Discourse 6

ܗܵܝ̇ ܕܐ̄ܢܵܫ ܢܸܫܬܿܟܲܚ ܒܓܸܕܼ̈ܫܹܐ ܕܤܲܟܼܠܘܼܬܼܵܐ: ܡܚܝܼܠܘܼܬܹܗ ܕܲܟܼܝܵܢܵܐ ܡܵܘܕܥܵܐ: ܕܐܵܠܨܵܐܝܼܬܼ ܟܝܵܢܲܢ ܡܩܲܒܿܠܵܢܵܐ ܗ̄ܘ̣ ܕܗܵܕܹܐ. ܠܵܐ ܐܸܬܼܚܲܙܝܲܬ̤ ܠܹܗ ܠܐܲܠܵܗܵܐ: ܕܡܵܘܬܿܪܵܐ ܠܹܗ ܕܢܸܬܼܥܲܠܸܐ ܠܲܓܼܡܵܪ ܡ̣ܢ ܗܵܕܹܐ: ܩܕܼܵܡ ܕܢܹܐܬܸܐ ܟܝܵܢܹܗ ܠܲܒܼܪܝܼܬܼܵܐ ܕܬܲܪܬܹܝܢ. ܘܗܵܕܹܐ ܡܩܲܒܿܠܵܢܘܼܬܼܵܐ ܕܓܸܕܼܫܹ̈ܐ: ܡܵܘܬܿܪܵܢܝܵܐ ܠܡܸܬܼܩܲܦܚܵܢܘܼܬܼܵܐ ܕܬܲܪܥܝܼܬܼܵܐ. ܗܵܝ̇ ܕܹܝܢ ܕܐܲܡܝܼܢܘܼܬܼܵܐ: ܡܲܪܵܚܘܼܬܼܵܐ ܗ̣̄ܝ. ܬܠܵܬܼܵܐ ܐܸܢܘܿܢ ܐܸܤܟܹܿܡܹ̈ܐ: ܕܲܒܼܗܘܿܢ ܡܸܬܼܩܲܪܒܼܵܐ ܟܠ ܢܲܦܫܵܐ ܡܠܝܼܠܬܼܵܐ ܠܘܵܬܼ ܐܲܠܵܗܵܐ. ܐܝܼܬܼ ܕܡ̣ܢ ܪܸܬܼܚܵܐ ܕܗܲܝܡܵܢܘܼܬܼܵܐ: ܘܐܝܼܬܼ ܕܡ̣ܢ ܕܸܚܠܬܼܵܐ: ܘܐܝܼܬܼ ܕܲܒܼܡܲܪܘܼܬܼܵܐ ܕܡ̣ܢ ܐܲܠܵܗܵܐ. ܠܛܲܟܼܤܵܐ ܕܹܝܢ ܕܚܘܼܒܵܐ: ܡܸܢܹܗ ܘܠܹܗ ܝܑܼܚܝܼܕܼܵܐܝܼܬܼ ܠܵܐ ܡܸܬܼܩܲܪܒܼܵܐ: ܐܸܠܵܐ ܟܲܕܼ ܚܲܕܼ ܡ̣ܢ ܗܵܠܹܝܢ ܐܸܤܟܹܡܹ̈ܐ ܥܸܠܬܼܵܐ ܢܵܤ̇ܒܵܐ܀ ܐܲܝܟܲܢܵܐ ܕܡ̣ܢ ܟܲܪܤܵܐ ܠܵܐ ܡܛܲܟܲܤܬܼܵܐ ܡܸܬܼܝܲܠܕܵܐ ܒܠܝܼܠܘܼܬܼܵܐ ܕܚܘܼ̈ܫܵܒܹܐ: ܗܵܟܲܢܵܐ ܡ̣ܢ ܠܲܥܒܘܼܬܼܵܐ ܕܲܒܼܡܸܠܹ̈ܐ ܘܥܸܢܝܵܢܹ̈ܐ ܠܵܐ ܡܸܛܲܟܤܹ̈ܐ: ܠܵܐ ܝܑܼܕܲܥܬܼܵܐ ܘܫܲܛܘܼܪܘܼܬܼܵܐ ܕܗܵܘܢܵܐ. ܨܸܦܬܼܵܐ ܕܤܘܼܗܪ̈ܵܢܹܐ: ܡܕܼܵܘܕܼܵܐ ܢܲܦܫܵܐ. ܘܢܘܼܬܵܦܵܐ ܕܲܥܒܼܵܕܹ̈̇ܐ: ܫܵܓܹܿܫ ܗܵܘܢܵܐ: ܘܡܲܦܸܩ ܠܹܗ ܡ̣ܢ ܒܗܝܼܠܘܼܬܼܵܐ: ܘܛܵܪܹܕܼ ܡܸܢܹܗ ܡܫܲܝܢܘܼܬܼܵܐ. ܙܵܕܹܩ ܠܹܗ ܠܝܼܚܝܼܕܼܵܝܵܐ ܕܙܲܡܸܢ ܘܐܲܦܠܲܚ̣ ܢܲܦܫܹܗ ܠܦܠܚܵܢܵܐ ܫܡܲܝܢܵܐ: ܕܐܲܡܝܼܢܵܐܝܼܬܼ ܕܠܵܐ ܨܸܦܬܼܵܐ ܢܸܗܘܸܐ ܒܬܲܪܥܝܼܬܹܗ. ܐܲܝܟܲܢܵܐ ܕܟܲܕܼ ܢܸܬܼܒܲܩܸܐ ܒܢܲܦܫܹܗ: ܘܢܸܬܼܚܲܫܲܒܼ ܡܸܕܸܡ ܤܘܼܥܪܵܢܵܐ ܡ̣ܢ ܕܥܵܠܡܵܐ ܗܵܢܵܐ: ܘܪܸܢܝܵܐ ܕܚܲܕܼ ܡ̣ܢ ܨܒܼܘܼ ܡܸܬܼܚܙܝܵܢܵܐ: ܒܢܲܦܫܹܗ ܠܵܐ ܚܵܙܹ̇ܐ. ܐܲܝܟܲܢܵܐ ܕܡ̣ܢ ܒܸܛܠܵܢܹܗ pb. 82 ܓܡܝܼܪܵܐ ܕܡ̣ܢ ܗܵܠܹܝܢ ܕܥܵܒܼܪ̈ܵܢ. ܢܸܫܟܲܚ ܕܲܒܼܢܵܡܘܿܤܵܐ ܕܡܵܪܝܵܐ ܢܸܬܼܗܲܓܸܐ ܒܠܸܠܝܵܐ ܘܒܼܐܝܼܡܵܡܵܐ: ܕܠܵܐ ܢܘܼܬܵܦܵܐ ܕܡܸܕܸܡ. ܥܲܡ̈ܠܹܐ ܕܦܲܓܼܪܵܐ: ܒܸܠܥܵܕܼ ܫܘܼܦܪܹ̈ܐ ܕܪܸܥܝܵܢܵܐ: ܡܲܪܒܿܥܵܐ ܡܓܲܙܝܵܐ ܘܲܬܿܕܲܝ̈ܵܐ ܝܲܒܝܼ̈ܫܹܐ. ܘܠܲܝܼܕܲܥܬܼܵܐ ܕܐܲܠܵܗܵܐ: ܠܵܐ ܡܩܲܪܒܼܝܼܢ. ܦܲܓܼܪܵܐ: ܥܡܝܼܠ. ܠܡܸܥܩܲܪ ܚܲܫܹ̈ܐ ܡ̣ܢ ܪܸܥܝܵܢܗܘܿܢ: ܠܵܐ ܒܛܝܼܠ ܠܗܘܿܢ. ܘܐܵܦ ܗܸܢܘܿܢ ܢܸܚܨܕܼܘܼܢ: ܘܠܵܐ ܡܸܕܸܡ. ܐܲܝܟܼ ܐ̄ܢܵܫ ܕܙܵܪܲܥ ܥܲܠ ܟܘ̈ܒܹܐ ܘܠܵܐ ܡܸܫܟܲܚ ܠܡܸܚܨܲܕܼ: ܗܵܟܲܢܵܐ ܡ̇ܢ ܕܲܡܚܲܒܿܠܵܐ ܬܲܪܥܝܼܬܹܗ ܒܨܸܦܬܼܵܐ ܘܐܲܟܿܬܼܵܢܘܼܬܼܵܐ ܘܝܲܥܢܘܼܬܼܵܐ ܕܟܼܘܼܢܵܫ ܢܸܟܼܤܹ̈ܐ: ܘܡܸܬܿܬܲܢܲܚ ܥܲܠ ܡܲܫܟܿܒܹܗ ܡ̣ܢ ܤܘܿܓܼܵܐܐ ܕܫܲܗܪܹܗ ܘܲܢܙܝܼܪܘܼܬܹܗ. ܘܤܵܗܹ̇ܕܼ ܟܬܼܵܒܼܵܐ ܕܐܵܡܲ݁ܪ: ܐܲܝܟܼ ܥܲܡܵܐ ܕܲܥܒܲܕܼ ܙܲܕܝܼܩܘܼܬܼܵܐ: ܘܠܵܐ ܫܒܲܩ̣ ܕܝܼܢܵܐ ܕܐܲܠܵܗܹܗ: ܫܵܐ̇ܠܝܼܢ ܠܝܼ ܕܝܼܢܵܐ ܘܙܲܕܝܼܩܘܼܬܼܵܐ: ܘܨܵܒܹ̇ܝܢ ܠܡܸܬܼܩܲܪܵܒܼܘܼ ܠܐܲܠܵܗܵܐ. ܠܡܵܢܵܐ ܨܵܡ̄ܢ ܘܠܵܐ ܚ̣ܙܲܝܬܿ: ܘܡܲܟܿܟܼ̄ܢ ܢܲܦܫܲܢ ܘܠܵܐ ܝܑܼܕܲܥ̣ܬܿ؟ ܗܵܐ ܒܝܵܘܡܵܐ ܕܨܵܘܡܟܼܡܟܼܘܿܢ: ܥܵܒܼܕܝܼܬܿܘܿܢ ܨܸܼܒܼܝܵܢܲܝ̈ܟܿܘܿܢ: ܘܲܡܩܲܪܒܼܝܼܢ ܐܢ̄ܬܿܘܿܢ ܦܬܲܟܼܪܲܝܟܿܘܿܢ ܟܠܗܘܿܢ. ܗܵܢܵܘ ܕܹܝܢ: ܚܘܼ̈ܫܵܒܹܗ ܒܝܼ̈ܫܹܐ: ܘܬܲܪ̈ܥܝܵܬܼܵܐ ܒܝܼ̈ܫܵܬܼܵܐ: ܕܘܼܟܲܬܼ ܐܲܠܵܗܵܐ ܐܲܚܝܼܕܼܝܼܢ ܐܢ̄ܬܿܘܿܢ ܒܢܲܦܫܟܼܘܿܢ. ܘܲܡܕܲܒܿܚܝܼܢ ܐܢ̄ܬܿܘܿܢ ܠܗܘܿܢ ܚܹܐܪܘܼܬܼܟܼܘܿܢ ܡܝܲܩܲܪܬܵܐ ܒܟܼܠܝܘܼܡ: ܕܸܒܼܚܬܼܵܐ ܕܡ̣ܢ ܟܠ ܡܸܕܸܡ ܝܲܩܝܼܪܵܐ: ܗܵܝ̇ ܕܠܝܼ ܦܲܐܝܵܐ ܗ̄ܘ̣ܵܬܼ ܕܬܸܦܪ̱ܫܘܼܢ: ܒܲܥܒܼܵܕܲܝ̈ܟܿܘܿܢ ܫܲܦܝܼܪܹ̈ܐ ܘܬܹܐܪܬܵܐ ܚܤܝܼܬܼܵܐ ܕܠܸܒܵܐ܀ ܐܲܪܥܵܐ ܛܵܒܼܬܼܵܐ ܕܲܡܚܲܕܝܵܐ ܠܡܵܪܵܗ̇ ܒܦܹܐܕܹ̈ܐ ܕܚܲܕܼ ܒܲܡܵܐܐ: ܢܲܦܫܵܐ ܕܡܸܙܕܲܗܝܵܐ pb. 83 ܒܡܲܪܢܝܼܬܼܵܐ ܕܐܲܠܵܗܵܐ: ܒܫܲܗܪܵܗ̇ ܥܝܼܪܵܐ ܕܠܹܠܲܝ ܐܝܼܡܵܡ. ܬܲܡܵܢ ܢܸܒܼܢܸܐ ܡܵܪܝܵܐ ܥܲܠ ܡܲܬܼܩܢܹ̈ܝܗ̇ ܘܲܚܕܼܵܪܹܝܗ̇: ܥܢܵܢܵܐ ܠܛܸܠܵܠܵܐ ܒܐܝܼܡܵܡܵܐ: ܘܙܲܗܪܵܐ ܕܫܲܠܗܹܒܼܝܼܬܼܵܐ ܕܢܘܼܪܵܐ ܒܠܸܠܝܵܐ. ܘܡ̣ܢ ܓܵܘ ܚܸܫܟܵܗ̇: ܢܘܼܗܪܵܐ ܢܸܕܼܢܲܚ܀ ܐܲܝܟܲܢܵܐ ܕܥܲܪܦܸܠܵܐ ܡܲܥܡܛܵܐ ܙܲܗܪܝܼܪ̈ܵܘܗܝ ܕܤܲܗܪܵܐ: ܗܵܟܲܢܵܐ ܬܸܢܵܢܵܗ̇ ܕܟܲܪܤܵܐ ܠܚܸܟܼܡܬܼܵܐ ܕܐܲܠܵܗܵܐ ܡ̣ܢ ܢܲܦܫܵܐ. ܘܐܲܝܟܼ ܢܲܒܼܪܲܫܬܼܵܐ ܕܢܘܼܪܵܐ ܒܩܲܝ̈ܤܹܐ ܝܲܒܼܝܼ̈ܫܹܐ: ܗܵܟܲܢܵܐ ܪܸܓܲܬܼܵܐ ܕܦܲܓܼܪܵܐ ܒܟܲܪܤܵܐ ܕܡܲܠܝܵܐ. ܘܐܲܝܟܲܢܵܐ ܕܐܵܕܼܫܹ̈ܐ ܕܲܗܝܼ̈ܢܹܐ ܡܓܲܪܹܝܢ ܠܲܫܕܵܐ ܕܫܲܠܗܹܒܼܝܼܬܼܵܐ: ܗܵܟܲܢܵܐ ܪܲܓܼܝܘܼܬܼܵܐ ܕܡܹܐܟܼ̈ܬܼܵܐ ܠܚܲܫܵܐ ܕܙܘܼܘܵܓܼܵܐ ܒܓܼܵܘ ܦܲܓܼܪܵܐ. ܒܦܲܓܼܪܵܐ ܪܵܚܹ̇ܡ ܢܵܚܹ̈ܐ: ܝܑܼܕܲܥܬܹܗ ܕܐܲܠܵܗܵܐ ܠܵܐ ܫܵܪܝܵܐ. ܒܲܪܢܵܫܵܐ ܪܵܚܹ̇ܡ ܦܲܓܼܪܹܗ: ܠܵܐ ܡܸܫܬܿܘܸܐ ܠܡܵܘ̈ܒܼܵܬܼܵܐ ܐܲܠܵܗܵܝ̈ܬܼܵܐ. ܐܲܝܟܲܢܵܐ ܕܡ̣ܢ ܚܸܒܼ̈ܠܹܐ ܡܸܬܼܝܼܠܸܕܼ ܦܹܐܪܵܐ ܡܚܲܕܝܵܢܵܐ ܠܒܲܛܢܬܼܵܐ: ܗܵܟܲܢܵܐ ܡ̣ܢ ܥܲܡ̈ܠܹܐ ܡܸܬܼܝܲܠܕܵܐ ܒܢܲܦܫܵܐ ܝܑܼܕܲܥܬܼܵܐ ܕܐ̄ܪ̈ܵܙܵܘܗܝ ܕܐܲܠܵܗܵܐ. ܠܲܚܒܸ̈ܢܵܢܹܐ ܕܹܝܢ ܘܪ̈ܵܚܡܲܝ ܢܚܵܝܹ̈ܐ: ܦܹܐܪܵܐ ܡܲܒܼܗܬܼܵܢܵܐ. ܐܲܝܟܲܢܵܐ ܓܹܝܪ ܕܚܵܐܹ̇ܣ ܐܲܒܼܵܐ ܥܲܠ ܒܪܹܗ: ܗܵܟܲܢܵܐ ܚܵܐܹ̇ܣ ܡܫܝܼܚܵܐ ܥܲܠ ܓܘܼܫܡܵܐ ܥܡܝܼܠܵܐ: ܘܩܲܪܝܼܒܼ ܠܦܘܼܡܹܗ ܒܟܼܠܥܸܕܢ. ܠܥܲܡܠܵܐ ܕܚܸܟܼܡܬܼܵܐ: ܠܲܝܬܿ ܠܹܗ ܕܡܲܝ̈ܵܐ܀ ܐܲܟܼܤܢܵܝܵܐ ܗܵܢܵܘ: ܐܲܝܢܵܐ ܕܐܲܟܼܤܢܵܝ ܒܬܲܪܥܝܼܬܹܗ ܠܟܼܠ ܐܸܤܡܹܗ ܕܥܵܠܡܵܐ ܗܵܢܵܐ. ܐܲܒܼܝܼܠܵܐ ܗܵܢܵܘ: ܐܲܝܢܵܐ ܕܲܒܼܟܲܦܢܵܐ ܘܲܒܼܨܲܗܝܵܐ ܘܐܸܒܼܠܵܐ ܡܲܦܸܩ ܟܠ ܝܵܘ̈ܡܬܹܗ ܕܲܒܼܗܵܠܹܝܢ ܚܲܝܹ̈ܐ: ܡܸܛܠ ܤܘܼܟܵܝܵܐ ܕܤܲܒܼܪܵܐ ܗܵܘ̇ ܫܡܲܝܵܢܵܐ. ܝܑܼܚܝܼܕܼܵܝܵܐ ܗܵܢܵܘ: ܐܲܝܢܵܐ ܕܟܲܕܼ ܢܤܝܼܡ pb. 84 ܝܲܬܼܒܹܗ ܡ̣ܢ ܚܸܙܘܲܝ̈ ܥܵܠܡܵܐ ܘܲܠܗܲܠ: ܫܸܐܠܬܼܵܐ ܝܑܼܚܝܼܕܼܵܝܬܼܵܐ ܐܝܼܬܼ ܠܹܗ ܒܲܨܠܘܿܬܼܵܐ: ܪܸܓܬܼܵܐ ܕܥܵܠܡܵܐ ܕܲܥܬܼܝܼܕܼ. ܥܘܼܬܼܪܹܗ ܕܚܝܼܚܝܼܕܼܵܝܵܐ ܗܵܢܵܘ: ܐܵܘ ܒܘܼܝܵܐܵܐ ܕܡ̣ܢ ܡܸܨܥܲܬܼ ܐܸܒܼܠܵܐ ܡܸܫܬܲܟܲܢ ܠܹܗ: ܐܵܘ ܚܲܕܼܘܼܬܼܵܐ ܕܡ̣ܢ ܗܲܝܡܵܢܘܼܬܼܵܐ: ܒܹܝܬܼ ܓܲܙܵܐ ܕܪܸܥܝܵܢܹܗ ܕܵܢܚܵܐ. ܡܪܲܚܡܵܢܵܐ ܗܵܢܵܘ: ܐܲܝܢܵܐ ܕܠܵܐ ܦܪܝܼܫ ܠܪܸܥܝܵܢܹܗ ܒܲܚܫܲܚܬܼܵܐ ܕܪ̈ܲܚܡܹܐ ܚܲܕܼ ܡ̣ܢ ܬܸܓܼܡ̈ܝܼܢ ܕܐ̄ܢܵܫܘܼܬܼܵܐ܀ ܒܬܼܘܼܠܘܼܬܼܵܐ ܐܝܼܬܹܝܗ̇: ܕܠܵܐ ܗ̄ܘ̣ܵܐ ܡ̣ܢ ܚܘܼܒܵܠܵܐ ܕܫܘܼ̈ܚܵܛܹܐ ܐ̄ܢܵܫ ܢܸܛܲܪ ܒܲܠܚܘܿܕܼ ܦܲܓܼܪܹܗ: ܐܸܠܵܐ ܕܐܵܦ ܡ̣ܢ ܢܲܦܫܹܗ ܡܸܬܼܟܲܚܲܕܼ: ܘܟܲܕܼ ܒܲܠܚܘܿܕܼܵܘܗܝ ܐܝܼܬܼܵܘܗܝ܀ ܐܸܢ ܠܢܲܟܼܦܘܼܬܼܵܐ ܪܓܼܝܼܓܼ ܐܲܢ̄ܬܿ: ܙܓܼܘܿܪ ܪܸܕܼܝܵܐ ܕܚܘܼ̈ܫܵܒܹܐ ܡܫܲܟܿܪܹ̈ܐ: ܒܥܸܢܝܵܢܵܐ ܕܩܸܪܝܵܢܵܐ: ܘܒܼܵܥܘܼܬܼܵܐ ܬܟܼܒܼܝܼܬܼܵܐ ܕܡ̣ܢ ܐܲܠܵܗܵܐ. ܘܗܵܝܕܹܝܢ: ܠܘܼܩܒܲܠ ܥܸܠ̈ܠܵܬܼܵܐ ܕܡ̣ܢ ܟܝܵܢܵܐ ܘܲܠܓܼܵܘ ܡܸܙܕܲܝܢܲܬܿ. ܒܸܠܥܵܕܼ ܗܵܠܹܝܢ: ܐ̄ܢܵܫ ܕܢܸܚܙܸܐ ܙܲܗܝܘܼܬܼܵܐ ܒܲܩܢܘܿܡܹܗ ܠܵܐ ܡܸܫܟܲܚ. ܐܸܢ ܪܓܼܝܼܓܼ ܐܲܢ̄ܬܿ ܠܡܸܩܢܵܐ ܡܪܲܚܡܵܢܘܼܬܼܵ: ܠܘܼܩܕܲܡ ܕܲܪܸܫ ܢܲܦܫܵܟܼ ܠܡܸܩܢܵܐ ܒܲܤܝܘܼܬܼܵܐ ܕܥܲܠ ܨܸܒܼ̈ܘܵܬܼܵܐ: ܕܝܲܩܝܼܪܘܼܬܼܗܹܝܢ ܠܵܐ ܬܸܓܸܿܕܼ ܠܪܸܥܝܵܢܵܐ ܠܡܸܦܲܩ ܡ̣ܢ ܤܝܵܡܵܐ ܕܢܝܼܫܹܗ ܕܐܸܬܼܩܲܕܲܡ܀ ܫܲܦܝܘܼܬܼܵܐ ܕܲܡܪܲܚܡܵܢܘܼܬܼܵܐ: ܒܲܡܤܲܝܒܿܪܵܢܘܼܬܼܵܐ ܕܲܛܠܘܼܡܝܵܐ ܡܸܬܼܝܲܕܼܥܵܐ. ܘܫܘܼܡܠܵܝܵܐ ܕܡܲܟܿܝܼܟܼܘܼܬܼܵܐ: ܒܲܥܫܘܼܩܝܵܐ ܕܡܲܓܵܢ ܟܲܕܼ ܬܸܚܕܼܵܐ܀ ܐܸܢ ܡܪܲܚܡܵܢܵܐ ܐܲܢ̄ܬܿ ܫܲܪܝܼܪܵܐܝܼܬܼ. ܡܵܐ ܕܡܸܬܼܓܿܠܸܙ ܐܲܢ̄ܬܿ ܡ̣ܢ ܕܝܼܠܵܟܼ ܥܵܘܵܠܵܐܝܼܬܼ ܘܒܲܛܠܘܼܡܝܵܐ: ܠܵܐ ܬܸܪܓܲܙ ܡ̣ܢ ܠܓܼܵܘ. ܘܡ̣ܢ ܠܒܲܪ: ܠܵܐ ܬܚܵܘܸܐ ܚܘܼܡܤܵܢܵܟܼ ܠܲܐ̄ܚܪ̈ܵܢܹܐ. ܐܸܠܵܐ ܢܸܬܼܒܲܠܥܘܼܢ ܤܘܪ̈ܚܵܢܹܐ ܕܲܛܠܘܼܡܝܵܟܼ ܒܚܲܫܹ̈ܐ ܕܪ̈ܲܚܡܹܐ: ܐܲܝܟܼ ܩܲܫܝܘܼܬܹܗ ܕܚܲܡܪܵܐ ܕܡܸܬܼܦܲܪܗܵܐ pb. 85 ܒܓܼܵܘ ܡܲܝ̈ܵܐ ܤܲܓܝܼ̈ܐܹܐ. ܐܸܠܵܐ ܚܵܘܵܐ ܐܲܢ̄ܬܿ ܐܵܬ̤ܵܐ ܕܫܲܦܝܘܼܬܼܵܐ ܕܡ̣ܢ ܪ̈ܚܡܹܐ ܤܲܓܝܼ̈ܐܹܐ: ܒܲܐ̄ܚܪ̈ܵܢܝܵܬܼܵܐ ܕܡܵܘܤܸܦ ܐܲܢ̄ܬܿ ܘܡܲܛܐܸܒܼ ܠܛܵܠܘܿܡܲܝ̈ܟ ܟܲܕܼ ܦܨܝܼܚ ܐܲܢ̄ܬܿ. ܐܲܝܬܿ. ܐܲܝܟܼ ܕܐܵܦ ܛܘܼܒܼܵܢܵܐ ܐܹܠܝܼܫܲܥ ܥ̣ܒܲܕܼ ܠܲܒܼܥܸܠܕܒܼܵܒܼܵܘ̈ܗܝ: ܕܐܸܬ̣ܼܵܘ ܥܠܵܘܗܝ ܕܢܸܫܒܿܘܿܢܵܝܗܝ. ܒܗܵܝ̇ ܕܹܝܢ ܕܨܲܠܝܼ ܘܚܲܦܝܼ ܥܲܝܢܲܝ̈ܗܘܿܢ ܒܲܫܪܲܓܼܪ̈ܵܓܼܝܵܬܼܵܐ: ܠܚܲܝܠܵܐ ܕܲܠܘܵܬܹܗ ܡܒܲܕܸܩ ܗ̄ܘ̣ܵܐ. ܘܕܸܐ ܒܵܥܹ̇ܐ: ܠܵܐ ܡܸܕܸܡ ܐܝܼܬܲܝܗܘܿܢ ܩܕܼܵܡܵܘܗܝ ܘܲܒܼܗܵܝ̇ ܕܐܵܘܟܼܠ̣ ܘܲܐܫܩܝܼ ܐܸܢܘܿܢ ܘܲܫ̣ܪܵܐ ܕܢܹܐܙܠܘܼܢ: ܥܲܠ ܪ̈ܲܚܡܹܐ ܕܲܩܢܸܐ ܗ̄ܘ̣ܵܐ ܠܓܼܵܘ ܡܸܢܹܗ ܒܲܕܸܩ̣܀ ܘܐܸܢ ܡܲܟܝܼܟܼܵܐ ܐܲܢ̄ܬܿ ܒܲܫܪܵܪܵܐ: ܡܵܐ ܕܬܸܬܼܥܫܸܩ: ܠܵܐ ܬܸܬܿܕܲܠܚ. ܘܪܘܼܚܵܐ ܥܲܠ ܐܲܦܲܝ̈ ܨܒܼܘܼܬܼܵܐ ܠܵܐ ܬܸܦܘܿܩ: ܐܸܠܵܐ ܕܒܲܫܪܵܪܵܐ ܩܲܒܸܠ ܥܠܲܝܟܼ ܠܡܸܠܬܼܵܐ ܥܵܘ̈ܠܬܼܵܐ ܕܲܥܠܲܝܟ: ܟܲܕܼ ܠܵܐ ܡܸܬܼܒܛܸܠ ܠܵܟܼ ܠܲܡܦܵܤܘܼ ܠܲܒܼܢܲܝ̈ܢܵܫܵܐ ܒܲܐ̄ܚܪܵܢܵܝܘܼܬܹܗ ܕܫܲܪܒܵܐ. ܐܸܠܵܐ ܝܲܬܝܼܪܵܐܝܼܬܼ: ܐܲܦܝܼܣ ܥܲܠ ܫܘܼܒܼܩܵܢܵܐ܀ ܐ̄ܚܪ̈ܵܢܹܐ: ܫܡܵܐ ܤܲܢܝܵܐ ܕܙܵܢܝܘܼܬܼܵܐ ܥܲܠܝܗܘܿܢ ܒܨܸܒܼܝܵܢܗܘܿܢ ܢܵܬܼܦܝܼܢ ܗ̄ܘ̣ܵܘ. ܘܲܐ̄ܚܪ̈ܵܢܹܐ: ܤܘܼܥܪ̈ܵܢܹܐ ܕܓܼܵܘܪܵܐ ܕܚܲܤܝܼܢ ܡܸܢܗܘܿܢ ܥܠܲܝܗܘܿܢ ܡܩܲܒܹܠܝܼܢ ܗ̄ܘ̣ܵܘ: ܘܲܠܦܹܐܪܵܐ ܕܲܚܛܝܼܬܼܵܐ ܕܠܵܐ ܕܝܼܠܗܘܿܢ ܐܲܝܟܼ ܕܕܝܼܠܗܘܿܢ ܐܝܼܬܼܵܘܗܝ ܒܕܸܡ̈ܥܹܐ ܡܪܲܒܹܝܢ ܗ̄ܘ̣ܵܘ. ܘܫܘܼܒܼܩܵܢܵܐ ܕܲܚܛܵܗܹ̈ܐ ܕܠܵܐ ܤܥܲܪܘ: ܒܲܒܼܟܼܵܬܼܵܐ ܡ̣ܢ ܥܵܫܘܿܩܵܐ ܫܵܐܠܝܼܢ ܗ̄ܘ̣ܵܘ: ܟܲܕܼ ܒܟܼܠܵܗ̇ ܕܲܟܝܘܼܬܼܵܐ ܕܢܲܟܼܦܘܼܬܼܵܐ ܡܟܲܠܠܵܐ ܢܲܦܫܗܘܿܢ. ܐ̄ܚܪ̈ܵܢܹܐ ܕܹܝܢ: ܡܸܛܠ ܕܠܵܐ ܢܸܫܬܲܒܿܚܘܼܢ ܡܸܛܠ ܕܘܼܒܵܪܹ̈ܐ ܬܡܝܼ̈ܗܹܐ ܕܲܒܼܛܘܼܫܝܵܐ ܐܲܚܝܼܕܼܝܼܢ: ܐܸܤܟܹܿܡܹ̈ܐ ܕܫܵܢܲܝ̈ܐ ܒܢܲܦܫܗܘܿܢ ܡܚܵܘܹܝܢ ܗ̄ܘ̣ܵܘ: ܟܲܕܼ ܒܟܼܠܵܗ̇ ܛܲܥܡܵܢܘܼܬܼܵܐ ܘܲܒܼܗܝܼܠܘܼܬܼܵܐ ܡܤܲܬܿܬܼܝܼܢ ܗ̄ܘ̣ܵܘ. ܐܲܝܟܲܢܵܐ ܕܡ̣ܢ ܕܡܝܼܪܘܼܬܼܵܐ ܕܤܘܼܥܪ̈ܵܢܹܐ: ܡܲܠܲܐܟܹ̈ܐ ܩܲܕܝܼ̈ܫܹܐ ܢܸܗܘܘܿܢ pb. 86 ܡܒܲܕܩܵܢܹ̈ܐ ܥܲܠ ܪܲܒܘܼܬܼܗܘܿܢ ܕܐ̄ܢܵܫܵܐ ܕܐܲܝܟܼ ܗܵܠܹܝܢ. ܐܲܢ̄ܬܿ ܕܹܝܢ ܡܲܟܿܝܼܟܼܘܼܬܼܵܐ ܡܲܤܒܲܪ ܐܲܢ̄ܬܿ ܥܲܠ ܢܲܦܫܵܟܼ: ܘܟܲܕܼ ܐ̄ܚܪ̈ܵܢܹܐ ܗܸܢܘܿܢ ܥܲܠ ܢܲܦܫܗܘܿܢ ܡܲܤܗܕܼܝܼܢ: ܐܲܢ̄ܬܿ ܘܐܵܦ ܠܵܐ ܟܲܕܼ ܢܸܤܬܲܩ̈ܒܿܠܵܢ ܠܘܵܬܼܵܟܼ ܒܫܸܬܼܩܵܐ ܡܤܲܝܒܲܪ ܐܲܢ̄ܬܿ: ܘܡܲܟܿܝܼܟܼܵܐ ܚܵܫܹ̇ܒܼ ܐܲܢ̄ܬܿ ܢܲܦܫܵܟܼ. ܐܸܢ ܡܲܟܝܼܟܼܵܐ ܐܲܢ̄ܬܿ: ܒܩܝܼ ܢܲܦܫܵܟܼ ܒܗܵܠܹܝܢ: ܐܸܢ ܠܵܐ ܡܸܬܿܕܲܠܲܚ ܐܲܢ̄ܬܿ܀ ܤܲܓܝܼܐܘܼܬܼ ܐܵܘܵܢܹ̈ܐ ܕܒܹܝܬܼ ܐܲܒܼܵܐ: ܠܡܘܼ̈ܫܚܵܬܼܵܐ ܕܪܸܥܝܵܢܵܐ ܡܟܲܢܸܐ ܕܕܲܝܵܪ̈ܵܘܗܝ ܕܐܲܬܼܪܵܐ ܗܵܘ̇. ܗܵܢܵܘ ܕܹܝܢ: ܠܦܘܼܪ̈ܫܵܢܲܝ ܫܘܼܟܵܢܹ̈ܐ ܘܕܲܪ̈ܓܹܐ ܪ̈ܘܼܚܵܢܹܐ ܕܪܸܥܝܵܢܵܐܝܼܬܼ ܒܗܘܿܢ ܡܸܬܼܒܲܤܡܝܼܢ: ܘܲܡܫܲܚܠܦܘܼܬܼ ܛܲܟܼܤܹ̈ܐ ܕܡܵܘ̈ܗܒܼܵܬܼܵܐ. ܘܠܵܘ ܟܲܕܼ ܒܲܡܦܲܪܫܘܼܬܼ ܕܘܼܝܵܪܵܐ ܐܲܬܼܪܵܢܵܝܵܐ: ܒܝܼܕܼܝܼܥܘܼܬܼܵܐ ܓܠܝܼܵܬܼܵܐ ܕܲܡܫܲܚܠܦܘܼܬܼ ܤܝܵܡܵܐ ܕܥܘܼܡܪܹ̈ܐ ܕܝܼܠܵܢܵܝܹ̈ܐ: ܠܟܼܠܚܲܕܼ ܚܲܕܼ ܡ̣ܢ ܦܲܪ̈ܨܘܿܦܹܐ ܡܸܬܿܬܿܚܲܡ ܒܲܗܘܵܝܵܐ. ܐܸܠܵܐ ܐܲܟܼܙܢܵܐ ܕܲܒܚܕܼܵܐ ܚܫܲܚܬܼܵܐ ܓܵܘܵܢܵܝܬܼܵܐ ܕܫܸܡܫܵܐ ܗܵܢܵܐ ܡܸܬܼܪܲܓܼܫܵܢܵܐ: ܠܟܼܠܚܲܕܼ ܚܲܕܼ ܡܸܢܲܢ ܗܸܢܝܵܢܵܐ ܝܑܼܚܝܼܕܼܵܝܵܐ ܝܑܼܚܝܼܕܼܵܝܵܐ ܕܡܸܢܹܗ: ܡ̣ܢ ܦܘܼܚܵܡܵܐ ܕܕܲܟܼܝܘܼܬܼܵܐ ܚܵܙܘܿܝܬܼܵܐ ܡܡܲܠܸܐ. ܐܲܝܟܼ ܡܵܐ ܕܡܸܫܟܲܚ ܚܵܒܹ̇ܫ ܥܘܼܒܵܐ ܕܒܼܵܒܼ̈ܬܹܗ ܐܲܫܝܕܼܘܼܬܼܵܐ ܫܘܼܝܼܬܼܵܐ ܕܢܘܼܗܪܹܗ: ܘܐܲܝܟܼ ܫܪܵܓܼܵܐ ܕܲܒܼܚܲܕܼ ܒܲܝܬܼܵܐ ܚܫܲܚܬܼܵܐ ܕܢܘܼܗܪܹܗ ܡܦܲܪܫܵܐܝܼܬܼ ܡܦܲܠܸܓܸ: ܟܲܕܼ ܗ̤ܘ ܠܵܐ ܡܦܲܠܲܓܼ ܩܢܘܿܡܵܐܝܼܬܼ ܡ̣ܢ ܦܫܝܛܘܼܬܼܵܐ ܕܕܼܢܚܹܗ ܠܤܲܓܝܼܐܘܼܬܼܵܐ ܒܲܡܫܲܚܠܦܘܼܬܼ ܚܸܙܘܹܗ. ܗܵܟܲܢܵܐ ܘܟܲܕܼ ܒܚܲܕܼ ܥܘܼܡܪܵܐ ܠܵܐ ܡܸܬܼܦܲܠܓܼܵܢܵܐ ܕܲܠܤܲܓܝܼܐܘܼܬܼ ܡܢܵܘ̈ܬܼܵܐ ܡܦܲܪ̈ܫܵܬܼܵܐ ܫܵܪܹܝܢ: ܐܲܝܠܹܝܢ ܕܲܠܬܲܡܵܢ ܫ̣ܘܵܘ ܒܙܲܒܼܢܵܐ ܕܲܡܬܲܚܲܡ: ܡ̣ܢ ܚܲܕܼ ܫܸܡܫܵܐ ܡܸܬܼܝܲܕܼܥܵܢܵܐ: ܐ̄ܢܵܫ ܐ̄ܢܵܫ ܠܦܘܼܬܼ ܛܲܟܼܤܵܐ ܕܕܼܘܼܒܵܪܹܗ: ܢܵܬܹ̇ܦ ܒܘܼܤܵܡܵܐ ܠܢܲܦܫܹܗ ܒܚܲܕܼ ܐܵܐܲܪ ܘܲܚܕܼܵܐ ܕܘܼܟܿܬܼܵܐ pb. 87 ܘܚܲܕܼ ܡܵܘܬܿܒܼܵܐ ܘܲܚܕܼܵܐ ܚܙܵܬܼܵܐ ܘܚܲܕܼ ܐܸܤܟܹܡܵܐ: ܟܲܕܼ ܠܵܐ ܚܵܙܹ̇ܐ ܡܫܘܼܚܬܼܵܐ ܪܲܒܿܬܼܵܐ ܕܛܲܟܼܤܵܐ ܕܚܲܒܼܪܹܗ: ܗܵܘ̇ ܕܲܒܼܨܝܼܪ ܡܸܢܹܗ. ܐܲܝܟܼ ܟܹܐܡܲܬܼ ܕܢܸܒܼܗܲܬܼ ܡ̣ܢ ܤܲܓܝܼܐܘܼܬܼ ܡܵܘ̈ܗܒܼܵܬܼܵܐ ܕܚܲܒܼܪܹܗ ܘܲܒܼܨܝܼܪܘܼܬܼܵܐ ܕܝܼܠܹܗ. ܘܗ̤ܝ ܗܵܕܹܐ ܡܸܟܹܝܠ ܗܵܘ̇ܝܵܐ ܠܹܗ: ܠܥܸܠܬܼܵܐ ܕܟܲܪܝܘܼܬܼܵܐ ܘܲܕܼܫܘܼܢܵܩܵܐ ܕܪܸܥܝܵܢܹܗ: ܚܵܣ. ܗܵܠܹܝܢ ܒܐܲܬܼܪܵܐ ܗܵܘ̇ ܕܒܼܘܼ̈ܤܵܡܹܐ ܠܡܸܪܢܵܐ: ܠܲܝܬܿ. ܐ̄ܢܵܫ ܒܡܵܘܗܲܒܼܬܼܵܐ ܕܐܸܫܬܿܘܝܼ ܘܪܲܒܘܼܬܼܵܐ ܕܛܲܟܼܤܹܗ: ܗ̤ܘ ܠܓܼܵܘ ܡܸܢܹܗ ܡܸܬܼܒܲܤܲܡ. ܚܙܵܬܼܵܐ ܕܹܝܢ ܡ̣ܢ ܠܒܲܪ ܠܟܼܠܗܘܿܢ ܚܕܼܵܐ: ܘܐܲܬܼܪܵܐ ܚܲܕܼ. ܘܲܕܼܝܲܬܿܝܼܪ ܡܫܲܪܪܵܐܝܼܬܼ: ܐܲܝܟܼ ܥܵܡܘܿܪܘܼܬܼ ܙܢܵܐ ܕܡܲܫܪ̈ܝܵܬܼܵܐ ܡܲܠܲܐܟܼܵܝ̈ܵܬܼܵܐ ܒܲܚܕܼܵܢܵܝܘܼܬܼ ܐܲܬܼܪܵܐ ܐܵܐܵܪܵܝܵܐ: ܘܫܲܘܝܘܼܬܼ ܚܙܵܬܼܵܐ ܓܠܝܼܬܼܵܐ ܘܝܼܕܼܝܼܥܘܼܬܼܵܐ ܟܤܝܼܬܼܵܐ ܕܕܲܪ̈ܓܲܝܗܘܿܢ: ܒܓܸܠܝܵܢܹ̈ܐ ܕܬܹܐܘܿܪܝܼܵܐ ܕܬܸܓܼܡܲܝ̈ܗܘܿܢ ܡܫܲܚܠܦܵܐܝܼܬܼ. ܐܸܢ ܡ̇ܢ ܠܲܩܢܘܿܡܹ̈ܐ ܐܝܼܬܼܵܝܵܝܹ̈ ܠܒܲܪ ܡ̣ܢ ܪܓܸܫܬܼܵܐ ܡܲܥܒܿܕܼܵܢܝܼܬܼܵܐ ܘܙܵܘ̈ܥܹܐ ܪܸ̈ܥܝܵܢܵܝܹܐ: ܘܐܵܽܦܠܵܐ ܒܥܵܠܡܵܐ ܕܲܥܬܼܝܼܕܼ ܕܬܸܗܘܸܐ ܡܸܬܿܬܲܡܪܲܚ ܡ̣ܢ ܐ̄ܢܵܫ ܠܡܲܝܬܵܝܘܼ ܒܡܸܠܡܵܐ ܐ̄ܚܪܵܢܵܝܘܼܬܼ ܙܢܵܐ ܕܡ̣ܢ ܗܵܢܵܐ: ܗܵܢܵܘ ܕܹܝܢ ܡ̣ܢ ܡܲܕܥܵܐ ܘܲܠܟܼܵܐ: ܘܐܵܦܸܢ ܡܸܛܠ ܓܡܝܼܪܘܼܬܹܗ ܕܲܟܼܝܵܢܵܐ ܝܲܬܿܝܼܪ ܝܑܼܕܼܝܼܥܵܐܝܼܬܼ. ܫܲܪܝܼܪܵܐ ܡܵܕܹܝܢ ܡܸܠܬܼܵܐ ܕܐܲܡܝܼܪܵܐ ܡ̣ܢ ܐܲܒܼܵܗ̈ܵܬܼܵܐ: ܕܡܸܢܵܗ̇ ܡ̣ܢ ܠܵܐ ܝܑܼܕܲܥܬܼܵܐ ܒܠܵܐ ܙܲܒܼܢܵܐ ܡܬܲܚܡܵܐ: ܡܸܢܵܗ̇ ܕܹܝܢ ܠܡܸܬܼܓܲܠܝܵܢܘܼܬܼܵܐ ܕܒܼܘܼܛܵܠܵܗ̇ ܙܲܒܼܢܵܐ ܢܛܝܼܪ: ܥܲܡ ܫܲܪܟܵܐ ܕܐ̄ܪ̈ܵܙܹܐ ܕܝܼܠܵܢܵܝܹ̈ܐ ܕܲܠܘܵܬܼ ܐܝܼܬܼܘܼܬܼܵܐ ܒܫܸܬܼܩܵܐ ܡܸܬܿܬܲܚܡܝܼܢ. ܤܛܲܪ ܓܹܝܪ ܡ̣ܢ ܥܸܠܵܝܘܼܬܼܵܐ ܟ̱ܠܵܢܵܝܬܼܵܐ ܘܬܲܚܬܵܝܘܼܬܼܵܐ ܓܡܝܼܪܬܵܐ: ܠܵܐ ܐܝܼܬܼ ܬܘܼܒܼ pb. 88 ܐܲܬܼܪܵܐ ܡܸܨܥܵܝܵܐ ܕܒܹܝܬܼ ܗܵܢܵܐ ܘܲܠܗܵܘ̇ ܒܦܘܼܤܩܵܢܵܐ ܕܲܥܬܼܝܼܕܼ. ܐܵܘ ܟ̱ܠܹܗ ܡ̣ܢ ܥܸܠܵܝܹ̈ܐ: ܐܵܘ ܟ̱ܠܹܗ ܡ̣ܢ ܬܲܚܬܵܝܹ̈ܐ. ܘܲܠܓܼܵܘ ܡ̣ܢ ܗܵܢܵܐ ܘܲܠܗܵܘ̇: ܛܲܟܼܤܹ̈ܐ ܡܫܲܚ̈ܠ̱ܦܹܐ ܕܦܘܼܪܥܵܢܘܼܬܼܵܐ. ܘܐܸܢ ܗܵܕܹܐ ܫܲܪܝܼܪܵܐ ܐܲܝܟܼ ܕܐܵܦ ܐܝܼܬܹܝܗ̇: ܡܵܢܲܐ ܗ̣̄ܝ ܠܸܠܘܼܬܼܵܐ ܗܵܝ̇ ܕܐ̄ܢܵܫ̈ܝܼܢ: ܠܵܐ ܠܲܡ ܒܵܥܹ̇ܢܵܐ ܗܘܵܝܵܐ ܕܲܒܼܡܲܠܟܿܘܼܬܼܵܐ: ܐܵܡܲ݁ܪ ܐ̄ܢܵܫ ܐ̄ܢܵܫ ܡܸܢܗܗܘܿܢ: ܠܘܲܝ ܕܐܸܫܬܵܘܙܲܒܼ ܒܲܠܚܘܿܕܼ ܡ̣ܢ ܓܹܗܲܢܵܐ ܡܨܸܐ ܐ̄ܢܵܐ ܠܡܸܬܼܚܲܦܵܛܘܼ. ܫܘܼܘܙܵܒܼܵܐ ܕܡ̣ܢ ܓܹܗܲܢܵܐ: ܗ̤ܝ ܗ̣̄ܝ ܡܲܠܟܿܘܼܬܼܵܐ. ܘܡܲܦܘܼܠܬܼܵܐ ܕܡ̣ܢ ܗܵܕܹܐ: ܗ̤ܝ ܗ̣̄ܝ ܓܹܗܲܢܵܐ. ܠܵܐ ܓܹܝܪ ܐܲܠܦܘܼܢ ܟܬܼܵܒܹ̈ܐ ܬܠܵܬܼܵܐ ܐܲܬܼܪ̈ܵܘܵܬܼܵܐ. ܐܸܠܵܐ ܡܵܢܵܐ؟ ܡܵܐ ܠܲܡ ܕܐܵܬܹ̇ܐ ܒܪܹܗ ܕܐ̄ܵܢܵܫܵܐ ܒܫܘܼܒܼܚܹܗ: ܡܩܝܼܡ ܠܥܸܪ̈ܒܹܐ ܡ̣ܢ ܝܲܡܝܼܢܹܗ: ܘܠܲܓܼ̈ܕܲܝܵܐ ܡ̣ܢ ܤܸܡܵܠܹܗ. ܐܵܦܠܵܐ ܬܠܵܬܼ ܓܘܼ̈ܕܹܐ ܐܵܡܲ݁ܪ ܗܵܪܟܵܐ: ܐܸܠܵܐ ܬܲܪܬܹܝܢ. ܝܲܡܝܼ̈ܢܵܝܹܐ. ܘܤܸܡܵܠܬܼܵܢܵܝܹ̈ܐ. ܦܘܼܪ̈ܫܵܢܹܐ ܕܐܲܬܼܪ̈ܵܘܵܬܼܵܐ ܕܡܲܥܡܲܪܗܘܿܢ: ܡܬܲܚܡܵܐܝܼܬܼ. ܗܵܠܹܝܢ ܐܵܡܲ݁ܪ: ܕܢܸܢܗ̱ܪܘܼܢ ܫܸܡܫܵܢܵܐܝܼܬܼ ܒܡܲܠܟܿܘܼܬܼܵܗ ܕܐܲܒܼܵܐ. ܘܗܵܠܹܝܢ: ܠܢܘܼܪܵܐ ܕܲܠܥܵܠܲܡ. ܘܬܼܘܼܒܼ: ܢܹܐܬܼܘܿܢ ܠܲܡ ܡ̣ܢ ܡܲܕܼܢܚܵܐ ܘܡ̣ܢ ܡܲܥ̱ܪܒܼܵܐ: ܘܢܸܤܬܲܡܟܿܘܼܢ ܥܲܡ ܕܒܹܝܬܼ ܐܲܒܼܪܵܗܵܡ ܒܡܲܠܟܿܘܼܬܼܵܐ. ܘܲܒܼܢܲܝ̈ ܡܘܼܠܟܵܢܵܐ ܕܠܵܐ ܐܸܬܿܛܦܝܼܣܘ: ܢܸܦܩܘܼܢ ܠܚܸܫܟܵܐ ܕܲܠܒܲܪ ܡ̣ܢ ܡܲܠܟܿܘܼܬܼܵܐ. ܬܲܡܵܢ ܢܸܗܘܸܐ ܒܸܟܼܝܵܐ ܢܲܦܫܵܢܵܝܵܐ: ܘܚܘܼܪܵܩ ܫܸܢܹ̈ܐ: ܕܐܝܼܬܹܝܗ̇ ܟܲܪܝܘܼܬܼܵܐ ܕܥܲܤܩܵܐ ܡ̣ܢ ܢܘܼܪܵܐ. ܐܸܤܬܲܟܲܠܬܿ ܡܸܟܵܐ: ܕܲܡܦܝܼܫܘܼܬܼܵܐ ܕܡ̣ܢ ܗܵܝ̇ ܡܲܤܲܩܬܼܵܐ: ܗ̤ܝ ܗ̣̄ܝ ܓܹܗܲܢܵܐ ܡܫܲܢܩܵܢܝܼܬܼܵܐ. ܫܲܦܝܼܪܵܐ ܗ̣̄ܝ ܕܐ̄ܢܵܫ ܢܲܪܬܸܐ ܠܲܒܼܢܲܝ̈ܢܵܫܵܐ ܠܫܲܦܝܼܪ̈ܵܬܼܵܐ: ܘܢܲܝܬܸܐ ܐܸܢܘܿܢ ܒܐܲܡܝܼܢܘܼܬܼܵܐ ܕܲܒܼܛܝܼܠܘܼܬܹܗ: ܡ̣ܢ pb. 89 ܛܵܥܝܘܼܬܼܵܐ ܠܝܼܕܲܥܬܼܵܐ ܕܚܲܝܹ̈ܐ. ܘܗܵܕܹܐ ܛܲܟܼܤܵܐ ܗ̣̄ܝ ܕܡܵܪܲܢ ܘܕܲܫܠܝܼܚܹ̈ܐ: ܘܪܲܒܲܬܼ ܡܥܲܠܝܵܐ. ܐܸܢܕܹܝܢ ܡܲܪܓܸܫ ܒܢܲܦܫܹܗ: ܕܡ̣ܢ ܚܘܼܠܛܵܢܵܐ ܐܵܘܝܵܐ ܘܐܲܡܝܼܢܘܼܬܼܵܐ ܕܐܲܝܟܼ ܗܵܕܹܐ: ܡܸܬܼܟܲܪܗܵܐ ܬܹܐܪܬܹܗ ܒܲܚܙܵܬܼܵܐ ܕܨܸܒܼ̈ܘܵܬܼܵܐ: ܘܲܒܼܗܝܼܠܘܼܬܹܗ ܡܸܬܿܕܵܘܕܼܵܐ ܕܦܘܼܪܫܵܢܵܐ: ܘܚܵܫ̇ܟܵܐ ܝܑܼܕܲܥܬܹܗ: ܕܲܥܕܲܟܹܝܠ ܥܲܠ ܙܗܝܼܪܘܼܬܼܵܐ ܤܢܝܼܩ ܪܸܥܝܵܢܹܗ: ܘܥܲܠ ܟܘܼܒܵܫܵܐ ܝܲܬܿܝܼܪܵܐ ܕܪܸ̈ܓܼܫܹܐ. ܘܥܲܕܼ ܗܸܢܘܿܢ ܢܸܬܼܐܲܤܘܿܢ: ܗ̤ܘ ܡܸܬܼܟܪܲܗ. ܘܟܲܕܼ ܠܗܘܿܢ ܨܵܒܹܿܐ ܕܢܲܚܠܸܡ: ܡܵܘܒܸܿܕܼ ܠܚܘܼܠܡܵܢܵܐ ܕܢܲܦܫܹܗ ܡܢܵܬܼܵܢܵܝܵܐ: ܘܢܵܦ̇ܩ ܡ̣ܢ ܚܹܐܪܘܼܬܼܵܐ ܡܢܲܟܲܦܬܼܵܐ ܕܨܸܒܝܵܢܹܗ: ܠܲܫܓܼܝܼܫܘܼܬܼܵܐ ܕܗܵܘܢܵܐ. ܢܸܬܿܕܟܲܪ ܗܵܢܵܐ ܠܡܸܠܬܹܗ ܕܲܫܠܝܼܚܵܐ ܕܐܵܡܲ݁ܪ: ܕܕܲܚܠܝܼ̈ܡܹܐ ܗ̣̄ܝ ܡܹܐܟܼܘܼܠܬܼܵܐ ܫܲܪܝܼܪܬܑܵܐ. ܘܢܸܥܛܘܿܦ ܠܒܸܤܬܪܹܗ: ܕܲܠܡܵܐ ܢܸܫܡܲܥ ܡܸܢܗܘܿܢ ܦܸܠܐܬܼܵܢܵܐܝܼܬܼ: ܕܐܲܝܟܲܢ ܐܝܼܬܲܝܟ ܐܵܤܝܵܐ ܕܲܐ̄ܚܪ̈ܵܢܹܐ: ܘܲܡܠܸܐ ܐܲܢ̄ܬܿ ܚܒܼܵܪ̈ܵܬܼܵܐ. ܘܢܸܗܘܸܐ ܡܵܕܹܝܢ ܥܲܡ ܢܲܦܫܹܗ: ܘܢܸܛܲܪ ܚܠܝܼܡܵܐ ܩܢܘܿܡܹܗ ܒܲܠܚܘܿܕܼ. ܘܕܼܘܼܟܲܬܼ ܡܸܠܬܼܵܐ ܡܸܬܼܪܲܓܼܫܵܢܝܼܬܼܵܐ: ܫܘܼܦܪܹ̈ܐ ܕܕܼܘܼܒܵܪܹܗ ܢܫܲܡܫܘܼܢ. ܘܲܚܠܵܦ ܡܸܠܹ̈ܐ ܕܦܘܼܡܵܐ: ܐܸܢ ܡܲܨܝܵܐ ܕܟܲܕܼ ܗ̤ܘ ܒܚܘܼܠܡܵܢܵܐ ܢܲܦܫܹܗ ܢܸܛܲܪ ܐ̄ܚܪܵܢܹܐ ܢܸܬܼܥܲܕܪܘܼܢ. ܘܲܒܼܝܲܕܼ ܚܘܼܠܡܵܢܹܗ ܢܸܬܼܚܲܠܡܘܼܢ: ܐܵܦ ܟܲܕܼ ܪܲܚܝܼܩ: ܒܲܛܢܵܢܵܐ ܕܒܲܥܒܼܵܕܼܵܘ̈ܗܝ ܡܝܲܬܿܪܹ̈ܐ: ܝܲܬܝܼܪ ܦܲܐܝܵܐ: ܡ̣ܢ ܕܟܲܕܼ ܢܫܲܡܸܫ ܐܸܢܘܿܢ ܒܲܫܚܝܼܡܘܼܬܼ ܡܸܠܬܼܵܐ ܒܲܩܢܘܿܡܹܗ ܟܲܕܼ ܗ̤ܘ ܡܪܲܥ: ܟܡܵܐ ܕܥܲܠ ܐܵܤܝܘܼܬܼܵܐ ܤܢܝܼܩ: ܐܵܦ ܗ̤ܘ ܝܲܬܿܝܼܪ ܡܸܢܗܘܿܢ܀ ܤܲܡܝܵܐ ܓܹܝܪ ܐܸܢ ܠܤܲܡܝܵܐ ܢܕܲܒܲܪ: ܬܪ̈ܲܝܗܘܿܢ ܒܓܼܘܼܡܵܨܵܐ ܢܵܦ̇ܠܝܼܢ. ܕܲܚܠܝܼܡܹ̈ܐ ܠܲܡ ܐܝܼܬܹܝܗ̇ pb. 90 ܡܹܐܟܼܘܼܠܬܼܵܐ ܫܲܪܝܼܪܬܵܐ: ܘܕܲܐܝܠܹܝܢ ܕܐܸܬܼܢܲܦܲܩܘ ܪܸ̈ܓܼܫܲܝܗܘܿܢ ܘܐܸܬܼܚܲܨܲܘ ܠܲܡܩܲܒܵܠܘܼ ܟܠ ܡܹܐܟܼ̈ܠܵܢ. ܗܵܢܵܘ ܕܹܝܢ: ܡ̣ܢ ܟܠ ܦܸܓܼܥ̈ܝܼܢ ܕܲܒܼܪܸ̈ܓܼܫܹܐ. ܒܲܕܼܠܑܵܐ ܡܸܬܼܟܿܪܲܗ ܠܸܒܵܐ: ܡܸܛܠ ܢܘܼܦܵܩܹܗ ܕܒܲܓܼܡܝܼܪܘܼܬܼܵܐ܀ ܐܸܡܲܬܼܝ ܕܹܝܢ ܕܨܵܒܹ̇ܐ ܤܵܛܵܢܵܐ ܕܲܢܛܲܡܲܐ ܪܸܥܝܵܢܵܐ ܙܲܗܝܵܐ ܒܚܘܼ̈ܫܵܒܹܐ ܕܙܵܢܝܘܼܬܼܵܐ: ܠܘܼܩܕܲܡ ܒܫܘܼܒܚܵܐ ܤܪܝܼܩܵܐ ܡܢܲܤܸܐ ܚܘܼܡܤܵܢܹܗ: ܟܲܕܼ ܗ̤ܘ ܫܘܼܪܵܝܵܐ ܕܚܘܼܫܵܒܼܵܐ ܠܵܐ ܕܵܡܹ̇ܐ ܠܲܕܼܚܵܫܘܿܫܹ̈ܐ. ܗܵܕܹܐ ܥܵܒܹ̇ܕܼ ܠܪܸܥܝܵܢܵܐ ܢܛܝܼܪܵܐ: ܗܵܘ̇ ܕܠܵܘ ܦܫܝܼܩܵܐܝܼܬܼ ܡܨܸܐ ܪܵܡܹ̇ܐ ܒܹܗ ܚܘܼܫܵܒܼܵܐ ܤܲܢܝܵܐ ܥܲܪܛܸܠܵܐܝܼܬܼ܀ ܡܵܐ ܕܹܝܢ ܕܲܢܦܲܩ̣ ܡ̣ܢ ܒܹܝܬܼ ܡܸܪܕܹܗ ܗܵܘ̇ ܚܲܤܝܼܢܵܐ ܒܝܲܕܼ ܪܸܥܝܵܐ ܕܲܒܼܚܘܼܫܵܒܹ̈ܐ ܩܲܕܼܡܵܝܹ̈ܐ: ܘܩܲܠܝܼܠ ܐܸܬܼܪܲܚܲܡ ܡ̣ܢ ܬܲܡܵܢ: ܡܲܦܓܲܥ ܒܹܗ ܡܠܘܿܐܹ̈ܐ ܕܙܵܢܝܘܼܬܼܵܐ: ܟܲܕܼ ܡܲܥܒܲܪ ܠܪܸܥܝܵܢܵܐ ܥܲܠ ܨܸܒܼ̈ܘܵܬܼܵܐ ܙܲܠܝܼ̈ܠܵܬܼܵܐ܀ ܠܘܼܩܕܲܡ ܕܹܝܢ ܡܸܬܼܪܗܸܒܼ ܡܸܢܫܹܠܝ ܒܦܸܓܼܥܹܗ ܕܲܒܼܗܹܝܢ: ܡܸܛܠ ܢܘܼܟܵܦܵܐ ܕܚܘܼ̈ܫܵܒܹܐ ܕܲܦܓܲܥ̣ܘ ܒܨܸܒܼ̈ܘܵܬܼܵܐ: ܕܡ̣ܢ ܚܙܵܬܼܗܹܝܢ ܢܙܝܼܪ ܗ̄ܘ̣ܵܐ ܡ̣ܢ ܟܲܕܼܘܼ ܗܵܘܢܵܐ ܡܕܲܒܿܪܵܢܗܘܿܢ. ܒܪܲܡ ܕܹܝܢ ܐܸܬܿܬܲܚܬܝܼ ܡ̣ܢ ܪܵܘܡܵܐ ܕܪܸܢܝܹܗ ܩܲܕܼܡܵܝܵܐ: ܐܵܦܸܢ ܠܵܐ ܐܸܬܿܛܲܡܲܐ. ܐܸܢ ܕܹܝܢ ܠܒܸܤܬܿܪܹܗ ܠܑܵܐ ܥܵܛܹ̇ܦ: ܘܲܠܚܘܼ̈ܫܵܒܹܐ ܩܲܕܼܡܵܝܹ̈ܐ ܡܲܕܸܪܸܟܼ ܚܲܪܝܼܦܵܐܝܼܬܼ: ܕܐܝܼܬܲܝܗܘܿܢ ܥܸܠܬܼܵܐ ܠܚܘܼ̈ܫܵܒܹܐ ܬܪ̈ܲܝܵܢܹܐ: ܡܵܐ ܕܲܒܼܗܹܝܢ ܒܨܸܒܼ̈ܘܵܬܼܵܐ ܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ ܦܵܓܲܥ: ܗܵܝܕܹܝܢ ܗ̤ܘ ܥܝܵܕܼܵܐ: ܡܤܲܡܸܐ ܠܦܘܪܫܵܢܵܗ̇ ܕܢܲܦܫܵܐ ܡ̣ܢ ܐܲܡܝܼܢܘܼܬܼܵܐ ܕܦܸܓܼܥܹ̈ܐ. ܒܲܕܓܼܘܿܢ ܠܦܘܼܬܼ ܟܡܵܝܘܼܬܼܵܐ ܘܲܙܢܵܢܵܝܘܼܬܼܵܐ ܕܚܲܫܵܐ ܩܲܕܼܡܵܝܵܐ: ܗܵܟܲܢܵܐ ܟܕܼܝܼܢܘܼܬܼܵܐ ܕܒܲܬܼܪܲܝܵܢܵܐ܀ ܠܡܸܓܼܢܲܒܼ ܐܸܢܘܿܢ ܠܚܲܫܹ̈ܐ ܒܥܘܼ̈ܗܕܵܢܹܐ ܕܲܡܝܲܬܿܪ̈ܵܬܼܵܐ ܦܫܝܼܩܵܐ ܐܵܦ ܫܲܦܝܼܪܵܐ: ܡ̣ܢ ܕܲܠܡܸܙܟܵܐ ܐܸܢܘܿܢ ܒܐܵܓܼܘܿܢܵܐ܀ ܕܡܵܐ ܕܲܢܦܲܩ̣ܘ ܗܸܢܘܿܢ ܚܲܫܹ̈ܐ ܡ̣ܢ ܐܲܬܼܪܗܘܿܢ: ܘܐܸܬܿܬܿܙܝܼܥܘ ܠܲܡܚܵܘܵܝܘܼ ܢܲܦܫܗܘܿܢ ܒܬܲܟܼܬܿܘܼܫܵܐ: pb. 91 ܗܵܝܕܹܝܢ ܐܵܦ ܨܘܼܪ̈ܵܬܼܵܐ ܘܕܸܡ̈ܘܵܬܼܵܐ ܛܵܒܼܥ̇ܝܼܢ ܒܪܸܥܝܵܢܵܐ. ܬܘܼܩܦܵܐ ܪܲܒܵܐ ܩܢܸܐ ܛܲܟܼܤܵܐ ܗܵܢܵܐ: ܠܡܸܤܲܒܼ ܚܲܝܠܵܐ ܡ̣ܢ ܪܸܥܝܵܢܵܐ. ܘܲܠܬܲܪܥܝܼܬܼܵܐ: ܪܵܘܪܒܼܵܐܝܼܬܼ ܫܵܓܹ̇ܫ ܘܲܡܕܲܠܲܚ. ܒܢܝܼܫܵܐ ܕܹܝܢ ܩܲܕܼܡܵܝܵܐ ܕܐܸܡ̇ܪܹܬܼ: ܐܵܦܠܵܐ ܥܸܩܒܲܝ̈ܗܘܿܢ ܕܚܲܫܹ̈ܐ ܡܸܬܼܝܲܕܼܥܝܼܢ ܒܪܸܥܝܵܢܵܐ: ܡ̣ܢ ܒܵܬܲܪ ܫܘܼܢܵܝܗܘܿܢ. ܠܕܲܟܼܝܘܼܬܼܵܐ ܡܢܲܛܪܝܼܢ ܥܲܡܠܹ̈ܐ ܦܲܓܼܪ̈ܵܢܵܝܹܐ: ܘܗܸܓܼܝܵܢܵܐ ܕܒܲܟܼܬܼܝܼ̈ܒܼܵܐ. ܘܲܠܗܘܿܢ ܠܥܲܡܠܹ̈ܐ ܡܫܲܪܪܝܼܢ: ܤܲܒܼܪܵܐ ܘܕܸܚܠܬܼܵܐ. ܘܲܠܤܲܒܼܪܵܐ ܘܲܠܕܸܚܠܬܼܵܐ ܡܩܝܼܡܝܼܢ ܒܪܸܥܝܵܢܵܐ: ܪܲܚܝܼܩܘܼܬܼܵܐ ܕܡ̣ܢ ܒܢܲܝ̈ܢܵܫܵܐ: ܘܒܼܵܥܘܼܬܼܵܐ ܐܲܡܝܼܢܬܼܵܐ. ܥܕܲܡܵܐ ܕܲܡܩܲܒܸܠ ܒܲܪܢܵܫܵܐ ܦܵܪܲܩܠܹܝܛܵܐ: ܥܲܠ ܪ̈ܘܼܫܡܹܐ ܕܲܕܼܝܘܿܬܼܵܐ ܤܢܝܼܩ. ܕܲܒܼܨܘܼܪ̈ܵܬܼܵܐ: ܥܘܼ̈ܗܕܵܢܹܐ ܡܵܘܬܿܪ̈ܵܢܹܐ ܢܸܩܒܿܘܿܥ ܒܠܸܒܹܗ. ܕܒܲܐܡܝܼܢܘܼ ܡ̣ܢ ܗܸܓܼܝܵܢܵܐ ܕܲܒܼܗܘܿܢ: ܢܚܲܕܸܬܼ ܐܸܢܘܿܢ ܠܓܼܘܪ̈ܵܓܹܐ ܕܲܡܝܲܬܿܪܘܼܬܼܵܐ: ܘܲܙܗܝܼܪܘܼܬܼܵܐ ܕܡ̣ܢ ܐܘܼܪ̈ܚܵܬܼܵܐ ܩܲܛܝܼ̈ܢܵܬܼܵܐ ܕܲܚܛܝܼܬܼܵܐ ܢܸܚܙܸܐ ܒܢܲܦܫܹܗ: ܒܝܲܕܼ ܕܚܲܝܠܵܐ ܐܵܚ̇ܘܿܕܼܵܐ ܕܪܘܼܚܵܐ: ܠܑܵܐ ܥܕܲܟܹܝܠ ܩܢܸܐ: ܕܕܵܚܹ̇ܩ ܠܛܘܼܥܚܲ ܗܵܝ̇ ܕܲܡܚܲܠܨܵܐ ܥܘ̈ܗܕܵܢܹܐ ܡܵܘܬܿܪ̈ܵܢܹܐ ܡ̣ܢ ܒܲܪܢܵܫܵܐ: ܘܲܡܩܲܪܒܼܵܐ ܠܘܵܬܹܗ ܫܘܼܗܵܝܵܐ ܒܝܲܕܼ ܦܘܼܠܗܵܕܵܐ ܕܗܵܘܢܵܐ܀ ܡܵܐ ܕܹܝܢ ܕܚܲܝܠܵܐ ܕܪܘܼܚܵܐ ܥܲܠ̣ ܘܲܫ̣ܪܵܐ ܒܚܲܝ̈ܠܹܝܗ̇ ܡܸܬܼܝܲܕܼܥܵܢܹ̈ܐ ܕܢܲܦܫܵܐ ܦܵܠܘܿܚܬܼܵܐ: ܗܵܝܕܹܝܢ ܚܠܵܦ ܢܵܡܘܿܤܹ̈ܐ ܕܒܲܕܼܝܘܿܬܼܵܐ: ܡܸܬܼܩܲܒܼܥܝܼܢ ܒܠܸܒܵܐ ܦܘܼ̈ܩܕܵܢܹܐ ܕܪܘܼܚܵܐ. ܗܵܠܹܝܢ ܕܗ̤ܘ ܠܸܒܵܐ ܟܲܤܝܵܐܝܼܬܼ ܡ̣ܢ ܪܘܼܚܵܐ ܝܵܠܹ̇ܦ: ܕܠܵܐ ܡܸܤܬܢܸܩ ܥܲܠ ܬܲܥܕܼܝܼܪܵܐ ܕܲܡ̈ܠܘܿܐܹܐ ܡܸܬܼܪ̈ܲܓܼܫܵܢܹܐ ܒܝܲܕܼ ܡܸܨܥܵܝܘܼܬܼܵܐ ܕܪܸ̈ܓܼܫܹܐ܀ ܟܠ ܟܡܵܐ ܕܡ̣ܢ ܗܝܼܘܼ̈ܠܹܐ ܝܵܠܹ̇ܦ ܗܵܘܢܵܐ: ܢܲܩܝܼܦܵܐ ܠܝܘܼܠܦܵܢܹܗ ܛܘܼܥܝܲܝ ܘܡܸܬܼܢܲܫܝܵܢܘܼܬܼܵܐ. ܟܲܕܼ ܕܹܝܢ ܗܘ̤ܵܐ ܝܘܼܠܦܵܢܹܗ ܒܐܲܝܠܹܝܢ ܕܠܵܐ ܡܸܬܼܚܲܒ̈ܠܵܢ: ܘܐܵܦ ܥܘܼܗܕܵܢܹܗ ܕܠܵܐ ܚܒܼܵܐ ܩܵܐܹ̇ܡ ܒܡܸܬܼܡܲܕܿܥܵܢܘܼܬܼܵܐ ܕܲܒܼܗܹܝܢ܀ ܐܝܼܬܼ ܚܘܼ̈ܫܵܒܹܐ ܛܵܒܹ̈ܐ: pb. 92 ܘܐܝܼܬܼ ܨܸܒܼܝܵܢܵܐ ܛܵܒܼܵܐ. ܐܝܼܬܼ ܚܘܼܫܵܒܹܐ ܤܢܲܝ̈ܵܐ: ܘܐܝܼܬܼ ܠܸܒܵܐ ܤܲܢܝܵܐ. ܩܲܕܼܡܵܝܹ̈ܐ ܓܹܝܪ: ܒܸܠܥܵܕܼ ܡ̣ܢ ܬܪ̈ܲܝܵܢܹܐ: ܒܨܝܼܪ ܡܸܬܼܚܲܫܒܿܝܼܢ ܠܦܘܼܪܥܵܢܘܼܬܼܵܐ. ܗܵܢܘܿܢ ܡܲܢ: ܙܵܘ̈ܥܹܐ ܐܸܢܘܿܢ ܕܥܵܒܼ̇ܪܝܼܢ ܒܓܼܵܘ ܪܸܥܝܵܢܵܐ: ܐܲܝܟܼ ܪ̈ܘܼܚܹܐ ܕܥܵܒܼܪ̈ܵܢ ܒܝܲܡܵܐ: ܘܡܸܬܿܬܿܪܝܼܡܝܼܢ ܓܲܠܠܹ̈ܐ. ܗܵܠܹܝܢ ܓܹܝܪ: ܥܸܩܵܪܹ̈ܐ ܐܸܢܘܿܢ. ܘܲܠܦܘܼܬܼ ܢܝܼܫܵܐ ܕܐܲܚܝܼܕܼܵܐ ܫܲܬܼܐܸܤܬܼܵܐ: ܗܵܟܲܢܵܐ ܗܵܘܹ̇ܐ ܦܘܼܪܥܵܢܵܐ ܛܵܒܼܵܐ ܐܵܘ ܒܝܼܫܵܐ: ܘܠܵܘ ܐܲܝܟܼ ܡܸܬܿܬܿܙܝܼܥܵܢܘܼܬܼܵܐ ܕܚܘܼ̈ܫܵܒܹܐ. ܢܲܦܫܵܐ ܓܹܝܪ ܠܲܡܵܙܥܘܼ ܚܘܼ̈ܫܵܒܹܐ ܡܫܲܚ̈ܠܦܹܐ: ܠܵܐ ܫܵܠ̇ܝܵܐ. ܐܸܢ ܕܹܝܢ ܐܲܢ̄ܬܿ ܠܟܼܠ ܚܲܕܼ ܡ̣ܢ ܗܵܠܹܝܢ ܦܘܼܪܥܵܢܵܐ ܡܲܩܸܨ ܐܲܢ̄ܬܿ: ܟܲܕܼ ܥܸܩܵܪܵܐ ܠܲܝܬܿ ܠܗܘܿܢ ܡ̣ܢ ܠܬܲܚܬܿ: ܩܲܪܝܼܒܼ ܐܲܢ̄ܬܿ ܡܵܕܹܝܢ ܕܐܵܠܹܦ ܙܲܒܼ̈ܢܝܼܢ ܒܚܲܕܼ ܝܵܘܡܵܐ: ܬܫܲܚܠܸܦ ܛܵܒܼ̈ܬܼܵܟܼ ܘܲܓܼܙܵܪ ܕܝܼܢܵܟܼ. ܦܲܪܘܼܓܼܵܐ ܕܠܑܵܐ ܓܸܦܹ̈ܐ ܐܝܼܬܼܘܗܝ: ܗܵܘܢܵܐ ܕܚܲܕܼܬܼܵܐܝܼܬܼ ܢܦܲܩ̣ ܡ̣ܢ ܥܘܼܪ̈ܙܵܠܲܝ ܚܲܫܹ̈ܐ ܒܥܲܡܠܹ̈ܐ ܕܲܬܼܝܵܒܼܘܼܬܼܵܐ. ܘܲܒܼܥܸܕܵܢܵܐ ܕܲܨܠܘܿܬܼܵܐ ܐܵܠܹ̇ܝܨ ܢܲܦܫܹܗ ܠܡܸܬܼܥܲܠܵܝܘܼ ܡ̣ܢ ܐܲܪ̈ܥܵܢܵܝܵܬܼܵܐ: ܘܠܵܐ ܡܸܫܟܲܚ. ܐܸܠܵܐ ܥܕܲܟܹܝܠ ܠܐܲܦܲܝ̈ ܐܲܪܥܵܐ ܡܫܲܦܸܦ: ܠܐܲܝܟܵܐ ܕܪܵܫܹ̇ܦ ܚܸܘܝܵܐ. ܡܟܲܢܸܫ ܕܹܝܢ ܚܘܼܫܵܒܼܵܘ̈ܗܝ ܒܝܲܕܼ ܩܸܪܝܵܢܵܐ ܘܥܲܡܠܹ̈ܐ ܘܕܸܚܠܬܼܵܐ: ܘܪܸܢܝܵܐ ܕܲܙܢܲܝ̈ ܡܝܲܬܿܪܘܼܬܼܵܐ. ܠܒܲܪ ܡ̣ܢ ܗܵܠܹܝܢ ܓܹܝܪ: ܡܸܕܸܡ ܐ̄ܚܪܹܝܢ ܠܵܐ ܝܵܕܲܥ̇. ܘܐܵܦ ܗܵܠܹܝܢ: ܥܸܕܵܢܵܐ ܙܥܘܿܪܵܐ ܡܢܲܛܪܝܼܢ ܠܗܵܘܢܵܐ ܟܲܕܼ ܕܟܸܐ. ܘܬܼܘܼܒܼ ܐܸܬܼ݂ܵܘ ܥܘܼ̈ܗܕܵܢܹܐ: ܘܲܕܼܠܲܚ̣ܘ ܘܛܲܢܸܦ̣ܘ ܠܠܸܒܵܐ. ܠܵܐ ܓܹܝܪ ܐܲܪܓܸܫ̣ ܥܕܲܟܹܝܠ ܒܐܵܐܲܪ ܡܫܲܝܢܵܐ ܘܚܹܐܪܵܝܵܐ: ܕܲܕܼܠܵܐ ܥܘܼܗܕܵܢܵܐ ܕܨܸܒܼ̈ܘܵܬܼܵܐ ܥܸܕܵܢܵܐ ܤܲܓܿܝܼܐܵܐ ܡܟܲܢܸܫ ܗܵܘܢܵܐ ܟܲܕܼ ܒܗܝܼܠ. ܥܕܲܟܹܝܠ ܓܹܝܪ ܐܸܒܼܪܹ̈ܐ ܒܸܤܪ̈ܵܢܵܝܬܼܵܐ ܐܝܼܬܼ ܠܹܗ: ܗܵܢܵܘ ܕܹܝܢ: ܡܝܲܬܿܪ̈ܵܬܼܵܐ ܦܲܓܼܪ̈ܵܢܵܝܵܬܼܵܐ pb. 93 ܕܲܒܼܓܸܠܝܵܐ ܡܸܬܼܦܲܠ̈ܚܵܢ. ܠܬܹܐܘܿܪܝܼܵܐ ܕܝܼܠܗܹܝܢ ܕܲܡܝܲܬܿܪ̈ܵܬܼܵܐ ܕܦܵܠܲܚ: ܠܑܵܐ ܥܕܲܟܹܝܠ ܚ̣ܙܵܐ ܘܐܲܪܓܸܫ̣ ܕܗ̤ܝ ܐܝܼܬܹܝܗ̇ ܓܸܦܹ̈ܐ ܕܗܵܘܢܵܐ: ܕܒܼܵܗ̇ ܡܸܬܼܩܲܪܲܒܼ ܠܘܵܬܼ ܫܡܲܝܵܢ̈ܝܬܼܵܐ ܘܡܸܬܼܪܲܚܲܩ ܡ̣ܢ ܐܲܪܥܵܐ. ܟܡܵܐ ܕܡܸܪܲܓܼܫܵܢܵܐܝܼܬܼ ܘܲܒܼܨܸܒܼ̈ܘܼܵܬܼܵܐ ܡܫܲܡܸܫ ܒܲܪܢܵܫܵܐ ܠܐܲܠܵܗܵܐ: ܛܲܒܼ̈ܥܹܐ ܕܨܸܒܼ̈ܘܵܬܼܵܐ ܡܸܬܼܪܲܡܫܝܼܢ ܒܚܘܼܫܵܒܼܵܘ̈ܗܝ: ܘܐܸܤܟܹܡܹ̈ܐ ܕܓܼܘܼ̈ܫܡܹܐ ܪܵܢܝܵܐ ܬܲܪܥܝܼܬܹܗ ܒܗܵܢܹܝܢ ܐܲܠܵܗܵܝ̈ܬܼܵܐ. ܡܵܐ ܕܹܝܢ ܕܐܲܪܓܸܫ̣ ܒܗܵܘ̇ ܕܲܠܓܼܵܘ ܡ̣ܢ ܨܸܒܼ̈ܘܵܬܼܵܐ: ܗܵܝܕܹܝܢ ܠܦܘܼܬܼ ܡܫܘܼܚܬܼܵܐ ܕܡܲܪܓܫܵܢܘܼܬܹܗ: ܗܵܘܹ̇ܐ ܐܵܦ ܗ̤ܘ ܪܸܥܝܵܢܹܗ ܡܪܲܝܲܡ ܡ̣ܢ ܐܸܤܟܹܡܹ̈ܐ ܕܨܸܒܼ̣̱̈ܘܵܬܼܵܐ ܙܲܒܼܢܵܐ ܒܙܲܒܼܢܹܗ. ܥܲܝܢܵܘ̈ܗܝ ܕܡܵܪܝܵܐ ܥܲܠ ܡܲܟܿܝܼ̈ܟܹܐ: ܘܐܸܕܼܢܵܘ̈ܗܝ ܠܡܸܫܡܲܥ ܐܸܢܘܢ. ܨܠܘܿܬܹܗ ܕܡܲܟܿܝܼܟܼܵܐ: ܐܲܝܟܼ ܕܡ̣ܢ ܦܘܼܡܵܐ ܠܐܸܢܵܐ. ܡܵܪܝܵܐ ܐܲܠܵܘܗܝ: ܢܸܢܼܡܲܪ ܚܸܫܘܿܟܼܝ. ܒܙܲܒܼܢܵܐ ܕܐܝܼܬܲܝܟ ܒܫܸܠܝܵܐ ܥܲܡ ܦܘܼܠܚܵܢܵܐ ܫܲܦܝܼܪܵܐ ܕܡܲܟܿܝܼܟܼܘܼܬܼܵܐ: ܡܵܐ ܕܩܸܪܒܲܬ̤ ܠܵܗ̇ ܢܲܦܫܵܟܼ ܠܡܸܦܲܩ ܡ̣ܢ ܬܚܹܝܬܼ ܥܲܡܛܵܢܵܐ: ܗܵܕܹܐ ܐܵܬ̤ܵܐ ܬܸܗܘܸܐ ܠܵܟܼ: ܝܵܩܹ̇ܕܼ ܠܸܒܵܟܼ ܘܪܵܬܲܚ ܐܲܝܟܼ ܕܲܒܼܢܘܼܪܑܵܐ ܠܸܠܝܵܐ ܘܐܝܼܡܵܡܵܐ. ܐܲܝܟܲܢܵܐ ܕܲܠܟܼܠܗܹܝܢ ܐܲܪ̈ܥܵܢܝܬܼܵܐ: ܩܸܛܡܵܐ ܘܙܸܒܼܠܵܐ ܬܸܚܫܘܿܒܼ. ܗܵܢܵܘ ܕܹܝܢ: ܕܐܵܦܠܵܐ ܠܤܲܝܒܵܪܬܵܐ ܬܸܗܢܸܐ ܠܵܟܼ ܠܡܸܩܪܲܒܼ: ܒܗܲܢܝܼܐܝܼܬܼܵܐ ܕܚܘܼ̈ܫܵܒܹܐ ܚܲܕ̈ܬܹܐ ܘܚܲܡܝܼ̈ܡܹܐ: ܕܐܲܡܝܼܢܵܐܝܼܬܼ ܒܢܲܦܫܵܟܼ ܡܸܬܿܬܿܙܝܼܥܝܼܢ. ܘܡ̣ܢ ܫܹܠܝ ܡܸܬܼܝܼܗܸܒܼ ܠܵܟ ܡܲܒܿܘܼܥܵܐ ܕܕܸܡܥܹ̈ܐ: ܐܲܝܟܲܢܵܐ ܕܐܲܝܟܼ ܡܲܝ̈ܵܐ ܕܢܲܚ̈ܝܠܹܐ: ܫܵܦ̈ܥܵܢ ܡ̣ܢ ܥܲܝܢܲܝ̈ܟ ܕܠܵܐ ܥܸܨܝܵܢ: ܟܲܕܼ ܚܠܝܼܛܵܢ ܒܟܼܠܗܘܿܢ ܦܘܼܠܚܵܢܲܝ̈ܟ. ܗܵܢܵܘ ܕܹܝܢ: ܥܲܡ ܩܸܪܝܵܢܵܟܼ ܘܥܲܡ ܨܠܘܿܬܼܵܟܼ: ܘܥܲܡ ܬܸܫܡܸܫܬܵܟܼ ܘܥܲܡ ܗܸܪܓܵܟܼ: ܘܥܲܡ ܤܲܝܒܵܪܬܵܟܼ ܘܥܲܡ ܫܸܩܝܵܟܼ: ܘܥܲܡ ܟܠ ܕܥܵܒܹ̇ܕܼ ܐܲܢ̄ܬܿ: ܕܸܡܥܹ̈ܐ ܡܙܲܝܼ̈ܓܼܵܢ ܒܗܘܿܢ. ܡܵܐ ܕܹܝܢ ܕܲܚ̣ܙܲܝܬܿ ܗܵܠܹܝܢ ܒܢܲܦܫܵܟܼ: ܐܸܬܼܠܲܒܲܒܼ: pb. 94 ܥ̣ܒܲܪܬܿ ܠܝܲܡܵܐ. ܘܐܵܘܤܸܦ ܥܲܡܠܹ̈ܐ: ܘܫܲܦܝܼܪ ܐܲܚܘܿܕܼ ܘܗܝܼܪܘܼܬܼܵܐ: ܕܬܸܤܓܸܐ ܛܲܝܒܘܼܬܼܵܐ ܝܵܘܡܵܐ ܡ̣ܢ ܝܵܘܡܵܐ. ܥܕܲܡܵܐ ܕܒܼܗܵܠܹܝܢ ܬܸܦܓܲܥ: ܠܵܐ ܥܕܲܟܹܝܠ ܫܸܠܡܲܬ̤ ܐܘܼܪܚܵܟܼ ܠܡܸܡܸܛܵܐ ܠܛܘܼܪܹܗ ܕܐܲܠܵܗܵܐ. ܐܸܢܕܹܝܢ ܡ̣ܢ ܒܵܬܲܪ ܕܐܸܫܟܲܚ̣ܬܿ ܓܵܙ ܠܗܹܝܢ: ܘܚܲܡܝܼܡܘܼܬܼܵܐ ܗܵܝ̇ ܫܗܵܬ̤ ܠܵܗ̇: ܕܠܵܐ ܚܘܼܠܵܦܵܐ ܕܡܸܕܸܡ ܐ̄ܚܪܹܝܬ ܕܒܼܵܬܼܪܗܹܝܢ ܥܬܼܝܼܕܼ ܐܲܢ̄ܬܿ ܠܡܸܤܲܒܼ: ܘܵܝ ܠܵܟܼ ܡܵܢ ܐܵܘܒܸܕܬܿ! ܐܵܘ ܐܸܬܿܬܿܪܝܼܡ̣ܬܿ: ܐܵܘ ܐܸܬܼܪܲܦ̣ܝܼܬܿ. ܕܡܵܢܵܐ ܗܵܟܹܝܠ ܐܝܼܬܼܵܘܗܝ ܗܵܘ̇ ܡܸܕܸܡ ܕܤܝܼܡ ܒܵܬܲܪ ܕܸܡ̈ܥܹܐ: ܕܡܵܐ ܕܲܥ̣ܒܲܪ ܐ̄ܢܵܫ ܡܸܢܗܹܝܢ ܒܹܗ ܦܵܓܲܥ. ܘܡܵܢܵܐ ܐ̄ܚܪܹܢܵܐ ܐܵܦ ܒܵܬܲܪ ܗܵܘ̇: ܪܵܫܡܝܼܢܲܢ ܠܬܲܚܬܿ: ܒܪܹ̈ܫܹܐ ܗܵܢܘܿܢ ܕܥܲܠ ܝܘܼܒܵܠܵܐ ܕܕܼܘܼܒܵܪܹ̈ܐ: ܐܲܝܟܼ ܡܸܕܸܡ ܕܐܸܐܼܢܲܗܲܪܢܲܢ ܡ̣ܢ ܟܬܼܵܒܹ̈ܐ: ܘܡ̣ܢ ܐܲܒܼܵܗ̈ܬܼܵܐ ܕܐܸܬܼܗܝܡܲܢܘ ܥܲܠ ܐ̄ܪ̈ܵܙܹܐ ܕܐܲܝܟܼ ܗܵܠܹܝܢ܀ ܐܸܢ ܠܲܝܬܿ ܠܵܟܼ ܥܲܡܠܹ̈ܐ: ܠܵܐ ܬܡܲܠܸܠ ܥܲܠ ܡܝܲܬܿܪܘܼܬܼܵܐ. ܝܲܩܝܼܪܝܼܢ ܥܲܠ ܐܲܠܵܗܵܐ ܐܘܼ̈ܠܵܨܢܹܐ ܕܲܚܠܵܦ ܙܲܕܝܼܩܘܼܬܼܵܐ: ܝܲܬܿܝܼܪ ܡ̣ܢ ܟܠ ܢܸܕܼܪܹ̈ܐ ܘܩܘܼܪ̈ܒܵܢܹܐ. ܘܪܹܚܝ ܕܘܼܥܬܼܵܐ ܕܠܹܐܘܲܬܼܗܘܿܢ: ܡ̣ܢ ܟܠܗܘܿܢ ܥܸܩܵܪܹ̈ܐ ܚܲܠܝܼܝ̈ ܪܹܚܵܐ ܘܗܹܪ̈ܘܿܡܹܐ ܓܒܲܝ̈ܵܐ܀ ܟܠ ܡܝܲܬܿܪܘܼܬܼܵܐ ܕܹܝܢ: ܕܦܲܓܼܪܵܐ ܒܵܗ̇ ܠܵܐ ܡܸܬܼܐܠܸܨ: ܚܲܝܛܵܐ ܚܫܘܿܒܹܝܗ̇ ܕܠܵܐ ܢܲܦܫܵܐ. ܩܘܼܪ̈ܒܵܢܲܝܗܘܿܢ ܕܙܲܕܝܼ̈ܩܹܐ: ܕܸܡܥܹ̈ܐ ܕܒܼܵܒܼ̈ܬܼܗܘܼܢ. ܘܕܸܒܼܚܲܝ̈ܗܘܿܢ ܡܩܲܒ̈ܠܹܐ: ܬܸܢ̈ܚܵܬܼܵܐ ܕܫܲܗܪ̈ܲܝܗܘܿܢ. ܓܵܥܹ̇ܝܢ ܩܲܕܝܼ̈ܫܹܐ ܡ̣ܢ ܝܘܼܩܪܹܗ ܕܦܲܓܼܪܵܐ ܘܡܸܬܿܬܲܢܚܝܼܢ: ܘܲܒܼܚܲܫܵܐ ܡܫܲܕܪܝܼܢ ܨܠܵܘܵܬܼ̈ܗܘܿܢ ܠܘܵܬܼ ܐܲܠܵܗܵܐ. ܘܲܠܩܵܠ ܓܥܵܬܼܗܘܿܢ: ܚܲܝ̈ܠܵܘܵܬܼܵܐ ܩܲܕܝܼ̈ܫܹܐ ܨܵܝ̇ܒܿܝܼܢ pb. 95 ܠܘܲܥܕܲܝ̈ܗܘܿܢ: ܕܲܢܠܲܒܿܒܼܘܼܢ ܐܸܢܘܿܢ ܒܤܲܒܼܪܵܐ ܘܲܢܒܲܝܐܘܼܢ ܐܸܢܘܿܢ. ܫܵܘ̈ܬܵܦܹܐ ܐܸܢܘܿܢ ܡܲܠܲܐܟܹ̈ܐ ܩܲܕܝܼ̈ܫܹܐ ܒܢܸܤܝ̈ܘܿܢܹܐ ܘܚܲܫܹ̈ܐ ܠܩܲܕܝܼ̈ܫܹܐ: ܒܩܲܪܝܼܒܼܘܼܬܼܗܘܿܢ ܕܲܠܘܵܬܼܗܘܿܢ܀ ܥܲܡܠܹ̈ܐ ܘܡܲܟܿܝܼܟܼܘܼܬܼܵܐ: ܐܲܠܵܗܵܐ ܥܵܒܼ̇ܕܝܼܢ ܒܐܲܪܥܵܐ ܠܒܲܪܢܵܫܵܐ. ܗܲܝܡܵܢܘܼܬܼܵܐ ܕܹܝܢ ܘܲܡܪܲܚܡܵܢܘܼܬܼܵܐ: ܠܫܲܦܝܘܼܬܼܵܐ ܡܩܲܪܒܼܝܼܢ ܩܲܠܝܼܠܵܐܝܼܬ. ܪܸܬܼܚܵܐ ܘܲܬܼܒܼܵܪ ܠܸܒܵܐ: ܒܲܚܕܼܵܐ ܢܲܦܫܵܐ ܠܵܐ ܗܵܘܹ̇ܝܢ. ܐܲܝܟܼ ܕܐܵܦܠܵܐ ܠܐܲܝܠܹܝܢ ܕܪܵܘܹܝܢ: ܟܘܼܒܵܫܵܐ ܕܬܲܪܥܝܼܬܼܵܐ. ܡܵܐ ܕܐܸܬܼܝܼܗܸܒܼ ܪܸܬܼܚܵܐ: ܡܸܫܬܲܩܠܵܐ ܟܲܪܝܘܼܬܼܵܐ ܘܐܲܒܼܝܼܠܘܼܬܼܵܐ. ܚܲܡܪܵܐ ܠܲܦܨܝܼܚܘܼܬܼܵܐ: ܘܪܸܬܼܚܵܐ ܠܚܲܕܼܘܼܬܼܵܐ ܕܢܲܦܫܵܐ ܡܸܬܼܝܲܗܒܿܝܼܢ. ܗܵܘ̇ ܡܲܢ: ܠܓܼܘܼܫܡܵܐ ܡܲܝܸܡ. ܡܸܠܲܬܼ ܐܲܠܵܗܵܐ ܕܹܝܢ: ܠܬܲܪܥܝܼܬܼܵܐ. ܐܲܝܠܹܝܢ ܕܲܒܼܪܸܬܼܚܵܐ ܡܸܫܬܲܓܼܪܝܼܢ: ܒܗܸܪܓܵܐ ܕܤܲܒܼܪܵܐ ܡܸܬܼܚܲܛܦܝܼܢ ܒܚܘܼܫܵܒܲܝ̈ܗܘܿܢ ܠܥܵܠܡܵܐ ܕܲܥܬܼܝܼܕܼ. ܐܲܝܟܼ ܕܐܵܦ ܗܵܢܘܿܢ ܕܲܒܼܚܲܡܪܵܐ ܪܵܘܹܝܢ: ܡܸܬܿܬܿܨܝܼܪܝܼܢ ܩܕܼܵܡܲܝܗܘܿܢ ܗܲܓܵܓܹ̈ܐ ܡܫܲܚ̈ܠܦܹܐ. ܗܵܟܲܢܵܐ ܘܗܵܘ̇ ܕܲܒܼܤܲܒܼܪܵܐ ܕܲܥܬܼܝܼ̈ܕܼܵܬܼܵܐ ܪܵܘܹ̇ܐ ܘܡܸܫܬܲܠܗܲܒܼ: ܠܵܐ ܐܘܼܠܨܵܢܵܐ ܝܵܕܲܥ̇: ܘܠܵܐ ܥܵܠܡܵܐ: ܘܠܵܐ ܡܸܕܸܡ ܕܒܹܗ. ܗܵܠܹܝܢ ܠܲܦܫܝܼ̈ܛܲܝ ܠܸܒܵܐ ܘܪ̈ܵܬܼܝܲܚ ܒܤܲܒܼܪܵܐ ܓܵܕܼ̈ܫܵܢ. ܘܤܲܓܝܼ̈ܐܵܬܼܵܐ ܐܲܝܠܹܝܢ ܕܒܼܵܬܲܪ ܥܲܡܠܹ̈ܐ ܢܲܓܼܝܼܪܹ̈ܐ ܕܕܲܟܼܝܘܼܬܼܵܐ ܥܬܝܼ̈ܕܼܵܢ ܠܡܸܗܘܵܐ: ܠܘܵܬܼ ܐܲܝܠܹܝܢ ܕܲܒܼܝܘܼܒܵܠܵܐ ܪܵܕܹܝܢ ܒܕܼܘܼܒܵܪܵܐ: ܗܵܠܹܝܢ ܒܪܹܫ ܐܘܼܪܚܵܐ ܛܵܥ̇ܡܝܼܢ: ܒܗܲܝܡܵܢܘܼܬܼܵܐ ܒܲܠܚܘܿܕܼ ܕܢܲܦܫܵܐ. ܟܠ ܕܨܵܒܹ̇ܐ ܡܵܪܝܵܐ ܥܵܒܹ̇ܕܼ܀ ܛܘܼܒܲܝܗܘܿܢ ܠܐܲܝܠܹܝܢ ܕܫܲܡܲܪܘ ܢܲܦܫܗܘܿܢ ܒܝܲܡܵܐ ܕܐܘܼ̈ܠܨܵܢܹܐ ܦܫܝܼܛܵܐܝܼܬܼ ܘܲܕܼܠܵܐ ܥܘܼܩܵܒܼ ܒܪܸܬܼܚܵܐ ܕܒܲܐܠܵܗܵܐ: ܘܠܵܐ ܐܲܗܦܸܟܼܘ ܚܲܨܵܐ: ܕܗܸܢܘܿܢ ܡܸܬܼܦܲܠܛܝܼܢ ܩܲܠܝܼܠܵܐܝܼܬܼ ܠܲܠܡܹܐܢܵܐ ܕܡܘܼ̈ܠܟܵܢܹܐ: ܘܢܵܚ̇ܝܼܢ ܒܐܵܘܵܢܹ̈ܐ ܗܵܢܘܿܢ ܕܲܠܗܘܿܢ ܡܡܲܢܥܝܼܢ ܟܠܗܘܿܢ ܥܵܡ̈ܠܲܝ ܫܲܦܝܼܪ. ܘܡܸܬܼܒܲܝܐܝܼܢ ܡ̣ܢ ܛܘܼܪ̈ܵܦܲܝܗܘܿܢ: ܘܕܼܵܝ̇ܨܝܼܢ ܒܚܲܕܼܘܼܬܼܵܐ pb. 96 ܕܤܲܒܼܪܗܘܿܢ. ܐܲܝܠܹܝܢ ܕܲܒܼܤܲܒܼܪܵܐ ܪܵܗ̇ܛܝܼܢ: ܠܢܸܟܼܝܵܢܹ̈ܐ ܕܒܼܐܘܼܪܚܵܐ ܠܵܐ ܡܸܬܼܪܡܹܝܢ ܚܵܙܹ̇ܝܢ: ܐܵܦܠܑܵܐ ܡܸܤܬܲܦܩܝܼܢ ܠܲܡܥܲܩܵܒܼܘܼ ܕܕܲܐܝܟܼ ܗܵܠܹܝܢ. ܡܵܐ ܕܹܝܢ ܕܲܤܠܸܩ̣ ܡ̣ܢ ܝܲܡܵܐ: ܗܵܝܕܹܝܢ ܡܸܬܼܚܙܹܝܢ ܠܗܘܿܢ: ܘܲܡܫܲܒܿܚܝܼܢ ܠܐܲܠܵܗܵܐ: ܕܐܲܝܟܲܢ ܐܸܬܼܢܛܲܪܘ ܒܲܝܢܵܬܼ ܟܠܗܘܿܢ ܗ̇ܢܘܿܢ ܡܲܚܫܘܼ̈ܠܹܐ ܘܲܫܩܝܼ̈ܦܹܐ ܤܲܓܝܼ̈ܐܹܐ: ܟܲ݊ܕܼ ܗܸܢ̣ܘܿܢ ܠܵܐ ܝܑܼܕܲܥ̣ܘ. ܒܗܵܝ̇ ܕܠܵܐ ܐܸܬܼܒܿܛܸܠ ܠܗܘܿܢ ܠܡܸܬܲܠ ܢܲܦܫܗܘܿܢ ܠܲܡܚܵܪ ܒܕܲܐܝܟܼ ܗܵܠܹܝܢ. ܐܲܝܠܹܝܢ ܕܹܝܢ ܕܬܲܪ̈ܥܝܵܬܼܵܐ ܤܒܼܝܼ̈ܤܵܬܼܵܐ ܪܵܢܹܝܢ: ܘܨܵܒܹ̇ܝܢ ܕܡܲܤܓܹܝܢ ܡܸܬܼܚܲܟܿܡܝܼܢ: ܘܝܵܗ̇ܒܿܝܼܢ ܢܲܦܫܗܘܿܢ ܠܗܘܼܦܵܟܼ ܚܘܼ̈ܫܵܒܹܐ ܘܲܠܕܸܚܠܬܼܵܐ: ܘܩܵܝ̇ܡܝܼܢ ܠܥܘܼ̈ܬܵܕܹܐ ܤܲܓܝܼ̈ܐܹܐ: ܘܲܠܡܸܚܙܵܐ ܘܲܠܡܸܬܼܚܫܵܒܼܘܼ ܥܸܠ̈ܠܵܬܼܵܐ ܕܢܸܟܼܝܵܢܹ̈ܐ ܘܚܘܼ̈ܫܵܒܹܐ ܪ̈ܦܲܝܵܐ: ܗܵܠܹܝܢ ܐܲܝܟܼ ܕܲܒܼܤܘܿܓܼܵܐܐ ܥܲܠ ܬܪܲܥ ܒܵܬܲܝ̈ܗܘܿܢ ܡܸܫܬܲܟܼܚܝܼܢ ܐܲܡܝܼܢܵܐܝܼܬܼ. ܚܒܸܢܵܢܵܐ ܠܲܡ ܡܵܐ ܕܡܸܫܬܲܕܲܪ ܐܵܡܲ݁ܪ: ܐܲܪܝܵܐ ܒܐܘܼܪܚܵܐ: ܘܩܸܛܠܵܐ ܒܹܝܬܼ ܫܘܼ̈ܩܹܐ. ܘܐܲܝܟܼ ܗܵܢܘܿܢ ܕܐܸܡ݂ܲܪܘ: ܕܲܒܼ̈ܢܲܝ ܓܲܢ̄ܒܵܪܹ̈ܐ ܚܙܲܝܢ ܬܲܡܵܢ: ܘܐܲܝܟܼ ܩܲܡ̈ܨܹܐ ܗ̤ܘܲܝܢ ܒܥܲܝܢܲܝ̈ܗܘܿܢ. ܘܲܡܕܸܝ̈ܢܵܬܼܗܘܿܢ: ܕܚܲܤܝܼ̈ܢܵܢ. ܘܤܵܠ̇ܩܝܼܢ ܫܘܼܪ̈ܲܝܗܘܿܢ: ܥܕܲܡܵܐ ܠܲܫܡܲܝܵܐ. ܗܵܠܹܝܢ ܐܸܢܘܿܢ: ܕܲܒܼܥܸܕܵܢ ܡܵܘܬܵܐ ܥܲܠ ܪܹܫ ܐܘܼܪܚܗܘܿܢ ܡܸܫܬܲܟܼܚܝܼܢ. ܗܵܠܹܝܢ ܕܐܲܡܝܼܢܵܐܝܼܬܼ ܡܸܬܼܚܲܟܵܡܘܼ ܡܸܬܼܚܲܟܿܡܝܼܢ: ܠܲܡܫܲܪܵܝܘܼ ܕܹܝܢ ܘܠܵܐ ܡܸܡܬܼܘܿܡ. ܘܗܸܕܼܝܘܿܛܵܐ ܤܚ̣ܵܐ: ܘܲܥ̣ܒܲܪ ܒܚܹܐܦܹܗ ܩܲܕܼܡܵܝܵܐ. ܠܵܐ ܥܲܠ ܦ̣ܓܼܪܵܐ ܪܢ̣ܵܐ: ܘܐܵܦܠܵܐ ܕܕܲܠܡܵܐ ܟܲܝ ܠܵܐ ܐܵܬܼܝܵܐ ܒܐܝܼܕܼܵܘ̈ܗܝ ܬܹܐܓܼܘܼܪܬܹܗ. ܠܵܐ ܬܸܗܘܸܐ ܝܲܬܝܼܪܘܼܬܼ ܚܸܟܼܡܬܼܵܟܼ ܬܘܼܩܠܬܼܵܐ ܠܢܲܦܫܵܟܼ ܘܦܲܚܵܐ ܩܕܼܵܡܲܝܟ: ܠܲܡܫܲܪܵܝܘ ܓܲܢ̄ܒܵܪܵܐܝܼܬܼ ܘܩܲܠܝܼܠܵܐܝܼܬܼ ܥܲܠ ܤܲܒܼܪܵܐ ܕܐܲܠܵܗܵܐ pb. 97 ܒܡܲܪܟܼܝܼܬܼܵܟܼ ܙܠܝܼܥܲܬܼ ܒܲܕܼܡܵܐ: ܕܠܵܐ ܬܸܗܘܸܐ ܐܲܡܝܼܢܵܐܝܼܬܼ ܨܪܝܼܟܼܵܐ: ܘܥܲܪܛܸܠܵܝ ܡ̣ܢ ܝܑܼܕܲܥܬܹܗ ܕܐܲܠܵܗܵܐ܀ ܕܚܵܐܲܪ ܠܪ̈ܘܼܚܹܐ: ܠܵܐ ܙܵܪܲܥ. ܦܲܩܵܚ ܠܲܢ ܡܵܘܬܵܐ ܕܒܲܩܪܵܒܼܵܐ ܕܲܚܠܵܦ ܐܲܠܵܗܵܐ: ܘܠܵܐ ܚܲܝܹ̈ܐ ܕܒܸܗܬܿܬܼܵܐ ܘܲܕܼܫܲܦܠܘܼܬܼܵܐ. ܡܵܐ ܕܲܥܬܼܝܼܕܼ ܐܲܢ̄ܬܿ ܠܲܡܫܲܪܵܝܘܼ ܒܚܲܕܼ ܡ̣ܢ ܥܒܼܵܕܼܵܘ̈ܗܝ ܕܐܲܠܵܗܵܐ: ܠܘܼܩܕܲܡ ܥܒܸܕܼ ܕܝܵܬܹܩܹܐ: ܐܲܝܟܼ ܡܲܢ ܕܬܼܘܼܒܼ ܠܲܝܬܿ ܠܵܟܼ ܚܲܝܹ̈ܐ ܒܥܵܠܡܵܐ ܗܵܢܵܐ: ܘܐܲܝܟܼ ܐܲܝܢܵܐ ܕܲܠܡܵܘܬܵܐ ܐܸܙܕܲܡܲܢ. ܒܲܦܤܵܩ ܤܲܒܼܪܵܐ ܬܸܩܪܘܿܒܼ ܥܠܵܘܗܝ: ܐܲܝܟܼ ܡ̇ܢ ܕܒܹܗ ܒܤܘܼܥܪܵܢܵܐ ܩܸܨܵܟܼ ܫܵܠܹ̇ܩ: ܘܚܲܪܬܼܵܐ ܗ̣̄ܝ ܕܝܵܘ̈ܡܵܬܼܵܟܼ: ܘܲܕܼܠܲܝܬܿ ܠܵܟܼ ܬܘܼܒܼ ܠܡܸܚܙܵܐ ܠܝܵܘ̈ܡܵܬܼܵܐ ܕܒܼܵܬܼܪ ܗܵܘ̇. ܘܗܵܕܹܐ ܒܲܫܪܵܪܵܐ ܗܘ̤ܵܬܼ ܦܤܝܼܩܵܐ ܒܬܲܪܥܝܼܬܼܵܟܼ. ܕܲܠܡܵܐ ܤܘܼܟܵܝܵܐ ܕܚܲܝܹ̈ܐ ܢܸܓܼܠܙܵܟܼ ܡ̣ܢ ܙܵܟܼܘܼܬܼܵܐ: ܒܥܸܠܲܬܼ ܕܲܡܪܲܦܸܐ ܠܬܲܪܥܝܼܬܼܵܟܼ. ܡܸܛܠܗܵܢܵܐ ܡܵܕܹܝܢ: ܠܵܐ ܟ̱ܠܹܗ ܠܚܸܟܼܡܬܼܵܐ ܬܲܫܠܸܛ ܥܲܠ ܨܸܒܼ̈ܘܵܬܼܵܟܼ. ܗܲܒܼ ܩܲܠܝܼܠ ܐܲܬܼܪܵܐ: ܐܵܦ ܠܗܲܝܡܵܢܘܼܬܼܵܐ ܒܪܸܥܝܵܢܵܟܼ. ܐܸܬܿܕܲܟܼ̄ܪ ܐܲܡܝܼܢܵܐܝܼܬܼ ܠܝܵܘ̈ܡܵܬܼܵܐ ܕܒܼܵܬܲܪ ܡܵܘܬܵܐ: ܘܲܠܥܵܠܲܡ ܠܵܐ ܥܵܐ̇ܠܵܐ ܪܲܦܝܼܘܼܬܼܵܐ ܥܲܠ ܢܲܦܫܵܟܼ. ܐܲܝܟܼ ܡܸܠܬܹܗ ܕܚܲܟܿܝܼܡܵܐ ܕܐܸܡ݂ܲܪ: ܐܵܠܹܦ ܫܢ̈ܝܼܢ ܡ̣ܢ ܕܥܵܠܡܵܐ ܗܵܢܵܐ: ܠܵܐ ܐܝܼܬܲܝܗܹܝܢ ܐܲܝܟܼ ܚܲܕܼ ܝܘܿܡ ܒܥܵܠܡܵܐ ܕܙܲܕܝܼ̈ܩܹܐ܀ ܓܲܢ̄ܒܵܪܵܐܝܼܬܼ ܫܲܪܵܐ ܒܟܼܠ ܥ̇ܒܼܵܕܼܵܐ ܕܲܡܝܲܬܿܪܘܼܬܼܵܐ: ܠܵܐ ܠܲܡ ܬܸܩܪܘܿܒܼ ܥܠܹܝܗ̇ ܒܲܬܼܪܹܝܢ ܠܸܒ̈ܝܼܢ. ܠܵܐ ܬܸܬܼܦܲܠܲܓܼ ܒܠܸܒܵܟܼ: ܒܐܘܼܪܚܵܐ ܕܡܲܪܕܝܼܬܼܵܟܼ ܥܲܠ ܤܲܒܼܪܵܐ ܕܛܲܝܒܿܘܼܬܹܗ ܕܐܲܠܵܗܵܐ: ܕܠܵܐ ܢܸܗܘܸܐ ܬܥܵܫܵܟܼ ܡܲܓܵܢ: ܘܢܹܐܩܲܪ ܥܠܲܝܟܼ ܥܲܡܠܵܐ ܕܦܘܼܠܚܵܢܵܟܼ. ܐܸܠܵܐ ܗܲܝܡܸܢ ܒܠܸܒܵܟܼ ܕܲܡܪܲܚܡܵܢ ܗ̄ܘ̣ ܐܲܠܵܗܵܐ: ܘܠܲܐܝܠܹܝܢ ܕܒܼܵܥܹ̇ܝܢ ܠܹܗ ܝܵܗܹ̇ܒܼ ܛܲܝܒܿܘܼܬܼܵܐ: ܠܵܘ ܐܲܝܟܼ ܦܘܼܠܚܵܢܲܢ: ܐܸܠܵܐ ܐܲܝܟܼ ܚܘܼܒܵܐ ܕܢܲܦܫܲܢ: ܘܐܲܝܟܼ ܗܲܝܡܵܢܘܼܬܲܢ ܕܲܠܘܵܬܹܗ. ܐܲܝܟܲܢܵܐ ܠܲܡ ܕܗܲܝܡܸܢ̣ܬܿ: ܢܸܗܘܸܐ ܠܲܟܼ܀ pb. 98 ܐܝܼܬܼ ܕܫܘܼܩܵܦܵܐ ܕܪܹܫܹܗ ܕܟܼܠܹܗ ܝܵܘܡܵܐ: ܗ̤ܘ ܡܡܲܠܸܐ ܚܠܵܦ ܥܸܕܵܢܹ̈ܐ ܕܬܸܫܡ̈ܫܵܬܹܗ. ܘܐܝܼܬܼ ܕܲܩܥܵܕܼܵܐ ܕܒܼܘܼܪ̈ܟܵܘܗܝ ܕܐܲܡܝܼܢ ܚܵܒܹ̇ܫ: ܡܸܢܝܵܢܵܐ ܕܲܨ̈ܠܵܘܵܬܹܗ. ܐܝܼܬܼ ܕܡܲܪܕܝܼܬܼܵܐ ܕܕܸܡܥܵܘ̈ܗܝ ܡܡܲܠܐ ܚܠܵܦ ܩܵܢܘܿܢܵܘ̈ܗܝ: ܘܠܵܐ ܒܵܥܹ̇ܐ ܥܲܡܵܗ̇ ܡܸܕܸܡ: ܕܛܵܒܼܵܐ ܠܹܗ ܡ̣ܢ ܟܠܡܸܕܸܡ. ܘܐܝܼܬܼ: ܕܲܚܦܝܼܛܘܼܬܼܵܐܐ ܕܲܒܼܗܸܪ̈ܓܲܝ ܡܲܕܥܹܗ: ܡܤܲܝܟܼܵܐ ܠܢܵܡܘܿܤܹ̈ܐ ܕܲܡܬܲܚܡܝܼܢ ܠܹܗ. ܐܝܼܬܼ: ܕܚܲܫܵܐ ܕܟܲܦܢܵܐ ܕܐܵܟܹ̇ܠ ܡ̣ܢ ܒܸܤܪܹܗ: ܡܦܝܼܫ ܠܹܗ ܒܲܤܪ̈ܵܩܹܐ ܕܲܡܢܲܓܸܕܼ ܟܲܪܤܹܗ: ܡ̣ܢ ܡܘܼܠܵܝܵܐ ܕܲܥ̇ܒܼܵܕܹܗ. ܘܐܝܼܬܼ ܕܲܒܼܪܸܬܼܚܵܐ ܕܬܲܪܥܝܼܬܹܗ: ܡܲܙܡܘܿܪ̈ܘܗܝ ܠܵܐ ܡܸܬܼܦܲܤܩܝܼܢ. ܘܐܼܝܼܬܼ: ܕܒܲܟܼܬܼܝܼ̈ܒܸܼܵܬܼܵܐ ܪܵܬܲܚ ܠܸܒܹܗ. ܘܐܝܼܬܼ: ܕܲܒܼܤܘܼܟܵܠܵܐ ܗܵܘܹ̇ܐ ܫܲܒܼܝܵܐ. ܘܐܝܼܬܼ ܕܬܸܡܗܵܐ ܕܦܸܬܼܓܼܵܡܹ̈ܐ: ܟܵܠܹ̇ܐ ܪܲܗܛܵܐ ܕܤܸܦ̈ܘܵܬܹܗ: ܡ̣ܢ ܪܸܕܝܵܐ ܗܵܘ̇ ܕܲܥܝܵܕܼܵܐ. ܘܐܝܼܬܼ ܕܲܛܥܸܡ̣ ܗܵܠܹܝܢ ܟܠܗܹܝܢ: ܘܲܤܒܲܥ̣: ܘܲܥܛܲܦ̣ ܘܦܵܫ̣. ܘܐܝܼܬܼ ܕܲܒܼܩܲܠܝܼܠ ܒܲܠܚܘܿܕܼ ܡܸܢܹܗܝܢ: ܘܲܢܦܝܼܚ ܘܲܚܬܼܝܼܪ: ܘܲܛܥܸܐ. ܐܝܼܬܼ ܕܦܲܓܼܪܹܗ ܬܲܟܼܤܹܗ ܡܸܢܗܹܝܢ ܒܤܲܓܝܼܐܘܼܬܼ ܚܲܫܹܗ ܥܲܡ ܟܹܐܒܼܵܘ̈ܗܝ. ܘܐܝܼܬܼ: ܕܓܘܼܪܵܓܼܵܐ ܕܡܸܕܸܡ ܡܸܕܸܡ. ܐܝܼܬܼ: ܕܪܹܫܵܢܘܼܬܼܵܐ. ܘܲܐ̄ܚܪ̈ܵܢܹܐ: ܫܘܼܒܼܚܵܐ ܕܐ̄ܢܵܫܵܐ. ܐ̄ܚܪ̈ܵܢܹܐ: ܚܲܫܵܐ ܕܨܸܒܼ̈ܘܵܬܼܵܐ. ܐ̄ܚܪ̈ܵܢܹܐ: ܥܸܢܝܵܢܵܐ ܥܲܡ ܠܲܥܒܿܘܼܬܼܵܐ. ܘܐܝܼܬܼ ܕܐܲܕܟܼܫܲܪ ܘܩܵܡ̣: ܘܠܵܐ ܐܲܗܦܸܟܼ ܚܲܨܵܐ: ܥܕܲܡܵܐ ܕܫܲܩܠ̣ܵܗ̇ ܠܡܲܪܓܵܢܝܼܬܼܵܐ܀ ܚܵܕܼܝܵܐܝܼܬܼ ܫܲܪܵܐ ܒܟܼܠ ܥ̇ܒܼܵܕܼܵܐ ܕܡܸܛܠ ܐܲܠܵܗܵܐ. ܘܐܸܢ ܕܟܸܐ ܡ̣ܢ ܚܲܫܹ̈ܐ ܘܡ̣ܢ ܦܠܝܼܓܼܘܼܬܼܵܐ ܕܠܸܒܵܐ: ܗ̤ܘ ܐܲܠܵܗܵܐ ܡܲܤܸܩ ܠܪܹܫ: ܘܲܡܥܲܕܲܪ ܠܵܟܼ pb. 99 ܘܲܡܚܲܟܸܡ ܠܵܟܼ: ܘܐܲܝܟܼ ܨܸܒܼܝܵܢܹܗ ܘܲܬܼܡܝܼܗܵܐܝܼܬܼ ܫܵܩܹ̇ܠ ܫܘܼܠܵܡܵܐ. ܕܠܹܗ ܫܘܼܒܼܚܵܐ ܘܐܘܼܚܕܵܢܵܐ ܘܤܸܓܼܕܬܼܵܐ ܘܪܘܼܡܪܵܡܵܐ: ܠܥܵܠܲܡ ܥܵܠܡܝܼܢ. ܐܵܡܹܝܢ.