Discourse 3

ܟܠ ܢܲܦܫܵܐ ܕܹܝܢ ܕܬܼܵܘܤܲܦܬܼܵܐ ܕܡܲܪܢܝܼܬܼܵܐ ܕܟܼܘܼܢܵܫ ܨܸܒܼ̈ܘܵܬܼܵܐ ܠܵܐ ܡܲܥܠܵܐ ܥܲܠ ܗܵܢܹܝܢ ܕܲܟܼܝܵܢܵܗ̇: ܠܵܐ ܤܢܝܼܩܵܐ ܥܲܠ ܒܛܝܼܠܘܼܬܼܵܐ ܤܲܓܝܼܐܬܼܵܐ: ܠܡܸܫܟܵܚܘܼ ܡܸܢܵܗ̇ ܘܒܼܵܗ̇ ܢܸܒܼ̈ܗܹܐ ܕܚܸܟܼܡ̱ܬܼܵܐ ܕܥܲܠ ܐܲܠܵܗܵܐ. ܗ̤ܝ ܕܹܝܢ ܫܲܠܝܘܼܬܼܵܗ̇ ܕܡ̣ܢ ܥܵܠܡܵܐ ܟܝܵܢܵܐܝܼܬܼ: ܪܦܵܬܼܵܐ ܡܥܝܼܪܵܐ ܕܤܘܼ̈ܟܵܠܹܐ ܒܢܲܦܫܵܐ: ܕܡܸܢܗܘܿܢ ܠܘܵܬܼ ܐܲܠܵܗܵܐ ܬܸܬܼܥܲܠܸܐ: ܘܲܒܼܬܸܡܗܵܐ ܢܩܵܘܸܐ܀ ܐܸܡܼܬܼܝ ܕܹܝܢ ܕܡܲܝ̈ܵܐ ܕܡ̣ܢ ܠܒܲܪ ܥܲܠ ܡܥܝܼܢܵܐ ܕܢܲܦܫܵܐ ܠܵܐ ܢܸܥܠܘܼܢ: ܢܸܗܘܿܢ ܡܲܝ̈ܵܐ ܕܡ̣ܢ ܟܝܵܢܵܗ̇ ܢܵܒܼܥ̇ܝܼܢ: ܤܘܼ̈ܟܵܠܹܐ ܐܸܢܘܿܢ ܬܗܝܼܪܹ̈ܐ: ܕܡܸܬܿܬܿܙܝܼܥܝܼܢ ܥܲܠ ܐܲܠܵܗܵܐ ܒܟܼܠܥܸܕܵܢ܀ ܟܠ ܐܸܡܲܬܼܝ pb. 21 ܗܵܟܹܝܠ ܕܲܠܒܲܪ ܡ̣ܢ ܗܵܕܹܐ ܬܸܫܟܲܚ: ܐܵܘ ܥܸܠܬܼܵܐ ܡ̣ܢ ܥܘܼܗܕܵܢܵܐ ܢܘܼܟܼܪܵܝܵܐ ܫܸܩܠܲܬ̤: ܐܵܘ ܪܸ̈ܓܼܫܹܐ ܐܲܙܝܼܥܘ ܥܠܹܝܗ̇ ܫܓܼܘܼܫܝܵܐ: ܒܝܲܕܼ ܦܸܓܼܥܹ̈ܐ ܕܨܸܒܼ̈ܘܵܬܼܵܐ. ܡܵܐ ܕܹܝܢ ܕܪܸ̈ܓܼܫܹܐ ܐܸܬܿܬܿܤܝܼܓܼܘ ܒܝܲܕܼ ܫܸܠܝܵܐ ܕܠܵܐ ܫܘܵܪ̈ܵܬܼܵܐ: ܘܥܘܼ̈ܗܕܵܢܹܐ ܢܸܥܬ̇ܩܘܼܢ ܒܝܲܕܼ ܥܘܼܕܼܪܵܢܵܐ ܕܡ̣ܢ ܗܵܢܵܐ: ܗܵܝܕܹܝܢ ܬܸܚܙܸܐ ܠܲܟܼܝܵܢܵܝܘܼܬܼܵܐ ܕܚܘܼ̈ܫܵܒܹܐ ܢܲܦܫܵܢܵܝܹ̈ܐ ܕܡܵܢܵܐ ܐܸܢܘܿܢ: ܘܡܵܢܵܐ ܐܝܼܬܼܵܘܗܝ ܟܝܵܢܵܗ̇ ܕܢܲܦܫܵܐ: ܘܐܲܝܠܹܝܢ ܓܲܙܹ̈ܐ ܐܲܤܝܼܢܝܼܢ ܒܵܗ̇. ܓܲܙܹ̈ܐ ܕܹܝܢ: ܤܘܼ̈ܟܵܠܹܐ ܠܵܐ ܓܫܝܼ̈ܡܹܐ: ܕܪܵܦ̇ܬܝܼܢ ܗܸܢܘܿܢ ܡ̣ܢ ܢܲܦܫܗܘܿܢ: ܕܠܵܐ ܒܛܝܼܠܘܼܬܼܵܐ ܘܥܲܡܠܵܐ ܕܲܥܠܲܝܗܘܿܢ. ܕܐܵܦܠܵܐ ܝܵܕܲܥ̇ ܒܲܪܢܵܫܵܐ: ܕܕܲܐܝܟܼ ܗܵܠܹܝܢ ܚܘܼ̈ܫܵܒܹܐ ܡܸܬܿܬܿܙܝܼܥܝܼܢ ܒܲܟܼܝܵܢܵܐ ܐ̄ܢܵܫܵܝܵܐ: ܘܡܲܢ̣ܘܼ ܗܘ̤ܵܐ ܠܹܗ ܡܲܠܦܵܢܵܐ: ܐܵܘ ܐܲܝܟܲܢ ܐܸܫܟܲܚ ܗܵܘ̇ ܡܸܕܸܡ ܕܐܵܦ ܗܵܘ̇ ܡܵܐ ܕܝܵܕܲܥ̇ ܠܡܸܬܼܢܵܐ ܠܚܲܒܼܪܹܗ ܠܵܐ ܝܵܕܲܥ̇: ܘܡܲܢ̣ܘܼ ܗܘ̤ܵܐ ܠܹܗ ܫܲܒܵܠܵܐ ܠܘܵܬܼ ܗܵܘ̇ ܕܠܵܐ ܝܑܼܠܸܦ̣ ܡ̣ܢ ܐ̄ܚܪܹܝܢ. ܗܵܢܵܐ ܐܝܼܬܼܵܘܗܝ ܟܝܵܢܵܗ̇ ܕܢܲܦܫܵܐ. ܡܵܕܹܝܢ ܚܲܫܹ̈ܐ: ܬܵܘܤܲܦܬܼܵܐ ܐܸܢܘܿܢ ܕܡ̣ܢ ܥܸܠ̈ܠܵܬܼܵܐ ܒܢܲܦܫܵܐ. ܡ̣ܢ ܟܝܵܢܵܗ̇ ܕܹܝܢ: ܠܵܐ ܐܝܿܬܹܝܗ̇ ܚܵܫܘܿܫܬܼܵܐ܀ ܐܸܡܲܬܼܝ ܕܝܹܢ ܕܚܲܫܹ̈ܐ ܢܲܦܫܵܢܵܝܹ̈ܐ ܘܦܲܓܼܪ̈ܵܢܵܝܹܐ ܬܸܫܟܲܚ ܒܕܼܘܼܟ ܒܲܟܼܬܼܵܒܹ̈ܐ: ܠܦܘܼܬܼ ܥܸܠ̈ܠܵܬܼܵܐ ܐܲܡܝܼܪ̈ܵܢ. ܠܢܲܦܫܵܐ ܡܲܢ: ܟܝܵܢܵܐܝܼܬܼ ܚܲܫܹ̈ܐ ܠܲܝܬܿ ܠܵܗ̇܀ ܦܝܼܠܵܤ̈ܘܿܦܹܐ ܕܹܝܢ ܕܲܠܒܲܪ: ܗܵܕܹܐ ܠܵܐ ܡܗܲܝܡܢܝܼܢ. ܘܒܹܗ ܒܲܙܢܵܐ: ܘܐܵܦ ܐܲܝܠܹܝܢ ܕܒܼܵܬܲܪܗܘܿܢ ܪܵܕܹܝܢ ܒܪܸܥܝܵܢܵܐ. ܚܢܲܢ ܕܹܝܢ ܡܗܲܝܡܢܝܼܢ ܚ̄ܢܲܢ ܗܵܕܹܐ: ܕܐܲܠܵܗܵܐ ܠܨܲܠܡܹܗ ܚܵܫܘܿܫܵܐ ܠܵܐ ܥ̣ܒܲܕܼ. ܨܲܠܡܹܗ ܕܝܢ: ܠܵܐ ܗ̄ܘ̣ܵܐ ܠܦܲܓܼܪܵܐ ܐܵܡܲ݁ܪܢܵܐ: ܐܸܠܵܐ ܠܢܲܦܫܵܐ: ܗܵܝ̇ ܕܐܝܼܬܹܝܗ̇ ܠܵܐ pb. 22 ܡܸܬܼܚܲܙܝܵܢܝܼܬܼܵܐ. ܟܠ ܨܲܠܡܵܐ ܕܹܝܢ: ܕܡܘܼܬܼܵܐ ܕܬܲܦܢܟܼܵܐ ܡܸܬܿܬܿܨܝܼܪܵܐ ܒܹܗ. ܘܨܲܠܡܵܐ ܡܸܬܼܚܲܙܝܵܢܵܐ ܠܡܸܕܸܡ ܕܠܵܐ ܡܸܬܼܚܙܸܐ: ܠܵܐ ܡܸܫܟܲܚ ܨܵܐܲܪ̇ ܕܡܘܼܬܹܗ. ܒܲܕܓܼܘܿܢ ܡܗܲܝܡܢܝܼܢܲܢ: ܕܚܲܫܹ̈ܐ ܢܲܦܫܵܢܵܝܹ̈ܐ: ܠܲܝܬܿ ܐܸܢܘܿܢ ܟܝܵܢܵܝܹ̈ܐ ܐܲܝܟܼ ܕܐܵܡ̇ܪܝܼܢ. ܐܸܢ ܕܹܝܢ ܐܝܼܬܼ ܕܡܸܬܼܚܪܸܐ ܥܲܠ ܗܵܕܹܐ: ܡܫܲܐܠܝܼܢܲܢ ܠܹܗ: ܘܢܹܐܡܲܪ ܠܲܢ: ܟܝܵܢܝܬܼܵܐ ܕܢܲܦܫܵܐ ܐܲܝܕܵܐ ܗ̣̄ܝ؟ ܗܵܝ̇ ܕܲܕܼܠܵܐ ܚܲܫܹ̈ܐ ܬܸܗܘܸܐ ܟܲܕܼ ܡܲܠܝܵܐ ܢܘܼܗܪܵܐ: ܐܵܘ ܟܲܕܼ ܒܚܲܫܹ̈ܐ ܬܸܬܿܙܝܼܥ ܘܬܸܗܘܸܐ ܚܲܫܝܼܟܼܵܐ؟ ܐܸܢ ܕܹܝܢ ܗ̄ܘ̣ܵܐ ܐܸܡܲܬܼܝ ܕܲܟܼܝܵܢܵܗ̇ ܕܢܲܦܫܵܐ ܫܦܸܐ ܗ̄ܘ̣ܵܐ: ܘܲܡܩܲܒܿܠܵܢܵܐ ܕܢܘܼܗܪܵܐ ܛܘܼܒܼܬܼܵܢܵܐ: ܘܐܸܡܲܬܼܝ ܬܘܼܒܼ ܕܠܲܒܼܪܝܼܬܼܵܗ̇ ܩܲܕܼ̱ܡܵܝܬܼܵܐ ܬܹܐܬܸܐ ܒܵܗ̇ ܒܗܵܕܹܐ ܬܸܫܬܿܟܲܚ. ܡܵܐ ܕܹܝܢ ܕܲܒܼܚܲܫܹ̈ܐ ܡܸܬܿܬܿܙܝܼܥܵܐ: ܠܒܲܪ ܡ̣ܢ ܟܝܵܢܵܗ̇ ܡܸܬܿܬܵܘܕܝܵܐ ܕܢܸܦܩܲܬ̤ ܡ̣ܢ ܟܠܗܘܿܢ ܒܢܲܝ̈ ܥܹܕܬܵܐ. ܡܵܕܹܝܢ ܚܲܫܹ̈ܐ: ܒܵܬܲܪܟܸܢ ܥܲܠ̣ܘ ܥܲܠ ܟܝܵܢܵܗ̇ ܕܢܲܦܫܵܐ. ܘܚܲܫܹ̈ܐ ܢܲܦܫܵܢܵܝܹ̈ܐ ܟܠ ܟ̱ܠܹܗ ܕܢܸܪܢܸܐ: ܠܵܐ ܙܵܕܸܩ. ܕܐܵܦܸܢ ܢܲܦܫܵܐ ܒܗܘܿܢ ܡܸܬܿܬܿܙܝܼܥܵܐ: ܐܸܠܵܐ ܐܸܬܼܓܲܠܝܲܬ̤: ܕܲܒܼܡܸܕܸܡ ܕܲܠܒܲܪ ܡܸܢܵܗ̇ ܗ̄ܘ̣ ܡܸܬܿܬܿܙܝܼܥܵܐ: ܘܠܵܘ ܒܕܼܝܼܠܵܗ̇. ܘܐܸܢ ܗܵܠܹܝܢ ܡܸܛܠ ܕܲܒܼܗܘܿܢ ܡܸܬܿܬܙܝܼܥܵܐ ܒܥܸܠܲܬ̤ ܦܲܓܼܪܵܐ: ܟܝܵܢܵܝ̈ܬܼܵܐ ܡܸܬܼܪ̈ܲܢܝܵܢ ܥܠܹܝܗ̇: ܡܵܕܹܝܢ ܐܵܦ ܟܲܦܢܵܐ ܘܨܲܗܝܵܐ ܘܫܸܢܬܼܵܐ ܕܝܼܠܵܗ̇ ܐܸܢܘܿܢ ܕܢܲܦܫܵܐ: ܡܸܛܠ ܕܲܒܼܗܘܿܢ ܚܵܐ̇ܫܵܐ ܘܡܸܬܿܬܿܢܝܼܚܵܐ ܥܲܡ ܦܲܓܼܪܵܐ. ܘܐܵܦ ܦܤܵܩܵܐ ܕܗܲܕܵܡܹ̈ܐ ܘܐܸܫܵܬܼܵܐ ܘܟܹܐܒܹ̈ܐ ܘܟܼܘܼܪ̈ܗܵܢܹܐ ܘܫܲܪܟܵܐ: ܕܡܸܛܠ ܕܲܒܼܫܵܘܬܵܦܘܼܬܼܵܐ ܕܥܲܡܵܗ̇ ܚܵܐܹ̇ܫ ܦܲܓܼܪܵܐ ܒܗܘܿܢ: ܘܗ̤ܝ ܥܲܡܹܗ: ܘܡܸܬܿܬܿܙܝܼܥܵܐ ܒܚܲܕܼܘܼܬܼܵܐ ܕܗܵܠܹܝܢ ܕܦܲܓܼܪܵܐ: ܘܲܡܩܲܒܿܠܵܐ ܥܵܩܬܼܵܐ ܒܲܫܚܵܩܵܘ̈ܗܝ. ܟܝܵܢܵܝܬܼܵܐ ܕܢܲܦܫܵܐ: ܘܕܲܠܒܲܪ ܡ̣ܢ ܟܝܵܢܵܗ̇: ܘܕܲܠܥܸܠ ܡ̣ܢ ܟܝܵܢܵܗ̇. pb. 23 ܟܝܵܢܝܵܬܐ ܕܹܝܢ ܕܝܼܠܵܗ̇ ܕܢܲܦܫܵܐ ܐܝܼܬܹܝܗ̇: ܤܘܼ̈ܟܵܠܹܐ ܕܒܸܪ̈ܝܵܬܼܵܐ ܟܠܗܹܝܢ: ܕܡܸܬܼܪ̈ܲܓܼܫܵܐ ܘܡܸܬܼܝܲܕ̈ܥܵܢ. ܠܥܸܠ ܡ̣ܢ ܟܝܵܢܵܗ̇ ܡܲܢ: ܪܵܦܘܿܬܼܘܼܬܼܵܗ̇ ܕܲܒܼܬܹܐܘܿܪܝܼܵܐ ܐܲܠܵܗܵܝܬܼܵܐ. ܠܒܲܪ ܡ̣ܢ ܟܝܵܢܵܗ̇ ܕܹܝܢ: ܡܸܬܲܬܿܙܝܼܥܵܢܘܼܬܼܵܗ̇ ܕܲܒܼܚܲܫܹ̈ܐ. ܗܵܐ ܘܐܵܦ ܢܲܗܝܼܪܵܐ ܕܬܹܒܹܝܠ ܥܛܝܼܦ ܙܵܟܼܘܼܬܼܵܐ ܒܵܤܝܼܠܸܣ ܗܵܟܲܢ ܐܵܡܲ݁ܪ: ܕܐܸܡܼܲܬܼܝ ܕܲܒܼܛܲܟܼܤܵܐ ܕܲܟܼܝܵܬܵܗ̇ ܐܝܼܬܹܝܗ̇ ܢܲܦܫܵܐ: ܠܥܸܠ ܡܸܫܬܲܟܼܚܵܐ. ܐܸܡܲܬܼܝ ܕܲܟܼܠܵܐ ܒܲܟܼܝܵܢܵܗ̇ ܕܹܝܢ: ܠܬܲܚܬܿ ܘܒܲܐܪܥܵܐ. ܚܲܫܹ̈ܐ ܡܵܕܹܝܢ ܠܥܸܠ ܠܵܐ ܐܝܼܬܼ: ܐܲܝܟܵܐ ܕܐܵܦ ܐܲܬܼܪܵܗ̇ ܕܢܲܦܫܵܐ ܡܸܬܼܐܡܲܪ. ܐܸܠܵܐ ܡܵܐ ܕܡ̣ܢ ܛܲܟܼܤܹܗ ܢܵܚܹ̇ܬܼ ܟܝܵܢܵܐ ܠܬܲܝܚܬܿ: ܗܵܝܕܹܝܢ ܗܵܘܹ̇ܐ ܚܵܫܘܿܫܵܐ. ܐܲܝܟܵܐ ܐܸܢܘܿܢ ܡܵܕܹܝܢ ܚܲܫܹ̈ܐ ܢܲܦܫܵܢܵܝܹ̈ܐ: ܕܗܵܐ ܐܸܬܼܓܲܠܝܲܬ̤ ܕܠܵܘ ܕܲܟܼܝܵܢܵܗ̇ ܐܸܢܘܿܢ. ܗܵܟܲܢ ܡܵܕܹܝܢ ܡܸܬܿܬܿܙܝܼܥܵܐ ܢܲܦܫܵܐ ܒܚܲܫܹ̈ܐ ܥܕܸܝ̈ܠܹܐ ܕܲܒܼܦܲܓܼܪܵܐ: ܐܲܝܟܼ ܕܐܵܦ ܒܟܲܦܢܵܐ ܘܲܒܼܨܲܗܝܵܐ ܡܸܛܠܵܬܹܗ. ܐܸܠܵܐ ܡܸܛܠ ܕܥܲܠ ܗܵܠܹܝܢ ܢܵܡܘܿܤܹ̈ܐ ܠܵܐ ܤܝܼܡܝܼܢ: ܠܵܐ ܥܕܝܼܠܵܐ. ܐܲܝܟܼ ܕܐܵܦ ܒܗܘܿܢ ܒܗܵܠܹܝܢ ܕܲܬܼܚܹܝܬܼ ܡܲܪܫܘܼܬܼܵܐ ܐܸܢܘܿܢ: ܐܝܼܬܼ ܐܸܡܲܬܼܝ: ܕܡ̣ܢ ܐܲܠܵܗܵܐ ܡܸܬܼܦܩܸܕܼ ܐ̄ܢܵܫ. ܘܲܚܠܵܦ ܪܸܫܝܵܢܵܐ ܘܥܸܕܼܠܵܝܵܐ: ܦܘܼܪܥܵܢܵܐ ܛܵܒܼܵܐ ܡܩܲܒܸܠ. ܐܲܝܟܼ ܗܘܿܫܵܥ ܢܒܼܝܼܵܐ ܕܐܸܫܬܵܘܬܲܦ ܒܙܘܼܘܵܓܼܵܐ ܕܠܵܐ ܢܵܡܘܿܣ: ܘܐܲܝܟܼ ܐܹܠܝܼܵܐ ܕܐܸܬܼܚܲܫܲܚ ܒܩܸܛܠܵܐ ܚܠܵܦ ܛܢܵܢܹܗ ܕܐܲܠܵܗܵܐ: ܘܗܵܢܘܿܢ ܕܲܒܼܦܘܼܩܕܵܢܵܐ ܕܡܘܼܫܹܐ ܕܓܲܫ̣ܘ ܒܤܲܝ̈ܦܹܐ ܠܩܲܪ̈ܝܼܒܲܝܗܘܿܢ. ܐܸܠܵܐ ܐܵܡ̇ܪܝܼܢ ܬܘܼܒܼ: ܠܵܗ̇ ܟܝܵܢܵܐܝܼܬܼ ܘܲܠܢܲܦܫܵܐ ܪܘܼܓܼܙܵܐ ܘܚܸܡܬܼܵܐ: ܤܛܲܪ ܡ̣ܢ ܗܵܠܹܝܢ ܕܲܟܼܝܵܢܹܗ ܕܦܲܓܼܪܵܐ: ܘܗܵܠܹܝܢ ܐܸܢܘܿܢ ܠܲܡ ܚܲܫܹ̈ܝܗ̇. ܫܘܼܐܵܠܵܐ ܕܲܬܼܪܹܝܢ. ܘܲܚܢܲܢ ܡܫܲܐܠܝܼܢܲܢ: ܪܸܓܿܬܼܵܗ̇ ܕܢܲܦܫܵܐ ܐܸܡܲܬܼܝ ܕܒܲܐܠܵܗܵܝܵܬܼܵܐ ܡܸܫܬܲܠܗܒܼܵܐ: ܪܸܓܬܼܵܗ̇ ܐܝܼܬܹܝܗ̇ ܕܲܟܼܝܵܢܵܗ̇: ܐܵܘ ܟܲܝ pb. 24 ܒܗܵܠܹܝܢ ܕܒܲܐܪܥܵܐ ܘܦܲܓܼܪܵܐ. ܘܟܲܕܼ ܚܠܵܦ ܐܲܝܠܹܝܢ ܕܡܸܬܿܛܲܢܲܢ ܟܝܵܢܵܗ̇ ܕܢܲܦܫܵܐ ܒܚܸܡܬܼܵܐ ܡܸܬܼܐܲܡܪܵܐ: ܐܵܘ ܚܸܡܬܼܵܐ ܟܝܵܢܵܝܬܼܵܐ. ܟܲܕܼ ܚܠܵܦ ܪܸܓܿܬܼܵܐ ܕܦܲܓܼܪܵܐ ܘܲܚܤܵܡܵܐ ܘܫܘܼܒܼܚܵܐ ܘܫܲܪܟܵܐ: ܐܵܘ ܟܲܕܼ ܠܲܡ ܠܩܘܼܒܼܠܗܹܝܢ ܕܗܵܠܹܝܢ. ܢܦܲܢܸܐ ܠܲܢ ܥܲܠ ܗܵܠܹܝܢ ܗܵܘ̇ ܡܲܢ ܕܡܸܬܼܚܪܸܐ: ܘܢܹܐܙܲܠ ܘܐܵܦ ܚܢܲܢ ܒܵܬܼܪܹܗ. ܤܲܓܿܝܼ̈ܐܵܬܼܵܐ ܓܹܝܪ ܐܵܡܲ݁ܪ ܟܬܼܵܒܼܵܐ ܩܲܕܝܼܫܵܐ: ܕܲܠܦܘܼܬܼ ܡܸܕܸܡ ܐܵܡܲ݁ܪ ܠܗܹܝܢ. ܘܤܵܐܹ̇ܡ ܫܡܵܗܹ̈ܐ ܫܐܝܼ̈ܠܹܐ: ܟܡܵܐ ܙܲܒܼ̈ܢܝܼܢ. ܐܲܝܠܹܝܢ ܕܲܕܼܦܲܓܼܪܵܐ ܐܸܢܘܿܢ ܥܲܠ ܢܲܦܫܵܐ: ܘܗܵܠܹܝܢ ܕܢܲܦܫܵܐ ܢܵܤܹ̇ܒܼ ܟܡܵܐ ܙܲܒܼ̈ܢܝܼܢ ܥܲܠ ܦܲܓܼܪܵܐ ܘܠܵܐ ܡܦܲܪܸܫ ܠܗܹܝܢ: ܐܲܝܟܼ ܕܠܵܐ ܢܹܐܪܲܟܼ ܫܲܪܒܵܐ. ܤܲܟܿܘܼ̈ܠܬܼܵܢܹܐ ܕܹܝܢ: ܡܸܤܬܲܟܿܠܝܼܢ ܡܸܕܸܡ ܕܩܵܪܹܝܢ. ܗܵܢܵܘ ܕܹܝܢ: ܠܢܝܼܫܹܗ ܕܲܟܼܬܼܵܒܼܵܐ. ܐܲܝܟܼ ܗܵܠܹܝܢ ܕܐܲܠܵܗܘܼܬܹܗ ܕܡܵܪܲܢ: ܕܢܵܤܹ̇ܒܼ ܥܲܠ ܐ̄ܢܵܫܘܼܬܹܗ ܡܥܲܠܝܵܐܝܼܬܼ ܘܪܵܡܵܐܝܼܬܼ: ܡܸܕܸܡ ܕܠܵܐ ܠܵܚܹ̇ܡ ܠܲܟܼܝܵܢܵܐ ܐ̄ܢܵܫܵܝܵܐ: ܘܡܸܕܸܡ ܕܠܵܐ ܠܵܚܹ̇ܡ ܥܲܠ ܐܲܠܵܗܘܼܬܹܗ. ܘܤܲܓܿܝܼ̈ܐܹܐ ܕܠܵܐ ܐܸܤܬܲܟܲܠܘ ܠܢܝܼܫܵܐ ܕܡܲܡܠܠܹܗ ܕܲܟܼܬܼܵܒܼܵܐ: ܗܵܪܟܵܐ ܐܸܬܿܬܿܩܸܠܘ ܬܘܼܠ̱ܬܼܵܐ ܕܠܵܐ ܩܵܘܡܵܐ. ܗܵܟܲܢܵܐ ܘܗܵܠܹܝܢ ܕܥܲܠ ܢܲܦܫܵܐ ܘܦܲܓܼܪܵܐ. ܐܸܢܕܹܝܢ ܡܝܲܬܿܪܘܼܬܼܵܐ ܚܘܼܠܡܵܢܵܐ ܗ̄ܘ̣ ܟܝܵܢܵܝܵܐ ܕܢܲܦܫܵܐ: ܚܲܫܹ̈ܐ ܕܹܝܢ ܟܙܼܪ̈ܗܵܢܹܐ ܐܸܢܘܿܢ: ܕܲܡܥܵܕܹܝܢ ܥܲܠ ܟܝܵܢܵܐ ܠܡܸܥܪܲܨ ܘܲܠܡܲܦܵܩܘܼܬܹܗ ܡ̣ܢ ܚܘܼܠܡܵܢܹܗ: ܝܑܼܿܕܼܝܼܥܵܐ ܕܚܘܼܠܡܵܢܵܐ: ܩܲܕܝܼܡ ܗ̄ܘ̣ ܒܲܟܼܝܵܢܵܐ ܠܓܸܕܼܫܹ̈ܐ ܕܟܼܘܼܪܗܵܢܵܐ. ܘܐܸܢ ܗܵܕܹܐ ܗܵܟܲܢܵܐ ܗ̣̄ܝ: ܐܲܝܟܼ ܕܐܵܦ ܐܝܼܬܹܝܗ̇ ܘܫܲܪܝܼܪܵܐ: ܡܵܕܹܝܢ ܡܝܲܬܿܪܘܼܬܼܵܐ: ܗܘ̤ܵܬܼ ܠܵܗ̇ ܐܲܝܟܼ ܕܡ̣ܢ ܐܵܢܲܢܩܹܐ ܟܝܵܢܵܝܬܼܵܐ ܒܢܲܦܫܵܐ: ܘܓܸܕܫܹ̈ܐ ܠܒܲܪ ܡ̣ܢ ܟܝܵܢܵܐ. ܒܲܕܼܠܵܐ ܡܲܨܝܵܐ ܕܗܵܘ̇ ܡܵܐ ܕܩܲܕܝܼܩ: ܠܵܘ ܗܘ̤ܝܘܼ ܟܝܵܢܵܝܵܐ. pb. 25 ܫܘܼܐܵܠܵܐ ܕܲܬܼܠܵܬܼܵܐ. ܚܲܫܹ̈ܐ ܦܲܓܼܪ̈ܵܢܵܝܹܐ ܥܲܠ ܦܲܓܼܪܵܐ ܟܝܵܢܵܐܝܼܬܼ ܤܝܼܡܝܼܢ: ܐܵܘ ܫܐܝܼܠܵܐܝܼܬܼ. ܘܢܲܫܦܵܐ: ܗܵܠܹܝܢ ܕܡ̣ܢ ܥܸܠܬܼܵܐ ܕܦܲܓܼܪܵܐ: ܫܐܝܼ̈ܠܹܐ ܐܸܢܘܿܢ: ܐܵܘ ܟܝܵܢܵܝܹ̈ܐ. ܐܸܠܵܐ ܗܵܠܹܝܢ ܕܦܲܓܼܪܵܐ ܠܒܲܪ ܡ̣ܢ ܟܝܵܢܵܐ ܕܢܹܐܡܲܪ: ܠܐ ܡܸܫܟܿܚܵܐ. ܘܲܕܢܲܦܫܵܐ ܕܹܝܢ: ܡ̣ܢ ܕܐܸܬܿܝܲܕܼܥܲܬ̤ ܘܲܕܼܡ̣ܢ ܟܠ ܡܸܬܿܬܵܘܕܝܵܐ ܕܕܲܟܼܝܘܼܬܼܵܐ ܟܝܵܢܝܬܼܵܐ ܗ̣̄ܝ ܠܵܗ̇: ܕܢܹܐܡܲܪ ܥܠܹܝܗ̇ ܗܵܪܟܵܐ ܚܵܫܘܿܫܬܼܵܐ ܠܵܐ ܫܐܝܼܠܵܐܝܼܬܼ: ܠܵܐ ܡܲܡܪܲܚ ܐ̄ܢܵܫ. ܒܗܵܝ̇ ܕܟܼܘܼܪܗܵܢܵܐ: ܬܪܲܝܵܢܵܐ ܡܸܬܿܬܵܘܕܸܐ ܕܚܘܼܠܡܵܢܵܐ. ܘܗ̤ܘ ܟܲܕܼ ܗ̤ܘ ܕܢܸܗܘܸܐ ܟܝܵܢܵܐ ܛܵܒܼܵܐ ܘܒܼܝܼܫܵܐ: ܠܵܐ ܡܸܫܟܚܵܐ. ܕܡ̣ܢ ܟܠܦܪܘܣ ܚܕܼܵܐ ܡܸܢܗܹܝܢ: ܩܲܕܝܼܡܵܐ ܠܲܚܒܲܪܬܼܵܗ̇. ܘܐܲܝܕܵܐ ܕܩܲܫܝܼܫܵܐ: ܗ̤ܝ ܗ̣̄ܝ ܟܝܵܢܵܝܬܼܵܐ. ܟܠܡܸܕܸܡ ܕܓܸܕܫܵܐ ܗ̣̄ܘ: ܡܸܢܹܗ ܡ̣ܢ ܟܝܵܢܵܐ ܠܵܐ ܡܸܬܼܐܡܲܪ ܘܠܵܘ ܒܲܝܬܵܝܵܐ: ܐܸܠܵܐ ܡ̣ܢ ܠܒܲܪ ܥܵܪܹܨ. ܘܟܼܠ ܓܸܕܼܫܵܐ ܘܥܵܪܨܘܼܬܼܵܐ: ܫܘܼܢܵܝܵܐ ܐܸܡܲܬܼܝ ܕܗ̤ܘ ܢܲܩܝܼܦ ܠܹܗ ܘܫܘܼܚܠܵܦܵܐ. ܟܝܵܢܵܐ ܕܹܝܢ ܠܵܐ ܡܸܫܬܲܚܠܲܦ: ܘܠܵܐ ܡܫܲܢܸܐ. ܟܠ ܚܲܫܹ̈ܐ ܕܐܝܼܬܼ: ܠܥܘܼܕܼܪܵܢܵܐ ܝܑܼܗܝܼܒܼܝܼܢ ܕܟܼܠ ܚܲܕܼ ܚܲܕܼ ܡ̣ܢ ܟܝܵܢܹ̈ܐ: ܐܲܝܠܹܝܢ ܕܲܟܼܝܵܢܵܐܝܼܬܼ ܐܝܼܬܲܝܗܘܿܢ ܠܗܘܿܢ: ܘܐܲܝܟܼ ܕܲܠܬܲܪܒܿܝܼܬܼܗܘܿܢ ܐܸܬܼܝܼܗܸܒܼܘ ܡ̣ܢ ܐܲܠܵܗܵܐ. ܚܲܫܹ̈ܐ ܦܲܓܼܪ̈ܵܢܵܝܹܐ: ܠܥܘܼܕܼܪܵܢܵܐ ܘܬܲܪܒܿܝܼܬܼܵܐ ܕܦܲܓܼܪܵܐ ܐܸܬܿܬܿܤܝܼܡܘ ܒܹܗ ܡ̣ܢ ܐܲܠܵܗܵܐ. ܘܚܲܫܹ̈ܐ ܕܢܲܦܫܵܐ: ܗܵܢܵܘ ܕܹܝܢ ܚܲܝ̈ܠܹܐ ܢܲܦܫܵܢܵܝܹ̈ܐ ܠܬܲܪܒܿܝܼܬܼܵܐ ܘܥܘܼܕܼܪܵܢܵܐ ܕܢܲܦܫܵܐ. ܘܐܸܡ݂ܲܬܼܝ ܕܦܲܓܼܪܵܐ ܡܸܬܼܥܨܸܐ ܠܡܸܦܲܩ ܡ̣ܢ ܚܵܫܘܿܫܘܼܬܹܗ: ܒܚܘܼܤܟܵܢܵܐ ܕܡܸܢܗܘܿܢ ܘܲܠܡܸܩܲܦ ܠܲܕܼܢܲܦܫܵܐ: ܡܸܤܬܲܓܲܦ. ܘܐܸܦܲܬܼܝ ܕܢܲܦܫܵܐ ܡܲܪܦܝܵܐ ܗܵܠܹܝܢ ܕܝܼܠܵܗ̇ ܘܢܵܩ̇ܦܵܐ ܠܲܕܼܦܲܓܼܪܵܐ: ܡܸܤܬܲܓܿܦܵܐ. ܡܸܛܠ ܕܐܲܝܟܼ ܡܸܠܲܬܼ ܫܠܝܼܚܵܐ: ܪܘܼܚܵܐ ܪܵܓܵܐ ܡܸܕܸܡ ܕܢܵܟܹ̇ܐ ܠܦܲܓܼܪܵܐ: pb. 26 ܘܦܲܓܼܪܵܐ ܪܵܐܹܓܼ ܡܸܕܸܢ ܕܢܵܟܹ̇ܐ ܠܪܘܼܚܵܐ. ܘܲܬܼܪ̈ܲܝܗܘܿܢ: ܤܲܩܘܼ̈ܒܼܠܹܐ ܐܸܢܘܿܢ ܚܲܕܼ ܕܚܲܕܼ ܒܲܟܼܝܵܢܵܝܘܼܬܼܗܘܿܢ. ܡܵܕܹܝܢ: ܠܵܐ ܐ̄ܢܵܫ ܢܓܲܕܸܦ ܥܲܠ ܐܲܠܵܗܵܐ: ܕܚܲܫܹ̈ܐ ܘܲܚܛܝܼܬܼܵܐ ܗ̤ܘ ܤܵܡ̣ ܒܲܟܼܝܵܢܲܢ. ܕܗ̤ܘ ܠܲܟܼܝܵܢܹ̈ܐ ܟܠ ܚܲܕܼ ܚܲܕܼ ܡܸܢܗܘܿܢ ܕܬܲܩܸܢ: ܡܸܕܸܡ ܕܲܡܪܲܒܸܿܐ ܠܹܗ ܒܹܗ ܤܵܡ̣. ܘܐܸܡ݂ܲܬܼܝ ܕܡܸܬܼܐܵܘܸܐ ܚܲܕܼ ܠܚܲܒܼܪܹܗ: ܠܵܘ ܒܕܝܼܠܹܗ ܡܸܫܬܿܟܲܚ: ܐܸܠܵܐ ܒܲܕܼܠܵܐ ܕܝܼܠܹܗ. ܘܐܸܢ ܗܵܠܿܝܬ ܚܲܫܹ̈ܐ ܟܝܵܢܵܐܝܼܬܼ ܕܢܲܦܫܵܐ ܐܸܢܘܿܢ: ܡܸܛܠܡܵܢܵܐ ܡܸܤܬܲܓܦܵܐ ܐܸܡܼܬܲܝ ܕܡܸܬܼܚܲܫܚܵܐ ܒܗܘܿܢ. ܕܝܼ̈ܠܵܝܵܬܼܵܐ ܕܹܝܢ ܕܝܼܠܹܗ ܕܲܟܼܝܵܢܵܐ: ܠܲܟܼܝܵܢܵܐ ܠܵܐ ܡܤܲܓ̈ܦܵܢ. ܘܲܠܡܵܢܵܐ ܫܘܼܡܠܵܝܗܘܿܢ ܕܚܲܫܹ̈ܐ ܦܲܓܼܪ̈ܵܢܵܝܹܐ ܬܲܪܒܿܝܼܬܼܵܐ ܐܝܼܬܼܵܘܗܝ ܘܚܘܼܝܵܠܵܐ ܠܦܲܓܼܪܵܐ. ܘܲܕܼܗܵܠܹܝܢ ܕܢܲܦܫܵܐ ܡܤܲܓܿܦܝܼܢ ܠܢܲܦܫܵܐ: ܐܸܢ ܕܝܼܠܵܗ̇ ܐܸܢܘܿܢ. ܘܲܠܡܵܢܵܐ ܡܝܲܬܿܪܘܼܬܼܵܐ ܠܦܲܓܼܪܵܐ ܡܫܲܢܩܵܐ: ܠܢܲܦܫܵܐ ܕܹܝܢ ܡܦܲܛܡܵܐ. ܚ̣ܙܲܝܬܿ ܡܸܕܸܡ ܕܲܠܒܲܪ ܡ̣ܢ ܟܝܵܡܵܐ: ܐܲܝܟܲܢ ܡܤܲܓܸܦ ܠܟܼܠ ܚܲܕܼ ܡ̣ܢ ܟܝܵܢܹ̈ܐ ܗܵܠܹܝܢ. ܟܠ ܚܲܕܼ ܡ̣ܢ ܟܝܵܢܹ̈ܐ ܓܹܝܪ ܟܲܕܼ ܩܵܪܹܒܼ ܠܕܼܝܼܠܹܗ: ܪܵܘܹ̇ܙ. ܝܨܵܒܹ̇ܐ ܐܲܢ̄ܬܿ ܠܡܸܕܲܥ ܕܐܲܝܠܹܝܢ ܐܸܢܹܝܢ ܕܝܼ̈ܠܵܝܵܬܼܵܐ ܕܟܼܠܚܲܕܼ ܡ̣ܢ ܟܝܵܢܹ̈ܐ ܗܵܠܹܝܢ: ܚܙܝܼ ܟܠܚܲܕܼ ܡܸܢܗܘܿܢ ܕܒܐܝܼܕܵܐ ܕܡܸܬܼܥܲܕܲܪ ܒܵܗ̇ ܒܲܚܫܲܚܬܼܗܹܝܢ: ܕܝܼܠܹܗ ܐܝܼܬܲܝܗܹܝܢ. ܘܒܲܐܝܠܹܝܢ ܕܡܸܫܬܲܢܲܩ: ܪܲܥ ܕܒܲܕܠܵܐ ܕܝܼܠܹܗ ܡܡܲܨܲܥ. ܗܵܢܵܘ ܤܵܟܼܵܐ. ܐܸܢ ܐܸܬܼܚܲܕܼܥܲܬ̤ ܡܸܟܹܝܠ: ܕܚܲܫܹ̈ܐ ܕܟܼܠܚܲܕܼ ܡ̣ܢ ܗܵܠܹܝܢ ܟܝܵܢܹ̈ܐ ܤܲܩܘܼ̈ܒܼܠܹܗ ܐܸܢܘܿܢ ܚܲܕܼ ܕܚܲܕܼ: ܡܵܕܹܝܢ ܟܠܡܸܕܸܡ ܕܲܠܦܲܓܼܪܵܐ ܡܥܲܕܲܪ ܘܲܡܢܝܼܚ: ܟܲܕܼ ܡܸܬܼܚܲܫܚܵܐ ܒܹܗ ܢܲܦܫܵܐ: ܠܵܘ ܕܲܕܼܝܵܢܵܗ̇ ܕܝܼܠܵܗ̇ ܢܸܬܼܚܫܸܒܼ. ܡܸܛܠ ܕܗܵܠܹܝܢ ܕܲܟܼܝܵܢܵܗ̇ ܕܢܲܦܫܵܐ: ܡܵܘܬܵܐ ܐܸܢܘܿܢ ܠܹܗ ܠܦܲܓܼܪܵܐ. ܐܸܠܵܐ ܕܲܥܠܹܝܗ̇ ܤܝܼܡܝܼܢ: ܫܐܝܼܠܵܐܝܼܬܼ. ܡܸܛܠ pb. 27 ܟܪܝܼܗܘܼܬܹܗ ܕܹܝܢ ܕܒܸܤܪܵܐ: ܕܬܸܬܼܚܲܪܲܪ ܡܸܢܗܘܿܢ ܠܲܓܼܡܵܪ ܠܵܐ ܡܲܨܝܵܐ ܟܡܵܐ ܕܲܠܒܼܝܼܫܵܐ ܠܹܗ. ܕܲܡܫܵܘܬܲܦ ܗ̄ܘ̣ ܟܝܵܢܵܗ̇ ܒܐܘܼܠܨܵܢܵܘ̈ܗܝ ܡܸܛܠ ܡܚܲܝܕܼܘܼܬܼܵܐ ܕܙܵܘ̈ܥܹܝܗ̇: ܕܲܥܙܝܼܠܝܼܢ ܒܪܸ̈ܓܼܫܵܘܗܝ ܒܸܤܪ̈ܵܢܵܝܹܐ ܒܚܸܟܼܡܬܼܵܐ ܗܵܝ̇ ܕܠܵܐ ܡܸܬܼܥܲܩܒܼܵܐ. ܒܪܲܡ ܕܹܝܢ ܘܐܵܦܸܢ ܗܵܟܲܢ ܚܠܝܼܛܵܐܝܼܬܼ: ܦܪܝܼܫܝܼܢ ܙܵܘ̈ܥܹܐ ܡ̣ܢ ܙܵܘ̈ܥܹܐ: ܘܨܸܒܼܝܵܢܵܐ ܡ̣ܢ ܨܸܒܼܝܵܢܵܐ. ܗܵܢܵܘ ܕܹܝܢ: ܕܒܸܤܪܵܐ ܡ̣ܢ ܪܘܼܚܵܐ. ܘܠܲܓܼܡܵܪ ܟܝܵܢܵܐ ܠܵܐ ܡܸܬܼܒܲܠܲܒܲܠ: ܘܥܲܠ ܕܝܼܠܹܗ ܠܵܐ ܟܵܐܹ̇ܡ. ܐܸܠܵܐ ܟܠܚܲܕܼ ܡܸܢܗܘܿܢ ܘܐܵܦܸܢ ܤܲܓܝܼ ܠܫܲܘܝܘܼܬܼܵܐ ܢܲܝܬܸܐ ܐܸܢܘܿܢ ܐ̄ܢܵܫ ܒܲܚܛܝܼܬܼܵܐ ܐܵܘ ܒܲܡܝܲܬܿܪܘܼܬܼܵܐ: ܒܲܙܒܲܢ ܟܠܚܲܕܼ ܡܸܢܗܘܿܢ: ܨܸܒܼܝܵܢܹܗ ܡܙܝܼܥ: ܘܲܒܼܕܼܝܼܠܹܗ ܪܵܦܹ̇ܬܼ. ܐܸܡܲܬܼܝ ܕܹܝܢ ܕܒܲܡܢܵܬܼܵܐ ܬܸܬܼܥܲܠܸܐ ܗ̤ܝ ܡܲܪܢܝܼܬܼܵܐ ܕܦܲܓܼܪܵܐ: ܗܵܝܕܹܝܢ ܟ̱ܠܵܗ̇ ܒܟܠܵܗ̇ ܒܪܘܼܚ ܢܵܒܼܗ̇ܝܼܢ ܙܵܘ̈ܥܹܝܗ̇: ܘܲܒܼܠܸܒܵܗ̇ ܕܲܫܡܲܝܵܐ ܤܵܚܹ̇ܝܢ ܒܨܸܒܼ̈ܘܵܬܼܵܐ ܠܵܐ ܡܸܬܿܕܲܪ̈ܟܵܢܝܵܬܼܵܐ. ܡ̣ܢ ܕܢܸܥܗܲܕܼ ܕܹܝܢ ܦܲܓܼܪܵܐ ܕܝܼܠܹܗ ܠܵܐ ܦܵܐܹ̇ܫ. ܘܐܵܦܸܢ ܗܵܟܲܢ: ܐܲܝܟܼ ܕܐܵܦܠܵܐ ܟܲܕܼ ܒܲܚܛܝܼܬܼܵܐ ܐܝܼܬܲܝܗܘܿܢ: ܫܲܦܝܼܪܵܬܼܵܐ ܕܢܲܦܫܵܐ ܡܸܫ̈ܬܲܠܝܵܢ: ܡ̣ܢ ܪܵܦܘܿܬܼܘܼܬܼܵܐ ܕܲܒܼܡܲܕܿܥܵܐ. ܕܡܵܢܵܐ ܐܝܼܬܹܝܗ̇ ܕܲܟܼܝܘܼܬܼ ܪܸܥܝܵܢܵܐ. ܕܟܸܐ ܪܸܥܝܵܢܵܐ ܐܝܼܬܼܵܘܗܝ: ܠܵܘ ܐܲܝܢܵܐ ܕܠܵܐ ܝܵܕܲܥ̇ ܒܝܼ̈ܫܵܬܼܵܐ. ܘܐܸܢ ܠܵܐ: ܒܥܝܼܪܵܐ ܐܝܼܬܼܵܘܗܝ. ܐܵܦܠܵܐ ܠܐܲܝܠܹܝܢ ܕܤܵܡ̣ ܐܸܢܘܿܢ ܟܝܵܢܵܐ ܒܲܡܫܘܼܚܬܼܵܐ ܕܫܲܒܼܪܘܼܬܼܵܐ: ܩܵܪܹܝܢܲܢ ܕܲܟܼܝܲܝ̈ ܪܸܥܝܵܢܵܐ. ܘܐܸܢ ܠܵܐ: ܐܵܦܠܵܐ ܛܲܟܼܤܵܐ ܕܲܒܼܪ̈ܲܝܵܐ ܬܵܒܼܥ̇ܝܼܢܲܢ ܡ̣ܢ ܒܢܲܝ̈ܢܵܫܵܐ. ܐܸܠܵܐ ܐܝܼܬܹܝܗ̇ ܕܲܟܼܝܘܼܬܼܵܐ ܕܪܸܥܝܵܢܵܐ: ܫܲܒܼܝܘܼܬܼܵܐ ܕܒܲܐ̈ܠܵܗܵܝܵܬܼܵܐ: ܕܗܵܘ̇ܝܵܐ ܒܵܬܲܪ ܡܝܲܬܿܪ̈ܵܬܼܵܐ ܤܲܓܿܝܼ̈ܐܵܬܼܵܐ ܕܐܸܬܼܦܠܲܚ܀ ܐܵܦܠܵܐ ܠܗܵܢܵܐ ܡܲܡܪܚܝܼܢܲܢ ܕܢܹܐܡܲܪ: ܕܲܕܼܠܵܐ ܢܸܤܝܵܢܵܐ ܕܚܘܼ̈ܫܵܒܹܐ ܕܕܲܠܩܘܼܒܼܠܵܐ ܩܢܸܐ ܠܵܗ̇ ܠܗܵܕܹܐ. ܘܐܸܢ ܠܵܐ: ܐܵܦܠܵܐ ܦܲܓܼܪܵܐ ܠܒܼܝܼܫ. ܚܢܲܢ ܕܹܝܢ ܤܲܩܘܼ̈ܒܼܠܵܝܵܬܼܵܐ ܡ̣ܢ pb. 28 ܟܝܵܢܵܐ: ܩܕܼܵܡ ܥܵܠܡܵܐ ܕܲܥܬܼܝܼܕܼ: ܠܵܐ ܡܪܝܼܡܝܼܢܲܢ. ܢܸܤܝܘܿܢܵܐ ܕܚܘܼ̈ܫܵܒܹܐ: ܠܵܘ ܠܗܵܝ̇ ܕܲܠܗܘܿܢ ܐ̄ܢܵܫ ܢܸܫܠܲܡ ܐܵܡܲܪ̇ܢܵܐ: ܐܸܠܵܐ ܠܫܘܼܪܵܝ ܐܵܓܼܘܿܢܵܐ ܕܚܲܘܼ̈ܫܵܒܹܐ ܕܡܸܬܿܬܿܙܝܼܥ ܒܪܸܥܝܵܢܵܐ: ܡ̣ܢ ܪܒܼܝܼܥܵܝܘܼܬܼ ܥܸܠ̈ܠܵܬܼܵܐ ܓܸܢ̈ܤܵܢܵܝܵܬܼܵܐ: ܕܤܝܼ̈ܡܵܢ ܠܡܸܬܿܬܿܙܝܼܥܵܢܘܼܬܼܵܐ ܕܟܼܠܗܘܿܢ ܐܵܕܫܲܝ̈ ܚܲܫܹ̈ܐ. ܐܲܝܟܼ ܕܠܵܐ ܢܸܫܬܿܟܲܚ ܒܗܵܠܹܝܢ ܚܲܝܹ̈ܐ ܐ̄ܢܵܫ: ܕܢܸܗܘܸܐ ܡܪܲܝܲܡ ܡ̣ܢ ܥܘܼܗ̈ܕܵܢܹܐ ܕܲܬܼܝܵܢ. ܢܸܗܘܸܐ ܕܗܵܢܘܿܢ ܪܹ̈ܫܲܝ ܐܵܓܼܘܿܢܹ̈ܐ: ܐܵܦܸܢ ܐܲܝܟܼ ܦܵܘܠܘܿܣ ܢܸܬܼܪܲܥܸܐ ܕܲܓܼܡܝܼܪ. ܐܸܠܵܐ ܟܲܕܼ ܦܲܓܼܪܵܐ ܒܝܲܕܼ ܙܵܘܥܵܘ̈ܗܝ ܐܲܝܟܼ ܛܲܟܼܤܵܐ ܟܝܵܢܝܵܐ: ܘܥܵܠܡܵܐ ܒܝܲܕܼ ܟܝܵܢܵܘ̈ܗܝ ܒܬܸܫܡܸܫܬܼܵܐ ܕܪܸ̈ܓܼܫܹܐ: ܘܢܲܦܫܵܐ ܒܝܲܕܼ ܚܘܼ̈ܫܵܒܹܐ ܘܥܘܼ̈ܗܕܵܢܹܐ ܘܚܲܝ̈ܠܹܐ ܕܡܸܨܛܲܠܝܵܢܘܼܬܼܵܐ: ܘܫܹܐܕܹ̈ܐ ܒܝܲܕܼ ܡܙܝܼܥܵܢ̈ܘܵܬܼܵܐ ܕܐܲܝܠܹܝܢ ܕܐܸܬܼܐܡܲܪ: ܒܝܲܕܼ ܗܵܠܹܝܢ ܐܲܪܒܲܥ ܠܸܙܬܼܵܐ ܕܚܲܫܹ̈ܐ ܠܘܵܬܹܗ ܡܢܲܗܝܵܐ: ܗ̤ܘ ܟܲܕܼ ܩܲܠܝܼܠ ܡܫܲܓܸܫ: ܡܸܬܼܚܲܛܲܦ ܠܘܵܬܼ ܨܸܒܼ̈ܘܵܬܼܵܐ ܡܝܲܬܿܪ̈ܵܬܼܵܐ ܡܝܲܬܿܪ̈ܵܬܼܵܐ ܕܲܒܼܤܘܼ̈ܟܵܠܹܐ ܡܸܬܼܚܲܙ̈ܝܵܢ. ܐܸܢ ܩܕܼܵܡ ܒܘܼܛܵܠܹܗ ܕܥܵܠܡܵܐ: ܐܵܘ ܒܝܲܕܼ ܫܘܼܢܵܝܵܐ ܕܲܒܼܡܵܘܬܵܐ: ܡܲܨܝܵܐ ܕܬܸܒܼܛܲܠ ܚܕܼܵܐ ܡ̣ܢ ܗܵܠܹܝܢ ܐܲܪܒܲܥ: ܕܘܼܢ ܐܲܢ̄ܬܿ. ܐܵܘ ܐܸܢ ܦܲܓܼܪܵܐ ܡܸܬܼܥܲܠܸܐ ܡ̣ܢ ܤܘܼܢܩܵܢܵܘ̈ܗܝ ܠܲܓܼܡܵܪ: ܕܠܵܐ ܥܵܨܹ̇ܐ ܠܹܗ ܟܝܵܢܵܐ: ܠܘܵܬܼ ܒܥܵܬܼܵܐ ܕܲܚܕܼܵܐ ܡ̣ܢ ܕܲܬܼܢܵܢ. ܐܸܢ ܕܹܝܢ ܕܢܸܬܼܪܲܥܸܐ ܫܟܼܝܼܪܵܐ ܟܡܵܐ ܕܗܵܠܹܝܢ ܩܵܝ̈ܡܵܢ: ܐܵܢܲܢܩܹܐ ܕܐܵܦ ܚܲܫܹ̈ܐ ܡܸܬܿܬܿܙܝܼܥܝܼܢ ܒܟܼܠܗܘܿܢ ܠܒܼܝܼ̈ܫܲܝ ܦܲܓܼܪܵܐ: ܘܥܲܠ ܙܗܝܼܪܘܼܬܼܵܐ: ܠܟܼܠ ܐܵܠܨܵܐ. ܚܲܫܹ̈ܐ ܕܹܝܢ ܠܵܘ ܚܲܕܼ ܘܲܬܼܪܹܝܢ ܐܵܡܲ݁ܪܢܵܐ: ܐܸܠܵܐ ܠܟܼܠܗܘܿܢ ܦܘܼܪ̈ܫܵܢܹܐ ܕܚܲܫܹ̈ܐ: ܐܲܝܟܼ ܠܒܼܝܼ̈ܫܲܝ ܒܸܤܪܵܐ. ܒܪܲܡ: ܐܸܠܵܐ ܐܸܢ ܕܡܲܡܪܲܚ ܐ̄ܢܵܫ: ܕܲܡܚܝܼܠܘܼܬܼ pb. 29 ܙܵܘ̈ܥܹܐ ܘܲܒܼܨܝܼܪܘܼܬܼ ܐܵܓܼܘܿܢܹ̈ܐ: ܢܹܐܡܲܪ ܗܵܘ̇ ܡ̇ܢ ܕܗ̤ܘ: ܕܠܵܘ ܥܲܠ ܥܲܡ̈ܠܹܐ ܤܢܝܼܩܝܼܢ: ܘܥܲܠ ܙܗܝܼܪܘܼܬܼܵܐ ܤܲܓܿܝܼܐܬܼܵܐ. ܕܡ̇ܢ ܦܘܼܪܫܵܢܵܐ ܒܹܝܬܼ ܕܲܟܼܝܘܼܬܼ ܪܸܥܝܵܢܵܐ ܠܕܲܟܼܝܘܼܬܼ ܠܸܒܵܐ. ܐ̄ܚܪܹܬܼܵܐ ܗ̣̄ܝ ܕܲܟܼܝܘܼܬܼܵܐ ܕܪܸܥܝܵܢܵܐ: ܘܲܐ̄ܚܪܹܬܼܵܐ ܕܲܟܼܝܼܘܼܬܼ ܠܸܒܵܐ. ܐܲܝܟܲܢܵܐ ܕܐܝܼܬܼ ܦܘܼܪܫܵܢܵܐ ܒܹܝܬܼ ܗܲܕܵܡܵܐ ܡ̣ܢ ܟ̱ܠܹܗ ܦܲܓܼܪܵܐ: ܠܦܲܓܼܪܵܐ ܟ̱ܠܹܗ. ܪܸܥܝܵܢܵܐ ܕܹܝܢ: ܚܲܕܼ ܡ̣ܢ ܪܸ̈ܓܼܫܹܐ ܐܝܼܬܼܵܘܗܝ ܕܢܲܦܫܵܐ. ܠܸܒܵܐ ܕܹܝܢ: ܗ̤ܘܝܘܼ ܐܲܚܝܼܕܼܾ ܪܸ̈ܓܼܫܹܐ ܓܵܘܵܝܹ̈ܐ. ܗܵܢܵܘ ܕܹܝܢ: ܪܓܸܫ ܪܸ̈ܓܼܫܝܼܢ. ܕܐܝܼܬܼܵܘܗܝ: ܥܸܩܵܪܵܐ. ܘܐܸܢ ܥܸܩܵܪܵܐ ܩܲܕܝܼܫܘܼ: ܐܵܦ ܤܵܘ̈ܟܹܐ ܟܠܗܘܿܢ. ܠܵܘ ܕܹܝܢ ܗܵܟܲܢܵܐ ܘܐܵܦ ܒܲܚܕܼܵܐ ܡ̣ܢ ܤܵܘ̈ܟܹܐ ܟܲܕܼ ܡܸܬܼܩܲܕܿܫܵܐ. ܪܸܥܝܵܢܵܐ ܕܹܝܢ ܒܥܸܢܝܵܢܵܐ ܙܥܘܿܪܵܐ ܕܲܟܼܬܼܵܒܹ̈ܐ ܘܩܲܠܝܼܠ ܥܲܡܠܵܐ ܕܨܵܘܡܵܐ ܘܫܸܠܝܵܐ: ܛܵܥܹ̇ܐ ܗܸܪܓܹܗ ܩܲܕܼܡܵܝܵܐ ܡܡܸܨܛܲܠܲܠ: ܟܲܕܼ ܢܸܬܼܚܤܸܟܼ ܡ̣ܢ ܥܸܢܝܵܢܹ̈ܐ ܢܘܼܟܼܪ̈ܵܝܹܐ. ܒܪܲܡ ܕܹܝܢ: ܐܵܦ ܕܠܝܼܠܵܐܝܼܬܼ ܡܸܨܛܲܐܸܐ. ܠܸܒܵܐ ܕܹܝܢ ܒܐܘܼ̈ܠܨܵܢܹܐ ܪܵܘܪ̈ܒܹܐ: ܘܲܒܼܓܼܘܼܠܙܵܢܵܐ ܕܡ̣ܢ ܟ̱ܠܹܗ ܚܘܼܠܛܵܢ ܥܵܠܡܵܐ: ܥܲܡ ܡܝܼܬܼܘܼܬܼܵܐ ܓܡܝܼܪܬܵܐ ܕܡ̣ܢ ܟܠ: ܡܸܬܿܕܲܟܸܐ. ܘܡܵܐ ܕܐܸܬܿܕܲܟܿܝܼ: ܡ̣ܢ ܦܸܓܼܥܹ̈ܐ ܕܨܸܒܼ̈ܘܵܬܼܵܐ ܙܥܘܿܪ̈ܝܵܬܼܵܐ: ܠܵܐ ܡܸܨܛܲܐܝܵܐ ܕܲܟܼܝܘܼܬܹܗ. ܗܵܢܵܘ ܕܹܝܢ: ܐܵܦܠܵܐ ܡ̣ܢ ܩܪ̈ܵܒܹܐ ܚܲܤܝܼ̈ܢܹܐ ܕܵܚ̇ܠܵܐ. ܩܢܵܬ̤ ܠܵܗ̇ ܓܹܝܪ ܐܸܤܛܘܼܡܟܵܐ ܚܠܝܼܡܵܐ: ܕܲܦܫܝܼܩܵܐܝܼܬܼ ܡܦܲܫܲܪ ܟܠ ܡܹܐܟܼ̈ܠܵܢ: ܕܠܲܐ̄ܚܪ̈ܵܢܹܐ ܥܲܤ̈ܩܵܢ ܠܡܲܪ̈ܥܲܝ ܒܬܹܐܪ̈ܵܬܼܗܘܿܢ. ܐܲܡܝܼܪ ܓܹܝܪ ܠܲܒܼܢܲܝ̈ ܐܵܤܵܘ̈ܵܬܼܵܐ ܕܟܼܠ ܤܲܝܒܵܪܬܵܐ ܕܒܸܤܪܵܐ ܕܥܲܤܩܵܐ ܠܲܦܫܵܪܵܐ: ܚܲܝܠܵܐ ܝܲܬܝܼܪܵܐ ܝܵܗ̇ܒܵܐ ܒܦܲܓܼܪܵܐ ܚܠܝܼܡܵܐ: ܟܲܕܼ ܡܸܬܼܢܲܤܒܵܐ ܠܓܼܵܘ ܐܸܤܛܘܼܡܟܵܐ ܚܲܝܠܬܼܵܢܵܐ. ܗܵܟܲܢܵܐ ܕܹܝܢ ܘܟܼܠ ܕܘܼܟܵܝܵܐ ܕܲܦܫܝܼܩܵܐܝܼܬܼ ܗܵܘܹ̇ܐ ܘܲܒܼܙܲܒܼܢܵܐ pb. 30 ܙܥܘܿܪܵܐ ܘܥܲܡ̈ܠܹܐ ܩܲܠܝܼ̈ܠܹܐ: ܐܵܦ ܦܫܝܼܩܵܐܝܼܬܼ ܡܸܬܿܛܲܡܲܐ. ܕܲܟܼܝܘܼܬܼܵܐ ܕܹܝܢ ܕܒܼܐܘܼ̈ܠܨܵܢܹܐ ܪܵܘܪ̈ܒܹܐ ܘܲܒܼܢܘܼܓܼܪܵܐ ܡܸܬܼܩܲܢܝܵܐ: ܘܒܲܡܢܵܬܼ ܡܢܵܘ̈ܵܬܼܵܐ ܕܢܲܦܫܵܐ: ܡ̣ܢ ܦܸܓܼܥܹ̈ܐ ܒܨܝܼܪܹ̈ܐ ܕܨܸܒܼ̈ܘܵܬܼܵܐ ܠܵܐ ܩܵܢ̇ܛܵܐ܀ ܪܸ̈ܓܼܫܹܐ ܟܢܝܼ̈ܟܹܐ: ܫܲܝܢܵܐ ܡܵܘܠܕܼܝܼܢ ܒܢܲܦܫܵܐ. ܒܲܕܼܠܵܐ ܫܵܒܼܩ̇ܝܼܢ ܕܬܸܤܲܒܼ ܢܸܤܝܵܢܵܐ ܕܬܲܟܼܬܘܼܫܵܐ. ܡ̣ܢ ܕܹܝܢ ܕܠܵܐ ܬܸܤܲܒܼ ܪܓܸܫܬܼܵܐ ܕܡܸܕܸܡ: ܙܵܟܼܙܼܬܼܵܐ ܗ̣̄ܝ ܕܠܵܐ ܐܵܓܼܘܿܢܵܐ. ܗܵܝ̇ ܕܹܝܢ ܕܬܲܗܡܸܐ ܒܗܵܕܹܐ ܕܲܬܼܚܲܡܤܸܢ ܕܠܵܐ ܬܸܕܲܥ: ܘܒܼܵܬܲܪ ܕܥܸܠܲܬ̤ ܪܓܸܫܬܼܵܐ ܬܸܬܼܟܲܬܲܫ ܠܡܸܗܘܵܐ ܠܒܲܪ ܡܸܢܵܗ̇: ܡܵܘܒܿܕܼܵܐ ܠܩܲܕܼܡܵܝ̈ܵܬܼܵܐ. ܗܵܠܹܝܢ ܕܐܲܝܬܲܝܗܹܝܢ: ܫܲܦܝܘܼܬܼܵܐ ܘܬܲܡܝܼܡܘܼܬܼܵܐ ܕܡ̣ܢ ܟܝܵܢܵܐ. ܤܘܿܓܹܐܗܘܿܢ ܓܹܝܪ ܕܲܒܼܢܲܝ̈ܢܵܫܵܐ: ܐܵܘ ܛܵܟܼ ܕܹܝܢ ܘܟܼܠܹܗ ܥܵܠܡܵܐ: ܒܢܝܼܫܵܐ ܗܵܢܵܐ ܢܵܦ̇ܩܝܼܢ ܡ̣ܢ ܐܲܬܼܪܵܐ ܗܵܘ̇. ܚܲܕܼ ܡ̣ܢ ܤܲܓܿܝܼ̈ܐܹܐ ܡܸܫܬܿܟܲܚ: ܕܲܥܛܲܦ̣ ܬܘܼܒܼ ܠܕܼܘܼܟܿܬܹܗ ܒܐܸܤܟܹܡܵܐ ܕܲܬܼܪܹܝܢ. ܛܵܒܼ ܕܹܝܢ ܫܲܦܝܼܪܵܐ ܦܫܝܼܛܘܼܬܼܵܐ ܐܵܘ ܙܢܲܝ̈ܵܐ ܡܫܲܚ̈ܠ̱ܦܹܐ ܕܫܘܼܒܼܩܵܢܵܐ. ܕܸܚ̱ܠܬܼܵܐ ܚܵܫ̇ܚܵܐ ܠܲܟܼܝܵܢܵܐ ܐ̄ܢܵܫܵܝܵܐ: ܠܡܸܛܲܪ ܬܚܘܼܡܵܐ ܕܲܥ̇ܒܼܵܪ ܦܘܼܩܕܵܢܵܐ. ܚܘܼܒܵܐ ܕܹܝܢ: ܠܲܡܙܵܥܘܼ ܒܹܗ ܤܘܼܘܵܚܵܐ ܕܛܵܒܼ̈ܬܼܵܐ: ܕܡܸܛܠܵܬܼܗܹܝܢ ܡܸܬܼܚܲܦܲܛ ܠܘܵܬܼ ܦܘܼܠܚܵܢܵܐ ܕܫܲܦܝܪ̈ܵܬܼܵܐ܀ ܝܑܼܕܲܥܬܼܵܐ ܕܪܘܼܚ: ܬܪܲܝܵܢܝܼܬܼܵܐ ܗ̣̄ܝ ܒܲܗܘܵܝܵܗ̇: ܠܦܘܼܠܚܵܢܵܐ ܕܲܡܝܲܬܿܪܘܼܬܼܵܐ. ܩܲܕܝܼܡܝܼܢ ܕܹܝܬ ܠܬܲܪ̈ܬܲܝܗܹܝܢ: ܚܘܼܒܵܐ ܘܕܸܚܠܬܼܵܐ. ܩܲܕܝܼܡܵܐ ܘܲܠܪܸܚܡܬܼܵܐ: ܕܸܚܠܬܼܵܐ. ܟܠ ܕܹܝܢ ܕܡܲܚܨܸܦ ܒܩܸܢܝܵܢܵܐ ܕܲܐ̄ܚܪ̈ܵܝܵܬܼܵܐ ܡ̣ܢ ܩܕܼܵܡ ܩܲܕܼ̈ܡܵܝܵܬܼܵܐ: ܕܠܵܐ ܦܘܼܫܵܟܼ ܫܲܬܼܐܸܤܬܼܵܐ ܕܐܲܒܼܕܵܢܵܐ ܤܵܐܹ̇ܡ ܒܢܲܦܫܹܗ. ܗܵܟܲܢܵܐ ܒܝܘܼܒܵܠܵܐ ܤܝܼ̈ܡܵܢ ܡ̣ܢ ܐܲܠܵܗܵܐ: ܕܗܵܢܹܝܢ: ܡ̣ܢ ܗܵܠܹܝܢ ܢܸܬܼ̈ܝܲܠܕܵܢ. ܠܵܐ ܬܚܲܠܸܦ ܚܘܼܒܵܐ ܕܩܲܪܝܼܒܼܵܟܼ ܒܚܘܼܒܵܐ ܕܨܸܒܼ̈ܘܵܬܼܵܐ: ܕܗܵܘ̇ ܕܡ̣ܢ ܟܠ ܝܲܩܝܼܪ: ܟܤܸܐ ܠܓܼܵܘ ܡܸܢܹܗ܀ ܗܵܘ̇ ܡܵܐ ܕܐܝܼܬܼܵܘܗܝ ܤܝܵܡܵܐ pb. 31 ܓܘܼܫܡܵܢܵܝܵܐ ܠܥܲܝ̈ܢܹܐ ܒܸܤܪ̈ܵܢܵܝܬܼܵܐ: ܗ̤ܘ ܟܲܕܼ ܗ̤ܘ ܚܫܲܚܬܼܵܐ ܚܲܫܵܢܵܝܬܼܵܐ ܠܚܵܙܘܿܝܘܼܬܼܵܐ ܟܤܝܼܬܼܵܐ. ܘܗܵܘ̇ ܡܵܐ ܕܐܝܼܬܼܵܘܗܝ ܛܲܟܼܤܵܐ ܕܥܲܪ̈ܦܸܠܲܝ ܚܲܫܹ̈ܐ ܠܬܹܐܘܿܪܝܼܵܐ ܟܝܵܢܵܝܬܼܵܐ ܕܬܲܪܬܹܝܢ: ܗ̤ܘ ܟܲܕܼ ܗ̤ܘ: ܘܗܵܕܹܐ ܠܬܲܩܢܘܼܬܼܵܐ ܟܝܵܢܵܝܬܼܵܐ: ܘܒܹܗ ܒܲܙܢܵܐ ܠܲܚܕܼܵܕܹ̈ܐ: ܥܕܲܡܵܐ ܠܐܲܝܕܵܐ ܕܲܠܘܵܬܼܵܗ̇ ܫܵܪܹܟܼ ܝܘܼܒܵܠܗܹܝܢ ܕܬܹܐܘܿܪ̈ܝܼܣ܀ ܡܵܐ ܕܲܒܼܬܲܩܢܘܼܬܼܵܐ ܟܝܵܢܵܝܬܼܵܐ ܩܵܐܹ̇ܡ ܗܵܘܢܵܐ: ܒܬܹܐܘܿܪܝܼܵܐ ܕܡܲܠܵܐܟܹ̈ܐ ܐܝܼܬܼܵܘܗܝ: ܕܗ̤ܝ ܗ̣̄ܝ ܬܹܐܘܿܪܝܼܵܐ ܩܲܕܼܡܵܝܬܼܵܐ ܘܲܟܼܝܵܢܵܝܬܼܵܐ: ܡܸܬܼܩܲܪܝܵܐ ܕܹܝܢ ܘܗ̤ܝ ܟܲܕܼ ܗ̤ܝ: ܘܗܵܘܢܵܐ ܥܲܪܛܸܠܵܝܵܐ. ܡܵܐ ܕܹܝܢ ܕܒܼܝܼܕܲܥܬܼܵܐ ܟܝܵܢܢܵܝܬܼܵܐ ܕܬܲܪܬܹܝܢ: ܡ̣ܢ ܬܕܼܵܝܹ̈ܐ ܓܫܝܼ̈ܡܹܐ ܝܵܢܹ̇ܩ ܘܡܸܤܬܲܝܒܲܪ ܚܲܠܒܼܵܐ: ܗܵܝ̇ ܕܡܸܬܼܩܲܪܝܵܐ: ܠܒܼܘܼܫܵܐ ܐ̄ܚܪܵܝܵܐ ܕܛܲܟܼܤܸܐ ܕܩܲܕܸܡ ܐܸܬܼܐ̱ܡܲܪ: ܕܡ̣ܢ ܒܵܬܲܪ ܕܲܟܼܝܘܼܬܼܵܐ ܤܝܼܡܵܐ: ܕܠܵܗ̇ ܠܘܼܩܕܲܡ ܢܸܥܘܿܠ ܗܵܘܢܵܐ: ܘܗ̤ܝ ܟܲܕܼ ܗ̤ܝ ܩܲܕܝܼܡܵܐ ܡܲܢ ܒܲܗܘܵܝܵܐ: ܛܲܟܼܤܵܐ ܗ̣̄ܝ ܓܹܝܪ ܩܲܕܼܡܵܝܵܐ ܕܝܼܕܲܥܬܼܵܐ. ܒܐܝܼܩܵܪܵܐ ܕܹܝܢ: ܐ̄ܚܪܵܝܵܐ. ܘܡܸܛܠܗܵܢܵܐ ܘܲܬܼܪܲܝܵܢܝܼܬܼܵܐ ܡܸܬܼܩܲܪܝܵܐ: ܘܐܲܝܟܼ ܪ̈ܘܼܫܡܹܐ ܡܸܕܸܡ ܕܐܵܬܼ̈ܘܵܬܼܵܐ: ܕܲܒܼܗܘܿܢ ܡܸܬܿܕܲܟܸܐ ܘܡܸܬܿܕܲܪܲܫ ܗܵܘܢܵܐ ܠܘܵܬܼ ܡܲܤܲܩܬܼܵܐ ܕܛܲܟܼܤܵܐ ܗܵܘ̇ ܕܲܬܼܪܹܝܢ: ܕܗ̤ܘܝܘܼ ܓܡܝܼܪܘܼܬܼܵܐ ܕܙܵܘ̈ܥܲܝ ܡܲܕܿܥܵܐ: ܘܛܲܟܼܤܵܐ ܩܲܪܝܼܒܼܵܐ ܕܲܠܘܵܬܼ ܬܹܐܘܿܪܝܼܵܐ ܐܲܠܵܗܵܝܵܬܐ܀ ܠܒܼܘܼܫܵܐ ܐ̄ܚܪܵܝܵܐ ܕܗܵܘܢܵܐ: ܪܸ̈ܓܼܫܹܐ. ܥܲܪܛܸܠܵܝܘܼܬܹܗ ܕܹܝܢ: ܡܸܬܿܬܿܙܝܼܥܵܢܘܼܬܹܗ ܕܲܒܼܬܹܐܘܿܪ̈ܝܼܵܣ ܕܠܵܐ ܗܘܼ̈ܠܹܐ܀ ܐܲܪܦܵܐ ܙܥܘܿܪ̈ܝܵܬܼܵܐ: ܕܬܸܫܟܲܚ ܡܝܲܩܪ̈ܵܬܼܵܐ܀ ܗ̤ܘܝܼ ܡܝܼܬܼܵܐ ܒܚܲܝܹ̈ܐ: ܘܠܵܐ ܬܸܚܸܐ ܒܡܝܼܬܼܘܼܬܼܵܐ. ܗܲܒܼ ܢܲܦܫܵܟܼ ܕܲܬܼܡܘܼܬܼ ܒܟܲܫܝܼܪܘܼܬܼܵܐ܀ ܘܠܵܐ ܠܡܸܚܵܐ ܒܚܘܼܝܵܒܼܵܐ. ܠܵܘ ܒܲܠܚܘܿܕܼ ܗܵܢ̇ܘܿܢ ܕܲܚܠܵܦ ܗܲܝܡܵܢܘܼܬܹܗ ܕܲܡܫܝܼܚܵܐ ܡܩܲܒܿܠܝܼܢ ܡܵܘܬܵܐ ܐܝܼܬܲܝܗܘܿܢ ܤܵܗ̈ܕܹܐ: ܐܸܠܵܐ ܐܵܦ ܐܲܝܠܹܝܢ ܕܲܚܠܵܦ ܢܛܘܼܪܲܬܼ ܦܘܼܩܕܵܢܵܘ̈ܗܝ ܡܵܝ̇ܬܿܝܼܢ܀ pb. 32 ܠܵܐ ܬܸܗܘܸܐ ܦܲܟܿܝܼܗ ܒܫܸܐ̈ܠܵܬܼܵܐ: ܕܠܵܐ ܬܨܲܥܲܪ ܠܐܲܠܵܗܵܐ ܒܠܵܐ ܝܑܼܕܲܥܬܼܵܟܼ܀ ܐܸܬܼܚܲܟܲܡ ܠܲܡܨܲܠܵܝܘܼ: ܕܬܸܫܬܘܸܐ ܠܲܫܒܼܝܼ̈ܚܵܬܼܵܐ܀ ܒܥܝܼ ܝܲܩܝܼܪ̈ܵܬܼܵܐ ܡ̣ܢ ܗܵܘ̇ ܕܠܵܐ ܚܵܤܹ̇ܟܼ: ܕܲܬܼܩܲܒܸܿܠ ܐܝܼܩܵܪܵܐ ܡ̣ܢ ܨܹܐܕܼܵܘܗܝ: ܡܸܛܠ ܓܒܼܝܼܬܼܵܐ ܕܨܸܒܼܝܵܢܵܟܼ ܚܲܟܿܝܼܡܵܐ܀ ܫܐܸܠ̣ ܫܠܹܝܡܘܿܢ ܚܸܟܼܡ̱ܬܼܵܐ: ܘܲܢܤܲܒܼ ܐܵܦ ܡܲܠܟܿܘܼܬܼܵܐ ܕܐܲܪܥܵܐ ܥܲܡܵܗ̇: ܡܸܛܠ ܗܵܝ̇ ܕܚܲܟܿܝܼܡܵܐܝܼܬܼ ܝܑܼܕܲܥ̣ ܠܡܸܫܐܲܠ: ܗܵܢܵܘ ܕܹܝܢ ܡ̣ܢ ܡܲܠܟܵܐ: ܪܵܘܪ̈ܒܼܵܬܼܵܐ܀ ܫܐܸܠ̣ ܐܹܠܝܼܫܲܥ ܚܲܕܼ ܬܪܹܝܢ ܒܪܘܼܚܵܐ ܕܥܲܠ ܪܲܒܹܿܗ: ܘܠܵܐ ܐܸܬܼܟܲܠܝܲܬ̤ ܡܸܢܹܗ ܫܸܐܠ̱ܬܹܗ܀ ܒܥ̣ܵܐ ܝܑܼܤܪܵܝܹܠ ܫܝܼ̈ܛܵܬܼܵܐ: ܘܩܲܒܸܿܠ̣ ܪܘܼܓܼܙܹܗ ܕܐܲܠܵܗܵܐ܀ ܐܲܪܦܝܼ ܠܗܵܝ̇ ܕܢܸܬܼܗܲܪ ܒܲܥܒܼܝܼ̈ܕܵܬܹܗ ܘܲܕܼܚܝܼ̈ܠܵܬܼܵܐ ܕܲܥܒܼܵܕܼܵܘ̈̇ܗܝ: ܘܲܫܐܸܠ̣ ܪ̈ܓܼܝܼܓܼܵܬܼܵܐ ܕܟܲܪܤܹܗ. ܘܥܲܕܼ ܡܹܐܟܼܘܼܠܬܿܗܘܿܢ ܒܦܘܼܡܗܘܿܢ: ܪܘܼܓܼܙܹܗ ܕܐܲܠܵܗܵܐ ܤܠܸܩ̣ ܒܗܘܿܢ. ܠܐܲܠܵܗܵܐ ܐܲܝܟܼ ܫܒܼܝܼܚܘܼܬܹܗ ܩܲܪܸܒܼ ܫܸܐ̈ܠܵܬܼܵܟܼ: ܕܢܹܐܪܲܒܼ ܠܘܵܬܹܗ ܐܝܼܩܵܪܵܟܼ: ܘܢܸܚܕܸܐ ܒܵܟܼ܀ ܐܲܝܟܲܢܵܐ ܕܐ̄ܢܵܫ ܢܸܫܐܲܠ ܡ̣ܢ ܓܲܒܼܪܵܐ ܘܲܠܟܵܐ ܡܠܸܐ ܟܲܝܠܵܐ ܙܸܒܼܠܵܐ: ܠܵܘ ܒܲܠܚܘܿܕܼ ܗ̤ܘ ܢܸܬܿܬܿܫܝܼܛ ܡܸܛܠ ܫܝܼܛܘܼܬܼܵܐ ܕܫܸܐܠܬܹܗ: ܒܗܵܝ̇ ܕܩܲܛܪܸܓܼ ܢܲܦܫܹܗ ܒܠܵܐ ܝܑܼܕܲܥܬܼܵܐ: ܐܸܠܵܐ ܘܨܲܥܪܵܐ ܩܲܪܸܒܼ ܠܡܲܠܟܵܐ ܡܸܛܠ ܦܝܵܤܹܗ ܦܲܟܿܝܼܗܵܐ: ܗܵܟܲܢܵܐ ܗ̄ܘ̣ ܡܲܢ ܕܦܲܓܼܪ̈ܵܢܝܬܼܵܐ ܢܸܫܐܲܠ ܒܲܨܠܘܿܬܼܵܐ ܡ̣ܢ ܐܲܠܵܗܵܐ܀ ܗܵܐ ܡܲܠܲܐܟܹ̈ܐ ܘܪ̈ܲܒܲܝ ܡܲܠܲܐܟܹ̈ܐ ܕܝܼܬܲܝܗܘܿܢ ܪܵܘܪ̈ܒܼܵܢܹܐ ܕܡܲܠܟܵܐ: ܚܵܝ̇ܪܝܼܢ ܒܵܟܼ ܒܥܸܕܵܢܵܐ ܕܲܨܠܘܿܬܼܵܐ: ܕܡܵܢܵܐ ܒܵܥܘܼܬܼܵܐ ܬܩܲܪܸܒܼ ܠܡܵܪܗܘܿܢ. ܘܬܼܵܗ̇ܪܝܼܢ ܒܵܟܼ ܟܲܕܼ ܚܵܙܹ̇ܝܢ ܠܦܲܓܼܪܵܢܵܐ ܕܐܲܪܦܝܼ ܠܩܸܩܠ̱ܬܹܗ: ܘܲܫܐܸܠ̣ ܫܡܲܝܵܢ̈ܝܵܬܼܵܐ܀ ܠܵܐ ܬܸܫܐܲܠ ܡ̣ܢ ܐܲܠܵܗܵܐ ܗܵܘ̇ pb. 33 ܡܸܕܸܡ: ܕܐܵܦ ܒܸܠܥܵܕܼ ܦܝܵܤܵܐ ܕܝܼܠܲܢ ܒܛܝܼܠ ܠܹܗ ܠܡܸܬܲܠ ܠܲܢ. ܠܵܘ ܒܲܠܚܘܿܕܼ ܠܒܲܝܬܵܝܵܘ̈ܗܝ: ܐܸܠܵܐ ܘܕܼܵܐܦܠܵܐ ܠܐܲܝܠܹܝܢ ܕܢܘܼܟܼܪܵܝܑܝܼܢ ܠܲܓܼܡܵܪ ܠܝܼܕܲܥܬܹܗ: ܘܐܵܦܠܵܐ ܕܐܝܼܬܼܵܘܗܝ ܝܵܕܼܥ̇ܝܼܢ: ܚܵܤܹ̇ܟܼ ܡܸܢܗܘܿܢ܀ ܠܵܐ ܠܲܡ ܬܸܗܘܘܿܢ ܡܦܲܩܩܝܼܢ ܐܲܝܟܼ ܚܲܢ̈ܦܹܐ. ܡܵܢܲܐ ܗ̣̄ܝ ܗܵܝ̇ ܕܐܲܝܟܼ ܚܲܢ̈ܦܹܐ؟ ܗܵܠܹܝܢ ܠܲܡ ܕܦܲܓܼܪܵܐ: ܥܲܡ̈ܡܹܐ ܗ̄ܘ̣ ܕܐܲܪܥܵܐ ܒܵܥܹ̇ܝܢ ܠܗܹܝܢ. ܐܲܢ̄ܬܿܘܿܢ ܠܲܡ: ܠܵܐ ܬܸܪܢܘܿܢ ܕܡܵܢܵܐ ܢܹܐܟܼܘܿܠ: ܐܵܘ ܡܵܢܵܐ ܢܸܫܬܸܐ: ܐܵܘ ܡܵܢܵܐ ܢܸܬܼܟܲܤܸܐ. ܐܲܒܼܘܼܟܼܘܿܢ ܠܲܡ ܝܵܕܲܥ̇: ܕܐܵܦ ܠܟܼܘܿܢ ܡܸܬܼܒܲܥ̈ܝܵܢ ܗܵܠܹܝܢ܀ ܠܵܐ ܡܸܡܬܼܘܿܡ ܫܵܐܹ̇ܠ ܒܪܵܐ ܡ̣ܢ ܐܲܒܼܘܼܗܝ ܠܲܚܡܵܐ: ܐܸܠܵܐ ܥܲܠ ܡܢܵܘ̈ܬܼܵܐ ܪܵܘܪ̈ܒܼܵܬܼܵܐ ܕܐܝܼܬܼ ܠܹܗ ܒܹܝܬܼ ܐܲܒܼܘܼܗܝ: ܡܩܲܪܸܒܼ ܦܝܵܤܵܐ܀ ܗܵܝ̇ ܕܲܦ̣ܩܲܕܼ ܡܵܪܲܢ ܥܲܠ ܠܚܸܡ ܝܵܘܡܵܐ ܠܡܸܫܐܲܠ ܒܲܨܠܘܼܬܼܵܐ: ܫܸܐܠ̱ܬܼܵܐ ܗ̣̄ܝ ܕܲܠܓܼܵܘܵܐ ܐܲܫܠܸܡ̣: ܡܸܛܠ ܡܚܝܼܠܘܼܬܼܵܐ ܕܬܲܪ̈ܥܝܵܬܼܗܘܿܢ. ܚܙܝܼ ܕܹܝܢ ܠܲܡܫܲܡ̈ܠܲܝܲܝ ܒܝܼܕܲܥܼܵܐ ܘܲܚܠܝܼ̈ܡܲܝ ܢܲܦܫܵܐ: ܡܵܢܵܐ ܦܵܩܹ̇ܕܼ ܠܗܘܿܢ: ܐܵܦܠܵܐ ܠܲܡ ܥܲܠ ܤܲܝܒܵܪܬܵܐ ܐܵܘ ܥܲܠ ܠܒܼܘܼܫܵܐ ܬܸܪܢܘܿܢ. ܐܸܢ ܥܲܠ ܦܵܪܲܚܬܼܵܐ ܠܲܡ ܕܲܕܼܠܵܐ ܢܦܸܫ ܒܛܝܼܠ ܠܹܗ ܠܐܲܠܵܗܵܐ: ܟܡܵܐ ܝܲܬܿܝܼܪܵܐܝܼܬܼ ܥܠܲܝܟܿܘܿܢ. ܐܸܠܵܐ ܒܥܵܘ ܡ̣ܢ ܐܲܠܵܗܵܐ ܡܲܠܟܿܘܼܬܼܵܐ ܘܙܲܕܝܼܩܘܼܬܼܵܐ: ܘܗܵܠܹܝܢ: ܐܲܝܟܼ ܝܲܬܿܝܼܪ̈ܵܬܼܵܐ ܡܵܘܤܸܦ ܠܟܼܘܿܢ܀ ܐܸܢ ܡܲܓܲܪ ܪܘܼܚܹܗ ܥܲܠ ܫܸܐܠ̱ܬܼܵܟܼ: ܟܲܕܼ ܬܸܒܼܥܸܐ ܘܠܵܐ ܬܸܤܼܲܒܼ ܕܠܝܼܠܵܐܝܼܬܼ: ܠܵܐ ܬܸܬܿܥܝܼܩ. ܠܵܐ ܓܹܝܪ ܚܲܟܿܝܼܡ ܐܲܢ̄ܬܿ ܡ̣ܢ ܐܲܠܵܗܵܐ. ܐܸܡܲܬܼܝ ܕܹܝܢ ܕܲܬܼܩܵܘܸܐ ܕܐܲܝܟܼ ܗܵܟܲܢ: ܐܵܘ ܡܸܛܠ ܕܘܼܒܵܪ̈ܲܝܟ ܕܠܵܐ ܫܵܘܹ̇ܝܢ ܠܫܸܐܠܵܬܼܵܟܼ: ܐܵܘ ܡܸܛܠ ܐܘܼܪ̈ܚܵܬܼܵܐ ܕܠܸܒܵܟܼ ܕܲܦܪ̈ܝܼܫܵܢ ܡ̣ܢ ܢܝܼܫܵܐ ܕܲܨܠܘܿܬܼܵܟܼ: ܠܵܘ ܡܸܛܠ ܡܫܘܼܚܬܼܵܟܼ ܕܲܒܼܟܸܤܝܵܐ ܕܫܲܒܼܪܵܐ ܠܘܵܬܼ ܪܲܒܿܘܼܬܼܵܗ̇ ܕܲܨܒܼܘܼܬܼܵܐ܀ ܠܵܐ ܙܵܕܹܩ ܕܨܸܒܼ̈ܘܵܬܼܵܐ ܪܵܘܪ̈ܒܼܵܬܼܵܐ ܕܠܝܼܠܵܐܝܼܬܼ pb. 34 ܢܸܦ̈ܠܵܢ ܒܐܝܼ̈ܕܲܝܢ: ܕܠܵܐ ܬܸܬܼܒܲܨܲܪ ܡܵܘܗܲܒܼܬܹܗ ܕܐܲܠܵܗܵܐ ܡܸܛܠ ܦܫܝܼܩܘܼܬܼܵܐ ܕܲܫܟܼܵܚܬܵܗ̇܀ ܟܠܡܸܕܸܡ ܕܲܕܼܠܝܼܠ ܒܲܫܟܼܵܚܬܹܗ: ܐܵܦ ܦܫܝܼܩܵܐܝܼܬܼ ܗܵܘܹ̇ܐ ܐܲܒܼܕܵܢܹܗ܀ ܟܠܡܸܕܸܡ ܕܲܒܼܥܲܡܠܵܐ ܡܸܫܬܿܟܲܚ: ܒܲܙܗܝܼܪܘܼܬܼܵܐ ܡܸܬܼܢܛܲܪ܀ ܨܗܝܼ ܡܸܛܠ ܝܼܫܘܿܥ: ܕܢܲܪܘܹܝܟܼ ܒܚܘܼܒܹܗ. ܥܲܡܸܨ ܥܲܝܢܲܝ̈ܟ ܡ̣ܢ ܝܲܩܝܼܪ̈ܵܬܹܗ ܕܥܵܠܡܵܐ: ܕܬܸܫܬܿܘܸܐ ܠܡܲܡܠܵܟܼܘܼ ܒܠܸܒܵܟܼ ܫܠܵܡܵܐ ܕܡ̣ܢ ܐܲܠܵܗܵܐ܀ ܨܘܼܡ ܡ̣ܢ ܡܓܲܪ̈ܓܼܵܢܝܵܬܼܵܐ ܕܲܡܗܲܒ̈ܒܼܵܢ ܠܥܲܝ̈ܢܹܐ: ܕܬܸܫܬܿܘܸܐ ܠܚܲܕܼܘܼܬܼܵܐ ܕܲܒܼܪܘܼܚ܀ ܐܸܢ ܠܵܐ ܫܵܘܹ̇ܝܢ ܕܘܼܒܵܪ̈ܲܝܟ ܠܐܲܠܵܗܵܐ: ܠܵܐ ܬܸܫܐܲܠ ܡܸܢܹܗ ܡܫܲܒ̈ܚܵܬܼܵܐ: ܕܠܵܐ ܬܸܬܼܚܙܸܐ ܐܲܝܟܼ ܓܲܒܼܪܵܐ ܕܲܡܢܲܤܸܐ ܠܐܲܠܵܗܵܐ܀ ܬܪܝܼܨܵܐܝܼܬܼ ܕܹܝܢ ܨܠܘܿܬܼܵܐ: ܠܦܘܼܬܼ ܕܘܼܒܵܪܹ̈ܐ ܗܵܘ̇ܝܵܐ܀ ܠܵܐ ܐ̄ܢܵܫ ܡܸܬܼܪܲܓܼܪܲܓܼ ܫܡܲܝܵܢ̈ܝܵܬܼܵܐ: ܟܲܕܼ ܐܲܤܝܼܪ ܒܲܦܟܼܵܪܹ̈ܐ ܨܸܒܼ̈ܝܵܢܵܝܹܐ ܡܸܛܠ ܦܲܓܼܪܵܐ. ܘܠܲܝܬܿ ܕܫܵܐܹ̇ܠ ܗܵܠܹܝܢ ܐܲܠܵܗܵܝ̈ܵܬܼܵܐ: ܘܲܥܢܸܐ ܒܐܲܪ̈ܥܵܢܵܝܵܬܼܵܐ. ܪܸܓܿܬܹܗ ܕܟܼܠܢܵܫ: ܡ̣ܢ ܥܒܼܵܕܼܵܘ̈ܗܝ ܡܸܬܼܝܲܕܼܥܵܐ. ܘܐܵܦ ܥܲܠ ܗܵܘ̇ ܡܵܐ ܕܲܒܼܛܝܼܠ ܠܹܗ: ܕܐܵܦ ܒܲܨܠܘܿܬܼܵܐ ܢܸܫܐܲܠ ܥܠܵܘܗܝ: ܐܲܟܼܝܼܦܵܐ ܠܹܗ. ܘܗܵܘ̇ ܡܵܐ ܕܲܡܨܲܠܸܐ ܡܸܛܠܵܬܹܗ: ܘܐܵܦ ܕܲܢܚܵܘܸܐ ܒܓܲܠ̈ܝܵܬܹܗ: ܚܦܝܼܛܘܼܬܼܵܐ ܡܚܵܘܸܐ܀ ܐܲܝܢܵܐ ܕܲܠܗܝܼܩ ܠܪܵܘܪ̈ܒܼܵܬܼܵܐ: ܒܲܒܼܨܝܼܪ̈ܵܬܼܵܐ ܠܵܐ ܥܢܸܐ܀ ܗ̤ܘܝܼ ܒܲܪ ܚܹܐܪܹ̈ܐ ܟܲܕܼ ܐܲܤܝܼܪ ܐܲܢ̄ܬܿ ܒܦܲܓܼܪܵܐ: ܘܚܵܘܵܐ ܫܘܼܥܒܵܕܼܵܐ ܒܚܹܐܪܘܼܬܼܵܟܼ ܡܸܛܠ ܡܫܝܼܚܵܐ: ܘܲܥܪܝܼܡܵܐ ܒܬܲܡܝܼܡܘܼܬܼܵܟܼ: ܕܠܵܐ ܬܸܬܼܓܿܢܸܒܼ܀ ܐܲܚܸܒܼ ܡܲܟܿܝܼܟܼܘܼܬܼܵܐ ܒܗܘܼ̈ܦܵܟܲܝܟܼ: ܕܬܸܬܼܦܲܨܠ ܡ̣ܢ ܦܲܚܹ̈ܐ ܠܵܐ ܡܸܬܿܕܲܪ̈ܟܵܢܹܐ: ܕܐܲܡܝܼܢܵܐܝܼܬܼ ܫܟܼܝܼܚܝܼܢ ܠܒܲܪ ܡ̣ܢ ܫܒܼܝܼ̈ܠܹܐ ܕܲܒܼܗܘܿܢ ܪܵܕܹܝܢ ܡܲܟܿܝܼ̈ܟܹܐ. ܠܵܐ ܬܲܤܠܸܐ ܐܘܼ̈ܠܨܵܢܹܐ: ܕܒܼܐܝܼܕܲܝ̈ܗܘܿܢ ܬܸܥܘܿܠ ܠܘܵܬܼ ܝܑܼܕܲܥܬܼܵܐ܀ ܠܵܐ ܬܸܕܼܚܲܠ ܡ̣ܢ ܢܸܤ̈ܝܘܿܢܹܐ: ܕܲܒܼܗܘܿܢ ܬܸܫܟܲܚ ܝܲܩܝܼܪ̈ܵܬܼܵܐ܀ pb. 35 ܨܲܠܵܐ: ܕܠܵܐ ܬܸܥܘܿܠ ܠܢܸܤ̈ܝܘܿܢܹܐ ܢܲܦܫܵܢܵܝܹ̈ܐ. ܠܲܕܼܦܲܓܼܪܵܐ ܕܹܝܢ: ܒܟܼܠܹܗ ܚܲܝܠܵܟܼ ܐܸܬܼܥܲܬܲܕܼ. ܘܲܒܼܟܠܗܘܿܢ ܗܲܕܵܡܲܝ̈ܟ: ܤܚܝܼ ܒܓܼܵܘܗܘܿܢ. ܒܸܠܥܵܕܲܝܗܘܿܢ ܓܹܝܪ ܕܬܸܬܼܩܲܪܲܒܼ ܠܐܲܠܵܗܵܐ: ܠܵܐ ܡܸܫܟܲܚ ܐܲܢ̄ܬܿ. ܠܓܼܵܘ ܡܸܢܗܘܿܢ ܓܹܝܪ ܤܝܼܡܵܐ: ܢܝܵܚܬܵܐ ܐܲܠܵܗܵܝܵܬܐ܀ ܕܥܵܪܹܩ ܡ̣ܢ ܢܸܤ̈ܝܘܿܢܹܐ: ܥܵܪܹܩ ܡ̣ܢ ܡܝܲܬܿܪܘܼܬܼܵܐ. ܠܵܘ ܡ̣ܢ ܢܸܤ̈ܝܘܿܢܹܐ ܕܲܪ̈ܓܼܝܼܓܼܵܬܐ: ܐܸܠܵܐ ܡ̣ܢ ܐܘܼ̈ܠܨܵܢܹܐ܀ ܘܐܲܝܟܲܢ ܕܵܡ̇ܝܵܐ ܗܵܝ̇ ܕܨܲܠܵܘ ܕܠܵܐ ܬܸܥܠܘܼܢ ܠܢܸܤܝܘܿܢܵܐ: ܠܗܵܝ̇ ܕܐܸܬܼܟܲܬܲܫܘ ܠܡܸܥܲܠ ܒܬܲܪܥܵܐ ܐܲܠܝܼܨܵܐ. ܘܠܵܐ ܠܲܡ ܬܸܕܼܚܠܘܼܢ ܡ̣ܢ ܐܲܝܠܹܝܢ ܕܩܵܛ̇ܠܝܼܢ ܦܲܓܼܪܵܐ: ܘܡܲܢ ܕܢܵܘܒܸܿܕܼ ܢܲܦܫܹܗ ܡܸܛܠܵܬܼܝ ܢܸܫܟܿܚܝܼܗ̇. ܒܟܼܠܕܘܼܟ: ܥܲܠ ܢܸܤ̈ܝܘܿܢܹܐ ܡܚܲܦܸܛ ܠܲܢ ܡܵܪܲܢ. ܘܗܵܪܟܵܐ ܦܵܩܹ̇ܿܕܼ ܕܲܢܨܲܠܸܐ: ܕܠܵܐ ܢܸܥܘܿܠ. ܐܲܝܕܵܐ ܡܝܲܬܿܪܘܼܬܼܵܐ ܡܸܬܼܓܲܡܪܵܐ ܒܸܠܥܵܕܼ ܡ̣ܢ ܢܸܤ̈ܝܘܿܢܹܐ؟ ܐܵܘ ܐܲܝܢܵܘ ܢܸܤܝܘܿܢܵܐ ܕܚܲܤܝܼܢ ܡ̣ܢ ܐܲܒܼܕܵܢܵܐ: ܕܦܵܩܹ̇ܕܼ ܠܲܢ ܠܡܸܥܲܠ ܡܸܛܠܵܬܹܗ؟ ܡܲܢ ܕܠܵܐ ܢܸܫܩܘܼܠ ܙܩܝܼܦܹܗ ܘܪܵܕܹܦ ܒܵܬܲܪܝ: ܠܵܐ ܫܵܘܹ̇ܐ ܠܝܼ. ܘܨܲܠܵܘ ܠܲܡ: ܕܠܵܐ ܬܸܥܠܘܼܢ ܠܢܸܤܝܘܿܢܵܐ. ܘܲܒܼܟܼܠܹܗ ܝܘܼܠܦܵܢܹܗ: ܡܲܥܲܠܬܼܵܐ ܕܲܠܢܸܤ̈ܝܘܿܢܹܐ ܙܪܝܼܥܵܐ. ܘܗ̤ܘ ܐܸܡ݂ܲܪ: ܕܒܸܠܥܵܕܼ ܢܸܤ̈ܝܘܿܢܹܐ: ܠܵܐ ܡܸܫܬܲܟܼܚܵܐ ܡܲܠܟܿܘܼܬܼܵܐ ܕܲܡܫܲܝܵܐ܀ ܐܘܿ ܟܡܵܐ ܩܲܛܝܼܢܵܐ ܐܘܼܪܚܵܐ ܕܝܘܼܠܦܵܢܵܟܼ ܡܵܪܲܢ! ܘܐܲܝܢܵܐ ܕܒܼܝܼܕܲܥܬܼܵܐ ܠܵܐ ܡܸܬܼܒܲܝܲܢ ܟܲܕܼ ܩܵܪܹܐ: ܐܲܡܝܼܢܵܐܝܼܬܼ ܠܒܲܪ ܡܸܢܵܗ̇ ܩܵܐܹ̇ܡ ܒܤܘܼܟܵܠܹܗ܀ ܟܲܕܼ ܒܥ̣ܵܘ ܡܸܢܹܗ ܒܢܲܝ̈ ܙܲܒܼܕܲܝ ܘܐܸܡܗܘܿܢ ܡܵܘܬܿܒܼܵܐ ܕܥܲܡܹܗ ܒܡܲܠܟܘܼܬܼܵܐ: ܗܵܕܹܐ ܬܒܲܥ̣ ܗ̄ܘ̣ܵܐ ܡܸܢܗܘܿܢ: ܕܐܸܢ ܡܸܫܟܿܚܝܼܢ ܚܲܕܼܝܵܐܝܼܬܼ ܠܲܡܩܲܒܵܠܘܼ ܟܵܤܵܐ ܕܢܸܤ̈ܝܘܿܢܹܐ. ܡܸܫܟܿܚܝܼܢ ܐܢ̄ܬܘܿܢ ܠܡܸܫܬܼܵܐ pb. 36 ܟܵܤܵܐ ܕܐܸܢܵܐ ܫܵܬܹ̇ܐ ܐ̄ܢܵܐ: ܘܡܲܥܡܘܿܕܸܝܬܼܵܐ ܕܥܵܡܹ̇ܕܼܢܵܐ ܬܸܥܡ̱ܕܼܘܼܢ؟ ܘܐܲܝܟܲܢܵܐ ܬܢܵܢ: ܨܲܠܵܘ ܕܠܵܐ ܬܸܥܠܘܼܢ: ܦܵܩܹ̇ܕܼ ܐܲܢ̄ܬܿ ܡܵܪܲܢ؟ ܕܡܸܛܠ ܐܲܝܠܹܝܢ ܢܸܤ̈ܝܘܿܢܹܐ ܢܨܲܠܸܐ ܕܠܵܐ ܢܸܥܘܼܠ. ܨܲܠܵܐ: ܕܠܵܐ ܬܸܥܘܿܠ ܠܢܸܤܝܘܿܢܵܐ ܒܗܲܝܡܵܢܘܼܬܼܵܟܼ܀ ܨܲܠܵܐ: ܕܠܵܐ ܬܸܥܘܿܠ ܠܢܸܤܝܘܿܢܵܐ ܒܡܲܤܒܿܪܵܢܘܼܬܼܵܐ ܕܲܒܼܪܸܥܝܵܢܵܟܼ: ܥܲܡ ܫܹܐܕܼܵܐ ܕܓܼܘܼܕܵܦܵܐ ܘܲܕܼܪܵܡܘܼܬܼܵܐ܀ ܨܲܠܵܐ: ܕܠܵܐ ܬܸܥܘܿܠ ܥܲܡ ܡܸܫܬܲܒܼܩܵܢܘܼܬܼܵܐ ܠܢܸܤ̈ܝܘܿܢܹܐ ܓܠܲܝ̈ܵܐ ܕܲܒܼܪܸ̈ܓܼܫܹܐ: ܕܝܵܕܲܥ̇ ܠܡܲܝܬܵܝܘܼ ܥܠܲܝܟܼ ܤܵܛܵܢܵܐ: ܟܲܕܼ ܢܸܬܼܦܤܸܣ ܠܹܗ ܡ̣ܢ ܐܲܠܵܗܵܐ: ܡܸܛܠ ܬܲܪ̈ܥܝܵܬܼܵܐ ܤܲܟܼ̈ܠܵܬܼܵܐ ܕܐܸܬܼܚܲܫܲܒܼܬܿ܀ ܨܲܠܵܐ: ܕܠܵܐ ܢܸܬܼܪܲܚܲܩ ܡܸܢܵܟܼ ܤܵܗܕܵܐ ܕܢܲܟܼܦܘܼܬܼܵܐ: ܘܬܸܬܼܢܲܤܸܐ ܒܫܲܠܗܸܒܼ̈ܝܵܬܼܵܐ ܕܲܚܛܝܼܬܼܵܐ ܒܸܠܥܵܕܼܵܘܗܝ܀ ܨܲܠܵܐ: ܕܠܵܐ ܬܸܥܘܿܠ ܒܢܸܤܝܘܿܢܵܐ ܕܓܼܘܼܕܵܦܵܐ ܕܡܸܕܸܡ܀ ܨܲܠܵܐ ܡܵܕܹܝܢ: ܕܠܵܐ ܬܸܥܘܿܠ ܠܢܸܤ̈ܝܘܿܢܹܐ ܢܲܦܫܵܢܵܝܹ̈ܐ. ܗܵܢܵܘ ܕܹܝܢ: ܒܗܵܠܹܝܢ ܕܲܠܢܲܦܫܵܐ ܒܐܵܓܼܘܿܢܵܐ ܘܲܒܼܦܘܼ̈ܠܵܓܹܐ ܘܲܒܼܓܼܘܼܪ̈ܵܓܹܐ ܡܩܝܼܡܝܼܢ. ܠܲܕܼܦܲܓܼܪܵܐ ܕܹܝܢ: ܒܟܼܠܹܗ ܦܲܓܼܪܵܟܼ ܐܸܬܼܥܲܬܲܕܼ. ܘܲܒܼܟܼܠܗܘܿܢ ܗܲܕܵܡܲܝ̈ܟ ܤܚܝܼ ܒܓܼܵܘܗܘܿܢ: ܟܲܕܼ ܡܲܠ̈ܝܵܢ ܥܲܝܢܲܝ̈ܟ ܕܸܡ̈ܥܹܐ: ܕܥܲܡ ܢܵܛܘܿܪܵܟܼ ܬܸܫܬܲܟܲܚ ܒܓܼܵܘܗܘܿܢ. ܕܠܵܐ ܢܸܤ̈ܝܘܿܢܹܐ ܕܹܝܢ: ܒܛܝܼܠܘܼܬܹܗ ܕܐܲܠܵܗܵܐ ܠܵܐ ܡܸܬܼܪܲܓܼܫܹܐ: ܘܦܵܪܹܗ̄ܤܝܼܵܐ ܕܲܠܘܵܬܹܗ ܠܵܐ ܡܸܬܼܩܲܢܝܵܐ: ܘܚܸܟܼܡܬܼܵܐ ܕܪܘܼܚܵܐ ܠܵܐ ܡܸܬܼܝܲܒܠܦܵܐ: ܘܚܘܼܒܹܗ ܕܐܲܠܵܗܵܐ ܒܢܲܦܫܵܐ ܠܵܐ ܡܸܤܬܲܬܲܬܼ܀ ܩܕܼܵܡ ܢܸܤ̈ܝܘܿܢܹܐ: ܐܲܝܟܼ ܢܘܼܟܼܪܵܝܵܐ ܡܨܲܠܸܐ ܒܲܪܢܵܫܵܐ ܠܐܲܠܵܗܵܐ. ܡܵܐ ܕܹܝܢ ܕܥܲܠ̣ ܠܐܘܼ̈ܠܨܵܢܹܐ ܡܸܛܠ ܚܘܼܒܹܗ ܘܠܵܐ ܩܲܒܸܿܠ̣ ܫܘܼܚܠܵܦܵܐ: ܗܵܝܕܹܝܢ ܐܲܝܟܼ ܡܲܢ ܕܚܘܼ̈ܒܼܠܹܗ ܡܸܕܸܡ ܐܲܪܡ̣ܝܼ ܥܲܠ ܐܲܠܵܗܵܐ: ܒܲܪ ܒܲܝܬܼܵܐ ܕܝܼܠܹܗ ܡܸܬܼܚܫܵܒܼ: ܘܪܵܚܡܵܐ ܕܐܸܬܼܟܲܬܲܫ ܚܠܵܦ ܨܸܒܼܝܵܢܹܗ ܠܘܼܩܒܲܠ ܚܲܝܠܵܐ ܕܲܒܼܥܸܠܒܼܵܒܼܵܘ̈ܗܝ. ܗܵܕܲܐ ܗ̣̄ܝ ܗܵܝ̇ pb. 37 ܕܨܲܠܵܘ: ܕܠܵܐ ܬܸܥܠܘܼܢ ܬܸܥܠܘܼܢ ܠܢܸܤܝܘܿܢܵܐ܀ ܘܬܼܒܼ ܨܲܠܵܐ: ܕܠܵܐ ܬܸܥܘܿܠ ܠܢܸܤ̈ܝܘܿܢܹܐ ܡܸܛܠ ܫܘܼܥܠܵܝܵܟܼ: ܐܸܠܵܐ ܡܸܛܠ ܗܵܝ̇ ܕܡܲܚܸܒܼ ܐܲܢ̄ܬܿ ܠܐܲܠܵܗܵܐ: ܐܲܝܟܼ ܕܚܲܝܠܹܗ ܢܸܬܼܢܲܨܲܚ ܒܵܟܼ. ܨܲܠܵܐ ܕܠܵܐ ܬܸܥܘܿܠ ܠܗܵܠܹܝܢ: ܐܲܝܟܼ ܕܡܸܛܠ ܤܲܟܼܠܘܼܬܼܵܐ ܕܚܘܼ̈ܫܵܒܲܝܟ ܘܤܘܼܥܪ̈ܵܢܲܝܟܼ: ܐܸܠܵܐ ܐܲܝܟܼ ܕܬܸܬܼܒܿܩܸܐ ܕܪܵܚܡܵܐ ܐܲܢ̄ܬܿ ܕܐܲܠܵܗܵܐ: ܘܐܲܝܟܼ ܕܢܸܫܬܲܒܲܚ ܚܲܝܠܹܗ ܒܲܡܤܲܝܒܿܪܵܢܘܼܬܼܵܟܼ. ܥܲܠ ܡܪܲܚܡܵܢܘܼܬܹܗ ܕܡܵܪܲܢ ܕܲܒܼܗܵܢܵܐ ܬܲܪܥܵܐ: ܕܡܲܫܚ̣̇ܗ̇ ܠܡܸܠܬܹܗ ܠܦܘܼܬܼ ܡܚܝܼܠܘܼܬܼܵܐ ܐ̄ܢܵܫܵܝܬܼܵܐ. ܬܘܼܒܼ ܕܹܝܢ ܒܗܵܢܵܐ ܬܲܪܥܵܐ: ܡܪܲܚܡܵܢܵܐܝܼܬܼ ܐܸܬܼܚܲܫܲܚ. ܐܸܢ ܬܸܬܼܒܿܩܸܐ ܘܲܒܼܗܵܠܹܝܢ ܕܦܲܓܼܪܵܐ: ܟܲܕܼ ܚܵܐܲܪ ܗ̄ܘ̣ܵܐ ܒܲܡܚܝܼܠܘܼܬܹܗ ܕܲܟܼܝܵܢܵܐ: ܕܕܲܠܡܵܐ ܟܹܝܬܼ ܡܸܛܠ ܕܵܘܝܘܼܬܹܗ ܕܦܲܓܼܪܵܐ: ܠܵܐ ܢܸܫܟܲܚ ܡܥܲܙܸܐ ܩܕܼܵܡ ܚܹܐܦܗܘܿܢ ܕܢܸܤ̈ܝܘܿܢܹܐ ܐܸܡܲܬܼܝ ܕܡܸܬܼܡܲܨܲܥ: ܘܡܸܛܠܗܵܕܹܐ ܐܵܦ ܡ̣ܢ ܫܪܵܪܵܐ ܢܸܦܸܠ: ܟܲܕܼ ܢܚܘܼܒܼ ܡ̣ܢ ܐܘܼ̈ܠܨܵܢܹܐ. ܒܲܕܼܓܼܘܿܢ: ܦܵܩܹ̇ܕܼ ܠܲܢ: ܕܲܟܼܡܵܐ ܕܡܲܨܝܵܐ: ܐ̄ܢܵܫ ܒܨܸܒܼܝܵܢܹܗ ܠܵܐ ܢܸܬܸܠ ܢܲܦܫܹܗ ܠܡܸܥܲܠ ܠܢܸܤܝܘܿܢܵܐ. ܘܠܵܘ ܗܵܟܲܢ: ܐܸܠܵܐ ܘܐܵܦ ܡܨܲܠܵܝܘܼ ܨܲܠܵܘ: ܕܐܵܦܠܵܐ ܥܵܪܨܵܐܝܼܬܼ ܬܸܫܬܲܟܼܚܘܼܢ ܒܓܼܵܘܹܗ: ܐܸܢ ܡܲܨܝܵܐ ܕܒܸܠܥܵܕܼܵܘܗ ܬܸܫܦܪܘܼܢ ܠܐܲܠܵܗܵܐ܀ ܐܸܢ ܕܹܝܢ ܐܲܠܨܲܬ̤ ܠܵܗ̇ ܥܲܠ ܡܝܲܬܿܪܘܼܬܼܵܐ ܕܛܵܒܼ ܪܲܒܵܐ: ܘܢܲܩܝܼܦܝܼܢ ܢܸܤ̈ܝܘܿܢܹܐ: ܐܵܦܸܢ ܪܲܒܲܬܼ ܕܚܝܼܠܝܼܢ: ܘܐܸܠܵܐ ܢܩܲܒܸܠ ܐܸܢܘܿܢ ܐ̄ܢܵܫ ܡܲܨܝܵܐ ܕܬܸܬܼܓܡܲܪ ܡܝܲܬܿܪܘܼܬܼܵܠ ܗܵܝ̇: ܒܙܲܒܼܢܵܐ ܗܵܢܵܐ: ܠܵܐ ܙܵܕܹܩ ܠܲܢ ܠܡܸܤܲܒܼ ܒܐܲܦܲܝ̈ ܢܲܦܫܲܢ ܐܵܘ ܕܐ̄ܢܵܫ. ܐܵܦܠܵܐ ܡܸܛܠ ܕܸܚܠ̱ܬܼܵܐ ܬܸܫܒܿܘܿܩ ܠܤܘܼܥܪܵܢܵܐ ܗܵܘ̇ ܪܲܒܵܐ ܕܒܹܗ ܐܝܼܬܲܝܗܘܿܢ ܚܲܝܹ̈ܐ ܕܢܲܦܫܵܟܼ: ܘܬܸܤܲܒܼ ܬܲܚܦܝܼܬܼܵܐ pb. 38 ܠܪܲܦܝܘܼܬܼܵܐ: ܗܵܝ̇ ܕܨܲܠܵܘ ܕܠܵܐ ܬܸܥܠܘܼܢ ܠܢܸܤܝܘܿܢܵܐ: ܗܵܠܹܝܢ ܐܸܢܘܿܢ ܕܐܲܡܝܼܪ ܥܠܲܝܗܘܿܢ ܕܲܒܼܦܘܼ̈ܩܕܵܢܹܐ ܡܲܫܛܝܵܐܝܼܬܼ ܚܵܛܹ̇ܝܢ܀ ܘܐܸܢ ܬܘܼܒܼ ܡܛ̣ܵܐ ܚܲܕܼ ܡ̣ܢ ܦܘܼܩܕܵܢܵܘ̈ܗܝ ܕܐܲܠܵܗܵܐ ܕܢܸܫܬܿܪܸܐ ܒܐ̄ܢܵܫ: ܐܵܘ ܩܝܵܡܵܐ ܕܢܲܟܼܦܘܼܬܼܵܐ: ܐܵܘ ܐܸܤܟܹܡܵܐ ܕܩܲܕܝܼܫܘܼܬܼܵܐ: ܐܵܘ ܬܵܘܕܝܼܬܼܵܐ ܕܲܒܼܗܲܝܡܵܢܘܼܬܼܵܐ: ܐܵܘ ܠܡܲܤܗܵܕܼܘܼ ܥܲܠ ܡܸܠܬܼܵܐ ܕܐܲܠܵܗܵܐ: ܐܵܘ ܠܡܸܛܲܪ ܙܗܝܼܪܵܐܝܼܬܼ ܬܚܘܼ̈ܡܹܐ ܕܢܵܡܘܿܤܵܐ ܕܫܲܪܟܵܐ: ܘܠܲܝܬܿ ܦܘܼܪܤܵܐ: ܕܠܵܐ ܢܸܦܸܠ ܐܸܢ ܢܸܩܢܲܛ ܡ̣ܢ ܢܸܤ̈ܝܘܿܢܹܐ. ܗܵܫܵܐ ܡܸܟܹܝܠ ܒܟܼܠܵܗ̇ ܬܟܼܝܼܠܘܼܬܼܵܐ ܢܒܲܤܲܪ ܥܲܠ ܦܲܓܼܪܵܐ: ܘܢܲܓܼܥܸܠ ܢܲܦܫܹܗ ܠܐܲܠܵܗܵܐ: ܘܢܸܥܘܿܠ ܒܲܫܡܹܗ ܕܡܪܝܵܐ. ܘܗܵܘ̇ ܕܲܗܘ̤ܵܐ ܥܲܡ ܝܵܘܤܸܦ ܒܐܲܪܥܵܐ ܕܡܸܨܪܹܝܢ ܘܲܗܘ̤ܵܐ ܤܵܗܕܵܐ ܕܢܲܟܼܦܘܼܬܼܵܐ: ܘܥܲܡ ܕܵܢܝܼܐܹܝܠ ܒܓܼܘܼܒܵܐ ܕܐܲܪ̈ܝܵܘܵܬܼܵܐ: ܘܥܲܡ ܕܒܹܝܬܼ ܚܲܢܲܢܝܵܐ ܒܐܲܬܘܿܢܵܐ ܕܢܘܼܪܵܐ: ܘܲܠܘܵܬܼ ܐܹܪܲܡܝܵܐ ܒܓܼܘܼܒܵܐ ܕܲܤܝܵܢܵܐ ܘܫܵܘܙܒܹܗ ܘܝܲܗ̣ܒܹܗ ܒܪ̈ܲܚܡܹܐ ܡܸܨܥܲܬܼ ܡܲܫܪܝܼܬܼܵܐ ܕܟܲܠܕܵܝܹ̈ܐ: ܘܥܲܡ ܦܲܛܪܘܿܣ ܒܹܝܬܼ ܐܲܤܝܼܪܹ̈ܐ ܘܐܲܦܩܹܗ ܒܬܲܪ̈ܥܹܐ ܐܲܚܝܼ̈ܕܹܐ: ܘܥܲܡ ܦܵܘܠܘܿܣ ܒܲܟܼܢܘܼ̈ܫܵܬܼܵܐ ܕܲܝܗܘܼ̈ܕܵܝܹܐ: ܘܐܲܝܟܼ ܕܒܲܟܼܢܝܼܫܘܼ ܗܵܘ̇ ܕܲܒܼܟܼܠܕܵܪ ܗܘ̤ܵܐ ܠܘܵܬܼ ܥܲܒܼܕܵܘ̈ܗܝ ܒܟܼܠ ܐܲܬܲܪ ܘܕܼܪ̈ܟܿܝܵܢ: ܘܚܵܘܝܼ ܒܗܘܿܢ ܚܲܝܠܹܗ ܘܢܲܨܲܚ ܘܢܲܛܲܪ ܐܸܢܘܿܢ ܒܕܼܘܼܡܵܪܵܐ ܪܲܒܵܐ: ܘܲܚܙܵܘ ܦܘܼܪܩܵܢܹܗ ܒܓܸܠܝܵܐ ܒܲܙܒܲܢ ܐܘܼܠܨܵܢܲܝ̈ܗܘܿܢ: ܗ̤ܘ ܡܚܲܝܸܠ ܘܲܡܢܲܛܲܪ ܠܗܵܢܵܐ ܟܲܕܼ ܡܸܨܥܲܬܼ ܡܲܚܫܘܼ̈ܠܹܐ ܕܲܒܼܗܘܿܢ ܚܡܝܼܠ. ܢܸܫܩܘܿܠ ܒܢܲܦܫܹܗ ܡܸܟܹܝܠ ܛܢܵܢܵܐ ܕܡܲܩ̈ܒܼܵܝܹܐ ܠܘܼܩܒܲܠ ܒܥܸܠܕܒܼܵܒܼܵܐ ܠܵܐ ܡܸܬܼܚܲܙܝܵܢܵܐ ܘܦܵܠܚܵܘ̈ܗܝ: ܘܐܲܝܟܼ ܫܲܪܟܵܐ ܕܲܢܒܼܝܹ̈ܐ ܩܲܕܝܼ̈ܫܹܐ ܘܲܫܠܝܼܚܹ̈ܐ ܘܤܵܗ̈ܕܹܐ ܘܡܵܘ̈ܕܝܵܢܹܐ ܘܝܼܚܝܼ̈ܕܼܵܝܹܐ: ܕܩܲܝܸܡ̣ܘ ܢܵܡܘܼܤܹ̈ܐ ܐܲܠܵܗܵܝܹ̈ܐ ܘܦܘܼ̈ܩܕܵܢܹܐ ܕܪܘܼܚܵܐ ܒܐܲܬܼܪ̈ܵܘܵܬܼܵܐ ܕܚܝܼ̈ܠܹܐ ܘܲܒܼܢܤ̈ܝܘܿܢܹܐ ܥܲܤ̈ܩܹܐ pb. 39 ܘܲܓܼܢܝܼܚܹ̈ܐ: ܘܲܫܕܼܵܘ ܠܥܵܠܡܵܐ ܘܦܲܓܼܪܵܐ ܠܒܸܤܬܲܪܗܘܿܢ. ܘܚܲܡܤܸܢ̣ܘ ܒܲܫܪܵܪܗܘܿܢ ܘܠܵܐ ܚܵܒܼܘ ܡ̣ܢ ܩܛܝܼܪܵܐ ܕܲܬܼܟܸܒܼ ܥܲܠ ܦܲܓܼܪܵܐ ܐܲܟܲܚ̄ܕܼ ܘܥܲܠ ܢܲܦܫܵܐ: ܘܓܲܢ̄ܒܵܪܵܐܝܼܬܼ ܐܸܬܼܢܲܨܲܚܘ: ܘܗܵܐ ܩܲܠܝܼܠ ܡ̣ܢ ܤܲܓܝܼ ܪܫܝܼܡܝܼܢ ܫܡܵܗܲܝ̈ܗܘܿܢ ܒܤܸܦ̣ܪܵܐ ܕܚܲܝܹ̈ܐ: ܥܕܲܡܵܐ ܠܡܹܐܬܼܝܼܬܹܗ ܕܡܵܪܲܢ. ܘܲܢܛܝܼܪܝܼܢ ܫܲܪ̈ܒܲܝܗܘܿܢ ܒܲܟܼܬܼܵܒܼܵܐ ܒܪܸܡܙܹܗ ܕܐܲܠܵܗܵܐ: ܠܝܘܼܠܦܵܢܵܐ ܘܲܠܠܘܼܒܼܵܒܼܵܐ ܕܝܼܠܲܢ: ܐܲܝܟܼ ܤܵܗܕܘܼܬܹܗ ܕܛܘܼܒܼܵܢܵܐ ܫܠܝܼܚܵܐ: ܕܡܸܢܗܘܿܢ ܢܸܬܼܚܲܟܲܡ ܘܢܹܐܠܲܦ ܐܘܼܪܚܵܐ ܕܐܲܠܵܗܵܐ: ܟܲܕܼ ܢܤܝܼܡ ܐܸܢܹܝܢ ܠܬܲܫ̈ܥܝܵܬܼܗܘܿܢ ܐܲܝܟܼ ܝܘܼ̈ܩܢܹܐ ܕܚܲܝܹ̈ܐ ܩܕܼܵܡ ܥܲܝ̈ܢܹܐ ܕܬܲܪܥܝܼܬܲܢ: ܘܢܸܫܩܘܿܠ ܕܘܼܡܝܵܐ ܡܸܢܗܹܝܢ: ܘܲܢܕܲܡܸܐ ܒܗܹܝܢ ܐܘܼܪ̈ܚܵܬܼܵܐ ܕܕܼܘܼܒܵܪ̈ܲܝܢ: ܡ̣ܢ ܦܸܚܡܵܐ ܕܩܲܕܼ̈ܡܵܝܹܐ܀ ܗܲܢܝ ܠܢܲܦܫܵܐ ܡܗܵܘܲܢܬܼܵܐ ܡܲܡܠܠܵܐ ܐܲܠܵܗܵܝܵܐ: ܐܲܝܟܼ ܤܲܝܒܵܪܬܵܐ ܕܲܗܝܼܢܬܼܵܐ ܕܲܡܫܲܢܵܐ ܠܦܲܓܼܪܵܐ ܒܚܸܟܵܐ ܕܲܚܠܝܼ̈ܡܹܐ܀ ܪ̈ܓܼܝܼܓܼܵܢ ܬܲܫ̈ܥܝܵܬܼܵܐ ܕܟܹܐܢܹ̈ܐ ܠܡܲܫܡܲܥܬܼܵܐ ܕܬܲܡܝܼ̈ܡܹܐ: ܐܲܝܟܼ ܫܸܩܝܵܐ ܐܲܡܝܼܢܵܐ ܠܢܸܨ̈ܒܵܬܼܵܐ ܚܲܕܼ̈ܬܼܵܬܼܵܐ܀ ܬܸܗܘܸܐ ܚܫܝܼܒܼܵܐ ܠܵܟܼ ܨܵܘܬܵܐ ܕܲܡܕܲܒܿܪܵܢܘܼܬܹܗ ܕܐܲܠܵܗܵܐ ܕܐܸܫܬܲܡܲܫ ܠܘܵܬܼ ܐ̄ܢܵܫܵܐ ܩܲܕܼ̈ܡܵܝܹܐ: ܐܲܝܟܼ ܤܲܡܡܵܢܹ̈ܐ ܝܲܩܝܼܪܹ̈ܐ ܠܥܲܝ̈ܢܹܐ ܕܲܓܼܗܝܼܪ̈ܵܢ. ܘܢܸܬܼܢܛܲܪ ܥܘܼܗܕܵܢܗܹܝܢ ܠܘܵܬܼܵܟܼ: ܒܟܼܠܗܘܿܢ ܥܸܕܵܢܹ̈ܐ ܕܝܵܘܡܵܐ. ܘܲܗܪܘܿܓܼ ܘܲܪܢܝܼ ܘܐܸܬܼܚܲܟܲܡ ܒܗܹܝܢ: ܘܬܸܕܲܥ ܠܡܸܤܲܒܼ ܒܐܝܼܩܵܪܵܐ ܥܘܼܗܕܵܢܵܐ ܕܪܲܒܿܘܼܬܹܗ ܕܐܲܠܵܗܵܐ ܒܢܲܦܫܵܟܼ. ܘܬܸܫܟܲܚ ܠܲܩܢܘܿܡܵܟܼ ܚܲܝܹ̈ܐ ܕܲܠܥܵܠܲܡ: ܒܝܼܫܘܿܥ ܡܫܝܼܚܵܐ: ܡܸܨܥܵܝܵܐ ܕܐܲܠܵܗܵܐ ܘܕܲܒܼܢܲܝ̈ܢܵܫܵܐ: ܘܲܡܚܲܝܕܼܵܐ ܒܲܬܼܪ̈ܲܝܗܘܿܢ ܟܝܵܢܵܘ̈ܗܝ. ܗܵܘ̇ ܕܟܲܕܼ ܒܬܸܫܒܿܘܿܚܬܼܵܐ ܕܲܟܼܪܝܼܟܼܵܐ ܠܲܬܼܪܘܿܢܘܿܣ ܕܐܝܼܩܵܪܹܗ: ܠܸܓܼܝܘܿܢܹ̈ܐ ܕܡܲܠܲܐܟܹ̈ܐ ܠܵܐ ܡܸܫܟܿܚܝܼܢ ܕܢܸܬܼܒܲܩܘܿܢ: ܐܸܬܼܚܵܘܝܼ ܡܸܛܠܵܬܼܵܟܼ ܠܥܵܠܡܵܐ: ܫܝܼܛܵܐ: ܘܡܲܟܿܝܼܟܼܵܐ ܕܐܲܢ̄ܢܵܫܵܐ. ܕܠܲܝܬܿ ܗ̄ܘ̣ܵܐ ܠܹܗ ܚܸܙܘܵܐ: ܘܠܵܐ ܙܝܼܘܵܐ. ܗܵܘ̇ pb. 40 ܕܟܲܕܼ ܠܵܐ ܡܸܬܼܚܲܙܝܵܢܘܼܬܹܗ ܠܵܐ ܫܵܟܼ̇ܢܵܐ ܬܚܹܝܬܼ ܪܓܸܫܬܼܵܐ ܕܲܒܼܪ̈ܲܝܵܐ ܘܲܥܒܼܝܼ̈ܕܹܐ: ܒܐܲܦܲܝ̈ ܬܲܪܥܵܐ ܕܡ̣ܢ ܗܲܕܵܡܲܝ̈ܢ ܫܲܡ̣ܠܝܼ ܡܕܲܒܿܪܵܢܘܼܬܹܗ: ܠܦܘܼܪܩܵܢܵܐ ܕܚܲܝܹ̈ܐ ܕܟܼܠ܀ ܗܵܢܵܐ ܕܕܲܟܿܝܼ ܒܹܗ: ܥܲܡܡܹ̈ܐ ܤܲܓܿܝܼ̈ܐܹܐ. ܘܡܵܪܝܵܐ ܐܲܦܓܲܥ̣ ܒܹܗ ܚܛܵܗܹ̈ܐ ܕܟܼܠܲܢ: ܐܲܝܟܼ ܡܸܠܬܹܗ ܕܐܹܫܲܥܝܵܐ. ܘܡܵܪܝܵܐ ܨܒܼܵܐ ܕܲܢܡܲܟܿܟܼܝܼܘܗܝ: ܘܢܲܚܫܝܼܘܗܝ. ܐܸܬܿܬܿܤܝܼܡ ܚܛܵܗܵܐ ܒܢܲܦܫܹܗ: ܟܲܕܼ ܚܛܵܗܵܐ ܠܵܐ ܝܑܼܕܲܥ̣. ܕܥܲܠ ܐܲܦܲܝ̈ ܡܕܲܒܿܪܵܢܘܼܬܹܗ ܕܲܒܼܟܼܠܗܘܿܢ ܕܵܪܹ̈ܐ ܕܡܸܛܠܵܬܲܢ: ܬܸܫܒܿܘܿܚܬܼܵܐ ܘܩܘܼܠܵܤܵܐ ܘܩܘܼܒܵܠ ܛܲܝܒܿܘܼܬܼܵܐ ܘܤܸܓܼܕܬܼܵܐ ܠܹܗ ܡ̣ܢ ܟܠ: ܐܵܦ ܗܵܫܵܐ ܘܲܒܼܟܼܠܙܒܲܢ: ܘܲܠܥܵܠܲܡ ܥܵܠܡܝܼܢ. ܐܵܡܹܝܢ.