Discourse 4

ܢܲܦܫܵܐ ܕܠܲܐܠܵܗܵܐ ܡܲܚܒܼܵܐ: ܒܐܲܠܵܗܵܐ ܗ̄ܘ̣ ܒܲܠܚܘܿܕܼ ܢܵܘܚܵܗ̇܀ ܩܲܕܸܡ ܫܪܝܼ ܡܸܢܵܟܼ ܐܲܤܘܼܪܹ̈ܐ ܕܲܠܒܲܪ: ܘܗܵܝܕܹܝܢ ܬܹܐܟܲܦ ܠܵܟܼ ܠܡܹܐܤܲܪ ܠܸܒܵܟܼ ܒܐܲܠܵܗܵܐ܀ ܩܲܕܝܼܡ ܗ̄ܘ̣ ܫܪܵܝܵܐ ܕܡܢ ܗܘܼ̈ܠܹܐ: ܠܐܲܤܘܼܪܝܵܐ ܕܒܲܐܠܵܗܵܐ܀ ܠܝܲܠܘܼܕܼܵܐ ܒܵܬܲܪ ܕܚܵܤ̇ܠܝܼܢ ܠܹܗ ܡ̣ܢ ܚܲܠܒܼܵܐ: ܗܵܝܕܹܝܢ ܡܩܲܪܒܼܝܼܢ ܠܹܗ ܡܹܐܟܼܘܼܠܬܼܵܐ ܕܠܲܚܡܵܐ. ܘܒܲܪܢܵܫܵܐ ܕܨܵܒܹ̇ܐ ܠܡܸܬܼܝܲܬܵܪܘܼ ܒܐܲܠܵܗܵܐ: ܩܲܕܼܡܵܝܑܬܼ ܢܲܦܫܹܗ ܚܵܤܹ̇ܠ ܡ̣ܢ ܥܵܠܡܵܐ: ܐܲܝܟܼ ܚܤܝܼܠܵܐ ܕܡ̣ܢ ܬܕܲܝ̈ ܐܸܡܹܗ܀ ܩܲܕܝܼܡܝܼܢ ܐܸܢܘܿܢ ܥܲܡ̈ܠܹܐ ܦܲܓܼܪ̈ܵܢܵܝܹܐ ܠܦܘܼܠܚܵܢܵܐ ܢܲܦܫܵܢܵܝܵܐ: ܐܲܝܟܼ ܕܐܵܦ ܒܲܗܘܵܝܵܐ: ܩܲܕܝܼܡܵܐ ܒܪܝܼܬܹܗ ܕܦܲܓܼܪܵܐ ܠܲܕܼܢܲܦܫܵܐ܀ ܕܠܲܝܬܿ ܠܹܗ ܓܹܝܪ ܥܲܡ̈ܠܹܐ ܕܦܲܓܼܪܵܐ: ܐܵܦܠܵܐ pb. 41 ܥܲܡ̈ܠܹܐ ܕܢܲܦܫܵܐ ܐܝܼܬܼ ܠܹܗ. ܡܸܬܼܝܲܠܕܝܼܢ ܓܹܝܪ ܗܵܠܹܝܢ ܡ̣ܢ ܗܵܢܘܿܢ: ܐܲܝܟܲܢܵܐ ܕܲܫܢܵܢܵܐ ܡ̣ܢ ܦܸܪ̈ܕܹܐ ܥܲܪ̈ܛܸܠܵܝܵܬܼܵܐ. ܘܲܕܼܸܠܲܝܬܿ ܠܹܗ ܦܘܼܠܚܵܢܵܐ ܢܲܦܫܵܢܵܝܵܐ: ܐܵܦ ܡ̣ܢ ܡܵܘ̈ܗܒܼܵܬܼܵܐ ܕܪܘܼܚ ܓܠܝܼܙܵܐ ܐܝܼܬܼܵܘܗܝ܀ ܠܵܐ ܦܵ̇ܚ̇ܡܝܼܢ ܚܲܫܹ̈ܐ ܙܲܒܼܢܵܢܵܝܹ̈ܐ ܕܲܚܠܵܦ ܫܪܵܪܵܐ: ܠܒܼܘܼܤܵܡܵܐ ܗܵܘ̇ ܕܲܡܛܲܝܲܒܼ ܠܥܵܡ̈ܠܲܝ ܒܲܡܝܲܬܿܪܘܼܬܼܵܐ܀ ܐܲܝܟܲܢܵܐ ܕܢܲܩܝܼ̈ܦܵܢ ܠܒܸܟܼܝܵܐ ܕܙܲܪܥܵܐ ܟܲܦܹ̈ܐ ܕܚܲܕܼ̈ܘܵܬܼܵܐ: ܗܵܟܲܢܵܐ ܚܲܕܼܘܼܬܼܵܐ ܠܥܲܡܠܹ̈ܐ ܕܡܸܛܠ ܐܲܠܵܗܵܐ. ܠܲܚܡܵܐ ܕܡ̣ܢ ܕܘܼܥܬܼܵܐ: ܗܲܢܝܼ ܠܦܲܠܵܚܵܐ. ܘܥܲܡ̈ܠܹܐ ܕܲܚܠܵܦ ܙܲܕܝܼܩܘܼܬܼܵܐ: ܠܠܸܒܵܐ ܕܩܲܒܸܿܠ̣ ܝܑܼܕܲܥܬܹܗ ܕܲܡܫܝܼܚܵܐ܀ ܤܲܝܒܲܪ ܫܝܼܛܘܼܬܼܵܐ ܒܡܘܼܟܵܟܼܵܐ: ܒܪܸܥܝܵܢܵܐ ܕܲܡܝܲܬܿܪܘܼܬܼܵܐ: ܡܸܛܠ ܦܵܪܹܗ̄ܤܝܼܵܐ ܕܠܸܒܵܐ ܕܲܠܘܵܬܼ ܐܲܠܵܗܵܐ. ܟܠ ܡܸܠܬܼܵܐ ܩܫܝܼܬܼܵܐ ܕܲܡܤܲܝܒܲܪ ܐ̄ܢܵܫ ܒܦܘܼܪܫܵܢܵܐ: ܠܒܲܪ ܡ̣ܢ ܥܸܠܬܼܵܐ ܕܤܲܟܼܠܘܼܬܼܵܐ: ܚܲܕܼ ܟܠܝܼܠܵܐ ܕܟܼܘܼ̈ܒܹܐ ܡܩܲܒܸܠ ܥܲܠ ܪܹܫܹܗ ܡܸܛܠ ܡܫܝܼܚܵܐ: ܘܛܘܼܒܼܵܘܗܝ. ܘܐܵܦ ܗ̤ܘ ܡܸܬܼܟܲܠܲܠ: ܒܙܲܒܼܢܵܐ ܕܠܵܐ ܝܵܕܲܥ̇܀ ܕܥܵܪܹܩ ܡ̣ܢ ܬܸܫܒܿܘܿܚܬܼܵܐ ܒܝܼܕܲܥܬܼܵܐ: ܒܤܲܒܼܪܹܗ ܕܥܵܠܡܵܐ ܕܲܥܬܼܝܼܕܼ ܒܲܩܢܘܼܡܹܗ ܐܲܪܓܸܫ̣܀ ܐܲܝܢܵܐ ܕܡܸܫܬܵܘܕܸܐ ܫܒܼܝܼܩܘܼܬܼ ܥܵܠܡܵܐ ܕܲܥܬܼܝܼܕܼ ܒܲܩܢܘܼܡܹܗ ܠܲܪܓܸܫ̣܀ ܐܲܝܢܵܐ ܕܡܸܫܬܵܘܕܸܐ ܫܒܼܝܼܩܘܼܬܼ ܥܵܠܡܵܐ: ܘܢܵܨܹ̇ܐ ܥܲܡ ܒܢܲܝ̈ܢܵܫܵܐ ܚܠܵܦ ܨܸܒܼ̈ܘܵܬܼܵܐ: ܡܸܛܠ ܗܵܝ̇ ܕܠܵܐ ܢܸܬܼܒܲܨܲܪ ܡ̣ܢ ܢܚܵܝܹܗ: ܗܵܢܵܐ ܥܘܼܝܼܪܵܐ ܗ̄ܘ̣ ܓܡܝܼܪܵܐ. ܕܐܲܪܦܝܼ ܠܥܵܠܡܵܐ ܟ̱ܠܹܗ ܨܸܒܼܝܵܢܵܐܝܼܬܼ: ܘܢܵܨܹ̇ܐ ܚܠܵܦ ܗܲܕܵܡܵܐ ܕܡܸܢܹܗ܀ ܕܥܵܪܹܩ ܡ̣ܢ ܢܝܵܚܹ̈ܐ ܕܲܬܼܢܵܢ: ܠܥܵܠܡܵܐ ܕܲܥܬܼܝܼܕܼ ܕܵܐܹ̇ܩ ܪܸܥܝܵܢܹܗ܀ ܕܐܲܚܝܼܕܼ ܒܩܸܢ̈ܝܵܢܹܐ: ܥܲܒܼܕܵܐ ܗ̄ܘ̣ ܕܚܲܫܹ̈ܐ. ܠܵܐ ܗ̄ܘ̣ܵܐ ܠܕܲܗܒܼܵܐ ܘܲܠܤܹܐܡܵܐ ܠܚܘܿܕܼ ܬܸܚܫܘܿܒܼ ܩܸܢ̈ܝܵܢܹܐ: ܐܸܠܵܐ ܟܠ ܕܲܠܪܸܓܿܬܼܵܐ ܕܨܸܒܼܝܵܢܵܟܼ ܐܲܚܝܼܕܼ ܐܲܢ̄ܬܿ ܒܗܹܝܢ܀ ܕܦܵܤܹ̇ܩ ܥܘܼܘܵܟܹ̈ܐ ܡܸܛܠ ܕܸܚܠܬܼܵܐ ܕܚܲܫܹ̈ܐ: ܚܲܟܿܝܼܡܵܐ ܗ̄ܘ̣ ܒܲܫܪܵܪܵܐ܀ ܒܸܠܥܵܕܼ ܐܲܡܝܼܢܘܼܬܼ ܦܘܼܠܚܵܢܵܐ ܕܲܡܝܲܬܿܪܘܼܬܼܵܐ: ܝܑܼܕܲܥܬܼܵܐ ܕܫܪܵܪܵܐ ܕܬܸܫܬܿܟܲܚ ܠܵܐ pb. 42 ܡܲܨܝܵܐ܀ ܠܵܘ ܒܥܲܡܠܹ̈ܐ ܦܲܓܿܪ̈ܢܵܝܹܐ ܝܑܼܚܝܼܕܼܵܐܝܼܬܼ ܡܸܬܼܩܲܢܝܵܐ ܝܼܕܲܥܬܼܵܐ ܝܼܕܲܬܼܵܐ ܕܚܲܝܹ̈ܐ: ܐܸܠܵܐ ܟܲܕܼ ܢܝܼܫܵܐ ܢܤܝܼܡ ܠܥܲܡܠܹ̈ܐ: ܠܲܦܤܵܩܵܐ ܕܚܲܫܲܝ̈ ܪܸܥܝܵܢܵܐ. ܐܲܝܢܵܐ ܕܲܕܼܠܵܐ ܦܘܼܪܫܵܢ ܥܵܡܹ̇ܠ: ܐܵܦ ܟܲܕܼ ܢܸܤܬܼܩ̈ܒܿܠܵܢ ܠܹܗ ܥܸܠ̈ܠܵܬܼܵܐ ܕܲܚܛܝܼܬܼܵܐ: ܦܫܝܼܩܵܐܝܼܬܼ ܢܵܦܹ̇ܠ ܒܗܹܝܢ܀ ܠܵܐ ܡܸܡܬܼܘܿܡ ܬܩܲܠܸܣ ܠܐܲܝܢܵܐ ܕܲܒܼܦܲܓܼܪܹܗ ܥܡܝܼܠ: ܘܲܒܼܪܸܓܼܫܵܘܗܝ ܫܪܸܐ ܘܲܫܒܼܝܼܩ: ܗܵܢܵܘ ܕܹܝܢ ܒܡܲܫܡܲܥܬܼܵܐ ܘܦܘܼܡܵܐ ܬܪܝܼܥܵܐ ܘܥܲܝ̈ܢܹܐ ܦܲܗܵܝ̈ܬܼܵܐ܀ ܐܸܡܲܬܼܝ ܕܢܝܼܫܵܐ ܬܤܝܼܡ ܠܢܲܦܫܵܟܼ ܕܬܸܬܼܚܲܫܲܚ ܒܤܘܼܥܪܵܢܵܐ ܪܲܡܪܲܚܡܵܢܘܼܬܼܵܐ: ܕܲܪܸܫ ܢܲܦܫܵܟܼ ܕܠܵܐ ܬܸܠܒܿܘܿܟܼ ܟܹܐܢܘܼܬܼܵܐ ܒܬܲܪ̈ܥܹܐ ܐ̄ܚܪ̈ܵܢܹܐ. ܕܠܵܐ ܬܸܬܼܚܙܸܐ: ܕܒܲܚܕܼܵܐ ܐܝܼܕܼܵܐ ܦܵܠܲܚ ܐܲܢ̄ܬܿ: ܘܒܲܐ̄ܚܪܹܬܼܵܐ ܡܒܲܕܲܪ. ܬܲܡܵܢ ܓܹܝܪ: ܥܲܠ ܚܲܝܘܼܤܬܼܵܢܘܼܬܼܵܐ ܐܵܠ̇ܨܵܐ. ܬܢܵܢ ܕܹܝܢ: ܥܲܠ ܪܘܼܝܼܚܘܼܬܼ ܬܲܪܥܝܼܬܼܵܐ܀ ܢܸܬܼܚܸܫܒܼ ܠܵܟܼ ܫܘܼܒܼܩܵܢܵܐ ܕܚܲܝܵܒܲܝ̈ܟ ܕܲܒܼܗܵܠܹܝܢ: ܥ̇ܒܼܵܕܼܵܐ ܕܙܲܕܝܼܩܘܼܬܼܵܐ. ܘܗܵܝܕܹܝܢ ܬܸܚܙܸܐ ܠܫܲܝܢܵܐ ܕܕܼܵܐܹ̇ܨ ܒܪܸܥܝܵܢܵܟܼ ܡ̣ܢ ܬܪ̈ܲܝܗܘܿܢ ܓܲܒܹ̈ܐ: ܗܵܢܵܘ ܕܹܝܢ: ܟܲܕܼ ܬܸܗܘܸܐ ܠܥܸܠ ܡ̣ܢ ܘܵܠ̇ܝܼܬܼܵܐ ܘܟܹܐܢܘܼܬܼܵܐ ܒܐܘܼܪܚܵܟܼ: ܘܲܠܚܹܐܪܘܼܬܼܵܐ ܒܟܼܠ: ܐܲܬܼܪܵܐ ܬܸܬܸܠ܀ ܚܲܕܼ ܓܹܝܪ ܡ̣ܢ ܩܲܕܝܼ̈ܫܹܐ: ܟܲܕܼ ܥܲܠ ܗܵܠܹܝܢ ܡܡܲܠܸܠ: ܠܵܡܲ݁ܪ: ܡܪܲܚܡܵܢܵܐ ܠܲܡ: ܐܸܢ ܠܵܐ ܐܝܼܬܼܵܘܗܝ ܟܹܐܢܵܐ: ܥܘܝܼܪܵܐ ܗ̄ܘ̣. ܕܢܹܐܡܲܪ: ܕܡ̣ܢ ܡܲܪ̈ܗܵܛܹܐ ܕܲܒܼܟܹܐܢܘܼܬܼܵܐ: ܘܥܲܡܠܹ̈ܐ ܕܢܲܦܫܹܗ ܢܦܲܪܢܸܣ ܠܲܐ̄ܚܪ̈ܵܢܹܐ: ܘܠܵܐ ܡ̣ܢ ܩܸܢ̈ܝܵܢܹܐ ܕܕܲܓܵܠܘܼܬܼܵܐ ܘܲܥܫܘܼܩܝܵܐ: ܘܲܛܠܘܼܡܝܵܐ ܘܦܘܼܪ̈ܤܹܐ܀ ܐܲܝܟܼ ܕܐܵܦ ܒܕܼܘܼܟܿܬܼܵܐ ܐ̄ܚܪܹܬܼܵܐ ܡܵܘܕܲܥ ܗ̤ܘ ܗܵܢܵܐ ܓܲܒܼܪܵܐ: ܐܸܢ ܠܲܡ ܙܵܕܲܥ̇ ܐܲܢ̄ܬܿ ܒܡܸܤ̈ܟܹܢܹܐ: ܡ̣ܢ ܕܝܼܠܵܟܼ ܙܪܘܿܥ. ܕܡ̣ܢ ܬܘܼܟܼܪ̈ܵܝܹܐ ܕܹܝܢ: ܝܲܬܿܝܼܪ ܡ̣ܢ ܙܝܼ̈ܙܵܢܹܐ ܡܲܪܝܼܪܝܼܢ܀ ܐܸܢܵܐ ܕܹܝܢ pb. 43 ܐܵܡܲ݁ܪܢܵܐ: ܕܡܪܲܚܡܵܢܵܐ ܐܸܢ ܘܐܵܦ ܠܥܸܠ ܡ̣ܢ ܟܹܐܢܘܼܬܼܵܐ ܠܵܐ ܢܸܗܘܸܐ: ܠܵܐ ܐܝܼܬܼܵܘܗܝ ܡܪܲܚܡܵܢܵܐ. ܗܵܢܵܘ ܕܹܝܢ: ܕܠܵܘ ܡ̣ܢ ܕܝܼܠܹܗ ܒܲܠܚܘܿܕܼ ܢܪܲܚܡ ܥܲܠ ܒܢܲܝ̈ܢܵܫܵܐ: ܐܸܠܵܐ ܘܐܵܦ ܛܠܘܼܡܝܵܐ ܗܲܢܝܼܵܐܝܼܬܼ ܢܤܲܝܒܲܪ ܒܨܸܒܼܝܵܢܹܗ. ܕܐܵܦܠܵܐ ܠܟܹܐܢܘܼܬܼܵܐ ܟ̱ܠܵܗ̇ ܢܩܝܼܡ ܘܢܸܬܼܒܲܥ ܒܲܥ̇ܒܼܵܕܹܗ ܕܗܵܘܹ̇ܐ ܠܘܵܬܼ ܒܲܪ ܙܵܘܓܹܗ: ܐܸܠܵܐ ܢܪܲܚܸܡ ܥܠܵܘܗܝ. ܕܟܲܕܼ ܒܲܡܪܲܚܡܵܢܘܼܬܼܵܐ ܢܸܙܟܹܿܝܗ̇ ܠܟܹܐܢܘܼܬܼܵܐ: ܢܸܩܛܘܿܪ ܠܹܗ: ܠܵܘ ܟܠܝܼܠܵܐ ܕܟܹܐܢܹ̈ܐ ܕܲܒܼܢܵܡܘܿܤܵܐ: ܐܸܠܵܐ ܕܲܓܼܡܝܼܪܹ̈ܐ ܕܒܲܕܼܝܵܬܹܩܹܐ ܚܕܲܬܵܐ܀ ܗܵܝ̇ ܕܢܸܬܸܠ ܐ̄ܢܵܫ ܠܡܸܤܟܹܿܢܵܐ ܡ̣ܢ ܕܝܼܠܹܗ: ܘܟܲܕܼ ܢܸܚܙܸܝܘܗܝ ܠܥܲܪܛܸܠܝܵܐ ܢܟܲܤܹܝܘܗܝ: ܘܢܲܚܸܒܼ ܠܩܲܪܝܼܒܹܗ ܐܲܝܟܼ ܢܲܦܫܹܗ: ܘܠܵܐ ܢܸܛܠܘܿܡ ܘܠܵܐ ܢܕܲܓܸܠ: ܗܵܠܹܝܢ ܘܐܵܦ ܢܵܡܘܿܤܵܐ ܥܲܬܿܝܼܩܵܐ ܦܵܩܹ̇ܕܼ ܗ̄ܘ̣ܵܐ. ܓܡܝܼܪܘܼܬܼܵܐ ܕܕܼܘܼܒܵܪܹ̈ܐ ܕܲܚܕܲܬܵܐ: ܗܵܟܲܢ ܦܵܩ̇ܕܵܐ. ܐܸܢ ܐ̄ܢܵܫ ܠܲܡ ܫܵܩܹ̇ܠ ܕܝܼܠܵܟܼ: ܠܵܐ ܬܸܬܼܒܲܥ. ܘܟܼܠ ܕܫܵܐܹ̇ܠ ܠܵܟܼ: ܗܲܒܼܠܹܗ. ܘܠܵܘ ܒܲܠܚܘܿܕܼ ܛܠܘܼܡܵܐ ܕܩܸܢ̈ܝܵܢܹܐ ܘܫܲܪܟܵܐ ܕܗܵܠܹܝܢ ܕܲܠܒܲܪ ܡܸܢܵܟܼ ܠܲܡܤܲܝܒܵܪܘܼ ܒܚܲܕܼܘܼܬܼܵܐ: ܐܸܠܵܐ ܘܲܕܼܢܲܦܫܵܟܼ ܬܸܬܸܠ ܚܠܵܦ ܒܲܪ ܒܸܤܪܵܟܼ܀ ܡܪܲܚܡܵܢܵܐ ܗܵܢܵܘ: ܕܠܵܘ ܒܡܵܘ̈ܗܒܼܵܬܼܵܐ ܒܲܠܚܘܿܕܼ ܢܪܲܚܸܡ ܥܲܠ ܩܲܪܝܼܒܹܗ: ܐܸܠܵܐ ܕܐܵܦܠܵܐ ܟܲܕܼ ܢܸܫܡܲܥ ܐܵܘ ܢܸܚܙܸܐ ܡܸܕܸܡ ܕܡܲܚܸܫ ܠܐ̄ܢܵܫ: ܡܤܲܝܒܲܪ ܠܸܒܹܗ ܡ̣ܢ ܝܲܩܕܵܢܵܐ: ܐܸܠܵܐ ܘܐܵܦ ܟܲܕܼ ܢܸܒܼܠܲܥ ܡ̣ܢ ܐܲܚܘܼܗܝ ܦܲܟܵܐ: ܠܵܐ ܡܲܡܪܲܚ ܕܐܵܦܸܢ ܒܡܸܠܬܼܵܐ ܢܦܲܢܸܐ ܠܹܗ ܦܘܼܪܥܵܢܵܐ: ܘܢܲܚܫܝܼܘܗܝ ܠܪܸܗܝܵܢܹܗ܀ ܝܲܩܲܪ ܥܲܡܠܹ̈ܐ ܕܫܲܗܪܵܐ: ܕܬܸܫܟܲܚ ܒܘܼܝܵܐܵܐ ܩܲܪܝܼܒܼܵܐ ܒܓܼܵܘ ܢܲܦܫܵܟܼ. ܐܸܬܼܐܲܡ̄ܢ ܒܩܸܪܝܵܢܵܐ ܒܫܸܠܝܵܐ: ܕܬܸܬܼܢܓܸܕܼ ܠܘܵܬܼ ܬܲܗܪܵܐ ܒܟܼܠܥܸܕܵܢ. pb. 44 ܐܲܚܸܒܼ ܡܸܤܟܹܢܘܼܬܼܵܐ ܒܚܘܼܡܤܵܢܵܐ: ܕܢܸܬܼܟܲܢܲܫ ܪܸܥܝܵܢܵܟܼ ܡ̣ܢ ܒܘܼܕܵܪܵܐ܀ ܤܢܝܼ ܫܘܼܪܬܵܚܵܐ: ܕܬܸܬܼܢܛܲܪ ܡ̣ܢ ܒܘܼܠܒܵܠܵܐ ܕܬܲܪܥܝܼܬܼܵܐ܀ ܦܤܘܿܩ ܡ̣ܢ ܤܲܓܿܝܼ̈ܐܹܐ ܘܲܫܩܘܿܠ ܨܸܦܬܼܵܐ ܕܕܼܘܼܒܵܪ̈ܲܝܟ: ܕܬܸܬܼܦܲܨܸܐ ܢܲܦܫܵܟܼ ܡ̣ܢ ܦܘܼܠܗܵܕܼܵܐ ܕܫܲܠܝܘܼܬܼܵܗ̇ ܓܵܘܵܝܬܼܵܐ܀ ܐܲܚܸܒܼ ܢܲܟܼܦܘܼܬܼܵܐ: ܕܠܵܐ ܬܸܒܼܗܲܬܼ ܒܥܸܕܵܢܵܐ ܕܒܼܵܥܘܼܬܼܵܐ ܩܕܼܵܡ ܤܵܐܹ̇ܡ ܐܵܓܼܘܿܢܵܐ܀ ܩܢܝܼ ܙܲܗܝܘܼܬܼܵܐ ܒܕܼܘܼܒܵܪ̈ܲܝܟ: ܕܬܸܪܘܲܙ ܢܲܦܫܵܟܼ ܒܲܨܠܘܿܬܼܵܐ. ܘܲܒܼܥܘܼܗܕܵܢ ܡܵܘܬܵܐ: ܬܸܬܼܢܲܒܼܪܲܫ ܚܲܕܼܘܼܬܼܵܐ ܒܬܲܪܥܝܼܬܼܵܟܼ܀ ܗ̤ܘܝܼ ܡܩܝܼܡ ܐܲܢ̄ܬܿ ܥܲܠ ܙܥܘܿܪ̈ܝܵܬܼܵܐ: ܕܠܵܐ ܬܸܕܼܚܸܐ ܠܪܵܘܪ̈ܒܼܵܬܼܵܐ܀ ܠܵܐ ܬܸܬܼܚܲܒܼܢܲܢ ܠܘܵܬܼ ܥܲܡܠܹ̈ܐ: ܕܠܵܐ ܬܸܒܼܗܲܬܼ ܡܵܐ ܕܬܸܬܼܘܲܥܲܕܸ ܨܹܝܕ ܟܠ ܒܢܲܝ̈ ܠܘܝܼܬܼܵܟܼ܀ ܒܝܼܕܲܥܬܼܵܐ ܛܥܲܢ ܥܲܡܠܵܟܼ: ܕܠܵܐ ܢܦܝܼܫܵܟܼ ܡ̣ܢ ܪܲܗܛܵܟܼ ܟ̱ܠܹܗ܀ ܠܵܐ ܬܸܗܘܸܐ ܤܦܝܼܩ ܡ̣ܢ ܙܘܵܕܹ̈ܐ: ܕܲܠܡܵܐ ܢܸܫܒܿܩܘܼܢܵܟܼ ܡܸܨܥܲܬܼ ܐܘܼܪܚܵܐ ܡܫܵܘܚܕܼܵܐܝܼܬܼ ܘܲܢܫܲܢܘܿܢ܀ ܩܢܝܼ ܚܹܐܪܘܼܬܼܵܐ ܒܕܼܘܼܒܵܪ̈ܲܝܟ: ܕܬܸܬܼܚܲܪܲܪ ܡ̣ܢ ܕܘܼܘܵܕܼܵܐ܀ ܠܵܐ ܬܹܐܚܕܝܼܗ̇ ܠܚܹܐܪܘܼܬܼܵܟܼ ܠܥܸܠܲܬ̤ ܢܚܵܝܹ̈ܐ: ܕܠܵܐ ܬܸܗܘܸܐ ܥܒܸܕܼ ܥܲܒܼ̈ܕܝܼܢ܀ ܪܚܲܡ ܤܘܼܡܥܵܠܵܐ ܒܕܼܘܼܒܵܪ̈ܲܝܟ: ܕܢܸܬܼܩܲܦܚܘܼܢ ܚܘܼ̈ܫܵܒܹܐ ܕܲܡܕܼܝܼܩܝܼܢ ܒܪܵܡܘܼܬܼ ܠܸܒܵܐ ܘܙܲܠܝܼܠܘܼܬܼܵܐ ܒܲܚܕܼܵܐ. ܕܢܸܩܢܸܐ ܬܲܪܥܝܼܬܼܵܐ ܤܚܝܼܦܬܼܵܐ ܪܵܚܹ̇ܩ ܤܸܩܠܵܐ: ܠܵܐ ܡܸܫܟܲܚ. ܐܵܠܨܵܐܝܼܬܼ ܓܹܝܪ ܠܸܒܵܐ ܕܲܠܓܼܵܘ: ܥܲܡ ܐܸܤܟܹܡܹ̈ܐ ܕܲܠܒܲܪ ܪܵܕܹ̇ܐ ܒܫܲܘܝܘܼܬܼܵܐ. ܡܲܢ̣ܘܼ ܕܟܲܕܼ ܦܵܠܲܚ ܐܸܤܛܪܹܢܝܵܐ: ܐܸܫܟܲܚ̣ ܕܢܸܩܢܸܐ ܢܘܼܟܵܦܵܐ ܕܪܸܥܝܵܢܵܐ؟ ܐܵܘ ܡܲܢ̣ܘܼ ܕܡܸܬܼܦܲܪܲܣ ܠܲܡܨܵܕܼܘܼ ܬܸܫܒܿܘܿܚܬܼܵܐ ܡ̣ܢ ܠܒܲܪ: ܘܲܩܢܸܐ ܠܓܼܵܘ ܡܸܢܹܗ ܚܘܼ̈ܫܵܒܹܐ ܤܚܝܼ̈ܦܹܐ؟ ܘܐܲܝܢܵܘ ܕܙܲܠܝܼܠ ܒܒܲܪ̈ܵܝܵܬܹܗ ܘܐܲܫܝܼܕܼ ܒܗܲܕܵܡܵܘ̈ܗܝ: ܘܐܝܼܬܼܵܘܗܝ ܢܲܟܼܝܼܚܵܐ ܒܠܸܒܹܗ ܘܚܲܤܝܵܐ ܒܚܘܼܫܵܒܼܵܘ̈ܗܝ؟ pb. 45 ܐܸܡܲܬܼܝ ܕܹܝܢ ܕܗܵܘܢܵܐ ܡ̣ܢ ܪ̈ܓܼܫܹܐ ܢܸܬܿܕܒܲܪ: ܥܲܡܗܘܿܢ ܡܸܤܬܲܝܒܲܪ ܡܹܐܟܼܘܼܠܬܼܵܐ ܕܚܲܝ̈ܘܵܬܼܵܐ. ܟܲܕܼ ܕܹܝܬ ܪܸ̈ܓܼܫܹܐ ܡ̣ܢ ܗܵܘܢܵܐ: ܡܸܤܬܲܝܒܿܪܝܼܢ ܥܲܡܹܗ: ܬܘܼܪܤܵܝܵܐ ܕܡܲܠܲܐܟܹ̈ܐ܀ ܫܘܼܒܼܚܵܐ ܤܪܝܼܩܵܐ: ܡܫܲܡܫܵܢܵܐ ܗ̄ܘ̣ ܕܙܵܢܝܘܼܬܼܵܐ. ܟܲܕܼ ܕܹܝܢ ܒܕܼܘܼܒܵܪܹ̈ܐ ܢܸܗܘܸܐ: ܕܪܵܡܘܼܬܼܵܐ. ܠܡܲܟܿܝܼܟܼܘܼܬܼܵܐ: ܩܦܝܼܤܘܼܬܼܵܐ. ܠܪܸܚܡܲܬܼ ܫܘܼܒܼܚܵܐ ܕܹܝܢ: ܐܲܫܝܼܕܼܘܼܬܼܵܐ ܢܲܩܝܼܦܵܐ. ܗܵܝ̇ ܡ̇ܢ: ܡܸܛܠ ܟܢܝܼܫܘܼܬܼܵܐ ܐܲܡܝܼܢܬܼܵܐ: ܦܵܓܼ̇ܥܵܐ ܒܬܹܐܘܿܪ̈ܝܼܵܣ: ܘܲܡܙܲܝܢܵܐ ܠܢܲܦܫܵܐ ܠܘܵܬܼ ܢܲܟܼܦܘܼܬܼܵܐ. ܗܵܕܹܐ ܕܹܝܢ: ܡܸܛܠ ܐܲܡܝܼܢܘܼܬܼ ܦܸܗܝܵܐ ܕܬܲܪܥܝܼܬܼܵܐ: ܒܝܲܕܼ ܦܸܓܼܥܵܐ ܕܨܸܒܼ̈ܘܵܬܼܵܐ ܟܵܢ̇ܫܵܐ ܐܲܤܵܢܹ̈ܐ: ܘܲܡܛܲܢܦܵܐ ܠܠܸܒܵܐ܀ ܗܵܕܹܐ ܓܹܝܪ: ܒܗܘܿܢ ܒܲܟܼ̈ܝܵܢܹܐ ܕܨܒܼ̈ܘܵܬܼܵܐ ܦܵܓܼ̇ܥܵܐ ܙܲܠܝܼܠܵܐܝܼܬܼ: ܘܫܵܓܼ̇ܪܵܐ ܠܪܸܥܝܵܢܵܐ ܒܝܲܕܼ ܚܘܼ̈ܫܵܒܹܐ ܙܲܠܝܼ̈ܠܹܐ. ܗܵܝ̇ ܕܹܝܢ: ܒܝܲܕܼ ܬܹܐܘܿܪܝܼܵܐ ܕܝܼܠܗܹܝܢ ܡܸܬܼܩܲܦܤܵܐ ܪܘܼܚܵܢܵܐܝܼܬܼ: ܘܲܠܘܵܬܼ ܬܸܫܒܿܘܿܚܬܼܵܐ ܡܙܝܼܥܵܐ ܠܩܲܢܵܚܹ̈ܗ̇܀ ܠܵܐ ܗܵܟܹܝܠ ܬܦܲܚܸܡ ܟܠܗܘܿܢ ܚܲܝ̈ܠܹܐ ܘܐܵܬܼ̈ܘܵܬܼܵܐ ܕܡܸܤܬܲܥܪܵܢ ܒܬܹܒܹܝܠ ܟ̱ܠܵܗ̇: ܥܲܡ ܗܵܝ̇ ܕܐ̄ܢܵܫ ܒܝܼܕܲܥܬܼܵܐ ܢܸܬܸܒܼ ܒܫܸܠܝܵܐ܀ ܐܲܚܸܒܼ ܒܸܛܠܵܢܵܐ ܕܲܒܼܫܸܠܝܵܐ: ܝܲܬܿܝܼܪ ܡ̣ܢ ܕܲܬܼܤܲܒܲܥ ܟܲܦܢܹ̈ܐ ܕܥܵܠܡܵܐ: ܘܬܲܦܢܸܐ ܠܤܘܿܓܼܵܐܐ ܕܥܲܡܡܹ̈ܐ ܡ̣ܢ ܛܵܥܝܘܼܬܼܵܐ ܠܤܸܓܼܕܬܹܗ ܕܐܲܠܵܗܵܐ. ܬܸܬܼܝܲܬܲܪ ܒܥܲܝ̈ܢܲܝܟ ܠܡܸܫܪܵܐ ܢܲܦܫܵܟܼ ܡ̣ܢ ܐܲܤܘܼܪܹ̈ܐ ܕܲܚܛܝܼܬܼܵܐ: ܝܲܬܿܝܼܪ ܡ̣ܢ ܕܲܠܡܸܫܪܵܐ ܟܒܼܝܼ̈ܫܹܐ ܠܚܹܐܪܘܼܬܼܵܐ: ܡ̣ܢ ܡܫܲܥ̈ܒܿܕܼܵܢܹܐ ܕܦܲܓܼܪ̈ܲܝܗܘܿܢ܀ ܐܸܫܬܲܝܲܢ ܐܲܢ̄ܬܿ ܥܲܡ ܢܲܦܫܵܟܼ ܒܐܵܘܝܘܼܬܼܵܐ ܕܒܲܬܼܠܝܼܬܼܵܝܘܼܬܼܵܐ ܕܒܼܵܟܼ: ܦܲܓܼܪܵܐ ܘܢܲܦܫܵܐ ܘܪܘܼܚܵܐ: ܝܲܬܝܪ ܡ̣ܢ ܕܲܬܼܫܲܝܸܢ ܠܲܪ̈ܓܼܝܙܹܐ ܒܡܲܠܦܵܢܘܼܬܼܵܟܼ܀ ܐܲܚܸܒܼ ܒܘܿܪܘܼܬܼܵܐ ܕܡܸܠܹ̈ܐ ܥܲܡ ܝܑܼܕܲܥܬܼܵܐ ܕܢܸܤܝܵܢܵܐ ܡ̣ܢ ܠܓܼܵܘ: ܝܲܬܿܝܼܪ ܡ̣ܢ ܕܬܲܒܲܥ pb. 46 ܓܝܼܚܘܿܢ ܕܡܲܠܦܵܢܘܼܬܼܵܐ: ܡ̣ܢ ܚܘܼܪܦܵܐ ܕܬܲܪܥܝܼܬܼܵܐ ܘܓܘܼܥܠܵܢܵܐ ܕܫܸܡܥܵܐ ܘܲܕܼܝܘܿܬܼܵܐ܀ ܢܸܬܼܒܿܛܸܠ ܠܵܟܼ ܠܲܡܢܲܚܵܡܘܼ ܡܝܼܬܼܘܼܬܼܵܐ ܕܢܲܦܫܵܟܼ ܡ̣ܢ ܚܲܫܹ̈ܐ ܠܘܵܬܼ ܡܸܬܿܬܿܙܝܼܥܵܢܘܼܬܼܵܐ ܕܢܸܒܼ̈ܗܹܐ ܕܒܲܐܠܵܗܵܐ: ܝܲܬܿܝܼܪ ܡ̣ܢ ܕܲܬܼܩܝܼܡ ܡ̣ܢ ܡܵܘܬܵܐ ܠܡܝܼ̈ܬܹܐ ܕܒܲܟܼܝܵܢܵܐ܀ ܤܲܓܿܝܼ̈ܐܹܐ ܗܘ̤ܵܘ ܕܲܤ̣ܥܲܪܘ ܚܲܝ̈ܠܹܐ ܘܐܲܩܝܼܡ̣ܘ ܡܝܼ̈ܬܹܐ: ܘܲܥܡܲܠ̣ܘ ܒܛܵܥܲܝ̈ܵܐ: ܘܲܥ̣ܒܲܕܼܘ ܐܵܬܼ̈ܘܵܬܼܵܐ ܪܵܘܪ̈ܒܼܵܬܼܵܐ: ܘܲܒܼܬܲܗܪܵܐ ܕܲܒܼܗܘܿܢ ܢܓܲܕܼܘ ܠܤܲܓܿܝܼ̈ܐܹܐ ܠܘܵܬܼ ܐܲܠܵܗܵܐ ܒܐܲܝܠܹܝܢ ܕܲܗ̤ܘܲܝ̈ ܒܐܝܼܕܲܝ̈ܗܘܿܢ: ܘܒܼܵܬܼܲܟܸܢ ܢܦܲܠ̣ܘ ܗܵܠܹܝܢ ܕܠܲܐܚܪ̈ܢܹܐ ܐܲܚ̣ܝܼܘ: ܒܚܲܫܹ̈ܐ ܫܟܼܝܼܪܹ̈ܐ ܘܡܲܤ̈ܠܲܝܵܐ. ܘܟܲܕܼ ܠܲܐ̄ܚܪ̈ܵܢܹܐ ܚܲܝܹ̈ܐ ܝܲܗ̣̄ܒܼܘ: ܗܸܢܘܿܢ ܠܗܘܿܢ ܐܲܡ̣ܝܼܬܼܘ: ܘܲܗܦܲܟܼܘ ܐܲܟܼܫܸܠܘ ܐܸܢܘܿܢ ܒܤܲܩܘܼܒܼܠܵܝܘܼܬܼܵܐ ܕܐܸܬܼܚܵܘܝܲܬ̤ ܡܸܢܗܘܿܢ ܒܲܥܒܼܵܕܲܝ̈ܗܘܿܢ. ܒܗܵܝ̇ ܕܟܲܕܼ ܥܕܲܟܹܝܠ ܟܪܝܼܗܝܼܢ ܗ̄ܘ̣ܵܘ ܗܸܢܘܿܢ ܒܢܲܦܫܗܘܿܢ: ܥܲܠ ܐܵܤܝܘܼܬܼܵܐ ܕܲܩܢܘܿܡܗܘܿܢ ܠܵܐ ܐܸܬܼܒܛܸܠ ܠܗܘܿܢ. ܐܸܠܵܐ ܝܲܗ̣̄ܒܼܘ ܢܲܦܫܗܘܿܢ ܠܡܸܦܲܠ ܒܝܲܡܹܗ ܕܥܵܠܡܵܐ ܠܡܲܐܤܵܝܘܼ ܢܲܦ̈ܫܵܬܼܵܐ ܕܲܐ̄ܚܪ̈ܵܢܹܐ: ܟܲܕܼ ܗܸܢܘܿܢ ܟܪܝܼܗܝܼܢ ܥܕܲܟܹܝܠ. ܘܐܵܘܒܸܿܕܼܘ ܢܲܦܫܗܘܿܢ ܡ̣ܢ ܤܲܒܼܪܵܐ ܕܒܲܐܠܵܗܵܐ ܒܢܝܼܫܵܐ ܗܵܢܵܐ ܕܐܸܡ̇ܪܹܬܼ: ܒܲܕܼܠܵܐ ܐܸܫܟܿܚܲܬ̤ ܡܚܝܼܠܘܼܬܼܗܘܿܢ ܕܪܸܓܼܫܹܐ ܠܡܸܦܓܲܥ ܒܙܲܠܝܼ̈ܩܹܐ ܕܨܸܒܼ̈ܘܵܬܼܵܐ: ܕܲܡ̈ܥܵܕܵܢ ܠܲܡܥܵܪܘܼ ܥܲܙܝܼܙܘܼܬܼܵܐ ܕܚܲܫܹ̈ܐ ܒܐܲܝܠܹܝܢ ܕܲܥܕܲܟܹܝܠ ܥܲܠ ܙܗܝܼܪܘܼܬܼܵܐ ܤܢܝܼܩܝܼܢ. ܐܵܡܲ݁ܪܢܵܐ ܕܹܝܢ ܚܸܙ̈ܘܲܝ ܢܸܫܹ̈ܐ ܘܲܢܝܵܚܹ̈ܐ ܘܟܸܤܦܵܐ ܘܨܸܒܼ̈ܘܵܬܼܵܐ: ܘܚܲܫܵܐ ܕܪܹܫܵܢܘܼܬܼܵܐ ܘܲܡܫܲܥܠܝܘܼܬܼܵܐ ܕܥܲܠ ܐ̄ܚܪ̈ܵܢܹܐ܀ ܗ̤ܘܝܼ ܡܸܬܼܒܲܤܲܪ ܡ̣ܢ ܤܲܟܼ̈ܠܹܐ ܡܸܛܠ ܒܘܿܪܘܼܬܼܵܐ: ܘܠܵܐ ܡ̣ܢ ܚܲܟܿܝܼ̈ܡܹܐ ܡܸܛܠ ܚܲܨܝܼܦܘܼܬܼܵܐ܀ ܐܸܬܼܡܲܤܟܲܢ ܡܸܛܠ ܡܘܼܟܵܟܼܵܐ: ܘܠܵܐ ܬܸܬܼܟܲܗܲܢ ܡܸܛܠ ܚܘܼܨܦܵܐ܀ pb. 47 ܒܚܲܠܵܐ ܕܲܡܝܲܬܿܪ̈ܵܬܼܵܟܼ ܟܲܚܸܕܼ ܐܸܢܘܿܢ ܠܕܼܵܪ̈ܘܿܫܹܐ: ܘܠܵܐ ܒܝܲܕܼ ܡܸܠܬܼܵܐ. ܘܒܲܡܫܲܝܢܘܼܬܼܵܠ ܕܤܸܦ̈ܘܵܬܼܵܟܼ ܠܲܟܼܪܘܿܡܵܐ ܕܠܵܐ ܡܸܬܿܛܦܝܼ̈ܤܵܢܹܐ: ܘܠܵܐ ܒܝܲܕܼ ܩܵܠܹ̇ܐ܀ ܐܲܒܼܗܸܬܼ ܠܙܲܠܝܼ̈ܠܹܐ ܒܝܲܩܝܼܪܘܼܬܼܵܐ ܕܕܘܼܒܵܪ̈ܲܝܟ: ܘܲܠܚܲܨܝܼ̈ܦܲܝ ܒܪܸ̈ܓܼܫܹܐ ܒܢܘܼܟܵܦܵܐ ܕܒܼܵܒܼ̈ܵܬܼܵܟܼ: ܕܲܟܼܢܝܼ̈ܫܵܢ ܨܹܐܕܲܝܟ ܒܲܒܼܗܝܼܠܘܼܬܼܵܐ܀ ܢܘܼܟܼܪܵܝܵܐ ܚܫܘܿܒܼ ܢܲܦܫܵܟܼ ܟܠ ܐܲܝܟܵܐ ܕܥܵܐܹ̇ܠ ܐܲܢ̄ܬܿ ܟܠܗܘܿܢ ܝܵܘ̈ܡܵܬܼܵܟܼ: ܕܬܸܫܟܲܚ ܡܲܡܸܕܼ ܡ̣ܢ ܚܘܼܤܪ̈ܵܢܹܐ ܪܵܘܪ̈ܒܹܐ ܕܡܸܬܼܝܲܠܕܝܼܢ ܡ̣ܢ ܦܵܪܹܗ̄ܤܝܼܵܐ܀ ܒܟܼܠ ܙܒܲܢ ܗ̤ܘܝܼ ܡܲܤܒܲܪ ܥܲܠ ܢܲܦܫܵܟܼ ܕܡܸܕܸܡ ܠܵܐ ܝܵܕܲܥ̇ ܐܲܢ̄ܬܿ: ܕܬܸܫܬܵܘܙܲܒܼ ܡ̣ܢ ܥܸܕܼܠܵܝܹ̈ܐ ܕܲܡܙܝܼܥܵܐ ܒܵܟܼ ܡܲܤܒܿܪܵܢܘܼܬܼܵܐ: ܕܤܵܦܹ̇ܩ ܐܲܢ̄ܬܿ ܠܬܼܘܼܪܵܨܵܐ ܕܲܐ̄ܚܪ̈ܵܢܹܐ܀ ܢܸܗܘܸܐ ܐܲܡܝܼܢ ܦܘܼܡܵܟܼ ܒܒܼܘܼܪ̈ܟܵܬܼܵܐ: ܘܠܵܐ ܡܸܡܬܼܘܿܡ ܬܸܦܓܲܥ ܒܵܟܼ ܨܘܿܚܝܼܬܼܵܐ ܡ̣ܢ ܐ̄ܢܵܫ. ܨܲܥܪܵܐ: ܨܲܥܪܵܐ ܡܵܘܠܸܕܼ. ܘܒܼܘܼܪܟܿܬܼܵܐ: ܒܘܼܪܟܿܬܼܵܐ܀ ܒܟܼܠܙܒܲܢ ܬܸܪܢܸܐ ܥܲܠ ܢܲܦܫܵܟܼ ܕܲܤܢܝܼܩ ܐܲܢ̄ܬܿ ܥܲܠ ܝܘܼܠܦܵܢܵܐ: ܕܲܒܼܟܼܠܗܘܿܢ ܚܲܝܲܝ̈ܟ ܚܲܟܿܝܼܡܵܐ ܬܸܫܬܿܟܲܚ܀ ܠܵܐ ܬܲܫܠܸܡ ܠܲܐ̄ܚܪ̈ܵܢܹܐ ܐܲܝܟܼ ܕܡ̣ܢ ܕܝܼܠܵܟܼ ܕܘܼܒܵܪܵܐ ܕܠܵܐ ܥܕܲܟܹܝܠ ܡܲܛ̣ܝܼܬܿ ܠܘܵܬܹܗ: ܕܠܵܐ ܬܸܒܼܗܲܬܼ ܐܲܢ̄ܬܿ ܡ̣ܢ ܢܵܦܫܵܟܼ: ܘܡ̣ܢ ܦܸܚܡܵܐ ܕܟܼܘܼܒܵܪ̈ܲܝܟ ܬܸܬܼܓܿܠܸܐ ܕܲܓܵܠܘܼܬܼܵܟܼ. ܐܸܠܵܐ ܐܵܦܸܢ ܬܡܲܠܸܠ ܥܲܠ ܘܵܠܝܼܬܼܵܐ: ܐܲܝܟܼ ܛܲܟܼܤܵܐ ܕܝܵܠܘܿܦܹ̈ܐ ܡܲܠܸܠ: ܘܠܵܐ ܡܫܲܠܛܵܐܝܼܬܼ: ܟܲܕܼ ܩܲܕܼܡܵܝܑܬܼ ܡܩܲܦܲܚ ܐܲܢ̄ܬܿ ܢܲܦܫܵܟܼ: ܘܲܡܚܵܘܸܐ ܐܲܢ̄ܬܿ ܕܲܒܼܨܝܼܪ ܐܲܢ̄ܬܿ ܗ̄ܘ̣ ܡܸܢܹܗ. ܕܐܵܦ ܠܫܵܡܘܿܥܲܝ̈ܟ ܬܸܬܸܠ ܛܘܼܦܤܵܐ ܕܡܲܟܿܝܼܟܼܘܼܬܼܵܐ: ܘܝܲܬܿܝܼܪ ܢܓܸܿܪܸܓܼ ܐܸܢܘܿܢ ܫܸܡܥܵܐ ܕܦܸܬܼܓܼܵܡܲܝ̈ܟ: ܠܪܲܗܛܵܐ ܕܲܠܘܵܬܼ ܥ̇ܒܼܵܕܼܵܐ: ܘܬܸܬܼܝܲܩܲܪ ܒܥܲܝܢܲܝ̈ܗܘܿܢ܀ ܟܡܵܐ ܕܡܲܨܝܵܐ: ܥܲܠ pb. 48 ܨܸܒܼ̈ܘܵܬܼܵܐ ܕܐܲܝܟܼ ܗܵܠܹܝܢ: ܠܕܸܡ̈ܥܹܐ ܡܲܠܸܠ. ܕܐܵܦ ܠܢܲܦܫܵܟܼ ܐܵܦ ܠܚܲܒܼܪ̈ܲܝܟ ܬܵܘܬܲܪ: ܘܲܠܛܲܝܒܿܘܼܬܼܵܐ ܬܸܓܸܕܼ ܨܹܐܕܲܝܟ܀ ܐܸܢ ܒܛܲܝܒܿܘܼܬܹܗ ܕܲܡܫܝܼܚܵܐ ܐܸܬܼܡܲܛܝܼܬܿ ܠܡܸܬܼܒܲܤܵܡܘܼ ܒܐ̄ܪ̈ܵܙܹܐ ܕܒܸܪ̈ܝܵܬܼܵܐ ܕܡܸܬܼܚܲܙ̈ܝܵܢ: ܕܐܝܼܬܼܵܘܗܝ ܐܲܩܡܵܐ ܩܲܕܼܡܵܝܵܐ ܕܝܼܕܲܥܬܼܵܐ: ܙܲܝܸܢ ܢܲܦܫܵܟܼ ܠܘܼܩܒܲܠ ܪܘܼܚܵܐ ܕܓܼܘܼܕܵܦܵܐ. ܕܠܵܐ ܙܲܝܢܵܐ ܕܹܝܢ ܠܵܐ ܬܩܘܼܡ ܒܐܲܬܼܪܵܐ ܗܵܢܵܐ: ܕܲܠܡܵܐ ܬܸܬܼܩܛܸܠ ܩܲܠܝܼܠܵܐܝܼܬܼ ܒܤܸܬܼܪܵܐ ܡ̣ܢ ܡܲܛܥܝܵܢܹ̈ܐ. ܙܲܝܢܵܟܼ ܕܹܝܢ ܢܸܗܘܸܐ: ܨܵܘܡܵܐ ܘܕܸܡ̈ܥܹܐ ܗܵܠܹܝܢ ܕܐܵܫܹ̇ܕܼ ܐܲܢ̄ܬܿ ܒܓܼܘܼܪ̈ܓܵܚܹܐ ܐܲܡܝܼ̈ܢܹܐ. ܘܲܕܿܬܸܙܕܗܲܪ ܡ̣ܢ ܕܬܸܩܪܸܐ ܒܲܟܼܬܼܵܒܹ̈ܐ ܕܲܡܦܲܪܫܝܼܢ ܪܸ̈ܥܝܵܢܹܐ ܕܕܸܚ̈ܠܬܼܵܐ ܒܢܝܼܫܵܐ ܟܹܐܡܲܬܼ ܕܲܫܪܵܝܵܐ: ܕܗܸܘܝܘܼ ܡܙܲܝܸܢ ܥܲܠ ܢܲܦܫܵܐ ܠܪܘܼܚܵܐ ܕܓܼܘܼܕܵܦܵܐ ܝܲܬܿܝܼܪܵܐܝܼܬܼ܀ ܡܵܐ ܕܡܲܠܝܵܐ ܟܲܪܤܵܟܼܸ: ܠܵܐ ܬܲܡܪܲܚ ܠܡܸܒܼܨܵܐ: ܕܲܠܡܵܐ ܬܸܬܿܘܸܐ. ܐܸܤܬܲܟܲܠ ܡܸܕܸܡ ܕܐܵܡܲ̇ܪܢܵܐ: ܠܲܝܬܿ ܒܟܲܪܤܵܐ ܕܡܲܠܝܵܐ: ܝܑܼܕܲܥܬܼܵܐ ܕܐ̄ܪ̈ܵܙܵܘܗܝ ܕܐܲܠܵܗܵܐ. ܐܸܬܼܥܲܢܵܐ ܤܲܓܝܼܵܐܝܼܬܼ ܕܠܵܐ ܤܲܒܼܥܘܼ ܒܲܟܼܬܼܵܒܹ̈ܐ ܕܲܡܦܲܪܢܤܵܢܘܼܬܹܗ ܕܐܲܠܵܗܵܐ: ܕܲܥܒܼܝܼܕܼܝܼܢ ܠܐ̄ܢܵܫܵܐ ܩܲܕܝܼ̈ܫܹܐ: ܕܲܡܚܵܘܹ̇ܝܢ ܠܢܝܼܫܵܐ ܕܲܡܫܲܚܠ̱ܦܘܼܬܼ ܥܒܼܵܕܼܵܘ̈̇ܗܝ ܒܬܼܘܼܩܵܢܵܐ ܕܲܡܦܲܪܫܘܼܬܼ ܟܝܵܢܵܘ̈ܗܝ ܕܥܵܠܡܵܐ. ܕܢܸܬܼܚܲܝܲܠ ܡܸܢܗܘܿܢ ܡܲܕܥܵܟܼ: ܘܬܸܩܢܸܐ ܙܵܘ̈ܥܹܐ ܢܲܗܝܼܪܹ̈ܐ ܡ̣ܢ ܩܲܛܝܼܢܘܼܬܼܗܘܿܢ: ܠܡܸܪܕܵܐ ܪܸܥܝܵܢܵܟܼ ܒܐܘܼܪܚܹܗ ܫܲܦܝܵܐܝܼܬܼ ܠܘܼܩܒܲܠ ܢܝܼܫܵܐ ܕܲܬܼܪܝܼܨܘܼܬܼ ܤܝܵܡܵܐ ܕܲܒܼܪܝܼܬܹܗ ܕܥܵܠܵܡܵܐ: ܐܲܝܟܼ ܡܫܲܒܿܚܘܼܬܼ ܬܲܪܥܝܼܬܹܗ ܚܲܟܿܝܼܡܬܼܵܐ ܕܒܼܵܪܘܿܝܵܐ ܕܲܟܼܝܵܢܹ̈ܐ܀ ܩܪܝܼ ܒܲܕܼܝܵܬܹܩ̈ܘܿܣ ܬܲܪ̈ܬܲܝܗܹܝ ܕܤܵܡ̣ ܐܸܢܹܝܢ ܐܲܠܵܗܵܐ ܠܝܼܕܲܥܬܼܵܐ ܕܟܼܠܵܗ̇ ܬܹܒܹܝܠ: ܕܬܸܙܕܵܘܲܕܼ ܡ̣ܢ ܚܲܝܠܵܐ ܕܲܡܕܲܒܪܵܢܘܼܬܹܗ ܕܲܒܼܟܼܠ ܕܵܪ: ܘܬܸܬܼܒܿܠܲܥ ܒܬܸܡܗܵܐ܀ ܗܵܠܹܝܢ ܩܸܪ̈ܝܵܢܹܐ ܘܕܲܐܝܟܼ ܗܵܠܹܝܢ: ܠܢܝܼܫܵܐ ܗܵܢܵܐ ܛܵܒܼ ܚܵܫ̇ܚܝܼܢ. ܩܸܪܝܵܢܵܟܼ: ܒܫܸܠܝܵܐ ܕܡ̣ܢ ܟܠ ܢܸܗܘܸܐ: pb. 49 ܟܲܕܼ ܡܚܲܪܲܪ ܡ̣ܢ ܤܲܓܿܝܼܐܘܼܬܼ ܨܸܦܬܼܵܐ ܕܦܲܓܼܪܵܐ ܘܲܫܓܼܘܼܫܝܵܐ ܕܤܘܼܥܪ̈ܵܢܹܐ: ܕܢܸܬܸܠ ܛܥܵܡܬܼܵܐ ܗܲܢܝܼܐܬܼܵܐ ܒܢܲܦܫܵܟܼ: ܒܤܘܼ̈ܟܵܠܹܐ ܚܠܲܝ̈ܵܐ ܕܲܠܥܸܠ ܡ̣ܢ ܪܸ̈ܓܼܫܹܐ: ܕܡܲܪܓܿܫܵܐ ܒܵܗ̇ ܢܲܦܫܵܐ ܒܐܲܡܝܼܢܘܼܬܼܵܗ̇ ܕܲܒܼܗܘܿܢ. ܠܵܐ ܬܤܝܼܡ ܐܸܢܹܝܢ ܠܡܸܠܹ̈ܐ ܕܡ̣ܢ ܢܸܤܝܵܢܵܐ ܐܲܝܟܼ ܒܸܕܼܝܵܐ ܕܲܐܡܙܲܒܿܢܲܝ̈ ܡܸܠܹ̈ܐ: ܕܲܠܡܵܐ ܬܦܘܼܫ ܒܚܸܫܟܵܐ ܥܕܲܡܵܐ ܠܫܘܼܠܵܡ ܚܲܝܲܝ̈ܟ: ܟܲܕܼ ܬܸܬܼܓܠܸܙ ܡ̣ܢ ܝܘܼܬܼܪܵܢܗܹܝܢ: ܘܲܬܼܓܲܫܓܸܿܫ ܐܲܝܟܼ ܕܲܒܼܠܸܠܝܵܐ ܒܙܲܒܼ̈ܢܹܐ ܕܲܩܪܵܒܼܵܐ: ܕܠܵܐ ܐܹܡܲ̇ܪ ܕܬܸܤܬܿܚܸܦ ܠܚܲܕܼ ܡ̣ܢ ܓܘܼܡܵܨܹ̈ܐ ܒܦܲܪܨܘܿܦ ܫܪܵܪܵܐ܀ ܗܵܕܹܐ ܐܵܬ̤ܵܐ ܬܸܗܘܸܐ ܠܵܟܼ: ܡܵܐ ܕܲܩܪܸܒܼܬܿ ܠܡܸܥܲܠ ܠܓܼܵܘ ܡ̣ܢ ܐܲܬܼܪܵܐ ܗܵܘ̇: ܕܡܵܐ ܕܫܲܪܝܲܬ̤ ܛܲܝܒܿܘܼܬܼܵܐ ܦܵܬܼ̇ܚܵܐ ܥܲܝܢܲܝ̈ܟ: ܠܡܲܪܓܵܫܘܼ ܒܵܗ̇ ܒܲܚܙܵܬܼܵܐ ܚܲܬܝܼܬܬܵܐ ܕܝܼܠܗܹܝܢ ܕܨܸܒܼ̈ܘܵܬܼܵܐ: ܒܹܗ ܒܥܸܕܵܢܵܐ ܡܫܲܪ̈ܝܵܢ ܥܲܝܢܲܝ̈ܟ ܠܡܹܐܫܲܕܼ ܕܸܡ̈ܥܹܐ: ܥܕܲܡܵܐ ܕܲܠܦܲܟܲܝ̈ܟ ܡܫܝܼܓܼܵܘ ܒܤܲܓܝܼܐܘܼܬܼܗܘܹܝܢ: ܘܬܲܙܝܼܙܘܼܬܼܗܘܿܢ ܕܪܸܓܼܫܹܐ ܬܸܬܼܡܲܬܲܢ: ܘܢܸܬܼܩܲܦܤܘܼܢ ܗܲܢܝܼܵܐܝܼܬܼ ܠܓܼܵܘ ܡܸܢܵܟܼ. ܐܸܢ ܐܝܼܬܼ ܐ̄ܢܵܫ ܕܲܠܒܲܪ ܡ̣ܢ ܗܵܠܹܝܢ ܡܲܠܸܦ ܠܵܟܼ: ܠܵܐ ܬܗܲܝܡܢܝܼܘܗܝ. ܤܛܲܪ ܡ̣ܢ ܕܸܡ̈ܥܹܐ ܕܹܝܢ ܕܬܸܒܼܥܸܐ ܡ̣ܢ ܦܲܓܼܪܵܐ ܡܸܕܸܡ ܐ̄ܚܪܹܝܢ ܠܫܘܼܘܕܵܥܵܐ ܕܡܲܪܓܫܵܢܘܼܬܼܵܐ ܕܲܫܪܵܪܵܐ ܒܐܵܬ̤ܵܐ ܓܠܝܼܬܼܵܐ ܠܵܐ ܫܲܠܝܼܛ ܠܵܟܼ: ܐܸܠܵܐ ܐܸܢ ܒܫܸܬܼܩܵܐ ܒܲܠܚܘܿܕܼ ܕܡ̣ܢ ܡܲܥܒܿܕܼܵܢܘܼܬܼܵܐ ܕܗܲܕܵܡܹ̈ܐ. ܗܵܢܵܘ ܕܹܝܢ: ܡܵܐ ܕܐܸܬܼܥܲܠܝܼ ܪܸܥܝܵܢܵܐ ܡ̣ܢ ܗܘܵܝܹ̈ܐ: ܘܐܵܦ ܡ̣ܢ ܕܸܡ̈ܥܹܐ ܢܦܘܼܫ ܦܲܓܼܪܵܐ ܘܡ̣ܢ ܡܲܪܓܫܵܢܘܼܬܼܵܐ ܘܡ̣ܢ ܡܸܬܿܬܿܙܝܼܥܵܢܘܼܬܼܵܐ: ܤܛܲܪ ܡ̣ܢ ܚܲܝܘܼܬܼܵܐ ܟܝܵܢܵܝܬܼܵܐ. ܠܵܐ ܓܹܝܪ ܡܸܬܿܬܲܚܬܿܝܵܐ ܗܵܝ̇ ܝܑܼܕܲܥܬܼܵܐ ܠܡܸܤܲܒܼ ܥܲܡܵܗ̇ ܫܵܘܦܵܐ: ܐܸܤܟܹܡܹ̈ܐ ܕܨܸܒܼ̈ܘܵܬܼܵܐ ܕܥܵܠܡܵܐ ܡܸܬܼܪܲܓܼܫܵܢܵܐ: ܫܐܝܼܠܵܐܝܼܬܼ ܒܲܚܙܵܬܼܵܐ ܕܪܸܥܝܵܢܵܐ܀ ܐܸܢ ܒܲܦܓܲܪܠܲܡ ܘܐܸܢ ܕܠܵܐ ܦܓܲܪ: ܠܵܐ pb. 50 ܠܵܐ ܝܵܕܲܥ̇ܢܵܐ: ܐܲܠܵܗܵܐ ܗ̄ܘ̣ ܝܵܕܲܥ̇: ܘܗܵܝ̇ ܕܲܫܡܲܥ̣ ܡܸܠܹ̈ܐ ܕܠܵܐ ܡܸܬܼܠ̈ܠܵܢ܀ ܟܠ ܕܹܝܢ ܕܒܸܐܕܼܢܹ̈ܐ ܡܸܫܬܿܡܲܥ: ܡܸܬܼܡܲܠܠܵܢܵܐ ܗ̄ܘ̣. ܗ̤ܘ ܕܹܝܢ ܠܵܐ ܒܩܵܠܹ̈ܐ ܡܸܬܼܪ̈ܲܓܼܫܵܢܹܐ ܡܫܲܥ̣: ܐܵܦܠܵܐ ܒܲܚܙܵܬܼܵܐ ܕܕܸܡ̈ܘܵܬܼܵܐ ܓܫܝܼ̈ܡܵܬܼܵܐ ܕܡܸܬܼܪܼ̈ܲܓܼܫܵܢܝܵܬܼܵܐ. ܐܸܠܵܐ ܒܙܵܘ̈ܥܹܐ ܕܬܲܪܥܝܼܬܼܵܐ: ܒܲܚܛܘܼܦܝܵܐ ܕܡ̣ܢ ܦܲܓܼܪܵܐ: ܘܠܵܘ ܟܲܕܼ ܡܫܵܘܬܲܦ ܥܲܡܵܗ̇ ܨܸܒܼܝܵܢܵܐ܀ ܥܲܝܢܵܐ ܠܲܡ ܠܵܐ ܚܙܵܬ̤ ܐܲܟܼܘܵܬܹܗ ܡܸܡܬܲܘܿܡ: ܘܐܸܕܼܢܵܐ ܠܵܐ ܫܸܡܥܲܬ̤ ܦܸܚܡܹܗ. ܘܕܼܘܼܡܝܵܐ ܕܲܚܙܵܬܹܗ ܠܸܒܵܐ: ܠܵܐ ܐܸܫܬܪܲܓܼܪܲܓܼ ܠܡܲܤܵܩܘܼ ܒܝܲܕܼ ܥܘܼܗܕܵܢܵܐ ܙܢܲܝ̈ ܝܑܼܕܲܥܬܹܗ: ܕܡܸܕܸܡ ܕܛܲܝܸܒܼ ܐܲܠܵܗܵܐ ܠܕܲܟܼܝܲܝ̈ ܠܸܒܵܐ ܠܲܡܚܵܘܵܝܘܼ ܒܡܝܼܬܼܘܼܬܼܗܘܿܢ ܕܡ̣ܢ ܥܵܠܡܵܐ. ܠܵܘ ܚܙܵܬܼܵܐ ܓܫܝܼܡܬܵܐ ܕܲܒܼܥܲܝ̈ܢܹܐ ܒܸܤܪ̈ܵܢܵܝܵܬܼܵܐ ܡܸܬܼܩܲܒܿܠܵܐ ܒܦܘܼܪ̈ܫܵܢܹܝܗ̇ ܥܲܒܼܝܵܐܝܼܬܼ: ܘܠܵܐ ܬܘܼܒܼ ܗܲܓܵܓܹ̈ܐ ܕܡܸܢܗܘܿܢ ܡܸܬܿܬܨܝܼܪܝܼܢ ܒܪܸܥܝܵܢܵܐ ܫܐܝܼܠܵܐܝܼܬܼ: ܐܸܠܵܐ ܦܫܝܼܛܘܼܬܼܵܐ ܕܬܹܐܘܿܪܝܼܵܐ ܕܡܸܬܼܝܲܕܼܥܵܢ̈ܝܵܬܼܵܐ ܘܡܸܬܼܗܲܝܡ̈ܢܵܢܝܵܬܼܵܐ: ܕܡܵܪܕܵܐ ܗ̣̄ܝ ܠܲܡܗܲܕܡܘܼܬܼܵܐ ܘܲܠܦܘܼ̈ܠܵܓܹܐ ܡܦܲܪ̈ܫܹܐ: ܡܚܵܘܝܲܝ̈ ܝܘܼ̈ܩܢܹܐ ܐܸܤܛܘܼ̈ܟܼܤܵܝܹܐ܀ ܠܘܲܥܕܵܐ ܕܐܸܤܦܹܝܪ ܫܸܡܫܵܐ: ܠܦܘܼܬܼ ܚܲܝܠܵܐ ܕܚܵܙܘܿܝܘܼܬܼܵܟܼ: ܐܲܨܸܕܼ ܚܝܵܪܵܟܼ ܠܡܸܬܼܒܲܤܵܡܘܼ ܒܲܠܚܘܿܕܼ ܒܙܲܠܝܼܩܵܘ̈ܗܝ: ܘܠܵܘ ܐܵܦ ܠܡܸܒܼܨܵܐ ܪܲܗܛܵܐ ܕܓܼܝܼܓܼܠܹܗ: ܕܲܠܡܵܐ ܬܸܬܼܚܲܠܲܨ ܡܸܢܵܟܼ: ܐܵܦ ܚܵܙܘܿܝܘܼܬܼܵܐ ܡܡܲܫܲܚܬܼܵܐ. ܐܸܢ ܬܸܫܟܲܚ ܕܸܒܼܫܵܐ: ܡܸܤܬܼܵܟܼ ܐܲܟܼܘܿܠ. ܕܠܵܐ ܟܲܕܼ ܬܸܤܒܲܥ: ܬܬܼܝܼܒܼܝܼܘܗܝ. ܨܒܼܘܼܬܼܵܐ ܗ̣̄ܝ ܩܲܠܝܼܠܬܼܵܐ ܟܝܵܢܵܗ̇ ܕܢܲܦܫܵܐ: ܘܒܲܙܒܲܢ ܙܒܲܢ ܦܵܤ̇ܥܵܐ: ܟܲܕܼ ܪܵܓܵܐ ܠܡܹܐܠܲܦ ܐܲܝܠܹܝܢ ܕܪ̈ܵܡܵܢ ܡ̣ܢ ܟܝܵܢܵܗ̇܀ ܘܙܲܒܼ̈ܢܝܼܢ ܤܲܓܿܝܼ̈ܐܵܢ ܡ̣ܢ ܪܲܗܛܵܐ ܕܩܸܪܝܵܢܵܐ ܘܬܹܐܘܿܪܝܼܵܐ pb. 51 ܕܨܸܒܼ̈ܘܵܬܼܵܐ: ܡܲܕܼܪܟܼܵܐ ܡܸܕܸܡ ܡܸܕܸܡ. ܕܟܲܕܼ ܢܸܬܼܦܲܚܡܘܼܢ: ܤܲܓܿܝܼ ܒܨܝܼܪܵܐ ܡܫܘܼܚܬܼܵܐ ܕܝܼܕܲܥܬܼܵܗ̇ ܠܦܸܚܡܵܐ ܕܲܫܟܼܵܚܬܵܗ̇. ܘܲܥܕܲܡܵܐ ܠܐܲܝܟܵܐ ܥܵܐ̇ܠܵܐ ܝܑܼܕܲܥܬܼܵܗ̇: ܥܕܲܡܵܐ ܕܙܵܘܥܵܐ ܘܲܪܬܹܝܬܼܵܐ ܠܵܒܼ̇ܫܵܐ ܒܚܘܼ̈ܫܵܒܹܝܗ̇. ܘܬܼܘܼܒܼ ܠܡܸܥܛܲܦ ܠܒܸܤܬܿܪܵܗ̇ ܡܸܤܬܲܪܗܒܼܵܐ ܡ̣ܢ ܕܸܚܠ̱ܬܼܵܐ: ܟܲܕܼ ܦܵܤ̇ܥܵܐ ܠܡܲܡܪܵܚܘܼ ܥܲܠ ܨܸܒܼ̈ܘܵܬܼܵܐ ܢܘܼܪ̈ܵܢܵܝܬܼܵܐ܀ ܐܸܠܵܐ ܕܸܚܠܬܼܵܐ ܡܲܢ ܬܵܟܼ̇ܤܵܐ ܠܵܗ̇: ܡܸܛܠ ܕܚܝܼܠܘܼܬܼܗܹܝܢ ܕܨܸܒܼ̈ܘܵܬܼܵܐ. ܘܦܵܪܘܿܫܘܼܬܼܵܐ ܡ̇ܢ ܒܫܸܬܼܩܵܐ ܪܵܡܙܵܐ ܠܹܗ ܠܗܵܘܢܵܗ̇ ܕܢܲܦܫܵܐ: ܕܠܵܐ ܬܲܡܪܲܚ: ܕܠܵܐ ܬܡܘܼܬܼ. ܘܲܕܼܩܲܫ̈ܝܵܢ ܡܸܢܵܟܼ: ܠܵܐ ܬܸܒܼܥܸܐ. ܘܲܕܬܲܩܝܼ̈ܦܵܢ ܡܸܢܵܟܼ: ܠܵܐ ܬܒܲܩܸܒܼ. ܒܡܵܐ ܠܲܡ ܕܐܲܫܠ̱ܛܘܼܟܼ ܐܸܤܬܲܟܲܠ: ܘܠܵܐ ܠܵܟܼ ܠܡܲܡܪܵܚܘܼ ܥܲܠ ܟܲܤ̈ܝܵܬܼܵܐ. ܤܓܼܘܿܕܼ ܡܵܘܕܹܝܢ ܘܫܲܒܲܚ ܒܫܸܬܼܩܵܐ: ܘܐܵܘܕܵܐ ܠܠܵܐ ܡܸܬܿܕܲܪܟܵܢܘܼܬܼܵܐ. ܡܸܛܠ ܕܤܲܓܝܼ ܡܸܢܵܟܼ ܐܸܬܼܚܵܘܝܼ ܠܵܟܼ: ܘܲܒܼܫܲܪܟܵܐ ܕܲܥ̇ܒܼܵܕܼܵܘ̈ܗܝ ܠܵܐ ܬܸܬܼܥܲܤܲܩ. ܘܗܵܝ̇ ܕܲܠܡܹܐܟܲܠ ܕܸܒܼܫܵܐ ܤܲܓܿܝܼ: ܠܵܐ ܫܲܦܝܼܪ: ܘܐܵܦܠܵܐ ܠܲܡ ܠܡܸܒܼܨܵܐ ܡܸܠܹ̈ܐ ܡܫܲܒ̈ܚܵܬܼܵܐ. ܕܲܠܡܵܐ ܟܲܕܼ ܡ̣ܢ ܛܵܘܪܵܐ ܤܲܓܝܼܐܵܐ ܨܵܒܹ̇ܝܢܲܢ ܕܢܸܚܙܸܐ: ܘܟܲܕܼ ܠܵܐ ܥܕܲܟܹܝܠ ܡܲܛܝܼܢܲܢ ܠܩܲܪܝܼܒܼܘܼܬܹܗ: ܡ̣ܢ ܠܵܐ ܡܡܲܫܚܘܼܬܼܵܗ̇ ܕܐܘܼܪܚܵܐ ܢܚܘܼܒܼ: ܘܐܵܦ ܡ̣ܢ ܚܲܝܠܵܗ̇ ܕܲܚܙܵܬܼܵܐ: ܘܢܸܤܬܲܓܲܦ. ܒܗܵܝ̇ ܕܐܝܼܬܼ ܐܸܡܲܬܼܝ: ܕܕܼܘܼܟܲܬܼ ܫܪܵܪܵܐ: ܫܪܲܓܼܪ̈ܵܓܼܝܵܬܼܵܐ ܡܫܲܡܫܵܐ. ܟܲܕܼ ܓܹܝܪ ܠܵܐܹ̇ܐ ܠܹܗ ܡܲܕܥܵܐ ܡ̣ܢ ܡܲܕܼܪܟܼܵܢܘܼܬܼܵܐ: ܐܵܦ ܠܚܲܬܝܼܬܘܼܬܹܗ ܛܵܥܹ̇ܐ. ܘܫܲܦܝܼܪ ܐܸܡ݂ܲܪ ܚܲܟܝܼܡܵܐ ܫܠܹܝܡܘܿܢ: ܕܐܲܝܟܼ ܡܕܼܝܼܢ̄ܬܼܵܐ ܬܪܝܼܥܬܼܵܐ ܕܠܲܝܬ ܠܵܗ̇ ܫܘܼܪܵܐ: ܗܵܟܲܢܵܐ ܗ̄ܘ̣ ܓܲܒܼܪܵܐ ܕܠܵܐ ܢܲܓܼܝܼܪܵܐ ܪܘܼܚܹܗ܀ ܠܵܐ ܐܵܠܨܵܐ ܠܡܸܦܗܵܐ ܒܵܬܲܪ ܐܲܠܵܗܵܐ ܒܲܫܡܲܝܵܐ ܘܒܲܐܪܥܵܐ: ܘܠܲܡܫܲܡܵܪܘܼ ܠܗܵܘܢܲܢ ܒܲܒܼܥܵܬܹܗ ܒܕܼܘܼ̈ܟܿܝܬܼܵܐ. ܕܲܟܵܐ ܢܲܦܫܵܟܼ: ܒܲܪܢܵܫܵܐ: pb. 52 ܘܐܲܥܒܲܪ ܡܸܢܵܟܼ ܪܸܢܝܵܐ ܕܥܘܼ̈ܗܕܵܢܹܐ ܕܲܠܒܲܪ ܡ̣ܢ ܟܝܵܢܵܐ: ܘܲܬܼܠܝܼ ܥܲܠ ܙܵܘܥܲܝ̈ܟ ܐܲܦܲܝ̈ ܬܲܪܥܵܐ ܕܢܲܟܼܦܘܼܬܼܵܐ ܘܡܲܟܿܝܼܟܼܘܼܬܼܵܐ. ܘܲܒܼܝܲܕܼ ܗܵܠܹܝܢ: ܡܸܫܟܲܚ ܐܲܢ̄ܬܿ ܠܹܗ ܕܐܝܼܬܼܵܘܗܝ ܠܓܼܵܘ ܡܸܢܵܟܼ. ܠܡܲܟܿܝܼ̈ܟܹܐ ܠܲܡ: ܐ̄ܪ̈ܵܙܹܐ ܡܸܬܼܓܠܹܝܢ܀ ܐܸܢ ܝܲܗ̣̄ܒܼܬܿ ܢܲܦܫܵܟܼ ܠܦܘܼܠܚܵܢ ܨܠܘܿܬܼܵܐ ܡܙܲܗܝܵܢܝܼܬܼܵܐ ܕܬܲܪܥܝܼܬܼܵܐ: ܘܠܲܐܡܝܼܢܘܼܬܼܵܐ ܕܫܲܗܪܵܐ ܕܠܲܝ̈ܠܵܘܵܬܼܵܐ: ܐܲܝܟܼ ܕܬܸܩܢܸܐ ܗܵܘܢܵܐ ܥܛܝܼܦ ܢܘܼܗܪܵܐ: ܐܲܓܼܢܵܐ ܢܲܦܫܵܟܼ ܡ̣ܢ ܚܸܙܘܲܝ̈ ܥܵܠܡܵܐ: ܘܲܦܤܘܿܩ ܡܸܢܵܟܼ ܥܸܢܝܵܢܵܐ ܕܡܲܡܠܠܵܐ. ܘܠܵܐ ܬܸܨܒܸܐ ܠܲܡܩܲܒܵܠܘܼ ܠܓܼܵܘ ܡ̣ܢ ܟܘܼܪܚܵܟܼ ܪܵܚܡܵܐ ܕܲܥܝܵܕܼܵܐ: ܐܵܦܠܵܐ ܒܢܝܼܫܵܐ ܕܲܡܝܲܬܿܪܘܼܬܼܵܐ: ܤܛܲܪ ܡ̣ܢ ܐܲܝܢܵܐ ܕܐܝܼܬܼܵܘܗܝ ܒܲܪ ܢܝܼܫܵܟܼ ܘܒܲܪ ܐ̄ܪܵܙܵܟܼ ܒܕܼܘܼܒܵܪܵܟܼ. ܐܸܢ ܩܵܢܹ̇ܛ ܐܲܢ̄ܬܿ ܡ̣ܢ ܦܘܼܠܗܵܕܼܵܐ ܘܥܸܢܝܵܢܵܐ ܢܲܦܫܵܢܵܝܵܐ ܕܲܒܼܟܸܤܝܵܐ: ܗܵܘ̇ ܕܡ̣ܢ ܢܲܦܫܹܗ ܡܥܵܕܼ ܠܡܸܬܿܬܿܙܵܥܘܼ ܕܠܵܐ ܒܥܵܬܼܵܐ ܕܝܼܠܲܢ: ܡܵܕܹܝܢ ܦܤܘܿܩ ܡܸܢܵܟܼ ܘܥܸܢܝܵܢܵܐ ܕܲܠܒܲܪ܀ ܐܲܩܸܦ ܡܝܲܬܿܪ̈ܵܬܼܵܐ ܠܲܨ̈ܠܵܘܵܬܼܵܟܼ: ܕܬܸܚܙܸܐ ܢܲܦܫܵܟܼ ܙܲܗܪܵܐ ܕܕܸܢܚܹܗ ܕܲܫܪܵܪܵܐ. ܟܠ ܟܡܵܐ ܕܡܸܫܬܲܝܲܢ ܠܸܒܵܐ ܡ̣ܢ ܥܘܼܗ̈ܕܵܢܹܐ ܒܲܪ̈ܵܝܹܐ: ܗܵܟܲܢܵܐ ܬܩܲܒܸܠ ܬܲܪܥܝܼܬܼܵܟܼ ܬܲܗܪܵܐ ܕܲܒܼܤܘܼܟܵܠ ܦܸܬܼܓܼܵܡܹ̈ܐ. ܡܥܵܕܼܵܐ ܗ̣̄ܝ ܢܲܦܫܵܐ ܦܫܝܼܩܵܐܝܼܬܼ ܠܲܡܚܲܠܵܦܘܼ ܥܸܢܝܵܢܵܐ ܒܥܸܢܝܵܢܵܐ: ܐܸܢ ܚܢܲܢ ܩܲܠܝܼܠ ܢܚܵܘܸܐ ܒܛܝܼܠܘܼܬܼܵܐ ܘܲܫܩܵܠ ܛܲܥܢܵܐ܀ ܐܲܪܡܵܐ ܥܠܹܝܗ̇ ܥܲܡܠܵܐ ܕܩܸܪܝܵܢܵܐ ܕܲܟܼܬܼܵܒܹ̈ܐ: ܐܲܝܠܹܝܢ ܕܡܵܘܕܥܝܼܢ ܩܲܛܝܼܢܘܼܬܼ ܐܘܼܪ̈ܚܵܬܼܵܐ ܕܕܼܘܼܒܵܪܹ̈ܐ: ܘܲܕܿܬܹܐܘܿܪܝܼܵܐ ܘܫܲܪ̈ܒܹܐ ܕܩܲܕܝܼ̈ܫܹܐ: ܘܐܵܦܸܢ ܠܵܐ ܡܲܪܓܿܫܵܐ ܒܫܘܼܪܵܝܵܐ ܒܗܲܢܝܼܐܘܼܬܼܵܐ: ܡܸܛܠ ܥܲܡܛܵܢܵܐ ܘܲܕܼܠܘܼܚܝܵܐ ܕܡ̣ܢ ܥܘܼܗ̈ܕܵܢܹܐ ܩܲܪ̈ܝܼܒܹܐ: ܐܲܝܟܼ ܕܲܬܼܚܲܠܸܦ ܥܸܢܝܵܢܵܐ ܒܥܸܢܝܵܢܵܐ. ܘܡܵܐ ܕܲܬܼܩܘܼܡ ܠܲܨܠܘܿܬܼܵܐ pb. 53 ܘܲܠܬܸܫܡܸܫܬܼܵܐ: ܚܠܵܦ ܗܸܪܓܵܐ ܕܥܵܠ̈ܡܵܢܵܝܵܬܼܵܐ: ܢܸܬܼܪܲܫܡܘܼܢ ܒܪܸܥܝܵܢܵܐ ܗܲܓܵܓܹ̈ܐ ܕܡ̣ܢ ܟܬܼܵܒܹ̈ܐ. ܘܲܒܼܗܵܠܹܝܢ ܡܸܬܿܛܥܸܐ ܘܡܸܬܼܠܚܸܐ ܡܸܢܹܗ ܥܘܼܗܕܵܢܵܐ ܕܡ̣ܢ ܟܬܼܵܒܹ̈ܐ. ܘܲܒܼܗܵܠܹܝܢ ܡܸܬܿܛܥܸܐ ܘܡܸܬܼܠ̱ܚܹܐ ܡܸܢܹܗ ܥܘܼܗܪܵܢܵܐ ܕܡܸܕܸܡ ܕܲܚ̣ܙܵܐ ܘܲܫܡܲܥ̣ ܡ̣ܢ ܟܲܕܼܘܼ. ܘܗܵܟܲܢܵܐ: ܢܹܐܬܸܐ ܪܸܥܢܵܢܵܟܼ ܠܕܲܟܼܝܘܼܬܼܵܐ. ܘܗܵܕܲܐ ܗ̣̄ܝ ܗܵܝ̇ ܕܐܲܡܝܼܪܵܐ: ܕܡܲܥܡ̱ܠܵܐ ܢܲܦܫܵܐ ܡ̣ܢ ܩܸܪܝܵܢܵܐ: ܡܵܐ ܕܬܹܐܬܸܐ ܠܲܨܠܘܿܬܼܵܐ: ܘܡ̣ܢ ܩܸܪܝܵܢܵܐ ܠܲܡ ܬܸܬܼܢܲܗܲܪ ܒܲܨܠܘܿܬܼܵܐ. ܗܵܢܵܘ ܕܹܝܢ: ܚܠܵܦ ܦܸܗܝܵܐ ܕܲܠܒܲܪ: ܢܸܫܢܿܟܲܚ ܠܢܲܦܫܵܐ ܡܠܘܿܐܵܐ ܠܫܘܼܚܠܵܦ ܙܢܹܝ̈ܗ̇ ܕܲܨܠܘܿܬܼܵܐ: ܤܘܼ̈ܟܵܠܹܐ ܚܲܬܝܼ̈ܬܹܐ ܕܲܒܼܪܸܥܝܵܢܵܐ ܒܵܠܩ̇ܝܼܢ: ܡ̣ܢ ܥܘܼ̈ܗܕܵܢܹܐ ܕܡܝܼܪܹ̈ܐ ܕܡ̣ܢ ܬܲܡܵܢ: ܕܲܟܼܡܵܐ ܙܲܒܼ̈ܢܝܼܢ ܡܫܲܬܸܩ ܘܲܡܒܲܠܗܸܐ ܠܹܗ ܐܵܦ ܡܸܢܵܗ̇ ܕܲܨܠܘܿܬܼܵܐ: ܘܲܡܩܝܼܡ ܠܹܗ ܕܠܵܐ ܙܵܘܥܵܐ ܗ̤ܘ ܚܲܝܠܵܐ ܕܬܹܐܘܿܪܝܼܵܐ ܕܡ̣ܢ ܟܬܼܵܒܹ̈ܐ ܒܗܵܠܹܝܢ ܥܸܕܵܢܹ̈ܐ. ܗܵܘ̇ ܠܵܗ̇ ܠܲܨܠܘܿܬܼܵܐ ܡܥܵܕܼ ܦܵܤܹ̇ܩ ܒܝܲܕܼ ܗܲܢܝܼܐܘܼܬܼܵܐ ܐܲܝܟܼ ܕܐܸܡ̇ܪܹܬܼ: ܘܫܸܠܝܵܐ ܡܲܪܡܸܐ ܥܲܠ ܠܸܒܵܐ: ܘܲܠܙܵܘ̈ܥܹܐ ܕܠܸܒܵܐ ܡܫܲܬܸܩ: ܒܝܲܕܼ ܦܵܘܫܵܐ ܕܗܲܕܵܡܹ̈ܐ ܢܲܦܫܵܢܵܝܹ̈ܐ ܘܦܲܓܼܪ̈ܵܢܵܝܹܐ܀ ܝܵܕܼܥ̇ܝܼܢ ܡܵܢܵܘ ܕܐܵܡܲ݁ܪ ܐ̄ܢܵܐ: ܐܲܝܠܹܝܢ ܕܲܫܩܝܼܠܝܼܢ ܢܸܤܝܵܢܵܗ̇ ܕܲܨܒܼܘܼܬܼܵܐ ܗܵܕܹܐ ܒܵܗ̇ ܒܢܲܦܫܗܘܿܢ ܘܲܠܓܼܵܘ ܡ̣ܢ ܐ̄ܪ̈ܵܙܹܝܗ̇ ܗܘ̤ܵܘ: ܘܠܵܐ ܡ̣ܢ ܝܘܼܠܦܵܢܵܐ ܕܡ̣ܢ ܐ̄ܚܪ̈ܵܢܹܐ ܘܓܼܘܼܪ̈ܢܒܹܐ ܕܡ̣ܢ ܟܬܼܝܼ̈ܒܼܵܬܼܵܐ: ܗܵܠܹܝܢ ܕܲܟܼܡܵܐ ܙܲܒܼ̈ܢܝܼܢ ܡܨܹܝܢ ܡܕܲܓܿܠܝܼܢ ܠܹܗ ܠܲܫܪܵܪܵܐ܀ ܢܕܼܝܕܼܵܐ ܥܲܠ ܟܲܪܤܵܐ ܕܡܲܠܝܵܐ ܒܨܵܬܼܵܐ ܕܫܲܪ̈ܒܹܐ ܪ̈ܘܼܚܵܢܵܝܹܐ: ܐܲܝܟܲܢܵܐ ܕܲܠܙܵܢܝܼܬܼܵܐ ܠܲܡܡܲܠܵܠܘܼ ܥܲܠ ܢܲܟܼܦܘܼܬܼܵܐ܀ ܬܹܐܪܬܵܐ ܕܡܲܠܝܵܐ ܡ̣ܢ ܟܘܼܪ̈ܗܵܢܹܐ: ܓܵܥ̇ܨܵܐ ܠܵܗ̇ ܡ̣ܢ ܡܹܐܟܼܘܼܠܬܼܵܐ ܕܲܗܝܼܢܬܼܵܐ. ܘܲܠܪܸܥܝܵܢܵܐ ܕܲܡܠܸܐ ܡ̣ܢ ܥܵܠܡܵܐ: ܠܡܸܬܼܩܲܪܵܒܼܘܼ ܠܥܘܼܩܵܒܼܵܐ ܕܦܘܼܪ̈ܠܚܵܢܹܐ ܐܲܠܵܗܵܝ݂̈ܐ pb. 54 ܠܵܐ ܡܸܫܟܲܚ܀ ܢܘܼܪܵܐ ܒܩܲܝ̈ܤܹܐ ܪ̈ܲܛܝܼܒܹܐ ܠܵܐ ܕܵܠ̇ܩܵܐ: ܘܪܸܬ̣ܚܵܐ ܕܒܲܐܠܵܗܵܐ ܒܠܸܒܵܐ ܪܵܚܹ̇ܩ ܢܝܵܚܹ̈ܐ ܠܵܐ ܡܸܬܼܢܲܒܼܪܲܫ܀ ܙܵܢܝܼܬܼܵܐ ܠܵܐ ܡܟܲܬܼܪܵܐ ܒܪܵܚܡܘܼܬܼܵܐ ܥܲܡ ܚܲܕܼ: ܘܠܵܐ ܢܲܦܫܵܐ ܕܐܲܤܝܼܪܵܐ ܒܤܲܓܝܼ̈ܐܹܐ ܡܩܵܘܝܵܐ ܒܪܵܚܡܘܼܬܼܵܐ ܕܝܘܼܠܦܵܢܵܐ ܪܘܼܚܵܢܵܝܵܐ܀ ܐܲܝܟܲܢܵܐ ܕܗܵܘ̇ ܕܲܠܫܸܡܫܵܐ ܠܵܐ ܡܸܡܬܼܘܿܡ ܚ̣ܙܵܐ ܒܥܲܝܢܵܘ̈ܗܝ: ܡ̣ܢ ܫܸܡܥܵܐ ܒܲܠܚܘܿܕܼ ܕܲܥܠܵܘܗܝ ܠܲܡܗܲܓܵܓܼܘܼ ܢܘܼܗܪܹܗ ܒܪܸܥܝܵܢܹܗ: ܠܡܸܤܲܒܼ ܕܡܘܼܬܼܵܐ ܡܸܕܸܡ ܒܢܲܦܫܹܗ: ܠܡܲܪܓܵܫܘܼ ܒܦܲܐܝܘܼܬܼܵܐ ܕܙܲܗܪܝܼܪ̈ܵܘܗܝ ܠܵܐ ܡܸܫܟܲܚ: ܗܵܟܲܢܵܐ ܡ̇ܢ ܕܲܛܥܵܡܬܼܵܐ ܕܦܘܼܠܚܵܢܵܐ ܪܘܼܚܵܢܵܐ ܒܢܲܦܫܹܗ ܠܵܐ ܐܲܪܓܸܫ: ܘܲܠܓܼܵܘ ܡ̣ܢ ܢܸܤܝܵܢܵܐ ܕܐ̄ܪ̈ܵܙܵܘܗܝ ܠܵܐ ܗܘ̤ܵܐ ܒܕܼܘܼܒܵܪ̈ܵܘܗܝ: ܠܡܸܤܲܒܼ ܒܪܸܥܝܵܢܹܗ ܕܘܼܡܝܵܐ ܕܡܲܤܒܲܗ ܠܲܫܪܵܪܵܐ: ܡ̣ܢ ܝܘܼܠܦܵܢܵܐ ܕܐ̄ܢܵܫܵܐ ܘܕܼܘܼܪܵܫܵܐ ܕܒܲܟܼܬܼܝܼ̈ܒܵܬܼܵܐ: ܠܡܸܫܟܵܚܘܼ ܦܝܵܤܵܐ ܫܲܪܝܼܪܵܐ ܒܢܲܦܫܹܗ ܘܲܠܡܲܕܼܪܵܟܼܘܼ ܠܚܲܬܿܝܼܬܼܘܼܬܼܵܗ̇ ܕܲܨܒܼܘܼܬܼܵܐ ܠܵܐ ܡܸܫܟܲܚ܀ ܐܸܢ ܩܢܸܐ ܐܲܢ̄ܬܿ ܡܸܕܸܡ ܝܲܬܿܝܼܪܵܐ ܥܲܠ ܤܲܝܒܵܪܬܵܐ ܕܝܒܵܪܬܵܐ ܕܝܵܘܡܵܐ: ܙܸܠ ܗܲܒܲܝܗܝ ܠܡܸܤ̈ܟܹܿܢܹܐ: ܘܬܼܵܐ ܩܲܪܸܒܼ ܨܠܘܿܬܼܵܐ ܕܦܵܪܹܗ̄ܤܝܼܵܐ. ܗܵܢܵܘ ܕܹܝܢ: ܡܲܠܸܠ ܥܲܡ ܐܲܠܵܗܵܐ: ܐܲܝܟܼ ܒܪܵܐ ܥܲܡ ܐܲܒܼܘܼܗܝ܀ ܠܲܝܬܿ ܡܸܕܸܡ ܕܲܡܩܲܪܸܒܼ ܠܠܸܒܵܐ ܠܘܵܬܼ ܐܲܠܵܗܵܐ ܐܲܝܟܼ ܡܪܲܚܡܵܢܘܼܬܼܵܐ: ܘܠܵܐ ܕܝܵܗܹ̇ܒܼ ܫܲܝܢܵܐ ܠܪܸܥܝܵܢܵܐ ܐܲܝܟܼ ܨܪܝܼܟܼܘܼܬܼܵܐ ܨܸܒܼܝܵܢܵܝܬܼܵܐ. ܢܓܲܢܘܿܢܵܟܼ ܤܲܓܝܼ̈ܐܹܐ ܐܲܝܟܼ ܠܵܐ ܝܵܕܲܘܿܥܵܐ: ܡܸܛܠ ܦܫܝܼܛܘܼܬܼܵܐ ܕܐܝܕܲܝ̈ܟ ܘܲܫܦܝܼܥܘܼܬܼܵܟܼ ܕܲܕܼܠܵܐ ܡܫܘܼܚܬܼܵܐ: ܒܢܝܼܫܵܐ ܕܕܸܚܠܲܬܼ ܐܲܠܵܗܵܐ: ܘܠܵܐ ܢܸܩܪܘܼܢܵܟܼ ܚܲܟܿܝܼܡܵܐ ܘܲܬܼܩܸܢ ܗܵܘܢܵܐ: ܡܸܛܠ ܡܚܲܤܟܘܼܬܼܵܟܼ. ܐܸܢ ܥܲܠ ܤܘܼܤܝܵܐ ܪܟܼܝܼܒܼ ܐ̄ܢܵܫ ܘܦܵܫܹ̇ܛ ܐܝܼܕܹܗ: ܠܵܐ ܬܸܩܦܘܿܣ ܐܝܼܕܼܵܟܼ ܡܸܢܹܗ: pb. 55 ܒܡܸܕܸܡ ܕܐܵܠܨܵܐ ܒܲܫܪܵܪܵܐ ܡܸܛܠ ܤܘܼܢܩܵܢܹܗ. ܒܫܵܥܬܼܵܐ ܕܹܝܢ ܗܵܝ̇: ܐܲܝܟܼ ܚܲܕܼ ܡ̣ܢ ܨܪ̈ܝܼܟܹܐ ܤܢܝܼܩ. ܘܡܵܐ ܕܝܵܗܹ̇ܒܼ ܐܲܢ̄ܬܿ: ܒܥܲܝܢܵܐ ܥܲܬܿܝܼܪܬܵܐ ܗܲܒܼ: ܘܐܲܦܨܲܚ ܐܲܦܲܝ̈ܟܼ ܠܩܘܼܒܼܠܹܗ. ܘܐܵܘܤܸܦ ܠܹܗ ܥܲܠ ܗܵܘ̇ ܡܵܐ ܕܲܒܼܥ̣ܵܐ: ܐܵܦ ܗܵܘ̇ ܡܵܐ ܕܠܵܐ ܫܐܸܠ̣. ܫܲܕܲܪ ܠܲܡ ܠܲܚܡܵܟܼ ܥܲܠ ܐܲܦܲܝ̈ ܡܲܝܵ̈ܐ: ܘܲܠܙܲܒܼܢܵܐ ܤܲܓܼܝܼܐܵܐ ܬܸܫܟܲܚ ܦܘܼܪܥܵܢܵܐ. ܠܵܐ ܬܸܦܪܘܿܫ ܥܲܬܿܝܼܪܵܐ ܘܡܸܤܟܹܢܵܐ: ܘܠܵܐ ܬܸܕܲܥ ܕܫܵܘܹ̇ܐ ܘܲܕܼܠܵܐ ܫܵܘܹ̇ܐ. ܠܟܼܠܗܘܿܢ ܒܢܲܝ̈ܢܵܫܵܐ: ܐܲܝܟܼ ܕܡ̣ܢ ܨܹܐܕܲܝܟ: ܠܛܵܒܼܬܼܵܐ ܐܲܫܘܵܐ. ܝܲܬܿܝܼܪܵܐܝܼܬܼ: ܕܲܒܼܝܲܕܼ ܗܵܠܹܝܢ ܡܓܲܪܸܓܼ ܐܲܢ̄ܬܿ ܠܗܘܿܢ ܠܘܵܬܼ ܫܪܵܪܵܐ. ܕܠܝܼܠܵܐܝܼܬܼ ܡܸܬܼܢܲܓܼܕܵܐ ܢܲܦܫܵܐ ܒܝܲܕܼ ܦܲܓܼܪ̈ܵܢܝܵܬܼܵܐ: ܠܬܲܪܥܝܼܬܼܵܐ ܕܕܸܚܠܲܬܼ ܐܲܠܵܗܵܐ. ܐܵܦ ܠܡܵܟܼܤܹ̈ܐ ܘܲܠܙܵܢ̈ܝܵܬܼܵܐ ܡܫܵܘܬܸܦ ܗ̄ܘ̣ܵܐ ܒܦܵܬܼܘܿܪܹܗ: ܟܲܕܼ ܠܵܐ ܡܦܲܪܸܫ ܗ̄ܘ̣ܵܐ ܕܲܕܠܵܐ ܫܵܘܹ̇ܝܢ: ܐܲܝܟܼ ܕܲܒܼܝܲܕܼ ܗܵܕܹܐ ܠܕܸܚܠܲܬܼ ܐܲܠܵܗܵܐ ܢܓܲܪܸܓܼ ܐܸܢܘܿܢ. ܘܲܒܼܝܲܕܼ ܫܵܘܬܵܦܘܼܬܼܵܐ ܕܦܲܓܼܪ̈ܵܢܝܵܬܼܵܐ: ܠܫܵܘܬܵܦܘܼܬܼܵܐ ܕܲܒܼܪܘܼܚ ܢܩܲܪܸܒܼ ܐܸܢܘܿܢ. ܡܸܛܠܗܵܢܵܐ: ܠܛܵܒܼܬܼܵܐ ܘܐܝܼܩܵܪܵܐ ܐܲܫܘܵܐ ܠܟܼܠܗܘܿܢ ܒܢܲܝ̈ܢܵܫܵܐ: ܐܸܢ ܝܗ̄ܘܼܕܵܝܵܐ ܢܸܗܘܸܐ: ܘܐܸܢ ܟܵܦܘܿܪܑܵܐ: ܘܐܸܢ ܩܵܛܘܿܠܵܐ. ܝܲܬܿܝܼܪܵܐܝܼܬܼ: ܕܐܲܚܘܼܟܼ ܐܝܼܬܼܵܘܗܝ ܘܒܲܪ ܟܝܵܢܵܟܼ: ܘܲܒܼܠܵܐ ܝܑܼܕܲܥܬܼܵܐ ܛܵܥܹ̇ܐ ܡ̣ܢ ܫܪܵܪܵܐ. ܐܸܡܲܬܼܝ ܕܥܵܒܹ̇ܕܼ ܐܲܢ̄ܬܿ ܛܵܒܼܬܼܵܐ: ܠܵܐ ܬܤܝܼܡ ܠܪܸܥܝܵܢܵܟܼ ܢܝܼܫܵܐ ܕܦܘܼܪܥܵܢܵܐ ܩܲܪܝܼܒܼܵܐ: ܘܲܒܼܬܲܪ̈ܬܲܝܗܹܝܢ ܬܸܬܼܦܪܲܥ ܡ̣ܢ ܐܲܠܵܗܵܐ. ܘܐܸܢ ܡܲܨܝܵܐ: ܐܵܦܠܵܐ ܡܸܛܠ ܦܘܼܪܥܵܢܵܐ ܕܲܠܗܲܠ: ܕܝܲܬܿܝܼܪܵܐܝܼܬܼ ܒܚܘܼܒܵܐ ܐܲܠܵܗܵܝܵܐ ܬܸܬܼܝܲܬܲܪ. ܡܓܼܵܘܲܝ ܗ̄ܘ̣ ܕܲܪܓܼܵܐ ܕܚܘܼܒܵܐ: ܐܵܦ ܡܸܢܹܗ ܕܦܘܼܠܚܵܢܵܐ ܠܘܵܬܼ ܐܲܠܵܗܵܐ. pb. 56 ܘܲܒܼܐܪܵܙܹܗ ܡܓܼܵܘܲܝ ܗ̄ܘ̣ ܡܸܢܹܗ: ܘܝܲܬܝܼܪ ܡ̣ܢ ܕܲܡܓܼܵܘܝܵܐ ܢܲܦܫܵܐ ܡ̣ܢ ܦܲܓܼܪܵܐ܀ ܐܸܢ ܤܵܡ̣ܬܿ ܠܢܲܦܫܵܟܼ ܢܝܼܫܵܐ ܕܲܡܤܲܪܩܘܼܬܼܵܐ ܡ̣ܢ ܟܲܕܼܘܼ: ܘܲܒܼܛܲܝܒܿܘܼܬܹܗ ܕܐܲܠܵܗܵܐ ܐܸܬܼܚܲܪܲܪܬܿ ܡ̣ܢ ܨܸܦܬܼܵܐ: ܘܲܗ̤ܘܲܝܬܿ ܠܥܸܠ ܡ̣ܢ ܥܵܠܡܵܐ ܒܲܡܤܲܪܩܘܼܬܼܵܟܼ: ܚܙܝܼ ܕܲܠܡܵܐ ܡܸܛܠ ܪܸܚܡܲܬܼ ܡܸܤ̈ܟܹܿܢܹܐ ܬܸܬܼܪܲܓܿܪܲܬܼ ܠܡܸܦܲܠ ܒܨܸܦܬܼܵܐ ܕܩܸܢ̈ܝܵܢܹܐ ܘܨܸܒܼ̈ܘܵܬܼܵܐ: ܐܲܝܟܼ ܕܲܠܡܸܥܒܲܕܼ ܟܹܐܲܡܲܬܼ ܙܸܕܼܩܬܼܵܐ: ܘܲܠܡܸܪܡܵܐ ܢܲܦܫܵܟܼ ܬܘܼܒܼ ܒܲܫܓܼܘܼܫܝܵܐ: ܠܡܸܤܲܒܼ ܡ̣ܢ ܗܵܘ̇ ܘܲܠܡܸܬܲܠ ܠܗܵܘ̇: ܘܬܲܙܸܠ ܝܲܩܝܼܪܘܼܬܼܵܟܼ ܒܡܸܬܼܪܲܟܼܢܵܢܘܼܬܼܵܐ ܕܩܘܼܪܵܒܼ ܦܝܵܤܵܐ ܠܐ̄ܢܵܫ̈ܝܼܢ: ܒܲܒܼܥܵܬܼܵܐ ܕܐܲܝܠܹܝܢ ܕܕܲܐܝܟܼ ܗܵܠܹܝܢ: ܘܬܸܦܸܠ ܡ̣ܢ ܪܵܘܡܵܐ ܕܬܲܪܥܝܼܬܼܵܟܼ ܡܚܲܪܲܪܬܵܐ ܠܪܸܢܝܵܐ ܬܘܼܒܼ ܕܐܲܪ̈ܥܵܢܝܵܬܼܵܐ. ܪܵܡ ܗ̄ܘ̣ ܕܪܓܼܵܟܼ ܡ̣ܢ ܕܥܵܒܼ̈ܕܲܝ ܙܸܕܼ̈ܩܵܬܼܵܐ. ܒܵܥܹ̇ܢܵܐ ܡܸܢܵܟܼ: ܠܵܐ ܬܸܬܼܓܿܚܸܟܼ. ܗܵܝ̇ ܡܲܢ: ܛܲܟܼܤܵܐ ܗ̣̄ܝ ܕܬܲܪܒܿܝܼܬܼܵܐ ܕܫܲܒܼܪܘܼܬܼܵܐ. ܗܵܕܹܐ ܕܹܝܢ: ܐܘܼܪܚܵܐ ܕܲܓܼܡܝܼܪܘܼܬܼܵܐ. ܐܸܢ ܐܝܼܬܼ ܠܵܟܼ: ܒܲܕܲܪ̈ܲܝܗܝ ܒܲܚܕܼܵܐ ܙܒܲܢ. ܘܐܸܢ ܠܲܝܬܿ ܠܵܟܼ: ܠܵܐ ܬܸܬܼܪܲܓܼܕ̈ܓܼ ܕܢܸܗܘܸܐ ܠܵܟܼ. ܕܲܟܵܐ ܥܘܼܡܪܵܟܼ ܡ̣ܢ ܦܘܼ̈ܢܵܩܹܐ ܘܝܲܬܿܝܼܪ̈ܵܬܼܵܐ: ܕܗܵܕܹܐ ܐܵܠܨܵܐܝܼܬܼ ܡܲܝܬܿܝܵܐ ܠܵܟܼ ܠܥܲܢܘܵܝܘܼܬܼܵܐ. ܐܵܢܲܢܩܹܐ ܓܹܝܪ: ܤܲܓܿܝܼ̈ܐܵܬܼܵܐ ܡܤܲܝܒܿܪܵܐ: ܐܲܝܠܹܝܢ ܕܲܒܼܨܸܒܼܝܵܢܲܢ ܡܵܐ ܕܐܝܼܬܼ ܦܘܼܪܤܵܐ: ܠܵܐ ܡܸܬܿܛܦܝܼܤܝܼܢ ܚ̄ܢܲܢ ܕܲܢܤܲܝܒܲܪ. ܐܲܝܠܹܝܢ ܕܠܲܩܪܵܒܼܵܐ ܕܲܠܒܲܪ ܙܟܼܵܐܘܼܗܝ: ܗܵܠܹܝܢ ܘܲܠܕܸܚܠܬܼܵܐ ܕܲܠܓܼܵܘ ܫܲܩ̣ܠܘܼܗ̇: ܘܠܲܝܬܿ ܬܘܼܒܼ ܩܛܝܼܪܵܐ ܕܕܼܵܒܲܪ ܠܗܘܿܢ ܥܸܨܝܵܢܵܐܝܼܬܼ: ܟܲܕܼ ܡܕܼܵܘܸܕܼ ܒܬܲܟܼܬܘܼܫܵܐ ܕܡ̣ܢ ܩܘܼܕܼܡܵܐ ܘܡ̣ܢ ܒܸܤܬܿܪܵܐ܀ ܩܪܵܒܼܵܐ ܕܲܠܒܲܪ ܩܵܪܹܐ ܐ̄ܢܵܐ: ܠܗܵܘ̇ ܕܲܒܼܪܸ̈ܓܼܫܹܐ ܡܥܝܼܪ ܐ̄ܢܵܫ ܥܲܠ ܢܲܦܫܹܗ ܤܲܟܼܠܵܐܝܼܬܼ. ܗܵܢܵܘ ܕܼܝܢ: ܒܡܲܤܒܼܵܐ ܘܡܲܬܿܠܵܐ: ܫܸܡܥܵܐ ܘܲܚܙܵܬܼܵܐ: pb. 57 ܡܲܡܠܠܵܐ ܘܟܲܪܤܵܐ: ܘܗܵܝ̇ ܕܢܲܤܓܸܐ ܬܟܼܝܼܒܼܵܐܝܼܬܼ ܐܝܼܕܼܵܐ ܒܐܝܼܕܼܵܐ ܤܘܼܥܪ̈ܵܢܹܐ ܠܢܲܦܫܹܗ ܐܲܝܟܼ ܕܬܸܬܼܥܵܘܲܪ: ܘܡ̣ܢ ܫܓܼܘܼ̈ܫܝܹܐ ܕܡ̣ܢ ܠܒܲܪ ܐܵܪܥܝܼܢ: ܕܠܵܐ ܬܸܫܟܲܚ ܬܸܚܙܸܐ ܗ̤ܝ ܠܵܗ̇ ܒܬܲܟܼܬܘܼܫܵܐ ܟܲܤܝܵܐ ܕܡܸܬܿܬܿܙܝܼܥ: ܘܡܸܛܠ ܒܗܝܼܠܘܼܬܼܵܐ ܢܸܙܟܸܿܐ ܠܗܵܠܹܝܢ ܕܒܼܵܠܩ̇ܝܼܢ ܡ̣ܢ ܠܓܼܵܘ܀ ܐܸܢ ܕܹܝܢ ܐܲܪ̈ܥܹܝܗ̇ ܕܲܡܕܼܝܼܢ̄ܬܼܵܐ ܢܹܐܤܘܿܪ ܒܲܪܢܵܫܵܐ: ܬܲܟܼܬܿܘܼܫܵܐ ܐܲܦܝܼ̈ܢ ܠܘܼܩܒܲܠ ܐܲܦܝܼ̈ܢ ܗܵܘܹ̇ܐ ܡܸܟܹܝܠ. ܘܡ̣ܢ ܟܡܹ̈ܐܢܹܐ ܕܡ̣ܢ ܒܸܤܬܲܪ ܡܕܼܝܼܢ̄ܬܼܵܐ: ܠܵܐ ܕܵܚܹ̇ܠ. ܛܘܼܒܼܵܘܗܝ ܠܒܲܪܢܵܫܵܐ ܕܝܼܕܲܥ̣ ܗܵܠܹܝܢ ܘܚܲܡܤܸܢ ܒܫܸܠܝܵܐ: ܘܠܵܐ ܐܲܤ̣ܓܝܼ ܥ̇ܒܼܵܕܼܵܐ ܠܢܲܦܫܹܗ ܐܵܦ ܬܲܡܵܢ: ܐܸܠܵܐ ܠܟܼܠܹܗ ܦܘܼܠܚܵܢܵܐ ܦܲܓܼܪܵܢܵܝܵܐ ܚܲܠܦܹܗ ܒܥܲܡܠܵܐ ܕܲܨܠܘܿܬܼܵܐ ܐܸܢ ܤܵܦܹ̇ܩ. ܘܲܕܼܡ̣ܢ ܬܸܫܡܸܫܬܼܵܐ ܠܬܸܫܡܸܫܬܼܵܐ: ܥܲܡ ܥ̇ܒܼܵܕܼܵܐ ܕܲܐܲܠܵܗܵܐ ܕܐܝܼܬܼܵܘܗܝ ܨܠܘܿܬܼܵܐ ܘܩܸܪܝܵܢܵܐ: ܠܵܐ ܫܵܘܬܸܦ̣ ܥܲܡܹܗ ܡܸܕܸܡ: ܘܗܲܝܡܸܢ ܕܟܲܕܼ ܥܲܡ ܐܲܠܵܗܵܐ ܦܵܠܲܚ̇: ܘܒܹܗ ܪܵܢܹܐ ܠܸܠܝܵܐ ܘܐܝܼܡܵܡܵܐ: ܠܵܐ ܡܲܚܤܲܪ ܠܹܗ ܡܸܕܸܡ ܡ̣ܢ ܐܵܠ̈ܨܵܬܼܵܐ ܕܡܸܬܼܒܲܥ̈ܝܵܢ ܠܹܗ: ܡܸܛܠ ܗܵܝ̇ ܕܡܸܛܠܵܬܹܗ ܠܵܐ ܦܵܠܲܚ܀ ܐܸܢ ܐܝܼܬܼ ܕܒܸܠܥܵܕܼ ܦܘܼܠܚܵܢܵܐ ܠܵܐ ܡܤܲܝܒܲܪ ܒܫܸܠܝܵܐ: ܐܵܠܨܵܐܝܼܬܼ ܢܸܦܠܘܿܚ. ܒܪܲܡ ܐܲܝܟܼ ܡܥܲܕܪܵܢܵܐ ܢܹܐܚܕܝܼܘܗܝ: ܘܠܵܐ ܐܲܝܟܼ ܝܲܥܢܵܐ. ܘܲܬܼܪܲܝܵܢܵܐ ܒܵܬܲܪ ܗܵܠܹܝܢ: ܘܠܵܘ ܐܲܝܟܼ ܦܘܼܩܕܵܢܵܐ ܪܹܫܵܝܵܐ. ܗܵܕܹܐ: ܐܲܝܟܼ ܕܠܲܡܚܝܼ̈ܠܹܐ. ܥ̇ܒܼܵܕܼܵܐ ܕܐܝܼ̈ܕܲܝܵܐ: ܡܥܲܟܿܪܵܢܵܐ ܕܥܘܼܗܕܵܢܵܐ ܕܐܲܠܵܗܵܐ ܡܫܲܡܲܗ ܐܹܘܲܓܼܪܝܼܣ. ܠܲܨܪ̈ܝܼܟܹܐ ܕܹܝܢ ܘܠܲܡܩܲܛ̈ܥܹܐ ܤܵܡ̣ܘ ܐܲܒܼܵܗ̈ܵܬܼܵܐ ܦܘܼܠܚܵܢܵܐ: ܘܠܵܘ ܐܲܝܟܼ ܕܠܲܚܦܝܼ̈ܛܹܐ ܒܐܵܢܲܢܩܹܐ ܕܢܵܡܘܿܤܵܐ܀ ܒܙܲܒܼܢܵܐ ܕܦܵܬܲܚ ܐܲܠܵܗܵܐ ܠܬܲܪܥܝܼܬܼܵܟܼ ܡ̣ܢ ܠܓܼܵܘ: ܘܝܵܗܹ̇ܒܼ ܐܲܢ̄ܬܿ ܢܲܦܫܵܟܼ ܠܲܤܝܵܡ ܒܘܼܪ̈ܟܹܐ ܤܒܼܝܼ̈ܤܹܐ: ܠܵܐ ܬܸܬܸܠ ܠܸܒܵܟܼ ܠܨܸܦܬܼܵܐ pb. 58 ܕܡܸܕܸܡ: ܟܲܕܼ ܡܦܝܼܤܝܼܢ ܠܵܟܼ ܫܹܐܕܹ̈ܐ ܒܤܸܬܼܪܵܐ ܒܤܸܬܼܪܵܐ: ܘܗܵܝܕܹܝܢ ܚܙܝܼ ܘܐܸܬܿܕܲܡܲܪ ܒܡܸܕܸܡ ܕܡܸܬܼܝܼܠܸܕܼ ܠܵܟܼ ܡ̣ܢ ܗܵܠܹܝܢ. ܠܵܐ ܬܦܲܚܸܡ ܠܚܲܕܼ ܡ̣ܢ ܕܘܼܒܵܪܹ̈ܐ: ܠܗܵܝ̇ ܕܠܹܠܲܝ ܐܝܼܡܵܡ ܐ̄ܢܵܫ ܢܲܦܝܼܠ ܥܲܠ ܐܲܦܵܘ̈ܗܝ ܩܕܼܵܡ ܨܠܝܼܒܼܵܐ: ܟܲܕܼ ܡܲܗܦ̈ܟܼܵܢ ܐܝܼܕܼܵܘ̈ܗܝ ܠܒܸܤܬܿܪܹܗ. ܨܵܒܹ̇ܐ ܐܲܢ̄ܬܿ ܕܠܵܐ ܢܸܩܗܸܐ ܪܸܬܼܚܵܟܼ ܡܸܡܬܼܘܿܡ: ܘܠܵܐ ܬܸܬܼܡܲܤܟܲܢ ܡ̣ܢ ܕܸܡ̈ܥܹܐ: ܒܗܵܠܹܝܢ ܐܸܬܼܚܲܫܲܚ. ܛܘܼܒܲܝܟ ܒܲܪܢܵܫܵܐ: ܐܸܢ ܒܗܵܠܹܝܢ ܬܸܪܢܸܐ ܕܐܸܡ̇ܪܹܬܼ ܠܵܟܼ: ܘܠܸܠܝܵܐ ܘܐܝܼܡܵܡܵܐ ܥܲܡܹܗ ܡܸܕܸܡ ܠܵܐ ܬܸܒܼܥܸܐ. ܗܵܝܕܹܝܢ ܢܸܬܼܦܬܲܚ ܢܘܼܗܪܵܟܼ ܐܲܝܟܼ ܨܲܦܪܵܐ: ܘܙܲܕܝܼܩܘܼܬܼܵܟܼ ܒܲܥܓܲܠ ܬܸܕܼܢܲܚ. ܘܬܸܗܘܸܐ ܐܲܝܡܼ ܦܲܪܕܲܝܤܵܐ ܕܪܵܘܹ̇ܙ: ܘܐܲܝܟܼ ܡܲܒܿܘܼܥܵܐ ܕܡܲܝ̈ܵܐ ܕܠܵܐ ܓܵܝ̇ܙܝܼܢ ܡܵܘ̈ܗܝ܀ ܚܘܼܪ: ܕܲܟܼܡܵܐ ܛܵܒܼ̈ܬܼܵܐ ܡܸܫܬܲܟܼ̈ܚܵܢ ܠܐ̄ܢܵܫ ܡ̣ܢ ܝܲܨܝܼܦܘܼܬܼܵܐ. ܐܝܼܬܼ ܐܸܡܲܬܼܝ ܕܲܤܡܝܼܟܼ ܒܲܪܢܵܫܵܐ ܥܲܠ ܒܘܼܪ̈ܟܵܘܗܝ ܒܥܸܕܵܢܵܐ ܕܲܨܠܘܿܬܼܵܐ: ܘܐܝܼܕܼܵܘ̈ܗܝ ܦܪ̈ܝܼܤܵܢ ܐܵܘ ܦܫܝܼ̈ܛܵܢ ܠܐܲܦܲܝ̈ ܫܡܲܝܵܐ: ܘܪܹܫܹܗ ܚܵܐܲܪ ܒܲܨܠܝܼܒܼܵܐ: ܘܐܲܝܟܼ ܕܲܠܡܹܐܡܲܪ ܟ̱ܠܹܗ ܙܵܘܥܹܗ ܘܬܲܪܥܝܼܬܹܗ ܠܘܵܬܼ ܐܲܠܵܗܵܐ ܡܬܼܝܼܚ ܒܬܲܟܼܫܲܦܬܼܵܐ. ܘܟܲܕܼ ܒܗܵܠܹܝܢ ܟܘܼ̈ܫܵܦܹܐ ܘܚܸܢ̈ܓܼܵܬܼܵܐ ܐܝܼܬܼܵܘܗܝ ܒܼܲܪܢܵܫܵܐ ܒܪܢܵܫܵܐ ܒܥܸܕܵܢܵܐ ܗܵܘ̇: ܡ̣ܢ ܫܸܠܝܵܐ ܡܸܬܿܬܿܙܝܼܥ ܡ̣ܢ ܠܸܒܹܿܗ ܡܲܒܿܘܼܥܵܐ ܕܗܲܢܝܼܐܘܼܬܼܵܐ: ܘܗܲܕܵܡܵܘ̈ܗܝ ܡܸܬܼܪܲܫܠܝܼܢ: ܘܥܲܝܢܵܘ̈ܗܝ ܡܸܬܼܥܲܡ̈ܨܵܢ: ܘܐܲܦܵܘ̈ܗܝ ܡܲܟܸܦ: ܘܚܘܼܫܵܒܼܵܘ̈ܗܝ ܡܸܫܬܲܓܼܢܹܝܢ: ܐܲܝܟܲܢܵܐ ܕܐܵܦܠܵܐ ܒܘܼܪ̈ܟܹܿܐ ܡܸܫܟ̈ܚܵܢ ܠܡܸܤܡܲܟܼ ܒܐܲܪܥܵܐ: ܩܕܼܵܡ ܪܘܵܙܵܗ̇ ܕܛܵܒܼܬܼܵܐ ܗܵܝ̇ ܕܢܵܨ̇ܦܵܐ ܒܟܼܠܹܗ ܓܘܼܫܡܵܐ܀ ܐܸܬܼܒܲܝܲܢ ܐܘܿ ܒܲܪܢܵܫܵܐ: ܒܡܸܕܸܡ ܕܩܵܪܹܐ ܐܲܢ̄ܬܿ. ܡܸܫ̈ܟܿܚܵܢ ܟܲܝ ܠܡܸܕܲܥ ܗܵܠܹܝܢ ܡ̣ܢ ܕܝܘܿܬܼܵܐ؟ ܐܵܘ ܕܲܠܡܵܐ ܡ̣ܢ ܟܬܼܝܼ̈ܒܼܵܬܼܵܐ ܛܥܵܡܬܼܵܐ ܕܕܸܒܼܫܵܐ ܥܵܒܼ̇ܪܵܐ ܒܚܸܟܹܗ ܕܩܵܪܘܿܝܵܐ؟܀ ܐܸܢ ܠܵܐ ܬܹܐܨܲܦ: pb. 59 ܠܵܐ ܬܸܫܟܲܚ. ܘܐܸܢ ܠܵܐ ܬܸܩܘܿܫ ܚܲܡܝܼܡܵܐܝܼܬܼ: ܘܬܸܫܗܲܪ ܥܲܠ ܬܲܪܥܵܐ ܢܲܓܼܝܼܪܵܐܝܼܬܼ: ܠܵܐ ܬܸܬܼܥܢܸܐ܀ ܡܲܢ̣ܘܼ ܕܗܵܠܹܝܢ ܢܸܫܡܲܥ ܘܢܸܬܼܪܲܓܼܪܲܓܼ ܠܙܲܕܝܼܩܘܼܬܼܵܐ ܕܲܠܒܲܪ: ܐܸܠܵܐ ܐܲܝܢܵܐ ܕܠܵܐ ܡܸܫܟܲܚ ܕܲܢܤܲܝܒܲܪ ܐܲܤܘܼܪܹ̈ܐ ܕܩܸܠܵܝܬܼܵܐ. ܒܪܲܡ ܐܸܢ ܐܝܼܬܼ ܐ̄ܢܵܫ ܕܗܵܠܹܝܢ ܠܵܐ ܡܨܸܐ: ܒܗܵܝ̇ ܕܡܵܘܗܲܒܼܬܼܵܐ ܗ̣̄ܝ ܕܡ̣ܢ ܐܲܠܵܗܵܐ: ܗܵܝ̇ ܕܐ̄ܢܵܫ ܢܸܗܘܸܐ ܠܓܼܵܘ ܡ̣ܢ ܬܲܪܥܵܐ: ܐܵܦܸܢ ܡ̣ܢ ܗܵܝ̇ ܡܢܵܬܼܵܐ ܐ̄ܚܪ݂ܬܼܵܐ ܠܵܐ ܢܦܘܼܫ: ܕܠܵܐ ܢܸܗܘܸܐ ܓܠܝܼܙ ܡ̣ܢ ܬܲܪ̈ܬܲܝܗܹܝܢ ܡܢܵܘ̈ܵܬܼܵܐ ܕܚܲܝܹ̈ܐ܀ ܥܕܲܡܵܐ ܓܹܝܪ ܕܡܵܐܹ̇ܬܼ ܒܲܪܢܵܫܵܐ ܒܲܪܵܝܵܐ ܡ̣ܢ ܤܘܼܥܪ̈ܵܢܹܐ ܕܥܵܠܡܵܐ: ܠܵܘ ܒܲܠܚܘܿܕܼ ܡ̣ܢ ܚܛܝܼܬܼܵܐ: ܐܸܠܵܐ ܘܡ̣ܢ ܟ̱ܠܹܗ ܦܘܼܠܚܵܢܵܐ ܦܲܓܼܪܵܢܵܝܵܐ: ܘܒܲܪܢܵܫܵܐ ܕܲܠܓܼܵܘ ܡ̣ܢ ܥܘܼ̈ܗܕܵܢܹܐ ܡܲܠܙܵܢܹ̈ܐ ܕܤܲܢ̈ܝܵܬܼܵܐ: ܘܙܵܘܥܵܐ ܬܘܼܒܼ ܕܲܟܼܝܵܢܵܐ ܡܸܫܬܲܠܲܦ ܘܡܵܐܹ̇ܬܼ ܦܲܓܼܪܵܐ ܒܨܝܼܪ ܩܲܠܝܼܠ ܒܝܲܕܼ ܥܲܡܠܹ̈ܐ: ܕܠܵܐ ܬܸܗܘܸܐ ܢܵܨ̇ܦܵܐ ܒܠܸܒܵܐ ܚܲܠܝܘܼܬܼܵܗ̇ ܕܲܚܛܝܼܬܼܵܐ: ܪܘܼܚܵܐ ܕܐܲܠܵܗܵܐ ܚܲܠܝܘܼܬܼܵܗ̇ ܠܵܐ ܡܲܥܒܿܕܼܵܐ ܒܒܲܪܢܵܫܵܐ. ܘܗܲܕܵܡܵܘ̈ܗܝ ܠܵܐ ܡܸܬܼܓܠܹܝܢ ܠܚܲܝܹ̈ܐ: ܘܙܵܘ̈ܥܹܐ ܐܲܠܵܗܵܝܹ̈ܐ ܒܢܲܦܫܵܐ ܠܵܐ ܡܸܬܼܚܙܹܝܢ. ܘܲܥܕܲܡܵܐ ܕܠܸܒܵܐ ܠܵܐ ܡܸܬܼܒܲܛܲܠ ܡ̣ܢ ܪܸܢܝܵܐ ܕܲܬܼܢܵܢ: ܤܛܲܪ ܡ̣ܢ ܐܵܠ̈ܨܵܬܼܵܐ ܕܗ̤ܘ ܟܝܵܢܵܐ ܬܵܒܲܥ ܠܹܗ ܒܥܸܕܵܢ ܤܘܼܢܩܵܢܹܗ: ܟܲܕܼ ܐܵܦ ܠܗܹܝܢ ܠܐܲܠܵܗܵܐ ܫܵܒܹ̇ܩ ܕܲܢܛܲܝܸܒܼ: ܪܵܘܝܘܼܬܼܵܐ ܕܲܒܼܪܘܼܚ ܠܵܐ ܡܸܬܿܬܿܥܝܼܪܵܐ ܒܹܗ. ܘܲܠܗܵܝ̇ ܫܵܢܝܘܼܬܼܵܐ: ܕܒܼܵܗ̇ ܫܠܝܼܚܵܐ ܡܸܬܼܚܲܤܲܕܼ ܗ̄ܘ̣ܵܐ: ܠܵܐ ܡܲܪܓܸܫ. ܤܘܿܓܼܵܐܐ ܠܲܡ ܕܲܟܼܬܼܵܒܹ̈ܐ ܥܲܒܼܕܘܼܗܝ ܕܢܸܫܢܸܐ܀ ܒܪܲܡ ܗܵܕܹܐ: ܠܵܘ ܒܲܦܤܵܩ ܤܲܒܼܪܵܐ ܐܵܡܲ݁ܪܢܵܐ: ܕܐܸܠܵܐ ܡܛ̣ܵܐ ܐ̄ܢܵܫ ܠܥܘܼܡܩܵܗ̇ ܕܲܓܼܡܝܼܪܘܼܬܼܵܐ: ܠܵܐ ܡܸܬܼܝܲܗܒܵܐ ܠܹܗ ܛܲܝܒܿܘܼܬܼܵܐ ܕܡ̣ܢ ܐܲܠܵܗܵܐ: ܐܵܘ ܠܵܐ ܦܵܓܲܥ ܒܹܗ ܒܘܼܝܵܐܵܐ܀ ܫܲܪܝܼܪܵܐܝܼܬܼ: ܕܡܵܐ ܕܐܲܤܠܝܼ ܒܲܪܢܵܫܵܐ ܠܒܼܝܼ̈ܫܵܬܼܵܐ: ܘܐܸܬܼܢܲܟܼܪܝܼ ܠܗܹܝܢ ܡܲܠܝܵܐܝܼܬܼ: ܘܐܸܬܼܢܲܩܲܦ pb. 60 ܠܛܵܒܼ̈ܬܼܵܐ: ܒܩܲܠܝܼܠ ܙܲܒܼܢܵܐ ܡܲܪܓܸܫ ܒܥܘܼܕܼܪܵܢܵܐ. ܘܐܸܢ ܩܲܠܝܼܠ ܡܸܬܼܚܲܦܲܛ: ܡܸܫܟܸܚ ܒܘܼܝܵܐܵܐ ܕܫܘܼܒܼܩܵܢ ܚܛܵܗܹ̈ܐ ܒܲܩܢܘܿܡܹܗ: ܘܡܸܫܬܿܘܸܐ ܠܛܲܝܒܘܼܬܼܵܐ: ܘܲܡܩܲܒܸܠ ܛܵܒܼ̈ܬܼܵܐ ܤܲܓܝܼ̈ܐܵܬܼܵܐ܀ ܒܪܲܡ: ܒܨܝܼܪ ܗ̄ܘ̣ ܐܲܝܟܼ ܕܲܒܼܦܸܚܡܵܐ: ܡ̣ܢ ܗܵܘ̇ ܕܲܓܼܡܝܼܪܵܐܝܼܬܼ ܐܸܬܼܢܲܟܪܝܼ ܠܥܵܠܡܵܐ: ܘܐܸܫܟܲܚ̣ ܒܲܩܢܘܿܡܹܗ ܐ̄ܪܵܙ ܛܘܼ̈ܒܹܐ ܗܵܘ̇ ܕܲܥܬܼܝܼܕܼ: ܘܐܲܕܪܸܟܼ ܠܗܵܘ̇ ܡܸܕܸܡ ܕܡܸܛܠܵܬܹܗ ܐܲܕܼܪܟܲܢ ܡܫܝܼܚܵܐ. ܕܠܹܗ ܘܠܲܐܒܼܘܼܗܝ ܘܲܠܪܘܼܚܵܐ ܕܩܘܼܕܼܫܵܐ: ܫܘܼܒܼܚܵܐ ܘܩܘܼܠܵܤܵܐ ܠܥܵܠܲܡ ܥܵܠܡܝܼܢ. ܐܵܡܹܝܢ.