Isaac of Nineveh: Discourse 8

ܛܘܼܒܼܵܘܗܝ ܠܒܲܪܢܵܫܵܐ ܕܝܼܕܲܥ̣ ܡܚܝܼܠܘܼܬܹܗ! ܗܵܕܹܐ ܝܑܼܕܲܥܬܼܵܐ: ܗܵܘ̇ܝܵܐ ܠܹܗ ܫܲܬܼܐܸܤܬܼܵܐ ܘܫܘܼܪܵܝܵܐ ܕܲܠܘܵܬܼ ܟܠܗܹܝܢ ܛܵܒܼ̈ܬܼܵܐ ܘܫܲܦܝܼܪ̈ܵܬܼܵܐ. ܡܵܐ ܕܹܝܢ ܕܝܼܕܲܥ̣ ܒܲܪܢܵܫܵܐ ܘܐܲܪܓܸܫ̣: ܕܚܲܬܿܝܼܬܼܵܐܝܼܬܼ ܘܐܲܝܟܼ ܕܒܲܫܪܵܪܵܐ ܡܚܝܼܠ ܗ̄ܘ̣: ܗܵܝܕܹܝܢ ܩܵܦܹ̇ܣ ܢܲܦܫܹܗ ܡ̣ܢ ܐܲܫܝܼܕܼܘܼܬܼܵܐ: ܕܐܝܼܬܹܝܗ̇ ܡܦܲܠܗ ܕܵܢܝܼܬܼܵܐ ܕܝܼܕܲܥܬܼܵܐ: ܘܡܲܤܓܸܐ ܙܗܝܼܪܘܼܬܼܵܐ ܠܢܲܦܫܹܗ. ܐܸܠܵܐ ܓܹܝܪ ܐܸܫܬܿܒܸܩ ܒܨܝܼܪ ܩܲܠܝܼܠ: ܘܲܗܘ̤ܵܬܼ ܠܘܵܬܹܗ ܡܲܗܡܝܵܢܘܼܬܼܵܐ ܙܥܘܿܪܬܵܐ: ܘܚܲܕܼܪܘܼܗܝ ܡܢܲܤ̈ܝܵܢܹܐ: ܐܵܘ ܒܡܲܚܫܵܢ̈ܝܬܼܵܐ ܕܦܲܓܼܪܵܐ: ܐܵܘ ܒܚܵܫܘܿܫܘܼܬܼܵܐ ܕܢܲܦܫܵܐ: ܠܵܐ ܡܸܫܟܲܚ ܒܲܪܢܵܫܵܐ ܡܲܪܓܸܫ ܒܲܡܚܝܼܠܘܼܬܹܗ. ܗܵܝܕܹܝܢ ܡ̣ܢ ܦܘܼܚܵܡܵܐ ܕܲܡܚܝܼܠܘܼܬܹܗ: ܚܵܟܹ̇ܡ ܐܵܦ ܠܥܘܼܕܼܪܵܢܵܐ ܕܡ̣ܢ ܐܲܠܵܗܵܐ: ܕܲܟܼܡܵܐ ܪܲܒܿ܀ ܘܡܵܐ ܬܘܼܒܼ ܕܚܵܙܹ̇ܐ: ܕܲܟܼܡܵܐ ܐܸܢ ܡܸܬܼܦܲܪܲܣ ܘܡܲܤܓܸܐ ܙܗܝܼܪܘܼܬܼܵܐ: ܘܩܵܦܹ̇ܣ ܘܲܡܤܲܬܲܪ ܢܲܦܫܹܗ pb. 105 ܒܪܸܒܿܘܿ ܬܵܘܵܢ̈ܝܼܢ: ܘܲܟܼܡܵܐ ܐܸܢ ܡܸܬܼܦܲܪܲܣ ܠܢܲܦܫܹܗ ܥܸܠ̈ܠܵܬܼܵܐ ܕܬܘܼܟܼܠܵܢܵܐ: ܥܕܲܟܹܝܠ ܠܸܒܵܐ ܠܵܐ ܫܵܠܹ̇ܐ ܡ̣ܢ ܩܸܢܛܵܐ. ܗܵܝܕܹܝܢ ܡܸܬܼܒܲܝܲܢ ܘܪܵܢܹ̇ܐ ܕܟܼܠܹܗ ܗܵܢܵܐ ܙܵܘܥܵܐ ܕܠܸܒܵܐ: ܡܸܕܸܡ ܐ̄ܚܪܹܝܢ ܕܝܲܬܿܝܼܪ ܐܵܠ̇ܨܵܐ ܥܠܵܘܗܝ ܡܵܘܕܲܥ ܕܚܲܤܝܼܪ: ܗܵܢܵܘ ܕܹܝܢ: ܕܥܲܠ ܥܘܼܕܼܪܵܢܵܐ ܐ̄ܚܪܹܢܵܐ ܤܢܝܼܩ. ܒܲܕܼܗ̤ܘ ܠܸܒܵܐ ܤܵܗܹ̇ܕܼ ܡ̣ܢ ܠܵܓܼܵܘ ܒܕܸܚܠܬܼܵܐ ܕܪܵܦ̇ܬܼܵܐ ܒܹܗ: ܕܚܲܤܝܼܪܘܼܬܼܵܐ ܕܡܸܕܸܡ ܡܵܘܕܥܵܐ. ܘܡܸܛܠܵܗܵܢܵܐ: ܠܵܐ ܡܸܫܟܲܚ ܫܵܪܹܐ ܒܬܼܘܼܟܼܠܵܢܵܐ. ܡܥܲܕܼܪܵܢܘܼܬܼܵܐ ܠܲܡ ܕܲܐܲܠܵܗܵܐ: ܡܸܬܼܒܲܥܝܵܐ ܠܫܘܼܘܙܵܒܼܵܐ. ܘܡܵܐ ܕܝܼܕܲܥ̣ ܕܲܤܢܝܼܩ ܥܲܠ ܥܘܼܕܼܪܵܢܵܐ ܐܲܠܵܗܵܝܵܐ: ܡܲܤܓܸܐ ܨܠܘܿܬܼܵܐ. ܘܡܵܐ ܕܐܲܤܓܝܼ ܟܘܼ̈ܫܵܦܹܐ: ܐܸܬܼܡܲܟܲܟܼ ܠܸܒܵܐ. ܡܸܛܠ ܕܲܠܝܬܿ ܕܲܤܝܼܩ ܘܫܵܐܹ̇ܠ: ܘܠܵܐ ܡܲܟܿܝܼܟܼ. ܘܠܸܒܵܐ ܫܚܝܼܩܵܐ ܘܡܲܟܼܝܼܟܼܵܐ: ܐܲܠܵܗܵܐ ܠܵܐ ܡܲܤܠܸܐ. ܥܕܲܡܵܐ ܕܡܸܬܼܡܲܟܲܟܼ ܠܸܒܵܐ: ܠܵܐ ܫܵܠܹ̇ܐ ܡ̣ܢ ܦܸܗܝܵܐ. ܡܲܟܿܝܼܟܼܘܼܬܼܵܐ ܠܠܸܒܵܐ: ܩܵܦ̇ܤܵܐ ܠܹܗ. ܘܡܵܐ ܕܐܸܬܼܡܲܟܲܟܼ ܒܲܪܢܵܫܵܐ: ܒܲܪ ܫܵܥܬܹܗ ܚܲܕܼܪܘܼܗܝ ܪ̈ܲܚܡܹܐ ܘܥܲܦܩ̣ܘܗܝ. ܘܡܵܐ ܕܲܩ̣ܪܸܒܼܘ ܪ̈ܲܚܡܹܐ: ܡܸܚܕܼܵܐ ܐܲܪܓܸܫ̣ ܠܸܒܵܐ ܒܥܘܼܕܼܪܵܢܵܐ. ܒܗܵܝ̇: ܕܐܵܦ ܬܘܼܟܼܠܵܢܵܐ ܡܸܕܸܡ ܘܚܲܝܠܵܐ ܪܵܦܹ̇ܬܼ ܒܹܗ. ܘܡܵܐ ܕܐܲܪܓܸܫ̣ ܒܡܹܐܬܼܝܼܬܹܗ ܕܥܘܼܕܼܪܵܢܵܐ ܐܲܠܵܗܵܝܵܐ ܕܲܠܘܵܬܹܗ: ܘܲܕܼܗ̤ܘܝܘܼ ܡܤܲܝܥܵܢܹܗ ܘܥܵܕܼܘܿܪܹܗ: ܗܵܝܕܹܝܢ ܒܲܪܫܵܥܬܹܗ ܠܸܒܵܐ ܡܸܬܼܡܠܸܐ ܗܲܝܡܵܢܘܼܢܼܵܐ. ܘܡܸܬܼܒܲܝܼܢ ܡܸܟܹܝܠ ܡ̣ܢ ܗܵܪܟܵܐ ܘܡܸܤܬܲܟܲܠ: ܕܲܨܠܘܿܬܼܵܐ ܠܡܹܐܢܵܐ ܗ̣̄ܝ ܕܥܘܼܕܼܪܵܢܵܐ: ܘܡܲܒܿܘܼܥܵܐ ܕܦܘܼܪܩܵܢܵܐ: ܘܤܝܼܡܬܼܵܐ ܕܬܼܘܼܟܼܠܵܢܵܐ: ܘܐܹܘܩܝܵܢܵܐ ܡܫܵܘܙܒܼܵܢܵܐ ܒܹܝܬܼ ܡܲܚܫ̈ܘܼܠܹܐ: ܘܡܲܢܗܪܵܢܝܼܢܼܵܐ ܕܚܲܫܝܼ̈ܟܹܐ: ܘܬܲܩܕܵܐ ܕܲܡܚܝܼ̈ܠܹܐ: ܘܤܸܬܵܪܵܐ ܒܲܙܒܲܢ ܢܸܤ̈ܝܘܿܢܹܐ: ܘܡܲܚܠܡܵܢܝܼܬܼܵܐ ܒܲܙܒܲܢ ܟܘܼܪ̈ܗܵܢܹܐ: ܘܤܲܟܿܪܵܐ ܕܥܘܼܕܼܪ̈ܵܢܹܐ ܒܲܩܪܵܒܼܵܐ: ܘܓܹܐܪܵܐ ܫܢܝܼܢܵܐ ܠܘܼܩܒܲܠ ܒܥܸܠܕܒܼܵܒܹ̈ܐ܀ pb. 106 ܘܲܕܼܗܵܠܹܝܢ ܟܠܗܹܝܢ ܛܵܒܼ̈ܬܼܵܐ ܒܝܲܕܼ ܨܠܘܿܬܼܵܐ ܐܸܫܟܲܚ ܡܲܥܠܵܢܵܐ ܠܘܵܬܼܗܹܝܢ: ܘܡܸܟܹܝܠ ܘܲܠܗܲܠ ܡܸܬܼܦܲܪܦܲܥ ܒܲܨܠܘܿܬܼܵܐ ܕܗܲܝܡܵܢܘܼܬܼܵܐ: ܟܲܕܼ ܪܵܘܹ̇ܙ ܠܸܒܹܗ ܒܬܼܘܼܟܼܠܵܢܵܐ: ܘܠܵܘ ܤܲܡܝܵܐܝܼܬܼ ܘܲܒܼܡܸܠܬܼܵܐ ܕܦܘܼܡܵܐ ܒܲܠܚܘܿܕܼ ܐܲܝܟܼ ܕܲܥܕܲܡܵܐ ܠܗܵܫܵܐ. ܘܡܵܐ ܕܗܵܡܹܐ ܝܑܼܕܲܥ̣: ܩܢܸܐ ܠܵܗ̇ ܡܸܟܹܝܠ ܠܲܨܠܘܿܬܼܵܐ ܐܲܝܟܼ ܤܝܼܡܬܼܵܐ ܒܓܼܵܘ ܢܲܦܫܹܗ. ܘܡ̣ܢ ܚܲܕܼܘܼܬܹܗ: ܡܫܲܚܠܸܦ ܠܹܗ ܠܢܝܼܫܵܐ ܕܲܨܠܘܿܬܹܗ ܠܩܵܠܹ̈ܐ ܕܬܼܵܘܼ̈ܕܝܵܬܼܵܐ. ܘܗܵܕܲܐ ܗ̣̄ܝ ܡܸܠܬܼܵܐ ܕܐܲܡܝܼܪܵܐ ܠܚܲܟܝܼܡ ܒܩܲܕܝܼ̈ܫܹܐ ܡܵܪܝ ܐܹܘܲܓܼܪܝܼܣ: ܗܵܘ̇ ܕܤܝܼܡ ܗ̄ܘ̣ܵܐ ܠܹܗ ܢܝܼܫܵܐ ܠܟܼܠ ܨܒܼܘܼ: ܕܲܨܠܘܿܬܼܵܐ ܠܲܡ ܐܝܼܬܹܝܗ̇: ܚܲܕܼܘܼܬܼܵܐ ܕܡܲܤܪܚܵܐ ܬܵܘܕܝܼܬܼܵܐ. ܥܲܠ ܥܵܕܹܐ ܨܠܘܿܬܼܵܐ ܕܒܼܵܬܲܪ ܡܩܲܒܿܠܵܢܘܼܬܼܵܐ ܕܝܼܕܲܥܬܹܗ ܕܐܲܠܵܗܵܐ ܐܵܡܲ݁ܪ: ܗܵܝ̇ ܕܹܝܢ ܕܡܲܤܪܚܵܐ: ܒܗܵܝ̇ ܕܠܵܘ ܗ̤ܘ ܐ̄ܢܵܫ ܡܨܲܠܸܐ ܘܲܒܼܥܲܡܠܵܐ: ܐܲܝܟܼ ܫܲܪܟܵܐ ܕܲܨܠܘܿܬܼܵܐ ܕܚܲܫܵܐ: ܕܡ̣ܢ ܩܕܼܵܡ ܡܲܪܓܫܵܢܘܼܬܼܵܐ ܕܲܒܼܛܲܝܒܿܘܼܬܼܵܐ: ܐܸܠܵܐ ܗ̤ܘ ܠܸܒܵܐ ܟܲܕܼ ܡܠܸܐ ܚܲܕܼܘܼܬܼܵܐ ܘܬܸܡܗܵܐ: ܡܸܒܲܗ ܢܵܒܲܗ ܤܒܼܝܼܤܵܐܝܼܬܼ ܒܙܵܘ̈ܥܹܐ ܕܬܼܵܘܕܝܼܬܼܵܐ ܘܲܕܼܩܘܼܒܵܠܛܲܝܒܿܘܼܬܼܵܐ: ܒܫܸܬܼܩܵܐ ܕܲܤܝܼܡ ܒܘܼܪܟܹܗ. ܒܲܪܓܼܘܿܢ ܡ̣ܢ ܚܹܐܦܵܐ ܕܡ̣ܢ ܠܓܼܵܘ: ܕܤܲܓܝܼ ܡܸܬܿܬܿܙܝܼܥ ܒܕܼܘܼܡܵܪܵܐ ܥܲܠ ܤܘܼ̈ܟܵܠܹܐ ܕܛܲܝ̈ܒܿܘܵܬܹܗ ܕܐܲܠܵܗܵܐ: ܡ̣ܢ ܫܹܠܝ ܡܪܝܼܡ ܩܵܠܹܗ ܘܲܡܫܲܒܲܚ ܕܠܵܐ ܤܲܒܼܥܵܐ: ܟܲܕܼ ܡܲܤܪܲܚ ܠܵܗ̇ ܠܬܼܵܘܕܝܼܬܹܗ ܗ̤ܘ ܚܹܐܦܵܐ ܕܡ̣ܢ ܠܓܼܵܘ ܘܐܵܦ ܒܠܸܫܵܢܵܐ: ܘܬܼܵܢܹ̇ܐ ܢܲܓܝܼܪܵܐܝܼܬܼ ܘܡܸܬܿܡܲܪܵܢܵܐܝܼܬܼ: ܡܲܢ̣ܘܼ ܗܘ̤ܵܐ ܒܗܵܠܹܝܢ ܩܪܝܼܚܵܐܝܼܬܼ ܘܠܵܐ ܒܲܗܘܼܪܵܐܝܼܬܼ: ܘܤܵܡ̣ ܒܗܹܝܢ ܝܲܕܼܥܑܵܐ ܒܦܘܼܪܫܵܢܵܐ: ܢܤܸܬܲܟܲܠ ܡܸܕܸܡ ܕܐܵܡܲ݁ܪܢܵܐ: ܕܠܲܝܬܿ ܒܹܗ ܫܘܼܚܠܵܦܵܢܵܐ: ܡܸܛܠ ܢܸܤܝܵܢܵܗ̇ ܤܲܓܝܼܐܵܐ ܕܲܨܒܼܘܼܬܼܵܐ. ܘܡܸܟܵܐ ܗܵܟܹܝܠ ܦܵܐܹ̇ܫ ܡ̣ܢ pb. 107 ܤܪ̈ܝܼܩܵܬܼܵܐ: ܘܲܠܘܵܬܼ ܐܲܠܵܗܵܐ ܡܸܬܼܐܡܸܢ ܕܠܵܐ ܫܘܼܢܵܝ ܒܐܲܡܝܼܢܘܼܬܼܵܐ ܕܲܨܠܘܿܬܼܵܐ: ܟܲܕܼ ܩܵܢܹ̇ܛ ܠܡܸܬܼܓܠܵܙܘܼ ܡ̣ܢ ܪܸܕܝܵܐ ܕܥܘܼܕܼܪ̈ܵܢܹܝܗ̇܀ ܗܵܠܹܝܢ ܟܠܗܹܝܢ ܫܲܦܝܼܪ̈ܵܬܼܵܐ ܡܸܬܼ̈ܝܼܠܕܵܢ ܡ̣ܢ ܗܵܝ̇ ܕܢܲܪܓܸܫ ܐ̄ܢܵܫ ܒܲܡܚܝܼܠܘܼܬܹܗ. ܕܡ̣ܢ ܗܵܪܟܵܐ ܡܸܛܠ ܝܘܼܐܵܒܼܵܐ ܕܲܠܥܘܼܕܼܪܵܢܵܐ: ܚܵܒܹ̇ܨ ܠܘܵܬܼ ܐܲܠܵܗܵܐ ܒܲܦܝܵܤܹ̈ܐ ܕܲܨܠܘܿܬܹܗ. ܘܲܟܼܡܵܐ ܕܗ̤ܘ ܡܸܬܼܩܲܪ̈ܲܒܼ ܒܬܲܪܥܝܼܬܹܗ ܠܘܵܬܹܗ: ܡܸܬܼܦܲܪܲܒܼ ܐܲܠܵܗܵܐ ܠܘܵܬܹܗ ܒܝܲܕܼ ܫܘܼܟܵܢܵܘ̈ܗܝ. ܘܠܵܐ ܡܸܡܬܼܘܿܡ ܡܪܝܼܡ ܡܸܢܹܗ ܡܲܓܿܢܵܢܘܼܬܹܗ: ܡܸܛܠ ܡܲܟܝܼܟܼܘܼܬܹܗ ܤܲܓܝܼܐܬܼܵܐ. ܕܐܲܝܟܼ ܐܲܪܡܲܠܬܼܵܐ ܠܘܵܬܼ ܕܲܝܵܢܵܐ ܓܵܥܹ̇ܐ ܒܟܼܠܥܸܕܵܢ: ܬܒܲܥܲܝܢܝ ܡ̣ܢ ܒܥܸܠܕܝܼܢܝ. ܡܸܛܠܗܵܬܹܗ: ܐܲܝܟܼ ܕܝܲܬܝܼܪ ܬܸܗܘܸܐ ܠܹܗ ܥܸܠܬܼܵܐ ܠܩܘܼܪܵܒܼܵܐ ܕܲܠܘܵܬܹܗ. ܘܡܸܛܠ ܤܢܝܼܩܘܼܬܹܗ: ܢܸܬܼܐܡܸܢ ܠܘܵܬܼ ܡܲܒܿܘܼܥܵܐ ܕܥܘܼܕܼܪ̈ܵܢܹܐ. ܟܲܕܼ ܡܸܢܗܹܝܢ ܕܫܸ̈ܐܠܵܬܹܗ ܡܦܲܢܸܐ ܠܹܗ ܩܲܠܝܼܠܵܐܝܼܬܼ: ܘܡܸܢܗܹܝܢ ܠܵܐ. ܗܵܢܵܘ ܕܹܝܢ: ܐܲܝܕܵܐ ܕܝܵܕܲܥ̇ ܕܒܸܠܥܵܕܹܝܗ̇ ܠܵܐ ܡܨܸܐ ܚܵܝܹ̇ܐ: ܘܫܲܪܟܵܐ ܡܬܲܗܸܐ. ܘܲܒܼܡܸܕܸܡ ܡܸܕܸܡ ܙܵܓܲܪ ܡܸܢܹܗ ܚܹܐܦܵܐ ܕܲܒܼܥܸܠܕܒܼܵܒܹ̈ܐ: ܘܲܒܼܡܸܕܸܡ ܡܸܕܸܡ ܝܵܗܹ̇ܒܼ ܐܝܼܕܼܵܐ ܠܢܸܤܝܘܿܢܹܗ. ܐܲܝܟܼ ܕܗ̤ܝ ܗܵܕܹܐ: ܐܲܝܟܼ ܕܐܸܡ̇ܪܹܬܼ: ܬܸܗܘܸܐ ܠܹܗ ܥܸܠܬܼܵܐ ܠܩܘܼܪܵܒܹܗ ܕܲܠܘܵܬܼ ܐܲܠܵܗܵܐ: ܘܲܕܼܢܸܬܼܚܲܟܲܡ ܡܸܢܗܘܿܢ ܕܢܸܤܝ̈ܘܿܢܹܐ: ܘܗܵܕܹܐ ܗ̣̄ܝ ܗܵܝ̇ ܕܐܲܡܝܼܪܵܐ ܒܲܟܼܬܼܵܒܼܵܐ: ܕܲܫܒܲܩ̣ ܡܵܪܝܵܐ ܥܲܡ̈ܡܹܐ ܤܲܓܝܼ̈ܐܹܐ: ܘܠܵܐ ܐܵܘܒܸܿܕܼ ܐܸܢܘܿܢ ܒܲܥܓܲܠ: ܘܠܵܐ ܐܲܫܠܸܡ̣ ܐܸܢܘܿܢ ܒܐܝܼܕܼܵܐ ܕܝܼܫܘܿܥ: ܠܲܡܢܲܤܵܝܘܼ ܒܗܘܿܢ ܠܝܼܤܪܵܝܹܠ: ܘܡܸܛܠ ܕܢܸܕܥܘܼܢ ܕܵܪܹ̈ܐ ܕܲܒܼܢܲܝ̈ ܝܑܼܤܪܵܝܹܠ ܕܢܹܐܠܦܘܼܢ ܩܪܵܒܼܵܐ܀ pb. 108 ܙܲܕܝܼܩܵܐ ܕܠܵܐ ܡܦܵܣ ܒܲܡܚܝܼܠܘܼܬܹܗ: ܒܩܸܢܛܵܐ ܐܝܼܬܲܝܗܹܝܢ ܨܸܒܼ̈ܘܵܬܹܗ. ܘܠܵܐ ܪܲܚܝܼܩ ܡ̣ܢ ܡܲܦܘܼܠܬܼܵܐ: ܘܠܵܐ ܡܲܒܼܥܲܕܼ ܡܸܢܹܗ ܐܲܪܝܵܐ ܡܚܲܝܒܿܠܵܢܵܐ: ܫܹܐܕܵܐ ܕܪܵܡܘܼܬܼܵܐ. ܕܚܲܤܝܼܪ ܡ̣ܢ ܝܑܼܕܲܥܬܼܵܐ ܕܲܡܚܝܼܠܘܼܬܹܗ: ܚܲܤܝܼܪ ܡ̣ܢ ܡܲܟܿܝܼܟܼܘܼܬܼܵܐ. ܕܚܲܤܝܼܪ ܡ̣ܢ ܡܲܟܿܝܼܟܼܘܼܬܼܵܐ: ܚܲܤܝܼܪ ܡ̣ܢ ܓܡܝܼܪܘܼܬܼܵܐ. ܕܚܲܤܝܼܪ ܡ̣ܢ ܓܡܝܼܪܘܼܬܼܵܐ: ܩܲܢܝܼܛܵܐ ܐܝܼܬܼܵܘܗܝ ܥܕܲܟܹܝܠ. ܘܐܸܡܲܬܼܝ ܕܗ̤ܘ: ܐܝܼܬܼ ܠܹܗ ܐܲܬܼܪܵܐ ܠܲܒܼܥܸܠܕܒܼܵܒܼܵܐ ܥܠܵܘܗܝ. ܒܲܕܼܠܵܐ ܡܫܲܪܪܵܐ ܡܕܼܝܢ̄ܬܹܗ ܒܡܘܼ̈ܟܼܠܹܐ ܕܦܲܪܙܠܵܐ: ܘܒܸܐܤ̈ܟܿܦܵܬܼܵܐ ܕܲܢܚܵܫܵܐ. ܐܵܦܠܵܐ ܓܹܝܪ ܘܗ̤ܝ ܡܲܟܿܝܼܟܼܘܼܬܼܵܐ ܡܸܬܼܩܲܢܝܵܐ ܒܸܠܥܵܕܼ ܡ̣ܢ ܥܸܠ̈ܠܵܬܼܵܗ̇: ܕܡܸܛܠܵܬܼܗܹܝܢ ܗܘ̤ܵܐ ܬܒܼܵܪ ܠܸܒܵܐ ܐܲܡܝܼܢܵܐܝܼܬܼ ܘܲܡܤܲܚܦܝܼܢ ܚܘܼ̈ܫܵܒܹܐ ܕܡܲܤܒܿܪܵܢܘܼܬܼܵܐ. ܒܸܠܥܵܕܼ ܡܲܟܿܝܼܟܼܘܼܬܼܵܐ ܠܵܐ ܡܸܬܼܚܲܬܲܡ ܦܘܼܠܚܵܢܹܗ ܕܒܲܪܢܵܫܵܐ. ܠܵܐ ܤܝܼܡ ܥܲܠ ܐܸܫܛܵܪܵܐ ܕܚܹܐܪܘܼܬܹܗ ܥܕܲܟܹܝܠ ܛܲܒܼܥܵܐ ܕܪܘܼܚܵܐ: ܥܕܲܟܹܝܠ ܥܲܒܼܕܵܐ ܐܝܼܬܼܵܘܗܝ: ܘܠܵܐ ܡܥܲܠܲܝ ܡ̣ܢ ܩܸܢܛܵܐ ܦܘܼܠܚܵܢܹܗ. ܠܵܐ ܒܸܠܥܵܕܼ ܡܘܼܟܵܟܼܵܐ ܡܸܫܬܲܪܲܪ ܦܘܼܠܚܵܢܹܗ: ܘܠܵܐ ܒܸܠܥܵܕܼ ܢܸܤܝ̈ܘܿܢܹܐ ܩܵܢܹ̇ܐ ܚܸܟܼܡܬܼܵܐ: ܘܠܵܐ ܒܸܠܥܵܕܼ ܚܸܟܼܡܬܼܵܐ ܡܵܛܹ̇ܐ ܠܡܲܟܿܝܼܟܼܘܼܬܼܵܐ. ܡܸܛܠܗܵܢܵܐ: ܐܵܠܨܵܐܝܼܬܼ ܫܵܒܹ̇ܩ ܐܲܠܵܗܵܐ ܥܲܠ ܩܲܕܝܼ̈ܫܹܐ ܥܸܠ̈ܠܵܬܼܵܐ ܕܡܲܟܿܝܼܟܼܘܼܬܼܵܐ: ܘܲܬܼܒܼܵܪ ܠܸܒܵܐ ܘܲܨܠܘܿܬܼܵܐ ܚܲܫܝܼܫܬܼܵܐ ܘܲܕܼܠܵܐ ܦܸܗܝܵܐ. ܟܲܕܼ ܒܲܙܒܲܢ ܒܝܲܕܼ ܥܵܪ̈ܨܵܬܼܵܐ ܕܚܲܫܵܘ̈ܗܝ ܕܲܟܼܝܵܢܵܐ ܡܩܲܦܲܚ ܠܗܘܿܢ: ܘܲܒܼܡܸܬܼܥܲܒܼܪ̈ܵܢܘܵܬܼܵܐ ܕܲܒܼܝܲܕܼ ܚܘܼ̈ܫܵܒܹܐ ܢܕܝܼ̈ܕܹܐ. ܘܒܲܙܒܲܢ ܒܨܲܥܪܵܐ: ܘܲܒܼܩܘܼ̈ܩܵܚܹܐ ܕܡܲܓܵܢ ܕܤܵܒܼ̇ܠܝܼܢ ܡ̣ܢ ܒܢܲܝ̈ܢܵܫܵܐ ܘܟܹܐܒܹ̈ܐ ܕܦܲܓܼܪܵܐ. ܘܒܲܙܒܲܢ ܒܡܸܤܟܹܢܘܼܬܼܵܐ: ܘܚܲܤܝܼܪܘܼܬܼܵܐ ܕܡ̣ܢ ܐܲܠ̇ܨܵܬܼܵܐ. ܘܒܲܙܒܲܢ: ܒܝܲܕܼ ܚܲܫܹ̈ܐ ܬܲܩܝܼ̈ܦܹܐ ܕܕܸܚܠ̱ܬܼܵܐ ܕܒܲܩܪ̈ܵܒܹܐ pb. 109 ܓܠܲܝ̈ܐ ܕܫܹܐܕܹ̈ܐ: ܕܫܵܒܹ̇ܩ ܥܠܲܝܗܘܿܢ: ܠܲܡܙܵܥܘܼܬܼܗܘܿܢ ܬܟܼܝܼܒܼܵܐܝܼܬܼ: ܘܲܒܼܫܘܼ̈ܚܠܵܦܹܐ ܕܚܝܼ̈ܠܹܐ: ܕܚܲܕܼ ܡ̣ܢ ܚܲܒܼܪܹܗ ܬܲܩܝܼܦ ܘܲܓܼܢܝܼܚ ܘܲܥܤܸܩ. ܘܟܼܠܗܹܝܢ ܗܵܠܹܝܢ: ܐܲܝܟܼ ܕܬܸܗܘܸܐ ܠܗܘܿܢ ܥܸܠܬܼܵܐ ܠܡܲܟܿܝܼܟܼܘܼܬܼܵܐ: ܘܲܠܗܵܝ̇ ܕܠܵܐ ܢܸܗܘܘܿܢܬ ܢܵܝ̇ܡܝܼܢ ܒܡܲܗܡܝܵܢܘܿܬܼܵܐ: ܐܵܘ ܕܐܲܝܠܹܝܢ ܕܩܵܝ̈ܡܵܢ ܘܲܒܼܗܹܝܢ ܟܪܝܼܗ ܐܲܬܼܠܹܝܛܵܐ: ܐܵܘ ܡ̣ܢ ܩܸܢܛܵܐ ܕܗܵܝ̇ ܕܲܥܬܼܝܼܕܼܵܐ. ܡܵܕܹܝܢ ܢܸܤܝ̈ܘܿܢܹܐ ܐܵܠܨܵܐܝܼܬܼ ܦܵܩ̇ܚܝܼܢ ܠܲܒܼܢܲܝ̈ܢܵܫܵܐ. ܘܠܵܘ ܗܵܕܲܐ ܗ̣̄ܝ ܕܐܵܡܲ݁ܪܢܵܐ: ܕܙܵܕܹܩ ܠܹܗ ܡܸܟܹܝܠ ܕܐܲܝܟܼ ܕܢܸܗܘܸܐ ܠܹܗ ܥܸܠܬܼܵܐ ܠܡܘܼܟܵܟܼܵܐ: ܢܸܬܼܪܲܦܸܐ ܒܨܸܒܼܝܵܢܹܗ ܠܘܵܬܼ ܒܝܼ̈ܫܵܬܼܵܐ: ܐܲܝܟܼ ܕܢܸܬܼܡܲܟܲܟܼ ܟܹܐܡܲܬܼ ܒܥܘܼܗܕܵܢܗܹܝܢ: ܐܵܘ ܕܢܸܤܬܲܪܗܲܒܼ ܠܘܵܬܼ ܗܵܠܹܝܢ ܢܸܤܝ̈ܘܿܢܹܐ ܐ̄ܚܪ̈ܵܢܹܐ: ܐܸܠܵܐ ܦܐܸܐ ܗ̄ܘ̣ܵܐ ܠܹܗ ܕܥܲܡ ܗܵܝ̇ ܕܦܵܠܲܚ ܘܥܵܡܹ̇ܠ ܒܫܲܦܝܼܪ̈ܵܬܼܵܐ: ܡܥܝܼܪ ܗ̄ܘ̣ܵܐ ܢܲܦܫܹܗ ܐܲܡܝܼܢܵܐܝܼܬܼ: ܘܢܸܬܼܚܲܫܲܒܼ ܕܲܥܒܼܝܼܕܼܵܐ ܐܝܼܬܼܵܘܗܝ: ܘܡܸܨܛܲܠܝܵܢܘܼܬܼܵܐ ܠܒܼܝܼܫ. ܘܟܼܠ ܕܲܥܒܼܝܼܕܼܵܐ ܗ̄ܘ̣: ܐܵܦ ܥܲܠ ܚܲܝܠܵܐ ܐ̄ܚܪܹܢܵܐ ܤܢܝܼܩ. ܗܵܢܵܘ ܕܹܝܢ: ܠܬܲܥܕܝܼܕܵܐ. ܘܐܲܝܢܵܐ ܕܥܲܠ ܐܲܥܕܝܼܪܵܐ ܕܡ̣ܢ ܐ̄ܚܪܹܢܵܐ ܤܢܝܼܩ: ܚܲܤܝܼܪܘܼܬܼܵܐ ܕܲܟܿܝܵܢܹܗ ܡܫܵܘܕܥܵܐ. ܘܟܼܠ ܕܝܵܕܲܥ̇ ܕܚܲܤܝܼܪ: ܐܵܦ ܡܘܼܟܵܟܼܵܐ ܙܵܕܹܩ ܠܹܗ: ܐܲܝܟܼ ܕܢܸܤܲܒܼ ܗܵܘ̇ ܡܵܐ ܕܲܤܢܝܼܩ: ܡ̣ܢ ܗܵܘ̇ ܡ̇ܢ ܕܤܵܦܹ̇ܩ ܕܢܸܬܸܠ ܠܹܗ. ܘܲܠܗܵܠܹܝܢ ܟܠܗܹܝܢ ܐܸܢ ܡ̣ܢ ܫܘܼܪܵܝܵܐ ܝܵܕܲܥ̇ ܗ̄ܘ̣ܵܐ: ܘܲܒܼܗܹܝܢ ܚܵܐܲܪ ܒܟܼܠܥܸܕܵܢ: ܠܵܐ ܕܵܡܹ̇ܟܼ ܗ̄ܘ̣ܵܐ. ܐܸܢ ܠܵܐ ܕܡܸܟܼ: ܠܵܐ ܐܸܫܬܿܠܸܡ ܗ̄ܘ̣ܵܐ ܠܐܝܼܕܼܵܐ ܕܐܵܠܘܿܨܹ̈ܐ ܐܲܡܥܵܪܘܼܬܹܗ. ܡܵܕܹܝܢ ܙܵܕܹܩ ܠܹܗ ܠܗܵܘ̇ ܕܪܵܕܹܐ ܒܐܘܼܪܚܵܐ ܕܐܲܠܵܗܵܐ: ܕܲܒܼܟܼܠܡܸܕܸܡ ܕܐܵܬܹ̇ܐ pb. 110 ܥܠܵܘܗܝ ܢܵܘܕܹܐ: ܘܢܸܥܕܘܿܠ ܘܲܢܩܲܦܲܚ ܢܲܦܫܹܗ: ܟܲܕܼ ܝܵܕܲܥ̇: ܕܐܵܘ ܡܸܛܠ ܕܐܲܗܡ̣ܝܼ: ܐܲܥܝܼܪܵܗ̇ ܡܢܲܤܝܵܢܵܐ ܒܦܘܼܩܕܵܢܵܐ ܕܲܡܕܲܒܿܪܵܢܵܐ: ܐܵܘ ܡܸܛܠ ܕܐܸܬܿܬܿܪܝܼܡ. ܘܒܲܕܼܓܼܘܿܢ ܠܵܐ ܢܸܫܘܲܪ ܘܢܸܙܕܲܥܙܲܥ. ܘܲܢܩܝܼܡ ܢܲܦܫܹܗ ܕܠܵܐ ܥܸܕܸܠܵܝ: ܕܠܵܐ ܬܸܥܘܿܦ ܒܝܼܫܬܹܗ. ܠܲܝܬܿ ܓܹܝܪ ܥܵܘ̣ܠܵܐ ܠܘܵܬܼ ܐܲܠܵܗܵܐ: ܚܵܣ: ܗܵܘ̇ ܡܲܒܿܘܼܥܵܐ ܕܙܲܕܝܼܩܘܼܬܼܵܐ.