܝܢ ܐܸܢܘܿܢ ܢܸܒܼ̈ܗܹܐ ܕܐܲܡܝܼܢܘܼܬܼܵܐ: ܘܐܲܝܠܹܝܢ ܐܸܢܘܿܢ ܕܓܸܕܼܫܵܐ ܡܙܝܼܥ ܠܗܘܿܢ. ܘܕܐܸܢ ܫܩܝܼܠܵܐ ܠܪܸܥܝܵܢܵܐ ܟܠ ܟ̱ܠܹܗ ܪܓܸܫܬܼܵܐ ܕܙܵܘ̈ܥܹܐ ܠܵܐ ܓܫܝܼ̈ܡܹܐ: ܐܵܘ ܟ̱ܠܹܗ ܗܘܼܠܵܢܵܐܝܼܬܼ ܪܵܦܹ̇ܬܼ. ܘܗ̤ܝ ܗܘܼܠܵܢܵܝܘܼܬܹܗ ܚܲܫܵܢܵܫܝܬܼܵܐ ܗ̣̄ܝ: ܐܵܘ ܟܹܝܬܼ ܛܲܒܼ̈ܥܹܐ ܐܸܢܘܿܢ ܕܲܓܼܫܝܼܡܘܼܬܼ ܦܘܼܠܚܵܢܵܐ: ܕܡܸܫܬܪܲܓܼܪܲܓܼ ܪܸܥܝܵܢܵܐ ܒܠܵܐ ܨܸܒܼܝܵܢܹܗ ܒܐܲܝܠܹܝܢ ܕܲܒܼܗܹܝܢ ܡܝܲܬܿܪ̈ܵܬܼܵܐ ܦܵܠܲܚ. ܘܡܸܢܗܹܝܢ ܠܵܐ ܟܪܝܼܗܵܐܝܼܬܼ ܠܪܸܬܼܚܵܐ ܢܵܤܹ̇ܒܼ ܥܸܠܬܼܵܐ ܘܲܠܟܼܘܼܢܵܫܵܐ pb. 20 ܕܚܘܼ̈ܫܵܒܹܐ: ܕܲܒܼܢܝܼܫܵܐ ܫܲܦܝܼܪܵܐ ܓܫܝܼܡܵܐܝܼܬܼ ܓܫܝܼܡܵܐܝܼܬܼ ܝܵܕܲܥ̇ ܠܡܸܦܠܲܚ ܪܸܥܝܵܢܵܐ ܡܸܛܠ ܠܵܐ ܡܢܲܦܩܘܼܬܹܗ: ܐܵܦܸܢ ܠܵܘ ܚܲܫܵܢܵܐܝܼܬܼ: ܘܕܸܐܢ ܠܵܐ ܡܸܬܼܡܪܲܗ ܒܟܲܤܝܘܼܬܼ ܦܸܓܼܥܹ̈ܐ ܕܛܲܒܼܥܲܝ̈ ܚܘܼ̈ܫܵܒܹܐ ܪܸܗܝܵܢܵܐ ܡܸܛܠ ܫܘܼܠܗܵܒܹܗ ܝܲܬܿܝܼܪܵܐ ܕܒܲܐܠܵܗܵܐ: ܗܵܘ̇ ܕܲܡܥܵܕܼ ܠܡܸܦܤܲܩ ܥܘܼ̈ܗܕܵܢܹܐ ܤܪ̈ܝܼܩܹܐ. ܗܵܠܹܝܢ ܪ̈ܘܼܫܡܹܐ ܙܥܘܿܪܹ̈ܐ ܕܲܒܼܪܹܫܵܐ ܗܵܢܵܐ: ܤܵܦ̇ܩܝܼܢ ܠܒܲܪܢܵܫܵܐ ܠܲܡܢܲܗܵܪܘܼܬܹܗ: ܐܸܢ ܫܠܸܡ ܘܦܵܪܘܿܫ: ܚܠܵܦ ܟܬܼܵܒܹ̈ܐ ܤܲܓܝܼ̈ܐܹܐ܀ ܚܲܤܝܼܢܵܐ ܒܒܲܪܢܵܫܵܐ: ܕܸܚܠܬܼܵܐ ܕܦܲܓܼܪܵܐ. ܘܕܲܐܝܟܼ ܗܵܟܲܢܵܐ: ܕܙܲܒܼ̈ܝܼܢ ܤܲܓܿܝܼ̈ܐܵܢ ܡ̣ܢ ܫܒܼܝܼ̈ܚܵܬܼܵܐ ܘܲܡܝܲܩܪ̈ܵܬܼܵܐ ܦܵܐܹ̇ܫ ܡܸܛܠܵܬܼܵܗ̇. ܡܵܐ ܕܹܝܢ ܕܲܬܿܕܼܝܩ ܥܲܠ ܗܵܕܹܐ ܕܸܚܠܬܼܵܐ ܕܢܲܦܫܵܐ: ܗܵܟܲܢܵܐ ܚܵܝ̇ܒܵܐ ܡ̣ܢ ܩܕܼܵܡܹܝܗ̇: ܐܲܝܟܼ ܩܹܪܘܼܬܼܵܐ ܡ̣ܢ ܚܲܝܠܵܗ̇ ܕܫܲܠܗܹܒܼܝܼܬܼܵܐ.