Discourse 9

ܐܝܬܼ ܚܛܝܼܬܼܵܐ ܕܡ̣ܢ ܡܚܝܼܠܘܼܬܼܵܐ: ܘܥܵܪܨܵܐܝܼܬܼ ܡܸܬܼܡܲܨܲܥ ܒܵܗ̇ ܐ̄ܢܵܫ. ܘܐܝܼܬܼ ܚܛܝܼܬܼܵܐ: ܕܡ̣ܢ ܨܸܒܼܝܵܢܵܐ. ܘܐܝܼܬܼ: ܕܡ̣ܢ ܒܘܿܪܘܼܬܼܵܐ. ܘܐܝܼܬܼ: ܕܓܸܕܼܫܵܐ ܡܲܦܓܲܥ ܒܹܗ. ܘܐܝܼܬܼ: ܕܐܲܡܝܼܢܘܼܬܼܵܐ. ܘܐܝܼܬܼ: ܕܡ̣ܢ ܥܝܵܕܼܵܐ. ܘܗܵܠܹܝܢ ܟܠܗܘܿܢ ܛܲܟܼܤܹ̈ܐ ܘܲܙ̈ܢܲܝܵܐ ܕܲܚܛܵܗܹ̈ܐ: ܐܵܦܸܢ ܟܠܗܘܿܢ ܬܚܹܝܬܼ ܡܲܪܫܘܼܬܼܵܐ ܚܒܝܼܫܝܼܢ: ܡܫܲܚ̱ܠܦܵܐܝܼܬܼ: ܘܲܒܼܨܝܼܪܘܼܬܼܵܐ ܘܤܲܓܝܼܐܘܼܬܼܵܐ ܐܝܼܬܼ ܒܲܬܼܒܲܥܬܼܵܐ ܕܲܥܠܲܝܗܘܿܢ. ܘܐܝܼܬܼ ܕܥܲܤܩܵܐܝܼܬܼ ܡܸܬܼܩܲܒܲܠ ܒܲܬܼܘܵܬܹܗ: ܘܥܸܕܼܠܵܝܹܗ ܪܲܒܿ. ܘܐܝܼܬܼ: ܕܩܲܪܝܼܒܼ ܗ̄ܘ̣ ܠܚܵܘܤܵܢܵܐ. ܐܵܦ ܐܲܠܵܗܵܐ ܠܐܵܕܼܵܡ ܘܲܠܚܵܘܵܐ ܘܲܠܚܸܘܝܵܐ: ܐܵܦܸܢ ܘܠܵܐ ܠܚܲܕܼ ܡܸܢܗܘܿܢ ܒܲܪܝܼ ܡ̣ܢ ܡܩܲܒܿܠܵܢܘܼܬܼܵܐ ܕܦܘܼܪܥܵܢ ܤܲܟܼܠܘܼܬܹܗ: ܫܘܼܚܠܵܦܵܐ ܤܲܓܝܼܐܵܐ ܚܵܘܝܼ ܒܠܵܘܛܬܹܗ ܕܲܠܚܸܘܝܵܐ: ܘܲܒܼܗܵܝ̇ ܕܚܵܘܵܐ: ܘܲܒܼܗܵܝ̇ ܕܲܠܘܵܬܼ ܐܵܕܼܵܡ: ܗܵܟܲܢܵܐ ܘܲܒܼܗܵܠܹܝܢ ܕܲܒܼܢܲܝ̈ܗܘܿܢ ܕܗܵܢ̇ܘܿܢ. ܠܟܼܠܢܵܫ ܠܦܘܼܬܼ ܫܩܵܠܛܲܥܢܵܐ ܘܪܵܚܡܘܼܬܼܵܐ ܕܐܝܼܬܼ ܠܹܗ ܠܘܵܬܼ ܚܛܝܼܬܼܵܐ: ܗܵܟܲܢܵܐ ܡܸܬܼܩܲܫܸܐ ܕܝܼܢܵܐ ܕܲܥܠܵܘܗܝ. ܘܐܸܢ ܐܝܼܬܼ ܬܘܼܒܼ pb. 111 ܕܠܲܚܛܝܼܬܼܵܐ ܠܡܸܩܲܦ ܠܵܐ ܪܵܚܹ̇ܡ: ܡ̣ܢ ܡܲܗܡܝܵܢܘܼܬܼܵܐ ܕܹܝܢ ܕܲܒܼܙܲܕܝܼܩܘܼܬܼܵܐ ܡܸܬܼܓܪܸܦ ܠܘܵܬܼ ܗܵܝ̇: ܡ̣ܢ ܒܠܲܚ ܚܦܝܼܛܘܼܬܼܵܐ ܕܲܒܼܗܵܕܹܐ: ܘܐܵܦܸܢ ܥܤܸܩ ܗ̄ܘ̣ ܠܹܗ ܚܘܼܠܛܵܢܵܐ ܕܲܒܼܗܵܝ̇: ܩܫܸܐ ܗ̄ܘ̣ ܕܝܼܢܹܗ. ܐܸܢ ܕܹܝܢ ܟܲܕܼ ܕܗܵܕܹܐ ܫܩܝܼܠ ܛܲܥܢܵܐ: ܐܵܪܥܝܼܢ ܠܹܗ ܢܸܤܝ̈ܘܿܢܹܐ ܕܗܵܝ̇: ܩܲܪܝܼܒܼܝܼܢ ܠܹܗ ܪ̈ܲܚܡܹܐ ܠܲܡܫܵܓܼܘܼܬܹܗ ܕܠܵܐ ܦܘܼܠܵܓܼ. ܐ̄ܚܪܹܬܼܵܐ ܗ̣̄ܝ ܓܹܝܪ ܕܟܲܕܼ ܫܩܝܼܠ ܐ̄ܢܵܫ ܨܸܦܬܼܵܐ ܕܥܲܠ ܐܲܦܲܝ̈ ܡܝܲܬܿܪܘܼܬܼܵܐ: ܘܐܲܡܝܼܢ ܒܲܥ̇ܒܼܵܕܹܝ̈ܗ̇: ܘܲܒܼܠܸܠܝܵܐ ܒܵܐܹ̇ܬܼ ܒܸܪܢܝܵܗ̇: ܕܕܲܡ ܢܸܚܤܲܪ ܡܸܕܸܡ ܡ̣ܢ ܘܵܠ̈ܝܵܬܼܵܗ̇. ܘܒܼܐܝܼܡܵܡܵܐ ܝܘܼܩܪܵܗ̇ ܛܥܝܼܢ ܘܡܸܬܼܟܿܪܸܟܼ: ܘܟܼܠܗ̇ ܡܲܪܢܝܼܬܹܗ ܕܟܹܐܢܘܼܬܼܵܐ ܐܝܼܬܹܝܗ̇: ܘܟܲܕܼ ܒܗܵܠܹܝܢ ܘܕܲܐܝܟܼ ܗܵܠܹܝܢ ܐܝܼܬܼܵܘܗܝ: ܡܸܛܠ ܠܵܐ ܝܑܼܕܲܥܬܼܵܐ: ܐܵܘ ܡܸܛܠ ܩܛܝܼܪܵܐ ܕܤܲܩܘܼܒܼ̈ܠܵܝܵܬܼܵܐ ܕܒܼܵܗ̇ ܒܐܘܼܪܚܵܐ ܕܲܡܝܲܬܿܪܘܼܬܼܵܐ: ܘܓܲܠܠܹ̈ܐ ܕܠܸܙܬܼܵܐ ܕܡܸܬܿܬܿܪܝܼܡܝܼܢ ܟܠܫܵܥ ܒܗܲܕܵܡܵܘ̈ܗܝ: ܘܡܸܨܛܲܠܝܵܢܘܼܬܼܵܐ ܕܤܝܼܡܵܐ ܒܹܗ ܠܒܼܘܼܚܪܵܢ ܚܹܐܪܘܼܬܼܵܐ: ܩܲܠܝܼܠ ܙܸܠܲܬ̤ ܟܲܦܵܐ ܕܡܲܤܲܐܬܼܵܐ ܠܤܸܡܵܠܵܐ: ܘܡܸܬܼܓܪܸܦ ܒܝܲܕܼ ܟܪܝܼܗܘܼܬܹܗ ܕܒܸܤܪܵܐ ܒܚܲܕܼ ܡ̣ܢ ܙܢܲܝ̈ܵܐ ܕܲܚܛܵܗܹ̈ܐ: ܟܲܕܼ ܚܲܫܝܼܫ ܘܲܡܥܵܩ ܥܲܠ ܐܲܦܹ̈ܝܗ̇: ܘܡܸܬܿܬܲܢܲܚ ܒܚܲܫܵܐ ܥܲܠ ܩܢܘܿܡܹܗ: ܡܸܛܠ ܕܵܘܝܘܼܬܼܵܐ ܕܠܘܼܩܒܲܠ ܓܸܕܼܫܹ̈ܐ ܕܒܲܙܒܲܢ ܙܒܲܢ. ܘܲܐ̄ܪܹܬܼܵܐ ܗ̣̄ܝ ܕܟܲܕܼ ܐ̄ܵܢܵܫ ܪܦܸܐ ܒܲܥ̇ܒܼܵܕܼܵܐ ܕܙܲܕܝܩܘܼܬܼܵܐ: ܐܵܘ ܟ̱ܠܵܢܵܐܝܼܬܼ ܫܒܼܝܼܩܵܐ ܠܹܗ ܐܘܼܪܚܵܐ: ܥܲܒܼܕܵܐܝܼܬܼ ܪܵܗܹ̇ܛ ܒܟܼܠܵܗ̇ ܡ̤ܫܬܲܡܥܵܢܘܼܬܼܵܐ ܩܕܼܵܡ ܟܠܗܹܝܢ ܗܲܢܝܼ̈ܐܵܬܼܵܐ ܕܲܚܛܝܼܬܼܵܐ: ܘܛܲܥܢܵܐ ܫܩܝܼܠ ܠܡܸܫܟܚܵܘܼ ܦܘܼܪ̈ܤܹܐ ܠܫܘܼܫܠܵܝܵܗ̇. ܘܐܲܝܟܼ ܥܲܒܼܕܵܐ ܡܛܲܝܲܒܼ pb. 112 ܚܦܝܼܛܵܐܝܼܬܼ ܠܡܸܥܒܲܕܼ ܨܸܒܼܝܵܢܵܐ ܕܲܒܥܸܠܕܲܪܹܗ: ܟܲܕܼ ܡܛܲܝܒܼܝܼܢ ܠܹܗ ܗܲܕܵܡܵܘ̈ܗܝ ܙܲܝܢܵܐ ܠܤܵܛܵܢܵܐ ܒܟܼܠܵܗ̇ ܡܸܫܬܲܡܥܵܢܘܼܬܼܵܐ. ܘܕܼܵܐܦ ܠܵܐ ܚܵܐܲܪ ܠܡܸܬܿܬܵܘܝܵܬܘܼܬܼܵܐ: ܠܡܸܬܼܩܲܪܵܒܼܘܼ ܠܘܵܬܼ ܡܝܲܬܿܪܘܼܬܼܵܐ: ܘܲܠܡܸܥܒܲܕܼ ܫܘܼܠܵܡܵܐ ܠܐܘܼܪܚܹܗ ܡܲܚܤܪܵܢܝܼܬܼܵܐ. ܐ̄ܚܪܵܢܝܬܼܵܐ ܐܸܢܹܝܢ ܫܲܪ̈ܥܵܬܼܵܐ ܘܡܲܦ̈ܠܵܬܼܵܐ ܕܤܝܼ̈ܡܵܢ ܒܐܘܼܪܚܵܐ ܕܲܡܝܲܬܿܪ̈ܵܬܼܵܐ: ܘܲܒܼܡܲܪܕܝܼܬܼܵܐ ܕܙܲܕܝܼܩܵܘܼܬܼܵܐ: ܐܲܝܟܼ ܡܸܠܲܬܼ ܐܲܒܼܵܗ̈ܬܼܵܐ. ܒܐܘܼܪܚܵܐ ܠܲܡ ܕܲܡܝܲܬܿܪܘܼܵܬܼܵܐ ܐܝܼܬܼ ܡܲܦ̈ܠܵܬܼܵܐ: ܐܝܼܬܼ ܫܘܼ̈ܠܵܦܹܐ: ܐܝܼܬܼ ܩܛܝܼܪܵܐ: ܘܫܲܪܟܵܐ. ܘܲܐ̄ܚܪܹܬܼܵܐ ܗ̣̄ܝ ܡܝܼܬܼܘܼܬܼܵܐ ܕܢܲܦܫܵܐ: ܘܐܲܒܼܕܵܢܵܐ ܓܡܝܼܪܵܐ: ܘܲܫܒܼܝܼܩܘܼܬܼܵܐ ܟ̱ܠܵܢܵܝܬܼܵܐ. ܘܗܵܕܹܐ ܡܸܬܼܝܲܕܼܥܵܐ: ܡ̣ܢ ܗܵܝ̇ ܕܟܲܕܼ ܢܵܦܹ̇ܠ: ܠܵܐ ܛܵܥܹ̇ܐ ܚܘܼܒܵܐ ܕܐܲܒܼܘܼܗܝ. ܘܟܲܕܼ ܤܵܒܹ̇ܐ ܫܲܪ̈ܥܵܬܼܵܐ ܕܟܼܠܙܢ̈ܝܼܢ: ܚܦܝܼܛܘܼܬܹܗ ܠܵܐ ܡܸܬܼܥܵܘܟܼܵܐ ܕܲܠܘܵܬܼ ܦܘܼܠܚܵܢܹܗ ܫܲܦܝܼܪܵܐ. ܘܡ̣ܢ ܪܲܗܛܹܗ: ܠܵܐ ܦܵܐܹ̇ܫ. ܘܠܲܡܩܵܡ ܒܬܲܟܼܬܘܼܫܵܐ ܡܸܢܕܪܹܫ ܠܘܼܩܒܲܠܗܹܝܢ: ܘܒܼܵܗ̇ ܒܡܸܙܕܲܟܼܝܵܢܘܼܬܹܗ: ܠܵܐ ܡܲܡܐܸܢ. ܘܠܲܤܚܝܼܦܘܼܬܼܵܐ ܕܒܸܢܝܵܢܹܗ ܟܠܝܘܿܡ ܠܡܸܥܒܲܕܼ ܫܘܼܪܵܝܵܐ ܠܫܲܬܼܐܸܤܬܼܵܐ: ܠܵܐ ܫܵܠܹ̇ܐ. ܘܡܸܠܬܹܗ ܕܲܢܒܼܝܼܵܐ ܒܦܘܼܡܹܗ: ܥܕܲܡܵܐ ܠܫܵܥܬܼܵܐ ܕܡܲܥܒܲܪܬܵܐ ܕܡ̣ܢ ܥܵܠܡܵܐ ܗܵܢܵܐ: ܠܵܐ ܬܸܚܕܸܐ ܠܝܼ ܒܥܸܠܕܒܼܵܒܼܝ: ܕܢܸܦ̇ܠܹܬܼ ܬܘܼܒܼ ܩܵܐܹ̇ܡ ܐ̄ܢܵܐ. ܘܲܕܼܝܸܬܼܒܹ̇ܬܼ ܒܚܸܫܘܿܟܼܵܐ: ܡܵܪܝܵܐ ܡܲܢܗܲܪ ܠܝܼ. ܘܠܵܐ ܫܵܠܹ̇ܐ: ܥܕܲܡܵܐ ܠܡܵܘܬܵܐ ܡ̣ܢ ܕܲܠܡܲܩܪܵܒܼܘܼ. ܘܠܵܐ ܝܵܗܹ̇ܒܼ ܢܲܦܫܹܗ ܠܡܸܙܕܲܟܼܝܵܢܘܼܬܼܵܐ: ܟܡܵܐ ܕܐܝܼܬܼ ܢܫܲܡܬܼܵܐ ܒܲܢܚܝܼܪ̈ܵܘܗܝ. ܘܟܲܕܼ ܟܠܝܘܿܡ ܡܸܬܿܬܲܒܪܵܐ ܐܸܠܦܹܗ: ܘܫܵܪܟܵܐ ܕܘܼܥܬܼܵܐ ܕܬܹܐܓܼܘܼܪܬܹܗ ܠܥܘܼܡܩܵܐ: ܠܵܐ ܫܵܠܹ̇ܐ ܡ̣ܢ ܕܝܵܙܹ̇ܦ ܘܲܡܪܲܟܸܒܼ ܤܦܝܼ̈ܢܹܐ: ܘܪܵܕܹܐ ܥܲܠ ܤܲܒܼܪܵܐ. ܥܕܲܡܵܐ ܕܟܲܕܼ ܢܸܚܙܸܐ ܡܵܪܝܵܐ ܚܦܝܼܛܘܼܬܹܗ: ܚܵܐܹ̇ܣ ܥܲܠ ܬܒܼܵܪܹܗ: ܘܡܲܪܟܸܢ ܠܹܗ ܪ̈ܲܚܡܵܘܗܝ. pb. 113 ܘܝܵܗܹ̇ܒܼ ܠܹܗ ܙܵܘ̈ܥܹܐ ܚܲܝ̈ܠܬܼܵܢܹܐ ܠܲܡܤܲܝܒܵܪܘܼ: ܘܲܠܡܹܐܪܲܥ ܓܹܐܪܹ̈ܐ ܝܵܩ̈ܕܹܐ ܕܒܼܝܼܫܵܐ. ܗܵܕܲܐ ܗ̣̄ܝ ܚܸܟܼܡܬܼܵܐ ܕܡ̣ܢ ܐܲܠܵܗܵܐ: ܘܗܵܢܵܘ ܟܪܝܼܗܵܐ ܚܲܟܿܝܼܡܵܐ. ܦܤܵܩ ܤܲܒܼܪܵܐ: ܗܸܢܝܵܢܵܐ ܠܵܐ ܩܢܸܐ. ܦܲܩܵܚ ܠܲܢ ܓܹܝܪ ܕܥܲܠ ܚܲܕܼܚ̈ܕܼܵܢܵܝܬܼܵܐ ܢܸܬܿܬܿܕܝܼܢ: ܘܠܵܐ ܥܲܠ ܫܒܼܝܼܩܘܼܬܼܵܐ ܓܡܝܼܪܬܵܐ. ܘܒܲܕܼܓܼܘܿܢ ܛܘܼܒܼܵܢܵܐ ܡܦܲܫܩܵܢܵܐ: ܟܲܕܼ ܡܙܲܗܲܪ ܕܠܵܐ ܬܸܡܐܲܢ ܠܲܢ ܡ̣ܢ ܤܲܓܿܝܼܐܘܼܬܼ ܬܲܟܼܬܿܘܼ̈ܫܹܐ ܘܲܙܢܲܝ̈ ܩܪ̈ܵܒܹܐ ܤܒܼܝܼ̈ܤܹܐ ܕܐܝܼܬܼ ܒܐܘܼܪܚܵܐ ܕܙܲܕܝܼܩܘܼܬܼܵܐ: ܘܢܸܥܛܘܿܦ ܠܒܸܤܬܿܪܲܢ: ܘܢܸܬܸܠ ܙܵܟܼܘܼܬܼܵܐ ܕܠܲܓܼܡܵܪ ܠܲܒܼܥܸܠܕܲܪܲܢ ܒܚܲܕܼ ܡ̣ܢ ܙܢ̈ܝܼܢ ܕܒܼܝܼ̈ܫܵܬܼܵܐ: ܟܲܕܼ ܤܵܕܲܪ ܠܗܘܿܢ ܐܲܝܟܼ ܕܲܒܼܪ̈ܘܼܫܡܹܐ: ܐܵܡܲ݁ܪ: ܐܸܢܗ̤ܘ ܓܹܝܪ ܕܒܲܫܪܵܪܵܐ ܚܦܝܼܛܝܼܢ ܐܢ̄ܬܿܘܿܢ ܠܲܡܚܵܪ ܠܘܵܬܼ ܡܝܲܬܿܪܘܼܬܼܵܐ: ܘܲܠܡܹܐܨܲܦ ܕܫܲܦܝܘܼܬܼ ܪܸܥܝܵܢܵܐ ܕܲܠܘܵܬܼ ܐܲܠܵܗܵܐ: ܘܲܠܡܸܤܥܲܪ ܐܲܝܠܹܝܢ ܕܠܹܗ ܡܸܬܼܚܲܙ̈ܝܵܢ: ܐܵܠܨܵܐܝܼܬܼ ܙܵܕܹܩ ܠܟܼܘܿܢ ܠܡܸܤܒܲܠ ܩܪ̈ܵܒܹܐ ܟܠܗܘܿܢ ܕܥܲܠ ܐܲܦܲܝ̈ ܗܵܠܹܝܢ: ܕܡ̣ܢ ܚܲܫܹ̈ܐ ܟܝܵܢܵܝܹ̈ܐ ܘܡ̣ܢ ܢܘܼܬܵܦܵܘ̈ܗܝ ܕܥܵܠܡܵܐ ܗܵܢܵܐ ܘܒܼܝܼܫܘܼܬܼܵܐ ܕܕܲܝܘܹ̈ܐ ܬܟܼܝܼܒܼܵܐܝܼܬܼ ܡܥܵܕܼܝܼܢ ܠܡܸܬܿܬܿܥܵܪܘܼ ܠܘܼܩܒܲܠܟܼܘܿܢ. ܟܲܕܼ ܠܵܐ ܠܵܐ ܡܸܬܼܪܲܫܠܝܼܢ ܐܢ̄ܬܿܘܿܢ ܡܸܛܠ ܐܲܡܝܼܢܘܼܬܹܗ ܘܠܵܐ ܡܸܫܬܲܠܝܵܢܘܼܬܹܗ ܕܬܲܟܼܬܘܼܫܵܐ: ܘܠܵܐ ܕܵܚ̇ܠܝܼܢ ܐܢ̄ܬܿܘܿܢ ܡ̣ܢ ܬܟܼܝܼܒܼܘܼܬܹܗ ܘܥܘܼܙܹܗ ܕܲܩܪܵܒܼܵܐ. ܘܠܵܐ ܡܸܤܬܲܪܕܼܝܼܢ ܐܢ̄ܬܿܘܿܢ ܡ̣ܢ ܡܲܫܪ̈ܝܵܬܼܵܐ ܕܲܒܼܥܸܠܕܒܼܵܒܹ̈ܐ: ܘܠܵܐ ܢܵܦ̇ܠܝܼܢ ܐܢ̄ܬܿܘܿܢ ܒܲܦܤܵܩ ܤܲܒܼܪܵܐ ܐܸܢ ܢܸܓܼܕܲܫ ܘܬܸܫܬܲܪܥܘܼܢ ܒܕܼܘܼܟ ܘܬܸܚܛܘܿܢ: ܘܡܲܚ̈ܘܵܬܼܵܐ ܘܫܘܼ̈ܡܵܬܼܵܐ ܐܲܝܟܼ ܕܒܲܩܪܵܒܼܵܐ ܕܗܵܢܵܐ ܟ̱ܠܹܗ ܪܲܒܿ ܬܩܲܒܿܠܘܼܢ ܥܲܠ ܐܲܦܲܝ̈ܟܿܘܿܢ. ܐܸܠܵܐ ܐܵܦ ܠܵܐ ܡܸܬܼܪܲܚܩܝܼܢ ܐܢ̄ܬܿܘܿܢ ܡܸܛܠܗܵܕܹܐ ܡ̣ܢ ܨܸܒܼܝܵܢܟܼܘܿܢ. ܡܩܵܘܹܝܬܿܘܿܢ ܕܹܝܢ ܒܲܓܼܒܼܝܼܬܼܵܐ ܕܕܼܘܼܒܵܪ̈ܲܝܟܿܘܿܢ: ܟܲܕܼ ܪܚܝܼܡܬܼܵܐ ܘܲܫܒܼܝܼܚܵܐ ܚܵܫ̇ܒܿܝܼܬܿܘܿܢ ܠܵܗ̇ ܠܗܵܕܹܐ: pb. 114 ܕܟܲܕܼ ܡܦܲܠܦܠܝܼܢ ܐܢ̄ܬܿܘܿܢ ܒܲܕܼܡܵܐ ܕܡܲܚ̈ܘܵܬܼܟܼܘܿܢ ܬܸܬܼܚܙܘܿܢ ܒܹܗ ܒܲܩܪܵܒܼܵܐ: ܟܲܕܼ ܠܵܐ ܒܵܛ̇ܠܝܼܢ ܐܢ̄ܬܿܘܿܢ ܡ̣ܢ ܬܲܟܼܬܘܼܫܵܐ ܕܠܘܼܩܒܲܠ ܒܥܸܠܕܒܼܵܒܹ̈ܐ ܠܲܓܼܡܵܪ. ܗܵܠܹܝܢ ܐܸܢܘܿܢ ܙܘܼܗܵܪ̈ܵܘܗܝ ܕܛܘܼܒܼܵܢܵܐ ܡܦܲܫܩܵܢܵܐ܀ ܒܪܲܡ: ܠܵܐ ܗ̄ܘ̣ܵܐ ܕܢܸܬܼܪܲܫܲܠ ܙܵܕܹܩ ܠܲܢ ܡܸܛܠ ܗܵܠܹܝܢ. ܘܵܝ ܠܹܗ ܠܝܼܚܝܼܕܵܝܵܐ ܕܲܡܕܲܓܸܠ ܒܲܩܵܝܵܡܹܗ: ܘܥܲܡ ܕܵܘܫܵܐ ܕܬܹܐܪܬܹܗ ܝܵܗܹ̇ܒܼ ܐܝܼܕܼܵܐ ܠܤܵܛܵܢܵܐ ܠܡܲܥܠܵܢܘܼܬܼܵܐ ܕܲܥܠܵܘܗܝ: ܒܲܙܥܘܿܪ ܘܪܲܒܼ ܒܐܵܕܹܫܹ̈ܐ ܕܲܚܛܝܼܬܼܵܐ. ܕܬܼܘܼܒܼ: ܠܵܐ ܡܸܫܟܲܚ ܚܲܝܠܵܐ ܠܲܡܩܵܡ ܒܐܲܦܲܝ̈ ܬܘܼܪܥܬܼܵܐ ܕܲܥܒܲܕܼ ܒܢܲܦܫܹܗ ܩܕܼܵܡ ܒܥܸܠܕܒܼܵܒܹ̈ܐ. ܘܒܲܐܝܠܹܝܢ ܐܲܦܹ̈ܐ ܢܸܚܙܸܐ ܡܵܐ ܕܡܸܬܼܘܲܥܕܸܝܢ ܢܲܟܼ̈ܦܹܐ ܚܲܒܼܪ̈ܵܘܗܝ ܠܘܵܬܼ ܚܕܼܵܕܹ̈ܐ: ܗܵܠܹܝܢ ܕܲܦܪܲܫ̣ ܡܸܢܗܘܿܢ ܐܘܼܪܚܹܗ ܠܡܹܐܙܲܠ ܠܐܘܼܪܚܵܐ ܕܐܲܒܼܕܵܢܵܐ: ܘܲܠܦܵܪܹܗ̄ܤܝܼܵܐ ܕܲܚܤܲܝ̈ܵܐ ܕܲܠܘܵܬܼ ܐܲܠܵܗܵܐ: ܘܗܵܝ̇ ܨܠܘܿܬܼܵܐ ܕܡ̣ܢ ܠܸܒܵܐ ܢܲܟܼܦܵܐ ܤܵܠ̇ܩܵܐ: ܘܡܸܬܼܥܲܠܝܵܐ ܘܥܵܒܼ̇ܪܵܐ ܐܵܦ ܠܢܲܫܪ̈ܝܵܬܼܵܐ ܕܡܲܠܲܐܟܹ̈ܐ: ܘܠܵܐ ܡܸܬܼܟܲܠܝܵܐ ܥܕܲܡܵܐ ܕܥܵܐ̇ܠܵܐ ܩܕܼܵܡ ܪܲܒܘܼܬܹܗ ܕܐܲܠܵܗܵܐ: ܟܲܕܼ ܐܲܚܝܼܕܼܵܐ ܩܠܝܼ̈ܕܹܐ ܒܐܝܼ̈ܕܿܝܗ̇ ܘܠܵܐ ܡܸܬܼܟܲܠܝܵܐ: ܥܕܲܡܵܐ ܕܫܵܩ̇ܠܵܐ ܫܸܐܠܬܼܵܗ̇: ܘܥܵܛ̇ܦܵܐ ܠܘܵܬܼ ܦܘܼܡܵܐ ܕܫܲܕܪܵܗ̇ ܒܚܲܕܼܘܼܬܼܵܐ. ܘܗܵܝ̇ ܕܥܲܤܩܵܐ ܡ̣ܢ ܟܠܗܹܝܢ: ܕܐܲܝܟܼ ܕܲܦܪܲܫ̣ ܗ̤ܘ ܗܵܪܟܵܐ ܐܘܼܪܚܹܗ ܡܸܢܗܘܿܢ: ܦܵܪܹܫ ܠܹܗ ܡܫܝܼܚܵܐ ܡܸܢܗܘܿܢ ܒܗܵܘ̇ ܝܵܘܡܵܐ: ܡܵܐ ܕܲܥܢܵܢܹ̈ܐ ܢܲܗܝܼܪ̈ܵܬܼܵܐ ܛܵܥ̈ܢܵܢ ܥܲܠ ܚܲܨܝ̈ܗܹܝܢ ܠܦܲܓܼܪܹܐ ܕܐܸܙܕܲܗܝܼܘ ܒܕܲܟܼܝܘܼܬܼܵܐ: ܘܥܵܐ̇ܠܝܼܢ ܒܬܲܪܥܵܐ ܪܲܒܑܵ ܕܲܫܡܲܝܵܐ. ܡܸܛܠܗܵܢܵܐ: ܠܵܐ ܢܩܘܼܡܘܼܢ ܪ̈ܲܫܝܼܥܹܐ ܒܕܝܼܢܵܐ. ܒܗܵܝ̇ ܕܡ̣ܢ ܟܲܕܼܘ: ܕܝܼܢ ܗ̄ܘ̣ ܥ̇ܒܼܵܕܼܗܘܿܢ. ܐܵܦܠܵܐ ܚܲܛܵܝܹ̈ܐ ܒܲܟܼܢܘܼܫܬܼܵܐ ܕܲܡܝܲܬܿܪܹ̈ܐ ܒܲܩܝܵܡܬܼܵܐ ܕܕܼܝܼܢܵܐ: ܐܵܦܠܵܐ ܙܲܠܝܼ̈ܠܹܐ ܒܤܸܕܼܪܹ̈ܐ ܕܩܲܕܝܼ̈ܫܹܐ.